ЧЄТВЄРТЫИ КНИ́ГИ МОЇСЇЄВЫ ЧИСЛА

Глв̑҇а, а҃·

И гл҃а г҃ь къ моѷсїю, въ пꙋсты́ни сина́истѣи, въ хра́мѣ свѣдѣ́нїѧ, въ а҃ дн҃ь, мцс̑҇а втора́го, втора́го лѣта, по и҆зъше́ствїи их̑, ѿ землѧ̀ е҆гѷпетьскїѧ·

Гл҃ѧ възмѣте съчтенїе всего со́ньма сн҃овъ і҆и҆л҃въ по роже́нїѧх̑ и҆хъ, и҆ по домо́мъ ѻ҆ч҃ьства и҆хъ, и҆ по числꙋ̀ и҆ме́нъ и҆хъ, всѧ́къ мꙋжескъ полъ, по глава́мъ и҆хъ·

ѿ дво́юдесѧтѝ лѣт꙽ и҆ вы́ше, и҆ всѧк̑҇ и҆ды́и съ си́лою і҆и҆л҃вою, съглѧда́ти и҆хъ по си́ле и҆хъ, т̂ы, і҆ а҆а҆ро́нъ, съзира́ите и҆хъ·

И҆ с ва́ми да бꙋ́дꙋт꙽ по си́ле и҆хъ ко́ждо и҆хъ.
кождо по племе́ни, ка́ждого ѿ кн҃ѕеи, по домо́м꙽ ѿч҃ьства да бꙋ́детъ·

И҆ сїѧ и҆мена̀ мꙋже́и, и҆же ста́нꙋтъ с ва́ми.
ѿ рꙋви́ма, е҆лисꙋръ, сн҃ъ седиѹ҆́ровъ·

И҆ ѿ симеѻ́на, салами́иль, сн҃ъ сꙋрисада́и·

И҆ ѿ і҆ю́ды, наа҆ссо́нъ, сн҃ъ а҆минада́вль·

И ѿ и҆саха́ръ, наѳанаи҆ль, сн҃ъ сога́ровъ·

и҆ ѿ заѹ҆ло́на, елиав̑҇, сн҃ъ хело́нь·

ѿ сн҃ов꙽ и҆ѻ́сифль и҆ ѿ е҆фрѣмль, е҆лиса́мъ, сн҃ъ семиѹ҆́довъ·

И҆ ѿ манасі́ѧ гамалі́илъ, сн҃ъ фадасꙋровъ·

и҆ ѿ веньа҆ми́на, а҆вида́нъ, сн҃ъ гедеѻ́нов̑҇·

И҆ ѿ да́на а҆хезеръ сн҃ъ а҆м꙽мисадаев̑҇·

и҆ ѿ а҆си́ра, фага́и҆лъ, сн҃ъ е҆храновъ·

ѿ га́да е҆лиса́фъ, сн҃ъ рагꙋ́иловъ·

И҆ ѿ неѳали́ма, а҆хире́и сн҃ъ е҆на́нь·

Сїѝ нарече́нїи со́ньма, кн҃ѕи ѿ племе́нъ, по ѿч҃ьства́хъ и҆хъ, ты́сꙋщницы і҆и҆л҃вы сꙋть·

И҆ поѧ̀ моѷсїи і҆ а҆а҆ро́нъ мꙋжа сїѧ нарече́ныѧ и҆менемъ·

Ве́сь же со́ньм꙽ събра́ша въ а҃ дн҃ь мцс̑҇а, втора́го, втора́го лѣта·

И҆ съглѧ́даша ѧ҆̀ по роже́нїѧхъ и҆хъ, и҆ по ѿч҃ьства́хъ и҆хъ, и҆ по числꙋ и҆мени и҆хъ ѿ к҃ лѣтъ и҆ вы́ше, всѧ́къ мꙋжескъ полъ по глава́мъ и҆хъ, ꙗ҆́коже повелѣ г҃ь моѷсїю, съглѧда́ша сїѝ въ пꙋсты́ни сина́истѣи·

И҆ бы́ша сн҃ове рꙋви́мли прьве́нца, і҆и҆л҃ва, по роже́нїю и҆хъ, и҆ по соньмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆мен̑҇ и҆хъ, и҆ по погла́вїю и҆хъ, всѧ́къ мꙋжескъ полъ ѿ к҃ лѣтъ и҆ вы́ше, всѧ́къ и҆ды́и съ си́лою съглѧда́нїѧ их̑ ѿ племе́ни рꙋви́млѧ·

҂м҃, ҂ѕ҃, и҆ е҃, со́тъ·

Сн҃овъ же симеѻ́новыхъ, по роже́нїю и҆хъ и҆ по соньмо́мъ и҆хъ, и҆ по домо́мъ ѿч҃ьства их̑, и҆ по числꙋ̀ и҆менъ их̑, и҆ по погла́вїю и҆хъ, всѧ́к꙽ мꙋже́скъ полъ ѿ к҃, лѣт꙽ и҆ вы́ше, всѧ́къ и҆ды́и съ си́лою съглѧда́нїе их̑ ѿ племе́ни симеѻ́нѧ.
҂н҃, ҂ѳ҃, и҆ т҃·

Сн҃овъ і҆ю́дины́хъ по роже́нїю и҆хъ, и҆ по соньмо́мъ и҆хъ, и҆ по домом̑ ѿч҃ьства и҆хъ, и҆ по числꙋ̀ и҆ме́нъ их̑, и҆ по погла́вїю и҆хъ, всѧ́къ мꙋжескъ полъ, ѿ к҃ лѣтъ и҆ вы́ше, всѧ́къ и҆ды́и съ си́лою, съглѧда́нїѧ и҆хъ, ѿ племе́ни і҆ю́дина ҂ѻ҃, ҂д҃, и҆ х҃·

И҆ ѿ сн҃овъ и҆саха́ровъ, по роже́нїю их̑, и҆ по соньмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆ме́нъ и҆хъ, и҆ по погла́вїю и҆хъ, всѧ́къ мꙋжескъ полъ, ѿ к҃ лѣтъ и҆ вы́ше, всѧ́къ и҆ды́и съ си́лою, съглѧда́нїе и҆хъ ѿ племе́ни и҆саха́рова, ҂н҃, и҆ ҂д҃, и҆ у҃·

И҆ ѿ сн҃овъ заѹ҆лонь по роженїю и҆хъ, и҆ по со́ньмомъ и҆х꙽, и҆ по домом̑ ѿч҃ьства их̑ по числꙋ̀ и҆ме́нъ и҆хъ, и҆ по погла́вїю и҆хъ, всѧ́къ мꙋжескъ полъ, ѿ к҃, лѣт꙽ и҆ вы́ше, всѧ́къ и҆ды́и съ си́лою съглѧда́нїе и҆хъ, ѿ племе́ни заѹ҆ло́нѧ, ҂н҃, и҆ ҂з҃, и҆ у҃·

И҆ ѿ сн҃овъ и҆ѻ҆сифль, и҆ сыновъ е҆фрѣмль, по роже́нїю и҆хъ, и҆ по сонмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆ме́нъ и҆хъ, и҆ по погла́вїю и҆хъ всѧ́къ мꙋжескъ полъ, ѿ к҃, лѣт꙽ и҆ вы́ше всѧ́къ и҆ды́и съ си́лою съглѧда́нїе их̑, ѿ племе́нъ е҆фрѣмль, ҂м҃, и҆ е҃ сот̑·

И҆ ѿ сн҃овъ манасі́инъ по роже́нїю их̑, и҆ по соньмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆ме́нъ и҆хъ, и҆ по погла́вїю и҆хъ всѧ́къ мꙋжескъ пол̑҇ и҆хъ, ѿ к҃, лѣтъ и҆ вы́ше, всѧ́къ и҆ды́и съ си́лою съглѧда́нїе и҆хъ ѿ племе́ни манасі́ина, ҂л҃, и҆ ҂в҃, и҆ с҃·

И҆ ѿ сн҃овъ веньа́минъ, по роже́нїю их̑ по соньмо́мъ и҆хъ, по домо́м꙽ ѻ҆ч҃ьства и҆хъ по числꙋ̀ и҆ме́нъ и҆хъ, по погла́вїю̀ и҆хъ, всѧ́къ мꙋжескъ полъ их̑, ѿ к҃ лѣтъ и҆ вы́ше, всѧ́къ и҆ды́и съ си́лою, съглѧда́нїе и҆хъ ѿ племе́ни веньѧ́мина, ҂л҃, и҆ ҂е҃ и҆ у҃·

И҆ ѿ сн҃ов꙽ га́довъ по роже́нїю и҆хъ, по соньмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆ме́нъ и҆хъ, и҆ по погла́вїю и҆хъ, всѧ́къ мꙋжескїи полъ и҆хъ, ѿ к҃, лѣтъ, и҆ вы́шеи, всѧ́къ и҆ды́и съ си́лою съглѧда́нїе и҆хъ ѿ племе́ни га́дова, ҂м҃, ҂е҃, и҆ х҃, и҆ н҃·

И҆ ѿ сн҃въ да́новъ по роже́нїю и҆хъ, и҆ по соньмо́мъ и҆хъ, и҆ по домо́мъ ѻ҆ч҃ьства и҆хъ, по числꙋ̀ и҆ме́нъ и҆хъ, и҆ по погла́вїю и҆хъ, всѧ́къ мꙋжескъ полъ и҆хъ, ѿ к҃ лѣт꙽ и҆ вы́ше, всѧк̑҇ и҆ды́и съ си́лою, съглѧда́нїе и҆хъ, ѿ племе́ни да́нова, ҂ѯ҃, и҆ ҂в҃, и҆ з҃ сот̑·

И҆ ѿ сн҃овъ а҆си́ровъ по роженїю и҆хъ, и҆ по соньмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆ме́нъ и҆хъ, по погла́вїю и҆хъ, всѧ́къ мꙋжескъ полъ и҆хъ ѿ к҃ лѣтъ и҆ вы́ше, всѧк̑҇ и҆ды́и съ си́лою съглѧда́нїе и҆хъ, ѿ племе́ни а҆сі́рова ҂м҃, и҆ ҂а҃, и҆ е҃ сот̑·

И҆ ѿ сн҃овъ неѳалимль по роже́нїю и҆хъ и҆ по соньмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆ме́нъ и҆хъ, и҆ по погла́вїю и҆хъ, всѧ́къ мꙋжескъ полъ и҆хъ ѿ к҃ лѣтъ и҆ вы́ше, всѧ́к꙽ и҆ды́и съ си́лою съглѧда́нїе и҆хъ, ѿ племе́ни неѳали́млѧ, н҃, и҆ ҂г҃, и҆ у҃·

Сїѧ съглѧда́нїѧ е҆же глѧда́ша моѷсїи съ а҆а҆ро́номъ, и҆ кн҃зи і҆и҆л҃вы, в҃і мꙋжїи.
мꙋжъ е҆ді́нъ ѿ племе́ни е҆ді́наго, ѿ племе́ни до́мꙋ ѿч҃ьства и҆хъ.
и҆ бысть всего съглѧда́нїѧ, сн҃въ і҆и҆л҃въ, съ си́лою и҆хъ, ѿ к҃ лт̑ѣ и҆ вы́ше, всѧ́къ и҆сходѧ́и въполча́тисѧ въ і҆и҆л҃ви, х҃, ты́сꙋщь и҆ ҂г҃, и҆ е҃ со́тъ, и҆ н҃·

Леви́ти же ѻтъ племе́ни ѻ҆ч҃ьства и҆хъ, не съглѧда́шасѧ въ сн҃охъ і҆ил҃выхъ·

И҆ рече г҃ь къ моѷсїю вѣждь племѧ̀ левгі́ино, да не съглѧда́еши е҆̀, и҆ числа̀ и҆хъ да не прїимеши средѝ сн҃овъ і҆и҆лвъ·

Ты́ же приста́ви леви́ты къ хра́мꙋ свѣдѣнїѧ, и҆ къ всѣмъ съсꙋ́домъ е҆го и҆ къ всемꙋ е҆ли́коже е҆сть в не́мъ·

да въздви́жꙋтъ сїѝ хра́мъ, и҆ вс̂ѧ съсꙋды е҆го, и҆ да слꙋжатъ в немъ, и҆ ѻ҆крс̑҇тъ хра́ма да сѧ въполча́тъ·

И҆ вънегда̀ въздви́гнꙋти хра́мъ, да разрꙋша́тъ леви́ты, и҆ вънегда̀ поста́вити хра́мъ да поста́вѧтъ, а҆ и҆ноплеме́ник̑҇ прикасаѧ́сѧ да ѹ҆́мрет̑·

И҆ да въполча́тсѧ сн҃ове і҆и҆л҃вы, мꙋж꙽ въ свое҆мъ чинꙋ̀, и҆ мꙋжъ въ свое҆мъ старѣи́шинъствѣ, съ си́лою свое҆ю·

Леви́ти же да сѧ въполча́тъ съпротивъ ѻ҆крс̑҇т꙽ хра́ма свѣдѣ́нїѧ, и҆ да не бꙋ́детъ съгрѣше́нїѧ въ сн҃охъ і҆и҆л҃выхъ, и҆ да снабдѧ́тъ леви́ти са́ми, снабдѣ́нїе хра́ма свѣдѣ́нїѧ·

И҆ сътвори́ша сн҃ве і҃и҆л҃вы по всемꙋ̀, е҆ли́коже заповѣда̀ г҃ь моѷсїю, та́ко сътвори́ша·

Глв̑҇а, в҃·

И рече г҃ь къ моѷсїю і҆ а҆аро́нꙋ гл҃ѧ, чл҃къ дръжа́исѧ по чинꙋ свое҆мꙋ, и҆ зна́менїю и҆ по домо́мъ ѿч҃ьства и҆хъ, да сѧ въполча́ют꙽ сн҃ве і҆и҆л҃вы прд̑е гм҃ъ, ѻ҆крс̑҇тъ хра́ма свѣдѣ́нїѧ, да сѧ въполча́ютъ сн҃ове і҆и҆л҃вы·

Въполча́ющїѝсѧ пе́рвїи, на въсто́къ чи́на по́лка і҆ю́дина, съ си́лою и҆хъ, и҆ кн҃зь ѿ сн҃овъ і҆юдинъ наа҆ссо́нъ, сн҃ъ а҆минада́вль, си́ла е҆го съглѧда́наѧ, ҂о҃, и҆ ҂д҃, и҆ х҃·

И҆ въполчитсѧ с ни́мъ племѧ и҆саха́рово, кн҃зь же сн҃овъ и҆саха́ровъ наѳа́иль сн҃ъ сога́ровъ, си́ла е҆го съглѧда́наѧ, ҂н҃, и҆ ҂д҃, и҆ у҃·

И҆ въполчи́тсѧ племѧ̀ заѹ҆ло́не, кн҃зь же сн҃овъ заѹ҆ло́нь, е҆лїа́въ сн҃ъ хело́нь си́ла е҆го съглѧда́наѧ ҂н҃, ҂з҃, и҆ у҃·

Всѣхъ же съчте́ни ѿ по́лка і҆ю́дина, р҃, ты́сꙋщъ, ҂п҃, ҂ѕ҃, и҆ у҃, съ си́лою и҆хъ·

Пръвыи да поставлѧ́ютъ чи́ны по́лка, рꙋви́м꙽ къ ю́гꙋ съ си́лою е҆го, кн҃зь же сн҃овъ рꙋви́мль, е҆лисꙋр꙽ сн҃ъ седиѹ҆́ровъ, си́ла е҆го, съглѧда́наѧ ҂м҃, и҆ ҂ѕ҃, и҆ е҃ сот̑·

И҆ въполчи́тсѧ с ни́мъ, племѧ́ симеѻ́не кнѧз̑ же сн҃овъ симеѻ́нь саламі́иль, сн҃ъ сꙋрисада́инъ, и҆ си́ла е҆го съчита́наѧ, ҂н҃, и҆ ҂ѳ҃, и҆ т҃·

И҆ въполчи́тсѧ племѧ́ гадово кн҃зь же сн҃въ га́довъ, е҆лиса́ѳъ, сн҃ъ рагꙋ́иль, си́ла е҆го съглѧда́наѧ ҂м҃, и҆ ҂е҃, и҆ х҃, и҆ н҃·

Всѣхъ же съчтенїи полка рꙋви́млѧ, ҂р҃, ҂н҃, и҆ ҂а҃, и҆ у҃, и҆ н҃, съ си́лою и҆хъ·

вторы́и да поставлѧ́ю҆тъ чи́ны полка, и҆ да въздвизае҆тсѧ хра́мъ свѣдѣ́нїѧ, съ по́лком꙽ леви́тъским꙽ средѣ̀ по́лковъ, ꙗ҆́коже въполча́ютсѧ, та́же и҆ да въста́ют̑ ко́иждо держа́сѧ по чинꙋ свое҆мꙋ под̑ знаменїе҆мъ чи́на свои҆мъ·

Знаменїе же по́лка е҆фрѣмлѧ, подле мо́рѧ съ си́лою их̑, кн҃зь же сн҃овъ е҆фрѣмль, е҆лиса́ма сн҃ъ а҆мїю́довъ, си́ла е҆го съчета́наѧ ҂м҃, и҆ е҃ ст̑о·

И҆ въполчи́тсѧ с ни́мъ племѧ́ манасі́ино кн҃зь же сн҃овъ манасі́инъ, гамалі́илъ сн҃ъ фад̑дасꙋровъ, си́ла е҆го, съглѧда́наѧ, ҂л҃, и҆ ҂в҃, и҆ с҃·

И҆ въполчи́тсѧ и҆же дръжа́тсѧ племѧ́ вениа҆миново кн҃зь же сн҃овъ веньѧ҆ми́нь а҆вида́нъ сн҃ъ гадеѻ́нинъ, си́ла е҆го съчета́наѧ ҂л҃, ҂е҃, и҆ у҃,·

Всѣх же съчтенїи полка е҆фрѣмлѧ ҂р҃, и҆ ҂и҃, и҆ р҃, съ си́лою и҆хъ·

Третїи да поставлѧ́ютъ чины по́лка, да́нъ, къ сѣ́верꙋ съ си́лою и҆хъ кн҃зь же сн҃въ да́новъ, а҆хие҆зе́ръ сн҃ъ а҆мисада́и, си́ла е҆го съглѧда́наѧ ѯ҃, ты́сꙋщъ, и҆ ҂в҃, и з сот̑·

Въполчи́т же сѧ и҆же дръжа́тсѧ е҆го с ни́мъ племѧ́ а҆си́рово, кн҃зь же племе́ни а҆си́рова фаге́на, сн҃ъ е҆хра́новъ, си́ла е҆го съглѧда́наѧ ҂м҃, и҆ ҂а҃, и҆ е҃ сот̑·

И҆ въполчи́тсѧ племѧ́ неѳали́мле, кн҃зь же сн҃овъ неѳали́мль, а҆хире́и сн҃ъ е҆на́нь си́ла е҆го съглѧда́наѧ, ҂н҃, и҆ ҂г҃, и҆ у҃·

Всѣх же съчтенїи по́лка данова р҃ ты́сꙋщъ, и҆ ҂н҃, и҆ ҂з҃, и҆ х҃, съ си́лою и҆хъ.
послѣднїи да поставлѧ́ют̑ чины по́лка по знаменїю и҆хъ·

Сїе съчита́нїе сн҃овъ і҆и҆л҃въ, по домо́м꙽ ѿч҃ьства и҆хъ вс̂ѧ съглѧда́нїѧ по́лковъ съ силами и҆хъ, х҃, ты́сꙋщь, и҆ ҂г҃, и҆ е҃ сот̑, и҆ н҃·

Леви́ти же не съглѧда́шасѧ, средѝ сн҃овъ і҆и҆л҃въ, ꙗ҆коже заповѣда̀ г҃ь моѷсїю·

И҆ сътвори́ша сн҃ове і҆и҆л҃вы вс̂е е҆ли́ко заповѣда г҃ь моѷсїю·

Та́ко въполча́хꙋсѧ по́ чинехъ и҆хъ, и҆ та́ко въстава́хꙋ е҆ді́ныи кои́ждо их̑ дръжа́щесѧ по со́ньмꙋ их̑, и҆ по домом̑ ѿч҃ьства их̑·

Глв̑҇а, г҃·

Сїѧ же рожде́нїѧ моѷсїѧ і҆ а҆ро́на, въ дн҃ь во́нже гл҃а г҃ь моѷсїю на горѣ сина́истѣи·

Сїѧ же и҆мена̀ сн҃овъ а҆а҆ро́нь прьвене́цъ, нада́въ, и҆ а҆виѹ҆́дъ, е҆лиа҆за́ръ.
и҆ѳама́ръ·

Сїѝ и҆мена̀ сн҃овъ а҆а҆ро́нь жрець пома́заныѧ, и҆́мже съвершиша́сѧ рꙋцѣ их̑ жрѣти, и҆ сконча́сѧ нада́въ, і҆ а҆виѹ҆дъ, прд̑е гм҃ъ, приносѧ́щи и҆мъ ѻ҆́гнь чю́ждъ прд̑е гм҃ъ, въ пꙋсты́ни сина́истїи, ча́дъ же ѹ҆ нихъ не бы́сть и҆мъ и҆ жре́чествовахꙋ, е҆лиа҆зор̑҇ и҆ѳамаръ, съ а҆а҆рономъ ѻ҆ц҃емъ их̑·

И҆ рече г҃ь къ моѷсїю гл҃ѧ, пои҆ми племѧ̀ левїи҆но, и҆ поста́вї ѧ предъ а҆а҆ро́номъ жерце́мъ, и҆ да слꙋжатъ е҆мꙋ·

И҆ да стрегꙋтъ стражбы е҆го и҆ стра́жбы сн҃овъ і҆и҆л҃въ предъ храмом̑ свѣдѣ́нїѧ, слꙋжи́ти слꙋжбꙋ хра́м꙽нꙋю·

И҆ да снабдѧт̑ вс̂ѧ сосꙋды хра́ма свѣдѣ́нїѧ, и҆ стра́жбы сн҃овъ і҆и҆л҃въ по всѣмъ дѣломъ храма, и҆ да дасѝ леви́ты а҆а҆ро́нꙋ братꙋ твое҆мꙋ, и҆ сн҃омъ е҆го жерцемъ да́ни, дани б̂о сꙋть е҆мꙋ сїѝ ѿ сн҃овъ і҆и҆л҃въ·

А҆а҆рона ж̑ и҆ сн҃ы е҆го, пристави въ хра́мѣ свѣдѣнїѧ̀ и҆ да снабдѧ́тъ жре́чество и҆хъ.
и҆ вс̂е е҆же ѹ҆ ѻ҆лтарѧ и҆ внꙋт́ренѧѧ̀ завѣсы, и҆ноплеме́никъ же прикаса́ѧ҆сѧ да ѹ҆́мретъ·

И҆ рече г҃ь къ моѷсїю гл҃ѧ, с̂е а҆зъ взѧхъ леви́ты, ѿ средѝ сн҃овъ і҆и҆л҃въ, въ мѣсто всего̀ прьвенца̀, ѿвръза́ющаго ѹ҆тро́бꙋ ѿ сн҃овъ і҆и҆л҃въ, и҆ да бꙋ́дꙋтъ мнѣ леви́ты·

Мнѣ б̂о всѧ́къ прьвене́цъ во́нже дн҃ь побихъ всѧкъ прьвенецъ въ землѝ е҆гѷпетъстѣи, и҆ ѻст҃ихъ себѣ всѧ́къ первене́цъ въ і҆и҆л҃и, ѿ чл҃ка до скота̀ мнѣ̀ да бꙋ́дꙋтъ, а҆зъ г҃ь·

И҆ рече г҃ь къ моѷсїю въ пꙋсты́ни сина́истѣи гл҃ѧ, съглѧда́и сн҃овъ леви́инъ по домо́мъ ѿч҃ьства и҆хъ, и҆ по со́ньмꙋ и҆хъ, и҆по рожде́нїю и҆хъ, всѧ́къ мꙋжескъ полъ ѿ мцс̑҇а е҆дінаго и҆ вы́ш꙽ше, съглѧдае҆ши и҆хъ·

И҆ съчтѐ и҆хъ моѷсїи по велѣ́нїемъ гн҃имъ ꙗ҆коже повелѣ е҆мꙋ г҃ь·

Бѣѧ҆хꙋ же сїѝ сн҃ове леви́ини ѿ и҆ме́нъ и҆хъ, гер̑҇сонъ, каа҆ѳъ, и҆ мера́ри·

Сїѝ же и҆мена сн҃овъ геръсо́нь по соньмꙋ и҆хъ ловенїи симе́и·

Сн҃ове же каа́ѳовы по племе́ни и҆хъ, а҆мъвра́мъ, и҆ сага́ръ, и҆ хеврон̑҇, и҆ ѻ҆зїиль·

Сн҃ове же мера́рины по племе́ни и҆хъ, мꙋли, и҆ мꙋси́лъ, сїѝ сꙋть со́ньми левъвит̑стїи, по до́момъ ѿч҃ьства и҆хъ.
ѿ герсо́на со́ньмъ ловенїинъ, и҆ соньм꙽ симеи҆нь, сїѝ сꙋть со́нми герсо́новы съглѧда́нїе и҆хъ по числꙋ всего̀ мꙋжеска полꙋ, ѿ мцс̑҇а е҆ді́наго и҆ вы́ше, съглѧда́нїѧ и҆хъ, з҃ ты́сꙋщъ, и҆ е҃ сот̑·

Сн҃ове же геръсо́новы за хра́момъ да въполча́ютсѧ къ мо́рю.
кн҃зь же до́мꙋ ѿч҃ьства и҆хъ со́ньма геръсо́нѧ, е҆лисафъ сн҃ъ даи҆лъ.

Стражба же сн҃овъ геръсо́новъ, въ хра́мѣ свѣдѣ́нїѧ, хра́мъ и҆ покро́въ е҆го и҆ покро́въ две́рїи хра́ма свѣдѣнїѧ, и҆ ѻ҆по́ны две́рныѧ, и҆ завѣса две́рнаѧ притво́ра, и҆же е҆сть ѹ҆ храма, и҆ всѧ дѣла е҆го·

ѿ каа́ѳа соньмъ а҆мъврамль е҆ді́нъ, и҆ со́ньмъ и҆саа́ровъ е҆ді́нъ, и҆ со́ньмъ хевро́нь, е҆ді́нъ и҆ со́ньмъ ѻ҆зі́ель е҆ді́нъ, сїѝ сꙋть со́ньми каа́ѳовы по числꙋ̀, всѧк̑҇ всѧк̑҇ мꙋжескъ пол̑, ѿ мцс̑҇а е҆ді́наг̑҇ и҆ выш̑҇ше и҃ ты́сꙋщъ, и҆ х҃, стрегꙋщїѝ, стра́жбы ст҃ых꙽·

Соньми сн҃овъ каа҆ѳовъ да въполча́ютсѧ по странѣ̀ хра́ма къ ю́гꙋ.
кн҃ѕь же до́мꙋ ѿч҃ьства и҆хъ со́ньма каа́ѳова, е҆лисафа́нъ, сн҃ъ ѻ҆зі́иль·

Стра́жба же и҆хъ, ковче́гъ и҆ трапе́за, и҆ свѣти́ло, и҆ ѻ҆лтарь и сосꙋ́ды ст҃го, е҆ли́ко в ни́хже слꙋжат̑ и҆ покро́въ, и вс̂ѧ дѣ́ла их̑·

Кн҃ѕь же над̑ кн҃ѕи леви́тъскими, е҆лїазаръ, сн҃ъ а҆а҆ро́на жерца̀, стрегꙋщїи стра́жбы ст҃ыхъ·

ѿ мера́ра же соньмъ мꙋлинь, и҆ со́ньмъ мꙋсїилинь, сїѝ сꙋт꙽ со́ньми мера́рини, и҆ съглѧда́нїе и҆хъ, по числꙋ̀ всѧ́къ мꙋжескъ полъ, ѿ мцс̑҇а е҆ді́наго и҆ вы́ше, ҂ѕ҃, и҆ с҃·

Кн҃ѕь же домꙋ ѿч҃ьства и҆хъ, племени мера́рина, и҆сꙋрїи́ль, сн҃ъ а҆вихеѻ҆въ, ѿ странѣ хра́ма, да сѧ въполча́ютъ къ сѣ́верꙋ·

Съглѧда́нїе стра́жбы сн҃овъ мера́ринъ, дъски хра́ма, и҆ розво́ры е҆го, и столпы̀ е҆го и҆ стоѧ́ла и҆хъ, и҆ всѧ̀ съсꙋды е҆го, и вс̂ѧ дѣ́ла е҆го, и҆ столпы̀ притворъны́ѧ, и҆же ѻ҆́крс̑҇тъ, и҆ стоѧ́ла и҆хъ, и҆ коликѝ и҆хъ, и҆ ве́рви и҆хъ въполча́ю҆щисѧ съ пре́ди хра́ма на въсто́ки·

Моѷсїи же і҆ а҆а҆ро́нъ и҆ сн҃ове е҆го, стрегꙋще стра́жбы ст҃го.
въ стра̀жбах꙽ сн҃овъ і҆и҆л҃въ, а҆ и́ноплеме́нникъ прикоснꙋ́выисѧ да ѹ҆́мрет꙽·

Вс̂е съглѧда́нїе леви́тъско, ꙗ҆же съглѧда̀ моѷсїи, і҆ а҆а҆ро́нъ по велѣ́нїем꙽ гн҃им꙽ по племе́ни и҆хъ.
всѧ́къ мꙋжескъ полъ, ѿ мцс̑҇а е҆ді́наго и҆ вы́ше, ҂к҃, и҆ ҂в҃·

И҆ рече г҃ь къ моѷсїю гл҃ѧ съглѧдаи вс̂ѧ первенца мꙋжеск꙽ по́лъ сн҃въ і҆и҆л҃въ ѿ мцс̑҇а е҆ді́наго и вы́ше, и҆ възмѝ число̀ и҆хъ по и́мени и҆хъ, и҆ да пои́меши мнѣ леви́ты за вс̂ѧ первенцы сн҃овъ і҆и҆л҃въ, а҆зъ г҃ь·

И҆ скоты и҆хъ за вс̂ѧ первенцы въ скотѣхъ сн҃овъ і҆и҆л҃въ ѿлꙋчи́ши мн̂ѣ·

Съглѧда́ же моѷсїи, ꙗ҆́коже заповѣ́да е҆мꙋ г҃ь, всѧ́къ первене́цъ въ сн҃ѣхъ і҆и҆л҃выхъ, и҆ бы́ша вс̂и первенцы̀ мꙋжескаго полꙋ, по числꙋ̀ и҆ме́н꙽ ѿ мцс̑҇а е҆ді́наго, и҆ вы́ше ѿ съглѧда́нїѧ и҆хъ ҂к҃, ты́сꙋщъ и҆ ҂в҃, и҆ с҃, и҆ о҃г·

И҆ реч̑҇ г҃ь къ моѷсїю гл҃ѧ, пои҆мѝ леви́ты за вс̂ѧ первенцы̀ сн҃въ і҆и҆л҃въ, и҆ скоты леви́тъскы въ скота̀ мѣ́сто и҆хъ, и҆ бꙋ́дꙋтъ мн̂ѣ леви́ты, а҆зъ г҃ь·

И҆скꙋпъ же ѿ двꙋ сотъ, о҃г, ѿ и҆збыва́ющихъ прьвенцъ сн҃въ і҆и҆л҃въ над̑ леви́ты да въз́меши по е҃, си́кль на главꙋ̀, по си́клю ст҃омꙋ, и҆ да бꙋ́дет꙽ к҃, пѣ́нѧзеи си́кль·

И҆ дасѝ сребро̀ а҆а҆ро́нꙋ, и҆ сн҃омъ е҆го, и҆скꙋпъ ѿ и҆з꙽быва́ющихъ надъ ни́хъ·

И҆ вз̂ѧ моѷсїи сребро̀, и҆скꙋ́пное ѿ и҆збыва́ю҆щих̑ над̑ ни́хъ, на и҆скꙋпъ леви́том̑·

ѿ первене́цъ же сн҃овъ і҆и҆л҃въ, вз̂ѧ сребро̀, ҂а҃, тѯ҃е си́клевъ, по си́клю ст҃омꙋ·

И҆ даде моѷсїи ѻ҆кꙋ́пное сребро̀, и҆збы́вшихъ а҆а҆ро́нꙋ и҆ сн҃омъ е҆го по велѣ́нїемъ гн҃имъ, ꙗ҆́коже заповѣ́да г҃ь моѷсїю·

Глв̑҇а, д҃·

И рече г҃ь къ моѷсїю і҆ а҆а҆ро́нꙋ гл҃ѧ, пои҆ми старѣи́шинъство сн҃въ каа́ѳовъ ѿ среды̀ сн҃овъ левїи́нъ по со́ньмꙋ их̑, и҆ по домо́мъ ѿч҃ьства и҆хъ, ѿ к҃, и҆ е҃, лѣтъ и҆ вы́ше, да́же д̂о н҃, лѣтъ, всѧ́къ въходѧ́и слꙋжит̑ сътвори́ти вс̂ѧ дѣ́ла, въ хра́мѣ свѣдѣ́нїѧ·

Сїѧ же дѣлеса̀ сн҃овъ каа́ѳовъ, ѿ среды̀ сн҃овъ левїинъ, по соньмꙋ и҆хъ, и҆ по домо́мъ ѿч҃ьства и҆хъ, въ хра́мѣ свѣдѣ́нїѧ ст҃ого ст҃ыхъ·

И҆ да въни́дꙋтъ а҆а҆ро́нъ и҆ сн҃ы е҆го, е҆гда̀ въздви́гнетъсѧ по́лкъ, и҆ да съи́мꙋтъ завѣсꙋ ѻ҆сѣнѧ́ющꙋю, и҆ да ѻ҆бовью́т꙽ в н̂ю ковче́г꙽ свѣдѣ́нїѧ, и҆ да покры́ютъ е҆го покро́вомъ ко́жанымъ си́нимъ, и҆ да възложа́тъ на́нь ѻ҆де́ждꙋ вс̂ю си́нетънꙋю съверхꙋ, и҆ да вложа́т꙽ носи́ла·

На трапе́зѣ же пред̑ложе́нїѧ да положа́тъ на не́и, ѻ҆де́жꙋ вс̂ю багрѧ́нꙋю и҆ блю́да и҆ кади́лница и҆ ча́ша, і҆ и҆злива́лница и҆́миже възлива́ют꙽, и҆ хлб̑҇ѣ на не́и въсегда̀ да бꙋ́дꙋтъ·

И҆ да възложа́тъ на ню̀ ѻ҆де́ждꙋ червле́нꙋ, и҆ да покрыю́тъ е҆ѧ̀ покро́вомъ ко́жаным̑ си́нимъ, и҆ да въложат̑ носи́ла е҆ѧ̀·

И҆ да въз́мꙋтъ ѻ҆де́ждꙋ багрѧ́нꙋ, и҆ покры́ютъ свѣти́ло свѣтѧ́щеѐ, и҆ свѣщѝ е҆го, и҆ щипъцы̀ е҆го, и҆ ѻ҆цыщала е҆го и҆ вс̂ѧ съсꙋды ма́сла е҆го, и҆́миже слꙋжатъ е҆мꙋ·

И҆ да въложа́тъ и҆̀ и҆ вс̂ѧ съсꙋ́ды е҆го, въ покро́въ ко́жанъ си́нїи, и҆ да възложа́тъ е҆го на носи́ла·

На ѻ҆лтарь же златы́и да положа́тъ, ѻ҆де́жꙋ багрѧ́нꙋ, и҆ да покры́ютъ е҆го покро́вом꙽ кожаннымъ си́нимъ, и҆ да въложа́т꙽ носи́ла е҆го·

И҆ да възмꙋтъ вс̂ѧ сосꙋды слꙋже́бныѧ.
в ни́хже слꙋжатъ въ ст҃ыхъ, и҆ въложа́тъ въ ѻ҆де́жꙋ багрѧ́нꙋю, и҆ да покры́ютъ и҆хъ покро́вомъ ко́жанымъ си́нимъ, и҆ да возложа́тъ на носи́ла·

И҆ покро́въ да възложа́тъ на ѻ҆лтарь, и҆ покры́ютъ е҆го ѻ҆де́жею все́ю багрѧ́ною, и҆ да възложа́тъ на́нь вс̂ѧ сосꙋды е҆го и҆же слꙋжа́тъ въ ни́х꙽, и҆ кадилники и҆ ви́лицы, и҆ ча́ша, и҆ покро́въ, и҆ вс̂ѧ сосꙋды ѻ҆лтарѧ̀, и҆ да възложа́тъ на́ нѧ покро́въ ко́жанъ си́нь, и҆ да въложа́тъ носи́ла е҆го·

И҆ да възмꙋт꙽ ѻ҆де́жꙋ багрѧ́нꙋ, и҆ да покры́ютъ ѹ҆мыва́лницꙋ и҆ стоѧ́ла е҆ѧ̀, и҆ да въложа́ть ю҆̀ в поволо́кꙋ ко́жанꙋ си́ню, и҆ да възложа́тъ на носи́ла·

И҆ егда̀ сверша́ть а҆а҆ро́нъ и҆ сн҃ове е҆го, покрыва́ющи ст҃аѧ, и҆ вс̂ѧ сосꙋды ст҃аѧ, и҆ вънегда̀ въста́етъ по́лкъ·

Тогда̀ же да вни́дꙋтъ сн҃ове каа́ѳовы въздви́гнꙋти, да сѧ не прико́снꙋт꙽ ст҃ыхъ, да не ѹ҆мрꙋтъ, и҆ се е҆сть слꙋже́нїе сн҃въ каа́ѳовых̑, въ хра́мѣ свѣдѣ́нїѧ·

Смотри́тель же е҆лїа́за́ръ сн҃ъ а҆а҆ро́на жерца̀, и҆ еле́и свѣти́лныи, и҆ ѳемїѧ́мъ сложе́ныи, и҆ тре́бꙋ ꙗ҆́же вс̂ѧ дн҃и, и҆ еле́и пома́занїѧ смотре́нїе всего̀ хра́ма, і҆ ели́коже е҆сть в не́мъ въ ст҃омъ, и҆ въ всѣхъ дѣлехъ·

И҆ рече г҃ь къ моѷсїю і҆ а҆аро́нꙋ гл҃ѧ, да не потреби́те со́ньма племе́ни каа́ѳова, ѿ среды̀ леви́тов̑҇·

Се же да сътвори́те и҆мъ, и҆ жи́ви бꙋдꙋтъ и҆ не ѹ҆́мрꙋтъ, приходѧ́щим꙽ и҆мъ, къ ст҃ымъ ст҃ыхъ, а҆а҆ронъ и҆ сн҃ове е҆го, да вни́дꙋтъ, и҆ да ѹ҆стро́итъ и҆хъ, кое҆го́ждо по ношенїю е҆го да не вни́дꙋтъ внезапꙋ видѣти ст҃ое и҆ ѹ́мрꙋтъ·

И҆ рече г҃ь къ моѷсїю гл҃ѧ.
пои́ми старѣ́ишинъство сн҃овъ геръсо́нь, і҆ и҆же по домо́мъ ѿч҃ьства и҆хъ, и҆ по со́ньмомъ и҆хъ, и҆ по племе́немъ и҆хъ, ѿ к҃, и҆ е҃ лт̑ѣ и҆ вы́ше, да́же до н҃, лѣтъ, съглѧда́ите ѧ҆̀, всѧ́къ въходѧ́и слꙋжити слꙋжбꙋ и҆ твори́ти дѣлеса̀ въ хра́мѣ свѣдѣ́нїѧ·

Сїѧ слꙋжба соньма герсо́нова, слꙋжи́ти и҆ въздвиза́ти да въздви́жꙋтъ ѻ҆по́ны хра́ма, и҆ хра́ма свѣдѣ́нїѧ, и҆ покро́въ е҆го, и҆ покро́въ кожъ си́нь сꙋщїи све́рхꙋ, и҆ ѻ҆понꙋ две́ри ѹ҆ хра́ма свѣдѣ́нїѧ, и҆ ѻ҆по́нꙋ притво́рнꙋю, и҆ завѣсꙋ врат̑ притво́рныхъ, е҆ли́коже ѹ҆ хра́ма свѣдѣ́нїѧ, і҆ и́же ѻ҆крс̑҇тъ ѻ҆лтарѧ̀ и҆ ве́рви и҆хъ, и҆ вс̂ѧ сосꙋ́ды слꙋже́нїа и҆ всѧ̀ е҆ли́ка слꙋжатъ в ни́хъ·

да сътворѧ́тъ по сло́вꙋ а҆а҆ро́на и҆ сн҃въ е҆го, и҆ да бꙋ́детъ вс̂ѧ, по всѣмъ слꙋжбам꙽ и҆хъ, и҆ по всѣмъ дѣ́лесемъ и҆хъ, и҆ да съглѧда́еши и҆хъ по и҆ме́немъ вс̂ѧ дѣлеса ꙗ҆́же в них̑·

Сїѧ слꙋж́ба со́ньма сн҃овъ геръсо́новъ, по всѣмъ слꙋжбам꙽ и҆хъ, и҆ по всѣмъ дѣ́лесемъ и҆хъ, и҆ да съглѧда́еши и҆хъ по и҆ме́немъ вс̂ѧ дѣлеса ꙗ҆́же в них̑·

Сїѧ слꙋж́ба со́ньма сн҃овъ геръсо́новъ, въ хра́мѣ свѣдѣ́нїѧ, и҆ стра́жба и҆хъ въ рꙋцѣ ѳама́ра, сн҃а а҆аро́нѧ жерца̀·

Сн҃ове же мера́рїины по племе́ни и҆хъ, и҆ по домо́мъ ѿч҃ьства и҆хъ съглѧда́ите и҆хъ ѿ к҃, и҆ е҃, лѣтъ и҆ вы́ше да́же д̂о н҃, лѣтъ, и҆ съглѧда́ите их̑, всѧ́къ входѧ́и слꙋжи́ти, въ дѣ́ла хра́ма свѣдѣ́нїѧ·

Сїѧ снабдѣ́нїѧ въздви́женыхъ и́ми, по всѣмъ дѣлесе́мъ их̑, въ хра́мѣ свѣдѣ́нїѧ·

дъски хра́мныѧ и҆ заво́ры е҆го, и҆ столпы е҆го, и҆ стоѧ́ла е҆го, и҆ запо́ны две́рїи хра́ма, и҆ покро́въ е҆го·

Столпы же притворны́ѧ и҆ стоѧ́ла их̑, и҆ столпы̀ завѣ́сныѧ вра́тъ притво́ра и҆ стоѧ́ла и҆хъ, и҆ колкѝ и҆хъ и҆ ве́рви и҆хъ, и҆ вс̂ѧ съсꙋ́ды и҆хъ, и҆ вс̂ѧ слꙋжба и҆хъ, по и҆ме́немъ и҆хъ, съглѧда́ите и҆хъ, и҆ вс̂ѧ съсꙋ́ды стра́жбы въздви́жемыхъ и҆ми·

