ТРЄТЇИ КНИ́ГИ МОЇСЇЄВЫ ЛЄВЇТЪ

глв̑҇а, а҃·

И възва̀ г҃ь моѷсїа и҆ рече е҆мꙋ и҆с хра́ма свѣдѣ́нїа гл҃ѧ, гл҃и сн҃омъ і҆и҃левым̑, и҆ рцы̀ к ни́мъ.
чл҃къ ѿ васъ аще принесет̑ даръ г҃ꙋ ѿ скота̀, и҆ ѿ говѧд̑ и҆ ѿ ѻ҆вец̑҇, да принесе́те дары ва́ша·

А҆́ще же съж꙽женїа даръ е҆го ѿ го́вѧд̑, мꙋ́жескъ пол̑҇ непоро́ченъ, да принесе́тъ пред̑ двери храма свѣдѣнїа, и҆ да принесет̑ е҆̀ прїа́тно пред̑ гм҃ъ, и҆ да възложит̑ рꙋ́кꙋ на главꙋ̀ приноше́нїю, прїѧ́то е҆мꙋ молитисѧ ѻ҆ нем̑·

И҆ да заколют̑ ю҆не́цъ пред̑ гм҃ъ, и҆ да принесꙋтъ сн҃ове а҆аро́нови, жерцы̀ кро́вь и҆ да пролїют̑ кровь на ѻ҆лта́рь о҆́крс̑҇тъ, и҆же ѹ҆ дв́ерїи храма свѣдѣ́нїа·

И҆ ѻ҆дра́вши всѐсъж꙽же́нїе, да раздробѧт̑ е҆̀ на ѹ҆́ды·

И҆ да възложат̑ сн҃ове а҆аро́ни жерцы̀ ѻ҆́гнь на ѻ҆лта́рь, и҆ да въскладꙋтъ дрова̀ на ѻ҆гнь, и҆ да въскладꙋтъ сн҃ове а҆а҆ро́ни жерцы̀, раз̑дробле́ное, и҆ главꙋ̀ и҆ тꙋкъ, на дрова̀ горѧ́ща ꙗ҆же на ѻ҆лта́ри·

ѹ҆тро́бꙋ же и҆ но́гы да и҆змы́ютъ водо́ю, и҆ да възложи́тъ жре́цъ вс̂ѧ на ѻ҆лта́рь, приношенїа жрътва е҆сть вонѧ бл҃гоѹ҆ха́нїа г҃ꙋ.
а҆́ще ли же ѿ ѻ҆вецъ дар꙽ свои гв҃и принесе́тъ ѿ а҆́гнецъ, и҆л̂и ѿ ко́злищъ, въ всѐсож꙽же́нїе, мꙋж́ескъ полъ чи́стъ да принесе́тъ и҆̀, и҆ да възложи́тъ рꙋ́кꙋ на главꙋ̀ е҆го.
и҆ да зако́лютъ е҆̀ въ странѣ̀ ѻ҆лта́рѧ къ сѣ́верꙋ пред̑ гм҃ъ·

И҆ да пролїю́тъ сн҃ове а҆а҆рони жерцы̀ кро́вь е҆го ѹ҆ ѻ҆лътарѧ.
и҆ да раздробѧ́тъ е҆го на ѹ҆́ды, и҆ главꙋ̀, и҆ тꙋкъ е҆го да въскладт̑ꙋ е҆̀ жеръцы̀ на ѻ҆лта́рь на дрова̀ ꙗ҆же на ѻ҆гни·

Ѹ҆тро́бꙋ же и҆ но́ги и҆змы́ют꙽ водо́ю.
и҆ принесе́тъ жре́цъ вс̂е, и҆ да възложи́т꙽ на ѻ҆лта́рь, принесе́ное ес̑҇ жр́ътва вонѧ̀ бл҃гоѹ҆ха́нїа г҃ꙋ·

А҆́ще ли ѿ птицъ даръ приносит꙽ г҃ꙋ, и҆ принесе́тъ ѿ го́рлицъ, и҆л̂и ѿ го́лꙋбовъ, даръ сво́и, и҆ да принесет̑ жре́цъ къ ѻ҆лта́рю, и҆ да ѹ҆то́ргнетъ главꙋ̀ е҆го, и҆ да възложи́тъ жре́цъ на ѻ҆лта́рь.
і҆ и҆сцѣ́дитъ кровь ѹ҆ стоѧ́ла ѻ҆лтарѧ̀.
и҆ да ѿлꙋ́чит̑ горта́нь с пе́рїемъ.
и҆ да и҆знесетъ ѿ ѻ҆лта́рѧ на восто́къ, на мѣсто попела, и҆ да и҆зломитъ е҆го ѿ крилꙋ̀ и҆ да не раздѣлитъ.
и҆ да възло́житъ е҆̀ жре́цъ на ѻ҆лта́рь, на дрова̀ горѧ́щаѧ, принесеное е҆сть жр́ътва вонѧ̀ бл҃гоѹ҆ханїа г҃ꙋ.

Глв̑҇а, в҃·

Аще ли безъ дш҃а принесе́тъ даръ г҃ꙋ, мꙋка̀ пшени́чна да бꙋ́детъ даръ е҆го.
и҆ да възлїетъ на ню е҆ле́и, и҆ да възложи́тъ на ню̀ ѳїмїа́м꙽ бѣ́лыи ж́рътва е҆сть, и҆ да несе́тъ ю҆̀ къ сн҃омъ а҆а҆ро́ним꙽ жерцемъ·

И҆ възметъ ѿ неѧ̀ по́лнꙋ го́рсть мꙋкѝ пшени́чны съ е҆леѻ́мъ, и҆ весь ѳїмїам̑ бѣ́лыи еѧ̀, и҆ да възложи́тъ жре́цъ въ па́мѧть е҆го на ѻ҆лта́рь, жр́ътва вонѧ̀ бл҃гово́нїа г҃ꙋ·

И҆ ѻ҆ста́нокъ ѿ жр́ътвъ а҆а҆ро́нꙋ и҆ сн҃омъ е҆го, ст҃аѧ ст҃ыхъ, ѿ жертвъ гн҃ь·

А҆́ще же принесет̑ да́ръ тре́бꙋ пече́нꙋ в꙽ пещѝ ѿ мꙋкѝ пшени́чны, жр́ътвꙋ хлѣбы прѣ́сны спрѧ́жены со е҆леѻм̑ и҆ ѻ҆прѣсноки, пома́занны е҆леѻм̑·

А҆́ще ли тре́ба сковрад̑на да́ръ твои, мꙋка̀ пшени́чна спрѧ́жена со е҆леѻ́мъ прѣсна да бꙋ́детъ.
и҆ да сла́млеши ю҆̀ на ѹ҆крꙋ́хи, и҆ да възлїе́тъ на нѧ е҆ле́и.
жр́ътва е҆сть г҃ꙋ·

А҆́ще ли жр́ътвꙋ ѻ҆гни́чнꙋю сътвори ѿ мꙋкѝ пшени́чны съ е҆леѻ́мъ да ю҆̀ сътвори́тъ, и҆ да принесе́тъ тре́бꙋ ю҆́же а҆́ще творит̑ ѿ си́хъ г҃ꙋ·

И҆ да принесе́тъ къ жерцꙋ̀, и҆ пристꙋ́питъ къ ѻ҆лта́рю и҆ да ѿи́мет̑ жре́цъ ѿ тре́бы па́мѧть еѧ̀.
и҆ да възложи́тъ жре́цъ на ѻ҆лта́рь, приносъ въ вонѧ̀ бл҃гово́нїа г҃ꙋ.
ѻ҆ста́нокъ же ѻ҆ тре́бы а҆а҆ро́нꙋ и҆ сн҃омъ е҆го ст҃аѧ ст҃ыхъ, ѿ прино́съ г҃ꙋ·

Вс̂ю тре́бꙋ ю҆́же а҆ще приноси́те г҃ꙋ, да сѧ не сътвори́тъ ква́сна, всѧ́къ б̂о ква́съ и҆ всѧ́къ мед̑, да не принесе́тсѧ ѿ него̀ прино́съ г҃ꙋ·

То́чїю даръ нача́тковъ да принесе́те г҃ꙋ.
на ѻ҆лтар̑҇ же да не принесе́тсѧ въ воню̀ бл҃гово́нїа г҃ꙋ·

И҆ всѧ́къ даръ тре́бъ ваших̑ со́лїю да со́литсѧ, и҆ да не ѻ҆ста́нетсѧ со́ль завѣта гн҃ѧ ѿ тре́бъ ваших̑, въ всѧ́комъ да́рѣ, да сѧ принесе́тъ со́ль·

А҆́ще ли принесе́ши тре́бꙋ нача́тки житъ твоих̑ г҃ꙋ, но́во спрѧ́жены кла́сы и҆стла́чены г҃ꙋ, и҆ принесе́ши тре́бꙋ начат̑ки, и҆ да в꙽злїеши на ню̀ е҆ле́и, и҆ да възложи́ши на ню̀ бѣлыи ѳїмїа́мъ, тре́ба е҆сть·

И҆ да принесет̑ жрецъ па́мѧть еѧ̀, ѿ спрѧ́женыхъ съ е҆леѻ́мъ, и҆ весь ѳїмїа́мъ бѣ́лыи еѧ̀ приносъ е҆сть г҃ꙋ·

Глв̑҇а, г҃·

Аще ли жр́ътва сп҃се́нїа бꙋдет̑ даръ е҆го г҃ꙋ.
а҆́ще ѹ҆бо ѿ говѧдъ е҆̀ принесет̑, а҆́ще мꙋж́еск꙽ полъ и҆л̂и же́неск꙽, чи́стъ и҆ да принесе́т꙽ е҆̀ пред̑ г҃ь.
и҆ възложи́тъ рꙋцѣ своѝ на главꙋ̀ да́рꙋ.
и҆ да зако́лютъ и҆̀, ѹ҆ дверїи хра́ма свѣдѣ́нїа, и҆ да възлїютъ сн҃ове а҆а҆ро́ни жерцы̀ кро́вь на ѻ҆лта́рь ѻ҆крс̑҇тъ, и҆ да принесꙋтъ ѿ тре́бы сп҃се́нїа прино́съ г҃ꙋ.
и҆ тк̑҇ꙋ же покрыва́ющїи ѹ҆тро̀бꙋ, и҆ весь тꙋкъ и҆же е҆сть въ ѹ҆тро́бѣ, и҆ ѻ҆бѣ и҆сте́си, и҆ тꙋк꙽ и҆же на нею̀, и҆ е҆же на стегна́хъ, и҆ повразъ ꙗ҆́тре́нїи, съ и҆стесами да ѿи҆мет̑сѧ.
и҆ да принесꙋтъ сїѧ сн҃ове а҆а҆ро́ни жер꙽цы̀ къ ѻ҆лта́рю, въ вс̂есъж꙽же́нїе на дрова̀ горѧ́щаѧ на ѻ҆лта́рь, приносъ вонѧ̀ бл҃гово́нїа г҃ꙋ·

А҆́ще ли ѿ ѻ҆вец̑҇ дар꙽ е҆го тре́ба спс̑҇нїа г҃ꙋ, мꙋ́жескъ пол̑҇ и҆ же́нескъ, непоро́чена да принесет̑ е҆̀·

А҆́ще ли а҆гнеца принесе́тъ даръ е҆го, да принесе́тъ и҆̀ пред̑ г҃ь, и҆ да възложит̑ рꙋ́кꙋ на главꙋ̀ да́ра е҆го, и҆ да зако́лет꙽ е҆го ѹ҆ дверїи хра́ма, свѣдѣ́нїа и҆ да пролїют̑ сн҃ове а҆а҆рони жерцы̀ кро́вь ѻ҆́крс̑҇тъ ѻ҆лта́рѧ, и҆ да принесꙋтъ ѿ тре́бы сп҃се́нїа приносъ г҃ꙋ.
тк̑҇ꙋ же и҆ чресла̀ чи́сто ѿ хребта̀ да ѿлꙋ́чит̑ и҆̀, и҆ ве́сь тꙋкъ покрыва́ющїи ѹ҆тро́бꙋ, и҆ весь тꙋкъ и҆же въ ѹ҆тро́бѣ, и҆ ѻ҆бѣ и҆стеси и҆ тꙋкъ и҆же на них̑, і҆ и҆же на стегнах̑, и҆ по́вразъ ꙗ҆́тре́нїи, съ и҆стесеми да ѿлꙋ́читъ.
да принесе́тъ жре́цъ къ ѻ҆лта́рю, въ воню̀ бл҃гово́нїа г҃ꙋ прино́съ гв҃и·

А҆́ще ли ѿ козе́лъ да́ръ е҆го г҃ꙋ, и҆ да принесе́тъ предъ г҃а и҆ възложи́тъ рꙋ́кꙋ на главꙋ̀ е҆го, и҆ да зако́лютъ е҆̀ пред̑ гм҃ъ, ѹ҆ две́рїи хра́ма свѣдѣ́нїа и҆ да пролїют̑ сн҃ове а҆а҆рони жерцы̀ кро́вь ѻ҆́коло ѻ҆лта́рѧ, и҆ да принесꙋтъ ѿ него̀ прино́съ г҃ꙋ, тꙋ́къ и҆же на ѹ҆тро́бѣ, и҆ ве́сь тк̑҇ꙋ и҆же въ ѹ҆тробѣ, и҆ ѻ́бѣ и҆стеси, и҆ ве́сь тꙋкъ и҆же на них̑, и҆ е҆же на стегнах̑, и҆ по́враз꙽ ꙗ҆́тре́нїи съ и҆стесема да ѿлꙋчит̑, и҆ да принесет̑ жре́цъ къ ѻ҆лта́рю, прино́съ вонѧ̀ бл҃гово́нїѧ г҃ꙋ.
ве́сь б̂о тꙋкъ г҃ꙋ, зако́нъ въ вѣкы, в ро́ды ва́ша въ все́мъ, ѻ҆бита́нїи ва́шем꙽ всего̀ тꙋка, и҆ всеѧ̀ кро́ви да не ꙗ҆́сте·

Глв̑҇а, д҃·

И рече г҃ь къ моѷсїю гл҃ѧ, гл҃и къ сн҃омъ і҆и҃левымъ, рекїи дш҃а а҆́ще съгрѣши́тъ предъ гм҃ъ, не хотѧ́щи ѿ всѣхъ повелѣн́їи гн҃ихъ, и҆хже не лѣпо твори́ти, и҆ сътворитъ ѿ сихъ е҆ді́но чт̂о·

А҆́ще ли ѹ҆бо а҆рхїереи пома́занныи съгрѣши́тъ, и҆же и҆ лю́дїе грѣша́тъ.
и҆ да приведет̑ грѣха ради свое҆го, е҆же е҆сть съгрѣшилъ, ю҆нецъ ѿ волов̑҇ непоро́чен̑҇ гв҃и, грѣха ра́ди и҆ да приведет̑ ю҆́нецъ къ две́рем̑ храма свѣдѣнїа пред̑ г҃а, и҆ да възложи́тъ рꙋ́кꙋ свою̀ на главꙋ̀ ю҆нцꙋ̀, и҆ да заколетъ ю҆нца̀ пред̑ гм҃ъ·

И҆ въземъ жре́цъ пома́заныи е҆мꙋже съвръшенѣ рꙋцѣ̀, ѿ кро́ви ю҆нца, да принесетъ ю҆̀ въ хра́мъ свѣдѣнїа, и҆ да ѻ҆мо́читъ жрецъ пе́рстъ въ кро́ви и҆ да ѻ҆кро́питъ кро́вїю сед̑ми́жды, пер̑҇стомъ прд̑е гм҃ъ, ѹ҆ завѣ́сы ст҃ыни·

И҆ да възложи́тъ жре́цъ ѿ кро́ви ю҆́нча на ѹ҆глы ѻ҆л꙽та́рѧ ѳїмїа́ма сложе́наго и҆же прд̑е гм҃ъ.
и҆же е҆сть, въ хра́мѣ свѣдѣ́нїа.
всю̀ же кро́вь ю҆́нчю да пролїе́тъ, ѹ҆ стоѧ́ла ѻ҆лтарѧ̀ прино́снаго, е҆же е҆сть ѹ҆ две́рїи хра́ма свѣдѣ́нїа·

И҆ ве́сь тꙋкъ ю҆́нца грѣхо́внаго, да възмет̑ ѿ него тꙋк꙽ и҆же на ѹ҆тро́бѣ·

И҆ ве́сь тꙋкъ и҆же въ ѹ҆тро́бѣ, и҆ ѻ҆бѣ и҆сте́си и҆ тꙋкъ и҆же на нихъ, і҆ и҆же е҆сть на стегнах̑, и҆ повразъ ꙗ҆́тренїи съ и҆стесема да въ́зметъ, ꙗ҆́коже възметъ и҆ ѹ҆ юнца тре́бы сп҃сенїа·

И҆ да възложи́тъ жре́цъ на ѻ҆лта́рь прино́сныи ко́жꙋ ю҆́нчꙋ и҆ вс̂е е҆го тѣло съ главо́ю, и҆ с нога́ми, и҆ съ ѹ҆тро́бою, и҆ съ моты́лы и҆ да и҆знесꙋтъ всего̀ ю҆нца и҆с по́лка на мѣ́сто чи́сто, и҆дѣже и҆ссы́пываю҆тъ по́пелы.
и҆ да съжгꙋтъ и҆̀ дро́вы на ѻ҆гнѝ, на мѣ́сте просы́панїа по́пела да сѧ съж꙽же́тъ·

А҆ще ли не хотѧщи ве́сь со́нмъ сн҃овъ і҆и҆л҃въ съгрѣшит̑ и҆ ѹ҆таи́тсѧ сло́во ѿ лица̀ со́н꙽ма, и҆ сътворѧ́тъ е҆ді́нꙋ ѿ всѣхъ за́повѣдїй гн҃ихъ, е҆ѧ́же нѣсть лѣпо твори́ти, и҆ съгрѣша́тъ, и҆ ѧ҆ви́тсѧ и҆мъ грѣ́хъ ꙗ҆́же съгрѣши́ша в꙽ немъ·

И҆ да приведе́тъ со́нмъ, ю҆нецъ ѿ воло́въ чистъ грѣха ради, и҆ приведꙋтъ и҆̀ прд̑е две́ри храма свѣдѣнїѧ̀.
и҆ да възложа́тъ ста́рци со́нма рꙋки своѧ на главꙋ̀ ю҆нца прд̑е гм҃ъ, и҆ да зако́лютъ ю҆нца прд̑е гм҃ъ.
и҆ да вънесе́тъ жр́ецъ пома́заныи, ѿ кро́ви ю҆́нца въ хра́мъ свѣдѣ́нїа·

И҆ да ѻ҆мо́читъ жре́цъ пе́рстъ сво́и въ кро́ви ю҆́нчи и҆ да покро́питъ седми́жд̑ы прд̑е гм҃ъ, прд̑е завѣсою ст҃ни·

И҆ ѿ кро́ви да възложи́тъ жре́цъ на ѹ҆глы ѻ҆лтарѧ̀, ѳимїѧ́ма сложе́наго и҆же е҆сть прд̑е гм҃ъ, и҆же е҆сть въ хра́мѣ свѣдѣ́нїа·

Всю̀ же кровь да пролїет꙽ ѹ҆ стоѧ́ла ѻ҆лтарѧ̀ прино́снаго, и҆же е҆сть ѹ҆ две́рїи хра́ма свѣдѣ́нїа·

И҆ весь тꙋкъ е҆го да въ́зметъ ѿ него и҆ възложи́тъ на ѻ҆лта́рь, и҆ сътвори́тъ ю҆́нцꙋ семꙋ, ꙗ҆́коже сътворѝ ю҆́нцꙋ е҆же ѻ҆ грѣсѣ, тако сътворит̑сѧ.
и҆ да помо́литсѧ ѻ҆ нихъ жре́цъ, и҆ ѻ҆ста́вѧтсѧ и҆мъ грѣсѝ·

И҆ да и҆знесꙋтъ ю҆́нца всего внѣ полка̀, и҆ да съжгꙋтъ ю҆́нца, ꙗ҆́коже сожго́ша ю҆́нца пе́рваго ѻ҆ грѣсѣ грѣхъ б̂о сонма̀ е҆сть.

А҆ще ли кн҃ѕь съгрѣши́тъ, и҆ сътвори́тъ е҆ді́нꙋ ѿ всѣх́ъ за́повѣдїи г҃а б҃а свое҆го не хотѧ е҆же нѣ́сть лѣпо твори́ти и҆ сътворит̑, и҆ ѹ҆вѣстьсѧ е҆мꙋ грѣхъ, и҆́мже съгрѣшѝ в не́мъ.
да принесе́тъ даръ свои, козе́лъ, ѿ ко́зъ мꙋжескъ полъ чистъ грѣха ра́ди·

И҆ възложи́тъ рꙋкꙋ свою на главꙋ̀ козла̀, и҆ да заколют꙽ и҆̀ на мѣстѣ, и҆дѣже закала́ютъ всѧсъж꙽же́нїа грѣха̀ ра́ди прд̑е гм҃ъ, ѻ҆ грѣсѣ б̂о е҆сть·

И҆ да възметъ жре́цъ ѿ кро́ви е҆же ѻ҆ грѣсѣ перстомъ на ѹ҆глы ѻ҆лтарѧ̀, всегосъж꙽женїѧ, всю же кро́вь е҆го да пролїе́тъ ѹ҆ стоѧ́ла ѻ҆л꙽тарѧ̀ вс̂есъж꙽женыхъ·

И҆ ве́сь тꙋкъ е҆го възложи́тъ на ѻ҆лтарь, ꙗ҆́коже и҆ тꙋкъ тре́бы сп҃сенїа·

И҆ да помоли́тсѧ ѻ҆ немъ жре́цъ грѣхъ е҆го ра́ди, и҆ ѻ҆ста́витсѧ е҆мꙋ·

А҆ще ли дш҃а е҆ді́на презрѣ́въ съгрѣши́тъ ѿ людїи и҆з꙽ землѧ̀ сеѧ̀, и҆ сътворит̑ е҆ді́нꙋ ѿ за́повѣдеи всѣхъ гн҃ихъ, е҆же нелѣпо твори́ти, и҆ съгрѣшит̑, и҆ ѹ҆вѣст꙽сѧ е҆мꙋ грѣхъ и҆же съгрѣшѝ в не́мъ·

да принесе́тъ да́ръ свои козꙋ̀ ѿ ко́зъ же́нескъ полъ непоро́чнꙋ, да принесе́тъ грѣха ра́ди свое҆го и҆мъже съгрѣшѝ·

да възложит̑ рꙋ́кꙋ свою на главꙋ̀ козѣ̀, и҆ зако́лет꙽ ю҆̀, ꙗ҆же грѣха̀ ра́ди, на мѣстѣ, на не́мже закала́ютъ вс̂есъж꙽же́нїа·

И҆ да въ́зметъ жре́цъ ѿ кро́ви е҆ѧ̀ пе́рстомъ и҆ да възложитъ на ѹ҆́глы ѻ҆лтарѧ̀, вс̂есъжже́нїѧ, и҆ всю же кро́вь еѧ̀ пролїе́тъ ѻ҆́крс̑҇тъ стоѧ́ла ѻ҆лтарѧ̀ вс̂есъж꙽же́нїа·

И҆ весь тꙋкъ да ѿи́метъ и҆̀ ꙗ҆́коже ѿе́млетъ тꙋкъ ѿ тре́бы спс̑҇нїѧ, и҆ да възложи́тъ жрецъ на ѻ҆лта́рь, въ воню̀ бл҃гово́нїѧ г҃ꙋ, и҆ да помолитсѧ жре́ц꙽ ѻ҆ немъ и҆ ѻ҆ста́витсѧ е҆мꙋ·

а҆ще ли ѻ҆вцꙋ̀ принесетъ да́ръ свои грѣха̀ ради же́нескъ пол̑҇, непоро́ченъ да принесе́тъ ю҆̀·

И҆ да възложи́тъ рꙋкꙋ свою на главꙋ̀ е҆же ѻ҆ грѣсѣ, и҆ да зако́лютъ ю҆̀ грѣха ра́ди, на мѣсте на немже закала́ютъ вс̂есъж꙽же́нїѧ на мѣстѣ ст҃ѣ.
и҆ вземъ жре́цъ ѿ кро́ви е҆же ѻ҆ грѣсѣ пе́рстомъ свои҆мъ и҆ да възложи́тъ на ѹ҆́глы ѻ҆лтарѧ̀ вс̂есъж꙽же́ныхъ, и҆ всю кро́вь еѧ̀ да пролїе́тъ ѹ҆ стоѧ́ла ѻ҆лтарѧ̀ вс̂есъж꙽же́нїѧ, и҆ весь тк̑҇ꙋ еѧ̀ да ѿлꙋчит̑, ꙗ҆́коже ѿе́млетъ тꙋкъ ѻ҆вцы̀ ѿ тре́бы спс̑҇нїѧ.
и҆ да възложи́тъ жре́цъ на ѻ҆лта́рь на вс̂есъж꙽же́нїе гн҃е, и҆ да помо́литсѧ ѻ҆ немъ жре́ц꙽, ѻ҆ грѣсѣ е҆го и҆же съгрѣшѝ, и҆ ѻ҆ста́витсѧ е҆мꙋ·

Глв̑҇а, е҃·

Аще ли дш҃а съгрѣшитъ, слы́шащи глс̑҇а клѧ́твеныи и҆ по́слꙋхъ сего бꙋдꙋще, а҆ще е҆сть видѣл꙽, и҆л̂и совѣсть, и҆ а́ще не повѣсть, прїиметъ грѣхъ·

И҆л̂и дш҃а ꙗ҆́же а҆ще прико́снет̑сѧ къ всѧ́кои ве́щи нечи́стѣи, и҆л̂и ме́ртвечинѣ, и҆л̂и ѕвѣроꙗ҆́динѣ нечи́стѣи, и҆л̂и ме́ртвечинах꙽ и҆л̂и гнꙋсех̑ нечи́стыхъ и҆ли мертвечины скот̑ нечи́стых̑, и҆ мертвечине гадъ нечи́стых̑ и҆ забывъ и҆хъ ѻ҆сквернитсѧ, и҆ли прико́снетсѧ нечи́стотѣ чл҃чи, ѿ всѧ́коѧ нечистоты̀ е҆го, и҆же прикоснꙋ́всѧ ѻ҆сквернит̑сѧ, и҆ забꙋдет̑.
посем же ѹ҆вѣсть повинен̑҇ грѣхꙋ·

дш҃а и҆же а҆́ще ѻ҆бѣща́етъ ѹ҆стна́ма свои́ма злѣ̀ и҆л̂и до́брѣ сътвори́ти, по всемꙋ̀ е҆ли́ко намѣни́тъ чл҃къ съ клѧ́твою̀, и҆ забꙋ́детъ, а҆ потомъ ѹ҆вѣсть и҆же съгрѣши́тъ е҆ді́но ѿ си́хъ, і҆ и҆сповѣсть грѣхъ, е҆гоже дѣлма съгрѣшил̑҇ е҆сть в немъ·

И҆ да принесе́тъ г҃ꙋ ѻ҆ грѣсѣ и҆́мже съгрѣшѝ, же́нескъ пол̑҇ ѿ ѻ҆ве́цъ, а҆́гницꙋ, и҆л̂и козꙋ̀ ѿ коз̑ грѣха̀ ра́ди, и҆ да помо́литсѧ ѻ҆ нем̑ жре́цъ грѣха̀ ра́ди и҆́мже съгрѣшѝ и҆ ѻ҆ста́витсѧ е҆мꙋ·

А҆́ще ли не мо́жет̑ рꙋка̀ е҆го спости́гнꙋти съ ѻ҆вцꙋ, да принесе́тъ грѣха̀ ра́ди свое҆го и҆́мже съгрѣшѝ, дв̂ѣ го́рлицы и҆л̂и дв̂а птенца̀ голꙋ́бина г҃ꙋ, е҆ді́нъ грѣха̀ рад̑и̑ и҆ е҆ді́нъ въ вс̂есъж꙽же́нїе.
и҆ да принесе́тъ ѧ҆̀ къ жерцꙋ̀, и҆ възме́тъ жре́ц꙽ е҆же за грѣхъ пре́же.
и҆ да ѹ҆рѣж́ет꙽ жре́цъ главꙋ̀ е҆го, съза́ди н̂о да не перерѣж́етъ, и҆ да покро́питъ ѿ кро́ви и҆же за грѣх꙽, на стѣнꙋ ѻ҆лтарѧ̀.
ѻ҆ста́нокъ же кро́ви да и҆сцѣдитъ ѹ҆ стоѧ́ла ѻ҆лтарѧ̀, ѻ҆ грѣсѣ б̂о е҆сть, вторы́м же да сътворитъ вс̂есъж꙽женїе, ꙗ҆́коже е҆сть·

И҆ да помо́литсѧ ѻ҆ немъ жре́цъ, грѣха̀ ради и҆же съгрѣшѝ и҆ ѻ҆ста́витсѧ е҆мꙋ·

А҆ще ли не ѻ҆брѧ́щетъ рꙋка̀ е҆го сꙋпрꙋга го́рлицъ, ил̂и двою̀ голꙋ́бичищꙋ, да принесетъ да́ръ свои за грѣхъ, десѧ́тꙋю ча́сть мѣры е҆фи мꙋкѝ пшени́чны за грѣхъ, и҆ да не възлива́етъ на ню̀ е҆ле́ѧ, н̂и да възложи́тъ на ню̀ ѳїмїѧ́ма бѣлаго, понеже ѻ҆ грѣсѣ̀ е҆сть, н̂о да принесетъ ю҆̀ къ жерцꙋ̀, и҆ да възметъ жре́цъ ѿ неѧ̀ по́лнꙋ го́рсть в па́мѧть е҆го, и҆ да възложи́тъ на тре́бникъ вс̂есъж꙽же́нїѧ гн҃ѧ, ѻ҆ грѣсѣ̀ б̂о е҆сть·

И҆ да помо́литсѧ ѻ҆ нем̑ жре́цъ, грѣха̀ ра́ди и҆мже съгрѣшѝ ѿ е҆ді́наго сихъ и҆ ѻ҆ста́витсѧ е҆мꙋ, ѻ҆ста́нокъ же бꙋдетъ жерцꙋ̀, ꙗ҆́коже тре́ба мꙋкѝ пшени́чны·

И҆ рече г҃ь къ моѷсїю гл҃ѧ дш҃а а҆ще забы́вшисѧ забве́нїемъ, и҆ съгрѣши́тъ не хотѧ̀ ѿ ст҃ынь гн҃ь, и҆ да принесе́тъ ѻ҆ престꙋпле́нїи своем̑ г҃ꙋ, ѻ҆ве́нъ непоро́ченъ ѿ ѻ҆ве́цъ, е҆мꙋже цѣна̀ сребра̀ си́клевъ дв̂а, по си́клемъ ст҃ымъ, ѻ҆ ни́хже съгрѣши, ѿ ст҃ыхъ да ѿдасть, и҆ пѧ́тꙋю ча́сть приложи́тъ на́нь, и҆ дас̑҇ е҆̀ жерцꙋ̀·

жре́ц же да помо́литсѧ ѻ҆ немъ прд̑е гм҃ъ престꙋпле́нїѧ е҆го, и҆ ѻ҆ста́витсѧ е҆мꙋ·

И҆ дш҃а ꙗ҆́же а҆ще съгрѣшитъ и҆ сътворит̑ е҆ді́нꙋ ѿ всѣхъ за́повѣдїи гн҃ь, и҆хже не лѣпо твори́ти, и҆ не ѹ҆вѣ́де, съгрѣши́тъ, и҆ ѹ҆вѣсть грѣх꙽ свой·

