Библия (1581). [10] 2 Царств

ВТОРЫ́И КНИ́ГИ ЦА́РТс̑҇ВЪ

ГЛАВА̀· А҃

И бы́сть е҆гда ѹ҆́мре саѹ҆́лъ, и҆ дв҃дъ възврати́сѧ побѣжа́ѧ а҆м꙽мали́ка, и҆ сѣде давы́дъ въ скелазѣ дн҃и дв̂а·

И҆ бысть въ тре́тїи дн҃ь, и се мꙋжь прїиде ѿ полка людїи саѹ́ловъ.
ры́зы же е҆го бѧ́хꙋ раздра́ны и҆ прь́сть на главѣ е҆мꙋ.
и҆ бы́сть е҆гд̑а вни́де къ дв҃дꙋ ѻ҆́трокъ, и҆ пад̑ на землѝ поклони́сѧ е҆мꙋ·

И҆ рече е҆мꙋ дв҃дъ ѿкꙋдꙋ т̂ы прїиде.
и҆ рече е҆мꙋ ѿ по́лъка і҆и҆л҃ева, то́кмо а҆́зъ е҆смь е҆ді́нъ ѹ҆гоньзлъ·

И҆ рече е҆мꙋ двд̑ъ чт̂о е҆сть слово с̂е възвѣсти м̂и.
и҆ се́й рече ꙗ҆́ко побѣго́ша лю́ди ѿ бра́ни, и҆ падо́ша мно́ѕи ѿ людїи і҆ и҆зъмро́ша.
и҆ саѹ́лъ и҆ ѻ҆а҆наѳа́нъ сн҃ъ е҆го ѹ҆́мре·

И҆ рече дв҃дъ ѻ҆́трокꙋ възвѣщейшемꙋ е҆мꙋ, како ви́дѣ ꙗ҆́ко ѹ҆́мре саѹ́лъ і҆ ѻ҆а҆наѳа́нъ сн҃ъ е҆го·

И҆ рече ѻ҆́трокъ възвѣща́ѧ е҆мꙋ бѣжа прїидо́хъ въ горꙋ̀ гелвꙋ́искꙋю.
и҆ с̂е саѹ́лъ натѧжа́шесѧ на ѻ҆рꙋжїе свое и҆ с̂е колесни́ци и҆ вельмо́жа събра́шасѧ на́нь·

И҆ ѻ҆зрѣв꙽сѧ саѹ́лъ и҆ ви́дѣ м̂ѧ и҆ призвавъ м̂ѧ и҆ рече м̂и, кт̂о ты̀ е҆си.
и҆ рѣхъ а҆м꙽мали́китъ е҆́смь а҆́зъ·

И҆ рече м̂и прїиди ѹ҆бо ѹ҆бїи м̂ѧ ꙗ҆́ко ѻ́бъѧт̑ м̂ѧ ѹ҆́же тма̀ лю́таѧ.
и҆ къ семꙋ ѹ҆́же дш҃а моа̀ нѣстъ въ мнѣ̀·

И҆ пристꙋпихъ к немꙋ ѹ҆бихъ и҆̀.
ви́дѣхъ б̂о ꙗ҆ко бѣ̀ е҆мꙋ живота̀.
по нападе́нїю е҆го, и҆ в꙽зѧхъ вѣне́цъ цр҃ьскїи, и҆же б̂ѣ на главѣ е҆го.
и҆ ѻ҆скри́лъ е҆же б̂ѣ на пле́щꙋ е҆го, и҆ принесохъ са́м꙽ ѻ҆бо́е къ господи́нꙋ мое҆мꙋ·

И҆ а́бїе дв҃дъ е҆м꙽сѧ за ри́зы своа̀, и҆ раздра ѧ҆̀.
и҆ вс̂ѧ мꙋжи раздра́ша ри́зы своѧ̀ и҆же с ним̑·

И҆ бишасѧ и҆ пла́кашасѧ, и҆ постишас̑҇ до́ вечера по саѹ́лѣ, и҆ по і҆ѻ҆а҆наѳанѣ сн҃ѣ е҆го и҆ по лю́дех̑ і҆ѹ҆́динах̑, и҆ по домꙋ і҆и҆л҃евѣ ꙗ҆́ко и҆збїе́ни бы́ша ѕѣло·

И҆ рече дв҃дъ ѻ҆́трокꙋ възвѣщ꙽шемꙋ е҆мꙋ, ѿкꙋдꙋ т̂ы е҆си.
и҆ рече сн҃ъ мꙋжа ѿ до́мꙋ а҆м꙽мали́кова е҆смь а҆́зъ·

И҆ реч̑҇ е҆мꙋ дв҃дъ.
т̂о ка́ко не ѹ҆боѧ́сѧ въздви́гнꙋти рꙋкѝ своѧ на х҃а гн҃ѧ·

Призва̀ дв҃дъ е҆ді́наго ѿ ѻ҆́трокъ свои҆хъ, и҆ рече и҆дѝ ѹ҆бїи е҆го, и҆ шед̑ ѹ҆би и҆̀, и҆ ѹ́мре·

И҆ рече е҆мꙋ дв҃дъ кровь твоа̀ на главѣ̀ твое́и.
ꙗ҆́ко ѹ҆ста̀ твоѧ̀ на́ тѧ́ възвѣща́ша гл҃ще ꙗ҆́ко а҆́зъ ѹ҆би́хъ х҃а гн҃ѧ·

И҆ пла́касѧ дв҃дъ пла́чемъ си́мъ по саѹ́лѣ, и҆ по і҆ѻ҆а҆наѳа́нѣ сн҃ѣ е҆го.
и҆ рече е҆же наѹ҆чи́ти сн҃ы і҆ѹ́дины стрелѧ́нїѧ.
ꙗ҆́ко пи́санно е҆сть в꙽ кни́ѕѣ и҆́стиннѣ·

И҆ рече ѹ҆тверди́сѧ і҆и҆л҃ю ѹ҆мр́ъших̑ ради на высо́кихъ ꙗ҆́звени.
и҆ како падо́ша си́лнїи да не възвѣща́ите въ геѳы.
н̂и повѣ́даите на и҆сходищихъ а҆сколонихъ.
да не възвеселѧт̑сѧ дще́ри и҆ноплеме́ннича.
ни да възра́дꙋют̑сѧ дще́ри неѻ҆брѣзаныхъ·

На го́рыж̑ гелвꙋ́искїѧ да не сни́детъ роса.
и҆ дождъ да сни́детъ на́ нѧ.
ни́же села̀ нача́лъ житныхъ да и҆зно́сѧтъ.
ꙗ҆ко рас꙽сы́пасѧ ѻ҆рꙋжїе си́лныхъ.
и҆ ѻ҆рꙋжїе саѹ́ле не бы́сть пома́зано и҆е҆леѻ́мъ·

Но̂ кровїю ꙗ҆́звеныхъ, ѿ тꙋка си́лныхъ.
лꙋкъ і҆ѻ҆а҆наѳа́нов̑҇.
да не возврати́сѧ т̂ще въспѧ́тъ.
и҆ ѻ҆рꙋжїе саѹ́лово не возврати́сѧ безꙋма·

Саѹ́лъ же і҆ѻ҆а҆наѳа́нъ възлю́бленаѧ и҆ кра́снаѧ.
не бѣ́ста разлꙋча́ющасѧ въ животѣ̀ свое҆мъ, и҆ въ см҃рти свое́и не разлꙋчи́стасѧ.
па́че ѻ҆рла̀ легча́е, и҆ лва крѣпльши·

Пла́чите по саѹ́лѣ дще́ри і҆и҆л҃евы.
и҆же в̂ы ѻ҆блача́ше въ чръвлени́ца съкрꙋшенїемъ ва́шимъ.
възлага́ющаго ѹ҆краше́нїе злато на ри́зы ва́ша·

Како падо́ша си́лнїи посреди бра́ни.
і҆ѻ҆а҆наѳа́нъ збоде́нъ бысть до см҃рти, на высо́кихъ твоих̑ ꙗ҆́звен̑҇·

Тѣмше болю̀ по тебѣ бра́те мо́и, і҆ѻ҆а҆наѳа́не кра́сныи мо́и ѕѣло.
ѹ҆стреми́ла бо сѧ бѧ́ше любы̀ тво́а на́ мѧ, па́че любы̀ же́ньскїѧ·

Ка́ко с̂и падо́ша си́лнїи, и҆ погꙋби́ша ѻ҆рꙋжїѧ бра́нна·

Глв̑҇а, в҃·

И бы́сть по сихъ въпросѝ двд̑ъ г҃а гл҃ѧ.
вни́дꙋ ли понѐ въ е҆ді́нъ градъ і҆ѹ́динъ.
и҆ реч̑҇ г҃ь к немꙋ вни́ди.
и҆ реч̑҇ двд̑ъ в кото́рыи вни́дꙋ.
и҆ рече г҃ь въ хевро́нъ·

И҆де дв҃дъ въ хевро́нъ и҆ ѻбѣ женѣ̀ е҆го.
а҆хонимїи і҆и҆л҃ьтѧныни.
и҆ а҆вигѣѧ бы́вшїѧ жена̀, нава́на кар̑҇мильскаго·

И҆ мꙋ́жи е҆го и҆же с ни́мъ бѣша ко́ждо и҆хъ, и҆ домове и҆́хъ с ни́ми.
и҆ нача́ша жи́ти во́ градѣ хевро́ньстемъ·

И҆ прїидо́ша мꙋжи ѿ і҆ѹ҆де́ѧ.
и҆ пома́заша т̂ꙋ двд̑а да црс̑҇твꙋетъ над̑ до́момъ і҆ѹ́диным̑.
и възвѣсти́ша дв҃дꙋ гл҃юще.
ꙗ҆́ко мꙋжи а҆висан꙽дьстїи, и҆ галат꙽стїи погребо́ша саѹ҆́ла·

И҆ посла̀ дв҃дъ послы̀ ко старѣ́ишинамъ, въ а҆висъ гад̑скїи и҆ речѐ к ни́мъ дв҃дъ.
блс̑҇ве́ни в̂ы б҃ꙋ ꙗ҆́ко сътвори́сте млс̑҇ть сїю ѻ҆ господи́нѣ свое҆мъ саѹ́лѣ.
х҃ѣ гн҃и и҆же погребо́сте и҆̀.
і҆ ѻ҆а҆наѳана сн҃а е҆го·

И҆ нн҃ѣ да сътвори́тъ г҃ь млс̑҇ть і҆ и҆стиннꙋ с ва́ми, а҆́зъ сътворю̀ сїѧ бл҃гаѧ.
поне́же сътвори́сте гл҃ъ се́й·

И҆ нн҃ѣ да ѹ҆крѣпѧ́тсѧ рꙋки ва́ша, и҆ да бꙋ́дете сн҃ове си́лніи, ꙗ҆́ко ѹ҆́мре господи́нъ ва́шъ саѹ҆́лъ.
мене же пома́за домъ і҆ѹ́динъ, црс̑҇твовати м̂и над̑ ни́ми·

И а҆вени́ръ сн҃ъ ни́ров̑҇, и҆же б̂ѣ вое҆вода саѹ́ль.
вз̂ѧ и҆е҆восте́ѧ сн҃а саѹ́лѧ.
и҆ възнесѐ е҆го и҆с полка въ мана́емъ·

И҆ црс̑҇твова с ним̑ над̑ галадитїею.
и҆ над̑ ѳаси, и҆ над̑ і҆и҃лем̑, и҆ над̑ е҆фрѣмомъ, и҆ над̑ венїа҆ми́номъ, и҆ надо всѣмъ і҆и҆л҃емъ·

Четы́рьдесѧть, лѣтъ, и҆е҆восте́ю б̂ѣ сн҃ꙋ саѹ́ловꙋ, е҆гда̀ нача црс̑҇твовати над̑ і҆и҆л҃емъ, и҆ дв̂ѣ лѣтѣ црс̑҇твова.
толи́ко дом̑ і҆ѹ́динъ бы́сть за дв҃дом̑·

И҆ бы́сть въ дн҃и в нѧ́же нача̀ црс̑҇твовати дв҃дъ въ хевро́нѣ над̑ до́момъ і҆ѹ́динымъ, з҃, лѣтъ.
и҆ ѕ҃, мс̑҇ць·

І҆ и҆зы́де а҆вени́ръ сн҃ъ ни́ров̑҇ и҆ ѻтроцы и҆е҆востеѻ́вы сн҃а саѹ́лѧ.
е҆гда нача̀ црс̑҇твовати манаи҆́момъ въ гава́те·

И҆ѻ҆а́въ сн҃ъ сарꙋи́евъ, и҆ ѻ́троцы дв҃дви и҆зыидо́ша ѿ хеврона.
и҆ стрѣтившим꙽сѧ и҆мъ, ѹ҆ пото́ка гавло́нѧ въкꙋ́пѣ.
и҆ сѣдо́ша тїѝ на пото́цѣ ѿсюдꙋ, і҆ и҆ тїѝ ѿтꙋдꙋ·

И҆ рече а҆вени́ръ къ і҆ѻ҆а́вꙋ.
да воста́нꙋт꙽ нн҃ѣ ѻ҆́троцы, и҆ да пои҆грают̑ пред̑ на́ми.
и҆ рече і҆ѻ҆а́въ да воста́нт̑ꙋ·

И҆ въста́вше прїидо́ша ѻ҆́трокъ венїа҆ми́нов̑҇ числом̑, в҃і.
и҆е҆воасте́ѧ сн҃а саѹ́лѧ, в҃і.
и҆ ѻ҆трок̑҇ двд̑овых̑, в҃і·

дръжа́ще ко́ждо рꙋко́ю шлем̑ и҆скренѧ́го свое҆го, и҆ ме́чи и҆хъ на ребрѣхъ комꙋждо их̑, и҆ падо́ша вс̂и въкꙋпѣ, и҆ нарече́сѧ и҆́мѧ мѣ́стꙋ томꙋ̀ часть хотѣнїѧ и҆же е҆сть въ гаваѻ́нѣ·

И҆ бы́сть бра́нь лю́та, до конца в то́й дн҃ь, и҆ паде а҆вени́ръ и҆ мꙋжи і҆и҆л҃ьти пред̑ ѻ҆́трокы двд҃вы·

И҆ бы́ша тꙋ тр̂и сн҃ове сарꙋ́иѧ, і҆ѻ҆а́въ, а҆веса, и҆ асаи́ль.
и҆ а҆саи́ль же б̂ѣ лего́къ нога́ма свои́ма, ꙗ҆́ко е҆ді́на серна̀ ска́чꙋщи на селѣ̀·

И҆ гна̀ а҆саи́ль въ слѣдъ авени́ра, и҆ не ѹ҆клони́сѧ н̂и на де́сно н̂и на лѣво, н̂о въ слѣдъ а҆вени́ра·

И҆ ѻ҆зрѣв꙽сѧ а҆вени́ръ назадъ себѐ реч̑҇, а҆́ще т̂ы е҆си са́мъ саи́ль, и҆ рече а҆́зъ е҆смь·

И҆ рече е҆мꙋ а҆вени́ръ.
ѹ҆клони́сѧ т̂ы лю́бо де́снымъ лю́бо шюим̑, и҆ женѝ до ѻ҆́трока, и҆ во́змеши себѣ̀ ѻ҆рꙋжїе и҆хъ.
и҆ не хотѧ́ше а҆саи́ль ѹ҆пра́витисѧ ѿ него ника́коже·

И҆ приложи е҆щѐ а҆вени́ръ гл҃ати къ а҆саи́лꙋ и҆ ѿи҆дѝ ѿ менѐ да тебѐ не разбі́ю ѻ҆ землю.
и҆ како посемъ ꙗ҆влю̀ лице своѐ къ і҆ѻ҆а́вꙋ бра́тꙋ твое҆мꙋ·

И҆ не хотѧ́ше ѻ҆ста́ти.
и҆ ѹ҆да́ри и҆̀ а҆венир̑҇ ко́пїемъ съза́ди в лѧ́двїѧ.
и҆ прои́де ко́пїе сквозѣ и҆̀, и҆ пад̑ и҆здъше пред̑ ним̑.
и҆ бысть всѧ́къ приходѧ́и до мѣ́ста и҆дѣже падесѧ а҆саиль.
и҆ ѹ́мре ѻ҆ста́вленъ·

И҆ го́ниста і҆ѻ҆а́въ и҆ а҆ве́са по а҆вени́рѣ.
и҆ слн҃це заходѧ́ше, и҆ та̀ прїидо́ста до холма е҆м꙽ма́това, и҆же е҆сть пред̑꙽ лицемъ га́и пꙋтѧ̀, пꙋсты́ни гаваѻ́нѧ·

И҆ събра́шасѧ сн҃ове венїа҆ми́нови за а҆вени́ромъ.
и҆ бы́ша въ снѧ́тїѝ е҆ді́ном̑.
и҆ поста́виша на ве́рсѣ хол̑҇мꙋ е҆ди́наго·

И҆ призва̀ а҆вени́ръ і҆ѻ҆а́ва, и҆ рече.
е҆да̀ на побѣдꙋ во́змет̑ ѻ҆рꙋ́жїе.
и҆л̂и не вѣси ꙗ҆ко гор̑҇ка е҆сть послѣже.
и҆ доко́лѣ не и҆́маши рещѝ людем̑ ѻ҆ста́ти съзади брата на́шего·

И҆ реч̑҇ і҆ѻ҆а҆въ жив̑҇ г҃ь поне́же бы м̂и гл҃а тог̑҇да̀, преже ѹ҆́трины б̂ы людїе мои преста́ша гонѧ́ще ко́ждо в꙽ слд̑ѣ бра́та своего.
и҆ въстрꙋби і҆ѻ҆а҆въ трꙋбо́ю.
и҆ ста́ша вс̂и людїе, и҆ не гна́ша въ слѣдъ і҆и҆льтѧнъ.
и҆ не приложи́ша пото́мъ побѣдитисѧ·

А҆вени́ръ же и҆ мꙋжи е҆го и҆доша на за́падъ вс̂ю но́щъ т̂ꙋ.
и҆ преидо́ша і҆ѻ҆рда́нъ и҆ прешед̑ше вс̂ю стра́нꙋ т̂ꙋ, и҆ прїидо́ша въ пол꙽къ·

И҆ѻ҆а́в же възврати́сѧ въспѧ́тъ гонѧщи ѿ а҆вени́ра.
и҆ събра̀ вс̂ѧ лю́ди, и҆ посѣти́ша ѻ҆́трокъ дв҃дыхъ пад̑ших, и҆ бы́сть и҆хъ, ѳ҃і, мꙋжъ, и҆ а҆саи́ль·

Ѡ҆троцы же дв҃двы ѹ҆би́ша сн҃овъ вениа҆ми́нь.
и҆ мꙋжъ а҆вени́ровъ и҆же бѣша с ни́мъ, т҃, и҆ ѯ҃, мꙋжъ·

И҆ взѧ́ша а҆саи́лѧ и҆ погребо́ша и҆̀ въ гробѣ ѿц҃а е҆го, въ виѳлеѻ́мѣ.
і҆ и́де и҆ѻ҆а́въ и҆ мꙋжи е҆го с ни́мъ вс̂ю нощ̑҇ и҆ ѻ҆свѣто́ша въ хевро́нѣ·

Глв̑҇а, г҃·

И бы́сть бра́нь на мно́го междꙋ до́мом̑ саѹ́лемъ.
и҆ межи до́мом̑ дв҃двомъ.
до́м же дв҃двъ възвыша́шесѧ и҆ крѣплѧ́шесѧ.
и҆ дом̑ саѹ́ль и҆дѧ́ше і҆ и҆знемога́ше·

И҆ роди́шасѧ дв҃дви въ хевро́нѣ сн҃овъ, ѕ҃. и҆ б̂ѣ прьворо́дныи е҆мꙋ сн҃ъ, а҆м꙽мо́нъ.
ѿ а҆хиноа҆мїи і҆и҆л҃ьтѧныни.
и҆ вторы́и е҆мꙋ сн҃ъ, далꙋи҆ѧ.
ѿ а҆вигѣѧ́ карми́льскїѧ.
и҆ тре́тїи а҆весало́мъ сн҃ъ маа҆ѻ҆ха́ны дще́ре ѳоли́мины, цр҃ѧ гасꙋ́рьска.
д҃ и, ѿ ѹ҆ри́нїѧ сн҃ъ а҆г꙽ги́ѳы, е҃ и, сафатїѧ ѿ витаа́лы.
ѕ҃ и.
е҆сѳъроа́мъ, ѿ а́глы жены̀, дв҃двы.
сїѝ роди́шасѧ дв҃домъ въ хевро́нѣ·

И҆ е҆гда бы́сть бра́нь междꙋ до́момъ саѹ́лемъ.
и҆ междꙋ до́момъ дв҃двымъ.
и҆ бѧ́ше а҆вени́ръ держа̀ до́мъ саѹ́ловъ·

И҆ саѹ́лова под̑ло́жница б̂ѣ, е҆йже бѣ̀ и́мѧ ре́сѳа дщѝ и҆ѻ҆а́ва.
и҆ поѧ́тъ ю҆̀ а҆вени́ръ.
и҆ рече гевосте́и, сн҃ъ саѹ́ль къ а҆венирꙋ, чт̂о с̂е ты̀ вни́де къ под̑ло́жни́цы ѿц҃а мое҆го·

И҆ съжалѝ с̂и ѕѣло а҆вени́ръ ѻ҆ словесѝ се́мъ, е҆же рече е҆мꙋ и҆ гевосте́и.
и҆ рече е҆мꙋ а҆вени́ръ е҆да̀ пе́сѣѧ̀ глава̀ е҆смь а҆зъ.
да с̂и сътвори́хъ вс̂ѧ дне́сь.
не сътворих̑ л̂и днесь млс̑҇ти до́мꙋ саѹ́лю ѿц҃а твое҆го и҆ братїи твое́и и҆ зна́емым̑ т̂и и҆ не въста́хъ л̂и а҆зъ на до́мъ дв҃двъ и҆ ты̀ взыска̀ непра́вды въ мн̂ѣ, жены̀ сеѧ̀ ра́ди дне́сь·

Си́ же да сътвори́тъ б҃ъ а҆вени́рꙋ.
и҆ си да приложѝ е҆мꙋ, ꙗ҆́коже бо клѧ́тсѧ г҃ь двд̑ꙋ та́ко сътворю̀ е҆мꙋ в꙽ сїи дн҃ь·

И҆ приꙗ҆́ти црс̑҇тво ѿ до́мꙋ саѹ́лѧ.
и҆ възъдви́гнꙋти прс̑҇толъ дв҃двъ въ і҆и҆л҃и.
и҆ на і҆ѹ́дꙋ, ѿ да́на даже до верса́вїѧ.

И҆ не възмо́же ктомꙋ̀ гевꙋсте́и ѿвѣща́ти а҆вени́рꙋ словесѝ ѿ бо́ѧзни е҆го·

И҆ посла̀ а҆вени́ръ къ дв҃дꙋ послы̀ въ ѳела́мъ хевро́ньскїи.
и҆дѣже б̂ѣ а҆бїе гл҃ѧ.
положѝ завѣтъ свой со мно́ю, и҆ с̂е рꙋка моѧ с тобо́ю.
възврати́ти м̂и к тебѣ весь і҆и҆л҃ь·

И҆ рече дв҃дъ добрѣ а҆зъ положꙋ̀ с тобо́ю завѣтъ.
н̂о то́кмо словесе е҆ді́наго прошꙋ̀ ѹ҆ тебѐ гл҃ѧ.
не и҆́маши ви́дѣти лица мое҆го.
а҆ще не приведе́ши мельхо́лы дще́ри саѹ́лѧ.
приходѧ́щꙋ ти ви́дѣти лицѐ мое·

И҆ посла̀ дв҃дъ къ гевосте́ю сн҃ꙋ саѹ́лю гл҃ѧ.
пꙋстѝ женꙋ̀ мою мельхо́лꙋ, юже бѣхъ прїꙗ҆́лъ ѻ҆брѣ́занїѧ дѣлѧ кра́ѧ и҆ноплеме́нник꙽·

И҆ пꙋстѝ и҆ гевосте́и, и҆ поꙗ҆́тъ ю҆̀ ѿ мꙋжа е҆ѧ, ѿ ѳан꙽тїи́лѧ сн҃а селимо́нѧ·

І҆ и҆дѧ́ше мꙋжъ е҆ѧ с не́ю пла́часѧ даже до вара́ма.
и҆ рече к немꙋ̀ а҆вени́ръ, и҆дѝ и҆ възврати́сѧ·

И҆ рече къ ста́ръцемъ і҆и҆л҃евымъ гл҃ѧ.
вчера̀ и҆ ѻ҆ном̑ дн҃и и҆ска́сте дв҃да црс̑҇твова́ти над̑ ва́ми·

И҆ нн҃ѣ сътвори́те ꙗ҆́коже г҃ь гл҃а ѻ҆ дв҃дѣ гл҃ѧ.
в рꙋ́цѣ раба̀ мое҆го дв҃да сп҃сꙋ лю́ди моѧ і҆и҆л҃ѧ, ѿ рꙋкѝ и҆ноплеме́нникъ.
и҆ ѿ рꙋкѝ вра́гъ их̑·

И҆ гл҃а а҆вени́ръ, въ ѹ́ши венїа҆ми́нꙋ і҆ и҆де а҆вени́ръ гл҃ати въ ѹ́ши дв҃двѣ въ хевро́нѣ.
вс̂ѧ ꙗ҆́же ѹ҆го́дна бѣша пред̑ ѻ҆чи́ма і҆и҆л҃евыма.
и҆ пред̑ ѻ҆чи́ма всего до́мꙋ венїа҆ми́нѧ·

И҆ прїиде а҆вени́ръ къ дв҃дꙋ въ хевро́нъ.
и҆ с ни́мъ, к҃, мꙋжъ.
и҆ сътворѝ двд̑ъ пи́ръ а҆вени́рꙋ и҆ мꙋжем꙽ е҆го и҆же с ним̑·

И҆ рече а҆вени́ръ къ дв҃дꙋ.
въста́невѣ нн҃ѣ і҆ и́девѣ.
и҆ да съберꙋтсѧ къ господи́нꙋ с̂и цр҃ви весь і҆и҆л҃ь.
и҆ положꙋ̀ с тобо́ю завѣтъ и҆ црс̑҇твова́ти и҆́маши всѣмѝ, и҆хже жела́етъ дш҃а т̂и и҆ посла̀ дв҃дъ а҆вени́ра, і҆ и́де с ми́ром̑·

И҆ сѐ ѻ҆́троцы дв҃двы, и҆ ѻ҆а́въ и҆дѧ́хꙋ ѿ и҆схо́да.
и҆ коры́сть мно́гꙋ несѧ́хꙋ съ собо́ю.
и҆ а҆вени́ръ ѹ҆жѐ не бѣ съ дв҃домъ въ хевро́нѣ.
ꙗ҆́ко ѿсла́нъ бѧ́ше и҆ ѿпꙋще́нъ с ми́ромъ·

И҆ѻ҆ав̑҇ же и҆ все во́инъство е҆го прїиде.
и҆ възвѣсти́ша и҆ѻ҆а́вꙋ гл҃юще.
приходѝ а҆вени́ръ сн҃ъ ни́ровъ къ дв҃дꙋ, и҆ посла̀ и҆̀ и҆ ѿи́де с ми́ромъ·

И҆ въниде і҆ѻ҆а́въ къ дв҃дꙋ, и҆ рече чт́о с̂е е҆си сътвори́лъ.
сѐ б̂о приходѝ а҆вени́ръ к тебѣ, и҆ почт̂о пꙋсти́лъ е҆си е҆го и҆ ѿи́де с ми́ромъ·

И҆л̂и не вѣ́си ѕло́бы а҆вени́ра сн҃а ни́рова.
ꙗ҆́ко сълꙋкавствова́ѧ к тебѣ и҆дѧ́ше.
разꙋмѣти хотѧ̀ и҆сход̑ твой и҆ въхо̑ твой, и҆ ѹ҆вѣдѣти вс̂ѧ ꙗ҆́же твори́ши ты̀·

И възврати́сѧ и҆ѻ҆а́въ ѿ дв҃да, и҆ посла̀ послы̀ въслѣ́дъ а҆вени́ра, и҆ въз꙽врати́ша и҆̀, ѿ кла́дѧзѧ седрам̑ска и҆ дв҃дъ не вѣ́дѧше·

И҆ възврати́сѧ а҆вени́ръ въ хевро́нъ.
и҆ ѹ҆врати и҆ѻ҆а́въ стра́нными вра́ты.
гл҃ати к немꙋ лꙋка́вно.
и҆ ѹ҆да́ри и҆̀ под̑ срд̑це и҆ ѹ́мре въ кро́ви, а҆висаи́ли, брата и҆ѻ҆а́влѧ·

И҆ слы́ша дв҃дъ по си́хъ и҆ рече чи́стъ е҆смь а҆зъ и҆ црс̑҇тво мое ѿ г҃а.
и҆ ѿ н҃нѣ и҆ до́ вѣка, ѿ кро́ве а҆вени́рѧ сн҃а ни́рова·

да сни́детъ на главꙋ̀ и҆ѻ҆а́влю, и҆ на ве́сь до́мъ ѿц҃а е҆го, да не ѻ҆скꙋдѣ́етъ ѿ до́мꙋ и҆ѻа́влѧ, и҆злива́ѧи сѣмѧ и҆ прокаже́ныи·

И҆ держа́и щи́тъ, и҆ да па́даю҆тъ ѻ҆рꙋжїемъ ѹ҆мале́ныи хлѣба да бꙋдетъ е҆мꙋ·

І҆ѻ҆а́в же і҆ а҆ве́са бра́тъ е҆го ѹ҆би́ша а҆вени́ра, понеж̑ ѹ҆бѝ а҆саи́лѧ бра́та и҆хъ в гаваѻ́ни на́ брани·

И҆ рече дв҃дъ къ и҆ѻ҆а́вꙋ и҆ къ всѣмъ лю́демъ е҆го раздерѣте ри́зы ва́ша, и҆ препоꙗ҆ши́тесѧ вре́тищи, и҆ рыда́ите ѻ҆ а҆вени́рѣ, сам̑ же цр҃ь дв҃дъ и҆дѧ́ше въ слѣ́дъ ѻ҆дра̀·

И погребо́ша а҆вени́ра въ хевро́нѣ, и҆ въздви́же цр҃ь гласъ свой, и҆ пла́касѧ над̑ гро́бомъ е҆го, и҆ вси лю́дїе пла́кашасѧ по а҆вени́рѣ·

