КНИ́ГА РꙊѲ́Ь
ГЛАВА̀ ПЄРВАѦ
И бы́сть внегда̀ сꙋдѧ́хꙋ сꙋдїѧ, бы́сть гла́дъ на землѝ.
і҆ и́де мꙋжъ ѿ виѳлеѻ҆́ма і҆юдина, ѻ҆бита́ти в се́ла моа́влѧ, са́м꙽ и҆ жена̀ е҆го и҆ дв̂а сн҃а е҆го·
И҆мѧ же мꙋжеви е҆лимеле́хъ, и҆́мѧ же женѣ̀ е҆го ное҆м꙽минь.
і҆ и́мѧ двѣма сн҃ома е҆го.
маа́лонъ.
и҆ хелеѻ҆́нъ.
е҆ѳраѳе́иска и҆же ѿ виѳлеѻ́ма і҆ю́дина.
и҆ прїидо́ша в село̀ моа́вле, и҆ бѣша т̂ꙋ·
И҆ ѹ́мре е҆лимеле́хъ мꙋжъ ное҆́м꙽минь.
и ѻ҆ста̀ ѻ҆на̀ и҆ ѻ́ба сн҃а е҆ѧ̀, и҆ поѧ́ста себѣ же́ны, моа҆ви́тъстїи.
и҆́мѧ е҆ді́нои ѻ҆́рѳа.
і҆ и҆́мѧ вто́рѣи рꙋѳъ.
и҆ жи́ша та́мо до і҃, лѣтъ·
И҆ ѹ҆мро́ста ѻ҆́ба сн҃а еѧ̀.
меа́лонъ.
и҆ хелеѻ́нъ.
и҆ ѻ҆ста̀ жена̀ по мꙋж́ꙋ свое҆мъ.
и҆ по ѻ҆бо́ю сн҃ꙋ еѧ̀.
и҆ въста̀ ѻ҆на̀ и҆ ѻ́бѣ сно́хи еѧ̀.
и҆ възъврати́шасѧ съ села̀ моа́влѧ.
занѐ ѻ҆бита́ша въ селехъ моа́влихъ, ꙗ҆ко присѣтѝ г҃ь людїи свои́хъ да́ти и҆мъ хлѣбы·
И҆ ѿи́де ѿ мѣста и҆же б̂ѣ та́мо ѻ҆на̀ и҆ ѻ́бѣ сно́сѣ еѧ̀ с не́ю.
и҆дѧ́хꙋ в пꙋть възврати́тисѧ въ землю і҆ю́динꙋ·
И҆ рече ное҆́м꙽минь ѻ҆бѣма сно́хама свои́ма.
и҆дѣта ѹ҆бо и҆ възврати́тасѧ каѧ́ждо в дом̑ ѿц҃а свое҆го.
да сътворѝ б҃ъ с ва́ма млс̑҇ть ꙗ҆́коже сътвори́ста съ ѹ҆ме́ршими и҆ съ мно́ю·
да да́сть г҃ь б҃ъ ва́ма ѻ҆брѣстѝ поко́и, коѧ́ждо въ домꙋ мꙋжа свое҆го и҆ цѣлова ѧ҆̀, ѻ҆ни́ же въздвиго́ша гла́сы своѧ̀ и҆ пла́кашасѧ·
И҆ реко́ста е́й сно́хи н̂и, н̂о и҆де́ва с тобою в лю́ди твоѧ·
И҆ рече ноем̑минь ѻ҆брати́тесѧ ѹ҆бо дщери моѝ, въскꙋю и҆́дете съ мно́ю.
и҆л̂и е҆ще сн҃а моѧ въ ѹ҆тро́бѣ мое́и, да бꙋ́дета вама мꙋжа·
Възврати́тесѧ ѹ҆бо дще́ри моѝ, і҆ и҆дѣте, ꙗ҆́ко състарѣхсѧ а́зъ, и҆ не бꙋдꙋ мꙋжꙋ.
е҆гдаж̑ и҆ гл҃ала быхъ.
ꙗ҆ко ѹ҆ мене е҆сть и҆мѣнїе.
да бꙋдꙋ мꙋжꙋ, и҆ рождꙋ сн҃ы·
Вы л̂и пожде́та и҆хъ, да възрастꙋтъ.
да ѧ҆̀ по́имета, а҆ не бꙋдета и҆́номꙋ мꙋжꙋ.