да принесе́тъ ѻ҆ве́нъ непороченъ ѿ ѻ҆ве́цъ цѣно́ю сребра̀, грѣха ради къ жерцꙋ̀.
и҆ да помо́литсѧ ѻ҆ немъ жре́цъ ѻ҆ невѣ́денїи е҆го е҆гоже невѣ́де и҆ ѻ҆ста́витсѧ е҆мꙋ, и҆ са́мъ б̂о невѣдѧше, сътворѝ б̂о забве́нїемъ грх̑ѣ пред̑ гм҃ъ·

Глв̑҇а, ѕ҃·

И реч̑҇ г҃ь къ моѷсїю гл҃ѧ, дш҃а а҆́ще съгрѣши́тъ, и҆ презрѣ́въ пре́зритъ за́повѣди гн҃ѧ, и҆ съл꙽же́тъ къ дрꙋ́гꙋ ѻ҆ вда́нїи, и҆л̂и ѻ҆ ѻ́бщинѣ, и҆л̂и ѻ҆ хище́нїѝ, и҆л̂и преѻ҆би́дилъ чим̑ дрꙋ́га, и҆л̂и ѻ҆брѣлъ что̀ погꙋбленаг̑҇ и҆ съ́лжетъ ѻ҆ не́мъ, и҆ клене́тсѧ въ непра́вдꙋ, е҆ді́наго ради ѻ҆ всѣхъ, ѿ ни́хже а҆ще сътвори́тъ чл҃къ, ꙗ҆́ко съгрѣше́нїе в ни́хъ, и҆ бꙋдетъ е҆гда̀ съгрѣши́тъ и҆ престꙋ́питъ, и҆ ѿда́сть ѿнѧ́тїе е҆же е҆сть ѿнѧл̑҇, и҆л̂и ѻ҆би́дꙋ е҆ю́же преѻ҆би́дѣ, и҆л̂и вда́нїе е҆мꙋже е҆сть вдано̀, и҆л̂и поги́бшее и҆же а҆ще ѻ҆брѣлъ ѿ всѣхъ ве́щїи е҆гоже ради клѧ́сѧ въ непра́вдꙋ, да ѿда́стъ само́е т̂о и҆́стое, и҆ пѧ́тꙋю ча́сть свою приложи́тъ к томꙋ, е҆гоже е҆сть томꙋ̀ да ѿда́стъ·

Во́ньже дн҃ь ѻ҆бли́читсѧ, ѻ҆ престꙋпле́нїи свое҆мъ, да принесе́тъ г҃ꙋ ѻ҆ве́нъ ѿ ѻ҆ве́цъ непороченъ, цѣны̀ по рассꙋжде́нїю престꙋпле́нїѧ, и҆ да помо́лит̑сѧ жре́цъ ѻ҆ немъ прд̑е гм҃ъ, и҆ ѻ҆ста́вит̑сѧ е҆мꙋ всѧ́къ грѣхъ е҆гоже сътворѝ престꙋпле́нїемъ·

И҆ рече г҃ь къ моѷсїю гл҃ѧ, заповѣж́ъ а҆а҆ро́нꙋ и҆ сн҃омъ е҆го рекїи сїй за́конъ вс̂есъж꙽же́нїѧ·

Сїе вс̂есъж꙽же́нїе е҆го, ѹ҆ ѻ҆лта́рѧ вс̂ю но́щь до заѹ҆́тра ѻ҆́гнь ѻ҆лтарѧ да гори́тъ ѹ҆ него̀ и҆ не ѹ҆гаса́етъ, и҆ да ѻ҆блече́тсѧ жре́цъ въ срачи́цꙋ лнѧ́нꙋ, и҆ надра́ги лнѧ́ны да възвлече́т꙽ на тѣло свое·

и҆ да и҆знесетъ принос̑҇ и҆же а҆́ще и҆ж꙽же́тъ ѻ҆гнь.
всегосъж꙽женїа, ѿ ѻ҆л꙽та́рѧ, и҆ да поста́витъ подлѣ ѻ҆л꙽та́рѧ·

И҆ да съвлече́тъ ри́зы своѧ, и҆ да ѻ҆блече́тсѧ в ри́зы и҆́ны, и҆ да и҆знесе́тъ прино́съ внѣ̀ полка̀ на мѣ́сто чи́сто·

А҆ ѻ́гнь ѹ҆ ѻ҆л꙽тарѧ да гори́тъ на не́мъ и҆ не ѹ҆гаса́етъ, и҆ да и҆ж꙽же́тъ ѹ҆ него жре́цъ дрова̀ по всѧ̀ ѹ҆тра, и҆ да въскладе́т꙽ на́нь, вс̂есъж꙽же́нїе, и҆ да възложи́т꙽ на нѧ тꙋ́къ ѻ҆ мирѣ, ѻ҆́гнь же по всѧ̀ часы̀ да гори́тъ и҆ не ѹ҆гаса́етъ на ѻ҆лтари·

И҆ сїи зако́нъ тре́бы ю҆́же принесꙋтъ е҆ѧ̀ сн҃ове а҆а҆ро́ни жер̑҇цы̀ прѧ́мо ѻ҆л꙽та́рѧ прд̑е гм҃ъ·

И҆ да възметъ жре́цъ горъсть мꙋки пшеничны, ѿ ѻ҆лта́рѧ, съ е҆леѻ́мъ и҆ съ ѳїмїѧ́момъ бѣлымъ е҆ѧ̀ сꙋщимъ съ тре́бою, да принесе́тъ къ ѻ҆лта́рꙋ приносъ въ воню̀ бл҃гово́нїѧ, въ па́мѧть е҆ѧ̀ г҃ꙋ·

И҆ ѿ и҆збы́тка е҆ѧ̀ да ꙗ҆́стъ а҆а҆ронъ и҆ сн҃ове е҆го, прѣсна да ꙗ҆́дѧ́тсѧ въ мѣстѣ ст҃ѣ, въ притво́рѣ хра́ма свѣдѣнїѧ да ѧ҆дѧт̑ ѧ҆̀, да не и҆спече́тсѧ ква́сна, зане ча́сть еѧ̀ далъ е҆смь и҆мъ ѿ прино́съ гн҃ь, ст҃аѧ б̂о ст҃ыхъ е҆сть·

Ꙗ҆́коже грѣха ради, та́ко и҆ престꙋпле́нїѧ всѧк̑҇ мꙋжескъ пол̑҇ жре́ческъ да ѧ́сть ѧ҆̀, зако́нно вѣ́чно въ ро́ды ва́ша.
и҆ ѿ прино́съ гн҃ь, всѧ́къ и҆же а҆ще прико́снетсѧ и҆хъ ѻ҆ст҃итсѧ·

И҆ рече г҃ь къ моѷсїю гл҃ѧ, сїе дарова́нїе а҆а҆ро́нꙋ и҆ сн҃омъ е҆го, и҆же принесꙋтъ г҃ꙋ.
въ дн҃ь вънже а҆ще пома́жеши и҆хъ, десѧ́тꙋю ча́сть мѣры е҆фѝ мꙋкѝ пшени́чны въ тре́бꙋ всегда̀, по́л꙽ еа̀ заѹ́тра, по́лъ же еѧ̀ ѿ ве́чера, въ сковрадѣ̀ въ е҆ле́ю да сътвори́тсѧ, съпрѧ́женꙋ да принесетъ ю҆̀, требꙋ ѿ ѹ҆крꙋхъ, требꙋ въ воню̀ бл҃гово́нїѧ г҃ꙋ·

Жре́цъ пома́заныи и҆же въ него̀ мѣсто ѿ сн҃овъ е҆го, да сътвори́т꙽ ю҆̀ зако́нно вѣчно, всегда̀ да съвершит̑сѧ·

И҆ всѧка же́ртва жре́ческа, вс̂есъж꙽же́нїа да бꙋдꙋт꙽, и҆ да не ꙗ҆́ст꙽сѧ·

И҆ рече г҃ь къ моѷсїю гл҃ѧ, гл҃и а҆а҆ро́нꙋ и҆ сн҃омъ е҆го, и҆ сїи зако́нъ съгрѣше́нїѧ, на мѣстѣ, на немже закала́ютъ вс̂есъж꙽же́нїѧ·

да закала́ютъ и҆̀ е҆же грѣха ради прд̑е гм҃ъ ст҃аѧ б̂о ст҃ых꙽ е҆сть.
жре́ц же приносѧ́й ю҆̀ да ꙗ҆́сть ю҆̀, въ мѣстѣ ст҃ѣ, да ꙗ҆́стьсѧ, въ притво́рѣ храма свѣдѣ́нїѧ, всѧ́къ прикаса́ѧйсѧ мѧ́сех̑ еѧ̀ ѻ҆ст҃итсѧ·

Є҆мꙋже сѧ въскро́пит̑ ѿ кро́ви еѧ̀ на ри́зꙋ, е҆мꙋже сѧ а҆́ще въскро́питъ на ню̀ да сѧ и҆спере́тъ на мѣ́стѣ ст҃ѣ.
и҆ всѧкъ съсꙋдъ гли́нѧнъ в не́мже сѧ варит̑ да разбїе́тсѧ.
а҆́ще ли в мѣдѧнѣ съсꙋ́дѣ сѧ свари́тъ, да и҆̀ пож꙽жѐ и҆ ѻ҆мы́етъ водо́ю.
всѧ́къ мꙋжескъ полъ въ жерцѣхъ да ꙗ҆́сть ю҆̀ ст҃аѧ б̂о ст҃ыхъ ес̑҇ г҃ꙋ·

Приноше́нїѧ же е҆же грѣха ради ѿ негоже кро́вь вно́ситсѧ въ храмъ свѣдѣнїѧ, къ ѻ҆чище́нїю въ ст҃ыни да сѧ не ꙗ҆́сть н̂о на ѻ҆гнѝ да съж꙽жет̑сѧ·

Глв̑҇а, з҃·

И с̂е зако́нъ гн҃ь ѻ҆ престꙋпле́нїи, и҆же е҆сть ст҃аа ст҃ых̑·

На мѣ́стѣ на не́мже закала́ютъ вс̂есъж꙽же́нїе, да зако́лютъ ѻ҆ве́нъ и҆же престꙋпле́нїѧ ради пред̑ гм҃ъ, а҆ кро́вь да пролию́тъ ѻ҆́крс̑҇тъ стоѧ́ла ѻ҆л꙽тарѧ, и҆ ве́сь тꙋ́къ е҆го да принесе́тъ ѿ него̀.
и҆ чресла̀ и҆ тꙋ́къ покрыва́ющїи ѹ҆тро́бꙋ·

І҆ ве́сь тꙋ́къ и҆же въ ѹ҆тробѣ и҆ ѻ́бѣ и҆сте́си и҆ тꙋ́къ и҆же на не́ю, і҆ и҆же на стегнꙋ̀.
и҆ по́вразъ ꙗтренїи съ и҆сте́сами да ѿи́метъ ѧ҆̀, и҆ принесет̑ ѧ҆̀ жре́цъ къ ѻ҆лтарю, приносъ въ воню̀ бл҃гово́нїа г҃ꙋ престꙋпле́нїа б̂о ра́ди е҆сть·

Всѧ́къ мꙋж́ескъ по́лъ ѿ жре́цъ да ꙗ҆́стъ ѧ҆̀ на мѣ́стѣ ст҃ѣ да ꙗ҆́дѧ́тъ ю҆̀ поне́же б̂о ст҃аа ст҃ых̑ ес̑҇·

Ꙗ҆́коже грѣха̀ ра́ди, та́ко и҆ престꙋпле́нїа ра́ди зако́нъ, е҆ді́нъ и҆́мать, жре́цъ и҆же мо́литсѧ ѻ҆ не́мъ, е҆мꙋ да бꙋ́детъ·

І҆ жре́цъ приносѧ́и вс̂ѧсъж꙽же́нїѧ чл҃ча, ко́жа вс̂есъж꙽же́нїѧ, е҆же прино́ситъ ѻ҆́нъ е҆мꙋ̀ да бꙋдетъ·

И҆ всѧ́ка тре́ба ꙗ҆́же сътвори́тсѧ в пещѝ, и҆ всѧ́ка е҆же твори́тсѧ на ѻ҆́гнищи, и҆л̂и въ сковрадѣ̀, жер꙽цꙋ и҆же прино́сит̑ ю҆̀, томꙋ̀ да бꙋдет̑·

И҆ вс̂ѧ тре́ба съпрѧ́жена съ е҆ле́ѻмъ, и҆ ꙗ҆́же не съпрѧ́жена, всѣмъ сн҃омъ а҆а҆ро́нимъ комꙋжд̑о ра́вно да бꙋдет̑·

Сїи зако́нъ тре́бы ми́рны, ю҆́же принесꙋтъ г҃ꙋ.
а҆́ще ѹ҆б̂о похвале́нїа рад̑и̑ принесꙋтъ ю҆̀.
и҆ да принесе́тъ съ тре́бою похвале́нїа хлѣ́бы, ѿ мꙋкѝ пшени́чны прѧ́жены въ і҆е҆ле́ю, и҆ ѻ҆прѣ́сноки пома́заны е҆ле́ѻмъ.
и҆ мꙋкꙋ̀ пшени́чнꙋ съ е҆леѻмъ съ хлѣбы прѣсными.
да принесет̑ даръ е҆го, съ требою тре́бы похвале́нїа сп҃се́ннаго и҆ да принесе́тъ ѿ него̀ е҆ді́нъ ѿ всѣ́хъ да́ръ свой ѹ҆ча́стїе г҃ꙋ, жерцꙋ̀ възлива́ющемꙋ кро́вь же́ртвы сп҃се́ныѧ томꙋ̀ да бꙋ́детъ, и҆ мѧ́са тре́бы похвале́нїй ми́рныхъ томꙋ̀ да бꙋдет̑·

Во́нже дн҃ь принесетсѧ, да и҆зъꙗ҆́стъсѧ, да не ѻ҆ста́нет̑ ѿ неѧ̀ на ѹ҆́трїа·

А҆́ще ли мл҃твꙋ во́лнꙋю даръ свои принесе́тъ, во́нже дн҃ь же́ртвꙋ свою̀ принесе́тъ въ то́и да сѧ и҆зꙗ҆́стъ и҆ на ѹ҆́трїе, и҆ ѻ҆ста́вшее мѧс̑҇ ѻ҆лтарьных̑ до дн҃е тре́тїаго на ѻ҆гни да съж꙽жет̑сѧ.

А҆́ще ли ꙗ҆ды́и ꙗ҆́сть ѿ мѧ́съ, въ дн҃ь третїи не прїимет̑сѧ приносѧ́щемꙋ ю҆̀, не и҆ въмѣни́тсѧ е҆мꙋ, ѻ҆скверне́нїе бо е҆сть.
и҆ дш҃а ꙗ҆же а́ще ꙗ҆́стъ ѿ них̑ грх̑ѣ прїиметъ, и҆ мѧ́са ꙗ҆́же а҆́ще сѧ приткнꙋт́ъ къ всемꙋ̀ нечи́стꙋ, да сѧ не ꙗ́дѧт̑, н̂о на ѻ҆гнѝ да съжгꙋтсѧ, и҆ всѧ́къ чи́стыи да не ꙗ҆́стъ мѧ́са·

И҆ дш҃а ꙗ҆́же а҆́ще ꙗ҆́стъ ѿ мѧ́са тре́бы сп҃се́ныѧ ꙗ҆́же е҆сть г҃ꙋ, и҆ нечистота̀ е҆го на не́мъ, погꙋби́тсѧ дш҃а ѻ҆на̀ ѿ людїи свои҆хъ·

І҆ дш҃а ꙗ҆́же а҆́ще приткнет̑сѧ къ всѧ́кои ве́щи нечи́стѣи.
и҆л̂и ѿ нечистоты̀ чл҃ча, и҆л̂и ѿ четвероно́гихъ нечи́стых̑, и҆ всѧ́кои ѻ҆скверне́нѣи нечистотѣ, и҆ ꙗ҆стъ ѿ мѧ́са тре́бы сп҃се́нїѧ и҆же е҆сть гн҃ѧ, погꙋби́тсѧ дш҃а т̂а ѿ людїи своих̑·

І҆ рече г҃ь къ моѷсїю гл҃ѧ, рц̂ы сн҃омъ і҆и҃левым̑ рекїи, всего̀ тꙋ́ка говѧ́жа, и҆ ѻ́вча, и҆ ко́зїа, да не ꙗ҆́сте, и҆ тꙋ́къ мертвечи́ненъ и҆ ѕвѣроꙗ҆́дныи да сътворит̑сѧ на всѐ дѣ́ло, въ ꙗ҆́де́нїихъ же да сѧ не ꙗ҆́стъ.
всѧ́къ ꙗ҆́ды́и тꙋ́къ ѿ скота̀, и҆же принесе́те ѿ них̑ даръ г҃ꙋ, погꙋби́тсѧ дш҃а т̂а ѿ людїи своих̑, и҆ всеѧ̀ кро́ви да не ꙗ҆́сте, въ всѣхъ селе́нїих̑ ва́шихъ, и҆ ѿ скота̀ и҆ ѿ пти́цъ.
и҆ вс̂ѧ дш҃а а҆́ще ꙗ҆стъ кро́вь погꙋби́тсѧ дш҃а т̂а ѿ людїи своих̑·

І҆ рече г҃ь къ моѷсїю гл҃ѧ, да реч̑҇ши сн҃омъ і҆и҃левым̑ рекїи.
приносѧ́и тре́бы сп҃се́нїа г҃ꙋ, да принесе́тъ да́ръ свои г҃ꙋ, ѿ тре́бы сп҃се́нїѧ·

Рꙋцѣ же е҆го да принесе́та прино́съ г҃ꙋ, тꙋ́къ и҆же на́ грꙋдехъ, и҆ по́вразъ ꙗ҆́тренїи, да да принесет̑ ѧ҆̀, ꙗ҆коже възложи ѧ҆̀ пред̑ г҃ь.
и҆ да възложи́тъ жре́цъ тꙋ́къ и҆же на́ грꙋдехъ, на ѻ҆лтарь, а҆ грꙋди да бꙋдт̑ꙋ а҆а҆ро́нꙋ и҆ сн҃омъ е҆го, и҆ ра́мо десно́е да сѧ даст꙽ ѹ҆ча́стїе же́рцꙋ, ѿ тре́бъ сп҃сенїи ва́шихъ·

И҆ приносѧщемꙋ же кро́вь сп҃сенꙋю и҆ тꙋкъ, ѿ сн҃овъ а҆а҆ро́новых̑ томꙋ да бꙋ́детъ ра́мо десно́е ѹ҆ча́стїе.
грꙋди възложе́нїѧ, ра́мо же ѹ҆ча́стїѧ взѧ́хъ ѿ сн҃овъ і҆ил҃въ, ѿ тре́бъ сп҃сеныхъ ва́шихъ, и҆ да́хъ ѧ҆̀ а҆а҆ро́нꙋ же́рцꙋ и҆ сн҃омъ е҆го въ закон̑҇ вѣ́чныи, ѿ сн҃овъ і҆ил҃въ·

Сїе пома́занїе а҆а҆ро́нꙋ, и҆ помаза́нїе сн҃омъ е҆го ѿ прино́съ гн҃ь, во́нже дн҃ь приведе́тъ ѧ҆̀ жрѣти г҃ꙋ, ꙗ҆́коже заповѣда̀ г҃ь, да́ти и҆́мъ·

Во́ньже дн҃ь помаза́ ѧ҆̀ ѿ сн҃овъ і҆ил҃въ, зако́нъ вѣчный в ро́ды и҆хъ·

Се́и зако́нъ вс̂есож꙽же́ных̑ и҆ тре́бы за грѣхѝ.
и҆л̂и за престꙋпле́нїе, и҆л̂и съверше́нїю тре́бы сп҃сенїа, ꙗ҆коже заповѣда̀ г҃ь моѷсїю, на горѣ сина́истѣй·

Во́н꙽же дн҃ь заповѣда̀ сн҃омъ і҆ил҃вымъ, приноси́ти да́ры своѧ̀ прд̑е г҃а, въ пꙋсты́ни сина́истѣй·

Глв̑҇а, и҃·

И рече г҃ь къ моѷсїю гл҃ѧ, пои҆мѝ а҆а҆ро́на и҆ сн҃ы е҆го и҆ ри́зы е҆го, и҆ е҆ле́и пома́занїа·

И҆ ю́нецъ и҆же за грѣхъ и҆ дв̂а ѻ҆вна, и҆ кошницꙋ ѻ҆прѣсно́чнꙋю.
и҆ весь со́ньмъ цр҃кви ꙗ҆́же б̂ѣ пред̑ две́ри храма свѣдѣнїа, и҆ сътворѝ моѷсїи ꙗ҆коже повелѣ е҆мꙋ г҃ь, и҆ звд̑е сонмъ пред̑ две́ри храма свѣдѣнїѧ<.>

И҆ реч̑҇ моѷсїи къ сон̑҇мꙋ, се е҆сть сло́во и҆же завѣща̀ г҃ь твори́ти.
и҆ приведѐ моѷсїи а҆аро́на и҆ сн҃ы е҆го, і҆ и҆змы̀ ѧ҆̀ водо́ю и҆ ѻ҆блечѐ е҆го, въ срачѝцꙋ, и҆ ѻ҆поѧ́са е҆го по́ѧсомъ и҆ ѻ҆блечѐ и҆̀ в ри́зꙋ, и҆ възвлечѐ на́нь верхнюю ри́зꙋ, и҆ ѻ҆поѧ́са е҆го поѧ́сомъ ефꙋ́днымъ и҆ стиснл̑҇ꙋ е҆го въ нем̑.
и҆ възложѝ нань сло́во, и҆ възложѝ на сло́во проповѣ́данїе и҆стинны и҆ възложѝ ѹ҆вѧ́сло на главꙋ̀ е҆го, и҆ възложѝ на ѹ҆вѧ́сло проти́въ лица̀ е҆го, дьскꙋ̀ златꙋю ѻ҆сщ҃нꙋю ст҃ым꙽ ꙗ҆́коже повелѣ̀ г҃ь моѷсїю·

И҆ взѧ̀ моѷсїи ѿ е҆ле́ѧ пома́занїа, и҆ въскропѝ ѿ него на ѻ҆лта́рь седми́жды, и҆ пома́за ѻ҆лта́рь и҆ ѻ҆ст҃и и҆̀ и҆ вс̂ѧ сосꙋ́ды е҆го, и҆ ѹ҆мыва́лницꙋ, и҆ стоѧ́ла е҆ѧ̀, ѻ҆ст҃и ѧ҆̀.
и҆ пома́за хра́мъ и҆ вс̂ѧ съсꙋ́ды е҆го и҆ ѻ҆ст҃и ѧ҆̀·

И҆ въз꙽лїѧ моѷсїи е҆ле́и пома́занїа на главꙋ̀ а҆а҆ро́ню, и҆ пома́за и҆̀ и҆ ѻ҆ст҃и и҆̀·

И҆ приведѐ моѷсїи сн҃ы а҆аро́нѧ и҆ ѻ҆блечѐ ѧ҆̀ въ срачи́цѧ, и҆ ѻ҆поѧ́са ѧ҆̀ по́ѧсы,<.>

И҆ възложѝ на́ нѧ клобꙋкѝ, ꙗ҆́коже повелѣ г҃ь моѷсїю·

И҆ приведѐ моѷсїи теле́цъ и҆же за грѣхъ, и҆ възложи́ша а҆а҆ро́нъ и҆ сн҃ове е҆го рꙋ́ки на главꙋ̀ те́лцꙋ и҆же за грѣхѝ, и҆ закла̀ е҆го моѷсїи·

И҆ взѧ̀ ѿ крови, пе́ръстом̑ е҆го, и҆ възложѝ на ѹглы ѻ҆крс̑҇тъ ѻ҆л꙽тарѧ, и҆ ѻ҆цы́сти ѻ҆л꙽тарь, и҆ кро́вь пролїѧ̀ ѹ҆ стоѧ́ла ѻ҆л꙽тарѧ, и҆ ѻ҆ст҃и и҆̀ е҆же моли́тисѧ ѹ҆ него·

И҆ взѧ̀ моѷсїи весь тꙋ́къ и҆́же въ ѹ҆тро́бѣ и҆ по́вразъ ꙗ҆́тре́нїи, и҆ ѻ́бѣ и҆сте́си, и҆ тꙋ́къ и҆же на нею, и҆ принесѐ моѷсїи къ ѻ҆л꙽тарю·

А҆ теле́цъ и҆ ко́жꙋ е҆го, и҆ мѧ́са е҆го и҆ моты́лы е҆го, съж꙽же на ѻ҆гнѝ внѣ полка̀, ꙗ҆коже повелѣ, г҃ь моѷсїю·

И҆ приведѐ моѷсїи ѻ҆́венъ, и҆же въ всѐсъж꙽же́нїе·

И҆ възложѝ а҆аро́нъ и҆ сн҃ове е҆го рꙋ́цѣ своѝ на главꙋ̀ ѻ҆́вню.
и҆ закла̀ моѷсїи ѻ҆́венъ, и҆ пролїѧ̀ моѷсїи кро́вь ѻ҆́крс̑҇тъ ѻ҆л꙽тарѧ, а҆ ѻ҆венъ раздробѝ на ѹ҆́ды е҆го·

И҆ възѧ̀ моѷсїи главꙋ̀ и҆ ѹ҆́ды и҆ тꙋ́къ, и҆ ѹ҆тро́бꙋ и҆ но́ги і҆ и҆змы́и ѧ҆̀ водо́ю·

И҆ възложѝ моѷсїи ве̂сь ѻ҆́венъ на ѻ҆́л꙽тарь въ всѐсъж꙽же́нїе, и҆́же е҆сть вонѧ̀ бл҃гово́нїѧ, прино́съ е҆сть г҃ꙋ ꙗ҆коже заповѣда̀ г҃ь моѷсїю·

И҆ приве́дъ моѷсїи ѻ҆́венъ вторы́и, ѻ҆́венъ съверъше́нїа.
и҆ възложѝ а҆а҆ро́нъ и҆ сн҃ове е҆го рꙋц́ѣ своѝ на главꙋ̀ ѻ҆́вню, и҆ закла̀ и҆̀·

И҆ взѧ̀ моѷсїи ѿ кро́ви е҆го и҆ възложѝ на ѻ҆бꙋшїе ѹ҆́ха а҆а҆ро́нѧ десна́го, и҆ на конец̑҇ рꙋќи е҆го десныѧ̀, и҆ на коне́цъ ногѝ е҆го десны́ѧ·

И҆ приведѐ моѷсїи сн҃ы а҆а҆ро́нѧ, и҆ възложѝ моѷсїи ѿ кро́ви на ѻ҆бꙋшїе ѹ҆шесꙋ их̑ деснꙋю, и҆ на коне́цъ рꙋ́кꙋ и҆хъ деснꙋю и҆ на коне́цъ но́гꙋ и҆хъ деснꙋю·

И҆ пролїѧ̀ моѷсїи кро́вь ѻ҆́крс̑҇тъ ѻ҆л꙽тарѧ·

И҆ взѧ̀ моѷсїи тꙋ́къ и҆ чресла̀ и҆ тꙋкъ и҆же на ѹ҆тро́бѣ, и҆ повра́зъ ꙗ҆тренїи и҆ ѻ҆бѣ и҆сте́си и҆ тꙋ́къ и҆же на не́ю, и҆ ра́мо десно́е ѿ ко́шницы съверше́нїю и҆же е҆́сть прд̑е гм҃ъ·

И҆взѧ̀ хлѣбъ е҆ді́нъ прїсны́и, и҆ хлѣбъ е҆леенъ е҆дин̑҇ и҆ ѻ҆прѣ́снокъ е҆ді́нъ, и҆ възложѝ на тꙋ́къ, и҆ ра́мо десно́е·

И҆ възложѝ вс̂е на рꙋцѣ а҆а҆ро́ни, и҆ на рꙋцѣ сн҃овъ е҆го, и҆ приведѐ ѧ҆̀ ѹ҆ча́стїе прд̑е г҃ь·

И҆ взѧ̀ их̑ моѷсїи ѿ рꙋ́кꙋ их̑, и҆ принесе ѧ҆̀ къ ѻ҆́л꙽тарю къ всѐсъж꙽женїю съверъше́нїѧ, е҆́же е҆сть вонѧ̀ бл҃гово́нїѧ, прино́съ бо е҆стъ г҃ꙋ·

И҆ взѧ̀ моѷсїи грꙋди ѿлꙋчѝ ѧ҆̀ положе́нїа прд̑е гм҃ъ.
ѿ ѻ҆вна̀ съверше́нїа, и҆ бы́сть моѷсїю ѹ҆ча́стїе, ꙗ҆́коже повелѣ̀ г҃ь моѷсїю<.>

И҆ взѧ̀ моѷсїи ѿ е҆ле́ѧ пома́занїа.
и҆ ѿ кро́ви ꙗ҆́же на ѻ҆л꙽тарꙋ·

И҆ въскропѝ на а҆а҆ро́на и҆ на ри́зы е҆го, и҆ на сн҃ы е҆го и҆ на ри́зы сн҃овъ е҆го с ни́мъ·

И҆ ѻ҆ст҃и а҆а҆ро́на, и҆ ри́зы е҆го, и҆ сн҃ы е҆го и҆ ри́зы сн҃овъ е҆го с ни́мъ·

И҆ рече моѷсїи а҆а҆ро́нꙋ и҆ сн҃омъ е҆го.
свари́те мѧ́са ѹ҆ две́реи хра́ма свѣдѣ́нїа.
въ мѣстѣ ст҃ѣ, и та́мо да и҆зъѧ́сте ѧ҆̀, и́ хлѣбы и҆же въ ко́шницы съверше́нїа да ѧ҆дѧ́тъ ѧ҆̀, а҆а҆ро́нъ и҆ сн҃ове е҆го, ꙗ҆́коже заповѣ́да мн̂ѣ г҃ь гл҃ѧ.
и҆ ѻ҆ста́нокъ мѧ́съ и҆ хлѣ́бовъ на ѻ҆гнѝ да съж꙽же́те и҆з две́рїи хра̀ма свѣ́дѣнїа, да не и҆схо́дите.
з҃, дн҃їи, до́ньдеже сконча́етсѧ дн҃ь дн҃е съверше́нїѧ вашего·

Въ се́дмь б̂о дн҃їи да съвершите рꙋ́цѣ ва́ши, ꙗ҆́коже сътворѝ въ дн҃ь сїи, во́нже заповѣда̀ г҃ь твори́ти, ꙗ҆́ко моли́тисѧ ѻ҆ васъ·

И҆ да ѹ҆ две́рїи хра́ма свѣдѣ́нїа, сѣди́те се́дмь дн҃їи, дн҃ь и҆ но́щъ, и҆ съхрани́те повелѣ́нїа гн҃ѧ, да не ѹ҆мрете та́ко б̂о ми повелѣ̀ г҃ь·

И҆ сътворѝ а҆аро́нъ и҆ сн҃ове е҆го, вс̂ѧ словеса̀, ꙗ҆кож̑ повелѣ̀ г҃ь моѷсїю·

Глв̑҇а, ѳ҃·

И бы́сть въ дн҃ь ѻ҆смы́и, и҆ призва̀ моѷсїи а҆аро́на и҆ сн҃ы е҆го и҆ ста́рцы і҆ил҃вы·

