Библия (1581). [05] Второзаконие

ПѦТЫИ КНИ́ГИ МОИСЇЄВЫ ВТОРЫИ ЗАКон̑҇

Глв̑҇а, а҃·

Сїи словеса̀ и҆хже гл҃а моѷсїи всемꙋ̀ і҆и҆л҃ю, ѻ҆́бонꙋ странꙋ̀ і҆ѻ҆рда́на.
въ пꙋсты́ни на за́пады, близ̑ чрьмна́го мо́рѧ междꙋ̀ фара́номъ и҆ тофо́ломъ, и҆ лово́номъ и҆ а҆вло́номъ, и҆ злат̑никомъ·

Є҆ді́нъна́десѧть дн҃їи ѿ хори́ва пꙋть до горы̀ сеи́ра.
да́ждь до кадисва́рни·

И҆ бысть въ м҃ е лѣто, въ а҃і мцс̑҇ъ.
въ а҃ дн҃ь мцс̑҇а.
гл҃а моѷсїи къ всм̑ѣ сн҃омъ і҆и҆л҃евым̑, по всемꙋ̀ е҆ли́ко заповѣда е҆мꙋ г҃ь к ним̑·

По ѹ҆бїе́нїи сїѻ́на цр҃ѧ а҆м꙽морре́иска, жи́вшаго въ а҆сево́не.
і҆ и҆ѻ́га цр҃ѧ васа́ньска, жи́вшаго въ а҆старо́ѳѣ, и҆ во е҆драѝ·

Ѡ҆бо́нꙋ же странꙋ̀ і҆ѻ҆рда́на въ землѝ моа҆вли, нача̀ моѷсїи проповѣ́дати зако́нъ сїи гл҃ѧ·

Гь҃ б҃ъ на́шъ гл҃а на́мъ въ хори́вѣ гл҃ѧ, довлѣе҆тъ вам̑ жи́ти въ горѣ се́й·

Ѡ҆брати́тесѧ, и҆ въздви́гнетесѧ в̂ы, и҆ внїидѣте въ горꙋ а҆м꙽морре́искꙋ.
и҆ къ всѣмъ насе́лником꙽, а҆ра́вы въ горꙋ̀ и҆ полѧ́нꙋ, и҆ на восто́къ, дꙋбра́вы, и҆ подо́лгъ мо́рѧ землѝ ханаан̑҇ски.
и҆ сꙋпроти́вꙋ дꙋбрави до рѣкѝ вели́кїѧ е҆в꙽фра́тѣ·

И҆ с̂е предах̑ пред̑ ва́ми зе́млю вшед̑ше ѻ҆дрьжите ю҆̀, е҆ю́же клѧ́хсѧ ѿц҃емъ ва́шимъ, а҆враа́мꙋ, і҆саа́кꙋ, і҆а́ковꙋ, да́ти ю҆̀ и҆м꙽ и҆ сѣмени их̑ по них̑·

И҆ реко́хъ къ вам̑ во́ времѧ ѻ҆́но гл҃ѧ.
не могꙋ̀ а҆́зъ е҆ді́нъ води́ти вас̑҇·

Гь҃ б҃ъ ва́шъ ѹ҆мно́жилъ вас̑҇ и҆ с̂е е҆стѐ днес̑҇, ꙗ҆ко ѕвѣ́зды нбс̑҇ныа мно́жеством̑·

Гь҃ б҃ъ ѿц҃ъ ва́шихъ приложѝ ва́мъ, ꙗ҆́ко е҆стѐ ты́сꙋща кра́тъ ѹ҆мно́жени и҆ блс̑҇ви васъ, ꙗ҆́коже гл҃алъ е҆сть вам̑·

Ка́ко могꙋ̀ самъ носи́ти трꙋды̀ ваша, и҆ тѧ́жести ваша и҆ прѧ̀ ваша, и҆збери́те себѣ мꙋжа мꙋ́дры и҆ ѹ҆мѣтелѧ и҆ смы́слены, въ племе́нехъ ваших̑.
и҆ да поста́влю и҆хъ над̑ ва́ми стрѣ́ишины ва́мъ·

И҆ ѿвѣща́сте ми и҆ реко́сте добро̀ сло́во е҆же гл҃алъ е҆си сътвори́ти·

И҆ поѧх̑ ѿ вас̑҇ мꙋжи мꙋ́дры, и҆ ѹ҆мѣтелны и҆ смыслены.
и҆ поста́вихъ и҆хъ владѣти над̑ вами ты́сꙋщники, и҆ со́тники и҆ пѧтьдесѧ́тники, и҆ десѧтники, и҆ кни́гочїа, сꙋдїа́мъ вашим̑·

И҆ заповѣ́дахъ сꙋдїа́мъ вашим꙽ в т̂о вре́мѧ гл҃ѧ раз̑сꙋжда́ите междꙋ бра́тїею своѐю, и҆ сꙋди́те по пра́вдѣ межѝ мꙋжемъ и҆ ме́ждꙋ бра́томъ е҆го, и҆ междꙋ прише́лцемъ·

Не зри́те лица̀ въ сꙋдѣ̀, по ма́лꙋ и҆ по вели́кꙋ сꙋ́диши не сꙋмнѧ́сѧ лица̀ чл҃ча сꙋдъ б̂о бж҃їи е҆сть·

с̂и рѣчь и҆же а҆́ще жестока бꙋдетъ ѹ҆ васъ, принеси́те до менѐ и҆ да слы́шꙋ ю҆̀·

И҆ заповѣ́дахъ ва́мъ въ вре́мѧ ѻ҆́но вс̂ѧ словеса̀ ꙗ҆́же сътвори́те·

И҆ воздви́гшесѧ ѿ хори́ва прои҆до́хом̑ вс̂ю пꙋсты́ню вели́кꙋю, и҆ стра́шнꙋю ѻ҆́нꙋ, ю҆́же ви́дѣсте.
въ пꙋтѝ горы̀ а҆м꙽морре́иски, ꙗ҆́ко заповѣда на́мъ г҃ь б҃ъ на́шъ, и҆ прїидохо́м꙽ до кадисва́рнїи·

И҆ реко́хъ вам̑, прїидѣте до горы̀ а҆м꙽морре́иски, ꙗ҆́же г҃ь б҃ъ нашъ да́етъ вам̑ ви́дите, предал̑҇ е҆сть г҃ь б҃ъ вашъ, пред̑ лице́мъ вашим̑ зе́млю, вше́дше прїимѣте.
ꙗ҆коже гл҃а г҃ь б҃ъ ѿц҃ъ ва́шихъ и҆ вамъ, не бо́итесѧ н̂и ѹ҆жаса́итесѧ·

И҆ прїидосте къ мнѣ вс̂и и҆ рекосте м̂и.
да по́слемъ мꙋжа пред̑ на́ми да соглѧдѧт̑ зе́млю.
и҆ повѣ́дѧтъ н̂ы ѿвѣтъ и҆ пꙋть и҆мже дои́демъ еѧ̀, и҆ гра́ды в нѧ́же н̂ы е҆сть вни́ти·

И҆ ѹ҆год̑но бысть слово с̂е предо мно́ю.
и҆ поѧ́хъ ѿ вас̑҇, в҃і, мꙋжа.
мꙋжа е҆ді́наго ѿ кое҆гождо племе́ни·

И҆ ѻ҆братившесѧ възы́доша на́ горꙋ, и҆ прїидоша до бе́ри грезно́вныа, и҆ соглѧда́ша ю҆̀·

И҆ взѧ́ша в рꙋцѣ своѝ ѿ плода̀ землѝ, и҆ принесо́ша к нам̑.
и҆ гл҃ахꙋ бл҃га́ѧ землѧ̀ ю҆́же вда́етъ г҃ь б҃ъ нам̑·

И҆ не въсхотѣ́сте внити, ни́же послꙋшасте гл҃ъ г҃а б҃а ва́шего·

И҆ възропта́сте в кꙋщахъ свои҆хъ и҆ реко́сте, ненави́сти ради и҆зведѐ н̂ы г҃ь и҆з землѧ̀ е҆гѷпетскїа, преда́ти насъ в рꙋцѣ а҆м꙽море́истѣ, потреби́ти нас̑҇·

Ка́мо м̂ы възы́дем꙽, братїѧ же наша ѿврати́ша срд̑ца наша гл҃юще.
ꙗ҆́зык̑҇ мно́гъ и҆ крѣпча́иши насъ, и҆ гра́ди вели́цѣ ѹ҆твръжд̑ены до нб҃си.
н̂о и҆ сн҃ы гига́нътовы ви́дѣхом̑ та́мо.
и҆ гл҃ахъ къ вам̑ не ѹ҆жаса́итесѧ и҆ не бо́итесѧ ѿ них꙽·

Гь҃ б҃ъ на́шъ пред̑ходѧ́и пред̑ лицемъ ва́шимъ то́й повою́етъ и҆хъ с ва́ми, по всемꙋ̀ е҆ли́ко сътворѝ ва́мъ, въ землѝ е҆гѷпетъстѣи пред̑ ѻ҆́чима ва́шима·

И҆ въ пꙋсты́ни се́й ю҆́же ви́дѣсте ꙗ҆́ко въспита̀ тебѐ г҃ь б҃ъ тво́и, ꙗ҆́коже нѣ́кїи чл҃къ питает̑ сн҃а свое҆го, по всемꙋ̀ пꙋтѝ во́ньже ходи́сте.
дон꙽деже прїидо́сте до мѣста сего̀, н̂о въ словесѝ се́мъ не вѣ́ровасте гв҃и б҃ꙋ ва́шемꙋ.
и҆же пред̑ходитъ пред̑ ва́ми въ пꙋть, и҆збра́ти вамъ мѣсто.
водѧ̀ васъ ѻ҆гне́мъ но́щїю, показа́ѧ вам̑ пꙋть и҆́мже и҆тѝ по немъ.
и҆ ѻ́блакомъ дн҃їю·

И҆ ѹ҆слы́ша г҃ь б҃ъ глас̑҇ словесъ ва́ших̑.
и҆ разгнѣ́васѧ и҆ клѧ́тсѧ гл҃ѧ·

А҆́ще ѹ҆́зритъ кт̂о ѿ мꙋжъ си́хъ зе́млю бл҃гꙋю сїю.
е҆ю́же а҆зъ клѧхсѧ ѿц҃ем̑ и҆хъ.
развѣ хале́ва сн҃а е҆фѳо́нина сїи ѹ҆́зритъ ю҆̀.
семꙋ же дам̑ зе́млю на нюже востꙋпи́лъ е҆сть, и҆ сн҃омъ е҆го, понеже прилежат̑ гв҃и·

И҆ на́ мѧ раз̑гнѣ́васѧ г҃ь вас̑҇ ра́ди рекїи, ни́же т̂ы вни́деши та́мо·

Но̂ і҆сꙋсъ сн҃ъ навѷнъ и҆же стои́тъ пред̑ тобо́ю, сїи вни́детъ та́мо в н̂ю, сего̀ ѹ҆крѣпѝ ꙗ҆́ко сїи прича́стит̑ ю҆̀ і҆и҆л҃ю·

И҆ ѻ҆троча́та ва́ши и҆хже гл҃асте въ плене́нїи бꙋ́дꙋтъ, и҆ всѧ́ко ѻ҆троча мла́до е҆же не вѣсть днес̑҇ добра̀ и҆ ѕла̀, сїи вни́дт̑ꙋ та́мо, и҆ си́мъ дамъ ю҆̀ и҆ сїи причастѧ́тъ ю҆̀·

Вы́ же ѻ҆брати́вшисѧ въполъчи́стесѧ въ пꙋсты́ню пꙋтем̑ къ чермно́мꙋ мо́рю·

И҆ гл҃асте ре́кꙋще къ мн̂ѣ съгрѣши́хомъ, пред̑ гм҃ъ бм҃ъ на́шимъ м̂ы.
шед̑ше да сѧ сѣче́мъ, по всемꙋ̀ е҆ли́ко заповѣ́да г҃ь б҃ъ на́шъ нам̑·

И҆ въземъ ко́ждо сосд̑ꙋ сво́и ра́тныи, и҆ собра́вшесѧ в꙽зыидо́сте на горꙋ̀·

И҆ рече г҃ь къ мн̂ѣ рцы̀ им̑ да не выхо́дѧтъ ни́же секꙋтсѧ, нѣсмь б̂о с ни́ми.
и҆ да не пробѣгнꙋтъ прд̑е врагѝ ва́шими·

И҆ гл҃ахъ къ вам̑ не послꙋш́асте менѐ, и҆ престꙋпи́сте слово гн҃е.
и҆ възнꙋди́вшесѧ възыидо́сте на горꙋ̀·

И҆ сшед̑ а҆м꙽морѣи живы́и на горѣ̀ то́й проти́вꙋ ва́мъ, и҆ прогна̀ в̂ы ꙗ҆́ко пчелам꙽ творѧ́тъ, і҆ и҆зби́ша в̂ы ѿ сеи́ра до е́рмы, тогда̀ възврати́стесѧ·

И҆ сѣдше пла́касте пред̑ гм҃ъ и҆ не послꙋша г҃ь гла́са ва́шего, и҆ не внѧт̑ ва́мъ·

И҆ сѣдѣсте в кади́си дн҃и мно́ги е҆ли́ко дн҃їи тогда̀ сѣдѣ́сте·

Глв̑҇а, в҃·

И възврати́вшесѧ въздвиго́хомсѧ въ пꙋсты́ню пꙋть морѧ чермна́го, ꙗ҆́коже гл҃а г҃ь ко мнѣ̀.
и҆ ѻ҆быходихом꙽ го́рꙋ, сеи́ръ, дн҃и многи.

И҆ рече г҃ь ко мнѣ, довлѣ́етъ вам̑ ѻ҆бъхожда́ти го́рꙋ сїю, возврати́стесѧ ѹ҆бо къ сѣ́верꙋ·

И҆ лю́демъ заповѣждь гл҃ѧ, в̂ы прои́дѣте по предѣлом̑ бра́тїа вашеѧ сн҃овъ и҆са́вовыхъ живꙋщихъ въ сеи́рѣ.
и҆ ѹ҆боѧ́тсѧ вас̑҇, ѹ҆жа́снꙋтсѧ ѕѣло·

Не сътвори́те с ними ра́ти, не да́хъ б̂о вамъ ѿ землѧ̀ и҆хъ, ниже стопы̀ ногѝ, ꙗ҆ко въ прича́стїе да́хъ сн҃омъ і҆са́вовым̑ го́рꙋ сеи́ръ·

Сребро́мъ пи́щꙋ кꙋпи́те себѣ ѹ҆ ни́хъ и҆ ꙗ҆ди́те, во́дꙋ въ мѣрꙋ во́змете ѿ нихъ, на ценѣ да пїете·

Гь҃ б̂о б҃ъ твои блс̑҇вилъ е҆сть тебѐ въ всем̑ дѣ́ло рꙋкꙋ твое҆ю.
разꙋмѣи ка́ко прои́де пꙋсты́ню вели́кꙋю и҆ стра́шнꙋю сїю.
с̂е м҃, лѣтъ г҃ь б҃ъ твои с тобо́ю, и҆ не просѝ словесѝ·

И҆ минꙋ́хомъ бра́тїю свою̀ сн҃ы і҆са́влѧ, живꙋщ́аѧ в сеи́рѣ ѹ҆ пꙋтѝ а҆рад̑скаго ѿ е҆ло́на, и҆ ѿ гасїѻ́на гаве́ра, и҆ възврати́вшесѧ преидо́хомъ пꙋть въ пꙋсты́ню моа́влю·

И҆ рече г҃ь къ мнѣ̀, не совраждꙋ́итесѧ моа́витомъ, и҆ не сътвори́те с ними ра́ти, не дахъ б̂о ва́мъ ѿ землѧ̀ их̑ въ прича́стїе, сн҃омъ б̂о ло́товомъ да́лъ е҆смь а҆рои́ръ причасти́ти·

И҆ ѻ҆ми́ны б̂о пре́жд̑е сѣдѧ́хꙋ в не́и и҆ чадь вели́ка и҆ мно́га и҆ крѣпка, ꙗ҆коже и҆ е҆наки́нъ рафа́инъ, гл҃ютсѧ и҆ сїи, ꙗ҆́коже е҆наки́ни и҆ моа҆ви́тѣ прозывают̑ ѧ҆̀ и҆ ѻ҆ми́ны·

И҆ въ сеи́рѣ сѣдѧ́ше хорѣ́и прежде.
н̂о сн҃ове і҆са́вовы, потреби́ша ѧ҆̀, і҆ и҆скорени́ша ѧ҆̀, ѿ лица̀ и҆ всели́шасѧ въ и́хъ мѣ́ста.
и҆м꙽же ѻ҆́бразомъ сътворѝ і҆и҆л҃ь на землѝ прича́стїа е҆го, ꙗ҆же далъ е҆сть г҃ь и҆мъ·

Нн҃ѣ ѹ҆бо в̂ы въста́ните и҆ въздви́гнитесѧ, и҆ про́идете де́брь заре́фовꙋ·

И҆ ни ꙗ҆́же ѿи҆до́хом꙽ ѿ кадис ва́рнїи до́ндеже преи҆до́хомъ де́брь заре́фовꙋ, л҃ и҆ и҃, лѣт꙽.
до́н꙽деже падѐ вс̂е рожде́нїе мꙋжь во́иских̑ ѿ по́лка.
ꙗ҆́коже клѧ́тсѧ и҆мъ г҃ь·

И҆ рꙋка̀ бж҃їа бѧ́ше на ни́хъ, погꙋби́ти ѧ҆̀ ѿ пол̑҇ка.
до́ндеже падо́ша·

И҆ бысть вънегда̀ падо́ша вс̂и мꙋжи во́истїи ѹ҆мира́юще ѿ средѝ людїи·

И҆ рече г҃ь къ мнѣ̀ гл҃ѧ.
т̂ы преи́деши дне́сь же предѣ́лы моа́влими, и҆ а҆рои́ровыми·

Пришед̑ше бли̑ сн҃овъ а҆м꙽ма́новыхъ не съвраждꙋ́итесѧ им̑, и҆ не сътвори́те с ними ра́ти, не дам̑ б̂о тебѐ ѿ землѧ̀ сн҃овъ а҆м꙽моновых꙽ во прича́стїе.
ꙗ҆́ко сн҃омъ ло́товымъ дах̑ во прича́стїе·

Землѧ̀ рафаи́нъска и҆менꙋетсѧ.
рафаи҆́ны б̂о на не́и прежде жи́вѧхꙋ, а҆мони́тѧне же прозыва́ютъ и҆хъ зоми́нъ.
ꙗ҆зы́къ велик̑҇ мно́гъ и҆ крѣпок꙽.
ꙗ҆коже и҆ е҆наки́мы, и҆ погꙋбѝ ѧ҆̀ г҃ь ѿ лица̀ и҆хъ, и҆ прїа́ша прича́стїа и҆ всели́шасѧ въ и҆хъ мѣсто, и҆ до сего̀ дн҃ѧ·

Ꙗ҆́коже сътворѝ сн҃омъ і҆са́вовым̑ живꙋщим̑ в сеи́рѣ.
им̑же ѻ҆бразом̑ потреби́ша хоре́ѧ ѿ лица̀ своег̑҇.
и҆ причасти́шасѧ в них̑ и҆ вселишасѧ въ их̑ мѣсто, и҆ до сего̀ дн҃е·

И҆ е҆ве́и живꙋщїа, въ а҆ро́ѳѣ до га́зы, кападокїи шед̑ше и҆зъ кападокїи́ потреби́ша ѧ҆̀, и҆ всели́шасѧ во и́хъ мѣсто·

Нн҃ѣ ѹ҆бо въста́нѣте в̂ы въздви́гнѣтесѧ и҆ прои҆дѣте в̂ы де́брь а҆рно́ню, с̂е предах̑ в рꙋцѣ твоѝ сїѻ́на цр҃ѧ е҆сево́нѧ, и҆ а҆м꙽морре́иска.
и҆ зем̑лю е҆го начнѝ причаща́ти.
сътворѝ с ни́ми ра́ть дн҃ешнїи дн҃ь·

Нн҃ѣ начнꙋ дати тре́петъ и҆ страх̑ тво́и пред̑ лицем̑ всѣмъ страна́м꙽ ꙗ҆же сꙋть под̑ нб҃сем̑.
ѻ҆ни же слы́шавшеи и҆́мѧ твоѐ възъмѧтꙋтсѧ.
и҆ болѣзнь прїимꙋтъ ѿ лица̀ твое҆го·

И҆ послахъ послы̀ ѿ пꙋсты́нѧ кедемо́ѳъ къ сїѻ́нꙋ цр҃ю а҆сево́ню, словесы̀ ми́рны гл҃ѧ·

д̂а прои́дꙋ сквоѕѣ зе́млю твою̀ по пꙋтѝ прои҆дꙋ и҆ не съвращ́ꙋсѧ н̂и на́ десно н̂и на́ лѣво·

Пи́щꙋ на ценѣ̀ да ны̀ даси, и҆ ꙗ҆мъ.
и҆ во́дꙋ на ценѣ̀ дасѝ и҆ пїю, ра́звѣ то́чїю нога́ма мои҆ма прои҆дꙋ·

Ꙗ҆́коже сътвори́ша м̂и сн҃ве і҆са́вови живꙋщїи въ сеи́рѣ, и҆ моа́вити живꙋщїи въ и҆ро́рѣ.
до́ндеже про́и҆дꙋ і҆ѻ҆рда́нъ на́ землю ꙗ҆́же г҃ь б҃ъ нашъ да́етъ нам̑·

И҆ не въсхотѣ̀ сїѻ́нъ цр҃ь а҆сево́нь да минем̑ сквоѕѣ ю҆̀, ꙗ҆́ко ѻ҆жесточѝ г҃ь б҃ъ нашъ дх҃ъ е҆го, и҆ ѹ҆крѣпѝ срд̑це е҆го да преда́стъ в рꙋцѣ твоѝ въ дн҃ешнїи дн҃ь·

И҆ рече г҃ь къ мн̂ѣ се нача́хъ, предаѧ́ти пред̑ лицемъ твои҆мъ сїѻ́на цр҃ѧ а҆сево́нѧ и҆ а҆м꙽море́иска и҆ зе́млю е҆го, и҆ начина́и причаща́ти зе́млю е҆го·

И҆зы́де сїѻ́нъ цр҃ь а҆сево́нь проти́вꙋ нам̑ самъ и҆ вс̂и лю́дїе е҆го на́ брань, въ и҆а́сꙋ·

И҆ предалъ и҆̀ г҃ь б҃ъ нашъ пред̑ лицемъ нашимъ въ рꙋцѣ наши, и҆ ѹ҆би́хом̑ е҆го и҆ сн҃ы е҆го, и҆ вс̂ѧ лю́ди е҆го·

И҆ ѻ҆дръжа́хомъ вс̂ѧ гра́ды е҆го во ѻ҆́но вре́мѧ, и҆ поби́хомъ вс̂ѧ грады и҆ногда̀ и҆ же́ны и҆х꙽ и҆ дѣти их̑ не ѻ҆ста́вихомъ живы·

Ра́звѣ скотъ плѣнихом̑ себѣ і҆ и҆мѣнїа град̑ны взѧ́хом̑·

ѿ а҆ро́ира.
и҆же е҆сть ѹ҆стїе водотеча а҆рно́нѧ и҆ грд̑а и҆же е҆сть в де́бри, и҆ до горы̀ гала́довы.
и҆ не бысть грд̑а ѹ҆целѣ́выи нас̑҇, вс̂ѧ предал̑҇ г҃ь б҃ъ нашъ в рꙋцѣ̀ наши·

Ра́звѣ въ землѝ сн҃овъ а҆м꙽ма́нихъ, не пристꙋпа́хом̑, и҆ вс̂ѧ съдръжа́щаасѧ с꙽ водоте́чею и҆а҆ва́ковою, и҆ гра́ды и҆же въ горах̑.
ꙗ҆́кож̑ повелѣ̀ г҃ь б҃ъ на́шъ·

Глв̑҇а, г҃·

И ѻбрати́вшесѧ възыидо́хом̑ пꙋте́мъ и҆же къ васа́нꙋ.
і҆ и҆зы́де, и҆ ѻ́гъ цр҃ь васа́нь проти́вꙋ намъ, са́мъ и҆ вс̂и лю́дїе е҆го с ни́мъ на́ брань въ а҆драи́нъ·

И҆ рече г҃ь къ мн̂ѣ не бо́исѧ е҆го ꙗ҆ко въ рꙋцѣ твоѝ предах̑ е҆го и҆ вс̂ѧ лю́дїе е҆го и҆ вс̂ю зе́млю е҆го·

И҆ сътвори́ши е҆мꙋ ꙗ҆́коже сътворѝ сїѻ́нꙋ цр҃ю а҆м꙽морре́искꙋ, и҆же жит̑ въ а҆сево́нѣ·

И҆ преда̀ и҆̀ г҃ь б҃ъ нш҃ь въ рꙋцѣ̀ на́ши, и҆ ѻ́га цр҃ѧ васа́нѧ и҆ вс̂ѧ лю́дїе е҆го і҆ и҆зби́хом̑ е҆го до́ндеже не ѻ҆ста̀ ѿ них̑ племѧ·

И҆ взѧ́хомъ вс̂ѧ гра́ды и҆хъ въ́ времѧ ѻ҆́но.
и҆ не бы́сть гра́да е҆гоже не взѧ́хомъ ѿ ни́хъ, ѯ҃, гра́дъ·

и҆ вс̂ѧ предѣ́лы а҆́рговы цр҃ѧ ѻ҆́гова, въ а҆са́нѣ·

Всѧ̀ гра́ды тве́рды гражде́нїемъ высо́кимъ, вра́та и҆ засо́вы, ра́звѣ гра́ды ферзе́ски мно́ги ѕѣ́ло·

И҆ потреби́хомъ и҆х꙽, ꙗ҆́коже сътвори́хомъ сїѻ́нꙋ цр҃ю а҆сево́ню.

И҆ потреби́хомъ вс̂ѧ гра́ды их̑ въкꙋ́пѣ и҆ же́ны их̑ и҆ ча́да·

Вс̂ѧ же ско́ты их̑, и҆ коры́сти град̑ныѧ плѣни́хом̑ себѣ̀·

И҆ взѧ́хомъ в то̀ вре́мѧ зе́млю ѿ рꙋкꙋ двою̀ цр҃ю а҆м꙽морре́искꙋ.
и҆же бы́ша ѻб̑҇ сю̀ странꙋ̀ и҆ѻрда́на.
ѿ водоте́ча а҆рно́нѧ до горы̀ а҆ермони·

финикѣ́и же.
прозыва́ютъ е҆рмона санїи́ръ·

А҆м꙽моррѣ́и же прозывают̑ и҆ сани́ръ·

Вс̂и грады мисо́ровы и҆ всего галаа́да, и҆ всего васа́на, да́ждь до е҆лхи·

И҆ до і҆ѻ҆рда́на вс̂ѧ гра́ды црс̑҇твїа ѻ҆́гова въ васа́нѣ·

Ꙗ҆́ко точїю и҆ ѻ҆гъ град̑ цр҃ь васа́нь ѻ҆ста̀ ѿ рафаи́ма.
с̂е ѻ҆́дръ е҆го ѻ҆́дръ желѣ́зенъ, с̂е то́и е҆сть на краи сн҃овъ а҆м꙽мановых̑, ѳ҃, лако́тъ длъгота̀ е҆го, и҆ д҃, ла́кти широта̀ е҆го.
ла́ктемъ мꙋж́ескимъ·

И҆ зе́млю т̂ꙋ прїа́хомъ въ ѻ҆́но времѧ ѿ а҆рои́ра.
и҆же е҆сть ѹ҆ ѹ҆стїа водоте́чїа а҆рнонѧ, и҆ полъ горы̀ галаа́довы, и҆ грады и҆хъ дахъ рꙋви́мꙋ, и҆ га́дꙋ·

И҆ ѻ҆ставшее галаа́дꙋ всего црс̑҇тва дахъ полꙋ племе́ни васа́нѧ и҆ ѻ҆́гова
манасїи́нꙋ.
и҆ вс̂ѧ се́ла ѻ҆́крс̑҇тъ а҆рго́ва, ве́сь васа́нь и҆хъ землѝ рафаи́ни примѣни́тсѧ·

И҆а҆и́ръ же сн҃ъ манасїинъ вз̂ѧ вс̂ѧ предѣ́лы а҆ргоговы, до предѣлъ гаргасин̑҇скихъ·

И҆ махеѳей прозва̀ и҆̀, и҆а҆и҆ръ по и́мени свое҆мꙋ васа́нъ и҆ а҆во́ѳъ, до сего дн҃и·

Махи́рови же дахъ галаа́дъ.
и҆ рꙋви́мꙋ и҆ гадови дахъ ѿ галаа́да даже до водоте́чи а҆рно́нѧ, сред̑и̑ водоте́чи предѣ́лъ.
и҆ до и҆а҆во́ка водоте́чи предѣлъ сн҃овъ а҆м꙽ма́нихъ·

И҆ ра́ва же і҆ и҆ѻ҆рда́нъ предѣ́лъ ѿ махенере́ѳа до а҆си́доха фаз̑ги ѿ восто́ка·

И҆ повелѣ́хъ вамъ въ́ времѧ ѻ҆́но гл҃ѧ г҃ь б҃ъ ва́шъ далъ е҆сть ва́мъ зе́млю сїю въ прича́стїе.
въѻ҆рꙋже́ни по́идите пред̑ лицемъ бра́тїѧ ва́шеѧ сн҃овъ і҆и҆л҃ев꙽, всѧ́к꙽ могїи на ра́ть·

То́чїю же́ны ва́ша и҆ дѣти ва́ша и҆ ско́ти ва́ша.
вѣ́де ꙗ҆́ко ско́тъ мног̑҇ е҆сть ва́мъ да пребꙋ́дꙋтъ въ гра́дех꙽ ва́шихъ, ꙗ҆́же да́хъ ва́мъ·

до́нъдеже ѹ҆поко́итъ г҃ь б҃ъ нашъ братїю ва́шꙋ.
ꙗ҆́ко и҆ ва́съ.
и҆ да причастѧт̑ и҆ сїѝ зе́млю, ю҆же г҃ь б҃ъ ваш꙽ да́сть и҆мъ.
ѻ҆бо́нꙋ странꙋ̀ і҆ѻ҆рда́на.
и҆ ѻ҆брати́тесѧ ко́ждо вас̑҇ въ прича́стїе своѐ е҆же да́хъ ва́мъ·

І҆сꙋсъ заповѣ́дахъ въ времѧ ѻ҆́но гл҃ѧ, ѻ҆́чи ва́ши ви́дѣша вс̂ѧ е҆ли́ко сътворѝ г҃ь б҃ъ вашъ, ѻ҆бѣма цр҃ема си́ма.
та́ко сътворит̑ г҃ь б҃ъ нашъ всѣ́мъ црс̑҇твомъ сквозѣ̀ нѧ т̂ы про́идеши та́мо.
да не ѹ҆бо́итесѧ ѿ нихъ ꙗ҆ко гв҃и въ ѻ҆́но вре́мѧ гл҃ѧ.
г҃и г҃и т̂ы нача̀ показа́ти твое҆мꙋ рабꙋ̀ крѣпость твою и҆ си́лнꙋю твою.
и҆ рꙋкꙋ крѣ́пкꙋ и҆ мы́шцꙋ высо́кꙋю, кт̂о б̂о е҆сть б҃ъ на нб҃си и҆л̂и на землѝ, и҆л̂и кто̀ сътвори́тъ ꙗ҆́коже сътворѝ т̂ы и҆ крѣ́пость твоѧ·

Минꙋвъ ѹ҆бо да ви́жꙋ зе́млю бл҃гꙋю сїю.
ꙗ҆́же ѻ҆бонꙋ стра́нꙋ і҆ѻ҆рда́на горꙋ̀ сїю бл҃гꙋ и҆ кра́снꙋ дꙋбра́вꙋ·

И҆ презрѣ м̂ѧ г҃ь васъ ра́ди и҆ не послꙋш́а менѐ.
и҆ рече г҃ь ко мн̂ѣ довлѣ́етъ т̂и, не приложѝ к семꙋ̀ гл҃ати словесѝ сего̀·

Възы́иди на ве́рхъ горы̀ сѣченыѧ и҆ възрѝ ѻ҆чи́ма свои́ма къ мо́рю и҆ сѣ́верꙋ и҆ ю́гꙋ и҆ на восто́ки·

И҆ ви́ждь ѻ҆чи́ма свои́ма ꙗ҆ко нѣ́сть т̂и минꙋти і҆ѻ҆рда́на сего·

И҆ заповѣ́ждь і҆сꙋ́сꙋ и҆ ѹ҆крѣпѝ е҆го и҆ ѹ҆тѣши́ е҆го ꙗ҆́ко семꙋ е҆сть минꙋти пред̑ лицемъ людїи си́хъ.
и҆ се́и да раздѣли́тъ и҆мъ вс̂ю зе́млю, ю҆́же е҆си ви́дѣлъ·

И҆ пребы́хом̑ на де́бри близь до́мꙋ фого́рова·

Глв̑҇а, д҃·

И нн҃ѣ і҆и҆л҃ю послꙋш́аи ѻ҆правда́нїи и҆ сꙋдовъ, ꙗ҆́же а҆зъ ѹ҆чю̀ вас̑҇ днесь дѣ́лати да поживе́те.
и҆ вшед̑ше в̂ы прїимѣте зе́млю ю҆́же г҃ь ѿц҃ъ ва́шихъ дае́тъ ва́мъ, в наслѣдїе·

да не приложи́те къ словесем̑ е҆же а́зъ зповѣдаю вам̑.
ниже да ѿи́мѣте ѿ них̑, снабди́те за́повѣди г҃а б҃а нашего, ꙗ҆же заповѣдаю вамъ а҆зъ дне́сь.
ѻ҆́чи ваши ви́дѣста вс̂ѧ е҆ли́ка сътворѝ г҃ь б҃ъ нашъ въ е҆льфего́рѣ·

Ꙗ҆́ко всѧ́къ чл҃къ и҆же послꙋжѝ е҆льфего́рꙋ, погꙋбѝ е҆го г҃ь б҃ъ на́шъ ѿ васъ·

Вы̑ прилежа́щїи гв҃и б҃ꙋ на́шемꙋ живете вс̂и до дне́сь·

Ви́дѣсте ꙗ҆́ко ѹ҆казах̑ вамъ ѻ҆правле́нїѧ и҆ сꙋды, ꙗ҆́коже заповѣ́да г҃ь б҃ъ мой твори́ти.
си́це в̂ы на землѝ в ню́же в̂ы и҆дѣте та́мо наслѣдити е҆ѧ·

Снабди́те же и҆ да сътвори́те.
ꙗ҆́ко сїѧ премꙋ́дрость ваша и҆ смышле́ныѧ пред̑ всѣми страна́ми.
е҆ли́цы а҆ще ѹ҆слы́шатъ вс̂ѧ ѻ҆правле́нїѧ сїѧ, и҆ рекꙋтъ.
сїи лю́дїе премꙋ́дри и҆ ѹ҆мѣт́ели.
племѧ̀ вели́кое с̂е·

Кїи б̂о ꙗ҆́зы́къ та́къ ве́лїи е҆мꙋже е҆сть г҃ь б҃ъ, приближа́ѧсѧ е҆го.
ꙗ҆́ко г҃ь б҃ъ на́шъ, въ все́мъ ѻ҆ немже а҆ще помо́лимъ е҆го сътвори́тъ.
и҆ коѐ племѧ̀ вели́кое е҆мꙋже сꙋть ѹ҆правле́нїѧ и҆ сꙋды̀.
пра́вы по всемꙋ̀ зако́нꙋ семꙋ.
е҆же аз̑ даю̀ пред̑ вами дне́сь·

Во́нми себѣ̀, и҆ снабдѝ дш҃ꙋ свою̀ ѕѣло, и҆ не забꙋди всѣхъ слове́съ ꙗ҆́же ви́дѣста ѻ҆́чи твоѝ·

И҆ да не ѿстꙋпѧтъ ѿ срд̑ца твое҆го вс̂ѧ дн҃и живота̀ твое҆го.
и҆ да наста́виши сн҃ы своѧ̀.
и҆ внꙋки своѧ̀ да не забꙋ́деши·

Въ дн҃ь во́ньже стоѧ́сте пред̑ гм҃ъ бм҃ъ вашимъ в хори́вѣ, въ дн҃ь зва́нїѧ е҆гда̀ рече г҃ь къ мн̂ѣ.
съберѝ къ мн̂ѣ лю́ди, и҆ да слы́шатъ словеса̀ моѧ̀.
да наѹ҆ча́тсѧ боѧ́тисѧ мене вс̂ѧ дн҃и, ꙗ҆же сїи живꙋтъ на землѝ·

И҆ сн҃ы своѧ̀ да наѹ҆ча́тъ·

И҆ прїидо́сте и҆ ста́сте под̑ горо́ю, гора́ же палѧ́ше ѻ҆гнемъ до нб҃си, тм̂а, и҆ м꙽гла̀, и҆ ды́мъ, и҆ глс̑҇а вели́къ·

И҆ гл҃а г҃ь къ ва́мъ на горѣ̀ и҆ с꙽ средѣ ѻ҆гнѧ̀.
глс̑҇а словесъ е҆го в̂ы слы́шасте, и҆ ѻ҆́браза не ви́дѣсте, н̂о глас̑҇·

И҆ заповѣда вам̑ завѣтъ е҆го.
е҆же заповѣда ва́мъ, творити, і҃, словес̑҇.
и҆ въписа̀ ѧ҆̀ на двою дъскꙋ ка́менꙋ·

