Библия (1581). [11] 3 Царств

ТРЕТИЕ КНИ́ГИ ЦАс̑҇ТВЪ

ГЛАВА̀· А҃

И цр҃ь дв҃дъ бы́сть состарѣ́въсѧ.
и҆ прешед̑ дн҃и своѧ.
и҆ ѻ҆дѣва́хꙋ и҆̀ ри́зами мно́гими.
и҆ не съгрѣва́шесѧ·

И҆ рѣша ѻ҆́троцы е҆мꙋ да пои҆́щемъ господи́нꙋ свое҆мꙋ цр҃ю.
дв҃ица ѹ́ныи и҆ пред̑ста́нетъ цр҃еви.
и҆ бꙋдетъ грѣ́ющи е҆го, и҆ да лежи́тъ с ни́мъ, и҆ съгрѣ́етъ господи́на на́шего цр҃ѧ·

И҆ възыска́ша ѹ҆́нотка до́бры въ всемъ предѣ́ли і҆и҆л҃евѣ.
и҆ ѻ҆брѣто́ша а҆виса́нꙋ сꙋман꙽тѧны́ню.
и҆ приведо́ша ѧ҆̀ къ цр҃ю·

И҆ б̂ѣ ю҆́нотка добра̀ видѣ́нїемъ ѕѣло.
и҆ бы́сть грѣ́ющи цр҃ѧ, и҆ слꙋжа́щи е҆мꙋ.
цр҃ь же не позна́ше еѧ̀·

И҆ посем̑ а҆до́нїѧ сн҃ъ а҆сги́ѳовъ под̑не́съсѧ гл҃ѧ а҆́зъ и҆́мамъ црс̑҇твова́ти.
и҆ сътворѝ себѣ̀ колесни́ца и҆ ко́нѧ, и҆ н҃, мꙋжъ и҆же хожда́хꙋ пред̑ ни́мъ·

И҆ не ѻ҆ста́ви е҆го ѿцъ е҆го никогда́же гл҃ѧ почто̀ с̂е т̂ы та́ко твори́ши.
и҆ б̂ѣ то́и кра́сенъ зра́комъ ѕѣ́ло·

и҆ того̀ роди́лъ по а҆весоло́мѣ·

И҆ бѣша совѣти е҆го съ і҆ѻ҆а́вомъ сн҃омъ сарꙋиа́совымъ.
и҆ съ вїа҆ѳа́ромъ і҆е҆ре́ѻ҆мъ.
и҆ помага́хꙋ въ слд̑ѣ а҆донїѧ́·

Садо́к же і҆е҆ре́и.
и҆ ванѣѧ сн҃ъ и҆ѻ҆а҆наданїи́нъ.
и҆ наѳа́нъ про̑҇ркъ, и҆ семеи́нъ и҆ рисі́и и҆ сн҃ове си́лнїи, двд҃вѣ не бѣша по а҆до́нїи·

И҆ жрѧ́ше а҆до́нїѧ ѻ҆́вца и҆ те́лца и҆ а́гнеца.
при ка́мени зое҆ле́ѳѣ.
и҆же ѻ҆блежа́ше ѹ҆́стїе кла́дѧѕю роги́лѧ.
и҆ призва̀ вс̂ю бра́тїю свою, сн҃ы цр҃евы.
и҆ вс̂ѧ мꙋжа і҆ѹ́довы ѻ҆́троки цр҃евы.
наѳа́на же про̑҇рка и҆ ване́ѧ.
и҆ вс̂ѧ си́лнїи.
и҆ соло́мона бра́та свое҆го не зва̀·

И҆ рече наѳа́нъ къ вирсаві́и ма́тери соло́мони гл҃ѧ·

Слы́шала л̂и е҆си ꙗ҆́ко црс̑҇твꙋ́етъ а҆до́нїѧ.
сн҃ъ а҆сги́ѳы.
господи́нъ нашъ дв҃дъ не вѣ́дѣ.
и҆ н҃нѣ прїидѝ совѣща́ю т̂и совѣтъ, і҆ и҆зба́виши дш҃ꙋ свою и҆ дш҃ꙋ сн҃а свое҆го соло́мона·

Прїидѝ и҆ вни́ди къ цр҃ю дв҃дꙋ.
и҆ речеши к не́мꙋ гл҃ющи, нѣ́си л̂и г҃и мои цр҃ю клѧ́лсѧ рабѣ̀ свое́и пред̑ гм҃ъ бм҃ъ гл҃ѧ.
ꙗ҆ко соло́монъ сн҃ъ твои црс̑҇твꙋе҆тъ по мн̂ѣ.
и҆ то́и сѧ́детъ на престо́лѣ мое́мъ·

Чт̂о с̂е е҆́сть да црс̑҇твꙋетъ а҆до́нїѧ, и҆ с̂е бꙋ́детъ гл҃юще тебѣ съ цр҃емъ, и҆ а́зъ вни́дꙋ въ слѣ́дъ тебѐ и҆ сконча́ю гл҃ъ тво́и·

И҆ вни́де вир꙽саві́ѧ къ цр҃ю въ ло́жницꙋ, и҆ цр҃ь состарѣ́лсѧ бѧ́ше ѹ҆же ѕѣ́ло, и҆ ави́са сꙋман꙽тѧны́ни бѧ́ше слꙋжащи цр҃ю·

И҆ прикло́ньшесѧ вир꙽савїѧ, поклони́сѧ цр҃еви.
и҆ рече цр҃ь что̀ т̂и е҆сть·

ѻ҆на́ же рече г҃и мои цр҃ю.
т̂ы клѧ́сѧ пред̑ гм҃ъ бм҃ъ твои҆мъ рабѣ̀ твое́и.
ꙗ҆́ко црс̑҇твꙋ́етъ сн҃ъ твои соло́монъ по мн̂ѣ, и҆ то́и сѧ́детъ на прс̑҇тлѣ мое҆мъ·

И҆ с̂е нн҃ѣ а҆до́нїѧ црс̑҇твꙋ́ет꙽, и҆ ты̀ господи́не мои цр҃ю не вѣ́си·

И҆ поже́рлъ е҆сть телца̀ и҆ а́гнеца.
и ѻ́вца мно́жество.
и҆ созва̀ вс̂ѧ сн҃ы цр҃евы.
и҆ а҆вїа҆ѳа́ра жерца̀ и҆ѻ҆а́ва.
кнѧ́ѕѧ си́лныхъ.
соло́мона же раба̀ твое҆го не призва̀·

Ты́ же г҃и мои цр҃ю ѻ҆́чи всего і҆и҆л҃ѧ к тебѣ возира́ют̑ да възвѣсти́ши и҆мъ кт̂о сѧ́детъ на прс̑҇тѣ господи́на мое҆го и҆ цр҃ѧ·

И҆ бꙋдетъ ꙗ҆́ко ѹ҆сне́тъ господин̑҇ мои цр҃ь съ ѿц҃ы свои́ми.
и҆ бꙋ́девѣ а҆зъ и҆ сн҃ъ мо́и соло́монъ грѣшна·

И҆ быс̑҇ е҆ще е́и гл҃ющи съ цр҃емъ и҆ наѳа́нъ про̑҇ркъ прїиде·

И҆ възвѣсти́ша цр҃ю гл҃юще с̂е наѳа́нъ про̑҇ркъ и҆ вни́де пред̑ лицѐ цр҃ево.
и҆ поклони́сѧ цр҃ю пред̑ лицемъ е҆го до землѧ̀·

И҆ рече наѳа́нъ г҃и мо́и цр҃ю.
ты́ ли рече а҆до́нїи да црс̑҇твꙋ́етъ по мнѣ̀.
и҆ да сѧ́детъ на прс̑҇тлѣ мое҆мъ·

Ꙗ҆́ко сни́де днс̑҇ь и҆ закла̀ те́лца, и҆ ꙗ҆гнѧ́та.
и҆ ѻ҆вца̀ въ мно́жество.
и҆ созва̀ вс̂ѧ сн҃ы цр҃вы и҆ кнѧ́ѕѧ си́лных̑.
и҆ а҆вїа҆ѳа́ра и҆ере́ѧ, и҆ с̂е сꙋть ꙗ҆дꙋщи и҆ пїю́щи пред̑ ним̑.
и рѣша да живе́тъ цр҃ь а҆до́нїѧ·

И менѐ самого раба̀ твое҆го.
и҆ садо́ка і҆ере́ѧ.
и҆ ванѣѧ сн҃а и҆ѻ҆да́ева.
и҆ соло́мона раба̀ твое҆го не зва̀·

ѿ господи́на л̂и цр҃ѧ мое҆го бы́сть гл҃ъ се́и.
не сказа̀ б̂о рабꙋ̀ свое҆мꙋ, кт̂о сѧ́дет̑ на прс̑҇тлѣ господи́на мое҆го цр҃ѧ по нем̑·

И҆ ѿвѣща̀ цр҃ь дв҃дъ, и҆ рече зовѝ м̂и вирсавїю.
и҆ вни́де вирсавїѧ, и҆ ста̀ пред̑ цр҃емъ·

И҆ клѧ́тсѧ цр҃ь и҆ рече, жи́въ г҃ь и҆же и҆зба́ви дш҃ꙋ мою̀ ѿ всеѧ̀ печа́ли.
ꙗ҆́коже клѧх̑ ти сѧ пред̑ гм҃ъ бм҃ъ і҆и҆л҃евымъ гл҃ѧ ꙗ҆́ко соло́монъ сн҃ъ твои, се́и црс̑҇твꙋ́етъ по мнѣ̀.
и҆ то́и сѧ́детъ на прс̑҇тлѣ моем̑ въ менѐ мѣсто.
ꙗ҆́ко та́ко сътворю̀ е҆мꙋ въ дне́шнїи дн҃ь·

И҆ преклони́сѧ вирсавїѧ лице́мъ на́ землю, и҆ поклони́сѧ цр҃еви.
и҆ рече да живе́тъ господи́нъ мо́и цр҃ь дв҃дъ въ вѣ́ки·

И҆ рече дв҃дъ цр҃ь.
призовѝ м̂и садо́ка жер̑҇ца̀ и҆ наѳа́на про̑҇рка.
и҆ ванѣѧ сн҃а и҆ѻ҆да́е҆ва.
и҆ въшед̑ше ста́ша пред̑ цр҃емъ·

И҆ рече и҆мъ цр҃ь, пои҆мѣте съ собо́ю рабы̀ господи́на свое҆го.
и҆ всади́те сн҃а мое҆го соло́мона на м꙽ща̀ моѐ.
и҆ ведѣте и҆̀ на ѻ҆лта́рь·

И҆ да пома́жет꙽ е҆го т̂ꙋ садо́къ і҆ере́и и҆ наѳа́нъ про̑҇ркъ на црс̑҇тво въ і҆и҆л҃и і҆ и҆ѹ́дѣ.
и҆ въстрꙋби́те ро́гомъ.
и҆ речетѐ живе́тъ цр҃ь соло́монъ·

І҆ и҆зыидѣте и҆ в̂ы въ слд̑ѣ е҆го.
и҆ вни́детъ и҆ сѧ́детъ на прс̑҇тлѣ мое҆мъ.
ꙗ҆́ко то́и црс̑҇твꙋ́етъ въ моѐ мѣ́сто.
и҆ а́зъ заповѣ́дахъ да бꙋдет̑ властели́нъ, надъ і҆и҆л҃емъ і҆ и҆ѹ́дою·

И҆ ѿвѣща́въ и҆ ванѣѧ́ сн҃ъ и҆ѻ҆а҆нада́евъ, ц҃рю и҆ рече.
да бꙋдет꙽ та́ко вѣренъ г҃ꙋ б҃ꙋ гл҃ъ се́и господи́на мое҆го цр҃ѧ·

Ꙗ҆́коже е҆сть г҃ь съ господи́номъ мои҆мъ цр҃емъ.
та́ко да бꙋдетъ и҆ с꙽ соло́мономъ.
и҆ да възвели́читъ прс̑҇етлъ е҆го паче прс̑҇тла господи́на мое҆го дв҃да·

И҆ сни́де садо́къ і҆е҆ре́и, и҆ а҆наѳа́нъ про̑҇ркъ.
и҆ ванѣѧ́ сн҃ъ и҆ѻ҆да́евъ.
и҆ хере́ѳ꙽ѳи и҆ ѻ҆ ѳелеѳїи́.
и҆ всади́ша соло́мона на м꙽ща̀ цр҃ѧ двд̑ва.
и҆ възведо́ша и҆̀ на ѻ҆лтар̑҇.

И взѧ́тъ садо́къ і҆е҆ре́и ро́гъ съ и҆еле́ѻм̑ ѿ скѵ́нїѧ.
и҆ помаза̀ соло́мона, и҆ въстрꙋби́ша ро́гомъ, и҆ рѣша вс̂и лю́дїе, живе́тъ цр҃ь соло́монъ·

И҆ възыидо́ша вс̂и лю́дїе въслѣд꙽ е҆го.
и҆ ликова́хꙋ в ли́цѣхъ, и҆ веселѧ́хꙋсѧ весе́лїемъ вели́кимъ, и҆ рас꙽сѣде́сѧ землѧ̀ ѿ гласа и҆хъ·

И҆ слы́ша а҆до́нїѧ и҆ вс̂и и҆збра́ннїи е҆го, и҆ тїи бѧ́хꙋ сконча́ли ѹ҆жѐ ꙗ҆дꙋще, и҆ слы́ша іѻ҆а́въ гла́съ ро́жныи, и҆ рече чїи́ глас̑҇ е҆сть гра́дꙋ шꙋмѧ́щꙋ·

И҆ с̂е е҆мꙋ е҆щѐ гл҃ющꙋ.
и҆ се́и і҆ѻ҆а҆наѳа́нъ сн҃ъ и҆а҆вїа҆ѳа́рь і҆е҆ре́ѧ прїиде.
и҆ рече а҆до́нїѧ, вни́ди ꙗ҆́ко мꙋжъ си́лныи т̂ы е҆си.
и҆ бл҃га́ѧ възвѣща́еши·

И҆ ѿвѣща̀ і҆ѻ҆а҆наѳа́нъ и҆ рече, и҆звѣстно господи́нъ нашъ цр҃ь дв҃дъ поставѝ соло́мона цр҃ем꙽·

И҆ посла̀ с ни́ми цр҃ь садо́ка і҆е҆ре́ѧ, и҆ наѳа́на про̑҇рка.
и҆ ванѣѧ́ сн҃а и҆ѻ҆да́ева.
и҆ хереѳі́ѧ, и҆ фелеѳїю́, и҆ всади́ша и҆̀ на м꙽ща̀ цр҃ево·

И҆ помаза́ста и҆̀ садо́къ і҆е҆ре́и, и҆ наѳан̑҇ про̑҇рк꙽ на црс̑҇тво на ѻ҆лтарѝ.
и҆ взыидо́ша ѿтꙋдꙋ веселѧ́щесѧ, и҆ то́и т̂и е҆сть бы́лъ шꙋмъ гра́да.
и҆ гласъ и҆же слы́шасте·

И҆ сѣ́де соло́монъ на прс̑҇тлѣ црс̑҇тѣмъ·

И҆ внидо́ша рабѝ цр҃еви блс̑҇ви́ти господи́на на́шего цр҃ѧ дв҃да гл҃юще.
да ѹ҆бл҃житъ г҃ь да ѹ҆бл҃житъ и҆́мѧ соломоне сн҃а твое҆го, паче и҆́мени твое҆го, и҆ да възвели́читъ прс̑҇тлъ е҆го.
па́че прс̑҇тола твое҆го.
и҆ поклони́сѧ цр҃ь къ ѻ҆дрꙋ е҆го·

И҆ си́це рече цр҃ь.
блс̑҇вен꙽ г҃ь б҃ъ і҆и҆л҃евъ.
и҆же да́стъ днесь ѿ сѣмене мое҆го, на прс̑҇тлѣ мое҆мъ.
и҆ ѻ́чи моѝ с̂е ви́дѣста·

И҆ ѹ҆жасо́шасѧ ѹ́жасомъ, и҆ въста́ша вс̂и и́збра́ннїи а҆до́нїе҆вы.
і҆ и҆дѧ́хꙋ кож̑до пꙋте́мъ свои́мъ·

И҆ а҆до́нїѧ ѹ҆боѧ́сѧ ѿ лица̀ соло́монѧ.
и҆ въстав̑҇ и ѿи́де.
и҆ ꙗ҆́сѧ за ро́гъ ѻ҆лтарѧ̀, и҆ възвѣсти́ша соло́монꙋ гл҃юще.
с̂е а҆до́нїѧ ѹ҆боꙗ҆́сѧ ѿ лица̀ цр҃ѧ соло́мона, и҆ держи́тсѧ за ро́гъ ѻ҆лтарѧ̀ гл҃ѧ.
да клене́тъ м̂и сѧ цр҃ь днесь ꙗ҆ко да не ѹ҆бїетъ раба̀ свое҆го ѻ҆рꙋжие҆мъ·

И рече соло́монъ, а҆ще бꙋдет̑ съ сн҃ы си́лныхъ т̂о ни власъ главы̀ е҆го ѹ҆падет̑ на́ землю.
и҆ а́ще ѕло́ба ѻ҆брѧ́шетсѧ в нем̑ потом̑, т̂о да ѹ́мретъ·

И҆ посла̀ цр҃ь соло́мон̑҇, и҆ сведо́ша и҆̀ со ѻ҆лтарѧ̀, и҆ поклони́сѧ цр҃ю соло́монꙋ, и҆ рече е҆мꙋ соло́мон̑҇ и҆дѝ в дом̑ свои·

Глв̑҇а, в҃·

И приближи́шасѧ дв҃дꙋ дн҃їе ѹ҆мрѣти.
и҆ заповѣ́да соло́монꙋ сн҃ꙋ е҆мꙋ гл҃ѧ·

А҆́зъ ѿхождꙋ̀ въ пꙋть все́ѧ землѧ̀.
ты́ же крѣ́писѧ, и҆ бꙋди мꙋж꙽ съвръшен̑҇·

И҆ съхранѝ храни́лище г҃а и҆ б҃а твое҆го ходити въ всѧ̀ пꙋтѝ е҆го.
съхранѧ́и за́повѣди е҆го и҆ ѻ҆пра́вданїа и҆ сд̑ꙋбы̀ и҆ свѣдѣ́нїѧ е҆го пи́санныѧ въ зако́нѣ моѷсїѻ҆вѣ.
да разꙋмѣ́еши ꙗ҆́же сътвори́ши ѻ҆ всх̑ѣ, е҆ли́коже заповѣдах̑ т̂и·

да поста́витъ г҃ь сло́во е҆го.
и҆же гл҃а к не́мꙋ гл҃ѧ, а҆́ще съхранѧ́тъ сн҃ове твоѝ пꙋти е҆го, ꙗ҆́ко ходи́ти предо мно́ю вои҆́стиннѣ всѣмъ срд̑цем̑ и҆́хъ.
и҆ все́ю дш҃ею и҆́хъ, гл҃ѧ не сожене́тъ тебѐ мꙋж́ъ съ прс̑҇тола і҆и҆л҃ева·

Се бо т̂ы вѣ́си е҆ли́ко сътворѝ м̂и и҆ѻ҆а҆въ сн҃ъ сарꙋ́инъ колико сотвори м̂и ѻ҆бѣ́ма старѣ́ишинома си́лы і҆и҆л҃евы.
а҆вени́рꙋ сн҃ꙋ ни́ровꙋ, и҆ а҆месїю сн҃ꙋ н̂е҆ѳе́ровꙋ вое҆водѣ і҆ѹ́динꙋ ѹ҆бѝ ѧ҆̀.
и҆ вы́лїѧ кро́ви бра́ни в ми́рнаѧ и҆ да́сть кро́ви неви́нныхъ.
на ѻ҆поѧсанїе чре́слом꙽ е҆го и҆ под̑ ногꙋ е҆го под̑ложѝ е҆го·

И҆ сътвори́ши по мꙋ́дрости свое́и.
и҆ не сведе́ши ста́рость е҆го ѿ ми́ра во а҆́дъ.

И҆ сн҃омъ верзовелеи҆номъ галатьског̑҇ сътвори́ши млс̑҇ть.
и҆ да бꙋ́дꙋтъ съ ꙗ҆дꙋщими трапе́зꙋ твою̀.
ꙗ҆́ко та́ко приближи́шасѧ мн̂ѣ.
и҆ вънегда̀ бѣжа́ти м̂и ѿ лица̀ а҆весало́млѧ бра́та твое҆го·

И҆ с̂е бꙋ́детъ с тобо́ю семенїи сн҃ъ гирїи́нъ сн҃ъ и҆ю҆минеи́нъ ѿ ваѳарїи́ма·

И҆ то́й клѧт̑ м̂ѧ клѧ́твою не́мощною въ дн҃ь во́нже и҆схожа́хъ с полки.
и҆ то́й сниде на срѣтенїе м̂и на і҆ѻ҆рда́нъ.
и҆ клѧ́хъсѧ е҆мꙋ ѻ҆ г҃ѣ гл҃ѧ.
не ѹ҆бїю т̂ѧ ѻ҆рꙋж́їемъ, и҆ не погꙋбиши е҆го·

И҆ ѹ҆вѣ́си чт̂о сътвори́ши е҆мꙋ ꙗ҆́ко мꙋж́ъ мꙋ́дръ е҆си.
и҆ сведе́ши ста́рость е҆го съ кровїю во а҆́дъ·

И҆ ѹ҆спѐ дв҃дъ, и҆ погребен꙽ бы́сть ѹ҆ ѿц҃ъ свои҆хъ.
въ́ градѣ давы́довѣ·

И҆ бы́сть дн҃їи въ нѧ́же црс̑҇твова дв҃дъ въ і҆и҆л҃и, м҃, лѣтъ.
в хевро́нѣ црс̑҇твова, з҃, лѣтъ, а҆ въ і҆ерс̑҇ли́мѣ, л҃г, лѣта·

И҆ соло́монъ сѣде на прс̑҇толѣ дв҃да ѿц҃а свое҆го.
сы́и, в҃і, лѣтъ.
и҆ ѹ҆чести́сѧ црс̑҇твїе е҆го ѕѣ́ло·

И҆ вни́де а҆до́нїѧ сн҃ъ а҆ги́ѳоновъ.
къ вирсавїѝ мт҃ри соло́мони и҆ поклони́сѧ е́й.
ѻ҆на́ же реч̑҇, ми́ръ въходꙋ твое҆мꙋ.
и҆ рече а҆до́нїа ми́ръ·

И па́ки рече.
рѣчъ м̂и е҆сть к тебѣ̀.
и҆ рече е҆мꙋ вирса́вїѧ гл҃и·

И҆ рече е́й т̂ы вѣ́си, ꙗ҆́ко б̂ѣ моѐ цр҃ьство.
къ мнѣ̀ б̂ѣ ѹ҆же ве́сь і҆и҆л҃ь ѻ҆брати́лъ лицѐ свое, ꙗ҆́ко црс̑҇твовати мн̂ѣ в ни́хъ.
и҆ ѻ҆брати́сѧ црс̑҇тво моѐ ѿ менѐ, и҆ бы́стъ на бра́тѣ моем̑, ꙗ҆́ко ѻ҆ г҃ѣ бы́сть та́ко·

И҆ нн҃ѣ проше́нїѧ е҆ді́ного ма́ла прошꙋ̀ ѿ тебѐ, т̂о не ѿврати лица̀ свое҆го.
и҆ реч̑҇ е҆мꙋ вирсавїѧ просѝ·

И҆ рече к не́и а҆до́нїа рцы̀ къ соло́монꙋ цр҃ю гл҃ѧ.
ꙗ҆́ко не и҆́мать ѿврати́ти лица̀ свое҆го ѿ тебѐ, и҆ дабы м̂и далъ а҆веса́нꙋ сꙋман꙽тѧны́ню въ женꙋ̀·

И҆ рече вирсавїа добрѣ а҆́зъ и́мам̑ гл҃ати ѻ҆ тебѣ̀ къ цр҃ю·

И҆ вни́де пред̑ цр҃ѧ вирсаві́а гл҃ати е҆мꙋ ѻ а҆до́нїи.
и҆ воста̀ цр҃ь на срѣте́нїе е́й и҆ поклони́сѧ е́й и҆ сѣде на прс̑҇толѣ своем̑.
и҆ поста́виша прс̑҇толъ дрꙋгїи мт҃ери цр҃евїи.
и҆ сѣ́де ѻ҆де́снꙋю сн҃а·

И реч̑҇ сн҃ꙋ свое҆мꙋ проше́нїѧ мала е҆ді́ного прошꙋ̀ ѹ҆ тебѐ и҆ не ѿвратѝ лица̀ твое҆го ѿ мене.
и҆ реч̑҇ к не́и цр҃ь просѝ мт҃и моѧ̀, ꙗ҆́ко не ѿвращꙋсѧ ѿ тебѐ·

И҆ рече да́жъ а҆веса́нꙋ сꙋмантѧны́ню а҆до́нїю братꙋ свое҆мꙋ въ женꙋ̀·

И҆ ѿвѣща цр҃ь соло́монъ мт҃ри свое́и и҆ рече.
въскꙋ́ю т̂ы про́сиши а҆виса́ны сꙋмантѧны́нѣ въ женꙋ̀ е҆мꙋ, т̂о и҆ просѝ ѹ҆́же е҆мꙋ и҆ црс̑҇тво.
ꙗ҆́ко то́й ес̑҇ брат̑ мо́и старѣ́и надо мно́ю.
того б̂ѣ а҆вїаѳа́ръ і҆е҆ре́и, и҆ того і҆ѻ҆а́въ сн҃ъ сарꙋи́нъ вое҆вода дрꙋ́гыи·

И҆ клѧт̑сѧ цр҃ь соло́монъ пред̑ гм҃ъ гл҃ѧ.
с̂и да сътвори́тъ м̂и б҃ъ, и҆ с̂и да приложит̑ м̂и ꙗ҆́ко ѻ҆ дш҃и свое́и гл҃ѧ а҆до́нїѧ слово·

И҆ нн҃ѣ жи́въ г҃ь, и҆же ѹ҆гото́ва м̂ѧ, и҆ посадѝ м̂ѧ на прс̑҇толѣ ѿц҃а мое҆го дв҃да.
и҆ то́й сътвори м̂и до́мъ, ꙗ҆́коже гл҃а г҃ь.
ꙗ҆́ко да днс̑҇ь ѹ҆́мре а҆до́нїѧ·

И҆ посла̀ цр҃ь соло́монъ рꙋкою ванѣѻ́вою сн҃а и҆ѻ҆да́ева, и҆ ѹ҆би и҆̀.
и҆ ѹ́мре а҆до́нїѧ в то́й дн҃ь·

И҆ а҆виаѳа́рꙋ і҆е҆ре́ю рече цр҃ь соло́мон꙽.
тецѝ т̂ы во а҆наѳа́ѳъ на село̀ свое.
ꙗ҆́ко мж̑ꙋ смр҃ти е҆си въ дн҃ешнїи дн҃ь, да не ѹ҆мръщ꙽вѧю тебѐ ꙗ҆́ко носи́лъ е҆си кїѻт̑ завѣта гн҃ѧ пред̑ ѿц҃емъ моим̑ дв҃дом̑.
и҆ къ семꙋ̀ ꙗ҆́ко ѻ҆злоби́сѧ ѻ҆ все́мъ.
и҆́мже ѻ҆злоби́сѧ ѿц҃ъ мо́и·

І҆ и҆згна̀ соло́монъ а҆вїаѳа́ра, не бы́ти і҆е҆рею гн҃ю·

Ꙗ҆́коже собы́тисѧ словеси гн҃ю е҆же гл҃а в домꙋ и҆л̂и в сило́мѣ·

И҆ слх̑ꙋ до́иде сїй до і҆ѻ҆а́ва сн҃а сарꙋ́ина ꙗ҆ко і҆ѻ҆а́въ послѣ́дова а҆до́нїи.
и҆ въ слд̑ѣ соло́монь не ѹ҆клони́сѧ, и҆ бѣжа̀ і҆ѻ҆а́въ въ кро́въ гн҃ь, и҆ ꙗ҆́сѧ по ро́гъ ѻ҆лтарѧ̀ гн҃ѧ·

И҆ възвѣсти́ша соло́монꙋ гл҃юще.
ꙗ҆́ко бѣжа̀ і҆ѻ҆а́въ въ кро́въ гн҃ь, и҆ дръжи́тсѧ по рогъ ѻ҆лтарѧ̀, и҆ посла цр҃ь соло́монъ къ і҆ѻ҆а́вꙋ гл҃ѧ.
что̀ т̂и е҆сть да бѣжал̑҇ е҆си въ ѻ҆лта́рь гн҃ь, и҆ рече і҆ѻ҆а́въ ꙗ҆́ко ѹ҆боѧ́хсѧ ѿ лица твое҆го, и҆ бѣжа́хъ къ г҃ꙋ·

И҆ посла соло́монъ ванѣ́ю сн҃а и҆ѻ҆да́ева гл҃ѧ.
и҆дѝ ѹ҆бїи і҆ѻ҆а́ва и҆ погреби и҆̀·

И҆ прїиде ванѣ́ѧ сн҃ъ и҆ѻ҆даин̑҇ къ і҆ѻ҆авꙋ въ кро́въ гн҃ь свѣдѣнїѧ.
и҆ рече е҆мꙋ с̂е гл҃етъ т̂и цр҃ь и҆зы́ди.
и҆ рече і҆ѻ҆а҆въ не и҆зы́дꙋ, н̂о да здѣ̀ ѹ҆мрꙋ.
и҆ возврати́сѧ и҆ ванѣѧ сн҃ъ и҆ѻда́евъ.
и҆ рече цр҃еви гл҃ѧ, с̂и гл҃а іѻ҆ав̑҇, и҆ с̂и ѿвѣща м̂и·

И҆ рече е҆мꙋ цр҃ь и҆дѝ и҆ сътвори е҆мꙋ та́ко ꙗ҆́коже т̂и е҆смь ре́клъ.
ѹ҆бїи и҆ погреби и҆̀ и҆ ѿи́ми днс̑҇ь кровь ю҆́же безꙋма̀ пролїѧ і҆ѻ҆ав̑҇ ѿ мене.
и҆ ѿ домꙋ ѿц҃а мое҆го·

И҆ возвратит̑ г҃ь днс̑҇ь кро́вь непра́вды е҆го на главꙋ̀ е҆го, ꙗ҆́кож̑ и҆ ѻ́нъ ѹ҆бѝ дв̂а мꙋж́а правед̑на, и҆ бл҃же́ише па́че е҆го и҆ ѹ́би ѧ҆̀ ѻ҆рꙋжїем̑, и҆ ѿц҃ъ мо́и дв҃дъ не разꙋмѣ кро́ви то́ѧ.
и҆ а҆вени́ра сн҃а ни́рова.
вое҆во́ды і҆и҆л҃ева, и҆ а҆месїа сн҃а и҆е҆ѳи́рова вое҆воды і҆ѹ́дина·

И҆ возвратит̑сѧ кро́вь е҆го на главꙋ̀ е҆го.
и҆ на главꙋ̀ сѣмени е҆го во вѣ́ки.
дв҃дꙋ же и҆ сѣмени е҆го и҆ до́мꙋ е҆го.
и҆ прс̑҇толꙋ е҆го ми́ръ да бꙋдет̑ до́ вѣка ѿ г҃а·

И҆ възы́де ванѣѧ сн҃ъ и҆ѻ҆да́евъ.
и҆ ѻ҆брѣте і҆ѻ҆а́ва и҆ ѹ҆би и҆̀ и҆ погребе и҆̀ в домꙋ е҆го въ пꙋстыни·

И҆ воставѝ цр҃ь соло́монъ ванѣѧ сн҃а и҆ѻ҆да́ева.
во і҆ѻ҆а́ва мѣ́сто вла́стелѧ.
и҆ црс̑҇тво и҆спра́висѧ въ і҆ерс̑҇ли́мѣ и҆ садо́ка і҆е҆ре́ѧ да́сть соло́монъ цр҃ь пр́ьвого.
и҆ въ и҆а҆ѳа́ра мѣ́сто·

И҆ соло́монъ сн҃ъ дв҃дъ въцр҃исѧ въ і҆ерс̑҇ли́мѣ и҆ над̑ і҆ѹ́дою въ е҆ли́мѣ.
и҆ дасть г҃ь смы́слъ соло́монꙋ и҆ мꙋдрость мно́гꙋ ѕѣ́ло.
и҆ широтꙋ срд̑ца ꙗ҆́ко и҆ пѣсокъ и҆же въ мо́ри·

І҆ и҆спл́ънисѧ смы́сла соло́мон̑҇ ѕѣло, паче смысла всх̑ѣ сн҃овъ старѣиших̑ и҆ пач̑҇ всх̑ѣ мꙋдрых̑ е҆гѷпет̑ских̑·

Глв̑҇а, г҃·

И поѧ́тъ соло́мон꙽ дще́рь фараѻ́на цр҃ѧ е҆гѷпет꙽ска себѣ въ женꙋ и҆ приведе́ ю҆̀ въ́ град̑ дв҃двъ до́ндеже сконча себѣ здати до́мъ свои и҆ дом̑ гн҃ь пе́рвое и҆ стѣнꙋ і҆ерс̑҇ли́мовꙋ ѻ҆́крс̑҇тъ.

