КНИ́ГА И҆СꙊ́СА СН҃А НАВИНА

Глав̑҇· а҃

И бы́сть по сконча́нїи моѷсїѻ҆вѣ раба̀ гн҃ѧ.
и҆ рече г҃ь і҆сꙋсꙋ сн҃ꙋ навѷинꙋ рабꙋ̀ моѷсїѻ҆вꙋ гл҃ѧ·

Моѷсїи ра́б꙽ мой сконча́сѧ.
нн҃ѣ ѹ҆бо въста́въ преидѝ і҆ѻ҆рда́нъ т̂ы и҆ вс̂и лю́дїе си̂ въ зе́млю ю҆́же а҆́з꙽ даю̀ вам̑·

Все мѣсто по немꙋже пре́идете сто́пою но́гъ ва́шихъ ва́мъ дам̑ ю҆̀ ꙗ҆́коже гл҃ахъ моѷсїю·

ѿ сеѧ̀ пꙋсты́нѧ и҆ сꙋпроти́въ дꙋбра́въ, даже до рекѝ вели́кїѧ е҆фра́та, и҆ до́ морѧ послѣднѧго.
и҆же ѿ за́пада слн҃ца да бꙋдт̑ꙋ предѣлы ва́ши·

Не сꙋпроти́витсѧ вамъ чл҃къ пред̑ ва́ми, въ вс̂ѧ дн҃и живота̀ ва́шего.
і҆ ꙗ҆коже бѣхъ съ моѷсїѻ҆мо, та́кожде бꙋдꙋ и҆ с тобо́ю не ѻ҆ста́влю тебѐ и҆ не пре́зрю т̂ѧ·

Ѹ҆крепи́ же сѧ и҆ бꙋди си́ленъ ты̀ б̂о раздѣли́ши людемъ сим̑ зе́млю, е҆ю́же сѧ клѧ́хъ ѿц҃емъ и҆хъ да́ти ю҆̀ им̑·

Толи́ко ѹ҆крѣпи́сѧ и҆ възмꙋжа́и ѕѣло, снабдева́ти и҆ твори́ти, ꙗ҆́коже тебѣ заповѣ́да моѷсїи ра́бъ мо́и.
и҆ не съврати́сѧ ѿ нихъ ни на́ десно н̂и на́ лѣво, да смы́слиши въ все́мъ ѻ҆ ни́хже а҆́ще дѣ́еши·

И҆ да не ѿстꙋпѧтъ кни́ги зако́на сего̀ ѿ ѹ҆́стъ твои҆хъ, н̂о да поѹ҆ча́ешисѧ в ни́х꙽ дн҃ь и҆ нощ꙽.
да смы́слиши сътвори́ти вс̂е пи́саное.
тогда̀ ѹ҆годи́т꙽ ти сѧ и҆ ѹ҆годи́ши пꙋтѝ своа и҆ тогда̀ смы́слиши, с̂е заповѣ́даю тебѣ̀·

Ѹ҆крѣпи́сѧ и҆ возмꙋжа́и не ѹ҆жаса́исѧ н̂и возбо́исѧ.
ꙗ҆ко с тобо́ю а҆зъ г҃ь б҃ъ тво́и, ꙗ҆́може а҆ще по́идеши·

И҆ заповѣ́да і҆сꙋсъ кни́гочїѧмъ люд̑скым꙽ гл҃ѧ.
вни́дѣте посредѣ̀ по́лчища люд̑ска, и҆ заповѣ́даите лю́дем̑ гл҃юще.
ѹ҆готова́ите бра́шна, ꙗ҆́ко е҆щѐ тр̂и дн҃и да мине́те і҆ѻ҆рда́нъ сїи.
и҆ вшед̑ше прїимѣте зе́млю, и҆же г҃ь б҃ъ ѿц҃ъ ва́шихъ да́стъ ва́мъ ю҆̀ въ прича́стїе·

Рꙋви́мꙋ же и҆ га́дꙋ, и҆ полꙋ̀ племе́ни манасїи́нꙋ.
реч̑҇ і҆сꙋсъ гл҃ѧ помѧнѣте сло́во, е҆же заповѣ́да вам̑ моѷсїи ра́бъ гн҃ь, гл҃ѧ.
г҃ь б҃ъ ваш꙽ поко́и вас̑҇, и҆ дасть вам̑ зе́млю сїю·

Же́ны ваша и҆ дѣти ваша, и҆ ско́ти ваши да живꙋтъ въ землѝ ю҆же да́стъ вамъ моѷсїи ѹ҆ і҆ѻ҆рда́на.
выж̑ да пре́идете въѻ҆рꙋже́ни пред̑ бра́тїею ва́шею всѧ́къ крѣ́покъ и҆ побо́рете по ни́хъ·

до́ндеже поко́итъ г҃ь б҃ъ ва́шъ бра́тїю ва́шꙋ, ꙗ҆́коже и҆ ва́съ да прїимꙋтъ и҆ сїи́ зе́млю ю҆же г҃ь б҃ъ ва́шъ да́етъ и҆мъ.
и҆ тогда̀ ѿи҆дет̑ ко́ждо въ прича́стїе своѐ и҆же да́сть ва́мъ моѷсїи, ѻ҆бо́нꙋ странꙋ̀ і҆ѻ҆рда́на, ѿ восто́ка сл҃нцꙋ·

И҆ ѿвѣща́вше і҆сꙋсꙋ рѣша вс̂е е҆ли́ко заповѣ́да нам̑ да сътворим̑ въ вс̂е мѣ́сто.
а҆́може пꙋстиши насъ и҆́демъ·

По всемꙋ̀ е҆ли́ко послꙋ́шахомъ моѷсїа, и҆ тебѐ послꙋ́шаемъ.
толи́ко да бꙋ́детъ г҃ь б҃ъ на́шъ с тобо́ю, ꙗ҆́коже бы́сть съ моѷсїем꙽·

Чл҃къ же и҆же не покорит̑сѧ тебѣ̀ н̂и послꙋ́шаетъ словес̑҇ твоих̑, ꙗ҆́коже заповѣ́да и҆мъ.
да ѹ҆́мретъ толи́ко ѹ҆крѣпи́сѧ и҆ възмꙋжа́и·

Глв̑҇а, в҃·

И посла̀ і҆сꙋсъ сн҃ъ навѷнъ ѿ сати́на дв̂ѣ ю҆́ноши съглѧдати въта́и гл҃ѧ, възы́дѣте съглѧда́ите зе́млю і҆е҆рихо́нъ.
и҆ шед̑ша дв̂а ю҆́ноши прїидо́ста въ і҆ерихо́нъ.
и҆ внидо́ша в дом̑ блд̑ꙋница жены̀, е́йже и҆́мѧ раа́въ, и҆ ѻ҆бита́ста т̂ꙋ·

И҆ повѣ́даша цр҃ю і҆ерихон̑҇скомꙋ гл҃юще.
с̂е мꙋжа внидо́ста сѣмо в сїю̀ но́щь ѿ сн҃овъ і҆и҆л҃евъ съглѧда́ти землѧ̀·

И҆ посла̀ цр҃ь і҆ерихо́ньскъ къ раа́вви гл҃ѧ, и҆зведѝ мꙋжа въшед̑шаѧ в дом̑ тво́и но́щїю, съглѧда́ти б̂о землѧ̀ прїидо́ста·

Пои́мши же жена̀ мꙋ́жи съкры̀ ѧ҆̀, и҆ рече им̑ гл҃юще.
прїидо́ста къ мн̂ѣ мꙋжа н̂о не вѣмъ ѿкꙋ́дꙋ бы́ша·

И҆ ꙗ҆́коже вра́та затворѧ́хꙋ в сꙋмра́ки, мꙋжа и҆зыидо́ста и҆ не вѣ́дѣ ка́мо и҆до́ста.
женѣте ско́ро въ слд̑ѣ и҆хъ и҆ пости́гнете ѧ҆̀·

Си́ же възведѐ ѧ҆̀ на храм̑ и҆ съкры̀ ѧ҆̀ въ па́здере и҆лнѧ́нѣ и҆же бѧ́ше съвокꙋ́плено ѹ҆ неѧ̀·

Мꙋжи же гна́ша въ слд̑ѣ их̑ пꙋтем̑ къ і҆ѻ҆рда́нꙋ прихо́домъ, вра́та же затвори́ша·

И҆ бысть ꙗ҆́ко и҆зыидо́ша женꙋщїи въ слд̑ѣ и҆хъ, си́ѧ же прь́во лежа́нїа и҆́ма.
ѻ҆на́ же въшед̑ши к ни́ма на́ храмъ, и҆ реч̑҇ к ни́ма·

Вѣ́дѣ ꙗ҆́ко преда́лъ е҆сть г҃ь зе́млю сїю ва́мъ.
напа́лъ б̂о е҆сть страх̑ ва́шъ на́ ны и҆ ксемꙋ̀ ѹ҆жасо́шасѧ ѻ҆бита́ющїи все́и землѝ ѿ лица̀ ва́шего·

Слы́шахомъ б̂о ꙗ҆́ко посꙋшѝ г҃ь б҃ъ мо́ре чер꙽мно́е пред̑ лице́мъ ва́шимъ, е҆гда и҆схожда́сте и҆зъ е҆гѷпта, и҆ е҆ли́ко сътвори́сте двѣма̀ цр҃ема а҆м꙽морре́искима, ꙗ҆же бѣ́ста ѻ҆бо́нꙋ странꙋ̀ і҆ѻ҆рда́на сїѻ́нꙋ, і҆ и҆ѻ́гꙋ.
ꙗ҆́же потреби́ста и҆хъ·

И҆ слы́шахомъ с̂е и҆ ѹ҆жаснꙋ́хомсѧ въ срд̑цы своем̑, и҆ нѣ́сть ктомꙋ̀ дш҃и н̂и въ е҆ді́номъ на́съ ѿ лица̀ ва́шего.
ꙗ҆́ко г҃ь б҃ъ ва́шъ, б҃ъ на́ нб҃си горѣ̀ и҆ на землѝ до́лѣ·

И҆ нн҃ѣ кленѣта ми сѧ гм҃ъ бм҃ъ ва́шимъ, ꙗ҆ко а҆зъ творю̀ млс̑҇ть ва́ма.
да сътвори́те и҆ в̂ы млс̑҇ть в домꙋ̀ ѿц҃а мое҆го, и҆ дадѣте м̂и зна́менїе и҆́сти́нно·

Ꙗ҆́ко живи́те дом̑ ѿц҃а мое҆го и҆ мт҃ре мое҆ѧ, бра́тїю мою и҆ се́стры моѧ̀ и҆ вс̂е е҆ли́ко е҆сть в нас̑҇.
и҆ ѿи҆мете дш҃ꙋ на́шꙋ ѿ смр҃ти·

И҆ реко́ста е́й мꙋжа дш҃и на́ю въ вас̑҇ мѣсто на смр҃ть дади́мъ а҆́ще нн҃ѣ не ѻ҆бъꙗ҆ви́ши нас̑҇·

и бꙋдетъ ꙗ҆́ко преда́сть на́мъ г҃ь гра̑ се́й сътворим̑ с тобо́ю млс̑҇ть і҆ и҆стин꙽нꙋ·

И҆ свѣси ѧ҆̀ ѻ҆кно́мъ и҆ ре́че и҆́ма ѿидѣта въ го́рꙋ да не срѧ́щꙋтъ ва́ю и҆́щꙋщїи.
и҆ скры́итасѧ та́мо тр̂и дни до́ндеже ѻ҆братѧт̑сѧ въ слд̑ѣ ва́ю гна́вшїи, потом̑ же да и҆́дете на пꙋть сво́и·

И҆ реко́ста к неи мꙋжи чи́ста е҆свѣ клѧтвы сеѧ̀ твое҆а е҆ю́же заклѧ̀ нас̑҇·

Се̂ мы е҆гда̀ вни́дем̑ въ град̑ се́й, и҆ да поста́виши зна́менїе верв꙽ червленꙋ, и҆ ѻ҆бвѧ́жеши ѹ҆ ѻ҆кна̀, и҆мже и҆спꙋстѝ н̂ы посредѣ̀, ѿц҃а же твое҆го и҆ мт҃рь твою̀, и҆ бра́тїю твою̀ и҆ весь до́мъ ѿц҃а твое҆го да съвокꙋ́пиши къ себѣ в дом̑ свой·

И҆ бꙋ́детъ вс̂ѧк꙽ и҆же а҆ще и҆зы́детъ из꙽ две́рїи до́мꙋ твое҆го во́нъ, са́мъ себѣ грѣшенъ бꙋ́детъ, а҆ м̂ы чи́сти бꙋ́демъ клѧ́твы сеѧ̀ твое҆ѧ.
и҆ е҆ли́цы а҆ще с тобо́ю бꙋ́дꙋтъ в домꙋ твое҆мъ, м̂ы бꙋ́демъ грѣшни а҆ще рꙋцѣ бꙋдꙋтъ на ни́хъ·

Є҆гда́ же словеса̀ с̂и на́ша ѻ҆бꙗ҆виши, бꙋдем̑ чи́сти клѧ́твы сеѧ̀ твое҆ѧ е҆ю́же заклѧ̀ нас̑҇·

И҆ ре́че им̑ по сло́вꙋ ва́ю тако бꙋ́ди.
і҆ и҆спꙋсти ѧ҆̀ и҆ ѿи҆до́ста и҆ ѹ҆вѧза̀ вервь червле́нꙋ ѹ҆ ѻ҆кна·

И҆ ѿи҆доста, и҆ прїидо́ста въ го́рꙋ, и҆ пребы́ста т̂ꙋ тр̂и дн҃и до́н꙽деже възвратишасѧ гна́вшїи, гна́вшїи же по нею̀ и҆зыска́ша по всм̑ѣ пꙋтемъ, и҆ не ѻ҆брѣто́ша, и҆ въз꙽врати́стасѧ с̂и.
дв̂а ю҆́ноши снидо́ста съ горы̀ преи҆до́ста і҆ѻ҆рдан̑҇ къ і҆сꙋ́сꙋ сн҃ꙋ на́вѷнꙋ и҆ повѣ́даста е҆мꙋ вс̂е слꙋчи́вшеесѧ и҆́ма·

И҆ реко́ста къ і҆сꙋсꙋ, ꙗ҆́ко преда̀ г҃ь б҃ъ нашъ в рꙋцѣ на́ши вс̂ю зе́млю.
ѹ҆боа́ша бо сѧ вс̂и живꙋщїи на землѝ то́й ѿ на́съ·

Глв̑҇а, г҃·

И ѻ҆бꙋтрѣвъ заоѹ҆́тра і҆сꙋсъ и҆ въздвиго́шасѧ ѿ сити́мъ прїидо́ша до і҆ѻ҆рда́на, то́й и҆ вс̂и сн҃ове і҆и҆л҃евы.
и҆ ста́ша т̂ꙋ пре́жде не́жели преи҆до́ша·

И҆ бы́сть по́ трехъ дн҃ехъ.
прои҆до́ша кни́гочїѧ сквоѕѣ по́лчище.

И҆ заповѣ́даша лю́дем꙽ гл҃юще, е҆гда̀ ѹ҆́зрите кїѻ́тъ завѣта г҃а б҃а на́шего.
и҆ жерца̀ наша, и҆ левѷты въздвиза́юще ѧ҆̀.
и҆ да въздвигнетесѧ и҆ в̂ы ѿ мѣстъ свои҆хъ, и҆ да по́идете въ слд̑ѣ е҆го·

Но̂ подалѣ да бꙋ́детъ междꙋ нами и҆ ѻ҆нѣхъ дво́ю ты́сѧщїю лакотъ станете.
и҆ не приближи́тесѧ к немꙋ̀, да ѹ҆вѣ́сте пꙋть по немꙋже по́идете, не ходи́сте б̂о пꙋтем̑ тѣмъ н̂и вчера̀, н̂и тре́тїаго дн҃е·

И҆ реч̑҇ і҆сꙋсъ къ лю́демъ, ѻ҆чи́ститесѧ наѹ҆трїе.
ꙗ҆́ко ѹ҆́тро сътвори́тъ въ вас̑҇ г҃ь чюдеса̀·

И҆ рече і҆сꙋсъ къ жерце́мъ гл҃ѧ.
въздви́гнете ковъче́гъ завѣта гн҃ѧ, и҆ по́идѣте пред̑ люд̑мѝ.
и҆ взѧ́ша жерцы̀ ковчег̑҇ завѣта гн҃ѧ, и҆ поидо́ша пред̑ люд̑мѝ·

И҆ реч̑҇ г҃ь къ і҆сꙋсꙋ, в се́и дн҃ь начина́ю възвыша́ти т̂ѧ пред̑ всѣми сн҃ьми і҆и҆л҃евыми.
да ѹ҆вѣ́дѧтъ ꙗ҆́коже бх̑ѣ съ моѷсїѻм̑ та́кожде бꙋ́дꙋ с тобо́ю·

Ты́ же заповѣ́ждъ жръце́мъ въздвиза́ющим̑ ковче́гъ завѣта гн҃ѧ.
ꙗ҆кож̑ вни́дете на ча́сть воды̀ і҆ѻ҆рда́на, и҆ въ і҆ѻ҆рда́нѣ стане́те·

И҆ реч̑҇ і҆сꙋсъ сн҃омъ і҆и҆л҃евымъ, пристꙋпи́те сѣмо да слы́шите сло́во г҃а б҃а ва́шего·

По семꙋ̀ ѹ҆вѣ́сте ꙗ҆́ко г҃ь живѐ въ вас̑҇, и҆ потреблѧ́а потребит̑ ѿ лица̀ на́шег̑҇.
ханане́а, и҆ хетѳе́а, и҆ ферезе́а, и҆ е҆ве́ѧ, и҆ гергесе́ѧ, и҆ а҆м꙽морре́а, и҆ е҆ѹ҆се́а·

Се́ же ковче́гъ завѣта, г҃а всеѧ̀ землѧ̀ прехо́дитъ і҆ѻ҆рда́нъ·

Събери́те же себѣ̀, в҃і.
мꙋжъ ѿ сн҃ов̑҇ і҆и҆л҃евъ, е҆ді́нъ ѿ кое҆го́ждо племе́ни·

И҆ бꙋ́детъ ꙗ҆́ко почїе́та но́ѕѣ жре́честѣи въздвиза́ющихъ ковче́гъ завѣта, г҃а всеѧ̀ землѧ̀ въ водѣ̀ і҆ѻрда́нѣ·

тогда̀ вода̀ і҆ѻ҆рда́нѧ ѻ҆скꙋдѣет̑ вода́ же текꙋ́щїѧ ста́нетъ·

И҆ быс̑҇ ꙗ҆́ко въздви́гнꙋшасѧ лю́дїе ѿ кꙋщъ свои҆хъ, преи҆тѝ і҆ѻ҆рда́нъ, жръцыж̑ въздвиго́ша ковче́гъ завѣта гн҃ѧ пред̑ люд̑ми·

Є҆гда̀ же внїидо́ша жръцы̀ въздви́жꙋще ковче́гъ завѣта гн҃ѧ въ і҆ѻ҆рда́нѣ, и҆ но́ги жре́чески въздвиза́ющих̑ ковче́гъ завѣта гн҃ѧ, ѻ҆мочи́шасѧ въ малѣ воды̀ і҆ѻ҆рда́на.
і҆ѻ҆рдан̑҇ б̂о наполнѧ́шесѧ въ всѧ̀ кра́ѧ е҆мꙋ, ꙗ҆́ко бы́сть въ дн҃и жа́твы·

И҆ ста́ша во́ды текꙋщїа съ горы̀, и҆ ста̀ гꙋстина̀ е҆ді́на ѿлꙋчившисѧ подале́че ѕѣ́ло ѕѣ́ло ѿ а҆да́ми, да́же до страны̀ кариѳїа́рима, и҆ текꙋщ́и, ꙗ҆же и҆стечѐ въ мо́ре а҆ра́въско, в꙽ мо́ре солищное, дон̑҇деже до конца̀ ѻ҆скꙋдѣ̀.
лю́дїе же стоа́хꙋ прѧ́мо і҆е҆рихо́нꙋ·

И҆ ста́ша жръцы̀ въздвиза́ющи ков꙽чегъ завѣта гн҃ѧ на́ сꙋсѣ средѝ і҆ѻ҆рда́на.
и҆ вс̂и сн҃ове і҆и҆л҃еви прехождахꙋ по́ сꙋхꙋ.
до́ндеже сконча́ша, вс̂и людїе преходѧ́ще і҆ѻ҆рда́нъ·

Глв̑҇а, д҃·

И е҆гда̀ сконча́ша вс̂и лю́дїе преходѧ̀ і҆ѻ҆рда́нъ и҆ реч̑҇ г҃ь къ і҆сꙋсꙋ гл҃ѧ·

Пои҆ми дв̂анадесѧ́те мꙋжа ѿ людїи мꙋжа е҆ді́наг̑҇ ѿ кое҆гождо племе́ни·

Повелѝ им̑ гл҃ѧ взѧ́ти ѿ среды̀ і҆ѻ҆рда́на ѿ мѣста и҆дѣже ста́ша ноѕѣ жречестѣ, в҃і, ка́мыкъ.
і҆ и҆знесете ѧ҆̀ съ собою, и҆ да поста́вите ѧ҆̀ въ по́лчищи ва́шемъ·

И҆дѣже ста́нете на сїю но́щъ.
и҆ призва̀ і҆сꙋсъ в҃і мꙋжа и҆хже и҆збра̀ ѿ сн҃овъ і҆и҆л҃евъ, е҆ді́нъ ѿ кое҆гождо племе́ни·

И҆ рече им̑ и҆дѣте пред̑ кїѻ́томъ гн҃имъ посредѣ і҆ѻ҆рда́на.
и҆ въземъ възложит̑ ѿтꙋдꙋ ка́мык̑҇ е҆ді́нъ кождо на ра́ма своа̀.
по числꙋ̀ племенъ сн҃овъ і҆и҆л҃евыхъ·

да бꙋ́дꙋтъ сїи въ зна́менїе посредѣ васъ лежа́ще всегда̀.
да е҆гда̀ въпраша́етъ тебѐ ѹ҆́тро сн҃ъ твой гл҃ѧ, чт̂о е҆сть ка́менїе сїе ва́мъ·

Ты́ же повѣси сн҃ови твое҆мꙋ гл҃ѧ, ꙗ҆́ко посо́хнꙋ і҆ѻ҆рда́нъ рѣка̀ ѿ лица̀ ковчега завѣта, г҃а всеѧ̀ землѧ̀ е҆гда̀ прехожда́ше и҆̀ і҆ и҆схно́ша во́ды і҆ѻ҆рда́новы, и҆ бꙋдꙋтъ вам̑ ка́мыки с̂и памѧть въ сн҃ѣхъ і҆и҆л҃евыхъ да́ждь до́ вѣка·

И҆ сътвори́ша та́ко сн҃ове і҆и҆л҃евы, ꙗ҆коже заповѣ́да г҃ь і҆сꙋсꙋ.
и҆ възем꙽ши, в҃і, ка́мыкъ ѿ среды̀ і҆ѻ҆рда́на, ꙗ҆коже заповѣ́да г҃ь і҆сꙋсꙋ, по числꙋ̀ племе́нъ сн҃овъ і҆и҆л҃евъ.
и҆ принесо́ша их̑ съ собо́ю въ по́лчище на мѣсто, и҆ положиша и҆хъ т̂ꙋ·

Поста́ви же і҆сꙋсъ и҆ дрꙋгїѧ, в҃і, ка́мыкъ посредѣ і҆ѻ҆рдана на мѣ́сте и҆дѣже стоѧ́сте ноѕѣ жречески, въздвиѕа́ющих̑ ковчегъ завѣта гн҃ѧ, и҆ сꙋть тамо да́же и҆ до днь·

Стоа́хꙋ же и҆ жръцы̀ въздвиза́ющи ковчегъ завѣта гн҃ѧ въ і҆ѻ҆рда́нѣ.
дон̑҇деже скон̑҇ча і҆сꙋсъ вс̂е е҆же заповѣда г҃ь і҆сꙋсꙋ повѣдати людем̑, и҆ потща́вшесѧ лю́дїе прои҆доша·

И҆ бы́сть ꙗ҆ко сконча́ша вс̂и лю́дїе преходѧ́ще і҆ѻ҆рда́нъ.
пре́иде же и҆ ковчег̑҇ завѣта гн҃ѧ и҆ ка́мыки пред̑ ними·

И҆ преи҆доша сн҃ове рꙋви́мли, и҆ сн҃ове га́довы и҆ полъ племе́ни манасїина.
ѹ҆краше́ни пред̑ сн҃ы і҆и҆л҃евыми.
ꙗ҆́кож̑ заповѣда и҆м꙽ моѷсїи·

҂м҃. воѻ҆рꙋже́ни на ра́ть пре́идоша прд̑е гм҃ъ на бо́и, къ гра́дꙋ і҆е҆рихо́ньскꙋ·

Въ то́й дн҃ь възвели́чи г҃ь і҆сꙋса пред̑ всѣмъ наро́домъ і҆и҆л҃евымъ.
и҆ боа́хꙋсѧ е҆го ꙗ҆кож̑ боа́хꙋсѧ моѷсїа, е҆ли́коже б̂ѣ жив̑҇·

И҆ рече г҃ь къ і҆сꙋсꙋ гл҃ѧ заповѣждь жер̑҇це́мъ въздвиѕа́ющим̑ ковче́гъ завѣта свѣдѣ́нїа, и҆стꙋпи́ти ѿ і҆ѻ҆рда́на·

И҆ заповѣ́да і҆сꙋсъ жръце́мъ гл҃ѧ, и҆зы́де съ і҆ѻ҆рда́на·

И҆ бы́сть ꙗ҆́ко и҆зыидо́ша жръцы̀ въздвиѕа́ющи ковче́гъ завѣта гн҃ѧ, ѿ среды̀ і҆ѻ҆рда́на.
и҆ поста́вита но́гы на́ сꙋсѣ, и҆ потечѐ вода̀ і҆ѻ҆рда́нова на мѣ́сто.
и҆ по́иде ꙗ҆ко вчера̀ и҆ третїемъ дн҃и по всемꙋ̀ дн̂ꙋ·

И҆ лю́дїе възыидо́ша ѿ і҆ѻ҆рда́на, въ і҃ дн҃ь, пр́ьваго мс̑҇ца.
и҆ ѻ҆полчи́шасѧ сн҃ове і҆и҆л҃еви в галъга́лѣхъ, на странѣ̀ ꙗ҆же на восток̑҇ слн҃ца ѿ і҆ерихо́на, в҃і же ка́мыка сїѧ́ ꙗ҆́же взѧ́ша ѿ і҆ѻ҆рда́на поста́ви і҆сꙋсъ въ гал꙽га́лѣхъ, и҆ реч̑҇ къ сн҃омъ і҆и҆л҃евым̑ гл҃ѧ·