н̂и дще́ри моѝ ꙗ҆́ко съжа́лисѧ мн̂ѣ паче ваю.
ꙗ҆́ко и҆зы́иде на́ мѧ рꙋка̀ гн҃ѧ·
И҆ възъдви́гше гла́сы своѧ, и҆ плакаста па́ки.
и҆ цѣлова́вше ѻ҆́рѳа свекровъ свою, и҆ ѻ҆брати́сѧ въ лю́ди своѧ.
рꙋ́ѳ же и҆́де въ слѣдъ све́кры своеѧ̀·
И҆ рече ное́м꙽минь къ рꙋ́ѳе с̂е ѻ҆брати́сѧ ꙗ҆́трь твоѧ̀ къ людемъ свои҆мъ и҆ ко богомъ свои҆мъ.
ѻ҆брати́сѧ ѹ҆́бо и҆ ты̀ въ слѣдъ ꙗ҆́трове свое́ѧ·
И҆ рече рꙋ́ѳъ не срѧ́щи менѐ т̂о, е҆же ѻ҆ста́вити тебѐ, е҆же и҆ ѻ҆брати́ти ми сѧ ѿ тебѐ.
н̂о и҆дѣж́е и҆́деши т̂ы, и҆ ѧ҆̀ пои҆дꙋ̀, і҆ и҆дѣж́е бꙋдеши т̂ы бꙋдꙋ і҆ а́зъ.
лю́дїе твоѝ и҆ лю́дїе моѝ.
и҆ б҃ъ твой б҃ъ мой·
И҆дѣж́е а́ще ѹ҆́мреши т̂ы, т̂ꙋ и҆ а́зъ, и҆дѣже погребе́шисѧ т̂ы.
т̂ꙋ и҆ аз̑ погребꙋсѧ, та́ко да сътворѝ м̂и г҃ь.
с̂е да приложи́тъ, ꙗ҆́ко смр҃ть разлꙋчитъ междꙋ мно́ю и҆ тобо́ю·
Ви́дѣвшиж̑ ноем̑минь ꙗ҆́ко ѹ҆крѣпи́сѧ и҆тѝ с не́ю, и҆ ѹ҆млъче гл҃ати къ не́и ксемꙋ̀·
И҆до́ста же ѻ҆́бѣ до́ндеже прїидо́ста въ виѳлеѻ́м꙽, и҆ бы́сть е҆гда̀ прїидо́ста ѻ҆нѝ, и҆ възгласѝ весь град̑ ѻ҆ них̑, и҆ реко́ша и҆л̂и сѐ е҆сть ное҆́м꙽минь·
И҆ реч̑҇ к ни́мъ не зовѣт́е ѹ҆бо менѐ ноем̑минь, н̂о зовѣте мене го́рка.
ꙗ҆́ко и҆сполнив̑҇ мн̂ѣ го́рести вседръжи́тель ѕѣло·
А҆́зъ б̂о и҆сполнь ѿи҆до́хъ, и҆ н҃нѣ т꙽щꙋ̀ м̂ѧ възвратѝ г҃ь.
да въскꙋю м̂ѧ наречетѐ ноем̑минь.
г҃ь смирѝ м̂ѧ и҆ недоста́токъ съѕлѝ мн̂ѣ·
И҆ възврати́сѧ ное҆́м꙽минь, и҆ рꙋ́ѳа моа҆ви́тины сно́ха е҆ѧ с не́ю, ѻ҆браща́ющисѧ с꙽ села̀ моа́влѧ.
и҆ прїидо́ста въ виѳлеѻм̑, в нача́ло жа́твы ꙗ҆чме́нѧ·
Глав̑҇, в҃·
И б̂ѣ мꙋ́жъ ѹ҆́жика мꙋж́ꙋ ное҆м꙽ми́ню.
мꙋж́ъ же си́ленъ ѿ рода е҆лимеле́хова, и҆мѧ ж̑ е҆мꙋ̀ воѻ҆́зъ·
И҆ рече рꙋѳъ моа҆ви́тини къ ноем̑мини.
да и҆дꙋ ѹ҆бо на ни́вꙋ и҆ съберꙋ кла́сы въслд̑ѣствꙋ́ющи.
и҆дж̑ѣ а҆́ще ѻ҆брѧ́щꙋ блгд̑ть пред̑ ѻ҆чи́ма чл҃ка.
