Библия (1581). [09] 1 Царств

ПЄ́РВЫИ КНИ́ГИ ЦА́РТс̑҇ВЪ

Глв̑҇а· А҃

И бысть чл҃къ ѿ е҆ѯарма́ѳема си́ѳъскаго, ѿ горы е҆фрѣмлѧ.
и҆мѧ е҆мꙋ е҆лка́на, сн҃ъ и҆е҆ремїи҆ль сн҃а и҆лі́и҆на.
сн҃а ѳеке́лѧ въ а҆си́ве, ѿ а҆рмаѳе́ма ѿ горы̀ е҆фрѣмлѧ·

Ѹ҆ сего̀ дв̂ѣ женѣ̀ бѣста, и҆мѧ е҆ді́нои а҆нна.
и҆мѧ вторѣи фена́на.
и҆ бѧ́хꙋ фена́нѣ дѣти.
а҆ннѣ же не бѧ́ше ѻ҆троча́та·

И҆ въсходѧ́ше чл҃къ ѿ дн҃и до дн҃и ѿ гра́да свое҆го.
е҆ѯармаѳе́ма, поклони́тисѧ.
и҆ пожрѣти г҃ꙋ б҃ꙋ саваѻ́ѳꙋ в сило́мъ.
и҆ т̂ꙋ бы́ша дв̂а сн҃а и҆лі́и҆на.
ѻ҆фни, и҆ финеѻ́съ жръцы̀ гн҃и·

И҆ бы́сть дн҃ь, и҆ пожре е҆лка́на.
и҆ да́сть фена́нѣ женѣ свое́й и҆ сн҃омъ е҆ѧ̀.
и҆ дще́ремъ е҆ѧ̀ ча́сть.

А҆н꙽нѣ же да́сть ча́сть е҆ді́нꙋ.
ꙗ҆́ко не бѣ е́й ча́да.
н̂о то́кмо а҆́ннꙋ люблѧ́ше паче фена́ны.
и҆ г҃ь затворѝ ложе́сна е҆ѧ̀.
и҆ не да́сть е́й ча́да·

И҆ ѻ҆скорбѧ́ше е҆ѧ̀ нена́висница е҆ѧ̀ и҆ смꙋща́шесѧ и҆ ѻ҆немоща̀ печа́льми свои҆ми.
и҆ сѣтова́ше сего ра́ди.
ꙗ҆́ко затворѝ г҃ь ѹ҆тро́бꙋ е҆ѧ̀.
не да́ти е́й ча́да·

Та́ко творѧ́ше ел̑҇ка́на ѿ го́да до го́да.
сїѧ же внегда̀ приходи́ти е́й в до́мъ гн҃ь.
ѹ҆корѧ́ше е҆ѧ̀ та́ко и҆ сѣтова́шесѧ и҆ пла́кашесѧ и҆ не ꙗ҆дѧ́ше·

И҆ реч̑҇ е́й е҆лка́на мꙋж́ъ е҆ѧ̀, а҆н꙽но.
чт̂о т̂и е҆сть ꙗ҆́ко пла́чешисѧ и҆ почт̂о не ꙗ҆сѝ, и҆ почт̂о бїеши срд̑це свое.
нѣсмь л̂и а҆зъ тебѐ до́брѣе пач̑҇ і҃. чад̑·

И҆ въста́вши а҆н꙽на по ꙗ҆де́нїю и҆хъ и҆́де в сило́мъ.
и҆ ста̀ пред̑ гм҃ъ.
и҆лі́и же жре́цъ сѣдѧ́ше на прс̑҇тлѣ, при пра́зе две́ри хра́ма гн҃ѧ·

И҆ т̂а ѹ҆миле́ною дш҃ею поклони́сѧ г҃ꙋ.
и҆ пла́чꙋщи пропла́ка·

Помоли́сѧ мл҃твою къ г҃ꙋ гл҃юще а҆дана́и г҃ь е҆л꙽ло саваѻ́ѳъ.
а҆ще призрѧ̀ при́зриши, на смиренїе рабы̀ твое҆ѧ.
и҆ помѧне́ши м̂ѧ и҆ дасѝ рабѣ̀ твое́й сѣ́мѧ мꙋ́жеско.
т̂о дам̑ и҆̀ пред̑ тобо́ю в да́ръ, до дн҃и смр҃ти е҆го.
вина̀ и҆ пїан꙽ства не пиет̑.
и҆ желѣ́зо не в꙽зы́идет̑ на главꙋ̀ е҆го·

И҆ бы́сть е҆гда̀ ѹ҆мно́жи молѧ́щисѧ пред̑ гм҃ъ.
и҆лі́и ж̑ жре́цъ възира́ше на ѹ҆ста̀ е҆ѧ̀·

И҆ т̂а гл҃аше въ срд̑цы свое҆м꙽.
толи́ко ѹ҆стнѣ е́й двиза́стасѧ.
а҆ гла́съ е҆ѧ̀ не слы́шашесѧ.
і҆ и҆ мнѧ́ше ю҆̀ и҆лі́и пїа́нꙋ сꙋщꙋ·

И҆ реч̑҇ е́й и҆лі́и.
доко́лѣ пїа́на е҆си ѿи҆ми вино̀ твое і҆ и҆ди ѿ мѣста гн҃ѧ.

И҆ ѿвѣща̀ а҆́нна, и҆ реч̑҇.
н̂и господи́не мои н̂о жена̀ в жесто́къ дн҃ь, а҆зъ е҆смь вина̀ и҆ пїѧ́нъства не пи́хъ.
н̂о и҆злїѧ́хъ пред̑ гм҃ъ дш҃ꙋ мою·

Не да ж̑ рабы̀ твое҆ѧ дщере́мъ порꙋга́нїѧ.
ꙗ҆́ко ѿ мно́жества ѹ҆ны́нїѧ мое҆го, и҆ ѿ мно́жества сѣтова́нїѧ мое҆го стоѧ́хъ да́же досе́лѣ·

И҆ ѿвѣща и҆лі́и и҆ рече к не́и, и҆дѝ съ ми́ромъ б҃ъ і҆и҆л҃евъ да́ждь т̂и всѧ́ко проше́нїе твоѐ.
е҆гоже про́сиши ѿ него̀·

И҆ реч̑҇ а҆́н꙽на да ѻ҆брѧ́щет꙽ раба̀ твоѧ̀ блгд̑ть пред̑ ѻ҆чи́ма твои́ма.
і҆ и́де жена̀ пꙋте́мъ свои҆мъ.
и҆ вни́де въ ѻ҆би́тель свою.
и҆ ꙗ҆́сть съ мꙋж́емъ свои҆мъ и҆ пит̑ и҆ лицѐ е҆ѧ̀ не и҆спадѐ ктомꙋ̀·

И҆ ѹ҆тренева́ше заѹ҆́тра.
и҆ поклони́шасѧ г҃ꙋ і҆ и҆до́ша пꙋте́мъ свои҆мъ.
и҆ вни́де е҆лка́на въ до́м꙽ свой, въ е҆ѯаръмаѳе́мъ.
и҆ разꙋмѣ̀ е҆лка́на женꙋ̀ свою̀ а҆́ннꙋ.
и҆ помѧнꙋ̀ ю҆̀ г҃ь, и҆ зачат̑·

И҆ бы́сть въ́ времѧ дн҃їи.
и҆ родѝ а҆́н꙽на сн҃ъ.
и҆ наречѐ и҆́мѧ е҆мꙋ само́иль.
и҆ рече ꙗ҆ко ѿ г҃а б҃а саваѻ́ѳа спросих̑ и҆̀·

И҆ взы́иде чл҃къ сїи е҆лка́на.
и҆ весь до́мъ е҆го.
въ сило́мъ пожрѣти жрътвꙋ дне́внꙋю.
и҆ мл҃твы свое́ѧ.
и҆ вс̂ѧ десѧти́ны вда́сть землѧ̀ свое́ѧ а҆́нна же жена̀ е҆го не взы́и҆де с ни́мъ.
ꙗ҆́ко речѐ мꙋж́еви свое҆мꙋ, до́ндеже взы́идетъ ѻ҆троча̀.
а҆́ще ѿдою̀ е҆̀.
и҆ ꙗ҆́ви́тсѧ лицꙋ̀ гн҃ю.
и҆ пребꙋдетъ т̂ꙋ до́ вѣка·

И҆ рече е́и҆ е҆лка́на мꙋжъ е҆ѧ̀.
творѝ бл҃гое пред̑ ѻ҆чи́ма твои҆ма сѣдѝ до́ндеже а́ще ѿдои́ши е҆̀.
и҆ да поста́витъ г҃ь слово твоѐ, и҆зшед̑ше и҆зъ ѹ҆́стъ твои҆хъ, и҆ сѣ́де жена̀.
и҆ доѧ́ше сн҃ъ свои до́ндеже ѿдои́тъ и҆̀·

И҆ взы́иде с нимъ ꙗ҆́ко ѿдоѝ е҆̀, съ тремѝ те́лцы.
и҆ съ хлѣбы е҆́фи мꙋкѝ пшени́чны.
и҆ мѣхъ вина̀.
и҆ вънидо́ша в до́мъ гн҃ь в сило́мъ.
и҆ ѻ҆троча̀ с ни́ми.
и҆ принесѐ и҆̀ пред̑ г҃а·

И҆ пожрѐ ѿц҃ъ е҆го жр́ътвꙋ е҆же творѧ́ше, ѿ дн҃е и҆ въ дн҃ь гв҃и.
и҆ принесо́ша ѻ҆троча̀ къ и҆лі́и.
и҆ закла̀ ю҆́нец̑҇.
и҆ рече а҆́н꙽на ѽ гн҃е жива̀ дш҃а моѧ.
а́зъ е҆смь жена̀ ꙗ҆же ѻ҆ семъ ста́вши пред̑ тобо́ю помоли́тисѧ г҃ꙋ·

ѻ҆ ѻ҆троча́ти се́мъ моли́хсѧ.
и҆ да́сть г҃ь проше́нїе моѐ е҆гоже проси́хъ ѹ҆ него.

І҆ а́з же даю̀ и҆̀ гв҃и въ всѧ̀ дни живота̀ е҆го.
на помаза́нїе гв҃и.
и҆ поклони́сѧ т̂ꙋ гв҃и·

Глв̑҇а, в҃·

И помоли́сѧ а҆́н꙽на и҆ рече, ѹ҆тверди́сѧ срд̑це моѐ ѻ҆́ г҃ѣ.
възнесе́сѧ ро́гъ мои ѻ҆ бѕ҃ѣ мое́мъ.
раз꙽шири́шасѧ ѹ҆ста̀ моѧ на врагѝ моѧ·

възвесели́хсѧ ѻ҆ сп҃се́нїи твое́мъ·

Ꙗ҆́ко нѣ́сть ст҃ъ ꙗ҆́ко г҃ь, и҆ нѣсть пра́веденъ ꙗ҆́ко б҃ъ нашъ, и҆ нѣ́сть си́ленъ па́че тебе г҃и·

Не хвали́тесѧ и҆ не гл҃ите высо́каѧ въ горды́ни, и҆ да не и҆зы́идетъ велерѣчїе и҆з꙽ ѹ҆́стъ ва́шихъ·

Ꙗ҆́ко б҃ъ ра́зꙋмовомъ г҃ь, и҆ б҃ъ ѹ҆гото́ваѧ начина́нїѧ своѧ̀·

Лꙋкъ си́лныхъ и҆знемо́же.
и҆ не́мощнїи препоꙗ҆́сашесѧ си́лою.
и҆спо́лненїи хлѣба лиши́шасѧ.
и҆ а́лчꙋщеи же прїидо́ша на́ зем̑лю ꙗ҆ко непло́ды родѝ се́дмь, и҆ мно́гаѧ въ ча́дѣхъ и҆знемо́же·

Гь҃ мр҃твит̑ и҆ живи́тъ.
низво́дитъ во а́дъ и҆ възво́дитъ·

Гь҃ ѹ҆бо́житъ и҆ бога́титъ, смирѧ́етъ и҆ вы́ситъ·

Въздвиза́ѧ ѿ землѧ̀ ѹ҆бо́га.
и҆ ѿ гно́ища възво́дитъ ни́ща.
поса́дит̑ е҆го и҆ съ могꙋщими люд̑скыми.
и҆ прс̑҇тол̑҇ сла́вы наслѣ́дитъ е҆мꙋ.
даѧ моли́твꙋ молѧ́щемꙋсѧ, и҆ блс̑҇вил̑҇ е҆сть лѣта пра́веднаго.
ꙗ҆́ко не ѹ҆крѣплѧ́етсѧ си́ленъ мꙋ́жъ крѣ́постїю свое́ю.
г҃ь не́мощна сътвори́тъ сꙋпоста́та е҆мꙋ, г҃ь ст҃ъ·

да не хва́литсѧ премꙋ́дрыи премꙋ́дростїю свое́ю.
и҆ да не хва́литсѧ си́лныи си́лою свое́ю.
и҆ да не хва́литсѧ бога́тыи бога́тъствомъ свои҆мъ·

Но ѻ҆ сем̑ да хва́литсѧ хвалѧ́исѧ е҆же разꙋмѣва́ти и҆ зна́ти г҃а.
и҆ твори́ти сꙋдъ и҆ пра́вдꙋ посредѣ землѧ̀·

Гь҃ възы́де на нб҃са и҆ възгремѣ̀, и҆ то́й сꙋдитъ ко́нцемъ землѧ̀ пра́веденъ сы́и.
и҆ дасть крѣпость цр҃ю на́шемꙋ и҆ възнесетъ ро́гъ х҃а свое҆го·

И҆ ѻ҆ста́ви и҆̀ т̂ꙋ е҆лка́на пред̑ гм҃ъ і҆ иде въ е҆ѯармаѳе́мъ в до́мъ сво́и.
ѻ҆троча́ же б̂ѣ слꙋжа̀ лицꙋ гн҃ю.
пред̑ лицем̑ и҆лі́ѧ жръца̀·

Сн҃ове же и҆лі́ины жръцо́вы бы́ша.
сн҃ове безако́нїѧ не вѣ́дꙋще г҃а.
ни пра́вды жре́ческы пред̑ людми всѣми жрꙋщими·

Внегда̀ б̂о кт̂о приношаше жрътвꙋ прихожда́ше ѻ҆́трок̑҇ жре́ческъ до́ндеже сварѧ́тсѧ мѧ́са.
и҆ ѹ́дица трезꙋбна в рꙋ́кꙋ е҆го·

И҆ влага́ше ю҆̀ в коно́бъ вели́кїи.
и҆л̂и въ мѣ́дѧныи сосꙋ́дъ и҆л̂и в ла́ткꙋ и҆ вс̂е е҆же вънзесѧ на ѹ҆́дицꙋ възима́ше е҆̀ себѣ жрецъ и҆ та́ко творѧ́ше всемꙋ̀ і҆и҆л҃еви.
приходѧ́щемꙋ пожрѣт́и гв҃и в силом̑·

И҆ пре́же пожре́нїѧ тꙋ́ка, прихожда́ше ѻ҆́трокъ жре́ческъ, и҆ гл҃аше мꙋжеви кадѧ́щемꙋ, да́ждь мѧ́са свари́ти жерцꙋ, и҆ не прїимꙋ ѿ тебе ктомꙋ̀ мѧ́са ѿ коно́ба·

А҆́ще же речетъ мꙋжъ жрѧ́и, да пока́дит̑сѧ пр́ьвое, ꙗ҆коже ѹ҆ста́въ тꙋ́ка, и҆ потомъ во́змеши себѣ ѿ всего̀, е҆же хо́щетъ дш҃а твоѧ̀, сїи же реч̑҇ н̂и, н̂о а҆ще нн҃ѣ не дасѝ, возмꙋ̀ си́лою·

И҆ б̂ѣ пред̑ гм҃ъ грх̑ѣ ѻ҆́трокꙋ ве́лїи ѕѣло, ꙗ҆ко ѿмѣта́хꙋ жрътвꙋ гн҃ю·

И҆ само́иль же б̂ѣ слꙋжа̀ пред̑ гм҃ъ, ѻ҆тро́чищъ сꙋще ѻ҆поꙗ҆сан̑҇ в ри́зꙋ жре́ческꙋ л꙽нѧ́нꙋ·

И҆ ѻ҆де́жꙋ сꙋгꙋ́бꙋ сътворѝ е҆мꙋ ма́ти е҆го, и҆ приноша́ше е҆мꙋ, ѿ дн҃и и҆ въ дн҃и, е҆гда̀ въсхожд̑аше с мꙋжемъ свои҆мъ пожрѣт́и жрътвꙋ в ты̀ дн҃и·

И҆ блс̑҇ви и҆лі́и е҆лка́на, и҆ женꙋ̀ е҆го гл҃ѧ да възда́сть т̂и г҃ь сѣ́мѧ ѿ женѝ тоѧ̀, за да́ръ и҆же дарова̀ гв҃и, и҆ ѿи́де чл҃къ въ мѣсто своѐ·

И҆ посѣтѝ г҃ь б҃ъ а҆н꙽нꙋ ꙗ҆́ко зача̀, и҆ родѝ е҆щѐ тр̂и сн҃ы, и҆ дще́ри дв̂ѣ·

И҆ възвели́ча ѻ҆́трокъ само́иль пред̑ гм҃ъ въ дн҃и ѻ҆́ны·

И҆лі́и же състарѣвсѧ ѕѣло, и҆ ѹ҆слы́ша ꙗ҆́же творѧ́ста сн҃а е҆го всѣмъ сн҃омъ і҆и҆л҃евымъ, и҆ ꙗ҆́ко быва́хꙋ со жена́ми, сꙋщими на мл҃твѣ ѹ҆ две́рїи хра́ма гн҃ѧ·

И҆ рече и҆́ма почто̀ твори́та по гл҃ꙋ семꙋ, и҆же а҆́зъ слы́шꙋ и҆зъ ѹ҆́стъ всѣхъ людїи ѻ҆ ва́съ·

Не сн҃а моѧ̀ е҆сте ꙗ҆́ко не бл҃го б̂о слы́шанїе а҆́зъ слы́шꙋ ѻ҆ ва́съ, ꙗ҆́ко въ грѣхъ въво́дите лю́ди гн҃ѧ, а҆ще б̂о съгрѣша́ѧ съгрѣши́тъ мꙋжъ мꙋж́еви и҆ помо́литсѧ б҃ꙋ за́нь, и҆л̂и а҆ще гв҃и съгрѣшит̑, кт̂о помо́литсѧ за́нь, ѻ҆наж̑ не послꙋш́аста гла́са ѿц҃а свое҆го, ꙗ҆́ко хотѧ̀ въсхотѣ г҃ь погꙋби́ти ѧ҆̀ ѻ҆́трок же самои́ль послꙋш́аше, и҆ възвелича́шесѧ, и҆ б̂ѣ бл҃гъ предъ гм҃ъ и҆ чл҃кы·

И҆ прїиде чл҃къ бж҃їи къ и҆лі́и, и҆ речѐ е҆мꙋ, та́ко гл҃етъ г҃ь е҆да̀ л̂и ꙗ҆́влѧ́ѧ не и҆зъꙗ҆ви́хсѧ до́мови ѿц҃а твое҆го, і҆ и҆же б̂ѣ с ни́мъ въ землѝ е҆гѷпетъстѣи, ра́бъ в домꙋ̀ фараѻ́ню·

І҆ и҆збра́хъ до́мъ ѿц҃а твое҆го ѿ всѣхъ до́мовъ і҆и҆л҃въ мн̂ѣ слꙋжи́ти въсходѧ́ще ко ѻ҆лтарю̀ мое҆мꙋ и҆ кади́ти кади́ломъ, и҆ взѧ́хъ е҆фꙋ́дъ, и҆ дахъ домꙋ ѿц҃а твое҆го, вс̂ѧ ѻ҆гне́ви жрътвенаѧ сн҃овъ і҆и҆л҃евъ въ снѣдь·

Почто́ же т̂ы призрѣ на ѳїмїꙗ҆мъ мои, и҆ на жрътвꙋ мою̀ лꙋка́внымъ ѻ҆́комъ, и҆ просла́ви сн҃а своѧ̀ па́че менѐ·

е҆же блс̑҇вити и҆сперва, всѧкꙋ жрътвꙋ въ і҆и҆л҃и, предо мно́ю·

Сего ради си́це рече г҃ь б҃ъ і҆и҆л҃евъ гл҃ѧ реко́хъ до́мъ твои, и҆ домъ ѿц҃а твое҆го, пре́идетъ предо мно́ю до́ вѣка, н̂о нн҃ѣ рече г҃ь ника́коже не бꙋди т̂о въ мн̂ѣ ꙗ҆коже прославлѧ́ющаго м̂ѧ просла́влю, и҆ ѹ҆ничижа́ѧи м̂ѧ без че́сти бꙋдетъ·

Се дн҃и и҆дт̑ꙋ и҆ потреблю̀ сѣмѧ твоѐ, и҆ племѧ̀ до́мꙋ ѿц҃а твое҆го, и҆ не бꙋдетъ ста́рца в домꙋ̀ твое҆мъ, и҆ ѹ́зриш꙽ проти́вника твое҆го въ хра́мѣ ст҃ом꙽ въ всѣхъ бл҃гостехъ і҆ил҃евыхъ·

И҆ ста́рца не бꙋдетъ в домꙋ твое́мъ въ вс̂ѧ дн҃и и҆ ни всѧ́ка мꙋжа·

І҆ и҆ж꙽женꙋ тебе и҆зъ ѻ҆лтарѧ̀ мое҆го·

и҆ ѹ҆ничиже́нїе ѻ҆́чїю е҆го сътворю̀·

да поболитъ дш҃а е҆го, и вс̂ѣ прочїи до́мꙋ твое́го падꙋтъ ѻ҆рꙋ́жїемъ мꙋ́жескомъ·

И҆ с̂е т̂и зна́менїе е҆же прїидетъ, на ѻ́ба сн҃а твоѧ̀ сїѧ, на ѻ҆финїю и҆ финеѻ́са, въ дн҃ь еді́нъ ѹ҆́мрета ѻ҆рꙋжїемъ вкꙋпѣ·

И҆ въздвигнꙋ въ не́ю мѣсто жерца̀ вѣрна и҆же вс̂е ꙗ҆же въ срд̑цы мое́мъ, и҆ ꙗ҆́же въ дш҃и мое́и сътворитъ, и҆ сътворю̀ е҆мꙋ до́мъ вѣ́ренъ, и҆ пред̑идетъ пред̑ гм҃ъ мои҆мъ вс̂ѧ дн҃и.

И҆ бꙋдет̑ ѻ҆ста́выи въ домꙋ̀ твоемъ, прїидет̑ на поклоне́нїе емꙋ, просѧ̀ сребра̀ и ѹ҆крꙋ́ха хлѣба, и҆ рече́тъ прїими м̂ѧ къ едіномꙋ слꙋже́нїю твое҆мꙋ·

снѣ́сти хлѣ́ба гн҃ѧ·

Глв̑҇а, г҃·

Ѡтро́чище же самои҆лъ б̂ѣ слꙋжа гв҃и прд̑е и҆лі́емъ і҆е҆ре́ем꙽.
и҆ гл҃ъ гн҃ь б̂ѣ че́стенъ, в ты̀ дн҃и, не бѣ видѣ́нїе посыла́емо·

И҆ бы́сть въ дн҃и т̂ы і҆ и҆лі́и сѣдѧ́ше на мѣ́стѣ свое҆мъ, и҆ ѻ҆́чи е҆го нача́ста тѧ́жцѣ бы́ти.
и҆ не можаа́ше зрѣти·

И҆ прежде да́же ѹ҆гасѐ свѣти́лникъ бж҃їи.
самои҆лъ спа́ше въ цр҃кви гн҃и, и҆дѣ́же кѣѻ́тъ бж҃їи·

И҆ възва̀ г҃ь гл҃ѧ, само́и҆ле, само́и҆ле, и҆ рече с̂е а҆зъ·

И҆ течѐ къ и҆лі́ю, и҆ реч̑҇ с̂е а҆зъ ꙗ҆́ко звал̑҇ мѧ е҆си.
и҆ рече и҆лі́и не възвах̑ тебѐ, възврати́сѧ и҆ спѝ и҆ възврати́сѧ и҆ спа̀·

И҆ приложѝ г҃ь е҆щѐ призва́ти само́и҆ла, и҆ възва̀, само́и҆лъ, само́и҆лъ, и҆ въста̀ само́и҆лъ, і҆ и́де къ и҆лі́и втори́цею и҆ рече, с̂е а҆зъ ꙗ҆́ко възва́лъ мѧ е҆си.
и҆ реч̑҇, не зва́хъ тебѐ ча́до.
възврати́сѧ и҆ спѝ·

И҆ самои҆лъ же в т̂о вре́мѧ е҆щѐ не зна̀ б҃а.
пре́жд̑е ѿкрове́нїа е҆мꙋ гла́са гн҃ѧ·

И҆ приложѝ г҃ь призва́ти само́и҆ла трети́цею.
и҆ въста́въ и҆де къ и҆лі́и, и҆ рече, с̂е а҆зъ ꙗ҆́ко зва́лъ мѧ е҆си.
и҆ разꙋмѣ и҆лі́и ꙗ҆́ко г҃ь призыва́етъ ѻ҆тро́чища·

И҆ реч̑҇ възвра́щсѧ и҆ спѝ ча́до, и҆ бꙋ́детъ а҆ще възове́тъ т̂ѧ зовы́и, и҆ рече́ши.
гл҃и г҃и, ꙗ҆́ко слы́шитъ ра́бъ тво́и.
і҆ и́де само́и҆лъ и҆ спа̀ на мѣ́стѣ свое҆мъ·

И҆ прїиде г҃ь и҆ ста̀, и҆ възва̀ е҆го ꙗ҆́коже пр́ьвое, и҆ второ́е, и҆ реч̑҇, само́и҆лъ, само́и҆лъ, гл҃и г҃и, ꙗ҆́ко слы́шитъ ра́бъ тво́и·

И҆ реч̑҇ г҃ь къ само́и҆лꙋ.
с̂е а҆зъ творю̀ гл҃ы моѧ̀ въ і҆и҆л҃и, ꙗ҆́коже всѣмъ слы́шащим̑ сїѧ.
пошꙋмѣта ѻ҆́бѣ ѹ҆́ши е҆го·

И҆ въ дн҃ь то́й въздви́гнꙋ на и҆лі́и, вс̂е е҆ли́ко гл҃ахъ до́мꙋ е҆го.
начнꙋ и҆ сконча́ю·

И҆ възвѣстих̑ е҆мꙋ, ꙗ҆́ко ѿмщꙋ а҆зъ на до́мѣ е҆го до́ вѣка, в непра́вдахъ сн҃овъ е҆го ꙗ҆́же вѣ́дѣ.
ꙗ҆́ко ѕл̂ослови́ста б҃а сн҃ове е҆го, и҆ не наказа̀ е҆ю̀·

Сего ради клѧх̑сѧ до́мꙋ и҆лі́и҆нꙋ, ꙗ҆́ко не ѻ҆́чи́ститсѧ непра́вда до́мꙋ и҆лі́и҆на.
в кади́лахъ и҆ жр́ътвахъ е҆го до́ вѣка·

И҆ спа̀ само́и҆лъ до ѹ҆́тра, и҆ ѹ҆тренева заѹ҆́тра и҆ ѿвр́ьзе две́ри хра́ма гн҃ѧ.
самои҆л꙽ же боѧ́сѧ повѣ́дати видѣ́нїѧ и҆лі́и·

И҆ възва̀ и҆лі́и само́и҆ла и҆ реч̑҇.
само́и҆ле ча́до, и҆ реч̑҇ с̂е а҆зъ·

И҆ рече и҆лі́и.
чт̂о гл҃ъ гл҃аныи к тебѣ̀.
не съкры́и ѹ҆бо ѿ менѐ гл҃а, ѿ всѣхъ слове́съ гл҃аных̑ к тебѣ̀.
молю̀ т̂ѧ не ѹ҆та́и предо мно́ю.
сїѧ сътвори́тъ тебѣ̀ г҃ь, и҆ сїа приложи́тъ а҆ще ѹ҆та́иши ѿ менѐ ѿ всх̑ѣ гл҃ъ, гл҃анных̑ к тебѣ̀·

І҆ и҆сповѣда само́и҆лъ и҆ не ѹ҆таѝ ѿ него ни е҆ді́наго гл҃а.
и҆ реч̑҇ и҆лі́и.
г҃ь самъ е҆сть ꙗ҆́ко го́дѣ бы́сть е҆мꙋ та́ко да сътвори́тъ·

И҆ възвелича́шесѧ само́и҆лъ.
и҆ г҃ь б̂ѣ с ни́мъ и҆ не падѐ ѿ всѣхъ слове́съ е҆го на землѝ ни е҆ді́нъ гл҃ъ·

И҆ разꙋмѣша вс̂и і҆и҆л҃ьти ѿ да́на, даже и҆ до вирса́вїа, ꙗ҆́ко вѣ́ренъ само́и҆лъ г҃ꙋ въ прро̑҇цѣх꙽·

И҆ приложѝ г҃ь възвѣсти́тисѧ в силом̑, ꙗ҆ви́ бо сѧ г҃ь самои҆лꙋ, и҆ вѣ́ренъ бы́сть въ прро̑҇цѣхъ само́и҆лъ къ г҃ꙋ въ все́мъ і҆и҆л҃и, ѿ конца̀ до ко́нца землѝ, і҆ и҆лі́и състарѣ́сѧ ѕѣло, и҆ сн҃а е҆го ходѧ́ще хожа́ста лꙋка́вїи пꙋтїе и҆хъ пред̑ гм҃ъ·

Глв̑҇а, д҃·

И бы́сть во́ дн҃и т̂ы събра́шасѧ и҆ноплеме́нницы проти́вꙋ і҆и҃лѧ.
і҆ и҆зы́де і҆и҃ль въ срѣте́нїе и҆хъ на́ брань.
и҆ въполчи́шасѧ въ невезе́ре.
і҆ и҆ноплеме́нницы вполчи́шасѧ въ а҆фе́це·

И҆ би́шасѧ и҆ноплеме́нницы съ і҆и҆л҃ьтѧны.
и҆ прекло́нисѧ бра́нь.
и҆ падо́ша мꙋжи і҆и҆л҃и прд̑е и҆ноплеме́н꙽никы.
и҆ ѹ҆би́ша въ бра́ни на селѣ̀, д҃. мꙋжъ·

И҆ прїидо́ша лю́дїе в꙽ по́лкъ, и҆ рѣша старцы і҆и҆л҃еви.
почт̂о поразѝ н̂ы г҃ь днс̑҇е, прд̑е и҆ноплеме́н꙽никы.
възмемъ кїѻ́тъ б҃а на́шего ѿ сило́ма.
і҆ и҆зы́дет̑ посредѣ̀ на́съ, и҆ сп҃сетъ н̂ы ѿ рꙋкѝ вра́гъ на́шихъ·

И҆ посла́ша лю́дїе в꙽ сило́мъ, и҆ взѧ́ша ѿтꙋдꙋ кїѻ҆тъ гн҃ь, сѣдѧ́щаго на херꙋви́мѣ·

И҆ бы́ша та́мо ѻ҆́ба сн҃а и҆лі́ина, с кїѻ́том̑ бж҃їимъ ѻ҆фънїи, и҆ ѳинеѻ́съ·

И҆ бы́сть ꙗ҆́ко прїиде кїѻ҆тъ гн҃ь въ по́лкъ.
и҆ възопѝ ве́сь і҆и҆л҃ь гла́сомъ вели́кимъ, и҆ возшꙋмѣ̀ землѧ̀·

И҆ ѹ҆слы́шаша и҆ноплеме́нницы глас̑҇ во́плѧ.
и҆ рѣша чт̂о с̂е во́пль вели́кїи въ по́лцѣ е҆вре́истѣ.
и҆ разꙋмѣша ꙗ҆́ко киѻ́тъ гн҃ь е҆сть въ по́лцѣ.
и҆ ѹ҆боа́шасѧ и҆ноплеме́нницы.
и҆ рѣша̑ с̂и бѕ҃и пришли сꙋть въ по́лкъ к ним̑.
го́ре намъ.
и҆змѝ н̂ы г҃и днс̑҇ь, ꙗ҆́ко не бы́сть та́ко вчера̀ и҆ ѻ҆но́мъ дн҃и·

Го́ре на́мъ кт̂о ны̀ и҆зме́тъ ѿ рꙋкѝ б҃ъ, ѹ҆твръжа́ющихъ ѧ҆̀.
с̂и сꙋть бѕ҃и поби́вшїи е҆гѷпта всѧ́цѣми ꙗ҆́звами, и҆ въ пꙋсты́ни·

Ѹ҆крѣпи́тесѧ.
и҆ бꙋ́дите въ мꙋ́жи и҆ноплеме́нницы ꙗ҆́ко да не поработае҆те и҆ е҆вреѻм̑.
ꙗ҆́ко порабо́таша на́мъ, и҆ бꙋ́дете въ мꙋж́ество.
и҆ побїитесѧ с ни́ми·

И҆ би́шасѧ с ни́ми, и҆ падо́ша мꙋж́и і҆и҆л҃еви пред̑ и҆ноплеме́нникы.
и҆ побѣжа ко́ждо на село̀ своѐ, и҆ бы́сть ꙗ҆́зва вели́ка ѕѣло̀.
и҆ падѐ ѿ і҆и҆л҃ѧ, ҂л҃, чино́въ·

И҆ киѻ́тъ бж҃їи в꙽зѧтъ бы́сть, и҆ ѻба сн҃а і҆лїи́на ѹ҆мро́ста.
ѻ҆фънїи, и҆ ѳинеѻ́съ·

И҆ течѐ мж̑ꙋ ѿ бра́ни и҆менемъ е҆менїи, и҆ прїи́де въ сило́мъ въ дн҃ь ѻ҆́нъ и҆ ри́зы своѧ̀ растерзав̑҇.
и҆ пер꙽сть б̂ѣ на главѣ̀ е҆го·

И҆ прїиде, и҆ с̂е і҆лі́и, сѣдѧ́ше на престо́лѣ е҆го ѹ҆ две́рїи помышлѧ́а пꙋть ꙗ҆ко б̂ѣ срд̑це е҆го въ ѹ҆жа́сѣ вели́цѣ, ѻ҆ кїѻ́тѣ бж҃їѝ.
и҆ чл҃къ вни́де во́ град̑ възвѣща́ѧ, и҆ возо́пи весь град̑ гласом̑ вели́кимъ·

И҆ слы́ша і҆лі́и гла́съ во́плѧ, и҆ рече чт̂о е҆сть гла́съ во́плѧ сего̀.
и҆ чл҃къ потща́в꙽сѧ вни́де, и҆ и҆сповѣ́да і҆лі́и·

И҆ б̂ѣ і҆лі́и, ч҃и, лт̑ѣ и҆ ѻ҆́чи е҆го бѣ́ста и҆знемоглѝ, и҆ не ви́дѧше·

И҆ рече і҆лі́и мꙋж́емъ.
пред̑стоа́щимъ ѹ҆ него̀, чт̂о е҆сть глас̑҇ во́плѧ сего̀.
и мꙋж́ъ пот꙽щав꙽сѧ вни́де къ і҆лі́ю, и҆ рече е҆мꙋ̀, а҆́зъ е҆смь пришедыи ѿ по́лка.
и҆ а́зъ прибѣжах̑ ѿ во́и днс̑҇ь, и҆ рече і҆лі́и.
чт̂о бы́в꙽шїи гл҃ъ ча́до·

И҆ ѿвѣща̀ ѻ҆тро́чищъ и҆ реч̑҇ побѣж́аша мꙋж́и і҆и҆л҃и, ѿ лица̀ и҆ноплеме́нникъ, и҆ ꙗ҆́зва ве́лїѧ б̂ѣ въ лю́дехъ, и҆ ѻ́ба сн҃а твоа̀ ѹ҆мро́ста, и҆ киѻ́тъ бж҃їи в꙽зѧт̑ е҆сть·

И҆ бы́сть ꙗ҆́ко помѧнꙋ̀ ѻ҆ киѻ́тѣ бж҃їѝ, и҆ спаде́сѧ і҆лі́и съ престо́ла възна́къ, и҆дж̑ѣ сѣдѧше при две́рехъ.
и҆ съкрꙋшисѧ хребетъ е҆го, и҆ ѹ́мре т̂ꙋ, ꙗ҆́ко стар̑҇ б̂ѣ чл҃къ и҆ тѧ́жекъ, и҆ то́й сꙋдѝ і҆и҆л҃еви, м҃, лѣтъ·

И҆ жена̀ ѳинеѻ҆́сова зачала̀ роди́ти, и҆ слы́ша вѣсть ꙗ҆́ко взѧт̑сѧ киѻ́тъ бж҃їи, и҆ ꙗ҆ко ѹ҆́мре свекоръ е҆ѧ̀, и҆ мꙋж́ъ е҆ѧ̀ и҆ пла́касѧ го́рко, и҆ родѝ.
ꙗ҆ко възврати́шасѧ на не́ѧ болѣ́зни е҆ѧ̀·

И҆ въ́ времѧ вънегда̀ ѹ҆мира́ше, и҆ рѣша е́й же́ны и҆ пред̑стоа́щаѧ е́й, не бо́исѧ ꙗ҆́ко сн҃а роди́ла е҆си и҆ не ѿвѣща̀, и҆ не разꙋмѣ срд̑це еѧ̀·