Є҆гда̀ въпраша́ютъ вас̑҇ сн҃ве ва́ши гл҃юще чт̂о сꙋть ка́менїе с̂е, т̂о възвѣсти́те сн҃омъ вашим̑.
ꙗ҆́ко по́ сꙋхꙋ е҆сть минꙋ́лъ і҆и҆л҃ь і҆ѻрда́нъ се́и.
и҆ссꙋшѝ б̂о г҃ь б҃ъ ваш̑҇ во́дꙋ і҆ѻ҆рда́ню пред̑ ними до́ндеже преидо́ша, ꙗ҆́коже сътворѝ г҃ь б҃ъ ва́шъ и҆ чръмно́мꙋ морю, е҆го́же и҆съсꙋшѝ пред̑ на́ми, до́ндеже преидо́хомъ.
да ѹ҆вѣ́дѧт̑ вс̂ѧ страны̀ зе́мныа.
ꙗ҆́ко рꙋка̀ гн҃ѧ крѣ́пка е҆сть, и҆ да чтете в̂ы г҃а б҃а ва́шего во вс̂е вре́мѧ·

Глв̑҇а, е҃·

И бы́сть ꙗ҆ко слы́шаша цр҃їе а҆м꙽морїи́стїи, и҆же бѧхꙋ ѻ҆бо́нꙋ странꙋ̀ і҆ѻ҆рда́на.
и҆ цр҃и ханаа́ни, и҆же бѧ́хꙋ близь мо́рѧ.
ꙗ҆ко посꙋшѝ г҃ь б҃ъ і҆ѻ҆рда́нъ рѣкꙋ̀, пред̑ сн҃ы і҆и҆л҃евыми прехо́да и҆хъ ра́ди·

И҆ ѹ҆клони́шасѧ мы́сли ихъ и҆ ѹ҆жасо́шасѧ.
и҆ не бѧ́ше въ ни́хъ смышле́нїѧ н̂и е҆ді́наго ѿ лица̀ сн҃овъ і҆и҆л҃евъ·

Въ ѻ҆́ноже вре́мѧ ре́че г҃ь і҆сꙋсꙋ, сътворѝ себѣ ножа̀ ка́мены ѿ камы́ка тве́рда и҆ сѣ́дъ ѻ҆брѣж́и сн҃ы і҆и҆л҃евы, второ́е·

И҆ сътворѝ і҆сꙋсъ себѣ ножа̀ ка́мены ѻ҆́стры.
и҆ ѻ҆брѣ́за сн҃ы і҆и҆л҃евы на мѣсте нарече́ном꙽ моги́ла ѻ҆брѣ́занїа.
сїѧ́ же ра́ди вины̀ ѻ҆брѣ́за і҆сꙋсъ сн҃ы і҆и҆л҃евы, вс̂и лю́дїе и҆же и҆зыдо́ша и҆зъ е҆гѷпта мꙋжеска по́лꙋ лю́дїе рат̑нїи, и҆зомро́ша въ пꙋсты́ни на пꙋтѝ·

И҆ ѻ҆брѣ́зани бы́ша вс̂и лю́дїе и҆зшед̑шїи и҆зъ е҆гѷпта·

Но̂ всѝ лю́дїе и҆же роди́шасѧ въ пꙋсты́ни на пꙋтѝ, е҆гда и҆зыдо́ша и҆зъ е҆гѷпта, неѻ҆брѣ́зани бѧ́хꙋ, вс̂ѧ сїѧ і҆сꙋсъ ѻ҆брѣ́за·

м҃ б̂о лѣтъ ѻ҆бхожда́ше і҆и҆л҃ь въ пꙋсты́ни до́ндеже сконча́сѧ весь ро́дъ и҆зшед̑шїи з꙽ землѧ̀ е҆гѷпет̑ски, не послꙋш́авшїи за́повѣди гн҃ѧ и҆́мже наречѐ г҃ь не ви́дѣти им̑ землѧ̀ е҆ю́же клѧ́тсѧ г҃ь ѿц҃емъ и҆хъ да́ти нам꙽ зе́млю кипѧ́щꙋ мле́ком̑ и҆ ме́дом̑·

Въ ни́хже мѣсто поста́ви сн҃ы и҆хъ, ꙗ҆́же і҆сꙋсъ ѻ҆брѣ́за.
ꙗ҆́ко сконча́ныѧ пло́ти бѧ́хꙋ и҆мъ.
поне́же на пꙋтѝ неѻ҆брѣ́зани бы́ша·

ѻ҆брѣз́авшем̑ же сѧ и҆мъ молча́нїе и҆мѧ́хꙋ т̂ꙋ сѣдѧ́ше въ по́л꙽чищи.
до́ндеже и҆сцѣли́шасѧ·

И҆ рече г҃ь къ і҆сꙋ́сꙋ въ дн҃ешнїи дн҃ь, ѿри́нꙋхъ ѹ҆кори́знꙋ е҆гѷпетъскꙋ ѿ ва́съ.
и҆ прозва̀ мѣсто т̂о галга́ла даже до сего дн҃е·

И҆ ста́ша сн҃ове і҆и҆л҃евы въ галга́лѣхъ.
и҆ сътвори́ша па́схꙋ въ четве́ртыи на́десѧтъ дн҃ь мс̑҇ца сего съ ве́чера на за́пад̑ і҆е҆рихо́нꙋ на́ поли·

И҆ ꙗ҆до́ша ѿ пшени́ца землѧ̀ ѻ҆ноѧ̀ ѻ҆прѣсноки, и҆ но́ваѧ в то́иже дн҃ь·

И҆ ѻ҆скꙋдѣ ман̑҇на ꙗ҆́ко ꙗ҆до́ша ѿ пшени́ца землѧ̀.
и҆ по се́мъ не бы́сть сн҃омъ і҆и҆л҃евым̑ ман̑҇ны н̂о ꙗ҆до́ша ѿ плодо́въ землѝ ханаа́ньскїѧ в т̂о лѣто·

И҆ бы́сть е҆гда бѧ́ше і҆сꙋсъ ѹ҆ е҆рихо́на.
и҆ възрѣвъ ѻ҆чи́ма свои́ма, и҆ в́идѣ чл҃ка стоѧ́ща пред̑ ни́мъ, и҆ ме́чь е҆го ѻ҆бнаже́нъ въ рꙋцѣ е҆го.
и҆ пристꙋпи́въ і҆сꙋсъ ре́че к немꙋ на́шъ л̂и е҆си и҆л̂и ѿ сопостат̑ на́шихъ·

Се́и же рече е҆мꙋ а҆зъ вое҆во́да си́лы гн҃ѧ н҃нѣ прїидох̑ сѣмо·

І҆сꙋсъ же па́дъ ни́цъ на́ землю и҆ поклони́сѧ е҆мꙋ.
и҆ рече г҃и чт̂о вели́ши рабꙋ̀ твое҆мꙋ·

Рече же вое҆во́да гн҃ь къ і҆сꙋсꙋ и҆з꙽зꙋ́и сапо́гъ с но́гꙋ твое҆ю мѣсто б̂о на не́мже ты̀ стои́ши ст҃о е҆сть, и҆ сътворѝ і҆сꙋсъ та́ко·

Є҆рихон꙽ же заключенъ и҆ ѻ҆гражденъ и҆ никтоже и҆з него не и҆схожда́ше н̂и въхожда́ше·

Глв̑҇а, ѕ҃·

И рече г҃ь къ і҆сꙋсꙋ, с̂е а҆́зъ предаю̀ тебѣ въ рꙋцѣ е҆рихонъ, и҆ цр҃ѧ е҆го, и҆ сꙋщаѧ в немъ силны крѣ́постїю·

Вы́ же ѻ҆бхо́дите град̑ ѻ҆́крс̑҇т꙽ вс̂и мꙋжи крѣ́пкїѧ е҆дїною на дн҃ь·

и҆ та́ко сътворите седмь дн҃їи·

Седмь же жрецъ да възмꙋт꙽ седмь трꙋбъ рожа́ныхъ пред̑ кїѻ҆́томъ.
и҆ седма́го дн҃ѧ ѻ҆бы́дете град̑ седми́жды, жерцы̀ же да трꙋбѧт꙽ въ трꙋбы̀·

И҆ бꙋдетъ ꙗ҆́ко въстрꙋбѧ́тъ трꙋбо́ю превлача́ѧ, да въскли́кнт̑ꙋ вс̂и лю́дїе гла́сомъ ве́лїимъ.
и҆ ꙗ҆́кож̑ въскли́кнꙋтъ падꙋтсѧ са́ми стѣны гра́да, и҆ вни́дꙋтъ вс̂и лю́дїе прѧ́мо себѣ ко́ждо въ град̑·

И҆ вниде і҆сꙋсъ сн҃ъ навѷинъ къ жерце́м꙽ сн҃ом꙽ і҆и҆л҃евымъ, и҆ рече и҆мъ гл҃ѧ.
възмѣте кїѻт̑ завѣта гн҃ѧ.
се́дмь же жрецъ да възмꙋтъ се́дмь трꙋбъ ст҃ыхъ·

Посем же рече лю́демъ, и҆дѣте и҆ ѻ҆бы́идѣте град̑, во́ини же да и҆дт̑ꙋ въѻ҆рꙋжени пред̑ кїѻ́том̑ гн҃им꙽·

Є҆гда же сїѧ рече і҆сꙋсъ, тогда̀ седмь жрецъ взѧ́ша се́дмь трꙋбъ пред̑и҆дꙋще, и҆ въстрꙋби́ша добро̀гла́сно.
а҆ ковчегъ завѣта гн҃ѧ въ слѣдъ по нихъ да и҆́детъ·

Воини же въѻ҆рꙋжени и҆дѧ́хꙋ пред̑ жерцы̀ с трꙋбѧщими въ трꙋбы̀ и҆ вс̂и лю́дїе и҆дѧ́хꙋ въ слд̑ѣ ковче́га, завѣта гн҃ѧ.
і҆ и҆дꙋще трꙋби́ша трꙋба́ми·

Лю́дем꙽ же заповѣ́да і҆сꙋсъ гл҃ѧ не вопи́те н̂и да не слы́шит̑ никто́же глс̑҇а ваших̑ до́ дн҃е во́н꙽же повелю̀ ва́мъ кли́кнꙋти, тогда̀ кли́кнете·

И҆ ѻ҆бне́сше кїѻт̑ завѣта бж҃їѧ, ѻ҆́крс̑҇тъ гра́да е҆ді́ною а҆́бїе и҆́де въ по́лчище и҆ ста̀ т̂ꙋ·

Въ вторы́и же дн҃ь въста́въ і҆сꙋсъ заѹ҆́тра, и҆ въздвиго́ша жерцы̀ ковчег̑҇ завѣта гн҃ѧ·

Жре́цъ же сед̑мь и҆же дръжа́хꙋ се́дмь трꙋ́бъ пред̑и҆дѧхꙋ пред̑ кїѻ́томъ гн҃имъ, и҆ трꙋби́ша трꙋба́ми, лю́дїе же вс̂и во́ини въѻ҆рꙋже́ни и҆дѧ́хꙋ пред̑ ни́ми·

Про́чїи же лю́дїе въ слѣдъ ковче́га завѣта гн҃ѧ и҆дѧ́хꙋ, е҆гда̀ трꙋби́ша рожа́ными трꙋба́ми·

И҆ ѻ҆быидо́ша гра́дъ въ дн҃ь, вторы́и, е҆ді́ною, і҆ и҆до́ша па́ки въ по́лчище, си́це же сътвори́ша.
д̂о ѕ҃ дн҃їи·

Бы́сть же въ з҃ дн҃ь, въста́ша въ воста́нїе ѹ҆́трьнее, и҆ ѻ҆быидо́ша град̑ в то́и дн҃ь седми́жды·

И҆ бы́сть въ ѻ҆бхожде́нїи сед̑мо́мъ въстрꙋби́ша жръцы̀ трꙋба́ми.
и҆ рече і҆сꙋсъ къ сн҃омъ і҆и҆л҃евомъ кли́кнѣте предал̑҇ б̂о е҆сть г҃ь на́мъ гра́дъ·

И҆ бꙋ́детъ град̑ сїи про́клѧтъ, все́ же е҆же в не́мъ гв҃и си́лъ.
ра́звѣ раа́въ блꙋ́дницꙋ снабди́те ю҆̀ и҆ вс̂е е҆же е҆сть в домꙋ̀ еѧ̀, ꙗ҆́ко съкры̀ прелагатаѧ ꙗ҆́же посыла́хом̑<.>

Вы́ же снабди́тесѧ ѿ клѧ́твы, и҆ да некогда̀ помы́слите в̂ы взѧ́ти ѿ клѧ́твы.
и҆ сътвори́те по́лчище ѿ сн҃овъ і҆и҆л҃евъ клѧ́тва, и҆ потреби́те н̂ы·

Зла́то же вс̂е и҆ сребро̀ мѣ́дь и҆ желѣ́зо ст҃о да бꙋдетъ гв҃и, въ сокро́вище гн҃е да сѧ внесе́тъ·

И҆ въстрꙋби́ша жръцы̀ трꙋба́ми ꙗ҆́коже ѹ҆слы́шаша лю́дїе глс̑҇а трꙋ́бныи, кли́кнꙋша вс̂и лю́дїе гла́сомъ вели́кимъ и҆ си́лнымъ.
и҆ падо́ша градꙋ стѣ́ны ѻ҆́крстъ, и҆ внидо́ша вс̂и лю́дїе въ град̑ ко́ждо проти́вꙋ себѐ, и҆ приꙗ҆́ша град̑·

И҆ проклѧ̀ и҆̀ і҆сꙋсъ, вс̂е е҆ли́ко бѧ́ше въ гра́дѣ ѿ мꙋжеска по́лꙋ и҆ до же́ньска.
ѿ ю́ноша и҆ до ста́рца и҆ ѿ телца̀ до ѻ҆вцы̀, и҆ до ѻ҆слѧ́ти вс̂е под̑ ме́чь·

двѣма́ же ю҆́ношама съглѧда́вшема зе́млю.
рече і҆сꙋсъ вни́дѣте въ до́мъ жены̀ блꙋ́дница і҆ и҆зведѣте и҆̀ ѿтꙋдѣ, и҆ вс̂е е҆же е҆сть е҆ѧ̀ ꙗ҆́коже клѧ́стасѧ е́й·

И҆ внидо́ста дв̂а ю҆́ноши съглѧда́вшїи гра́дъ въ до́мъ жены̀.
і҆ и҆зведо́ста раа́въ блꙋ́дницꙋ и҆ ѿц҃а еѧ̀, и҆ мт҃ръ е҆ѧ̀, и҆ бра́тїю еѧ̀.
и҆ вс̂е е҆же еѧ̀ бы́сть, и҆ вс̂е рожде́нїе е҆ѧ̀ и҆зведо́ста, и҆ поста́виша и҆̀ вн̂ѣ по́лчища і҆и҆л҃ева·

Град̑ же запали́ша ѻ҆гне́мъ съ всѣмъ е҆же б̂ѣ в не́мъ.
ра́звѣ зла́та и҆ сребра̀ мѣ́ди и҆ желѣза, ѿда́ша въ дом̑ гн҃ь внестѝ гв҃и·

Раа́в же блꙋдницꙋ и҆ весь до́мъ е҆ѧ̀ ѿч҃ескїи ѻ҆ста́ви и҆ живѝ и҆̀ і҆сꙋсъ.
и҆ ѻ҆бита́ти сътворѝ въ і҆и҆л҃и, а҆жъ и҆ до дн҃ешнѧго дн҃и поне́же съкры̀ прелага́таѧ ꙗ҆́же посла̀ і҆сꙋсъ съглѧда́ти і҆е҆рихо́на·

И҆ проклѧ́лъ і҆сꙋсъ въ то́и дн҃ь гл҃ѧ, пр́оклѧтъ чл҃къ пред̑ гм҃ъ и҆же поста́витъ и҆ съгради́тъ град̑ сїи і҆е҆рихо́нъ на прьвенцы̀ свое҆мъ, ѻ҆снове́тъ и҆́.
и҆ на ме́ншемъ свое҆мъ поста́витъ вра́та е҆го·

И҆ си́це сътворѝ а҆за́нъ и҆же ѿ веѳи́лѧ, на а҆вирона прьве́нца е҆го ѻ҆снова̀ и҆̀.
и҆ на ме́ншем꙽ сп҃сеном꙽ поста́ви вра́та е҆го·

Глв̑҇а, з҃·

И бѧ́ше г҃ь съ і҆сꙋсомъ, и҆ б̂ѣ и҆́мѧ е҆го по все́и землѝ.
и҆ прегрѣши́ша сн҃ове і҆и҆л҃евы прегрѣше́нїемъ вели́ким꙽, и҆ ѹ҆лꙋчи́ша ѿ клѧ́твы, взѧ̀ б̂о а҆ха́ръ сн҃ъ хармїи́нъ сн҃а зам꙽врїи́на, сн҃а зарїи́на, ѿ племе́ни і҆ѹ́дина ѿ клѧт̑вы, и҆ разгнѣвасѧ г҃ь ꙗ҆́ростїю на сн҃ы і҆и҆л҃евы·

Посла́ же і҆сꙋсъ мꙋжа̀ ѿ і҆ерихо́на въ га́и, и҆же е҆сть проти́вꙋ виѳа́нъ на восто́къ веѳи́лѧ, и҆ рече и҆мъ гл҃ѧ.
шед̑ше соглѧда́ите зе́млю.
і҆ и҆до́ша мꙋжи и҆ съглѧда́ша га́и·

И҆ възврати́шасѧ къ і҆сꙋсꙋ и҆ реко́ша е҆мꙋ, да не́ и҆дꙋтъ вс̂и лю́ди.
н̂о ꙗ҆́ко дв̂ѣ ты́сѧщи и҆л̂и тр̂и ты́сѧща мꙋжѝ да и҆́дꙋтъ, и҆ да вою҆́ютъ га́и.
да не веде́ши та́мо всѣ́хъ людїи, ма́ло б̂о е҆сть и҆хъ та́мо·

І҆ и҆до́ша ѿ людїи та́мо а҆ки тр̂и ты́сѧща мꙋжъ, и҆ пробѣ́гнꙋша ѿ лица̀ мꙋже́и га́иских̑<.>

И҆ ѹ҆би́ша ѿ ни́хъ мꙋжи га́и, ꙗ҆́ко л҃, и҆ ѕ҃, мꙋжъ.
и҆ ѿгна́ша и҆хъ ѿ врат̑.
до́ндеже съкрꙋши́ша ѧ҆̀ до катафарꙋса, и҆ ѹ҆жасе́сѧ срд̑це лю́дїи и҆ бы́сть ꙗ҆ко вода̀·

И҆ растерза̀ і҆сꙋс꙽ ри́зы своѧ̀, и҆ падѐ на землѝ на лицѐ свое пред̑ гм҃ъ.
а҆жъ до вечера са́мъ и҆ ста́рцы і҆и҆л҃евы, всы́паша прьсть на главы̀ своѧ̀·

И҆ рече і҆сꙋсъ молѧ́сѧ, г҃и г҃и въскꙋ́ю преведѐ ра́бъ твой люди сїѧ чрезъ і҆е҆рда́нъ, преда́ти ѧ҆̀ а҆м꙽мор꙽ре́ѻм꙽ на погꙋбленїе.
а҆ще бы́хомъ пребы́ли всели́лисѧ быхомъ подолгъ і҆ѻ҆рда́на·

Ги҃ что рекꙋ е҆лмаже и҆змѣнѝ і҆и҆л҃ь вы́ю свою̀ пред̑ врагѝ свои҆ми·

Ѹ҆слы́шавши же ханаа́ни и҆ вс̂и живꙋщїи на землѝ ѻ҆быидꙋтъ, потребѧ́тъ насъ съ землѧ̀.
чт̂о же сътвори́ши и҆́мени твое҆мꙋ вели́комꙋ·

И҆ рече г҃ь къ і҆сꙋсꙋ въста́ни въскꙋю с̂е ѹ҆ныло е҆сть лицѐ твоѐ съгрѣши́ша лю́дїе, и҆ престꙋпи́ша завѣтъ мои е҆же завѣща́хъ к ни́мъ, и҆ ѹ҆крад̑ше ѿ клѧ́твы и скры́ша въ сосꙋдѣхъ свои҆хъ·

Сего ра́ди не възмогꙋтъ сн҃ове і҆и҆л҃евы ста́ти пред̑ лицемъ вра́гъ своих̑·

н̂о хребетъ ѻ҆братѧ́т꙽ пред̑ врагѝ свои҆ми, ꙗ҆́ко клѧ́твою сташа, и҆ не приложꙋ̀ ксемꙋ бы́ти с ва́ми, а҆ще не и҆змете клѧ́твы ѿ себѐ са́ми·

Въста́въ ѻ҆чи́сти лю́ди, и҆ рцы̀ ѻ҆чи́ститесѧ до ѹ҆́тра, ꙗ҆́ко с̂е гл҃етъ г҃ь б҃ъ і҆и҆л҃евъ.
клѧ́тва е҆сть въ вас̑҇ не възмо́жете ста́ти пред̑ врагѝ вашими, до́ндеже и҆́змете ѿ себе са́ми клѧ́твꙋ·

да съберетесѧ вс̂и заѹ҆́тра, по племеномъ ва́шимъ и҆ бꙋдетъ племѧ̀ е҆же пока́жетъ г҃ь·

да приведетѐ до сонмꙋ, сонмъ же и҆же покажетъ г҃ь.
да приведете по домом̑ до́м же и҆же покажетъ г҃ь.
да приведетѐ по мꙋжемъ·

І҆ и҆же сѧ ѻ҆бличит̑ да и҆згори́тъ ѻ҆гне́мъ самъ и҆ вс̂е е҆ли́коже е҆сть е҆го, ꙗ҆ко престꙋпѝ завѣтъ гн҃ь.
и҆ сътворѝ безаконїе въ і҆и҆л҃и·

И҆ ѻ҆бꙋтрѣ і҆сꙋс꙽ заѹ҆́тра и҆ приведѐ люд̑и̑ по племе́ни, і҆ ѻ҆бличи́сѧ племѧ̀ і҆ѹ́дино·

И҆ приведесѧ по сон̑҇момъ, и҆ ѻ҆бличи́сѧ сонмъ зара́ин꙽꙽.
и҆ приведесѧ со́нмъ зара́инъ по до́мꙋ и҆ ѻ҆бличи́сѧ до́мъ замврїи·

И҆ приведе́сѧ до́мъ е҆го по́ мꙋжемъ, и҆ ѻ҆бличисѧ а҆ха́ръ сн҃ъ хармїи́нъ, сн҃а зам̑врїина, сн҃а зара́нѧ, ѿ племе́ни і҆ѹ́дина·

И҆ рече і҆сꙋсъ а҆ха́рꙋ сн҃ꙋ мой да́ждь сла́вꙋ днс̑҇е, гв҃и б҃ꙋ і҆и҆л҃евꙋ.
и҆ да́ждь е҆мꙋ и҆сповѣ́данїе, и҆сповѣждь м̂и чт̂о е҆си сътвори́лъ и҆ не потаѝ ѿ менѐ·

И҆ ѿвѣща̀ а҆ха́р꙽ і҆сꙋсꙋ и҆ рече пои҆́стин꙽нѣ съгрѣшихъ.
пред̑ гм҃ъ бм҃ъ і҆и҆л҃евымъ, си́це и҆ си́це сътвори́хъ·

Ви́дѣхъ въ плѣнѣ ри́зꙋ.
кра́снꙋ и҆ добрꙋ̀, и҆ с҃ дидра́гмъ сребра̀ и҆ съсꙋдъ е҆ді́нъ зла́тъ.
н҃. дидра́гмъ, помы́слихъ на́ нѧ и҆ взѧ́хъ, и҆ всѐ т̂о съкры́хъ в землѝ въ кꙋщи мое́и, сребро̀ съкры́хъ под̑ ни́ми·

И҆ посла̀ і҆сꙋсъ послы̀ и҆ шед̑ше въ кꙋщꙋ въ по́лчище.
сїе же бѧ́ше съкрове́нно въ кꙋщи, и҆ сребро̀ под̑ ни́ми·

І҆ и҆знесо́ша и҆̀ и҆с кꙋща и҆ принесо́ша къ і҆сꙋсꙋ и҆ къ ста́рцемъ і҆и҆л҃евым̑ и҆ положи́ша ѧ҆̀ пред̑ гм҃ъ·

И҆ поѧ̀ і҆сс̑҇ꙋ а҆ха́ра сн҃а зара́нѧ.
и҆ сребро̀ и҆ ри́зꙋ и҆ съсꙋдъ зла́тыи възведѐ и҆̀ въ де́брь къ а҆ха́рꙋ и҆ сн҃ы е҆го и҆ дще́ри е҆го, и҆ говѧ́да е҆го и҆ ѻ҆слѧ́та е҆го и҆ вс̂и ѻ҆вца̀ е҆го и҆ кꙋщꙋ е҆го, и҆ вс̂е и҆мѣнїе е҆го.
и҆ весь і҆и҆л҃ь по не́мъ, и҆ възведѐ ѧ҆́ съ всѣмъ въ е҆мекахо́ръ·

И҆ рече і҆сꙋсъ а҆ха́рꙋ почт̂о потребѝ на́съ.
потреби т̂ѧ г҃ь дне́сь и҆ поби́ша и҆̀ ка́менїем̑ весь і҆и҆л҃ь.
и҆ съжго́ша е҆го вс̂е ѻ҆гнем̑, и҆ намета́ша ка́менїемъ·

И҆ссы́паша на не́мъ моги́лꙋ ка́менїемъ вели́кꙋ.
и҆ ѹ҆ста́ви г҃ь ꙗ҆́рость гнѣ́ва свое҆го.
сего ра́ди прозва́сѧ и҆́мѧ мѣстꙋ томꙋ̀ е҆мекахо́ръ, дажъ и҆ до сего дн҃е·

Глв̑҇а, и҃·

И реч̑҇ г҃ь къ і҆сꙋ́сꙋ не бо́исѧ н̂и ѹ҆жаса́исѧ пои҆мѝ съ собо́ю вс̂ѧ мꙋж́а во́искїа, въста́в꙽ же възы́иди въ га́и.
с̂е даю̀ въ рꙋцѣ̀ твоѝ цр҃ѧ га́иска и҆ зе́млю е҆го, и҆ лю́ди е҆го и҆ гра́дъ е҆го·