И҆ мн̂ѣ заповѣда г҃ь въ времѧ ѻ҆́но наѹ҆чи́ти в̂ы ѻ҆правле́нїѧ и҆ сꙋды̀ твори́ти вамъ ѧ҆̀ на землѝ, в ню́же в̂ы и҆́дете, та́мо причасти́ти еѧ̀·

И҆ да снабди́те дш҃а своѧ ѕѣ́ло ꙗ҆ко не ви́дѣсте всѧ́каго ѻ҆́браза, въ дн҃ь во́ньже гл҃а г҃ь къ ва́мъ, в горѣ̀ хори́вѣ и҆зъ среды̀ ѻ҆гнѧ̀·

Не безако́ннꙋите да не сътвори́те себѣ са́ми ѻ҆́браза ваѧ́нна.
всѧ́каго ѻ҆бли́чїѧ̀ мꙋжеска полꙋ и҆л̂и женьска·

И҆ ѻ́браза всѧ́каго скота, и҆же е҆сть на землѝ.
ѻ҆́браза всѧ́кїа птица и҆же под̑ нб҃семъ парѧ́щїѧ·

ѻ҆́браза всѧ́каго га́да и҆же плѣжетъ по землѝ.
ѻ҆́браза всѧкїѧ ры́бы иж̑ въ вода́хъ под̑ внꙋтрь землѝ·

И҆ да не когда возрѣвъ на нб҃о и҆ ви́дѣвъ слн҃це и҆ мцс̑҇ъ и҆ ѕвѣзды, и҆ всю̀ твар̑҇ нбс̑҇нꙋю прельсти́вшисѧ поклони́шисѧ и҆мъ и҆ послꙋжи́ши и҆мъ, ꙗ҆же сътвори́лъ г҃ь б҃ъ тво́и всѣмъ страна́мъ.
ꙗ҆же под̑ нб҃семъ·

Вас̑҇ же в꙽зѧ̀ г҃ь б҃ъ і҆ и҆зведе ва́съ ѿ пещи желѣ́зны и҆зъ е҆гѷпта да бꙋдете е҆мꙋ лю́дїе и҆ прича́стїе.
ꙗ҆́коже е҆сть въ дн҃ешнїи дн҃ь·

И҆ г҃ь б҃ъ ра́згнѣвасѧ на мѧ ѻ҆ словесѣхъ ва́шихъ, и҆ клѧ́сѧ да не минꙋ̀ і҆ѻ҆рдана́ сего, и҆ да не преи҆дꙋ до землѝ ю҆́же г҃ь б҃ъ дае҆т꙽ вамъ въ причастїе·

А҆́зъ ѹ҆бо ѹ҆мрꙋ̀ в се́и землѝ, а҆ не переидꙋ і҆ѻ҆рдана сего̀·

А҆ в̂ы минꙋете и҆ прїимѣте землю бл҃гꙋю сїю·

Воньмите в̂ы да не забꙋ́дите завѣта г҃а б҃а вашег̑҇ и҆же завѣща къ ва́мъ.
и҆ да не сътвори́те са́ми себѣ ѻ҆́браза и҆зваѧ́нна всѣхъ ꙗ҆́же заповѣда г҃ь б҃ъ тво́и·

Ꙗ҆́ко г҃ь б҃ъ твой, ѻ҆́гнь потреблѧ́а и҆̀ е҆сть, б҃ъ ревни́въ·

А҆́ще же роди́ши сн҃ы и҆ внꙋ́ки, и҆ ѹ҆медли́те на землѝ, и҆ собезако́н꙽нꙋете.
и҆ сътворите и҆зва́ѧнъ ѻ҆́бразъ всѧкъ, и҆ сътвори́те ѕло́е прд̑е гм҃ъ бм҃ъ ва́шим꙽ раздражни́те е҆го·

И҆звѣстꙋ́ю вам꙽ днесь нб҃семъ и҆ земле́ю, ꙗ҆́ко па́гꙋбою поги́бнете съ землѧ̀.
на ню́же вы̀ минꙋ́ете чрезъ і҆ѻ҆рда́нъ та́мо наслѣдитї ю҆̀, и҆ не пребꙋ́дете мно́го дн҃їи на не́и.
н̂о потребле́нїем̑ потреби́тесѧ·

И҆ разъсы́плетъ в̂ы г҃ь въ всх̑ѣ ꙗзы́цех̑.
и бꙋдете ма́ли числом̑ въ ꙗ҆́зы́цехъ.
в нѧ́же въведет̑ в̂ы гь та́мо·

И҆ послꙋж́ите та́мъ бого́мъ и҆́нѣмъ, дѣ́лꙋ рꙋкъ члчс̑҇екъ древꙋ, и҆ ка́менїю и҆же не ѹ҆́зрѧтъ, и҆ не ѹ҆слы́шатъ.
н̂и ꙗ҆́дѧ́тъ, н̂и ѻ҆бонѧ́ютъ·

И҆ взы́щете т̂ꙋ г҃а б҃а ва́шего, и҆ на́идете и҆̀·

Є҆гда възы́щете е҆го ѿ всего ва́шего срд̑ца и҆ ѿ всеѧ дш҃а ва́шеѧ·

И҆ въ ско́рбь твою̀ пости́гнꙋтъ т̂ѧ всѧ̀ сѝ словеса̀ въ послѣ́днѧа дн҃и, и҆ ѻ҆брати́шисѧ къ гв҃и б҃ꙋ твое҆мꙋ, и҆ ѹ҆слы́шитъ глс̑҇а е҆го·

Ꙗ҆́ко б҃ъ ще́дръ и҆ милосе́рдъ г҃ь б҃ъ твои·

И҆ не ѻ҆ста́вит꙽ тебѐ и҆ ниже потреби́тъ тебѐ, не забꙋ́дет꙽ завѣта ѿц҃ъ твои҆хъ, и҆мже клѧт̑сѧ и҆мъ·

Въпраша́ите дн҃їи пр́ьвыхъ бы́вшихъ пре́жде вас̑҇, ѿ дн҃е во́нже сътвори б҃ъ чл҃ка на землѝ·

И҆ ѿ кра́ѧ нб҃ꙋ до кра́ѧ нб҃ꙋ, а҆ще быс̑҇ по словесѝ вели́комꙋ семꙋ̀.
а҆ще е҆ст꙽ слы́шано си́це·

І҆ а́ще коѐ племѧ̀ слы́ша глс̑҇а б҃а жи́ва гл҃юща средѝ ѻ҆гнѧ̀ и҆мже ѻ҆́бразомъ слы́ша т̂ы и҆ жи́въ бы́сть.
а҆ще и҆скꙋсѝ когда̀ в̂ы б҃ъ взѧ́ти себѣ̀ ꙗ҆́зы́къ ѿ среды̀ стран̑҇ и҆скꙋ́сомъ, и҆ зна́менїи, и҆ чюдесы̀, и҆ бра́нїю, и҆ рꙋко́ю си́лною и҆ мы́шцею высо́кою, и҆ видѣ́нїи вели́кими.
по всемꙋ е҆ли́ко сътворѝ г҃ь б҃ъ на́шъ въ е҆гѷптѣ пред̑ тобою·

Вѣ́дꙋщꙋ тебѣ.
ꙗ҆́коже да разꙋмѣ́еши ты ꙗ҆́ко г҃ь б҃ъ тво́й се́и б҃ъ тво́и е҆сть и҆ нѣ́сть ра́звѣе сего̀·

ѿ нб҃си слы́шанъ сътвори́ти тебѣ глс̑҇а свой наказати т̂ѧ и҆ на землѝ и҆ показа́ти тебѣ ѻ҆́гнь свои вели́кїи, и҆ гл҃анїѧ е҆го слы́ша и҆з꙽ среды̀ ѻ҆гнѧ̀·

Того ра́ди ꙗ҆́ко възлюбѝ ѿц҃ъ твоих̑.
и҆ вас̑҇ и҆збра̀ сѣмѧ и҆хъ послѣ и҆хъ вас̑҇, и҆ вы́велъ тебѐ си́лою свое́ю, вели́кою и҆зъ е҆гѷпта·

И҆ потребѝ страны вели́кїѧ и҆ крѣпча́ишаѧ̀ тебѐ съ лица̀ твое҆го, въвестѝ т̂ѧ, и҆ дати тебѣ зе́млю и҆хъ прича́стїе ꙗ҆́коже и҆́маши дне́сь·

И҆ ѹ҆вѣси дне́сь и҆ ѻ҆брати́шисѧ ѹ҆мо́мъ, ꙗ҆́ко г҃ь б҃ъ твои е҆сть се́и б҃ъ на́ нб҃си горѣ̀ и҆ на́ землѝ до́лѣ и҆ нѣсть развѣ е҆го,<.>

И҆ д̂а снабди́ши ѻ҆правле́нїѧ и҆ сꙋды̀ ег̑҇ е҆ли́коже т̂и а҆зъ заповѣдаю дне́сь, да тѝ бл҃го бꙋ́детъ, и҆ сн҃омъ твоим̑ по тебѣ.
да бꙋ́дете мно́ги дн҃и на землѝ ꙗ҆́же г҃ь б҃ъ тво́и дает̑ тебѣ вс̂ѧ дн҃и·

Тогда раздѣлѝ моѷсїи тр̂и гра́ды ѻ҆бо́нꙋ странꙋ̀ і҆ѻрда́на, на восто́къ сл҃нца·

Въбѣ́гати та́мо ѹ҆бїицы.
и҆же а҆ще ѹ҆бїетъ по́дрꙋга не вѣ́дыи.
се же н̂е ненави́дѧ е҆го ни вчера̀ ни третїемъ дн҃и.
и҆ да въбѣгнетъ въ е҆ді́нъ град̑ си́хъ и҆ жи́въ бꙋдетъ·

Въсо́рꙋ въ пꙋсты́ни въ землѝ се́лнеи, рꙋви́мꙋ и҆ рафомо́ѳъ въ галаа́дѣ гады́ди, и҆ гаѹ҆ло́нъ въ васа́нѣ манасїю·

Сїи зако́н꙽ сказа̀ моѷсїи пред̑ сн҃ы і҆ил҃ьтескими·

Сїѧ свѣдѣ́нїѧ и҆ ѻ҆правле́нїѧ, и҆ сꙋды̀, ꙗ҆же гл҃а моѷсїи сн҃омъ і҆и҆л҃евымъ въ пꙋсты́ни, и҆зшед̑шимъ им̑ и҆з꙽ землѧ̀ е҆гѷпетъскїѧ·

ѻ҆ сїю странꙋ̀ і҆ѻ҆рдана въ де́бри бли́зъ до́мꙋ фого́рова.
в землѝ сїѻ́на цр҃ѧ а҆м꙽морре́иска.
иж̑ живе въ а҆сїѻ́нѣ.
е҆гоже и҆збѝ моѷсїи и҆ сн҃ове і҆и҆л҃ви и҆зшед̑шимъ им̑ и҆з꙽ зем̑лѧ̀ е҆гѷпетъски, и҆ прїа́ша зе́млю е҆го, и҆ зе́млю ѻ҆́говꙋ цр҃ѧ васа́нѧ дв̂ою цр҃ю а҆м꙽морре́искꙋ ꙗ҆же бѣста ѻ҆ сїю странꙋ̀ і҆ѻ҆рда́на на восто́къ сл҃нца·

ѿ а҆рои́ра е҆же е҆сть въ ѹ́стїи водоте́чи а҆рно́нѧ·

и҆ ѹ҆ горы̀ сїѻ́нѧ ꙗ҆́же е҆сть а҆хермон̑҇·

И҆ вс̂ю а҆равїю ѻ҆бо́нꙋ странꙋ̀ і҆ѻ҆рда́на.
на въсток̑҇ сл҃нца ѿ а҆сидо́ѳа те́санаго·

Глв̑҇а, е҃·

И гл҃а моѷсїи всемꙋ і҆и҆л҃ю и҆ рече къ ни́мъ.
послꙋш́аи і҆и҆л҃ю ѻ҆правле́нїѧ и҆ сꙋды̀, е҆ли́ко а҆зъ гл҃ю въ ѹ́ши ва́ши въ дн҃ешнїи дн҃ь, да сѧ наѹ҆чи́те их̑ и҆ снабди́те твори́тї ѧ҆̀.

Гь҃ б҃ъ вашъ завѣща̀ вамъ завт̑ѣ въ хори́вѣ, не ѻ҆днымъ ѻт̑ц҃емъ ва́шимъ завѣща̀ за́вѣтъ сеи, н̂о и҆ ва́мъ, вы́ же ѹ҆бо здѣ вс̂и жи́ви дне́сь·

Лицемъ къ лицꙋ̀ гл҃а г҃ь къ вамъ, на горѣ̀ и҆з꙽ среды̀ ѻ҆гнѧ̀, аз̑ же стоѧ́хъ междꙋ гм҃ъ и҆ ва́ми.
въ времѧ ѻ҆́но и҆звѣсти́ти вамъ гл҃ъ гн҃ь ꙗ҆ко ѹ҆боѧ́стесѧ ѿ лица̀ ѻ҆гню̀, и҆ не възыидо́сте на горꙋ̀ гл҃ѧи·

А з̑ е҆смь г҃ь б҃ъ твой и҆зведы́и т̂ѧ и҆з꙽ землѧ̀ е҆гѷпет꙽ски ѿ до́мꙋ рабо́ты·

И҆ да не бꙋ́дꙋтъ тебѣ боѕи и҆́ни, пред̑ лицемъ мои҆мъ.
да не сотвори́ши себѣ̀ ваа́нїѧ, и҆ никое҆гоже ѻ҆́браза, е҆ли́ко на́ нб҃си горѣ̀ и҆ е҆ли́ко на землѝ до́лꙋ, е҆ли́ко въ водѣ̀ под̑ земле́ю·

да сѧ не покло́ниши и҆мъ, и҆ да не послꙋжи́ши и҆мъ, ꙗ҆́ко а҆́зъ е҆смь г҃ь б҃ъ твой.
б҃ъ ревни́въ, ѿдаѧ́и грѣхѝ ѿц҃евы на дѣти, до тре́тїѧго и҆ четве́ртаго ро́да, ненави́дѧщимъ менѐ·

И҆ творѧ́и млс̑҇ть в ты́сꙋщахъ ро́довъ любѧ́щимъ менѐ, и҆ снабдѧ́щимъ повелѣ́нїе моѐ·

да не прїимеши и҆мени г҃а б҃а твое҆го въсꙋе.
не ѻ҆чи́ститъ б̂о г҃ь б҃ъ тво́и прилага́ющаг̑҇ и҆́мѧ е҆го къ сꙋ́емꙋ·

Снабди́те дн҃ь сꙋбо́тныи ѻ҆сщ҃аите е҆го, ꙗ҆кож̑ заповѣ́да тебѣ г҃ь б҃ъ тво́и.
ѕ҃, дн҃ь да дѣ́лаеши и҆ да сътвори́ши вс̂ѧ дѣ́ла твоѧ·

А҆ дн҃ь з҃, сꙋбо́та г҃ꙋ б҃ꙋ твое҆мꙋ.
да не сътвори́ши во́нь всего дѣ́ла, т̂ы и҆ сн҃ъ твои, и҆ дщер̑҇ твоѧ̀, и҆ рабъ тво́и и҆ раба̀ твоѧ̀, во́лъ твои и҆ ѻ҆се́лъ твой, и҆ всѧкъ ско́тъ твои.
и҆ прише́лецъ и҆же прд̑е вра́ты твои҆ми·

да почїетъ рабъ твои, и҆ раба̀ твоѧ̀ и҆ ѻ҆се́лъ твои ꙗ҆́коже и҆ т̂ы·

И҆ да помѧне́ши.
ꙗ҆ко и҆ т̂ы ра́бъ бы́лъ в землѝ е҆гѷпет̑стеи.
и҆зведе т̂ѧ г҃ь б҃ъ ѿтꙋдꙋ.
рꙋко́ю крѣ́пкою и҆ мы́шцею высо́кою, сего ра́ди повелѣ̀ т̂и г҃ь б҃ъ твои, ꙗ҆ко снабдѣти тебѣ̀ дн҃ь сꙋбо́тныи и҆ ѻ҆сщ҃ати е҆го·

Чт̂и ѿц҃а твое҆го и҆ мт҃рь твою̀, ꙗ҆коже ѹ҆каза̀ тебѣ г҃ь б҃ъ твой да бл҃го т̂и бꙋ́детъ.
сего ра́ди мно́га лѣта̀ бꙋ́деши на землѝ, ꙗ҆́же г҃ь б҃ъ да́сть тебѣ̀·

Не ѹ҆бїи·

Не любодѣ́и·

Не ѹ҆крад̑и̑·

Не послꙋшествꙋ́и на бли́жнѧго свое҆го лжа̀·

Не помы́сли на женꙋ̀ по́дрꙋга твое҆го.
не помы́сли на до́мъ по́дрꙋга твое҆го, н̂и на село̀ е҆го, н̂и на раба̀ е҆го, н̂и на рабꙋ е҆го, н̂и на вол̑҇ е҆го, н̂и на ѻ҆слѧ̀ е҆го, н̂и на всѧ́каго скота̀ е҆го, н̂и на вс̂е е҆ли́коже бли́жнѧг̑҇ тебѣ̀·

Сїи словеса̀ гл҃а г҃ь къ всемꙋ̀ со́нмꙋ ва́шемꙋ на горѣ̀, средѝ ѻ҆гнѧ̀, тм̂а и҆ м꙽гла̀ ды́мъ, гла́съ вели́къ и҆ не преста̀·

И҆ въписа е҆̀ въ дв̂ѣ до́сцѣ ка́мен꙽нѣ, и҆ дадѐ мн̂ѣ·

И҆ бысть ꙗ҆ко слы́шасте, глс̑҇а и҆з꙽ сред̑и̑ ѻ҆гнѧ̀.
гора́ же горѧ́ше ѻ҆гнемъ, и҆ прїидо́ста къ мн̂ѣ вс̂ѧ старѣ́ишины по племе́немъ ва́шим̑ и҆ ста́рцы ва́ша·

И҆ рѣста с̂е показа̀ намъ г҃ь б҃ъ нашъ сла́вꙋ свою̀, и҆ глс̑҇а е҆гож̑ слы́шахомъ и҆з꙽ среды̀ ѻ҆гнѧ̀.
въ дне́шнїи дн҃ь ви́дѣхомъ ꙗ҆́ко гл҃етъ б҃ъ чл҃кꙋ и҆ жи́въ бꙋдетъ·

И҆ н҃нѣ да не и҆з꙽мремъ, ꙗ҆́ко потребит̑ нас̑҇ ѻ҆́гнь вели́кїи се́и.
а҆ще приложи́мъ м̂ы слы́шати глс̑҇а г҃а б҃а на́шего, к семꙋ̀ да и҆з꙽мрем̑·

Ка́ѧ пло́ть е҆сть ꙗ҆́же слы́ша глс̑҇а б҃а жи́ва гл҃юща и҆з꙽ среды̀ ѻ҆гнѧ̀ ꙗ҆́коже м̂ы и҆ живет̑·

Пристꙋпѝ т̂ы и҆ послꙋш́аи вс̂е е҆ли́ко к тебѣ̀ рече́тъ г҃ь б҃ъ нашъ.
сътвори́мъ и҆ послꙋш́аемъ·

И҆ послꙋш́а г҃ь глс̑҇а словесѐ ва́шего, глющим̑ вам̑ къ мн̂ѣ и҆ рече г҃ь ко мн̂ѣ слы́шахъ глс̑҇а словес̑҇ людїй сихъ е҆ли́ко гл҃аша к тебѣ̀ пра́во гл҃аша вс̂е·

Кт̂о дасть срд̑це и҆хъ бы́ти в нихъ ꙗ҆коже боѧ́тисѧ менѐ, и҆ снабдѣти вс̂ѧ за́повѣди моѧ̀.
и҆ въ вс̂ѧ дн҃и да бл҃го бꙋ́детъ и҆мъ, и҆ сн҃омъ их̑ въ вѣки·

Грѧди и҆ рцы̀ и҆мъ, ѻ҆братитесѧ в̂ы въ до́мы своѧ·

Ты же ста́ни со мно́ю, да гл҃ю к тебѣ̀ вс̂ѧ за́повѣди и҆ ѻ҆правле́нїѧ и҆ сꙋды̀.
е҆ли́коже заповѣ́си и҆мъ и҆ да сътворѧ́тъ си́це въ землѝ ю҆́же а҆зъ даю̀ и҆мъ въ прича́стїе·

И҆ да снабди́те твори́ти, ꙗ҆́коже заповѣ́да г҃ь б҃ъ твой, и҆ да не съврати́шисѧ н̂и на́ десно н̂и на́ лѣво·

По всемꙋ пꙋтѝ е҆лико заповѣ́да тебѣ г҃ь б҃ъ твои ходити во́нь, да т̂ѧ поко́итъ и҆ бл҃го ти бꙋдет꙽, и҆ мно́ги дн҃и бꙋдете на землѝ ю҆́же прїи́мете·

Глв̑҇а, ѕ҃·

Сїа́ же за́повѣди і҆ и҆справле́нїа и҆ сꙋды̀, е҆ли́ко заповѣ́да г҃ь б҃ъ ва́шъ.
наѹ҆чи́ти ва́съ твори́ти та́ко.
на землѝ в ню́же в̂ы вхо́дите та́мо причасти́ти е҆ѧ̀·

да сѧ бо́ите г҃а б҃а свое҆го, и҆ снабди́те вс̂ѧ ѻ҆правле́нїа ег̑҇ и҆ за́повѣди е҆го, ꙗ҆́же а́зъ заповѣдаю тебѣ̀ днс̑҇ь.
т̂ы и҆ сн҃ове твоѝ и҆ внꙋ́цы твоѝ, вс̂ѧ дн҃и живота твое҆го, да мно́ги дн҃и пребꙋ́дете·

И҆ послꙋшаи і҆и҆л҃ю, и҆ снабдѝ твори́ти да бл҃го ти бꙋ́детъ.
и҆ да ѹ҆мно́житесѧ ѕѣ́ло ꙗ҆́коже гл҃а г҃ь б҃ъ ѿц҃ъ ва́ших̑, да́ти тебѣ̀ зе́млю кипѧ́щꙋ мле́комъ и҆ ме́домъ·

Сїѧ́ же ѻ҆правле́нїѧ и҆ сꙋды̀, е҆ли́ко заповѣ́да г҃ь б҃ъ сн҃омъ і҆и҆л҃евымъ въ пꙋсты́ни.
из̑шед̑шимъ и҆мъ из̑ землѧ̀ е҆гѷпетски·

Слы́ши і҆и҆л҃ю г҃ь б҃ъ твои г҃ь е҆ді́нъ е҆сть·

И҆ да лю́биши г҃а б҃а твое҆го, ѿ всего̀ срд̑ца твое҆го, и҆ ѿ всеѧ̀ дш҃а свое҆ѧ, и҆ ѿ всеѧ̀ си́лы твое҆ѧ·

И҆ да бꙋ́дꙋтъ ти словеса̀ с̂и, ꙗ҆же а́зъ заповѣ́даю т̂и днс̑҇ь.
въ срд̑цы твое҆мъ, въ дш҃и твое́й·

И҆ да нака́жеши и́ми сн҃ы твоѧ̀, и҆ да гл҃еши в ни́хъ сѣдѧ́и въ домꙋ̀, і҆ и҆ды́и пꙋте́мъ, и҆ лежа̀, и҆ въста́ѧ·

И҆ възложѝ ѧ҆̀ въ зна́менїе на́ рꙋкꙋ твою̀.
и҆ да бꙋ́детъ невъсколѣ́блема пред̑ ѻ҆чи́ма твои́ма·

И҆ д̂а въпи́шеши ѧ҆̀ на пра́зѣхъ хра́мины свое҆ѧ, и҆ на вра́тѣхъ своих̑·

И҆ да бꙋ́детъ е҆гда̀ въведе́тъ т̂ѧ г҃ь б҃ъ твои в зе́млю е҆ю́же клѧ́тсѧ ѿц҃ем̑ твои҆мъ, а҆враа́мꙋ, и҆саа́кꙋ, і҆а́ковꙋ да́ти тебѣ̀ гра́ды вели́ки, и҆ добры̀, и҆х꙽же нѣ́си съгради́лъ т̂ы·

И҆ до́мы по́лны всего̀ бл҃га, их̑же нѣ́си напо́лнилъ.
и҆ пото́ки и҆ско́паны, и҆х꙽же нѣ́си копа́лъ, и҆ виногра́ды, и҆ ма́слины и҆х꙽же нѣ́си насади́лъ, и҆ ꙗ҆ды́и и҆ насыти́в꙽сѧ·

Вонмѝ себѣ̀ да не раз꙽шири́тсѧ срд̑це твоѐ, и҆ забꙋ́детъ г҃а б҃а твое҆го, и҆зве́дшаго тебѐ и҆з꙽ землѧ̀ е҆гѷпет꙽ски, ѿ до́мꙋ рабо́тнаго·

Га҃ б҃а твое҆го бо́исѧ, и҆ томꙋ̀ е҆ді́номꙋ да слꙋж́иши.
и҆ е҆мꙋ̀ прилепи́шисѧ, і҆ и́менемъ е҆го клене́шисѧ·

да не хо́диши въ слѣ́дъ богов̑҇ и҆́ныхъ, къ богом̑ стра́нъ ꙗ҆́же ѻ҆́крс̑҇тъ васъ·

Ꙗ҆́ко б҃ъ ревни́въ г҃ь б҃ъ твои посредѣ тебѐ.
да не разгнѣ́вавъсѧ ꙗ҆ростїю г҃ь б҃ъ твои на́ тѧ, и҆ потреби́тъ т̂ѧ съ лица̀ всего̀ зем̑на́го·

да не и҆скꙋша́еши г҃а б҃а свое҆го ꙗ҆́коже и҆скꙋша́сте въ и҆скꙋше́нїи·

Снабдѧ̀ да снабди́ши за́повѣди г҃а б҃а свое҆го, и҆ свѣдѣ́нїѧ е҆го, и҆ ѻ҆правле́нїѧ е҆го, е҆ли́ко заповѣ́да тебѣ̀·

И҆ да сътвори́ши ѹ҆го́дное и҆ бл҃го́е пред̑ гм҃ъ бг҃омъ твои҆мъ, да бл҃го бꙋ́детъ тебѣ̀·

И҆ вни́деши и҆ прїимеши зем̑лю бл҃гꙋю, е҆ю́же клѧ́тсѧ ѿц҃емъ на́шимъ·

ѿгна́ти вс̂ѧ сꙋпоста́ты твоѧ̀ съ лица̀ твое҆го, ꙗ҆́коже е҆сть гл҃а г҃ь·

И҆ бꙋ́детъ е҆гда̀ въпраша́ет꙽ т̂ѧ сн҃ъ твои ѹ҆́трѣ гл҃ѧ.
коѧ̀ сꙋть свѣдѣнїѧ и҆ ѻ҆правле́нїѧ и҆ сꙋды̀ е҆ли́ко заповѣ́далъ е҆сть г҃ь б҃ъ нашъ на́мъ·

И҆ рече́ши сн҃ꙋ свое҆мꙋ, рабы̀ бѣ́хомъ фараѻ́нꙋ въ е҆гѷптѣ и҆зведѐ насъ г҃ь б҃ъ ѿтꙋ́дѣ.
рꙋко́ю крѣ́пкою, и҆ мы́шцею высо́кою·

И҆ да́стъ г҃ь б҃ъ зна́менїа и҆ чюдеса̀ вели́ка и҆ ѕла́ѧ въ е҆гѷптѣ ѹ҆ фараѻ́на, и҆ въ домꙋ е҆го и҆ въ си́лѣ е҆го пред̑ на́ми·

И҆ нас̑҇ и҆зведѐ г҃ь б҃ъ ѿтꙋ́дѣ, да въведе́тъ нас̑҇ да́ти намъ зе́млю сїю.
е҆ю́же клѧ́тсѧ г҃ь б҃ъ нашъ ѿц҃емъ на́шимъ да́ти ю҆̀ намъ·

И҆ заповѣ́да намъ г҃ь твори́ти, вс̂ѧ ѻ҆правле́нїѧ сїѧ боѧ́тисѧ г҃а б҃а на́шего бл҃го да бꙋ́детъ намъ, вс̂ѧ дн҃и да живе́мъ, ꙗ҆́коже и҆ днес̑҇·

И҆ милосе́рдїе да бꙋ́детъ намъ, а҆́ще снабдим̑ сътвори́ти вс̂ѧ за́повѣди зако́на сего̀, пред̑ гм҃ъ б҃мъ на́шим̑, ꙗ҆́коже заповѣ́да намъ·

Глв̑҇а, з҃·

И бꙋ́детъ е҆гда̀ въведе́тъ т̂ѧ г҃ь б҃ъ твои въ зе́млю в ню́же вхо́диши та́мо прїѧ́тї ю҆̀.
і и҆згна́ти страны̀ вели́кїа и҆ мно́гїа с꙽ лица̀ твое҆го.
хет̑ѳе́ѧ, и҆ герьгесе́ѧ, и҆ а҆м꙽морре́ѧ, и҆ ханане́ѧ, и҆ ферезе́ѧ, и҆ е҆вꙋе҆ѧ, и҆ е҆ѹ҆се́ѧ.
з҃, стра́нъ вели́ких̑ и҆ мно́гих̑, и҆ крѣпча́е вас̑҇·

И҆ преда́стъ и҆хъ г҃ь б҃ъ твои въ рꙋцѣ твоѝ, і҆ и҆збїе́ши ѧ҆̀.
па́гꙋбою погꙋби́ши ѧ҆̀, да не завѣща́еши к ни́мъ завѣта, н̂и поми́лꙋеши и҆хъ·

Ниже сва́тьства сътвори́ши с ни́ми, дще́ри свое҆а не да́си сн҃ꙋ е҆го.
н̂иже дще́ри е҆го да не пое́млеши, сн҃ꙋ свое҆мꙋ·

ѿврати́тъ б̂о сн҃а твое҆го ѿ менѐ.
и҆ послꙋ́житъ бого́мъ и҆́нѣмъ, и҆ разгнѣ́ваетсѧ г҃ь гнѣ́вомъ на́ вы, и҆ потреби́тъ т̂ѧ въско́рѣ·

Но̂ си́це да сътвори́те им̑.
тре́бища их̑ рассы́плете, и҆ столпы̀ и҆хъ да съкрꙋши́те.
и҆ дꙋбра́вы и҆хъ да посѣче́те и҆ ваꙗ҆́нїа бо́гъ и҆хъ да и҆зож꙽же́те на ѻ҆гнѝ·

Ꙗ҆́ко лю́ди ст҃и в̂ы е҆сте гв҃и б҃ꙋ твое҆мꙋ, и҆ тебѐ и҆збра́л꙽ е҆сть г҃ь б҃ъ тво́и.
и҆ да бꙋ́дете е҆мꙋ лю́ди и҆збра́нни, па́че всѣхъ стра́нъ е҆ли́ко е҆сть на все́и землѝ·

Не и́мже мно́ѕи е҆сте па́че всѣхъ странъ и҆зѧт̑ вас̑҇ г҃ь, і҆ и҆збра̀ вас̑҇ г҃ь·

Вы̂ б̂о е҆сте ме́ншѣи ѿ всѣхъ стра́нъ·

Но им̑же възлюбѝ г҃ь вас̑҇, и҆ снабдѧ̀ клѧ́твꙋ е҆же клѧ́тсѧ ѿц҃емъ ва́шимъ.
і҆ и҆зведе г҃ь вас̑҇ рꙋко́ю крѣ́пкою и҆ мы́шцею высо́кою, і҆ и҆зба́вилъ т̂ѧ ѿ до́мꙋ рабо́ты, и҆ ѿ рꙋкѝ фараѻ́на цр҃ѧ е҆гѷпет̑ска·

И҆ да ѹ҆вѣ́си ꙗ҆́ко г҃ь б҃ъ тво́и, се́и б҃ъ.
б҃ъ вѣ́рныи, снабдѧ́и завѣтъ сво́и, и҆ млс̑҇ть любѧ́щим̑ е҆го.
и҆ снабдѧ́щимъ завѣтъ е҆го въ ты́сѧщъ рожде́нїи·

И҆ ѿда́ѧ ненави́дѧщимъ е҆го в лицѐ потреби́ти ѧ҆̀.
и҆ не ѹ҆ме́длитъ ненави́дѧщимъ в лицѐ ѿда́ти и҆мъ·

да снабди́ши за́повѣди, и҆ ѻ҆правле́нїѧ и҆ сꙋды̀ сїѧ.
е҆ли́ко а҆зъ заповѣ́даю тебѣ сътвори́ти дне́сь·

И҆ бꙋ́детъ е҆гда̀ послꙋшаете вс̂ѧ ѻ҆правле́нїа с̂и и҆ снабди́те сътвори́ти ѧ҆̀·

И҆ снабди́тъ г҃ь б҃ъ твои и҆ тебѣ, завт̑ѣ и҆ млс̑҇ть ꙗ҆́коже клѧ́сѧ ѿц҃емъ ва́шимъ·

И҆ възлю́битъ т̂ѧ и҆ блс̑҇витъ т̂ѧ, и҆ ѹ҆мно́житъ т̂ѧ.
и҆ блс̑҇ви́тъ пло́дъ чре́ва твое҆го, и҆ пло́дъ землѧ̀ твое҆ѧ.
и҆ пшени́цꙋ твою̀, и҆ вино̀ твоѐ и҆ е҆ле́и тво́и, и҆ ста́до воло́въ твои҆хъ·

и҆ па́ствꙋ ѻ҆ве́цъ твои҆хъ на землѝ е҆ю҆же клѧт̑сѧ ѿц҃емъ их̑ дати тебѣ̀·

И҆ блс̑҇венъ бꙋ́деши па́че всѣхъ ꙗ҆́зык̑҇, и не бꙋ́детъ въ ва́съ бес племе́нни, ниже непло́ды въ ско́тѣхъ твои҆х꙽·

И҆ ѿи҆́метъ г҃ь б҃ъ твои ѿ тебе вс̂е раслабле́нїе.
и҆ вс̂ю ꙗ҆́зю е҆гѷпетъскꙋю ѕлꙋю̀, ю҆же ви́дѣсте<.>

И҆ е҆лико съвѣси не възложит̑ на тѧ, н̂о въложит̑ ѧ҆̀ на вс̂ѧ ненави́дѧщаѧ тебѐ·

И҆ ꙗ҆́сти бꙋ́дешъ весь плѣнъ стра́нъ, и҆же г҃ь б҃ъ дае́тъ тебѣ̀ да не пощадѧт̑ ѻ҆́чи твоѝ ѿ нихъ, и҆ да не послꙋж́иши бо́гомъ и҆х꙽, ꙗ҆́ко вредъ тебѣ̀ е҆сть с̂е·

А҆́ще л̂и гл҃еши въ ѹ҆́мѣ̀ с̂и ꙗ҆́ко страна̀ с̂и множа́иши паче мене.
ꙗ҆ко възмогꙋ̀ а҆́зъ потребити ѧ҆̀, не възбо́исѧ и҆х꙽·

Па́мѧтїю да помѧне́ши е҆лико сътворѝ г҃ь б҃ъ твоѝ фараѻ́нꙋ и҆ всм̑ѣ е҆гѷптѧномъ·

Бѣды̀ вели́кїа ꙗ҆́же ви́дѣста ѻ҆́чи твоѝ.
зна́менїа ѻ҆́на и҆ чюдеса̀ вели́каѧ.
и҆ рꙋко́ю крѣ́пкою, и҆ мы́шцею высо́кою, ꙗ҆́ко и҆зведѐ т̂ѧ г҃ь б҃ъ твои.
та́ко сътворит̑ г҃ь б҃ъ вашъ, всѣмъ страна́мъ и҆хже т̂ы бои́шисѧ ѿ лица̀ и҆хъ·

И҆ ше́ршни по́слетъ г҃ь б҃ъ твои на ни́хъ до́ндеж̑ потребѧ́тсѧ ѻ҆ста́вленїи и҆ съкрове́нїи ѿ тебѐ·

Не вреди́шисѧ ѿ лица̀ и҆хъ.
ꙗ҆́ко г҃ь б҃ъ твои в꙽ тебѣ, б҃ъ вели́кїи и҆ крѣ́пкїи·

И҆ погꙋбит̑ г҃ь б҃ъ твои ꙗ҆зы́ки сїѧ, с лица̀ твое҆го по ма́лꙋ до ма́ла, не возмо́жеши погꙋби́ти и҆хъ въско́рѣ да не бꙋдет꙽ землѧ̀ пꙋста̀, да совокꙋпѧ́тсѧ и҆ роз̑множат̑сѧ ѕвѣрїе дивїи на́ тѧ·

И҆ предастъ е҆̀ г҃ь б҃ъ твои в рꙋцѣ твоѝ и҆ погꙋбѝ и҆хъ, погꙋбле́нїемъ вели́ким̑, до́ндеже и҆скорени́ши их̑·

И҆ преда́стъ цр҃и и҆хъ в рꙋцѣ твоѝ.
и҆ погꙋби́те и҆́мѧ и҆хъ ѿ мѣста сего̀.
и҆ не постоит̑ ни́же е҆ді́нъ пред̑ лицем̑ твоим̑, до́ндеже погꙋби́ши и҆хъ·

И҆ ваѧ́нїа боговъ их̑ и҆ж꙽же́ши на ѻ҆гнѝ, да не похо́щеши зла́та и҆ сребра̀ взѧ́ти себѣ̀ ѿ него, да не когда̀ съгрѣшиши того̀ ради.
ꙗ҆ко хꙋ́лно е҆сть гв҃и б҃ꙋ твое҆мꙋ·

Не вносѝ похꙋ́лы въ сво́и до́мъ, и҆ проклѧт̑ бꙋ́деши ꙗ҆́ко и҆ т̂о, н̂о проклѧ́тїем꙽ прокленеши лиши е҆̀ ꙗ҆́ко проклѧта̀·

Глв̑҇а, и҃·

Вс̂ѧ за́повѣди ꙗ҆́же заповѣда вам̑ днс̑҇ь, да снабдѝ твори́ти и҆̀ да живе́те, и҆ ѹ҆мно́житесѧ, и҆ внїи́дѣте и҆ прїимѣте зе́млю бл҃гꙋю.
е҆ю́же клѧ́тсѧ г҃ь б҃ъ ѿц҃емъ ва́шимъ·

И҆ да помѧне́ши весь пꙋть, и҆́мже прове́лъ тебѐ г҃ь б҃ъ твои, в꙽ пꙋсты́ни.
да и҆скꙋсѝ т̂ѧ и҆ зазлит̑ т̂ѧ, и҆ ѹ҆разꙋмѣе҆тсѧ е҆же въ срд̑цы твое҆мъ, а҆́ще снабди́ши за́повѣди е҆го и҆л̂и нѝ·

И҆ заѕлѝ тебѣ̀, и҆ гла́домъ заморѝ т̂ѧ, и҆ посем̑ пита т̂ѧ ма́нною, е҆же т̂ы не ѹ҆вѣдѣ н̂и ѿц҃ы твоѝ, и҆ да ꙗ҆ви́тъ тебѣ̀.
ꙗ҆́ко не ѻ҆ хлѣбѣ е҆ді́нем̑ жи́въ бꙋдетъ чл҃къ н̂о ѻ҆ всѧ́комъ словесѝ и҆з꙽ходѧщим̑ и҆зъ ѹ́стъ бж҃иих̑ жи́въ бꙋдетъ чл҃къ·

И ри́зы твоа̀ не раздра́шасѧ на тебѣ̀.
но́ѕи твои не ꙗ҆звитесѧ, с̂е м҃ лѣтъ·

И҆ сего̀ ради разꙋмѣ́еши срд̑цемъ твои҆мъ ꙗ҆́ко кт̂о чл҃къ нака́жетъ сн҃ъ свои.