Сїѧ слꙋжба племе́ни сн҃въ мера́ринъ въ всѣхъ дѣлесѣхъ и҆хъ, въ хра́мѣ свѣдѣнїа въ рꙋцѣ ѳама́ра, сн҃а а҆а҆ро́нѧ жерца̀ и҆ съглѧда̀ моѷсїи і҆ а҆аро́нъ, и҆ кн҃ѕи і҆и҆л҃вы, сн҃ы каа́ѳовы по племе́ни их̑, и҆ по домо́м꙽ ѿч҃ьства их̑, ѿ к҃, и҆ е҃, лт̑ѣ и҆ выш̑҇ше да́же д̂о, н҃, лѣтъ, всѧ́къ въходѧ́и слꙋжити и҆ сътвори́ти дѣлеса̀, въ хра́мѣ свѣдѣ́нїѧ·

И҆ бы́сть съглѧда́нїе и҆хъ, по племе́немъ, и҆хъ, ҂в҃, з҃, со́тъ и҆ н҃·

Сеѐ съчте́нїе соньма, каа́ѳова, всѣхъ слꙋжа́щихъ въ хра́мѣ свѣдѣ́нїѧ, ꙗ҆́коже съглѧда̀ моѷсїи і҆ а҆а҆ро́нъ, по велѣ́нїемъ гн҃им꙽, въ рꙋцѣ̀ моѷсїи҆ни·

Съглѧда́нїе же сн҃овъ геръсо́новъ, по племе́немъ и҆хъ, и҆ по домо́мъ ѿчьства и҆хъ, ѿ к҃, и҆ е҃, лѣтъ и҆ выш̑҇ше, даже д̂о н҃, лѣтъ, всѧк̑҇ въходѧ́и слꙋжи́ти и҆ твори́ти дѣлеса̀ въ хра́мѣ свѣдѣ́нїѧ·

И҆ бы́сть съглѧда́нїе и҆хъ, по соньмо́мъ и҆хъ, по домо́мъ ѿч҃ьства и҆хъ, в҃ ты́сꙋщи, и҆ х҃, и҆ л҃·

Сїѧ съглѧда́нїѧ, со́ньма сн҃въ геръсо́новъ, всѣхъ слꙋжа́щихъ въ хра́мѣ свѣдѣнїѧ, ꙗ҆́же съглѧда́ша моѷсїи і҆ а҆а҆рон̑҇ по гл҃ꙋ гн҃ю<.>

Съглѧда́нїе же сн҃овъ мера́ринъ, по племе́немъ и҆хъ, и҆ по домо́мъ ѿч҃ьства и҆хъ, ѿ к҃, и҆ е҃ лѣтъ и҆ выш̑҇ше, да́же д̂о н҃ лѣтъ, всѧ́къ входѧ́и слꙋжи́ти на слꙋже́нїе хра́ма свѣдѣн́їѧ·

И҆ бы́сть съчте́нїе и҆хъ по племе́немъ и҆хъ, по сон꙽мо́мъ и҆хъ, и҆ по домо́мъ ѿч҃ьства и҆хъ, ҂г҃. и҆ с҃·

Сїѝ чи́сла со́ньма сн҃въ мера́ринъ, ꙗ҆́же съглѧда̀ моѷсїи і҆ а҆а҆ро́нъ, по гл҃ꙋ гн҃ю·

Всѣх же съглѧда́нїи леви́товъ ꙗ҆́же съглѧда̀ моѷсїи і҆ а҆а҆ро́нъ, и҆ кн҃ѕи сн҃въ і҆и҆л҃въ по со́ньмꙋ и҆хъ, и҆ по домо́м꙽ ѿч҃ьства и҆хъ, ѿ к҃, и҆ е҃, лѣтъ, и҆ выш̑҇ше, да́же д̂о, н҃, лѣтъ, всѧ́къ и҆ды́и на дѣло дѣ́лати, по дѣлесе́хъ въз꙽движе́нїѧ, въ хра́мѣ свѣдѣ́нїѧ·

Бы́ша же съглѧда́нїѧ их̑, ҂и҃, е҃ сот̑, и҆ п҃, по велѣ́нїемъ гн҃имъ·

И҆ съглѧда́ша и҆хъ рꙋко́ю моѷсїевою, мꙋжа по слꙋже́нїи е҆го, по дѣлесе́мъ е҆го, и҆ е́же въздвиза́хꙋ сїѝ, и҆ съглѧда́ни сꙋть, ꙗ҆́коже повелѣ̀ г҃ь моѷсїю·

Глв̑҇а, е҃·

И рече г҃ь къ моѷсїю гл҃ѧ, повелѝ сн҃омъ і҆и҆л҃вымъ, и҆ да вы́гонѧтъ и҆с полка̀ вс̂ѧ прокаже́ныѧ, и҆ вс̂ѧ пролива́ющїѧ сѣмѧ, и҆ вс̂ѧ нечи́стыѧ дш҃ею, ѿ мꙋжеска по́лꙋ до же́ньска, и҆ да и҆зго́ните во́нъ полка да не ѻ҆сквернѧ́тъ по́лкъ свои҆хъ, в ни́хже а҆зъ быва́ю·

И҆ сътвори́ша сн҃ове і҆и҆л҃вы та́ко, и҆згна́ша и҆хъ во́нъ полка̀, ꙗ҆́коже гл҃а г҃ь моѷсїю, та́ко сътвори́ша сн҃ове і҆и҆л҃вы·

И҆ рече г҃ь къ моѷсїю гл҃ѧ, гл҃и сн҃омъ і҆и҆л҃вымъ рекїи мꙋжъ, и҆л̂и жена̀, и҆ жена а҆ще сътвори́тъ, ѿ всѣхъ грѣхъ чл҃къ, и҆ презрѣвъ пре́зритъ въ г҃ѣ, и҆ престꙋпитъ дш҃а т̂а·

да и҆сповѣсть грх̑ѣ и҆же сътвори́ша, и҆ да ѿда́стъ престꙋпле́нїе гла́вное, и҆ пѧтꙋю ча́сть е҆го, да приложи́тъ к немꙋ, и҆ да ѿда́стъ е҆мꙋже съгрѣши·

А҆ще нѣсть чл҃кꙋ ѹ҆́жикы ꙗ҆ко ѿда́ти е҆мꙋ престꙋпле́нїе, да ѿдасть престꙋпле́нїе г҃ꙋ, престꙋпле́нїе же ѿда̂емое г҃ꙋ, жерцꙋ̀ да бꙋдетъ, ра́звѣ ѻ҆вна̀ ѻ҆цыще́нїѧ, и҆же помо́литсѧ ѻ҆ немъ грѣха̀ е҆го ра́ди·

И҆ всѧ̂къ нача́токъ, и҆ всѧ́ка сщ҃аема въ сн҃ѣхъ, і҆и҆л҃евѣхъ, е҆ли́ко а҆ще приносѧтъ г҃ꙋ жерцꙋ̀ да бꙋ́детъ·

И҆ кое҆го́ждо ѻ҆сщ҃енїе, томꙋ̀ да бꙋ́детъ, и҆ мꙋжъ а҆ще да́стъ жерцꙋ̀ томꙋ̀ да бꙋ́детъ·

И҆ рече г҃ь къ моѷсїю гл҃ѧ, гл҃и сн҃омъ і҆и҆л҃вымъ, и҆ рцы̀ къ нимъ.
мꙋжꙋ а҆ще престꙋп́итъ жена̀ е҆го, и҆ презира́ѧ пре́зритъ е҆го, и҆ бꙋ́детъ кт̂о с не́ю ло́же сѣмени, и҆ ѹ҆таи́тъ ѿ ѻ́чїю мꙋжа свое҆го, и҆ ѹ҆кры́етсѧ, а҆ ѻ҆на́ же бꙋд́етъ ѻ҆скверне́на, и҆ по́слꙋха не бꙋ́дет꙽ на не́ѧ, и҆ сїѧ нѣсть ꙗ҆́та·

И҆ прїидетъ на него дх҃ъ ревнова́нїѧ, и҆ възревнꙋе́тъ женѣ свое́и, ѻ҆на́ же бꙋ́детъ ѻ҆скверне́на, и҆л̂и прїидетъ е҆мꙋ дх҃ъ ревнова́нїю да възревнꙋет̑ женѣ свое́и, а҆ ѻ҆на же бꙋ́детъ неѻ҆сквернена·

И҆ да приведе́тъ мꙋжъ женꙋ̀ свою къ жерцꙋ̀, и҆ да принесе́т꙽ да́ръ за ню, десѧ́тꙋю ча́сть мѣры е҆фи мꙋкѝ ꙗ҆́чныѧ̀, и҆ да не влїетъ на́ ню е҆ле́ѧ ниже да възложи́тъ на ню̀ бѣ́лаго ѳимїѧ́ма.
тре́ба бо ревнова́нїѧ е҆сть, тре́ба па́мѧти, помина́ющи грѣхъ·

И҆ да приведе́тъ ю҆̀ жре́цъ, и҆ поста́вит꙽ ю҆̀ пре́дъ гм҃ъ.
и҆ да во́зметъ жрецъ во́дꙋ жи́вꙋ чи́стꙋ въ сосꙋ́дѣ гли́нѧнѣ и҆ персти землѝ сꙋщїѧ ѹ҆ хра́ма свѣдѣ́нїѧ, и҆ да во́зметъ жре́цъ да въсы́плетъ въ во́дꙋ, и҆ да поста́витъ жре́цъ женꙋ̀ пре́дъ гм҃ъ, и҆ да ѿкры́етъ главꙋ̀ женѣ, и҆ да да́стъ в рꙋцѣ тре́бꙋ па́мѧти, тре́бꙋ ревнова́нїѧ, а҆ в рꙋцѣ жерцꙋ да бꙋ́детъ вода̀ ѻ҆бличе́нїѧ, клено́маѧ с̂и·

И҆ да заклене́тъ ю҆̀ жре́цъ, и҆ рече́тъ женѣ̀, а҆ще не бы́сть н̂икто́же с тобо́ю, и҆ нѣси́ ли пристꙋпи́ла ѻ҆скверъни́тисѧ ѿ мꙋжа свое҆го, неви́нна бꙋ́ди ѿ воды̀ ѻ҆бличе́нїѧ клено́мыѧ сеѧ̀·

А҆́ще л̂и престꙋпи́ла е҆си мꙋжа́та сꙋщи и҆л̂и ѻ҆скверне́на е҆си, и҆ да́стъ кт̂о тебѣ ло́же свое, ра́звѣ мꙋжа твое҆го·

И҆ да заклене́т꙽ жре́ц꙽ женꙋ̀ клѧ́твами клѧ́твы свое҆ѧ̀, и҆ да рече́тъ жре́цъ женѣ̀, да да́стъ т̂ѧ г҃ь въ клѧ́твꙋ, и҆ проклѧ́тїе средѝ людїи твоих̑, вънегда̀ да́стъ г҃ь и҆ бꙋди стегно твоѐ ѿпа́дше, и҆ чре́во твоѐ ѿпа́дше, и҆ ѻ҆те́кше·

И҆ да вни́детъ вода̀ клено́маѧ с̂и, въ чре́во твое, и҆ нады́шетъ т̂и ѹ҆тро́бꙋ, и҆ ѿпаде́тъ стегно̀ твоѐ.
и҆ ѿвѣща́етъ жена̀ т̂а.
бꙋ́ди то бꙋ́ди то·

И҆ да въпи́шетъ жре́цъ клѧ́твы сїѧ въ кни́ги, и҆ да ѻ҆мо́чит꙽ въ водѣ ѻ҆бличе́нїѧ клено́мыѧ, да напои́тъ женꙋ̀ водо́ю ѻ҆бличе́нїѧ, и҆ проклѧ́тїѧ и҆ да вни́дет꙽ в н̂ю вода̀ клѧ́таѧ ѻ҆бличе́нїѧ·

И҆ да во́змет꙽ жре́цъ ѿ рꙋкѝ женьски тре́бꙋ ревнова́нїѧ.
и҆ да во́зложи́тъ тре́бꙋ прд̑е гм҃ъ, и҆ да приведе́т꙽ ю҆̀ къ ѻ҆лтарю̀·

И҆ да въ́зметъ жрец̑҇ го́ръстїю тре́бы па́мѧти е҆ѧ̀, и҆ да принесе́тъ ю҆̀ жрец̑҇ на ѻ҆лта́рь, посе́м же напои́тъ водо́ю женꙋ̀ т̂ꙋ·

И҆ бꙋ́детъ а҆ще е҆сть ѻ҆скверне́на, и҆ а́ще та́тбою, ѹ҆таи́ласѧ е҆сть мꙋжа свое҆го, и҆ да ви́идет̑ в н̂ю вода̀ клѧ́таѧ ѻ҆бличе́нїѧ, и҆ да надме́тъ чре́во е́и, и҆ да ѿпадет̑ стегно̀ е҆ѧ̀, и҆ да бꙋ́дет꙽ жена̀ въ проклѧ́тїе въ лю́дехъ свои҆хъ·

А҆ще л̂и не бꙋ́детъ ѻ҆скверне́на жена, и҆ чс̑҇та е҆сть, и҆ невин̑҇на бꙋ́детъ, и҆ да прїиметъ въ чре́вѣ и҆ всѣе́тъ сѣмѧ·

Сїи зако́нъ ревнова́нїѧ е҆сть е҆же а҆ще престꙋпитъ жена̀ мꙋжа́та сꙋщи, и҆ ѻ҆скверни́тсѧ·

И҆л̂и чл҃къ е҆мꙋже а҆ще наи́дет꙽ на́нь дх҃ъ ревнова́нїѧ, и҆ възревнꙋ́етъ женѣ̀ свое́и да поста́вит꙽ женꙋ̀ свою прд̑е гм҃ъ·

И҆ да сътвори́тъ е́и жре́цъ ве́сь закон̑҇ сїи, и҆ чтс̑҇ъ бꙋ́детъ чл҃къ ѿ грѣха̀.
жена́ же т̂а въз́мет꙽ грѣхъ сво́и·

Глв̑҇а, ѕ҃·

И рече г҃ь къ моѷсїю гл҃ѧ, гл҃и сн҃омъ і҆и҆л҃вымъ, и҆ рече́ши къ ни́мъ, мꙋжъ и҆л̂и жена̀ и҆же а҆ще ѻ҆беща́етсѧ ѕѣло молбо́ю къ г҃ꙋ·

да ѻ҆чи́ститсѧ чистото́ю, и҆ въздержи́тсѧ ѿ ви́на и҆ си́кера, и҆ ѻ҆цта ви́нна, и҆ ѻ҆цта ѻ҆лови́нна, да не пїетъ, и҆ е҆ли́коже съдѣ́лаетсѧ ѿ гро́здъ ви́н꙽ныхъ да не пїетъ·

И҆ вина̀ свѣжа́го и҆ сꙋхо́го да не ꙗ҆́стъ, въ вс̂ѧ дн҃и моли́твы е҆го, ѿ всего̀ е҆же бꙋ́детъ ѿ ви́нничины и҆ вина̀, ѿ ко́сти и҆ до скорълꙋ́пы да не пїете, ниже ꙗ҆́сте ѿ всего̀·

И҆ въ вс̂ѧ дн҃и молбы̀ ѻ҆цыще́нїѧ е҆го, бричь да не възы́идет̑ на главꙋ̀ е҆го, до́ндеже сконча́ютсѧ дн҃їе, е҆ли́коже ѻ҆бѣща́лъ е҆сть г҃ꙋ, ст҃ъ бꙋ́детъ растѧ́и вла́сы главы̀ свое҆ѧ·

И҆ въ вс̂ѧ дн҃и молбы̀ е҆го г҃ꙋ.
над̑ все́ю дш҃ею сконча́вшеюсѧ, да не хо́дитъ.
надъ ѿц҃а, и҆ над̑ мт҃ръ, и҆ над̑ бра́та и҆ над̑ сестрꙋ, да сѧ не ѻ҆скверни́тъ ѿ них̑ ѹ҆ме́ршимъ и҆мъ.
ꙗ҆ко мольба̀ б҃а е҆го на главѣ е҆го, вс̂ѧ дн҃и мольбы̀ е҆го, ст҃ъ е҆сть г҃ꙋ·

А҆́ще ли кт̂о смр҃тїю внеза́пꙋ ѹ҆мретъ ѹ҆ него̀ а҆́бїе, да ѻ҆скверни́тсѧ глава̀ мольбы̀ е҆го, да ѻ҆брїетъ вла́сы главы̀ своеѧ̀.
во́ньже дн҃ь ѻ҆чи́ститсѧ, въ дн҃ь з҃ да ѻ҆бросне́тъсѧ, а҆ въ дн҃ь, и҃, да принесе́тъ дв̂а го́рличища и҆л̂и дв̂а голꙋ́бичища, къ жръцꙋ пред̑ две́ри хра́ма свѣдѣ́нїа·

И҆ да сътвори́тъ жре́цъ е҆ди́нꙋ грѣха̀ ра́ди, а҆ дрꙋгꙋю въ вс̂есож꙽же́нїе, и҆ да помо́литсѧ жре́цъ ѻ҆ не́мъ съгрѣше́нїѧ ра́ди ѻ҆ дш҃и, и҆ да ѻ҆ст҃итъ главꙋ̀ е҆го·

В то́и дн҃ь во́н꙽же ѻ҆ст҃итсѧ г҃ꙋ въ дн҃и молбы̀ е҆го, и҆ да приведе́тъ а҆́гнецъ е҆ді́нолѣтенъ въ престꙋпле́нїе, дн҃їе же пре́жнїѝ, да не бꙋ́дꙋтъ е҆мꙋ въ число̀, поне́же ѻ҆скверни́сѧ глава̀ мольбы̀ е҆го·

Сїи же зако́нъ моле́нїѧ, вънже дн҃ь сконча́етъ, дн҃ь мольбы̀ свое҆ѧ̀, да принесе́тъ са́мъ къ две́ремъ хра́ма свѣдѣ́нїѧ·

И҆ да принесе́тъ да́ръ свои г҃ꙋ, а҆́гнецъ е҆ді́нолѣтенъ, е҆ді́нъ непоро́ченъ въ вс̂есъж꙽же́нїе, и҆ а́гницꙋ е҆ді́нолѣтнꙋ непоро́чнꙋ грѣха̀ ра́ди, и҆ ѻ҆ве́нъ е҆ді́нъ непороченъ сп҃сенїѧ·

И҆ ко́шъ ѻ҆прѣсно́чныи хлѣ́бовъ ѿ мꙋкѝ пшени́чны, въмѣшеных̑ съ е҆леѻ́мъ и҆ ѻ҆прѣсноки пома́заны е҆леѻ́мъ и҆ тре́бꙋ и҆хъ и҆ възлїѧ́нїе и҆хъ·

И҆ да принесе́тъ жрец̑҇ прд̑е г҃ь, и҆ да сътвори́тъ е҆же грѣха̀ ра́ди е҆го, и҆ вс̂есъж꙽же́нїе е҆го·

ѻ҆ве́н꙽ же да сътвори́тъ тре́бꙋ сп҃сеннꙋю̀ г҃ꙋ на ко́шницѣ ѻ҆прѣс́ночнѣй, и҆ да сътвори́тъ жре́цъ тре́бꙋ, и҆ възълїѧ́нїе е҆го·

И҆ да ѻ҆бро́снетсѧ ѻ҆бѣща́выи, прд̑е две́рми хра́ма свѣдѣнїѧ глава̀ молбы̀ е҆го, и да възложит̑ власы̀ на ѻ҆гнь, и҆же е҆сть ѹ҆ тре́бы сп҃сеныѧ·

И҆ да въз́мет꙽ жре́цъ ра́мо варе́но ѿ ѻ҆вна̀, и҆ хлѣбъ е҆ді́нъ принесе́нъ ѿ ко́шницы, и҆ ѻ҆прѣ́снокъ е҆ді́нъ, и҆ да възложи́тъ на рꙋцѣ̀ ѻ҆бѣща́вшемꙋсѧ, по ѻ҆броснове́нїѝ главы̀ е҆го·

И҆ да принесе́тъ ѧ҆̀ жрец̑҇, възложе́нїе пре́дъ г҃ь.
с̂е ст҃о да бꙋдетъ жерцꙋ̀ къ грꙋ́дем꙽ възложе́нїѧ и҆ къ ра́мꙋ ѹ҆ча́стїѧ, по се́м же ѻ҆бѣщавы́исѧ, да пїетъ вино̀.
сїи закон̑҇ ѻ҆бѣщавшемꙋсѧ, и҆же а҆ще ѻ҆бѣща́е҆тъ да́ръ г҃ꙋ ѻ҆ молбѣ̀ свое́и, и҆же а҆ще ѻ҆брѧ́щетъ рꙋка̀ е҆го, по си́лѣ молбы̀ е҆го, ю҆же а҆́ще ѻ҆бѣща́етъ, с̂е да принесе́т꙽ по зако́нꙋ ѻ҆цѣще́нїѧ е҆го·

И҆ рече г҃ь къ моѷсїю гл҃ѧ, гл҃и а҆аро́нꙋ и҆ сн҃омъ е҆го рекїи си́це·

Блс̑҇ви́те сн҃ы і҆и҆л҃вы гл҃щи и҆мъ, и҆ възложи́те и҆́мѧ моѐ на сн҃ы і҆и҆л҃вы·

И҆ а́зъ г҃ь блс̑҇влю и҆хъ, гл҃ющи и҆мъ, и҆ блс̑҇витъсѧ г҃ь, и҆ снабди́тъ т̂ѧ и҆ просвѣти́тъ г҃ь лицѐ своѐ на́ тѧ, и҆ поми́лꙋетъ т̂ѧ·

Въздви́гнетъ г҃ь лицѐ своѐ на́ тѧ, и҆ да́ст꙽ т̂и ми́ръ и҆ да възложа́ть и҆́мѧ моѐ на сн҃ы і҆и҆л҃вы а҆́зъ г҃ь, блс̑҇влю ѧ҆̀·

Глв̑҇а, з҃·

И бы́сть въ дн҃ь вонже сконча̀ моѷсїи, ꙗ҆́коже поста́вити хра́мъ и҆ помаза и҆̀, и҆ ѻ҆ст҃и и҆̀, и҆ вс̂ѧ сосꙋ́ды е҆го, ѻ҆л꙽таръ, и҆ вс̂ѧ сосꙋ́ды е҆го, и҆ пома́за ѧ҆̀ и҆ ѻ҆ст҃и ѧ҆̀·

И҆ приведо́ша кн҃ѕи і҆и҆л҃тьстїѝ, в҃і, кн҃ѕь до́мꙋ ѿч҃ьства и҆хъ, сїѝ кн҃ѕи кое҆гождо племе́ни, сїи же пред̑стоѧ́тъ на́дъ съглѧда́нїи·

И҆ приведоша дары своѧ̀ пре́дъ гм҃ъ ѕ҃, колесни́цъ, цр҃ьскыхъ, и҆ в҃і, воло́въ, и҆ колесни́ца е҆ді́на ѿ дво́ю кн҃ѕю, и҆ теле́цъ ко́ждо и҆хъ, и҆ принесо́ша пред̑ храм̑·

И҆ рече г҃ь къ моѷсїю гл҃ѧ.
възмѝ ѿ ни́хъ, и҆ да бꙋ́дꙋтъ на дѣлеса̀ слꙋже́бнаѧ хра́ма свѣдѣ́нїѧ, и҆ даждь ѧ҆̀ леви́томъ ко́ждо и҆хъ, по дѣлꙋ их̑·

И҆ пои́мъ моѷсїи колесни́цы и҆ волы, и҆ да́стъ ѧ҆̀ леви́томъ·

дв̂ѣ колесни́цы, и҆ д҃, волы̀, да́стъ сн҃омъ геръсо́нимъ по слꙋжбамъ и҆хъ, четы́ри же колесни́цы, и҆ и҃ воловъ, дастъ сн҃омъ мера́риномъ, по слꙋж꙽бамъ и҆хъ и҆ под̑ рꙋкꙋ ѳамара сн҃а а҆а҆ро́на жерца̀·

Сн҃ом же каа́ѳовымъ не да́стъ, ꙗ҆́ко слꙋжбы ст҃го и҆мѣѧ҆хꙋ, на рамꙋ и҆хъ да въздви́жꙋт꙽·

И҆ принесо́ша кнѧ́ѕи на ѻ҆сщ҃енїе ѻ҆лъта́рѧ, въ дн҃ь во́нже пома́за е҆го, и҆ принесо́ша кн҃ѕи да́ры своѧ пред̑ ѻ҆лъта́рь·

И҆ рече г҃ь къ моѷсїю кн҃ѕь е҆ді́н꙽ на́ дн҃ь, и҆ кн҃ѕь въ дн҃ь дрꙋгїи, да принесе́тъ дар̀ы своѧ̀, на ѻ҆сщ҃енїе ѻ҆лътарѧ̀·

Бѧ́ше же приносѧй да́ры своѧ̀, въ а҃ дн҃ь наа҆ссон̑҇, сн҃ъ а҆минода́вль, кн҃ѕь племе́ни і҆юдина, и҆ принесѐ да́ръ сво́и блю́до сре́брѧно е҆ді́но, а҆ мѣра е҆го, р҃, и҆ л҃, си́кль, и҆ ча́шꙋ е҆ді́нꙋ сре́брѧнꙋ, о҃, си́кль, по си́клю ст҃омꙋ, ѻ҆боѐ по́лны мꙋкѝ пшени́чны, спрѧ́жены съ е҆леѻ҆мъ на тре́бꙋ·

И҆ ѳимїѧ́мникъ е҆ді́нъ і҃ зла́тникъ пол̀ны каде́нїѧ·

И҆ теле́цъ а҃, ѿ воло́въ, и҆ ѻ҆ве́нъ а҃, и҆ а҆́гнецъ а҃, е҆ді́нолѣтенъ.
въ вс̂есъж꙽же́нїе·

И҆ козе́лъ ѿ ко́зъ а҃, грѣха̀ ра́ди·

На тре́бꙋ же сп҃сенꙋю, ю҆ница̀ в҃, и҆ ѻ҆ве́нъ е҃, и҆ козе́лъ е҃, а҆́гнецъ е҆ді́нолѣте́нъ е҃, сїи да́ръ наа҆ссо́на сн҃а а҆минода́влѧ·

И҆ въ в҃, дн҃ь принесѐ наѳана́илъ сн҃ъ сога́ровъ кн҃ѕь, племе́ни и҆саха́рѧ, и҆ принесѐ да́ръ свой блю́до сре́брѧно а҃, а҆ мѣра е҆го р҃, и҆ л҃ си́кль, и҆ ча́шꙋ е҆ді́нꙋ сре́брѧнꙋ о҃ си́кль, по си́клю ст҃омꙋ, ѻ҆бо́е по́лны мꙋкѝ пшени́чны, спрѧ́жены съ е҆ле́ѻмъ на тре́бꙋ·

И҆ ѳимиѧ́мникъ е҆ді́нъ, і҃, зла́тникъ, по́лнъ каде́нїѧ·

И҆ теле́цъ а҃ ѿ воло́въ и҆ ѻ҆вен̑҇, а҃, и҆ а́гнецъ, а҃, е҆динолѣтен̑҇ въ вс̂есъж꙽же́нїе·

И҆ козе́лъ ѿ козъ, а҃ грѣха̀ ра́ди·

На требꙋ же сп҃се́нꙋю ю҆нъца, в҃, и҆ ѻ҆вен̑҇, е҃, и҆ козел̑҇, е҃, и҆ а҆гнец̑҇ е҆динолѣтенъ, е҃, сїи да́ръ наѳана́илев̑҇ сн҃а сого́рова·

И҆ въ г҃ дн҃ь кн҃ѕь сн҃овъ заѹ҆ло́нь е́лїа́въ сн҃ъ хело́новъ, дар̑҇ е҆го блю́до сре́брѧно, а҃, мѣ́ра е҆го р҃ и҆ л҃ си́кль и҆ ча́шꙋ е҆ди́нꙋ сре́брѧнꙋ о҃, си́кль, по си́клю ст҃омꙋ ѻ҆бо́е по́лно мꙋкѝ пшени́чны спрѧ́жены съ е҆ле́ѻм̑ на тре́бꙋ·

И҆ ѳїмиѧ́мникъ е҆дин̑҇, і҃, зла́тникъ по́лнъ каде́нїѧ,<.>

И҆ теле́цъ, а҃, ѿ волов̑҇ и҆ ѻ҆ве́нъ, а҃, и҆ а́гнец̑҇ а҃ е҆динолѣт́енъ въ вс̂есъж꙽же́нїе·

И҆ козе́лъ ѿ ко́зъ а҃ грѣха̀ ра́ди·

На тре́бꙋ же сп҃сенꙋю, ю҆нца в҃. и҆ ѻ҆ве́нъ е҃, и҆ козе́лъ, е҃. и҆ а́гнецъ е҆динолѣтенъ, е҃. сїи да́ръ е҆лїа́вль, сн҃а хело́нова·

И҆ въ д҃, дн҃ь, кн҃ѕь сн҃овъ рꙋвимль е҆лисꙋ́ръ, сн҃ъ сеѹ҆дировъ.
даръ е҆го блю́до сре́брѧно.
а҃, мѣ́ра е҆го.
р҃, и҆ л҃, си́кль, и҆ ча́шꙋ е҆ді́нꙋ сре́брѧнꙋ.
о҃, си́кль по си́клю ст҃мꙋ, ѻ҆бо́е по́лны мꙋкѝ пшени́чны, спрѧ́жены съ е҆ле́ѻ҆мъ на тре́бꙋ·

И҆ ѳимїа́мникъ е҆ді́нъ.
і҃, зла́тникъ, по́лнъ каде́нїѧ·

И҆ теле́цъ а҃ ѿ волов̑҇, и҆ ѻ҆ве́нъ а҃, и҆ а́гнецъ а҃, е҆динолѣтенъ, въ вс̂есъж꙽же́нїе·

И҆ козе́лъ ѿ ко́зъ а҃ грѣха̀ ра́ди·

На тре́бꙋ же сп҃сенꙋю ю҆нца, в҃, и҆ ѻ҆ве́нъ, е҃, и҆ козе́лъ.
е҃, и҆ а́гнецъ е҆ди́нолѣтен̑҇, е҃, сїи да́ръ е҆лисꙋ́ровъ сн҃а седеѹ҆рова·

И҆ въ.
е҃, дн҃ь кн҃ѕь сн҃овъ симеѻ́нь, саламі́иль, сн҃ъ сꙋрисада́иль.
даръ е҆го блю́до сре́брѧно.
а҃, мѣ́ра е҆го.
р҃, и҆ л҃, си́кль, и҆ ча́шꙋ е҆ді́нꙋ сре́брѧнꙋ.
о҃, си́кль по си́клю ст҃омꙋ, ѻ҆бо́е по́лны мꙋкѝ пшени́чны, спрѧ́жены съ е҆ле́ѻмъ на тре́бꙋ·

И҆ ѳимїа́мникъ е҆ді́нъ, і҃, зла́тникъ по́лнъ каде́нїѧ·

И҆ теле́цъ а҃ ѿ волов̑҇, и҆ ѻ҆ве́нъ а҃, и҆ а́гнецъ а҃ е҆динолѣтен꙽ въ вс̂есъж꙽же́нїе·

И҆ козе́лъ ѿ ко́зъ а҃ грѣха̀ ра́ди·

На тре́бꙋ же сп҃сенꙋю ю҆нца в҃, ѻ҆ве́нъ.
е҃, козе́лъ.
е҃, а҆́гнецъ е҆динолѣтенъ, е҃, сїи да́ръ саламїиль, сн҃а сꙋрисадаи҆лѧ·

И҆ въ ѕ҃ дн҃ь, кн҃ѕь сн҃овъ га́довъ, е҆лисаа́фъ сн҃ъ рагꙋи́левъ.
да́ръ е҆го блю́до сре́брѧно, а҃, мѣ́ра е҆го, р҃, и҆ л҃, си́кль, и҆ ча́шꙋ е҆ди́нꙋ сре́брѧнꙋ.
о҃, си́кль по си́клю ст҃мꙋ, ѻ҆бо́е по́лны мꙋкѝ пшени́чны, спрѧ́жены съ е҆ле́ѻ҆мъ на тре́бꙋ·

И҆ ѳимїа́мникъ е҆ді́нъ.
і҃, зла́тникъ по́лнъ каде́нїѧ·

И҆ теле́цъ а҃ ѿ воло́въ, и҆ ѻ҆ве́нъ а҃, и҆ а́гнецъ а҃ е҆динолѣтенъ, въ вс̂есъж꙽же́нїе·

И҆ козе́лъ ѿ коз̑, а҃, грѣха̀ ра̀ди·

На тре́бꙋ же сп҃сенꙋю ю҆нца̀.
в҃, и҆ ѻ҆венъ.
е҃. и҆ козе́лъ.
е҃, и҆ а́гнецъ е҆динолѣтенъ е҃, сїи да́ръ е҆лиса́фль сн҃а рагꙋ́илева·

И҆ въ з҃, дн҃ь, кн҃ѕь сн҃овъ е҆фрѣмль, е҆лиса́ма сн҃ъ семиѹ҆́довъ.
да́ръ е҆го, блю́до сре́брѧно.
а҃, мѣ́ра е҆го.
р҃, и҆ л҃ си́кль, и҆ ча́шꙋ е҆ді́нꙋ сре́брѧнꙋ.
о҃, си́кль, по си́клю ст҃мꙋ, ѻ҆бо́е по́лны мꙋкѝ пшени́чны, съпрѧ́жены съ е҆ле́ѻ҆мъ на тре́бꙋ·

И҆ ѳимїа́мникъ е҆ді́нъ.
і҃, зла́тникъ, по́лнъ каде́нїѧ·

И҆ теле́цъ а҃ ѿ воло́въ, и҆ ѻ҆ве́нъ а҃, и҆ а́гнецъ а҃ е҆динолѣтенъ, въ вс̂есъж꙽же́нїе·

И҆ козе́лъ ѿ ко́зъ а҃ грѣха̀ ра́ди·

На тре́бꙋ же сп҃сенꙋю ю҆нца в҃, и҆ ѻ҆ве́нъ.
е҃, и҆ козе́лъ е҃, и҆ а́гнецъ е҆дїнолѣтенъ е҃, сїи да́ръ е҆лисама́новъ.
сн҃а семиѹ҆́дова·

И҆ въ и҃, дн҃ь, кн҃ѕь сн҃ъ манасїи́нь, гамалїи́ль, сн҃ъ фад̑дасꙋ́ровъ.
да́ръ е҆го блю́до сре́брѧно.
а҃, мѣ́ра е҆го.
р҃, и҆ л҃ сикль.
и҆ ча́шꙋ е҆ді́нꙋ сре́брѧнꙋ.
о҃, си́кль, по си́клю ст҃омꙋ, ѻ҆бо́е по́лны мꙋкѝ пшени́чны.
съпрѧ́жены съ е҆леѻ҆мъ на тре́бꙋ·

И҆ ѳимїа́мник̑҇ е҆ді́нъ.
і҃, зла́тникъ, по́лнъ каде́нїѧ·

И҆ те́лецъ а҃ ѿ воло́въ, и҆ ѻ҆ве́нъ а҃, и҆ а́гнецъ а҃ е҆динолѣтен̑҇, въ вс̂есъж꙽же́нїе·

И҆ козе́лъ ѿ ко́зъ а҃ грѣха̀ ра́ди·

На тре́бꙋ же сп҃сенꙋю ю҆нца в҃, и҆ ѻ҆ве́нъ е҃, и҆ козе́лъ е҃, и҆ а́гнецъ е҆динолѣтенъ е҃. сїи да́ръ гамалїи́ль.
сн҃а фад̑дасꙋ́рова·

И҆ въ ѳ҃, дн҃ь, кн҃ѕь сн҃овъ венїами́нь, а҆вида́нъ сн҃ъ гадеѻ́нинъ.
да́ръ е҆го, блю́до сре́брѧно.
а҃, мѣ́ра е҆го.
р҃, и҆ л҃. си́кль, и҆ ча́шꙋ е҆динꙋ сре́брѧнꙋ о҃, си́кль, по си́клю ст҃мꙋ, ѻ҆бо́е по́лны мꙋкѝ пшени́чны.
съпрѧ́жены съ е҆ле́ѻ҆мъ на тре́бꙋ·

И҆ ѳимїа́мник̑҇ е҆ді́нъ.
і҃, зла́тникъ, по́лнъ каде́нїѧ·

И҆ теле́цъ, а҃, ѿ волов̑҇, и҆ ѻ҆ве́нъ а҃, и҆ а́гнецъ а҃ е҆динолѣтенъ въ вс̂есъж꙽же́нїе·

И҆ козе́лъ ѿ ко́зъ а҃, грѣха̀ ра́ди·

На тре́бꙋ же сп҃сенꙋю.
юнца в҃, и҆ ѻ҆ве́нъ е҃, и҆ козелъ е҃, и҆ а́гнецъ е҆динолѣтенъ.
е҃, сїи да́ръ а҆вида́новъ сн҃а гадеѻ́нїина·

И҆ въ.
і҃, дн҃ь кн҃ѕь сн҃овъ дановъ, а҆хее҆зе́ръ, сн҃ъ а҆мисада́и.
да́ръ е҆го блю́до сре́брѧно, а҃. мѣ́ра е҆го.
р҃, и҆ л҃, си́кль.
и҆ ча́шꙋ е҆ди́нꙋ сре́брѧнꙋ.
о҃, си́кль, по си́клю ст҃мꙋ, ѻ҆бо́е по́лны мꙋкѝ пшени́чны съпрѧ́жены съ е҆ле́ѻмъ на тре́бꙋ·

И҆ ѳимїа́мникъ е҆ді́нъ.
і҃, зла́тникъ, по́лнъ каде́нїѧ·

И҆ теле́цъ а҃ ѿ воло́въ, и҆ ѻ҆ве́нъ а҃, и҆ а́гнецъ а҃, е҆динолѣтенъ въ вс̂есъж꙽же́нїе·

И҆ козе́лъ ѿ ко́зъ а҃ грѣха̀ ра́ди·

На тре́бꙋ же сп҃сенꙋю.
ю҆нца в҃, и҆ ѻ҆ве́нъ е҃ и҆ козе́лъ е҃, и҆ а́гнецъ е҆динолѣтенъ е҃. сїи да́ръ а҆хее҆зе́ровъ сн҃а мисада́инѧ·

И҆ въ а҃і, дн҃ь кн҃ѕь сн҃овъ а҆си́ровъ, фаге́ль сн҃ъ е҆хра́нь.
да́ръ е҆го блю́до сре́брѧно а҃, мѣ́ра е҆го.
р҃, и҆ л҃ си́кль, и҆ ча́шꙋ е҆ді́нꙋ сре́брѧнꙋ.
о҃, си́кль, по си́клю ст҃мꙋ, ѻ҆бо́е по́лны мꙋкѝ пшени́чны, съпрѧ́жены съ е҆ле́ѻм̑ на тре́бꙋ·

И҆ ѳимїа́мникъ е҆дин̑҇.
і҃, зла́тникъ, по́лнъ каде́нїѧ·

И҆ теле́цъ а҃ ѿ воло́въ, и҆ ѻ҆ве́нъ а҃, и҆ а́гнецъ, а҃, е҆динолѣтен̑҇, въ вс̂есъж꙽же́нїе·

И҆ козе́лъ ѿ коз̑, а҃, грѣха̀ ра́ди·

На тре́бꙋ же сп҃сенꙋю.
ю҆нца̀ в҃, и҆ ѻ҆ве́нъ е҃, и҆ козе́лъ е҃, и҆ а́гнец꙽ е҆динолѣтенъ е҃, сїи да́ръ фаге́иль сн҃а е҆хра́нѧ·

И҆ въ в҃і, дн҃ь, кн҃ѕь сн҃овъ неѳали́мль, а҆хи́ра сн҃ъ е҆на́нь.
да́ръ е҆го блю́до сре́брѧно а҃, мѣ́ра е҆го р҃, и҆ л҃ си́кль, и҆ ча́шꙋ е҆ді́нꙋ сре́брѧнꙋ.
о҃, си́кль по си́клю ст҃мꙋ, ѻ҆бо́е по́лны мꙋкѝ пшени́чны.
съпрѧ́жены съ е҆ле́ѻмъ на тре́бꙋ·

И҆ ѳимїа́мник꙽ е҆ді́нъ.
і҃ зла́тникъ, по́лнъ каде́нїѧ·

И҆ теле́цъ а҃, ѿ воло́въ, и҆ ѻ҆ве́нъ а҃, и҆ а́гнецъ а҃, е҆динолѣтен̑҇ въ вс̂есъж꙽же́нїе·

И҆ козе́лъ ѿ ко́зъ а҃ грѣха̀ ра́ди·

На тре́бꙋ же сп҃сенꙋю ю҆нца в҃, и҆ ѻ҆ве́нъ е҃, и҆ козе́лъ е҃, и҆ а́гнецъ е҆динолѣтенъ е҃, сїи да́ръ а҆хировъ, сн҃а е҆на́нѧ·

Се̂ ѻ҆сщ҃енїе ѻ҆лтарѧ̀, во́ньже дн҃ь пома́за и҆̀, ѿ кн҃ѕеи сн҃овъ і҆и҆л҃въ, блюд̑ сре́брѧных̑ в҃і, и҆ ча́шъ сре́брѧных̑ в҃і, и҆ ѳимїа́мникъ зла́тых̑ в҃і, по р҃, и҆ л҃ си́кль въ кое́м꙽ждомъ блю́дѣ и҆ по о҃ си́кль ча́ши е҆дїнои, въ всѣ́хъ же съсꙋдх̑ѣ сребра̀ ҂в҃, у҃, си́клевъ по си́клемъ ст҃ымъ·

И҆ ѳимїа́мникъ зла́тых̑ в҃і, по́лны каде́нїѧ, по і҃ зла́тник꙽ въ кое́м꙽ждо ѳимїа́мникꙋ, всего́ же зла́та въ ѳимїа́мницех̑, р҃, и҆ к҃, зла́тникъ·

Всѣ́хъ же говѧ́дъ въ вс̂есъж꙽же́нїе.
теле́цъ в҃і, ѻ҆ве́нъ в҃і, а҆́гнецъ е҆дїнолѣтенъ в҃і, тре́бы и҆хъ·

и҆ козе́лъ ѿ ко́зъ в҃і, грѣха̀ ра́ди.

