ВТО́РЫИ КНИГИ МОИ҆СЇѠВЫ ИСХОДЪ

Глв̑҇а, а҃·

Си и҆мена̀ сн҃омъ і҆ил҃евимъ въходѧ́щим̑ въ е҆гѷпетъ, въкꙋ́пѣ съ і҆а́ковом̑ ѿт҃цемъ и҆хъ, кождо съ всѣмъ домом̑ свои҆мъ внидо́ша·

Рꙋвим̑, симеѻ́нъ, левїи, і҆ѹ́да, и҆саха́ръ, завꙋло́нъ;
и҆ венїѧми́нъ, данъ, и҆ неѳалим̑, га́дъ и҆ аси́ръ·

І҆ѻ́сиф̑҇ же бѧше въ е҆гѷптѣ.
бѣ же всѣх꙽ дш҃ъ и҆зшед̑шихъ, и҆зъ і҆а́кова, о҃е, ѹ҆мрѣтъ же і҆ѻ́сифъ, и҆ вс̂ѧ братїа е҆го, и҆ ве́сь родъ ѻ́нъ·

Сн҃ове же і҆ил҃евы възрасто́ша, и҆ ѹ҆мно́жишасѧ, и҆ мно́ѕи быша·

И҆ крѣплѧ́хꙋсѧ ѕѣло ѕѣло, ѹ҆мно́жи же сѧ землѧ̀ ѿ нихъ·

Въста́в же цр҃ъ и́нъ въ е҆гѷптѣ, и҆же не зна́ше і҆ѻ҆сифа·

И҆ рече къ лю́демъ своим̑ с̂е народ̑ сн҃овъ і҆ил҃евыхъ.
вели́ко множество ѹ҆крѣплѧ́етсѧ па́че насъ·

Прїидѣте ѹ҆бо премꙋдримъ и҆хъ, да не когда̀ ѹ҆мно́жатсѧ, и҆ внегда̀ а҆ще приключи́тсѧ намъ бра́нь, приложа́тсѧ и҆ тїи к сꙋпоста́томъ нашимъ.
и҆ ѻ҆долѣ́вше нам̑ и҆зы́дꙋтъ, и҆з꙽ землѧ̀ нашеѧ, и҆ пристави настоа́телѧ дѣ́ломъ, да ѻ҆злобѧ́тъ ѧ҆̀ в дѣлх̑ѣ.
и҆ ѹ҆ѕижда́ша грады твръ́ды, фараѻ́нꙋ.
пи́ѳо, и҆ раме́си, і҆ ѻ́нъ, с̂е ес̑҇ слн҃нъ град̑·

По е҆ли́кꙋ же и҆хъ смирѧ́хꙋ, толи́ко множа́иши бывахꙋ, и҆ ѹ҆крѣплѧ́хꙋсѧ велмѝ ѕѣло·

И҆ гнꙋшахꙋсѧ е҆гѷптѧне ѿ сн҃овъ і҆ил҃евъ, и҆ наси́льствовахꙋ е҆гѷптѧне сн҃омъ і҆ил҃евымъ нꙋждею·

И҆ болѣ́зненꙋ жи́знь творѧ́хꙋ и҆мъ въ дѣ́лехъ же́стокыхъ бренїемъ, и҆ пли́нъѳами, и҆ всѣми дѣлы е҆же в по́лехъ въ всѣхъ и҆хже порабоща́хꙋ и҆хъ съ нꙋж́дею·

И рече цр҃ь е҆гѷпетъскыи баба́мъ е҆вреи́ским꙽, и҆́мѧ е҆ді́нои сепфо́ра, и҆́мѧ второ́и фꙋа, и҆ гл҃а и҆мъ·

Є҆гда̀ ба́бите е҆врѣа́нынѧ, и҆ сꙋть къ рожд̑енїю, а҆́ще ѹ҆бо мꙋж́ескыи полъ бꙋдетъ, ѹ҆бїите и҆̀, а҆́ще ли же́нъскїи соблюдѣте и҆̀.
ѹ҆боѧ́вше же сѧ ба́бы б҃а, и҆ не сътвори́ша, ꙗ҆́коже повелѣ и҆мъ цр҃ь е҆гѷпетьскыи, и҆ живлѧ́хꙋ мꙋ́жескыи полъ·

Призва же цр҃ь е҆гѷпетьскыи ба́бы, и҆ рече и҆мъ, чт̂о ꙗ҆́ко сътвори́сте вещъ сїю, и҆ ѻ҆живлѧ́ете мꙋж́ескїи полъ·

Реко́шаж̑ ба́бы фараѻ́нꙋ, не та́ко жены̀ е҆гѷп꙽тѧнынѧ, ꙗ҆́ко жены̀ е҆врѣа́нынѧ ст̑ꙋ ражда́ют꙽ б̂о прежде.
е҆гда же не внїити къ ни́мъ ба́бамъ·

И҆ ражда́хꙋ и҆ того рад̑и̑ бл҃го творѧ́ше б҃ъ ба́бамъ·

И҆ множахꙋсѧ лю́дїе и҆ крѣплѧ́хꙋсѧ ѕѣло, е҆льма́ же боѧ́хꙋсѧ бабы б҃а, сътвори́ша себѣ хлѣ́вины·

Заповѣда же фараѻ́нъ всѣмъ лю́демъ своим̑ гл҃ѧ, весь мꙋж́ескїи полъ, и҆же сѧ роди́тъ е҆врѣѻ́мъ, въвр́ъзѣте и҆̀ в рѣкꙋ, и҆ весь же́ньскїи полъ снабди́те и҆̀ живо̀·

Глв̑҇а, в҃·

Бѧ́ше же е҆ді́нъ ѿ колѣ́на левїина, и҆же поѧ́тъ ѿ дще́рїи левїиныхъ.
і҆ и҆мѣ ю҆̀·

и зача́тъ въ чревѣ, и҆ родѝ мꙋж́ескыи полъ·

Видѣв꙽ше же е҆го добра̀ и҆ лѣ́па, и҆ кры́ша е҆го тр̂и мс̑҇цы·

Є҆гда же не можа́хꙋ ѹ҆кры́ти е҆го, и҆ взѧ́тъ мт҃и е҆го, ковче́жецъ си́товыи и҆ посмоли и҆̀ клїем꙽ и҆ смоло́ю, и҆ вложѝ ѻ҆троча̀ во́нь, и҆ положѝ е҆го в лꙋцѣ, при бре́гꙋ рѣкѝ.
блюдѧ́ше же сестра̀ е҆го и҆здале́ча да ви́дитъ чт̂о бꙋ́детъ е҆мꙋ·

И҆зыде же тогда̀ дще́рь фараѻ́нова.
и҆зъмы́тисѧ в рѣцѣ, и҆ рабы́нѧ еѧ̀·

И҆ хожда́хꙋ по́ брегꙋ рѣкѝ, ѹ҆зрѣ́вши же ковчежецъ в лꙋцѣ, посла рабы́ню и҆ взѧ́тъ и҆̀, и҆ ѿвр́ъзши видѣ ѻ҆троча̀ пла́чющесѧ въ ковчежцѣ, и҆ пощадѝ е҆̀ дще́рь фараѻ́нѧ, и҆ рече.
ѿ дѣте́и е҆врѣи́скыхъ е҆сть с̂е·

И҆ рече сестра е҆го дще́ри фараѻ́новѣ, хо́щеши ли призовꙋ̀ т̂и женꙋ̀ дои́лицꙋ ѿ е҆врѣи, и҆ въздои́тъ и҆̀ въско́рмитъ т̂и ѻ҆троча̀·

И҆ рече е́и дще́рь фараѻ́нова, и҆д̂и.
шед̑ши же ѻ҆трокови́ца призва̀ мт҃ръ ѻ҆троча́те·

Речеж̑ к не́и дще́рь фараѻ́нова, съблюди м̂и ѻ҆троча сїе, и҆ въздоѝ м̂и е҆̀, а҆́з же да́мъ ти м꙽здꙋ̀ твою̀·

Взѧ́т же ѻ҆троча̀ жена̀, и҆ доа́ше е҆го, възмꙋжавшꙋ же ѻ҆трочати, и҆ въведе и҆̀ къ дще́ри фараѻ́новѣ, и҆ бысть е́й въ сн҃а·

И҆ нарече и҆́мѧ е҆мꙋ моѷсїи, гл҃ющи, ꙗ҆́ко ѿ воды̀ взѧ́хъ е҆го·

Бысть же въ дн҃и мно́гиѧ ѻ҆ны̀ е҆гда̀ вели́къ бывъ моѷсїи, і҆ и҆зы́де же къ бра́тїамъ свои҆мъ сн҃омъ іи҃левым̑, разꙋмѣв꙽ же болѣ́знь их꙽, ви́дѣ чл҃ка е҆гѷптѧнина, бию́ща нѣ́коего е҆врѣа҆нина ѿ бра́тїа е҆го сн҃овъ і҆и҃левых̑·

ѻ҆зрѣ́в же сѧ та́мо, и҆ са́мо, и҆ не ви́дѣ никогоже, и҆ ѹ҆би́въ е҆гѷптѧнина, и҆ скры̀ е҆го в песцѣ̀·

И҆зшед̑ же и҆ въ вторы́и дн҃ь, ви́дѣ дв̂а мꙋжа е҆врѣа́нинѧ.
прѧ́щасѧ, и҆ гл҃а, къ ѻ҆би́дѧщемꙋ, чт̂о ради т̂ы бїе́ши и҆скренѧго·

ѻ҆́н же рече кт̂о тѧ̀ поста́ви кн҃ѕѧ и҆ сꙋдїю̀ над̑ нами, е҆гда̀ ѹ҆би́ти м̂ѧ ты̀ хо́щеши, ꙗ҆́коже ѹ҆бѝ вчера̀ е҆гѷптѧнина, ѹ҆боа́в же сѧ моѷсїи и҆ рече, а҆́ще си́це ꙗ҆вле́нъ бꙋдетъ гл҃ъ сїи·

Ѹ҆слы́шав же фараѻ́нъ рѣчь сїю̀, и҆ска́ша ѹ҆би́ти моѷсїѧ.
ѿи҆де же моѷсїи ѿ лица̀ фараѻ́нова, и҆ въсели́сѧ въ землѝ мадїа́мъстѣи·

И҆ е҆гда же прише́дъ въ зе́млю мадїа́мъскꙋю, и҆ сѣ́де при кла́дѧѕи·

Сщ҃енникꙋ же мадїа́мъскомꙋ бѣша, з҃, дще́рїи пасꙋще ѻ҆́вца ѿц҃а свое҆го, иѻ҆ѳо́ра·

И҆ пришед̑ше черпа́хꙋ до́ндеже напо́лъниша коры́та, напои́ти ѻ҆́вца ѿц҃а свое҆го и҆ѻ҆ѳо́ра, пришед̑ше же па́стырїе и҆згна́ша ѧ҆̀·

Въста́в же моѷсїи и҆зба́ви и҆хъ, и҆ налїа̀ и҆мъ, и҆ напоѝ ѻ҆вца и҆хъ·

Прїидо́ша же къ і҆ѻ҆ѳорꙋ ѿц҃ꙋ свое҆мꙋ, се́й же рече и҆мъ, чт̂о ꙗ҆́ко ѹ҆скори́сте прїити днс̑҇ь·

ѻ҆ниж̑ рекоша, чл҃къ е҆гѷптѧнинъ и҆зба́ви насъ ѿ па́стыреи, и҆ начерпа̀ нам̑, и҆ напоѝ ѻ҆́вца наша·

Сей же рече къ дще́ремъ свои҆мъ, гдѣ е҆сть ѻ҆́нъ и҆ въскꙋ́ю си́це ѻ҆ста́висте чл҃ка, възовѣте ѹ҆бо е҆го да ѧ́сть хлѣбъ·

Въсели́ же сѧ моѷсїи ѹ҆ чл҃ка, и҆ дадѐ семъфо́рꙋ дще́рь свою̀, моѷсїю въ женꙋ·

Заче́нши же въ ѹ҆тро́бѣ жена̀ роди сн҃а, и҆ нарече и҆́мѧ е҆мꙋ моѷсїи, гирсе́мъ гл҃ѧ, ꙗ҆́ко пришле́цъ е҆смь аз̑ въ землѝ чꙋжде́и·

И҆ па́ки заченъ породѝ дрꙋгїи и҆ нарече и҆́мѧ е҆мꙋ е҆лие҆зеръ гл҃ѧ, б҃ъ ѿц҃а мое҆го, помощникъ мн̂ѣ, и҆зба́ви мѧ и҆з рꙋкѝ фараѻ́новы·

По дн҃ех же мно́гыхъ тѣхъ, ѹ҆мрѣтъ цр҃ь е҆гѷпет̑скыи, и҆ въстенаша сн҃ове і҆и҃левы ѿ дѣлъ, и҆ възопи́ша, и҆ възы́де во́пль и҆хъ къ бг҃ꙋ ѿ работъ·

И҆ ѹ҆слы́ша б҃ъ стена́нїе и҆хъ.
и҆ помѧнꙋ̀ б҃ъ завт̑ѣ свои, и҆же къ а҆враа́мꙋ, і҆саа́кꙋ, і҆а́ковꙋ.
и҆ възрв̑҇ѣ б҃ъ на сн҃ы і҆и҆л҃евы, и҆ възвѣстисѧ и҆мъ·

Глв̑҇а, г҃·

Моѷсїи же бѧ́ше, пасы́и ѻ҆в꙽ца і҆ѻ҆ѳора те́стѧ свое҆го, сщ҃енника мадїам̑ска, и҆ гнаше ѻ҆́вца въ пꙋсты́ню.
и҆ прїиде въ го́рꙋ бж҃їю хорив̑҇·

Ꙗ҆́ви́ же сѧ е҆мꙋ а҆́гг҃лъ гн҃ь въ пла́мени ѻ҆гньнѣи и҆с кꙋпи́ны, и҆ ви́дѣ ꙗ҆́ко кꙋпи́на горѧ́ше ѻ҆гнемъ, и҆ не съгара́ше·

Реч̑҇ же моѷсїи момошед̑ и҆ ви́ждꙋ чт̂о видѣнїе вели́кое с̂е, ꙗ҆́ко не съгара́ше кꙋпи́на·

И҆ е҆гда̀ видѣ г҃ь ꙗ҆ко пристꙋпа́етъ ви́дѣти, и҆ възва̀ е҆го г҃ь и҆с кꙋпи́ны гл҃ѧ·

Моѷсїи, моѷсїи, ѻ҆́н же рече с̂е а҆́зъ г҃и·

Речеж̑ г҃ь не приближа́исѧ сѣмо, и҆ззꙋ́и сапогѝ ѿ ногъ твои҆хъ, мѣсто б̂о, на не́мже т̂ы стои́ши землѧ̀ ст҃а ес̑҇·

И҆ рече е҆мꙋ, азъ е҆смь б҃ъ ѿц҃а твое҆го, б҃ъ а҆враа̀мовъ, б҃ъ і҆сааковъ, б҃ъ і҆а́ковль.
ѿвратилъ же лице своѐ моѷсїи, не смѣа́ше б̂о възрѣти пред̑ б҃а·

И҆ рече г҃ь къ моѷсїю, ви́дѧ ви́дѣхъ бѣдꙋ, людїи мои҆хъ и҆же въ е҆гѷптѣ, и҆ во́пль и҆хъ ѹ҆слы́шахъ ѿ дѣ́лъ настоа́тел̑҇.
и҆ ви́дѣхъ болѣзни и҆хъ, и҆ сънидо́хъ и҆зѧти и҆хъ ѿ рꙋкꙋ е҆гѷпетскꙋ, і҆ и҆звестѝ ѧ҆̀ из꙽ землѧ̀ тоѧ̀, и҆ въвестѝ и҆хъ въ зе́млю бл҃гꙋ и҆ мно́гꙋ, въ зе́млю кипѧ́щꙋ мле́ком̑ и҆ медом̑·

Въ мѣсто ханане́иско, и҆ хетѳе́иско, и а҆мор꙽ре́иско, и҆ ферезе́иско, и҆ гергесе́нско, и҆ е҆вꙋсеиско·

Нн҃ѣ бо во́пль сн҃овъ і҆и҃левых̑ прїиде къ мнѣ̀, и҆ а́зъ ви́дѣхъ тꙋгꙋ̀ и҆хъ, и҆же е҆гѷптѧне стꙋжа́ютъ и҆мъ·

Ты же ходѝ да т̂ѧ послю̀ къ фараѻ́нꙋ цр҃ю егѷпет̑скомꙋ, да и҆зведе́ши лю́ди моа, сн҃ы і҆и҃левы, ѿ землѧ̀ е҆гѷпет̑скы·

Рече же моѷсїи къ бг҃ꙋ, кт̂о е҆смь а҆́зъ, ꙗ҆́ко да и҆дꙋ̀ къ фараѻ́нꙋ цр҃ю е҆гѷпетскомꙋ, да и҆зведꙋ сн҃ы і҆и҃левы, ѿ землѧ̀ е҆гѷпетскы·

И҆ реч̑҇ б҃ъ къ моѷсїю гл҃ѧ бꙋдꙋ с тобо́ю, се же т̂и зна́менїе, ꙗ҆ко а҆́з т̂ѧ посыла́ю, и҆звести лю́ди моа̀.
и҆зъ е҆гѷпта.
да́ сѧ помо́лѧтъ бг҃ꙋ въ горѣ се́й·

Рече же моѷсїи, къ бг҃ꙋ, с̂е а҆́з꙽ и҆дꙋ̀ к꙽ сн҃омъ і҆и҃левым̑, и҆ рекꙋ к ни́мъ·

б҃ъ ѿц҃ъ на́ших꙽ посла̀ м̂ѧ къ ва́мъ.
а҆́ще же въпра́шати начнꙋть м̂ѧ, ка́ко е҆мꙋ е҆сть и҆́мѧ, и҆ чт̂о ѿвѣща́ю къ ни́мъ·

И҆ рече б҃ъ къ моѷсїю азъ е҆смь е҆же е҆смь, и҆ рече та́ко гл҃и сн҃ом꙽ і҆и҆лв҃ымъ сый м̂ѧ посла̀ къ вам̑ б҃ъ·

И҆ рече паки б҃ъ моѷсїю, тако гл҃и сн҃омъ і҆и҆лв҃ымъ.
г҃ь б҃ъ ѿц҃ъ на́ших̑ б҃ъ, а҆враа́мовъ, б҃ъ і҆саа́ковъ, б҃ъ і҆а́ковль посла̀ м̂ѧ къ ва́мъ.
с̂е мѝ и҆́мѧ вѣ́чное и҆ па́мѧть ѿ́ рода въ род̑·

Пришедши же съберѝ ста́рца сн҃овъ і҆и҆л҃евъ.
и҆ рцы̀ къ ним꙽·

Гь҃ б҃ъ ѿц҃ъ на́шихъ ꙗ҆́ви ми сѧ, б҃ъ а҆враа́мовъ, б҃ъ і҆саа́ковъ, б҃ъ і҆а́ковль, гл҃ѧ·

Присѣще́нїемъ.
присѣти́хъ ва́съ, и҆ ели́ко слꙋчи́сѧ вамъ въ е҆гѷптѣ.
и҆ рече и҆зведꙋ̀ в̂ы ѿ землѧ̀ и҆ ѿ работы е҆гѷпетъскїѧ въ зе́млю ханане́искꙋ и҆ хетѳе́искꙋ, и҆ еве́искꙋ, і҆ а҆мор꙽ре́искꙋ, и҆ ферезе́искꙋ, и҆ гергесе́искꙋ, и҆ евꙋсе́искꙋ, въ зе́млю кипѧ́щꙋ мле́комъ и҆ ме́домъ, и҆ послꙋш́аютъ гласа твое҆го·

И҆ вни́деши т̂ы.
и҆ старѣ́ишины і҆лв҃ы къ фараѻ́нꙋ цр҃ю е҆гѷпет꙽скомꙋ, гл҃еши же къ немꙋ̀·

Гь҃ б҃ъ е҆вре́искїи възва̀ насъ и҆ да и҆демъ пꙋте́мъ тр̂и дн҃и въ пꙋсты́ню, и҆ положи́мъ тре́бꙋ г҃ꙋ б҃ꙋ нашемꙋ·

А҆зъ же вѣмъ ꙗ҆́ко не ѿпꙋ́ститъ васъ фараѻ́нъ цр҃ь е҆гѷпет꙽скїи и҆тѝ, дон̑҇деже рꙋко́ю крѣ́пкою, и҆ просте́ръ рꙋкꙋ свою̀ погꙋблю̀ е҆гѷптѧны, всѣми чюдесы̀ мои́ми ꙗ҆же сътворю̀ в них꙽·

По се́м же ѿпꙋсти́тъ в̂ы, и҆ дамъ блгд̑ть лю́демъ си́мъ предъ е҆гѷптѧны·

Є҆гда же ѿхо́дите не ѿходи́те тщѐ.
н̂о да и҆спро́ситъ жена ѿ сꙋсѣды, съсꙋды сре́брены и҆ зла́ты, и҆ ри́зы и҆ ѹ҆краси́те сн҃ы ва́ша, и҆ дщери ва́ша, и҆ прелести́те е҆гѷптѧны·

Глв̑҇а, д҃·

Ѿвѣща́въ моѷсїи и҆ рече, а҆́ще л̂и не ѹ҆вѣ́рꙋют ми, н̂и послꙋш́аютъ гла́са моего, рекꙋтъ б̂о ꙗ҆́ко нѣсть б҃ъ.
ꙗ҆́ви́лъ ми сѧ чт̂о рекꙋ к ним̑·

И҆ реч̑҇ к немꙋ̀ г҃ь, чт̂о ес̑҇ въ рꙋцѣ твое́й, сей же реч̑҇ же́злъ·

И҆ рече е҆мꙋ повръзи е҆го на́ землю, и҆ вер̑҇же ѝ на зе́млю, и҆ быс̑҇ змїи, и҆ ѿбѣже моѷсїи ѿ него·

И҆ реч̑҇ г҃ь къ моѷсїю, прострѝ рꙋкꙋ, і҆ и҆ми и҆̀ за хво́стъ, и҆ прострѐ моѷсїи рꙋкꙋ и҆ ꙗ҆́ть е҆го и҆ бысть па́кы жезлъ в рꙋцѣ̀ е҆го·

И҆ рече е҆мꙋ, да ѹ҆вѣрꙋют꙽ т̂и, ꙗ҆́ко ꙗ҆́вил̑҇ ти сѧ е҆сть г҃ь б҃ъ ѿц҃ъ твоих̑ б҃ъ а҆враа́мовъ, б҃ъ і҆саа́ковъ, б҃ъ і҆а́ковль·

Рече же е҆мꙋ г҃ь паки.
вложѝ рꙋкꙋ твою в꙽ нѧ́дра твоа, и҆ вложѝ рꙋкꙋ свою въ нѧ́дра своѧ̀, і҆ и҆зѧт̑ еа̀ ѿ нѧ́дръ свои҆хъ, и҆ бысть рꙋка̀ е҆го прокаже́нна и҆ бѣла ꙗ҆́ко снѣгъ·

И҆ реч̑҇ па́ки е҆мꙋ г҃ь, вложѝ рꙋкꙋ твою въ нѧ́дра твоѧ, и҆ вложи́лъ рꙋкꙋ свою въ нѧ́дра своѧ̀, і҆ и҆зѧ́ть ю҆̀ ѿ нѧ́дръ свои҆хъ, и҆ бы́сть пакы рꙋмѧ́нїа е҆мꙋ пло́ти свое́ѧ·

І҆ а́ще ѹ҆бо не ѹ҆вѣрꙋю҆тъ т̂и и҆ не послꙋшаютъ гла́са чюда пр́ъваго, т̂о вѣрꙋютъ гла́сꙋ чюда вто́раго·

А҆ще не вѣрꙋютъ т̂и, си́ма двѣма̀ чю́дома, н̂и послꙋш́ают̑ гла́са твое҆го.
да въ́змеши ѿ воды̀ рѣчны́ѧ.
и҆ пролие́ши на́ сꙋхо, и҆ бꙋдетъ вода̀ ю҆же възмеши ѿ рѣкѝ кро́вїю, на́ сꙋсѣ·

Рече же моѷсїи къ г҃ꙋ, молю́ ти сѧ г҃и, ꙗ҆́ко нѣсмь рѣчи́стъ ѿ вчера́шнѧго и҆ третїаго дн҃е н̂и понели́же начатъ гл҃ати рабꙋ̀ твоемꙋ хꙋдогла́сенъ, и҆ косноꙗ҆́зы́ченъ а҆́зъ е҆смь·

И҆ рече г҃ь къ моѷсїю кт̂о дасть ѹ҆ста̀ чл҃кꙋ.
кт̂о ли сътвори́лъ е҆сть нѣма и҆ глꙋ́ха, и҆ слѣпа, и҆ ви́дѧща.
не а́зъ ли, г҃ь б҃ъ·

и҆ди нн҃ѣ, а҆́зъ б̂о ѿверзꙋ ѹста̀ тво́ѧ, и҆ ѹ҆стро́ю тѧ, е҆же ти бꙋдет̑ гл҃ати·

Рече же моѷсїи, молю́ ти сѧ г҃и, и҆зберѝ могꙋща и҆ного е҆гоже по́слеши·

И҆ разгнѣ́васѧ ꙗ҆́ростїю г҃ь на моѷсїѧ, и҆ рече·

Нѣсть ли с̂е братъ твой а҆а҆ро́нъ леви́тинъ, вѣмъ бо ꙗ҆́ко гл҃ѧ възгл҃етъ.
се же се́и и҆зы́детъ проти́вꙋ тебѣ, и҆ ѹ҆зрѣвъ т̂ѧ възра́дꙋетсѧ въ себѣ̀·

И рече́ши е҆мꙋ, и҆ въдасѝ е҆мꙋ словеса̀ моѧ въ ѹ҆ста̀ е҆го.

А҆́зъ же ѿвр́ъзꙋ ѹ҆ста̀ твоа, и҆ ѹ҆ста̀ е҆го, и҆ ѹ҆стро́ю вамъ е҆же и҆́мате твори́ти·

Се́и же гл҃етъ ѿ тебе къ лю́демъ.
и҆ се́и же ѹ҆бо да бꙋдетъ ѹ҆ста̀ твоѧ ты́ же бꙋди е҆мꙋ въ б҃а·

И҆ же́злъ се́и и҆спрове́ргїисѧ въ змїю̀.
възмѝ, въ рꙋкꙋ твою, си́мъ б̂о сътвори́ши чюдеса̀·

И҆́де же моѷсїи, и҆ възвратисѧ къ і҆ѻ҆ѳо́рꙋ те́стю своемꙋ, и҆ рече и҆дꙋ възвращꙋсѧ къ бра́тїи своей е҆же сꙋть въ е҆гѷптѣ, да ви́ждꙋ, е҆ще́ ли живи·

Рече же і҆ѻ҆ѳо́ръ къ моѷсїю.
и҆дѝ здра́въ·

по днех же ѻ҆ных̑ мно́гихъ, ѹ҆мре цр҃ь е҆гѷпет꙽скїи·

И҆ рече г҃ь къ моѷсїю въ землѝ мадїа́м꙽стѣи, ходѝ, і҆ и҆дѝ пакы въ е҆гѷпет̑, и҆змро́ша б̂о всѝ и҆́щꙋщеи дш҃а твоеа·

Поѧ́т же моѷсїи женꙋ̀ свою̀, и҆ ѻ҆троча́та и҆ всадѝ и҆̀ на ѻ҆слѧ́та, и҆ ѻ҆брати́сѧ въ е҆гѷпетъ·

И҆ взѧ́тъ моѷсїи же́злъ и҆же и҆мѣ ѿ б҃а в рꙋкꙋ своею·

Рече же г҃ь къ моѷсїю, и҆дꙋщꙋ тебѣ, и҆ възвраща́ющꙋсѧ въ е҆гѷпетъ, смотри всѣхъ чюде́съ ѧж̑ да́х꙽ въ рꙋцѣ твоѝ, да сътвори́шї ѧ҆̀ предъ фараѻ́номъ·

А҆зъ же ѻ҆жещꙋ̀ срд̑це е҆го, ꙗ҆ко не и҆спꙋсти́ти людїи·

Ты́ же гл҃еши фараѻ́нꙋ, си́це гл҃етъ гь б҃ъ е҆вре́искїи, и҆ сн҃ъ мои прьвенец꙽ і҆ил҃ь.
рѣх же тебѣ ѿпꙋстѝ лю́ди моѧ да м̂и требꙋ положа́тъ, не хо́щеши ли ѿпꙋсти́ти и҆хъ, блюдѝ с̂е а҆́зъ ѹ҆бїю̀ прьвене́цъ сн҃ъ твой·

Бысть же на пꙋтѝ, на станꙋ̀, срѣте и҆̀ а҆́гг҃лъ гн҃ь, и҆ска́ше е҆го ѹ҆бити и҆ въземши семфо́ра, камень несѣко́мъ и҆зощренъ·

И҆ ѻбрѣ́за коне́чьнꙋю плоть, сн҃а своего.
и҆ припад̑ши к нога́мъ и҆ рече, бысть кро́вь ѻ҆брѣзанїѧ сн҃а мое҆го·

Рече же г҃ь къ а҆а҆ро́нꙋ и҆зы́ди противꙋ моѷсїю въ пꙋсты́ню, і҆ и́де·

И҆ срѣте и҆̀ въ горѣ̀ бж҃їи и҆ цѣловастасѧ ѻ҆́ба.
и҆ повѣда моѷсїи а҆а҆ро́нꙋ вс̂ѧ словеса̀ гнс̑҇ѧ ꙗ҆́же посла̀ и҆ вс̂ѧ чюдеса̀ ꙗ҆же заповѣда е҆мꙋ·

шедше же моѷсїи і а҆а҆ро́нъ, събра́ста вс̂ѧ ста́рца сн҃овъ і҆ил҃евыхъ.
и҆ гл҃а и҆мъ а҆аро́нъ вс̂ѧ словеса сїѧ ꙗ҆́же гл҃а г҃ь моѷсїѻ҆ви, и҆ сътворѝ чюдеса̀ прд̑е всѣми людмѝ·

И҆ вѣ́роваша и҆мъ лю́дїе, и҆ възра́довашасѧ.
ꙗ҆ко посѣтѝ б҃ъ сн҃ы і҆ил҃евы, і҆ ꙗ҆́ко призрѣ̀ на и҆хъ скорбѣнїе, и҆ преклони́шасѧ лю́дїе, поклони́шасѧ·

Глв̑҇а, е҃·

По с́ем же въни́де моѷсїи, і҆ а҆а҆ро́нъ, къ фараѻ́нꙋ, и҆ реко́ста е҆мꙋ·

Си́це гл҃етъ г҃ь б҃ъ і҆ил҃евъ.
ѿпѹстѝ лю́ди моѧ, да тре́бꙋ положат̑ м̂и въ пꙋсты́ни·

Рече же фараѻ́нъ кт̂о то́и е҆сть е҆гоже а҆́зъ послꙋшаю гла́са, ꙗ҆́ко ѿпꙋсти́ти и҆́мам̑ сн҃ы і҆ил҃евы, не вѣмъ г҃а і҆ил҃ѧ не ѿпꙋщꙋ·

Рекоста е҆мꙋ.
бг҃ъ е҆вре́искїи, повелѣ намъ, да и҆демъ пꙋтемъ три дн҃и въ пꙋстыню, и҆ положи́мъ тре́бꙋ г҃ꙋ б҃ꙋ нашемꙋ, да не когда̀ слꙋчит̑сѧ на́мъ смертоно́сїе и҆ли ра́ть·

Рече же и҆ма цр҃ь е҆гѷпетскїи, въскꙋю м̂и, моѷсїи, і҆ а҆а҆ро́нъ, ѻ҆браща́ета лю́ди моѧ ѿ дѣлъ и҆хъ, и҆дѣта же кождо ва́съ на дѣло свое·

И҆ рече фараѻ́нъ, с̂е нн҃ѣ ѹ҆мно́жишасѧ лю́дїе сїи на землѝ, не полегчи́мъ и҆мъ дѣлесы̀·

Заповѣда же фараѻ́нъ приста́вникомъ дѣлесъ лю́дъскыхъ и҆ кни́гочїамъ гл҃ѧ.
ѿсе́лѣ не мози́те даꙗ҆ти плѣ́въ лю́демъ къ зда́нїю пли́нъѳомъ ꙗ҆коже вчера̀ и҆ тре́тїего дн҃е и҆ нн҃ѣ.
н̂о сами шед̑ше да събира́ют̑ плѣ́вы, и҆ заро́къ зда́нїѧ плинъѳе́ннаго ꙗ҆́же сътворѧ́тъ, да творѧт̑ вс̂ѧ дн҃и·

Приложи́те, а҆ не ѹ҆емли́те ничто́же, празныѧ б̂о дѣю҆тъ, и҆ сего ради гл҃ютъ да и́демъ и҆ положимъ требꙋ б҃ꙋ нашемꙋ.
ѻ҆тѧгчи́те дѣ́ла людемъ симъ, да сѧ и́ми пекꙋтъ, и҆ не помы́слѧтъ мы́сльми свои́ми сꙋесло́вїѧ·

Тща́хꙋ же сѧ приста́вницы, и҆ кни́гочїѧ, и҆ гл҃ахꙋ людемъ рекꙋще·

Се гл҃ет꙽ фараѻ́нъ, ѿселѣ не дамъ вам̑ плѣв꙽ но шед̑ше са́ми себѣ събира́ите плѣвы, и҆деже ѻ҆брѧ́щете.
и҆ заро́къ зда́нїѧ да дае́те, не ѹ҆́имет꙽ б̂о сѧ ѿ завѣта ва́шего, ни ма́ложе·

И҆ разыдо́шасѧ вс̂и лю́дїе по все́и землѝ е҆гѷпетъстѣи, да съберꙋтъ тро́стїе на плѣвы·

Приста́вницы же нꙋжда́хꙋ и҆хъ, гл҃юще, скончева́ите дѣла ваша заро́чнаа на всѧ́къ дн҃ь ꙗ҆́коже и҆ е҆гда̀ плѣвы даꙗ҆́хом̑ вамъ·

И҆ даꙗ҆́ше же раны кни́гочїѧ наро́дꙋ сн҃овъ і҆ил҃евыхъ, и҆же бѣша приста́вленїи и҆хъ ѿ преста́вникъ фараѻ́новыхъ гл҃юще, почт̂о не сконча́сте.
заро́ка вашего пли́нѳеннаго ꙗ҆́коже вчера̀ и҆ третїего дн҃е та́коже и҆ днс̑҇е·

Въшед̑ше же кни́гочїѧ сн҃овъ і҆ил҃евъ, възопи́ша ко фараѻ́нꙋ гл҃юще, почт̂о тако твори́ши рабо́мъ твои҆м꙽ плевелъ не дадѧ́тъ рабомъ твои҆мъ велѧ́т же намъ пли́нѳы твори́ти.
се же рабѝ твоѝ мꙋ́чими сꙋть, кри́вдꙋ твори́ши людемъ свои҆мъ·

И҆ рече и҆мъ ꙗ҆коже пра́здныѧ дѣе҆те пра́здныѧ и҆ гл҃ете, и҆ сего ради гл҃ете, ꙗ҆́ко да и́демъ и҆ положи́мъ тре́бꙋ б҃ꙋ нашемꙋ·

Нн҃ѣ ѹ҆бо дѣ́лаите шед̑ше, а҆ плѣвъ не дамъ вамъ, заро́к же зда́нїѧ плинѳе́ннаго да дае́те·

Видѧ́хꙋ же кни́гочїѧ сн҃овъ і҆ил҃евыхъ себе быти въ злѣ̀, гл҃ще не съста́нетсѧ плинѳъ заро́ка дн҃и.

Стрѣто́ста же и҆хъ моѷсїи, і҆ а҆а҆рон̑҇ и҆дꙋща ѿ фараѻ́на, и҆ рѣша и҆ма, ви́ждь вамъ б҃ъ, и҆ сꙋдѝ ва́ма, ꙗ҆́ко ѻ҆гнꙋси́сте насъ пред̑ фараѻ́номъ.
и҆ прд̑е мꙋжмѝ е҆го, дати ме́чъ въ рꙋцѣ ѹ҆би́ти насъ·

Глв̑҇а, ѕ҃·

Възвра́ти же сѧ моѷсїи къ г҃ꙋ, и҆ реч̑҇.
молю́ ти сѧ г҃и, почто̀ вредѝ лю́ди сїѧ, въскꙋ́ю же м̂ѧ посла̀.
ѿнели́же бо въхождꙋ̀ къ фараѻ́нꙋ.
гл҃ати твои́мъ и҆́менемъ, ѻ҆́нъже вредѝ лю́ди твоѧ̀.
и҆ не и҆зба́ви людїи твои҆хъ·

Рече же г҃ь къ моѷсїю, с̂е ѹ҆́зриши чт̂о сътворю̀ фараѻ́нꙋ, рꙋкою бо крѣ́пкою и҆спꙋсти́тъ и҆хъ, и҆ мы́шцею высо́кою и҆зжене́тъ ѧ҆̀ ѿ землѝ свое́ѧ·

Гл҃а же г҃ь къ моѷсїю, и҆ реч̑҇ е҆мꙋ.
а҆́зъ г҃ь ꙗ҆́вле́исѧ а҆враа́мꙋ, і҆ и҆саа́кꙋ, і҆а́ковꙋ, бг҃ъ сы́и и҆хъ, и҆́мѧ же ми г҃ь, сего̀ не ꙗ҆́ви́хъ и҆мъ·

Поста́вихъ же завѣтъ мои к ни́мъ, ꙗ҆́ко да́ти и҆мъ зе́млю ханаа́ньскꙋ, зе́млю пришествїа и҆хъ на не́иже ѻ҆бита́хꙋ·

А҆́зъ же ѹ҆слы́шахъ стена́нїе сн҃овъ і҆и҃левыхъ, и҆́мже е҆гѷптѧне порабо́тиша и҆хъ.

