Библия (1581). [07] Судьи

КНИ́ГА СꙊДЄ́И І҆ИЛВЫ҃ХЪ

ГЛАВА̀· А҃

И бы́сть по скон̑҇ча́нїи і҆сꙋ́совѣ, въпроша́хꙋ сн҃ове і҆и҆л҃еви е҆гда̀ гл҃юще.
кт̂о взы́идет̑ съ на́ми к ханане́ю въе҆во́дою сѣщ́исѧ с ни́ми·

И҆ реч̑҇ г҃ь, і҆ю҆́да взы́идетъ, с̂е да́хъ зе́млю в рꙋ́цѣ е҆го·

И҆ рече і҆ю҆́да къ симеѻ҆нꙋ бра́тꙋ свое҆мꙋ.
взы́ди со мно́ю свобожда́ти жре́бїи мои, да сѣче́мсѧ съ ханане́ѻмъ·

да и҆ а́зъ поидꙋ̀ с тобо́ю свобожда́ти жре́бїи твой·

І҆ и҆дѐ с нимъ симеѻ́н꙽·

И҆ взы́иде і҆ю́да и҆ да́сть г҃ь ханаа́на, и҆ ферезе́ѧ в рꙋцѣ е҆го, і҆ и҆збы́ша в꙽ везе́цѣ.
і҃, ты́сꙋщъ мꙋжъ·

І҆ ѻ҆брѣто́ша а҆донивезе́ка в꙽ везе́цѣ и҆ сѣко́шасѧ с ни́ми.
і҆ и҆зби́ша ханане́ѧ и҆ ферезе́ѧ·

И҆ ѿбѣж́е а҆донивезе́къ.
и҆ гна́ша въ слд̑ѣ е҆го и҆ пости́гнꙋша и҆̀.
и҆ ѿсѣко́ша пѧ́сти рꙋ́кꙋ е҆го, и҆ пле́снѣ но́гꙋ е҆го·

И҆ рече а҆донивезе́къ, сед̑ми десѧ́ти ц҃ремъ ѻ҆бсеко́хъ рꙋцѣ и҆ но́ѕѣ·

И҆ бы́ша собира́юще ѿ крꙋпиц̑҇ под̑ трапе́зою мое҆ю ꙗ҆́коже ѹ҆бо сотворих̑ та́кож̑ и҆ ѿда̀ ми б҃ъ.
и҆ приведо́ша и҆̀ въ і҆е҆рс̑҇лимъ, и҆ ѹ҆́мре т̂ꙋ·

И҆ вое҆ва́ша сн҃ове і҆ю҆́дини на і҆ерс̑҇лим̑, и҆ взѧ́ша и҆̀.
и҆ погꙋби́ша и҆̀ мече́мъ.
и҆ гра̑ запали́ша ѻ҆гне́мъ·

Посе́м же снидо́шасѧ сн҃ове і҆ю́дини, вое҆ва́ти на ханане́ѧ, живꙋщ́аго в го́рстѣи ко ю҆́гꙋ, и҆ в ра́внѣи·

І҆ и́де і҆ю́да на ханаа́на живꙋщ́аго в хевро́нѣ.
и҆мѧ же б̂ѣ хевро́нꙋ преже карїа҆ѳа́ръвъсефе́ръ.
и҆ ѹ҆би́ша сеси́на, и҆ а҆хима́на·

И҆ ѳоломїѧ.
род̑ е҆на́ков꙽·

И҆ възыидо́ша ѿтꙋ́дꙋ къ живꙋщ́имъ в дави́рѣ.
и҆́мѧ же дави́рꙋ б̂ѣ пре́же град̑ писмен̑҇ныи·

И҆ рече хале́въ и҆же кт̂о и҆збїет̑ гра́ды писме́нныи, и҆ во́зметъ е҆го.
да́мъ е҆мꙋ а҆сха́нь дще́рь мою въ женꙋ̀·

И҆ взѧ̀ е҆го гоѳоні́илъ сн҃ъ кене́ѯовъ бра́тъ хале́вовъ мнїи·

И҆ дас̑҇ е҆мꙋ хале́въ а҆сха́нь дще́рь свою̀ въ женꙋ̀·

И҆ бы́сть внегда̀ ѿхожда́ше, и҆ подви́же ю҆̀ гоѳонїи́лъ, проси́ти ѹ҆ ѿц҃а свое҆го села̀.
и҆ въздыха́ше сѣдѧ́щи на ѻ҆слѧ́ти.
и҆ възопѝ на ѻ҆слѧ́ти, на́ землю ю҆́жескꙋ ѿдал̑҇ м̂ѧ е҆си.
и҆ рече е҆й хале́въ что̀ т̂и е҆сть·

И҆ рече е҆мꙋ а҆сха́нь, да́ждь м̂и блс̑҇венїе ꙗ҆́ко на́ землю ю҆́жескꙋ ѿдае́ши м̂ѧ.
да м̂и дасѝ і҆ и҆схо́дища вод̑ныѧ.
и҆ дас̑҇ е́й хале́въ по срд̑цꙋ еѧ̀.
и҆схо́дища вы́шнихъ, і҆ и҆схо́дища нижнихъ·

Сн҃ове же кине́вли зѧ́тѧ моѷсїѻ҆ва, взыидо́ша ѿ гра́да фини́ческа, къ сн҃омъ і҆ю́диномъ въ пꙋсты́ню сꙋщꙋю на ю́гъ.
къ и҆схо́дꙋ а҆ре́довꙋ.
и҆до́ша и҆ всели́шасѧ съ люд̑ми·

І҆ и́де і҆юда съ сїмеѻ́номъ бра́томъ свои҆мъ.
і҆ и҆збѝ ханане́ѧ живꙋщаго в сефе́ѳѣ.
и҆ потреби́ша и҆̀.
и҆ прозва́ша и҆́мѧ гра́дꙋ потребле́нїе·

Посе́мъ взѧ̀ і҆ю́да га́зꙋ и҆ ѻ҆крс̑҇тныѧ е҆го.
и҆ а҆скало́на.
и҆ ѻ́крс̑҇тныѧ е҆го.
и҆ а҆каро́нъ, и҆ предѣ́лы е҆го.
и҆ а҆зато́нъ, и҆ предѣлы ег̑҇·

И҆ бѧ́ше г҃ь со і҆ю҆́дою.
и҆ прїѧт̑ горꙋ̀, н̂о не възмого́ша прїѧ́ти живꙋщихъ в раздо́лїи, зане риха́въ раздѣлѝ ю҆̀ колесни́цы желѣ́зны и҆мѣѧ́ше·

И҆ да́ша хале́вꙋ хевро́нъ, ꙗ҆коже гл҃а моѷсїи.
и҆ причастѝ т̂ꙋ тр̂и гра́ды сн҃овъ е҆на́ковъ.
і҆ и҆згна̀ ѿтꙋдꙋ тр̂и сн҃ы е҆на́ковы·

Но е҆вꙋсе́ѧ живꙋщаго въ і҆ерс̑҇ли́мѣ, не из̑гна́ша сн҃ове венїа҆ми́нови.
и҆ живѧ́хꙋ и҆евꙋсе́и, съ сн҃ъми венїа҆ми́ни въ і҆ерс̑҇лі́мѣ и҆ до сего̀ дне·

И҆ взыидо́ша сн҃ове і҆ѻ́сифли, и҆ сїи́ въ веѳи́ль и҆ г҃ь бѧ́ше с ни́ми·

И҆ соглѧда́ли быша сн҃ове і҆ѻ́сифовы веѳи́ль·

И҆мѧ же б̂ѣ пре́же градꙋ лю́за·

И҆ ви́дѣша стрегꙋщїи мꙋжа сходѧ́щаго и҆з гра́да.
и҆ ѧ́ша и҆̀ и҆ реко́ша е҆мꙋ покажѝ н̂ы вход̑ въ град̑, и҆ сътворим̑ с тобо́ю млс̑҇ть·

И҆ показа̀ и҆мъ вход̑ гра́дныи, и҆ посѣко́ша град̑ и҆хъ мече́мъ, а҆ мꙋжа и҆ сород̑ство е҆го, ѿпꙋсти́ша, и҆ ѿи҆́де мꙋжъ сїи въ зе́млю геѳии҆́м꙽скꙋ.
и҆ съзи́жде т̂ꙋ град̑, и҆ прозва̀ и҆́мѧ е҆мꙋ лю́за, с̂е и҆́мѧ е҆мꙋ до дн҃е·

Но не и҆згна̀ манаси́съ.
вефса́нь е҆же е҆сть скиѳо́нскъ град̑, н̂и ѻ҆́крс̑҇тныхъ предѣ́лъ е҆го.
ниже е҆кѳана́хъ, ни ѻ҆крс̑҇тных̑ предл̑҇ѣ е҆го.
н̂и живꙋщих̑ в꙽ дорѣ, ниже ѻ҆крс̑҇тных̑ е҆го.
ни́же живꙋщаа въ е҆ла́мѣ, н̂и ѻ҆крс̑҇тных̑ е҆го.
ни живꙋщаѧ въ мее҆до́нїи ни ѻ҆крс̑҇тных̑ е҆го, понеже възлюбѝ ханаан̑҇ жити на землѝ се́и·

И҆ быс̑҇ е҆гда̀ ѹ҆крепи́сѧ і҆и҆л҃ь, и҆ сътворѝ ханане́а дан̑҇ника и҆згна́нїем̑ же не из̑гна̀ е҆го·

І҆ е҆фре́мъ не и҆згна̀ ханане́а живꙋщаго въ газе́рѣ.
н̂о живѧ́ше ханаа́нъ средѣ их̑ въ газе́рѣ.
и҆ бы́сть емꙋ в꙽ дан꙽ника̀·

И҆ заѹ҆ло́нъ не и҆зъгна̀ живꙋщихъ въ хедронѣ, и҆ живꙋщихъ въ а҆ма́нѣ.
и҆ всели́сѧ ханаан̑҇ средѣ и҆хъ, и҆ бы́сть е҆мꙋ да́нник꙽·

І҆ а҆си́ръ не и҆згна̀ живꙋщаѧ въ а҆кхоре́и, ни живꙋщаѧ въ до́рѣ.
ни живꙋщаѧ в꙽ сидо́нихъ, ни живꙋщаѧ в дала́ѳѣ.
и҆ въ а҆хазїи.
и҆ въ е҆́лве, и҆ въ наѳе́кꙋ.
и҆ въ роѻ҆́ѳѣ·

И҆ всели́сѧ а҆си́ръ средѣ ханане́ѧ живꙋщаго на землѝ то́и.
занѐ не възмо́же и҆згна́ти е҆го·

И҆ неѳали́мъ не и҆зъгна̀ живꙋщихъ в꙽ веѳсамꙋ́сѣ.
ниже живꙋщих̑ в꙽ веѳана́хꙋ.
и҆ всели́сѧ нефѳали́м꙽, средѣ ханаа́на живꙋщ́аго на землѝ се́и, живꙋщїи же въ е҆ѳсамꙋ́сѣ.
и҆ в꙽ веѳана́хꙋ, бы́ша е҆мꙋ да́нницы·

И҆ въгна̀ а҆м꙽море́и сн҃ы да́новы в горꙋ̀.
ꙗ҆́ко не попꙋстѝ и҆мъ сни́ти на равнинꙋ̀·

И҆ възлюбѝ ам̑морре́и жи́ти в꙽ горѣ̀ в ка́менѣ.
в꙽ мерсиѻ҆́нѣ, и҆ в салави́не, и҆ ѻ҆тѧжча̀ рꙋка̀ до́мꙋ і҆ѻ́сифлѧ на ам̑морре́ѧ.
и҆ бы́сть е҆мꙋ да́нн꙽икъ·

Предѣ́ли же а҆м꙽мор꙽реистїи и҆дꙋме́ѻсъ свы́ше ѿ восхода а҆кра́лина ѿ камы́ка вы́ше·

Глв̑҇а, в҃·

И взы́де а҆́гг҃лъ гн҃ь ѿ галгал̑҇, къ веѳи́лю.
к домꙋ і҆и҆л҃вꙋ.
и҆ рече к ни́мъ.
си́це гл҃етъ г҃ь и҆зведы́и ва́съ и҆зъ е҆гѷп꙽та.
и҆ въведы́и въ зе́млю е҆ю҆́же клѧ́сѧ къ ѿц҃емъ ва́шимъ да́ти ва́мъ.
и҆ рече не рас꙽сы́плю завѣта мое҆го и҆же с ва́ми въ вѣ́ки·

Вы́ же не завѣща́ите завѣта к꙽ сѣдѧ́щимъ на землѝ се́и, ниже богом̑ и҆хъ да поклони́тесѧ, н̂о и҆зваѧ́наѧ и҆хъ да съкрꙋши́те.
ѻ҆́лтарь их̑ да раскопа́ите, и҆ не послꙋшасте гла́са мое҆го.
и҆ с̂е сътвори́сте·

А҆з же рх̑ѣ не приложꙋ̀ и҆згна́ти и҆хъ ѿ лица̀ ва́шего и҆ бꙋ́дꙋтъ ва́мъ те́рнїемъ.
и҆ бози и҆хъ бꙋ́дꙋтъ вам̑ въ собла́знь<.>

И҆ бы́сть ꙗ҆́ко гл҃а агг҃лъ гн҃ь словеса̀ си къ всѣмъ сн҃омъ і҆и҆л҃вымъ.
и҆ въз꙽дви́гше людїе глас̑҇ сво́и, и҆ въспла́каша·

И҆ сего ради прозва́сѧ и҆́мѧ мѣ́стꙋ томꙋ̀ пла́чь.
и҆ положи́ша т̂ꙋ требꙋ гв҃и·

И҆ ѿпꙋстѝ і҆сꙋ́съ лю́ди.
и҆ ѿи҆до́ша сн҃ове і҆и҆л҃еви кождо в домы̀ своѧ.
и҆ кождо въ прича́стїе свое, причасти́ти зе́млю т̂ꙋ·

И҆ рабо́таша лю́дїе гв҃и въ всѧ̀ дн҃и і҆сꙋсовы, и҆ въ всѧ̀ дн҃и ста́рчески, е҆ли́коже и҆хъ пожи́ша мно́ги дн҃и по і҆сꙋсѣ.
и҆ ели́коже и҆хъ разꙋмѣша дѣ́ло гн҃е вели́кое.
е҆же сътворѝ і҆и҆л҃ю·

И҆ сконча́сѧ і҆сꙋсъ ра́бъ гн҃ь сн҃ъ навѷи҆нъ, жив̑҇, р҃. и҆ і҃. лѣтъ·

И҆ погребо́ша и҆̀ въ предѣлехъ прича́стїѧ е҆го въ ѳа́мнѣ ѳаре́сѣ в горѣ̀ е҆фремли, ѿ сѣвера горы̀ гаа́ѳа·

Посем̑ весь ро́д꙽ ѻ҆́нъ приложи́шасѧ къ ѿц҃емъ и҆хъ.
и҆ въста̀ род̑ дрꙋгїи по си́хъ и҆же не позна̀ г҃а, и҆ дѣ́ла ꙗ҆́же сотворѝ въ і҆и҆л҃и.

И҆ сътвори́ша сн҃ове і҆и҆л҃еви ѕло́е пред̑ гм҃ъ.
и҆же послꙋжи́ша ваа́лꙋ·

И҆ ѻ҆ста́виша г҃а б҃а ѿц҃ь свои҆хъ.
и҆звед̑шаго и҆хъ и҆з꙽ землѧ̀ е҆гѷпет꙽ски.
і҆ и҆до́ша въ слѣдъ бо́гъ и҆́нѣхъ.
ѿ бо́гъ стра́н꙽скъ ꙗ҆же ѻ҆́крс̑҇тъ и҆хъ.
и҆ поколишасѧ и҆м꙽.
и҆ раз꙽гнѣ́ваша г҃а·

И҆ ѻ҆ста́виша г҃а.
и҆ послꙋжи́ша ваа́лꙋ.
и҆ а҆ста́ртови·

И҆ раз̑гнѣвасѧ ꙗ҆́ростїю г҃ь на і҆и҆л҃ѧ, и҆ предас̑҇ и҆̀, в рꙋкꙋ плѣнѧ́ющего ѧ҆̀.
и҆ плѣни́ша ѧ҆̀ и҆ ѿда́сть ѧ҆̀ в рꙋцѣ вра́гъ и҆хъ и҆же ѻ҆́крс̑҇тъ и҆хъ.
и҆ не възмого́ша ста́ти пред̑ лице́мъ вра́гъ свои҆хъ·

И҆ въ всѣхъ в ни́хже прохожда́хꙋ рꙋка̀ гн҃ѧ бѧше и҆мъ на ѕло.
ꙗ҆коже гл҃а г҃ь, и҆ ꙗ҆́ко клѧ́сѧ и҆мъ г҃ь ѕѣ́ло·

Посе́м же въста́ви и҆мъ г҃ь сꙋдїѧ, і҆ и҆збавлѧ́хꙋ и҆хъ, и҆з рꙋки плѣнѧ́щихъ ѧ҆̀·

ѻ҆ба́че же и҆ сꙋде́и не послꙋшаша н̂о соблꙋди́ша въ слѣд꙽ бо́гъ и҆́нѣхъ.
и҆ поклони́шасѧ и҆мъ и҆ раз꙽гнѣваша г҃а.
и҆ склони́шасѧ с пꙋтѝ ско́ро, во́нже ходи́ша ѿц҃ы и҆хъ·

послꙋш́ати за́повѣдїи гн҃ь не сътвори́ша та́ко·

І҆ ꙗ҆́ко въста́ви им̑ г҃ь сꙋдїѧ.
и҆ бѧ́ше г҃ь съ сꙋдїею.
и҆ сп҃се ѧ҆̀ ѿ рꙋкѝ вра́гъ и҆хъ, въ всѧ̀ дн҃и сꙋдїи, ꙗ҆ко ѹ҆мили́сѧ г҃ь въздыха́нїа и҆хъ, ѿ лица̀ вою́ющихъ на нѧ, и҆ врежа́ющихъ ѧ҆̀·

И҆ бы́сть ꙗ҆́ко ѹ҆́мре сꙋдїи, и҆ ѿвраща́хꙋсѧ.
и҆ па́ки рас꙽сы́пахꙋсѧ па́че ѿц҃ъ свои҆х꙽ и҆дꙋще въ слѣдъ бо́гъ и҆́нѣхъ.
слꙋжи́ти и҆мъ, и҆ поклони́тисѧ и҆мъ.
не ѻ҆ста́виша тва́реи свои́хъ, и҆ не ѿстꙋпи́ша ѿ пꙋти свое҆го жесто́каго<.>

И҆ разгнѣ́васѧ ꙗ҆́ростїю г҃ь на і҆и҆л҃ѧ.
и҆ рече, поне́же ѻ҆ста́ви род̑ сїи завт̑ѣ мо́и.
и҆же заповѣ́дахъ ѿц҃емъ их̑, и҆ не послꙋш́аша гла́са мое҆го·

І҆ а́зъ не приложꙋ̀ ѿгна́ти кого̀ ѿ лица̀ и҆хъ ѿ сихъ ро́довъ ꙗ҆же ѻ҆ста́ви і҆сꙋсъ навѷи҆нъ на земли и҆ ѹ҆́мрѣтъ·

да и҆скꙋшꙋ̀ и҆ми і҆и҆л҃ѧ.
а҆́ще снабдѧ́т꙽ пꙋть гн҃ь ходи́ти во́нь ꙗ҆́коже снабдѣша ѿц҃ы и҆хъ.
и҆л̂и нѝ·

И҆ ѻ҆ста́ви г҃ь страны̀ сїѧ не съгна́ти и҆хъ въско́рѣ.
и҆ ниже преда́сть и҆хъ в рꙋкꙋ і҆сꙋ́совꙋ·

Глв̑҇а, г҃·

Сїѧ же страны̀ ꙗ҆́же ѻ҆ста́ви г҃ь.
да и҆скꙋси́т꙽ и҆ми і҆и҆л҃ѧ вс̂ѧ невѣ́дꙋщаѧ ра́ти, ханаа́ньски·

Ꙗ҆́ко да ѹ҆вѣсть с̂е наслѣ́дникъ сн҃овъ і҆и҆л҃евъ, и҆ да ѹ҆чи́тъ ѧ҆̀ ра́ти.
ѻ҆ба́че и҆же прежде сего̀ не ѹ҆вѣ́дѧше·

пѧ́ть вое҆во́дъ и҆ноплеме́н꙽ническъ, кнѧзе́и и҆ всего̀ ханане́ѧ, и҆ сидо́нина и҆ е҆ѹ҆е́ѧ живꙋщаго в лива́нѣ, ѿ горы̀ ваа́лъ е҆рмо́на.
да ла́въвема́ѳа·

И҆ бы́сть ꙗ҆коже и҆скꙋсѝ и҆́ми і҆и҆л҃ѧ.
да ѹ҆вѣ́стьсѧ послꙋш́аютъ л̂и за́повѣдь гн҃ю, ꙗ҆́же заповѣ́да ѿц҃ем꙽ и҆хъ рꙋко́ю моѷсїи҆ною·

И҆ вселишасѧ сн҃ове і҆и҆л҃еви средѣ ханане́ѧ.
и҆ хет꙽ѳе́ѧ.
і҆ а҆м꙽морре́ѧ.

И҆ ферезе́ѧ.
и е҆в꙽ве́ѧ.
и҆ гер꙽гесе́ѧ, и҆ е҆ѹ҆се́ѧ·

И҆ поꙗ҆́ша дще́ри и҆хъ себѣ̀ въ жены̀, и҆ дще́ри своѧ да́ша сн҃омъ и҆хъ.
и҆ послꙋжи́ша бого́мъ и҆хъ·

И҆ сътвори́ша сн҃ове і҆и҆л҃еви ѕл̂о пред̑ бм҃ъ и҆ забы́ша г҃а б҃а свое҆го.
и҆ послꙋжи́ша ваа́лꙋ и҆ а́л꙽сꙋ·

И҆ разгнѣ́васѧ ꙗ҆́ростїю г҃ь на і҆и҆л҃ѧ, и҆ преда́сть ѧ҆̀ в рꙋкꙋ хꙋсарсаѳе́мꙋ цр҃ю сѷрскꙋ в꙽ междорѣчїе и҆ рабо́таша е҆мꙋ, лѣт꙽ и҃·

И҆ възопи́ша сн҃ове і҆и҆л҃еви къ г҃ꙋ.
и҆ въста́ви г҃ь сп҃сенїе і҆и҆л҃ю.
и҆ сп҃се ѧ҆̀ гоѳонии҆́лъ, сн҃ъ кене́зовъ бра́тъ хале́вов̑҇ мнїи, и҆ бы́сть на не́мъ дх҃ъ гн҃ь и҆ сꙋдѝ і҆и҆л҃ѧ.
і҆ и҆зы́де на рать къ хꙋсарсаѳе́мꙋ цр҃ю и҆ преда̀ г҃ь в рꙋ́цѣ е҆го цр҃ѧ сѷрска, и҆ ѹ҆крѣпи́сѧ рꙋка̀ е҆го над̑ хꙋсарсаѳемом̑ сѷрскимъ·

И҆ бысть въ поко́и землѧ̀, м҃, лѣтъ.
и҆ посе́мъ ѹ҆́мре гоѳонии҆́лъ сн҃ъ кене́зов̑҇.