За сед̑мь лѣтъ, сътвори и҆ сконча̀·

И҆ бѧ́ше ѹ҆ соло́мона, ҂о҃, мꙋж́ъ, носѧ́щихъ бре́мена.
дѣ́лающихъ ка́менїе.
и҆, ҂п҃, сѣкꙋщ́ихъ въ горѣ̀ дре́во.
и҆ сътворѝ соло́монъ мо́ре и҆ ѹ҆крѣпленїа, и҆ ба́нѧ вели́кїѧ и҆ столъпы̀, и҆ ѹ҆глы дво́рныѧ и҆ море мѣ́дѧное, и҆ созда̀ кра́инаа и҆ среднаа е҆го.
и҆ разбѝ гра̑ двд҃въ.
та́ко дщ̂и фараѻ́нѧ преиде ѿ гра́да двд҃ва, в до́мъ сво́и е҆́же созда̀ е́й.
и҆ тогда̀ созда ѻ҆́лтарь и҆ соло́монъ возноша́ше трижды лѣтомъ жрътвꙋ·

И҆ ми́рнаѧ на ѻ́лтарь и҆же созда гв҃и.
и҆ жрѧ́ше пред̑ гм҃ъ, и҆ скон꙽ча до́мъ.
и҆ сїи старѣ́ишины притсавле́ныѝ над̑ дѣ́ломъ црѧ҃ соло́мона, ҂г҃, и҆ х҃, приста́вник̑҇ за люд̑ми дѣ́лающими дѣ́ло.
и҆ созда̀ а҆сꙋръ, и҆ магъдо́нъ, и҆ газе́ръ, и҆ вѣтꙋрꙋ.
и҆ вы́шнїи а҆вела́ѳъ.
ток̑҇мо же по созданїи домꙋ гн҃ѧ, и҆ стѣны і҆е҆рс̑҇ли́мъскїѧ ѻ҆́кс̑҇ртъ·

Таже потомъ созда̀ грады сїѧ.
вънегда̀ е҆ще̑ сꙋщ́е двд҃ꙋ жи́вꙋ, заповѣ́да соло́монꙋ гл҃ѧ·

Се́й да е҆сть с тобо́ю семе́и сн҃ъ гираи́нъ, сн҃ъ семе́не и҆е҆менеи́на ѿ хевро́на·

И҆ с̂е клѧ́тъ м̂ѧ клѧтво́ю ѹ҆кори́зненою.
въ дн҃ь вонже и҆дѧ́хꙋ с по́лки.
ты же сни́де въ срѣтенїе м̂и на і҆ѻ҆рда́нъ.
и҆ клѧх̑сѧ е҆мꙋ гм҃ъ гл҃ѧ.
ꙗ҆́ко не ѹ҆мръщ꙽влю тебе ѻ҆рꙋжїемъ.
и҆ нн҃ѣ не каса́исѧ е҆мꙋ ꙗ҆́ко мꙋж́ъ смы́сленъ е҆си т̂ы.
и҆ разꙋмѣи ꙗ҆́же сътвори́ши е҆мꙋ.
и҆ сведе́ши ста́рость е҆го со кро́вїю во ад̑·

И҆ посла цр҃ъ соло́монъ, и҆ призва̀ семе́ѧ, сн҃а гираа́ша, и҆ рече е҆мꙋ.
соѕи́жди себѣ̀ дом̑ въ і҆е҆рлс̑҇и́мѣ, и҆ сѣдѝ тꙋ и҆ не ходи ѿтꙋдꙋ ника́мож̑·

И҆ бꙋдет̑ в꙽ дн҃ь исхо́да твое҆го, и҆ пре́идеши потоки ке́дръскїѧ.
и҆ разꙋмѣѧ разꙋмѣи, ꙗ҆́ко смрт҃їю ѹ҆́мреши.
и҆ кровь твоѧ бꙋдет̑ на главѣ̀ твое́и.
и҆ заклѧт̑ и҆̀ цр҃ь в꙽ дн҃ь то́й.
и҆ рече семе́и къ цр҃ю.
бл҃гъ гл҃ъ и҆же гл҃а г҃и мо́и цр҃ꙋ та́ко да сътворит̑ рабъ тво́и, и҆ сѣде семе́и въ і҆е҆рлс̑҇и́мѣ, г҃, лѣта.
и҆ бы́сть по трех̑ лѣтех̑.
и҆ бѣжаста дв̂а раба̀ семе́ина ко а҆к꙽хꙋсꙋ сн҃ꙋ маа҆ха́инꙋ, цр҃ю геѳъскꙋ.
и҆ возвѣсти́ша семе́ю гл҃юще, с̂е е҆́ста раба̀ твоа въ геѳ꙽тѣ, и҆ въстав̑҇ семеѝ.
и҆ ѻ҆сѣдла ѻ҆слѧ̀ свое, и҆́де в꙽ ге́ѳꙋ ко а҆кхꙋсꙋ взыска́а рабꙋ̀ свое́ю, і҆ и́де семе́и и҆зъ і҆е҆рлс̑҇и́ма.
и҆ приведѐ раба̀ своа ѿ геѳа.
и҆ возвѣстиша соло́монꙋ гл҃юще.
ꙗ҆́ко семе́и ходѝ и҆зъ і҆е҆рлс̑҇и́ма въ геѳы, и҆ возврати раба̀ своѧ·

И҆ посла цр҃ь и҆ призва семе́ѧ, и҆ рече цр҃ь к немꙋ̀.
не клѧ́хъ ли т̂и сѧ гм҃ъ и҆ засвѣдѣтельствова́хъ т̂и гл҃ѧ, во́нже а́ще дн҃ь и҆зы́деши и҆зъ е҆рлс̑҇и́ма.
і҆ и҆зы́деши на́ десно, и҆л̂и на шꙋ́е, разꙋмѣѧ разꙋмѣи, ꙗ҆́ко смр҃тїю ѹ҆́мреши·

И҆ рече м̂и бл҃гъ гл҃ъ и҆́же слы́шах̑.
чтож̑ ꙗ҆́ко не сохранѝ клѧ́твы гн҃ѧ, и҆ за́повѣди и҆́же бѣхъ т̂и заповѣ́далъ·

И҆ ре́че цр҃ь къ семе́ю, т̂ы вѣ́си вс̂ю ѕло́бꙋ свою ꙗ҆́же вѣ́сть срд̑це твое, и҆ ꙗ҆́же сътвори дв҃дꙋ мое҆мꙋ ѿц҃ꙋ.
и҆ возвратѝ г҃ь ѕло́бꙋ твою на главꙋ твою.
и҆ цр҃ь соло́монъ е҆сть блс̑҇ве́нъ.
и҆ прс̑҇толъ двд̑въ е҆сть гото́въ пред̑ бм҃ъ во́ вѣки, и҆ заповѣ́да цр҃ь соло́монъ ванѣю сн҃ꙋ і҆ѻ҆да́евꙋ, и҆ шед̑ ѹ҆бїи семе́ѧ, и҆ ѹ́мре семе́и·

И҆ б̂ѣ цр҃ь соло́монъ смы́слен̑҇ ѕѣло и҆ мꙋдръ.
і҆ѹ́да же і҆и҆л҃ь мно́ѕи бѣхꙋ ѕѣло, ꙗ҆́ко пѣсокъ и҆́же при мо́ри, въ мно́жествѣ ꙗ҆дꙋще и҆ пїюще и҆ веселѧ́щесѧ·

И҆ соло́мон̑҇ б̂ѣ ѻ҆блада всѣми црс̑҇твы, ѿ рѣкъ и҆ до землѧ̀ ѳилистим̑скїѧ, даже до предѣлъ е҆гѷпетъскъ, и҆ бѣхꙋ приносѧ́ще да́ры и҆ рабо́тающе соло́монꙋ во вс̂ѧ дн҃и живота е҆го·

И҆ соло́монъ нача̀ развръза́ти си́лнаѧ лива́нова, и҆ то́й сам̑ созда̀ ѳермі́ю въ пꙋсты́ни·

И҆ сїе снѣ́дь бываше соло́монꙋ, и҆ сїѝ потребованїѧ соло́монова въ дн҃ь е҆ді́нъ, л҃, мѣръ смида́леныѧ мꙋкѝ, и҆ ѯ҃, ꙗ҆́дїи разли́чныхъ, и҆ і҃ те́лецъ из꙽бра́нныхъ, и҆ к҃, говѧд̑ тꙋчныхъ, и҆ ст̂о, ѻ҆́внов̑҇, ра́звѣ е҆́ленїи, и҆ сернъ и҆ бꙋи́воловъ.
и҆ вс̂ѧ потре́бна ѕвѣрїи и҆ ѿ кꙋрѧтъ тꙋ́чныхъ и҆збра́нных̑, и҆ ѿ всѧ́кого пти́ча и҆же на потре́бꙋ, мно́гое мно́жество·

И҆ бѧ́ше соло́монъ ѻ҆блада́ѧ всѣми стра́нами, и҆ ѻ҆б о́нъ полъ рѣкѝ·

И҆ ѿ ѳара́ѳы до га́зы, и҆ всѣми црс̑҇твїи, ѻ҆б о́нъ полъ рѣкѝ, и҆ б̂ѣ е҆мꙋ ми́рно ѿ всѣ х̑ стра́нъ ѻ҆́крс̑҇тъ е҆го·

И҆ живѧ́хꙋ і҆ѹ҆де́и і҆и҆л҃ьтѧ́не безъ печа́ли кож̑до въ домꙋ̀ свое҆мъ, и҆ под̑ виногра́домъ свои҆мъ, и҆ под̑ смоко́вницами свои҆ми ꙗ҆дꙋще и҆ пїю́ще, и҆ ликꙋ́юще, и҆ ѿ да́на и҆ до вирсавїѧ въ всѧ дн҃и соло́монѧ·

И҆ с̂е старѣ́ишины бѧ́хꙋ соло́монѧ, а҆зорѣѧ сн҃ъ садо́ков̑҇, і҆ере́ѧ и҆ ѻ҆рнїѧ сн҃ъ і҆а҆вїа҆ѳа́рь, ꙗ҆́же бѣ̀ старѣ́ишина пред̑стоѧ́щимъ, и҆ е҆сара́нъ и҆же над̑ до́мом̑ е҆го к҃а, кни́гочїѧ и҆ ва́ра сн҃ъ и҆ѻ҆а́ра вое҆во́ды, и҆ а҆химам̑ сн҃ъ вара́конь, гатарси́на, и҆ ванѣ́ѧ сн҃ъ и҆ѻ҆даев̑҇, над̑ а҆лꙋхї́ею, на возда́нїи бѧ́ше, и҆ сак꙽хꙋ́съ сн҃ъ наѳа́нь, и҆же въ свѣтех̑, и҆ бѧ́ше ѹ҆ соло́мона ҂м҃, ко́нїи и҆збра́нныхъ со колесни́цами, ҂в҃і, ко́нникъ, и҆ бѣ̀ ѻ҆блада́ѧ всѣми црс̑҇твы, и҆ ѿ рѣкѝ и҆ до землѧ̀ и҆ноплеме́нникъ и҆ до предѣлъ е҆гѵ́пта·

И҆ соло́монъ сн҃ъ дв҃двъ, црс̑҇твова̀ над̑ і҆и҆л҃емъ, и҆ над̑ і҆ѹ́дою въ і҆ерс̑҇ли́мѣ то́кмо·

Лю́дїе же тогда̀ бѧ́хꙋ жрꙋщ́е на высина́хъ, ꙗ҆ко не бѣ̀ созда́нъ до́мъ и҆́мени гн҃ю да́же и҆ до дн҃и ѻ҆́ного·

И҆ възлюбѝ соло́монъ г҃а.
ходи́ти в наѹ҆че́нїих̑ дв҃двыхъ ѿц҃а свое҆го, то́кмо на хол̑҇мѣхъ жрѧ́ше и҆ кадѧ́ше·

И҆ въста̀ соломонъ и҆́де в гаваѻ́нъ пожрѣти т̂ꙋ, ꙗ҆́ко та́мо бѣ̀ высота̀ ве́лїѧ и҆ ты́сѧщꙋ жрътвъ възнесѐ, на жрътвеницѣ в гаваѻ҆́нѣ·

И҆ ꙗ҆ви́сѧ г҃ь соло́монꙋ въ снѣ̀ но́щїю, и҆ рече е҆мꙋ просѝ чт̂о хо́щеши и҆ да́мъ т̂и·

И҆ рече соло́монъ, ты̀ е҆си сътворил̑҇ со ра́бомъ твои҆мъ дв҃домъ ѿц҃емъ мои́мъ млс̑҇ть ве́лїю, ꙗ҆́коже е҆сть ходи́лъ пред̑ тобо́ю, и҆́стинною и҆ пра́вдою, и҆ пра́вымъ срд̑цемъ с тобо́ю и҆ съхранѝ е҆мꙋ млс̑҇ть вели́кꙋю, и҆ еж̑ да́ти сн҃ови е҆го сѣ́сти на прс̑҇тлѣ е҆го ꙗ҆́ко и҆ дне́сь ꙗ҆́вѣ·

И҆ н҃нѣ г҃и бж҃е мо́и ты̀ сътвори́лъ е҆си раба̀ свое҆го цр҃емъ въ дв҃да мѣсто ѿц҃а мое҆го, и҆ а́зъ е҆смь ѻ҆тро́чищъ ма́лъ, и҆ не ви́дѣ и҆схо́да свое҆го и҆ вхо́да·

Раб̑҇ же твои посредѣ людїи твои҆хъ.
ꙗ҆́же и҆збра̀ лю́ди мно́ги, ꙗ҆́ко пѣсо́къ и҆же при́ мори, е҆гоже никто́же не и҆зочте́тъ ѿ мно́жества·

Сего ради да́ждь рабꙋ̀ свое҆мꙋ срд̑це смы́слено.
на послꙋша́нїе и҆ сꙋже́нїе лю́дем꙽ твоим̑ въ пра́вдꙋ и҆же разꙋмѣва́ти посреди добрꙋ и҆ ѕл̂ꙋ, ꙗ҆ко кт̂о мо́жетъ сꙋди́ти людемъ твои҆мъ тѧ́жкимъ си́мъ·

И҆ ѹ҆го́дно бы́сть сло́во с̂е пред̑ гм҃ъ бм҃ъ.
ꙗ҆́ко и҆спросѝ соло́мон꙽ гл҃ъ се́и·

И҆ рече г҃ь к немꙋ зане́же просѝ ѿ менѐ гл҃ъ се́и.
и҆ не просѝ ѿ менѐ дн҃їи мно́го, и҆ не просѝ богат̑ства, ниже просѝ дш҃а вра́гъ твоих̑ н̂о и҆спросѝ себѣ мꙋ́дрости и҆ ра́зꙋма, да послꙋш́аеши сꙋ́да·

с̂е сътворих̑ по гл҃ꙋ твое҆мꙋ.
с̂е да́хъ т̂и срд̑це смы́слено, и҆ мꙋ́дрость·

Ꙗ҆́коже нѣсть бы́лъ мꙋж́ъ пред̑ тобо́ю и҆ по тебѣ̀ не воста́нет̑ подо́бенъ тебѣ·

И к семꙋ и҆хже не просѝ да́хъ т̂и, и҆ бога́тъство и҆ сла́вꙋ.
ꙗ҆́ко нѣ́сть бы́лъ ни е҆ді́нъ мꙋжъ подо́бенъ т̂и въ цр҃ехъ по вс̂ѧ дн҃и твоѧ·

И҆ а́ще хо́диши по пꙋтѝ мое҆мꙋ, и҆ сохраниши за́повѣди моѧ и҆ повеленїа моѧ.
ꙗ҆коже ходи и҆ дв҃дъ ѿц҃ъ тво́и ѹ҆мно́жꙋ дн҃и твоѧ̀·

И҆ въз꙽бнꙋ соло́монъ и҆ се бѣ̀ со́ненъ.
и҆ воста́въ и҆́де въ і҆ерс̑҇ли́мъ, и҆ ста̀ пред̑ лицемъ жрътевникꙋ пред̑ лицемъ кїѻ́та завѣта гн҃ѧ въ сїѻ́нѣ.
и҆ вознесе жрътвꙋ, и҆ сътвори ми́рнаѧ.
и҆ сътвори пи́ръ ве́лїи себѣ̀ и҆ всѣмъ ѻ҆́троком̑ свои҆мъ·

Тогда пред̑ста́стѣ дв̂ѣ женѣ̀ блꙋ́дницы пред̑ цр҃емъ, и҆ стоѧ́ста пред̑ нимъ·

И҆ рече жена̀ е҆ді́на, въ мнѣ̀ е҆сть бѣда̀ г҃и мо́и.
а҆́зъ и҆ с̂и по́дрꙋга ми, и҆ живе́вѣ в домꙋ̀ е҆ді́ном̑ и҆ породи́ховѣ въ домꙋ·

И҆ бысть по третїем꙽ дн҃и роженїа мое҆го.
и҆ родѝ и҆ жена̀ сїѧ, и҆ бѣ́ховѣ са́ми ме́ждꙋ собо́ю.
и҆ не бѣ̀ никто́же с нама ра́звѣ нас̑҇ в домꙋ̀ на́ю·

И҆ ѹ҆́мре сн҃ъ жены̀ се́ѧ в но́щи, ꙗ҆́ко лежа̀ на не́мъ·

И҆ воста́вши полꙋно́щїю взѧ̀ ѻ҆троча̀ мое и҆з рꙋкꙋ мое́ю.
и҆ ѹ҆спѝ на ло́нѣ своем̑, и҆ ѹ҆мръшее ѻ҆́троча своѐ положи́ла бѧше ѹ҆ ме́не·

И҆ востах̑ заѹ҆́тра накарми́ти ѻ҆троча́ти.
и҆ ѻ҆брѣтох̑ е҆̀ мрътво.
и҆ внегда̀ со тща́нїемъ зрѧ̀ заѹ҆́тра.
и҆ с̂е нѣсть сн҃ъ мои е҆гоже е҆смь а҆́зъ родила·

И҆ реч̑҇ дрꙋга́ѧ жена н̂и, н̂о с̂е е҆сть сн҃ъ мо́и живы́и, а҆ с̂е е҆сть сн҃ъ твои ѹ҆мры́и.
и҆ прѧ́стасѧ пред̑ цр҃емъ·

И҆ рече и҆́ма цр҃ь.
т̂ы гл҃еши тако с̂е е҆сть сн҃ъ мо́и живы́и а҆ сн҃ъ се́ѧ мр҃твыи с̂е.
и҆ т̂ы гл҃еши н̂и, н̂о живы́и е҆сть сн҃ъ мо́и, а҆ твой сн҃ъ ѹ҆мръшїи·

Принесите м̂и меч̑҇ и҆ принесо́ша мечъ пред̑ цр҃ѧ·

И҆ рече цр҃ь разсѣцыте ѻ҆́троча сꙋщее жи́во на́ двое, и҆ дади́те е́й полъ, а҆ ѻ҆но́и дрꙋгꙋю по́лъ·

И҆ ѿвѣща жена̀ е́йже б̂ѣ сн҃ъ живы́и къ цр҃ю.
понеже смѧтесѧ ѹ҆троба е҆ѧ̀ ѻ҆ сн҃ꙋ е҆ѧ и҆ реч̑҇ во мнѣ е҆сть бѣда господи́не мо́и.
дади́те е́й ѻ҆́троча с̂и жи́во, смр҃тїю же не ѹ҆морите е҆го.
и҆ т̂а рече да не бꙋдетъ н̂и мнѣ н̂и тебѣ, н̂о пресицѣте е҆̀·

И҆ ѿвѣща цр҃ь рече, дади́те дѣтищ̑҇ живы́и женѣ рекше́и дади́те се́и е҆̀, а҆ смр҃тїю не ѹ҆мори́те е҆го, сїѧ е҆сть мт҃и е҆го·

И слы́шавъ весь і҆и҆л҃ь сд̑ꙋ се́й, и҆м꙽же сꙋдѝ цр҃ь, и҆ ѹ҆боѧ́шасѧ ѿ лица̀ цр҃ева, разꙋмѣша б̂о ꙗ҆́ко смы́слъ бж҃їи б̂ѣ в немъ сътвори́ти ѻ҆правда́нїѧ·

Глв̑҇а, д҃·

И б̂ѣ цр҃ь соло́монъ црс̑҇твꙋѧ над̑ і҆и҆л҃емъ·

И҆ сїи старѣ́ишины и҆же бѣша с ни́мъ, а҆за́рїѧ сн҃ъ садо́ка жерца̀ жрецъ·

И҆ е҆лїѧ и҆ а҆хїѧ сн҃ы си́сы кни́гочїи, и҆ѻ҆а҆саѳа́тъ, сн҃ъ а҆хали́довъ, повѣ́даѧ ѻ҆ всемъ·

И҆ ванѣѧ сн҃ъ и҆ѻ҆да́евъ надъ си́лными, и҆ садо́къ, и҆ а҆вїаѳа́ръ і҆ерѣѧ·

И҆ а҆зарїѧ сн҃ъ наѳа́нь над̑ престоѧ́щими.
и҆ завѳ̑҇ꙋ сн҃ъ наѳа́нь бли́жнїи цр҃ѧ·

И҆ а҆хисаръ б̂ѣ строи҆́тель.
и҆ е҆лїа́въ сн҃ъ сафа́товъ над̑ ѿчествомъ.
и҆ а҆донира́мъ сн҃ъ а҆вдои҆нъ над̑ данїю·

И҆ ѹ҆ соло́мона бѣ́ста в҃і, приста́вникъ, надо всм̑ѣ і҆и҆л҃емъ строѧ́ща цр҃ѧ и҆ домъ е҆го по мс̑҇цꙋ, в꙽ лѣто быва́ющи е҆ді́нъ·

И҆ сїѧ и҆ме́на и҆хъ бѣша.
вено́ръ ѿ предѣ́лъ е҆фремль е҆ді́нъ·

Сн҃ъ дакарь, и҆же в махема́те.
и҆ въ вифсалами́мѣ, и҆ веѳ꙽сами́се, и҆ е҆ло́мѣ, и҆ во е҆ѳана́не е҆ді́нъ·

Сн҃ъ се́довъ во е҆сараво́ѳѣ, въ фтꙋсох̑ѳе, вс̂ѧ землѧ ѻ҆фе́рова·

Сн҃ъ а҆минадава, и҆ вс̂ѧ нефѳадо́рїѧ.
и҆ тефа́ѳъ же дщ̂и соло́монѧ б̂ѣ е҆мꙋ в женꙋ̀·

Въ ваа́нѣ сн҃ъ а҆хилꙋѳов̑҇, въ ѳаа҆на́хꙋ, и҆ магед̑до, и҆ весь до́мъ саны́и, и҆же ѻ҆ е҆солѣ сареѳа́нъ, под̑ ни́мже і҆и҆л҃ь.
и҆ ѿ виѳ꙽са́на, и҆ до савелмаѹ҆́ма.
и҆ до веем̑мера́ила ѿ ма́ла е҆дин̑҇·

Сн҃ъ и҆а҆ве́ровъ, въ равеѳѣ галад̑скомъ.
с̂е ѻ҆́бласть въ е҆рга́вѣ, и҆́же б̂ѣ въ ва́сѣ, ѯ҃, град̑ вели́кихъ под̑ рꙋко́ю е҆го.
и҆ врата мѣ́дѧнаѧ бѧхꙋ и҆мъ·

А҆хидана́въ же сн҃ъ са́довъ, в манаи҆мъ·

А҆хима́съ в неѳали́мѣ.
и҆ се́й поѧ васема́ѳꙋ, дще́рь соло́моню въ женꙋ себѣ̀·

Ванїинъ сн҃ъ хꙋсїи, и҆же въ а҆си́рѣ, и҆ вало́ѳѣ·

А҆саѳаѳ꙽ сн҃ъ ѳарꙋа́нь.
и҆ въ и҆сахарїи·

Симеѻн̑҇ же сн҃ъ и҆́ла, и҆же ѿ венїами́на·

Кълѳа́на, гавер̑҇ сн҃ъ гада́инъ въ земли галаа́дѣ, въ земли сїѻ́новѣ цр҃ѧ веса́в꙽ска, и҆ ѻ́га цр҃ѧ васа́нъска·

И҆ наси́фъ старѣ́ишина въ земли і҆ѹ́довѣ.
и҆ тако стоѧ́хꙋ приста́вницы цр҃ѧ соло́мона
и҆ вс̂ѧ потребнаѧ даѧ́хꙋ на трапе́зꙋ цр҃евꙋ.
и҆ всѣмъ приходѧ́щимъ къ трапезѣ е҆го, ко́ждо свое҆го мс̑҇ца не премѣнѧше н̂и сло́во·

да́юще е҆чмень ко́немъ и҆ плѣвы м꙽скомъ ко́ждо ꙗ҆́ко заповѣ́дано бысть е҆мꙋ·

И҆ ѻ҆рꙋжїа ноша́хꙋ на мѣ́сто, а҆́може а́ще и҆дѧ́ше цр҃ь.
и҆ ко́ждо их̑ по свое҆мꙋ чинꙋ·

И҆ дасть г҃ь смы́слъ и҆ мꙋдрость соло́монꙋ, мно́го ѕѣл́о и҆ разли́тїе срд̑ца ꙗ҆ко пѣсокъ и҆же при́ мори·

И҆ распространи́сѧ мꙋдрость соло́монꙋ ѕѣло паче смы́сла всѣхъ стары́хъ чл҃къ, и҆ паче смы́сленых̑ всѣхъ е҆гѷптѧн̑҇·

И҆ ѹ҆мꙋдрѣ̀ паче всѣхъ чл҃къ.
и҆ ѹ҆мꙋдрѣ паче геѳа́ны і҆и҆л҃ьтѧнина.
и҆ е҆ма́на, и҆ халга́да, и҆ да́рды сн҃а сама́дова и҆ просла́висѧ и҆́мѧ е҆го во всх̑ѣ стра́нахъ ѻ҆́крс̑҇тъ·

И҆ гл҃а соло́мон̑҇, ҂г҃, при́тчеи, и҆ быша пѣсни, ҂е҃·

И гл҃а ѻ҆ древх̑ѣ и҆же ѿ ке́дръ лива́ньских̑ и҆ до и҆с꙽со́па.
и҆дꙋщего и҆зъ стѣны̀.
и҆ гл҃а ѻ҆ ско́тѣ и҆ ѻ҆ пти́цахъ, и҆ ѻ҆ гадех̑ и҆ ѻ҆ ры́бахъ·

И҆ прїидо́ша вс̂и лю́дїе слы́шати премꙋдрость соло́моню, и҆ прїима́ше дары ѿ всѣх꙽ цр҃ь земных̑ и҆же слы́шахꙋ премꙋдрость е҆го·

Глв̑҇а, е҃·

И посла хира́мъ цр҃ь тѷрскъ ѻ҆́троки своа помаза́нїѧ рад̑и̑ соло́мони слы́ша б̂о ꙗ҆́ко пома́заша е҆го на црс̑҇тво въ двд̑а мѣсто ѿц҃а е҆го.
ꙗ҆́ко любѧ́ше б̂ѣ хирам̑ дв҃да вс̂ѧ дн҃и·