И҆ помѧнх̑ꙋ завт̑ѣ мои, и҆дѝ и҆ рцы̀ сн҃омъ і҆и҃левым̑ гл҃ѧ·

А҆́зъ г҃ь б҃ъ и҆зведꙋ̀ васъ ѿ наси́лїѧ е҆гѷпетъска, і҆ и҆зба́влю васъ ѿ рабо́ты и҆хъ, и҆ ѿи҆мꙋ̀ вас̑҇ мы́шцею высо́кою, и҆ сꙋдо́мъ вели́кимъ.
и҆ прїимꙋ̀ в̂ы себѣ въ лю́ди, и҆ бꙋ́дꙋ вам꙽ б҃ъ.
и҆ вразꙋмѣ́ете ꙗ҆́ко аз̑ е҆смь г҃ь б҃ъ вашъ, и҆зведы́и васъ ѿ землѧ̀ е҆гѷпетъски.
и҆ ѿ наси́лїѧ е҆гѷпет̑ска·

И҆ въведꙋ̀ васъ въ зе́млю на ню́же прострох̑ рꙋ́кꙋ мою да́ти ю҆̀ а҆враа́мꙋ, і҆саа́кꙋ, і҆а́ковꙋ, и҆ да́мъ ю҆̀ вамъ въ прича́стїе.
а҆́зъ г҃ь·

Гл҃а же моѷсїи тако сн҃омъ і҆и҃левымъ, и҆ не послꙋш́аша моѷсїѧ наси́лїѧ ради дш҃ъ и҆ рабо́тъ жесто́кихъ·

И҆ рече г҃ь къ моѷсїю гл҃ѧ въни́ди и҆ гл҃и къ фараѻ́нꙋ цр҃ю е҆гѷпетъскомꙋ да и҆спꙋ́ститъ сн҃ы і҆и҃левы ѿ землѧ̀ свое́ѧ·

Рече же моѷсїи пред̑ гм҃ъ гл҃ѧ, с̂е сн҃ове і҆и҃левы не послꙋш́аша менѐ, да како послꙋшати фараѻ́нꙋ менѐ, а҆́зъ же не ѹ҆миле́нъ е҆смь·

И҆ рече г҃ь къ моѷсїю, и҆ а҆а҆ро́нꙋ, и҆дѣте и҆ завѣща́ите, къ фараѻ́нꙋ цр҃ю е҆гѷпетъскомꙋ, да ѿпꙋ́ститъ сн҃ы і҆и҃левы ѿ землѧ̀ е҆гѷпетъскїѧ·

Сїѧ же старѣ́ишины до́мꙋ родꙋ и҆хъ.
сн҃ове рꙋви́мовы.
пер꙽венца̀ і҆и҃лева, е҆но́хъ, и҆ фалꙋ́съ, а҆сро́нъ, и҆ ха́рми, се племѧ̀ рꙋви́мово·

Сн҃ове же симеѻ́новы, е҆мꙋи҆лъ, и҆ а҆ми́нъ, и҆ а҆ѻ́дъ, и҆ а҆хи́н꙽, и҆ саа́ръ, и҆ саѹ́лъ, и҆же ѿ ѳинисинѧ.
сїи рожд̑енїа сн҃овъ симеѻ́новых̑·

Си и҆мена сн҃овъ левїиныхъ по съро́дъствꙋ и҆хъ, гирсо́нъ, каа́ѳъ, и҆ мера́ри·

Лѣтъ же житїѧ левїи҆на, рл҃з·

Си́ же сн҃ве гирсо́ни, лове́ни, и҆ семе́ни.
с̂и до́мове рожденїѧ и҆хъ·

Сн҃ове же каа́ѳовы, а҆мвра́мъ, и҆ саа́ръ, и҆ хевронъ, и҆ ѻ҆е҆зїи҆ль.
лт̑ѣ же житїѧ каа́ѳова, р҃л·

Сн҃ве же мера́ри, моѻ́лѣ, и҆ ѻ҆мꙋ́си.
с̂и до́мове ѿ рожд̑енїѧ левїи҆на.
по сърод̑ствꙋ их̑·

Поѧ̀тъ же а҆мвра́мъ, и҆ѻ҆хаве́ѳъ дще́рь брата ѿц҃а свое҆го, себѣ въ женꙋ̀.
роди же е҆мꙋ а҆а҆ро́на, и҆ моѷсїѧ, и҆ марїѧ́мъ сестрꙋ̀ и҆хъ.
лѣтъ же житїа а҆м꙽вра́мова, рл҃з·

Сн҃ве же и҆саа́ровы, ко́ре, нефе́к꙽, и҆ зе́хри·

Сн҃ове же і҆ѻ҆е҆зїи҆ловы, мисаилъ, е҆лисафанъ, сегри·

Поѧ́тъ же а҆а҆ронъ, е҆лисавеѳъ, дщерь а҆минада́вовꙋ, сестрꙋ̀ нассо́новꙋ, себѣ в женꙋ̀·

Породи́ же е҆мꙋ, надам̑, и҆ авиѹ҆́да, и҆ е҆лиа҆за́ра, и҆ѻ҆ѳама́ръ·

Сн҃ве же коре́ѻ҆вы, а҆си́ръ, и҆ е҆л꙽ка́на, и҆ а҆ваа҆са́ръ.
с̂и рожде́нїѧ коре́ѻ҆ва·

Є҆лиа҆за́ръ, сн҃ъ а҆аро́новъ, поѧ́тъ дще́рь, фꙋти́на, себѣ въ женꙋ̀·

породи́ же е҆мꙋ финее́са·

Сїи старѣ́ишинъства леви́тъска по съро́дъствꙋ и҆хъ·

Се̂ а҆а҆ро́нъ, и҆ моѷсїи, и҆́ма же реч̑҇ б҃ъ, и҆звестѝ сн҃ы і҆и҃лвы, ѿ е҆гѷпта въ крѣ́пости и҆хъ·

Си̂ сꙋть ꙗ҆́же гл҃аста къ фараѻ́нꙋ цр҃ю е҆гѷпетъскомꙋ, ꙗ҆́ко и҆звестѝ сн҃ы і҆и҃лвы ѿ землѧ̀ е҆гѷпетъскїѧ·

Се̂ моѷсїи і҆ а҆а҆ро́нъ, въ́нъже дн҃ь гл҃а г҃ь къ моѷсїю въ землѝ е҆гѷпетъстѣи·

И҆ рече г҃ь къ моѷсїю гл҃ѧ, а҆зъ г҃ь, гл҃и къ фараѻ́нꙋ цр҃ю е҆гѷпет꙽скомꙋ.
е҆ликоже а҆́зъ гл҃ю к тебѣ·

Рече же моѷсїи пред̑ гм҃ъ, с̂е а́зъ хꙋдорѣ́чивъ е҆смь да ка́ко послꙋшати мене и҆́мать фараѻ́нъ·

Глв̑҇а, з҃·

.

И рече г҃ь къ моѷсїю гл҃ѧ.
с̂е дахъ тѧ б҃а фараѻ́нꙋ.
брат̑ же тво́и а҆а҆ронъ, бꙋ́детъ тебѣ прро̑҇къ·

Ты же гл҃еши вс̂е е҆ли́ко ти заповѣ́дахъ.
ааронъ же братъ тво́и, да гл҃етъ къ фараѻ́нꙋ, да ѿпꙋс́титъ сн҃ы і҆и҃левы ѿ землѧ̀ е҆го·

А҆́зъ же ѻ҆жещꙋ̀ срд̑це фараѻ́нꙋ, и҆ ѹ҆мно́жꙋ зна́менїѧ и чюдеса̀ моѧ̀ въ землѝ е҆гѷпетъстѣи·

И҆ не послꙋш́аетъ васъ фараѻ́нъ, и҆ възложю̀ рꙋ́кꙋ мою на е҆гѷпетъ, і҆ и҆зведꙋ̀ съ си́лою мое҆ю лю́ди моѧ, сн҃ы і҆и҃левы ѿ землѧ̀ е҆гѷпетъскїѧ, съ ѿмще́нїемъ вели́кимъ·

И҆ ѹ҆вѣ́дѧтъ вс̂и е҆гѷптѧне ꙗ҆ко а́зъ е҆смь г҃ь простира́ѧ рꙋкꙋ на е҆гѷпетъ, и҆зводѧ̀ сн҃ы і҆и҃левы ѿ среды̀ и҆хъ·

Сътвори́ста же моѷсїи, і҆ а҆а҆ро́нъ, ꙗ҆́коже заповѣда и҆мъ г҃ь.

Моѷсїи же б̂ѣ тогда̀, п҃, лѣтъ.
а҆а҆ро́нъ, п҃г, лѣтъ.
е҆гда̀ гл҃аста къ фараѻ́нꙋ·

И҆ рече г҃ь къ моѷсїю і҆ а҆а҆ро́нꙋ гл҃ѧ, а҆ще рече́тъ фараѻ́нъ къ ва́мъ гл҃ѧ, покажи́те намъ зна́менїе и҆ли чю́до.
и҆ рече́ши братꙋ твое҆мꙋ а҆а҆ро́нꙋ, възмѝ же́злъ и҆ пове́рзи пред̑ фараѻ́номъ, и҆ пред̑ мꙋжмѝ е҆го, и҆ бꙋдет̑ ѕмїи.

Внїидо́ста же моѷсїи і҆ а҆а҆рон̑҇ пред̑ фараѻ́на и҆ пред̑ мꙋжѝ е҆го, и҆ сътвори́ста та́ко ꙗ҆коже заповѣда и҆ма г҃ь·

Пове́рже а҆а҆ро́нъ жезлъ пред̑ фараѻ́ном̑, и҆ пред̑ мꙋжмѝ е҆го, и҆ бысть ѕмїи·

Съзва́ же фараѻ́нъ вс̂ѧ мꙋдръца е҆гѷпетъскїѧ, и҆ влъхвы̀.
сътвори́ша же влъхвы е҆гѷпетъстїи, чарова́нїемъ свои҆мъ такожде.
и҆ поверго́ша кождо жезлъ свои, и҆ быша ѕми́еве.
и҆ пожрѐ же́злъ а҆а҆ро́новъ ѻ҆нѣ́хъ жезлы̀·

И҆ ѹ҆крѣпѝ срд̑це фараѻ́нъ, да не послꙋшаетъ и҆хъ, ꙗ҆ко́же гл҃а и́ма г҃ь·

И҆ рече г҃ь къ моѷсїю, ѻ҆тѧгчи́сѧ срд̑це фараѻ́нꙋ и҆ не хо́щетъ ѿпꙋсти́ти людїи, и҆дѝ къ фараѻ́нꙋ, заѹ҆́тра, се бо тои и҆сходитъ на́ воды, бꙋ́ди же срѣта́ѧ е҆го на́ брезѣ рѣчнѣмъ, и҆ възмѝ же́злъ въ рꙋ́кꙋ твою и҆же б̂ѣ и҆спрове́рглъсѧ въ ѕмїю, и҆ рече́ши къ немꙋ̀·

Гь҃ б҃ъ е҆врѣ́искїи посла̀ м̂ѧ к тебѣ гл҃ѧ, ѿпꙋстѝ лю́ди моѧ, да ми помо́лѧтсѧ въ пꙋстыни, ты же не послꙋшалъ доселѣ·

Се̂ гл҃етъ г҃ь по семꙋ̀ ѹ҆́вѣ́си, ꙗ҆́ко аз̑ е҆смь г҃ь.
с̂е а́зъ ѹ҆да́рю жезло́мъ, и҆же в рꙋцѣ моей въ во́дꙋ рѣчнꙋ́ю, и҆ спровержетсѧ въ кро́вь, и҆ ры́бы и҆же в рѣцѣ и҆з꙽мрꙋтъ, и҆ въсмерди́тсѧ рѣка, и҆ не възмо́гꙋтъ е҆гѷптѧне пи́ти воды̀ ѿ рѣкѝ·

И҆ реч̑҇ г҃ь къ моѷсїю.
рцы а҆а҆ро́нꙋ братꙋ твое҆мꙋ.
възмѝ жезлъ твои и҆ прострѝ рꙋ́кꙋ твою на́ воды е҆гѷпетъскїѧ.
и҆ на рѣ́ки их̑, и҆ на вс̂ѧ кла́дѧзѧ и҆хъ, и҆ на де́бри их̑, и҆ на вс̂ѧ во́ды питїѧ и҆хъ, и҆ да бꙋдт̑ꙋ въ кро́вь, по все́и землѝ е҆гѷпет̑стѣи въ съсꙋ́дѣхъ древѧных̑ и҆ ка́менных̑·

Сътвори́ста же тако моѷсїи, і҆ а҆а҆ро́нъ, ꙗ҆коже повелѣ и҆ма г҃ь·

Възе́мъ же а҆а҆ро́нъ жезлъ свои, и҆ ѹ҆да́ри въ во́дꙋ рѣчнꙋ́ю пред̑ фараѻ́номъ.
и҆ пред̑ всѣми людми е҆го, и҆спрове́рже вс̂ю во́дꙋ рѣчнꙋ́ю въ кро́вь, и҆ ры́бы ꙗ҆́же быша в рѣцѣ и҆з꙽мро́ша·

И҆ въсмердѣ́сѧ рѣка̀, и҆ не можа́хꙋ е҆гѷп꙽тѧне пити воды ѿ рѣкѝ.
и҆ бѧше кро́вь, по все́и землѝ е҆гѷпет̑стѣи·

Сътвори́ша же и҆ волхвы̀ е҆гѷпет̑стїи вол꙽хвова́нїемъ свои҆мъ та́кожде·

И҆ ѻ҆жестѣ срд̑це фараѻ́нꙋ, и҆ не послꙋшаше и҆хъ, ꙗ҆́коже и҆мъ ре́клъ г҃ь·

ѻ҆братив же сѧ фараѻ́нъ.
и҆ прїиде въ до́мъ свои, не положѝ себѣ сего̀ въ ѹ҆мѣ·

И҆скопа́ша же вс̂и е҆гѷптѧне по́ брегꙋ рѣкѝ да пїютъ, не можа́ше бо воды̀ рѣчны́ѧ пити.
и҆ сконча́сѧ се́дмь дн҃їи по ѹ҆даре́нїи гдс̑҇ни в рѣкꙋ·

Глв̑҇а, и҃·

И рече г҃ь къ моѷсїю, въни́ди къ фараѻ́нꙋ, и҆ рцы̀ е҆мꙋ.
си́це гл҃етъ г҃ь, ѿпꙋстѝ лю́ди моѧ да ми помо́лѧтъсѧ·

А҆́ще ли не ѿпꙋс́тиши, с̂е а́зъ побїю̀ предѣ́лы твоѧ вс̂ѧ жа́бами.
и҆ с̂е и҆зве́ржет̑ рѣка жа́бы, і҆ и҆злѣзъше вънїидꙋтъ въ домы̀ твоѧ и҆ въ клѣти ѻ҆́дръ твои҆хъ, и҆ в꙽ посте́лѧ твоѧ̀.
и҆ в домы̀ рабо́въ и҆ людїи твои҆хъ, и҆ въ тѣ́ста твоѧ, и҆ въ пе́щи твоѧ, и҆ на́ тѧ.
и҆ на мꙋжа твоѧ.
и҆ на́ люди твоѧ възлѣзт̑ꙋ жабы·

И҆ рече г҃ь къ моѷсїю.
рцы̀ а҆а҆ро́нꙋ братꙋ твое҆мꙋ.
простри рꙋкꙋ твою, и҆ же́злъ твои на рѣки, и҆ на и҆сто́чники и҆ на де́бри.
і҆ из꙽жд̑енѝ жа́бы на́ землю е҆гѷпетъскꙋю·

Прострѣтъ же а҆а҆ро́нъ рꙋ́кꙋ на́ воды егѷпетъскїѧ, і҆ и҆згна жа́бы, і҆ и҆злѣзо́ша жа́бы на́ землю е҆гѷпетъскꙋю, и҆ покры́ша вс̂ю зе́млю е҆гѷпет̑скꙋю·

Сътвори́ша же си́це и҆ въл꙽хвы е҆гѷпет̑стїи, въл꙽хвова́нїемъ свои҆мъ, и҆згна́ша жа́бы на́ землю е҆гѷпет̑скꙋю·

Призва́ же фараѻ́нъ моѷсїѧ і҆ а҆а҆ро́на, и рече и́ма.
моли́те г҃а за мѧ, да ѿжене́тъ ѿ менѐ жа́бы, и҆ ѿ людїи мои҆хъ, и҆ ѿпꙋщꙋ̀ лю́ди, да тре́бꙋ г҃ꙋ положа́тъ·

Рече же моѷсїи къ фараѻ́нꙋ.
завѣща́и съ мно́ю къгда̀ молю̀ за́ тѧ, и҆ за рабы̀ твоѧ̀, и҆ за́ люди твоѧ̀, да поги́бнꙋтъ жа́бы ѿ тебѐ, и҆ ѿ людїи твоих̑, и҆ ѿ домо́въ ваших̑·

Но̂ то́чїю въ рѣцѣ да ѻ҆ста́нꙋтъ.
се́й же рече ѹ҆́тро и҆ рече ꙗ҆́ко т̂ы гл҃еши бꙋ́ди.
н̂о да ѹ҆вѣ́си ꙗ҆ко нѣ́сть и҆но́го развѣ г҃а·

И҆ ѿженꙋт́сѧ жа́бы ѿ тебѐ, и҆ ѿ домо́въ ваших̑, и҆ ѿ се́лъ, и҆ ѿ рабо́въ твои҆х꙽.
и҆ ѿ людїи твоих̑, то́чїю в рѣцѣ да ѻ҆ста́нꙋтъ·

І҆ и҆зы́де моѷсїи і҆ а҆а҆ронъ ѿ фараѻ́на.
и҆ възопѝ моѷсїи къ г҃ꙋ, ѻ҆ зарече́нїи жа́бъ, ꙗ҆коже съвѣща̀ съ фараѻ́ном̑·

Сътвори́ же г҃ь, ꙗ҆́коже рече моѷсїи, і҆ и҆зъмро́ша жа́бы ѿ домо́въ и҆хъ, и҆ ѿ се́лъ их̑, и҆ ѿ ни́въ и҆хъ, и҆ събра́ша ѧ҆̀ въ стогѝ и҆ стогѝ·

И҆ въсмер꙽дѣ́сѧ землѧ̀.
ви́дѣвъ же фараѻ́нъ ꙗ҆́ко бы́сть поко́и.
ѻ҆жесточа́ же срд̑це е҆го, и҆ не послꙋш́а е҆ю̀, ꙗ҆коже ре́клъ г҃ь·

И҆ рече г҃ь къ моѷсїю, рцы̀ а҆а҆ро́нꙋ прострѝ рꙋко́ю же́злъ твои, и҆ ѹ҆да́ри в пер꙽сть земнꙋ́ю, и҆ да бꙋ́дꙋт꙽ скни́пы въ чл҃цѣхъ, и҆ въ ско́тѣхъ.
и҆ на фараѻ́нѣ и҆ до́мꙋ е҆го и҆ рабо́хъ е҆го, и҆ ве́сь пѣсокъ земны́и ста́нетъ скни́пами въ все́и землѝ е҆гѷптъстѣи, и҆ просте́ръ а҆а҆ро́нъ рꙋко́ю же́злъ и҆ ѹ҆да́ри в пер꙽сть земны́и, и҆ бы́сть скни́пы въ чл҃цѣхъ въ ско́тѣхъ, и҆ на всѧ́комъ пѣскꙋ земно́мъ бы́сть скни́пы, въ все́и землѝ е҆гѵ́петъстѣи·

И҆ твори́ша та́кожде въл꙽свѝ въл꙽хвова́нїемъ свои҆мъ и҆звестѝ скни́пы и҆ не възмого́ша.
и҆ бы́ша скни́пы въ чл҃цѣхъ и҆ скотѣхъ·

И҆ рѣша волъсвы фараѻ́нꙋ пр́ъстъ бж҃їи с̂е е҆сть·

ѻ҆жесточа́ же срд̑це фараѻ́ново, и҆ не послꙋша их̑, ꙗ҆́коже и҆мъ б̂ѣ ре́клъ г҃ь·

И҆ рече г҃ь къ моѷсїю, въста́въ заѹ҆тра, ста́ни пред̑ фараѻ́ном̑, се б̂о ѻ҆́нъ и҆зы́детъ на́ воды, и҆ речеши е҆мꙋ, си́це гл҃етъ г҃ь·

ѿпꙋстѝ лю́ди моа да м̂и помо́лѧтсѧ въ пꙋсты́ни·

А҆́ще ли не ѿпꙋ́стиши людїи моих̑.
се а҆́зъ пꙋщꙋ на́ тѧ и҆ на рабы̀ твоа̀, и҆ на́ люди твоѧ̀, и҆ на домы̀ ваша пе́сїѧ мꙋхи, и҆ напо́лънѧтсѧ домо́ве е҆гѷпетъстїи пе́сїи҆хъ мꙋхъ, и҆ в землѝ на не́иже сꙋть·

И҆ сътворю в то́и дн҃ь дивнꙋ зе́млю гесе́мскꙋ, на не́иже людїе моѝ ста́ша, на не́иже т̂ꙋ не бꙋ́детъ пе́сїѧ мꙋхи.
и҆ да ѹ҆вѣси, ꙗ҆́ко а꙽зъ г҃ьствꙋѧ все́и землѝ·

И҆ положꙋ разлꙋ́ченїе междꙋ̀ люд̑ми мои́ми, и҆ люд̑ми твои́ми.
въ ѹ҆трѣи же да бꙋ́детъ зна́менїе с̂е на землѝ·

Сътвори́ же г҃ь та́ко и прїидо́ша пе́сїа мꙋхи мно́гы въ домы̀ фараѻ́новы, и҆ въ домы̀ рабо́въ е҆го, и҆ въ всю̀ зе́млю е҆гѷпетъскꙋ, и҆ погы́бе землѧ̀ ѿ пе́сїѧ мꙋхи·

Възва́ же фараѻ́нъ моѷсїѧ і҆ а҆аро́на, гл҃ѧ.
по́идѣте, положи́те требꙋ г҃ꙋ бг҃ꙋ ва́шемꙋ в то́и землѝ·

Рече же моѷсїи не мо́жет꙽ с̂е тако быти, хꙋлно бо с̂е е҆гѷптѧномъ, не положимъ требꙋ г҃ꙋ бг҃ꙋ нашемꙋ·

А҆́ще б̂о положи́мъ тре́бꙋ по хꙋле́нїю е҆гѷпетъскꙋ, пред̑ ними, каменїем꙽ побию́тъ н̂ы·

Но̂ три дн҃и пꙋть шед̑ше въ пꙋсты́ню, положи́мъ тре́бꙋ г҃ꙋ бг҃ꙋ нашемꙋ, ꙗ҆́коже е҆сть реклъ намъ·

И҆ рече фараѻ́нъ, а҆́зъ ѿпꙋщꙋ в̂ы, да положите тре́бꙋ г҃ꙋ бг҃ꙋ вашемꙋ въ пꙋсты́ни.
н̂о не дале́че сѧ протѧ́гнете и҆тѝ, моли́те же сѧ и҆ за́ мѧ къ г҃ꙋ·

Рече же моѷсїи, та́ко а҆́зъ и҆зъшед̑ ѿ тебѐ, молю́сѧ за тѧ къ бг҃ꙋ, да ѿи҆дꙋтъ пе́сїѧ мꙋхи ѿ фараѻ́на, и҆ ѿ мꙋже́и, и҆ ѿ люде́и е҆го ѹ҆тро.
н̂о не приложѝ е҆ще прельсти́ти насъ ктомꙋ̀ не ѿпꙋсти́ти людїи, и҆ положи́ти требꙋ б҃ꙋ·

И҆зшед̑ же моѷсїи ѿ фараѻ́на, и҆ помолисѧ б҃ꙋ·

Сътвори́ же г҃ь ꙗ҆́коже рече моѷсїи, и҆ ѿгна̀ пе́сїѧ мꙋхи ѿ фараѻ́на, и҆ ѿ рабо́въ е҆го, и҆ ѿ людїи е҆го, и҆ не ѻ҆ста̀ ни е҆ді́на·

И҆ ѿтѧгчи́ же срд̑це фараѻ́нъ в сїе времѧ, и҆ не хотѣ̀ ѿпꙋсти́ти лю́дїи·

Глв̑҇а, ѳ҃·

И рече г҃ь къ моѷсїю, въни́ди къ фараѻ́нꙋ, и҆ рцы̀ е҆мꙋ·

Си́це гл҃ет꙽ г҃ь б҃ъ е҆вре́искїи ѿпꙋстѝ лю́ди моѧ, да м̂и помо́лѧтсѧ·

А҆́ще ли не хо́щеши ѿпꙋсти́ти лю́дїи мои҆хъ, но и҆ ещѐ и҆хъ ѹ҆дръжи́ши, с̂е рꙋка̀ гн҃ѧ.
на ско́ты твоѧ в по́лѧхъ, и҆ на ко́нѧ, и҆ на ѻ҆слы̀, и҆ на вельблю́ды и҆ на говѧ́да, и҆ на ѻ́вца, смр҃ть вели́кꙋ ѕѣло·

И҆ ди́вна сътворю̀ себѐ а҆́зъ в той часъ междꙋ̀ ско́ты е҆гѷпетъскими, и҆ междꙋ ско́ты сн҃овъ і҆ил҃евыхъ.
и҆ н̂и е҆ді́но же ѹ҆мретъ ѿ всѣхъ скотъ сн҃овъ і҆и҃льскыхъ·

И҆ даде г҃ь б҃ъ заро́къ гл҃ѧ, въ ѹ҆трънїи дн҃ь сътвори́тъ г҃ь б҃ъ слово с̂е на землѝ·

И҆ сътворѝ г҃ь с̂е сло́во на ѹ҆трїи, и҆змре ве́сь скотъ е҆гѷпет꙽скыи, а҆ ѿ скота́ же сн҃овъ і҆и҃левѣхъ не ѹ҆мре н̂и е҆ді́но·

Ви́дѣв же фараѻн̑҇ ꙗ҆́ко ѿ ско́тъ сн҃овъ і҆и҃левыхъ не ѹ҆́мре ни е҆дїно, ѻ҆тѧжча̀ срд̑це фараѻ́нꙋ, и҆ не ѿпꙋстѝ людїи·

И҆ рече б҃ъ къ моѷсїю і҆ а҆а҆ро́нꙋ гл҃ѧ·

Възми́те себѣ по́лны рꙋцѣ пе́пела пе́щнаго, да въсы́плетъ и҆̀ моѷсїи, къ нб҃си пред̑ фараѻ́номъ, и҆ пред̑ мꙋжъми е҆го·

И҆ да бꙋ́детъ прах̑ по все́и землѝ е҆гѷпетъстѣи·

И҆ да бꙋ́детъ на чл҃цѣх꙽ и҆ на скотѣхъ, гно́иныѧ стрꙋ́пы, вели́кы на чл҃цѣхъ, и҆ на скотѣхъ, и҆ по все́и землѝ е҆гѷпетъстѣи·

И҆ взѧ́тъ пе́пелъ пе́щныи пред̑ фараѻ́номъ, и҆ всы́па моѷсїи къ нб҃си, и҆ бы́ша гно́иныѧ стрꙋ́пы, горѧ́щїи.
на чл҃цѣхъ и҆ на скотѣхъ·

И҆ не можа́хꙋ волъхвы стоѧ́ти пред̑ моѷсїѻм̑ стрꙋ́повъ ради·

Бы́ша б̂о стрꙋп́ы на во́лъхвѣхъ, и҆ на все́и землѝ е҆гѷпетъстѣи·

ѻ҆жесточи́ же г҃ь срд̑це фараѻ́ново, и҆ не послꙋш́а и҆хъ, ꙗ҆́коже повелѣ г҃ь моѷсїю·

И҆ рече г҃ь къ моѷсїю въста́въ заѹ҆тра, ста́ни пред̑ фараѻ́номъ, и҆ рцы к немꙋ̀·

Си́це гл҃етъ г҃ь бг҃ъ е҆врѣ́искыи·

ѿпꙋстѝ лю́ди моа̀ да ми сѧ помо́лѧт̑ в сїи б̂о часъ·

А҆́зъ и҆спꙋщꙋ̀ вс̂ѧ ка́зни моѧ̀ въ срд̑це твое, и҆ рабовъ твои҆хъ, и҆ людїи твои҆хъ, да ѹ҆вѣси, ꙗ҆́ко нѣсть и҆́нъ б҃ъ ꙗ҆́коже а҆́зъ по все́и землѝ·

Н н҃ѣ ѹ҆бо пꙋщꙋ рꙋ́кꙋ мою и҆ побїю̀ т̂ѧ, и҆ лю́ди твоа̀ и҆зморю̀ мо́ром꙽, и҆ потреби́шисѧ ѿ землѧ̀·

И сего б̂о ради пощадѣсѧ досе́лѣ, да покажꙋ тобо́ю крѣпость мою̀·

И҆ ꙗ҆ко проповѣ́стьсѧ и҆́мѧ моѐ по все́и земли́·

А҆́ще ѹ҆бо ты̀ с̂е твори́ши лю́демъ мои҆мъ, и҆ не ѿпꙋстиши их̑·

Се̂ а́зъ и҆спꙋщꙋ в то́и же часъ ѹ҆тро гра́дъ мно́гъ ѕѣло·

Ꙗ҆́ковъ же нѣсть былъ въ е҆гѷптѣ, ѿ него́же дн҃е ꙗ҆́ко сътвори́сѧ и҆ до днс̑҇е·

Нн҃ѣ ѹ҆бо потщи́сѧ събра́ти ве́сь скотъ свои, и҆ все е҆же ти е҆сть на́ поли.
вси́ бо чл҃цы и҆ скоти, і҆ и҆же сꙋть на́ поли, а҆́ще не вни́дꙋтъ въ домы̀.
паде́тъ же ли на нѧ гра́дъ и҆змрꙋтъ·

Ѹ҆боѧ́вши же сѧ сло́ва гнс̑҇ѧ ѿ мꙋжїи фараѻ́новых̑.
въгна́ша скоты своа въ домы̀, а҆ и҆же не прїа́ша сло́ва гн҃ѧ въ ѹ҆мѣ, сїи ѻ҆ста́виша скоты своа̀ на́ поли·

И҆ рече г҃ь къ моѷсїю, простри́ рꙋ́кꙋ на нб҃о, и҆ да бꙋ́детъ гра́дъ по все́и землѝ е҆гѷпетъстѣи, на чл҃кы, и҆ на скоты, и҆ на всю̀ травꙋ̀ земнꙋ́ю·

Простре́ же моѷсїи рꙋкꙋ на нб҃о, г҃ь же дасть глас̑҇ гро́ма, и҆ гра́дъ, и҆ ѻ́гнь течѧ́ше по землѝ.
и҆ надождѝ г҃ь гра́дъ, по все́и землѝ е҆гѷпет̑стѣй·

Бѣ же гра́дъ и҆ ѻ҆гнь горѧ́ше въ гра́дѣ, и҆ град̑ же мног̑҇ ѕѣло ѕѣло, ꙗ҆́ковъ же не бысть си́цевъ въ е҆гѷптѣ.
понелико, и҆ бы́ша лю́ди в немъ·

И҆зби́ же град̑ вс̂ю зе́млю е҆гѷпетъскꙋю, ѿ чл҃ка и҆ до ско́та, и҆ вс̂е и҆же бѧ́ше на́ поли, и҆ вс̂ю травꙋ земнꙋ́ю и҆збилъ град̑·

И҆ вс̂е дре́во по́льное, сътре гра́дъ, ра́звѣ землѧ̀ гесе́мъски и҆дѣже бѧ́хꙋ сн҃ове і҆ил҃евы не бысть град̑·

Посла́ же фараѻ́нъ, и҆ призва̀ моѷсїѧ, і҆ а҆а҆ро́на.
и҆ рече и́ма, съгрѣшихъ до нн҃ѣ, г҃ь пра́веденъ, а҆́з же и҆ лю́дїе моѝ безако́нни, моли́тесѧ за мѧ къ г҃ꙋ даб̂ы преста́ли гро́ми бж҃їи, и҆ град̑, и҆ ѻ҆гнь на землѝ, и҆ ѿпꙋщꙋ в̂ы и҆ ктомꙋ̀ не приложи́те премед̑лити·

Рече же е҆мꙋ моѷсїи, ꙗ҆́ко и҆зы́дꙋ и҆зъ града, и҆ въздви́гнꙋ рꙋцѣ на нб҃о къ гв҃и, и҆ гро́ми ѹ҆ста́нꙋтъ, гра́да и҆ дожда не бꙋ́детъ ктомꙋ·

И҆ да ѹ҆вѣси, ꙗ҆ко гнс̑҇ѧ е҆сть землѧ̀.
ты́ же и҆ рабѝ твоѝ, вѣмъ ꙗ҆́ко николи́же ѹ҆боѧ́стесѧ г҃а·

Ле́н же и҆ ꙗ҆чме́нь поби́тъ е҆сть, ꙗ҆чмень ѹ҆бо и҆спꙋщаше кла́сы, а҆ ле́н же процвѣташе.
пшеница же и҆ жито не и҆згыбнета по́знд̑ы бо бѧ́ше·

И҆сшед̑ же моѷсїи ѿ фараѻ́на и҆з гра́да, и҆ въздви́же рꙋцѣ своѝ къ г҃ꙋ, и҆ преста́ша гро́мове, и҆ град̑, и҆ дождъ не ѹ҆ка́нꙋ на́ землю бо́лее·

Ви́дѣв же фараѻ́нъ, ꙗ҆́ко преста до́ждъ, и҆ гра́дъ, и҆ гро́ми, и҆ приложѝ съгрѣши́ти е҆ще, и҆ ѻ́тѧгча срд̑це е҆мꙋ.
и҆ мꙋжїи е҆го, ѻ҆жесточа́ же срд̑це е҆го, и҆ рабо́въ е҆го, и҆ не ѿпꙋстѝ сн҃овъ і҆ил҃евыхъ, ꙗ҆коже гл҃а г҃ь къ моѷсїю·

Глв̑҇а, і҃·

И рече г҃ь къ моѷсїю гл҃ѧ, въни́ди къ фараѻ́нꙋ·

А҆́зъ б̂о ѻ҆тѧгчи́хъ срд̑це е҆го, и҆ мꙋжїи е҆го, да и҆ ещѐ пребꙋ́дꙋт꙽ зна́менїѧ сїѧ на ни́хъ·

Ꙗ҆́ко дабы̀ и҆сповѣ́дали е҆сте ча́домъ свои҆мъ въ ѹ҆́ши, и҆ внꙋ́комъ своим̑, ели́ко сѧ нарꙋга́хъ е҆гѷптѧномъ·

И҆ зна́менїѧ моѧ е҆же в ни́хъ сътвори́хъ, и҆ да ѹ҆вѣсте ꙗ҆́ко г҃ь е҆смь·

Въшед̑ же моѷсїи, і҆ а҆аро́нъ пред꙽ фараѻ́на, и҆ рѣста е҆мꙋ, си́це гл҃етъ г҃ь б҃ъ е҆вре́искый·

доко́лѣ не хо́щеши ѹ҆срамлѧ́тисѧ менѐ, ѿп́ꙋстѝ лю́ди моѧ̀.
да м̂и помо́лѧтсѧ·

А҆́ще л̂и не хо́щеши ѿпꙋстити лю́ди моѧ, се а́зъ заѹ҆́тра пꙋщꙋ̀ прꙋ́ги мно́ги на вс̂ѧ предѣлы твоѧ, и҆ покры́ютъ вс̂е лицѐ земно́е, и҆ не възмо́жеши ви́дѣти землѧ̀·

И҆ поꙗ҆́дѧ́тъ ве́сь ѻ҆ста́нокъ, и҆же ѻ҆ста̀ ѿ гра́да, і҆ и҆зъꙗ҆дѧ́тъ вс̂ѧко дре́во растꙋщее и҆з꙽ землѧ̀·

И҆ напо́лнѧтсѧ до́мове твоѝ и҆ до́мове мꙋжїи твои҆хъ, и҆ вс̂и до́мове по все́и землѝ е҆гѵпетъстѣи·

е҆го́же не ст̑ꙋ никогд́а же ви́дѣли ѿц҃и твоѝ ни пра́дѣди и́хъ.
ѿ него́же дн҃е бы́ша на землѝ, и҆ до днешнѧ̀го дн҃е, и҆ сїѧ ре́кши и҆зы́де ѿ фараѻ́на·

Реко́ша же мꙋжи фараѻ́новы к немꙋ̀, доколѣ намъ е҆сть сїѧ̀ м́ꙋка, ѿпꙋстѝ лю́ди, да помо́лѧт꙽сѧ г҃ꙋ бг҃ꙋ свое҆мꙋ а҆́ще ли н̂и, т̂о да вѣ́си.
ꙗ҆ко поги́бнет̑ егѷпетъ·

И҆ ѻ́брати́ша моѷсїѧ і҆ а҆а҆ро́на, предъ фараѻ́на·

И҆ рече и҆ма фараѻ́нъ, и҆дѣта моли́тасѧ г҃ꙋ б҃ꙋ вашемꙋ.
кт̂о и҆ кт̂о сꙋть и҆дꙋщїи·

Рече же моѷсїи, съ ю́нотами нашими, и҆ съ ста́рцы, да и́демъ, съ сынми, и҆ дще́рми, и҆ съ ѻ҆вца́ми, и҆ говѧ́ды нашими.
бꙋ́детъ б̂о вели́къ дн҃ь г҃а б҃а нашего·

И҆ реч̑҇ и҆ма фараѻн̑҇.
да бꙋдетъ та́ко г҃ь с вами, ꙗ҆́коже васъ пꙋщꙋ̀ съ стѧжа́нїемъ вашим̑·

Ви́дите ꙗ҆́ково̀ лꙋка́въствїе ѻ҆брѣта́етсѧ въ вас̑҇.
не та́ко, н̂о да и́дꙋтъ точїю мꙋжи и҆ да сѧ помо́лѧтъ б҃ꙋ, сего б̂о вы̀ са́ми про́сите, і҆ и҆згнаша и҆хъ ѿ лица̀ фараѻ́нова·

И҆ рече г҃ь моѷсїю, прострѝ рꙋкꙋ твою на зем̑лю е҆гѷпетъскꙋю, и҆ да и҆злѣзт̑ꙋ прꙋзи на зе́млю е҆гѷпет̑скꙋ, и҆ да сънѣ́дѧт꙽ вс̂ю травꙋ̀ земнꙋ́ю и҆ весь плодъ древный е҆же ѻ҆ста̀ ѿ града·

И҆ въздви́же моѷсїи.
же́злъ на нб҃о, г҃ь же наведѐ вѣтръ въсточныи на всю̀ зе́млю, въ то́и дн҃ь и҆ тоѝ нощи·

Бысть же заѹ҆тра вѣтръ въсто́чныи заи́мъ прꙋги, наведѐ на всю̀ зе́млю е҆гѷпет꙽скꙋ, и҆ налѧго́ша на вс̂ѧ предѣлы е҆гѷпет̑ски мно́ги ѕѣло, прежде б̂о сихъ не бы́ша сицевїи прꙋѕи на землѝ, ниже по се́мъ бꙋдꙋтъ·

И҆ покрыша лицѐ земно́е, і҆ и҆стлѣ землѧ̀, и҆ сънѣдо́ша вс̂ю травꙋ̀ земнꙋю, и҆ ве́сь плодъ дре́вныи, і҆ е҆ли́ко же б̂ѣ ѻ҆ста́ло ѿ гра́да·

И҆ не ѻ҆ста̀ зеле́но ничт̂о на́ древѣхъ и҆ въ все́и травѣ е҆же на́ поли, по все́и землѝ е҆гѷпетъстѣи·

Потща́в же сѧ фараѻ́нъ, възва̀ моѷсїѧ і҆ аа҆ро́на гл҃ѧ, съгрѣшихъ къ г҃ꙋ б҃ꙋ вашемꙋ и҆ к ва́мъ, простѣте мой грѣхъ·

І҆ еще нн҃ѣ.
да моли́те г҃а б҃а вашего, дабы ѿнѧ́лъ смр҃ть сїю ѿ менѐ·

И҆зшедъ же моѷсїи ѿ фараѻ́на и҆ моли́сѧ къ г҃ꙋ.
и҆ прѣменѝ г҃ь ѿ морѧ вѣтръ вели́къ, и҆ заи́мъ прꙋги и҆ въгна̀ и҆хъ въ мо́ре чермно́е.
и҆ не ѻ҆ста ни е҆дін꙽ прꙋгъ на все́и землѝ е҆гѷпетъстѣй·

ѻ҆жесточи́ же г҃ь срд̑це фараѻ́ново, и҆ не ѿпꙋстѝ сн҃овъ і҆и҆л҃евѣхъ·

И҆ рече г҃ь моѷсїю прострѝ рꙋкꙋ твою на́ нб҃о, и҆ да бꙋдетъ тм̂а ѻ҆сѧжи́ма по все́и землѝ е҆гѷпет̑стѣи·

Простре же моѷсїи на́ нб҃о рꙋкꙋ свою, и҆ бысть тм̂а, мгла̀ и҆ ды́мъ по все́и землѝ е҆гѷпетъстѣи, три дн҃и·

И҆ не видѣ никто́же брата свое҆го.
и не въста̀ никто́же ѿ ѻ҆дра̀ своего три дн҃и·

Всѣм же сн҃омъ і҆и҆л҃евымъ бѧ́ше свѣтъ въ всѣхъ предѣлехъ, в ни́хже пребыва́хꙋ·

Призва же фараѻ́нъ, моѷсїѧ, і҆ ааро́на гл҃ѧ·

И҆дѣте помоли́тесѧ г҃ꙋ б҃ꙋ вашемꙋ, развѣ ѻ҆ве́цъ и҆ говѧд̑, стѧжа́нїе же все да и҆дет꙽ с вами·

Рече же моѷсїи ника́коже.
н̂о ты ли намъ даси тре́бꙋ, и҆ вс̂есъжеже́нїе, да положи́мъ г҃ꙋ б҃ꙋ нашемꙋ, н̂о да и҆ скотъ нашъ и҆детъ с нами, да не ѻ҆ста́вимъ и҆ копы́та·