Всх̑ѣ ж́е воло́въ, на тре́бꙋ сп҃сенꙋю, ю҆не́цъ к҃д, и҆ ѻ҆ве́нъ ѯ҃, и҆ козе́лъ е҆динолѣтенъ ѯ҃, и҆ а́гнецъ е҆динолѣтенъ непоро́чных̑, ѯ҃·

Се̂ ѻ҆сщ҃енїе ѻ҆лтарѧ̀ по и҆сполне́нїю рꙋкъ и҆хъ, и҆ по помазанїи е҆го·

Внегда̀ въхождаше моѷсїи въ хра́мъ свѣдѣнїѧ, гл҃ати е҆мꙋ.
и҆ ѹ҆слы́ша гн҃ь гл҃ъ, гл҃ющъ къ немꙋ̀, съвы́ше ѻ҆цѣще́нїѧ.
е҆же е҆сть ѹ҆ ковче́га свѣдѣ́нїа.
межд̑ꙋ двѣма̀ херꙋви́мома, и҆ гл҃а к немꙋ̀·

Глв̑҇а, и҃·

И гл҃а г҃ь къ моѷсїю гл҃ѧ, гл҃и а҆а҆ро́нꙋ рекїи к немꙋ̀.
е҆гда̀ въста́виши свѣти́ла по́ рѧдꙋ, съпредѣ̀ свѣти́ла, да свѣтѧт̑.
з҃, свѣщник̑҇·

И҆ сътворѝ та́ко а҆а҆ро́нъ, ѿ е҆ди́ноѧ страны̀, съ прѣдѝ свѣти́ла, вож̑же свѣщѝ е҆го, ꙗ҆́коже повелѣ г҃ь моѷсїю·

Сеже творе́нїе свѣти́лное.
сълїа́но зла́то и҆ сте́блїе е҆го, и҆ цвѣтци е҆го сълїа́ны вс̂и, по ѻ҆́бразꙋ, ꙗ҆́ко показа̀ г҃ь моѷсїю, та́ко сътворѝ свѣщник̑҇·

И҆ рече г҃ь къ моѷсїю гл҃ѧ.
пои҆ми леви́ты ѿ посрд̑ѣ сн҃овъ і҆и҃левъ, и҆ да ѻ҆ци́стиши ѧ҆̀·

Си́це же да сътвори́ши и҆мъ, ѻ҆цыще́нїе да покропи́ши на них̑ во́дꙋ ѻ҆цѣще́нїѧ, и҆ да възы́идетъ бри́чь на всѐ тѣ́ло и҆хъ, і҆ и҆сперꙋт́ъ ри́зы своѧ̀, и҆ чи́сты бꙋ́дꙋтъ·

И҆ да по́имꙋтъ е҆ди́нъ ѿ воло́въ, и҆ тре́бꙋ мꙋкѝ пшени́чны съпрѧ́жены съ е҆ле́ѻмъ, и҆ теле́цъ вторы́и е҆динолѣтенъ, да по́имеши грѣха̀ ра́ди·

И҆ да приведе́ши леви́ты пред̑ хра́мъ свѣдѣ́нїа.
и҆ да и҆ събере́ши ве́сь со́ньм꙽ сн҃въ і҆и҃лвъ·

И҆ приведе́ши леви́ты пред̑ г҃ь, и҆ да възложат̑ сн҃ве і҆и҃льстїи, рꙋкѝ своѧ̀ на левѝты, и҆ да ѿлꙋ́читъ а҆а҆ро́нъ леви́ты ѿда́нїе пред̑ г҃ь ѿ сн҃въ і҆и҃лвъ, и҆ да слꙋж́атъ слꙋж́бꙋ гв҃и·

Леви́ты же да възложа́тъ рꙋ́ки на главы̀ телцемъ, и҆ да сътвори́ши е҆ді́нъ грѣха̀ ра́ди.
а҆ вторы́и въ вс̂есъж꙽же́нїе г҃ꙋ, ѻ҆чи́стити ѻ҆ нихъ·

Поста́виши же леви́ты пред̑ а҆а҆ро́номъ и҆ пред̑ сн҃ъмѝ е҆го.
и҆ да ѿда́си ѧ҆̀ ѿда́нїе г҃ꙋ·

И҆ да ѿлꙋ́чиши леви́ты, ѿ среды̀ сн҃въ і҆и҃лвъ, и҆ да бꙋ́дꙋтъ мнѣ·

Посе́мъ же да вни́дт̑ꙋ леви́ты слꙋжи́ти слꙋ́жбꙋ, въ хра́мѣ свѣдѣнїа, и҆ да ѻ҆чи́стишї их̑, и҆ да ѿда́си ѧ҆̀ ѿда́нїе пред̑ гм҃ъ.
ꙗ҆́ко ѿда́нїа ѿда́ны сїи мн̂ѣ сꙋть, ѿ среды̀ сн҃въ і҆и҃лвъ.
въ ѿврерза́ющихъ мѣ́сто, всѧ́ка ложесна̀ первене́цъ всх̑ѣ ѿ сн҃въ і҆и҃лвъ, прїꙗ҆́хъ ѧ҆̀ себѣ·

Ꙗ҆́ко мн̂ѣ е҆сть весь прьвене́цъ ѿ сн҃въ і҆и҃лвъ.
ѿ чл҃ка до ско́та, въ дн҃ь во́нже поби́хъ ве́сь первене́цъ, в землѝ е҆гѷпетьсте́и, ѻ҆ст҃ихъ ѧ҆̀ себѣ·

И҆ поꙗ҆́хъ леви́ты въ мѣ́сто всѧ́каго прьвенца̀ сн҃овъ і҆и҃лвъ·

ѿда́х꙽ же леви́ты ѿда́нїем̑·

а҆а҆ро́нꙋ и҆ сн҃омъ е҆го, ѿ среды̀ сн҃овъ і҆и҃лвъ, слꙋжи́ти слꙋж́бꙋ сн҃въ і҆и҃лвъ въ хра́мѣ свѣдѣ́нїѧ.
и҆ да мо́лѧтсѧ ѻ҆ сн҃ѣхъ і҆и҃лвыхъ.
ꙗ҆́ко да не бꙋ́детъ гнѣвъ на сн҃ѣхъ і҆и҃лвыхъ.
е҆гда̀ пристꙋпи́ти и҆мъ къ ст҃ымъ·

И҆ сътворѝ моѷсїи и҆ а҆а҆ро́нъ и҆ ве́сь соньмъ сн҃овъ і҆и҃лвъ, леви́томъ ꙗ҆́коже заповѣда̀ г҃ь моѷсїю ѻ҆ леви́тх̑ѣ.
та́ко сътвори́ша и҆мъ сн҃ве і҆и҃лви·

И҆ ѻ҆чи́стишасѧ леви́ти.
і҆ и҆спра́ша ри́зы своѧ̀, и҆ ѿда́стъ ѧ҆̀ а҆а҆ро́нъ ѿда́нїе пред̑ гм҃ъ.
и҆ помоли́сѧ ѻ҆ ни́хъ а҆а҆ро́нъ ѻ҆чище́нїѧ ра́ди и҆хъ·

Посе́мъ внидо́ша леви́ти.
слꙋжи́ти слꙋж́бы их̑ въ хра́мѣ свѣдѣ́нїѧ.
пред̑ а҆а҆ро́номъ и҆ пред̑ сн҃ы е҆го.
ꙗ҆́коже повелѣ г҃ь моѷсїю ѻ҆ леви́техъ та́ко сътвори́ша·

И҆ рече г҃ь къ моѷсїю гл҃ѧ, с̂е е҆сть ѻ҆ леви́техъ, ѿ, к҃е, лѣтъ и҆ вы́ш꙽ше.
да вни́дꙋтъ слꙋжи́ти слꙋже́нїе, въ хра́мъ свѣдѣ́нїѧ.
ѿ н҃ же лѣтъ да ѻ҆ста́нꙋтъ слꙋже́нїѧ, и҆ да не слꙋжатъ по се́мъ·

И҆ да слꙋ́жатъ бра́тїѧ е҆го, въ хра́мѣ свѣдѣ́нїа стрѣщѝ стражбꙋ̀.
а҆ дѣ́ла да не дѣ́лают̑.
та́ко сътворѝ леви́том̑ въ страж̑бѣ их̑·

Глв̑҇а, ѳ҃·

И гл҃а г҃ь къ моѷсїю въ пꙋсты́ни сина́истѣи, въ второ́е лѣто, и҆зшед̑шимъ и҆мъ и҆з землѧ̀ е҆гѷпет̑скїа въ, а҃, мцс̑҇а гл҃ѧ·

Рцы̀ да сътворѧ́тъ сн҃ве і҆и҃льстїи па́схꙋ въ́ времѧ е҆ѧ̀·

Въ д҃і, дн҃ь, мцс̑҇а, а҃, къ ве́черꙋ.
и҆ сътвори́ши ю҆̀ въ́ времѧ е҆ѧ̀, по зако́нꙋ е҆ѧ̀, и҆ по сꙋдꙋ̀ е҆ѧ̀ сътвори́ши ѧ҆̀·

И҆ реч̑҇ моѷсїи сн҃омъ і҆и҃льским̑, сътвори́те па́схꙋ·

И҆ сътворѝша па́схꙋ, начина́ющꙋсѧ, а҃, мцс̑҇ꙋ, въ д҃і дн҃ь.
въ пꙋсты́ни сина́истеи, ꙗ҆́коже повелѣ̀ г҃ь моѷсїю, та́ко сътвори́ша сн҃ве і҆и҃лви·

И҆ прїидо́ша мꙋж́и и҆же бѣхꙋ нечисти ѻ҆ дш҃и чл҃чи, и҆ не можа́хꙋ сътвори́ти па́схи, въ то́и дн҃ь, и҆ прїидо́ша пред̑ моѷсїа и҆ а҆а҆ро́на въ то́и дн҃ь, и҆ реко́ша к немꙋ, м̂ы нечи́сты е҆сми ѻ҆ дш҃и чл҃чи, чесо̀ ра́ди намъ не досто́итъ принестѝ да́ръ г҃ꙋ въ́ в́ремѧ е҆го, посредѣ сн҃въ і҆и҃лвъ·

Рече же моѷсїи к ни́мъ ста́ните т̂ꙋ, да слы́шꙋ г҃ь ѻ҆ вас̑҇ чт̂о повели́тъ·

И҆ рече г҃ь къ моѷсїю гл҃ѧ, гл҃и сн҃омъ і҆и҃лвымъ рекїи·

Чл҃къ чл҃къ и҆же а́ще бꙋ́дет̑ нечи́стъ ѻ҆ дш҃и чл҃чи.
и҆л̂и на пꙋтѝ дале́че, и҆л̂и въ васъ, и҆л̂и в роже́нїи ва́шемъ, и҆ да сътвори́тъ па́схꙋ г҃ꙋ·

Въ мцс̑҇ъ вторы́и.
въ д҃і дн҃ь мцс̑҇а къ ве́черꙋ, да сътворѧ́тъ ю҆̀, съ ѻ҆прѣ́сноки съ горчи́цами, да ꙗ҆́дѧ́тъ ю҆̀·

Не ѻ҆ста́вѧтъ же ѿ неѧ̀ наѹ҆́трїѧ, и҆ ко́сти да не съкрꙋша́тъ ѿ неѧ̀, по всемꙋ̀ зако́нꙋ па́схи да сътворѧт̑ ю҆̀·

Чл҃къ же и҆же а́ще чи́стъ бꙋ́детъ и҆ на пꙋтѝ дале́че нѣ́сть, и҆ ѻ҆ста́нетъ сътвори́ти па́схꙋ, потреби́тсѧ дш҃а т̂а ѿ людїи́ свои҆хъ, ꙗ́ко да́ра гн҃ѧ не прине́съ въ́ времѧ е҆го, грѣхъ сво́и прїиметъ чл҃къ то́и·

А҆ще л̂и прїидет̑ к ва́мъ прише́лецъ въ зе́млю вашꙋ, и҆ сътвори́тъ па́схꙋ г҃ꙋ, по зако́нꙋ па́схи, и҆ по́ чинꙋ е҆ѧ̀, та́ко сътвори́тъ е҆ѧ̀·

Зако́нъ е҆ді́нъ да бꙋ́детъ вамъ, и҆ прише́лцꙋ и҆ т̂ꙋземцꙋ·

И҆ въ дн҃ь во́нже поста́висѧ храмъ, покры́лъ ѻ҆́блакъ хра́мъ, и҆ до́мъ свѣдѣ́нїѧ, ѿ вече́ра же бѣа́ше на хра́мѣ а҆ки зарѧ̀ ѻ҆́гнена до заѹ҆́трїѧ.
та́ко бысть всегда̀, ѻ҆́блак꙽ покрыва́ше е҆го въ дн҃ь, а҆ зарѧ ѻ҆́гнена но́щїю·

Є҆гда же ѿстꙋпа́ше ѻ҆́блак̑҇ ѿ хра́ма, по си́хъ въздвиза́хꙋсѧ сн҃ве і҆и҃льтестїи, на мѣ́сто на нем꙽же стоѧ́ше ѻ҆́блакъ.
та́мо въполча́хꙋсѧ сн҃ве і҆и҃лви·

По повелѣ́нїю гн҃ю да въста́ютъ сн҃ве і҆и҃лви.
и҆ по велѣнїемъ гн҃имъ ста́нꙋтъ въ всѧ́ дн҃и, в нѧ́же ѻ҆сѣнѧ́етъ ѻ҆́блакъ на хра́мѣ да въполча́ют̑сѧ сн҃ве і҆и҃лви·

Є҆гда́ же премедлитъ ѻ҆́блакъ на хра́мѣ дн҃и мно́ги.
да снабдѧт̑ сн҃ве і҆ил҃ьтестїи снабдѣ́нїе гн҃е, и҆ да не въста́ютъ·

И҆ бꙋ́детъ е҆гда̀ покры́етъ ѻ҆́блакъ дн҃и чте́ныѧ на храмъ, гл҃омъ гн҃им̑ да ста́ютъ, и҆ по велѣ́нїемъ гн҃имъ да подвижꙋтсѧ·

Бꙋ́детъ же е҆гда̀ бꙋ́дет̑ ѻ҆́блакъ ѿ ве́чера до заѹ҆́трїа, и҆ а́ще въздви́гнетсѧ ѻ҆́блакъ заѹ҆́тра, да въздви́гнꙋтсѧ дн҃їю, и҆л̂и но́щїю.
и҆ а́ще подви́гнетсѧ ѻ҆́блакъ и҆ да по́идт̑ꙋ·

И҆л̂и дн҃ь, и҆л̂и мцс̑҇ъ, и҆л̂и дн҃їи ѹ҆мно́житъ ѻ҆́блакъ ѻ҆сенѧ́ющъ на не́мъ·

да ста́нꙋтъ сн҃ове і҆и҃лви, и҆ да не въздвиза́ютсѧ.
въ ѿстꙋпле́нїи е҆го, въздвизашесѧ·

Ꙗ҆́коже по велѣ́нїемъ гн҃имъ въполча́ютсѧ, и҆ по велѣ́нїемъ гн҃имъ да ѿи́дꙋтъ, снабдѣ́нїе гн҃е да снабдѣша по повеле́нїи гн҃и, в рꙋцѣ моѷсїинѣ·

Глв̑҇а, і҃·

И рече г҃ь къ моѷсїю гл҃ѧ.
сътворѝ себѣ дв̂ѣ трꙋбы̀ сре́брѧны кова́ны сътвори́ши ѧ҆̀ и҆ да бꙋ́дета т̂и на съзва́нїе со́ньмꙋ, и҆ въставлѧ́ти по́лки·

И҆ да трꙋ́биши и́ма, и҆ да събере́тсѧ к тебѣ̀ ве́сь со́ньмъ пред̑ две́рми хра́ма свѣдѣ́нїѧ·

А҆́ще л̂и е҆ди́ною трꙋбо́ю въстрꙋ́бѧтъ, да прїидꙋт꙽ к тебѣ вс̂и кн҃ѕи и҆ ты́сѧщники і҆и҃льтестїи·

И҆ да трꙋ́бите въ зна́менїе.
и҆ да въздви́жꙋтсѧ по́лцы въполча́ющїисѧ на въсто́ки·

И҆ да въстрꙋ́бите въ зна́менїе вто́рое, и҆ да възд̑ви́гнт̑ꙋсѧ по́лцы въполча́ющїисѧ ѿ ю́га·

И҆ да въстрꙋ́бите въ зна́менїе тре́тїе, и҆ да сѧ въздви́гнꙋтъ по́лцы, въполча́ющїисѧ ѿ мо́рѧ·

И҆ да въстрꙋ́бите въ зна́менїе четве́ртое, и҆ въздви́гнꙋтсѧ по́лцы въполча́ющїисѧ ѿ сѣ́вера.
зна́менїѧ же да въстрꙋ́бѧтъ въ воздви́женїе их̑·

Є҆гда́ же събере́те со́нмъ, да въстрꙋбите не въ зна́менїе.
сн҃ве же а҆а҆ро́ни жерцы да трꙋ́бѧтъ трꙋба́ми, и҆ да бꙋ́детъ ва́мъ зако́нъ вѣ́чныи в роже́нїѧ ваша·

А҆́ще ли и҆зы́идете на́ брань въ землѝ ва́шеи къ сꙋпоста́том̑ сꙋпроти́вѧщимсѧ вамъ, и҆ воз̑трꙋби́те, и҆ съзна́менꙋ́итесѧ трꙋба́ми, и҆ въспомѧне́тесѧ пред̑ гм҃ъ·

і҆ и҆зба́витесѧ ѿ вра́гъ ва́шихъ·

Въ дн҃ь же весе́лїа ва́шего и҆ въ пра́здникахъ ва́шихъ, и҆ въ новомѣ́сечїа́хъ ва́ших̑, да въстрꙋ́бите трꙋба́ми.
и҆ на вс̂есъж꙽же́нїе и҆ на тре́бы сп҃се́нїи ва́ших̑, и҆ да бꙋдт̑ꙋ вам̑ на въспомина́нїе пред̑ бм҃ъ ва́шим̑, а҆́зъ г҃ь б҃ъ вашъ·

И҆ бы́сть въ второ́е лѣто въ вторы́и мцс̑҇ъ, въ к҃ мцс̑҇а, възнесе́сѧ ѻ҆́блак̑҇ ѿ хра́ма свѣдѣ́нїа.
и҆ възд̑виго́шасѧ сн҃ове і҆и҃леви, съ со́ньмы свои́ми ѿ пꙋсты́ни сина́искїа, и҆ ст̂а ѻ҆́блакъ въ пꙋсты́ни фара́ни·

И҆ въздви́гнꙋшасѧ первїи съ гла́сомъ гн҃имъ, рꙋко́ю моѷсїе҆вою.
и҆ въздвиго́ша зна́менїе по́лка сн҃въ и҆ю́динъ, пе́рвыи съ си́лою своею, над̑ си́лою же их̑ наа҆ссо́н꙽, сн҃ъ а҆минода́вль·

Над̑ си́лою же племе́ни сн҃въ и҆саха́ровъ наѳана́елъ, сн҃ъ сога́ровъ·

Над̑ си́лою же племе́ни сн҃въ заѹ҆ло́нь, е҆лїа́въ сн҃ъ хело́нь·

И҆ да слага́ютъ хра́мъ и҆ въздвиго́шасѧ сн҃ве герсо́ни, и҆ сн҃ве мераринѣ, носѧ́щи хра́мъ·

И҆ въздви́жесѧ зна́менїе по́лка рꙋви́млѧ, съ си́лою свое҆ю, над̑ си́лою же е҆го и҆е҆лисꙋ́ръ сн҃ъ седиѹ҆́ровъ·

Над̑ си́лою же племе́ни сн҃овъ симеѻ҆́нь саламїилъ сн҃ъ сꙋрисад̑да́евъ·

На̑ си́лою же племе́ни сн҃в꙽ га́довъ, е҆лиса́фъ сн҃ъ рагꙋ́илевъ·

И҆ да въздви́гнꙋтсѧ сн҃ве каа́ѳовы, въздвиза́ющїи ст҃аѧ, и҆ да поста́вѧтъ хра́мъ до́ндеже сїи прїидт̑ꙋ·

И҆ да въздви́гнетсѧ зна́менїе по́лка е҆фрѣмлѧ съ си́лою свое҆ю, над̑ си́лою же е҆го е҆лиса́ма сн҃ъ семиѹ҆́довъ·

Над̑ си́лою же племе́ни сн҃овъ манасїинъ гамалеи́лъ сн҃ъ фадасꙋ́ровъ·

Над̑ си́лою же племе́ни сн҃овъ венїами́нь а҆вида́нъ сн҃ъ гадеѻ҆́новъ·

И҆ да въздви́гнетсѧ зна́менїе по́лка сн҃овъ да́новыхъ, послѣ́днїи всѣ́хъ по́лкъ съ си́лою свое҆ю, над̑ си́лою же их̑ а҆хие҆зе́ръ сн҃ъ а҆мисада́евъ·

Над̑ си́лою же племе́ни сн҃овъ а҆сирь фагеел̑҇, сн҃ъ е҆хра́нь·

Над̑ си́лою же пле́мени сн҃ов̑҇ неѳали́мль, ахи́ръ сн҃ъ е҆на́нь·

Сїи полки сн҃овъ і҆и҃лвъ, съ си́лою и҆хъ и҆ та́ко въздвиго́шасѧ·

Рече же моѷсїи и҆ѻ҆ва́вꙋ сн҃ꙋ рагꙋ́илевꙋ мадїа́нинꙋ, те́стю моѷсїѻ҆вꙋ, въста́емъ м̂ы на мѣ́сто ѻ҆ не́мже г҃ь рекїи.
дамъ е҆̀ вамъ, пои҆дѝ с на́ми сътвори́мъ тебъ добро̀, ꙗ҆́ко г҃ь до́брѣ гл҃а ѻ҆ і҆и҃ли·

ѿвѣща̀ к немꙋ̀ не идꙋ̀, н̂о въ зе́млю мою̀, и҆ в роже́нїе моѐ и҆дꙋ̀·

И҆ реч̑҇, не ѻ҆ста́ни насъ поне́же б̂ѣ с на́ми въ пꙋсты́ни, и҆ бꙋ́деши в нас̑҇ ста́рецъ·

И҆ бꙋ́детъ а҆ще и́деши с на́ми, ѿ бл҃га сего̀ е҆же г҃ь намъ сътвори́тъ, бл҃го сътвори́мъ и҆ тебѣ·

ѿи҆до́ша же ѿ горы̀ гн҃ѧ въ пꙋт́ь тр̂и дн҃и.
и҆ ковче́гъ завѣта гн҃ѧ преди и҆дѧ́ше пред̑ ни́ми въ пꙋт́ь тр̂и дн҃и съглѧда́ти им̑ ста́на·

И҆ бы́сть е҆гда̀ въздвиза́хꙋ ковче́гъ, ре́че моѷсїи, въста́ни г҃и, да раз꙽сы́плютсѧ вра́зи твоѝ, и҆ вс̂и ненави́дѧщїи тебѐ да побѣ́гнꙋтъ ѿ лица̀ твое҆го·

И҆ въ поста́вленїи ковче́га рече·

Възвраща́и г҃и тысꙋща тем̑ въ і҆и҃ли.
ѻ҆́блакъ же гн҃ь бы́сть на них̑ въ дн҃ь е҆гда̀ въздвиза́хꙋсѧ с по́лка·

Глв̑҇а, а҃і·

И бы́ша людїе ро́пщꙋще зла́ѧ пред̑ гм҃ъ.
и҆ слы́ша г҃ь и҆ раз꙽гнѣ́васѧ гнѣ́вомъ, и҆ раз̑горѣ́сѧ в них̑ ѻ҆́гнь ѿ г҃а, и҆ потребѝ ча́сть е҆ді́нꙋ ѿ пол̑҇ка·

Възопи́шаже лю́дїе къ моѷсїю, и҆ помоли́сѧ моѷсїи къ г҃ꙋ, и҆ ѹ҆ста́висѧ ѻ҆́гнь.
и҆ прозва́сѧ и́мѧ мѣ́стꙋ томꙋ запале́нїе, ꙗ҆ко разгорѣ́сѧ в них̑ ѻ҆́гнь ѿ г҃а·

Прїидо́ша же и҆же в них̑, пожада́ша похотѣ́нїе·

И҆ сѣд́ше пла́кахꙋсѧ сн҃ове і҆и҃лви.
и҆ реко́ша, кто̀ н̂ы напита́етъ мѧ́съ·

Помѧнꙋх́ом̑ бо ры́бы ꙗ҆́же ꙗ҆́до́хомъ въ землѝ е҆гѷпет̑стѣ, тꙋ́не·

И҆ смо́квы и҆ ды́ни, лꙋ́къ, и҆ червле́ныи лꙋ́къ, и҆ чеснок̑҇·

А҆ нн҃ѣ дш҃а на́ша и҆схла̀, ничто́же то́чїю ма́нна пред̑ ѻ҆чима на́шима·

Ма́нна же бѧ́ше а҆ки сѣмѧ корїа́ндрово е҆сть, ѻ҆бли́чїе е҆го ꙗ҆́ко ѻ҆бли́чїе би́сера чи́ста·

И҆схожда́хꙋ лю́дїе, и҆ събира́хꙋ, и҆ мелѧ́хꙋ в же́рновнах̑, и҆ толца́хꙋ въ стꙋ́пахъ, и҆ варѧ́хꙋ въ горшка́хъ, и҆ творѧ́хꙋть е҆ю̀ потре́бники, и҆ бѧше вкꙋше́нїе е҆го, ꙗ҆́ко вкꙋше́нїе мꙋкѝ съ е҆ле́ѻм꙽·

Є҆гда́ же схожда́ше роса̀ на по́лкъ но́щїю, схожда́ше же ма́нна на́ нѧ·

И҆ ѹ҆слы́ша моѷсїи пла́чющихсѧ и҆хъ въ со́нмх̑ѣ своих̑, ко́ждо их̑ пред̑ свои́ми две́рми, и҆ разгнѣ́васѧ г҃ь гнѣ́вомъ ѕѣло, и҆ пред̑ моѷсїѻм̑ бѣше зл̂о·

Реч̑҇ моѷсїи къ г҃ꙋ, въскꙋ́ю заѕлѝ рабꙋ̀ свое҆мꙋ, почт̂о не ѻ҆брѣтох̑ блгд̑ти пред̑ тобо́ю, е҆же възложи́ти напа́сть людїи сихъ на́ мѧ·

Є҆да̀ а́зъ е҆смь въ ѹ҆тро́бѣ зача́лъ вс̂ѧ лю́ди сїа, и҆л̂и а́зъ е҆смь роди́лъ ѧ̀, ꙗ҆́ко да гл҃еши м̂и възмѝ и҆хъ на ра́мꙋ твою̀, ꙗ҆́коже дои́лица носитъ дои́мыѧ, въ зе́млю е҆ю́же клѧ́сѧ ѿц҃емъ и҆хъ·

ѿкꙋ́дꙋ мн̂ѣ мѧ́са да́ти всѣмъ лю́демъ симъ, ꙗ҆́ко пла́чютъ на́ мѧ гл҃юще, да́ждь н̂ы мѧ́са да ꙗ҆́мы·

Не могꙋ а́зъ е҆дин̑҇ вестѝ людїи сихъ, ꙗ҆́ко тѧжча́иши менѐ е҆сть·

А҆́ще л̂и та́ко твори́ши мн̂ѣ, побїи м̂ѧ побїе́нїем꙽, а҆́ще л̂и е҆смь ѻ҆брѣ́лъ блгд̑ть пред̑ тобо́ю, да не ви́жꙋ заѕлѣ́нїѧ мое҆го·

И҆ рече г҃ь къ моѷсїю, съберѝ м̂и, о҃, мꙋ́жъ ѿ ста́рецъ і҆и҃лвъ, ꙗ҆́же т̂ы сам̑ вѣси, ꙗ҆́ко тїи сꙋть ста́рцы люд̑стїи, и҆ книг̑҇чїѧ и҆хъ.
и҆ да приведе́ши ѧ҆̀ въ хра́м꙽ свѣдѣ́нїа, и҆ да ста́нꙋтъ та́мо с тобо́ю·

И҆ сни́дꙋ, и҆ гл҃ю та́мо с тобо́ю и҆ ѹ҆и҆мꙋ̀ ѿ́ дх҃а и҆же при тебѣ, и҆ възложꙋ̀ на́ нѧ да подо́имꙋтъ с тобо́ю, наказа́нїе людїе тїи, да не во́диши т̂ы е҆ди́нъ·

Лю́дем꙽ же рече́ши ѻ҆чи́ститесѧ до заѹ҆́трїа да ꙗ҆сте мѧ́са, ꙗ҆́ко пла́кастесѧ пред̑ гм҃ъ, гл҃юще, кто̀ н̂ы напита́етъ мѧсъ, ꙗ҆́ко добрѣ́е н̂ы бы́сть въ е҆гѷптѣ, и҆ да́стъ г҃ь вам̑ мѧ́са ꙗ҆́сти, и҆ ꙗ҆́сте мѧ́са·

Не е҆ди́нъ дн҃ь да ꙗ҆сте н̂и два̀, н̂и е҃, дн҃їи, н̂и і҃ дн҃їи, н̂и к҃ дн҃ь·

Но̂ ве́сь мцс̑҇ь ꙗ҆́сте, до́ндеже и҆зы́детъ и҆з но́здрїи ва́шихъ, и҆ бꙋ́детъ вам̑ в ме́рзость, ꙗ҆́ко не покори́стесѧ г҃ꙋ, и҆же е҆сть въ вас̑҇.
и҆ пла́кастесѧ пред̑ ним̑ гл҃юще, въскꙋ́ю б̂ѣ на́мъ и҆зы́ити и҆з꙽ е҆гѷпта·

Рече же моѷсїи, х҃, ты́сѧщъ людїи сихъ, в ни́х же а҆́зъ е҆смь, ты же рече мѧ́съ и҆мъ да́мъ, да ꙗ҆дѧт̑ мцс̑҇ъ дн҃їи·

Є҆да̀ ѻ҆вча́та, и҆ли воло́ве, и҆ско́лютсѧ и҆мъ, да им̑ доста́нет꙽.
и҆л̂и вс̂ѧ ры́бы морскїа, съберꙋтсѧ и҆мъ и҆ доста́нетъ и҆м꙽·

И҆ рече г҃ь къ моѷсїю.
е҆да рꙋка гн҃ѧ не постигнетъ с̂е, нн҃ѣ же въразꙋмѣеши а҆ще пости́гнетъ сло́во мое и҆лѝ н̂и·

І҆ и҆зы́иде моѷсїи, и҆ гл҃а лю́дем̑ словеса̀ гн҃ѧ.
и҆ събра̀, о҃, мж̑ꙋ ѿ ста́рецъ люд̑скихъ.
и҆ поста́ви ѧ҆̀ ѻ҆́крс̑҇тъ хра́ма·

И҆ сни́де г҃ь въ ѻ҆́блацѣ и҆ гл҃а к немꙋ̀.
и҆ ѹѧ̀ ѿ́ дх҃а и҆же на не́мъ, и҆ възложѝ на о҃ старецъ, ꙗ҆́коже препочѝ дх҃ъ на них̑ и҆ прро̑҇коваша, и҆ посем̑ не преста́ша·

И҆ ѻста́ста дв̂а мꙋжа в по́лцѣ, и҆́мѧ е҆ди́номꙋ е҆лда́дъ и҆́мѧ второ́мꙋ мода́дъ, и҆ препочѝ на них̑ дх҃ъ, и҆ сїа же бѣ́ста ѿ в꙽пи́саных̑, н̂о не прїидо́ста къ хра́мꙋ, и҆ прро̑҇коваша въ по́лцѣ·

И прибѣж́е ю҆́ноша и҆сповѣ́да моѷсїю, и҆ рече.
гл҃ѧ е҆лдад̑ и҆ мода́дъ прро̑҇кꙋютъ въ по́лцѣхъ·

И҆ ѿвѣща̀ и҆сꙋ́съ на́винъ пред̑стоѧ́й моѷсїю и҆збра́нныи е҆мꙋ̀, и҆ реч̑҇ г҃и мо́и моѷсїю запретѝ и҆мъ·

Рече же е҆мꙋ моѷсїи.
е҆да̀ ревнꙋ́еши ли т̂ы менѐ ра́ди, т̂о кто̀ б̂ы да́лъ всѣмъ лю́дем̑ прро̑҇кы, е҆да̀ да́стъ г҃ь дх҃ъ сво́и на́ нѧ·

І҆ иде моѷсїи са́мъ въ по́лкъ, и҆ ста́рцы і҆и҃льтестїи, и҆ дх҃ъ и҆зы́иде ѿ г҃а і҆ и҆зведѐ красте́ли и҆з мо́рѧ, и҆ наведѐ на по́лкъ дн҃ь хо́дꙋ ѿсю́дꙋ, и҆ дн҃ь хо́дꙋ ѿ ѻ҆вꙋ́дꙋ ѻ҆́крс̑҇тъ полка̀, ꙗ҆́ко два ла́кти ѿ землѧ̀·

И҆ въста́вше лю́дїе ве́сь дн҃ь и҆ всю̀ но́щъ, и҆ ве́сь дн҃ь наѹ́трїѧ, и҆ събра́ша кра́стели, и҆же ма́ло събра̀ кт̂о і҃, спꙋ́ды, і҆ и҆с꙽сꙋши́ша себѣ̀ сꙋшани́ца ѻ҆́крстъ пол̑҇ка̀·

И҆ мѧ́са бѧ́хꙋ и҆мъ е҆щѐ въ зꙋбх̑ѣ и҆х꙽, прежде ѻ҆скꙋдѣ́нїа, и҆ г҃ь разгнѣ́васѧ ѕѣло на́ люди, и҆ поразѝ г҃ь лю́ди вре́домъ вели́кимъ ѕѣло.
и҆ прозва́сѧ мѣ́сто т̂о гро́бъ похотѣ́нїѧ, ꙗ҆́ко т̂ꙋ погребо́ша лю́ди похотѣ́вшаѧ·

И въздвиго́шасѧ лю́ди ѿ гро́бъ похотѣ́нїѧ въ а҆сиро́ѳъ, и҆ бы́ша лю́дїе въ а҆сиро́ѳѣ·

Глв̑҇а, в҃і·

И възгл҃аста марїам̑ і҆ а҆а҆ро́нъ.
на моѷсїа жены̀ ради мꙋрѧнинѧ ю҆́же поѧ̀ моѷсїи, зане б̂о женꙋ̀ поѧ мꙋр́ининю, и҆ реко́ста, е҆да̀ л̂и моѷсїю е҆ді́номꙋ гл҃а г҃ь·

Ѹ҆́бо и҆ намъ гл҃алъ е҆сть, и҆ ѹ҆слы́ша г҃ь·

Чл҃къ же моѷсїи кро́токъ е҆сть ѕѣло, паче всѣх꙽ чл҃къ сꙋщихъ на землѝ·

И҆ рече г҃ь внеза́пꙋ къ моѷсїѻ҆ви і҆ аа҆ро́нꙋ, и҆ къ марїа́ми и҆зы́дите в̂ы трїе въ хра́м꙽ свѣдѣнїѧ, и҆ и҆зы́идоша трїе в꙽ храм̑ свѣдѣнїѧ·

И҆ сни́де г҃ь въ столпѣ̀ ѻ҆́блачнѣ, и҆ ста ѹ҆ две́рїи хра́ма свѣдѣнїѧ, и҆ възва̀ а҆а҆рона и҆ марїа́мъ, і҆ и҆зыдо́ста ѻ҆́ба·

И҆ рече и҆мъ послꙋшаите слове́съ мои҆хъ, а҆ще бꙋдет꙽ въ вас̑҇ прро̑҇къ гн҃ь въ видѣнїи е҆мꙋ позна́юсѧ, и҆ въ снѣ̀ возгл҃ю е҆мꙋ·

А҆ не та́ко ꙗ҆́ко рабꙋ̀ мое҆мꙋ моѷсїю.
въ все́мъ домꙋ̀ мое҆мъ вѣ́ренъ е҆сть·

И҆ ѹ҆сты̀ къ ѹ҆сто́мъ гл҃ю е҆мꙋ.
въ видѣнїи, а҆ не гада́нїемъ, и҆ сла́вꙋ гн҃ю ви́дѣ.
и҆ почто́же не ѹ҆боа́стесѧ гл҃ати на раба̀ мое҆го моѷсїа, и҆ гнѣв꙽ ꙗ҆́рости гн҃ѧ бысть на них̑ и҆ ѿи́де·

И҆ ѻ҆блак̑҇ ѿстꙋпи́ ѿ хра́ма.
се́ же марїам̑ прокаже́на бѧше ꙗ҆ко снѣ́гъ, и҆ възрѣ а҆а҆ро́нъ на марїа́мъ.
и҆ с̂е прокаже́на·

И҆ рече а҆а҆ро́нъ къ моѷсїю, молю́ тѧ г҃и, не възлага́и на́ ны грѣха̀, поне́же невѣ́дѧхомъ съгрѣши́хомъ.
да не бꙋ́детъ сїѧ ꙗ҆ко мр҃тва ꙗ҆́ко и҆звръгъ е҆же и҆зве́рженъ и҆з ложе́снъ мт҃рнь, с̂е ѹ҆́же поꙗ҆дѐ полъ пло́ти е҆ѧ̀·

И҆ възопѝ моѷсїи къ г҃ꙋ гл҃ѧ.
б҃е молю́ ти сѧ и҆сцѣлѝ ю҆̀·

И҆ рече г҃ь къ моѷсїю, а҆ще ѿц҃ъ е҆ѧ̀ плю́ѧ заплю́етъ въ лицѐ е҆ѧ̀, и҆ не срами́тсѧ з҃ дн҃ь да ѿлꙋчи́тсѧ вн̂ѣ полка̀, и҆ по си́хъ да вни́детъ·

И҆ ѿлꙋчи́сѧ марїамъ вн̂ѣ полка́ з҃ дн҃їи·

Лю́дїе же не въздвиго́шасѧ до́ндеже ѻ҆чи́стисѧ марїа́мъ·

Глв̑҇а, г҃і·

И по семъ въздвиго́шасѧ лю́дїе ѿ а҆сѷро́ѳа.
и҆ въполчи́шасѧ въ пꙋсты́ни ѳара́нѣ·

И҆ рече г҃ь къ моѷсїю гл҃ѧ.
послѝ ѿ себе мꙋ́жи, да съглѧда́ют꙽ зе́млю ханаа́ньскꙋ, ю҆́же а҆зъ даю̀ сн҃омъ і҆и҃лвомъ въ дръжа́вꙋ, мꙋж́а е҆ді́наго ѿ племе́ни, по соньмом̑ ѿч҃ьства их̑.
да послеши ѿ их̑ вс̂ѧ старѣи҆шины их̑·

И҆ посла̀ ѧ҆̀ моѷсїи.
ѿ пꙋсты́нѧ ѳара́нѧ, гл҃омъ гн҃им̑.
вс̂и мꙋж́и старѣи́шины сн҃овъ і҆и҃лев̑҇ сїи·

И҆ сїѧ и҆мена̀ их̑.
ѿ племе́ни рꙋви́млѧ самїи́лъ сн҃ъ закхꙋсовъ·

ѿ племе́ни сїмеѻ́нѧ, сафатъ сн҃ъ сꙋ́ринь·

ѿ племе́ни і҆ю́дина, халев̑҇, сн҃ъ и҆е҆фо́нинъ·

ѿ племе́ни и҆саха́рѧ и҆гад̑ сн҃ъ і҆ѻ́сифль·

ѿ племе́ни е҆фрѣмлѧ а҆вси́съ сн҃ъ на́винъ·

ѿ племе́ни веньа́минѧ фалтїи сн҃ъ рафꙋи́левъ·

ѿ племе́ни заѹ҆ло́нѧ, гꙋдїиль сн҃ъ сꙋдїи·

ѿ племе́ни і҆ѻ́сифлѧ сн҃овъ манасїи҆нъ, гад̑ди сн҃ъ сꙋси́нъ·

ѿ племе́ни да́нова а҆мїиль сн҃ъ гама́ли·

ѿ племе́ни а҆сирова, саѳꙋ́ръ, сн҃ъ миха́иль·

ѿ племе́ни нефѳали́млѧ.
наа҆вїи, сн҃ъ са́ви.
ѿ племе́ни га́дова гꙋдїи́ль, сн҃ъ махїиль·

Сїѧ же и҆мена̀ мꙋжъ, ꙗ҆же посла̀ моѷсїи, съглѧда́ти землѧ̀ ханаа́ньски·

И҆ прозва̀ моѷсїи а҆всїа сн҃а на́вина і҆сꙋ́съ·

И҆ посла̀ ѧ҆̀ моѷсїи ѿ пꙋсты́ни а҆а҆ро́на съглѧда́ти землѧ̀ ханаа́ньскїѧ·

И҆ рече к ни́мъ взы́дите пꙋсты́нею се́ю, и҆ да възы́дите на горꙋ̀·

И҆ съглѧда́ите зе́млю.
какова̀ е҆сть, и҆ лю́ди сѣдѧ́щаѧ на не́и, си́лни ли сꙋть, и҆л̂и не́мощни.
ма́ло ли и҆хъ е҆сть, и҆л̂и много·

И҆л̂и какова е҆сть землѧ̀, на не́иже сїи сѣдѧ́тъ, добра̀ л̂и е҆сть и҆л̂и зла.
и҆ какови гра́ди в нихъ же живꙋтъ сїи, ѻ҆гражде́ни ли сꙋть и҆л̂и неѻ҆гражде́ни·

И҆ какова землѧ̀ и҆зоѻ҆би́лна ли, и҆л̂и неи҆зоѻ҆би́лна, сꙋть ли на не́и саже́ни садо́вїе, и҆л̂и не сꙋть, и҆ ѹ҆крѣпи́вшесѧ, възмѣте ѿ плода̀ землѝ, дн҃и же дн҃еи лт̑ѣнихъ пред̑ спева́ющимъ ꙗ҆́годамъ·

И҆ шед꙽ше съглѧда́ша землѧ̀, ѿ пꙋсты́нѧ си́нь, да́же до ѻ҆ровъ, до и҆схо́дищъ е҆ма́ѳъ·

и҆ възы́доша въ пꙋсты́нѧ, и҆ прїидо́ша до хевро́на, и҆ та́мо живѧ́ше а҆хима́нъ и҆ сесїи, и҆ ѳела́ми, рожде́нїа е҆накова, хевро́н꙽ же.
вселисѧ сед̑мь лѣтъ прежде тани́немъ градомъ е҆гѷпетьским̑·

и прїидо́ша до де́бри гро́здныѧ, и҆ съглѧда́ша ю҆̀, и҆ ѹ҆рѣзаша ѿтꙋдꙋ ви́ничинꙋ съ грезнове́нїемъ е҆ді́нꙋ ѿ ни́хъ, и҆ въздвиго́ша ю҆̀ на же́рдь, и҆ ѿ ши́покъ и҆ ѿ смо́ковъ·

и҆ назва́ша и҆̀ мѣсто ѻ҆́но де́бръ грезно́внаѧ грезна̀ дѣлѧ и҆же ѹ҆рѣз́аша ѿтꙋ́дѣ сн҃ове і҆и҃льтестїи·