И҆ да сътвори́ши га́ю и҆ цр҃ю е҆го, ꙗ҆́коже сътворѝ і҆е҆рихо́нꙋ и҆ цр҃ю е҆го.
полон̑҇ же и҆ ско́ты е҆го да плѣниши себѣ̀, ѹ҆стро́и же себѣ̀ под̑садꙋ гра́да за собо́ю·

И҆ въста́въ і҆сꙋ́съ и҆ вс̂и мꙋж́и во́иньстїи, да въни́дꙋтъ въ га́и.
і҆ и҆збра̀ і҆сꙋ́съ, л҃, ты́сѧщъ мꙋ́жъ во́инъских̑ си́лных̑ крѣ́постїю, и҆ посла̀ но́щїю·

И҆ заповѣ́да и҆мъ гл҃ѧ, в̂ы съкры́итесѧ за гра́домъ.
да не бꙋдете дале́че гра́да ѕѣ́ло.
и҆ да бꙋдете вс̂и гото́ви·

А҆́з꙽ же и҆ вс̂и людїе и҆же съ мно́ю.
пристꙋ́пимъ къ гра́дꙋ, и҆ да бꙋ́детъ е҆гда̀ и҆зы́идꙋтъ живꙋщїи въ га́и, въ стрѣте́нїе на́мъ ꙗ҆́коже и҆ пре́жде·

Побѣ́гнем̑ ѿ лица̀ и҆хъ и҆ ꙗ҆́коже и҆зы́идꙋтъ въ слд̑ѣ нас̑҇, да ѿба́вимъ ѧ҆̀ ѿ гра́да, и҆ рекꙋтъ бѣжа́тъ сї́и ѿ лица̀ на́шего ꙗ҆́коже и҆ пре́жде·

Вы̂ же въста́вше ѿ кро́ва да вни́дете въ гра́дъ, и҆ преда́стъ их̑ г҃ь б҃ъ на́шъ в рꙋцѣ ва́ши·

Бꙋ́ди же и҆ ꙗ҆́коже во́зметъ град̑ да запали́те и҆̀ ѻ҆гне́мъ по словесѝ гн҃ю сътвори́те, с̂е заповѣ́даю вам̑·

И҆ посла̀ ѧ҆̀ і҆сꙋ́съ, і҆ и҆до́ша въ заста́вы и҆ сѣдо́ша межд̑ꙋ веѳи́лемъ, и҆ ме́ждꙋ га́ием̑, ѿ мо́рѧ га́иска·

И҆ ѻ҆бꙋтрѣ́въ і҆сꙋ́съ заѹ҆́тра съглѧда̀ лю́ди.
и҆ възы́иде сам꙽ и҆ ста́рцы і҆и҆л҃ьтестїи пред̑ людми въ га́и·

И҆ вс̂и лю́дїе во́инстїи с ни́мъ възыидо́ша, і҆ и҆дꙋщи прїидо́ша сꙋпроти́въ гра́да ѿ въсто́ка.
и҆ ѻ҆пол̑҇чи́шасѧ ѿ сѣ́вера въ га́и, и҆ бы́сть де́бр꙽ межд̑ꙋ и́ми и҆ межд̑ꙋ га́ие҆мъ·

И҆ вз̂ѧ ꙗ҆́ко, ҂е҃, мꙋжїи, и҆ положѝ и҆хъ на под̑са́дꙋ междꙋ̀ веѳи́лемъ и҆ гаие҆мъ ѿ за́пада гра́да·

И҆ прибли́жишасѧ лю́дїе ве́сь по́лкъ ѿ сѣ́вера гра́да, а҆ ѻ҆ста́тки е҆го ѿ мо́рѧ гра́да, и҆ по́иде і҆сꙋ́съ но́щи ѻ҆ноѧ̀ посредѣ де́бри·

И҆ бы́сть ꙗ҆́ко ви́дѣ цр҃ь га́искїи, потща́сѧ заѹ҆́тра и҆зы́ти и҆ мꙋжи град̑стїи проти́вꙋ и҆мъ прѧмо·

И҆ быс̑҇ е҆гда̀ ѹ҆ви́дѣ с̂е цр҃ь га́искїи, а҆́бїе въста́въ ра́но, і҆ и҆зыдо́ша мꙋжїе га́истїи на́ брань, са́мъ и҆ вс̂и лю́дїе е҆го.
въ́ времѧ пред̑ лицем̑ заста́въ, сїи же не вѣ́дѧша ꙗ҆́ко под̑са́да е҆сть за гра́дом̑ е҆го·

И҆ ѹ҆ви́дѣвъ ѧ҆̀ і҆сꙋ́съ ѿи҆де и҆ ве́сь лю́дъ ѿ лица̀ и҆хъ, и҆ бего́ша пꙋте́мъ въ пꙋсты́ню·

И҆ премо́гъ же ве́сь лю́дъ гна́ти по них̑, и҆ прельсти́шасѧ.
и҆ погна́ша въ слѣ́дъ сн҃овъ і҆и҆л҃евъ, и҆ ѿстꙋпи́ша ѿ гра́да·

И҆ не ѻ҆ста̀ никто́же въ га́и и҆ веѳи́ль, н̂о гна́ша вс̂и въ слд̑ѣ і҆и҆л҃ѧ.
и҆ ѻ҆ста́виша гра́дъ ѿве́рстъ, и҆ гна́ша въ слѣ́дъ і҆и҆л҃ѧ·

И҆ реч̑҇ г҃ь къ і҆сꙋ́сꙋ прострѝ рꙋ́кꙋ свою̀ и҆ копїѐ и҆же в рꙋцѣ̀ твое́й на гра́дъ, ꙗ҆́ко в рꙋ́кꙋ твою̀ предах̑ и҆̀·

И҆ прострѐ і҆сꙋсъ рꙋ́кꙋ свою̀ и҆ копїѐ на градъ, и҆ заста́вы въста́ша ско́ро ѿ мѣста свое҆го.
і҆ и҆зыидо́ша е҆гда̀ прострѐ рꙋ́кꙋ и҆ вънидо́ша въ гра́дъ и҆ взѧ́ша и҆̀.
и҆ пот꙽ща́вшасѧ запали́ша е҆го ѻ҆гне́мъ·

И҆ ѻ҆зрѣвшесѧ ѻ҆баватели насел̑҇ницы га́истїи въспѧ́ть и҆хъ ѹ҆зрѣш́а ды́мъ въсходѧ́ще ѿ гра́да до нб҃се.
и҆ посе́мъ не и҆мѣша ка́мо побѣ́гнꙋти н̂и сѣмо н̂и ѻ҆ва́мо.
лю́дїе же ѿбѣ́гшїи въ пꙋсты́ню въз꙽врати́шасѧ на гони́тели·

І҆сꙋсъ же и҆ весь і҆и҆л҃ь ви́дѣвше, ꙗ҆́ко взѧша заставы гра́дъ.
и҆ ꙗ҆́ко въсходитъ дымъ гра́дныи до нб҃се, и҆ ѻ҆братившесѧ.
і҆ и҆збыша мꙋжи га́искїи·

Сїи же и҆зыдо́ша и҆з града проти́вꙋ и҆мъ, и҆ ѻ҆бъѧ́ша и҆хъ ѿвсюдꙋ і҆и҆л҃ьтѧне.
сїи ѿ сїю странꙋ̀, а҆ и́нїи ѻ҆бо́нꙋ странꙋ̀, і҆ и҆збиша ѧ҆̀.
дон꙽деже не ѻ҆ста̀ н̂и е҆ді́нъ ѿ нихъ цѣлъ н̂и ѹ҆бѣжа·

Цр҃ѧ же га́иска ꙗ҆́ша жи́ва и҆ приведо́ша и҆̀ къ і҆сꙋ́сꙋ·

И҆ бы́сть ꙗ҆́ко преста́ша сн҃ове і҆и҆л҃еви сѣкꙋщ́и насел̑҇никъ га́искихъ.
на́ полехъ въ горѣ̀ до и҆схо́да.
на не́мъже и҆хъ гони́ша и҆дѣже падо́ша вс̂и ѻ҆́стрїем̑ меча̀·

И҆ ѻ҆брати́сѧ ве́сь і҆и҆л҃ь въ га́и и҆ посѣ́че ѧ҆̀ мече́м꙽·

И҆ бы́ша вс̂и пад̑шїи въ то́и дн҃ь ѿ мꙋже́ска по́лꙋ и҆ до же́ньска, в҃і ты́сѧщь, всѣ́хъ живꙋщих̑ въ га́и·

І҆сꙋ́съ же не ѻ҆братѝ рꙋ́кꙋ ꙗ҆́же просте́р꙽ копїе́мъ на землю̀.
до́ндеже проклѧ̀ всѣхъ ѻ҆бита́ющих̑ въ га́и·

Ра́звѣ скота̀ и҆хъ і҆ и҆мѣ́нїа и҆же въ́ градѣ ѻ҆́ном̑ плени́ша себѣ̀ сн҃ове і҆и҆л҃еви, по повелѣ́нїю гн҃ю ꙗ҆́коже повелѣ̀ і҆сꙋ́сꙋ·

И҆ запалѝ гра́дъ і҆сꙋ́съ ѻ҆гне́мъ, и҆ е́сть без꙽ ѹ҆селе́нїѧ въ вѣ́къ, и҆ е҆сть ѻ҆пꙋстѣнїемъ даже и҆ до сего̀ дн҃е·

Цр҃ѧ же га́иска повѣ́си на́ древѣ, и҆ бѧше на́ древѣ до́ вечера.
заходѧ́щꙋ же слн҃цꙋ, повелѣ і҆сꙋсъ.
и҆ снѧ́ша тѣло е҆го съ дре́ва и҆ поверго́ша и҆̀ въ пото́цѣ, пред̑ враты града, і҆ и҆ссыпа над̑ ним̑ моги́лꙋ вели́кꙋ каменїем̑ и҆ до сего̀ дн҃е·

Тогда̀ съградѝ і҆сꙋ́съ ѻ҆лта́рь, гв҃и б҃ꙋ і҆и҆л҃евꙋ въ горѣ̀ гаи҆ва́лъ·

Ꙗ҆́коже б̂ѣ заповѣ́да моѷсїи рабъ гн҃ь сн҃омъ і҆и҆л҃евымъ.
ꙗ҆́коже пи́шетъ въ законѣ моѷсїѻ҆вѣ, ѻ҆лта́рь ѿ ка́менїи нете́саныхъ.
на нихъже нѣсть сѧ възложило желѣзо, и҆ възнесѐ т̂ꙋ всѐсъж꙽женїе гв҃и требꙋ сп҃сенїѧ·

И҆ въписа̀ і҆сꙋсъ на камыцѣхъ, вторы́и законъ, законъ моѷсїѻ҆въ.
и҆же написа̀ пред̑ сн҃ы і҆и҆л҃евыми·

Весь же і҆и҆л҃ь и҆ старцы и҆хъ сꙋдїѝ их̑ и҆ книгочїа их̑, преходѧхꙋ ѻ҆ба полы съ странꙋ̀ ковче́га.
пред̑ жерцы̀ и҆ левѷти възд̑виза́ющими ковчегъ завѣта гн҃ѧ.
пришелецъ же и҆ т̂ꙋземецъ и҆же бѧхꙋ полъ и҆хъ близъ горы̀ гава́лъ, и҆ пол꙽ и҆хъ близъ горы̀ е҆валъ.
ꙗ҆́коже б̂ѣ заповѣ́да моѷсїи рабъ гн҃ь.
блс̑҇вѧще люди і҆и҆л҃евы въ первых̑·

По семꙋ же тако почтѐ вс̂ѧ словеса̀ закона сего̀, блс̑҇венїа и҆ клѧтвы.
по всемꙋ̀ писа́нїю въ законѣ моѷсїѻ҆вѣ·

И҆ не бы́сть словесѝ ѻ҆ всх̑ѣ и҆же заповѣ́да моѷсїи.
е҆гоже не почтѐ і҆сꙋсъ въ ѹ҆́ши всемꙋ̀ соньмꙋ сн҃овъ і҆и҆л҃евъ, мꙋжем̑ и҆ женам̑ и҆ дѣтемъ, и҆ пришелцемъ, ходѧщимъ посредѣ и҆хъ·

Глв̑҇а, ѳ҃·

И бы́сть ꙗ҆́ко ѹ҆слы́шаша вс̂и цр҃и а҆м꙽мор꙽реистїи, ꙗ҆́же ѻ҆бо́нꙋ странꙋ̀ і҆ѻ҆рда́на.
і҆ и҆же въ го́рстѣи і҆ и҆же въ ра́внѣи, і҆ и҆же подолгъ морѧ великаго.
і҆ иже въ сꙋпроти́внѣи дꙋбравѣ, и҆ хет꙽ѳеи, и҆ а҆м꙽мор꙽реи, и҆ гергесе́и, и҆ ханане́и, и҆ ферезеи, и҆ е҆веи, и҆ е҆ѹ҆сеи·

Снидо́шасѧ въкꙋпѣ сѣщисѧ съ і҆сꙋсомъ и҆ съ і҆ил҃емъ е҆дїномы́сленно·

И҆ живꙋщимъ же въ хо́лъмѣ въ гаваѻ́нѣ.
слы́шаша е҆ли́ко сътворѝ г҃ь и҆е҆рихо́нꙋ, и҆ га́и·

Сътвори́ша же и҆ сїи съ лꙋка́въством̑·

пришед̑ше ѹ҆бо и҆ съдѣ́лаша себѣ послы̀, възе́мше вре́тища ве́тха на ѻ҆слы своѧ̀, и҆ мѣ́хи ве́тхи ви́нны, и҆ разсѣ́дъшаѧ҆сѧ завѧ́заны·

И҆ сапозѝ вет̑хи, и҆ запла́чены на но́гꙋ их̑.
и҆ ри́зы поветша́ны на ни́х꙽, и҆ хлѣ́б и бра́шна и҆хъ бѣша пресхлѝ съдробе́ни и҆ съплеснѣ́ли·

И҆ прїидо́ша къ і҆сꙋ́сꙋ въ по́лчище і҆и҆л҃ево въ галга́лꙋ.
и҆ реко́ша е҆мꙋ и҆ всемꙋ̀ і҆и҆л҃ю ѿ землѧ̀ да́л꙽нїа прїидо́хомъ, и҆ нн҃ѣ завѣща́ите намъ завѣтъ·

И҆ реко́ша сн҃ове і҆и҆л҃еви къ хоре́ю.
вѣ́дѣ ꙗ҆́ко т̂ы посредѣ̀ нас̑҇ жевеши, ка́ко завѣща́ю тебѣ завѣтъ·

И҆ реко́ша къ ісꙋ́сꙋ рабѝ е҆смы̀ твоѝ.
и҆ реч̑҇ к ни́мъ і҆сꙋсъ ѿкꙋдꙋ е҆стѐ, и҆л̂и ѿкꙋ́дꙋ хо́дите·

И҆ реко́ша къ немꙋ̀ ѿ да́лнѧа землѧ̀ ѕѣло прїидо́хомъ рабѝ твоѝ, въ и҆́мѧ г҃а б҃а твое҆го.
слы́шахомъ б̂о и҆́мѧ е҆го и҆ вс̂е е҆ли́ко сътвори въ е҆гѷптѣ·

И҆ вс̂е е҆ли́ко сътвори двѣма цр҃ема а҆м꙽мор꙽ре́искома.
и҆же бѣ́хꙋ ѻ҆бо́нꙋ странꙋ̀ і҆ѻ҆рда́на, сїѻ́нꙋ цр҃ю сево́ньскꙋ.
і҆ и҆ѻ́гꙋ цр҃ю васа́ньскꙋ, и҆же живѧ́ше въ а҆старо́ѳѣ, и҆ въ дра́инѣ·

Реко́ша к на́мъ ста́рцы наши, и҆ вс̂и живꙋщ́їи на землѝ на́шеи гл҃юще.
възмѣте себѣ̀ бра́шно на пꙋть, і҆ и҆дѣте проти́вꙋ и҆мъ, и҆ рцѣте къ ни́мъ рабѝ е҆смы̀ ва́ши, и҆ нн҃ѣ завѣща́ите на́мъ завѣтъ·

Сїи́ хлѣ́бы на́ши те́плыѧ взѧ́хомъ ѿ домо́въ на́ших̑.
во́ньже дн҃ь и҆зыидо́хомъ прїитѝ къ ва́мъ, нн҃ѣ же пресхо́ша и҆ бы́ша и҆стоще́ни·

И҆ сїи́ мѣ́си ви́нны но́вы их̑же налїѧ́хомъ, и҆ с̂и рас꙽сѣдо́шасѧ.
и҆ ри́зы на́ша сїа́ и҆ ѻ́бꙋвища на́ша ѻ҆бет̑ша́ша, ѿ до́лга пꙋтѝ ѕѣ́ло·

И҆ взѧ́ша кн҃ѕи бра́шно и҆хъ, а҆ г҃а не въпраша́ша.
и҆ сътвори і҆сꙋ́съ с ни́ми ми́ръ, и҆ ѹ҆ста́ви къ ни́мъ завт̑ѣ, ради снабдѣнїа и҆хъ.
и҆ клѧ́шасѧ им̑ кн҃ѕи со́ньма·

И҆ бы́сть по трех̑ дн҃ех꙽ по завѣща́нїи къ ни́мъ завѣта.
и҆ слы́шаша ꙗ҆́ко близ̑ и҆хъ сꙋть, и҆ ꙗ҆́ко посредѣ̀ их̑ живꙋт́ъ·

И҆ въста́вше сн҃ове і҆и҆л҃еви възыидо́ша въ́ градъ их̑, въ тре́тїи дн҃ь.
гра́ди же ихъ бѧ́хꙋ гаваѻ́нъ, и҆ кефи́ра, и҆ вирои гра́дъ и҆а҆ри́мъ·

И҆ не сътвори́ша съ ни́ми ра́ти і҆сꙋ́съ и҆ сн҃ове і҆и҆л҃еви.
ꙗ҆́ко клѧ́шасѧ и҆мъ кн҃ѕи со́ньма гм҃ъ бг҃омъ і҆и҆л҃евымъ, и҆ ропта́хꙋ ве́сь со́нмъ і҆и҆л҃евъ до кн҃ѕеи·

И҆ реко́ша вс̂и кн҃ѕи всемꙋ̀ со́ньмꙋ, м̂ы клѧ́хомсѧ и҆мъ гм҃ъ бг҃омъ і҆и҆л҃евомъ.
и҆ нн҃ѣ не мо́жем̑ коснꙋтисѧ ихъ·

Се̂ да сътворим̑ да ѧ҆̀ жи́вимъ и ѹ҆стро́имъ ѧ҆̀ и҆ не бꙋ́детъ на нас̑҇ гнѣ́въ клѧ́твы рад̑и̑ е҆ю́же клѧ́хомсѧ и҆мъ·

И҆ рекоша им̑ кн҃ѕи да живꙋтъ с̂и.
и҆ бꙋдꙋтъ древоносцы и҆ водоно́сцы всемꙋ̀ соньмꙋ, и҆ сътворѝ весь соньмъ ꙗ҆́коже рекоша и҆мъ кн҃ѕи·

И҆ съзва̀ и҆хъ і҆сꙋсъ и҆ реч̑҇ и҆мъ гл҃ѧ, почто̀ прельстисте насъ гл҃ще.
ꙗ҆́ко далече е҆сми ѿ тебѐ ѕѣло, вы же насе́лницы е҆стѐ живꙋщїи в нас̑҇·

И҆ нн҃ѣ проклѧти в̂ы, и҆ не ѻ҆скꙋдѣет꙽ ѿ васъ рабъ древоно́сецъ и҆ водоносецъ мн̂ѣ, и҆ бв҃и мое҆мꙋ·

И҆ ѿвѣщаша і҆сꙋсꙋ гл҃юще, понеже възвѣстисѧ намъ рабомъ твоим̑, е҆лико ѻ҆бѣща̀ г҃ь б҃ъ твои моѷсїю рабꙋ̀ свое҆мꙋ дати вамъ вс̂ю сїю зе́млю.
и҆ потребити насъ, и҆ вс̂ѧ живꙋщаѧ на неи ѿ лица ва́шего.
сего̀ ради и҆ ѹ҆боѧ҆хом̑сѧ ѕѣло ѻ҆ дш҃ахъ нашихъ ѿ лица̀ ва́шего сътворихомъ дѣло с̂е·

И҆ нн҃ѣ с̂е мы̀ въ рꙋцѣ твоей, ꙗ҆́коже в̂ы е҆сть годѣ и҆ ꙗ҆ко сѧ вамъ мнитъ твори́ти нам꙽ сътвори·

И҆ сътвори́ша имъ сице, і҆ и҆збави ѧ҆̀ ісꙋсъ въ то́и дн҃ь ѿ рꙋкꙋ̀ сн҃овъ і҆и҆л҃евъ, и҆же не ѹ҆биша и҆хъ·

И҆ постави ѧ҆̀ і҆сꙋсъ въ то́и дн҃ь древоносца и҆ водоносца, всемꙋ̀ сонмꙋ и ѻ҆л꙽тарю бж҃їю.
сего̀ рад̑и̑ быша живꙋще, въ гаваѻ́нѣ древоно́си, и҆ водоноси ѻ҆лтарю бж҃їю и҆ до дн҃ешнѧго дн҃е, на мѣсте е҆же изберетъ г҃ь·

Глв̑҇а, і҃·

Посе́мъ ꙗ҆́коже ѹ҆слы́ша а҆донивезо́къ цр҃ь і҆ерс̑҇ли́мъскъ ꙗ҆́ко взѧ̀ і҆сꙋсъ га́и, и҆ потребѝ е҆го ꙗ҆́коже сътворѝ і҆е҆рихо́нꙋ и҆ цр҃ю е҆го·

та́ко сътворѝ и҆ га́ю, и҆ цр҃ю е҆го·

И҆ ꙗ҆́ко са́ми сꙋть въда́лисѧ живꙋщїи въ гаваѻ́нѣ къ і҆сꙋ́сꙋ и҆ къ і҆и҆л҃ю, и҆ бы́ша въ них̑·

Ѹ҆боѧ́шасѧ сами в себѣ̀ ѕѣло, вѣдѧхꙋ б̂о ꙗ҆́ко гра́дъ бѧше вели́къ гаваѻнъ.
ꙗ҆́ко е҆ді́нъ ѿ вели́кихъ грд̑а, и҆ вс̂и мꙋжи и҆же въ не́мъ крѣ́пцы·

И҆ посла̀ а҆донивезо́къ цр҃ь і҆ерс̑҇лим̑скъ, къ е҆ла́мꙋ цр҃ю хевро́ньскꙋ, и҆ къ фераа́нꙋ цр҃ю и҆еримꙋѳьскꙋ, и҆ къ а҆фїю цр҃ю лѧхи́съ, и҆ къ даве́рꙋ цр҃ю ѻ҆долам̑скꙋ гл҃юще·

Възы́идѣте къ мнѣ̀ и҆ помозѣте м̂и да повоюем̑ гаваѻ́нъ·

вда́ли бо сѧ сꙋть са́ми къ і҆сꙋ́сꙋ, и҆ къ сн҃омъ і҆и҆л҃евымъ·

И҆ събра́шасѧ и҆ възыидо́ша, е҃, цр҃еи е҆вꙋсѣ́искъ, и҆ цр҃ь і҆ерс̑҇ли́мъскъ, и҆ цр҃ь хевро́нскъ, и҆ цр҃ь е҆рмꙋ́ѳъскъ, и҆ цр҃ь лѧхи́съ, и҆ цр҃ь а҆гло́нъскъ.
сїи са́ми и҆ вс̂и лю́дїе и҆хъ, и҆ ѻ҆бъсѣ́дше гаваѻ́нъ, и҆ въе҆ва́хꙋ на́нь·

И҆ посла́ша живꙋщїи въ гаваѻ́нѣ къ і҆сꙋ́сꙋ въ пол̑҇чище і҆и҆л҃во въ галга́лꙋ гл҃юще, не ѿрѣша́и рꙋ́кꙋ свою̀ ѿ ра́бъ свои҆хъ.
възы́иди къ нам̑ ско́ро, и҆ помозѝ на́мъ, и҆ ѿи҆ми нас̑҇, ꙗ҆ко съ́браны сꙋть на́ ны вс̂и цр҃и а҆м꙽мор꙽ре́истїи живꙋщеи въ го́рстѣи·

И҆ възы́иде і҆сꙋ́съ ѿ галга́лъ самъ и҆ вс̂и лю́дїе во́иньстїи с ни́мъ, и҆ ве́сь мꙋж꙽ си́лныи и҆ крѣ́пкїи·

И҆ реч̑҇ г҃ь къ і҆сꙋ́сꙋ не бо́исѧ их̑ ꙗ҆́ко в рꙋцѣ твоѝ предах̑ ѧ҆̀.
и҆ не ѻ҆ста́нетъ ѿ ни́хъ н̂и е҆ді́нъ прд̑е ва́ми·

И҆ прїиде на ни́хъ і҆сꙋ́съ внеза́пꙋ.
вс̂ю бо но́щь и́де ѿ галга́лъ·

И҆ ѹ҆жасѝ ѧ҆̀ г҃ь ѿ лица̀ і҆и҆л҃ева, и҆ съкрꙋшѝ ѧ҆̀ съкрꙋше́нїемъ вели́кимъ въ гаваѻ́нѣ.
и҆ прогна́ша ѧ҆̀ пꙋте́м꙽ въсхо́да виѳоро́ньска, и҆ сѣча́хꙋ и҆хъ даже до а҆зи́ка, и҆ до маки́да·

Вънегда́ же бѣжа́хꙋ сїи ѿ лица̀ сн҃овъ і҆и҆л҃евъ, до въсхо́да веѳеро́ньска·

и҆ г҃ь просы́па на́ нѧ ка́менїе вели́кое съ нб҃се даже до а҆зи́ка, и҆ бы́сть мно́жаише ѹ҆ме́ршихъ ѿ гра́да ка́менна, не́же ѹ҆бїе́ныхъ, ѿ сн҃овъ і҆и҆л҃евыхъ мече́мъ на сѣ́чи·