ѿ си́х же възе́мше, положим̑ требꙋ г҃ꙋ б҃ꙋ нашемꙋ, и҆ м̂ы не вѣмы шт̂о принесемъ г҃ꙋ б҃ꙋ нашемꙋ.
дондеже до́идем̑ тамо·

ѻ҆жесточа́ же срд̑це фараѻ́ново, и҆ не хотѣ ѿпꙋсти́ти и҆хъ·

И҆ реч҆е е҆мꙋ фараѻ́нъ, ѿи҆дѝ ѿ мене.
блюди́ же сѧ ктомꙋ̀, да не приложи́ши ви́дѣти лица̀ мое҆го.
а҆́ще л̂и ни, т̂о во́нже дн҃ь ꙗ҆́ви́шисѧ мн̂ѣ ѹ҆́мреши.
гл҃а же моѷсїи ꙗ҆́ко гл҃еши не ꙗ҆́влю́ ти сѧ предъ лицемъ·

Глв̑҇а, а҃і·

И рече г҃ь къ моѷсїю, и҆ е҆ще е҆дін̑҇ вредъ приведꙋ̀ на фараѻ́на, и҆ на е҆гѷпетъ, и҆ по семъ ѿпꙋститъ в̂ы·

Є҆гда же ѿпꙋститъ в̂ы, то и҆ съ всм̑ѣ и҆мѣнїемъ и҆зженетъ в̂ы·

Гл҃и ѹ҆бо ѻ҆та́и въ ѹ҆ши лю́демъ, да и҆спро́сѧтъ.
ѹ҆ сꙋсѣда, и҆ жена̀ ѹ҆ сꙋсѣды свое́и, съсꙋды златы, и҆ сребрены и҆ ри́зы, г҃ь бо далъ блгд̑ть лю́демъ свои҆мъ, пред꙽ е҆гѷптѧны, и҆ да́ша и҆мъ·

Чл҃къ же моѷсїи вели́къ бысть ѕѣло предъ е҆гѷптѧны, и҆ предъ фараѻ́номъ, и҆ предъ мꙋжмѝ е҆го, и҆ прд̑е ѻ҆чи́ма всѣхъ людїи·

И҆ рече моѷсїи си́це гл҃етъ г҃ь.
въ полꙋнощи а҆́зъ прїидꙋ посредѣ е҆ѳгѷпта, і и҆змретъ ве́сь прьвене́цъ въ землѝ е҆гѷпет̑стѣй ѿ пръвенца̀ фараѻ́нова е҆же сѣди́тъ на прс̑҇толѣ, даже до прьвенца̀ рабы́нѧ ꙗ҆же ѹ҆ же́рновъ, и҆ до прьвенца̀ всего скота̀·

И҆ бꙋдетъ въпль вели́къ по все́и землѝ е҆гѷпетъстѣи.
ꙗ҆ко́въ же не б̂ѣ, и҆ си́цевъ ктомꙋ не бꙋдетъ·

А҆ въ всѣхъ сн҃ѣхъ і҆и҆л҃евѣхъ.
не въско́млетъ ни песъ ꙗ҆́зы́комъ свои҆мъ ѿ чл҃ка.
и҆ до скота̀, да ѹ҆́зриши е҆ли́ко просла́витъ г҃ь, междꙋ е҆гѷптѧны, и҆ сн҃ъми і҆и҆л҃евыми.
и҆ въскли́кнꙋтъ вс̂и ѻ҆́троцы с̂и къ мн̂ѣ.
и҆ покло́нѧтсѧ мн̂ѣ гл҃юще, ѿидѝ т̂ы и҆ вси лю́дїе твоѝ, и҆хже т̂ы во́диши.
по се́мъ же ѿи҆дꙋ̀·

И҆зшед же моѷсїи ѿ фараѻ́на съ гнѣвомъ·

И҆ рече г҃ь къ моѷсїю, не послꙋш́ае҆тъ васъ фараѻ́нъ, да ѹ҆мно́жꙋ зна́менїѧ и҆ чюдеса̀ въ землѝ е҆гѷпетъстѣи·

Моѷсїи же і҆ аа҆ро́нъ, сътвори́ша зна́менїѧ и҆ вс̂и чюдеса сїи пред̑ фараѻ́номъ и҆ ѻ҆жесточѝ г҃ь срд̑це фараѻ́ново, и҆ не хотѣ ѿпꙋсти́ти сн҃овъ і҆и҆л҃евѣхъ ѿ землѧ̀ е҆гѷпетъскїѧ·

Глв̑҇а, в҃і·

И рече г҃ь къ моѷсїю, і҆ а҆а҆ро́нꙋ, въ землѝ е҆гѷпет̑стѣи гл҃ѧ.
мцс̑҇ь се́й вамъ нача́ло мцс̑҇ем꙽.
пр́ъвыи бꙋ́детъ вамъ въ мцс̑҇ехъ лѣтꙋ·

Рцы̀ къ всемꙋ̀ со́нмꙋ сн҃овъ і҆и҃левъ гл҃ѧ.
въ, і҃, мцс̑҇а сего да прїиметъ ко́ждо ѻ҆вча̀ на до́мъ, въ ѿч҃ество своѐ.
ѻ҆вча̀ на до́мъ·

А҆́ще ли же ма́ло и҆хъ е҆сть въ домꙋ̀, ꙗ҆́ко не дово́лномъ быти на ѻ҆вча̀, да прїиметъ съ собо́ю сꙋсѣ́да бли́жнего свое҆го, по числꙋ̀ дш҃ь, ко́ждо дово́лное себѣ, съчте́тъ, на ѻ҆вча̀ съверше́но, мꙋ́жеска полꙋ непоро́чно и҆ е҆ді́нолѣтно, ѿ а́гнецъ, и҆ ѿ ко́злищъ прїимѣте·

И҆ да бꙋ́дет̑ вам꙽ съблюде́но, даже до четвертаго на́десѧть дн҃е мцс̑҇а сего, и҆ зако́лют̑ т̂о, все мно́жество събо́ра сн҃въ і҆и҃левыхъ къ ве́черꙋ·

И҆ прїимꙋтъ ѿ кро́ви, и҆ пома́жꙋтъ на ѻ҆бою̀ подво́ю и҆ на пра́гъ, и҆ въ домѣ́хъ, е҆го́же сънѣ́дѧтъ в нихъ сеѧ̀ но́щи мѧса т̂а пече́на ѻ҆гне́мъ.
и҆ ѻ҆прѣ́снокъ съ желтѧни́цею, сънѣдѧтъ·

И҆ не сънѣ́сте ѿ нихъ сꙋ́рово, ниже съваре́но въ водѣ̀, но пече́но ѻ҆гне́мъ.
съ главо́ю съ нога́ми, и҆ съ ѹ҆тро́бою·

І҆ не ѻ҆ста́вите ѿ него̀.
ничто́же на заѹ҆́тръ.
и҆ ко́сти не съкрꙋши́те ѿ него̀, въ ѹ҆́трѣи же ѻ҆ста́нки сꙋщ́аѧ ѿ него̀ ра́но, ѻ҆гне́мъ съж꙽же́те·

И҆ та́ко ꙗ҆́сти бꙋ́дете ѿ него̀, чресла̀ ва́ша препоꙗ҆́сана, и҆ сапозѝ ва́ши на ногах̑ вашихъ, и҆ жезлы̀ ва́ши въ рꙋка́хъ вашихъ·

И҆ сънѣ́сте съ тща́нїем꙽ ско́ро, па́сха е҆сть гн҃ѧ·

И проидꙋ̀ землю е҆гѷпетъскꙋю.
сеѧ̀ но́щи ѹ҆бива́ѧ всѧ́къ прьвене́цъ въ землѝ е҆гѷпетъстѣи, ѿ чл҃ка до скота̀.
и҆ въ всѣ́хъ бо́ѕѣхъ е҆гѷпетъскихъ сътворю̀ ѿмщенїе а҆́зъ г҃ь·

И҆ да бꙋ́дет̑ кро́вь вамъ въ зна́менїе на домо́хъ.
в ни́хъ же в̂ы бꙋ́дете тамо, и҆ ѹ҆зрв̑҇ѣ кро́вь покры́ю в̂ы, и҆ не бꙋ́детъ въ вас̑҇ вре́да поги́бнꙋти, е҆гд̑а ѹ҆бїю̀ зе́млю е҆гѷпетъскꙋю·

И҆ да бꙋ́детъ вамъ дн҃ь се́й въ па́мѧть, и҆ чте́те пра́зник̑҇ гꙋ въ ро́дѣхъ вашихъ, зако́нно и҆ вѣчно, пра́знд̑ꙋите з҃ дн҃їи ѻ҆прѣсноки, да ꙗ҆́сте·

ѿ пр́ъваго дн҃е и҆змѣте квасъ, ѿ домо́въ вашихъ·

Всѧ́къ б̂о и҆же сънѣ́сть ки́село, поги́бнетъ дш҃а т̂а ѿ і҆и҃лѧ·

ѿ дн҃е пе́р꙽ваго, и҆ до дн҃е седма́го·

Пе́рвыи же дн҃ь да сѧ прозове́тъ ст҃ыи, а҆ сед̑мы́и дн҃ь наро́читъ ст҃ъ да бꙋ́детъ вам̑·

Всего̀ дѣ́ланїѧ рабо́тна да не сътвори́те в о́нь, ра́звѣ е҆ли́ко сънѣ́сть, сътвори́тсѧ всѧ́кои дш҃и, то́чїю сїѧ да сътво́рѧтсѧ вамъ·

Сънабди́те же за́повѣди сїѧ, в сїи б̂о дн҃ь и҆зведꙋ̀ си́лꙋ вашꙋ ѿ землѧ̀ е҆гѷпетъскїѧ, и҆ да сътвори́те въ сїи дн҃ь въ ро́ды ваша, зако́нно и҆ вѣ́чно начина́юще·

Въ, д҃і, дн҃ь.
пе́рваго мцс̑҇а съ ве́чера да ꙗ҆сте ѻ҆прѣ́сноки, до дв̂адесѧти, и҆ е҆ді́наго дн҃е мцс̑҇а до ве́чера.
се́дмь дн҃їи ква́съ да сѧ не ꙗвитъ въ домѣ́хъ вашихъ·

Всѧ́къ и҆же а́ще ꙗ҆́сть ква́сно, погꙋби́тсѧ дш҃а та ѿ со́нма сн҃овъ і҆и҃левыхъ.
и҆ въ прише́льцѣхъ землѝ, всѧкого кваса да не ꙗ҆́сте.
въ всѣ́хъ же домѣ́хъ да ꙗ҆́сте ѻ҆прѣ́сноки·

Съзва́ же моѷсїи вс̂ѧ ста́рца, і҆и҃левы.
и҆ ре́че и҆мъ.
шед̑ше пои҆мѣте себѣ а́гнъца по срод̑ствꙋ вашемꙋ, и҆ же́ртвꙋите пасхꙋ·

Възмѣте же ки́сть и҆с꙽со́па ѻ҆мочи́вши же въ кро́вь, две́рныѧ пома́жете пра́ги, и҆ ѻ҆бою̀ подво́ю ѿ кро́ви ꙗ҆же е҆сть бли́зꙋ двере́и.
а҆ в̂ы да не и҆сходи́те, никто́же ѿ две́рїи до́мꙋ свое҆го до заѹ҆́трїѧ·

И҆ мина́ѧ г҃ь и҆збива́ѧ е҆гѷп꙽тѧны, и҆ ѹ҆́зритъ кро́вь на пра́зѣ, и҆ на ѻ҆бою̀ подво́ю, и҆ мине́тъ г҃ь две́ри, и҆ не попꙋ́ститъ ѹ҆бива́ющемꙋ въни́ти въ домы̀ ва́ша ѹ҆бива́ти·

Снабди́те же сло́во, с̂е зако́нно себѣ, и҆ сн҃омъ ва́шимъ до́ вѣка·

А҆́ще же въни́дете въ зе́млю ю҆́же да́сть г҃ь вам̑, ꙗ҆коже гл҃а.
снабди́те слꙋже́нїе с̂е·

да бꙋ́детъ е҆гда̀ въз꙽гл҃ютъ вам̑ сн҃ове ва́ши, чт̂о е҆сть слꙋже́нїе с̂е, т̂о рече́те и҆мъ, же́ртовнаѧ пасха е҆сть г҃ꙋ.
и҆́же покры̀ до́мы сн҃овъ і҆и҃левых꙽ въ е҆гѷптѣ·

Є҆гда̀ побѝ е҆гѷптѧны, а҆ до́мы наша и҆зба́ви·

И҆ прекло́ншесѧ поклони́шасѧ лю́дїе.
шед̑ше же сн҃ове і҆и҃леви сътвори́ша ꙗ҆́коже заповѣда̀ г҃ь моѷсїю, і҆ а҆а҆ро́нꙋ та́коже сътвори́ша сїи·

Бы́сть же въ полꙋ́нощи, г҃ь и҆збѝ всѧ́къ первене́цъ въ землѝ е҆гѷпетъстѣи, ѿ первен꙽ца̀ фараѻ́нова.
сѣдѧ́щаго на прс̑҇толѣ, до первенца̀ плѣ́ннича.
ꙗ҆́же въ до́лѣ·

и҆ всѧ́къ первене́цъ ско́тїи·

Въста́ же фараѻ́нъ но́щїю, и҆ вс̂ѧ мꙋж́и е҆го, и҆ вс̂и е҆гѷптѧне, и҆ бы́сть во́пль велик̑҇ по все́и землѝ е҆гѷпетъстѣи, и҆ не быс̑҇ до́мъ в не́мъже не б̂ѣ мр҃твца̀·

Възва́ же фараѻ́нъ моѷсїа, і҆ а҆а҆ро́на въ нощи́, и҆ рече и҆́ма.
въста́вше ѿи҆дѣта ѿ людїи мои҆хъ, и҆ в̂ы и҆ сн҃ове і҆и҃левы, и҆дѣте да сѧ помо́лите, г҃ꙋ бг҃ꙋ вашемꙋ, ꙗ҆́коже гл҃асте.
и҆ ѻ҆́вца и҆ говѧ́да ваша пои́м꙽ше, и҆дѣте, блс̑҇ви́те же и҆ мене·

И҆ нꙋжд̑ахꙋ е҆гѷптѧне ѿпꙋсти́ти люди ско́ро ѿ землѧ̀, реко́ша б̂о ꙗ҆ко вс̂и и҆з꙽мрем̑·

Взѧ́ша же лю́дїе мꙋкꙋ̀ пре́жд̑е въскисе́нїѧ тѣ́стꙋ и҆хъ, и҆ въвѧза́вше в ри́зы възложи́ша на ра́мы своѧ̀.
и҆ сътвори́ша ꙗ҆́коже заповѣда̀ и҆мъ моѷсїи·

І҆ и҆спроси́ша ѿ е҆гѷптѧнъ съсꙋ́ды, сре́брѧны, и҆ зла́ты, и҆ ри́зы, г҃ь же да́сть блгд̑ть лю́демъ своим̑ пред̑ е҆гѷптѧны, и҆ да́ша и҆мъ, и҆ плѣни́ша е҆гѷптѧны, въздвиго́ша же сѧ сн҃ове і҆и҃левы, ѿ раме́си въ сокхо́ѳъ до шестѝ со́тъ ты́сꙋщъ, пѣшихъ мꙋжїи ра́звѣ че́лѧди, и҆ прише́лцы же мнози и҆зыидо́ша с ни́ми, и҆ ѻ҆́вца и҆ волы̀ и҆ ско́ти мно́ѕи ѕѣло·

І҆ и҆спеко́ша тѣ́сто мꙋкꙋ̀ е҆же и҆знесо́ша и҆з꙽ е҆гѷпта, ѻ҆прѣ́сноки не въскис꙽ша б̂о·

И҆згна́ша же и҆хъ е҆гѷптѧне, и҆ не мого́ша пребы́ти ни бра́шна сътвори́ша на пꙋть·

ѻ҆бита́нїѧ же сн҃овъ і҆и҃левѣхъ.
е҆же ѻбита́ша въ землѝ е҆гѷпетъстѣи, и҆ въ землѝ ханаа́ни, сїи҆̀, и҆ ѿц҃ы и҆хъ, лт̑ѣ, у҃, и҆ л҃·

И҆ бы́сть по четы́рехъ стѣхъ, и҆ тр̂идесѧти лѣтѣхъ, и҆зыиде вс̂ѧ си́ла гн҃ѧ ѿ землѧ̀ е҆гѷпет̑скїѧ, в нощѝ стражьба̀ е҆сть г҃ꙋ·

И҆звести и҆хъ ѿ землѧ̀ е҆гѷпет꙽скїа, и҆ сїѧ но́щь стражьба̀ г҃ꙋ, ꙗ҆́ко всѣмъ сн҃омъ і҆и҃левымъ, бꙋ́детъ въ ро́дъ и҆хъ·

И҆ рече г҃ь къ моѷсїю, і҆ а҆а҆ро́нꙋ, с̂е зако́нъ па́схи.
всѧ́къ и҆ноплеме́нникъ да не ꙗ҆́сть ѿ неѧ̀, и҆ всѧ́кого раба̀ кꙋ́пленаго ѻ҆брѣжеши, и҆ тогда̀ да ꙗ҆́сть ѿ неѧ̀, при́шлец̑҇ и҆ кꙋпле́ник̑҇ да не ꙗ҆́сть ѿ неѧ̀·

Въ хра́мѣ е҆дїномъ да сънѣстьсѧ·

А҆́ще же ѻ҆ста́нетъ мѧсъ на ѹ҆́трїѧ, и҆ не и҆зно́сите мѧс̑҇ вонъ и҆з хра́ма, и҆ ко́сти не съкрꙋши́те ѿ него.
ве́сь со́нмъ сн҃овъ і҆и҃левых̑ сътвори́тъ сїѧ·

А҆́ще ли кт̂о прїидетъ пришле́цъ к ва́мъ, и҆ сътворит̑ па́схꙋ г҃ꙋ·

ѻ҆брѣ́жеши е҆го всѧ́къ мꙋжескїи полъ, и҆ тогда̀ да прїидет꙽ сътвори́тї ю҆̀, и҆ да бꙋдетъ а҆ки съжи́тель.
всѧк же неѻ҆брѣ́заныи да не ꙗ҆́сть ѿ неѧ̀·

Зако́нъ е҆дїнъ да бꙋдет̑, и҆ съжи́телю и҆ прише́лцꙋ пришед̑шемꙋ въ вас̑҇·

И҆ сътвори́ша сн҃ове і҆и҃левы, ꙗ҆́коже заповѣда г҃ь моѷсїю і҆ аа҆ро́нꙋ, та́ко сътвори́ша.
и҆ быс̑҇ въ иже дн҃ь и҆зведе г҃ь сн҃ы і҆и҃левы ѿ землѧ̀ е҆гѷпет̑скїѧ съ си́лою их̑·

Глв̑҇а, г҃і·

И рече г҃ь къ моѷсїю гл҃ѧ, ѻ҆свѧти́те ми всѧ́къ первенец̑҇ перворожде́ныи ѿверза́ѧ б̂о ѹ҆тробꙋ вс̂ю, въ сн҃охъ і҆и҆л҃евыхъ, ѿ чл҃ка до скота̀, да бꙋдетъ мн̂ѣ·

Рече же моѷсїи къ лю́демъ, по́мните дн҃ь се́й.
вънже и҆схо́дите ѿ землѧ̀ е҆гѷпетскы, ѿ домꙋ рабо́тнаго.
рꙋко́ю крѣпкою.
и҆зведе васъ г҃ь ѿтꙋ́дꙋ.
и҆ не ꙗ҆́ди́те ква́сна, поне́же въ днешнїи дн҃ь и҆схо́дите въ мѣсѧцъ жи́тъ новыхъ·

И҆ бꙋдетъ е҆гда̀ въведет т̂ѧ г҃ь б҃ъ твой, въ зе́млю ханане́искꙋ, и҆ хет̑ѳе́искꙋ, і҆ а҆море́искꙋ, і҆ еве́искꙋ, і҆ евꙋсе́искꙋ, и҆ гергесе́искꙋ, и҆ ферезе́искꙋ, е҆ю́же клѧ́тсѧ къ ѿц҃ем꙽ твоим̑ да́ти тебѣ зе́млю точа́щꙋю мле́ко и҆ ме́дъ·

И҆ сътвори́ши ѹ҆бо слꙋжбꙋ сїю сего мцс̑҇а.
шесть дн҃їи да ꙗ҆́сте ѻ҆прѣсноки, въ сед̑мыи же дн҃ь пра́зник̑҇ г҃ꙋ.
ѻ҆прѣсноки да ꙗ҆́сте се́дмь дн҃їи, да сѧ не ꙗ҆́ви́тъ тебѣ ква́сно.
и҆ да не бꙋдетъ ква́съ въ всѣхъ предѣлех꙽ твои҆хъ·

И҆ повѣси сн҃ꙋ твоемꙋ въ дн҃ь ѻ́нъ гл҃ѧ.
сего ради сътвори́лъ г҃ь б҃ъ мн̂ѣ е҆гда̀ и҆схожда́хъ ѿ е҆гѷпта·

И҆ да бꙋдетъ тебѣ зна́менїе на рꙋцѣ твое́и, и҆ помина́нїе пред̑ ѻ҆чи́ма твои҆ма.
ꙗ҆́ко да бꙋдетъ зако́нъ гн҃ь въ ѹ҆стѣхъ твои҆хъ, рꙋко́ю б̂о крѣпкою и҆звелъ т̂ѧ г҃ь из̑ е҆гѷпта·

И҆ снабди́ши зако́нъ сей.
въ времѧ подо́бно.
ѿ дн҃е до дн҃е, и҆ бꙋдетъ е҆гда̀ въведетъ т̂ѧ г҃ь б҃ъ твои въ зе́млю ханане́искꙋ, ꙗ҆́коже е҆сть клѧ́лсѧ ѿц҃емъ твои҆мъ, и҆ да́сть ю҆̀ тебѣ·

ѿлꙋчи́ши ве́сь ѿверза́ющъ ѹ҆тро́бꙋ, мꙋжескъ полъ г҃ꙋ, ве́сь ѿверза́ю҆щїи ѹ҆тро́бꙋ, ѿ ста́дъ и҆ ѿ ско́тъ твои҆хъ, и҆ ели́коже бꙋдетъ мꙋжеска полꙋ ѻ҆ст҃иши г҃ꙋ·

Ве́сь ѿверза́а ѹ҆тро́бꙋ ѻ҆́слю, и҆змѣни́ши ѻ҆вце́ю.
а҆ще ли не и҆змѣни́ши, т̂о и҆збавит꙽ и҆ всѧ́къ первене́цъ чл҃чь сн҃овъ твои҆х꙽ да и҆зба́виши·

А҆́ще же въпраша́ет꙽ т̂ѧ сн҃ъ твой по семъ гл҃ѧ, что̀ с̂е е҆сть.
т̂о речеши къ немꙋ̀, ꙗ҆ко рꙋко́ю крѣпкою, и҆зведе насъ г҃ь, ѿ землѧ̀ е҆гѷпетски.
ѿ до́мꙋ работ̑наго·

Є҆гда̀ б̂о ѻ҆жесточѣ фараѻ́нъ.
не ѿпꙋсти́ти насъ, и҆збѝ г҃ь вс̂ѧ первенца̀ в землѝ е҆гѷпетстѣи, ѿ первенца̀ чл҃ча до первенца̀ ско́тїѧ·

Сего ради а҆зъ поклада́ю требꙋ г҃ꙋ.
весь ѿверза́аѝ ѹ҆тро́бꙋ мꙋжескъ полъ г҃ꙋ да ве́сь первене́цъ сн҃овъ мои҆хъ и҆зба́влю·

И҆ да бꙋдетъ въ знаменїе на рꙋцѣ твое́и, и҆ не ѻ҆сла́блено пред̑ ѻ҆чи́ма твои҆ма·

Рꙋко́ю бо крѣпкою и҆зведѐ насъ г҃ь и҆зъ е҆гѷпта·

Є҆гда же ѿпꙋстѝ фараѻ́нъ люди, не веде и҆хъ г҃ь пꙋте́мъ, землѧ̀ филистим̑скїѧ, ꙗ҆́ко бли́зь бѧше.

Рече б̂о г҃ь, да не когда̀ раска́ют̑сѧ лю́дїе ви́дѣвше ра́ть и҆ възвратѧ́тсѧ въ е҆гѷпет̑·

И҆ ѻ҆бведѐ б҃ъ лю́ди пꙋтемъ, въ пꙋсты́ню къ чрьмно́мꙋ морю.
пѧ́того же колѣна и҆зыдо́ша сн҃ове і҆и҃левы ѿ землѧ̀ е҆гѷпетъскїѧ·

И҆ взѧ́ть моѷсїи ко́сти і҆ѻ́сифовы съ собо́ю, клѧ́твою б̂о бѣ заклѧл̑҇ і҆ѻ́сифъ сн҃ы і҆и҃левы глѧ.
въ присѣще́нїи, и҆́мже посѣти́тъ васъ г҃ь б҃ъ, да и҆знесете ѿтꙋ́дꙋ ко́сти моѧ съ собо́ю·

Въздвиго́ша же сѧ сн҃ове і҆и҃левы, ѿ сокъхо́ѳа, и҆ ѻ҆полчи́шасѧ въ ѻ҆ѳо́мѣ при пꙋсты́ни.
б҃ъ же въжда́ше и҆хъ въ дн҃ь столпом̑, ѻ҆́блачномъ, показа́ти и҆мъ пꙋть.
но́щїю же столпомъ ѻ҆́гненымъ свѣтити и҆мъ·

И҆ не ѻ҆скꙋдѣ сто́лпъ ѻ҆́блачныи въ дн҃е, и҆ сто́лп꙽ ѻ҆́гненыи но́щїю, пред̑ всѣми людмѝ·

Глв̑҇а, д҃і·

И рече г҃ь къ моѷсїю гл҃ѧ, рцы̀ сн҃омъ і҆и҃левымъ, ѻ҆брати́вшесѧ да ѻ҆полча́тсѧ прѧ́мо придво́рїю, посредѣ магда́лы, и҆ посредѣ мо́рѧ.
прѧмо веельсепфо́нꙋ, пред ни́ми ѻ҆полчи́тесѧ при́ мори·

И҆ речетъ фараѻн̑҇ лю́демъ свои҆мъ ѻ҆ сн҃охъ і҆и҃левыхъ.
блꙋ́дѧтъ с̂и по землѝ, затвори бо и҆хъ пꙋсты́нѧ·

А҆́зъ же ѻ҆жесточю срд̑це фараѻ́ново, и҆ пожене́тъ съза́ди ихъ, и҆ просла́влюсѧ ѻ҆ фараѻ́нѣ, и҆ ѻ҆ всѣхъ во́ехъ е҆го, и҆ разꙋмѣютъ вс̂и е҆гѷптѧне ꙗ҆́ко а҆́зъ е҆смь г҃ь, и҆ сътвори́выи си́це·

Възвѣще́но же быс̑҇ цр҃ю е҆гѷпетъскомꙋ, ꙗ҆́ко бѣжа́ша лю́дїе.
и҆ преврати́сѧ срд̑це фараѻ́ново, и҆ слꙋ́гъ е҆го на́ люди.
и҆ реко́ша, что̀ с̂е сътвори́хомъ, е҆же ѿпꙋсти́ти сн҃ы і҆и҃левы, да не порабо́таютъ намъ·

И҆ въпрѧжѐ фараѻ́нъ колесница своѧ, и҆ вс̂ѧ лю́ди своѧ събра̀ съ собо́ю, и҆ поꙗ҆́ть, х҃, колесни́цъ и҆збра́нныхъ, и҆ вс̂ѧ конѧ̀ е҆гѷпет̑ска, и҆ триста́ты над̑ всѣми·

І҆ ѻжесточѝ г҃ь срд̑це фараѻ́на цр҃ѧ е҆гѷпетска, и҆ погна̀ съза́ди сн҃овъ і҆и҃левыхъ.
сн҃ове же і҆и҃левы, и҆схожда́хꙋ, рꙋко́ю высо́кою·

И҆ погнаша е҆гѵптѧне въ слѣдъ и҆хъ, и҆ ѻ҆брѣто́ша и҆хъ.
ѻ҆полчи́вшисѧ при́ мори.
и҆ конѧ.
и҆ колесни́ца фараѻ́новы, и҆ во́ин꙽ство е҆го конни́цы прѧмо придво́рїю, проти́вꙋ веельсепфо́нꙋ.
и҆ фараѻнъ приближа́шесѧ·

Възрѣвше же сн҃ове і҆и҆л҃евы ѻ҆чи́ма, ви́дѣша, і҆ с̂е е҆гѷптѧне ѻ҆полчи́шасѧ въ слѣдъ и҆хъ, и҆ ѹ҆боꙗ҆́шасѧ ѕѣло·

И҆ възопиша сн҃ве і҆и҃левы къ г҃ꙋ, и҆ рекоша къ моѷсїю, зане лꙋчши ли быти гробомъ нашимъ въ е҆гѷптѣ, и҆зве́лъ е҆си насъ ѹ҆мрѣти въ пꙋсты́ни.
что̀ с̂е сътвори́лъ е҆си намъ, и҆зве́лъ е҆си нас̑҇ и҆зъ е҆гѷпта·

Не се́й ли бѧше гл҃ъ и҆же реко́хомъ въ е҆гѷптѣ.
к тебѣ гл҃юще.
ѻ҆ста́ви насъ рабо́тати е҆гѷптѧномъ, лꙋчше б̂о бѧ́ше намъ рабо́тати е҆гѷптѧномъ, не́жели ѹ҆́мрѣти въ пꙋсты́ни се́й·

Рече же моѷсїи къ лю́дем̑ дерза́ите сто́ите, и҆ зрѣте сп҃снїе е҆же ѿ г҃а, е҆же сътвори́тъ нам̑ днесь ꙗ҆́коже ѹ҆зрѣсте е҆гѷптѧны днесь, не приложи́те ктомꙋ ви́дѣти и҆хъ въ вѣ́чное лѣто, г҃ь б̂о побо́рит꙽ по нас̑҇ вы́ же ѹ҆мо́лкнѣте·

И҆ рече г҃ь къ моѷсїю чт̂о въпие́ши къ мнѣ, рцы̀ сн҃ом꙽ і҆и҃левымъ да съберꙋтсѧ.
ты же възмѝ же́злъ твой, и҆ прострѝ рꙋкꙋ твою на́ море, и҆ раздѣли е҆̀.
и҆ да въни́дꙋтъ сн҃ове і҆и҃левы посредѣ мо́рѧ по́ сꙋхꙋ·

И҆ с̂е а́зъ ѻ҆жещꙋ̀ срд̑це фараѻ́ново и҆ всѣхъ е҆гѷптѧнъ, и҆ въни́дꙋтъ въ слѣдъ и҆хъ, и҆ просла́влюсѧ ѻ҆ фараѻ́нѣ, и҆ ѻ҆ всѣхъ во́ехъ е҆го, и҆ ѻ҆ колесни́цахъ, и҆ ѻ҆ ко́нѣхъ е҆го.
да ѹ҆вѣдѧтъ вс̂и е҆гѷптѧне, ꙗ҆ко а҆́зъ е҆смь г҃ь прославлѧ́ющїисѧ ѻ҆ фараѻ́нѣ и҆ ѻ҆ колесни́цахъ и҆ ѻ҆ ко́нех꙽ е҆го·

И въздви́жесѧ а҆гг҃лъ бж҃їи ходѧ́и прд̑е по́лкомъ сн҃овъ і҆и҃левыхъ, и҆ по́иде съзади и҆хъ, възнесесѧ и҆ сто́лпъ ѻ҆́блачныи ѿ лица̀ и҆хъ и҆ ста̀ съзадѝ и҆хъ, и҆ въни́де посредѣ по́лка е҆гѵпет̑ска, и҆ посредѣ по́лка сн҃овъ і҆и҃левых̑·

И҆ бысть тма̀ и҆ мгла̀, и҆ прїиде нощь и҆ не съвокꙋпи́шасѧ дрꙋгъ дрꙋгꙋ вс̂ю но́щь·

Простре́ же моѷсїи рꙋкꙋ на́ море, и҆ възгна̀ г҃ь мо́ре вѣтромъ ю҆́жнымъ нꙋж́нымъ вс̂ю но́щъ, и҆ сътворѝ мо́ре сꙋшꙋ, и҆ рас꙽стꙋпи́сѧ вода̀, и҆ внидо́ша сн҃ове і҆и҃левы посредѣ мо́рѧ по́ сꙋхꙋ.
и҆ вода̀ и҆мъ стѣна бысть ѻ҆деснꙋю, и҆ стѣна̀ ѻ҆шꙋю́ю·

Гна́ша же е҆гѷптѧне и҆ внидо́ша в слд̑ѣ и҆хъ, и҆ всѧ́къ ко́нь фараѻ́новъ, и҆ колесни́ца, и҆ всад̑ники посредѣ морѧ.

Бысть же въ стражꙋ ѹ҆́тренюю̀, и҆ възрѣ г҃ь на по́лкъ е҆гѷпетскїи, въ столпѣ ѻ҆́гненомъ и҆ ѻ́блачномъ, и҆ смѧте по́лкъ и҆хъ, и҆ свѧза̀ кола колесни́цам̑ и҆хъ.
и҆ водѧ́ше ѧ҆̀ съ нꙋждею и҆ реко́ша е҆гѷптѧне.
бѣжи́мъ ѿ лица і҆и҃лева, г҃ь бо пособъствꙋ́етъ по ни́хъ.
на е҆гѷптѧны·

И҆ рече г҃ь къ моѷсїю, прострѝ рꙋкꙋ твою на́ море, и҆ растр́ъгни е҆̀, да съвокꙋпи́тсѧ вода̀, и҆ да покры́етъ е҆гѷптѧны.
на колесни́ца же и҆ вса́дники·

Простре́ же моѷсїи рꙋкꙋ на́ море, и҆ ѹ҆стро́исѧ вода̀ ко днꙋ̀ на мѣ́сто своѐ.
предо дн҃емъ·

Є҆гѷптѧне же бѣжа́ша под̑ водо́ю, и҆ сътрѧсѐ г҃ь е҆гѷптѧны посредѣ мо́рѧ, и҆ ѻ҆брати́вшисѧ вода̀ покры̀ колесни́ца и҆ вса́дникы, и҆ всю̀ си́лꙋ фараѻ́новꙋ, и҆дꙋщꙋю въ слѣдъ и҆хъ въ мо́ре, и҆ не ѻ҆ста̀ ѿ них̑ ни е҆ді́нъ·

Сн҃ове же і҆и҃левы прои҆до́ша по́ сꙋхꙋ посредѣ мо́рѧ, вода́ же им̑ стѣна̀ бысть ѻ҆деснꙋ́ю, и҆ стѣна̀ ѻшꙋ́юю, і҆ и҆зба́ви г҃ь і҆и҃лѧ въ дн҃ь ѻн̑҇ и҆з рꙋкѝ е҆гѷпетски·

И҆ видѣша сн҃ове і҆и҃левы е҆гѷптѧны и҆зме́рша при кра́и мо́рѧ, ви́дѣвше же рꙋ́кꙋ вели́кꙋю, ꙗ҆же сътворѝ г҃ь е҆гѷптѧномъ и҆ ѹ҆боꙗ҆́шесѧ лю́дїе г҃а, и҆ вѣ́роваша б҃ꙋ, и҆ моѷсїю ѹ҆го́дникꙋ е҆го·

И҆ тогда̀ възопѝ моѷсїи, и҆ сн҃ове і҆и҃левы пѣ́снь сїю гв҃и, и҆ реко́ша гл҃юще·

Глв̑҇а, е҃і·

Пои́мъ гв҃и сла́вно б̂о и҆ просла́висѧ, конѧ̀ и҆ вса́дники въве́рже въ мо́ре·

Помо́щник̑҇ и҆ покрови́тель бысть мн̂ѣ въ сп҃се́нїе·

Се̂ б҃ъ и҆ просла́влю и҆̀, б҃ъ ѿц҃а мое҆го и҆ възнесꙋ и҆̀, г҃ь съкрꙋша́ѧ бра́ни, г҃ь и́мѧ е҆мꙋ·

Колесни́ца фараѻ́новы, и҆ си́лꙋ е҆го въве́рже въ мо́ре, и҆збра́нъныѧ вса́дники триста́ты, потопѝ въ чр́ьмнемъ мо́ри, пꙋчи́ною покры́и и҆хъ, погрѧзо́ша въ глꙋбинѣ ꙗ҆́ко ка́мень.
десни́ца твоѧ г҃и просла́висѧ въ крѣ́пости.
десна́ѧ ти рꙋка г҃и съкрꙋши врагѝ, и҆ мно́жеством̑ сла́вы твоеѧ съте́рлъ е҆си сопоста́ты, посла́ гнѣвъ свои, поꙗ҆́сть и҆хъ ꙗ҆ко сте́блїе, и҆ дх҃омъ ꙗ҆́рости твоеѧ растꙋпи́сѧ вода̀.
ѻ҆гꙋстѣша ꙗ҆́ко стѣна̀ во́ды, ѻ҆гꙋстѣша во́лны̀ посредѣ мо́рѧ·

Рече враг̑҇ гна́въ пости́гнꙋ раздѣлю̀ кори́сть, и҆спо́лню дш҃ꙋ мою, ѹ҆тнꙋ̀ мече́мъ мои҆мъ, поѻ҆блада́етъ рꙋка̀ моѧ·

Посла́лъ е҆си дх҃ъ твой, покры̀ и҆хъ мо́ре.
погрѧзо́ша ꙗ҆́ко ѻ́лово въ водѣ зе́лнѣи·

Кт̂о подо́бенъ тебѣ въ бо́ѕѣхъ г҃и, кт̂о подо́бенъ тебѣ, просла́вленъ въ ст҃ыхъ ди́венъ, въ сла́вѣ творѧ́и чюдеса·

Прострт̑ѣ десни́цꙋ свою̀, пожрѣт꙽ их̑ землѧ̀·

Наста́вилъ е҆си пра́вдою твое́ю лю́ди твоѧ̀ сїѧ, ꙗ҆́же и҆зба́ви.
ѹ҆тѣшил̑҇ е҆си крѣпостїю свое́ю, въ ѻби́тель ст҃ꙋю твою̀·

Слы́шаша же ꙗ҆зы́цы и҆ прогнѣ́вашасѧ, болѣзни прїѧ́ша живꙋщаѧ въ филисти́мѣ·

Тогда̀ потща́шасѧ влд̑ки е҆до́мскїѧ, и҆ кнѧ́ѕи моа҆ви́т꙽стїи҆̀, прїѧ́тъ и҆хъ трепетъ·

Растаѧ́шасѧ вс̂и живꙋщїи въ ханаа́нѣ, нападѐ на нѧ страхъ и҆ тре́петъ·

Вели́чїемъ мы́шца твоеѧ да ѻ҆ка́менѧтсѧ·

дондеже проидо́ша лю́дїе твои г҃и, дондеже проидо́ша лю́дїе твои сїи, и҆хъже стѧжа̀·

Въве́дъ насади ѧ҆̀ въ го́рꙋ достоѧ́нїѧ твое҆го.
въ гото́вое жи́лище твое, е҆же съдѣла г҃и, ст҃ыню г҃и, е҆же ѹ҆гото́вастѣ рꙋцѣ твои Гь҃ цр҃ьствꙋѧ вѣки, и҆ на вѣкъ, е҆ще ꙗ҆́ко въни́де ко́нь фараѻ́новъ, съ колесни́цами, и҆ вса́дники въ море, и҆ наведѐ на ни́хъ г҃ь водꙋ мор꙽скꙋ́ю·

Сн҃ове же і҆и҃левы проидо́ша по́ сꙋхꙋ посредѣ морѧ·

Поꙗ҆тъ моѷсїи сн҃ы і҆и҃левы ѿ мо́рѧ чрьм́наго, и҆ въведѐ их̑ въ пꙋсты́ню сѷръ.
і҆ и҆дѧ́хꙋ три дн҃и въ пꙋсты́ни, и҆ не ѻ҆брѣта́хꙋ воды̀ пи́ти·