И҆ наречѐ ѻ҆тро́чищ̑҇ варха́воѳъ.
гл҃юще, пренесе́сѧ сла́ва гн҃ѧ ѿ і҆и҆л҃ѧ поне́же в꙽зѧт̑ бы́сть, кїѻ́тъ бж҃їи.
и҆ ѻ҆ све́крѣ е҆ѧ̀ и҆ ѻ҆ мꙋжи е҆ѧ̀·

И҆ рече погы́бе сла́ва і҆и҆л҃ева, ꙗ҆́ко взѧ́тъ бысть кїѻ́тъ бж҃їи·

Глв̑҇а, е҃·

И взѧ́ша же и҆ноплеме́нницы кїѻ́тъ бж҃їи, і҆ и҆знесо́ша е҆го ѿ а҆венезе́ра въ а҆затон̑҇·

И҆ прїе́мши и҆ноплеме́нницы кїиѻ́тъ гн҃ь, и҆ внесоша и҆̀ въ хра́мъ даго́нь, и҆ поста́виша и҆̀ ѹ҆ дагона·

И҆ ѻ҆бъѹ҆тренева́вше а҆зо́ты наѹ҆́трїе, и҆ внидо́ша въ хра́мъ даго́нь, и҆ ѹ҆ви́дѣша и҆ с̂е даго́нъ быс̑҇ спа́лъсѧ на землю на лицѐ свое пред̑ кїѻ҆́томъ бж҃їимъ, и҆ въздвиго́ша даго́на, и҆ поста́виша и҆̀ на мѣстѣ е҆го·

И҆ па́ки воста́ша заѹ҆́тра и҆ ѹ҆ви́дѣша и҆ с̂е дагон̑҇ лежа́ше лицем̑ на землѝ пред̑ кїѻ́томъ бж҃їимъ, гла́ва же даго́нова и҆ ѻ́бѣ дла́ни рꙋкꙋ е҆го ѿсѣко́шасѧ на пра́гꙋ, толи́ко хребетъ даго́новъ ѻ҆ста̀ на мѣ́сте своем̑·

И҆ сего ради не стꙋпа́ше жеръцы даго́новы, и҆ вс̂и въходѧ́щїи въ хра́мъ даго́новъ, на пра́гъ даго́новъ, въ а҆зоте даже до дне́сь·

И҆ ѻ҆тѧ́гча̀ рꙋка̀ гн҃ѧ на а҆зоты, и҆ мꙋчи ѧ҆̀ и҆ поби ѧ҆̀ въ вла́стехъ а҆зо́тъскихъ, и҆ предѣлы и҆хъ, и҆ посредѣ̀ землѧ̀ их̑ ѹ҆мно́жишасѧ мꙋхы, и҆ бы́сть смꙋще́нїе смр҃ти вели́ко въ́ градѣ·

И҆ ви́дѣша мꙋ́жи а҆зо́тъстїи, ꙗ҆ко та́ко бы́сть, и҆ гл҃аша, ꙗ҆ко да не пребꙋ́дет̑ кїѻ́тъ б҃а і҆и҆л҃ева с на́ми, ꙗ҆́ко лю́та рꙋка̀ е҆го, на́ ны и҆ на даго́на б҃а на́шег̑҇·

И҆ посла́вше събра́ша вс̂ѧ вое҆воды и҆ноплеме́нникъ а҆зо́т꙽стїи къ себѣ, и҆ гл҃аша чт̂о сътвори́мъ кїѻ҆́тꙋ б҃а і҆и҆л҃ева, и҆ рѣша геѳ꙽фе́и, да пре́идет̑ кїѻ҆́тъ б҃а і҆и҆л҃ева к нам̑ въ геѳъ, и҆ прїиде кїѻ҆тъ б҃а і҆и҆л҃ева въ геѳ̑҇·

И҆ бысть по пришествїи е҆го, и҆ бы́сть рꙋка гн҃ѧ на гра́дѣ и҆ мѧ́теж̑ ве́лїи ѕѣло бы́сть и҆ поразѝ мꙋ́жи гра́да, ѿ мала до ве́ли́ка, и҆ порази их̑ въ ѻ҆́бластех̑ и҆хъ·

И҆ сътвори́ша геѳ꙽фе́и себ́ѣ сѣдѣнїа зла́ты и҆ пꙋсти́ша кїѻ҆́тъ бж҃їи въ а҆скало́нъ, и҆ бысть ꙗ҆́ко въни́де киѻт̑ б҃а і҆и҆л҃ева въ а҆скало́нъ, и҆ возопи́ша а҆скалони́тѧне гл҃юще, почто̀ възврати́сте кїѻ́тъ б҃а і҆и҆л҃ева к нам̑, ѹ҆мори́ти н̂ы, и҆ люди на́ша·

И҆ посла́ша и҆ събра́ша вс̂ѧ во́ѧ и҆ноплеме́нникъ, и҆ рѣша по́слете киѻ́тъ б҃а і҆и҆л҃ева, и҆ да поста́витсѧ на мѣстѣ свое҆мъ, и҆ да не ѹ҆мори́тъ на́съ и҆ людїи на́шихъ, ꙗ҆́ко бы́сть мѧтежъ смр҃ти въ всѣ́хъ гра́дѣхъ тѧ́жокъ ѕѣло, ꙗ҆́ко вни́де кїѻ҆́тъ б҃а і҆и҆л҃ева т̂ꙋ·

И҆ живꙋщїи и҆ не ѹ҆мръшїи, ѹ҆ꙗ҆́звишасѧ на се́лѣхъ, и҆ възы́де во́пль град̑ныи до нб҃си·

Глв̑҇а, ѕ҃·

И б̂ѣ киѻ҆́тъ гн҃ь въ селѣхъ и҆ноплеме́нникъ, з҃ мс̑҇ць, и҆ въсмердѣ́сѧ землѧ̀ мꙋ́хами·

И҆ призва́ша и҆ноплеме́нницы, жерца и҆ волъхвы и҆ ѻ҆бааники и҆хъ гл҃юще, чт̂о сътвори́мъ кїѻ҆́тꙋ гн҃ю, скажи́те нам̑.
и҆ како по́слемъ и҆̀ въ мѣ́сто е҆го·

Ѡ҆ни́ же рѣша им̑, а҆́ще ѿпꙋща́ете в̂ы кїѻ҆́тъ завѣта б҃а і҆и҆л҃ева, т̂о да не по́слете е҆го т꙽ща̀, н̂о ѿда́юще ѿдади́те е҆мꙋ за мꙋ́ки да́ры, и҆ тогда̀ ѻ҆ста́витсѧ ва́мъ і҆ и҆сцѣ́литесѧ, да не ѿстꙋ́питъ рꙋка̀ е҆го ѿ вас̑҇·

И҆ гл҃аша чт̂о е҆мꙋ за мꙋ́ки ѿдамы̀, и҆ рѣша и҆мъ.
по чисме́ню вое҆во̑ и҆ноплеме́нническъ, е҃, сѣде́нїи зла́тых̑, и҆ пѧ́ть мꙋ́хъ зла́тыхъ, ꙗ҆ко прегрѣшенїѧ въ вас̑҇, и҆ въ кнѧ́ѕѣхъ ва́шихъ и҆ в людехъ ва́шихъ·

И҆ та́ко сътвори́те подобїе сѣда́нїи ва́ших̑, и҆ подобїе мꙋхъ ва́шихъ, расто́чшим̑ зе́млю и҆ въздади́те сла́вꙋ б҃ꙋ і҆и҆л҃евꙋ, ꙗ҆́ко да ѻ҆блегчи́тъ рꙋ́кꙋ свою ѿ ва́съ, и҆ ѿ бого́въ ва́шихъ и҆ ѿ землѧ̀ ва́шеѧ·

И҆ почт̂о ѻ҆тѧгча́ете срд̑це ва́ше, ꙗ҆коже ѻ҆тѧгчѝ е҆гѷпетъ и҆ фараѻ́нъ срд̑це сво́е, до́ндеже погꙋбѝ и҆хъ тогда̀ ѿпꙋстѝ и҆хъ, и҆ ѿи҆доша·

И҆ нн҃ѣ возмѣте и҆ сътвори́те колесницꙋ но́вꙋ е҆ді́нꙋ и҆ дв̂ѣ кра́ве пр́ьвород̑нѣ, и҆мѣю́ща телѧ́та на ни́хже не бѧ́ше ꙗ҆́рмо.
и҆ въпрѧзите кра́вы в колесницꙋ, а҆ телѧ́та възврати́те въспѧ́тъ въ до́мъ·

И҆ възе́мше кїѻ҆́тъ гн҃ь и҆ въстави́те и҆҇ на колесни́цꙋ, и҆ сосꙋды зла́тыа ѿдади́те е҆мꙋ за мꙋ́ки, и҆ положите въ ѻ҆бложе́нїе въ стра́нѣ ѹ҆ча́стїе е҆мꙋ и҆ ѿпꙋ́сти́те и҆̀ да и҆́детъ·

Посе́м же ѹ҆́зрите а҆́ще бꙋ́детъ на пꙋтѝ предѣла свое҆го, въ веѳъсамꙋсъ т̂о сїи сътворѝ на́мъ ѕло́бꙋ вели́кꙋю сїю, и҆ а́ще н̂и, т̂о ѹ҆разꙋмѣ́емъ ꙗ҆́ко нѣсть рꙋка̀ е҆го прикаса́ющисѧ на́съ, н̂о приключе́нїе с̂е бы́сть на́мъ·

И҆ сътвори́ша и҆ноплеме́нницы та́ко.
и҆ пое́мша дв̂ѣ кра́ве прьворо́днѣ.
и҆ въпрѧго́ша ѧ҆̀ в колесни́цꙋ.
и҆ телѧ́та ею̀ затвори́ша въ хра́мѣ·

И҆ възложи́ша кїѻ́тъ на колесни́цꙋ, и҆ да́ры ѻ҆бложи́ста мꙋ́хи зла́тыѧ и҆ подо́бнаѧ сѣда́нїю и҆хъ·

И҆ ѹ҆пра́вистасѧ кра́вы на пꙋть, прѧ́мо пꙋте́мъ и҆же въ веѳса́мꙋ и҆до́ста.
и҆ не съвраща́ющисѧ, н̂и на́ десно, н̂и на шꙋ́е.
и҆дꙋще и҆ рекꙋще, и҆ вое҆во́ды и҆ноплеме́нникъ.
и҆дѧ́хꙋ въ слѣдъ е҆го до предѣлъ веѳса́мъскихъ·

И҆ въ веѳсами́се жнѧ́хꙋ жа́твы пшени́ца въ ѹ҆до́лїѝ, и҆ възведо́ста ѻ҆́чи своѝ ви́дѣша киѻ́тъ гн҃ь, и҆ възвесели́шасѧ ви́дѧще.
і҆ и҆зыидо́ша на срѣте́нїе е҆мꙋ̀·

И҆ колесни́ца вни́де въ село̀ е҆ѳса́м꙽ско, и҆ ста̀ т̂ꙋ.
и҆ быс̑҇ т̂ꙋ камы́къ ве́лїи, і҆ и҆с꙽сѣ́кше дре́ва колесни́чнаѧ, и҆ кра́вы.
възнесо́ша на вс̂ѧсъж꙽жега́емаѧ г҃ꙋ·

Левѷти же възнесо́ша киѻ́тъ гн҃ь, и҆ да́ры ѻ҆бложи́ста и҆же с не́ю бы́ша.
и҆ ѹ҆ них̑ сосꙋ́ди зла́тїи и҆ положи́ша ѧ҆̀ при ка́мени сем̑ вели́цѣмъ.
и҆ мꙋжи веѳсамꙋ́ски възнесо́ша вс̂ѧсъж꙽жега́емаѧ·

и҆ пожро́ша жрътвꙋ в то́и дн҃ь г҃ꙋ·

И҆ пѧ́ть вое҆во́дъ и҆ноплеме́нникъ зрѧ́хꙋ.
и҆ възврати́шасѧ въ а҆к꙽каро́нь въ дн҃ь то́и·

И҆ сїи седѣ́нїѧ зла́тыѧ, и҆же възда́ша и҆ноплеме́нницы за мꙋ́кꙋ г҃ꙋ.
а҆задьска е҆ді́на, га́зска е҆ді́на, а҆скало́ньска е҆ді́на, ге́ѳ꙽ска е҆ді́на, а҆к꙽каро́ньска е҆ді́на·

И҆ зла́тыѧ мꙋхи по чисме́нъ всѣ́хъ град̑ и҆ноплеме́нническъ пѧтѝ вое҆во́дъ ѿ гра́да ѹ҆тверъжде́на.
и҆ до ве́си фериѕе́ѻвы, и҆ до ка́мени вели́каго.
на не́мже положи́ша киѻ́тъ завѣта гн҃ѧ и҆же е҆сть и҆ до сего дн҃и.
на селѣ̀.
веѳса́мы·

И҆ ѹ҆бѝ б҃ъ въ мꙋже́хъ веѳсамꙋ́скихъ и҆же възрѣша в꙽ киѻ́тъ гн҃ь.
и҆ ѹ҆бѝ в ни́хъ, ҂н҃, и҆ о҃ мꙋжїи.
и҆ пла́кашесѧ людїе.
ꙗ҆́ко сътворѝ г҃ь в лю́дех̑ ꙗ҆́звꙋ вели́кꙋ ѕѣ́ло·

И҆ рѣша мꙋжи и҆же ѿ веѳсамꙋса.
кт̂о мо́жетъ пои҆тѝ пред̑ гм҃ъ ст҃ымъ си́мъ.
и҆ къ комꙋ̀ взы́идетъ киѻ́тъ завѣта гн҃ѧ, ѿ нас̑҇·

И҆ посла́ша послы̀ къ живꙋщим̑ в карїа҆ѳїа҆ри́мѣ гл҃ще.
възврати́ша и҆ноплемен̑҇ницы киѻт̑ гн҃ь и҆ сни́дѣте възнесете и҆̀ та́мо к себѣ̀·

Глв̑҇а, з҃·

И прїидо́ша мꙋ́жи карїаѳїарим̑стїи, и҆ взѧ́ша кїѻ́тъ завѣта гн҃ѧ, и҆ внесо́ша и҆̀ въ хра́мъ а҆миа҆да́вль, и҆же на хо́лмѣ е҆лиа҆за́ра сн҃а е҆го, и҆ ѻ҆стиша на съхране́нїе кїѻ́та завѣта гн҃ѧ·

И҆ бы́сть ѿ него́же дн҃и б̂ѣ̀ кїѻ́тъ в карїаѳїа҆ри́мѣ, и҆ ѹ҆мно́жишасѧ дн҃їе, и҆ бы́сть, к҃, лт̑ѣ, и҆ призрѣша ве́сь до́мъ і҆и҆л҃евъ вслѣ́дъ г҃а·

И реч̑҇ само́и҆лъ къ всемꙋ̀ до́мꙋ і҆и҆л҃евꙋ гл҃ѧ, а҆ще всѣмъ срд̑цемъ ва́шимъ ѻ҆брати́тесѧ къ г҃ꙋ, и҆ ѿи҆мѣте бо́ги чюжа́ѧ ѿ среды ва́съ·

и҆ гаѝ, и҆ ѹ҆гото́ваите срд̑ца ва́ша къ г҃ꙋ, и҆ порабо́таите е҆мꙋ е҆ді́номꙋ, і҆ и҆зба́вит̑ в̂ы ѿ рꙋкы и҆ноплеме́нник꙽·

И҆ ѻ҆ста́виша сн҃ове і҆и҆л҃еви ваа́лима, и҆ гаѝ, а҆старо́ѳы, и҆ порабо́таша г҃ꙋ е҆ді́номꙋ·

И реч̑҇ само́и҆лъ събере́те къ мнѣ̀ всего і҆и҆л҃ѧ въ масиѳаѳꙋ, и҆ помолю́сѧ ѻ҆ ва́съ къ г҃ꙋ·

И҆ събра́шасѧ лю́дїе вс̂и в масиѳаѳꙋ, и҆ почрьпа́хꙋ во́дꙋ, и҆ пролива́хꙋ пред̑ гм҃ъ на́ землю.
и҆ пости́шасѧ в то́и дн҃ь, и҆ рѣша съгрѣши́хомъ пред̑ гм҃ъ, и҆ ѻ҆правда̀ само́и҆лъ сн҃ы і҆и҆л҃евы в масиѳаѳѣ·

И҆ слы́шаша и҆ноплеме́нницы ꙗ҆́ко събрашасѧ сн҃ове і҆и҆л҃еви в масиѳаѳꙋ·

и҆ взыидо́ша вое҆во́ды и҆ноплеме́нникъ на і҆и҆л҃ѧ, и҆ ѹ҆слы́шаша сн҃ове і҆и҆л҃еви, и҆ ѹ҆боѧ́шасѧ ѿ лица̀ и҆ноплеме́нникъ·

И҆ рѣша сн҃ове і҆и҆л҃еви къ само́и҆лꙋ, не премолчѝ ѻ҆ нас̑҇ въпїа къ г҃ꙋ б҃ꙋ на́шемꙋ, да и҆зба́вит̑ н̂ы ѿ рꙋкы̀ и҆ноплеме́нникъ·

И҆ рече самои҆лъ не бꙋ́ди сїе е҆же ѿстꙋпи́ти ѿ г҃а б҃а мое҆го, и҆ не не въпи́ти ѻ҆ ва́съ съ моле́нїемъ·

И҆ взѧ̀ самои҆лъ ꙗ҆́гнѧ е҆ді́но с꙽сꙋща е҆щѐ, и҆ принесе и҆̀ на вс̂есъж꙽же́нїе, съ всѣми люд̑ми, гв҃и, и҆ възопѝ само́и҆лъ къ г҃ꙋ ѻ҆ і҆и҆л҃и.
и҆ послꙋша е҆го г҃ь·

И҆ е҆гда̀ само́и҆лъ възносѧ вс̂есъж꙽же́наѧ, і҆ и҆ноплеме́нницы приближа́хꙋсѧ на́ брань къ і҆и҆л҃ю, и҆ възгремѣ г҃ь гла́сомъ ве́лїим̑ въ дн҃ь ѻ҆́нъ на и҆ноплемен̑҇никы, и҆ смѧто́шасѧ и҆ падо́ша прд̑е і҆и҆л҃ем꙽·

І҆ и҆зыидо́ша мꙋжи і҆и҆л҃еви ѿ масиѳаѳа и погна́ша и҆ноплеме́нникы, и҆ би́ша ѧ҆̀ до подо́лїа вет̑хо́рѧ·

И҆ взе́мъ само́и҆лъ ка́мень е҆ді́нъ, и҆ поста́ви и҆̀ межи масиѳа́ѳомъ, и҆ межи вет̑хим̑, и҆ нарече и҆мѧ е҆мꙋ а҆венезе́ръ, рекше ка́мень по́мощи, и҆ реч̑҇ до́ здѣ помо́же намъ г҃ь·

И҆ смири г҃ь и҆ноплеме́нникы.
и҆ не приложи́ша ктомꙋ̀ и҆тѝ въ предѣ́лы і҆и҆л҃евы.
и҆ бы́сть рꙋка̀ гн҃ѧ на и҆ноплеме́нницѣхъ, въ вс̂ѧ дн҃и само́и҆ловы·

И҆ преда́шасѧ гра́ды, и҆хже взѧ́ша и҆ноплеме́нницы ѿ сн҃ов꙽ і҆ил҃евъ.
и҆ преда́ша и҆хъ і҆и҆л҃еви, ѿ а҆к꙽каро́на даже до геѳа.
и҆ предѣ́лы і҆и҆л҃ѧ свободи́шасѧ, ѿ рꙋкы̀ и҆ноплеме́нникъ, и҆ б̂ѣ ми́ръ межи і҆и҆л҃ем꙽, и҆ межи а҆м꙽мор꙽рѣ́емъ·

И҆ сꙋди само́и҆лъ і҆и҆л҃ю вс̂ѧ дн҃и живота̀ свое҆го, и҆ прохожда́ше сквоѕѣ н̂ѧ ѿ го́да до го́да, и҆ ѻ҆́крс̑҇тъ веѳи́лѧ и҆ галга́лы, и҆ маси́ѳы, и҆ сꙋжда́ше і҆и҆л҃ѧ въ всх̑ѣ сщ҃еныхъ си́хъ·

Бѧ́ше же е҆мꙋ възвраще́нїе въ а҆рмаѳе́мꙋ ꙗ҆́ко т̂ꙋ емꙋ до́мъ б̂ѣ, и҆ т̂ꙋ сꙋжда́ше і҆и҆л҃ю, и҆ създа̀ т̂ꙋ ѻ҆лта́рь гв҃и·

Глв̑҇а, и҃·

И бы́сть ꙗ҆́ко състарѣ́сѧ само́и҆лъ, и҆ поста́ви сн҃ы своа сꙋди́ти і҆и҆л҃еви·

И҆ сїѧ и҆мена̀ сн҃ома е҆го, первенцꙋ и҆мѧ и҆ѻ҆и́ль, а҆ второ́мꙋ и҆мѧ а҆вїѧ, и҆же бы́ша сꙋдїи въ вирсаве́и·

Но̂ не ходи́ста сн҃а е҆го пꙋте́м꙽ е҆го, и҆ ѹ҆клони́стасѧ въспѧ́ть на конъчи́нꙋ поги́бели, и҆ прїима́ста м꙽здꙋ, и҆ разврати́ста пра́вед̑наѧ·

И҆ събра́шасѧ мꙋжи і҆и҆л҃еви, и҆ прїидо́ста къ само́илꙋ въ сармаѳе́мꙋ·

И҆ рѣша е҆мꙋ, с̂е ты̀ ѹ҆же състарѣ́сѧ сн҃ове же твои не хо́дита по пꙋти твоемꙋ.
то поста́ви нн҃ѣ над на́ми цр҃ѧ, да н̂ы сꙋ́дитъ, ꙗ҆́коже и҆ про́чїи ꙗ҆зы́кы·

И҆ бы́сть лꙋка́вны гл҃ы пред̑ ѻ҆чима само́иловыма, е҆гда̀ рѣша да́и же на́мъ ц҃рѧ да н̂ы сꙋ́дитъ, и҆ помоли́сѧ самои҆лъ къ г҃ꙋ·

И҆ рече г҃ь само́илꙋ, послꙋшаи гла́са людїи, ꙗ҆́коже гл҃ютъ к тебѣ̀, ꙗ҆́ко не тебѐ ѹ҆ничижи́ша, н̂о менѐ, не црс̑҇твова́ти м̂и над̑ ними·

И҆ вс̂ѧ творе́нїа ꙗ҆́же сътвори́хъ, ѿ него́же дн҃е възведо́хъ и҆хъ, и҆з꙽ землѧ̀ е҆гѷпет̑скы до дн҃ешнѧго дн҃е·

ѻ҆ста́вльше м̂ѧ, послꙋжи́ша бого́мъ и҆нѣмъ, та́ко и҆ тебѣ̀ тїи тво́рѧтъ·

И҆ нн҃ѣ послꙋш́аи гла́са ихъ, ѻ҆баче засвѣдѣтел꙽ствꙋ́ѧ, засвѣдѣтел꙽ствꙋ́еши и҆мъ, и҆ възвѣсти́ши и҆мъ пра́вдꙋ цр҃евꙋ, и҆же црс̑҇твова́ти бꙋ́детъ над̑ ними·

И҆ рече само́илъ вс̂ѧ словеса̀ гн҃ѧ к лю́демъ, просѧ́щимъ ѿ него̀ цр҃ѧ·

И҆ гл҃а и҆мъ, с̂е е҆сть ѻ҆правда́нїе цр҃ево, и҆же црс̑҇твꙋ́етъ над̑ вами сн҃ы ва́ша во́зметъ.
и҆ поло́жит̑ ѧ҆̀ въ ѻ҆рꙋжїе е҆го, и҆ на ко́ни въса́дит̑ их̑, и҆ пред̑текꙋщаѧ пред̑ колесни́цами е҆го·

И҆ поста́витъ ты́сꙋщникы себѣ, и҆ со́тники, и҆ жа́телми жа́твы свое҆ѧ.
и҆ ѻ҆бы́имꙋтъ ѻ҆быима́нїемъ гро́здїа ѹ҆ е҆го.
и҆ сътвори́ти съсꙋ́ды побѣ́ды свое҆ѧ, и҆ съсꙋ́ды колесни́цъ свои҆хъ·

И҆ дще́ри ва́ши во́зметъ твори́ти во́дки, и҆ дрꙋгїѧ сътворит̑ поварїи.
і҆ и́ны сътвори́тъ печѝ хлѣ́бы·

И҆ се́ла ва́ша и҆ виногра́ды ва́ша, и҆ масли́чины ва́ша, и҆ бл҃га́а ва́ша во́зметъ, и҆ да́стъ рабо́мъ свои҆мъ·

И҆ сѣмена ва́ша, и҆ вино̀ ва́ше ѻ҆десѧтери́тъ и҆ да́стъ ско́пцем̑ свои҆мъ, и҆ рабо́мъ свои҆мъ·

И҆ рабы же ва́ша, и҆ рабы́нѧ и҆ ста́да ва́ша бл҃гїѧ, и҆ ѻ҆слы̀ ва́ша ѿи҆метъ.
и҆ ѹ҆десѧтери́тъ на дѣ́ло своѐ·

И҆ па́ствины ва́ша ѻ҆десѧтери́тъ.
и҆ в̂ы бꙋдете е҆мꙋ̀ въ рабѝ·

И҆ възопїе́те ѿ лица̀ цр҃ѧ ва́шего въ дн҃ь ѻ҆́нъ.
е҆гоже и҆збра́сте себѣ̀.
и҆ не ѹ҆слы́шитъ вас̑҇ г҃ь въ дн҃ь ѻ҆́нъ, ꙗ҆́ко в̂ы са́ми и҆збра́сте себѣ цр҃ѧ·

И҆ не въсхотѣша лю́дїе ѹ҆слы́шати само́и҆ла, и҆ рѣша е҆мꙋ н̂и.
н̂о цр҃ь да бꙋ́детъ над̑ нами·

И҆ бꙋ́демъ и҆ м̂ы ꙗ҆́ко и҆ вс̂и ꙗ҆́зы́цы, и҆ да сꙋ́дитъ на́мъ цр҃ь на́шъ.
і҆ и҆зы́идетъ пред̑ нами.
и҆ побѣди́тсѧ, поборе́нїемъ по нас̑҇·

И҆ слы́ша само́и҆лъ вс̂ѧ гл҃ы людїи, і҆ и҆згл҃а ѧ҆̀ въ ѹ҆́ши гв҃и·

И҆ реч̑҇ г҃ь къ само́и҆лꙋ.
послꙋш́аи гла́са и҆хъ.
и҆ поста́ви и҆мъ цр҃ѧ.
и҆ рече самои҆лъ къ лю́демъ і҆и҆л҃евымъ, да и҆́дет̑ ко́ждо ва́съ въ сво́и гра́дъ·

Глв̑҇а, ѳ҃·

И б̂ѣ мꙋжъ ѿ сн҃овъ венїами́нь е҆мꙋже и҆́мѧ ки́съ, сн҃ъ е҆веи҆левъ, сн҃а и҆а҆редова, сн҃а вахи́рова, сн҃а а҆фе́кова, сн҃а мꙋжа и҆е҆минеѻ҆ва.
мж̑ꙋ си́ленъ и҆ крѣ́покъ·

И҆ семꙋ̀ б̂ѣ сн҃ъ, и҆мѧ е҆мꙋ саѹ́лъ, добро̀ вели́ченъ мꙋж́ъ и҆ бл҃гъ.
и҆ не бѣ̀ въ сн҃ѣхъ і҆и҆л҃евыхъ бл҃гъ паче е҆го, и҆ преподо́бнѣи надо всѣми, и҆ вышїи всеѧ землѧ̀·

И҆ погибо́ша ѻ҆слѧ́та ки́сова, ѿц҃а саѹ́лова.
и҆ рече ки́съ къ саѹ́лꙋ сн҃ꙋ свое҆мꙋ.
возмѝ съ собою е҆ді́ного ѿ ѻ҆трокъ, и҆ въста́вше и҆дѣта и҆ пои҆́щѣте ѻ҆слѧ́тъ·

И҆ прошед̑ сквоѕѣ го́рꙋ е҆фрѣмлю, и҆ проше̑ сквоѕѣ зе́млю селка, и҆ не ѻ҆брѣтоста.
и҆ прошед̑ сквоѕѣ зе́млю сегали́млю, и҆ не ѻ҆брѣтоста.
и҆ прошед̑ сквоѕѣ зем̑лю а҆миню, и҆ не ѻ҆брѣтоста·

И҆ пришед̑шимъ и҆мъ въ зе́млю сифа́новꙋ, и҆ рече саѹ́лъ къ ѻ҆тро́кꙋ свое҆мꙋ и҆же с ни́мъ.
прїиди и҆ възвративѣсѧ.
нерадитъ б̂о ѿц҃ъ мо́и ѻ҆ ѻ҆слѧ́техъ помышлѧ́ѧ, н̂о паче ѻ҆ на́ю·

И҆ реч̑҇ е҆мꙋ ѻ҆́трокъ е҆го.
с̂е здѣ̀ чл҃къ бж҃їи въ градѣ се́мъ, и҆ чл҃къ сла́венъ.
вс̂е е҆же а҆́ще чт̂о речетъ приходѧщим̑ к немꙋ бꙋ́детъ и҆мъ.
и҆ нн҃ѣ ѹ҆бо и҆девѣ та́мо, да неглѝ ска́жетъ нам̑ пꙋть на́шъ, и҆м꙽же по́идемы·

И҆ рече саѹ҆лъ ѻ҆́трокꙋ и҆же с ним̑.
с̂е по́идевѣ и҆ чт̂о внесевѣ къ чл҃кꙋ бж҃їю ꙗ҆ко хлѣбы ѻ҆скꙋдѣша ѿ вре́тища на́ю, и҆ ничт̂оже нѣсть ѹ҆ наю.
е҆же внести к꙽ чл҃кꙋ ѿ и҆мѣнїа на́ю·

И҆ приложи ѻ҆́трокъ ѿвѣщати саѹ́лꙋ и҆ рече.
не се л̂и ѻбрѣта́етсѧ в рꙋцѣ мое́и, четверта́ѧ ча́сть си́клѧ сребра̀, да да́си чл҃кꙋ бж҃їю, и҆ възвѣститъ на́мъ пꙋть на́ю·

Прежде б̂о во і҆и҆л҃и си́це гл҃аше, ко́ждо е҆гда̀ кт̂о и҆дѧ́ше въпраша́ти б҃а.
грѧди да и҆девѣ къ прозорливцꙋ, ꙗ҆ко нн҃ѣ людїе нарица́хꙋ прро̑҇ка т̂о прежде прозорли́вецъ зва́нъ·

И҆ рече саѹ́лъ ѻ҆́трокꙋ свое҆мꙋ.
блс̑҇ве́нъ гл҃ъ тво́и грѧди да и҆де́вѣ, і҆ и҆до́ста во́ градъ, и҆дѣже б̂ѣ чл҃къ бж҃їи·

И҆́ма же въходѧ́щема въ в꙽ход̑ град̑ныи.
и҆ с̂е сїѧ ѻ҆брѣто́ста дв҃цѣ.
и҆шли б̂о бѧхꙋ воды̀ почерпъсти, и҆ гл҃аста и҆́ма.
е҆сть л̂и гдѣ здѣ прозорли́вецъ·

И҆ ѿвѣщаста и҆́ма дв҃цѣ, гл҃юще им̑ е҆сть зд̂ѣ противꙋ лицꙋ ва́ю.
нн҃ѣ же пот꙽щи́тасѧ, ꙗ҆́ко дн҃и ради прїиде во́ град̑.
ꙗ҆ко жрътва днс̑҇е быва́етъ людемъ въ вамѣ·

И҆ ꙗ҆́ко вни́дета во́ град̑, тако и҆ ѻ҆брѧщета и҆̀ въ градѣ прежде даже не възы́детъ въ вамꙋ на ꙗ҆́дь, ꙗ҆́ко не и́мꙋть ꙗ҆́сти людїе.
до́ндеже не вни́детъ се́й, ꙗ҆ко то́й блс̑҇витъ же́ртвꙋ.
и҆ по сихъ ꙗ҆дѧ́тъ и҆ страннїи, а҆ нн҃ѣ възыдѣта ꙗ҆́ко дн҃е ра́ди ѻ҆брѧщете и҆̀·

И҆ взы́идоста въ градъ, и҆́ма же въходѧ́щи среди гра́да.
и҆ с̂е само́илъ и҆зы́де и҆мъ на срѣтенїе.
е҆же възыити въ вамꙋ·

И г҃ь проꙗ҆́ви преже само́илꙋ.
дн҃емъ е҆ді́нѣмъ, прежде пришествїѧ к немꙋ саѹ́лѧ гл҃ѧ.
ꙗ҆́ко въ вре́мѧ с̂е, ѹ҆́тро послю̀ к тебѣ мꙋж́а ѿ племе́ни венїа҆ми́нова, и҆ да пома́жеши и҆̀ на црс̑҇тво людемъ мои́мъ і҆и҆л҃ю, и҆ сп҃сетъ лю́ди моа ѿ рꙋкѝ и҆ноплеме́нникъ, ꙗ҆́ко призрѣхъ на ѻ҆биденїе людїи мои҆хъ.
и҆ ꙗ҆́ко взы́де во́пль их̑ къ мнѣ̀·

И҆ ви́дѣ самои́лъ саѹ́ла, и҆ г҃ь рече к немꙋ.
се́и чл҃къ ѻ҆ немже реко́хъ т̂и, се́и начнетъ въ лю́дехъ і҆и҆л҃евыхъ црс̑҇твовати·

И҆ приближи́сѧ саѹ҆лъ къ само́илꙋ посредѣ гра́да, и҆ рече възвѣсти ми кото́рыи дом̑ ви́дѧщаго·

И҆ ѿвѣща само́илъ саѹ́лꙋ, и҆ рече а҆́зъ самъ е҆смь.
възы́ди предо мно́ю въ вамꙋ.
и҆ ꙗ҆́жд̑ь со мно́ю днс̑҇ь, и҆ пꙋщꙋ т̂ѧ заѹ҆́тра.
и҆ вс̂ѧ ꙗ҆́же въ срд̑ци твое҆мъ възвѣщꙋ т̂и·

И҆ ѻ҆ ѻ҆слѧтехъ и҆зги́бших̑ т̂и, днс̑҇е третїи дн҃ь.
не помышлѧ́и въ срд̑цы с̂и ѻ҆ ни́хъ.
ꙗ҆́ко ѻ҆брѣто́шасѧ, и҆ нѣ́каѧ ꙗ҆же сꙋть кра́снаѧ і҆и҆л҃ева.
и҆ не тебѣ токмо н̂о и҆ до́мꙋ ѿц҃а твое҆го·

И҆ ѿвѣща саѹ́лъ и҆ рече.
а҆зъ е҆смь, сн҃ъ не мꙋж́а л̂и и҆е҆минеѻ҆ва, мнїишаго ски́петра пле́мени і҆и҆л҃ева и҆ колѣ́на ме́ншаго, ѿ всего ски́петра вениа҆ми́нова.
и҆ ѻ҆течество мое мен̑҇ши пач̑҇ всх̑ѣ ѻ҆течествъ венїа҆ми́новых̑·

и҆ въскꙋю гл҃а къ мнѣ̀ ѻ҆ гл҃ѣ семъ·

И҆ поѧ́тъ само́илъ саѹ҆́ла и҆ ѻ́трока его, и҆ въведе ѧ҆̀ въ ѻ҆бита́лище.
и҆ да̀ и҆́ма мѣсто в пе́рвых̑ зва́ных̑.
ꙗ҆́ко в сед̑мидесѧт̑ мꙋж́евъ·

И҆ рече само́ил̑҇ кꙋ́харꙋ, да же м̂и ча́сть, е҆же дахъ т̂и ѻ҆ не́иже рѣхъ т̂и положитї ю҆̀ ѹ҆ себѐ·

И҆ взѧ̀ кꙋхарь жрътве́наѧ.
и҆ пред̑ложи ѧ҆̀ саѹ҆́лови, и҆ рече само́ил̑҇ саѹ҆́лови с̂е и҆збы́токъ.
пред̑ложи пред̑ сѧ.
и҆ ꙗ҆жд̑ь ꙗ҆́ко тебѐ ради с̂е ѻ҆ста́виша.
ѿ людїи приклонисѧ, и҆ ꙗ҆́стъ саѹ́лъ съ само́иломъ в то́й дн҃ь·

И҆ сни́де ѿ ва́мы во́ град̑, и҆ посла́ша саѹ́лови на зда́нїи и҆ спа̀·

И҆ бы́сть е҆гда̀ приближа́шесѧ ѹ҆́тро.
възва̀ само́илъ саѹ҆́ла ѿ го́рнѧа посте́ли и҆ рече, въста́ни ѿпꙋщꙋ т̂ѧ.
и҆ въста̀ саѹ́лъ і҆ и҆зы́иде само́илъ с ни́мъ во́н꙽·

Тѣма же и҆сходѧ́щема в ча́сть града.
и҆ рече само́илъ къ саѹ҆́лови рцы̀ ю҆́ноши да пред̑идетъ пред̑ нами.
и҆ т̂ы пребꙋ́ди т̂ꙋ ма́ло.
и҆ ѹ҆слы́шит̑ ти сѧ гл҃ъ бж҃їи·