и҆ възврати́шасѧ ѿтꙋ́дѣ.
съглѧдав̑҇ше землю, въ м҃ дн҃їи·

И҆ ходи́вше прїидо́ша къ моѷсїю и҆ къ а҆аро́нꙋ, и҆ къ всемꙋ̀ со́нмꙋ сн҃овъ і҆и҃лвъ, въ пꙋсты́ню ѳара́ню въ кади́съ.
и҆ ѿповѣ́даша и҆мъ сло́во и҆ всемꙋ̀ со́нмꙋ, и҆ показа́ша и҆м꙽ пло́дъ зе́мныи·

И҆ повѣ́даша и҆м꙽, и҆ реко́ша.
ходи́хом̑ на́ землю на ню́же н̂ы посыла́сте, землѧ́ же т̂а кипѧ́щи мле́комъ и҆ ме́дом꙽, и҆ с̂е плод̑ е҆ѧ̀·

Но̂ си́лни лю́ди и҆же на не́и живт̑ꙋ, и҆ гра́ди ѹ҆тверже́ни гражде́нїемъ, и҆ вели́цы ѕѣ́ло.
и҆ роже́нїе а҆на́ково, ви́дѣхомъ та́мо·

И҆ а҆мали́къ та́мо живе́тъ въ землѝ ѿ ю́га.
и҆ хет꙽ѳе́и, и҆ е҆ве́и, и҆ е҆вꙋсе́и, и҆ а҆морѣ́и живꙋтъ въ гора́хъ, а҆ ханане́и живꙋт꙽ ѿ мо́рѧ подо́лгъ рѣкѝ і҆ѻ҆рда́на·

И҆ поста́ви хале́въ лю́ди пред̑ моѷсїѻ҆мъ и҆ реко́ша е҆мꙋ, н̂ика́коже н̂о въста́виши да и́дем꙽, и҆ прїимемъ ю҆̀.
ꙗ҆́ко си́лни м̂ы съпроти́витисѧ и҆мъ·

И҆ чл҃цы ходи́вшїи с ни́мъ реко́ша.
не идем꙽, ꙗ҆́ко не мо́жемъ и҆зы́ти проти́вꙋ им̑, ꙗ҆́ко крѣ́пцы сꙋть паче насъ ѕѣло·

І҆ и҆знесо́ша ѹ҆жасова́нїе на́ землю, и҆же съглѧда́ша ю҆̀, къ сн҃омъ і҆и҃лвым̑ гл҃юще.
зе́млю ю҆же проидо́хомъ съглѧда́юще, землѧ̀ е҆сть поꙗ҆́дꙋщи живꙋщїѧ на не́и, и҆ вс̂и лю́ди и҆хже ви́дѣхом̑ на не́и, мꙋж́и высо́цы сꙋщїи·

И҆ та́мо ви́дѣхомъ щꙋ́ды.
сн҃ы е҆на́ковы, и҆ бѣ́хом̑ пред̑ ни́ми ꙗ҆́ко прꙋ́зи, и҆ та́ко преидо́хомъ пред̑ ни́ми·

Глв̑҇а, д҃і·

И пои́мъ ве́сь со́нмъ да́стъ гла́съ, и҆ пла́кахꙋсѧ лю́дїе вс̂ю но́щь т̂ꙋ·

И҆ ропта́хꙋ на моѷсїа, и҆ а҆а҆ро́на, вси сн҃ове і҆и҃льтестїи, и҆ реко́ша к ним̑ ве́сь со́нмъ.
ѹ҆́нее б̂ѣ ѹ҆́мрѣти намъ въ землѝ е҆гѷпет̑стѣи, не́жели въ пꙋсты́ни се́и·

Въскꙋ́ю въведѐ нас̑҇ г҃ь въ зе́млю т̂ꙋ, па́сти мечем̑, же́ны же на́ша и҆ дѣти на́ша бꙋ́дꙋтъ въ разграбле́нїе.
и҆ нн҃ѣ ѹ҆бо ѹ҆́нее ес̑҇ на́мъ възврати́тисѧ въ е҆гѷпет̑·

И҆ рече дрꙋ́гъ къ дрꙋ́гꙋ.
поста́вимъ себѣ старїишинꙋ, да сѧ ѻ҆братимъ въ е҆гѷпетъ·

И҆ падо́ста моѷсїи и҆ а҆аро́нъ ниць пред̑ всѣмъ со́нмомъ сн҃въ і҆и҃левъ·

И҆сꙋсъ же сн҃ъ на́вѷнъ, и҆ хале́въ сн҃ъ и҆ефо́нинъ, ѿ съглѧдавшихъ зе́млю, разтерза́ста ри́зы своѧ̀·

И҆ реко́ста къ всемꙋ̀ со́нмꙋ сн҃овъ і҆и҃лвъ, гл҃юще.
зе́млю ю҆́же съглѧда́хом̑, бл҃га е҆сть ѕѣло ѕѣло·

А҆ще лю́битъ нас̑҇ г҃ь, въведе́тъ нас̑҇ въ зе́млю т̂ꙋ, и҆ да́стъ ю҆̀ на́мъ.
зе́млѧ же е҆сть кипѧ́щи ме́дом̑ и҆ мле́ком꙽·

Развѣ ѿ г҃а не бꙋ́дите ѿстꙋпницы, вы́ же не ѹ҆бо́истесѧ люде́и землѧ̀ тоѧ̀, поне́же ꙗ҆́ко въ пи́щꙋ нам̑ е҆сть, ѿстꙋпи́ло бо вре́мѧ ѿ них̑, г҃ь же с на́ми, не бо́итесѧ и҆хъ·

И҆ реч̑҇ ве́сь со́нмъ да побїемъ их̑ ка́менїемъ·

Сла́ва же гн҃ѧ ꙗ҆́ви́сѧ въ ѻ҆́блацѣ въ хра́мѣ свѣдѣ́нїѧ, въ всѣ́хъ сн҃ѣхъ і҆и҃лвыхъ·

І҆ рече г҃ь къ моѷсїю, доко́лѣ разгнѣ́ваютъ м̂ѧ лю́дїе сїи, и҆ доко́лѣ не вѣ́рꙋютъ мн̂ѣ, въ всѣх꙽ чюдесѣ́хъ, ꙗ҆́же сътвори́хъ в них̑·

Поражю̀ и҆хъ смертїю и҆ погꙋблю̀ их̑, и҆ сътворю̀ т̂ѧ и҆ до́мъ ѿц҃а твое҆го въ лю́ди вели́ки и҆ мно́ги пач̑҇ не́жели сїа·

И҆ рече моѷсїи къ г҃ꙋ, ѹ҆слы́шатъ е҆гѷптѧне, ꙗ҆́ко възведѐ крѣ́постїю свое́ю лю́ди твоѧ̀ сїѧ ѿ нихъ·

І҆ вс̂и живꙋщїи на землѝ се́и.
слы́шаша ꙗ҆́ко т̂ы е҆си г҃ь въ млс̑҇ти сы́и.
и҆же ѻ҆чи́ма пред̑ ѻ҆чи́ма ꙗ҆влѧ́ешисѧ г҃и, и҆ ѻ҆́блакъ твои ста̀ над̑ ни́ми, и҆ столпом̑ ѻ҆́блачнымъ и҆́деши т̂ы пред̑ ни́ми въ дн҃ь.
и҆ столпо́мъ ѻ҆́гненом̑ в но́щи·

Є҆гда же и҆ потреби́ши лю́ди сїа, а҆́ки е҆ди́наго чл҃ка.
и҆ рект̑ꙋ вс̂и стра́ны, и҆же слы́шаша и҆́мѧ твое гл҃юще·

Занѐ не мо́же г҃ь людїи своих̑ въвестѝ въ зе́млю, ѻ҆ не́иже клѧ́тсѧ и҆мъ.
и҆ погꙋбѝ и҆хъ въ пꙋсты́ни·

І҆ нн҃ѣ да сѧ възнесе́тъ рꙋка твоѧ̀ г҃и, ꙗ҆́коже гл҃алъ е҆си рекїи·

Гь҃ терпѣлив̑҇, и҆ многомлс̑҇тивъ, и҆́стинен̑҇.
ѿм꙽ща̀ безако́нїе, и҆ грѣхѝ, и҆ непра́вды, и҆ ѻ҆чище́нїемъ не ѻ҆чи́ститъ пови́н꙽наго.
ѿдаѧ̀ грѣхѝ ѿч҃а на ча́да, до тре́тїѧго и҆ четве́ртаго ро́да·

ѻ҆ста́ви грѣхѝ лю́демъ симъ, по вели́цеи млс̑҇ти твое́и, ꙗ҆́ко млс̑҇тивъ б̂ѣ и҆мъ въ е҆гѷптѣ и҆ досе́лѣ·

И҆ реч̑҇ г҃ь къ моѷсїю.
млс̑҇тивъ и҆мъ е҆смь, по словесѝ твое҆мꙋ·

Н҆о живꙋ̀ а́зъ и҆ прс̑҇но живе́тъ и҆́мѧ моѐ.
и҆ напо́лнит꙽ сла́ва гн҃ѧ вс̂ю зе́млю·

Ꙗ҆́ко вс̂и мꙋжи ви́дѧщїи сла́вꙋ мою, и҆ чюдеса̀ ꙗ҆́же сътвори́хъ въ е҆гѷптѣ, и҆ въ пꙋсты́ни сеи, и҆скꙋси́ша мѧ с̂е десѧ́тое, и҆ не послꙋш́аша гл҃ъ мои҆хъ·

И҆ да не ѹ҆́зрѧтъ землѧ̀ е҆ю́же клѧх̑сѧ ѿц҃емъ и҆хъ.
н̂о ча́домъ и҆хъ, ꙗ҆же сꙋть съ мно́ю зд̂ѣ, и҆же не вѣ́дѧтъ добра̀ и҆ ѕла̀·

Всѧк̑҇ ю҆́ноша невѣ́дыи си́мъ да́мъ зе́млю, вси́ же разгнѣвавшїи м̂ѧ не ѹ҆́зрѧт̑ е҆ѧ̀·

Ра́бъ же мои хале́въ.
ꙗ҆́ко бы́сть дх҃ъ и҆́нъ при не́мъ, и҆ въслѣ́дова мн̂ѣ·

Въведꙋ и҆̀ въ зе́млю в ню́же вхо́дит̑ та́мо, и҆ племѧ̀ е҆го прїиметъ ю҆̀, и҆ а҆мали́ка и҆ ханане́ѧ живꙋ́щихъ въ ѹ҆до́лїи·

ѹ҆́трѣ възвратитесѧ и҆ подви́гнетесѧ въ пꙋсты́ню пꙋте́мъ мо́рѧ чрьмна́го·

И҆ рече г҃ь къ моѷсїю и҆ а҆аро́нꙋ гл҃ѧ.
доко́лѣ со́нмъ сїи ѕлы́и, ро́пщꙋтъ проти́вꙋ мн̂ѣ, ропта́нїе б̂о сн҃овъ і҆и҃лвъ и҆мже възропта́ша ѻ҆ вас̑҇ слы́шахъ·

Рцы̀ и҆мъ, живꙋ̀ а҆́зъ гл҃етъ г҃ь, ꙗ҆́коже гл҃асте въ ѹ҆́ши моѝ, та́ко сътворю̀ ва́мъ·

Въ пꙋсты́ни се́и падꙋтъ телеса̀ ва́ша, и҆ вс̂и съглѧда́нїи ва́ши, и҆ съчте́ныи ва́ши, ѿ к҃, лѣтъ и҆ выш̑҇ше, вс̂и и҆же ропта́ша до менѐ·

А҆ще вни́дете въ зе́млю.
на ню́же простро́хъ рꙋ́кꙋ мою, всели́ти васъ на не́и, ра́звѣ хале́въ сн҃ъ е҆фѳинѣи҆нъ, и҆сꙋсъ сн҃ъ на́вѷнъ·

Ча́да же ваши и҆хже рѣ́сте въ разгра́бленїи бы́ти, въведꙋ ѧ҆̀ въ зе́млю и҆ прїимꙋтъ зе́млю, ѿ неѧ́же в̂ы н҃нѣ ѿверго́стесѧ·

Телеса́ же ваша падꙋтъ въ пꙋсты́ни се́и·

Сн҃ове же ва́ши бꙋ́дꙋтъ пасꙋщесѧ въ пꙋсты́ни се́и, м҃ лѣтъ, и҆ ѿи́мꙋт̑ блꙋже́нїе ваше, до́ндеже потребѧт̑сѧ телеса̀ ва́ша въ пꙋсты́ни·

По числꙋ̀ дн҃їи в них̑же съглѧда́сте землю м҃ дн҃їи, дн҃и лѣта е҆ді́наго понесе́те грѣхѝ ва́ша м҃, лѣтъ, и҆ ѹ҆вѣ́сте ꙗ҆́рость гнѣ́ва мое҆го·

А҆́зъ г҃ь гл҃ах꙽ вамъ, та́ко сътворю̀ со́нмꙋ семꙋ̀ ѕло́мꙋ, въста́вшемꙋ на́ мѧ, въ пꙋсты́ни б̂о се́и, потребѧт̑сѧ, и҆ т̂ꙋ и҆зъмрꙋтъ·

Мꙋж́а же ꙗ҆́же посыла̀ моѷсїи съглѧда́ти землѧ̀, и҆ ходи́вшеи, сропта́ша ѻ҆ не́и къ со́нмꙋ.
и҆ гл҃аша словеса̀ ѕла̀ ѻ҆ не́и·

І҆ и҆зомро́ша мꙋж́и гл҃авшїи ѻ҆ землѝ ѕло̀ вре́дом̑ пред̑ гм҃ъ·

І҆сꙋсъ же сн҃ъ на́вѷнъ, и҆ хале́въ сн҃ъ и҆е҆фѳо́нинъ, жи́ва быста ѿ мꙋжъ тѣ́хъ ходи́вших̑ съглѧда́ти землѧ̀·

И҆ гл҃а моѷсїи словеса̀ с̂и, къ всѣмъ сн҃омъ і҆и҃левымъ, и҆ въскорбѣша лю́дїе ѕѣло·

И҆ въстав̑҇ше заѹ҆́тра.
възыдо́ша на ве́рхъ горы̀ гл҃юще.
с̂е мы̀ да възы́идемъ на мѣсто, е҆же реч̑҇ г҃ь, ꙗко съгрѣши́хом̑·

И҆ реч̑҇ моѷсїи въскꙋ́ю в̂ы престꙋпа́ете сло́во гн҃е, не ѹ҆годи́тсѧ вамъ·

Не въсходи́те, нѣсть б̂о г҃ь с ва́ми, и҆ паде́те пред̑ лицемъ врагъ ва́ших̑·

Занѐ а҆мали́къ и҆ ханане́и та́мо пред̑ ва́ми, и҆ паде́те мече́мъ.
и҆же ѹ҆бо ѻ҆братите́сѧ, непокарѧ́ющїисѧ г҃ꙋ, сего ради нѣ́сть г҃ь с ва́ми·

И҆ ѿходѧ́щїи възыидо́ша на верхъ горы̀, ковче́гъ же завѣта гн҃ѧ, и҆ моѷсїи не пристꙋпа́ше ѿ среды̀ полка̀·

И҆ сни́де а҆мали́къ и҆ ханане́и, сѣдѧ́и в горѣ то́и, і҆ и҆с꙽стро́ша и҆хъ, і҆ и҆с꙽сѣко́ша их̑ да́же до е҆рма̀, и҆ възврати́шасѧ въ по́лкъ·

Глв̑҇а, е҃і·

И рече г҃ь къ моѷсїю гл҃ѧ, гл҃и сн҃омъ і҆и҆лвымъ, рекїи къ ни́мъ.
е҆гда̀ въни́дете въ зе́млю вселе́нїѧ ва́шего, ю҆́же а́зъ даю̀ ва́мъ·

И҆ да сътвори́те прино́съ г҃ꙋ, въ вс̂есъж꙽же́нїе, и҆л̂и тре́бꙋ, и҆л̂и вели́кꙋ мольбꙋ̀, и҆л̂и бл҃гово́льнꙋ, и҆л̂и въ пра́зд̑ники ва́ша въ воню̀ бл҃гово́нїа г҃ꙋ·

А҆́ще ѹ҆бо ѿ воло́въ, и҆л̂и ѿ ѻ҆ве́цъ, и҆ да принесе́тъ приносѧ́и да́ръ свои г҃ꙋ.
да принесе́тъ и҆ тре́бꙋ мꙋкѝ пшени́чны десѧ́тꙋю часть е҆фи, мѣ́ры, вмѣшены въ е҆ле́ю четве́ртые ча́сти и҆́ны мѣ́ры·

Вина́ же на възлїѧ́нїѧ четве́ртꙋю ча́сть и҆́ны мѣ́ры, да сътвори́те въ вс̂есъж꙽же́нїе, и҆л̂и въ тре́бꙋ а҆́гньцꙋ е҆ди́номꙋ да сътвори́те толи́ко, принос̑҇ вонѝ бл҃гово́нїѧ г҃ꙋ·

и҆ ѻ҆вна е҆гда̀ творите е҆го въ вс̂есож̑же́нїе и҆л̂и въ тре́бꙋ·

да сътвори́те тре́бꙋ мꙋкѝ пшени́чны, к҃, ча́стїи вмѣшаныхъ въ е҆ле́ю тре́тїю ча́сть и҆́ны мѣ́ры·

Вина́ же на възлїа́нїе, тре́тїю ча́сть и҆́ны мѣ́ры да принесе́те въ воню̀ бл҃гово́нїѧ г҃ꙋ·

А҆́ще ли твори́те ѿ воло́въ въ вс̂есъж꙽женїе, и҆л̂и въ тре́бꙋ, и҆л̂и възвеличе́нїе молбы̀, и҆л̂и въ сп҃се́нꙋю г҃ꙋ·

И҆ да принесе́те съ телце́мъ принос̑҇ мꙋкѝ пшени́чны а҃, части вмѣша́ны въ е҆ле́и, пол̑҇ и҆́ны мѣ́ры·

Вина́ же на възлїа́нїе, пол̑҇ и҆́ны мѣ́ры прино́съ въ воню̀ бл҃гово́нїа г҃ꙋ·

Та́ко да сътвори́те, телцꙋ̀ е҆ди́номꙋ.
и҆л̂и ѻ҆внꙋ̀ е҆ди́номꙋ, и҆л̂и а҆́гньцꙋ е҆ді́номꙋ, и҆л̂и ѻ҆вцѣ и҆л̂и козѣ·

По числꙋ̀ и҆х꙽же сътвори́сте.
та́коже да сътвори́те е҆ді́номꙋ по числꙋ̀ и҆хъ·

И҆ всѧкъ т̂озе́мецъ да сътворитъ та́ко.
сицева̀ принестѝ приноше́нїѧ, въ воню̀ бл҃гово́нїа г҃ꙋ·

А҆́ще ли прише́лецъ въ ва́съ пребꙋ́дет꙽ въ землѝ ва́шеи, и҆л̂и а́ще пребꙋ́дет꙽ въ ва́съ в роже́нїи ва́шихъ, и҆ да сътвори́тъ прино́съ въ во́ню̀ бл҃гово́нїа г҃ꙋ, ꙗ҆́коже твори́те в̂ы та́коже да сътвори́тъ и҆ се́и г҃ꙋ·

Зако́нъ е҆ді́н꙽ вамъ, и҆ прише́лцемъ прилежа́щим꙽ въ ва́съ, зако́нъ вѣ́чныи, въ роже́нїа ваша, ꙗ҆́коже в̂ы та́ко и҆ прише́лец̑҇ да бꙋ́детъ пред̑ гм҃ъ·

Зако́нъ е҆ді́н꙽ да бꙋ́детъ, и҆ ѻ҆правле́нїе е҆ді́но да бꙋдетъ ва́мъ, и҆ прише́лцꙋ прилежа́щемꙋ въ ва́съ·

И҆ рече г҃ь къ моѷсїю гл҃ѧ.
гл҃и сн҃омъ і҆и҃левымъ, і҆ и҆ рцы̀ к ним̑, вънегда̀ вни́дете въ зе́млю, в ню́же в̂ы а́зъ въведꙋ̀ та́мо·

И҆ да бꙋ́детъ е҆гда̀ ꙗ҆́сте ѿ хлѣ́бовъ землѝ тоѧ̀, да ѿложи́те ѹ҆ча́стїе г҃ꙋ·

Ве́рхъ тѣ́ста вашего, хлѣ́бъ да ѿлꙋчи́те.
и҆ ѹ҆ча́стїе е҆го, ꙗ҆коже ѹ҆ча́стїе ѿ гꙋмна̀, та́коже да ѿлꙋчи́те е҆мꙋ хлѣ́бъ·

ѿ верха̀ тѣ́ста ва́шего, и҆ да́сте г҃ꙋ ѹ҆ча́стїе в роже́нїѧ ваша·

Є҆гда́ же съгрѣши́те, и҆ не сътвори́те за́повѣдеи всх̑ѣ сих꙽, и҆хже гл҃а г҃ь моѷсїю·

Ꙗ҆́коже повелѣ г҃ь б҃ъ к ва́мъ.
рꙋко́ю моѷсїе҆вою, ѿ дн҃и ѿ него́же повелѣ г҃ь к ва́мъ, и҆ пото́мъ в роже́нїѧ ваша·

Є҆да̀ л̂и а́ще пред̑ ѻ҆чи́ма со́нмъ бꙋ́детъ не хотѧ́щеи съгрѣшит̑, и҆ да сътворитъ ве́сь со́нмъ теле́цъ е҆ди́нъ, непоро́чен̑҇ ѿ воло́въ въ вс̂есъж꙽же́нїе, въ воню̀ бл҃гово́нїа г҃ꙋ.
и҆ тре́бꙋ е҆го и҆ возлїа́нїе е҆го, по повелѣ́нїю е҆го.
и҆ козе́лъ е҆дін̑҇ ѿ ко́зъ грѣха̀ ра́ди·

И҆ да помо́лит̑сѧ жре́цъ ѻ҆ все́мъ со́нмѣ сн҃овъ і҆ил҃евъ.
и҆ да ѻ҆ста́витсѧ и҆мъ, ꙗ҆́ко нехотѣнїе е҆сть·

Сїи же принесо́ша да́ръ свои принесе́нїе г҃ꙋ, грѣхъ ра́ди своих̑ пред̑ г҃ь, нехотѣ́нїи ради и҆хъ·

И҆ ѻ҆ста́витсѧ всемꙋ̀ со́нмꙋ, сн҃овъ і҆и҃левъ, и҆ пришелцꙋ прилежа́вшемꙋ въ ва́съ, ꙗ҆коже всѣ́хъ людїи нехотѣ́нїю·

А҆́ще л̂и дш҃а е҆ді́на нехотѧ́ще съгрѣши́т꙽.
да приведе́тъ козꙋ̀ е҆ди́нолѣтнꙋ грѣха̀ ра́ди·

И҆ да помо́литсѧ жре́цъ, ѻ҆ дш҃и нехотѣв꙽шеи, и҆ съгрѣш꙽шеи нехотѣ́нїемъ пред̑ гм҃ъ, и҆ да помо́литсѧ ѻ҆ не́и, и҆ ѻ҆ста́витсѧ е́й·

И҆ насе́лникꙋ зем̑лѧ̀ сн҃овъ і҆и҃левъ, и҆ прише́лцꙋ прилежа́вшемꙋ въ ва́съ, зако́нъ е҆ді́нъ да бꙋдетъ въ ва́съ, и҆же а́ще сътвори́т꙽ нехотѧ́щи·

И҆ дш҃а ꙗ҆же а́ще сътвори́тъ рꙋко́ю го́рдости ѿ т̂озе́мецъ, и҆л̂и ѿ прише́лец꙽, б҃а сїа разгнѣ́вает̑, и҆ да потребит̑сѧ дш҃а т̂а ѿ людїи своих̑·

Ꙗ҆́ко сло́во гн҃е ѻ҆болга̀, и҆ за́повѣди е҆го раз̑сы́па, сътре́нїемъ да сътре́тсѧ дш҃а т̂а, и҆ грх̑ѣ е҆ѧ̀ на не́и·

И҆ бѣѧ́хꙋ сн҃ове і҆и҃леви въ пꙋсты́ни, и҆ ѻ҆брѣто́ша мꙋжа събира́юща дрова̀, въ дн҃ь сꙋбо́тныи·

И҆ приведо́ша е҆го и҆же ѻ҆брѣто́ста берꙋщ́а дрова̀ къ моѷсїю, и҆ а҆а҆ро́нꙋ, и҆ къ всемꙋ̀ со́нмꙋ сн҃овъ і҆и҃левъ, и҆ въверго́ша и҆̀ въ темни́цꙋ.
не съвѣща́ша б̂о что̀ сътворѧ́тъ е҆мꙋ·

И҆ рече г҃ь къ моѷсїю гл҃ѧ смертїю да ѹ҆́мретъ чл҃къ се́и, да побїе́тъ и҆̀ ка́менїемъ ве́сь со́нмъ вн̂ѣ полка̀·

И҆ вы́ведоша е҆го ве́сь со́нмъ вн̂ѣ пол̑҇чища и҆ поби́ша е҆го ка́менїемъ ве́сь со́нмъ вн̂ѣ полчища, ꙗ҆коже гл҃а г҃ь моѷсїю·

И҆ реч̑҇ г҃ь къ моѷсїю гл҃ѧ.
гл҃и сн҃омъ і҆и҃левымъ и҆ рцы̀ и҆мъ, да сътворѧ́тъ себѣ повразки на ѹ҆́глехъ ри́зъ своих̑ в роже́нїих̑ свои҆хъ.
и҆ да възложат̑ на кра́ѧ ѹ҆́глех̑ риз̑ своих̑, прѧ́денїе си́нее·

И҆ да бꙋ́детъ вамъ на кра́ехъ, и҆ е҆гда̀ ѹ҆́зрите и҆хъ, и҆ въспомѧне́те вс̂ѧ за́повѣди гн҃ѧ, и҆ сътвори́те ѧ҆̀·

И҆ не въслѣ́дꙋите въ слѣ́дъ срд̑цъ свои҆хъ, и҆ въ слѣ́дъ ѻ҆́чїю ва́шею, и҆́мже в̂ы съблꙋди́сте въ слѣ́дъ и҆хъ·

Ꙗ҆́ко да помѧне́те и҆ сътвори́те вс̂ѧ за́повѣди моѧ̀, и҆ бꙋ́дите ст҃и б҃ꙋ ва́шемꙋ·

А҆́зъ г҃ь б҃ъ вашъ.
и҆зведы́и в̂ы и҆з꙽ землѧ̀ е҆гѷпетъски быти вамъ б҃ъ а҆́зъ г҃ь б҃ъ ва́шъ·

Глв̑҇а, ѕ҃і·

И гл҃а коре́и сн҃ъ а҆саха́ровъ, сн҃ъ каа́ѳовъ, сн҃ъ левїинъ и҆ дафа́нъ, і҆ а҆виро́нъ сн҃ове е҆ли́амли і҆ а҆в꙽на́нь сн҃ъ фале́ховъ, сн҃овъ рꙋві́мль·

И҆ въста́ша пред̑ моѷсїемъ.
и҆ мꙋжи сн҃овъ і҆и҃левъ с҃, и҆ н҃, старѣ́ишины со́нмꙋ, прича́стницы совѣтꙋ, и҆ мꙋжи и҆менити·

И҆ въста́ша на моѷсїа и҆ а҆а҆ро́на и҆ реко́ста к ни́ма, ѹ҆ста́висѧ въ вас̑҇ ꙗ҆́коже вс̂и со́нми вс̂и ст҃и и҆ в нихъ г҃ь, то̀ чт̂о ради въста́ете на со́нмъ гн҃ь·

И҆ слы́шав̑҇ моѷсїи падѐ ни́цъ.
и҆ гл҃а коре́ю, и҆ къ всемꙋ̀ со́ньмꙋ е҆го рекїи, съглѧда̀ и҆ позна̀ г҃ь сꙋщих̑ е҆го, и҆ ст҃ыхъ и҆хже приведѐ к себѣ̀.
і҆ и҆хже не и҆збра̀ себѣ си́хъ и҆ не приведѐ къ себѣ·

сїе сътвори́те, възмѣте себѣ сами кади́л꙽никы.
коре́и и҆ ве́сь со́ньмъ тв́ои.
и҆ вложи́те ѻ҆гнь в н̂ѧ, и҆ вложи́те в н̂ѧ ѳїмиѧ́мъ пред̑ гм҃ъ ѹ҆трѣ·

И҆ бꙋдетъ мꙋжь е҆гоже а҆́ще и҆зберетъ г҃ь, сїи ст҃ъ, да довлѣ́ютъ вамъ сн҃ове левїи́ны·

И҆ рече моѷсїи до коре́ѧ, послꙋш́аите менѐ сн҃ове левїи́ны.
е҆да̀ с̂е мало вамъ е҆сть, ꙗ҆́ко ѿлꙋчѝ васъ б҃ъ ѿ со́ньма і҆и҃лева, и҆ приведѐ васъ к себѣ̀ слꙋжи́ти слж̑ꙋбы въ хра́мѣ свѣдѣнїа, и҆ стоѧ́ти пред̑ со́нмомъ гн҃имъ, и҆ слꙋжи́ти е҆мꙋ·

И҆ приведе т̂ѧ и҆ вс̂ю бра́тїю твою̀, сн҃ы левїи́ны с тобо́ю, и҆ проси́те жрѣти сице·

Сего ра́ди т̂ы и҆ весь со́ньм꙽ тво́и собраныи совѣщасте къ б҃ꙋ, а҆а҆ро́нъ же кт̂о е҆сть, ꙗ҆́ко поропта́сте на́нь·

И҆ посла̀ моѷсїи призва́ти дафа́на, и҆ а҆виро́на, сн҃ы е҆лиа́влѧ, и҆ реко́ста не възы́идем꙽·

Не ма́ло и҆ сего̀, ꙗ҆́ко и҆зведѐ н̂ы, ѿ землѧ̀ кипѧ́щꙋю млекомъ и҆ медомъ, е҆же погꙋби́ти нас̑҇ въ пꙋсты́ни, и҆ ꙗ҆́ко владѣ́еши нами кнѧ́ѕь е҆си·

И҆ ты̀ л̂и в зе́млю кипѧ́щꙋю ме́домъ и҆ мле́комъ въведѐ н̂ы.
и҆ да́лъ е҆си намъ ча́сть села̀ и҆ виногра́да, и҆ ѻ҆чи чл҃къ тх̑ѣ и҆зъткнꙋлъ е҆си, не и҆зы́идем꙽·

И҆ ѻ҆тѧжа̀ моѷсїи гнѣвомъ ѕѣло, и҆ рече къ г҃ꙋ.
не прїими тре́бъ и҆хъ, ни е҆ді́наго б̂о похотѣнїа ѿ нихъ прїѧ́хъ, и҆ ниже зазли́хъ ни е҆ді́номꙋ же и҆хъ·

И҆ реч̑҇ моѷсїи къ корѣ́ю.
ѻ҆ст҃и сонмъ тво́и и҆ бꙋ́дете гото́ви пред̑ гм҃ъ, т̂ы и҆ а҆а҆рон̑҇ и҆ ѻ҆нѝ ѹ҆́тро·

И҆ възмѣте ко́ждо кади́лники своѧ̀ и҆ възложи́те нан̑҇ ѳимиа́м꙽, и҆ принеси́те пред̑ г҃ь, ко́ждо вас̑҇ кади́лникъ свои, с҃, и҆ н҃, кади́лникъ.
т̂ы и҆ а҆а҆рон̑҇ сво́и кождо ва́ю кади́лник̑҇·

и҆ взѧ́ша ко́ждо свои кади́лникъ и҆ вложи́ша на́ нѧ ѻ҆гнь, и҆ вложи́ша на́ нѧ ѳимїѧ́м꙽, и҆ поста́виша пред̑ две́рми хра́ма свѣдѣ́нїѧ, моѷсїи и҆ а҆а҆ро́нъ·

И҆ въста́ша на́ нѧ коре́и и҆ весь со́ньмъ е҆го, пред̑ две́рми хра́ма свѣдѣнїа, и҆ ꙗ҆́ви́сѧ слава гн҃ѧ всемꙋ̀ со́ньмꙋ·

И҆ рече г҃ь къ моѷсїю и҆ а҆а҆ро́нꙋ гл҃ѧ, ѿстꙋпи́та ко́ждо вас̑҇ ѿ среды̀ со́нма того, и҆ потреблю ѧ҆̀ е҆ді́ницею·

И҆ припадо́ста ни́цъ и҆ реко́ста, б҃е б҃е ѿц҃ъ, и҆ всѧ́коѧ плоти·

А҆́ще чл҃къ е҆ді́нъ съгрѣшѝ, и҆ на ве́сь л̂и со́нмъ гнѣвъ гн҃ь·

И҆ рече г҃ь къ моѷсїю гл҃ѧ.
рцы̀ со́нмꙋ гл҃ѧ, ѿстꙋпи́те ѻ҆́крс̑҇тъ ѿ сон̑҇ма коре́ева, и҆ дафа́нѧ, и҆ а҆виро́нѧ·

И҆ въста́въ моѷсїи и҆де къ дафа́нꙋ и҆ а҆ви́ронꙋ, і҆ и҆до́ша с ни́мъ вс̂и старцы і҆и҃льтестїи·

И҆ гл҃а къ со́нмꙋ рекїи, ѿстꙋпи́те ѿ кꙋщ́ъ чл҃къ непокори́выхъ си́хъ, и҆ не прикоснетесѧ къ всемꙋ̀ е҆ликоже е҆сть и҆хъ да не поги́бнете въ все́мъ грѣсѝ и҆хъ·

И҆ ѿстꙋпи́ша ѻ҆́крс̑҇тъ кꙋщъ коре́а, и҆ дафа́на, и҆ а҆виро́на ѻ҆́крс̑҇тъ·

дафа́нъ же, и҆ а҆ви́ронъ, и҆злѣзо́ста и҆ ста́ста пред̑ две́рїи хра́ма кꙋщ́ъ свои҆хъ.
и҆ жены и҆хъ и҆ дѣти их̑, і҆ и҆мѣнїе их̑·

И҆ рече моѷсїи, ѻ҆ семъ да ѹ҆вѣсте ꙗ҆́ко г҃ь посла̀ м̂ѧ сътвори́ти вс̂ѧ дѣлеса̀ сїѧ ꙗ҆́ко не ѻ҆ себѣ а҆зъ творю̀ сїѧ.
а҆ще смр҃тїю всѣхъ людїи ѹ҆́мрꙋть сїи·

И҆ а́ще по присѣще́нїю всѣхъ чл҃къ, присѣщенїе бꙋдетъ их̑, т̂о нѣсть г҃ь посла̀ менѐ·

Но̂ а҆́ще въ ꙗ҆вле́нїи пока́жетъ г҃ь.
и҆ ѿвр́ъзши зе́млѧ ѹ҆ста̀ своа и҆ пожретъ ѧ҆̀, и҆ до́мы их̑ и҆ кꙋща и҆хъ, и҆ вс̂ѧ е҆лика сꙋть и҆хъ и́ съни́дꙋтъ жи́ви въ а҆дъ.
и҆ да ѹ҆вѣ́дѧтъ ꙗ҆ко разгнѣ́ваша чл҃цы сїи г҃а·

И҆ бысть ꙗ҆ко преста̀ гл҃ѧ словеса̀ с̂и, и҆ разсѣ́десѧ землѧ̀ под̑ нога́ми и҆хъ и҆ ѿвр́ъзесѧ землѧ̀ и҆ пожре ѧ҆̀, и҆ до́мы их̑, вс̂ѧ люди сꙋщ́аѧ съ кореѻ҆мъ, и҆ скоты и҆хъ, снидо́ша и҆ сїи и҆ вс̂ѧ е҆ли́ко бѧше и҆хъ, жи́ви во ад̑, и҆ покры̀ и҆хъ землѧ̀, и҆ погибо́ша ѿ среды̀ полка·

И҆ весь і҆и҃ль і҆ и҆же о҆крс̑҇тъ и҆хъ ѿбѣго́ша ѿ во́плѧ и҆хъ, занѐ реко́ша гл҃юще, да не жретъ на́съ землѧ̀·

ѻ҆́гнь же и҆зы́де ѿ г҃а, і҆ и҆ждежѐ, с҃, и҆ н҃, мꙋж́ъ, прине́съшаѧ ѳимїѧ́м꙽·

И҆ рече г҃ь къ моѷсїю.
рцы̀ е҆лїаза́рꙋ, сн҃ꙋ а҆а҆ро́новꙋ жерцꙋ̀.
да соберетъ кади́лники мѣ́деныѧ ѿ среды̀ и҆згорѣвшихъ, и҆ ѻ́гнь чю́ждїи сїи рас꙽сы́плите тамо·

Ꙗ҆́ко ѻ҆ст҃ишасѧ кади́лницы грѣшныхъ сих̑ въ дꙋша́хъ и҆хъ.
и҆ сътвори́те ѧ҆̀ на па́мѧть ѻ҆кова́ны, ѻ҆бложе́нїе ѹ҆ ѻ҆лта́рѧ ꙗ҆́ко принесо́шас̑҇ пред̑ г҃ь и҆ ѻ҆ст҃ишасѧ, и҆ бысть въ зна́менїе сн҃омъ і҆и҃лвым̑·

И҆ взѧ̀ е҆лїаза́ръ сн҃ъ а҆а҆ро́на жерца̀ кади́лники мѣ́деныа, е҆ли́ко принесо́ша и҆згорѣ́вшеи, и҆ ѻ҆бложи́ша въ ѻ҆бложе́нїе ѻ҆лтарѧ̀·

Въ па́мѧтъ сн҃ом̑ і҆и҃левымъ, ꙗ҆ко да не прїидет̑ никтож̑ и҆ноплеме́нникъ, и҆же нѣсть ѿ плода̀ а҆а҆ро́на, е҆же възложи́ти ѳимїѧ́м꙽ пред̑ гм҃ъ.
и҆ да не бꙋдетъ ꙗ҆́ко и҆ коре́и, и҆ совѣтницы е҆го, ꙗ҆́коже гл҃а е҆мꙋ г҃ь моѷсїѻ҆мъ·

И҆ възропта́ша сн҃ове і҆и҃льтестїи, наѹ҆трїе на моѷсїа и҆ а҆а҆ро́на гл҃юще, в̂ы и҆зби́ста люди гн҃ѧ·

И҆ бысть е҆гда̀ възврати́сѧ по́лкъ на моѷсїа и҆ а҆а҆ро́на и҆ въѻ҆рꙋжи́шасѧ къ хра́мꙋ свѣдѣнїа.
храмъ же покры̀ ѻ҆́блакъ, и҆ ꙗ҆́ви́сѧ слава гн҃ѧ.
и҆ вниде моѷсїи і҆ а҆аро́нъ съпредѝ хра́ма свѣдѣнїа·

И҆ рече г҃ь къ моѷсїю і҆ а҆аро́нꙋ гл҃ѧ, ѹ҆стꙋпи́те ѿ среды̀ со́ньма сего̀ и҆ потреблю̀ ѧ҆̀ е҆ді́ницею и҆ па́доста ница·

И҆ рече моѷсїи къ а҆а҆ро́нꙋ възмѝ кади́лникъ и҆ вложи́ же вонь ѻ҆́гнь ѿ ѻ҆лта́рѧ, и҆ възложѝ на́нь ѳимїа́м꙽, и҆ несѝ ско́ро въ полкъ и҆ помоли́сѧ ѻ҆ ни́хъ, съшелъ б̂о е҆сть гнѣвъ ѿ лица̀ гн҃ѧ, и҆ нача̀ гꙋби́ти люди·

И҆ взѧ̀ а҆а҆ро́нъ ꙗ҆́коже гл҃а е҆мꙋ моѷсїи, и҆ течѐ въ со́ньмъ.
ѹ҆же б̂о пришла̀ бѧ́ше па́гꙋба на́ люди.
и҆ възложѝ ѳимїа́м꙽ и҆ помоли́сѧ ѻ҆́ людех̑·

И҆ ста̀ междꙋ мр҃твыми и҆ живы́ми, и҆ преста̀ па́гꙋба·

И҆ бы́сть ѹ҆ме́ръшихъ въ па́гꙋбе ҂д҃і и҆ з҃ сот̑, кромѣ̀ ѹ҆ме́ршихъ кореѧ ради·

И҆ възврати́сѧ а҆а҆ро́нъ къ моѷсїю, къ две́рем꙽ хра́ма свѣдѣ́нїа, и҆ ѹ҆ста̀ па́гꙋба·

Глв̑҇а, з҃і·

И рече г҃ь къ моѷсїю гл҃ѧ.
гл҃и сн҃омъ і҆и҃левымъ, и҆ возмѝ ѿ нихъ по е҆ді́номꙋ жезлꙋ̀ же́злъ, же́злъ ѿ всѣхъ кн҃ѕь и҆хъ, по домо́мъ ѿч҃ьства и҆хъ в҃і жезла̀, и҆́мѧ же кое҆гождо напиши на жезлѣ̀ е҆го·

И҆́мѧ же а҆а҆ро́не напиши́ на жезлѣ левѷинѣ, е҆сть б̂о же́злъ е҆ді́нъ по племе́ни и҆хъ до́мꙋ ѿч҃ьства и҆хъ·

И҆ да положи́ши и҆̀ въ хра́мѣ свѣдѣнїѧ прѧ́мо свѣдѣнїю, в них̑ же ꙗ҆́влю́сѧ тебѣ т̂ꙋ·

И҆ да бꙋдетъ чл҃къ е҆гоже а҆́ще и҆зберꙋ̀ же́злъ е҆го проѕѧ́бнетъ, и҆ ѿвр́ьгꙋ ѿ тебѐ ропта́нїе сн҃овъ і҆и҃левыхъ, е҆ли́ко сїи ро́пщꙋтъ на́ вы·

И҆ гл҃а моѷсїи сн҃омъ і҆и҃левым̑.
и҆ даша е҆мꙋ вс̂и кн҃ѕи и҆хъ же́злъ, кн҃ѕю е҆ді́номꙋ же́злъ, кн҃ѕѧ по до́мꙋ ѿч҃ьства и҆хъ.
в҃і, жезло́въ, и҆ жезлъ а҆а҆ро́нь посредѣ же́злъ их̑·

И҆ положѝ моѷсїи жезлы̀ пред̑ гм҃ъ, въ хра́мѣ свѣдѣнїа·

И҆ бы́сть наѹ҆́трїе и҆ вни́де моѷсїи і҆ а҆аро́нъ, въ хра́мъ свѣдѣ́нїа, и҆ с̂е проѕѧбѐ же́злъ а҆аро́нь, въ домꙋ̀ левѷинѣ, и҆зрасти вѣтвїю, и процвѣте цвѣтец̑҇, і҆ и҆зрасти ѻ҆рѣх́и·