И҆ рече моѷсїи къ аа҆ро́нꙋ.
пои҆мѝ себѣ теле́цъ ѿ говѧд̑, грѣха̀ рад̑и̑ и҆ ѻ҆венъ непороченъ въ всѐсъж꙽же́нїе и҆ принесѝ ѧ҆̀ прд̑е г҃а·

И҆ ста́рцемъ і҆и҃левымъ.
рече́ши гл҃ѧ, да възмꙋтъ козе́лъ ѿ ко́зъ е҆ді́нъ грѣха̀ ра́ди, и҆ ѻ҆ве́нъ и҆ теле́цъ и҆ а҆́гнецъ е҆ді́нолѣтны́и, непоро́чный, въ прино́сы·

И҆ теле́цъ ѿ говѧ́дъ, и҆ ѻ҆ве́н꙽ на же́ртвꙋ сп҃сенїа прд̑е г҃ь, и҆ мꙋкꙋ̀ пшени́чнꙋ съпрѧ́женꙋ съ е҆леѻ҆мъ занѐ днс̑҇ь г҃ь ꙗ҆́ви́тсѧ въ ва́съ, и҆ поѧ҆ша ꙗ҆́коже заповѣда̀ моѷсїи прд̑е хра́момъ свѣ́дѣ́нїа·

И҆ прїиде весь сонмъ и҆ ста́ прд̑е гм҃ъ·

И҆ ре́че моѷсїи, с̂е сло́во и҆́же, речѐ г҃ь сътвори́те, и҆ ѧ҆ви́тсѧ въ ва́съ сла́ва гн҃ѧ·

И҆ рече моѷсїи а҆а҆ро́нꙋ, пристꙋпѝ къ ѻ҆л꙽тарꙋ.
и҆ сътворѝ грѣха̀ ра́ди свое҆го вс̂есъж꙽же́нїе свое, и҆ помоли́сѧ ѻ҆ себѣ, и҆ ѻ҆ до́мꙋ твое҆мъ.
и҆ сътворѝ да́ръ люд̑скїи, и҆ помоли́сѧ ѻ҆ ни́хъ ꙗ҆́коже заповѣда̀ г҃ь·

И҆ пристꙋпѝ а҆а҆ро́нъ къ ѻ҆л꙽тарꙋ, и҆ закла̀ теле́цъ и҆же грѣха̀ ра́ди е҆го·

И҆ принесо́ша сн҃ове а҆а҆ро́ни кро́вь к немꙋ, и҆ ѻ҆мочѝ пръс́тъ сво́и въ кро́вь, и҆ възложѝ на ѹ҆глы ѻ҆л꙽та́рѧ, а҆ кро́вь пролїи ѹ҆ стоѧ́ла ѻ҆л꙽та́рѧ·

Тꙋ́къ же и҆ ѻ҆бѣ и҆сте́си, и҆ повра́зъ ꙗ҆тре́нїи и҆же грѣха̀ ра́ди, възложѝ на ѻ҆л꙽та́ръ, ꙗ҆́коже заповѣда̀ г҃ь моѷсїю·

Мѧ́со же и҆ ко́жꙋ съж꙽жѐ на ѻ҆гнѝ вн̂ѣ полка̀ закла́ же въвсѐсъж꙽же́ное, и҆ принесо́ша сн҃ове а҆а҆ро́ни кро́вь к не́мꙋ.
и҆ пролїѧ ѻ҆́крс̑҇тъ ѻ҆л꙽та́рѧ, и҆ всѐсъжже́нїе принесо́ша к немꙋ̀, и҆ ѹ҆́ды ѻ҆́ны и҆ главꙋ̀, и҆ възложѝ на ѻ҆л꙽та́ръ і҆ и҆змы́ ѹ҆тро́бꙋ и҆ но́ги водо́ю, и҆ възложѝ въ всѐсъж꙽же́нїе на ѻ҆лта́ръ·

Принесе́ же и҆ да́ръ люд̑скїи, и҆ взѧ̀ козла̀ и҆же грѣха̀ ра́ди люд̑ска, и҆ закла̀ и҆̀, и҆ ѻ҆цысти и҆̀ ꙗ҆коже пе́рвы́и, и҆ принесѐ вс̂есъж꙽же́нїе и҆ сътворѝ ꙗ҆́коже досто́итъ·

Принесе́ же и҆ тре́бꙋ и҆ напо́лни рꙋцѣ ѿ неѧ̀, и҆ възложѝ на ѻ҆л꙽та́ръ, кромѣ съж꙽же́нїѧ заѹ҆́тренѧго·

Закла̀ же те́лецъ и҆ ѻ҆́ве́нъ тре́бы сп҃сенїа люд̑ска.
и҆ принесо́ша сн҃ове а҆а҆ро́ни кро́вь к не́мꙋ, и҆ пролїѧ̀ ѻ҆́крс̑҇тъ ѻ҆л꙽та́рѧ·

Тꙋкъ же те́лчїи и҆ ѻ҆́внїи и҆ чресла̀, и҆ тꙋкъ покрыва́ющїи ѹ҆тро́бꙋ.
и҆ ѻ҆бѣ и҆сте́си, і҆ тꙋк꙽ и҆же на нею̀, и҆ повра́зъ ꙗ҆́тре́нїи, и҆ възложѝ тꙋки на грꙋ́ди.

И҆ принесѐ тꙋки на ѻ҆л꙽та́ръ, грꙋ́ди же и҆ ра́мо десно́е.
раздѣлѝ а҆а҆ро́нъ ѹ҆ча́стїе прд̑е гм҃ъ, ꙗ҆коже повелѣ моѷсїи·

И҆ въздви́гъ а҆а҆ро́нъ рꙋцѣ к лю́дем̑ и҆ блс̑҇ви ѧ҆̀ и҆ снїиде сътвори́ти приноше́нїе грѣха̀ ра́ди, и҆ всѐсъж꙽же́нїе, и҆ е́же ѻ҆ сп҃сенїѝ·

И҆ въше́дъ моѷсїи і҆ а҆а҆ро́нъ въ хра́мъ свѣ́дѣнїа, і҆ и҆зшед̑ше блс̑҇ви́ста вс̂ѧ лю́ди, и҆ ꙗ҆́ви́сѧ слава гн҃ѧ всѣмъ лю́демъ·

І҆ и҆зы́иде ѻ҆́гнь ѿ г҃а, и҆ съж꙽же е҆́же на ѻ҆л꙽та́ри, и҆ всѐсъж꙽же́нїе и҆ тк̑҇ꙋ,<.>

И҆ ви́дѣша вс̂и лю́дїе и҆ ѹ҆жасо́шасѧ, и҆ падо́ша на лица̀·

Глв̑҇а, і҃·

И възѧ́ста ѻ҆́ба сн҃а а҆а҆ро́нѧ нада́въ, и҆ а҆виѹ҆́дъ, ко́ждо свою̀ кади́лницꙋ, и въложи́ста в н̂ѧ ѻ҆́гнь.
и҆ възложи́ста на́нь ѳїмїѧм̑, и҆ принесо́ста прд̑е г҃а ѻ҆́гнь чюжд̑ъ е҆гоже не повелѣ и҆́ма г҃ь·

И҆зы́иде же ѻ҆́гнь ѿ г҃а и҆ потре́би ѧ҆̀, и҆ ѹ҆мро́ста прд̑е гм҃ъ·

И҆ рече моѷсїи къ а҆аро́нꙋ с̂е е҆́сть и҆же рече г҃ь гл҃ѧ.
въ приближа́ю҆щихъсѧ мн̂ѣ ѻ҆сщ҃ꙋсѧ, и҆ въ все́м꙽ со́нмѣ прославлю́сѧ·

Ѹ҆боѧ́ же сѧ а҆а҆ро́нъ и҆ ѻ҆печа́лисѧ и҆ възва̀ моѷсїи миса́ила, и҆ е҆лисафа́на.
сн҃ы ѻ҆зи́илевы, сн҃ы бра́та ѻ҆ц҃а а҆а҆ро́нѧ, и҆ реч̑҇ и҆́ма пристꙋпи́та и҆ възмѣта брата своѧ̀ ѿ мѣста ст҃а вн̂ѣ по́лка·

И҆ пристꙋпи́ша и҆ взѧ́ша и҆хъ в ри́зы своѧ̀, і҆ и҆знесо́ша вн̂ѣ полка̀ ꙗ҆́коже рече моѷсїи·

И҆ рече моѷсїи къ а҆а҆ро́нꙋ и҆ е҆леа҆за́рꙋ и҆ ѳама́рꙋ, сн҃ома е҆го ѻ҆ста́вшима.
гла́въ вашихъ не ѿкрыва́ите, и҆ ри́зъ вашихъ не раздира́ите, да не ѹ҆́мрете, и҆ на ве́сь сънмъ бꙋ́детъ гнѣ́въ·

Бра́тїѧ же ваша ве́сь до́мъ і҆ил҃въ да сѧ пла́чют꙽ запале́нїѧ, и҆́мже запали́шасѧ ѿ г҃а, і҆ и҆з две́рїи хра́ма свѣдѣ́нїа не и҆сходи́те, да не ѹ҆́мрете·

Є҆ле́и бо пома́занїѧ е҆же е҆́сть ѿ г҃а на ва́съ е҆́сть и҆ сътвори́ша по словесѝ моѷсїѻ҆вꙋ·

И҆ гл҃а г҃ь къ а҆а҆ро́нꙋ рекїи, вина̀ и҆ сике́ра не пїи ты̀ и҆ сн҃ове твоѝ с тобо́ю·

Є҆гда̀ въхо́дите въ хра́мъ свѣдѣ́нїа.
и҆л̂и пристꙋпа́ющимъ вамъ къ ѻ҆лтарю̀, да не ѹ҆́мрете, и҆ бꙋ́детъ с̂е въ зако́нъ вѣ́чныи въ ро́дѣхъ ва́шихъ.
ѿлꙋчи́те междꙋ ве́щьми ст҃ыми, и҆ междꙋ скверна́выми, и҆ междꙋ̀ нечи́стыми, и҆ междꙋ̀ чи́стыми.
и҆ да ѹ҆стро́ите сн҃ом̑ і҆и҃левым̑ вс̂е зако́н꙽ное е҆́же гл҃а г҃ь к ни́мъ рꙋко́ю моѷсїѻ҆вою·

И҆ рече моѷсїи къ а҆а҆ро́нꙋ, и҆ е҆лиа҆зарꙋ, и҆ ѳамарꙋ сн҃ома е҆го ѻ҆ста́вшима.
възъмѣте тре́бꙋ ѻ҆ста́вленꙋю ѿ прино́съ гн҃ь.
и҆ ѧ҆ди́те ѻ҆прѣ́сноки ѹ҆ ѻ҆лтарѧ̀, ꙗ҆́ко ст҃аѧ ст҃ыхъ е҆́сть, и҆ да ѧ҆́сте ѧ҆̀ в мѣ́стѣ ст҃ѣ·

Зако́нно б̂о тебѣ е҆́сть, и҆ зако́нно сн҃ома твои́ма, с̂е ѿ прино́съ гн҃ь.
си́це б̂о ми заповѣда̀ г҃ь·

И҆ грꙋ́ди ѹ҆ча́стїа, и҆ ра́мо ѹ҆ча́стїѧ.
да ѧ҆ди́те в мѣстѣ ст҃ѣ т̂ы и҆ сн҃ове твоѝ и҆ до́мъ твои, с тобо́ю·

зако́нно бо тебѣ̀ и҆ зако́нно сн҃ома твои́ма, да́стъсѧ и҆ ѿ тре́бы сп҃сен꙽ныѧ сн҃овъ і҆и҆л҃въ·

Ра́мо ѹ҆ча́стїѧ и҆ грꙋ́ди ѹ҆ча́стїѧ, въ прино́сехъ тꙋчныхъ да принесꙋтъ, ѹ҆ча́стїѧ и҆́же прино́сѧтъ прд̑е г҃ь·

И҆ да бꙋ́детъ тебѣ и҆ сн҃омъ твои҆мъ, и҆ дще́ремъ твои҆мъ с тобо́ю, въ зако́нъ вѣ́чныи, ꙗ҆́коже повелѣ г҃ь моѷсїю·

Посем же моѷсїи възыска́ѧ възыска̀ козла̀, и҆́же грѣха̀ ра́ди, се́иже съж꙽же́нъ бѧ́ше·

И҆ разгнѣвасѧ моѷсїи на е҆лиа҆за́ра, и҆ ѳама́ра сн҃ы а҆а҆ро́нѧ ѻ҆ставшаѧ, гл҃ѧ·

Почто не ѧ́сте въ мѣстѣ ст҃ѣ, е҆́же грѣха̀ ра́ди.
ꙗ҆́ко ст҃аѧ ст҃ыхъ е҆́сть·

Се дастъсѧ вамъ ꙗ҆́сти.
да ѿве́ржете грѣхъ сънма̀, и҆ помоли́тесѧ ѻ҆ них̑ прд̑е гм҃ъ·

Не внесѐ б̂о сѧ ѿ кро́ви е҆го въ ст҃о́е.
на лице внꙋтрь да ѧ́сте е҆̀, въ мѣ́стѣ ст҃ѣ, ꙗ҆́коже повелѣ мн̂ѣ г҃ь·

И҆ рече а҆а҆ро́нъ къ моѷсїю гл҃ѧ, а҆́ще днс̑҇е принесꙋтъ грѣха̀ ра́ди их̑ и҆ вс̂есъж꙽же́нїе и҆́хъ прд̑е г҃а·

И҆ лꙋчи́тъ ми сѧ т́ако, и҆ ѧ́мъ е҆́же грѣха̀ ра́ди днс̑҇е.
бꙋ́дет ли го́де г҃ꙋ.
и҆ слы́ша моѷсїи и҆ ѹ҆годно е҆мꙋ бы́сть·

Глв̑҇а, а҃і·

И речѐ г҃ь къ моѷсїю і҆ а҆а҆ро́нꙋ гл҃ѧ, гл҃ите сн҃омъ і҆и҆л҃вым̑ рекꙋщ́е.
сїи ско́ты и҆же ꙗ҆́сте ѿ всѣхъ ско́тъ и҆же на землѝ·

Всѧ́къ ско́тъ на двое дѣлѧ̀ па́зноготь, и҆ копы́то копытѧ на́ двое, ѿрижа́и жва́нїе, въ ско́тѣхъ сїѧ̀ да ѧ҆́сте·

Ра́звѣ ѿ си́хъ да не ѧ́сте, и҆́же не ѿры́жꙋтъ жва́нїе·

І҆ и҆же на́ двое дѣ́лѧтъ па́зногти, а҆ не копы́тѧтъ.
вельблꙋда, ꙗ҆́ко и҆зно́ситъ жва́нїѧ но па́зногти не дѣ́литъ на́ двое, нечи́стъ сїи ва́мъ·

Хирогри́ль ꙗ҆́ко не и҆зносит̑ жва́нїа и҆ па́зногти не дѣ́литъ нечи́стъ сїи ва́мъ·

И҆ заѧ́цъ и҆́же ѿры́жетъ жва́нїе но па́зногти не дѣлит̑ на́ двое, нечи́стъ сїи ва́мъ·

И҆ свинїа ꙗ҆́ко дѣ́литъ па́зногти на двое, и҆ копы́то копытитъ, н̂о не ѿры́жет̑ жва́нїа, нечи́ста сїѧ̀ вамъ.
ѿ мѧ́съ и҆хъ да не ѧ́сте, и҆ мертвечи́не их̑ да не прикаса́етесѧ нечи́ста сїа вам̑, и҆ сїѧ̀ да ѧ́сте ѿ всѣхъ ꙗ҆́же въ водах꙽·

Всѣмъ и҆́мже сꙋть пера̀ и҆ чешꙋѧ̀ въ вода́хъ и҆ въ мори́хъ, и҆ въ е́зерехъ.
сїѧ̀ да ѧ́сте·

И҆ всѣмъ и҆́мже нѣсть пера̀ и҆ чешꙋѧ̀.
въ вода́хъ и҆ въ мо́рих̑ и҆ въ е́зерех̑, ѿ всѣхъ и҆хъ ꙗ҆́же и҆зъно́сѧтъ воды·

И҆ всѧ́ка дш҃а живꙋщаѧ̀ въ водѣ.
скве́рна е҆сть, и҆ скве́рна да бꙋ́дꙋтъ вам꙽ ѿ мѧ́съ и҆́хъ да не ѧ́сте, и҆ мертвечи́ны и҆хъ гнꙋша́и҆тесѧ·

И҆ всѣмъ и҆́мже нѣ́сть пера̀ и҆ чешꙋѧ̀ и҆́же въ вода́хъ скве́рна сїѧ̀ е҆сть вамъ, и҆ сихъ гнꙋша́итесѧ·

ѿ пти́цъ, и҆ да не ѧ́сте и҆хъ гнꙋ́си сꙋть.
ѻ҆рла̀ и҆ но́га, и҆ морьска́го ѻ҆рла̀ и҆ неѧ́сыти, и҆ кти́на, и҆ е́же к сим̑ подо́бна.
вра́бїѧ, и҆ вра́на, и҆ совы̀ и҆ подо́бнаѧ и҆́мъ.
и҆ вы́пелица, и҆ сꙋхола́плѧ, і҆ и҆же и҆́мъ подо́бнаѧ, и҆ ѧ́стреба и҆же подо́бно к немꙋ, и҆ вра́на нощнаго, и҆ лили́ка і҆ и́вина и҆ порфꙋриѻ́на.
пелика́на, и҆ ѻ҆родиѻ́на, и҆ харадриѻ́на, и҆ е́же подо́бна симъ, и҆ вдо́да и҆ но́щна нетопырѧ̀, и҆ всѧ̀ га́ды пти́чїѧ, и҆же хо́дѧтъ на четырехъ скве́рны вамъ да бꙋ́дꙋтъ·

Но сїѧ же да ѧ́сте, ѿ всѣхъ гадъ пти́чныхъ и҆же хо́дѧтъ четверонож̑ и҆же и́мꙋтъ го́лени выше пле́снꙋ и҆хъ скака́ти и҆́ми ѿ землѧ̀·

И҆ сїѧ̀ да не ѧ́сте, ѿ сихъ, ѹ҆́сеница и҆ е́же подобно е҆сть е́и.

Сверче́къ и҆ е́же подо́бно к семꙋ, и҆ прꙋ́ги и҆же подо́бно к ним̑ и҆ сꙋпротивлѧю́щагосѧ змиѧ̀, и҆ е́же подо́бно к немꙋ·

И҆ всѧ́къ гд̑а ѿ птицъ и҆́мже сꙋть четырино́гы.
скверна́во вамъ е҆́сть, и҆ в си́хъ да не ѻ҆сквернавитесѧ, и҆ всѧ́къ и҆же прикаса́ѧсѧ мертвечи́нѣ и҆хъ нечи́стъ бꙋ́детъ до́ вечера·

И҆ всѧ́къ носѧ́и мертвечи́нꙋ и҆хъ да и҆спере́тъ ризы своѧ̀, и҆ нечи́стъ бꙋ́детъ до́ вечера·

Въ всх̑ѣ скотѣхъ, и҆́мже дѣлитсѧ на́ двое па́зноготь, и҆ копы́то копы́титъ и҆ жва́нїѧ не жꙋе́тъ нечи́сти да бꙋдт̑ꙋ вамъ.
всѧ́къ прикаса́ѧсѧ мертвечи́нѣ и҆хъ нечи́стъ бꙋде́тъ і҆ и҆ всѧк̑҇ и҆же хо́дитъ на ла́пахъ.
въ всѣ́хъ ѕвѣрехъ ꙗ҆́же хо́дѧтъ на четы́рехъ нечи́сто е҆сть вамъ·

Всѧ́къ прикаса́асѧ мертвечи́нѣ и҆хъ нечи́стъ бꙋ́детъ до́ вечера, и҆ носѧ́и мертвечинꙋ и҆хъ да и҆спере́тъ ри́зы своѧ̀ нечи́стъ бꙋ́детъ до́ вечера, нечи́ста сїѧ бꙋ́дꙋтъ вамъ·

И҆ сїѧ вамъ нечи́ста ѿ гд̑а плѣжꙋщихъ по землѝ.
ла́сица, черепа́ха, и҆ мы́шъ, коркоди́лъ земны́и, пнѧ́вица е҆́жь мигалѝ, хамалеѻ́нъ, бѣ́лка, и҆ калавотисъ, и҆ ѧ́щеръ, и҆ кроторы́ѧ·

Сїѝ нечи́сти ва́мъ, ѿ всѣхъ га́дъ плѣжꙋщихсѧ по землѝ.
всѧ́къ прикаса́ѧсѧ мертвечи́нѣ и҆хъ, нечи́стъ бꙋ́детъ до́ вечера·

И҆ всѧ́къ и҆же а҆́ще впаде́тъ ѿ нихъ в нѣчто, ѿ мерътвечи́ны и҆хъ нечи́сто бꙋ́детъ·

Въ всѧ́къ съсꙋдъ дре́вѧнъ, и҆л̂и въ ризꙋ, и҆л̂и въ мѣхъ, и҆л̂и въ вре́тище и҆л̂и въ всѧ́кїи сосꙋдъ в не́мже твори́тсѧ дѣло.
въ водѣ да и҆змо́читсѧ, и҆ нечи́стъ бꙋ́детъ до́ вечера, и҆ паки чи́стъ бꙋ́детъ·

И҆ всѧ́къ съсꙋ́дъ гли́ненъ во́ньже а҆́ще впаде́тъ ѿ сих̑ внꙋтръ а҆ е́же е҆́сть в не́мъ.
нечи́сто бꙋ́детъ, и҆ сосꙋ́дъ да разбие́тсѧ, и҆ всѧ́кꙋ ꙗ҆дь ю҆же ꙗ҆́сте.
на ню́же а҆́ще възлие́тсѧ вода̀, и҆ впаде́тъ ѿ мертвечи́ны и҆хъ нечи́сто бꙋ́детъ вам̑ и҆ вс̂е питїе е҆́же пїе́те въ всѧ́комъ сосꙋдѣ, нечи́сто бꙋ́детъ вамъ, и҆ вс̂е е҆́же а҆́ще въпаде́тъ в н̂е ѿ мертвечи́ны и҆хъ нечи́сто бꙋ́детъ·

Пе́щи ѻ҆́гнища да съкрꙋша́тсѧ нечи́сты бо сꙋтъ, и҆ нечи́сты да бꙋ́дꙋтъ вамъ ра́звѣ и҆сто́чникъ водныхъ, и҆ поток̑҇ и҆ сне́мъ водных̑, да бꙋ́дꙋтъ чи́сты·

А҆ и́же прикаса́етсѧ мертвечи́намъ и҆хъ нечи́стъ бꙋ́детъ, и҆ а́ще впадет̑ ѿ мертвечи́ны и҆хъ на вс̂е сѣмѧ сѣмѧнное е҆же сѣе́тсѧ чи́сто бꙋ́дет꙽, а҆́ще ли возлие́тсѧ вода̀ на вс̂е сѣмѧ, и҆ въпаде́тъ ѿ мертвечи́ны их̑ на нѐ, нечи́сто бꙋ́детъ вамъ, а҆́ще ли ѹ҆́мретъ ѿ скота̀, и҆́же ва́мъ ꙗ҆́сти, а҆ прикаса́ѧсѧ мертвечи́нѣ е҆го, нечи́стъ бꙋ́детъ до́ вечера.
и҆ ꙗ҆ды́и ѿ мертвечи́нъ и҆хъ, да и҆спере́тъ ризы своѧ̀, нечи́стъ бꙋ́детъ до́ вечера.
и҆ носѧ́и мертвечи́нꙋ и҆хъ, да и҆змые҆тъ ри́зы своѧ нечи́стъ бꙋ́детъ до вечера·

И҆ всѧк̑҇ га́дъ плѣ́жꙋщїисѧ по землѝ, скверна́во ва́мъ е҆сть с̂е да сѧ не ѧ́стъ·

Всѧ́къ ходѧ́и чре́вом̑ и҆ всѧ́къ ходѧ́и на четве́рехъ, и҆ всѧ́ко многоно́жное, въ всѣхъ га́дѣхъ, и҆́же плѣжꙋтъ по землѝ.
да не ѧ́сте и҆хъ, ꙗ҆́ко скверна́во ва́мъ е҆́сть, и҆ да не ѻ҆скверна́вите дш҃ъ вашихъ·

Въ всѣ́хъ гадѣхъ плѣжꙋщихсѧ на землѝ, да не ѻ҆скверна́витесѧ в ни́х꙽ и҆ да не бꙋ́дете нечи́сти в них̑.
ꙗ҆́ко а҆зъ е҆смь г҃ь б҃ъ ва́шъ, и҆ да ѻ҆ст҃ите́сѧ и бꙋ́дете ст҃и, ꙗ҆́ко ст҃ъ е҆́смь а҆зъ г҃ь б҃ъ вашъ·

И҆ да не ѻ҆скверна́вите дш҃ъ вашихъ въ всѣ́хъ гадѣхъ, дви́жꙋщихсѧ по землѝ, ꙗ҆ко а҆зъ е҆смь г҃ь, и҆зведы́и васъ из̑ землѧ̀ е҆гѷпет̑скїѧ да бꙋ́дꙋ вамъ б҃ъ, и҆ бꙋ́дете ст҃и, ꙗ҆́ко а҆́зъ е҆смь ст҃ъ·

Се̂ закон̑҇ ѻ҆ ско́тѣхъ, и҆ ѻ҆ пти́цахъ и҆ всѧ́кои дш҃и дви́жꙋщеисѧ въ вода́хъ, и҆ всѧ́кои дш҃и дви́жꙋщеисѧ по землѝ·

Разлꙋчи́ти ме́ждꙋ нечи́стыми и҆ междꙋ чи́стыми.
къ наѹ҆че́нїю сн҃овъ і҆ил҃вых̑ ме́ждꙋ ѻ҆живлѧ́ющими, ꙗ҆́домыми и҆ ме́ждꙋ ѻ҆живлѧ́ющими неѧ҆до́мыми·

Глв̑҇а, в҃і·

И рече г҃ь къ моѷсїю гл҃ѧ.
гл҃и сн҃омъ і҆и҃лвымъ, и҆ речеши к ни́мъ гл҃ѧ.
жена̀ и҆́же а҆́ще за́чнет̑ и҆ роди́тъ мꙋжескъ полъ нечи́ста бꙋ́детъ з҃ дн҃їи, и҆ по дн҃ехъ е҆́стестве́наго разлꙋче́нїѧ скве́рны е҆ѧ̀ нечи́ста бꙋдет̑·

И въ дн҃ь ѻ҆́смыи да ѻ҆брѣжетъ пло́ть коне́чнꙋю е҆го, и҆ да сѣди́тъ, л҃, и҆ г҃ дн҃и, въ кро́ви ѻ҆чище́нїа е҆ѧ̀, и҆ всѧ́кои ве́щи ст҃ѣи да не прикаса́етсѧ, и҆ въ ст҃илище да не въхо́дитъ, до́ньдеже сконча́ютсѧ дн҃їе ѻ҆чище́нїю е҆ѧ̀.
а҆́ще ли же́нескъ полъ родитъ.
нечи́ста бꙋде́тъ д҃і дн҃їи.
по е҆стественѣи скве́рнѣ е҆ѧ̀, ѯ҃, и҆ ѕ҃ дн҃їи да сѣди́тъ въ кро́ви нечистоты̀ е҆ѧ̀·

И҆ е҆гда̀ сѧ сконча́ютъ дн҃їе ѻ҆чище́нїѧ е҆ѧ̀.
ѻ҆ сн҃ꙋ и҆л̂и дще́ри да принесе́тъ а҆́гнецъ непоро́ченъ е҆ді́нолѣте́нъ, въ всѐсъж꙽женїе·

И҆ голꙋби́чища, и҆л̂и го́рличища грѣха̀ рад̑и̑, прд̑е две́ри хра́ма свѣдѣнїа къ жерцꙋ̀, и҆ да принесетъ е҆̀ прд̑е г҃ь.
и҆ помолитсѧ ѻ҆ не́и жре́цъ, и҆ да ѻ҆чи́ститъ ю҆̀ ѿ вре́да кро́ви е҆ѧ̀·

Се́и зако́нъ ража́ющеи мꙋжескъ полъ и҆ же́нескъ, а҆́ще ли не пости́гнетъ б̑҇ рꙋка̀ е҆ѧ̀ съ а҆́гнеца, и҆ да въз́метъ дв̂ѣ го́рлицѣ и҆л̂и дв̂а голꙋ́бичища·

Є҆ді́нъ на всѐсъж꙽же́нїе а҆́ дрꙋгїи грѣха̀ ра́ди, и҆ помо́литсѧ ѻ҆ неи жре́цъ, и҆ ѻ҆цы́ститсѧ·

Глв̑҇а, г҃і·

И гл҃а г҃ь къ моѷсїю і҆ а҆аро́нꙋ рекїи.
чл҃кꙋ е҆мꙋже а҆́ще бꙋдетъ на ко́жи плоти е҆го стрп̑҇ꙋ зна́менїа, и҆л̂и нача́ло прокаже́нїю, и҆ бꙋ́детъ на ко́жи плоти е҆го бле́скъ прокаже́нїѧ.
да прїведетсѧ къ а҆а҆ро́нꙋ жръцꙋ, и҆л̂и къ е҆ді́номꙋ ѿ сн҃овъ е҆го жръцꙋ̀, и҆ ѹ́зрит̑ жре́цъ бле́скъ на ко́жи плоти е҆го, и҆ вла́съ в бле́скꙋ и҆змѣни́лсѧ бꙋ́детъ в бѣ́ло·

И҆ взо́ръ бле́скꙋ ѹ҆малѧ́етсѧ ѿ ко́жа плотныѧ е҆го.
бле́скъ прокаже́нїѧ е҆́сть и҆ ѹ́зритъ жрѐцъ, и҆ ѻ҆скверна́витъ и҆̀·

А҆́ще ли прокаже́нїе бѣло е҆́сть на кожи пло́тнѣи е҆го, и҆ не хꙋдѣе бꙋ́детъ взо́ръ плоти е҆го ѿ кожа пло́тныѧ, и҆ вла́съ е҆го нѣсть сѧ и҆змѣни́лъ в бѣ́ло, и҆ сїе е҆́сть теменъ и҆ ѿлꙋчи́тъ жре́цъ бле́скъ на з҃ дн҃їи и҆ ѹ́зритъ жре́цъ бле́скъ въ дн҃ь сед꙽мы́и·

И҆ сѐ бле́скъ пребыва́етъ прд̑е нимъ, и҆ не и҆змѣнил̑҇сѧ бле́скъ в кожи и҆ ѿлꙋчи́тъ е҆го жре́цъ на дрꙋгꙋю з҃, дн҃їи, и҆ ѹ́зритъ е҆го жре́цъ в седмы́и дн҃ь втори́цею, и҆ сѐ бле́скъ потемнл̑҇ѣ и҆ не и҆змѣни́лъсѧ бле́скъ в ко́жи, и҆ ѻ҆циститъ е҆го жре́цъ зна́менїе б̂о е҆сть·

И҆спра́въ ризы своѧ чи́стъ бꙋ́детъ.
а҆́ще ли и҆змѣнѧ́ющи и҆з꙽мѣни́тсѧ зна́менїе в кожи.
по видѣнїи е҆го же́рцꙋ и҆ ѻ҆цы́ститъ е҆го, и҆ ꙗ҆́ви́тсѧ второ́е жръцꙋ̀.
и҆ ѹ́зритъ е҆го жре́цъ, и҆ с̂е и҆змѣни́сѧ зна́менїе в ко́жи, и҆ да ѻ҆скверна́витъ и҆̀ жре́цъ прокаже́нїе бо е҆сть·