Тако г҃ь б҃ъ твои наказꙋетъ т̂ѧ.
и҆ да снабди́ши за́повѣди г҃а б҃а твое҆го, ходи́ти во пꙋтѝ е҆го и҆ боа́тисѧ е҆го·

Гь҃ б̂о б҃ъ твой въведѐ т̂ѧ въ зе́млю бл҃гꙋю и҆ мно́гꙋ, и҆дѣже водоте́чи вод̑ны́ѧ і҆ и҆сто́чники глꙋбо́ки.
и҆сходѧщеи по по́лемъ и҆ горам̑·

Въ зем̑лю пшени́цы и҆ ꙗ҆́чме́ни, виноград̑ и҆ смо́кви и҆ ши́пцы, въ зе́млю ма́сличїю и҆ е҆ле́ю и҆ ме́дꙋ.
въ зе́млю на не́иже не с нището́ю и҆зъꙗ҆́си хлѣ́ба твое҆го.
и҆ не про́сиши ничто́же на не́и.
в꙽ землю в꙽ не́иже ка́менїе желѣз́но, и҆ ѿ горъ и҆хъ и҆сто́чит̑сѧ мѣдь·

И҆ ꙗ҆́си и҆ насыти́шисѧ и҆ блс̑҇ви́ши г҃а б҃а твое҆го, на землѝ бла́ѕѣи ю҆же е҆сть да́лъ тебѣ̀·

Во́ньми себѣ̀ не забꙋдѝ г҃а б҃а свое҆го, снабдѣти за́повѣди е҆го, и҆ сꙋдо́въ и҆ ѻ҆правле́нїи е҆го.
е҆ли́ко а҆́зъ заповѣдаю тебѣ днс̑҇ь, да не когда̀ ꙗ҆дыи насыти́в꙽сѧ и҆ хра́мы добры съгради́въ, и҆ всели́всѧ в н̂ѧ, и҆ волы твоѝ и҆ ѻв̑҇цы твоѝ ѹ҆мно́жатсѧ тебѣ̀, и҆ сребро̀ и҆ зла́то ѹ҆мно́жит̑сѧ тебѣ̀.
и҆ вс̂е е҆ли́ко т̂и е҆сть ѹ҆мно́жит꙽сѧ тебѣ·

И҆ посем̑ възнесе́шисѧ срд̑цем꙽ твоим̑ и҆ забꙋдеши г҃а б҃а твое҆го.
и҆звед̑шаго т̂ѧ и҆з꙽ землѧ̀ е҆гѷпет̑ски ѿ до́мꙋ рабо́ты.

И҆ прове́дшаго т̂ѧ сквоѕѣ пꙋсты́ню вели́кꙋю, и҆ стра́шнꙋю ѻ҆́нꙋ.
въ не́иж̑ ѕмїѧ̀ хапа́ющїѧ и҆ скорпїи, и҆ жажд̑а в не́иже не бѣѧ́ше воды̀, и҆же из̑ведѐ тебѣ̀ и҆с камы́ка несѣко́ма и҆сто́чник̑҇ водны́и·

И҆ пита́ѧи т̂ѧ ма́нною въ пꙋсты́ни.
е҆гоже не вѣ́де т̂ы ниже вѣ́дѧхꙋ ѿц҃ы твои, да заѕли́тъ т̂и да и҆скꙋ́ситъ т̂ѧ и҆ бл҃го т̂и сътвори́тъ напослѣдокъ твои·

да не рече́ши въ срд̑цы твое҆мъ крѣ́пость моѧ и҆ си́ла рꙋки мое҆ѧ сътворѝ мн̂ѣ си́лꙋ вели́кꙋю сїю·

да помѧне́ши г҃а б҃а твое҆го.
ꙗ҆́ко то́и дасть тебѣ крѣпость и҆ си́лꙋ твори́ти, и҆ да ѹ҆ста́витъ завт̑ѣ свои.
и҆мже клѧ́сѧ ѿц҃емъ твои҆мъ до днесь·

И҆ бꙋдет̑ а҆ще ли забве́нїемъ забꙋдеши г҃а б҃а твое҆го, и҆ по́идеши въ слѣдъ бого́въ и҆ныхъ, и҆ послꙋж́иши и҆мъ и҆ поклони́шисѧ и҆мъ, засвѣдѣтельствꙋю вамъ днесь нб҃семъ и҆ земле́ю ꙗ҆́ко па́гꙋбою поги́бнете·

Ꙗ҆́коже и҆ про́чїи ꙗ҆́зы́цы, ꙗ҆́же г҃ь б҃ъ погꙋблѧ́етъ ѿ лица̀ ва́шего·

Та́коже поги́бнете и҆хже ради не послꙋшасте гла́са г҃а б҃а ва́шего·

Глв̑҇а, ѳ҃·

Послꙋш́аи і҆и҆л҃ю т̂ы минꙋе҆ши і҆ѻ҆рда́нъ дне́сь.
внити прїѧ́ти страны̀ вели́кїѧ, и҆ крѣпча́иша паче ва́съ.
грады вели́ки и҆ ѹ҆гражде́ны до нб҃се·

Лю́ди вели́ки и҆ мно́ги и҆ предо́лжены, сн҃ы е҆на́ковы ꙗ҆́же т̂ы вѣси.
и҆ слы́шалъ е҆си.
кт̂о проти́вꙋ ста́нетъ сн҃омъ е҆на́ковымъ·

И҆ ѹ҆вѣ́си дне́сь ꙗ҆́ко г҃ь б҃ъ твои се́и преди по́идетъ пред̑ тобо́ю.
ѻ҆́гнь б̂о попалѧ́ай е҆сть се́и потреби́т꙽ ѧ҆̀, и҆ сїи ѹ҆клони́тъ и҆хъ ѿ лица̀ ва́шего и҆ потреби́тъ ѧ҆̀ въско́ре, ꙗ҆́коже ре́клъ е҆сть тебѣ г҃ь·

Не рцы̀ въ срд̑цы своем̑ е҆гда потребит̑ г҃ь б҃ъ твой страны̀ сїѧ ѿ лица̀ твое҆го гл҃ѧ пра́вдъ ра́ди мои҆хъ въведе м̂ѧ г҃ь причасти́ти зе́млю бл҃гꙋю сїю, н̂о безче́стїѧ рад̑и̑ стра́нъ сихъ г҃ь потребѝ ѧ҆̀ ѿ лица̀ твое҆го·

А҆ не пра́вды ради твое҆ѧ, ниже преподо́бїѧ ради срд̑ца твое҆го, т̂ы вхо́диши прїѧ́ти землю их̑, н̂о нече́стїѧ ра́ди и҆ безако́нїѧ ради стра́нъ сихъ, г҃ь ѿ лица̀ твое҆го потребї ѧ҆̀.
и҆ да ѹ҆ста́витъ завѣтъ и҆мже клѧ́тсѧ г҃ь ѿц҃емъ вашим꙽·

а҆враа́мꙋ и҆саа́кꙋ і҆а́ковꙋ·

И҆ да вѣси дне́сь ꙗ҆́ко не пра́вды ради твоеѧ, г҃ь б҃ъ дае́тъ тебѣ̀ зе́млю бл҃гꙋю сїю прїѧ́ти.
ꙗ҆́ко лю́дїе жесто́цы е҆сте·

помѧнѝ не забꙋди коли́ко раз̑гнѣ́васте г҃а б҃а свое҆го в꙽ пꙋсты́ни ѿ него́же дн҃е и҆зыдо́сте и҆з꙽ землѧ̀ е҆гѷпет꙽ски, даже вънидо́сте в мѣсто сїе·

Непокорѧ́щесѧ съгрѣши́сте пред̑ гм҃ъ.
и҆ въ хори́вѣ разгнѣвасте г҃а, и҆ разгнѣвасѧ г҃ь на́ вы, потреби́ти вас̑҇·

Въсходѧ́щꙋ мн̂ѣ на горꙋ̀, взѧ́ти двою дъскꙋ ка́мен̑҇нꙋ и҆ дъсцѣ ка́мен̑҇нѣ завѣта, и҆же завѣща г҃ь къ ва́мъ·

И҆ пребых̑ в горѣ м҃, дн҃їи, и҆ м҃, но́щїи хлѣ́ба не ꙗ҆до́хъ ниже воды̀ пи́хъ·

И҆ да́сть м̂и г҃ь дв̂ѣ дъсцѣ ка́менны напи́сано пр́ьстомъ бж҃їимъ.
в ни́хже бѧ́хꙋ напи́сана вс̂ѧ словеса̀ ꙗ҆́же гл҃а г҃ь къ ва́мъ въ горѣ̀.
ѿ среды ѻ҆гнѧ̀ въ дн҃ь събра́нїѧ·

И҆ бысть по м҃ дн҃їи, и҆ по м҃ но́щїи.
и҆ дастъ м̂и г҃ь дв̂ѣ дъсцѣ ка́меннѣ, дъсцѣ завѣта·

И҆ рече г҃ь къ мн̂ѣ въста́ни і҆ и҆зы́ди ско́ро ѿсю́дꙋ.
ꙗ҆́ко безако́нова́ша лю́ди твоѝ, ꙗ҆́же и҆зведѐ и҆з꙽ землѧ̀ е҆гѷпет꙽ски, състꙋпи́ша ско́ро с пꙋтѝ.
и҆же заповѣ́дахъ и҆мъ.
сътвори́ша себѣ солїѧ́нїѧ·

И҆ рече г҃ь къ мн̂ѣ, гл҃ахъ тебѣ̀ е҆ді́ною и҆ дв̂ажды, гл҃ѧ.
ви́дѣхъ лю́ди сїѧ, с̂е лю́дїе жестоковыи сꙋть.
ѻ҆ста́ви м̂ѧ да ѧ҆̀ потреблю̀ и҆ погꙋблю̀, і҆ и҆мѧ и҆хъ под̑ нб҃семъ, и҆ сотворю̀ т̂ѧ въ ꙗ҆зы́къ вели́къ и҆ крѣпок꙽, и҆ мног̑҇ па́че сихъ·

И҆ ѻ҆брати́всѧ снидо́хъ съ горы̀ и҆ гора̀ кꙋрѧ́шесѧ ѻ҆гнем̑ и҆ дв̂ѣ дъсцѣ свѣдѣ́нїа въ ѻ҆бою̀ рꙋ́кꙋ мое́ю.

И҆ ви́дѣхъ ꙗ҆́ко съгрѣши́сте пред̑ гм҃ъ бм҃ъ нашимъ, и҆ сътвори́сте себѣ̀ теле́цъ сълїꙗ҆нъ, и҆ състꙋпи́сте с пꙋтѝ ско́ро, и҆же заповѣ́да г҃ь вам̑ твори́ти.
и҆ ем̑ ѻ҆́бѣ дъсцѣ повергох̑ и̑ рꙋкꙋ моею̀ и҆ съкрꙋших̑ и҆х꙽ прд̑е вами·

И҆ моли́хсѧ пред̑ гм҃ъ второ́е, ꙗ҆коже и҆ пе́рвое, м҃, дн҃їи.
и҆ м҃, но́щїи, хлѣ́ба не ꙗ҆до́хъ и҆ воды̀ не пи́хъ.
всх̑ѣ ради грѣхъ ва́шихъ, ꙗ҆́же съгрѣши́сте творѧ́ще ѕло́е пред̑ гм҃ъ бг҃омъ ва́шимъ.
разгнѣ́вающи е҆го·

И҆ съ боꙗ҆́знїю бѣхъ гнѣ́ва ради и҆ ꙗ҆́рости, ꙗ҆́ко разгнѣвасѧ г҃ь на́ вы, да потреби́тъ васъ.
и҆ послꙋша менѐ г҃ь, и҆ въ то вре́мѧ·

И҆ на а҆ро́на разгнѣвасѧ г҃ь ѕѣ́ло е҆же погꙋби́ти е҆го.
и҆ моли́хсѧ за а҆а҆ро́на въ вре́мѧ ѻ҆́но·

И҆ грѣх́ъ вашъ и҆же сътвори́сте теле́цъ взѧх̑ е҆го и҆ съжжего́хъ на ѻ҆гнѝ, і҆ и҆зби́хъ и҆̀ и҆ сътро́хъ и҆̀ ѕѣ́ло, дажд̑ь бы́сть дро́бенъ, и҆ бы́сть ꙗ҆́ко пра́хъ и҆ просы́пахъ пра́хъ въ водоте́чь сходѧ́щꙋю съ горы̀·

И҆ въ запале́нїи, и҆скꙋше́нїи, и҆ въ гро́бѣхъ похотѣнїа раз̑гнѣ́вали бѣсте г҃а б҃а ва́шего·

И҆ е҆гда̀ в̂ы, пꙋстѝ г҃ь ѿ кади́сварнїѝ гл҃ѧ, възыди́те, и҆ прїимѣте зе́млю ю҆́же а҆зъ даю̀ вамъ и҆ съпроти́вистесѧ гл҃омъ г҃а б҃а ва́шего, и҆ не вѣровасте е҆мꙋ, и҆ не послꙋшасте словес̑҇ е҆го·

И҆ не покорѧ́щесѧ бѣ́сте г҃ꙋ ѿ дн҃е в о́ньже ꙗ҆́ви́сѧ вамъ·

И҆ молих̑сѧ пред̑ гм҃ъ, м҃, дн҃їи.
и҆ м҃, но́щїи, ꙗ҆́же моли́хсѧ, рече б̂о г҃ь погꙋби́ти васъ·

И҆ моли́хсѧ гв҃и и҆ реко́хъ, г҃и г҃и, цр҃ю стра́намъ не погꙋбѝ людїи свои҆хъ и҆ прича́стїа свое҆го е҆же и҆зба́ви крѣ́постїю твое́ю вели́кою ꙗ҆́же и҆зведѐ и҆з꙽ землѧ̀ е҆гѷпетъски крѣ́постїю твое́ю вели́кою и҆ рꙋко́ю си́лною и҆ мы́шцею свое҆ю высо́кою·

Помѧнѝ рабы̀ своѧ̀ а҆враа́ма, і҆саа́ка, і҆а́кова, и҆м꙽же сѧ клѧ̀ собо́ю.
не призира́и на жесто́чество людїи сихъ, и҆ на бесче́стїе и҆хъ, и҆ на грѣхѝ их̑, да не когда̀ рект̑ꙋ живꙋщ́їи на землѝ, ѿню́дꙋже и҆зведѐ насъ гл҃ющи.
не могїи г҃ь въвестѝ и҆хъ въ зе́млю ю҆́же и҆мъ ѻ҆бѣща̀, и҆ ненави́дѧ и҆хъ г҃ь и҆зве́дъ и҆ погꙋбѝ и҆хъ въ пꙋстыни·

Сїи же лю́дїе твоѝ и҆ прича́стїе твоѐ.
и҆хже и҆зведѐ и҆з꙽ землѧ̀ е҆гѷпетъски крѣ́постїю свое҆ю вели́кою, и҆ мыш̑҇цею высо́кою·

Глв̑҇а, і҃·

Въ ѻно вре́мѧ рече г҃ь къ мн̂ѣ.
и҆стешѝ себѣ дв̂ѣ дъсцѣ ка́меннѣ ꙗ҆́цѣже и҆ пе́рвїи, и҆ възы́ди къ мн̂ѣ на горꙋ̀ и҆ да сътвори́ши себѣ̀ ковче́гъ дре́вѧнъ, и҆ въпишꙋ на дъсцѣ словеса̀.
е҆ликоже их̑ бѣ на первых̑ дъсках꙽, и҆хже съкрꙋшѝ, и҆ да вложи́ши ѧ҆̀ въ ковче́гъ·

И҆ сътвори́хъ ковче́гъ ѿ дре́въ негнию́щъ.
і҆ и҆стеса́хъ дв̂ѣ дъсцѣ ка́мен꙽нѣ ꙗ҆́цѣ же и҆ пе́рвїи.
и҆ възыидо́хъ на горꙋ̀, ѻ҆́бѣ же дъсцѣ въ ѻ҆бою̀ рꙋ́кꙋ мою̀·

И҆ въписа̀ на дъскꙋ по писа́нїю пе́рвомꙋ, і҃, словес̑҇, ꙗ҆́же гл҃а г҃ь к ва́мъ, на горѣ̀ ѿ среды̀ ѻ҆гнѧ̀, и҆ вда́сть ѧ҆̀ г҃ь мн̂ѣ·

И҆ ѻ҆брати́в꙽сѧ снидо́хъ съ горы̀, и҆ вложи́хъ дъсцѣ въ ковче́гъ и҆же сѣтвори́хъ.
и҆ бѣ́ста т̂ꙋ ꙗ҆́коже повелѣ̀ м̂и г҃ь·

Сн҃ове же і҆и҆л҃еви въздвиго́шасѧ ѿ виро́ѳа, сн҃овъ и҆а҆ки́мль, мисадаин̑҇·

т̂ꙋ ѹ҆мре а҆а҆ро́нъ, и҆ погребе́нъ быс̑҇ т̂ꙋ, и҆ бы́сть жрецъ е҆лїа҆за́ръ сн҃ъ а҆а҆ро́нь въ ѿц҃а мѣсто·

ѿтꙋдꙋ же въздвигошасѧ въ гад̑гадъ, и҆ ѿ гад̑гада до и҆е҆таваѳа землѝ водотечь водъ·

Въ ѻ҆́но времѧ, ѿлꙋчѝ г҃ь племѧ̀ левѷино, носи́ти ковче́гъ завѣта гн҃ѧ.
и҆ пред̑стоѧ́ти пред̑ гм҃ъ слꙋжи́ти, и҆ моли́ти и҆ блс̑҇ви́ти и҆́мѧ е҆го, до дн҃ешнѧго дн҃е·

Сего̀ ради нѣ́сть левѷтомъ ча́сти н̂и жребїа въ братїи и҆хъ, г҃ь б̂о са́мъ прича́стїе и҆хъ, ꙗ҆́коже е҆сть ре́клъ им̑·

А҆́зъ же стоѧх̑ на горах꙽, м҃, дн҃їи.
и҆ м҃, но́щїи, и҆ послꙋша г҃ь менѐ вс̂е вре́мѧ, и҆ не въсхотѣ̀ г҃ь погꙋби́ти васъ·

И҆ рече г҃ь къ мнѣ грѧдѝ въздви́гнисѧ пред̑ люд̑мѝ си́ми, и҆ да вни́дꙋтъ и҆ причастѧт̑ зе́млю е҆ю́же клѧ́хсѧ ѿц҃емъ их̑ да́ти ю҆̀ си́мъ·

И҆ нн҃ѣ і҆и҆л҃ю чт̂о про́ситъ г҃ь б҃ъ тво́и ѹ҆ тебѐ, то́чїю да с̂ѧ боꙗ҆́ти г҃а б҃а твое҆го, и҆ ходити въ всѧ̀ пꙋтѝ е҆го и҆ люби́ти е҆го, и҆ слꙋжи́ти г҃ꙋ б҃ꙋ твое҆мꙋ, ѿ всего̀ срд̑ца твое҆го, и҆ ѿ всеѧ̀ дш҃а твое҆ѧ·

Снабдѣти за́повѣди г҃а б҃а твое҆го, и҆ ѻ҆правле́нїа е҆го, е҆лико а҆зъ заповѣ́даю днс̑҇е да т̂и бл҃го бꙋдет̑<.>

Се̂ г҃а б҃а твое҆го нб҃о, и҆ нб҃о нб҃си, землѧ̀ и҆ вс̂ѧ е҆лико е҆сть на не́и·

ѻ҆баче ѿц҃а ва́ша поѧ̀ прежд̑е г҃ь люби́ти ѧ҆̀.
і҆ и҆збра̀ племѧ̀ и҆хъ по ни́хъ ва́съ, па́че всѣ́хъ стра́нъ до дн҃ешнѧго дн҃е·

И҆ да пресѣче́те жесто́чь срд̑цъ ва́шихъ, и҆ вы́ю вашꙋ не жесточи́те по сем̑·

Гь҃ б̂о б҃ъ ва́шъ сїи б҃ъ бм҃ъ, и҆ г҃ь гм҃ъ·

Бг҃ъ вели́кїи и҆ крѣпкїи и҆ стра́шныи и҆же не зрит̑ лица̀, н̂и во́зметъ да́ра·

Творѧи сꙋдъ, прише́лцꙋ, и҆ сиротѣ̀ и҆ вдови́це·

и҆ люби́ти прише́лца да́ти е҆мꙋ хлѣ́бъ, и҆ ри́зꙋ·

И҆ люби́те прише́лца, прише́лцы б̂о бѣ́сте въ землѝ е҆гѷпет̑стѣи·

Га҃ б҃а твое҆го бо́исѧ, и҆ томꙋ̀ да слꙋж́иши, и҆ к томꙋ̀ прилѣпи́сѧ, и҆́менемъ е҆го клени́сѧ·

И҆ то́и хвала̀ твоѧ̀, и҆ то́и б҃ъ тво́и, и҆же сътворѝ тебѣ ве́лїа и҆ сла́внаѧ сїѧ, ꙗ҆́же ви́дѣста ѻ҆́чи твоѝ о҃, и҆ е҃ ю, дш҃ъ внидо́ша ѿц҃ы твоѝ въ е҆гѷпетъ, и҆ нн҃ѣ же сътворѝ т̂ѧ е҆сть г҃ь б҃ъ тво́и, ꙗ҆ко ѕвѣ́зды нбс̑҇ныѧ мно́жествомъ·

Глв̑҇а, а҃і·

И да лю́биши г҃а б҃а твое҆го, и҆ снабди́ши снабдѣ́нїа е҆го, и҆ ѻ҆правле́нїѧ е҆го, и҆ за́повѣди е҆го, и҆ сꙋды̀ е҆го вс̂ѧ дн҃и·

И҆ да ѹ҆вѣ́сте дне́сь ꙗ҆ко не дѣтемъ ва́шимъ гл҃ю ꙗ҆же не свѣ́дѧтъ ни ви́дѣша наказа́нїа г҃а б҃а твое҆го, и҆ вели́чества е҆го, и҆ рꙋ́кꙋ си́лнꙋю, и҆ мы́шцꙋ высо́кꙋю·

Ни̂ зна́менїа е҆го, н̂и чюдеса̀ е҆го, е҆ли́ка сътворѝ посредѣ е҆гѷпта фараѻ́нꙋ цр҃ю е҆гѷпетьскꙋ и҆ все́и землѝ е҆го·

И е҆ли́ко сътворѝ си́ле е҆гѷпетьстѣи и҆ ѻ҆рꙋж́їѧ и҆хъ, и҆ ко́ни и҆хъ.
ка́ко потопѝ вода чермна́го морѧ пред̑ лицем̑ и҆хъ женꙋщ́имъ и҆мъ по ва́съ, и҆ погꙋбѝ и҆хъ г҃ь б҃ъ до дн҃ешнѧго дн҃е·

И҆ е҆ли́ко сътворѝ ва́мъ въ пꙋсты́ни до́ндеже прїидо́сте на мѣ́сто сїе·

И҆ е҆лико сътвори, дафа́нꙋ и҆ а҆виро́нꙋ сн҃ома е҆лїа́влема сн҃а рꙋвинѧ.
ꙗ҆́же ѿврьз꙽ши землѧ̀ ѹ҆ста̀ своѧ̀ пожрѐ их̑ и҆ домы и҆хъ, и҆ кꙋща и҆хъ, и҆ вс̂е и҆хъ и҆мѣ́нїе с ни́ми средѝ всего̀ і҆и҆л҃ѧ.
Ꙗ҆́ко ѻ҆́чи ваши ви́дѣста вс̂ѧ дѣ́ла гн҃ѧ, вели́каѧ, е҆ли́ко сътворѝ вам̑ днесь·

И҆ да снабди́те вс̂ѧ за́повѣди е҆го е҆ли́ко а҆́зъ заповѣ́даю вамъ днс̑҇е.
да живе́те и҆ ѹ҆мно́житесѧ, и҆ въни́дѣте и҆ прїимѣте зе́млю, на ню́же в̂ы минꙋ́ете чрез꙽ і҆ѻ҆рда́нъ та́мо причасти́ти ю҆̀·

да мно́ги дн҃и бꙋ́дете на землѝ, е҆ю́же клѧ́тсѧ г҃ь ѿц҃емъ вашимъ.
да́ти и҆мъ и҆ сѣ́мени их̑ по них̑.
зе́млю кипѧ́щꙋ мле́комъ и҆ ме́дом̑·

Землѧ̀ б̂о е҆сть на ню́же в̂ы и҆́дете та́мо причасти́ти е҆ѧ̀·

Не ꙗ҆́ко землѧ̀ е҆гѷпетъска е҆сть, ѿню́дꙋже ѿхо́дите та́мо, е҆гда̀ сѣ́ютъ сѣ́мѧ, и҆ напаѧ́ютъ и҆̀ пое́нїемъ, ꙗ҆́ко ѻ҆гра́дꙋ ѕе́льнꙋю·

Землѧ̀ же в ню́же т̂ы вхо́диши та́мо причасти́ти ю҆̀, землѧ̀ го́рна и҆ ра́вна, ѿ дожда̀ нбс̑҇наго напаѧ́етсѧ·

Землѧ̀ ю҆́же г҃ь б҃ъ тво́и снабди́тъ всегда̀.
ѻ҆́чи г҃а б҃а твое҆го на не́и въ нача́ло лѣтꙋ, и҆ до конца̀ лѣтꙋ·

А҆́ще же слꙋхомъ послꙋш́аете всѣ́хъ заповѣдеи его, е҆ли́ко аз̑ заповѣ́даю тебѣ днс̑҇е·

люби́ти г҃а б҃а твое҆го, и҆ слꙋжи́ти е҆мꙋ ѿ всего̀ срд̑ца твое҆го, и҆ ѿ всеѧ̀ дш҃а твое҆ѧ·

И҆ да́стъ до́ждь землѝ твое́и по вре́мени ра́нныи и҆ по́зд̑ныи.
и҆ събере́ши жи́та твоѧ̀.
и҆ вино̀ твоѐ и҆ е҆ле́и твои·

И҆ да́си пищꙋ на се́лѣх꙽ ско́томъ твои҆мъ, ꙗ҆́дъ же и҆ насыти́шисѧ·

Блюдѝ себѐ, да не развелича́етсѧ срд̑це твоѐ.
и҆ пристꙋпи́вше послꙋ́жите бого́мъ и҆нѣмъ, и҆ покло́нитесѧ и҆мъ·

И҆ ꙗ҆́ростїю раз̑гнѣ́ваетсѧ г҃ь на́ вы, и҆ затвори́тъ нб҃о.
и҆ не бꙋ́детъ дождѧ̀ и҆ землѧ̀ не да́стъ плода̀ свое҆го, и҆ поги́бнете въско́рѣ съ землѧ̀ бл҃гїа ю҆́же г҃ь да́стъ ва́мъ·

И҆ да вложи́те словеса̀ с̂и въ срд̑ца ва́ша и҆ въ дш҃ꙋ ва́шꙋ.
и҆ да възложи́те ѧ҆̀ въ зна́менїе на́ рꙋкꙋ вашꙋ да бꙋ́дꙋтъ на челѣ́хъ междꙋ̀ ѻ҆чи́ма ва́шима·

И҆ да наѹ҆чи́те ча́да своѧ̀ гл҃ати сих̑ сѣдѧще въ домꙋ̀, і҆ и҆дꙋще въ пꙋть, и҆ лежа́ще и҆ въста́юще·

И҆ въпиши́те ѧ҆̀ на пра́зѣхъ хра́ма свое҆го, и҆ на вра́тѣхъ своихъ·

да ѹ҆мно́жатсѧ дн҃и ва́ши, и дн҃и сн҃овъ ва́шихъ.
на землѝ е҆ю́же клѧ́тсѧ г҃ь ѿц҃емъ ва́шимъ да́ти ю҆̀ ꙗ҆́ко дн҃їе нб҃ꙋ на землѝ·

И҆ бꙋ́детъ а҆ще слꙋхомъ послꙋш́аете всѣ́хъ за́повѣдеи сихъ, ꙗ҆́же ѧ҆̀ заповѣдаю ва́мъ днс̑҇е твори́ти.
люби́ти г҃а б҃а ва́шего, ходи́ти въ вс̂ѧ за́повѣди е҆го и҆ прилеплѧ́тисѧ къ немꙋ̀·

Тогда̀ ѿженет̑ г҃ь стра́ны сїа ѿ лица ва́шего, и҆ ѻ҆дръжи́те стра́ны великїа и҆ крѣ́пкїа ѕѣло па́че ва́съ·

Вс̂ѧ мѣ́ста на ни́хже ста́нетъ стопа̀ но́гъ ва́шихъ, вам̑ бꙋ́детъ, ѿ пꙋсты́нѧ, и҆ ѿ дꙋбрав̑҇, и҆ ѿ рѣкѝ вели́кїа е҆фра́т꙽, и҆ до мо́рѧ, е҆же на за́пади бꙋдт̑ꙋ предѣ́ли ва́ши·

Не ста́нетъ н̂икто́же пред̑ лицемъ ва́шимъ, и҆ тре́петъ ва́шъ и҆ стра́хъ ва́шъ възложи́тъ г҃ь б҃ъ вашъ на лицѐ всеѧ̀ землѧ̀ на ню́же а҆ще в꙽зы́идете ꙗ҆́коже гл҃а г҃ь къ ва́мъ·

Се̂ а́зъ даю̀ пред̑ ва́ми днс̑҇е, блс̑҇ве́нїе и҆ клѧ́твꙋ.
блс̑҇ве́нїе а҆ще послꙋш́аете за́повѣдїи г҃а б҃а ва́шего, е҆ли́коже а҆зъ заповѣдаю вамъ днс̑҇е·

Клѧ́твы же а҆ще не послꙋш́аете за́повѣди г҃а б҃а ва́шего, и҆же заповѣ́дахъ вамъ днс̑҇е·

И҆ съвратите́сѧ с пꙋтѝ и҆же заповѣ́дахъ вамъ, и҆дꙋщ́е послꙋжи́ти бого́мъ и҆нѣмъ и҆́хже не вѣ́сте·

И҆ бꙋ́детъ е҆гда̀ въведетъ тебѐ г҃ь б҃ъ твои, въ зе́млю въ ню́же минꙋ́ете та́мо причасти́ти е҆ѧ̀·

И҆ да да́си блс̑҇ве́нїе на горꙋ̀ гаризи́ню, а҆ клѧ́твꙋ на горꙋ̀ гева́лю.
е҆же е҆сть ѻ҆бо́нꙋ странꙋ̀ і҆ѻ҆рдана за пꙋтем̑ и҆же на за́пади слн҃ца въ землѝ ханаа҆н꙽стеи, ѻ҆бита́ющим̑ на за́пади слн҃ца бли́зъ голго́ла высо́каго·

Вы̂ бо̀ минꙋе́те і҆ѻ҆рда́нъ въшед̑ше прїѧ́ти землѧ̀, ю҆же г҃ь б҃ъ ва́шъ дае́тъ ва́мъ въ прича́стїе вс̂ѧ дн҃и, и҆ прїимете ю҆̀ и҆ всели́тесѧ в н̂ю·

И҆ да съхрани́те твори́ти вс̂ѧ за́повѣди е҆го, и҆ сꙋды̀ е҆го ꙗ҆же а́зъ даю̀ ва́мъ днс̑҇ь·

Глв̑҇а, в҃і·

Сїи́ же за́повѣди и҆ сꙋды̀ ꙗ҆́же снабди́те твори́ти на зем̑лѝ ю҆же г҃ь б҃ъ ѿц҃ъ ва́шихъ дает̑ вамъ въ прича́стїе всѧ дн҃и ꙗ҆́же в̂ы живе́те на землѝ·

Па́гꙋбою погꙋби́те вс̂ѧ мѣ́ста, въ ни́х же слꙋжи́ша т̂ꙋ стра́ны бого́мъ своимъ, ꙗ҆́же в̂ы прїимете на гора́хъ высо́кихъ и҆ хо́лмехъ, и҆ под̑ дре́вомъ сѣ́нным̑·

И҆ да раскопа́ете тре́бища и҆хъ, и҆ съкрꙋши́те столпы̀ и҆хъ, и҆ сады̀ и҆хъ съсѣче́те, и҆ ваѧ́нїа богов̑҇ и҆хъ и҆зож꙽же́те на ѻ҆гнѝ, и҆ поги́бнет̑ и҆́мѧ и҆хъ ѿ мѣ́ста того̀·

да не сътвори́те та́ко г҃ꙋ б҃ꙋ вашемꙋ.
н̂о на мѣ́стѣ и҆дѣже и҆збере́тъ г҃ь б҃ъ нашъ.
всѣмъ племене́мъ вашемъ призва́ти и҆́мѧ е҆го т̂ꙋ.
и҆ взы́щете и҆ въни́дете та́мо·

И҆ принесе́те т̂ꙋ вс̂есъжже́нїа ваша и҆ тре́бы ваша и҆ приноше́нїа ваша.
и҆ мл҃твы ваша и҆ во́лнаа ваша.
и҆сповѣ́данїа ваша, и҆ первенца̀ воло́въ вашихъ, и҆ ѻ҆ве́цъ вашихъ·

И҆ да ꙗ҆́сте та́мо пред̑ гм҃ъ бм҃ъ вашимъ.
и҆ възвесели́тесѧ ѻ҆ все́мъ, на не́же възложи́те рꙋкѝ ваша в̂ы и҆ до́мове ваши, ꙗ҆́ко т̂ѧ блс̑҇ви́лъ е҆сть г҃ь б҃ъ тво́и·

да не сътворите т̂ꙋ по всемꙋ̀ е҆ликоже творите зд̂ѣ днс̑҇ь, кожд̑о ѹ҆год̑но пред̑ собою·

Нѣ́сте б̂о пришлѝ до нн҃ѣ въ поко́и.
въ прича́стїе е҆же г҃ь б҃ъ вашъ дае́тъ ва́мъ·

Но̂ е҆гда̀ пре́идете і҆ѻ҆рда́нъ и҆ всели́тесѧ на землѝ ю҆́же г҃ь б҃ъ ваш꙽ причасти́тъ вамъ, и҆ поко́итъ вас̑҇ ѿ всѣ́хъ вра́гъ ва́ших̑ и҆же ѻ҆́крс̑҇тъ вас̑҇, и҆ всели́тесѧ без꙽ събла́зна·

И҆ бꙋ́дет̑ мѣ́сто и҆дѣже и҆збере́тъ г҃ь б҃ъ вашъ призва́ти и҆мѧ е҆го т̂ꙋ·

Тꙋ принесе́те вс̂е е҆ли́ко а҆зъ заповѣ́даю вамъ днс̑҇е.
вс̂есъжже́нїѧ ваша, и҆ тре́бы ваша.
и҆ десѧти́ны ваша, и҆ начат̑ки рꙋ́къ ваших̑, и҆ всѧ́къ и҆збра́нъ даръ вашъ.
е҆ли́ко ѻ҆бѣща́ете гв҃и б҃ꙋ ва́шемꙋ·

И҆ възвесели́тесѧ пред̑ гм҃ъ бм҃ъ ва́шимъ, в̂ы и҆ сн҃ове ва́ши, и҆ дще́ри ваши, и҆ рабы̀, и҆ рабы́нѧ ваша, и҆ левѷти и҆же ѹ҆ вратъ ва́ших̑, ꙗ҆́ко нѣ́сть им̑ ча́сти н̂и жре́бїа с ва́ми·

Блюдѝ себѐ са́мъ не приносѝ вс̂есъжже́нїа свое҆го въ всѧ́комъ мѣ́стѣ е҆го́же а҆ще възлю́биши·

Но̂ в мѣ́сте е҆же и҆збере́тъ г҃ь б҃ъ твои въ е҆ді́номъ грд̑а твоих꙽.
т̂ꙋ да принесе́ши вс̂есъжже́нїе твоѐ, и҆ т̂ꙋ сътвори́ши вс̂е е҆ли́ко а҆зъ заповѣда́ю тебѣ̀ днс̑҇ь·

Но̂ всм̑ѣ хотѣ́нїемъ дш҃а твое҆а.
да же́ртвꙋеши и҆ ꙗ҆́жь мѧ́са, по блс̑҇венїю г҃а б҃а твое҆го и҆же дадѐ тебѣ̀ въ всх̑ѣ гра́дѣх꙽ твои҆хъ, нечи́сты и҆ тебѣ̀, и҆ чи́стыи въкꙋ́пѣ да ꙗ҆́стъ ѧ҆̀, ꙗ҆́ко се́рнꙋ и҆ е҆ле́нь·

Ра́звѣ кро́ви да не ꙗ҆́сте, на́ землю пролива́ите ю҆̀ а҆ки во́дꙋ.