І҆ и҆знесѐ моѷсїи вс̂ѧ жезлы̀ ѿ лица̀ гн҃ѧ къ всѣм́ъ сн҃омъ і҆и҃левымъ, и҆ видѣша, и҆ вз̂ѧ ко́ждо же́злъ сво́и·

И҆ рече г҃ь къ моѷсїю, положѝ же́злъ а҆аро́нь пред̑ свѣдѣнїем̑, въ сохране́нїе, и҆ въ зна́менїе, сн҃въ ѻ҆слꙋшли́вых̑, и҆ да ѻ҆ста́нет̑ ропта́нїе их̑ ѿ менѐ, и҆ не змрт̑ꙋ·

И҆ сътворѝ моѷсїи і҆ а҆арон̑҇, е҆ли́ко повелѣ г҃ь моѷсїю та́ко сътвори́ша·

И҆ рекоша сн҃ове і҆и҃леви къ моѷсїю гл҃юще, с̂е потреби́хомсѧ, и҆ погибо́хом̑ і҆ и҆счезо́хом̑·

Всѧк̑҇ присезаѧй къ хра́мꙋ свѣдѣнїа гн҃ѧ ѹ҆́мретъ и҆ до конца л̂и ѹ҆́мира́юще поги́бнем̑·

Глв̑҇а, и҃і·

И рече г҃ь къ а҆аро́нꙋ гл҃ѧ, т̂ы и҆ сн҃ове твоѝ и҆ дом̑ ѿц҃а твое҆го с тобо́ю, да во́змете пер̑҇веньства̀ грѣхъ ст҃ыхъ.
ты же и҆ сн҃ове твоѝ да прїимете грѣхѝ жречества ва́шего·

И҆ бра́тїю твою̀ племѧ̀ левѷино со́ньма ѿц҃а свое҆го, и҆ приведѝ къ себѣ, и҆ да пред̑ста́нꙋтъ тебѣ, и҆ да послꙋжатъ тебѣ, и҆ тебѣ и҆ сн҃омъ твоим̑ с тобо́ю пред̑ хра́момъ свѣдѣнїа·

И҆ да блю́дꙋтъ страж꙽бы̀ твоа, и҆ страж̑бы̀ хра́ма.
ра́звѣ къ сосꙋдомъ ст҃ымъ и҆ ко ѻ҆лтарю да не пристꙋпают̑, да не и҆змрꙋтъ, и҆ сїи, и҆ в̂ы·

И҆ прило́жатсѧ к тебѣ, и҆ да блюдꙋтъ стражбы̀ хра́ма свѣдѣнїа, и҆ всѧ̀ слꙋж́бы храма.
а҆ и҆ноплеме́нникъ да не пристꙋпа́етъ къ ва́мъ, и҆ да съблюде́те страбы̀ ст҃ыхъ, и҆ страж̑бы̀ ѻ҆лтарѧ̀, и҆ не бꙋдетъ ктомꙋ̀ гнѣ́ва на сн҃ѣхъ і҆и҃левых̑·

А҆́зъ б̂о взѧ́хъ братїю ва́шꙋ левѷты, ѿ среды сн҃овъ і҆и҃левъ, ва́мъ в да́ръ вда́ныи, г҃ꙋ слꙋжи́ти слꙋжбы хра́ма свѣдѣ́нїа·

Ты́ же и҆ сн҃ове твоѝ с тобо́ю, съхрани́те жречество ва́ше, по всемꙋ̀ дѣ́лꙋ ѻ҆лтарѧ̀, и҆ внꙋтрьнѧа завѣ́сы.
и҆ да слꙋ́жите слж̑ꙋбы в данїа дахъ вам̑ жречество ва́ше, и҆ноплеме́нникъ же пристꙋпа́ѧ да ѹ҆мретъ·

И҆ рече г҃ь къ а҆аро́нꙋ, с̂е а҆́зъ дах̑ вамъ снабдѣнїе приносъ мои҆хъ, и҆ ѿ всѣхъ сщ҃енныхъ мн̂ѣ, ѿ сн҃овъ і҆и҃левъ, тебѣ дахъ ѧ҆̀ въ старѣишин꙽ство, и҆ сн҃омъ твои҆мъ по тебѣ зако́нъ вѣ́чныи·

И҆ сїе да бꙋ́детъ вам̑, ѿ всѧ́каго сщ҃еннаг̑҇ ст҃ыхъ.
ѿ всѣ́хъ даро́въ и҆хъ, и҆ ѿ всх̑ѣ требъ их̑, и҆ ѿ всѧ́каго престꙋпленїѧ их̑, и҆ ѿ всх̑ѣ грѣхъ их̑, е҆ли́ка ѿдают̑ мн̂ѣ ѿ всѣхъ ст҃ыхъ.
тебѣ да бꙋдꙋтъ и҆ сн҃омъ твоим̑·

Въ ст҃омъ ст҃ыхъ да ꙗ҆́сте ѧ҆̀.
ве́сь мꙋжескъ полъ да ꙗ҆́сте ѧ҆̀, т̂ы и҆ сн҃ове твоѝ ст҃а да бꙋ́дꙋтъ тебѣ·

Се́ же да бꙋдетъ вамъ ѿ начат̑ка данїа и҆хъ, ѿ всѣхъ возложе́нїи сн҃овъ і҆и҃левъ, тебѣ да́хъ ѧ҆̀ и҆ сн҃омъ твоим̑, и҆ дще́ремъ твоим̑ с тобо́ю, закон̑҇но вѣчно.
всѧ́къ чи́стыи въ домꙋ твое҆мъ да ꙗ҆́сте ѧ҆̀·

Ве́сь нача́токъ е҆леи́ныи, и҆ всѧ́къ нача́токъ ви́нныи, и҆ пшени́чныи, нача́тки и҆хъ, е҆ли́ко а҆́ще ѿдадѧт̑ г҃ꙋ тебѣ дахъ ѧ҆̀·

Первород̑наѧ е҆ли́ка въ землѝ и҆хъ, е҆лика а҆́ще принесꙋтъ г҃ꙋ тебѣ да бꙋ́дет̑, всѧ́к꙽ чи́стъ в домꙋ твое҆мъ да ꙗ҆́стъ ѧ҆̀·

Всѧ́ко наро́чное въ сн҃ѣхъ і҆и҃левых̑, тебѣ да бꙋ́детъ·

И҆ всѧ́къ ѿвръза́ѧи҆ всѧ́ка ложесна̀ ѿ всеѧ̀ плоти, е҆ли́ко прино́сѧтъ г҃ꙋ, ѿ чл҃ка до скота̀, тебѣ̀ да бꙋ́детъ.
н̂о и҆скꙋпленїемъ и҆скꙋ́пѧтсѧ, сн҃ове чл҃чїи, и҆ прьвенцы̀ скота̀ нечи́стаго да и҆скꙋпѧтсѧ·

И҆скꙋ́пъ же и҆хъ ѿ е҆ди́наго мцс̑҇а, и҆же съцѣне́нїе, е҃, си́кль, по си́клю ст҃омꙋ, к҃, мѣ́дниць е҆сть·

ра́звѣ первене́цъ те́лчїи, и҆ первене́цъ ѻ҆́вчїихъ, и҆ первене́цъ, козьи҆хъ да не и҆скꙋ́пѧтсѧ, ст҃и б̂о сꙋть, и҆ кро́вь и҆хъ пролїеши ѹ҆ ѻ҆лтарѧ̀, и҆ ло́и принесе́ши приносъ въ воню̀ бл҃гово́нїѧ г҃ꙋ·

А҆ мѧса тебѣ да бꙋдт̑ꙋ, ꙗ҆коже и҆ грꙋ́ди възложенїа, и҆ ра́мо десно́е тебѣ да бꙋ́дꙋтъ·

Всѧ́ко ѹ҆ча́стїе ст҃ыхъ, е҆ли́коже а҆́ще ѿлꙋчат̑ сн҃ове і҆и҃льтестїи г҃ꙋ, тебѣ далъ е҆смь, и҆ сн҃омъ твои́мъ с тобо́ю, и҆ дщеремъ твои҆мъ.
зако́нъ вѣчныи, завѣт꙽ соли люд̑скъ вѣчныи пред̑ гм҃ъ тебѣ е҆сть, и҆ племе́ни твое҆мꙋ по тебѣ·

И҆ рече г҃ь къ а҆а҆ро́нꙋ въ землѝ и҆хъ, да не причасти́ши, ча́сти тебѣ да не бꙋдетъ в ни́хъ·

Ꙗ҆́ко а҆́зъ часть е҆смь твоа̀, и҆ прича́стїе твое, средѝ сн҃овъ і҆и҃левъ, сн҃ом же левѷиномъ, с̂е да́лъ е҆смь вс̂ю десѧти́нꙋ въ і҆и҃ли въ прича́стїе въ слж̑ꙋбы мѣсто и҆хъ.
е҆ли́ко слꙋжат̑ сїи слꙋже́нїе, въ хра́мѣ свѣдѣ́нїа·

И҆ да не пристꙋпаютъ по се́мъ, сн҃ове і҆и҃льтестїи къ хра́мꙋ свѣдѣ́нїа, прїѧ́ти грѣха̀ смр҃тнаго·

Но̂ да слꙋжат̑ левѷти сами слꙋжбꙋ хра́ма свѣдѣнїа, и҆ сїи возмꙋтъ грѣхъ и҆хъ, въ зако́нъ вѣчныи в роже́нїа и҆хъ, и҆ средѝ сн҃овъ і҆и҃левъ да не причастѧт̑ прича́стїѧ·

Ꙗ҆́ко десѧти́нꙋ сн҃овъ і҆и҃левъ, е҆лико а҆́ще ѿлꙋча́тъ г҃ꙋ, ѹ҆частїе далъ е҆смь левѷтом̑ въ прича́стїе, сего ради рекох꙽ им̑ средѝ сн҃ов̑҇ і҆и҃лев꙽, да не причастѧт̑ прича́стїѧ·

И҆ рече г҃ь къ моѷсїю гл҃ѧ левѷтомъ да гл҃еши рекїи к ним̑, а҆́ще во́змете десѧти́нꙋ, ѿ сн҃овъ і҆и҃левъ, ꙗ҆́же дахъ вам̑ ѿ нихъ въ прича́стїе, да ѹ҆и҆мете в̂ы ѿ неѧ̀ ѹ҆ча́стїе г҃ꙋ десѧти́нꙋ, ѿ десѧти́ны еѧ̀.
да ѹ҆мнит̑сѧ вамъ ѹ҆ча́стїе ваше.
ꙗ҆́ко пшени́ца ѿ гꙋмна̀, и҆ ꙗ҆ко ѹ҆частїе ѿ точи́ла·

Та́ко да ѹ҆имѣте и҆ в̂ы ѿ всх̑ѣ ѹ҆частїи г҃ꙋ, ѿ всѧ́кїа десѧти́ны свое҆ѧ е҆лико а҆ще во́змете ѿ сн҃овъ і҆и҃левъ, и҆ дади́те ѿ нихъ ѹ҆ча̂стїе г҃ꙋ а҆а҆ро́нꙋ жерцꙋ̀·

ѿ всѣхъ да́нїи вашихъ, и҆ да ѹ҆имѣте ѹ҆ча́стїе г҃ꙋ, ѿ всѣхъ начат̑ковъ ѻ҆сщ҃е́ныхъ ѿ него·

И҆ рцы̀ к ним̑ е҆да̀ ѹ҆и҆мете принос̑҇ ѿ них̑, и҆ пременит̑сѧ левѷтом̑, а҆ки жи́то ѿ гꙋмна̀, и҆ ꙗ҆ко ѹ҆ча́стїе ѿ точи́ла·

И҆ да ꙗ҆́сте т̂а въ всем̑ мѣстѣ, в̂ы и҆ сн҃ове ва́ши, и҆ домове ваши ꙗ҆́ко мзда̀ с̂и ваша ес̑҇ въ слꙋж́ебъ мѣсто ва́ших̑, ꙗ҆́же въ хра́мѣ свѣдѣнїа·

И҆ не прїимете их̑ ради грѣха̀, ꙗ҆́ко ѿлꙋчи́те тꙋкъ е҆ѧ ѿ нихъ.
но ст҃ых̑ сн҃овъ і҆и҃лев̑҇ да не ѻ҆сквернавите, и҆ да не ѹ҆́мрете·

Глв̑҇а, ѳ҃і·

И рече г҃ь къ моѷсїю і҆ а҆а҆ро́нꙋ гл҃ѧ.
с̂е разлꙋче́нїе зако́на е҆лико заповѣ́да г҃ь гл҃ѧ, гл҃и сн҃омъ і҆и҃левымъ, и҆ да приведꙋтъ к тебѣ ю҆ницꙋ ры́жꙋ непоро́чнꙋ, ꙗ҆же не и҆́мать на себѣ порока, и҆ на не́иже нѣсть было и҆́го·

И҆ даси ю҆̀ къ е҆лиа҆за́рꙋ жерцꙋ̀ и҆ да възведт̑ꙋ ю҆̀ вн̂ѣ пол̑҇чища на мѣсто чи́сто, и҆ да заколютъ ю҆̀ пред̑ нимъ·

И҆ да во́змет̑ е҆лїаза́ръ ѿ кро́ви еѧ̀, и҆ да въскропи́тъ съпредѝ хра́ма свѣдѣнїа ѿ крови еѧ̀ сед̑мижды·

И҆ да сожъгꙋтъ ю҆̀ пред̑ нимъ, и҆ ко́жꙋ еѧ̀, и҆ мѧ́са еѧ̀, и҆ кровь еѧ̀ с моты́лы еѧ̀ да сож̑гꙋтъ·

И҆ да во́зметъ жре́цъ древо ке́дрово і҆ и́ссопъ.
и҆ соска́нїе червле́ное и҆ да сложит̑ средѝ сож꙽женыа ю҆́ница·

И҆ да и҆сперет̑ ри́зы своа̀ жре́цъ, и҆ да ѻ҆мы́етъ тѣ́ло свое водо́ю, и҆ потом̑ да вни́детъ въ по́лкъ, и҆ нечи́стъ бꙋ́детъ жре́цъ до́ вечера·

А҆ и́же сожига́етъ еѧ̀ да и́сперетъ ри́зы е҆го.
и҆ да ѻ҆мы́етъ тѣ́ло е҆го водо́ю, и҆ нечи́стъ бꙋдетъ до́ вечера, и҆ да соберет̑ члкъ по́пелъ чи́стъ ю҆́ница, и҆ да и҆знесетъ вн̂ѣ по́лчища, на мѣсто чи́сто.
и҆ да бꙋ́детъ со́ньмꙋ сн҃овъ і҆и҃левъ въ снабдѣнїе, вода̀ ѻ҆кропле́нїа ѻ҆цыще́нїе е҆сть·

И҆ собира́ѧй по́пелъ ю҆ница, да и҆сперет̑ ри́зы е҆го, и҆ нечи́стъ бꙋ́детъ до́ вечера.
и҆ да бꙋ́детъ сн҃омъ і҆и҃левымъ, и҆ пришел̑҇цемъ прилежа́щим̑ посредѣ васъ, зако́нно вѣчно·

И҆ присѧзаѧи к꙽ мр҃твомꙋ всѧкїѧ дш҃и чл҃чи, нечи́стъ бꙋдетъ з҃ дн҃їи·

Сїи да ѻ҆чи́ститсѧ се́ю водо́ю въ дн҃ь г҃, и҆ въ дн҃ь, з҃, чи́стъ бꙋ́детъ·

А҆́ще ли не ѻ҆чи́стит̑сѧ ею̀ въ дн҃ь г҃, и҆ въ дн҃ь з҃, нечи́стъ бꙋдетъ·

Всѧ́къ прикаса́асѧ мр҃твомꙋ ѿ всѧ́кїа дш҃и чл҃чи·

А҆́ще ѹ҆́мретъ, не ѻ҆чи́стѧсѧ сїи храм̑ гн҃ь ѻ҆скверна́вилъ, и҆ потреби́тсѧ дш҃а т̂а ѿ і҆и҃лѧ, ꙗ҆ко вода̀ ѻ҆кропле́нїа не въскропи́сѧ на́нь нечи́стъ е҆сть, ꙗ҆ко и҆ на потомъ нечистота̀ е҆го на не́мъ бꙋ́детъ·

Сїи зако́нъ, чл҃къ а҆́ще ѹ҆́мретъ въ хра́мѣ, всѧ́къ входѧ́и въ хра́мъ.
и е҆лико е҆сть въ храмѣ, нечиста бꙋ́детъ з҃ дн҃їи·

И҆ ве́сь сосд̑ꙋ непокрове́нъ, е҆ли́ко а҆́ще покрыва́ла не и҆́мать на себѣ, нечистъ ес̑҇·

И҆ всѧ́къ и҆же а҆́ще присѧжет̑ къ лицꙋ̀ ѻ҆троча́ти стрꙋпи́ва и҆л̂и мр҃тва, и҆л̂и ко́сти чл҃чи, и҆л̂и гро́бꙋ з҃ дн҃їи, нечи́стъ бꙋ́детъ·

И҆ да во́змꙋтъ нечи́стомꙋ ѿ по́пела съж꙽женїа, и҆ ѻ҆цыще́нїа, и҆ да возлїют̑ на́нь во́дꙋ живꙋ въ сосд̑ꙋ·

И҆ да во́змет̑ и҆с꙽сопъ, и҆ ѻ҆мо́читъ и҆̀ въ во́дꙋ мꙋж́ъ чи́стъ, и҆ да кропи́тъ на храм̑, и҆ на сосꙋды, и҆ на дш҃а и҆же а҆́ще сꙋть т̂ꙋ.
и҆ присѧ́гших̑ ко́сти чл҃чїи, и҆л̂и стрꙋп꙽ливꙋ и҆л̂и мр҃твечи́нѣ, и҆л̂и гро́бꙋ.
да въскропит̑ чи́стыи на нечи́стаго, въ дн҃ь г҃. и҆ въ дн҃ь з҃, и҆ ѻ҆чи́ститсѧ сед̑ма́го дн҃ѧ, и҆ да и҆сперет̑ ри́зы своа̀, и҆ да ѻ҆мы́етъ тѣло е҆го водо́ю, и҆ нечи́стъ бꙋдетъ до́ вечера, и҆ въ ве́черъ чистъ бꙋдетъ·

И҆ чл҃къ и҆же а҆́ще ѻ҆скврънит̑сѧ.
и҆ не ѻ҆чи́стит̑ себѐ потребит̑сѧ дш҃а т̂а ѿ среды̀ со́ньма, ꙗ҆́ко ст҃аѧ гн҃ѧ ѻ҆скверна́ви, ꙗ҆́ко вода̀ ѻ҆кропле́нїа не въскропи́сѧ на́нь, нечи́стъ ес̑҇·

И҆ да бꙋдетъ вамъ зако́нъ вѣ́чныи·

И҆ ѻ҆кроплѧ́а водо́ю ѻ҆кропленїа.
да и҆сперет̑ ри́зы своа, и҆ присѧжа́ѧ водѣ̀ ѻ҆кропленїа, нечи́стъ бꙋ́детъ до́ вечера·

И҆ всѧ́комꙋ е҆мꙋже сѧ прикоснет̑ нечистыи нечи́сто бꙋдетъ, и҆ дш҃а прикаса́ющаасѧ нечи́ста ес̑҇ до веч̑҇ра·

Глв̑҇а, к҃·

И прїидо́ша сн҃ове і҆и҆л҃ьтестїи весь со́ньмъ, въ пꙋсты́ню си́нъ, въ мцс̑҇ъ, а҃, и҆ прибыва́хꙋ лю́дїе въ кади́сѣ, и҆ сконча́сѧ т̂ꙋ марїа́мъ и҆ погребе́сѧ т̂ꙋ·

И҆ не бѧ́ше воды̀ со́н꙽мꙋ.
и҆ събра́шасѧ на моѷсїѧ, і҆ а҆а҆ро́на·

И҆ хꙋлѧ́хꙋ лю́ди на моѷсїѧ гл҃юще, ѹ҆́нее б̂ы было̀ намъ да бы́хом꙽ изме́рли въ поги́бели братїѧ на́шеѧ пред̑ гм҃ъ, въскꙋю въведо́сте со́ньмъ гн҃ь въ пꙋсты́ню сїю, погꙋби́ти н̂ы и҆ ско́ты наша·

Въскꙋ́южъ н̂ы и҆зведо́сте и҆зъ е҆гѷпта, и҆ прїидо́сте въ мѣсто с̂е зло́е, мѣсто в немже не сѣ́етсѧ ни смо́кви.
н̂и виногра́да, ниже ши́покъ, ниже воды̀ е҆сть пи́ти·

И҆ пришед̑ моѷсїи і҆ а҆а҆ро́нъ ѿ лица̀ со́ньмꙋ.
пред̑ две́ри хра́мꙋ свѣдѣнїѧ, и҆ падо́ша ниц̑, и҆ ꙗ҆́ви́сѧ сла́ва гн҃ѧ на нею̀·

И҆ рече г҃ь къ моѷсїю гл҃ѧ, възмѝ жезлъ свой и҆ съзовѝ со́ньмъ т̂ы, і҆ а҆а҆ро́нъ братъ твои, и҆ гл҃ета къ ка́меню пред̑ ни́ми, и҆ дас̑҇ во́ды своѧ.
і҆ и҆зведе́ши и҆мъ во́ды и҆с ка́мени, и҆ напои́та со́нмъ, и҆ ско́ты и҆хъ·

И҆ взѧ̀ моѷсїи жезлъ е҆же пред̑ гм҃ъ, ꙗ҆́коже повелѣ̀ г҃ь·

И҆ съзва̀ моѷсїи і҆ а҆а҆ро́нъ со́нмъ пред̑ ка́мень.
и҆ рече к ни́мъ, послꙋш́аите мене, непокори́вїи, е҆да̀ л̂и ѿ ка́мени сего, и҆зведе́мъ вам̑ во́дꙋ·

И҆ въздви́гъ моѵсїи рꙋкꙋ свою.
и҆ ѹ҆да́ри въ ка́мень жезломъ два́жды, і҆ и҆зы́де вода̀ мно́га и҆ напи́сѧ со́нмъ весь, и҆ ско́ты и҆хъ·

И҆ рече г҃ь къ моѵсїю і҆ а҆а҆ро́нꙋ гл҃ѧ.
ꙗ҆́ко не вѣ́роваста ѻ҆ст҃ити мѧ пред̑ сн҃ьми і҆и́л҃ьтескими, сего̀ ради не въведе́та в̂ы соньма̀ сего̀ в꙽ зе́млю ю҆́же да́хъ и҆мъ·

Си вода̀ сопе́рнаѧ.
ꙗ҆ко похꙋли́ша сн҃ове і҆и҆л҃ьтестїи пред̑ гм҃ъ, и҆ ѻ҆ст҃исѧ в них̑·

И҆ посла̀ моѷсїи послы̀ ѿ кади́съ къ ц҃рю е҆до́мъскомꙋ гл҃ѧ, та́ко рече бра́тъ твои і҆и҆л҃ь, т̂ы вѣси ве́сь трꙋдъ дошед̑шїи насъ·

И҆ снидо́ша ѿц҃ы наши въ е҆гѷпет꙽.
и҆ жи́хомъ въ е҆гѷптѣ дн҃и мно́ги, и҆ съзли́ша намъ е҆гѷптѧне, и҆ ѿц҃емъ нашим̑·

И҆ възопи́хом̑ къ г҃ꙋ.
и҆ ѹ҆слы́ша г҃ь гла́съ нашъ, и҆ посла́въ а҆́гг҃ла і҆ и҆зведѐ н̂ы и҆зъ е҆гѷпта, и҆ нн҃ѣ е҆смы̀ въ кади́сѣ гра́дѣ, на конец꙽ предѣлъ твои҆хъ.
да пре́идем꙽ сквозѣ зе́млю твою̀, не про́идемъ сквозѣ се́ла, н̂и сквозѣ виногра́ды, н̂и пїем̑ воды̀, въ пото́цѣхъ твои҆хъ·

Но̂ пꙋте́мъ ц҃рьскимъ про́идемъ, не съврати́мсѧ, н̂и на́ десно, н̂и на́ лѣво, до́ндеже про́идемъ предѣлы твоѧ·

И҆ рече къ ни́мъ е҆до́м꙽ не про́идеши сквозѣ м̂ѧ, а҆ще л̂и нѝ т̂о ра́тїю и҆зы́демъ проти́вꙋ тебѐ·

Реко́ша же к ни́мъ сн҃ове і҆и҆л҃еви, под̑ горо́ю мине́мъ, и҆ а́ще ѿ воды̀ твое́ѧ пїе́мъ м̂ы и҆ ско́ты на́ша да́мы цѣнꙋ̀ тебѣ, и҆но́го нѣсть никое҆го́же дѣла, под̑ горо́ю да мине́мъ·

Се́и же рече, не мине́ши сквозѣ м̂ѧ.
і҆ и҆зы́де проти́вꙋ и҆мъ е҆до́мъ с наро́домъ тѧ́жкым꙽, и҆ рꙋко́ю крѣ́пкою·

И҆ не въсхотѣ е҆до́мъ минꙋти і҆и҆л҃ю посредѣ предѣлъ свои҆хъ, и҆ ѹ҆клони́сѧ і҆и҆л҃ь ѿ него·

И҆ въздвиго́шасѧ ѿ кади́съ, и҆ прїидо́ша сн҃ове і҆и҆л҃ьтестїи весь со́нмъ, въ ѻ҆́ръ го́рꙋ·

И҆ рече г҃ь къ моѷсїю і҆ а҆аро́нꙋ въ ѻ҆́ръ горѣ̀ ѹ҆ предѣлъ землѧ̀ е҆до́млѧ гл҃ѧ·

да сѧ приложит̑ а҆аро́нъ къ людем̑ своим̑, ꙗ҆́ко не вни́дете въ зе́млю ю҆́же дах̑ сн҃омъ і҆и҆л҃евымъ въ наслѣдїе.
понеже раз꙽гнѣ́васте м̂ѧ ѹ҆ воды̀ похꙋле́нїа·

Возмѝ а҆а҆ро́на брата твое҆го, и҆ е҆лиа҆зара сн҃а е҆го, и҆ възведѝ ѧ҆̀ на ѻ҆́ръ горꙋ пред̑ всѣмъ со́ньмом̑·

И҆ съвлечѝ а҆аро́нꙋ ри́зы ег̑҇, и҆ ѻ҆блечѝ е҆лиа҆за́ра сн҃а е҆го, а҆аро́н же приближи́в꙽сѧ да ѹ҆́мрет̑ т̂ꙋ·

И҆ сътворѝ моѷсїи ꙗ҆коже повелѣ е҆мꙋ г҃ь.
и҆ възведѐ ѧ҆̀ на ѻ҆́ръ го́рꙋ, пред̑ всѣмъ со́ньмомъ·

И҆ съвлечѐ а҆а҆ро́нꙋ ри́зы е҆го, и҆ ѻ҆блечѐ в н̂ѧ е҆лиа҆за́ра, сн҃а е҆го·

И҆ ѹ҆́мре а҆а҆ро́нъ та́мо на вр́ъсѣ горы̀.
и҆ сни́де моѷсїи и҆ е҆лиа҆за́ръ, съ горы̀·

И҆ ви́дѣ ве́сь соньмъ ꙗ҆ко ѹ҆́мре а҆аро́нъ, и҆ пла́кашасѧ лю́дїе над̑ а҆а҆ро́номъ л҃ дн҃їи, и҆ весь до́мъ і҆и҃левъ·

Глв̑҇а, к҃а·

Ѹ҆слы́шав же ханаа́нь цр҃ь.
а҆ра́довъ, живы́и при пꙋстыни къ сѣ́верꙋ ꙗ҆́ко прише́лъ е҆сть і҆и҃ль, пꙋтемъ а҆ѳарим̑скимъ, и҆ бисѧ съ і҆и҃лем̑, и҆ плѣниша ѿ них̑ плѣнникы·

И҆ ѻ҆бѣщасѧ і҆и҃ль ѻ҆бѣтомъ г҃ꙋ.
и҆ рече, а҆́ще мн̂ѣ предаси лю́ди сїѧ, под̑рꙋчницы нарекꙋ и҆хъ и҆ грады и҆хъ·

И҆ ѹ҆слыша г҃ь молбꙋ̀ і҆и҃левꙋ, и҆ преда ханаа҆на под̑рꙋ́чницы е҆мꙋ, и҆ ѻ҆пꙋстошѝ е҆го, и҆ гра́ды е҆го.
и҆ прозва̀ и́мѧ мѣстꙋ томꙋ пꙋсто́шъ·

И҆ въздвиго́шасѧ ѿ ѻ́ра горы̀ пꙋте́мъ и҆же къ мо́рю чермно́мꙋ.
и҆ ѻ҆быидо́ша землю е҆до́млю, і҆ и҆знемого́ша лю́дїе ѿ пꙋтѝ·

І҆ ропта́хꙋ лю́дїе на́ б҃а и҆ на моѷсїѧ рекꙋще, въскꙋ́ю и҆зведѐ н̂ы и҆зъ е҆гѷпта, ѹ҆би́ти нас̑҇ въ пꙋсты́ни, ꙗ҆́ко нѣ́сть хлѣ́ба н̂и воды̀, и҆ дш҃а наша недꙋ́гꙋетъ ѻ҆ хлѣ́бѣ семъ тщем̑·

І҆ пꙋстѝ г҃ь на́ люди ѕмїа ѹ҆морѧ́юща, и҆ ѹ҆ꙗ҆́да́хꙋ людїи.
и҆ ѹ҆морѧ́хꙋ мно́ги ѿ сн҃овъ і҆и҃левъ·

И҆ пришед̑ше лю́дїе къ моѷсїѻ҆́ви и҆ гл҃аша.
съгрѣши́хомъ ꙗ҆́ко ропта́хомъ на́ г҃а и҆ на́ тѧ, моли́сѧ ѹ҆бо къ г҃ꙋ, да ѿжене́тъ ѿ нас̑҇ ѕмїѧ̀, и҆ молѝ моѷсїи ѻ҆́ людех̑·

И҆ рече г҃ь къ моѷсїю.
сътворѝ себѣ ѕмїю̀ мѣ́дѧнꙋ, и҆ положѝ ю҆̀ въ зна́менїе, и҆ бꙋ́детъ а҆ще ѹ҆ꙗ҆́стъ ѕмїа̀ чл҃ка, и҆ всѧ́къ ѹ҆ꙗ́де́ныи ви́дѣвъ ю҆̀ ѻ҆живе́тъ·

И҆ сътворѝ моѷсїи ѕмїю̀ мѣ́дѧнꙋ, и҆ поста́ви ю҆̀ на зна́менїи·

И҆ бысть е҆гда̀ ѹ҆ꙗ҆́дѧ́ше ѕмїѧ̀ чл҃ка и҆ възира́ше на ѕмїю̀ мѣдѧнꙋ и҆ ѻ҆живѧ́ше·

И҆ въздви́гнꙋвшесѧ сн҃ове і҆и҃леви, ѻ҆полчи́шасѧ въ е́ѳи·

И҆ въздви́гшесѧ ѿ е́ѳа.
въполчи́шасѧ въ а҆хелъе҆и ѻ҆бъ ѻ҆но́ѧ страны̀ пꙋсты́нѧ, ꙗ҆́же е҆сть пред̑ лицемъ моа҆ви́тъскимъ, на въсто́къ сл҃нца·

И҆ ѿтꙋдꙋ въздви́гшесѧ и҆ въполчи́шасѧ въ де́бри заре́дъ·

И҆ ѿтꙋ́дꙋ въздви́г꙽шесѧ въполчи́шасѧ ѻ҆б о́нꙋ странꙋ̀ а҆рно́на въ пꙋсты́ни, ꙗ҆же и҆схо́дитъ ѿ предѣ́лъ а҆море́искихъ, е҆́сть б̂о а҆рно́нъ предѣ́лъ моа́вль, междꙋ моа́вомъ, и҆ междꙋ а҆море́ѻ҆м꙽·

Сего̀ ра́ди гл҃етсѧ въ кни́зѣ ра́ти гн҃ѧ, ꙗ҆́ко сътворѝ въ мори чермном̑, тако сътворѝ, и҆ водоте́чи а҆рнони, ѻ҆ста̀ насели́ти и҆́ръ, и҆ прилежитъ же предѣ́лѣхъ моа́влихъ·

И҆ ѿтꙋ́дꙋ же въздвигошасѧ къ кладѧѕю.

Сїи же е҆сть кладѧзь и҆же рече г҃ь къ моѷсїю.
съберѝ люди и҆ да́и и҆мъ пити водꙋ·

Тогда̀ въспѣ̀ і҆и҃ль пѣснь сїю ѹ҆ кладѧзѧ.
начина́ите е҆мꙋ кладѧзь, копаша б̂о и҆̀ кнѧ́ѕи, и҆ пределиша и҆̀ цр҃їе ꙗ҆́зыческїи въ црс̑҇твїихъ, вънегда̀ ѻ҆бладати и҆́ми·

І҆ ѿ кладѧзѧж̑ въздвиго́шасѧ въ манъѳанаилъ·

І҆ ѿ манѳана́ила въ наа҆дїилъ, и҆ ѿ наа҆дїила въ вамо́ѳъ·

І҆ ѿ вамоѳа въ на́пинъ.
е҆же е҆сть на́ поли моа́вли, ѿ ве́рха просѣче́наго зрѧ́щаго пред̑ лицѐ пꙋстынѧ·

И҆ посла̀ моѷсїи послы̀, къ сїѻ́нꙋ цр҃ю а҆море́искꙋ.
словеса̀ ми́рны гл҃ѧ·

да про́идемъ сквоѕѣ̀ землю твою пꙋтемъ про́идемъ.
не ѹ҆клоним̑сѧ н̂и на села, н̂и на виногра́ды, ниже пїемъ воды̀ ѿ кладѧзь твоих̑.
пꙋтемъ цр҃ьскимъ поидемъ дондеже проидем̑ предѣлы твоѧ̀·

И҆ не дастъ сиѻ҆́нъ і҆и҃лю минꙋти сквозѣ предѣлы своѧ̀, и҆ събра̀ сїѻ́нъ вс̂ѧ лю́ди е҆го, і҆ и҆зы́иде сѣщисѧ съ і҆и҃лемъ въ пꙋсты́ню, и҆ прїи҆де въ и҆а҆са́нъ и҆ въполчи́шасѧ къ і҆и҃лю·

И҆збѝ ѧ҆̀ і҆и҃ль сѣ́ченїем̑ ме́чным̑, и съвладѣша земле́ю е҆го, ѿ а҆рно́на до а҆во́ка, до сн҃овъ а҆м꙽мо́нь, ꙗ҆́ко а҆зи́ръ предѣлѝ сн҃овъ а҆мъмо́нь сꙋть·

И҆ прїѧ̀ і҆и҃ль вс̂ѧ тїи гра́ды с̂и.
и҆ всели́сѧ і҆и҃ль въ всѣ́хъ гра́дѣх꙽ а҆море́искихъ, въ е҆сево́нѣ, и҆ въ всх̑ѣ вла́стехъ сꙋщихъ в них̑·

Є҆сть б̂о е҆сево́нъ гра́дъ сїѻ́на цр҃ѧ а҆море́иска, и҆ си́це повое҆ва́ша пр́ьвое ц҃рѧ моа́влѧ, и҆ взѧ̀ вс̂ю зе́млю е҆го ѿ а҆рои́ра, и҆ до а҆рно́на·

Сего̀ ра́ди рекꙋ́тъ при́точницы прїидите въ е҆сево́нъ.
да съгради́тсѧ и҆ сътвори́тсѧ град̑ сїѻ́н꙽·

Ꙗ҆́ко ѻ҆́гнь и҆зы́иде ѿ е҆сево́на и҆ пла́мень ѿ гра́да сїѻ́нѧ.
и҆ попалѝ до моа́ва, и҆ пожрѐ столпы̀, а҆рно́нѧ·

Лю́тѣ тебѣ моа́ве, поги́бните лю́дїе хамо́совы.
ѿда́шасѧ сн҃ове е҆го снабдѣнїа ра́ди и҆ дще́ри е҆го, плѣ́нница цр҃ю а҆море́искꙋ сїѻ́нꙋ·

И҆ сѣмѧ и҆хъ.
погиба́етъ е҆сево́нъ даже до дево́на, и҆ же́ны и҆хъ е҆щѐ разожго́ша ѻ҆́гнь на моа́ва·

И҆ всели́ же сѧ і҆и҃ль въ вс̂ѧ гра́ды а҆море́иски·

И҆ посла̀ моѷсїи съглѧда́ти и҆а҆зи́ра, и҆ взѧша и҆̀, и҆ се́ла е҆го, і҆ и҆згна́ша а҆море́а сꙋщаго т̂ꙋ·

И҆ възврати́шасѧ прїидо́ша пꙋте́мъ въ васа́нь, і҆ и҆зы́иде и҆ѻ́гъ ц҃рь васа́ньскїи проти́вꙋ и҆мъ, и҆ вс̂и лю́дїе е҆го на́ брань въ е҆драи́нъ·

И҆ реч̑҇ г҃ь къ моѷсїю не бо́исѧ е҆го ꙗ҆́ко в рꙋцѣ твоѝ преда́хъ и҆̀, и҆ вс̂и лю́дїе е҆го, и҆ вс̂ю зе́млю е҆го, и҆ сътвори́ши е҆мꙋ, ꙗ҆́коже сътворѝ сїѻ́нꙋ цр҃ю а҆море́искꙋ, и҆же жи́лъ во е҆сево́нѣ·

И҆ ѹ҆би́ша е҆го, и҆ сн҃ы е҆го и҆ вс̂ѧ лю́ди е҆го.
да́ждь не ѻ҆ста̀ в ни́хъ живы́и.
и҆ прїѧ́ша землю и҆хъ·

Глв̑҇а, к҃в·

И въздви́гнꙋшасѧ сн҃ве і҆и҃льтестїи, и҆ въполчи́шасѧ на за́паде, моа́ва ѹ҆́ і҆ѻ҆рда́на, къ е҆рихо́нꙋ·

И҆ видѣвъ вала́къ сн҃ъ е҆фо́ровъ вс̂е е҆лико сътворѝ і҆и҃ль а҆море́ю·

И҆ ѹ҆боа́сѧ моа́въ ѿ людїи ѕѣ́ло ꙗ҆́ко мно́ѕи бѧ́хꙋ, и҆ ѻ҆скорбѣ моа́въ ѿ лица̀ сн҃овъ і҆и҃левъ·

И҆ рече моа́въ ста́рцем̑ мадїам̑лим̑ нн҃ѣ сътребѧт̑ со́нм꙽ сїи вс̂ѧ и҆же ѻ҆крс̑҇тъ нас̑҇, ꙗ҆коже сътреблѧет̑ телецъ злакъ на́ поли·

Вала́къ же сн҃ъ сепфо́ровъ, бѧ́ше цр҃ь моа́вль въ то вре́мѧ·

И҆ посла́ къ валаа́мꙋ сн҃ꙋ воѻ́ровꙋ фаѳꙋ́ра и҆же е҆сть ѹ҆ рекѝ землѧ̀ люді́и е҆го, възва́ти е҆го гл҃ѧ·

Се̂ людїе и҆зы́доша и҆зъ е҆гѷпта.
и҆ с̂е покрыша лицѐ землѝ, и҆ сїи сѣдѧт̑ при ѻ҆деръжанїи мое҆мъ·

Нн҃ѣ ѹ҆бо прїиди и҆ прокленѝ мн̂ѣ люди сїѧ, ꙗ҆́ко крѣплѣйшїи сꙋть паче нас̑҇, а҆́ще възможем̑ сихъ и҆збити, и҆ да и҆зженꙋ̀ их̑ и҆з꙽ землѧ̀·

Ꙗ҆́ко вѣдѣ.
и҆хже а҆́ще блс̑҇ви́ши блс̑҇вѧт̑сѧ, і҆ и҆хже а҆́ще прокленеши т̂о прокленꙋтсѧ·

І҆ идо́ша старцы моа́вли и҆ старцы мадїамли, и҆ влъхвова́нїа въ рꙋках̑ и҆хъ, и҆ прїидоша къ валаа́мꙋ, и҆ гл҃аша е҆мꙋ словеса̀ вала́кова·

И҆ рече к ним̑ прилежи́те т̂ꙋ нощь сїю, и ѿвѣща́ю вам꙽ дѣа́нїа, ꙗ҆́же а҆́ще гл҃етъ г҃ь ко мнѣ, и҆ прилежаша кн҃ѕи моа́вли ѹ҆ валаа́ма·

И҆ прїиде г҃ь къ валаа́мꙋ, и҆ рече е҆мꙋ.
чт̂о сꙋть чл҃цы сїи ѹ҆ тебѐ·

Рече ж̑ валаа́мъ къ б҃ꙋ.
вала́къ сн҃ъ сепфоровъ, цр҃ь моа́вль, послалъ ѧ҆̀ е҆сть ко мнѣ̀ рекїи·

Се̂ лю́дїе и҆зъшлѝ сꙋть и҆зъ е҆гѷпта, и҆ покры́ша лицѐ землѝ, и҆ с̂е сѣдѧ́тъ при ѻ҆держа́нїи мое҆мъ·

Нн҃ѣ же прїиди и҆ проклени́ и҆хъ.
а҆́ще клѧ́твою возмогꙋ и҆з꙽би́ти и҆хъ, и҆ ѿгна́ти ѧ҆̀ ѿ землѧ̀·

И҆ рече г҃ь къ валаа́мꙋ да не и҆деши с ни́ми, ниже кленеши людїи.
сꙋть б̂о блс̑҇вены·

И҆ въста́въ валаа́мъ заѹ҆́тра, рече кн҃ѕемъ вала́ковым̑.
възвратитесѧ къ гнс̑҇ꙋ свое҆мꙋ, не ѻ҆ста́ви ми б҃ъ и҆тѝ с вами·

И҆ въста́вше кн҃ѕи моа́вли прїидоша къ вала́кꙋ·

и҆ рекоша е҆мꙋ, не хощетъ валаа́мъ прїитѝ с нами·

И҆ приложѝ вала́къ посла́ти кн҃ѕи множа́иша и҆ чс̑҇тнѣиша сих̑·

И҆ прїидоша къ валаа́мꙋ, и҆ гл҃аша е҆мꙋ с̂е гл҃етъ вала́къ сн҃ъ сепфо́ровъ, молю́ ти сѧ не ѻ҆бленисѧ прїити ко мнѣ̀·

Чтс̑҇нѣ̀ б̂о тѧ̀ почтꙋ̀ по всемꙋ е҆лика а҆́ще рече́ши ми сътворю т̂и, н̂о прїидѝ и҆ проклени м̂и лю́ди сїѧ·

И҆ ѿвѣща валаа́мъ и҆ рече кн҃ѕемъ вала́ковымъ, а҆́ще м̂и дастъ вала́къ по́лнъ храмъ е҆го зла́та и҆ сребра̀, не могꙋ̀ престꙋпи́ти сло́ва г҃а б҃а, и҆ сътвори́ти ѻ҆ них̑ мало и҆ли вели́ко в разꙋмѣ своем̑·