Тогда̀ гл҃а і҆сꙋс́ъ къ г҃ꙋ во́нже дн҃ь преда̀ г҃ь б҃ъ а҆м꙽море́а под̑ рꙋкꙋ̀ і҆и҆л҃ѧ, во́ньже съкрꙋшѝ ѧ҆̀ въ гаваѻ́нѣ.
и҆ съкрꙋши́шасѧ ѿ лица̀ і҆и҆л҃ева, и҆ реч̑҇ і҆сꙋсъ.
да ста́нет̑ слн҃це прѧ́мо гаваѻ́нꙋ.
и҆ мс̑҇ць прѧ́мо де́бри а҆лиѻ́нъ·

И҆ ста̀ слн҃це, и҆ мс̑҇ць ста̀ дон̑҇деже лю́дїе і҆и҆л҃евы ѿм꙽сти́ша враго́мъ свои҆мъ, не се́ ли е҆сть пи́сано въ кни́гахъ пра́вед꙽наго.
и҆ ста̀ слн҃це средѣ нб҃си, и҆ не скорѝ и҆тѝ на за́пад̑ въ совершенїе дн҃и е҆ді́наго.
и҆ не бы́сть дн҃ь такїи, ниже прежде н̂иже по то́мъ.
да послꙋш́аетъ б҃ъ та́ко гла́са чл҃ча, ꙗ҆ко г҃ь поборѝ по і҆и҆л҃ю·

И҆ възврати́сѧ і҆сꙋсъ и҆ ве́сь і҆и҆л҃ь с ни́мъ въ по́лчище галга́лъ·

И҆ ѿбѣго́ша, е҃, цр҃еи с̂и и҆ съкры́шасѧ въ пеще́рѣ ꙗ҆́же въ маки́дѣ·

И҆ повѣда́ша і҆сꙋсꙋ гл҃юще.
ѻ҆брѣто́шасѧ, пѧ́ть, цр҃ь, съкры́вшихъсѧ въ пеще́рѣ маки́да·

И҆ рече і҆сꙋсъ завалѧ́ите ка́менїемъ ве́лїемъ ѹ҆́стїе пеще́рѣ, и҆ приста́вите над̑ ни́ми мꙋжа стрещѝ и҆хъ·

Вы́ же не ѻ҆става́ите женꙋщи въ слд̑ѣ врагъ ва́шихъ·

И҆ сечѣте ѻ҆ста́нок̑҇ и҆хъ, и҆ не дади́те въни́ти и҆мъ въ гра́ды и҆хъ.
преда̀ б̂о ѧ҆̀ г҃ь б҃ъ на́ш꙽ въ рꙋцѣ на́ши·

И҆ бысть ꙗ҆́ко преста і҆сꙋсъ, и҆ вс̂и сн҃ове і҆и҆л҃евы сѣкꙋще и҆хъ сѣче́нїемъ вели́ким꙽ ѕѣ́ло, дажъ и҆ до кон꙽ца̀, ѹ҆цѣлѣвшїи же ѿ них꙽, и҆ внидо́ша въ гра́ды тве́рды·

И҆ възврати́шасѧ вс̂и лю́дїе въ пол̑҇чище къ і҆сꙋсꙋ въ маки́да здра́ви и҆ не дви́гнꙋвъ никто́же и҆хъ на сн҃ы і҆и҆л҃евы ꙗ҆зы́комъ свои҆мъ·

И҆ рече і҆сꙋсъ ѿврь́зите ѹ҆́стїе пеще́рѣ, и҆зведи́те къ мнѣ̀ сїѧ, е҃. цр҃еи.
и҆с пещеры·

И҆ сътвори́ша сїѧ, і҆ и҆зведо́ша к немꙋ, е҃, цр҃еи.
и҆с пеще́ры цр҃ѧ і҆ерс̑҇ли́мска, цр҃ѧ хевро́нъска, цр҃ѧ е҆рм꙽мꙋ́ѳъска, и҆ цр҃ѧ лѧхїиска, и҆ цр҃ѧ а҆гло́нъска·

И҆ бы́сть ꙗ҆ко и҆зведо́ша и҆хъ къ і҆сꙋсꙋ.
и҆ съзва̀ і҆сꙋсъ.
весь і҆и҆л҃ь, и҆ старѣ́ишины во́искїѧ ходѧ́щаѧ съ ни́мъ гл҃ѧ къ ни́мъ.
пристꙋпѣте и҆ въстꙋпи́те нога́ми свои҆ми на вы́ѧ цр҃еи си́хъ.
и҆ пристꙋпи́вше въстꙋпи́ша нога́ми свои҆ми на вы́ѧ и҆хъ·

И҆ рече къ ни́мъ і҆сꙋсъ не бо́итесѧ и҆хъ, н̂и ѹ҆жаса́итесѧ.
н̂о возмꙋжаите, и҆ крѣпи́тесѧ.
ꙗ҆́ко си́це сътворѝ г҃ь всѣмъ врагом꙽ ва́шимъ и҆хже в̂ы повою́ете·

И҆ ѹ҆бѝ ѧ҆̀ і҆сꙋсъ и҆ повѣси ѧ҆̀, на е҃ древес̑҇ и҆ бѣша ви́сѧще до́ вечера·

И҆ бысть на за́ходѣ сл҃нцю, повелѣ і҆сꙋсъ и҆ снѧ́ша ѧ҆̀ съ древесъ и҆ въверго́ша ѧ҆̀ в пеще́рꙋ в нюж̑ сѧ бѣша съкры́ли, та́мо и҆хъ завали́ша ка́менїемъ вели́ким̑ ѿ ѹ҆стїѧ пеще́ры, до днешнѧго дн҃е·

Взѧ́ша же и҆ макида́нъ въ то́и дн҃ь.
і и҆збѝ ѻ҆рꙋжїемъ, и҆ потреби́ша цр҃ѧ е҆го, и҆ вс̂е ды́шꙋщее в не́мъ.
и҆ не ѻ҆ста̀ никто́же в не́мъ цѣлъ.
и҆ сътвори́ша цр҃ю македа́нскꙋ ꙗ҆́коже сътвори́ша цр҃ю і҆ерихо́нъскꙋ·

І҆ и́де і҆сꙋсъ и҆ весь і҆ил҃ь с ним̑, ѿ македа́на въ лем̑нꙋ и҆ ѻ҆блего́ша ѧ҆̀·

И҆ преда̀ г҃ь и҆ си́хъ в рꙋцѣ і҆и҆л҃ю и҆ цр҃ѧ е҆го.
и҆ ѹ҆би́ша е҆го ѻ҆́стрїемъ меча, и҆ вс̂е ды́шꙋщее въ немъ·

И҆ не ѻ҆ста̀ цѣло в не́мъ н̂и е҆ді́но.
и҆ сътворѝ цр҃ю е҆го, ꙗ҆́коже сътворѝ цр҃ю і҆е҆рихо́ньскꙋ·

І҆ и́де і҆сꙋсъ и҆ ве́сь і҆и҆л҃ь с ним̑ ѿ ле́вна, въ лѧхи́съ, и҆ ѻ҆блеже ѧ҆̀, и҆ вое҆ва́ша на́нь.
и҆ преда́стъ г҃ь лѧхи́съ, в рꙋцѣ і҆и҆л҃евы и҆ взѧ̀ е҆го въ дн҃ь в҃, і҆ и҆збѝ е҆го ѻ҆стрїем̑ меча̀, и҆ вс̂е ды́шꙋщее в не́мъ, и҆ потребѝ е҆го, ꙗ҆́коже сътворѝ и҆ ле́внѣ·

Тогда̀ възы́де ѻ҆рам̑ цр҃ь газе́р꙽скъ, помага́ѧ лѧхи́сꙋ.
и҆ ѹ҆бѝ е҆го і҆сꙋсъ ѻ҆стрїемъ меча̀ и҆ лю́ди е҆го, до́ндеже не ѻ҆ста̀ их̑ н̂и е҆ді́нъ н̂и ѹ҆бѣ́гнꙋвъ·

И҆ ѡти́де і҆сꙋсъ, и҆ ве́сь і҆и҆л҃ь с ним̑ ѿ лѧхи́съ, въ а҆гло́нъ.
и҆ ѻ҆блеже и҆̀ и҆ воева́ша на нѧ·

И҆ преда̀ и҆̀ г҃ь в꙽ рꙋцѣ і҆и҆л҃ю и҆ взѧ̀ и҆̀ въ то́й дн҃ь і҆ и҆зби и҆̀ ѻ҆стрїем̑ меча̀, и҆ вс̂е ды́шꙋщее е҆ли́ко в не́мъ ѹ҆бѝ, и҆ сътворѝ е҆мꙋ та́кожде ꙗ҆́ко и҆ лѧхи́сꙋ·

И҆ ѿи҆де і҆сꙋсъ и҆ ве́сь і҆и҆л҃ь с ним̑ въ хевро́нъ, и҆ ѻ҆бсѣдѐ и҆̀.
и҆ взѧ̀ е҆го і҆ и҆збѝ е҆го ѻ҆стрїемъ меча̀, и҆ вс̂и гра́ды е҆го и҆ вс̂е ды́шꙋщее е҆ли́ко же бѣѧ́ше в не́мъ.
и҆ не ѻ҆ста̀ их̑ н̂и е҆ді́нъ та́ко сътворѝ ꙗ҆́коже и҆ а҆гло́нꙋ, потребиша и҆̀ е҆ли́коже в нем̑ бѧ́ше·

И҆ ѻ҆братисѧ і҆сꙋсъ и҆ весь і҆и҆л҃ь с ним̑, в꙽ давир̑҇.
и҆ ѻ҆бсд̑ѣше и҆̀ взѧ́ша и҆̀ и҆ цр҃ѧ е҆го и҆ вс̂ѧ гра́ды е҆го і҆ и҆збиши и҆̀ мечем̑, и҆ потребиша и҆̀ и҆ вс̂е ды́шꙋщее в нем̑.
и҆ не ѻ҆ставиша ѝ н̂и е҆ді́наго ѹ҆цѣлѣ́вша.
ꙗ҆́ко сътвориша хевро́нꙋ и цр҃ю е҆го, та́кожд̑е сътвориша вави́рꙋ и҆ цр҃ю е҆го.
и҆ ꙗ҆́ко сътвориша и҆ лев꙽нꙋ и҆ цр҃ю е҆го·

І҆ и҆збѝ і҆сꙋсъ вс̂ю зе́млю го́рскꙋю, и҆ нагев꙽, и҆ ра́внꙋю, и҆ а҆сидо́ѳа и҆ вс̂ѧ цр҃ѧ и҆хъ.
и҆ не ѻ҆ста̀ в нихъ н̂и е҆ді́нъ ѹ҆цѣлѣвъ и҆ вс̂е ды́шꙋщее потребиша ꙗ҆́коже заповѣ́да г҃ь б҃ъ і҆и҆л҃ю·

І҆ и҆збѝ и҆хъ і҆сꙋсъ ѿ кадисва́рни, даже до га́зы и҆ вс̂ю зе́млю гесем̑ до гаваѻ́на·

И҆ вс̂ѧ цр҃ѧ сїѧ, и҆ зе́млю их̑ взѧ̀ і҆сꙋсъ е҆ді́ною ꙗ҆́ко г҃ь б҃ъ і҆ил҃евъ помага́ше і҆и҆л҃ю·

И҆ возврати́сѧ і҆сꙋсъ, и҆ ве́сь і҆и҆л҃ь с ним̑ въ полчи́ще въ галга́лъ·

Глв̑҇а, а҃і·

Ꙗкоже ѹ҆слы́ша и҆а҆ви́нъ цр҃ь а҆со́рскъ.
посла̀ къ і҆ѻ҆а́вꙋ цр҃ю мадо́нъскꙋ, и҆ къ цр҃ю емеро́ньскꙋ, и҆ къ цр҃ю а҆хиа́фъскꙋ, и҆ къ цр҃емъ и҆же в сидонѣ вели́комъ и҆ въ го́рстѣи.
въ раваѳъ прѧ́мо хенере́фꙋ, и҆ на полѧ́нѣ и҆ въ нафедо́ре и҆ въ предѣ́лехъ до́рских̑ ѿ за́пада·

Ханане́ѧ е҆же ѿ въсто́к꙽ и҆ за́пада, и҆ въ а҆м꙽мор꙽ре́а, и҆ хет̑ѳе́а.
и҆ ферезе́ѧ.
и҆ е҆ѹ҆се́ѧ и҆же въ горѣ̀, и҆ е҆ве́ѧ и҆же под̑ а҆е҆рмо́номъ, въ землѝ маси́фа·

И҆зыидо́ша с̂и и҆ цр҃и и҆хъ с ни́ми лю́ди мно́ѕи.
ꙗ҆́ко пѣсо́къ и҆же подо́лгъ кра́ѧ мо́рьска мно́жеством̑, ко́нїи же и҆ ѻ҆рꙋжїа мно́го ѕѣло·

И҆ снидо́шасѧ вс̂и цр҃и сїи́ и҆ прїидо́ша въкꙋпѣ.
и҆ ста́ша подо́лгъ воды̀ мо́рскїа вое҆ва́ти на і҆и҆л҃ѧ·

И҆ реч̑҇ г҃ь къ і҆сꙋ́сꙋ не ѹ҆бо́исѧ ѿ лица̀ и҆хъ, ꙗ҆́ко ѹ҆́тро в сїи ча́съ а҆зъ преда́мъ ѧ҆̀ въ трꙋ́пъ пред̑ сн҃ы і҆и҆л҃евы.
и҆ ко́немъ и҆хъ жи́лы пресѣче́ши, и҆ ѻ҆рꙋж́їе их̑ да съж꙽же́ши ѻ҆гне́мъ·

И҆ прїиде і҆сꙋ́съ и҆ вс̂и лю́ди во́истїи с ни́мъ на ни́хъ къ водѣ миро́ньстѣи внеза́пꙋ, и҆ нападо́ша на́ нѧ въ го́рстѣи·

И҆ преда́стъ ѧ҆̀ г҃ь под̑ рꙋцѣ і҆и҆л҃еви.
и҆ сѣкꙋщ́їѧ и҆хъ прогна́ша и҆хъ до сидо́на вели́каго.
и҆ до масрефоѳъ маи҆мъ, и҆ до по́ль маси́фекъ на въсто́ки·

И҆ сѣко́ша и҆хъ до́ндеже не ѹ҆цѣлѣ̀ в ни́хъ н̂и е҆ді́нъ н̂и ѹ҆бѣжа́въ·

И҆ сътворѝ им̑ і҆сꙋ́съ ꙗ҆́коже заповѣ́да е҆мꙋ г҃ь, ко́немъ их̑ жи́лы пресѣ́че, и҆ ѻ҆рꙋж́їе и҆хъ на ѻ҆гнѝ съж꙽жѐ·

И҆ ѻ҆брати́сѧ і҆сꙋ́съ въ то̀ вре́мѧ и҆ прїѧ̀ а҆со́ръ и҆ цр҃ѧ е҆го ѹ҆бѝ мече́мъ.
а҆со́ръ б̂о б̂ѣ пре́жде ѻ҆блада́ющїи всѣми црс̑҇твы си́ми·

І҆ и҆збѝ вс̂е ды́шꙋщее, е҆же в не́мъ бы́сть ѻ҆́стрїемъ меча̀ и҆ потреби́ша вс̂ѧ, и҆ не ѻ҆ста̀ в немъ всѧ́къ ды́шꙋщїи.
и҆ а҆соръ запали́ша ѻ҆гнемъ·

И҆ вс̂ѧ грады цр҃еи и҆хъ, и҆ вс̂и цр҃и и҆хъ поѧ̀ і҆сꙋсъ.
і҆ и҆зби ѧ҆ мечемъ, и҆ потребѝ и҆хъ, ꙗ҆́коже повелѣ̀ и҆мъ моѷсїи раб꙽ бж҃їи·

Всѣ же грады крѣпки не запалѝ і҆и҆л҃ь.
раз̑вѣе а҆соръ е҆ди́нъ точїю запалѝ і҆сꙋсъ·

Всѧ же коры́сти и҆хъ и҆ вс̂и скоты и҆хъ плѣниша себѣ̀ сн҃ове і҆и҆л҃еви·

Людїе же вс̂и поби́ша мечем̑ и҆ погꙋби́ша ѧ҆̀ дондеже потребиша ѧ҆̀.
и҆ не ѻ҆ста́виша ѿ нихъ ни е҆ді́наго ды́шꙋщаго·

Ꙗ҆́коже повелѣ г҃ь моѷсїю рабꙋ̀ свое҆мꙋ, тако моѷсїи заповѣ́да і҆сꙋсꙋ, и҆ тако сътворѝ і҆сꙋсъ.
и҆ не престꙋпѝ ни е҆ді́наго же ѿ всѣхъ ꙗ҆́же заповѣ́да г҃ь моѷсїю·

И҆ прїѧ̀ і҆сꙋсъ вс̂ю землю го́ръскꙋю и҆ вс̂ю зе́млю нагеѳъ и҆ вс̂ю землю госомъскꙋ, и҆ равнꙋю и҆ ꙗ҆́же на западъ и҆ горꙋ̀ і҆и҆л҃евꙋ и҆ по́лѧ е҆ѧ̀·

И҆же ѿ горы̀ а҆хирѣ и҆з неѧ́же въсходитъ сїиръ, даждь да вал꙽гаѳа.
и по́ле дꙋбра́вы под̑ горо́ю а҆е҆рмон̑҇, и҆ вс̂ѧ цр҃ѧ и҆хъ взѧ̀ і҆ и҆збѝ·

И҆ множа́иша дн҃и сътвори і҆сꙋсъ съ цр҃и сими бра́ни.

И҆ не бы́сть н̂и е҆ді́нъ гра́дъ е҆го́же не преда̀ г҃ь сн҃омъ і҆ил҃евым̑ раз̑вѣ хиве́и ѻ҆битающихъ въ гаваѻ́нѣ всх̑ѣ възѧ́ша мече́мъ·

Ꙗ҆́ко гм҃ъ сътворена бысть сїа, ѹ҆крѣпити срд̑це их꙽ съпротиви́тисѧ на ра́ти къ і҆ил҃ю.
да потребѧ́тъ и҆х꙽, не сътвори́вше млс̑҇ти, н̂о да сѧ потребѧ́тъ, ꙗ҆́ко гл҃а г҃ь къ моѷсїю·

И҆ прїиде і҆сꙋсъ в т̂о времѧ, и҆ портеби вс̂ѧ е҆накими ѿ горскїа ѿ хеврона и҆ ѿ давира и҆ ѿ а҆нова, и҆ ѿ всеѧ горы̀ і҆и҆л҃евы, и҆ ѿ всеѧ̀ горы̀ і҆ю҆́дины.
съ грады их̑ потреби ѧ҆̀ і҆сꙋсъ·

И҆ не ѻ҆ста̀ н̂и е҆дінъ е҆накимъ въ землѝ сн҃овъ і҆и҆л҃евыхъ.
ра́звѣ точїю въ гази́ве и҆ въ геѳѣ, и въ а҆съдо́ѳѣ ѻ҆ста́виша·

И҆ взѧ̀ і҆сꙋсъ вс̂ю зе́млю ꙗ҆́коже заповѣ́да г҃ь моѷсїю.
и҆ дасть ю҆̀ въ прича́стїе і҆и҆л҃ю, жребїемъ по племе́ни и҆хъ и҆ преста̀ землѧ̀ вою́ема·

Глв̑҇а, в҃і·

Си̂ сꙋть цр҃їе землѧ̀ ꙗ҆́же и҆з꙽биша сн҃ове і҆и҆л҃еви.
и҆ причасти́ша зе́млю их̑, ѻ҆бонꙋ странꙋ̀ і҆ѻ҆рда́на, ѿ восто́ка слн҃цꙋ, ѿ дебри а҆ро́ньски до горы̀ а҆е҆рмо́нъ и҆ вс̂ю зе́млю.
а҆ра́вꙋ ѿ восто́къ·

Сїѻ́на цр҃ѧ а҆м꙽моррѣиска и҆же живѧше въ е҆сеѻ́нѣ.
ѻ҆блады́и ѿ а҆роин̑҇ ꙗ҆́же е҆сть въ де́бри а҆ро́н꙽стѣи и҆ сре́ды де́бры.
и҆ пол̑҇ землѝ галаа́да до иаво́ка, и҆дж̑ѣ предѣли сн҃въ а҆м꙽монь·

ѿ а҆ра́ва же до мо́рѧ хенере́ѳъ на высо́ки, да́же до мо́рѧ а҆ра́ва, мо́рѧ со́лищнаго.
на въсто́къ пꙋтемъ ко висимо́ѳꙋ и҆ под̑ ѳема́нь, ꙗ҆же под̑ сидоѳа си́га·

Предѣл же и҆ѻ́га цр҃ѧ васа́нъска, ѻ҆ста́вшїи ѿ щꙋдо́въ и҆же ѻ҆бита̀ въ а҆старо́ѳѣ, и҆ въ і҆ѻ҆рда́нѣ.
ѻ҆блады́и же ѿ горы̀ а҆е҆рмонъ и҆ ѿ се́лха, и҆ вс̂ю зе́млю васа́нь до предѣлъ гесꙋри́нъ и҆ маха́ѳи, и҆ полъ галаа́да, и҆дѣже предѣлъ сїѻ́на цр҃ѧ е҆сево́ньска·

Моѷсїи рабъ гн҃ь и҆ сн҃ове і҆и҆л҃еви, и҆зби́ша ѧ҆̀.
и҆ дасть ю҆̀ моѷсїи ра́бъ бж҃їи въ ѻ҆дръжа́нїе рꙋви́мꙋ и҆ га́дови и҆ полъ племе́ни манасїинꙋ·

Сїи же цр҃и ам꙽моррѣ́истїи ꙗ҆́же и҆збѝ і҆сꙋсъ и҆ сн҃ове і҆и҆л҃евы, ѻ҆бо́нꙋ странꙋ̀ і҆ѻ҆рдана.
подо́лгъ мо́рѧ валса́дова, на́ поли дꙋбра́вы до горы̀ а҆ло́к꙽ е҆же и҆́де въ сии́ръ, и҆ да́стъ ю҆̀ і҆сꙋсъ племе́ном꙽ і҆и҆л҃евом꙽, прича́стїе по жребїи е҆го·

Въ горѣ̀ и҆ на́ поли, и҆ въ а҆ра́вь, и҆ въ а҆сида́ѳѣ, и҆ въ пꙋсты́ни и҆ въ а҆ге́ѳѣ.
хетѳе́ѧ.
и҆ а҆м꙽мор꙽ре́ѧ.
и҆ ханане́ѧ.
и ферезе́ѧ, и҆ е҆ве́ѧ, и҆ е҆ѹ҆сеѧ·

Цр҃ѧ і҆ерихо́ньска, и҆ цр҃ѧ га́ина ꙗ҆́же е҆сть бли́зъ веѳи́ли·

цр҃ѧ і҆е҆рс̑҇лимъска, и҆ цр҃ѧ хевро́нска·

цр҃ѧ е҆римꙋфе́ска, и҆ цр҃ѧ лѧхи́съ·

цр҃ѧ е҆гло́мъска, и҆ цр҃ѧ газе́рска·

Цр҃ѧ дави́ръска, и҆ цр҃ѧ гаде́рска·

цр҃ѧ е҆́рмъска, и҆ цр҃ѧ а҆де́ръска·

цр҃ѧ ле́вна, и҆ цр҃ѧ ѻ҆дале́мъска.
цр҃ѧ маки́да.
и҆ цр҃ѧ веѳи́лѧ·

цр҃ѧ а҆пъфꙋ, и҆ цр҃ѧ ѻ҆фе́ръска·

цр҃ѧ а҆фе́ка.
и҆ цр҃ѧ херъсаро́ньска·

цр҃ѧ самъвро́нъ, и҆ цр҃ѧ фꙋ́га·

цр҃ѧ маро́ньска.
и҆ цр҃ѧ а҆хъса́ѳъ·

цр҃ѧ ѳана́хъска, и҆ цр҃ѧ магедо́ньска·

цр҃ѧ кедо́ньска, и҆ цр҃ѧ и҆е҆кона́мъска е҆рме́лѧ·

цр҃ѧ а҆доръска, нафедо́ръ.
и҆ цр҃ѧ гои҆́мъска.
гельа҆ге́лѧ·

цр҃ѧ ѳе́рса, си́хъ всѣх꙽ цр҃еи, л҃а·

Глв̑҇а, г҃і·

Исꙋ́съ же състарѣ́всѧ прешд̑е дн҃и.
и҆ реч̑҇ г҃ь къ і҆сꙋ́сꙋ, т̂ы състарѣ́сѧ дн҃ьми.
а҆ зем̑лѧ̀ ѻ҆ста̀ мно́га въ причаще́нїе·

Си́ же землѧ̀ ѻ҆ста́вленаѧ предѣ́лы филисти́мли.
ѿ гесꙋри и҆ хананеѧ́нъ·

ѿ рѣкѝ си́хра ꙗ҆́же и҆дѐ ѿ лица̀ е҆гѷптови.
даждь до предѣ́лъ а҆къкаро́ньскъ къ сѣ́верꙋ хананеи́, намѣни́тсѧ пѧ́ть ѻ҆́бластїи филисти́мъскъ.
газе́вꙋ и҆ а҆зотїю и҆ а҆сколонитꙋ, и҆ геѳоѳею и҆ а҆къкаро́нитꙋ.
и҆ е҆ѷею ѿ ѳема́нъ·

ѿ ю́га же вс̂ѧ землѧ̀ ханаа́н꙽ска прѧ́мо ѿ га́зы.
и҆ сидо́нъ даждь до а҆фе́ка, до предѣ́лъ а҆м꙽мор꙽ре́искъ·

И҆ вс̂ю зе́млю га́мъвли, филисти́млю.
и҆ ве́сь лива́нъ ѿ въсто́къ слн҃ца, ѿ гал̑҇га́лъ под̑ горо́ю а҆е҆рмо́нъ до вхо́да е҆маѳ̑҇·

И҆ вс̂и ѻ҆бита́ющїи въ го́рьстѣи ѿ лива́на и҆ до масрефо́ѳъ маи҆ма·

Вс̂ѧ сидо́нскїа аз̑ потреблю̀ ѿ лица̀ іи҆л҃ѧ.
толи́ко разда́и жре́бїемъ і҆и҆л҃ю въ прича́стїе, ꙗ҆́коже заповѣ́дах̑ тебѣ·

И҆ нн҃ѣ раздѣлѝ зе́млю сїю въ прича́стїе.
ѳ҃ тѝ, племене́мъ и҆ пол̑҇ племе́ни манасїи́нꙋ·