И҆ бле́ск꙽ прокаже́нїѧ а҆́ще бꙋ́детъ на чл҃цѣ, и҆ прїиде къ жерцꙋ и҆ ѹ́зрит̑ и҆̀ жре́цъ и҆ с̂е стрꙋпъ бѣлъ на ко́жи.
сїи же и҆змѣни́лъ бꙋдетъ вла́сы въ бѣлы·

И҆ ѿ здра́вїѧ пл̀оти живы́ѧ въ стрꙋпѣ прокаже́нїа, ве́тхо е҆сть въ ко́жи плоти е҆го, и҆ ѻ҆скверна́витъ и҆̀ жрецъ и҆ ѿлꙋч́итъ и҆̀ ꙗ҆́ко нечи́стъ е҆сть·

А҆́ще ли же процвѣтаѧ̀ процвѣте́тъ прокаже́нїе въ ко́жи, и҆ покры́етъ прокаже́нїе вс̂ю ко́жꙋ блескомъ, ѿ главы̀ до ногꙋ̀ е҆го, по всемꙋ̀ взо́рꙋ жерьцо́вꙋ·

И҆ ѹ́зритъ жре́цъ.
и҆ с̂е покры́ло прокаже́нїе вс̂ю кожꙋ пло́ти е҆го, и҆ да ѻ҆цы́стит̑ жре́цъ бле́скъ.
ꙗ҆ко весь и҆змѣнил̑҇сѧ е҆́сть въ бѣло, чи́стъ е҆сть·

И҆ во́ иже дн҃ь а҆́ще ꙗ҆ви́тсѧ в немъ пло́ть жива̀ ѻ҆скверна́витсѧ, и҆ ѹ́зритъ жре́цъ плоть цѣлꙋ, и҆ ѻ҆скверна́вит꙽ ю҆̀ плоть здра́ва нечи́ста е҆сть, прокаже́нїе е҆сть·

А҆́ще ли съста́витсѧ плоть здра́ваѧ, і҆ и҆змѣнитсѧ въ бѣ́ло, и҆ прїидетъ къ же́рцꙋ.
и҆ ѹ҆́зритъ жре́цъ, и҆ с̂е и҆змѣни́лъсѧ бле́скъ въ бѣло, и҆ да ѻ҆цы́ститъ жре́цъ бле́скъ чи́стъ е҆сть·

И҆ тѣло а҆́ще л̂и бꙋ́детъ на ко́жи е҆го болѧ́чка гно́ина, і҆ и҆сцѣлѣе́тъ, и҆ бꙋ́детъ на мѣстѣ болѧ́чки стрꙋпъ бѣлъ, и҆л̂и прокаже́нїе бѣлꙋѧ́сѧ и҆л̂и рдѧ́сѧ и҆ ѧ҆ви́тсѧ жрьцꙋ.
и҆ ѹ́зритъ жре́цъ и҆ с̂е взоръ хꙋдѣ́е кожи, и҆ вла́съ е҆го и҆змѣнилъсѧ въ бѣ́ло, и҆ ѻ҆скверна́вит̑ ю҆̀ жре́цъ бле́скъ прокаже́нїѧ е҆сть, на болѧ́чки процве́лъ·

А҆́ще л̂и ви́дит̑ жре́цъ, и҆ сѐ нѣсть в нем̑ вла́съ бѣлъ и҆ не хꙋдѣи е҆сть ѿ ко́жа пло́тныѧ·

и҆ сїи же е҆сть те́менъ, и҆ ѿлꙋчи́тъ е҆го жре́цъ на з҃. дн҃їи·

А҆́ще л̂и раз̑сы́панїемъ разсы́плетсѧ в кожи да ѻ҆скверна́витъ и҆̀ жре́цъ бле́скъ прокаженїѧ е҆сть, въ гно́и процвелъ·

А́ще л̂и в тѣ́ле пребыва́етъ прокаже́нїе и҆ не разсыпа́етсѧ, стрꙋпъ болѧ́чки е҆сть, да ѻ҆цы́ститъ и҆̀ жре́цъ·

И҆ плоть а҆́ще бꙋ́детъ в ко́жи е҆го и҆ж꙽женїе ѻ҆́гнено, и҆ бꙋ́детъ въ ко́жи е҆го немощь и҆сцѣлѣвши, и҆ж꙽же́нїе блескꙋѧ҆сѧ прокаже́нїѧ бѣ́ло и҆ли червле́но, и҆ли пробѣлꙋе́тсѧ и҆ ѹ́зритъ и҆̀ жре́цъ и҆ с̂е премѣни́лсѧ е҆сть вла́съ въ блеща́нїе.
и҆ взо́ръ е҆мꙋ хꙋдѣе́ ѿ ко́жа.
прокаже́нїе е҆сть, въж꙽же́нїю процвело̀, и҆ да ѻ҆скверни́тъ и҆̀ жре́цъ, бле́скъ прокаже́нїѧ е҆́сть.

А҆́ще ли ѹ҆ви́дитъ и҆̀ жре́цъ, и҆ сѐ нѣ́сть въ блеща́нїю вла́са бѣл́а, и҆ не хꙋдѣе е҆сть ѿ ко́жа, са́мо же те́мно.
да ѿлꙋ́читъ и҆̀ жре́цъ на, з҃, дн҃їи, и҆ ѹ҆́зритъ и҆̀ жре́цъ въ дн҃ь сед̑мыи.
и҆ а́ще разсы́панїемъ разсы́плетсѧ в ко́жи.
да ѻ҆скверна́вит̑ и҆̀ жре́цъ бле́скъ прокаже́нїѧ е҆сть, съ гно́емъ процве́лъ·

А҆́ще ли в тѣ́лѣ пребꙋ́детъ блеща́нїе, и҆ не разсы́пае҆тсѧ в кожи.
сїе же те́мно е҆сть, стрꙋпъ съж꙽же́нїѧ е҆сть.
да ѻ҆цы́стит̑ и҆̀ жре́цъ, ѻ҆́бразъ бо съж꙽же́нїа е҆сть·

Мꙋжꙋ же и҆л̂и женѣ̀, е҆мꙋже а҆́ще бꙋдетъ в нихъ прокаже́нїѧ, на главѣ̀, и҆л̂и на брадѣ̀·

И҆ ѹ҆́зрит̑ жре́цъ бле́скъ.
и҆ с̂е ѻ҆бли́чїе е҆го хꙋдѣе ко́жа, в не́мже вла́съ желтꙋѧ́сѧ то́нокъ, и҆ ѻ҆скверна́витъ и҆̀ жре́цъ вре́дъ е҆сть, прокаже́нїе главы̀, и҆л̂и прокаже́нїе брады̀ е҆сть·

И҆ а҆́ще ѹ҆́ви́дитъ жре́цъ бле́скъ вре́дныи и҆ с̂е не бꙋ́детъ ѻ҆бли́чїе хꙋдѣе́ ко́жа, и҆ вла́съ желтꙋѧ́сѧ не бꙋ́детъ в не́м꙽, и҆ да ѿлꙋ́читъ жре́цъ бле́скъ вре́дныи на з҃, дн҃їи·

И҆ ѹ́зритъ жре́цъ бле́скъ въ дн҃ь сед̑мы́и, и҆ не разсы́пасѧ вре́д꙽, и҆ вла́съ съжелтꙋѧ́сѧ нѣсть в нем̑, и ѻ҆бли́чїе вре́да нѣ́сть хꙋдѣ́е ко́жа, и҆ ѻ҆стрижетъ ко́жꙋ.
а҆ вре́дъ да сѧ не бро́снетъ, да ѿлꙋч́итъ жре́цъ вред̑ на з҃, дн҃їи второе, и҆ ѹ҆́зритъ жрец̑҇ вре́дъ въ дн҃ь седмы́и, и҆ с̂е не разсы́пасѧ вред̑ въ ко́жи по ѻ҆бросне́нїю е҆го, и҆ ѻ҆бли́чїе вре́да нѣ́сть хꙋдѣе́ ко́жа, и҆ да ѻ҆цы́ститъ и҆̀ жре́цъ, і҆ и҆спра́въ ри́зы чи́стъ бꙋ́детъ·

А҆́ще ли разсы́панїемъ разсы́плетсѧ вре́дъ въ ко́жи по ѻ҆цыщенїю е҆го.
и҆ ѹ́зритъ и҆̀ жрец̑҇ и҆ с̂е разсы́пасѧ вре́дъ въ ко́жи, да не присѣща́етъ жре́цъ ѻ҆ вла́сѣ желтꙋю҆щемсѧ, нечи́стъ е҆сть·

А҆́ще ли пребꙋ́детъ в тѣ́ле вре́дъ, и҆ вла́съ че́рнъ ꙗ҆́ви́тсѧ в не́мъ, і҆ и҆сцѣлѣ вред̑ чи́стъ е҆сть, и҆ ѻ҆цы́ститъ и҆̀ жре́цъ·

Мꙋжꙋ и҆л̂и женѣ е҆мꙋже а҆́ще бꙋдетъ на ко́жи плоти е҆го блеща́нїѧ блеща́сѧ бѣлꙋ́ющее҆сѧ, и҆ ѹ҆ви́дитъ жре́цъ, и҆ с̂е на ко́жи пло́ти е҆го бле́скъ, и҆ блеща́сѧ бѣлꙋетсѧ, вла́га е҆сть, процвела̀ ко́жа пло́ти е҆го чи́стъ ес̑҇·

А҆́ще комꙋ̀ ѻ҆ползе глава̀ плѣшив̑҇ е҆сть чи́стъ е҆сть.
а҆́ще ли съ предѝ ѻ҆пол̑҇зе глава̀ възлы́съ е҆́сть, чи́стъ е҆сть.
а҆ще ли бꙋ́детъ на плѣши е҆го, и҆л̂и на възлы́синѣ е҆го, бле́скъ бѣлъ, и҆л̂и червленꙋ́ѧсѧ, прокаже́нїе процвита́юще на плѣши е҆го, и҆ на възлы́синѣ е҆го·

И҆ ѹ҆ви́дитъ и҆̀ жре́цъ и҆ с̂е ѻ҆бли́чїе бле́ска бѣла, и҆ли червле́на, на плѣши е҆го, и҆л̂и на възлы́синѣ е҆го ꙗ҆́ко ѻ҆бли́чїе прокаже́нїа на ко́жи пло́ти е҆го·

Чл҃къ прокаже́нъ е҆сть, ѻ҆скверне́нїемъ ѻ҆скверна́витъ жре́цъ на главѣ̀ е҆го бле́скъ е҆сть·

И҆ прокаже́нъ на немже е҆сть бле́скъ, ри́зы е҆го да бꙋ́дꙋтъ взѧ́ты, и҆ глава̀ е҆го непокровена, и҆ ѻ҆коло ѹ҆́стъ е҆го да ѻ҆бвїе́тсѧ, нечи́стъ прозове́тсѧ.
вс̂ѧ дн҃и в нѧ́же бꙋ́детъ в не́мъ бле́скъ нечи́стъ е҆сть, и҆ нечи́стъ бꙋ́детъ ѿлꙋченъ кромѣ да сѣди́тъ вн̂ѣ по́л꙽чища да бꙋ́детъ е҆мꙋ пребыва́нїе·

И҆ ри́за а҆́ще бꙋ́детъ на не́и бле́скъ прокаже́нїа, на ри́зѣ сꙋкнѧ́нѣ, и҆л̂и на и҆згре́бнѣ и҆л̂и на прѧ́денѣ, и҆л̂и на кло́кахъ, и҆л̂и на лнѣ́хъ, и҆л̂и на во́л꙽нѣ, и҆л̂и на ко́жи, и҆л̂и на всѧ́кои ко́жи ква́шенѣ·

И҆ ꙗ҆́ви́тсѧ бле́скъ зеленъ и҆л̂и червленꙋ́ѧсѧ на ко́жи, и҆л̂и на ри́зѣ, и҆л̂и на прѧ́денехъ, и҆л̂и на кло́кахъ, и҆ на все́мъ съсꙋдѣ ква́шенѣ бле́скъ прокаже́нїа е҆сть·

И҆ пока́жет̑ жерцꙋ, и҆ ѹ҆ви́дитъ жре́цъ бле́скъ да ѿлꙋчитъ жре́цъ бле́скъ на з҃, дн҃їи и҆ да ѹ҆ви́дитъ жре́цъ бле́скъ въ дн҃ь седмы́и а҆́ще сѧ разсы́палъ бле́скъ по ри́зѣ, и҆ по прѧденꙋ и҆л̂и по кло́ках꙽ и҆л̂и по ко́жи.
по всемꙋ е҆ли́ко твори́тсѧ ко́жа ква́шенїемъ.
прокаже́но и҆́сто е҆сть, бле́скъ нечи́стъ е҆сть.
да съж꙽же́тъ ри́зꙋ и҆ прѧ́денїѧ, и҆ кло́ки, и҆л̂и на во́лнѣ, и҆л̂и на лнѣ, и҆л̂и на всѧ́комъ сосꙋдѣ ко́жанѣ.
на нем̑же а҆́ще бꙋ́детъ прокаже́нїе, поне́же прокаже́нїе и҆́сто е҆сть на ѻ҆гнѝ да сож꙽же́тсѧ·

А҆́ще ли ѹ҆́зритъ жре́цъ, и҆ не разсы́плетсѧ бле́скъ по ри́зѣ, и҆л̂и по прѧ́денꙋ, и҆ по кло́ком̑, и҆л̂и по всѧ́комꙋ сосꙋдѣ ко́жанѣ да повели́тъ жрец̑҇ да и҆спере́тъ, на не́мже бꙋ́детъ бле́скъ, да ѿлꙋч́итъ жре́цъ бле́скъ на дрꙋгꙋю седмь дн҃їи, и҆ да ви́дит̑ жрец̑҇ по и҆спра́нїѝ е҆го бле́скъ·

И҆ а҆ще не бꙋдетъ бле́скъ и҆змѣни́лъ лица свое҆го и҆ бле́скъ не разсы́палъсѧ нечи́стъ е҆сть, на ѻ҆гнѝ да сѧ съж꙽же́тъ, и҆л̂и на ри́зѣ, и҆л̂и на прѧ́денѣ·

И҆л̂и на кло́кахъ, и҆ ви́дитъ жре́цъ.
и҆ бꙋдет̑ темнѣе бле́скъ по и҆спра́нїи е҆го, да ѿвержетъ е҆̀ ѿ ри́зы, и҆л̂и ѿ прѧ́дена и҆л̂и ѿ ко́жа, и҆л̂и ѿ кло́къ·

И҆ а́ще сѧ ѹ҆ви́дитъ е҆́ще на ри́зѣ, и҆ли на прѧ́денѣ, и҆л̂и на кло́кахъ, и҆л̂и на всѧ́комъ съсꙋдѣ ко́жанѣ.
прокаже́нїе процвѣта́ѧ, на ѻ҆гнѝ да сѧ сож꙽жетъ на не́мже е҆сть бле́скъ.
а҆ ри́за и҆ прѧ́дено и҆ кло́ки, и҆ всѧ́къ сосꙋдъ ко́жан̑҇ и҆же и҆спере́тсѧ, и҆ да ѿидетъ ѿ него̀ бле́скъ, і҆ и҆спере́тсѧ второ́е, и҆ чи́стъ бꙋ́детъ·

Сїи е҆сть зако́нъ бле́скꙋ, прокаже́нїѧ ри́зѣ сꙋкнѧ́нѣ и҆л̂и згре́бнѣ, и҆л̂и прѧ́денѣ, и҆ кло́ком̑ и҆ всѧ́комꙋ съсꙋ́дꙋ ко́жанꙋ на ѻ҆цыще́нїе е҆мꙋ, и҆л̂и не на ѻ҆цыще́нїе·

Глв̑҇а, д҃і·

И рече г҃ь къ моѷсїю гл҃ѧ, с̂е зако́нъ прокаже́номꙋ, во́н꙽же дн҃ь а҆́ще ѻ҆цы́ститсѧ, и҆ приведе́тсѧ къ жерцꙋ̀.
да и҆зы́идетъ жре́цъ во́нъ полка, и ѹ́зритъ жре́цъ, и҆ с̂е и҆сцѣлѣ бле́скъ прокаже́нїѧ ѿ прокаже́ннаго·

и҆ повели́тъ жре́цъ да сѧ во́зметъ ѻ҆цыще́номꙋ двѣ кꙋрѧти жи́вѣ чи́стѣ и҆ дре́во кедрово, и҆ соска́нꙋ червленицꙋ і҆ и҆ссопъ·

И҆ повели́тъ жре́цъ.
да зако́лютъ кꙋ́рѧ е҆ді́но въ ст҃ое, въ сосꙋдъ гли́нѧнъ, над̑ водо́ю живо́ю живо́ е҆же кꙋ́рѧ да възметъ и҆ дре́во кедрово и҆ соска́нꙋ червленицꙋ і҆ и҆ссопъ, и҆ да ѻ҆мо́читъ и҆хъ и҆ кꙋ́рѧ живо́е въ кро́ви закла́наго кꙋ́рѧти, е҆́же сѧ закла̀ над̑ водо́ю живо́ю, и҆ да въскро́питъ на ѻ҆цыстившагосѧ ѿ прокаже́нїѧ, сед̑мижды, и҆ чи́стъ бꙋ́детъ·

И҆ да ѿпꙋститсѧ кꙋ́рѧ живо́е на́ поле, и҆ да и҆сперетъ ѻ҆цысти́выисѧ ри́зы своѧ̀ и҆ да ѻ҆бро́снетъ вс̂ѧ вла́сы е҆го, и҆ да и҆змыетсѧ водо́ю, и҆ чистъ бꙋ́детъ·

и҆ по семъ да вни́детъ въ полкъ, и҆ да хо́дитъ в полчищи, з҃, дн҃їи, кромѣ̀ до́мꙋ свое҆го, и҆ бꙋ́детъ въ дн҃ь седмы́и, да ѻ҆бро́снꙋтсѧ вс̂и вла́сы е҆го главꙋ̀ е҆го, и҆ брадꙋ̀, и҆ бро́ви, и҆ всѧ́къ вла́съ е҆го, да ѻ҆бро́снетсѧ, и҆ да и҆спере́тъ ри́зы своѧ̀, и҆ да ѻ҆мы́етсѧ пло́ть е҆го водо́ю, и҆ чи́стъ бꙋдет̑ въ дн҃ь же ѻ҆смы́и да възметъ дв̂а а҆́гньца е҆ді́нолѣтна непоро́чна, и҆ ѻ҆вцꙋ е҆ді́нꙋ е҆ді́нолѣтнꙋ непоро́чнꙋ·

И҆ три́десѧте ча́сти мꙋки пшени́ч꙽ны въ тре́бꙋ съпрѧ́женꙋ съ е҆леѻ҆мъ, и҆ ча́шꙋ е҆леѧ е҆ді́нꙋ·

И҆ да поста́витъ жре́цъ ѻ҆цыща́ѧ чл҃ка ѻ҆цыща́емаг̑҇.
се же прд̑е гм҃ъ ѹ҆ две́рїи хра́ма свѣдѣнїѧ.
и҆ да възметъ жре́цъ, а҆́гнец꙽ е҆ді́нъ.
и҆ да приведетъ е҆го престꙋпле́нїѧ ради и҆ ча́шꙋ е҆ле́ѧ, и҆ да ѿлꙋчитъ е҆го жрецъ ѿлꙋче́нїем̑ прд̑е гм҃ъ.
и҆ заколютъ а҆́гнецъ на мѣстѣ, и҆дѣже закала́ютъ вс̂есъжже́нїе, е҆же грѣха ради на мѣстѣ ст҃ѣ, ес̑҇ б̂о е҆же грѣха ради ꙗ҆́коже и҆ престꙋпле́нїѧ ра́ди да бꙋ́детъ жрьцꙋ, ст҃аѧ ст҃ыхъ е҆сть, и҆ възметъ жре́цъ ѿ крови ꙗ҆́же престепле́нїѧ ра́ди·

И҆ възложи́тъ жре́цъ на ѻ҆бꙋшїе ѹ҆́ха десна́го ѻ҆цища́емаго, и҆ на коне́цъ рꙋкѝ е҆го десны́ѧ, и҆ на коне́цъ ногѝ е҆го десны́ѧ·

И҆ възе́мъ жрецъ ѿ ча́ши е҆ле́ѧ, да възлїетъ жре́цъ на́ рꙋкꙋ лѣ́вꙋю свою̀, и҆ да ѻ҆мо́читъ жре́цъ прьстъ свои десны́и, въ е҆ле́и е҆же е҆сть въ рꙋцѣ е҆го лѣ́вѣи·

И҆ да въскро́питъ ѿ е҆ле́ѧ прьстом꙽, з҃ жды, пред̑ гм҃ъ і҆ и҆збы́вшеѐ е҆ле́ѧ е҆же е҆сть въ рꙋцѣ е҆го да възложи́тъ жре́цъ, на ѻ҆бꙋшїе ѹ҆́ха, ѻ҆цыща́емаго десно́е, и҆ на коне́цъ рꙋки е҆го десны́ѧ, и҆ на коне́цъ ноги е҆го десны́ѧ, и҆ на мѣс́то кро́ви е҆́же престꙋпле́нїѧ·

ѻ҆ста́вшее́ же е҆ле́ѧ, е҆же въ рꙋцѣ жрьцꙋ̀ да възлїе́т꙽ жре́цъ на главꙋ̀ ѻ҆цыще́номꙋ, и҆ да помо́литсѧ ѻ҆ не́мъ жре́цъ прд̑е гм҃ъ, и҆ да сътвори́тъ жре́цъ е҆же грѣха̀ рад̑и̑ и҆ да ѻ҆цы́ститъ жре́цъ ѻ҆цыщающагосѧ ѿ грѣха̀ е҆го·

По се́м же заколет̑ жре́цъ вс̂есъж꙽же́нїе, и҆ да възнесе́т꙽ жре́цъ вс̂есъж꙽же́нїе, и҆ тре́бꙋ на ѻ҆лтарь прд̑е гм҃ъ·

да помо́литсѧ ѻ҆ нем̑ жре́цъ, и҆ ѻ҆цы́ститсѧ, а҆́ще л̂и ѹ҆богъ е҆сть и҆ рꙋка е҆го не пости́гнетъ да по́иметъ а҆́гне́цъ е҆ді́нолѣтенъ е҆ді́нъ, во́нже е҆сть престꙋпи́лъ на ѿлꙋче́нїе, ꙗ҆ко ѻ҆цы́ститисѧ ѻ҆ нем̑·

И҆ де́сѧть ча́стїи мꙋкѝ пшени́чны спрѧ́жены съ е҆ле́ѻм̑ въ тре́бꙋ, и҆ ча́шꙋ е҆ле́ѧ е҆ді́нꙋ, и҆ дв̂а го́рличища, и҆л̂и дв̂а голꙋ́бичища, ꙗ҆́ко пости́гнетъ рꙋка̀ е҆го, и҆ да бꙋ́детъ е҆ді́нъ грѣха̀ ра́ди, а҆ дрꙋгїи въ вс̂есъж꙽же́нїе·

И҆ да принесе́тъ ѧ҆̀ въ дн҃ь ѻ҆смы́и, въ е҆же ѻ҆цы́стити е҆го къ жрьцꙋ, прд̑е две́ри хра́ма свѣдѣ́нїѧ пред̑ г҃ь, и҆ да по́иметъ жре́цъ а҆́гньца е҆же престꙋпле́нїѧ ра́ди, и҆ ча́шꙋ е҆ле́ѧ възложит̑ е҆ѧ̀, ꙗ҆́ко възложе́нїе прд̑е гм҃ъ, и҆ зако́летъ а҆́гньца престꙋпле́нїѧ, и҆ да възметъ жре́цъ ѿ кро́ви престꙋпле́нїѧ·

И҆ да възло́житъ на ѻ҆бꙋшїе ѹ҆́ха ѻ҆цыща́емаго десно́е, и҆ на конец̑҇ рꙋки е҆го десны́а, и҆ на коне́цъ ногѝ е҆го десны́ѧ·

И҆ ѿ е҆ле́ѧ възлїетъ жре́цъ на́ рꙋкꙋ свою лѣ́вꙋю, и҆ да въскро́питъ прьстомъ свои҆мъ десны́мъ ѿ е҆ле́ѧ е҆же въ рꙋцѣ е҆го лѣ́вѣи, седми́жды прд̑е гм҃ъ·

И҆ ѿ е҆ле́ѧ сꙋщаго въ рꙋцѣ жрьцꙋ, да възло́житъ на ѻ҆бꙋшїе ѹ҆́ха ѻ҆цыща́емаго де́сное, и҆ на конец̑҇ рꙋки е҆го десны́ѧ, и҆ на коне́цъ ногѝ е҆го десны́ѧ на мѣстѣ кро́ви ꙗ҆́же престꙋпле́нїѧ·

ѻ҆ста́вши же ѿ е҆ле́ѧ е҆же е҆сть въ рꙋцѣ жрьцꙋ̀.
да възлїе́тъ на главꙋ̀ ѻ́цысти́вшемꙋсѧ, и҆ да помо́литсѧ ѻ҆ не́мъ жре́цъ прд̑е гм҃ъ·

И҆ да сътвори́тъ е҆ді́нꙋ ѿ го́рлицъ, и҆л̂и голꙋб́ичищъ, ꙗ҆коже пости́гнꙋла рꙋка е҆го, е҆ді́нъ грѣха̀ рад̑и̑, а҆ дрꙋгїи въ вс̂есъж꙽же́нїе съ тре́бою, и҆ да помо́литсѧ жре́цъ ѻ҆ ѻ҆цыщае́мѣмъ прд̑е гм҃ъ, сїи зако́нъ въ не́мже е҆сть бле́скъ прокаже́нїѧ, и҆ не ѻ҆брѣта́юще рꙋкою ѻ҆цище́нїѧ свое҆го·

И҆ рече г҃ь къ моѷсїю і҆ а҆а҆ро́нꙋ гл҃ѧ, ꙗ҆́ко а҆́ще вни́дете въ зе́млю ханаѻ҆ньскꙋ ꙗ҆же а҆́зъ даю̀ ва́мъ въ притѧжа́нїе, и҆ дамъ бле́скъ прокаже́нїа въ домꙋ въ всѣх́ъ землѧ́хъ притѧжа́нныхъ вам̑ и҆ прїидетъ къ кото́ромꙋ до́мꙋ их̑, и҆ повѣсть жрьцꙋ̀ гл҃ѧ а҆ки бле́скъ ꙗ҆влѧе҆тсѧ въ домꙋ мое҆мъ, и҆ да велит̑ жре́цъ и҆спразни́ти сосꙋды до́мꙋ·

Преже вни́тїѧ и҆ видѣнїа жрьцꙋ бле́ска и҆ а҆ще не не бꙋ́детъ, нечи́сто е҆сть вс̂е е҆же въ домꙋ̀·

По се́м же вни́дет꙽ жре́цъ съглѧда́ти до́мъ, и҆ ѹ́зрит̑ жре́цъ бле́скъ, и҆ се бле́скъ на стѣнах̑ до́мꙋ, ѹ҆доли ꙗ҆́ко зеленꙋ́ющасѧ, и҆л̂и червленꙋ́ющасѧ, и҆ ѻ҆бли́чїе и҆хъ хꙋдѣ́е стѣнъ·

И҆зы́иде же жре́цъ и҆с до́мꙋ къ две́ремъ до́мꙋ, да ѿлꙋчит̑ жре́цъ до́мъ на з҃, дн҃їи, да ѻ҆братитсѧ жре́цъ въ з҃ дн҃ь, и҆ ѹ́зри́т꙽ до́мъ, и҆ с̂е разсы́палсѧ бле́скъ по стѣна́хъ до́мꙋ, и҆ да повели́тъ жрец̑҇ да и҆змꙋтъ ка́мыки на ни́хъже е҆сть бле́скъ, и҆ да и҆знесꙋтъ вонъ из̑ гра́да на мѣ́сто нечи́сто·

И҆ да пострꙋжт̑ꙋ и҆з внꙋтри до́мъ ѻ҆́крс̑҇тъ, и҆ да просы́плютъ прьс́ть посострога́нꙋю вн̂ѣ гра́да на мѣ́стѣ нечи́стѣ·

И҆ да възмꙋтъ ка́мыки и҆́ны ѻ҆стро́ганы, и҆ да вложа́тъ ѧ҆̀ въ ка́мыкъ мѣсто и҆ пе́рсть и҆́нꙋ да възмꙋтъ, да и҆стребѧ́тъ до́мъ·

А҆́ще ли па́ки наи́дет꙽ бле́скъ, и҆ ѧ҆ви́тсѧ в до́мꙋ, по и҆знесе́нїю ка́мыкъ, и҆ по строга́нїю до́мꙋ и҆ по и҆стребле́нїѝ, и҆ въни́дет꙽ жре́цъ, и҆ ѹ́зритъ а҆́ще разсы́палсѧ бꙋ́детъ бле́скъ по домꙋ̀, въ прокаже́нїе пребывае҆тъ въ до́мꙋ, нечи́стъ е҆сть, и҆ да разори́тъ до́мъ, и҆ дре́ва е҆го и҆ ка́менїе е҆го, и҆ вс̂ю пе́рсть до́мꙋ и҆звн̂ѣ гра́да на мѣсто нечи́сто, и҆ входѧ́и въ до́мъ вс̂ѧ дн҃и, в нѧ́же е҆́сть ѿлꙋче́нъ нечи́стъ бꙋ́детъ до́ вечера·

А҆ лежа́и въ домꙋ̀ да и҆спере́тъ ри́зы своѧ̀, и҆ нечи́стъ бꙋ́детъ до́ вечера, и҆ ꙗ҆́ды́и въ домꙋ, да и҆спере́тъ ри́зы своѧ̀, и҆ нечи́стъ бꙋ́детъ до́ вечера, а҆́ще ли пришеды́и вни́детъ жре́цъ, и҆ ви́дитъ, и҆ с̂е разсы́панїемъ не раз꙽сы́палсѧ е҆сть бле́скъ въ домꙋ̀·

По построга́нїѝ до́мꙋ, да ѻ҆цы́ститъ жре́цъ до́м꙽, ꙗ҆́ко и҆сцѣлѣлъ е҆сть бле́ск꙽ и҆ да възметъ ѻ҆цы́стити до́мъ дв̂а кꙋ́рѧти жи́вѣ чи́стѣ·

И҆ дре́во ке́дрово и҆ соска́нꙋ червлени́цꙋ, і҆ и́ссопъ и҆ да зако́летъ кꙋ́рѧ е҆ді́но, въ сосꙋ́дъ гли́нѧнъ над̑ водо́ю живо́ю·

И҆ да въз꙽метъ дре́во ке́дрово, и҆ съска́нїе черъвле́ное, І҆ и҆ссопъ, и҆ кꙋ́рѧ живо́е, и҆ да ѻ҆мо́читъ ѧ҆̀ въ кро́въ заколе́наго кꙋрѧтѣ над̑ водо́ю живо́ю, и҆ да ѻ҆кро́пит꙽ и҆́ми въ домꙋ з҃ жды, и҆ ѻ҆чи́ститъ до́мъ кро́вию кꙋ́рѧчїю, и҆ водо́ю живо́ю, и҆ кꙋ́рѧтемъ живы́мъ, и҆ дре́вом̑ ке́дровомъ і҆ и́ссопомъ и҆ соска́ною червлени́цею, и҆ да ѿпꙋститъ кꙋрѧ живо́е вонъ и҆з гра́да на́ поле ѻ҆чистит̑ ѻ҆ домꙋ и҆ чи́стъ бꙋ́детъ, сїи зако́н꙽ ѻ҆ въсе́мъ бле́скꙋ прокаже́нїѧ·