И҆ пла́касѧ цр҃ь а҆вени́ра, и҆ рече а҆ще по сме́рти а҆ва́ли ѹ҆спѐ а҆вени́ръ·

То рꙋцѣ твоѝ не свѧ́жетасѧ, ни но́ѕѣ твоѝ не спине́тасѧ, н̂о ꙗ҆ко па́даютъ пред̑ сн҃ъми непра́вды та́ко падѐ, и҆ приложи́ша вси лю́дїе пла́катисѧ е҆го·

И҆ прїидо́ша вс̂и лю́дїе вече́рѧть.
съ дв҃домъ ꙗ҆́сти хлѣ́бъ.
е҆ще сꙋщꙋ дн҃и и҆ клѧ́тсѧ дв҃дъ гл҃ѧ с̂е да сътвори́тъ м̂и г҃ь, и҆ си́це да приложи́тъ.
ꙗ҆́ко а҆́ще не за́идетъ сл҃нце не и́мамъ вкꙋси́ти хлѣба, н̂и иного чого̀·

И҆ ѹ҆го́дно бы́сть сло́во с̂е пред̑ всѣми, всѧ е҆ли́ко сътворѝ цр҃ь пред̑ людмѝ·

И҆ разꙋмѣша вс̂и лю́дїе, и҆ весь і҆и҆л҃ь в то́и дн҃ь.
ꙗ҆́ко не бы́сть ѿ цр҃ѧ ѹ҆бїиства а҆вени́рꙋ сн҃ꙋ ни́ровꙋ·

И рече цр҃ь ѻ҆́трокомъ свои҆мъ.
не вѣсте л̂и ꙗ҆́ко властели́нъ вели́къ падѐ в сїи́ дн҃ь въ і҆и҆л҃и·

І҆ ꙗ҆́ко а҆зъ е҆сми съѻ҆бѣщник̑҇ дне́сь и҆ въста́вленъ на цр҃ѧ.
мꙋжи же сїѝ сн҃ове сарꙋи́ли, злѝ м̂и сꙋть.
да възда́сть г҃ь творѧ́щимъ лꙋка́внаѧ, по ѕло́бѣ и҆хъ·

Глв̑҇а, д҃·

И слы́ша гевосте́и сн҃ъ саѹ́ль.
ꙗ҆́ко ѹ́мре а҆вени́ръ сн҃ъ ни́ровъ въ хевро́нѣ.
и҆ разрѣши́стасѧ рꙋцѣ е҆го.
и҆ вс̂и мꙋжи і҆и҆л҃еви подиви́шасѧ е҆мꙋ·

И҆ дв̂а мꙋжа вельмо́жа развраще́ника гевосте́ѻ҆вы сн҃а саѹ́лѧ.
и҆́мѧ е҆ді́номꙋ ваа҆а́н꙽.
а҆ дрꙋго́мꙋ риха́въ.
сн҃а рем꙽мо́нѧ, вироѳе́искаго ѿ сн҃овъ венїа҆ми́нь.
ꙗ҆́ко виро́ѳъ мни́мъ бѧ́ше сн҃омъ венїа҆ми́ним̑·

И҆ ѿи҆до́ша вироѳѣ́и въ геѳе́мъ.
и҆ бѣша та́мо живꙋще и҆ до дне́шнѧго дн҃е·

І҆ и҆ѻ҆а҆наѳа́на сн҃а саѹ́лѧ.
сн҃ъ бѣ хро́мъ на́ ногꙋ ꙗ҆́ко е҃ лѣтъ е҆мꙋ бы́сть е҆гда прїиде възвѣще́нїе ѻ҆ саѹ́лѣ, и҆ ѻ҆а҆наѳа́нꙋ сн҃ꙋ е҆го, ѿ і҆и҆л҃ѧ.
и҆ взѧ́тъ е҆го пѣстꙋ́ница е҆го и҆ бѣжа̀.
и҆ бы́сть тща́щисѧ е҆й на ѿше́ствїе, пад̑ши и҆ ѻ҆хромѣ̀.
и҆́мѧ б̂ѣ е҆мꙋ мемъѳивостеи·

И҆ поидо́ша сн҃ове рем꙽мо́ни вироѳе́искаго риха́въ.
и҆ ваа҆а́н꙽ и҆ внидо́ша въ те́плыи дн҃ь въ до́мъ гевосте́ѻ҆въ.
и҆ то́и почива́ше на ѻ҆дрѣ̀ въ полꙋ́дне.
и҆ вра́тникъ до́мꙋ, ѻчища́ше пшени́цꙋ и҆ въздрѣма́всѧ спа́ше·

Риха́в же и҆ ваа҆а́нъ, ѻ҆́ба бра́та таꙗ҆́щесѧ внидо́ста в дом̑.
гевосте́и же почива́ше на ѻ҆дрѣ е҆го.
въ ло́жници е҆го и҆ ѹ҆биста е҆го и҆ взѧ́ша главꙋ̀ е҆го.
и҆ ѿи҆до́ша пꙋте́мъ и҆же наза́дъ вс̂ю нощ̑҇·

И҆ принесо́ста главꙋ̀ гевосте́ѻ҆вꙋ, къ дв҃дꙋ въ хевро́нъ.
и҆ рѣста къ цр҃ю.
с̂е глава̀ гевосте́ѻ҆ва сн҃а саѹ́лѧ врага̀ твое҆го, и҆же и҆ска́ше дш҃а твоеѧ и҆ да́сть г҃ь господи́нꙋ на́шемꙋ и҆ цр҃ю ѿмще́нїе враго́мъ е҆го.
до дне́шнѧго дн҃е.
саѹ́ла врагꙋ̀ е҆го, и҆ сѣмени е҆го·

И҆ ѿвѣща̀ дв҃дъ риха́вꙋ и҆ ваа҆а́нꙋ бра́тꙋ е҆го сн҃омъ рем꙽мо́на вироѳе́искаго.
и҆ рече и́ма жи́въ г҃ь и҆же и҆зба́ви дш҃ꙋ мою̀ ѿ всѧ́коѧ ско́рби·

И҆бо первѣи възвѣстѝ м̂и.
ꙗ҆́ко ѹ́мре саѹ́лъ и҆ ѻ҆а҆наѳа́нъ, и҆ то́и мнѧ́ше ꙗ҆́ко бл҃говѣствꙋ́ѧи предо мно́ю, и҆ а́зъ ꙗ҆́хъ и҆̀, и҆ ѹ҆бих̑ и҆̀ в сикеи́лѣ.
мнѧ́ше б̂о да да́мъ е҆мꙋ да́ръ·

Но и҆ нн҃ѣ мꙋжи лꙋка́ви, ѹ҆би́ша мꙋжа пра́ведна в домꙋ̀ е҆го на ѻ҆дрѣ̀ е҆го.
и҆ нн҃ѣ взыщꙋ̀ кро́ве е҆го ѿ рꙋкꙋ ва́шꙋ.
і҆ и҆скореню вы̀ ѿ зем̑лѧ̀·

И҆ заповѣ́да дв҃дъ ѻ҆́трокомъ своим̑.
и҆ ѹ҆би́ша ѧ҆̀, и҆ ѹ҆сѣко́ша рꙋцѣ и҆́ма и҆ но́ѕѣ, и҆ повѣ́сиша ѧ҆̀ на садꙋ̀ въ хевро́нѣ.
и҆ главꙋ̀ гевосте́ѻ҆вꙋ погребо́ша въ гробѣ а҆вени́рѣ, сн҃а ни́рова·

Глв̑҇а, е҃·

И прїидо́ша вс̂и племе́на і҆и҆л҃еви къ дв҃дꙋ въ хевро́нъ и҆ гл҃аша е҆мꙋ.
с̂е кости твоѧ̀ и҆ пло́ть твоа̀ м̂ы е҆смы·

И҆ вчера̀ и҆ ѻ҆но́мъ дн҃и.
саѹ́лꙋ сꙋщꙋ цр҃ю над̑ на́ми.
т̂ы бы́сть въводѧ́и і҆ и҆зводѧ́и і҆и҆л҃ѧ.
и҆ рече г҃ь к тебѣ.
т̂ы да пасе́ши людѝ моѧ̀ і҆и҆л҃ѧ, и҆ т̂ы да бꙋ́деши во́ждем̑ людем̑ мои́мъ і҆и҆л҃ю.
и҆ прїидо́ша вс̂и ста́р꙽цы і҆и҆л҃еви къ цр҃ю въ хевро́нъ.
и҆ положи и҆́мъ цр҃ь дв҃дъ завѣт꙽, въ хевро́нѣ пред̑ гм҃ъ, и҆ пома́заша дв҃да на црс̑҇тво над̑ всѣмъ і҆и҆л҃емъ·

Бѣ двд̑ъ л҃ ти, лѣтъ, в нѧже црс̑҇твовати е҆мꙋ.
и҆ црс̑҇твова, м҃, лѣтъ·

И҆ над̑ і҆ѹ́дою.
црс̑҇твова̀ в хевро́нѣ, з҃ лт̑ѣ, и҆ мс̑҇цеи, ѕ҃. црс̑҇твова въ і҆ерс̑҇ли́мѣ, л҃г, лѣта, над̑ і҆и҆л҃емъ і҆ и҆ѹ҆де́ею·

И҆ ѿи́де дв҃дъ и҆ вс̂и мꙋ́жи и҆же с ни́мъ въ і҆ерс̑҇ли́мъ къ е҆вѷсѣѻ́мъ, живꙋщим̑ тогда̀ на землѝ то́й.
и҆ рѣша дв҃дꙋ не въходѝ сѣмо е҆щѐ.
ꙗ҆́ко въста́ша хро́мїѝ и҆ слѣпїѝ гл҃ще, ꙗ҆́ко не вни́дет̑ дв҃дъ сѣмо·

И҆ прїѧ̀ дв҃дъ вс̂ѧ страны̀ сїѻ́нѧ.
с̂е е҆сть град̑ двд̑въ·

И҆ реч̑҇ дв҃дъ въ дн҃ь то́й всѧ́къ да ѹ҆бивает̑ е҆вѷсѣ́ина мечем̑.
слѣпы́ѧ и҆ хро́мыѧ и҆ ненави́дѧщихъ дш҃а двд҃вы.
сего̀ ради рѣша слѣпїѝ и҆ хро́мїѝ не вни́дт̑ꙋ въ до́мъ гн҃ь·

И҆ сѣде дв҃дъ въ странѣ̀, и҆ наречесѧ сїи́ град̑ двд҃въ.
и҆ създа̀ е҆го гра̑ въѻ҆́коло.
и҆ домъ сво́и ѿ кра́ѧ.
і҆ и҆дѧ́ше дв҃дъ, и҆ды́и и҆ велича́емъ, и҆ г҃ь вседръжи́тель с ним̑·

И҆ древа ке́рдова, и҆ древодѣ́лѧ.
и҆ ка́менїю дѣла́телѧ и҆ воздаша дом̑ двд̑ꙋ·

И҆ посла̀ хирам̑ цр҃ь ти́рскїи послы̀ к꙽ двд̑ꙋ и разꙋмѣ дв҃дъ, ꙗ҆́ко ѹ҆готови и҆̀ г҃ь на црс̑҇тво въ і҆и҆л҃и.
ꙗ҆́ко взѧт̑сѧ цр҃ьство е҆го людїи е҆го ра́ди і҆и҆лѧ·

И поꙗ҆́тъ дв҃дъ е҆щѐ же́ны.
и҆ под̑ло́жницы ѿ і҆ерс̑҇ли́ма по прише́ствїи е҆го ѿ хевро́на.
и҆ бы́ша е҆мꙋ сн҃ове и҆ дще́ри·

И҆ сїѧ и҆мена̀ поро́ждшимсѧ е҆мꙋ въ і҆ерс̑҇ли́мѣ.
самꙋсъ, и҆ съвавїи, и҆ наѳа́нъ, и҆ соло́монъ·

И҆ е҆веа́ръ, и҆ е҆лисꙋ́е, и҆ е҆нафи́къ, и҆ е҆фі́е·

І҆ н̂елиса́ма.
и҆ е҆лида́е, и҆ е҆лъфала́ѳъ, и҆ сама́е, и҆ е҆сива́ѳъ, и҆ наѳа́нъ, и҆ галомаа́нъ, и҆ е҆ваа́ръ, ѳеиѳꙋс е́лъфалаѳ̑҇ и҆ наге́ѳъ.
и҆ нафе́къ, и҆ѻ҆наѳа́нъ, воа҆лима́ѳъ, е҆лифаа́ѳъ·

И҆ слы́шаша и҆ноплеме́нницы, ꙗ҆ко пома́засѧ дв҃дъ на црс̑҇тво въ і҆ерс̑҇ли́мѣ.
и҆ взыдо́ша и҆ноплеме́нницы и҆щꙋще дв҃да·

и҆ слы́шавъ дв҃дъ и҆́де въ страны̀·

И҆́ноплеме́нницы же пришед̑ше, и҆ ста́ша̑ въ ѹ҆до́лїи тита́ньстїи·

И҆ въпросѝ дв҃дъ г҃а гл҃ѧ.
а҆́ще възы́идꙋ къ и҆ноплеме́нникомъ, предасѝ л̂и ѧ҆̀ въ рꙋцѣ моѝ·

И҆ рече г҃ь възы́ди.
ꙗ҆́ко предаѧ҆̀ преда́мъ и҆ноплеме́ники въ рꙋцѣ твоѝ·

И҆ прїиде дв҃дъ с вы́шнѧа страны̀.
и҆ побѝ и҆ноплеме́нники т̂ꙋ.
и҆ рече дв҃дъ и҆с꙽сѣчѐ г҃ь врагы̀ моѧ̀ и҆ноплеме́нники предо мно́ю.
ꙗ҆́коже пресѣка́етъ во́дꙋ.
сего̀ ра́ди наречесѧ и҆́мѧ мѣ́стꙋ томꙋ̀ свы́ше сѣкїи·

И҆ ѻ҆ста́виша и҆ноплеме́нницы богы̀ своѧ.
и҆ взѧтъ ѧ҆̀ дв҃дъ и҆ мꙋжи е҆го.
и҆ реч̑҇ съжещѝ ѧ҆̀ во ѻ҆гнѝ·

И҆ приложи́ша па́ки прїити и҆ноплеме́нницы.
и҆ сташа па́ки на ѹ҆до́лїи тита́ньстѣи·

И҆ въпросѝ дв҃дъ г҃а а҆́ще възы́идꙋ къ и҆ноплеме́нникомъ и҆ предаси л̂и и҆́хъ въ рꙋцѣ моѝ, и҆ реч̑҇ е҆мꙋ г҃ь, не въходѝ на срѣтенїе им̑, н̂о ѹ҆клони́сѧ ѿ нихъ, и҆ пождѝ ма́ло бли́зꙋ ѹ҆до́лїи пла́ча·

И҆ бꙋ́детъ е҆гда ѹ҆слы́шиши глс̑҇а трꙋса лꙋж́наг̑҇ тогда̀ сни́деши к ни́мъ.
ꙗ҆ко тогда̀ и҆зы́детъ г҃ь пред̑ тобо́ю, сѣщи на́ брани и҆ноплеме́нники·

И҆ сътворѝ дв҃дъ ꙗ҆́коже заповѣ́да е҆мꙋ г҃ь.
і҆ и҆з꙽бѝ и҆ноплемен̑҇ники ѿ гаваѻ́на, даже и҆ до землѝ гази́ры·

Глв̑҇а, ѕ҃·

И събра дв҃дъ е҆щѐ всѧкꙋю ю҆́ношꙋ ѿ і҆и҆л҃ѧ, ꙗ҆́ко з҃, сотъ ты́сѧщъ·

И҆ въставъ і҆ и́де дв҃дъ, и҆ вс̂и лю́дїе и҆же с ни́мъ.
и҆ ѿ кнѧ́ѕь і҆ѹ́дин̑҇, на въсхо̑ хол꙽мны́и.
ꙗ҆́ко възнестѝ ѿтꙋдꙋ кїѻ́тъ бж҃їи.
а҆ в немъ же на нарица́етсѧ и҆́мѧ г҃а си́лнаго, сѣдащаго на херꙋви́мѣ·

И҆ възѧ́ша кїѻ́тъ гн҃ь.
на ко́лѣхъ но́выхъ, и҆ ѿвезоша и҆̀ ѿ домꙋ̀ а҆минода́влѧ с хол̑҇мꙋ.
ѻ҆зїѧ же и҆ бра́тъ е҆го сн҃ове а҆минода́вли.
везѧ́хꙋ ко́ла съ кїѻ́том꙽ гн҃им꙽ и҆ братїа е҆го и҆дѧ́хꙋ пред̑ киѻ҆́том꙽ бж҃їим̑·

И҆ дв҃дъ и҆ сн҃ове і҆и҆л҃еви и҆дѧ́хꙋ пред̑ гм҃ъ и҆гра́юще въ ѻ҆рга́ны ѹ҆строе́ных̑ въ крѣ́пости и пѣнїих̑ и҆ въ гꙋ́слех̑, и҆ въ свири́лех̑ и҆ в꙽ тим̑панх̑ѣ и҆ въ кѵм̑валх̑ѣ·

И҆ прїидо́ша до а҆лоно́на нахо́рска.
и҆ прострѐ ѻ҆зі́ѧ рꙋкꙋ свою̀ на кїѻт̑ бж҃їи придръжа́ти.
и҆ ꙗ҆́тъ за́нь, ꙗ҆́ко превраща́ше е҆го те́лецъ·

И҆ разгнѣ́васѧ гнѣвомъ г҃ь на ѻ҆зїю.
и҆ поразѝ и҆̀ т̂ꙋ г҃ь, и҆ ѹ́мре т̂ꙋ ѿ кїѻ́та гн҃ѧ предъ гм҃ъ·

И҆ въспечалова̀ дв҃дъ, понеж̑ порази г҃ь пораженїемъ ѻ҆зі́ю.
и҆ нарече́сѧ мѣсто т̂о пораже́нїе і҆ѻ҆зі́ино и҆ до сего дн҃е·

И҆ ѹ҆боѧ́сѧ г҃а дв҃дъ въ дн҃ь то́й, гл҃ѧ како сни́детъ къ мнѣ̀ кїѻ́тъ гн҃ь.
и҆ не хотѧ́ше двд̑ъ да бꙋ́детъ ѹ҆ него̀ кїѻ́тъ завѣта бж҃їа въ́ градѣ двд҃вѣ, н̂о затворї и҆̀ дв҃дъ въ домꙋ̀ а҆ведарїи́нѣ ге́ѳ꙽ѳе·

И҆ ста̀ кїѻ́тъ гн҃ь въ домꙋ аведа́ра ге́ѳ꙽ѳе, мс̑҇ць, пѧ́ть.
и҆ блс̑҇ви г҃ь вес̑҇ домъ а҆ведарїи́нъ и҆ вс̂ѧ е҆го·

И҆ възвѣсти́ша цр҃ю дв҃дꙋ гл҃юще.
блс̑҇ви г҃ь до́мъ а҆ведарїи́нъ, и҆ вс̂ѧ е҆го кїѻ́та ради гн҃ѧ.
і҆ и҆дѐ дв҃дъ и҆ взѧ̀ кїѻт̑ бж҃їи, и҆з до́мꙋ а҆ведарїи́на.
и҆ во́ гра̑ двд҃въ въселѝ и҆̀·

И҆ бѣша с ни́мъ несꙋще кїѻ́тъ гн҃ь, сед̑мь по́лкъ наро́да.
и҆ жрътва те́лцем̑ и҆ а҆гнѧ́том̑·

И҆ дв҃дъ бїѧ́ше въ ѻ҆рга́ны ѹ҆строе́ны пред̑ гм҃ъ, и҆ ѻ҆болче́нъ бы́сть дв҃дъ въ ѻ҆деждꙋ бѣлꙋ, и҆ дв҃дъ и҆ весь дом̑ і҆и҆л҃евъ.
несѧхꙋ кїѻ́тъ гн҃ь.
съ во́племъ и҆ съ гласомъ трꙋ́бнымъ.

И҆ бы́сть кїѻ́тꙋ приноси́мꙋ къ градꙋ двд̑вꙋ.
и҆ мельхо́ла дщѝ саѹ́лова призира́ше ѻ҆ко́нцем̑.
и҆ ви́дѣ цр҃ѧ дв҃да ска́чꙋща и҆гра́юще пред̑ кїѻ́том̑ гн҃емъ и҆ ѹ҆ничижѝ и҆̀ въ срд̑цы своем̑·

И҆ внесо́ша кїѻ́тъ гн҃ь, и҆ поста́виша е҆го на мѣ́стѣ е҆го.
посредѣ пола́ты ю҆́же създа̀ дв҃дъ.
и҆ възнесѐ двд҃ъ жрътвꙋ пред̑ г҃а, и҆ ми́рнаѧ·

И҆ съверши двд҃ъ възносѧ́и вс̂ѧсъж꙽женїѧ и҆ ми́рнаѧ.
и҆ блс̑҇ви лю́ди ѻ҆ и́мени гн҃и си́л꙽наго·

И҆ раздѣли́въ вс̂ѧ лю́ди и҆ на всю̀ си́лꙋ і҆и҆л҃евꙋ.
ѿ да́на даже и҆ до вирса́вїѧ, и҆ ѿ мꙋжъ даже и҆ до же́нъ комꙋждо по ѹ҆крꙋхъ хлѣба.
и҆ сковрад̑ныѝ млины̀ и҆ зелїа, ѿ кро́ш꙽вници, і҆ и҆до́ша вс̂и лю́дїе ко́жд̑о в домы̀ своа·

И҆ възврати́сѧ дв҃дъ блс̑҇вити до́мꙋ свое҆го.
і҆ и҆зы́де мельхо́ла дщ̂и саѹ҆́лова на срѣте́нїе дв҃дꙋ.
и҆ блс̑҇ви е҆го и҆ реч̑҇ чт̂о просла́висѧ днс̑҇ь цр҃ю і҆и҃левъ.
ꙗ҆́коже ѿкры́сѧ днс̑҇ь пред̑ ѻ҆чи́ма ра́бъ свои҆хъ.
ꙗ҆́коже ѿкрыва́етсѧ, ѿкрыва́ешисѧ и҆гра́ющимъ·

И҆ рече двд̑ъ къ мельхолѣ.
а҆́зъ пред̑ гм҃ъ и҆гра́хъ.
и҆ блс̑҇венъ г҃ь, и҆же и҆збра̀ м̂ѧ пач̑҇ ѿц҃а твое҆го.
и҆ паче всего до́мꙋ е҆го.
ꙗ҆́ко и҆ поста́ви м̂ѧ властели́на над̑ людмѝ е҆го і҆и҆л҃емъ, сего ради и҆гра́ю и҆ плѧшꙋ̀ пред̑ гм҃ъ·

И҆ ѿкры́юсѧ е҆ще си́це.
и҆ бꙋдꙋ неподо́бенъ пред̑ ѻ҆чи́ма твои́ма и҆ съ ю҆нота́ми с нимиже рече м̂и не провитисѧ·

И҆ ѹ҆ мельхо́лы дщ̂и саѹ́ли не бы́сть дѣтища до дн҃е смр҃ти еѧ̀·

Глв̑҇а, з҃·

И быс̑҇ е҆гда сѣде цр҃ь в домꙋ̀ своем̑ и҆ г҃ь ѹ҆наслѣдѝ и҆̀ надо всѣмѝ врагѝ е҆го·

И҆ рече цр҃ь къ наѳа́нꙋ про̑҇рокꙋ.
с̂е а҆зъ живꙋ̀ в пола́тахъ ке́дрънах̑ и҆ кїѻ́тъ бж҃їи по́средѣ да стои́тъ·

И҆ рече наѳа́нъ къ цр҃ю.
вс̂е е҆ли́ко а҆ще е҆сть на срд̑цы твое҆мъ, ходѝ и҆ творѝ ꙗ҆́ко г҃ь е҆сть с тобо́ю·

И҆ бы́сть в но́щи то́и глс̑҇а гн҃ь къ наѳа́нꙋ гл҃ѧ·

Идѝ и҆ рцы̀ рабꙋ̀ мое҆мꙋ дв҃дꙋ, си́це гл҃етъ г҃ь.
не и҆́маши т̂ы сътвори́ти до́мꙋ на пребыва́нїе мн̂ѣ·

Ꙗ҆́ко не ѻ҆бита́хъ въ домꙋ̀ ѿ ни́хже дн҃їи и҆зведо́хъ сн҃ы і҆и҆л҃евы.
и҆зъ землѧ̀ е҆гѷпетъски до дн҃е сего̀.
н̂о токмо бѣхъ пребыва́ѧ въ ѻ҆би́телищихъ и҆ в сѣни·

И҆ въ все́мъ и҆дѣже а҆ще вхожа́хъ въ всемъ і҆и҆л҃и.
а҆ще гл҃ѧ гл҃ахъ къ е҆ді́номꙋ колѣ́нꙋ, е҆мꙋже заповѣ́дахъ па́сти люди моѧ і҆и҆л҃ѧ гл҃ѧ почто не създа́сте м̂и до́мꙋ ке́дрена·

То нн҃ѣ сѝ да рече́ши рабꙋ̀ мое҆мꙋ дв҃дꙋ.
си́це гл҃етъ г҃ь вседержи́тель.
поꙗ҆́хъ т̂ѧ ѿ па́жити ѻ҆́вчаѧ на вла́стельство лю́демъ мои҆мъ і҆и҆л҃ю·

И҆ нн҃ѣ е҆смъ с тобо́ю вездѣ̀ а҆́може и҆́деши, і҆ и҆скоренихъ врагѝ твоѧ ѿ лица̀ твое҆го.
и҆ сътвори́хъ т̂ѧ и҆мени́та по и҆́мени вели́ких̑ и҆же сꙋть на землѝ·

И҆ положꙋ̀ мѣсто лю́дем̑ мои҆мъ і҆и҆л҃ю.
и҆ насажꙋ̀ и҆хъ, и҆ вселѧ́тсѧ в себѐ са́ми, и҆ не въскорби́тъ никогда̀, и҆ не приложит̑ сн҃ъ непра́вды ѻ҆би́дѣти е҆го, ꙗ҆́кож̑ и҆спрь́ва·

И҆ с̂е ѿ дн҃їи в нѧ́же поста́вихъ сꙋдїѧ въ і҆и҆л҃и въ лю́дехъ моих̑ и҆ поко́ю т̂ѧ ѿ всѣхъ вра́гъ твоих̑, и҆ възвѣсти́тъ т̂и г҃ь ꙗ҆ко съзи́ждеши до́мъ е҆мꙋ·

И҆ бꙋдетъ е҆гда сконча́ютсѧ дн҃їе твоѝ, и҆ ѹ҆сне́ши съ ѿц҃ы твои҆ми.
и҆ въста́влю сѣмѧ твое по тебѣ̀, и҆же е҆сть ѿ чре́ва твое҆го, и҆ ѹ҆гото́влю црс̑҇тво е҆го·

И҆ то́и съзи́ждетъ дом̑ и҆́мени мое҆мꙋ, и҆ ѹ҆пра́влю прс̑҇тлъ е҆го до́ вѣка·

А҆з꙽ бꙋдꙋ е҆мꙋ въ ѿц҃ъ, и҆ то́и бꙋдет̑ м̂и въ сн҃ъ.
а҆ще прїидетъ непра́вда е҆го, и҆ а́зъ ѻ҆бличꙋ̀ и҆̀ па́лицею мꙋжа наставле́нїе сн҃омъ чл҃ческимъ·

И҆ млс̑҇ти же мое́ѧ не ѻ҆ста́влю ѿ него, ꙗ҆́коже ѿстꙋпи́хъ е҆гда̀ ѿстꙋпи́ша ѿ лица̀ мое҆го·

И҆ вѣ́ровати и҆́мать до́мъ е҆го, и҆ црс̑҇тво е҆го до́ вѣка предо мно́ю, и҆ прс̑҇тлъ е҆го бꙋдетъ и҆справле́нъ до́ вѣка·

И҆ по всѣхъ словесех̑ си́хъ, и҆ по всемꙋ̀ видѣнїю се́мъ, та́ко гл҃а наѳа́нъ къ дв҃дꙋ·

И҆ вни́де цр҃ь дв҃дъ, и҆ сѣде пред̑ гм҃ъ, и҆ рече кт̂о е҆смъ а҆зъ г҃и мо́и г҃и, и҆л̂и чт̂о до́м꙽ мой, ꙗ҆́ко възлюбѝ м̂ѧ до сего·

И҆ съгрѣшихъ пред̑ тобо́ю мно́го г҃и мо́и г҃и, и҆ гл҃а до́мꙋ ра́ди раба̀ свое҆го и҆здале́ча, си́це же за́конъ чл҃кꙋ г҃и мой г҃и·

И҆ чт̂о приложи́тъ дв҃дъ е҆ще гл҃ати к тебѣ, и҆ нн҃ѣ ты̀ вѣси г҃и мой г҃и раба̀ свое҆го·

И҆ раба̀ своег̑҇ ради сътворѝ, и҆ по срд̑цꙋ свое҆мꙋ, сътворѝ вс̂е вели́чество с̂е, позна́ти раба̀ свое҆го·

Вели́чїѧ ради твое҆го г҃и мой г҃и, нѣ́сть б̂о и҆́нъ ꙗ҆́коже ты̀, и҆ нѣ́сть б҃а ра́звѣи тебѐ въ всх̑ѣ ꙗ҆́же слы́шахом꙽ ѹ҆ши́ма на́шима.