Глв̑҇а, і҃·

И въземъ само́илъ сосꙋдъ съ е҆леѻ́мъ.
и҆ възлїѧ на главꙋ̀ е҆го, и҆ лобыза и҆̀.
и҆ рече пома́за л̂и тебѐ г҃ь на црс̑҇тво лю́демъ своим̑ и҆же въ і҆ил҃и·

и т̂ы пр́ьвыи бꙋ́деши въ людех̑ гн҃их̑, и҆ сп҃сеши ѧ҆̀ ѿ рꙋки врагъ их̑ ѻ҆́крс̑҇тъ·

Се̂ т̂и зна́менїе ꙗ҆́ко пома́за т̂ѧ г҃ь на достоа́нїе свое въ кнѧ́ѕѧ.
и҆ ꙗ҆́ко ѿи҆́деши днс̑҇ь ѿ менѐ, и҆ ѻ҆брѧ́щеши дв̂а мꙋж́а при гробѣхъ рахи́линых̑.
ѹ҆ предѣлехъ венїаминих̑.
в силомѣ въ вакала́ѳе положени вели́ки, и҆ речета т̂и, ѻ҆брѣте л̂и ѻ҆слѧ́та, их̑же ходи́ста и҆ска́ти.
и҆ с̂е ѿц҃ъ тво́и ѿвръжесѧ гл҃омъ ѻ҆слѧ́тъ.
и҆ въспыта̀ ѻ҆ васъ гл҃ѧ.
чт̂о сътворю̀ ѻ҆ сн҃ꙋ свое҆мъ·

И҆ ѿи́деши ѿтꙋ́дꙋ, и҆ по тѣхъ прїидеши до дꙋ́ба фаво́рѧ, и҆ ѻ҆брѧ́щеши т̂ꙋ тр̂и мꙋж́а въсходѧ́ща къ г҃ꙋ въ веѳи́ль.
и҆ е҆ді́наго водѧ́ща тро́е козлѧ́тъ.
а҆ дрꙋга́го носѧща тр̂и врѣтища хлѣ́ба.
а҆ тре́тїи носѧ́ще мѣхъ вина̀·

И҆ въпро́сѧт꙽ т̂ѧ ꙗ҆́же ѻ҆ мирѣ, и҆ дадѧ́т꙽ т̂и дв̂а нача́лнаѧ хлѣ́ба, и҆ прїми ѿ рꙋкъ и҆хъ·

И҆ по сих̑ да възы́деши на хо́лмъ бж҃їи.
и҆деже е҆сть събра́нїе и҆ноплеме́нникъ, ꙗ҆́ко т̂ꙋ е҆сть жи́тїе их̑·

и҆ бꙋ́детъ е҆гда̀ взы́деши тꙋ̀ во́ град̑, и҆ срѧ́щеши ли́къ прро̑҇къ и҆сходѧ́щъ ѿ ва́мы и҆ пред̑ ни́ми свири́ли, ти́мпа́ны, и҆ сопѣ́ли, и҆ гꙋ́сли.
и҆ тїи проповѣ́дающе·

И҆ сни́детъ на́ тѧ дх҃ъ гн҃ь, и҆ прро̑҇чествꙋ́еши с ни́ми.
и҆ ѻ҆брати́шисѧ въ мꙋж́а и҆но́го·

И҆ бꙋдет̑ е҆гда̀ прїи́дꙋтъ зна́менїѧ с̂и на́ тѧ, творѝ вс̂е е҆ли́ко а҆́ще ѻ҆брѧ́щетъ рꙋка̀ твоа, ꙗ҆́ко б҃ъ е҆сть с тобо́ю·

И҆ сни́деши пре́жде менѐ въ галга́лъ.
и҆ с̂е а҆́зъ сни́дꙋ к тебѣ възнестѝ вс̂есъж꙽же́ныхъ, и҆ пожрѣти жр́ътвꙋ ми́рнꙋ, з҃, дн҃їи.
пожде́ши до́ндеже прїидꙋ к тебѣ, и҆ покажꙋ̀ т̂и что̀ сътвори́ши·

И҆ бы́сть е҆гда̀ възврати́сѧ саѹ́л꙽ ѿ совокꙋпле́нїа, разыйтисѧ съ само́иломъ.
и҆ преложи е҆мꙋ б҃ъ срд̑це на и҆́но, и҆ прїидо́ша вс̂ѧ зна́менїа сїѧ въ дн҃ь ѻ҆́нъ·

И҆ възы́детъ ѿтꙋдꙋ на хо́лмъ.
и҆ с̂е ли́къ прро̑҇чески проти́вꙋ е҆мꙋ, и҆ взы́де на́нь дх҃ъ бж҃їи, и҆ прорица́ше средѣ их̑·

И бы́ша вс̂и ви́дѣвшей е҆го вчера̀ и҆ ѻ́номъ дн҃и, и҆ ви́дѣша и҆ с̂е то́й посредѣ̀ пророкъ прорица́ѧ·

И҆ рѣша лю́дїе ко́ждо къ и҆́скренемꙋ своемꙋ, чт̂о сѐ быв̑҇шее сн҃ꙋ ки́совꙋ, е҆да̀ и҆ саѹ́лъ е҆сть въ прро̑҇цѣхъ·

И҆ ѿвѣща̀ нѣ́кто и҆хъ и҆ рече, кт̂о ѿц҃ъ е҆мꙋ не ки́съ л̂и, сего ра́ди бы́сть въ при́тъчю, а҆́ще и҆ саѹ́лъ въ прро̑҇цѣхъ·

И҆ скон꙽ча прро̑҇чествꙋа, и҆ прїиде тꙋ на хо́лмъ·

И речѐ ѹ҆́й е҆го к немꙋ, и҆ къ ѻ҆тро́чищꙋ е҆го ка́мо и҆дѣта, и҆ рѣста ѻ҆слѧт̑ и҆ска́ти, и҆ вѣ́девѣ, ꙗ҆́ко нѣсть их̑, и҆ въходи́хомъ къ само́илꙋ·

И҆ рече ѹ҆́й саѹ́ловъ възвѣсти м̂и нн҃ѣ чт̂о тѝ речѐ само́илъ·

И҆ рече саѹл̑҇ ѹ҆́е҆ви свое҆мꙋ, вѣ́стїю възвѣстѝ м̂и ꙗ҆ко ѻ҆брѣтошасѧ ѻ҆слѧ́та.
гл҃а же црс̑҇каго не възвѣстѝ е҆мꙋ, е҆же реч̑҇ самои҆лъ·

И҆ заповѣ́да само́илъ всм̑ѣ лю́демъ прїити къ г҃ꙋ в маси́ѳъ·

И҆ рече само́илъ къ сн҃омъ і҆и҆л҃евымъ, си́це речѐ г҃ь б҃ъ і҆и҆л҃евъ гл҃ѧ·

а҆зъ е҆смь и҆зведы́и ѿц҃а ва́ша сн҃ы і҆и҆л҃евы ѿ землѧ̀ е҆гѷпет̑ски.
і҆ и҆зѧх̑ в̂ы ѿ рꙋкѝ фараѻ́на цр҃ѧ е҆гѷпет̑ска, и҆ ѿ всѣхъ цр҃ь ѻ҆скръблѧ́ющих̑ в̂ы·

И҆ в̂ы днс̑҇е ѹ҆ничижи́ста б҃а ва́шего.
иже то́й е҆сть сп҃са́ѧ в̂ы ѿ всего̀ ѕл̂а ва́шего и҆ скр́ъби, и҆ рѣсте н̂и.
н̂о цр҃ѧ да поста́ви над̑ на́ми·

И҆ нн҃ѣ ста́ните в̂ы са́ми пред̑ гм҃ъ по хорꙋгвам̑ ва́шимъ, и҆ по племе́немъ вашим̑, и҆ ты́сѧщами ва́шими·

И҆ приведѐ само́илъ вс̂ѧ колѣ́на і҆и҆л҃ева.
и҆ падѐ жре́бїи на хорꙋгвѝ венїа҆ми́ни·

И҆ вънесе хорꙋго́въ венїами́ню в колѣна.
и҆ ѻ҆брꙋчъ колѣномъ ма́терїиномъ, и҆ розложи́ша по мꙋ́жехъ.
и҆ ѻ҆брꙋчен꙽ бысть саѹ́лъ сн҃ъ кисовъ, і҆ и҆ска́хꙋ е҆го и҆ не брѣта́шесѧ·

И҆ въпраша́ше само́илъ е҆ще г҃а гл҃ѧ, а҆́ще прїи́дет̑ сѣмо мꙋжъ е҆щѐ, е҆гоже м̂и г҃ь нареч̑҇.
и҆ речѐ г҃ь с̂е се́й съкрове́нъ е҆сть въ ков꙽че́зѣ·

И҆ текъ само́илъ приведе и҆̀ ѿтꙋдꙋ, и҆ поста́ви и҆̀ посредѣ людїи и҆ възне́съсѧ над̑ всѣми люд̑ми.
паче подо́бїѧ и҆ выш꙽ше·

И҆ рече само́илъ къ всѣмъ люде́мъ ви́дите л̂и е҆гоже и҆збра̀ г҃ь.
ꙗ҆ко нѣсть ни е҆ді́нъ ѿ вас̑҇ подо́бенъ е҆мꙋ.
и҆ ра́довашасѧ вс̂и людїе и҆ рѣша, да живе́тъ цр҃ь·

И҆ рече само́илъ къ люде́мъ ѻ҆правда́нїа црс̑҇твїѧ, и҆ написа́въ кни́гꙋ и҆ положи пред̑ гм҃ъ.
и҆ ѿпꙋстѝ само́ил̑҇ вс̂ѧ лю́ди, і҆ и҆до́ша ко́ждо въ своа с̂и, и҆ саѹ́лъ и҆́де в дом̑ сво́и, въ гаваѻ́ны.
і҆ и҆до́ша с ни́мъ сн҃ове си́лных̑, и҆хже г҃ь ѻ҆чистѝ срд̑ца съ саѹ҆́лом̑·

А҆ сн҃овеж̑ лꙋві́ини рѣша.
чт̂о сп҃сетъ нас̑҇ то́й и҆ беществова́ша и҆̀, и҆ не и҆знесо́ша е҆мꙋ да́ровъ·

Глв̑҇а, а҃і·

И бы́сть ꙗ҆́ко по мс̑҇цы, и҆ възы́и҆де наа́съ а҆мани́тѧнинъ.
и҆ ѻ҆полчи́сѧ на а҆ви́са галаад̑скаго.
и҆ рѣша вс̂и мꙋ́жи а҆ви́тъстїи, къ наа́сꙋ а҆мани́тѧнинꙋ, положѝ на́мъ завѣтъ и҆ рабо́тае҆мъ т̂и.
и҆ реч̑҇ к ни́мъ наа́съ ам̑мани́тѧнинъ.
сїи завѣтъ положꙋ̀ ва́мъ, да и҆зверчꙋ̀ комꙋ́ждо васъ ѻ҆́ко десно́е, и҆ положꙋ̀ поноше́нїе всемꙋ̀ і҆и҆л҃ю·

И҆ рѣша е҆мꙋ мꙋж́и а҆ви́та галаа́дъского.
ѻ҆ста́ви на́мъ, з҃, дн҃и да по́слемъ вѣ́стники въ всѧ̀ предѣ́лы і҆и҆л҃евы, и҆ а҆ще не бꙋ́детъ сп҃саю҆щего насъ.
т̂о и҆зы́идемъ к вам̑·

И҆ прїидо́ша вѣ́стницы в꙽ гаваѻ́нъ къ саѹ҆́лꙋ.
и҆ повѣ́даша словеса̀ с̂и, въ ѹ҆́ши всѣ́хъ люді́и.
и҆ въздви́гнꙋша вси лю́дїе глас̑҇ сво́и, и҆ пла́кашасѧ·

И҆ с̂е саѹ҆́лъ пришед̑ заѹ҆́тра съ села̀ слы́шавъ рѣ́чъ.
и҆ рече саѹ҆́лъ чт̂о с̂е пла́четъ лю́дъ.
и҆ сказа́ша е҆мꙋ гл҃ы мꙋж́ъ а҆ви́тъскихъ·

И҆ снїиде дх҃ъ гн҃ь на саѹ҆́ла, ꙗ҆́ко ѹ҆слы́ша сїа.
и҆ разгнѣ́васѧ на́ нѧ ѕѣ́ло·

И҆ пои҆мъ дв̂ѣ говѧ́дѣ и҆ раздробѝ ѧ҆̀ на ѹ҆́ды.
и҆ посла̀ въ вс̂ѧ предѣ́лы і҆и҆л҃евы, рꙋка́ми вѣ́стникъ гл҃ѧ.
и҆же не бꙋ́дет̑ и҆ды́и въ слѣ́дъ саѹ҆́ла, и҆ въ слѣ́дъ само́и҆ла.
т̂о сїе сътво́рѧт̑ говѧ́дома е҆го.
и҆ сни́де ѹ҆́жасъ бж҃їи на і҆и҆л҃ьты.
і҆ и҆зыидо́ша ꙗ҆́ко е҆ді́нъ мꙋж́ъ·

И҆ съчтѐ и҆хъ саѹ҆́лъ, и҆ бы́сть всѣхъ мꙋжїи і҆и҆л҃ьтескихъ, ҂у҃. и҆ мꙋже́и і҆ѹ҆́диныхъ, ҂л҃·

И҆ рече вѣ́стникомъ пришед̑шимъ.
та́ко повѣ́дите мꙋже́мъ а҆вид̑скимъ галаа́ды, ѹ҆́тро бꙋ́детъ ва́мъ сп҃сенїе въсходѧ́щꙋ слн҃цꙋ.
и҆ пріидо́ша вѣ́стницы въ град̑, и҆ възвѣсти́ша мꙋже́мъ а҆вид̑скимъ, и҆ възра́довашасѧ·

И҆ рѣша мꙋжи а҆ви́тстїи къ наа́сꙋ а҆м꙽мани́тѧнинꙋ·

Ѹ҆́тро и҆зы́идем̑ к вам̑, и҆ сътвори́те намъ бл҃гое пред̑ ѻ҆чи́ма ва́шима·

И҆ бы́сть ѹ҆́тро, и҆ с̂е саѹ҆́лъ раздѣлѝ во́ѧ на г҃, по́лки.
и҆ внидо́ша по́средѣ по́лковъ.
въ стра́жꙋ ѹ҆́тренюю.
і҆ и҆зби́ша сн҃ы а҆м꙽мани́тъски, до́ндеже разогрѣ́сѧ дн҃ь.
і҆ и́же ѻ҆ста́сѧ ѿ их̑, разбѣго́шасѧ.
и҆ не ѻ҆ста́шасѧ ни дв̂а ѿ них̑ въкꙋ́пѣ·

И рѣша лю́дїе къ само́и҆лꙋ, кт̂о е҆сть рекїи, ꙗ҆́ко да саѹ҆́лъ не црс̑҇твꙋ́етъ над на́ми.
дадѣт́е ча́дь т̂ꙋ намъ і҆ и҆збїемъ ю҆̀·

И҆ рече саѹ҆́лъ да не ѹ҆́мретъ и҆ н̂и е҆ді́нъ въ дн҃е́шнїи дн҃ь.
ꙗ҆́ко дне́сь сътворѝ г҃ь спс̑҇нїе въ і҆и҆л҃и·

И҆ рече само́и҆лъ къ люде́мъ гл҃ѧ.
прїидѣт́е да и́демъ въ галга́лы и҆ ѻ҆бновим̑ т̂ꙋ црс̑҇тво·

І҆ и҆до́ша вс̂и лю́дїе в꙽ галга́лы.
и҆ пома́за т̂ꙋ само́илъ саѹ́ла на црс̑҇тво, пред̑ гм҃ъ в галга́лх̑ѣ·

И҆ пожро́ша т̂ꙋ жр́ътвы ми́рны пред̑ гм҃ъ.
и҆ възвесели́сѧ т̂ꙋ саѹ҆́лъ и҆ вс̂и мꙋжи і҆и҆л҃еви до конца̀·

Глв̑҇а, в҃і·

И рече само́и҆лъ къ всѣ́мъ люде́мъ і҆и҆л҃евымъ, с̂е слы́шах̑ гла́съ ва́шъ ѻ҆ всѣ́хъ е҆ли́ко м̂и рѣ́сте.
и҆ поста́вихъ над ва́ми цр҃ѧ·

И҆ с̂е нн҃ѣ цр҃ь прехо́дитъ пред̑ ва́ми.
а҆зъ же състарѣхсѧ и҆ сѣ́дъ.
и҆ сн҃ове моѝ съ мно́ю.
и҆ а҆зъ б̂о преходи́хъ пред̑ ва́ми, ѿ ю́ности мое҆ѧ до дн҃е́шнѧго дн҃е·

И с̂е а҆зъ вѣща́ите м̂и пред̑ гм҃ъ, и҆ пред̑ хм҃ъ е҆го.
е҆да̀ ѹ҆ кого̀ вас̑҇ те́лца взѧх̑, или ѻ҆слѧ̀.
и҆ли кого̀ васъ насил꙽ствова́хъ, и҆л̂и ѿ кого̀ ва́съ взѧ́хъ чт̂о.
и҆ли ѿ рꙋ́кꙋ нѣ́кого ѿ васъ прїѧ́хъ м꙽здꙋ, и҆ли та́йно взѧх̑.
вѣща́ите на́ мѧ, и҆ възвращꙋ̀ ва́мъ·

И҆ рѣша къ само́и҆лꙋ, нѣ́си насъ ничим̑же ѻ҆би́дѣлъ ни наси́л꙽ствовал̑҇ е҆си на нас̑҇.
ни́же разгра́билъ е҆си на́съ.
н̂и м꙽зды̀ взѧ́лъ е҆си ѿ на́съ.
н̂иже взѧ́лъ ѿ рꙋкы̀ ничїе҆ѧ же ничтоже·

И҆ рече само́и҆лъ къ люде́мъ.
свѣдѣт́ель е҆сть г҃ь на ва́съ.
и҆ свѣдѣт́ель е҆сть х҃с е҆го, въ дн҃е́шнїи дн҃ь ꙗ҆́ко нѣ́сте ѻ҆брѣ́ли въ рꙋ́кꙋ мое҆ю ничтоже.
и҆ рѣша лю́дїе свѣдѣт́ель·

И҆ реч̑҇ само́и҆лъ па́ки къ люде́мъ.
гл҃ѧ, свѣдѣт́ель е҆сть г҃ь, сътвори́выи моѷсїѧ и҆ а҆а҆ро́на, і҆ и҆зведы́и ѿ землѧ̀ е҆гѷпет꙽скїа ѿц҃а на́ша·

И҆ нн҃ѣ пред̑ста́нѣте.
и҆ ѿвѣща́ю ва́мъ пред̑ гм҃ъ.
и҆ възвѣщ́ꙋ вам̑ вс̂ю пра́вдꙋ гн҃ю, ꙗ҆́же сътворѝ ва́мъ и҆ ѿц҃емъ ва́шимъ·

Є҆гда б̂о вни́де і҆а́ковъ и҆ сн҃ове е҆го въ е҆гѷпетъ, и҆ смири́ша и҆хъ ѕѣло е҆гѷптѧне.
и҆ възопи́ша ѿц҃ы на́ши къ г҃ꙋ.
и҆ посла̀ им̑ г҃ь моѷсїѧ и҆ а҆а҆ро́на, і҆ и҆зведо́ша ѿц҃а на́ша и҆зъ е҆гѷпта, и҆ въсели́ста их̑ на мѣ́стѣ се́мъ, н̂о забы́ша г҃а б҃а свое҆го.
и҆ въда́стъ ѧ҆̀ в рꙋ́цѣ сиса́рѣ а҆рхистрати́гꙋ, и҆а҆ви́сꙋ цр҃ю а҆со́рскꙋ.
и҆ въ рꙋ́кы и҆ноплеме́нникъ, и҆ въ рꙋцѣ цр҃ѧ моа́въска.
и҆ побѣжа́хꙋ ѧ҆̀·

И възопи́ша къ г҃ꙋ и҆ рѣ́ша съгрѣши́хомъ ꙗ҆́ко ѻ҆ста́вихомъ г҃а, и҆ порабо́тахомъ ваа́ломъ и҆ а҆старо́ѳомъ.
и҆ нн҃ѣ и҆змѝ н̂ы ѿ рꙋ́къ вра́гъ на́ших̑, и҆ порабо́таемъ т̂и·

И҆ посла̀ г҃ь и҆ероваа́ла и҆ вара́ка, и҆ е҆ѳа́ѧ, и҆ само́и҆ла, і҆ и҆зѧ̀ в̂ы и҆з рꙋ́къ вра́гъ ва́ших̑, ѻ҆́крс̑҇тных̑ и҆ ѻ҆бита́сте ѹ҆пова́юще, и҆ вѣ́сте ꙗ҆́ко наа҆съ цр҃ь сн҃ъ а҆м꙽мо́нь прїиде на́ вы.
и҆ рѣ́сте м̂и, н̂и, н̂о цр҃ь, да црс̑҇твꙋе́тъ над на́ми.
вънегда̀ г҃ь б҃ъ црс̑҇твова̀ над̑ ва́ми, и҆ с̂е нн҃ѣ цр҃ь е҆го́же избра́сте, и҆ его́же проси́сте, и҆ с̂е да́сть г҃ь над ва́ми цр҃ѧ·

А҆́ще ѹ҆бои́тесѧ г҃а, и҆ порабо́таете емꙋ и҆ послꙋш́аете гла́са его, и҆ не ѿвр́ьжетесѧ ѹ҆сте́нъ гн҃ь.
и҆ бꙋ́детъ ва́мъ цр҃ь црс̑҇твꙋѧ над̑ ва́ми и҆ в̂ы бꙋ́дете въ слѣдъ г҃а ходѧ́ще, рꙋка̀ гн҃ѧ не бꙋ́детъ над̑ ва́ми·

А҆ще л̂и не послꙋш́аете гла́са гн҃ѧ.
и҆ речетѐ проти́вꙋ ѹ҆стомъ гн҃имъ, бꙋ́детъ рꙋка̀ гн҃ѧ на ва́съ, и҆ на цр҃и ва́шем̑.
и҆ потреби́тъ ва́съ.
и҆ нн҃ѣ ста́нете и҆ ви́дите гла́съ се́и вели́кїи, и҆же сътвори́тъ г҃ь прд̑е ѻ҆чи́ма ва́шима·

Нѣсть л̂и жа́тва пшени́цы, дне́сь призовꙋ̀ г҃а, и҆ да́сть гро́ми и҆ тꙋ́ча.
и҆ въразꙋмѣ́ете и҆ ѹ҆ви́дите, ꙗ҆́ко ѕло́ба ва́ша вели́ка, ю҆́же сътвори́сте пред̑ гм҃ъ просѧ́ще себѣ̀ цр҃ѧ·

И҆ призва̀ само́илъ г҃а и҆ да̀ г҃ь гро́мъ и҆ до́ждь в то́и дн҃ь.
и҆ ѹ҆боѧ́шасѧ вс̂и лю́дїе ѕѣ́ло г҃а, и҆ само́и҆ла·

И҆ рѣш́а вс̂и лю́дїе къ само́илꙋ.
помолисѧ ѻ҆ рабѣ́хъ свои҆хъ, г҃ꙋ б҃ꙋ свое҆мꙋ.
да не ѹ҆́мремъ.
ꙗ҆́ко приложи́хомъ къ всм̑ѣ грѣхо́мъ на́шимъ ѕло́бꙋ на́шꙋ.
просѧ́ще себѣ̀ цр҃ѧ·

И҆ рече само́илъ къ люде́мъ, не бо́итесѧ в̂ы сътвори́сте вс̂ю ѕло́бꙋ сїю́.
то́кмо не ѹ҆клони́тесѧ ѿ за́дныхъ гн҃ь.
и҆ порабо́таите г҃ꙋ всѣ́мъ срд̑цемъ ва́шимъ·

И҆ не престꙋпи́те въ слѣ́дъ, ничтоже сꙋщихъ.
и҆же не пособъствѧ́тъ, и҆ не ѿи́мꙋтъ ѧ҆̀.
ꙗ҆ко ничтоже сꙋть·

Поне́же не ѻ҆ста́витъ г҃ь люді́и своих̑, именѝ ра́ди свое҆го вели́кого.
ꙗ҆́ко крѣпокъ г҃ь.
прїиметъ в̂ы себѣ̀ в лю́ди·

И҆ да ѿстꙋ́питъ ѿ менѐ с̂е ктомꙋ̀ не съгрѣша́ти г҃ꙋ.
и҆ е҆же ктомꙋ̀ не моли́тисѧ па́кы ѻ҆ вас̑҇ къ г҃ꙋ.
н̂о рабо́таю гв҃и.
и҆ покажꙋ̀ ва́мъ пꙋт́ь бл҃гъ и҆ гла́докъ·

То́кмо бо́итесѧ б҃а.
и҆ рабо́таите е҆мꙋ по и́стиннѣ всѣ́мъ срд̑цемъ ва́шимъ ꙗ҆́ко свѣ́сте.
и҆же вели́каѧ сътворѝ г҃ь с ва́ми·

И҆ а҆ще ѕл̂о сътво́рите то в̂ы и҆ цр҃ь ва́шь сі́и поги́бнетъ·

Глв̑҇а, г҃і·

По двꙋ ж́е лѣтехъ црс̑҇тва свое҆го.
ꙗ҆ко нача црс̑҇твова́ти въ і҆и҆л҃и и҆збра̀ себѣ̀ саѹ҆́лъ ҂г҃, мꙋж́ъ.
ѿ мж̑ꙋ.
і҆и҆л҃въ и҆ бѣ́ста съ саѹ҆́ломъ, ҂в҃. въ махма́се и҆ въ горѣ̀ веѳи́ли.
и ты́сѧща же бѣша съ и҆ѻ҆а҆наѳа́номъ.
въ гава́и.
венїа҆ми́новѣ.
і҆ и́ныѧ же вс̂и лю́ди ѿпꙋстѝ кое҆го́ждо въ своѧ̀ се́ла·

И҆ поразѝ и҆̀ѻ҆а҆наѳан̑҇.
а҆си́ѳа и҆ноплеме́нника и҆же на хо́лмѣ.
и҆ ѹ҆слы́шаша с̂е и҆ноплеме́нницы.
и҆ саѹ҆́лъ въстрꙋбѝ трꙋбо́ю и҆ проповѣдѧтъ въ всю̀ зе́млю гл҃ѧ.
да ѹ҆слы́шатъ е҆вре́и·

И҆ слы́ша ве́сь і҆и҆л҃ь гла́съ гл҃ющъ.
ꙗ҆́ко нии҆зложѝ саѹ́л꙽ а҆си́ѳа и҆ноплеме́нника.
и҆ ѹ҆ничижим̑ бы́сть і҆и҆л҃ь въ ѻ́чїю и҆ноплеме́нникъ и҆ собра́шасѧ вс̂и лю́ди въ слд̑ѣ саѹ́ла въ галга́лѣхъ·

І҆ и҆ноплеме́нницы же собра́хꙋсѧ на́ брань на і҆и҆л҃ѧ, ҂л҃. ѻ҆рꙋжникъ.
и҆ ҂ѕ҃, ко́нникъ.
ѻ҆́бщих̑ же людїи множество̀ бѧ́ше.
ꙗ҆ко пѣсо́къ мо́рскїи.
и҆ шед̑ше вполчи́шасѧ въ махма́се проти́вꙋ веѳоро́нꙋ на восток̑҇·

И҆ ви́дѧще мꙋжи і҆и҆л҃ви ꙗ҆́ко не мого́ша проти́вꙋ ста́ти.
и҆ съкры́шасѧ лю́дїе въ врьте́пехъ.
и҆ въ гора́хъ.
и҆ в ка́менїѧхъ.
и҆ въ про́пастехъ и҆ въ ѧ́махъ·

дрꙋзїи же бѣжа́ша и҆ пробѣго́ша і҆ѻ҆рда́нъ.
въ зе́млю га́довꙋ.
и҆ галаад̑скꙋ.
саѹ́л же бѧ́ше е҆щѐ в галга́лѣхъ.
и҆ вс̂и лю́дїе ѹ҆жасо́шасѧ и҆же бѧ́хꙋ с ни́мъ·

И҆ жда́ше, з҃. дн҃їи до вре́мени.
ꙗ҆кож̑ повелѣ̀ е҆мꙋ само́и҆лъ.
и҆ не прїиде само́и҆лъ въ галга́лы
.
и҆ ѿхожда́хꙋ лю́дїе е҆го ѡ него̀·

И҆ рече саѹ́лъ приведѣте ꙗ҆́ко да сътворю̀ вс̂есъж꙽же́нїа и҆ ми́рное.
и҆ възнесѐ вс̂есъж꙽же́наѧ·

И҆ бы́сть е҆гда сконча̀ възносѧ̀ вс̂есъж꙽же́нїѧ.
и҆ с̂е само́илъ прїиде.
и҆ саѹ́лъ и҆зы́иде на срѣте́нїе е҆мꙋ блс̑҇ви́тисѧ и҆мъ·

И҆ рече само́и҆лъ чт̂о с̂е сътворѝ.
и҆ рече саѹ́лъ ви́дѣхъ ꙗ҆ко ѿхожда́хꙋ лю́дїе ѿ менѐ.
и҆ ты̀ не прїиде.
ꙗ҆́коже заповѣ́да въ времѧ дн҃їи.
и҆ноплеме́нницы же събра́шасѧ в махма́съ·

И҆ рѣхъ и҆ноплеме́нницы нн҃ѣ съшед̑шесѧ къ мнѣ̀ въ галга́лы.
и҆ лица̀ гн҃ѧ не ѹ҆молих̑.
и҆ не въздръжа́всѧ възнесо́хъ вс̂ѧсъж꙽же́наѧ·

И҆ рече само́илъ къ саѹ́лꙋ въсꙋ́е е҆́сть т̂и с̂е, поне́же не съхранѝ за́повѣди г҃а б҃а твое҆го, и҆же заповѣ́да т̂и а҆ще б̂ы не сътворил̑҇ е҆си сего̀, т̂о нн҃ѣ б̂ы ѹ҆крѣпи́лъ г҃ь црс̑҇тво твое на і҆и҆л҃и до́ вѣка·

И҆ нн҃ѣ црс̑҇тво твое не ста́нетъ.
ꙗ҆́ко ѻ҆брѣтѐ г҃ь чл҃ка по срд̑цꙋ свое҆мꙋ·

И҆ повелѣ̀ е҆мꙋ г҃ь властели́на бы́ти над̑ людмѝ е҆го.
ꙗ҆́ко не съхранѝ за́повѣди е҆ли́ко заповѣ́да т̂и г҃ь·

И҆ въста́въ само́илъ і҆ и́де ѿ галга́лы пꙋте́мъ свои҆мъ.
и҆ ѻ҆ста́нокъ людїи и҆до́ша въ слѣ́дъ саѹ́ла.
на срѣте́нїе люде́мъ ра́тнымъ.
тѣмже приходѧ́щимъ ѿ галга́лы въ ста́нъ венїа҆ми́новъ.
и҆ съгледа̀ саѹ́лъ лю́ди ѻ҆брѣтшаѧсѧ с ни́мъ ꙗ҆́ко х҃, мꙋжъ·

Саѹ́л же и҆ ѻ҆а҆наѳа́нъ сн҃ъ е҆го и҆ лю́ди ѻ҆брѣтшаѧсѧ с ни́ми, сѣдо́ша въ станꙋ̀ венїа҆ми́новѣ и҆ пла́кашасѧ, і҆ и҆ноплеме́нницы ѻ҆полчи́шасѧ въ махма́се·

І҆ и҆зыидо́ша тр̂и по́лки и҆ноплеме́нникъ гꙋбѧ́ще се́ла.
по́лкъ же прьвое по́иде пꙋтем꙽ гоѳе́ры на́ землю сова́лю·

И҆ по́лкъ вторы́и по́иде пꙋте́мъ веѳо́рским̑.
и҆ по́лкъ тре́тїи по́иде пꙋте́мъ гаве́искимъ ѹ҆мѣта́ющимсѧ на ѹ҆дол̑҇ ѻ҆рнїи в пꙋсты́ню, на и҆сто́чники саве́м꙽ски·

Творе́нїе же желѣзное не ѻ҆брѣта́шесѧ.
въ все́и землѝ і҆и҆л҃вѣ ꙗ҆́ко рѣша и҆ноплеме́нницы.
да не сътво́рѧтъ е҆вре́и ѻ҆рꙋжїѧ и҆ ко́пїѧ·

И҆ хожда́хꙋ вс̂и сн҃ове і҆и҆л҃еви до и҆ноплеме́нникъ.
кова́ти ко́ждо своѧ ко́сы.
и҆ ѻ҆рꙋжїѧ своѧ, і҆ и҆ ко́ждо секи́ры своѧ̀, и҆ серпы̀ своѧ̀·

И҆ притꙋпи́шасѧ вс̂ѧ ѹ҆готова́нїѧ въ вре́мѧ жа́твы.
секи́ры.
и҆ серпы̀.
и҆справле́нїѧ же и҆́ма не бы́сть·

И҆ бы́сть въ дн҃и бра́ни махма́м꙽скїѧ.
не ѻ҆брѣте́сѧ ѻ҆рꙋжїе и҆ копїѧ в рꙋках̑ всѣхъ людїи, и҆же съ саѹ́ломъ.
и҆ съ і҆ѻ҆а҆наѳа́номъ.
кро́мѣ толи́ко ѹ҆ саѹ́ла і҆ ѻ҆а҆наѳа́на сн҃а е҆го.
и҆ ѻ҆бра́ти́сѧ саѹ́лъ.
и҆ ѻ҆а҆наѳа́нъ сн҃ъ е҆го.
і҆ и҆зыидо́ша и҆зо ѻ́бласти и҆ноплеме́нникъ.
въ прехо́дъ махе́м꙽скїи·

Глв̑҇а, д҃і·

И бы́сть въ е҆ді́нъ дн҃ь и҆ рече и҆ѻ҆а҆наѳа́нъ сн҃ъ саѹ́ловъ ѻ҆тро́чищꙋ свое҆мꙋ носѧ́щемꙋ ѻ҆рꙋжїе е҆го грѧдѝ и҆ прїидевѣ въ меса́вꙋ и҆ноплеме́нникъ и҆же на ѻ́нои стра́нѣ.
ѿц҃ꙋ же свое҆мꙋ не възвѣстѝ сего·

И҆ саѹ́лъ седѧ́ше под̑ сѣнїю на верхꙋ хол̑҇ма и҆же в магдо́нѣ.
и҆ бѧ́ше с ни́мъ ꙗ҆́ко, х҃. мꙋжъ·

А҆хїѧ же сн҃ъ а҆хи́товъ.
бра́та и҆ѻ҆а҆ви́ѳова.
сн҃а ѳенеѻ́сова.
сн҃а и҆лі́ина і҆ере́ѧ бж҃їа въ сило́ме носѧ̀ ри́зꙋ жре́ческꙋ, и҆ лю́дїе не вѣдѧхꙋ ꙗ҆́ко ѿи́де и҆ѻ҆а҆наѳа́нъ·

Посредѣ́ минова́нїѧ, и҆дѣже хотѧ́ше и҆ѻ҆а҆наѳа́нъ минꙋти въ станы̀ и҆ноплеме́нникъ, бы́сть ка́мень ѿсю́дꙋ.
и҆ ѿѻ҆нꙋдꙋ пꙋтѧ̀.
и҆́мѧ е҆ді́номꙋ моси́съ.
а҆ дрꙋго́мꙋ си́нна.
ка́мень же е҆ді́нъ стоѧ́ше ѿ сѣ́вера проти́вꙋ махе́мы.
ка́мень вторы́и ѿ ю́га проти́вꙋ гавѣ́и·

И҆ рече и҆ѻ҆а҆наѳа́нъ къ ѻ҆тро́чищꙋ носѧ́щемꙋ ѻ҆рꙋжїе е҆го, грѧдѝ и҆ прїидевѣ въ месав̑҇.
неѻ҆брѣженꙋю сїю, и҆ е҆да г҃ь повою́етъ ѻ҆ нас̑҇.
ꙗ҆́ко нѣсть г҃ꙋ съдръжа́щїисѧ, спс̑҇ти и҆л̂и въ мно́ѕѣ и҆л̂и въ ма́лѣ·

И҆ рече е҆мꙋ носѧ́и ѻ҆рꙋжїе е҆го, твори вс̂е е҆же т̂и срд̑це мы́слитъ, с̂е а҆зъ с тобо́ю е҆смь.
ꙗ҆́ко срд̑це твоѐ, та́ко и҆ срд̑це моѐ·

И҆ рече и҆ѻ҆а҆наѳа́нъ с̂е мы̀ преидевѣ к мꙋжемъ, и҆ ꙗ҆ви́мысѧ и҆м꙽·

А҆ще же рекꙋтъ к намъ помедли́та т̂ꙋ до́ндеже възвѣсти́мъ ва́ма.
т̂о посто́ива са́ма на мѣсте своем̑.
и҆ не по́идевѣ к ни́мъ·