Прїидо́ша же въ ме́ррꙋ, и҆ не можа́хꙋ пи́ти воды̀ ѿ ме́рры, горка̀ б̂о бѣ.
сего ра́ди нарече́сѧ и҆́мѧ мѣстꙋ томꙋ̀ го́ресть, и҆ ропта́хꙋ лю́дїе на моѷсїѧ гл҃юще, чт̂о пїемъ·

Възопи́ же моѷсїи къ г҃ꙋ, и҆ показа̀ е҆мꙋ г҃ь дре́во, и҆ вложѝ и҆̀ въ во́дꙋ и ѹ҆слади́сѧ·

Тꙋ б̂о положѝ е҆мꙋ ѻ҆правда́нїѧ и҆ сꙋдбы̀, и҆ т̂ꙋ е҆го и҆скꙋсѝ, и҆ рече.
а҆ще слꙋхом̑ ѹ҆слы́шиши гласъ б҃а твое҆го, и҆ ѹ҆го́днаѧ пред нимъ сътвори́ши, и҆ внꙋши́ши заповѣдем꙽ е҆го, и҆ съхрани́ши вс̂ѧ ѻ҆правда́нїѧ е҆го.
всѧ́кꙋ болѣ́знь е҆ꙗ҆́же наведо́хъ е҆гѷптѧномъ, не наведꙋ̀ на́ тѧ.
а҆зъ б̂о е҆смь г҃ь и҆сцѣлѧай т̂ѧ·

И҆ прїдоша въ ели́мъ, и҆ б̂ѣ тꙋ, в҃і, и҆сто́чника во́дъ, и҆ ѻ҃, сте́блїи фи́ников̑҇, и҆ ѻ҆полчи́шасѧ т̂ꙋ при водах̑·

Глв̑҇а, ѕ҃і·

Взѧ́ша же сѧ ѿ е҆ли́ма, и пріиде ве́сь сонмъ сн҃овъ і҆и҃левъ въ пꙋсты́ню си́нъ.
ꙗ҆́же е҆сть междꙋ̀ е҆ли́мъ, и҆ междꙋ̀ сина́ю·

Въ пѧ́тыи же надесѧтыи дн҃ь, втора́го мцс̑҇а, и҆з꙽шд̑ешимъ ѿ землѧ̀ е҆гѷпетъски.
възропта́ша ве́сь събо́ръ сн҃овъ і҆и҃левыхъ, на моѷсїѧ, и҆ а҆а҆ро́на·

И҆ реко́ша к нимъ сн҃ове і҆и҃левы, ѹ҆нѐ б̂ѣ да бы́хомъ, и҆з꙽ме́рли ѹ҆ꙗ҆зве́ни ѿ г҃а в землѝ е҆гѷпетъстѣи, е҆гда̀ сѣда́хомъ тамъ, над̑ котлы̀ мѧсны́ми, и ѧ҆да́хомъ хлѣбы до сы́тости, не́жели ꙗко и҆зведо́сте н̂ы въ пꙋсты́ню сїю, ѹ҆мори́ти со́нмъ се́и гла́дом꙽·

И҆ рече г҃ь къ моѷсїю, с̂е а́зъ ѻ҆дождꙋ вамъ хлѣ́бъ съ нб҃се, і҆ и҆зы́идꙋтъ лю́дїе, и҆ да съберꙋтъ на всѧ́къ дн҃ь ꙗ҆́ко да и҆скꙋшꙋ и҆хъ, а҆́ще и́дꙋтъ въ законѣ мое҆мъ или н̂и·

И꙼ бꙋ́детъ въ дн҃ь шесты́и, да ѹ҆гото́вѧтъ, и҆же и҆знесꙋт꙽ и҆ да бꙋ́детъ сꙋгꙋ́бо, ꙗ҆́же съберꙋтъ ѿ дн҃еи всего дн҃е·

Рече же моѵсїи и҆ а҆а҆ро́нъ къ всемꙋ наро́дꙋ сн҃овъ і҆и҃левыхъ.
въ ве́черъ се́и ѹ҆вѣсте, ꙗ҆́ко г҃ь и҆зведы́и в̂ы ѿ землѧ̀ е҆гѷпетъски, заѹ҆́тра ѹ҆́зрите сла́вꙋ гн҃ю, поне́же г҃ь ѹ҆слы́ша ропта́нїе ваше на́ бг҃а, м̂ы ѹ҆бо что е҆смы̀, да ро́пщете на́ ны·

И҆ рече моѷсїи, е҆гд̑а̀ да́сть г҃ь вамъ ве́черъ мѧс̑҇ ꙗ҆сти, и҆ хлѣ́бы заѹ҆́тра до сы́тости.
поне́же г҃ь слы́ша ропта́нїе ва́ше, и҆же ро́пщете на́ ны, а҆ мы̀ чт̂о е҆смы̀, не на́ ны ѹ҆бо ропта́нїе ваше, н̂о на́ бг҃а·

И҆ рече моѷсїи къ а҆а҆ро́нꙋ, гл҃и къ всемꙋ̀ со́нмꙋ сн҃овъ і҆и҃левъ, пріидѣте пред̑ б҃а, ѹ҆слы́ша б̂о ропта́нїе ваше·

Єгда́ же гл҃аше а҆а҆ро́нъ, всемꙋ̀ со́нмꙋ сн҃овъ і҆и҃левъ, и҆ ѻ҆брати́шасѧ въ пꙋсты́ню, и҆ сла́ва гн҃ѧ ꙗ҆́ви́сѧ на ѻ҆́блацѣхъ·

И҆ рече г҃ь къ моѷсїю гл҃ѧ, слышахъ ропта́нїе сн҃овъ і҆и҃левых̑, рцы̀ же к ни́мъ гл҃ѧ.
на́ вечеръ да ꙗ҆́сте мѧ́са, а҆ заѹ҆́тра насыти́тесѧ хлѣба.
и҆ да ѹ҆вѣ́сте, ꙗ҆́ко а́зъ е҆смь г҃ь б҃ъ вашъ·

Бы́сть же ве́черъ, прїидо́ша красте́ли, и҆ покры́ша ве́сь по́лкъ.
заѹ҆́тра же ѻ҆сѧза́ющи росѣ ѻ҆́коло по́лка, и с̂е на лицы̀ пꙋсты́ни, ꙗ҆́ко сѣмѧ бѣ́ло а҆ки ледъ на землѝ·

Ѹ҆зрѣ́вше же сн҃ове і҆и҃левы, рече дрг̑҇ꙋ къ дрꙋгꙋ, что̀ с̂е е҆сть.
не вѣ́дѧхꙋ бо что̀ с̂е е҆сть·

Рече же моѷсїи к ним̑, се хлѣ́бъ, и҆же да́сть г҃ь ꙗ҆́сти вам̑, и҆ с̂е сло́во е҆же ѻбѣща̀ г҃ь, съберѣте ѿ него̀ ко́ждо вас̑҇, въ сво́и гоморъ, на главꙋ̀ по числꙋ̀ дш҃ъ ва́шихъ, ко́ждо васъ.
съ дома́шними свои́ми събира́ите·

И҆ сътвори́ша тако сн҃ове і҆и҃левы, и҆ събра́ша ѻ҆́въ мно́го ѻ҆́в꙽ же ма́ло, в мѣ́рꙋ ко́ждо гомо́ръ свои, и҆ не и҆збы́сть ѹ҆ него́же мно́го, и҆ недоста̀ ѹ҆ него́же ма́ло, ко́ждо е҆ли́коже бѣ е҆мꙋ събра̀·

И҆ рече моѷсїи к ним̑, никто́же да ѻ҆ставитъ на ѹ҆́трїѧ ѿ него, и҆ не послꙋш́аша моѷсїѧ, н̂о ѻ҆ста́виша дрꙋзїи ѿ него̀ на ѹ҆́трїа, и҆ съгниѧ҆сѧ чр́ьвми и҆ въсмердѣ́сѧ.
ѻ҆скорби́ же сѧ на́ нѧ моѷсїи, и҆ забра̀ ра́но ра́но ко́ждо доста́точное е҆мꙋ, и҆дѣже ѻ҆грѣѧ́ше слн҃це, раста́ѧше·

Бы́сть же въ дн҃ь шесты́и, и҆ събра́ша доста́точное сꙋгꙋ́бо дв̂а гомора въ е҆дино, комꙋж́до, прїидо́ша же вс̂и кн҃ѕи со́нъма, и҆ повѣ́даша моѷсїю·

Рече же моѷсїи к нимъ, с̂е е҆сть сло́во е҆же гл҃а г҃ь, сꙋбо́та поко́и ст҃ъ г҃ꙋ·

Ѹ҆тро е҆ли́ко а҆ще и҆спече́те, пецѣте, и҆ е҆ли́ко а҆ще сва́рите, свари́те, все же и҆збы́точное о҆ста́вите въ скро́вѣ, на ѹ҆́трїѧ·

И҆ ѻ҆́ста́виша до ѹ҆́трїѧ, ꙗ҆́коже заповѣ́да и҆м꙽ моѷсїи.
и҆ не въсмердѣ́сѧ, и҆ че́рвь не бы́сть въ не́мъ·

Рече же и҆мъ моѷсїи ꙗ҆́ди́те днс̑҇ь.
е҆сть бо сꙋбо́та поко́ище г҃ꙋ днс̑҇ь.
не ѻ҆брѧ́щете на́ поли.
ше́сть бо дн҃їи да събира́ете, а҆ въ седмы́и дн҃ь сꙋбо́та.
не ѻ҆брѧ́щете в немъ·

Бы́сть же въ седмы́и дн҃ь, и҆до́ша нѣцыи събира́ти, и҆ не ѻ҆брѣто́ша·

Рече же г҃ь моѷсїѻ҆ви, доко́лѣ не хо́щете послꙋшати за́повѣдеи мои҆хъ, и҆ зако́на мое҆го блюстѝ.
г҃ь бо далъ вамъ сїи дн҃ь сꙋбо́тꙋ, сего̀ ра́ди далъ вамъ въ дн҃ь шесты́и хлѣба на два дн҃и, да сѣди́те ко́ждо васъ въ домꙋ̀ свое҆мъ ѻ҆ себѣ, и҆ да никто́же вас̑҇ и҆схо́дитъ ко́жд̑о ѿ мѣ́ста свое҆го, въ дн҃ь седмы́и·

И҆ сꙋботьствꙋѧ лю́дїе въ дн҃ь сед̑мы́и.
и҆ прозва́ша сн҃ове і҆и҃леви и҆́мѧ е҆го ма́нна.
ѻ҆на́ же бѧше ꙗ҆ко сѣмѧ кориꙗ҆́нъдрово.
и҆ ꙗ҆́ко мꙋка̀ бѣ́ло, а҆ въкꙋше́нїе е҆ѧ̀ а҆ки мꙋка̀ с ме́домъ·

Рече же и҆мъ моѷсїи, с̂е сло́во е҆же вѣща̀ г҃ь, напо́лните гомо́ръ ѿ ма́нны въ кро́вь роженїи вашихъ.
да вѣ́дѧтъ хлѣ́бъ е҆го́же е҆сте ꙗ҆́ли въ пꙋсты́ни, е҆гда̀ и҆зведѐ в̂ы г҃ь ѿ землѧ̀ е҆гѷпетъски·

И҆ рече моѷсїи къ а҆а҆ро́нꙋ, възми съсꙋ́дъ златы́и е҆ді́нъ, и҆ вложѝ в него̀ гомо́ръ по́лныи ѿ ма́нны, и҆ положи́ши то́е прд̑е гм҃ъ, въ снабдѣ́нїе роже́нїю ва́шемꙋ.
ꙗ҆́коже заповѣ́да г҃ь моѵ́сїю.
и҆ положи ю҆̀ а҆а҆ро́нъ, прд̑е свѣдѣнїемъ, въ снабдѣ́нїе·

Сн҃ве же і҆и҃левы ꙗ҆́до́ша маннꙋ, лт̑ѣ четы́ридесѧтъ до́нъдеже прїидо́ша въ зе́млю ѻ҆бита́ющꙋю, и҆ ꙗ҆до́ша маннꙋ до́н꙽деже прїидо́ша къ кра́ю фини́чномꙋ, гомо́ръ же десѧ́таѧ часть трех̑ мѣръ бѧше·

Глв̑҇а, з҃і·

И въста́вше весь со́нмъ сн҃въ і҆и҃лвъ, ѿ пꙋсты́нѧ си́нъ.
по полко́мъ и҆хъ, словесе́м꙽ гн҃им̑, и҆ ста́ша в рафи́дѣ, и҆ не бѧ́ше воды̀ пити людем̑, и хꙋлѧ́хꙋ лю́дїе моѷсїа гл҃юще, да́жд̑ь намъ во́дꙋ да пїемъ·

Рече же моѷсїи, чт̂о хꙋ́лите мѧ.
и҆ чт̂о и҆скꙋша́ете г҃а.
жажда́ша же т̂ꙋ лю́дїе воды̀, и҆ ропта́хꙋ на моѷсїѧ гл҃юще.
въскꙋ́ю нас̑҇ и҆зведѐ и҆з꙽ е҆гѷпта.
ѹмори́ти насъ, и҆ ча́да наша, и҆ скоты наша жа́ждею·

Возъпи́ же моѷсїи къ г҃ꙋ гл҃ѧ.
чт̂о сътворю̀ лю́демъ симъ, и҆ е҆щѐ мало и҆ побїю́тъ м̂ѧ ка́менїемъ·

И҆ рече г҃ь къ моѷсїю, поидѝ пред̑ людми, и҆ поимѝ съ собо́ю ѿ ста́рецъ люд̑скихъ, и҆ же́злъ имже пребѝ мо́ре възмѝ в рꙋ́кꙋ твою, и҆ поидѝ.
азъ же ста́нꙋ т̂ꙋ пре́жд̑е прише́ствїѧ твое҆го ѹ҆ ка́мени въ хори́вѣ.
и ѹ҆да́риши въ ка́мень, і҆ и҆зы́детъ ѿ него вода̀, да пїю́тъ людїе·

Сътвори́ же тако моѷсїи пред̑ сн҃ы і҆и҃левыми.
и҆ прозва̀ и҆́мѧ мѣ́стꙋ томꙋ и҆скꙋ́съ, и҆ похꙋле́нїе хꙋлы ради сн҃овъ і҆и҃левъ.
і҆ и҆скꙋше́нїѧ ради г҃а гл҃щих̑, а҆́ще е҆сть в насъ г҃ь, и҆ли н̂и·

Прїиде же а҆малик̑҇, и҆ въе҆ва̀ на і҆и҃лѧ въ рафиди́нѣ, рече же моѷсїи къ і҆с҃ꙋ, и҆зберѝ себѣ мꙋжа си́лны.
и҆ шед̑ ѻ҆полчи́сѧ къ а҆мали́кꙋ, ѹ҆́трѣ, с̂е же а҆́зъ ста́нꙋ, на верхꙋ̀ горы̀, и҆ же́злъ же бж҃їи в рꙋцѣ моеи·

И҆ сътворѝ і҆сꙋсъ, ꙗ҆́коже рече е҆мꙋ моѷсїи, и҆ ѻ҆полчи́сѧ \къ а҆мали́кꙋ, моѷсїи же, і҆ а҆а҆ро́нъ, і҆ ѻ́ръ, възыидо́ша въ ве́рхъ горы̀·

И҆ бы́сть е҆гда̀ въздвиза́ше моѷсїи рꙋцѣ, ѻ҆долѣва́ше і҆и҃ль, е҆гда́ же пригина́ше рꙋцѣ, ѻ҆долѣва́ше а҆малик̑҇·

рꙋцѣ же моѷсїѻ҆вѣ тѧ́ж꙽цѣ бѣша, и҆ възе́мше ка́мень под̑ложи́ша е҆мꙋ, и҆ сѣдѧ́ше на не́мъ.
а҆а҆ро́нъ же і҆ ѻ́р꙽, под̑держа́ста рꙋцѣ е҆мꙋ, е҆ді́нъ ѿсюдꙋ а҆ дрꙋгїи ѿтꙋ́дꙋ, и҆ бы́ша моѷсїѻ́вѣ рꙋцѣ ѹ҆крѣпле́ни, до за́хода слн҃цꙋ, и́ ѻ҆долѣ і҆сꙋсъ а҆мали́кꙋ, и҆ вс̂ѧ лю́ди посѣчѐ мече́мъ·

И҆ рече г҃ь къ моѷсїю въпишѝ с̂е на памѧть въ кни́ги, и҆ въда́и въ ѹ҆́ши и҆сꙋсꙋ ꙗ҆ко па́гꙋбою погꙋблю̀ па́мѧть а҆мали́ковꙋ ѿ землѧ̀·

И҆ създа̀ моѷсїи ѻ҆́лтаръ г҃ꙋ, и҆ прозва̀ и҆́мѧ е҆мꙋ г҃ь мои, прибѣ́жище моѐ.
ꙗ҆́ко рꙋко́ю крѣ́пкою бо́ретъ г҃ь на а҆мали́ка, ѿ рода въ ро́дъ·

Глв̑҇а, и҃і·

Ѹслы́ша же і҆ѻ҆ѳоръ і҆е҆рѣ́и мадиѧ́мъскїи.
те́сть моѷсі꙼ѻ́въ, вс̂е е҆ли́ко сътворѝ г҃ь і҆и҃лю свои҆мъ лю́демъ.
и҆ ꙗ҆́ко и҆зведѐ г҃ь і҆и҃лѧ и҆з꙽ е҆гѷпта·

И҆ поѧ̀ і҆ѻ҆ѳоръ, те́сть моѷсїѻ҆въ, сепфи́рꙋ женꙋ̀ моѷсїѻ҆вꙋ, съ и҆мѣ́нїемъ е҆ѧ̀, и҆ съ двѣма сн҃ома е҆го.
имѧ е҆ді́номꙋ, герса́мъ, гл҃ѧ пришле́ць е҆смь въ землѝ чюжде́и.
и҆́мѧ второ́мꙋ е҆лие҆зе́ръ, гл҃ѧ, б҃ъ ѿц҃а мое҆го помо́щникъ мои, и҆зба́ви мѧ и҆з рꙋкѝ фараѻ́нѧ·

И҆ прїиде і҆ѻ҆ѳоръ.
те́сть моѷсїѻ҆въ, и҆ сн҃ове и҆ жена̀ къ моѷсїю въ пꙋсты́ню, и҆деже стоѧ́хꙋ въ пꙋсты́ни при горѣ бж҃їи·

Възвѣсти́ша же моѷсїю гл҃юще, се́й іѻ҆ѳоръ те́сть твои и́детъ к тебѣ, и҆ жена̀ твоѧ̀, и҆ ѻ́ба сн҃а твоѧ̀ с ним̑·

И҆зы́де же моѷсїи проти́вꙋ те́стю свое҆мꙋ, и҆ поклони́сѧ е҆мꙋ, и҆ цѣлова и҆̀, и҆ пыта́лъ дрꙋгъ дрꙋ́га здра́вїа, и҆ въведѐ и҆̀ моѷсїи въ кꙋщ́ꙋ, і҆ и҆сповѣда моѷсїи те́стю свое҆мꙋ, вс̂е е҆ли́ко сътворѝ г҃ь фараѻ́нꙋ, и҆ е҆гѷптѧном̑ і҆и҃лѧ ради.
и҆ ве́сь трꙋдъ и҆мъже быс̑҇ на пꙋтѝ.
и҆ ꙗ҆́ко и҆зба́ви и҆хъ г҃ь ѿ рꙋкѝ фараѻ́нѧ, и҆ ѿ рꙋкѝ е҆гѷпетъски·

Чюди́ же сѧ і҆ѻ҆ѳоръ все́и блгд̑ти, ꙗ҆́же сътворѝ г҃ь съ ними, ꙗ҆ко и҆зба́ви г҃ь и҆хъ ѿ рꙋкѝ е҆гѷпетъски и҆ ѿ рꙋкѝ фараѻ́нѧ·

И҆ рече и҆ѻ҆ѳоръ блгс̑҇ве́нъ г҃ь и҆же и҆зба́ви лю́ди и҆з рꙋкѝ е҆гѷпет̑скїа, і҆ и҆з рꙋкѝ фараѻ́нѧ·

Нн҃ѣ ѹ҆вѣдх̑ѣ ꙗ҆́ко вели́къ е҆сть г҃ь, паче всх̑ѣ боговъ, сего ра́ди ꙗ҆́ко налего́ша на нихъ въздал̑҇ и҆мъ г҃ь.
и҆ положѝ і҆ѻ҆ѳо́ръ те́сть моѷсїѻ҆въ, вс̂есъжеженїа и҆ же́ртвы·

Прїиде же а҆а҆ро́нъ, и҆ вс̂и ста́рцы̀ і҆и҃левы ꙗ҆сти хлѣба съ те́стемъ моѷсїѻ҆вымъ, пред̑ бг҃омъ·

И҆ бы́сть по сем̑ на ѹ҆́трїе.
сѣ́де моѷсїи, сꙋди́ти люди.
стоѧ́хꙋ же пред̑ моѷсїѻ҆мъ вс̂и лю́дїе, ѿ ѹ҆тра и҆ до ве́чера.
ви́дѣв꙽ же те́сть моѷсїѻ҆въ і҆ѻ҆ѳоръ, вс̂е е҆ли́ко творѧ́ше лю́демъ·

И҆ рече чт̂о сѐ т̂ы твори́ши лю́демъ, почто̀ т̂ы е҆ді́нъ сѣди́ши, а҆ вс̂и лю́дїе пред̑стоѧт̑ тебѣ, ѿ ѹ҆́тра до ве́чера·

Рече же моѷсїи те́стю, поне́же прихо́дѧтъ лю́дїе къ мнѣ, въпраша́юще сꙋда̀ ѿ бг҃а, е҆гда́ же бꙋ́детъ и҆мъ прѧ̀, и҆ прїидꙋтъ къ мнѣ, разъсꙋж́дꙋ комꙋж́до.
и҆ накажꙋ̀ ѧ҆̀, по повелѣ́нїю бж҃їю, и҆ зако́нꙋ е҆го·

Рече же те́сть моѷсїѻ҆въ къ немꙋ, непра́ведно твори́ши сло́во с̂е, сѐ б̂о раз꙽сы́панїемъ раз꙽сы́плеши т̂ы и҆ вс̂и лю́дїе сїи, и҆же с тобо́ю.
тѧ́жко тебѣ сло́во с̂е, и҆ не възмо́жеши твори́ти т̂ы е҆ді́нъ·

Нн҃ѣ же послꙋш́аи менѐ, да съвѣтꙋю тебѣ, бꙋ́детъ бг҃ъ с тобо́ю.
бꙋ́ди ты лю́демъ ꙗ҆же къ бг҃ꙋ.
и҆ донесе́ши словеса̀ и҆хъ къ бг҃ꙋ·

И҆ възвѣща́й и҆мъ повелѣ́нїа бж҃їа, и҆ зако́нъ е҆го.
и҆ повѣ́си и҆мъ пꙋтѝ е҆го, в нѧ́же по́идꙋтъ, и҆ дѣлеса̀ ꙗ҆́же сътворѧ́тъ, а҆ т̂ы и҆зберѝ себѣ ѿ всѣ́хъ людїи мꙋжа си́лны, бг҃а боѧ́щихъсѧ.
мꙋж́а пра́ведны.
и҆ ненави́дѧщаѧ велича́нїѧ·

Поста́ви же над ни́ми ты́сѧщники, и҆ сотники, и҆ пѧтьдесѧ́тъники, и҆ десѧ́тники, и҆ кни́гочїѧ, да сꙋ́дѧтъ ѧ҆̀ по вс̂ѧ часы̀, а҆ рѣчь ѹ҆си́лнаѧ, донесꙋтъ до тебѐ малы́ѧ же сꙋды̀ да сꙋ́дѧтъ ѻ҆нѝ, и҆ ѹ҆ма́лѧт̑ ти трꙋда̀.
и҆ под̑помо́гꙋтъ т̂ѧ·

А҆́ще сътвори́ши сло́во с̂е, ѹ҆крѣпит̑ т̂ѧ бг҃ъ.
и҆ възмо́жеши слꙋжи́ти, и҆ вс̂и лю́дїе прїидꙋтъ въ своѐ мѣ́сто ко́ждо с ми́ромъ·

Послꙋ́ша же моѷсїи гласа те́стѧ свое҆го, и҆ сътворѝ вс̂е е҆ли́ко реч̑҇ е҆мꙋ·

І҆ и҆збра̀ моѷсїи мꙋж́а си́лны ѿ всего̀ іи҃лѧ.
и҆ сътворѝ ѧ҆̀ над̑ ни́ми ты́сѧщники и҆ со́тники, и҆ пѧт̑десѧ́тники и҆ десѧ́тники, и҆ кни́гочїѧ, и҆ сꙋжд̑ахꙋ лю́демъ по всѧ̀ часы̀.
всю́ же рѣчь ѹ҆си́лнꙋю приноси́ша къ моѷсїю, а҆ ма́лꙋю же сами сꙋжд̑аше· ѿпꙋсти́ же моѷсїи те́стѧ свое҆го, и҆ ѿи́де въ свою̀ зе́млю·

Глв̑҇а, ѳ҃і·

Мцс̑҇а же тре́тїаго и҆з꙽шествїа сн҃овъ і҆и҃левъ ѿ землѧ̀ е҆гѷпетъскїѧ, в сїи дн҃ь, прїидо́ша въ пꙋсты́ню сина́искꙋю, и҆ въздвиго́шасѧ ѿ рафиди́на, и҆ прїидо́ша въ пꙋсты́ню сина́икꙋю.
и҆ ста̀ т̂ꙋ і҆и҃ль прѧ́мо гомо́рѣ.

Моѷсїи же възы́иде на горꙋ̀ бж҃їю, и҆ възва̀ и҆̀ б҃ъ ѿ горы̀ гл҃ѧ.
си́це гл҃еши до́мꙋ і҆а́ковлю, и҆ повѣж́дь сн҃омъ і҆и҃левымъ.
са́ми ви́дите е҆ли́ко сътвори́хъ е҆гѷптѧномъ, и҆ взѧх̑ в̂ы ꙗ҆́ко на крилѣ̀ ѻ҆́рли, и҆ приведох̑ в̂ы к себѣ·

И҆ нн҃ѣ а́ще послꙋш́анїемъ послꙋш́аете гла́са мое҆го, и҆ снабди́те завѣтъ мои.
бꙋ́дете ми лю́дїе сꙋщ́е ѿ всѣ́хъ ꙗ҆зы́къ, моѧ̀ б̂о е҆сть вс̂ѧ землѧ̀.
вы́ же бꙋ́дѣте м̂и цр҃ьское сщ҃енїе, и҆ ꙗ҆́зы́къ ст҃ъ.
с̂и словеса̀ да гл҃еши сн҃омъ і҆и҃левымъ·

Пришедъ же моѷсїи възва̀ вс̂ѧ ста́рца лю́дъски, и҆ рече, і҆ и҆сповѣ́да и҆мъ вс̂ѧ словеса̀ с̂и, ꙗ҆́же завѣща̀ им̑ б҃ъ·

ѿвѣща́ша же вс̂и лю́дїе кꙋ́пно и҆ реко́ша.
вс̂е е҆ли́ко ре́клъ б҃ъ, сътворим̑, и҆ послꙋ́шаемъ.
доне́съ же моѷсїи словеса̀ с̂и къ бг҃ꙋ·

И҆ рече г҃ь къ моѷсїю с̂е а́зъ прїидꙋ̀ к тебѣ въ столпѣ ѻ҆́блачнѣ.
да ѹ҆слы́шатъ лю́дїе гл҃юща м̂ѧ к тебѣ̀, и҆ да тебѣ̀ вѣрꙋютъ въ вѣки.
повѣ́да же моѷсїи, словеса̀ лю́дїи къ г҃ꙋ·

И҆ рече г҃ь моѷсїю съни́ди, възвѣсти лю́демъ, и҆ ѻ҆чи́сти ѧ҆̀ днесь и҆ ѹ҆́трѣ.
и҆ да и҆сперꙋт꙽ ри́зы, и҆ да бꙋ́дꙋтъ гото́ви, въ дн҃ь третїи, въ тре́тїи б̂о дн҃ь сни́дет꙽ г҃ь на горꙋ̀ сина́искꙋю, пред꙽ лицемъ всѣхъ людїи, и҆ ѹ҆стро́иши лю́ди ѻ҆боꙗ҆́мо гл҃ѧ, въне́млите себѣ не въсходи́ти на горꙋ̀ и҆ ничи́мже коснꙋтисѧ еѧ̀, всѧ́къ б̂о прикоснꙋ́выйсѧ горѣ̀ смр҃тїю ѹ҆́мретъ.
прие́мшаѧж̑сѧ е́й рꙋка̀ ка́менїемъ побїе́тсѧ, и҆лѝ стрѣло́ю ѹ҆стрѣ́литсѧ.
любо звѣ́рь, любо чл҃къ, не бꙋ́детъ жив̑҇ е҆гда́ же гласъ трꙋбы̀ и҆ ѻ́блакъ ѿи́дет̑ ѿ горы̀, сїѝ да възы́идꙋтъ на горꙋ̀·

И҆зы́де же моѷсїи съ горы̀ къ лю́демъ и҆ ѻ҆чи́стї ѧ҆̀, і҆ испра́ша ри́зы своѧ, рече же лю́демъ, бꙋ́дите гото́ви три дн҃и и҆ не ходи́те къ жена́мъ·

Бысть же въ тре́тїи дн҃ь, къ свита́нїю, и҆ бы́ша гла́си, и҆ мо́лнїѧ, и҆ ѻ҆́блакъ мо́лнїанъ на горѣ сина́истѣи и҆ гла́съ трꙋбныи.
глаша́ше си́лно ѕѣло, и҆ ѹ҆боꙗ҆шасѧ вс̂и людїе въ по́лцѣ·

И҆зведе́ же моѷсїи, лю́ди проти́вꙋ б҃ꙋ, ѿ полка̀, и҆ ста́ша подъ горо́ю.
гора́ же сина́искаѧ кꙋрѧ́шесѧ вс̂ѧ.
схожде́нїѧ ради бж҃їѧ на ню̀, въ ѻ҆гнѝ.
и҆ схожда́ше же дымъ, ꙗ҆́ко ды́мъ пе́щныи.
и҆ ѹ҆жасо́шасѧ вс̂и лю́дїе ѕѣло·

Быша же гла́си трꙋбнїи, сходѧ́ще крѣп́цѣ ѕѣло.
моѷсїи же гл҃аше, а҆ б҃ъ ѿвѣщава́ше е҆мꙋ гласомъ·

Сни́де же г҃ь на горꙋ̀ сина́искꙋю, на ве́рхъ горы̀, и҆ възва̀ г҃ь моѷсїѧ на ве́рхъ горы̀, и҆ възы́де моѷсїи·

Рече же б҃ъ к немꙋ гл҃ѧ.
съни́ди, и възвѣстѝ лю́демъ.
да не когда̀ пристꙋ́плѧт̑ къ горѣ̀, къ бг҃ꙋ разꙋмѣти, и҆ падꙋтъ ѿ нихъ мно́ѕи, и҆ жерцы́ же пристꙋпа́ѧи къ г҃ꙋ б҃ꙋ да сѧ ѻ҆ст҃ѧт꙽.
да не когда̀ и҆змѣни́тъ ѿ нихъ г҃ь·

Рече же моѵсїи къ б҃ꙋ, не возмо́гꙋтъ лю́дїе възы́ти на горꙋ̀ сина́искꙋю, ты б̂о завѣща́лъ е҆си насъ гл҃ѧ.
предѣли́ти, ѹ҆ горы̀, и҆ ѻ҆ст҃ити ю҆̀·

И҆ рече е҆мꙋ г҃ь.
и҆дѝ съни́ди, и҆ възы́ди т̂ы, і҆ аа҆ро́нъ с тобо́ю.
жерцы́ же и҆ лю́дїе да сѧ не нꙋ́дѧтъ възытѝ къ б҃ꙋ.
да не когда̀ погꙋби́тъ ѿ них̑ г҃ь.
сни́де же моѷсїи, къ лю́демъ и҆ рече им̑·

Глв̑҇а, к҃·

И гл҃а г҃ь вс̂ѧ словеса̀ с̂и ко моѷсїю гл҃ѧ.
а҆́зъ е҆смь г҃ь б҃ъ твои, и҆зведы́и т̂ѧ ѿ землѧ̀ е҆гѷпетъскы, ѿ домꙋ работнаго·

да не бꙋ́дꙋтъ тебѣ боѕи и҆́ни ра́звѣ мене.
ни сътворѝ себѣ кꙋми́ра, и҆ всѧ́кого подо́бїа, е҆же на́ нб҃си горѣ, и҆ е҆ли́ко на́ земли ни́зꙋ, и҆ е҆ли́ко въ вода́хъ и҆ подъ земле́ю.
да сѧ не поклони́ши и҆мъ·

н̂и да послꙋж́иши и҆мъ, а҆́зъ б̂о е҆смь г҃ь б҃ъ твои.
б҃ъ ревни́въ, ѿдаѧ грѣхы̀ ѿц҃ъ на ча́да, до тре́тїаго и҆ до четве́ртаго ро́да, ненавидѧщихъ менѐ.
творѧ́и же млс̑҇ть въ ты́сѧщах꙽ лю́бѧщимъ м̂ѧ, и҆ снабдѧ́щимъ заповѣди моа̀·

Не прїе́мли именѝ г҃а б҃а твое҆го всꙋ́е, не ѻ҆цѣ́стит̑ б̂о г҃ь, прилага́ющихъ и҆́мѧ е҆го тꙋнѐ·

По́мни дн҃ь сꙋбот̑ныи, ст҃ити е҆го ше́сть дн҃и дѣ́лаи и҆ сътвори́ши в нихъ вс̂ѧ дѣ́ла твоа.
а҆ дн҃ь сед̑мы́и сꙋбо́та г҃ꙋ б҃ꙋ твое҆мꙋ·

да не сътвори́ши всего̀ дѣ́ла во́нь.
т̂ы и҆ сн҃ъ твои, и҆ дще́рь твоа̀, и҆ ра́бъ твои, и҆ раба̀ твоа̀, и҆ во́лъ твои, и҆ ѻ҆слѧ̀ твоѐ, и҆ ве́сь ско́тъ твои, и҆ прише́лець твои ѻ҆бита́ѧ ѹ҆ тебѐ, занѐ в шестѝ дн҃ех꙽ сътворѝ г҃ь нб҃о и҆ землю̀, мо́ре и҆ вс̂ѧ ꙗ҆́же на них̑.
и҆ почѝ въ дн҃ь сед̑мы́и.
сего ради блс̑҇ви г҃ь дн҃ь сед̑мы́и и҆ ѻ҆ст҃и е҆го·

Чт̂и ѿц҃а твое҆го, и҆ мт҃рь твою̀, да бл҃го т̂и бꙋ́детъ.
и҆ долголѣтенъ бꙋ́деши на землѝ бла́ѕѣ, ю́же г҃ь б҃ъ твой дас̑҇ тебѣ·

Не ѹ҆бїи не любодѣ́и не ѹ҆кра́ди, не послꙋшествꙋ́и на дрꙋ́га свое҆го свѣдѣтельства ло́жна·

Не пожела́и жены̀ и҆́скренего твое҆го, не пожела́и домꙋ бли́жнего твое҆го, н̂и села̀ е҆го, н̂и раба̀ е҆го, н̂и рабы̀ни е҆го, н̂и вола̀ е҆го, н̂и ѻ҆сла̀ е҆го, н̂и всего скота̀ е҆го, н̂и всѐ е҆ли́ко бли́жнего твое҆го·

Вси́ же лю́дїе смотрѧ́хꙋ гла́са и҆ свѣщъ, и҆ гласа трꙋ́бнаго, и҆ горꙋ̀ кꙋрѧ̀щꙋсѧ, и҆ ѹ҆боа́шасѧ вс̂и лю́дїе ста́ша пода́лѣ·

И҆ реко́ша моѷсїю гл҃и т̂ы с на́ми, да не гл҃етъ к нам̑ б҃ъ да не когда̀ ѹ҆мрем̑·

Рече же и҆мъ моѷсїи ѹ҆пова́ите не бо́итесѧ и҆скꙋше́нїа бо ради.
прїиде б҃ъ к ва́мъ, ꙗ҆́ко да бꙋ́детъ стра́хъ е҆го въ ва́съ, да не съгрѣша́ете·

Стоа́хꙋ же вс̂и лю́дїе пода́лѣ.
моѷсїи же вни́де въ мглꙋ̀, и҆дѣже бѧ́ше г҃ь·

И҆ рече г҃ь къ моѷсїю.
с̂е рцы̀ до́мꙋ і҆а́ковлю.
и҆ възвѣстѝ сн҃омъ і҆и҃левым꙽.
в̂ы ви́дѣсте, ꙗ҆́ко с нб҃се гл҃ахъ к вам̑.
да не сътвори́те себѣ са́ми бого́въ сре́бреныхъ, и҆ бого́въ златыхъ не сътворите сами себѣ·

ѻ҆лъта́ра съ землѝ, да сътвори́те м̂и.
и҆ положи́те на не́мъ, вс̂есъжеже́нїа и҆ сп҃се́нїа ваша.
ѻ҆́вца, и҆ те́лца ваша, на всѧ́комъ мѣстѣ.
и҆дѣже нарекꙋ̀ и҆́мѧ мое, т̂ꙋ и҆ прїидꙋ к тебѣ, и благосло́влю т̂ѧ·

А҆́ще же ѻ҆лта́ръ ѿ ка́менїа сътвори́ши м̂и, да не гла́диши е҆го сѣчивомъ, сѣ́чиво б̂о свое а҆́ще възложи́ши нан̑҇, т̂о ѻ҆скверъни́ши и҆̀.
да не въсхо́диши на стоѧ́ла ѻ҆лъта́ра мое҆го, ꙗ҆ко да не ꙗ҆́ви́ши ѻ҆сквръне́нїѧ свое҆го на немъ·

Глв̑҇а, к҃а·

И сїѧ ѻ҆правда́нїа и҆ сꙋды положи пред̑ ни́ми, а҆́ще притѧ́жеши раб̑҇ е҆врѣ́инъ, шесть лт̑ѣ да ти работа́етъ.
а҆ въ сед̑мое лѣто ѿпꙋсти́ши е҆го свобо́дъ тꙋнѐ·

А҆́ще са́мъ е҆ді́нъ вни́детъ т̂о е҆ді́нъ і҆ и҆зы́детъ, а҆́ще ли и҆ жена̀ вни́детъ с нимъ, т̂о и҆ жена̀ ѿи́детъ с нимъ·

А҆́ще ли господин̑҇ дастъ е҆мꙋ женꙋ̀, и҆ родитъ е҆мꙋ сн҃ъ и҆л̂и дще́рь, жена̀ и҆ дѣти да бꙋ́дꙋтъ господи́нꙋ е҆го, а҆ самъ е҆ді́нъ.
да ѿи́детъ·

А҆́ще ли ѿвѣщавъ рабъ речетъ, възлюбих̑ гдс̑҇на мое҆го и҆ женꙋ мою̀ и҆ дѣти моѝ.
не ѿхождꙋ̀ свобо́денъ.
да приведет̑ и҆̀ господин̑҇ е҆го пред̑ сꙋди́ще бж҃їе.
тогда же приведет̑ е҆го пред̑ две́ри на стоѧ́ла, и҆ да провръти́тъ е҆мꙋ̀ ѹ҆хо гдс̑҇нъ е҆го ши́ломъ, и҆ да работа́етъ е҆мꙋ въ́ вѣки·

А҆́ще кт̂о прода́стъ свою дще́рь в рабыню, и҆ да не ѿи́детъ, ꙗ҆́коже ѿхо́дѧтъ рабынѧ.
а҆́ще же не ѹ҆годи́тъ пред꙽ ѻ҆чи́ма господи́на свое҆го ꙗ҆́же е҆мꙋ помы́сливъ ѻ҆бѣща, да ѿпꙋ́стит̑ ю҆̀.
ꙗ҆́зы́кꙋ же чюже́мꙋ гдс̑҇нъ да не прода́стъ еѧ̀, понеже погордѣ ею̀·