И҆ кт̂о ꙗ҆́коже лю́дїе твоѝ і҆и҆л҃ь.
ꙗ҆́зык̑҇ и҆́нъ на землѝ.
ꙗ҆́коже наста́ви и҆хъ б҃ъ е҆же и҆зба́вити себѣ̀ людїи.
и҆ е́же положи́ти себѣ̀ и҆́мѧ.
и҆ е҆же сътвори́ти вели́чїе.
и҆ просвѣте́нїе е҆же приꙗ҆́ти и҆хъ ѿ лица̀ людїи си́хъ.
и҆́хже и҆зба́вихъ себѣ̀ ѿ е҆гѷпта.
ꙗ҆́зы́ки и҆ селища·

И҆ ѹ҆гото́ва себѣ̀.
лю́ди своѧ і҆и҆л҃евъ лю́ди на́ вѣкъ.
и҆ т̂ы г҃и бꙋди и҆мъ въ б҃ъ·

И҆ нн҃ѣ г҃и мой г҃и.
гл҃ъ и҆же гл҃а ѻ҆ рабѣ̀ свое҆м꙽ и҆ ѻ҆ домꙋ̀ е҆го ѹ҆вѣрѝ до́ вѣка.
ꙗ҆́коже гл҃а сътворѝ·

И҆ нн҃ѣ да възвели́читсѧ и҆́мѧ твое до́ вѣка.
гл҃ѧ·

Гь҃ вседержи́тель б҃ъ над̑ і҆и҆л҃емъ.
и҆ до́м꙽ раба̀ твое҆го дв҃да.
да бꙋдетъ и҆справле́нъ пред̑ тобо́ю·

Ꙗ҆́ко т̂ы г҃ь вседержитель б҃ъ і҆и҆л҃евъ.
ѿверзе ѹ҆́хо рабꙋ̀ твое҆мꙋ гл҃ѧ до́м꙽ съзида́ю т̂и сего ради ѻ҆брѣте рабъ твои срд̑це своѐ е҆же помоли́тисѧ тебѣ̀ мл҃твою сею̀·

И҆ нн҃ѣ г҃и мои г҃и ты̀ е҆си б҃ъ.
и҆ словеса̀ твоѧ̀ бꙋдꙋтъ и҆́сти́нна.
и҆ гл҃а раба̀ ради твое҆го бл҃гаѧ сїѧ·

И҆ нн҃ѣ начнѝ и҆ блс̑҇ви до́мъ раба̀ с̂и.
ꙗ҆́ко бы́ти е҆мꙋ въ вѣки пред̑ тобо́ю.
ꙗ҆́ко ты̀ г҃и мой г҃и.
гл҃а ѿ блс̑҇венїѧ твое҆го.
да блс̑҇витсѧ до́мъ раба̀ твое҆го пред̑ тобо́ю·

Глв̑҇а, и҃·

И бы́сть по си́хъ и҆ побѣдѝ дв҃дъ и҆ноплеме́нники.
и҆ смирѝ и҆хъ.
и҆ прїꙗ҆́тъ двд̑ъ ѿлꙋче́нїе ѿ рꙋкѝ и҆ноплеме́нникъ·

И҆ ѹ҆бѝ дв҃дъ моава, и҆ раздѣлѝ ѧ҆̀ на ча́сти и҆ положѝ ѧ҆̀ на землѝ.
и҆ бы́ста дв̂ѣ ча́сти на ѹ҆мръщве́нїе и҆ на наполне́нїе тре́теѝ ча́сти.
и҆ бы́ша моа́влѧне двд̑ви рабѝ да́ю҆ще е҆мꙋ да́нь·

И҆ ѹбѝ двд̑ъ а҆драза́ра, сн҃а раа́влѧ цр҃ѧ сꙋ́вска.
и҆дꙋщꙋ е҆мꙋ наста́вити предѣлъ на рецѣ е҆фра́тъстѣи·

И҆ пред̑взѧ̀ дв҃дъ е҆же ѿ е҆го, ҂а҃, колесни́цъ.
и҆ ҂з҃ ко́нниковъ, и҆ ҂к҃ мꙋжъ пѣшъцовъ.
и҆ раздрꙋшѝ дв҃дъ вс̂ѧ ѻ҆рꙋжїа и҆ ѻ҆ста̀ е҆мꙋ ѿ нихъ.
р҃ колесни́цъ·

І҆ и́де в сѷрїю дама́сковꙋ, на по́мощъ а҆драза́рꙋ цр҃ю сꙋ́вскꙋ.
и҆ ѹ҆бѝ дв҃дъ ѿ сѷрїѧ, ҂к҃в, мꙋжъ·

И҆ поста́ви т̂ꙋ дв҃дъ блюсти́телѧ в сѷрїи, ꙗ҆́же под̑ дама́скомъ.
и҆ бы́сть сѷрїѧ двд̑ви в рабїю да́юще да́нь, и҆ сп҃са́ше г҃ь дв҃да а҆може и҆дѧ́ше·

И҆ прїѧ́тъ дв҃дъ по́ꙗ҆сы зла́тыѧ и҆же бѣша на ѻ҆́троцх̑ѣ а҆драза́рихъ цр҃ѧ сꙋ́вска.
и҆ принесѐ ѧ҆̀ въ і҆ерс̑҇лі́мъ·

И҆ взѧт̑ ѧ҆̀ сꙋсаки́мъ цр҃ь е҆гѷпетъскъ, е҆гда приходѝ въ і҆ерс̑҇лі́мъ въ дн҃и ровоа́ма сн҃а соло́монѧ.
и҆ ѿ метева́ка.
и҆ ѿ и҆збо́рныхъ гра́дъ а҆драза́ровъ.
и҆ взѧ̀ дв҃дъ мѣ́дь мно́гꙋ ѕѣло·

Тою̀ б̂о мѣ́дїю сътворѝ мо́ре мѣ́дѧно соло́монъ.
и҆ столпы̀ и҆ ба́нѧ и҆ вс̂ѧ сосꙋ́ды, и҆ слы́ша сево́и цр҃ь и҆́мах̑, ꙗ҆́ко и҆збѝ дв҃дъ вс̂ю си́лꙋ а҆драза́рю·

И҆ посла̀ ѳо́ѹ҆ и҆е҆дꙋра́ма сн҃а свое҆го къ цр҃ю дв҃дꙋ.
въпроси́ти и҆̀ ꙗ҆́же ѻ҆ ми́рѣ.
и҆ ѻ҆ блс̑҇вити и҆̀ поне́же побѣдѝ а҆драза́ра.
и҆ ѹ҆бѝ и҆̀ занѐ съпротивлѧ́ѧсѧ б̂ѣ а҆драза́рꙋ.
и҆ в рꙋкꙋ е҆го бѧ́ше сосꙋ́ды сре́брены и҆ зла́ты, и҆ сосꙋ́ды мѣдѧны·

И҆ сїѧ блс̑҇ви цр҃ь дв҃дъ г҃ꙋ со сребро́мъ и҆ зла́томъ и҆же ѻ҆ст҃и ѿ всеѧ бра́ни·

И҆же наси́лова ѿ и҆дꙋме́а и҆ ѿ моа́ва, и҆ ѿ сн҃в꙽ а҆м꙽мо́нь.
и҆ ѿ и҆ноплеме́нникъ.
и҆ ѿ ам̑мали́ка.
и҆ ѿ коры́сти а҆драза́рихъ сн҃а роа́влѧ цр҃ѧ сꙋ́вска·

И҆ сътворѝ дв҃дъ себѣ̀ сла́вꙋ е҆гда̀ възъврати́сѧ побѣ́ждъ и҆дꙋме́ю.
в꙽ геле́мѣ, съ ҂и҃і·

И҆ поста́ви въ и҆дꙋмѣи дв҃дъ блюстителѧ, и҆ бы́ша вс̂и и҆дꙋмѣ́и рабѝ дв҃дꙋ.
и҆ сп҃се г҃ь дв҃да вездѣ̀ а҆́може а҆ще и҆дѧ́ше·

И҆ црс̑҇твова̀ дв҃дъ над̑ і҆и҆л҃емъ.
и҆ бѣ дв҃дъ творѧ́и сꙋдъ и҆ пра́вдꙋ, надо всѣми людмѝ е҆го·

І҆ѻ҆а́въ сн҃ъ сарꙋ́инъ над̑ во́и҆нъствїи е҆го.
і҆ и҆а҆сафаѳ̑҇ сн҃ъ а҆хилꙋдовъ въ паметописа́нїи·

И҆ садокъ сн҃ъ а҆хи́товъ, и҆ а҆вимелех̑ сн҃ъ а҆вїа҆ѳа́ръ жерцы̀.
и҆ саса́и кни́жникъ·

И҆ ванѣ́асъ сн҃ъ и҆ѻ҆да́нь б̂ѣ совѣтник꙽, и҆ ѻ҆ хеле́ѳъ, и҆ ѻ҆ ѳет̑, и҆ сн҃ове дв҃дви пола́тамъ строи́теле бѣша·

Глв̑҇а, ѳ҃·

И рече дв҃дъ а҆ще е҆сть гдѣ̀ е҆ще ѻ҆ста́нокъ домꙋ саѹ́лѧ.
и҆ сътворю̀ с ни́ми ми́лость і҆ѻ҆а҆наѳа́на ради·

И҆ ѿ до́мꙋ саѹ́лѧ б̂ѣ ѿрокъ и҆мѧ е҆мꙋ си́ва.
и҆ призва́ша и҆̀ къ дв҃дꙋ.
и҆ рече к немꙋ̀ дв҃дъ цр҃ь.
ты̀ л̂и е҆си си́ва ѻ҆́трокъ.
и҆ рече си́ва аз̑ ра́бъ твои·

И҆ рече цр҃ь ѻ҆ста̀ ли сѧ е҆ще ѿ до́мꙋ саѹ́лѧ гдѣ̀ мꙋжъ.
и҆ сътворю̀ с ни́мъ млс̑҇ть бж҃їю.
и҆ рече си́ва къ цр҃ю.
е҆ще е҆сть сн҃ъ и҆ѻ҆а҆наѳа́нь, хро́мъ нога́ми·

И҆ рече цр҃ь гдѣ е҆сть.
и҆ рече си́ва къ цр҃ю.
с̂е в домꙋ̀ махе́ровѣ сн҃а а҆мїи́лѧ ѿ лодава́ры·

И҆ посла̀ цр҃ь дв҃дъ и҆ поѧ́тъ и҆̀ ѿ до́мꙋ махе́рова, сн҃а а҆мїи́лѧ ѿ лодава́ры·

И҆ прїиде мем꙽ѳивосте́и сн҃ъ и҆ѻ҆а҆наѳа́нь сн҃а саѹ́лова къ цр҃ю дв҃дꙋ.
и҆ па́дъ на лицы̀ свое҆мъ, и҆ поклони́сѧ е҆мꙋ.
и҆ рече е҆мꙋ дв҃дъ мем̑ѳивосте́ю и҆ рече с̂е ра́бъ твои·

И҆ рече е҆мꙋ дв҃дъ.
не бои́сѧ ꙗ҆́ко творѧ̀ сътворю̀ с тобо́ю млс̑҇ть, и҆ѻ҆а҆наѳа́на ради ѿц҃а т̂и.
и҆ дамъ т̂и вс̂ѧ се́ла саѹ́лѧ дѣ́да твое҆го.
а҆ ты̀ ѧж̑ хлѣ́бъ на трапе́зѣ мое́и всегда̀·

И҆ поклони́сѧ е҆мꙋ мем꙽ѳивосте́и.
и҆ рече кто е҆смь а҆зъ рабъ твои и҆же призрѣ̀ на ѱа̀ ѹ҆ме́рша на менѐ·

И҆ призва̀ цр҃ь си́вꙋ ѻ҆тро́чища саѹ́лѧ.
и҆ рече е҆мꙋ вс̂е е҆ли́ко е҆сть саѹ́ле.
весь до́мъ е҆го да́хъ сн҃ꙋ господи́на т̂и·

да дѣлае҆ши зе́млю.
ты̀ и҆ сн҃ове твоѝ, и҆ рабѝ твоѝ.
и҆ да приноси́ши сн҃ꙋ господи́на твое҆го хлѣбы да ꙗ҆́сть.
и҆ мем꙽ѳивосте́и сн҃ъ господи́на т̂и да ꙗ҆́сть хлѣбы всегда̀ на трапе́зѣ мое́и.
и҆ ѹ҆ си́вы бѧ́ше е҃і сн҃овъ, и҆ к҃ ра́бъ·

И҆ рече си́ва къ цр҃ю ѻ҆ всѣхъ и҆хже заповѣ́да.
дасть м̂и господи́нъ и҆ цр҃ь.
та́ко да сътворю̀ ра́бъ твои.
и҆ мем꙽ѳивосте́и ꙗ҆дѧ́ше на трапе́зѣ дв҃двѣ.
ꙗ҆ко е҆ді́нъ ѿ сн҃овъ цр҃ьскихъ·

И҆ мемѳивоа́лꙋ сн҃ъ б̂ѣ ма́лъ.
и҆́мѧ е҆мꙋ ми́ха.
и҆ всѧко и҆мѣнїе до́мꙋ сиво́нѧ рабѝ бѧ́хꙋ мемѳивосте́ѻ҆вы·

И҆ мемѳивосте́и живѧ́ше въ і҆ерс̑҇лі́мѣ.
и҆ на трапезѣ цр҃евѣ ꙗ҆дѧ́ше всегда̀ и҆ то́и бѧ́ше хро́мъ ѻ҆бѣма нога́ма свои́ма·

Глв̑҇а, і҃·

И бы́сть по си́хъ ѹ҆́мре цр҃ь сн҃овъ а҆намо́них̑.
и҆ црс̑҇твова сн҃ъ е҆го а҆но́нъ в него мѣсто·

И҆ рече дв҃дъ да сътворю̀ млс̑҇ть съ а҆на́номъ сн҃омъ а҆́совымъ а҆мо́шимъ.
и҆мже ѻ҆́бразомъ сътворѝ ѿц҃ъ е҆го млс̑҇ть со мно́ю.
и҆ посла̀ дв҃дъ послы̀ на ѹ҆тѣше́нїе рабы̀ своѧ ѻ҆ ѿц҃ы е҆го.
и҆ прїидо́ша ѻ҆́троцы дв҃двы в зе́млю сн҃овъ а҆м꙽монихъ·

И҆ рѣша старѣ́ишины а҆м꙽мо́ни къ а҆но́нꙋ господи́нꙋ свое҆мꙋ.
не прославле́нїѧ ра́ди ѿц҃а твое҆го, пꙋсти́лъ е҆сть дв҃дъ к тебѣ ѹ҆тѣши́телѧ.
н̂о да и҆спыта́ют̑ гра́дъ и҆ съглѧдают̑ е҆го.
того ра́ди пꙋстѝ дв҃дъ рабы̀ своѧ к тебѣ·

И҆ поꙗ҆́тъ а҆но́нъ ѻ҆́троки дв҃двы и҆ ѻ҆стрижѐ бра́ды и҆мъ.
и҆ ѿрѣза ѻ҆дѣꙗ҆́нїѧ и҆хъ въ срѣди до по́ѧса, и҆ ѿпꙋстѝ ѧ҆̀·

И҆ възвѣсти́ша дв҃дꙋ гл҃юще ѻ҆ мꙋже́хъ.
и҆ посла̀ проти́вꙋ им̑.
ꙗ҆́ко бѣша мꙋжи т̂ы что́мы ѕѣ́ло.
и҆ рече цр҃ь сѣди́те въ е҆рихо́нѣ, до́нде̑ възрастꙋтъ бра́ды ва́ша.
и҆ тогда сѧ възврати́те·

И҆ ви́дѣша сн҃ове а҆м꙽мо́ни ꙗ҆́ко посрамле́ни бы́ша мꙋжы дв҃двы.
и҆ посла́ша сн҃ове ам̑мо́ни.
и҆ наꙗ҆́ша сѷрїю виѳроа́мовꙋ.
и҆ сѷрїю со́вовꙋ.
и҆ ро́воѻ҆вꙋ, ҂к҃, пѣшца.
и҆ цр҃ѧ а҆м꙽мали́кова маа́хи, ҂а҃, мꙋжъ.
і҆ и҆стовъскихъ мꙋжъ ҂в҃і·

И҆ слы́ша дв҃дъ.
и҆ посла̀ і҆ѻ҆а́ва и всю̀ си́лꙋ си́лныхъ·

І҆ и҆зыидо́ша сн҃ове а҆м꙽мони.
и҆ ѹ҆строи́ша бра́нь пред̑ вра́ты гра́да.
и҆ сѷрѧ́не сꙋвїинї и́ ровъ, і҆ и҆стовъ.
и҆ а҆м꙽мали́киты е҆ді́ни ста́ша на селѣ̀·

И҆ ви́дѣ и҆ѻ҆а́въ ꙗ҆́ко бы́ти и҆мъ с ни́ми в лицѐ бра́ни.
ѿ лица̀ проти́вныхъ и҆зъза́дꙋ и҆збра̀ ѿ всѣхъ ю҆́ношъ і҆и҆л҃въ и҆ ѹ҆стро́и ѧ҆̀ проти́вꙋ сѷрѧ́нъ·

І҆ и҆збы́токъ людїи да́сть в рꙋцѣ бра́тꙋ свое҆мꙋ а҆ве́сѣ.
и҆ ѹ҆строи ѧ҆̀ противꙋ сн҃омъ а҆м꙽мо́немъ·

И҆ рече и҆ѻ҆а́въ къ а҆весѣ.
а҆ще ѹ҆держит̑сѧ сѷрїѧ паче мене, то бꙋди м̂и на сп҃сенїе.
сн҃ове же а҆м꙽мо́ни.
а҆ще ѻ҆держа́тъ па́че тебѐ, т̂о бꙋдевѣ сп҃са́юще тебе·

І҆ ѹ҆крѣпи́мсѧ, и҆ мꙋжа́имсѧ ѻ҆ лю́дехъ на́ю, и҆ ѻ҆ гра́дѣ б҃а на́шего.
и҆ г҃ь сътворит̑ бл҃го пред̑ ѻ҆чи́ма свои҆ма·

И҆ прїиде и҆ѻ҆а́въ и҆ лю́ди е҆го с ни́мъ на́ брань на сѷрїю.
и҆ бѣжа̀ ѿ лица̀ и҆хъ·

И҆ ви́дѣвше сн҃ове а҆м꙽мони.
ꙗ҆́ко бѣжаша сѷрѧ́не.
и҆ тїи бѣжа́ша ѿ лица а҆ве́сы, і҆ и҆до́ша въ́ град̑, и҆ възврати́сѧ и҆ѻ҆ав̑҇ ѿ сн҃овъ а҆м꙽монь.
и҆ прїиде въ і҆ерс̑҇лім̑·

И҆ ви́дѣвше сѷрѧ́не.
ꙗ҆́ко не мого́ша проти́витисѧ і҆и҆л҃ьтомъ.
и҆ събра́шасѧ въкꙋ́пѣ, и҆ посла̀ а҆драза́ръ.
и҆ приведѐ сѷрїꙗ҆не и҆же ѻ҆бонъ полъ реки халама́ка.
и҆ прїидоша въ е҆ѻ҆ла́мъ и҆ съва́къ.
старѣишина б̂ѣ си́ли а҆драза́ровы пред̑ ними·

И҆ възвѣсти́ша дв҃дꙋ.
и҆ събра̀ весь і҆и҆л҃ь и҆ пре́иде і҆ѻ҆рда́нъ.
и҆ прїиде въ е҆лам̑·

И҆ ѹ҆строи́шасѧ сѷрѧ́не на дв҃да, и҆ бра́шасѧ с ни́мъ·

И҆ бѣжа́ша сѷрѧ́не ѿ лица̀ і҆и҆л҃ьтѧнъ.
и҆ взѧ̀ дв҃дъ ѿ сѷрїѧ, з҃, со́тъ колесни́цъ, и҆ ҂м҃, ко́нникъ.
и҆ съва́ка старѣ́ишинꙋ е҆го ѹ҆бѝ, и҆ ѹ҆́мре т̂ꙋ·

И҆ ви́дѣша вс̂и цр҃и.
и҆ рабѝ а҆драза́ри, ꙗ҆́ко падо́ша пред̑ і҆и҆л҃емъ.
и҆ повинꙋшасѧ і҆и҆л҃ю.
и҆ порабо́таша и҆мъ.
и҆ ѹ҆боѧ́шасѧ сѷрѧ́не.
ꙗ҆́ко не ѹ҆цѣлѣти ктомꙋ̀ сн҃омъ а҆м꙽мо́немъ·

Глв̑҇а, а҃і·

И бы́сть по възвраще́нїи лѣта того̀.
въ времѧ и҆схожде́нїѧ цр҃емъ на́ брань.
и҆ посла̀ дв҃дъ і҆ѻ҆а́ва, и҆ ѻ́троки е҆го с ним̑.
и҆ всего і҆и҆л҃ѧ.
и҆ расточѝ сн҃ы а҆м꙽монѧ.
и҆ ѻ҆бъсѣдо́ша ѻ҆́крс̑҇тъ рава́ѳа.
и҆ дв҃дъ сѣде въ і҆ерс̑҇лі́мѣ·

И҆ бы́сть при ве́черѣ, и҆ въста́въ дв҃дъ с ло́жа свое҆го.
и҆ хожда́ше по пола́тѣ въ домꙋ̀ свое҆мъ, и҆ ви́дѣ женꙋ̀ с пола́ты мы́ющꙋсѧ·

и҆ бѣ жена̀ взо́рꙋ добра велмѝ·

И҆ посла̀ дв҃дъ и҆ в꙽зы́ска жены̀ и҆ рече.
нѣсть ли с̂е версавіи дщи е҆лїа́влѧ, жена̀ ѹ́рїѧ хетѳе́ѧ·

И҆ посла̀ дв҃дъ слꙋги своѧ и҆ приведо́ша ю҆̀.
і҆ и҆ вни́де к не́и, и҆ лѧ́же с не́ю.
и҆ та б̂ѣ ѻ҆чи́стиласѧ ѿ нечистоты̀ свое́ѧ.
и҆ въста́вши възврати́сѧ в до́мъ свои·

И҆ зача́тъ жена̀ въ чревѣ и҆ посла́вши възвѣстѝ дв҃дꙋ и҆ рече.
с̂е а҆зъ въ чревѣ зачахъ·

И҆ посла̀ дв҃дъ къ и҆ѻ҆а́вꙋ, гл҃ѧ.
послѝ къ мнѣ ѹ́рїю хетѳе́ѧ.
и҆ посла̀ и҆ѻ҆а́въ ѹ҆́рїю къ дв҃дꙋ·

И҆ прїиде ѹ́рїѧ къ дв҃дꙋ.
и҆ въпросѝ е҆го дв҃дъ ѻ҆ здра́вїи и҆ѻ҆а́ва.
и҆ ѻ҆ здра́вїи людїи, и҆ ѻ҆́ ми́рꙋ и҆ ѻ҆ бра́ни, и҆ рече дв҃дъ къ ѹ́рїи дои҆дѝ в дом̑ свои ѹ҆мы́и ноѕѣ своѝ.
и҆́де ѹ́рїѧ и҆з до́мꙋ цр҃ева.
і҆ и҆де въ слѣдъ е҆го слꙋга цр҃евъ·

И҆ спа̀ ѹ́рїѧ пред̑ вра́ты до́мꙋ цр҃ева, со рабы̀ господи́на свое҆го, а҆ не ходѝ в до́мъ свои.
и҆ възвѣсти́ша дв҃дꙋ гл҃юще ꙗ҆́ко не ходѝ ѹ́рїѧ в до́мъ свои, и҆ рече дв҃дъ къ ѹ́рїи.
нѣси л̂и ты̀ с пꙋтѝ прише́лъ т̂о что̀ с̂е нѣси в дом̑ свои пришел̑҇·

И҆ рече ѹ́рїѧ.
киѻ́тъ бж҃їи і҆и҆л҃ь, и҆ѹ҆де́е пребыва́ютъ въ кровѣхъ, а҆ господи́нъ мои і҆ѻ҆а́въ, и҆ рабѝ господи́на мое҆го, на лицы̀ всѣхъ селъ пребыва́ютъ, т̂о ка́ко а҆зъ вни́дꙋ в домъ свои ꙗ҆́сти и҆ пи́ти и҆л̂и спа́ти съ жено́ю свое́ю, жива̀ бꙋдетъ дш҃а моа̀, а҆ще сътворю̀ аз̑ гл҃ы сїѧ·

И҆ рече дв҃дъ къ ѹ́рїи, посѣди зд̂ѣ днесь и҆ ѹ́тро, и҆л̂и тре́тїꙗ҆го дн҃е и҆ пꙋщꙋ т̂ѧ.
и҆ пребысть ѹ҆́рїѧ въ і҆ерс̑҇ли́мѣ въ то́й дн҃ь и҆ въ дрꙋгы́и·

И҆ призва̀ дв҃дъ ѹ҆́рїю.
и҆ ѻ҆бѣ́давъ с нимъ и҆ питъ, и҆ ѹ҆пи́сѧ, і҆ и́де вечеръ спа́ти на ло́же свое, съ рабы̀ господи́на свое҆го, а҆ в дом̑ свои не и҆дѐ·

И҆ бы́сть ѹ҆́тро и҆ напи́са дв҃дъ кни́ги къ і҆ѻ҆а́вꙋ, и҆ пꙋстѝ рꙋко́ю ѹ҆́рїиною·

И҆ напи́са въ кни́гахъ гл҃ѧ.
пꙋстѝ ѹ́рїю проти́вꙋ бра́ни лꙋ́чшеи.
и҆ възвратитесѧ въспѧ́ть ѿ него̀ да ꙗ҆́з꙽венъ ѹ҆́мретъ·

И҆ бы́сть е҆гда̀ хранѧ и҆ѻ҆а́въ ѹ҆ гра́да.
и҆ поста́ви и҆ ѹ́рїю на мѣ́стѣ.
ѿнꙋдꙋже вѣдѧ́ше мꙋ́жа сꙋща си́лны т̂ꙋ·

І҆ и҆зыдо́ша мꙋ́жи и҆з гра́да, и҆ бїѧ́хꙋсѧ съ і҆ѻ҆а́вом̑ и҆ падо́ша мно́ѕи ѿ люді́и.
и҆ ѿ ра́бъ двд҃въ.
ѹ҆́мре же и҆ ѹ́рїѧ хетѳе́инъ и҆ посла̀ и҆ѻ҆а́въ и҆ възвѣсти т̂а двд̑ви вс̂ѧ рѣ́чи ꙗ҆́же ѻ҆ бра́ни гл҃ѧ·

И҆ заповѣ́да и҆ѻ҆а́въ послꙋ̀ гл҃ѧ, е҆гда скон꙽ча́еши вс̂ѧ рѣчи, ꙗ҆́же ѻ҆ бра́ни къ цр҃ю гл҃ѧ.
а҆́ще па́че разгнѣ́ваетсѧ цр҃ь и҆ речет꙽ ти.
т̂о почто̀ приближи́стесѧ къ гра́дꙋ на́ брань.
не вѣсте ли ꙗ҆́ко стрѣлѧ́ютъ съ стѣны̀·

Кто е҆сть ѹ҆би́лъ а҆вимеле́ха сн҃а и҆е҆ровоа́млѧ, сн҃а ни́рова.
не жена̀ ли ес̑҇ връ́гла на́нь ѹ҆лом꙽комъ жер꙽нова съ стѣны̀, и҆ ѹ҆рази е҆го и҆ ѹ́мре въ ѳаме́сѣ.
т̂о почто̀ пристꙋпа́сте ко стѣнѣ.
и҆ речеши и҆б̂о и҆ ра́бъ тво́и ѹ҆́рїѧ хет꙽ѳе́инъ, ѹ҆бїенъ бы́сть и҆ ѹ́мре·

І҆ и́де посо́лъ и҆ѻ҆а́вль къ цр҃ю въ і҆ерли́мъ.
и҆ прїиде и҆ възвѣсти́ дв҃дꙋ вс̂е е҆ли́ко гл҃а е҆мꙋ и҆ѻ҆а́въ вс̂ѧ гл҃ы бра́ни·

И҆ разгнѣ́васѧ дв҃дъ на и҆ѻ҆а́ва.
и҆ рече дв҃дъ къ послꙋ̀.
почто е҆сте приближи́лисѧ къ гра́дꙋ би́тисѧ·

Не вѣ́дасте ли ꙗ҆́ко ꙗ҆́звенїю е҆сть мно́гꙋ бы́ти съ стѣны̀.
кт̂о ѹ҆би а҆вимеле́ха сн҃а и҆е҆ровоа́млѧ не жена л̂и е҆сть връгла ка́мень жернова съ стѣны̀.
и҆ ѹ́мре въ ѳаме́сѣ, и҆ почто б̂о приближи́стесѧ къ стѣнѣ̀·

И҆ рече посо́лъ къ дв҃дꙋ, ꙗ҆́ко ѹ҆крышасѧ на́ ны мꙋжи і҆ и҆зыдо́ша на́ ны на село̀.
и҆ гони́хомъ ѧ҆̀ до вра́тъ гра́да·

И҆ стрѣлѧша стрѣ́лцы съ стѣны̀ в ны̀, и҆ ѹ҆стрѣли́ша ѿ ѻ҆́трок̑҇ цр҃ьскихъ.
и҆ ѹ́рїю хет꙽ѳе́ина ѹ҆би́ша·

И҆ рече дв҃дъ къ послꙋ̀ си́це.
да речеши къ и҆ѻ҆а́вꙋ, да не бꙋ́дет ти печа́ль пред̑ ѻ҆чи́ма словесѐ.
ꙗ҆́ко ѻ҆́вогда си́це ѻ҆́вогда ѻ҆на́ко бывает̑ сѣчъ, и҆ ѹ҆крѣпи бра́нь твою на град̑, и҆ раскопа и҆̀·

И҆ слыша жена̀ ѹ҆́рїина ꙗ҆́ко ѹ҆бїенъ бы́сть мꙋ́жъ е҆ѧ̀.
и҆ рыдаше по мꙋжи свое҆мъ, и҆ пла́касѧ.
і҆ и҆схожаше гла́съ пла́ча е҆ѧ̀.
и҆ посла́въ дв҃дъ приведе́ ю в домъ сво́и и҆ бы́сть е҆мꙋ жена̀.
и҆ роди е҆мꙋ сн҃ъ, и҆ лꙋка́вен̑҇ ꙗ҆ви́сѧ гл҃ъ.
и҆же сътвори дв҃дъ пред̑ ѻ҆чи́ма гн҃има·

Глв̑҇а, в҃і·

И посла̀ г҃ь наѳа́на прро̑҇ка къ дв҃дꙋ.
и҆ внїиде к немꙋ, и҆ рече е҆мꙋ ѿвѣща́и м̂и цр҃ю нн҃ѣ сꙋ́дъ и҆ рече е҆мꙋ.
дв̂а мꙋ́жа бѣ́ста въ е҆ді́номъ градѣ.
е҆ді́нъ бога́тъ а҆ дрꙋгїи ѹ҆бо́гъ·