И҆ посла̀ соло́монъ къ хира́мꙋ гл҃ѧ·

Ты вѣ́си ѿц҃а мое҆го дв҃да, ꙗ҆́ко не возмо́же созда́ти домꙋ и҆́мени г҃ꙋ б҃ꙋ мое҆мꙋ, ѿ лица̀ проти́вныхъ, ѻ҆́крс̑҇тных̑ е҆го, до́ндеже дасть ѧ҆̀ е҆мꙋ г҃ь под̑ножїе нога́ма е҆го·

И҆ нн҃ѣ ѹ҆покоѝ г҃ь б҃ъ мо́и мнѣ̀ ѻ҆́крс̑҇тъ.
нѣсть врага̀, ни́же сопротивлѧ́ющагосѧ лꙋка́вно·

И҆ с̂е а҆́зъ гл҃ю созда́ти домъ и́мени б҃а мое҆го.
ꙗ҆́коже гл҃а г҃ь къ дв҃дꙋ ѿц҃ꙋ мое҆мꙋ гл҃ѧ.
с̂е сн҃ъ твои е҆гоже дам̑ въ тебѐ мѣсто на прс̑҇толъ тво́и, то́й соѕи́ждет꙽ храм̑ и҆́мени мое҆мꙋ·

И҆ нн҃ѣ заповѣжъ да ѿсѣкꙋтъ м̂и ке́дрова древа ѿ лива́на.
и҆ с̂е рабъ мо́и съ рабы̀ твои҆ми, и҆ нае́мъ по́мощи твое́и дамъ т̂и, по всемꙋ̀ е҆ли́ко речеши.
т̂ы вѣси ꙗ҆́ко нѣсть мн̂ѣ вѣ́данїѧ дре́ва сѣщи, ꙗ҆́коже сидо́нове·

И҆ бысть ꙗ҆́ко слы́ша хирам̑ слово соло́моне, възра́довасѧ ѕѣло и҆ рече блс̑҇ве́нъ б҃ъ днс̑҇ь.
и҆же дасть дв҃дꙋ сн҃а разꙋмна, над̑ люд̑ми симѝ мно́гими·

И҆ посла̀ хира́мъ къ соло́монꙋ гл҃ѧ.
слы́шахъ ѻ҆ всѣхъ е҆гоже ради посла̀ ко мнѣ̀, и҆ а́зъ творю̀ вс̂е хотѣнїе твое.
и҆ дамъ ѹ҆сѣкнꙋти древа ке́дрова, и҆ пе́вгова·

Слꙋ́ги моѧ и҆знесꙋтъ ѧ҆̀ ѿ лива́на въ мо́ре, и҆ а́зъ положꙋ̀ ѧ҆̀ въ складенїе на мѣсто, и҆дѣже возвѣсти́ши мн̂ѣ, довезꙋтъ ѧ҆̀.
и҆ та́мо во́змеши ѧ҆̀ и҆ сотвори́ши хотѣнїе мое, и҆же да́ти кръмлю до́мꙋ мое҆мꙋ·

И҆ б̂ѣ хирам̑ да́ѧ соло́монꙋ, ке́дры смере́чи, и҆ вс̂е хотѣнїе е҆го сотвори·

И҆ дасть соло́монъ, ҂к҃, мѣръ пшеницы и҆ пищꙋ до́мꙋ е҆го·

И҆ к҃, корчаг̑҇ и҆е҆ле́ю чи́ста по семꙋ̀ даваше хира́мꙋ на въсѧ́ко лѣто, и҆ г҃ь дасть соло́монꙋ премꙋдрость.
ꙗ҆́коже гл҃а е҆мꙋ, и҆ б̂ѣ ми́ръ ме́ждꙋ хира́мом̑, и҆ соло́моном̑, и҆ положиша завѣтъ междꙋ собо́ю·

И҆ приведѐ цр҃ь вы́бранїе ѿ всего і҆и҆л҃ѧ, л҃, ты́сѧщъ мꙋжъ·

И҆ посла̀ ѧ҆̀ в лива́нъ, ҂і҃, на мс̑҇ць въ премѣнꙋ, мс̑҇ць бывше в лива́нѣ, а҆ дв̂а мс̑҇ца, в домꙋ̀ свое҆мъ.
и҆ бѧ́ше а҆донира́мъ, над̑ выбра́нїем̑·

И҆ бѧ́ше соло́монꙋ.
҂о҃ носѧ́щихъ бремена̀.
и҆ ҂п҃, сѣкꙋщих̑ въ горѣ̀·

Кро́мѣ старѣ́ишин꙽ и҆ приста́вник̑҇, и҆же бѣхꙋ над̑ дѣломъ соло́моним̑, ҂г҃, и҆ х҃, приста́вник̑҇ дѣл́ающих̑ дѣло, и҆ готова́ша дре́ва и҆ ка́менїѧ, г҃, лѣта·

Глв̑҇а, ѕ҃·

И бы́сть в꙽ четы́ридесѧ́тное в четве́ртосо́тное лѣто, и҆схода сн҃овъ і҆и҆л҃евых̑ ѿ е҆гѷпта.
в꙽ лѣто, четве́ртое въ мс̑҇ць вто́рыи.
црс̑҇твꙋю҆щꙋ цр҃ю соло́монꙋ над̑ і҆и҆л҃ем꙽, созда̀ хра́мъ гв҃и·

И҆ с̂е храм̑ е҆гоже созда̀ соло́монъ цр҃ь гв҃и.
бѧше, м҃, лакот̑ долгота е҆го.
и҆ к҃, лако́тъ широта е҆го.
и к҃е, лако́тъ высота е҆го·

И҆ кома́ра ꙗ҆́же́ б̂ѣ пре лицемъ е҆го, к҃, лако́тъ долгота̀ е҆го.
толи́ко же ꙗ҆́ко в꙽ высинꙋ̀ до́ма.
в꙽ ширинꙋж̑, і҃ лакот̑·

Кома́ра бысть и҆ сїѧ пред̑ лицем̑ хра́мꙋ.
и҆ созда̀ храмъ и сконча̀ и҆̀.
и҆ сътвори храмꙋ ѻ҆́кна преклоне́ны, с꙽кровены ѻ҆крс̑҇тъ стѣны храм̑ныѧ, притво́ры ѻ҆́коло цр҃кви всеѧ̀.
сътворѝ ѹ҆ дави́ра, и҆ сътвори закро́вы ѻ҆́коло·

Закро́въ и҆ нижнїи странѣ̀, е҃, лакот̑ ширина б̂ѣ.
и҆ сре́днеи, ѕ҃, лако́тъ ширина̀, и҆ третеи, з҃, лакот̑ ширина̀ е҆го, поне́же ѹ҆твръженїе хра́мꙋ сътворѝ, ѻ҆́крс̑҇тъ внѣ̀ѹ́дꙋ хра́ма ꙗ҆́ко да не прїимают̑сѧ стѣнѣ храма·

И҆ хра́мꙋ ѕиждемꙋ сꙋщꙋ ка́менїемъ несѣченымъ е҆дина́цѣмъ ꙗ҆́ко приноша́шесѧ, мла́тъ же, и҆ тесли́ца, и҆ всѣхъ дѣ́лных̑ желѣзъ не слы́шасѧ въ хра́мѣ е҆гда зда́ша.

І҆ и҆ две́ри закро́вꙋ сътвори, ꙗ҆́же сꙋть ниж̑нѧѧ страны̀ хра́ма з десны́ѧ, і҆ и҆звїе́ныи бѧше восход̑, въ сред̑нїи, и҆ ѿ среди́на г҃, ча́сти бѧше въход̑·

И҆ созда̀ храм̑ и҆ соверши е҆го, и҆ ѻ҆ста́ви ѻ҆́коло всего̀ хра́ма до́щками.
и҆ сворѝ ке́дрїемъ и҆ сътвори вѧза́нїѧ ѻ҆́крс̑҇тъ всего̀ хра́ма, е҃, лако́тъ въ высотꙋ̀ е҆го и҆ сн̂ѧ вѧза́нїе, дре́вомъ ке́дровым̑·

И҆ бысть слово гн҃е къ соло́монꙋ гл҃ѧ·

Хра́мъ сїи е҆сть и҆же т̂ы ѕи́ждеши.
аще хо́диши въ за́повѣдехъ мои҆хъ и҆ сꙋдбы̀ моѧ сътвори́ши, и҆ съхрани́ши вс̂ѧ повелѣнїа моѧ, ѻ҆браща́ющисѧ въ нихъ, ѹ҆ста́влю слово мое к тебѣ̀, е҆же гл҃ах дв҃дꙋ ѿц҃ꙋ твое҆мꙋ·

И҆ вселю́сѧ по́средѣ сн҃овъ і҆и҆л҃евъ, и҆ не ѻ҆ста́влю люді́и моих̑ і҆и҆л҃ѧ·

И҆ созда̀ соло́монъ храмъ и҆ сконча и҆̀·

И҆ созда̀ стѣ́ны хра́мꙋ внꙋтръ древомъ ке́дровомъ ѿ землѧ̀ до стѣны̀ и҆ ѿ стѣны до верха̀ въ ѻ҆́коло ѻ҆ста́ви ꙗ҆́ко съдръжати древомъ внꙋтръѹ҆́дꙋ хра́мꙋ, и ѹ҆крѣплѧ́ти внꙋтръ страны̀ пе́вгїем̑·

И҆ созда̀, к҃, лако́тъ ѿ конца̀ стѣны̀ странꙋ̀ е҆ді́нꙋ ѿ землѧ до верха̀, и҆ сътвори внꙋтръ·

ѿ ѻ҆лтарѧ̀ до ст҃аѧ ст҃ыхъ, м҃, лако́тъ, б̂ѣ цр҃кви пред̑ лицем̑ ѻ҆лтарѧ̀·

По́средѣ храма внꙋтръ, т̂ꙋ же бѧше лѣ́по поставлѧ́ти кїѻ́та гн҃ѧ, и҆ бѧше к҃, лакот̑ в꙽ долготꙋ, и҆ к҃, лакот̑ в꙽ широтꙋ.
и҆ к҃, лакот̑ высота е҆го, и҆ ѻ҆бъѧт̑ и҆̀ зла́томъ и҆ ѹ҆твръди·

И҆ сътворѝ ѻ҆лта́рь ке́дровый проти́вꙋ ѻ҆лтарѧ̀ ѻ҆бъѧ́тъ и҆̀ златомъ и҆ весь хра́мъ ѻ҆бъѧ́тъ зла́том̑ до сконча́нїа всемꙋ̀ хра́мꙋ·

И҆ сътвори въ ѻ҆лтарю̀, дв̂а херꙋви́ма древомъ кипарисном̑, і҃, лако́тъ мѣ́рою вели́чество, і҃, лакотъ ко́ждо ѻ҆ себѣ̀·

Пѧ́ть лакот̑ кры́лѣ бѧста херꙋви́мꙋ е҆ди́номꙋ.
и҆ е҃, лакот̑ крылѣ херꙋви́мꙋ второ́мꙋ.
і҃, лакот̑ ѿ крила̀ до крила е҆мꙋ.

Та́ко мѣра бѣ̀, херꙋви́ма втора́го в тꙋже мѣрꙋ и҆ тако совръшены мѣры ѻ҆́ба·

И҆ высота̀ б̂ѣ херꙋви́ма кое҆гождо б̂ѣ, і҃, лако́тъ·

Та́коже и҆ второ́мꙋ, и҆ ѻ́ба херꙋви́ма бѣста посредѣ̀ хра́ма внꙋтрънѧго, и҆ простира́хꙋ кры́ла их̑, досѧза́ше крыло̀ е҆ді́но до стѣны̀ е҆ді́ноѧ хра́мꙋ, и҆ крыло дрꙋга́го херꙋві́ма досѧза́ше до стѣны̀ вторыѧ, и҆ кры́ла е҆ѧ̀ и҆же посредѣ хра́ма каса́шесѧ крыло̀ съ крылом̑·

И҆ ѻ҆бъѧ́та бѣста херꙋви́ма зла́томъ.
и҆ вс̂ѧ стѣны хра́ма ѻ҆́коло, и҆зъваꙗ҆́нна писа̀ подо́бна херꙋви́мома, и҆ фѷни́комъ внꙋтръѹ҆́дꙋ, и҆ вн̂ѣѹ҆́дꙋ·

И҆ помо́стъ и҆зъвнꙋ и҆ внѣ̀ ѻ҆бъѧ̀ зла́томъ·

И҆ две́ри ѻ҆лтарю̀ сътворѝ древомъ лѣ́пымъ, пра́ги пѧтери́цею, и҆ дво́ѧ две́ри дре́вомъ пе́вговым̑ и҆зваѧ́н꙽на на ни́хъ подо́бїѧ херꙋви́момъ древомъ фѷни́ковымъ, и҆ позоло́тою ѹ҆строѝ, и҆ снѧ́ть зла́том̑ и҆ бѧше златом̑ ѹ҆строе́но до херꙋвимовъ, и҆ до фѷник̑҇·

И҆ тако сотворѝ и҆ вра́томъ цр҃кви и҆ пра́ги дре́вомъ лѣпым̑ на четы́ри ѹ҆́глы·

И҆ вс̂ѧ двери дре́вомъ пев꙽говым꙽ ѹ҆красѝ.
засови́ты две́ри пе́рвыѧ, и҆ ѿвръзенїе и҆́хъ къ себѣ.
и҆ вторы́е две́ри засови́ты ѿвръза́юща къ себѣ·

На ни́х же сотвори и҆зваѧ́н꙽ни херꙋви́ми и҆ фѷники и҆ ѹ҆строе́ны бѣхꙋ позла́тою и҆ преима́ны златом̑, и҆ свѣшены до́лꙋ·

И҆ созда̀ дворецъ внꙋтренїи, тремѝ стѣна́ми нете́санымъ дре́вомъ.
и҆ е҆ді́на стѣна̀ те́сана древа ке́дръска въѻ҆́коло·

И҆ созда дворецъ до́мꙋ госпо́дню, и҆ вънꙋтреѣѧ.
и҆ кома́ра.
ꙗ҆же б̂ѣ проти́вꙋ хра́мꙋ·

И҆ посла́въ цр҃ь соло́монъ.
въ тѵ́ръ приведѐ хира́ма ѿ тѵ́ра, сн҃а жены̀ вдови́ца.
и҆ то́и б̂ѣ ѿ колѣ́на неѳали́млѧ, и҆ ѿц҃ъ е҆го б̂ѣ мꙋжъ тирин̑҇.
бїѧ́и мѣ́дь.
и҆спо́лнъ хꙋдо́жества и҆ ра́зꙋма и҆ вѣ́дѣнїѧ е҆же дѣ́лати всѧ́ко дѣ́ло мѣ́дѧное.
и҆ приведо́ша и҆̀ къ цр҃ю соло́монꙋ·

И҆ сътворѝ вс̂ѧ дѣла̀, и҆ солїѧ̀ дв̂а сто́лпа кома́рѣ цр҃ко́внѣи, и҃і, лако́тъ высота̀ столпа̀.
и҆ ѻ́крс̑҇тъ мѣ́ра е҆го, д҃і, лако́тъ.
и҆ тол꙽стота̀ столпꙋ̀ д҃, пе́рс꙽ты.
та́коже б̂ѣ и҆ вторы́и сто́лпъ.
и҆ дв̂ѣ главѣ̀ сотворѝ, и҆же възложи́ти на ве́рхъ столпо́в꙽.
солїѧ́ны ѿ мѣ́ди, е҃, лако́тъ въ высотꙋ̀, възложе́нїе е҆ді́но.
и҆ е҃, лако́тъ въ высотꙋ̀ на возложе́нїе дрꙋго́мꙋ·

И҆ сотворѝ дв̂ѣ мре́жи.
и҆́ма же покрыти главы̀ возложе́нїѧ и҆ дв̂ѣ мре́жи сътворѝ е҆же покры́ти возложе́нїе столпо́въ·

И҆ мре́жꙋ возложе́нїѧ е҆ді́наго, и҆ мре́жꙋ возложе́нїѧ втора́го.
и҆ дѣ́ло вывешенно дв̂ѣ стро́ки солїѧ́нныхъ.
мѣ́дѧных̑ сомрежены, дѣло вывешен̑҇но строка̀ над̑ строко́ю, та́коже сътворѝ возложе́нїю второ́мꙋ·

И҆ возложе́нїѧ на сто́лпх̑ѣ, подо́бна криновꙋ цвѣтꙋ ꙗ҆́ко и҆ въ кома́ре·

И҆ поста́ви сто́л꙽па въ кома́ре цр҃ко́внѣи.
и҆ поста́ви сто́л꙽пъ е҆дин̑҇.
и҆ нареч̑҇ и҆́мѧ е҆мꙋ і҆ꙗ҆́км̑ꙋ, и҆ поста́ви сто́л꙽пъ вторы́и, и҆ нареч̑҇ и҆́мѧ е҆мꙋ вало́зъ.
и҆ на главѣ̀ столъпо́ма, дѣ́ло кри́нова цвѣтꙋ.
и҆ сков̑҇ча̀ дѣло столпо́въ, ꙗ҆́коже над̑ кома́рою д҃ ла́ктѣ, и҆ под̑ставки под̑ ѻ́ба столпа̀, и҆ совы́ше стра́нъ возложе́нїе бѣ̀.
под̑ставки и҆ солїѧ́нных̑ строк̑҇ с҃, ѻ҆́коло на главѣ̀ вторы́ѧ тол꙽стоты·

И҆ сътворѝ мо́ре лїѧ́но, е҃. лакот̑, ѿ кра́ѧ до кра́ѧ е҆го, крꙋ́гло ѻ҆́коло е҆го, е҃, лако́тъ высота̀ е҆го.
и҆ ѻ́коло е҆го, л҃. ла́ктеи, и҆ под̑по́ры е҆мꙋ бѧ́хꙋ и҆ спо́ди въѻ́коло, і҃. лако́тъ, и҆ състоѧ̀ мо́ре ѻ́коло в҃і, воло́въ под̑ мо́емъ, г҃, зрѧ́щи на сѣверъ.
и҆ г҃, зрѧ́щи на ю́гъ, и҆ г҃. на за́падъ, г҃ же, на восто́къ.
и҆ всѣмъ бѧ́хꙋ соза́ди къ себѣ и҆ мо́ре бѧ́ше верхꙋ̀ и҆х꙽.
и҆ ѹ́стїе е҆го бѧ́ше ꙗ҆ко ѹ́стїе поти́ра прозѧба́ющаго кри́на, и҆ тол꙽стота̀ е҆го вели́ка·

И҆ сътворѝ і҃ мѣхоно́ѳъ мѣ́дѧнъ, е҃, лако́тъ мѣхоно́ѳъ е҆ді́нъ.
и҆ д҃ ла́кти широта̀ е҆го, и҆ ѕ҃ лако́тъ высота̀ е҆го, и҆ с̂е дѣ́ло мѣхоно́ѳовъ и҆ спое́нїе и҆хъ, и҆ спое́нїе срѣди и҆сходѧ́щихъ.
и҆ во спое́нїе и҆хъ бѧ́хꙋ по́средѣ и҆сходѧ́щихъ.
подо́бїе львов̑҇ и҆ воло́въ и҆ херꙋви́мов̑҇.
та́ко же бѧ́хꙋ и҆ внѣ̀ содержа́щихъсѧ, и҆ свы́шеи под̑ и҆ львы̀ и҆ под̑ волми ѹ҆тверже́нїѧ·

дѣло сохожде́нїа, и҆ д҃ ко́ла мѣдѧны мѣхоноѳꙋ кое҆мꙋждо.
и҆ пред̑держа́нїѧ мѣдѧна, и҆ д҃ ча́сти и҆хъ, и҆ ра́ма их̑ под̑ ѹ҆мыва́лницею.
ра́ма же солїѧ́ныѧ ко ѻ҆бъѻ҆нꙋ странꙋ̀, мꙋжа прилежа́ще, и҆ ѹ҆ста̀ е҆го внѣ главы̀, и҆ вы́ше е҆ді́наго ла́ктѧ, и҆ ѹ́стїе е҆го крꙋ́гло на ѻ҆смь лако́т꙽, и҆ на ѹ́стїю е҆го мѣхоно́ѳы, и҆ мѣхоно́ѳы е҆го четвероѹ҆го́лны, а҆ не крꙋглы, и҆ д҃ колеса под̑ мѣхоно́ѳами, и҆ рꙋцѣ во колесе́хъ, во мѣхоно́ѳꙋ, и҆ высота̀ е҆ді́наго ко́ла ла́коть и҆ пол̑҇.
и҆ дѣло ко́лъ возовы́хъ, рꙋцѣ и҆хъ и҆ хрибты̀ и҆хъ и҆ вс̂ѧ вещи их̑ лїѧ́ны четы́ри рама на четырехъ ѹ́глехъ мехоно́ѳы е҆ді́ноѧ, и҆ ѿ мѣхоно́ѳы ра́ма и҆хъ.
и҆ на главѣ̀ мѣхоноѳы полъ ла́ктѧ вели́чество ихъ, крꙋ́гло же ѻ҆́крст꙽ главы̀ мехоноѳовы, и҆ нача́ла рꙋ́къ е҆го.
и҆ споенїѧ е҆го·

И҆ ѿвръза́шесѧ въ нача́лѣ рꙋкъ е҆го и҆ спое́нїѧ е҆го·

Подо́бїѧ херꙋви́мов̑҇ и҆ льво́въ.
и҆ ѳѷни́ковъ стоѧ́щи и҆ содержа́щисѧ.
ко́ждо противꙋ лица̀ е҆го.
внꙋт́ръ ѻ҆́крс̑҇тъ·

Потомꙋ же сътворѝ, і҃. мѣхоно́ѳъ по чинꙋ̀ е҆ді́номꙋ, и҆ по мѣре е҆ді́нои въ всѣхъ·

И҆ сътворѝ і҃ лїѧ́ныхъ столповъ мѣ́дѧныхъ.
м҃, мѣръ въмеща́ющи ко́ждо со́пль·

Число̀ д҃ ла́ктѣ столпъ е҆ді́нъ.
на мѣхоно́ѳѣ е҆ді́номъ·

И҆ поста́ви і҃ мѣхоно́ѳовъ, е҃ по десно́и странѣ̀ въ хра́мѣ, на восто́къ.
и҆ е҃ по лѣвои странѣ̀ въ хра́мѣ.
и҆ мо́ре во дрꙋгꙋю странꙋ̀ хра́ма ѻ҆деснꙋю на восто́ки.
въ ѹ́глѣ полꙋ́денном̑.
и҆ сътворѝ хирам̑ коно́бы, и҆ тепли́ца г҃, и҆ ѳїѧ́лы·

И҆ сконча̀ хира́мъ вс̂ѧ дѣла̀ творѧ̀.
ꙗ҆́же творѧ́ше цр҃еви соло́монꙋ·

Въ хра́мѣ гн҃и столпа̀ дв̂а.
и҆ о҆бъви́тїѧ столпо́въ над̑ гла́вныхъ дв̂а мре́жи дв̂ѣ, е҆же покрыва́ти ѻ҆́ба ѻ҆бви́тїѧ, и҆зваѧ́ныхъ.
ꙗ҆́же на столпѣхъ сꙋть.
ши́пковъ мѣ́дѧныхъ, у҃. ѻ҆бѣма̀ мре́жема дв̂ѣ строцѣ ши́пковъ мре́жи е҆ді́нои, покрива́ти ѻ҆́ба ѻ҆б꙽ви́тїѧ, на ѻ́бѣ х̑ столпѣхъ, и҆ мѣхоно́ѳъ і҃ лїѧ́ныхъ со́пль пра́зныхъ і҃, на мѣхоно́ѳѣ.
и҆ мо́ре е҆ді́но, и҆ волов̑҇ в҃і, и҆ спод̑ подъ мо́рем̑ и҆ коноб꙽, и҆ тепли́цы г҃, и҆ ѳїѧ́лы и҆ вс̂ѧ сосꙋ́ды, и҆же сътворѝ хира́м꙽ цр҃ю соло́монꙋ въ хра́мѣ гн҃ѣ, и҆ стол̑҇по́въ м҃ и҆ и҃, до́мꙋ цр҃евꙋ, и҆ домꙋ гн҃ю, вс̂ѧ дѣла̀ цр҃ева, ꙗ҆́же сътворѝ хирам̑ мѣ́дѧна солїѧ́на·

И҆ множествꙋ мѣ́дьномꙋ не бѣ̀ числа̀.
и҆м꙽же творѝ вс̂ѧ дѣла̀ с̂и мно́га ѕѣ́ло, не б̂ѣ конца̀ числꙋ̀ мѣ́ди.
и҆же сътворѝ при ѻ҆бита́нїю і҆ѻ҆рда́на·

И҆ солїѧ̀ и҆хъ цр҃ь въ тол꙽стотѣ̀ зем̑лѧ̀ и҆ межи кохо́ѳътом̑, и҆ межи геи҆ра́ма·

И҆ да́сть цр҃ь соло́монъ вс̂ѧ сосꙋды, ꙗ҆́же сътворѝ въ храм̑ гн҃ь, и҆ ѻ҆лтар̑҇ златыи и҆ трапе́зꙋ, на не́иже хлѣби прино́снїи, и҆ зла́ты свщ̑҇ѣники, е҃, ѻ҆деснꙋ́ю, е҃, ѻ҆шꙋ́юю пред̑ лицемъ дави́ра, ст҃аѧ ст҃ыхъ зла́томъ спо́ены, и҆ свѣти́ла и҆ свѣща, и҆ вс̂ѧ цѣ́ла зла́та, и҆ пред̑две́рїе и҆ гво́здїе, и҆ ѳїѧ́лы, и҆ блю́да, и҆ кади́лницы зла́ты, спо́енїи·

И҆ две́рца две́ри хра́мꙋ внꙋтрънемꙋ, ст҃аѧ ст҃ым̑, и҆ две́ри хра́мꙋ цр҃ко́вномꙋ зла́ты·

И҆ скончасѧ вс̂е дѣло, и҆же сътворѝ соло́монъ въ хра́мѣ гн҃и·

И҆ вънесѐ соло́монъ ст҃аѧ дв҃да ѿц҃а свое҆го и҆ вс̂ѧ ст҃аѧ соло́монова сребро̀ и҆ зла́то и҆ сосꙋды, на сокро́вище да́сть въ хра́мъ гн҃ь·

Глв̑҇а, з҃·

И до́мъ свои созида̀ соло́монъ тремѝ на́ і҃ лѣты и҆ совръши соло́монъ весь дом̑ свои·

И҆ созида̀ та́кожде дом̑ древом̑ лива́ньскомъ, р҃ лакотъ в꙽ долготꙋ̀ е҆го, и҆ л҃ лако́тъ въ высотꙋ̀ е҆го.
и҆ н҃, лако́тъ в широтꙋ̀ е҆го.
и҆ д҃, рѧды древа ке́дрова.
и҆ ра́ма ке́дрова сто́лъпнаѧ·

И҆ поби́лъ дщи́цами ке́дровыми домъ ѿ горы̀ во странꙋ̀ столповъ.
и҆ число̀ столпов̑҇ м҃, и҆ е҃. и҆ е҃і, рѧ́довъ, и҆ ѻ́кна, г҃·

И҆ кома́ра над̑ кома́рою трижды̀, и҆ вс̂ѧ ѻ҆́кна и҆ кома́ры на д҃ ѹ҆́глы притво́рени и҆ ѿ ѻ҆кон̑҇ до дверїи троѧ́ко·

И҆ сѣни ꙗ҆́же на столпѣ̀, н҃, лакот̑ в долготꙋ, и҆ л҃, в широтꙋ.
и҆ сїѧ сѣ́ни бѧхꙋ на столпх̑ѣ пред̑ лицем̑ до́мꙋ.
и҆ столпѝ хожденїѧ пред̑ лицем̑ е҆ѧ̀·

Сътворѝ полатꙋ на неиже стоа́ще прс̑҇толъ е҆го на нем̑же сꙋдѧ́ше т̂ꙋ.
и҆ ѻ҆би и҆̀ сверха даже до землѧ̀ дщи́цами ке́дровыми и҆ т̂о слы́шашесѧ кома́ра сꙋ́дич̑҇наѧ·

И҆ домъ в не́мже живѧше.
и҆ дворе́цъ е҆ді́нъ и҆збран̑҇ по дѣ́лꙋ семꙋ сътворѝ и҆ дворъ дще́ри фараѻ́ни.
и҆же бѧше за соло́мономъ при кома́рѣ то́й соѕи́жде·

И҆ с̂е всѧ̀ бѧхꙋ ка́менемъ многоцѣнным̑ ѹ҆краше́на.
ѿ ростоѧ́нїѧ внꙋтръѹ҆́дꙋ.
и҆ ѿ ѻ҆снова́нїѧ до кро́ва.
и҆ внѣѹ́дꙋ в꙽ дворѣ̀ велицм̑ѣ·

ѻ҆снова́нїе же бысть ка́менїем꙽ дра́гым̑ и҆ вели́кимъ ка́менїемъ, і҃, лакот̑, і҆ и҆но́е, и҆ и҃, лакотъ·

И҆ съ верхꙋ̀ та́кожде чтс̑҇ного ка́менїа, по числꙋ четверо ѹ҆го́лно.
и҆ ке́дри ѻ҆бїено·

И҆ ѻ́крс̑҇тъ двора̀ вели́кого, г҃, рѧды ѿ ка́менїѧ те́саного.
и҆ е҆ді́нъ рѧ́дъ те́санымъ ке́дрїемъ.
и҆ съвръши соло́мон̑҇ весь дом̑ свои·

Глв̑҇а, и҃·

И бысть е҆гда совръши соло́мон̑҇ ѕижда́и домъ гн҃ь, и҆ домъ свои, по к҃, лѣтех̑·

И҆ тогда̀ собра цр҃ь соло́монъ вс̂ѧ старѣ́ишины і҆и҆л҃вы во і҆ерс̑҇лим̑ да въздви́гнꙋтъ кїѻ́тъ завѣта гн҃ѧ, ѿ гра́да дв҃дова.
т̂о е҆сть ѿ сїѻ́на·

И҆ собра́шасѧ къ цр҃ю соло́монꙋ вс̂и лю́дїе і҆и҆л҃евы въ мс̑҇ць, а҆ѳаним̑.
въ пра́зник̑҇, сїи б̂о е҆сть мс̑҇ць сед̑мыи·