А҆ще л̂и на́мъ си́це рекꙋтъ преидѣта к на́мъ, т̂о и҆ пре́идевѣ.
ꙗ҆́ко преда́сть ѧ҆̀ г҃ь в рꙋки на́ша, и҆ с̂е на́ма зна́менїе да бꙋдетъ·

И҆ внидо́ста ѻ҆́ба вкꙋпѣ въ меса́вꙋ и҆ноплеме́нникъ.
и҆ гл҃аша и҆ноплеме́нницы.
с̂е е҆вре́и и҆схо́дѧтъ и҆зъ распа́линъ ка́меных̑.
и҆дѣже сѧ бѧ́ше съкры́ли·

И҆ ѿвѣщаша мꙋжи меса́вли, къ и҆ѻ҆а҆наѳа́нꙋ и҆ к носѧ́щемꙋ ѻ҆рꙋжїе е҆го, и҆ рѣша възы́идета к на́мъ.
и҆ ꙗ҆́ви́мъ ва́мъ рѣчи.
и҆ рече и҆ѻ҆а҆наѳа́нъ к носѧ́щемꙋ ѻ҆рꙋжїе е҆го, грѧдѝ по мн̂ѣ ꙗ҆́ко преда́сть ѧ҆̀ г҃ь в рꙋцѣ і҆и҆л҃евѣ·

И҆ възы́иде и҆ѻ҆а҆наѳа́нъ прегнꙋвшисѧ на рꙋка́хъ и҆ на нога́хъ свои҆хъ.
и҆ носѧ́и ѻ҆рꙋжїе е҆го за ни́мъ.
и҆ ѹ҆зрѣвше и҆ноплеме́нницы лицѐ и҆ѻ҆а҆наѳа́не.
и҆ падо́ша пред ним̑ ѻ҆́трок̑҇ же е҆го побива́ше и҆хъ·

И҆ бы́сть с̂е ꙗ҆́зва прьваѧ ю҆́же побѣди и҆ѻ҆а҆наѳан̑҇ и҆ носѧ́и ѻ҆рꙋжїе е҆го ꙗ҆́ко к҃ мꙋжъ на полъ стра́ны села̀ ю҆́же дв̂а волы̀ въ дн҃ь и҆зора́ти мо́жета·

И҆ бы́сть ѹ҆жа́съ в по́лцѣхъ и҆ноплеменникъ, на се́лѣхъ.
и҆ вси лю́дїе и҆же въ меса́вли.
и҆ во́и е҆го ѹ҆жаснꙋшасѧ.
т̂и б̂о ꙗ҆ко не боѧ́щасѧ бѣша.
и҆ въстрепета́сѧ землѧ̀.
и҆же бы́сть и҆мъ ѹ҆́жасъ ѿ г҃а·

И҆ бы́сть вѣ́сть саѹ́лови въ станꙋ̀ венїа҆ми́ни.
ꙗ҆́ко по́лци разгна́ни бѣша сѣмо и҆ ѻ҆на́мо·

И҆ рече саѹ҆́лъ людемъ сꙋщим̑ с ни́мъ съчита́итесѧ нн҃ѣ и҆ дозрѣте.
е҆да гд̂ѣ кт̂о е҆сть ѿше́лъ ѿ на́съ.
и҆ съчто́шасѧ.
и҆ с̂е не ѻ҆брѣтесѧ с ни́ми и҆ѻ҆а҆наѳа́нъ.
и҆ носѧи ѻ҆рꙋжїе е҆го·

И҆ рече саѹ́лъ къ а҆хїѝ приведѣте ми носѧ́щаго ри́зы жре́чески.
ꙗ҆́ко б̂ѣ кїѻ́тъ бж҃їи.
в т̂ы дн҃и съ сн҃ъми і҆и҆л҃евыми.
и҆ бы́сть е҆гда гл҃аше саѹ́лъ къ і҆е҆ре́ю.
и҆ с̂е шꙋмъ бы́сть в по́лцѣ и҆ноплеме́нник̑҇ ходѧ̀ и҆дѧ́ще и҆ мно́жашесѧ.
и҆ реч̑҇ саѹл̑҇ къ і҆е҆ре́ю.
пригнѝ рꙋцѣ с̂и·

І҆ и҆зы́де саѹ́лъ и҆ вс̂и лю́дїе с нимъ.
і҆ и҆зыдо́ша до сѣ́чища.
и҆ с̂е бы́сть ѻ҆рꙋжїе кое҆го́ждо бли́жнего свое҆го ѹ҆бива́ше и҆ бы́сть мѧте́жъ вели́къ ѕѣло·

Но і҆е҆вре́и и҆же бѣша со и҆ноплеме́нники в꙽чера̀ и҆ тре́тїи дн҃ь вшед̑шїи вое҆ва́ти по и҆ноплеме́нникох꙽ ѻ҆брати́шасѧ и҆ тїѝ, и҆ бы́ша съ і҆и҆л҃ьты и҆ съ саѹ́ломъ.
и҆ съ и҆ѻ҆а҆наѳа́номъ·

И҆ вс̂и і҆и҆л҃ьты съкры́вшасѧ въ горѣ̀ е҆фре́мли.
слы́шавше ꙗ҆́ко ѿбѣго́ша и҆ноплеме́нницы.
и҆ събра́вшесѧ и҆ тїи и҆ погна́вше в слд̑ѣ и҆хъ.
събра́нїю·

И҆ та́ко сп҃се г҃ь въ то́и дн҃ь і҆и҆л҃ьты ѿ рꙋкꙋ и҆ноплеме́нникъ.
бра́нь же с̂и расшири́сѧ даже до вамо́на·

И҆ вс̂и лю́дїе бѧ́хꙋ съ саѹ́ломъ.
бѧ́ше же ꙗ҆́ко ҂і҃ мꙋжъ.
и҆ б̂ѣ всего гра́да тог̑҇ бра́нь рас꙽сы́пашасѧ.
и҆ ѿбѣже в горꙋ̀ е҆фре́млю, и҆ заклѧ̀ саѹ́лъ лю́ди клѧ́твою ве́лїею в то́и дн҃ь.
и҆ реч̑҇ рцѣте люде́мъ.
проклѧ́тыи чл҃къ и҆же ꙗ҆́сть хлѣбъ в то́и дн҃ь до́ вечера.
до́ндеже ѿмщꙋ̀ враго́мъ мои҆мъ.
и҆ не вкꙋси́ша лю́дїе вс̂ѣ хлѣ́ба·

И҆ ѻ҆брати́шасѧ лю́дїе вс̂ѧ землѧ̀ въ лꙋ́гъ.
и҆ с̂е лꙋ́гъ бѧ́ше по́лнъ пче́лъ ѿ всѣхъ се́лъ ѻ҆пꙋстѣвших̑·

И҆ внидо́ша вс̂и лю́дїе в лꙋ́гъ пче́лныи.
и҆ с̂е зрѧ́хꙋ лю́дїе ꙗ҆́ко и҆стечѐ мед̑, н̂о не бѣ възвраща́ющаго рꙋ́кы свое́ѧ къ ѹ҆стомъ свои́мъ.
ꙗ҆́ко боа́шасѧ лю́дїе клѧ́твы·

Сего же і҆ѻ҆а҆наѳа́нъ не слы́ша е҆гда заклина́ше ѿц҃ъ е҆го лю́ди.
и҆ просте́ръ конец̑҇ хорꙋгвѝ свое́а ꙗ҆́же в рꙋ́кꙋ е҆мꙋ.
и҆ ѻ҆мочи́въ коне́цъ в ме́дъ и҆ ꙗ҆дѐ, и҆ възвратѝ рꙋ́кꙋ свою въ ѹ҆ста̀ своѧ, и҆ просвѣти́стасѧ ѻ҆чи е҆го·

И҆ речѐ е҆ді́нъ ѿ людїи гл҃ѧ.
клены́и проклѧ̀ ѿц҃ъ тво́и людѝ гл҃ѧ проклѧ́тъ чл҃къ и҆же ꙗ҆́стъ хлѣбъ въ дн҃ь се́й, і҆ и҆знемого́ша людїе·

И҆ѻ҆а҆на́ѳанъ же разꙋмѣвъ и҆ рече.
смꙋтѝ ѿц҃ъ мо́и лю́ди на землѝ, ви́дите ꙗ҆́ко просвѣти́шасѧ ѻ҆́чи моѝ е҆гда въкꙋсихъ ма́ло ѿ ме́дꙋ сего̀·

Є҆да̀ не лꙋчшее л̂и бы́сть а҆́ще б̂ы лю́ди ꙗ҆́ли днс̑҇е коры́сть вра́гъ свои҆хъ е҆же ѻ҆брѣто́ша.
и҆ множа́ишаѧ б̂ы днс̑҇е ꙗ҆́зва была̀ въ и҆ноплеме́нницх̑ѣ·

И҆ побѣди́ша въ дн҃ь то́й и҆ноплеме́н꙽никы множа́иши нежели в꙽ мах̑ма́се, и҆ ѹ҆трꙋди́шасѧ лю́дїе ѕѣ́ло·

И҆ ѻ҆брати́шасѧ людїе на коры́сть.
и҆ поѧ́ша людїе ста́да, и҆ бꙋ́иволы и҆ говѧ́да.
і҆ и҆ закалахꙋ на землѝ.
и҆ ѧ҆до́ша лю́дїе съ кро́вїю·

И҆ възвѣсти́ша къ саѹ́лꙋ гл҃юще.
съгрѣши́ша лю́дїе къ г҃ꙋ, ꙗ҆дꙋщ́а съ кро́вїю.
и҆ рече саѹ҆́лъ къ геѳомъ привали́те м̂и сѣмо ка́мень ве́лїи·

И҆ па́ки рече саѹл̑҇ шед̑ше к люде́мъ рцѣте и҆мъ.
да принесе́тъ ко́ждо свое телѧ̀, и҆ ко́ждо ѻ҆вцꙋ̀ свою.
и҆ да зако́лют꙽ ѹ҆ ка́мени сего̀ и҆ да ꙗ҆дѧ́тъ и҆̀ и҆ не съгрѣша́ите г҃ꙋ е҆же ꙗ҆дꙋще съ кро́вїю.
и҆ приведо́ша но́щїю вс̂и лю́дїе свое ко́ждо.
е҆же и҆мѣѧ́ше в рꙋ́кꙋ свое́ю, и҆ закала́хꙋ т̂ꙋ·

И҆ саѹ́лъ създа̀ т̂ꙋ ѻ҆́лтарь г҃ꙋ.
и҆ с̂е пе́рвїе нача саѹ́лъ зда́ти ѻ҆́лтарь г҃ꙋ·

И҆ рече саѹ́лъ.
сни́дем̑ въ слд̑ѣ и҆ноплеме́нникъ но́щїю, и҆ хи́тимъ их̑ до́ндеже за́рѧ бꙋ́детъ.
и҆ не ѻ҆ста́вимъ ѿ нихъ мꙋж́а и҆ рѣша̑ вс̂ѧ бл҃гаѧ, пред̑ ѻ҆чи́ма твои́ма творѝ.
и҆ рече і҆е҆ре́и прїидемъ ѿсюдꙋ къ г҃ꙋ·

И҆ въпроси саѹ́лъ б҃а.
а҆́ще вели́ши м̂и сни́ти въ слѣдъ и҆ноплеме́нникъ.
и҆ а́ще предасѝ и҆хъ въ рꙋ́ки і҆и҆л҃ьтомъ.
и҆ не ѿвѣща е҆мꙋ г҃ь въ дн҃ь то́й·

И҆ рече саѹ́лъ стꙋпи́те сѣмо вс̂и старѣ́ишины і҆и҆л҃евы, и҆ ѹ҆разꙋмѣе́те и҆ ѹ҆вѣ́сте на ком̑ бысть грѣхъ се́й днс̑҇е·

Ꙗ҆́ко жи́въ г҃ь спасы́и і҆и҆л҃ѧ.
а҆́ще л̂и і҆ѻ҆а҆наѳа́на ради сн҃а мое҆го бы́сть с̂е.
смр҃тїю да ѹ҆́мретъ, и҆ не бѣ̀ ѿвѣщава́ющаго ѿ всѣхъ людїи і҆и҆л҃евъ·

И҆ рече саѹ́лъ всемꙋ і҆и҆л҃ю.
в̂ы ста́нѣте по е҆ді́нꙋ стра́нꙋ, а҆з же і҆ ѻ҆а҆наѳа́нъ сн҃ъ мо́и ста́невѣ по дрꙋ́гꙋю странꙋ̀, и҆ рѣша̑ лю́дїе къ саѹ́лꙋ ꙗ҆́ко т̂и годѣ бы́сть та́ко и҆ творѝ·

И҆ рече саѹ́лъ г҃и б҃е і҆и҆л҃евъ что̀ се ꙗ҆́ко не ѿвѣща рабꙋ̀ свое҆мꙋ днс̑҇е, и҆л̂и мое е҆сть и҆л̂и сн҃а мое҆го, і҆ѻ҆а҆наѳа́на безаконїе·

Ги҃ б҃е і҆и҆л҃евъ даждь зна́менїе, а҆́ще л̂и речеши сїѧ на людѝ своѧ і҆и҆л҃ѧ безако́нїе т̂о да́ждь винꙋ̀, и҆ падѐ ѻ҆бличе́нїе на і҆ѻ҆а҆наѳа́на и҆ саѹ́ла а҆ людїе и҆зы́доша·

И҆ рече саѹ́лъ възвръзи́те жребїи на́ мѧ, і҆ на і҆ѻ҆а҆наѳа́на сн҃а мое҆го, и҆ е҆гоже ѻ҆бъꙗ҆ви́тъ г҃ь, смр҃тїю да ѹ́мретъ·

И҆ рѣша лю́дїе саѹ́лꙋ, нѣсть с̂е добръ гл҃ъ, и҆ ѹ҆дръжа саѹ́лъ лю́ди, и҆ възвръго́ша ѻ҆ немъ і҆ ѻ҆а҆наѳанѣ сн҃ѣ е҆го, и҆ падѐ на і҆ѻ҆а҆наѳа́на жребїи·

И҆ рече саѹл̑҇ къ і҆ѻ҆а҆наѳанꙋ сн҃ꙋ свое҆мꙋ и҆звѣсти м̂и чт̂о е҆си сътвори́лъ.
і҆ и҆звѣсти е҆мꙋ і҆ѻ҆а҆наѳа́нъ.
и҆ рече въкꙋша́ѧ въкꙋсих̑ ма́ло медꙋ ѻ҆мочи́въ конецъ копїѧ и҆же въ рꙋ́кꙋ мое́ю·

И҆ рече е҆мꙋ саѹл̑҇ та́ко сътвори́ ми б҃ъ, и҆ с̂е приложи м̂и, да смр҃тїю ѹ҆́мреши дне́сь·

И҆ рѣша вс̂и лю́дїе къ саѹ́лꙋ, е҆да̀ л̂и ѹ҆мре́ти и҆́мать і҆ѻ҆а҆наѳа́н꙽.
сътвори́выи днс̑҇ь сп҃се́нїе вели́кое і҆и҆л҃ю·

Не бꙋ́ди т̂о жи́въ г҃ь.
а҆́ще и҆ паде́т꙽ и҆ вла́съ главы̀ на́ землю, ꙗ҆ко млс̑҇тїю бж҃їею сътвори́въ дн҃ь сїи.
и҆ помоли́шасѧ лю̂дїе, ѻ҆ і҆ѻ҆а҆наѳа́нѣ въ дн҃ь то́й и҆ не ѹ҆́мретъ·

И҆ не гна̀ саѹ́лъ въ слѣдъ и҆ноплеме́н꙽никъ.
і҆ и҆ноплеме́н꙽ницы же ѿидо́ша в꙽ мѣ́сто своѐ·

И҆ саѹ́лъ ѹ҆крѣпи́сѧ црс̑҇твова́ти въ і҆и҆л҃и.
и҆ побѣдѝ ѻ҆́крс̑҇тъ вс̂ѧ врагы̀ своѧ въ моа́вѣ, и҆ въ сн҃ѣхъ а҆м꙽монх̑ѣ и҆ въ сн҃ѣхъ е҆домли́хъ и҆ въ вефорѣ, и҆ въ црс̑҇твїи сꙋва́ни, и҆ въ и҆ноплеме́н꙽ницѣхъ.
и҆ ꙗ҆́може а҆́ще ѻ҆браща́шесѧ т̂о спсашесѧ·

И҆ събра̀ си́лꙋ, и҆ побѣди а҆мали́ка.
і҆ и҆зба́ви і҆и҆л҃ьты и҆з рꙋки побѣжд̑аю҆щих̑ ѧ҆̀, и҆ бѣша сн҃ове саѹ́лови.
і҆ѻ҆а҆наѳан̑҇, и҆ е҆сꙋ́и, и҆ мельхисꙋе.
и҆мена́ же дво́ю дще́рїю е҆го и҆мѧ пр́ьворо́днѣи ѻ҆трокови́цы меро́ва.
и҆мѧ второ́и мельхо́ла·

И҆мѧ ж̑ женѣ̀ е҆го, а҆хїѻ́нома, дщ̂и а҆химаа҆сова.
і҆ и́мѧ старѣишинѣ вой е҆го а҆вени́ръ.
сн҃ъ ниро́въ, ѹ҆́й саѹ҆́ловъ·

Ки́съ б̂о ѿц҃ъ саѹ҆́ловъ, а҆ ни́ръ ѿц҃ъ вени́ровъ бы́ша сн҃ове а҆ви́лѧ·

И҆ б̂ѣ бра́нь крѣ́пка на и҆ноплеме́н꙽ники, въ вс̂ѧ дн҃и саѹ҆́ловы.
и҆ кого̀ ви́дѧше въ мꙋж́ех꙽ си́лна и҆ крѣп꙽ка събира ѧ҆̀ къ себѣ·

Глв̑҇а, е҃і·

И рече само́илъ къ саѹ҆́лꙋ.
посла̀ м̂ѧ г҃ь пома́зати т̂ѧ на црс̑҇тво, в лю́дехъ е҆го въ і҆и҆л҃ю.
и҆ нн҃ѣ послꙋш́аи гла́са слове́съ гн҃ихъ·

Си́це рече г҃ь саваѻ́ѳъ.
нн҃ѣ ѿмщꙋ̀, ꙗ҆́же сътворѝ ам̑мали́къ і҆и҆л҃ю, и҆же срѣте и҆̀ на пꙋтѝ, въсходѧ́щимъ и҆мъ ѿ е҆гѷпта·

И҆ нн҃ѣ т̂ы и҆дѝ, и҆ побѣдѝ ам̑мали́ка, и҆ а҆ри́ма.
и҆ вс̂ѧ ꙗ҆́же сꙋть е҆го.
и҆ не живи ѿ ни́хъ ничтоже, і҆ и҆скорени́ши и҆хъ.
и проклене́ши и҆̀.
всѣ́хъ сꙋщ́ихъ е҆го, не ѿпꙋсти́ши и҆х꙽.
и҆ да и҆̀ ѹ҆бїеши ѿ мꙋж́еска по́лꙋ, и҆ до же́ньска.
ѿ ю́ношъ, и҆ до с꙽сꙋщих̑ мле́ко.
и҆ ѿ говѧ́дъ до ѻ҆ве́цъ.
и҆ ѿ вельблю́дъ, до ѻ҆слѧ́тъ·

И҆ събра̀ лю́ди саѹ҆́лъ и҆ съчте ѧ҆̀.
в галга́лх̑ѣ число́мъ же б̂ѣ и҆хъ, ҂с҃, пѣш́ихъ.
и҆ ҂і҃. ѿ сн҃овъ і҆ѹ҆́диныхъ·

И҆ прїиде саѹ́лъ до гра́да ам̑маликова, и҆ ѹ҆таи҆сѧ въ пото́цѣхъ·

И҆ рече саѹ҆́лъ къ кинѣѻ҆ви, и҆дѝ и҆ пробѣ́гни среди ам̑мали́ковъ, и҆ к ни́мъ не приближа́исѧ да не погꙋблю т̂ѧ съ ни́ми, ты б̂о б̂ѣ сътвори́лъ млс̑҇ть съ сн҃ы і҆и҆л҃евыми, е҆гда̀ и҆схожа́хꙋ и҆зъ е҆гѷпта·

И҆ ѹ҆клони́сѧ кинѣи ѿ срѣды ам̑мали́ковъ, и҆ побѝ саѹ҆́лъ ам̑мали́ка, ѿ е҆фъи҆ла́ѳа, да́же и҆ до сꙋ́ра пред̑ лицемъ е҆гѷптѧ́нъ·

И҆ ѧ́тъ а҆га́га цр҃ѧ ам̑мали́кова жи́ва, и҆ вс̂ѧ лю́ди а҆ми́нѧ, и҆збѝ ѻ҆рꙋ́жїемъ и҆ е҆ри́ма ѹ҆бѝ мече́мъ, и҆ взѧ̀ саѹ҆́лъ и҆ вс̂и лю́дїе, а҆га́га цр҃ѧ жи́ва, и҆ бл҃гаѧ ста́да и҆ па́ствины, и҆ бꙋ́иволица, и҆ ѻ҆де́жа и҆ виногра́ды, и҆ вс̂е бл҃гое, и҆ не хотѧ́хꙋ всего̀ того̀ и҆скорени́ти, толи́ко хꙋж́дьшее, и҆ ѹ҆ничиже́ное разъвръго́ша·

И҆ бы́сть гл҃ъ гн҃ь къ само́илꙋ гл҃ѧ раскаѧ҆хсѧ, ꙗ҆́ко пома́захъ саѹ҆́ла на црс̑҇тво, поне́же ѿврати́сѧ ѿ менѐ, и҆ слове́съ мои҆хъ не съблюдѐ, и҆ съжали́сѧ само́илъ и҆ възопѝ къ г҃ꙋ вс̂ю но́щъ·

И҆ ѹ҆ра́ни само́илъ, и҆дѧ́ше на срѣтенїе і҆и҆л҃ьтомъ заѹ҆́тра, и҆ възвѣсти́ша само́илꙋ, гл҃юще, приближа́етсѧ саѹ҆́лъ въ карми́л꙽, и҆ с̂е ѹ҆же ѻ҆слабѣ е҆мꙋ рꙋка̀, и҆ възврати́сѧ съ ѻ҆рꙋж́їемъ въ галга́лы·

И҆ прїиде само́илъ къ саѹ҆́лꙋ, и҆ с̂е то́и самъ възносѧ́и вс̂есъж꙽же́нїе г҃ꙋ, пр́ьвые коры́сти и҆же взѧ̀ на ам̑мали́цѣхъ·

И҆ прїиде само́илъ къ саѹ҆́лꙋ и҆ рече е҆мꙋ саѹ҆́лъ, блс̑҇ве́нъ т̂ы г҃ꙋ, сътвори́хъ б̂о вс̂е е҆ли́ко м̂и гл҃а г҃ь·

И҆ рече само́илъ чт̂о е҆сть гла́съ ста́дъ сихъ въ ѹ҆́шїю мое҆ю, и҆ гла́съ говѧд̑ е҆же а҆зъ слы́шꙋ·

И҆ рече саѹ҆л̑҇ ѿ а҆м꙽мали́ка ѧ҆̀ пригна́хомъ, ꙗ҆́же събра́ша лю́дїе силнѣ́ишаѧ па́ствины, и҆ воло́въ, ꙗ҆́ко пожре́ти ѧ҆̀ г҃ꙋ б҃ꙋ свое҆мꙋ, а҆ про́чаѧ и҆зби́хъ·

И҆ рече само́илъ къ саѹ҆́лꙋ, пождѝ възвѣщꙋ т̂и ꙗ҆́же гл҃а г҃ь къ мнѣ̀ в сі́ю но́щь·

И҆ рече е҆мꙋ саѹ҆́лъ гл҃и, и҆ реч̑҇ само́илъ къ саѹ҆́лꙋ, е҆да̀ не ма́лъ быс̑҇ ты пред̑ нимъ, и҆ не властели́на ли тѧ поста́ви хорꙋгвѝ, колѣ́на і҆и҆л҃ева, и҆ пома́за т̂ѧ г҃ь на црс̑҇тво і҆и҆л҃ево·

И҆ посла̀ т̂ѧ г҃ь пꙋте́мъ, и҆ рече т̂и и҆дѝ и҆скоренѝ а҆м꙽мали́ка, и҆ не поми́лꙋ́и съгрѣш꙽шихъ предо мно́ю, и҆ побѣди́сѧ с ни́ми до сконча́нїѧ и҆хъ·

И҆ почто̀ не послꙋ́ша гла́са гн҃ѧ, по всемꙋ̀ е҆ли́ко гл҃ат̂и, н̂о ѹ҆стреми́сѧ на коры́сть пожре́ти ю҆̀, и҆ сътворѝ лꙋка́вое пред̑ гм҃ъ·

И҆ рече саѹ҆́лъ къ само́и҆лꙋ, послꙋш́ахъ гла́са гн҃ѧ, і҆ и҆до́хъ пꙋте́мъ и҆м꙽же посла̀ м̂ѧ г҃ь, и҆ приведо́хъ а҆га́га цр҃ѧ а҆м꙽мали́кова, и҆ а҆м꙽мали́ки и҆скоренихъ·

И҆ взѧ́ша лю́ды коры́сти стад̑ныѧ, и҆ бꙋ́иволы, и҆ пред̑нѧа коры́сти на пожрѣ́нїе г҃а б҃а на́шего в галга́лѣхъ·

И҆ реч̑҇ само́илъ къ саѹ҆́лꙋ е҆да̀ л̂и бы́ша и҆ ѹ҆го́дны г҃ꙋ вс̂есъж꙽же́нїѧ и҆ жр́ьтвы, н̂о лꙋ́чши е҆сть послꙋшати гла́са гн҃ѧ, и҆ ѹ́не е҆сть жр́ьтвы бл҃ги послꙋша́нїе, и҆ паче тꙋ́ка ѻ҆́внѧ·

Ꙗ҆́ко ѹ҆бо грѣ́хъ е҆сть чарова́нїе, та́ко грѣ́хъ е҆сть противле́нїе, ꙗ҆́ко грѣ́хъ есть и҆́долопоклоне́нїе, та́ко грѣ́хъ е҆сть престꙋпа́ти за́повѣди гн҃ѧ, ꙗ҆́ко ѹ҆ничижи́лъ е҆си гл҃ы гн҃ѧ, и҆ ѹ҆ничижи́т꙽ т̂ѧ г҃ь, не бы́ти тебѣ̀ цр҃ю въ і҆и҆л҃и·

И҆ рече саѹ́лъ къ само́и҆лꙋ съгрѣшихъ ꙗ҆́ко престꙋпи́хъ слово гн҃е, и҆ гл҃ъ твои, ѹ҆боѧ҆́хъ бо сѧ людїи, и҆ послꙋшахъ гласа и҆хъ·

И҆ нн҃ѣ вѣдѣ ѻ҆ грѣсѣ мое҆мъ, и҆ въз꙽вратисѧ съ мно́ю да поклоню́сѧ г҃ꙋ б҃ꙋ·

И҆ рече само́илъ къ саѹ҆́лꙋ, не възвращꙋ́сѧ с тобо́ю.
ꙗ҆ко ѹ҆ничижи́лъ е҆си гл҃ъ гн҃ь.
и҆ ѹ҆ничижи́тъ т̂ѧ г҃ь не бы́ти тебѣ̀ цр҃ю въ і҆и҆л҃и·

И҆ ѿвратѝ лицѐ своѐ само́илъ, ѿи҆тѝ хотѧ̀ ѿ него̀.
и҆ ѧ́тъ саѹ҆́лъ за въскры́лїе риз̑ е҆го, и҆ раздра̀ и҆хъ, и҆ рече е҆мꙋ само́илъ, ѿѧ г҃ь црс̑҇тво і҆и҆л҃ево ѿ рꙋ́кꙋ твое҆ю дне́сь, и҆ да́сть е҆̀ бли́жнемꙋ твое҆мꙋ.
и҆ бл҃жа́ишꙋ тебѐ·

И҆ победи́тель въ люде́хъ і҆и҆л҃евыхъ не ѿстꙋп́итъ, и҆ не ѻ҆брати́тсѧ ниже покает̑сѧ ст҃ыи і҆и҆л҃евъ, ꙗ҆́ко не чл҃къ ес̑҇ пока́ѧтисѧ.
то́и б̂о запрети́тъ и҆ не пребꙋ́дет꙽·

И҆ рече саѹ҆́лъ съгрѣши́хъ г҃и.
н̂о просла́ви м̂ѧ пред̑ ста́рцы і҆и҆л҃евы, и҆ пред̑ людмѝ мои́ми, и҆ възврати́сѧ съ мно́ю, и҆ поклоню́сѧ г҃ꙋ б҃ꙋ твое҆мꙋ·

И҆ възврати́сѧ само́илъ въ слѣ́дъ саѹ҆́ла, и҆ поклони́сѧ г҃ꙋ·

И҆ реч̑҇ само́ил̑҇ приведѣте м̂и сѣ́мо а҆га́га цр҃ѧ а҆м꙽мали́кова.
и҆ прїиде к немꙋ̀ а҆га́гъ трепе́ща.
и҆ рече а҆га́гъ ѽ го́рко смр҃ть·

И҆ реч̑҇ само́илъ къ а҆га́гꙋ, ꙗ҆́коже бещад̑ствова жены̀ ѻ҆рꙋ́жїе твоѐ.
та́ко бещади́тсѧ в жена́хъ ма́ти твоѧ̀·

И҆ закла̀ само́илъ а҆га́га пред̑ гм҃ъ въ галга́лѣхъ·

И҆ ѿи́де само́илъ въ сармаѳе́мꙋ.
и҆ саѹ҆́лъ ѿи́де в до́мъ сво́и въ гава́вꙋ·

И҆ не приложѝ само́илъ ктомꙋ̀ ви́дѣти саѹ҆́ла, и҆ до дн҃е смр҃ти е҆го.
н̂о пла́каше само́илъ по саѹ҆́лѣ, за е҆же ка́ѧшесѧ г҃ь ꙗ҆́ко црс̑҇твова саѹ҆́лъ въ і҆и҆л҃и·

Глв̑҇а, ѕ҃і·

И рече г҃ь къ само́и҆лꙋ, доко́лѣ т̂ы пла́чеши по саѹ҆́лѣ.
а҆́з꙽ ѹ҆ничижих̑ не црс̑҇твова́ти въ і҆ил҃и е҆мꙋ.
и҆ рече и҆спо́лни ро́гъ і҆е҆ле́ю.
и҆ прїидѝ послю̀ т̂ѧ къ і҆е҆с꙽се́ю въ виѳлеѻ́мъ.
ꙗ҆́ко ѹ҆зрѣ́хъ въ сн҃ѣ́хъ е҆го себѣ̀ цр҃ѧ·

И҆ реч̑҇ самоилъ ка́ко поидꙋ̀ и҆ ѹ҆слы́шитъ саѹ҆́лъ и҆ ѹ҆бі́етъ м̂ѧ.
и҆ рече г҃ь ю҆́ницꙋ ѿ воло́въ, прїимѝ в рꙋ́цѣ с̂и.
и҆ рече́ши пожрѣт́и гв҃и прїидох̑·

И҆ призове́ши і҆е҆с꙽се́ѧ, и҆ сн҃ы е҆го на жр́ьтвꙋ.
и҆ а́зъ т̂и покажꙋ̀ ꙗ҆́же сътвори́ши.
и҆ пома́жеши м̂и е҆го́же т̂и рекꙋ̀·

И҆ сътворѝ само́илъ вс̂ѧ е҆ли́ко рече е҆мꙋ г҃ь.
и҆ прїиде въ виѳлеѻ́мъ.
и҆ ѹ҆жасо́шасѧ ста́рцы гра́да, і҆ и҆зыидо́ша въ срѣте́нїи его.
и҆ рѣш́а ми́ръ вхо́дꙋ твое҆мꙋ, ѽ прозорли́вче·

И҆ рече въ ми́рѣ пожрѣт́и г҃ꙋ прїидо́хъ.
ѻ҆ст҃и́тесѧ и҆ възвесели́тесѧ дне́сь со мно́ю.
и҆ ѻ҆ст҃и і҆е҆с꙽се́ѧ и҆ сн҃ы е҆го.
и҆ призва̀ ѧ҆̀ на жр́ътвꙋ·

И҆ бы́сть е҆гда̀ въведѐ ѧ҆̀ и҆ ви́дѣ е҆лїа́ва.
и҆ рече а҆ще с̂и е҆сть пред̑ гм҃ъ цр҃ь е҆го·

И҆ рече г҃ь само́илꙋ не зрѝ на лицѐ е҆го, ни на ѻ҆бы́чаи вели́чества е҆го.
ꙗ҆́ко ѹ҆ничижи́хъ и҆̀ поне́же б̂о не та́ко зрит̑ чл҃къ·

ꙗ҆́ко зри́тъ б҃ъ, ꙗ҆́ко чл҃къ ви́дитъ на лицѐ.
а҆ б҃ъ ви́дитъ на срд̑це·

И҆ призва̀ і҆е҆с꙽се́и и҆ а҆минада́ва, и҆ пред̑ста́ви и҆̀ пред̑ лице́мъ само́ила.
и҆ рече само́илъ.
н̂и сего и҆збра̀ г҃ь.
и҆ приведѐ і҆е҆с꙽се́и сам꙽ма́ѧ, и҆ рече и҆ сего не и҆збра̀ г҃ь.
и҆ приведѐ і҆е҆с꙽се́и вс̂ю, з҃, сн҃овъ свои҆хъ пред̑ само́ила.
и҆ рече само́илъ къ і҆е҆с꙽се́ю, не и҆збра̀ г҃ь всѣхъ сих̑·

И҆ рече па́кы само́и҆лъ къ і҆е҆с꙽се́ю, не доста̀ л̂и ѹ҆́же дѣтїи.
и҆ реч̑҇ і҆е҆с꙽се́и и҆ е҆щѐ е҆сть е҆ді́нъ ма́лъ, и҆ се́й пасет̑ на па́жити.
и҆ реч̑҇ само́илъ къ і҆е҆с꙽се́ю.
послѝ и҆ приведи и҆̀, ꙗ҆́ко не и҆́мамъ и҆зыитѝ, а҆́ще то́й не прїидет̑ сѣмо, и҆ посла̀ и҆ въведе и҆̀.
бѣ б̂о се́й чр́ъмен̑҇ до́брыма ѻ҆чи́ма, и҆ бл҃гъ възо́ром̑·

И рече г҃ь къ само́илꙋ.
въста́ни и҆ пома́жи дв҃да ꙗ҆́ко то́й бл҃гъ е҆сть·

И҆ прїѧ́тъ само́илъ ро́гъ со і҆е҆леѻм̑·

и҆ пома́за и҆̀ посредѣ бра́тїа е҆го.
и҆ ноша́шесѧ дх҃ъ гн҃ь над̑ двд҃омъ, ѿ того̀ дн҃е и҆ пото́мъ·

И҆ въста̀ само́ил̑҇ ѿи҆́де въ сармаѳе́мꙋ·

И҆ дх҃ъ гн҃ь ѿстꙋпѝ ѿ саѹ́ла, и҆ давлѧ́ше и҆̀ дꙋхъ лꙋка́выи ѿ г҃а·

И҆ рѣша ѻ҆тро́цы саѹ҆́лови к не́мꙋ.
се нн҃ѣ дх̑ꙋ лꙋка́выи ѿ г҃а да́витъ т̂ѧ·

да и҆́дꙋтъ рабѝ твоѝ нн҃ѣ пред̑ тобо́ю и҆ възы́щꙋтъ господи́нꙋ на́шемꙋ мꙋж́а зна́юща въ гꙋ́сли пѣти.
и҆ вънегда́ же бꙋдет̑ дꙋхъ лꙋка́выи, на тебѣ̀.
и҆ тогда̀ да пое҆тъ въ гꙋ́сли своѧ̀.
и҆ бл҃го т̂и бꙋ́детъ и҆ поко́итъ т̂ѧ·

И҆ рече саѹ҆́лъ къ ѻ҆тро́комъ свои҆мъ.
ви́дѣсте л̂и колѝ мꙋж́а до́брѣ пою́ща.
и҆зыщи́те и҆ въведи́те и҆̀ ко мнѣ̀·

И҆ ѿвѣща е҆мꙋ е҆ді́нъ ѿ ѻ҆тро́къ е҆го, и҆ ре́че.
с̂е нн҃ѣ ви́дѣхъ сн҃а і҆е҆с꙽се́ѻва и҆зъ виѳлеѻ́ма.
и҆ то́и вѣ́дыи пѣтїе и҆ мꙋ́жъ разꙋ́менъ, и҆ чл҃кобо́рецъ и҆ мꙋдръ въ словесѝ.
и҆ мꙋ́жъ бл҃гъ видѣнїемъ, и҆ г҃ь с ни́мъ·

И҆ посла̀ саѹ́лъ вѣстники къ і҆ес꙽се́ю гл҃ѧ.
пꙋстѝ ко мнѣ̀ дв҃да сн҃а свое҆го, и҆же е҆сть ѹ҆ ста́да твое҆го.
и҆ възе́мъ і҆ес꙽се́и бре́мѧ хлѣ́бовъ и҆ мѣхъ вина̀, и҆ козлѧ̀ ѿ ко́зъ е҆ді́но и҆ посла къ саѹ́лꙋ рꙋко́ю двд҃овою сн҃а свое҆го·

И҆ въни́де дв҃дъ къ саѹ́лꙋ, и҆ пред̑ста пред̑ ни́мъ.
и҆ възлюбѝ и҆̀ ѕѣло саѹ́лъ, бы́сть е҆мꙋ носѧ́и ѻ҆рꙋжїе е҆го·

И҆ посла̀ саѹ́лъ къ і҆е҆с꙽се́ѻ҆ви гл҃ѧ.
не дѣ́и дв҃да да пребꙋ́детъ ѹ҆ менѐ, ꙗ҆́ко ѻ҆брѣте блгд̑ть пред̑ ѻчи́ма мои́ма.
и҆ бы́сть е҆гда̀ бы́ти дꙋхꙋ нечи́стꙋ въ саѹ́лѣ.
и҆ прїимъ дв҃дъ рꙋкама свои́ма гꙋ́сли, и҆ поѧ́ше и҆̀ и҆ ѿдохнꙋ̀ саѹ́лъ и҆ бл҃го е҆мꙋ бы́сть и҆ ѿстꙋпѝ ѿ него̀ дꙋхъ нечи́стыи·

Глв̑҇а, з҃і·

И събира́шасѧ и҆ноплеме́нници, въ по́лки своѧ на́ брань и҆ събра́шасѧ в сокхо́ѳѣ і҆ѹ҆де́истемъ.
и҆ ста́ша средѣ сокхо́ѳа.
въ срѣди а҆зи́ка въ а́фездо́мине·

И҆ саѹ́лъ и҆ мꙋжи і҆и҆л҃еви събра́шасѧ.
и҆ внидо́ша въ ѹ҆до́ль тереви́н꙽ѳю.
строѧ́хꙋтьсѧ на́ брань и҆зыити къ и҆ноплеменником̑·

І҆ и҆ноплеме́нницы стоѧ́хꙋ на горѣ ѻ҆со́бе.
і҆и҆л҃ь стоѧ́ше ѻ҆со́бе.
ѹ҆до́ль же междꙋ и҆́ми бѧ́хꙋ·

І҆ и҆зы́де мꙋжъ си́ленъ.
и҆с по́лкъ и҆ноплеме́нникъ, и҆́мѧ е҆мꙋ голїѧ́дъ, ѿ меге́ѳа.
высота́ же е҆го бѧ́ше ѕ҃, лако́тъ, и҆ пѧ́дь·

И҆ шле́мъ мѣдѧнъ на главѣ̀ е҆го.
и҆ бро́нѧ ꙗ҆ко ѹ́жа и҆зви́ты в нѧ́же ѻ҆болче́нъ бѧ́ше.
и҆ число бро́нь е҆го, ҂е҃. си́кли.
мѣры мѣди и҆ желѣза·

И поно́жи мѣдѧны ве́рхꙋ го́ленїю е҆го.
и҆ щи́тъ мѣдѧнъ на пле́щꙋ е҆го·

И҆ ко́пїе в рꙋкꙋ е҆го ꙗ҆́ко вода̀ и҆щище́но блеща́щесѧ.
и҆ сꙋ́лица е҆го, х҃. си́кль мѣры желѣза в не́и.
и҆ носѧ̀ ѻ҆рꙋжїе е҆го пре́ди и҆дѧ́ше пред̑ нимъ·

И҆ ста́въ и҆ възопѝ пред̑ по́лки і҆и҆л҃евыма, и҆ рече и҆мъ.
почт̂о и҆зыдо́сте въполчи́тисѧ л̂и на́ брань проти́вꙋ на́мъ.
нѣсмь л̂и а҆зъ и҆ноплеме́нникъ и҆ вы̀ е҆вре́и.
съ саѹ́ломъ пришед̑шїи.
и҆збери́те в себѣ мꙋжа да сни́девѣсѧ, и҆ побо́ретсѧ со мно́ю·

И҆ а҆ще възмо́жет꙽ со мно́ю бра́тисѧ и҆ ѻ҆долѣе҆тъ м̂и.
т̂о бꙋ́демъ ва́мъ рабѝ.