И҆ приложи́ша сн҃ове і҆и҆л҃еви сотвори́ти ѕл̂о пред̑ гм҃ъ.
и҆ ѹ҆крѣпѝ г҃ь е҆гло́ма цр҃ѧ моа́влѧ на і҆и҆л҃ѧ занеже сътворѝ ѕло́е пред̑ гм҃ъ·

И҆ събра̀ к себѣ вс̂ѧ сн҃ы ам̑мо́нѧ.
и҆ а҆мали́ковы, і҆ и́де и҆ побѝ і҆и҆л҃ѧ, и҆ прїѧ̀ гра́ды ѳини́чески·

И҆ рабо́таша сн҃ове і҆и҆л҃ви е҆гло́мꙋ цр҃ю моа́влю, лѣтъ, и҃і·

И҆ възопи́ша сн҃ове і҆и҆л҃еви къ г҃ꙋ.
и҆ въста́ви и҆мъ г҃ь сп҃сенїе а҆ѻ́да сн҃а гара́нѧ, сн҃а е҆мїина мꙋжа е҆же не владѣ десни́цею.
и҆ посла́ша сн҃ове і҆и҆л҃еви дары рꙋко́ю е҆го, е҆гло́мꙋ цр҃ю моа́влю·

И҆ сътворѝ себѣ а҆ѻ́дъ но̑ ѻ҆бою́дꙋ ѻ҆́стръ, на́ пѧдь е҆ди́нꙋ долгота̀ е҆го.
и҆ поѧса́сѧ и҆мъ по бедрѣ десно́и свое́и·

І҆ и́де и҆ принесѐ дары е҆гло́мꙋ цр҃ю моа́влю.
е҆гло́м же мꙋж꙽ ѻ҆сла́блен̑҇ б̂ѣ ѕѣ́ло·

И҆ бы́сть ꙗ҆́ко сконча̀ а҆ѻ́дъ приносѧ̀ дары.
и҆ вы́слалъ носѧ́щаѧ да́ры·

И҆ е҆гло́мъ ѻ҆брати́сѧ ѿ і҆́долъ и҆же въ галга́лѣхъ.
и҆ реч̑҇ а҆ѻ́дъ слово мн̂ѣ е҆сть к тебѣ та́ино цр҃ю, и҆ рече е҆гло́мъ всѣмъ пред̑стоѧ҆́щимъ пред ни́мъ.
да и҆зы́дꙋтъ во́нъ, і҆ и҆зыдо́ша вс̂и пред̑стоѧ́щїи е҆го·

А҆ѻ́д же внїиде к немꙋ̀.
се́и же сидѧ́ше на восхо́дницы лѣтнїи е҆ді́н꙽ и҆ рече а҆ѻ́дъ слово бж҃їе мн̂ѣ къ тебѣ цр҃ю.
и҆ въста̀ е҆гло́мъ съ стола̀ и҆ прїиде к немꙋ̀·

И҆ бысть е҆гда въста̀ а҆гїе, прострѐ а҆ѻ́дъ рꙋкꙋ лѣвꙋю с̂и і҆ и҆звлечѐ но́жъ и҆же над̑ стегно́мъ е҆го де́сным꙽, и҆ вон꙽зѐ во чре́во е҆гло́мово·

И҆ под̑ти́снꙋ и҆ чрен̑҇ под̑ ко́жꙋ, и҆ затворѝ ꙗ҆́звꙋ тꙋ́къ, ꙗ҆́ко не и҆звлечѐ ножа̀ и҆с чре́ва е҆го н̂о и҆зы́де лаи҆но̀·

І҆ и҆зы́де а҆ѻ́дъ во па́пертъ.
и҆ затворѝ двери вхо́дницы го́рнеи е҆го, и҆ заключѝ е҆го<.>

І҆ е҆гда сїи и҆зы́де прїидо́ша рабѝ е҆го ѹ҆зрѣша, и҆ с̂е две́ри въсхо́дницы затво́рены.
и҆ рѣша, е҆д̂а в за́дѣ сѣдит̑ ѹ҆го́днаѧ себѣ̀ творѧ̀ ѿшедъ ѿ ло́жа·

И҆ прежда́ше ѹ҆мо́л꙽кше·

и҆ се не бы́сть ѿврьза́ѧй две́ри въсход̑ницы, и҆ взе́мше клю́чь ѿврьзо́ша, и с̂е господи́нъ и҆хъ лежи́тъ на зем̑лѝ мр҃твъ·

А҆ѻ́д же ѹ҆бѣжа̀ до́ндеже ѻ҆бозрѣша, и҆ минꙋ́въ і҆́долы вни́де въ ро́ѳꙋ·

И҆ бы́сть е҆гда прїиде а҆ѻд̑ въ зе́млю і҆ил҃евꙋ, и҆ въстрꙋбѝ ро́гом̑ в горѣ̀ ефре́мли, и҆ снидо́ша с нимъ съ горы̀ сн҃ове і҆и҆л҃еви, се́и же пред̑ ни́ми·

И҆ рече к ни́мъ, и҆дѣте въ слд̑ѣ менѐ, ꙗ҆́ко преда́сть г҃ь б҃ъ врагы̀ на́ша моа́влѧне в рꙋцѣ на́ши·

І҆ и҆до́ша въ слѣ́дъ е҆го, и҆ пред̑взѧ́ша прехо́ды ѹ҆ і҆ѻ҆рда́на и҆ моа́влѧ, и҆ не да́ша никомꙋже минꙋт́и·

І҆ и҆зби́ша моа́ва в т̂о вре́мѧ ꙗ҆́ко, і҃, ты́сѧщ̑҇ мꙋжъ вс̂ѧ во́ины, и҆же в ни́хъ, и҆ всѧ́къ мꙋжъ си́ленъ и҆ не ѹ҆бѣже н̂и е҆ді́нъ·

И҆ премѣни́сѧ моа́въ в то́и дн҃ь под̑ рꙋкꙋ і҆и҆л҃евꙋ, и҆ бысть в поко́й землѧ̀, п҃, лѣтъ и҆ сꙋдѝ и҆мъ а҆ѻд̑ до́ндеже ѹ҆́мре·

По не́м же въста̀ самега́ръ сн҃ъ а҆на́ѳовъ, се́и избѝ и҆ноплеме́н꙽никъ, х҃, мꙋжъ, радлицею плꙋж́ною и҆ сп҃се и҆ се́и і҆и҆л҃ѧ·

Глв̑҇а, д҃·

И приложи́ша сн҃ове і҆и҆л҃еви сътвори́ти ѕл̂о пред̑ гм҃ъ е҆гда̀ а҆ѻд̑ ѹ҆́мре·

И҆ ѿда́стъ ѧ҆̀ г҃ь в рꙋцѣ и҆а́винꙋ цр҃ю ханаѻ́ню, и҆же црс̑҇твова въ а҆со́рѣ·

и҆ вое҆во́да е҆го си́лныи бы́сть сиса́ра·

Си̂ живѧ́ше въ а҆саро́ѳѣ стра́н꙽стѣ·

И҆ възопи́ша сн҃ове і҆и҆л҃еви къ г҃ꙋ.
ꙗ҆́ко ѳ҃, со́т꙽ колесни́цъ желѣз́ных̑ бѣа́ше е҆мꙋ, и҆ сїи стꙋжи́мъ і҆и҆л҃еви ѕѣ́ло.
лѣтъ, к҃·

дѣво́ра же проро́чица, жена̀ лафидо́ѳова.
сїа сꙋди і҆и҆л҃еви в т̂о врѣмѧ·

И҆ сїѧ живѧ́ше под̑ фꙋни́комъ дево́риномъ, междꙋ ра́мом̑.
и҆ ме́ждꙋ веѳи́лемъ в горѣ̀ е҆фрѣмовѣ.
и҆ въсхожа́хꙋ сн҃ове і҆и҆л҃еви, к не́и та́мо на сꙋд꙽·

И҆ посла́вше дево́ра, призва̀ вара́ка сн҃а а҆вине́млѧ, ѿ племе́ни неѳали́мова.
и҆ реч̑҇ к немꙋ не заповѣ́да ли тебѣ̀ г҃ь б҃ъ і҆и҆л҃евъ, да и́деши въ горꙋ̀ фаво́ровꙋ.
и҆ да пои҆ме́ши съ собо́ю, і҃, ты́сѧщь мꙋжеи.
ѿ сн҃овъ неѳали́мль и҆ ѿ сн҃овъ заѹ҆ло́нь·

А҆зъ же приведꙋ̀ к тебѣ̀ в꙽ водоте́чь, кисо́нъ, сиса́рꙋ вое҆во́дꙋ си́лы а҆ви́нѧ.
и҆ колесни́ца е҆го и҆ мно́жество во́и е҆го, и҆ преда́мъ и҆̀ в рꙋ́кꙋ твою·

И҆ реч̑҇ к не́и вара́къ, а҆ще и҆́деши со мно́ю, т̂о и҆дꙋ̀, а҆ще л̂и не и҆́деши со мно́ю, т̂о не и҆дꙋ̀·

И҆ реч̑҇ дево́ра к немꙋ̀, и҆дꙋщи и҆дꙋ̀ с тобо́ю.
ѻ҆бач̑҇ вѣждъ ꙗ҆́ко не бꙋ́детъ т̂и съ сла́вою пꙋть сїи во́ньже и҆́деши.
поне́же въ рꙋ́кꙋ же́ньскꙋ преда́стъ г҃ь сиса́рꙋ.
и҆ въста́вши дево́ра і҆ и́де с вара́комъ до кади́съ·

И҆ възва̀ вара́къ заѹ҆ло́на, и҆ неѳали́ма.
и҆ повелѣ̀ въ слд̑ѣ себѐ и҆тѝ.
і҃ ти, ты́сѧщи мꙋжем̑.
і҆ и́де с ни́ми дево́ра·

Бли́жнїи же кине́и.
ѿлꙋчи́лсѧ бы́сть ѿ ке́ны и҆же бы́сть ѿ сн҃овъ и҆ѻ҆а҆ваковых̑ зѧ́тѧ моѷсїѻ҆ва.
и҆ потъкнꙋ̀ кꙋщꙋ свою̀, под̑ дꙋ́бомъ почива́ющимъ, ꙗ҆́же въ кади́сѣ·

И҆ възвѣсти́ша сиса́рѣ ꙗ҆́ко възы́иде вара́къ сн҃ъ а҆виное́мль, на горꙋ̀ ѳаво́ръ·

И҆ съзва̀ сиса́ра вс̂ѧ колесни́ца своѧ̀.
ѳ҃, сот̑ колесни́цъ желѣ́знъ.
и҆ всѧ̀ лю́ди и҆же с ни́мъ.
ѿ а҆рисо́ѳа стра́ньска.
въ водоте́чь кисо́нь<.>

И҆ реч̑҇ дево́ра къ вара́кꙋ.
въста́ни ꙗ҆́ко сїи дн҃ь.
во́ньже преда́стъ г҃ь сиса́рꙋ в рꙋ́кꙋ твою̀.
занѐ г҃ь и҆зы́иде пред̑ тобо́ю.
и҆ сни́де вара́къ с горы̀ ѳаво́ръ.
и҆ і҃, ты́сѧщъ мꙋжъ въ слѣ́дъ е҆го и҆ сътрѐ г҃ь сиса́рꙋ.
и҆ всѐ ѻ҆рꙋж́їе е҆го.
и҆ ве́сь по́лкъ е҆го ѻ҆́стрїем̑ меча̀ пред̑ вара́комъ.
и҆ сни́де сиса́ра съ колесни́цы свое҆ѧ, и҆ пробѣже пш̑҇ѣ·

А҆ вара́къ жены́и въ слѣ́дъ колесни́цъ е҆го, и҆ въ слѣ́дъ по́лка.
да́же до дꙋбра́вы стра́ньски.
и҆ падѐ ве́сь по́лкъ сиса́ринъ ѻ҆́стрїемъ меча̀, не ѻ҆ста̀ же н̂и е҆ді́нъ·

А҆ сиса́ра ѹ҆бѣже пѣш꙽ въ кꙋщ́ꙋ и҆а҆ви́лю.
хеве́ра кене́ина.
ꙗ҆́ко ми́ръ бѣа҆ше межꙋ иа҆винемъ цр҃ем̑ а҆сровом̑.
и҆ ме́ждꙋ домом̑ хаве́ровом꙽·

кене́и҆номъ·

І҆ и҆зы́иде и҆а҆и҆ль проти́вꙋ сиса́рѣ, и҆ рече к꙽ немꙋ̀, съврати́сѧ господи́не мо́и съврати́сѧ ко мнѣ̀ не бо́исѧ.
и҆ съврати́сѧ къ не́и в кꙋщꙋ.
и҆ покры̀ и҆̀ ѻ҆де́ждею свое҆ю·

И҆ реч̑҇ сиса́ра к не́и.
напо́и м̂ѧ ма́ло воды̀, ꙗ҆́коже вжадах̑сѧ.
и҆ ѿрѣшѝ мх̑ѣ мле́чныи и҆ напо́и е҆го, и҆ па́ки покры̀ е҆го·

И҆ реч̑҇ к не́и сиса́ра ста́ни в꙽ две́ри кꙋща.
и҆ да бꙋ́детъ а҆ще кт̂о прїидет̑ к тебѣ и҆ въпраша́етъ т̂ѧ рекꙋщи.
е҆сть ли зд̂ѣ кт̂о, и҆ да рече́ши нѣсть·

И҆ взѧ и҆а҆и҆ль жена̀ хеве́рова ко́лъ кꙋщ꙽ныи.
и҆ взѧ̀ мла́тъ в рꙋ́кꙋ свою̀.
и҆ вни́де к немꙋ ти́хо.
и҆ приложѝ ко́лъ въ ѻ҆бо́чье главы̀ е҆го и҆ ѹ҆да́ри мла́том̑.
и҆ пробѝ даже до землѧ̀.
се́и же ѹ҆трꙋждьсѧ спѧ́ше.
і҆ и҆здъше·

И҆ с̂е бара́къ жены́и сиса́рꙋ.
і҆ и҆зы́иде и҆а҆и́ль проти́вꙋ е҆мꙋ, и҆ реч̑҇ е҆мꙋ ходѝ да покажꙋ ти мꙋжа е҆го́же ты и҆́щеши.
и҆ въни́де к не́и, и҆ с̂е сиса́ра лежа́ше мр҃тв꙽.
а҆ ко́лъ въ ѻ҆бо́чьи главы̀ е҆го·

И҆ покорѝ г҃ь б҃ъ в то́и дн҃ь.
и҆ꙗ҆ви́на цр҃ѧ ханаа́нѧ, пред̑ сн҃ы і҆и҆л҃евыми·

И҆ по́иде рꙋка̀ сн҃овъ і҆и҆л҃евъ.
и҆ ѹ҆крѣпи́сѧ стꙋжа́ющи.
на и҆а҆ви́нѧ цр҃ѧ ханаѻ҆́нѧ.
дон꙽деже и҆стреби́ша и҆̀·

Глв̑҇а, е҃·

И възопѝ дево́ра и҆ вара́къ сн҃ъ авинее́мовъ.
в то́и дн҃ь.
и҆ рѣ́ста·

Внегда же ѿдастъ ѿмще́нїе ѻ҆би́дѧщим̑ і҆и҆л҃ѧ, въ и҆зволе́нїе людем̑.
блс̑҇вите г҃а·

Слы́шите цр҃и и҆ внꙋши́те кн҃ѕи, а҆зъ гв҃и въспою.
и҆ въсхва́лю б҃а і҆и҆л҃ева·

Ги҃ въ и҆схо́дѣ твое҆мъ ѿ сїи҆ра.
вънегда въздвижа́шесѧ ѿ села̀ е҆до́мова.
землѧ̀ сѧ потресѐ, и҆ нб҃о възмꙋти́сѧ.
и҆ ѻ҆́блаци прокапа́ша во́дꙋ, го́ры подвиза́шасѧ ѿ лица̀ гн҃ѧ.
и҆ гора̀ сїѻ́нъ ѿ лица̀ г҃а б҃а і҆и҆л҃ева·

Въ́ дн҃и самега́ровы, сн҃а е҆на́ѳова, въ дн҃и і҆и҆л҃евы·

ѻ҆скꙋдѣша пꙋтїе і҆ и҆до́ша без̑ чинꙋ.
и҆до́ша в꙽ пꙋтѝ кри́вы·

ѻ҆скꙋдѣша живꙋщїи въ і҆и҆л҃и.
ѻ҆скꙋдѣша до́ндеже въстах̑ а҆зъ дево́ра м҃ти въ і҆и҆л҃и·

Є҆гда̀ и҆зво́лиша богѝ но́вы, ꙗ҆́ко хлб̑҇ѣ ꙗ҆́ченъ.
тогда̀ и҆мѣа́ше врагѝ въ вра́тѣхъ и҆ въе҆ва́ша гра́ды и҆хъ, и҆ не ꙗ҆влѧшесѧ пра́ща, а҆ни ко́пїе·

въ м҃. ты́сѧщахъ въ і҆и҆л҃и·

Срд̑це моѐ къ заповѣ́данымъ і҆и҆л҃евы.
си́лнымъ в людех̑ блс̑҇вите г҃а·

ѻ҆҇ ездѧ́щїи на ѻ҆слѧ́тахъ бѣ́лыхъ и҆ на сꙋ́дъ и҆дꙋщїи совѣта.
провѣща́ите·

Глс̑҇а плетꙋщих̑ средѣ веселѧ́щих̑сѧ·

тамо да дадѧ́тъ пра́вдꙋ гв҃и правед̑нїи да ѹ҆крѣпиши въ і҆и҆л҃и.
нн҃ѣ да разыдт̑ꙋсѧ въ гра́ды своѧ̀ лю́дїе гн҃и·

Въста́ни въста́ни дево́ра, въста́ни въста́ни гл҃и съ пѣ́снїю.
въста́ни и҆ вара́кꙋ.
и҆ плѣнѝ плѣ́нь тво́и сн҃е а҆винее́нь·

Нн҃ѣ възвели́читсѧ ѻ҆ста́вшїи въ вельмо́жах̑ людїи.
г҃ь сми́ри на́мъ крѣ́пльшаѧ нас̑҇.
лю́ди е҆фрѣмлѧ ѹ҆томи́ша и҆хъ в доли́не·

Братъ тво́и венїами́нъ послѣднїи в лю́дехъ свои҆хъ.
бы́сть ѿ менѐ махи́ръ сни́де взыска́ющїи тебѐ.
и҆ ѿ заѹ҆ло́на ѹ҆крѣплѧ́ющїисѧ въ ски́петре ѹ҆казꙋ́юще писа́нїе·

Нача́лнїи въ и҆саха́рѣ съ дево́рою и҆ вараком̑·

такоже и҆ варакъ ѿпꙋстѝ пѣшца своѧ̀ в꙽ поли́нꙋ.
прострѐ нога́ма свои҆ма ѹ҆ раздѣленїа рꙋви́мова.
вели́ка и҆спытанїа срд̑ца·

И҆ варакъ въскꙋю ми сѣ́сти средѣ мосѳеѳа́ма.
послꙋшати звизда́нїе въстава́ющих̑ проити въ рꙋвїю ве́лїѧ.
и҆спыта́нїа срд̑ца·

Галаа҆дъ ѻ҆бонꙋ странꙋ̀ і҆ѻ҆рдана, вселисѧ и҆ да́нъ.
въскꙋю ѻ҆бита́еши въ мно́гихъ.
аси́ръ ѻ҆бита̀ в помо́рїихъ мо́рскихъ.
и҆ в лꙋѕѣхъ свои҆х꙽ вселисѧ заѹ҆ло́нъ.
лю́дїе ѹкори́ша дш҃ꙋ ег҃о на смр҃ть.
и҆ неѳали́мъ на высотѣ̀ села̀·

И҆ прїидо́ша до него̀ цр҃и, и҆ въполчи́шасѧ, тогда̀ вое҆ва́ша цр҃и ханаа́ни въ ѳанаа́хꙋ, ѹ҆ воды̀ маге́довы.
и҆ мно́жества сребра̀ не взѧ́ша·

ѿ нб҃си вое҆ва́ша ѕвѣ́зды ѿ чинꙋ и҆хъ.
вое҆ва́ша съ сиса́рою·

Въ водоте́чїи ки́с꙽сооп̑҇.
и҆згна̀ ѧ҆̀ водоте́чь, кадими́нъ, въ водоте́чь кис꙽со́нъ.
попере́тъ ѧ҆̀ дш҃а моѧ̀ си́лно·

Тогда̀ ѿсѣко́ша копы́та ко́ньски, и҆ ѹ҆мѧкче́ны ѿ потопта́нїѧ си́лныхъ е҆го·

Проклина́ите мазо́ра.
и҆ реч̑҇ а҆гг҃лъ гн҃ь, проклѧ́тїемъ клени́те живꙋщаѧ в не́и.
ꙗ҆́ко не прїидо́ша въ помо́щь гн҃ю.
въ помо́щь гн҃ю на си́лъныхъ·

Блс̑҇вена в꙽ женахъ і҆и҆л҃евых̑, жена̀ хаве́рова кинїина ѿ жен̑҇ в꙽ кꙋщи, блс̑҇вена бꙋ́ди·

Воды̀ проси ѹ҆ неѧ, и҆ да́стъ е҆мꙋ мле́ко въ ча́ши си́лных̑.
принесѐ ма́сло·

Рꙋ́кꙋ свою лѣ́вꙋю до ко́ла.
прострѐ десни́цꙋ свою до мла́та рабо́тающихъ.
и҆ ѹ҆бѝ сиса́рꙋ.
и҆ разбѝ главꙋ̀ е҆го, и҆ ѿлꙋчѝ че́люсть е҆мꙋ, и҆ ѹ҆бѝ ме́жꙋ нога́ма е҆ѧ̀, преклони́въ, паде́сѧ ѹ҆трꙋжде́нъ и҆ ѹ́мре посредѣ но́гъ е҆ю̀ и҆ т̂ꙋ падѐ нечести́вне.
ѻ҆ко́нцом̑ призира́ше ма́ти сиса́рина.
ѻ҆кно́мъ средѣ решот̑ки.
чт̂о премедлѝ колесни́ца е҆го прїити въскꙋ́ю ѹ҆медлѣша стопы̀ ѻ҆рꙋж́їѧ е҆го·

Мꙋ́дрыѧ нача́л꙽ства е҆ѧ̀, ѿвѣща́ша е́й.
и҆ сама̀ ѿвѣщава́ше словеса своѧ̀ к себѣ·

Не ѻ҆брѧ́щꙋтъ е҆го раздѣлѧ́юща кори́сть, дрꙋжа́ѧ дрꙋ́ги на главꙋ̀ мꙋж́а си́лна кори́сть, ри́зы разноли́чныѧ сиса́ръ кори́сть.
разли́чна ри́зъ ѹ҆краше́нныхъ.
и҆ разли́чнаѧ шве́нїѧ на вы́и е҆го·

Та́ко да поги́бнꙋтъ вс̂и вра́зи твоѝ г҃и.
и҆ любѧ́щїи е҆го ꙗ҆́ко въсто́къ слн҃ца въ си́лѣ свое́й.
и҆ бы́сть въ поко́и землѧ̀, м҃, лѣтъ·

Глв̑҇а, ѕ҃·

И сътвори́ша сн҃ове і҆и҆л҃еви ѕло́е пред̑ гм҃ъ.
и҆ преда́стъ ѧ҆̀ г҃ь въ рꙋ́кꙋ мадїа́млю, з҃, лѣтъ·

И҆ ѹ҆крѣпи́сѧ рꙋка̀ мадїа́млѧ на і҆и҆л҃ѧ.
и҆ сътвори́ша себѣ сн҃ове і҆и҆л҃еви ѿ лица̀ мадїа́млѧ ѻ҆гра́ды в꙽ гора́хъ в꙽ пеще́рах̑ и҆ въ тве́рдехъ·

И҆ бы́сть е҆гда̀ сѣѧ́ше чл҃къ і҆и҆л҃евъ, и҆ въсхожда́ше, мадїа́мъ, и҆ а҆мали́къ и҆ сн҃ове въсто́къ.
и҆ въсхожда́хꙋ на́ нѧ·

И҆ въполча́хꙋсѧ на́ нѧ.
и҆ рас꙽сыпова́хꙋ пло́ды земныѧ, до́ндеже вни́ти въ газа́нꙋ.
и҆ не ѻ҆ставлѧ́хꙋ бы́тїа жи́зненаго въ і҆и҆л҃и.
н̂и стадъ теле́цъ н̂и ѻ҆слѧ́тъ·

Ꙗ҆́ко са́ми и҆ ско́тъ их̑ въсхожд̑аа́хꙋ.
и҆ кꙋщи их̑ принесо́ша, и҆ прїидо́ша ꙗ҆́ко прꙋзи мно́жеством̑·

самѣмъ же и҆ вельблю́домъ и҆хъ не бѧ́ше числа̀.
и҆ прихожда́хꙋ б̂о на́ землю і҆и҆л҃евꙋ рас꙽сы́пати ю҆̀·

И҆ ѻ҆ѹ҆бозѣ і҆и҆л҃ь ѕѣ́ло ѿ лица мадїа́млѧ·

И҆ възопи́ша сн҃ове і҆и҆л҃еви къ г҃ꙋ·

И бы́сть е҆гда възопи́ша сн҃ове і҆и҆л҃еви къ г҃ꙋ.
мадїа́ма ра́ди.
и҆ посла̀ г҃ь мꙋж́а прро̑҇ка сн҃омъ і҆и҆л҃евомъ.
и҆ реч̑҇ и҆мъ с̂е гл҃етъ г҃ь б҃ъ і҆и҆л҃евъ.
аз̑ е҆смь и҆зведы́и вас̑҇ изъ е҆гѷпта.
і҆ и҆зведох̑ ва́съ и҆з до́мꙋ рабо́ты·

І҆ изба́вих̑ вас̑҇ ѿ рꙋкѝ е҆гѷпет̑скїѧ.
и҆ ѿ рꙋки всѣ́хъ стꙋжа́ющихъ ва́мъ, и҆ прогнах̑ ѧ҆̀ ѿ лица̀ ва́шего.
и҆ дах̑ ва́мъ зе́млю и҆хъ·

И҆ реко́хъ ва́мъ а҆́зъ е҆смь г҃ь б҃ъ ва́шъ.
не ѹ҆бо́итесѧ бо́гъ а҆м꙽мор꙽ре́искъ.
в꙽ них꙽же живетѐ въ землѝ ихъ.
н̂о не послꙋш́асте гла́са мое҆го·

И҆ прїиде а҆гг҃лъ гн҃ь, и҆ сѣ́де под̑ дꙋ́бом̑, ꙗ҆́же е҆сть въ е҆ѳра́ѳе и҆же бы́сть и҆ѻ҆а́са ѿц҃а е҆сри́мова.
и҆ гедеѻ́нъ сн҃ъ е҆го млача́ше пшеницꙋ на гꙋмнѣ̀ е҆го.
да бѣжа́тъ с не́ю ѿ лица̀ мадїа́млѧ·

И҆ ꙗ҆висѧ е҆мꙋ а҆гг҃лъ гн҃ь, и҆ реч̑҇ г҃ь с тобо́ю мꙋж́ꙋ си́л꙽ныи·

И҆ реч̑҇ к немꙋ̀ гедеѻ́нъ.
г҃и мо́и, а҆ще е҆сть г҃ь в на́съ.
т̂о въскꙋ́ю н̂ы ѻ҆брѣто́ша вс̂ѧ ѕла́ѧ с̂и.
и҆ гд̂ѣ сꙋть вс̂ѧ чюдеса̀ е҆го.
е҆лико повѣ́даша нам̑ ѿц҃ы наши гл҃юще.
не и҆зъ е҆гѷпта л̂и и҆зведѐ насъ г҃ь, и҆ нн҃ѣ ѿвр́ьже нас̑҇ г҃ь.
и҆ преда́стъ нас̑҇ в рꙋ́кꙋ мадїа́млю·

И҆ възрѣ́въ на́нь а҆гг҃лъ гн҃ь и҆ реч̑҇ е҆мꙋ.
и҆дѝ въ крѣ́пости свое́й се́и.
и҆ сп҃се́ши і҆и҆л҃ѧ ѿ рꙋ́кꙋ мадїа́млю, и҆ с̂е пошлю̀ т̂ѧ·

И҆ реч̑҇ къ немꙋ гедеѻ́нъ.
г҃и.
чим̑ сп҃сꙋ і҆и҆л҃ѧ.
с̂е ты́сѧща м̂ѧ хꙋдѣ́иша в꙽ манасїи.
и҆ а́зъ мнїи́ в꙽ домꙋ ѿц҃а мое҆го·

И҆ реч̑҇ к немꙋ г҃ь поне́же а҆зъ бꙋ́дꙋ с тобо́ю.
і҆ и҆збїе́ши мадїа́ма ꙗ҆́ко е҆ді́наго мꙋжа·

И҆ реч̑҇ к немꙋ гедеѻ́нъ.
а҆́ще е҆смь ѻ҆брѣ́лъ блгд̑ть прд̑е ѻ҆чи́ма твои́ма.
да сътвори́ши м̂и зна́менїе, ꙗ҆́ко т̂ы е҆си и҆же гл҃еши со мно́ю·

Не постꙋпѝ ѿсю́дꙋ до́н꙽деже прїидꙋ̀ к тебѣ̀, и҆ принесꙋ̀ тре́бꙋ свою и҆ положꙋ̀ прд̑е тобо́ю, и҆ реч̑҇ а҆зъ премедлю̀ до́ндеже ѻ҆брати́шисѧ·

Гедеѻ́нъ же, в꙽ни́де и҆ сътворѝ ко́злище ѿ ко́зъ, и҆ че́тверть е҆́фи мꙋкѝ ѻ҆прѣ́сноковъ, и҆ вложѝ с мѧ́сомъ въ кро́шницꙋ, и҆ ю́хꙋ в꙽лїѧ̀ въ горне́цъ, і҆ и҆знесѐ к немꙋ под̑ дꙋб꙽, и҆ поста́ви·