Не възмо́жеши ꙗ҆́сти въ гра́дх̑ѣ свои҆х꙽ десѧти́ны, пшени́ца твое҆ѧ и҆ вина̀ твое҆го, и҆ е҆ле́ѧ твое҆го.
первенца̀ воло́въ свои҆хъ, и҆ ѻ҆ве́цъ свои҆хъ, и҆ вс̂ѧ ѻ҆бѣти е҆же ѻ҆бѣща́еши, і҆ и҆сповѣ́данїа ваша, и҆ прино́съ рꙋкъ ва́ших꙽·

Но̂ пред̑ гм҃ъ бм҃ъ свои҆мъ да ꙗ҆́си ѧ҆̀ въ мѣ́сте и҆дѣже и҆зберет̑ г҃ь б҃ъ твои себѣ̀·

Ты̂ и҆ сн҃ъ твои и҆ дще́ри твоа̀ и҆ ра́бъ твои и҆ раба̀ твоѧ̀, и҆ левѷтин̑҇, и҆ прише́лецъ, и҆же въ гра́дх̑ѣ твоих̑, и҆ възвесели́шасѧ пред̑ гм҃ъ бм҃ъ твоим̑ ѻ҆ всем̑ на не́же возложи́ши рꙋкꙋ твою̀·

Блюдѝ себѐ са́мъ да не ѻ҆ставлѧ́еши левѷтинина въ вс̂е вре́мѧ до́ндеже е҆си жи́въ на землѝ·

А҆́ще же раз꙽шири́тъ г҃ь б҃ъ предѣ́лы твоѧ̀, ꙗ҆коже т̂и е҆сть гл҃а и҆ рече́ши да ꙗ҆́мъ мѧ́са.
а҆ще въсхо́щетъ дш҃а твоѧ̀ ꙗ҆ко ꙗ҆́сти мѧ́са.
въ все́мъ похотѣ́нїю дш҃а твое҆ѧ да ꙗ҆́си мѧ́са·

А҆́ще же пода́ле мѣ́сто ѿ тебѐ е҆же и҆збере́тъ г҃ь б҃ъ тво́и, призыва́ти и҆́мѧ е҆го т̂ꙋ·

и҆ тре́бꙋ положи́ши ѿ воло́въ свои҆хъ, и҆ ѿ ѻ҆ве́цъ свои҆хъ ꙗ҆́же да́стъ тебѣ̀ б҃ъ твои.
ꙗ҆́коже заповѣ́дах̑ тебѣ̀, да ꙗ҆́си въ гра́дѣхъ твоих̑ по похотѣнїю дш҃а твое҆ѧ·

Ꙗ҆́коже сѧ ꙗ҆́стъ серна̀ и҆ е҆ле́нь.
такоже да ꙗ҆си ѧ̀, нечи́стыи тебѣ̀ и҆ чи́стыи та́кожде да ꙗ҆дѧ́тъ·

Во́ньми крѣ́пце да не ꙗ҆́си кро́ви, кро́вь б̂о е҆сть дш҃а е҆го.
да не ꙗ҆́ст꙽сѧ дш҃а с мѧ́сы·

да не ꙗ҆́сте еа̀, н̂о на́ землю пролива́ите ѧ҆̀ а҆ки во́дꙋ, да не ꙗ҆́си ю҆̀.
да бл҃го тебѣ̀ бꙋ́детъ и҆ сн҃омъ твои҆мъ по тебѣ̀ въ вѣ́ки·

А҆́ще сътвори́ши с̂е, е҆же добро̀ и҆ ѹ҆гд̑оно е҆сть пред̑ гм҃ъ бм҃ъ твои҆мъ·

Ра́звѣ ст҃аѧ твоѧ̀ и҆же бꙋ́дет̑ тебѣ̀, и҆ ѻ҆бѣты твоѧ̀ възе́мъ да прїи́деши на мѣ́сто, и҆дѣже и҆збере́тъ г҃ь б҃ъ твои ѻ́но себѣ̀, призва́ти и҆мѧ е҆го т̂ꙋ·

И҆ да сътвори́ши вс̂ѧсъжже́нїѧ твоѧ̀, мѧ́са же и҆ кровь възнесе́ши на ѻ҆лтарь г҃а б҃а твое҆го.
кровь же тре́бъ твои҆х꙽.
да пролїе́ши пред̑ степе́ни ѻ҆лта́рѧ б҃а твое҆го, а҆ мѧ́са да ꙗ҆́си·

Снабдѝ и҆ послꙋш́аи и҆ да сътвори́ши вс̂ѧ словеса̀ ꙗ҆́же а҆зъ заповѣ́даю тебѣ̀ днс̑҇ь.
да бл҃го т̂и бꙋдет̑ и҆ сн҃омъ твоим̑ по тебѣ̀ въ вѣ́ки·

А҆́ще сътвори́ши добро̀ и҆ ѹ҆го́дно прд̑е гм҃ъ твои҆мъ·

А҆́ще же потребит̑ б҃ъ страны̀, в нѧже вхо́диши т̂ы та́мо прїѧ́ти зе́млю и҆хъ ѿ лица твое҆го, и҆ прїимеши ю҆̀ и҆ всели́шисѧ въ зе́млю и҆хъ·

Блюдѝ себѣ̀ са́мъ не възы́щи въ слѣ́дъ и҆т̂и и҆хъ, по потребле́нїю и҆хъ ѿ лица̀ твое҆го.
не възыщѝ богов̑҇ и҆хъ гл҃ѧ.
ка́ко творѧ́тъ страны̀ сїа бого́мъ свои҆мъ, сътворю̀ и҆ аз̑·

да не сътвори́ши г҃ꙋ б҃ꙋ свое҆мꙋ та́ко, похꙋ́лено бо е҆сть е҆го́же г҃ь ненави́дит̑.
сътвори́ша бого́мъ свои҆мъ.
ꙗ҆ко сн҃ы своѧ и҆ д꙽щери своѧ ж꙽гꙋтъ ѻ҆гнем̑ бого́мъ и҆мъ·

Вс̂е сло́во е҆же а́зъ заповѣ́даю тебѣ днс̑҇ь, с̂е снабдѝ твори́ти.
да не приложи́ши к семꙋ̀ н̂и ѹ҆́и҆меши ѿ него̀·

Глв̑҇а, г҃і·

Аще въста́нет̑ въ тебѣ̀ про̑҇ркъ и҆л̂и видѧ̀ со́нъ, и҆ да́стъ тебѣ̀ зна́менїѧ и҆ чюдеса̀·

и҆ прїиде зна́менїе и҆л̂и чю́до е҆же бꙋ́детъ гл҃ати рекі́и, и҆́демъ да послꙋж́имъ бо́гом̑ и҆нѣмъ, и҆хже не вѣ́сте·

да не послꙋшаете гл҃ъ прро̑҇ка того̀, и҆л̂и ви́дѧщаго со́нъ то́и.
ꙗ҆ко и҆скꙋша́етъ г҃ь б҃ъ васъ ѹ҆вѣдѣти а҆́ще лю́бите г҃а б҃а ва́шег̑҇ всѣмъ срд̑цемъ ва́шимъ и҆ все́ю дш҃ею ва́шею·

По г҃ѣ бѕ҃ѣ ва́шемъ, да хо́дите и҆ того бои́тесѧ, и҆ за́повѣди е҆го снабдите.
и҆ гла́са е҆го да послꙋшае҆те и҆ томꙋ послꙋж́ите, и҆ к немꙋ̀ прилепи́тесѧ·

И҆ про̑҇ркъ то́й и҆л̂и ви́дѧи со́нъ да ѹ҆́мрет̑·

Гл҃алъ б̂о е҆сть прельсти́ти т̂ѧ ѿ г҃а б҃а твое҆го и҆звед̑шаго тѧ и҆з꙽ землѧ е҆гѷпет̑скїа и҆зба́вльшаго тѧ и҆з рабо́ты·

Хотѧ́ще съврати́ти т̂ѧ с пꙋтѝ, и҆же заповѣ́да тебѣ г҃ь б҃ъ тво́и ходи́ти во́нь.
сего̀ ра́ди погꙋби́те сами зло́е ѿ васъ·

А҆́ще же молит̑ т̂ѧ брат̑ твои сн҃ъ мт҃ри твоеѧ̀ и҆л̂и сн҃ъ твои и҆л̂и дщѝ твоа̀, и҆л̂и жена̀ ло́на твое҆го, и҆л̂и дрꙋгъ твой то́ченъ дш҃и твое́й, ѻ҆та́и гл҃ѧ.
и҆́демъ и҆ послꙋ́жимъ бо́гомъ и҆нѣм꙽, и҆хже не ви́дѣ т̂ы н̂и ѿц҃ы твоѝ·

ѿ бого́въ странъ ꙗ҆же ѻ҆́крс̑҇тъ насъ, приближа́ющих̑сѧ тебѣ̀, и҆л̂и да́лних̑ ѿ тебѐ, ѿ конца землѝ до конца̀ землѝ·

Не восхощѝ и҆тѝ с ним̑, ни́же послꙋш́аи е҆го.
и҆ да не пощади́тъ ѻ҆́ко твое на него, и҆ не възлюбѝ е҆го и҆ да не прикры́еши е҆го·

Возвѣща́ѧ возвѣстиши ѻ҆ немъ.
и҆ рꙋка твоа̀ да бꙋдет̑ на не́мъ въ пр́ьвыхъ побитї ѝ, и҆ рꙋкѝ всѣхъ людїи послѣждь·

И҆ побїе́те е҆го ка́менїемъ и҆ ѹ҆́мретъ, ꙗ҆́ко възыска́лъ е҆сть ѻ҆брати́ти тебѐ ѿ г҃а б҃а твое҆го, и҆звед̑шаго т̂ѧ и҆зъ землѧ̀ е҆гѷпет̑ски ѿ до́мꙋ рабо́ты·

И҆ ве́сь і҆и҆л҃ь ѹ҆слы́шавъ ѹ҆бои́тсѧ и҆ не приложи́тсѧ посемъ сътвори́ти по словеси семꙋ̀ ѕло́мꙋ и҆же въ вас̑҇·

А҆́ще л̂и ѹ҆слы́шиши въ е҆ді́номъ ѿ град̑ ꙗ҆́же г҃ь б҃ъ да́етъ тебѣ всели́тисѧ т̂ꙋ гл҃ющихъ·

И҆зыидо́ша мꙋжѝ без꙽законїи ѿ нас̑҇, и҆ ѿврати́ша живꙋщ́аѧ въ гра́дѣхъ и҆хъ гл҃юще.
и҆́демъ да послꙋж́им꙽ бого́мъ и҆́нѣмъ, и҆́хже не вѣ́сте·

И҆ да възы́щеши и҆ вопраша́еши и҆ ѻ҆бы́щеши ѕѣло.
и҆ сеж̑ л̂и и҆́стинно сло́во бы́сть ꙗ҆́вѣ, и҆ похꙋ́ленїе е҆сть въ вас̑҇·

Се̂ ѹ҆бива́ѧ ѹ҆бїе́ши вс̂ѧ живꙋщ́аа въ гра́дѣ ѻ҆́ном̑ ѹ҆бо́емъ ме́чнымъ.
и҆ възложе́нїем꙽ да възложи́ши и҆хъ и҆ вс̂ѧ ꙗ҆же в ним̑·

И҆ ве́сь пл́ѣнь е҆го събере́ши и҆ в распꙋтїихъ е҆го.
и҆ да запали́ши гра̑ ѻ҆́гнем̑ и҆ всю̀ коры́сть е҆го всѧ́ческы пред̑ гм҃ъ бм҃ъ твои҆мъ, и҆ бꙋ́детъ пꙋстъ въ вѣ́ки, не въз꙽гра́дитсѧ посе́мъ·

да приложит̑сѧ ничто́же ѿ положенїѧ в рꙋцѣ твоѝ.
да ѿвратит̑ б҃ъ ѿ ꙗ҆́рости гнѣвъ сво́и, и҆ да́сть т̂и млс̑҇ть и҆ помилꙋет꙽ т̂ѧ и҆ ѹ҆мно́жит̑ т̂ѧ ꙗ҆́кож̑ е҆сть гл҃а тебѣ, и҆ ꙗ҆́коже сѧ е҆сть клѧ̀ г҃ь ѿц҃емъ ва́шимъ·

А҆́ще послꙋша́е҆ши гласа г҃а б҃а твое҆го, и҆ снабди́ши вс̂ѧ за́повѣди е҆го, ꙗ҆́же а҆зъ заповѣ́даю тебѣ дне́сь.
твори́ти добро̀ и҆ ѹ҆год̑но пред̑ гм҃ъ бм҃ъ твоим̑·

Глв̑҇а, д҃і·

Сн҃ове б̂о вы̀ г҃а б҃а ва́шего да не рѣж́етесѧ, и҆ не возложи́те плѣши межѝ ѻ҆чи́ма ва́шима на ме́ртвемъ·

Ꙗ҆́ко лю́дїе ст҃и е҆сте гв҃и б҃ꙋ ва́шемꙋ.
тебѐ б̂о и҆збра́лъ е҆сть г҃ь б҃ъ твои бы́ти е҆мꙋ себѣ̀ лю́демъ преподобным̑ ѿ всѣхъ стра́нъ ꙗ҆же на лицы̀ землѝ.
да не ꙗ҆́сте всего̀ скверна́ва·

Се въ ско́тѣхъ да ꙗ҆́сте, теле́цъ ѿ говѧд̑ а҆гнецъ ѿ ѻ҆вец̑҇, и҆ козе́лъ ѿ коз̑.
е҆ле́нѧ и҆ се́рнꙋ и҆ бꙋ́иволицꙋ, и҆ ла́нѧ, зꙋ́бръ, и҆ ѻ҆нагръ, саи҆га́къ, и҆ всѧк̑҇ ско́тъ на́ двое дѣ́лѧ па́зногти, и҆ копы́то на́ двое копы́тѧ.
и҆ възносѧ̀ жва́нїе во ско́тѣ сїѧ̀ да ꙗ҆́сте·

И҆ сих̑ да не ꙗ҆́сте ѿ възносѧ́щихъ жва́нїе, и҆ ѿ дѣлѧ́щихъ па́зногти на́ двое, н̂о копы́та не копы́тѧщих̑, велблю́да и҆ за́ѧца ꙗ҆́ко възносѧт̑ жва́нїа сїи н̂о копы́та не копы́тѧтъ нечи́сто с̂и вамъ·

И҆ свинїа̀ ꙗ҆́ко на́ двое дѣ́лѧт̑ па́зногти, и҆ копы́та копы́тит̑ сїѧ же жва́нїа не жꙋе́тъ нечи́ста с̂и ва́мъ е҆сть ѿ мѧ́са и҆хъ да не ꙗ҆́сте и҆ мр҃твечи́не и҆хъ да не прикаса́етесѧ·

И҆ сїѧж̑ да ꙗ҆́сте ѿ всѣх꙽ и҆же въ водѣ̀, е҆мꙋже е҆сть пе́рїе и҆ чешꙋѧ̀ ты́и да ꙗ҆́сте.
и҆ всемꙋ̀ е҆мꙋже нѣсть пе́рїа ни чешꙋѧ̀ да не ꙗ҆сте нечи́ста т̂а вам̑·

И҆ вс̂ю пти́цꙋ чи́стꙋ да ꙗ҆́сте·

И҆ сих̑же да не ꙗ҆́сте ѿ них̑ ѻ҆рла̀, и҆ но́га, и҆ ѻ҆рла̀ мо́рскаго, и҆ неꙗ҆́сыти, и҆кти́на и҆ подо́бныа сим̑·

И҆ вра́на, и҆ врабїѧ̀.
и҆ вы́пелица.
и҆ сꙋхола́плѧ и҆ ꙗ҆́стреба и҆ подо́бныа сим̑, и҆ вра́на но́щнаго, и҆ лилика, и҆ подо́бнаѧ симъ·

И҆ е҆родїѻ́на, и҆ ле́бедѧ і҆ и́винъ, и҆ катара́кта, и҆ вдо́да·

И҆ но́щнаго нетопырѧ, и҆ сыча̀, и҆ теслоно́са, и харадрїѻ́на и҆ подо́бныа сим̑, и҆ порфирїѻ́на·

И҆ вс̂ѧ га́ды пти́ческїа нечи́ста сїѧ ва́мъ, да не ꙗ҆́сте ѿ нихъ·

Всѧ́кꙋ пти́цꙋ чи́стꙋ да ꙗ҆́сте.
все ꙗ҆́же мр҃твечины да не ꙗ҆сте ѻ҆битал꙽никꙋ и҆же въ гра́дѣ да да́сте и҆ да ꙗ҆́стъ, и҆л̂и да ѿда́сте стра́н꙽никꙋ, ꙗ҆́ко лю́дїе ст҃и е҆сте гв҃и б҃ꙋ ва́шемꙋ, да не свари́ши ꙗ҆́гнѧте въ мле́цѣ ма́тери е҆го·

десѧти́ны да ꙗ҆́си ѿ всего̀ пло́да сѣмени свое҆го, плд̑о нив̑҇ твои҆хъ ѿ го́да до го́да·

да ꙗ҆́си ѧ҆̀ пред̑ гм҃ъ бм҃ъ свои҆мъ на мѣ́стѣ и҆дѣже и҆збере́тъ г҃ь б҃ъ твои, призыва́ти и҆́мѧ е҆го т̂ꙋ.
та́мо да принесе́ши десѧти́нꙋ пшени́ца твое҆ѧ и҆ вина̀ твое҆го, і҆ е҆ле́а твое҆го, и҆ прьвене́цъ воло́въ твоих̑ и҆ ѻ҆ве́цъ твоих̑, да сѧ наѹ҆чи́ши боѧ́тисѧ г҃а б҃а твое҆го вс̂ѧ дн҃и·

А҆́ще л̂и дале́че бꙋ́дет̑ пꙋтем̑ ѿ тебѐ и҆ не возмо́жеши донестѝ и҆хъ, ꙗ҆ко дале́че мѣ́сто ѿ тебѐ, е҆же и҆збере́тъ г҃ь б҃ъ твои, призывати и҆мѧ е҆го т̂ꙋ, ꙗ҆ко блс̑҇ви т̂ѧ г҃ь б҃ъ твои·

Тогда̀ ѿдасѝ сїе на ценѣ̀ и҆ во́змеши цѣнꙋ̀ в рꙋ́кꙋ свою̀, и҆ да и́деши въ мѣсто е҆же и҆збере́тъ г҃ь б҃ъ твои себѣ̀·

И҆ да́си цѣнꙋ на всем̑ на не́же т̂и помы́слит̑ дш҃а твоѧ̀ на волы̀ и҆ ѻ́вцы и҆л̂и на вино̀, и҆л̂и на ѻ҆ло́винꙋ и҆л̂и на вс̂е на не́же помышлѧет̑ дш҃а твоѧ, и҆ да ꙗ҆́си т̂ꙋ пред̑ гм҃ъ бм҃ъ твои҆мъ.
да възвесели́шисѧ т̂ы и҆ до́мъ твои·

Левѷтинъ же и҆же въ гра́дѣхъ твои҆хъ, не ѻ҆ста́виши е҆го ꙗ҆́ко нѣ́сть е҆мꙋ ча́сти, ни жре́бїа с тобо́ю·

По тре́хъ лѣтехъ да и҆знесе́ши вс̂ю десѧти́нꙋ жи́тъ свои҆хъ в т̂о лѣто ѻ҆́но да положи́шї ю҆̀ въ гра́дѣхъ свои҆хъ·

И҆ прїидетъ левѷтинъ ꙗ҆́ко нѣсть е҆мꙋ ча́сти, н̂и жре́бїа с тобо́ю и҆ прише́лецъ и҆ сирота̀ и҆ вдова̀, ꙗ҆же въ гра́дѣхъ твоих̑.
да ꙗ҆дѧ́тъ и҆ насы́тѧтсѧ и҆ блс̑҇вит̑ т̂ѧ г҃ь б҃ъ тво́и въ всѣхъ дѣлехъ твоих̑ ꙗ҆́же а҆ще сътвориши·

Глв̑҇а, е҃і·

Въ сед̑мо́е лѣто да сотвори́ши ѿпꙋще́нїе.
си́ же за́повѣдь ѿпꙋще́нїа, да ѻ҆ста́виши ве́сь до́лгъ свои им̑же дл́ъжен̑҇ ближнїи тебѣ̀.
и҆ бра́та своег̑҇ не стѧжѝ ꙗ҆́ко нарече́сѧ ѿпꙋще́нїе г҃ꙋ б҃ꙋ твое҆мꙋ·

ѿ стра́н꙽ника да стѧ́жеши, е҆ли́ко ти е҆сть ѹ҆ него̀.
а҆ бра́тꙋ свое҆мꙋ ѿпꙋще́нїе да сътвори́ши до́лга твое҆го ꙗ҆́ко нѣсть доста́точенъ·

Сего̀ ради словесѝ блс̑҇ве́нїем̑, блс̑҇ви́тъ т̂ѧ г҃ь б҃ъ твои.
въ землѝ ю҆же т̂и г҃ь б҃ъ дае́тъ въ прича́стїе прїѧ́ти ю҆̀·

А҆́ще же слꙋ́хомъ послꙋша́ете гла́са г҃а б҃а ва́шего, снабдѣти и҆ твори́ти вс̂ѧ за́повѣди сїѧ, ꙗ҆́же а҆́зъ заповѣ́даю тебѣ днесь·

Ꙗ҆́ко г҃ь б҃ъ твои блс̑҇ви́лъ т̂ѧ е҆сть ꙗ҆́ко̑ ти е҆сть гл҃алъ.
и҆ въ заи́мъ да́си страна́мъ мно́гимъ, ты́ же не за́имеши.
и҆ ѻ҆блада́еши т̂ы страна́ми мно́гами, тобо́ю же не ѻ҆блада́ютъ ни̂кто̀·

А҆́ще л̂и бра́тъ ѿ бра́тїа твоеѧ̀ бꙋ́детъ тебѣ̀ недоста́точен̑҇, въ е҆ді́номъ град̑ твоих̑ въ землѝ ю҆же г҃ь б҃ъ тво́и да́етъ тебѣ̀.
да не ѿврати́ши срд̑ца твое҆го, ни съж꙽мѝ рꙋкѝ твое҆ѧ пред̑ бра́томъ твои҆мъ просѧ́щимъ·

Прострѣнїемъ прострѝ рꙋ́кꙋ твою̀ е҆мꙋ.
и҆ вза́имъ да да́си е҆мꙋ е҆ли́ко про́сит̑.
и҆ е҆ли́ко е҆мꙋ недоста́нетъ·

Блюдѝ себѐ сам̑ да не бꙋ́детъ слово та́ино въ срд̑цы твое҆м꙽ безако́нїа гл҃ѧ.
приспѣе́тъ сед̑мое лѣто, ѿпꙋще́нїа·

И҆ съзло́бит꙽ ѻ҆́ко твоѐ бра́тꙋ твое҆мꙋ просѧ́щемꙋ, и҆ не да́си е҆мꙋ, и҆ възопїетъ на́ тѧ къ гв҃и, и҆ бꙋ́детъ т̂и грѣхъ велик̑҇·

данїе҆мъ да́си е҆мꙋ, и҆ занѧ́тїемъ за́имеши е҆мꙋ, е҆ли́коже а҆ще про́сит̑ ѹ҆ тебѐ, не съжа́ли с̂и въ срд̑цы своем̑, даю́щꙋ т̂и е҆мꙋ·

Ꙗ҆́ко сего̀ ради сло́ва блс̑҇ви́тъ т̂ѧ г҃ь б҃ъ тво́и въ всѣх꙽ дѣ́лехъ твои҆хъ, и҆ на вс̂е на не́же възложи́ши рꙋ́кꙋ твою̀·

И҆б̂о не ѻ҆скꙋдѣет̑ ндоста́точен̑҇ въ землѝ твое́и, сего̀ ради аз̑ заповѣ́даю слово с̂е гл҃ѧ.
ѿвръза́ѧ ѿве́рзи рꙋцѣ своѝ бра́тꙋ твое҆мꙋ ни́щемꙋ, и҆ просѧ́щемꙋ на землѝ твое́и·

А҆́ще л̂и прода́стъсѧ к тебѣ̀ брат̑ тво́и е҆врѣа́нинъ и҆л̂и е҆вреа́нынѧ да т̂и рабо́тае҆тъ ѕ҃ лѣтъ.
въ сед̑мо́е же да ѿпꙋс́тиши е҆го свобод̑на ѿ себѐ·

А҆́ще же пꙋ́стиши е҆го свобод̑на ѿ себѐ, да не ѿпꙋстиши е҆го тща̀.
па́мѧтное е҆мꙋ да ѹ҆гото́виши ѿ ѻ҆ве́цъ свои҆хъ и҆ ѿ пшени́ца свое҆ѧ и҆ ѿ вина̀ твое҆го, ꙗ҆́коже т̂ѧ блс̑҇вит̑ г҃ь б҃ъ тво́и и҆ да да́си е҆мꙋ·

И҆ помѧнѝ ꙗ҆́ко ра́бъ и҆ ты̀ б̂ѣ, въ землѝ е҆гѷпет̑стеи и҆ свободи т̂ѧ г҃ь б҃ъ тво́и ѿтꙋдꙋ·

Сего ра́ди и҆ а҆зъ заповѣ́даю тебѣ̀ твори́ти сло́во с̂е·

А҆́ще же гл҃етъ к тебѣ̀ не ѿидꙋ ѿ тебѐ ꙗ҆ко възлю́бих̑ т̂ѧ и҆ дом̑ твои.
и҆ ꙗ҆́ко лю́бо е҆мꙋ е҆сть ѹ҆ тебе·

да прїимеш̑҇ ши́ло, и҆ провръти́ши е҆мꙋ ѹ҆́хо пред̑ две́рми ѹ҆ степе́ни.
и҆ бꙋдет̑ ти раб꙽ въ вѣ́ки, и҆ рабѣ свое́и да сотвори́ши та́кожд̑е·

И҆ да не бꙋдет̑ же́стока пред̑ тобо́ю ѿпꙋща́емым̑ ѿ тебѐ свобод̑но.
ꙗ҆́ко и҆стѧ́женꙋю м꙽здꙋ рабо́тал̑҇ т̂и е҆сть, ѕ҃, лѣтъ.
и҆ блс̑҇ви́т꙽ т̂ѧ г҃ь б҃ъ тво́и въ всем̑ е҆же твори́ши·

И҆ всѧ́къ первене́цъ роже́н꙽ныи ѿ волов̑҇ твои҆хъ и҆ ѻ҆ве́цъ твоих̑.
мꙋжескъ пол̑҇ да ѻ҆ст҃иши гв҃и б҃ꙋ твое҆мꙋ, и҆ да не дѣ́лаеши первенце́мъ ѿ ю҆нцевъ, и҆ да не стриже́ши прьвенца̀ въ ѻ҆́вцахъ твои҆хъ·

Пред̑ гм҃ъ бм҃ъ твои҆мъ да ꙗ҆́си ѧ҆̀ ѿ лѣта до лѣта, въ мѣсте и҆дѣже и҆збере́тъ г҃ь б҃ъ тво́и, т̂ы и҆ до́мъ тво́и·

А҆́ще л̂и на не́мъ бꙋдет̑ порече́нїе, храмота̀, и҆л̂и слѣпота̀ и҆ вс̂е порече́нїе ѕло́е да не положи́ши и҆̀ тре́бы г҃ꙋ б҃ꙋ твое҆мꙋ·

Въ гра́дѣх꙽ твоих̑ да ꙗ҆́си ѧ҆̀, нечи́стыи и҆ чи́стыи ѹ҆ тебѐ.
та́кожде да ꙗ҆́сте ꙗ҆ко и҆ сернꙋ и҆ е҆ле́нѧ, ра́звѣ кро́ви да не ꙗ҆́си, на́ землю пролива́и и҆̀ а҆ки во́дꙋ·

Глв̑҇а, ѕ҃і·

Снабдѝ мс̑҇цъ но́выхъ, и҆ да твори́ши.
па́схꙋ гв҃и б҃ꙋ твое҆мꙋ.
ꙗ҆ко въ мс̑҇цъ но́выи и҆зведы́и т̂ѧ и҆зъ е҆гѷп꙽та но́щїю·

И҆ да жрътвꙋе҆ши па́схꙋ гв҃и б҃ꙋ твое҆мꙋ.
ѻ҆́вца и҆ говѧ́да, въ мѣ́сте е҆же и҆збере́тъ г҃ь б҃ъ тво́и себѣ̀ призыва́ти и҆́мѧ е҆го т̂ꙋ·

да не ꙗ҆́сѝ в н̂ю ква́са.
з҃, дн҃їи.
да ꙗ҆́си в н̂ѧ ѻ҆прѣ́сноки хлѣб꙽ ѕло́бныи ꙗ҆́ко съ т꙽ща́нїемъ и҆зыидо́сте и҆зъ е҆гѷпта да помина́ете дн҃ь и҆схо́да ва́шего.
ѿ землѧ̀ е҆гѷпетъски, вс̂ѧ дн҃и жи́тїѧ ва́шего·

да не ꙗ҆́ви́тсѧ тебѣ̀ ква́сно въ всѣхъ предѣ́лѣхъ твои҆хъ.
з҃. дн҃їи.
и҆ да не ѻ҆бъвечерѣ́етъ ѿ мѧ́съ ꙗ҆́же пожрете къ ве́черꙋ.
въ а҃. дн҃ь.
до ѹ҆́трїѧ·

Не возмо́жеши требова́ти па́схи н̂и въ е҆ді́номъ же гра́дъ твоих̑ ꙗ҆же г҃ь б҃ъ тво́и дае҆тъ тебѣ̀·

Но̂ въ мѣ́сте е҆же и҆збере́т꙽ г҃ь б҃ъ твои, призыва́ти и҆́мѧ е҆го т̂ꙋ.
т̂ꙋ требꙋ́еши па́схꙋ въ ве́черъ до за́хода сл҃нца, въ времѧ в не́же и҆зыидо́сте и҆з꙽ земѧ̀ е҆гѷпет꙽ски, и҆ съвари́ши і҆ и҆спече́ши и҆ ꙗ҆́си на мѣ́сте и҆дѣже и҆збере́тъ г҃ь б҃ъ твои себѣ̀, и҆ въз꙽врати́шисѧ заѹ҆́тра і҆ и́деши въ дом̑ сво́и·

ѕ҃ дн҃їи да ꙗ҆́си ѻ҆прѣ́сноки, въ седмы́и же дн҃ь и҆схо́дныи пра́здник̑҇ гв҃и б҃ꙋ твое҆мꙋ, да не сътвори́ши в н̂ѧ всѧ́каго дѣ́ла·

И҆ з҃, недѣ́ль и҆спо́лненых꙽ да сочте́ши себѣ̀, а҆ въ нача́ло же твое҆го се́рпа на жи́та.
начни че́сти з҃. недѣ́ль, и҆ да сътвори́ши пра́з꙽дникъ недѣ́лныи гв҃и б҃ꙋ твое҆мꙋ.
ꙗ҆́коже т̂и доспѣ́ет꙽ рꙋка̀, и҆ е҆ли́ко же да́сть т̂и.
ꙗ҆́коже т̂ѧ блс̑҇вѝ г҃ь б҃ъ тво́и·

И҆ възвесели́шисѧ пред̑ гм҃ъ бм҃ъ твои҆мъ, т̂ы и҆ сн҃ъ тво́и и҆ д꙽щѝ твоѧ, и҆ ра́бъ тво́и и҆ раба̀ твоѧ̀, и҆ левѷтинъ и҆же въ гра́дѣхъ твои҆хъ, и҆ прише́лецъ и҆ сирота̀, и҆ вдова̀ ꙗ҆́же въ ва́съ, въ мѣсте и҆дѣже и҆збере́тъ г҃ь б҃ъ тво́и себѣ̀, призыва́ти и҆́мѧ е҆го т̂ꙋ·

И҆ помѧне́ши ꙗ҆́ко раб̑҇ б̂ѣ и҆ т̂ы въ земли е҆гѷпет̑стеи, и҆ снабди́ши и҆ сътвори́ши за́повѣди е҆го·

И҆ пра́зд꙽ник̑҇ кꙋщ꙽ныи да сътвори́ши себѣ̀, з҃ дн҃їи, е҆гда̀ събере́ши ѿ ни́вы твое҆ѧ и҆ ѿ точи́ла твое҆го.
и҆ да́ сѧ възвесели́ши ѻ҆ пра́зднице твоем̑, т̂ы и҆ сн҃ъ твои.
и҆ д꙽щѝ твоѧ̀, и҆ ра́бъ и҆ раба̀ твоѧ̀ и҆ левѷт꙽ и҆ прише́лец꙽ и҆ сирота̀ и҆ вдова̀, и҆же въ гра́дѣхъ твои҆хъ·

з҃ дн҃їи да пра́зднꙋ́еши гв҃и б҃ꙋ твое҆мꙋ, въ мѣсте и҆дѣж́е и҆збе́ретъ г҃ь б҃ъ себѣ призыва́ти и҆́мѧ е҆го т̂ꙋ·

А҆ще же блс̑҇вит꙽ т̂ѧ г҃ь б҃ъ твой въ всх̑ѣ жи́тех̑ твои҆хъ, и҆ въ всем̑ дѣ́ле рꙋкъ твоих̑, и҆ бꙋ́деши веселѧ́сѧ·

И҆ три́жды въ лѣто да ꙗ҆влѧ́етсѧ всѧ́къ мꙋжескъ по́лъ пред̑ гм҃ъ бм҃ъ твои҆мъ·

На мѣ́стѣ е҆же и҆збра̀ г҃ь б҃ъ тво́и, въ пра́зд꙽никъ ѻ҆прѣ́сночныи, и҆ въ пра́здникъ недѣ́лныи, и҆ въ пра́зд̑ник̑҇ кꙋщныи.

И҆ да не ꙗ҆́ви́шисѧ пред̑ гм҃ъ бм҃ъ твои҆мъ то́щъ.
ко́ждо по постиже́нїю рꙋкы̀ свое҆ѧ, по блс̑҇венїю г҃а б҃а свое҆го и҆же да́лъ е҆сть тебѣ̀·

Сꙋдїѧ̀ и҆ кни́гочїѧ поста́виши себѣ̀ въ всѣ́хъ гра́дѣхъ твои҆хъ ꙗ҆́же г҃ь б҃ъ да́стъ тебѣ̀ по племенемъ, да сꙋ́дѧтъ лю́демъ сꙋ́дъ пра́ведныи.
да не ѹ҆кло́нѧтъ сꙋда̀.
ниже да зрѧ́тъ на лица̀ ниже да во́змꙋтъ м꙽зды̀.
м꙽зда̀ б̂о ѻ҆слеплѧ́етъ ѻ҆́чи мꙋ́дрыхъ, и҆ ѿме́щетъ словеса пра́ведныхъ·

Пра́вед̑не пра́веднаго възыщытѐ, да поживетѐ.
и҆ шед̑ше прїимѣте зе́млю, ю҆́же г҃ь б҃ъ твои дае́тъ ва́мъ·

да не насади́ши себѣ̀ садо́въ ниже дре́ва подлѣ̀ ѻ҆лта́рѧ г҃а б҃а твое҆го е҆же сътвори́ши себѣ̀ и҆ да не поста́виши себѣ̀ ка́пища е҆гож̑ възненави́дѣ г҃ь б҃ъ тво́и·

Глв̑҇а, з҃і·

И да не приведе́ши гв҃и б҃ꙋ твое҆мꙋ телца̀ н̂и ѻ҆вча́те на не́мже е҆сть порече́нїе, и҆ вс̂е сло́во ѕл̂о, ꙗ҆́ко хꙋ́лно гв҃и б҃ꙋ твое҆мꙋ е҆сть с̂е·

А҆́ще же сѧ ѻ҆брѧ́щетъ ѹ҆ тебѐ въ е҆ді́номъ ѿ град̑ твои҆хъ, ꙗ҆́же г҃ь б҃ъ дае́тъ тебѣ̀.
мꙋжъ и҆л̂и жена̀ иж̑ сътвори́т꙽ ѕл̂о пред̑ гм҃ъ бм҃ъ твоим̑ и҆ престꙋпит̑ завѣтъ е҆го.
и҆ шед̑ше послꙋж́итъ богом̑ и҆́нѣмъ, и҆ покло́нитсѧ и҆мъ.
сл҃нцꙋ и҆л̂и всемꙋ̀ ѿ нбс̑҇ных̑ е҆гоже нѣ́сть.
повелѣлъ т̂и г҃ь·

И҆ повѣдѧ́тъ т̂и с̂е е҆же ѹ҆слы́шиши, и҆ да възы́щеши ѕѣ́ло, и҆ а҆ще с̂е и҆́стин꙽но бꙋ́дет꙽ сло́во ꙗ҆ко хꙋле́нїе с̂е бꙋдет̑ въ і҆и҆л҃и.
да и҆зведе́ши чл҃ка, того̀ и҆л̂и женꙋ̀ т̂ꙋ ꙗ҆́же сътвори́ста дѣ́ло ѕло́е с̂е, при две́рех꙽ и҆ побїете и҆̀ ка́менїемъ, и҆ да ѹ҆́мретъ.
пред̑ двема̀ по́слꙋхома.
и҆л̂и пред̑ трима̀ да ѹ҆́мретъ ѹ҆мира́ѧи да не ѹ҆мира́етъ е҆ді́нѣмъ по́слꙋхом̑·

Рꙋка́ же по́слꙋхъ бꙋ́детъ на немъ пр́ьвое ѹ҆би́ти и҆̀.
и҆ рꙋка́ же всѣ́хъ людїи послѣж́дь.
и҆ да и҆зве́ржете ѕло́е ѿ вас̑҇ самѣхъ·

А҆́ще л̂и и҆знемо́жетъ сло́во ѹ҆ тебѐ въ сꙋдѣ̀, междꙋ кро́вїю и҆ кро́вїю.
и҆ ме́ждꙋ сꙋдом̑ и҆ сꙋ́дом꙽, и҆ ме́ждꙋ внѧ́тїе҆мъ внѧ́тїе, и҆ ме́жди прѣ́нїемъ прѣ́нїѧ·

Є҆гда словеса̀ сꙋ́днаѧ въ гра́дѣхъ твои҆хъ бꙋ́детъ, т̂о въставъ възы́идеши на мѣ́сто, е҆же и҆зберет̑ г҃ь б҃ъ тво́и призва́ти и҆́мѧ е҆го т̂ꙋ.