А҆ще л̂и а҆зъ възмогꙋ̀ ѻ҆долѣти и҆̀.
бꙋдете вы̀ на́мъ рабѝ.
и҆ поработае҆те нам̑·

И҆ рече и҆ноплеме́нникъ.
с̂е а҆зъ днс̑҇е ѹ҆ничижи́хъ по́лкъ і҆и҆л҃евъ, въ дн҃ешнїи дн҃ь рекъ дади́те м̂и мꙋжа и҆же побо́ретъ со мно́ю е҆ді́нъ·

И҆ слы́ша саѹ́лъ, и҆ весь і҆и҆л҃ь гл҃ы и҆ноплеме́ннича, и҆ ѹ҆жасо́шасѧ, и҆ ѹ҆боѧ́шасѧ ѕѣ́ло·

дв҃дъ же е҆фраѳе́е҆въ.
сїи бѣ̀ ѿ виѳлеѻ́ма і҆ю́дина, и҆́мѧ же ѿц҃ꙋ е҆го і҆е҆с꙽се́и, е҆мꙋже б̂ѣ и҃, сн҃овъ.
въ дн҃и же саѹ́ловы б̂ѣ мꙋжъ то́и, состарѣ́сѧ въ мꙋже́хъ ѕѣ́ло·

І҆ и҆до́ша тр̂и сн҃ы і҆е҆с꙽се́ѻ҆вы старѣ́ишїи на́ брань съ саѹ́ломъ, и҆ме́на же сн҃овъ е҆го пошед̑шихъ на́ брань, е҆лїа́въ перворо́дныи е҆го, и҆ вторы́и а҆минада́въ.
и҆ тре́тїи са́м꙽ма·

дв҃дъ же б̂ѣ ю҆нѣ́ишїи, и҆ тр̂и старѣ́ишїи е҆го, и҆до́ша въ слѣдъ саѹ́ла·

дв҃дъ же възврати́вшисѧ ѿ саѹ́ла ѿи́де па́сти ѻ҆вца̀ ѿц҃а свое҆го въ виѳлеѻ́мъ·

И҆ прихожда́ше и҆ноплеме́нникъ ѹ́тро и҆ въ ве́черъ, ꙗ҆влѧ́ющисѧ пред̑ і҆и҆л҃емъ, м҃ дн҃їи·

И҆ рече і҆е҆с꙽се́и дв҃дꙋ сн҃ꙋ свое҆мꙋ.
възмѝ ѹ́бо бра́тома твои҆ма мѣрꙋ е҆́фи мꙋкѝ, и҆ десѧть хлѣ́бъ си́хъ і҆ и҆дѝ в по́лкъ, и҆ да́ждь бра́тома твои҆ма·

И҆ де́сѧть сы́ров̑҇ ѿ мле́ка сего̀ и҆ да́ждь ты́сꙋщникꙋ.
и҆ бра́тїю свою̀ посети́ши въ ми́ре.
и҆ е҆ли́ко а҆́ще требꙋ́ютъ ѹ҆вѣ́си.
празнова́ти же бꙋ́деши со мно́ю·

Саѹ҆́л же и҆ вс̂и лю́дїе бѣхꙋ въ ѹ҆до́ли дриѻ́си.
ратꙋ́юще съ и҆ноплеме́н꙽ники·

И҆ въста̀ дв҃дъ ѿ ѹ҆́тра, ѻ҆́вца же ѻ҆ста́ви съ стра́жею, и҆ взѧ̀ ꙗ҆́коже заповѣ́да е҆мꙋ ѿц҃ъ е҆го і҆е҆с꙽се́и ѿи́де.
и҆ пришед̑ на мѣсто и҆дѣже и҆схожда́хꙋ си́лнїи на́ врань.
и҆ въпиꙗ҆́хꙋ во по́лцехъ.
зане́же въѻ҆рꙋжа́шесѧ і҆и҆л҃ь проти́вꙋ и҆ноплеме́нником̑ і҆ и҆ноплеме́нницы въѻ҆рꙋжа́хꙋсѧ проти́вꙋ і҆и҆л҃ѧ·

И҆ положѝ дв҃дъ бре́мѧ своѐ в рꙋках̑ стра́жа.
и҆ течѐ въ по́лк꙽ и҆ пришед̑ въпросѝ бра́тїю свою въ ми́ре·

Гл҃ющꙋ же е҆мꙋ съ ни́ми.
и҆ с̂е мꙋжъ а҆месе́искїи е҆мꙋже и҆́мѧ голиꙗ҆́дъ филисти́млѧнинъ ѿ ге́ѳы, пришед̑ ѿ по́лковъ и҆ноплеме́ннических̑ и҆ гл҃а по словесе́мъ ѻ҆́нымъ.
и҆ слы́шав̑҇ дв҃дъ·

Вс̂и же мꙋжи і҆и҆л҃еви е҆гда̀ ви́дѣша мꙋжа.
пробегнꙋша ѿ лица̀ е҆го, ѹ҆боꙗ҆́ша бо сѧ ѕѣло̀·

И҆ рѣша мꙋжи і҆и҆л҃ьтески, ви́дѣсте л̂и мꙋжа сего въсходѧ́ща.
ꙗ҆́ко поноси́ти і҆и҆л҃ѧ прїиде.
и҆ а́ще бꙋдетъ мꙋжъ и҆же ѹ҆бїетъ е҆го.
ѻ҆богати́тъ е҆го цр҃ь бога́тествомъ ве́лїимъ.
и҆ дщер̑҇ свою̀ да́сть е҆мꙋ, и҆ до́мъ ѿц҃а е҆го сътвори́тъ свобо́денъ въ і҆и҆л҃и·

И҆ реч̑҇ дв҃дъ къ мꙋжем̑ стоꙗ҆́щимъ с ним̑ гл҃ѧ.
чт̂о сътвори́те мꙋжꙋ, и҆же ѹ҆бїетъ и҆ноплеме́нника сего̀.
и҆ ѿи́метъ поно́съ ѿ і҆и҆л҃ѧ.
ꙗ҆́ко кт̂о е҆сть и҆ноплеме́нникъ неѻ҆брѣзаныи се́и.
и҆же поно́ситъ по́лкꙋ б҃а жива́го.

И҆ реко́ша е҆мꙋ лю́дїе по словесѝ пре́жнем̑ гл҃юще, та́ко сътвори́тсѧ мꙋжꙋ и҆же ѹ҆бїе́тъ е҆го·

И҆ слы́шавъ е҆лиа҆́въ бра́тъ е҆го старѣ́ишїи.
вънегда̀ гл҃ати е҆мꙋ къ мꙋжемъ, и҆ разъгнѣ́васѧ ꙗ҆́ростїю е҆лїа́въ на дв҃да, и҆ речѐ почт̂о с̂е прише́лъ е҆си.
и҆ комꙋ̀ ѻ҆ста́ви малы́ѧ ѻ҆́вца ѻ҆ны̀ въ пꙋсты́ни, вѣ́де б̂о а́зъ го́рдость твою̀, и҆ ѕло́бꙋ срд̑ца твое҆го, ꙗ҆́ко видѣ́нїѧ ради бра́ни прише́лъ е҆си сѣмо·

И҆ речѐ дв҃дъ, чт̂о сътвори́хъ нн҃ѣ.
нѣ́сть л̂и рѣчь, и҆ ѿврати́сѧ ѿ него̀ проти́вꙋ и҆́номꙋ.
и҆ речѐ по словесѝ семꙋ̀.
и҆ ѿвеща́ша е҆мꙋ лю́дїе по словесѝ пре́жнемꙋ·

И҆ слы́шаны бы́ша гл҃ы, и҆́хже гл҃а дв҃дъ.
и҆ възвести́ша пред̑ саѹ́ломъ, и҆ поꙗ҆́ша е҆го лю́дїе и҆ приведо́ша пред̑ саѹ́ла.
и҆ речѐ дв҃дъ къ саѹ́лꙋ да не ѹ҆жаса́етсѧ срд̑це господи́нꙋ мое҆мꙋ ѻ҆ се́мъ.
и҆ да и҆́детъ ра́бъ тво́и, и҆ побо́ретсѧ съ и҆ноплеме́нникомъ си́мъ·

И҆ рече саѹ́лъ къ дв҃дꙋ не мо́жеши и҆тѝ, къ и҆ноплеме́нникꙋ семꙋ̀, и҆ побори́тисѧ с ни́мъ.
ꙗ҆́ко т̂ы дѣт́ищъ е҆си.
а҆ с̂е мꙋжъ боре́цъ е҆сть ѿ ю́ности свое́ѧ·

И҆ рече дв҃дъ къ саѹ́лꙋ, послꙋшаи гл҃ы раба̀ твое҆го.
е҆да̀ пасѧ́хъ а҆зъ ѿц҃а свое҆го ста́да.
и҆ е҆гда̀ прихожда́ше ле́въ и҆л̂и медвѣдица, и҆ въсхища́ше ѿ ста́дъ ѻ҆вцꙋ е҆ді́нꙋ·

И҆ а́зъ въ слѣдъ е҆го и҆схожда́хъ и҆ поража́хъ и҆̀.
і҆ и҆зъторгах̑ и҆зъ ѹ҆́стъ е҆го взѧ́тое, и҆ а́ще въспротивлѧ́ше ми сѧ.
т̂о е҆́мъ за горта́нь е҆го и҆ разбива́хъ, и҆ ѹ҆мръщвѧ́хъ и҆хъ ра́бъ твои·

И҆ а́ще бꙋдетъ и҆ноплеме́нникъ се́и бес по́мощи.
ꙗ҆́коже и҆ звѣрїе ѻ҆нѝ, т̂о не и҆дꙋ л̂и и҆ поражꙋ̀ и҆̀ и҆ ѿи҆мꙋ̀ дне́сь поноше́нїе і҆и҆л҃ево.
понеже непоко́рныи се́и и҆ноплеме́нникъ, ѹ҆ничижѝ повелѣнїе б҃а жи́ва·

И҆ речѐ двд̑ъ г҃ь ꙗ҆́коже и҆зѧ́тъ м̂ѧ ѿ ѹ́стъ львов̑҇ и҆ ѿ рꙋкѝ медвѣдица.
сїи же г҃ь и҆змѝ м̂ѧ ѿ рꙋкꙋ и҆ноплеме́нн꙽ика сего непоко́рнаго.
и҆ рече саѹ́лъ къ дв҃дꙋ.
и҆дѝ и҆ бꙋди г҃ь с тобо́ю.
и҆ ѻ҆блечѐ саѹ́лъ дв҃да ѻ҆де́жею и҆ шле́мъ мѣдѧнъ възложѝ на главꙋ̀ е҆го.
и҆ препоꙗ҆са̀ и҆̀ ѻ҆рꙋжїемъ е҆го верхꙋ̀ ѻ҆де́жи е҆го·

И҆ дв҃дъ похожа̀ въ ѻ҆рꙋжїѝ сѣмо и҆ ѻ҆ва́мо, и҆ ѹ҆трꙋди́сѧ.
б̂ѣ б̂о мно́жество ѻ҆рꙋжїѧ на не́мъ, и҆ речѐ дв҃дъ саѹ́лꙋ, не могꙋ̀ и҆тѝ въ ѻ҆рꙋжїѝ семъ, ꙗ҆́ко нѣсмъ ѻ҆бы́клъ е҆го, и҆ взѧ́ша ѿ него ѻ҆рꙋжїе·

И҆ взѧ̀ па́лицꙋ свою̀ въ рꙋкꙋ, і҆ и҆збра̀ себѣ пѧ́ть ка́менїи до́бръ ѿ потока и҆ вложѝ ѧ҆̀ в тобо́лецъ па́стыр꙽скїи, и҆же ноша́ше, и҆ пра́щꙋ и҆мы́и в рꙋкꙋ свое́ю, і҆ и́де к꙽ мꙋжеви и҆ноплеме́нникꙋ·

І҆ и҆дѧ́ше и҆ноплеме́нникъ, и҆ды́и на побѣдꙋ къ дв҃дꙋ, и҆ носѧ́и ѻ҆рꙋжїе е҆го пред ни́мъ и҆дѧ́ше·

И҆ ви́дѣ голїꙗ҆́дъ и҆ноплеме́нникъ дв҃да ѻ҆безчествова́ше и҆̀, зане дѣтищъ б̂ѣ и҆ черме́нъ и҆ лѣпъ ѻ҆чи́ма·

И речѐ и҆ноплеме́нникъ къ дв҃дꙋ, та́к же л̂и е҆смь а́зъ ꙗ҆́ко пе́съ, да и҆́деши проти́вꙋ мн̂ѣ съ па́лицею то́кмо и҆ ка́менїемъ, и҆ проклѧ́тъ и҆ноплеме́нникъ дв҃да богѝ свои́ми и҆ речѐ и҆ноплеме́нникъ къ дв҃дꙋ и҆дѝ на́ мѧ, и҆ дамъ пло́ть твою пти́цамъ нбс̑҇нымъ, и҆ звѣрем̑ зе́мным̑·

И речѐ дв҃дъ и҆ноплеме́нникꙋ, т̂ы и҆деши на́ мѧ въ ѻ҆рꙋжїи и҆ въ бро́нѧхъ и҆ съ щи́томъ, а҆́з же и҆дꙋ̀ на́ тѧ въ и҆́мѧ г҃а саваѻ́ѳа, б҃а, наста́вника і҆и҆л҃ева и҆ е҆гоже т̂ы ѹ҆ничижѝ дне́сь·

И҆ преда́ти т̂ѧ и҆́мать б҃ъ днесь въ рꙋ́цѣ моѝ и҆ ѹ҆бїю̀ т̂ѧ, и҆ ѿи҆мꙋ̀ главꙋ̀ твою ѿ тебѐ, и҆ да́мъ тѣло твоѐ, и҆ телеса̀ по́лка твое҆го и҆ноплеме́ннича въ дн҃ь сїи пти́цамъ нбс̑҇нымъ, и҆ звѣремъ зе́мнымъ, и҆ рзсꙋмѣ́етъ вс̂ѧ землѧ̀, ꙗ҆́ко есть г҃ь б҃ъ въ і҆и҆л҃и·

И҆ разꙋмѣ́етъ весь събо́ръ се́и, ꙗ҆ко ни ѻ҆рꙋ́жїемъ н̂и бро́нѧми сп҃са́етъ г҃ь, ꙗ҆́ко гн҃ѧ е҆сть бра́нь с̂и, и҆ преда́сть в̂ы г҃ь в рꙋки на́ша·

И҆ въста́въ и҆ноплеме́нник꙽ и҆дѧ́ше ско́ро на срѣте́нїе дв҃дꙋ, и҆ ѹ҆скорѝ дв҃дъ и҆ течѐ с по́лка на срѣте́нїе и҆ноплеме́нникꙋ·

И҆ прострѐ рꙋкꙋ свою в тобо́лецъ, и҆зѧ̀ и҆з него ка́мень еді́нъ и҆ вложѝ въ пра́ще, врь́же ка́менем̑ и҆ ѹ҆разѝ и҆ноплеме́нника в чело̀, и҆ ѹ҆нъзѐ ка́мень под̑ шле́момъ е҆го в чело̀ его, и҆ падѐ голїꙗ҆́дъ на лицы̀ свое҆мъ на землѝ·

И҆ ѹ҆крѣпи́сѧ дв҃дъ над̑ и҆ноплеме́нникомъ, и҆ ѹ҆мр҃тви и҆̀ пра́щею и҆ ка́менем̑.
и҆ ѹ҆би и҆̀, и҆ ѻ҆рꙋжїѧ не бѣ в рꙋцѣ̀ его·

И течѐ ско́ро дв҃дъ и҆ ста̀ над̑ ним꙽, и҆ прїе҆мъ ѻ҆рꙋжїе е҆го і҆ и҆звлечѐ и҆̀ ѿ ꙗ҆́дрꙋ е҆го ѹ҆мертвѝ и҆̀, и҆ ѿсѣчѐ и҆мъ главꙋ̀ е҆го, и҆ ви́дѣвше и҆ноплеме́нницы, ꙗ҆́ко ѹ҆же ѹ҆́мре си́лныи и҆хъ и҆ бѣжа̀ша·

И҆ въста́вше мꙋжи і҆и҆л҃еви, і҆ѹ҆́дины, и҆ въскли́кнꙋвше и҆ гна́ша съза́ди, до мѣста меге́ѳова, и҆ до вра́тъ а҆сколоньскихъ, и҆ падоша ꙗ҆́звами мно́ѕи и҆ноплеме́нницы по пꙋтѝ до врат̑ мегеѳа и҆ а҆сколона·

И҆ възврати́шасѧ мꙋжи і҆и҆л҃еви гна́вшїисѧ въ слд̑ѣ и҆ноплеме́нникъ і҆ и҆зби́вше по́лки и҆хъ·

И҆ взѧт̑ дв҃дъ главꙋ̀ и҆ноплеменничꙋ, и҆ внесѐ ю҆̀ въ і҆ерс̑҇лі́мъ.
и҆ ѻ҆рꙋжїе е҆го положѝ въ хра́мѣ, и҆ е҆гда̀ ви́дѣ саѹ҆́лъ дв҃да исходѧ́ща, въ стрѣте́нїе и҆ноплеме́нникꙋ, речѐ къ а҆вени́рꙋ кнѧ́ѕю си́лы, чїи есть сн҃ъ ю҆́ноша се́и а҆венире и҆ рече а҆вени́ръ да живе́тъ дш҃а твоѧ̀ цр҃ю, ꙗ҆́ко не ви́дѣ·

И҆ рече цр҃ь, въпросѝ ѹ҆бо т̂ы чїи есть сн҃ъ ю҆́ноша се́и·

И҆ ꙗ҆́ко възврати́сѧ двд̑ъ по ѹ҆бїенїѝ и҆ноплеме́н꙽ника.
поѧ̀ е҆го а҆вени́ръ и҆ приведѐ е҆го пред̑꙽ саѹ҆́ла.
глава̀ же иноплеме́ннича б̂ѣ в рꙋцѣ е҆го·

И҆ рече к немꙋ саѹ́лъ, чїи еси сн҃ъ ю҆́ноше, и҆ рече дв҃дъ, сн҃ъ раба̀ твое҆го і҆е҆ссе́ѧ, ѿ виѳлеѻ́ма·

Глв̑҇а, и҃і·

И бы́сть е҆гда̀ преста̀ гл҃ати къ саѹ҆́лꙋ.
и҆ дш҃а и҆ѻ҆а҆наѳа́на съ дш҃ею дв҃довою съпрѧже́сѧ.
и҆ възлюбѝ е҆го и҆ѻ҆а҆наѳа́нъ ѿ дш҃а свое҆ѧ·

И҆ поѧ́тъ е҆го саѹ҆́лъ въ дн҃и ѻ҆́ны, и не дадѐ е҆мꙋ възврати́тисѧ въ дом̑ ѿц҃а е҆го·

И҆ завѣща̀ и҆ѻ҆а҆наѳа́нъ съ дв҃домъ завѣт́ъ, за не́же възлюби е҆го ѿ дш҃а свое҆ѧ·

И҆ съвлече́сѧ и҆ѻ҆а҆наѳа́нъ съ ри́зы свое҆ѧ, и҆ да̀ ю҆̀ двд҃ви, і҆ и́ны ѻ҆де́жи своѧ̀ да́же до ѻ҆рꙋж́їѧ свое҆го, и҆ до лꙋ́ка свое҆го, и҆ до по́ѧса свое҆го·

І҆ и҆схожда́ше дв҃дъ въ всѣ́хъ пꙋте́хъ, и҆дѣж́е а҆́ще посыла́ше е҆го саѹ҆́лъ, поста́ви же е҆го саѹ҆́лъ над̑ мꙋжѝ во́искими, и҆ ѹ҆го́денъ б̂ѣ пред̑ ѻ҆чи́ма всѣ́хъ люде́и, и҆ пред̑ слꙋга́ми саѹ҆́ловыми·

И҆ быс̑҇, внегда̀ входи́ти и҆мъ, вънегда възврати́сѧ дв҃дъ ѿ побѣжде́нїѧ и҆ноплеме́нникъ, і҆ и҆зыидо́ша дв҃ы ликоствꙋ́ющїи на срѣте́нїе саѹ҆́ла цр҃ѧ, ѿ всѣ́хъ гра́дъ і҆и҆л҃евыхъ пою́ще и҆ скачюще, в тѷм꙽па́нѣхъ съ ра́достїю и҆ съ гꙋ́сльми·

И҆ хожда́хꙋ же́ны ликꙋ́юще и҆ гл҃юще, побѣди саѹ҆́лъ съ ты́сѧщами а҆ дв҃дъ съ тма́ми, и҆ разгнѣ́васѧ саѹ҆́лъ ѕѣ́ло лꙋка́вы б̂о ꙗ҆ви́шасѧ гл҃ы пред̑ ѻ҆чи́ма саѹ҆́ловыма ѻ҆ словесѝ се́мъ, и҆ рече саѹ҆́лъ, дв҃дви даша тмы̀, а҆ мнѣ да́ша ты́сѧща, и҆ что же е҆мꙋ не быс̑҇ толи́ко црс̑҇тво·

И҆ б̂ѣ пострѣка́емъ саѹ҆́лъ дв҃домъ ѿ того̀ дн҃е и҆ пото́мъ·

И҆ бы́сть ѿ ѹ҆́трѣшнего дн҃е, и҆ нападѐ дꙋ́хъ лꙋка́выи ѿ г҃а на саѹ҆́ла, и҆ прорица́ше посредѣ̀ до́мꙋ свое҆го, и҆ дв҃дъ поѧ́ше въ гꙋ́сли ꙗ҆́коже и҆ по всѧ̀ дн҃и, ко́пїе же в рꙋ́кꙋ саѹ҆́лю·

И҆ взе́мъ саѹ҆́лъ ко́пїе и҆ рече поражꙋ̀ дв҃да къ стѣнѣ̀, и҆ ѹ҆клони́сѧ дв҃дъ ѿ лица̀ его два́щи·

И҆ ѹ҆боѧ́сѧ саѹ҆́лъ ѿ лица̀ двд҃ва, ꙗ҆́ко г҃ь б̂ѣ с ни́мъ, а҆ ѿ саѹ҆́ла ѿстꙋпѝ·

И҆ ѿста́ви е҆го саѹ҆́лъ ѿ себѐ, и҆ постави е҆го въ ѻ҆́бласти свое́и ты́сꙋщника́ і҆ и҆схожд̑а́ше, и҆ въсхожд̑а́ше пред̑ люд̑ми·

И҆ бѣ дв҃дъ въ всѣ́хъ пꙋте́хъ свои҆хъ смыслѧ̀ и҆ г҃ь б̂ѣ с ни́мъ·

И ви́дѣ саѹл̑҇ ꙗ҆́ко то́и смы́слитъ ѕѣ́ло, и҆ сꙋмнѧ́шесѧ ѿ лица̀ е҆го·

Ве́сь же і҆и҆л҃ь, і҆ и҆ѹ́да люблѧ́хꙋ дв҃да.
ꙗ҆́ко се́и въсхожда́ше і҆ и҆схожда́ше, пред̑ лице́мъ всх̑ѣ люді́и·

И҆ рече саѹ҆́лъ къ дв҃дꙋ, с̂е дщи моѧ̀ большаѧ меро́въ, сїю тебѣ да́мъ в женꙋ̀, то́кмо бꙋди м̂и въ сн҃а си́лы, и҆ побора́и бра́ни гн҃и, саѹ҆́лъ б̂о рече да не бꙋ́детъ рꙋка̀ моѧ̀ на нем̑, н̂о да бꙋдет̑ рꙋка̀ и҆ноплеме́нническа·

И҆ рече дв҃дъ къ саѹ́лꙋ кт̂о а҆́зъ е҆смь, и живо́тъ ѿц҃а мое҆го въ і҆и҆л҃и, ꙗ҆́ко да бꙋ́дꙋ зѧ́ть црс̑҇кїи·

И҆ бы́сть въ вре́мѧ е҆гда̀ да́ти е҆мꙋ меро́въ дще́рь саѹ҆́ловꙋ дв҃дови, сїѧ же дасѧ есрои́лю молаѳи́тъскомꙋ въ женꙋ̀.
и҆ възлюби́ же мельхо́ла дщ̂и саѹ҆́лова дв҃да.
и҆ възвѣсти́ша с̂е саѹ́лꙋ и҆ ѹ҆го́дно бы́сть пред̑ ѻ҆чи́ма е҆го сло́во т̂о·

И҆ реч̑҇ саѹ́лъ да́мъ е҆мꙋ̀ и҆ бꙋ́детъ е҆мꙋ на събла́знъ.
и҆ бꙋ́детъ б̂о на не́мъ рꙋка̀ и҆ноплеме́ннича.
и҆ рече саѹ́лъ къ дв҃дꙋ.
си́лъ ра́ди бꙋ́деши м̂и зѧ́ть дне́сь·

И҆ заповѣ́да саѹ́лъ ѻ҆́троком̑ свои҆мъ гл҃ѧ.
р꙽цѣт́е в̂ы та́ино дв҃дꙋ гл҃юще.
с̂е цр҃ь хо́щетъ да́ти за́ тѧ дще́рь свою̀, и҆ вс̂и ѻ҆́троцы лю́бѧтъ т̂ѧ, и҆ т̂ы бꙋ́ди зѧ́ть цр҃ю·

И҆ гл҃аша ѻ҆́троцы саѹ́ловы, въ ѹ́ши дв҃дꙋ гл҃ы сїѧ.
и҆ реч̑҇ дв҃дъ а҆ще пра́во с̂е е҆сть пред̑ ѻ҆чи́ма ва́шима, и҆же быти м̂и зѧ́темъ цр҃ю а҆зъ б̂о е҆смь мꙋж́ъ смире́нъ и҆ несла́венъ·

И҆ възвѣсти́ша ѻ҆́троцы саѹ́лꙋ с̂и словеса̀, ꙗ҆́же гл҃а дв҃дъ·

И҆ рече саѹ́лъ, си́це рцѣт́е двд҃ви.
не хо́щет̑ цр҃ь съ бога́теством̑ зѧ́тѧ н̂о съ сто́м꙽ кра́е неѻ҆брѣ́заных̑ и҆ноплеме́нническихъ.
ѿм꙽сти́ти враго́мъ цр҃евымъ.
саѹ́лъ б̂о мышлѧ́ше, въда́ти дв҃да в рꙋ́цѣ и҆ноплеме́нникомъ·

И҆ възвѣсти́ша ѻ҆́троцы саѹ́ловы гл҃ы сїѧ двд҃ви.
и҆ ѹ҆го́дна быша словеса̀ с̂и пред̑ ѻ҆чи́ма дв҃довыма, е҆же бы́ти в꙽ зѧтѧ цр҃ви, и҆ не по мно́ѕѣхъ дн҃ехъ·

И҆ въста́въ дв҃дъ і҆ и́де самъ, и҆ мꙋ́жи е҆го с ни́м꙽.
и҆ ѹ҆би́ша ѿ и҆ноплеме́нникъ, с҃, мꙋ́жъ, и҆ принесо́ша кра́е неѻ҆брѣзанїе и҆хъ цр҃ю.
и҆ въда̀ е҆мꙋ̀ и҆ бы́сть зѧ́ть цр҃ю.
и҆ въда́сть е҆мꙋ цр҃ь мельхо́лꙋ дще́ръ свою̀ въ женꙋ̀·

И҆ ви́дѣ саѹ́лъ ꙗ҆ко г҃ь е҆сть съ дв҃домъ.
и҆ ве́сь і҆и҆ль лю́битъ и҆̀·

И҆ приложѝ саѹ́лъ ѿто́лѣ па́че боѧ́тисѧ дв҃да.
и҆ бысть дв҃дъ ненави́димъ саѹ́лом̑ вс̂ѧ дн҃и·

І҆ и҆зыидо́ша кн҃ѕи и҆ноплемен̑҇нически, и҆ бы́сть послд̑ѣ́нїи и҆сход̑ и҆хъ.
дв҃дъ же ра́зꙋменъ б̂ѣ па́че всѣхъ слꙋ́гъ саѹ́ловых̑.
и҆ почте́сѧ и҆́мѧ е҆го ѕѣ́ло·

Глв̑҇а, ѳ҃і·

И гл҃а саѹ́лъ къ и҆ѻ҆а҆наѳа́нꙋ сн҃ꙋ свое҆мꙋ и҆ къ всѣ́мъ ѻ҆́трокомъ свои҆мъ.
да ѹ҆мрътвѧ́тъ дв҃да.
н̂о и҆ѻ҆а҆наѳа́нꙋ же сн҃ꙋ саѹ́лю, ѹ҆го́денъ бѧ́ше дв҃дъ ѕѣ́ло·

И҆ възвѣстѝ и҆ѻ҆а҆наѳа́нъ дв҃дꙋ гл҃ѧ.
ѿц҃ъ мо́и саѹ́лъ и҆́щетъ т̂ѧ ѹ҆би́ти, съхрани́сѧ ѹ҆бо ѹ҆́тро, заѹ҆́тра скры́исѧ, и҆ сѧ́ди въ съкро́вищи·

И҆ а́зъ и҆зыидꙋ̀ и҆ ста́нꙋ молѧ́сѧ ѿц҃ꙋ свое҆мꙋ на селѣ̀ и҆дѣ́же а҆ще е҆си т̂ы.
и҆ а́зъ гл҃ю ѿц҃ꙋ свое҆мꙋ ѻ҆ тебѣ̀, да и҆дѣ́же бꙋ́деши възвѣщꙋ̀ т̂и·

И҆ гл҃а и҆ѻ҆а҆наѳа́нъ ѻ҆ дв҃дѣ бл҃гаѧ къ саѹ́лꙋ ѿц҃ꙋ свое҆мꙋ и҆ речѐ к немꙋ.
е҆да̀ съгрѣшѝ ѽ цр҃ю ра́бъ тво́и дв҃дъ н̂о мню̀ ꙗ҆́ко не съгрѣшѝ ничи́мъже, и҆ дѣ́ла б̂о е҆го бл҃га сꙋть ѕѣ́ло·

И҆ положѝ дш҃ꙋ свою̀ в рꙋ́кꙋ е҆го и҆ побѣдѝ и҆ноплеме́нника.
и҆ сътворѝ г҃ь сп҃се́нїе вели́ко всемꙋ̀ і҆и҆л҃ю.
ты́ же вѣ́дѣ и҆ пора́довасѧ.
и҆ почто̀ съгрѣша́еши въ кро́вь непови́ннꙋ, ѹ҆би́ти велѧ̀ дв҃да въсꙋ́е·

И҆ послꙋша саѹ́лъ глс̑҇а и҆ѻ҆а҆наѳа́нь и҆ клѧ́сѧ и҆ гл҃ѧ, жи́въ г҃ь ꙗ҆́ко не ѹ́мретъ дв҃дъ·

И҆ призва̀ и҆ѻа҆наѳа́нъ дв҃да и҆ възвѣстѝ е҆мꙋ вс̂ѧ гл҃ы сїѧ.
и҆ в꙽ведѐ и҆ѻ҆а҆наѳа́нъ дв҃да къ саѹ́лꙋ, и҆ б̂ѣ пред̑ ни́мъ ꙗ҆́ко и҆ пре́жде·

И҆ приложи́сѧ бра́ни бы́ти на саѹ́ла.
и҆ ѹ҆крѣпи́сѧ дв҃дъ и҆ побѣдѝ и҆ноплеме́нникъ.
і҆ и҆збѝ ꙗ҆́звою вели́кою ѕѣ́ло.
и҆ бѣжа́ша ѿ лица̀ е҆го·

И҆ бы́сть дꙋ́хъ лꙋка́въ на саѹ́лѣ.
и то́и в домꙋ̀ своем̑ почива́ше, и҆ ко́пїе в рꙋцѣ̀ его.
и҆ дв҃дъ поѧ́ше въ гꙋ́сли своѧ̀·

І҆ и҆ска́ше саѹ́лъ ѻ҆рꙋжїемъ разби́ти дв҃да, и҆ ѿстꙋпѝ дв҃дъ ѿ лица̀ саѹ́лѧ.
и҆ съкрꙋшѝ саѹ́лъ ѻ҆рꙋж́їе ѻ҆́ стѣнꙋ, и҆ дв҃дъ ѿшед̑ сп҃се́сѧ в но́щь т̂ꙋ·

И҆ посла̀ саѹ́лъ вѣ́стники в до́мъ двд҃въ стрещѝ е҆го да ѹ҆бїютъ и҆̀.
и҆ по совѣт́ꙋ възвѣсти дв҃дꙋ мелхо́ла жена̀ е҆го гл҃ющи.
а҆ще не сп҃сеши дш҃а свое҆ѧ в но́щь сїю т̂о ѹ́тро ра́но ѹ́мреши·

И҆ свѣсѝ мелхо́ла дв҃да ѻ҆ко́нцемъ, и҆дѐ, и҆ бѣжа и҆ сп҃сесѧ·

И҆ прїѧ́тъ мелхо́ла новопогреба́лнаѧ, и҆ положѝ на ѻ҆́дрѣ, и҆ плат̑ и҆же полага́ше е҆мꙋ на главѣ̀, и҆ покры̀ ѧ҆̀ ри́зами·

И҆ посла̀ саѹ́лъ слꙋ́ги да и҆мꙋтъ дв҃да.
и҆ гл҃аше ꙗ҆́ко бо́ленъ е҆сть.
и҆ посла̀ саѹ́лъ второ́е да ѻ҆глѧда́ютъ дв҃да гл҃ѧ.
принесѣте и҆̀ на ѻ҆́дрѣ къ мнѣ̀, да ѹ҆мрьщвлю и҆̀ а҆зъ·