И҆ рече к немꙋ̀ а҆гг҃лъ гн҃ь възмѝ мѧ́са и҆ хлѣ́бы прѣ́сныѧ, и҆ положѝ ѹ҆ ка́мене ѻ҆́ного, и҆ ю́хꙋ близ̑ пролїи́, и҆ сътворѝ та́ко·

И҆ прострѐ а҆гг҃лъ гн҃ь коне́цъ жезла̀ и҆же въ рꙋцѣ̀ е҆го, и҆ прикоснꙋ́сѧ мѧ́сѣхъ и҆ хлѣ́бехъ прѣ́сныхъ, и҆ възгорѣ́сѧ ѻ҆́гнь ѿ ка́мене, и҆ съж꙽жѐ мѧ́са и҆ ѻ҆прѣ́сноки, а҆гг҃лъ же гн҃ь ѿи҆́де ѿ ѻ҆́чїю е҆го·

И҆ ви́дѣ гедеѻ́нъ, ꙗ҆́ко а҆гг҃лъ е҆сть гн҃ь, и҆ рече гедеѻн̑҇, ѽ г҃и г҃и сего̀ ли ра́ди ви́дѣхъ а҆гг҃ла гн҃ѧ лице́мъ къ лицꙋ̀·

И҆ рече е҆мꙋ г҃ь, ми́ръ тебѣ не бо́исѧ, не ѹ҆́мреши·

И҆ съградѝ та́мо гедеѻ́нъ ѻ҆л̂тарь гв҃и, и҆ прозва̀ и҆̀ ми́ръ гн҃ь до сего дн҃е, и҆ е҆щѐ сꙋщꙋ е҆мꙋ въ е҆ѳра́ѳѣ ѿц҃а е҆срїи́на·

И҆ быс̑҇ в т̂ꙋ но́щь и҆ реч̑҇ е҆мꙋ г҃ь, поимѝ теле́ц꙽ ѹ҆пита́н꙽ныи ѿ ско́тъ ѿц҃а твое҆го, теле́цъ и҆ дрꙋгїи́, въ з҃, лѣтъ, и҆ разорѝ ѻ҆лтарь ваа́ль, и҆же е҆сть ѿц҃а твое҆го, и҆ са́дъ и҆же ѹ҆ него̀ да посѣче́ши·

И҆ да съгради́ши ѻ҆л꙽тарь гв҃и б҃ꙋ твое҆мꙋ, ꙗ҆ви́вшꙋ ти сѧ е҆мꙋ на верхꙋ̀ горы̀ сеѧ̀, въ пред̑чинїю̀, и҆ да по́имеши теле́цъ вторы́и и҆ възнесе́ши въ всѐсъж꙽же́нїе, на́ древх̑ѣ сада и҆же посѣче́ши·

И҆ поѧ̀ гедеѻ́нъ і҃, мꙋ́жь ѿ ра́бъ свои҆хъ, и҆ сътворѝ ꙗ҆́коже заповѣ́да е҆мꙋ г҃ь, и҆ бы́сть ꙗ҆́ко сѧ ѹ҆́боѧ̀ до́мꙋ ѿц҃а свое҆го, и҆ мж̑ꙋ град̑ныхъ, сътвори́ти сего̀ въ дн҃е, и҆ сътворѝ но́щїю·

ѻ҆бꙋтрѣвше же мꙋж́и град̑стїи заѹ҆́тра, ви́дѣша и҆ с̂е раско́панъ ѻ҆лтарь ваа́ль, и҆ сад̑ и҆же ѹ҆ него посѣче́нъ, и҆ теле́цъ ѹ҆пита́ныи възнесе́нъ на вс̂есъж꙽же́нїе на ѻ҆л꙽тарь но́во съгражде́ныи·

И҆ реко́ша дрꙋ́гъ къ дрꙋгꙋ кт̂о со́творѝ ве́щъ сїю и҆ въпраша́хꙋ і҆ и҆ска́хꙋ, и҆ реко́ша ꙗ҆́ко гедеѻ́нъ сн҃ъ и҆а́совъ сътвори́лъ е҆сть ве́щъ сїю·

И҆ реко́ша мꙋж́и грд̑астїи къ и҆ѻ҆а́сꙋ и҆зведѝ сн҃ъ тво́и, и҆ да ѹ҆́мретъ, ꙗ҆́ко раскопа̀ ѻ҆лтарь ваа́ль, и҆ ꙗ҆́ко посѣчѐ са́дъ и҆́же ѹ҆ него̀·

И҆ реч̑҇ и҆ѻ҆а́съ къ мꙋже́мъ въста́вшимъ на́нь, вы̀ л̂и нн҃ѣ прю̀ гл҃ете ѿ ваа́ла, и҆ вы̀ л̂и е҆го сп҃сетѐ, н̂о а҆́ще кт̂о сътвори́лъ е҆мꙋ е҆сть кривинꙋ̀, да ѹ҆́мретъ до заѹ҆́трїѧ, а҆́ще б҃ъ е҆сть да м꙽сти́тъ себѐ кт̂о раскопа̀ е҆го ѻ҆лтарь·

И҆ прозва́ша и҆̀ в то́и дн҃ь прѣт́ели ваа́ла рекꙋще да ѿм꙽сти́тъ на не́мъ ваа́ль.
кт̂о раскопа̀ ѻ҆л꙽тарь е҆го·

Тогда̀ ве́сь мадїа́мъ и҆ а҆мали́къ, и҆ сн҃ове въсток̑҇ снидо́шасѧ вкꙋ́пѣ, и҆ преидо́ша рекꙋ̀ и҆ ста́ша в доли́нѣ і҆ил҃ь·

дх҃ъ же бж҃їи бы́сть ѹ҆крѣплѧ́а гедеѻ́на и҆ въстрꙋби ро́гомъ, и҆ възпѝ а҆вїезе́ръ въ слѣ́дъ е҆го·

посла же послы̀ къ всемꙋ̀ манасїю, и҆ съзва́сѧ и҆ се́и въ слѣ́дъ е҆го, посе́мъ посла̀ послы̀ въ а҆си́ръ, и҆ въ заѹ҆ло́нъ, и҆ въ нефѳали́мъ, и҆ взыидоша сꙋпроти́витисѧ и҆мъ·

И҆ реч̑҇ гедеѻ́нъ къ б҃ꙋ, а҆́ще и҆́стинно сп҃са́еши рꙋко́ю моею і҆и҆л҃ѧ, ꙗ҆́коже гл҃а·

Се̂ а҆́зъ положꙋ̀ рꙋ́но во́лнѧно на тоцѣ̀, и а҆́ще роса̀ бꙋ́дет꙽ на́ рꙋ́нѣ то́чїю, а҆ по всеи зем̑лѝ сꙋша, т̂о ѹ҆ви́дѣ ꙗ҆́ко сп҃са́еши рꙋко́ю моею і҆и҆л҃ѧ, ꙗ҆́коже гл҃а·

И҆ бы́сть та́ко, и҆ ѻ҆бꙋт́рѣвъ гедеѻ́нъ наѹ҆́трїѧ, и҆збѝ рꙋ́но і҆ и҆ска́па и҆з рꙋ́на роса̀, и҆ напо́лни ча́шꙋ воды̀·

И҆ реч̑҇ гедеѻ́нъ къ б҃ꙋ, да не разгнѣ́ваетсѧ ꙗ҆́рость твоѧ̀ на́ мѧ, да гл҃ю е́щѐ е҆ді́ною, і҆ и҆скꙋшꙋ е҆щѐ е҆ді́ною, в рꙋ́нѣ се́мъ, да бꙋ́детъ в рꙋ́нѣ то́чїю сꙋша, а҆ по все́и землѝ роса̀ бꙋ́детъ·

И҆ сътворѝ б҃ъ в꙽ тꙋ но́щь та́ко, и҆ бысть сꙋ́хо на рꙋ́нѣ то́чїю, а҆ по все́и землѝ роса̀·

Глв̑҇а, з҃·

И ѻ҆бꙋтрѣ̀ ровоа́ль.
с̂е е҆сть гедеѻ́нъ.
и҆ вс̂и люди и҆же с ним̑, въполчи́шасѧ ѹ҆ и҆сто́чника а҆ред̑.
полкъ же мадїа́мль и҆ а҆мали́ков꙽ бѣа́ше е҆мꙋ с сѣ́вера на хо́лмѣ мо́се гава́ѳовѣ, а҆м꙽мор꙽реѻ҆вы в꙽ доли́не·

И҆ рече г҃ь къ гедеѻ҆́нꙋ.
мно́ѕи людїе и҆же с тобо́ю.
сего ра́ди не предам̑ мадїа́ма в рꙋкꙋ их̑.
да не когда̀ похва́литсѧ і҆и҆л҃ь на́ мѧ гл҃ѧ, рꙋка моа сп҃се мѧ·

И҆ нн҃ѣ гл҃и ѹ҆бо въ ѹ҆ши люде́мъ рекыи.
кт̂о боꙗ҆зливъ, и҆ ѹ҆жастив̑҇ да ѻ҆братит̑сѧ.
и҆ заѹ҆́тра и҆дѝ ѿ горы̀ галаа́довы.
и҆ ѻ҆брати́шасѧ ѿ людїи.
҂к҃в, а҆ і҃ тисѧщ̑҇ ѻ҆ста̀·

И҆ реч̑҇ г҃ь къ гедеѻ҆нꙋ, е҆щѐ людїе мно́ѕи сꙋть съведи ѧ҆̀ на́ водꙋ да тїѧ҆̀ и҆скꙋшꙋ̀ т̂ꙋ.
и҆ да бꙋ́дет̑ е҆гоже а҆ще нарекꙋ̀ тебѣ̀.
се́й да и҆дет̑ с тобо́ю.
а҆ е҆гоже а҆ще не нарекꙋ̀ да не и҆́детъ с тобо́ю·

И҆ сведѐ людѝ на́ воводꙋ·

И҆ рече г҃ь къ гедеѻ́нꙋ вс̂ѧ и҆же ло́четъ ꙗ҆зы́комъ свои҆мъ ѿ воды̀, ꙗ҆коже ло́четъ пе́съ.
да поста́виши и҆̀ ѻ҆ е҆ді́нꙋ.
и҆ весь и҆же на колѣ́нꙋ падет̑ и҆ пїе҆т꙽ во́дꙋ ѿлꙋчи и҆̀ ѻ҆ е҆ді́нꙋ<.>

И҆ быс̑҇ число̀ в го́рстехъ лока́вших̑ ꙗ҆зы́ком̑.
т҃ мꙋж́ь, и҆ вс̂и же ѻ҆ста́вшїи лю́дїе преклони́шасѧ на колѣ́нꙋ и҆хъ пи́ти во́дꙋ·

И҆ рече г҃ь къ гедеѻ҆́нꙋ, тре́ми ст̂ы мꙋж́ь лока́вшими во́дꙋ сп҃сꙋ в̂ы, и҆ предам̑ мадїа́ма в рꙋ́кꙋ твою.
и҆ вс̂и лю́дїе да и҆дт̑ꙋ на мѣ́ста своѧ̀·

И҆ взѧ́ша себѣ бра́шно ѿ людїи в рꙋкꙋ свое҆ю.
ро́гы своѧ̀ в꙽сего же і҆и҆л҃ѧ ѿпꙋстѝ въ хра́мы своѧ̀.
а҆ т҃, мж̑ꙋ ѹ҆дръжа.
по́лкъ же мадїа́мль бѣше ни́же е҆го̀ в доли́не.
бы́сть в т̂ꙋ нощ̑҇.
рече к немꙋ̀ г҃ь.
въста́въ и҆ снидѝ ѿсꙋ́дѣ ско́ро, в꙽ пол꙽къ ꙗ҆́ко предах̑ и҆хъ в рꙋ́кꙋ твою·

А҆́ще ли сѧ т̂ы бои́ши сни́ти.
т̂о снидѝ т̂ы и҆ ѳа́ра ра́бъ твои въ по́лкъ·

И҆ послꙋ́шаи да чт̂о възгл҃ютъ, и посе́мъ ѹ҆крѣпѣют̑ рꙋцѣ твоѝ и҆ сни́деши в꙽ полкъ, и҆ сни́де са́мъ, и҆ ѳа́ра ра́бъ е҆го в ча́сть.
н҃, тниковъ в꙽ по́лкъ·

Мадїа́м же и҆ а҆мали́къ и҆ вс̂и сн҃ове, въсто́къ стоа́хꙋ в поли́нѣ.
ꙗ҆́ко прꙋѕи мно́жествомъ.
и҆ вельблю́домъ их̑ не бѣа́ше чи́сла.
н̂о бѣа́хꙋ ꙗ҆́ко пѣсок̑҇ на кра́и мо́рстѣмъ мно́жествомъ·

И҆ вни́де та́мо гедеѻ́нъ.
и҆ с̂е е҆ді́нъ повѣ́даше сон̑҇ по́дрꙋгꙋ свое҆мꙋ.
и҆ рече се́й со́нъ е҆гоже ви́дѣхъ.
и҆ с̂е тѣ́сто хлѣ́ба ꙗ҆́чна, валѧꙗ҆́сѧ въ полкъ мадїа́мль.
и҆ привали́сѧ въ кꙋщи мадїа҆мъ.
и҆ побї ю҆̀, и҆ превратї ю҆̀.
и҆ паде́сѧ кꙋща·

И҆ ѿвѣща по́дрꙋгъ е҆го и҆ рече.
нѣ́сть т̂о тѣ́сто н̂о ко́пїе гедеѻ́ново, сн҃а и҆ѻ́сова мꙋж́а і҆и҆л҃ева.
преда́стъ г҃ь в рꙋкꙋ е҆го мадїа́ма, и҆ ве́сь по́лкъ·

И҆ бы́сть ꙗ҆́ко ѹ҆слы́ша гедеѻ҆́нъ повѣ́данїе сна̀ и҆ разсꙋже́нїе е҆го.
поклони́сѧ гв҃и и҆ ѻ҆брати́сѧ въ по́лкъ і҆и҆л҃евъ.
и҆ рече въста́нѣте ꙗ҆́ко предас̑҇ г҃ь в рꙋцѣ на́ши пол꙽къ мадїа́мль.

И҆ раздѣлѝ, т҃, мꙋж́ь на тр̂и нача́ткы.
и҆ вда́сть ро́гы в рꙋцѣ всѣмъ.
и҆ водоно́сы скꙋде́лны т꙽щѝ, и҆ свѣща средѣ водоно́совъ·

И рече и҆мъ мене смотри́те ꙗ҆ко аз̑ творю̀, та́коже и҆ вы́ сътвори́те, е҆гда а҆́зъ внїидꙋ въ ча́сть по́лка.
и҆ да бꙋ́детъ ꙗ҆́коже а҆́ще сътворю̀, та́коже да сътвори́те·

И҆ е҆гда̀ а҆́зъ въстрꙋблю ро́гом꙽, и҆ вс̂и и҆же со мно́ю да въстрꙋбите и҆ в̂ы в ро́гы ѻ҆́крс̑҇тъ по́лка.
и҆ да речетѐ ко́пїе б҃ꙋ и҆ гедеѻ҆́нꙋ·

И҆ вни́де гедеѻ҆́нъ, и҆ р҃, мꙋжъ и҆же с ним̑.
в꙽ ча́сть по́лка въ нача́стїе стра́жи сре́днее, и҆ ѹ҆бꙋже́нїемъ въста́виша стрежа́щихъ, и҆ въстрꙋ́биша ро́гы, и҆ съкрꙋшиша водоно́сы и҆же в рꙋкахъ и҆хъ.
и҆ вострꙋби́ша въ три начат̑ки в ро́ги сокрꙋша́юще водоно́сы, и҆ възѧ́ша в лѣ́вꙋю рꙋкꙋ свѣщи, и҆ въ десне́и рꙋцѣ и҆хъ ро́гы в нѧже трꙋби́ша.
и҆ възопи́ша ко́пїе гв҃и и҆ гедеѻ҆́нꙋ·

И҆ ста́ша кои҆ждо ѻ҆ себѣ ѻ҆́крестъ по́лка.
и҆ смѧте́сѧ ве́сь полкъ и҆ ѹ҆жасо́шасѧ и҆ побѣго́ша·

Сїи же трꙋби́ша, въ, т҃, рог̑҇.
и҆ положѝ г҃ь на́ нѧ ме́чь ко́ждо по́дрꙋгъ свое҆го въ все́мъ по́лъцѣ, и҆ пробѣж́е полкъ до виѳасе́пы.
и҆ даже до а҆вельмаѹ҆ла и҆ к тави́ѳꙋ·

И҆ созва́шасѧ мꙋжи і҆и҆л҃ьстїи ѿ неѳали́ма, и҆ ѿ а҆си́ра, и҆ ѿ всего̀ мана́сїѧ.
и҆ погна́ша въ слд̑ѣ мадїа́ма·

И҆ посла̀ послы̀ гедеѻн̑҇ въ ве́сь предѣлъ е҆фрѣмль гл҃ѧ, сни́дѣте въ срѣте́нїе мадїа́мꙋ.
и҆ варите им̑ во́дꙋ до веѳи́ра і҆ерда́на·

И҆ созва́шасѧ вс̂и мꙋ́жїе е҆фрѣмовы, и҆ пред̑ѿнѧ́ли во́дꙋ, до веѳи́ри, і҆е҆рда́на.
и ѧ҆ша, в҃, кнѧ́ѕѧ мадїа́млѧ.
ѻ҆ривꙋ, и҆ зи́вꙋ, и҆ ѹ҆би́ша ѻ҆рива в꙽ сꙋрѣ, а҆ зивꙋ ѹ҆би́ша въ е҆кевѣ.
и҆ погна́ша мадїа́ма.
и҆ главꙋ̀ ѻ҆ри́вовꙋ, и҆ зи́вовꙋ.
принесо́ша къ гедеѻ҆́нꙋ ѿ ѻ҆но́ѧ страны̀ і҆е҆рда́на·

Глв̑҇а, и҃·

И рекоша к немꙋ̀ мꙋ́жи е҆фрѣмли что̀ с̂е сътворѝ на́мъ ꙗ҆́ко не позва̀ нас̑҇ е҆гда по́иде вое҆ва́ти на мадїа́ма.
и҆ прѧ́хꙋсѧ с ни́мъ си́лно·

И҆ рече к ним̑ гедеѻ́нъ, не та́ко ли сътвори́хъ нн҃ѣ ꙗ҆́коже и҆ в̂ы.
не лꙋ́чшее л̂и собра́нїе послд̑ѣнее е҆фрѣмле, нежели собранїе вина̀ а҆вїезе́рова·

В рꙋкꙋ ва́шꙋ, предас̑҇ г҃ь кнѧ́ѕѧ мадїа́млѧ.
ѻ҆ри́ва, и҆ зи́ва.
и҆ что́же а҆́зъ могох̑ сътвори́ти ꙗ҆́коже в̂ы.
тогда̀ почѝ дх҃ъ их̑ ѿ него̀, вънегда̀ гл҃а им̑ сло́во с̂е·

И҆ прїиде гедеѻн̑҇ къ і҆ѻ҆ръда́нꙋ.
и҆ пре́иде сам̑ і҆ и҆же с ним̑, т҃, мж̑ꙋ а҆л꙽чни и҆ ѹ҆трꙋжде́ни гонѧ́ще·

И҆ реч̑҇ мꙋ́жем̑ сокхо́ѳскым̑.
дадите ѹ҆́бо мꙋжем̑ хлѣбы и҆же со мно́ю ꙗ҆́ко ал̑҇чни ст̑ꙋ.
аз̑ б̂о женꙋ̀ въ слд̑ѣ зеве́ѧ, и҆ салмона цр҃ѧ мадїам̑лѧ·

И҆ реко́ша кнѧ́ѕи съкхоѳе́иски е҆гда̀ глава̀ зеве́а и҆ салмо́на нн҃ѣ въ рꙋцѣ твое́и, ꙗ҆́ко да дамы̀ вое҆мъ твои҆мъ хлѣ́бы·

И҆ реч̑҇ гедеѻ҆́нъ не та́ко н̂о вънегда̀ преда́стъ г҃ь зеве́ѧ и҆ салмо́на въ рꙋ́кꙋ мою.
а҆́зъ сотрꙋ̀ пло́ти ва́ша те́рнїемъ въ пꙋсты́ни и҆ побы́лью·

И҆ възы́де ѿтꙋ́дꙋ въ ваѳанꙋ́илъ, и҆ гл҃а к ним̑ по се́мꙋ же.
и҆ ѿвѣща́ша е҆мꙋ мꙋ́жи ѳанꙋ́или, ꙗ҆́коже ѿвѣща́ша е҆мꙋ мꙋж́їе сокхо́ѳъстїи·

И҆ реч̑҇ гедеѻ҆́нъ мꙋж́емъ ѳанꙋ́ильским̑ рекꙋщ́е, внегда̀ ѻ҆брѧ́щꙋсѧ с ми́ромъ.
раскопа́ю столпъ с́еи·

Зеве́и же и҆ салмон̑҇, быша в꙽ карка́рѣ и҆ по́лкъ их̑ с ни́ми, до е҃і, тысѧщъ мꙋж́еи ѻ҆ставших̑ ѿ всего по́лка сн҃овъ въсто́чныхъ.
а҆ ѹ҆ме́рших̑ бѣа́ше, р҃, и҆ к҃ тысѧщъ мꙋж́ь дръжащих̑ ко́пїе·

И҆ възы́де гедеѻ҆́нъ пꙋте́мъ живꙋщ́ихъ въ кꙋщахъ.
ѿ восто́къ а҆нава́и прѧ́мо на́вы.
і҆ и҆збѝ по́лкъ.
по́лкъ же бѣа́ше ѹ҆пова́ющъ·

И҆ пробѣгнꙋ́ста зеве́и, и҆ салмо́на.
и҆ гна̀ въ слд̑ѣ и҆хъ и҆ ѧ҆̀ ѻ҆́ба̀ цр҃ѧ мадїа́млѧ.
зеве́ѧ, и҆ салмо́на.
и́ весь по́лкъ е́ю рас꙽сыпа·

И҆ ѻ҆брати́сѧ гедеѻ҆́нъ сн҃ъ и҆ѻ҆а́совъ ѿ ра́ти, пре́жде въсхо́да сл҃нца·

И҆ ѧ̀ ѻ҆тро́чищъ ѿ мꙋже́и сък꙽хо́ѳъ, и҆ въпраша е҆го.
и҆ въписа̀ ѿ него̀ кнѧ́ѕѧ сок꙽хо́ѳ꙽скы.
и҆ ста́рца и҆хъ, ѻ҃, и҆ сед̑мь мꙋ́жь·

И҆ прїиде гедеѻ҆́нъ къ мꙋже́мъ сокхо́ѳъ.
и҆ реч̑҇ и҆мъ с̂е зеве́и и҆ салмо́нъ, и҆хже ради ѹ҆кори́сте м̂ѧ гл҃юще.
е҆да̀ глава̀ зеве́а и҆ салмо́на,<.>

И҆ нн҃ѣ въ рꙋ́цѣ твое́и.
да дадим̑ мꙋжемъ твоим̑·

ѿ ѹ҆трꙋж́дъшим꙽сѧ хлѣ́бы·

И҆ поѧ̀ кнѧ́ѕи и҆ ста́рца град̑ныѧ, и҆ те́рнїе, ѿ пꙋсты́ни и҆ наказа̀ и҆мъ мꙋ́жа сокхо́ѳ꙽ски.
и҆ сто́лпъ ѳанꙋ́иль раскопа̀.
і҆ и҆збѝ мꙋж́а град̑ныѧ·

И҆ реч̑҇ къ зеве́ю и҆ салмо́нꙋ.
ꙗ҆́ко в̂ы мꙋж́и ꙗ҆́же и҆зби́сте въ ѳаво́рѣ.
и҆ рѣша ꙗ҆ков̑҇ т̂ы таковїи ѻ҆нѝ.
подо́бен꙽ ты е҆си и҆мъ.
ко́ждо б̂о их̑ ѻ́бразомъ ꙗ҆́ко сн҃ове цр҃ьски·

И҆ реч̑҇ гедеѻн̑҇ бра́тїа моа и҆ сн҃ове мт҃ре мое́ѧ ст̑ꙋ.
жи́въ г҃ь а҆́ще бы́сте живи́ли и҆хъ.
не ѹ҆билъ бы́хъ ва́съ·

И҆ реч̑҇ е҆ѳе́рꙋ прьвенцꙋ̀ свое҆мꙋ въста́въ ѹ҆бїи их̑, и҆ не и҆звлечѐ ѻ҆тро́чищь меча̀ свое҆го, ѹ҆боѧ́сѧ млад̑ б̂о бѣаше·

И҆ реч̑҇ зеве́а и҆ салмо́на.
въста́ни ѹ҆бо т̂ы и҆ съпротиви́сѧ на́ю, ꙗ҆́ко́въ б̂о мꙋжъ та́ко и҆ си́ла е҆го.
и҆ въста́въ гедеѻн̑҇ ѹ҆бѝ зеве́ѧ и҆ салмо́на.
и҆ взѧ̀ мо́хры ꙗ҆же на вы́ѧхъ вельблю́домъ и҆хъ·

И҆ реко́ша мꙋж́и і҆и҆л҃ьстїи къ гедеѻ́нꙋ.
владѣ́и т̂ы в нас̑҇ и҆ сн҃ове сн҃овъ твоих̑, ꙗ҆́ко т̂ы сп҃се нас̑҇ ѿ рꙋ́кꙋ мадїа́млю·

И҆ реч̑҇ к ни́м꙽ гедеѻ́нъ не владѣ́ю а҆́зъ ва́ми.
н̂и воз꙽владѣ́етъ сн҃ъ мо́и ва́ми.
н̂о г҃ь да владѣе́тъ ва́ми·

И҆ реч̑҇ к ним̑ гедеѻн̑҇ прошꙋ ѹ҆ васъ е҆ді́ноѧ вещи.
да мѝ дасть мꙋж́ь ѹ҆серѧ́зь ѿ полона̀ свое҆го, ꙗ҆́ко ѹ҆серѧ́зи зла́ты мно́ѕи бѧхꙋ и҆мъ.
зане́же и҆зъмалтѧне бѧ́хꙋ·

И҆ реко́ша даю́ще да́мы и҆ простроша ри́зꙋ.
и҆ възверго́ша т̂ꙋ мꙋж́и ѹ҆серѧ́зь злат̑ полона̀ свое҆го·