И҆ да вшед̑ши къ жерце́мъ и҆ левѷтомъ и҆ къ сꙋдїѝ и҆же бꙋдетъ въ ты́и дн҃и и҆ възыска́вше възвѣстѧ́тъ тебѣ̀ сꙋ́дъ·

И҆ сътвори́ши по словесѝ е҆же т̂и възвѣстѧт̑.
и҆ ѿ мѣста и҆же т̂и и҆збере́тъ г҃ь б҃ъ тво́и призыва́ти и҆мѧ е҆го т̂ꙋ·

И҆ да снабдиши ѕѣло твори́ти въ все́мъ е҆ли́ко зако́нъ положи́тсѧ тебѣ̀·

По зако́нꙋ и҆ по сꙋдꙋ̀ и҆же рекꙋтъ тебѣ̀ сътвори́ти да сѧ не ѹ҆кло́ниши ѿ словесѝ е҆же и҆звѣстѧт̑ тебѣ, н̂и на́ десно н̂и на́ лѣво·

И҆ чл҃къ и҆же сътвори́тъ презрѣнїе не послꙋшати жерца̀, пред̑стоа́щаго слꙋжи́ти во и҆́мѧ г҃а б҃а твое҆го и҆л̂и сꙋдїѧ и҆же въ ты́и дн҃и бꙋ́детъ.
да ѹ҆́мрет̑ чл҃къ то́и.
и҆ да и҆звержеши ѕло́е ѿ і҆ил҃ѧ·

И҆ вс̂и лю́дїе ѹ҆слы́шавше ѹ҆боѧ́тсѧ и҆ не беществꙋ́ютъ посем꙽·

А҆ще же вни́деши въ зе́млю ю҆́же г҃ь б҃ъ дае́тъ тебѣ̀ въ прича́стїе и҆ прїимеши ю҆̀, и҆ всели́шисѧ на не́и, и҆ рече́ши поста́влю кн҃ѕѧ себѣ̀ ꙗ҆ко и҆́ныѝ страны̀, ꙗ҆́же ѻ҆́крс̑҇тъ на́съ·

Поста́вѧ да поста́виши себѣ̀ кн҃ѕѧ е҆гоже и҆зберетъ г҃ь б҃ъ твои ѿ бра́тїа твое҆ѧ да поста́виши себѣ̀ кн҃ѕѧ, да не възмо́жеши себѣ̀ поста́вити кн҃ѕѧ чл҃ка чю́ждаго, е҆же нѣ́сть бра́тъ твои·

И҆ да не ѹ҆мно́житъ себѣ ко́нь и҆ да не възврати́тъ людїи въ е҆гѷпетъ, ꙗ҆́ко да не ѹ҆мно́жиши себѣ̀ ко́нь.
г҃ь б̂о рече ва́мъ не приложи́те възврати́тисѧ въспѧ́ть посе́мъ·

И҆ да не ѹ҆мно́жит꙽ себѣ̀ жен̑҇ да не съврати́тсѧ срд̑це е҆го, и҆ сребра̀ и҆ зла́та не ѹ҆мно́житъ себѣ̀ ѕѣ́ло·

И҆ бꙋдетъ е҆гда̀ сѧ́детъ на столѣ̀ вла́сти свое҆ѧ.
да въпи́шетъ себѣ̀ зако́нъ сїи въ кни́ги ѿ жре́цъ и҆ ѿ левѷтъ·

И҆ да бꙋдет̑ е҆мꙋ и҆ да чте́т꙽ по всѧ дн҃и жи́тїѧ свое҆го да сѧ наѹ҆́читъ боꙗ҆́тисѧ г҃а б҃а свое҆го, и҆ да снабди́тъ вс̂ѧ за́повыди сїѧ и҆ ѻ҆правле́нїѧ сїѧ твори́ти ѧ҆̀·

И҆ да сѧ не възвы́ситъ срд̑це е҆го ѿ бра́тїѧ е҆го да не престꙋ́питъ ѿ за́повѣдеи н̂и на́ десно н̂и на́ лѣво ꙗ҆ко да бꙋдетъ мно́ги лѣта въ вла́сти свое́и той и҆ сн҃ы е҆го с ни́мъ въ сн҃ѣхъ і҆и҆л҃евых̑·

Глв̑҇а, и҃і·

Да не бꙋ́детъ жерце́мъ и҆ левѷтомъ всемꙋ̀ племе́ни, ча́сти ниже жре́бїа съ і҆и҆л҃емъ.
принос̑҇ б̂о гн҃ь ча́сть и҆хъ, да ꙗ҆́дѧ́тъ ѧ҆̀·

Жре́бїи же да не бꙋдет̑ е҆мꙋ въ бра́тїи е҆го.
г҃ь б̂о сам̑ наслѣдїе е҆го, ꙗ҆́ко же гл҃алъ им̑·

Сеже сꙋ́дъ жре́ческъ ѿ людїи ѿ кладꙋщихъ тре́бꙋ·

А҆ще теле́цъ, а҆ще ѻ҆вцꙋ̀ да дасѝ жерцꙋ̀, ра́мо и҆ че́люсти и҆ ѹ҆́тро́бꙋ·

Нача́тки же пшени́ца твоеѧ и҆ вина̀ твое҆го и҆ е҆ле́ѧ твое҆го, и҆ нача́токъ стриже́нїѧ ѻ҆ве́цъ твои҆хъ да дасѝ е҆мꙋ.
ꙗ҆ко того̀ и҆збра́лъ е҆сть г҃ь б҃ъ твой, ѿ всего̀ племе́ни твое҆го, пред̑стоѧ́ти пред̑ гм҃ъ бм҃ъ твои҆мъ, слꙋжи́ти и҆ блс̑҇вити во и҆́мѧ гн҃е, то́и и҆ сн҃ове е҆го въ вс̂ѧ дн҃и·

А҆ще же прїидет̑ левѷтинъ ѿ е҆ді́наго гра́дъ твои҆хъ.
ѿ всѣхъ сн҃овъ і҆и҆л҃евъ, и҆дѣже е҆сть ѻ҆бита́лъ.
ꙗ҆ко похо́щетъ дш҃а е҆го в мѣсте е҆же и҆збере́тъ г҃ь.
да слꙋжитъ и҆́мени г҃а б҃а вашего ꙗ҆́коже и҆ вс̂ѧ бра́тїѧ е҆го левѷти предъстоꙗ҆́щеи та́мо пред̑ гм҃ъ·

Ча́сть раздѣле́нꙋю да ꙗ҆́стъ, ра́звѣ прода́жа и҆же въ ѿч҃ествѣ·

А҆ще же вни́деши въ зе́млю ю҆же г҃ь б҃ъ дае҆тъ тебѣ̀·

да не навы́кнеши твори́ти по похꙋле́нїемъ стра́нъ тѣ́хъ.
да не ѻ҆брѧ́щетсѧ въ тебѣ̀ ѻ҆́чища́ѧ сн҃а свое҆го, и҆ дщери свое҆ѧ ѻ҆гне́мъ.
въл꙽хвꙋѧ́ вълъхвова́нїе, и҆ чарꙋѧ́и чарова́нїе·

ѻ҆бава́ѧ ѻ҆бава́нїѧ, и҆ въ ѹ҆тро́бѣ волъхвꙋѧ́и и҆ смотрѧ́ай ко́би, и҆ въпраша́ѧй мр҃твыхъ·

Є҆сть б̂о похꙋ́ленъ гв҃и б҃ꙋ твоемꙋ.
всѧк̑҇ творѧи похꙋле́нїѧ сїѧ, си́х꙽ б̂о ра́ди похꙋле́нїи, потребит̑ ѧ҆̀ г҃ь б҃ъ твои ѿ лица̀ твое҆го·

И҆ да бꙋ́деши съверше́нъ пред̑ гм҃ъ бм҃ъ твои҆мъ, съ страна́ми же си́ми да не причасти́шисѧ.
сїи б̂о чарова́нїи, и҆ волъхвова́нїи послꙋшают꙽, а҆ тебѣ̀ не та́ко дал̑҇ е҆сть г҃ь б҃ъ твои·

Прро̑҇ка ѿ средѣ бра́тїѧ твое́ѧ въста́витъ тебѣ̀ г҃ь б҃ъ тво́и.
ꙗ҆́ко менѐ того̀ послꙋшаите·

По всемꙋ̀ е҆ли́ко проси́л꙽ е҆си г҃а б҃а твое҆го в хори́вѣ, въ дн҃ь зва́нїѧ гл҃юще.
да не приложи́мъ посем̑ слы́шати глс̑҇а г҃а б҃а на́шего, и҆ ѻ҆гнѧ̀ вели́каго сего̀ не ви́димы посе́мъ да не и҆зъмре́мъ·

И҆ рече г҃ь къ мн̂ѣ прѧ́мо вс̂е е҆ли́ко гл҃ахꙋ·

Про̑҇рка въста́влю им̑ ѿ среды̀ бра́тїѧ и҆хъ.
ꙗ҆́ко и҆ тебѐ, въда́мъ сло́во мое въ ѹ҆ста̀ е҆го, и҆ гл҃етъ и҆мъ ꙗ҆́коже заповѣ́даю е҆мꙋ·

Чл҃къ же тои и҆же не послꙋшаетъ словесъ е҆го, е҆ли́коже гл҃етъ про̑҇ркъ въ и҆́мѧ моѐ, а҆ а́зъ м꙽щꙋ̀ ѿ него·

Ра́звѣ е҆же про̑҇ркъ е҆ли́ко, а҆ще бесче́ствꙋетъ гл҃ати въ и҆́мѧ моѐ сло́во, е҆гоже не повелѣхъ е҆мꙋ гл҃ати, і҆ и҆же а҆ще въз꙽гл҃етъ въ и҆мѧ бо́гъ и҆́нѣхъ, да ѹ҆́мретъ про̑҇ркъ то́и·

А҆́ще же рече́ши въ срд̑цы свое҆мъ, ка́ко позна́емъ сло́во е҆гоже нѣсть гл҃алъ г҃ь·

Є҆ли́коже а҆ще гл҃ет̑ про̑҇ркъ въ и҆мѧ гн҃е.
и҆ не ѹ҆лꙋ́читсѧ слово с̂е е҆гоже нѣсть гл҃алъ г҃ь, въ бесче́стїе гл҃ал̑҇ про̑҇ркъ той не попꙋсти́те живота̀ е҆мꙋ, н̂о да ѹ҆бі́ете е҆го·

Глв̑҇а, ѳ҃і·

Внегда́ же погꙋби́тъ г҃ь б҃ъ твои страны̀ ꙗ҆́же г҃ь б҃ъ твои дае́тъ тебѣ зе́млю и҆хъ.
и҆ причасти́ши ю҆̀, и҆ всели́шисѧ въ гра́ды и҆хъ и҆ въ домы̀ и҆хъ·

Тр̂и гра́ды да ѿлꙋчи́ши себѣ̀ средѝ землѧ̀ свое҆ѧ, юж̑ г҃ь б҃ъ твои дае́тъ тебѣ̀ въ прича́стїе, ѹ҆гото́ви себѣ̀ пꙋть, и҆ на́ трое раздѣлѝ предѣ́лы зем̑лѧ̀ твое҆а, ю҆же раздѣлѧ́етъ тебѣ̀ г҃ь б҃ъ твои, и҆ да бꙋдетъ ѹ҆бѣ́жище та́мо всѧ́комꙋ ѹ҆бїицы·

Се́ же да бꙋ́детъ заповѣд́анїе ѹ҆бїицы, и҆же а́ще ѹ҆бѣжи́тъ та́мо и҆ жи́въ бꙋ́детъ.
и҆же а́ще ѹ҆бїет̑ бли́жнѧго свое҆го не хотѧ̀, си́ же не ненави́дѣ е҆го пре́жд̑е вчера́шнѧг̑҇ дн҃и и҆ тре́тїѧго·

І҆ и҆же а҆ще по́идет̑ с по́дрꙋгомъ е҆го въ лѣ́съ събира́ти дрова̀, и҆ попо́лъзнетъ рꙋка̀ е҆мꙋ съ секи́рою сѣкꙋщи дрова̀, и҆ спад̑ секи́ра с топори́ща лꙋ́читъ по́дрꙋга е҆го и҆ ѹ́мрѣтъ·

И҆ сїи да ѹ҆бѣжи́тъ въ е҆ді́нъ ѿ град̑ сих̑ и҆ да бꙋдетъ жи́въ·

да не го́нитъ ѹ҆́жика кро́ви въ слд̑ѣ ѹ҆би́вшаго, ꙗ҆ко раз̑горит̑сѧ срд̑це е҆мꙋ и҆ пости́гнетъ и҆̀·

А҆́ще бꙋ́детъ надолзѣ пꙋть е҆го и҆ ѹ҆бїет̑ дш҃ꙋ и҆ ѹ́мрет̑·

Сїе же нѣсть сꙋ́дъ смр҃тныи, поне́же не б̂ѣ ненави́дѧ е҆го пре́жд̑е вчера́шнѧго и҆ тре́тїѧго дн҃и·

Сего̀ ради заповѣ́даю а҆зъ тебѣ̀ сло́во с̂е гл҃ѧ, тр̂и гра́ды да ѿлꙋ́чиши себѣ̀·

А҆́ще л̂и разши́ритъ г҃ь б҃ъ предѣ́лы твоѧ̀, ꙗ҆коже клѧ́сѧ ѿц҃емъ твои҆мъ, и҆ да́стъ тебѣ г҃ь вс̂ю зе́млю ю҆же ре́клъ ѿц҃емъ твои҆мъ да́ти·

А҆́ще послꙋшае҆ши твори́ти вс̂ѧ за́повѣди сїа, ꙗ҆́же а҆́зъ заповѣ́даю тебѣ̀ дне́сь.
люби́ти г҃а б҃а свое҆го, и҆ ходи́ти въ вс̂ѧ пꙋтѝ е҆го вс̂ѧ дн҃и·

И҆ да приложи́ши себѣ̀ е҆щѐ тр̂и гра́ды к сим̑ трїем̑ гра́домъ.
и҆ да не пролїе́тсѧ кро́вь без̑ви́нна въ землѝ твое҆и.
ю҆же г҃ь б҃ъ тво́и дае҆тъ тебѣ̀ въ прича́стїе.
и҆ да не бꙋ́детъ на тебѣ̀ кро́ви пови́н꙽ны·

А҆́ще же бꙋ́детъ чл҃къ ненави́дѧ по́дрꙋга свое҆го.
и҆ под̑са́дꙋ сътвори на́нь, и҆ въста́нетъ на́нь и҆ ѹ҆бїет̑ дш҃ꙋ е҆го и҆ ѹ́мретъ, и҆ въбѣ́гнетъ въ е҆ді́нъ гра́дъ сихъ·

да по́слютъ ста́рцы гра́да того, и҆ да пои҆ма́ют꙽ е҆го и҆ ѿтꙋ́дѣ, и҆ да предадѧ́тъ е҆го в рꙋцѣ ѹ҆́жицы кро́ви, и҆ да ѹ҆́мрет̑·

да не пощади́тъ ѹ҆бо е҆го ѻ҆́ко твоѐ, и҆ да ѻ҆чи́стиши кровь без꙽грѣшнꙋ ѿ і҆и҆л҃ѧ, и҆ бл҃го бꙋ́детъ тебѣ̀·

И҆ да не прелꙋчи́ши предѣ́ла по́дрꙋга свое҆го, ꙗ҆́же поста́виша ѿц҃ы твоѝ въ прича́стїи твое҆мъ.
и҆́мже причасти́лсѧ е҆си въ землѝ ю҆же г҃ь б҃ъ дае́тъ тебѣ̀ въ прича́стїе твоѐ·

И҆ да не пребꙋдет̑ по́слꙋхъ е҆ді́нъ въ послꙋшество̀ на чл҃ка по всѧ́кои ѻ҆би́де и҆ по всѧ́комꙋ грѣхꙋ̀, и҆же а́ще съгрѣши́тъ.
н̂о при ѹ҆стѣхъ двою̀ свѣдѣтель и҆л̂и трїе҆хъ, да ста́нетъ всѧ́ко сло́во.

А҆́ще л̂и ста́нетъ по́слꙋхъ неправди́в꙽ на чл҃ка гл҃ѧ до него̀ безче́стїе·

да ста́нета ѻ҆́ба чл҃ка и҆́ма же е҆сть прѧ̀ пред̑ гм҃ъ, и҆ прд̑е жерцы, и҆ пред̑ сꙋдїа́ми и҆же бꙋ́дꙋтъ въ ты́и дн҃и·

И҆ да и҆спыта́ютъ и҆хъ сꙋдїѧ̀ прилѣжно.
сеже по́слꙋхъ непра́веденъ послꙋшествова́ше непра́вдꙋ и҆ сꙋпротивлѧ́асѧ на бра́та свое҆го.
да сътворите е҆мꙋ ꙗ҆коже и҆ ѻ́нъ ѹ҆мы́сли сꙋпроти́въ на бра́та свое҆го, да ѿвр́ьжете ѕло́е ѿ вас̑҇ самѣ́хъ, да и҆ про́чїи ѹ҆слы́шавше ѹ҆боѧтсѧ, и҆ не приложа́тъ къ семꙋ̀ твори́ти словесѝ ѕла́го сего̀ въ вас̑҇·

да не пощади́тъ и҆̀ ѻ҆́ко твоѐ.
н̂о дш҃а въ дш҃и мѣ́сто, ѻ҆́ко въ ѻ҆́ка мѣ́сто, зꙋ́бъ въ зꙋ́ба мѣ́сто, рꙋка̀ въ рꙋкѝ мѣ́сто, нога̀ въ ногѝ мѣ́сто.
по всемꙋ̀ и҆же а́ще кт̂о да́стъ поро́къ на по́дрꙋга своего, си́це възда́ст꙽сѧ е҆мꙋ·

Глв̑҇а, к҃·

Аще л̂и и҆зы́идеши на́ брань къ враго́мъ твоим̑, и҆ ви́дв̑҇ѣ ко́ни и҆ вса́дники и҆ люды мно́жаиши тебѐ да не ѹ҆бои́шисѧ и҆хъ·

Ꙗ҆́ко г҃ь б҃ъ твои с тобо́ю, и҆зведы́и т̂ѧ и҆з꙽ землѧ̀ е҆гѷпет꙽ски·

И҆ бꙋдетъ е҆гда̀ прибли́жишисѧ к ра́ти.
и҆ пристꙋпи́въ жрецъ да гл҃етъ к лю́демъ рекїи къ ни́мъ·

Послꙋшаи і҆и҆л҃ю, в̂ы въхо́дите днесь на ра́ть къ враго́мъ ва́шимъ.
да не ѻ҆слабѣ́етъ срд̑це ва́ше н̂и ѹ҆бо́итесѧ, н̂иже ѹ҆страши́тесѧ, и҆ не ѹ҆клони́тесѧ ѿ лица и҆хъ·

Ꙗ҆́ко г҃ь б҃ъ вашъ и҆ды́и пред̑ ва́ми способъствꙋе́тъ на врагѝ ва́ши и҆ сп҃сет̑ васъ·

И҆ да гл҃ютъ кни́гочїѧ къ лю́демъ рекꙋще, е҆гда̀ кт̂о е҆сть чл҃къ създа́выи хра́минꙋ но́вꙋ и҆ нѣсть ѻ҆бнови́лъ е҆ѧ, да и́детъ и҆ да възврати́тсѧ въ до́мъ свои, да не ѹ҆́мрет꙽ на ра́ти, и҆ чл҃къ и́нъ да не ѻ҆бнови́т꙽ еѧ̀·

И҆ егда̀ чл҃къ и҆же насади́лъ е҆сть виногра́дъ и҆ нѣсть сѧ весели́л꙽ ѿ него, да и́детъ и҆ възврати́тсѧ въ до́мъ свои, да не ѹ҆́мретъ на ра́ти.
и҆ чл҃къ и҆нъ възвесели́тсѧ ѿ него·

И҆ е҆гда̀ чл҃къ и҆же ѻ҆брꙋчи́лъ е҆сть женꙋ̀ и҆ нѣсть понѧ́лъ еѧ̀, да и́детъ и҆ възврати́тсѧ въ до́мъ свои и҆ да не ѹ҆́мрет꙽ на ра́ти·

І҆ и́нъ чл҃къ по́имет̑ ю҆̀·

И҆ да приложа́тъ кни́гочїа гл҃ати къ лю́демъ и҆ да рекꙋтъ·

и҆ егда̀ кт̂о чл҃къ страшли́въ и҆ сла́бъ срд̑цемъ, да и́детъ и҆ възврати́тсѧ въ до́мъ свои, да не ѹ҆стра́шитъ срд̑ца брата свое҆го а҆ки срд̑це своѐ·

И҆ бꙋдетъ е҆гда̀ ѹ҆мо́лъкнꙋтъ кни́гочїѧ гл҃юще къ лю́демъ, и҆ да поста́вѧтъ вое҆во́ды лю́демъ, и҆ пред̑вожда во́емъ·

А҆щеж̑ прїидеши къ гра́дꙋ вое҆ва́ти на́нь, и҆ възове́ши ѧ҆̀ с ми́ром꙽·

А҆́ще ѹ҆бо ми́рное ѿвѣща́ютъ т̂и, и҆ ѿвр́ьзт̑ꙋ тебѣ̀ гра́дъ и҆ вс̂и лю́дїе ѻ҆брт̑ѣшїисѧ въ гра́дѣ, да бꙋдꙋтъ т̂и да́нь даю҆́щи, и҆ послꙋшающїи тебѐ·

А҆ще ли же не покорѧ́тъ ти сѧ, и҆ сътворѧт̑ с тобо́ю ра́ть, и҆ ѻ҆бсѧ́деши ѧ҆̀.
и҆ е҆гда̀ преда́стъ ѧ҆̀ г҃ь б҃ъ твои въ рꙋцѣ твоѝ.
да и҆збїеши всѧкъ мꙋжескъ по́лъ и҆хъ, в немъ ѹ҆бїенїемъ ме́чнимъ.
развѣ же́нъ и҆мѣнеи всѣхъ, и҆ скотъ и҆ всего́ е҆ликоже е҆сть въ гра́дѣхъ их̑, и҆ все стѧжа́нїе да плѣни́ши себѣ, и҆ да ꙗ҆си весь плѣн꙽ враг̑҇ свои҆хъ, ꙗ҆́же г҃ь б҃ъ дает̑ тебѣ̀·

Та́ко да сотвори́ши всѣм꙽ вра́гом̑ и҆же сꙋть дале́че ѿ тебѐ ѕѣ́ло, и҆же не сꙋть ѿ стра́нъ гра́дъ си́хъ·

Но̂ и҆ ѿ сихъ гра́дъ, и҆хже г҃ь б҃ъ дае́тъ тебѣ прїѧ́ти зе́млю и҆хъ, ѿ них̑ б̂о да не ѻ҆живи́те всѧ́каго дыха́нїѧ, н̂о и҆ проклѧ́тїем꙽ проклени́те и҆хъ хет꙽ѳе́ѧ, и҆ а҆м꙽морре́ѧ, и҆ ханане́ѧ, и҆ ѳерезе́ѧ.
и҆ е҆ве́ѧ, и҆ еѹ҆се́ѧ, и҆ гергесе́а ꙗ҆́коже т̂и е҆сть заповѣ́да г҃ь б҃ъ твои.
да не наѹ҆чат̑ сътвори́ти вас̑҇ всѧ́кїѧ нечистоты̀ и҆хъ, е҆же твори́ша бого́мъ свои҆мъ.
и҆ съгрѣши́те пред̑ гм҃ъ бм҃ъ своим̑·

А҆ще же ѻ҆бсѧ́деши грд̑а дн҃и мно́ги вое҆ванїи въ принѧ́тїе е҆го, да не посѣче́ши садо́вїѧ е҆го, възложи́въ желѣзо на́нь.
н̂о да ꙗ҆́си пло́дъ ѿ нихъ, а҆ самаго да не посѣче́ши.
е҆гда̀ чл҃къ древо е҆же въ дꙋбра́вѣ сни́ти ѿ лица̀ твое҆го въ забра́ла.
н̂о дре́во вс̂е и҆же вѣси ꙗ҆́ко не ꙗ҆́стъсѧ плодъ е҆го с̂е потребѝ и҆ посѣчѝ.
и҆ сътворѝ лѣствица на́ градъ.
и҆же сътворѧ́тъ на́ тѧ ра́ть до́ндеж̑ ти сѧ въдадѧ́тъ·

Глв̑҇а, к҃а·

Аще ли сѧ ѻ҆брѧ́щетъ ѹ҆бїен̑҇ лежа̀ на́ поли.
в зем̑лѝ ю҆́же г҃ь б҃ъ дае́тъ тебѣ принѧ́ти и҆ не вѣ́дѧтъ и҆же е҆го ѹ҆би́лъ·

И҆ да прїидꙋт꙽ ста́рцы и҆ сꙋдїѝ твоѝ.
и҆ да и҆змѣ́рѧтъ до гра́дъ ѻ҆́крс̑҇тъ ѹ҆бїенаго.
и҆ бꙋдет̑ гра́дъ приближа́ѧсѧ ѹ҆бїе́номꙋ.
и҆ да и҆мꙋтъ ста́рцы гра́да того ю́ницꙋ ѿ говѧ́дъ, е҆ю́же не дѣ́лано н̂и въ ѧ҆рмѣ̀ не тежа̀·

И҆ да и҆зведꙋт꙽ ста́рцы гра́да того̀ ю́ницꙋ в де́брь сꙋ́хꙋ.
в не́иже нѣ́сть ѻ҆́рано ниже насѣѧ́но, и҆ да пресѣкꙋтъ жи́лы ю́ница в꙽ дебрѝ.
и҆ да пристꙋпѧтъ жерцы̀ и҆ левѷти, ꙗ҆́ко тїи и҆збра̀ ес̑҇ г҃ь б҃ъ тво́и пред̑стоѧ́ти е҆мꙋ, и҆ блс̑҇ви́ти въ и҆́мѧ е҆го, и҆ въ ѹ҆стѣхъ и҆хъ да бꙋдт̑ꙋ вс̂ѧ гл҃анїѧ, и҆ всѧ́ка прѧ̀·

И҆ вси́ же ста́рцы гра́да того̀ и҆же приближа́ютсѧ ѹ҆бїе́номꙋ да ѹ҆мыют̑ рꙋцѣ въ кро́ви ю́ница е́иже пресѣ́чены сꙋть жи́лы въ дебрѝ·

И҆ ѿвѣща́вше да рекꙋтъ рꙋцѣ на́ши не пролїѧ́ша кро́ви сеѧ̀ и҆ ѻ҆́чи на́ши не ви́дѣли е҆ѧ̀.
млс̑҇тивъ бꙋ́ди лю́дем̑ свои҆мъ, і҆и҆л҃ю, и҆хже и҆зведѐ г҃и из̑ землѧ̀ е҆гѷпетъски, и҆ не возложѝ кро́ви непови́нны средѣ люде́и твоих̑ і҆и҆л҃ѧ н̂о и҆зба́вы и҆хъ ѿ кро́ви тоѧ̀<.>

И҆ та́ко ѿи́меши кро́вь непови́ннꙋ ѿ среды себѐ, а҆ще сътвори́ши до́брое и҆ ѹ҆го́дное пред̑ гм҃ъ бм҃ъ твои҆мъ·

А҆́ще и҆зы́идеши на́ брань проти́вꙋ враго́мъ твои҆мъ и҆ преда́стъ ѧ҆̀ г҃ь б҃ъ твои в꙽ рꙋцѣ твоѝ, и҆ плѣни́ши плѣ́нъ ѿ них̑.
и҆ ѹ҆зри́ши въ плѣ́не женꙋ̀ до́брꙋ ѻ҆бличїем̑, и҆ възлю́биши е҆ѧ̀, и҆ по́имеши ю҆̀ себѣ въ женꙋ̀.
тогда въведе́ши ю҆̀ въ до́мъ свой, и҆ да ѻ҆бро́снеши главꙋ̀ еѧ̀ и҆ да в꙽рѣжеши но́гти еѧ̀, и҆ да съвлече́ши ри́зы плѣнн́ыѧ е҆ѧ с неѧ̀.
и҆ да сѧ́детъ в꙽ домꙋ̀ твое҆мъ и҆ да сѧ пла́четъ ѿц҃а свое҆го, и҆ ма́тери своеѧ̀, мс̑҇цъ дн҃їи.
и҆ посем̑ въни́деши к не́и и҆ съвокꙋ́пишисѧ с не́ю и҆ бꙋ́дет꙽ т̂и жена̀·

И҆ бꙋ́дет꙽ а҆ще не въсхо́щеши еѧ̀ да ѿпꙋ́стиши ю҆̀ свобо́днꙋ, прода́жею же да не продасѝ еѧ̀ на цѣнѣ̀, и҆ да не ѻ҆ста́виши еѧ̀ поне́же ѻ҆бидѣлъ ю҆̀ е҆си·

А҆́ще ли бꙋдет̑ мꙋжꙋ дв̂ѣ женѣ̀, е҆ді́на е҆мꙋ люба̀ а҆ дрꙋга́ѧ не люба̀, и҆ породи́тъ е҆мꙋ люба̀ и҆ не люба̀, и҆ бꙋдетъ сн҃ъ прьворожде́ныи ѿ не люби́мыѧ·

И҆ бꙋдетъ воньже дн҃ь разде́лит̑ сн҃омъ свои҆мъ, и҆мѣнїе свое.
и҆ да не воз̑мо́жетъ прьвенцем̑ быти сн҃ъ люби́мыѧ презрѣ́вши не люби́мыѧ прьвен꙽ца̀·

Но̂ сн҃а нелюби́мыѧ въ прьвенецъ прїимет꙽, и҆ дастъ е҆мꙋ сꙋгꙋ́бо ѿ всего̀ ꙗ҆́же ѻ҆брѧ́щетсѧ е҆мꙋ, ꙗ҆́ко се́й е҆сть нача́ло чад̑ е҆го, и҆ семꙋ̀ достои́тъ прьвен꙽ство̀·

А҆́ще л̂и комꙋ̀ бꙋ́детъ сн҃ъ непокори́въ, и҆ гꙋби́тель непослꙋшаѧѝ гла́са ѿц҃а свое҆го и҆ гла́са мт҃ре свое҆ѧ и҆ нака́жꙋтъ е҆го, и҆ не послꙋша́етъ и҆хъ·

да по́имет̑ е҆го ѿц҃ъ е҆го и҆ мт҃и е҆го, и҆ да и҆зведꙋтъ е҆го пред̑ ста́рцы гра́да свое҆го, и҆ пред̑ вра́та мѣста свое҆го·

И҆ да рекꙋтъ къ мꙋжем̑ гра́да свое҆го, сн҃ъ на́шъ сїи непокори́въ е҆сть и҆ гꙋби́тель и҆ непослꙋжает̑ рѣ́чи на́шеѧ, вѣтꙋѧ́ пїа́нствꙋет̑·

И҆ да побїю́тъ и҆̀ мꙋжи гра́да сего̀ ка́менїемъ и҆ да ѹ҆́мретъ.
да и҆змѣте ѕло́е ѿ себѐ са́ми, да и҆ дрꙋѕїи слы́шавше ѹ҆боа́тсѧ·

А҆́ще л̂и бꙋ́детъ в кои́мъ грѣсѣ̀ сꙋ́дъ смр҃тныи и҆ ѹ҆ме́ртвїе и҆ повѣ́ситї е на́ древѣ.
да не преме́длитъ тѣло е҆го на́ древѣ, н̂о въ гро́бѣ погреби́те и҆̀ въ то́иже дн҃ь·

Ꙗ҆́ко проклѧт̑ е҆сть ѿ б҃а всѧ́къ висѧ́и на́ древѣ, да не ѻ҆скверна́виш꙽ зе́млѧ ю҆́же г҃ь б҃ъ тво́и да́етъ тебѣ̀ въ прича́стїе·

Глв̑҇а, к҃в·

Аще ви́диши телца̀ бра́та свое҆го, и҆л̂и ѻ҆вцꙋ̀ е҆го блꙋдѧ́щꙋ на пꙋтѝ не минѝ и҆̀, н̂о ѻ҆браще́нїемъ, ѻ҆братѝ и҆хъ бра́тꙋ свое҆мꙋ·

А҆́ще л̂и нѣ́сть бли́зꙋ тебѐ брат̑ твои·

и҆ не ѹ҆вѣси е҆го, заи҆мѝ е҆го внꙋтрь до́мꙋ твое҆го, и҆ да бꙋ́детъ ѹ҆ тебѐ до́ндеже взы́щетъ их̑ бра́тъ тво́и, и҆ ѿда́си их̑ е҆мꙋ·

Та́кожде сътвори́ши и҆ ѻ҆слѧти е҆го, и҆ ри́зе е҆го, и҆ та́ко да сътвори́ши всемꙋ погꙋбле́номꙋ бра́та твое҆го, е҆ли́коже и҆збѣгнет꙽ е҆мꙋ.
и҆ ѻ҆брѧ́щеши ѧ҆̀, да не возмо́жеши минꙋти ѧ҆̀·

Ни́же пре́зри ѻ҆слѧ́ти бра́та свое҆го.
и҆л̂и телца̀ е҆го пад̑шагосѧ на пꙋтѝ да не мине́ши е҆го, въста́вѧ ѧ҆̀ да въста́виши с ним̑·

И҆ да не бꙋ́детъ ѹ҆тварь мꙋжеска на женѣ̀.
н̂и да ѻ҆блачи́тсѧ мꙋжь в ри́зꙋ же́ньскꙋ, ꙗ҆́ко гнꙋсенъ е҆сть гв҃и б҃ꙋ твое҆мꙋ, всѧ́къ творѧ́и сїѧ·

А҆́ще л̂и гд̂ѣ лꙋчи́ши гнѣздо птичїе прд̑е ѻ҆чи́ма свои҆ма на пꙋтѝ и҆л̂и на дре́вѣ нѣкоем̑, и҆л̂и на землѝ, и҆ в нем̑ птен̑҇ца и҆л̂и ꙗ҆́и҆ца и҆ мт҃и сѧ́дет̑ на птенцх̑ѣ и҆ли ꙗ҆́и҆цѣхъ, да не во́змеши ма́тере съ п꙽тенцы̀·

Но̂ ѿпꙋ́стомъ ѿпꙋс́тиши ма́терь, а҆ птен꙽ца̀ во́змеши себѣ̀, да ти бл҃го бꙋ́детъ.
и҆ мно́ги дн҃и бꙋ́деши·

А҆́ще л̂и съгради́ши храм̑ но́въ, да сътвори́ши и҆ ѻ҆гражденїе хра́мови свое҆мꙋ.
и҆ да не сътвори́ши ѹ҆бо́ю въ домꙋ̀ твое҆мъ, а҆́ще паде́тъ пады́и ѿ него·

И҆ да не сѣ́еши виногра́да твое҆го разли́чь, да сѧ не ѻст҃итъ плод̑.
и҆ сѣмѧ е҆же насѣе҆ши съ плодо́мъ ви́н꙽номъ·

И҆ да не ѻ҆ре́ши ю҆нце́мъ и҆ ѻ҆слѧ́темъ въкꙋпѣ.
и҆ да сѧ не ѻ҆блече́ши въ ри́зꙋ раз̑ноли́чнꙋ, солнꙋ̀ и҆ во́лны в꙽кꙋпѣ тка́нꙋ·

И҆ повра́зки да сътвори́ши себѣ на четы́рехъ кра́ехъ ѻ҆дежа свое҆ѧ, в ню́же а҆́ще ѻ҆блече́шисѧ·

И҆ а́ще кт̂о по́иметъ женꙋ̀ и҆ бꙋ́детъ с не́ю, и҆ възненави́дитъ е҆ѧ̀·

И҆ приложит̑ е́й ви́нна словеса̀, и҆ возложит꙽ на́ ню и҆́мѧ ѕло́е.
и҆ въз꙽г҃летъ, женꙋ̀ сїю поѧ́хъ, и҆ пришед̑ к не́и не ѻбрѣтох̑ ю҆̀ дв҃цею·

И҆ възем꙽ши ѿц҃ъ дв҃цы и҆ мт҃ри да и҆знесꙋтъ деви́чьство ѻ҆трокови́ца, пред̑ стра́ца къ вратом̑·