А҆́ще лиж̑ сн҃ꙋ свое҆мꙋ ѻ҆бещалъ еѧ̀, по ѻ҆правле́нїю дще́рню да сътвори́тъ е́й.
а҆́ще ли и́нꙋ по́иметъ себѣ, и҆ потре́бныа и҆ ри́зы и҆ вѣ́но еѧ̀ да́стъ е́й.
не ѹ҆меншитъ, а҆́ще ли сего̀ трое҆го не твори́тъ е́й, да ѿи́детъ бес цѣны̀ тꙋнѐ·

И҆ а́ще кого кт̂о ѹ҆да́ритъ и҆ ѹ҆мретъ, смр҃тїю да ѹ҆мрет̑ и҆ то́й·

А҆́ще ли не хотѧ̀, н̂о б҃ъ бꙋ́детъ предалъ въ рꙋцѣ е҆го, то да́мъ т̂и мѣсто, в неже бѣжи́тъ тамо ѹ҆би́выи·

А҆́ще ли кт̂о приложи́тъ ѹ҆би́ти бли́жнего свое҆го ѻ҆та́и, прибѣгнетъ къ ѻ҆лта́рю, и҆ ѿ ѻ҆лта́рѧ мое҆го възметсѧ ѹ҆мрѣти·

И҆же биет̑ ѿц҃а свое҆го, и҆л̂и мт҃рь, смр҃тїю да ѹ́мретъ, иже а҆́ще кт̂о злорѣ́читъ ѿц҃ꙋ и҆л̂и мтр҃и смр҃тїю да ѹ҆мрет̑·

И҆ аще кт̂о ѹ҆ кого̀ ѹ҆кра́детъ сн҃овъ і҆и҃левъ, и҆ съѻ҆долѣвъ семꙋ̀ прода́сть и҆̀, и҆ ꙗ҆ви́тсѧ нань, смр҃тїю да сконча́етсѧ·

А҆́ще же свари́тасѧ дв̂а мꙋжа.
и҆ ѹ҆да́ритъ е҆ді́нъ дрꙋга́го ка́менемъ, и҆ли пѧ́стїю, и҆ не ѹ҆мретъ, н̂о сей лѧ́жетъ на ѻ҆́дрѣ, а҆́ще же въста́въ мꙋжь.
и҆ похо́дит꙽ ѻ҆ жезлѣ, чистъ е҆го ѹ҆да́ривыи, то́чїю на дѣ́ланїе е҆го да да́стъ и҆ на цѣлбꙋ·

А́ще же кт̂о би́етъ раба̀ свое҆го, и҆л̂и рабꙋ̀ свою жезло́мъ, и҆ ѹ́мретъ ѿ рꙋки е҆го, сꙋдо́мъ да сѧ м꙽ститъ ѹ҆би́ти.
а҆́ще ли пребꙋдет̑ дн҃ь и҆ли дв̂а, да не м꙽сти́тсѧ е҆мꙋ, сребро б̂о е҆го е҆мꙋ е҆сть·

А҆́ще сѧ би́юще дв̂а мꙋжи, и҆ ѹ҆рази́та женꙋ непра́знд̑ꙋ, и҆зы́детъ младе́нец̑҇ еѧ҆ не ѻ҆бли́ченъ желѣдбою да жьлѣдетъ, ꙗ҆́коже заде́жет̑ мꙋжъ жены́ с подобо́ю да ѿда́сть цѣнꙋ.
а҆́ще ли ѻ҆бли́ченъ бꙋ́детъ, да да́стъ дш҃ꙋ за́ дш҃ꙋ·

ѻко въ ѻ҆чесѣ мѣсто.
рꙋкꙋ въ рꙋ́кꙋ мѣсто, зꙋбъ въ зꙋ́ба мѣсто.
нога̀ въ ногѝ мѣсто.
из̑женїе въ из̑женїа мѣсто.
вред̑ вреда мѣсто, ꙗ҆́звꙋ въ ꙗ҆звꙋ мѣсто·

А҆́ще ли кт̂о и҆стъкнет̑ ѻ́ко рабꙋ свое҆мꙋ, и҆ли ѻ҆ко рабы́ни своей, и҆ ѻ҆слѣпи́тъ.
свободъ да ѿпꙋститъ ѧ҆̀ въ ѻ҆ка мѣсто их̑·

А҆́ще зꙋбъ рабꙋ свое҆мꙋ, и҆л̂и зꙋбъ рабѣ свое́й, и҆зби́ет꙽, свобод̑ да ѿпꙋстит̑ ѧ҆̀ въ зꙋ́ба мѣсто и҆хъ·

А҆́ще во́лъ ѹ҆боде́тъ мꙋжа, и҆л̂и женꙋ, и҆ ѹ҆мретъ, ка́менїемъ да сѧ поби́етъ во́лъ то́й, и҆ да не ꙗ҆́дѧт̑ мѧ́са е҆го.
а҆ господин̑҇ вола̀ чи́стъ бꙋ́детъ·

А҆́щеж̑ во́лъ бодли́въ бꙋ́детъ пр́ъвѣе вчера́шнего и҆ третїѧ́го дн҃е, и҆ гл҃ютъ гдс̑҇нꙋ е҆го, и҆ не и҆згꙋ́битъ е҆го, и҆ ѹ҆бодетъ мꙋжа и҆л̂и женꙋ̀ во́лъ да сѧ погꙋби́тъ.
а҆ гдс̑҇нъ е҆го, да ѹ҆мрет̑·

А҆́ще ли винꙋ̀ заде́жꙋтъ е҆мꙋ, да да́стъ винꙋ̀ за дш҃ꙋ свою, е҆лико заде́жꙋтъ е҆мꙋ·

И҆ а́ще сн҃а и҆л̂и дще́рь ѹ҆боде́тъ, то по семꙋже ѻ҆пра́вленїю да сътворѧ́тъ е҆мꙋ·

А҆́ще ли раба̀, и҆л̂и рабꙋ̀, ѹ҆бодетъ во́лъ, сребра̀, л҃ дидра́гмь, да да́стъ гдс̑҇нꙋ и҆хъ, а҆ во́лъ ка́менїемъ да сѧ побі́етъ·

А҆́ще кт̂о ѿвр́ьзетъ кла́дѧзь, и҆л̂и и҆скопа́етъ ѧ҆́мꙋ, и҆ не покры́етъ еѧ̀ и҆ впаде́тсѧ в ню телѧ, и҆л̂и ѻ҆слѧ̀, гдс̑҇нъ ꙗ҆́мы ѿдастъ гдс̑҇нꙋ ско́тїю цѣнꙋ̀, а҆ ѹ҆мръшее е҆мꙋ да бꙋ́дет꙽·

А҆́ще чїй во́лъ ѹ҆бодетъ вола̀ по́дрꙋга свое҆го и҆ ѹ҆мретъ, да прода́стъсѧ во́лъ живы́и, и҆ раздѣли́та цѣнꙋ е҆го и҆ во́ла ѹ҆мръшего да раздѣли́та·

А҆́ще же зна́ютъ вола̀ ꙗ҆ко бодли́въ ес̑҇ прежде вчера́шнего, и҆ третїа́го дн҃е и҆ сꙋть гл҃али гдс̑҇нꙋ е҆го, и то́й не брежет̑ и҆̀ и҆л̂и не ѹ҆бїетъ е҆го, да да́стъ во́лъ въ вола мѣсто, мр҃твыи же е҆мꙋ да бꙋ́деть·

Глв̑҇а, к҃в·

Аще кт̂о ѹ҆кра́детъ телѧ̀ и҆л̂и ѻ҆́вцꙋ, и҆ зако́летъ и҆̀, и҆л̂и продасть пѧ́теро телѧт̑ да въздастъ въ телѧ́те мѣсто.
а҆ четы́ри ѻ҆́вцы въ ѻ҆́вцы̀ мѣсто·

А҆́ще в под̑копа́нїи заста́нетсѧ тать, и҆ ꙗ҆́звенъ ѹ҆́мрет̑, нѣсть е҆мꙋ вины̀ кро́ви е҆го.
а҆́ще же възы́детъ сл҃нце нань пови́ненъ ес̑҇ ѹ҆мрѣти за него·

а҆ще ли не и҆́мат̑, да сѧ продас̑҇ въ тат̑бы мѣсто·

А҆́ще ли ѧт̑ бꙋдет̑ и҆ ѻ҆брѧ́щетсѧ татьбы ѻ́браз̑ въ рꙋ́кꙋ е҆го ѿ ѻ҆слѧ́те до ѻ҆вца̀ жи́во сꙋгꙋ́бъ да ѿда́стъ.
а҆́ще кт̂о и҆спꙋститъ скотъ е҆го і҆ и҆спасетъ нивꙋ дрꙋгаго, и҆л̂и виногра́дъ дрꙋга свое҆го да да́стъ цѣнꙋ ѿ ни́вы свое҆ѧ и҆ ѿ жи́та свое҆го·

А҆ще вс̂ю ни́вꙋ и҆спасе́тъ ѹ҆́нее ни́вы свое́ѧ, и҆ ѹ́нїе виногра́да свое҆го да тѧ́житъ·

А҆́ще и҆сшедъ ѻ҆́гнь, и҆ ѻ҆брѧ́щетъ трънїе, и҆ запа́литъ гꙋмно, и҆л̂и стог̑҇, и҆ли ни́вꙋ, и҆ тѧ́жит̑, ꙗ҆́же възгнѣщъ ѻ҆́гнь·

А҆́ще же кт̂о дастъ дрꙋгꙋ сребро, и҆л̂и сосꙋдъ съкры́ти, и҆ ѹ҆кра́детсѧ, и҆з домꙋ мꙋж́а того, и҆ а́ще ѻ҆брѧ́щетсѧ ѹ҆кра́дыи, да възда́стъ сꙋгꙋбо.
а҆́ще ли не ѻ҆брѧ́щет̑сѧ та́ть.
да прїидетъ гдс̑҇нъ до́мꙋ пред̑ бг҃а да сѧ клене́тъ, а҆́ще самъ е҆го не коры́стовалъ и҆ не лꙋкавъствова, н́а вс̂е положе́нїе дрꙋж́не·

По семꙋ̀ словесѝ въ крывинꙋ̀, ѻ҆ телѧ́ти, и҆ ѻ҆слѧти, и҆ ѻ́вцы̀, и҆ ѻ҆ ри́ѕѣ, и҆ ѻ҆ все́и поги́бели е҆ꙗ҆же и҆менꙋ́етъ свое́ю прѣнїе ѹ҆бо да е҆сть пред̑ бг҃мъ, да прїидетъ сꙋдъ ѻ҆бо́ю, кого сꙋдїа пови́нит꙽ да тѧ́жит̑ сꙋгꙋбо ѹ҆ бли́жнего·

А҆́ще же кт̂о дастъ дрꙋгꙋ ѻ҆слѧ̀, и҆ли те́лецъ, и҆л̂и ѻ҆́вцꙋ, и҆л̂и вс̂ѧкъ скотъ, снабдѣти.
и҆ ѹ҆́мретъ, и҆л̂и поги́бнетъ, и҆л̂и плѣнѧтъ е҆̀, и҆ никто́же не вѣсть, клѧ́тва да бꙋдетъ бж҃їа междꙋ̀ и́ма.
а҆́ще самъ нѣсть слꙋка́вствовалъ, до всего̀ дрꙋжнего положе́нїѧ, и҆ та́ко прїемлет꙽ господи́нъ е҆го·

и҆ да не тѧжитъ гдс̑҇нꙋ е҆го·

А́ще ѹ҆кра́детсѧ ѿ него, да тѧ́житъ гдс̑҇нꙋ·

А҆́ще ѕвѣръ сънѣлъ, да ведетъ и҆хъ на ѕвѣроꙗ҆́динꙋ, и́ да не тѧ́жетъ·

А҆́ще же кт̂о и҆спроси́тъ ѹ҆ дрꙋга и҆ погибнетъ, и҆л̂и ѹ҆мретъ, и҆л̂и плѣни́тсѧ, а҆ гдс̑҇нъ е҆го не бꙋдетъ с ним̑, то́е да тѧ́житъ, а҆́ще гдс̑҇нъ е҆го бꙋ́детъ с ни́мъ, то да не тѧ́житъ.
а҆́ще ли нае́мник̑҇ е҆сть, да бꙋ́дет꙽ е҆мꙋ въ мздꙋ̀ е҆го·

А҆́ще же кт̂о прельстит̑ не ѻ҆бѣща́нꙋ деви́цꙋ, и҆ бꙋдетъ с нею̀ вѣ́номъ да вѣ́нитъ е҆ѧ̀, и҆ пои́метъ е҆ѧ̀ себѣ въ женꙋ̀·

А҆́ще възбранѧ́а възбрани́тъ, и҆ не хо́щетъ ѿц҃ъ е҆а̀ да́ти е҆мꙋ въ женꙋ̀, цѣнꙋ̀ дадѧ́тъ сребра̀ ѿц҃ꙋ, ꙗ҆́коже е҆сть вѣ́но дв҃чьско·

Волхвъ да не живет̑.
и҆ пото́мъ всего съ ското́м꙽ быва́юща, смр҃тїю ѹ҆би́ета·

А҆ и҆же требꙋ кладет̑ богом̑ да потребите и҆̀, н̂о то́чїю г҃ꙋ е҆ді́номꙋ и пришелца не вреди́те, ни сжа́лите е҆мꙋ, пришелцы б̂о бѣсте въ землѝ е҆гѷпетъстѣи·

И҆ всѧ́коѧ вдовы̀, и҆ сироты̀ не вреди́те, а҆́ще бо зло́бою вредите ѧ҆̀, и҆ тїи въстена́вше възопію́тъ къ мнѣ, слꙋ́хомъ ѹ҆слы́шꙋ глас̑҇ и҆хъ, и҆ разгнѣваюсѧ ꙗ҆́ростїю и҆ побїю в̂ы мече́мъ, и҆ бꙋ́дꙋтъ жены̀ ваша вдовы̀, и҆ ча́да ваша сироты̀.

А҆́ще же даси сребро̀ вза́емъ братꙋ ни́щемꙋ и҆же ѹ҆ тебе ес̑҇, не бꙋ́ди тщали́въ е҆мꙋ ни зажедѝ е҆мꙋ ли́хвы въ зало́гъ, и҆ а́ще зало́житъ ризꙋ дрꙋгъ твои до за́хода сл҃нцꙋ ѿда́ждъ е҆мꙋ е҆сть б̂о ѻ҆де́жда е҆мꙋ с̂и, е҆ді́на ри́за стыде́нїемъ е҆го, въ чемъ е҆мꙋ̀ спа́ти, а҆́ще бо възопїетъ къ мнѣ слꙋ́хом꙽ ѹ҆слы́шꙋ, млс̑҇тивъ бо е҆смь богомъ да не гл҃еши зл̂а·

ни кн҃ѕю людїи твои҆хъ не рцы зл̂а·

Нача́ток̑҇ же ѿ гꙋмна̀ и҆ ѿ точи́ла твое҆го да ми принесе́ши.
прьвенца сн҃овъ твоих̑, да ми дасѝ·

Та́кожде сътвори́ши ѿ телца твое҆го, и҆ ѿ ѻ҆вцы̀ твое҆ѧ̀, и҆ ѿ ѻ҆слѧ́те твое҆го сед̑мь дн҃їи да бꙋ́дет̑ ѹ҆ матери, а҆ въ ѻ҆смы́и же дн҃ь ѿдаси ѧ҆̀ мн̂ѣ·

Лю́ди ст҃и да бꙋ́дете м̂и и҆ звѣроꙗ҆́дины да не ꙗ҆́сте, ѱо́мъ же да дастъсѧ·

Глв̑҇а, к҃г·

Да не прїимеши слы́шанїѧ сꙋѧ́, да не приложи́шисѧ съ стропти́выми быти.
по́слꙋхъ непра́веденъ.
да не бꙋдеши съ мно́гими на зло́е.
да не приложи́ши съ мно́жеством̑ свари́тисѧ мно́гажды, ꙗ҆́ко преврати́ти сꙋ́дъ.
и҆ ни́щаго да не ми́лꙋеши на сꙋдѣ̀·

А҆́ще же срѧ́щеши говѧ́до врага̀ твое҆го, и҆ли ѻ҆слѧ е҆го блꙋдитъ заше́дъше.
ѻ҆брати́въ дасѝ е҆мꙋ·

А҆́ще же ѹ҆́зриши ѻ҆слѧ̀ врага̀ твое҆го па́дъшесѧ съ бре́менемъ е҆го, да не мине́ши е҆го, н̂о да въздви́гнеши е҆го с ни́мъ·

да не преврати́ши сꙋда̀ ни́щаго въ сꙋдѣ е҆го.
ѿ всѧ́кого сло́ва непра́ва да ѿстꙋ́пиши·

Чтс̑҇а и҆ правди́ва да не ѹ҆бїе́ши.
н̂и ѻ҆правди́ши нечс̑҇ти́ваго, мъзды̀ ра́ди·

И҆ да не възмеши мъзды̀, мъзда̀ б̂о ѻслѣплѧ́етъ ѻ҆́чи ви́дѧщимъ, и҆ раз꙽сыпа́етъ словеса̀ пра́ведна.
пришел̑҇цꙋ не вражд̑ꙋ́ите, н̂и стꙋжи́те е҆мꙋ, вы б̂о вѣ́сте дш҃ю прише́л꙽чю, поне́же и҆ в̂ы бѣ́сте пришел꙽цы въ землѝ е҆гѷпетъстѣй, ѕ҃, лѣтъ да сѣ́еши зе́млю твою̀, и҆ да събере́ши пло́ды е҆ѧ̀.
въ седмо́е же ѻ҆ста́вленїе да сътвори́ши, и҆ пꙋ́стиши ю҆̀.
да ꙗ҆́дѧ́тъ ѹ҆бо́зїи ꙗ҆́зы́ка твое҆го.
ѻ҆ста́нокъ же да ꙗ҆́дѧ́тъ звѣ́рїе ди́вїи.
та́ко да сътвори́ши и҆ виногра́дꙋ твое҆мꙋ, и҆ ма́сличїю твое҆мꙋ·

шесть дн҃їи да сътвори́ши дѣ́ло твоѐ, въ седмы́и же дн҃ь, да почи́еши, да почи́етъ во́лъ твои, и҆ ѻ҆се́лъ твои.
да почи́етъ сн҃ъ рабы̀ твое҆ѧ̀, и҆ пришле́цъ;

Вс̂е е҆ли́ко гл҃ахъ вамъ снабди́те, и҆ме́н꙽ же бого́въ и҆нѣхъ не помина́ите, н̂и да слы́шатсѧ и҆зъ ѹ҆́стъ ва́шихъ·

По тр̂и кра́ты в лѣтѣ сътвори́те м̂и вели́къ дн҃ь.
ѻ҆прѣ́сноки, снабди́те, се́дмь дн҃їи.
и҆ ꙗ҆́ди́те ѻ҆прѣ́сноки, ꙗ҆коже заповѣ́дахъ ва́мъ, по вре́мени новомѣ́сечїа, въ то́и б̂о и҆зы́до́сте и҆зъ е҆гѷпта, да не ꙗ҆ви́шисѧ предо мно́ю то́щь·

И вели́къ дн҃ь въ пр́ьвыхъ, жа́твъ жи́тъ твои҆хъ ꙗ҆́коже сѣ́еши на ни́вѣ твое́й·

И вели́къ дн҃ь сконча́нїѧ преходѧ́щꙋ лѣтꙋ, въ събра́нїе дѣле́съ ѿ ни́въ твои҆хъ·

Въ тр̂и времена̀ лѣтныѧ да сѧ ꙗ҆ви́тъ всѧкъ мꙋ́жескъ по́лъ твой прд̑е гм҃ъ бг҃омъ твои҆мъ.
е҆гда же ѿженꙋ̀ ꙗ҆зы́ки ѿ лица̀ твое҆го, и҆ разширю̀ предѣ́лы твоѧ̀, и҆ никто̀ не пожадает̑ землѝ твое́й.
да не положи́ши на ква́съ кро́ви и҆ жрьтвы мое҆ѧ, и҆ да не долежи́тъ тꙋ́къ вели́ка дн҃е мое҆го на ѹ҆́трїѧ·

Нача́токъ пр́ьвых꙽ житъ землѧ̀ твое҆ѧ, да внесе́ши въ дом̑ г҃а бг҃а твое҆го.
да не свари́ши ꙗ҆́гнѧ́те въ млецѣ мт҃ре е҆го.

Се́ же а҆́зъ пошлю̀ а҆́гг҃ла мое҆го пред̑ лице́мъ твои҆мъ, да т̂ѧ снабдит̑ на пꙋтѝ, ꙗ҆ко да въведе́тъ т̂ѧ въ землю, ю҆́же ѹ҆гото́вахъ тебѣ.
вонмѝ себѣ и҆ послꙋш́аи е҆го и҆ не ѻ҆слꙋш́аисѧ е҆го, не ѻ҆пꙋ́ститъ т̂ѧ, и҆мѧ б̂о моѐ е҆сть на не́мъ·

А҆́ще слꙋ́хомъ послꙋш́аеши гласа мое҆го, и҆ сътвори́ши е҆ли́ко а҆́з꙽ заповѣ́дахъ тебѣ, вра́гъ бꙋ́дꙋ враго́мъ твоимъ, и҆ съпроти́влюсѧ съпроти́вникомъ твои҆мъ по́идетъ б̂о а́гг҃лъ мои прд̑е тобо́ю, и҆ въведе́тъ т̂ѧ въ а҆мор꙽ре́ѧ, и҆ хет꙽ѳе́ѧ, и҆ ферезе́ѧ, и҆ ханане́ѧ, и҆ гер꙽гесе́ѧ, и҆ е҆в꙽ве́ѧ, и҆ евꙋсе́ѧ, и҆ потреблю̀ ѧ҆̀ ѿ лица̀ ва́шего·

Не поклонѧ́итесѧ богом̑ и҆хъ, и҆ не послꙋш́аите и҆хъ.
да не сътвори́те по дѣ́ломъ и҆хъ.
н̂о ѻ҆чище́нїѧ и҆хъ разори́ши, и҆ съкрꙋша́ѧ съкрꙋшиши столпы̀ и҆хъ, и҆ послꙋж́иши г҃ꙋ бг҃ꙋ твое҆мꙋ.
и҆ блс̑҇влю хлѣ́бъ твои, и҆ вино̀ твоѐ, и҆ во́дꙋ твою, и҆ ѿвращꙋ̀ раз꙽сла́бленїа твоѧ̀·

И҆ не бꙋ́дете бесчадны, н̂и неплоды на землѝ твоеи, и҆ число̀ дн҃їи твои҆хъ съвр́ьша́ѧ съвр́ьшꙋ̀, и҆ стра́хъ пошлю ве́дꙋщи тебѐ, и҆ ѹ҆страшꙋ̀ вс̂ѧ ꙗ҆́зы́ки, в нѧ́же т̂ы вхо́диши к нимъ·

И҆ вдам̑ съпроти́вники твоѧ̀ в бѣгꙋны̀, и пꙋщꙋ̀ ше́р꙽шены прд̑е тобо́ю, и҆ ѿженꙋ̀ а҆мор꙽реѧ, и҆ е҆в꙽ве́ѧ, и҆ е҆вꙋсе́ѧ, и҆ ханане́ѧ, и҆ хет꙽ѳеѧ ѿ тебѐ.
не и҆з꙽женꙋ̀ и҆хъ въ лѣтѣ е҆ди́номъ, да не бꙋ́детъ землѧ̀ пꙋста̀·

И҆ мно́ѕи бꙋ́дꙋтъ на тѧ звѣ́рїе дивїи, пома́лꙋ пома́лꙋ ѿженꙋ̀ ѧ҆̀, ѿ тебѐ, до́н꙽деже възрасте́ши, и҆ прїи́меши зе́млю.
и҆ положꙋ̀ предѣ́лы твоѧ̀ ѿ чрьмна́го морѧ.
до мо́рѧ филисти́млѧ, ѿ пꙋсты́нѧ до рѣкѝ вели́кїѧ е҆фрат̑·

И҆ преда́мъ в рꙋцѣ ваши сѣдѧ́щаа на землѝ, и҆ ѿженꙋ̀ ѧ҆̀ ѿ тебѐ, да не смѣсишисѧ с ними, и҆ бого́мъ и҆хъ да не завѣща́еши завѣта, и҆ да не ѻ҆ста́нꙋтъ на землѝ твое́и, да тебѣ не сътворѧ́тъ съгрѣши́ти къ мнѣ, а҆́ще бо рабо́таеши бого́мъ их̑, с̂и бꙋ́дꙋтъ тебѣ на събла́знъ·

Глв̑҇а, к҃д·

Моѷсїю же реч̑҇ възы́иди къ г҃ꙋ, т̂ы и҆ а҆аро́нъ, и҆ нада́въ, и҆ а҆виѹ҆́дъ, и҆ о҃, ста́рецъ і҆и҃левъ, да сѧ покло́нѧтъ и҆здалеча г҃ꙋ·

И҆ пристꙋпѝ моѷсїи е҆динъ къ бг҃ꙋ, и҆ ѻ҆ни да не пристꙋпа́ютъ, и҆ людїе е҆же с нимъ не взы́дꙋтъ·

Прїиде же моѷсїи, и҆сповѣ́да лю́демъ вс̂ѧ словеса̀ бж҃їа, и҆ сꙋды̀·

ѿвѣща́ша вс̂и лю́дїе гла́сом̑ вели́кимъ, гл҃юще, вс̂ѧ словеса̀ ꙗ҆́же гл҃а г҃ь, сътвори́мъ и҆ послꙋш́аем꙽.
и҆ написа̀ моѷсїи вс̂ѧ словеса̀ гн҃ѧ·

ѻ҆бꙋт́рѣвъ же моѷсїи заѹ҆́тра, създа̀ ѻ҆лтарь под̑ го́рою, и҆ в҃і, ка́менїи, въ в҃і, племе́нъ і҆и҃левъ.
и҆ распꙋстѝ ю҆́ноты сн҃овъ і҆и҃левъ, и҆ принесо́ша вс̂есъжеже́наѧ, и҆ положи́ша требꙋ сп҃се́нꙋю г҃ꙋ бг҃ꙋ телца̀·

Въземъ же моѷсїи полъ кро́ви вълїѧ̀ въ ча́шꙋ, по́лъ же крови възлїѧ на ѻ҆л꙽та́рь, възе́мъ кни́ги завѣтныѧ почтѐ лю́демъ въ ѹ҆́ши.
и҆ реко́ша вс̂и, вс̂е е҆же гл҃а г҃ь сътвори́мъ и҆ послꙋш́аемъ·

Възе́мъ же моѷсїи кро́вь ѻ҆кропѝ лю́ди, и҆ рече, с̂и кро́вь завѣта е҆же завѣща̀ г҃ь къ вамъ, ѻ҆ всѣ́хъ словесе́хъ сихъ·

И҆ възы́иде моѷсїи, и҆ а҆аро́нъ, и҆ нада́въ, и҆ а҆виѹ҆́дъ, и҆ о҃, ѿ ста́рець і҆и҃левъ, и҆ видѣша мѣсто и҆деже стоѧ̀ б҃ъ і҆и҃левъ, и҆ под нога́ма е҆го ꙗ҆́ко дѣло камени сапѳи́ра, и҆ ꙗ҆́ко видѣнїе тверди нбс̑҇ныѧ свѣт́лы, і҆ избра́нныхъ і҆и҃левъ не раз꙽гласѝ н̂и е҆ді́н же, ꙗ҆́ви́шасѧ на мѣстѣ бж҃їи і҆ ѧ́ша, и҆ пи́ша·

И҆ рече г҃ь къ моѷсїю, възы́ди къ мн̂ѣ на горꙋ̀ и҆ ста́ни т̂ꙋ, и҆ дам̑ ти до́сцѣ ка́меннѣ, зако́нъ и҆ заповѣди, ꙗ҆́же писа́хъ зако́нъ положи́ти и҆мъ·

И҆ въста́въ моѷсїи, і҆ и҆с҃ предъстоѧ́ше е҆мꙋ, въшд̑еше же на горꙋ̀ бж҃їю, и҆ ста́рцемъ рѣша.
пожди́те въ молча́нїи т̂ꙋ, до́ндеже възврати́мсѧ к вамъ, с̂е же а҆аро́нъ и҆ ѻ́ръ, с ва́ми, а҆ще комꙋ слꙋчи́тсѧ прѧ̀, да и́дꙋтъ к нима·

И҆ взы́де моѷсїи на горꙋ̀ и҆ покры̀ ѻ҆́блакъ горꙋ̀, и҆ сни́де слава бж҃їѧ на горꙋ̀ сина́искꙋю и҆ покры̀ еѧ̀ ѻ҆́блакъ, шесть дн҃їи·

И҆ възва̀ г҃ь моѷсїѧ въ дн҃ь седмы́и.
ѿ среды̀ ѻ҆́блака ѻ҆бли́чїе же славы гн҃ѧ ꙗ҆́ко ѻ҆́гнь пламенꙋ́ѧ, верхꙋ̀ горы̀ прд̑е сн҃ы і҆и҃левы.
и҆ вни́де моѷсїи, въ средꙋ ѻ҆́блака, и҆ въстꙋпѝ на горꙋ̀.
и б̂ѣ тꙋ̀ на горѣ, м҃, дн҃їи, и҆ м҃, но́щїи·

Глв̑҇а, к҃е·

И гл҃а г҃ь къ моѷсїю, рекїи, рцы̀ сн҃омъ і҆и҃левымъ, да принесꙋтъ м̂и нача́тки ѿ всего̀ и́мже възлюби́сѧ въ срд̑цы и҆хъ.
възмѣте нача́тки моѧ̀·

Се же е҆сть нача́тки, и҆же возмете ѿ ни́хъ зла́то, сребро̀ мѣдь, и҆ синетꙋ̀, и҆ багрѧни́цꙋ и҆ чрьвлени́цꙋ, сꙋгꙋ́бо прѧ́денꙋю, и҆ виссо́нъ тка́ныи, и҆ во́лнꙋ ко́зїю, и҆ ко́жа ѻ҆́внѧ, ѻ҆чрьмне́ны, кожа си́нѧ, и҆ дре́во негнию҆щее·

Ка́мени сардиѻ́нъскїѧ, и҆ еле́и къ свѣти́лом꙽ ѳимїꙗ҆мъ ѻ҆ма́занъ въ и҆еле́и, въ сложе́нїе ѳимїѧ́мꙋ.
и҆ ка́мени въ ваѧ́нїе, е҆пими́да ѻ҆кри́нꙋ, и҆ поди́ра·

И҆ да сътвори́ши м̂и ѻ҆сщ҃енїе, и҆ ꙗ҆́влю́сѧ въ васъ, и҆ сътвори́ши м̂и по всемꙋ̀ е҆ли́ко а́зъ покажꙋ тебѣ на горѣ ѻ҆́бразъ хра́мꙋ, и҆ ѻ҆́бразъ съсꙋдъ е҆го всх̑ѣ.
сице да сътвори́ши·

И҆ сътвори́ши киѻ́тъ свѣденїа ѿ древ̑҇ негнию́щихъ двою лактїи, и҆ по́лъ въ длъготꙋ.
лакти же, и҆ по́лъ въ широтꙋ.
ла́кти же и҆ по́лъ въ высотꙋ̀, и҆ позлати́шї и҆̀ зла́томъ, чи́стымъ вънꙋтрѹ҆дꙋ, и҆ вн̂ѣѹ҆дꙋ, позлати́ші и҆̀·

И҆ сътвори́ши на вер̑҇хꙋ е҆го вѣнецъ, зла́томъ ѻ҆бою́дꙋ, и скꙋе́ши е҆мꙋ, ѻ҆́боди четы́ри зла́ты, и҆ възложи́ши на четы́ри ѹ҆глы̀ е҆мꙋ дв̂ѣ ѻ҆боди на е҆ді́нъ ѹ҆голъ, двѣ же на вторы́и ѹ҆голъ·

Сътвори́ши же носи́ла ѿ древа негнию́ща и҆ позлати́шї и҆̀ зла́томъ чи́стым̑, и҆ въста́виши носи́ла въ ѻ҆боди ꙗ҆́же сꙋть на ѹ҆глѣхъ киѻ́тꙋ, да носит̑сѧ и҆́ми киѻ́тъ завѣта, и҆ да бꙋ́дꙋтъ носи́ла незы́блющисѧ, и́ положи́ши въ киѻ́тъ завѣтъ, ꙗ҆́же дамъ тебѣ·

И҆ да сътвори́ши покро́въ ѻ҆цыще́нїю зла́томъ, чи́стымъ, двою лактїи по́лъ въ долготꙋ̀.
ла́кти, и҆ по́лъ въ широтꙋ̀.
и҆ сътвори́ши дв̂а херꙋви́ма злата, и҆зва́ѧна, и҆ възложи́ши ѧ҆̀ на́ полы ѹ҆́глꙋ ѻ҆бою̀ ѻ҆цыще́нїѧ.
да сътвори́тсѧ херꙋвим̑ е҆динъ ѿ ѹ҆́гла е҆динаго, а҆ дрꙋгїи ѿ ѹ҆́гла втора́го ѻ҆цыще́нїю·

Такоже сътвори́ши дв̂а херꙋви́ма ѿ ѻ҆бою̀ ѹ҆́глꙋ̀.
раскрылѧ́ющисѧ врьхꙋ̀ ѻ҆сенѧ́юще кры́лы свои́ми ѻ҆цыще́нїе, лице́ же е҆ю̀ к себѣ къ ѻ҆цыще́нїю, и҆ да възложи́ши ѻ҆цыще́нїе, на киѻ́тъ врьхꙋ, въ киѻ́тъ же да вложи́ши свѣдѣнїѧ, ꙗ҆́же дамъ тебѣ·

И҆ възвѣщꙋ́сѧ тебѣ ѿтꙋдꙋ̀, и҆ гл҃ю тебѣ съвы́ше ѻ҆цыще́нїѧ, междꙋ̀ двѣма херꙋви́мома, ꙗ҆́же сꙋть над̑ киѻ́томъ свѣдѣ́нїѧ, и҆ по всемꙋ̀ е҆ли́ко заповѣдахъ тебѣ къ сн҃омъ і҆и҃левымъ·

И҆ сътвори́ши трапе́зꙋ ѿ дре́ва негнию́ща двою̀ лактїи въ долготꙋ̀, ла́кти же в широтꙋ̀, ла́кти же и҆ полъ въ высотꙋ̀ и҆ позлати́вши зла́том чистым̑, и҆ сътвори́ши е҆мꙋ покро́въ зла́тъ.
ѻ҆сѧза́ющи ѻ҆боѧ́мо, и҆ сътвори́ши вѣне́цъ пѧ́ди ѻ҆боѧ́мо, и҆ сътвори́ши ѻ҆сѧза́юща ѻ҆боѧ́мо вѣнца̀·

И҆ сътвори́ши, д҃, ѻ҆́боди зла́ты, и҆ възложи́ши, д҃, ѻ҆́боди на ѹ҆́глы но́гъ е҆ѧ̀.
под̑ѻ҆бъе́млющим꙽ вѣнце́мъ, и҆ да бꙋ́дꙋтъ ѻ҆́боди въ ѻ҆бнѧ́тїе, ꙗ҆коже въздвиза́ти на них̑ трапе́зꙋ·

И҆ сътвори́ши носи́ла е҆ѧ̀, ѿ дре́ва негнию́ща, и҆ позлати́ши златомъ чи́стымъ, и҆ въздви́гнетсѧ на нихъ трапе́за·

И҆ сътвори́ши блю́да, и҆ ѳимїа́микъ, и҆ съсꙋ́ды тре́бныѧ, и҆ ча́ша в нѧ́же влива́еши, ѿ зла́та чс̑҇та.
да сътвори́ши ѧ҆̀, и҆ положи́ши на трапе́зѣ хлѣбы прд̑еложе́нїѧ предо мно́ю прс̑҇но·

И҆ да сътвори́ши свѣти́лникъ ѿ зла́та чи́ста, ва́ѧнно сътвори́ши свѣти́лникъ, и҆ сте́блїе е҆го, вѣтви е҆го, и҆ ча́ша е҆го, и҆ крꙋ́ѕи е҆го, и҆ цвт̑ѣцы̀ е҆го ѿ него да бꙋ́дꙋт꙽·

шесть вѣт́вїи, и҆сходѧ́щи ѿ странꙋ̀ свѣти́лнꙋю.
тр̂и вѣтви свѣти́лныѧ, ѿ страны̀ е҆диноѧ, тр̂и же вѣтви свѣти́лныѧ ѿ страны̀ вторы́ѧ, и҆ тр̂и ча́ши въ ѻ҆́бразъ ѻ҆рѣ́ха въ е҆ди́нои вѣтви крꙋг꙽ и҆ цвѣтецъ, та́коже по шестѝ вѣтвїи и҆сходѧ́щихъ, ѿ свѣти́ла·

Въ свѣти́лѣ же по тр̂и ча́ши въ ѻ҆́браз̑ ѻ҆рѣ́ха, въ е҆ди́нои вѣтви крꙋ́ѕи и҆ цвѣтцы е҆го, крꙋ́гъ под̑ двѣма вѣтвѣма ѿ него.
и҆ крꙋ́гъ под̑ четы́рма вѣтви е҆ѧ̀, та́коже и҆ по шестѝ вѣтвемъ и҆сходѧ́щимъ ѿ свѣти́ла, и҆ въ свѣти́лѣ четы́ри ча́ши въ ѻ҆́браз̑ ѻ҆рѣ́ха, вѣтви и҆ крꙋзи ѿ неѧ̀, да бꙋдꙋтъ ѹ҆ва́ѧна, ѿ е҆ди́наго злата чиста·

И҆ да сътвори́ши свѣти́лъ се́дмь, и҆ въста́виши свѣти́ла е҆го, да свѣтѧтъ.
ѿ е҆ди́наго лица̀ е҆мꙋ и҆ щипцы̀ е҆го, и҆ под̑ста́вы е҆го ѿ злата чиста сътвори́ши.
тала́нтом̑ злата чиста, сътвори́ши вс̂ѧ съсꙋ́ды сїѧ·

Смотрѝ, да сътвори́ши по ѹ҆каза́нномꙋ тебѣ на горѣ̀·

Глв̑҇а, к҃ѕ·

Хра́мъ же да сътвори́ши ѿ десѧтѝ ѻ҆по́нъ, ѿ багрѧни́ца прѧ́дены, и҆ ѿ синеты̀, и҆ ѿ чрьвлени́ца прѧ́дены, и҆ мно́жествомъ херꙋви́мъ дѣ́ломъ шве́нным̑ да сътвори́ши ѧ҆̀, въ долготꙋ ѻ҆по́ны е҆ди́ноѧ, к҃. и҆ и҃, ла́ктїи.
а҆ широта̀ е́й, д҃, ла́ктїи.
и҆ да бꙋ́детъ ѻ҆по́на е҆ди́ноѧ мѣры.
та́коже всѣмъ ѻ҆по́намъ да бꙋ́дет̑·

Пѧ́ть же ѻ҆по́нъ, да бꙋ́дꙋтъ вкꙋ́пѣ съдрьжа́щисѧ, дрꙋ́га ѻ҆́ дрꙋзѣ.
и҆ пѧ́ть ѻ҆по́нъ съдрьжа́щисѧ дрꙋ́га ѻ҆́ дрꙋзѣ·

И҆ сътвори́ши пе́тлѣ съ синеты̀, ѹ҆ кра́ѧ ѻ҆по́ны е҆ді́наго конца̀ въ сложе́нїе, си́це же сътвори́ши на кра́и ѻ҆по́ны вы́шнеѧ, къ сложе́нїю второ́мꙋ, н҃ же сътвори́ши пе́тлей, е҆ді́нои ѻ҆по́ны, н҃. пе́тлеи да сътвори́ши ѿ кра́ѧ ѻ҆по́ны, по сложе́нїю второ́мꙋ лицем̑ къ лицꙋ̀ състоѧ́щаасѧ к себѣ ка́ѧждо·

И҆ сътвори́ши, н҃. крючко́въ зла́тыхъ, и҆ съвокꙋпи́ши ѻпо́ны дрꙋ́гъ ко́ дрꙋзѣ крючка́ми, и҆ бꙋдетъ храмъ е҆ді́нъ·