И҆ нн҃ѣ в̂ы потрьпи́те но́щъ сїю, да ѹ҆вѣде чт̂о приложи́тъ г҃ь гл҃ати ко мнѣ̀·

И҆ прїиде б҃ъ къ валаа́мꙋ во снѣ̀ но́щїю и҆ рече е҆мꙋ.
а҆́ще зовꙋще т̂ѧ пришли сꙋть чл҃ци сїи въста́въ и҆дѝ въ слд̑ѣ и҆хъ, н̂о слово и҆же а҆́ще гл҃ю тебѣ, т̂о да сътворѝ·

И҆ въставъ валаам̑ заѹ҆́тра, ѻ҆сѣдла̀ ѻ҆слѧ̀ свое, і҆ и́де съ кн҃ѕи моа́вли·

И҆ раз̑гнѣвасѧ ꙗ҆́ростїю б҃ъ ꙗ҆ко и҆́де сїи к немꙋ̀.
и́ въстав̑҇ а҆́гг҃лъ бж҃їи на сопротивле́нїе е҆мꙋ на пꙋтѝ.
сїи же сѣдѧ́ше на ѻ҆слѧ́ти свое҆мꙋ, и҆ дв̂а раба̀ е҆го с ним̑·

И҆ ѹ҆зрѣ ѻ҆слѧ̀ а҆́гг҃ла бж҃їѧ сꙋпроти́въ стоа́ща на пꙋтѝ, и҆ мечъ и҆звлечен꙽ в рꙋцѣ̀ е҆мꙋ, и҆ съвратисѧ ѻ҆се́лъ с пꙋтѝ и҆дѧше на́ поле, и҆ би́въ валаа́мъ ѻ҆слѧ̀ жезло́мъ, е҆же напра́витї е҆̀ на пꙋть·

И҆ стоѧ а҆́гг҃лъ бж҃їи, на стеѕѧх̑ виноград̑ныхъ, ѻ҆гражденїе ѿсю́дѣ, гражд̑енїе и҆ ѻ҆вꙋдѣ·

И ѹз̑рѣ ѻ҆слѧ̀ а҆́гг҃ла бж҃їа, приложи себѐ къ ѻ҆гра́де и҆ съкрꙋшѝ но́гꙋ валаа́мꙋ ѻ҆ ѻ҆градꙋ, и҆ приложи е҆щѐ множа́е би́ти е҆̀·

И҆ пришел̑҇ а҆́гг҃лъ бж҃їи, и҆ шед̑ пред̑ста̀ въ мѣстѣ ѹ҆́ѕ꙽цѣ, в не́мже не бѧ́ше ѹ҆клони́тисѧ н̂и на́ десно н̂и на́ лево·

И҆ ѹ҆зрѣ ѻ҆слѧ̀ а҆́гг҃ла бж҃їа, и҆ лѧ́же под̑ валаа́момъ, и҆ разгнѣ́васѧ валаа́мъ и҆ бїѧ́ше ѻ҆слѧ̀ жезло́мъ·

И҆ ѿверзе б҃ъ ѹ҆ста̀ ѻ҆слѧ̀ти.
и҆ рече валаа́мꙋ, что̀ т̂и е҆смь сътвори́лъ ꙗ҆́ко с̂е третїе бїе́ши м̂ѧ·

И҆ рече валаам̑ ѻ҆слѧ́ти.
ꙗ҆́ко нарꙋгал̑҇ ми сѧ е҆си, да а́ще бых̑ ме́чъ и҆мѣлъ в рꙋ́кꙋ мое҆ю пробо́лъ т̂ѧ бы́хъ·

И҆ рече ѻ҆слѧ̀ валаа́мꙋ.
не се л̂и а҆́зъ ѻ҆слѧ̀ твое, на нем̑же т̂ы е҆здеши, ѿ ю́ности свое҆ѧ, до дн҃ешнѧго дн҃ѧ, е҆смь л̂и презо́ром꙽ презрѣлъ сътвори́ти тебѣ сїе, се́й же рече н̂и.
ѿвр́ьз꙽ же б҃ъ ѻ҆чи валаа́мꙋ, и҆ ѹ҆зрѣ а҆́гг҃ла бж҃їа пред̑стоа́ща на пꙋтѝ, и҆ ме́чъ и҆звлече́нъ в рꙋцѣ е҆го, и҆ приклони́въ поклони́сѧ е҆мꙋ лицем̑·

Рече е҆мꙋ а҆гг҃лъ бж҃їи.
почто̀ бїе́ши ѻ҆слѧ̀ свое сїе третїе, се́ же а҆́зъ прїидох̑ на погꙋбленїе твое ꙗ҆́ко не прїа́тенъ пꙋть твои предо мно́ю·

И҆ ѹ҆зрѣв м̂ѧ ѻ҆слѧ̀ съвратисѧ с̂е тре́тїе.
а҆́ще б̂ы не ѹ҆конил̑҇сѧ ѿ менѐ, нн҃ѣ т̂ѧ ѹ҆бо ѹ҆бил̑҇ бых̑, а҆ сїю ѻ҆живи́лъ быхъ·

И҆ рече валаам̑ къ а҆гг҃лꙋ гн҃ю, съгрѣших̑ не ѹ҆вѣдх̑ѣ б̂о, ꙗ҆́ко т̂ы мнѣ̀ пред̑ста́еши проти́вꙋ мн̂ѣ на пꙋти, и҆ нн҃ѣ а҆ще т̂и нс̑҇ѣ го́дѣ ѻ҆бращꙋсѧ·

И҆ рече а҆гг҃лъ бж҃їи къ валаа́мꙋ.
и҆дѝ т̂ы съ чл҃ки ѻ҆ба́че̑ слово, е҆же а҆ще рекꙋ тебѣ̀, сїе снабдѝ гл҃ати, і҆ и́де валаа́мъ съ кн҃ѕи вала́ковы·

И҆ ѹ҆слы́шавъ вала́къ ꙗ҆́ко приходит̑ валаа́мъ, і҆ и҆зы́де проти́вꙋ е҆мꙋ во́ град̑ моа́вль.
и҆же е҆сть въ предѣ́лехъ а҆рно́нѣхъ, и҆же е҆сть на кра́и предѣ́лъ·

Рече же вала́къ къ валаа́мꙋ, не посла́хъ л̂и пре́жде зва́ти тебѐ.
почт̂о не прїиде къ мнѣ̀, и҆л̂и не възмого́хъ почти́ти тебѐ·

И҆ рече валаа́мъ къ вала́кꙋ.
с̂е прихожꙋ̀ къ тебѣ, и҆ нн҃ѣ мо́щенъ бꙋ́дꙋ гл҃ати нѣ́кое сло́во, е҆же а҆́ще вложи́тъ г҃ь въ ѹ҆ста̀ моѧ̀ сїе рекꙋ̀·

І҆ и́де валаа́мъ съ вала́комъ, и҆ внидо́ша въ́ градъ се́лныи·

И҆ събра̀ вала́к꙽ тельца̀, и҆ ѻ҆вца̀, и҆ посла̀ валаа́мꙋ и҆ кн҃ѕемъ, и҆же с ни́мъ·

И҆ бы́сть заѹ҆́тра, и҆ поѧ̀ вала́къ валаа́ма и҆ възведѐ е҆го на сто́лпъ ваа́ловъ, и҆ показа̀ е҆мꙋ ѿтꙋ́дꙋ чс̑҇а нѣ́кꙋю людїи·

Глв̑҇а, к҃г·

И рече валаа́мъ къ вала́кꙋ.
съградѝ м̂и зд̂ѣ, з҃, тре́бищъ, и҆ ѹ҆гото́ваи м̂и здѣ̀ з҃, теле́цъ, и҆ з҃ ѻ҆ве́нъ·

И҆ сътворѝ вала́къ ꙗ҆коже повелѣ̀ е҆мꙋ валаа́мъ, и҆ възложѝ теле́цъ и҆ ѻ҆венъ на требище·

И҆ рече валаамъ къ валакꙋ стани ѹ҆ требы свое҆ѧ̀, и҆ да и҆дꙋ̀ а҆́ще ми сѧ ꙗ҆́витъ б҃ъ въ срѣтенїе, и҆ слово е҆же м̂и ѹ҆кажет̑ и҆сповѣмъ т̂и·

И҆ ста̀ вала́къ ѹ҆ тре́бы свое҆ѧ.
валаамъ же и́де въпроси́ти б҃а, и҆́де же прѧ́мо·

И ꙗ҆́ви́сѧ б҃ъ валаа́мꙋ.
и҆ рече к немꙋ валаа́мъ.
з҃, тре́бищъ съгото́вих̑, и҆ възложих̑ теле́цъ, и҆ ѻ҆ве́нъ на тре́бища·

И҆ вложѝ б҃ъ сло́во, въ ѹ҆ста̀ валаа́мꙋ и҆ реч̑҇, възврати́сѧ къ вала́кꙋ и҆ та́ко гл҃и·

И҆ възврати́в꙽сѧ к немꙋ̀, сеже стоѧ́ше ѹ҆ вс̂есъж꙽же́нїи свои҆хъ, и҆ вс̂и кн҃ѕи моа́вли с ни́мъ·

И҆ бы́сть дх҃ъ бж҃їи на не́мъ.
и҆ въспрїим̑ притча е҆го и҆ рече и҆мъ, ѿ межꙋрѣ́чїѧ приведѐ м̂ѧ, валакъ цр҃ь моавль, ѿ горъ въсточныхъ гл҃ѧ, ходѝ да м̂и прокленеши і҆акова, и҆ ходѝ да м̂и прокленеши і҆и҃лѧ·

Чт̂о прокленꙋ̀ е҆гоже не клене́тъ б҃ъ.
и҆ чт̂о злоблю е҆гоже не ѻ҆злоби б҃ъ·

Ꙗ҆́ко ѿ верхъ горъ вижю е҆го, и҆ ѿ хо́лмъ прозираю е҆го.
а҆ с̂е люди е҆дины вополча́ютсѧ, и҆ къ ꙗ҆зыкомъ не примѣша́ютсѧ·

Кт̂о и҆считал̑҇ е҆сть племѧ̀ і҆а́ковле, и҆л̂и кт̂о и҆зочте́тъ со́нмы і҆и҆л҃ѧ, да ѹ҆́мретъ дш҃а моѧ въ дш҃ах꙽ пра́ведныхъ, и҆ бꙋди племѧ̀ мое ꙗ҆́коже племѧ̀ и҆хъ·

И҆ рече вала́къ къ валаа́мꙋ чт̂о сътворѝ м̂и, на клѧ́тїе вра́гъ моих̑ възва́х т̂ѧ, и҆ с̂е блс̑҇ви ѧ҆̀ блс̑҇ве́нїемъ·

И҆ рече валаа́мъ къ вала́кꙋ.
с̂е е҆ли́ко вложѝ б҃ъ сло́во, въ ѹ҆ста̀ моѧ̀ снабжꙋ̀ гл҃ати·

И҆ рече к немꙋ̀ вала́къ, пои҆дѝ е҆щѐ со мно́ю на мѣсто и҆́но, ѿнюдꙋже ѹ҆́зриши их̑ ѿтꙋ́дꙋ, н̂о ча́сть и҆хъ ѹ҆́зриши, а҆ всѣхъ не ѹ҆́зриши, и҆ прокле́неши их̑ мн̂ѣ та́мо·

И҆ поѧ̀ е҆го на стра́жбы се́лныѧ.
на ве́рхꙋ и҆сте́санъ и҆ съград̑и̑ т̂ꙋ, з҃. тре́бищь, и҆ възложѝ телца̀ и҆ ѻ́вна на тре́бище·

И҆ рече валаа́мъ къ вала́кꙋ.
ста́ни ѹ҆ тре́бы своеѧ, а҆́з же и҆дꙋ̀ въпраша́ти б҃а·

И҆ срѣте б҃ъ валаа́ма.
и҆ вложѝ сло́во въ ѹ҆ста̀ е҆мꙋ, и҆ рече възврати́сѧ къ вала́кꙋ и҆ да гл҃еши сїѧ же·

И҆ въз꙽врати́сѧ к немꙋ̀, се́и же стоѧ́ше ѹ҆ вс̂есъж꙽же́нїи свои҆хъ.
и҆ вс̂и кн҃ѕи моа́вли с нимъ,<.>

И҆ рече е҆мꙋ вала́къ чт̂о гл҃а г҃ь·

И҆ възпрїимъ при́тчи е҆го и҆ рече, въста́ни вала́че и҆ послꙋшай, и҆ вънꙋшѝ с̂и свѣдѣтельство сн҃ꙋ сепъфо́ровъ·

Не ꙗ҆́ко чл҃къ преставлѧ́етъ б҃ъ.
ниже ꙗ҆ко сн҃ъ чл҃чьскїи и҆зменѧ́етъ.
е҆гда̀ гл҃аше н̂о не сътворит̑ л̂и и҆ ѻ҆беща́вый не да́сть л̂и с̂е блс̑҇вити ѧ҆̀ поча́хъ блс̑҇влю и҆ не възъвращꙋ̀сѧ·

Не бꙋдетъ трꙋда̀ въ і҆а́ковѣ ниже ѹ҆́зри́тсѧ болѣзнь въ і҆и҆л҃и, г҃ь б̂о б҃ъ и҆хъ с ни́мъ, и҆ сла́ва цр҃ьскаѧ на ни́хъ·

б҃ъ и҆зведы́и и҆х꙽ и҆зъ е҆гѷпта.
ꙗ҆́ко си́ла е҆ді́норога в нихъ·

Нѣсть б̂о вражбы̀ въ і҆а́ковѣ, ниже въл꙽хвова́нїѧ, въ і҆и҆л҃и, въ́ времѧ нарече́тсѧ і҆а́ковъ і҆и҆л҃ю чт̂о съвръшѝ б҃ъ·

с̂е лю́ди ꙗ҆́ко льви́чищи въста́нꙋтъ.
ꙗ҆́ко ле́въ възнесе́тсѧ, не лѧ́жетъ до́ндеже ꙗ҆́сть пи́щꙋ и҆ кро́вь сѣ́ченыхъ, и҆зъпїе́тъ·

И҆ рече вала́къ к꙽ валаа́мꙋ.
н̂и клѧ́твами мн̂ѣ кленѝ и҆хъ, ниже блс̑҇венїемъ бл҃свѝ и҆хъ·

ѿвѣща́ же валаа́мъ рече къ вала́кꙋ, не гл҃ахъ л̂и т̂и рекїи, сло́во е҆же а҆́ще гл҃етъ б҃ъ т̂о сътворю̀·

И҆ рече вала́къ къ валаа́мꙋ и҆дѝ пои҆мꙋ т̂ѧ на мѣсто и҆́но.
а҆́ще го́дѣ бꙋдетъ б҃ꙋ, и҆ проклене́ши м̂и и҆х꙽ ѿтꙋдѣ·

и҆ поѧ̀ вала́къ валаа́ма.
на врь́хъ фоѻ҆го́ра приходѧ́щего въ пꙋсты́ню.

И҆ рече валаа́мъ къ вала́кꙋ, съград̑и̑ ми здѣ̀, з҃. тре́бищъ, и҆ ѹ҆гото́ваи м̂и здѣ̀, з҃, теле́цъ, и҆ з҃, ѻ҆ве́нъ·

И҆ сътворѝ вала́къ ꙗ҆́коже рече е҆мꙋ валаа́мъ.
и҆ възложѝ теле́цъ, и҆ ѻ҆ве́нъ на ѻ҆лтарь·

Глв̑҇а, к҃д·

И ви́дѣвъ валаа́м꙽ ꙗ҆́ко добро̀ е҆сть предъ гм҃ъ.
блс̑҇вити і҆и҆л҃ѧ, не и́де по зако́нꙋ е҆го и҆ въ срѣте́нїе влъхвова́нїем̑, и҆ възвратѝ лицѐ своѐ въ пꙋсты́ню·

И҆ възведѐ валаа́мъ ѻ҆́чи своѝ и҆ ѹ҆зрѣ і҆и҆л҃ѧ въполча́ющасѧ съ племенемъ, и҆ бы́сть дх҃ъ бж҃їи на немъ·

И҆ въспрїимъ при́тча е҆го и҆ рече.
гл҃етъ валаа́мъ сн҃ъ воѻ҆́ров̑҇ гл҃етъ чл҃къ и҆́стинны, гл҃етъ слꙋхаѝ словеса крѣпкихъ ви́дѧи е҆ли́ко ви́дѣ, видѣ́нїе бж҃їе въ снѣ̀ ѿкрове́нѣ ѻ҆́чи е҆го·

Ко́ль добрѣ до́мове твои і҆а́кове.
и҆ кꙋща твоѧ і҆и҆л҃ю·

Ꙗ҆́ко раздо́лы ѻ҆сѣнѧ́ющесѧ.
и҆ ꙗ҆ко са́ди при рѣка́хъ, и҆ ꙗ҆́ко кꙋща ꙗ҆́же поткнꙋ̀ г҃ь, а҆ки ке́дръ подлъ́гъ воды̀·

И҆зы́детъ чл҃къ и҆с племе́ни твое҆го.
и҆ съвладѣ́етъ страна́ми мно́гими, и҆ възнесет̑сѧ го́гъ цр҃ьство е҆го, и҆ възрасте́тъ·

б҃ъ и҆зведы́и и҆хъ и҆зъ е҆гѷпта.
а҆ки сла́вꙋ е҆дїнорога е҆го, и҆зъꙗ҆́стъ странꙋ̀ врагъ свои҆хъ.
и҆ тол꙽стотꙋ и҆хъ и҆зможди́тъ, и҆ стрела́ми свои҆ми застрѣ́литъ вра́га·

И҆ възлегъ почѝ а҆ки левъ и҆ а҆ки лви́щъ, кт̂о въста́витъ и҆̀.
блс̑҇вѧ́щїи т̂ѧ блс̑҇вени, а҆ кленꙋщ́їи т̂ѧ проклѧ́ти·

И҆ раз̑гнѣвасѧ вала́къ на валаа́ма, и҆ пле́снꙋв꙽ рꙋка́ма свои҆ма.

И҆ рече вала́къ къ валаа́мꙋ, клѧ́ти т̂ѧ вра́га мое҆го призва́хъ, се́ же бл҃вѧ́ѧ блс̑҇виши их̑ тре́тїе·

Нн҃ѣ ѹ҆бо бѣжѝ на мѣ́сто свое.
реко́хъ чс̑҇тїю тебѐ почс̑҇твова́ти, и҆ нн҃ѣ ѿнѧ́лъ г҃ь ѿ тебе чс̑҇ть·

И҆ рече валаа́м꙽ къ вала́кꙋ, не послом̑ л̂и твои҆мъ, и҆хже посла̀ къ мн̂ѣ гл҃ах꙽ рекїи·

А҆ще м̂и да́сть вала́къ храм̑ е҆го по́лнъ сребра̀ и҆ зла́та.
не могꙋ̀ престꙋпи́ти сло́ва бж҃їѧ, не сътвори́ти е҆мꙋ ѕл̂о и҆л̂и добро ѻ҆ себѣ̀, е҆ли́ко а́ще рече м̂и б҃ъ т̂о гл҃ю·

И҆ нн҃ѣ и҆дꙋ до мѣ́ста свое҆го.
ходѝ да т̂и съвѣща́ю чт̂о сътворѧ́тъ лю́дїе сїи, лю́демъ твои҆м꙽, въ послд̑ѣнѧа дн҃и·

И҆ въспрїим꙽ при́тча своа рече.
гл҃етъ валаа́м꙽, сн҃ъ веѻ҆́ровъ гл҃етъ чл҃къ и҆́стинны·

Ви́дѧи и҆ слы́шаи словеса̀ бж҃їѧ.
ѹ҆мѣѧ ѹ҆мѣнїе вы́шнѧго, и҆ видѣ́нїе бж҃їе ви́дѣ въ снѣ̀ ѿкрове́ни ѻ҆́чи е҆го·

Покажꙋ̀ е҆мꙋ и҆ не нн҃ѣ ѹ҆блажꙋ̀, и҆ не приближꙋ́сѧ, въсїа́етъ б̂о ѕвѣзда̀ ѿ і҆а́кова, и҆ въста́нетъ чл҃къ ѿ і҆и҆л҃ѧ и҆ погꙋби́тъ кнѧ́ѕѧ моа́влѧ, и҆ плени́тъ вс̂ѧ сн҃ы си́ѳовы·

И҆ бꙋ́детъ е҆до́мъ наслѣ́дїе, и҆ бꙋдетъ наслѣдїе и҆са́въ вра́гъ е҆го, і҆и҆л҃ѧ сътвори́лъ е҆сть крѣ́постїю·

И҆ въста́нет̑ ѿ і҆а́кова, и҆ погꙋ́битъ сп҃са́емыхъ ѿ гра́да·

И҆ ви́дѣвъ а҆мали́къ.
и҆ пои҆мъ при́тча своѧ и҆ рече.
нача́ло ꙗ҆́зы́ковъ а҆мали́къ и҆ сѣмѧ и҆хъ поги́бнетъ·

И҆ ви́дѣ кенеѻ҆́на, и҆ поим̑ при́тча е҆го рече, си́лно ѹ҆си́лїе твое, и҆ а́ще положи́ши на ка́мени кꙋщ́ꙋ твою̀·

І҆ а́ще бꙋ́детъ веѻ҆́рꙋ кꙋща кова́ръства.
а҆сѷрїи пленѧ́т꙽ т̂ѧ·

И҆ ви́дѣ ѻ҆́гъ и҆ въспрїимъ при́тча ег̑҇ и҆ рече го́ре го́ре и҆ кт̂о жи́въ бꙋдетъ е҆гда̀ положи́тъ б҃ъ сїѧ·

І҆ и҆зы́дет꙽ и҆з рꙋкъ ките́искихъ.
и҆ съзлѧ́тъ а҆са́рꙋ, и҆ съзлѧ́тъ е҆вре́ѻ҆мъ, и҆ т̂їи въкꙋпѣ поги́бнꙋтъ·

И҆ въста́въ валаа́мъ ѿиде, възврати́сѧ на мѣсто своѐ, и҆ валак̑҇ ѿи́де к немꙋ̀·

Глв̑҇а, к҃е·

И жи́лъ і҆и҆л҃ь въ сатъги́ме, и҆ ѻ҆скверни́шасѧ лю́дїе блꙋже́нїемъ, съ дще́рми моа́вли·

И҆ възваша ѧ҆̀ въ требы кꙋми́ръ свои҆хъ, і҆ ꙗ҆́ша лю́дїе тре́бы и҆хъ.
и҆ поклони́шасѧ кꙋми́ромъ и҆хъ·

И҆ послꙋжѝ і҆и҆л҃ь вее҆льфего́рꙋ, и҆ разгнѣ́васѧ ꙗ҆́ростїю г҃ь на і҆и҆л҃ѧ·

И҆ рече г҃ь къ моѷсїю, пои҆мѝ кнѧѕи людски и҆ ѻ҆бличѝ ѧ҆̀ г҃ꙋ прѧ́мо слн҃цꙋ, и҆ ѿврати́сѧ гнѣвъ ꙗ҆́рости гн҃ѧ ѿ і҆и҆л҃ѧ·

И҆ рече моѷсїи къ племе́немъ і҆и҆л҃ьскымъ и҆збїйте ко́ждо ѹ́жика свое҆го слꙋжи́вшаго вее҆льфего́рꙋ·

И҆ с̂е чл҃къ ѿ сн҃овъ і҆и҆л҃евъ пришд̑е приведѐ бра́та свое҆го съ мадїа҆ни́тынею пред̑ моѷсїѧ.
и҆ прд̑е весь со́нмъ сн҃овъ і҆и҆л҃евъ, сїи же пла́кахꙋсѧ пред̑ две́рми хра́ма свѣдѣнїѧ·

И ви́дѣ финее́съ, сн҃ъ е҆ліа҆за́ровъ внꙋ́къ а҆а҆ро́на жерца̀, въста̀ и҆зъ среды̀ со́нма, и҆ взе́мъ сꙋли́цꙋ свою в рꙋцѣ·

И҆ вни́де въ слѣд꙽ чл҃ка і҆и҆л҃ьтѧни́на въ пеще́рꙋ, и҆ прободѐ ѻ҆́ба чл҃ка і҆и҆л҃ьтѧни́на, и҆ женꙋ̀ мадїа҆ни́тыню сквоѕѣ ложесна̀ е҆ѧ, и҆ ѹ҆ста̀ вре́дъ ѿ сн҃овъ і҆и҆лв҃ъ·

И҆ бы́ша же ѹ҆мро́ша вре́домъ тм̑ѣ, ҂к҃. и҆ ҂д҃·

И рече г҃ь къ моѷсїю гл҃ѧ, финее҆съ сн҃ъ е҆лїа҆заров̑҇.
внꙋ́къ а҆а҆ро́на жеръца̀ ѹ҆ста́ви гнѣвъ мой ѿ сн҃овъ і҆и҆лв҃ъ, е҆гда̀ възревнова̀ възревнова́нїе моѐ в нихъ, и҆ не потреби́хъ сн҃овъ і҆и҆л҃въ, въ рве́нїи свое҆мъ·

Та́ко рѣхъ, с̂е а҆́зъ даю̀ е҆мꙋ завт̑ѣ мой ми́рныи·

И҆ бꙋдетъ е҆мꙋ и҆ племе́ни е҆го по немъ, завѣтъ жре́чества вѣчныи.
понеже възревнова̀ по́ бѕ҃ѣ свое҆мъ, и҆ ѹ҆млс̑҇рдова ѻ҆ сн҃ѣх꙽ і҆и҆лв҃ых̑·

И҆мѧ же чл҃кꙋ і҆и҆л҃ьтѧни́нꙋ, е҆гоже ѹ҆бѝ съ мадїа҆ни́тынею, зам̑мврїи сн҃ъ са́лонь кн҃ѕь до́мꙋ ѿч҃ества сн҃овъ симеѻ́нь·

И҆мѧ женѣ̀ мадиа҆ни́тыни, прободе́нои.
ха́зви, дщѝ сѷрова кн҃ѕѧ страны̀ сомо́ѳовых̑ до́мꙋ ѿч҃ества е҆сть мадїа́млѧ·

И҆ рече г҃ь къ моѷсїю гл҃ѧ.
гл҃и сн҃омъ і҆и҆лв҃ымъ рекїи, съвраждꙋ́ите мадїа҆ни́томъ, и҆ бїите ѧ҆̀.

Занѐ съвраждова́ша ва́мъ сїи лꙋка́въствы е҆ли́ко лꙋка́вствꙋ́ютъ вами фего́ром̑, и҆ хазе́въю дще́рїю кн҃ѕѧ мадїа́млѧ, сестро́ю и҆хъ прободе́ною, въ дн҃ь ꙗ҆́зве́ныи фого́ра ра́ди·

Глв̑҇а, к҃ѕ·

И бы́сть по ѹ҆би́тїи.
и҆ рече г҃ь къ моѷсїю и҆ е҆лїа҆за́рꙋ жерцꙋ̀ гл҃ѧ·

Пои҆мѣт́е нача́ла всего̀ со́нма сн҃ов꙽ і҆и҆л҃въ ѿ к҃, лѣтъ и҆ выш̑҇ше, по домо́мъ ѿч҃ьства и҆хъ, ве́сь и҆ды́и въѻ҆рꙋжи́тисѧ въ і҆и҆л҃и·

И҆ гл҃а моѷсїи и҆ е҆лїа҆за́ръ жре́цъ къ ни́мъ въ а҆рамо́ѳѣ моа́вли, при і҆ѻр̑҇да́ни ѹ҆ е҆ри́ха гл҃ѧ ѿ к҃, лѣтъ.
и҆ выш̑҇ше, сочтете, ꙗ҆́коже повелѣ̀ г҃ь моѷсїю·

Сн҃ове же і҆и҆л҃ьтестїи и҆зшед̑шїи и҆зъ е҆гѷпта.
рꙋви́мъ прьвене́цъ і҆и҆лв҃ъ и҆ сн҃ове рꙋви́мли е҆но́хъ.
и҆ со́ньмъ е҆но́ховъ, фа́лꙋи, и҆ со́ньмъ фа́лꙋевъ а҆съро́нь, и҆ со́ньмъ а҆сро́новъ ха́рми, и҆ со́ньмъ хармїи́нъ·

Сїи со́ньми рꙋви́мли, и бы́сть съглѧда́нїе и҆хъ.
҂м҃. ҂г҃. и҆ х҃. и҆ л҃·

Сн҃ове же фа́лꙋ, е҆лїавъ и҆ сн҃ове е҆лїа́вли, намꙋ́илъ, и҆ дафа́н꙽ и҆ а҆виро́нъ, сїи наро́читїи со́нмꙋ·

Сїи сꙋть въста́вше на моѷсїѧ і҆ а҆а҆ро́на.
въ со́нмѣ коре́инѣ въ раз̑стоѧнїи пред̑ гм҃ъ·

И҆ ѿве́рзъши землѧ̀ ѹ҆ста̀ своѧ пожрѐ и҆хъ.
и҆ коре́и въ см҃рти со́ньма е҆го, е҆гда попалѝ ѻ҆́гнь.
с҃ и҆ н҃, и҆ бы́ша в꙽ зна́менїе·

Сн҃ове же коре́ини не из̑мро́ша·

И҆ сн҃ве симеѻ҆́ни, со́ньмъ же симеѻ҆́нь, намꙋ́иль, и҆ со́ньмъ намꙋ́илевъ.
и҆а҆ми́нь, и҆ со́ньмъ и҆а҆ми́нь.
а҆хи́нь.
и҆ со́ньмъ а҆хїи́нь за́ра, и҆ со́ньмъ зара́и҆нъ.
саѹ҆и́лъ, со́ньмъ саѹ҆́иль.
сїи со́ньми симеѻ́ни ѿ соглѧда́нїѧ и҆хъ.
҂к҃в, и҆ с҃·

Сн҃ове же і҆ѹ҆́дини иръ, и҆ а҆на́нъ, и҆ сило́мъ, и҆ фаресъ и҆ за́ра·

И҆ ѹ҆мре и҆́ръ.
и҆ а҆на́нъ, въ землѝ ханаа́ни·

И҆ бы́ша сн҃ове і҆ю҆дини.
по со́ньмомъ и҆хъ.
сило́мъ, со́ньмъ сило́мль.
фаре́съ, и҆ со́ньмъ фаре́совъ.
за́ра, и҆ со́ньмъ за́рин꙽·

И бы́ша сн҃ове фаре́совы а҆сро́мъ.
и҆ со́ньмъ а҆сро́мль, и҆а҆мꙋ́илъ, и҆ со́ньмъ и҆а҆мꙋ́иль·

Сїи со́ньми і҆ѹ́дины.
по соглѧда́нїю и҆хъ.
҂о҃. ҂ѕ҃, и҆ е҃ сот̑·

И҆саха́ръ.
по со́ньмомъ и҆хъ, ѳо́ла, и҆ со́ньмъ ѳола́и, фꙋ́а, и҆ со́ньмъ фꙋа́и҆ль, и҆а҆сꙋ́въ, и҆ со́ньмъ и҆а҆сꙋ́вль, а҆мъвра́мль, и҆ со́ньмъ а҆мъвра́мль·

Сїи со́ньми и҆саха́рови по соглѧда́нїю и҆хъ.
҂ѯ҃, и҆ ҂д҃, и҆ у҃·

И҆ сн҃ове заѹ҆лони по со́ньмомъ и҆хъ, саре́дъ.
и҆ со́ньмъ саре́довъ, а҆л꙽ло́нъ, и҆ со́ньмъ а҆л꙽ло́нь, а҆л꙽ли́лъ, и҆ со́ньм꙽ а҆л꙽ли́ль·

Сїи со́ньми.
заѹ҆ло́ни.
по съглѧда́нїю и҆хъ.
҂ѯ҃. и҆ е҃. сот̑·

И҆ сн҃ове же га́дови.
по со́нмомъ и҆хъ·

сафо́нъ и҆ со́нмъ сафо́нин꙽.
а҆г꙽ги́нъ, и҆ сон̑҇мъ а҆г꙽гїи́нъ.
сꙋнѝ.
и҆ со́нмъ сꙋнїи́нъ.
а҆зе́ни.
и҆ со́нмъ а҆зене́инъ.
а҆́д꙽ди.
и҆ со́нмъ а҆д꙽дїи́нъ.
а҆роа҆́ди.
и҆ со́нмъ а҆роа҆дїи́нъ.
а҆рїи́лъ.
и҆ со́нм꙽ а҆рїи́ль, сїи со́нми га́довъ·

По соглѧда́нїю и҆х꙽, ҂м҃. и҆ ҂д҃, и҆ е҃, сот̑·

И҆ сн҃ове а҆си́рови.
по со́нмомъ и҆хъ, и҆а҆мин̑҇, и҆ со́нмъ а҆мїи́нь.
и҆е҆сꙋ́и.
и҆ со́нмъ, и҆е҆сꙋ́инь.
варїѧ̀, и҆ со́нмъ варїа́нин꙽ хеве́ръ, и҆ со́нмъ хеве́ровъ.
мелхи́и҆лъ.
и҆ со́нмъ мельхїи́ль·

И҆мѧ же дще́ри а҆си́рови са́ра, сїи со́нми а҆си́рови по соглѧда́нїю их̑.
҂м҃. ҂г҃, и҆ у҃·

И҆ сн҃ове и҆ѻ́сифли.
по сонмомъ и҆хъ.
манасїи и҆ е҆фрѣмъ.
и҆ сн҃ове манасии҆ни, махи́ръ, и҆ со́нм꙽ махи́ринь.
и҆ махи́ръ родѝ галаа́да.
и҆ галла́дь со́нмъ галадїи.
и҆ сїи сн҃ове гала́дїи е҆хїе҆зе́ръ, и҆ со́нмъ е҆хие҆зе́ровъ, хеле́къ, и҆ со́нмъ хеле́ковъ.
е҆срїи́ль и҆ со́нмъ е҆срїи́ль.
сихе́мъ, и҆ со́нмъ сихе́мль.
симае́ръ и҆ со́нм꙽ симае́рин̑҇.
и҆ ѻфе́ръ, и҆ со́нмъ и҆ѻ҆фе́ровъ.
салъпа́дꙋ же сн҃ꙋ ѻ҆фе́ровꙋ.
не бы́сть сн҃въ н̂о дще́ри, се́ же и҆мена̀ дще́ремъ, салпа́довымъ.
маа́ла, и҆ нꙋ́а, и҆ егла̀, и҆ ме́льха, и҆ фе́рса.
сїи со́нми манасїѝ по соглѧда́нїю и҆хъ, ҂н҃, и҆ ҂в҃, и҆ х҃·

И҆ сїи сн҃ове е҆фрѣмовы, сꙋѳа́ла, и҆ со́нм꙽ сꙋѳала́инъ тана́хъ.

И҆ со́нмъ танахїинъ, сїи сн҃ове твоѝ е҆де́нъ, со́нмъ е҆де́нинъ.
сїи со́нми е҆фрѣмли.
по соглѧда́нїю и҆хъ.
҂л҃, ҂в҃, е҃ сот̑·

И҆ сїи со́нми сн҃овъ і҆ѻ́сифль по со́нмꙋ и҆хъ·

И҆ сн҃ове вениа҆ми́ни, по сон̑҇мꙋ и҆хъ.
ва́ле, и҆ сонмъ вале́инъ.
а҆сиви́ръ, и҆ сонмъ а҆сиви́ровъ.
а҆хира́нъ, и҆ сонмъ а҆хира́нинъ.
софа́нъ, и҆ сонмъ софа́нинъ·

И҆ бы́ша сн҃ове ва́ле а҆́деръ, и҆ ное҆ма́нъ, а҆дерꙋ и҆ сонмъ а҆деа҆ринъ.
и҆ ное҆манꙋ и҆ сонмъ ное҆ма́нинъ.
сїи сн҃ове венїа҆ми́ни.
по сонмꙋ и҆хъ и҆ по соглѧда́нїи и҆хъ, ҂м҃, ҂е҃. и҆ х҃·

И҆ сн҃ове данови, по сонмꙋ и҆хъ.
са́ме, сонмъ саме́инъ.
сїи со́нми да́нови.
по со́нмом̑ и҆хъ·

Вс̂и со́нми саме́ини, по соглѧданїю и҆хъ.
҂ѯ҃, ҂д҃, и҆ у҃. и҆ сн҃ове неѳали́мли по со́нмꙋ и҆х꙽.
а҆сїи́ль.
со́ньмъ а҆сїи́левъ.
го́ини, и҆ со́нмъ го́и҆нинъ, и҆е҆срѝ, и҆ со́нмъ и҆е҆сри́новъ сели́мъ, и҆ со́нмъ сели́мль, сїи сон̑҇ми неѳали́мли по соглѧда́нїи и҆хъ, м҃, ҂е҃, и҆ у҃. сїи съглѧда́нїѧ сн҃овъ і҆и҆л҃въ.
҂х҃, и҆ ҂а҃. и҆ х҃. и҆ л҃·

И҆ рече г҃ь къ моѷсїю гл҃ѧ, си́мъ да сѧ раз꙽дѣли́тъ землѧ̀.
причасти́тисѧ по числꙋ̀ и҆ме́нъ и҆хъ.

Мно́гимъ ѹ҆мно́жиши прича́стїе.
и҆ ма́лымъ ѹ҆ма́ли прича́стїе и҆хъ.