рече же е́й·
ное҆м꙽ми́нь, и҆дѝ дщ̂и моѧ̀.
і҆ и́де и҆ прїиде събира́ти на ни́вѣ, въслѣдъствꙋю҆щи жа́телем̑.
и҆ въпадѐ невѣ́дѧ в꙽ части ни́вы воѻ҆́зовы и҆же бы́сть ѿ племе́ни е҆лимеле́хова·
И҆ с̂е воѻ҆́зъ прїиде ѿ виѳлеѻ҆́ма, и҆ рече жнꙋщ́имъ г҃ь с ва́ма, и҆ рѣша е҆мꙋ жнꙋщїѝ, да блс̑҇витъ т̂ѧ г҃ь·
И҆ рече воѻ҆́зъ ѻ҆́трокꙋ свое҆мꙋ стоа́щемꙋ за жа́тели, кт̂о е҆сть ѻ҆трокови́ца т̂а·
И҆ ѿвѣща̀ е҆мꙋ моа́витини ес̑҇, пришед̑шаѧ с ное҆мъми́ною, ѿ села моа́влѧ·
И҆ речи м̂и да съберꙋ̀ в꙽ сно́пы̀ послѣ́дꙋ жнꙋщ́ихъ.
и҆ ꙗ҆́ко прїи́де и҆ ста̀ ѿ ѹ҆́тра и҆ до́ вера, и҆ не почива̀ на ни́вѣ ни ма́ла·
И҆ рече воѻ҆́зъ къ рꙋѳи, слы́ши д꙽щѝ.
не ходи събира́ти на и҆́нꙋ, и҆ не ѿхо́диши ѿсю́дꙋ, н̂о здѣ̀ приста́ни къ ѻ҆трокови́цамъ мои́мъ·
И҆ ѻ҆чи твоѝ да бꙋдета̀ на ни́вѣ и҆дѣже жнꙋтъ, и҆ да хо́диши въ слд̑ѣ и҆хъ.
и҆ с̂е заповѣ́даю ѻ҆́троком̑ мои́мъ не присѧщи к тебѣ̀.
и҆ е҆гда̀ въжада́еши да и҆де́ши къ сосꙋд́омъ.
и҆ пїеши ѿнꙋ́дꙋже че́рплют̑ жа́тели·
И҆ падѐ ѻ҆трокови́ца ни́ць, и҆ поклони́сѧ е҆мꙋ до зе́млѧ рекꙋщи е҆мꙋ.
чт̂о бл҃го сътворихъ пред̑ ѻ҆чи́ма твои́ма да м̂ѧ позна̀, а҆́з же е҆смь стра́нна·
И҆ ѿвѣща воѻ҆́зъ рече к не́и.
възвѣщенїемъ възвѣсти́ша м̂и, и҆же сътвори́ла е҆си съ све́кровъю свое́ю, по ѹ҆мр҃твїи мꙋж́а твое҆го.
и҆ ка́ко ѻ҆ставѝ ѿц҃а свое҆го и҆ мт҃рь свою, и҆ зе́млю рожде́нїа свое҆го.
и҆ прїиде въ лю́ди и҆хже не вѣ́да.
ѿ вче́ра и҆ ѻ҆но́мъ дн҃и, да въздасть г҃ь дѣ́ло твоѐ.
и҆ бꙋди м꙽зда твоа̀ и҆сполнь ѿ г҃а б҃а і҆и҆л҃ева.
к не́мꙋже прїиде ѹ҆пова́ти под̑ крило́ма е҆го·
Си же рече ѻ҆брѣтох̑ блгд̑ть пред̑ ѻ҆чима твои́ма гн҃е мо́и, ꙗ҆ко ѹ҆тѣши м̂ѧ и҆ гл҃а въ срд̑це рабы̀ твое҆ѧ.
и҆ с̂е а҆́зъ бꙋ́дꙋ ꙗ҆́ко е҆ді́на ѿ рабы́нь твои҆хъ·
И҆ рече е́й воѻ҆́зъ, часъ б̂о е҆сть ꙗ҆́сти, приближисѧ ѹ҆бо сѣмо да ꙗ҆сѝ хлѣбъ мо́и.
и҆ ѻ҆мочѝ с̂и ѹ҆крꙋхъ тво́и въ ѻ҆цетъ, и҆ сѧде рꙋѳъ ѿ стра́ны жа́тель и҆ пода̀ е́й воѻ҆́зъ прѧ́жмо.