И҆ сътвори́ши ѻ҆по́нъ, а҃і, ѿ во́лны въ покро́въ храмꙋ, длъгота̀ ѻ҆по́ны е҆ді́ноѧ, да бꙋдетъ, л҃, лако́тъ, д҃ же ла́кти широта̀ ѻ҆по́ны е҆ді́ноа, и҆ во е҆ді́нꙋ мѣрꙋ, та́ко да бꙋдетъ, а҃і, ѻ҆по́нъ·

И҆ съвокꙋпи́ши, е҃, ѻ҆по́нъ въкꙋпѣ, и҆ ше́сть ѻ҆по́нъ въкꙋпѣ, и҆ пригне́ши ѻ҆по́нꙋ шестꙋ́ю въ вхо́дъ храма·

И҆ да сътвори́ши пе́тлеи.
н҃, на кра́и ѻ҆по́ны е҆ді́ноѧ, сре́днѧ по сложе́нїю, н҃ да сътвори́ши пе́тлей на кра́и ѻ҆по́ны по съвокꙋпле́нїю вторы́ѧ·

И҆ та́ко сътвори́ши крючков̑҇ мѣдѧн̑҇ н҃, съвокꙋпи́ши крючки с петлѧми ве́рхними, и҆ да совъкꙋпи́ши ѻ҆по́ны, и҆ бꙋдетъ е҆ді́но·

И҆ да положи́ши и҆збыва́ющее ѻ҆по́нъ хра́мныхъ, закры́ти за́днѧѧ храмꙋ, лакти е҆ді́наго ѿ сего̀ ла́кти же ѿ дрꙋга́го, ѿ и҆збыва́ющихъ в долготꙋ̀ ѻ҆по́нъ хра́мныхъ, и҆ да бꙋдетъ покрыва́ѧ съ странꙋ̀ хра́ма, ѿсю́дꙋ и҆ ѿѻ҆нꙋ́дꙋ, да покры́етъ·

И҆ да сътвори́ши покро́въ храмꙋ, ко́жами ѻ҆́внѧми, червле́ными, и҆ све́рхꙋ покро́въ ко́жами си́нѧми·

И҆ да сътвори́ши столпы̀ хра́мꙋ, ѿ дре́въ негнию́щихъ, і҃, ла́ктїи въ высотꙋ̀ сто́лпъ е҆дінъ, ла́кти же е҆ді́наго и҆ по́лъ.
въ ширинꙋ̀ столпꙋ̀ е҆ді́номꙋ.
дв̂а ла́кти столпа̀ е҆ді́наго, ѿтища́щꙋ дрꙋгъ ѿ дрꙋга, та́ко сътворѝ всѣмъ столпо́мъ хра́мным꙽·

И҆ да сътвори́ши сто́лпы храмꙋ, к҃, ѿ ѹ҆́гла сѣ́вернаг̑҇.
м҃, же стоѧ́лъ и҆мъ сре́брѧнъ да сътвори́ши двѣма̀ десѧтма̀ столпом̑ дв̂ѣ стоѧ́лѣ е҆ді́номꙋ столпꙋ̀, на ѻ҆бою̀ концꙋ̀ е҆мꙋ.
и҆ дв̂ѣ стоѧ́лѣ е҆ді́номꙋ столпꙋ̀ на ѻ҆бою̀ концꙋ̀ въ ѹ҆́глѣ вторѣмъ, къ сѣверꙋ, к҃, столпов̑҇, м҃. же стоѧ́лъ и҆мъ сре́бреныхъ, двѣ стоѧ́лѣ столпꙋ̀ е҆ді́номꙋ, на ѻ҆бою̀ концꙋ̀ е҆мꙋ, дв̂ѣ же стоѧ́лѣ е҆ді́номꙋ на ѻ҆бою̀ концꙋ̀ е҆мꙋ·

И҆ съ зад̑и̑ хра́мꙋ по странѣ̀ ꙗ҆́же къ мо́рю, да сътвори́ши ше́сть столпо́въ·

два ж̑ столпа сътвори́ши в ѹ҆́глꙋ храма ѿ за́пада, и҆ да бꙋ́дꙋтъ ра́вна, ѿ до́лꙋ и҆ до верха̀, въ соста́въ е҆ді́нъ, та́ко сътвори́ши ѻ҆бѣма ѹ҆́глома ра́вна да бꙋдꙋтъ·

И҆ бꙋдетъ, и҃. столпо́въ, и҆ стоѧ́ла и҆хъ сребрѧ́на, ѕ҃і, дв̂ѣ стоѧ́лѣ столпꙋ е҆ді́номꙋ, и҆ дв̂ѣ стоѧ́лѣ столпꙋ̀ е҆ді́номꙋ.
на ѻ҆бою̀ концꙋ̀ е҆мꙋ·

И҆ да сътвори́ши разво́ры, ѿ древе́съ негнию́щихъ, е҃, разво́ръ столпꙋ̀ е҆ді́номꙋ, ѿ е҆ді́ноѧ страны̀ хра́ма, е҃ же разво́ръ столпꙋ̀ второ́мꙋ ѹ҆́глꙋ хра́ма, е҃ же разво́ръ столпꙋ̀ заднемꙋ ѹ҆́глꙋ хра́ма, и҆же къ мо́рю·

Сре́днѧѧ же межи столпы̀, дв̂а прохо́дѧтъ ѿ е҆ді́наго ѹ҆́гла, въ дрꙋгїи ѹ҆́гол꙽·

Столпы̀ же, да позлати́ши зла́томъ, ѻ҆́боди же сътвори́ши зла́ты, в нѧж̑ вложи́ши разво́ры.
позлати́ши, и҆ разво́ры зла́томъ, и҆ съста́виши хра́мъ по ѻ҆́бразꙋ показа́нномꙋ тебѣ на горѣ̀·

Сътвори́ши завѣсꙋ ѿ синеты̀ и҆ порфи́ры, и҆ червлени́ца и҆ вис꙽со́нꙋ прѧ́денаго дѣломъ тка́номъ влаче́но.
да сътвори́ши е́й, херꙋвим̑, и҆ распростре́ши на четы́рехъ столпх̑ѣ негнию́щихъ, и҆ позлаще́ныхъ зла́томъ и҆ верхѝ и҆хъ зла́ты, и҆ стоѧ́ла и҆хъ, д҃. сре́брена, и҆ повѣ́сиши завѣсꙋ на столпѣ́хъ·

Внесе́ши т̂ꙋ внꙋтръ завѣсы киѻ́тꙋ свѣдѣнїѧ, и҆ да раздѣлѧ́етъ завѣса междꙋ ст҃ынѧ, и҆ междꙋ̀ ст҃аѧ ст҃ыхъ.
и҆ закры́еши завѣсою, киѻ́тъ свѣдѣнїа въ ст҃аѧ ст҃ыхъ·

И҆ поста́виши трапезꙋ вн̂ѣѹ҆́дꙋ завѣсы, и҆ свѣти́ло прѧ́мо трапе́зы, на странѣ̀ хра́ма ꙗ҆́же къ ю́гꙋ.
трапезꙋ же поста́виши на странѣ̀ хра́мꙋ, ꙗ҆́же къ сѣверꙋ·

да сътвориши закро́въ въ две́рехъ, ѿ синеты̀, и҆ порфи́ры, и҆ червлени́ца съпрѧ́дены, и҆ виссо́нꙋ тка́наго, дѣломъ пестрѧ́щаго·

И҆ да сътвори́ши завѣсѣ пѧ́ть столпъ ѿ дре́въ негнию́щих̑, и҆ позлати́ши и҆хъ зла́том̑, и҆ верхѝ их̑ зла́ты, и҆ да съдѣ́лаеши им̑, е҃ стоѧлъ мѣдѧнъ.

Глв̑҇а, к҃з·

И да сътвори́ши ѻлтарь ѿ древ̑҇ негнию́щихъ, е҃, лако́тъ въ долготꙋ̀, е҃ же лако́тъ в широтꙋ̀, на д҃, ѹ҆́глы, да бꙋ́детъ ѻ҆лта́рь, г҃, ла́кти высота̀ е҆го.
и҆ да сътвори́ши ро́ги, на четы́рехъ ѹ҆́глѣ́хъ, и҆з него̀ да бꙋ́дꙋтъ ро́ги, и҆ покры́еши е҆̀ мѣдїю.
и҆ да сътвори́ши вѣне́цъ ѻ҆лтарꙋ, и҆ покро́въ е҆го, и҆ па́ивица е҆го, и҆ ви́лицы е҆го, кади́лникы е҆го, и҆ вс̂ѧ съсꙋ́ды е҆го, да сътвори́ши е҆мꙋ мѣдѧны·

И҆ да сътвори́ши ѻ҆́гнище въ подо́бїе мре́жи, и҆ сътвори́ши ѻ҆́гнищꙋ, д҃, ѻ҆́боди мѣ́дѧны, на д҃ ѹ҆́глы, и҆ подложи́ши под̑ ѻ҆́гнище ѻ҆л꙽тарѧ, ни́же.
и҆ бꙋдетъ ѻ҆́гнище до среды̀ ѻ҆лтарѧ·

И҆ да сътвори́ши ѻ҆лтарю носи́ла, по странѣ̀, ѿ дре́весъ негнїю́щихъ, и҆ ѻ҆кꙋ́еши и҆̀ мѣдїю.
и҆ вложи́ши носи́ла въ ѻ҆́боды, и҆ да бꙋдꙋтъ носи́ла ѻ҆лтарю, на дв̂ꙋ стра́нахъ под̑держа́ти е҆го, и сътвори́ши е҆го внꙋт́ръѹ҆́дꙋ то́щъ съ до́скъ по ѹ҆каза́нномꙋ тебѣ на горѣ̀, та́ко сътвори́ши и҆̀·

И҆ да сътвори́ши притво́ръ храмꙋ на ѹ҆глы, и҆же на въсто́къ, къ сѣ́верꙋ, и҆ да бꙋдꙋтъ ѻ́поны притво́рꙋ съ вис꙽со́нꙋ тка́наго.
долгота̀, сто лако́тъ, ѹ́глꙋ е҆ді́номꙋ, и҆ столпо́въ и҆хъ, к҃, и҆ стоѧ́лъ и҆хъ, к҃. мѣдѧныхъ крючкѝ и҆хъ, и҆ ѻ́боди их̑ сре́бренѣ·

Си́це же въ ѹ҆́глѣ къ ю҆́гꙋ ѻ҆по́ны, р҃. лако́тъ въ долготꙋ̀, и҆ столпо́въ е҆мꙋ, к҃, и҆ стоѧ́ла е҆мꙋ, к҃. мѣ́дѧны.
ѻ҆́боди и҆ верхѝ сто́лпнїи, и҆ вс̂ѧ стоѧ́ла посре́брена сребро́мъ·

широта́ же притво́рꙋ ꙗ҆́же е҆сть къ мо́рю ѻ҆по́ны, н҃, лако́тъ.
столповъ е҆го і҃, и҆ стоѧ́ла и҆хъ, і҃·

И҆ е҃і лако́тъ высота̀ ѻ҆по́нъ ѹ҆́глꙋ е҆ді́номꙋ, столпы̀ и҆хъ, г҃, и҆ стоѧ́ла и҆хъ, г҃·

ѹ҆́глꙋ же второ́мꙋ ѻ҆по́нъ, е҃і, лакот̑, высота̀, столпы̀ и҆хъ, г҃. и҆ стоѧ́ла и҆хъ, г҃, вратомъ притворным꙽ завѣса, к҃, лако́тъ высота̀, ѿ синеты̀, и҆ порфи́ры, и҆ червлени́ца, и҆ виссо́нꙋ прѧ́денаго, пестре́нїемъ шве́ннымъ.
столпы̀ еѧ̀, д҃. стоѧ́ла еѧ̀, д҃, вс̂и столпы̀ притво́рные ѻ҆боѧ́мо ѻ҆ко́вано сребро́мъ, и҆ верхѝ и҆хъ сре́брени, и҆ стоѧ́ла и҆хъ мѣдѧны, долгота́ же притво́рꙋ, р҃, до, р҃, широта́ же, н҃. до, н҃, высота́ же, е҃, лако́тъ ѿ виссо́нꙋ прѧ́денаго, стоѧ́ла же и҆хъ мѣ́дѧны и҆ вс̂ѧ ѹ҆́тварь и҆ вс̂и съсꙋды и҆ колкѝ притво́рꙋ мѣдѧны, и҆ сътвори́ши ризы, съ синеты̀, и҆ порфи́ры, и҆ червлени́цы, и҆ да слꙋ́жиши в ни́хъ въ ст҃ыни·

Ты́ же заповѣждь сн҃ом꙽ і҆и҃левымъ да въ́змꙋтъ себѣ і҆еле́й ѿ ма́сличїѧ, чи́сто съмле́но въ свѣти́ла, и҆ да свѣтитъ въ хра́мѣ свѣдѣ́нїѧ.
всегда̀ вн̂ѣѹ҆́дꙋ завѣсы, ꙗ҆же ви́ситъ ѹ҆ завѣта мое҆го да въжиза́етъ е҆ѧ̀, а҆аро́нъ, и҆ сн҃ове е҆го съ ве́чера до заѹ҆́трїѧ прд̑е гм҃ъ въ зако́нъ вѣ́чныи, въ ро́ды ва́ша ѹ҆ сн҃овъ і҆и҃левъ·

Глв̑҇а, к҃и·

Ты́ же приведѝ к себѣ, а҆аро́на бра́та твое҆го и҆ сн҃ы е҆го, ѿ сн҃овъ і҆и҃левъ, жре́ти мн̂ѣ, а҆аро́на, и҆ нада́ва, и҆ а҆виѹ҆́да, и҆ е҆лиа҆за́ра, и҆ фама́ра, сн҃ы а҆аро́нѧ·

И҆ да сътвори́ши ри́зы ст҃ы, а҆аро́нꙋ бра́тꙋ твое҆мꙋ на честь и҆ сла́вꙋ·

Ты́ же гл҃и къ всѣмъ премꙋ́дрымъ ѹ҆́мнымъ, ѧж̑ напо́лнихъ дх҃а мꙋ́дрости, и҆ смышле́нїѧ, и҆ да сътворѧт̑ ри́зы ст҃ы, а҆аро́нꙋ въ ни́хже въ ст҃омъ да жре́тъ мнѣ·

Си́ѧ же ри́зы да сътворѧ́тъ на пе́рси е́й ри́зꙋ ве́рхнюю, и҆ до́лгꙋю ри́зꙋ, и҆ ри́зꙋ треснови́тꙋ.
и҆ нагла́вїе, и҆ по́ѧсъ.
и҆ да сътворѧ́т꙽ ри́зы ст҃ы а҆а҆ро́нꙋ, и҆ сн҃омъ е҆го, жрѣти мн̂ѣ·

Сїи же да во́змꙋтъ зла́то, и҆ синетꙋ̀, и҆ порфи́рꙋ и҆ червлени́цꙋ, и҆ виссо́нъ.
и҆ да сътворѧ́тъ ризꙋ ве́рхнюю ѿ виссо́нꙋ съпрѧ́денаго дѣ́ло шве́нно пестрѧ́ще.
дв̂ѣ ри́зы ве́рх꙽нїѧ да бꙋ́дета.
съдержа́щисѧ, дрꙋ́га дрꙋ́ѕѣ.
на ѻ҆́бѣ странѣ и҆сходѧ́ще·

Наволоче́нїе же ри́зъ ве́рхних̑ е҆же е́сть на не́й по сътворе́нїю еѧ̀, да бꙋ́детъ ѿ зла́та чи́ста, и҆ ѿ синеты̀, и҆ багрѧни́ца, и҆ червлени́ца, сътка́ныѧ, и҆ виссо́нꙋ прѧ́денаго·

И҆ воз́меши ка́мени дв̂а ка́менѧ змара́гда, і҆ и҆зва́еши на них꙽ и҆мена̀ сн҃овъ і҆и҃левъ.
ѕ҃, и҆ме́нъ на ка́мени е҆ді́номъ, ѕ҃ же и҆ме́нъ на ка́мени дрꙋго́мъ.
по ро́дꙋ их̑ дѣ́ло ка́менныѧ хи́трости, ва́ѧнїе зна́менїѧ ѻ҆́ба ка́менѧ и҆мене́мъ сн҃овъ і҆и҃левъ·

И҆ положи́ши ѻ҆́ба ка́менѧ, на ѻ҆́бѣ ра́мѣ ра́мныхъ ри́зъ ка́менѧ, въ па́мѧть сн҃овъ і҆и҃левъ.
и҆ въздви́гнетъ а҆а҆ро́нъ, и҆мена̀ сн҃овъ і҆и҃лев꙽ прд̑е гм҃ъ, на ѻ҆́бѣ ра́мѣ своѝ въ па́мѧть ѿ ни́хъ·

И҆ да сътвори́ши дв̂а щита̀, ѿ зла́та чи́ста, и҆ да сътвори́ши двѣ тресно́вици ѿ зла́та чи́ста, съмѣше́нїе цвѣтꙋ, дѣ́ло плѣте́нїѧ, и҆ положи́ши треснови́ца плете́нїи на щи́тꙋ, на ра́мꙋ их̑ съпрѧжѐ·

И҆ да сътвори́ши сло́во сꙋ́дное, дѣ́ло пестрѧ́щаго, по съста́вꙋ ри́зы, сътвори́ши с̂е ѿ зла́та, и҆ синеты̀ и҆ багрѧни́ца, и҆ червлени́ца съпрѧ́дены, и҆ виссо́нꙋ тка́наго.
сътвори́ши же на четы́ри ѹ҆́глы, да бꙋдетъ сꙋгꙋбъ.
пѧ́ди въ долготꙋ̀, пѧ́ди ж̑ въ широтꙋ̀·

И҆ наши́еши на не́й швы̀ по ка́мени, четы́рми рѧды, рѧ́дъ ка́менїи да бꙋ́детъ, сардїи топаѕиѻ́нъ змара́гдъ, рѧ́дъ е҆ді́нъ.
рѧ́д꙽ же вторы́и, а҆нѳра́ксъ, и҆ санфи́ръ и҆ а́списъ.
рѧ́д же тре́тїи лигириѻ́н꙽ и҆ а҆хати́съ, и҆ а҆меѳисто́съ·

Рѧ́д же д҃, хрисолиѳо́съ и҆ ви́риллиѻ́нъ, и҆ ѻ҆нихиѻ́нъ, ѻ҆бѧ́та зла́томъ, и҆ съплете́на въ зла́тѣ, да бꙋ́детъ по́ рѧдꙋ и҆хъ·

Ка́мени же да бꙋ́дꙋтъ ѿ и҆ме́нъ, в҃і, сн҃овъ і҆и҃левъ, прд̑е гм҃ъ на дв̂ѣ ра́мѣ е҆го, в҃і, по и҆менем̑ и҆хъ, и҆ по́ родѣхъ и҆хъ, въ ваѧ́нїих̑ зна́менїи, ко́ждо и҆ме́немъ да бꙋдт̑ꙋ в҃і, племе́нъ, и҆ да сътвори́ши въ сло́вꙋ тре́сни плете́ны, и҆ ѻ҆бли́чїем꙽ вѣри́жнымъ ѿ зла́та чи́ста·

И҆ възметъ а҆аро́нъ и҆мена̀ сн҃овъ і҆и҃левъ, на сло́вѣ сꙋднѣмъ на пе́рсехъ входѧ́ще, въ сщ҃е́нїе ст҃ое, на па́мѧть прд̑е бм҃ъ·

И҆ да положи́ши на словесѣ̀ сꙋ́днѣм꙽ тре́сны плѣте́нїѧ, на ѻ҆́ба ѹ҆́гла слове́снаѧ възложи́ши.
и҆ ѻ҆́ба щита̀ възложи́ши на ѻ҆́бѣ ра́мѣ, ри́зъ съпрѧ́женїѧ, възложи́ши на сло́во сꙋ́дное, проповѣ́данїе, і҆ и́стин̑҇нꙋ.
и҆ да бꙋдетъ на пе́рсехъ а҆аро́нꙋ.
е҆гда̀ вни́детъ въ ст҃ое предъ б҃а.
и҆ да но́ситъ а҆аро́нъ, сꙋ́ды сн҃овъ і҆ил҃евъ на пе́рсехъ прд̑е лице́мъ гн҃имъ всегда̀·

И҆ да сътвори́ши ри́зꙋ ѹ҆́трьнюю до землѧ̀ си́ню, и҆ да бꙋ́детъ ѹ҆́стїе посредѣ, и҆ ѻ҆жере́лїе ѿ него̀, ѻ҆меты и҆мѣ́а ѻ҆бою́дꙋ ѻ҆жере́лїѧ дѣло шве́нно, съста́въ шве́нъ ѿ него̀ да не раскрилѧ́етсѧ·

И҆ да сътвори́ши на ѻ҆ме́тѣ ри́знѣмъ до́лѣ, а҆ки ши́пка цвѣтꙋщ́а, пꙋ́гвица съ синето́ю и҆ багрѧни́цею, и҆ червленицею съпрѧ́деною и҆ вис꙽сонꙋ тканаго на ѻ҆ме́тѣ ри́зы ѻ҆бою҆́дꙋ·

В то́и же ѻ҆́браз̑ пꙋ́гвичьныи, и҆ златы звонца, межд̑ꙋ си́ми ѻ҆бою́дꙋ, при пꙋ́гвицы зла́тъ звоне́цъ, и҆ цвѣтъ на ѻ҆ме́тѣ ри́знѣмъ, ѻ҆боꙗ҆́мо.
и҆ да бꙋдетъ а҆аро́нꙋ, е҆гда̀ слꙋжитъ.
ѹ҆слы́шитсѧ гла́съ е҆го входѧ́щи въ сщ҃енїе пред̑ гм҃ъ, і҆ и҆сходѧ́щи да не ѹ҆́мретъ·

И҆ да сътвори́ши доскꙋ зла́тꙋ чи́стꙋ, и҆ да сътвори́ши в не́и ѻ҆́бразъ зна́менїѧ ѻ҆сщ҃енїѧ гн҃ѧ·

И҆ да възложи́ши е҆ѧ̀ на синетꙋ съпрѧ́денꙋ.
и҆ да бꙋдетъ на ѹ҆вѧ́слѣ, съ предѝ ѹ҆вѧ́сла да бꙋдетъ.
и҆ да бꙋдетъ на челѣ а҆аро́нꙋ, и҆ да ѿи́метъ а҆аро́нъ съгрѣше́нїѧ и҆хъ, е҆ли́коже да ѻ҆ст҃ѧтъ сн҃ове і҆ил҃евы всего̀ дѣѧ́нїѧ ст҃ыхъ.
и҆ да бꙋ́детъ на челѣ̀ а҆аро́нꙋ всегда̀, прїѧ́то и҆м꙽ предъ гм҃ъ·

тре́снови ри́зъ, ѿ черьвлени́ца, и҆ да сътвори́ши клобꙋ́къ червле́нъ, и҆ по́ѧсъ да сътвори́ши дѣ́ла пестрѧ́щаго.
и҆ сн҃омъ а҆аро́новымъ, да сътвори́ши ри́зы, и҆ по́ѧсы, и҆ клобꙋкы, да сътвори́ши им̑ въ чес̑҇ и҆ сла́вꙋ.
ѻ҆блецы же в н̂ѧ а҆аро́на брата твое҆го, и҆ сн҃ы е҆го с ни́мъ, и҆ пома́жеши ѧ҆̀, і҆ и҆сполниши рꙋцѣ и҆хъ, и҆ ѻ҆ст҃иши ѧ҆̀, да м̂и жертвꙋютъ·

И҆ да сътвори́ши и҆мъ надра́гы полотнѧ́ны, покрыва́ти стыдѣнїа плоти и҆хъ, ѿ бе́дръ даже до сте́гнъ и҆ да ѧ̀ и҆́мать а҆аро́нъ, и҆ сн҃ове е҆го, е҆гда̀ въхо́дѧтъ въ храм̑ свѣдѣнїа·

І҆ егда̀ прихо́дѧтъ слꙋжи́ти, къ жертвени́кꙋ ст҃ыни.
да не възложа́тъ на сѧ грѣха̀ да не ѹ҆́мрꙋтъ.
въ зако́нъ вѣчныи е҆мꙋ, да бꙋ́детъ с̂е и҆ сѣмени е҆го по не́мъ·

Глв̑҇а, к҃ѳ·

Се́ же е҆сть е҆же сътвори́ши им̑ и҆ ѻ҆ст҃иши ѧ҆̀ ꙗ҆́ко жре́ти и҆м꙽ мн̂ѣ·

да по́имеши теле́цъ е҆ді́нъ ѿ говѧ́дъ, и҆ ѻ҆вна̀ дв̂а чи́ста, и҆ хлѣбы прѣсны смѣшены с ма́сломъ древѧным̑.
и҆ ѻ҆прѣснокы пома́заны е҆ле́ѻмъ.
с мꙋкѝ пшени́чны сътвори́ши ѧ҆̀·

И҆ да възложи́ши ѧ҆̀ в ко́шъ е҆ді́нъ, понесе́ши, и҆ ѿнесе́ши с̂е в кошѝ теле́цъ, и҆ ѻ҆́ба ѻ҆́вна·

А҆аро́на же и҆ ѻ҆́ба сн҃а е҆го приведе́ши ѧ҆̀ прд̑е две́ри храмꙋ свѣдѣнїѧ, і҆ и҆змы́еши ѧ҆̀ водо́ю, и҆ взе́мъ ри́зы ст҃ыѧ, и҆ ѻ҆блече́ши а҆аро́на бра́та твое҆го, до землѝ ри́зою и҆ ри́зꙋ ѹ҆́тренюю, и҆ сло́во съвокꙋ́пиши е҆мꙋ, сло́во къ ѹ҆́тренїи ри́зѣ·

И҆ възложи́ши на главꙋ е҆го клобꙋкъ, и҆ възложи́ши доскꙋ ѻ҆сщ҃енїа на ѹ҆вѧ́сло, и҆ да во́змеши ѿ і҆елеѧ помазаннаго, и҆ да възлїеши на главꙋ̀ е҆го, и҆ ма́жеши и҆̀·

И҆ сн҃ы е҆го приведе́ши, и҆ ѻ҆блече́ши ѧ҆̀ въ ри́зы, и҆ ѻ҆поѧ́шеши ѧ҆̀ по́ѧсы, и҆ възложи́ши и҆ма клобꙋка̀, и҆ да бꙋдетъ и҆ма жре́ти мн̂ѣ въ́ вѣкы.
и҆ съверши́ши рꙋцѣ а҆аро́ни и҆ рꙋцѣ сн҃ов꙽ е҆го·

И҆ да въведе́ши теле́цъ, прд̑е две́ри хра́мꙋ свѣдѣнїѧ, и҆ възложи́тъ а҆аро́нъ и҆ сн҃ове е҆го рꙋцѣ своѝ на главꙋ телцꙋ̀, пред̑ гм҃ъ ѹ҆ дверїи хра́ма свѣдѣнїа.
и҆ да зако́леши теле́цъ предъ гм҃ъ ѹ҆ дверїи хра́ма свѣдѣнїа·

И҆ да во́змеши ѿ кро́ви те́лча, и҆ положи́ши на глава́хъ ѻ҆лтарю̀, пр́ьстомъ твоим̑ ѻ҆ста́нокъ же кро́ви пролие́ши, ѹ҆ стоѧ́ла ѻ҆лтарю̀·

И҆ да возмеши весь тꙋ́къ, и҆же на ѹ҆тро́бѣ и҆ повра́зъ ꙗ҆́тренїи, и҆ ѻ́бѣ и҆сте́сѣ, и҆ тꙋкъ и҆же на нею̀, и҆ възложи́ши на ѻ́лтарь мѧ́са же те́лча, и҆ ко́жꙋ, и҆ моты́ла да съжеже́ши на ѻ҆гнѝ.
вънѣ полка̀ грѣ́хъ б̂о е҆сть.
ѻ҆ве́н же да по́имеши е҆ді́нъ, и҆ да възложи́тъ а҆аро́нъ, и҆ сн҃ове е҆го рꙋцѣ на главꙋ̀ ѻ҆́вню, и҆ зако́летъ и҆̀.
и҆ възе́м꙽ кро́вь пролие́ши предъ ѻ҆лтаремъ ѻ҆бою́дꙋ, ѻ҆ве́н же да расплата́еши на ѹ҆́ды.
и҆змы́еши ѹ҆тро́бꙋ, и҆ но́ги въ водѣ·

И҆ во́змеши ѹ҆́ды и҆ главꙋ̀.
и҆ възложи́ши ве́сь ѻ҆вен̑҇ на ѻ҆лтарь, въ вс̂есъжеже́нїе б҃ꙋ въ ѻ҆бонѧ́нїе бл҃гоѹ҆ха́нїѧ же́ртва г҃ꙋ е҆сть·

И҆ да по́имеши вторы́и ѻ҆ве́нъ, и҆ възложи́тъ а҆аро́нъ и҆ сн҃ове е҆го, рꙋцѣ̀ на главꙋ̀ ѻ҆́вню, и҆ зако́леши и҆̀, и҆ во́змеши ѿ кро́ви е҆го, възложи́ши на слꙋхъ, ѹ҆шесѝ а҆аро́нѧ десна́го, и҆ на коне́цъ рꙋкѝ десны́ѧ, и҆ на коне́цъ ногѝ десны́ѧ, и҆ на слꙋ́хъ ѹ҆шесѝ сн҃овъ е҆го деснꙋю, и҆ на коне́ц꙽ рꙋ́кꙋ и҆хъ деснꙋ́ю, и҆ на коне́цъ но́гꙋ их̑ деснꙋю·

И҆ да возмеши ѿ кро́ве ꙗ҆́же на ѻ҆лтари, и҆ ѿ і҆еле́ѧ пома́занаго, и҆ да въскропи́ши на а҆аро́на, и҆ на ри́зꙋ е҆го и҆ на сн҃ы е҆го, и҆ на ри́зы сн҃овъ е҆го, съ ни́мъ, и҆ ѻ҆ст҃итсѧ са́мъ, и҆ ри́зы е҆го, и҆ сн҃ы е҆го и҆ ри́зы сн҃овъ е҆го съ ни́мъ.
кро́вь же ѻ҆́вню да пролїе́ши ѹ҆ ѻ҆лтарѧ ѻ҆бою́дꙋ·

И҆ да возмеши ѿ ѻ҆вна̀ тꙋкъ е҆го, и҆ тꙋкъ и҆же на ѹ҆тро́бѣ е҆мꙋ, и҆ повразъ ꙗ҆тренїи, и҆ ѻ́бѣ и҆стесѣ и҆ тꙋкъ, и҆же на ни́хъ и҆ ра́мо десное.
е́сть б̂о съверше́нїе т̂о·

И҆ хлѣбъ е҆ді́нъ ма́сличенъ, и҆ ѻ҆прѣснокъ е҆ді́нъ ѿ коша, ѻ҆прѣсноковъ.
положе́ныхъ предъ гм҃ъ, и҆ възложи́ши вс̂е на рꙋцѣ̀ а҆аро́нѣ, и҆ на рꙋцѣ̀ сн҃овъ е҆го, и҆ нарече́ши ѧ҆̀ наро́къ предъ гм҃ъ, и҆ положи́ши вс̂е на рꙋцѣ̀ аа҆ро́новы·

Посе́м же во́змеши ѿ рꙋкꙋ их꙽, и҆ възложи́ши на ѻ҆лта́рь въ всѐсъжеже́нїе пред꙽ гм҃ъ, въ воню̀ бл҃гоѹ҆ха́нїѧ жертва е҆сть г҃ꙋ·

И҆ да во́змеши грꙋ́ди ѿ ѻ҆вна̀ съвершенаго, і҆ и҆же е҆сть а҆аро́нꙋ.
и҆ нарече́ши е҆мꙋ наро́къ предъ гм҃ъ, и҆ да бꙋдетъ тебѣ въ ча́сть·

И҆ ѻ҆ст҃иши грꙋ́ди ѻ҆сщ҃енны, и҆ ра́мъ ѿлꙋче́нїѧ нарече́тсѧ, и҆же ѿлꙋчи́сѧ ѿ ѻ҆вна̀ съверше́наго, ѿ а҆аро́на и҆ ѿ сн҃овъ е҆го да бꙋ́детъ а҆аро́нꙋ и҆ сн҃омъ е҆го, закон̑҇ вѣчныи, ѿ сн҃овъ і҆и҃левъ·

Є҆сть ѹ҆́бо ѿлꙋче́нїе с̂е, и҆ нарече́нїе да бꙋдет̑ ѿ сн҃овъ і҆и҃левыхъ, ѿ требъ сп҃се́ных̑ ѿлꙋче́нїе г҃ꙋ·

Ри́зы же посщ҃ены, ꙗ҆же сꙋть а҆аро́новы, да бꙋдт̑ꙋ сн҃омъ е҆го по немъ.
пома́затисѧ и҆мъ въ ни́хъ, и҆ съверши́ти рꙋцѣ и҆хъ, седмь дн҃їи, да сѧ ѻ҆блачи́тъ в н̂ѧ і҆ере́и вели́кїи, и҆же е҆сть в него̀ мѣсто ѿ сн҃овъ е҆го, и҆же въни́детъ въ хра́мъ свѣде́нїѧ слꙋжи́ти, въ ст҃ыни·

І҆ ѻ҆́ве́нъ съверше́нъ да возмеши, и҆ да свари́ши мѧ́са въ мѣстѣ ст҃ѣ, и҆ да ꙗ҆дѧ́тъ а҆аро́нъ, и҆ сн҃ове е҆го, мѧ́са ѻ҆́внѧ, и҆ хлѣбъ ꙗ҆́же в кошѝ, ѹ҆ две́рїи хра́ма свѣде́нїѧ ꙗ҆дѧт̑ сїи, и҆ми же сѧ ѻ҆ст҃иши в ни́хъ, съверши́ти рꙋцѣ и҆хъ, и҆ ѻ҆ст҃ити ѧ҆̀ и҆ноплеме́нникъ да не ѧ́сть ѿ ни́хъ ст҃и бо сꙋть·

А҆́ще же ѻ҆ста́нетъ ѿ мѧ́са тре́бнаго.
съверше́нїа и҆ ѿ хлѣбовъ на ѹ҆́трїе да съжже́ши ѻ҆станок̑҇ ѻ҆гне́мъ, да не ꙗ҆́стьсѧ, ѻ҆сщ҃енїе б̂о е҆сть·

Сътвори́ши же а҆аронꙋ, и҆ сн҃омъ е҆го та́ко по всемꙋ̀ е҆ли́ко заповѣда́хъ тебѣ, седмь дн҃їи съверши́ши рꙋцѣ и҆хъ·

Теле́ц же грѣха̀ рад̑и̑, да сътвориши въ ѻ҆чище́нїе.
и҆ да ѻ҆чи́стиши ѻ҆лта́рь вънегда̀ ѻ҆сщ҃аеши на не́мъ, и҆ пома́жеши е҆го да бꙋдет꙽ посщ҃енъ.
седмь днїи ѻ҆чи́стиши ѻ҆лта́рь и҆ ѻ҆ст҃иши е҆го и҆ бꙋдет̑ ѻ҆лта́рь ст҃аѧ ст҃ых꙽·

Всѧкъ прикоснꙋвыисѧ ѻ҆лтарю̀ ѻ҆ст҃итсѧ.
се же е҆сть е҆же сътвори́ши на ѻ҆лтарѣ а҆́гньца е҆дїнолѣтна дв̂а, чи́ста на всѧкъ дн҃ь же́ртвꙋеши прс̑҇но.
а҆́гнецъ е҆ді́нъ да сътвори́ши ра́но, вторы́и же а҆́гнецъ да сътвори́ши въ ве́черь, и҆ десѧ́тꙋю ча́сть мꙋкѝ пшени́чны въ ма́слѣ вмѣше́ны въ мѣ́рꙋ четве́ртꙋю ча́сть и҆́на, и҆ пролїѧ́нїе четве́ртꙋю ча́сть и҆́на.
вина̀ е҆ді́номꙋ ѻ҆́внꙋ·

А҆́гнецъ же вторы́и да сътвори́ши ѿ ве́чера, ꙗ҆́коже ѹ҆́тренюю тре́бꙋ, и҆ пролїа́нїе е҆го, сътвори́ши въ ѻ҆бонѧ́нїе бл҃гоѹ҆ханїѧ требꙋ г҃ꙋ.
всегда̀ въ послꙋша́нїѧ, и҆ в ро́ды ва́ша, прд̑е две́рми хра́мꙋ свѣде́нїѧ предъ гм҃ъ, въ них̑ же ꙗ҆влю́сѧ тебѣ тꙋ, ꙗ҆коже гл҃ати тебѣ·

И҆ завеща́ю т̂ꙋ сн҃омъ і҆и҃левымъ, и҆ ѻ҆сщ҃ꙋ ѧ҆̀ въ сла́вѣ мое́и, и҆ ѻ҆сщ҃ꙋ хра́мъ свѣде́нїѧ, и҆ ѻ҆лта́рь, и҆ а҆аро́на, и҆ сн҃ы е҆го, ѻ҆сщ҃ꙋ жрѣти мн҃ѣ·

И҆ прозовꙋ́сѧ въ сн҃охъ і҆и҃левыхъ, и҆ бꙋдꙋ и҆мъ б҃ъ, и҆ ѹ҆вѣдѧт̑ ꙗ҆́ко а҆́зъ е҆смь г҃ь б҃ъ и҆хъ, и҆зведы́и ѧ҆̀ ѿ землѧ̀ е҆гѷпетски, прозва́тисѧ и҆мъ, и҆ быти им̑ б҃ъ·

Глв̑҇а, л҃·

И да сътвори́ши м̂и ѻ҆лта́рь кади́ленъ, ѳимїѧ́мꙋ, ѿ дре́ва негнїю́ща·

Сътвори́ши и҆̀ ла́кти в долготꙋ̀.
ла́кти же и҆ въ широтꙋ̀, на д҃, ѹ҆́глы да бꙋдетъ, двою́ же ла́кти въ высотꙋ̀, ѿ самого да бꙋдꙋт꙽ ро́ги е҆мꙋ·

и҆ позлати́ши зла́томъ чи́стымъ, ѻ҆́гнище е҆мꙋ, и҆ стѣ́нь е҆го ѻ҆́коло и҆ ро́ги е҆го·

И҆ да сътвори́ши е҆мꙋ вѣне́цъ зла́тъ ѻ҆́коло, и҆ по двѣ ѻ҆́боди зла́та чиста, да сътвори́ши е҆мꙋ, под̑ вѣнце́мъ е҆го ѻ҆́коло на ѻ҆бою̀ ѹ҆́глꙋ, да сътвори́ши е҆мꙋ, по ѻ҆бѣма страна́ма, и҆ бꙋ́дꙋтъ носи́ла и҆ ве́рви ꙗ҆́коже держа́ти и҆́ма·

И҆ да сътвори́ши носи́ла ѿ древе́съ негнїю́щих̑ и҆ позлати́ши ѧ҆̀ зла́томъ, и҆ да положи́ши ѧ҆̀ прѧ́мо завѣсѣ, ꙗ҆́же е҆сть ѹ҆ киѻ́та свѣдѣнїѧ, в ни́хже ꙗ҆влю́сѧ тебѣ ѿтꙋ́дꙋ·

И҆ да кади́тъ над̑ ни́мъ а҆а҆ро́нъ ѳимїѧ́момъ сложе́ном̑ бл҃говонномъ ра́но ра́но, е҆гда̀ потворѧ́етъ свѣти́ла кади́ти ѹ҆ него̀, е҆гда̀ въжига́етъ а҆а҆ронъ.
свѣти́ла с ве́чера, да кадит̑ ѹ҆ него̀, ѳимїѧ́мъ всегда̀ прс̑҇но предъ гм҃ъ въ ро́ды и҆х꙽·

И҆ да не принесе́тсѧ к немꙋ̀ ѳимїѧ́мъ и҆́нъ.
прино́съ, и҆ тре́ба и҆ пролива́нїѧ.
да не пролїе́ши нань·