Кое҆мꙋжд̑о ꙗ҆коже сꙋть съглѧдани да сѧ да́сть прича́стїе их̑, по жре́бїю.
да сѧ раз̑дѣли́тъ землѧ̀ и҆хъ.
на и҆мена̀ племене́мъ ѿч҃ествїѧ их̑.
да причастѧт̑·

ѿ жре́бїѧ, да раздѣли́ши прича́стїе и҆хъ.
междꙋ мно́гими, и҆ малы́ми сїи сꙋть съглѧда́нїѧ левѷи·

И҆ сн҃ве левѷи҆ни.
по со́нмꙋ и҆хъ.
герсо́нъ, и҆ со́нмъ герсо́новъ.
каа́ѳъ, и҆ со́нм꙽ каа́ѳовъ.
мера́ри, и҆ со́нмъ мера́рин̑҇ сїи со́нми сн҃овъ левѷи҆нъ.
и҆ со́нмъ лове́нинъ, и҆ со́нмъ хевро́нинъ.
и҆ со́нмъ мꙋси, и҆ со́нмъ корїи́нъ.
и҆ каѻ҆́ѳъ же родѝ, а҆м꙽вра́ма, і҆ и́мѧ женѣ̀ а҆м꙽вра́мли и҆ѻ҆хаве́ѳъ дщѝ левѷина, сїѧ же роди́ сѧ левѷе҆ви въ е҆гѷпте роди́ же а҆м꙽вра́мꙋ.
а҆а҆ро́на, и҆ моѷсїа и҆ марїа́мъ, сестрꙋ̀ их̑·

И҆ роди́ же сѧ а҆а҆ро́нꙋ нада́въ.
и҆ а҆виѹ҆́дъ, и҆ елеа҆за́ръ, и҆ ѳама́ръ·

И҆ ѹ҆́мре надав̑҇, и҆ авиѹ҆́дъ, е҆гда принесо́ста ѻ҆́гнь и҆́нъ прд̑е гм҃ъ, въ пꙋсты́ни сина́истѣи·

И҆ бы́ша же ѿ соглѧда́нїи их̑, ҂к҃, ҂г҃, ве́сь мꙋжескъ пол꙽ ѿ е҆ді́наго мцс̑҇а, и҆ вы́ш꙽ше, не соглѧдаша б̂о сѧ съ сн҃ы і҆и҆л҃евыми, ꙗ҆́ко не дастъсѧ и҆мъ жребїи, ѿ среды̀ сн҃ов꙽ і҆и҆л҃въ·

Сїе съглѧда́нїе моѷсїино, и҆ е҆лїазарово, жръцово, ꙗ҆́же съглѧдаша сн҃ы і҆и҆л҃вы, въ а҆рвоѳѣ, моа́вли и҆ ѹ҆́ ѻ҆рдана, при е҆рихонѣ·

И҆ в ни́хъ не бѧ́ше ѿ соглѧ́даныхъ прежде моѷсїѻ҆мъ и҆ а҆а҆ро́номъ ꙗ҆́же съглѧдаша сн҃ы і҆и҆л҃вы, в꙽ пꙋсты́ни синаистѣи·

Ꙗ҆́коже рече им̑ г҃ь, смр҃тїю и҆з꙽мрт̑ꙋ, въ пꙋсты́ни.
и҆ не ѻ҆ста̀ ѿ нихъ н̂и е҆ді́нъ, развѣ халека сн҃а е҆ѳонина, і҆сꙋса, сн҃а навѷна·

Глв̑҇а, к҃з·

И прїидо́ша дще́ри салпаа́довы сн҃а ѻ҆фо́рова.
сн҃а галаа́дова, сн҃а махи́рова, со́ньма манасїина, сн҃овъ і҆ѻ́сифль·

И҆ сїа же и҆мена̀ их̑·

маа́ла, и҆ нꙋѧ, и҆ е҆гла, и҆ ме́лха, и҆ фе́рса·

И҆ ста́ша пред̑ моѷсїѻ҆мъ, и҆ пред̑ е҆леа҆за́ромъ жерце́мъ.
и҆ пред̑ кнѧ́ѕи, и҆ пред̑ всѣмъ со́нмом꙽, ѹ҆ две́рїи хра́ма свѣдѣ́нїа, въпїю́ща·

ѿц҃ъ нашъ ѹ҆́мре въ пꙋсты́ни.
и҆ се́и не б̂ѣ средѣ со́нма съста́вльшагосѧ на́ г҃а.
въ со́нмѣ корѣѻ҆вѣ, ꙗ҆́ко грѣха̀ ради свое҆го ѹ҆́мре, сн҃ове же не бы́ша е҆мꙋ·

да не поги́бнетъ и҆́мѧ ѿц҃а на́шего, ѿ среды̀ со́нма е҆го.
ꙗ҆́ко нѣсть сн҃овъ е҆мꙋ, дади́те н̂ы ча́сть средѝ бра́тїѧ ѿц҃а на́шего·

И҆ принесѐ моѷсїи раз̑сꙋжде́нїе и҆хъ пред̑ г҃ь·

И҆ реч̑҇ г҃ь къ моѷсїю гл҃ѧ, пра́вѣ гл҃аша дще́ри салпа́довы.
да́нїе да да́си им̑ и҆ ѻ҆держа́нїе прича́стїа средѝ братїа ѿц҃а и҆хъ, и҆ да възложи́ши жре́бїи ѿц҃а и҆хъ на́ нѧ·

І҆ сн҃омъ же і҆и҃левым̑ да рече́ши гл҃ѧ.
чл҃къ а҆ще ѹ҆́мрет̑, и҆ не бꙋ́детъ сн҃а е҆мꙋ.
да възложи́те прича́стїе е҆го на дще́рь е҆го·

А҆́ще л̂и дще́ри не бꙋ́детъ е҆мꙋ.
да да́сте ча́сть е҆го бра́тꙋ е҆го·

А҆́ще л̂и не бꙋдетъ бра́та е҆мꙋ, да да́сте ча́сть бра́тꙋ ѿц҃а е҆го·

А҆́ще л̂и не бꙋ́детъ бра́та ѿц҃а е҆го, да да́сте ча́сть ѹ҆́жицы е҆го.
и҆л̂и бли́жнемꙋ е҆го ѿ племе́ни е҆го причасти́тї ѧ҆̀, и҆ да бꙋдет̑ с̂е сн҃омъ і҆и҆л҃евымъ ѻ҆правле́нїе сꙋда̀, ꙗ҆́коже заповѣ́да г҃ь моѷсїю·

И҆ реч̑҇ г҃ь къ моѷсїю в꙽зы́ди на горꙋ̀, ꙗ҆́же ѻ҆бонꙋ̀ странꙋ̀ горы̀, нава́ни.
и҆ ви́ждь зе́млю ханаа́ню, ю҆́же а҆зъ даю̀ сн҃ом꙽ і҆и҆л҃евым̑, въ ѻ҆держанїе·

И҆ ѹ́зри ю҆̀, и҆ приложишисѧ къ людемъ свои҆мъ и҆ ты̀.
ꙗ҆коже приложисѧ, и҆ а҆а҆ро́нъ братъ твои на горѣ̀ ѻ҆́ри·

Понеже престꙋпи́сте слово моѐ въ пꙋсты́ни си́нѣ.
вънегда̀ сꙋпротивитисѧ соньмꙋ ѻ҆ст҃ити м̂ѧ, и҆ не ѻ҆ст҃исте менѐ ѹ҆ воды̀ пред̑ ними, с̂е е҆сть вода̀ сꙋпротивнаѧ кадисъ, въ пꙋсты́ни синъ·

И҆ рече моѷсїи къ г҃ꙋ.
да и҆зберетъ г҃ь б҃ъ дх҃а все́и плоти чл҃чи, въ со́нмѣ се́мъ.
и҆же и҆зы́идетъ пред̑ ни́ми, и҆ кт̂о вни́детъ пред̑ лицемъ и҆хъ, и҆ кто̀ ѧ҆̀ и҆зведетъ и҆ кто̀ ѧ҆̀ въве́детъ.
и҆ да не бꙋдꙋтъ сонмъ гн҃ь, ꙗ҆́ко ѻ҆вца̀ не и҆мꙋщи па́стырѧ·

И҆ рече г҃ь къ моѷсїю гл҃ѧ.
пои҆мѝ съ собою и҆сꙋ́са сн҃а навѷна.
чл҃ка и҆же и҆́мать в себѣ̀ дх҃ъ, и҆ да възложиши рꙋцѣ своѝ на́нь·

И҆ да поставиши и҆̀ пред̑ е҆лїа҆за́ромъ жерце́мъ.
и҆ да заповѣ́сть е҆мꙋ, пред̑ всѣмъ со́нмомъ, и҆ да заповѣждь ѻ҆ немъ пред̑ ними·

И҆ д̂а да́си сла́вꙋ свою̀ нань.
ꙗ҆́ко да послꙋшаю҆тъ е҆го вс̂и сн҃ове і҆и҆л҃еви·

Прд̑е е҆лїа҆заромъ жерцем̑, да станет̑.
и҆ да въпраша́ютъ е҆го сꙋда̀, ꙗ҆вленїем̑ пред̑ гм҃ъ, реченїемъ е҆го да и҆зы́дт̑ꙋ, и҆ рече́нїемъ е҆го да вни́дꙋтъ, самъ и҆ сн҃ове і҆и҆л҃евы, и҆ весь сонмъ в꙽кꙋпѣ·

И҆ сътворѝ моѷсїи, ꙗ҆коже повелѣ̀ е҆мꙋ г҃ь б҃ъ.
и҆ пои҆мъ и҆сꙋ́са, и҆ постави е҆го, прд̑е е҆лїа҆за́ромъ жерцемъ, и҆ пред̑ всѣмъ со́нмомъ·

И҆ възложѝ рꙋцѣ своѝ нань.
и҆ ѹ҆стави и҆̀ ꙗ҆́коже повелѣ̀ г҃ь моѷсїю·

Глв̑҇а, к҃и·

И рече г҃ь къ моѷсїю гл҃ѧ, заповѣж́дь сн҃омъ і҆и҆л҃евым꙽, и҆ гл҃и к ни́мъ рекїи.
дарове моѝ и҆ данїа моѧ̀, и҆ прино́си моѝ, въ воню̀ бл҃овонїѧ, да снабди́те приноси́ти мн̂ѣ навс̂ѧ празд̑ники моѧ̀·

И҆ да рече́ши к ним̑, сїа да́ры ꙗ҆́же прино́сите г҃ꙋ, а҆́гнецъ е҆дїнолѣтних̑ непоро́чных̑ дв̂а на дн҃ь.
въ вс̂есъж꙽женїе вы́нꙋ·

А҆́гнецъ е҆ді́нъ да сътвори́те ра́но.
и҆ а́гнецъ вторы́и да сътвори́ши въ вечеръ·

И҆ да сътвори́те десѧ́тꙋю ча́сть е҆фи мѣ́ры, мꙋкѝ пшени́чны на тре́бꙋ, вмѣше́нꙋ въ е҆ле́ю.
четве́ртꙋю ча́сть мѣ́ры и́нъ.
всесъж꙽же́нїе вы́нꙋ, ꙗ҆коже бы́сть въ горѣ̀ сина́истѣи.
въ воню бл҃гово́нїа г҃ꙋ·

И҆ възлїа́нїе е҆го четве́ртꙋю ча́сть мѣ́ры и́нъ.
а҆́гньцꙋ е҆ді́номꙋ, въ ст҃омъ.
да възлїе́ши възлїѧ́нїе сике́рꙋ г҃ꙋ·

І҆ а́гньцꙋ второ́мꙋ сътвори́ши къ вечерꙋ по требѣ е҆го.
и҆ по възлїѧ́нїи е҆го да сътвори́ши, въ воню̀ бл҃гово́нїа г҃ꙋ·

И҆ въ дн҃ь сꙋбо́тъ, да приведе́те дв̂а а́гньца е҆дїнолѣтна, непоро́чна, и҆ дв̂ѣ десѧти́ны мꙋкѝ пшени́чны въ вс̂есъж꙽же́нїе, вмѣшены въ е҆ле́ю, и҆ възлїа́нїа е҆го, вс̂есъж꙽же́нїѧ сꙋбо́ты сꙋбо́тамъ на вс̂есъж꙽же́нїе всегда́шнее и҆ възлїѧ́нїа е҆го·

И҆ въ нача́лехъ мс̑҇цемъ да принесе́те въ вс̂есъж꙽же́нїе г҃ꙋ, телца̀ дв̂а ѿ говѧ̀дъ.
и҆ ѻ҆ве́нъ е҆ді́нъ, и҆ а́гнецъ е҆дїнолѣтнихъ з҃ непоро́чных̑·

Тр̂и десѧти́ны мꙋкѝ пшени́чны вмѣшены въ е҆ле́ю, телцꙋ̀ е҆ді́номꙋ, и҆ дв̂ѣ десѧти́ны мꙋкѝ пшени́чны вмѣшены въ е҆ле́ю ѻ҆внꙋ̀ е҆ді́номꙋ·

И҆ десѧти́нꙋ е҆ді́нꙋ мꙋкѝ пшени́чны вмѣшены въ е҆ле́ю, а҆́гньцꙋ е҆ді́номꙋ, на тре́бꙋ въ воню̀ бл҃гово́нїѧ·

Прино́съ же г҃ꙋ, възлїѧ́нїе и҆хъ по́лъ мѣ́ры и́нъ, да бꙋ́детъ телцꙋ̀ е҆ді́номꙋ.
а҆ тре́тїѧ ча́сть мѣ́ры и́нъ да бꙋ́дет̑ ѻ҆внꙋ̀ е҆ді́номꙋ·

А҆ четве́ртаѧ ча́сть мѣ́ры и́нъ, да бꙋ́детъ а҆́гньцꙋ е҆ді́номꙋ, ѿ вина̀ с̂е въ вс̂есъж꙽же́нїе, ѿ мцс̑҇а до мцс̑҇а въ мцс̑҇ы лѣта·

И҆ козе́лъ е҆ді́нъ ѿ ко́з꙽ грѣха̀ ра́ди, г҃ꙋ на вс̂есъж꙽же́нїе при́сное, да сотвори́те и҆ възлїа́нїе ег̑҇·

Въ мцс̑҇ъ же а҃, въ д҃і дн҃ь мцс̑҇а, па́сха г҃ꙋ·

И҆ въ е҃і дн҃ь мцс̑҇а сего, пра́здникъ.
з҃ дн҃їи ѻ҆прѣ́сноки да ꙗ҆́сте·

И҆ а҃ дн҃ь наро́читъ ст҃ъ да бꙋ́детъ вамъ.
всего дѣ́ла слꙋж́нѧ да не сътвори́те·

И҆ да принесе́те вс̂есъж꙽же́нїѧ прино́съ г҃ꙋ.
телца̀ ѿ воло́въ дв̂а, и҆ ѻ҆ве́нъ е҆ді́нъ.
и҆ а́гнецъ е҆дїнолѣтнихъ, з҃, непоро́чны да бꙋ́дꙋтъ вамъ·

И҆ тре́бы и҆хъ мꙋкѝ пшени́чны, вмѣшены въ е҆лею тр̂и десѧти́ны телцꙋ̀ е҆ді́номꙋ, а҆ дв̂ѣ десѧти́ны ѻ҆внꙋ̀ е҆ді́номꙋ, да сътвори́те·

десѧти́нꙋ десѧти́ны сътвори́ша а҆́гньцꙋ е҆ді́номꙋ, и҆ сед̑ми а҆́гньцемъ·

И҆ козла̀ е҆ді́наго ѿ коз̑ грѣха̀ ра́ди, ѻ҆цы́стити ѻ҆ вас̑҇·

Ра́звѣ вс̂есъж꙽же́нїѧ.
е҆же всегда̀ ес̑҇ ѹ҆́тренего, е҆же е҆сть тре́ба всегда́шнѧа, сътвори́те сїа·

По семꙋ̀ да сътвори́те дн҃ю.
за з҃ дн҃їи да́ръ вс̂есъж꙽же́нїа въ воню̀ бл҃гово́нїа г҃ꙋ, на вс̂есъж꙽же́нїе при́сное сътвори́ши възлїѧ́нїе е҆го·

И҆ дн҃ь же сед̑мы́и наро́читъ ст҃ъ да бꙋ́детъ вам꙽.
всего̀ дѣ́ла слꙋ́жнѧ да не сътвори́те во́нь·

И҆ дн҃ь новыхъ плод̑ недѣлныхъ е҆гда̀ принесе́те тре́бꙋ новꙋ г҃ꙋ, наро́читъ и҆ ст҃ъ да бꙋ́детъ вамъ, всего̀ дѣ́ла слꙋ́жнѧ да не сътвори́те·

И҆ да прино́сите вс̂ѧсъж꙽же́нїѧ въ воню̀ бл҃гово́нїѧ г҃ꙋ.
теле́цъ ѿ воло́въ дв̂а, ѻ҆ве́нъ е҆ді́нъ, а҆́гнецъ е҆дїнолѣтних̑ з҃ непоро́чны·

Тре́ба их̑ мꙋка̀ пшени́чна вмышена въ е҆ле́ю·

Тр̂и десѧти́ны телцꙋ̀ е҆ді́номꙋ.
а҆ дв̂ѣ десѧти́ны ѻ҆внꙋ̀ е҆ді́номꙋ·

А҆ десѧти́на десѧти́ны а҆́гньцꙋ е҆ді́номꙋ, и҆ сед̑ми а҆́гньцемъ·

И҆ козла̀ е҆ді́наго ѿ ко́зъ грѣха̀ ра́ди ѻ҆цы́стити ѻ҆ вас̑҇·

Ра́звѣ вс̂есъж꙽же́нїа новомѣ́сѧчнаго и҆ тре́ба их̑ и҆ вс̂есъж꙽же́нїе всегда́шнее и҆ жертвꙋ и҆хъ сътвори́те мн̂ѣ.
непоро́чны да бꙋ́дꙋтъ вамъ, и҆ въ и҆злїа́нїѧ и҆хъ·

Глв̑҇а, к҃ѳ·

И сед̑мо́мꙋ мцс̑҇ꙋ, а҃, дн҃ь мцс̑҇а наро́читъ, ст҃ъ да бꙋ́дет꙽ вамъ.
всего̀ дѣ́ла слꙋж́нѧ да не сътвори́те.
дн҃ь зна́менїю да бꙋ́детъ вамъ·

И҆ да сътвори́те вс̂есъж꙽же́нїѧ, въ воню̀ бл҃гово́нїѧ г҃ꙋ·

Теле́цъ ѿ волов̑҇ е҆ді́нъ, и҆ ѻ҆ве́нъ е҆ді́нъ, и҆ а́гнецъ е҆дїнолѣтнихъ, з҃, непоро́чны·

И҆ тре́бы и҆хъ, мꙋкѝ пшени́чны вмѣшены въ е҆ле́ю.
тр̂и десѧти́ны телцꙋ̀ е҆ді́номꙋ.
а҆ дв̂ѣ десѧти́ны ѻ҆внꙋ̀ е҆ді́номꙋ·

А҆ десѧти́на десѧти́ны а҆́гньцꙋ е҆ді́номꙋ.
и҆ сед̑ми а҆гньцем꙽·

И҆ козла̀ ѿ ко́зъ е҆ді́наго грѣха̀ ра́ди ѻ҆цы́стити ѻ҆ васъ·

Ра́звѣ всего̀съж꙽же́нїа.
новомѣ́сѧчнаго и҆ тре́бы их̑ и҆ възлїѧ́нїѧ и҆хъ·

И҆ вс̂есъж꙽же́нїе всегда́шнее.
и҆ тре́бы их̑ и҆ въз?їа́нїа их̑, по раз̑сꙋжде́нїю и҆хъ въ воню̀ бл҃гово́нїа г҃ꙋ·

И҆ десѧ́тыи дн҃ь мцс̑҇а сего̀ наро́чит̑ ст҃ъ да бꙋ́детъ вам̑.
и҆ да ѻ҆зло́бите дш҃а ваша, и҆ всего̀ дѣ́ла слꙋж́нѧ да не сътвори́те·

И҆ да принесе́те вс̂есъж꙽же́нїе въ воню̀ бл҃гово́нїа г҃ꙋ, прино́съ·

Теле́цъ е҆ді́нъ ѿ говѧ́дъ, и҆ ѻ҆ве́нъ е҆ді́н꙽, и҆ а́гнецъ е҆дїнолѣтних̑ з҃ непоро́чны, да бꙋ́детъ вамъ·

И҆ тре́ба и҆хъ мꙋкѝ пшени́чны.
вмѣшены въ е҆ле́ю, тр̂и десѧтины, телцꙋ̀ е҆ді́номꙋ, а҆ дв̂ѣ десѧтины ѻ҆внꙋ̀ е҆ді́номꙋ·

И҆ десѧтина десѧтины а҆́гньцꙋ е҆ді́номꙋ, и҆ з҃ ми, ѻ҆вномъ·

И҆ козла̀ е҆ді́наго ѿ козъ грѣха̀ ради ѻцыстити ѻ҆ вас̑҇·

Развѣ е҆же грѣха̀ ради ѻ҆цыщенїе, и҆ вс̂есъж꙽же́нїе всегдашнее, и҆ треба е҆ѧ и҆ възлїанїе еа̀, по раз̑сꙋженїю е҆а̀, въ воню̀ бл҃говонїа, приносъ г҃ꙋ·

И҆ е҃і дн҃ь, з҃ го, мцс̑҇а сего̀ нарочи́тъ ст҃ъ да бꙋдетъ вам̑.
всего̀ дѣ́ла слꙋжнѧ да не сътворите, и҆ празднꙋи́те вонь праздникъ гв҃и з҃ дн҃їи·

И҆ принесете вс̂есъж꙽женїѧ приносъ въ воню̀ бл҃говонїѧ г҃ꙋ·

Въ а҃, дн҃ь, телецъ ѿ говѧдъ, г҃і, и҆ ѻ҆вна̀ дв̂а.
а҆́гнецъ е҆дїнолѣтнихъ.
д҃і.
непорочни да бꙋдꙋтъ вамъ·

Тре́бы же и҆хъ мꙋкѝ пшеничны вмѣшены въ е҆лею.
тр̂и десѧтины телцꙋ̀ е҆ді́номꙋ, такоже и҆ г҃і, телцем̑·

И҆ дв̂ѣ десѧтины ѻ҆внꙋ̀ е҆ді́номꙋ також̑ и второмꙋ ѻ҆внꙋ·

И҆ десѧтина десѧтины а҆́гньцꙋ е҆ді́номꙋ такоже и҆ д҃і а҆гньцемъ.

И҆ козла̀ е҆дїнаго ѿ козъ грѣха̀ ради.
развѣ вс̂есъж꙽женїа всегдашнѧго.
тревы и҆хъ, и҆ възлїанїа и҆хъ·

И҆ въ дн҃ь вторыи теле́цъ в҃і, а҆ ѻ҆вна̀ в҃, а҆гнецъ е҆дїнолѣтнихъ д҃і, непоро́чных̑·

Тре́ба и҆хъ и҆ възлїа́нїа и҆хъ, телце́мъ и҆ ѻ҆вно́мъ, и҆ а́гньцемъ по числꙋ̀ их̑, по разсꙋжде́нїю и҆хъ·

И҆ козла̀ е҆ді́наго ѿ ко́зъ грѣха ра́ди·

Ра́звѣ вс̂есъж꙽же́нїѧ всегда́шнѧго, тре́бы их̑ и҆ възлїѧ́нїа и҆хъ·

И҆ въ дн҃ь г҃, теле́цъ а҃і, и҆ ѻ҆вна̀ дв̂а.
и҆ а́гнецъ е҆дїнолѣтнихъ, д҃і, непоро́чныхъ·

Тре́бы и҆хъ и҆ възлїа́нїа и҆хъ, телцем̑ и҆ ѻ҆вно́мъ, и҆ а́гньцемъ по числꙋ̀ и҆хъ по разсꙋжде́нїю и҆хъ·

И҆ козла̀ ѿ коз̑ е҆ді́наго грѣха̀ ра́ди, ра́звѣ вс̂есъж꙽же́нїѧ всегда́шнѧго.
тре́бы и҆хъ и҆ възлїѧ́нїѧ и҆хъ·

И҆ въ дн҃ь д҃, теле́цъ і҃. ѻ҆вна̀ дв̂а.
а҆́гнецъ е҆дїнолѣтнихъ д҃і, непоро́чных̑·

Тре́бы и҆хъ и҆ възлїѧ́нїѧ и҆хъ, телце́мъ и҆ ѻ҆вно́мъ.
и҆ а́гньцемъ по числꙋ̀ их̑.
и҆ по рас꙽сꙋжде́нїю и҆хъ·

И҆ козла̀ ѿ коз̑ е҆ді́наго грѣха̀ ради.
ра́звѣ вс̂есъж꙽же́нїа всегда́шнѧго.
тре́бы и҆хъ и҆ възлїѧ́нїѧ и҆хъ·

И҆ въ дн҃ь е҃, теле́цъ ѳ҃. ѻ҆вна̀ дв̂а, а҆́гнецъ е҆дїнолѣтних̑ д҃і, непоро́чныхъ·

Тре́бы и҆хъ и҆ възлїѧ́нїѧ и҆хъ, телце́мъ и҆ ѻвном̑.
и҆ а́гньцемъ по числꙋ̀ и҆хъ.
и҆ по рас꙽сꙋжде́нїю их̑·

И҆ козла̀ ѿ ко́зъ е҆ді́наго грѣха̀ ра́ди.
ра́звѣ вс̂есъж꙽же́нїа всегда́шнѧго.
тре́бы и҆хъ и҆ възлїа́нїа и҆хъ·

И҆ въ дн҃ь, ѕ҃. телецъ, и҃. и҆ ѻ҆вна̀ дв̂а.
а҆гнецъ е҆дїнолѣтних̑, д҃і.
непорочныхъ·

Требы и҆хъ и҆ възлїѧнїѧ и҆хъ.
телцемъ и҆ ѻ҆вном̑, и҆ а҆́гньцемъ.
по числꙋ̀ и҆хъ, и҆ по рас꙽сꙋжде́нїю и҆хъ·

И҆ козла ѿ коз̑ е҆ді́наго грѣха̀ ради.
развѣ вс̂есъж꙽женїа всегда́шнѧго, требы и҆хъ и҆ възлїѧнїа и҆хъ·

И҆ въ дн҃ь з҃, телецъ з҃. и҆ ѻ҆вна̀ дв̂а, а҆́гнецъ е҆дїнолѣтних̑ д҃і, непорочных̑·

Требы и҆хъ и҆ възлїанїа и҆хъ.
телцемъ и҆ ѻ҆вномъ и҆ агньцем̑, и҆ по числꙋ̀ и҆хъ.
и҆ по рассꙋжденїю их̑,<.>

И҆ козла̀ ѿ козъ е҆ді́наго грѣха̀ ради.
развѣ вс̂есъж꙽женїѧ всегдашнѧго.
требы и҆хъ и҆ възлїѧнїа и҆хъ·

И҆ въ дн҃ь и҃, и҆схо́дныи да бꙋдетъ вамъ, всего̀ дѣла слꙋжнѧ да не сътворите вонь.
и҆ да принесете въ вс̂есъж꙽женїе въ воню̀ бл҃говонїа г҃ꙋ, телецъ е҆ді́н꙽, ѻ҆венъ е҆ді́нъ, а҆́гнецъ е҆дїнолѣтних̑ з҃, непорочных̑·

Требы и҆хъ, и҆ възлїѧнїѧ и҆хъ, телцемъ, и҆ ѻ҆вном̑, и҆ а҆́гньцемъ, по числꙋ̀ и҆хъ и҆ по рас꙽сꙋжденїю их̑·

И҆ козла̀ ѿ козъ е҆ді́наго грѣха̀ ради.
развѣ вс̂есъж꙽же́нїа всегда́шнѧго.
тре́бы их̑, и҆ възлїа́нїа и҆хъ·

Сїа да сътвори́те г҃ꙋ, въ пра́здники ваша·

Развѣ ѻ҆бѣщанїи ваших̑, и҆ во́лныхъ вашихъ, и҆ вс̂есъж꙽женїи ва́шихъ.
и҆ требъ ваших̑, и҆ възлїанїи ваших̑, и҆ сп҃сеных̑ ваших꙽·

Глв̑҇а, л҃·

И гл҃а моѷсїи сн҃омъ і҆и҆л҃евым̑ по всемꙋ̀ е҆ли́ко заповѣ́да г҃ь моѷсїю.
и҆ гл҃а моѷсїи кн҃ѕем̑ племенъ сн҃овъ і҆и҆л҃евыхъ гл҃ѧ, с̂е слово е҆же повелѣ г҃ь·

Чл҃къ чл҃къ и҆же а҆́ще помо́лит̑сѧ ѻ҆бѣщанїем̑ г҃ꙋ.
и҆л̂и закленет̑сѧ клѧ́твою.
и҆л̂и наречетъ наро́комъ, ѻ҆ дш҃и свое́и, да не ѻ҆скверна́витъ словесѝ свое҆го, вс̂е е҆ли́ко и҆зрече́тъ и҆зъ ѹ҆́стъ е҆го, да сътворит̑·

А҆́ще ли помо́литсѧ жена̀ ѻ҆бѣщанїем̑ г҃ꙋ.
и҆ли наречет̑ наро́къ в домꙋ̀ ѿц҃а свое҆го въ ю҆́ности свое́и·

И҆ ѹ҆слы́шит̑ ѿц҃ъ е҆ѧ̀ ѻ҆бѣтъ еѧ̀ и҆ нарече́нїа еѧ̀, ꙗ҆́же нарекла̀ е҆сть на́ дш҃ꙋ свою.
и҆ помолъчи́тъ ѿц҃ъ е҆ѧ̀, и҆ да бꙋ́дꙋтъ вс̂ѧ моленїа е҆ѧ̀.
и҆ вс̂ѧ нареченїа еѧ̀, ꙗ҆́же нарекла̀ е҆сть на́ дш҃ꙋ свою, да пребꙋ́дꙋтъ е́й·

А҆́ще възбраненїем̑ възбрани́тъ е́й ѿц҃ъ е҆ѧ̀, во́нже дн҃ь ѹ҆слы́шитъ вс̂ѧ ѻ҆бѣты еѧ̀, и҆ нареченїа е҆ѧ̀, ꙗ҆́же нарекла̀ е҆сть на́ дш҃ꙋ свою.
и҆ не ста́нꙋтъ, и҆ г҃ь ѻ҆цы́ститъ ю҆̀ ꙗ҆́ко възбрани ѿц҃ъ е҆ѧ·

А҆́ще ли посѧ́гнет̑ за́ мꙋжь, т̂о ѻ҆бт̑ѣ еѧ̀ на не́и.
по ѿлꙋченїи ѿ ѹ҆́стъ еѧ̀, ꙗ҆́же нарекла̀ е҆сть на́ дш҃ꙋ свою·

И҆ ѹ҆слы́шит̑ мꙋж́ь е҆ѧ̀, и҆ помолчит̑ е́й.
во́ньже дн҃ь ѹ҆слы́шит̑, та́ко да стант̑ꙋ вс̂и ѻ҆бѣты е҆ѧ̀ и҆ нареченїа е҆ѧ̀ ꙗ҆́же нарекла̀ ес̑҇ на́ дш҃ꙋ свою да стант̑ꙋ·

А҆́ще л̂и възбраненїем̑ възбранит̑ мꙋжь еѧ̀.
во́ньже дн҃ь ѹ҆слы́шит꙽ вс̂ѧ ѻ҆бѣты еѧ̀, и҆ нареченїа еѧ̀ ꙗ҆́же нарекла̀ е҆сть на́ дш҃ꙋ свою да не пребꙋ́детъ, ꙗ҆́ко мꙋжь е҆ѧ̀ възбрани́тъ ѿ неѧ̀.
и҆ г҃ь ѻ҆цы́ститъ ю҆̀·

И҆ ѻ҆бѣтъ вдови́чь и҆ пꙋщени́ца.
е҆ли́ко а҆́ще ѻ҆беща́етъ на́ дш҃ꙋ свою да пребꙋ́детъ и҆мъ·

А҆́ще л̂и в домꙋ мꙋжа свое҆го, ѻ҆бѣтъ еѧ̀ и҆ наро́къ, и҆же на́ дш҃ꙋ еѧ̀ съ клѧтвою·

И҆ ѹ҆слы́шитъ мꙋжь еѧ̀, и҆ помолчит̑ е́й, не възбранитъ е́й.
да ста́нꙋтъ вс̂и ѻ҆бѣты е҆ѧ̀, и҆ вс̂ѧ нареченїа еѧ́, ꙗ҆́же нарекла̀ е҆сть на́ дш҃ꙋ свою̀ да ста́нꙋтъ е́й·

А҆́ще ли ѿлꙋча́ѧ ѿлꙋчит̑ мꙋжь еѧ̀, во́ньже дн҃ь ѹ҆слы́шитъ.
вс̂е е҆ли́ко а́ще и҆зошло̀ е҆сть, и҆зъ ѹ҆́стъ еѧ̀, по ѻ҆бѣтомъ еѧ̀, и҆ по нарече́нїемъ еѧ̀, е҆же на́ дш҃ꙋ еѧ̀, не пребꙋ́детъ е́й, мꙋжь б̂о еѧ̀ ѿлꙋчилъ е҆сть.
и҆ г҃ь ѻ҆цы́стит̑ е҆ѧ̀·

Всѧкъ ѻ҆бѣтъ и҆ всѧ́ка клѧ́тва соѹ҆́за заѕлит̑ дш҃и.
и҆ мꙋжь еѧ̀ ста́нетъ е́й, и҆ мꙋжь еѧ̀ ѿлꙋ́чит̑·

А҆́ще ли молча̀ помол̑҇чи́тъ е́й, ѿ дн҃е до дн҃е да ѻ҆ста́нꙋтъ е́й вс̂ѧ ѻ҆бѣти еѧ̀.
и҆ вс̂ѧ нареченїѧ ꙗ҆́же до неѧ̀, ста́нꙋтъ е́й, ꙗ҆́ко молча́лъ е́й е҆сть сїи дн҃ь во́нже слыша·

А҆́ще ли ѿлꙋча ѿлꙋчит̑ мꙋжь е҆ѧ̀, по́ дн҃и во́ньже слы́шалъ е҆сть, и҆ прїиметъ себѣ грѣхъ еѧ̀·

Сїи ѹ҆правленїа е҆ли́ко заповѣ́да г҃ь моѷсїю, междꙋ мꙋжем̑ и҆ междꙋ жено́ю̀ е҆го, и҆ междꙋ ѿцем̑ и҆ дще́рїю въ ю҆́ности е҆ѧ̀ в домꙋ ѿч҃и·

Глв̑҇а, л҃а·

И рече г҃ь къ моѷсїю гл҃ѧ, мстѝ ме́сть ѿ сн҃овъ і҆и҃лев̑҇, ѿ мадїани́товъ.
и҆ потом꙽ приложи́сѧ к лю́демъ своим̑·

И҆ рече моѷсїи къ лю́дем̑ гл҃ѧ.
въѻ҆рꙋжитесѧ на бра́нь, и҆ въполчи́тесѧ пред̑ гм҃ъ на мадїа́ма, ѡтда́ти ѿмще́нїе ѿ г҃а мадїа́мꙋ·

Ты́сꙋщꙋ ѿ племе́ни.
и҆ ты́сꙋща ѿ племе́ни, ѿ всѣхъ племе́нъ, сн҃овъ і҆и҆л҃евъ.
послите въполчи́тисѧ и҆ сочто́ша ѿ ты́сꙋщъ і҆и҆л҃евых.
тысꙋщꙋ ѿ племе́ни, и҆ бысть в҃і ты́сꙋщъ, въѻ҆рꙋженыхъ на бра́нь·

И҆ посла̀ ѧ҆̀ моѷсїи ты́сꙋщꙋ ѿ племе́ни, и҆ ты́сꙋща ѿ племени, съ си́лою и҆хъ.
и҆ фїнее҆съ сн҃ъ е҆лїаза́ровъ, сн҃а а҆а҆ро́нѧ жрецъ и҆ сосꙋ́ды ст҃ыа, и҆ трꙋ́бы зна́мен̑҇ныа, в рꙋкꙋ е҆го·

И҆ въполчи́шасѧ на мадїа҆ма.
ꙗ҆́коже повелѣ г҃ь моѷсїю, і҆ и҆зби́ша весь мꙋжескъ пол̑҇·

И҆ цр҃ѧ мадїа́млѧ и҆ ѹ҆би́ша въкꙋпѣ съ ꙗ҆́звеными их̑.
и҆ не́вина, и҆ рокома и҆ сѷръ.
и҆ ѹ҆ра, и҆ ревока, и҆ всѣхъ цр҃еи мадїа́млих̑.
и҆ валаа́ма сн҃а воѻ҆́рова ѹ҆биша ѻ҆рꙋжїем꙽ съ ꙗ҆́звеными их̑·

И҆ плениша жены мадїа́млѧ, і҆ и҆мѣнїа их̑ и҆ скоты и҆хъ и҆ вс̂ѧ притежа́нїа и҆хъ и҆ си́лꙋ и҆хъ плениша·

И҆ вс̂ѧ грады и҆хъ.
и҆же въ ѻ҆бита́нїи и҆хъ, и҆ дворы и҆хъ, пож꙽гоша ѻ҆гнем̑·

И҆ поа́ша ве́сь плѣнъ и҆хъ и҆ вс̂ѧ притѧжа́нїа и҆хъ, ѿ чл҃ка до ско́та·

И҆ приведо́ша до моѷсїа и҆ е҆лїаза́ра жерца̀, и҆ къ всѣмъ сн҃омъ і҆и҆л҃евым̑, плѣнъ и҆ кори́сти і҆ и҆мѣнїе и҆хъ въ по́лчище.
въ а҆раа҆воѳ̑҇ моа́вль и҆же е҆сть ѹ҆ і҆ѻрдана при е҆рихо́нѣ·

І҆ и҆зы́де моѷсїи і҆ е҆лїа҆за́ръ жрецъ, и҆ вс̂и кн҃ѕи со́нма проти́вꙋ и҆мъ, внѣ по́лчища·

И҆ раз̑гнѣвасѧ моѷсїи на строи́телѧ си́лы ты́сꙋщники и҆ сотники, пред̑и̑ по́лка ходѧща́ѧ·

И҆ рече им̑ моѷсїи въскꙋ́ю живи́сте же́нескъ полъ весь·

Тїи б̂о бы́ша сн҃омъ і҆и҆л҃евымъ, по словесѝ валаа́млю.
ѿстꙋпле́нїе и҆ презрѣнїе словꙋ гн҃ю.
вельфего́ра ради.
и҆ быс̑҇ вред̑ въ со́нмѣ гн҃и·

Нн҃ѣ же и҆збі́ите всѧ́къ мꙋжескъ по́лъ въ всемъ съвер̑҇шенїи.
и҆ всѧ́кꙋ женꙋ̀ и҆же позна̀ ло́же мꙋжеско побїи́те·

Всѧ́ко раз̑лꙋче́нїе же́н꙽ско.
а҆ ꙗ҆́же не зна́ет꙽ мꙋжеска полꙋ живи́те ю҆̀·

Вы́ же ста́ните вн̂ѣ по́лчища з҃ дн҃їи, всѧ́къ ѹ҆би́выи дш҃ꙋ и҆ присѧ́гїи ѹ҆бїе́номꙋ, да ѻ҆чистит̑сѧ, въ г҃ дн҃ь, и҆ въ дн҃ь сед̑мыи в̂ы и҆ плѣнъ вашъ·

И҆ вс̂ѧ ѻ҆дежда, и҆ всѧкъ сосꙋдъ ко́жанен̑҇, и҆ вс̂е съдѣланое ѿ козли́чины, и҆ всѧк̑҇ сосд̑ꙋ дре́вѧнъ да ѻ҆чи́стите·

И҆ рече е҆лїа҆за́ръ жрецъ, къ мꙋжем̑ си́лы, приходѧ́щимъ съ сѣча ра́тныѧ.
с̂е ѻ҆правле́нїе зако́на е҆же заповѣ́да г҃ь моѷсїю·

Развѣ сребра̀ и҆ зла́та, и҆ мѣди и҆ желѣза, и҆ коситера, и҆ ѻ́лова.
всѧ́ка вещь и҆же прои́дет̑ сквоѕѣ ѻ҆́гнь ѻ҆гнемъ и҆скꙋ́ситсѧ, н̂о вод̑ным̑ ѻ҆чищенїем̑ ѻ҆цы́ститсѧ·

И҆ вс̂е е҆же не прои́детъ сквоѕѣ ѻ҆́гнь, да прои́дет̑ сквоѕѣ водꙋ·

І҆ и҆спере́те ризы ваша̑ въ дн҃ь сед̑мыи и҆ да ѻ҆цы́ститсѧ, и҆ потом̑ да вни́детъ въ по́лчище·

И҆ рече г҃ь къ моѷсїю гл҃ѧ, возмѣте нача́токъ ѿ коры́сти плѣ́ннаго ѿ чл҃ка до скота̀.
т̂ы і҆ е҆лїа҆за́ръ жрец̑҇, и҆ кн҃ѕи племе́нъ со́нма·

И҆ да раздѣли́те коры́сти междꙋ во́ины ходи́вшими на сѣчь, и҆ междꙋ всѣмъ со́нмомъ·

И҆ да ѿлꙋчи́те да́нь г҃ꙋ, ѿ людїи воин̑҇ ходи́вшихъ на сѣчь.
е҆ді́нꙋ дш҃ꙋ, ѿ пѧть со́тъ чл҃къ а҆ ѿ скота̀, и҆ воловъ, ѿ ѻ҆ве́цъ и҆ ѿ ѻ҆слѧтъ·

И҆ ѿ полови́ны же и҆хъ да во́змете и҆ да дадите е҆лїаза́рꙋ жеръцꙋ̀.
да́нь г҃ꙋ·

И҆ ѿ полови́ны сн҃овъ і҆и҆л҃ев̑҇, да воз̑меши е҆ді́но ѿ, н҃, чл҃къ, и҆ ѿ волов̑҇, и҆ ѻ҆вец̑҇, и҆ ѿ ѻ҆слѧ́тъ, и҆ всего скота̀, даде ѧ҆̀ левѷтомъ, и҆же стрегꙋтъ страж̑бы̀ въ хра́мѣ гн҃и·

И҆ сътворѝ моѷсїи, і҆ е҆лїа́заръ жрецъ, ꙗ҆́коже повелѣ г҃ь моѷсїю·

И҆ бысть мно́жество полонꙋ̀, и҆же полони́ша мꙋжи вои́ньстїи ѿ ѻ҆вец̑҇, х҃ ѻ҃е ты́сѧщь·

Воло́в же, о҃в ты́сѧщи.
ѻ҆слов̑҇ же ѯ҃а ты́сѧща·

дш҃ъ же чл҃къ ѿ же́ньска по́лꙋ ѧж̑ не бѧ́ше прилѣпна мꙋжѣхъ, всх̑ѣ дш҃ъ, л҃в ты́сѧщи·

И҆ бысть половин꙽наѧ часть ходи́вшихъ на сѣ́чь.
ѿ числа̀ ѻ҆́вна, тл҃з ты́сѧщь, и҆ пѧть сот̑·

И҆ бы́сть да́нь г҃ꙋ ѿ ѻ҆ве́цъ, х҃о҃ и҆ е҃. и҆ воловъ, ҂л҃ и҆ ҂ѕ҃, да́нь же г҃ꙋ, о҃ и҆ в҃. и҆ ѻ҆словъ, ҂л҃ пѧть сот̑, да́нь же г҃ꙋ ѯ҃а.
дш҃ь же чл҃чь ҂ѕ҃і, да́нь же ѿ сих̑ г҃ꙋ л҃в дш҃и·

И҆ даде моѷсїи да́нь г҃ꙋ ѹ҆частїе б҃ꙋ, е҆лїа́зарꙋ жерцꙋ, ꙗ҆́кож̑ повелѣ г҃ꙋ моѷсїю·

ѿ половин꙽ же сн҃ов꙽ і҆и҆л҃евъ, е҆же раздѣли моѷсїи.
ѿ мꙋжеи вои́ских̑·

И҆ бысть половина ѿ со́нма, ѻ҆вецъ, ҂т҃ и҆ ҂л҃҂з҃ и҆ пѧть сот̑.
и҆ волов꙽ же ҂л҃҂ѕ҃. и҆ ѻ҆селъ ҂л҃ и҆ пѧть сот̑.
и҆ чл҃чихъ дш҃ъ ҂ѕ҃і·

И҆ поѧ̀ моѷсїи ѿ половинъ сн҃овъ і҆и҆л҃евъ е҆ді́нъ ѿ н҃ ѿ чл҃ка и҆ скота.
и҆ дасть ѧ҆̀ левѷтом̑, стрегꙋщим̑ стражбы̀ въ хра́мѣ гн҃и, ꙗ҆́коже повелѣ г҃ь моѷсїю·

И҆ прїидо́ша къ моѷсїю вс̂и поставле́нїи над̑ ты́сꙋщами си́лы.
и҆ сотницы си́лы·

И҆ реко́ша къ моѷсїю ѻ҆троцы твоѝ взѧша сочте́нїе ѿ мꙋжь вои́нских̑ и҆же сꙋть ѹ҆ нас̑҇, и҆ никтоже поги́бе ѿ них̑·

Се́ же принесо́хом̑ даръ г҃ꙋ.
е҆же кт̂о ѻ҆брѣлъ е҆сть сосд̑ꙋ зла́тъ, ѻ҆брꙋчи и҆ гривны, пр́ьстьни и҆ ѹ҆серѧ́зи и҆ чѣпи зла́ты, ѻ҆цы́стити ѻ҆ нас̑҇ пред̑ гм҃ь·

И҆ взѧ̀ моѷсїи і҆ е҆лїа́заръ, зла́то ѿ ни́хъ весь сосꙋдъ съдѣла́нъ·

И҆ быс̑҇ всего̀ злата, ѹ҆ча́стїе е҆же ѿлꙋчи́сѧ г҃ꙋ, ѕ҃і ты́сѧщь и҆ х҃ и҆ н҃, си́кль, ѿ тысѧщникъ и҆ ѿ со́тникъ.
мꙋжиж̑ во́истїи плѣни́ша ко́ждо себѣ·

И҆ вз̂ѧ моѷсїи і҆ е҆лїа́заръ жрецъ зла́то, ѿ ты́сѧщникъ, и҆ со́тникъ.
и҆ внесо́ша и҆̀ въ хра́мъ свѣдѣ́нїа, па́мѧть сн҃овъ і҆и҆л҃евъ пред̑ гм҃ь·

Глв̑҇а, л҃в·

И скота̀ мно́жество бѧше, сн҃омъ рꙋви́млимъ.
и҆ сн҃ом꙽ га́довом̑ мно́го ѕѣ́ло, и҆ ви́дѣша село̀, и҆а҆зи́рово, и҆ село̀ галаа́дово.
и҆ бѧ́ше мѣсто мѣ́сто, ско́тное·

И҆ прїидо́ша сн҃ове рꙋви́мли.
и҆ сн҃ове гадовы рекоша къ моѷсїю, и҆ къ е҆лїа́зарꙋ жерцꙋ̀.
и҆ къ кн҃ѕемъ со́нма гл҃юще·

А҆таро́ѳъ, и҆ дево́нъ, и҆ а҆зи́ръ, и҆ нам꙽мра̀ и҆ а҆сево́нъ, и҆ е҆леа́ли, и҆ сева́ма, и҆ навав̑҇, и҆ валїа́нъ·

Зе́млю ю҆́же преда́лъ ес̑҇ г҃ь пред̑ сн҃ы і҆и҆л҃евы.
землѧ̀ же скотопи́щна е҆сть, рабо́м же твоим̑ скот꙽ е҆сть·

И҆ гл҃ахꙋ а҆́ще е҆смы ѻ҆брѣли блгд̑ть пред̑ тобо́ю.
да да́сть намъ зе́млю т̂ꙋ рабо́мъ твоим̑, въ ѻ҆дръжа́нїе.
и҆ не преводѝ нас̑҇ чресъ і҆ѻ҆рдан̑҇·

И҆ рече моѷсїи сн҃омъ га́довомъ и҆ сн҃ом̑ рꙋви́млимъ.
бра́тїа ва́ша пои́дт̑ꙋ на сѣ́чь, и҆ вы̀ л̂и седи́те т̂ꙋ·