и҆ ꙗ҆́сть и҆ насы́тисѧ, и҆ ѻ҆ста̀·
И҆ въста̀ събира́ти.
и҆ заповѣ́да воѻ҆́зъ ѻ҆́троком̑ свои҆мъ гл҃ѧй средѣ сноповъ да събира́етъ, и҆ не засрами́те е҆ѧ̀·
И҆ носѧ́щи но́ситъ.
и҆ да́юще дади́те е́й ѿ скла́деныхъ, и҆ не дѣ́ите е҆ѧ̀ събира́ти и҆ ꙗ҆́сти, и҆ не възбрани́те е́й·
и҆ събира̀ до́ вечера на ни́вѣ, і҆ и҆з꙽млати е҆же събра̀.
и҆ бысть събра́нное ꙗ҆́ко в мѣрꙋ дво́ю спд̑ꙋ ꙗ҆чме́ню·
И҆ взѧ̀ прїиде во́ град̑.
и҆ ви́дѣ све́кры е҆ѧ̀ е҆же събра̀.
і҆ и҆зем꙽ши рꙋѳъ ѿ на́дръ своих̑ и҆ дасть свекро́ви свое́й.
е҆же б̂ѣ ѻ҆ста́вила, и҆ ѿ нихже насы́тисѧ·
И҆ реч̑҇ к не́и све́кры еѧ̀, гд̂ѣ е҆си съби́рала днс̑҇ь.
и҆ гдѣ̀ рабо́таше, да бꙋ́детъ блс̑҇венъ позна́выи т̂ѧ.
і҆ и҆сповѣда̀ рꙋ́ѳъ свекро́ви свое́й гд̂ѣ бы́сть, и҆ рече и҆́мѧ мꙋжꙋ воѻ҆́зъ, ѹ҆ негоже бых̑ днс̑҇ь·
Рече же ное҆м꙽минь снохѣ̀ свое́и.
блс̑҇венъ е҆сть г҃ь ꙗ҆ко не ѻ҆скꙋдѣ млс̑҇ти свое҆ѧ, съ живы́ми и҆ съ ѹ҆мръшими.
и҆ рече е́й ное҆м꙽ми́нь.
ѹ҆жика е҆сть намъ мꙋж́ъ то́й, и҆ е҆сть ѿ ѹ҆́жикъ на́шихъ·
И҆ рече рꙋѳъ къ свекро́ви свое́й, и҆ мн̂ѣ ѹ҆бо рече къ ѻ҆трокови́цамъ моим̑ приста́ни.
до́ндеже сконча́ютъ вс̂ю жа́твꙋ ꙗ҆́же е҆сть мн̂ѣ·
И҆ реч̑҇ ное҆м꙽ми́нь къ рꙋ́ѳи снохѣ̀ свое́й, бл҃го дщ̂и ꙗ҆́ко ходи́ти и́маши, съ ѻ҆трокови́цами е҆го.
и҆ не ѻ҆ста́виша тебѐ въ чꙋжд̑е село̀·
И҆ приста̀ рꙋѳъ ѻ҆трокови́цам̑ воѻ҆́зовымъ.
събира́юще кла́сы до́ндеже сконча́сѧ жа́тва ꙗ҆́чме́нѧ и҆ пшени́цѣ и҆ сѣде съ свекро́вїю свое́ю·
Глав̑҇, г҃·
Рече же е́й ное҆́м꙽минь све́кры еѧ̀, дщ̂и моѧ̀ не пои҆щꙋ л̂и тебѣ̀ поко́ѧ, да бл҃го т̂и бꙋдетъ·
И҆ н҃нѣ ѹ҆бо воѻ́зъ не ѹ҆́жикъ л̂и е҆сть на́мъ.
и҆дѣже съ ѻ҆трокови́цами е҆го е҆си была̀.
и҆ с̂е нн҃ѣ то́й свѣта́етъ на гꙋмнѣ ꙗ҆чме́нь се́ѝ но́щи.
ты́ же и҆зъмы́исѧ и҆ помасти лицѐ своѐ, и҆ ѻ҆блецы́сѧ в ри́зы твоа свѣтлѣишїа.
да и҆́деши на гꙋмно̀, и҆ не ꙗ҆ви́сѧ е҆мꙋ до́ндеже сконча́етъ ꙗ҆́сти и҆ пи́ти·
И҆ бꙋдетъ е҆гда̀ лещѝ е҆мꙋ.