И҆ да ѻ҆чи́ститъ ѹ҆ него̀ а҆аро́нъ, ѹ҆ рого́въ е҆го е҆ді́ною лѣтом꙽, ѿ кро́ви ѻ҆цыще́нїѧ грѣхъ ѹ҆моле́нїѧ е҆ді́ною лѣта, ѻ҆чи́стити е҆̀ въ ро́дъ их̑, ст҃аа ст҃ыхъ е҆сть г҃ꙋ·

И҆ гл҃а г҃ь къ моѷсїю рекїи, аще въне́млеши смышле́нїе сн҃овъ і҆ил҃евъ, въ присѣще́нїе и҆хъ, и҆ дадѧ́тъ ко́ждо и҆збавле́нїе за дш҃а и҆хъ г҃ꙋ, и҆ не бꙋдет꙽ паде́нїе междꙋ и҆́ми въ посѣще́нїе и҆хъ·

Се́ же е҆сть е҆ли́ко дадѧ́тъ и҆хъ, е҆гда̀ прихо́дѧтъ, въ присѣще́нїе полъ дидра́гмъ, е҆же е҆сть дидра́гмꙋ ст҃омꙋ, к҃, ца́тъ полъ дидра́гма да́нь г҃ꙋ, всѧ́къ въходѧ́и въ присѣще́нїе ѿ, к҃, лѣтъ и҆ вы́ш꙽ше дадꙋтъ да́нь г҃ꙋ.
бога́тыи да не приложи́тъ, и҆ ни́щїи да не ѹ҆мни́тъ, ѿ полъ дидра́гмы·

Є҆гда̀ даю́тъ да́нь г҃ꙋ ѿ сн҃овъ і҆и҃левыхы, ѹ҆моле́нїѧ ѻ҆ дш҃ахъ ва́ших̑, и҆ да во́змеши сребро̀ да́ни ѿ сн҃овъ і҆и҃левыхъ, даси́ же на съдѣла́нїе хра́мꙋ свѣде́нїѧ, и҆ да бꙋдетъ сн҃омъ і҆и҃левымъ па́мѧть предъ гм҃ъ, ѹ҆моле́нїѧ ѻ҆ дш҃ахъ вашихъ·

И҆ рече г҃ь моѷсїю гл҃ѧ, сътворѝ ѹ҆мывал̑҇ницꙋ мѣ́дѧнꙋ, и҆ стоѧ́ла е́и мѣ́дѧна, ꙗ҆коже ѹ҆мыва́тисѧ·

И҆ да поста́виши ю҆̀ междꙋ хра́момъ свѣдѣнїѧ, и҆ ѻ҆лтаремъ, и҆ да влїе́ши в н̂ю во́дꙋ, и҆ ѹ҆мыва́етъ а҆аронъ, и҆ сн҃ове е҆го, рꙋ́ки своѝ, и҆ но́ги, е҆гда̀ хо́дѧтъ въ хра́мъ свѣдѣнїѧ, да сѧ ѻ҆мыва́ютъ водо́ю, и҆ не ѹ҆́мрꙋтъ·

И҆ли е҆гда̀ прихо́дѧт꙽ къ ѻ҆лтарю̀ слꙋжи́ти, и҆ прино́сѧтъ требы г҃ꙋ, ѹ҆мы́ют꙽ рꙋцѣ и҆ но́ѕѣ водо́ю.
е҆гда вхо́дѧтъ въ хра́мъ свѣдѣ́нїѧ да не ѹ҆́мрꙋтъ, и҆ да бꙋдетъ е҆мꙋ с̂е въ зако́нъ вѣчныи, и҆ сн҃омъ е҆го въ ро́ды и҆хъ по не́м꙽·

И҆ рече г҃ь къ моѷсїю гл҃ѧ, ты́ же възмѝ вонѧ̀, цвѣта ми́рра и҆збра́нна, пѧть сот̑ си́клев̑҇ и҆ цыномонꙋ бл҃гово́нна полъ сего̀, с҃, и҆ н҃, мѧ́ты бл҃гово́нны, с҃ н҃ и҆ ере́ѻ, пѧть сот̑ си́клевъ.
ст҃го ма́сла древѧна́го и҆́н꙽ сътвори́ши с̂е и҆еле́и пома́занїе ст҃ꙋ воню̀, хи́трости варѧ́щаго вонѧ̀ и҆ еле́и, ст҃ое пома́занїе бꙋдетъ·

И҆ да пома́жеши ѿ него хра́мъ свѣдѣнїѧ, и҆ кїѻ́тъ свѣдѣ́нїѧ, и҆ вс̂ѧ е҆го съсꙋды и҆ свѣщникъ и҆ вс̂ѧ съсꙋды е҆го, и҆ ѻ҆лтарь кади́лныи, и҆ ѻ҆лта́рь в̂сесъжеже́нїѧ и҆ вс̂ѧ е҆го съсꙋды, и҆ трапе́зꙋ и҆ вс̂ѧ е҆ѧ̀ съсꙋды, и҆ ѹ҆мыва́лницꙋ и҆ вс̂ѧ стоѧ́ла е҆ѧ̀·

І҆ ѻст҃иши и҆ бꙋдꙋтъ ст҃аѧ ст҃ыхъ, и҆ всѧ́къ прикоснꙋвыисѧ, ѻ҆ст҃итсѧ·

А҆аро́на же и҆ сн҃ы е҆го пома́жеши, и҆ ѻ҆ст҃иши ѧ҆̀, жрѣти мн̂ѣ·

И҆ сн҃омъ і҆и҃левымъ да гл҃еши рекїи.
е҆ле́и ма́сть пома́занїѧ ст҃го да бꙋдеть с̂е вамъ, въ ро́ды ва́ша.
пло́ть чл҃ка да сѧ непома́жетъ и҆мъ, и҆ по ѻ҆́бразꙋ сего̀, да не сътвори́те сами себѣ и҆но́го сице.
ст҃о е҆сть, и҆ ст҃о бꙋдет̑ вам̑·

А҆́ще же кт̂о си́це сътвори́тъ, и҆ли а҆ще кт̂о да́стъ ѿ сего̀, и҆ноплеме́нникꙋ да потребит̑сѧ ѿ людїи своих̑·

И҆ рече г҃ь къ моѷсїю, възмѝ себѣ вонѧ̀, ста́кти, и҆ ѻ҆ни́ха, и҆ халва́нꙋ, бл҃гово́нна и҆ бѣла, и҆ ѳимїѧ́мъ ч́истый.
всѐ т̂о в ра́внꙋ мѣрꙋ да бꙋдт̑е и҆ да сътвори́ши ѳимиѧ́мъ, во́нно дѣло варѧ́щаго вонѧ̀, смѣше́но дѣло чи́сто и҆ ст҃о, и҆ съдроби́ши то́нко ѿ сего̀, и҆ положи́ши прѧ́мо свѣдѣнїю, въ хра́мѣ свѣдѣ́нїѧ ѿнꙋ́дꙋже ꙗ҆́влю́сѧ тебѣ, ѿтꙋдꙋ ст҃аѧ ст҃ыхъ и҆ бꙋдетъ вамъ ѳимїѧ́мъ се́й·

По сложе́нїю же семꙋ̀, да не сътвори́те себѣ са́ми, въ ѻ҆сщ҃енїе б̂о да бꙋдетъ вамъ г҃ꙋ.
а҆́ще же кт̂о сътвори́тъ си́це ѻ҆бонева́ти ѿ него̀, поги́бнетъ дш҃а т̂а ѿ людїи свои҆хъ·

Глв̑҇а, л҃а·

И рече г҃ь къ моѷсїю гл҃ѧ, с̂е нареко́хъ, и҆́менемъ, веселеи́ла е҆же е́сть ѹ҆́ри сн҃а ѻ҆́рова, с племенѐ і҆ѹ҆́дина·

И҆ напо́лнихъ и҆̀ дх҃а бж҃їѧ, и҆ премꙋ́дрости и҆ смышле́нїѧ, и҆ ѹ҆мѣ́нїѧ.
въ всѧ́ком꙽ дѣлѣ, нача́ти древодѣ́льством꙽ дѣ́лати·

Зла́то и҆ сребро̀ и҆ мѣдь, и҆ синетꙋ̀, и҆ багрѧни́цꙋ, и҆ червлени́цꙋ съпрѧ́денꙋ, и҆ виссо́нъ тка́ныи, и҆ ка́менное дѣло, и҆ разли́чное древодѣ́льство въ всѣхъ дѣлехъ·

А҆́зъ б̂о дахъ е҆мꙋ е҆лїа́ва а҆хисама́хова, ѿ племенѐ да́нова.
и҆ семꙋ̀ смы́слено срд̑це, дахъ и҆ смы́сл꙽ и҆ да дѣ́лаютъ и҆ творѧ́тъ вс̂е е҆ли́ко заповѣда́хъ тебѣ·

Хра́мъ свѣдѣнїѧ, и҆ кїѻ́тъ завѣта и҆ ѻ҆чище́нїе е҆же верхꙋ е҆го, ѹ҆́тварь храма, и҆ потре́бникы и҆ трапезꙋ, и҆ вс̂ѧ съсꙋды е҆го, и҆ свѣти́лникъ чи́стыи, и҆ вс̂ѧ съсꙋды е҆го.
и҆ ѹ҆мыва́лницꙋ и҆ стоѧ́ла еѧ̀.
и҆ ри́зы жреческїѧ, а҆аро́на и҆ ри́зы сн҃овъ е҆го жрѣти мн̂ѣ.
и҆ ма́сло пома́занїѧ, и҆ ѳимїѧ́мъ сложе́нїѧ въ ст҃ыни, по всемꙋ е҆ли́ко повелѣхъ тебѣ сътворѧ́тъ·

И҆ рече г҃ь къ моѷсїю гл҃ѧ, ты́ же гл҃и сн҃омъ і҆и҃левымъ, рекїи смотри́те, и҆ сꙋботы моѧ сънабди́те, е҆сть б̂о знаменїе междꙋ мно́ю и҆ ва́ми.
въ ро́ды ваша, да вѣсте ꙗ҆́ко а҆́з г҃ь, ѻ҆сщ҃аа в̂ы·

И҆ да сънабди́те сꙋбо́тꙋ, ꙗ҆́ко ст҃а е҆сть г҃ꙋ и҆ вамъ.
ѻ҆скверни́выи б̂о смр҃тїю ѹ҆́мретъ·

І҆ иже сътвори́тъ в н̂ю дѣло, потреби́тсѧ дш҃а т̂а ѿ среды̀ людїи свои҆хъ, ѕ҃, дн҃їи да сътвори́те дѣлеса̀, въ дн҃ь же седмы́и сꙋбо́та.
поко́и ст҃ъ г҃ꙋ, всѧк̑҇ и҆же сътвори́тъ дѣ́ло, въ седмы́и дн҃ь, смр҃тїю ѹ҆́мретъ·

И҆ да сънабдѧ́т꙽ сн҃ове і҆и҃левы сꙋбо́ты, держа́ти въ ро́ды и҆хъ, въ завѣтъ вѣ́чен꙽ въ мн̂ѣ, и҆ въ сн҃охъ і҆и҃левыхъ.
знаменїе е҆сть вѣчное.
ꙗ҆ко въ ѕ҃, днех̑ сътворѝ г҃ь нб҃о и҆ зе́млю, въ сед̑мы́и же дн҃ь преста̀ и҆ почѝ·

да́сть же б҃ъ моѷсїю е҆гда̀ преста̀ гл҃ѧ е҆мꙋ, на горѣ сина́истѣи двѣ до́сцѣ свѣдѣ́нїѧ до́сцѣ ка́меннѣ напи́санѣ, прь́стом̑ бж҃їимъ·

Глв̑҇а, л҃в·

Ви́дѣвше же лю́дїе ꙗ҆́ко ѹ҆ме́дли моѷсїи сни́ти съ горы̀, въста́ша лю́дїе на а҆аро́на, и҆ гл҃аша е҆мꙋ, въста́ни и сътворѝ намъ бо́ги, и҆же по́идꙋтъ пред на́ми.
моѷсїи б̂о сїи чл҃к꙽ і҆ и́же и҆зведѐ нас꙽ ѿ егѷпта не вѣмы чт̂о е҆мꙋ бы́сть.

Рече же и҆мъ а҆арон̑҇ и҆змѣте ѹ҆срѧ́зѧ зла́тыѧ, и҆зъ ѹ҆шїю же́нъ ва́шихъ и҆ дще́рїи, и҆ принесѣте къ мн̂ѣ·

И҆зима́ша же вс̂и лю́дїе, ѹ҆серѧ́зи зла́ты, и҆же въ ѹ҆шесѣ́хъ же́нъ и҆хъ и҆ дще́рїи, и҆ принесо́ша, къ а҆аро́нꙋ·

И҆ взѧ̀ ѿ рꙋкꙋ̀ и҆хъ, и҆ сълїѧ́въ ѻ҆́бразъ, и҆ сътвори и҆мъ теле́цъ лїѧ́нъ.
и҆ реко́ша с̂и бо́ѕи твоѝ і҆и҃лю, и҆же т̂ѧ и҆зведо́ша и҆з꙽ землѧ̀ е҆гѷпетъски·

Ви́дѣв же а҆аро́нъ създа̀ ѻ҆лтарь прѧ́мо е҆мꙋ, и҆ проповѣда а҆аро́нъ гл҃ѧ велик̑҇, дн҃ь гн҃ь, ѹ҆́трѣ·

И҆ ѻбꙋт́ривъ наѹ҆трїа, и҆ възнесѐ и҆ съжеже́нїѧ, и҆ принесѐ тре́бꙋ сп҃се́нїѧ и сѣдо́ша лю́дїе ѧ҆́сти и҆ пи́ти, и҆ въста́ша и҆гра́ти·

И҆ рече г҃ь къ моѷсїю гл҃ѧ съни́ди ско́ро ѿсю́дꙋ, безакони́ша б̂о лю́дїе твоѝ, и҆хже и҆зве́лъ е҆си и҆з꙽ зем̑лѧ̀ е҆гѷпетски·

Престꙋпи́ша с пꙋтѝ ско́ро, и҆же заповѣда́лъ е҆си и҆мъ, и҆ сътвори́ша себѣ теле́цъ, и҆ поклони́шасѧ е҆мꙋ, и҆ же́ртвоваша гл҃юще с̂и бо́ѕи твоѝ і҆и҃лю и҆же и҆зведо́ша т̂ѧ и҆з꙽ землѧ̀ е҆гѷпет̑ски·

Нн҃ѣ же не дѣй менѐ, да възъꙗ҆ри́всѧ гнѣ́вомъ на нѧ̀ потреблю̀ ѧ҆̀, и҆ сътворю̀ т̂ѧ въ ꙗ҆зы́къ вели́къ·

И҆ моли́сѧ прд̑е гм҃ъ бм҃ъ свои҆мъ моѷсїи, и҆ рече въскꙋю г҃и ѧ҆ри́шисѧ гнѣвом꙽ на люди твоѧ̀ и҆хже и҆зве́лъ е҆си и҆з꙽ землѧ̀ е҆гѷпетъски.
крѣпостїю вели́кою, и҆ мыш̑҇цею твое́ю высо́кою·

да не когда̀ рекꙋтъ е҆гѷптѧне гл҃юще, на лꙋка́въствѣ и҆зведѐ ѧ҆̀ погꙋби́ти в гора́хъ, сътреби́ти ѧ҆̀ ѿ землѧ̀.
ѹ҆стави гнѣвъ ꙗ҆́рости твое҆ѧ, и҆ млс̑҇тивъ бꙋ́ди до зло́бы людїи твои҆хъ, помѧнꙋ́въ а҆враа́ма, і҆ и҆саа́ка, і҆ ꙗ҆́кова, твоѧ̀ рабы̀, и҆́мже сѧ е҆си клѧ́лъ собо́ю, ре́клъ къ ни́мъ гл҃ѧ.
ѕѣло ѹ҆мно́жꙋ сѣмѧ ваше, ꙗ҆́ко звѣ́зды нбс̑҇ныѧ мно́жествомъ, и҆ всю̀ сїю землю юж̑ рече, да́ти ю҆̀ сѣмени их̑, и҆ да прїимꙋтъ ю҆̀ въ вѣкы.
и҆ ѻ҆чи́сти г҃ь зло́бꙋ ю҆́же рече твори́ти лю́демъ сим̑·

И҆ съни́де моѷсїи со горы̀, и҆ дв̂ѣ до́сцѣ свѣдѣнїѧ в рꙋ́кꙋ е҆го.
до́сцѣ камен̑҇нѣ напи́саны ѻ҆бѣ странѣ е҆ю̀, сю́дѣ, и҆ ѻ҆нꙋ́дѣ.
быша напи́саны, и҆ до́сцѣ бж҃їе дѣло бѣста, и҆ написа́нїе.
писа́нїѧ бж҃їѧ, въва́ѧно въ доска́х꙽·

Ѹслы́шав же і҆сс̑҇ꙋ гласъ людїи крича́щих꙽.
и҆ рече къ моѷсїю, гласъ рат̑ныи въ полцѣ.
рече же моѷсїи, нѣсть гласъ начина́ющихъ си́лою, ни глас̑҇ побѣжда́емыхъ ѻ҆долѣ́нїемъ.
н̂о гласъ напива́ющих̑сѧ вином̑ а҆́зъ слы́шꙋ·

Є҆гда же приближа́шесѧ къ пол̑҇кꙋ̀, и҆ ѹ҆зрѣ теле́цъ и҆ ли́кы, и҆ въз꙽ѧ҆ри́всѧ гнѣвомъ моѷсїи, поврь́же и҆с рꙋкꙋ свое́ю ѻ҆́бѣ до́сцѣ.
и҆ съкрꙋшѝ ѧ҆̀ подъ горо́ю·

И҆ взе́мъ теле́цъ, и҆же сътвори́ша.
съжежѐ на ѻ҆гнѝ, и҆ сътрѐ по́ тонкꙋ, и҆ раз꙽сы́па и҆̀ по водѣ̀, и҆ напо́и е҆ю̀ сн҃ы і҆и҃леви·

И҆ рече моѷсїи къ а҆аро́нꙋ.
чт̂о сътвори́ша лю́дїе тебѣ, да приведѐ на́ нѧ грѣх꙽ вели́къ·

Рече же а҆аро́нъ къ моѷсїю не гнѣ́ваисѧ гдс̑҇не, ты̀ б̂о вѣ́си людїи сихъ нра́вы, гл҃аше б̂о мѝ, сътворѝ на́мъ богѝ, и҆же по́идꙋтъ предъ на́ми.
моѷсїи бо се́й чл҃къ и҆же и҆зведе ны̀ ѿ е҆гѷпта, не вѣмы чт̂о е҆мꙋ бысть рекохъ же и҆мъ и҆же и҆́мать зла́то и҆змѣте, і҆ и҆зѧ́ша, и҆ да́ша ѧ҆̀ мн̂ѣ и҆ въверго́хъ и҆̀ въ ѻ҆́гнь, и҆ ѹ҆лїѧ́сѧ теле́цъ сїи·

Ви́дѣв же моѷсїи людѝ ꙗ҆́ко раздѣли́шасѧ, раздѣли б̂о и҆хъ а҆аро́нъ, въ пора́дованїе сꙋпоста́том̑ и҆хъ·

ста́в же моѷсїи въ вратѣхъ полкꙋ̀, и҆ рече.
а҆́ще кт̂о е҆сть гнс̑҇ь, да и́детъ къ мн̂ѣ, и҆ снидо́шасѧ вс̂и сн҃ове левви, и҆ рече и҆мъ·

Се гл҃тъ г҃ь б҃ъ і҆и҃левъ, препоѧ́шитесѧ ко́ждо свои҆мъ мечем꙽ по бедрѣ̀, и҆ по́идѣте, и҆ възврати́тесѧ, ѿ вра́тъ до вра́тъ сквозѣ полкъ, і҆ ѹ҆бїе́те ко́ждо брата свое҆го, и҆ ко́ждо дрꙋга свое҆го, и҆ ко́ждо сꙋсѣда свое҆го·

И҆ сътвори́ша сн҃ове левїинѣ, ꙗ҆коже гл҃а и҆м꙽ моѷсїи, и҆ падѐ ѿ людїи, въ то́и дн҃ь до трехъ ты́сѧщъ мꙋжїи·

И҆ рече и҆мъ моѷсїи, пост҃исте рꙋкы ваша днесь г҃ꙋ ко́ждо въ сн҃ꙋ своемъ и҆ въ бра́тѣ свое҆мъ, и҆ дастьсѧ на в̂ы блс̑҇венїе·

И҆ бысть на ѹ҆́трѣе, рече моѷсїи къ лю́демъ, в̂ы съгрѣти́сте грѣхъ вели́къ.
нн҃ѣ же възы́дꙋ къ б҃ꙋ.
да ѻ҆чи́щꙋ ѻ҆ грѣсѣ вашемъ·

И҆ възврати́сѧ моѷсїи къ г҃ꙋ, и҆ рече молю́ ти сѧ г҃и, съгрѣши́ша лю́дїе сїи грѣхъ вели́къ, сътвори́вше сами себѣ, боги зла́ты.
нн҃ѣ а҆́ще ѻ҆ста́виши и҆мъ грх̑ѣ и҆хъ, т̂о ѻ҆ста́ви, а҆́ще ли н̂и, и҆зложѝ м̂ѧ и҆с кни́гъ ꙗ҆́же въпи́са̀·

Рече же г҃ь къ моѷсїю, и҆же кт̂о съгрѣши́лъ къ мн̂ѣ, и҆зве́ргꙋ и҆̀ ѿ книг̑҇ свои҆хъ.
нн҃ѣ же и҆дѝ и҆ сни́ди, и҆ възведѝ лю́ди на мѣсто е҆же е҆смь реклъ тебѣ, с̂е а҆гг҃лъ мои прд̑еи́детъ прд̑е лице́мъ твои҆м꙽, во́нже дн҃ь присѣщꙋ̀ и҆̀, и҆ възложꙋ̀ на́ нѧ грѣхъ и҆хъ·

И҆ побѝ г҃ь люди, сътворе́нїѧ ради те́лча, и҆же сътворѝ а҆аро́нъ·

Глв̑҇а, л҃г·

И рече г҃ь къ моѷсїю, и҆дѝ и҆ възы́ди ѿсю́дꙋ т̂ы, и҆ лю́ди твоѧ̀, и҆хже и҆зведѐ ѿ землѧ̀ е҆гѷпетъски, на зем̑лю е҆ю́же клѧ́хсѧ къ а҆враа́мꙋ, і҆ и҆саа́кꙋ, і҆ ꙗ҆́ковꙋ гл҃ѧ сѣмени твое҆мꙋ, да́мъ ю҆̀·

И҆ послю̀ а҆гг҃ла мое҆го предъ тобо́ю, и҆ ѿжене́ши ханане́ѧ, а҆мморе́ѧ, и҆ хетѳе́а, и҆ ферезе́ѧ, и҆ гергесе́ѧ, і҆ еве́ѧ, е҆вꙋсе́ѧ.
и҆ въведꙋ т̂ѧ въ зе́млю текꙋщ́ꙋю мле́комъ, и҆ ме́домъ.
и҆ са́м꙽ же не пойдꙋ̀ с тобо́ю, ꙗ҆́ко лю́дїе же́стоковыи҆́ сꙋть, да не ѹ҆бїю̀ тебѐ на пꙋтѝ·

Ѹ҆слы́шавше же лю́дїе слово с̂е, боѧ҆́знено въскорбѣша, и҆ въстꙋжи́ша·

И҆ рече г҃ь къ моѷсїю, гл҃и сн҃омъ і҆и҃левымъ, в̂ы лю́дїе же́стоковы́и блюдѣтесѧ, да не вре́дъ дрꙋгїи възложꙋ̀ на́ в̂ы, и҆ потреблю̀ в̂ы, и҆ нн҃ѣ ѹ҆бо съи҆мѣте ри́зы сла́вы вашеѧ, и҆ ѹ́твари, и҆ покажꙋ̀ е҆же сътворю̀ тебѣ·

І҆ ѿѧ҆́ша сн҃ове і҆и҃левы ѹ҆́тварь и҆хъ, и҆ ри́зы ѿ горы̀ хори́ва·

Възе́м꙽ же моѷсїи, свои́ храмъ, потчѐ и҆̀, вн̂ѣ полка̀, и҆ пода́лѣ ѿ пол̑҇ка, и҆ прозва́сѧ храмъ свѣдѣ́нїѧ·

И҆ быс̑҇ всѧкъ възыща́и г҃а, и҆зы́де въ храм̑ и҆же вн̂ѣ покла̀·

Є҆гда же и҆схожда́ше моѷсїи ѿ полка̀, стоѧ́хꙋ вс̂и лю́дїе смотрѧ́ще ко́ждо прд̑е две́рми храмꙋ свое҆го, и разꙋмѣва́хꙋ ѿходѧ́щꙋ моѷсїю, ꙗ҆́коже вни́ти е҆мꙋ въ храм̑·

І҆ ꙗ҆́ко въхожда́ше моѷсїи въ хра́мъ, снѝде же сто́лпъ ѻ҆́блачныи, и҆ ста̀ прд̑е две́рми храма, и҆ гл҃а г҃ь моѷсїю·

Ви́дѧхꙋ же вс̂и лю́дїе, столпъ ѻ҆́блачныи стоѧ́щъ прд̑е две́рми храмꙋ.
и҆ ста́вше вс̂и лю́дїе поклони́шасѧ ко́ждо с̂и, з две́рїи храма свое҆го·

И҆ гл҃аше г҃ь къ моѷсїю, лицемъ къ лицꙋ̀, ꙗ҆́коже кт̂о въз꙽г҃летъ, дрꙋгъ къ дрꙋгꙋ свое҆мꙋ, и҆ посыла́ше и҆̀ въ по́лкъ.
слꙋга́ же ісс̑҇ꙋ сн҃ъ на́винъ ю҆́ноша, не и҆схожда́ше и҆з꙽ хра́ма·

Рече ж̑ моѷсїи къ г҃ꙋ, с̂е ты̀ мн̂ѣ гл҃еши, и҆зведѝ лю́ди сїѧ, ты́ же не повѣ́да мн̂ѣ, кого посыла́еши съ мно́ю, тыж̑ мн̂ѣ рече вѣ́дѧ т̂ѧ, па́че всѣхъ, и҆ блгд̑ть и҆́маши ѿ менѐ, а́ще же ѻ҆брѣто́хъ блгд̑ть предъ тобо́ю, ꙗ҆́ви ми сѧ са́мъ, ꙗ҆вѣ и҆ разꙋмно да ви́ждꙋ т̂ѧ.
ꙗ҆́коже ѻ҆брѣто́хъ блгд̑ть предъ тобо́ю да позна́ю, ꙗ҆́ко лю́дїе твоѝ, ꙗ҆́зы́къ сїи·

И҆ рече е҆мꙋ г҃ь, а҆́зъ самъ пои҆дꙋ̀ предъ тобо́ю, и҆ ѹ҆ста́влю т̂ѧ·

Рече же к немꙋ̀, а҆ще са́мъ т̂ы не и́деши с на́ми, т̂о не и҆зводѝ насъ ѿсю́дꙋ, ка́ко ли ꙗ҆́вѣ бꙋдетъ и҆́стинною ꙗ҆ко ѻ҆брѣтох̑ блгд̑ть предъ тобо́ю, а҆́зъ и҆ лю́дїе твоѝ.
н̂о и҆дѝ т̂ы с на́ми, и҆ просла́вленъ бꙋдꙋ а҆́зъ и҆ лю́дїе твоѝ, паче всѣхъ ꙗ҆зы́къ е҆ли́ко на землѝ е҆сть·

И҆ рече г҃ь къ моѷсїю, с̂е сло́во е҆же вѣща́хъ тебѣ, и҆ сътворю̀.
ѻ҆брѣ́лъ б̂о е҆си блгд̑ть предо мно́ю, и҆ вѣмъ т̂ѧ паче всѣхъ·

Рече же покажѝ м̂и славꙋ твою̀·

И҆ рече г҃ь къ моѷсїю, а҆́зъ и҆дꙋ̀ предъ тобо́ю съ сла́вою мое҆ю, и҆ прозовꙋ̀ и҆́мѧ мое предъ тобо́ю г҃ь.
и҆ поми́лꙋю, е҆го́же а҆́ще поми́лꙋю, и҆ ѹ҆ще́дрю, е҆го́же а҆́ще ѹ҆ще́дрю·

И҆ рече, не възмо́жеши ви́дѣти лица̀ мое҆го.
нѣсть б̂о, а҆́ще ви́дитъ чл҃к꙽ лицѐ мое, жи́въ быти·

И҆ рече г҃ь с̂е мѣсто ѹ҆ менѐ, и҆ ста́неши ѹ҆ ка́мене, е҆гда́ же прїидетъ сла́ва моѧ̀, и҆ поста́влю т̂ѧ ѹ҆ пеще́ры ка́менны.
и҆ покры́ю рꙋко́ю мое҆ю надъ тобо́ю, до́ндеже минꙋ̀.
и҆ ѿи҆мꙋ̀ рꙋ́кꙋ мою.
тогда̀ ѹ҆́зриши за́днѧа моа̀.
лицеж̑ мое не ꙗ҆́ви́тъ ти сѧ·

Глв̑҇а, л҃д·

И рече г҃ь къ моѷсїю, и҆стешѝ себѣ дв̂ѣ до́сцѣ ка́меннѣ, ꙗ҆́цѣ бѣ́ста и҆ пе́рвѣе, и҆ възы́ди къ мн̂ѣ на горꙋ̀.
да въпишꙋ̀ словеса̀ на до́скꙋ, ꙗже бѣша на пе́рвꙋю до́скꙋ, ꙗ҆же е҆си съкрꙋшилъ·

Бꙋди же гото́въ заѹ҆́тра, да възы́деши на горꙋ̀ сина́искꙋю, и҆ ста́неши т̂ꙋ, на ве́рсѣ горы̀.
и҆ да никто́же възы́детъ с тобо́ю, ни да сѧ ꙗ҆́ви́тъ кт̂о в сей горѣ, и҆ ѻ҆вца и҆ говѧ́да, да сѧ не пасꙋтъ, близь горы̀ тоѧ̀·

І҆ и҆стеса̀ дв̂ѣ до́сцѣ ка́менны, ꙗ҆́цѣ же и҆ прь́вѣи, и҆ ѹ҆ра́ни моѷсїи заѹ҆́тра, и҆ възы́де на горꙋ̀ сина́искꙋю, ꙗ҆́коже завѣща̀ е҆мꙋ г҃ь.
и҆ възѧ́тъ моѷсїи съ собо́ю дв̂ѣ до́сцѣ ка́меннѣ·

И҆ съни́де г҃ь въ ѻ҆́блацѣ, и҆ ста̀ пред ни́мъ т̂ꙋ, и҆ възва̀ и҆́менемъ гн҃имъ.
и҆ минꙋ̀ г҃ь предъ лице́мъ е҆го·

И҆ призва̀ г҃а, г҃ь б҃ъ ще́дръ, и҆ млс̑҇тив꙽, терпелив̑҇ і҆ и́стиненъ, пра́вдꙋ снабдѧ̀ и҆ творѧ́и млс̑҇ть въ ты́сѧщахъ, ѿмщаа безако́нїѧ и҆ непра́вды, и҆ грѣхѝ, и҆ не потреби́тсѧ вина̀ е҆го, възлага́а грѣхѝ ѿц҃ъ на ча́да, и҆ на сн҃ы сн҃овъ, до тре́тїѧго и҆ до четве́ртаго ро́дꙋ.
и҆ потща́всѧ моѷсїи, преклони́сѧ до землѧ̀, и҆ поклони́сѧ б҃ꙋ, и҆ рече.
а҆́ще ѻ҆брѣто́хъ блгд̑ть предъ тобо́ю молю̀ ти сѧ г҃и да и́деши с на́ми, лю́дїе б̂о же́стоковыѝ сꙋть, да ѻ҆ста́виши грѣхѝ и҆ непра́вости наша, и҆ да бꙋ́демъ твоѝ·

И҆ рече г҃ь къ моѷсїю, с̂е а́зъ полага́ю тебѣ завѣтъ, пред̑ всѣми людмѝ твои҆ми, сътворю̀ вели́каѧ и҆ сла́внаѧ, ꙗ҆коваже не бѣша по все́и землѝ.
н̂и въ всѣхъ страна́хъ, н̂и въ всѣхъ ꙗ҆́зы́цехъ, и҆ ѹ҆́зрѧтъ вс̂и лю́дїе в ни́хже сꙋть дѣла гн҃ѧ, ꙗ҆́коже чю́дна сꙋть, ꙗ҆́же сътворю̀ а҆́зъ тебѣ.
вънми же т̂ы вс̂е е҆ли́ко а҆́зъ заповѣ́даю тебѣ·

Се а҆́зъ ѿженꙋ̀ предъ лице́мъ вашим̑, а҆морре́ѧ, и҆ ханане́ѧ, и҆ хетѳе́ѧ и҆ ферезе́ѧ, и҆ еве́ѧ, и҆ гергесе́ѧ, и҆ евꙋсе́ѧ·

Во́нми себѣ самъ, да не когда̀ завѣща́еши завѣтъ сѣдѧ́щим̑ на землѝ.
в ню́же вни́деши, да не бꙋдетъ събла́знъ въ васъ·

И҆ ѻ҆́лтарѧ и҆хъ разсы́плете, и҆ кꙋми́ры их̑ да съкрꙋши́те, и҆ сады̀ и҆хъ да посѣче́те и҆ ваѧ́нїѧ бо́гъ их̑, да съжеже́те на ѻ҆гнѝ·

да сѧ не поклони́те богꙋ и҆́номꙋ, г҃ь б҃ъ ревно и҆́мѧ.
б҃ъ ревнив̑҇ е҆сть, да не когда̀ завѣща́еши завт̑ѣ сѣдѧ́щимъ на землѝ, и҆ съвратѧт̑сѧ въ слѣдъ бого́въ и҆хъ, и҆ требꙋ положа́тъ бого́мъ и҆хъ, и҆ възовꙋт́ъ т̂ѧ, і҆ ѧ́си тре́бꙋ и҆хъ.
и҆ по́имеши дще́ри и҆хъ сн҃омъ твои҆мъ, и҆ дще́ри твоѧ̀, дасѝ сн҃омъ и҆хъ, и҆ съвратѧ́тсѧ дще́ри твоѧ̀ въ слѣдъ бого́въ и҆хъ, и҆ сн҃ове твоѝ съвратѧт̑сѧ въ слѣдъ бого́въ и҆хъ·

И бо́гъ сълїѧ҆́нъ да не сътвори́ши себѣ, пра́здникъ ѻ҆прѣсночныи снабди́ши.
з҃, дн҃їи да ѧ́си ѻ҆прѣснокы, ꙗ҆коже т̂и заповѣдахъ вс̂ѧ лѣта в но́выи мцс̑҇ъ, въ мцс̑҇ъ б̂о новы́и.
и҆зше́лъ е҆си ѿ землѧ̀ е҆гѷпетскы·

Всѧ́къ ѿверза́ѧѝ ложесна мн̂ѣ мꙋжеска полꙋ да бꙋдетъ первене́цъ те́лца, и҆ первене́цъ а҆́гньца, первене́цъ ѻ҆слѧ́те и҆змѣни́ши ѻ҆вце́ю, а҆́ще ли не и҆змѣни́ши, т̂о цѣ́нꙋ е҆го дасѝ.
и҆ всѧ́къ перве́нецъ сн҃овъ твои҆хъ и҆змѣни́ши, да сѧ не ѧ҆ви́ши предо мно́ю то́щъ·

В ше́сть днїи дѣ́лае҆ши.
въ седмы́и же дн҃ь да почї́еши, сѣѧ́твы, и҆ жа́твы преста́неши.
и҆ вели́къ дн҃ь недѣ́ленъ да сътвори́ши м̂и, нача́ла жа́твъ пшени́ца.
и҆ вели́къ дн҃ь съвокꙋпле́нїѧ посредѣ лѣта·

Въ тр̂и времена̀ в лѣтѣ, да сѧ ꙗ҆́ви́тъ всѧ́къ мꙋжескъ полъ твой, предъ гм҃ъ бм҃ъ і҆и҃левымъ·

Є҆гда̀ бо ѿженꙋ̀ ꙗ҆́зы́кы ѿ лица̀ твоег̑҇, и҆ разширю̀ предѣлы твоѧ̀, нѣсть б̂о помы́слити никомꙋж́е на зе́млю твою̀·

Є҆гда же а҆́ще прїидеши ꙗ҆́ви́тисѧ предъ гм҃ъ бм҃ъ твои҆мъ, въ тр̂и времена̀ лѣта, да не зако́леши съ ква́сомъ крови тре́бы мое҆ѧ, и҆ да не прележи́тъ на ѹ҆́трїа, заколе́нїа вели́ка дн҃и пасхи·

Нача́ла житъ землѧ̀ твое҆ѧ, да внесе́ши въ до́мъ г҃а б҃а твое҆го, да не свари́ши а҆́гньца въ мле́цѣ ма́тере е҆го·

И҆ рече г҃ь къ моѷсїю, пишѝ себѣ словеса̀ с̂и, въ словесѣхъ б̂о си́хъ полага́ю тебѣ завѣтъ і҆и҃лю·

И҆ б̂ѣ тамо моѷсїи предъ гм҃ъ, м҃, днїи, и҆ м҃, но́щїи, хлѣба не ꙗ҆́ды́и н̂и воды̀ пїѧ̀, и҆ въписа моѷсїи въ до́сцѣ словеса̀ с̂и завѣта, і҃, слове́съ·

Сходѧ́щж̑ꙋ моѷсїю съ горы̀ сина́иски, и҆ ѻ҆́бѣ до́сцѣ въ рꙋ́кꙋ бѣста моѷсїинꙋ.
сходѧ́щꙋ же е҆мꙋ съ горы̀, моѷсїи же не вѣ́дѧше, ꙗ҆́ко просла́висѧ ѻ҆бли́чїе пло́ти лица̀ е҆го, е҆гда̀ гл҃аше с ним̑·

І҆ ѹ҆зрѣ а҆аро́нъ, и҆ вс̂и сн҃ове і҆и҃левы моѷсїѧ, бѧ́ше б̂о просла́влено ѻ҆бли́чїе пло́ти лица̀ е҆го.
и҆ ѹ҆боѧ́шасѧ пристꙋпи́ти ко немꙋ̀, и҆ възва̀ ѧ҆̀ моѷсїи, и҆ възврати́шасѧ к немꙋ̀, а҆аро́нъ, и҆ вс̂и кнѧѕи со́нма·

И҆ гл҃а моѷсїи къ нимъ, и҆ посе́мъ прїидо́ша к немꙋ вс̂и сн҃ове і҆и҃левы, и҆ заповѣ́да и҆мъ вс̂е е҆ли́ко гл҃а к немꙋ̀ г҃ь на горѣ сина́истѣи·

Є҆гда́ же преста̀ гл҃ѧ к нимъ, възложѝ на лице свое покро́въ.
е҆гда̀ же въхожда́ше моѷсїи предъ г҃а гл҃ати к немꙋ̀, снима́ше покро́въ, до́ндеже схожда́ше·

И҆ съшд̑еши же гл҃аше къ всѣмъ сн҃омъ і҆и҃левымъ е҆ли́ко заповѣ́да е҆мꙋ г҃ь·

И҆ видѣша сн҃ове і҆и҃левы, ꙗ҆́ко просла́висѧ лицѐ моѷсїѻ҆во.
и҆ възложѝ моѷсїи покро́въ на лицѐ своѐ, до́ндеж̑ прїидетъ гл҃ати к нимъ

Глв̑҇а, л҃е·

И събра̀ моѷсїи ве́сь со́нм꙽ сн҃ов꙽ і҆и҃левъ, и҆ рече к ни́мъ, с̂и словеса̀ ꙗ҆́же гл҃а г҃ь твори́ти ѧ҆̀·

ше́сть дн҃їи дѣлай, а҆ въ дн҃ь седмы́и почі́еши.
ст҃а сꙋбо́та поко́и г҃ꙋ, всѧ́къ творѧ́и дѣло в н̂ю да ѹ҆́мретъ.
да не възгнѣти́те ѻ҆гнѧ̀, въ всѣхъ домх̑ѣ ва́шихъ.
въ дн҃ь сꙋбо́тныи, а҆́зъ г҃ь·