И҆ прїидо́ша слꙋ́ги, и҆ с̂е но́вопогреба́лнаѧ на ѻ҆́дрѣ.
и҆ ѹ҆брꙋ́съ і҆ и́же б̂ѣ на главѣ̀ е҆го·

И҆ рече саѹ́лъ къ мелхо́лѣ.
что̀ с̂е помы́слила е҆си, и҆ ѿпꙋсти́ла е҆си вра́га мое҆го, и҆ гон꙽зѐ менѐ.
и҆ реч̑҇ мелхо́ла саѹ́лови.
сам̑ м̂и рече ѿпꙋстѝ м̂ѧ.
а҆ще л̂и нѝ т̂о погꙋблю̀ т̂ѧ·

И҆ дв҃дъ бѣжав̑҇ сп҃сесѧ.
і҆ и́де къ само́илꙋ въ сармаѳе́мꙋ.
і҆ и҆сповѣ́давъ е҆мꙋ вс̂ѧ, е҆ли́ко сътворѝ е҆мꙋ саѹ́лъ.
і҆ и҆до́ста дв҃дъ и҆ само́и҆лъ.
и҆ сѣдо́ста на сꙋ́дищи в ра́мѣ·

И҆ възвѣсти́сѧ с̂е саѹ́лꙋ.
и҆ посла̀ слꙋ́ги саѹ́лъ ꙗ҆́ти дв҃да.
и҆ ви́дѣша събо́ръ прро̑҇къ.
и҆ само́илъ стоѧ́ше всѧ́ко над ни́ми.
и҆ бы́сть дх҃ъ бж҃їи на слꙋга́хъ саѹ́лихъ.
и҆ нача́ша прорица́ти·

Възвѣсти́ша саѹ́лꙋ, и҆ посла̀ дрꙋгїѧ слꙋ́ги, и҆ прорица́ти нача́ша и҆ тїѝ.
и҆ приложи саѹ́лъ посла́ти слꙋ́ги тре́тїи, и҆ нача́ша и҆ тїи прорица́ти·

И҆ разгнѣ́васѧ гнѣ́вомъ вели́кимъ саѹ́лъ.
і҆ и́де са́мъ въ сармаѳе́мꙋ.
и҆ прїиде до кла́дѧѕѧ вели́кого, и҆же е҆сть сеѳі́и҆нъ.
и҆ въпросѝ саѹ́лъ рече гд̂ѣ е҆сть самоил̑҇ и҆ дв҃дъ.
и҆ рѣш́а с̂е е҆сть въ наѳе́ѳѣ, в ра́мѣ·

І҆ и́де в наѳо́ѳы, ꙗ҆́же в рамѣ.
и бы́сть и҆ на то́мъ дх҃ъ бж҃їи.
і҆ и҆дѧ́ше и҆ды́и прорица́ѧ, до́ндеже прїитѝ е҆мꙋ в наѳо́ѳꙋ ꙗ҆́же в ра́мѣ·

И съвлече́сѧ съ ри́зъ свои҆хъ.
и҆ прорицаше предо всѣ́ми и҆ми ве́сь дн҃ь то́и, и҆ вс̂ю но́щь т̂ꙋ.
того̀ ра́ди гл҃ахꙋ, а҆ще и҆ саѹ́лъ е҆сть въ прро̑҇цѣхъ·

Глв̑҇а, к҃·

И ѿбѣж́е дв҃дъ ѿ нава́ѳа въ ра́мꙋ.
и прїиде къ и҆ѻ҆а҆наѳа́нꙋ.
и҆ реч̑҇ чт̂о сътворих̑.
чт̂о непра́вда моѧ̀.
и чт̂о съгрѣших̑ прд̑е ѿц҃емъ твоим̑ да и҆́щетъ дш҃а мое҆ѧ·

И҆ рече е҆мꙋ и҆ѻ҆а҆наѳа́нъ ника́коже ѹ҆бо не и҆́маши ѹ҆мрѣти.
с̂е б̂о не и́мать сътвори́ти ѿц҃ъ мо́и гл҃а вели́ка и ма́ла, и҆ не ѿкры́етъ ѹ́ха мое҆го.
и҆ чт̂о ꙗ҆́ко скры́етъ ѿц҃ъ мой гл҃ъ се́и ѿ менѐ.
не бꙋ́ди с̂е·

И҆ ѿвѣща̀ дв҃дъ и҆ѻ҆а҆наѳа́нꙋ и҆ реч̑҇.
вѣ́сть свѣды́и ѿц҃ъ твои ꙗ҆́ко ѻ҆брѣто́хъ блгд̑ть пре ѻ҆чи́ма твои́ма, и҆ та́ко гл҃етъ не възвѣщꙋ̀ сего̀ и҆ѻ҆а҆наѳа́нꙋ, чт̂о с̂е ѹ҆мы́слих̑, н̂о жи́въ г҃ь и жива̀ дш҃а твоѧ̀, ꙗ҆́коже б̂о реко́хъ и҆спо́лнитсѧ межи мно́ю и҆ межи ѿц҃емъ твоим̑ смр҃ть·

И҆ рече па́ки и҆ѻа҆наѳа́нъ къ дв҃дꙋ, чт̂о хо́щетъ дш҃а твоѧ̀ да сътворю̀ т̂и·

И҆ рече дв҃дъ къ и҆ѻа҆наѳа́нꙋ, с̂е ѹ҆бо новомѣ́сѧчїе е҆сть ѹ́тро и҆ а́зъ сѣды́и не сѧ́дꙋ съ цр҃емъ ꙗ҆́сти, и҆ по́слеши м̂ѧ и҆ скры́юсѧ на́ поли до́ вечера тре́тїѧго·

И҆ а́ще съзира́ѧ съзрит̑ ѿц҃ъ тво́и, и҆ речеши просѧ́сѧ просѝ ѹ҆ менѐ дв҃дъ, ѿи҆тѝ въ виѳлеѻ́мъ гра́дъ свои, ꙗ҆́ко жр́ьтва днс̑҇е та́мо всемꙋ̀ племе́ни·

А҆ще ли с̂е реч̑҇ бл҃го ми́ръ рабꙋ̀ твое҆мꙋ, а҆ще л̂и лю́то ѿвѣща́етъ т̂и, разꙋмѣ́и ꙗ҆́ко съврьши́тсѧ ѕло́ба ѿ него·

И҆ та́ко сътвори́ши млс̑҇ть съ рабо́мъ твоим̑, ꙗ҆́ко завѣт́омъ гн҃имъ въве́лъ е҆си раба̀ свое҆го къ себѣ̀, и҆ а́ще е҆сть непра́вда в рабѣ̀ твое҆мъ, побі́и м̂ѧ т̂ы са́мъ, и҆ къ ѿц҃ꙋ твое҆мꙋ почто̀ м̂ѧ и҆́маши води́ти·

И҆ рече и҆ѻ҆а҆наѳа́нъ ника́коже не бꙋ́ди с̂е, е҆гда̀ бо разꙋмѣва́ѧ въразꙋмѣ́ю, ꙗ҆́ко е҆щѐ не сконча́сѧ ѕло́ба ѿц҃а мое҆го, е҆же прїитѝ на тебѣ̀, т̂о и҆ въ гра́дехъ твои҆хъ тебѣ̀ възвѣщꙋ·

И҆ рече дв҃дъ къ и҆ѻа҆наѳа́нꙋ, кт̂о възвѣсти́тъ м̂и, а҆ще ѿвѣща́етъ ѿц҃ъ тво́и ѕл̂ѣ·

И рече и҆ѻа҆наѳа́нъ къ дв҃дꙋ и҆дѝ и҆ пребꙋ́ди на́ поли, і҆ и҆до́ста ѻ҆́ба на́ поле·

И҆ реч̑҇ и҆ѻ҆а҆наѳа́нъ, къ дв҃дꙋ, г҃ь б҃ъ і҆и҆л҃евъ вѣ́сть ꙗ҆́ко и҆скꙋшꙋ̀ ѿц҃а мое҆го.
ꙗко а҆ще не ѻ҆жесточи́тсѧ заѹ́тра и҆л̂и до тре́тїаго дн҃е.
и҆ с̂е бл҃го бꙋ́дет̑ ѻ҆ тебѣ̀ дв҃дѣ.
и҆ не и҆́мамъ посла́ти к тебѣ̀ на́ поле·

И҆ възвѣсти́ти сїѧ въ ѹ́ши твои.
с̂еже да сътвори́тъ г҃ь и҆ѻа҆наѳа́нꙋ, сїе да приложи́тъ.
и҆ а́ще ли же въсхо́щетъ ѿц҃ъ мой сътвори́ти ѕла́ѧ тебѣ.
т̂о и҆ с̂е ѿкры́ю ѹ́хꙋ твое҆мꙋ.
и҆ послю̀ т̂ѧ, і҆ и҆деши въ ми́ръ, и҆ бꙋдетъ г҃ь с тобо́ю.
ꙗ҆́коже б̂ѣ съ ѿц҃ем꙽ мои҆мъ·

И҆ а́ще и҆ е҆щѐ жи́вꙋ сꙋщꙋ м̂и.
да сътвори́ши съ мно́ю млс̑҇ть гн҃ю.
и҆ а́ще смр҃тїю ѹ҆мрꙋ̀, да не ѿи҆́меши млс̑҇ти твое҆ѧ ѿ до́мꙋ мое҆го до́ вѣка.
и҆ а́ще и҆ ѿи́метъ б҃ъ врагѝ двд҃вы, когождо ѿ лица̀ землѝ.
да ѻ҆брѧ́щетсѧ и҆́мѧ и҆ѻ҆а҆наѳа́не в домꙋ̀ двд҃вѣ·

И҆ сътворѝ завѣт́ъ и҆ѻ҆а҆наѳа́нъ съ до́момъ двд҃вымъ гл҃ѧ.
і҆ и҆зы́щетъ г҃ь врагѝ двд҃вы·

И҆ приложѝ и҆ѻ҆а҆наѳа́нъ клѧ́тисѧ двд҃ви.
ꙗ҆́ко възлюбѝ дш҃ꙋ любѧ́щꙋю е҆го·

И҆ рече и҆ѻ҆а҆наѳа́нъ къ немꙋ̀.
ѹ́тро е҆сть но́во мѣ́сѧчїе, и҆ въспомѧне́шисѧ ꙗ҆́ко пра́зно бꙋдетъ сѣде́нїе твоѐ·

Ты̂ же премед̑ли́ши тр̂и дн҃и.
и҆ пребꙋ́деши на мѣ́стѣ твоем̑ и҆дѣж́е съкры́ешисѧ въ дн҃ь дѣла́нїѧ.
и҆ сѧ́деши при ѻ҆рга́вѣ ѻ҆́номъ·

И҆ а́зъ тре́тїѧго дн҃е и҆зыидꙋ̀ стрѣлѧ́ючи стрѣла́ми, и҆ стрѣлю̀ до а҆магъга́рїѧ·

И҆ посе́мъ послю̀ ѻ҆́трока гл҃ѧ, и҆дѝ и҆ ѻ҆брѧ́щи м̂и стрѣлꙋ̀, и҆ а́ще рекꙋ̀ ѻ҆́трокꙋ бли́зъ е҆сть стрела̀ ѿ тебѐ, и҆ зд̂ѣ возми ю҆̀ и҆ т̂ы и҆ди къ мнѣ̀ бꙋ́ди разꙋмѣва́ѧ ꙗ҆́ко ми́ръ тебѣ̀, и҆ нѣ́сть т̂и лꙋка́вно, жи́въ г҃ь·

А҆ще же та́ко рекꙋ̀ ю҆́ноши подалеи стрела̀ ѿ тебѐ, и҆ по тѣхъ т̂о, и҆дѝ ꙗ҆́ко посла̀ т̂ѧ г҃ь, и҆ гл҃ы ꙗ҆́же а҆зъ гл҃ахъ и҆ т̂ы, с̂е г҃ь свѣдѣтель есть межи тобо́ю и҆ мно́ю до́ вѣка·

И҆ съкры́сѧ двд̑ъ на селѣ̀.
и҆ прїиде новомѣ́сѧчїе.
и҆ прїиде цр҃ь на трапе́зꙋ ꙗ҆́сти·

И҆ сѣ́де цр҃ь на сѣ́далищи свое҆мъ ꙗ҆́коже и҆ прс̑҇но, на сѣ́далищи при стѣнѣ̀.
и҆ прежде варѝ и҆ѻ҆а҆наѳа́на.
и҆ сѣ́де а҆вени́ръ ѿ въз꙽гла́вница саѹ́лѧ.
и҆ пра́зно бы́сть мѣ́сто двд҃во·

И҆ не гл҃а саѹ́лъ ничто́же в то́и дн҃ь.
помы́сли б̂о в себѣ̀ ꙗ҆́ко сего̀ ра́ди с на́ми не сѧ́де поне́же нечи́стъ е҆сть и҆ занѐ не ѻ҆чи́стисѧ·

И҆ бы́сть наѹ́трїѧ мцс̑҇а, в дн҃ь, в҃, та́кожде пра́зно бысть мѣ́сто двд҃во, и҆ рече саѹ́лъ къ и҆ѻ҆а҆наѳа́нꙋ сн҃ꙋ свое҆мꙋ.
чт̂о сѐ не прїиде сн҃ъ і҆е҆с꙽се́ѻ҆въ ни вчера̀ ни днс̑҇е на трапе́зꙋ·

И҆ рече и҆ѻ҆а҆наѳа́нъ къ саѹ́лꙋ, проси́сѧ ѹ҆ менѐ дв҃дъ въ виѳлеѻ́мъ гра́дъ свои и҆тѝ·

И҆ рече пꙋстѝ м̂ѧ нн҃ѣ въ виѳлеѻм̑ ꙗ҆́ко жрьтва колѣ́на на́шего въ́ градѣ е҆сть.
заповѣ́даша б̂о м̂и бра́тїѧ моѧ̀.
и҆ нн҃ѣ ѻ҆брѣто́хъ л̂и блгд̑ть пред̑ ѻ҆чи́ма твои́ма да и҆дꙋ̀ нн҃ѣ, и҆ ѹ҆зрю̀ бра́тїю мою̀.
сего ра́ди не прїиде на трапе́зꙋ цр҃евꙋ·

И҆ разгнѣ́васѧ гнѣ́вомъ саѹ́лъ на и҆ѻа҆наѳа́на ѕѣ́ло.
и҆ реч̑҇ е҆мꙋ сн҃е мт҃рїи са́мо ѻ҆сла́бленыхъ.
не вѣ́дѣ ли б̂о ꙗ҆́ко прича́стникъ сн҃ꙋ і҆е҆с꙽се́ѻвꙋ е҆си.
въ срамотꙋ̀ твою, и҆ въ бестꙋ́дїе ѿкрове́нїѧ мт҃ри твое҆ѧ·

Ꙗ҆́ко въ вс̂ѧ дн҃и ѻ҆ка́нныи, сн҃ъ і҆е҆с꙽се́ѻ҆въ е҆же жи́ти и҆́мать на землѝ.
не ѹ҆крѣпи́шисѧ т̂ы ни црс̑҇тво твоѐ.
нн҃ѣ ѹ҆бо посла́въ поимѝ къ мнѣ̀, ꙗ҆́ко сн҃ъ смр҃ти е҆сть се́и.
и҆ ѿвѣща̀ и҆ѻ҆а҆наѳа́нъ саѹ́лꙋ ѿц҃ꙋ свое҆мꙋ, и҆ реч̑҇ за чт̂о ѹ҆мира́етъ чт̂о сътворѝ.
и҆ взѧ́тъ саѹ́лъ ѻ҆рꙋж́їе на и҆ѻа҆наѳа́на да и҆̀ ѹ҆мрьтви́тъ, и҆ разꙋмѣ и҆ѻ҆а҆наѳа́нъ, ꙗ҆́ко ѹ҆́же съврьши́сѧ ѕло́ба ѿц҃а е҆го, да ѹ҆мрътви́тъ дв҃да·

И҆ въско́чи и҆ѻа҆наѳа́нъ съ гнѣ́вомъ гнѣ́ваѧсѧ ѿ тра́пезы.
и҆ не ꙗ҆́сть хлѣ́ба въ дн҃ь вторы́и мцс̑҇а, ꙗ҆́ко жа́лоба по дв҃дѣ.
ꙗ҆́ко съвръшѝ ѕло́бꙋ ѻ҆ не́мъ ѿц҃ъ е҆го·

И҆ бы́сть заѹ́тра.
і҆ и҆зы́иде и҆ѻ҆а҆наѳа́нъ на село̀, ꙗ҆́же заповѣд̂а ѻ҆ свѣдѣ́нїи двд҃вѣ.
и҆ ѻ́трокъ ма́лъ с ни́мъ·

И҆ рече ѻ҆́трокови, и҆ течѝ и҆ ѻ҆брѧ́щи ми стрелы̀ ꙗ҆́же а҆зъ стрѣлѧ́ю.
и҆ ѻ́трокъ течѐ, принестѝ ю҆̀, и҆ ѻ́нъ стрелѝ стрело́ю, за него̀.
и҆ прїиде ѻ҆́трокъ до мѣ́ста стрелы̀ и҆дѣж́е стрели́лъ и҆ѻа҆наѳа́нъ.
и҆ възопѝ и҆ѻа҆наѳа́нъ въ слѣдъ ѻ҆́трока свое҆го.
і҆ и҆ рече та́мо стрела̀ ѿ тебѐ·

И҆ па́ки възопѝ и҆ѻа҆наѳа́нъ въ слѣ́дъ ѻ҆́трока свое҆го.
и҆ рече потщи́сѧ ско́ро и҆ не замедлѝ.
и҆ събра̀ ѻ҆́трокъ и҆ѻа҆наѳа́нꙋ стрѣ́лы, и҆ принесѐ ѧ҆̀ къ господи́нꙋ свое҆мꙋ·

И҆ ѻ́трокъ не свѣдѧ́ше ничт̂оже.
ра́звѣ и҆ѻа҆наѳа́нъ и҆ дв҃дъ, свѣдѧ́ше гл҃ы·

И҆ ѿда̀ и҆ѻ҆а҆наѳан̑҇ ѻ҆рꙋж́їе своѐ ѻ҆́трокꙋ свое҆мꙋ.
и҆ реч̑҇ ѻ҆́трокꙋ с̂и, и҆дѝ и҆ ѿнесѝ во́ грд̑а·

Ꙗ҆́коже и҆́де ѻ҆́трокъ, и҆ дв҃дъ въста̀ ѿ е҆рга́ва.
и҆ пад̑ на́ землю поклони́сѧ е҆мꙋ три́жды.
и҆ ѻ҆блобыза́стасѧ ко́ждо.
и҆ пла́касѧ ко́ждо по и҆́скренемъ с̂и, до сконча́нїѧ вели́ка·

И҆ рече и҆ѻ҆а҆наѳа́нъ дв҃дꙋ, и҆дѝ с ми́ромъ.
ꙗ҆́коже клѧ́ховѣсѧ м̂ы ѻ҆́ба и҆́менемъ гн҃имъ гл҃юще.
г҃ь е҆сть свѣдѣтель междꙋ мно́ю и҆ тобо́ю, и҆ междꙋ сѣменемъ твои҆мъ и҆ междꙋ сѣменем꙽ мои҆мъ до́ вѣка·

И҆ въста́въ дв҃дъ и҆ ѿи́де, и҆ѻа҆наѳа́нъ вні́иде во́ грд̑а·

Глв̑҇а, к҃а·

И прїиде дв҃дъ въ цр҃ковь къ а҆вимеле́хꙋ і҆е҆ре́ю.
і҆ и҆зы́иде а҆вимеле́хъ въ срѣте́нїе е҆мꙋ.
и҆ речѐ е҆мꙋ чт̂о с̂е ты̀ е҆ді́нъ е҆си, и҆ нѣсть никогож̑ с тобо́ю·

И҆ речѐ дв҃дъ і҆ере́ѻ҆ви цр҃ь заповѣ́да м̂и гл҃ъ дне́сь, и҆ рече къ мн̂ѣ, никто́же да не разꙋмѣ́ет꙽ гл҃а е҆гоже а҆зъ ради пꙋща́ю т̂ѧ.
и҆ ѻ҆ нем̑же а҆зъ заповѣ́даю ти и҆ ѻ́троки ѻ҆ста́вихъ.
на мѣсте гл҃емемъ е҆мъмо́нмъ·

И҆ нн҃ѣ е҆́сть л̂и гдѣ̀ ѹ҆ тебѐ, е҃ хлѣбъ да́ждь м̂и е҆ли́ко и҆́маши·

И҆ ѿвѣща̀ і҆е҆ре́и дв҃дви и҆ реч̑҇ нѣ́сть хлѣбы про́сты ѹ҆ менѐ.
н̂о сꙋть хлѣби ѹ҆ менѐ сщ҃ени.
храни́ми тѣмъ, и҆же чи́сти сꙋть ѿ жен̑҇ и҆ тїи ꙗ҆дѧ́тъ ѧ҆̀·

И҆ ѿвѣща̀ дв҃дъ і҆е҆ре́ѻ҆ви речѐ.
и҆ м̂ы е҆смы чи́сти ѿ же́нъ.
ѿ тре́тїꙗ҆го дн҃е, и҆ до дн҃е, ѿне́лѣже и҆зыидо́хомъ на пꙋт́ь.
и҆ сꙋт́ь ѻ҆́троцы вс̂и чи́сти, и҆ пꙋт́ь се́и е҆сть чи́стъ.
зане ѻ҆ст҃ѧтсѧ дне́сь сосꙋдъ ради мои҆хъ·

И҆ да́сть е҆мꙋ і҆е҆ре́и а҆вимеле́хъ хлѣ́бы пред̑ложе́ныѧ, ꙗ҆́ко не бѣ т̂ꙋ и҆́ного хлѣба тїи б̂о бѣхꙋ е҆ді́ни хлѣби прине́сени и҆хже взѧ́ша пред̑ лице́мъ гн҃имъ.
и҆ то́и да́сть ѧ҆̀ е҆мꙋ в то́и дн҃ь·

И҆ б̂ѣ т̂ꙋ е҆ді́нъ ѻ҆́трокъ саѹ́ловъ въ дн҃ь ѻ҆́нъ, держа́и ю҆́ное ста́до пред̑ гм҃ъ.
і҆ и́мѧ е҆мꙋ и҆дои́къ сѷринъ.
старѣ́ишина ѿ па́стырь саѹ́ловыхъ.
и҆ се́и пасѧ̀ м꙽скѝ саѹ́ловы·

И҆ рече дв҃дъ къ а҆вимеле́хꙋ.
ви́ждь а҆ще е҆сть здѣ ѹ тебѐ копїѐ и҆ щи́тъ ꙗ҆́ко копїѧ̀ мое҆го ни ѻ҆рꙋжїѧ мое҆го не взѧ́хъ съ собо́ю.
ꙗ҆́ко цр҃во повеле́нїе напра́сно м̂и бѣ̀·

И҆ рече і҆е҆ре́и.
с̂е копїе голиꙗ҆́да и҆ноплеме́нника е҆гоже т̂ы ѹ҆бѝ на ѹ҆до́лїи, и҆ то̀ в ри́зꙋ ѻ҆би́тое стоитъ за ст҃ою трапе́зою.
и҆ т̂о възмѝ а҆ще т̂и е҆сть на потре́бꙋ, нѣсть б̂о и҆́ного здѣ кромѣ сего̀.
и҆ реч̑҇ дв҃дъ ꙗ҆́ко нѣсть и҆́но ѻ҆ба́че да́ждь м̂и е҆̀.
и҆ да́сть е҆мꙋ е҆̀·

И҆ въста́въ дв҃дъ в то́и дн҃ь, бѣжа̀ ѿ лица̀ саѹ́лова.
и҆ прїиде дв҃дъ къ а҆кхꙋсꙋ цр҃ю ге́ѳскꙋ, и҆ рѣша ѻ҆́троцы а҆кхꙋ́сови к немꙋ нѣсть л̂и се́и дв҃дъ бы́выи цр҃ь въ свое́и землѝ, и҆ не семꙋ л̂и и҆зыидо́ша проти́вꙋ же́ны ликꙋ́юще гл҃ѧ.
побѣдѝ саѹл̑҇ со ты́сѧщами свои́ми.
а҆ дв҃дъ съ тма́ми свои́ми, и҆ положѝ дв҃дъ гласъ сїи на срд̑цы своем̑ и҆ ѹ҆боꙗ҆́сѧ ѕѣло, а҆кхꙋса цр҃ѧ ге́ѳъска·

І҆ и҆змѣни́сѧ лицѐ е҆мꙋ пред ним̑ ѿ ѹ҆́жасти.
и҆ претвори́сѧ въ дн҃ь то́и.
и҆ бїꙗ҆́ше ѹ҆ вра́та гра́дꙋ ꙗ҆́ко въ тим꙽па́нъ, и҆ тресѧ́ше рꙋка́ми свои́ми, и҆ падѐ ѹ҆ вра́тъ гра́дꙋ.
и҆ сли́ны е҆го теча́ше по бра́дѣ е҆го·

И҆ речѐ а҆кхꙋсъ къ ѻ҆́трокомъ свои҆мъ с̂е ви́дѣсте мꙋжа скꙋдна ра́зꙋмом꙽ почт̂о и҆̀ въведо́сте къ мн̂ѣ.
е҆гда не и҆мѣхъ л̂и а҆зъ тако́го мꙋжа того л̂и ради въведо́сте и҆̀, да бѣснꙋе҆тсѧ предо мно́ю, а҆ще та́ко да не вхо́дитъ въ до́мъ мои и҆ ѿи́де дв҃дъ ѿтꙋ́дꙋ и҆ сп҃сесѧ·

Глв̑҇а, к҃в·

И прїиде в пеще́рꙋ и҆а҆дала́мъскꙋ, и҆ слы́шавше бра́тїѧ е҆го и҆ до́мъ ѿц҃а е҆го, прїидо́ша к немꙋ̀ та́мо·

И҆ събра́шасѧ к немꙋ̀ вс̂и сꙋщи въ бѣда́х꙽.
и҆ вс̂и и҆же въ ѕлѣ̀, и҆ вс̂и и҆же в печа́лех̑, и҆ бѣ̀ и҆́ми ѻ҆блада́ѧи и҆ бѧ́ше с ни́мъ ꙗ҆ко, у҃, мꙋжъ·

И҆ ѿи́де дв҃дъ ѿтꙋдꙋ в масиѳа́ѳъ моа҆ви́тскїи.
и҆ рече дв҃дъ къ цр҃ю моа҆ви́тскꙋ.
да бꙋдетъ мои ѿц҃ъ, и҆ ма́ти моѧ ѹ҆ тебе здѣ̀, до́ндеже ви́жꙋ чт̂о сътвори́тъ мн̂ѣ б҃ъ·

И҆ ѹ҆моли́сѧ цр҃ю моа҆вит̑скꙋ, и҆ пребыва́хꙋ ѹ҆ него̀ по вс̂ѧ дн҃и сꙋщи дв҃дꙋ въ ѻ҆́бласти то́и·

И҆ рече га́дъ прро̑҇къ къ дв҃дꙋ.
не сѣдѝ въ ѻ҆́бласти се́и, повста́въ и҆дѝ въ ѻ́бласть і҆ѹ́динꙋ і҆ и́де дв҃дъ.
и҆ пришед̑ и҆ сѣде въ́ градѣ сири́хъ·

И҆ слы́ша саѹ́лъ.
ꙗ҆́ко ꙗ҆ви́сѧ дв҃дъ и мꙋжи и҆же с нимъ, и҆ саѹ́лъ сѣдѧ́ше на хо́лмѣ на столѣ̀ в ра́мѣ, и҆ копїѐ в рꙋкꙋ е҆го, и҆ вс̂и ѻ҆́троцы е҆го пред̑стоꙗ҆́хꙋ е҆мꙋ·

И҆ реч̑҇ саѹ́лъ къ ѻ҆́трокомъ свои҆мъ пред̑стоꙗ҆́щимъ е҆мꙋ слы́шите нн҃ѣ сн҃ве венїа҆ми́новы а҆ще въи҆́стиннꙋ всм̑ѣ вамъ.
да́сть сн҃ъ і҆е҆с꙽се́ѻ҆въ.
се́ла и҆ виногра́ды, и҆ поста́витъ в̂ы всѝ со́т꙽ники, и҆ ты́сꙋщники·

Ꙗ҆́ко вс̂и съгласи́стесѧ на́ мѧ и҆ никто́же васъ не повѣ́дае҆тъ м̂и ѻ҆ немъ ничто́же положѝ завѣтъ сн҃ъ мои съ сн҃омъ і҆е҆с꙽се́ѻвымъ, и҆ нѣсть ѿ ва́съ ни е҆ді́нъ болѧ̀ со мно́ю и҆ възвѣстѝ въ ѹ́ши моѝ.
ꙗ҆́ко въздви́же сн҃ъ мои раба̀ мое҆го на́ мѧ врага до дне́шнѧго дн҃е·

И҆ ѿвѣща̀ дои́къ сѷринъ пасы́и м꙽скѝ саѹ́лѧ и҆ стоꙗ҆́ше в т̂о вре́мѧ со рабы̀ саѹ́ловы, и҆ рече ви́дѣхъ сн҃а і҆е҆с꙽се́ѻва пришед̑ша въ цр҃ковь къ а҆вимеле́хꙋ сн҃ꙋ а҆хи́товꙋ і҆е҆ре́ю·

И҆ въпроша̀ и҆̀ б҃а ради, и҆ бра́шно вдасть е҆мꙋ, и҆ копїѐ голїꙗ҆́дово и҆ноплеме́нника вда́сть е҆мꙋ, и҆ посла̀ цр҃ь призва́ти а҆вимеле́ха сн҃а а҆хи́това, и҆ вс̂ѧ сн҃ы ѿц҃а е҆го, і҆е҆ре́ѧ ѿ но́мвы.
и҆ прїидо́ша вс̂и къ цр҃ю.

И҆ рече саѹ́лъ.
послꙋшаи ѹ҆бо сн҃ꙋ а҆хи́товъ.
и҆ рече с̂е аз̑ гл҃и гн҃е·

И҆ рече е҆мꙋ па́ки саѹ́лъ чт̂о помы́сли на́ мѧ т̂ы и҆ сн҃ъ і҆е҆с꙽се́ѻ҆въ, ꙗ҆ко вда̀ е҆мꙋ хлѣбъ и҆ копїѐ.
и҆ въпроси́лъ е҆си б҃а ра́ди е҆го.
положи́ти е҆го на́ мѧ врага̀ до дне́шнѧго дн҃е.
и҆ рече а҆вимеле́хъ цр҃ю, т̂о кто е҆сть въ всѣ́хъ рабехъ твои҆хъ вѣрен̑҇ ꙗ҆́коже дв҃дъ и҆ зѧ́ть цр҃евъ.
и҆ кн҃зь всѣмъ за́поведемъ твои҆мъ, и҆ сла́венъ в домꙋ̀ твое҆мъ·

И҆л̂и мни́ши дне́сь наче́нша м̂ѧ моли́тисѧ ѻ҆ нем꙽ къ б҃ꙋ, н̂и ѹ҆бо да не възложи́ши цр҃ю на раба̀ свое҆го слове́съ сихъ.
и҆ на ве́сь до́мъ ѿц҃а мое҆го ꙗ҆ко не вѣде ра́бъ твой сего словесѐ ни ма́ла ни вели́ка, и҆ рече цр҃ь саѹ́лъ смр҃тїю да ѹ҆́мреши а҆вимеле́хъ т̂ы, и҆ весь до́мъ ѿц҃а твое҆го·

И҆ реч̑҇ цр҃ь ры́щꙋщим̑ пред̑ ним꙽.
и҆ пред̑стоащим̑ пред̑ ним̑ приведите і҆ и҆збїите і҆е҆ре́ѧ гн҃ѧ.
ꙗ҆́ко рꙋка̀ их̑ съ дв҃дом и҆ ксемꙋ разꙋмѣ́вше ꙗ҆́ко бѣжи́тъ дв҃дъ.
и҆ не възвѣсти́ша въ ѹ́шїю мою, и҆ не хотѧ́хꙋ ѻ҆́троцы цр҃евы възложи́ти рꙋкъ свои҆хъ насопротив̑҇ і҆е҆ре́ѻ҆мъ бж҃їимъ·

И҆ рече цр҃ь дои҆́кови възврати́сѧ т̂ы и҆ срѧ́щи і҆е҆ре́ѧ.
и҆ ѻ҆брати́сѧ дои́къ сѷринъ, и҆ ѹ҆бѝ і҆е҆ре́ѧ гн҃ѧ в то́и дн҃ь, п҃, и҆ е҃ мж̑ꙋ.
и҆ вс̂ѧ носѧ́щаѧ е҆фꙋдъ.
и҆ ном̑ва́тъ гра́дъ і҆е҆ре́искїи, погꙋбѝ ѹ҆сты̀ ѻ҆рꙋжїѧ.
ѿ мꙋжеска по́лꙋ и҆ до же́ньска, ѿ ѻ́трокъ и҆ до с꙽сꙋщ́их꙽ и҆ телѧ́тъ, и҆ ѻ҆се́лъ и҆ ѻ҆вча́тъ·

И҆ гонзѐ е҆ді́нъ сн҃ъ а҆вимеле́ховъ, сн҃а а҆хи́това, и҆́мѧ е҆мꙋ а҆віа҆ѳа́ръ и҆ бѣжа въ слд̑ѣ дв҃да.

И҆ възвѣстѝ а҆вїа҆ѳа́ръ дв҃дꙋ, ꙗ҆́ко ѹ҆бѝ саѹ́лъ вс̂ѧ і҆е҆реѧ гн҃ѧ·

И҆ рече дв҃дъ къ а҆виа҆ѳа́рꙋ.
ви́дѣхъ въ дн҃ь то́и, ꙗ҆́ко та́мо б̂ѣ дои́къ сѵ́ринъ.
ꙗ҆́ко възвѣща́ѧ възвѣстѝ саѹ́лови.
а҆зъ е҆смь ви́ненъ ѻ҆ дш҃ахъ до́мꙋ ѿц҃а твое҆го·

Сѣдѝ зд̂ѣ со мно́ю не бо́исѧ.
ꙗ҆́ко и҆дѣж́е а҆ще и҆щꙋ̀ дш҃и своеи мѣ́ста.
възыщꙋ̀ и҆ дш҃и твое́и.
ꙗ҆́ко съхранен̑҇ бꙋдеши днес̑҇ со мно́ю·

Глв̑҇а, к҃г·

И възвѣсти́ша дв҃дꙋ гл҃юще се и҆ноплеме́нницы ѻ҆блего́ша кеи́ль, и҆ расхита́ютъ плѣ́нь.
и҆ попераю҆тъ пло́ды·

И҆ въпросѝ дв҃дъ г҃а гл҃ѧ, а҆ще шед̑ и҆збїю̀ и҆ноплеме́нникы сїѧ, рече г҃ь и҆дѝ и҆ побѣди́ши и҆ноплеме́нники сїѧ, и҆ сп҃сеши кеи́ль·

И҆ рѣша мꙋжи дв҃дви к немꙋ̀, с̂е м̂ы зд̂ѣ въ і҆ѹ҆де́и бои́мсѧ, ка́ко бꙋдет̑ а҆ще и҆́демъ въ кеи́ль въ чревеса̀ и҆ноплеме́нникомъ вни́демъ·

И҆ приложѝ е҆щѐ дв҃дъ въпроси́ти г҃а.
и҆ ѿвѣща̀ е҆мꙋ г҃ь и҆ речѐ.
въста́ни и҆ сни́ди в кеи́ль, ꙗ҆́ко а҆зъ нн҃ѣ предаю̀ и҆ноплеме́нники в рꙋцѣ твоѝ·

І҆ и́де дв҃дъ и҆ мꙋжи е҆го с ни́мъ в кеи́ль.
и҆ бра́шасѧ съ и҆ноплеме́нники.
и҆ бѣжа́ша и҆ноплеме́нницы ѿ лица̀ двд̑ва и҆ поꙗ҆́тъ ско́ты и҆хъ, и҆ поразѝ их̑ ꙗ҆звою вели́кою, и҆ сп҃се дв҃дъ живꙋщаѧ въ кеи́лѣ·

И҆ бы́сть е҆гда бѣжа̀ а҆виа҆ѳа́ръ сн҃ъ а҆вимеле́ховъ къ дв҃дꙋ.
и҆ сни́де и҆ се́и с ни́мъ в꙽ кеи́лꙋ и҆мы́и е҆фꙋ́дъ в рꙋцѣ̀ свое́й·

И҆ възвѣсти́сѧ саѹ́лꙋ, ꙗ҆́ко прїиде двд̑ъ в кеи́лꙋ.
и҆ рече саѹ́лъ, ꙗ҆́ко предас̑҇ и҆̀ б҃ъ в рꙋцѣ моѝ, ꙗ҆́ко затвори́сѧ вшед̑ въ градъ вра́ты и҆ верїа҆ми·

И҆ заповѣда саѹ́лъ всѣмъ лю́демъ на́ брань сни́ти в кеи́лꙋ ꙗ҆́ти дв҃да и҆ мꙋжи е҆го·

И҆ ѹ҆вѣсть с̂е дв҃дъ ꙗ҆́ко ѕл̂ѣ ѹ҆мы́сли ѻ҆ немъ саѹ́лъ, и҆ рече дв҃дъ къ а҆вїа҆ѳа́рꙋ жръцꙋ̀, принесѝ е҆фꙋ́дъ гн҃ь·

И҆ рече дв҃дъ г҃и б҃е і҆и҆л҃евъ, слы́ша ѹ҆слы́шалъ е҆сть ра́бъ твой.
ꙗ҆́ко и҆́щетъ саѹл̑҇ прїитѝ на кеи́лꙋ, растли́ти гра́да менѐ ради·

Предадꙋтъ л̂и менѐ живꙋщ́їи в ке́и҆лѣ в рꙋцѣ саѹ́лови.
и҆ нн҃ѣ а҆ще сни́детъ саѹ́лъ ꙗ҆́коже слы́шалъ е҆сть ра́бъ твой, г҃и бж҃е і҆и҆л҃евъ възвѣстѝ рабꙋ̀ с̂и.
и҆ рече г҃ь предадѧ́тъ т̂ѧ·

И҆ въста́въ дв҃дъ и҆ мꙋжи е҆го с нимъ ꙗ҆́ко, х҃, и҆зыдо́ша и҆с кеи́лы.
і҆ и҆дѧ́хꙋ а҆́може хотѧ́хꙋ, и҆ възвѣсти́ша саѹ́лꙋ ꙗ҆́ко сп҃сесѧ дв҃дъ и҆с кеи́лы.
и҆ ѹ҆ста́висѧ е҆ще и҆ не и҆зы́иде·

И҆ сѣде двд̑ъ въ пꙋсты́ни в масе́рмѣ въ ѹ́зинѣ и҆ сѣде въ пꙋсты́ни въ горѣ̀ зифо́рѣ в горѣ̀ те́мнѣ въ землѝ м꙽гле́нѣ.
і҆ и҆ска́ше е҆го саѹ́лъ въ вс̂ѧ дн҃и, и҆ не преда́сть е҆го б҃ъ в рꙋцѣ саѹ́ли·

И҆ ви́дѣ дв҃дъ ꙗ҆́ко и҆схо́дитъ саѹ́лъ и҆ска́ти е҆го, и҆ бѧ́ше дв҃дъ въ зем̑ли м꙽гле́нѣ.
и҆ ѻ҆бновле́нїе зи́ѳовѣ·

И҆ въста̀ и҆ѻ҆а҆наѳа́нъ сн҃ъ саѹ́ловъ і҆ и́де къ дв҃дꙋ въ ѻ҆бновле́нїе.
и҆ въз꙽дви́же рꙋцѣ своѝ къ б҃ꙋ·

И҆ рече к немꙋ не бо́исѧ ꙗ҆́ко не и҆́мать ѻ҆брѣстѝ тебѐ рꙋка̀ ѿц҃а мое҆го саѹ́ла.
и҆ т̂ы и҆́маши црс̑҇твова́ти въ і҆и҆л҃и.
и҆ а́зъ бꙋдꙋ по тебѣ дрꙋгїи.
и҆ саѹ́лъ ѿц҃ъ мой вѣде та́ко·

И҆ положи́ста ѻ҆́ба завѣтъ пред̑ гм҃ъ, и҆ сидѧ́ше дв҃дъ въ ѻ҆бновле́нїи, и҆ѻ҆а҆наѳа́нъ вни́де в до́мъ сво́й.