да разꙋмѣ́еши мѣ́сто гд̂ѣ лѧ́жетъ та́мо да вни́деши.
и҆ ѿкры́еши ѹ҆ нога́хъ е҆го.
и҆ лѧ́жеши та́мо, и҆ то́й повѣсть т̂и ꙗ҆же и҆́маши твори́ти·
И҆ рече рꙋ́ѳъ к не́и.
вс̂е е҆ли́ко рече́ши къ мнѣ̀ т̂о сътворю̀·
І҆ и́де в гꙋмно и҆ сътворѝ по всемꙋ̀ е҆ли́ко заповѣ́да све́кры еѧ̀·
І҆ ꙗ҆́стъ воѻз̑ и҆ пи́т꙽.
и҆ въз꙽блажа̀ срд̑це е҆го.
и҆ предѣ́лище въ странѣ̀ складѐ.
си́ же прїиде в та́и, и҆ ѿкры̀ ѹ҆ ногах̑ е҆го и҆ лѧ́же.
и҆ бы́сть въ полꙋнощи ѹ҆жасе́сѧ мꙋжъ и҆ възмѧте́сѧ.
и҆ с̂е жена̀ лежи́тъ ѹ҆ ногъ е҆го·
И҆ рече е҆й воѻ҆́зъ кт̂о е҆си т̂ы.
си́ же рече а҆́зъ е҆смь рꙋ́ѳъ раба̀ твоѧ.
да возло́жиши крыло своѐ на рабꙋ̀ твою.
ꙗ҆́ко ѹ́жикъ т̂ы е҆си мнѣ̀·
И҆ рече воѻ҆́зъ блс̑҇вена т̂ы гв҃и б҃ꙋ дщ̂и моѧ̀.
ꙗ҆́ко раз꙽блажа млс̑҇ть свою̀ послѣ́днюю паче прь́выѧ.
ꙗ҆́коже ѹ҆же не и҆тѝ тебѣ въ слд̑ѣ ю҆́нотъ, а҆ще ѹ҆богъ а҆́ще бога́тъ·
И҆ н҃нѣ дщ̂и не бо́исѧ н̂о всѐ е҆ли́ко рече сътворю̀ тебѣ.
вѣсть б̂о всѐ пле́мѧ людїи мои҆хъ, ꙗ҆́ко жена̀ си́лы т̂ы е҆си·
И҆ по и҆́стиннѣ ес̑҇ ꙗ҆́ко ѹ҆́жикъ е҆смь а҆́зъ.
н̂о е҆щѐ е҆сть ѹ҆́жик̑҇ ближ꙽шїи менѐ·
Ѹ҆ менѐ переле́жи сїю но́щ꙽.
и҆ бꙋдетъ заѹ҆́тра а҆́ще прїимет̑ т̂ѧ т̂о бл҃го, да пои́метъ.
а҆ще л̂и не хо́щетъ поѧ́ти тебѐ, т̂о по́и҆мꙋ т̂ѧ а҆́зъ.
жи́въ г҃ь прележѝ здѣ̀ до заѹ҆́трїѧ, и҆ лежа̀ ѹ҆ ногъ е҆го до заѹ҆́трїа.
и҆ посе́мъ въста̀ заѹ҆́тра да́же не ѻ҆чꙋтѝ по́дрꙋгъ е҆го.
и҆ рече е́й воѻ҆́зъ, да не ꙗ҆ви́шисѧ ꙗ҆́ко приходи́ла е҆си на гꙋмно̀·
И҆ рече е́й принесѝ препрꙋгъ и҆же на тебѣ, и҆ дръжи е҆го, си́же дръжа е҆̀, и҆ намѣри е́й, ѕ҃. мѣръ ꙗ҆чме́нѧ, и҆ задѣ е́й.
си́ же и҆́де во́ градъ·
И҆ прїиде рꙋ́ѳъ къ свекро́ви свое́и.
и҆ рече ей све́кры чт̂о е҆сть дщ̂и.
и҆ повѣда е́й, е҆ли́ко сътворѝ е́й мꙋж́ъ·
И҆ повѣд́а е́й, ѕ҃ мѣръ ꙗ҆чме́нѧ, с̂е да́сть м̂и, гл҃а б̂о къ мн̂ѣ, да не и҆́деши тща̀ къ свекро́ви свое́й·
Си́ же рече сѣдѝ дщ̂и.