Въскꙋю развраща́ете срд̑це сн҃овъ і҆и҆л҃ев꙽ не преи҆тѝ на́ землю ю҆́же дае҆ть г҃ь им̑·

Не та́ко л̂и сътвори́ша ѿц҃ы ва́ши.
е҆гда̀ послах̑ ѧ҆̀ ѿ кади́са варни съглѧда́ти зе́млю·

И҆ възыйдо́ша до де́бри гризновїю, и҆ соглѧда́ша землю, и҆ ѿврати́ша срд̑це сн҃овъ і҆и҆л҃евъ, ꙗ҆́ко не внити въ землю̀ ю҆́же да́лъ е҆сть г҃ь и҆мъ·

И҆ разгнѣ́васѧ ꙗ҆́ростїю г҃ь въ дн҃ь ѻ҆нъ, и҆ клѧ́тсѧ гл҃ѧ.
а҆́ще ѹ҆́зрѧтъ чл҃цы сїи.
и҆зшедъше и҆зъ е҆гѷпта, ѿ к҃ лт̑ѣ, и҆ выш̑҇ше.
вѣдꙋщей добро̀ и҆ ѕло̀·

Землѧ̀ е҆ю́же клѧ́хсѧ, а҆враа́мꙋ, і҆ и҆саа́кꙋ, і҆ и҆а́ковꙋ.
не въслѣ́доваша б̂о въ слд̑ѣ менѐ.
ра́звѣ хале́въ сн҃ъ и҆е҆ѳо́нинъ, ѿлꙋче́ныи.
і҆ и҆сꙋсъ сн҃ъ навѷнъ, ꙗ҆́ко въслѣ́доваша въ слд̑ѣ г҃а·

И҆ раз̑гнѣвасѧ ꙗ҆́ростїю г҃ь на і҆и҃лѧ.
и҆ потомѝ ѧ҆̀ въ пꙋсты́ни, м҃ лѣтъ, до́ндеже потреби́сѧ вс̂е роже́нїе творѧще ѕло̀ пред̑ гм҃ъ·

Се̂ въста́сте въ мѣсто ѿц҃ъ свои҆хъ съгрѣше́нїе чл҃къ ѕлых̑, приложи́ти е҆щѐ.
къ ꙗ҆́рости гнѣ́ва гн҃ѧ на і҆и҆л҃ѧ·

Ꙗ҆́ко ѿврати́те ѿ нег̑҇ приложити е҆щѐ.
ѻ҆ста́вити е҆го въ пꙋсты́ни, и҆ събезако́нꙋете въ всем꙽ со́нмѣ се́мъ·

И҆ пришед̑ше к немꙋ̀ и҆ гл҃аша, ѻ҆гра́ды ѻ҆вцам̑ да соградим̑ зд̂ѣ скотом̑ свои҆мъ.
и҆ ѻ҆гра́ды и҆мѣнїемъ на́шим̑.
а҆ м̂ы въѻ҆рꙋже́ни пои́дем̑ на страж̑бꙋ прьвїи, сн҃омъ і҆и҆л҃евымъ.
до́ндеже въведе́мъ ѧ҆̀ в мѣсто их̑.
и҆ да вселѧт̑сѧ и҆мѣнїа на́ша въ гра́ды ѹ҆твержены насе́лник̑҇ рад̑и̑ землѧ́·

И҆ не ѻ҆братим̑сѧ въ до́мы наша дондеже раздѣлѧт̑сѧ сн҃ове і҆и҆л҃ьтестїи.
кождо въ прича́стїе свое·

Мы ѹ҆бо да не причатим̑сѧ в ни́хъ, ѻ҆бонꙋ стра́нꙋ і҆ѻрда́на.
и҆ да́леи, ꙗ҆́ко прїа́хомъ прича́стїе на́ше сїю странꙋ̀ і҆ѻ҆рда́на на восто́ки·

И҆ рече к нимъ моѷсїи.
а҆́ще сътвори́те по словесѝ семꙋ̀.
а҆́ще въѻ҆рꙋжи́тесѧ пред̑ гм҃ъ на́ брань·

И҆ пре́идет̑ всѧ́къ ѻ҆рꙋж́никъ вашъ і҆ѻ҆рда́нъ, пред̑ гм҃ъ, на сѣчь.
до́ндеже потребит̑сѧ враг̑҇ е҆го.
ѿ лица̀ е҆го·

И҆ съѻ҆бладает̑ земле́ю пред̑ гм҃ъ.
и҆ по се́мъ ѻ҆братите́сѧ, и҆ бꙋ́дете безъ вины̀, предъ гм҃ъ, и҆ ѿ і҆и҆л҃ѧ.
и҆ бꙋ́детъ землѧ̀ всѧ̀ с̂и вамъ, въ ѻ҆дръжа́нїе предъ гм҃ъ·

А҆́ще ли не сътвори́те тако, съгрѣши́те пред̑ гм҃ь.
и҆ ѹ҆вѣсте грх̑ѣ свои е҆гда̀ в̂ы пости́гнетъ ѕл̂о, да съградите в̂ы себѣ̀ ѻ҆гра́ды и҆мѣнїю ва́шемꙋ.
и҆ ѻ҆гра́ды ското́мъ вашим̑, и҆звѣщенїе и҆зъ ѹ҆́стъ ва́шихъ да сътвори́те·

И҆ реко́ша сн҃ове рꙋви́мли и҆ сн҃ове га́довы къ моѷсїю гл҃юще, рабѝ твоѝ сътворѧ́тъ ꙗ҆́ко г҃ь на́шъ повелѣлъ е҆сть·

И҆мѣнїе наше и҆ же́ны наша.
и҆ весь ско́тъ на́шъ, да бꙋ́дꙋтъ въ гра́дѣхъ галаа́довыхъ·

и҆ раби́ же твоѝ минꙋт́ъ вс̂и въ ѻ҆рꙋж́їи, и҆ ѹ҆гото́вани пред̑ гм҃ь на́ бран̑҇.
ꙗ҆́коже гл҃етъ г҃ь·

И҆ приста́ви им̑ моѷсїи, е҆лїаза́ра жерца̀, і҆ и҆сꙋ́са навѷна.
и҆ кн҃ѕѧ ѿч҃ьствъ племе́ни сн҃ов꙽ і҆и҆л҃евъ·

И҆ рече к ним̑ моѷсїи, а҆́ще ли пре́идꙋтъ сн҃ове рꙋви́мли и҆ сн҃ове га́довы.
с ва́ми чресъ і҆ѻ҆рда́нъ и҆ всѧ́к꙽ въѻ҆рꙋжен̑҇ на́ брань пред̑ гм҃ъ, и҆ съѻ҆блада́ете земле́ю пред̑ собо́ю.
тогда̀ дадите им̑ зе́млю галаа́довꙋ.
въ ѻ҆дръжа́нїе·

А҆́ще л̂и не преидт̑ꙋ въѻ҆рꙋже́ни с ва́ми на́ брань пред̑ гм҃ъ да препꙋ́стите и҆мѣнїе и҆хъ.
и҆ же́ны и҆хъ, и҆ ско́ты и҆хъ.
прежде васъ на землю̀ ханаа́ню.
и҆ да причастѧт̑сѧ с вами на землѝ ханаа́ни·

И҆ ѿвѣща́ша же сн҃ове рꙋви́мли и҆ сн҃ове га́довы гл҃ще, е҆ли́ко гл҃етъ г҃ь рабомъ свои҆мъ та́ко сътворим̑ м̂ы, пре́идемъ въѻ҆рꙋжени пред̑ гм҃ъ.
в землю ханаа́ню.
и҆ дастѐ нам̑ въ ѻ҆дръжа́нїе странꙋ сїю і҆ѻ҆рда́на·

И҆ дастъ им̑ моѷсїи сн҃омъ га́довомъ.
и҆ сн҃омъ рꙋви́млемъ.
и҆ полꙋ племе́ни манасїинꙋ, сн҃овъ і҆ѻ҆сифль, црс̑҇тво сїѻ́на цр҃ѧ а҆м꙽мореи́ска и҆ црс̑҇тво ѻ҆гово, цр҃ѧ васа́нѧ, зем̑лю и҆ грады.
и҆ съ предѣлы е҆ѧ̀.
и҆ гра́ды ѻ҆крс̑҇тъныѧ землѧ̀·

И҆ съгради́ша сн҃ове га́довы, даво́ѳъ, и҆ а҆староѳ̑҇, и҆ а҆ро́иръ, и҆ съфа́нъ, и҆ а҆зи́ръ и҆ възнесоша и҆хъ, и҆ на а҆мъвра́ма, и҆ веѳара́на грады тве́рды, и҆ ѻ҆грады ѻ҆вцам꙽·

Сн҃ове же рꙋви́мли, съгради́ша е҆сево́на и҆ е҆леа́ли, и҆ каа҆риѳе́ма и҆ наво́на, и҆ вее҆льмеѻ́на ѻ҆градиша ѻ҆крс̑҇тъ, и҆ севама·

И҆ прозваша по и҆менемъ своим̑, и҆мена градом꙽ ꙗ҆́же съградиша·

И҆ шед̑ ѹ҆́ръ сн҃ъ махи́ров̑҇, внꙋкъ манасїевъ въ галаа́дъ, и҆ взѧ̀ е҆го и҆ погꙋбѝ ам꙽море́ѧ живꙋщаго в немъ·

И҆ дастъ моѷсїи галаа́дъ махи́рꙋ, сн҃ꙋ манасїинꙋ и҆ в꙽сели́сѧ т̂ꙋ·

И҆ а҆е́ръ сн҃ъ манасїевъ, и҆́де и҆ прїѧ̀ се́ла и҆хъ, и҆ прозваша ѧ҆̀ се́ла и҆а҆е́рова·

И҆ нава́нъ шед̑ прїѧ̀ канаѳа, и҆ се́ла е҆го, и҆менова̀ ѧ҆̀ наванъ ѿ и҆мени свое҆го·

Глв̑҇а, л҃г·

Сїи станове сн҃овъ і҆и҆л҃въ.
ꙗ҆́же и҆зыдо́ша и҆з꙽ землѧ̀ е҆гѷпет꙽скїѧ, съ си́лою их̑.
рꙋко́ю моѷсїѻ҆вою, і҆ а҆а҆ро́нею·

И҆ въписа̀ моѷсїи въздвиженїѧ и҆хъ.
и҆ ста́нове и҆хъ, по словесѝ гн҃ю·

Сїи же ста́нове ше́ствїѧ пꙋтѝ и҆хъ·

И҆ въздвиго́шасѧ ѿ раме́с꙽сы.
въ мцс̑҇ъ, а҃. въ е҃і.
дн҃ь, а҃. мцс̑҇а, наѹ҆́трїѧ па́схи и҆зыдо́ша сн҃ове і҆и҆л҃ьтестїѝ, рꙋко́ю высо́кою пред̑ всѣми е҆гѷптѧны·

Є҆гѷптѧне же погрѣба́хꙋ ѹ҆ме́ршаѧ ѿ ни́хъ вс̂ѧ, ꙗ҆́же и҆збѝ г҃ь весь первене́цъ в землѝ е҆гѷпет꙽стѣи, и҆ въ бо́ѕѣхъ и҆хъ, сътворѝ ѿмще́нїе г҃ь.

И҆ въздви́гше же сѧ сн҃ове і҆и҆л҃ви ѿ раме́с꙽сы, въполчи́шасѧ въ сохо́ѳѣ·

И҆ въздвиго́шасѧ ѿ сохо́ѳа въполчи́шасѧ въ вꙋѳа́нѣ, и҆же е҆сть ча́сть нѣ́каѧ пꙋсты́нѧ·

И҆ въздвиго́шасѧ ѿ вꙋѳа́на.
и҆ въполчи́шасѧ въ ѹ҆́стїи ро́ѳи, и҆же е҆сть прѧ́мо вее҆льсеѳ̑҇фо́нꙋ·

И҆ въполчи́шасѧ прѧ́мо магда́дꙋ·

И҆ въздвиго́шасѧ прѧ́мо хиро́ѳꙋ, и҆ прои҆до́ша средѝ морѧ въ пꙋсты́ню.
і҆ и҆до́ша пꙋтем̑ тр̂и дн҃и, въ пꙋсты́ни то́и и҆ въполчи́шасѧ въ го́ркостехъ·

И҆ въздвиго́шасѧ ѿ го́ркости, и҆ прїидо́ша въ е҆ли́мъ.
въ е҆ли́мѣ же бѣ́ста. в҃і, и҆сто́чника. во́дъ. и҆ о҃, ѿр́асли фи́никъ, и҆ въполчи́шасѧ ѹ҆ воды̀ та́мо·

И въздви́гшесѧ ѿ еле́ма, въполчи́шасѧ ѹ мо́рѧ чр́ьмнаго·

И҆ въздвиго́шасѧ ѿ мо́рѧ чр́ьмнаго.
и҆ въполчи́шасѧ въ пꙋсты́ни си́нъ·

И҆ воз̑двиг̑҇шесѧ ѿ пꙋсты́ни си́нъ, и҆ въполчи́шасѧ въ рафа́ка·

И въздви́гшесѧ ѿ рафа́ка, и҆ въполчи́шасѧ въ е҆лꙋ́сѣ и҆ въздви́гшесѧ ѿ е҆лꙋ́са.
и҆ въполчи́шасѧ въ рафиди́нѣ, и҆ не бысть там̑ воды̀ лю́демъ пи́ти·

И҆ въздви́гъшесѧ ѿ рафиди́на.
и҆ въполчи́шасѧ въ пꙋсты́ни си́нъ·

И҆ въздви́гшесѧ ѿ пꙋсты́ни си́н꙽, въполчи́шасѧ въ гро́бѣхъ похотѣ́нїѧ·

И въз꙽двиг̑҇шесѧ ѿ гроб̑҇ похотѣнїѧ, и҆ въпол꙽чи́шасѧ въ а҆сиро́ѳѣ·

И҆ въздвиг̑҇шесѧ ѿ а҆сиро́ѳа, и҆ въполчи́шасѧ въ раѳа́мѣ·

И҆ въздви́гшесѧ ѿ раѳа́ма и҆ въполчи́шасѧ въ ревонъ фаре́са·

И҆ въздвиго́шасѧ ѿ ревонъ фаре́са, въполчи́шасѧ в лем꙽во́нѣ·

И҆ възъдви́гшесѧ ѿ лем꙽во́на.
въпол̑҇чи́шасѧ въ рес꙽са́нѣ·

И҆ въздвиго́шасѧ ѿ рес꙽са́на.
въполчи́шасѧ в макело́ѳѣ·

И҆ въздви́гнꙋлисѧ ѿ макело́ѳа, въполчи́лисѧ въ а҆ръсафа́ѳъ·

И҆ възъдвиго́шасѧ ѿ а҆ръсафа́ѳъ горы̀ , и҆ въполчи́шасѧ въ харада́ѳе·

И҆ възъдви́гнꙋшасѧ ѿ харада́ѳа, и҆ въполъчи́шасѧ въ македо́ѳѣ·

И въздви́гнꙋша ѿ македо́ѳа, и҆ въполчи́шасѧ въ катаа́ѳѣ·

И҆ вѣздви́гшесѧ ѿ катаа́ѳа.
и҆ въплчи́шасѧ въ ѳара́ѳе·

И҆ въздви́гшесѧ ѿ ра́ѳа , и҆ въполчи́шасѧ въ маѳѣ́кꙋ·

И҆ въздви́гшесѧ ѿ маѳе́ка.
и҆ въполчи́шасѧ въ а҆селъмо́нѣ·

И҆ въздви́гшесѧ ѿ а҆селмо́на и҆ въполчи́шасѧ въ масꙋро́ѳѣ·

И҆ въздви́гошасѧ ѿ масꙋро́ѳа, и҆ въполчи́шасѧ въ нака́не·

И҆ въздви́гошасѧ ѿ ванака́на, и҆ въполчи́шасѧ в горѣ̀ гад̑да́дове·

И҆ въздви́гшеж̑сѧ ѿ горы̀ гад̑да́довы, и҆ въполчи́шасѧ въ е҆тева́ѳе·

И҆ въздвиго́шасѧ ѿ е҆тева́ѳа и҆ въполчи́шасѧ въ е҆м꙽рво́нѣ·

И҆ въздви́гшесѧ ѿ е҆м꙽рво́на, и҆ въполчи́шасѧ въ геѳъсїѻ́нѣ гаве́ръ·

И҆ въздви́гше же сѧ ѿ геѳъсїѻ́нъ гавера, и҆ въполчи́шасѧ въ пꙋсты́ни си́нъ·

И҆ въздви́гшесѧ ѿ пꙋсты́ни си́нъ, и҆ въполчи́шасѧ въ пꙋсты́ни фаранѣ и҆же е҆сть кадис̑҇·

И҆ въздвиго́шасѧ ѿ кади́са, и҆ въполчи́шасѧ въ горѣ̀ ѻ҆́рѣ близꙋ землѝ е҆до́мли·

И҆ възы́де а҆а҆ро́нъ жре́цъ на горꙋ̀ ѻ҆́ръ, повелѣнїемъ гн҃имъ, и҆ ѹ҆́мре т̂ꙋ, въ м҃, лѣтъ, и҆зшед̑ствїѧ сн҃овъ і҆и҆л҃въ, и҆з꙽ землѧ̀ е҆гѷпет꙽ски, мцс̑҇а е҃ го, въ а҃ дн҃ь, мцс̑҇а·

А҆а҆рон̑҇ же бѧ́ше р҃, к҃, г҃, лѣтъ.
е҆гда̀ ѹ҆́мре въ горѣ̀ ѻ҆́рѣ·

И҆ ѹ҆слы́шавъ хананей цр҃ь а҆родо́въ, сїи же живѧ́ше в землѝ ханаа́нѣ.
е҆гда̀ вхожда́хꙋ сн҃ове і҆и҆л҃вы·

И҆ въздви́гшесѧ ѿ горы̀ ѻ҆́ры.
и҆ въполчи́шасѧ в селмо́нѣ·

Въздви́гше же сѧ ѿ селмо́на, и҆ въпол̑҇чи́шасѧ въ фино́нѣ·

И҆ въздвиг̑҇шеж̑сѧ ѿ фино́на, и҆ въполчи́шасѧ въ ѻ҆воѳѣ·

И҆ въздви́гше же сѧ ѿ воѻ҆во́ѳа.
и҆ въполчи́шасѧ въ га́и ѻ҆б о́нꙋ странꙋ̀ предѣ́лъ моа́вль·

И҆ възъдви́гше же сѧ ѿ га́иѧ, и҆ въполчи́шасѧ въ дево́нѣ га́дъ·

И҆ въздви́гшесѧ ѿ девона га́да.
въполчи́шасѧ въ гелмо́нѣ девлаѳе́мъ·

И҆ въздви́г꙽шесѧ ѿ гелмо́на девлаѳе́ма, и въполчишасѧ в гора́хъ а҆варимлѧхъ прѧ́мо нава́вꙋ·

И въздвигшесѧ ѿ горы̀ а҆вари́млѧ.
и въполчи́шасѧ на за́пади моа́вли ѹ҆ і҆ѻ҆рда́на прї е҆рихо́нѣ·

И҆ воз̑двиго́шасѧ ѿ за́пада моа́влѧ, и въпол̑҇чишасѧ ѹ҆ і҆ѻр̑҇да́на межꙋ симо́фом̑ до вел̑҇саѳи́ма на за́пады моа́ва<.>

И҆ гл҃а г҃ь къ моѷсїю въ за́падѣ моа́ва, ѹ҆ і҆ѻ҆рда́на.
при е҆рихо́нѣ рекїи·

Гл҃и сн҃омъ і҆и҆л҃евымъ и҆ рече́ши к ни́мъ.
в̂ы прехо́дите і҆ѻ҆рда́нъ, въ зе́млю ханаа́ню·

И҆ да погꙋ́бите вс̂ѧ живꙋщаѧ на землѝ ѿ лица̀ ва́шего.
и҆ раздрꙋши́те стражбы̀ их̑.
и҆ вс̂ѧ и҆́долы и҆злїа́ныѧ и҆зва́ѧнїѧ и҆х꙽ погꙋбите ѧ҆̀.
и҆ вс̂ѧ ка́пища их̑ разрꙋши́те, и҆ погꙋби́те вс̂ѧ живꙋщаѧ на землѝ·

И҆ всели́тесѧ в н̂ю, ва́мъ б̂о да́лъ е҆сми зе́млю и҆хъ, ѻ҆́крс̑҇тъ по жре́бїю ѻ҆быи́мете зе́млю и҆хъ въ ѻ҆держа́нїе, по племе́немъ вашимъ.
мно́гимъ ѹ҆мно́жите ѻ҆держа́нїе и҆хъ, и҆ ма́лым̑ ѹ҆ма́лите ѻ҆держа́нїе ихъ.
в не́иже и҆зы́детъ жре́бїи е҆го, та́мо да бꙋдетъ е҆го, по племе́немъ ѿч҃ьствїи ва́шихъ
причасти́те·

А҆́ще л̂и не погꙋ́бите живꙋщ́ихъ на землѝ ѿ лица̀ ва́шего.
и҆ бꙋ́детъ ꙗ҆́же ѻ҆ста́вите ѻ҆ нихъ, ѻ҆стъни въ ѻ҆́чїю ва́шею.
и҆ ꙗ҆́звы въ ре́брахъ ва́шихъ.
и҆ съвраждꙋ́ютъ вамъ на землѝ на не́и же всели́тесѧ·

И҆ бꙋ́детъ ꙗ҆́коже помы́слихъ сътвори́ти ѻ҆нѣ́мъ, т̂о сътворю̀ ва́мъ·

Глв̑҇а, л҃д·

И рече г҃ь къ моѷсїю гл҃ѧ.
заповѣж́дь сн҃омъ і҆и҆л҃евым̑, и҆ рече́ши къ ни́мъ·

Вы̂ вхо́дите въ зе́млю ханаа́ню.
и҆ сїѧ же бꙋ́детъ вамъ, въ причаще́нїе землѧ̀ ханаа́нѧ.
съ предѣ́лы е҆ѧ̀·

И҆ да бꙋ́детъ вамъ ѹ҆́го́лъ.
ꙗ҆же ѿ лива́на ѿ пꙋсты́ни си́нъ даже до е҆до́ма.
и҆ да бꙋ́дꙋтъ вам̑ прѣдѣ́лы да́же до лива́на.
ѿ кра́ѧ мо́рѧ слн҃чнаго ѿ въсто́къ·

И҆ да ѻ҆бы́идꙋтъ вас̑҇ прѣдѣ́лы.
ѿ лива́на до въше́ствїѧ и҆кро́винѧ, и҆ да про́идетъ до е҆на́къ, и҆ да бꙋ́детъ хо́дъ и҆схо́дъ е҆го на лива́нъ, кадис꙽ варїи·

И҆ да и҆зы́детъ на село̀ а҆раа́дово.
и҆ да про́идетъ до селмо́на, и҆ да ѻ҆бы́идетъ прѣдѣ́лы ѿ селмо́на, водоте́чь е҆гѷпетскꙋ.
и҆ да бꙋ́детъ и҆сход̑ мо́ре вели́кое·

И҆ предѣ́лы мо́рстїи да бꙋдꙋтъ вам̑.
мо́ре вели́кое да ѹ҆лꙋчит̑.
с̂е да бꙋ́детъ вам̑ прѣдѣ́лъ мо́рскїи·

И҆ с̂е да бꙋ́детъ вам̑ предѣ́лъ к сѣверꙋ ѿ мо́рѧ вели́каго.
и҆змѣ́рите сами себѣ ѿ горы̀, горо́ю·

И҆змѣ́рите са́ми себѣ.
въходѧ́щеи въ е҆ма́ѳъ, и҆ да бꙋдꙋтъ прехо́дъ е҆го предѣ́лы а҆сада́да.
и҆ да и́дꙋтъ прѣдѣ́лы зье҆фро́на·

И҆ да бꙋ́детъ и҆схо́дъ е҆го а҆р꙽сена́инъ, с̂е да бꙋ́дꙋтъ предѣ́лы ѿ сѣ́вера·

И҆змѣ́рите же са́ми себѣ и҆ прѣдѣ́лы въсто́чныа.
ѿ а҆рсенаи́на до сепфа́ма.
и҆ да сни́дꙋтъ прѣдѣ́лы ѿ сепфа́м аръвила ѿ въсто́къ на и҆сто́чники.
и҆ да сни́дꙋтъ прѣдѣ́лы ви́лы, и҆ да про́идꙋтъ на́ море хенере́ѳъ, ѿ въсто́къ·

И҆ да сни́дꙋтъ предѣ́лы на і҆ѻ҆рда́нъ.
и҆ да бꙋ́детъ предѣ́лъ е҆го море сланое.
т̂а бꙋ́дет꙽ землѧ̀ вам̑.
и҆ предѣ́лы е҆ѧ̀ ѻ҆́крс̑҇тъ·

И҆ заповѣ́да моѷсїи сн҃омъ і҆и҆л҃евымъ гл҃ѧ, с̂и землѧ̀ ю҆́же прїимете съ причаще́нїемъ по жре́бїю.
ꙗ҆́коже повелѣ г҃ь, да́ти е҆ѧ̀.
девѧтѝ племен̑҇.
и҆ полꙋ̀ племе́ни манасїи́нꙋ·

Ꙗ҆́коже взѧ́ша племѧ̀ сн҃въ рꙋви́мль, и҆ племѧ̀ сн҃овъ га́довъ.
по домом̑ ѿч҃ьствъ и҆хъ.
и҆ по́лъ племе́ни манасїи́на, взѧ́ша прича́стїа своѧ·

дв̂ѣ племе́ни и҆ по́лъ племе́ни прїѧ́ша прича́стїѧ своѧ ѹ҆ і҆ѻ҆рда́на, при е҆рихо́нѣ ѿ полꙋ̀дн҃ѧ на въсто́ки·

И҆ рече г҃ь къ моѷсїю гл҃ѧ, с̂и и҆мена̀ мꙋжь и҆же раздели́ти вамъ землю̀.
е҆лиа҆за́ръ жре́цъ и҆сꙋсъ на́вѵнъ·

И҆ кн҃ѕѧ е҆ді́наго ѿ племе́ни да по́имете разделити ва́мъ зе́млю·

Сїи же и҆мена̀ мꙋже́мъ племе́ни і҆ю́дина.
хале́въ сн҃ъ и҆гефѳо́нинъ·

И҆ племе́ни симеѻ́нѧ, саламїи́ль сн҃ъ семиѹ҆́довъ·

И҆ племе́ни венїами́нѧ, е҆льда́съ сн҃ъ хасъло́новъ·

И҆ племе́ни да́нова кн҃ѕь въкеро́вь, сн҃ъ е҆кли́нинъ·

И҆ сн҃овъ и҆ѻ́сифль, племе́ни сн҃овъ манасїи́нь.
кн҃ѕь а҆нїи҆ль, сн҃ъ сꙋфи́довъ·

И҆ племе́ни сн҃овъ е҆фрѣ́мль.
кн҃ѕь камꙋ́иль, сн҃ъ сафта́новъ·

И҆ племе́ни заѹ҆ло́нѧ кн҃ѕь е҆лисафа́нъ сн҃ъ харъна́ховъ·

И҆ племе́ни сн҃въ и҆сахаровъ, кн҃ѕь фан꙽тїи́ль, сн҃ъ ѻ҆заи҆нь·

И҆ племе́ни сн҃овъ а҆сри́въ, кн҃ѕь а҆хиѻ́ръ сн҃ъ селемїи·

И҆ племе́ни сн҃овъ неѳали́мль.
кн҃ѕь фадїил̑҇, сн҃ъ и҆а҆миѹ҆́довъ·

Сїи и҆мже заповѣ́да г҃ь.
пречасти́ти сн҃ом̑ и҆і҆л҃евым̑.
въ землѝ хана́ани·

Глв̑҇а, л҃е·

И рече г҃ь къ моѷсїю на за́пади моа́ва, ѹ҆ і҆ѻ҆рдана при е҆рихо́не гл҃ѧ·

Заповѣждь сн҃омъ і҆и҆л҃евымъ.
и҆ дадѧт̑ левѷтом̑ ѿ прича́стїа ѻ҆дръжа́нїа и҆х꙽.
гра́ды всели́тесѧ, и҆ хлѣвины.
града ѻ҆крс̑҇тъ и҆хъ дадѧ́тъ левѷтомъ·

да бꙋ́дꙋтъ гради и҆хъ вселѧ́тисѧ, и҆ ѹ҆ча́стїа и҆хъ да бꙋдꙋтъ ско́томъ их̑, и҆ всемꙋ̀ четвероно́жномꙋ и҆хъ·

И҆ ѻ҆бдержа́нїе градов̑҇ и҆хже да́сте левѷтомъ ѿ стены̀ града вн̂ѣ, дв̂ѣ ты́сѧщи лакот̑ ѻ҆́крс̑҇т꙽·

И҆ да и҆змѣ́риши странꙋ вн̂ѣ гра́да, ꙗ҆́же на восто́къ.
двою̀ ты́сѧщꙋ лакот꙽·

И҆ страна̀ и҆же къ сѣ́верꙋ двою̀ ты́сѧщꙋ лако́тъ·

И҆ страна̀ ꙗ҆́же къ мо́рю двою̀ ты́сѧщꙋ ла́котъ·

И҆ страна̀ ꙗ҆́же ко за́падꙋ двою̀ ты́сѧщꙋ ла́котъ·

И҆ гра́ды же посредѣ сего̀ да бꙋ́дꙋтъ вамъ, и҆ съдръжа́нїа гра́довъ·

И҆ грады ꙗ҆же да́сте левѷтом̑ ѕ҃, град̑ да бꙋ́дꙋтъ ѹ҆бѣжных̑.
и҆же да́сте бѣ́гати в н̂ѧ ѹ҆би́вшимъ.
и҆ къ сим̑ же, м҃ и҆ в҃, грады·

Всѣ́хъ гра́довъ и҆хже да́сте левѷтом̑ м҃ и҆ и҃ градов̑҇.
и҆ хлѣви́ны их̑·

Сїа же и҆ гра́ды их̑же да́сте им̑, ѿ ѻ҆дрьжа́нїа сн҃овъ і҆и҃лев̑҇ ѿ многихъ мно́го, ѿ ма́лыхъ ма́ло.
ко́ждо по прича́стїю свое҆мꙋ, е҆же пречастѧтъ, да дадѧ́тъ ѿ грд̑а левѷтомъ·

И҆ рече г҃ь къ моѷсїю гл҃ѧ.
гл҃и сн҃омъ і҆и҃левымъ рекїи къ ним̑.
в̂ы минꙋ́ете і҆ѻ҆рда́нъ въ зе́млю ханаа́ню.
и҆ разлꙋчи́те са́ми себѣ̀ грады и҆ ѹ҆бѣженїа да бꙋ́дꙋтъ ва́мъ.
ѹ҆бѣжати в н̂ѧ ѹ҆бо́иникꙋ, всѧк̑҇ ѹ҆би́вый дш҃ю не хотѧ̀·

И҆ да бꙋдꙋтъ вамъ гра́ди ѹ҆бѣжа́нїа, ѿ сердобо́лныѧ крови.
да не ѹ҆́мретъ ѹ҆би́выи.
дон꙽деже ста́нет пред̑ сонмом꙽ на сꙋдѣ.

И҆ гра́ды ꙗ҆́же да́сте, ѕ҃, град̑ ѹ҆бѣж꙽ныхъ да бꙋ́дꙋтъ вам̑.
г҃, гра́ды, дасте ѻ҆бо́нꙋ странꙋ̀ і҆ѻ҆рда́на.

И҆ тр̂и грады да́сте въ землѝ ханаа́ни, ѹ҆бѣ́жище да бꙋ́дет̑·

Сн҃омъ і҆и҆л҃евым̑ и҆ прише́лцꙋ, и҆ ѻ҆бита́лникꙋ, и҆же въ ва́съ.
да бꙋ́дꙋтъ гра́ди сїй въ ѹ҆бѣжа́нїе ѹ҆бѣга́ти та́мо всѧ́комꙋ, ѹ҆бива́ющемꙋ дш҃ꙋ нехотѣ́нїемъ, а҆́ще ли сосꙋ́домъ желѣзным̑ ѹ҆бїет꙽ и҆̀ и҆ ѹ҆́мрет̑.
ѹ҆бі́ица е҆сть, смр҃тїю да ѹ҆́мретъ ѹ҆бі́ица·

А҆́ще ли ка́менемъ и҆з рꙋкѝ, ѹ҆бїетъ и҆̀, и҆ е҆же ѹ҆́мрети ѿ него, и҆ ѹ́мретъ, ѹ́бїица е҆сть, смр҃тїю да ѹ҆́мрет̑ ѹ҆бїйца·

А҆́ще ли сосꙋ́домъ дре́вѧнымъ, и҆з рꙋкѝ е҆гоже ради ѹ҆́мрети, и҆ тѣмъ ѹ҆бїетъ и҆̀ и҆ ѹ҆́мрет̑, ѹ҆бі́ица е҆сть, смр҃тїю да ѹ҆́мретъ ѹ҆бі́ица·

Ѹ҆́жикъ крови тоѧ̀ да ѹ҆бі́етъ ѹ҆би́вшаго, е҆гда̀ ѹ҆срѧ́щетъ и҆̀ тогда̀ ѹ҆бїетъ и҆̀·

А҆́ще вражды̀ ради вр́ьжетъ на́нь, всѧ́къ сосꙋ́дъ с хи́тростїю и҆ ѹ́мретъ·

И҆л̂и съ гнѣ́вомъ ѹ҆би́лъ и҆̀ рꙋко́ю и҆ ѹ́мретъ, смр҃тїю да ѹ҆́мретъ ѹ҆би́выи, ѹ҆бі́ица б̂о е҆сть.
смр҃тїю да ѹ҆́мрет̑ ѹ҆би́ваѧ и҆̀·

Ѹ҆́жикъ крови, да ѹ҆бїетъ, ѹ҆бїйцꙋ, е҆гда̀ стрѣтитсѧ с ним̑·

А҆́ще л̂и внеза́пꙋ и҆ не вражды̀ ради, вр́ьжет̑ на́нь всѧкъ сосд̑ꙋ, и҆ не съ вра́ждо́ю·

И҆л̂и всѧ́кимъ ка́мыкомъ и҆мже вр́ьжетъ невѣ́дыи и҆ па́детъ на него и҆ ѹ́мрет꙽, сїи же врагъ е҆го не бѣ̀, ни́же хотѧ́и ѕла̀ е҆мꙋ твори́ти·

И҆ да сꙋдит̑ соньмъ междꙋ̀ ѹ҆би́вшимъ, и҆ межи ѹ҆́жикою кро́ви, по раз̑сꙋдженїю ѻ҆́номꙋ·

да и҆зба́витъ со́ньмъ ѹ҆би́вшаго и҆̀, ѿ ѹ҆́жика кро́ви.
и҆ да ѹ҆ста́вит̑ со́ньм꙽ въ градѣ ѹ҆бѣжнем̑ во́ньже ѹ҆бѣжит̑, да живетъ т̂ꙋ.
до́ндеже ѹ҆́мретъ жре́цъ вели́кїи·

е҆гоже пома́заша е҆ле́ѻмъ ст҃ымъ·

А҆́ще л̂и и҆сходомъ и҆зы́идет̑ ѹ҆би́выи, вн̂ѣ предѣлъ гра́да во́ньже ѹ҆вѣглъ та́мо, и҆ ѻ҆брѧ́щетъ и҆̀ ѹ҆́жика кро́ви, вн̂ѣ предѣлъ гра́да ѹ҆бѣжав̑҇шаго е҆мꙋ, ѹ҆бїетъ ѹ҆́жикъ кро́ви.
ѹ҆бившаго, нѣсть повин̀енъ·

Въ гра́де б̂о ѹ҆бѣжа́нїа да живе́тъ, до́ндеже ѹ҆́мретъ жре́цъ вели́кїи·

По ѹ҆мр҃твїи жерца̀ вели́каго да с̂ѧ ѻ҆брати́тъ ѹ҆би́выи, въ зе́млю ѻ҆дръжа́нїа свое҆го·

И҆ да бꙋ́детъ с̂е вамъ въ ѻ҆правле́нїе сꙋда, в роже́нїа ва́ша, въ всх̑ѣ селе́нїихъ ва́ших̑·

Всѧ́каго ѹ҆би́вшаго дш҃ꙋ, сꙋдїа по словесе́мъ пред̑ по́слꙋховъ да ѹ҆бїетъ ѹ҆би́вшаг̑҇.
по́слꙋх же е҆ді́нъ да не послꙋшествꙋет̑ на́ смр҃ть дш҃и·

И҆ да не во́змете и҆скꙋ́па на дш҃и, ѿ ѹ҆би́вшаго.
повин̑҇нꙋ сꙋщꙋ е҆мꙋ ѹ҆бїенїю смр҃тїю ѹ҆бо да ѹ҆́мретъ·

И҆ да не во́змете и҆скꙋпа, за́ дꙋшꙋ ѿ ѹ҆би́вшаго ви́ннаго сꙋща́го на ѹ҆бїенїе, смр҃тїю б̂о да ѹ҆́мретъ·

И҆ да не во́зметъ и҆скꙋ́па, на ѹ҆бѣже́нїе во́ грд̑а ѹ҆бѣженїа, да па́ки живе́тъ на землѝ, до́ндеже ѹ҆́мретъ жре́цъ вели́кїи·

И҆ да не поги́бнет̑ землѧ̀ ѹ҆бїе́нїемъ на не́иже в̂ы ѻ҆бита́ете.
кро́вь б̂о сїа побїет꙽ зе́млю, и҆ не ѻ҆чи́ститсѧ землѧ̀ ѿ кро́ви пролїа́нныѧ на не́и, толи́ко ѿ кро́ви пролива́ющаго·

да не ѻ҆сквръни́те землѧ̀, на не́иже живе́те.
на не́иже а҆́зъ вселѧ́юсѧ посредѣ вас̑҇, а҆́зъ б̂о е҆смь г҃ь, вселѧ́аисѧ средѣ сн҃овъ і҆и҆л҃евъ·

Глв̑҇а, л҃ѕ·

И прїидо́ша кн҃ѕи ѿч҃ьствъ, сн҃ъ галаа́довых̑, сн҃а махи́рова, сн҃а манасі́ина, ѿ племе́ни сн҃овъ і҆ѻ́сифль.
и҆ гл҃аша прд̑е моѷсїѻ҆мъ и҆ прд̑е е҆лїа́за́ромъ жерцем̑, и҆ пред̑ кн҃ѕи домо́въ ѿч҃ьства, сн҃овъ і҆и҆ле вых̑·

И҆ реко́ша г҃ꙋ на́шемꙋ, повелѣ̀ г҃ь ѿда́ти зе́млю, прича́стїа по жре́бии и҆ сн҃омъ і҆и҆л҃евымъ.
и҆ г҃ꙋ на́шемꙋ заповѣ́да г҃ь.
да́ти прича́стїе, са́лпаа҆да бра́та на́шего дще́ремъ е҆го·

И҆ бꙋдт̑ꙋ л̂и е҆ді́номꙋ, ѿ племени сн҃овъ і҆и҆л҃ев꙽ и҆на́го племе́ни в꙽ же́ны, и҆ ѿлꙋчит̑сѧ прича́стїе и҆хъ, ѿ ѻ҆дрьжа́нїа ѿцъ на́ших̑.
и҆ приложи́тсѧ къ прича́стїю племе́ни, и҆мже бꙋдт̑ꙋ в꙽ жены̀, и҆ ѿ жребїа причастїа на́шего ѿлꙋчит̑сѧ·

А҆́ще бꙋ́дꙋт꙽ ѹ҆ ѿꙗ҆́тїе сн҃овъ і҆и҆л҃евъ, и҆ приложит̑сѧ прича́стїе их̑, къ прича́стїю племе́не.
и҆мже а҆́ще бꙋдꙋт꙽ в꙽ жены.
и҆ ѿ прича́стїа племе́ни ѿч҃ьства ва́шего, ѿлꙋчат̑сѧ прича́стїа и҆хъ·

И҆ заповѣ́да моѷсїи сн҃омъ і҆и҆л҃евым̑ по повелѣ́нїю гн҃ю гл҃ѧ, си́це племе́ни сн҃омъ і҆ѻ҆сифлем̑ гл҃ющи и҆́стин꙽но·

Се̂ слово е҆же заповѣ́да г҃ь дще́рем̑ сал꙽паа́довым̑ гл҃ющи, и҆дѣже а҆́ще го́дѣ им̑ да бꙋдт̑ꙋ въ жены, ра́звѣ ѿ сон̑҇ма ѿч҃ьства свое҆го да бꙋдт̑ꙋ въ же́ны·

И҆ да не и҆зменитсѧ прича́стїе сн҃овъ і҆и҆л҃евъ, ѿ племе́не въ племѧ̀ и҆́но·

Ꙗ҆́ко ко́ждо въ прича́стїи племе́ни ѿч҃ьства своег̑҇.
да сѧ же́нѧт̑ сн҃ове і҆и҆л҃еви·

И҆ всѧ́ка дщѝ ѹ҆́жика сꙋщи дръжа́ще прича́стїе ѿ племе́ни сн҃овъ і҆и҆л҃евъ.
е҆ді́номꙋ ѿ со́ньма ѿч҃ества е҆ѧ̀ да бꙋдет̑ жена̀, да ѹ҆жичествꙋю҆тъ сн҃ове і҆и҆л҃еви, ко́ждо прича́стїе ѿц҃а своег̑҇·

И҆ да не и҆зменит̑сѧ прича́стїе ѿ племе́ни, въ племѧ̀ и҆́но.
н̂о ко́ждо въ прича́щенїе свое да сѧ пое҆млют̑ сн҃ове і҆и҆л҃еви, ꙗ҆́коже повелѣ г҃ь моѷсїю, та́ко сътвори́ша дще́ри сал꙽паа́довы·

И҆ бы́ша маа҆ла, и҆ ферса и҆ е́гла, и҆ мел̑҇ха, и҆ нꙋѧ̀, дще́ри сал꙽паа́довы, бра́тиим̑ сн҃ом̑ ѿ со́нма манасїи́на, сн҃овъ і҆ѻ́сифль быша же́ны, и҆ бысть прича́стїе и҆хъ в꙽ племе́ни со́нма ѿц҃а их̑·

Сїи за́повѣди и҆ ѻ҆правле́нїа и҆ сꙋды̀.
ꙗ҆́же заповѣ́да г҃ь рꙋко́ю моѷсїевою, на за́пади моа́ва, на і҆ѻ҆рда́нѣ ѹ҆ е҆рихо́на·

Коне́цъ, четве́ртымъ кни́гам̑ моѷсїѻ́вым̑.

И҆́мать в себѣ̀ глв̑҇а, л҃ѕ·