І҆ и҆зыидо́ша зиѳѣ́и ѿ м꙽гле́ныѧ землѧ̀ к саѹ́лꙋ гл҃юще на хо́лмѣ·

Вѣ́си л̂и ꙗ҆́ко дв҃дъ кры́е҆тсѧ в на́съ в махе́рѣ въ ѹ́зинахъ в но́вѣи, на хо́лмѣ хела́тъстѣ, ѻ҆деснꙋю і҆е҆семо́на·

И҆ нн҃ѣ е҆ли́ко по дш҃и цр҃евѣ е҆сть, да сни́детъ к на́мъ затворе́нъ б̂о е҆сть, и҆ та́ко мнѝ ꙗ҆ко в рꙋцѣ т̂и е҆сть·

И҆ рече саѹ́лъ блс̑҇вени вы̀ гв҃и ꙗ҆́ко поболѣсте со мно́ю, и҆дѣте нн҃ѣ ѹ҆гото́вите и҆̀, и҆ ктомꙋ̀ разꙋмѣ́ите мѣсто е҆го, и҆дѣже е҆сть ста́нъ е҆го, та́мо ѹ҆бо и҆дѣте, е҆да ка́ко слꙋкꙋ́етъ·

Но вы̀ вѣдѣте и҆ разѹмѣ́ите ѻ҆ всѣхъ мѣстъ, и҆дѣже сѧ кры́е҆тъ и҆ възврати́тесѧ къ мн̂ѣ, да на гото́во и҆дꙋ̀ с ва́ми а҆ще е҆сть и҆ под̑ земле́ю и҆зыска́ти и҆́мамъ его, и҆ въ всѣ́хъ ты́сꙋщахъ і҆ѹ́динахъ.

И҆ въста́вше зи́ѳѣ ѿ м꙽гле́ныѧ и҆дѧ́хꙋ пред̑ саѹ́ломъ, дв҃дъ же и҆ мꙋжи е҆го бѧ́хꙋ въ пꙋсты́ни внꙋтренеи, при ве́черѣ ѻ҆деснꙋ́ю и҆е҆семо́на·

І҆ и́де саѹ́лъ и҆ мꙋжи е҆го и҆ска́ти дв҃да и҆ възвѣсти́ша с̂е дв҃дꙋ, и҆ сни́де в ка́мы и҆же бѣ въ пꙋсты́ни, и҆ слы́шав̑҇ саѹ́лъ, и҆ гна̀ въ слд̑ѣ дв҃да въ пꙋстыню внꙋт́ренюю·

І҆ и҆дѧ́ше саѹл̑҇ и҆ мꙋжи е҆го в ча́сть горы̀ тоѧ̀, и҆ б̂ѣ дв҃дъ и҆ мꙋжи е҆го кры́ѧсѧ ѿ лица̀ саѹ́ла, саѹ́л же и҆ мꙋжи е҆го нападо́ша на дв҃да, и҆ хотѣша ꙗ҆́ти и҆̀·

И҆ прїиде а҆́гг҃лъ къ саѹ́лꙋ гл҃ѧ, потщи́сѧ и҆ прїидѝ, ꙗ҆́ко прїидо́ша в землю твою и҆ноплеме́нницы·

И҆ възврати́сѧ саѹ҆лъ, ꙗ҆ко ктомꙋ̀ не гонѝ дв҃да, і҆ и҆де на срѣте́нїе и҆ноплеме́нникомъ, сего ради наречесѧ мѣсто т̂о ка́мы раздѣлныѝ, и҆ въста̀ дв҃дъ ѿтꙋдꙋ и҆ сѣде въ ѹ҆зинах̑ в га́ди·

Глв̑҇а, к҃д·

И бы́сть е҆гда̀ възврати́сѧ саѹ҆́лъ въспѧ́тъ ѿ и҆ноплеменникъ.
и҆ възвѣсти́ша е҆мꙋ гл҃юще, с̂е дв҃дъ б̂ѣ въ пꙋсты́ни гад̑стѣи.
и҆ поѧт̑ саѹ҆́лъ съ собо́ю, ҂г҃, мꙋжъ, и҆збранны ѿ всего і҆и҆л҃ѧ.
і҆ и҆де и҆ска́ти давы́да и҆ мꙋжь е҆го въ мѣсто сад̑де́емъ въ горꙋ̀ е҆леѻ́ню·

И҆ прїидо́ша до стад̑ пасо́мых̑ пꙋте́мъ.
и҆ бѣ т̂ꙋ верте́пъ и҆ саѹ҆́лъ вни́де да почїет̑ т̂ꙋ.
дв҃дъ же и҆ мꙋжи е҆го внꙋтрених꙽ връте́пѣхъ сѣдѧ́хꙋ·

И҆ рѣша мꙋжи дв҃дви к немꙋ̀.
с̂е дн҃ь то́й и҆же рече г҃ь тебѣ преда́ти врагы̀ твоѧ̀ в рꙋцѣ твоѝ.
и҆ сътвори́ши и҆мъ ꙗ҆́ко бл҃го пред̑ ѻ҆чи́ма твои́ма·

И҆ въста́въ дв҃дъ.
и҆ ѿѧ́тъ въскри́лїе приѻ҆дѣва́ла саѹ́лѧ ѻ҆та́и·

И҆ бы́сть по си́х и҆ въстопта̀ дв҃дꙋ срд̑це своѐ.
ꙗ҆́ко ѿѧ́тъ въскри́лїе приѻ҆дѣва́ла саѹ҆́лѧ·

И҆ рече дв҃дъ къ мꙋж́емъ своим̑ не бꙋ́ди мн̂ѣ ничто́же ѿ г҃а.
а҆ще сътворю̀ гла́съ се́и господи́нꙋ с̂и х҃ꙋ гн҃ю, и҆же въздви́гнꙋти рꙋкꙋ мою̀ на́нь, ꙗ҆́ко х҃с гн҃ь е҆сть се́й·

И҆ ѹ҆кротѝ дв҃дъ мꙋжа своѧ словесы̀.
и҆ не да́стъ и҆мъ ѹ҆би́ти саѹ҆́ла.
и҆ въста̀ саѹ́лъ и҆ сни́де на пꙋть сво́и·

І҆ и҆зы́де дв҃дъ въ слѣдъ е҆го и҆з верте́па.
и҆ възопѝ дв҃дъ за ни́мъ гл҃ѧ.
г҃и цр҃ю.
и҆ ѻ҆зрѣсѧ саѹ́лъ въ слд̑ѣ е҆го.
и҆ прекло́нъсѧ дв҃дъ до землѧ̀ лице́мъ и҆ поклони́сѧ е҆мꙋ·

И҆ рече дв҃дъ къ саѹ́лꙋ почт̂о послꙋша́еши словесѐ людїи гл҃ющъ.
ꙗ҆́ко с̂е дв҃дъ и҆́щетъ дш҃а твое́ѧ·

Се б̂о днс̑҇ь ви́дѣста ѻ҆́чи твоѝ.
ꙗ҆́ко преда́лъ т̂ѧ бѧ́ше г҃ь в рꙋ́цѣ моѝ въ вертепѣ.
и҆ не помы́слихъ ѹ҆би́ти тебѐ, н̂о поми́ловахъ т̂ѧ.
и҆ рѣхъ не прострꙋ̀ рꙋкѝ мое҆ѧ на г҃а мое҆го, ꙗ҆ко помаза́нникъ е҆сть гн҃ь се́й·

И҆ ви́ждъ въскри́лїе ѻ҆дѣѧ́ла свое҆го въ рꙋцѣ̀ мое́и.
а҆́зъ ѿѧ́хъ въскры́лїе ѻ҆дѣѧ́ла твое҆го, и҆ не ѹби́хъ тебѐ.
и҆ разꙋмѣ́и и҆ ви́ждъ днс̑҇е ꙗ҆́ко нѣсть ѕло́би въ рꙋцѣ̀ мое́и, н̂и бесче́стїѧ ни нена́висти, н̂иже съгрѣши́хъ к тебѣ̀.
а҆ т̂ы и҆́щеши дш҃а мое҆ѧ и҆зѧ́тї ю·

да сꙋдит̑ г҃ь межди мно́ю и҆ тобо́ю.
и҆ да ѻ҆пра́вдитъ м̂ѧ г҃ь ѿ тебѐ, рꙋка̀ б̂о моѧ нѣсть на́ тѧ·

Ꙗ҆́коже гл҃етъ при́тча пр́ьваѧ, ѿ безако́н꙽никъ, и҆зы́детъ престꙋпле́нїе, н̂о рꙋка̀ моѧ нѣсть на́ тѧ·

И҆ нн҃ѣ цр҃ю і҆и҆л҃евъ въ слѣдъ кого̀ т̂ы ходи́ши, и҆л̂и по ко́мъ го́ниши въслѣдъ л̂и ѱа̀ ѹ҆мръша, и҆л̂и въ слд̑ѣ блохы̀ е҆ді́ноѧ·

да бꙋ́дет꙽ г҃ь сꙋдїѧ и҆ ѿвѣтни́к꙽, ме́ждꙋ мно́ю и҆ тобо́ю ви́ждъ г҃и и҆ сꙋдѝ сꙋ́домъ м̂и, и҆ ѿсꙋди м̂ѧ ѿ рꙋкѝ твое҆ѧ·

И҆ бы́сть е҆гда̀ сконча̀ дв҃дъ гл҃ы сїѧ, гл҃ѧ къ саѹ́лꙋ.
и҆ рече саѹ́лъ тво́и л̂и е҆сть с̂е гла́съ ча́до дв҃де, и҆ въздви́же саѹ́л꙽ глас̑҇ свои, и҆ въспла́ка·

И҆ рече дв҃дꙋ пра́веденъ е҆си т̂ы надо мно́ю.
ꙗ҆́ко т̂ы възда̀ м̂и бл҃га́ѧ, а҆́з же тебѣ въз꙽да́хъ ѕла́ѧ·

И҆ т̂ы възвѣсти м̂и днс̑҇ь, и҆же сътвори м̂и бл҃гаѧ.
е҆гда̀ б̂о предалъ м̂ѧ е҆сть г҃ь б҃ъ і҆и҆л҃евъ въ рꙋкꙋ твое҆ю, и҆ нѣси менѐ ѹ҆би́лъ·

Ꙗ҆́коже а҆́ще кт̂о ѻ҆брѧ́щетъ врага̀ свое҆го въ печа́ли и҆зведет̑ и҆̀ въ пꙋть бл҃гъ.
и҆ г҃ь въздасть е҆мꙋ бл҃гыхъ ꙗ҆́коже т̂ы сътворил̑҇ е҆си днс̑҇ь·

И҆ нн҃ѣ с̂е а҆зъ ви́дѣ ꙗ҆́ко цр҃юѧ црс̑҇твова́ти и҆́маши.
и҆ ста́ти и҆́мать въ рꙋцѣ̀ твоѝ црс̑҇тво і҆и҆л҃ево.
и҆ нн҃ѣ покленимисѧ гм҃ъ, ꙗ҆́ко не и҆скорени́ши сѣмени мое҆го по мнѣ̀.
и҆ не погꙋби́ши и҆́мени мое҆го ѿ до́мꙋ ѿц҃а мое҆го·

И҆ клѧ́тсѧ дв҃дъ саѹ́лови.
і҆ и́де саѹ́лъ на мѣсто своѐ.
дв҃дъ же и҆ мꙋжи е҆го възыдо́ша въ срѣдꙋ тѣсноты̀·

Глв̑҇а, к҃е·

И ѹ́мре само́илъ, и҆ събра́сѧ ве́сь і҆и҆л҃ь.
и҆ пла́кашесѧ е҆го и҆ погребо́ша и҆̀ в до́мꙋ е҆го въ саръмаѳе́мѣ.
и҆ въста́въ дв҃дъ сни́де въ пꙋсты́ню маа́ню вънꙋтре́нюю·

И҆ б̂ѣ чл҃къ въ маа́нѣ.
и҆ ста́да е҆мꙋ своѧ на карми́лѣ, и҆ чл҃къ с̂и вели́къ ѕѣ́ло, и҆ сего ѻ҆вецъ б̂ѣ, ҂г҃, а҆ ко́зъ ҂а҃. и҆ бы́сть е҆гда̀ стрижаще стада своѧ на кар̑҇ми́лѣ·

И҆мѧ́ же чл҃кꙋ нава́нъ, і҆ и́мѧ женѣ̀ е҆го и҆а҆вигѣѧ, и҆ бѧ́ше жена̀ е҆го бл҃га и҆ смысле́на, и҆ възоро́мъ ви́дѣти ѕѣ́ло добра̀, а҆ мꙋжъ е҆ѧ̀ чл҃къ твръдъ, и҆ лꙋка́въ при всѣмъ, и҆ не ѻ҆бщи́въ·

И҆ слы́ша дв҃дъ въ пꙋсты́ни, ꙗ҆́ко стрижетъ нава́нъ на каръми́лѣ ста́да своѧ·

И҆ посла̀ дв҃дъ, і҃, ѻ҆́троковъ, и҆ рече ѻ҆́трокомъ възы́дѣте на карми́ль, і҆ и҆де́те къ нава́нꙋ и҆ въпроси́те и҆̀ ѿ менѐ с миром̑·

Негли здра́въ е҆си и҆ до́мъ тво́и, и҆ вс̂ѧ твоѧ здра́ва л̂и сꙋть·

И҆ нн҃ѣ ѹ҆бо слы́шꙋ ꙗ҆́ко стригꙋтъ пастꙋси твоѝ, и҆же бѣша с на́ми въ пꙋсты́ни, и҆ не възбра́нихомъ и҆мъ, и҆ не сътвори́хомъ ничесо́же въ вс̂ѧ дн҃и, е҆гда бѣша на карми́лѣ·

Въпросѝ ѻ҆́троки своѧ, и҆ възвѣстѧ́т꙽ ти, и҆ ѻ҆брѣто́шасѧ ѻ҆тро́цы твоѝ съ радостїю пред̑ ѻ҆чи́ма твои́ма.
ꙗ҆́ко въ дн҃ь бл҃гъ прїидо́хом̑, т̂о да́ же нн҃ѣ сн҃ови твое҆мꙋ дв҃дꙋ, е҆же а҆́ще хо́щеши·

И҆ прїидо́ша ѻ҆́троцы дв҃дви и҆ гл҃аша словеса̀ с̂и къ нава́нꙋ.
и҆ вс̂ѧ гл҃ы сїа и҆менем̑ дв҃двым̑·

И҆ въско́чи наван̑҇ ѿвѣща ѻ҆́троком̑ двд̑вым̑ рекъ.
чт̂о ес̑҇ двд̑ъ и҆л̂и чт̂о е҆сть сн҃ъ і҆е҆с꙽сеѻв̑҇.
днс̑҇ь ѹ҆множе́ни сꙋть рабѝ, ѿходѧ́ще ко́жд̑о ѿ лица̀ господи́на свое҆го, и҆ возмꙋ̀ хлѣба и҆ вина̀ и҆ закла́нїа моѧ̀ ꙗ҆́же заклах̑ стригꙋщим̑ моѧ̀ ѻ҆́вца.
то та̀ л̂и дам̑ мꙋжем̑ их̑же не вѣ́дѣ ѿкꙋ́дꙋ сꙋть·

И҆ възврати́шасѧ ѻ҆́троцы дв҃дви пꙋтемъ свои҆м꙽.
и҆ възвра́щ꙽шесѧ прїидо́ша и҆ възвѣсти́ша дв҃дꙋ по гл҃ꙋ семꙋ̀·

И҆ рече дв҃дъ мꙋж́емъ своим̑, ѻ҆поѧ́шисѧ ко́ждо вас̑҇ ѻ҆рꙋжїемъ своим̑ і҆ и҆до́ша въ слд̑ѣ дв҃дъ.
ꙗ҆́ко у҃, мж̑ꙋ.
а҆ с҃ и҆хъ ѻ҆ста̀ ѹ҆ сосꙋдовъ·

И҆ а҆вигѣѝ женѣ̀ нава́новѣ повѣ́да е҆ді́нъ ѻ҆́трокъ гл҃ѧ.
с̂е присыла̀ дв҃дъ послы̀ ѿ пꙋсты́нѧ блс̑҇ви́ти господи́на на́шего.
н̂о ѻ҆́нъ ѹ҆врати́сѧ ѿ них̑·

Сїи же мꙋж́и бла́ѕи бѣша на́мъ ѕѣ́ло, и҆ не възбранѧ́хꙋ на́м꙽ ѕѣ́ло, н̂и сътвори́ша н̂ы ѕл̂а ничт̂оже въ вс̂ѧ дн҃и в нѧ́же бѣхом̑ с ни́ми·

И҆ сꙋщим̑ нам̑ т̂ꙋ, ꙗ҆́ко стѣны бѣша ѻ҆ нас̑҇, въ нощѝ и҆ въ дн҃и по вс̂ѧ дн҃и сꙋщим̑ с ни́ми, на селѣ̀ пасꙋщ́е ста́да·

А҆ нн҃ѣ разꙋмѣи и҆ ви́ждъ т̂ы чт̂о сътвори́ши ꙗ҆́ко съверши́сѧ вс̂ѧ ѕло́ба господи́на на́шего, и҆ на домꙋ̀ е҆го.
и҆ семꙋ̀ глад̑нꙋ сꙋщꙋ, нел꙽зѣ гл҃ати к немꙋ̀·

И҆ пот꙽щасѧ а҆вигѣѧ́.
и҆ взѧ̀, с҃, хлѣбъ и҆ дв̂ѣ корча́ѕѣ вина̀, и҆ е҃, ѻ҆́венъ, и҆ е҃, хлѣбъ смида́ленъ чи́стъ, и҆ ко́шницꙋ гро́здїѧ, и҆ с҃, вѧ́заницъ смо́квеи, и҆ възложѝ на ѻ҆слѧ́та·

И҆ рече къ ѻ҆́трокомъ своим̑ пои҆дѣте предо мно́ю, и҆ с̂е а҆́зъ въ слд̑ѣ вас̑҇ и҆дꙋ̀.
и҆ мꙋжꙋ свое҆мꙋ с̂и не възвѣстѝ·

И҆ бы́сть е́й въсѣд꙽ше на ѻ҆слѧ̀.
і҆ и҆сходѧ́щꙋ въ часть горы̀.
и҆ с̂е дв҃дъ и҆ мꙋжи е҆го и҆дꙋще сꙋпроти́въ е́й, и҆ та̀ срѣте ѧ҆̀·

И҆ рече дв҃дъ до́брѣ сп҃се непра́вед̑ника.
а҆́зъ б̂о всѧ̀ съхраних̑ нава́нꙋ въ пꙋсты́ни.
и҆ не помы́слих̑ поꙗ҆́ти ничт̂оже ѿ всего е҆мꙋ̀.
и҆ възда́сть м̂и ѕла́ѧ въз꙽ бл҃гаа·

Се̂ же сътворѝ б҃ъ двд̑ви и҆ с̂и приложѝ.
а҆́ще ѻ҆ста́нетъ нѣ́что ѿ всего̀ нава́нꙋ.
да́же и҆ до ѹ́тра ѹ҆ви́ди ꙗ҆же полꙋчѝ·

И҆ ѹ҆ви́дѣ а҆вигѣ́ѧ дв҃да.
и҆ потщав̑҇шисѧ ско́чи съ ѻ҆слѧ́те.
и҆ падѐ пред̑ дв҃дом̑, и҆ поклони́сѧ е҆мꙋ до землѧ̀·

И҆ посе́мъ падѐ пред̑ нога́ми е҆го.
и҆ реч̑҇, на мн̂ѣ вина с̂и господи́не, моа̀ е҆сть непра́вда.
а҆́ще вели́ши да гл҃етъ раба̀ твоа̀ въ ѹ́ши твоѝ, и҆ послꙋшаи словесъ рабы̀ твое́ѧ·

Не положѝ господи́не на срд̑цы свое҆мъ ничесо́же, чл҃ка сего̀ ра́ди глд̑аствꙋю́щаго.
ꙗ҆ко б̂о и҆́мѧ е҆мꙋ та́ко и҆ е҆сть нава́нъ б̂о е҆сть и҆́мѧ е҆мꙋ и҆ нѣсть смы́сла в нем̑, а҆́з же раба̀ твоа̀ не вѣ́да ѻ҆́трок̑҇ твоих̑ господи́на мое҆го ꙗ҆́же е҆си посла̀·

И҆ нн҃ѣ господи́не мо́и живъ г҃ь и҆ жива дш҃а твоѧ̀, ꙗ҆ко въз꙽бранѝ т̂и г҃ь.
да прїидеши на кро́вь непови́ннꙋ, и҆ сп҃се рꙋ́кꙋ свою самъ.
и҆ нн҃ѣ да бꙋдꙋт̑ ꙗ҆́ко и҆ нава́нъ вра́ѕи твоѝ и҆́щꙋще господи́нꙋ мое҆мꙋ ѕл̂а·

И҆ нн҃ѣ возмѝ принесе́нїе с̂е е҆же бѣ̀ принесла̀ раба̀ господи́нꙋ свое҆мꙋ.
и҆ даждъ ѻ҆́троком̑ пред̑стоа́щимъ господи́нꙋ мое҆мꙋ·

ѿи҆мѝ нн҃ѣ непра́вдꙋ рабы̀ твое́ѧ.
ꙗ҆́ко творѧ̀ сътвори́тъ г҃ь до́мъ вѣренъ господи́на мое҆го.
ꙗ҆ко бра́нїю господи́на мое҆го г҃ь побо́ретъ, и҆ ѕло́ба не ѻ҆брѧ́щет꙽сѧ въ тебѣ̀ нико́лиже·

А҆́ще же и҆ въста̀ чл҃къ гонѧ́и тѧ, и҆́ща дш҃а твое́ѧ.
и҆ е҆сть дш҃а господи́на мое҆го привѧ́зана при ѹ́зомъ живы́мъ ѿ г҃а б҃а, и҆ дш҃ꙋ врага̀ своег̑҇ ѹ҆рази́ши пра́щею·

И҆ бꙋдетъ е҆гда̀ сътвори́тъ г҃ь господи́нꙋ мое҆мꙋ вс̂ѧ е҆ли́ко гл҃а бл҃го тебѣ̀.
и҆ съвръшит̑ т̂ѧ г҃ь на влд̑чество въ і҆и҆л҃и.
и҆ не бꙋдетъ с̂е на ме́рзость и҆ на собла́знь срд̑цꙋ господи́на мое҆го, е҆же и҆злїа́ти кро́вь непови́ннꙋ безꙋма̀.
и҆ сп҃си рꙋкꙋ свою̀ господи́нꙋ мое҆мꙋ.
и҆ да ѹ҆бла́житъ г҃ь господи́на мое҆го.
и҆ помѧне́ши рабꙋ̀ свою ѹ҆блажи́ти ю҆̀·

И҆ реч̑҇ дв҃дъ къ а҆вигѣ́и.
блс̑҇вен̑҇ г҃ь б҃ъ і҆и҆л҃евъ, и҆же посла̀ т̂ѧ днс̑҇ь на срѣте́нїе м̂и.
и҆ блс̑҇вен̑҇ совѣтъ тво́и.
и҆ блс̑҇ве́на т̂ы ѹ҆ставле́ши м̂ѧ въ дн҃ь сїи.
во́ньже не прїити м̂и на проли́тїе кро́ви, и҆ спс̑҇ти м̂и рꙋкꙋ свою̀·

Ѡ҆ба́че жив̑҇ г҃ь б҃ъ і҆и҃лев̑҇, и҆же възбрани́ ми днс̑҇ь ѕл̂а не сътвори́ти.
а҆́ще б̂о бы̀ не пот꙽щасѧ на срѣтенїе м̂и.
тогда̀ рѣ́хъ, а҆ще кт̂о ѻ҆скꙋдѣе҆тъ м̂и ѿ нава́на.
ѹ҆тро до́ свѣта полꙋчи́та ви́димоѐ·

И҆ прїѧт̑ дв҃дъ ѿ рꙋкꙋ е҆ѧ вс̂ѧ ꙗ҆́же принесѐ е҆мꙋ и рече е́й и҆дѝ с ми́ромъ в до́мъ сво́и, ꙗ҆́ко послꙋшахъ гла́са твое҆го, и҆ възлюби́хъ лицѐ твое.
і҆ и́де а҆вигѣѧ́ къ наванꙋ, и҆ се́й и҆мѣа́ше пи́ръ в домꙋ̀ свое҆мъ, ꙗ҆́ко пи́ръ цр҃евъ, и҆ срд̑це нава́ново веселѧ́сѧ бѣ в не́мъ, пїѧн̑҇ б̂о бѧше ѕѣло.
и҆ не възвѣстѝ а҆вигѣ́ѧ нава́нꙋ гл҃а н̂и вели́ка н̂и ма́ла, до́ свѣта ѹ҆́тренѧго·

И҆ бы́сть заѹ҆́тра ꙗ҆́ко и҆стрезви́сѧ нава́нъ ѿ вина̀ и҆ повѣ́да е҆мꙋ жена̀ е҆го вс̂ѧ гл҃ы сїѧ̀, и҆ ѹ́мре срд̑це е҆го в нем̑, и҆ то́й сам̑ бы́сть ꙗ҆́ко ка́мень·

И҆ ꙗ҆́ко бы́сть де́сѧть дн҃ь, поразѝ г҃ь нава́на и҆ ѹ́мре·

И҆ слы́шавъ дв҃дъ и҆ рече, блс̑҇вен̑҇ г҃ь е҆же сꙋдѝ сꙋ́дъ поноше́нїа мое҆го ѿ рꙋкѝ нава́нѧ, и҆ раба̀ свое҆го въздръжа̀ ѿ ѕла̀, и҆ ѕло́бꙋ нава́ню възврати г҃ь на главꙋ̀ е҆го.
и҆ посла̀ дв҃дъ гл҃а къ а҆вигѣ́и, да поимꙋ̀ т̂ѧ себѣ въ женꙋ̀·

И҆ прїидо́ша ѻ҆́троцы двд̑ви къ а҆вигѣ́и въ карми́лъ, и҆ рѣша е́й гл҃юще, дв҃дъ посла̀ н̂ы къ тебѣ̀ да т̂ѧ по́иметъ себѣ въ женꙋ̀·

И҆ въста́вши поклони́сѧ до землѧ̀ лице́мъ, и҆ ре́че с̂е раба̀ твоѧ̀, ꙗ҆́ко и҆ раба̀ и҆же ѹ҆мыва́етъ но́гы ѻ҆́трокомъ твоим̑·

И҆ въста̀ а҆вигѣѧ́ и҆ въсѣдъ на ѻ҆слѧ̀ и҆ е҃, дв҃ць и҆дѧ́ше въ слѣ́дъ е҆ѧ̀ і҆ и҆дѧ́ше въ слѣ́дъ ѻ҆́трокъ дв҃двыхъ, и҆ бы́сть е҆мꙋ в꙽ женꙋ̀ а҆вигѣѧ́·

И҆ по се́мъ и҆ нахина́мꙋ поѧ́тъ дв҃дъ ѿ і҆и҆л҃ѧ.
и҆ бѣ́ста е҆мꙋ дв҃ѣ женѣ̀.
саѹ́лъ да́сть мельхо́лꙋ дще́рь свою̀ женꙋ̀ дв҃двꙋ, ѳалтїю сн҃ꙋ ами́шꙋ, и҆же ѿ ро́м꙽ма·

Глв̑҇а, к҃ѕ·

И прїидо́ша ѕивѣ́и, ѿ м꙽гле́ныѧ къ саѹ́лꙋ на хол̑҇мъ гл҃юще.
не се́й л̂и дв҃двъ съкрыл̑҇сѧ е҆сть ѹ҆ на́съ на хо́лмꙋ, и҆же въ е҆хала́ѳѣ противꙋ и҆е҆сѣмо́нꙋ·

И҆ въста́въ саѹ҆́лъ и҆ сни́де въ пꙋсты́ню зи́ѳъскꙋю.
и҆ с ним̑, ҂г҃, мꙋжъ и҆збра́нных̑ ѿ і҆и҆л҃ѧ и҆зы́идо́ша и҆ска́ти дв҃да въ пꙋсты́ню зиѳ̑҇скꙋ̀·

И҆ ста̀ саѹ́лъ ѻ҆́крс̑҇тъ хол꙽ма хелаѳ̑҇ска и҆же противꙋ и҆е҆семо́нꙋ при пꙋтѝ.
и҆ дв҃дъ сѣдѧ́ше въ пꙋсты́ни и҆ ви́дѣ дв҃дъ ꙗ҆́ко приближи́сѧ саѹ́л꙽ въ слд̑ѣ е҆го в꙽ пꙋсты́ню·

И҆ посла̀ двд̑ъ съзира́телѧ.
и҆ разꙋмѣвъ, ꙗ҆́ко приближа́етсѧ саѹ́лъ въ слд̑ѣ е҆го, въ келаса́гъ·

И҆ въста̀ двд̑дъ та́и.
и҆ въни́де в мѣсто и҆дѣже почива́ше саѹл̑҇ и҆ т̂ꙋ бѣше и҆ а҆вени́ръ сн҃ъ ни́ровъ, старѣ́и вое҆во́дѣ е҆го.
и҆ саѹ҆́лъ спа́ше въ свѣтлѣи, и҆ лю́дїи по́лкы ѻ҆́крестъ е҆го·

И҆ ѿвѣща̀ дв҃дъ и҆ рече къ а҆вимеле́хꙋ хет꙽те́инꙋ.
и҆ къ а҆ве́сꙋ сн҃ꙋ сарꙋи҆ѻ́вꙋ бра́тꙋ і҆ѻ҆а́влю.
рекїи кт̂о вни́детъ со мно́ю къ саѹ́лꙋ въ по́лкъ.
и҆ рече а҆ве́са а҆зъ вни́дꙋ с тобо́ю·

И҆ внидо́ста дв҃дъ и҆ а҆ве́са, въ во́ѧ но́щїю.
и҆ с̂е саѹ҆́лъ б̂ѣ спѧ̀ въ свѣтлѣи.
и҆ ко́пїѧ̀ е҆го въдрꙋже́на бѧ́хꙋ въ зе́млю ѿ възъгла́вїи е҆го, а҆вени́ръ же, и҆ во́и е҆го спа́хꙋ ѻ҆́крс̑҇тъ е҆го·

И҆ рече а҆ве́са къ дв҃дꙋ, с̂е да́лъ ти е҆сть г҃ь днс̑҇ь врага̀ твое҆го в рꙋцѣ твоѝ.
и҆ с̂е да ѹ҆бїю и҆̀.
се б̂о ѻ҆рꙋж́їе е҆го кро́мѣ е҆го е҆сть, и҆ в꙽торо́е не маха́ю на́нь·

И҆ рече дв҃дъ къ а҆весѣ, не ѹ҆бива́и е҆го.
ꙗ҆́ко кт̂о колѝ просте́ръ рꙋкꙋ на х҃а гн҃ѧ и҆ ѻ҆чи́стит꙽сѧ·

И҆ реч̑҇ дв҃дъ жи́въ г҃ь, а҆́ще не г҃ь низложит̑ е҆го.
и҆л̂и дн҃ь е҆мꙋ пришелъ б̂ы, и҆ даб̂ы ѹ҆ме́рлъ, и҆л̂и въ бра́нь б̂ы прише́лъ, и҆ т̂ꙋ поги́блъ б̂ы.
да не бꙋдетъ м̂и г҃и, наложи́ти рꙋ́кꙋ мою̀ на х҃а гн҃ѧ.
и҆ нн҃ѣ возмѝ ко́пїе ѿ възъгла́вїѧ и҆ сосꙋдъ вод̑ны́и, и҆ ѿидевѣ ѻ҆со́бѣ·

И҆ взѧтъ дв҃дъ ко́пїе и҆ сосꙋдъ вод̑ны́и ѿ въз꙽гла́вїѧ е҆мꙋ, и҆ ѿи҆до́ста ѻ҆б̂а.
и҆ не бѣ и҆же б̂ы разꙋмл̑҇ѣ и҆л̂и ви́дѣлъ ѧ҆̀ и҆ не бѧ́ше въста́ющаг̑҇ нико́гоже, вс̂и бо спа́хꙋ.
ꙗ҆ко со́нъ бѣ̀ крѣ́покъ ѿ г҃а напа́лъ на́ нѧ·

И҆ преше́дъ дв҃дъ на ѻ҆́нъ полъ и҆ ста̀ на версѣ̀ горы̀ и҆здале́ча.
и҆ вели́къ бѣ̀ пꙋть межи и҆́ми·

И҆ възва̀ дв҃дъ лю́ди.
и҆ а҆вени́рꙋ ѿвѣща̀ гл҃ѧ.
не ѿвѣща́еши л̂и м̂и а҆вени́ре.
и҆ ѿвѣща а҆вени́р꙽ и҆ реч̑҇.
кто т̂ы е҆си зовы́и м̂ѧ·

И҆ рече дв҃дъ къ а҆вени́рꙋ.
не мꙋжъ л̂и е҆си т̂ы и҆ кт̂о подо́бенъ ти въ і҆и҆л҃и, и҆ почто̀ не храни́ши господи́на свое҆го цр҃ѧ, ꙗ҆́ко вни́де е҆ді́н꙽ ѿ людїи ѹ҆би́ти господи́на твое҆го цр҃ѧ·

И҆ не бл҃го с̂е е҆сть ѕѣл́о, е҆же сътвори жи́въ г҃ь, ꙗ҆́ко сн҃ове е҆сте смр҃ти вс̂и вы̀ не хранѧ́ще г҃а свое҆го цр҃ѧ х҃а гн҃ѧ.
и҆ нн҃ѣ ви́ждь ѹ҆́же гдѣ е҆сть ко́пїе цр҃ево и҆ сосꙋдъ вод̑ны́и, и҆же бѣ̀ въ воз꙽гла́вїи гдѣ̀ ес̑҇·

И҆ позна̀ саѹ́лъ глас̑҇ двд̑въ.
и҆ рече тво́и ли е҆сть гла́съ ча́до дв҃де, и҆ рече дв҃дъ, а҆́зъ ра́бъ твои г҃и цр҃ю·