И҆ прокаже́нїѧ ри́зы и҆ до́мꙋ и҆ ꙗ҆́звы и҆ зна́менїѧ блеща́щагосѧ, и҆сповѣ́дати воньже дн҃ь нечи́сто и҆ во́ньже дн҃ь ѻ҆цы́стите, сїи законъ прокаже́нїѧ·

Глв̑҇а, е҃і·

И рече г҃ь къ моѷсїю і҆ а҆а҆ро́нꙋ гл҃ѧ, гл҃и сн҃омъ і҆и҆л҃вымъ и҆ рече́ши к нимъ, мꙋжꙋ мꙋжꙋ е҆мꙋже а҆́ще бꙋ́детъ и҆злїѧнїе ѿ тѣ́ла е҆го, и҆злїѧ́нїе е҆го нечи́сто е҆́сть·

Сїи же закон̑҇ нечи́стоты е҆сть и҆злива́ѧй сѣмѧ ѿ тѣла е҆го, ѿ и҆злїѧ́нїѧ и҆́мже съста́влено е҆сть тѣ́ло е҆го, въ и҆злїѧ́нїе·

Сїѧ нечистота̀ е҆го е҆сть, вс̂ѧ дн҃и и҆злїѧ́нїе тѣла е҆го, и҆́мже съста́влено е҆сть тѣ́ло е҆го въ и҆злїѧ́нїе е҆го нечи́стота е҆го е҆сть, всѧ́ко ложе на немже а҆́ще лѧ́жетъ и҆злива́ѧй сѣмѧ нечи́сто бꙋ́детъ, и҆ всѧ́къ сосꙋдъ на не́мже а҆́ще сѧ́детъ ве́рхъ е҆го и҆з꙽лива́ѧй сѣмѧ, нечи́стъ бꙋ́детъ·

И҆ чл҃къ и҆́же а҆́ще прико́снетсѧ ло́жа е҆го, да и҆спере́тъ ри́зы своѧ̀, и҆ да ѻ҆мы́етъ тѣ́ло свое водо́ю, и҆ нечи́стъ бꙋ́детъ до́ вечера, и҆ сѣдѧ́и на сосꙋдѣ на не́мже а҆́ще сѧ́детъ ве́рхъ е҆го и҆злива́ѧи сѣмѧ, да и҆спере́тъ ри́зы своѧ, и҆ да ѻ҆мы́етсѧ водо́ю, и҆ нечи́стъ бꙋ́детъ до́ вечера, и҆ прикоснꙋвыисѧ къ плоти и҆злива́ющаго сѣмѧ да и҆спере́тъ ри́зы своѧ̀, и҆ да ѻ҆мы́етсѧ водо́ю и҆ нечѝстъ бꙋ́детъ до́ вечера, и҆ а҆́ще прико́снетсѧ и҆злива́ѧй сѣмѧ къ чистомꙋ да и҆спере́тъ ри́зы своѧ̀, и҆ да и҆змы́етсѧ водо́ю и҆ нечи́стъ бꙋ́детъ до́ вечера·

И҆ на всѧ́ко сѣдло ѻ҆́слее на неже а҆́ще всѧ́детъ, и҆злива́ѧѝ сѣмѧ, нечи́сто бꙋ́дет꙽ до́ вечера, и҆ всѧ́къ прикоснꙋ́выисѧ ѿ всѣхъ ꙗ҆же сꙋть под̑ нимъ, и҆ нечи́стъ бꙋ́детъ до́ вечера·

І҆ и҆же въз꙽дви́жетъ ѧ҆̀, да и҆спере́тъ ри́зы своѧ и҆ ѻ҆мы́етсѧ водо́ю, и҆ нечи́стъ бꙋдет̑ до́ ве́чера·

І҆ их̑же сѧ прико́снетъ и҆злива́ѧи сѣмѧ, и҆ рꙋкъ свои҆хъ не ѻ҆мыл̑҇ водо́ю, да и҆спере́тъ ри́зы своѧ̀ и҆ ѻ҆мы́етъ с̂и тѣ́ло водо́ю, и҆ нечи́стъ бꙋ́детъ до́ вечера·

И҆ сосꙋдъ гли́нѧн̑҇ е҆мꙋже а҆́ще прико́снетсѧ и҆злива́ѧи сѣмѧ, да разбие́тсѧ а҆ сосꙋдъ древѧ́ныи да сѧ и҆змы́етъ водо́ю, и҆ чи́стъ бꙋ́детъ·

А҆́ще ли ѻ҆чи́ститсѧ и҆злива́ѧи сѣмѧ, ѿ и҆злива́нїѧ свое҆го, да съчтетъ себѣ̀ се́дмь дн҃їи на ѻ҆цыще́нїе е҆го, да и҆спере́тъ ри́зы своѧ̀, и҆ да ѻ҆мы́еть тѣ́ло свое водо́ю живо́ю и҆ чи́стъ бꙋ́детъ·

И҆ въ дн҃ь ѻ҆смы́и да възметъ дв̂а го́рличища, и҆л̂и дв̂а голꙋби́чища, и҆ да принесе́тъ ѧ҆̀ прд̑е г҃ь, къ две́ремъ хра́ма свѣдѣ́нїа и҆ дасть ѧ҆̀ жрьцꙋ, и҆ да сътвори́тъ ѧ҆̀ жре́цъ, е҆ді́нъ грѣха̀ ра́ди, а҆ дрꙋгїи въ вс̂есъж꙽же́нїе·

И҆ да помо́литсѧ ѻ҆ не́мъ жре́цъ прд̑е гм҃ъ, ѻ҆ и҆злиѧ́нїѝ е҆го·

И҆ чл҃къ е҆мꙋже а҆́ще и҆зы́детъ ѿ ло́жа е҆го сѣмѧ, и҆ да ѻ҆мы́етъ водо́ю вс̂е тѣло своѐ, и҆ нечи́стъ бꙋ́детъ до́ вечера, и҆ всѧ́ка ри́за, и҆ всѧ́ка ко́жа на ни́х же а҆́ще бꙋ́дет̑ ложе сѣмѧнное, да и҆спере́тсѧ водо́ю, и҆ нечи́сто бꙋдет̑ до́ вечера·

И҆ а́ще лѧ́жетъ мꙋжъ съ женою своею ложа сѣмени, да и҆змы́ю҆тсѧ ѻ҆́ба водо́ю и҆ нечи́сты бꙋ́дꙋтъ до́ вечера, и҆ жена́ а҆́ще бꙋ́детъ кро́вь точа́щи, и҆ бꙋ́детъ тече́нїе е҆ѧ̀ въ тѣ́леси е҆ѧ̀ з҃ дн҃їи, да бꙋ́детъ въ скве́рнѣ е҆ѧ̀·

И҆ всѧ́къ прикаса́ѧи́сѧ е҆и нечи́стъ бꙋ́детъ до́ вечера, и҆ вс̂е на не́мже а҆́ще сѣдитъ въ тече́нїю е҆ѧ̀ нечи́сто бꙋ́детъ, и҆ всѧ́ко на не́же а҆́ще присѧ́детъ ѻ҆на̀ нечи́ста бꙋдет̑ и҆ всѧ́къ и҆же а҆ще прико́снетсѧ ло́жа е҆ѧ̀ да и҆спере́тъ ри́зы своѧ̀ и҆ да ѻ҆мы́е҆тъ водо́ю тѣ́ло своѐ, и҆ нечи́стъ бꙋ́детъ до́ вечера·

И҆ всѧ́къ прикаса́ѧи҆сѧ всѧ́комꙋ съсꙋ́дꙋ, на не́мже а҆́ще сѣдитъ, да и҆спере́тъ ри́зы своѧ̀, и҆ да и҆змы́етсѧ водо́ю и҆ нечи́стъ бꙋ́детъ до́ вечера·

А҆́ще же и҆ на ло́жи сꙋщи е́и, и҆л̂и на сосꙋ́дѣ на не́мже а҆́ще сѣди́тъ ѻ҆на̀, е҆льма же прико́снетсѧ е́и, нечи́стъ бꙋ́детъ до́ вечера, а҆́ще л̂и кто̀ бꙋдет̑ на ло́жи с не́ю и҆ бꙋ́детъ нечистота̀ е҆ѧ̀ на нем̑ нечи́стъ бꙋ́детъ з҃ дн҃їи, и҆ всѧ́ко ло́же на не́мже а҆́ще лѧ́жетъ нечи́сто бꙋ́детъ·

И҆ жена̀ а҆́ще тече́тъ, тече́нїе кро́ви, дн҃и многи не въ в́ремѧ скве́рны е҆ѧ̀, и҆ а́ще тече́тъ по скве́рненїѝ е҆ѧ̀, вс̂ѧ дн҃и тече́нїѧ нечистоты̀ е҆ѧ̀.
ꙗ҆́коже въ дн҃и скве́рны е҆ѧ̀, нечи́ста бꙋ́детъ·

И҆ всѧ́ко ло́же на не́мже а҆́ще лежи́тъ вс̂ѧ дн҃и тече́нїе е҆ѧ̀ ꙗ҆́коже скве́рны е҆сть, и҆ всѧ́къ съсꙋдъ на не́мже сѧ́детъ нечи́стъ бꙋдетъ·

По нечистотѣ̀ скве́рны е҆ѧ̀, и҆ всѧ́къ прикаса́ѧи҆сѧ е́и нечи́стъ бꙋ́детъ, да и҆спере́тъ ри́зы своѧ̀, и҆ ѻ҆мы́етъ водо́ю тѣ́ло своѐ, и҆ нечи́стъ бꙋ́детъ до́ вечера, а҆́ще л̂и ѻ҆чи́ститсѧ ѿ тече́нїѧ е҆ѧ̀, да съчте́т꙽ себѣ з҃ дн҃їи, и҆ по сих̑ да ѻ҆чи́ститсѧ.
и҆ въ ѻ́смы́и дн҃ь да въз́метъ дв̂а го́рличища, и҆л̂и дв̂а птенца̀ голꙋ́бина и҆ принесе́тъ ѧ҆̀ къ же́рцꙋ, къ две́рем꙽ хра́ма свѣдѣ́нїа, и҆ да сътвори́тъ жре́цъ е҆ді́нъ грѣха̀ ра́ди, а҆ дрꙋгїи въ всѐсъж꙽же́нїе, и҆ да помо́литсѧ ѻ҆ не́и жре́цъ прд̑е гм҃ъ, ѻ҆ тече́нїѝ нечистоты̀ е҆ѧ̀, и҆ бл҃гобоѧ́знены сътвори́тъ сн҃ы і҆ил҃вы·

ѿ нечисто́тъ их̑ да не ѹ҆́мрꙋтъ нечистоты̀ ра́ди их̑, вънегда̀ ѻ҆скверни́ти и҆мъ хра́мъ свѣдѣ́нїа собо́ю·

Сїи зако́нъ и҆злива́ющемꙋ сѣмѧ, а҆ще комꙋ̀ и҆зы́идет̑ и҆з него̀ ло́же сѣменное, ꙗ҆́коже ѻ҆скверна́витисѧ в нем̑, и҆ точа́щеи кро́вь въ скве́рнѣ е҆ѧ̀·

И҆злива́й сѣмѧ и҆злиѧ́нїемъ своим̑ мꙋжескꙋ по́лꙋ и҆ же́ньскꙋ, и҆ мж̑ꙋ и҆же а҆ще бꙋдет̑ съ скверна́вою·

Глв̑҇а, ѕ҃і·

И гл҃а г҃ь къ моѷсїю по ѹ҆́мрътвїѝ дв̂ꙋ а҆а҆ро́нихъ сн҃овъ, вънегда̀ принесо́ста ѻ҆́гнь чю́ждь прд̑е г҃ь, и҆ скончастасѧ и҆ рече г҃ь къ моѷсїю.
гл҃и а҆а҆ро́нꙋ бра́тꙋ твое҆мꙋ, да не вни́дет̑ по вс̂ѧ часы̀ въ ст҃ое, внꙋтръ завѣсы, прд̑е лицѐ ѻ҆цыще́нїю, и҆же е҆сть прд̑е киѻ́томъ свѣдѣ́нїѧ да не ѹ҆́мрет̑, въ ѻ́блацѣ б̂о ꙗ҆́влю́сѧ ѹ҆ ѻ҆цыще́нїа, си́це вни́идетъ а҆а҆ронъ въ ст҃ое, съ телце́мъ ѿ говѧдъ грѣха̀ ра́ди, а҆ ѻ҆ве́нъ въ вс̂есъж꙽же́нїе, и҆ въ ри́зꙋ платнѧ́гꙋ ѻ҆сщ҃еннꙋ да сѧ ѻ҆блечет̑·

Надра́ги платнѧ́ны да бꙋ́дꙋтъ на тѣ́ло е҆го, и҆ поѧ́сомъ платнѧ́ным꙽ да сѧ ѻ҆поѧ́шетъ, и҆ клобꙋ́къ платнѧ́нъ да възложи́тъ, ри́зы ст҃ы сꙋть, и҆ да ѻ҆мы́етъ водо́ю вс̂е тѣ́ло свое, и҆ да ѻ҆блечет̑сѧ в н̂ѧ, и҆ ѿ со́ньма сн҃овъ і҆ил҃въ, да въ́зметъ дв̂а коз̑ла̀ ѿ ко́зъ грѣха̀ ра́ди, и҆ ѻ҆ве́нъ е҆ді́нъ въ вс̂есъж꙽же́нїе·

И҆ да приведе́тъ а҆аро́нъ телец̑҇ и҆же грѣха ра́ди свое҆го и҆ да помо́литсѧ ѻ҆ себѣ, и҆ ѻ҆ до́мꙋ свое҆мъ, и҆ да въз́метъ дв̂а козла̀, и҆ поста́витъ ѧ҆̀ прд̑е гм҃ъ, ѹ҆ две́рїи хра́ма свѣдѣ́нїѧ, и҆ да възложи́тъ а҆а҆ро́нъ на ѻ҆ба козла̀ жре́бїѧ, жре́бїи е҆ді́нъ гн҃ь, а҆ жре́бїи дрꙋгїи ѿпꙋще́нїю, и҆ да приведе́тъ а҆а҆ро́нъ козла̀ на не́мже па́лъ е҆сть жре́бїи г҃ꙋ, и҆ да принесе́тъ грѣха̀ ра́ди·

а҆ козла̀ на не́мже па́лъ е҆сть жре́бїи ѿпꙋще́нїа да поста́витъ и҆̀ прд̑е гм҃ъ жи́ва, ꙗ҆́ко помоли́тисѧ ѻ҆ немъ и҆ ꙗ҆́ко ѿпꙋсти́ти е҆го въ ѿпꙋще́нїе·

И҆ да пꙋститъ е҆го въ пꙋсты́ню, и҆ да възметъ козе́лъ на́ сѧ безако́нїѧ и҆хъ въ зе́млю непроходи́мꙋ, и҆ да приведет̑ а҆а҆ро́нъ телца̀ и҆же грѣха̂ ра́ди свое҆го и҆ да помо́литсѧ ѻ҆ себѣ̀ и҆ ѻ҆ до́мꙋ своем̑, и҆ да зако́летъ телца̀ и҆же грѣха̀ ра́ди свое҆го, и҆ да въ́зметъ кади́лникъ по́лнъ ѹ҆́глиѧ̀ ѻ҆гнена ѿ ѻ҆лтарѧ и҆же прд̑е гм҃ъ, и҆ да напо́лнитъ рꙋцѣ ѳимїа́ма сложе́наго чи́ста·

И҆ да принесе́тъ внꙋтрьѹ҆́дꙋ завѣсы, и҆ да възложи́тъ ѳимїѧ́ма на ѻ҆́гнь прд̑е гм҃ъ, и҆ покры́етъ ды́мъ ѳимиѧ́м꙽ны́и ѻ҆цыще́нїѧ е҆же е҆сть на свѣдѣнїѝ и҆хъ, и҆ да не ѹ҆́мретъ, и҆ да въз꙽метъ ѿ кро́ви телца̀, и҆ да въскропит̑ пе́ръстомъ на ѻ҆цыще́нїю на въсто́ки прд̑е лице́мъ ѻ҆цыще́нїю, да въскропит̑ седми́жды, ѿ кро́ви пе́рстом̑ своим̑·

И҆ да зако́лет꙽ козе́лъ и҆же грѣха̀ ра́ди е҆же за́ люди прд̑е гм҃ъ, и҆ да внесетъ ѿ кро́ви е҆го внꙋтрь завѣ́сы, и҆ да сътвори́тъ кро́вь е҆го, ꙗ҆коже сътворѝ кро́ви телчи, и҆ да въскропит̑ кро́вїю е҆го на ѻ҆лта́рь прд̑е лицем̑ ѻ҆чище́нїю·

И҆ да ѻ҆цы́ститъ ѿ ст҃ыхъ ст҃ое, ѿ нечисто́тъ сн҃овъ і҆ил҃въ, и҆ ѿ непра́вды и҆хъ, ѻ҆ всѣ́хъ грѣсѣхъ и҆хъ, и҆ та́ко сътворит̑ хра́мꙋ свѣдѣ́нїѧ·

Сътворенꙋ в ни́хъ посредѣ̀ нечистоты̀ и҆хъ, и҆ всѧкъ чл҃къ да не бꙋ́дет꙽ въ храмѣ свѣдѣ́нїѧ, е҆гда̀ въхо́дит̑ моли́тисѧ въ ст҃ое.
дондеже и҆зы́детъ, и҆ да помо́литсѧ ѻ҆ себѣ̀, и҆ ѻ҆ до́мꙋ свое҆мъ и҆ ѻ҆ все́мъ съньмѣ сн҃въ і҆ил҃въ·

І҆ и҆зы́идетъ къ ѻ҆лта́рю, и҆же е҆́сть прд̑е гм҃ъ, и҆ да помо́литсѧ ѻ҆ немъ, и҆ да въз́мет̑ ѿ кро́ви телца̀ и҆ ѿ кро́ви козла̀, и҆ да въз́ложитъ на ѹ҆́глы ѻ҆лта́рѧ ѻ҆́крс̑҇тъ, и҆ да въскропи́тъ прьстомъ свои҆мъ нань седьмижды, ѿ крови, и҆ ѻ҆чи́ститъ и҆̀, и҆ ѻ҆ст҃и́тъ ѿ нечистоты сн҃въ і҆ил҃въ, и҆ съверши́тъ ѻ҆цыща́ѧ ст҃ое и҆хъ, и҆ хра́мъ свѣдѣ́нїѧ, и҆ ѻ҆лта́рь, и҆ ѻ҆ жерцѣ́хъ ѻ҆цы́ститъ·

И҆ да приведет̑ козла̀ жива́го, и҆ да въз́ложитъ а҆а҆ро́нъ ѻ҆бѣ рꙋцѣ̀ свои, на главꙋ̀ козла̀ жива́го, и҆ да и҆сповѣсть на не́м꙽ вс̂ѧ безако́нїѧ сн҃въ і҆ил҃въ.
и҆ вс̂ѧ непра́вды и҆хъ, и҆ вс̂ѧ грѣхѝ и҆хъ, и҆ въз꙽ложи́тъ ѧ҆̀ на главꙋ̀ козла̀ жива́го, и҆ да ѿпꙋститъ рꙋко́ю чл҃ка ѹ҆гото́ваннаго, въ пꙋсты́ню и҆ въз́метъ козе́лъ на́ сѧ непра́вды их̑, въ зе́млю непроходи́мꙋ, и҆ да ѿпꙋ́ститъ козла̀ жива́го въ пꙋсты́ню, и҆ да вни́идетъ а҆а҆ро́нъ въ хра́мъ свѣдѣ́нїа, и҆ да съвлече́тъ ри́зы платнѧ́ны в нѧ́же ѻ҆бол꙽че́нъ въходѧ́щꙋ е҆мꙋ въ ст҃ое, да положи́тъ ѧ҆̀ та́мъ, да ѻ҆мы́етъ тѣ́ло своѐ водо́ю на мѣ́стѣ ст҃ѣ, и҆ да ѻ҆блече́тсѧ в ри́зы своѧ̀ і҆ и҆зше́дъ да сътвори́тъ вс̂есъж꙽же́нїе своѐ и҆ лю́дское, и҆ да помо́литсѧ ѻ҆ себѣ̀ и҆ ѻ҆ до́мꙋ свое́мъ, и҆ ѻ҆ людехъ ꙗ҆́коже и҆ ѻ҆ жерце́хъ·

А҆ тꙋкъ и҆же грѣха̀ ра́ди да възложит̑ на ѻ҆лта́рь, ѿпꙋстивы́ же козла̀ ѿпꙋще́наго, въ ѿпꙋще́нїе, да и҆сперет̑ ри́зы своѧ̀, и҆ да ѻ҆мы́етъ пло́ть свою̀ водо́ю, и҆ посе́мъ да и́дет꙽ въ по́лкъ·

И҆ те́лца̀ и҆же грѣха̀ ра́ди и҆ козла̀ и҆же грѣха̀ ра́ди, и҆хже кро́вь вънесе́сѧ ѻ҆цы́стити въ мѣсто ст҃ое да и҆знесꙋтъ ѧ҆̀ вн̂ѣ полка̀, и҆ да съж꙽гꙋтъ ѧ҆̀ на ѻ҆гни, и҆ ко́жи и҆хъ и мѧ́са и҆хъ, и҆ моты́ла и҆хъ·

И҆ жгїи ꙗ҆же жжетъ да и҆спере́тъ ри́зы своѧ̀, и҆ да ѻ҆мы́етъ тѣ́ло своѐ водо́ю, и҆ по сем̑ да вни́детъ в꙽ полкъ, и да бꙋ́детъ се ва́мъ закон̑҇ вѣчны́и, въ мцс̑҇ъ з҃ и҆ въ і҃, дн҃ь мцс̑҇а, покори́те дш҃а ва́ша, и҆ всѧ́ка дѣ́ла да не сътвори́те н̂и т̂ꙋзе́мецъ н̂и прише́ле прилежа́и въ ва́съ·

Въ то́и б̂о дн҃ь мо́литсѧ ѻ ва́съ, и҆ ѻ҆чи́ститесѧ вы̀ ѿ грѣхъ вашихъ, прд̑е гм҃ъ, и҆ чи́сти бꙋдете·

Сꙋбота сꙋбо́тъ поко́и да бꙋ́детъ сїѧ ва́мъ, покори́те дш҃а ва́ша, зако́нъ вѣчны́и·

И҆ да помо́литсѧ за нѧ жре́цъ, е҆гоже а҆́ще помажꙋтъ и҆́мъ, е҆мꙋже съвръше́нѣ рꙋцѣ е҆го, жре́ти е҆мꙋ по ѿц҃ы своем̑, и҆ да ѻ҆блече́тсѧ в ри́зы платнѧ́ны ег̑҇, ри́зы ст҃ы, и҆ да ѻ҆цы́стит̑ ст҃ое ст҃ого и҆ хра́мъ свѣдѣ́нїѧ, и҆ ѻ҆лта́рь да ѻ҆цыститъ, и҆ ѻ҆ жрецѣхъ и҆ ѻ все́мъ сонмѣ да ѻ҆цыститъ, и҆ да бꙋ́дет꙽ се ва́мъ зако́нъ вѣ́чныи·

Моли́тисѧ ѻ҆ сн҃ѣхъ і҆ил҃выхъ, ѻ҆ всѣ́хъ грѣсѣх꙽ и҆хъ, е҆ді́ною въ лѣто да сътвори́те ꙗ҆́коже заповѣда г҃ь моѷсїю·

Глв̑҇а, з҃і·

И рече г҃ь къ моѷсїю гл҃ѧ, гл҃и а҆аро́нꙋ и сн҃ом꙽ е҆го, и҆ къ всм̑ѣ сн҃омъ і҆ил҃евым꙽, и рече́ши къ нимъ.
с̂е сло́во е҆же заповѣда г҃ь гл҃ѧ, чл҃къ ѿ сн҃въ і҆и҃левъ, и҆л̂и ѿ прише́лецъ и҆же прилежа́тъ въ васъ·

И҆же а҆ще зако́лет̑ теле́цъ, и҆л̂и ѻ҆вцꙋ̀ и҆л̂и козꙋ̀, въ полкꙋ·

И҆же зако́летъ вн̂ѣ полка̀, и҆ прд̑е две́ри хра́ма свѣдѣ́нїѧ да не принесе́тъ, ꙗ҆́коже сътвори́тъ е҆̀ въ вс̂есъж꙽же́нїе, и҆л̂и сп҃сенїе г҃ꙋ прїѧ́тно въ воню̀ бл҃гово́нїѧ·

И҆же а҆́ще зако́летъ вн̂ѣ и прд̑е две́ри хра́ма свѣдѣнїа да не принесе́тъ е҆го, ꙗ҆́ко принестѝ даръ г҃ꙋ, прд̑е хра́мъ свѣдѣнїа·

Кро́вь въмѣни́тсѧ чл҃кꙋ томꙋ̀ кро́вь пролиѧл̑҇, да потреби́тсѧ дш҃а ѻ҆на ѿ людїи свои҆хъ, ꙗ҆́ко да принест̑ꙋ сн҃ове і҆ил҃вы тре́бы своѧ̀·

Є҆ли́ко же а҆́ще сїи закала́ютъ на́ поли и҆ да принесꙋтъ е҆̀ къ две́ремъ хра́ма свѣдѣнїѧ къ жерцꙋ, и҆ положа́тъ тре́бꙋ сп҃сенїѧ г҃ꙋ, и҆ да възлие́тъ жре́цъ кро́вь на ѻ҆лта́рь ѻ҆крс̑҇тъ, прд̑е гм҃ъ, ѹ҆ две́рїи хра́ма свѣдѣ́нїѧ·

И҆ да въз꙽несе́тъ тꙋкъ, въ воню̀ бл҃гово́нїѧ г҃ꙋ, и҆ посе́мъ да не полага́ютъ тре́б꙽ свои҆хъ, сꙋе́тнымъ.
и҆́мже са́ми и҆зы́идꙋтъ въ слѣдъ и҆хъ, зако́нъ вѣ́чныи бꙋ́детъ вамъ в роже́нїи҆хъ ва́шихъ, и҆ да рече́ши к ни́мъ·

Чл҃къ ѿ сн҃въ і҆ил҃въ, и҆ ѿ сн҃овъ прише́лецъ и҆же прилежитъ въ васъ, и҆же а҆́ще сътвори́тъ вс̂есъж꙽же́нїе, и҆ли тре́бꙋ и҆ къ две́ремъ хра́ма свѣдѣ́нїѧ, да не принесе́тъ сътвори́ти е҆̀ гв҃и.
потре́битсѧ дш҃а т̂а ѿ людїи свои҆х꙽·

И҆ чл҃къ ѿ сн҃въ і҆и҃лвъ, и҆л̂и ѿ прише́лецъ, прилежа́щихъ въ ва́съ, и҆же а҆ще ꙗ҆́сть всѧ́кꙋю кро́вь, т̂о ѻ҆прꙋ лицѐ мое на дш҃и ꙗ҆́дꙋщеи кро́вь, и҆ погꙋблю ю҆̀ ѿ людїи свои҆хъ·

Зане́же дш҃а всѧ́кїѧ плоти кро́вь е҆го е҆сть, а҆з же дахъ ю҆̀ вамъ ѹ҆ ѻ҆лта́рѧ ѻ҆цища́ти ѻ дш҃ахъ ва́шихъ, кро́вь бо ихъ въ дш҃и мѣсто ѻ҆цыща́етсѧ·

Сего̀ ра́ди реко́хъ сн҃омъ і҆ил҃вымъ, всѧ́ка дш҃а ѿ васъ да не ѧ҆сть кро́ви, и҆л̂и прише́лецъ прилежащїи въ васъ не ꙗ҆сть кро́ви·

И҆ чл҃къ ѿ сн҃овъ і҆ил҃въ и҆л̂и ѿ прише́лецъ прилежа́щихъ въ васъ, и҆же а҆ще ѹ҆лови́тъ звѣрь, и҆л̂и пти́цꙋ, е҆же сѧ ꙗ҆́ст꙽, и҆ пролиют̑ кро́вь е҆ѧ̀ и́ покры́ютъ ю҆̀ земле́ю·

дш҃а бо всѧ́кїѧ пло́ти кро́вь е҆ѧ̀ е҆сть.
и҆ рекохъ сн҃омъ і҆ил҃вымъ кро́ви всѧ́кїѧ пло́ти да не ѧ́сте, ꙗ҆́ко дш҃а всѧ́кїѧ пло́ти кро́вь е҆ѧ̀ е҆сть, всѧ́къ ꙗ҆́ды́и ю҆̀ потреби́тсѧ·

И҆ всѧ́ка дш҃а ꙗ҆́же ꙗ҆́сть мертвечи́ны и҆́л̂и звѣроѧ҆́динꙋ ѿ т̂озе́мецъ, и҆л̂и ѿ прише́лецъ, да и҆спере́тъ ри́зы своѧ̀, и҆ да ѻ҆мы́етъ тѣ́ло водо́ю, и҆ нечи́ст꙽ бꙋ́детъ до́ вечера, посе́м же чи́стъ бꙋ́детъ·

А҆ще ли не и҆спере́тъ ри́зъ свои҆хъ, н̂и ѻ҆мы́етъ тѣ́ла водо́ю, т̂о прїиметъ безако́нїе своѐ·

Глв̑҇а, и҃і·

И рече г҃ь къ моѷсїю гл҃ѧ, гл҃и сн҃омъ і҆ил҃вымъ, и҆ рцы̀ къ нимъ, а҆зъ г҃ь б҃ъ ва́шъ·

По тваре́нїемъ землѧ̀ е҆гѷпетъскїѧ в не́иже ѻ҆бита́сте да не сътвори́те.
по тваре́нїем̑ землѧ̀ ханане́искїѧ в ню́же аз̑ ведꙋ̀ в̂ы та́мъ да не сътвори́те, и҆ по зако́ном̑ и҆хъ да не ходи́те·

Сꙋды̀ моѧ̀ да сътвори́те, и҆ повелѣ́нїѧ моѧ̀ снабди́те, да ходи́те в нихъ, а҆́зъ г҃ь б҃ъ ва́шъ·

И҆ снабди́те вс̂ѧ повелѣнїѧ моѧ̀, и҆ всѧ̀ сꙋды̀ моѧ̀ да сътвори́те ѧ҆̀, а҆́ сътвори́выи ѧ҆̀ чл҃къ жи́въ бꙋдетъ в нихъ, а҆́зъ г҃ь б҃ъ вашъ·

Чл҃къ свое҆мꙋ бли́жнемꙋ да не престꙋпитъ ѿкры́ти стыдѣ́нїе, а҆́зъ г҃ь·

Стыдѣ́нїе ѿц҃а твое҆го, и҆ стыдѣнїе ма́тери твое҆ѧ̀ да не ѿкры́еши, мт҃и б̂о твоѧ е҆сть.
да не ѿкры́еши стыдѣ́нїѧ е҆ѧ̀·

Стыдѣ́нїѧ жены̀ ѿц҃а твое҆го да не ѿкры́еши, стыдѣ́нїе б̂о ѿц҃а твое҆го е҆сть·

Стыдѣнїе сестры̀ твое҆ѧ̀ ꙗ҆же ѿ ѻ҆ц҃а твое҆го и҆ мате́ри твое҆ѧ́ роже́нои ѿ нихъ, и҆л̂и роже́нои вн̂ѣ, да не ѿкры́еши стыдѣнїѧ их̑·

Стидѣ́нїѧ дще́ри сн҃а твое҆го, и҆л̂и дще́ри дще́ри твое҆ѧ̀ да не ѿкры́еши стыдѣ́нїѧ и҆хъ, ꙗ҆́ко твое стыдѣ́нїе е҆сть·

Стыдѣ́нїѧ дще́ри жены̀ ѿц҃а твое҆го, не ѿкры́е҆ши е҆ді́на́ко роже́ны ѿ ѻ҆ц҃а твое҆го, сестра̀ б̂о тѝ е҆сть, да не ѿкры́еши стыдѣ́нїѧ е҆ѧ̀·

Стыдѣ́нїѧ сестры ѿц҃а твоег̑҇ да не ѿкры́еши, и҆з до́мꙋ б̂о ѿц҃а твоег̑҇ е҆сть·

Стидѣ́нїѧ сестры мате́ри твое҆ѧ̀ да не ѿкры́еши, ѹ҆́жика б̂о мате́ри тѝ е҆сть·

Стыдѣнїѧ бра́та ѿц҃а твоег̑҇ да не ѿкры́еши и҆ къ женѣ е҆го да не вни́деши, сро́дник̑҇ б̂о тѝ е҆сть·

Стидѣ́нїѧ невѣ́стки твое҆ѧ̀ да не ѿкры́еши, жена̀ б̂о сн҃а твое҆го е҆сть, да не ѿкры́и стыдѣ́нїа е҆ѧ̀·

Стидѣ́нїѧ жены̀ бра́та твое҆го да не ѿкры́еши, стыдѣнїе бра́та твоег̑҇ е҆сть, стыдѣнїе жены̀ и҆ дще́ри е҆ѧ̀ да не ѿкры́еши, дще́ри сн҃а е҆ѧ̀ и҆ дще́ри дще́ри е҆ѧ̀ да не по́имеши ѿкры́ти стыдѣ́нїѧ̀ и҆хъ бли́жнїѝ б̂о тѝ сꙋть, бесче́стїе е҆сть.