И҆ прїидо́ша вс̂ѧ старѣи́шины і҆и҆л҃евы и҆ взѧ́ша і҆е҆реѝ кїѻ́тъ, и҆ сѣнь завѣтнꙋю, и҆ вс̂ѧ сосꙋды ст҃ыѧ.
и҆же бѣша в сѣни свѣдѣнїѧ·

И҆ несо́ша і҆ и҆е҆реѝ и҆ левѷти цр҃ь же и҆ весь і҆и҆л҃ь и҆дꙋще пред̑ кїѻ́томъ, жрѧхꙋ ѻ҆вны̀ и҆ волы бес числа̀·

Внесо́ша кїѻ́тъ і҆ереѝ в꙽ мѣсто е҆го въ ѻ҆лта́рь въ храм̑ гн҃ь въ ст҃аѧ ст҃ыхъ.
под̑ кры́ла херꙋви́мова·

Херꙋви́ма б̂о бѣста раскри́лила кры́лѣ свои над̑ мѣсте кїѻ́та и҆ прикры́ста херꙋви́ма над̑ кїѻ́том꙽.
и҆ над̑ ст҃ыми е҆го сверхꙋ·

И҆ ѻ҆бдержа́ста сщ҃енїѧ.
и҆ принича́ста главѣ̀ сщ҃енныма.
ѿ ст҃ыхъ пред̑ лице ѻ҆лъта́ра, и҆ не ꙗ҆влѧ́хꙋсѧ внѣ̀·

И не б̂ѣ ничтоже въ кїѻ҆́тѣ то́кмо дв̂ѣ скрижа́ли ка́меннѣ, скрижа́ли завѣта и҆же положи т̂ꙋ моѷсїи въ хоривѣ.
и҆же завѣща г҃ь междꙋ сн҃ъми і҆и҆л҃евы.
внегда̀ и҆зытѝ им̑ ѿ землѧ̀ е҆гѷпетъскїѧ·

И҆ бысть ꙗ҆́ко и҆зыдо́ша і҆е҆реѝ ѿ ст҃и́лища, и҆ ѻ҆блак̑҇ и҆спо́лни храмъ гн҃ь·

И҆ не можа́хꙋ і҆е҆реѝ ста́ти слꙋжи́ти пред̑ лице́мъ ѻ́блака.
ꙗ҆́ко и҆спо́лни сла́ва гн҃ѧ храм̑·

И҆ рече соло́монъ, г҃и, и҆же ѻ҆бѣща пребыва́ти во м꙽глѣ̀·

зи́жда соѕиждохъ хра́мъ жи́лища тебѣ̀·

И҆ ѻ҆братѝ цр҃ь лицѐ свое.
и҆ блс̑҇ви цр҃ь всего і҆и҆л҃ѧ и҆ весь собо́ръ і҆и҆л҃евъ и҆же стоѧ́ше та́мо·

И҆ реч̑҇ цр҃ь блс̑҇ве́нъ г҃ь б҃ъ і҆и҆л҃евъ днс̑҇ь.
и҆же гл҃а ѹ҆сты свои́ми дв҃дꙋ ѿц҃ꙋ мое҆мꙋ, и҆ вс̂ѧ е҆мꙋ и҆сплъни гл҃ѧ·

Въ дн҃ь во́ньже и҆зведох̑ лю́ди моѧ і҆и҆л҃ѧ ѿ е҆гѷпта.
не и҆збра́хъ града ѿ всѣ́хъ племе́нъ въ і҆и҆л҃и.
на созда́нїе хра́мꙋ, и҆ на пребыва́нїе и҆́мени мое҆мꙋ т̂ꙋ.
н̂о и҆збра́хъ въ і҆ерс̑҇ли́мѣ бы́ти и҆́мени мое҆мꙋ.
і҆ и҆зъбра́хъ дв҃да бы́ти е҆мꙋ властели́нꙋ над̑ люд̑ми мои́ми і҆и҆л҃емъ·

И҆ бысть на срд̑цы ѿц҃ꙋ мое҆мꙋ дв҃дꙋ.
е҆же созда́ти хра́мъ и҆́мени г҃а б҃а і҆и҆л҃ева·

И҆ рече г҃ь къ дв҃дꙋ ѿц҃ꙋ мое҆мꙋ, понеж̑ възы́де на срд̑це твое, е҆же созда́ти храмъ и҆́мени мое҆мꙋ.
до́брѣ сътворил̑҇ е҆си, ꙗ҆́ко бысть т̂и на срд̑цы·

Тыж̑ не соѕи́ждеши хра́ма.
н̂о сн҃ъ твои и҆же и҆зы́детъ и҆зъ чреслъ твои҆хъ.
то́й соѕи́ждетъ храм̑ и҆́мени мое҆мꙋ·

И воста́ви г҃ь гл҃ы своѝ и҆же гл҃а.
и҆ воста́ви въ дв҃да мѣсто ѿц҃а мое҆го менѐ, и҆ сѣдо́хъ на прс̑҇толѣ і҆и҆л҃евѣ, ꙗ҆коже гл҃а г҃ь.
и҆ соѕи́ждохъ хра́мъ и҆́мени г҃а б҃а і҆и҆л҃ева·

И҆ поста́вихъ на мѣ́стѣ т̂ꙋ кїѻ́тъ, в не́мже завѣтъ гн҃ь.
и҆же завѣща̀ г҃ь съ ѿц҃ы на́шими, во и҆звоже́нїю их̑ и҆з꙽ землѧ̀ е҆гѷпет꙽скїѧ·

И҆ ста̀ соло́монъ пред̑ лицемъ ѻ҆лтарѧ̀ гн҃ѧ.
пред̑ всѣмъ собо́ромъ і҆и҆л҃евомъ, и҆ воздви́же рꙋцѣ своѝ на́ нб҃о·

И҆ реч̑҇.
г҃и б҃е і҆и҆л҃въ нѣсть б҃а ра́звѣ тебѐ на нб҃си го́рѣ, и҆ на землѝ ни́зꙋ.
сохранѝ завѣтъ и҆ млс̑҇ть даже рабꙋ̀ твое҆мꙋ ходѧ́щемꙋ пред̑ тобо́ю, всѣмъ срд̑цемъ е҆го·

Ꙗ҆́коже сохрани дв҃дꙋ рабꙋ̀ свое҆мꙋ, ѿц҃ꙋ мое҆мꙋ.
ꙗ҆́коже е҆мꙋ ѻ҆бѣща̀.
и҆ гл҃а ѹ҆сты свои́ми, и҆ рꙋко́ю свое́ю съвръши, и҆ до дне́шнѧго дн҃е·

И҆ нн҃ѣ г҃и б҃е і҆и҆л҃евъ сохранѝ раба̀ своег̑҇ дв҃да ѿц҃а мое҆го, ꙗ҆́коже реч̑҇ е҆мꙋ гл҃ѧ не ѻ҆скꙋдѣ́етъ мꙋжъ ѿ лица̀ мое҆го, сѣдѧ́и на прс̑҇толѣ і҆и҆л҃евѣ.
то́кмо а҆́ще сохранѧ́тъ ча́да твоѧ пꙋтѝ моѧ, по ним̑же ходи́ти предо мно́ю.
ꙗ҆́коже ходил̑҇ е҆си предо мно́ю·

И҆ нн҃ѣ г҃и б҃е і҆и҆л҃евъ.
да ѹ҆вѣри́тсѧ гл҃ъ твои, е҆же ѻ҆бѣща двд̑ꙋ ѿц҃ꙋ мое҆мꙋ·

Ꙗ҆́ко а҆́ще и́стинно пребывае҆т꙽ б҃ъ съ чл҃кы на землѝ.
а҆́ще б̂о нб҃о нб҃си не довлѣ́ютъ т̂и.
не то́кмо хра́мъ се́й, и҆же созда́хъ и҆́мени твое҆мꙋ·

И҆ да при́зритъ на мл҃твꙋ мою г҃ь б҃ъ і҆и҆л҃евъ.
послꙋшати моле́нїѧ и҆ моли́твы.
е҆ю́же сѧ мо́лит̑ ра́бъ тво́и пред̑ тобо́ю днс̑҇е·

И҆ да бꙋ́дꙋтъ ѻ҆́чи твоѝ ѿвр́ъсты на хра́мъ сїи дн҃ь и҆ но́щъ на мѣсто ѻ҆ не́мъже рече.
ꙗ҆́ко быти и҆́мени мое҆мꙋ т̂ꙋ на послꙋшанїе мл҃твы.
ею́же помо́литсѧ ра́бъ тво́и на мѣстѣ се́мъ дн҃ь и҆ нощ̑҇·

И҆ ѹ҆слы́ши мл҃твꙋ мою раба̀ своег̑҇, и҆ людїи свои҆хъ і҆и҆л҃ѧ, е҆гда помо́лѧт̑ ти сѧ на мѣстѣ сем̑.
и҆ т̂ы ѹ҆слы́ши на мѣ́стѣ ѻ҆бита́лища свое҆го на́ нб҃си и҆ ѹ҆слы́шимъ и҆ поми́лꙋе҆ши·

Є҆ли́ко а҆́ще съгрѣши́тъ бли́жнїи къ и҆скрънемꙋ свое҆мꙋ.
и҆ а́ще прїи́метъ ѿ них̑ клѧ́твꙋ клѧ́тїе.
и҆ прїидетъ і҆ и҆сповѣ́сть пред̑ лицемъ ѻ҆лтарѧ̀ твое҆го, въ хра́мѣ се́мъ·

И҆ т̂ы ѹ҆слы́ши ѿ нб҃съ и҆ сътвори сꙋдъ люде́мъ своим̑ і҆и҆л҃ю.
ꙗ҆влѧ́ѧ безаконова́ти безако́нїѧ да́ти пꙋть е҆го на главꙋ̀ е҆го.
і҆ и҆зба́вити пра́вед̑наго, и҆ да́ти е҆мꙋ по пра́вдѣ е҆го·

Є҆да̀ съгрѣши́тъ лю́демъ твоим̑ і҆и҆л҃ю.
пред̑ врагы̀ е҆го ꙗ҆́ко съгрѣшат̑ т̂и, и҆ возвратѧт̑сѧ.
и҆сповѣдѧ́тъ ти сѧ и҆́мени твое҆мꙋ, и҆ мо́лѧтсѧ.
и҆ възгл҃ютъ мл҃твꙋ к тебѣ̀ въ хра́мѣ семъ·

И҆ т̂ы ѹ҆слы́шиши съ нб҃се, и҆ млс̑҇тив̑҇ бꙋ́деши ѻ҆ согрѣше́нїихъ людїи свои҆хъ і҆и҆л҃ѧ, и҆ возврати́ши ѧ҆̀ въ зе́млю и҆же да́лъ е҆си ѿц҃емъ и҆́хъ·

Внегда̀ затѧгнꙋтисѧ нб҃си, ꙗ҆́ко не бы́ти до́ждꙋ.
ꙗ҆ко съгрѣшатъ т̂и и҆ помо́лѧтсѧ на мѣ́стѣ се́мъ.
і҆ и҆сповѣдѧ́тсѧ и҆́мени твое҆мꙋ.
и҆ ѿ грѣхъ и҆хъ възвратѧт̑сѧ е҆гда̀ смири́ши ѧ҆̀·

И҆ ѹ҆слы́шиши съ нб҃се.
и҆ млс̑҇тив̑҇ бꙋ́деши ѻ҆ грѣсѣхъ ра́бъ свои҆хъ людїи свои҆хъ і҆и҆л҃ѧ.
ꙗ҆́ко возвѣстиши и҆мъ пꙋть бл҃гыи ходи́ти по немꙋ̀.
и҆ дасѝ и҆мъ до́ждъ на́ землю, ю́же далъ е҆си людем̑ свои҆мъ въ достоа́нїе·

Гла́дъ а́ще бꙋ́детъ и҆ли смр҃ть на землѝ.
и҆ а́ще бꙋ́детъ, ꙗ҆́ко в раж꙽женїе гꙋсе́ница, и҆ хрꙋщеве, и҆ а́ще ѻ҆скорбѧт̑ ѧ҆̀ вра́ѕи их̑ и҆ли въ е҆ді́номъ ѿ град̑ и҆хъ вс̂е проти́вное всѧ́ка бо́лѣзнь и҆ всѧ́ка ꙗ҆́зва·

Всѧ́ка мл҃тва, всѧ́ко приноше́нїе а҆́ще бꙋ́детъ всѧ́комꙋ чл҃кꙋ ѿ людїи і҆и҆л҃евыхъ.
е҆ли́ко ѹ҆разꙋмѣет̑ ко́ждо бо́лезнь ѿ срд̑ца свое҆го.
и҆ въздви́гнет̑ рꙋцѣ своѝ въ хра́мѣ се́мъ·

И҆ т̂ы ѹ҆слы́ши ѿ нб҃се, ѿ гото́ваго жи́лища̑ т̂и, и҆ млс̑҇тив̑҇ бꙋ́деши.
и҆ сотвори́ши и҆ дасѝ мꙋ́жеви по пꙋтем̑ е҆го.
ꙗ҆́коже б̂о совѣ́си срд̑це е҆го.
ꙗ҆́ко т̂ы сам̑ то́кмо совѣ́си всѣхъ срд̑ца сн҃овъ чл҃чъ·

да боѧ́тсѧ тебе вс̂ѧ дн҃и, в нѧ́же т̂и живꙋтъ на землѝ.
ю҆́же далъ е҆си ѿц҃емъ на́шимъ·

И҆ чю́ждимъ·

ꙗ҆́же не сꙋть ѿ людїи твои҆хъ і҆и҆л҃ѧ а҆́ще прїидꙋтъ и҆́мени ради твое҆го и҆ помо́лѧтсѧ на мѣ́стѣ се́мъ·

И҆ т̂ы ѹ҆слы́шиши съ нб҃се, ѿ гото́ваг̑҇ жи́лища т̂и.
и҆ сотвори́ши по всемꙋ̀ е҆ли́ко а҆́ще призовет꙽ т̂ѧ сі́и чюжїи.
ꙗ҆́ко да разꙋмѣ́ютъ вс̂и лю́дїе зем̑нїи и҆́мѧ твоѐ.
и҆ ѹ҆боѧ́тъсѧ тебѐ.
ꙗ҆́коже и҆ лю́дїе твоѝ і҆и҆л҃ь.
и҆ разꙋмѣют̑ ꙗ҆́ко и҆́мѧ твоѐ наречетсѧ на хра́мѣ се́мъ и҆же созда́хъ·

Ꙗ҆́ко и҆зыдꙋт꙽ лю́дїе твоѝ на́ брань на врагы̀ своѧ, пꙋтем꙽ им̑же возвратиши ѧ҆̀.
и҆ помо́лѧт̑сѧ и҆́менем̑ гн҃им꙽.
пꙋте́мъ град̑ным̑ и҆же и҆збра̀ себѣ̀.
и҆ къ хра́мꙋ и҆же а҆́зъ созда́хъ и҆́мени твое҆мꙋ·

И҆ т̂ы ѹ҆слышиши съ нб҃се мл҃твꙋ и҆хъ.
и҆ моле́нїѧ и҆хъ.
и҆ сътвори́ши ѻ҆правда́нїѧ их̑.
и҆ внегда̀ согрѣшат̑ т̂и·

Ꙗ҆́ко нѣсть чл҃ка, и҆же не съгрѣшит̑.
и҆ разгнѣ́вае҆шисѧ на́ нѧ, и҆ предасѝ ѧ҆̀ пред̑ врагы̀ и҆хъ.
и҆ поплѣнѧ́тъ их̑ плѣнѧ́щїи землю дале́че и҆ бли́зъ·

И҆ ѹ҆вратѧ́тъ срд̑ца въ зе́млю и҆дѣже пресели́шасѧ.
т̂ꙋ и҆ възвритѧ́тсѧ и҆ помо́лѧтсѧ въ зе́мли преселе́нїѧ их̑ гл҃юще.
съгрѣши́хом̑ и҆ безаконова́хом̑ и҆ не ѻ҆правди́хомъ·

И҆ ѻ҆брати́тсѧ к тебѣ̀, всѣмъ срд̑цемъ свои҆мъ, и҆ всею̀ дш҃ею свое́ю.
въ зе́мли врагъ их̑ и҆дѣже возведе ѧ҆̀.
и҆ помо́лѧтсѧ к тебѣ̀ на пꙋтехъ землѧ̀ свое́ѧ ю҆́же далъ е҆си ѿц҃емъ их̑, и҆ къ гра́дꙋ е҆гоже и҆збра̀.
и҆ къ хра́мꙋ и҆же создах̑ и҆́мени твое҆мꙋ·

И҆ ѹ҆слы́ши ѿ нб҃се, ѿ готова́го жи́лища твое҆го.
мл҃твꙋ и҆ моленїе и҆хъ и҆ сътвори́ши и҆мъ сꙋдъ·

И҆ млс̑҇тивъ бꙋ́деши на непра́вед̑ных꙽, и҆миже съгрѣши́ша т̂и.
и҆ по всѣхъ ѿмѣта́нїи и҆хъ и҆миже ѿвр́ъгт̑ꙋсѧ тебѐ.
да даси и҆мъ въ щедроты̀·

пред̑ всѣмѝ плѣн꙽шими ѧ҆̀.
и҆ ѹ҆щедрѧ́тъ ѧ҆̀·

Ꙗ҆́ко лю́дїе твоѝ сꙋтъ и҆ наслѣдїе твое.
ꙗ҆́же и҆зведѐ и҆з꙽ зем̑лѧ̀ е҆гѷпет̑ски.
ѿ сре́ды пе́щы желѣзныа·

И҆ да бꙋ́дета ѹ҆́ши твоѝ и҆ ѻ́чи твоѝ ѿвр́ъз꙽ты на мл҃твꙋ раба̀ свое҆го.
и҆ къ моле́нїю лю́дїи твои҆хъ і҆и҆л҃ѧ.
и҆ послꙋшати и҆хъ ѻ҆ всѣхъ ѻ҆ ни́хже призовꙋт꙽ т̂ѧ·

Ꙗ҆ко т̂ы и҆збра ѧ҆̀ себѣ въ наслѣ́дїе ѿ всѣ́хъ лю́дїи.
ѿ всѣ́хъ людїи зе́мных̑.
ꙗ҆́коже гл҃а рꙋкою раба̀ свое҆го моѷсїѧ.
е҆да и҆звести тебѣ и҆з꙽ землѧ е҆гѷпет̑ски ѿц҃ы на́ши г҃и г҃и·

Тогда̀ гл҃а соло́монъ ѻ҆ хра́мѣ ꙗ҆́ко съвръши ѕи́жда е҆го, сл҃нце позна̀ на нб҃си.
г҃ь реч̑҇ пребыти во м꙽глѣ̀, соѕи́жди хра́мъ мой.
храм̑ прелѣпъ е҆го, ꙗ҆́ко пребыва́ти в новости се́й.
и҆ не с̂е л̂и пи́сано въ кни́гах̑ пѣ́сни·

И҆ бы́сть ꙗ҆́ко скон꙽ча соло́мон̑҇ молѧ́сѧ б҃ꙋ всею̀ мл҃твою и҆ моле́нїем̑ си́мъ.
и҆ воста ѿ лица̀ ѻ҆лтарѧ̀ гн҃ѧ и҆ паки поклони́в꙽сѧ на колѣнꙋ̀ свое́ю, и҆ рꙋ́цѣ своѝ воздѣ на́ нб҃о·

И҆ е҆щѐ блс̑҇ви весь собо́ръ і҆и҆л҃евъ.
гласомъ ве́лїимъ гл҃ѧ·

Блс̑҇венъ г҃ь б҃ъ днс̑҇ь, и҆же да́лъ е҆сть поко́и лю́демъ своим̑ і҆и҆л҃ю.
по в꙽семꙋ и҆же гл҃а, не забы̀ словесѐ нико́егоже въ словесех̑ е҆го бл҃гихъ и҆ми́же гл҃а въ рꙋцѣ моѷсїѻ́вѣ раба̀ свое҆го·

да бꙋдет̑ г҃ь б҃ъ на́шъ с на́ми ꙗ҆коже б̂ѣ съ ѿц҃ы на́шими.
да не ѻ҆ста́витъ на́съ·

Но да возвратит̑ нас̑҇, преклони́ти срд̑ца на́ша к немꙋ̀.
е҆же ходи́ти въ вс̂ѧ пꙋтѝ е҆го.
и҆ храни́ти вс̂ѧ за́повѣди е҆го.
и҆ повеленїа е҆го, и҆ ѻ҆правда́нїѧ е҆го.
ꙗ҆́же заповѣ́да ѿц҃емъ на́шимъ·

И҆ да бꙋдт̑ꙋ словеса с̂и и҆миже мо́лимсѧ пред̑ гм҃ъ бм҃ъ на́шим꙽.
днс̑҇ь приближа́ющесѧ г҃ꙋ б҃ꙋ на́шемꙋ.
дн҃ь и҆ нощ̑҇ твори́ти ѻ҆правда́нїѧ рабꙋ̀ твое҆мꙋ.
и҆ ѻ҆правданїѧ лю́демъ твои҆мъ і҆и҆л҃ю, во всѧ̀ дн҃и·

Ꙗ҆́ко да разꙋмѣ́ютъ вс̂и лю́дїе землѧ̀.
ꙗ҆́ко г҃ь б҃ъ то́й сам̑ б҃ъ и҆ нѣ́сть и҆́ного·

И҆ да бꙋ́дꙋтъ срд̑ца на́ша съвръшена къ г҃ꙋ б҃ꙋ на́шемꙋ.
прпд̑бно да ходи́ти въ повеле́нїих̑ е҆го, и҆ храни́ти за́повѣди е҆го до дне́шнѧго дн҃е·

И҆ цр҃ь и҆ вс̂и сн҃ове і҆и҆л҃еви пожро́ша жрътвꙋ пред̑ бм҃ъ·

И҆ пожре цр҃ь соло́монъ жрътвы ми́рныѧ, и҆же пожрѐ гв҃и.
воло́въ.
҂в҃і.
и҆ ѻ҆вецъ, р҃, и҆ к҃, ты́сѧщъ.
и҆ ѻ҆бнови цр҃ь храм̑ гн҃ь, и҆ вс̂и сн҃ове і҆и҆л҃еви·

В то́иже дн҃ь ѻ҆ст҃и цр҃ь соло́монъ сред̑нѧѧ двор̑҇ и҆же пред̑ лицемъ хра́ма гн҃ѧ.
ꙗ҆́ко сътвори т̂ꙋ всѧ̀сож̑женїѧ, и҆ жрътвы и҆ тꙋчныѧ ми́рныхъ.
ꙗ҆́ко ѻ҆лта́рь мѣ́дѧныи, и҆же пред̑ гм҃ъ малыи б̂ѣ ꙗ҆ко не возмощи прїѧ́ти вс̂есож̑женїѧ и҆ да́ровъ и҆ жрътвы тꙋ́чнаѧ·

И҆ сътвори соло́мон̑҇ празнд̑икъ в то́й дн҃ь и҆ весь і҆и҆л҃ь с ним̑, собор̑҇ ве́лїи ѿ и҆схода и҆хима до рѣки е҆гѷпта, пред̑ гм҃ъ бм҃ъ на́шим̑, ѹ҆ хра́ма е҆гоже созда̀, ꙗ҆ды́и и҆ пїѧ и҆ веселѧ́сѧ пред̑ гм҃ъ бм҃ъ на́шимъ.
по сед̑мь дн҃їи, и҆ во ѻ҆смы́и дн҃ь распꙋстѝ лю́ди.
и҆ блс̑҇виша лю́ди цр҃ѧ.
і҆ и҆до́ша ко́ждо в до́мъ сво́и, ра́дꙋющесѧ весе́ломъ срд̑цем̑ ѻ҆ бл҃гых̑.
ꙗ҆́же сътворѝ г҃ь дв҃дꙋ рабꙋ свое҆мꙋ, і҆и҆л҃ю и҆ лю́демъ свои҆мъ·

Глв̑҇а, ѳ҃·

И бы́сть ꙗ҆́ко сконча̀ соло́монъ зи́жда хра́мъ гн҃ь.
и҆ до́мъ цр҃евъ.
и҆ всѧ́кꙋ ве́щъ е҆го соло́монъ сътворѝ, е҆ли́ко въсхотѣ̀·

И ꙗ҆́ви́сѧ г҃ь соло́монꙋ вторицею.
ꙗ҆́коже бѣ ꙗ҆вил̑҇сѧ е҆мꙋ въ гаваѻ́нѣ·

И҆ рече к немꙋ̀ г҃ь ѹ҆слы́шахъ гла́съ мл҃твы твое́ѧ.
и҆ моле́нїѧ твое҆го и҆́мже моли́ ми сѧ предо мно́ю, сътвори́х ти по все́и мл҃твѣ твое́и.
и҆ ѻ҆ст҃ихъ храм̑ се́и.
е҆гоже созда е҆же положи́ти и҆́мѧ мое т̂ꙋ въ вѣки.
и҆ бꙋдт̑ꙋ ѻ҆́чи моѝ т̂ꙋ, и҆ срд̑це моѐ въ всѧ̀ дн҃и·

И҆ т̂ы а҆ще хо́диши предо мно́ю, ꙗ҆́коже ходѝ и дв҃дъ ѿц҃ъ тво́и въ прпд̑бїи срд̑ца, и҆ въ простотѣ̀ и҆ е́же твори́ти по всемꙋ̀ ꙗ҆́коже заповѣ́дахъ е҆мꙋ.
и҆ повелѣнїѧ моѧ̀, и҆ за́повѣди моѧ съхрани́ши·

И҆ ѹ҆твержꙋ̀ прс̑҇тлъ црс̑҇твїѧ твое҆го въ і҆и҆л҃и въ вѣки.
ꙗ҆́коже гл҃ах̑ къ дв҃дꙋ ѿц҃ꙋ твое҆мꙋ гл҃ѧ.
не ѻ҆скꙋдѣ́етъ т̂и мꙋжъ властели́нъ въ і҆и҆л҃и·

А҆ще възвраща́ющесѧ въз꙽врати́тесѧ в̂ы, и҆ ча́да ваша ѿ мене и҆ не съхрани́те за́повѣдеи мои҆хъ, и҆ повелѣ́нїи мои҆хъ, ꙗ҆́же да́лъ е҆сть моѷсїи пред̑ всѣмѝ ва́ми, и҆ по́идꙋт꙽ и҆ порабо́таю҆тъ бого́мъ дрꙋги́мъ.
и҆ покло́нѧтсѧ им̑·

І҆ и҆зринꙋ̀ і҆и҆л҃ѧ и҆з꙽ землѧ̀ ю́же да́хъ и҆мъ.
и҆ хра́мъ се́и е҆гоже ѻ҆ст҃ыхъ и҆́мени мое́мꙋ, ѿвръ́гꙋ ѿ лица̀ мое҆го.
и҆ бꙋдет̑ і҆и҆л҃ь въ и҆зринове́нїе.
и҆ въ гл҃анїе всѣмъ лю́демъ·

И҆ до́мъ высо́кїи се́и всѧк̑҇ и҆же прїидетъ во́нь ѹ҆жасне́тсѧ.
и҆ възмѧте́тсѧ·

И҆ речетъ чесо̀ ради сътворѝ г҃ь та́ко землѝ се́и и҆ хра́мꙋ семꙋ·

И҆ рекꙋтъ поне́же ѻ҆ста́виша г҃а б҃а и҆х꙽.
и҆же и҆зведѐ ѿц҃ы их̑ и҆зъ е҆гѷпта.
ѿ до́мꙋ работ̑на и҆ прїꙗ҆́ша богѝ чꙋжаѧ.
и҆ поклони́шасѧ и҆мъ.
и҆ порабо́таша и҆мъ.
сего ради наведѐ на́ нѧ г҃ь ѕло́бꙋ сїю·

И бы́сть въ к҃ лѣтъ в нѧ́же созда̀ соло́монъ дв̂а домы̀.
хра́мъ гн҃ь и҆ до́мъ цр҃евъ.
хира́мъ цр҃ь тѵ́рскїи помага́ше соло́монꙋ дре́вы ке́дръскими.
и҆ дре́вы пе́вгиновыми.
и҆ зла́том̑ и҆ всѣмъ хотѣ́нїемъ е҆го.
тогда̀ да́сть соломонъ хира́мꙋ, к҃ градов̑҇ въ землѝ галиле́истѣи·

И҆ шед̑ хирам̑ ѿ тѵ́ра.
и҆дѧ́ше в галиле́ю.
ви́дѣти хотѧ̀ гра́ды, ꙗ҆́же е҆мꙋ дадѐ соло́монъ.
и҆ ви́дѣ и҆ не бы́ша е҆мꙋ го́дни·

И҆ рече чт̂о м̂и сꙋть гра́ди сѝ.
ꙗ҆́же м̂и да́лъ е҆си бра́те, и҆ нарече ѧ҆̀ землѧ̀ хавꙋль до дне́шнѧго дн҃е·

И҆ принесе хира́мъ соло́монꙋ, р҃, и҆ к҃. тала́нтъ зла́та сїѧ же е҆́сть вина̀ да́нїе ꙗ҆́же ѹ҆ста́ви цр҃ь соло́монъ.
да сози́ждетъ хра́м꙽ гн҃ь и҆ хра́мъ свои.
и҆ мильло́нъ.
и҆ стѣнꙋ̀ і҆ерс̑҇ли́мъскꙋ, и҆ а҆сѷръ и҆ магда́ль и҆ газе́рꙋ·

фараѻ́нъ же цр҃ь е҆гѷпет꙽скїи и҆зы́иде и҆ взѧ̀ газе́ръ.
и҆ съж꙽жѐ и҆̀ ѻ҆гне́мъ, и҆ ханаѻ́на живꙋщаго въ гра́дѣ то́мъ погꙋбѝ, и҆ да́сть гра́д꙽ въ прида́ное дще́ри свое́и женѣ̀ соло́мони·

И҆ съградѝ соло́монъ газе́ръ и҆ веѳиро́нъ ни́жнїи.
и҆ валаа́ѳъ.
и҆ палми́рꙋ в꙽ землѝ пꙋсто́и·

И҆ вс̂и гра́ды и҆же бѧ́хꙋ жи́тницы е҆го.
и҆ вс̂и грады и҆деже бѣхꙋ колесни́цы и҆ ко́нницы е҆го и҆ вс̂е е҆же бысть ѹ҆годно цр҃ю соло́монꙋ съзи́жде въ і҆ерс̑҇ли́мѣ и҆ в лива́нѣ, и҆ въ все́и землѝ црс̑҇тва свое҆го·