И҆ бы́сть мѣра ѹ҆серѧ́зь зла́тыхъ, и҆хже ѹ҆просѝ ты́сꙋща, и҆ з҃ сот̑, сикль зла́та ра́звѣе плениц̑҇, и҆ ѻ҆дѣнїи е҆м꙽ѳоѳовых̑.
и҆ ри́зъ багрѧ́ныхъ ꙗ҆же на цр҃ихъ мадїа́млихъ·

ра́звѣе гри́венъ златыхъ, ꙗ҆́же на вы́ѧхъ вельблюд̑ и҆хъ·

И҆ сътвори ѿ нихъ гедеѻ́нъ ꙗ҆́ко ри́зꙋ жре́ческꙋ, и҆ постави и҆̀ въ гра́дѣ свое҆мъ е҆фраѳа и҆ съблꙋдѝ ве́сь і҆и҆л҃ь въ слд̑ѣ е҆го та́мо и҆ бы́сть гедеѻ́нꙋ и҆ всемꙋ̀ е҆го до́мꙋ въ собла́знь·

И҆ премѣни́сѧ мадїа́мъ пред̑ сн҃ы і҆и҆л҃евы.
и҆ не приложи́ша въздви́гнꙋти гла́вы свое҆ѧ, и҆ бы́сть въ покоѝ землѧ̀, м҃, лт̑ѣ.
въ дн҃и гедеѻ́новы·

І҆ и҆де е҆рова́ль сн҃ъ и҆ѻа́сов̑҇ и҆ сѣ́де в домꙋ̀ свое҆мъ·

Гедеѻ́нꙋ же бѣше, ѻ҃, сн҃овъ, и҆зшед̑шїи ѿ чре́слъ е҆го.
ꙗ҆́ко же́ны бѣхꙋ мно́гы е҆мꙋ·

И҆ подло́жница е҆го ꙗ҆́же в сики́мѣ и҆ с̂и родѝ е҆мꙋ сн҃ъ.
и҆ нарече и҆́мѧ е҆мꙋ а҆вимеле́хъ·

И҆ ѹ́мре гедеѻ́нъ сн҃ъ и҆ѻ҆а҆с꙽со́въ.
въ ста́рости бла́зѣ.
и҆ погребе́сѧ въ горѣ̀ і҆ѻ҆а́сса ѿц҃а е҆го въ веѳра́ѳе.
ѿц҃а е҆здрые҆ва·

И҆ бы́сть ꙗ҆ко ѹ҆́мре гедеѻ́нъ, съврати́шасѧ сн҃ове і҆и҆л҃еви, и҆ съблꙋди́ша въ слѣ́дъ ваали́ма.
и҆ сътвори́ша себѣ̀ ваа́львери́ѳа въ за́вѣтъ, да и҆мъ бꙋ́дет꙽ бг̑҇о·

И҆ не въспомѧнꙋша сн҃о і҆и҆л҃еви г҃а б҃а свое҆го, и҆збавльшаго ѧ҆̀ и҆з рꙋкы всѣ́хъ вра́гъ и҆хъ ѻ҆́крс̑҇тныхъ·

И҆ не сътвори́ша милости съ домо́мъ і҆е҆роа́ловым̑, сїи е҆сть гедеѻ́нъ по все́и млти е҆го и҆же сътворѝ съ і҆ил҃емъ·

Глв̑҇а, ѳ҃·

И і́де а҆вимеле́хъ сн҃ъ і҆е҆ровоа́мль въ сикемъ, къ бра́тїи мт҃ре свое́ѧ.
и҆ рече к ни́мъ и҆ къ всемꙋ̀ племе́ни до́мꙋ ѿц҃а мтр҃и свое҆ѧ гл҃юще·

Гл҃ите с̂е въ ѹ҆́ши всѣм꙽ мꙋжем̑ сиким̑скимъ, чт̂о бл҃жїе вамъ с̂е лѝ и҆же владѣти ва́ми, ѻ҃, мꙋж́ь вс̂и сн҃ове і҆е҆роваа́мли, и҆л̂и владѣти вам̑ мꙋж́ꙋ е҆ді́номꙋ, и҆ помѧни́те ꙗ҆́ко ко́сть ва́ша и҆ пло́ть ва́ша е҆смь а҆́зъ·

И҆ гл҃аша бра́тїа мт҃ри е҆го ѻ҆ немъ, въ ѹ҆́ши всѣ́хъ мꙋжь сике́м꙽скъ, вс̂ѧ словеса̀ с̂и.
и҆ ѹ҆клони́сѧ срд̑це и҆х꙽ въ слд̑ѣ а҆вимеле́ха, реко́ша б̂о ꙗ҆ко бра́тъ на́шъ е҆сть·

И҆ даша е҆мꙋ ѻ҃, сребре́никъ ѿ до́мꙋ ваа́ла, фериѳа.
и҆ наѧ̀ и҆́ми а҆вимеле́хъ мꙋже́въ млады́хъ и҆ лѣ́пыхъ.
и҆ хожда́хꙋ въ слд̑ѣ е҆го·

И҆ прїиде в дом̑ ѿц҃а свое҆го въ е҆ѳра́ѳꙋ, і҆ избѝ бра́тїю свою сн҃ы е҆ровоа́левы, ѻ҃, мꙋжъ на ка́мени е҆ді́номъ.
толико ѻ҆ста̀ і҆ѻ҆а҆ѳа́мъ сн҃ъ і҆ѻ҆ровоа́ль мнїи съкры́ бо сѧ·

И҆ собра́шасѧ вс̂и мꙋж́и сике́м꙽стїи.
и весь до́мъ маа́ловъ.
и҆ шед̑ше и҆ поста́виша а҆вимеле́ха цр҃емъ, ѹ҆ вала́нѧ ста́нꙋ и҆же в сики́мехъ·

И҆ повѣ́даша с̂е и҆ѻ҆а́ѳамꙋ.
и҆ шед̑ ст̂а на вр́ъхъ горы̀ газири́н꙽.
и҆ въздви́же гла́съ свои и҆ възва̀ рече и҆мъ.
послꙋша́ите менѐ мꙋж́и сики́м꙽стїи, да и҆ васъ ѹ҆сли́шитъ б҃ъ·

И҆дꙋщ́и и҆до́ша дре́ва і҆и҆збра́ти себѣ̀ цр҃ѧ.
и҆ рѣша масли́чинѣ бꙋ́ди нам̑ цр҃ь·

И҆ рече и҆мъ масли́чина.
и҆л̂и ѻ҆ста́вивши сы́тость свою̀, е҆же въ мнѣ̀ просла́ви б҃ъ и҆ чл҃цы.
да и҆дꙋ̀ владѣти древа́ми·

И҆ реко́ша древа̀ смо́кви, прїиди и҆ црс̑҇твꙋи над̑ на́ми·

И҆ рече им̑ смо́кви, ѻ҆ста́вивши свою сладость и҆ плод̑ сво́и бл҃гыи, да и҆дꙋ̀ владѣти древа́ми·

И҆ реко́ша древа̀ к виногра́дꙋ.
прїиди и҆ бꙋ́ди нам̑ цр҃ь·

И҆ рече им̑ виноград̑ ѻ҆ста́вивши л̂и вино̀ свое и҆ весе́лїе члчс̑҇ко.
да и҆дꙋ̀ владѣти древа́ми·

И҆ посем̑ реко́ша вс̂и древа̀ те́рьнїю.
прїиди и҆ бꙋ́ди намъ цр҃ь·

И҆ реч̑҇ те́рнїе къ древам̑.
а҆ще по и҆́стиннѣ и҆збира́ете себѣ цр҃ѧ менѐ.
т̂о прїидѣте и҆ внїи́дѣте под̑ сѣ́нь мою̀.
а҆ще ли же н̂и т̂о и҆зы́де ѻ҆́гнь и҆зъ те́рнїа и҆ попалит̑ вс̂ѧ ке́дры лива́нъскыѧ·

И҆ нн҃ѣ а҆́ще по и҆́стин꙽нѣ и҆ по съвръше́нїю творитѐ, поставлѧ́юще а҆вимеле́ха цр҃емъ.
и҆ а́ще е҆сте добро̀ сътвори́ли съ і҆ѻ҆ровоа́мом̑ и҆ з до́момъ е҆го.
и҆ а́ще по ѿда́нїи рꙋкы̀ е҆го сътвори́сте е҆мꙋ·

Поне́же вое҆ва̀ ѿц҃ъ мо́и по вас̑҇ и҆ дава́ше дш҃ꙋ свою проти́вꙋ.
і҆ и҆зба́ви вас̑҇ ѿ рꙋкы̀ мадїа́млѧ·

Вы же въста́сте на до́мъ ѿц҃а мое҆го дне́сь, и҆зби́сте сн҃ове е҆го.
ѻ҃, мꙋжъ на е҆ді́номъ ка́мени, и҆ поста́висте цр҃ем꙽ а҆вимеле́ха, сн҃а рабы̀ е҆го над̑ мꙋжи сики́мски ꙗ҆́ко бра́тъ ва́шъ е҆сть·

І҆ а́ще по и҆́стин꙽нѣ с̂е и҆ по соверше́нїи сътвори́сте, съ и҆е҆ровоа́ломъ и҆ до́мом̑ е҆го дне́сь, блс̑҇вени в̂ы бꙋ́дете и҆ весе́ли, ѻ҆ а҆вимеле́сѣ и҆ тои ѻ҆ ва́съ·

А҆ще ли же н̂и да и҆зы́иде ѻ҆́гнь и҆з꙽ а҆вимеле́ха и҆ попали́тъ мꙋжа сиким̑ски, и҆ до́мъ маа҆ло́нь и҆ посе́м꙽ да и҆зы́иде ѻ҆́гнь ѿ мꙋжъ сики́мских̑, и҆ ѿ до́мꙋ моа҆ло́нѧ, и҆ попалѝ а҆вимеле́ха·

И҆ ѿи҆́де и҆ѻ҆а҆ѳа́мъ и҆ пробѣже, і҆ и́де въ ви́рꙋ, и҆ всели́сѧ т̂ꙋ, ѿ лица̀ а҆вимеле́ха бра́та свое҆го·

И҆ ѻ҆блада̀ а҆вимеле́хъ въ і҆и҆л҃и, г҃ лѣта·

И҆ посла̀ б҃ъ дх҃ъ ѕол̑҇ межд̑ꙋ а҆вимеле́хом̑, и҆ междꙋ̀ мꙋжи сики́м꙽скими.
и҆ погордѣш́а мꙋжѝ сики́мъстїи а҆вемеле́хомъ·

Ꙗ҆́ко да възы́детъ ѿмще́нїе.
о҃, сн҃овъ и҆е҆ровоа҆и́ль.
и҆ кро́ви их̑ да възло́жатъ на а҆вимеле́ха бра́та и҆хъ, и҆же ѹ҆би́въ и҆хъ.
и҆ на мꙋжа сики́м꙽ски и҆же ѹ҆крѣпи́ша рꙋцѣ е҆го.
ѹ҆би́ти бра́тїю свою·

И҆ поста́виша на́нь мꙋжи сики́мстїи под̑са́ды.
на връсѣ́хъ го́рских̑.
и҆ разграблѧ́хꙋ вс̂ѧ и҆дꙋщаѧ к ни́мъ на пꙋтѝ.
и҆ повѣ́дахꙋ с̂е а҆вимеле́хꙋ·

И҆ по се́мъ прїиде гаа́лъ сн҃ъ а҆ве́довъ и҆ бра́тїа е҆го.
и҆ прїидо́ша в꙽ сики́мꙋ.
и҆ ѹ҆пова́ша на́нь мꙋжѝ сики́мстїи·

І҆ и҆зыдо́ша на село̀.
и҆ ѻ҆бъи҆ма́ша виногра́ды своѧ̀.
і҆ и҆згнета́хꙋ и҆ сътвори́ша ли́ки.
и҆ ходи́ша въ хра́мъ бого́въ свои҆хъ.
и҆ ꙗ҆́ша и҆ пи́ша, кленꙋще а҆вимеле́ха·

И҆ рече гаа́дъ сн҃ъ а҆ве́довъ.
чт̂о е҆сть а҆вимеле́хъ.
и҆л̂и чт̂о е҆сть сн҃ъ сꙋхе́мовъ, ꙗ҆́ко да рабо́тае҆мъ е҆мꙋ.
нѣ́сть л̂и се́и сн҃ъ и҆е҆рова́ль, и҆ зеѹ҆́ль.
и҆же е҆сть страж̑ е҆го да слꙋжим̑ лꙋ́чше мꙋжем̑ е҆мо́ра ѿц҃а сꙋхе́млѧ.
и҆ почто и҆ма́мы рабо́тати е҆мꙋ·

И҆ ктоже с̂е да́сть да бꙋ́дꙋтъ лю́дїе сїи въ рꙋ́кꙋ мое҆ю.
и҆ преставлю̀ а҆вимеле́ха, и҆ речѐ, къ а҆вимеле́хꙋ ѹ҆мно́жи си́лꙋ твою̀, і҆ и҆зы́иди·

И҆ ѹ҆слы́ша с̂е зеѹ҆́ль кнѧ́ѕь гра́да, словеса̀ гаа҆ла сн҃а а҆ве́дова.
и҆ разгнѣ́васѧ ꙗ҆́ростїю·

И҆ посла̀ послы̀ къ а҆вимеле́хꙋ съ ле́стїю гл҃ѧ.
с̂е гаа҆дъ сн҃ъ а҆ве́довъ, и҆ бра́тїа е҆го прїидо́ша в꙽ сики́мꙋ.
и҆ сїи въставлѧ́ютъ на́ тѧ град̑·

И҆ нн҃ѣ въста́ни но́щїю т̂ы, и҆ вс̂и лю́дїе тво́и с тобо́ю.
и҆ под̑сѣдѝ до заѹ҆́трїѧ ѹ҆ селѐ·

И҆ е҆гда̀ бꙋ́дет꙽ да́но, ꙗ҆́ко възы́дет̑ слн҃це, ѻ҆бꙋтрѣ́ю и҆ протѧгни́сѧ къ гра́дꙋ.
и҆ а҆ще то́й са́мъ и҆ лю́дїе и҆же с ним̑ и҆зы́дꙋтъ к тебѣ.
т̂о сътвори́ши е҆мꙋ ꙗ҆коже а҆́ще возмо́же рꙋка̀ твоѧ·

И҆ въста̀ а҆вимелех̑ и҆ вс̂и лю́дїе и҆же с ни́мъ но́щїю.
и҆ под̑сѣдоша в сики́мѣ, на д҃, ча́сти·

И҆ бы́сть заѹ҆́тра і҆ и҆зы́де гаа́лъ сн҃ъ а҆ве́довъ.
и҆ ст̂а пред̑ вра́ты гра́дꙋ.
и҆ въста̀ а҆вимеле́хъ и҆ лю́дїе и҆же с ним̑ ѿ под̑са́ды·

И҆ видѣ̀ гаа҆л꙽ сн҃ъ а҆ве́дов̑҇ лю́ди.
и҆ рече к꙽ зеѹ҆́лю.
с̂е народ̑ людїи и҆схо́дитъ съ ве́рхъ го́рских꙽.
и҆ рече к немꙋ зеѹ҆́ль, стѣ́ню дꙋбра́вы ты̀ ви́диши ꙗ҆ко мꙋжа·

И҆ приложѝ е҆щѐ гаа́лъ гл҃ати.
и҆ рече се лю́ди и҆схо́дѧтъ ѿ высоты̀ землѧ̀.
и҆ пол̑҇къ е҆ді́нъ и҆де́тъ ѿ пꙋтѝ дꙋбра́в꙽ска ви́дѧщимъ·

И҆ рече к немꙋ зеѹ҆́ль гдѣ сꙋтъ нн҃ѣ ѹ҆ста̀ твоѧ̀ гл҃щаа чт̂о е҆сть а҆вимеле́хъ да рабо́тае҆мъ е҆мꙋ.
не се л̂и сꙋть лю́дїе ꙗ҆́же ты̀ ѹ҆корѝ.
и҆зы́ди ѹ҆бо нн҃ѣ и҆ въполчи́сѧ проти́вꙋ е҆мꙋ·

І҆ и҆зы́де гаа́дъ пред̑ мꙋжи сиким̑ски, и҆ ста̀ проти́вꙋ а҆вимеле́хꙋ·

И҆ прогна̀ и҆̀ а҆вимеле́х꙽, ѻ҆́н꙽же пробѣгнꙋ ѿ лица̀ е҆го.
и҆ падо́ша ꙗ҆зве́нїи мно́ѕи до вра́тъ град̑ных̑·

И҆ ѻ҆бита̀ а҆вимеле́хъ въ а҆ри́мѣ.
зеѹ҆́ль же и҆згна̀ гаа́ла и҆ бра́тїю е҆го да не живꙋтъ в꙽ сихе́мꙋ·

И҆ бы́сть наѹ҆́трїѧ и҆зыдо́ша лю́дїе на́ поле.
и҆ повѣ́даша а҆вимеле́хꙋ·

И҆ поѧ̀ лю́дїе и҆ раздѣлѝ на тр̂и ча́сти и҆ заста́ви под̑садꙋ на селѣ̀ и҆ ви́дѣ.
и҆ с̂е лю́дїе и҆схожда́хꙋ и҆з гра́да.
и҆ въста̀ на́ нѧ і҆ и҆збѝ и҆хъ·

А҆вимелех̑ же и҆ старѣ́ишины ꙗ҆́же с ни́мъ протѧго́шасѧ, и҆ ста́ша ѹ҆ вра́тъ гра́да.
а҆ дв̂ѣ ча́сти пролїа́шасѧ на вс̂ѧ ꙗ҆же на селѣ̀ і҆ и҆збѝ ѧ҆̀·

А҆вимеле́х же добыва́ше гра́да ве́сь дн҃ь то́и, и҆ взѧ̀ гра́дъ и҆ лю́ди и҆же в не́мъ.
и҆збѝ и҆ разори́ша гра́дъ и҆ посѣ́ѧ в꙽ не́мъ со́ль·

И҆ ѹ҆слы́шаша с̂е вс̂и мꙋжи столпа̀ сихе́млѧ и҆ внидо́ша въ тве́рдь до́мꙋ бога веѳи́ль вери́ѳъ·

И҆ повѣда́ша а҆вимеле́хꙋ, ꙗ҆́ко събра́шасѧ та́мо вс̂и мꙋжи столпа̀ сики́мска·

И҆ взы́де а҆вимеле́хъ в горꙋ̀ е҆л꙽моновꙋ.
са́мъ и҆ вси лю́дїе и҆же с ни́мъ.
и҆ взѧ̀ а҆вимеле́хъ секи́рꙋ в рꙋкꙋ свою и҆ ѹ҆сѣче сно́пъ вѣтвїѧ ѿ дре́ва.
и҆ воздви́же и҆̀ и҆ положѝ на ра́мꙋ свою.
и҆ рече лю́дем̑ и҆же с ни́мъ.
чт̂о ви́дѣсте м̂ѧ творѧ́ща.
сътвори́те и҆ вы̀ ско́ро ꙗ҆́коже і҆ а́зъ·

И҆ ѹ҆сѣко́ша вс̂и лю́дїе вѣтвїѧ, и҆ взѧ́ша и҆ пои҆до́ша въ слѣ́дъ а҆вимеле́ха.
и҆ възложи́ша на тверди́ль.
и҆ запали́ша ѻ҆́нѣхъ тверди́ль ѻ҆гне́мъ.
і҆ и҆змро́ша вс̂и лю́дїе столпа̀ сики́м꙽ска до, ҂а҃. мꙋже́и и҆ женъ·

И҆ посе́мъ и҆́де а҆вимеле́хъ въ ѳиви́с꙽, и҆ ѻ҆бсѧ́де е҆го и҆ взѧ̀ е҆го·

Сто́лпъ же б̂ѣ тве́рдъ средѣ града и҆ вбѣгнꙋша т̂ꙋ вс̂и мꙋжа и҆ же́ны, и҆ вс̂ѧ старѣ́ишины гра́да.
и҆ заключи́шасѧ сами же и҆ в꙽зыидо́ша на възгражде́нїе столпа̀·

И҆ прїиде а҆вимелехъ до столпа̀.
и҆ сꙋпротиви́стасѧ е҆мꙋ.
и҆ пристꙋпѝ а҆вимеле́хъ до вра́тъ столпꙋ̀, запали́ти е҆го хотѧ̀ ѻ҆гнемъ·

И҆ све́рже жена̀ е҆ді́на и҆зло́мок̑҇ жерно́вныи, на главꙋ̀ а҆вимеле́хꙋ.
и҆ съкрꙋшѝ е҆мꙋ тѣмѧ·

И҆ възопѝ ско́ро а҆вимеле́хъ къ ѻ҆́трокꙋ носѧ́щемꙋ сосꙋды е҆го.
и҆ рече е҆мꙋ и҆звлецѝ ме́чъ твои и҆ ѹ҆бїи мѧ.
да не рекꙋт꙽ ꙗ҆́ко жена̀ ѹ҆бѝ е҆го.
и҆ прободѐ и҆̀ ѻ҆́трокъ е҆го, и҆ ѹ́мре т̂ꙋ·

И҆ ви́дѣша мꙋжи і҆и҆л҃ьсти ꙗ҆́ко ѹ҆же ѹ҆́мре а҆вимелех̑.
и҆ ѿи́де ко́иждо на свое мѣ́сто·

И҆ ѿда̀ б҃ъ ѕл̂о а҆вимеле́хꙋ ꙗ҆́же сътворѝ ѿцꙋ свое҆мꙋ.
и҆же ѹ҆би́въ, ѻ҃. бра́тїѧ свое҆ѧ·

Та́коже и҆ вс̂ѧ ѕло́бы мꙋжїи сихе́мль, и ѿда̀ б҃ъ на главꙋ̀ и҆хъ.
и҆ взы́иде на́ нѧ клѧ́тва.
и҆ѻ҆а҆ѳе́ма, сн҃а і҆е҆рова́лѧ·

Глв̑҇а, і҃·

И въста̀ по а҆вимеле́сѣ спс̑҇ти сн҃ы і҆и҆л҃ѧ.
ѳо́ла сн҃ъ ѳꙋ́а сн҃ъ бра́та ѿч҃а е҆мꙋ, мꙋж꙽ ѿ и҆саха́ра.
се́и же живѧ́ше в семарѣ в горѣ̀ е҆фре́мовѣ·

И҆ сꙋдѝ і҆и҆л҃еви.
лт̑ѣ, к҃г.
и҆ ѹ҆мре, и҆ погребе́нъ бы́сть в сема́рѣ·

И҆ въста̀ по не́мъ и҆а҆и́ръ галаа҆ди́тинъ.
и҆ сꙋди і҆и҆л҃еви.
лт̑ѣ, к҃в·

И҆ бы́сть е҆мꙋ сн҃овъ, л҃, е҆здѧ́щихъ.
на.
л҃ ѻ҆слехъ.
гра́ди же и҆мъ.
л҃, и҆же прозыва́хꙋ ѧ҆̀ и҆а҆и́ровы да́же до дн҃е, и҆же сꙋть в꙽ землѝ галаа́довѣ·

И҆ ѹ́мре и҆а҆и́ръ.
и҆ погребе́нъ бысть въ и҆камо́нѣ·

И҆ приложи́ша сн҃ве і҆и҆л҃ви твори́ти ѕло́е пред̑ гм҃ъ.
и҆ послꙋжи́ша ваа́лимꙋ и҆ а҆старо́ѳꙋ и҆ бого́мъ сѷр꙽скимъ.
и҆ бого́мъ сидо́ньскимъ.
и҆ бого́мъ моа́вльскимъ.
и҆ бого́мъ сн҃овъ а҆м꙽монь, и҆ богом̑ и҆ноплемен̑҇ник̑҇.
и҆ ѻ҆ста́виша г҃а, и҆ не рабо́таша е҆мꙋ·

И҆ разгнѣвасѧ г҃ь ꙗ҆́ростїю на і҆и҆л҃ѧ.
и҆ въда́сть ѧ҆̀ в꙽ рꙋкꙋ ѳилисти́мꙋ.
и҆ в꙽ рꙋкꙋ сн҃овъ а҆м꙽мо́нь·

И҆ заѕлиша.
и҆ ѻ҆печали́ша сн҃ы і҆и҆л҃евы в т̂о вре́мѧ.
и҃і, лѣтъ.
всѣхъ сн҃овъ і҆и҆л҃евыхъ и҆же ѻ҆бонꙋ странꙋ і҆ѻ҆рда́на в꙽ землѝ ам̑мор꙽ре́истеи, и҆же в галаа́дѣ·

И҆ посем̑ проидо́ша сн҃ове а҆мъмо́ни і҆е҆рда́нъ, вое҆ва́ти на і҆ю́дꙋ и҆ венїа҆ми́на.
и҆ на до́мъ е҆фре́мов̑҇.
и҆ въскорбѣша сн҃ове і҆и҆л҃еви ѕѣло·

И҆ възопи́ша сн҃ове і҆и҆л҃еви къ г҃ꙋ гл҃юще.
съгрѣши́хомъ к тебѣ, ꙗ҆́ко ѻ҆ста́вихомъ б҃а нашего, и҆ рабо́тахомъ ваа҆ли́мꙋ·

И҆ рече г҃ь къ сн҃омъ і҆и҆л҃вым̑ не ѿ е҆гѷпта л̂и.
и҆ ѿ ам̑мор꙽ре́ѧ и҆ ѿ сн҃ов꙽ а҆м꙽мо́нь.
и҆ ѿ ѳилисти́ма·

И҆ ѿ сидо́нѧнъ.
и҆ ѿ а҆мали́ка, и҆ ѿ мадїа҆ма и҆же стꙋжи́ша ва́мъ.
и҆ ꙗ҆ко възопи́сте къ мн̂ѣ, и҆ сп҃сохъ вы̀ ѿ рꙋкѝ их̑.