Жены̀ сестры̀ е҆ѧ̀, не приводѝ на ню̀, ре́вности, ѿкры́ти стыдѣ́нїе е҆ѧ̀ прд̑е не́ю е҆же жи́вѣ сꙋщи е́и·

И҆ къ женѣ̀ ѿлꙋче́нои въ нечистотѣ̀ е҆ѧ̀, да не вни́деши ѿкры́ти стыдѣ́нїѧ̀ е҆ѧ̀·

И҆ къ женѣ̀ дрꙋ́га своеѓо да не дасѝ ло́жа сѣмени твое҆го ѻ҆скверни́тисѧ къ не́и.
и ѿ сѣмени твое҆го да не дасѝ работати кнѧ́ѕю и҆долꙋ.
да не ѻ҆скверни́ши и҆мени ст҃аго, а҆́зъ г҃ь·

И҆ с мꙋжемъ да не лѧ́жеши же́ньска ло́жа, ѻ҆скверне́нїе б̂о е҆сть·

И҆ къ всѧ́комꙋ четвероно́гомꙋ да не да́си ло́жа свое҆го, въ сѣменїе, ѻ҆скверни́тисѧ в нем̑, и҆ жена да не ста́нет̑ къ всѧ́комꙋ четвероно́гомꙋ, ѻ҆скверни́тисѧ, нечи́сто е҆сть.
да не ѻ҆сквернѧ́итесѧ.
въ всѣхъ б̂о сих̑ ѻ҆скверни́шасѧ ꙗ҆́зы́цы, и҆хже а҆́зъ ѿженꙋ̀ прд̑е лице́мъ ва́шимъ.
и҆ ѻ҆скверни́сѧ землѧ̀ и҆ възда́хъ непра́вдꙋ их̑ е҆ѧ̀ ра́ди, и҆ възненави́дѣ землѧ̀ сѣдѧ́щих꙽ на не́и·

И҆ да съхрани́те вс̂ѧ законы моѧ̀, и҆ вс̂ѧ повелѣнїѧ моѧ̀, и҆ да не сътвори́те ѿ всѣ́хъ гнꙋ́съ сих̑ т̂ꙋзе́мецъ и҆ прибы́вшихъ пришеле́цъ въ васъ.
всѧ̀ б̂о сїѧ̀ гнꙋ́сы сътворѝша члц҃ы зе́мнїи, бы́вшїѝ преже васъ и҆ ѻ҆скверни́сѧ землѧ̀·

И҆ да не ѻ҆печа́литсѧ вами землѧ̀ внегда̀ ѻ҆скверни́ти вамъ ю҆̀, и҆́мже ѻ҆́бразом̑ ѻ҆печа́лисѧ ꙗ҆́зы́ками, и҆же прежде васъ ꙗ҆́ко всѧк̑҇ и҆же а҆́ще сътвори́т꙽ ѿ всѣхъ гнꙋсъ сих꙽ потребѧ́тсѧ дш҃и творѧ́щѧ с̂е ѿ людїй своих̑·

И҆ да съхрани́те повелѣнїа моѧ̀.
ꙗ҆́ко да не сътвори́те ѿ всѣх꙽ зако́нъ гнꙋ́сных꙽, и҆же бѣша прежд̑е васъ.
да не ѻ҆скверни́тесѧ в них̑, ꙗко а҆́зъ г҃ь б҃ъ вашъ·

Глв̑҇а, ѳ҃і

И рече г҃ь къ моѷсі́ю гл҃ѧ, гл҃и всемꙋ̀ со́ньмꙋ сн҃въ і҆и҃левъ и҆ рече́ши к ни́мъ, ст҃и бꙋ́дете, ꙗ҆́коже а҆́зъ ст҃ъ е́смь г҃ь б҃ъ ва́шъ·

Ко́ждо ѿц҃а свое҆го и҆ мт҃ри свое́ѧ да бои́тсѧ, и҆ сꙋбо́ты моѧ̀ да съхрани́те ꙗ҆ко а҆́зъ г҃ь б҃ъ ваш̑҇, не послѣ́дꙋите и҆́доломъ, и҆ бо́гъ сълїанъ не сътвори́те себѣ̀, а҆́зъ г҃ь б҃ъ вашъ, и҆ а́ще положи́те же́ртвꙋ сп҃сенїѧ г҃ꙋ, прїѧ́тнꙋ ва́шꙋ да положи́те·

Во́нже дн҃ь а҆ще положи́те въ то́и дн҃ь да и҆зъѧ҆дѧ́тъ ѧ҆̀, и҆ наѹ҆́трїѧ·

И҆ а́ще ѻ҆ста́нетсѧ до тре́тїѧго дн҃е, на ѻ҆гнѝ да съж꙽же́тсѧ·

А҆ще л̂и ꙗ҆́де́нїемъ съѧ́стъсѧ въ дн҃ь тре́тїи нетре́бно е҆сть, и҆ не прїиметсѧ, і҆ и҆же ꙗ҆́стъ ѧ҆̀ грѣхъ прїимет̑.
ꙗ҆́ко ст҃аѧ гн҃ѧ ѻ҆сквернѝ, и҆ потреби́тсѧ дш҃а их̑ ꙗ҆́дꙋщаѧ̀ ѿ людїи своих̑·

И пожина́ющимъ вамъ жа́твꙋ нивъ вашихъ, и҆ да не скончава́ете жа́твы ва́шеѧ, ни́вы твое҆ѧ пожина́нїѧ, и҆ ѿпа́дающих̑ кла́сь жа́твы ва́шеѧ, да не побира́еши·

И҆ виногра́да твое҆го да не ѻ҆бира́еши, и҆ зе́рно виногра́да твоего да не събира́еши, ни́щемꙋ и҆ прише́лцꙋ да ѻ҆ста́виши е҆̀·

А҆́зъ г҃ь б҃ъ вашъ, да не ѹ҆кра́дете, н̂и сълже́те и҆ не ѻ҆болже́те ко́ждо подрꙋга, и҆ не клени́тесѧ и҆́менемъ мои҆мъ на непра́вдꙋ, и҆ да не ѻ҆скверни́те и҆́мени ст҃го б҃а ва́шего.
а҆́зъ г҃ь б҃ъ вашъ.
да не ѻ҆би́диши бли́жнѧго, и҆ да не ѿи҆меши, и҆ да не прележи́тъ мъзда нае́мника твое҆го ѹ҆ тебѐ до ѹ҆́трїѧ зл̂а да не рече́ши глꙋхо́мꙋ, и҆ пред̑ слѣпымъ да не положи́ши препо́ны, и҆ да ѹ҆бои́шисѧ г҃а б҃а твое҆го, а҆́зъ г҃ь б҃ъ ва́шъ·

И҆ да не сътвори́те неправды въ сꙋдѣ.
не пре́зри лица̀ ни́щаго, н̂и въз́ри лица̀ могꙋщаго, по пра́вдѣ да сꙋ́диши бли́жнемꙋ твое҆мꙋ, да не хо́диши ле́стїю въ свое҆мъ ꙗ҆́зы́цѣ, и҆ не въста́ни на кро́вь бли́жнѧго твоег̑҇ а҆́зъ г҃ь б҃ъ ва́шъ·

да не възненави́диши бра́та твое҆го въ ѹ҆мѣ свое҆мъ, ѻ҆бличе̂нїемъ да ѻ҆бличи́ши бли́жнего твое҆го, да не прїимеши ег̑҇ ра́ды грѣха̀ да не ѿмсти́тъ ти сѧ рꙋка̀, и҆ да не дръжи́ши лю́тости до сыно́въ людїи свои҆хъ, люби́ же бли́жнѧго свое҆го а҆ки са́мъ себѐ, а҆́зъ г҃ь б҃ъ ва́шъ·

Зако́нъ мои съхрани́те, и҆ скота̀ твое҆го да не спрѧже́ши съ и҆ны́мъ ꙗ҆́р꙽мо́мъ, и҆ виногра́да твое҆го да не насади́ши разли́чь, и҆ в ри́зꙋ и҆стка́нꙋ разноли́чнꙋ не ѻ҆дежи́сѧ в ню̀·

А҆ще кто̀ бꙋ́детъ съ жено́ю, ло́же сѣменѣ, с̂и же раба̀ снабдѣ́нїѧ чл҃кꙋ, с̂и же цѣно́ю да не и҆зба́влена е҆сть, и҆л̂и свобода̀ не дана̀ е҆сть е́й, даби ты бꙋ́дꙋтъ, а҆ не ѹ҆́мрꙋтъ, ꙗ҆́ко не свободи́сѧ·

И҆ да приведе́тъ за престꙋпле́нїе своѐ г҃ꙋ къ две́рїи хра́ма свѣдѣнїѧ, ѻ҆ве́нъ престꙋпле́нїѧ, и҆ да помо́литсѧ ѻ҆ не́мъ жре́цъ, въ ѻ҆внѣ̀ престꙋпле́нїѧ прд̑е гм҃ъ, грѣха̀ ра́ди и҆́мже съгрѣши, и҆ ѻ҆ста́вит̑сѧ е҆мꙋ грѣх꙽ е҆го и҆же сътворѝ е҆гда же вни́дете въ зе́млю, ю҆же г҃ь б҃ъ ва́шъ да́сть вам̑ и҆ насади́те всѧ́ко дре́во снѣ́дное, и҆ ѻ҆чи́стите нечистотꙋ̀ е҆го, пло́дъ е҆го три лѣта нечи́стъ да бꙋ́детъ ва́мъ да не ꙗ҆́стъсѧ, в лѣто же, д҃ е всѧк̑҇ пло́дъ е҆го ст҃ъ и҆ похва́ленъ г҃ꙋ·

В лѣто же пѧ́тое да ꙗ҆сте пло́дъ е҆го, прибы́токъ ва́мъ пло́дъ е҆го, а҆́зъ г҃ь б҃ъ ва́шъ·

Не ꙗ҆́ди́те с кровїю скота и҆ не ходи́те на́ горы, и҆ не вражи́те, и҆ ни срѧ́ща смотри́те ѿ пти́цъ, и҆ да не сътвори́те стриже́нїѧ вла́съ гла́въ ва́шихъ, н̂иже брие҆те бра́дъ ва́шихъ, и҆ крое́нїѧ на дш҃и да не сътвори́те, въ тѣ́лѣ ва́шемъ, ꙗ҆́звъ настреканных̑ да не сътвори́те въ ва́съ, а҆́зъ г҃ь б҃ъ ва́шъ.
да не ѻ҆скверни́те дще́ри твое҆ѧ̀ преблꙋди́ти ю҆̀, и҆ да не прелюбы̀ дѣетъ землѧ̀, и҆ напо́лнитсѧ землѧ̀ безако́нїи·

Сꙋбо́ты моѧ̀ да съхрани́те, и҆ ѿ ст҃ыхъ мои҆хъ ѹ҆бо́итесѧ, а҆́зъ г҃ь.
да не послѣ́дꙋите ѹ҆тро́бнымъ ба́снем̑ и҆ къ волхво́мъ не прїиди́те и҆ не ѻ҆скверни́тесѧ въ них꙽, а҆́зъ г҃ь б҃ъ ва́шъ.
прд̑е лице́мъ сѣда́го въста́ни, и҆ почтѝ лицѐ ста́рче, и҆ да бои́шисѧ г҃а б҃а твое҆го, а҆́зъ г҃ь б҃ъ ва́шъ·

И҆ а҆ще кт̂о прїидетъ к вамъ прише́лецъ въ зе́млю ва́шꙋ да не стꙋжи́те е҆мꙋ, ꙗ҆ко т̂ꙋзе́мецъ бꙋ́детъ въ ва́съ·

Пришелецъ и҆же прїидетъ къ ва́мъ, да лю́биши и҆̀ ꙗ҆ко са́мъ себѐ, ꙗ҆́ко и҆ в̂ы прише́лцы въ землѝ бѣсте е҆гѷпетъстѣѝ, а҆́зъ г҃ь б҃ъ ва́шъ, да не сътвори́те непра́вды въ сꙋдѣ̀, въ мѣрилехъ, и҆ въ стоѧ́лехъ и҆ въ превѣсех̑ прс̑҇но правди́вы мѣ́ры, и҆ сꙋдъ праведенъ да бꙋ́детъ въ ва́съ.
а҆́зъ е҆смь г҃ь б҃ъ ва́шъ, и҆зведы́и вы̀ ѿ землѧ̀ е҆гѷпетскїѧ, снабди́те же свѣдѣ́нїа моѧ и҆ ве́сь зако́нъ мои и҆ вс̂ѧ повелѣнїѧ моѧ̀ сътвори́те, ꙗ҆́ко а҆́зъ г҃ь·

Глв̑҇а, к҃·

И рече г҃ь къ моѷсїю гл҃ѧ, рц҃ы сн҃омъ і҆ил҃вымъ гл҃ѧ.
аще кт̂о ѿ сн҃овъ і҆ил҃въ, и҆л̂и роди́вшихсѧ прише́лецъ въ і҆ил҃и·

и҆же а҆ще кт̂о дасть сѣмени свое҆го кнѧ́ѕю и҆долꙋ, см҃ртїю да ѹ҆́мретъ, лю́дїе землѧ̀, да побию́тъ и҆̀ ка́менїемъ.
а҆зъ же ѻ҆прꙋ лицѐ мое на чл҃ка того̀ и҆ погꙋблю̀ и҆̀ ѿ людїи е҆го, ꙗ҆́ко сѣмени свое҆го да̀ст꙽ кнѧ́ѕю и҆долꙋ.
да ѻ҆сквернит̑ ст҃ынѧ моѧ, и҆ да ѻ҆скверни́тъ и҆́мѧ ѻ҆сщ҃еных̑ мн̂ѣ·

А҆ще л̂и презрѣнїемъ пре́зрѧт̑ т̂ꙋзе́мцы землѧ̀ ѻ҆чи́ма свои҆ма, ꙗ́же ѿ чл҃ка того вънегда̀ дати е҆мꙋ ѿ сѣмени кнѧ́ѕю и҆долꙋ, е҆же не ѹ҆би́ти е҆го.
и҆ ѻ҆прꙋ лицѐ моѐ на чл҃ка того̀, и҆ на сро́дники ег̑҇, и҆ погꙋблю̀ и҆̀ и҆ вс̂и смыслѧ́ющїи е҆дина́ко с ни́мъ, ꙗ҆́коже съблꙋжа́ти и҆мъ къ и́долꙋ ѿ людїи и҆хъ.
и҆ дш҃а ꙗ҆́же а҆ще послѣ́дꙋе҆тъ ѹ҆тро́бнымъ ба́снемъ, и҆л̂и къ волъхвованым̑, ꙗ҆́ко ѻ҆братитисѧ въ слѣдъ их̑.
ѻ҆прꙋ лицѐ моѐ на́ дш҃ꙋ т̂ꙋ, и҆ погꙋблю̀ ю҆̀ ѿ людїи е҆ѧ̀.
и да бꙋ́дете ст҃и, ꙗ҆́ко а҆́зъ ст҃ъ г҃ь б҃ъ ва́шъ·

Снабди́те же повелѣ́нїѧ моѧ̀ и҆ сътвори́те ѧ҆̀, ꙗ҆́ко а҆́зъ г҃ь ѻ҆сщ҃аѧ в̂ы·

Чл҃къ чл҃къ и҆же а҆ще зл̂орѣчит̑, ѿц҃ꙋ свое҆мꙋ, и҆л̂и мт҃ри свое҆ѝ смр҃тїю да ѹ҆́мрет̑, ѿц҃а свое҆го и҆ мт҃рь свою̀ злорѣ́чивъ пови́ненъ бꙋ́детъ·

Чл҃къ чл҃къ и҆же а҆ще прелюбы̀ дѣе́тъ с мꙋ́жескою жено́ю, и҆л̂и кт̂о прелюбы̀ дѣ́ет꙽ съ жено́ю по́дрꙋга свое҆го, смр҃тїю да ѹ҆́мрета, прелюбодѣи и҆ прелюбодѣ́ица·

І҆ и҆же а҆ще кт̂о бꙋ́детъ съ жено́ю ѿц҃а свое҆го, стыдѣнїе ѿц҃а свое҆го ѿкры́лъ е҆сть, смр҃тїю да ѹ҆́мрета ѻ҆ба повин̑҇на сꙋть.

И҆ а҆ще кт̂о бꙋ́дет꙽ с невѣ́сткою свое҆ю̀ смр҃тїю ѹ҆́мрета ѻ҆ба, безче́ствоваста, пови́нна сꙋть·

И҆ а́ще кт̂о бꙋ́детъ с мꙋжескимъ по́ломъ ло́же же́ньско гнꙋ́съ сътвори́ли ѻ҆ба, съмертїю да ѹ҆́мрета, повин̑҇на сꙋть·

І҆ и҆же а҆ще по́иметъ женꙋ̀ и҆ мт҃рь е҆ѧ̀ безако́нїе е҆сть въ ѻ҆гнѝ да съжгꙋт꙽ е҆го і҆ и҆хъ, и҆ да не бꙋ́детъ безако́нїе въ ва́съ·

І҆ и҆же а҆ще дастъ ло́же своѐ четвероно́жномꙋ смр҃тїю да ѹ҆́мрета четвероно́жное же да побїет̑сѧ.
и҆ жена̀ ꙗ҆же а҆ще пристꙋ́пит꙽ къ всемꙋ скотꙋ быти с ни́мъ, да побию́тъ женꙋ̀, и҆ ско́тъ смр҃тїю да ѹ҆́мретъ, пови́нни сꙋть·

І҆ и҆же а҆ще кт̂о по́иметъ сестрꙋ свою̀ ѿ ѻ҆ц҃а свое҆го и҆л̂и ѿ мт҃ри свое҆ѧ̀, и҆ ѹ҆ви́дитъ стыдѣ́нїе е҆ѧ̀, и҆ ѻ҆на ѹ҆види́тъ стыдѣнїе е҆го, ѹ҆кори́зна бо е҆мꙋ е҆сть, да потребѧт̑сѧ пред̑ сн҃ы ро́да и҆хъ, стыдѣ́нїе сестры̀ свое҆ѧ̀ ѿкры́лъ грѣхъ себѣ прїемлют̑.
и҆ мꙋжъ и҆же бꙋ́дет꙽ съ жено́ю сквернавою и҆ ѿкры́етъ стыдѣ́нїе е҆ѧ̀, тече́нїе е҆ѧ̀ ѿкры, и҆ ѻ҆на̀ ѿкры̀ тече́нїе кро́ви свое҆ѧ, да потребѧ́тсѧ ѻ҆́ба ѿ ро́да и҆хъ·

Стыдѣ́нїѧ же сестры̀ ѿц҃а твое҆го, и҆ сестры̀ мт҃ри твое҆ѧ̀ да не ѿкры́еши, ѹ҆жичьство б̂о ѿкры̀ грѣхъ ѿнесꙋтъ.
и҆же а҆ще бꙋ́дет꙽ съ сро́дницею свое́ю, стыдѣ́нїе срд̑оства е҆ѧ̀ ѿкры̀, без чадъ да и҆змрꙋтъ·

И҆ чл҃къ и҆же а҆ще поимет꙽ женꙋ̀ бра́та свое҆го нечи́ст꙽ е҆сть, стыдѣ́нїе бра́та свое҆го ѿкры́лъ е҆сть бес чад̑ и҆змрꙋт꙽·

И҆ снабди́те вс̂ѧ повелѣ́нїѧ моѧ, и҆ вс̂ѧ сꙋдбы̀ моѧ̀, и҆ сътвори́те ѧ҆̀·

И҆ а́ще л̂и н̂и, да не ѻ҆печа́литсѧ ва́ми землѧ̀, в ню́же а҆зъ въведꙋ вы̀, та́мо вселитесѧ на не́и, и҆ да не ходи́те въ зако́ны стра́ньскїѧ и҆хже аз̑ ѿгоню̀ ѿ ва́съ, ꙗ҆ко сїѧ вс̂ѧ сътвори́ша, и҆ гнꙋ́си бы́ша мн̂ѣ.
и҆ рѣхъ къ ва́мъ в̂ы наслѣдите зе́млю и҆хъ, и҆ а҆зъ дам̑ вамъ е҆ѧ̀ въ притѧжа́нїе·

Землѧ̀ и҆з неѧ́же течет̑ ме́д꙽ и҆ мле́ко, а҆зъ г҃ь б҃ъ ва́шъ, ѿлꙋчи́выи ва́съ ѿ всѣх꙽ стра́нъ·

И҆ да ѿлꙋчи́те себѐ межѝ скотомъ чи́стымъ, и҆ межи нечи́стымъ, и҆ межѝ пти́цами чи́стыми и҆ нечи́стыми·

И҆ да не ѻ҆скверни́те дш҃ь ва́шихъ, въ ско́тѣхъ и҆ въ пти́цахъ, и҆ въ всѣ́хъ га́дехъ землѝ, ꙗ҆́же а҆́зъ раздѣли́х꙽ ѧ҆̀ въ нечистотѣ̀, и҆ да бꙋ́дете ми ст҃и ꙗ҆́ко а҆́зъ ст҃ъ е҆смь г҃ь б҃ъ ва́шъ·

И҆же ѿлꙋчи́хъ в̂ы ѿ всѣ́хъ ꙗ҆зы́къ бы́ти мои҆мъ, и҆ мꙋжъ и҆ жена̀, и҆же а҆ще бꙋ́детъ в нихъ въ ѹ҆тро́бѣ ба́сни и҆л̂и вълъшвленїе, смр҃тїю да ѹ҆́мрета ѻ҆ба.
ка́менїем꙽ да побїе́те ѧ҆̀ пови́нни сꙋть·

Глв̑҇а, к҃а·

И рече г҃ь къ моѷсїю, гл҃и жерце́мъ сн҃омъ а҆а҆ро́немъ, и рцы̀ и҆мъ, въ дш҃ах꙽ да сѧ не ѻ҆сквернѧ́ите в лю́дехъ.
но развѣ въ домꙋ̀ бли́жнего ва́шего, къ ѿц҃ꙋ и҆л̂и къ ма́тери, и҆ къ сн҃омъ, и҆ къ дще́ремъ, и҆ къ бра́тꙋ, и҆ къ сестрѣ̀ свое́и дв҃ци, е҆же е҆сть бли́жнѧа е҆мꙋ не да́нои мꙋжеви в си́хъ да ѻ҆сквернѧ́тсѧ·

да не ѻ҆сквернѧтсѧ внезаа҆пꙋ в люде́х꙽ свои҆хъ, въ ѻ҆скверненїѝ ег̑҇·

И҆ да не ѻ҆броснт̑ꙋсѧ главы по мр҃твѣмъ, и҆ ѻ҆бли́чїе брады̀ да не ѻ҆бро́снꙋтъ·

И҆ на пло́ти и҆хъ да не сътворѧ́тъ ꙗ҆́звы, ст҃и да бꙋ́дꙋтъ б҃ꙋ и҆хъ, да не ѻ҆сквернѧт̑ и҆́мени г҃а б҃а и҆хъ.
тре́бы б̂о гн҃и дар̑҇ б҃а и҆хъ, са́ми принесꙋт꙽, и҆ бꙋ́дꙋт꙽ ст҃и, жены̀ блꙋдни́ца ѻ҆скверне́ны да не пое́млютъ, и҆ жены̀ ѿгна́ныѧ ѿ мꙋжа е҆ѧ̀ да не пое́млют꙽, ꙗ҆́ко ст҃и сꙋть г҃ꙋ б҃ꙋ свое҆мꙋ·

И҆ да ѻ҆ст҃иши е҆го, да́ры бо г҃а б҃а ва́шего сїи да прино́ситъ ст҃и бꙋ́дꙋтъ, ꙗ҆ко ст҃ъ а҆зъ е҆смь г҃ь б҃ъ ва́шъ, ѻ҆сщ҃аѧ и҆хъ, и҆ дщи чл҃ка жрьца̀, а҆ще ѻ҆скверни́тсѧ проблꙋди́тъ и҆́мѧ ѿц҃а свое҆го сїѧ ѻ҆сквернѧ́етъ, ѻ҆гне́м꙽ да съж꙽же́тсѧ и҆ жре́цъ вели́кїи ѿ бра́тїѧ ег̑҇, е҆мꙋже возлїенъ на главꙋ̀ е҆ле́и пома́занїѧ, и҆ съверше́н꙽ныи.
е҆же ѻ҆блачи́тсѧ в ри́зы·

Главы̀ да не ѿкры́етъ, и҆ ри́зъ е҆го да не раздре́т꙽, и҆ на всю̀ дш҃ꙋ ѹ҆ме́ршꙋ да не вни́детъ, н̂и над̑ ѻ҆ц҃а е҆го ни над̑ мт҃ръ, да не ѻ҆скверна́витсѧ·

ѿ ст҃ыхъ да не и҆зы́идетъ, и҆ да не ѻ҆скверни́тъ и҆́мени ст҃го б҃а свое҆го, ꙗ҆ко ст҃ыи е҆ле́и пома́занїѧ бг҃а е҆го на не́мъ, а҆́зъ г҃ь·

се́и женꙋ̀ дѣ́вою ѿ ро́да людїи своих̑ да по́имет̑·

Вдови́цы же, и҆ пꙋщени́цы, и҆ блꙋд꙽ницы, си́хъ да не по́иметъ·

Но дѣви́цꙋ ѿ племе́ни свое҆го да по́иметъ въ женꙋ̀.
да не ѻ҆скверни́тъ сѣмени свое҆го в лю́дехъ свои҆хъ, а҆́зъ г҃ь б҃ъ ѻ҆сщ҃аѧ́и ег̑҇·

И҆ рече г҃ь къ моѷсїю гл҃ѧ рцы̀ къ а҆а҆ро́нꙋ гл҃ѧ.
чл҃къ ѿ ро́да твое҆го в роже́нїѧхъ ва́ших̑, и҆ а҆ще кое҆мꙋ бꙋ́детъ на немъ поро́къ, да не прихо́дитъ приноси́ти да́ръ б҃а свое҆го, всѧ́къ чл҃къ е҆мꙋже а҆ще бꙋ́дет꙽ на нем̑ поро́къ, да не прихо́дит꙽ чл҃къ слѣ́пъ и҆л̂и хро́мъ и҆л̂и корнъ, и҆л̂и ѹ҆́хомъ ѹ҆рѣз́аномъ и҆л̂и чл҃къ е҆мꙋже е҆сть съкрꙋше́нїе рꙋцѣ, и҆л̂и съкрꙋше́нїе нозѣ̀, и҆л̂и горба́т꙽, и҆л̂и гноеточив̑҇ ѻ҆чима, и҆л̂и бѣлмо на́ ѻцѣ е҆мꙋ·

И҆л̂и чл҃къ на немже сꙋть кра́сты ди́виѧ̀, и҆л̂и лиша́и, и҆л̂и ѻ҆ е҆ді́номъ и҆сте́сѣ, всѧ́къ е҆мꙋже а҆ще бꙋ́детъ на немъ поро́къ, ѿ сѣмени а҆а҆ро́на жерца̀, да не пристꙋпит꙽ принестѝ тре́бъ б҃ꙋ твоемꙋ, занѐ порокъ на нем̑ да́ровъ бж҃їихъ да не принесе́т꙽, да́ры б҃а е҆го ст҃аѧ ст҃ыхъ·

А҆ ѿ ст҃ыхъ да ꙗ҆́сть ра́звѣ къ завѣсѣ да не пристꙋпитъ, и҆ къ ѻ҆лтарю да не приближитсѧ ꙗ҆́ко порокъ и҆́мать, и҆ да не ѻ҆скверни́тъ и҆́мени ст҃го б҃а свое҆го, ꙗ҆́ко а҆́зъ г҃ь ѻ҆сщ҃аѧ и҆хъ·

И҆ гл҃а моѷсїи къ а҆а҆ро́нꙋ и҆ сн҃омъ е҆го, и҆ къ всѣм꙽ сн҃омъ і҆ил҃вымъ·

Глв̑҇а, к҃в·

И рече г҃ь къ моѷсе́ю гл҃ѧ.
рцы̀ а҆а҆ро́нꙋ и҆ сн҃омъ е҆го да сѧ блюдꙋтъ ѿ прино́съ ст҃ыхъ е҆же ѿ сн҃въ і҆ил҃выхъ, и да не ѻ҆сквернѧ́тъ и҆́мени моег̑҇ ст҃го е҆ли́ка ѻ҆нѝ сщ҃а́ютъ м̂и а҆́зъ г҃ь.
рцы̀ и҆мъ в роже́нїѧ ваша, всѧ́къ чл҃къ и҆же а҆́ще и҆ пристꙋп́итъ ѿ всего̀ племе́ни ва́шего къ ст҃ы́мъ е҆ли́ко ст҃ѧ́тъ сн҃ве і҆ил҃҃вѣ г҃ꙋ.
и҆ нечистота̀ е҆го на не́мъ, потребит̑сѧ дш҃а е҆го ѿ менѐ, а҆́зъ г҃ь, и҆ чл҃къ ѿ сѣмени а҆а҆ро́на жерца̀ прокаженъ и҆л̂и сѣмѧ и҆злива́ѧ, ѿ ст҃ыхъ да не ꙗ҆́стъ до́ндеже ѻ҆чи́ститсѧ, прикаса́ѧисѧ всѧ́кои нечистотѣ дш҃а и҆л̂и чл҃къ е҆мꙋже а҆́ще и҆зы́идетъ ѿ е҆го ло́жа сѣмѧ, І҆ и҆же а҆́ще кт̂о прико́снетсѧ всѧ́комꙋ ꙗ҆́дꙋ нечи́стꙋ ѻ҆скверни́тсѧ·