И҆ рече моѷсїи къ всемꙋ̀ со́нмꙋ сн҃овъ і҆и҃левъ, гл҃ѧ с̂е сло́во, е҆же завѣща̀ г҃ь гл҃ѧ, възмѣте ѿ себѐ са́ми ѹ҆ча́стїе г҃ꙋ, всѧ́къ по во́ли ср҃дца свое҆го.
да да́стъ на ѹ҆ча́стїе г҃ꙋ, зла́то и҆ сребро̀, и҆ мѣдь, и҆ синетꙋ̀, и҆ багрѧни́цꙋ, и҆ червлени́цꙋ, сꙋгꙋ́бъ съпрѧ́денꙋ, и҆ виссо́нꙋ тканаго, и҆ ко́злїю волнꙋ, и҆ ко́жа ѻ҆́внѧ червле́ны, и҆ ко́жа си́нѧ, и҆ древеса̀ негнию́ща, и҆ ка́мени сарда́ньскы·

И҆ ка́мени въ ваѧ҆́нїе ризѣ, ве́рхнеи, и҆ ѧж̑ до землѧ̀.
и҆ всѧ́къ премꙋдрый ѹ҆мом̑ въ ва́съ, пришедъ да дѣ́лае҆тъ, вс̂е е҆ли́ко заповѣ́да г҃ь·

Хра́мъ ѻ҆по́ны, и҆ покро́вы, и҆ разво́ры, и҆ затво́ры, и҆ столпы̀.
и кїѻ́тъ свѣдѣнїѧ и҆ носи́ла е҆го и҆ ѻ҆цѣще́нїе е҆го, и҆ завѣсꙋ·

и҆ ѻпо́нꙋ притвора, и҆ столпы̀ е҆го, ка́мени и҆змара́гдовы·

И҆ ѳимиѧм̑ и҆ ма́сло древѧно́е пома́занное и҆ ма́сло свѣти́лное, и҆ а҆рама́ты на и҆е҆ле́и пома́занїѧ, и҆ ѳимїѧ́мъ слꙋже́нїѧ·

И҆ трапезꙋ, и҆ вс̂ѧ съсꙋды е҆го и҆ свѣщникъ свѣще́нїѧ, и҆ вс̂ѧ съсꙋды е҆го, и҆ ѳимїѧмъ слꙋже́нїѧ, и҆ ѻпо́нꙋ ѹ҆ две́ри храмꙋ.
и҆ ѻ҆́лтарь, и҆ вс̂ѧ съсꙋды е҆го и҆ ри́зы ст҃аѧ а҆аро́на жерца̀, и҆ ри́зы в ни́х же слꙋжитъ въ ст҃ыни, и҆ ри́зы сн҃омъ а҆аро́новым̑ жре́ческїѧ·

И҆зы́де же весь со́нмъ сн҃овъ і҆и҃левъ, ѿ моѷсїѧ, и҆ принесо́ша ко́ждо и҆хъ, ꙗ҆́ко срд̑це и҆хъ ѻ҆блюбѝ, и҆ ꙗ҆́коже помы́сли дш҃а е҆го, наро́къ и҆ принесо́ша ѹ҆ча́стїе г҃ꙋ.
на вс̂е дѣло храмꙋ свѣдѣ́нїѧ, и҆ на вс̂ѧ съсꙋды е҆го, и҆ на вс̂ѧ ри́зы ст҃ыѧ.
принесо́ша же не то́чїю мꙋж́и н̂о и҆ же́ны, ко́ждо, ꙗ҆́коже помы́сли ѹ҆мом̑·

Принесо́ша печа́ти, и҆ ѹ҆серѧ́зѧ, и пе́рстени плени́ца, и҆ мони́ста, и҆ всѧкꙋ кꙋ́знь зла́тꙋ.
вс̂и е҆ли́ко принесо́ша ѹ҆ча́стїе г҃ꙋ·

И҆ всѧ́къ ѹ҆ него́же сѧ ѻ҆брѣте виссо́нъ, и҆ всѧ́къ ѹ҆ него́же сѧ ѻ҆брѣте ко́жи ѻ҆́вни черъвле́ны, и҆ ко́жа си́нѧ·

Вс̂е же ѹчащаѧ ѹ҆ча́стїе, сребро̀ и҆ мѣдь.
принесо́ша ѹ҆ча́стїе г҃ꙋ, и҆ в ни́хже сѧ ѻ҆брѣто́ша древеса̀ негнию́ща, на вс̂е съдѣлованїе съсꙋдовъ принесо́ша·

и҆ всѧ́ка жена̀ мꙋдра ѹ҆мо́мъ, и҆ рꙋкама прѧде, принесо́ша прѧ́денїе синетꙋ̀, и҆ багрѧни́цꙋ, и҆ червлени́цꙋ, и҆ виссо́нъ, и҆ вс̂ѧ же́ны, и҆́мже любовь въ ѹ҆мѣ и҆хъ, хи́тростїю, съпрѧдо́ша во́лнꙋ ко́злїю·

Кнѧ́ѕи же принесо́ша ка́мени и҆змара́гдовы, и҆ ка́мени на соверше́нїе.
ри́зѣ врь́хнеи, и҆ на сло́во и҆ зложе́нїѧ, и҆ дре́вѧно ма́сло пома́занїѧ, и҆ сложе́нїѧ ѳимиѧ́ма·

И҆ всѧ́къ мꙋж꙽ и҆ жена̀, и҆мже разꙋмѣва́ше ѹ҆́мъ и҆хъ.
въше́дше твори́ти вс̂ѧ дѣлеса̀, е҆ли́ко заповѣда г҃ь моѷсїѻмъ, и҆ принесо́ша сн҃ове і҆и҃левы ѹ҆ча́стїе г҃ꙋ·

Рече же моѷсїи сн҃омъ і҆и҃левымъ, с̂е нарече б҃ъ и҆менемъ веселе́ила ѹ҆рїи́на сн҃а ѻ҆́рова ѿ племенѐ і҆ѹ́дина, и҆ напо́лни и҆̀ дх҃а бж҃їѧ.
премꙋдрости, и҆ ра́зꙋма, ѹ҆мѣнїа всего̀ древа дѣ́ланїа.
въ всх̑ѣ дѣлесѣхъ древодѣлныхъ твори́ти зла́то, и҆ сребро̀, мѣдь, и҆ ва́ѧти, ка́мени, и҆ дѣлати дре́во, и҆ твори́ти по всемꙋ̀ дѣ́лꙋ премꙋдрости·

И҆ приложи́ти же, въ ѹ҆мѣ дастъ семꙋ, і҆ елна́вꙋ а҆хисама́ховꙋ, ѿ племенѝ да́нова, и҆ напо́лни ѧ҆̀ премꙋдрости, и҆ ра́зꙋма, ѹ҆мо́мъ вс̂ѧ разꙋмѣти.

Твори́ти дѣло ст҃ыни тка́нїа и҆ спестре́нїѧ, и҆стка́ти червлени́цꙋ и҆ багрѧни́цꙋ, и҆ виссо́нъ, твори́ти вс̂е дѣло древодѣ́ли хꙋдо́жна·

Глв̑҇а, л҃ѕ·

Сътвори́лъ веселеи́лъ, і҆ елиа́въ, и҆ всѧ́къ мꙋ́дрыи ѹ҆мо́мъ, е҆мꙋже дана̀ е҆сть премꙋдрость, и҆ хи́трость разꙋмѣти.
твори́ти вс̂ѧ дѣлеса̀ лѣпотна, ꙗ҆́же ст҃ыни по всемꙋ̀ е҆ли́ко заповѣда г҃ь·

И҆ възва̀ моѷсїи веселеи́ла, і҆ елїа́ва, и҆ вс̂ѧ и҆мꙋщаѧ премꙋдрости.
и҆́мже даст꙽ б҃ъ ра́зꙋмъ и҆ хи́трость въ срд̑цы, и҆ вс̂ѧ во́лею приходѧ́щаѧ къ дѣлесѝ, ꙗ҆ко съверши́ти е҆̀·

И҆ взѧ́ша ѿ моѷсїѧ вс̂ѧ приноше́нїѧ ꙗ҆́же принесо́ша сн҃ове і҆и҃левы на вс̂е дѣ́ло ст҃ыни твори́ти ѧ҆̀, си́ же прїима́хꙋ.
посе́мъ бо́лее вс̂ѧ приноси́маѧ, ѿ приносѧ́щихъ заѹ҆́тра, заѹ҆́тра·

И҆ приходѧ́ще вс̂и мꙋдрїи, и҆же творѧ́хꙋ дѣлеса̀ ст҃ыни, ко́ждо по свое҆мꙋ дѣлꙋ сами дѣлахꙋ.
и҆ реко́ша моѷсїю, ꙗ҆́ко мно́го прино́сѧтъ лю́дїе вс̂ѧ дѣлеса̀, е҆ли́ко же заповѣда г҃ь сътвори́ти·

И҆ повелѣ моѷсїи проповѣдати въ по́лцѣ гл҃ѧ, мꙋжъ и҆ жена̀, ктомꙋ̀ не приноси́тѣ, въ прино́съ ст҃ыни, и҆ преста́ша лю́дїе посе́мъ приноси́ти.
дѣлеса́ же бѧхꙋ и҆мъ мно́га, на сътворе́нїе твори́ти, и҆ скон̑҇ча́ша·

И҆ сътворѝ всѧк̑҇ премꙋдрыи, и҆ въ дѣ́лающихъ ри́зы ст҃ыѧ, ꙗ҆́же сꙋть а҆аро́нꙋ жерцꙋ̀, ꙗ҆́коже заповѣда г҃ь моѷсїю·

Сътвори́ша же ри́зꙋ ве́рхнюю, ѿ зла́та, и҆ синеты̀, и҆ багрѧни́ца, и҆ червлени́ца съпрѧ́дены, и҆ виссо́нꙋ тка́наго.
и҆ раздѣли́ша зла́то по вла́сꙋ, ꙗ҆́коже съшити съ синето́ю, и҆ багрѧни́цею, и҆ съ червлени́цею прѧ́деною, и҆ съ виссо́ном̑ дѣло съверше́ное сътвори́ша в нем̑·

Ри́зꙋ же ве́рхнюю съдрьжа́щꙋсѧ, съ ѻ҆бою̀ странꙋ̀, дѣло шве́нно к себѣ̀ съплете́но, са́ми ѿ себѐ сътвори́ша, по е҆го̀ тва́ри ѿ зла́та, ѿ синеты̀, и҆ багрѧни́ца, и҆ червлени́ца съпрѧ́дены, и҆ виссо́нꙋ тка́наго, ꙗ҆́коже заповѣда г҃ь моѷсїѻви·

Сътвори́ша ж̑ ѻ҆́ба ка́мени и҆змара́гдова състѣгана сво́рою, и҆ ѻ҆бложена зла́том̑.
и҆зва́ѧно и҆зва́ѧнїемъ зна́менїѧ, ѿ и҆ме́н꙽ сн҃овъ і҆и҃левъ, и҆ възложи́ша на ѻ҆́бѣ рамѣ ри́зы ве́рхнѧа.
ка́менїе па́мѧть е҆ста̀ сн҃овъ і҆и҃левъ, ꙗ҆́коже заповѣда г҃ь моѷсїю·

И҆ сътвори́ша сло́во дѣло шве́нно пестрото́ю на дѣло ри́зы ве́рхнѧа, ѿ зла́та и҆ синеты̀, и҆ багрѧни́ца, и҆ червлени́ца съпрѧ́дены, и҆ виссо́нꙋ тка́наго четвероѹ҆голно же, сꙋгꙋбо сътвори́ша сло́во.
пѧ́ди в долготꙋ̀, пѧ́ди же в широтꙋ̀ сꙋгꙋ́бъ·

И҆ съши́ста в нем̑ шве́нїемъ по три ка́мени четы́рми рѧ́ды, рѧ́дъ ка́менїи сардїѻ҆́нъ, топазїѻ́нъ, и҆ змара́гдъ, си́ми е҆ді́н꙽ рѧдъ.
рѧ́д же вторы́и а҆нъѳра́ксъ и҆ сапфи́ръ і҆ а́списъ.
рѧд же тре́тїи, лигирїѻ́нъ, і҆ а҆хати́съ, і҆ а҆меѳистос̑҇, рѧ́д же четве́ртыи хрисоли́ѳъ, и҆ вирилїѻ́нъ і҆ ѻ҆нихїѻ́н꙽.
ѻ҆кова́нѣ ѻ҆́коло зла́томъ, і҆ ѻсаже́но въ зла́тѣ·

Ка́мени же бѧхꙋ, ѿ и҆ме́нъ сн҃овъ і҆и҃левъ, в҃і, по и́менемъ и҆хъ и҆зва́ѧ҆но зна́менїѧ ко́жд̑о свои҆мъ и҆́менем̑, въ, в҃і.
племе́нъ·

И҆ сътвори́ша ѻ҆́коло.
слова тре́сны съплете́ны, дѣло плетени́чно ѿ зла́та чи́ста.
и҆ сътвори́ша дв̂а щита̀ зла́та, и҆ дв̂ѣ ѻ҆́бодѣ зла́тѣ, и҆ възложи́ша на ѻ҆́ба конца̀ сло́ва·

И҆ вложи́ша плетени́ца зла́ты въ ѻ҆́бѣ ѻ҆́бодѣ, съ ѻ҆бою̀ концꙋ̀ слова.
въ ѻ҆́бѣ сложе́нїи дв̂ѣ плетени́ца.
и҆ възложи́ша на ѻ҆́ба щита̀, и҆ възложи́ша на ѻ҆́бѣ ра́мѣ ри́зы ве́рхнѧа, съпроти́въ лицемъ е҆го·

И҆ сътвори́ша дв̂ѣ ѻ҆́бодѣ зла́тѣ, и҆ възложи́ша на ѻ҆́ба ѹ҆́гла сло́ва до конца̀ съза́ди ри́зѣ, внꙋтрьѹ҆́дꙋ ри́зѣ ве́рхнеи·

И҆ сътвори́ша дв̂ѣ ѻ҆́бодѣ зла́тѣ, и҆ положи́ша въ ѻ҆́бѣ ра́мѣ ри́зѣ ве́рхнеи ни́же на лицы̀ по съставле́нїю, вы́ше съста́ва ри́знаго, и҆ стѧгнꙋша слово ѻ҆́бодми, и҆же на немъ.
въ ѻ҆́бодѣ ри́зныѧ съдръжа́щисѧ, синето́ю съпрѧ́дены, въ шве́нїи ри́знм̑ѣ, да не спаде́тъ сло́во ѿ ри́зы, ꙗ҆́коже заповѣда г҃ь моѷсїю·

И҆ сътвори́ша подо́лнꙋю ри́зꙋ е҆же подъ ве́рхнею.
дѣ́ло шве́но плете́но вс̂е синето́ю·

ѻ҆жерелїе же внꙋтренеи ризѣ, на средѣ шве́нно, съплете́но.
ѻ҆ме́ты, и҆мꙋщи ѻ҆́коло ѻ҆́жере́лїе нераз̑лꙋче́но·

И҆ сътвори́ша ѻ҆ме́ты, ризѣ ѹ҆́тренеи до́лѣ ꙗ҆́ко процвѣта́юща ши́пка пꙋгви, ѿ синеты̀, и҆ багрѧни́ца.
и҆ червлени́ца, съпрѧ́дены, и҆ виссо́нꙋ тка́наго·

И҆ сътвори́ша звонца̀ зла́ты, и҆ възложи́ша звонца̀ на ѻ҆ме́ты ризы внꙋтренѧа, ѻ҆́крс̑҇тъ междꙋ̀ пꙋ́гвами, звонца̀ зла́ты.
таже пꙋ́гви на ѻ҆ме́тахъ ри́зы ѻ҆́крс̑҇тъ въ слꙋжбꙋ, ꙗ҆́коже повелѣ г҃ь моѷсїю·

И҆ сътвори́ша ризы съ виссо́нꙋ дѣло тка́но а҆аро́нꙋ, и҆ сн҃омъ.
е҆го, и҆ клобꙋкѝ съ виссо́нꙋ, и҆ ѹ҆вѧ́сло съ виссо́нꙋ, и҆ надра́гы со виссо́нꙋ тка́наго и҆ по́ѧсы их̑ съ виссо́нꙋ, и҆ синеты̀ и҆ багрѧни́ца, и҆ червлени́ца дѣло пестрѧ́щаго, ꙗ҆́коже заповѣда г҃ь моѷсїю·

И҆ сътвори́ша до́скꙋ зла́тꙋ въ ѻ҆сщ҃енїе ст҃ыни.
ѿ зла́та чи́ста.
и҆ въписа́ша на не́и писмена̀ въва́ѧные зна́менїѧ ѻ҆сщ҃енїе г҃ꙋ.
и҆ възложи́ша ю҆̀ на под̑метъ си́нь, ꙗ҆коже лежа́ти, на ѹ҆вѧ́слѣ верхꙋ̀ свы́ше ꙗ҆коже заповѣ́да г҃ь моѷсїѻ҆ви·

И҆ сътвори́ша храмꙋ, і҃, ѻ҆по́нъ, к҃. и҆, и҃. лако́тъ долгота̀ е҆ді́ноа ѻ҆по́ны, си́це же бѣша вс̂и, четы́рех̑ же лакот̑ широта̀ кое҆ѧждо̀ ѻ҆по́ни·

И҆ сътвори́ша завѣсꙋ ѿ синеты̀ и҆ багрѧни́ца, и҆ червлени́ца спрѧ́дены, и҆ виссо́нꙋ тка́наго, дѣло шве́нно на завѣсѣ херꙋви́мъ, шве́нїем꙽ навлаче́нъ херꙋви́мъ·

И҆ възложи́ша ю҆̀ на д҃, столпы̀ негнїю́ща позлаще́ны зла́томъ.
и҆ верхѝ и҆хъ зла́ты.
и҆ стоѧ́ла и҆хъ.
д҃, сре́брѧны, и҆ сътвори́ша две́рем꙽ запо́нꙋ храмꙋ свѣдѣнїѧ, ѿ синеты̀ и҆ багрѧни́ца.
и҆ червлени́ца съпрѧ́дены.
и҆ виссо́нꙋ тка́наго, дѣло шве́нно херꙋви́мъ и҆ столпы̀ е҆ѧ пѧ́ть.
и҆ ѻ́боди и҆хъ, и҆ разво́ры и҆хъ, и҆ верхѝ и҆хъ позлати́ша зла́томъ, и҆ стоѧ́ла и҆хъ, е҃ мѣдѧна.
и҆ сътвори́ша притворъ къ восто́кꙋ і҆ ю҆гꙋ.
простра́нство притво́ра съ виссо́нꙋ тка́наго, р҃. до р҃ и҆ столпы̀ и҆хъ, к҃, и҆ стоѧ́ла и҆х꙽, к҃ мѣдѧна, і҆ ѹ҆́гол꙽ къ сѣ́верꙋ, р҃ до р҃ и҆ столпы̀ и҆хъ, к҃, и҆ стоѧ́ла и҆х꙽, к҃ мѣдѧны.
і҆ ѹ҆́гол꙽ къ сѣ́верꙋ, р҃ до р҃ столпы̀ е҆го.
к҃, и҆ стоѧ҆ла и҆хъ.
к҃ мѣдѧна, і҆ ѹ҆́голъ къ мо́рю, попо́ны, н҃, ла́ктїи, столпы̀ е҆го·, і҃, и҆ стоѧ́ла и҆хъ, і҃, і҆ ѹ҆́голъ къ восто́кꙋ, н҃, лактїи.
ѻ҆по́ны.
н҃, ла́ктїи къ ю́гꙋ.
столпы̀ е҆го тр̂и.
и҆ стоѧ́ла и҆хъ тр̂и.
и҆ на второ́м꙽ ѹ҆́ ю́га ѿсю́дꙋ и҆ ѻ҆вꙋ́дꙋ.
ѹ҆ две́рїи притво́рꙋ ѻ҆по́ны, е҃і, ла́ктїи.
и҆ столпы̀ и҆х꙽ тр̂и, и҆ стоѧ́ла и҆хъ тр̂и, всѧ́ же ѻ҆по́ны хра́мꙋ съ виссо́нꙋ тка́наго.
и҆ стоѧ́ла столпо́въ и҆хъ мѣдѧны и҆ кра́ѧ и҆хъ сре́брѧны.
и҆ верхѝ и҆хъ посре́брены сре́бромъ, и҆ столпы̀ и҆хъ посре́брены сре́бром.
вс̂и столпы̀ притво́рꙋ, и҆ покрыва́ло две́рїи притво́рꙋ, дѣло шве́нно ѿ синеты̀ и҆ пор꙽фи́ры и҆ червлени́ца прѧ́дены, и҆ виссо́нꙋ тка́наго.
к҃, ла́ктїи долгота̀ и҆ высота̀.
широта́ же пѧть ла́ктїи ра́вны ѻ҆по́намъ притво́рꙋ.
и҆ столъпы̀ и҆хъ, д҃. и҆ стоѧ́ла и҆хъ.
д҃, мѣдѧны, и҆ кра́ѧ и҆хъ сре́брены, и҆ верхѝ и҆хъ посре́брены сре́бром, и҆ вс̂и колкѝ притво́рꙋ ѻ҆́коло мѣдѧны.
и҆ сїе ѕижде́нїе хра́мꙋ свѣдѣнїа ꙗ҆́коже заповѣда г҃ь моѷсїю въ слꙋже́нїе быти леви́томъ.
чрезъ и҆ѳама́ра сн҃а а҆аро́на жерца̀, и҆ веселеи́ла ѹ҆рїина ѿ племенѐ і҆ѹ́дина сътворе́но б̂ѣ ꙗ҆́ко заповѣда г҃ь моѷсїю.
і҆ е҆лиа́ва а҆хисама́хова ѿ племенѐ да́нова, ꙗ҆́же съѕида́ше тка́ныѧ ве́щи и҆ швеныѧ пестрѧ̀ с червлени́цы и҆ виссо́нꙋ·

Глв̑҇а, л҃з·

И сътворѝ веселеи́лъ кїѻ́т꙽, и҆ позлатѝ и҆̀ зла́томъ чи́стым̑, внꙋт́рьѹ҆́дꙋ и҆ вн̂ѣѹ҆́дꙋ.
сътворѝ е҆мꙋ злат꙽ ѻ҆бво́дъ ѻ҆бою́дꙋ, и҆ сътворѝ е҆мꙋ, д҃ ѻ҆́боды зла́ты, на, д҃, страны̀ е҆го дв̂а е҆ді́номꙋ ѹ҆́глꙋ, и҆ дв̂а дрꙋго́мꙋ ѹ҆́глꙋ широкѝ носиламъ ꙗ҆́ко носи́ти е҆го и҆́ми.
и҆ сътворѝ ѻ҆цыще́нїе надъ кїѻ́томъ ѿ зла́та чиста.
и҆ дв̂а херꙋви́ма зла́ты, херꙋвим̑ е҆ді́нъ ѿ ѹ҆гла е҆ді́наг̑҇ ѻ҆цыще́нїѧ.
и҆ херꙋвим̑ дрꙋгїи ѿ втораг̑҇ ѹ҆́гла ѻ҆цыще́нїѧ ѻ҆сѣнѧ́юще кры́лами и҆хъ над̑ ѻ҆цыще́нїемъ.
и҆ сътворѝ т́рапе́зꙋ прд̑еложе́нїѧ ѿ зла́та чи́ста.
и҆ сътворѝ е́й, д҃, ѻ҆́боды зла́ты, дв̂а ѻ҆́боды е҆ді́номꙋ ѹ҆́глꙋ, и҆ дв̂а ѻ҆́боды ѹ҆́глꙋ второ́мꙋ широ́ки ꙗ҆ко подноси́ти носи́лами еѧ̀.
и҆ носи́ла кѷѻ́тꙋ и҆ трапе́зѣ позлатѝ зла́том̑.
и҆ сътворѝ съсꙋ́ды трапе́зѣ блю́да, и҆ ѳимїам̑ник꙽ и҆ ча́ша зла́ты, в ни́хже пролїа́нїе вълїа́ти.
и҆ сътворѝ свѣти́лникъ ꙗ҆́же свѣти́ти зла́тыи крѣ́пкїи і҆ и҆ сте́блїе по ѻ҆бо́ю странꙋ̀ е҆го.
и҆ ѿ сте́блїи е҆го вѣтви и҆схожда́хꙋ, тр̂и ѿ е҆ді́ноѧ.
и҆ тр̂и ѿ вторы́ѧ страны̀ ра́вны кꙋпно.
и҆ свѣти́ла и҆хъ ꙗ҆́же на верхꙋ̀ и҆хъ въ ѻ҆́бразъ ѻ҆рѣ́ха ѿ них꙽, и҆ цвѣтцы ѿ ни́х꙽, и҆ крꙋзи и҆хъ, и҆ да бꙋ́дꙋтъ свѣти́ла на них̑·

и҆ крꙋгъ седмы́и на кра́ю свѣти́ла, на верхꙋ̀ крѣпкїи ве́сь златъ, и҆ седмь свѣти́лъ на не́мъ зла́тыхъ, и҆ щипцы̀ е҆го зла́тыи.
под̑ста́вы е҆го зла́ты, си́це же посребрѝ столпы̀, и҆ сътворѝ столпо́мъ ѻ҆́боды зла́ты.
и҆ съвершѝ и҆ позлатѝ разво́ры зла́томъ.
и҆ посрѣбрѝ столпы̀ завѣ́се зла́тыѝ·

и҆ сътворѝ лꙋкоты̀ зла́ты.

Си́це сътвори ѻ҆́боды хра́ма зла́ты, и҆ ѻ́боды ѻ҆понѣ, и҆ ѻ́боды на роспростре́нїе ѻ҆по́ны сверхꙋ̀ мѣдѧны.
та́ко сътворѝ ча́ши сре́брены хра́ма,<.>

И҆ верхѝ мѣдѧны две́рїи хра́ма, и҆ две́рїи притво́ра·

И҆ лꙋкоты̀ сътворѝ сребрѧны над̑ столпы̀, си́це посребрѝ их̑<.>

Та́коже сътворѝ и҆ кол̑҇кы̀ хра́ма и҆ кол̑҇кѝ притво́ра мѣдѧны·

Глв̑҇а, л҃и

Сице сътворѝ ѻ҆лта́ръ мѣдѧн̑҇ и҆ ѻ́гнище мѣдѧно ꙗ҆́же быс̑҇ лю́демъ стоѧ́щимъ со́нмища коре́ѻ҆ва, и҆ та́ко сътворѝ вс̂ѧ съсꙋды ѻ҆лта́рѧ и҆ стоѧ́ла е҆го, и҆ ѻ҆гнищѐ е҆го и҆ ча́ши, и҆ ви́лицы е҆го.
си́це сътворѝ ѻ҆лтарю̀, ѻ҆́кр́естъ положе́нїе дѣлом̑, мрежным̑ ѻ҆гнище, под ним̑ до среды̀ е҆го.
и҆ положѝ на немъ, д҃. ѻ҆́боды ѿ четырехъ стран̑҇ положе́нїѧ ѻ҆лтарѧ́ мѣдѧны широ́кы носи́ламъ носи́ти ѻ҆лтарь на нихъ.
си́це же сътворѝ и҆ еле́и пома́занїѧ ст҃ыи и҆ сложе́нїе ѳимїѧ́ма дѣло чи́стое бл҃гоѹ҆ха́нїѧ·

Сице сътворѝ и҆ ѹ҆мыва́лницꙋ мѣдѧнꙋ и҆ стоа́ло еа̀ мѣдѧно смотре́нїѧ постѧ́щихъ ѧж̑ пости́шасѧ ѹ҆ дверїи хра́ма свѣдѣнїѧ, во́нже дн҃ь поста́ви и҆̀.
и҆ сътворѝ ѹ҆мыва́лницꙋ ꙗ҆́же ѹ҆мыва́хꙋсѧ ѿ неѧ̀, моѷсїи и҆ а҆а҆ро́нъ и҆ сн҃ове е҆го, рꙋцѣ и҆хъ и҆ но́ѕѣ входѧ́щимъ и҆мъ въ хра́мъ свѣдѣнїѧ.
и҆л̂и когда̀ прихожда́хꙋ къ ѻ҆́лтарю слꙋжи́ти ѻ҆мыва́хꙋсѧ ѿ него̀, ꙗ҆́коже заповѣ́да г҃ь моѷсїю.
всѧ́кое же зла́то е҆же дѣлано бысть в дѣлѣ по всѧ́комꙋ дѣла́нїю первен̑҇чества, ст҃ыхъ.
бѧ́ше зла́та первенъства̀.
к҃ѳ, тала́нътовъ, и҆ сед̑мь со́тъ.
и҆ ̀
к҃. си́клевъ по си́клю ст҃омꙋ.
и҆ сребра ѹ҆ча́стнаго ѿ смотре́нїѧ людїи со́нмꙋ, р҃, тала́нтовъ.
и҆ ҂а҃, и҆ се́дмь сот̑, и҆ седмьдесѧ́тъ и҆ пѧть си́клевъ, дра́хма е҆ді́на на главѣ̀ полъ си́клѧ, по си́клю ст҃омꙋ.
и҆ всѧ́къ приходѧ́и къ присѣще́нїю.
ѿ к҃ лѣтъ.
и҆ вы́ш꙽шей, на ѯ҃ те́мъ, и҆ на ҂г҃ пѧтьсо́тъ, и҆ н҃ и҆ быша р҃ тала́нтъ сребра̀, на съверше́нїе р҃ до́скъ храмꙋ и҆ до́ски завѣтныѧ, р҃ до́скъ р҃ тала́нтъ.
и҆ тала́нтъ до́скъ.
а҆ ты́сѧщꙋ сед̑мьсо́тъ, и҆ о҃е си́кль, сътвори́ша на лꙋкоты̀ сто́лпныѧ.
и҆ позлати́ша до́ски и҆хъ и҆ ѹ҆краси́ша ѧ҆̀·

А҆ мѣдь ѹ҆ча́стнаѧ, о҃, тала́нтъ, и҆ ҂в и҆ у҃ си́клевъ.
и҆ сътвори́ша ѿ него стоѧ́ла две́рнаѧ хра́мꙋ свѣдѣнїѧ, и҆ стоѧ́ла хра́мꙋ ѻ҆́крс̑҇тъ.
и҆ стоѧ́ла две́рїи притворꙋ.
колкы̀ храмꙋ и҆ колкы̀ притворꙋ ѻ҆́крстъ, и҆ ѻ҆бложе́нїе мѣдѧно ѻ҆́крс̑҇тъ ѻ҆́лтарѧ и҆ вс̂ѧ съсꙋ́ды хра́мꙋ свѣдѣнїѧ.
и҆ сътвори́ша сн҃ове і҆и҃леви, ꙗ҆́коже заповѣ́да г҃ь моѷсїю, та́ко сътвори́ша.

И҆збыва́ющим же зла́томъ ѹ҆ча́стїѧ створи́ша съсꙋды, слꙋжи́ти в нихъ пред̑ гм҃ъ·

Глв̑҇а, л҃ѳ

Съ и҆збыва́ю҆щаѧ же синеты̀, и҆ багрѧница и҆ червлени́ца и҆ вис꙽со́нꙋ сътвори́ша ри́зы слꙋжебныѧ̀ а҆а҆ро́нꙋ, ꙗ҆́коже слꙋжи́ти в ни́хъ въ ст҃ыни.
и҆ принесо́ша ризы къ моѷсі́ю.
и҆ хра́мъ и҆ вс̂ѧ съсꙋ́ды е҆го.
и҆ разворы е҆го и҆ столпы и҆ стоѧ́ла е҆го.
и҆ киѻ́тъ завѣта, и҆ под̑поръ е҆го.
и҆ ѻ҆лтарь и҆ вс̂ѧ съсꙋ́ды е҆го, и҆ ел́еи помаза́нїа, и҆ ѳїмиѧ́мъ сложе́нїѧ, свѣти́ло чтс̑҇ое.
и҆ свѣти́ла въжига́нїа, и҆ ма́сло свѣще́нїа.
и҆ трапе́за пред̑лага́нїа и҆ вс̂ѧ съсꙋ́ды е́ѧ, и҆ хлб̑҇ѣ пред̑ложе́ныи, и҆ ри́зы ст҃ыѧ ꙗ҆́же слꙋжитъ а҆а҆ро́нъ, и҆ ри́зы сн҃овъ е҆го въ жре́чество·

И҆ ѻ҆по́ны притво́рꙋ и҆ стл̑҇опы̀ и҆ стоѧ́ла е҆го, и҆ завѣ́са две́рїй хра́мꙋ, и҆ две́рїй притво́рꙋ.
и҆ вс̂ѧ съсꙋ́ды хра́ма, и҆ всѧ дѣ́ла е҆го, и҆ ко́жи ѻ҆́внѧ ѻ҆червле́ны и҆ покро́вы ко́жа си́нѧ.
и҆ всѣхъ ѻ҆по́нъ, и҆ колъко́въ и҆ вс̂ѧ дѣ́ла на съдѣ́ланїе хра́ма свѣдѣнїю, е҆ли́ко же завѣ́да г҃ь моѷсїю, та́ко сътвори́ша сн҃ове і҆и҃л҃ви вс̂е схожед̑нїе·

И҆ ви́дѣ моѷсїи вс̂ѧ дѣ́ла иже сътвори́ша е҆̀, ꙗ҆коже заповѣ́да г҃ь моѷсїю, та́ко сътвори́ша е҆̀, и҆ блс̑҇ви ѧ҆̀ моѷсїи·

Глв̑҇а, м҃·

И рече г҃ь къ моѷсїю гл҃ѧ.
въ пръвыи дн҃ь мцс̑҇а пр́ьваго поста́виша хра́м꙽ свѣдѣнїа, и҆ да положи́ши киѻ́тъ свѣдѣнїѧ.
и҆ да покры́еши кїѻт̑ завѣсою, и҆ да принесе́ши трапе́зꙋ, и҆ прд̑еложи́ши прд̑еложе́нїе еѧ̀, и҆ да внесе́ши свѣти́лникъ, и҆ да въста́виши свѣти́ла е҆го.
и҆ зложи́ши ѻ҆лта́рь зла́тыи въ ка́жде́нїе прд̑е кїѻ́томъ свѣдѣнїѧ, и҆ да положи́ши закро́въ завѣсы, ѹ҆ две́рїи хра́ма свѣдѣнїѧ и҆ ѻ҆лта́рь приноше́нїа, поста́виши ѹ҆ две́рїи хра́ма свѣдѣнїѧ.
и҆ да поста́виши храмъ и҆ вс̂е е҆же в не́мъ, и҆ да ѻ҆ст҃иши и҆̀ ѻ҆́крс̑҇тъ.
и҆ во́змеши ма́сло помаза́нїѧ, и҆ да пома́жеши храм̑ и҆ вс̂е е҆же в немъ, и҆ ѻ҆ст҃иши и҆̀, и҆ вс̂ѧ съсꙋды е҆го, и҆ да бꙋдетъ ст҃ъ.
и҆ да пома́жеши ѻ҆лта́рь, приноше́нїи, и҆ вс̂ѧ съсꙋды е҆го, и҆ ѻ҆ст҃и́ши ѻ҆лта́рь, и҆ да бꙋдетъ ѻ҆лта́рь ст҃аѧ ст҃ыхъ.
и҆ да приведе́ши а҆аро́на, и҆ сн҃ы е҆го, прд̑е две́ри хра́мꙋ свѣдѣнїѧ и҆ да и҆змы́еши ѧ҆̀ водо́ю, и҆ да ѻ҆блече́ши а҆а҆ро́на, в ри́зы ст҃ыѧ, и҆ пома́жеши и҆̀ и҆ ѻ҆ст҃иши и҆̀, и҆ да жрет̑ мн̂ѣ и҆ сн҃ы е҆го да приведе́ши и҆̀, ѻ҆блече́ши ѧ҆̀ в ри́зы, и҆ да пома́жеши ѧ҆̀, ꙗ҆коже пома́за ѿц҃а и҆мъ, и҆ да жрꙋт꙽ мн̂ѣ, и҆ да бꙋтъ, ꙗ҆́коже бы́ти и҆мъ в пома́занїе жре́чествꙋ въ вѣкы в род̑ и҆хъ.
и҆ сътворѝ моѷсїи вс̂е е҆лѝко заповѣда е҆мꙋ г҃ь си́це сътворѝ·

И҆ бысть въ пр́ьвыи мцс̑҇ъ въ второ́е лѣто и҆сходѧ́щимъ и҆мъ ѿ е҆гѷпта, въ пр́ьвыи дн҃ь мцс̑҇а ста̀ хра́мъ·

И҆ поста́ви моѷсїи хра́мъ, и҆ въложѝ доски, и҆ въве́рзе разво́ры, и҆ поста́ви столпы̀, и҆ прострѐ ѻ҆по́ны ѻ҆коло хра́ма, и҆ възложѝ ѻ҆поны хра́ма на́нь горѣ̀, ꙗ҆́коже заповѣда г҃ь моѷсїю·

И҆ взе́мъ свѣдѣнїѧ вложѝ в꙽ киѻ́тъ, и҆ поста́ви но́ги под̑ кїѻ́тъ, и҆ внесѐ кїѻ́тъ въ хра́мъ и҆ вложѝ покро́въ, и҆ завѣсы и҆ закры̀ киѻ́тъ свѣдѣнїѧ ꙗ҆коже заповѣда г҃ь моѷсїю·

И҆ поста́ви трапе́зꙋ въ хра́мѣ свѣдѣнїѧ, вложѝ на ѹ҆́голъ хра́мꙋ свѣдѣ́нїѧ, и҆же къ сѣверꙋ, внѣѹ҆́дꙋ завѣсы хра́мꙋ, и҆ възложѝ на́ ню хлѣбъ прд̑еложе́ныи прд̑е гм҃ъ, ꙗ҆́коже заповѣда г҃ь моѷсїю·

И҆ поста́ви свѣти́ло въ хра́мѣ свѣдѣнїѧ и҆ на ѹ́голъ хра́мꙋ ꙗже къ ю҆́гꙋ, и҆ въстави свѣтила е҆го прд̑е гм҃ъ, ꙗ҆́коже заповѣда е҆мꙋ г҃ь·

И҆ поста́ви ѻ҆лта́рь зла́тыи въ хра́мѣ свѣдѣнїѧ против̑҇ завѣсѣ, и҆ ѻ҆кадѝ и҆̀ ѳїмиꙗ҆́момъ сложе́нымъ, ꙗ҆́коже заповѣ́да г҃ь моѷсїю, и҆ ѻ҆лъта́рь приноше́нїѧ поста́ви ѹ҆ две́рїи хра́мꙋ свѣдѣнїѧ и҆ положѝ ѻпонꙋ ѻ҆́крестъ хра́ма и҆ ѻ́лтарѧ, и҆ сконча̀ моѷсїи вс̂е дѣло·

И҆ покры̀ ѻ҆́блакъ хра́мъ свѣдѣнїѧ, и҆ сла́вы гн҃ѧ напо́лнисѧ храм̑.
и҆ не можа́ше внїити моѷсїи, въ храм̑ свѣдѣнїѧ, ꙗ҆́ко ѻ҆сѣнѧ́ше и҆̀ ѻ҆́блакъ, и҆ сла́вы гн҃ѧ напо́лнисѧ хра́мъ·

Є҆гда же ѹ҆бо въстꙋплѧ́ше ѻ҆́блакъ въ хра́мъ въздвига́хꙋсѧ сн҃ове і҆и҃леви съ и҆мѣнїем̑ своим̑·

а҆ще б̂ы не въстꙋпи́лъ ѻ҆́блакъ не въздви́гнꙋлибысѧ а҆жъ до дн҃е, во́нже въстꙋпѝ ѻ҆́блакъ.
ѻ҆́блак꙽ б̂о бѧ́ше над̑ хра́мом̑ въ дн҃ь, ѻ҆́гнь бѧ́ше над̑ ни́ми в нощѝ прд̑е всѣмъ і҆и҃лемъ, въ всѣхъ поше́ствїи и́хъ·