А по́лъ племе́ни второ́мꙋ дадѐ моѷсїи ча́сть, съ сн҃ъми рꙋви́мли и҆ га́довыми ѻ҆бо́нꙋ странꙋ̀ і҆ѻ҆рда́на на въсто́къ слн҃ца·

Ꙗ҆́коже да́стъ и҆мъ моѷсїи ра́бъ гн҃ь, ѿ роръ и҆ ꙗ҆́же е҆сть ѿ ѹ҆́стїа водоте́чи а҆рноне́ѧ.
и҆ град̑ и҆же междꙋ де́брею, и҆ вс̂ю ра́внꙋю ѿ мадава́на·

Вс̂ѧ гра́ды сїѻ́на цр҃ѧ а҆м꙽мор꙽ре́иска, и҆же црс̑҇твова въ е҆сево́нѣ, даждь до предл̑҇ѣ сн҃овъ а҆м꙽мо́нь·

И҆ галаа́дъ, и҆ предѣ́лы гесꙋ́ри.
и҆ мага́ѳи вс̂ю горꙋ а҆е҆рмо́нь, и҆ вс̂ю васани́т꙽скꙋ до ел̑҇ха·

Вс̂е црс̑҇тво и҆ѻ́гово въ васани́тиди и҆же црс̑҇твова, въ а҆старо́ѳѣ и҆ въ е҆даи́н꙽·

сїи ѻста̀ е҆ді́нъ ѿ щꙋ́довъ, и҆ ѹ҆бѝ е҆го моѷсїи, и҆ потребѝ и҆̀·

Но не потреби́ша сн҃ове і҆и҆л҃евы гесꙋ́ри.
и҆ маха́ѳи и҆ ханане́ѻ҆въ.
зане́же живе́тъ цр҃ь гесꙋ́ри и҆ маха́ѳи.
въ сн҃ѣхъ і҆ил҃евъ, до сего дн҃е·

Ра́звѣ племе́ни левѷинꙋ не да́ст꙽сѧ прича́стїе.
г҃ь б҃ъ і҆и҆л҃евъ са́мъ причастѝ си́хъ, ꙗ҆́коже реч̑҇ и҆мъ г҃ь·

И҆ сїе раздѣле́нїе е҆же раздѣлѝ моѷсїи сн҃омъ іи҆л҃евым꙽ по племене́мъ и҆хъ·

Въ а҆раво́ѳѣ, и҆ въ моа́вѣ ѻ҆бо́нꙋ странꙋ̀ і҆ѻрда́на ѹ҆ е҆рихо́на.
и҆ да́стъ моѷсїи племе́ни сн҃овъ рꙋви́млимъ по со́ньмꙋ и҆хъ·

И҆ бы́ша и҆мъ предѣ́ли ѿ раѻ҆и́ръ, и҆же при бре́гꙋ де́бри а҆рно́нъскїѧ.
и҆ гра́дъ и҆же е҆сть въ де́бри а҆рно́нстѣи, и҆ вс̂ю зе́млю мисо́рскꙋ·

Є҆сево́нъ вс̂ѧ гра́ды и҆же сꙋть въ мисо́рѣ и҆ дево́рѣ и҆ вамо́ѳъ.
ваа́ль, и҆ до́мы велмо́нѧ·

И҆ а́сса и҆ кедимо́ѳа, и҆ мифаа́ѳъ·

И҆ карїаѳе́мъ и҆ се́вама и҆ сарѳо́вы и҆ сиѻ́ровы, въ предѣ́ле е҆на́ка и҆ веѳъфаго́ра·

И҆ а҆сидофаѳ̑҇сга, и҆ висимꙋ́ѳа·

И҆ вс̂ѧ гра́ды мисо́ровы.
и҆ вс̂е црс̑҇твїе сїѻ́на цр҃ѧ а҆м꙽мор꙽реиска, е҆гоже ѹ҆бѝ моѷсїи самого и҆ старѣи́шины мадиа́млѧ.
а҆е҆́вїѧ и҆ роко́ма и҆ сꙋра и҆ ѹ҆́ра и҆ ровека·

Кн҃ѕи сїѻ́нѧ и҆же ѻ҆битахꙋ на землѝ той.
и҆ валаа́ма веѻ҆́рова волхва ѹ҆би́ша мечемъ сн҃ове і҆и҆л҃евы въ плѣнѣ·

Бы́ша же предѣли рꙋви́нѣ и҆ѻ҆рда́нь предѣлъ·

Сїе прича́стїе сн҃овъ рꙋви́мовъ по сонмомъ их̑, и҆ град̑ и҆хъ и҆ села и҆хъ·

даде́ же моѷсїи и҆ сн҃омъ гадовымъ по сонмомъ и҆хъ.
и҆ бы́ша же и҆мъ предѣ́ли и҆ази́ръ вс̂и гради галаа́ди.
и҆ полъ землѧ̀ сн҃овъ а҆мо́нь да а҆рои҆ра и҆же е҆сть пред̑ лицемъ рав꙽ваѳа·

И҆ ѿ е҆севона до рамо́ѳа, по ма́сфе и҆ въ и҆тани́мѣ.
и҆ ѿ манаи́ма, до предѣ́лъ дави́ровъ·

И҆ въ е҆сме́кꙋ виѳара́мъ, и҆ виѳна́мъ.
и҆ съхо́ѳа и҆ сафо́на, и҆ ѻ҆ста́нокъ цр҃ьства сїѻ́на и҆ цр҃ѧ е҆сево́ньска·

І҆ѻ҆рдан̑҇ и҆ е́же над̑ ни́мъ да́ждь до ча́сти и҆ мо́ре хенере́ѳъ ѻ҆бо́нꙋ странꙋ̀ і҆ѻ҆рда́на ѿ въсто́къ·

Сїе прича́стїе сн҃овъ га́дов̑҇ по соньмо́мъ и҆хъ, и҆ по гра́дохъ и҆хъ и҆ по се́лах̑ и҆хъ·

И҆ дадѐ моѷсїи и҆ по́лꙋ племе́ни манасїи́нꙋ, по соньмом̑ их꙽·

и҆ бы́ша предѣ́ли и҆хъ ѿ маи҆а҆и́ма, и҆ вс̂е црс̑҇тво васа́ново, и҆ вс̂е црс̑҇тво и҆ѻ́гово цр҃ѧ васа́ньска.
и҆ вс̂ѧ ве́си и҆а҆и́ра и҆же сꙋть въ васанити́ди ше́стьдесѧ́тъ гра́довъ·

И҆ по́лъ галаа́да и҆ въ а҆старо́ѳѣ, и҆ въ е҆надраи́нъ.
гра́ды црс̑҇тва ѻ҆́гова въ васанити́ди.
и҆ да́шасѧ сн҃омъ махи́ровым꙽, и҆ сн҃ꙋ манасїи́нꙋ и҆ по́лꙋ сн҃омъ махи́ровым̑, по соньмо́мъ и҆хъ·

Сїѧ же сꙋть и҆же раздѣли моѷсїи ѻ҆бо́нꙋ странꙋ̀ і҆ѻ҆рда́на въ а҆раво́ѳе прѧ́мо і҆е҆рихо́на на въсто́к꙽·

Племе́ни же левѷинꙋ не дадѐ моѷсїи прича́стїа.
поне́же са́мъ г҃ь б҃ъ і҆и҆л҃евъ прича́сти сего е҆сть ꙗ҆́коже гл҃а им̑·

Глв̑҇а, д҃і·

Си же прича́стїа сн҃овъ і҆ил҃ев̑҇ въ землѝ ханаа́ньстѣи, и҆́мже раздели́ша ю҆̀, е҆лїа́зар̑҇ жрец̑҇.
і҆ и҆сꙋсъ сн҃ъ навѷинъ, и҆ кнѧ́ѕи ѿч҃ествъ племе́н꙽ сн҃овъ і҆и҆л҃евъ·

По жре́бїемъ прича́стїа своѧ̀ взѧ́ша.
ꙗ҆́коже заповѣда г҃ь моѷсїѻм̑ да́ти, ѳ҃ ти, племен̑҇ и҆ пол̑҇ племе́ни манасїи́нꙋ·

И҆ дадѐ б̂о моѷсїи двема̀ племе́нем̑ и҆ по́лъ племе́ни прича́стїе, ѻ҆бо́нꙋ странꙋ̀ і҆ѻ҆рда́на.
левѷтом же не дадѐ прича́стїа в них̑, зане́ же бѣа́хꙋ сн҃ове і҆ѻ́сифли.
дв̂а племе́ни манасїи, и҆ е҆фремли.
и҆ сего̀ ради не да́стъ ча́сти землѝ левѷтом̑ н̂о по градо́мъ вселе́нїа, и҆ пред̑гра́дїа скотом̑ и҆хъ·

Ꙗ҆́коже заповѣ́да г҃ь, моѷсїю.
тако сътвори́ша сн҃ове і҆и҆л҃еви, и҆ раздели́ша зе́млю·

И҆ прїидо́ша сн҃ове і҆ѹ҆дини къ і҆сꙋсꙋ, въ гал̑҇га́лы.
и҆ реч̑҇ к немꙋ̀ хале́въ, и҆ефо́нин̑҇ кенезе́и, т̂ы съвѣси сло́во, е҆же гл҃а г҃ь къ моѷсїю чл҃кꙋ бж҃їю, ѻ҆ мн̂ѣ и҆ ѻ҆ тебѣ въ кадисва́рнїи·

м҃, б̂о лѣтъ бѣхъ е҆гда̀ посла̀ м̂ѧ моѷсїи ра́бъ гн҃ь, ѿ кадисва́рнїи съглѧда́ти зе́млю.
и҆ ѿвѣща́хъ е҆мꙋ словеса̀ по всемꙋ е҆же бы́сть въ срд̑цы мое҆мъ·

Бра́тїа же моа̀ ходи́вшїи со мно́ю, преврати́ша срд̑це людїи.
а҆́з же преложих̑сѧ въ слд̑ѣ гв҃и б҃ꙋ мое҆мꙋ·

И҆ клѧ́сѧ моѷсїи въ то́й дн҃ь гл҃ѧ.
землѧ̀ на ню́же е҆си въз꙽ше́лъ теб́ѣ бꙋ́детъ въ прича́стїе, и҆ ча́дом̑ твоим̑ въ вк̑҇ѣ.
ꙗ҆́ко приложѝ слѣди́ти по г҃ѣ бѕ҃ѣ мое҆мъ·

И҆ нн҃ѣ прекормил̑҇ м̂ѧ е҆сть г҃ь, ꙗ҆́коже е҆сть реклъ с̂е, м҃, и҆ е҃, лѣтъ ѿнели́же гл҃а г҃ь с̂е сло́во к моѷсїю.
ꙗ҆ко е҆ще хожда́ше і҆и҆л҃ь въ пꙋсты́ни, и҆ нн҃ѣ сѐ м̂и днс̑҇ь, п҃, и҆ е҃, лѣтъ·

И҆ та́ко е҆смь днс̑҇е могїи ꙗ҆́ко̑ и҆ е҆гда̀ посла м̂ѧ моѷсїи.
також̑ и҆ нн҃ѣ могꙋ̀ входѧ́ще на́ брань і҆ и҆сходѧ́ще·

И҆ нн҃ѣ прошꙋ̀ ѹ҆ тебѐ горы̀ сїѧ́, ꙗ҆кож̑ реч̑҇ г҃ь въ дн҃ь ѻ҆́нъ, ꙗ҆́ко т̂ы слы́ша сло́во с̂е въ дн҃ь ѻ҆́нъ, въ а҆кимѣ же тамо сꙋть гра́ды тве́рды и҆ вели́цы, и҆ а҆ще б̂о е҆сть г҃ь со мно́ю потреблю и҆̀ ꙗ҆коже е҆сть ре́клъ г҃ь·

И҆ блс̑҇ви е҆го і҆сꙋсъ, и҆ дастъ хевро́на, хале́вꙋ сн҃ꙋ и҆е҆фѳонѣи́нꙋ, сн҃ꙋ ханезеи́нꙋ, въ прича́стїе·

Сего ради бы́сть хеврон̑҇ хале́вꙋ и҆е҆ѳо́ни хенезе́инꙋ, въ прича́стїе до дне́шнѧго дн҃ѧ, поне́же въслѣ́дова по велѣнїю г҃а б҃а і҆и҆л҃ева·

И҆́мѧ же хевро́нꙋ пе́рвое бы́сть кариа҆ѳа́рва, а҆́рба б̂о мꙋжъ ве́лїи средѣ воа҆ки́мъ бы́сть, и҆ преста̀ землѧ̀ ѿ бра́ни·

Глв̑҇а, е҃і·

И бы́сть жре́бїи сн҃овъ і҆ѹ҆дин̑҇ по со́ньмомъ и҆хъ, ѿ предл̑҇ѣ и҆дꙋмеискъ ѿ пꙋсты́нѧ си́нъ къ лива́нꙋ, да́ждь до кадис̑҇ къ ю҆́гꙋ.
и҆ бы́ша предѣли их̑ ѿ въсто́къ до ча́сти морьскїа и҆ лꙋкїискїѧ, и҆ ѿ хо́лмическїа клонѧ́щаго къ ю҆́гꙋ·

И҆ прохо́дит̑ прѧ́мо въсхожд̑енїю, а҆крав꙽ви́мъ.
і҆ и҆схо́дит̑ ѿ сина, и҆ въсхо́дитъ ѿ ю҆́га, до ли́вы и҆же къ кадисва́рни·

И҆ захо́дитъ въ е҆врон̑҇, и҆ въсхо́дитъ въ а҆гъда́рꙋ, і҆ и҆схо́дит̑ на запады кади́съ, і҆ и́детъ въ а҆кар̑҇ки·

И҆зхо́дит꙽ же въ а҆семо́нꙋ, и҆ въхо́дитъ до де́бри е҆гѷпет꙽ски.
и҆ да бꙋ́дет̑ и҆схо̑ е҆го и҆ предл̑ѣ е҆го къ мо́рю.
сїа сꙋть предѣли их̑ ѿ ю҆́га·

Предѣ́ли ѿ восто́къ и҆ вс̂е мо́ре сла́ное, до части і҆ѻ҆рда́на.
и҆ предѣ́лы и҆хъ къ сѣ́верꙋ, и҆ ѿ холми́чнаго мо́рѧ и҆ ѿ ча́сти і҆ѻ҆рда́ньски·

Въсхо́дѧтъ предѣ́ли тїи въ виѳа́глꙋ, и҆ прехо́дит̑ ѿ сѣ́вера къ вефѳа́ра.
и҆ въсхо́дѧт̑ предѣ́ли сїи къ ка́мени веѻ҆́рꙋ, сн҃а рꙋви́млѧ·

И҆ въсхо́дѧтъ предѣ́ли сїи къ деви́рꙋ де́бри а҆хо́ровы, и҆схо́дѧт̑ же до к галга́лы и҆же е҆сть прѧ́мо схожде́нїю додомин̑҇, ꙗ҆же е҆сть къ ю҆́гꙋ дебри.
и҆ въсхо́дит̑ предѣ́лъ сїи къ водѣ̀ и҆сто́чника со́лнечна, и҆ концы̀ е҆мꙋ сꙋть ѹ҆ и҆сто́чникъ роги́лъ·

И҆ въсхо́дит̑ предѣлъ в де́брь е҆но́млю къ ю҆́гꙋ в еѹ҆́съ ѿ ливо́са, сїѧ е҆сть і҆е҆рс̑҇ли́мъ.
і҆ и҆схо́дит̑ предѣ́лъ сїи къ ве́рхꙋ го́ръ, ꙗ҆́же е҆сть пред̑ лице́мъ де́бри е҆но́мли ѹ҆́ морѧ, ꙗ҆́же е҆сть ѿ ча́сти землѝ рафаи́нѧ къ сѣ́верꙋ·

И҆ выво́дит̑ предѣлы на врх̑ъ горы̀, къ и҆сто́чникꙋ воды̀ нафъѳо.
и҆ выво́дитъ къ горѣ̀ е҆фро́ни, и҆ ѻ҆́крс̑҇тъ и҆́дꙋтъ сїи предѣл́и въ ваал̑҇, с̂е е҆сть град̑ и҆а҆рим̑·

И҆ да ѻ҆бхо́дитъ предѣлъ ѿ ваа҆́ла къ мо́рю, и҆ да прихо́дитъ во́ град̑ сїиръ.
и҆ да преходит̑ къ ю́гꙋ гра́да и҆а҆римъ ѿ сѣ́вера, с̂е е҆сть хасало́нъ и҆ да сни́детъ къ градꙋ слн҃чнꙋ, и҆ да прїидетъ къ ю҆́гꙋ·

И҆ да и҆зведет̑ предѣлъ къ ю҆́гꙋ а҆къкеа҆ранꙋ до сѣ́вера.
и҆ да и҆зведе́тъ предѣ́лы въ а҆къхорана, да преи҆детъ горꙋ землѝ валаа́ни.
і҆ и҆зведет̑ къ а҆и҆вѣнїю, и҆ да бꙋ́детъ предѣ́ломъ и҆сход̑ къ морю·

И҆ предѣли и҆хъ за́пад̑нїи, море вели́кое.
сїи́ предѣ́ли сн҃ов̑҇ і҆ѹ҆́динъ ѻ҆́крс̑҇тъ по сонмо́мъ и҆хъ·

И҆ дадѐ і҆сꙋсъ хале́вꙋ сн҃ꙋ ѻ҆фонїи́нꙋ ча́сть средѣ̀ сн҃овъ і҆ѹ҆динъ, повеле́нїа ради бж҃їа къ і҆сꙋсꙋ.
и҆ да́сть е҆мꙋ і҆сꙋсъ град̑ а҆рво́нъ ѿц҃а е҆на́кова, с̂и е҆сть хевро́нъ·

И҆ потребѝ ѿтꙋ́дꙋ хале́въ сн҃ъ и҆е҆фѳонїи́нъ.
тр̂и сн҃ы ена́ковы.
і҆ сꙋсїи́ и҆ фолма́и и҆ а҆хима́на.
и҆ възы́де ѿтꙋдꙋ хале́въ на живꙋщ́ихъ въ дави́ре.
и҆́мѧ же пре́жде бѧ́ше давирꙋ град̑ писме́нъ·

И҆ рече хале́въ и҆же а҆́ще во́зметъ кт̂о град̑ писме́нъ.
и҆ совладѣет̑ им̑ да́мъ е҆мꙋ а҆сха́нь дще́рь мою̀ въ женꙋ̀·

И҆ поѧт̑ ю҆̀ гофонїилъ, сн҃ъ кенезе́ѻвъ бра́та хале́вова ю҆нѣи́шїи.
и҆ да́стъ е҆мꙋ а҆сха́нь дще́рь свою̀ въ женꙋ̀·

И҆ быс̑҇ вънегда̀ ѿходѧщи е́й совеща̀ с ни́м꙽ гл҃ющи, попрошꙋ̀ ѹ҆ ѿц҃а мое҆го села̀.
и҆ въскочѝ съ ѻ҆слѧ́ти, и҆ рече е́й халев̑҇ чт̂о тѝ е҆сть·

И҆ реч̑҇ е҆мꙋ да́ждь м̂и блс̑҇ве́нїе, ꙗ҆́ко въ зе́млю полꙋ́деннꙋю ѿда м̂ѧ.
да́ждь м̂и галафъмаим̑, и҆ дасть е́й хале́въ галафъмаи́мъ, и҆ вы́ш꙽шꙋю и҆ до́лнюю гала́ѳа·

Се̂ прича́стїе сн҃овъ і҆ѹ҆динъ, и҆ племе́ни и҆хъ·

Бы́ша же гра́ди и҆хъ, град̑ старѣ́ишїи племе́нъ сн҃овъ і҆ѹ҆дин̑҇, къ предѣлом̑ е҆до́млим̑ къ ю҆́гꙋ·

Къ пꙋсты́ни кав꙽сеи́лъ и҆ е҆драи и҆ а҆вꙋрь·

Ки́на же и҆ дим̑мо́на и҆ а҆да́да.
и҆ кеде́съ и҆ е҆ѳнази́фъ и҆ теле́мъ·

И҆ е҆вало́ѳъ и҆ град̑ а҆серо́нъ.
и҆ а҆со́ръ но́выи и҆ вс̂и гра́ди е҆серо́ни.
сїи же е҆сть а҆со́ръ а҆ма́мъ и҆ се́ме и҆ ѳемаа́ма и҆ мода́да и҆ а҆са́ръсꙋ.
и҆ а҆се́ръ гад̑да́лъ и҆ а҆семон̑҇ и҆ ваѳфелеѳ̑҇·

И҆ а҆сарсꙋ́ла и҆ вирсавїи е҆везꙋѳїѧ́, и҆ села и҆хъ и҆ дворы̀ их̑·

Ваа҆ла́на и҆ е҆вим̑ и҆ а҆семъ·

И҆ е҆льѳодад̑ и҆ хесид̑ и҆ е́рма·

И҆ сикиле́гъ и҆ махари́мъ, и҆ сее҆н꙽накъ·

И҆ ламо́ѳъ и секеле́нъ и҆ а҆и́нъ и҆ е҆рмо́нъ, всѣхъ град̑, к҃ и҆ ѳ҃, и҆ се́ла их̑·

На ра́вни же е҆сѳаѻ́ль и҆ саа҆ра́къ и҆ а́зра·

И҆ рамин̑҇ и҆ за́но, и҆ гон꙽нии҆мъ ѳафъфꙋ́нъ і҆ и҆на́имъ·

И҆ е҆рмꙋ́ѳъ и҆ ѻ҆дола́мъ, и҆ не́мра и҆ со́хо и҆ а҆зи́ка·

И҆ сараи́мъ и҆ дїа҆геѳаи́мъ и҆ гада́ра, села е҆ѧ.
и҆ град̑, д҃і, и҆ ве́си их̑·

Сена́нь и҆ да́са и҆ малгадад̑·

И҆ далаа́нь и҆ маси́ѳа, и҆ е҆хѳае́ль.
и҆ лѧхи́съ и҆ васка́ѳъ и҆ а҆гломъ·

И҆ ха́ввань и҆ лама́съ и҆ хаѳали́съ·

И҆ гадиро́ѳъ и҆ ви́ѳъдаго́нь и҆ наа҆ма и҆ маки́да, град̑, ѕ҃і, и҆ веси и҆хъ·

Є҆ѳе́рь ле́на и҆ а҆а҆са́рнъ.
і҆ и҆е҆фѳа и҆ а҆се́нна и҆ кела́и и҆ неси́ѳа·

и҆ а҆хим̑ и҆ мари́са и҆ малом̑ град̑, ѳ҃, и҆ ве́си ихъ·

А҆к꙽каро́нь и҆ се́ла их̑ и҆ селенїа их̑.
ѿ а҆коро́нь и҆а҆мна́и, и҆ ве́си и҆же сꙋть близ̑ а҆здо́ѳъ, и҆ ве́си и҆хъ и҆ селе́нїа их̑.