И҆л̂и ѿ чл҃ка и҆же е҆сть ѻ҆сквернены́и по всѧ́кои нечи́стотѣ̀ е҆го дш҃а и҆же а҆ще прико́снетсѧ и҆хъ, нечи́ста бꙋ́дет꙽ до́ вечера, да не ꙗ́стъ ѿ ст҃ыхъ·

А҆ще ѻ҆мы́ет꙽ пло́ть свою водо́ю, и҆ за́идетъ слн҃це чи́стъ бꙋдетъ, и҆ тогда̀ да ꙗ҆́стъ ѿ ст҃ых꙽, ꙗ҆ко хлѣ́бъ е҆го е҆сть, мертвечины и҆ звѣроꙗ҆́дины да не ꙗ҆́ст꙽, ѻ҆скверна́витъсѧ въ нихъ.
а҆́зъ г҃ь, и҆ да снабди́те свѣдѣнїа моѧ̀ да не прїимꙋт꙽ си́хъ ра́ди грѣха̀, и҆змрꙋтъ за них̑ а҆ще ѻ҆сквернѧ́тъ и҆хъ·

А҆́зъ г҃ь ѻ҆сщ҃аѧ и҆хъ, и҆ всѧ́къ и҆ноплеме́нник꙽ да не ꙗ҆́стъ ст҃ыхъ, и҆ се́лникъ и҆л̂и нае́мникъ е҆ре́евъ да не ꙗ҆сть ст҃ых̑·

А҆ще же жре́цъ притѧ́житъ дш҃ꙋ.
притѧжа́нїемъ сребра̀, сїи да ꙗ҆́стъ хлѣбъ е҆го, и҆ домоча́децъ е҆го да ꙗ҆́стъ хлѣ́бъ е҆го·

И дщи чл҃ка жръца̀ а҆ще посѧ́гнетъ къ мꙋжꙋ и҆ноплеменникꙋ, сїѧ ѿ прино́съ ст҃ыхъ да не ꙗ҆́стъ·

И҆ дщѝ жрьца̀ а҆ще бꙋ́детъ вдова̀ и҆л̂и ѿпꙋще́на, и҆ плода̀ не бꙋде ѿ неѧ̀, ꙗ҆́же възврати́тсѧ въ до́мъ ѿц҃а е҆ѧ̀, въ ю́ности е҆ѧ̀, ѿ хлѣ́бъ ѿч҃ь да ꙗ҆́стъ, и҆ всѧ́къ и҆ноплемен̑҇ник꙽ да не ꙗ҆́стъ ѿ них꙽·

И҆ чл҃къ и҆же а҆ще ꙗ҆́стъ ст҃аѧ не разꙋмѣвъ, и҆ да приложи́тъ пѧ́тꙋю е҆го ча́сть къ и́стовомꙋ и҆ да да́стъ с̂е жрьцꙋ ст҃ое·

И҆ да не ѻ҆скверна́вѧтъ прино́съ ст҃ыхъ е҆же ѿ сн҃овъ і҆ил҃въ, ꙗ҆́же ѻ҆ни прино́сѧт꙽ г҃ꙋ, и҆ да не приведꙋтъ на ни́хъ безако́нїе престꙋпле́нїѧ, вънегда ꙗ҆́дѧт̑ ст҃ынѧ их̑, ꙗ҆́ко а҆зъ г҃ь ѻ҆сщ҃аѧ и҆х꙽·

И҆ рече г҃ь къ моѷсїю гл҃ѧ, гл҃и а҆а҆ро́нꙋ и҆ сн҃омъ е҆го, и҆ всемꙋ со́ньмꙋ і҆ил҃вꙋ, и҆ рече́ши к нимъ.
чл҃къ чл҃къ ѡ сн҃въ і҆ил҃въ, и҆л̂и ѿ прише́лец꙽ прилежащих̑ въ ва́съ въ і҆ил҃и, и҆же а҆ще принесет꙽ даръ, по всемꙋ̀ и҆сповѣ́данїю и҆хъ, и҆л̂и по всемꙋ̀ и҆зволе́нїю и҆хъ, е҆ли́ко а҆ще принесꙋт꙽ г҃ꙋ, на всесъж꙽же́нїе въ прїѧ́тїе ѿ ва́съ мꙋжескъ по́лъ непоро́ченъ, ѿ ста́дъ воло́въ и҆л̂и ѿ ѻ҆ве́цъ, и҆л̂и ѿ козел̑҇.
всѧ́ко и҆же а҆ще и҆́мать поро́къ на себѣ̀, да не прино́ситсѧ г҃ꙋ, поне́же непрїѧ́тно бꙋдет̑ ѿ ва́съ·

И҆ чл҃къ е҆ли́ко а҆ще принесе́т꙽ тре́бꙋ сп҃сенїѧ г҃ꙋ, разлꙋчив̑҇ молбꙋ̀ по и҆збра́нїю и҆л̂и въ пра́зники ваша, и҆ ѿ ста́дъ воло́въ и҆л̂и ѿ ѻ҆ве́цъ, непоро́чно да бꙋ́детъ въ прїѧ́тїе, да не бꙋ́детъ никое҆го поро́ка на не́мъ, слѣ́по и҆л̂и съкрꙋше́но, и҆л̂и ꙗ҆зве́ног̑҇ и҆л̂и черви́во, и҆л̂и кра́ставо, и҆л̂и лишаво, да не прино́сѧтъ тѣхъ г҃ꙋ, и҆ въ вс̂есъж꙽же́нїе да не да́стьсѧ ѿ них̑ на ѻ҆лта́рь гв҃и·

Теле́цъ же и҆л̂и ѻ҆вцꙋ̀ и҆л̂и слѧки ѹ҆́ды и҆мѣѧ, въ заколе́нїѧ сътвори́ши по и҆зволе́нїю, въ молбꙋ же твою да не приведетсѧ·

Чище́наг̑҇ же и҆ требенна́го, и҆ вреже́на, и҆ скопца, да не принесе́те си́хъ г҃ꙋ, и҆ въ землѝ ва́шеи да не сътвори́те·

ѿ рꙋки же и҆ноплеменикъ да не принесе́те даров꙽ б҃ꙋ ва́шемꙋ ѿ всѣхъ сихъ, ꙗ҆́ко вреже́нїѧ е҆сть на ни́хъ и҆ поро́къ на ни́хъ не прїиметсѧ сїѧ ѿ ва́съ·

И҆ рече г҃ь къ моѷсїю гл҃ѧ, телчѧ̀ и҆ли ѻ҆вчѧ̀ и҆л̂и козлѧ̀ е҆гда̀ сѧ роди́т꙽, да бꙋ́дет꙽ се́дмь дн҃їи под̑ мтр҃їю свое҆ю, а҆ ѿ дн҃е ѻ҆смаго и҆ да́леи принесе́тсѧ въ да́ръ прино́съ г҃ꙋ·

телца̀ же и҆ ѻ҆вча́те, въкꙋпѣ съ мт҃рїю да не зако́лете въ е҆ді́нъ дн҃ь, а҆́ще ли положи́ши тре́бꙋ мл҃твꙋ ра́дованїѧ гв҃и, въ прїѧ́тїе вамъ да положи́те ю҆̀·

Сїѧ въ дн҃ь тои да и҆зъꙗ҆́стъсѧ, да не ѻ҆ста́нет꙽ ѿ мѧ́съ наѹ҆́трїѧ.
а҆́зъ г҃ь, и҆ да снабди́те за́повѣди моѧ, и҆ сътвори́те ѧ҆̀ аз̑ г҃ь и҆ не ѻ҆скверни́те и҆́мени ст҃го и҆ ѻ҆сщ҃ꙋсѧ посредѣ̀ сн҃въ і҆и҆л҃въ, а҆́зъ г҃ь ѻ҆сщ҃аѧ в̂ы и҆зведы́и в̂ы из̑ зем̑лѧ е҆гѷпетъскїѧ ꙗкоже бы́ти ва́мъ б҃ꙋ а҆́зъ г҃ь

Глв̑҇а, к҃г·

И рече г҃ь къ моѷсїю гл҃ѧ, гл҃и сн҃омъ і҆и҆л҃вымъ, и҆ рече́ши къ нимъ, пра́знд̑ики гн҃ѧ, ꙗ҆́коже прозове́те сїѧ нареч̑҇ны ст҃ымъ, се сꙋть пра́знд̑ицы мои, ѕ҃ дн҃їи да сътвори́ши дѣла·

А҆ въ сед̑мы́и дн҃ь сꙋбо́ты поко́и наречены́и ст҃ъ гв҃и, всѧ́кого дѣла да не твори́те сꙋбота е҆сть гв҃и·

Въ все́мъ ѻ҆бита́нїи вашемъ, сїѝ пра́знд̑ицы г҃ꙋ наре́чены ст҃ы, ꙗ҆́коже нарече́те сїѧ въ времена̀ и҆хъ·

Въ а҃. мцс̑҇ъ, д҃і, и҆ дн҃ь мцс̑҇а, междꙋ вече́рными па́сха г҃ꙋ·

И҆ въ е҃і, дн҃ь, мцс̑҇а а҃ го, пра́знд̑икъ ѻ҆прѣснокъ г҃ꙋ·

Се́дмь дн҃їи да ꙗ҆́сте ѻ҆прѣсноки, пръ́выи же дн҃ь нарече́нъ ст҃ъ бꙋ́детъ ва́мъ.
всѧ́кого дѣ́ла слꙋ́жнѧ да не твори́те, и҆ да принесе́те вс̂есъж꙽же́нїе г҃ꙋ, з҃, дн҃їи, седмы́и же дн҃ь нарече́нъ ст҃ъ бꙋ́детъ ва́мъ, всѧ́кого дѣ́ла слꙋжнѧ да не твори́те·

И҆ рече г҃ь къ моѷсїю гл҃ѧ, гл҃и сн҃омъ і҆и҆л҃вымъ, и҆ рече́ши къ ни́мъ, е҆гда̀ в꙽ни́дете въ зе́млю ю҆же а҆́зъ даю̀ вамъ, и҆ пожнѣте жа́твꙋ е҆ѧ̀, и҆ да принесе́те пе́рвыѧ снопы̀ жа́твы ва́шеѧ, къ же́рцꙋ, и҆ принесе́тъ сно́пъ прд̑е г҃ь прїѧ́тенъ вамъ·

На заѹ҆́трїе перваго дн҃ѧ сꙋботы, да възнесе́тъ и жре́цъ, и҆ да сътвори́те въ дн҃ь вонже а҆ще принесе́те сно́пъ, ѻ҆вча̀ непоро́чно е҆ді́нолѣтно, въ вс̂есъж꙽же́нїе г҃ꙋ, и҆ требꙋ е҆го, дв̂а десѧ́тые ча́сти мꙋки пшени́чны, спрѧ́жены въ е҆ле́ю, тре́бꙋ г҃ꙋ въ воню бл҃гово́нїѧ г҃ꙋ, и҆ възлїѧнїе е҆го четвертꙋю ча́сть и҆́нъ вина̀, хлѣб же и҆ прѧ́жены кла́сы но́вы да не ꙗ҆сте, дажъ до того̀ дн҃и самог̑҇, дондеже принесе́те в̂ы да́ры б҃ꙋ вашемꙋ, зако́нъ вѣчны́и в роже́нїѧ ва́ша въ все́мъ вселе́нїи ва́шемъ и҆ съчтете себѣ̀, ѿ наѹ҆́трїѧ сꙋбо́ты до дн҃е во́ньже а҆ще принесе́те снопы̀ възложенїѧ сед̑мь недель цѣлых̑·

да сочте́ши даже до наѹ҆́трїѧ послѣднїѧ недели, да съчте́те, н҃, дн҃їи, и҆ да принесе́те тре́бꙋ но́вꙋ г҃ꙋ.
ѿ вселе́нїа ва́шего, да принесе́те хлѣб́ы·

Възложе́нїѧ, в҃, хлѣб́а, з двꙋ десѧ́тыхъ ча́стеи мꙋкѝ пшени́чны, да бꙋдетъ хлѣ́бъ е҆ді́нъ ква́шеный·

да сѧ и҆спекꙋтъ с пе́рвыхъ жи́тъ г҃ꙋ, и да принесе́те съ хлѣ́бы з҃, а҆́гнецъ, непоро́ченъ е҆ді́нолѣтныхъ, и҆ ѻ҆вна̀ дв̂а непоро́чна, и҆ телец̑҇ е҆ді́нъ ѿ стад̑, и҆ да бꙋ́дꙋтъ въ вс̂есож꙽же́нїе г҃ꙋ, и тре́бы и҆хъ и҆ възлїѧнїѧ их̑, тре́ба вонѧ̀ бл҃гово́нїѧ г҃ꙋ·

И҆ да сътвори́те козелъ ѿ ко́зъ е҆ді́нъ грѣха̀ ра́ди и҆ дв̂а а҆́гньца е҆ді́нолѣтна въ тре́бꙋ спс̑҇нїѧ съ хлѣбы прьвых̑ жит̑, и҆ да возложит̑ ѧ҆̀ жрец̑҇.
съ хлѣ́бы пе́рвых̑ жит̑, възложе́нїе пред̑ гм҃ъ, съ ѻ҆бѣма а҆́гньцема.
ст҃а бꙋдт̑ꙋ г҃ꙋ и҆ жрьцꙋ и҆же прино́си ѧ҆̀ томꙋ̀ да бꙋдет̑·

И прозове́те сїи дн҃ь, наро́чи ст҃ъ да бꙋ́детъ вам̑, всѧ́каго дѣла слꙋжнѧ да не твори́те вонь·

Закон̑҇ вѣ́чныи в роже́нїѧ ва́ша, въ все́мъ въселе́нїѝ ва́шемъ, е҆гда̀ пожнете жа́твꙋ землѧ̀ ва́шеѧ, да не потребите ѻ҆ста́нка жа́твы свое҆ѧ̀, внегд̑а жнете, и҆ ѿпадающаѧ̀ жа́твы ва́шеѧ̀, да не побира́ете, ни́щемꙋ и чюжемꙋ и҆ пришелцꙋ да ѻ҆ста́вите ѧ҆̀ а҆́зъ г҃ь б҃ъ ва́шъ·

И҆ рече г҃ь къ моѷсїю гл҃ѧ, гл҃и сн҃омъ і҆и҆л҃вымъ рекїи мцс̑҇а се́дмаго, въ а҃, дн҃ь мцс̑҇а да бꙋдетъ ва́мъ поко́и, па́мѧть тре́бъ нарече́на ст҃а г҃ꙋ, всѧ́каго дѣла слꙋжнѧ да не твори́те, и҆ да принесе́те вс̂есъж꙽же́нїе г҃ꙋ·

И҆ рече г҃ь къ моѷсїю гл҃ѧ, въ і҃ и, дн҃ь, з҃, мцс̑҇а сего дн҃ь ѻ҆цыще́нїѧ, нарече́нъ ст҃ъ, да бꙋ́детъ ва́мъ·

И҆ да покори́те дш҃а ва́ша, и҆ да принесете вс̂есъж꙽же́нїе г҃ꙋ, всѧ́каго дѣла да не твори́те в сїи дн҃ь, е҆сть б̂о дн҃ь ѻ҆цыще́нїѧ сїи вам̑ ѻ҆цы́стити ѻ҆ ва́съ, прд̑е гм҃ъ бм҃ъ ва́шимъ, всѧ́ка б̂о дш҃а ꙗ҆́же не покори́тсѧ въ то́й дн҃ь, да потреби́тсѧ ѿ людїи свои҆хъ, и҆ всѧ́ка дш҃а ꙗ҆́же твори́тъ дѣло в сїи дн҃ь, поги́бнет꙽ дш҃а т̂а ѿ людїи свои҆хъ·

Всѧ́каго дѣ́ла да не твори́те, зако́нъ вѣчны́и в роже́нїѧ ва́ша, въ всѣхъ селе́нїих̑ ва́шихъ, пра́знд̑икъ пра́знд̑иковъ да бꙋд́етъ ва́мъ, и҆ да покори́те дш҃а ва́ша, ѿ ѳ҃ го, дн҃е мцс̑҇а, ѿ вече́ра даже до десѧ́таго дн҃е мцс̑҇а до ве́чера пра́знд̑ꙋите пра́зникъ ва́шъ·

И҆ рече г҃ь къ моѷсїю гл҃ѧ, гл҃и сн҃омъ і҆и҆л҃вым̑ рекїи, въ е҃і, дн҃ь, мцс̑҇а з҃ го сего, пра́знд̑икъ кꙋщныи, з҃, дн҃їи г҃ꙋ, и҆ первыи дн҃ь нареченъ ст҃ъ да бꙋ́дет꙽ всѧ́каго дѣ́ла слꙋжнѧ да не твори́те з҃, дн҃їи да приноси́те вс̂ѧсъж꙽же́нїа г҃ꙋ, ѻ҆смы́и же дн҃ь нареченъ ст҃ъ да бꙋ́детъ ва́мъ, да принесе́те вс̂есъж꙽же́нїе г҃ꙋ, и҆схо́дно е҆сть, всѧ́каго дѣ́ла слꙋжнѧ да не твори́те·

се пра́знд̑ицы гн҃и ꙗ҆́же наречете наро́читы ст҃ы, ꙗ҆коже принесе́те прино́съ г҃ꙋ, и҆ вс̂есъж꙽же́нїѧ, и҆ тре́бы и҆хъ, и҆ възлїѧнїѧ и҆хъ ѿ дн҃е до дн҃е, ра́звѣ сꙋботъ гн҃ь, и҆ ра́звѣ да́ръ ва́шихъ и҆ ра́звѣ всѣхъ моле́нїи ва́шихъ, и҆ развѣ бл҃говолныхъ ва́шихъ, ꙗ҆́же да́сте г҃ꙋ, въ е҃і, дн҃ь мцс̑҇а, з҃ го сего, е҆гда сконча́ете жи́та землѧ̀, да пра́знꙋете г҃ꙋ, з҃, дн҃їи, въ дн҃ь первы́и поко́и, и҆ дн҃ь и҃, поко́и, и҆ и҆ да въз́мете себѣ̀ въ дн҃ь а҃, пло́дъ дре́ва кра́сенъ, и҆ вѣтвь фини́ческꙋю и҆ вѣтви дре́ва ча́стаго ли́стїѧ, и҆ ве́рби ѿ водоте́чи, и҆ възвесели́тесѧ прд̑е гм҃ъ бм҃ъ ва́шимъ, з҃, дн҃їи въ лѣтѣ зако́нъ вѣ́чныи, в роже́нїѧ ваша, въ мцс̑҇ъ, з҃. пра́знꙋите, и҆ въ кꙋщах꙽, да пребꙋ́дете, з҃, дн҃їи всѧ́къ т̂ꙋзе́мецъ въ і҆и҆л҃и, да пребꙋ́детъ въ кꙋщахъ ꙗ҆ко ви́дѧтъ в роженїѧ ва́ша, ꙗ҆́ко въ кꙋщахъ вселих̑ сн҃ы і҆и҆л҃вы·

Є҆гда̀ и҆звожд̑ꙋ ѧ҆̀ и҆хъ, и҆з землѧ̀ е҆гѷпетьскїѧ·

А҆зъ г҃ь б҃ъ ва́шъ, и҆сповѣда моѷсїи всѧ̀ пра́знд̑ики гн҃ѧ сн҃омъ і҆и҆л҃вымъ·

Глв̑҇а, к҃д·

И рече г҃ь къ моѷсїю гл҃ѧ, заповѣждь сн҃омъ і҆и҆л҃вымъ, да принест̑ꙋ т̂и е҆ле́и ѿ дре́ва чи́ста, и҆ цѣжена въ свѣтѣнїе.
да гори́тъ свѣти́ло всегда̀.
вн̂ѣѹ҆́дꙋ завѣсы въ хра́мѣ свѣдѣ́нїѧ, и҆ да ж꙽гꙋтъ е҆̀, а҆а҆ро́нъ и҆ сн҃ове е҆го, ѿ ве́чера до заѹ҆́тра прд̑е гм҃ъ, не преста́юще зако́нъ вѣчны́и в роже́нїѧ ва́ша, на свѣти́лѣ чи́стем̑ да ж꙽жетъ въ свѣти́лѣ прд̑е гм҃ъ до заѹ҆́тра, и҆ да въ́змете мꙋкѝ пшени́чны, и҆ да сътвори́те ѿ неѧ, в҃і хлѣ́бовъ.
дв҃ꙋ десѧти́нъ да бꙋ́дет꙽ хлѣ́бъ е҆ді́нъ, и҆ възложи́те и҆хъ на дв̂а положе́нїѧ·

По ѕ҃, хлѣ́бовъ на трапе́зѣ чи́стѣ прд̑е гм҃ъ.
и҆ да възложи́те на е҆ді́но положе́нїе ѳимиѧм̑ чи́стъ и҆ со́ль, и да бꙋ́дꙋтъ хлѣ́бы въ памѧть пред̑лежа́щїи пре гм҃ъ, въ дн҃ь сꙋбо́ты, да пред̑лежи́тъ прд̑е гм҃ъ всегда̀ ѿ сн҃овъ і҆и҆л҃въ, завѣт꙽ вѣ́чныи, и҆ да бꙋ́дет а҆а҆ро́нꙋ и҆ сн҃ом꙽ е҆го, и҆ да ꙗ҆́дѧтъ ѧ҆̀ въ мѣстѣ ст҃ѣ сꙋть б̂о ст҃аѧ ст҃ыхъ.
с̂е им̑ ѿ тре́бы г҃ꙋ закон̑҇ вѣ́чныи·

І҆ и҆зы́де сн҃ъ жены̀ і҆и҆л҃ьтески, и҆ се же бѣѧше сн҃ъ е҆гѷпътѧнина въ сн҃ѣхъ і҆и҆л҃вых꙽, и котороа҆шесѧ въ полчищи, и҆же ѿ і҆и҆л҃ьтенынѧ мꙋжъ і҆и҆л҃ьтѧнинъ наре́къ сн҃ъ жены̀ і҆и҆л҃ьтѧныни и҆́мѧ гн҃е проклѧ̀·

И҆ приведо́ша и҆̀ къ моѷсїю, и҆мѧ же мт҃ри е҆го саломи́ѳъ.
д꙽щи даврі́и҆на ѿ племенѝ да́нова, и҆ въвергоша и҆̀ въ темни́цꙋ ѻ҆сꙋди́ти и҆̀ по велѣ́нїемъ гн҃имъ·

И҆ рече г҃ь къ моѷсїю гл҃ѧ, и҆зведи́те клѧ́вшаго вн̂ѣ по́лчища, и҆ да възложат̑ вс̂и слы́шавшїѝ рꙋцѣ̀ своѝ на главꙋ̀ е҆го, и҆ да побию́тъ и҆̀ каменїемъ ве́сь со́нм꙽·

И҆ сн҃омъ і҆и҆л҃вым̑ гл҃и, и҆ рече́ши к ни́мъ, чл҃къ чл҃къ и҆же а҆ще проклене́тъ б҃а свое҆го грѣх꙽ прїиметъ·

Клены́и же и҆́мѧ гн҃е, смр҃тїю да ѹ҆́мретъ ка́менїемъ да побию́тъ и҆̀ весь со́ньмъ, а҆ще л̂и земецъ и҆л̂и прише́лецъ, внегда̀ проклене́тъ, и҆́мѧ гн҃е да ѹ҆́мретъ·

И чл҃къ и҆же а҆ще ѹ҆бїетъ всѧ́кꙋ дш҃ꙋ чл҃чꙋ смр҃тїю да ѹ҆́мретъ, и҆же а҆ще кт̂о ѹ҆бїетъ говѧ́до и҆ ѹ́мрет꙽, да тѧжет꙽ дш҃ꙋ въ дш҃и мѣсто, и҆ а́ще кт̂о сътвори́тъ поро́къ бли́жнемꙋ, ꙗ҆коже сътворѝ е҆мꙋ та́коже и҆ емꙋ сътворѧ́тъ, и҆зломле́нїе въ и҆зломле́нїѧ мѣсто, ѻ҆ко въ ѻ҆ка мѣсто, зꙋбъ въ зꙋ́ба мѣсто.
ꙗ҆́коже сътвори́лъ поро́къ чл҃кꙋ та́коже сътворѧт̑ и҆ емꙋ, и҆же а҆ще кт̂о ѹ҆даритъ чл҃ка и҆ ѹ́мрет꙽ и҆ то́и смр҃тїю да ѹ҆́мрет̑·

ѻ҆правле́нїе е҆ді́но е҆сть, прише́лцꙋ и҆ насе́лникꙋ, ꙗ҆́ко а҆зъ г҃ь б҃ъ ва́шъ, и҆ гл҃а моѷсїи къ сн҃омъ і҆и҆л҃вымъ, і҆ и҆зведо́ша клѧ́вшаго вн̂ѣ по́лчища и҆ поби́ша и҆̀ ка́менїемъ ве́сь соньмъ сн҃въ і҆и҆л҃въ, сътвори́ша е҆же заповѣда г҃ь моѷсїю·

Глв̑҇а, к҃е·

И гл҃а г҃ь къ моѷсїю на горѣ синаи́стѣи рекїи, гл҃и сн҃омъ і҆и҆л҃вымъ, и҆ рече́ши къ ним̑ вънегда̀ вънидете въ зем̑лю ю҆же а҆зъ даю̀ вамъ, да почїетъ землѧ̀ ю҆же а҆зъ даю̀ ва́мъ сꙋботы г҃ꙋ, ѕ҃, лѣтъ да сѣеши ни́вꙋ твою, и҆ ѕ҃, лт̑ѣ, да рѣжеши виногра́дъ твои и҆ ѻ҆бье҆млеши пло́дъ е҆го·

А҆ въ з҃ е лѣто сꙋбо́та поко́и да бꙋ́детъ землѝ, сꙋбота гн҃ѧ, ни́вы свое́ѧ не сѣ́еши, ви́ногра́да своег̑҇ да не рѣжеши, и҆ никнꙋща ѻ҆ себѣ, ни́вы твое҆ѧ̀ да не жне́ши, и҆ виногра́да ѿлꙋченїѧ твое҆го да не ѻ҆бье҆млеши, лѣто поко́ѧ бꙋдет̑ зем̑ли·

И҆ бꙋ́дꙋтъ сꙋбо́ты землѝ ꙗ҆дь тебѣ и҆ дѣтищꙋ твое҆мꙋ, и҆ рабꙋ̀ твое҆мꙋ и҆ рабыни твое́и, и҆ нае́мникꙋ твое҆мꙋ и҆ ѻ҆бита́лникꙋ прилежащемꙋ тебѣ и҆ ско́тꙋ твое҆мꙋ, и҆ звѣри сꙋщемꙋ въ землѝ твое́и, да бꙋ́детъ всѧ́к꙽ пло́дъ е҆го въ ꙗдь·

И҆ съчте́ши з҃, лѣтъ поко́ю с̂е е҆сть з҃, лѣтъ седьми́жды, и҆ бꙋ́дꙋтъ тебѣ̀, з҃, лт̑ѣ си́хъ поко́ю, м҃ѳ лѣтъ, и҆ да расповѣсте трꙋбнымъ гла́сомъ въ все́и землѝ ва́шеи·

Мцс̑҇а з҃ го, і҃ го дн҃ѧ мцс̑҇а, въ дн҃ь ѻ҆чище́нїѧ, да расповѣсте трꙋбо́ю въ все́и землѝ ва́шеи и҆ да ѻ҆ст҃ите сїе лѣто, лѣто н҃ е, и҆ да просла́вите ѻ҆ставле́нїе всѣмъ живꙋщимъ на не́и, лѣто ѻ҆ставле́нїѧ, знаме́нїе се бꙋдетъ ва́мъ, и҆ да ѿидетъ ко́ждо ва́съ въ притѧ́жанїе свое, и҆ ко́ждо въ ѿчс̑҇тво свое ѿи҆детъ·

И҆ ѻ҆ставле́нїе, зна́менїа да бꙋ́детъ с̂е ва́мъ, лѣто, н҃ е, лѣто бꙋ́ди ва́мъ, да не сѣе҆те н̂и жне́те е҆же са́мо и҆зни́кнетъ на не́и и҆ да не ѻ҆бье҆млеши ѻ҆ставленых꙽, на неи, ꙗ҆́ко зна́менїе е҆сть, ѻ҆ставле́нїѧ ст҃о да бꙋ́детъ ва́мъ·

ѿ ни́въ да ѧ́сте жита е҆ѧ̀, и҆ въ лѣто ѿставленїѧ зна́менїѧ и҆хъ, да прїидет꙽ ко́ждо въ притѧжа́нїе свое, а҆ще ѿдаси кꙋплю бли́жнемꙋ твое҆мꙋ а҆ще л̂и притѧ́жеши ѿ бли́жнѧго твое҆го да не ѻ҆скорблѧ́етъ чл҃къ бли́жнѧго·

по числꙋ лѣтъ по зна́менїю да притѧ́житъ ѿ бли́жнѧго по числꙋ̀ лт̑ѣ жи́тъ да да́сть тѝ, ꙗ҆́коже а҆ще бо́лїи лѣтъ, ѹ҆мно́житъ притѧжа́нїе е҆го, ꙗ҆́коже мнѣ́е лѣтъ, ѹ҆мен꙽шитъ притѧжа́нїѧ е҆го·

Та́ко и҆ число̀ житъ да ти ѿда́сть, да не ѻ҆скорби́тъ чл҃къ бли́жнѧго, и҆ да ѹ҆бои́шисѧ̀ г҃а б҃а свое҆го, а҆́зъ г҃ь б҃ъ ва́шъ и҆ да сътворите вс̂ѧ ѻ҆правда́нїѧ моѧ̀ и҆ всѧ̀ сꙋды̀ моѧ̀, снабди́те и҆ сътвори́те ѧ҆̀, и҆ вселите́сѧ на землѝ, ѹ҆пова́юще·

И҆ да́стъ землѧ̀ пло́дъ свои, и҆ ꙗ҆́сте в сы́тость, и҆ всели́тесѧ на не́и ѹ҆пова́ющеи, а҆ще глаголите чт̂о н̂ы ꙗ҆́сти бꙋ́детъ, въ седмо́е лѣто, а҆ще не сѣе҆мъ, н̂и събира́емъ жи́тъ свои҆хъ, послю̀ бл҃гослове́нїе моѐ ва́мъ, въ лѣто ѕ҃ е, и҆ сътвори́тъ жита е҆ѧ̀, въ г҃ лѣта да сѣе҆те до лѣта ѻ҆́смаго, и҆ да ꙗ҆́сте ѿ житъ ве́тхих̑ да́же до лѣта ѳ҃ го, до́ндеже приспѣю́тъ жита еѧ̀, да ꙗ҆́сте ве́тхаѧ̀ ве́тхих꙽, землѧ́ же не преда́сте въ ѻ҆скверне́нїе, моѧ̀ б̂о е҆сть землѧ̀, ꙗ҆ко прише́лцы и҆ ѻ҆бита́тели в̂ы е҆сте предо мно́ю по все́и землѝ ѻ҆дръжа́нїѧ ва́шего, и҆скꙋпъ да дае҆те землѝ, а҆ще л̂и ни́щꙋе҆тъ бра́тъ тво́и и҆же с тобо́ю, и҆ ѿдаст꙽ ѿ ѻ҆дръжа́нїѧ свое҆го да прїидетъ, ѹ҆́жикъ бли́жнїи е҆мꙋ и҆ да и҆скꙋп́ит꙽ проданїѧ бра́та свое҆го, а҆ще л̂и не бꙋ́детъ е҆мꙋ ѹ҆́жикъ, и҆ възмо́жет꙽ рꙋка е҆го пости́гнꙋти дово́лныи и҆скп̑҇ꙋ е҆го, и҆ да съчтꙋтсѧ лѣта кꙋ́пли е҆го и҆ да възда́ст꙽ е҆же и҆́мать чл҃кꙋ е҆мꙋже долженъ бѣ̀, и҆ възврати́тсѧ въ ѻ҆дръжа́нїе е҆го·