И҆ ѹ҆ бога́таго стада бѧ́хꙋ и҆ бꙋи́воли мно́ѕи ѕѣ́ло·

А҆ ѹ҆ ѹ҆бо́гаго не бѣ̀ ничто́же.
н̂о токмо а҆́гница е҆ді́на ма́ла, ю҆́же стѧ́жа и҆ ѹ҆строи ю҆̀, и҆ въскорми ю҆̀ и҆ възрастѐ с ни́мъ, и҆ съ сн҃омъ е҆го въкꙋпѣ.
ѿ хлѣба е҆го ꙗ҆дѧ́ше, и҆ ѿ ча́ши е҆го пїѧ́ше.
и҆ на ло́нѣ е҆го почива́ше.
и҆ б̂ѣ е҆мꙋ ꙗ҆́ко дщ̂и·

И҆ прїиде нѣкто̀ с пꙋти къ мꙋжꙋ бога́томꙋ.
и҆ не въсхотѣ поѧ́ти ѿ стад̑ свои҆хъ и҆ ѿ бꙋи́волицъ свои҆хъ на сътворе́нїе ѻ҆бѣ́дꙋ, пꙋтникꙋ пришед̑шꙋ к немꙋ̀, н̂о поѧ́тъ а҆́гницꙋ ѹ҆бога́го.
и҆ сътвори ѻ҆бѣ́дъ мꙋ́жꙋ пришед̑шꙋ к немꙋ̀·

И҆ разгнѣвасѧ гнѣ́вомъ ѕѣ́ло дв҃дъ на мꙋ́жа того̀.
и҆ рече дв҃дъ къ наѳа́нꙋ, жив̑҇ г҃ь ꙗ҆́ко достои́нъ е҆сть мꙋж́ъ то́й смр҃ти сътвори́выи т̂о·

И҆ а́гницꙋ възврати́ть сꙋгꙋбъ сед̑морице́ю, понеже е҆сть сътвори́лъ си́це.
и҆ ѻ҆ нем̑же не въсхотѣ̀·

И҆ рече наѳа́нъ къ дв҃дꙋ.
т̂ы е҆си чл҃къ сътвори́выи с̂е, се же т̂ы гл҃етъ г҃ь б҃ъ і҆и҆л҃евъ, а҆́зъ е҆смь пома́зах̑ т̂ѧ на црс̑҇тво въ і҆и҆л҃и.
а҆́зъ и҆збави́хъ т̂ѧ и҆з рꙋкѝ саѹ́ловы·

И҆ дахъ т̂и до́мъ г҃а твое҆го и҆ жены̀ господи́на твое҆го в ло́но твоѐ и҆ да́хъ т̂и до́мъ і҆и҆л҃евъ і҆ѹ́динъ·

и҆ли т̂и ма́ло т̂о е҆сть да ти приложꙋ̀ к си́мъ и҆ е҆щѐ·

И҆ чт̂о ꙗ҆́ко ѻ҆скверни сло́во гн҃е, е҆же сътворѝ лꙋка́вое пред̑ ѻ҆чи́ма е҆го.
ѹ҆́рїю б̂о хет꙽ѳе́ѧ ѹ҆бѝ ѻ҆рꙋжїемъ и҆ женꙋ е҆го поѧ́тъ себѣ̀ въ женꙋ.
и҆ того ѹ҆́рїю ѹ҆бѝ сн҃ъ ам̑монь ѻ҆рꙋжїемъ·

И нн҃ѣ да не ѿстꙋ́пит꙽ ѻ҆рꙋжїе ѿ до́мꙋ твое҆го до́ вѣка.
занѐ ѹ҆ничи́жи м̂ѧ и҆ поѧ́тъ женꙋ̀ ѹ҆́рїѧ хет꙽ѳе́ѧ въ женꙋ себѣ̀·

Си́це глет̑ г҃ь с̂е а҆́зъ въставлю̀ ѕл̂о ѿ до́мꙋ твое҆го.
и҆ разда́мъ жены̀ твоѧ пред̑ ѻ҆чи́ма твои́ма.
и҆ дамъ ближним̑ твоим̑ и лѧгꙋтъ со жена́ми твои́ми предъ сл҃нцемъ си́мъ·

Ꙗ҆́ко т̂ы сътворѝ въ та́инѣ.
и҆ а́зъ сътворю̀ гл҃ъ се́й пред̑ всѣмъ і҆и҆л҃емъ, и҆ пред̑ слн҃цемъ си́мъ·

И҆ рече дв҃дъ къ наѳа́нꙋ.
съгрѣши́хъ къ г҃ꙋ мое҆мꙋ, и҆ рече наѳан̑҇ къ дв҃дꙋ.
г҃ь ѿꙗ҆́тъ съгрѣшенїе твое ѿ тебѐ не и҆́маши ѹ҆́мрети·

Токмо ꙗ҆́ко ѻ҆стрѧ̀ и҆зъѻ҆стрю̀ врагы̀ твоѧ гла́сомъ си́мъ.
и҆ с̂е сн҃ъ тво́и рожде́исѧ ѿ тебѐ, смр҃тїю ѹ҆́мрет̑·

И҆ ѿи́де наѳа́нъ в до́мъ свои.
и҆ съкрꙋши г҃ь дѣтищъ.
и҆же родѝ жена̀ ѹ҆́рїина дв҃дꙋ и҆ разболѣ́сѧ·

И҆ взыска̀ дв҃дъ г҃а ѻ҆ дѣтищи.
и҆ постисѧ двд̑ъ по́стомъ.
и҆ ѻ҆блекъсѧ въ врѣтище лежа́ше ниц̑҇ на землѝ·

И҆ внидо́ша к немꙋ̀ ста́рцы до́мꙋ е҆го.
въздви́гнꙋти и҆̀ ѿ землѧ̀ хотѧ́ше и҆ не хотѧ́ше въста́ти.
и҆ не въкꙋси с ни́ми хлѣба·

И҆ ꙗ҆́ко бы́сть дн҃ь, з҃. и҆ ѹ́мре ѻ҆тро́ча.
и҆ възбоѧ́шасѧ раби́ двд҃ви повѣ́дати е҆мꙋ ꙗ҆́ко ѹ҆́мре ѻ҆тро́ча.
рѣша б̂о е҆щѐ бѧ́ше ѻ҆́троча жи́во, и҆ не послꙋша гла́са на́шего.
т̂о ка́ко нн҃ѣ речем꙽ к немꙋ.
ꙗ҆́ко ѹ҆́мре ѻ҆тро́ча, и҆ сътвори́тъ ѕл̂о·

И҆ разꙋмѣ двд҃ъ ꙗ҆́ко ѻ҆́троцы е҆го скорбѧ́хꙋ.
и҆ ѹ҆вѣда ꙗ҆́ко ѹ҆́мре ѻ҆тро́ча.
и҆ рече двд҃ъ ѻ҆́трокомъ свои҆мъ, ѹ҆́мре л̂и ѻ҆тро́ча.
и҆ рѣша ѹ҆́мре·

И҆ въстав̑҇ двд҃ъ ѿ землѧ̀ и҆ ѹ҆мы́сѧ.
і҆ и҆змѣнѝ ри́зы своѧ̀.
и҆ вни́де в до́мъ бж҃їи и҆ поклони́сѧ е҆мꙋ.
и҆ възвра́щсѧ в дом̑ сво́и.
и҆ просѝ ꙗ҆́сти хлѣба.
и҆ пред̑ложи́ша е҆мꙋ ꙗ҆сти хлѣ́бы·

И҆ рѣша̑ ѻ҆́троцы е҆го к немꙋ.
чт̂о сътворѝ ѻ҆троча́ти ра́ди.
ꙗ҆́ко е҆щѐ сꙋ́щꙋ ѻ҆троча́ти жи́вꙋ.
постѧ́шесѧ и҆ пла́кашесѧ и҆ бдѧ́ше.
и҆ ꙗ҆́ко ѹ҆́мре ѻ҆тро́ча.
и҆ т̂ы въста́в꙽ и҆ ѧ҆дѧ̀ хлѣб꙽ и҆ питъ·

И҆ рече двд҃ъ е҆гда б̂ѣ ѻ҆тро́ча жи́во, пости́хъсѧ и҆ пла́кахсѧ, ꙗ҆́ко рѣхъ кт̂о вѣсть поми́лꙋетъ л̂и мѧ г҃ь, и҆ жи́во бꙋ́детъ ѻ҆тро́ча·

И҆ нн҃ѣ ѹ҆́же ѹ҆́мре, да почто мн̂ѣ ѹ҆́же пости́тисѧ.
е҆да могꙋ̀ възъврати́ти и҆̀ ктомꙋ̀.
а҆́зъ б̂о и҆́мам꙽ и҆тѝ к немꙋ, а҆ то́й не възвратит̑сѧ къ мнѣ̀·

И҆ призва̀ двд҃ъ вирсавїю женꙋ̀ свою.
и҆ внїиде с не́ю в ло́жницꙋ свою, и҆ лѧ́же с не́ю, и҆ зача́тъ въ чре́вѣ вирса́вїѧ, и҆ родѝ сн҃а и҆ нарече и҆мѧ е҆мꙋ соло́монъ и҆ г҃ь възлюбѝ и҆̀·

И҆ пꙋстѝ рꙋко́ю наѳа́на прро̑҇ка и҆ нареч̑҇ и҆́мѧ е҆мꙋ и҆е҆д꙽де́ди.
поне́же прїѧ́тъ сло́во гн҃е·

И҆ побѣдѝ и҆ѻ҆а́въ въ рав̑҇вва́те сн҃ы а҆м꙽монѧ, и҆ прїѧ́тъ град̑ црс̑҇тва·

И҆ посла̀ и҆ѻ҆а́въ послы̀ къ двд҃ꙋ, и҆ ре́че побыди́хсѧ ѻ҆ равва́ѳѣ и҆ ѿꙗ҆́хъ во́дꙋ градꙋ·

И҆ нн҃ѣ съвокꙋпѝ ѻ҆ста́нокъ людїи, и҆ прїиди къ гра́дꙋ, и҆ прїими е҆го да не а҆́зъ преимꙋ град̑, и҆ наречет̑сѧ и҆́мѧ мое в нем̑·

И҆ собра̀ двд҃ъ вс̂ѧ лю́ди и҆́де въ равваѳ̑҇ и҆ въполчи́сѧ на́нь и҆ прїѧ́т꙽ и҆̀·

И҆ взѧт̑ вѣнецъ молхо́ѧ цр҃ѧ и҆хъ съ главы̀ е҆го, тала́нтъ зла́та мѣра е҆го, ѿ ка́менїа дра́га, и҆ на главѣ̀ двд҃вѣ б̂ѣ прс̑҇но, и҆ коры́сть и҆знесѐ и҆з гра́да того мно́гꙋ ѕѣ́ло·

И҆ лю́ди сꙋщаѧ в не́мъ и҆зведѐ, и҆ приста́ви къ пилам̑ и҆ къ три зꙋ́бомъ желѣзным̑ и҆миже ѿсѣка́ют꙽ ка́менїе, и҆ къ творѧ́щим̑ желѣ́зо, и҆ къ творѧ́щимъ пли́нѳы превожда́ше, и҆ та́ко сътворѝ всм̑ѣ гра́домъ сн҃овъ а҆м꙽мо́нь, и҆ възврати́сѧ двд҃ъ и҆ ве́сь і҆и҆л҃ь въ і҆ерс̑҇лим̑·

Глв̑҇а, г҃і·

И бы́сть по си́хъ и҆ ѹ҆ а҆весало́ма сн҃а дв҃два.
б̂ѣ сестра̀ взо́рꙋ добра̀ ѕѣло.
и҆́мѧ же б̂ѣ е́и ѳама́рь.
и҆ възлюбѝ ю҆̀ а҆м꙽мо́нъ сн҃ъ дв҃двъ·

И҆ та́ко скорбѧ́ше а҆м꙽мо́нъ.
ꙗ҆́ко и҆ разболѣ́сѧ ѕѣ́ло сестры̀ е҆го ра́ди ѳамары ꙗ҆́ко дв҃ою бѧ́ше сїѧ.
и҆ бѧ́ше при́сно пред̑ ѻ҆чи́ма а҆м꙽мо́нема хоти́ма ꙗ҆́коже и҆мѣти ю҆̀·

И҆ б̂ѣ а҆м꙽мо́нꙋ бра́тꙋ ча́дь.
и҆́мѧ е҆мꙋ, і҆ѻ҆а҆нада́въ сн҃ъ самаи́нъ, бра́та двд҃ва.
і҆ѻ҆а҆нада́въ б̂ѣ мꙋжъ мꙋ́дръ ѕѣ́ло.

И҆ ре́че е҆мꙋ і҆ѻ҆а҆нада́въ что̀ т̂и ꙗ҆ко та́ко боли́ши сн҃ꙋ цр҃евъ, не възвѣща́еши м̂и ѹ́тро ѹ́тро·

И҆ рече е҆мꙋ а҆м꙽мо́нъ ѳама́рꙋ сестрꙋ̀ а҆весало́млю бра́та свое҆го а҆зъ люблю̀·

И҆ ре́че е҆мꙋ і҆ѻ҆а҆нада́въ.
лѧ́зи на посте́ли свое́и и҆ разболи́сѧ.
и҆ вни́дет꙽ ѿц҃ъ ви́дѣти тебѐ.
и҆ рече́ши к не́мꙋ да прїидетъ ѹ҆бо ѳама́рь сестра̀ моѧ̀.
и҆ да м̂и да́сть ꙗ҆́сти.
и҆ да сътвори́тъ пред̑ ѻ҆чи́ма мои́ма ꙗ҆́дь.
и҆ да ви́дѣвъ неглѝ мощѝ начнꙋ̀ вкꙋси́ти ѿ рꙋкѝ е҆ѧ̀·

И҆ ѻ҆бъле́же а҆м꙽мон̑҇ и҆ разболѣ́сѧ.
и҆ вни́де цр҃ь ви́дѣти е҆го.
и҆ рече а҆м꙽мо́нъ къ цр҃ю.
да прїидетъ ѹ҆́бо ѳама́рь сестра̀ моѧ къ мн̂ѣ, и҆ да и҆спече́тъ м̂и дв̂ѣ ча́сти мѧ́снѣ пред̑ ѻ҆чи́ма мои́ма.
да бы́хъ ꙗ҆́лъ ѿ рꙋкꙋ е҆ѧ̀·

И҆ посла̀ дв҃дъ къ ѳама́рѣ в до́мъ гл҃ѧ.
и҆дѝ нн҃ѣ в дом̑ а҆м꙽мона бра́та свое҆го, и҆ сътворѝ е҆мꙋ ꙗ҆́дь·

І҆ и́де ѳама́рь в до́мъ а҆м꙽мо́нь бра́та свое҆го.
и҆ то́и лежа́ше и҆ взѧ́тъ тꙋ́къ.
и҆ потща́вши ѹ҆стро́и пред̑ ѻ҆чи́ма е҆го.
и҆спечѐ ѻ҆́бѣ ча́сти мѧ́снѣ въ сковрадѣ̀·

І҆ и҆зложѝ ѧ҆̀ на блю́до пред̑ не́го, и҆ не въсхотѣ ꙗ҆́сти.
и҆ рече а҆м꙽мо́нъ и҆жденѣте вс̂ѧ мꙋжа.
и҆же сꙋть над̑ м̂ѧ пришлѝ.
і҆ и҆згна́ша вс̂ѧ мꙋжа, и҆же бѣша пришлѝ над о́нь·

И҆ рече ам̑мон̑҇ къ ѳама́рѣ.
внесѝ м̂и ꙗ҆́дь внꙋтренюю клѣть, и҆ ꙗ҆́мъ ѿ рꙋкꙋ твое́ю.
и҆ взѧ́тъ ѳама́рь ча́сть в рꙋ́кꙋ, юж̑ б̂ѣ и҆спекла̀.
и҆ внесѐ а҆м꙽мо́нꙋ братꙋ с̂и въ внꙋтренюю клѣть·

И҆ предъста́ви е҆мꙋ да ꙗ҆́сть.
і҆ и́мъ ю҆̀ рече е́й лѧ́зи со мною се́стро моѧ̀·

И҆ реч̑҇ е҆мꙋ ѳама́рь.
н̂и брате мо́и и҆ не погꙋбѝ менѐ.
поне́же не сътвори́тсѧ си́це въ і҆и҆л҃и.
не сътворѝ безꙋмїѧ сего·

И҆ а́зъ ка́мо де́жꙋ безче́стїе моѐ, и҆ т̂ы бꙋ́деши съ безꙋмными въ і҆и҆л҃и.
и҆ нн҃ѣ ѹ҆же гл҃и къ цр҃ю, да не ѿлꙋчи́тъ менѐ ѿ тебѐ.
и҆ не въсхотѣ̀ а҆м꙽мо́нъ послꙋш́ати гла́са е҆ѧ̀.
і҆ и́мъ ю҆̀ лѧ́же с не́ю.
и҆ възненавѣ́дѣ ю҆̀ ѿто́лѣ а҆м꙽мо́нъ.
нена́вистїю вели́кою ѕѣ́ло.
ꙗ҆́ко ве́лїемъ възненавѣдѣ́нїемъ възненавидѣ̀ ю҆̀ паче любвѐ е҆ю́же люблѧ́ше ю҆̀.
и҆ реч̑҇ е́й а҆м꙽мо́нъ, въста́ни и҆ ѿи҆дѝ·

И҆ рече е҆мꙋ ѳама́рь.
н̂и бра́те ꙗ҆ко зло́ба бо́лши е҆сть послѣ́днѧѧ па́че прь́выѧ.
ю҆́же сътворѝ со мно́ю, е҆же ѿпꙋсти́ти менѐ, и҆ не хотѧ́ше а҆м꙽мо́нъ слы́шати гла́са е҆ѧ̀·

Призва̀ ѻ҆́трока свое҆го, дръжа́щаго дом̑ е҆го, и҆ рече е҆мꙋ и҆спꙋстѝ ѹ҆бо во́нъ сїю ѿ ме́не, и҆ заключѝ две́ри, да не вни́дет꙽·

И҆ б̂ѣ ри́за на не́и дꙋгна́та, ꙗ҆́ко такꙋ ри́зꙋ ноша́хꙋ дще́ри цр҃ѧ, сꙋщаѧ дв҃ица, и҆ такїи ѻ҆скри́лы ноша́хꙋ, і҆ и҆згна̀ ю҆̀ во́нъ слꙋга̀ е҆го, и҆ затворѝ две́ри за не́ю.

И҆ взе́мши ѳама́рь по́пелъ насы́па на главꙋ̀ с̂и, и҆ ѻ҆де́ждꙋ дꙋгна́тꙋ, и҆ ю́же ноша́ше све́рже с꙽ себѐ, и҆ възложѝ рꙋцѣ своѝ на главꙋ̀ свою, и҆ рѣ́ющисѧ и҆дѧ́ше, и҆ въпїѧ́ше·

И҆ рече к не́и а҆весоло́мъ бра́тъ еѧ̀, еда а҆м꙽мо́нъ бра́тъ тво́и бы́сть с тобо́ю, т̂о и҆ нн҃ѣ се́стро ѹ҆молча́и ꙗ҆́ко бра́тъ е҆сть, и҆ не полага́и с̂и на срд̑цы ꙗ҆́ко гл҃ати словеса̀ с̂и, и҆ сѣде ѳама́рь вдовꙋ́ющи и҆ молча́щи в домꙋ̀ а҆весоло́ма бра́та свое҆го·

И҆ слы́ша дв҃дъ цр҃ь словеса̀ с̂и и҆ разгнѣ́васѧ ѕѣло·

И҆ не поскорбѣ̀ дш҃ею ѻ҆ а҆м꙽мо́нѣ сн҃ѣ свое҆мъ, поне́же люблѧ́ше е҆го ꙗ҆́ко прьве́нецъ б̂ѣ е҆мꙋ, и҆ не гл҃а а҆весоло́мъ ѿто́лѣ съ а҆м꙽мо́ном꙽ ни ѻ҆ до́брѣ ни ѻ҆ ѕлѣ̀, поне́же възненави́дѣ а҆весоло́мъ а҆м꙽мо́на, того ра́ди поне́же бѧ́ше ѳама́рь сестрꙋ̀ е҆го нарꙋга́лъ·

И҆ бы́сть ми́мошед̑шимъ дн҃емъ мно́гимъ, и҆ бѣша стригꙋще ѻ҆́вца а҆весоло́мови рабѝ, в꙽ веласо́рѣ въ ѻ҆́бласти е҆фре́мли, и҆ призва̀ а҆весоло́мъ вс̂ѧ сн҃ы цр҃ѧ·

И҆ прїиде а҆весоло́мъ къ цр҃ю, и҆ рече с̂е нн҃ѣ стригꙋтъ рабѝ твоѝ, т̂о дабы̀ ше́лъ цр҃ь и҆ ѻ҆́троцы е҆го с ни́мъ къ мн̂ѣ рабꙋ свое҆мꙋ·

И҆ рече цр҃ь къ а҆весоло́мꙋ сн҃ꙋ свое҆мꙋ, н̂и сн҃ꙋ мо́и не и҆́демъ вс̂и, да т̂и не сътвори́мъ тѧ́жка, и҆ нꙋжда́ше и҆̀, и҆ не хотѧ́ше цр҃ь и҆тѝ, и҆ блс̑҇ви и҆̀·

И҆ рече а҆весоло́мъ, т̂о да и́детъ понѐ а҆м꙽мо́нъ бра́тъ мои, и҆ рече е҆мꙋ цр҃ь т̂о да почто̀ и́детъ с тобо́ю а҆м꙽мо́нъ·

И҆ нꙋжа́ше и҆̀ а҆весоло́мъ, и҆ пꙋстѝ с нимъ а҆м꙽мо́на, и҆ вс̂ѧ сн҃ы цр҃ѧ·

И҆ сътворѝ а҆весоло́мъ пи́ръ ꙗ҆́коже тво́ритъ пи́ръ цр҃ь, и҆ заповѣда а҆весоло́мъ ѻ҆́трокомъ свои҆мъ гл҃ѧ, ви́дите е҆гда̀ възблажа́етъ срд̑це а҆м꙽мо́не и҆ рекꙋ ва́мъ ѹ҆бїите а҆ммо́на до сме́рти, и҆ не ѹ҆бо́итесѧ а҆́з꙽ б̂о повелѣва́ю вам̑, мꙋжа́итесѧ и҆ бꙋдете въ сн҃ы си́лны·

И҆ сътвори́ша ѻ҆́троцы а҆весоло́мли а҆ммо́нꙋ, ꙗ҆́коже заповѣ́да и́мъ а҆весоло́мъ и҆ ѹ҆би́ша и҆̀, и҆ въста́ша сн҃ове цр҃ви и҆ всѣде ко́жд̑о на мща̀ своѐ и҆ бѣжаша·

И҆ бы́сть сꙋщемъ и́мъ на пꙋтѝ, слꙋхъ до́иде дв҃да гл҃ѧ, и҆збѝ а҆весоло́мъ вс̂ѧ сн҃ы цр҃евы, и҆ не и҆збы̀ ѿ ни́хъ ни е҆ді́н же·

И҆ въста́въ двд̑ъ цр҃ь све́рже ри́зы своѧ̀ и҆ лѧ́же ни́цъ на землѝ, и҆ вс̂и ѻ҆́троцы пред̑стоꙗ҆́щїѝ е҆мꙋ сверго́ша ри́зы своѧ·

И҆ рече и҆ѻ҆а҆нада́въ сн҃ъ самаи́нъ, бра́та дв҃два, и҆ рече да не речетъ господи́нъ мо́и цр҃ь, ꙗ҆́ко вс̂ѧ ѻ҆́троки и҆ сн҃ы цр҃ѧ ѹ҆би́ша, н̂о а҆м꙽мо́нъ е҆сть е҆ді́нъ ѹ҆бїе́нъ, ꙗ҆́ко то́и и҆зъ ѹ́стъ а҆весоло́мꙋ не и҆схожда́ше, ѿнелѣже ѻ҆брꙋга̀ сестрꙋ̀ е҆го ѳама́рꙋ·

И҆ нн҃ѣ да не полага́етъ с̂и на срд̑цы господи́н꙽ мо́и цр҃ь словесѐ сего гл҃ѧ, ꙗ҆́ко вс̂и цр҃їе сн҃ове не и҆збїе́ни бы́ша, н̂о то́кмо а҆м꙽мо́нъ е҆сть е҆ді́нъ ѹ҆бїе́нъ·

И҆ бѣжа̀ а҆весоло́мъ и҆ ви́дѣ ѻ҆́трокъ слꙋжа́и пред̑ ѻ҆чи́ма е҆го, и҆ с̂е люді́и мно́жество и҆дꙋще пꙋте́мъ и҆ѻ҆а́мъскимъ съза́ди е҆го съ страны̀ го́ръски въ и҆схо́дѣ·

І҆ и́де слꙋга̀ и҆ възвѣстѝ цр҃ю, и҆ рече е҆мꙋ мꙋ́жа ви́жꙋ на пꙋтѝ іѻ҆рда́ньстемъ, съ стра́ны горъ сходѧ̀, и҆ рече и҆ѻ҆а҆нада́в꙽ къ цр҃ю сн҃ове цр҃еви прихо́дѧтъ, по словесѝ раба̀ твое҆го та́ко бы́сть·

И҆ бы́сть е҆гда̀ сконча̀ гл҃ѧ, и҆ сн҃ови цр҃еви прїидо́ша, и҆ въздвиго́ша гласъ свои и҆ пла́кашасѧ и҆ са́мъ цр҃ь и҆ вс̂и ѻ҆́троцы е҆го и҆ пла́кашасѧ пла́чемъ велики́мъ ѕѣ́ло·

И҆ а҆весоломъ въстав̑҇ бѣжа̀, і҆ и́де къ ѳол꙽ми сн҃ꙋ е҆мно́ню цр҃ю геѳьсе́рь, въ землю гад̑скꙋ, и҆ пла́касѧ двд҃ъ цр҃ь по сн҃ꙋ свое҆мъ вс̂ѧ дн҃и·

И҆ а҆весоло́мъ бѣжа̀ і҆ и́де в геѳ̑҇се́рь, и҆ бѣ т̂ꙋ, г҃ лѣта·

И҆ помы́сли цр҃ь и҆зыи́ти въ слд̑ѣ а҆весоло́ма, ꙗ҆́ко не бѧ́шесѧ ѹ҆тѣшилъ ѻ҆ а҆м꙽мо́нѣ, ꙗ҆́ко ѹ҆бїенъ бѧ́ше·

Глв̑҇а, д҃і·

И разꙋмѣ́въ и҆ѻ҆а́въ сн҃ъ сарꙋи́нъ ꙗ҆́ко срд̑це цр҃ево преклони́сѧ къ а҆весоло́мꙋ·

И҆ посла̀ и҆ѻ҆а́въ въ ѳеко́ю и҆ поѧт̑ ѿтꙋ́дꙋ женꙋ̀ мꙋ́дрꙋ, и҆ реч̑҇ к не́й.
сѣтꙋ́и нн҃ѣ и҆ ѻ҆блецысѧ въ ри́зы сѣтова́нїѧ.
и҆ не пома́заисѧ и҆е҆ле́ѻ҆мъ.
и҆ бꙋ́деши ꙗ҆́ко и҆ жена̀ дн҃и мно́ги сѣтꙋ́ющи по ѹ҆мръщвенм̑ѣ·

И҆ вни́деши къ цр҃ю, и҆ гл҃еши к немꙋ̀ по гл҃ꙋ семꙋ̀.
и҆ положѝ и҆ѻ҆а́въ словеса̀ с̂и въ ѹ҆стѣ́хъ е҆ѧ̀·

И҆ прїи́де жена̀ и҆ѳеко́искаѧ къ цр҃ю.
и падѐ на лицы̀ свое҆мъ на земли.
и҆ поклони́сѧ е҆мꙋ и҆ рече сп҃си м̂ѧ цр҃ю сп҃си м̂ѧ·

И҆ реч̑҇ е́й цр҃ь что̀ т̂и е҆сть.
и҆ рече ѿ да́вна вдова жена̀ а҆́зъ е҆смь.
ѹ҆́мре б̂о мꙋж́ъ мои.
и҆ е́ста рабѣ̀ т̂и дв̂а сн҃а.
и҆ би́стасѧ сама̀ на селѣ̀.
и҆ не бы́сть кт̂о б̂ы е҆ю̀ разлꙋчи́лъ.
и҆ нападѐ е҆ді́нъ е҆ю̀ на бра́та и҆ ѹ҆би и҆̀·

И҆ с̂е вс̂е ѿч҃ество въста̀ на рабꙋ̀ твою̀.
и҆ рѣш́а даи҆ ѹ҆би́вшаго бра́та свое҆го, и҆ побїемъ въ дш҃а мѣ́сто, бра́та е҆го́же ѹ҆бѝ.
и҆ погꙋби́ти хотѧ́тъ наслѣдника на́ю.
и҆ ѹ҆гасѧ́тъ свѣ́щꙋ мою̀ ѻ҆ста́вшꙋю.
ꙗ҆́ко не ѻ҆ста́вити мꙋжа мое҆го наслѣ́дника.
і҆ и҆мени на лицы̀ землѧ̀·

И҆ рече цр҃ь къ женѣ̀.
и҆дѝ здра́ва в до́мъ свои, и҆ а́зъ заповѣ́даю ѻ҆ тебѣ̀·

И҆ рече жена̀ ѳеко́итѧныни къ цр҃ю.
на мнѣ̀ безако́нїе г҃и мо́и цр҃ю, и҆ на до́мꙋ ѿц҃а мое҆го.
цр҃ь же и҆ прс̑҇тлъ е҆го без вины̀·

И҆ рече цр҃ь кто̀ с̂е е҆сть гл҃алъ к тебѣ̀, да и҆ приведе́ши къ мнѣ̀.
и҆ не прило́житъ ктомꙋ̀ коснꙋтисѧ тебѐ·

И҆ рече жена̀ да въспомѧне́тъ ѹ҆бо цр҃ь къ г҃ꙋ б҃ꙋ свое҆мꙋ.
внегда ѹ҆мно́жити пролїѧ́нїѧ кро́ви, и҆ растли́ти.
и҆ не и҆мꙋт́ь погꙋби́ти сн҃а мое҆го.
и҆ реч̑҇ цр҃ь жи́въ г҃ь, а҆ще и҆ вла́съ ѿпаде́тъ сн҃ꙋ твое҆мꙋ съ главы̀ на землѝ се́й·