Вы́ же ѻ҆ста́висте менѐ и҆ рабо́тасте бого́мъ и҆нѣм꙽.
сего̀ ради не приложꙋ̀ спс̑҇ти ва́съ·

И҆дѣте и҆ възопїите къ бого́мъ ꙗ҆́же и҆збра́сте себѣ̀.
и҆ т̂и да сп҃сꙋтъ в̂ы въ вре́мѧ ско́рби ва́шеѧ·

И҆ рѣша сн҃ове і҆и҆л҃еви къ г҃ꙋ.
съгрѣши́хомъ сътворѝ т̂ы нам̑ по всемꙋ̀ е҆ли́ко го́дѣ бы́сть пред̑ ѻ҆чи́ма твои҆ма.
то́чїю и҆зба́ви насъ в꙽ сїи дн҃ь·

І҆ и҆звергоша богѝ чю́ждаѧ ѿ средѣ себѐ и҆ послꙋжи́ша гв҃и е҆ді́номꙋ и҆ съжалѣ́сѧ дш҃а е҆го.
трꙋжде́нїѧ і҆и҆л҃ева и҆ поми́лова их̑·

И҆ събра́шасѧ сн҃ове а҆м꙽мо́ни, и҆ ста́ша в꙽ галаа́дѣ събра́шасѧ та́кожде и҆ сн҃ове і҆и҆л҃еви и҆ въполчи́шасѧ въ стра́жбѣ·

И҆ рѣша кн҃ѕи людїи гала́дъскихъ, ко́ждо дрꙋгъ дрꙋгꙋ.
кождо мꙋжъ и҆же начне́тъ би́тисѧ съ сн҃ъми а҆м꙽моновыми.
то́и бꙋдетъ кн҃ѕь всѣмъ живꙋщимъ в꙽ галаа́дѣ·

Глв̑҇а, а҃і·

И бы́сть е҆́ѳа галаа́д꙽скїи мж̑ꙋ во́ин꙽.
и҆ си́лныи крѣп́остїю, се́и же быс̑҇ сн҃ъ жены̀ блꙋ́дница, и҆же родѝ галаа́дꙋ, і҆е҆ѳа́ѧ.
и҆ роди́ же и҆ жена галаа́дова сн҃овъ е҆мꙋ.
и҆ е҆гда̀ възмꙋжа́ша сн҃ове жены̀.
и҆згна́ша е҆ѳа́ѧ.
и҆ реко́ша е҆мꙋ не причасти́шисѧ в꙽ домꙋ̀ ѿц҃а на́шего.
ꙗко жены̀ блꙋ́дныѧ е҆си т̂ы·

И҆ ѿи́де і҆е҆ѳа́и ѿ лица̀ братїѧ свое҆ѧ.
и҆ всели́сѧ въ землѝ то́вовѣ.
и҆ събира́хꙋсѧ къ е҆ѳа́ю мꙋжи про́сти, и҆ хожда́хꙋ с ни́мъ·

И҆ быс̑҇ по днехъ сихъ вое҆ва́ша сн҃ове а҆ммо́ни на і҆и҆л҃ѧ·

И҆ внегда̀ вое҆ва́ша сн҃ве а҆м꙽мо́ни на і҆и҆л҃ѧ.
и҆до́ша ста́рцы галаа́дови поѧ́ти е҆ѳа́ѧ ѿ землѧ̀ то́вовы·

И҆ реко́ша къ е҆ѳа́еви.
прїидѝ да н̂ы бꙋдеши старѣ́ишина.
да сѧ вополчи́мъ на сн҃ы а҆м꙽мо́нѧ·

И҆ рече е҆ѳа́и ста́рцемъ галаа́дъским꙽.
не вы́ л̂и ѹ҆бо възненави́дѣсте м̂ѧ.
і҆ и҆згна́сте мѧ и҆з до́мꙋ ѿц҃а мое҆го, и҆ ѿпꙋсти́сте мѧ ѿ себѐ.
т̂о почто̀ прїидо́сте къ мн̂ѣ нн҃ѣ, в꙽негда̀ печа́лни е҆сте·

И҆ реко́ша ста́рцы галаа́д꙽стїи къ е҆ѳа́еви.
сего̀ ради н҃нѣ прїидо́хомъ к тебѣ̀.
да и҆́деши с на́ми и҆ да въполчи́мсѧ на сн҃ы а҆м꙽мо́ни и҆ бꙋ́деши на́мъ кн҃ѕь всѣмъ живꙋщимъ в галаа́дѣ·

И҆ рече е҆ѳа́и къ ста́рцем̑ галаа́довымъ а҆ще ѻ҆браща́е҆те мѧ въпол꙽чи́тисѧ на сн҃ы ам̑мо́нѧ и҆ преда́сть ѧ҆̀ г҃ь предо мно́ю, бꙋдꙋ л̂и а҆зъ вамъ кн҃ѕь·

И҆ реко́ша ста́рцы галаа́дъски къ е҆ѳа́еви.
г҃ь да бꙋдет̑ по́слꙋхъ междꙋ тобо́ю и҆ на́ми.
а҆ще по сло́вꙋ твое҆мꙋ та́ко не сътворим̑·

І҆ и́де е҆ѳа́и съ ста́рцы галаа́дъскими и҆ поста́виша и҆̀ лю́дїе старѣ́ишинꙋ над̑ собо́ю во́жда и҆ кн҃ѕѧ.
и҆ гл҃а е҆ѳа́и всѧ словеса̀ своѧ̀ пред̑ бм҃ъ в꙽ маси́ѳѣ·

По сем̑ посла̀ е҆ѳа́и послы̀ къ цр҃ю сн҃овъ а҆м꙽мо́нь, гл҃ѧ чт̂о мн̂ѣ и҆ тебѣ̀, ꙗ҆́ко прїиде къ мн̂ѣ въполчи́тисѧ на землѝ мое́й·

И҆ реч̑҇ цр҃ь сн҃ов꙽ а҆м꙽монь къ посло́мъ е҆ѳа́емъ.
чт̂о ради взѧ̀ і҆и҆л҃ь зе́млю мою, внегда̀ и҆зы́де из̑ е҆ги́пта ѿ а҆рно́нѧ, даже до иаа҆во́ка и҆ до е҆рда́на, и҆ н҃нѣ възвратѝ ю҆̀ с ми́ромъ и҆ ѿи́дꙋ, и҆ възврати́шасѧ послы̀ къ е҆ѳа́ю·

И҆ приложѝ е҆ще е҆ѳа́и и҆ посла̀ послы̀ къ цр҃ю сн҃овъ а҆м꙽мо́нь·

И҆ рекоша е҆мꙋ та́ко гл҃етъ е҆ѳа́и.
не взѧ́лъ і҆и҆л҃ь зе́млю моа́влю, ниже зе́млю сн҃овъ а҆м꙽мо́нь.

Но е҆гда̀ и҆схожа́хꙋ и҆зъ землѧ̀ е҆гѷпетъскїѧ і҆ и́де і҆ил҃ь по пꙋсты́ни до мо́рѧ чрьмнаг̑҇ и҆ прїиде до кади́съ·

И҆ посла̀ і҆и҆л҃ь послы̀ къ цр҃ю е҆до́мъскꙋ гл҃ѧ да́и м̂и и҆тѝ сквоѕѣ зе́млю твою̀, и҆ не послꙋша цр҃ь е҆до́м꙽скъ.
такоже посыла́лъ и҆ къ цр҃ю моа́вскꙋ и҆ не въсхотѣ̀.
и҆ сѣде і҆и҆л҃ь в кади́сѣ·

По семъ и҆́де пꙋсты́нею.
и҆ ѻ҆бы́иде зе́млю е҆до́млю и҆ зе́млю моа́влю.
и҆ прїиде на восто́к꙽ сл҃нцꙋ, до землѝ моа́вли.
и҆ въполъчи́сѧ ѻ҆бо́нꙋ странꙋ̀ а҆рно́нь.
н̂о не вни́де в꙽ предѣлы моав̑҇лѧ.
ꙗ҆́ко а҆рно́нь бѧ́ше предѣ́лъ моа́вль·

И҆ посла̀ і҆и҆л҃ь послы̀ къ сиѻ҆́нꙋ цр҃ю ам̑мор꙽рѣ́искꙋ и҆ цр҃ю е҆сево́ньскꙋ и҆ рече к немꙋ і҆и҆л҃ь, да мине́мъ по землѝ твое́и до мѣ́ста мое҆го·

И҆ не въсхотѣ сїѻ́нъ і҆и҆л҃ѧ пропꙋсти́ти по предѣ́лꙋ свое҆мꙋ.
н̂о собра̀ сїѻн̑҇ вс̂ѧ лю́ди своѧ, и҆ въпол̑҇чи́сѧ къ і҆и҆л҃ю до и҆а́сы и҆ вое҆ва̀ на і҆и҆л҃ѧ·

И҆ преда́сть г҃ь б҃ъ в рꙋцѣ і҆и҆л҃ю сїѻ́на, и҆ вс̂ѧ лю́ди е҆го, і҆ и҆збѝ ѧ҆̀.
и҆ прїѧ̀ і҆и҆л҃ь вс̂ю зе́млю, ам̑морре́ѧ живꙋщаго на землѝ то́и и҆ взѧ́ша весъ предѣлъ а҆м꙽море́искъ·

ѿ а҆рно́на, да́же до а҆во́ка.
и҆ ѿ пꙋсты́нѧ до і҆ѻ҆рда́на·

И҆ н҃нѣ г҃ь б҃ъ і҆и҆л҃евъ и҆згна̀ ам̑морре́ѧ ѿ лица людїи своих̑ і҆и҆л҃ѧ.

Ты же хо́щеши причасти́ти ю҆̀ себѣ̀·

Ни̂, н̂о е҆ли́ко причастѝ тебѣ̀ хамо́съ бо́гъ твой.
сїѧ да причасти́ши, и҆ вс̂ѧ ꙗ҆же и҆згна̀ г҃ь б҃ъ на́шъ ѿ лица̀ нашего, т̂о мы̀ причасти́мъ·

Но н҃нѣ лꙋ́чшїи лѝ е҆си т̂ы валаа́ка сн҃а сепѳо́рова цр҃ѧ моа́влѧ.
не препира́ ли сѧ съ і҆и҆л҃емъ.
и҆л̂и не вою́ѧ вое҆ва̀ на́ нѧ·

Внегда̀ всели́сѧ і҆и҆л҃ь въ е҆сево́нѣ, и҆ въ предѣ́лехъ е҆го и҆ въ а҆рои́ре и҆ въ предѣ́лехъ е҆го и҆ въ всѣхъ гра́дех̑ и҆же въ предѣ́лехъ а҆рно́ни.
т҃. лт̑ѣ, почто̀ не и҆зба́висте и҆хъ въ вре́мѧ т̂о·

А҆з же не съгрѣши́хъ тебѣ̀.
а҆ ты̀ твори́ши со мно́ю ѕл̂о вою́юще на́ мѧ.
да сꙋ́дитъ г҃ь и҆же сꙋдѝ днесь ме́ждꙋ сн҃ы і҆и҆л҃евыми, и҆ междꙋ сн҃ы а҆м꙽мо́ни·

И҆ не послꙋша цр҃ь сн҃овъ а҆м꙽мо́нь слове́съ е҆ѳа́евыхъ и҆хже посыла̀ к немꙋ̀·

И҆ бы́сть на е҆ѳаѝ дх҃ъ гн҃ь.
и҆ минꙋ̀ галаа́да и҆ манасїю, и҆ стражбꙋ̀ галаа́довꙋ.
и҆ ѿ стражбы̀ галаа́довы и҆́де на ѻ҆́нꙋ странꙋ̀ сн҃овъ а҆м꙽мо́нь·

И҆ молисѧ и҆е҆ѳа́и мл҃твою къ гв҃и и҆ рече.
г҃и а҆ще преда́нїемъ предасѝ сн҃ы а҆м꙽мо́нѧ в рꙋ́кꙋ мою.

То чт̂о и҆зы́идетъ и҆з вра́тъ до́мꙋ мое҆го, проти́вꙋ мн̂ѣ, е҆гда̀ ѻ҆бращꙋсѧ с ми́ромъ ѿ сн҃овъ а҆м꙽мо́нь.
да бꙋ́детъ с̂е гв҃и.
и҆ли възнесꙋ и҆̀ въ вс̂есъж꙽же́нїе·

И҆ прїиде е҆ѳа́и къ сн҃омъ а҆м꙽мо́немъ въполчи́тисѧ на́ нѧ.
и҆ преда́сть ѧ҆̀ г҃ь в рꙋцѣ е҆го·

І҆ и҆збѝ ѧ҆̀ ѿ а҆рои́ра, до́ндеже прїитѝ въ семинꙋѳъ.
к҃, гра́дъ да́же и҆ до а҆ве́ѧ.
и҆ виногра́домъ вре́домъ вели́кимъ ѕѣ́ло.
и҆ покоре́ни сꙋть сн҃ове а҆м꙽мо́ни пред̑ лицемъ сн҃овъ і҆и҆л҃евъ·

И҆ прїиде и҆е҆ѳа́и въ маси́ѳꙋ в до́мъ сво́и.
и҆ с̂е дщѝ е҆го и҆схожда́ше проти́вꙋ е҆го съ тим꙽па́ны и҆ ли́ки.
си же е҆ді́ночад̑на сꙋщи е҆мꙋ и҆ възлю́блена.
и҆ не бѣ е҆мꙋ сн҃а н̂и дрꙋгїѧ дще́ре, ра́звѣ еѧ̀·

И҆ бы́сть е҆гда̀ ви́дѣ и҆̀ са́мъ, растерза̀ ри́зы своѧ̀ на себѣ̀.
и҆ рече ѽ дщѝ моѧ̀ смꙋща́юще смꙋтѝ м̂ѧ.
и҆ ты̀ нн҃ѣ въ жесто́тѣ бы́сть пред̑ ѻ҆чи́ма мои҆ма.
а҆зъ б̂о ѿврьзо́х꙽ ѹ҆ста̀ моѧ къ г҃ꙋ, и҆ не възмогꙋ̀ въспѧ́ть ѻ҆брати́ти·

И҆ рече к немꙋ дщѝ ѿч҃е а҆ще ѿврьзлъ е҆си ѹ҆ста̀ своѧ̀ къ г҃ꙋ.
сътворѝ мн̂ѣ ꙗ҆́коже и҆зы́иде, и҆зъ ѹ́стъ твоих̑.
зане же сътворѝ г҃ь месть враго́мъ твоим̑, ѿ сн҃овъ а҆м꙽монь·

И҆ рече къ ѿц҃ꙋ с̂и сътворѝ ѿч҃е мой с̂е сло́во.
ѻ҆ста́ви м̂ѧ дв̂а мцс̑҇а, да и҆́дꙋ и҆ взы́идꙋ на го́ры.
и҆ да пла́чꙋсѧ дв҃ъства мое҆го а҆зъ и҆ дрꙋги́нѧ моѧ̀·

И҆ рече е́й и҆дѝ и҆ ѿпꙋстѝ ю҆̀ на, в҃ мцс̑҇а, і҆ и́де сама̀ и҆ дрꙋги́нѧ е҆ѧ̀.
и҆ пла́касѧ дв҃ъства свое҆го на горах̑·

И҆ бы́сть на коне́цъ дво́ю мцс̑҇ꙋ, възврати́сѧ къ ѿц҃ꙋ свое҆мꙋ.
и҆ сътворѝ е́й е҆ѳа́и по ѻ҆беща́нїю свое҆мꙋ, е҆ю́же сѧ ѻ҆беща̀.
си́ же та́ко бы́сть не зна́ющи мꙋж́а.

И҆ бы́сть с̂е в зако́нъ въ і҆и҆л҃и ѿ го́да до го́да.
и҆ съхожда́хꙋ дще́ри і҆и҆л҃евы да пла́чꙋтъ дще́ри ради е҆ѳа́евы галаа҆ди́тина.
д҃, дн҃и въ лѣте·

Глв̑҇а, в҃і·

И събра́шасѧ мꙋж́и е҆фре́мли и҆ прїидо́ша въ сефи́нꙋ.
и҆ рѣша къ е҆ѳа́е҆ви, почт̂о ходѝ въпол꙽чи́тисѧ на сн҃ы а҆м꙽монѧ.
и҆ нас̑҇ не позва̀ и҆ти съ собо́ю.
до́мъ твой с тобо́ю съж꙽жем꙽ ѻ҆гнемъ·

И҆ рече к ни́мъ е҆ѳа́и и҆мх̑ѣ прю̀ ве́лїю, и҆ лю́дїе моѝ съ сн҃ъми а҆м꙽мо́новыми и҆ ѻ҆скорби́ша менѐ и҆ лю́дїе моѝ ѕѣ́ло, а҆з же възва́хъ ва́съ и҆ не и҆зба́висте менѐ ѿ рꙋкꙋ и҆хъ·

И҆ ви́дѣхъ ꙗ҆ко не бѧ́ше сп҃саю҆щаго.
и҆ положи́хъ дш҃ꙋ свою въ рꙋ́кꙋ мою̀.
і҆ и҆до́хъ къ сн҃омъ а҆м꙽мо́нимъ.
и҆ предастъ ѧ҆̀ г҃ь в рꙋ́кꙋ мою̀.
въскꙋ́ю же прїидо́сте къ мнѣ днс̑҇е, въполчи́ти ли сѧ на́ мѧ·

І҆ и҆збра̀ и҆е҆ѳа́и вс̂и мꙋжа галаа́дъски, и҆ в꙽полчи́сѧ на е҆фре́ма.
і҆ и҆зби́ша мꙋж́и галаа́дъстїи е҆фре́ма.
поне́же гл҃ахꙋ ꙗ҆́ко бегꙋны̀ с̂е е҆фре́мови, в̂ы галаад̑ средѣ е҆фре́ма и҆ средѣ манасїѧ·

И҆ засѧ́де галаа́дъ прохо́ды с̂и ѹ҆ і҆е҆рда́на е҆фре́мови, и҆ бы́сть е҆гда̀ рѣша ѹ҆цѣлѣвшїи ѿ е҆фре́ма да мине́мъ.
и҆ реко́ша и҆мъ мꙋж́и галаа́дъстїи.
е҆да л̂и ѿ е҆фре́ма вы̀.
и҆ рѣша нѣсмы·

И҆ рѣша им̑ рцѣте завт̑ѣ и҆ не ѹ҆пра́виша гл҃ати си́це, ѻ҆ни́же и҆ма́хꙋ и҆хъ и҆ закала́хꙋ ѹ҆ прехо́дъ і҆е҆рда́нихъ·

И҆ падо́ша в т̂о вре́мѧ ѿ е҆фре́ма.
҂м҃, и҆ двѣ ты́сѧщи·

И҆ сꙋдѝ і҆е҆ѳаи і҆ил҃еви, лт̑ѣ, ѕ҃. и҆ по се́мъ ѹ҆́мре и҆е҆ѳа́и галаа҆ди́тинъ.
и҆ погребе́нъ быс̑҇ въ гра́дѣ свое҆мъ в꙽ галаа́дѣ·

И҆ сꙋдѝ по не́мъ і҆и҆л҃еви, е҆севон̑҇ ѿ виѳлеѻ́ма·

Се́и и҆мѧ́ше, л҃, сн҃овъ, и҆ л҃, дще́рїи ꙗ҆́же ѿда́лъ ѿ себѐ мꙋже́мъ, а҆ л҃, же́нъ.
и҆ приведѐ сн҃омъ свои҆мъ и҆звнꙋ̀.
и҆ сꙋдѝ і҆и҆л҃еви, з҃, лт̑ѣ·

Посе́мъ ѹ́мре е҆сево́нь, и҆ погребе́нъ бы́сть въ виѳлеѻ́мѣ·

И҆ сꙋдѝ по нем̑ і҆и҆л҃еви е҆лло́нъ заѹ҆ло́нъскїи.
і҃, лт̑ѣ и҆ ѹ́мре е҆лло́нъ заѹ҆ло́нъскїи и҆ погребе́нъ въ е҆ли́ме въ землѝ заѹ҆ло́ни·

И҆ сꙋдѝ по не́мъ і҆и҆л҃еви, авдо́нъ сн҃ъ е҆лїе́ховъ фараѳони́тинъ·

Се́и и҆мѧше, м҃, сн҃овъ.
а҆ л҃, внꙋковъ и҆же ꙗ҆здѧ́ше.
на о҃, ѻ҆се́лъ.
и҆ сꙋдѝ і҆и҆л҃еви.
и҃, лѣтъ·

По сем̑ ѹ҆́мре а҆вдо́нъ сн҃ъ е҆лие́ховъ, фараѳони́тин̑҇ и҆ погребе́нъ бы́сть въ ѳараво́нѣ в꙽ землѝ е҆фре́мли, в꙽ горѣ а҆мали́ковѣ·

Глв̑҇а, г҃і·

И приложи́ша е҆щѐ сн҃ове і҆и҆л҃ви творити ѕл̂о пред̑ гм҃ъ, и҆ преда́ ѧ҆̀ в рꙋ́кꙋ филистим̑скꙋ, м҃, лт̑ѣ·

И҆ бѧ́ше мꙋж́ъ въ а҆ѱа́рѣ ѿ племе́ни да́нова и҆мѧ́ же е҆мꙋ мано́е.
и҆ жена̀ е҆мꙋ бѧ́ше непло́ды и҆ не ражд̑аа́ше·

И҆ ꙗ҆ви́сѧ а҆гг҃лъ гн҃ь къ женѣ̀, и҆ рече к не́и.
с̂е ѹ҆бо т̂ы непло́ды и҆ не ро́ди, с̂е б̂о зачне́ши и҆ роди́ши сн҃ъ·

И҆ нн҃ѣ снабдѝ ѹ҆бо.
не пїи вина̀ н̂и сике́ра, и҆ не ꙗ҆́жъ нечи́ста ничто́же·

Ꙗ҆́ко с̂е ты̀ въ ѹ҆тро́бѣ прїи́меши и҆ породи́ши сн҃ъ, и҆ желѣ́зо на гла́вꙋ е҆го не възы́идетъ, ꙗ҆́ко назире́и бв҃и бꙋдет̑ с̂е, ѻ҆тро́ча ѿ чре́ва.
и҆ се́и начне́тъ спс̑҇ти і҆и҆л҃ѧ и҆з рꙋкѝ и҆ноплеме́н꙽ник꙽·

И҆ вни́де жена̀ и҆ рече мꙋж́еви свое҆мꙋ гл҃юще, чл҃къ бж҃їи прїиде къ мнѣ̀ и ѻ́бразъ е҆го ꙗ҆́ко ѻ҆́бразъ а҆гг҃ла бж҃їа стра́шенъ ѕѣ́ло, и҆ въпраша́хъ е҆го ѿкꙋ́дꙋ е҆си, і҆ и́мени свое҆го не повѣ́да м̂и·

И҆ речѐ м̂и с̂е ты̀ въ ѹ҆тро́бѣ зачне́ши, и҆ роди́ши сн҃ъ.
и҆ нн҃ѣ не пїи вина̀ ни ѻ҆лови́ны и҆ не ꙗ҆́жъ н̂ичто́же нечи́ста.
ꙗ҆́ко назире́ѻ҆нъ б҃ꙋ бꙋ́детъ ѻ҆тро́чищъ, ѿ ѹ҆тро́бы до дн҃е смр҃ти е҆го·

И҆ помоли́сѧ мано́е къ гв҃и.
и҆ рече ѽ г҃и.
чл҃къ бж҃їи е҆го́же посла̀ мано́евы, и҆ прїиде па́ки а҆гг҃лъ бж҃їи к꙽ женѣ̀.
сїа же сѣдѧ́ще на селѣ̀, мано́е же мꙋж́ъ е҆ѧ̀ не бѧ́ше с не́ю·

И҆ пот꙽ща́сѧ жена̀ и҆ те́кши ско́ро повѣда̀ мꙋж́ꙋ свое҆мꙋ, и҆ рече к немꙋ.
с̂е ꙗ҆ви́сѧ м̂и мꙋжъ, и҆же приходѝ въ дн҃ь ѻ҆́нъ къ мнѣ̀·

И҆ въставъ и҆́де мано́е въ слд̑ѣ жены̀ свое҆ѧ и҆ прїиде к мꙋж́ꙋ, и҆ рече е҆мꙋ.
ты л̂и е҆си мꙋж́ъ гл҃авыи къ женѣ̀ мое́и, и҆ рече а҆гг҃лъ а҆́зъ е҆смь·

И҆ рече мано́е нн҃ѣ ѹ҆бо да прїидетъ сло́во твое чт̂о е҆сть сꙋ́дъ ѻ҆троча́те, и҆ чт̂о е҆сть творе́нїе е҆го·

И҆ рече а҆гг҃лъ гн҃ь к꙽ мано́еви.
ѿ сего̀ е҆же гл҃ах̑ женѣ̀ да съхрани́тсѧ ѿ всего̀·

И҆ ѿ всего̀ и҆же и҆схо́дитъ и҆з виногра́да да не ꙗ҆́сть и҆ вина̀ и҆ сике́ра да не пїе́тъ, и҆ всего̀ нечи́ста да не ꙗ҆́сть, и҆ вс̂е е҆ли́ко заповѣ́дахъ сїе да снабди́тъ·

И҆ рече мано́е къ а҆гг҃лꙋ бж҃їю, да т̂ѧ понꙋди́мъ, и҆ сътвори́мъ пред̑ тобо́ю ко́злище ѿ ко́зъ·

И҆ рече а҆гг҃лъ бж҃їи к꙽ мано́еви, а҆́ще м̂ѧ нꙋ́диши и҆ не ꙗ҆́м꙽ хлѣ́ба твое҆го, н̂о а҆́ще сътвори́ши вс̂есъж꙽же́нїе гв҃и, т̂о възнеси е҆̀.
не вѣ́дѧше б̂о мано́е ꙗ҆́ко а҆гг҃лъ гн҃ь ес̑҇·

И҆ реч̑҇ мано́е къ а҆гг҃лꙋ гн҃ю чт̂о ти е҆сть имѧ твое да е҆гда̀ събꙋдет̑сѧ сло́во твоѐ просла́вим̑ тѧ·

И҆ реч̑҇ е҆мꙋ а҆гг҃лъ гн҃ь почто̀ с̂е въпраша́еши и҆́мени мое҆го с̂е же е҆сть чю́дно·

И҆ взѧ̀ мано́е ко́злищъ ѿ ко́зъ и҆ тре́бꙋ, и҆ възнесѐ на ка́мень гв҃и.
и҆ сътвори чю́дно·

Мано́и же и҆ жена̀ е҆го гледѣ́ста·

И҆ быс̑҇ е҆гда̀ пла́мы взы́иде вы́ше ѻ҆лтарѧ̀ до нб҃се.
и҆ взы́иде а҆гг҃лъ гн҃ь въ пла́мени ѻ҆лтарѧ̀ мано́е же и҆ жена̀ е҆го смотрѧ́ста, и҆ падо́ста ни́цъ на зем̑лѝ·

И҆ не приложѝ к꙽ семꙋ а҆гг҃лъ гн҃ь ꙗ҆ви́тис̑҇ мано́еви и҆ женѣ̀ е҆го, тогда̀ ѹ҆вѣ́дѣ мано́и ꙗ҆́ко а҆гг҃лъ гн҃ь е҆сть·