И҆ речет̑ ѿц҃ъ ѻ҆трокови́ца къ стра́рцем̑, дще́рь мою̀ сїю да́хъ мꙋжꙋ семꙋ̀ въ женꙋ̀.
и҆ нн҃ѣ же възненави́дв̑҇ѣ е҆ѧ·

прилага́етъ е́й ви́н꙽на словеса̀ гл҃ѧ, не ѻ҆брѣто́хъ дще́ри твое҆ѧ дѣ́вою.
а҆ с̂е дѣвъство дще́ри мое҆ѧ, и҆ да раз̑гнт̑ꙋ ри́зы пред̑ старцы гра́да ѻ҆́ного·

И҆ да по́имꙋтъ ста́рцы гра́да ѻ҆́ного мꙋжа того̀ и҆ накажꙋтъ и҆̀·

И҆ да ѻ҆бвинѧ́тъ и҆̀, р҃, си́кль, и҆ дадѧт̑ ѿц҃ꙋ ѻ҆трокови́ца, ꙗ҆́ко проне́слъ ес̑҇ и҆́мѧ ѕл̂о на дв҃цꙋ і҆и҆л҃ьтескꙋ, и҆ па́ки да бꙋ́детъ е҆мꙋ жена̀, и҆ не возмо́жет̑ ѿпꙋсти́ти е҆ѧ̀, по всѧ̀ лѣта·

А҆́ще л̂и бꙋ́детъ въи҆стиннꙋ сло́во с̂е.
и҆ не ꙗ҆́ви́тсѧ дѣв꙽ство ѻ҆трокови́ца·

да и҆зведꙋт꙽ дѣви́цꙋ пред̑ вра́та хра́ма ѿц҃а е҆ѧ̀, да побїют̑ ю҆̀ ка́менїем꙽, мꙋжи град̑стїи, и҆ да ѹ҆́мрет̑.
ꙗ҆ко сътворѝ безꙋмїе въ сн҃ѣхъ і҆и҆л҃евых̑.
проблꙋдѝ до́мъ ѿц҃а свое҆го.
і҆ и́змите ѕло́е ѿ себѐ са́ми·

А҆́ще л̂и мж̑ꙋ допꙋстит̑сѧ лежа́ти съ женою мꙋжа́тою, да ѹ҆бїютъ ѻ҆́ба, мꙋжа́тꙋю и҆ лежа́щаго с не́ю, да ѿи́мꙋтъ ѕло́е ѿ і҆и҆л҃ѧ·

А҆́ще же бꙋ́детъ дѣ́ва съвѣща́на мꙋжꙋ и҆ ѹ҆ласкавъ ю҆̀ мꙋжь дрꙋгїи въ гра́де и҆ бꙋдет̑ с не́ю·

да и҆зведе́те ѻ҆́ба пред̑ вра́та град̑наѧ, и҆ да побїе́те ѻ҆́ба ка́менїем̑, и҆ ѹ҆мрт̑ꙋ.
ѻ҆трокови́цꙋ, поне́же не въпи́ла въ гра́дѣ а҆ мꙋжа поне́же е҆сть ѻ҆би́дилъ женꙋ̀ по́дрꙋга свое҆го, и҆ ѿи҆мѣте ѕло́е ѿ себѐ са́ми·

А҆́ще на́ поли понаси́лит꙽ мꙋжь дв҃ꙋ съвѣща́нꙋю, и҆ нꙋ́ждею ѻ҆би́дит̑ ю҆̀ да ѹбїе́те мꙋжа бы́вшаго с не́ю·

А҆ ѻ҆трокови́цы не сътвори́те ничто́же, нѣсть б̂о дѣ́вѣи грѣха̀ смр҃тнаго.
а҆́ки кт̂о въста́нетъ на по́дрꙋга свое҆го и҆ ѹ҆бїе́тъ дш҃ꙋ е҆го·

Та́коже е҆сть и҆ с̂е дѣло, и҆ е҆гда кт̂о на́ поли понасилит̑ ю҆̀, възопѝ ѻ҆трокови́ца съвѣща́ннаѧ и҆ не бы́сть кт̂о помога́ѧй е́й·

А҆́ще л̂и кт̂о поси́лит̑ дв҃ꙋ ꙗ҆́же нѣсть съвѣща́на, и҆ нꙋж́ею бꙋ́детъ с не́ю, и҆ ѻ҆бличит̑сѧ·

да дас̑҇ мꙋжь то́й ѿц҃ꙋ ѿрокови́ци, н҃, дидра́гмъ сребра̀ и҆ томꙋ̀ бꙋ́детъ жена̀, поне́же ѻ҆би́дилъ ю҆̀ е҆сть, и҆ не возможет̑ ѿпꙋсти́ти ю҆̀ въ вс̂е вре́мѧ·

И҆ да не пое́млетъ чл҃къ жены̀ ѿц҃а свое҆го, и҆ да не ѿкры́етъ покрове́нїа ѿц҃а свое҆го·

Глв̑҇а, к҃г·

Да не въхо́дитъ ка́женикъ.
и҆ скопе́цъ.
въ со́нмъ гн҃ь·

Ни́же да въни́детъ блꙋдород̑ныи въ со́нмъ гн҃ь до десѧ́таго племе́ни·

да не вни́детъ а҆монити́нъ, и҆ моа҆ви́тин̑҇ въ со́нмъ гн҃ь.
и҆ десѧ́таго племе́ни да не в꙽хо́дит̑ въ храм̑ гн҃ь да́ждь и҆ до вѣка·

Поне́же не срѣто́ша ѻ҆ни васъ съ хлѣбы и҆ водо́ю на пꙋтѝ, и҆сходѧ́щимъ вамъ и҆з꙽ землѧ̀ е҆гѷпет̑ски·

И҆ к семꙋ̀ наѧ́ша на́ тѧ валаа́ма сн҃а веѻ҆́рова, ѿ средорѣ́чїа да т̂ѧ проклене́тъ·

И҆ не въсхотѣ̀ г҃ь б҃ъ твои, слы́шати валаа́ма, и҆ възвратѝ г҃ь б҃ъ тво́и клѧ́твы въ блс̑҇ве́нїе, ꙗ҆ко възлюбѝ т̂ѧ г҃ь б҃ъ твои·

да не съвѣща́еши ми́ра къ ни́мъ и҆ поспѣшнаго и҆мъ не да́и вс̂ѧ дн҃и въ вѣ́ки·

да не гнꙋша́ешисѧ и҆дꙋмѣ́аниномъ, ꙗ҆́ко брат̑ твой е҆сть да не гнꙋша́ешисѧ е҆гѷптѧ́нина, ꙗ҆́ко ѻ҆бита́лецъ бы́лъ е҆си въ землѝ и҆хъ·

Сн҃ове а҆́ще родѧ́тсѧ и҆мъ племѧ̀ тре́тїе да въни́детъ въ со́нмъ гн҃ь·

А҆ще же и҆зы́деши въполчи́тисѧ на врагѝ твоа да сѧ снабди́ши ѿ всего̀ ѕл̂а сло́ва·

И҆ а́ще бꙋдетъ въ тебѣ̀ чл҃къ нечи́стъ ѿ и҆злїѧ́нїѧ но́щїю, да и҆зы́детъ вн̂ѣ по́лчища и҆ да не въхо́дитъ въ по́лчище.
и е҆гда̀ бꙋдетъ къ ве́черꙋ, и҆ да ѻ҆мы́етъ тѣло своѐ водо́ю, и҆ ꙗ҆ко за́идетъ сл҃нце да въни́детъ въ пол̑҇чище·

И҆ мѣсто тебѣ̀ да бꙋдетъ вн̂ѣ по́лчища, и҆ да и҆зы́деши та́мо во́нъ·

Рыле́цъ же да бꙋ́детъ за́ поѧ҆сомъ твои҆мъ, и҆ бꙋдетъ е҆гда̀ сѧ́деши вн̂ѣ, да въскопа́еши и҆мъ ꙗ҆мꙋ и҆ посе́мъ наврати́въ да покры́е҆ши стыдѣнїе свое в не́и.
ꙗ҆́ко г҃ь б҃ъ твои прехо́дитъ въ по́лчищи твоем̑.
и҆збавлѧ́ти т̂ѧ, и҆ преда́ти врагѝ твоѧ̀, въ рꙋцѣ твоѝ пред̑ лицемъ твои҆мъ и҆ да бꙋ́детъ по́лчище твое ст҃о, и҆ да не ꙗ҆ви́тсѧ ѹ҆ тебе стыдѣ́нїѧ ве́щъ, и҆ ѿврати́тсѧ ѿ тебѐ.
да не предасѝ раба̀ гн҃ꙋ е҆го, и҆же прїидетъ къ тебѣ ѿ гн҃а свое҆го·

С тобо́ю да всели́тсѧ въ всемъ мѣстѣ и҆дѣже го́дѣ бꙋдет꙽ е҆мꙋ, да не стꙋжи́ши е҆го.
и҆ да не бꙋдет̑ блꙋ́дница ѿ дще́реи і҆и҆л҃въ, и҆ да не бꙋдет꙽ блꙋдѧ́щихъ ѿ сн҃овъ і҆и҆л҃въ·

да не дасѝ м꙽зды̀ блꙋдницы, ниже и҆змене́нїѧ ѱа̀ въ до́мъ г҃а б҃а твое҆го въ всѧ́кꙋ мл҃твꙋ ꙗ҆́ко гнꙋше́нїе сꙋть гв҃и б҃ꙋ твое҆мꙋ ѻ҆боѧ̀·

да не расти́ши бра́тꙋ твое҆мꙋ ли́хвы сребре́ныѧ и҆ ли́хвы пи́щныѧ и҆ ли́хвы всѧ́кїѧ ве́щи е҆мꙋже а҆ще в꙽ заи́мъ дасѝ·

Чю́ждемꙋ да расти́ши ли́хвꙋ, братꙋ же твое҆мꙋ да не расти́ши.
да блс̑҇вит̑ тѧ̀ г҃ь б҃ъ тво́и въ всѣхъ дѣлехъ твоих̑ въ землѝ в ню́же и҆́деши та́мо приѧ҆́ти еѧ̀·

А҆́ще же ѻ҆бѣща́еши ѻ҆беща́нїе гв҃и б҃ꙋ твое҆мꙋ.
да не ѹ҆ме́длиши възда́ти е҆го, ꙗ҆́ко възыща̀ възы́щетъ г҃ь б҃ъ тво́и ѿ тебѐ, и҆ бꙋдетъ на тебѣ грѣ́хъ·

А҆́ще л̂и не хо́щеши ѻ҆бѣща́тисѧ нѣ́сть т̂и грѣха̀·

И҆сходѧ́щаѧ и҆зъ ѹ́стъ твои҆хъ снабдѝ и҆ сътворѝ.
и҆м꙽же ѻ҆́бразомъ ѻ҆беща̀ гв҃и б҃ꙋ твое҆мꙋ дар̑҇ е҆же е҆си гл҃алъ ѹ҆стна́ми твои҆ми·

А҆́ще вни́деши на ни́вꙋ по́дрꙋга свое҆го и҆ да събере́ши в рꙋцѣ своѝ кла́сы, а҆ се́рпа не задѣи на ни́вꙋ по́дрꙋга своего.
а҆ще въни́деши въ виноград̑ по́дрꙋга свое҆го да зо́блеши вино̀, е҆ли́ко насыти́ши дш҃ꙋ свою, а҆ въ сосꙋдъ не вложи́ши·

Глв̑҇а, к҃д·

Аще же кт̂о по́иметъ женꙋ̀ и҆ живе́тъ с не́ю.
и҆ бꙋдетъ а҆ще не ѻ҆брѧ́щетъ блгд̑ть пред̑ нимъ нѣкое҆го ра́ди срамна дѣла да напи́шетъ е́й кни́ги ѿпꙋще́нїѧ и҆ вда́стъ в рꙋцѣ е́й.
и҆ да ѿпꙋстит̑ ю҆̀ и҆з до́мꙋ свое҆го.
и҆ ѿше́дши да бꙋдетъ жена̀ мꙋжꙋ и҆но́мꙋ·

И҆ е҆гда̀ възненави́дитъ ю҆̀ мꙋжъ вторы́и, и҆ въпи́шетъ е́й кни́гꙋ ѿпꙋще́нїѧ и҆ да́стъ е́й в рꙋцѣ е҆ѧ̀, и҆ ѿпꙋстит꙽ ю҆̀ и҆з до́мꙋ свое҆го.

И҆л̂и ѹ҆мре́тъ мꙋжъ е҆ѧ̀ вторы́и и̑ б̂ѣ ю҆̀ поѧ́лъ себѣ̀ въ женꙋ̀, и҆ не възмо́жетъ мꙋжъ прь́выи ѿпꙋсти́вый ю҆̀.
ѻ҆брати́тисѧ и҆ поѧ́ти ю҆̀ себѣ̀ въ женꙋ̀, по ѻ҆скверне́нїи е҆ѧ̀ ꙗ҆ко гнꙋсно е҆сть пред̑ гм҃ъ бм҃ъ твои҆мъ да не ѻ҆скверна́вите землѧ̀ ю҆́же г҃ь б҃ъ ва́шъ дае́тъ ва́мъ въ наслѣдїе·

И҆ а́ще кт̂о бꙋдетъ женꙋ̀ поѧ́лъ въ но́вѣ да не и́детъ на́ брань, и҆ да не заде́жетсѧ е҆мꙋ ника́ѧ же ве́щь, и҆ без вины̀ е҆сть·

И҆ да бꙋ́детъ въ домꙋ̀ свое҆мъ лѣто е҆ді́но, и҆ да веселит̑ женꙋ̀ свою ю҆же е҆сть поѧ́лъ·

И҆ да не възе́млеши в залог̑҇ же́рнова и҆ же́рновицы, ꙗ҆́ко дш҃ꙋ свою дае́тъ в залог̑҇.

А҆́ще кт̂о ꙗ҆вит̑сѧ чл҃къ кра́дыи дш҃ꙋ ѿ бра́тїѧ свое́ѧ сн҃овъ і҆и҆л҃евъ, и҆ наси́лїемъ и҆ продае́тъ ю҆̀, да ѹ́мрет꙽ та́ть таковы́и, и҆ ѿи́мѣте ѕло́е ѿ себѐ са́ми·

И҆ блюдѝ себѐ са́мъ, въ бле́скъ прокаже́нїѧ.
и҆ снабдѝ ѕѣло твори́ти по всемꙋ̀ зако́нꙋ, и҆же повелѧ́тъ тебѣ̀ жерцы̀ и҆ левѷты ꙗ҆коже е҆смь заповѣдал̑҇ и҆м꙽ снабдѣти и҆ твори́ти.
по́мните коли́ко сотворѝ г҃ь б҃ъ твой марїа́ми въ и҆схо́де и҆сходѧ́щимъ вам̑ и҆зъ е҆гѷпта·

А҆́ще до́лгъ е҆сть како́въ лю́бо на по́дрꙋзѣ твое́мъ, да не вни́деши въ храм꙽ е҆го взѧ́ти заложе́нїѧ н̂о вн̂ѣ ста́неши·

Чл҃къ же той на не́мже е҆сть до́лгъ твои и҆знесе́тъ са́мъ заложе́нїе вон̑҇·

А҆ще л̂и чл҃къ ѹ҆бо́гъ е҆сть, да не ѻ҆блежи́ши в зало́зѣ е҆го·

Но ѿда́нїем̑ ѿда́си ри́зꙋ е҆го до за́хода слн҃ца, и҆ да лѧ́жетъ въ ри́зе свое́и, и҆ блс̑҇витъ т̂ѧ.
и҆ бꙋ́детъ т̂и млс̑҇ть пред̑ гм҃ъ бм҃ъ твоим̑·

да не лиши́ши м꙽зды̀ ѹ҆бо́гаго и҆ просѧ́щаго въ бра́тїи твое́й, и҆л̂и ѿ пришелец̑҇ въ гра́де твоем̑·

Въ то́и дн҃ь да ѿда́си м꙽здꙋ̀ е҆мꙋ, да не за́идетъ сл҃нце е҆мꙋ ꙗ҆́ко ѹ҆бог̑҇ е҆сть и҆ в то́мъ и҆мать наде́ждꙋ·

И҆ да не възопїе́тъ на́ тѧ къ гв҃и и҆ бꙋд́етъ тебѣ̀ грѣ́хъ·

И҆ да не ѹ҆́мрꙋтъ ѿц҃ы за́ сн҃ы, и҆ сн҃ове да не ѹ́мрꙋтъ за ѿц҃ы.
н̂о ко́ждо за сво́и грѣхъ да ѹ҆́мретъ·

И҆ да не ѹ҆кло́ниши сꙋда̀ прише́лцꙋ и҆ сиротѣ̀ и҆ вдовѣ̀·

И҆ да не възе́млеши въ зало́гъ ри́зы вдовича̀·

Но помѧне́ши ꙗ҆́ко рабъ и҆ т̂ы б̂ѣ въ землѝ е҆гѷпетъстѣи и҆ свободѝ т̂ѧ г҃ь б҃ъ твои ѿтꙋ́дꙋ.
сего ра́ди а҆зъ тебѣ̀ заповѣ́даю твори́ти с̂е сло́во·

А҆́ще по́жнеши ни́вꙋ на селѣ̀ свое҆мъ, и҆ заб́ꙋдеши снопы̀ на ни́вѣ свое́и да не възврати́шисѧ взѧ́ти и҆хъ прише́лцꙋ, и҆ ѹ҆бо́гꙋ, и҆ сиротѣ̀, и҆ вдовѣ̀ да бꙋ́детъ, да т̂ѧ блс̑҇витъ г҃ь б҃ъ твои въ всѣхъ дѣлех̑ рꙋкꙋ твое҆ю·

І҆ а́ще же ма́сличїе бере́ши.
да сѧ не възврати́ши ѻ҆би́рок̑҇ твори́ти за собо́ю·

Н҆о прише́лцꙋ и҆ сиротѣ̀, и҆ вдовѣ̀ да бꙋ́детъ·

И҆ въспомѧне́ши ꙗ҆́ко ра́бъ и҆ т̂ы бѣ̀ въ землѝ е҆гѷпетъстѣи·

Сего ра́ди а҆зъ тебѣ̀ повелѣва́ю твори́ти слово с̂е·

А҆ще же ѻ҆бъе́млеши виногра́д꙽ свои, да не събира́еши ѻ҆би́рокъ за собо́ю.
н̂о прише́лцꙋ и҆ сиротѣ и҆ вдовѣ̀ да бꙋ́детъ·

И҆ помѧне́ши ꙗ҆́ко ра́бъ бы́лъ е҆си въ землѝ е҆гѷпетъстѣи·

Сего ра́ди а҆́зъ тебѣ̀ заповѣ́даю твори́ти с̂е сло́во·

Глв̑҇а, к҃е·

Аще же бꙋдетъ прѧ̀ междꙋ чл҃кома, и҆ прїидꙋтъ на сꙋд꙽ и҆ да сꙋдѧт̑ и҆̀ и҆ да ѻ҆правдѧт꙽ пра́ваго.
и҆ да ѻ҆сꙋдѧт̑ нечести́ваго·

І҆ е҆гда̀ бꙋ́детъ досто́инъ ра́нъ нечести́выи, да поста́виши и҆̀ пред̑ сꙋдїа́ми и҆ да бїю́тъ е҆го пред ни́ми по нече́стїю е҆го въ число̀ да бїю́т꙽ и҆̀, м҃ ра́н꙽, бесче́стїѧ е҆го да не приложит̑ к семꙋ·

А҆ще л̂и приложа́тъ паче ра́нъ сихъ.
би́ти е҆го мо́жае безлѣ́потно е҆сть бра́тꙋ твое҆мꙋ пред̑ тобою·

И҆ да не ѻ҆борти́ши вола̀ верхꙋщ́аго житъ·

І҆ егда̀ живꙋтъ бра́тїѧ въкꙋпѣ.
и҆ ѹ́мрет꙽ е҆ді́нъ ѿ ни́хъ, и҆ пло́да не бꙋдетъ е҆мꙋ да не бꙋдетъ жена̀ ѹ҆ме́ршаго ѿ до́мꙋ и҆но́мꙋ мꙋж́ꙋ, и҆же нѣсть ѹ҆́жика·

Но бра́тъ мꙋжа е҆ѧ̀ да вни́детъ къ не́и да по́имет꙽ ю҆̀ въ женꙋ̀ себѣ̀, и҆ да живе́тъ с не́ю·

И҆ бꙋ́детъ первене́цъ и҆же сѧ роди́тъ да ѹ҆ста́витсѧ въ и́мѧ ѹ҆мершаго и҆ не поги́бнетъ и҆́мѧ е҆го ѿ і҆и҆л҃ѧ·

А҆ще л̂и не хо́щетъ чл҃къ поѧ́ти жены̀ бра́та свое҆го да прїидетъ жена̀ къ вра́томъ пред̑ ста́рцы, и҆ речетъ не хо́щетъ бра́тъ мꙋжа мое҆го въставити и҆́мени бра́та свое҆го въ і҆и҆л҃и·

И҆ да призовꙋт꙽ и҆̀ ста́рцы гра́да того̀ и҆ да гл҃ютъ е҆мꙋ.
и҆ а́ще ставъ рече́тъ не хощꙋ̀ поѧ́ти еѧ̀·

И҆ пристꙋпи́вши жена̀ бра́та е҆го къ немꙋ̀ пред̑ стар̑҇цы, и҆ да и҆з꙽зꙋетъ сапогъ е҆го е҆дїнъ ѿ ногѝ е҆го, и҆ да заплю́етъ на лицѐ е҆го, и҆ ѿвѣща́въ да речетъ, сице да сътворѧт̑ чл҃кꙋ, и҆же не созида́ет̑ домꙋ бра́та свое҆го·

И҆ прозоветсѧ и҆́мѧ е҆го въ і҆и҆л҃и домъ и҆з꙽зꙋвшаго сапогъ·

А҆́ще же бїют̑сѧ чл҃ка дв̂а въкꙋпѣ, мꙋжъ съ бра́том̑ свои҆мъ, и҆ пришед̑ши жена̀ е҆дїнаго ею̀ ѿѧ҆́ти мꙋжа свое҆го ѿ рꙋкѝ бию҆́щаго и҆ просте́рши рꙋкꙋ свою̀ и҆́мет̑ за лоно̀ е҆го да ѿсѣче́ши рꙋ́кꙋ ей, да не пощади́ши ѻ҆́ка твое҆го на ню̀·

И҆ да не бꙋдетъ въ вре́тищи твое҆мъ мѣ́рило, и҆ мѣрило вели́кое и҆ малое·

И҆ да не бꙋдет꙽ в домꙋ̀ твое҆мъ мѣ́ра, и҆ мѣ́ра вели́ка и҆ ма́ла·

Но̂ мѣрило пра́во, и҆ пра́ведно да бꙋ́детъ тебѣ̀ и҆ мѣра ра́вна і҆ и́стина бꙋдет̑ тебѣ̀·

да мно́ги дн҃и бꙋ́деши на землѝ ю҆́же г҃ь б҃ъ твой дае́тъ тебѣ̀ въ прича́стїе·

Ꙗ҆́ко гнꙋ́сенъ е҆сть гв҃и б҃ꙋ твое҆мꙋ, всѧ́къ творѧ́и сїѧ.
всѧк̑҇ творѧ́и непра́вдꙋ·

Помѧнѝ коли́ко т̂и сътворѝ а҆м꙽мали́къ на пꙋтѝ, и҆сходѧ́щꙋ т̂и и҆зъ е҆гѷпта·

Ка́ко съпроти́висѧ на пꙋтѝ тебѣ.
і҆ и҆с꙽сѣчѐ твою стражбꙋ̀ стрѣгꙋщꙋю за тобо́ю.
ты́ же а҆́лченъ бѣа́ше и҆ трꙋден̑҇ и҆ не възбоѧ́сѧ б҃а·

И҆ бꙋ́детъ е҆гда̀ поко́итъ т̂ѧ г҃ь б҃ъ тво́и ѿ всѣхъ вра́гъ твои҆хъ, и҆же ѻ҆́коло тебѐ въ землѝ ю҆́же г҃ь б҃ъ дае́тъ тебѣ̀ въ прича́стїе, всели́тисѧ на не́и·

да погꙋби́ши и҆́мѧ а҆м꙽мали́ково и҆же под̑ нб҃семъ, и҆ да не забꙋ́деши·

Глв̑҇а, к҃ѕ·

И бꙋ́детъ е҆гда̀ вни́деши въ зе́млю ю҆́же г҃ь б҃ъ тво́и дае́тъ тебѣ̀ въ прича́стїе, и҆ всели́шисѧ въ не́и·

И҆ да во́змеши нача́тки ѿ зем̑лѧ твоеѧ̀, ꙗ҆же г҃ь б҃ъ тво́и дает̑ тебѣ̀ въ ѻ҆дръжа́нїе, да вложи́ши въ ко́шницꙋ.
и҆ да и́деши въ мѣсто и҆дѣже и҆зберет̑ тебѣ̀ г҃ь б҃ъ тво́и призыва́ти и҆́мѧ е҆го т̂ꙋ·

И҆ да прїи́деши къ жерцꙋ̀ и҆же бꙋдет̑ в ты дн҃и, и҆ рече́ши къ немꙋ̀, и҆сповѣ́даюсѧ днс̑҇е гв҃и б҃ꙋ свое҆мꙋ.
ꙗ҆́ко внидо́хомъ въ зе́млю, е҆ю́же клѧ́тсѧ г҃ь ѿц҃емъ на́шимъ да́ти ю҆̀ намъ·

И҆ да во́змет̑ жрец̑҇ ѿ рꙋ́кꙋ твое҆ю ко́шницꙋ.
и҆ да положит̑ ю҆̀ прѧ́мо ѻ҆лтарю̀ г҃а б҃а твое҆го·

И҆ ѿвеща́в꙽ гл҃еши пред̑ гм҃ъ бм҃ъ твоим̑.
сирїю ѻ҆ста́ви ѿц҃ъ мо́и, и҆ сни́де въ е҆гѷпетъ, и҆ ѻ҆бита̀ тꙋ̀ число́мъ ма́лым̑ и҆ бы́сть т̂ꙋ въ лю́ди мно́ги, и҆ въ мно́жество вели́ко·

И҆ заѕли́ша нам̑ е҆гѷптѧне и҆ преѻ҆би́дѣша н̂ы, и҆ възложи́ша на́ ны дѣла тѧ́жка·

И҆ възопи́хомъ къ г҃ꙋ б҃ꙋ ѿц҃ъ на́шихъ, и҆ ѹ҆слы́ша г҃ь во́пль нашъ, и҆ ви́дѣ смире́нїе на́ше и҆ трꙋдъ на́шъ, и҆ ско́рбь на́шꙋ·

И҆зведѐ н̂ы г҃ь и҆зъ е҆гѷпта са́мъ крѣ́постїю свое́ю вели́кою, и҆ рꙋко́ю си́лною и҆ мы́шцею высо́кою.
и҆ въ ѹ҆дивле́нїи велицм̑ѣ и҆ въ зна́менїи и҆ въ чюдесе́хъ·

И҆ въведѝ н̂ы въ мѣсто с̂е, и҆ да́сть нам̑ зе́млю сїю·

зе́млю кипѧ́щꙋ мле́комъ и҆ ме́дом̑·

И҆ нн҃ѣ с̂е принесо́х꙽ нача́т꙽ки ѿ плода̀ землѧ̀ ю҆́же да́лъ е҆си мн̂ѣ г҃и·

И҆ ѻ҆ста́виши е҆̀ пред̑ гм҃ъ бм҃ъ твои҆мъ, и҆ поклони́шисѧ т̂ꙋ предъ гм҃ъ бм҃ъ твои҆мъ·

И҆ весели́шисѧ ѻ҆ всѣхъ бл҃гостехъ ꙗ҆же да́лъ е҆сть тебѣ̀ г҃ь б҃ъ твои, и҆ домꙋ твое҆мꙋ, и҆ левѷтинꙋ и҆ прише́лцꙋ и҆же ѹ҆ тебѐ·

Є҆гда́ же съверши́ши ѻ҆десѧти́ти вс̂ю десѧти́нꙋ жи́тнꙋю землѧ̀ твоеа̀ въ лѣто тре́тїе, въ лѣто в неже десѧт꙽ствꙋ́ют꙽ десѧти́нꙋ.
и҆ да дасѝ левѷтинꙋ и҆ прише́лцꙋ и҆ сиротѣ̀ и҆ вдовѣ̀
да ꙗ҆́дѧ́тъ въ градѣхъ твои҆хъ, и҆ насы́тѧтсѧ·

И҆ речеши пред̑ гм҃ъ бм҃ъ твои҆мъ ѻ҆чи́стих̑ ст҃аѧ и҆з до́мꙋ мое҆го, и҆ да́хъ ѧ꙽ левѷтꙋ и҆ прише́лцꙋ и҆ сиротѣ̀, и҆ вдовѣ̀, по всѣм꙽ за́повѣдемъ твоим̑ и҆хже заповѣ́да мн̂ѣ·

Не престꙋпи́хъ за́повѣди твое҆ѧ, и҆ не забы́хъ·

И҆ не и҆зъꙗ҆́х꙽ въ болѣ́знь мою ѿ ни́хъ, и҆ не да́хъ ѿ ни́хъ въ нече́стїе, и҆ не дах̑ ѿ ни́хъ ѹ҆ме́ршемꙋ·

Послꙋша́хъ гла́са г҃а б҃а мое҆го.
сътвори́хъ ꙗ҆коже заповѣ́да мн̂ѣ·

При́зри же съ нб҃си ѿ хра́ма ст҃ого твое҆го, и҆ блс̑҇ви лю́ди своѧ і҆и҆л҃ѧ, и҆ зе́млю ю҆́же е҆си да́лъ им̑, ꙗ҆́коже сѧ е҆си клѧ́лъ ѿц҃емъ на́шим꙽ дати на́мъ зе́млю кипѧ́щꙋ мле́ком̑ и҆ ме́домъ·

Въ то́и дн҃ь заповѣ́дает̑ тебѣ̀ г҃ь б҃ъ твой, сътвори́ти вс̂ѧ ѻ҆правле́нїѧ сїѧ, и҆ сꙋды̀·

И҆ да снабди́те и҆ сътвори́те ѧ҆̀ ѿ всего срд̑ца вашего, и҆ ѿ всеѧ̀ дш҃а ва́шеѧ·

Га҃ и҆збра́лъ е҆си днесь бы́ти тебѣ̀ б҃ꙋ.
и҆ ходи́ти въ вс̂ѧ пꙋтѝ е҆го, и҆ снабдѣт́и вс̂ѧ ѻ҆правле́нїѧ е҆го и҆ повелѣнїѧ и҆ сꙋды̀ е҆го и҆ послꙋшатѝ гла́са е҆го·

И҆ г҃ь и҆збра̀ ва́съ днесь, да бꙋдете е҆мꙋ лю́ди прпд̑бнїи, ꙗ҆́коже ти е҆сть реклъ снабдѣти вс̂ѧ за́повѣди е҆го.
и҆ да бꙋ́деши вы́ше над̑ всѣми страна́ми, и҆мже сътвори́тъ т̂ѧ и҆ме́н꙽на, и҆ хва́лна, и҆ сла́вна.
быти лю́дем̑ ст҃ым̑ г҃ꙋ б҃ꙋ ва́шемꙋ ꙗ҆́кож̑ гл҃а·

Глв̑҇а, к҃з·

И заповѣ́да моѷсїи ста́рцем꙽ сн҃овъ да́етъ вамъ въ прича́стїе, да поста́виши себѣ̀ ка́мыки вели́ки, и҆ да ѻ҆мѣ́лиши ѧ҆̀ мѣ́ломъ·

И҆ да въпи́шеши на ка́мыцехъ вс̂ѧ словеса̀ зако́на сего.
ꙗ҆́коже пре́идете і҆ѻ҆рдан̑҇ и҆ вни́дете въ землю ю҆же г҃ь б҃ъ тво́и да́етъ тебѣ, зе́млю кипѧ́щꙋю ме́домъ и҆ мле́комъ, ꙗ҆́коже е҆сть ре́клъ г҃ь б҃ъ ѿц҃ъ твоих̑ тебѣ·

И҆ бꙋдетъ ꙗ҆́ко преидете і҆ѻ҆рда́нъ, да поста́вите ка́мыки с̂и их̑же а҆зъ повелѣва́ю ва́мъ днес̑҇ въ горѣ̀ а҆е҆ва́лѣ.
и҆ помѣ́лиши их̑ мѣлом̑·

И҆ да съгради́ши т̂ꙋ ѻ҆лта́рь гв҃и б҃ꙋ твое҆мꙋ.
ѻ҆лтар̑҇ ѿ ка́менѧ, да не възложи́ши на́нь желѣ́за·

Ка́менїем̑ цѣ́лым̑ да съгради́ши ѻл̑҇тарь г҃ви б҃ꙋ твоемꙋ·

И҆ да воз̑ложи́ши на́ нѧ вс̂есъж꙽женїе гв҃и б҃ꙋ твое҆мꙋ, и҆ положи́ши тре́бꙋ сп҃сенїа, да ꙗ҆́си насыти́шисѧ т̂ꙋ, и҆ воз̑весели́шисѧ пред̑ гм҃ь бм҃ъ твоим̑, и҆ въпишѝ на камыцх̑ѣ сих̑ ве́сь закон̑҇ сїи ѕѣло ꙗ҆́вѣ·

И҆ гл҃а моѷсїи жерце́м꙽ и҆ левѷтомъ и҆ въсемꙋ̀ і҆и҆л҃ю рекꙋщ́и молча̀ послꙋш́аи і҆и҆л҃ю, въ дн҃ь б̂о сїи бы́сть въ лю́ди гв҃и б҃ꙋ твое҆мꙋ·

И҆ да послꙋш́аеши гла́са г҃а б҃а свое҆го, и҆ да сътвори́ши вс̂ѧ за́повѣди е҆го и҆ ѻ҆правле́нїа е҆го, ꙗ҆́же а҆зъ заповѣ́даю тебѣ̀ дне́сь·

И҆ заповѣ́да моѷсїи лю́демъ въ то́й дн҃ь гл҃ѧ.
сїи да ста́нꙋтъ блс̑҇ви́ти лю́ди на горѣ̀ гаризи́нъ, пришед̑ши і҆ѻ҆рда́нъ симеѻ́нъ, левѷи, і҆ю́да, и҆саха́ръ.
і҆ѻ҆сифъ, и҆ веньа́минъ·

Сїи же да ста́нꙋтъ ѹ҆ клѧ́твы на горѣ̀ гева́лѣ, рꙋви́мъ, и҆ гад̑ а҆си́ръ, заѹ҆ло́нъ, да́нъ, и҆ неѳали́мъ·

И҆ ѿвеща́вше да рекꙋтъ левѷти всемꙋ і҆и҆л҃ю гла́сомъ вели́кимъ·

Проклѧ́тъ чл҃къ и҆же сътворит̑ и҆зва́ѧнїа, и҆л̂и солїа́нїа скве́рно гв҃и.
дѣло рꙋчное и҆ хи́траго и҆ положи́тъ ѧ҆̀ въ покро́вѣ.
и҆ да ѿвѣща́вше вс̂и лю́дїе рекꙋтъ бꙋ́ди т̂о·

Про́клѧт̑ и҆же ѕлорѣ́читъ ѿц҃а свое҆го и҆л̂и ма́тери свое́и, и҆ рекꙋтъ вс̂и лю́дїе бꙋди·

Про́клѧтъ и҆же претворѧ́етъ предѣлы по́дрꙋга свое҆го и҆ да рект̑ꙋ вс̂и лю́дїе бꙋ́ди·

Про́клѧт̑ прельща́ѧи слѣпаго въ пꙋтѝ, и҆ рект̑ꙋ вс̂и лю́дїе бꙋди·

Про́клѧт̑ и҆же ѹ҆клонит̑ сꙋд꙽ пришел̑҇цꙋ и҆ сиротѣ и҆ вдовѣ̀ и҆ рект̑ꙋ вс̂и лю́дїе бꙋди·

Про́клѧт̑ лежа́и съ жено́ю ѿц҃а своег̑҇ ꙗ҆́ко ѿкрыл̑҇ е҆сть ѿкрове́нїе ѿц҃а свое҆го, и҆ рект̑ꙋ вс̂и лю́дїе бꙋ́ди·

Про́клѧт̑ лежа́и съ всѧ́ким̑ ско́том꙽, и҆ рекꙋтъ вс̂и лю́дїе бꙋ́ди·

Про́клѧт̑ лежа́и съ сестро́ю свое҆ю дще́рїю ѿц҃а свое҆го, и҆л̂и дще́рїю ма́тери свое҆ѧ, и҆ рекꙋт꙽ вс̂и лю́ди бꙋ́ди·

Про́клѧтъ лежа́и с те́щїю свое҆ю, и҆ рекꙋтъ вс̂и лю́дїе бꙋ́ди·

Про́клѧтъ и҆же бїет꙽ по́дрꙋга съ лестїю, и҆ да рекꙋтъ вс̂и лю́ди бꙋди·

Про́клѧтъ и҆же во́зметъ м꙽здꙋ̀.
на ѹ҆бо́и дш҃а кро́ви неви́нныа и҆ рекꙋтъ вс̂и лю́дїе бꙋ́ди·

Про́клѧт̑ всѧ́къ чл҃къ и҆же не пребꙋ́детъ въ всѣ́хъ словесѣ́хъ зако́на сего̀ е҆же твори́ти ѧ҆̀, и҆ рекꙋтъ вс̂и лю́ди бꙋ́ди·

И҆ бꙋ́детъ е҆гда̀ пре́идете і҆ѻ҆рда́нъ, въ зе́млю ю҆́же г҃ь б҃ъ ваш̑҇ дает̑ вам̑·