Лю́дїе же ѻ҆ста́вшїи ѿ ам̑море́и.
и҆ хет꙽ѳе́и.
и҆ ферезе́и, и҆ е҆ве́и.
и҆ е҆вꙋсе́и, ѻ҆ни́ же не сꙋть ѿ сн҃овъ і҆и҆л҃евъ·

Сн҃ове и҆хъ и҆же ѻ҆ста́ша по ни́хъ на землѝ, и҆хже не возмого́ша сн҃ове і҆и҆л҃евы и҆стощи́ти ѿ средѣ себе, цр҃ь соло́монъ порабо́ти и҆хъ, и҆ дава́хꙋ да́ни да́же до дне́сь·

ѿ сн҃ов же і҆и҆л҃евыхъ не да́сть на дѣло соло́монъ ꙗ҆́ко тїи бѧ́хꙋ мꙋжи хра́брїи е҆го и҆ ѻ́троцы е҆го и҆ кнѧ́ѕи и҆ вое҆во́ды е҆го и҆ властели́ни колесни́цъ и҆ ко́неи е҆го·

И҆ бѧ́хꙋ старѣ́ишины приста́вленым꙽ над̑ дѣлы цр҃ѧ соло́мона.
и҆ бы́сть и҆хъ, фн҃. заповѣдаю҆ще дѣлаю҆щимъ·

дще́рь же фараѻ́нѧ принесе́сѧ и҆з гра́да двд҃ва.
в до́мъ свои, и҆же созижде е́и соло́мон̑҇·

И҆ посем̑ сози́жде мильло́нъ.
и҆ приноша́ше соло́монъ три́жды в го́дъ всесъж꙽же́нїѧ.
и҆ ми́рныѧ жр́ътвы на ѻ҆лта́рь е҆гоже сози́жде г҃ꙋ.
и҆ кадѧ́ше ѳимиꙗ҆́мъ бл҃гово́нныи пред̑ гм҃ъ, и҆ съвръши хра́мъ·

И҆ сътворѝ цр҃ь соло́мон̑҇ кора́бль въ е҆рга́зѣ гаве́рскомъ.
и҆же при е҆ла́ѳе.
при ѹ́стїи мо́рѧ послѣднего.
в землѝ е҆до́м꙽стѣи·

И҆ посла̀ хира́мъ нѣкоих̑ ѿ ѻ҆́трокъ своих̑ мꙋжа.
ко́рмъчїѧ направлѧ́ти свѣдꙋщихъ мо́ре съ ѻ́троки соло́мони, и҆ прїидо́ша ко е҆фи́рꙋ, и҆ взѧ́ша ѿтꙋдꙋ зла́та у҃, и҆ к҃ тала́нтъ и҆ принесо́ша цр҃ю соло́монꙋ·

Глв̑҇а, і҃·

И цр҃ца са́въска слы́шавше и҆́мѧ соло́моне.
і҆ и́мѧ гн҃е.
и҆ прїиде и҆скꙋси́ти е҆го прит̑чами.
и҆ прїиде въ і҆ерс̑҇ли́мъ съ си́лою тѧ́жкою ѕѣло.
и҆ на вельблю́дх̑ѣ принесо́ша слад̑кости зе́леи, и҆ зла́то мно́го ѕѣло.
и҆ ка́мень дра́гїи, и҆ вни́де к соло́монꙋ и҆ гл҃а е҆мꙋ.
вс̂е е҆ли́ко и҆мѣ̀ на срд̑цы сѝ·

И҆ възвѣстѝ е́и соло́монъ вс̂ѧ гл҃ы е҆ѧ̀.
и҆ не бѣ̀ сло́ва ни е҆ді́наго, е҆же гонзѐ цр҃ь и҆ е҆го́же не възвѣстѝ е́и·

И҆ ви́дѣ цр҃а са́вска, ве́сь смы́слъ соло́монь, и҆ до́мъ и҆же сози́жде и҆ ꙗ҆де́нїѧ соло́монѧ и҆ сѣда́нїе ѿ ѻ҆́трок̑҇ е҆го.
и҆ пред̑стоꙗ҆́нїе слꙋжа́щихъ е҆мꙋ и҆ ѻ҆блаче́нїе и҆хъ, и҆ виноче́рп꙽цы е҆го и҆ вс̂ѧсож꙽же́нїѧ е҆го ꙗ҆́же приноша́ше въ хра́мъ гн҃ь·

И҆ в себѣ̀ бы́вше реч̑҇ к꙽ соло́монꙋ цр҃ꙋ.
и҆́стин꙽на сꙋть словеса̀ ꙗ҆́же слы́шахъ в землѝ мое́и ѻ҆ словесѣхъ твои҆хъ, и҆ ѻ҆ смы́слѣ твое́мъ·

И҆ не и҆нѧхъ вѣри гл҃ющим̑ м̂и, до́ндеже и҆ прїидо́хъ сѣмо, и҆ ви́жꙋ ѹ҆же ѻ҆чи́ма свои́ма.
и҆ с̂е нѣсть ни пол̑҇ того̀ е҆же м̂и повѣда́ша н̂о ты̀ приложи́лъ е҆си бл҃гаѧ къ си́м꙽ па́че всѧ́каго слꙋха и҆же слы́шахъ в землѝ мое́и сꙋщи·

Блж҃ены же́ны твоѧ, и҆ бл҃жени ѻ҆́троцы твоѝ сїи, и҆же т̂и пред̑стоѧт̑ пред̑ тобо́ю, всегда̀ слы́шащи смы́слъ твой·

И҆ бꙋди г҃ь б҃ъ твои блс̑҇венъ, и҆же въсхотѣ т̂ѧ да́ти на прс̑҇тлъ і҆и҆л҃евъ, за любо́вь гн҃ю ю҆́же над̑ і҆и҆л҃емъ поста́ви въ вѣки, и҆ поста́ви тѧ цр҃ѧ над̑ ними твори́ти сꙋдъ въ пра́вдꙋ, в꙽ сꙋдбах̑ е҆го, и҆ да́сть соло́монꙋ, р҃, и҆ к҃, тала́нтъ зла́та, и҆ слад̑кости мно́ги ѕѣ́ло, и҆ ка́менїе драго́е, не прїиде ктомꙋ̀ такова̀ сла́дкость и҆ та́ко мно́жество еѧ̀ ꙗ҆́ко сла́дкости сїѧ мно́жествомъ ꙗ҆́же да́сть цр҃ца сав̑҇ска, цр҃ю со́ло́монꙋ·

И҆ кора́бль хира́мль, приносѧ́щи и҆ злато ѿ фира и҆ дре́ва мно́га ѕѣло принесѐ нете́саного, и҆ ка́менїе драго́е·

И҆ сътворѝ цр҃ь дре́вомъ недѣланомъ подъпо́ры хра́мꙋ гн҃ю, и҆ до́мꙋ цр҃евꙋ, и҆ сопѣ́ли и гꙋ́сли пѣвцо́мъ, не пришло̀ по сем̑ такова́го дре́ва недѣ́лана на землѝ ниже ви́дѣно бы́сть нигде́же и҆ да́же до дне́сь·

И҆ цр҃ь соло́монъ да́сть цр҃цы са́в꙽стѣи вс̂ѧ е҆ли́ко въсхотѣ̀ и҆ е҆гоже просѝ ѹ҆ него ѿ всего и҆же дас̑҇ е́й рꙋка́ма свои́ма соло́монъ цр҃ь, и҆ възвра́щ꙽шисѧ и҆́де в꙽ зе́млю свою, т̂а сама̀ и҆ вс̂и ѻ҆́троцы е҆ѧ̀·

И҆ б̂ѣ число̀ прине́сенаго зла́та соло́монꙋ е҆ді́наго лѣта, х҃, и҆ ѯ҃, и҆ ѕ҃, тала́нтъ зла́та ра́звѣ да́нїи притѧжа́ныхъ ѿ кꙋпцо́въ, и҆ ѿ всѣхъ цр҃ь стра́нныхъ, и҆ ѿ вое҆вод̑ зе́мных̑·

И сътворѝ цр҃ь соло́монъ, т҃ ко́пїи зла́тыхъ и҆збра́нныхъ, по т҃, зла́тыхъ въ е҆ді́нꙋ копїю̀ в꙽дѣла̀·

И҆ т҃, ѻ҆рꙋж́їи и҆збра́нныхъ зла́тых̑ по тре́мъ фꙋн꙽томъ зла́та бѧ́ше на кое́м꙽ждо ѻ҆рꙋжїѝ, и҆ да́сть ѧ҆̀ цр҃ь въ хра́мъ.
и҆же б̂ѣ здѣланъ ѿ дре́ва ливан꙽скаго·

И҆ сътворѝ цр҃ь прс̑҇тлъ ѿ ко́стїи слоно́выхъ вели́къ.
и҆ позлатѝ ѝ зла́томъ и҆скꙋше́нымъ·

ѕ҃, степе́нїи прс̑҇тлꙋ.
и҆ на връхꙋ е҆го бы́сть ѻ҆крꙋглость соза́ди.
и҆ рꙋцѣ сю́дꙋ и҆ сю́дꙋ на прс̑҇тлѣ и҆дѣже сѣ́сти и҆ дв̂а льва стоꙗ҆́ща ѹ҆ рꙋкꙋ, и҆ в҃і.
льва̀ стоꙗ҆́ща бѣста т̂ꙋ ѹ҆ степе́нїи сю́дꙋ и҆ сю́дꙋ.
и҆ не бѣ̀ та́ко ни в꙽ кое́же црс̑҇тво·

И҆ вс̂и сосꙋди и҆же бѧ́ше при цр҃и соло́монѣ зла́ти бѣша.
и҆ ѹ҆мыва́лница златы.
и҆ вс̂и сосꙋди хра́ма дре́ва лива́ньска, зла́томъ чи́стымъ сни́мано, безъ сребра̀.
за ничто́же б̂о бѣ̀ сребро̀ въ дн҃и соло́монѧ, кора́бль б̂о ѳа́рьскїи и҆мѣѧ цр҃ь соло́монъ, в꙽ мо́ри съ сн҃ы хира́мовыми, е҆ді́ною, въ тре́хъ лѣтехъ прихожда́ше цр҃еви ѿ ѳарси́са и҆ приноша́ше зла́та и҆ сребра̀.
зꙋбы слоно́вы и҆ пифи́ки и҆ па́вы, и҆ ка́менїе дѣ́лано и҆ не дѣ́лано·

Сїѧ б̂ѣ ве́щь коры́сти ю҆́же прине́съ цр҃ь соло́монъ на созида́нїе хра́мꙋ гн҃ю.
и҆ до́мꙋ цр҃евꙋ, и҆ стѣнѣ̀ і҆ерс̑҇ли́мъстѣи.
и҆ кра́инꙋю же ѻ҆радѝ стѣно́ю гра́да двд҃ва·

И҆ а҆сꙋ́ръ, и҆ магда́лъ.
и҆ гезе́рꙋ, и҆ веѳе́рꙋ вы́шнюю.
и҆ ев̑҇ѳермаѳ̑҇ и҆ вс̂ѧ гра́ды.
и҆ в ни́х же бѣша ѻ҆рꙋжницы.
и҆ вс̂ѧ гра́ды в ни́х же бѧ́хꙋ без꙽зако́нницы и҆ ко́зни соло́мони, и҆́мже зижда́ше въ і҆ерс̑҇ли́мѣ и҆ въ все́и землѝ ꙗ҆́ко не смꙋтѝ е҆мꙋ всѣхъ людїи́.
и҆ ѿ ѻ҆ста́вленых̑ и҆же ѿ хе́та и҆ ѿ а҆марїи, и҆ ѳерезїи́ и҆ ѿ ханане́и и҆ ѿ е҆в꙽ве́и.
и҆ ѿ е҆вꙋсе́и, и҆ ѿ гергесе́и, и҆же не бы́ша ѿ сн҃въ і҆и҆л҃евъ.
и҆ ча́да и҆хъ ѻ҆ста́виша с ни́ми на землѝ.
и҆же не возмого́ша сн҃ове і҆и҆л҃евы и҆стощи́ти и҆хъ, і҆ и҆ възведѐ ѧ҆̀ соло́монъ въ дан꙽никѝ да́же до дне́сь, ѿ сн҃ов꙽ же і҆и҆л҃евъ не да́стъ на дѣ́ло соло́монъ, ꙗ҆́ко тїи́ бѧ́хꙋ мꙋжи хра́бри и҆ ѻ́троцы е҆го и҆ вое҆во́ды трїе е҆го, и҆ вое҆во́ды ѻ҆рꙋж́никъ е҆го, и҆ ко́нникъ е҆го·

И҆ возвели́чисѧ соло́монъ па́че всѣхъ цр҃ь зе́мныхъ.
и҆ бога́тъствомъ и҆ смы́сломъ·

И҆ вс̂и цр҃и зе́м꙽стїѝ.
и҆ска́хꙋ ви́дѣти лицѐ е҆го.
и҆ слы́шати смы́слъ е҆го, и҆же да́сть е҆мꙋ г҃ь въ срд̑цы е҆го·

И҆ тїи́ приноша́хꙋ ко́ждо да́ры своѧ̀.
и҆ сосꙋ́ды зла́ты и҆ сре́брены, и҆ ри́зы и҆ ѻ҆рꙋ́жїѧ и҆ слад̑кости.
и҆ ко́нѧ и҆ м꙽ща́та, и҆ всѧ́кꙋю ве́щь лѣто по лѣтꙋ.
и҆ бѣша ѹ҆ соло́мона, ҂м҃, ста́дъ ко́нныхъ въ колесни́ца.
и҆ ҂в҃і, сонꙋзд̑ницъ.
и҆ поста́ви ѧ҆̀ въ гра́дѣхъ со колесни́цами.
и҆ дрꙋзїи́ бѧ́хꙋ ѹ҆ цр҃ѧ въ і҆ерс̑҇ли́мѣ·

И҆ б̂ѣ властели́нъ всѣмъ цр҃емъ.
ѿ рѣкѝ и҆ до землѧ̀ и҆ноплеме́нникъ.
и҆ до предѣлъ е҆гѷпта.
и҆ сложѝ цр҃ь зла́то и҆ сребро̀ въ і҆ерс̑҇ли́мѣ.
ꙗ҆́ко ка́менїе и҆ ке́дръ сложѝ.
ꙗ҆́ко и҆ черни́чїе е҆же на́ поли ѿ мно́жества·

И҆ привожда́хꙋ соло́монꙋ ко́ни ѿ е҆гѷпта.
и҆ ѿ ѳе́кꙋ и҆ кꙋпцы̀ цр҃ьстїѝ кꙋпова́хꙋ и҆̀ ѿ ѳекꙋѧ́ и҆змѣ́ною·

И҆ прихожда́ше ко́ни со колесни́цами ѿ е҆гѷпта, за х҃, сре́бреникъ.
и҆ ко́ни за рн҃ сре́бреникъ.
та́коже и҆ въ все́мъ црс̑҇твѣ хиѳи́м꙽скомъ, и҆ сѷрїи́скомъ и҆схожда́ше·

Глв̑҇а, а҃і·

И цр҃ь соло́мон꙽ бѣ̀ любѧ̀ же́ны ѕѣло, и҆ поꙗ҆́тъ же́ны чꙋждаѧ.
и҆ дще́рь фараѻ́ню, моа҆ви́тѧнынѧ, и҆ а҆м꙽мани́тѧнынѧ, и҆ а҆сѷрѧны́нѧ и҆домѣаны́нѧ, и҆ хеѳе́ѻнынѧ.
и҆ а҆меѳены́нѧ.
ѿ ꙗ҆зы́къ, ꙗ҆коже заповѣ́да г҃ь сн҃омъ і҆и҆л҃евымъ не входи́ти в нѧ̀.
и҆ тїи́ да не вхо́дѧтъ въ ва́съ.
и҆ да не ѿвратѧ́тъ дш҃ъ ва́шихъ, въ слѣ́дъ и҆́долъ и҆хъ.
и҆ тх̑ѣ приложи́сѧ соло́мон̑҇ люби́ти·

И҆ бы́ста е҆мꙋ же́ны нача́лных̑.
з҃ сот̑·

и҆ подло́жниць, т҃·

И҆ быс̑҇ въ вре́мѧ ста́рости соло́монѧ.
и҆ съврати́ша же́ны чꙋж́даѧ срд̑це е҆го въ слд̑ѣ бо́гъ и҆́ныхъ.
не бѣ̀ срд̑це е҆го съ гм҃ъ бм҃ъ е҆го, ꙗ҆́коже срд̑це дв҃да ѿц҃а е҆го·

И҆ хожда́ше соло́мон̑҇ въ слѣдъ а҆стар̑҇са и҆ скве́рнаго сидо́ньскаго.
и҆ въ слѣ́дъ цр҃ѧ и҆хъ и҆́доловъ.
сн҃овъ а҆м꙽мо́нь.
и҆ сътворѝ соло́мон̑҇ лꙋка́вное пред̑ гм҃ъ.
и҆ не ходѝ въ слѣ́дъ г҃а, ꙗ҆коже дв҃дъ ѿц҃ъ е҆го·

Тогда созда̀ соло́монъ высо́ко ка́пище и҆́дола моа́влѧ, и҆ цр҃ѧ и҆хъ и҆́долы сн҃овъ а҆м꙽мо́нь.
и҆ а҆ста́ртꙋ скве́рнꙋю сидо́ньскꙋю на горѣ̀ и҆же пред̑ і҆ерс̑҇ли́момъ·

И҆ та́ко сътворѝ всѣмъ жена́мъ свои҆мъ чꙋжи́мъ.
ꙗ҆́же закала́хꙋ и҆ жрѧ́хꙋ и҆́доломъ свои҆мъ·

И҆ раз꙽гнѣ́васѧ г҃ь на соло́мона.
ꙗ҆́ко ѹ҆клонѝ срд̑це своѐ ѿ г҃а б҃а і҆и҆л҃ева.
ꙗ҆́вльшагосѧ е҆мꙋ два́жды·

И҆ заповѣ́давшемꙋ е҆мꙋ два́жды ѻ҆ словесѝ се́мъ прс̑҇но.
ꙗ҆́ко не ходи́ти е҆мꙋ въ слѣдъ бо́гъ и҆́нѣх꙽ и҆ храни́ти и҆ сътвори́ти ꙗ҆́же заповѣ́да е҆мꙋ г҃ь б҃ъ·

И҆ рече г҃ь к꙽ соло́монꙋ, поне́же бы́ша сї́и с тобо́ю.
и҆ не съхранѝ за́повѣдїи мои҆хъ и҆ повеле́нїи мои҆хъ, и҆миже заповѣ́дахъ тѝ и҆ разве́ргъ разве́ргꙋ црс̑҇тво твоѐ и҆з рꙋ́кꙋ твое́ю.
и҆ да́мъ е҆̀ рабꙋ̀ твое҆мꙋ·

Во́ дн҃и же твоѧ̀ не сътворю̀ си́хъ дв҃да ради ѿц҃а твое҆го.
ѿ рꙋкиж̑ сн҃овъ твои҆хъ ѿи҆мꙋ̀ и҆̀·

То́кмо всего црс̑҇тва не прїимꙋ̀.
хорꙋгве́ иже да́мъ сн҃ꙋ твое҆мꙋ дв҃да ра́ди раба̀ мое҆го.
і҆ерс̑҇ли́ма ра́ди гра́да е҆гоже и҆збра́хъ·

И҆ въздви́же г҃ь на соло́мона стꙋжа́ющаго.
раздро́на сн҃а е҆лиде́кова.
и҆же и҆збѣжа̀ ѿ вараме́ѳы и҆ а҆драза́ра цр҃ѧ сꙋ́вска господи́на своег̑҇ и҆ събра́шасѧ к немꙋ мꙋ́жи, и҆ б̂ѣ вое҆во́да по́лкꙋ в꙽негда̀ побѣжда́ше ѧ҆̀ дв҃дъ.
и҆ прїидо́ша в дама́скъ·

и҆ всели́шасѧ в нем̑ и҆ воц҃рисѧ в꙽ седо́кꙋ·

И҆ б̂ѣ стꙋжа́ѧ і҆и҆л҃еви въ вс̂ѧ дн҃и соло́монѧ.
и҆ вѣздви́же г҃ь стꙋжа́ю҆щаго на соло́мона.
и҆ а҆да́ра и҆дꙋмѣꙗ҆нина, ѿ сѣмени цр҃ьска въ и҆дꙋме́и<.>

И бы́сть е҆гда и҆скоренѝ дв҃дъ е҆до́ма.
е҆гда̀ и҆́де і҆ѻ҆а́въ вое҆во́да, во́и погреба́ти ꙗ҆́звенїи.
і҆ и҆с꙽сѣче всѧ́къ мꙋ́жескъ по́лъ въ и҆дꙋмѣи·

Ꙗ҆́ко ѕ҃ мс̑҇цъ.
сѣде т̂ꙋ і҆ѻ҆а́въ, и҆ весь і҆и҆л҃ь въ и҆дꙋмѣ́и.
до́ндеже и҆зби́ша всѧ́къ мꙋжескъ по́лъ въ и҆дꙋмѣ́и·

И҆ бѣжа̀ а҆да́ръ самъ и҆ вс̂и мꙋжи и҆дꙋмѣ́истїи.
и҆ ѻ́троки ѿц҃а е҆го с ним̑.
а҆да́дъ же бы́сть ѻ҆тро́чищъ ма́лъ·

И҆ внидо́ша въ е҆гѷпет꙽.
и҆ въста́ша мꙋжи гра́да мадїам̑ска.
и҆ прїидо́ша въ фара́нъ.
и҆ поꙗ҆́ша мꙋжа съ собо́ю и҆ прїидо́ша къ фараѻ́нꙋ цр҃ю е҆гѷпет꙽скомꙋ.
и҆ вни́де а҆да́ръ къ фараѻ́нꙋ.
и҆ да́сть е҆мꙋ цр҃ь до́мъ и҆ ѹ҆рок̑҇ ꙗ҆́ди.
и҆ зе́млю дадѐ е҆мꙋ·

И҆ ѻ҆брѣтѐ а҆дар̑҇ ра́дость пред̑ ѻ҆чи́ма фараѻ́нима ѕѣло.
и҆ да́сть е҆мꙋ женꙋ̀ сестрꙋ жены̀ свое́ѧ сестрꙋ ѳекеми́ны старѣ́ишꙋю·

И҆ родѝ е҆мꙋ сестра̀ ѳекеме́ина сн҃а а҆деръ ганава́ѳа.
и҆ въскормѝ и҆̀ ѳекеми́на по́средѣ сн҃овъ фараѻ́нь.
и҆ б̂ѣ ганива́ѳъ по́средѣ сн҃овъ фараѻ́нь·

И҆ а҆де́ръ слыша въ е҆гѷптѣ ꙗ҆́ко ѹ҆спѐ дв҃дъ, съ ѿц҃ы свои́ми.
і҆ ꙗ҆ко ѹ҆́мре і҆ѻ҆а́въ вое҆во́да старѣ́ишинамъ.
и҆ рече а҆де́ръ къ фараѻ́нꙋ.
пꙋстѝ м̂ѧ да сѧ възвращꙋ̀ въ зе́млю свою·

И҆ рече а҆де́рови фараѻ́нъ.
чт̂о недово́ленъ е҆си ѹ҆ мене.
и҆ с̂е ты̀ проси́шисѧ в зе́млю свою.
и҆ рече е҆мꙋ а҆дер̑҇ ꙗ҆́ко ѿпꙋща́ѧ ѿпꙋсти́ши м̂ѧ·

И҆ възврати́сѧ а҆де́ръ в зе́млю свою.
с̂и ѕло́ба и҆же сътворѝ а҆де́ръ.
ѻ҆тѧж̑чи́сѧ на і҆и҆л҃ѧ.
и҆ црс̑҇твова́ же в землѝ е҆до́м꙽стѣи.
и҆ е҆ровоа́м꙽ сн҃ъ нава́тов̑҇ и҆ е҆фра́ѳи, и҆же ѿ сари́ра.
сн҃ъ жены̀ вдови́цы рабы̀ соло́мони.
и҆ сїи́ възъдви́же рꙋцѣ на цр҃ѧ соло́мона·

И҆ сїа вина̀ и҆же въз꙽дви́же рꙋцѣ на цр҃ѧ, внегда̀ цр҃ь соло́монъ созда́лъ б̂ѣ кра́и, и҆ съвръшѝ пло́том̑.
въ́ градѣ дв҃да ѿц҃а свое҆го.
и҆ чл҃къ б̂ѣ е҆ровоам̑ крѣпокъ си́лою.
и҆ ви́дѣ соло́мон̑҇ ꙗ҆́ко мꙋжъ ѻ҆́трок на дѣ́ло е҆сть, и҆ поста́ви и҆̀ надо всѣми строе́нїи до́мꙋ і҆ѻ́сифова·

И҆ бы́сть во врѣмѧ т̂о.
и҆ е҆ровоа́мъ и҆зы́де и҆зъ е҆рс̑҇ли́ма.
и҆ ѻ҆брѣте и҆̀, а҆хїѧ силонитѧнин̑҇ про̑҇ркъ на пꙋтѝ, и҆ соврати и҆̀ с пꙋтѝ.
и҆ б̂ѣ а҆хїѧ ѻ҆болченъ в꙽ ри́зꙋ но́вꙋ.
и҆ бѣста ѻ҆́ба е҆ді́на на́ поли·

И҆ взѧ̀ а҆хїѧ за ри́зꙋ свою̀ но́вꙋю и҆же б̂ѣ на нем̑.
и҆ раздра и҆̀, на в҃і, жре́бїѧ·

И҆ рече и҆е҆ровоа́мꙋ, прїими себѣ, і҃, жребїи ꙗ҆́ко та́ко гл҃етъ г҃ь і҆и҆л҃евъ, с̂е а҆́зъ ѿи҆мꙋ црс̑҇тво и҆з рꙋки соло́монѧ, и҆ дам̑ ти хорꙋгвїи, і҃·

А҆ дв̂ѣ хорꙋгви ѻ҆ставлю е҆мꙋ, раба̀ ра́ди мое҆го давы́да, і҆ерс̑҇ли́ма ради града мое҆го, и҆же и҆збрахъ себѣ въ все́мъ колѣ́нѣ і҆и҆л҃евѣ·

Зане́же ѻ҆стави м̂ѧ, и҆ поклони́шасѧ а҆ста́ртꙋ сквръномꙋ сидо́нскꙋ, и҆ хамо́сꙋ кꙋми́рꙋ моа́влю и҆ цр҃ю и҆хъ на срамленїе сн҃омъ а҆м꙽монимъ·

И҆ не ходи́ша по пꙋтих̑ моих̑, е҆же творити ѹд̑го́наѧ предо мно́ю, ꙗ҆коже и҆ дв҃дъ ѿц҃ъ е҆го.
сего ра́ди прилага́ѧ приложꙋ̀ в꙽сѧ дн҃и живота̀ е҆го, и҆ не ѿи҆мꙋ̀ црс̑҇тва в꙽сего ѿ рꙋ́кꙋ е҆го дв҃да рад̑и̑ ра́ба моег̑҇, е҆го́же и҆збрах̑·

И҆ ѿи҆мꙋ црс̑҇тво ѿ рꙋки сн҃а е҆го, и҆ дам̑ ти, і҃ хорꙋгви.
сн҃ови же е҆го дамъ дв̂ѣ хорꙋгвѣ, ꙗ҆́коже завѣщах̑ рабꙋ̀ мое҆мꙋ дв҃дꙋ.
во вс̂ѧ дн҃и предо мно́ю въ і҆ерс̑҇ли́мѣ градѣ.
е҆гоже и҆збрахъ на положе́нїе и҆́мени мое҆мꙋ т̂ꙋ·

И҆ т̂ѧ прїимꙋ и҆ црс̑҇твꙋе́ши, ѻ҆ них̑же жадает̑ т̂и дш҃а.
и҆ т̂ы бꙋ́деши цр҃ь над̑ і҆и҆л҃емъ·

И҆ бꙋ́детъ а҆́ще съхрани́ши вс̂е е҆ли́ко заповѣ́даю ти.
и҆ да ходи́ши пꙋте́мъ моим̑ и҆ сътвори́ши ѹ҆год̑наѧ предо мно́ю.
храни́ти за́повѣди моѧ и҆ повеле́нїѧ моѧ̀ ꙗ҆́коже сътвори дв҃дъ ра́бъ мо́и, и҆ бꙋ́дꙋ с тобо́ю.
и҆ соѕи́ждꙋ т̂и домъ вѣрен̑҇.
ꙗ҆́коже создах̑ дв҃дꙋ и҆ дамъ т̂и і҆и҆л҃ѧ.
и҆ накажꙋ ро́дъ дв҃двъ ради сего н̂о не во всѧ̀ дн҃и·

І҆ и҆ска́ше соло́монъ ѹ҆би́ти и҆е҆ровоа́ма.
и҆ воста́въ и҆е҆ровоа́мъ бѣжа́ въ е҆гѷпетъ къ сꙋсаки́мꙋ цр҃ю е҆гѷпет꙽скꙋ.
и҆ б̂ѣ въ е҆гѷптѣ, до́ндеже соло́монъ ѹ҆́мре·

И҆ проча́ѧ слове́съ соло́монихъ, и҆ вс̂ѧ е҆ли́ко сътвори.
и҆ весь смы́слъ е҆го.
не с̂е л̂и пи́сана быша в꙽ кни́зе гл҃емой соло́монъ·

И҆ бѣ дн҃їи в нѧже црс̑҇твова соло́монъ въ і҆ерс̑҇ли́мѣ надо всѣмъ і҆и҆л҃емъ, м҃, лѣтъ.
и҆ ѹ҆спѐ соло́мон̑҇ съ ѿц҃ы свои҆ми.
и҆ погребо́ша и҆̀ въ градѣ дв҃да ѿц҃а е҆го.
и҆ бысть е҆гда̀ ѹ҆слы́ша и҆е҆ровоа́мъ сн҃ъ нава́товъ, е҆мꙋже е҆щѐ сꙋщꙋ въ е҆гѷпте.
ꙗ҆́ко ѹ҆бѣжа ѿ лица соло́монѧ и҆ пребываше в꙽ е҆гѷптѣ.
и҆ въстав̑҇ прїиде во́ град̑ е҆го в꙽ зе́млю сарираи҆ню, и҆же въ предѣлех̑ е҆фрѣмлих̑·