И҆ рече жена̀ ѳекои҆тѧны́нѧ къ цр҃ю.
да бы́хъ и҆ е҆щѐ а҆зъ раба̀ твоѧ̀ погл҃ала къ цр҃ю господи́нꙋ мое҆мꙋ сло́во.
ѻ҆́н же рече гл҃и·

И҆ рече жена̀ почто̀ помы́сли с̂е та́ко ѻ҆ лю́дехъ бж҃їихъ.
и҆л̂и ꙗ҆́ко ѿ ѹ́стъ цр҃евыхъ е҆сть сло́во си́цево.
ꙗ҆́ко престꙋпле́нїе, е҆же въз꙽врати́ти ц҃рю, ѿгна́наго ѿ не́го·

Вс̂и бо ѹ҆мира́юще ѹ҆мира́емъ.
и҆ ꙗ҆́ко вода приходѧщаѧ на́ землю не събере́тсѧ и҆ во́зметъ б҃ъ дш҃а помышлѧ́ѧ спс̑҇ти хотѧ̀, ѿ него ѿринове́нїѧ·

И҆ нн҃ѣ прїидо́хъ гл҃ати къ цр҃ю господи́нꙋ мое҆мꙋ гл҃ъ се́й.
ꙗ҆́ко ѹ҆ви́дѧтъ м̂ѧ лю́дїе и҆ рече раба̀ твоѧ̀ да гл҃етъ ѹ҆бо къ господи́нꙋ мое҆мꙋ цр҃ю.
да сътвори́тъ цр҃ь рѣ́чь рабѣ̀ свое́й·

Ꙗ҆́ко слы́шитъ цр҃ь и҆зме́тъ рабꙋ̀ свою̀ и҆з рꙋ́къ мꙋж́ъ хотѧ́щихъ въсхити́ти м̂ѧ.
и҆ сн҃а мое҆го ѿ ѹ҆ча́стїѧ бж҃їѧ·

И҆ речетъ раба̀ твоѧ̀ да бꙋ́детъ сло́во нн҃ѣ г҃а мое҆го и҆ цр҃ѧ на жр́ътвꙋ.
ꙗ҆́коже б̂о а҆гг҃лъ бж҃їи, та́ко г҃ь мои цр҃ь послꙋшаѧ бл҃гихъ.
и҆ лꙋка́вых̑ не брегїи, сего ра́ди г҃ь б҃ъ тво́и да бꙋ́детъ с тобо́ю·

И҆ ѿвѣща̀ цр҃ь, и҆ реч̑҇ къ женѣ̀.
ника́коже да не потаи́ши предо мно́ю гл҃а, ѻ҆ не́мъже а҆зъ въпрошꙋ̀ т̂ѧ.
и҆ рече жена̀, да гл҃етъ г҃ь мо́и цр҃ь·

И рече цр҃ь е҆да̀ рꙋка̀ и҆ѻ҆а́влѧ ѻ҆ все́мъ се́мъ с тобо́ю е҆сть.
и҆ рече жена̀ къ цр҃ю да живет̑ дш҃а твоѧ̀ г҃и мо́и цр҃ю, аще е҆сть ѻ҆деснꙋ́ю и҆ ѻ҆шꙋ́юю и҆ ѻ҆ всѣх꙽ ꙗ҆́же гл҃а господи́нъ мо́и цр҃ь, ꙗ҆́ко рабъ тво́и и҆ѻ҆а́въ.
то́и м̂и заповѣ́да и҆ то́и вложѝ въ ѹ҆ста рабѣ̀ твое́й словеса̀ с̂и·

до́ндеже прїитѝ на лицѐ гл҃ꙋ семꙋ̀.
и҆же сътворѝ ра́бъ твои и҆ѻ҆а́въ ле́сть сїю.
н̂о господи́нъ мои цр҃ь мꙋ́дръ бл҃гъ, ꙗ҆коже мꙋ́дрость а҆гг҃ла бж҃їѧ, разꙋмѣѧ́ вс̂е е҆же на землѝ·

И҆ рече цр҃ь къ и҆ѻ҆а́вꙋ.
с̂е нн҃ѣ сътворих̑ т̂и по словесѝ твое҆мꙋ.
н̂о и҆дѝ и҆ възвратѝ ѻ҆́трока а҆весоло́ма·

И҆ падѐ на лицы̀ свое҆мъ и҆ѻ҆а́въ на землѝ и҆ поклони́сѧ, и҆ блс̑҇ви цр҃ѧ, и҆ ре́че и҆ѻ҆а́въ дне́сь разꙋмѣ́хъ, ра́бъ твои ꙗ҆́ко ѻ҆брѣте блгд̑ть пред̑ ѻ҆чи́ма твои҆ма г҃и мои цр҃ю, ꙗ҆́ко послꙋш́а цр҃ь мои и҆ господи́нъ, слове́съ раба̀ свое҆го.

И҆ въста́въ и҆ѻ҆а́въ, і҆ и́де в гесꙋ́ръ, и҆ приведѐ а҆весоло́ма въ і҆ерс̑҇лимъ·

И҆ рече цр҃ь възврати и҆̀ в домъ е҆го, и҆ лица мое҆го да не ви́дит̑.
и҆ възврати́сѧ а҆весоло́мъ в дом̑ сво́и, и҆ лица цр҃ева не ви́дѣ·

И҆ ꙗ҆́коже б̂ѣ а҆весоло́мъ, не бѣ̀ такова̀ мꙋжа въ і҆ерс̑҇ли́мѣ і҆и҆л҃и, хва́ленъ ѕѣло, ѿ пѧты̀ но́гꙋ и҆ до верха̀ е҆го не бѣ̀ в немъ поро́ка·

И҆ е҆гда̀ стри́щи е҆мꙋ главꙋ̀ свою.
и҆ бысть е҆мꙋ ѿ нача́ла дн҃и и҆ до́ дн҃їи, в нѧ́же стрижа́шесѧ.
ꙗ҆́ко тѧ́жко бѧ́ше е҆мꙋ ѿ них̑.
и҆ стриг꙽сѧ и҆ събира́ше вла́сы главы̀ свое́ѧ, с҃, си́клы мѣры в мѣрꙋ црс̑҇кꙋю·

И҆ роди́шасѧ а҆весоло́мꙋ, г҃, сн҃ы и҆ дще́рь е҆ді́на, і҆ и́мѧ е́й ѳама́ръ.
сїѧ же б̂ѣ ѕѣло добра̀ възо́ромъ·

И҆ сѣдъ а҆весоло́мъ въ і҆ерс̑҇ли́мѣ, в҃ лѣта, дн҃їи и҆ лица̀ цр҃ева не ви́дѣ·

И҆ посла̀ а҆весоло́мъ къ и҆ѻ҆а́вꙋ дабы пꙋсти́лъ и҆̀ къ цр҃ю, и҆ не въсхотѣ прїитѝ к немꙋ̀.
и҆ посла̀ а҆весоло́мъ вто́рое, къ і҆ѻ҆а́вꙋ и҆ не въсхотѣ̀ прїити к немꙋ̀·

И҆ рече а҆весоло́мъ къ ѻ҆́трокомъ свои́мъ.
вѣ́сте в̂ы стра́нꙋ села̀ и҆ѻ҆а́влѧ дръжа́щагосѧ м̂ѧ, и҆ того т̂ꙋ е҆чме́нь, и҆дѣте и҆ запали́те и҆̀ ѻ҆гнемъ.
и҆ шед̑ше запали́ша рабѝ а҆весоло́мли, стра́нꙋ и҆ѻ҆а́влю ѻ҆гне́мъ·

И҆ прїидо́ша рабѝ и҆ѻ҆а́вли къ и҆ѻ҆а́вꙋ.
раздра́вше ри́зы своѧ̀, и҆ рѣша к не́мꙋ.
въжго́ша рабѝ а҆весоло́мли стра́нꙋ твою̀ ѻ҆гнемъ·

И҆ въста́въ и҆ѻ҆а́въ прїиде къ а҆весоломꙋ в до́мъ е҆го, и҆ рече к не́мꙋ.
почто̀ сꙋть рабѝ твоѝ стра́нꙋ мою̀ заж꙽глѝ ѻ҆гнемъ·

И҆ рече а҆весоло́мъ къ и҆ѻ҆а́вꙋ.
с̂е посылахъ к тебѣ̀ гл҃ѧ, е҆ді́ною и҆ два́жды и҆дѝ сѣмо и҆ послю̀ т̂ѧ къ цр҃ю гл҃ѧ, почто̀ прїидо́хъ и҆з гесꙋ́ра.
ѹ҆́не б̂ѣ быти мн̂ѣ е҆щѐ та́мо.
и҆ нн҃ѣ чт̂о с̂е лица̀ цр҃ева не ви́жꙋ.
а҆́ще ли б̂ы е҆сть въ мн̂ѣ непра́вда, т̂о да ѹ҆бїи м̂ѧ·

И҆ вни́де и҆ѻ҆а́въ къ цр҃ю и҆ възвѣстѝ е҆мꙋ.
и҆ призва̀ а҆весоло́ма.
и҆ прїиде къ цр҃ю, и҆ поклони́сѧ е҆мꙋ, и҆ пад̑ лицем̑ на землѝ, пред̑ лице́мъ цр҃евымъ.
и҆ ѻ҆блобыза̀ цр҃ь а҆весоло́ма·

Глв̑҇а, е҃і·

И бы́сть по си́хъ, и҆ сътворѝ себѣ̀ а҆весоломъ колесни́ць и҆ ѻ҆рꙋжїе и҆ конѧ̀ събра, и҆ н҃ мꙋжъ текꙋщихъ пред̑ ним̑·

И҆ ѹ҆ранѝ а҆весало́мъ и҆ ста̀ на нача́лнѣмъ пꙋтѝ вра́тъ и҆ бы́сть всѧ́къ мꙋж́ъ, ѻ҆ не́мже бы́сть прѧ̀ прїиде пред̑ цр҃ѧ на сꙋ́дъ.
и҆ възопѝ к немꙋ̀ а҆весоло́мъ.
и҆ рече е҆мꙋ ѿ кое҆го гра́да т̂ы е҆си.
и҆ рече е҆мꙋ мꙋ́жъ, ѿ е҆ді́наго колѣ́на і҆и҆л҃ева а҆́зъ ра́бъ тво́и·

И҆ рече к немꙋ̀ а҆весоло́мъ, с̂е словеса̀ твоѧ бл҃га и҆ добра̀.
и҆ послꙋшаѧй и҆хъ нѣ́сть т̂и ѿ цр҃ѧ·

И҆ реч̑҇ а҆весоло́мъ, кто̀ м̂ѧ поста́витъ сꙋдїю̀ въ землѝ над̑ і҆и҆л҃емъ, и҆же къ мнѣ̀ прїидетъ всѧ́къ мꙋ́жъ і҆и҃лев̑҇, и҆мѣѧ́и прю̀ и҆л̂и сꙋдъ.
т̂о и҆ ѻ҆правда́ю ѧ҆̀.

И҆ бысть е҆гда̀ приближи́тисѧ е҆мꙋ мꙋжъ на поклоне́нїе, и҆ простеръ рꙋкꙋ свою̀ прїѧ́тъ и҆̀, и҆ цѣлова и҆̀·

И҆ сътворѝ та́ко а҆весоло́мъ по всемꙋ̀ гл҃ꙋ семꙋ̀ всемꙋ̀ і҆и҆л҃ю, приходѧ́щим̑ на сд̑ꙋ къ цр҃ю, и҆ присвойстве́ны сътворѝ срд̑ца сн҃овъ і҆и҆л҃евъ·

И҆ бысть ѿ конца̀, м҃ лѣтъ, и҆ рече а҆весоло́м꙽ къ ѿц҃ꙋ свое҆мꙋ и҆дꙋ̀ нн҃ѣ, і҆ и҆спо́лню мл҃твы моѧ̀, и҆ми́же моли́хсѧ г҃ꙋ въ хевро́нѣ·

И҆ми́же мл҃твами моли́сѧ ра́бъ тво́и сы́и въ гев꙽сꙋ́рѣ сѷристемъ гл҃ѧ, аще възвраща́ѧ възврати́тъ м̂ѧ г҃ь въ і҆ерс̑҇ли́мъ и҆ послꙋжꙋ г҃ꙋ·

И҆ рече е҆мꙋ цр҃ь и҆дѝ с ми́ром̑, и҆ въста́въ і҆ и́де в꙽ хевро́нъ·

И҆ посла̀ а҆весоло́мъ послы̀ въ всѧ́ко колѣ́но і҆и҆л҃ево гл҃ѧ, е҆гда̀ ѹ҆слы́шите трꙋбы рова́ны, т̂о р꙽цѣте ꙗ҆́ко ѹ҆́же цр҃ьствꙋетъ а҆весоло́мъ въ хевро́нѣ·

І҆ и҆до́ша съ а҆весоло́момъ, с҃, мꙋжъ нарочи́тых̑ ѿ і҆ерс̑҇ли́ма, і҆ и҆дѧ́хꙋ въ простра́нъстви свое҆мъ, и҆ не разꙋмѣва́хꙋ всѧ́кого гл҃а·

И҆ посла̀ а҆весоло́мъ, и҆ призва̀ а҆хитофе́ла галамонѣ́искаго совѣтника двд҃ва·

ѿ гра́да е҆мꙋ свое҆го голо́мы, внегда̀ жрътвы своѝ жрѧ́ше, и҆ бы́сть смѧте́нїе крѣ́пко, бѧ́ше б̂о мно́жество людїи, и҆дꙋщихъ съ а҆весоло́момъ·

И҆ прїиде нѣ́кто възвѣща́ѧ дв҃дꙋ и҆ гл҃ѧ, ѹ҆́же бы́сть срд̑це всѣ́хъ мꙋ́жїи і҆и҆л҃евь, съ а҆весоло́мом̑ сн҃омъ твоим̑·

И҆ рече дв҃дъ всм̑ѣ ѻ҆́троком̑ своим̑ сꙋщим̑ въ і҆ерс̑҇ли́мѣ, въста́нѣте и҆ бѣжим̑ ꙗ҆́ко нѣ́сть на́мъ сп҃се́нїѧ ѿ лица̀ а҆весоло́млѧ, и҆ ѹ҆скори́те да и҆́демъ, да не заста́въ на́съ и҆збїетъ н̂ы, и҆ възы́щетъ на на́съ зло́бы, и҆збїет̑ гра̑ мечемъ·

И҆ рѣша ѻ҆́троцы къ цр҃ю, вс̂е е҆ли́ко заповѣ́да г҃ь на́мъ и҆ цр҃ь на́шъ, с̂е м̂ы ѻ҆́троцы твоѝ·

І҆ и҆зы́де цр҃ь и҆ ве́сь до́мъ е҆го нога́ми свои́ми, и҆ ѻ҆ста́ви цр҃ь, і҃, же́нъ под̑ло́жнинць храни́ти дом̑·

І҆ и҆зы́де цр҃ь и҆ вс̂и ѻ҆́троцы е҆го пѣши, и҆ ста́ша ѿ домꙋ дале́че·

И҆ вс̂и ѻ҆́троцы е҆го стрегꙋще и҆дѧ́хꙋ, и҆ вс̂и ѿража́ющїи и҆ вс̂и ѹ҆тѣша́ющїи и҆дѧ́хꙋ с ним̑ и҆ вс̂и геѳѣ́и, х҃, мꙋж꙽ шед̑ше пѣши ѿ геѳа пред̑и҆дѧхꙋ пред̑ лицем̑ цр҃евым̑·

И҆ реч̑҇ цр҃ь къ е҆ѳи е҆ѳѣ́инꙋ, почто т̂ы и́деши с на́ми, възврати́сѧ и҆ бꙋ́деши съ цр҃емъ ꙗ҆́ко чꙋжъ е҆си т̂ы, и҆ ꙗ҆́ко пришелъ е҆си т̂ы ѿ свое́ѧ землѧ̀ вче́ра, и҆ днс̑҇ь л̂и и҆схо́диши с на́ми·

И҆ а́з꙽ б̂о и҆дꙋ̀ а҆́може и҆дꙋ̀ и҆ т̂ы възврати́сѧ і҆ и҆дѝ, и҆ възврати бра́тїю свою съ собо́ю, и҆ да г҃ь сътворит̑ с тобо́ю млс̑҇ть і҆ и́стиннꙋ·

И҆ ѿвѣща̀ е҆́ѳи къ цр҃ю, и҆ рече, жи́въ г҃ь, и҆ жи́въ господи́нъ мо́и цр҃ь, ꙗ҆́ко в не́мже бꙋ́дет̑ господин̑҇ мо́и цр҃ь, лю́бо въ смр҃ти, лю́бо въ жи́зни, т̂ꙋ и҆ а́зъ е҆смь ра́бъ тво́и с тобо́ю·

И҆ рече цр҃ь къ е҆́ѳи, грѧ́ди и҆ прїидѝ со мно́ю, и҆ прїиде е҆́ѳи геѳеин̑҇ и҆ цр҃ь и҆ вс̂и ѻ҆́троцы е҆го с ни́мъ и҆ ве́сь народ̑ и҆́же с ни́мъ·

Вс̂ѧ же землѧ̀ пла́кашасѧ гла́сомъ вели́кимъ, и҆ вс̂и лю́дїе и҆дꙋщїѝ, пре́иде цр҃ь чрес̑҇ пото́къ ке́дрьскыи, и҆ вс̂и лю́дїе пред̑ лицемъ цр҃евымъ, и҆дѧ́хꙋ пꙋтем꙽ пꙋсты́ннымъ·

И҆ с̂е по немъ по́иде садо́къ і҆е҆ре́и, и҆ вс̂и левѷти с ни́м꙽, носѧ́ще кїѻ́тъ завѣта гн҃ѧ ѿ жева́ры, и҆ поста́виша кїѻ́тъ бж҃їи.
и҆ а҆вїа҆ѳа́ръ възы́дет̑ и҆ ста̀ дон꙽деже пред̑ста́ша лю́ди и҆дꙋщи и҆з гра́да·

И҆ рече цр҃ь къ садо́кꙋ.
възвратѝ киѻ҆тъ бж҃їи въ́ град̑, и҆ да ста́нетъ на мѣ́стѣ свое҆мъ.
а҆́ще ѻ҆брѣтох̑ бл҃годать пред̑ ѻ҆чи́ма гн҃има, и҆ въз꙽врати́тъ м̂ѧ и҆ пока́жетъ м̂и е҆го и҆ лѣпотꙋ̀ свою̀·

И҆ а́ще та́ко речетъ не въсхотѣ́хъ тебѐ.
с̂е а҆́зъ е҆смь сътвори́тъ м̂и по бл҃гомꙋ пред̑ ѻ҆чи́ма свои́ма·

И҆ рече цр҃ь садо́кꙋ і҆е҆ре́ю.
с̂е ты възврати́шисѧ въ́ град̑ с ми́ром̑ и҆ а҆хима́съ сн҃ъ тво́и, і҆ѻ҆а҆наѳа́нъ сн҃ъ а҆виа҆ѳа́ровъ, и҆ дв̂а сн҃а ва́ша с ва́ми·

Видѣте же ꙗ҆́ко а҆́зъ вселю́сѧ въ раѻ́тъ пꙋсты́нныи.
до́ндеже прїидетъ м̂и вѣ́сть ѿ вас̑҇, сказа́ѧй м̂и ѻ҆ всемъ·

И҆ възвратѝ садо́къ и҆ а҆виа҆ѳа́ръ кїѻ́тъ бж҃їи въ і҆ерс̑҇ли́мъ, и҆ поставиша и҆̀ т̂ꙋ, и҆ дв҃дъ въсходѧ́ше въсходом̑ на́ горꙋ е҆леѻ́ньскꙋю.
и҆ пла́касѧ покры́вше главꙋ̀ свою, і҆ и҆дѧ́ше бо́сыма нога́ма.
и҆ вс̂и лю́дїе и҆же с ни́мъ покрове́нныма глава́ма въсходѧ́ще въсхо́дом̑ пла́кахꙋсѧ·

И҆ възвѣсти́ша дв҃дꙋ гл҃юще.
а҆хитофе́ль съ смѧтенїемъ съ а҆весоло́момъ, и҆ съ мꙋжи и҆же бѣша с ни́мъ шлѝ.
и҆ реч̑҇ цр҃ь да раздрꙋши́тъ совт̑ѣ а҆хитофе́левъ г҃ь б҃ъ мо́и·

И҆ б̂ѣ давыдъ грѧды́и къ ро́са, и҆дѣже поклонисѧ б҃ꙋ т̂ꙋ.
и҆ с̂е на срѣте́нїе е҆мꙋ и҆зы́де хꙋсїи ста́рецъ.
растерѕа́въ ри́зы своѧ̀, и҆ посы́пав꙽ главꙋ̀ свою̀·

И҆ реч̑҇ е҆мꙋ дв҃дъ.
а҆́ще мине́ши со мно́ю и бꙋдеши м̂и на ѹ҆тѣ́хꙋ·

И҆ а́ще во́ град̑ възврати́шисѧ, и҆ речеши а҆весоло́мꙋ.
минꙋша бра́тїа твоѧ̀, и҆ цр҃ь за мно́ю минꙋ̀ ѿц҃ъ тво́и, и҆ нн҃ѣ рабѝ твоѝ е҆смы̀ цр҃ю.
пощади м̂ѧ жи́ва бы́ти ра́бъ е҆смь бы́лъ ѿц҃а твоег̑҇ тогда̀.
и҆ нн҃ѣ а҆́зъ е҆смь тво́и ра́бъ разрꙋши́ши м̂и совт̑ѣ а҆хитоѳе́лов̑҇·

И҆ с̂е с тобо́ю та́мо садо́къ и҆ а҆вїа҆ѳа́ръ і҆ере́и.
и҆ бꙋдетъ всѧ́къ гл҃ъ, и҆ ꙗ҆́кож̑ слы́шиши и҆зъ ѹ҆стъ цр҃ьскъ, и҆ ска́жеши садо́кꙋ и҆ а҆вїа҆ѳарꙋ і҆е҆ре́е҆ма.

И҆ та́мо с ни́ма дв̂а сн҃а е́ю, а҆михас̑҇ сн҃ъ садо́ков̑҇·

и҆ѻ҆а҆наѳан̑҇ сн҃ъ а҆вїа҆ѳаровъ.
пꙋстите в рꙋкахъ е́ю къ мнѣ всѧ́къ гл҃ъ, и҆же а҆́ще ѹ҆слы́шите·

И҆ вни́де хꙋсїи старыи подрꙋгъ двд̑въ въ́ градъ, а҆весоло́мъ тогда̀ вхожда́ше въ і҆ерс̑҇ли́мъ, и҆ а҆хитоѳель с ним̑·

Глв̑҇а, ѕ҃і·

И внегда̀ дв҃дъ пре́иде ма́ло ѿ рꙋ́са, и҆ с̂е прїиде си́ва ѻ҆́трокъ мемъѳивостеѻ҆въ на срѣте́нїе е҆мꙋ.
и҆ сꙋпрꙋгъ ѻ҆слѧ́тъ ѻ҆сѣ́дланыхъ, и҆ на не́ю, с҃. хлѣ́бъ.
и҆ ко́шница гро́здїѧ ви́нна.
и҆ мѣ́ра смо́квеи, и҆ мх̑ѣ вина̀.
и҆ сто̀ фини́къ·

И҆ реч̑҇ цр҃ъ к си́вѣ что̀ сꙋть с̂и.
и҆ рече си́ва съпрѧ́женаѧ на снѣде́нїе ѹ҆гото́вана е҆ста цр҃ю, и҆ хлѣ́би и҆ фини́къ на снѣде́нїе ѻ҆́трокомъ, и҆ вино̀ пи́ти.
ѻ҆слабѣ́вшимъ въ пꙋсты́ни·

И҆ рече цр҃ь т̂о гдѣ̀ е҆сть сн҃ъ господи́на т̂и.
и҆ рече си́ва къ цр҃ю, с̂е сѣди́тъ въ і҆ерс̑҇ли́мѣ, ꙗ҆́ко рече дне́сь възвратѧт̑ м̂и весь до́мъ і҆и҆л҃евъ, црс̑҇тво ѿц҃а мое҆го·

И҆ рече цр҃ь къ си́вѣ.
с̂е тебѣ вс̂е е҆ли́ко е҆сть мем꙽ѳивосте́ѻво.
и҆ рече си́ва покло́ньсѧ.
ѻ҆брѣто́хъ блгд̑ть пред̑ ѻ҆чи́ма твои́ма г҃и мой цр҃ю·

И прїиде дв҃дъ цр҃ь до ваѳири́ма.
и҆ с̂е ѿтꙋдꙋ мꙋж́ъ и҆схожда́ше ѿ ро́да до́мꙋ саѹ́лѧ, и҆́мѧ е҆мꙋ симеи, сн҃ъ гиро́вль.
и҆зы́иде же и҆сходѧ́ и проклина́ѧ·

И҆ ка́менїемъ меща на дв҃да и҆ на всѧ̀ ѻ҆́троки цр҃ѧ давы́довы и҆ на всѧ̀ лю́ди и҆же бѣша с ним̑ и҆ на всѧ̀ си́лныѧ ѻ҆деснꙋ́ю и҆ ѻ҆шꙋю́ю цр҃ѧ·

И҆ та́ко рече симе́и проклина́ѧ е҆го, и҆зыидѝ и҆зыидѝ мꙋжꙋ кро́ви.
и҆ мꙋ́жꙋ безако́ненъ·

Възвратѝ на́ тѧ г҃ь вс̂ю кро́вь домꙋ саѹ́лѧ, понеже црс̑҇твова̀ въ е҆го мѣсто.
и҆ дас̑҇ г҃ь црс̑҇тво в рꙋ́цѣ а҆весоло́мꙋ сн҃ꙋ твое҆мꙋ, и҆ с̂е ты̀ въ ѕло́бѣ свое́и, ꙗ҆́ко мꙋ́жъ кро́ви е҆си ты̀·

И҆ рече а҆ве́са сн҃ъ сарꙋи́нъ къ цр҃ю.
почто̀ проклина́етъ пе́съ се́и ме́ртвыи господи́на мое҆го цр҃ѧ.
с̂е нн҃ѣ пришед̑, и҆ ѿи҆мꙋ̀ главꙋ̀ е҆мꙋ·

И҆ рече цр҃ь къ а҆ве́сѣ чт̂о мнѣ̀ и҆ ва́ма сн҃ꙋ сарꙋ́инъ.
ѻ҆ста́ви е҆го.
да проклина́етъ, ꙗ҆́ко г҃ь реч̑҇ е҆мꙋ проклина́ти дв҃да.
и҆ кт̂о речет̑ к немꙋ̀, чт̂о с̂е сътворѝ та́ко·

И҆ рече дв҃дъ къ а҆ве́сѣ и҆ къ всм̑ѣ ѻ҆́трокомъ свои҆мъ, с̂е сн҃ъ мо́и и҆зше́дъ и҆з чре́ва мое҆го, и҆́щетъ дш҃а моеѧ и҆ с̂е нн҃ѣ и҆ сн҃ъ е҆минѣ́евъ ѻ҆стави́те е҆го, проклина́ти м̂ѧ, ꙗ҆́ко рече е҆мꙋ г҃ь·

Неглѝ ви́дитъ м̂ѧ г҃ь въ смире́нїи мое҆мъ.
и҆ възвратит̑ м̂и бл҃га́ѧ.
въ проклина́нїѧ сего̀ мѣ́сто въ дне́шнїи дн҃ь·

І҆ и҆дѧ́ше дв҃дъ и҆ вс̂и мꙋ́жи е҆го пꙋтемъ, и҆ симе́ръ и҆дѧ́ше близꙋ посре́дѣ горы̀ проклина́ѧ и҆ ка́менїемъ меща по странѣ себѐ, и҆ пе́рсть сы́плѧ на всѧ̀·

И҆ прїиде цр҃ь и҆ вс̂и лю́дїе и҆же с ни́мъ, ѹ҆трꙋже́ни и҆ препочи́ша т̂ꙋ·

А҆весолом̑ же и҆ вс̂и мꙋжїе і҆и҆л҃еви.
внидо́ша въ і҆ерс̑҇ли́мъ, и҆ а҆хитофе́ль с ни́ми·

И҆ бы́сть е҆гда̀ прїиде хꙋсїи́ старыи дрꙋ́гъ дв҃двъ.
къ а҆весоло́мꙋ, и҆ рече хꙋсїи́ къ а҆весоло́мꙋ, да живет̑ цр҃ь·

И рече а҆весоло́мъ к хꙋсї́и, с̂е ли млс̑҇ть твоѧ̀ с по́дрꙋгомъ твои҆мъ почт̂о нѣ́си ше́лъ с по́дрꙋгомъ твои҆мъ·

И҆ рече хꙋсїи къ а҆весоло́мꙋ, н̂и, н̂о въ слѣдъ и҆до́хъ е҆гоже и҆збра̀ г҃ь и҆ лю́дїе сѝ, и҆ вси мꙋж́и і҆и҆л҃еви.
того е҆смъ и҆ с тѣ́мъ бꙋдꙋ·

І҆ и́номꙋ же а҆́зъ не рабо́таю, н̂о пред̑ сн҃омъ е҆го, ꙗ҆́коже рабо́тахъ пред̑ ѿц҃емъ твоим̑, та́ко бꙋдꙋ и҆ пред̑ тобо́ю·

И҆ рече а҆весоло́мъ къ а҆хитофе́лꙋ дадѣте совѣтъ.
чт̂о сътвори́мъ·

И҆ рече а҆хитофе́ль къ а҆весоло́мꙋ, вни́ди къ под̑ло́жницамъ ѿц҃а твое҆го, ꙗ҆́же ѻ҆ста́ви стре́щи до́мъ е҆го, и҆ ѹ҆слы́шатъ вс̂и і҆и҆л҃ьтѧ́не ꙗ҆́ко посрамил̑҇ е҆си ѿц҃а свое҆го.
и҆ възмо́гꙋтъ рꙋ́ки всѣхъ сꙋщихъ с тобо́ю·

И҆ поста́виша а҆весоломꙋ поло́гъ на пола́тѣ.
и вни́де а҆весоло́м꙽ къ под̑ло́жницам̑ ѿц҃а свое҆го, пред̑ ѻ҆чи́ма всх̑ѣ і҆и҆л҃ьтѧн̑҇·

И҆ совѣтъ а҆хитофе́ловъ, и҆же б̂ѣ съвѣща́лъ въ́ дн҃и прь́выѧ.
ꙗ҆́цѣмъ же ѻ҆́бразомъ въпросѝ кт̂о ѻ҆ словесѝ бж҃їи.
тако́въ весь совѣтъ а҆хитофе́ловъ, и҆ е҆же на дв҃да, і҆ и҆же на а҆весоло́ма·