Га́за и҆ ве́си е҆ѧ̀ и҆ се́ла е҆ѧ, до водотечи е҆гѷпет̑ски, и҆ мо́ре вели́кое и҆ предл̑҇ѣ·

И҆ въ горстѣи сафи́рь и҆ е҆ѳе́рь и҆ со́хо и҆ е҆де́на·

И҆ град̑ писме́нъ, се́и есть даве́ръ·

И҆ а҆на́въ и҆ гестем̑ и҆ а҆нев̑҇·

И҆ госо́мъ и҆ хилꙋѻ́нъ и҆ сило́нъ, грд̑а е҆ді́нъна́десѧть и҆ ве́си и҆хъ·

И҆ е҆ре́въ и҆ рꙋ́ма и҆ а҆са́нь·

И҆ а҆нꙋмъ и҆ виѳапъфꙋѳъ и҆ а҆фа́ка·

И҆ е҆ма́та и҆ карїата́рба, се́и е҆сть хевро́нь, и҆ сїѻ́ръ, гра́дъ.
ѳ҃, и҆ се́ла и҆хъ·

маѻ́нъ и҆ хирме́ль и҆ зи́ѳъ, и҆ ет꙽та́и·

И҆ зꙋрае́ль и҆ е҆кдаа́мъ и҆ за́но·

И҆ а҆ки́мъ и҆ е҆дни и҆ гава́ѧ и҆ фа́мна, грд̑а, і҃. и҆ ве́си и҆хъ·

Є҆лꙋ́лъ и҆ виѳсꙋ́ръ и҆ хедꙋ́ръ·

И҆ маа҆ро́ѳъ и҆ виѳаноѳъ и҆ е҆лѳеке́нъ, гра́дъ, ѕ҃. и҆ ве́си их̑·

ѳе́ко и҆ е҆ѳра́ѳа, с̂е е҆сть виѳлее҆мъ, и҆ ѳаго́ръ и҆ е҆та́мъ и҆ кꙋло́мъ и҆ тата́ми и҆ съри́съ и҆ каре́мъ и҆ галїи́мъ и҆ виѳи́ръ и҆ мано́хо, грд̑а, а҃і.
и҆ ве́си их̑·

Карїа́ѳъваалъ, сі́и гра́дъ і҆а҆ри́мъ и҆ а҆рв꙽ва въ е҆римови́ѳе, гра́ды.
в҃. и҆ се́ла е҆ю̀·

И҆ виѳара́ва и҆ мадо́на и҆ ѻ҆хоха́нъ·

И҆ нефъса́нъ, и҆ гра́ды слн҃чные, і҆ и́нъга́ди гра́ды, ѕ҃. и҆ ве́си и҆хъ·

И҆ е҆вꙋ́си и҆же ѻ҆бита́ющих̑ въ і҆ерс̑҇лимѣ.
не възмого́ша сн҃ове и҆ѹ҆дины и҆згна́ти.
и҆ всели́сѧ е҆вꙋсе́и съ сн҃ъми і҆ѹ҆диными въ і҆ерс̑҇лимѣ, до дн҃ешнѧго дн҃е·

Глв̑҇а, ѕ҃і·

И бы́сть жре́бїи сн҃овъ і҆ѻ́сифль ѿ і҆ѻ҆рда́на и҆же въ е҆рихо́нѣ.
до во́дъ е҆рихоньскихъ на восто́къ въ пꙋсты́ню, и҆сходѧ́щꙋю ѿ е҆рихо́на въ го́рскꙋю въ веѳи́ль·

І҆ и҆сходитъ ѿ веѳи́лѧ въ лю́зꙋ.
и҆ да прїидетъ къ предѣломъ а҆рхиа҆тароѳъ·

И҆ да и҆́детъ къ мо́рю къ предѣломъ веѳели́мъскомъ, до предѣлъ веѳоро́нь ни́жнѧго, и҆ да бꙋдетъ и҆схо́дъ и҆хъ къ мо́рю·

И҆ та́ко прїѧ́ша прича́стїѧ своѧ, сн҃ве и҆ѻ́сифли и҆ ефремли и҆ манасїини·

И҆ бы́ша предѣли сн҃овъ е҆фремль по со́н꙽момъ и҆хъ·

И҆ бы́ша предѣли прича́стїѧ и҆хъ ѿ восто́къ, а҆таро́ѳъ и҆ а҆да́ръ до веѳаро́на вы́шнѧго и҆ газа́ры, и҆ прехо́дѧтъ предѣ́ли сїи къ мо́рю въ махѳо́ѳъ ѿ сѣвера.
і҆ и́дꙋтъ на въсто́къ и҆ въ ѳина́ѳъ сило́мъ, и҆ да пре́идꙋтъ ѿ въсто́ка въ и҆а҆но́ѳъ ѿ во и҆а҆но́ѳъ же и҆́де въ а҆таро́ѳъ и҆ въ нара́ѳа, и҆ приходитъ ко і҆ерихо́нꙋ, и҆ и҆сходитъ къ і҆ѻ҆рда́нꙋ·

И҆ ѿ а҆дафꙋ́ѳъ, да пои́дꙋтъ предѣли къ мо́рю къ водоте́чи ка́на.
и҆ да бꙋд́етъ и҆схо́дъ и҆хъ къ мо́рю, сїе прича́стїе сн҃овъ е҆фремль племе́немъ и҆хъ·

Гра́ды же ѿлꙋче́ныѧ сн҃омъ е҆фремлим̑ посредѣ прича́стїѧ сн҃ов꙽ манасїин꙽, вс̂и гра́ды и҆ ве́си и҆хъ·

Но̂ не и҆згна́ша ханаа́на живꙋщаго въ газе́ре.
и҆ ѻ҆бита́ше хананеи́ средѣ е҆фрема даю́ще е҆мꙋ да́ни до дн҃ешнѧго дн҃е.
до́ндеже възы́де фараѻ҆́нъ цр҃ь е҆гѷпет̑скїи, и҆ взѧ̀ гра́дъ и҆ запалѝ е҆го ѻ҆гне́мъ.
и҆ ханане́ѧ, и҆ ферезе́ѧ и҆ живꙋщаѧ въ газе́ръ, и҆ да́стъ и҆̀ фараѻ҆́нъ въ вѣ́но дще́ри свое́й·

Глв̑҇а, з҃і·

И бы́ша жре́бїи сн҃овъ манасїин̑҇ ꙗ҆́ко сїи прьвене́цъ и҆ѻ́сифꙋ махи́рови прьвенцꙋ̀ манаси́и҆нꙋ, ѿц҃ꙋ галаа́довꙋ.
се́и б̂о бы́сть мꙋжъ хра́бръ, и҆ бысть прича́стїе е҆го галаа́д꙽ и҆ васан̑҇<.>

И бы́сть вторы́мъ сн҃омъ манасі́иномъ ѻ҆ста́вшимъ по сонмо́мъ их̑, прича́стїе сн҃омъ а҆хїезе́ровымъ, и҆ сн҃омъ хале́ковымъ, и҆ сн҃омъ е҆срии҆́левымъ, и҆ сн҃омъ е҆хе́мовымъ, и҆ сн҃омъ е҆фе́ровымъ, и҆ сн҃омъ семераи҆́ловымъ, сїѧ сꙋть сн҃ове манасїини сн҃а и҆ѻ́сифлѧ мꙋжескъ по́лъ по племе́немъ свои҆мъ·

Салпа́дꙋ же сн҃ꙋ е҆фе́ровꙋ сн҃а галаа́дова сн҃а махи́рова сн҃а манасїина не бѧ́ше сн҃овъ н̂о дще́ри·

Си́ же и҆мена̀ дще́ремъ салпаа́довымъ, мала́а, и҆ нꙋѧ́, и҆ е҆́гла, и҆ ме́лха, и҆ ѳе́рса·

ѻ҆ни́ же ста́ша пред̑ е҆леа҆зо́ромъ жръце́мъ и҆ пред̑ и҆сꙋсомъ сн҃омъ на́вѷинымъ, и҆ пред̑ кн҃ѕи гл҃юще.
б҃ъ заповѣ́да рꙋко́ю моѷсїиною, да́ти намъ прича́стїе посредѣ бра́тїѧ на́шеѧ.
и҆ ++дас̑҇ѧ и҆мъ прича́стїе повелѣнїѧ ради гн҃ѧ жре́бїи въ бра́тїи ѿц҃а и҆хъ·

И҆ падѐ жре́бїи манасїю по́ле лава́дово кромѣ землѧ̀ галаа́довы.
и҆ васа́нь ꙗ҆́же е҆́сть ѻ҆бо́нꙋ странꙋ̀ і҆ѻ҆рда́на·

Сн҃овъ манасїинъ, дще́ри б̂о причасти́ша прича́стїе средѣ бра́тїѧ их̑ землѧ́ же галаа́дова бысть вторым꙽ сн҃омъ манасїинымъ ѻ҆ста́вшим̑·

И҆ бы́ша предѣли сн҃овъ манасїинъ ѿ а҆си́ра мах꙽ѳо́ѳъ и҆ дана́ѳъ, ꙗ҆́же е҆сть пред̑ лице́мъ сихе́мовым꙽.
і҆ и҆де къ предѣломъ и҆а҆миновымъ и҆ а҆си́мовымъ·

И҆ вы́шеи къ и҆сто́чникꙋ ѳаѳо́ѳъ·

Манасїю́ же дае҆тъсѧ зем̑лѧ̀ и҆ ѳапѳꙋ́ѳова са́м же ѳапѳꙋ́ѳъ за предѣломъ манасїинымъ сн҃омъ е҆фре́млимъ·

И҆ ѿтꙋдꙋ и҆́де сїи предѣлъ къ де́бри ка́не.
на ю́гъ де́бри иаи҆ри́ни.
тереви́нъѳꙋ·

Гра́ди сїи е҆фремли сꙋть средѣ градовъ манасїи́нъ.
предѣ́ли же манасїинѣ къ сѣверꙋ до водоте́чи, и҆ бы́ша и҆схо́ди их̑ къ мо́рю·

Ко ю҆́гꙋ же е҆фремови, и҆ къ сѣверꙋ манасїю.
и҆ бы́сть море предѣлъ и҆мъ, и҆ къ а҆си́рꙋ да совокꙋпѧ́тъ и҆̀ ѿ сѣвера, и҆ къ и҆саха́рꙋ ѿ восто́къ·

И҆ бы́сть манасїи в саха́рѣ и҆ во а҆си́рѣ.
и҆ виѳса́не и҆ ве́си их̑, и҆ живꙋщаѧ въ до́рѣ и҆ ве́си е҆го.
и҆ живꙋщаѧ въ тана́це и҆ ве́си е҆ѧ, и҆ живꙋщаѧ въ маге́д꙽де и҆ ве́си е҆ѧ, тре́тїю час̑҇ нефе́та и҆ ве́си е҆ѧ, три страны̀.
и҆ не възмогоша сн҃ове манасїини потреби́ти градовъ сихъ, ꙗ҆́ко ѹ҆годно бы́сть ханаа҆́нꙋ жити въ землѝ сей<.>

И҆ бы́сть е҆гда ѹ҆крѣпишасѧ сн҃ове іи҆л҃еви, и҆ сътвориша ханаа҆́на послꙋшны.
потребленїем же непотребиша и҆хъ·

И҆ ѿвѣщаша сн҃ове и҆ѻ́сифли і҆сꙋсꙋ гл҃юще, почт̂о причастѝ насъ жребїемъ е҆ді́немъ, и҆ мѣрою е҆ді́ною а҆́зъ люд̑ многъ е҆смь, и҆ блс̑҇ви м̂ѧ б҃ъ даждь доселѣ·

И҆ рече и҆мъ і҆сꙋсъ, а҆ще и҆ лю́дъ мно́гъ е҆си взы́ди въ дꙋбра́вꙋ и҆ ѻ҆требѝ себѣ та́мо мѣсто въ землѝ феризи́нѣ и҆ щꙋдовъ, а҆ще т̂ѧ ѹ҆теснѧ́етъ гора̀ е҆фрѣмлѧ·

И҆ рѣша сн҃ове и҆ѻ́сифли.
не дово́лно намъ горы̀ е҆фрѣмлѧ, и҆ ко́нь преи҆збра́нныи и҆ колесниц̑҇ желѣзныхъ въ всѣхъ ханане́и живꙋщихъ съ на́ми въ вефъса́мѣ и҆ въ ве́сехъ еѧ̀, и҆ въ раздѣле́нїих꙽ і҆и҆л҃вых̑·

И҆ рече і҆сꙋсъ къ сн҃омъ і҆ѻ́сифлимъ гл҃ющи, е҆фремꙋ и҆ манасїю гл҃юще.
а҆ще люд̑ мно́гъ е҆си, и҆ си́лꙋ вели́кꙋ и҆́маши, не бꙋдетъ т̂и жре́бїи е҆ді́н꙽ сего ра́ди гора̀ твоѧ̀ да бꙋ́детъ, и҆ сїѧ дꙋбра́ва е҆сть тебѣ̀ даю̀·

И҆ съсѣче́ши и҆ концы̀ еѧ̀ тебѣ да бꙋдꙋт꙽, е҆гда потреби́ши ханаа́на.
а҆ще же и҆ ко́нь преи҆збра́нныи е҆сть е҆мꙋ и҆ сам̑ си́ленъ, ты̀ б̂о преси́лиши е҆го·

Глв̑҇а, и҃і·

И събра́сѧ ве́сь со́нмъ сн҃овъ і҆и҆л҃евъ в сило́мѣ, и҆ поткнꙋша та́мо храм̑ свѣдѣнїѧ.
е҆гда̀ землѧ ѹ҆держа́сѧ ѿ нихъ·

И҆ ѻ҆ста́ша сн҃овъ і҆и҆л҃евъ;
и҆же не причасти́ша прича́стїѧ свое҆го седмь племе́нъ·

И҆ рече і҆сꙋсъ сн҃омъ і҆и҆л҃евымъ, доко́ле в̂ы раслаблѧ́етесѧ.
не хотѧ́ще причасти́ти зе́млю ю҆́же дадѐ вам꙽ г҃ь б҃ъ ѿц҃ъ ва́шихъ·

да́ите ѿ себѐ по тр̂и мꙋжа ѿ племе́ни и҆ пошлю̀ и҆̀, и҆ въста́вше и҆ да про́идꙋтъ землю, и҆ да препи́шт̑ꙋ ю҆̀, ꙗ҆́коже е҆сть лѣ́по раздѣли́ти ю҆̀.
и҆ прїидꙋтъ къ мн̂ѣ и҆ раздѣлю̀ и҆мъ по прича́стїю и҆хъ на седмь ча́стїи·

І҆ѹ́да да поста́вит̑ предѣлъ свой ѿ лива́на.
и҆ сн҃ове и҆ѻ́сифли да поста́вѧтъ предѣлъ свой ѿ сѣвера·

Вы́ же раздѣли́те зе́млю на седмь ча́стїи.
и҆ принесе́те къ мн̂ѣ сѣмо, и҆знесꙋ в̂ы жребїи пред̑ гм҃ъ бм҃ъ ва́шимъ·

Нѣсть б̂о ча́сти ѹ҆ ва́съ сн҃омъ левѷиномъ, зане́ же жре́чество гн҃е ча́сть и҆мъ·

Га́д же и҆ рꙋви́мъ, и҆ по́лъ племе́ни манасїина.
взѧ́ша прича́стїе свое ѻ҆бо́нꙋ странꙋ̀ і҆ѻрда́на на восто́ки, и҆же дадѐ и҆мъ моѷсїи ра́бъ гн҃ь·

И҆ въста́ша мꙋжи і҆ и҆до́ша и҆ заповѣда і҆сꙋсъ мꙋжемъ и҆дꙋщем꙽ ѻ҆бходи́ти зе́млю гн҃ю.
и҆дѣте и҆ ѻ҆бходи́те зе́млю и҆ препишѣте еѧ̀, и прїидѣте къ мн̂ѣ, и҆знесꙋ̀ ва́мъ жре́бїи пре гм҃ъ в сило́мѣ·

І҆ и҆до́ша мꙋжи и҆ и҆сходи́ша зе́млю, съглѧда́ша ю҆̀ и҆ преписа́ша ю҆̀.
съ гра́ды е҆ѧ на седмь ча́стїи въ кни́ги, и҆ принесо́ша къ і҆сꙋсꙋ въ сило́м꙽·

И҆ врь́же и҆м꙽ і҆сꙋсъ жре́бїи пре гм҃ъ въ силомѣ·

И҆ раз̑дѣлѝ та́мо зе́млю і҆сꙋсъ сн҃омъ і҆и҆л҃евым꙽ по жре́бїю и҆хъ·

І҆ и҆зы́де жре́бїи племе́ни сн҃овъ венїами́новых꙽, прь́выи по со́нмомъ и҆хъ.
і҆ и҆зыдо́ша предѣли жре́бїю и҆хъ, средѣ сн҃овъ і҆ю́дин̑҇ и҆ посредѣ сн҃въ і҆ѻ́сифль·

И҆ бы́ша предѣ́ли их̑ ѿ сѣ́вера ѿ і҆ѻ҆рда́на.
и҆ възы́дт̑ꙋ предѣ́ли ѿ ю҆́жнꙋю странꙋ̀ і҆е҆рихо́на къ сѣверꙋ и҆ да възы́дет̑ къ горѣ̀ к морю, и҆ бы́сть и҆схо́дъ е҆го въ мармариты веѳанїины·

И҆ да про́идꙋтъ ѿтꙋ́дꙋ предѣли в лю́зꙋ ѿ страны̀ лю́зы къ ю́гꙋ, и҆ да снидꙋтъ предѣли сїи ѿ а҆таро́ѳа, е҆д꙽да́ръ го́рстѣи ꙗ҆́же е҆сть къ лива́нꙋ, ветеро́ни ниж́неи·

И҆ да пре́идꙋтъ предѣли и҆ ѻ҆бы́идꙋтъ къ странѣ̀ зрѧ́щи къ мо́рю ѿ ливы, и҆ ѡт горы̀ пред̑ лицемъ веѳоро́нь лива́новы·

И҆ да бꙋдетъ и҆схо́дъ е҆го въ карїа́ѳъ, с̂и е҆сть карїа҆фїа҆ри́мъ град̑ сн҃овъ і҆ѹ́динъ.
с̂е е҆сть ча́сть ꙗ҆же къ мо́рю·

И҆ ча́сть ꙗ҆́же къ лива́нꙋ, ѿ ча́сти каріа҆ѳъваа́ль.
и́ да про́идт̑ꙋ предѣли морскїѧ въ гаи́нъ, на исто́чникъ воды̀ наѳо́новы·

И҆ да снидт̑ꙋ предѣли на странꙋ горы̀ е҆же е҆сть пред̑ лицемъ на́пи, сн҃а е҆но́млѧ е҆же е҆сть ѿ ча́сти е҆ме́къ.
рафаи́нъ ѿ сѣвера, и҆ да сни́детъ къ геномꙋ на ю҆́г꙽ и҆е҆вꙋсꙋ, да снидꙋтъ ѿ ю҆́га на и҆сто́чникъ рогиль·

да про́идꙋтъ на источникъ самесовъ.
и҆ да про́идꙋтъ на галило́мъ, ꙗ҆́же е҆сть прѧ́мо въше́ствїю е҆додимо́нꙋ, да сни́дꙋтъ на ка́мень ваа́на, сн҃а рꙋви́млѧ·

да про́идꙋтъ на ю҆́жнꙋю странꙋ витара́вы, и҆ да сни́детъ къ ю́гꙋ виѳа́глы ѿ сѣ́вера·

И҆ да бꙋ́детъ и҆схо́дъ предѣ́лъ на хл́ъмницы мо́рѧ со́лищнаго ѿ сѣ́вера, въ странꙋ і҆ѻ҆рда́новꙋ ѿ ли́вы, сі́а предѣ́ли юж̑ныѧ·

І҆ѻ҆рда́н꙽ же предѣлѧ́етъ ѧ҆̀ ѿ страны̀ въсто́ка.
сїе́ прича́стїе сн҃овъ венїа҆ми́новъ, предѣ́ли е҆ѧ̀ ѻ҆́крс̑҇тъ по сонмо́мъ и҆х꙽·

И҆ бы́ша гра́ди племе́ни сн҃овъ венїа҆ми́нь, по сонмо́мъ и҆хъ.
и҆е҆ри́хо и҆ вифа́гла, и҆ а҆мек꙽каси́съ·

И҆ вифара́ва и҆ семри́мъ и҆ веѳи́лъ·

фе́ди и҆ а҆ѷмъ и҆ ѻфра и҆ а҆ѳра́ѳа и екаре́мъ·

И҆ каѳираминъ и҆ а҆фо́ни и҆ гава́а·

гра́дъ, в҃і.
и҆ ве́си и҆хъ·

Гаваѻ́нъ и҆ е҆тикиѻ́нъ и҆ рама́ѳъ и҆ виро́ѳъ·

И҆ сворфо́ѳъ и҆ ма́ѳа и҆ хеѳи́ра и҆ моса̀·

Реке́мъ и҆ е҆рфаи́ль и҆ фера́ла и҆ серале́ѳъке́лѧ е҆ле́фъ·

И҆ е҆ѹ́съ, сїа е҆сть і҆ерс̑҇лимъ.
и҆ гаваа́ѳъ, и҆ гра́дъ и҆а҆рима́и.
гра́дъ.
д҃і, и҆ ве́си и҆хъ.
сїе прича́стїе сн҃овъ венїами́нь по сонмом̑ и҆хъ·

Глв̑҇а, ѳ҃і·

И і҆зы́де вторы́и жре́бїи симеѻ́нь, и҆ племе́ни сн҃овъ симеѻ́нь.
и҆ бы́сть прича́стїе их̑ средѣ̀ прича́стїа сн҃овъ і҆ѹ́динъ·

И҆ бы́сть прича́стїе их̑ вирсаві́а и҆ саве́а и҆ моладам̑·

И҆ а҆серъсꙋа́ль и҆ ваѳоѹ҆́ль и҆ во́ла.
и҆ а҆со́нъ и҆ е҆рма и҆ секо́ла и҆ веѳъма́ръ и҆ хаз̑во́ѳъ и҆ а҆серсꙋ́ла·

И҆ вивлава́тъ гра́довъ г҃і, и҆ ве́си и҆хъ.
а҆и́нъ и҆ керемо́нь и҆ е҆ѳе́рь і҆ а҆са́нь, грады д҃, и҆ ве́си и҆хъ и҆ вс̂ѧ ве́си·

ꙗ҆же ѻ҆крс̑҇тъ град̑ сихъ, даждь до вале́ѳъ вирамо́ѳа, и҆дꙋщих̑ на и҆а҆ме́ѳъ до ли́вы.
с̂и е҆сть прича́стїе племе́нъ симеѻ́нь по сонмом̑ их̑·

ѿ жре́бїа і҆ѹ́дина прича́стїа племе́ни сн҃овъ симеѻ́нь.
ꙗ҆́ко бы́сть ча́сть сн҃овъ і҆ю́динъ бо́лши сих̑.
и҆ причастиша сн҃ове симеѻ́ни, средѣ прича́стїа и҆хъ·

І҆ и҆зы́де жре́бїи, г҃, и҆ сн҃овъ заѹ҆ло́нь по сонмо́мъ и҆хъ.
и҆ бы́ша предѣли прича́стїа и҆хъ, до сирида·

И възы́де предѣлъ ихъ ко за́падꙋ марала́да, и҆ до́иде къ дава́стѣ, и҆ въ де́брь ꙗ҆́же е҆сть къ лицꙋ̀ и҆а́к꙽мы·

И възвраща́етсѧ ѿ сарида сꙋпротивъ восто́къ.
на предѣлы а҆ѳасалоѳовы, и҆ фаво́ровы.
и҆ проидт̑ꙋ къ давра́ѳꙋ, и да възыдет̑ въ а҆і҆а҆фїю·

ѿтꙋ́дꙋ же да ѻ҆бы́идꙋтъ сꙋпроти́въ на восто́ки, на гоѳае́фѳовы въ град̑ каси́мъ.
и҆ да про́идетъ на рем꙽мона а҆м꙽маѳанна дрꙋнꙋа́иньска·

Посем̑ сїи же предл̑҇ѣ и҆́де ѿ сѣверъ въ е҆навъѻѳ̑҇.
да бꙋ́детъ и҆схо̑ их̑ на га́ю и҆е҆фѳаи҆льскꙋ и҆ кат꙽та́ѳъ и҆ налоѳъ и҆ семро́нъ и҆ а҆дила и҆ виѳлеем̑ град̑, в҃і, и҆ веси их̑·

Се̂ е҆сть прича́стїе сн҃овъ заѹ҆ло́нь по племе́ни и҆ по сонмо́мъ и҆хъ·

А҆саха́рꙋ же и сн҃омъ е҆го по родꙋ их̑ и҆зы́де жребїи д҃ и.
и҆ бы́ша предѣ́лъ и҆хъ і҆и҆л҃ь, и҆ а҆хасело́ѳъ и҆ сꙋни́мъ·

И҆ а҆ферарим̑ и҆ сиа́нъ и҆ рена́ѳъ и҆ равдо́ѳъ·

И҆ кесїѻ́нъ и҆ а҆е́ме и҆ рама́и·

І҆ и҆нъгани́мъ і҆ и҆над̑да и҆ вефѳасис̑҇·

І҆ и҆зы́иде сїи предѣ́лъ на ѳаво́ръ.
и҆ на саси́ма къ мо́рю, и҆ веѳъсма́съ, да бꙋ́детъ и҆схо́дъ предѣ́лъ и҆хъ і҆ѻ҆рда́нъ, грд̑а ѕ҃. и҆ се́ла и҆хъ·

Се̂ е́сть прича́стїе сн҃овъ и҆саха́ров̑҇ по племе́ни и҆ по сонмꙋ̀ и҆хъ·

І҆ и҆зы́иде жре́бїи, е҃ и, и҆а҆си́ровъ по сонмо́мъ и҆хъ·

И҆ бы́ша предѣ́лъ и҆хъ, хелъка́ѳъ и҆ ѻ́ли и҆ ва́тне и҆ а҆са́фъ·

И҆ а҆лимеле́хъ и҆ а҆ма́дъ и҆ маса́лъ, і҆ и҆зы́иде въ карми́лъ къ мо́рю и҆ сиѻ҆со́рови и҆ лавана́ѳꙋ·

И҆ да ѻ҆братѧ́тсѧ на въсто́къ слн҃ца, и҆ виѳдаго́нь·

и҆ до́иде къ заѹ҆ло́нꙋ и҆ въ га́ю и҆е҆ѳа́иль, и҆ да и́детъ подол̑҇нее къ ве́рре на сѣ́веръ въкꙋ́пе·

да вни́детъ въ предѣ́лы сафѳа́на виѳае҆мек̑҇, и҆ да и́детъ по доли́не а҆нїи́ла, да про́идетъ въ хаво́лъ на лѣ́во и҆ а҆хра́на и҆ роѻ́ва и҆ а҆ммо́на и҆ кана́и, до сидо́ны вели́кїѧ·

да въз꙽вратит̑ предѣ́лы въ рама́дъ до гра́да тве́рда, тириѻ́нь.
да възврати́тъ предѣ́лы до со́сы, и҆ да бꙋ́детъ и҆схо́дъ е҆го мо́ре ѿ мѣ́ры а҆хъзи́флѧ·

И҆ ксемꙋ̀ а҆́мъма, и҆ а҆ѳекъ и҆ роѻ́въ, гра́ды, к҃, и҆ в҃, и҆ ве́си их̑·

Се̂ е́сть прича́стїе племе́ни сн҃овъ а҆си́ровъ по сонмо́мъ их̑ гра́ды и҆хъ и҆ ве́си и҆хъ·

И҆ нефѳали́мꙋ же и҆зы́иде жре́бїи, ѕ҃ и·

И҆ быс̑҇ предѣ́лъ и҆хъ мее́лефъ и҆ мило́мъ и҆ весенани́мъ и҆ а́рме и҆ наве́къ і҆ и҆а́вни, дажд̑ь до лак꙽ко́нъ·

И҆ бы́ша и҆схо́ди и҆хъ і҆ѻ҆рда́нъ·

да възврати́тъ предѣ́лъ сїи на за́пад̑.
а҆зано́ѳъ ѳаво́ръ.
и҆ да про́идет̑ ѿтꙋ́дꙋ въ и҆ко́к꙽·

И҆ да притъкнет̑ къ заѹ҆ло́нꙋ ѿ ю́га, и҆ а҆си́ръ да съвъкꙋ́питъ къ мо́рю, и҆ къ і҆ѹ́де на і҆ѻ҆рда́нъ ѿ въсток̑҇ слн҃ца·

Гра́ди же ѻ҆гражде́ни сꙋть тириѻ́ньстїи.
а҆съсидим̑ тиро́съ и҆ а҆м꙽ма́ѳъ и҆ рек꙽ка́ѳъ и҆ ханере́ѳъ·

и҆ а҆да́ми и҆ рама̀ и҆ а҆со́ръ·

И҆ кеде́съ и҆ е҆дра́и, і҆ и҆сто́чникъ а҆со́ровъ·

И҆ реѻ́нъ и҆ магдалїи́лъ и҆ ѻ҆ра́нъ и҆ виѳана́ѳъ и҆ ѳасмꙋ́съ, гра́довъ, ѳ҃і.
и҆ ве́си их̑·

Си̂ е́сть прича́стїе сн҃омъ нефѳали́мль, по рожде́нїемъ их̑·

да́нови же и҆зы́иде жре́бїи, з҃ и.
и҆ бы́ша предѣ́ли и҆хъ сара̀ и҆ е҆сѳаѻ́ль, и҆ гра́дъ саме́сь·

И҆ салави́нь и҆ валон̑҇ и҆ е́ѳла·

И҆ е҆ло́нь и҆ ѳа́мна и҆ ак̑҇каро́нь·

И҆ е҆лѳе́ко и҆ гава́ѳонъ и҆ ваа҆ло́ѳъ·

І҆ и҆ѹ́ѳъ и҆ ванивара́къ и҆ геѳремъмо́нъ·

И҆ ѿ мо́рѧ и҆ерако́ньска предѣ́лъ бли́зъ и҆ѻ́п꙽пы, грд̑а, е҃і·

А҆ зд̂ѣ не до́иде въ съверше́нїе предѣ́лъ сн҃омъ да́новым̑·

И҆ сего̀ ради и҆зыидо́ша сн҃ове да́нови, и҆ вое҆ва́ша на лесе́мъ и҆ взѧ́ша е҆го, і҆ и҆зби́ша е҆̀ мече́мъ и҆ всели́шасѧ в нем̑·