Глв̑҇а, к҃и·

Аще слꙋхомъ послꙋша́ете гла́са г҃а б҃а ва́шего, и҆ снабди́те твори́ти вс̂ѧ за́повѣди е҆го.
ꙗ҆же аз̑ заповѣ́даю т̂и днс̑҇ь, и҆ дастъ т̂и г҃ь б҃ъ тво́и над̑ всѣми страна́ми землѧ̀·

И҆ прїидт̑ꙋ на́ тѧ вс̂ѧ блс̑҇ве́нїа сїѧ.
и҆ ѻ҆брѧ́щꙋтъ т̂ѧ·

А҆́ще слꙋхомъ послꙋшаеши слове́съ г҃а б҃а твое҆го.
блс̑҇ве́нъ т̂ы въ гра́дѣ блс̑҇ве́нъ т̂ы на селѣ̀·

Блс̑҇ве́на племена̀ ѹ҆тро́бы твое҆ѧ и҆ плод̑ землѧ̀ твое҆а, и҆ ста́да воловъ твои҆хъ, и҆ па́ствины ѻ҆ве́цъ твоих̑·

Блс̑҇вены гꙋ́мна твоѝ и҆ про́чаѧ твоѧ·

Блс̑҇ве́на ко́шница твоа и҆ ѻ҆ста́нцы твоѝ.
блс̑҇ве́нъ ты е҆гда̀ въхо́диши, и҆ блс̑҇ве́нъ т̂ы е҆гда̀ и҆схо́диши·

Преда́стъ б̂о г҃ь б҃ъ врагѝ твоа̀ сꙋпротивѧ́щаасѧ тебѣ, съкрꙋше́ны пред̑ лицем̑ твои҆мъ пꙋтемъ е҆ді́немъ прїидт̑ꙋ к тебѣ, и҆ сед̑мїю пꙋтїи пробѣ́гнꙋт꙽ ѿ лица̀ твое҆го·

По́слетъ г҃ь на́ тѧ блс̑҇ве́нїе въ домх̑ѣ твои҆хъ, и҆ на вс̂ѧ на нѧ́же възложи́ши рꙋ́кꙋ твою̀ за землѝ, ю҆́же г҃ь б҃ъ твои да́етъ тебѣ̀·

Въста́витъ т̂ѧ г҃ь б҃ъ тво́и себѣ люд̑ ст҃ъ, ꙗ҆́кож̑ сѧ е҆сть клѧл̑҇ ѿцем꙽ твоим̑.
а҆́ще послꙋшае҆ши гла́са г҃а б҃а твоег̑҇, и҆ хо́диши въ пꙋтѝ е҆го·

И҆ ѹ҆́зрѧт̑ тѧ всѧ̀ страны̀ земныа, ꙗ҆́ко и҆́мѧ г҃а б҃а твое҆го призва́сѧ на́ тѧ, и҆ ѹ҆боѧт̑сѧ тебѐ·

И҆ ѹ҆мно́жит̑ т̂ѧ г҃ь б҃ъ тво́и въ бл҃го.
ѻ҆ племене́хъ ѹ҆тро́бы твое҆ѧ, и҆ ѻ҆ плодх̑ѣ скот꙽ твоих̑ и҆ ѻ҆ плодх̑ѣ землѝ твое҆ѧ на́ земли.
ꙗ҆́же клѧсѧ г҃ь ѿц҃ем̑ твоим̑ дати ю҆̀ тебѣ̀·

ѿкры́етъ тебѣ̀ г҃ь съкро́вище своѐ бл҃го́е.
нб҃о да́стъ до́ждь землѝ твое́и въ вре́мѧ свое, блс̑҇ви́ти вс̂ѧ дѣлеса̀ рꙋкꙋ твое҆ю.
и҆ въда́си въ за́емъ стра́намъ мно́гимъ ты́ же не ѻ҆должи́шисѧ·

И҆ ѻ҆блада́еши т̂ы мно́гими страна́ми, тобо́ю же не ѻ҆блада́ют̑·

И҆ поста́витъ т̂ѧ г҃ь б҃ъ твои въ нача́ле а҆ не въ концы̀, и҆ бꙋ́деши тогда̀ вы́ше, и҆ не ни́же·

А҆́ще послꙋш́аеши за́повѣди г҃а б҃а свое҆го е҆ли́ко а҆зъ заповѣ́даю тебѣ̀ днс̑҇ь снабдѣти и҆ твори́ти·

И҆ да не престꙋ́пиши ѿ всѣх꙽ словес̑҇ ꙗ҆же а҆зъ заповѣ́даю тебѣ днс̑҇ь, на́ десно ни́же на́ лѣво, да не хо́дите въ слд̑ѣ бо́гъ чюжди́хъ слꙋжити им̑·

И҆ бꙋдетъ а҆́ще не послꙋша́еши гла́са г҃а б҃а твое҆го, снабдѣти и҆ твори́ти вс̂ѧ за́повѣди е҆го, е҆ли́ко а҆зъ заповѣ́даю тебѣ̀ днс̑҇ь·

Прїидꙋтъ на́ тѧ вс̂ѧ клѧ́твы сїѧ, и҆ пости́гнт̑ꙋ т̂ѧ, и҆ про́клѧт̑ бꙋ́деши т̂ы въ гра́де, и҆ про́клѧтъ т̂ы и҆ на селѣ·

Про́клѧты гꙋмна твоѝ, и҆ прочаѧ твоа·

Проклѧ́та племе́на ѹ҆тро́бы твоеѧ, и҆ жи́та землѧ̀ твое҆ѧ, и҆ ста́да волов̑҇ твоих̑, и҆ па́ствы ѻ҆ве́цъ твоих̑·

И҆ про́клѧт̑ т̂ы е҆гда̀ въхо́диши, и҆ про́клѧт̑ т̂ы вънегда̀ из̑хо́диши·

И҆ послет̑ тебѣ г҃ь недоста́ток̑҇, и҆ а҆л꙽кне́нїе, и҆ потребле́нїе, на вс̂е на нем̑же возложи́ши рꙋ́кꙋ свою, и҆ е҆ли́ко а҆́ще сътвори́ши дон̑҇деже потреби́тъ т̂ѧ, и҆ дон꙽деже погꙋбит̑ т̂ѧ въскорѣ.
ѕлых̑ ради дл̑҇ѣ твоих̑, поне́же ѻ҆ста́ви е҆го·

Прилѣпи́тъ г҃ь к тебѣ̀ смр҃ть до́н꙽деже потребит̑ т̂ѧ ѿ землѧ̀, в ню́же т̂ы въхо́диши та́мо прїа́ти ю҆̀·

Побїет̑ т̂ѧ г҃ь неи҆мѣ́нїемъ и҆ мо́лнїею и҆ зимо́ю, и҆ ва́ромъ, и҆ ѹ҆боемъ и҆ вѣтры тлѣ́нными, и҆ блѣдостїю и҆ поженет̑ тѧ до́ндеже погꙋбит̑ т̂ѧ·

И҆ бꙋдет̑ нб҃о над̑ главо́ю твое҆ю мѣ́дѧно.
и҆ землѧ̀ под тобо́ю желѣ́зна·

да́стъ г҃ь до́ждь землѝ твое҆и прах̑.
и҆ пр́ьсть съ нб҃си сни́дет̑ на́ тѧ, до́ндеже съкрꙋшит̑ тѧ, и҆ дон꙽деже погꙋбит̑ т̂ѧ·

да́стъ тѧ г҃ь на и҆с꙽сѣче́нїе пред̑ враги твои́ми.
пꙋтем̑ е҆ді́нем̑ и҆зы́идеши к ним̑, а҆ сед̑мїю̀ да пробѣ́гнеши ѿ лица̀ их̑.
и҆ бꙋ́деши в рас꙽сы́панїе въ всх̑ѣ црс̑҇твх̑ѣ земных̑·

И҆ бꙋдт̑ꙋ мр҃твецы ваши пи́ща птицам̑ нбс̑҇ным, и҆ ѕвѣремъ земным̑ и҆ не бꙋдет̑ ѿгонѧ́щаго·

Побїет̑ т̂ѧ вре́дом̑ е҆гѷпет꙽скимъ въ седа́лехъ, и҆ кра́стами дивїими, и҆ гноем̑.
ꙗ҆́ко не мощѝ тебѣ̀ и҆сцѣлитисѧ·

Побїет̑ т̂ѧ г҃ь неи҆стов꙽ствомъ смѧтенїем̑ срд̑ца, и҆ невѣдѣнїемъ и҆ ѹ҆жасне́нїем̑ ра́зꙋма·

И҆ да бꙋ́деши ѻ҆сеза́ѧи въ полꙋдн҃и ꙗ҆́коже ѻ҆сѧза́етъ слѣпы́и въ тмѣ̀, и҆ не ѹ҆лꙋчи́ши пꙋтїи своих̑.
и҆ бꙋ́деши тогда̀ ѻ҆бидим̑, и҆ расхита́емъ въ вс̂ѧ дн҃и.
и҆ не бꙋдетъ помага́ѧ тебѣ̀·

Женꙋ ѻ҆брꙋчиши и҆́нъ мꙋжь по́имет̑ ю҆̀.
до́мъ съгради́ши и҆ не поживе́ши въ немъ.

Виноград̑ насади́ши и҆ не ѻ҆бъе́млеши его·

Во́лъ тво́и закла́нъ пред̑ тобо́ю, и҆ не ꙗ҆́си ѿ него и҆ ѻ҆слѧ̀ твое ѿꙗ҆́то ѿ тебѐ, и҆ не възврати́тсѧ к тебѣ̀, ѻ҆вца твоѧ̀ ѿда́ны бꙋ́дꙋтъ врагом̑ твоим̑.
и҆ не бꙋдетъ тебѣ̀ помага́ющаго·

Сн҃ове твоѝ и҆ дще́ри твоа̀ ѿда́ны бꙋдꙋтъ ꙗ҆зы́кꙋ и҆номꙋ и҆ ѻ҆чи твоѝ зрѧ́ще и҆зы́дꙋтъ в н̂ѧ, и҆ не возмо́жет̑ рꙋка твоа·

Во́зрастъ землѧ̀ твое҆а, и҆ всѧкъ трд̑ꙋ твои, и҆зъꙗ҆́стъ страна̀ е҆ꙗ҆́же не вѣ́си.
и҆ бꙋ́деши ѻ҆би́дим̑ и҆ съкрꙋшен̑҇ въ вс̂ѧ дн҃и·

И҆ бꙋдеши и҆сполнен̑҇ печа́ли, видѣнїа ради ѻ҆чїю твое҆ю, ꙗ҆́же ѹ҆́зриши·

Побїе́тъ т̂ѧ г҃ь вредом̑ злы́мъ на колѣнохъ і҆ на го́ленехъ, ꙗ҆ко не́ мощно и҆сцѣлити тебѣ̀, ѿ стопы̀ но́гꙋ твое҆ю даже до ве́рхꙋ главы̀ твое҆ѧ·

И҆ ѿведет̑ т̂ѧ г҃ь и҆ кн҃ѕѧ твоѧ̀ ꙗ҆́же поста́виши себѣ̀.
въ странꙋ̀ ю҆же не вѣ́дѧше т̂ы ниже ѿц҃ы твоѝ, и҆ послꙋж́иши та́мо богом̑ и҆нѣмъ древꙋ и҆ ка́менїю·

И҆ бꙋ́деши та́мо въ позо́ръ и҆ въ прит̑чю, и҆ по́вѣсть всѣмъ страна́мъ, в нѧ́же въведе́т꙽ т̂ѧ г҃ь б҃ъ та́мо·

Сѣмѧ мно́го и҆знесе́ши на по́лѧ, а҆ ма́ло внесе́ши.
ꙗ҆́ко поꙗ҆дѧ́тъ ѧ҆̀ прꙋѕи·

И҆ виногра́ды насади́ши, и҆ воз̑дѣла́еши, и҆ вина̀ не пїе́ши, и҆ не възвесели́шисѧ ѿ него, ꙗ҆́ко поꙗ҆́стъ ѧ҆̀ че́рвь·

Ма́слины бꙋ́дꙋтъ тебѣ̀ въ всѣхъ предѣ́лех꙽ твои҆хъ, е҆леем̑ же не помажешисѧ.
ꙗ҆́ко и҆стече́тъ ма́сли́ца твоа·

Сн҃ы и҆ дще́ри роди́ши и҆ не бꙋ́дꙋтъ пред̑ тобо́ю, ѿидꙋтъ б̂о въ плѣ́нъ·

Вс̂ѧ дре́вѧнаѧ твоа̀ и҆ вс̂ѧ жи́та землѧ̀ твое҆ѧ, потребит̑ р꙽жа̀·

И҆ прише́лецъ и҆же е҆сть ѹ҆ тебѐ, възы́детъ над̑ т̂ѧ вы́ше вы́ше, ты же състꙋ́пиши ни́зꙋ ни́зꙋ·

То́й въ заи́мъ да́стъ тебѣ̀, ты́ же е҆мꙋ не заи́м꙽ствꙋеши.
и҆ се́й бꙋдет꙽ въ нача́ло, а҆ т̂ы бꙋ́деши на концы̀·

И҆ прїидꙋт꙽ на́ тѧ вс̂ѧ клѧ́твы сїѧ.
и҆ поженꙋт꙽ т̂ѧ, и҆ пости́гнꙋт꙽ т̂ѧ.
до́ндеже потребѧт̑ т̂ѧ, и҆ дондеже погꙋбѧт̑ т̂ѧ, ꙗ҆́ко не послꙋша гла́са г҃а б҃а свое҆го.
снабдѣти за́повѣди е҆го, и҆ ѻ҆правле́нїа е҆го, е҆ли́коже е҆сть заповѣ́да тебѣ̀·

И҆ бꙋдꙋтъ тебѣ̀ зна́менїа и҆ чюдеса̀, и҆ во племе́ни твоем̑ до́ вѣка·

Поне́же не послꙋжѝ гв҃и б҃ꙋ твое҆мꙋ, съ весе́лїемъ и҆ бл҃гим̑ срд̑цем꙽ мо́жества ра́ди всѣхъ бл҃гихъ н̂о послꙋ́жиши врагом̑ твоим̑ ꙗ҆́же послетъ г҃ь б҃ъ твои на́ тѧ, съ гла́домъ и҆ жа́ждею и҆ нагото́ю, и҆ съ ѻ҆скꙋ́дѣнїемъ всѣмъ.
и҆ възложит̑ ꙗ҆ре́мъ желѣзен̑҇ на вы́ю твою̀, до́ндеже съкрꙋшит̑ т̂ѧ·

И҆ наведет̑ г҃ь на́ тѧ, странꙋ̀ и҆здале́ча ѿ кра́ѧ землѧ̀ а҆ки воѻ҆рꙋже́нїе ѻ҆́рле странꙋ̀ е҆ѧ́же не разꙋмѣ́еши гл҃а.
странꙋ̀ без̑ сра́ма лицемъ, и҆же не посрамит̑сѧ лица̀ ста́рча, и҆ ю́на не помилꙋетъ·

И҆ поꙗ҆́сть пло̑ ско́тъ твои҆хъ, и҆ жита землѧ̀ твое҆ѧ.
ꙗ҆́же не ѻ҆ста́вит̑ тебѣ пшени́ца, н̂и вина̀ н̂и е҆ле́ѧ.
и҆ ста́да воло́въ твоих̑ и҆ па́ствины ѻ҆ве́цъ твоих̑, до́ндеже потребит̑ т̂ѧ·

И҆ погꙋбит̑ т̂ѧ въ всх̑ѣ гра́дѣхъ твоих̑.
до́ндеже и҆скоренѧт̑сѧ стѣ́ны твоѝ вили́кїе и҆ крѣ́пкїе, въ ни́хже т̂ы ѹ҆пова́еши, въ все́и землѝ твое́и.
и҆ зазлит̑ т̂ѧ въ всѣ́хъ гра́дех̑ твои҆хъ, ꙗ҆́же е҆сть далъ тебѣ̀ г҃ь б҃ъ тво́и·

І҆ и҆зъꙗ҆́си племѧ̀ ѹ҆тро́бы свое҆ѧ, пло́ть сн҃овъ и҆ дще́реи твоих̑.
и҆хже да́лъ тебѣ̀ г҃ь б҃ъ тво́и въ тꙋзѣ̀ твое́й, и҆ въ скорбѣнїи, им̑же стꙋжат̑ тебѣ вра́ѕи твоѝ·

Ю҆́ныи въ ва́съ и҆ млады́и ѕѣ́ло, възрѣвнꙋе́тъ ѻ҆́ком̑ своим̑ бра́тꙋ свое҆мꙋ, и҆ женѣ̀ ꙗ҆же во лонѣ е҆го, и҆ ѻ҆ставшим̑ чадам̑, ꙗ҆́же а҆ще ѻ҆стант̑ꙋ е҆мꙋ·

Ꙗ҆́ко да́ти е҆ді́номꙋ их̑ ѿ пло́ти чад̑ своих̑, их̑же из̑ꙗ҆́сти, поне́же нс̑҇ѣ ѻ҆ста́ло е҆мꙋ ничтож̑ въ тꙋѕѣ̀ и҆ въ скорбѣ́нїи твоем̑.
им̑же слꙋжат̑ тебѣ̀ вра́ѕи твоѝ, въ всх̑ѣ гра́дх̑ѣ твоих̑·

Ю҆́наѧ же въ вас̑҇ жена̀ и҆ млада ѕѣ́ло.
е҆и҆же нѣсть ѻ҆бы́кла нога̀ еѧ̀ стꙋпа́ти по землѝ ю҆́ности ради и҆ мла́дости.
за́зрит̑ ѻ҆́ком̑ своим̑ мꙋж́ꙋ свое҆мꙋ и҆же въ лонѣ̀ е҆ѧ̀, и҆ сн҃ꙋ и҆ дщери свое҆и·

І҆ и҆звергъ сво́и съшед̑шеи ѿ ло́на еѧ̀, и҆ ча́до еѧ̀ е҆же породит̑ и҆зъꙗ҆́стъ ѧ҆̀ ѹ҆бо ѻ҆та́и всего̀ недостат̑ка ра́ди свое҆го.
и҆ въ тꙋѕѣ̀ и҆ въ скорбѣнїи свое҆мъ.
и҆ми́же стꙋжит̑ тебѣ̀ враг̑҇ тво́и, въ всх̑ѣ гра́дх̑ѣ твоих̑·

А҆́ще не послꙋш́ае҆те творити всх̑ѣ словесъ зако́на сего̀, напи́саннаго въ кни́гах̑ си́хъ, боѧ́тисѧ и҆́мени ст҃го и҆ чюде́снаго г҃а б҃а твое҆го·

То̂ ѹ҆мно́жит̑ г҃ь ꙗ҆́звы твоѧ̀, и҆ ꙗ҆́звы племе́ни твое҆го ꙗ҆́звы вели́кїа и҆ ди́вныа и҆ болѣзни злы́и и҆ совѣдены·

И҆ възвратит̑ на́ тѧ вс̂ю болѣзнь е҆гѷпет̑скꙋ ѕлꙋ́ю, е҆ѧ́же т̂ы боа́шесѧ ѿ лица их̑, и҆ прилепи́тсѧ к тебѣ̀·

И҆ вс̂е раслабле́нїе и҆ вс̂ю ꙗ҆звꙋ не напи́саннꙋю, и҆ вс̂ю пи́санꙋю въ кни́гах̑ зако́на сего.
напꙋстит̑ г҃ь на́ тѧ, до́ндеже потребит̑ т̂ѧ·

И҆ ѻ҆ста́нетъ васъ въ число̀ ма́ло.
въ того̀ мѣсто и҆же бѣсте ꙗ҆ко ѕвѣзды нбс̑҇ныѧ мно́жеством̑, ꙗ҆ко не послꙋш́асте гла́са г҃а б҃а ва́шего·

И҆ бꙋ́детъ ꙗ҆́ко весели́сѧ г҃ь ѻ҆ вас̑҇ бл҃готворѧ̀ ва́мъ.
и҆ мно́жа вас̑҇.
та́ко възвеселит̑сѧ г҃ь ѻ҆ ва́съ, потреблѧ́а вас̑҇.
і҆ и҆зги́бнете ѿ землѧ̀, в ню́же в̂ы въхо́дите та́мо принѧ́тї еѧ̀·

и҆ раз̑сы́плет̑ ва́съ г҃ь б҃ъ ва́шъ въ всѣ страны̀, ѿ кра́ѧ землѝ до кра́ѧ е҆ѧ·

И҆ послꙋ́жите та́мо богом̑ и҆нѣмъ дре́вꙋ и҆ ка́менїю.
и҆хже не вѣ́си т̂ы ни ѿц҃ы твоѝ·

И҆ во странах̑ тѣ́хъ не поко́итъ тебѐ.
и҆ не бꙋ́детъ ѹ҆ставле́нїѧ пле́снома твои҆ма.
и҆ дас̑҇ тебѣ̀ г҃ь та́мо срд̑це горю́ще и҆ ѻ́чи скꙋ́дни, і҆ и҆с꙽хнꙋщ́ꙋ дш҃ꙋ·

И҆ бꙋдет̑ жи́тїе твое ꙗ҆́ко ви́сѧ пред̑ ѻчи́ма твои҆ма.
и҆ ѹ҆бои́шиса въ дн҃и и҆ в но́щѝ, и҆ не бꙋдетъ т̂и и҆звѣ́сто жотїе твоѐ.
заѹ҆́тра рече́ши ка́ко бы́ти ве́черꙋ, и҆ въ ве́черъ рече́ши ка́ко бы́ти заѹ́тра ѿ бо́ѧзни срд̑ца твое҆го боѧ́ же сѧ ѹ҆бои́шисѧ.
ѿ видѣнїѧ ѻ҆́чїю твое҆ю.
и҆хже зри́ши·

И҆ ѻ҆брати т̂ѧ г҃ь б҃ъ въ е҆гѷпетъ въ кораблѝ и҆ въ пꙋтѝ е҆гоже реко́хъ не приложи́те ксемꙋ̀ ви́дѣти е҆го·

И҆ преда́стесѧ та́мо враго́м꙽ вашим̑.
въ рабы̀ и҆ въ рабы́нѧ и҆ не бꙋ́детъ притѧжа́вшаго·

Глв̑҇а, к҃ѳ·

Сїи словеса̀ завѣта и҆же завѣща̀ г҃ь моѷсїю поста́вити сн҃омъ і҆и҆л҃евымъ въ землѝ моа́вли.
над̑ завѣтъ и҆же положѝ и҆мъ въ хори́вѣ·

И҆ призва̀ моѷсїи вс̂ѧ сн҃ы і҆и҆л҃евы и҆ реч̑҇ к нимъ.
в̂ы ви́дѣсте вс̂е е҆ли́ко сътворѝ г҃ь въ землѝ е҆гѷпетъстей прд̑е вами, фараѻ́нꙋ и҆ всѣмъ слꙋгам̑ е҆го, и҆ все́и землѝ е҆го·

И҆скс̑҇ꙋтва вели́ка ꙗ҆́же ви́дѣста ѻ҆́чи твоѝ.
и҆ зна́менїа и҆ чюдеса̀ вели́каа ѻ҆́на, рꙋко́ю крѣ́пкою и҆ мы́шцею высо́кою·

Но̂ не да́стъ г҃ь б҃ъ вамъ срд̑ца разꙋмѣти, ниже ѻ҆́чїю прозрѣти.
н̂и ѹ҆́шїю слы́шати, до дне́сь·

И҆ водихъ вас̑҇, м҃, лт̑ѣ сквозѣ пꙋсты́нѧ.
и не ѻ҆бет̑ша́ша ри́зы ва́ша, ниже споѕѝ ва́ши състарѣшасѧ на но́гꙋ вашꙋ·

Хлѣ́ба не ꙗ҆до́сте, ниже вина̀ и҆ сике́ра пи́сте.
да позна́ете ꙗ҆́ко се́и г҃ь б҃ъ ва́шъ·

И҆ прїидо́сте до сего̀ мѣ́ста.
і҆ и҆зы́иде сїѻ́нъ цр҃ь е҆сеѻ҆ньскїи, и҆ ѻ́гъ цр҃ь васа́ньскїи, проти́вꙋ нам̑ на ра́ть, і҆ и҆зби́хомъ ѧ҆̀ на ра́ти·

И҆ прїѧ́хом̑ зе́млю и҆хъ.
и҆ дахъ ю҆̀ въ прича́стїе рꙋви́мꙋ и га́дꙋ и҆ полꙋ племе́ни манасїи́нꙋ·

Снабди́те же вс̂ѧ словеса̀ зако́на сего̀ твори́ти ѧ҆̀.
да разꙋмѣе҆те вс̂е е҆ли́ко сътвори́те·

Вы̂ стои́те вс̂и днс̑҇ь пред̑ гм҃ъ бм҃ъ вашим̑, и҆ старѣ́ишины плѣме́нъ ва́шихъ.
и҆ ста́рцы ва́ши, и҆ сꙋдїѧ̀ ва́ша, и҆ кни́гочїѧ ва́ша, и҆ всѧ́къ мꙋжъ і҆и҆л҃ьтескъ·

И҆ же́ны ва́ша и҆ дѣти ва́ша, и҆ прише́лецъ и҆же посредѣ пол̑҇чища ва́шего, ѿ древосѣ́чца ва́шего и҆ до водоно́сца ва́шего·

пре́деши въ завѣтѣ г҃а б҃а ва́шего, и҆ въ клѧ́твѣ е҆го.
е҆ли́ко же завѣща́етъ г҃ь б҃ъ тво́и къ тебѣ днс̑҇ь·

да т̂ѧ ѹ҆ста́витъ себѣ̀ въ лю́ди.
и҆ то́и бꙋдет̑ тебѣ̀ б҃ъ, ꙗ҆́коже т̂и е҆сть ре́клъ·

И҆ ꙗ҆́коже сѧ е҆сть клѧ́лъ ѿц҃емъ твоим̑ а҆враа́мꙋ і҆саа́кꙋ.
і҆а́ковꙋ·

Не вам̑ же е҆ді́нѣмъ а҆зъ завѣтъ сїи, и҆ клѧ́твꙋ завѣща́ю·

Но̂ и҆ си́мъ и҆же съ ва́ми сꙋть зд̂ѣ, пред̑ гм҃ъ бм҃ъ ва́шимъ·

И҆ не сꙋщимъ с ва́ми зд̂ѣ днс̑҇ь.
вы̀ б̂о вѣ́сте ка́ко жи́хомъ въ землѝ е҆гѷпетъстѣи, и҆ како проидо́хомъ сквоѕѣ страны̀, и҆хже преидо́сте·

И҆ ви́дѣсте гнꙋ́сы и҆хъ, и҆ кꙋми́ры и҆хъ.
дре́во и҆ ка́менїе сребро̀ и҆ зла́то е҆же е҆сть ѹ҆ них̑·

Є҆гда̀ кт̂о ес̑҇ въ вас̑҇ мꙋжъ и҆л̂и жена̀, и҆л̂и ѿч҃ьсто и҆л̂и племѧ̀ нѣ́кое.
е҆же срд̑це ѿвратѝ ѿ г҃а б҃а ва́шего.
и҆тѝ и҆ слꙋжи́ти бого́мъ стра́нъ тѣ́хъ·

е҆да̀ кт̂о е҆сть въ ва́съ ко́рень горѣ̀ прораста́ѧ же́лчь и҆ го́ресть·

И҆ бꙋ́детъ а҆ще ѹ҆слы́шит̑ словеса̀ клѧ́твы сеѧ̀.
и҆ размы́слит꙽ въ срд̑цы свое҆мъ гл҃ѧ·

Прпд̑бно мн̂ѣ бꙋди.
ꙗ҆́ко въ прельще́нїи срд̑ца мое҆го поидꙋ.
да не погꙋби́тъ грѣшникъ не грѣшника съ собо́ю·

Не въсхо́щет̑ б҃ъ млс̑҇тивъ бы́ти е҆мꙋ.
н̂о тогда̀ разгори́тсѧ гнѣ́въ гн҃ь и҆ рве́нїе е҆го на чл҃ка того̀·

И҆ прилѣ́пнꙋтъ е҆мꙋ вс̂ѧ клѧ́твы завѣта сего̀.
въпи́саныѧ в꙽ кни́ги зако́на сего̀·

И҆ потребит̑ г҃ь и҆́мѧ е҆го ѿ под̑нбс̑҇ныхъ·

И҆ ѿлꙋ́читъ е҆го г҃ь на ѕло̀, ѿ всѣхъ сн҃овъ і҆и҆л҃въ.
по всѣмъ клѧ́твамъ завѣта въпи́саного въ кни́ги зако́на сего̀·

И҆ рече́тъ дрꙋгїи ро́дъ сн҃ове ва́ши по ва́съ быва́ющїи.
і҆ и҆ноплеме́нницы и҆же прїидꙋтъ и҆здале́ча и҆ е҆гда̀ ѹ҆́зрѧ́тъ вред̑ землѧ̀ твое҆ѧ.
и҆ ꙗ҆́зѧ е҆ѧ, ю҆же посла̀ г҃ь на́ ню·

Ка́мык꙽.
жꙋ́пелъ и҆ со́ль съж꙽же вс̂ю землѝ е҆го, не насѣ́етсѧ н̂и прозѧ́бнетъ, н̂и возни́кнет̑ на не́и всѧ́къ зла́къ, ꙗ҆коже исъпровр́ьже содо́ма и҆ гомо́ра, и҆ ад̑ма и҆ севои́ма, ꙗ҆́же и҆спровр́ьже г҃ь въ ꙗ҆́рости гнѣ́ва свое҆го·

И҆ рекꙋт́ъ всѧ страны̀, почто̀ сътворѝ г҃ь си́це, землѝ се́и, ка́ѧ ꙗ҆́рость гнѣ́ва вели́каго сего̀·

И҆ рекꙋтъ ꙗ҆ко ѻ҆ста́виша завѣтъ г҃а б҃а ѿц҃ъ свои҆х꙽, и҆же завѣща̀ ѿц҃емъ их̑, е҆гда̀ и҆зведѐ ѧ҆̀ ѿ землѧ̀ е҆гѷпетъски·

И҆ шед̑ше слꙋжи́ша бого́мъ и҆нѣмъ, и҆ поклони́шасѧ и҆мъ, и҆́хже не вѣ́дѧхꙋ, и҆ не да́стъ и҆мъ ничто́же н̂и е҆дїнъ·

И҆ разгнѣ́васѧ г҃ь на́ землю т̂ꙋ.
и҆ наведѐ на ню̀ по всѣмъ клѧ́твамъ.
завѣта пи́санаго в꙽ кни́гах̑ зако́на сего̀·

И҆ потребѝ ѧ҆̀ г҃ь ѿ землѧ̀ их̑ ꙗ҆́ростїю гнѣ́ва, и҆ прогнѣ́ванїемъ вели́кимъ ѕѣ́ло.
і҆ и҆згна̀ их̑ въ зе́млю и́нꙋ и҆ до нн҃ѣ·

Та́инаѧ гв҃и б҃ꙋ на́шемꙋ, ꙗ҆вле́нна ꙗ҆́же на́мъ и҆ ча́домъ на́шим̑ въ вѣ́ки.
твори́ти вс̂ѧ словеса̀ зако́на сего̀·

Глв̑҇а, л҃·

И бꙋ́детъ ꙗ҆ко прїидт̑ꙋ на́ тѧ вс̂ѧ словеса̀ с̂и блс̑҇ве́нїе и҆ клѧ́тва, ю҆́же да́хъ пред̑ лицем꙽ твои҆мъ·

И прїимеши е҆̀ въ срд̑цы свое҆мъ въ всх̑ѣ страна́хъ.
в нѧ́же т̂ѧ раз꙽сы́плетъ г҃ь б҃ъ твои та́мо·

И҆ ѻ҆брати́шисѧ къ г҃ꙋ б҃ꙋ твое҆мꙋ и҆ послꙋшаеши гласа е҆го, по всемꙋ е҆ли́ко а҆зъ заповѣ́даю тебѣ̀ днс̑҇ь, т̂ы и҆ сн҃ъ твои, ѿ всего̀ срд̑ца твое҆го, и҆ ѿ всеѧ̀ дш҃а твое҆ѧ·

И҆ ѻ҆цы́стит̑ г҃ь грѣхѝ твоѧ̀, и҆ поми́лꙋетъ т̂ѧ, и҆ па́ки събере́тъ т̂ѧ.
ѿ всх̑ѣ стра́нъ, в нѧ́же рас꙽сы́па т̂ѧ г҃ь б҃ъ та́мо·

А҆́ще бꙋ́детъ рас꙽сы́панїе твоѐ, ѿ кра́ѧ нбс̑҇наго до кра́ѧ нб҃си·

И҆ ѿтꙋ́дѣ съберетъ т̂ѧ г҃ь б҃ъ твои, и҆ ѿтꙋ́дꙋ въспрїимет̑ т̂ѧ·

И҆ въведет̑ т̂ѧ на зе́млю ю҆же прїѧ́ша ѿц҃ы твоѝ.
и҆ прїимеши ю҆̀, и҆ бл҃го т̂и сътворѝтъ.
и҆ ѹ҆мно́жит̑ т̂ѧ пач̑҇ ѿц҃ъ твои҆хъ·

И҆ ѻ҆чистит̑ г҃ь срд̑це твоѐ и҆ срд̑це племе́ни твое҆го.
любити г҃а б҃а твое҆го ѿ всего̀ срд̑ца твое҆го, и҆ ѿ всеѧ̀ дш҃а твое҆ѧ, да живеши т̂ы·

И҆ дастъ г҃ь б҃ъ тво́и сїа клѧ́твы на врагѝ твоѧ̀, и҆ на ненави́дѧщаѧ тебѐ, и҆же т̂ѧ ѿгнаша·

Ты же ѻ҆брати́шисѧ и҆ послꙋш́аеши гласа г҃а б҃а твое҆го.
и҆ сътвори́ши за́повѣди е҆го, е҆лико аз̑ заповѣ́даю тебѣ̀ днс̑҇ь·

И҆ ѹ҆мно́жит̑ т̂ѧ г҃ь б҃ъ твои, въ всем̑ дѣле рꙋкꙋ твое҆ю, и҆ въ пло́дѣхъ ѹ҆тробы твое҆ѧ, и҆ въ плодѣхъ скотъ твоих̑.
и҆ въ житехъ землѧ̀ твое҆а·

Ꙗ҆́ко ѻ҆братитсѧ г҃ь б҃ъ твои, и҆ възвеселит̑сѧ ѻ҆ тебѣ̀ бл҃гостїю, ꙗ҆́коже възвесели́сѧ ѻ҆ ѿц҃ѣхъ твои҆хъ·

А҆́ще послꙋшаеши гласа г҃а б҃а твое҆го.
снабдѣти и҆ твори́ти вс̂ѧ за́повѣди е҆го, и҆ ѻ҆правленїѧ, и҆ сꙋды̀ е҆го, напи́саные въ книгах̑ зако́на сего̀·

А҆́ще ѻ҆братишисѧ къ г҃ꙋ б҃ꙋ твое҆мꙋ и҆зъ всего̀ срд̑ца твое҆го, и҆зъ всеѧ̀ дш҃а твое҆ѧ·

Ꙗ҆́ко за́повѣди сїа ꙗ҆́же а҆зъ заповѣ́даю тебѣ̀ днс̑҇е.
не съкрыты сꙋть ни далече е҆сть ѿ тебѐ·

Нѣсть на нб҃си, да речеши кт̂о възы́де ѿ нас̑҇ на нб҃о, и҆ принесе́тъ ю҆̀ намъ.
и҆ слышавше ю҆̀ сътвори́мъ·

Ни̂ ѻ҆бонꙋ странꙋ̀ морѧ е҆сть да гл҃еши кт̂о принесет̑ ю҆̀ намъ ѡтт̑ꙋдꙋ, и҆ слы́шавше ю҆̀ сътвори́мъ·

Близ̑ тебѐ е҆сть слово ѕѣ́ло, въ ѹ҆стѣ́хъ твоих̑ и҆ въ срд̑цы твоем̑, и҆ въ рꙋкꙋ твое҆ю твори́ти е҆̀·

Се̂ дахъ пред̑ лицемъ твои҆мъ днесь, жизнь и҆ смр҃ть, бл҃го и҆ ѕл̂о·

А҆́ще послꙋшаеши за́повѣди г҃а б҃а твое҆го.
ю҆́же а҆зъ заповѣ́даю тебѣ̀ днесь любити г҃а б҃а твое҆го, и҆ ходити въ вс̂ѧ пꙋтѝ е҆го, и҆ хранити вс̂ѧ ѻ҆правленїѧ и҆ за́повѣди е҆го, и҆ сꙋды̀ е҆го·

И҆ ѻ҆живеши и҆ ѹ҆мно́жишисѧ, и҆ блс̑҇вит̑ т̂ѧ г҃ь б҃ъ твои на землѝ, в ню́же въни́деши прїа́ти е҆ѧ̀ та́мо·

А҆́ще л̂и ѻ҆брати́тсѧ срд̑це твоѐ, и҆ не послꙋшае҆ши, и҆ блꙋдѧ́щи поклонишисѧ бого́мъ чюждим̑, и҆ послꙋж́иши и҆м꙽·

Заповѣ́даю ва́мъ днс̑҇е, ꙗ҆́ко поги́белїю поги́бнете.
и҆ не ѹ҆мно́жите дн҃їи на землѝ ю҆́же г҃ь б҃ъ дае́тъ тебѣ̀, и҆дѣже и҆́деши чрез̑ і҆ѻ҆рда́нъ та́мо прїа́ти е҆ѧ̀·

Свѣдѣтель поставлѧ́ю на вас̑҇ дне́сь, нб҃о и҆ зе́млю.
живо́тъ и҆ смр҃ть, да́лъ е҆сми пред̑ лице́мъ ва́шимъ, блс̑҇ве́нїе и҆ клѧ́твꙋ·