до́ндеже ѹ҆вѣ́си ка́ко ѹ҆лѧ́жет̑ сло́во, не ѹ҆молъчит̑ б̂о мꙋжъ, до́ндеж̑ съвръши́тъ сло́во днес̑҇ ++
Глв̑҇а, д҃·
Воѻ҆́зъ же прїиде къ вра́том̑ и҆ сѣ́де т̂ꙋ.
и҆ с̂е ѹ҆́жика минова́ше, е҆гоже нарече воѻз̑.
и҆ рече е҆мꙋ̀ воѻ҆́зъ.
съврати́сѧ и҆ сѧ́ди зд̂ѣ.
ѻ҆́нъ же съврати́сѧ и҆ сѣ́де·
И҆ поѧ̀ воѻ҆́зъ і҃, мꙋж́ъ ѿ ста́рецъ гра́да.
и҆ рече сѧ́дѣте зд̂ѣ и҆ сѣдо́ша·
Посе́мъ реч̑҇ воѻ҆́зъ ѹ҆́жикꙋ.
ча́сть села̀ ꙗ҆́же ес̑҇ бра́та на́шего е҆лимеле́ха.
и҆же ѿдал̑҇ е҆сть ное҆м꙽ми́не, ѻ҆на́ же наврати́сѧ дне́сь ѿ села̀ моа́влѧ·
А҆́зъ же рекох̑ въ ѹ҆́мѣ с̂и да ꙗ҆влю̀ т̂и с̂е въ ѹ҆́хо твое гл҃ѧ, притѧжѝ е́й пред̑ сѣдѧ́щими пред̑ ста́рцы людїи моих̑, и҆ а́ще ѹ҆жич̑҇ствꙋе́ши, т̂о ѹ҆жич̑҇ствꙋи.
а҆́ще ли не ѹ҆жич̑҇ствꙋе́ши, т̂о повѣ́жъ ми да вѣ́даю.
ꙗ҆́ко нѣ́сть ра́звѣи тебѐ ѹ҆жич̑҇ствова́ти бли́ж꙽ши і҆ и҆ а́зъ е҆смь по тебѣ̀.
се́й же рече а҆́зъ е҆смь ѹ҆жич̑҇ствꙋю·
И҆ реч̑҇ воѻ҆́зъ въ дн҃ь во́нже притѧ́жеши село̀ ѿ рꙋкѝ неем̑ми́нѧ, то и҆ рꙋ́ѳъ моа҆ви́тѧнꙋ, женꙋ̀ ѹ҆мр́ьшаго, въ прича́стїе е҆го, по́и҆меши себѣ̀, и҆ т̂ꙋ досто́ит̑ ти поꙗ҆́ти да въста́виши и҆́мѧ ѹ҆мр́ьшаго въ прича́стїи е҆го·
И҆ реч̑҇ ѹ҆́жикъ воѻ҆́зꙋ.
не възмогꙋ̀ ѹ҆жич̑҇ствова́ти себѣ̀.
да бы́хъ не рассы́палъ прича́стїа мое҆го.
ѹ҆жич̑҇ствꙋ́и себѣ̀ т̂ы, ѹ҆жич̑҇ство моѐ, а҆́зъ б̂о не възмогꙋ̀ ѹ҆жич̑҇ствова́ти·
Се же ѹ҆правле́нїе бы́сть пре́же въ і҆и҆л҃и.
ѻ҆ ѹ҆жич̑҇ствова́нїю, и҆ ѻ҆ премене́нїю.
е҆же ѹ҆крѣпле́нїа ра́ди всѧ́каго словесѝ, і҆ и҆зꙋѧ́ше мꙋж́ъ сапо́гъ сво́и.
и҆ даа́ше по́дрꙋгꙋ свое҆мꙋ ѹ҆жич̑҇ствꙋ́ющи ѹ҆́жич̑҇ство е҆го, и҆ с̂е бѧ́ше свѣдѣтельство въ і҆и҆л҃и·
И҆ реч̑҇ ѹ҆́жик̑҇ воѻ҆́зꙋ.
притѧ́жи себѣ ѹ҆́жич̑҇ство моѐ.
і҆ и҆зꙋ́въ сапо́гы своѝ и҆ да́сть е҆мꙋ.