И҆ прозва́ша и҆̀ лесенъда́нъ по и́мени да́на ѿц҃а свое҆го.
с̂е е҆сть прича́стїе сн҃овъ да́новыхъ, по племе́немъ их̑.
с̂и гра́ды и҆ ве́си и҆хъ·

И҆ та́ко сконча́ста дели́ти зе́млю въ предѣ́лех̑ е҆ѧ̀.
и҆ да́ша сн҃ове і҆и҆л҃евы прича́стїе і҆сꙋ́сꙋ сн҃ꙋ навѷинꙋ повелѣ́нїемъ гн҃имъ средѣ̀ себѐ·

И҆ да́ша е҆мꙋ грд̑а е҆гоже просѝ тамна́ѳъсараѝ и҆же е҆сть в горѣ̀ е҆фраи҆́млѣ, и҆ съградѝ град꙽ и҆ вселисѧ вонь·

Си̂ сꙋть причастїѧ ꙗ҆́же раздѣлиша.
е҆леа҆заръ жрецъ, і҆ и҆сꙋсъ навѷинъ, и҆ кн҃ѕи ѿч҃ьствъ въ племенехъ і҆и҆л҃ихъ по жребїемъ в силоме пред̑ гм҃ъ ѹ҆ дверїи храма свѣдѣнїѧ·

и҆ сконча́ста дели́ти землѧ̀·

Глв̑҇а, к҃·

И рече г҃ь къ і҆сꙋсꙋ гл҃ѧ, гл҃и сн҃омъ і҆и҆л҃евымъ рекїи.
дади́те гра́ды ѹ҆бѣже́нїѧ ꙗ҆́же реко́хъ къ вамъ моѷсиѻ҆мъ·

да ѹ҆бежи́тъ та́мо ѹ҆би́вшїи дш҃ꙋ не вѣ́дѧ, и҆ да бꙋдꙋтъ вамъ гра́ди ѹ҆бѣжища.
и҆ да не ѹ҆́мретъ ѹ҆бїица ѿ възыска́ю҆щаго кро́ве, до́ндеже поста́витъ пред꙽ со́нмомъ на сꙋдѣ·

И҆ а́ще кт̂о въбѣгнетъ въ е҆ді́нъ гра̑ сихъ, и҆ да ста́нетъ въ вра́тѣхъ гра́да е҆го і҆ и҆сповѣсть въ ѹ́ши ста́рцем̑ гра́да того̀ словеса̀ своѧ, и҆ прїимꙋтъ е҆го въ гра́дъ къ себѣ̀, и дадѧ́тъ е҆мꙋ мѣсто жити с ни́ми·

И҆ ꙗ҆ко прибѣже въ слѣдъ възыска́ѧ кро́ве е҆го.
да не дадꙋтъ ѹ҆би́вшаго въ рꙋцѣ е҆го ꙗ҆ко невѣдыи ѹ҆бивъ бли́жнѧго е҆го, и҆ не ненави́дѧи е҆го ѿ вчера̀ и третїаго дн҃и·
и҆ да всели́тсѧ въ то́и град̑ до́н꙽деже ста́нетъ пред̑ лице́мъ сонмища на сꙋдѣ.
и҆л̂и до́ндеже ѹ҆́мретъ жрец̑҇ вели́кїи, и҆же бꙋдетъ въ ты́и дн҃и.
тогда̀ да сѧ ѻ҆брати́тъ ѹ҆бїица , и҆ прїидетъ въ град̑ свои и҆ въ до́м꙽ свой и҆ въ
град̑ ѿню́дꙋже е҆сть и҆збѣглъ там̑ ѿ ѹ҆жики кро́ве·

И҆
ѿлꙋчи́ста на се кеде́съ, въ галиле́и, въ горѣ̀ неѳали́мли·

И҆ сихе́мъ въ горѣ̀ е҆фрм̑ѣли и҆ грд̑а а҆рво́ль.
сїи е҆сть хевро́нь въ горѣ̀ і҆ѹ́динѣ·

И҆ ѻ҆бо́нꙋ странꙋ̀ і҆ерихо́на і҆ѻ҆рда́на на восто́къ.
даша восо́ръ въ пꙋсты́ни в ра́вни ѿ племе́ни рꙋви́млѧ.
и рамо́ѳъ въ галаа́дѣ ѿ племе́ни га́дова.
и҆ гаваа́нь въ санити́дѣ ѿ племе́ни манасїина·

Сїи гра́ди и҆збра́ни бы́ша всѣмъ сн҃омъ і҆и҆л҃евымъ·

И прише́лцꙋ прилежа́щꙋ е҆мꙋ въ нихъ,
ѹ҆бѣжа́нїе тамо всемꙋ̀ ѹ҆бива́ющемꙋ дш҃ꙋ невѣ́дѧ.
да не ѹ҆́мретъ ѿ рꙋкꙋ ѹ҆жи́цѣ кро́ви до́ндеже ста́нет̑ пред̑ со́нмом̑ на сꙋдѣ·

Глв̑҇а, к҃а·

И прїидо́ша старѣи́шины ѿчествъ сн҃овъ левѷин̑҇, къ е҆леа҆за́рꙋ жерцꙋ̀, и҆ къ і҆сꙋсꙋ сн҃ꙋ навѷинꙋ, и҆ къ старѣишинамъ племе́нъ ѿч҃ества сн҃овъ і҆и҆л҃евъ·

И рѣша къ нимъ въ сило́мѣ въ
земли ханаа́ни ѻ҆ни гл҃юще.
заповѣ́да г҃ь рꙋко́ю моѷсиѻ҆вою да́ти намъ гра́ды къ пребыва́нїю, и҆ ѻ҆́крс̑҇тныѧ и҆хъ пред̑гра́дїѧ ското́мъ на́шимъ·

И҆ да́ша сн҃ове і҆и҆л҃еви левѷтомъ ѿ прича́стїи своих̑ повелѣнїемъ гн҃имъ гра́ды и҆ ѻ҆́крс̑҇тъныѧ пред̑гра́дїѧ и҆хъ·

І҆ и҆зы́де жре́бїи къ со́нмꙋ къа́ѳовꙋ, и҆ бы́сть сн҃ом̑ а҆а҆ро́немъ жръцемъ левѷтомъ ѿ племе́не і҆ѹ҆́дина, и҆ ѿ племе́не сїмеѻ҆́нѧ, и҆ ѿ племе́не венїа҆ми́нѧ.
жре́біем̑ град̑.
г҃і·

Сн҃омъ же каа́ѳовымъ ѻ҆ста́вшим̑ ѿ племе́не е҆фре́мова, и҆ ѿ племе́не данова и҆ ѿ полꙋ племе́не манасїина, быс̑҇ жре́бїем̑ град̑.
і҃
·

Сн҃ом꙽ же герсо́нем̑ ѿ племе́не и҆саха́рова, и ѿ племе́ни а҆си́рова и҆ ѿ племене неѳали́млѧ,
и ѿ полꙋ племе́не манасїина еж̑ въ васа́нь, быс̑҇ жре́бїем̑ грд̑а, г҃і·

А҆ сн҃омъ мера́рином̑ по со́нмом̑ и҆х꙽ ѿ племе́не рꙋвїина, и҆ ѿ племе́не гадова, и҆ ѿ племе́не заѹ҆ло́нѧ град̑ в҃і·

И҆ да́ша сн҃ове і҆и҆л҃еви, левѷтомъ гра́ды, и҆ дѣли ѻ҆́крс̑҇тныѧ и҆хъ.
ꙗ҆́ко заповѣда г҃ь моѷсїѻ҆ви по жре́бїю·

И҆ даша ѿ племе́не сн҃овъ і҆ѹ҆́динъ, и҆ ѿ племе́не сн҃овъ, сїмеѻ҆́нь, и҆ ѿ племе́не сн҃овъ венїа҆ми́нь гра́ды сїа их̑же зд̂ѣ нареко́ша·

И҆ бысть сн҃омъ а҆а҆ро́новым꙽ ѿ племе́ни каа́ѳова сн҃овъ левѷинъ·

Ꙗ҆́ко си́мъ бысть жре́бїи прь́выи·

И҆ да́ша и҆мъ а҆карїа́ѳа́ръ ѿц҃а е҆на́кова старѣ́и град̑ с̂и е҆сть хеврон꙽.
въ горѣ̀ і҆ѹ҆́динѣ, и҆ ѻ҆крс̑҇тныа дѣли е҆го·

И҆ села гра́да сего, и҆ ве́си е҆го да́ша хале́вꙋ сн҃ꙋ и҆е҆фонїинꙋ въ ѻ҆держа́нїе е҆го·

Сн҃ом же а҆аро́на жерца да́ша град̑ ѹ҆бѣженыи ѹ҆би́вшемꙋ хевро́нъ, и҆ ѿлꙋче́нїе е҆го·

И҆ ле́вна, и҆ ѿлꙋче́нїе е҆го·

І҆ ефе́ръ, и҆ ѿлꙋче́нїе е҆го·

Є҆сфемꙋсъ, и҆ ѿлꙋче́нїе е҆го·

І҆ и҆ло́нъ, и҆ ѿлꙋче́нїе е҆го<.>

И҆ дави́ръ, и҆ ѿлꙋче́нїе е҆го·

И҆ наи́н꙽ и҆ ѿлꙋче́нїе е҆го·

І҆ е҆т꙽гꙋ́ина, и҆ ѿлꙋче́нїе е҆го·

И҆ веѳъсамꙋ́съ, и҆ ѿлꙋче́нїе е҆го, град̑.
ѳ҃, ѿ дв̂ою се́ю племен̑҇ и҆ ѿ племе́не венїа҆ми́нѧ, гаваѻ́нъ, и҆ ѿлꙋче́нїе е҆го·

И҆ гав̑҇ и҆ ѻ҆́крс̑҇тныа дѣли е҆го.
и҆ а҆нано́ѳъ и҆ ѻ҆́крс̑҇тныа дѣли е҆го·

І҆ а҆лмо́на и҆ ѻ҆́крс̑҇тныа дѣли е҆го, град̑, д҃·

Всх̑ѣ же град̑ сн҃овъ а҆а҆ро́на жерца̀.
град̑, д҃і, и҆ ѻ҆́крс̑҇тнаа дѣ́ль их̑·

Племѧ́ же сн҃овъ каа́ѳовъ левѷтомъ ѻ҆ста́вльшим̑ ѿ сн҃овъ каа́ѳовъ.
бы́ша град̑и̑ жре́бїем̑ их̑ ѿ племе́не е҆фре́мова·

И҆ да́ша им̑ град̑ ѹ҆бѣжище ѹ҆би́вшемꙋ сихем̑, и҆ ѻ҆́крс̑҇тныа дѣли е҆го·

Въ горѣ е҆фремли и҆ газе́ръ, и҆ ѻ҆́крс̑҇тныа дѣли е҆го.

И҆ кавсаи҆м꙽, и҆ ѻ҆крс̑҇тныа дѣли е҆го·

И҆ вефоро́нь, и҆ ѻ҆крс̑҇тныа дѣ́ли е҆го, град̑ д҃·

І҆ ѿ племе́не да́нова е҆льфе́ка, и҆ ѻ҆́крс̑҇тныа дѣли е҆го.
и҆ гавефо́нъ, и҆ ѻ҆́крс̑҇тныа дѣли е҆го·

И҆ а҆гило́нъ и҆ ѻ҆́крестныа дѣли е҆го.
и҆ геѳремо́нъ, и҆ ѻ҆́крс̑҇тныа дѣли е҆го град̑, д҃·

И҆ ѿ полꙋ̀ племе́не манасїи́на наах̑, и҆ ѻ҆́крс̑҇тныа дѣли е҆го.
веѳъсам̑, и҆ ѻ҆́крс̑҇тныа дѣли е҆го, град̑ в҃·

И҆ всх̑ѣ же сих̑ град̑ і҃, и҆ ѻ҆́крестныа их̑, по сонмом̑ сн҃овъ каа́фовъ ѻ҆ста́вшим̑·

И҆ сн҃ом̑ герсо́ним̑ левѷтом̑ ѿ полꙋ̀ племе́ни манасїи́на, гра́ды нарече́ныа ѹ҆би́вшим̑ гола́нъ въ васанити́де, и҆ ѻ҆́крс̑҇тъныа дѣли е҆го.
и҆ вее҆съѳра, и҆ ѻ҆́крс̑҇тныа дѣли е҆го, град̑ в҃. и҆ ѿ племе́не и҆саха́рова кисїѻ́нъ, и҆ ѻ҆́крс̑҇тныа дѣли е҆го·

И҆ даа҆вва́ѳъ, и҆ ѻ҆́крс̑҇тныа дѣли е҆го.
і҆ и҆ръмо́ѳъ, и҆ ѻ҆́крс̑҇тныа дѣли е҆го.
і҆ и҆сто́чникъ писме́нъ, и҆ ѻ҆́крс̑҇тныа дѣли е҆го град̑ д҃·

И҆ ѿ племе́не а҆си́рова масаал̑҇, и҆ ѻ҆́крс̑҇тъныа дѣли е҆го.
и҆ а҆вдо́нъ, и҆ ѻ҆́крс̑҇тныа дѣли е҆го·

И҆ хелька́ѳъ, и҆ ѻ҆́крс̑҇тныа дѣли е҆го.
и҆ роав̑҇, и҆ ѻ҆́крс̑҇тныа дѣли е҆го град̑ д҃·

И҆ ѿ племе́не нефѳали́мова, гра́ды нарече́нныи ѹ҆би́вшемꙋ, кедес̑҇ въ галиле́и и҆ ѻ҆́крс̑҇тныа дѣли е҆го.
и҆ е҆маѳдор̑҇, и҆ ѻ҆́крс̑҇тныа дѣли е҆го·

И҆ ное҆ммон̑҇ и҆ ѿлꙋченїе е҆го и҆ кардан̑҇, и҆ ѿлꙋченїе е҆го, гра́ды, г҃·

Всѣхъ град̑, гер̑҇со́новыхъ по сонмом̑ и҆хъ, град̑ г҃і, и҆ ѿлꙋченїе и҆хъ·

И҆ ѿ со́нмꙋ сн҃овъ мера́рїинъ, левѷтомъ ѻ҆ста́вшим̑, ѿ племене сн҃овъ заѹ҆ло́нь, е҆кнаам̑, и҆ ѻ́крс̑҇тъныа дѣли е҆го.
и҆ карѳа́нъ, и ѻ́крс̑҇тъныа дѣ́ли е҆го·

И҆ да́мна, и҆ ѻ́крс̑҇тныа дѣ́ли е҆го.
и҆ дало́лъ, и҆ ѻ́крс̑҇тъныѧ дѣ́ли е҆го гра́ды д҃·

И҆ ѻ҆бо́нꙋ странꙋ̀ і҆ѻр̑҇да́на къ і҆е҆рихонꙋ, ѿ племе́ни рꙋви́нова, дас̑҇ гра́ды ѹ҆бѣженїа ѹ҆би́вшемꙋ.
восо́ръ въ пꙋсты́ни мисо́рове, и҆ ѻ́крс̑҇тныа дѣ́ли е҆го.
і҆ и҆а҆зи́ръ, и҆ ѻ́крс̑҇тныа дѣ́ли е҆го·

И҆ гед̑со́нъ, и҆ ѻ҆крс̑҇тныа дѣ́ли е҆го, и҆ мас̑҇фа и҆ ѻ́крс̑҇тныа дѣли е҆го гра́ды д҃·

И҆ ѿ племе́ни га́дова, гра́ды ѹ҆бѣженїа ѹ҆би́вшемꙋ.
рамо́ѳъ въ галаа́де.
и҆ ѻ҆́крс̑҇тныа дѣ́ли е҆го.

И҆ манаим̑, и҆ ѻ҆́крс̑҇тныа дѣ́ли е҆го.
и҆ е҆совон̑҇, и҆ ѻ҆́крс̑҇тыа дѣли е҆го.
и҆ а҆зи́ръ, и҆ ѻ́крс̑҇тныа дѣ́ли е҆го гра́ды д҃·

Вс̂и град̑и̑ сном̑ мера́рїином̑.
по соньмом̑ их̑·

ѻ҆ста́вшим̑ ѿ племе́ни левѷина·

И҆ бы́ша им̑ град̑и̑, в҃і·

Вси ж̑ гра́ды левѷтьскїа посредѣ ѻ҆дръжа́нїа сн҃овъ і҆и҆л҃евъ.
м҃, и҆ и҃, град̑·

И҆ бы́ша гра́ди сїи ко́ждо ѻ҆ себѣ̀, и҆ нарече́нїѧ и҆хъ, ѻ҆́крс̑҇тъ их̑, и҆ ѻ́крс̑҇тъ кое҆го́ждо гра́да ѿ градо́въ си́хъ·

И҆ сконча̀ і҆сꙋсъ раздѣлѧ́ти зе́млю, въ предѣлех̑ и҆хъ·

И҆ да́ша сн҃ове і҆и҆л҃евы ча́сть і҆сꙋсꙋ, повелѣнїемъ гн҃им̑, даша е҆мꙋ град̑ е҆гоже просѝ тамна́ѳъсараѝ и҆же е҆сть в꙽ предѣле е҆фрѣмове·

И҆ созда̀ і҆сꙋсъ град̑, е҆гоже просѝ и҆ въсели́сѧ в не́мъ.
и҆ възѧ̀ і҆сꙋсъ ножѝ ка́менныѧ, и҆́миже ѻ҆брѣз́ова сн҃ы і҆и҆л҃евы, бы́вшихъ на пꙋтѝ въ пꙋсты́ни·

Ꙗ҆́ко неѻ҆брѣзова́шесѧ въ пꙋсты́ни.
и҆ положи ѧ҆̀, въ тамна́ѳѣсараѝ·

И҆ та́ко дадѐ г҃ь і҆и҆л҃ю вс̂ю зе́млю е҆ю҆же клѧ́сѧ дати ѿц҃емъ и҆хъ·

И҆ причасти́ша ю҆̀, и҆ всели́шасѧ въ неи·

И҆ ѹ҆поко́и г҃ь и҆хъ ѻ҆́крс̑҇тъ по всемꙋ̀, ꙗ҆коже клѧ́сѧ ѿц҃ем̑ и҆хъ.
и҆ не въста̀ никто́же проти́вꙋ и҆мъ, ѿ всѣхъ вра́гъ и҆хъ·

И҆ всх̑ѣ враго́въ и҆хъ преда̀ им̑ г҃ь в рꙋ́цѣ ихъ·

и҆ не ѹ҆бы́сть сло́во н̂и е҆ді́но ѿ всѣхъ глаго́лъ бл҃гихъ, и҆́хже рече г҃ь сн҃ом꙽ і҆и҆л҃евымъ.
н̂о всѧ̀ събы́шасѧ·

Глв̑҇а, к҃в·

Тогда̀ съзва̀ і҆сꙋсъ сн҃овъ рꙋви́новых̑.
и҆ сн҃овъ га́довых̑·

И҆ по́лъ пле́мени манасїи́на и҆ рече и҆мъ в̂ы снабдѣ́сте вс̂е е҆ли́ко заповѣ́да моѷсїи ра́бъ гн҃ь и҆ послꙋшасте рѣ́чи мое҆ѧ, по всемꙋ̀ е҆ли́ко заповѣ́дах꙽ вам̑·

И҆ не ѻ҆ста́висте бра́тїѧ ва́шеѧ сїѧ дн҃и и҆ множа́иши до дне́шнѧго дн҃е.
снабдѣсте страж̑бꙋ̀ за́повѣди г҃а б҃а на́шего·

Нн҃ѣ же поко́и г҃ь б҃ъ ва́ш꙽ бра́тїю вашꙋ, ꙗ҆́коже рече им̑.
нн҃ѣ ѹ҆бо възврати́вшесѧ ѿи́дете въ до́мы ваша·

И҆ въ землѝ ѻ҆дръжа́нїѧ ва́шего, ю҆же дадѐ вам̑ моѷсїи ра́бъ гн҃ь.
ѻ҆бо́нꙋ странꙋ̀ і҆ѻ҆рда́на·

Но̂ храни́те ѕѣло твори́ти за́повѣди и҆ зако́нъ, е҆го́же заповѣ́да вам̑ моѷсїи ра́бъ гн҃ь.
да лю́бите г҃а б҃а ва́шего, ходи́ти въ всѧ̀ пꙋтѝ е҆го, снабдѣти за́повѣди е҆го и҆ прилежа́ти и҆мъ.
и҆ слꙋжи́ти е҆мꙋ ѿ всего срд̑ца ва́шего, и҆ ѿ всеѧ̀ дш҃а ва́шеѧ·

И҆ блс̑҇ви ѧ҆̀ і҆сꙋ́съ, и҆ ѿпꙋсти ѧ҆̀.
и҆ ѿи҆до́ша въ до́мы своѧ̀·

И҆ полꙋ племе́ни манасїинꙋ въдадѐ моѷсїи ѻ҆держа́нїе въ васа́нѣ.
и҆ второ́мꙋ полꙋ племе́ни дадѐ і҆сꙋ́съ съ бра́тїею и҆хъ, ѹ҆ і҆ѻ҆рда́на къ за́падꙋ.
и҆ сих̑ ѿпꙋстѝ і҆сꙋ́съ въ до́мы и҆хъ, и҆ блс̑҇ви и҆хъ·

И҆ рече къ ни́мъ гл҃ѧ, съ и҆мѣ́нїемъ мно́гим̑ възврати́стесѧ въ до́мы своѧ̀.
и҆ ско́тъ мно́гъ ѕѣло, и҆ сребро̀ и҆ зла́то и҆ мѣ́дь и҆ желѣ́зо, и҆ ри́зы мно́ги ѕѣло.
раздѣли́те плѣ́нъ вра́гъ ваших̑ съ бра́тїею ва́шею·

И҆ възврати́вшесѧ ѿи҆до́ша сн҃ове рꙋви́мли, и҆ сн҃ове га́дови, и҆ по́лъ племе́ни манасїина, ѿ сн҃овъ і҆и҆л҃евъ.
ѿ сило́мъ е҆же въ землѝ ханаа҆ньстѣ, да и҆́дт̑ꙋ въ зе́млю галаа́довꙋ въ зем̑лю прїа́тїа свое҆го, ю҆́же причасти́ша повелѣ́нїем̑ гн҃имъ въ рꙋцѣ моѷсїинѣ·

Прїидо́ша въ галилоѻ́ѳъ і҆ѻ҆рда́ньскъ, и҆же е҆сть въ землѝ ханаа́ни.
и҆ съгради́ша т̂ꙋ сн҃ове рꙋви́мли, и҆ сн҃ове га́дови и҆ по́лъ племе́ни манасїина ѻ҆лта́рь, ѹ҆ і҆ѻрда́на ѻ҆л꙽та́рь ве́лїи видѣ́нїем̑·

И҆ ѹ҆слы́шаша с̂е сн҃ове і҆и҆л҃евы, гл҃ющи, с̂е съгради́ша сн҃ове рꙋви́мли.
и҆ сн҃ы га́довѣ, и҆ по́лъ племе́ни манасїина ѻ҆лта́рь, прѧ́мо землѧ̀ ханаа́нѧ, въ галилоѻ́ѳѣ ѹ҆ і҆ѻ҆рдана·

ѻ҆бо́нꙋ странꙋ̀ сн҃овъ і҆и҆л҃евъ·

И҆ съвъкꙋпи́шасѧ вс̂и сн҃ове і҆и҆л҃еви в силом̑, ꙗ҆́коже възшед̑ше вое҆ва́ти на́ нѧ·

И҆ посла́ша сн҃ове і҆и҆л҃евы, къ сн҃омъ рꙋви́немъ, и҆ къ сн҃омъ га́довомъ, и҆ по́лꙋ племе́ни манасїинꙋ, в зе́млю галаа́довꙋ.
финее́са сн҃а е҆леа҆за́рова, сн҃а а҆а҆ро́на жръца̀.
и҆ і҃. кн҃ѕь с ним̑.
кн҃ѕь е҆ді́нъ ѿ до́мꙋ ѿч҃ьства, ѿ всх̑ѣ племе́нъ сн҃овъ і҆и҆л҃ев꙽.
мꙋжѝ и҆ кн҃ѕи домо́въ ѿч҃ьствъ и҆хъ, и҆же сꙋть ты́сѧщницы і҆и҆л҃евы·

И҆ прїидо́ша къ сн҃омъ рꙋви́млимъ, и҆ къ сн҃омъ га́довымъ, и҆ по́лꙋ племе́ни манасии҆нꙋ, въ зе́млю галаа́довꙋ.
и҆ гл҃аша къ ни́мъ гл҃юще·

Та́ко гл҃тъ ве́сь со́нмъ гн҃ь.
что̀ с̂е прегрѣше́нїе и҆же съгрѣши́сте пред̑ гм҃ъ і҆и҆л҃евомъ.
ѿврати́тисѧ дне́сь ѿ г҃а б҃а і҆и҆л҃ева, съгради́сте себѣ ѻ҆лта́рь тре́бище, ѿстꙋп́никовъ вас̑҇ бы́ти дне́сь ѿ г҃а.
е҆да̀ ма́лъ вамъ грѣ́хъ фого́ровъ, ꙗ҆́ко не ѻ҆чи́стихом̑сѧ ѿ него̀ до сего дн҃е, и҆ бы́сть вре́дъ въ со́нмѣ гн҃и·

И҆ в̂ы ѿврати́стесѧ дне́сь ѿ г҃а.
и҆ бꙋдетъ е҆гда̀ ѿстꙋ́пите дне́сь ѿ г҃а, и҆ ѹ҆́тро на всемъ і҆и҆л҃ю бꙋ́детъ гнѣ́въ гн҃ь·

И҆ нн҃ѣ а҆ще ма́ла землѧ̀ прїѧ́тїа вашего, прїидѣте въ зе́млю прїа́тїа гн҃ѧ.
и҆дѣже пребыва́етъ храм̑ гн҃ь, и҆ пꙋ?ичасти́те средѣ̀ нас̑҇, и҆ не бꙋ́дете ѿстꙋ́пницы ѿ г҃а.
н̂и ѿ нас̑҇ не ѿстꙋпи́те.
съгражда́юще себѣ ѻ҆лта́рь кромѣ ѻ҆лтарѧ̀ г҃а б҃а на́шего·