Цр҃ь же соло́монъ ѹ҆спѐ съ ѿц҃ы свои҆ми.
и црс̑҇твова ровоа́мъ сн҃ъ е҆го в него̀ мѣсто·

Глв̑҇а, в҃і·

Идѧше цр҃ь ровоам̑ въ сики́мꙋ.
ꙗ҆ко въ сики́мъ прїиде весь і҆и҆л҃ь въцрс̑҇тви́ти и҆̀·

И҆ быс̑҇ е҆гда̀ ѹ҆слы́ша и҆е҆ровоамъ сн҃ъ нава́тов̑҇ и҆ томꙋ̀ е҆щѐ сꙋщꙋ въ е҆гѷп꙽тѣ.
ꙗ҆́ко ѹ҆бѣжа̀ ѿ лица̀ соло́монѧ.
и҆ пребыва́ше въ е҆гѷптѣ·

Въста́въ же и҆ прїиде въ́ градъ свои въ зе́млю сарират꙽скꙋ.
въ предѣлы е҆фрѣмлѧ, и҆ гл҃аша лю́дїе къ цр҃ю ровоа́мꙋ гл҃юще·

ѿц҃ъ твои ѻ҆тѧгча̀ ꙗ҆ре́мъ нашъ.
понѐ т̂ы нн҃ѣ ѻ҆блегчѝ работꙋ̀ ѿц҃а твое҆го ѕлꙋ́ю и҆ ѿ ꙗ҆ре́ма е҆го тѧ́жкаго.
и҆же възложѝ на́ ны, и҆ порабо́тае҆мъ т̂и·

И҆ рече к ни́мъ и҆дѣте и҆ пребꙋдѣте до тре́тїꙗ҆го дн҃е.
и҆ па́ки възврати́тесѧ къ мн̂ѣ і҆ и҆до́ша·

И҆ возвѣстѝ ровоа́мъ цр҃ь ста́рцемъ, и҆же бѣша пред̑стоꙗ҆́ще пред̑ соло́моном꙽ ѿц҃емъ е҆го, е҆гда̀ е҆ще жи́вꙋ е҆мꙋ сꙋщꙋ.
гл҃ѧ ка́ко в̂ы мы́слите.
да ѿвѣща́ю людемъ сим̑ слово·

И҆ рѣша е҆мꙋ гл҃юще.
а҆ще въ дн҃ешнїи дн҃ь бꙋдеши ра́бъ лю́демъ симъ.
и҆ порабо́тае҆ши и҆мъ.
и҆ гл҃еши и҆м꙽ словеса̀ бл҃га.
и҆ бꙋдꙋтъ т̂и рабѝ въ всѧ̀ дн҃и·

И҆ небрѣжа́ше совѣта ста́рец̑҇ и҆же совѣща́ша с ним꙽.
и҆ совѣща́ша съ ѻ҆́троки и҆же бѣша въско́р꙽млени с ним̑ и҆ съ пред̑стоꙗ҆́щима пред̑ ѻ҆чи́ма е҆го·

И҆ рече им̑ чт̂о вы̀ совѣщава́ете.
и҆ чт̂о ѿвѣща́ю людемъ симъ, и҆же рѣша къ мнѣ гл҃юще.
ѻ҆блегча́и нн҃ѣ ꙗ҆ре́м꙽ и҆же възложи ѿц҃ъ твои на́ ны·

И҆ гл҃аша к немꙋ ѻ҆́троцы и҆же бѣхꙋ въскор̑҇млени с ним̑.
и҆ рѣша е҆мꙋ.
сице да гл҃еши людем̑ си́м꙽, и҆же рѣша к тебѣ гл҃ще ꙗ҆́ко, ѻ҆тѧгчѝ ѿц҃ъ твои ꙗ҆ре́м꙽ наш̑҇ и҆ т̂ы ѻ҆блегчѝ ѿ нас̑҇, сѝ да рече́ши к нимъ.
ю҆́ность моѧ тол꙽стѣ́иши е҆сть, чре́слъ ѿц҃а мое҆го·

И҆ понеж̑ е҆сть ѿц҃ъ мои на́ вы ꙗ҆ре́мъ тѧ́жек̑҇ наложи́лъ.
и҆ а҆зъ приложꙋ̀ къ ꙗ҆ре́мꙋ ва́шемꙋ.
ѿц҃ъ мои наказа̀ в̂ы ра́нами.
и҆ а́зъ накажꙋ̀ в̂ы расточе́нїем̑·

И҆ прїиде весь і҆и҆л҃ь къ цр҃ю ровоа́мꙋ.
въ дн҃ь тре́тїи ꙗ҆́коже рече и҆мъ цр҃ь гл҃ѧ възврати́тесѧ къ мнѣ̀ въ дн҃ь тре́тїи·

И҆ ѿвѣща̀ цр҃ь к лю́демъ тѧ́жцѣ.
и҆ ѻ҆ста́ви цр҃ь совт̑ѣ старец̑҇ и҆миже совѣща́ша е҆мꙋ·

И҆ гл҃а к ним̑ по совѣтꙋ ѻ҆́трокъ гл҃ѧ.
ѿц҃ъ мои ѻ҆тѧгчѝ ꙗ҆ре́мъ вашъ, и҆ а́зъ приложꙋ̀ ꙗ҆ремꙋ̀ ва́шемꙋ ѿц҃ъ мои ѻ҆тѧгчѝ и҆ наказа́ше в̂ы ра́нами.
и҆ а́зъ накажꙋ̀ в̂ы расточе́нїемъ·

И҆ не послꙋ́ша цр҃ь людїи.
ꙗ҆́ко б̂ѣ раз꙽враще́нїе ѿ г҃а.
ꙗ҆́коже ѹ҆ста́вити гл҃ъ свои́.
ꙗ҆́коже гл҃а рꙋко́ю а҆хі́иѧ силони́т꙽скаго.
къ і҆е҆ровоа́мꙋ сн҃ꙋ нава́товꙋ·

И҆ ви́дѣ весь і҆и҆л҃ь ꙗ҆́ко не послꙋш́а цр҃ь гла́са и҆хъ, и҆ ѿвѣща́ша лю́дїе цр҃ю гл҃юще.
ка́ѧ намъ часть въ дв҃дѣ.
и҆ нѣсть на́мъ наслѣдїѧ въ сн҃ѣ і҆е҆с꙽се́инѣ, разыидѣтесѧ сн҃ове і҆и҆л҃ьстїѝ въ кро́вы своѧ.
нн҃ѣ пасѝ до́мъ твои дв҃де.
и҆ ѿи́де і҆и҆л҃ь въ кро́вы своѧ·

Над̑ сн҃ъми́ же і҆и҆л҃выми и҆же живѧ́хꙋ въ́ градехъ і҆ѹ́диныхъ црс̑҇твова̀ ровоам̑ сн҃ъ соло́монь·

И҆ посла̀ цр҃ь а҆донира́ма.
и҆же над̑ да́нью и҆ побѝ е҆го ка́менїе҆мъ весь і҆и҆л҃ь и҆ ѹ́мре.
и҆ цр҃ь ровоа́мъ, пот꙽ща́сѧ на колесни́цꙋ бѣжа̀ и҆ вни́де въ і҆ерс̑҇ли́м꙽·

И ктомꙋ̀ не пристꙋпѝ і҆и҆л҃ь к до́мꙋ дв҃двꙋ даже до дне́сь·

И҆ бы́сть ꙗ҆́ко слы́ша і҆и҆л҃ь.
ꙗ҆́ко възврати́сѧ і҆е҆ровоа́мъ ѿ е҆гѷпта.
и҆ посла́вше по него и҆ призва́ша и҆̀ на собо́ръ.
и҆ поста́виша цр҃ѧ над̑ і҆и҆л҃ем꙽.
и҆ не бѣша по до́мꙋ двд҃вѣ.
то́кмо, и҆же бѧ́хꙋ с хорꙋго́вїю і҆и҆ѹ́диною, и҆ венїа҆ми́нею·

И҆ ровоа́мъ вни́де въ і҆ерс̑҇ли́мъ.
и҆ собра̀ собо́ръ і҆ѹ́динъ.
и҆ хорꙋгвѝ венїа҆ми́нѧ.
р҃, и҆ ҂к҃ ю҆́ношъ и҆ твори́ти бра́нь на́ брань до́мꙋ і҆и҆л҃ева, воз꙽врати́ти црс̑҇тво ровоа́мꙋ сн҃ꙋ соло́моню·

И҆ бы́сть сло́во гн҃е къ саме́ю чл҃кꙋ бж҃їю гл҃ѧ·

Рцы̀ къ ровоа́мꙋ сн҃ꙋ соло́моню цр҃ю і҆ѹ́динꙋ, и҆ къ всемꙋ̀ до́мꙋ і҆ѹ́динꙋ, и҆ вениа҆ми́новꙋ, и҆ къ про́чимъ лю́демъ гл҃ѧ·

Та́ко гл҃етъ г҃ь.
не взы́идѣте ни побѣди́тесѧ съ бра́тїею свое́ю съ сн҃ъми і҆и҆л҃евыми, н̂о возврати́тесѧ ко́ждо в домы̀ своѧ̀, ꙗ҆́ко ѿ менѐ бы́сть гл҃ъ се́и·

И҆ послꙋшаша слове́съ гн҃ь, и҆ ѹ҆стави́шасѧ и҆ не и҆до́ша по гл҃ꙋ гн҃ю·

И҆ цр҃ь соло́мон̑҇ спѧ́ше съ ѿц҃ы свои́ми, и҆ положе́нъ бы́сть въ́ градѣ дв҃двѣ, црс̑҇твова́ же ровоа́мъ сн҃ъ е҆го в него̀ мѣ́сто въ і҆ерс̑҇ли́мѣ сы́и ѕ҃і лѣтъ, е҆гда̀ цр҃ь бы́сть.
и҆ з҃і лѣтъ црс̑҇твова̀ въ і҆ерс̑҇ли́мѣ, и҆́мѧ б̂ѣ мт҃ри е҆го наа҆на́на дщѝ а҆но́нѧ сн҃а наа́са цр҃ѧ сн҃овъ а҆м꙽мо́нь·

И҆ сътворѝ лꙋка́вое пред̑ гм҃ъ, и҆ не начатъ ходи́ти по пꙋте́мъ дв҃да ѿц҃а е҆го.
бѣ же чл҃къ се́и ѿ предѣлъ е҆фрѣмль раб̑҇ соло́монь, и҆́мѧ е҆мꙋ і҆е҆ровоа́мъ.
і҆ и́мѧ мт҃ри ег̑҇ сари́ра жена̀ блꙋ́дница, и҆ да́лъ е҆го соло́монъ въ кнѧ́ѕѧ ски́томъ.
въ ѻ҆держа́нїю до́ма и҆ѻ́сифова.
и҆ созда̀ соло́монꙋ сари́рꙋ.
въ предѣлех̑ е҆фрем̑лих̑ и҆ бѣша е҆мꙋ, т҃, колесни́ц꙽ и҆ ко́неи.
се́и созда̀ а҆́крꙋ.
въ ѻ҆держанїе до́мꙋ и҆е҆фрѣмова.
се́и совръши град̑ двд҃въ и҆ б̂ѣ подносѧ́сѧ на црс̑҇тво.
и҆ взыска̀ соло́монъ ѹ҆би́ти е҆го.
и҆ ѹ҆боꙗ҆́сѧ и҆ ѿбѣжѐ до сꙋсаки́ма цр҃ѧ е҆гѷпет꙽ска и҆ б̂ѣ с ним̑ до́ндеже ѹ҆́мре соло́монъ·

И҆ слы́ша і҆е҆ровоа́мъ въ е҆гѷпте ꙗ҆́ко ѹ҆́мре соло́монъ, и҆ гл҃а въ ѹ́ши сꙋсакимꙋ цр҃ю е҆гѷпет꙽скꙋ гл҃ѧ.
ѿпꙋсти́ мѧ и҆ ѿи́дꙋ въ зе́млю мою̀·

и҆ рече е҆мꙋ сꙋсаки́мъ.
просѝ нѣкое проше́нїе и҆ да́мъ т̂и.
сꙋсаки́м же да́сть і҆е҆ровоа́мꙋ а҆́нꙋ сестрꙋ̀ ѳеко́минꙋ, старѣ́ишѹю жены свое́ѧ е҆мꙋ въ женꙋ̀.
и҆ сїѧ б̂ѣ вели́ка въ дще́рехъ црс̑҇кихъ.
и҆ родѝ и҆е҆ровоа́мꙋ а҆вїѧ сн҃а е҆го.
и҆ рече і҆е҆ровоа́мъ къ сꙋсаки́мꙋ сꙋще ѿпꙋсти́ мѧ, и҆ ѿи́дꙋ і҆ и҆зы́иде і҆е҆ровоа́мъ ѿ е҆гѷпта.
и҆ прїиде въ зе́млю сари́рю въ предѣлы е҆фрѣмлѧ.
и҆ собра́сѧ т̂ꙋ вс̂ѧ хорꙋгвѝ е҆фрѣмлѧ къ і҆е҆ровоа́мꙋ.
и҆ созда̀ т̂ꙋ і҆е҆ровоа́мъ ѻ҆гра́дꙋ.
и҆ разболѣсѧ дѣтищ꙽ е҆го бо́лѣзнїю крѣ́пкою ѕело і҆ и҆дѐ і҆е҆ровоа́мъ въпроси́ти ѻ҆ дѣтищꙋ.
и҆ рече а҆́не женѣ̀ свое́и, въста́ни і҆ и҆дѝ.
въпросѝ б҃а ѻ҆ дѣтищꙋ а҆ще жи́въ бꙋдетъ, ѿ бо́лезни е҆го·

Бѣ́ же чл҃къ въ сило́ме и҆́мѧ е҆мꙋ а҆хїа́ и҆ с̂е сы́и ѯ҃ лѣтъ, и҆ гл҃ъ бж҃їи б̂ѣ с ни́мъ.
и҆ рече і҆е҆ровоа́мъ къ женѣ̀ свое́и.
въста́ни и҆ возмѝ в рꙋцѣ твоѝ чл҃кꙋ бж҃їю хлѣ́бы, и҆ ѻ҆прѣ́снокъ дѣтемъ е҆го, и҆ гро́здїе, и҆ сосꙋдъ ме́дꙋ.
и҆ въста̀ жена̀ и҆ взѧ̀ в рꙋцѣ е҆ѧ̀ хлѣбы и҆ дв̂а ѻ҆прѣ́сноки, и҆ гро́здїѧ и҆ сосꙋдъ ме́дꙋ, а҆хі́и.
чл҃къ же ста́ръ б̂ѣ.
и҆ ѻ́чи е҆го ѻ҆мрачи́стасѧ не видѣти, и҆ въста̀ ѿ сари́ра і҆ и́де и҆ бы́сть входѧ́щи е́й въ градъ къ а҆хі́ю силони́т꙽скомꙋ, и҆ рече а҆хїѧ́ ѻ҆́трокꙋ свое҆мꙋ.
и҆зыдѝ ѹ҆́бо въ срѣте́нїе а҆́ны жены̀ і҆е҆ровоа́мли и҆ рече́ши к не́и.
вни́ди и҆ не сто́и, ꙗ҆́ко сїѧ гл҃етъ г҃ь, жесто́ко аз̑ послю̀ на́ тѧ и҆ вни́де а҆́на къ чл҃кꙋ бж҃їю, и҆ рече е́и а҆хі́ѧ въскꙋ́ю принесѐ м̂и хлѣбы и҆ ѻ҆прѣ́сноки и҆ гро́здїе и҆ сосꙋдъ ме́дꙋ.
сїѧ гл҃етъ г҃ь, с̂е ты̀ ѿи́деши ѿ мене.
и҆ бꙋдетъ в꙽ходѧ́щꙋ тебѣ̀ въ́ градъ сари́рꙋ.
и дѣвицы твоѝ и҆зыидꙋтъ на срѣте́нїе тебѣ, и҆ рекꙋтъ т̂и, ꙗ҆́ко дѣтищъ ѹ҆ме́ръ ес̑҇ ꙗ҆́ко сїѧ гл҃етъ г҃ь.
с̂е а҆зъ и҆скореню̀ і҆е҆ровоа́мова моча́щаго къ стенѣ̀.
и҆ бꙋдетъ ѹ҆ме́ршаго і҆е҆ровоа́мова въ́ граде и҆зъе҆дѧ́т꙽ ѱѝ и҆ ѹ҆ме́ршаго на селѣ̀ и҆зъе҆дѧ́т꙽ пти́цы нбс̑҇ныѧ.
и҆ дѣтища рыда́ютсѧ ѽ г҃и, ꙗ҆́ко ѻ҆брѣте́сѧ в немъ гл҃ъ до́бръ ѻ҆ г҃ѣ·

И҆ ѿи́де жена̀ ꙗ҆́ко слы́ша, и҆ бы́сть е҆гда вни́де въ сари́рꙋ.
и҆ дѣтищъ ѹ́мре і҆ и҆зы́иде во́пль въ срѣтенїе е҆ѧ̀ і҆ и́де і҆е҆ровоа́мъ въ сики́мꙋ и҆же въ предѣле е҆фре́мли.
и҆ собра̀ т̂ꙋ колѣна і҆и҆л҃ева;
и҆ възы́иде т̂ꙋ ровоа́мъ сн҃ъ соло́монов̑҇ и҆ сло́во гн҃е бы́сть къ са́мѣю е҆лами́тѧнинꙋ гл҃ѧ.
възмѝ себѣ ри́зꙋ но́вꙋ.
ꙗ҆́же не вни́де въ во́дꙋ.
и҆ раздрѝ ю҆̀ на в҃і ча́стїи.
и҆ дасѝ і҆е҆ровоа́мꙋ и҆ рече́ши к немꙋ̀, сїѧ гл҃етъ г҃ь възмѝ себѣ і҃ ча́стеи е҆же покры́ти т̂ѧ и҆ взѧ̀ і҆е҆ровоа́мъ.
и҆ рече саме́ѧ сїѧ гл҃етъ г҃ь с̂е а҆зъ разделю̀ црс̑҇тво соло́моново.
и҆ дам̑ т̂и і҃, скѷпетровъ.
и҆ дв̂а скѷпетра бꙋдꙋтъ ровоа́мꙋ сн҃ꙋ соло́моню·

И҆ бы́сть по ѹ҆мрътвїѝ цр҃ѧ соло́мона въцр҃исѧ сн҃ъ е҆го ровоа́мъ в него мѣсто·

И҆ реко́ша лю́дїе къ ровоа́мꙋ ѿц҃ъ твои ѻ҆тѧгчѝ ꙗ҆рмо̀ своѐ на нас̑҇ и҆ ѻ҆тѧгчѝ ꙗ҆де́нїѧ трапе́зы свое́ѧ нн҃ѣ ѻ҆блегчѝ нам꙽, и҆ послꙋжим̑ т̂и.
и҆ рече ровоа́мъ къ лю́демъ.
е҆ще по трехъ дн҃ехъ, ѿвѣща́ю ва́мъ рѣчъ и҆ рече ровоа́мъ, приведѣте м̂и преѕви́теры, и҆ совѣтꙋ́ю с ни́ми чт̂о ѿвѣща́ю лю́демъ рѣ́чъ въ дн҃ь тре́тїи.
и҆ гл҃а ровоа́мъ въ ѹ́ши и҆хъ.
ꙗ҆́кож̑ посла́ша лю́дїе к немꙋ, и҆ реко́ша ста́рцы людїи та́ко ꙗ҆́ко гл҃аша к тебѣ лю́дїе, да гл҃еши къ лю́дем꙽.

И҆ разорѝ ровоа́мъ совѣтъ и҆хъ.
и҆ не ѹ҆го́дно б̂ѣ пред̑ нимъ, и҆ посла̀, и҆ въведѐ въспита́н꙽ныхъ с ни́мъ, и҆ гл҃а и҆мъ сїѧ и҆ сїѧ.
посла́ша лю́дїе къ мн̂ѣ, и҆ рѣша въспита́н꙽нїи с ни́мъ та́ко гл҃и къ лю́демъ.
ю҆́ность моѧ тол꙽стѣ́иши паче чре́слъ ѿц҃а моег̑҇.
ѿц҃ъ мо́и бїѧ́ше ва́съ биче́мъ аз̑ же начнꙋ̀ васъ би́ти съ расточе́нїемъ ѹ҆го́денъ б̂ѣ гл҃ъ пред̑ ровоа́момъ.
и ѿвѣща лю́демъ ꙗ҆́коже совѣща́ша е҆мꙋ въспита́ннїи с ни́мъ ѻ҆́троцы, и҆ реко́ша лю́дїе ꙗ҆́ко мꙋжъ е҆ді́нъ, ко́ждо бли́жнемꙋ свое҆мꙋ, и҆ възопи́ша вс̂и гл҃юще.
нѣ́сть ча́сти нам̑ въ дв҃де.
ниже наслѣ́дїѧ въ сн҃ꙋ і҆е҆с꙽се́ѻ҆вѣ.
ко́ждо въ домы̀ своѧ̀ і҆и҆л҃ю да и҆́детъ ꙗ҆́ко чл҃къ се́и, не е́сть въ нача́лника, ниже въ во́жда и҆ разыидо́шасѧ вс̂и лю́дїе ѿ сики́ма, и҆ ѿи́де ко́ждо въ до́мъ сво́и.
и҆ низдержа̀ ровоа́мъ, и҆ ѿи́де и҆ възы́иде на колесни́цꙋ свою и҆ вни́де въ і҆ерс̑҇ли́мъ, і҆ и҆зы́иде въ слѣдъ е҆го ве́сь ски́петръ і҆ѹ́динъ, и҆ весь ски́петръ венїа҆минь и҆ бы́сть въ стоꙗ҆нїѝ е҆ді́ного лѣта.
и҆ собра̀ ровоа́мъ вс̂ѧ мꙋжи і҆ѹ́дины и҆ венїа҆ми́ни.
и҆ възы́иде бра́тисѧ съ і҆е҆ровоа́момъ въ сики́мъ, и҆ бы́сть гл҃ъ гн҃ь къ саме́ю чл҃кꙋ бж҃їю гл҃ѧ, рцы̀ ровоа́мꙋ цр҃ю і҆ѹ́динꙋ, и҆ къ всемꙋ̀ до́мꙋ і҆ѹ́динꙋ, и҆ венїа҆ми́ню, и҆ къ всѣмъ про́чїи҆мъ людемъ гл҃ѧ сїѧ гл҃етъ г҃ь, не восходи́те ниже бі́итесѧ съ бра́тїею вашею сн҃ы і҆и҆л҃евыми ѿврати́тесѧ кождо в꙽ дом̑ сво́и занѐ ѿ мене бы́сть гл҃ъ се́и, и҆ послꙋшаша гл҃а гн҃ѧ, и҆ не пои҆до́ша по гл҃ꙋ гн҃ю·

И҆ созда̀ і҆е҆ровоа́мъ сики́мꙋ въ предѣлехъ е҆фрѣмлихъ.
и҆ всели́сѧ в немъ, і҆ и҆сшед̑ ѿтꙋдꙋ созда̀ ѳанꙋ́илѧ·

И҆ рече і҆е҆ровоа́мъ въ срд̑цы свое҆мъ.
с̂е нн҃ѣ възъврати́тсѧ црс̑҇тво в до́мъ дв҃двъ·

А҆ще възы́идꙋтъ лю́дїе сїѝ възнестѝ жр́ътвы въ хра́мъ гн҃ь въ і҆ерс̑҇лим̑ и҆ ѻ҆брати́тсѧ срд̑це людїи къ г҃ꙋ и҆ къ господи́нꙋ их̑ ровоа́мꙋ цр҃ю і҆ѹ́динꙋ·

И҆ ѹ҆бїю́т꙽ м̂ѧ, и҆ смышль си́це цр҃ь и҆ сътворѝ дв̂ѣ ю҆́ницы зла́тѣ.
и҆ реч̑҇ к лю́демъ довлѣ́етъ вамъ ходи́ти въ і҆ерс̑҇лимъ.
с̂е бѕ҃и твои і҆и҆л҃ю и҆зведшїи т̂ѧ и҆з꙽ землѧ е҆гѷпет̑ски·

И поста́ви е҆ді́нꙋ въ веѳи́ли.
а҆ дрꙋгꙋю поста́ви в꙽ да́нѣ·

И҆ бы́сть слово с̂е на согрѣше́нїе до́мꙋ і҆е҆ровоа́млю.
і҆ и҆дѧ́хꙋ лю́дїе пред̑ лицемъ ю҆́нца е҆ді́ноѧ до да́на·

И҆ ѻ҆стави́ша хра́мъ гн҃ь·

И҆ сътворѝ ка́пища на высо́кихъ.
и҆ сътворѝ жръцов̑҇ ча́сть ѿ людїи.
и҆же не бѣша ѿ сн҃овъ левгі́инъ·

И҆ сътворѝ і҆е҆ровоа́мъ пра́здникъ въ и҃ мс̑҇ць.
въ е҃і дн҃ь мс̑҇ца.
по пра́знд̑икꙋ, и҆же въ зем꙽лѝ б̂ѣ і҆ѹ́динѣ.
и҆ взы́иде въ ѻ҆лта́рь, и҆же сътворѝ въ веѳи́ли.
пожретѝ ю҆́ницамъ, и҆хже б̂ѣ сътвори́лъ, и҆ поста́вилъ въ веѳи́ли жръцо́въ на высо́кихъ на всѧ́кое мѣсто е҆же сътворѝ·

И҆ взы́иде въ ѻ҆лта́рь и҆же бѣ̀ сътвори́лъ, въ и҃ мс̑҇ць, въ е҃і дн҃ь мс̑҇ца.
въ пра́зникъ и҆же съста́ви ѻ҆ себѣ са́мъ, и҆ сътворѝ пра́зникъ сн҃омъ і҆и҆л҃евомъ.
и҆ взы́иде на ѻ҆лта́рь е҆же пожрѣти·

Глв̑҇а, г҃і·

И с̂е чл҃къ бж҃їи прїиде.
ѿ и҆ѹ́ды по словесѝ гн҃ю въ веѳи́ль, и҆ е҆ровоа́мъ б̂ѣ стоѧ̀ въ ѻ҆лтари свое́мъ жрѣти хотѧ̀·

И҆ възопѝ къ ѻ҆лтарю̀ словомъ гн҃имъ и҆ рече ѻ҆лта́рю ѻ҆лта́рю си́це гл҃етъ г҃ь.
с̂е сн҃ъ сѧ ража́етъ до́мꙋ двд҃вꙋ.
и҆ѻ҆сїѧ и҆́мѧ е҆мꙋ.
и҆ пожре́тъ жръцы̀ жрꙋщ́аѧ нн҃ѣ на тебѣ.
и҆ ко́сти чл҃ческїѧ съж꙽же́тъ в꙽ тебѣ̀·

И҆ дасть ѿ дн҃їи того чю́до гл҃ѧ.
с̂е гл҃ъ и҆же гл҃а г҃ь гл҃ѧ.
с̂е ѻ҆лта́рь раз꙽сѧ́дет̑сѧ.
і҆ и҆злѣю҆тсѧ сы́ти ꙗ҆́же сꙋть в꙽ немъ·

И҆ бы́сть е҆гда ѹ҆слы́ша цр҃ь и҆е҆ровоам̑.
слово чл҃ка бж҃їѧ възопи́вшаго къ ѻ҆лтарю̀ въ веѳи́лѣ.
и҆ простре́тъ цр҃ь рꙋкꙋ свою ѿ ѻ҆лтарѧ̀ гл҃ѧ.
и҆мѣте и҆̀, и҆ с̂е ѹ҆сшѐ рꙋка̀ е҆го, ю҆́же прострѐ на́нь, и҆ не можа́ше възврати́ти ю҆̀ к꙽ себѣ·

И҆ ѻ҆лта́рь рас꙽сѣдесѧ і҆ и҆зли́тсѧ насыще́нїе ѿ ѻ҆лтарѧ̀, по чюдесѝ е҆же рече чл҃къ бж҃їи по словесѝ гн҃ю·

И҆ рече і҆е҆ровоа́мъ цр҃ь чл҃кꙋ бж҃їю.
помоли́сѧ пред̑ лицемъ г҃а б҃а твое҆го.
дабы́ сѧ преклони́ла рꙋка̀ моѧ̀ къ мн̂ѣ·

И҆ помоли́сѧ чл҃къ бж҃їи пред̑ лицемъ гн҃имъ.
и҆ преклони́сѧ рꙋка̀ цр҃ѧ к немꙋ̀.
и҆ бы́сть ꙗ҆́коже и҆ пре́жде·

И҆ гл҃а цр҃ь къ чл҃кꙋ бж҃їю.
вни́ди со мною в꙽ домъ и҆ ѻ҆бѣдꙋевѣ, и҆ да́мъ т̂и да́ръ·

И҆ рече чл҃къ бж҃їи къ цр҃еви.
а҆ще дасѝ м̂и по́лъ и҆мѣнїѧ твое҆го.
не въни́дꙋ с тобо́ю ниже ꙗ҆́мъ хлѣ́ба.
ни́же пїю воды̀ на мѣ́сте се́мъ·

Ꙗ҆́ко та́ко м̂и заповѣ́да г҃ь словомъ гл҃ѧ.
ни ꙗ҆́жъ хлѣ́ба ни пїи воды̀, ниже въз꙽врати́сѧ пꙋте́мъ тѣмже·

Но възврати́сѧ пꙋте́мъ и҆́нѣм꙽.
а҆ не и҆де пꙋте́мъ и҆́мже бѣ̀ прише́лъ въ веѳи́ль·

И҆ про̑҇ркъ е҆ді́нъ ста́ръ живѧ́ше въ веѳи́лѣ.
и҆ прїидо́ша сн҃ове е҆го и҆сповѣда́ша е҆мꙋ вс̂ѧ дѣла̀.
ꙗ҆́же сътвори чл҃къ бж҃їи въ дн҃ь то́и въ веѳи́лѣ.
и҆ словеса̀ ꙗ҆́же гл҃а цр҃еви.
повѣда́ша ѿц҃ꙋ свое҆мꙋ·

И҆ гл҃а к ним̑ ѿц҃ъ и҆хъ гл҃ѧ.
кѷи҆мъ пꙋте́мъ и҆́де.
и҆ показа́ша е҆мꙋ сн҃ове е҆го пꙋть и҆мже и҆де чл҃къ бж҃їи.
и҆з꙽ше́дыи ѿ и҆ѹ́ды.
и҆ рече сн҃омъ свои҆мъ ѻ҆сѣдла́ите м̂и ѻ҆слѧ̀ и ѻ҆сѣдлаша е҆мꙋ̀ ѻ҆слѧ̀ и҆ всѣде на́ нѧ·

І҆ и́де в꙽ слд̑ѣ чл҃ка бж҃їѧ.
и҆ ѻ҆брѣтѐ и҆̀ под̑ дꙋбом̑ сидѧ́ща, и҆ реч̑҇ е҆мꙋ ты́ ли е҆си чл҃къ бж҃їи прише́дыи ѿ і҆ѹ́ды.
и҆ реч̑҇ а҆зъ·

И҆ реч̑҇ е҆мꙋ прїидѝ со мною снѣ́си хлѣ́ба·

И҆ реч̑҇ е҆мꙋ не могꙋ̀ възврати́тисѧ с тобо́ю ниже ꙗ҆́мъ хлѣба.
ни пїю́ ѿ воды̀ ѿ мѣ́ста сего·

Ꙗ҆́ко заповѣ́да м̂и г҃ь словесе́мъ гл҃ѧ.
не ꙗ҆́жъ хлѣ́ба.
ни пїи воды̀ т̂ꙋ, и҆ не възврати́шисѧ пꙋте́мъ тм̑ѣ, и҆мже и҆́деши та́мо.