А҆ще л̂и не пости́гнетъ рꙋка̀ е҆го дово́лное ꙗ҆́коже ѿда́ти е҆мꙋ да бꙋ́дет꙽ притѧжа́нїе продавшемꙋ сїѧ, до лѣта ѻ҆ставле́нїѧ·

Є҆гдаж̑ и҆зы́иде лѣто ѻ҆ставле́нїѧ и҆ прїидет̑ въ ѻ҆дръжа́нїе е҆го, а҆ще л̂и кт̂о прода́стъ до́мъ вселе́нїѧ ѻ҆гражде́нїѧ въ градѣ, да бꙋ́детъ и҆скꙋпле́нїе е҆го, до́ндеже скон̑҇чают̑сѧ лѣт́а дн҃и.
и҆ да бꙋдет̑ и҆скꙋпле́нїе е҆го, а҆ще л̂и не и҆скꙋпит̑ до́ндеже сконча́е҆тсѧ лѣто вс̂е, да ѻ҆дръжи́тсѧ дом̑ сꙋщїи въ гра́дѣ, и҆мꙋщемꙋ ѻ҆гражд̑енїе, въ тве́рдь притѧжа́вшемꙋ е҆̀, и҆ в роже́нїѧ е҆го, и҆ да не възвратит̑сѧ въ ѻ҆ставле́нїе·

до́ми же и҆же на се́лех꙽ и҆мже нѣсть ѻ҆коло и҆хъ ѻ҆гражд̑енїѧ, къ селꙋ землѝ да сѧ приложат̑, и҆скꙋпи е҆го всегда̀ да бꙋ́дꙋтъ, и҆ въ ѻ҆ставле́нїе да сѧ възвратѧтъ·

Гра́ди же леви́тъстїѝ и҆ до́мы ѻ҆дръжинїѧ их̑ и҆скꙋпи да бꙋ́дꙋт꙽, прс̑҇но леви́томъ·

И҆н̂о и҆же кт̂о а҆ще и҆скꙋпитъ ѿ леви́тъ да и҆зы́идетъ прода́нїе дворовъ грд̑аныхъ ѻ҆дръжанїѧ и҆хъ, въ ѻ҆ставле́нїе, ꙗ҆́ко дворо́ве гра́дъ леви́тъскихъ, ѻ҆дръжа́нїѧ и҆хъ посреди сн҃въ і҆и҆л҃въ, и҆ се́ла нарече́нїѧ въ граде́хъ и҆хъ, да сѧ не продадꙋтъ ꙗ҆́ко ѻ҆дръжа́нїе и҆хъ вѣ́чное е҆сть, а҆́ще ли же ни́щꙋетъ бра́тъ твои, иже с тобо́ю и҆ знемо́жетъ ѹ҆ тебѐ рꙋка́ми, по́дъи҆ми е҆го.
ꙗ҆ко прише́лца и҆ ѻ҆бита́лника·

да поживе́тъ бра́тъ твои с тобо́ю не въз꙽меши ѿ него̀ лих̑вꙋ, н̂иже сꙋгꙋ́бины и҆ ѹ҆бои́шисѧ б҃а твое҆го, а҆́зъ г҃ь, да поживе́тъ бра́тъ тво́и с тобо́ю.
сребра̀ твое҆го не да́си е҆мꙋ въ ли́хвꙋ·

и҆ пи́ща твое҆ѧ̀ не дасѝ е҆мꙋ въ сꙋгꙋбинꙋ, а҆́зъ г҃ь б҃ъ ваш꙽, и҆зведы́и в̂ы и҆зъ землѧ̀ е҆гѷпетъскїѧ, да́ти вамъ зе́млю ханаа́ньскꙋ.
ꙗ҆́ко бы́ти мн̂ѣ б҃ꙋ ва́шемꙋ·

И҆ а҆ще ѻ҆ѹ҆бо́жает̑ бра́тъ тво́и ѹ҆ тебѐ.
и҆ продастъсѧ тебѣ̀, да не рабо́тае҆тъ тебѣ̀ рабо́ты ра́бїѧ, а҆ки нае҆мникъ, и҆л̂и насе́лникъ да бꙋ́детъ ти до лѣта ѻ҆ставле́нїѧ, да дѣ́лаетъ ѹ҆ тебѐ, и҆ да и҆зы́идетъ ѿ тебѐ и҆ дѣти е҆го с ни́м꙽ въ лѣто ѻ҆ставле́нїѧ, и҆ да и́детъ в роже́нїе своѐ, и҆ въ ѻ҆дръжа́нїе ѿч҃ества е҆го да и́детъ·

Поне́же рабѝ сꙋть сїѝ моѝ, ꙗ҆́же и҆зведо́хъ и҆зъ землѧ̀ е҆гѷпетьски, да сѧ не продаст꙽ прода́нїемъ ра́бїем꙽, да не стꙋжи́ши е҆мꙋ трꙋдомъ, да ѹ҆бои́шисѧ г҃а б҃а твое҆го, ра́бъ же тво́и и҆ раба̀ и҆же а҆́ще бꙋ́дет꙽ ѹ҆ тебѐ ѿ ꙗ҆́зы́къ, и҆же ѻ҆крс̑҇тъ тебѐ сꙋть ѿ тѣхъ, да притѧ́житсѧ ра́бъ и҆ рабы́нѧ, и҆ ѿ сн҃въ населны́хъ и҆же сꙋть въ ва́съ ѿ си́хъ да притѧжи́те, и҆ ѿ роже́нїѧ и҆хъ.
е҆ли́цы и҆же а҆́ще бꙋ́дꙋтъ в землѝ ва́шеи да бꙋ́дет꙽ ва́мъ въ ѻ҆дръжанїе и҆ да раздѣли́те ѧ҆̀ дѣтемъ ва́шимъ по ва́съ, и҆ да бꙋ́детъ ва́мъ во ѻ҆дръжанїе въ вѣки, бра́тїѧ же ва́шеѧ̀ сн҃въ і҆и҆л҃въ ко́иждо бра́та свое҆го, да не стꙋжи́тъ трꙋдо́мъ, а҆́ще пости́гне рꙋка̀ прише́лцꙋ и҆ ѻ҆битал̑҇никꙋ и҆же ѹ҆ тебѐ, и҆ ѻ҆ѹ́божа́лъ бра́тъ твои и҆ прода́стьсѧ къ пришел̑҇цꙋ, и҆л̂и къ ѻ҆бита́лникꙋ и҆же ѹ҆ тебѐ, и҆л̂и ро́дившемꙋсѧ тꙋ прише́лцꙋ по прода́нїѝ к немꙋ, и҆скꙋпъ да бꙋ́дет꙽ е҆мꙋ, е҆ді́номꙋ ѿ бра́тїѧ да и҆скꙋпитъ е҆го бра́тъ ѿц҃а е҆го, и҆л̂и сн҃ъ бра́та ѿц҃а е҆го, да и҆скꙋпитъ е҆го и҆л̂и ѿ сво́иствены́ѧ пло́ти ро́да е҆го, и҆скꙋпитъ е҆го, а҆ще л̂и возмо́жет꙽ рꙋка е҆го и҆скꙋпи́ти себѐ да съчте́тсѧ съ притѧжа́вшим̑ е҆го, ѿ лѣта е҆же вда́сѧ е҆мꙋ, да́же до лѣта ѻ҆ставле́нїѧ̀·

И҆ да бꙋ́детъ сребро̀ прода́нїѧ е҆го, а҆ки дн҃ь нае́мъникꙋ, ѿ лѣта до лѣта да бꙋ́детъ с ни́мъ, а҆́ще л̂и комꙋ бо́лїи лт̑ѣ е҆сть, против̑҇ то́мꙋ ѿдаст꙽ и҆скꙋпъ свои·

ѿ сребра̀ прода́наго, а҆́ще л̂и мало ѻ҆ста́нетсѧ ѿ лѣтъ, до лѣтъ ѻ҆ставле́нїѧ, и҆ да съчте́тъ е҆мꙋ по лѣтом̑ е҆го, и҆ да ѿда́стъ и҆скꙋпъ е҆го а҆ки нае́мникъ ѿ го́да до го́да, да бꙋ́дет꙽ с ни́мъ·

да не стꙋжи́ши е҆мꙋ трꙋдом̑ прд̑е тобо́ю, а҆́ще л̂и не и҆скꙋ́питсѧ, посе́мъ да и҆зы́идетъ въ лѣто ѻ҆ставле́нїѧ, са́мъ и҆ дѣти е҆го с ни́мъ, ꙗ́ко моѝ рабѝ сн҃ове і҆и҆л҃вы, рабѝ моѝ с̂и сꙋть, и҆хже и҆зведо́х꙽ и҆зъ землѧ̀ е҆гѷпет̑скїѧ·

Глв̑҇а, к҃ѕ·

Не сътвори́те себѣ ѻ҆браза рꙋкотворе́на, ни́же начерта́ныхъ, ни́же столпа̀ поста́вите себѣ̀, и҆ не поста́вите себѣ̀ болва́нъ ка́менъ и҆стꙋка́нъ въ землѝ ва́шей, и҆ не поклони́тесѧ и҆мъ, а҆́зъ е҆смь г҃ь б҃ъ ва́шъ, сꙋбо́ты моѧ̀ снабди́те, и҆ ѿ ст҃ыхъ мои҆хъ ѹ҆бои́тесѧ а҆́зъ е҆смь г҃ь·

Аще въ повелѣнїи҆хъ мои҆хъ хо́дите и҆ за́повѣди моѧ̀ снабдитѐ и сътвори́те ѧ҆̀, и҆ дам꙽ до́ждь вам̑ въ́ времѧ свое, и҆ землѧ̀ да́сть пло́дъ свои, и҆ древеса се́лнаѧ дадꙋт꙽ ѻ҆во́щь сво́и, и҆ спости́гнетъ васъ млаченїе жи́т꙽ і҆ и҆манїе вина, и҆манїе же вина постигнетъ времѧ сѣѧ́нїѧ, и҆ ꙗ҆́сте хлѣб꙽ вашъ в сы́тость, и҆ всели́тесѧ без꙽ стра́ха на землѝ ва́шеи и҆ ра́ть не прои́детъ сквозѣ зе́млю ва́шꙋ, и҆ дам̑ ми́ръ в землѝ ва́шеи, и҆ ѹ́снете, и҆ не бꙋдетъ ѹ҆страша́ѧй ва̀съ, и҆ погꙋблю̀ ѕвѣри лю́тыѧ̀ ѿ зем̑лѧ ва́шеа и҆ рать сквозѣ землѧ̀ ва́шеѧ не про́идет̑ и҆ пожене́те врагы̀ ваша, и҆ па́дꙋтъ прд̑е ва́ми ѹ҆бо́емъ·

И҆ поженꙋтъ ѿ васъ е҃ р҃, а҆ р҃, ва́съ пожене́т꙽ тм̂ꙋ и҆ падꙋтъ вра́зи ва́ши прд̑е вами мечемъ·

И҆ при́зрю на ва́съ и҆ блгс̑҇влю̀ ва́съ, и҆ възвращꙋ ва́съ и҆ ѹ҆множꙋ ва́съ, и҆ поста́влю завт̑ѣ мо́и с ва́ми·

и҆ ꙗ҆́сте ве́тхаѧ, и҆ ветхаѧ ве́тхих̑ и҆ ве́тхаѧ̀ ѿ лица̀ но́выхъ и҆знесе́те и҆ поста́влю завѣтъ мо́и въ ва́съ и҆ не похꙋ́литъ дш҃а моѧ̀ ва́съ·

И҆ похождꙋ въ ва́съ, и҆ бꙋ́дꙋ ва́мъ б҃ъ, а҆ в̂и бꙋ́дете м̂и въ лю́ды·

А҆́зъ г҃ь б҃ъ ва́шъ, и҆зведы́и в̂ы и҆зъ землѧ̀ е҆гѷпетьскїѧ сꙋщимъ ва́мъ рабо́мъ, и҆ съкрꙋши́хъ ѹ҆́зы ꙗ҆́рма̀ ва́шего, и҆зведо́хъ в̂ы съ вла́стїю·

А҆ще л̂и не послꙋша́ете менѐ и҆ не сътворитѐ повелѣнїи мои҆хъ си́хъ, и҆ сꙋпроти́витесѧ мн̂ѣ, и҆ сꙋдо́мъ мои́мъ не ѹ҆годи́тъ дш҃а ва́ша, ꙗ҆́коже не сътвори́ти ва́мъ всѣхъ за́повѣдїи мои҆хъ, и҆ ꙗ҆́ко разсы́пати завѣтъ мои, и҆ а́зъ сътворю̀ си́це ва́мъ, и҆ приста́влю на в̂ы неи҆мѣнїе, и҆ ра́ны и҆ кра́сты, врѣжа́ющи ѻ҆́чи ва́ши, и҆ дш҃ꙋ ва́шꙋ сꙋшащꙋ, и҆ всѣ́ете въ тщѐ сѣмена ва́ша, и҆зъꙗ҆́дѧт꙽ б̂о е҆̀ сꙋпоста́ты ва́ша.
и҆ ѻ҆прꙋ лицѐ моѐ на вас̑҇, и҆ паде́те прд̑е врагѝ ва́шими, и҆ поженꙋтъ в̂ы ненави́дѧщїѝ ва́съ, и҆ пробѣ́гнете не гони́ми ники́мже·

И҆ а́ще до сего̀ не послꙋшае҆те менѐ, и҆ приложꙋ̀ наказа́ти в̂ы вре́дъ з҃. за грѣхѝ ва́ша, и҆ съкрꙋшꙋ̀ ѹ҆кориз̑нꙋ презо́ра ва́шего, и҆ положꙋ нб҃о ва́мъ а҆ки желѣз́но и҆ зе́млю ва́шꙋ а҆ки мѣдѧнꙋ·

И҆ бꙋ́детъ вътщѐ крѣп́ость ва́ша, и҆ не да́стъ землѧ̀ ва́ша сѣмени свое҆го, и҆ дре́ва села̀ ва́шего не дадꙋт꙽ плода̀ свое҆го·

И҆ а́ще посе́мъ соблꙋ́дите на страны̀, и҆ не и҆зво́лите послꙋшати мене, приложю̀ на в̂ы вре́дъ се́дмь по грѣхо́мъ ва́шимъ·

И напꙋщꙋ̀ на в̂ы ѕвѣри лю́тыѧ зем꙽ны́ѧ, і҆ и҆зъꙗ҆́дѧтъ в̂ы, и҆ потребѧт̑ ско́тъ ва́шъ, и҆ ма́ли сътворю̀ в̂ы, и҆ пꙋсты бꙋ́дꙋт꙽ пꙋтїе ва́ши, і҆ а҆ще си́мъ не нака́жетесѧ, но по́идете къ мн̂ѣ в непра́вдѣ, и҆ пои҆дꙋ и҆ а́зъ противꙋ ва́мъ во ꙗ҆́рости мое́и съ рве́нїем̑ и҆ погꙋблю̀ в̂ы а҆́зъ се́дми́жды грѣхъ ра́ди ва́ших꙽·

И҆ наведꙋ на́ вы мечъ мьстѧ́и сꙋда̀ завѣтнаго, и҆ въбѣгнете ли въ гра́ды ва́ша, пꙋщꙋ на́ вы см҃рть, и҆ въпаде́те въ рꙋцѣ вра́гъ ва́шихъ·

Вънегда̀ скорбѣти ва́мъ пи́ща хлѣ́бовъ.
тогда̀ и҆спекꙋтъ де́сѧть же́нъ хлѣ́бы ва́ша, въ е҆ді́нои пе́щи, и҆ ѿдадѧ́т꙽ хлѣ́бы ва́ша въ мѣрꙋ, и҆ ѧ́сте и҆ не насыти́тесѧ·

А҆ще же и҆ симъ не послꙋшае́те менѐ, и҆ по́идете къ мнѣ̀ страно́ю и҆ а́зъ пои҆дꙋ проти́вꙋ ва́мъ въ ꙗ҆́рости съ рве́нїемъ и҆ накажꙋ̀ в̂ы а҆́зъ сед̑ми́жды грѣхъ ра́ди ва́шихъ·

И҆ ѧ́сти бꙋдете плоти сн҃въ ва́ших꙽, и҆ пло́ти дще́реи ва́шихъ ꙗ҆́сте·

И҆ сътворю̀ пꙋсты́ѧ ка́пища ва́ша, и҆ потреблю̀ древена́ѧ рꙋкотворе́нїа ваша, и҆ положꙋ̀ трꙋпы ваша на трꙋ́пѣх꙽ кꙋмир̑҇ ва́шихъ, и҆ възненавидит̑ васъ дш҃а моѧ·

И҆ сотворю̀ гра́ды ва́ша пꙋсты и҆ разсы́плю ст҃аѧ ва́ша, и҆ не ѻ҆бонѧ́ю вонѧ̀ тре́бъ ва́шихъ·

И҆ сътворю̀ пꙋстꙋ а҆́зъ зе́млю вашꙋ, и҆ въздивѧ́тсѧ ѻ҆ не́и вра́зи ваши живꙋщеи на не́и, и҆ разсы́плю в̂ы въ ꙗ҆́зы́ки и҆ потреби́тъ в̂ы приходѧ́и мече́мъ, и҆ бꙋ́детъ землѧ̀ ва́ша пꙋста̀, и҆ гра́ди ва́ши бꙋ́дꙋтъ пꙋсты·

И҆ в̂ы бꙋ́дете въ землѝ вра́гъ ва́шихъ, и҆ тогда̀ пра́знꙋетъ землѧ̀, и҆ бл҃говоли́тъ пра́зника е҆ѧ̀, въ всѧ̀ дн҃и ѻ҆пꙋстѣнїѧ е҆ѧ̀, пра́знꙋетъ ꙗ҆же не пра́знова въ пра́зницѣхъ ва́шихъ, е҆гда живѧ́сте на не́и·

И҆ ѻ҆ста́вльшим̑ ѿ ва́съ вложꙋ̀ стра́хъ въ срцд̑а и҆хъ, въ землѝ вра́гъ и҆хъ, и҆ пожене́тъ их̑ гла́съ листа летѧ́ща и҆ пробѣгнꙋт꙽ ꙗ҆́ко бѣжа́щїѝ ѿ ра́ти, и҆ падꙋтъ н̂ики́мже гони́ми.
и҆ пре́зритъ брат̑ бра́та а҆ки на ра́ти ники́мже гони́ми и҆ не възмо́жете сꙋпроти́витисѧ врагом̑ ва́шимъ·

И҆ поги́бнете въ странах̑, и҆ сътреби́т꙽ в̂ы землѧ̀ враг̑҇ ваших̑.
и҆ ѻ҆ставшїѝ ѿ вас̑҇ и҆стлѣют̑ за грѣхѝ их̑ и҆ за грѣхѝ ѿц҃ъ и҆хъ, въ землѝ враг̑҇ и҆хъ и҆стлѣ́ютъ·

І҆ и҆сповѣ́дѧтъ грѣхѝ своѧ̀ и҆ грѣхѝ ѿц҃ъ своих̑, ꙗ҆́ко престꙋпи́ша и҆ презрѣша мѧ̀, и҆ ꙗ҆́ко ходи́ша предо мно́ю в непра́вдѣ, и҆ а́з꙽ пои҆дꙋ противꙋ и҆мъ въ гнѣ́вѣ въ ꙗ҆́рости страно́ю и҆ въведꙋ ѧ҆̀ въ землѝ вра́гъ и҆хъ.
тогда̀ смири́тсѧ срцд̑е и҆хъ непокори́вое, и҆ тогда̀ позна́ют꙽ грѣхъ и҆хъ, и҆ въспомѧнꙋ̀ завѣт꙽ і҆а҆ковль, и҆ завѣтъ і҆саа́ковъ, и҆ завѣтъ а҆враа́мль помѧнꙋ̀, и҆ зе́млю помѧнꙋ·

землѧ́ же ѻ҆ста́нетсѧ ѿ ни́хъ, тогда̀ прїиметъ землѧ̀ пра́зники своѧ̀, вънегда̀ ѻ҆пꙋстѣти е҆й и҆хъ ра́ди, и҆ ѻ҆ни прїимꙋтъ своѧ̀ безако́нїѧ, сего̀ ра́ди и҆же презрѣша сꙋды̀ моѧ̀, и҆ повелѣнїи мои҆хъ въз꙽негодова̀ дш҃а их̑·

И҆ ꙗ҆́ко не бѧ́хꙋ л̂и въ землѝ вра́гъ свои҆хъ и҆ не призрѣх꙽ и҆хъ, н̂иже възнегодова́хъ и҆хъ, ꙗ҆ко потреби́ти ѧ҆̀, и҆ разсы́пати завѣтъ мои и҆же с ни́ми, а҆́зъ г҃ь б҃ъ и҆х꙽.
и҆ помѧнꙋхъ на завѣт꙽ мо́и прьвы́и, ꙗ҆́ко и҆зведо́хъ и҆хъ и҆зъ землѧ̀ е҆гѷпетьскїѧ̀, ѿ до́мꙋ рабо́ты прд̑е страна́ми е҆же быхъ и҆мъ бм҃ъ а҆зъ г҃ь·

Се сꙋды, и҆ повелѣ́нїѧ и҆ закон̑҇, и҆же да́лъ г҃ь, междꙋ собо́ю, и́ межд̑ꙋ сн҃ы і҆и҆л҃вы въ горѣ сина́истѣи, рꙋко́ю моѷсїевою·

Глв̑҇а, к҃з·

И рече г҃ь къ моѷсїю гл҃ѧ, гл҃и сн҃омъ і҆и҆лвымъ, и҆ рече́ши къ ним̑ гл҃ѧ, чл҃къ и҆же а҆ще мо́литсѧ молбо́ю, за и҆зъмѣнꙋ дш҃а свое҆ѧ̀ г҃ꙋ, да бꙋдꙋтъ цѣна̀ мꙋжеска по́лꙋ, ѿ, к҃, лѣтъ, д̂о ѯ҃, лѣтъ, да бꙋ́детъ цѣна е҆го, н҃, дидра́гмъ сребра̀ мѣрою ст҃ою·

А҆ же́ньска по́лꙋ да бꙋ́дет꙽ цѣна̀, л҃, дидра́гмъ.
а҆ще же ѿ е҃ лѣтъ, д̂о к҃, лѣтъ.
да бꙋ́детъ цѣна̀ мꙋжескꙋ по́лꙋ к҃, дидра́гмъ, же́ньскꙋ же по́лꙋ і҃, дидра́гмъ·

ѿ мцс̑҇а же е҆ді́наго до, е҃, лѣт꙽.
да бꙋдетъ цѣна̀ мꙋжеска по́лꙋ е҃, дидра́гмъ сребра̀.
а҆ же́ньска по́лꙋ, г҃, дидра́гмы сребра̀, а҆ще л̂и ѿ ѯ҃, лѣт꙽ и҆ вы́ше, а҆́ще л̂и е҆сть мꙋжескъ по́лъ да бꙋ́детъ цѣна̀ е҆го, е҃і, дидра́гм꙽ сребра̀, а҆ же́ньска полꙋ і҃, дидрагм̑·

А҆ще л̂и ѹ҆бо́гъ е҆сть цѣною е҆го да ста́нетъ прд̑е жерце́мъ, и҆ да ѻ҆цѣни́тъ е҆го жре́цъ ꙗ҆коже мо́жетъ рꙋка̀ ѻ҆бѣща́вшагосѧ, та́ко ѻ҆цѣ́нитъ е҆го жре́цъ·

А҆ще л̂и ѿ скота̀, приноси́маго ѿ них̑ да́ръ г҃ꙋ, и҆же а҆ще да́ст꙽ ѿ си́хъ г҃ꙋ, бꙋ́детъ ст҃о·

да не и҆з꙽мѣни́ши добра̀ за зло̀, а҆ ни зла̀ за добро̀, а҆ще л̂и и҆змѣнѧ́ѧ и҆змѣни́ши с̂е скотъ скотомъ, да бꙋ́дет꙽ и҆ то́и и҆змѣне́нїе ст҃о·

А҆́ще ли всѧ́къ скот̑ нечи́стъ е҆сть, ѿ ни́хже не прино́ситсѧ даръ г҃ꙋ.
да поста́витъ ско́тъ прд̑е жрьце́мъ, и҆ ѻ҆цѣн́итъ и҆̀ жре́цъ междꙋ до́брымъ и҆ междꙋ злы́мъ, ꙗ҆́коже ѻ҆цѣн́итъ жре́цъ та́ко да бꙋдетъ·

А҆ще л̂и и҆скꙋ́плѧѧ̀ и҆скꙋпит̑ и҆̀ да приложит̑ пѧ́тꙋю ча́сть къ цѣнѣ̀ е҆го·

и҆ чл҃къ а҆ще ст҃итъ до́мъ сво́и ст҃ынею г҃ꙋ, да ѻ҆цѣ́нитъ и҆̀ жре́цъ междꙋ̀ до́брымъ и҆ междꙋ̀ злы́мъ.
ꙗ҆́коже ѻ҆цѣ́нитъ и҆̀ жре́цъ, та́ко да ста́нетъ·

А҆ще л̂и ѻ҆сщ҃аѧ е҆го и҆скꙋпитъ хра́мъ сво́и, да приложи́тъ на сѐ пѧтꙋю ча́сть сребра̀ цѣны̀ е҆го и҆ да бꙋ́детъ е҆мꙋ.
а҆́ще л̂и ѿ ни́въ ѻ҆дръжа́нїѧ е҆го, ѻ҆ст҃итъ чл҃къ г҃ꙋ, и҆ да бꙋ́детъ цѣна̀ е҆го по сѣѧ́нїю е҆го, спꙋ́дъ ꙗ҆чме́ню и҃, дидра́гмъ сребра̀ а҆ще л̂и ѿ лѣта ѻ҆ставле́нїѧ, ѻ҆ст҃ит̑ ни́вꙋ свою̀, по цѣнѣ̀ е҆ѧ̀ да ста́нет꙽·

А҆ще л̂и послѣди ѻ҆ставле́нїѧ̀ ѻ҆ст҃ит꙽ ни́вꙋ е҆го, да съчтет̑ е҆мꙋ сребро̀ жрѐц꙽, з҃, лѣтъ ѻ҆ста́вшаѧ̀ до лѣта ѻ҆ставле́нїѧ̀, и҆ да ѹ҆имет꙽ ѿ цѣны̀ е҆го·

И҆ а҆ще и҆скꙋ́питъ ни́вꙋ свою̀ ѻ҆сщ҃аѧ ю҆̀ да приложит̑, пѧ́тꙋю ча̀сть сребра̀, къ цѣнѣ е҆го и҆ да бꙋ́дет꙽ е҆мꙋ·

А҆ще л̂и не скꙋ́питъ ни́вы да ѿда́ст꙽ ни́вꙋ и҆номꙋ чл҃кꙋ по се́м꙽ да не и҆скꙋ́пит꙽ и҆̀·

Но да бꙋ́детъ ни́ва минꙋвша́го ѻ҆ставле́нїѧ, ст҃а и҆ хва́лна г҃ꙋ, а҆ки зем̑лѧ̀ ѿлꙋче́наѧ жрьцꙋ, да бꙋ́детъ въ ѻ҆дръжа́нїе е҆го·

А҆ще л̂и ѿ ни́вы притѧжетъ, и҆же нѣсть ѿ села̀ ѻ҆дръжа́нїѧ е҆го ѻ҆ст҃и́тъ г҃ꙋ, да съчте́тъ е҆мꙋ жрец̑҇ съвръше́нїе цѣны̀, ѿ лѣта ѻ҆ставле́нїѧ, и҆ да ѿда́стъ цѣнꙋ въ то́и дн҃ь въ ст҃ыню г҃ꙋ·

И҆ въ лѣто ѻ҆ставле́нїѧ да сѧ ѿда́ст꙽ ни́ва чл҃кꙋ ѿ него́же е҆сть притѧжа́лъ ю҆̀, е҆гоже бѣ ѻ҆дръжа́нїе земно́е·

И҆ всѧ́ка цѣна̀ да бꙋ́детъ въ мѣрꙋ ст҃ꙋ к҃, мѣръ да бꙋ́детъ дидра́гм꙽·

Всѧ́к꙽ прьвенец̑҇ и҆же а҆́ще роди́тсѧ въ ско́тѣ твое҆мъ да бꙋ́дет꙽ г҃ꙋ, и҆ да не ѻ҆ст҃ит꙽ е҆го никто́же, а҆ще телец̑҇ а҆ще ѻ҆вча̀ г҃ꙋ е҆сть·

А҆́ще ли ѿ четвероно́жныхъ нечи́стыхъ да и҆змѣни́тъ по цѣнѣ е҆го, и҆ да приложи́тъ е҃ ю ча́сть е҆го к семꙋ, и҆ да бꙋ́детъ е҆мꙋ·

А҆ще ли не и҆скꙋ́питсѧ.
да сѧ прода́ст꙽ по цѣнѣ е҆го·

Всѧ́к же ѻ҆бѣтъ и҆же а҆ще ѻ҆бѣща́етъ чл҃къ г҃ꙋ, ѿ всего̀ е҆ли́ко е҆мꙋ е҆сть ѿ чл҃ка до скота̀, и҆ ѿ ни́въ ѻ҆дръжа́нїѧ е҆го, не ѿда́стъ ни́же и҆скꙋпит̑ всѧ́каго ѻ҆бѣта ст҃аѧ ст҃ых꙽ бꙋ́дет꙽ г҃ꙋ·

И҆ ѿ всѧ́каго ѻ҆бѣта и҆же а҆ще ѻ҆бѣща́етъ чл҃къ, не и҆скꙋ́питсѧ, см҃ртїю да ѹ҆́мретъ·

Всѧ́ка десѧти́на земна́ѧ ѿ сѣмене земна́го и҆ ѿ плода̀ дре́внаг̑҇, г҃ꙋ е҆сть, ст҃о г҃ꙋ·

А҆ще ли и҆скꙋпа́ѧ и҆скꙋ́питъ чл҃къ десѧти́нꙋ е҆го е҃ ю ча́сть е҆го да приложит̑ к немꙋ, и҆ да бꙋ́детъ е҆мꙋ·

И҆ всѧ́ка десѧти́на воло́въ и҆ ѻ҆ве́цъ, и҆ всѧ́ко е҆же а҆ще прїидетъ въ число̀ под̑ жезлъ десѧ́тое да бꙋ́детъ ст҃о г҃ꙋ·

Не и҆з꙽мѣнѝ до́браго злы́мъ а҆ ни до́брымъ зла́го, а҆ще ли и҆змѣне́нїемъ и҆з꙽мѣни́ши е҆̀ тогда̀ т̂о и҆ и҆змѣне́нїе е҆го бꙋдетъ ст҃о, да сѧ не и҆скꙋ́питъ·

Се сꙋть за́повѣди, ꙗ҆́же заповѣда̀ г҃ь моѷсїю и҆ къ сн҃ом꙽ і҆и҆л҃вымъ въ горѣ сина́истѣи·

Коне́цъ кни́гамъ третимъ моѷсїѻ҆вымъ·

и҆́мать в себѣ глв̑҇а, к҃з·