И҆ па́ки реч̑҇ дв҃дъ.
почто̀ го́ниши раба̀ твое҆го г҃и цр҃ю·

Ꙗ҆́ко чи́мъ т̂и съгрѣших̑, и҆ ка́ѧ ѻ҆брѣтесѧ непра́вда въ мнѣ̀·

То понѐ нн҃ѣ ѹ҆же да ѹ҆слы́шитъ г҃ь и цр҃ь гл҃ы раба̀ свое҆го.
а҆́ще б҃ъ приво́дитъ т̂ѧ на́ мѧ.
ꙗ҆́ко възвели́чит̑сѧ жрътва твоѧ̀.
а҆́ще л̂и сн҃ове чл҃чи про́клѧтїи с̂и пред̑ гм҃ъ.
ꙗ҆́ко и҆згна́ша м̂ѧ днс̑҇ь, не причасти́тисѧ въ жребїи гн҃ь.
гл҃щей пои҆дѝ рабо́таи бо́гомъ чꙋж́димъ·

И҆ нн҃ѣ да не паде́тъ кровь моѧ на́ землю, пред̑ лицем̑ гн҃емъ, ꙗ҆́ко и҆зы́иде цр҃ь і҆и҆л҃ев꙽, і҆ и́щетъ дш҃а мое҆ѧ, и҆ гоним̑ е҆смь ꙗ҆́кож̑ но́щныи вра́нъ скво́ѕѣ го́ры·

И҆ рече саѹ́лъ съгрѣши́хъ, възврати́сѧ ча́до дв҃де ꙗ҆́ко ктомꙋ̀ не сътворю т̂и ѹ҆́же ѕл̂а.
зане ѹ҆гото́вана е҆сть дш҃а моѧ̀ пред̑ ѻ҆чи́ма твои́ма въ дн҃ь с̂и ѻ҆сꙋжд̑енъ бѣ́хъ.
и҆ не разꙋмѣхъ мно́го ѕѣло·

И ѿвѣща̀ дв҃дъ и҆ рече с̂е ко́пїе цр҃ево, и҆ да прїидетъ ѻ҆́трок̑҇ е҆ді́нъ и҆ возмет̑ ѻ҆рꙋжїе·

И҆ г҃ь ѻ҆брати́тъ кого́ждо по ѻ҆правданїемъ е҆го и҆ по вѣрѣ е҆го, ꙗ҆́коже преда̀ т̂ѧ г҃ь днс̑҇ь в рꙋцѣ моѝ.
и҆ не ра́чихъ възложи́ти рꙋки мое҆ѧ на х҃а гн҃ѧ·

И҆ с̂е ꙗ҆́ко възвели́чисѧ дш҃а твоѧ̀ днс̑҇ь, ѻ҆ си́хъ въ ѻ҆́чїю мое́ю та́ко да възвели́чит̑сѧ дш҃а моѧ̀ пред̑ гм҃ъ, и҆ покры́ет꙽ м̂ѧ, і҆ и҆зведе́т꙽ м̂ѧ ѿ все́ѧ печали·

И҆ рече саѹ́лъ къ дв҃дꙋ, блс̑҇ве́нъ т̂ы ча́до и҆ творѧ́и сътвори́ши, и҆ могы́и въз꙽мо́жеши, и҆ ѿи́де дв҃дъ пꙋте́мъ свои́мъ, и҆ саѹ́лъ възврати́сѧ на мѣ́сто своѐ·

Глв̑҇а, к҃з·

И рече дв҃дъ въ срд̑цы свое҆мъ гл҃ѧ, нн҃ѣ приложит̑мисѧ бы́ти въ дн҃ь е҆ді́нъ в рꙋкꙋ саѹ́лю.
и҆ не бꙋдетъ м̂и бл҃го.
а҆ще не и҆дꙋ̀ в зе́млю и҆ноплеме́нничꙋ, и҆ т̂ꙋ и҆збꙋдꙋ е҆го, а҆ще по́слетъ саѹ́лъ и҆ска́ти менѐ въ всѧ̀ предѣлы і҆и҆л҃ѧ, и҆ сп҃сꙋсѧ и҆з꙽ рꙋкѝ е҆го·

И҆ въста́въ дв҃дъ, и҆ х҃ мꙋжъ и҆же с ни́мъ, і҆ и́де къ а҆кхꙋ́сꙋ сн҃ꙋ а҆ма́ховꙋ цр҃ю ге́ѳъскꙋ·

И҆ пребы́сть ѹ҆ него самъ и҆ мꙋжи е҆го с ним̑ и҆ до́мъ е҆го, и҆ ѻ́бѣ женѣ е҆го.
а҆хиное́ми і҆и҆л҃ьтѧны́ни.
и҆ а҆вигѣѧ́ и҆же бѣ̀ жена̀ нава́на карми́льскаго·

И҆ възвѣсти́ша саѹ́лꙋ ꙗ҆́ко ѿбѣже дв҃дъ в ге́ѳы.
и҆ не приложѝ ктомꙋ̀ саѹ́лъ и҆ска́ти дв҃да·

И҆ рече дв҃дъ къ а҆кхꙋ́сꙋ а҆ще ѻ҆брѣтѐ ра́бъ твой ра́дость пред̑ ѻ҆чи́ма твои́ма.
да дасѝ м̂и мѣсто е҆ді́но ѻ҆гра́дникъ на селѣ̀, и҆ сѧ́дꙋ т̂ꙋ.
а҆ въскꙋ́ю седи́тъ ра́бъ твой въ гра́дѣ, црс̑҇твꙋ́ющи с тобо́ю·

И҆ да̀ е҆мꙋ въ дн҃ь то́и сикела́гъ, сего ра́ди бы́сть црс̑҇твꙋ і҆ѹ́де́искꙋ сикела́гъ, до дне́шнѧго дн҃е.

И҆ бы́сть число̀ дне́и.
в нѧ́же сѣ́де дв҃дъ на селѣ̀ и҆ноплемен̑҇ничи четы́ри мс̑҇цы·

И҆ въсхожда́ше дв҃дъ и҆ мꙋжи е҆го, напада́хꙋ на вс̂ѧ гесѣры, и҆ на а҆м꙽мали́киты.
и҆ с̂е сѝ землѧ̀ прилежа́ше ѿ ламосꙋ́ра.
и҆ до землѧ̀ е҆гѷпетъски·

И побѣжд̑а́ша зе́млю т̂ꙋ.
и҆ не живѧше мꙋжеска по́лꙋ и же́ньска.
пои҆ма́хꙋ ста́да и҆ бꙋ́иволицы, ѻ҆слѧ́та вельблю́ды и҆ ри́зы.
и҆ възвраща́ющасѧ прихожда́хꙋ, къ а҆кхꙋ́сꙋ·

И҆ рече а҆кхꙋ́съ къ дв҃дꙋ ка́мо вое҆ва́стѣ нн҃ѣ·

И҆ рече дв҃дъ къ а҆кхꙋ́сꙋ.
на ю҆́гъ і҆ѹ҆деѧ и҆ на ю҆́гъ и҆е҆зме́ги.
и҆ на ю҆́гъ кенезїѧ·

Ни мꙋжеска по́лꙋ и҆ же́ньска не живи́хомъ ꙗ҆́ко не въвестѝ в ге́ѳы гл҃ѧ, е҆гда ка́ко възвестѧ́тъ в ге́ѳы на́ ны гл҃юще.
ꙗ҆́ко с̂е дв҃дъ тво́ритъ.
себѣ ѻ҆правда́нїе е҆го, вс̂ѧ дн҃и.
в нѧ́же сѣде дв҃дъ на селѣ̀ и҆ноплеме́нничи·

И҆ ѹ҆вѣри́сѧ дв҃дъ а҆кхꙋ́сови ѕѣло гл҃ѧ.
ѹ҆крѣпи́сѧ крѣпѧ́сѧ в лю́дех꙽ свои҆хъ і҆и҆л҃и.
и҆ бꙋдетъ м̂и ра́бъ въ вѣки·

Глв̑҇а, к҃и·

И бы́сть въ дн҃и т̂ы и҆ събра́шасѧ и҆ноплеме́нницы в пол̑҇ки своѧ, и҆зыитѝ и҆ бра́тисѧ съ і҆и҆л҃ьты.
и҆ реч̑҇ а҆кхꙋсъ къ дв҃дꙋ.
разꙋмѣѧ разꙋмѣи, ꙗ҆́ко со мно́ю и҆сходи́ши на́ брань, т̂ы и҆ мꙋжи твои·

И҆ рече дв̂дъ къ а҆кхꙋсꙋ ѿ нн҃ѣ да разꙋмѣ́еши ꙗ҆́ко сътвори́тъ ра́бъ твой.
и҆ рече а҆къхꙋ́съ къ дв҃дꙋ.
тѣмже нача́лника во́емъ, и҆ храни́телѧ поставлѧ́ю т̂ѧ въ вс̂ѧ дн҃и·

И҆ самоил̑҇ ѹ҆ме́рлъ б̂ѣ и҆ рыда́ше по немъ ве́сь і҆и҆л҃ь.
и҆ погребо́ша и҆̀ в сармаѳе́мѣ въ градѣ е҆го и҆ саѹ́лъ и҆збѝ во́лхвы, и҆ разꙋмники землѧ̀ свое҆ѧ·

И҆ събра́вшесѧ и҆ноплеме́нницы пришед̑ше ста́ша в сано́мѣ.
и҆ събра̀ саѹ́лъ вс̂ѧ мꙋжи і҆и҆л҃ѧ, и҆ пришед̑ше ста́ша в гелвꙋ́и·

И҆ ви́дѣ саѹ́лъ по́лки и҆ноплеме́нничи ѹ҆боѧ́сѧ и҆ ѹ҆жасе́сѧ срд̑це е҆го ѕѣло·

И҆ въпросѝ саѹ҆лъ г҃а.
и҆ не ѿвѣща̀ е҆мꙋ г҃ь ничесо́же, ни въ снѣ̀ ни ꙗ҆́ве.
ни прро̑҇ки·

И҆ рече саѹ҆лъ ѻ҆́трокомъ свои҆мъ.
пои҆щи́те м̂и жены̀ ꙗ҆́же и҆́мать волхвова́нїе в рꙋцѣ̀, і҆ и҆дꙋ̀ к неи въпрошꙋ̀ и҆̀.
и҆ рѣша ѻ҆́троцы е҆го к немꙋ.
с̂е жена̀ ꙗ҆́же и҆́мать в рꙋцѣ̀ волшве́нїѧ въ е҆ндо́ре·

И҆ съкры́сѧ саѹ́лъ, и҆ ѻ҆блече́сѧ в ризы и҆́ны.
і҆ и҆дѧ́ше са́мъ и҆ дв̂а мꙋжа с ни́мъ.
и҆ прїиде но́щїю къ женѣ̀·

И҆ рече саѹ́лъ повражѝ м̂и, и҆мѣю҆щи в рꙋцѣ волшве́нїѧ.
и҆ приведѝ м̂и е҆гоже рекꙋ ти·

И҆ рече е҆мꙋ жена̀ с̂е нн҃ѣ т̂ы самъ вѣси, е҆ли́ко сътворѝ саѹ́лъ, и҆ ка́ко расточѝ и҆мꙋща в рꙋка́хъ волшве́нїѧ, и҆ разꙋмныѧ на землѝ се́и.
и҆ ка́ко с̂е т̂ы ло́виши дш҃ꙋ мою.
да ѹ҆мори́ши ю҆̀·

И҆ клѧ́тсѧ к неи саѹ́лъ гл҃ѧ.
жи́въ г҃ь а҆ще срѧ́щетъ т̂ѧ непра́вда ѻ҆ словесѝ семъ·

И҆ рече жена саѹ́лови.
кого възведꙋ̀ ти.
и҆ рече саѹ́лъ само́ила възведѝ м̂и·

И҆ ви́дѣ жена̀ само́ила и҆ възъгласѝ гла́сомъ, и҆ рече жена̀ к саѹ́лꙋ, почт̂о м̂ѧ прельстѝ и҆ ты̀ е҆си саѹ́лъ·

И҆ рече е́и цр҃ь, не бо́исѧ и҆зрещѝ, ꙗ҆́коже ви́дѣ.
и҆ рече е҆мꙋ жена̀.
богѝ ви́дѣх꙽ въсходѧ́ща ѿ землѧ̀·

И҆ рече е́и цр҃ь ꙗ҆́ко въ что́же е҆сть ѻ҆́бразъ е҆го и рече е҆мꙋ жена̀.
ви́дѣхъ мꙋжа ра́но сходѧ́ща ѿ землѧ̀.
и҆ с̂е ѻ҆болче́нъ ѻ҆дѣꙗ҆́ломъ.
и҆ разꙋмѣ саѹ́лъ ꙗ҆́ко само́илъ е҆сть.
и҆ положѝ лице своѐ на землѝ.
и҆ поклони́сѧ е҆мꙋ до зем̑лѧ<.>

И҆ рече е҆мꙋ само́илъ.
чт̂о с̂е нꙋдиши м̂ѧ взыитѝ м̂и.
и҆ рече саѹ́лъ скорблю̀ ѕѣло, ꙗ҆́ко и҆ноплеме́нницы въю́ютъ на́ мѧ, и҆ г҃ь ѿстꙋпѝ ѿ менѐ, и҆ ѹ҆же не послꙋшае҆тъ менѐ ктомꙋ.
ни рꙋка́ми прро̑҇ческими, ни въ снѣхъ.
ни въ ꙗ҆вле́нїи.
и҆ нн҃ѣ призва́х тѧ да наста́виши м̂ѧ чт̂о сътворю̀·

И҆ рече само́ил̑҇ чт̂о въпраша́еши м̂ѧ а҆ г҃ь ѿстꙋпил̑҇ е҆сть ѿ тебѐ и҆ г҃ь ѹ҆же съ ю҆нѣ́ишим꙽ тебе·

И҆ сътвори́лъ е҆сть тебѣ, ꙗ҆́коже гл҃а мно́ю.
и҆ ѿи́метъ г҃ь црс̑҇тво твое из̑ рꙋкꙋ твою, и҆ вда́сть и҆̀ ближнемꙋ ти дв҃дꙋ·

Поне́же т̂ы не послꙋша гла́са гн҃ѧ.
и҆ не и҆спо́лни гнѣва ꙗ҆́рости е҆го на а҆м꙽мали́цѣ.
гл҃а ради того̀ сътворѝ тебѣ г҃ь с̂и въ дн҃и сїи·

И҆ преда́сть г҃ь і҆и҆л҃ѧ и҆с тобо́ю, в рꙋки и҆ноплеме́нникъ.
и҆ ѹ́тро т̂ы и҆ сн҃ове твоѝ падꙋтъ с тобо́ю, и҆ по́лкъ і҆и҆л҃евъ да́сть г҃ь в рꙋцѣ и҆ноплеме́нъникъ·

И҆ потща́всѧ саѹ́лъ ꙗ҆́коже стоѧ̀ и҆ падѐ на землѝ.
и҆ възбоѧ́сѧ ѕѣло ѿ лица̀ словесѐ само́и҆лѧ.
и҆ не бы́сть ктомꙋ̀ крѣ́пости в немъ.
ꙗ҆́ко не ѧ́лъ хлѣба ве́сь дн҃ь то́и и҆ вс̂ю но́щь т̂ꙋ·

И҆ вни́де жена̀ къ саѹ́лꙋ и҆ ви́дѣ е҆го ꙗ҆́ко смѧте́сѧ саѹл̑҇ ѕѣло и҆ рече к немꙋ с̂е нн҃ѣ слы́ша раба̀ твоѧ гла́съ твой.
и҆ положи́хъ дш҃ꙋ мою в рꙋцѣ твоѝ.
и҆ послꙋшахъ словесъ ꙗ҆же ми б̂ѣ гл҃алъ·

И҆ нн҃ѣ ѹ҆же послꙋш́аи гла́са рабы̀ твое҆ѧ.
и҆ положꙋ̀ пред̑ тобо́ю насыще́нїе хлѣба и҆ ꙗ҆́ждъ, и҆ бꙋдетъ в тебѣ крѣпость.
и҆ по сем̑ и҆́деши в пꙋть и҆ не хотѧ́ше ꙗ҆́сти·

И҆ понꙋжа́хꙋ и҆̀ ꙗ҆́сти, ѻ҆́троцы е҆го и҆ жена̀, и҆ послꙋша гла́са и҆хъ.
и҆ въста́въ ѿ землѧ̀ и҆ сѣде на́ двое мы́слѧ.
и҆ бѣ женѣ то́и в домꙋ̀ ю҆́ница и҆ подви́гшисѧ заколѐ и҆̀.
и҆ взе́мши мꙋкꙋ̀ вмѣсѝ.
и҆ сътворѝ хлѣбъ·

И҆ принесѐ пред̑ саѹ́ла, и҆ пред̑ ѻ҆́троки е҆го.
и҆ ꙗ҆́ша и҆ въста́вше тоѝ но́щи и҆ ѿи҆до́ша·

Глв̑҇а, к҃ѳ·

И събра́ша и҆ноплеме́нницы вс̂ѧ по́лки своѧ на софек̑҇кꙋ.
і҆ и҆л҃ьтѧ́не ста́ша на е҆ндо́рѣ и҆же въ і҆и҆л҃и·

И҆ по́лцы и҆ноплеме́нникъ, и҆дѧ́хꙋ по ст̂о.
и҆ по ты́сѧщи.
дв҃дъ же и҆ мꙋжи е҆го и҆дѧ́хꙋ ѻ҆со́бъ.
съ а҆кхꙋсомъ·

И҆ рѣша вое҆во́ды и҆ноплеме́ннича.
кто сꙋть и҆дꙋщїи сїи с на́ми.
и҆ рече а҆къхꙋсъ к вое҆во́дамъ и҆ноплеме́нничамъ не се́ ли дв҃дъ ра́бъ саѹ́ла цр҃ѧ і҆и҆л҃ва и҆ се ѹ҆ насъ бы́сть мно́го дн҃їи.
и҆ семꙋ е҆сть ѹ҆ нас̑҇, второ́е лѣто, и҆ нѣсм꙽ ѻ҆брѣлъ в немъ ничто́же ѕл̂а, ѿ дн҃е во́ньже е҆сть прише́лъ къ мнѣ̀ и҆ до дн҃е сего·

И҆ приско́рбны бы́ша ѻ҆ немъ вс̂ѧ вое҆во́ды и҆ноплеме́ннича.
и҆ гл҃аша е҆мꙋ възвратѝ мꙋжа, и҆ пꙋстѝ на мѣ́сто свое.
и҆дѣже поста́вилъ е҆си та́мо, да не и́дꙋтъ с на́ми на́ брань, да не бꙋ́детъ развраще́нїе в по́лцѣхъ.
и҆ чт̂о ра́ди ѿлꙋчи́сѧ се́и господи́на свое҆го не глава́ми л̂и мꙋжъ тѣхъ·

Не се л̂и е҆сть дв҃дъ е҆мꙋже же́ны и҆зыидо́ша ликꙋю҆ще и҆ гл҃юще.
побѣдѝ саѹ́лъ съ ты́сѧщами свои҆ми и҆ дв҃дъ съ тма́ми свои҆ми·

И҆ призва̀ а҆кхꙋсъ дв҃да, и҆ рече жи́въ г҃ь.
ꙗ҆́ко до́бръ е҆си и҆ благ̑҇ пред̑ ѻ҆чи́ма мои҆ма.
и҆ вхо́дъ твои і҆ и҆схо́дъ твой со мно́ю е҆сть в по́лцѣ ꙗ҆́ко не ѻ҆брѣто́хъ в тебѣ̀ ѕло́бы ѿне́лѣже е҆си прише́лъ къ мнѣ̀ до дне́шнѧго дн҃е.
н̂о пред̑ ѻ҆чи́ма вое҆во́дѣ не бл҃гъ е҆си т̂ы·

И҆ нн҃ѣ възвра́щъсѧ ты̀, и҆дѝ с ми́ромъ.
и҆ не и́маши сътвори́ти ѕл̂а, пред̑ ѻ҆чи́ма вое҆вод̑ и҆ноплеме́нничъ·

И рече дв҃дъ къ а҆кхꙋсꙋ чт̂о сътвори́хъ т̂и.
и҆ чт̂о ѻ҆брѣтѐ ѕло́бы в рабѣ свое҆мъ, и҆ коли́ко дн҃їи бы́хъ пред̑ тобо́ю, и҆ не сътвори́хъ до дн҃е сего̀ ничто́же.
т̂о чт̂о ра́дьма не и҆дꙋ на́ брань враго́мъ господи́на свое҆го цр҃ѧ·

И҆ ѿвѣща̀ а҆кхꙋсъ дв҃дꙋ, ви́дѣ ꙗ҆́ко бл҃гъ е҆си пред̑ ѻ҆чи́ма мои́ма.
н̂о вое҆во́ды и҆ноплеме́нничи гл҃ютъ.
да не хо́дитъ с на́ми на́ брань·

И҆ нн҃ѣ ѹ҆ра́нь заѹ́тра т̂ы, и҆ ѻ́троцы твоѝ сꙋщїѝ с тобо́ю, и҆дѣте на мѣсто и҆дѣже поста́вилъ е҆смь та́мо.
и҆ не и҆мѣ́ите печа́ли на срд̑цы свое҆мъ никое́ѧже, ꙗ҆́ко бл҃гъ е҆си т̂ы предо мно́ю.
и҆ ѹ҆рани́те въ пꙋть е҆гда бꙋдетъ вамъ свѣтъ и҆дѣте·

И҆ ѹ҆ранѝ дв҃дъ са́мъ и҆ мꙋжи е҆го і҆ и҆до́ша стрещѝ землѧ̀ и҆ноплеме́ннича.
а҆ и҆ноплеме́нницы взыидо́ша на́ брань къ і҆и҆л҃ьтомъ·

Глв̑҇а, л҃·

И бы́сть ѿшед̑шꙋ дв҃дꙋ и҆ мꙋжемъ е҆го ѿ сикела́га.
и҆ въ дн҃ь тре́тїи.
и҆ ам̑мали́къ на́иде на ѹ́жнꙋю странꙋ̀ и҆ на сикела́гъ.
и҆ побра́ша мꙋже́и сикела́гъскихъ.
и҆ гра́дъ зажго́ша ѻ҆гнемъ·

Же́ны же и҆ вс̂ѧ сꙋщаѧ на мѣ́стѣ то́мъ.
ѿ ма́ла и҆ до вели́ка побра́ша и҆ не ѹ҆би́ша ѿ них꙽ ни мꙋжа ни жены̀.
н̂о плени́ша и҆дѧ́хꙋ пꙋте́мъ свои҆мъ·

И҆ прїиде дв҃дъ и҆ мꙋжи е҆го въ́ градъ, и҆ съж꙽же́нъ бѧ́ше ѻ҆гне́мъ град̑.
и҆ же́ныж̑ и҆хъ и҆ сн҃ове и҆хъ и҆ дще́ри и҆хъ бѧ́хꙋ полоне́ни·

И въздви́же дв҃дъ и҆ мꙋжи е҆го гла́съ свои.
и҆ пла́кашасѧ дон̑҇деже нача́ша не мощѝ пла́катисѧ·

И же́ны е҆го ѻ҆́бѣ бѣша плѣне́ни.
а҆хинамїи, і҆и҆л҃ьтѧны́ни.
і҆ а҆вигѣѧ́ бы́вшїѧ жена̀, нава́на карми́льскаго·

И҆ ѻ҆скорбѣ дв҃дъ ѕѣ́ло, ꙗ҆́ко съвѣща́шасѧ лю́дїе ка́менїем̑ поби́ти е҆го, ꙗ҆ко ѻ҆ѕло́блена бѧ́ше дш҃а всх̑ѣ людїи, комꙋж́до сн҃овъ своих̑ ра́ди и҆ дще́рїи.
н̂о ѹ҆крѣпи́сѧ дв҃дъ ѻ҆ г҃ѣ бѕ҃ѣ е҆го·

И҆ рече дв҃дъ къ а҆виѳа́рꙋ і҆е҆ре́ю сн҃ꙋ а҆вимеле́ховꙋ.
принесѝ е҆фꙋ́дъ и҆ принесѐ а҆виѳа́ръ е҆фꙋ́дъ къ дв҃дꙋ·

И҆ въпросѝ дв҃дъ г҃а гл҃ѧ.
а҆ще женꙋ̀ въ слѣдъ во́и си́хъ а҆ще пости́гнꙋ ѧ҆̀ и҆ побѣжꙋ л̂и ѧ҆̀.
и҆ рече г҃ь женѝ, ꙗ҆́ко пости́гнꙋѧ пости́гнеши.
і҆ и҆збавѧ́и и҆зба́вити и҆́маши своѧ лю́ди·

І҆ и́де дв҃дъ са́мъ и҆ х҃, мꙋжъ с ни́мъ.
и҆ прїидо́ша даже до пото́ка въсо́рска.
а҆ прочїи ѻ҆ста́ша, и҆ гна́въ съ д҃ ми сты̀ мꙋжъ, с҃ б̂о и҆хъ ѻ҆ста́ша, и҆ сѣдѧ́хꙋ ѻ҆бо́нъ пол̑҇ пото́ка въсо́р꙽ска·

И҆ ѻ҆брѣто́ша т̂ꙋ мꙋж́а е҆гѷптѧнина на селѣ̀.
и҆ поѧ́ша и҆̀.
и҆ приведо́ша и҆̀ къ дв҃дꙋ.
и҆ да́ша е҆мꙋ хлѣбъ ꙗ҆́сти, и҆ напои́ша и҆̀ воды̀·

И҆ да́ша е҆мꙋ ѹ҆крꙋхъ сы́ра, и҆ ꙗ҆́сть.
и҆ ста̀ дꙋхъ е҆го в немъ, ꙗ҆́ко бѧ́ше не ꙗ҆лъ хлѣба, ни пи́лъ воды̀, г҃. дн҃и, и҆ г҃ но́щи·

И҆ рече дв҃дъ ѿкꙋдꙋ е҆си, и҆ чїи е҆си т̂ы.
и҆ рече е҆мꙋ ѻ́трокъ.
е҆гѷптѧнинъ е҆смь а҆зъ и҆ ра́бъ мꙋжа а҆м꙽мали́кова, и҆ ѻ҆ста́ви мѧ господи́нъ мои, ꙗ҆́ко разболѣ́хсѧ дне́сь ѹ҆же тре́тїи дн҃ь.
и҆ м̂ы с̂е входи́хомъ на ю҆́гъ до хеле́фи и҆ на і҆ѹ҆де́искїѧ страны̀.
и҆ на гелвꙋ́е и҆ сикеи́лꙋ, заж꙽го́хомъ ѻ҆гне́мъ·

И҆ рече е҆мꙋ дв҃дъ.
вести л̂и м̂ѧ и҆́маши до во́и тх̑ѣ, ѻ҆́н же реч̑҇ к немꙋ кленѝ м̂и сѧ бм҃ъ ꙗ҆́ко не ѹ҆бі́еши м̂ѧ, и҆ не предасѝ менѐ в рꙋцѣ господи́нꙋ мое҆мꙋ и҆ доведꙋ тѧ на во́ѧ сѝ·

И҆ клѧ́тсѧ е҆мꙋ дв҃дъ.
и҆ ведѐ и҆̀ та́мо.
и҆ с̂е тїи бѧ́хꙋ розошли́сѧ по всеи землѝ.
и҆ бѧхꙋ ꙗ҆дꙋще и҆ пїю́ще и҆ празднꙋ́юще ѻ҆ все́и коры́сти то́и вели́цеи.
ꙗ҆́же бѧ́хꙋ взѧлѝ на зем̑ли и҆ноплеме́нничи, и҆ на землѝ і҆ѹ́динѣ·

И҆ прїиде на́ нѧ дв҃дъ, и҆ би ѧ҆̀ ѿ ѹ́тра и҆ до́ вечера.
и҆ наѹ́трїѧ и҆збѝ ѧ҆̀.
и҆ ни е҆ді́нъ же ѻ҆ста̀ ѿ ни́хъ мꙋжъ.
ра́звѣ у҃ ѻ҆́трокъ всѣдше на велблю́ды ѹ҆бѣжа́ша·

И҆ взѧ́тъ дв҃дъ вс̂ѧ е҆ли́ко бѣша взѧ́ли а҆м꙽мали́киты.
и҆ ѻ́бѣ женѣ̀ своѝ поꙗ҆́тъ·

И҆ не ѻ҆ста̀ т̂ꙋ ничтож̑ ѿ ма́ла и҆ до вели́ка, и҆ ѿ коры́сти до сн҃овъ и҆ дще́рїи и҆ вс̂ѧ и҆же бѣша взѧ́ли, възвратѝ ѧ҆̀ дв҃дъ въспѧтъ вс̂ѧ·

И҆ поѧ̀ дв҃дъ вс̂ѧ ста́да и҆ па́ствины, и҆ женѧ́ше ѧ҆̀ пред̑ плѣномъ и҆ плѣ́нъ нарица́шесѧ плѣ́нъ двд̑въ·

И҆ прїиде дв҃дъ къ двѣма сто́ма мж̑ꙋ ѻ҆ста́вшихъ, и҆тѝ въ слѣ́дъ дв҃двъ и҆же повелѣша ѻ҆ста́ти на пото́цѣ въсо́ръстѣ.
і҆ и҆зыидо́ша на срѣте́нїе дв҃дꙋ, и҆ на срѣте́нїе людем̑, и҆же с ни́мъ.
и҆ прїиде дв҃дъ до людїи.
и҆ въпроси́ша е҆го ѻ҆ ми́рныхъ·

И҆ ѿвѣща́ша вс̂и мꙋжи гнѣвливыѝ и҆ лꙋка́вныѝ, ѿ мꙋжебо́рцеи сходѧ́щихъ съ дв҃домъ.
и҆ рѣша ꙗ҆́ко не гони́ша с на́ми.
не да́мы и҆мъ ѿ плѣ́на, и҆же е҆смы̀ поѧ́ли.
н̂о то́кмо ко́ждо их̑ же́ны своѧ̀ и҆ ча́да своѧ да во́змꙋтъ и҆ възвратѧ́тсѧ·

И҆ рече дв҃дъ не твори́те бра́тїѧ моѧ та́ко.
преда́нїѧ ради гн҃ѧ и҆ снабдѣ́нїѧ и҆мже съхранѝ насъ.
и҆ преда́сть г҃ь во́ѧ пришед̑шаѧ на́ ны в рꙋ́ки на́ша·

И҆ кт̂о послꙋшаетъ ва́шего словесѝ.
ꙗ҆́ко не на́ши л̂и сꙋть.
поне́же ꙗ҆́ко по ча́сти съшед̑шаго на́ брань.
та́ко е҆сть ча́сть сѣдѧ́щаго ѹ҆ рѣшины, с тѣмѝ то́чно да раздѣли́тсѧ·

И҆ бы́сть ѿ дн҃е того̀ и҆ вы́ше, и҆ бы́сть въ повеле́нїе и҆ на ѻ҆правда́нїе, до дн҃е сего̀ і҆и҆л҃ю<.>

И҆ прїиде дв҃дъ в сикела́гъ и҆ посла̀ къ ста́рцемъ і҆ѹ́диномъ ѿ плѣ́на, і҆ и҆скрени́мъ е҆го гл҃ѧ с̂е вам̑ блс̑҇венїе.
ѿ плѣ́нникъ и҆же бѣша плѣни́ли вра́ѕи гн҃и·

И҆же ѿ веѳъсꙋра і҆ и҆же ѿ рано́ма на ю́гꙋ.
и҆ ѿ е҆и҆ѳиѳе́ра.
і҆ и҆же ѿ а҆рои́ра.
і҆ и҆же ѿ а҆мадїѧ і҆ и҆же ѿ саѳїѧ·

І҆ и҆же ѿ е҆сѳїѧ і҆ и҆же ѿ геѳа і҆ и҆же ѿ кина́на·

І҆ и҆же ѿ сафе́ха.
і҆ и҆же ѿ ѳимаѳїѧ.
і҆ и҆же ѿ карми́ла.

І҆ и҆же ѿ гра́дъ и҆рее҆меи҆ль.
і҆ и҆же ѿ гра́дъ кинезїи́нъ.
і҆ и҆же ѿ римꙋѳа і҆ и҆же ѿ вирсавїѧ.
і҆ и҆же ѿ номъвѣѧ·

І҆ и҆же ѿ хевро́на.
и҆ въ вс̂ѧ мѣ́ста.
а҆́може ходи́лъ дв҃дъ т̂ꙋ и҆ мꙋжи е҆го с ни́мъ·

Глв̑҇а, л҃а·

А иноплеме́нницы вое҆ва́хꙋ тогда̀ на і҆и҆л҃ѧ и҆ бѣжа́ша мꙋжи і҆и҆л҃еви.
ѿ лица̀ и҆ноплеме́нникъ.
и҆ па́дахꙋ ꙗ҆́звени въ горѣ̀ гелвꙋнїи·

И҆ снидо́шасѧ и҆ноплеме́нницы съ саѹ́лом̑ и҆ съ сн҃ьми е҆го, и҆ ѹ҆би́ша и҆ноплемен̑҇ницы и҆ѻ҆а҆наѳа́на.
и҆ минода́ва, и҆ мел̑҇хесꙋѧ, сн҃ы саѹ́лѧ·

И҆ ѻ҆тѧгчи́сѧ бра́нь на саѹ́ла.
и҆ прїидо́ша на́ нѧ бескопе́йницы мꙋжи стрѣлцы̀, и҆ ꙗ҆зви́ша саѹ́ла в дебе́лое мѣ́сто·

И҆ рече саѹл̑҇ к носѧ́щемꙋ ѻ҆рꙋжїе из̑сꙋни ѻ҆рꙋжїе свое прободѝ м̂ѧ им̑ да не пришед̑ше неѻ҆брѣзанїи сїи и҆збодт̑ꙋ м̂ѧ и҆ порꙋга́ютсѧ мно́ю·

и҆ не хотѧ́ше того сътвори́ти носѧ́и ѿрꙋжїе е҆го ꙗ҆ко боꙗ҆́шесѧ ѕѣ́ло, и҆ взѧ́тъ саѹ́лъ ѻ҆рꙋжїе свое, и҆ нападе́сѧ са́м꙽ на нѐ·

И҆ ви́дѣ носѧ́и ѻ҆рꙋжїе е҆го, ꙗ҆ко ѹ́мре саѹ́лъ, и҆ падѐ и҆ то́и сам̑ на ѻ҆рꙋжїе е҆го, и҆ ѹ́мре с ни́мъ·

И҆ ѹ́мре саѹл̑҇, и҆ трїе сн҃ове е҆го, и҆ носѧ́и ѻ҆рꙋжїе е҆го, и҆ вс̂и мꙋжи е҆го въ дн҃ь то́и с нимъ·

И҆ ви́дѣвше мꙋжїе і҆и҆л҃ьстїи, и҆же ѻ҆бо́нъ по́лъ и҆ ѹ҆до́лїѧ, і҆ и҆же ѻ҆бо́нъ по́лъ і҆ѻ҆рда́на, ꙗ҆коже бѣжа́ша мꙋжи і҆и҆л҃ьстїи и҆ ꙗ҆́ко ѹ́мре саѹ́лъ и҆ сн҃ове е҆го, и҆ ѻ҆ста́вльше гра́ды своѧ и҆ бѣжа́ша, и҆ прїидо́ша и҆ноплеме́нницы и҆ пребы́ша в ни́хъ·

И҆ бы́сть наѹ́трїе, и҆ прїидо́ша и҆ноплеме́нницы съвлачи́ти мрътве́цъ, и҆ ѻ҆брѣто́ша саѹ́ла мрътва сꙋща и҆ тр̂и сн҃ы е҆го, па́дша въ горѣ̀, е҆йже и҆́мѧ гелвꙋнїи·

И҆ снѧ́ша ѻ҆рꙋжїе е҆го и҆ ѿсѣкше главꙋ̀ е҆го, и҆ посла́ша въ зем̑лю и҆ноплеме́нникъ, ѻ҆́крс̑҇тъ възвѣща́юще и҆́доломъ их̑, и҆ лю́демъ их̑·

И положи́ша ѻ҆рꙋжїе и҆хъ ѹ҆ васта́ръта, а҆ тѣ́ло и҆хъ въткнꙋша на стѣнѣ веѳъса́мли·

И҆ слы́шаша живꙋщїи въ а҆ви́сѣ гала́тъстѣмъ, ꙗ҆́же сътвори́ша саѹ́лови и҆ноплеме́нницы·

И҆ въста́вше вс̂е мно́жество си́лныхъ мꙋжъ, і҆ и҆до́ша вс̂ю но́щь, и҆ взѧ́ша тѣло саѹ҆́лово, и҆ѻ҆ана́ѳаново сн҃а е҆го, съ стѣны веѳ̑҇са́мъски, и҆ принесо́ша ѧ҆̀ въ а҆вис̑҇, и҆ съжъго́ша ѧ҆̀ т̂ꙋ·

И҆ взѧ́ша ко́сти и҆хъ, и҆ погребо́ша ѧ҆̀ под̑ кома́рою, ꙗ҆́же въ а҆ви́сѣ, и҆ пости́шасѧ сед̑мь дн҃їи·

Конецъ а҃ кни́гъ црс̑҇твъ.
и҆́мать в себѣ глв̑҇а, л҃а·