И҆ реч̑҇ въѻ҆́зъ ста́рцем̑ и҆ всѣ́мъ людемъ.
по́слꙋси в̂ы днс̑҇е.
ꙗ҆́ко притѧжа́хъ дне́сь вс̂е е҆ли́ко быс̑҇ е҆лимеле́хово, и҆ вс̂е е҆ли́ко е҆сть хемеѻ́не, и҆ ва́лоне ѿ рꙋкѝ ное҆м꙽ми́нѧ·
И҆ къ семꙋ́ же рꙋ́ѳъ моа҆ви́тининꙋ женꙋ̀ маа҆ло́ню, пое́млю себѣ̀ въ женꙋ̀, въста́вити и҆́мѧ ѹ҆мр́ьшаго.
въ прича́стїи е҆го, да не поги́бнетъ и҆́мѧ ѹ҆ме́рьшаго ѿ бра́тїѧ е҆го и҆ ѿ племе́не е҆го.
по́слꙋси в̂ы дне́сь сего̀·
И҆ ѿвѣща́ша вс̂и лю́дїе е҆же бы́ша ѹ҆ вра́тъ и҆ ста́рцы, по́слꙋси е҆смы̀ да да́сть г҃ь женѣ̀ се́й въходѧ́щеи в дом̑ тво́и.
ꙗ҆́коже рахи́ли и҆ ꙗ҆́ко лїѝ е҆же притѧжа́ста ѻ҆́бѣ до́мъ і҆и҆л҃евъ, сътворѝ си́лꙋ въ е҆фра́ѳѣ, и҆ бꙋ́детъ и҆мѧ твоѐ въ виѳлеѻ́мѣ·
И҆ бꙋ́ди до́мъ тво́и, ꙗ҆́коже до́мъ фаре́совъ, е҆гоже родѝ ѳама́ръ і҆ю́дѣ, ѿ племе́не твое҆го.
е҆же да́стъ т̂и г҃ь ѿ рабы̀ сеѧ̀ ча́да·
И҆ поѧ̀ воѻ҆́зъ рꙋ́ѳъ, и҆ бы́сть е҆мꙋ жена̀, и҆ вни́де к не́й.
и҆ да́сть е́й г҃ь зача́ти, и҆ родѝ сн҃ъ·
И҆ реко́ша жены̀ къ ное҆м꙽ми́ни.
блс̑҇венъ г҃ь б҃ъ тво́и и҆же не рас꙽сы́па ѹ҆́жика твое҆го дне́сь, н̂о да́сть прозва́ти и҆мѧ е҆го въ і҆и҆л҃и, и҆ бꙋ́дет̑ тебѣ̀ въ ѻ҆бража́ющасѧ дш҃ꙋ, и҆ въ прекормле́нїе ста́рости твое́и.
ꙗ҆́ко сно́ха твоѧ̀ възлю́бившаа тебѐ родѝ сн҃ъ.
ꙗ҆́же е҆сть бл҃женнѣ́иши тебѣ, па́че сед̑ми сн҃овъ·
И҆ взѧ̀ ноем̑ми́нь ѻ҆троча̀, и҆ положи и҆̀ на ло́нѣ свое҆мъ, и҆ бы́сть е҆мꙋ дои́лица·
И҆ прозва́ша сосѣдѐ и҆мѧ е҆го, гл҃юще роди́сѧ сн҃ъ ноем̑ми́ни.
и҆ нареко́ша и҆мѧ е҆мꙋ и҆ѻ҆ви́дъ.
с̂е е҆сть ѿц҃ъ и҆е҆ссе́евъ ѿц҃а двд̑ва·
И҆ сїи рожде́нїѧ фаре́сова.
фаресъ родѝ е҆сро́ма.
е҆сро́м꙽ же родѝ и҆а҆ра́ма.
и҆а҆рам̑ же родѝ а҆минадава.
а҆минада́въ же роди наа҆сс꙽о́на.
наа҆с꙽со́н꙽ же род̑и̑ салмо́на.
салмо́н꙽ же родѝ воѻ҆́за.
воѻ҆́зъ же родѝ ѻ҆ви́да.
ѻ҆ви́дъ же родѝ і҆е҆с꙽се́ѧ.
і҆е҆с꙽се́и же родѝ дв҃да·
Коне́цъ, кни́зе, рꙋ́ѳъ·
и҆́мать в себѣ, глв̑҇а, д҃·