Не се ли а҆харъ сн҃ъ зара́новъ, прегрѣшенїе прегрѣшѝ ѿ проклѧтїа, и҆ бысть на весь сонмъ і҆и҆л҃евъ гнѣ́въ.
а҆ще и҆ е҆ді́нъ сїи бѣ́аше, н̂о не самъ ѹ҆́мре грѣхомъ свои҆мъ·

И҆ ѿвѣща́ша сн҃ове рꙋви́мли, и҆ сн҃ове га́дови, и҆ пол̑҇ племе́ни манасїина, и҆ гл҃аша ты́сѧщникомъ і҆и҆л҃евымъ·

б҃ъ бг҃омъ г҃ь е҆сть, и҆ б҃ъ бг҃омъ г҃ь самъ вѣсть.
і҆и҆л҃ь са́мъ позна́етъ свѣтъ.
а҆ще въ ѿстꙋпле́нїе прегрѣшихом̑ прд̑е гм҃ъ.
да не и҆зба́вит̑ нас̑҇ б҃ъ въ дн҃ешнїи дн҃ь·

А҆ще съгради́хомъ себѣ ѻ҆лта́рь, ꙗ҆́ко ѿстꙋпи́ти нам̑ ѿ г҃а б҃а нашего.
и҆ли възнести намъ на́нь тре́бꙋ въ всѐсъжже́нїи.
и҆ли ꙗ҆́коже сътвори́ти на не́мъ тре́бꙋ сп҃сенїа, самъ г҃ь взы́щет꙽.
н̂о бл҃гоче́стїа гл҃ъ ради с̂е сътворихомъ гл҃юще·

да не рект̑ꙋ ѹ҆́тро чада ваша чадомъ нашимъ гл҃юще·

Чт̂о нам̑ и҆ гв҃и б҃ꙋ і҆и҆л҃евꙋ·

Предѣ́лы б̂о поста́ви г҃ь междꙋ ва́ми и҆ на́ми, сн҃ове рꙋвим̑ли и҆ сн҃ове га́дови і҆ѻ҆рда́на.
и҆ нѣсть вамъ ча́сти гн҃ѧ и҆ ѿврь́гꙋтъ сн҃ове ва́ши сн҃овъ на́ших̑ боѧ́тисѧ г҃а·

Сего ра́ди реко́хомъ сътвори́ти си́це.
согражде́нїе ѻ҆лтарѧ̀, не приноше́нїи ради, ниже треб̑҇ ради·

Но да бꙋдетъ свѣдѣ́нїе с̂е междꙋ ва́ми и҆ нами, и҆ междꙋ рожде́нїи на́шими и҆ ва́шими, по на́съ слꙋжи́ти слꙋжбꙋ гв҃и пред̑ ни́ми.
въ приноше́нїихъ на́шихъ, и҆ въ тре́бахъ сп҃сеныхъ на́шихъ, въ тре́бахъ сн҃овъ нашихъ, да не рекꙋтъ ча́да ваша ѹ҆́тро ча́домъ нашим̑.
нѣсть вамъ ча́сти гн҃ѧ·

И҆ реко́хом̑ а҆ще с̂е бꙋдетъ е҆гда възгл҃ютъ къ на́мъ, и҆л̂и рожде́нїемъ на́шимъ ѹ҆́тро.
и҆ рече́мъ зри́те на сїе подо́бїе ѻ҆лтарѧ̀ гн҃ѧ, ꙗ҆же сътвори́ша ѿц҃ы на́ши.
не приноше́нїѧ ра́ди ниже тре́б꙽ ради, н̂о въ свѣдѣнїе е҆сть междꙋ на́ми, и҆ междꙋ ва́ми, и҆ междꙋ сн҃ы на́шими·

И҆ не бꙋди ѹ҆бо на́мъ ѿстꙋпи́ти ѿ г҃а, ꙗ҆́коже ѿврати́тисѧ въ дне́шнїи дн҃ь ѿ г҃а ꙗ҆́коже сътвори́ти намъ ѻ҆лта́рь приноше́нїем꙽, и҆ тре́бы сп҃сенїѧ, ра́звѣ ѻ҆лтарѧ̀ г҃а б҃а на́шего, и҆же е҆сть прд̑е хра́момъ е҆го·

И҆ ѹ҆слы́ша финїе́съ жре́цъ, и҆ вс̂и кн҃ѕи со́нма ты́сѧщники і҆и҆л҃вы и҆же бѣша с нимъ словеса̀ ꙗ҆́же гл҃аша сн҃ове рꙋви́мли, и҆ сн҃ове га́дови, и҆ пол̑҇ племе́ни манасїина, и҆ го́дѣ и҆мъ бы́сть с̂е·

И҆ рече финїе́съ жре́цъ сн҃омъ рꙋви́млимъ, и҆ сн҃омъ га́довымъ, и҆ по́лꙋ племе́ни манасїи́нꙋ.
днс̑҇е позна́хомъ ꙗ҆́ко с на́ми е҆сть г҃ь.
и҆же не погрѣши́сте пред̑ гм҃ъ прегрѣше́нїѧ, и҆ н̂о днесь и҆зба́висте сн҃ы і҆и҆л҃евы ѿ рꙋкѝ гн҃ѧ·

И҆ възврати́сѧ финїе́съ жре́цъ, и҆ кн҃ѕи ѿч҃ествъ ѿ сн҃овъ рꙋви́мль, и҆ ѿ сн҃овъ га́довъ и҆ ѿ по́лꙋ племе́ни манасїи́на, ѿ землѝ галаа́довы.
въ зе́млю ханаа́ню къ сн҃омъ і҆и҆л҃евомъ, и҆ ѿвѣща́ша и҆мъ словеса̀ с̂и·

И҆ го́дѣ бы́сть слово с̂е сн҃омъ і҆и҆л҃евомъ.
и҆ блс̑҇виша б҃а сн҃ове і҆и҆л҃евы, и҆ не реко́ша къ семꙋ да не и҆зы́демъ къ нимъ ра́тїю, потребити зе́млю сн҃овъ рꙋви́мль, и҆ сн҃овъ га́довъ, и по́лъ племе́не манасїина, и҆же вселишасѧ на не́и·

И҆ прозва́ша сн҃ове рꙋвимли, и҆ сн҃ове гадови, и҆ по́лъ племе́не манасїина ѻ҆лта́рь сїи свѣдѣнїе е҆сть междꙋ на́ми, ꙗ҆́ко г҃ь тои са́мъ е҆сть б҃ъ·

Глв̑҇а, к҃г·

И бы́сть по́ днехъ мноѕх̑ѣ ꙗ҆́ко ѹ҆поко́и г҃ь б҃ъ і҆ил҃ѧ ѿ всх̑ѣ врагъ и҆хъ и҆же ѻ҆́крс̑҇тъ.
і҆сꙋсъ же състарѣсѧ преше̑ дн҃и·

И҆ съзва̀ і҆сꙋсъ вс̂ѧ сн҃ы і҆ил҃евы, и҆ старца и҆хъ.
и҆ кн҃ѕѧ и҆хъ, и҆ сꙋдїѧ и҆хъ, и҆ книгочїѧ и҆хъ и҆ рече къ нимъ, с̂е а҆́зъ състарѣхсѧ и преидо́хъ дн҃и·

Вы́ же ви́дѣсте вс̂е е҆лико сътвори г҃ь б҃ъ ва́шъ всм̑ѣ страна́мъ си́мъ, ѿ лица̀ ва́шего.
занѐ г҃ь б҃ъ на́шъ и҆же поможе на́мъ·

Видѣсте ꙗ҆́ве ꙗ҆ко раздѣли́хъ ва́мъ страны̀, ѻ҆ставшаѧ сїѧ въ прича́стїе племе́нем̑ вашим꙽·

ѿ і҆ѻ҆рдана на вс̂ѧ страны̀ ꙗ҆́же потребихъ ꙗ҆́зы́ки, ѿ мо́рѧ вели́каго ѿ за́пада сл҃нца·

Гь҃ же б҃ъ ва́шъ то́и потреби́тъ и҆хъ ѿ лица̀ ва́шего, до́ндеже поги́бнꙋтъ.
и҆ да пꙋститъ на нѧ ѕвѣ́ри лю́ты, до́ндеже потребитъ ѧ҆̀, и҆ цр҃ѧ и҆хъ, ѿ лица̀ ва́шего.
и҆ причастите зе́млю и҆хъ.
ꙗ҆ко же гл҃а ва́мъ г҃ь б҃ъ ва́шъ·

Ѹ҆крѣпи́тесѧ ѹ҆бо ѕѣ́ло, снабдѣти и҆ твори́ти вс̂ѧ писа́нїа въ кни́гах̑ зако́на моѷсїѻ҆ва.
да не ѹ҆клони́тесѧ ѿ него̀ на́ десно и҆ на лѣ́во·

Ꙗ҆́ко да не вни́дете въ стра́ны ѻ҆ста́вшаѧ сїѧ.
и҆мена̀ бого́въ их̑ да не и҆менꙋю́т꙽сѧ въ вас̑҇, ни́же да клене́тесѧ и҆ми, да не слꙋ́жите им̑, ни́же покло́нитесѧ и҆мъ·

Но̂ г҃ꙋ б҃ꙋ ва́шемꙋ прильпѣтесѧ, ꙗ҆́коже твори́сте до сего̀ дн҃е·

Сего ради потребѝ г҃ь ѿ лица̀ ва́шего, страны̀ вели́ки и҆ си́лны.
ꙗ҆́ко никто́же въста̀ съпроти́висѧ ва́мъ до сего̀ дн҃е·

Є҆ді́нъ ѿ вас̑҇ прогна̀ ты́сѧща, ꙗ҆́ко г҃ь б҃ъ ва́шъ б̂ѣ побѣжда́ѧ и҆̀ ѿ вас̑҇, ꙗ҆́коже гл҃а вам̑·

И҆ та́ко да снабди́те ѕѣло люби́ти г҃а б҃а ва́шего·

А҆́ще б̂о ѿвратитесѧ и҆ приложите́сѧ къ ѻ҆ста́вшимъ стра́намъ симъ ꙗ҆же с ва́ми.
и҆ бра́ки сътвори́те с ни́ми, и҆ смесите́сѧ с ни́ми, и҆ ходи́ти бꙋ́дете к ни́мъ и҆ ѻ҆нѝ къ ва́мъ·

Вѣ́даѧ вѣ́дьте, ꙗ҆́ко не приложит̑ ксемꙋ̀ г҃ь, потреби́ти стран̑҇ сихъ ѿ лица̀ ва́шего, н̂о бꙋ́дꙋтъ вам̑ въ сѣть и҆ въ собла́знъ.
и҆ гво́здїѧ въ пѧта́хъ вашихъ, и҆ тр́ьнїемъ въ ѻ҆́чїю вашею.
до́ндеже поги́бнете ѿ землѧ̀ бл҃гїа сїѧ, ю҆́же да́лъ вам̑ г҃ь б҃ъ ваш̑҇·

А҆́з же днес̑҇ ѿхождꙋ̀ въ пꙋть ꙗ҆́коже и҆ вс̂и и҆же на землѝ, вы́ же вѣ́сте всѣмъ срд̑цемъ ва́шимъ и҆ все́ю дш҃ею ва́шею.
ꙗ҆́ко не ѿпадѐ сло́во н̂и е҆ді́но ѿ всх̑ѣ слове́съ бл҃гъ, и҆́хже речѐ г҃ь б҃ъ ва́шъ къ ва́мъ, вс̂е пребыва́етъ на вас̑҇ и҆ не ѻ҆ста̀ ѿ нихъ н̂и е҆ді́но сло́ва·

Но̂ посих̑ бꙋ́детъ ꙗ҆́ко и҆́мже ѻ҆́бразомъ прїиде на ва́съ вс̂ѧ словеса̀ до́браа ꙗ҆́же гл҃а г҃ь б҃ъ на́ вы·

Та́коже приведет̑ г҃ь на́ вы, вс̂ѧ словеса̀ ѕла́ѧ.
до́ндеже потребит̑ в̂ы ѿ землѧ̀ бл҃гїа сїѧ, ю҆́же е҆сть далъ вам̑ г҃ь б҃ъ вашъ·

И҆ вънегда̀ престꙋ́пите завѣтъ гн҃ь б҃а ва́шего, и҆же заповѣ́да вамъ.
и҆ шед̑ше послꙋ́жите бого́мъ и҆нѣмъ, и҆ покло́нитесѧ им̑.
и҆ раз̑гнѣ́ваетсѧ ꙗ҆́ростїю г҃ь на́ вы, и҆ поги́бнете ско́ро ѿ землѧ̀ бл҃гїѧ сїѧ ю҆́же да́стъ г҃ь вам̑·

Глв̑҇а, к҃д·

И събра̀ і҆сꙋсъ вс̂ѧ племена̀ і҆и҆л҃ева въ сихе́мъ.
и҆ съзва̀ ста́рца і҆и҆л҃евы, и҆ кнѧ́ѕѧ их̑ и҆ сꙋдїа и҆хъ, и҆ кни́гочїа их̑, и҆ ста́ша пред̑ гм҃ъ бм҃ъ·

И рече і҆сꙋсъ къ всѣмъ лю́демъ гл҃ѧ, с̂е гл҃етъ г҃ь б҃ъ і҆и҆л҃евъ.
ѻ҆бо́нꙋ странꙋ̀ рѣкѝ жи́ша ѿц҃ы ва́ши и҆спр́ьва, ѳа́ра ѿц҃ъ а҆враа́мль, и҆ ѿц҃ъ и҆а҆харь и҆ слꙋжи́ша богом̑ и҆́нм̑ѣ·

И҆ поѧх̑ ѿц҃а вашего а҆враа́ма ѿ ѻ҆́ноа страны̀ и҆ рекѝ, и҆ преведох̑ и҆̀ чрес̑҇ вс̂ю землю ханаа́ню, и҆ ѹ҆множих̑ племѧ̀ е҆го.
и҆ дах̑ е҆мꙋ і҆саа́ка, і҆ и҆саа́кꙋ же дах̑ і҆а́кова і҆ и҆сава.
и҆ дах̑ и҆савꙋ горꙋ сїир̑҇ вселитис̑҇ в н̂ю.
іаков же, и҆ сн҃ове е҆го снидо́ша въ е҆гѷпет̑·

И҆ бы́сть та́мо въ ꙗ҆́зы́къ велик̑҇ и҆ крѣпокъ и҆ мног̑҇.
и҆ заѕли́ша им̑ е҆гѷп꙽ты·

И҆ послах̑ моѷсїѧ і҆ а҆а҆ро́на, и҆ побих̑ е҆гѷпет̑ въ знаменїих̑, и҆́хже сътворѝ в них̑.
и҆ посем̑ и҆зведох̑ васъ и҆зъ е҆гѷп꙽та·

І҆ и҆зведох̑ ѿц҃ы ваши и҆зъ е҆гѷпта, и҆ внидо́сте въ мо́ре чрьмное.
и погнаша е҆гѷптѧне въ слд̑ѣ ѿц҃ь ваших̑ во ѻ҆рꙋжїи на конех̑ в мо́ре чрьм̑ное·

И҆ възопи́хом̑ къ г҃ꙋ, и҆ дастъ ѻ҆блакъ и҆ м꙽глꙋ междꙋ на́ми, и҆ ме́ждꙋ е҆гѷп꙽тѧны, и҆ наведѐ на́ нѧ мо́ре и҆ покры̀ ѧ҆̀.
и҆ видѣ́ста ѻ҆́чи наши е҆лѝко сътвори г҃ь землѝ е҆гѷпет̑стѣи, и҆ бѣсте въ пꙋсты́ни дн҃и мно́ги·

И҆ приведохъ в̂ы въ зе́млю а҆м꙽морреи́скꙋ, живꙋщихъ ѻ҆бо́нꙋ странꙋ̀ і҆ѻрда́на.
и҆ въполчишасѧ на́ вы, и҆ предахъ ѧ҆̀ в рꙋцѣ ва́ши, и҆ причасти́сте землю и҆хъ.
и҆ потребих̑ ѧ҆̀ ѿ лица ва́шего·

Посемъ въста̀ вала́къ сепфо́ровъ цр҃ь моа́вль, и҆ въполчисѧ проти́въ і҆и҆л҃ю.
и҆ пославъ призва̀ валаа́ма сн҃а воѻ҆́рова клѧ́ти васъ·

И҆ не въсхотх̑ѣ послꙋшати валаа́ма.
и҆ блс̑҇венїемъ блс̑҇вих̑ в̂ы, и҆ ѿꙗ҆́хъ васъ ѿ рꙋ́кꙋ е҆го·

Посе́мъ преидосте і҆ѻрда́нъ, и҆ прїидо́сте въ і҆е҆рихонъ.
и҆ бишасѧ с вами живꙋщїи въ і҆е҆рихо́нѣ, и҆ ферезе́и хананеѝ хет꙽ѳеи и҆ ам꙽мор꙽реѝ гергесеѝ и҆ е҆веи, и҆ е҆ѹ҆сеи.
и҆ предахъ ѧ҆̀ въ рꙋцѣ ваши·

И҆ посла̀ первѣе шершъни, и҆ ѿгна́ша ѿ лица̀ вашего дв̂а цр҃ѧ ам꙽мор꙽реиска.
не ѻ҆рꙋжїем̑ твоим̑, ниже лꙋ́комъ твоим̑·

И҆ дахъ вамъ зе́млю ѻ҆ не́иже не трꙋдистесѧ на не́и.
и҆ гра́ды и҆́хже не съгради́сте, и҆ пребысте в них꙽·

И҆ винограды и҆ масли́чїе, и҆́хъже не бѣ́сте насадили в̂ы ꙗ҆́сте ѧ҆̀·

И҆ нн҃ѣ ѹ҆бо́итесѧ г҃а и҆ слꙋжи́те е҆мꙋ правдо́ю і҆ и҆́стинною.
и҆ ѿврьзите боги чюжд̑ѧа и҆м꙽же слꙋжи́ша ѿц҃ы ва́ши, ѻ҆бо́нꙋ странꙋ̀ рекѝ.
и҆ въ е҆гѷптѣ, и҆ слꙋжи́те гв҃и·

А҆́щеж̑ неѹ҆го́дно вам̑ слꙋжи́ти гв҃и, и҆збере́те са́ми себѣ̀ дне́сь кое҆мꙋ слꙋжи́ти.
а҆ще бого́мъ тѣм꙽ и҆́маже слꙋжи́ша ѿц҃ы ва́ши, и҆же бы́ша ѻ҆бо́нꙋ странꙋ̀ рекѝ.
и҆л̂и бого́мъ а҆м꙽мор꙽рѣ́иском̑ въ ни́х꙽же в̂ы живе́те на землѝ и҆х꙽·

Но̂ а҆́з же и҆ до́мъ мо́и слꙋжи́ти бꙋдем̑ гв҃и, ꙗ҆́ко ст҃ъ е҆сть·

И҆ ѿвѣща́в꙽ше вс̂и лю́дїе и҆ рѣша, не бꙋди нам꙽ ѻ҆ста́вити г҃а.
ꙗ҆́коже слꙋжи́ти бого́мъ и҆́нѣм꙽·

Гь҃ б̂о б҃ъ на́шъ се́и б҃ъ е҆сть се́и и҆зведе на́съ и҆ ѿц҃ы на́ша ѿ землѧ̀ е҆гѷпетъскїѧ.
ѿ до́мꙋ рабо́тнаго и҆же сътворѝ пред̑ ѻ҆чи́ма на́шима чюдеса̀ ве́лїѧ.
и҆ снабдѣ̀
нас̑҇ въ все́мъ пꙋтѝ во́нже и҆до́хомъ, и҆ въ всѣ́хъ страна́хъ сквоѕѣ нѧ́же минꙋ́хомъ ра́ди е҆го·

И҆ ѿгна̀ г҃ь вс̂ѧ ꙗ҆зы́ки.
і҆ ам̑мор꙽рѣ́ѧ живꙋщаго въ то́и землѝ ѿ лица̀ на́шего.
н̂о и҆ мы̀ слꙋжимъ гв҃и, се́и б̂о е҆сть б҃ъ на́шъ·

И҆ рече і҆сꙋ́съ къ лю́демъ не възмо́жете слꙋжи́ти гв҃и б҃ꙋ ꙗ҆́ко б҃ъ ст҃ъ е҆сть.
и҆ гнѣ́венъ е҆сть, не ѻ҆ста́вит̑ ва́мъ грѣ́хъ ва́шихъ и҆ безако́нїи ва́шихъ·

Є҆гда́ же ѻ҆ста́вите г҃а и҆ послꙋжите бого́мъ чю́ж꙽димъ, и҆ пришед̑ съкрꙋши́тъ и҆ потреби́т꙽ вас̑҇, напослѣ́ди и҆́мже бл҃го сътворѝ вам̑·

И҆ реко́ша вс̂и лю́дїе і҆сꙋсꙋ, н̂и.
н̂о гв҃и слꙋ́жимъ·

И҆ рече і҆сꙋсъ къ лю́демъ по́слꙋси в̂ы сами на́ сѧ, ꙗ҆́ко и҆збра́сте в̂ы слꙋжи́ти гв҃и само́мꙋ.
и҆ реко́ша по́слꙋси м̂ы·

И҆ нн҃ѣ ѿврь́зите бо́ги чю́ждаѧ и҆же сꙋть въ вас̑҇ и҆спра́вите срд̑ца ва́ша къ г҃ꙋ б҃ꙋ і҆и҆л҃евꙋ·

И҆ реко́ша вс̂и лю́дїе къ і҆сꙋсꙋ.
гв҃и б҃ꙋ на́шемꙋ послꙋжимъ и҆ гласа е҆го послꙋшае҆мъ·

И҆ завѣща̀ і҆сꙋсъ завѣтъ къ лю́демъ въ дн҃ь ѻ҆́нъ.
и҆ да́сть и҆мъ ѻ҆правда́нїѧ и҆ сꙋ́дъ въ сихе́ме пред̑ хра́момъ г҃а б҃а і҆и҆л҃ева·

И҆ въписа̀ і҆сꙋ́съ словеса̀ с̂и въ кни́ги зако́на бж҃їѧ.
и҆ взѧ̀ ка́мень ве́лїи, и҆ поста́ви е҆го въ тереви́н꙽ѳе, е҆же е҆сть пред̑ гм҃ъ·

И҆ рече къ лю́демъ с̂е камень сїи да бꙋдетъ вам꙽ въ свѣдѣ́нїе.
ꙗ҆́ко се́и слы́ша вс̂е гл҃ан꙽ное ѿ г҃а е҆ли́ко гл҃а къ ва́мъ дне́сь, и҆ с̂и да бꙋ́детъ въ свѣдѣ́нїе до кончи́ны дн҃їи, ꙗ҆́ко да не со́лжете гв҃и б҃ꙋ ва́шемꙋ·

И҆ ѿпꙋстѝ і҆сꙋ́съ лю́ди кое҆го́ждо въ мѣ́ста своѧ̀·

И҆ слꙋжѝ і҆и҆л҃ь гв҃и, въ всѧ̀ дн҃и і҆сꙋсовы и҆ въ вс̂ѧ дн҃и ста́рецъ, и҆же пребы́ша вре́мѧ по і҆сꙋсѣ.
и҆же ви́дѣша вс̂ѧ дѣ́ла гн҃ѧ е҆ли́ко сътворѝ въ і҆и҆л҃и·

И҆ бы́сть по си́хъ, ѹ҆́спе і҆сꙋ́съ сн҃ъ навѷи҆н꙽ раб̑҇ гн҃ь, жи́въ лт̑ѣ, р҃, и҆·

И҆ погребо́ша е҆го въ предѣ́лехъ прича́стїѧ е҆го въ ѳамиасаха́ръ въ горѣ̀ е҆фре́мли.
ѿ сѣ́вера горы̀ гаа́совы·

И҆ положи́ша та́мо с нимъ въ гро́бѣ.
въ не́мже погребо́ша е҆го, ножа̀ ка́меныѧ и҆́миже ѻ҆брѣ́за сн҃ы і҆и҆л҃евы в꙽ галга́лѣхъ і҆сꙋсъ·

Є҆гда̀ и҆зведѐ и҆хъ и҆зъ е҆гѷпта ꙗ҆́коже повелѣ̀ г҃ь.
и҆ т̂ꙋ сꙋтъ да́ждь до дне́сь·

И҆ ко́сти і҆ѻ́сифовы и҆знесо́ша сн҃ове і҆и҆л҃еви и҆з꙽ е҆гѷпта.
и҆ въкопа́ша и҆хъ в꙽ сихе́мх̑ѣ въ ча́сти села̀, и҆же притѧжа̀ і҆а́ков̑҇ ѿ а҆м꙽мор꙽рѣи живꙋщїи в сихе́мѣхъ.
у҃, си́клевъ сре́бра, и҆ быша сн҃омъ і҆ѻ́сифлимъ прича́стїемъ·

И҆ быс̑҇ посе́мъ і҆ е҆леа҆за́ръ сн҃ъ а҆а҆ро́нь жрецъ сконча́сѧ.
и҆ погребо́ша е҆го въ гава́дѣ финее́са сн҃а свое҆го, и҆же да́нъ быс̑҇ е҆мꙋ въ горѣ̀ е҆фре́мовѣ·

Въ то́и дн҃ь възе́мши сн҃ове і҆и҆л҃евы ковче́г꙽ бж҃їи ѻ҆бноша́хꙋ съ собо́ю, и҆ финїе́съ жре́чествова.
въ е҆леа҆за́ра мѣ́сто ѿц҃а свое҆го до́н꙽деже ѹ҆́мре.
и҆ погребе́сѧ въ галаа́фѣ свое҆мъ·

Сн҃ове же і҆и҆л҃евы ѿидо́ша ко́ждо въ мѣ́ста своѧ̀ и҆ въ сво́и град̑·

И҆ чтѧ́хꙋ сн҃ове і҆и҆л҃евы.
а҆старти́са, и҆ а҆старо́ѳа, бого́въ стра́ньских̑ и҆же ѻ҆́крс̑҇тъ и҆х꙽·

И҆ преда́сть ѧ҆̀ г҃ь въ рꙋ́цѣ е҆хло́мовы цр҃ѧ моа́влѧ.
и҆ съвлада́ше и҆ми лѣтъ, и҃і·

Коне́цъ кни́гъ, і҆сꙋса сн҃а навѷи҆на.
и҆ма́ть в꙽ себѣ̀, глв̑҇а, к҃д·