Прїими же себѣ живо́тъ да живе́ши т̂ы и҆ племѧ̀ твоѐ, люби́ти г҃а б҃а твое҆го послꙋшати гла́са е҆го, и҆ прилѣпи́тисѧ къ немꙋ̀·

То́и б̂о е҆сть живот̑ твои, и҆ долгота̀ дн҃їи твоих̑ жи́ти на землѝ, ю҆же клѧ́сѧ г҃ь б҃ъ ѿц҃емъ твои҆мъ а҆враа́мꙋ і҆саа́кꙋ і҆а́ковꙋ да́ти и҆мъ·

Глв̑҇а, л҃а·

И шед̑ моѷсїи гл҃ѧ, вс̂ѧ словеса̀ с̂и къ всм̑ѣ сн҃омъ і҆и҆л҃евым̑·

И҆ реч̑҇ к нимъ, р҃, и҆ к҃, лт̑ѣ, а҆зъ е҆смь дне́сь, и҆ не възмогꙋ ксемꙋ̀ въходи́ти, і҆ и҆сходи́ти, г҃ь же гл҃а къ мнѣ̀, не пре́идеши і҆ѻ҆рда́на сего̀·

Гь҃ б҃ъ твои и҆же прд̑еи҆́детъ пред̑ лице́мъ твоим̑.
то́и потребит̑ страны̀ сїа́ ѿ лица̀ твое҆го.
и҆ причасти́ши и҆хъ.
і҆сꙋсъ же и҆ды́и пред̑ лице́мъ тво́имъ, ꙗ҆́коже гл҃алъ е҆сть г҃ь·

И҆ сътвори́тъ и҆мъ г҃ь, ꙗ҆́коже сътворѝ сїѻ́нꙋ и҆ ѻ́гꙋ двѣма цр҃ема а҆м꙽моррѣ́искима.
ꙗ҆́же бѣ́ста ѻбо́нꙋ странꙋ̀ і҆ѻ҆рда́на.
и҆ земли их̑·

Ꙗ҆́ко потребѝ и҆хъ, и҆ преда́стъ ѧ҆̀ г҃ь въ рꙋцѣ ва́ши.
и҆ да сътвори́те и҆мъ ꙗ҆́коже заповѣ́дахъ вамъ·

Възмꙋжа́и и҆ ѹ҆крѣпи́сѧ, н̂и бо́исѧ н̂и ѹ҆жаса́исѧ, н̂и ѹ҆клони́сѧ ѿ лица̀ и҆хъ.
ꙗ҆́ко г҃ь б҃ъ тво́и се́и пред̑и́детъ вамъ, и҆ не ѿстꙋ́питъ ѿ тебѐ, ниже ѻ҆ста́вит꙽ т̂ѧ·

И҆ призва̀ моѷсїи і҆сꙋ́са, и҆ реч̑҇ е҆мꙋ пред̑ всѣмъ і҆и҆л҃емъ, възмꙋжа́и и҆ ѹ҆крѣпи́сѧ.
т̂ы бо вни́деши пред̑ лицемъ людїи́ сихъ, въ зе́млю е҆ю́же сѧ кл̂ѧ г҃ь ѿц҃емъ ва́шим̑ да́ти ю҆̀ и҆мъ.
и҆ ты̀ ю҆̀ причасти́ши и҆мъ·

Гь҃ же са́мъ и҆ды́и с тобо́ю не ѻ҆ста́вит꙽ т̂ѧ, и҆ не ѿстꙋ́питъ ѿ тебѐ.
не бо́и҆сѧ н̂и ѹ҆жаса́исѧ·

И҆ въписа̀ моѷсїи вс̂ѧ словеса̀ зако́на сего̀ въ кни́ги, и҆ въда́стъ и҆̀ жерцем̑ сн҃омъ левѷином̑, въздви́жꙋщимъ ковче́гъ завѣта гн҃ѧ.
и҆ ста́рцемъ сн҃овъ і҆и҆л҃евых̑·

И҆ заповѣ́да и҆мъ моѷсїи въ то́и дн҃ь гл҃ѧ.
по сед̑ми лѣтъ въ́ времѧ лѣта ѻ҆ставле́нїа, въ празд̑ник̑҇ кꙋщныи·

Вънегда̀ съхо́дитсѧ ве́сь і҆и҆л҃ь, ꙗ҆ви́тисѧ пред̑ гм҃ъ бм҃ъ твои҆мъ, въ мѣ́стѣ е҆же и҆зберет̑ г҃ь.
почита́ите зако́нъ сїи, пред̑ всѣмъ і҆и҆л҃емъ въ ѹ҆́ши их̑·

Съзови́те лю́ди, мꙋжа и҆ же́ны и҆ дѣти и҆ прише́лца твое҆го, и҆же въ гра́дѣхъ ва́шихъ.
да слы́шит̑ и҆ наѹ҆чи́тсѧ боѧ́тисѧ и҆́мени г҃а б҃а ва́шего, и҆ послꙋш́аютъ твори́ти вс̂ѧ словеса̀ зако́на сего̀·

И҆ сн҃ове их̑ и҆же не вѣ́дѧтъ ѹ҆слы́шат̑, и҆ наѹ҆чат̑сѧ боѧ́тисѧ г҃а б҃а ва́шего, въ вс̂ѧ дн҃и е҆ли́коже сꙋть жи́ви на землѝ, на ню́же в̂ы минꙋ́ете і҆ѻрда́нъ т̂ꙋ причасти́ти ю҆̀·

И҆ реч̑҇ г҃ь къ моѷсїю с̂е приспѣша дн҃їе смр҃ти твое҆ѧ.
призови і҆сꙋ́са и҆ ста́нета пред̑ две́рми хра́ма свѣдѣ́нїѧ, и҆ заповм̑ѣ е҆мꙋ·

І҆ и́де моѷсїи і҆ и҆сꙋ́съ въ хра́мъ свѣдѣнїа.
и҆ ста́ста пред̑ две́рми хра́ма свѣдѣ́нїа·

И҆ сни́де г҃ь въ столпѣ̀ ѻ҆́блачнѣ.
и҆ ста̀ сто́лпъ ѻ҆́блачныи ѹ҆ две́рїи хра́ма свѣдѣ́нїа·

И҆ реч̑҇ г҃ь къ моѷсїю.
с̂е ты̀ почи́еши съ ѿц҃ы твои҆ми.
и҆ въста́вше лю́дїе сїи съблꙋ́дѧтъ въ слѣ́дъ бо́гъ чю́ждихъ, въ землѝ в ню́же по́идꙋтъ сїи та́мо.
и҆ ѻ҆ста́вѧтъ м̂ѧ, и҆ рас꙽сы́плютъ завѣтъ мо́и, и҆же завѣща́хъ и҆мъ·

И҆ раз꙽гнѣ́ваюсѧ ꙗ҆́ростїю на́ нѧ в꙽ то́и дн҃ь, и҆ ѻ҆ста́влю ѧ҆̀ и҆ ѿвращꙋ̀ лицѐ моѐ ѿ них̑.
и҆ бꙋ́дꙋтъ въ из̑ꙗ҆де́нїе, и҆ ѻ҆брѧ́щт̑ꙋ ѧ҆̀ ѕл̂а мно́га и҆ ско́рби.
и҆ рече́тъ в꙽ то́и дн҃ь, не сего́ ли ради и҆же нѣ́сть г҃а б҃а въ нас̑҇, пости́гнꙋша м̂ѧ ѕла́ѧ сїа·

А҆́зъ же ѿвраще́нїемъ ѿвращꙋ̀ лицѐ моѐ ѿ ни́хъ въ то́и дн҃ь, ѕло́бъ ради всѣх́ъ ꙗ҆́же сътвори́ша.
ꙗ҆́ко ѻ҆брати́шасѧ къ бого́мъ чюждим̑·

И҆ нн҃ѣ въпиши́те словеса̀ пѣ́сни сеѧ̀.
и҆ наѹ҆чи́те е҆ѧ̀ сн҃ы і҆и҆л҃вы.
и҆ да въложи́те ю҆̀ въ ѹ҆ста̀ и҆хъ.
да бꙋ́детъ м̂и пѣ́снь с̂и въ послꙋшество̀ въ сн҃ѣхъ і҆и҆л҃евыхъ·

Въведꙋ́ бо ѧ҆̀ въ зе́млю бл҃гꙋю, е҆ю́же сѧ клѧ́хъ ѿц҃емъ их̑, да́ти и҆мъ зе́млю кипѧ́щꙋ мле́комъ и҆ ме́домъ.
и҆ ꙗ҆дѧ́тъ, и҆ насыти́вшесѧ възбꙋѧ́ютъ·

И҆ ѻ҆братѧт̑сѧ къ бого́мъ чюждимъ, и҆ послꙋж́ат̑ и҆мъ и҆ разгнѣ́ваютъ м̂ѧ·

и҆ рас꙽сы́плютъ завѣтъ мой, и҆же завѣщах̑ и҆мъ·

Тогда́ же на́идетъ на́нь ѕло́ба различна и҆ ско́рбь, и҆ сꙋпротивит꙽сѧ им̑ пѣ́снь сїѧ противꙋ лица̀ и҆хъ.
въ свѣдѣтел̑҇ство и҆звѣствꙋющи ꙗ҆́ко не забы́стьсѧ ѿ ѹ҆́стъ племе́ни и҆х꙽.
зане́ же б̂о а҆зъ вѣде ѕло́бы и҆хъ, ели́ко творѧ́тъ дне́сь зд̂ѣ.
пр́ьвѣе въведе́нїѧ и҆хъ въ зе́млю бл҃гꙋю, е҆ю́же сѧ клѧ ѿц҃емъ и҆хъ.
и҆ въписа моѷсїи пѣ́снь сїю въ то́и дн҃ь, и҆ наѹ҆чи е҆ю̀ сн҃ы і҆ил҃евы·

И҆ заповѣ́да г҃ь і҆сꙋ́сꙋ сн҃ꙋ на́вѷинꙋ.
и҆ реч̑҇ е҆мꙋ.
възмꙋжа́и ѹ҆крѣпи́сѧ, ты́ бо въведе́ши сн҃ы і҆ил҃евы въ зе́млю е҆ю҆же клѧ́хъсѧ и҆мъ, и҆ аз̑ бꙋ́дꙋ с тобо́ю·

И҆ е҆гда̀ же сконча̀ моѷсїи пиша̀.
вс̂ѧ словеса̀ зако́на сего̀ въ кни́ги даже до конца̀.
и҆ заповѣ́да левѷтомъ, вѣздвижꙋщимъ ковче́гъ завѣта гн҃ѧ гл҃ѧ·

Възе́мше кни́ги зако́на сего̀.
положите ѧ҆̀ въ странꙋ̀ ковче́га завѣта г҃а б҃а ва́шего, и҆ да бꙋ́детъ т̂ꙋ вамъ въ свѣдѣ́нїе·

Ꙗ҆ко а҆зъ вѣ́дѣ разъгнѣ́ванїе твое, и҆ выю твою̀ же́стокꙋю.
е҆ще б̂о мн̂ѣ жи́вꙋ сꙋщꙋ съ ва́ми дне́сь, разгнѣвали е҆сте г҃а и҆ ꙗ҆ко па́че по смерти моей·

Призови́те къ мн̂ѣ старѣ́ишины племен꙽ вашихъ, и҆ ста́рца ва́ша.
и҆ сꙋдїѧ̀ ваша.
и҆ книгочїѧ ва́ша да гл҃ю въ ѹ҆́ши и҆хъ вс̂ѧ словеса̀ сїѧ, и҆ засвѣдѣтельствꙋю̀ вам̑ нб҃семъ и҆ зем̑лею·

Вѣдѣ б̂о ꙗ҆́ко по скончанїи мое҆мъ безаконїемъ събезакон꙽ните.
и҆ скло́нитесѧ с пꙋтѝ, и҆же а҆зъ заповѣ́дах꙽ вамъ·

и҆ ѻ҆брѧщетъ в̂ы ѕл̂о въ послѣднѧ́а дн҃и, ꙗ҆ко сътвори́сте ѕл̂о пред̑ гм҃ъ бм҃ъ разгнѣ́вати е҆го въ всѣ́хъ дѣ́лехъ рꙋкꙋ ва́шею·

И҆ гл҃а моѷсїи въ ѹ҆ши всемꙋ сонмꙋ вс̂ѧ словеса̀ пѣ́сни сеа̀ даж̑ и҆ до конца̀·

Глв̑҇а, л҃в·

Во́нми нб꙽о, и҆ въз꙽гл҃ю, и҆ да слы́шитъ землѧ̀ гл҃ы ѹ҆́стъ мои҆хъ·

да ча́етъ ꙗ҆́ко до́ждь просвѣще́нїе мое и҆ сни́дт̑ꙋ ꙗ҆́ко рода̀ гл҃и моѝ·

Ꙗ҆́ко тꙋ́ча на́ троскотъ, ꙗ҆́ко и́неи на сѣно·

Ꙗ҆́ко и́мѧ гн҃е призва́хъ, дади́те вели́чїе б҃ꙋ на́шемꙋ·

Бг҃ъ и҆́стинна дѣ́ла е҆го, и҆ вс̂и пꙋтїе е҆го сꙋдъ, б҃ъ вѣренъ, и҆ нѣсть непра́вды въ немъ.
пра́веденъ и҆ прпд̑бенъ г҃ь·

Съгрѣши́ша не того ча́да поро́чнаѧ.
ро́дъ стропти́въ и҆ разъвраще́нъ·

Сїѧ л̂и гв҃и вѣздае́те сїи лю́дїе бꙋ́и, и҆ немꙋдри.
не сам̑ л̂и се́и ѿц҃ъ тво́и, стѧжа̀ т̂ѧ и҆ сътворѝ т̂ѧ, и҆ създа̀ т̂ѧ·

Помѧни́те дн҃и вѣчныѧ.
разꙋмѣ́ите же лѣта ро́да родов̑҇.
въпросѝ ѿц҃а твое҆го и҆ възвѣсти́т꙽ тебѣ̀, ста́рца твоѧ и҆ рекꙋтъ тебѣ̀·

Є҆гда̀ раздѣлѧа́ше вы́шнїи ꙗ҆зы́ки ꙗ҆коже раз꙽сѣ́ѧ сн҃ы а҆да́мовы.
положѝ предѣлы ꙗ҆зы́комъ, по числꙋ̀ а҆́гг҃лъ бж҃їихъ·

И҆ бы́сть ча́сть гн҃ѧ, лю́дїе е҆го, і҆а́ковъ.
ча́сть наслѣ́дїѧ е҆го і҆и҆л҃ь·

Ѹ҆до́вли е҆го въ пꙋсты́ни безво́днѣ.
въ жа́жди зно́ѧ ѻ҆бы́иде е҆го и҆ наказа̀ е҆го.
и҆ съхранѝ е҆го ꙗ҆́ко зѣ́ницꙋ ѻ҆́ка·

Ꙗ҆́ко ѻ҆ре́лъ покры́ти гнѣздо̀ своѐ, и҆ на пте́нца своѧ̀ въжделѣ.
простер̑҇ крылѣ̀ свои, и҆ прїа́тъ их̑, и҆ под̑ѧ́тъ и҆хъ на ра́мꙋ свое́ю·

Гь҃ е҆ді́нъ въжда́ше и҆хъ, и҆ не бѣ̀ с ни́ми б҃ъ чю́ждь·

Възведѐ ѧ҆̀ на си́лꙋ землѝ, насытѝ и҆хъ жи́тъ се́лныхъ.
със꙽са́ша ме́дъ и҆с ка́мене, и҆ е҆ле́и ѿ тве́рда ка́мене·

Ма́сло кра́вїе, и҆ мле́ко ѻ҆́вчее, съ тꙋ́комъ а҆́гньчим̑ и҆ ѻ́внимъ, сыно́въ ю҆́нчихъ и҆ ко́злих̑ съ тꙋкомъ пшени́чномъ.
и҆ кро́вь гро́здовꙋ пїа́хꙋ вино̀·

И҆ ꙗ҆дѐ і҆а́ков꙽ и҆ насыти́сѧ.
и҆ ѿве́ржесѧ възлю́бленныи.
ѹ҆ты̀ ѹ҆толъстѣ̀, и҆ раз̑ширѣ̀.
и҆ ѻ҆ста́ви б҃а сътвор꙽шаго и҆̀, и҆ ѿстꙋпѝ ѿ б҃а сп҃са свое҆го·

Прогнѣваша м̂ѧ ѻ҆ чю́жди́х꙽, въ ме́рзостех̑ свои҆хъ прегорчи́ша м̂ѧ·

Пожро́ша бѣ́совомъ а҆ не б҃ꙋ.
бого́мъ, и҆хже не вѣ́даша.
новїи с̂екра́тъ, прїидо́ша, и҆хже не вѣ́даша ѿц҃ы и҆х꙽·

Бг҃а ро́ждьшаго т̂ѧ ѻ҆ста́ви, и҆ забы̀ б҃а пита́ющаго т̂ѧ·

И҆ ви́дѣ г҃ь и҆ възревнова̀.
и҆ раздражи́сѧ, за гнѣ́въ сн҃овъ их̑ и҆ дщерїи·

И҆ рече, ѿвращꙋ̀ лицѐ моѐ ѿ ни́хъ, и҆ покажꙋ̀ чт̂о бꙋ́детъ и҆мъ на послѣ́докъ ꙗ҆́ко ро́дъ разъвраще́нъ е҆сть.
сн҃ве и҆́хже нѣсть вѣры въ ни́хъ·

Тїи раздражи́ша м̂ѧ не ѻ҆ бѕ҃ѣ, прогнѣваша м̂ѧ въ и́долѣхъ своихъ, а҆́з꙽ раздражꙋ̀ их̑ не ѻ҆ ꙗ҆зыцх̑ѣ ѻ҆ ꙗ҆зыцх̑ѣ же неразꙋмливых̑ прогнѣ́ваю их̑·

Ꙗ҆́ко ѻ҆́гнь възгори́тсѧ ѿ ꙗ҆́рости моеѧ̀, раждьже́тсѧ до а́да преи҆спо́днѧго.
снѣсть зе́млю, и҆ жита е҆ѧ, попа́литъ ѻ҆снова́нїѧ гора́мъ·

Съберꙋ̀ на нихъ ѕла́ѧ, и҆ стрѣ́лы моѧ скон꙽чаю въ ни́хъ·

Та́юща гла́домъ.
и҆ снѣ́дь пти́цъ, и҆ гръбъ неи҆сцѣлен̑҇.
зꙋ́бы ѕвѣ́рїи послю̀ в нѧ̀, съ ꙗ҆́ростїю пресмыка́ющимисѧ по землѝ·

ѿ вн̂ѣ безча́дитъ и҆хъ мечь, и҆ ѿ храм̑ и҆хъ стра́хъ.
ю҆́ноша съ дв҃ою.
със꙽сыи.
съ ѻ҆́трокомъ старцемъ·

Рѣхъ, разсѣ́ю и҆хъ, ѹ҆ста́влю же ѿ чл҃къ па́мѧть и҆хъ·

Токмо за гнѣ́въ вра́гъ, ꙗ҆́ко да не долголѣтъствꙋ́ютъ, и҆ да не налѧ́гꙋтъ сꙋпоста́ти.
да не рекꙋтъ, рꙋка̀ на́ша высо́ка.
и҆ не г҃ь сътворѝ сїѧ вс̂ѧ·

Ꙗ҆́ко ꙗ҆зы́къ погꙋ́бль совѣтъ е҆сть и҆ нѣсть в ни́хъ хꙋдожьства.
не смы́слиша разꙋмѣти, сїѧ вс̂ѧ·

да прїимꙋтъ въ грѧдꙋщее вре́мѧ.
ка́ко пожене́тъ е҆ді́нъ ты́сѧщꙋ, и дв̂а дви́гнета тм̂ы.
а҆́ще не б҃ъ ѿда́стъ и҆хъ и҆ г҃ь преда́стъ и҆хъ·

Нѣ сꙋть б̂о бо́ѕи и҆хъ ꙗ҆́ко б҃ъ на́шъ вра́ѕи же на́ши неразꙋ́мливи·

ѿ виноградъ б̂о содомъскихъ виноград̑ и҆хъ, и҆ лоза̀ и҆хъ ѿ гоморы.
гроздъ и҆хъ, гроздъ желчи, гроздъ горести ихъ·

Ꙗ҆́рость ѕмїи, вино̀ их̑ и҆ ꙗ҆́рость а҆спидъ неи҆сцѣ́лна·

Не сїѧ л̂и вс̂ѧ събрашасѧ ѹ҆ менѐ, и҆ запечатлѣшасѧ въ съкровищих̑ мои҆х꙽ въ дн҃ь ѿм꙽щенїѧ възда́мъ, въ времѧ вънегда̀ съблазни́тсѧ нога̀ их꙽ ꙗ҆́ко близь дн҃ь поги́бели и҆хъ, и҆ пред̑сташа гото́ваѧ ва́мъ·

Ꙗ҆́ко сꙋдит̑ г҃ь люде́мъ свои҆мъ, и҆ ѻ҆ рабѣхъ свои҆хъ ѹ҆моле́нъ бꙋдетъ.
видѣ б̂о их̑ раз꙽слаблены, і҆ и҆ста́ѧвша въ времѧ і҆ и҆знемогоша·

И҆ рече г҃ь гд̂ѣ сꙋть бо́ѕи и҆хъ, и҆же ѹ҆поваша на нѧ·

И҆хже тꙋкъ жр́ътвъ их̑ ꙗ҆дѧ́сте, и пїꙗ҆́сте вино̀ требъ ихх̑·

да въскрс̑҇нт̑ꙋ и҆ помогт̑ꙋ вам̑ и҆ бꙋдт̑ꙋ вам̑ покровителе·

Ви́дите ви́дите, ꙗ҆́ко а҆́зъ е҆смь, и҆ нѣсть б҃ъ ра́звѣ менѐ.
а҆зъ ѹ҆бїю̀ и҆ жи́ти сътворю̀.
поражꙋ̀, и҆ а́зъ и҆сцѣлю̀.
и҆ нѣсть и҆же и҆змет̑ ѿ рꙋкꙋ̀ мое҆ю·

Ꙗ҆́ко въздви́гнꙋ на́ нб҃о рꙋ́кꙋ мою, и҆ кленꙋ́сѧ десни́цею мое҆ю.
и҆ рекꙋ̀, жи́вꙋ а҆́зъ въ вѣкъ·

Ꙗ҆́ко поѻ҆стрю̀ ꙗ҆́ко мо́лнїю ме́чь мои, и҆ прїиметъ сꙋ́дъ рꙋка моѧ̀.
и҆ възда́мъ ме́сть врагомъ, и҆ ненави́дѧщим̑ м̂ѧ възда́мъ·

Ѹ҆пою̀ стрѣ́лы моа̀ ѿ кро́ви, и҆ ме́чь мо́и снѣсть мѧ́са.
ѿ кро́ве ꙗ҆́звеныхъ и҆ плѣне́нїа, ѿ глав̑҇ кн҃ѕь ꙗ҆зы́ческих꙽·

Възвесели́тесѧ нб҃са кꙋп́но с ним̑, и҆ да покло́нѧтсѧ е҆мꙋ вс̂и а҆гг҃ли бж҃їи·

Възвесели́тесѧ ꙗ҆зы́цы съ люд̑ми е҆го, и҆ да ѹ҆крѣпѧт̑сѧ е҆мꙋ вс̂и сн҃ове бж҃їи·

Ꙗ҆́ко кро́вь сн҃ов̑҇ свои҆хъ м꙽ща́етъ, и҆ ѿм꙽сти́тъ и҆ возда́стъ ме́сть враго́мъ, и҆ ненави́дѧщим̑ е҆го възда́стъ.
и҆ ѻ҆чи́ститъ г҃ь зе́млю людїи свои҆хъ·

И҆ въписа̀ моѷсїи пѣ́снь сїю́ въ то́й дн҃ь, и҆ наѹ҆чѝ е҆ю сн҃ы і҆и҃лѧ.
и҆ въни́де моѷсїи къ лю́дем̑.
и҆ гл҃а вс̂ѧ словеса̀ зако́на сего̀ въ ѹ҆́ши лю́демъ, сам̑ і҆ и́сꙋсъ навѷнъ·

И҆ сконча̀ моѷсїи гл҃ѧ словеса̀ сїи в꙽семꙋ̀ і҆и҆л҃ю·

И҆ рече к ни́мъ въне́млите срд̑цемъ ва́шим̑ вс̂ѧ словеса̀ сїи.
ꙗ҆́же азъ и҆звѣстꙋ́ю вам̑ днс̑҇е·

Ꙗ҆́же да заповѣ́сте сн҃омъ своим̑.
снабдѣти и҆ твори́ти вс̂ѧ словеса̀ зако́на сего̀·

Ꙗ҆́ко нѣсть сло́во с̂е сꙋ́е вам̑ н̂о жи́знь ваша, и҆ сего ра́ди сло́ва длъги дн҃и бꙋ́дете на землѝ.
на ню́же в̂ы минꙋе́те і҆ѻ҆рда́нъ та́мо причастити ю҆̀·

И҆ рече г҃ь къ моѷсїю въ дн҃ь сїи гл҃ѧ.
възы́ди на горꙋ̀ а҆варим̑.
гора наварїѹ҆̀ ꙗ҆же е҆сть въ землѝ моа́вли прѧ́мо е҆ри́хꙋ.
и҆ виждь зе́млю ханаа́ню, ю҆же а́зъ да́ю сн҃омъ і҆и҆л҃евымъ въ ѻ҆дръжа́нїе·

И҆ сконча́исѧ тамо на горѣ̀ на нюже въсхо́диши, и҆ приложисѧ къ людемъ своим̑.
ꙗ҆́кож̑ ѹ҆́мре а҆а҆ро́нъ бра́тъ тво́и на горѣ̀ ѻ҆́рѣ, и҆ приложи́сѧ к люде́мъ своим̑·

Поне́же не покори́стесѧ сло́вꙋ мое҆мꙋ въ сн҃ѣхъ і҆и҆л҃евѣхъ ѹ҆ воды̀ сꙋпротивныѧ кади́съ, въ пꙋсты́ни си́ни.
и҆ понеже не ѻ҆ст҃исте менѐ въ сн҃ѣхъ і҆и҆л҃евых꙽·

Ꙗ҆́ко съпрѧма во́зриши зе́млю.
н̂о тамо не въни́деши, е҆ꙗ҆́же даю̀ сн҃омъ і҆ил҃евымъ·

Глв̑҇а, л҃г·

Се же блс̑҇ве́нїемъ и҆же блс̑҇ви моѷсїи чл҃къ бж҃їи сн҃ы і҆ил҃евы прежде скон̑҇ча́нїа свое҆го·

И҆ рече, г҃ь ѿ сїѻ́на прїиде, и ꙗви́сѧ ѿ.
їира намъ и приспѣ̀ ѿ горы̀ фара́нѧ и҆ прїиде со т꙽мами ст҃ыхъ ѻ҆деснꙋю е҆го ѻ҆́гнь зако́нꙋ и҆мъ·

И҆ пощадѣ̀ люди своа, и҆ вс̂и ст҃їи въ рꙋках̑ е҆го сꙋть, и҆ приставшїи ногам꙽ е҆го прїа́ша ѿ словесъ е҆го·

Зако́нъ, и҆же заповѣ́да намъ моѷсїи.
и҆ причастїе со́нма і҆а́ковлѧ·

И҆ бꙋдетъ правед̑наго цр҃ь вънегда̀ собирахꙋсѧ кнѧѕи люд̑стїи въкꙋпе и҆ племена сн҃овъ і҆ил҃евыхъ·

да живет꙽ рꙋви́мъ, да не ѹ҆́мретъ, и҆ бꙋ́детъ въ мало число̀.
и симеѻ́нъ да бꙋдетъ мно́гъ числом̑·

А҆ с̂е і҆ю҆дѣ.
и҆ рече послꙋшай г҃и гла́са і҆ю҆дина и҆ въ люди е҆го въведѝ.
рꙋка̀ е҆го ѻ҆би́лна е҆мꙋ, и҆ помо́щник꙽ на враги е҆го да бꙋдешѝ·

И҆ левѷи речѐ, дадите левѷи страшли́выѧ е҆го, і҆ и҆стиннꙋ е҆го мꙋжꙋ прпд̑бнꙋ, е҆гоже и҆скꙋси во и҆скꙋшенїи и҆ ѻ҆блъгаше и҆̀ ѹ҆ воды̀ сꙋпротивныа·

Гл҃ѧй ѿц҃ꙋ свое҆мꙋ и҆ мт҃ри свое҆и, не ви́дѣхъ тебѐ.
и҆ братїѧ свое҆ѧ не позна̀.
и҆ сн҃овъ свои҆хъ не ѹ҆видѣ.
снабдѣ̀ словеса̀ твоѧ̀ и҆ завт̑ѣ тво́и снабдѣ̀·

Повѣдѧтъ ѻ҆правле́нїа твоѧ̀ і҆а́ковꙋ и҆ зако́нъ твои і҆ил҃ю.
възложа́тъ ѳимїѧ́мъ въ гнѣ́вѣ твое҆мъ прино́съ на ѻ҆́лтарь тво́и·

Блс̑҇ви г҃и крѣ́пость е҆го, и҆ дѣ́ла рꙋкꙋ̀ е҆го прїими.
побїи чресла̀ въставших̑ на́нь вра́гъ е҆го, и҆ ненави́дѧщих̑ е҆го, да не въскрс̑҇нꙋтъ·

И҆ веньꙗ҆ми́нꙋ реч̑҇ възлю́бленныи гм҃ъ ѹ҆поваѧй вселит̑сѧ в немъ и҆ б҃ъ ѻ҆кри́литъ е҆го, вс̂ѧ дн҃и.
и҆ посредѣ̀ ра́менъ е҆го почїет̑·

І҆ и҆ѻ́сифови реч̑҇ съ блс̑҇ве́нїемъ гн҃имъ землѧ̀ е҆го, ѿ высоты̀ нбс̑҇ныѧ росы̀, и҆ ѿ безд̑нъ и҆сто́чники ни́зꙋ·

И҆ въ времѧ жи́та со́лнечных̑ премене́нїи, и҆ ѿ сне́мъ мѣ́сѧчныхъ·

И҆ ѿ ве́рха горъ нача́ло.
и҆ ѿ ве́рха холмовъ а҆е҆наѻ́ньскихъ·

И҆ по времени землѧ̀ съверше́нїа·

и҆ прїа́тенъ ꙗ҆ви́вшемꙋсѧ въ кꙋпи́нѣ.
да прїидꙋтъ на главꙋ̀ и҆ѻ́сифꙋ.
и҆ на ве́рхъ, да просла́вит̑сѧ въ бра́тїи е҆го·

Ꙗ҆́ко первород̑наго телца̀ доброта̀ е҆го.
и҆ ꙗ҆́ко рогъ и҆норо́га ро́зи е҆го.
тѣ́ми страны̀ прободе́тъ въкꙋ́пѣ до кра́ѧ землѧ̀.
сїѧ тм̂ы е҆фрѣмовы.
и҆ сїѧ ты́сꙋща манаси́и҆на·

И҆ заѹ҆ло́нꙋ реч̑҇.
възвесели́сѧ заѹ҆ло́нъ въ и҆схо́дѣ твое҆мъ.
и҆саха́ръ въ домѣ́хъ е҆го·

Страны̀ на горꙋ̀, и҆ призовꙋтъ, и҆ положат̑ т̂ꙋ тре́бꙋ пра́вдѣ.
и҆ богат̑ство морско́е въздоѧ́т꙽.
и҆ прїимꙋтъ съкро́вища съкрове́нныѧ въ песцѣ·

И҆ га́дꙋ реч̑҇ блс̑҇ве́нъ раз꙽ширѧ́асѧ гад̑.
ꙗ҆́ко ле́въ почѝ съкрꙋши́выи мы́шцꙋ кн҃ѕѧ·

И҆ ѹ҆ви́дѣ нача́ткы своѧ̀ ꙗ҆́ко та́мо раздѣли́сѧ землѧ̀, кн҃ѕеи събра́ных̑ въкꙋ́пѣ въ нача́ло змлѝ люд̑скїѧ.
пра́вдꙋ сътвори́тъ г҃ꙋ, и сꙋ́дъ сво́и съ і҆и҆л҃емъ·

И҆ да́нꙋ реч̑҇ да́нъ лви́чищ꙽ ско́читъ ѿ васа́на·

И҆ неѳали́мꙋ реч̑҇.
неѳали́мъ насыще́нїе прїа́тно.
и҆ насы́титсѧ блс̑҇ве́нїа ѿ г҃а.
мо́ре и҆ ю́гъ наслѣ́дитъ·

И҆ а҆си́рꙋ реч̑҇, блс̑҇ве́нъ ѡ ча́дъ а҆си́ръ.
и҆ бꙋ́детъ прїѧ́тенъ бра́тїи свое́й.
ѻ҆мо́читъ въ е҆ле́и но́гꙋ свою̀·

Желѣ́зо и҆ мѣ́дь сапо́гъ е҆го бꙋдетъ.
и҆ а҆ки дн҃ь твои крѣпость твоѧ̀·

Нѣсть б̂о ꙗ҆́ко б҃ъ любез̑наго.
въсходѧ́и на нб҃о помощь тебѣ.
и҆ великолѣпыи въ твердилѣ·

И҆ покрыет̑ т̂ѧ бж҃їе начало.
и҆ под̑ крѣпостїю мыш꙽ца прс̑҇носꙋщныѧ, ѿженет̑ ѿ лица̀ твое҆го врагѝ.
гл҃ѧ погꙋблю̀·

И҆ вселитсѧ і҆и҆л҃ь ѹ҆поваѧ е҆ді́нъ на землѝ і҆а́ковли.
вино́мъ и҆ пшени́цею.
и нб҃о е҆мꙋ ѻ҆бла́чно росо́ю·

Бл҃же́нъ е҆си і҆и҆л҃ю.
кт̂о подо́бенъ ва́мъ.
лю́дїе спс̑҇нїи ѿ г҃а.
щи́тъ по́мощъ твоѧ.
и҆ ѻ҆рꙋжїе хвала твоѧ̀, и҆ съ́лжютъ тебѣ̀ враѕи твоѝ.
ты́ же на вы́ю и настꙋ́пиши·

Глв̑҇а, л҃д·

И взы́де моѷсїи ѿ а҆ровоѳа моа́влѧ.
на горꙋ̀ моа́влю, на ве́рхъ ѳазга, е҆же е҆сть прѧмо е҆рихꙋ.
и҆ показа̀ е҆мꙋ г҃ь вс̂ю зе́млю галаад̑скꙋ до да́на·

И҆ вс̂ю зе́млю неѳли́млю и҆ е҆фрѣмовꙋ, и манасїинꙋ.
и҆ вс̂ю землю і҆ю҆́динꙋ до мо́рѧ послѣ́днѧго·

И҆ пꙋстыню и҆ ѻ҆́крс̑҇тнаѧ села̀.
и҆е҆рихона гра́да фини́чьскаго, до сиго́ра·

И҆ реч̑҇ г҃ь къ моѷсїю.
сїѧ землѧ̀ е҆ю́же клѧх̑сѧ, а҆враа́мꙋ, і҆саа́кꙋ, і҆а҆ковꙋ гл҃ѧ.
племени ва́шемꙋ дамъ ю҆̀.
и҆ показах̑ ю҆̀ ѻ҆чи́ма твои҆ма, н̂о та́мо не внидеши·

И҆ скончасѧ т̂ꙋ моѷсїи рабъ гн҃ь въ землѝ моа́вли сло́вом̑ гн҃и·

И҆ погребо́ша е҆го въ землѝ моа́вли, бли́зъ до́мꙋ ѳого́рова.
и҆ не свѣде н̂иктоже погребенїа е҆го, даже и҆ до днс̑҇е·

Моѷсїю же б̂ѣ, р҃, и҆ к҃, лѣтъ, вънегда̀ сконча́сѧ.
и҆ не ѻ҆темнѣстѣ ѻ҆́чи е҆мꙋ н̂и и҆стлѣ́ста вѣжди е҆го·

И҆ плака́шесѧ сн҃ове і҆ил҃еви моѷсїа въ равоѳѣ моа́вли ѹ҆ і҆ѻ҆рда́на близъ е҆рихона.
л҃, дн҃їи.
и҆ сконча́шасѧ дн҃їе пла́ча желѣ́нїѧ моѷсїина·

І҆ и҆сꙋсъ сн҃ъ навѷинъ напо́лнисѧ дх҃а смыслена.
възложи б̂о моѷсїи рꙋцѣ̀ своѝ на́нь.
и҆ послꙋшаша е҆го сн҃ове і҆и҆л҃ви, и҆ сътвори́ша ꙗ҆́коже заповѣ́да г҃ь моѷсїю·

И҆ не въста̀ по семъ прро̑҇къ въ і҆и҆л҃и ꙗ҆́коже моѷсїи.
е҆гоже позна̀ г҃ь лицемъ къ лицꙋ̀·

Въ всѣ́хъ знаменїихъ и҆ чюдесѣ́хъ, и҆же посла̀ е҆го г҃ь сътвори́ти ѧ҆̀ все́и землѝ е҆гѷпет̑стеи.
фараѻ҆́нꙋ и҆ слꙋгам̑ е҆го.
и҆ земли е҆го чюдеса̀ вели́ка.
рꙋкою крѣ́пкою и҆ мы́шцею высо́кою, е҆же сътворѝ моѷсїи пред̑ всѣмъ і҆и҆л҃емъ·

Конецъ пѧтым̑ кни́гамъ моѷсїѻвым̑.
и҆ маю҆́тъ в себѣ̀ глв̑҇а, л҃д·