Глв̑҇а, з҃і·

И рече а҆хитофе́ль къ а҆весоло́мꙋ.
да и҆зберꙋ съ собо́ю, ҂в҃і, мꙋ́жъ.
и҆ въста́вше пожене́мъ въ слѣдъ дв҃да но́щїю·

И҆ наи҆демъ на́ нѧ и҆ тѣ́мъ ѹ҆трꙋжде́номъ сꙋщемъ, и҆ ѻ҆слабе́нымъ рꙋка́ми.
и҆ ѹ҆страшꙋ̀ ѧ҆̀ и҆ побѣжа́тъ вс̂и лю́дїе и҆же с ни́м꙽.
и҆ ѹ҆бїю цр҃ѧ е҆ді́наго·

И҆ възвращꙋ вс̂ѧ лю́ди к тебѣ.
ꙗ҆цѣмъ же ѻ҆́бразомъ ѻ҆бращает̑сѧ невѣ́ста к мꙋж́еви свое҆мꙋ.
ты б̂о то́кмо дш҃а е҆ді́наго мꙋж́а и҆́щеши.
и҆ всѣ́мъ мꙋже́мъ бꙋ́детъ ми́ръ·

И҆ а́бїе сло́во бы́сть пред̑ ѻ҆чи́ма а҆весоло́млима ѹ҆го́дно.
и҆ пред̑ ѻ҆чи́ма всѣ́хъ ста́рецъ і҆и҆л҃евъ·

И҆ рече а҆весоло́мъ призовѣте м̂и хꙋсїю а҆раха́ина.
и҆ слы́шимъ чт̂о и҆зъ ѹ́стъ е҆го·

И҆ вни́де хꙋсїѧ къ а҆весоло́мꙋ.
и҆ рече а҆весоло́мъ къ хꙋсїи.
гл҃ѧ по гл҃ꙋ семꙋ̀ и҆же гл҃а а҆хитофе́л꙽.
сътвори́мъ л̂и по словесѝ семꙋ̀, а҆ще ли н̂и то т̂ы гл҃и·

И҆ рече хꙋсїа къ а҆весоло́мꙋ не бл҃гъ е҆сть совѣтъ сїи е҆же совѣща̀ а҆хитофе́ль си́це·

И҆ рече па́ки хꙋсїѧ.
т̂ы вѣ́си ѿц҃а свое҆го и҆ мꙋж́и е҆го ꙗ҆́ко си́лни сꙋть ѕѣло.
и҆ гнѣвли́ви дш҃ами свои́ми.
ꙗ҆́ко мед̑вѣдицы в берлозѣ рага́юще.
и҆л̂и ꙗ҆́ко серна̀ бо́рза на́ поли.
и҆ ѿц҃ъ тво́и мж̑ꙋ боре́цъ, и҆ не гꙋби́тъ людїи·

Се б̂о то́и самъ нн҃ѣ съкры́лсѧ е҆сть на нѣ́которомъ хо́лмѣ, и҆л̂и на нѣ́которомъ мѣ́стѣ.
и҆ бꙋдетъ внегда̀ нападе́тъ на́ нѧ в нача́ло.
и҆ ѹ҆слы́шатъ стра́жїе во́инъстїи, въскли́чꙋтъ, и҆ бꙋ́детъ съкрꙋше́нїе на люде́хъ за́днихъ, и҆же за а҆весоло́мом̑·

И҆ с̂е то́и самъ мꙋ́жъ си́ленъ.
е҆мꙋже срд̑це, ꙗ҆́ко и҆ срд̑це львꙋ̀.
та́ющꙋ таит̑ ꙗ҆́ко совѣ́сть ве́сь і҆и҆л҃ь.
ꙗ҆́ко си́ленъ ѿц҃ъ твои.
и҆ сн҃ове си́лныхъ вс̂и сꙋть с нимъ·

Та́ко совѣтꙋѧ а҆зъ и҆ совѣтова́хъ.
и҆ събира́ѧ събере́тсѧ к тебѣ ве́сь і҆и҆л҃ь ѿ да́на до версавѣѧ.
ꙗ҆́ко пѣсо́къ и҆же по мо́рю въ мно́жество и҆ лице твое и҆ды́и посредѣ их̑·

И҆ прїидемъ к немꙋ на е҆ді́но мѣ́сто.
і҆ и҆дѣже ѻ҆брѧ́щемъ е҆го.
та́мо и҆ въполчим̑сѧ на́ нѧ.
и҆ ꙗ҆́ко спада́етъ роса̀ на́ землю та́ко нападе́мъ на́ нѧ, и҆ не ѻ҆ста́вим̑ в не́мъ, ни е҆ді́наго же мꙋж́а, и҆же с ни́мъ·

И҆ а́ще сѧ въ град̑ съберꙋт꙽, т̂о и҆ да събере́тъ ве́сь і҆и҆л҃ь къ гра́дꙋ томꙋ ѹ́жа, и҆ въвлече́мъ и҆̀ до пото́ка, до́ндеже не ѻ҆ста́нетъ в не́мъ ни камы́къ·

И҆ рече а҆весоло́мъ и҆ вс̂и мꙋж́и і҆и҆л҃ьстїи, бл҃гъ совѣтъ хꙋсїѧ а҆рихїи́на, паче совѣта а҆хитофе́лѧ, и҆ г҃ь заповѣ́да разори́ти совѣтъ а҆хитофе́ль, бл҃гїи ꙗ҆́ко да наведе́тъ г҃ь на а҆весоло́ма ѕла́а вс̂ѧ·

И҆ рече хꙋсїи а҆рахїи҆нъ, къ садо́кꙋ и҆ а҆виа҆ѳа́рꙋ і҆е҆ре́ѻма та́ко, и҆ та́ко совѣтова а҆хитофе́ль съ а҆весало́мом̑, и҆ съ ста́рцы і҆и҆л҃евы, и҆ а́зъ та́ко и҆ та́ко совѣща́хъ·

А҆ нн҃ѣ пꙋсти́та ско́ро, и҆ възвѣсти́те дв҃дꙋ гл҃юще, не пребꙋ́ди на но́щь сїю в раво́ѳѣ пꙋсты́ннѣмъ, н̂о минꙋти потщи́тесѧ е҆да ка́ко срѣтитъ цр҃ь и҆ вс̂и лю́дїе с ни́мъ·

І҆ и҆ѻ҆а҆наѳа́нъ и҆ а҆хи́ма стоѧ́ста на стꙋде́нцы рохи́ли, и҆ шед̑ши рабы́ни повѣ́да и́ма с̂е, и҆ тїи шед̑ши възвѣсти́ста дв҃дꙋ цр҃ю, ꙗ҆́ко не мого́ста ꙗ҆ви́тисѧ и҆ внити въ́ грд̑а·

И҆ ви́дѣвъ ѧ҆̀ ѻ҆тро́чищъ, и҆ повѣ́да а҆весоло́мꙋ, і҆ и҆до́ста ѿ мѣста ѻ҆́ба ско́ро, и҆ прїидо́ста в до́мъ нѣ́коего мꙋжа ваа҆рїи́мъ, и҆ т̂ꙋ б̂ѣ ро́въ на дворѣ̀, и҆ влѣзо́ста т̂ꙋ·

И҆ взе́мши жена̀ положи покро́въ на ѹ́стїи рова̀, и҆ почи на не́м꙽ а҆раве́ѳъ, и҆ не разꙋмѣ́ста гл҃а·

И҆ прїидо́ша ѻ҆́троцы а҆весоло́мли къ женѣ̀ в дом̑, и҆ рѣша е́и гдѣ е҆сть а҆хима́съ і҆ и҆ѻа҆наѳа́нъ.
и҆ рече и҆мъ жена̀ преидо́ша на ѻ҆́нъ по́лъ рѣкѝ.
і҆ и҆ска́хꙋть е҆ю и҆ не ѻ҆брѣто́ша.
и҆ възврати́шасѧ въ і҆ерс̑҇лимъ·

Бы́сть же по ѿше́ствїи и҆хъ.
и҆злѣзо́ста и҆з ро́ва, і҆ и҆до́ста и҆ възвѣсти́ша дв҃дꙋ цр҃ю.
и҆ гл҃аста е҆мꙋ.
въста́ните и҆ преиди ско́ро во́дꙋ ꙗ҆́ко си́це совѣща на́ вы а҆хитофе́ль·

И҆ въста дв҃дъ и҆ вс̂и лю́дїе и҆же с ним̑.
и преидо́ша и҆ѻ҆рда́нъ, до́ свѣта заѹ́тра.
і҆ и҆ ни е҆ді́нъ же не ѻ҆ста̀ и҆же не преиде и҆ѻ҆рда́нъ·

И҆ а҆хитофе́ль ви́дѣ ꙗ҆́ко не събы́стьсѧ совѣтъ е҆го.
и҆ ѻ҆сѣдла̀ ѻ҆слѧ̀ свое.
и҆ въста́въ и҆́де в до́мъ сво́и, и҆ въ́ градъ сво́и.
и҆ заповѣ́да до́мꙋ свое҆мꙋ.
и҆ ѹ҆дави́сѧ и҆ ѹ́мре.
и҆ погребе́нъ бы́сть въ гро́бѣ ѿц҃а свое҆го·

И҆ дв҃дъ про́иде в манаи́мъ.
и҆ а҆весоломъ преиде и҆ѻ҆рда́нъ са́мъ и҆ вс̂и мꙋж́и і҆и҆л҃ьстїи с нимъ·

И҆ а҆месѣ́ѧ поста́ви а҆весоло́мъ въ і҆ѻ҆ава мѣ́сто ѹ҆ себѐ над̑ вое҆во́дами и҆ а҆меса бы́сть сн҃ъ мꙋж́а нѣ́коего е҆мꙋже и҆мѧ б̂ѣ и҆е҆фе́ръ і҆и҆л҃ьтѧни́нъ.
се́и вни́де къ а҆вигѣ́и дщери и҆е҆се́инѣ.
сестры сарꙋ́ины мт҃ре и҆ѻ҆а́влѧ·

И҆ про́иде а҆весоло́мъ и҆ ве́сь і҆и҆л҃ь в зе́млю галаад̑скꙋю·

И҆ бы́сть ꙗ҆́ко вни́де дв҃дъ въ по́лкъ манаи́мль, и҆ е́свїи сн҃ъ нава́совъ.
ѿ крава́ѳа сн҃а а҆м꙽мо́нѧ, и҆ махи́ръ сн҃ъ а҆мїи҆ль.
и҆же кладава́ръ.
и҆ ферзелїи, галаад̑скїи.
и҆же къ крогели́ма·

Внесо́ша, і҃, посте́ль ѹ҆строе҆ныхъ.
и҆ коно́бъ, і҃. и҆ съсꙋ́ды зда́ныи, и҆ пшени́цꙋ.
и҆ ꙗ҆чме́нь и҆ мꙋкꙋ̀, и҆ ѳꙋни́къ и҆ со́чиво.
и҆ лѧщꙋ·

И҆ ме́дъ и҆ ма́сло, и҆ ѻ́вцы и҆ е҆ді́но ю҆́нѧ.
и҆ мле́ко говѧ́же, и҆ принесо́ша двд̑ꙋ и҆ людем꙽ и҆же с ни́мъ ꙗ҆́сти и҆́мъ бѣша б̂о лю́ди глад̑ни и҆ скꙋд꙽ни, и҆ жаж̑ни ѿ пꙋсты́ни·

Глв̑҇а, и҃і·

И съглѧда̀ дв҃дъ всѣ́хъ людїи сꙋщихъ с ни́мъ.
и҆ поста́ви в нихъ ты́сѧщники и҆ со́тники·

И҆ посла̀ дв҃дъ г҃ ю ча́сть людїи в рꙋцѣ і҆ѻ҆а́вли.
и҆ г҃ ю ча́сть в рꙋцѣ а҆ве́сѣ сн҃ꙋ сарꙋ́инꙋ, и҆ бра́та и҆ѻ҆а́влѧ.
и҆ г҃ ю ча́сть е҆ѳи́тꙋ, геѳе́ѻ҆вꙋ.
и҆ рече дв҃дъ к лю́демъ.
шед̑ше и҆зыидѣте и҆ а́зъ с ва́ми·

И҆ вс̂и лю́дїе рѣша не и҆зыидѝ ꙗ҆́ко а҆ще побѣ́гнем.
не положа́тъ на на́съ срд̑це.
и҆ а҆ще ѹ́мретъ по́лъ насъ не поло́жатъ на на́съ срд̑ца, и҆ гл҃аша е҆мꙋ ты б̂о е҆си въ на́съ, и҆ нн҃ѣ лꙋ́чше ꙗ҆́ко ѻ҆ста́неши въ́ градѣ на по́мощъ на́мъ·

И҆ рече и҆мъ цр҃ь е҆же ѹ҆го́дное пред̑ ва́ми сътворю̀, и ста̀ цр҃ь пред̑ вра́ты.
и҆ вс̂и лю́дїе и҆схождахꙋ стори́цами, и҆ ты́сѧщами·

И заповѣ́да цр҃ь и҆ѻ҆а́вꙋ и҆ а҆ве́сѣ и҆ е҆ѳе́еви гл҃ѧ.
пощади́те м̂и ѻ҆́трока мое҆го а҆весоло́ма.
и҆ вс̂и лю́дїе слы́шаша за́повѣдь црс̑҇кꙋ е҆гда заповѣ́да всѣмъ кн҃ѕемъ а҆весоло́ма ра́ди·

І҆ и҆зыидо́ша вс̂и лю́дїе в дꙋбра́вꙋ, сꙋпротивъ і҆и҆л҃ю.
и҆ быс̑҇ бра́нь в дꙋбра́вѣ е҆фре́мли·

И҆ падо́ша т̂ꙋ лю́ди і҆и҆л҃еви пред̑ ѻ҆́троки давы́довы.
и҆ бы́сть съкрꙋше́нїе вели́ко в то́и дн҃ь.
ꙗ҆́ко падо́ша т̂ꙋ ҂к҃, мꙋж́ъ·

И҆ бы́сть т̂ꙋ рас꙽сы́пана бра́нь по лицꙋ̀ все́го лꙋ́га.
и҆ ѹ҆мно́жисѧ лꙋ́гъ на посѣче́нїе ѿ людїи.
па́че не́же посѣче ме́чь в то́и дн҃ь·

И҆ побѣжа̀ а҆весоло́мъ пред̑ ѻ҆́троки давы́довы.
всѣ́дъ на мща̀ свое.
и҆ в꙽бѣже с ним̑ мща̀ в ча́щꙋ лꙋ́га вели́каго.
и҆ ѻ҆би́тсѧ е҆мꙋ гла́вны вла́сы дꙋбѣ и҆ пови́се ме́ждꙋ нб҃омъ и҆ земле́ю.
м꙽ща́ же под ни́мъ про́иде·

И҆ ви́дѣ и҆̀ мꙋжъ е҆ді́нъ.
и҆ възвѣсти и҆ѻ҆а́вꙋ и҆ рече.
с̂е ви́дѣхъ ви́сѧща а҆весоло́ма на́ дꙋбѣ·

И҆ рече и҆ѻ҆а́въ мꙋжеви възвѣсти́вшемꙋ е҆мꙋ.
сего̀ л̂и е҆си ви́дѣлъ т̂о почто̀ нѣ́си е҆го ѹ҆би́лъ т̂ꙋ на землѝ, и҆ а́зъ да́лъ т̂и бы́хъ н҃ си́кль сребра̀ и҆ по́ѧсъ е҆ді́нъ·

И҆ рече мꙋж́ъ и҆ѻ҆а́вꙋ.
а҆ще т̂ы вложи́ши в рꙋ́цѣ моѝ.
҂а҃ си́кль сребра̀.
т̂о не възложꙋ̀ рꙋкѝ мое́ѧ на сн҃а цр҃ева, слы́шахомъ б̂о ꙗ҆́ко заповѣ́да цр҃ь въ ѹ́ши тебѣ̀ и҆ а҆ве́сѣ, и҆ е҆ѳїе́ви гл҃ѧ.
съблюдѣте м̂и ѻ҆троча́те а҆весоло́ма·

Не сътвори́те дш҃и е҆го непра́ведна.
поне́же всѧ́ка ве́щь пред̑ цр҃емъ не ѹ҆таи́тсѧ.
а҆ т̂ы стои́ши сꙋпроти́въ е҆мꙋ·

И҆ рече и҆ѻ҆а́въ с̂е аз̑ начнꙋ̀.
а҆ не пребꙋдꙋ пред̑ тобо́ю.
и҆ възе́мъ и҆ѻ҆а́въ і҃ стрѣ́лъ в рꙋ́цѣ своѝ.
и҆ вонзѐ ѧ҆̀ въ срд̑це а҆весоло́мꙋ.
сꙋщꙋ е҆мꙋ е҆ще жи́вꙋ на́ дꙋбѣ·

І҆ ѻ҆б꙽стꙋпи́ша, і҃ ѻ҆́трокъ носѧ́щїѝ ѻ҆рꙋжїе и҆ѻ҆а́вле, и҆ ѹ҆би́ша а҆весоло́ма и҆ ѹ҆мори́ша и҆̀·

И҆ въстрꙋбѝ и҆ѻ҆а́въ трꙋбо́ю.
и҆ възврати́шасѧ лю́дїе не гна́ти въ слѣ́дъ і҆и҆л҃ѧ, ꙗ҆́ко запретѝ и҆ѻ҆а́въ лю́демъ·

И҆ взе́мъ и҆ѻ҆а́въ а҆весоло́ма.
въве́рже и҆̀ въ про́пас̑҇ вели́кꙋ, и҆ скла̀ над̑ нимъ кꙋ́пꙋ ка́менїѧ вели́кꙋ, и҆ всѝ і҆и҆л҃ьтѧ́не бѣжа́ша на се́ла своѧ̀·

А҆весоло́м же прежде жив̑҇ сы́и поста́вилъ б̂ѣ сто́лпъ себѣ̀, въ ѹ҆до́лїи црс̑҇тѣй в не́иже поги́бе.
рече б̂о нѣсть м̂и сн҃а на па́мѧть, и҆́мени мое҆го.
и҆ нарече сто́лпъ и҆́менемъ свои҆мъ.
и҆ нарече е҆го рꙋко́ю а҆весоло́млею е҆сть и҆ до дне́шнѧго дн҃е·

И҆ а҆хима́съ сн҃ъ садо́ковъ рече къ и҆ѻ҆а́вꙋ.
текꙋ л̂и и҆ възвѣщꙋ цр҃ю ꙗ҆́ко сꙋдѝ са́мъ г҃ь ѿ рꙋкѝ вра́гъ е҆го.

И҆ рече и҆ѻ҆а́въ не добро̀ мꙋж́ꙋ възвѣсти́ти дне́сь.
н̂о възвѣсти́ши въ дн҃ь дрꙋгїи.
а҆ въ дне́шнїи дн҃ь не добро̀ възвѣще́нїе.
поне́же сн҃ъ цр҃въ ѹ҆ме́рлъ е҆сть·

И҆ рече и҆ѻ҆а́въ хꙋсїи шед̑ повѣ́жъ цр҃ю е҆ли́ко ви́дѣ.
и҆ покло́ньсѧ хꙋсїи и҆ѻ҆а́вꙋ і҆ и́де·

И҆ приложѝ и҆ е҆щѐ а҆хи́ма сн҃ъ садо́ковъ рещѝ къ и҆ѻ҆а́вꙋ.
т̂о чт̂о стою̀, н̂о да и҆ а́зъ текꙋ̀ въ слѣ́дъ хꙋсїѧ́.
и҆ реч̑҇ и҆ѻ҆а́въ почто̀ т̂ы хо́щеши тещѝ сн҃е мой.
грѧдѝ н̂о нѣ́сть добро̀ възвѣще́нїе нивъчто́же, хо́щеши ты̀ и҆тѝ·

И҆ рече а҆хи́ма т̂о что̀ м̂и бꙋдетъ а҆ще текꙋ̀, и҆ рече е҆мꙋ и҆ѻ҆а́в꙽ тецы̀.
и҆ теча́ше а҆хи́ма пꙋте́мъ про́стымъ.
і҆ и҆зминꙋ̀ хꙋсїю·

И дв҃дъ седѣ посредѣ двою вра́тъ.
і҆ и҆дѧ́ше стра́жъ, в пола́тꙋ две́рїю къ стенѣ̀, и҆ въздви́гъ ѻ҆́чи своѝ ви́дѣ и҆ с̂е мꙋжъ текїи е҆ді́нъ пред̑ ним̑.

И҆ възопѝ стра́ж꙽ и҆ сказа̀ цр҃еви.
и҆ реч̑҇ цр҃ь а҆́ще е҆ді́нъ е҆сть бꙋ́детъ възвѣщенїе въ ѹ҆стх̑ѣ е҆го.
і҆ и҆дѧ̂ше и҆ды́и и приближа́ѧсѧ·

И҆ ви́дѣ стра́жъ мꙋжа дрꙋга́го текꙋща.
и҆ възопѝ къ две́ремъ и҆ ре́че.
с̂е мꙋ́жъ дрꙋгы́и текїи е҆ді́нъ.
и҆ ре́че цр҃ь и҆ то́й е҆сть възвѣща́ѧ·

И҆ рече стра́жъ, а҆́зъ ви́дѣхъ тече́нїе пр́ьваго.
ꙗ҆́ко тече́нїе а҆хима́са сн҃а садо́кова.
и҆ реч̑҇ цр҃ь, мꙋ́жъ бл҃гъ с̂е совѣща́етъ бл҃гыню приходѧ́щꙋю·

И҆ възопѝ а҆хима́съ реч̑҇ къ цр҃ю ми́ръ т̂и.
и҆ поклони́сѧ цр҃ю пред̑ лицемъ е҆го до землѧ̀.
и҆ рече блс̑҇вен̑҇ г҃ь б҃ъ тво́и, и҆же затворѝ мꙋ́жа въздви́жꙋща рꙋки и҆хъ на господи́на свое҆го цр҃ѧ·

И҆ рече цр҃ь ми́ръ ѻ҆́трочищꙋ мое҆мꙋ а҆весоло́мꙋ, а҆́ще жи́въ е҆сть.
и҆ рече а҆химасъ ви́дѣхъ мно́жество вели́ко веселѧ́щесѧ.
внегда̀ ѿпꙋща́ше м̂ѧ и҆ѻ҆а́въ ра́бъ цр҃евъ раба̀ твое҆го, и҆́ного же не разꙋмѣ́хъ ничт̂оже·

И҆ рече цр҃ь възвратисѧ и҆ ста́ни зд̂ѣ.
и҆ шед̑ съза́дꙋ ста̀, и҆ с̂е хꙋсїи въ слд̑ѣ е҆го прїиде, и҆ реч̑҇ цр҃ю възвѣща́етсѧ господи́нꙋ мое҆мꙋ цр҃ю ꙗ҆́ко сꙋди г҃ь днс̑҇е ѿ рꙋки всх̑ѣ въста́ющих̑ на́ тѧ·

И҆ реч̑҇ цр҃ь к хꙋсїѝ мир̑҇ л̂и ѻ҆тро́чищꙋ мое҆мꙋ а҆весоло́мꙋ а҆́ще жив̑҇ е҆сть и҆ рече хꙋсі́и, да бꙋдет̑ ꙗ҆́ко ѻ҆́трочищ꙽, вра́ѕи господи́на мое҆го цр҃ѧ и҆ вс̂и е҆ли́ко их̑ въста́ша на́нь зло́бою·

И҆ смѧтесѧ цр҃ь, и҆ взы́де на полатꙋ двор꙽скꙋю и҆ плакасѧ го́рко по а҆весоло́мѣ, и҆ тако реч̑҇ в꙽ плачѝ своем̑ сн҃ꙋ мо́и а҆весоло́ме.
сн҃ꙋ мо́и сн҃ꙋ мо́и а҆весоло́ме.
кт̂о м̂и дас̑҇ смр҃ть в꙽ тебѐ мѣ́сто, да бых̑ а҆́зъ въ тебѐ мѣ́сто, а҆весоломе сн҃ꙋ мо́и сн҃ꙋ мо́и сн҃ꙋ мо́и а҆весоло́ме·

Глв̑҇а, ѳ҃і·

И повѣ́даша і҆ѻ҆а́вꙋ гл҃юще, с̂е цр҃ь пла́чет̑ и҆ рыда́етъ по а҆весоло́мѣ·

И҆ бы́сть сп҃се́нїе в то́й дн҃ь в рыда́нїе всм̑ѣ люде́мъ, ѹ҆слы́шаша б̂о лю́дїе в то́й дн҃ь глс̑҇а гл҃ющъ, ꙗ҆́ко печа́ленъ е҆сть цр҃ь ѻ҆ сн҃ꙋ свое҆мꙋ·

И҆ ѹ҆крадахꙋсѧ людїе в то́й дн҃ь въходѧ́ще въ́ град̑, ꙗ҆́коже кра́дꙋщесѧ лю́дїе ѻ҆срамленїи, и҆ внегда̀ бѣга́ти и҆мъ ѿ бра́ни·

И҆ цр҃ь съкры̀ лице свое, и҆ възопѝ цр҃ь гла́сомъ вели́ким꙽ гл҃ѧ сн҃ꙋ мо́и а҆весоло́ме, а҆весоло́ме сн҃ꙋ мо́и·

И҆ вни́де и҆ѻ҆а́въ къ цр҃ю в дом̑, и҆ рече посрами́лъ е҆си днс̑҇ь лицѐ рабъ свои҆хъ всѣхъ, и҆земшихъ днс̑҇ь дш҃ꙋ твою̀ ѿ смр҃ти, и҆ дш҃и сн҃овъ твоих̑ и҆ дще́рїи твои҆хъ, и҆ дш҃а же́нъ твоих̑ и҆ под̑ложниць твоих̑ всѣ́хъ·

Є҆́же люби́ти ненави́дѧщаѧ тебѐ, и҆ ненави́дѣти лю́бѧщаѧ т̂ѧ, ꙗ҆́ви́лъ б̂о е҆си днс̑҇ь ꙗ҆́ко не сꙋть т̂и кнѧ́ѕи ни́же ѻ҆́троцы н̂о разꙋмѣхъ днс̑҇ь, ꙗ҆́ко а҆́ще б̂ы авесоло́мъ живъ бы́лъ, т̂о мы вс̂и днс̑҇ь мр҃тви бы́хомъ бы́ли, ꙗ҆́ко с̂е ли право есть пред̑ ѻчи́ма твои́ма·

И҆ нн҃ѣ въстав̑҇ и҆зы́ди, и҆ гл҃и въ срд̑ца рабо́мъ свои́мъ, ꙗ҆́ко ѻ҆ г҃ѣ клѧ́хсѧ, ꙗ҆ко а҆́ще не и҆зы́деши днс̑҇ь, не ѻста́нет̑ н̂и е҆ді́нъ мꙋжъ с тобо́ю в но́щъ сїю и҆ разꙋмѣ́и в себѣ̀ ꙗ҆́ко зл̂о ти есть с̂е па́че всего̀ зл̂а, ꙗ҆́же прїидо́ша ѿ ю҆́ности твое́ѧ до нн҃ѣ·

И въставъ цр҃ь сѣдѣ на полатѣ при дверехъ, и҆ възвѣстиша с̂е всм̑ѣ людемъ гл҃юще.
с̂е цр҃ь сѣдитъ въ дверех̑, и҆ внидо́ша вс̂и лю́дїе пред̑ лице цр҃ево пред̑ двери, а҆ мꙋ́жи і҆и҆л҃еви бѣжа́ша на се́ла своа̀·

Прѧ́хꙋсѧ вс̂и лю́дїе въ всѣхъ колѣнах̑ іи҆л҃евыхъ.
гл҃юще цр҃ь дв҃дъ и҆зба́ви ны ѿ всѣхъ вра́гъ нашихъ.
и҆ с̂е и҆зѧт̑ насъ ѿ рꙋкѝ и҆ноплеме́нничъ.
и҆ нн҃ѣ бѣжа̀ ѿ землѧ̀, и҆ ѿ црс̑҇тва свое҆го ѿ а҆весоло́ма·

А҆весоломъ же е҆гоже пома́захомъ намъ на црс̑҇тво.
и҆ ѹ́мре въ бра́ни.
и҆ нн҃ѣ чт̂о вы ѻ҆слꙋша́е҆тесѧ е҆же не възврати́тисѧ къ цр҃ю·

И҆ гл҃ъ всего і҆и҆л҃ѧ прїидетъ къ цр҃ю.
и҆ цр҃ь дв҃дъ пꙋсти къ садо́кꙋ и҆ къ а҆виа҆ѳарꙋ і҆е҆ре́ѻ҆мъ гл҃ѧ.
рцѣте та́ко ста́рцемъ і҆ѹ́динамъ гл҃юще почто̀ бы́сте послѣднїи, е҆же възъврати́ти цр҃ѧ в до́мъ е҆го.
сло́во же всего і҆и҆л҃ѧ прїиде въ до́мъ е҆го·

Бра́тїѧ моѧ е҆сте.
и҆ ко́сти моѧ е҆сте.
и҆ пло́ть моѧ в̂ы е҆сте, т̂о почто̀ бы́сте послѣ́днїи.
е҆же възврати́ти цр҃ѧ в до́мъ е҆го·

И҆ а҆веса́ю рцѣте нѣ́си л̂и ко́сть моѧ и пло́ть моѧ т̂ы е҆си.
и҆ нн҃ѣ с̂е м̂и да сътвори́тъ б҃ъ.
и҆ с̂е да приложитъ а҆ще не бꙋ́деши кн҃ѕь си́лы, предо мно́ю, по всѧ дн҃и въ и҆ѻ҆а́ва мѣ́сто·

И҆ та́ко преклони срд̑ца всѣ́хъ мꙋжїи, і҆ѹ́динъ, ꙗ҆́ко мꙋж́а е҆ді́наго.
и҆ посла́ша къ цр҃ю гл҃юще.
да възврати́шисѧ т̂ы и҆ вс̂и рабѝ твои·

И҆ възврати́сѧ цр҃ь и҆ прїиде до і҆ѻ҆рда́на.
и҆ мꙋж́и і҆ѹ́дины прїидо́ша въ галга́лꙋ, и҆зыити на срѣте́нїе цр҃ю.
превести цр҃ѧ чре́съ і҆ѻ҆рда́нъ·