И҆ рече к не́мꙋ, и҆ а́зъ про̑҇ркъ е҆смь ꙗ҆́кож̑ и҆ ты̀, и҆ а҆гг҃лъ къ мн̂ѣ гл҃а словесе́м꙽ гн҃имъ гл҃ѧ, възвратѝ и҆̀.
к себѣ̀ в до́мъ свои да снѣсть хлѣба и҆ пї́етъ воды̀.
и҆ сълга̀ е҆мꙋ и҆ възвратѝ и҆̀.
и҆ ꙗ҆́сть хлѣбъ и҆ пї́етъ во́дꙋ в домꙋ̀ е҆го·

И҆ бы́сть и҆мъ сѣдѧ́щимъ на трапе́зѣ.
и҆ бы́сть сло́во гн҃е къ про̑҇ркꙋ възвращ꙽шемꙋ е҆го·

И҆ рече къ чл҃кꙋ бж҃їю пришед̑шемꙋ ѿ і҆ѹ́ды.
си́це гл҃етъ г҃ь.
поне́же престꙋпѝ гл҃ъ гн҃ь.
и҆ не съхрани за́повѣди, ю҆же заповѣ́да ти г҃ь б҃ъ твои·

И҆ възврати́всѧ и҆ ꙗ҆́лъ е҆си хлѣбъ.
и҆ пи́лъ е҆си во́дꙋ на мѣ́стѣ семъ.
и҆же реклъ къ тебѣ гл҃ѧ.
да не ꙗ҆сѝ хлѣба и҆ не пі́еши воды̀.
т̂о ты̀ ꙗ҆́сть и҆ пи́тъ.
да ѹ҆же не и́маши погребен̑҇ бы́ти съ ѿц҃ы свои҆ми·

И҆ бы́сть по ꙗ҆де́нїи хлѣба и҆ пи́тїѝ воды̀.
и҆ ѻ҆сѣдла́ша е҆мꙋ ѻ҆слѧ̀ про̑҇рка·

И҆ въз꙽вра́щъсѧ и҆ ѿи҆де.
и҆ срѣтѐ и҆̀ ле́въ на пꙋтѝ, поразѝ и҆̀ и҆ ѹ́мре.
и҆ б̂ѣ тѣло е҆го разбїе́но на пꙋтѝ.
и҆ ѻ҆се́лъ стоѧ́ше над ни́мъ.
и҆ ле́въ стоꙗ҆ше бли́зь телесѐ е҆го·

И҆ с̂е мꙋжи и҆дꙋщи и҆ ви́дѣша мр҃тва разбїе́на на пꙋтѝ.
и҆ льва̀ стоꙗ҆́ща близꙋ тѣла мр҃тваго.
и҆ пришед̑ше повѣ́даша въ́ градѣ в немже живѧ́ше про̑҇ркъ старъ·

И҆ ѹ҆слы́шавъ с̂е про̑҇ркъ възврати́выи е҆го с пꙋтѝ.
и҆ рече ꙗ҆́ко чл҃къ бж҃їи с̂е е҆сть.
и҆же престꙋпѝ гл҃ъ бж҃їи.
и҆ преда̀ е҆го г҃ь львꙋ̀ и҆ съкрꙋшѝ е҆го.
и҆ ѹ҆морѝ е҆го.
по гл҃ꙋ гн҃ю и҆же рече е҆мꙋ·

И҆ повелѣ сн҃омъ свои҆мъ гл҃ѧ ѻ҆сѣдла́ите м̂и ѻ҆слѧ̀ и҆ ѻ҆сѣдла́ша·

І҆ и́де и҆ ѻ҆брѣтѐтѣло е҆го на пꙋтѝ.
и҆ ѻ҆се́лъ и҆ ле́въ стоꙗ҆́ста над̑ тѣломъ.
и҆ не бѧ́ше ѧл̑҇ телесѐ ле́въ чл҃ка бж҃їѧ.
и҆ ни бѧ́ше разби́лъ ѻ҆сла̀·

И҆ взѧ́тъ про̑҇ркъ тѣло чл҃ка бж҃їѧ, и҆ възложѝ и҆̀ на ѻ҆се́лъ, и҆ възвратѝ и҆̀ про̑҇ркъ и҆ прїиде въ́ градъ на погребе́нїе·

И҆ положѝ и҆̀ въ́ градѣ свое҆мъ.
и҆ рыдастасѧ по немъ с̂е го́ре бра́те мои·

И҆ бы́сть побїе́нїе по не́мъ, и҆ рече къ сн҃омъ свои҆мъ гл҃ѧ, а҆ще ѹ҆мрꙋ̀ т̂о положи́те м̂ѧ въ гробѣ се́мъ, и҆дѣже и҆ чл҃къ бж҃їи погребен̑҇ е҆сть, при костех̑ е҆го положи́те м̂ѧ, да съхрани́тсѧ ко́сть моѧ̀ с ко́стьми е҆го·

Ꙗ҆́ко пребꙋдетъ гл҃ъ и҆же гл҃а словесемъ гн҃им꙽ ѻ҆ ѻ҆лтарѝ и҆же въ веѳи́лѣ, и҆ ѻ҆ до́мх̑ѣ высо́кихъ и҆же в꙽ самарїи́·

И҆ по гл҃ѣ се́мъ не възврати́сѧ і҆е҆ровоамъ ѿ ѕло́бы свое҆ѧ и҆ възврати́сѧ, и҆ сътворѝ ѿ ча́сти е҆ді́ноѧ людїи.
і҆е҆ре́ѧ высокїѧ е҆же помы́сли т̂о и҆ съвръшѝ рꙋко́ю, и҆ бы́сть і҆е҆ре́и въ высо́ких꙽·

И҆ бы́сть гла́съ се́и въ прегрѣшенїе в домꙋ̀ і҆е҆ровоа́мли на и҆спроверже́нїе, на и҆щезнове́нїе ѿ лица̀ зе́мли·

Глв̑҇а, д҃і·

Въ вре́мѧ ѻ҆́но раз̑болѣ́сѧ а҆вїѧ сн҃ъ і҆е҆ровоа́мль·

И҆ реч̑҇ і҆еровоам̑ женѣ̀ свое́и, востани.
і҆ из̑мѣни ри́зы своа да не познают̑ т̂ѧ ꙗ҆́ко ты жена і҆е҆ровоа́мова і҆ и҆дѝ в силом̑, се б̂о та́мо а҆хїѧ про̑҇ркъ то́й гл҃а ѻ҆ мнѣ̀, е҆же црс̑҇твовати над̑ люд̑ми си́ми·

И҆ возми в꙽ рꙋцѣ твоѝ чл҃кꙋ бж҃їю хлѣбы и҆ ѻ҆прѣсноки и҆ гро́здїе, и҆ сосꙋ́дъ ме́дꙋ.
і҆ и҆дѝ к не́мꙋ, и҆ то́й возвѣсти́т꙽ т̂и чт̂о бꙋ́детъ съ ѻ҆троча́темъ си́мъ·

И҆ сътворѝ та́ко жена̀ і҆е҆ровоа́млѧ.
и҆ воста́въ и҆́де в сило́мъ, и҆ вони́де в дом̑ а҆хїи́нъ, а҆хїѧ же старъ бы́сть и҆ ѻ́чи е҆го ѻ҆мрачи́стасѧ не ви́дѣти·

И҆ рече г҃ь къ а҆хїи, с̂е в꙽ходит꙽ к тебѣ̀ жена̀ і҆е҆ровоа́мова вопраша́ти т̂ѧ ѻ҆ сн҃ꙋ е҆ѧ̀ ꙗ҆́ко болѣзнꙋ́ет꙽, и҆ по семꙋ да гл҃еши к ней внегда̀ бо в꙽ходи́ти и́мать ꙗ҆ви́тсѧ и҆́ною·

И҆ бысть е҆гда ѹ҆слы́ша а҆хїа стꙋпа́нїе но́гъ е҆ѧ̀, въходѧ́щи е́й ко вра́том̑.
и҆ реч̑҇ вни́ди же́но і҆е҆ровомова, почт̂о кры́ешисѧ, а҆́зъ б̂о е҆смь посла́н꙽никъ к тебѣ̀ лю́тъ·

Возврати́сѧ и҆ возвѣстѝ і҆е҆ровоа́мꙋ.
та́ко гл҃етъ г҃ь б҃ъ і҆и҆л҃евъ, поне́же вознесо́хъ т̂ѧ ѿ сре́ди людїи, и҆ дахъ т̂ѧ во́жда лю́демъ моим̑ і҆и҆л҃ю.
и҆ ѿѧ́хъ црс̑҇тво ѿ домꙋ двд҃ва.
и҆ дахъ е҆̀ тебѣ ты́ же не бы́сть ꙗ҆́ко ра́бъ мо́и дв҃дъ ѻ҆́нже сохранѝ за́повѣди моа̀.
и҆ ходѝ въ слд̑ѣ мене всѣмъ срд̑цемъ творѧ́ще сїѧ е҆же ѹ҆год̑но бы́сть предо мно́ю·

Ты́ же ѕолъ и҆ ѕла́ѧ творѧ̀ па́че всх̑ѣ и҆же пред̑ тобо́ю бы́ша, ꙗ҆́ко по́иде и҆ сотворѝ себѣ бо́ги чю́жды солїа́нны.
въ прогнѣва́нїе мн̂ѣ, и҆ ѿвръже м̂ѧ соза́ди себѐ·

Сего ради с̂е а́зъ навождꙋ ѕла́ѧ на до́мъ і҆е҆ровоа́мовъ, и҆ потреблю̀ і҆е҆ровоа́ма мочащаго ко стѣнѣ.
ѿве́ржена бесче́стна въ і҆и҆л҃и, і҆ соберꙋ і҆е҆ровоа́ма ꙗ҆ко̑ собирает̑сѧ гно́и до́ндеже соверши́ти.
і҆ и҆стощꙋ ѻ҆ста́н꙽ки і҆е҆ровоа́мовы·

Ѹ҆мершаг̑҇ і҆е҆ровоа́мова и҆ во граде и҆зъꙗдѧ́тъ ѱи.
и҆ ѹ҆мръшаго на селѣ̀ и҆зъꙗ҆дѧт̑ пти́цы нбс̑҇ныѧ, си́це гл҃а г҃ь б҃ъ·

Ты́ же воста́въ и҆дѝ в до́мъ тво́и.
и внегда̀ входи́ти нога́ма твои́ма во́ град̑.
ѹ҆́мретъ дѣтищъ·

И҆ въспла́четсѧ по не́мъ весь і҆и҆л҃ь и҆ погребꙋтъ и҆̀.
то́й б̂о толи́ко е҆ді́нъ погребе́нъ бꙋ́детъ ѿ ро́дꙋ і҆е҆ровоа́млѧ, ꙗ҆́ко ѻ҆брѣтесѧ в немъ гл҃ъ бл҃гъ ѻ҆ г҃ѣ бѕ҃ѣ і҆и҆л҃евѣ въ домꙋ і҆е҆ровоа́мли·

И҆ воста́вит̑ себѣ г҃ь цр҃ѧ над̑ і҆и҆л҃емъ, и҆же и҆скорени́тъ домъ і҆е҆ровоа́мовъ в то́и дн҃ь·

И҆ нака́жет̑ г҃ь б҃ъ і҆и҆л҃ѧ, и҆ поколѣблет̑ и́ми, ꙗ҆́коже колѣблет̑сѧ тро́сть вѣтром̑ на водѣ̀·

І҆ и҆зоръвет̑ і҆и҆л҃ѧ ѿ высоты̀ землѝ бл҃гїѧ сїѧ, ю҆́же дал̑҇ е҆сть ѿц҃емъ их̑, и҆ проженет̑ ѧ҆̀ ѿ ѻ҆бо́нꙋ странꙋ̀.
понеже сотвори́ша̑ себѣ̀ ка́пищи прогнѣва́юще г҃а·

Сего ради преда́сть г҃ь і҆и҆л҃ѧ грѣха̀ ради і҆е҆ровоам̑лѧ им̑же согрѣши, і҆ и҆мже грѣшити приведѐ і҆и҆л҃ѧ·

И҆ воста̀ жена̀ і҆е҆ровоа́млѧ.
і҆ и҆дѐ, и прїиде въ сари́рꙋ, и҆ бы́сть е҆гда̀ вни́де во пред̑дверїе до́мꙋ, и҆ дѣтищъ ѹ҆́мре·

И҆ погребо́ша и҆̀, и҆ пла́касѧ по нем̑ ве́сь і҆и҆л҃ь по слевесѝ гн҃ю е҆же гл҃а рꙋко́ю раба̀ свое҆го а҆хїѧ про̑҇рка·

ѻ҆ста́нок꙽ же сло́въ і҆е҆ровоа́мовыхъ е҆ли́ко сътворѝ, и҆ е҆ли́ко црс̑҇твова с̂е сїѧ напи́сана въ кни́ѕе гл҃ъ дн҃їи цр҃еи і҆и҆л҃евыхъ·

И҆ дн҃їе в ни́хже црс̑҇твова̀ і҆е҆ровоамъ, быша лѣтъ, к҃в.
и҆ ѹ҆спѐ съ ѿц҃ы свои́ми.
и҆ въцр҃исѧ а҆да́нъ сн҃ъ е҆го внего̀ мѣсто·

Ровоа́м же сн҃ъ соло́монь црс̑҇твова над̑ і҆ѹ́дою и҆ бысть е҆мꙋ м҃, и҆ е҆ді́но лѣто.
е҆гда нача̀ црс̑҇твова́ти.
и҆ з҃і, лт̑ѣ црс̑҇твова въ і҆ерс̑҇ли́мѣ гра́дѣ е҆же и҆збра̀ г҃ь в нем̑ положи́ти и҆́мѧ свое т̂ꙋ ѿ всѧ́кого колѣ́на і҆и҆л҃ева.
и҆́мѧ б̂ѣ мт҃ри е҆го наа́на амані́тѧныни·

И҆ сътвори ровоам̑ лꙋка́вое пред̑ гм҃ъ, и҆ раз̑дражи и҆̀ ѻ҆ всх̑ѣ ꙗ҆́же сътвори́ша ѿц҃ы их̑.
ѻ҆ грѣсѣхъ и҆хъ и҆́миже съгрѣши́ша·

И҆ съгради́ша сїѝ себѣ̀ высо́каѧ.
и҆ стол̑҇пы̀ и҆ ка́пища на всѧ́ком̑ хл́ъмѣ высо́цѣмъ и҆ под̑ всѧ́цм̑ѣ древом̑ смоко́вничнымъ·

И҆ сплетенїе б̂ѣ ѕл̂о въ землѝ и҆хъ.
и сътвори́ша ѿ всѣхъ ме́рских̑ ꙗ҆зык̑҇, ꙗ҆́же и҆спровръже г҃ь ѿ лица̀ сн҃овъ і҆и҆л҃ев꙽·

И҆ бысть в꙽ лѣто, е҃ е, црс̑҇твꙋю҆щи ровоа́мꙋ.
в꙽зы́де сꙋсаким̑ цр҃ь е҆гѷпет̑скїи на і҆ерс̑҇лим̑·

И҆ взѧ̀ вс̂ѧ сокро́вища до́мꙋ гн҃ѧ и҆ сокро́вища в домѣ цр҃евѣ.
и҆ ѻ҆рꙋжїа зла́таа ꙗ҆́же б̂ѣ взѧл꙽ двд̑ъ и҆з рꙋкѝ ѻ҆́трок̑҇ а҆драза́ра цр҃ѧ сꙋв꙽скаго и҆ вне́слъ ѧ҆̀ б̂ѣ въ і҆ерс̑҇лимъ вс̂ѧ взѧ же и҆ щита зла́таѧ, ꙗ҆́же б̂ѣ сътвори́лъ соло́монъ и҆ внесе ѧ҆̀ въ е҆гѷпетъ·

И҆ сътворѝ цр҃ь ровоам̑ ѻ҆рꙋжїѧ мѣденаѧ в꙽ того̀ мѣсто.
и҆ поста́ви над̑ ни́мъ вла́стелѧ.
ѿ пред̑ри́щꙋщих̑ пред̑ ни́мъ и҆же хранѧ́хꙋ вра́тъ домꙋ цр҃ева·

И҆ бысть внегда̀ въходи́ти нача цр҃ь в до́мъ гн҃ь носѧ́хꙋ ѧ҆̀ пред̑ри́щꙋщїи.
и҆ па́ки возвращахꙋ во сокро́вище·

Прочїи же гл҃ъ ровоамль и҆ вс̂ѧ ꙗ҆́же сотвори.
не с̂е ли сꙋть пи́сана въ кни́ѕѣ слов̑҇ дн҃и црс̑҇тва і҆ѹ́дина·

И҆ бра́нь б̂ѣ ме́ждꙋ ровоа́мом̑.
и҆ междꙋ і҆е҆ровоа́момъ въ всѧ дн҃и ты̀·

И҆ ѹ́мре ровоа́мъ, и҆ погребе́нъ бы́сть съ ѿц҃ы свои́ми, во́ градѣ двд҃вѣ.
и҆ цр҃ьствова̀ а҆вїѧ сн҃ъ е҆го въ е҆го мѣсто.

Глв̑҇а, е҃і·

Во ѻ́смоена́десѧте, лѣто црс̑҇тва і҆е҆ровоа́мова сн҃а нава́това.
нача црс̑҇твова́ти а҆вїѧ сн҃ъ ровоа́мль, надъ і҆ѹ́дою·

И҆ тр̂и лѣта цр҃ьствова въ і҆ерс̑҇ли́мѣ.
и҆́мѧ мт҃ри его маа́꙽ ха дщ̂и а҆весало́млѧ·

И҆ хожда́ше въ всѣхъ грѣсѣхъ ѿц҃а свое҆го ꙗ҆́же сътвори пред̑ нимъ.
и҆ не бѣ̀ срд̑це е҆го съвръшено съ гм҃ъ бм҃ъ е҆го ꙗ҆́кож̑ б̂ѣ двд̑ꙋ срд̑це ѿц҃а е҆го·

Но двд̑а рад̑и̑ ѻ҆ста́ви и҆̀ г҃ь б҃ъ ѻ҆ста́нок̑҇ во і҆ерс̑҇лмѣ.
да воставлѧ́ѧ поста́ви по нем̑ ча́да е҆го ѹ҆твер꙽ждаѧ і҆ерс̑҇ли́м꙽·

Ꙗ҆́коже сътворѝ дв҃дъ ѹ҆год̑ное пред̑ гм҃ъ.
и҆ не ѹ҆клони́сѧ ѿ всего̀ е҆же заповѣ́да е҆мꙋ вс̂ѧ дн҃и живота̀ е҆го.
кро́мѣ е҆ді́наго сло́ва ѹ҆́рїѧ хетѳе́искаго·

И҆ бра́нь б̂ѣ ме́ждꙋ ровоа́момъ, и҆ междꙋ і҆е҆ровоа́мом̑ въ вс̂ѧ дн҃и живота е҆го·

И прочаѧ словесъ а҆вїиных̑ и҆ вс̂ѧ ꙗ҆́же сътворѝ не се л̂и сїѧ напи́сана въ кни́гахъ слов̑҇ бы́тїѧ цр҃еи і҆ѹ́диныхъ.
и҆ брань б̂ѣ ме́ждꙋ а҆вїемъ и҆ междꙋ і҆е҆ровоа́мом̑·

И ѹ́мре а҆вїи и҆ положе́нъ бысть съ ѿц҃ы свои́ми.
въ к҃ е лѣто і҆е҆ровоа́ма, и҆ погребо́ша и҆̀ съ ѿц҃ы е҆го во́ градѣ двд҃вѣ.
и҆ црс̑҇твова а҆са сн҃ъ е҆го въ мѣсто е҆го·

И҆ въ лѣто, к҃ е, і҆е҆ровоа́ма цр҃ѧ і҆и҆л҃ева, црс̑҇твова́ша а҆́са над̑ і҆ѹ́дою·

И҆ м҃ и҆ а҃, лѣто, црс̑҇твова въ і҆ерс̑҇ли́мѣ.
и҆́мѧ же мт҃ри е҆го а҆́на дщ̂и а҆весало́млѧ·

И҆ сотворѝ а҆́са ѹ҆год̑ное пред̑ гм҃ъ ꙗ҆́коже и҆ дв҃дъ ѿц҃ъ е҆го·

И҆ ѿѧ́тъ сквернаѧ ѿ землѧ̀.
і҆ и҆скорени вс̂ѧ и҆зваѧ́ннаѧ ꙗ҆́же сътвори́ша ѿц҃ы е҆го·

И҆ а́нꙋ мт҃рь свою ѻ҆ста́ви ꙗ҆́ко не владѣти е́й.
ꙗ҆́ко сотвори соборъ ѻ҆ ка́пищꙋ еѧ̀ и҆ ѿсѣче а҆́са га́и е҆ѧ̀.
и҆ сож꙽же ѻ҆гне́м꙽ в потоцѣ ке́дръстѣмъ·

Высоких̑ же не и҆скорени срд̑це же а҆сїино б̂ѣ съвръшенно пред̑ гм҃ъ во всѧ́ дн҃и е҆го·

И҆ вънесе сосꙋ́ды ст҃ыѧ ѿц҃а свое҆го и҆ ст҃аѧ своѧ̀ внесѐ въ храмъ гн҃ь, сре́брены и҆ зла́ты сосꙋ́ды·

И҆ бра́нь б̂ѣ межи а҆сїею.
и҆ межи ваа́сом̑ цр҃емъ і҆и҆л҃евым̑ въ всѧ̀ дн҃и и҆хъ·

И҆ възы́де ваа́са цр҃ь і҆и҆л҃евъ на і҆ѹ́дꙋ.
и҆ созда̀ ра́мꙋ ꙗ҆́ко не бы́ти на вохожде́нїе і҆ и҆схожде́нїе а҆́сѣ цр҃ю і҆ѹ́динꙋ·

И҆ взѧт̑ а́са вс̂е сребро̀ и҆ зла́то, и҆ ѻ҆брѣтъшее҆сѧ въ сокровищихъ до́мꙋ гн҃ѧ.
и҆ в꙽ сокро́вищахъ до́мꙋ цр҃ева.
и҆ дасть ѧ҆̀ въ рꙋцѣ ѻ҆́трокъ свои҆хъ.
и҆ посла̀ и҆̀ цр҃ь а҆́са къ сн҃ꙋ а҆деровꙋ, тавїинꙋ въ рама́нъ, къ сн҃ꙋ а҆зеи́левꙋ, цр҃ѧ а҆сѷрїиска живꙋщаго въ дама́сцѣ гл҃ѧ·

Положѝ завѣтъ межи мно́ю и҆ тобо́ю и҆ межи ѿц҃ем꙽ моим̑ и҆ ѿцм҃ъ твоим̑.
с̂е послах̑ т̂и дары сребро̀ и҆ зла́то.
прїиди и҆ раз̑дрꙋши завт̑ѣ твои и҆же съ ваа́сою цр҃емъ і҆и҆л҃евымъ.
да и҆зы́детъ ѿ менѐ·

И҆ послꙋша сн҃ъ а҆да́ровъ цр҃ѧ а҆́сы.
и посла̀ вое҆водъ си́лных̑ е҆го на гра́ды і҆и҆л҃евы.
и҆ побѣдѝ а҆и́на, и҆ а҆да́нъ.
и҆ а҆ве́лѧ домꙋ махїи́на, и҆ весь хенере́ѳъ до всеѧ̀ землѧ̀ неѳали́млѧ·

И҆ бысть ꙗ҆́ко ѹ҆слы́шавъ ваа́са.
и҆ ѻ҆ста́ви ѕи́жда ра́мꙋ, и҆ возврати́сѧ въ ѳе́рсꙋ·

И цр҃ь а҆́са заповѣ́да всемꙋ̀ і҆ѹ́дѣ въ е҆наки́мѣ.
и҆ взѧ́ста ка́менїе ѿ ра́мы и҆ дре́во е҆ѧ̀, и҆́мже б̂ѣ ѻ҆снова́лъ ваа́са.
и҆ созда̀ в них̑ цр҃ь а҆́са всѧ́къ хл́ъмъ венїа҆ми́нь и҆ стра́жища·

И҆ прочаа словеса̀ а҆́сина и҆ вс̂ю си́лꙋ е҆го и҆ всѧ ꙗ҆́же сътвори, и҆ грады ꙗ҆́же созда̀.
и҆ с̂е сꙋть писана въ кни́зѣ слове́съ дн҃їи цр҃ь і҆ѹ́диных̑, въ вре́мѧ же ста́рости свое́ѧ нача́тъ болѣти но́ги е҆го·

И҆ ѹ́мре а҆́са, и҆ погребо́ша и҆̀ съ ѿц҃ы е҆го во́ градѣ давы́довѣ.
и҆ црс̑҇твова и҆ѻ҆сафат̑ сн҃ъ е҆го въ е҆го мѣсто·

Нада́волъ же сн҃ъ і҆е҆ровоа́мль нача̀ црс̑҇твова́ти над̑ і҆и҃лем̑ въ второ́е лѣто а҆́сы цр҃ѧ і҆ѹ́дина и҆ црс̑҇твова над̑ і҆ерс̑҇ли́момъ дв̂ѣ лѣтѣ·

И сътвори лꙋка́вное пред̑ гм҃ъ.
и҆ хожда́ше пꙋтемъ ѿц҃а свое҆го.
и҆ по грѣхо́мъ е҆го и҆́миже съгрѣшѝ въ і҆и҆л҃и·

И ѻ҆б꙽сѣ́де и҆̀ ваа́са сн҃ъ а҆хїинъ в домꙋ̀ веланїи сн҃а а҆хїина.
и҆ ѹ҆би́ша е҆го в꙽ гаваѻ́нѣ и҆ноплеме́нникъ.
и҆ надав̑҇ б̂о и҆ весь і҆и҆л҃ь ѻ҆бъсѣдо́ша а҆гаваѳон̑҇·

І҆ и҆збѝ ѧ҆̀ ваа́са въ лѣто, г҃ е, а҆́сы цр҃ѧ і҆ѹ́дина.
и҆ црс̑҇твова̀ в него мѣсто·

И҆ бысть ꙗ҆ко црс̑҇твова.
и҆ побѝ весь до́мъ і҆е҆ровоа́мль, и҆ не ѻ҆ста́ви ничтоже ѿ всего дыха́нїѧ і҆е҆ровоам̑лѧ до́н꙽деже и҆скоренѝ и҆хъ по гл҃ꙋ гн҃ю.
и҆же гл҃а рꙋкою раба̀ свое҆го а҆хїѧ силонит̑скаго·

Грѣхъ ради і҆е҆ровоа́млих̑ и҆́миже съгрѣши, и҆́миже і҆и҆л҃ѧ въ грѣхъ въведѐ.
и҆ въ прогнѣ́ванїи е҆го и҆́мже прогнѣ́ва г҃а б҃а і҆и҆л҃ева·

И҆ про́чаѧ словеса̀ нада́ва.
и҆ вс̂е ꙗ҆́же сътворѝ.
не с̂е ли сꙋть вс̂ѧ пи́сана въ кни́зѣ словъ дн҃їи цр҃ь і҆и҆л҃евъ·

И҆ быс̑҇ бра́нь междꙋ а҆́сою цр҃емъ і҆ѹ́диным꙽ и҆ ваа́сою цр҃емъ і҆и҆л҃евым̑ во всѧ̀ дн҃и их̑·

И҆ въ тре́тїе лѣто а҆́сы цр҃ѧ і҆ѹ́дина.
црс̑҇твова ваа́са сн҃ъ а҆хїи́нъ надо всм̑ѣ црс̑҇твомъ і҆и҆л҃евымъ въ ѳе́рсѣ.
к҃, и҆ д҃ лѣта·

И҆ сътворѝ лꙋка́вное пред̑ гм҃ъ, і҆ и҆́де пꙋтемъ і҆е҆ровоа́млимъ сн҃а нава́това.
и҆ во грѣсѣхъ е҆го им̑же въ согрѣше́нїе приведѐ і҆и҆л҃ѧ·

Глв̑҇а, ѕ҃і·

И бы́сть сло́во гн҃е рꙋко́ю сн҃а а҆на́нина ко ваа́се гл҃ѧ·

Поне́же вознесох̑ т̂ѧ на землѝ.
и҆ дах̑ т̂ѧ вла́стелѧ над̑ люд̑мѝ мои҆ми і҆и҆л҃емъ.
и҆ хо́диши пꙋтемъ і҆е҆ровоа́млимъ.
и҆ въведѐ въ грѣхъ лю́ди моѧ і҆и҆л҃ѧ.
е҆же прогнѣ́вати м̂ѧ сꙋе́тными их̑·