И҆ рече мано́и къ женѣ̀ свое́и, смр҃тїю ѹ҆мревѣ, ꙗ҆́ко б҃а видѣховѣ·

И҆ рече е҆мꙋ жена̀ е҆го, а҆́ще бы хотѣ́лъ б҃ъ ѹмр҃твити на́ю т̂о не бы̀ взѧ́лъ ѿ рꙋ́ки на́ю вс̂есъж꙽же́нїѧ и҆ тре́бы.
и҆ не бы̀ показа́лъ на́ма сего̀ всего̀·

И҆ не бы̀ слы́шано с̂е сътвори́лъ на́мъ и зача жена̀ и҆ родѝ сн҃ъ и҆ нарече и҆́мѧ е҆мꙋ самѱо́нъ, и҆ възмо́же ѻ҆тро́ча и҆ блс̑҇ви е҆̀ б҃ъ·

И҆ нача́тъ дх҃ъ гн҃ь ходи́ти с ни́мъ, и҆ въ по́лцѣ да́новѣ средѣ сараа́ка, и҆ сре́дѣ е҆сѳеѻ҆́ла·

Глв̑҇а, д҃і·

По се́мъ и҆́де сам꙽ѱо́нъ въ ѳам̑наѳа, и҆ ви́дѣ женꙋ̀ въ ѳамнаѳѣ ѿ дще́рїи филистим̑ских̑, и҆ годѣ бы́сть пред̑ ним̑·

И҆ взы́иде повѣ́да ѿц҃ꙋ свое҆мꙋ и мтри свое́и, и҆ рече, женꙋ ви́дѣхъ въ ѳамна́ѳѣ ѿ дще́рїи филисти́мль, и҆ нн҃ѣ пои҆мѣте ю҆̀ мн̂ѣ въ женꙋ̀·

И҆ рече е҆мꙋ ѿц҃ъ е҆го и҆ мт҃и е҆го е҆да нѣсть дще́ри ѿ бра́тїѧ твое́а и҆ ѿ всѣхъ людїи мои҆хъ жены̀, ꙗ҆ко т̂ы хощеши поѧ́ти женꙋ̀ ѿ дще́рїи и҆ноплеме́н꙽никъ неѻ҆брѣзаныхъ.
и҆ рече сам̑ѱо́нъ къ ѿц҃ꙋ свое҆мꙋ, т̂ꙋ м̂и пои҆мѝ.
ꙗ҆́ко та̀ м̂и ѹ҆го́дна е҆сть пред̑ ѻ҆чи́ма мои҆ма·

ѿц҃ъ же е҆го и҆ ма́ти е҆го не разꙋмѣша ꙗ҆ко с̂е ѿ г҃а е҆сть, ꙗ҆́ко вины̀ взы́щетъ ѿ ѳилисти́млѧнъ.
в т̂о бо вре́мѧ владѧ́хꙋ ѳилисти́ни сн҃ы і҆и҆л҃евыми·

И҆ сни́де самѱо́н꙽ и҆ ѿц҃ъ е҆го и҆ ма́ти е҆го въ ѳамна́ѳа.
и҆ прїидо́ша до виногра́да ѳамна́ѳы, и҆ с̂е льви́чищъ ревы́и проти́вꙋ е҆мꙋ·

И҆ сни́де нань дх҃ъ гн҃ь и҆ въсхитѝ льва̀ и҆ растерза̀ и҆̀, ꙗ҆́ко ко́злищъ.
и҆ ничто́же не и҆мѣа́ше в рꙋкꙋ свое́ю.
и҆ не повѣда̀ ѿц҃ꙋ с̂и и҆ мт҃ри е҆же сътворѝ·

И҆ посе́м꙽ и҆́де и҆ гл҃а съ жено́ю.
и҆ ѹ҆го́дно пред̑ ѻ҆чи́ма самѱо́нꙋ·

И҆ възврати́сѧ по дн҃ехъ поꙗ҆́ти ю҆̀.
и҆ съврати́сѧ ви́дѣти трꙋпъ льво́въ.
и҆ с̂е ро́и пче́лъ въ ѹ҆стѣхъ льво́выхъ и҆ ме́дъ·

І҆ и҆зѧ̀ и҆̀ ѿ ѹ҆стъ льво́въ на́ рꙋкꙋ свою, і҆ и҆ды́и и҆дѧ́ше и҆ ꙗ҆́ды́и.
і҆ и́де къ ѿц҃ꙋ свое҆мꙋ и҆ мт҃ри свое́и.
и҆ да́сть и҆́ма и҆ ꙗ҆́ста.
н̂о не повѣда и҆́ма ꙗ҆́ко ѿ трꙋ́па льво́ва в꙽зѧ̀ сїи ме́дъ·

И҆ сни́де ѿц҃ъ е҆го к невѣ́сте, и҆ сътворѝ самѱо́нъ та́мо пи́ръ.
з҃. дн҃їи.
ꙗ҆ко та́ко тво́рѧтъ ю҆́ноты·

И҆ быс̑҇ е҆гда нача́ша боꙗ҆́тисѧ е҆го, приста́виша к немꙋ̀.
л҃, дрꙋговъ.
и҆ бѧ́хꙋ с ни́мъ·

И҆ рече им̑ самѱо́нъ, да вы̀ пред̑ложꙋ нн҃ѣ гада́нїе.
и҆ а҆ще ѿгада́ю҆ще сповѣ́дите мн̂ѣ.
въ з҃. дн҃їи пирꙋ сего.
т̂о да́мъ вы̀, л҃. по́нѧв꙽ и҆, л҃, ри́зъ и҆змѣн꙽ны·

И҆ а҆ще л̂и не мо́жете и҆сповѣ́дати мн̂ѣ.
т̂о дасте вы̀ мн̂ѣ, л҃, по́нѧвъ.
и҆ л҃, ри́зъ и҆змѣн꙽ны·

И҆ реко́ша е҆мꙋ пред̑ложѝ гада́нїе твое да слы́шимъ и҆̀.
и҆ гл҃а и҆мъ ѿ ꙗ҆дꙋщаго ꙗ҆до́мое и҆зы́иде.
и҆ ѿ крѣпкаго и҆зы́иде слад̑кость, и҆ не мого́ша и҆сповѣдати гада́нїѧ, до трехъ дн҃їи·

И҆ бы́сть въ дн҃ь четве́ртыи и҆ бы́сть е҆гда приближа́шесѧ дн҃ь се́дмыи, реко́ша женѣ̀ сам̑ѱо́новѣ.
прельстѝ ѹ҆бо мꙋжа свое҆го да ти повѣсть гада́нїе с̂е хо́щеши л̂и да не съж꙽жемъ т̂ѧ и҆ до́мъ ѿц҃а твое҆го.
ѻ҆ѹ҆бо́жати л̂и съзва́сте ны̀ здѐ·

И҆ пла́касѧ жена̀ сам꙽ѱо́нова к сам꙽ѱо́нꙋ мꙋжꙋ свое҆мꙋ.
и҆ рече почто ненави́диши менѐ.
и҆ не възлюби́лъ е҆си мене ꙗ҆́ко гада́нїе е҆же е҆си пред̑ложил̑҇ сн҃омъ людїи мои҆хъ.
и҆ не повѣда е҆го мн̂ѣ.
и҆ рече е́й сам꙽ѱо́нъ с̂е ѿц҃ꙋ свое҆мꙋ и҆ мт҃ри свое́и не повѣ́дахъ сего.
а҆ тебѣ л̂и и҆́мамъ повѣдити·

И҆ пла́касѧ к немꙋ̀, з҃, дн҃їи в нѧ́же б̂ѣ и҆мъ пи́ръ.
и҆ бы́сть въ дн҃ь з҃, и҆ повѣда е́и ꙗ҆́ко стꙋжѝ е҆мꙋ вельмѝ.
си́ же скоро повѣда сн҃омъ людїи своих̑<.>

И҆ реко́ша е҆мꙋ мꙋжи град̑стїи въ дн҃ь се́дмыи.
прежде зашествїѧ сл҃нцꙋ чт̂о слад̑ше ме́дꙋ, чт̂о л̂и крѣплѣи льва̀.
и҆ рече и҆мъ самѱо́нъ.
а҆ще не бысте принꙋ́дили ю҆́ница мое́ѧ.
т̂о не бы́сте ѹ҆вѣ́дали гада́нїѧ мое҆го·

И҆ падѐ нань дх҃ъ гн҃ь.
и҆ сни́де въ а҆сколо́нꙋ.
і҆ и҆збѝ тамо.
л҃, мꙋжъ и҆ взѧ̀ ри́зы и҆хъ.
и҆ дасть и҆̀ повѣдавшимъ гада́нїе.
и҆ разгнѣвасѧ ꙗ҆́ростїю сам꙽ѱо́нъ, и҆ взы́де в дом̑ ѿц҃а свое҆го·

Жена́ же самѱо́нова и҆́де за и҆ныи мꙋжъ и҆же бы́сть е҆ді́нъ ѿ дрг̑҇ꙋ е҆го пи́рныхъ·

Глв̑҇а, е҃і·

И бы́сть по дн҃ехъ въ дн҃и жа́твы пшени́ца.
и҆ присѣтѝ самѱо́нъ женꙋ̀ свою, несы́и ко́злище ѿ ко́зъ.
и҆ рече да вни́дꙋ къ женѣ̀ мое́и въ храм̑ и҆ не да̀ е҆мꙋ ѿц҃ъ е҆ѧ̀ внїити·

И҆ рече ѿц҃ъ е҆ѧ̀ гл҃ѧ рѣ́хъ ꙗ҆́ко ненави́дѧи ненави́диши е҆ѧ.
и҆ ѿда́хъ ю҆̀ е҆ді́номꙋ ѿ дрꙋгъ твои҆хъ.
не се л̂и сестра̀ е҆ѧ̀ ме́ншаѧ добрѣиши е҆ѧ е҆сть да бꙋ́детъ тебѣ нн҃ѣ в꙽ тоѧ̀ мѣ́сто·

И҆ рече е҆мꙋ самѱо́нъ чи́стъ бꙋдꙋ н҃нѣ ѿ ѳилисти́млѧнъ.
а҆ще и҆ сътворю̀ а҆зъ с ни́ми ѕл̂о·

І҆ и́де самѱо́нъ и҆ ѧ̀ т҃, лиси́ць.
и҆ взѧ̀, т҃, свѣщъ и҆ свѧза̀ всѣ́хъ вкꙋпе за ѻ҆шиби.
ѹ҆стро́и е҆ді́нꙋ свѣщꙋ ме́ждꙋ двѣма ѻ҆́шибома.
и҆ раж꙽жѐ ѻ҆́гнь въ свѣщах̑ и҆ пꙋстѝ и҆̀ в ни́вы ѳилисти́мъски.
и҆ запалѝ ни́вы до гꙋме́нъ и҆ до виноград̑ и҆ масли́чїа·

И҆ реко́ша и҆ноплеме́нницы, кт̂о лѝ сътворѝ сїѧ и҆ реко́ша самѱо́нъ зѧ́ть ѳамнаѳїе́въ, ꙗ҆ко ѿда̀ женꙋ̀ е҆го е҆ді́номꙋ ѿ дрг̑҇ꙋ е҆го.
и҆ в꙽зыидо́ша и҆ноплеме́н꙽ницы и҆ спали́ша женꙋ̀ и҆ ѿц҃а е҆ѝ ѻ҆гне́мъ·

И҆ реч̑҇ им̑ самѱо́нъ, а҆ще и҆ сътвори́сте в̂ы тако е́й, т̂о с̂е а҆́зъ не бл҃гои҆зво́лю н̂о ѿм꙽ще́нїе моѐ е҆ді́номꙋ комꙋж́до васъ сътворю̀.
и҆ посе́мъ почїю·

І҆ и҆збѝ ѧ҆̀ мы́шцею на стегнох̑ ꙗ҆́звою ве́лїею.
и҆ сни́де и҆ всели́сѧ ѹ҆ водоте́чи в꙽ пеще́рѣ ка́мене и҆та́мъ·

І҆ и҆зыидо́ша филисти́ни, и҆ въполчи́шасѧ въ і҆ю҆де́и.
і҆ и҆зверго́шасѧ въ лахи́съ·

И҆ рече и҆мъ ве́сь мꙋж́ъ і҆ю́динъ.
почто̀ прїидо́сте на́ ны.
и҆ реко́ша сїи свѧза́ти самѱо́на прїидо́хомъ, и҆ сътвори́ти е҆мꙋ ꙗ҆́коже сътворѝ на́мъ·

И҆ снидо́ша тр̂и ты́сѧщи мꙋж́ъ ѿ і҆ю́ды къ пеще́рѣ ка́мени и҆та́млѧ.
и҆ реко́ша къ сам̑ѱо́нꙋ.
не вѣ́си л̂и ꙗ҆́ко владѣют̑ на́ми филисти́ни.
въскꙋ́ю сїѧ сътворѝ намъ.
и҆ рече и҆мъ самѱонъ ꙗ҆́коже м̂и сътвори́ша та́ко и҆ а́зъ сътвори́хъ и҆мъ·

И҆ реко́ша е҆мꙋ свѧза́ти тебѐ прїидохомъ, и҆ преда́ти т̂ѧ в рꙋцѣ и҆ноплеме́нникомъ·

И҆ реч̑҇ и҆мъ самѱо́нъ клени́те ми сѧ да не ѹ҆бїете м̂ѧ вы̀·

И҆ реко́ша е҆мꙋ гл҃юще не ѹ҆бїемъ т̂ѧ.
н̂о съѹ́зом̑ свѧ́жемъ т̂ѧ.
и҆ предади́мъ в рꙋцѣ и҆хъ.
смр҃тїю же не ѹ҆мо́римъ тебѐ и҆ свѧза́ша и҆̀ двема ѹ҆́жи но́вы і҆ и҆зведо́ша и҆̀ ѿ ка́мени того̀·

И҆ приведо́ша и҆̀ до че́люсти.
и҆ноплеме́н꙽ницы же кли́кнꙋша и҆ стеко́ша проти́вꙋ е҆мꙋ.
и҆ в꙽зы́иде на́нь дх҃ъ гн҃ь.
и҆ бы́ша ѹ́жа на рꙋ́кꙋ е҆го ꙗ҆́ко и҆згре́би, е҆гда̀ прежига́етъ ѻ҆́гнь, и҆ рас꙽сы́пашасѧ ѹ҆́зы ѿ рꙋ́кꙋ е҆го.

И҆ ѻ҆брѣтѐ че́люсть ѻ҆́слю повр́ьженꙋ.
и҆ просте́р꙽ рꙋ́кꙋ и҆ взѧ̀ ю҆̀.
і҆ и҆збѝ е҆ю̀ ты́сѧщꙋ мꙋж́ъ.
и҆ рече самѱо́нъ че́люстїю ѻ҆́слею потребѧ́ѧ потреби́хъ и҆хъ, и҆ че́люстїю ѻ҆́слею и҆зби́хъ ты́сѧщꙋ мꙋж́ъ·

И҆ бы́сть ꙗ҆́ко преста̀ гл҃ѧ, повр́ьже че҆́люсть ѿ рꙋкѝ свое҆ѧ.
и҆ прозва̀ мѣ́сто т̂о и҆збо́и че́люстныи·

И҆ вжажда́сѧ ѕѣ́ло.
и҆ възопѝ къ гв҃и и҆ реч̑҇.
т̂ы бл҃говолѝ в꙽ рꙋцѣ раба̀ твое҆го сп҃се́нїе вели́кое сїе.
и҆ нн҃ѣ ѹ҆мира́ю жа́жд̑ею и҆ впадꙋ̀ в рꙋки неѻ҆брѣз́аных̑·

И҆ ѿвр́ьже б҃ъ ꙗ҆́звꙋ на че́люсти і҆ и҆зы́иде и҆з неѧ̀ вода̀ и҆ пѝ.
и҆ възврати́сѧ дх҃ъ е҆го и҆ ѿдыха̀.
сего ра́ди прозва́сѧ и҆́мѧ е́й и҆сто́чник̑҇ призыва́ющаго и҆же е҆сть в꙽ че́люсти и҆ до сего дн҃е·

И҆ сꙋдѝ і҆и҆л҃еви въ дн҃и филисти́млѧн꙽ к҃, лѣтъ·

Глв̑҇а, ѕ҃і·

И і́де сам̑ѱо́нъ в꙽ га́зꙋ, и҆ ви́дѣ т̂ꙋ женꙋ̀ блд̑ꙋницꙋ, и҆ прїиде к не́и·

И҆ повѣ́даша га́зом̑ гл҃юще прїиде самѱо́н сѣмо.
и҆ ѻ҆быидо́ша и҆̀, и҆ под̑сѣдо́ша е҆мꙋ вс̂ю но́щь ѹ҆ врат̑ град̑ных̑.
и҆ потаи́шасѧ вс̂ю но́щь гл҃юще, до́н꙽деже ѻ҆свитѧ̀ ѹ҆́тро ѹ҆бїемъ е҆го·

И҆ спа̀ самѱо́н꙽ до полꙋно́щи.
и҆ въстав̑҇ полꙋно́щи и҆ захити две́ри ѹ҆ вра́тъ гра́да съ ѻ҆бѣи҆ма под̑бо́ема.
и҆ възвд̑иже ѧ҆̀ съ заво́рою и҆ възложѝ ѧ҆̀ на ра́мѣ своѝ.
и҆ възнесѐ ѧ҆̀ на вр́ьхъ горы̀ ꙗ҆́же пред̑ лице́мъ хевро́немъ, и҆ положѝ ѧ҆̀ т̂ꙋ·

И҆ бысть посе́мъ и҆ възлюбѝ женꙋ̀ ѿ водоте́чи сори́ховы, и҆мѧ же е́й дали́да·

И҆ възыидо́ша к не́и кнѧ́ѕи и҆ноплеме́нникъ.
и҆ реко́ша е́й прельсти и҆ ви́жд̑ь, в че́мъ е҆мꙋ е҆сть крѣпость е҆го та́ко вели́каѧ.
и҆ чи́мъ възмо́жемъ на́нь, и҆ свѧ́жемъ е҆го ꙗ҆́ко смири́ти е҆го.
и҆ м̂ы тебѣ̀ дадим̑, ҂а҃, и҆ р҃, сребра̀.

И҆ рече дали́да къ самъѱо́нꙋ.
повѣж́ъ м̂и ѹ҆бо в꙽ че́мъ т̂и крѣ́пость сїѧ та́ко вели́каѧ.
и҆ чим̑ свѧ́жешисѧ и҆ смири́шисѧ·

И҆ реч̑҇ е́й самѱо́нъ.
а҆́ще свѧ́жꙋтъ м̂ѧ сед̑мїю тѧти́въ мо́крыми и҆ не и҆стлѣ́вшими, і҆ и҆знемо́гꙋ, и҆ бꙋ́дꙋ ꙗ҆́ко е҆ді́нъ ѿ чл҃къ·

И҆ възнесоша е́й кнѧ́ѕи ѿ и҆нопле́менникъ сед̑мь тѧти́въ мо́крыхъ и҆ не и҆стлѣв́шихъ.
и҆ свѧза̀ е҆го ими, присѣдѧ́хꙋ же под̑са꙽женїи въ хра́мѣ·

И реч̑҇ е҆мꙋ.
с̂е и҆ноплеме́н꙽ницы на́ тѧ самъѱо́не.
и҆ рас꙽сы́па тѧти́вы, ꙗ҆́ко кт̂о прето́ргнетъ соска́нїе и҆згребїи, в꙽негда̀ прежигает̑ ѻ҆́гнь, и҆ не ѹ҆вѣ́десѧ крѣ́пость е҆го·

И҆ рече дали́да къ самѱо́нꙋ.
с̂е прельсти м̂ѧ, гл҃ѧ къ мн̂ѣ л꙽жꙋ̀, нн҃ѣ ѹ҆бо повѣж꙽ м̂и чи́мъ свѧ́жешисѧ·

И҆ рече к не́и сам̑ѱо́нъ.
а҆ще ѹ҆вѧ́жꙋт꙽ м̂ѧ ѹ҆́жи но́выми.
и҆же не дѣлано и҆́ми.
и҆знемогꙋ и҆ бꙋдꙋ ꙗ҆́ко е҆ді́нъ ѿ чл҃къ·

И҆ взѧ̀ дали́да ѹ́жа но́ва и҆ свѧза̀ и҆ми самѱо́на, и҆ реч̑҇ е҆мꙋ.
с̂е и҆ноплеме́н꙽ницы на́ тѧ самѱо́не.
под̑са́да же сидѧ́ше въ хра́мѣ.
и҆ розорвасѧ ѿ рꙋкꙋ е҆го ꙗ҆́ко връ́вь·

И҆ реч̑҇ дали́да къ самѱо́нꙋ даже до нн҃ѣ прельстѝ м̂ѧ и҆ гл҃а къ мн̂ѣ лжꙋ.
повѣжъ м̂и ѹ҆бо чи́м꙽ свѧ́жешисѧ.
и҆ реч̑҇ е́и а҆ще съплете́ши, з҃. плени́цъ влс̑҇а глаы̀ мое́ѧ съпрѧ́денїем̑ и въбїеши на колѣ въ стѣнꙋ, и҆ бꙋдꙋ не́мощенъ ꙗ҆́ко е҆ді́нъ ѿ чл҃къ·

И҆ бы́сть внегда̀ ѹ҆спѝ дали́да е҆го среди колѣнꙋ е҆ѧ.
и҆ по заспанїю в꙽зѧ̀ дали́да, з҃, плени́ц꙽ влас̑҇ главы̀ е҆го, и҆ сплетѐ съпрѧ́денїем̑ и҆ вон̑҇зе на колꙋ в꙽ стѣнꙋ, и҆ реч̑҇.
с̂е и҆ноплеме́нницы на тѧ сам̑ѱо́не.
и҆ въз꙽бнꙋ ѿ сна̀ свое҆го.
і҆ и҆сто́рже кол̑҇ съ плете́нїем̑ съ стѣны̀, и҆ не ѹ҆вѣ́десѧ крѣпость е҆го·

И҆ рече к немꙋ̀ дали́да.
ка́ко гл҃еши възлюби́хъ т̂ѧ, а҆ срд̑це твоѐ нѣ́сть со мно́ю.
с̂е тре́тїе прельстѝ м̂ѧ, и҆ не повѣда м̂и в че́мъ крѣпость твоѧ̀ вели́каѧ·

И҆ бы́сть внегда̀ стꙋжѝ е҆мꙋ словесы̀ свои҆́ми во всѧ дн҃и и҆ състꙋже́нїемъ е҆ѧ̀ ве́лїим꙽ ѹ҆мо́жесѧ до ѹ҆мр҃твїѧ·

И҆ повѣда е́и вс̂е срд̑це свое, и҆ рече к не́и нѣсть в꙽зышла̀ бры́тва на главꙋ̀ мою.
ꙗ҆́ко назире́и е҆смь а҆́з꙽ г҃ꙋ, ѿ ѹ҆тро́бы мт҃ри свое҆а а҆ще ѹ҆бо ѻ҆броснꙋсѧ ѿстꙋпи́тъ ѿ менѐ крѣпость моѧ̀, і҆ и҆знемо́гꙋ, и҆ бꙋдꙋ ꙗ҆́коже и҆ вс̂и чл҃ци·

И҆ ви́дѣ дали́да ꙗ҆́ко повѣда е́и вс̂е срд̑це свое.
посла̀ и҆ възва̀ кн҃ѕѧ и҆ноплемен̑҇ник̑҇ гл҃юще.
възы́дѣте е҆ді́ною, с̂е ꙗ҆́ко повѣда м̂и вс̂е срд̑це свое.
и҆ в꙽зыидо́ша к не́и вс̂и кнѧ́ѕи и҆ноплеме́нникъ, и҆ принесо́ша сребро̀ в рꙋкꙋ свое́ю·

И҆ ѹ҆спѝ дали́да самѱо́на на ло́нѣ своем̑, и҆ възва̀ стри́гача.
и҆ ѻ҆броснꙋ, з҃, плени́цъ власъ главы̀ е҆го.
и҆ нача̀ смѣрѧ́тисѧ.
и҆ ѿстꙋпѝ крѣпость е҆го ѿ него·

И҆ реч̑҇ дали́да къ сам꙽ѱо́нꙋ с̂е и҆ноплеме́нницы на́ тѧ сам꙽ѱо́не, и҆ ѹ҆бꙋди́сѧ ѿ сна̀ свое҆го.
и҆ реч̑҇ да и҆зы́дꙋ ꙗ҆́ко і҆ и҆ногда и҆стръгнꙋсѧ, и҆ не разꙋмѣ.
ꙗ҆́ко г҃ь ѿстꙋпѝ ѿ него·

І҆ ꙗ҆ша е҆го и҆ноплеме́н꙽ницы і҆ и҆збодо́ша е҆мꙋ ѻ҆́чи.
и҆ въведо́ша и҆̀ в га́зꙋ, и҆ ѻ҆кова́ша и҆̀ пꙋты мѣ́дѧны.
и҆ бѣше мелѧ̀ в꙽ хра́мѣ темни́ца·

И҆ нача́ша вла́сы главы̀ е҆го растѝ, ꙗ҆́ко̑ ѻ҆броснꙋли·

Кнѧ́ѕи же и҆ноплеме́нъник꙽ събра́шасѧ положи́ти требꙋ вели́кꙋ, даго́нꙋ богꙋ их̑ и҆ весели́тисѧ.
и҆ реко́ша преда́лъ е҆сть бо́гъ на́шъ в рꙋкꙋ нашꙋ сам̑ѱо́на вра́га на́шего·

И҆ ви́дѣша е҆го лю́дїе и҆ похвали́ша бо́га и҆хъ ꙗ҆́ко рѣша предасть бо́гъ наш̑҇ в рꙋкꙋ на́шꙋ вра́га на́шего, и҆скази́вшаго зе́млю на́шꙋ, и҆же ѹ҆мно́жи ꙗ҆́зве́ныа на́ша.
и҆ бы́сть е҆гда̀ въз꙽блажа̀ срд̑це их̑.
и҆ реко́ша приведи́те самѱо́на и҆з хра́ма темни́чнаго.
да и҆гра́етъ пред̑ на́ми.
и҆ призва́ша сам̑ѱо́на и҆з꙽ хра́ма темни́чнаго, і҆ и҆гра́ша с ним̑.
и҆ поста́виша и҆̀ межи стол꙽пы̀·

И҆ рече сам̑ѱо́нъ къ ю҆́ноши дръжа́щемꙋ е҆го за́ рꙋкꙋ и҆ не дѣи менѐ да ѻ҆сѧ́жꙋ столпы̀ дв̂а, на них̑же храм̑ се́и ѹ҆тверже́нъ е҆сть, да сѧ прислоню̀ на́ нѧ, ю҆́ноша же сътворѝ та́ко·

Хра́мъ же бѧ́ше по́лнъ мꙋжїи и҆ же́н꙽.
тꙋ же и҆ вс̂и кнѧ́ѕи и҆ноплеме́н꙽никъ.
въ хра́мѣ же то́мъ до тр̂и ты́сѧщь мꙋжъ и҆ жен̑҇.
и҆ позорꙋ́ющесѧ и҆ рꙋга́ю҆щесѧ самѱо́нꙋ.
и҆ възва̀ самѱо́нъ къ б҃ꙋ, и҆ рече·

А҆дона́и г҃и г҃и си́лъ помѧнѝ м̂ѧ нн҃ѣ и҆ ѹ҆крѣпѝ м̂ѧ, и҆ е҆ще с̂е е҆ді́ною б҃е, да ѿда́м꙽ м꙽ще́нїе е҆ді́ною в꙽ мѣсто дв̂ꙋ ѿ ѻ́чїю мое҆ю над̑ филисти́ны·

І҆ ѻ҆бъѧ̀ сам̑ѱо́нъ ѻ҆́ба столпа̀ сред̑нѣѧ, на нею́ же хра́мина бѧ́ше ѹ҆тверже́на.
и҆ стоа́ше дръжа̀ е҆ді́нъ рꙋко́ю десно́ю, и҆ дрꙋгїи лѣвою·

И҆ реч̑҇ самѱо́нъ да ѹ́мретъ дш҃а моѧ съ и҆ноплеме́нники симѝ.
и҆ преклони́сѧ крѣпостїю и҆ падесѧ хра́мина, на кнѧ́ѕи и҆ на вс̂и лю́ди и҆же с ни́ми.
и҆ бы́ша мрт҃выхъ их̑же и҆ ѹ҆морѝ самѱо́н꙽ въ см҃рти свое́и, мно́жаише ꙗ҆́же ѹ҆морѝ в꙽ животѣ своем̑·

И҆ снидо́ша бра́тїѧ е҆го и҆ весь дом̑ ѿц҃а е҆го.
и҆ взѧ́ша и҆̀ и҆ взыдо́ша и҆ погребо́ша и҆̀ междꙋ сара́ѧ и҆ междꙋ ѻ҆ѳаѻ҆́лѧ въ гробѣ мано́ѧ ѿц҃а е҆го.
с̂е же сꙋдѝ і҆и҆л҃еви, лѣтъ, к҃·

И҆ воста̀ по сам̑ѱо́не е҆мега́ръ сн҃ъ е҆на́нь.
и҆ ѹ҆бѝ ѿ и҆ноплеме́нникъ мꙋжїи вн̂ѣ скота̀ и҆ сп҃се и҆ ѻ́нъ і҆и҆л҃ѧ·

Глв̑҇а, з҃і·

И бы́сть мꙋжъ ѿ горы̀ е҆фрѣмлѧ и҆мѧ е҆мꙋ ми́ха·

И҆ реч̑҇ мт҃ри свое́й.