И҆ ѹ҆скори семе́и сн҃ъ гира́мъ сн҃а и҆е҆меѻ҆ва.
и҆же ѿ ваѹ҆ри́ма.
и҆ сни́де с мꙋжъми і҆ѹ́диными, на срѣте́нїе цр҃ю дв҃дꙋ, и҆ ҂а҃, мꙋж́ъ с ни́мъ, ѿ венїа҆ми́на и҆ сива ѻ҆́трокъ до́мꙋ саѹ́лѧ.
и҆ е҃і, сн҃овъ е҆го с ним̑, и҆ к҃, ра́бъ е҆го с ни́мъ, и҆ ѹ҆пра́виша на і҆ѻ҆рда́нъ пꙋть пред̑ цр҃емъ·

И҆ послꙋжи́ша слꙋже́нїемъ ѻ҆ преведе́нїи цр҃евѣ, и҆ преидо́ша мꙋж́и да пренест̑ꙋ до́мъ цр҃евъ, и҆ сътвори́тъ пра́вое пред̑ ѻ҆чи́ма е҆го, и҆ семе́и сн҃ъ гира́м꙽, падѐ на лицы̀ свое҆мъ пред̑ цр҃емъ, вънегда̀ прехожда́ше і҆ѻ҆рданъ·

И҆ реч̑҇ къ цр҃ю дабы не помышлѧ́лъ господи́н꙽ мои безако́нїѧ, и҆ не помѧни е҆ли́ко съгрꙋ́би ра́бъ твои въ дн҃ь ѻ҆́нъ, во́ньже господи́нъ мои цр҃ь съхожда́ше и҆зъ і҆ерс̑҇лима, ни съдръжи сего въ срд̑цы свое҆мъ·

И҆ разꙋмѣ ра́бъ тво́и ꙗ҆́ко а҆зъ съгрѣши́хъ, и҆ с̂е а҆зъ прїидо́хъ дне́сь, первїе всего і҆и҆л҃ѧ до́мꙋ і҆ѻ́сифлѧ, е҆же сни́ти м̂и на срѣте́нїе господи́нꙋ мое҆мꙋ цр҃ю·

И҆ ѿвеща̀ а҆ве́са сн҃ъ сарꙋ́инъ, и҆ рече сего л̂и ра́ди не ѹ҆мр҃тви́тсѧ семе́и, ꙗ҆́ко проклѧт̑ х҃а гн҃ѧ·

И҆ рече дв҃дъ чт̂о мнѣ и҆ вам̑ сн҃ове сарꙋ́ины, ꙗ҆́ко бы́сте мнѣ̀ днс̑҇ь въ навѣтъ, дне́сь не ѹ҆мр҃тви́тсѧ мꙋж́ъ ѿ і҆и҆л҃ѧ, ꙗ҆́ко не вѣдали дне́сь и҆же црс̑҇твова́ти и҆́мамъ и҆ а́зъ над̑ і҆и҆л҃емъ·

И҆ рече цр҃ь к꙽ семе́ю, не ѹ́мреши, и҆ клѧ́тсѧ е҆мꙋ цр҃ь·

И҆ се ме́м꙽ѳивосте́и сн҃ъ и҆ѻ҆а҆наѳа́нь, сн҃а саѹ́лѧ, сни́де на срѣте́нїе цр҃ю, и҆ не ѻ҆мы́въ но́гꙋ своею, и҆ не ѻ҆брѣ́зова но́готь рꙋ́кꙋ свое́ю, ниже ѹ҆тва́ри бра́ды своеѧ, и҆ ри́зъ свои҆хъ не пра̀, ѿ дн҃е того во́ньже и҆зы́иде цр҃ь, до дн҃е во́ньже възы́иде с миромъ въ і҆ерс̑҇лим̑·

И҆ бы́сть егда̀ въниде въ і҆ерс̑҇лимъ на срѣте́нїе цр҃ю, и҆ рече емꙋ цр҃ь, чт̂о с̂е ꙗ҆́ко не и́де съ мно́ю мем꙽ѳивосте́и·

И҆ рече к немꙋ мем꙽ѳивосте́и, г҃и мои цр҃ю, небрежѐ менѐ ра́бъ мои, ꙗ҆́ко рече ра́бъ твои е҆мꙋ, ѻ҆сѣдла́и м̂и ѻ҆слѧ̀ и҆ всѣ́дъ на нѐ і҆ и҆дꙋ съ цр҃емъ, ꙗ҆́ко хро́мъ е҆смь а҆́зъ ра́бъ твои·

И ѻ҆болга раба твое҆го къ господи́нꙋ мое҆мꙋ цр҃ю, и҆ господи́нъ мои цр҃ь, ꙗ҆́ко а́гг҃лъ бж҃їи сътвори бл҃гое пред̑ ѻ҆чи́ма твои҆ма·

Ꙗ҆́ко не бѣ̀ ве́сь до́м꙽ ѿц҃а мое҆го, развѣ мꙋж́и винные смр҃ти господинꙋ мое҆мꙋ цр҃ю, и҆ посадилъ е҆си раба̀ твое҆го съ ꙗ҆дꙋщими на трапе́зѣ твое́и, ѿ чїе́ѧж̑ рꙋки бꙋдет̑ м̂и е҆ще ѻ҆правле́нїе, и҆ возопити м̂и е҆щѐ къ цр҃ю·

И҆ реч̑҇ е҆мꙋ цр҃ь.
почто̀ гл҃еши и҆ е҆ще словеса̀ твоѧ.
рѣхъ т̂и и҆ си́во раздѣли́те себѣ̀ се́ла·

И рече мем̑ѳивосте́и къ цр҃ю т̂о ѹ҆же вс̂е да прїимет̑ поне́же прїиде господи́нъ мои цр҃ь въ ми́ре в до́мъ сво́и·

Посе́м же верзелі́и и҆же ѿ галади́ты сни́де, ѿ е҆кроголи́ма, и҆ пре́иде съ цр҃емъ и҆ѻ҆рдан̑҇, е҆же превести е҆го черезъ и҆ѻ҆рданъ·

И верзелїи́ мꙋжъ ста́ръ ѕѣ́ло ꙗ҆́ко п҃, лѣтъ, и҆ то́и напита̀ цр҃ѧ.
вънегда̀ живѧ́ше въ манаи́мѣ.
ꙗ҆́ко и҆ мꙋжъ бѣ̀ велїи ѕѣ́ло·

И҆ рече цр҃ь къ верзелі́ю, т̂ы мине́ши съ мно́ю и҆ прекор꙽млю̀ ста́рость твою.
съ собо́ю въ і҆ерс̑҇лі́мѣ·

И рече верзелїи къ цр҃ю.
коли́ко дн҃їи живота̀ мое҆го ꙗ҆́ко да възы́идꙋ съ цр҃ем꙽ въ і҆ерс̑҇лі́м꙽·

ѹ҆же сы́и ѻ҆смидесѧтъ лѣтъ а҆́зъ дне́сь е҆смъ.
не разꙋмѣ́ю а҆зъ по́средѣ бл҃га и҆ посредѣ лꙋка́ва, и҆л̂и разꙋмѣ́етъ е҆ще ра́бъ твои е҆же ꙗ҆́м꙽ и҆л̂и е҆же пі́ю.
и҆л̂и ѹ҆слы́шꙋ гла́съ е҆ще пою́щихъ, и҆л̂и въспѣва́ющих̑, да въскꙋю т̂и бꙋдет̑ е҆ще ра́бъ тво́и в тѧ́жести господи́нꙋ мое҆мꙋ цр҃ю·

Ма́ло пре́иде ра́бъ тво́и і҆ѻ҆рда́на съ цр҃емъ.
и҆ почто̀ въздае́тъ м̂и цр҃ь възда́нїе с̂е·

да възвратитъсѧ нн҃ѣ ра́бъ твои, и҆ ѹ҆мрꙋ̀ нн҃ѣ въ́ градѣ мое́мъ, ѹ҆ гроба ѿц҃а мое҆го и҆ ма́тере мое́ѧ, и҆ с̂е рабъ тво́и сн҃ъ мо́и хамаа́мъ, пре́идетъ съ гм҃ъ мои́мъ цр҃емъ·

И҆ сътвори́ши е҆мꙋ бл҃гое пред̑ ѻ҆чи́ма твои́ма.
и҆ рече цр҃ь к немꙋ со мно́ю да пре́идетъ хамаам꙽ и҆ а́зъ сътворю̀ е҆мꙋ бл҃гое пред̑ ѻчи́ма мои́ма.
и҆ вс̂е е҆ли́ко и҆збере́тъ себѣ̀ ѹ҆ менѐ сътворю̀ е҆мꙋ.

И҆ преидо́ша вс̂и лю́дїе і҆ѻ҆рда́нъ.
и҆ цр҃ь преиде и҆ цѣлова̀ верзелі́ю.
и҆ блс̑҇ви е҆го и҆ ѿпꙋсти е҆го̀ в до́мъ е҆го·

И҆ прїиде цр҃ь в꙽ галга́лꙋ и хамаа́м꙽ прїиде с нимъ, и҆ вс̂и лю́ди і҆ѹ́дини прехожда́хꙋ съ цр҃емъ, и҆ с̂е по́лъ людїи і҆и҆л҃евъ·

И с̂е вс̂и лю́дїе і҆и҆л҃еви прїидо́ша къ цр҃ю, и҆ рѣша к немꙋ̀, чт̂о с̂е ѹ҆крадо́ша тебе бра́тїѧ на́ша мꙋжи і҆ѹ́дины, и҆ преведо́ша цр҃ѧ и҆ до́мъ е҆го чресъ і҆ѻ҆рда́нъ, и҆ вс̂и мꙋжи дв҃двы с ни́мъ·

И҆ ѿвѣща́ша вс̂и мꙋжи і҆ѹ́дины, къ мꙋжемъ і҆и҆л҃евомъ, и҆ рѣша зане приближи́сѧ к на́мъ цр҃ь почто́ сѧ гнѣ́ваете ѻ҆ словесѝ се́мъ.
е҆да ꙗ҆́ди ꙗ҆́хомъ ѿ цр҃ѧ, ил̂и ѻ҆дѣ́нїе да́сть на́мъ, и҆л̂и мꙋжескъ по́лъ ѿꙗ҆́тъ ѿ на́съ·

И҆ ѿвѣща́ша мꙋжи і҆и҆л҃ьстїи к мꙋж́емъ і҆ѹ́динымъ, и҆ рѣша, і҃, рꙋкъ м̂ы ѹ цр҃ѧ и҆ въ давы́де е҆сми па́че тебѐ, и҆ первенецъ а҆зъ л̂и е҆смъ, и҆ли ты̀.
да почто̀ ѹ҆карѧ́еши м̂ѧ, и҆ не въмѣни́сѧ сло́во мое прежде менѐ і҆ѹ́де ѻ҆брати́ти цр҃ѧ мн̂ѣ, и҆ ѻ҆тѧгча̀ сло́во мꙋжїи іѹ́динъ, паче слове́съ мж̑ꙋ і҆и҆л҃въ·

Глв̑҇а, к҃·

И т̂ꙋ нарица́емъ сн҃ъ безакон̑҇ныи, и҆́мѧ е҆мꙋ саве́и.
сн҃ъ въхо́ровъ.
мꙋжъ и҆е҆мене́ѻ҆въ.
и҆ въстрꙋбѝ трꙋбо́ю и҆ рече нѣ́сть намъ ча́сти съ дв҃домъ, ни́же достоѧ́нїѧ на́мъ ѹ҆ сн҃а і҆ѻ҆сѣ́ева.
възврати́тесѧ мꙋжи в се́ла ва́ша і҆и҆л҃ьтеска·

И҆ ѿстꙋпи́ша вс̂и мꙋжи і҆и҆л҃еви ѿ дв҃да до саве́и.
сн҃а въхо́рова.
мꙋжи же і҆ѹ́дины прилепишасѧ къ цр҃ю свое҆мꙋ ѿ і҆ѻ҆рда́на даже и҆ до і҆ерс̑҇ли́ма·

И҆ вни́де дв҃дъ въ до́мъ сво́и въ і҆ерс̑҇лим̑ и҆ поꙗ҆́тъ цр҃ь, і҃. подло́жницъ своих̑ ꙗ҆́же б̂ѣ ѻ҆ста́вилъ стрещѝ до́мъ свои ѿ до́мꙋ стражбы̀ и҆ прекормѝ ѧ҆̀ и҆ ѿто́лѣ не вни́де к ни́мъ.
и҆ бѣша хранѧ́щесѧ до дн҃е см҃рти е҆го.
вдо́в꙽скїи живꙋщи·

И҆ рече цр҃ь къ а҆меса́и созовѝ мꙋжа і҆ѹдины тремѝ дн҃ьми т̂ы бꙋди с ни́ми·

І҆ и́де а҆меса́и събра́ти мꙋжъ і҆ѹ́диных̑.
и҆ ѹ҆медлѝ ѡ вре́мене.
ꙗ҆́коже повелѣ̀ е҆мꙋ дв҃дъ и҆ рече дв҃дъ къ а҆ве́сѣ.
нн҃ѣ ѕл̂о сътвори́т꙽ нам̑ саве́и сн҃ъ вехо́рь па́че а҆весоло́ма·

И҆ нн҃ѣ т̂ы пои҆мѝ съ собо́ю ѻ҆́троки господи́на свое҆го.
и҆ женѝ въ слѣ́дъ е҆го.
е҆да ка́ко ѻ҆брѧ́щет̑ себѣ̀ гра́ды тве́рды, и҆ застѣнит̑сѧ ѿ ѻ́чїю на́шею·

І҆ и҆зыидо́ша въ слд̑ѣ е҆го а҆меса́и и҆ мꙋжи и҆ѻ҆а́вли.
и҆ ѻ҆ хереѳ̑҇ и҆ ѻ҆ фелеѳъѳі́и.
и҆ вс̂и си́лнїи і҆ и҆зыидо́ша и҆зъ і҆ерс̑҇лі́ма.
гна́ти въ слѣд꙽ саве́ѧ, сн҃а вохо́рїева·

І҆ е҆гда̀ бѧ́хꙋ ѹ҆ ка́мени вели́каго и҆же въ гаваѻ́нѣ и҆ а҆меса́и и҆зы́иде пред̑ ни́ми.
и҆ѻ҆а́въ препоꙗ҆́санъ ри́зами ѻ҆дѣꙗ҆́нїѧ свое҆го и҆ верхꙋ̀ того̀ препоѧ́санъ мече́мъ.
припрѧ́женымъ при чре́слѣхъ е҆го.
въ но́жнахъ е҆го и҆ е҆гда ѿи́де.
и҆ ме́чь и҆зъсꙋ́нꙋсѧ и҆ не падѐ·

И҆ рече и҆ѻ҆а́въ а҆меса́ю.
здра́въ л̂и е҆си бра́те.
и҆ прїꙗ҆́тъ і҆ѻ҆а́въ рꙋко́ю де́сною за бра́дꙋ а҆меса́е҆вꙋ лобза́ти и҆̀ хотѧ̀·

А҆меса́и же не бреже́сѧ меча̀ и҆же при бе́дрꙋ и҆ѻ҆а́влю.
и҆ впадѐ на́нь ѡ и҆ѻа́ва ме́чь въ чре́сла е҆го і҆ и҆злїѧ́сѧ чрево е҆го на землю.
и҆ не повто́ри е҆го и҆ ѹ҆́мре т̂ꙋ а҆меса́и.
и҆ѻ҆а́в же и҆ а҆ве́са бра́тъ е҆го гна́ста въ слѣдъ саве́ѧ сн҃а вохо́рѧ·

И҆ мꙋжъ ста̀ над ни́ми нѣ́кто ѿ ѻ҆́трокъ и҆ѻ҆а́вль и҆ рече кт̂о хотѧ́и бы́ти дв҃двъ въ слѣдъ и҆ѻ҆а́ва и҆ а҆ве́са да и҆́детъ·

А҆меса́и ме́ртвъ валѧ́шесѧ въ кро́ви посредѣ пꙋтѝ.
и҆ ви́дѣвъ мꙋжъ ꙗ҆́ко стоѧт̑ вс̂и лю́дїе.
и҆ съвратѝ а҆меса́ѧ с пꙋтѝ на село̀.
и възложа́ше на́нь ри́зы ви́дѧще вс̂ѧ приходѧ́щаѧ над̑ не́го и҆ ста́юща·

И҆ бысть е҆гда̀ принесо́ша ѿ пꙋтѝ.
и҆ прїидо́ша вс̂и мꙋжи і҆и҆л҃еви въ слѣдъ и҆ѻ҆а́ва е҆же гна́ти въ слѣдъ саве́ѧ сн҃а вохо́рѧ·

Но се́и ѻ҆бышед̑ вс̂ѧ колѣ́на і҆и҆л҃ева.
и҆ прїиде въ е҆ве́ль и҆ въ е҆ѳъмахꙋ́рꙋ, и҆ вс̂и въ харꙋ́и.
и҆ вс̂и гра́ды събра́шасѧ, і҆ и҆до́ша въ слѣ́дъ е҆го·

И҆ пришед̑ше и҆ въполчи́шасѧ на́нь ѻ коло, и҆ во е҆ве́лѣ.
и҆ въ ѳарма́хꙋ.
и҆ възе́мше число̀ рас꙽сы́пашасѧ ꙗ҆́ко и҆ пе́рсть на град̑ и҆ стоѧ́ше ѹ҆ прь́выѧ стѣны̀ гра́да.
и҆ вс̂и лю́дїе и҆же съ и҆ѻ҆а́вомъ дꙋ́мающе ка́ко б̂ы шлѝ и҆ низложи́ли стѣны град̑ныѧ·

И҆ рече жена̀ мꙋ́дра съ гра́да.
и҆ рече слы́шите м̂ѧ слы́шите.
і҆ и҆ рцѣ́те и҆ѻ҆а́вꙋ да приближит̑сѧ до здѣ̀ и҆ гл҃ю к не́мꙋ·

И҆ приближи́сѧ к не́и и҆ѻ҆а́въ и҆ реч̑҇ жена̀ т̂ы ли е҆си и҆ѻ҆ав̑҇ ѻ҆н же реч̑҇ а҆зъ·

И҆ реч̑҇ е҆мꙋ жена̀ послꙋш́аи словес̑҇ рабы̀ свое́ѧ.
и҆ реч̑҇ е́и и҆ѻ҆ав̑҇ послꙋш́аю·

И҆ реч̑҇ с̂е слово гл҃ах꙽ гл҃ющи къ старѣ́ишинам̑ вопроша́ема вопросѝ во е҆ве́ли, и҆ въ е҆н꙽да́нѣ.
а҆ще ѻ҆скꙋдѣша е҆же положи́ша вѣ́рнїи і҆и҆л҃еви.
вопраша́ю҆ще въспро́сѧт̑ во е҆ве́ли, и҆ та́ко рече а҆ще ѻ҆скꙋдѣша.

А҆зъ е҆смъ въ ми́ръ, и҆ ѹ҆тверже́нїе і҆и҆л҃ево.
ты́ же и҆́щеши ѹ҆мори́ти гра́дъ.
и҆ ма́тере гра́дъ і҆и҆л҃евъ.
и҆ почт̂о ты̀ потоплѧ́еши достоѧ́нїе гн҃е·

И҆ ѿвѣща̀ и҆ѻ҆а́въ рече млс̑҇тивыи млс̑҇тивы́и а҆ще потоплю̀.
и҆ а́ще разрꙋшꙋ̀·

Не та́ко сло́во.
ꙗ҆́ко мꙋжъ со горы̀ е҆фрѣ́млѧ.
саве́и сн҃ъ вохо́рь и҆́мѧ е҆мꙋ.
то́и взѧ́т꙽ рꙋ́кꙋ свою на цр҃ѧ дв҃да.
дади́те м̂и то́кмо того̀ е҆ді́наго.
и҆ ѿи́демъ кро́мѣ ѿ гра́да.
и҆ рече жена̀ къ и҆ѻ҆а́вꙋ.
с̂е глава̀ е҆го све́ржет̑сѧ к тебѣ съ стѣны̀ град̑ныѧ·

И҆ вни́де жена̀ къ всѣмъ лю́демъ.
и҆ гл҃а къ всемꙋ̀ гра́дꙋ мꙋ́дростїю свое́ю.
и҆ ѿсѣко́ша главꙋ̀ саве́инꙋ сн҃а вохо́рѧ.
и҆ съверго́ша ю҆̀ къ и҆ѻ҆а́вꙋ.
і҆ и҆ѻ҆а́въ въстрꙋбѝ в꙽ трꙋбꙋ̀.
и҆ разыидо́шасѧ мꙋжи ѿ гра́да вс̂и на се́ла своѧ̀.
а҆ и҆ѻ҆а́въ възврати́сѧ въ і҆ерс̑҇лим̑ къ цр҃ю·

Бѣ б̂о и҆ѻ҆а́въ надо всѣмѝ си́лными і҆и҆л҃евыми.
и҆ ванѣѧ сн҃ъ и҆ѻ҆да́евъ.
над̑ хе́рїю.
и҆ над̑ велеѳі́ею·

А҆донира́мъ же над̑ да́ньми.
и҆ а҆сафат̑ сн҃ъ а҆хилꙋ́ѳъ.
воспомина́ѧ, и҆ сꙋса́ра кни́гочїи, и҆ садо́хъ.
и҆ а҆вїа҆ѳа́ръ і҆е҆ре́ѧ·

Геи́ра.
и҆ ѻ҆а҆и́ръ бы́сть жрец̑҇ дв҃двъ·

Глв̑҇а, к҃а·

И бы́сть гла́дъ на землѝ въ дн҃и дв҃двѣ, г҃, лѣта, лѣто подле лѣ́та.
и҆ възыска̀ дв҃дъ лица̀ гн҃ѧ·

І҆ рече г҃ь саѹ́ла ради и҆ проли́тїѧ кро́ве до́мꙋ е҆го ѻ҆бидѝ ѻ҆би́да сїа е҆сть поне́же ѹ҆мрътвѝ гаваѻ҆ни́ты·

И҆ призва̀ цр҃ь гаваѻ҆ни́ты, и҆ рече к ни́мъ.
и҆ гаваѻ҆ни́тѧне.
не сꙋть сн҃ове і҆и҆л҃еви.
н̂о ѿ сѣмене а҆м꙽море́и҆на, н̂о сн҃ове і҆и҆л҃еви клѧ́шасѧ к ним̑ ꙗ҆́ко не вое҆ва́ти на́ нѧ.

Саѹ́л же възыска̀ попра́тї ѧ зави́дѧще и҆мъ сн҃ове і҆и҆л҃еви і҆ и҆ѹ́дины·

И рече двд̑ъ къ гаваѻ҆ни́тѧномъ.
чт̂о сътворю̀ ва́мъ.
и҆ ка́ко в̂ы ѹ҆молю̀.
да блс̑҇ви́те достоꙗ҆́нїе гн҃е·

И҆ рѣша е҆мꙋ гаваѻ҆ни́ти нѣ́сть на́мъ ѻ҆бще́нїѧ ѻ҆ сребрѣ̀ и҆ зла́тѣ, съ саѹ́ломъ и҆ съ до́мом̑ е҆го.
и҆ нѣ́сть намъ мꙋжа ѹ҆мори́ти ѿ всего і҆и҆л҃ѧ.
и҆ рече и҆мъ чт̂о вы̀ гл҃ете и҆ сътворю̀ вамъ·

И҆ рѣша къ цр҃ю.
мж̑ꙋ сконча́выи н̂ы и҆ погна́выи н̂ы.
и҆ помышлѧ́ше потреби́ти ны̀.
въспроти́вимсѧ е҆мꙋ да не бꙋдетъ въ всѣ́хъ предѣлех꙽ і҆и҆л҃елвых꙽.
дади́те нам̑, з҃, мꙋжъ ѿ сн҃овъ е҆го, и҆ м꙽сти́мъ и҆хъ ѽ г҃и.
на хо́лмѣ саѹ́ли и҆збра́нномꙋ г҃ꙋ.
и҆ рече цр҃ь а҆зъ да́мъ ва́мъ·

И҆ пощадѣ̀ цр҃ь мем꙽ѳивосте́ѧ.
сн҃а і҆ѻ҆а҆наѳа́нѧ.
сн҃а саѹ́лѧ, клѧ́твы ра́ди гн҃ѧ·

І҆ и҆же посредѣ и҆хъ посредѣ дв҃домъ и҆ посредѣ і҆ѻ҆а҆наѳа́ном̑ сн҃омъ саѹ́лимъ·

И҆ поѧ́тъ цр҃ь дв̂а сн҃а и҆ре́сѳы дще́ри а҆и́ѧ, подло́жници саѹ́лѧ.
ꙗ҆же родѝ саѹ́лꙋ, и҆р꙽моні́ѧ, и҆ мем꙽ѳивосте́ѧ, и҆ е҃, сн҃овъ мела́ховы, дще́ре саѹ́лѧ, ꙗ҆́же родѝ е҆здрїи҆лі́ю, сн҃ꙋ верзеи́лю маѹ҆ла́ѳи·

И҆ да́сть ѧ҆̀ в рꙋки гаваѻ҆нитомъ.
и възведо́ша ѧ҆̀ на́ горꙋ пред̑ гм҃ъ.
и҆ падо́ша т̂ꙋ, з҃, въкꙋпѣ.
тїи же ѹ҆мро́ша во́ дн҃и жа́твеныѧ.
въ пр́ьвое нача́ло жа́твы ꙗ҆чме́нѧ·

И҆ възе́м꙽ши ре́сѳа д꙽щи а҆ке́ва взѧ̀ вре́тище и҆ постла̀ е҆го себѣ сама̀ на ка́мени въ нача́ло жа́твеное ꙗ҆чме́нѧ.
до́ндеже снидо́ша на́ нѧ во́ды бж҃їѧ съ нб҃се.
и҆ не дадѧ́ше пти́цамъ нбс̑҇нымъ дн҃їю.
н̂и ѕвѣ́ремъ зе́мнымъ но́щїю почи́ти на ни́хъ·

И҆ повѣда́ша дв҃дꙋ вс̂ѧ е҆ли́ко сътворѝ ре́сѳа дщѝ а҆и́ѧ под̑ло́жница саѹ́лѧ·

И҆ шед̑ дв҃дъ и҆ взѧ̀ ко́сти саѹ́лѧ.
и҆ ко́сти і҆ѻ҆а҆наѳа́нѧ сн҃а саѹ́лѧ, ѿ мꙋжъ а҆ви́съ галад̑скихъ.
и҆же бѣша ѹ҆кра́ли со стѣны̀ веѳъса́нѧ.
повѣсившемъ ѧ҆̀ т̂ꙋ и҆ноплеме́нникомъ.
въ дн҃ь во́нже поби́ша и҆ноплеме́нницы саѹ́ла въ гел꙽вꙋ́и·

И҆ възнесѐ дв҃дъ ко́сти саѹ́лѧ ѿтꙋ́дꙋ.
и҆ ко́сти і҆ѻ҆а҆наѳа́нѧ сн҃а саѹ́лѧ.
и҆ събра́въ ко́сти и҆зби́вшихъ·

И҆ погребо́ша ко́сти саѹ́лѧ.
и҆ ко́сти и҆ѻ҆а҆наѳа́нѧ сн҃а е҆го, и҆ ко́сти всѣ́хъ и҆зби́вшихъ.
въ землѝ венїа҆ми́новѣ.
въскра́и гроба̀ ки́сова ѿц҃а е҆го.
и҆ сътвори́ша вс̂ѧ е҆ли́ко заповѣ́да цр҃ь, и҆ послꙋш́а б҃ъ землѧ̀ по сих̑·

И бы́сть па́ки бра́нь въ и҆ноплеме́нницѣхъ съ і҆и҆л҃ьты.
и҆ сни́де дв҃дъ и҆ ѻ҆́троцы е҆го с ни́мъ.
и҆ би́шасѧ съ и҆ноплеме́нники ѹ҆трж̑ꙋсѧ дв҃дъ·

І҆ е҆сві́и же и҆же бѣ̀ ѿ внꙋк꙽ рафа́иновыхъ ѹ҆ него́же б̂ѣ вага̀ копїѧ е҆го́, т҃, си́кль мѣры мѣ́дѧны и҆ то́и бѣ̀ препоꙗ҆́санъ ѻ҆рꙋжїем꙽ своим̑ хотѧ̀ поби́ти дв҃да·

И҆ възва̀ и҆̀ а҆ве́са сн҃ъ сарꙋ́инъ.
і҆ и҆зба́ви дв҃да а҆ве́са.
и҆ поразѝ и҆ноплеме́нника и҆ ѹ҆морѝ и҆̀·

И҆ тогда̀ клѧ́шасѧ мꙋжи дв҃дви гл҃юще.
не вни́деши ктомꙋ̀ на́ брань с нами, да не ѹ҆гаси́ши свѣти́лника і҆и҆л҃ева·

И҆ бы́сть по си́хъ бра́нь въ не́ѳе, съ и҆ноплеме́нники.
тогда̀ поразѝ савохѣ́и, и҆же ѿ а҆со́ѳ꙽ собра́нныѧ внꙋки гига́нтовы·

И҆ быс̑҇ паки бра́нь въ ровѣ̀ съ и҆ноплемен̑҇ники и҆ поразѝ е҆леа҆на́нъ сн҃ъ а҆лворїѧ виѳлеѻ҆́м꙽скаго.
голїа́ѳа и҆же ѿ геѳ꙽ѳе́ѧ.
и҆ дре́во ко́пїѧ е҆го бы́сть вели́ко ѕѣло·

И҆ бы́сть паки бра́нь въ ге́ѳѣ.
и҆ бѣ мꙋжъ ѿ мадо́на.
и҆ прь́сты рꙋкꙋ е҆го и҆ но́гꙋ е҆го по, ѕ҃, пр́ьстъ, кои́ждо рꙋцѣ и҆ но́ѕѣ.
число́мъ, к҃, и҆ д҃. и҆ то́и роди́сѧ ѿ ра́ѳы·

И҆ е҆гда ѹ҆ничижѝ і҆и҆л҃ѧ, тогда ѹ҆би и҆̀ и҆ѻ҆а҆наѳа́нъ сн҃ъ сафа́евъ бра́та дв҃два·

Четы́ри сїи роди́шасѧ ѿ внꙋ́къ гига́нтовыхъ раѳѣши·

Въ ге́ѳѣ, и҆ падо́ша ѿ рꙋ́кꙋ двд҃вꙋ, и҆ ѿ рꙋ́кꙋ ра́бъ е҆го·

Глв̑҇а, к҃в·

И гл҃а дв҃дъ къ г҃ꙋ словеса̀ пѣсни сеѧ̀.
во дн҃ь во́нже и҆зба́ви и҆̀ г҃ь и҆з рꙋ́ки всѣ́хъ враг̑҇ е҆го, і҆ и҆з рꙋ́ки саѹ҆́ловы·

И рече г҃ь ка́мень мо́и, ѹ҆твръженїе моѐ, и҆ сп҃ситель мо́и б҃ъ мо́и, храни́тель бы́сть мо́и.
ѹ҆пова́ѧ бꙋ́дꙋ на́ тѧ.
защит̑никъ мо́и и҆ ро́гъ сп҃се́нїа мое҆го.
застꙋ́пникъ мо́и прибѣ́жище сп҃се́нїю мое҆мꙋ и҆ ѿ непра́вды сп҃се́ши м̂ѧ·

Хвалѧ́и призовꙋ̀ г҃а, и҆ ѿ вра́гъ мои҆хъ сп҃сꙋсѧ·

Ꙗ҆́ко ѻ҆дръжа́ша м̂ѧ бо́лѣзни смр҃тныѧ, и҆ пото́цы безако́нїа смꙋти́ша м̂ѧ·

И҆ болѣ́зни а҆́довы ѻ҆быдо́ша м̂ѧ.
вари́ша мѧ сѣти смерътныѧ·

И҆ въ скорбъ мою̀ призва́хъ г҃а.
и҆ къ б҃ꙋ мое҆мꙋ во́звахъ.
и҆ ѹ҆слы́ша м̂ѧ ѿ ст҃ыа цр҃кви свое́ѧ глас̑҇ мо́и.
и҆ во́пль мо́и пред̑ ни́мъ вни́дет꙽ во ѹ҆́ши е҆го·

И҆ подвижа́сѧ и҆ трепет̑на бы́сть землѧ̀.
и҆ ѻ҆снова́нїа го́ръ смѧто́шасѧ, и҆ подви́зашасѧ и҆ трепе́тна бы́сть и҆ прогнѣ́васѧ на́ нѧ г҃ь и҆хъ·

Възы́де ды́мъ гнѣ́вомъ е҆го.
и҆ ѻ́гнь ѿ лица̀ е҆го воспланет̑сѧ.
и҆ ѹ́глїе возгорѣшасѧ ѿ не́го·

Преклонь нб҃са и҆ сни́де, и҆ примра́къ под̑ нога́ма е҆го·

И҆ въсѣ́де на херꙋви́мъ, и҆ ле́тѣ и҆ ꙗ҆ви́сѧ на кры́лꙋ вѣтренюю·

И҆ положѝ тм̂ꙋ за кро́въ свой.
и҆ ѻ́крестъ е҆го кро́въ е҆го.
те́мна вода̀ во ѻ́блацѣхъ а҆е́рныхъ.
ѿ сїѧнїа пред̑ ним̑ разгорѣшасѧ ѹ҆́глїе ѻ҆гне́нїи·

И҆ возгремѣ съ нб҃се г҃ь, и҆ вы́шнїи дас̑҇ гла́съ сво́и.