Ты́сѧщꙋ ѹбо и҆ р҃, сребреникъ и҆же и҆зги́бе ѹ҆ тебе и҆ проклина́еши, и҆ слы́шах̑ то.
и҆ реч̑҇ въ ѹ҆́ши моѝ.
и҆ с̂е сребро̀ ѹ҆ менѐ аз̑ взѧх̑ и҆̀.
и҆ реч̑҇ мати е҆го блс̑҇вен꙽ сн҃ъ мои гв҃и·

И҆ ѿда́сть ты́сѧщꙋ и҆ р҃, сребре́никовъ мт҃ри свое́и.
и҆ реч̑҇ мт҃и е҆го ѻ҆сщ҃а́юще ѻ҆ст҃ихъ сребро̀ гв҃и ѿ рꙋкы̀ мое҆ѧ тебѐ сн҃ови мое҆мꙋ сътвори́ти ѻ҆бразъ и҆зваѧ́нъ и҆ слиѧ́нъ, и҆ нн҃ѣ ѿдамъ е҆̀ тебѣ̀·

И҆ ѿда́сть сребро̀ мт҃ри свое́и.
и҆ взѧ̀ мт҃и е҆го, с҃, сребрениковъ и҆ дасть и҆̀ зла́тарю.
и҆ сътворѝ и҆мъ ѻ҆́бразъ и҆звѧ́анъ и҆ слїѧ́нъ.
и҆ бысть с̂е в꙽ домꙋ̀ ми́хи·

И҆ до́мъ михїинъ е҆мꙋ домъ б҃а.
и҆ сътворѝ ри́зꙋ жре́ческꙋ и҆ ѳераѳи́ма.
и҆ наполни рꙋкꙋ е҆ді́номꙋ ѿ сн҃овъ свои҆хъ, и҆ бы́сть е҆мꙋ въ жре́чество·

И҆ в т̂ы дн҃и не бѣа́ше цр҃ѧ въ і҆и҆л҃и.
н̂о е҆мꙋже сѧ видѣ правое пред̑ ѻ҆чи́ма е҆го творѧ́ше·

И҆ быс̑҇ ю҆́ноша ѿ виѳлеѻ҆́ма і҆ю́дина, и҆ ѿ ро́да и҆ племени і҆ю́дина.
се́и же ю҆́ноша быс̑҇ левѷтинъ и҆ ѻ҆бита́ше т̂ꙋ·

И҆ посем̑ и҆́де се́и мꙋжъ ѿ гра́да виѳлеѻ҆́ма і҆ю́дина.
ѻ҆бита́ти и҆деже ѻ҆брѧ́щет꙽ мѣ́сто.
и҆ прїиде до горы̀ е҆фрѣмлѧ и҆ до́мꙋ михїина сходѧ́ще въ пꙋть свой·

И҆ реч̑҇ е҆мꙋ ми́ха ѿкꙋдꙋ и҆́деши.
и҆ реч̑҇ е҆мꙋ левѷтинъ а҆́зъ е҆смь ѿ виѳлеѻ҆́ма і҆ю́дина и҆дꙋ же ѻ҆бита́ти и҆дѣже ѻ҆брѧщꙋ мѣ́сто·

И҆ реч̑҇ е҆мꙋ ми́ха сѧ́ди со мно́ю.
и҆ бꙋ́ди м̂и ѿц҃ъ и҆ жре́цъ, а҆зъ т̂и да́мъ сребре́никовъ, і҃, в꙽ год̑, и҆ дво́е ри́зы і҆ и҆же на жи́тїе тебѣ.
і҆ и҆де левгѷ въ слд̑ѣ е҆го·

И҆ нача̀ ѻ҆битати ѹ҆ мꙋжа и҆ бы́сть ю҆́ноша ꙗ҆ко е҆ді́нъ ѿ сн҃овъ е҆го·

И҆ напо́лни ми́ха рꙋкꙋ левѷтинꙋ.
и҆ бысть е҆мꙋ ю҆́ноша жрецъ в꙽ домꙋ е҆го·

И҆ рече ми́ха нн҃ѣ ѹ҆вѣдѣ ꙗ҆́ко бл҃го сотвори́тъ б҃ъ мн̂ѣ.
ꙗ҆́ко бы́сть мн̂ѣ левѷтинъ жре́цъ·

Глв̑҇а, и҃і·

Въ ты̀ дн҃и не бѧ́ше цр҃ѧ въ і҆и҆л҃и.
и҆ в ты̀ дн҃и племѧ да́ново проша́ше себѣ ѹ҆ча́стїа всели́тисѧ.
ꙗ҆ко не падѐ е҆мꙋ прича́стїе до ты́хъ дн҃їи, средѣ племе́не сн҃овъ і҆и҆л҃ь·

И҆ посла́ша сн҃ове да́новы ѿ сн҃овъ своих̑ е҃, мꙋжъ ѿ ча́сти мꙋжїе си́лны ѿ сара́ка и҆ е҆ѳ꙽ѳаѻ҆́лѧ.
съглѧда́ти зе́млю і҆ и҆сходи́ти ю҆̀.
и҆ реко́ша к ним̑, и҆дете і҆ и҆сходи́те зе́млю.
и҆ прїидо́ша до горы̀ е҆фрѣмлѧ до до́мꙋ михі́ина и҆ ста́ша т̂ꙋ·

Є҆гда же бѧ́хꙋ не дале́че до́мꙋ михїи́на.
и҆ позна́ша гла́съ ю҆́ноши левѷтина.
и҆ съврати́шасѧ та́мо и҆ реко́ша е҆мꙋ.
кт̂о тѧ̀ приведе сѣмо, чт̂о же твори́ши в꙽ мѣсте се́мъ и҆ чт̂о ли т̂и е҆сть зд̂ѣ·

И҆ рече и҆мъ си́це и҆ си́це, сътворѝ м̂и ми́ха, и҆ наѧ̀ м̂ѧ, и҆ бы́хъ е҆мꙋ жрец̑҇<.>

И҆ реко́ша е҆мꙋ въпраша́и ѹ҆́бо ѻ҆́ бѕ҃ѣ и да ѹ҆вѣмы.
а҆ще бл҃го годи́тсѧ пꙋть на́шъ, воньже м̂ы и҆́демъ·

И҆ рече и҆мъ жрецъ и҆дѣте с ми́ром̑, пред̑ гм҃ъ пꙋть ва́шъ во́ньже и҆дѣте·

І҆ и҆до́ша в пꙋть, е҃, мꙋжи.
и҆ прїидо́ша в лаи́съ.
и҆ ви́дѣша лю́ди живꙋщаѧ въ не́и, и҆ сидѧ́ща съ ѹ҆пова́ніем̑ и҆ по разсꙋже́нїю, съ молча́нїемъ и҆ наде́жею, и҆ не могꙋще гл҃ати сло́ва.
занѐ дале́ко бѣ́хꙋ ѿ сидо́нѧнъ, и҆ ксемꙋ̀ не и҆мѣѧ́хꙋ словеси з никои҆́мъждо чл҃комъ·

И҆ прїидо́ша, е҃, мꙋжъ къ бра́тїи свое́и въ ѳара́ѹ·

и҆ е҆съсоѳаѻ́лъ.
и҆ реко́ша и҆мъ бра́тїа и҆хъ, чт̂о вы̀·

Въста́нѣте і҆ и́дем̑ на нѧ занеже ви́дѣхомъ зе́млю·

и҆ с̂е бл҃га ѕѣ́ло, а҆ вы̀ празнꙋ́ете, не лени́тесѧ и҆тѝ причасти́ти землѧ̀·

І҆ е҆гда прїидете и҆ вни́дѣте в лю́ди живꙋщаѧ съ ѹ҆пова́нїем.
а҆ землѧ̀ престра́нна на дѣла́нїе ꙗ҆́ко преда́сть ю҆̀ г҃ь б҃ъ в рꙋки наша мѣсто на не́мже нѣсть скꙋдость въ всем̑ и҆же на землѝ·

И҆ въздвиго́шасѧ ѿтꙋ́дꙋ съ племе́ни да́нова, ѿ сара́ѧ и҆ е҆сѳаѻ́ла, х҃, мꙋж́ъ.
ѻ҆поꙗ҆са́ни въ ѻ҆рꙋжїе въполче́н꙽ное·

Възыидо́ша и҆ въполчи́шасѧ.
въ карїа҆ѳери́ме въ і҆ю́дѣ.
сего ра́ди прозва́сѧ мѣ́сто т̂о по́лкъ да́новъ.
и҆ до сего дн҃е.
с̂е за́ди карїа҆ѳери́ма·

И҆ минꙋша ѿтꙋ́дꙋ в горꙋ̀ е҆фре́млю.
и҆ прїидо́ша до до́мꙋ михїина·

И҆ ѿвѣща́ша, е҃, мꙋже́и ходи́вшїи съглѧда́ти землѧ̀.
и҆ реко́ша къ бра́тїи свое́й.
разꙋмѣ́сте л̂и, ꙗ҆́ко е҆сть в домꙋ̀ семъ ри́за жре́ческа и҆ ѳерафи́мъ.
і҆ и҆зваѧ́но и҆ сълїѧ́но.
т̂о нн҃ѣ ѹ҆вѣдите чт̂о сътвори́те·

И҆ съврати́шасѧ та́мо.
и҆ внидо́ша в до́мъ ю҆́ноши левѷтина в до́мъ михїинъ.
и҆ въпраша́ша е҆го в꙽ ми́ре·

И҆ х҃, мꙋ́жъ препоꙗ҆са́ни въ ѻ҆рꙋжїе полченое.
сїѝ стоѧ́хꙋ ѹ҆ две́рїи вра́тных̑ и҆же ѿ сн҃овъ да́новъ·

И҆ взыдо́ша е҃, мꙋж́ъ ходи́вшїи съглѧда́ти землѧ̀ и҆ вшед̑ше та́мо и҆ взѧ́ша и҆зваѧ́но и҆ ри́зꙋ жре́ческꙋ, и҆ ѳерафи́мъ и҆ сълїѧ́но.
жре́цъ же стоѧ̀ ѹ҆ две́рїи вра́тных̑, и҆ х҃, мꙋж́ъ препоѧ́сани въ ѻ҆рꙋ́жїе во́инъско.
и҆ сїѝ внидо́ша в до́мъ михїинъ.
и҆ взѧ́ша ри́зꙋ жре́ческꙋ и҆ ѳерафим̑ солїа́но і҆ и҆зваа́но·

И҆ рече к ни́мъ жре́цъ чт̂о вы̀ сътвори́сте·

И҆ рѣша е҆мꙋ ѹ҆молчѝ, и҆ положѝ рꙋ́кꙋ на ѹ҆стѣхъ с̂и.
пои҆дѝ с на́ми и҆ бꙋ́ди на́мъ ѿц҃ъ и҆ жре́цъ.
е҆да̀ ѹ́не е҆сть тебѣ̀ бы́ти жерцꙋ̀, е҆ді́наго мꙋ́жа до́мꙋ.
нежели бы́ти жръцꙋ племе́ни и҆ до́мꙋ и҆ со́ньма і҆и҆л҃ева·

И҆ възблажѣ срд̑це жре́ческо.
и҆ взѧ̀ ри́зꙋ жре́ческꙋю и҆ ѳерафи́ма і҆ и҆зваѧ́но и҆ солїѧ́но.
и҆ вни́де посредѣ люде́и·

И҆ възврати́шасѧ и҆ ѿи҆до́ша и҆ пꙋсти́ша пред̑ собо́ю ча́да и҆ ско́т꙽ и҆ притѧжа́нїе е҆го чс̑҇тное·

Є҆гда́ же ѹ҆дали́вшимсѧ и҆мъ ѿ до́мꙋ михїина.
мꙋж́и и҆же з до́момъ михїином꙽ бы́ша съзва́шасѧ и҆ постиго́ша сн҃ы да́новы·

И҆ въпи́ша къ сн҃омъ да́новымъ.
си же ѻ҆брати́ша лица̀ своѧ̀ к ни́мъ, и҆ рѣша къ миха́еви чт̂о ес̑҇ тебѣ̀ и҆же събра́сѧ та́ко·

И҆ рече ми́ха ꙗ҆́ко и҆зваѧ́ное мое е҆же сътвори́хъ взѧ́сте и҆ жръца̀ ѿведо́сте и҆ чт̂о ми с̂е е҆ще гл҃ете.
и҆ что̀ с̂е реко́сте къ мнѣ̀ чт̂о ти е҆сть·

И҆ реко́ша е҆мꙋ сн҃ове да́нови да сѧ не слы́шитъ глс̑҇а тво́и въ слд̑ѣ на́съ.
да не въста́нꙋтъ на́ вы мꙋж́и лю́тою дш҃ею.
и҆ пред̑ложи́ши дш҃ꙋ свою.
и҆ дш҃ꙋ до́мꙋ свое҆го·

І҆ и҆до́ша сн҃ове да́нови въ пꙋть свой.
и҆ ви́дѣ ми́ха ꙗ҆́ко силне́иши сꙋть па́че и҆хъ, и҆ ѻ҆брати́сѧ в до́мъ свой·

Сн҃ове же да́нови взѧ́ша, е҆ли́коже сътворѝ ми́ха, и҆ жръца̀ и҆же бы́сть в него, и҆ прїидо́ша в лꙋ́сꙋ к лю́дем̑ молча́щим̑, и҆ ѹ҆пова́ющимъ наде́ждею.
і҆ и҆зби́ша и҆̀ ѻ҆рꙋж́їемъ, и҆ гра́дъ спали́ша ѻ҆гне́мъ·

И҆ не бы́сть и҆хъ ѿи҆мы́и кт̂о.
ꙗ҆́ко дале́че бѣхꙋ ѿ сидо́нѧн꙽.
рѣ́чи б̂о не бѧ́ше и҆мъ съ чл҃ки.
с̂е же град̑ бы́сть въ ѹ҆до́лїи и҆же е҆сть недале́че до́мꙋ роа́влѧ.
и҆ съгради́ша т̂ꙋ град̑ и҆ всели́шасѧ в немъ·

И҆ прозва́ша гра́дꙋ и҆мѧ да́нъ въ и҆мѧ да́ново ѿц҃а и҆хъ, и҆же сѧ родѝ і҆и҆л҃еви.
бѧ́ше же пре́же и҆мѧ гра́дꙋ лаи́съ·

И҆ поста́виша себѣ̀ сн҃ове да́нови и҆зваѧ́но.
и҆ѻ҆наѳа́нъ же и҆ сн҃ове е҆го бѧ́хꙋ жръцы̀, племе́ни да́новꙋ до дн҃е преселе́нїѧ землѧ̀·

И҆ поста́виша себѣ̀ и҆зваѧ́но и҆же сътворѝ ми́ха и҆ ста̀ въ всѧ̀ дн҃и е҆ли́ко бѧ́ше до́мъ бж҃їи в сило́мѣ·

Глв̑҇а, ѳ҃і·

И бы́сть въ ты̀ дн҃и не бѣа́ше цр҃ѧ въ і҆и҆л҃и, и҆ бы́сть мꙋж꙽ левѷтинъ живы́и въ стра́не горы̀ е҆фрѣмовы, и҆ поѧ̀ себѣ̀ женꙋ̀ под̑ло́жницꙋ ѿ виѳлеѻ́ма і҆ю́дина·

И҆ разгнѣ́васѧ на́нь подло́жница е҆го.
и҆ ѿи҆де ѿ не́го въ до́мъ ѿц҃а свое҆го.
и҆ въ виѳлеѻ́мъ і҆ю́динъ.
и҆ б̂ѣ та́мо, д҃, мцс̑҇ы·

И҆ въста̀ мꙋж́ъ е҆ѧ̀, і҆ и́де въ слѣ́дъ е҆ѧ̀, гл҃ати въ срд̑це е҆ѧ̀.
да намо́вит̑ еѐ себѣ̀, и҆ да приведе́тъ е҆ѧ̀ па́ки къ себѣ̀.
и҆ ѻ҆тро́къ е҆го с ни́мъ бы́сть, и҆ дво́е ѻ҆слѧ́тъ.
си же въведе и҆̀ в дом̑ ѿц҃а свое҆го.
и҆ ви́дѣ е҆го ѿц҃ъ ѻ҆трокови́цы и҆зы́иде з весе́лїемъ въ срѣте́нїе е҆го·

И҆ ѹ҆дръжа̀ и҆̀ те́сть е҆го ѿц҃ъ ѻ҆трокови́ца, пребы́сть с ни́мъ, г҃, дн҃и и҆ ꙗ҆́ша и҆ пи́ша.
и҆ прележа т̂ꙋ·

И҆ бы́сть въ дн҃ь, д҃, ѻ҆бꙋтрѣ́вши заѹ́тра и҆ въста̀, и҆ сїи поитѝ.
и҆ реч̑҇ ѿц҃ъ ѻ҆трокови́ца к зѧтю свое҆мꙋ, ѹ҆твръдѝ срд̑це твоѐ ѹ҆ло́мъками хлѣ́ба.
и҆ посе́мъ и҆́дете·

И сд̑ѣше ѻ҆́ба и҆ ꙗ҆́ста в꙽кꙋ́пѣ и҆ пи́ста.
и҆ рече ѿц҃ъ ѻ҆трокови́ца к мꙋж́ꙋ.
и҆дѝ нн҃ѣ и҆ преспѝ, и҆ воз̑бл҃жа́етъ срд̑це твоѐ·

И҆ въста̀ мꙋ́жъ пои҆тѝ и҆ задръжа̀ е҆го те́сть е҆го, и҆ прележа̀ та́мо·

И҆ въста́лъ ра́но.
въ, е҃, дн҃ь, да идетъ.
и҆ ре́клъ ѿц҃ъ ѻ҆трокови́ца ѹ҆моцнѝ ѹ҆б̂о срд̑це твоѐ хлѣ́бомъ, и҆ пото́мъ да и҆́дешъ.
и҆ та́ко задръжа е҆го до́н꙽деже преклони́сѧ дн҃ь и҆ ꙗ҆́ли и҆ пи́ли ѻ҆́ба·

И҆ ѹ҆ста́лъ мꙋжъ да и҆́детъ са́мъ и҆ жени́ма е҆го с ни́мъ и҆ ѻ́трокъ е҆го.
и҆ реч̑҇ е҆мꙋ те́сть е҆го ѿц҃ъ ѻ҆троковица.
с̂е нн҃ѣ скончава́етсѧ дн҃ь на́ вечеръ и҆ прележи зд̂ѣ.
и҆ въз꙽бл҃жа́етъ срд̑це твоѐ.
и҆ ѻ҆бꙋтрѣ́ете ѹ҆́тро въ пꙋть ва́шъ, и҆ ѿидеши въ хра́мъ сво́и·

И҆ не и҆зво́ли мꙋж́ъ прележа́ти.
и҆ въста́въ ѿи́де.
и҆ прїиде да́ждь прѧ́мо е҆вꙋ́сꙋ, и҆ се́и ес̑҇ і҆ерс̑҇ли́мъ.
и҆ с ни́мъ дво́е ѻ҆слѧ́тъ съ бре́мены.
и҆ жени́ма е҆го с ни́мъ·

И҆ е҆гда̀ прїидо́ша и҆ до е҆вꙋ́съ дн҃ь же преклони́сѧ къ ве́черꙋ ѕѣло, и҆ реч̑҇ ѻ҆́трок꙽ к господи́нꙋ свое҆мꙋ.
ходѝ ѹ҆бо да сѧ съврати́мъ въ град̑ се́и и҆е҆вꙋ́съ да прележи́мъ т̂ꙋ·

И҆ реч̑҇ к немꙋ̀ господи́нъ е҆го.
не съврати́мсѧ въ град̑ чю́жь, и҆же нѣ́сть ѿ сн҃овъ і҆и҆л҃евъ.
н̂о да мине́мъ до гаваѻ́на·

И҆ реч̑҇ къ ѻ҆́трокꙋ си.
ходѝ да пристꙋ́пимъ къ е҆ді́номꙋ ѿ мѣ́ста гаваѻ́ньскаго.
да прележи́мъ в꙽ гаваѻ́нѣ и҆л̂и в ра́мѣ·

И҆ минꙋша и҆̀ прїидо́ша, и҆ за́иде слн҃це бли́зъ гаваѻ́на, и҆же е҆сть венїами́нь·

И҆ съврати́шасѧ та́мо вънистѝ прележа́ти въ гаваѻ́нъ.
и҆ въшед̑ше сѣ́де на сте́гнах̑.
и҆ не бы́сть мꙋж́а въводѧ́щаго и҆хъ в до́мъ прележа́ти·

И҆ с̂е мꙋж́ъ ста́рь и҆зы́иде съ дѣ́ла свое҆го ѿ по́лѧ въ ве́черъ, и҆ се́и мꙋ́жъ ѿ горы̀ е҆фрѣ́млѧ.
ѻ҆бѣтова́ше же въ гаваѻ́нѣ.
мꙋж́и же град̑стїи сн҃ове венїами́ни·

И҆ възвед̑ ѻ҆́чи своѝ видѣ̀ мꙋж́а пꙋт́ника на сте́гнахъ град̑ных̑, и҆ реч̑҇ мꙋж́ꙋ ста́рецъ ка́мо и҆́деши ѿкꙋ́дꙋ л̂и грѧде́ши·

И҆ реч̑҇ к немꙋ̀ прїидо́хомъ ѿ виѳлеѻ́ма і҆ю́дина і҆ и́демъ даже до коне́цъ горы е҆фрѣмлѧ ѿкꙋ́дꙋ а҆́зъ е҆смь.
и҆ ходих̑ до виѳлеѻ́ма і҆ю́дина.
и҆ нн҃ѣ и҆дꙋ̀ в дом̑ сво́и, и҆ нѣ́сть никто́же в꙽веды́и м̂ѧ в до́мъ·

А҆ пле́вы и҆ пи́ща ѻ҆слѧ́том̑ на́шимъ е҆сть.
и҆ мн̂ѣ хлѣ́бъ и҆ вино̀ е҆сть.
и҆ ѻ҆трокови́цы и҆ ѻ́трокꙋ, и҆ рабо́мъ нѣ́сть скд̑ꙋно никое҆ѧ ве́щи·

И҆ реч̑҇ сїи мꙋ́жꙋ ста́ръ ми́ръ тебѣ̀.
и҆ недоста́токъ тво́и на мнѣ̀.
ѻ҆бач̑҇ на сте́гнахъ не лѧ́зи.
и҆ в꙽веде и҆̀ в дом̑ сво́и и҆ пред̑ложи ѻ҆слѧ́томъ е҆го пи́щꙋ.
и҆ сим̑ ѹ҆мы̀ но́ѕѣ.
и҆ ꙗ҆до́ша и҆ пи́ша·

И҆ е҆гда възвесели́сѧ срд̑це и҆хъ.
и҆ с̂е мꙋ́жи град̑стїи сн҃ове безако́н꙽никъ.
ѻ҆быидо́ша дво́ръ и҆ бїюще въ две́ри.
и҆ рѣша господи́нꙋ до́ма ста́рцꙋ гл҃ющи и҆зведѝ мꙋ́жа и҆же вни́де в дом̑ тво́и.
да позна́емъ е҆го·

И҆зы́иде к ни́мъ господи́нъ до́мꙋ и҆ реч̑҇ и҆мъ.
н̂и бра́тїа моѝ не сътвори́те ѕл̂а.
въшед̑шꙋ мꙋж́ꙋ семꙋ̀ в до́мъ мо́и.
и҆ не сътвори́те безꙋ́мїѧ сего̀·