И҆ пꙋ́сти стрѣ́лы и҆ расточи ѧ҆̀.
и҆ бле́снꙋ мо́лнїѧ ѹ҆стра́ши ѧ҆̀·

И҆ ꙗ҆ви́шасѧ и҆сто́чницы мор̑҇стїи.
и҆ ѿкры́шасѧ ѻ҆снова́нїѧ в꙽селе́ныѧ, ѿ запрѣще́нїѧ гн҃ѧ.
и҆ ѿ дох̑нове́нїа дх҃а гнѣва твое҆го·

Посла̀ свы́ше и прїѧ́тъ м̂ѧ и҆ под̑ѧ́тъ мѧ ѿ во́дъ мно́гъ·

І҆ и҆зба́ви м̂ѧ ѿ вра́гъ мои҆хъ си́лныхъ, и҆ ѿ ненави́дѧщих̑ м̂ѧ.
ꙗ҆́ко ѹ҆твръди́шасѧ па́че менѐ·

Вари́ша м̂ѧ во дн҃ь печа́ли мое́а и҆ бысть г҃ь под̑ѧ́тель мо́и·

И҆ възведе м̂ѧ на широтꙋ̀ и҆зба́ви м̂ѧ, ꙗ҆ко вохсотѣ̀ м̂ѧ·

И҆ возда́сть м̂и г҃ь по правдѣ мое́й и҆ по чистотѣ̀ рꙋ́кꙋ мое́ю възда́сть м̂и·

Ꙗ҆́ко съхрани́хъ пꙋтѝ гн҃ѧ.
и҆ не нечествова́хъ ѿ б҃а мое҆го·

Ꙗ҆́ко вс̂и сꙋди е҆го предо мно́ю сꙋть и҆ ѻ҆правда́нїѧ е҆го не ѿстꙋпи́ша̑ ѿ ме́не·

И҆ бꙋ́дꙋ непоро́ченъ с ним̑, и҆ съхраню́сѧ ѿ безако́нїа мое҆го·

И҆ возда́сть м̂и г҃ь по пра́вдѣ мое́й, и҆ по чистотѣ̀ рꙋ́кꙋ мое́ю пред̑ ѻ҆чи́ма е҆го·

Съ прпд̑бными прпд̑бнъ бꙋ́деши и҆ съ мꙋже́мъ непови́ннымъ непови́нен̑҇ бꙋ́деши·

И҆ съ и҆збра́ннымъ и҆збран̑҇ бꙋ́деши.
и҆ со стропти́вымъ раз꙽врати́шисѧ·

Лю́ди же смире́нныа спасе́ши.
и҆ ѻ́чи го́рдыхъ смири́ши·

Ꙗ҆́ко т̂ы просвѣща́еши свѣти́лникъ мо́и г҃и, б҃е мо́и просвѣща́еши тм̂ꙋ мою̀·

Ꙗ҆́ко тобо́ю и҆зба́влюсѧ ѿ напа́сти.
и҆ ѻ́ бѕ҃ѣ моем̑ прелѣзꙋ стѣнꙋ·

Крѣ́пкїѝ и҆ непоро́чны пꙋтѝ е҆го.
гл҃ъ гн҃ь раж꙽жен̑҇, защи́тник̑҇ е҆сть всм̑ѣ ѹ҆пова́ющим̑ на́нь·

Ꙗ҆́ко кт̂о б҃ъ ра́звѣ б҃а на́шего.
л̂и кт̂о тво́рец̑҇ ра́звѣ г҃а на́шего·

Крѣ́покъ б҃ъ ѻ҆бдержа́и м̂ѧ си́лою, и҆ положѝ непоро́чен̑҇ пꙋть мо́и·

Полага́ѧ но́ѕѣ моѝ ꙗ҆́ко е҆́лени.
и҆ на высо́ких̑ поставлѧ́а м̂ѧ·

Наѹ҆ча́ѧ рꙋ́цѣ моѝ на́ брань.
полага́ѧ лꙋкъ мѣдѧнъ мы́шци мое́й·

И҆ дал̑҇ м̂и е҆си защище́нїе спс̑҇нїю.
и҆ наказа́нїе твоѐ и҆спра́вит̑ м̂ѧ.
наѹ҆чит̑ м̂ѧ до конца̀·

Раз̑ширил̑҇ е҆си стопы̀ моа̀ подо мно́ю.
и҆ не позыбле́тасѧ го́лени мо́и·

И҆ поженꙋ̀ врагы̀ моѧ̀ и҆ пости́гнꙋ ѧ҆̀.
и҆ не воз꙽вращꙋсѧ до́ндеже сконча́ют̑сѧ·

Сокрꙋшꙋ ѧ҆̀ и҆ не и҆́мꙋть постоѧ́ти, и҆ падт̑ꙋ под̑ нога́ма мои́ма·

Препоꙗ҆сал̑҇ мѧ е҆си си́лою на́ бран̑҇ и҆ въспѧл̑҇ е҆си вс̂ѧ воста́ющаѧ на́ мѧ под̑ м̂ѧ·

И҆ враг̑҇ моих̑ дал̑҇ м̂и е҆си хребет̑.
и҆ ненави́дѧщаѧ м̂ѧ ѹ҆мрътви́лъ е҆си·

Возва́ша и҆ не бѣ̀ сп҃са́ющаго, возва́ша ко г҃ꙋ, и҆ не ѹ҆слы́ша их̑·

И҆ ѿѧ́т꙽ ѧ҆̀ ꙗ҆ко прах̑ зе́мныи.
и҆ ꙗ҆́ко бе́рнїе по пꙋтѝ и҆стон̑҇чи ѧ҆̀·

И҆зба́ви м̂ѧ ѿ прерѣка́нїа людїи моих̑.
и҆ поста́виши м̂ѧ в꙽ главꙋ ꙗ҆́зы́ком̑ и҆ лю́дїе их̑же не знах̑ рабо́таша м̂и.
и҆ во слх̑ꙋ ѹ҆́ха ѹ҆слы́шаша м̂ѧ·

Сн҃ве тꙋждїи сол꙽гаша м̂и, сн҃ове тꙋж́дїи ѻ҆бет̑шаша и҆ ѻ҆хромо́ша ѿ стезь своих̑·

Жив̑҇ г҃ь и҆ блс̑҇вен̑҇ б҃ъ.
и҆ вознесет̑сѧ б҃ъ мо́и сп҃съ мо́и крѣпкїи г҃ь да́ѧ и҆ месть мн̂ѣ.
и҆ приводѧ̀ лю́ди под̑ м̂ѧ.
и҆ взѧт̑ м̂ѧ ѿ враг̑҇ моих̑.
и҆ на воста́ющаа на́ мѧ вознесе́ши м̂ѧ и҆ ѿ мꙋж́а непра́вед̑на и҆зба́ви м̂ѧ·

Сего̀ рад̑и̑ и҆сповм̑ѣ т̂ѧ въ ꙗ҆зы́цх̑ѣ г҃и.
і҆ и́мени твое҆мꙋ воспо́ю·

възвелича́ю спс̑҇енїе цр҃ево, и҆ творѧ́и млс̑҇ть х҃ꙋ свое҆мꙋ дввд̑и, и҆ сѣмени е҆го до́ вѣка·

Глв̑҇а, к҃г·

Сїѝ словеса̀ двд҃ва послд̑ѣнїи, вѣрен̑҇ дв҃дъ сн҃ъ і҆ес꙽сеѻв̑҇.
и҆ вѣрен̑҇ мꙋ́жъ, е҆го̑ воставѝ х҃а ѿ б҃а і҆а́ковлѧ и҆ бл҃голѣпен̑҇ ѱалом̑никъ і҆и҆л҃евъ.
и҆ дх҃ъ гн҃ь во мнѣ̀ гл҃а и҆ сло́во е҆го на ꙗ҆зы́цѣ моем̑·

Гл҃етъ б҃ъ і҆и҆л҃евъ мнѣ̀.
гл҃а храни́тель і҆и҆л҃евъ прит̑чꙋ рекїи во чл҃цѣх꙽ ка́ко ѹ҆дръжи́те страх̑ бж҃їи ꙗ҆́ко во свѣтѣ бж҃їи заѹ҆́тра и҆ в꙽зы́де слн҃це ѹ҆́тро и҆ не поме́рчет̑ ѿ сїѧ́нїа.
ꙗ҆́ко ѿ горы па́жит̑ныѧ ѿ землѧ̀.
не та́ко б̂о дом̑ мо́и съ крѣ́постїю.
завт̑ѣ б̂о вѣ́чныи положѝ м̂и, ѹ҆гото́ванъ во всѧ́ко вре́мѧ сохранен̑҇.
ꙗ҆ко вс̂е сп҃се́нїе моѐ.
и҆ вс̂е хотенїе моѐ ѻ҆ г҃ѣ·

Ꙗ҆́ко не и҆́мать прозѧ́бнꙋти безакон̑҇ныи.
ꙗ҆́ко те́рнъ и҆зострен̑҇, и҆ вс̂и сїѝ.
ꙗ҆́ко не въстргнт̑ꙋсѧ рꙋка́ми ни́же мж̑ꙋ трꙋ́дит̑сѧ в них̑.
и҆ мно́жество желѣ́за и҆ древа ѿ ко́пїа ѻ҆гнем̑ пож̑гꙋтсѧ, и҆ попалѧт̑сѧ срамото́ю свое́ю·

Сїи и҆мена̀ си́лных̑ двд҃вых̑ і҆е҆восѳе́и хананеа́нин̑҇ кнѧз̑ третїи е҆сть.
и҆ а҆динон꙽ неѻс̑҇, и҆ се́й ѻ҆бнажѝ ко́пїе своѐ, на и҃, сот̑ воин̑҇ и҆ побѣди въско́рѣ·

И҆ по нем̑ е҆лїа҆за́ръ сн҃ъ ѿц҃а бра́та е҆го въ трех̑ си́лных̑ се́и б̂ѣ съ дв҃дом꙽ в сира́не внегда̀ поноси́ти их̑ и҆ноплеме́нником̑.
і҆ и҆ноплеме́нницы собра́шасѧ т̂ꙋ на́ брань.
і҆ и҆зыидо́ша мꙋжи і҆и҆л҃ви противꙋ лицꙋ̀ и҆хъ·

И҆ то́и воста̀.
и҆ бѝ и҆ноплемен̑҇ники, дон̑҇деже ѹ҆трꙋди́сѧ рꙋка̀ е҆го, и҆ прильпѐ рꙋка̀ е҆го к꙽ мечꙋ̀.
и҆ сътворѝ г҃ь спс̑҇нїе вели́ко въ то́и дн҃ь.
и҆же лю́дїе ѻ҆брати́шасѧ въ слд̑ѣ е҆го, то́кмо совлача́ти·

И҆ по нем̑ самаїѧ сн҃ъ а҆саи́на а҆рꙋке́искаго.
і҆ и҆ноплемен̑҇ницы собра́шасѧ въ ѳирїю.
и҆ бѣ т̂ꙋ ча́сть села̀ и҆сполнь лѧща.
и҆ лю́дїе бѣжа́ша ѿ лица̀ и҆ноплеме́нникъ·

И҆ събраша́сѧ посре́дѣ ча́сти, и҆ брани́ша е҆го.
і҆ и҆збѝ и҆ноплеме́никы.
и҆ сътворѝ г҃ь сп҃се́нїе вели́ко въ то́й дн҃ь·

И҆ снидо́ша тр̂и ѿ триде́сѧт̑ кнѧзе́и, и҆ прїидо́ша въ жа́твꙋ.
къ дв҃дꙋ въ верте́пъ ѿдала́м꙽скъ.
и҆ чино́ве и҆ноплеме́нникъ, внидо́ша во ѹ҆доль раѳаи҆́ньскꙋю·

И҆ дв҃дъ тогда̀ б̂ѣ въ ѻ҆бдеръжа́нїи, и ста́н꙽ б̂ѣ и҆ноплеме́нническъ въ виѳлеѻ́мѣ·

И҆ вожажда̀ дв҃дъ, и҆ рече кт̂о мѧ и҆́мать напои́ти ѿ воды̀ рова, и҆же въ виѳлеѻ҆́мѣ при вратѣхъ.
ста́нъ же б̂ѣ тогда̀ и҆ноплеменическъ въ виѳлеѻ́ме, и҆ разгна́ша си́лнїи трі́е, ѻ҆пол̑҇че́нїе и҆ноплеме́нникъ, и҆ почерпъша воды̀ ѿ рова виѳлеѻм̑скаго е҆́же ѹ҆ врат̑, и҆ възе́мше прїидо́ша къ дв҃дꙋ, и҆ не хотѧ́ше пи́ти е҆ѧ̀, и҆ помоли́сѧ г҃ꙋ·

И рече млс̑҇ть м̂и г҃ь сътворѝ сїю, кро́вь ли с̂е мꙋж́ъ шед̑ших̑ въ дш҃а и҆́хъ пи́ти и҆́мамъ а҆́зъ, и҆ не хотѧ́ше пи́ти е҆ѧ̀, с̂и сотвори́ша три си́лнїи мꙋж́и·

И҆ а҆ве́са бра́тъ і҆ѻ҆а́вль сн҃а сарꙋ́ина, се́й б̂ѣ кнѧ́ѕь над̑ третїею ча́стїю, сі́и же въздви́же ѻ҆рꙋжїе своѐ на т҃, мꙋж́ъ ѹ҆ꙗ҆зви́ти, и҆ томꙋ̀ и҆́мѧ е҆сть въ тре́хъ·

И҆ ѿ трїи тѣхъ сла́вныи, и҆ бысть имъ вла́стельство, и҆ но до трїех̑ си́хъ до три́жды не до́иде·

И҆ ванѣѧ́ сн҃ъ и҆ѿдаев̑҇, мж̑ꙋ то́й мно́г꙽ въ дѣлех̑ ѿ каваса́илѧ, и҆ то́й побѝ дв̂а сн҃а а҆рїи́лѧ моа́в꙽скаго и҆ то́й сни́де и҆ побѝ льва̀ по́средѣ рова в꙽ дн҃ь снѣжен̑҇·

И҆ то́й побѝ мꙋжа е҆гѷптѧнина мꙋж́а кра́сна в꙽ рꙋ́кꙋ же е҆гѷп꙽тѧнина б̂ѣ ко́пїе ꙗ҆́ко сто́лпъ, и҆ сни́де к не́мꙋ с па́лицею, і҆ и҆сторже ко́пїе и҆з рꙋ́кꙋ е҆гѷптѧнина, и҆ ѹ҆бѝ и҆ ѻ҆рꙋжїемъ е҆го·

Сїѧ сътворѝ ваи҆е҆а́съ сн҃ъ і҆ѻ҆да́евъ, и҆ томꙋ̀ и҆́мѧ въ трех̑ си́лныхъ·

И҆ бы́сть над̑ ѻ҆ны̀, л҃, сла́вныхъ, н̂о къ тре́мъ не прїиде, и҆ постави дв҃дъ над̑ стра́жꙋ послꙋ́шати е҆го·

І҆ и҆мена̀ си́лных̑ дв҃да цр҃ѧ, а҆саи́ль братъ і҆ѻ҆а́вль, сїи въ тре́хъ десѧтихъ е҆леа҆на́нъ сн҃ъ ѿц҃а бра́та свое҆го ѿ виѳлеѻ́ма·

Семо́въ а҆родїи́нъ, хели́съ ѿ е҆лодоѳ꙽ньсїки·

І҆и́ра сн҃ъ ѿ киса, а҆ѳекоитьскаго, а҆вїезеръ а҆наѳоѳ꙽скїи, савꙋхе́и и҆же ѿ а҆соѳи́ты, е҆лоѻ҆нъ а҆лони́тьскїи.
мове́и и҆же ѿ и҆ѳае҆тоѳи́ты·

Є҆́ли сн҃ъ ваа́нь, и҆же ѿ нетофа́ѳитъ.
е҆́ѳ꙽ѳи, сн҃ъ а҆рива́нъ ѿ гаваѻ҆́ны сн҃ов̑҇ венїа́минъ·

Ваи҆еа́съ, фараѳонит̑скїи ѹ҆́рїи, ѿ налалиге́ѧ·

А҆рїил̑҇, сн҃ъ а҆варꙋ́ѳовъ.
а҆заѻ́ръ, варсамит̑скїи·

Є҆лїа́са, сн҃ъ лавонит̑скїи.
васе́и, гони́тъ скїи.
і҆ѻ҆а҆ѳа́нъ·

Сн҃ъ сама́на а҆рори́тьскаго.
а҆хїа́нъ сн҃ъ а҆ретаи́нъ.
а҆раѳꙋ́ръскаго·

Є҆лифала́ѳъ, сн҃ъ маа҆хїа́вль·

Є҆лїа́въ, сн҃ъ а҆хитофе́ль гелоѻ҆́нит̑скаго.
а҆са́рѣи, карми́льскїи.
тꙋѹ҆ре́мъ, сн҃ъ а҆́свы·

И҆га́ла, сн҃ъ и҆а҆фан̑҇.
и҆ ваа́н꙽ сн҃ъ, а҆гарїинъ.
е҆́лих̑ а҆мани́тъскїи·

Хелорѣ́и вироѳїискїи носѧ́и ѻ҆рꙋжїе і҆ѻ҆а́вле, сн҃а сарꙋи҆на·

И҆ра́съ е҆ѳ꙽ѳе́ръскїи.
гари́въ е҆ферѣ́искїи.
и҆ ѹ́рїѧ, ѿ геѳе́искїи·

и҆ всѣхъ, л҃, и҆ сед̑мъ·

Глв̑҇а, к҃д·

И приложѝ гнѣ́въ г҃ь, раз꙽горѣтисѧ въ і҆и҆л҃и.
и҆ подви́же в ни́хъ дв҃да гл҃ѧ.
шед̑ и҆ сочтѝ і҆и҆л҃ѧ і҆ѹ́дꙋ·

И҆ реч̑҇ дв҃дъ къ і҆ѻ҆а́вꙋ, кнѧѕю старѣишемꙋ и҆же с ни́мъ.
и҆дѝ нн҃ѣ въ всѧ̀ колѣ́на і҆и҆л҃ева і҆ и҆ѹ́дина.
ѿ да́на да́же и҆ до верса́вїѧ.
и҆ сочтѝ лю́ди.
и҆ да ѹ҆вѣмъ число̀ люде́мъ·

И҆ рече і҆ѻ҆а́въ къ цр҃ю да приложи́тъ г҃ь б҃ъ тво́и къ люде́мъ твои҆́мъ.
ꙗ҆́коже сѧ и҆́мъ стори́цею сꙋгꙋ́бъ ѹ҆мно́жити.
и҆ ѻ́чи господи́на мое҆го цр҃ѧ ви́дѣти, и҆ господи́нъ мо́и цр҃ь почт̂о помышлѧ́етъ ѻ҆ словесѝ сем̑·

И҆ ѹ҆крѣпѝ сло́во цр҃ь къ і҆ѻ҆а́вꙋ, и҆ къ кнѧѕе́мъ си́лным̑.
і҆ и҆зы́де і҆ѻ҆а́въ, и҆ кнѧ́ѕи крѣ́пости пред̑ цр҃ѧ, сочестѝ лю́ди і҆и҆л҃евы·

И҆ преидо́ша і҆ѻ҆рдан̑҇, и҆ внидо́ша въ а҆рои́ръ, съ ѻ҆де́снꙋю гра́да, и҆же посре́дѣ дебрѝ га́дїи, и҆ е҆лїезе́ръ·

И҆ прїидо́ша в галаа́дꙋ, и҆ въ землю ѳавасо́нъ.
и҆ въ ѳо́нъ.
и҆ въ да́сꙋ.
и҆ внидо́ста въ данида́нъ.
и҆ ѻ҆бидо́ста до сидо́на·

И҆ пото́мъ прїидо́ста въ маѱар̑҇ ти́рꙋ, и҆ въ всѧ̀ гра́ды гевꙋ́ины.
и҆ въ хананеи́ны.
і҆ и҆до́ста на ю҆́гъ і҆ѹ́ды, и҆ въ вирса́вїю·

И҆ ѻ҆быидо́ста вс̂ю зе́млю, и҆ прїидо́ста въ і҆ерс̑҇ли́мъ.
сконча́вше і҃ ю, мс̑҇цъ, и҆ к҃ ма дн҃їи·

И҆ да́ст꙽ і҆ѻ҆а́въ число̀ сочте́ныхъ людїи цр҃ю.
и҆ бѣ̀ і҆и҆л҃ѧ числомъ.
и҃. со́тъ ты́сѧщъ мꙋжъ си́лныхъ держа́щихъ ѻ҆рꙋжїе.
и҆ мꙋжъ і҆ѹ́динъ.
пѧть со́тъ ты́сѧщъ мꙋжъ боре́цъ·

І҆ ѹ҆боꙗ҆́сѧ срд̑це двд҃во.
по числꙋ людїи и҆ рече дв҃дъ къ г҃ꙋ съгрѣши́хъ ѕѣ́ло сътвори́хъ гл҃ъ се́и·

И҆ н҃нѣ г҃и ѿи҆мѝ ѕло́бꙋ раба̀ свое҆го ꙗ҆ко ѻ҆сꙋетѣх꙽ ѕѣло·

И҆ въста̀ дв҃дъ заѹ́тра и҆ сло́во гн҃е бы́сть къ гаа́дꙋ про̑҇ркꙋ въ снѣ гл҃ѧ·

Ше́дъ гл҃и къ дв҃дꙋ та́ко гл҃етъ г҃ь.
тро́е а҆зъ рекꙋ̀ тебѣ і҆ и҆збере́ши е҆ді́но ѿ и́хъ.
и҆ сътворю̀ т̂и·

И҆ вни́де га́дъ къ дв҃дꙋ і҆ и҆сповѣ́да е҆мꙋ гл҃ѧ.
и҆зберѐ са́мъ себѐ бы́ти чт̂о хо́щеши.
прїидꙋтъ г҃, лѣта гла́дъ на́ землю твою и҆л̂и г҃, мс̑҇цы бѣ́гати пред̑ врагѝ твои́ми и҆ бꙋдꙋтъ гонѧ́ще т̂ѧ и҆л̂и г҃, дн҃и сме́рти въ землѝ твое́и бы́ти.
нн҃ѣ ѹ҆́бо разꙋмѣ́и и҆ ви́ждь чт̂о ѿвѣща́ю посла́вшемꙋ м̂ѧ·

И҆ рече дв҃дъ къ га́дꙋ.
тѣ́сно м̂и ѿвсю́дꙋ е҆сть тро́е с̂е.
да в꙽падꙋ̀ въ рꙋ́цѣ гн҃и.
ꙗ҆́ко мно́ги сꙋть щедроты̀ е҆го ѕѣ́ло.
в рꙋцѣ же чл҃чи да не впадꙋ̀.
і҆ и҆збра̀ себѣ̀ дв҃дъ са́мъ сме́рть.
и҆ дн҃їе жа́твенїи пшени́цы·

И҆ дас̑҇ г҃ь сме́рть въ і҆и҆л҃и.
ѿ ѹ́тра до ча́са ѻ҆бѣ́днего и҆ нача́сѧ ꙗ҆́зва бы́ти въ лю́дехъ.
и҆ ѹ҆мро́ша ѿ людїи гн҃ихъ ѿ дана и҆ до верса́вїѧ, ҂о҃, мꙋжъ·

И҆ прострѐ а҆гг҃лъ бж҃їи рꙋкꙋ свою въ і҆ерс̑҇ли́мъ расточи́ти ѧ҆̀, и҆ не преклонѝ г҃ь на ѕло́бꙋ.
и҆ рече а҆́гг҃лꙋ расточа́ющемꙋ лю́ди.
довлѣ́етъ т̂и нн҃ѣ ѿи҆мѝ рꙋкꙋ твою.
и҆ а́гг҃лъ гн҃ь б̂ѣ стоѧ̀ пред̑ гꙋмно́мъ ѻ҆рнѣѧ́ і҆е҆ѷсѣ́ева·

И҆ рече дв҃дъ къ г҃ꙋ внегда̀ ви́дѣ а҆́гг҃ла бию́ща лю́ди.
и҆ рече а́зъ е҆смь съгрѣши́выи.
а҆́зъ е҆смь па́стырь ѕл̂о сътвори́выи.
а҆ сїѧ ѻ҆́вца чт̂о сотвори́ша.
бꙋ́ди нн҃ѣ рꙋка̀ твоѧ на мн̂ѣ, и҆ на до́мъ ѿц҃а мое҆го·

И҆ прїиде гад̑ къ двдꙋ въ дн҃ь то́и.
и҆ рече е҆мꙋ възыиди.
и҆ поста́ви б҃ꙋ ѻ҆лта́рь въ гꙋмнѣ̀ ѻ҆рнѣѧ́ і҆е҆ѷсѣ́ина·

И҆ възы́иде дв҃дъ по гл҃ꙋ га́да про̑҇рка.
и҆мъже ѻ҆́бразом̑ заповѣ́да е҆мꙋ г҃ь·

И҆ прекло́нсѧ ѻ҆рнїи и҆ ви́дѣ цр҃ѧ и҆ ѻ́троки е҆го въсходѧ́ща вы́ше е҆го.
і҆ и҆зы́иде ѻ҆́рна.
и҆ поклони́сѧ цр҃ю пад̑ на лицы̀ свое҆мъ на землѝ·

И҆ рече ѻ҆́рна.
что̀ с̂е ꙗ҆́ко прїиде господи́нъ мои цр҃ь къ рабꙋ̀ свое҆мꙋ.
и҆ рече е҆мꙋ дв҃дъ кꙋпи́ти ѹ҆ тебѐ гꙋмно̀ прїидо́хъ.
въ созда́нїе ѻ҆лтарѧ̀ бж҃їѧ.
да и҆ преста́нетъ ꙗ҆́зва ѿ людїи·

И҆ рече ѻ҆́рна къ дв҃дꙋ.
да прїиметъ и възнесе́тъ господи́нъ мои цр҃ь.
г҃ꙋ б҃ꙋ бл҃гое пред̑ ѻ҆чи́ма свои́ма.
с̂е воло́ве въ всѧ̀съжига́емаѧ.
и҆ колеса̀ и҆ сосꙋ́ди.
волов̑҇ на дрова̀·

Вс̂ѧ да́сть ѻ҆́рна цр҃ю.
и҆ рече ѻ҆́рна къ цр҃ю, г҃ь б҃ъ твои да блс̑҇витъ тѧ·

И҆ рече цр҃ь въ премѣне́нїи възнесꙋ̀ г҃ꙋ б҃ꙋ мое҆мꙋ.
и҆ не вознесꙋ̀ вс̂есожига́емыхъ тꙋнѐ·

И кꙋпѝ дв҃дъ гꙋмно̀ и҆ волы̀.
за н҃, си́кль сребра̀, и҆ сози́жде дв҃дъ ѻ҆лтар̑҇ б҃ꙋ на гꙋмнѣ̀.
и҆ възнесѐ вс̂ѧсожига́е҆маѧ.
и҆ ми́рнаѧ.
и҆ послꙋш́а г҃ь землѧ̀, и҆ ѿѧ́тъ ꙗ҆́звꙋ ѿ і҆и҆л҃ѧ·

Коне́цъ в҃ кни́гъ црс̑҇твъ, и҆́мать в себѣ, глв̑҇а, к҃д·