Се̂ дщи моѧ̀ дв҃ою, и҆ жени́ма е҆го да и҆зведꙋ̀ ѻ҆́бѣ и҆ ѻ҆би́дѣте ѧ҆̀.
и҆ сътвори́те и҆́ма по блгс̑҇ти ѻ҆́чїю ва́шею.
а҆ мꙋж́ꙋ не сътвори́те ника́коже безꙋ́мїѧ сего̀·

И҆ не и҆зво́лиша мꙋж́и послꙋш́ати е҆го.
и҆ е́мъ мꙋж́ъ жени́мꙋю е҆го і҆ и҆зведе ю҆̀ к ним̑ и҆ позна́ли ю҆̀.
и҆ бы́ша с нею вс̂ю но́щь до́ свѣта.
и҆ ѿпꙋсти́ша ю҆̀ е҆гда̀ въсходи ден꙽ни́ца·

И҆ прїиде жени́ма къ заѹ҆́трїю.
и҆ паде ѹ҆ две́рїи вра́тныхъ, дворꙋ мꙋж́а и҆деже бѧ́ше мꙋж́ъ е҆ѧ̀.
и҆ въста̀ господи́н꙽ е҆ѧ̀ заѹ҆́тра ѿвръзе две́ри хра́мꙋ, і҆ и҆зы́иде поитѝ въ пꙋть свои, и҆ с̂е жени́ма е҆го лежа́ше, и҆ рꙋ́цѣ е҆ѧ̀ на пред̑две́рїю·

И҆ реч̑҇ к не́и въста́ни да и҆́демъ, и҆ не ѿвѣща̀ е҆мꙋ бѧ́ше б̂о ꙗ҆́ко мр҃тва, и҆ възложѝ ю҆̀ на ѻ҆слѧ̀, и҆ въста̀ мж̑ꙋ и҆ по́иде на мѣ́сто своѐ·

И҆ прїиде в꙽ дом̑ сво́и, и҆ взѧ̀ но́жъ и҆ е́мъ жени́мꙋ свою, и҆ раздроби ю҆̀ по ко́стем̑ е҆ѧ̀ на, в҃і, ча́стїи, и҆ посла̀ ю҆̀ въ всѧ̀ племе́на і҆и҆л҃ѧ·

И҆ бы́ша вс̂и ви́дѧще ю҆̀, и҆ реко́ша, ꙗ҆́ко нѣ́сть бы́ло н̂и ви́дѣно си́це, ѿ дн҃е ше́ствїа сн҃ов꙽ і҆и҆л҃ь ѿ землѧ̀ е҆гѷпет̑ски, да́же до дне́сь, и҆ заповѣ́да мꙋже́мъ их̑же посла̀ гл҃ющи си́це гл҃ите къ всемꙋ̀ і҆и҆л҃ю вон꙽ми́те себѣ̀ с̂е ѹ҆ста́вите в̂ы са́ми ѻ҆ се́мъ совѣтъ и҆ гл҃ите·

Глв̑҇а, к҃·

И ізыидо́ша вс̂и сн҃ве і҆и҆л҃еви, и҆ събра́шасѧ ве́сь со́ньмъ ꙗ҆́ко е҆ді́нъ мꙋж́ъ.
ѿ да́на и҆ до вирса́вїа, и҆ землѧ̀ галаад̑ска къ гв҃и ѹ҆ маси́ѳе·

И ста́ша старѣ́ишины всѣ́хъ людїи и҆ всѧ̀ племе́на і҆и҆л҃ева в со́нмѣ людїи бж҃їих̑.
у҃, ты́сѧщь мꙋж́ъ пѣших̑ въздви́гнꙋщихъ ѻ҆рꙋжїа·

И҆ слы́шаша сн҃ове венїами́ни, ꙗ҆́ко и҆зыидо́ша сн҃ове і҆и҆л҃евы въ маси́ѳъ, и҆ реко́ша сн҃ове і҆и҆л҃евы гл҃ите гд̂ѣ бы́сть ѕло́ба сїѧ·

И҆ ѿвѣща̀ мꙋж́ъ левѷтинъ, мꙋж́ъ жены̀ ѹ҆мо́реныѧ гл҃ѧ, въ гаваѻ́нѣ венїами́нѣ.
прїидо́хъ а҆́зъ и҆ жени́ма моѧ̀ прележа́ти·

И҆ въста́ша на́ мѧ мꙋ́жи гаваѻд̑стїи.
и҆ ѻ҆быидо́ша м̂ѧ въ дворѣ̀ но́щїю.
и҆ хотѣш́а м̂ѧ ѹ҆би́ти и҆ жени́мꙋю мою ѻ҆би́дѣша, и҆ ѻ҆брꙋга́ша и҆ ѹ҆́мре.

И҆ взѧх̑ женꙋ̀ свою и҆ раздроби́хъ ю҆̀.
и҆ послах̑ ю҆̀ въ всѧ̀ предѣ́лы прича́стїа і҆и҆л҃ева, ꙗ҆́ко сътвори́ша безꙋ́мїе въ і҆и҆л҃и·

Се̂ вс̂и вы̀ сн҃ове і҆и҆л҃евы дадѣте и҆мъ сло́во и҆ совѣт́ъ·

И҆ въста́ша вс̂и лю́дїе ꙗ҆́ко е҆ді́нъ мꙋ́жъ гл҃юще.
не ѿи҆́детъ мꙋж́ъ въ хра́мъ сво́и.
и҆ не ѹ҆кло́нимсѧ въ дом̑ на́шь·

И҆ нн҃ѣ сло́во с̂е сътвори́мъ гаваѻ́нꙋ.
да взы́идемъ на ню̀ по жре́бїю, и҆ да по́имемъ по, і҃, мꙋж́ъ, ѿ р҃, въ всѣ́хъ племе́нехъ і҆и҆л҃евых̑, и҆ р҃, ѿ ты́сѧщи.
и҆ ҂а.
ѿ тмы̀·

И҆ тѝ да и҆дꙋтъ в꙽зѧти бра́шно лю́демъ на съвръше́нїе и҆сходѧ́щимъ.
въ гава́ю венїами́ню.
и҆ сътворѧ́тъ е҆мꙋ по всемꙋ̀ съгрѣше́нїю и҆же сътворѝ въ і҆и҆л҃и·

И҆ събра́шасѧ вс̂и мꙋж́и і҆и҆л҃евы къ гра́дꙋ, ꙗ҆́ко е҆ді́нъ мꙋж́ъ ѡ град̑ и҆сходѧ́ще·

И҆ распꙋсти́ша племе́на і҆и҆л҃евы, мꙋж́и въ вс̂е племѧ̀ венїами́не.
гл҃юще чт̂о е҆сть ѕло́ба с̂и бы́в꙽шаѧ въ ва́съ·

И҆ нн҃ѣ дади́те мꙋж́и безако́нни и҆же въ гава́и сн҃овъ велїа́ловыхъ, и҆ да ѹ҆мо́рим̑ и҆хъ, и҆ ѻ҆чи́стимъ ѕл̂о ѿ і҆и҆л҃ѧ.
и҆ не и҆зво́лиша сн҃ове венїами́ни послꙋшати гла́са бра́тїи свое҆ѧ сн҃овъ і҆и҆л҃евъ·

Но̂ събра́шасѧ сн҃ове венїами́ни ѿ гра́довъ и҆хъ в гава́ю, и҆зы́ити на по́лкъ сн҃овъ і҆и҆л҃евъ·

И҆ съчто́шасѧ сн҃ове венїами́ни ѡ гра́да в то́и дн҃ь.
к҃, и҆ е҃, ты́сѧщь мꙋж́ъ въздви́гнꙋщихъ ѻ҆рꙋж́їа кро́мѣ живꙋщихъ в гава́ле.
и҆же съчте́сѧ, з҃, сот̑, и҆ к҃, мꙋж́ъ и҆збра́нных̑ ѿ всх̑ѣ люде́и.
ѻ҆бое҆мꙋ хꙋдо́жни сїи вс̂и пра́щницы ме́щꙋще ка́менїе къ вла́сꙋ и҆ не грѣша́юще·

И҆ всх̑ѣ мꙋже́и і҆и҆л҃евъ съчте́сѧ ра́звѣ сн҃овъ венїами́новых̑.
у҃, ты́сѧщь мꙋж́ъ възвд̑иза́ющихъ ѻ҆рꙋж́їе, и҆ вс̂и сїи мꙋ́жи во́ини·

И҆ въста́ша възыидо́ша в꙽ веѳи́ль и҆ въпраша́ша ѹ҆ б҃а.
и реко́ша сн҃ове і҆и҆л҃еви, кт̂о ѿ нас̑҇ възы́идет̑ въже́мъ пр́ьвое, въе҆ва́ти съ сн҃ьми венїами́новыми.
и҆ реч̑҇ г҃ь і҆ю́да да възы́идетъ въ нача́токъ·

И҆ въста́ша сн҃ове і҆и҆л҃еви заѹ҆́тра, и҆ въпол̑҇чи́шасѧ в гаваѻ́на·

І҆ и҆зы́иде ве́сь мж̑ꙋ.
і҆и҆л҃евъ на́ брань съ венїами́номъ.
и҆ ѻ҆полчи́шасѧ на венїами́на мꙋж́и і҆и҆л҃евы на́ брань въ гава́ю·

И҆зыидо́ша сн҃ове венїами́нови, из̑ гаваѻ́на.
і҆ и҆зби́ша въ і҆и҆л҃и в то́и дн҃ь.
҂к҃в, мꙋж́ъ на землѝ·

И҆ ѹ҆крѣпи́сѧ ве́сь мꙋж́ъ і҆и҆л҃евъ.
и҆ приложи́ша сни́тисѧ в пол̑҇къ на мѣ́сто и҆де́же снидо́шасѧ въ дн҃ь пр́ьвыи·

И҆ възыидо́ша сн҃ове і҆и҆л҃еви, и҆ пла́кашасѧ пред̑ гм҃ъ до́ вечера.
и҆ въпраша́ша г҃а гл҃юще.
а҆ще прило́жимъ е҆щѐ пристꙋпи́ти в пол̑҇къ къ сн҃омъ венїами́ним̑ бра́та на́шего.
и҆ реч̑҇ г҃ь възы́идете к ни́мъ·

И҆ прїидо́ша сн҃ове і҆и҆л҃еви къ сн҃омъ венїами́немъ, въ дн҃ь, в҃. і҆ и҆зыидо́ша сн҃ове венїами́ни проти́вꙋ и҆мъ, ѿ гаваѻ́на въ дн҃ь, в҃. і҆ и҆зби́ша е҆щѐ ѿ сн҃овъ і҆и҆л҃евъ.
҂и҃і, мж̑ꙋ на зем̑лѝ.
сїи вс̂и въздвизающе ѻ҆рꙋж́їе·

И҆ в꙽зыидо́ша в꙽си сн҃ове і҆и҆л҃еви и҆ вс̂и лю́дїе въ веѳи́ль и҆ пла́кашасѧ, и҆ сѣдоша пред̑ гм҃ъ, и҆ пости́шасѧ в꙽ то́и дн҃ь даже къ ве́черꙋ.
и҆ възнесо́ша вс̂есъж꙽же́нїе сп҃сенїѧ в то́и дн҃ь пред̑ гм҃ъ и҆ т̂ꙋ ковче́гъ завѣта гн҃ѧ.
в т̂ы дн҃и, и҆ ѳинее́съ сн҃ъ е҆лїа҆за́ровъ, сн҃а а҆а҆ро́нѧ, пред̑стоѧ̀ пред̑ нимъ в ты дн҃и·

И҆ въпраша́ше сн҃ове і҆и҆л҃евы гл҃юще.
а҆ще прило́жимъ в꙽зыитѝ е҆ще на по́лкъ къ сн҃омъ венїа҆ми́нем̑.
брата на́шего.
и҆л̂и ѻ҆ста́вимъ·

И҆ рече г҃ь в꙽зыидѣте, ꙗ҆́ко ѹ́тро дам̑ ѧ҆̀ в рꙋки ваша·

И҆ под̑ста́виша сн҃ове і҆и҆л҃евы под̑са́дꙋ ѻ҆́крс̑҇тъ гаваѻ́на·

И҆ взыидо́ша сн҃ове і҆и҆л҃еви къ сн҃омъ венїа҆ми́немъ въ дн҃ь тре́тїи и҆ въпол̑҇чи́шасѧ на гаваѻ́на ꙗ҆́ко е҆ді́ною, и҆ е҆ді́ною·

И҆зыидо́ша сн҃ове венїа҆ми́ни проти́вꙋ людем̑, и҆ протѧго́шасѧ и҆з гра́да.
и҆ нача́ша ѹ҆бива́ти людїи ѹ҆ꙗ҆́звле́ныхъ.
ꙗ҆ко прь́вое и҆ второ́е на пꙋтѝ, и҆же е҆сть е҆ді́н꙽ сходѧ́и въ веѳи́ль, а҆ дрꙋгїи въ гава́и.
ꙗ҆́ко л҃, мꙋжъ въ і҆и҆л҃и·

И҆ реко́ша сн҃ве венїа҆ми́ни, па́даютъ пред̑ нами ꙗ҆́ко и҆ пре́жде.
сн҃ове же і҆и҆л҃еви реко́ша.
побѣ́гнемъ д̂а ѧ҆̀ и҆зведемъ и҆з гра́да на пꙋти·

И҆ сътвори́ша та́ко и҆ вс̂и мꙋжи і҆и҆л҃еви въста́ша ѿ мѣста свое҆го.
и҆ снидо́шасѧ въ валаѳама́рѣ.
под̑са́да же і҆и҆л҃ева и҆зы́иде ѿ мѣста свое҆го.
ѿ за́пада гава́и·

И҆ прїиде проти́вꙋ гаваем̑, і҃, ты́сѧщъ мꙋжъ и҆збра́нныхъ ѿ всего і҆и҆л҃ѧ, и҆ по́лкъ ѹ҆силенъ.
сиж̑ не разꙋмѣша ꙗ҆́ко постиза́етъ ѧ҆̀ ѕл̂о·

И҆ побѝ г҃ь венїа҆ми́на пред̑ сн҃ы і҆и҆л҃евыми, и҆ рас꙽сы́паша сн҃ве і҆и҆л҃ви ѿ венїа҆ми́на в то́и дн҃ь ҂к҃е, и҆ р҃, мꙋж꙽ и҆ сїи вс̂и воз̑двиза́юще ѻ҆рꙋжїе·

И҆ ви́дѣша сн҃ове венїа҆ми́ни, ꙗ҆ко и҆зби́ша и҆хъ.
и҆ да́ша мѣ́сто сн҃ове і҆и҆л҃еви венїа҆ми́нꙋ.
ꙗ҆́ко ѹ҆пова́ша под̑са́дамъ и҆же под̑сади́ша ѹ҆ гава́и·

И҆ подви́жесѧ под̑сѣд꙽ і҆ и҆зыиде в гава́ю и҆ начаша трꙋби́ти і҆ и҆зби́ша весь град̑ ѻ҆́стрїемъ меча̀·

І҆и҆л҃ьтѧне же и҆мѣхꙋ зна́менїе со под̑сѣдомъ е҆гда̀ за́жгꙋтъ град̑ мꙋж꙽ же принесъ ме́чь къ под̑са́де.
на зна́менїе, да запа́лѧт̑ и ды́мъ да ѹ҆мно́житсѧ и҆з гра́да·

Є҆гда б̂о възврати́сѧ і҆и҆л҃ь въ ра́ть.
венїа҆ми́н же нача̀ ѹ҆бива́ти ꙗ҆́звенных̑ въ і҆и҆л҃и, до, л҃, мꙋж꙽ ꙗ҆́ко реко́ша, пакы паде́нїемъ падꙋтъ пред̑ на́ми.
ꙗ҆́коже и҆ прь́выи по́лкъ·

Є҆гда́ же ꙗ҆́ви́сѧ ѻ҆́гнь и҆сходѧ̀ ѿ гра́да и҆ сто́лпъ ды́менъ, и҆ ѻ҆зрѣсѧ вениа҆мин̑҇ за сѧ, и҆ с̂е в꙽зы́иде скон̑҇ча́нїе гра́дꙋ до нб҃си·

Мꙋж꙽ же і҆и҆л҃евъ возврати́сѧ.
и҆ разбего́шасѧ сн҃ве венїа҆ми́ни.
ви́дѣша б̂о ꙗ҆́ко возвраща́шесѧ на него ѕл̂о·

И҆ ѿбѣго́ша пред̑ сн҃ы і҆и҆л҃евыми на пꙋтѝ пꙋсты́нѧ, пол̑҇к же подви́гнꙋлъсѧ на́ нѧ.
і҆ и҆же ѿ гра́да бїѧ́хꙋ ѧ҆̀ средѣ себѐ·

И҆ побива́хꙋ венїа҆ми́на, и҆ гна́ша за пѧ́тъ е҆мꙋ до гава́ѧ, безъ ѿпочива́нїа, и҆ потопта́ша и҆хъ даже проти́вꙋ гаваѻ́на на восто́къ сл҃нцꙋ·

И҆ падо́ша ѿ венїа҆ми́на, ҂и҃і, мꙋж꙽.
и҆ си вс̂и и҆ мꙋжи си́лни·

И ѻ҆зрѣ́вшесѧ ѻ҆ста́вшеи҆́ и҆ пробѣго́ша въ пꙋсты́ню къ камы́кꙋ рем꙽мо́ню.
и҆ собира́хꙋ и҆хъ ꙗ҆́ко ѻ҆ставшее ѿ вина̀ по стеѕѧм̑, ҂е҃, мж̑ꙋ и҆ гна́ша въ слд̑ѣ и҆хъ до гаваа́да.
і҆ и҆зби́ша ѿ них̑, ҂в҃, мꙋж꙽·

И҆ бысть всѣхъ мꙋжъ пад̑шихъ ѿ венїа́ми́на въ то́и дн҃ь, ҂к҃е, мꙋжеи въздвиза́ю҆щих̑ ѻ҆рꙋжїе, всиж̑ с̂и мꙋжи си́лнїи·

И҆ ѻ҆зрѣшасѧ ѻ҆ста́вшїи, и҆ въбѣго́ша въ пꙋсты́ню къ камы́кꙋ рем꙽мо́ню, х҃, мж̑ꙋ.
и҆ сѣдѣша въ камы́цѣ рем̑мо́ни, д҃, мс̑҇цѣ·

Сн҃ове же і҆и҆л҃еви воз̑врати́шасѧ къ сн҃омъ венїа҆ми́нем̑·

і҆ и҆зби́ша ѧ҆̀ ѻ҆рꙋжїемъ ѿ града вн̂е.
и҆ скотъ и҆ вс̂е е҆же ѻ҆брѣте́сѧ въ всх̑ѣ гра́дехъ, и҆ гра́ды вс̂ѧ ѻ҆брт̑ѣшаꙗ҆́сѧ и҆зожго́ша ѻ҆гнемъ·

Глв̑҇а, к҃а·

Сн҃ове же і҆и҆л҃еви клѧ́шасѧ въ маси́ѳѣ гл҃юще, мꙋжъ ѿ нас̑҇ да не да́сть венїа҆ми́нꙋ дще́ре свое҆а в꙽ женꙋ̀·

И҆ прїидоша лю́ди въ веѳи́ль.
и сѣдѣша тꙋ до́ вечера пред̑ гм҃ъ.
и҆ въз꙽двиго́ша глс̑҇а свои, и҆ пла́кашесѧ пла́чемъ ве́лїимъ·

И҆ реко́ша въскꙋю г҃и б҃е і҆и҆л҃евъ, бы́сть си́це дне́сь въ і҆и҆л҃и.
е҆же ѿлꙋчи́сѧ ѿ і҆и҆л҃ѧ племѧ̀ е҆ді́но·

И҆ бы́сть наѹ҆́трїѧ ѻ҆бꙋт́рѣша лю́дїе.
и҆ съгради́ша т̂ꙋ ѻ҆лта́рь.
и҆ възнесо́ша вс̂есъж꙽же́нїе сп҃сенїѧ·

И҆ реко́ша сн҃ове і҆и҆л҃ви кт̂о е҆сть и҆же не възше́лъ въ собо́ръ ѿ всѣхъ племе́нъ і҆и҆л҃ь къ г҃ꙋ.
ꙗ҆ко вели́ка клѧ́тва бѧ́ше, не вшед̑шим꙽ къ г҃ꙋ въ маси́ѳъ, гл҃юще да и҆змрт̑ꙋ смр҃тїю·

И҆ жалѣша сн҃ове і҆и҆л҃еви ѻ҆ венїа҆ми́нѣ бра́те своем̑.
и҆ реко́ша и҆ ѻ҆сѣ́чено днс̑҇е е҆ді́но племѧ̀ ѿ і҆и҆л҃ѧ·

Чт̂о сътво́римъ ѻ҆ста́вшихъ ѻ҆ жена́хъ.
а҆ мы̀ клѧ́хомсѧ гм҃ъ, не да́ти и҆мъ ѿ дще́рїи на́шихъ в жены̀·

И҆ реко́ша кт̂о е҆сть е҆ді́нъ ѿ племе́ни і҆и҆л҃евъ, и҆же не взы́и҆де къ гв҃и въ маси́ѳъ.
и҆ с̂е не прїиде нї е҆ді́нъ в полкъ ѿ а҆ви́съ галаа́довыхъ в со́ньмъ·

И҆ съглѧда́ша людїи и҆ с̂е не бѧ́ше т̂ꙋ мꙋжа, ѿ живꙋщихъ въ а҆ви́сѣ галаа́довѣ·

И҆ посла́ша та́мо со́ньмъ ҂в҃і мꙋжъ си́лы.
и҆ заповѣ́даша и҆мъ гл҃юще, и҆дѣте і҆ и҆збїите живꙋщаѧ въ а҆ви́сѣ галаа́довѣ, ѻ҆рꙋжїемъ же́ны и҆ наро́ди·

Се же сътвори́те всемꙋ̀ мꙋжескꙋ по́лꙋ, и҆ все́и женѣ̀ позна́вшеи ло́же мꙋжеско, побїите.

А҆ дв҃цѣ живи́те и҆ сътвори́ша та́ко·

И҆ ѻ҆брѣто́ша ѿ живꙋщихъ въ и҆а҆ви́се галаа́довѣ.
у҃, дв҃ць дв҃ою, ꙗ҆́же не позна́ша ложа мꙋжеска.
и҆ приведо́ша ѧ҆̀ в по́лчище в сило́мъ, и҆же е҆сть в землѝ ханаа́нѣ·

И҆ посла̀ весь со́нмъ.
и҆ гл҃аша къ сн҃омъ вениа҆ми́новым̑.
и҆же в камы́цѣ рем꙽мо́ни.
и҆ призва́ша и҆̀ съ ми́ромъ·

И҆ ѻ҆брати́сѧ венїа҆ми́нъ къ сн҃омъ і҆и҆л҃евым̑ в т̂о вре́мѧ, и҆ да́ша им̑ сн҃ове і҆и҆л҃еви же́ны ꙗ҆же жи́во съхра́нше ѿ дще́реи а҆ви́с꙽съ галаа́дова.
и҆ ѹ҆годи́ша и҆мъ та́ко, и҆ лю́дїе же ѹ҆мили́шасѧ ѻ҆ венїа҆ми́нѣ.
ꙗ҆ко сътворѝ г҃ь разлꙋче́нїе в племе́нехъ і҆и҆л҃евыхъ·

И҆ реко́ша ста́рцы со́нма чт̂о сътво́римъ ѻ҆ста́вшимъ ѻ҆ жена́хъ.
ꙗ҆́ко поги́бе ѿ венїа҆ми́на жена̀·

И҆ ка́ко бꙋ́детъ прича́стїе ѹ҆цѣлѣвшихъ ѿ вениа҆ми́на.
да не поги́бнетъ племѧ̀ ѿ і҆и҆л҃ѧ·

А҆ м̂ы не возмо́жемъ да́ти им̑ же́нъ ѿ дще́рїи наших̑ ꙗ҆́ко клѧ́шасѧ сн҃ове і҆и҆л҃еви гл҃юще, про́клѧтъ даѧ̀ женꙋ̀ венїа҆ми́нꙋ·

И҆ реко́ша с̂е пра́здникъ г҃ꙋ в сило́мѣ ѿ дн҃їи въ дн҃ь.
и҆же е҆сть ѿ сѣвера къ веѳи́лю, на въсто́къ сл҃нцꙋ ѹ҆ пꙋтѝ въсходѧ́щаго, ѿ веѳи́лѧ в сихе́мъ, и҆ ѿ юга лево́ны·

И҆ заповѣ́даша сн҃омъ вениа҆ми́немъ гл҃юще.
и҆дѣте и҆ пресѣди́те въ виногра́дѣхъ·

И҆ смотри́те а҆ще и҆зы́дꙋтъ дще́ри живꙋщихъ в сило́мѣ, плѧса́ти въ ли́ки да и҆зы́дете и҆з виногра́да и҆ да въсхи́тите мꙋжъ женꙋ̀ себѣ ѿ дще́рїи сило́мль.
да ѿи́дете на́ землю венїа҆ми́ню·

И҆ е҆гда̀ бꙋдетъ прїидꙋтъ ѿц҃ы и҆хъ и҆ бра́тїѧ и҆хъ прѣтисѧ к на́мъ.
и҆ речемъ им̑ поми́лꙋите ѧ҆̀.
ꙗ҆ко нѣсть мꙋжъ поꙗ҆́лъ жены̀ своеѧ в꙽ по́лце, ꙗ҆́ко м̂ы нѣ́смы далѝ и҆мъ же́нъ.
ꙗ҆́ко не съгрѣши́сте·

И҆ сътвори́ша та́ко сн҃ове венїа҆ми́ни.
и҆ поѧ́ша же́ны по числꙋ их̑ ѿ плѧ́шꙋщих̑ ꙗ҆́же въсхити́ша ѿи҆до́ша, и҆ възврати́шасѧ въ прича́стїе свое.
и҆ съград̑и̑ша гра́ды, и҆ всели́шасѧ в ни́хъ·

И҆ ѿи҆до́ша ѿтꙋдꙋ сн҃ове і҆и҆л҃еви в т̂о вре́мѧ, и҆ мꙋжъ въ племѧ̀ свое и҆ в род̑ свои і҆ и҆зы́де ѿтꙋдꙋ мꙋж꙽ въ прича́стїе свое·

И҆ в ты̀ дн҃и не бѧ́ше цр҃ѧ въ і҆и҆л҃и, и҆ мꙋжъ е҆же ѹ҆го́дно пред̑ ѻ҆чи́ма творѧ́ше·

Коне́цъ, книгъ, сꙋде́и і҆и҆л҃евых̑·

и҆́мать в себѣ̀, глв̑҇а, к҃а·