Се а҆́зъ ѿвръгꙋ наслѣ́дїе ваа́са.
и҆ наслѣдїе до́мꙋ твое҆го и҆ сътворю до́мъ тво́и ꙗ҆́ко дом̑ і҆е҆ровоа́мль, сн҃а нава́това·

Ѹ҆мръшего воа҆со́ва во́ градѣ снѣдѧт̑ ѱѝ.
и҆ ѹ҆мръшего на́ по́ли снѣдѧ́тъ пти́ца нбс̑҇ныѧ·

И҆ про́чаѧ слове́съ ваа́синъ и҆ вс̂е е҆же сотвори.
и҆ си́лнаѧ е҆го.
не с̂е ли сꙋть пи́сана въ кни́зе сло́въ дн҃їи цр҃ь і҆и҆л҃евъ·

И҆ ѹ́мре ваа҆́са и҆ погребен̑҇ бысть съ ѿц҃ы свои҆ми в꙽ ѳа́рсѣ.
и҆ црс̑҇твова̀ и҆́ла сн҃ъ е҆го в него̀ мѣсто·

И в рꙋцѣ сн҃а а҆на́нїѧ про̑҇рка гл҃а г҃ь на ваа́сꙋ и҆ на дом̑ е҆го вс̂ю ѕлобꙋ е҆же сътворѝ пред̑ гм҃ъ е҆же прогнѣ́вати и҆̀ дѣ́ломъ рꙋ́кꙋ е҆го.
быти е҆мꙋ ꙗ҆́коже и҆ до́мꙋ і҆е҆ровоа́млю.
и҆ ѻ҆ то́мъ е҆же е҆мꙋ пораже́нꙋ быти·

В лѣто к҃ѕ е, а҆́сы цр҃ѧ і҆ѹ́дина црс̑҇твова̀ и҆́ла сн҃ъ ваа́синъ над̑ і҆и҆л҃емъ въ ѳе́рсѣ, в҃, лѣтѣ.
и҆ воздви́же г҃ь на́нь ѻ́троки е҆го зам꙽врїи кнѧ́ѕь полови́ны ко́н꙽никъ.
и҆ се́й б̂ѣ въ ѳе́рсѣ ѹ҆пи́въсѧ и҆ пїѧ́нъ сы́и в до́мꙋ а҆́сы, б̂ѣ строѧ́ше въ ѳе́рсѣ·

И҆ вни́де замъврїи, и҆ ѹ҆би и҆̀ и҆ ѹ҆мрътвѝ.
в лѣто, к҃з е а҆́сы цр҃ѧ і҆ѹ́дина.
и҆ црс̑҇твова̀ в него̀ мѣсто·

И бысть црс̑҇твꙋ́ющꙋ е҆мꙋ, е҆гда̀ сѣ́сти е҆мꙋ на прс̑҇тлѣ е҆го, и҆збѝ весь до́мъ ваа́синъ по гл҃ꙋ гн҃ю.
и҆же гл҃а на до́мъ ваа́синъ.
и҆ ко е́хꙋ про̑҇ркꙋ ѻ҆ всѣхъ грѣсѣхъ ваа́сїихъ, і҆ и́ле сн҃ꙋ е҆го и҆же съгрѣши въ і҆и҆л҃и, е҆же разгнѣ́вати г҃а б҃а і҆и҆л҃ева сꙋ́етными свои́ми·

Ѡ҆ всѣх же про́чїих словесх̑ѣ и҆́лы и҆ ѻ҆ всѣхъ и҆же сътворѝ.
не с̂е ли пи́сана въ кни́гахъ словесъ дн҃їи цр҃ь і҆и҆л҃евъ·

В лѣто, к҃з е, цр҃ѧ і҆ѹ́дина црс̑҇твова замъврїи сед̑мь дн҃їи въ ѳе́рсѣ.
и҆ б̂ѣ по́лкъ і҆и҆л҃евъ на гаваѳо́нѣ и҆ноплеме́нничестѣм꙽·

И҆ слы́шаша лю́дїе сꙋщїи в꙽ по́лцѣ гл҃ющих̑ преврати́сѧ зам̑врїи нападѐ на цр҃ѧ и҆ ѹ҆би и҆̀, и҆ поста́виша цр҃емъ во і҆ерс̑҇ли́мѣ замъврїѧ властїлина, и҆же над̑ во́ѧми въ і҆и҆л҃и во дн҃и ѻ́ны в꙽ по́лцх̑ѣ·

И҆ възы́де а҆м꙽врїи и҆ весь і҆и҆л҃ь с ни́мъ ѿ гаваѳо́на.
и҆ ѻб̑҇сѣде ѳе́рсꙋ·

И҆ бы́сть ꙗ҆ко ви́дѣ зам꙽врїи ꙗ҆́ко пред̑ и҆ма́етъ град̑.
и҆ вни́де въ странꙋ̀ до́мꙋ цр҃ѧ, и҆ заж꙽же до́мъ цр҃евъ верхꙋ себе·

И҆ ѹ́мре за грѣхи своѧ̀ ꙗ҆́же сътворѝ сътворе́нїѧ ради лꙋка́ваго пред̑ гм҃ъ, и҆же ходѧ пꙋтем̑ і҆е҆ровоа́млем̑ сн҃ом꙽ нава́товым̑.
и҆ въ грѣсѣхъ своих̑ ꙗ҆же съгрѣшѝ, и҆ ꙗ҆́же воведѐ во грх̑ѣ і҆и҆л҃ѧ·

И҆ про́чаѧ словес̑҇ зам̑врїинъ, и҆ възвѣщенїи е҆го ꙗ҆́же и҆звѣща̀.
не с̂е ли сꙋть пи́сана в꙽ кни́гах̑ сло́въ дн҃їи цр҃ь і҆и҆л҃въ·

Тогда̀ раздѣли́шасѧ лю́ди і҆и҆л҃ьстїи, по́лъ людїи бы́сть за ѳам̑нїемъ сн҃ом꙽ гона́ѳовымъ е҆же да црс̑҇твꙋетъ ѻ́нъ, и҆ полъ лю́дїи бысть по а҆мъврїю·

Лю́дїе же сꙋщїи по а҆м꙽врїю ѹ҆дръжа́ша лю́ди, бы́вшаѧ по ѳамнїю сн҃ѣ гона́ѳовѣ.
и҆ ѹ́мретъ ѳам꙽нїи, и҆ ѻ҆ра́мъ братъ е҆го.
въ вре́мѧ ѻ́но.
и҆ црс̑҇твова а҆м꙽врїи по ѳамънїю.
въ а҃ е лѣто а҆́сы цр҃ѧ і҆ѹ́дина·

В лѣто л҃а, а҆́сы цр҃ѧ і҆ѹ́дина црс̑҇твова а҆мъврїи въ і҆и҆л҃и, в҃і, лт̑ѣ·

въ ѳе́рсѣ же ѕ҃, лѣтъ црс̑҇твова·

И҆ кꙋпѝ а҆мъврїи горꙋ семе́рьскꙋ, в семи́ра двѣма̀ тала́нтома сребра̀, и҆ созда̀ горꙋ.
и҆ нарече и҆́мѧ горѣ̀ и҆же созда̀ въ и҆́мѧ семи́ра, по и́мени семе́ра господи́на горы̀ ѻ҆но́ѧ гора̀ семи́ръ·

И҆ сътворѝ а҆м꙽врїи лꙋка́вое пред̑ гм҃ъ, и҆ прелꙋка́во.
па́че всѣхъ бы́вшихъ пред̑ ним̑·

И҆ хожда́ше по всѣмъ пꙋтем̑, і҆е҆ровоа́млимъ сн҃а нава́това.
и҆ во безако́нїих̑ е҆го и҆́миже съгрѣши въ і҆и҆л҃и.
и҆же раз꙽гнѣ́вати г҃а б҃а і҆и҆л҃ева, въ сꙋет̑ных̑ е҆го·

И҆ про́чаѧ слове́съ а҆м꙽врїевыхъ и҆ вс̂е е҆ли́ко сътвори и҆ вс̂ѧ си́ла е҆го.
не с̂е ли сꙋть пи́сана в꙽ кни́ѕѣ слов̑҇ дн҃їи цр҃ь і҆и҆л҃евъ·

И҆ ѹ́мре а҆м꙽врїи, и҆ погребе́нъ бы́сть съ ѿц҃ы свои҆ми в꙽ самарїи.
и҆ нача̀ црс̑҇твова́ти а҆хаав̑҇ сн҃ъ е҆го въ е҆го мѣсто·

А҆хаа́въ же сн҃ъ а҆м꙽врїевъ црс̑҇твова над̑ і҆и҆л҃емъ, в лѣто, л҃и е.
а҆́сы цр҃ѧ і҆ѹ́дина.
црс̑҇твова же а҆хаа́въ, сн҃ъ а҆м꙽врїевъ над̑ і҆и҆л҃емъ в самарїи, лѣтъ, к҃в.
и҆ въ а҃і, лѣто, а҆м꙽врїино црс̑҇твова́ти начатъ і҆ѻ҆сафа́тъ сн҃ъ а҆сїи́н꙽ лѣтъ, л҃е, въ црс̑҇твѣ е҆го.
и҆ к҃е, лт̑ѣ црс̑҇твова въ і҆ерс̑҇ли́мѣ·

И҆́мѧ б̂ѣ мт҃ри е҆го газꙋ́ва дщ̂и селїина, и҆ ход̑и̑ по пꙋте́мъ а҆́сы ѿц҃а свое҆го и҆ не ѹ҆клони́сѧ ѿ него̀ е҆же твори́ти бл҃гое пред̑ гм҃ъ.
то́кмо высо́ких̑ не развръже, н̂о жрѧ́хꙋ на высо́ких̑·

И҆ и҆́же сложи́сѧ и҆ѻ҆сафатъ съ цр҃емъ і҆и҆л҃евымъ, и҆ вс̂ѧ си́ла е҆го ю҆же сътворѝ і҆ и́хже побѣдѝ, не се́ ли сꙋть пи́сана в꙽ книзѣ слове́съ дн҃їи цр҃ь і҆ѹ́дин꙽·

И҆ прочаѧ смѣше́нїѧ ꙗ҆́же бѣша въ дн҃и а҆́сы ѿц҃а е҆го и҆стребѝ ѿ землѧ̀, и҆ цр҃ѧ не бѣ̀ въ а҆сѷрїи наси́в꙽стеи и҆ цр҃ь и҆ѻ҆сафа́тъ сътворѝ ка́рабль въ ѳарси́се и҆тѝ въ софиѳ̑҇рꙋ по зла́то и҆ не и҆́де ꙗ҆ко съкрꙋши́сѧ кара́бль въ гасиѻ́не га́в꙽стемъ тогда̀ рече цр҃ь і҆и҆л҃евъ къ а҆сафа́тꙋ пошлю̀ ѻ҆́троки моѝ съ ѻ҆́троки твои́ми, и҆ не въсхотѣ̀ і҆ѻ҆сафа́тъ, и҆ ѹ́мре і҆ѻ҆сафа́тъ и҆ положе́нъ бы́сть съ ѿц҃ы свои҆ми въ градѣ двд҃вѣ, и҆ црс̑҇твова и҆ѻ҆ра́мъ сн҃ъ е҆го в него мѣ́сто,꙽ въ вто́рое лѣто і҆ѻ҆сафа́та цр҃ѧ і҆ѹ́дина·

А҆ха́в же сїи сн҃ъ а҆м꙽врїи́н꙽ црс̑҇твова̀ над̑ і҆и҆л҃ем꙽ въ самарїи к҃в лѣта, и҆ сътворѝ а҆ха́въ сн҃ъ а҆м꙽врїи́нъ лꙋка́вое пред гм҃ъ, и҆ слꙋкова̀ па́че всѣхъ пре́жних̑ е҆го·

И҆ б̂ѣ е҆мꙋ дово́лно е҆же ходи́ти въ грѣсѣхъ і҆е҆ровоа́млихъ сн҃а нава́това, и҆ поꙗ҆́тъ женꙋ̀, и҆е҆заве́лю дще́рь и҆е҆ѳава́лю цр҃ѧ сидо́ньска, и҆ шед̑ и҆ нача̀ слꙋжи́ти кꙋми́рꙋ и҆е҆ваа́лю, и҆ поклони́сѧ е҆мꙋ·

И҆ сътворѝ тре́бникъ ваа́лꙋ в домꙋ̀ приноше́нїи е҆го, и҆же созда̀ въ самарїи·

И҆ сътвори а҆хаа́въ мръ́ское пред̑ гм҃ъ, и҆ приложи а҆хаа́въ сътворити разъгнѣва́нїе, е҆же разгнѣ́ва г҃а б҃а і҆ил҃ева паче всѣхъ цр҃ь і҆и҆л҃евъ бы́вшихъ пре́жнихъ е҆го·

Въ дн҃и же е҆го созда̀ а҆хїи́лъ и҆ веѳїилъ е҆рихо́нъ над̑ а҆вира́мѣ пръворо́дномъ свое҆мъ ѻ҆снова̀ и҆̀.
и҆ на ѕегꙋ́вѣ ю҆нѣ́ишемъ свое҆мъ.
и҆ ѹ҆строѝ две́ри е҆го по гл҃ꙋ гн҃ю е҆же гл҃а рꙋкою і҆сꙋса сн҃а навѷи҆на·

Глв̑҇а, з҃і·

И прїиде и҆лїѧ̀ про̑҇рк꙽ ѿ ѳезві́ѧ галаа́дъскїѧ къ а҆хаа́вꙋ, и҆ рече, жи́въ г҃ь б҃ъ і҆и҆л҃въ и҆же пред̑стою̀ пред ни́мъ.
а҆ще бꙋдетъ в лѣто с̂и роса̀ и҆л̂и дождъ, то́лїи ѿ ѹ́стъ словесѝ мое҆го·

И҆ бы́сть гл҃ъ гн҃ь къ и҆лїѝ, и҆дѝ ѿсю́дꙋ на восто́къ.
и҆ скры́исѧ в꙽ потоцѣ хора́ѳа прѧ́мо лицꙋ̀ і҆ѻ҆рда́новꙋ·

И҆ бꙋдеши пи́ти ѿ пото́ка во́дꙋ и҆ вра́номъ заповѣ́дахъ препита́ти т̂ѧ тꙋ̀·

И҆ сътворѝ и҆лїѧ̀ по г҃лꙋ гн҃ю, и҆ сѣдѣ при пото́цѣ хора́ѳи прѧ́мо лицꙋ̀ і҆ѻ҆рда́новꙋ·

И҆ вра́нове приноша́хꙋ е҆мꙋ хлѣ́бы заѹ́тра, и҆ мѧ́са к ве́черꙋ, и҆ ѿ пото́ка пїꙗ҆́ше во́дꙋ·

И҆ бы́сть по дн҃ехъ и҆сшѐ и҆с꙽то́чникъ.
ꙗ҆́ко не бѣ̀ до́жда на́ землю·

И҆ бы́сть гл҃ъ гн҃ь къ и҆лїѝ гл҃ѧ·

Въста́ни і҆ и҆дѝ въ саре́ѳꙋ сидо́ньскꙋю и҆ пребꙋди та́мо.
се́ бо заповѣдахъ т̂ꙋ женѣ̀ вдови́ци препита́ти т̂ѧ·

И҆ въста́въ и҆́де въ саре́ѳꙋ сидо́ньскꙋю.
и҆ прїиде къ вра́томъ гра́да, и҆ с̂е т̂ꙋ жена̀ вдови́ца събира́ющи дровца, и҆ възопѝ съзад̑и̑ и҆лїѧ̀, и҆ рече е́и.
принесѝ ѹ҆́бо ма́ло воды̀ в꙽ сосꙋ́дѣ и҆ да пїю·

І҆ и́де взѧти и҆ възопѝ въ слѣдъ е҆ѧ̀ и҆лїѧ̀.
и҆ рече прїимѝ ѹ҆бо ѹ҆крꙋхъ хлѣба в рꙋцѣ свое́и и҆ да ꙗ҆́м꙽·

И рече жена̀, жи́въ г҃ь б҃ъ мои а҆ще е҆сть въ сокро́вищи мое҆мъ чт̂о.
н̂о то́кмо при́горща мꙋкѝ въ водоно́сѣ, и҆ ма́ло ма́сла въ чва́нцѣ.
и҆ с̂е а҆зъ събира́ю дв̂ѣ полѣнцы.
и҆ вни́дꙋ и҆ сътворю̀ себѣ̀ и҆ дѣтемъ свои҆мъ и҆ ꙗ҆́ми и҆ ѹ́мрем̑·

И҆ рече к ней и҆лїѧ̀.
потщи́сѧ вни́ди и҆ сътворѝ ꙗ҆́коже рече.
и҆ сътвори́ ми ѿтꙋдꙋ ѻ҆прѣ́снокъ ма́лъ пре́жде принесѝ м̂и.
себѣ̀ же и҆ ча́домъ своим̑ сътвори́ши послѣжде·

Ꙗ҆́ко та́ко гл҃етъ г҃ь б҃ъ і҆и҆л҃евъ водоно́съ мꙋкѝ не ѻ҆скꙋдѣ́етъ, и҆ чва́нецъ ма́сла не ѹ҆мали́тсѧ.
до дн҃е дондеже дасть г҃ь до́ждъ на́ землю·

І҆ и́де жена̀ и҆ сътворѝ, по гл҃ꙋ и҆лїи҆нꙋ̀ и҆ да́сть е҆мꙋ, и҆ ꙗ҆сть сам̑, и҆ та̀ и҆ ча́да е҆ѧ̀·

И҆ съсꙋдъ мꙋ́чныи не ѻ҆скꙋдѣ.
и҆ чва́нецъ ма́сла не ѹ҆мали́сѧ по гл҃ꙋ гн҃ю и҆же гл҃а рꙋко́ю и҆лїи҆но́ю·

Бы́сть по си́хъ и҆ разболѣсѧ сн҃ъ господы́нѧ до́мꙋ.
и҆ бо́лѣзнь е҆го бѣ̀ крѣ́пка ѕѣ́ло, до́н꙽деже и҆зы́иде ѿ него дх҃ъ е҆го·

И҆ реч̑҇ къ и҆лїѝ чт̂о мнѣ̀ и҆ тебѣ чл҃че бж҃їи, вни́де къ мнѣ въспомѧнꙋти непра́вдъ моих̑, и҆ ѹ҆мори́ти сн҃а мое҆го·

И҆ рече и҆лїѧ̀ къ женѣ̀, да́ждь м̂и сн҃а твое҆го, и҆ взѧ́тъ е҆го ѿ ло́на е҆ѧ̀ и҆ възнесѐ и҆̀ в го́рницꙋ, и҆дѣже са́мъ т̂ꙋ почива́ше, и҆ положѝ и҆̀ на ѻ҆дрѣ свое́мъ·

И҆ възопѝ и҆лїѧ̀ къ г҃ꙋ и҆ рече, ѹ҆вы́ мнѣ г҃и свѣдѣтелю вдовы̀ ѹ҆ неꙗ҆́же нн҃ѣ а҆зъ пребыва́ю, т̂ы ѻ҆ѕлобѝ е҆же ѹ҆мори́ти сн҃а е҆ѧ̀·

И҆ дꙋнꙋ на ѻ҆тро́чище три́жды, и҆ призва̀ г҃а и҆ рече, г҃и бж҃е мо́и да възврати́тсѧ ѹ҆бо дш҃а ѻ҆тро́чища сего во́нь и҆ бы́сть та́ко·

И҆ възопѝ ѻ҆тро́чищъ.
и҆ сведѐ и҆̀ съ го́рницы в домꙋ и҆ да́сть и҆̀ мт҃ри е҆го.
и҆ рече и҆лїѧ̀ ви́ждъ ꙗ҆ко жи́въ е҆сть сн҃ъ твои·

И҆ рече жена̀ къ и҆лїѝ, с̂е а́зъ разꙋмѣхъ ꙗ҆́ко чл҃къ бж҃їи е҆си ты̀, и҆ гл҃ъ гн҃ь въ ѹ҆стѣхъ твои҆х꙽ и҆́стиненъ·

Глв̑҇а, и҃і·

И бы́сть по дн҃ехъ мно́ѕѣхъ гл҃ъ гн҃ь къ и҆лїѝ в лѣто, г҃ е, гл҃ѧ·

ше́дъ и҆ ꙗ҆ви́сѧ а҆ха́вови, да́мъ б̂о до́ждъ на лицы̀ земли·

І҆ и҆де и҆лїа̀ къ а҆ха́вꙋ ꙗ҆ви́тисѧ.
и҆ бѣ̀ глад̑ крѣпок̑҇ въ самарї́и·

И҆ призва̀ а҆ха́въ а҆вдїа строи́телѧ до́мꙋ.
и҆ а҆вдѣи́ бѣ̀ боꙗ҆́сѧ г҃а ѕѣ́ло·

И҆ бы́сть е҆гда нача̀ би́ти е҆заве́ль про̑҇рки гн҃ѧ.
и҆ поѧ̀ а҆вдїи, р҃, мꙋжъ про̑҇рки.
и҆ скры̀ ѧ҆̀ по н҃, въ дво́ю връте́пꙋ, и҆ кормѧ́ше и҆хъ хлѣбомъ и҆ водо́ю·

И҆ рече а҆ха́въ къ а҆вдїю поидѝ б̂о про́идевѣ на́ землю на и҆сто́чники во́дныѧ, и҆ на всѧ́къ пото́къ, да неглѝ ка́ко ѻ҆брѧ́щевѣ бы́лїе, и҆ преко́рмивѣ ко́нѧ и҆ м꙽ска̀, и҆ да не и҆зги́нт̑ꙋ ѿ скот̑·

И҆ раздѣли́ста себѣ̀ пꙋть и҆тѝ и҆мъ.
а҆ха́въ и҆дѐ пꙋтем̑ е҆дин꙽.
и҆ а҆вдїи и҆дѐ пꙋтем꙽ дрꙋги́мъ е҆ді́нъ·

И҆ бѣ̀ а҆вдїи е҆ді́нъ на пꙋтѝ.
и҆ прїиде и҆лїѧ̀ на срѣте́нїе е҆мꙋ.
и҆ а҆вді́и пот̑ща́всѧ, поклонисѧ на лицы̀ свое҆мъ и҆ падѐ.
и҆ рече а҆ще т̂ы е҆си здѣ̀ са́мъ г҃и мои и҆лїѧ̀·

И҆ рече и҆лїѧ̀ къ а҆вдїю с̂е а҆зъ е҆смь и҆дѝ и҆ повѣ́ждъ господи́нꙋ свое҆мꙋ гл҃ѧ, с̂е и҆лїѧ̀·

И҆ рече а҆вдїѧ чт̂о съгрѣши́хъ а҆зъ ꙗ҆́ко предае́ши м̂ѧ раба̀ твое҆го в рꙋцѣ а҆ха́вли на ѹ҆мре́нїе моѐ·

Жи́въ г҃ь б҃ъ твои.
а҆ще е҆сть ꙗ҆зык̑҇ где под̑ црс̑҇твом꙽ е҆го.
ка́мо нѣ́сть пꙋща́лъ господин̑҇ мои и҆ска́ти тебѐ.
и҆ е҆гда̀ рѣша нѣсть, и҆ заклѧ̀ и҆ взыска́ста тебѐ въ все́мъ црс̑҇твїи свое҆мъ, и҆ въ всѣхъ землѧ́хъ своих̑ и҆ не ѻ҆брѣто́ша тебѐ.
и҆ нн҃ѣ ты̀ гл҃еши м̂и, и҆дѝ възвѣстѝ господи́нꙋ свое҆мꙋ и҆ рцы̀ с̂е и҆лїѧ̀·

И҆ бꙋдетъ е҆гда̀ а́зъ ѿи҆дꙋ̀ ѿ тебѐ и҆ дх҃ъ гн҃ь во́зметъ т̂ѧ.
и҆ в зе́млю нѣ́вкꙋю в ню́же не вѣ́дѣ, и҆ вни́дꙋ възвѣсти́ти а҆ха́вꙋ и҆ не ѻ҆брѧ́щетъ тебѐ и҆ ѹ҆бї́етъ м̂ѧ.
и҆ ра́бъ твои е҆смь боѧ́исѧ г҃а ѿ ю́ности мое҆ѧ·

И҆л̂и не сꙋть възвѣсти́ли г҃и мо́и ꙗ҆́же сътвори́хъ.
е҆гда хотѣ̀ и҆зби́ти е҆заве́ль про̑҇рки гн҃ѧ.
и҆ взѧх̑ ѿ про̑҇ркъ гн҃ь, р҃, мꙋжъ.
и҆ скрыхъ ѧ҆̀ въ вер̑҇те́пѣ по н҃, и҆ корми́хъ ѧ҆̀ хлѣбом꙽ и҆ водо́ю.
и҆ нн҃ѣ ты̀ гл҃еши и҆дѝ и҆сповѣждъ господи́нꙋ с̂е здѣ̀ и҆лїѧ̀ и҆ ѹ҆бїет̑ м̂ѧ·

И҆ рече и҆лїѧ̀ жи́въ г҃ь си́лъ е҆мꙋже пред̑стою̀ пред ни́мъ ꙗ҆ко днс̑҇ь покажꙋ́сѧ е҆мꙋ·

І҆ и҆дѐ а҆вдїѧ противꙋ а҆ха́вꙋ и҆ възвѣстѝ е҆мꙋ, и҆ ѹ҆скорѝ а҆ха́въ и҆дѐ на срѣте́нїе и҆лїѝ·

И҆ бысть е҆гда ѹ҆зрѣ а҆ха́въ и҆лїю̀.
и҆ рече а҆ха́въ къ и҆лїѝ, а҆ще ты̀ л̂и е҆си развраща́ѧ і҆и҆л҃ѧ·

И҆ реч̑҇ и҆лїѧ̀ не развраща́ю а҆зъ і҆и҆л҃ѧ н̂о ты̀ и҆ до́мъ ѿц҃а твое҆го внегда̀ ѻ҆стави́сте вы̀ г҃а б҃а вашег̑҇ і҆ и҆до́сте въ слд̑ѣ ваа́ла·

И҆ нн҃ѣ пꙋсти и҆ събери къ мнѣ весь і҆и҆л҃ь, на горꙋ̀ кармильскꙋю, и҆ про̑҇рки без꙽стꙋдныѧ.
ваа́ловы.
у҃, и҆ н҃, и҆ про̑҇ркъ, ме́рскихъ у҃, и н҃. ꙗ҆дꙋщих̑ трапе́зꙋ і҆е҆завелинꙋ·

И҆ посла̀ а҆ха́въ въ ве́сь і҆и҆л҃ь и҆ приведѐ всѧ про̑҇рки на горꙋ̀ карми́льскꙋю·

И҆ приведѐ къ всѣмъ и҆мъ и҆лїю̀.
и҆ реч̑҇ и҆мъ и҆лїѧ̀ доко́лѣ в̂ы хра́млете на ѻ҆́бѣ пле́снꙋ ва́шею.
а҆ще е҆сть г҃ь б҃ъ и҆дѣте въ слѣ́дъ е҆го.
а҆ще л̂и ваа́ль е҆сть т̂о и҆дѣте за ни́мъ и҆ не ѿвѣща́ша лю́дїе·

И҆ рече и҆лїѧ̀ к лю́дем̑ а҆зъ е҆смь ѻ҆ста́хъ про̑҇ркъ гн҃ь е҆ді́нъ и҆ про̑҇рцы ваа́ловы, у҃ и҆ н҃, мꙋжъ·

И҆ рече и҆лїѧ̀ дади́те н̂ы дв̂а ю҆́нца и҆ да и҆зберетѐ себѣ е҆ді́нъ и҆ да расте́шꙋтъ и҆̀ на ѹ́ды, и҆ възло́жатъ на дрова̀ и҆ да не пригнѣтѧ́тъ ѻ҆гнѧ̀ и҆ а҆зъ растешꙋ̀ ю́нецъ дрꙋгїи.
и҆ ѻ҆гнѧ̀ не пригнещꙋ̀·

И҆ да призоветѐ и҆́мена бо́гъ ва́ших꙽, и҆ а́зъ призовꙋ̀ и҆́мѧ г҃а б҃а мое҆го, и҆ то́и е҆сть б҃ъ и҆же а́ще послꙋшае҆тъ ѻ҆гне́мъ т̂о е҆сть б҃ъ.
и҆ ѿвѣща́ша вс̂и лю́дїе рѣша до́бръ гл҃ъ, и҆же гл҃а, да бꙋдет̑ та́ко·

И҆ рече и҆лїѧ̀ про̑҇ркомъ без̑стд̑ꙋнымъ и҆зберѣте себѣ̀ ю҆́нецъ е҆ді́нъ.
и҆ сътворите вы̀ пре́жде, ꙗ҆́ко вы̀ ес̑҇ мно́жаише.
и҆ призовѣте и҆мена бог̑҇ ва́шихъ.
и҆ ѻ҆гнѧ̀ не пригнѣща́ите·

И҆ поꙗ҆́ша ю҆́нецъ, и҆ сътвориша та́ко и҆ призыва́хꙋ и҆мѧ ваа́лово ѿ ѹ́тра и҆ до по́лꙋ дн҃е.
и҆ рѣша послꙋшаи нас̑҇ ваа́ле послꙋшаи насъ.
и҆ не бѣ гла́са ни послꙋша́нїѧ.
и҆ риста́хꙋ ѻ҆ жрътве́ницѣхъ и҆же сътвориша·

И҆ быс̑҇ в꙽ полꙋ дн҃е, и҆ порꙋга́сѧ и҆мъ и҆лїѧ̀ ѳезвитѧнинъ, и҆ рече зовите гла́сом̑ великим̑ ꙗ҆́ко непра́зньство е҆мꙋ е҆сть.
е҆да чт̂о и҆но строи и҆л̂и ѹ҆снꙋлъ бꙋдет̑ и҆ да ѻ҆бꙋ́дите и҆̀·

И҆ зовѧ́хꙋ гласом̑ вели́кимъ.
и҆ кра́ꙗ҆хꙋсѧ по ѻ҆бы́чаю свое҆мꙋ но́жи.
и҆ мно́ѕи би́шасѧ съ бичми до проли́тїѧ кро́ви свое҆ѧ·

И҆ бы́сть до ѿвече́рїѧ и҆ прорица́хꙋ до́ндеже бы́сть врѣмѧ взыти жрътвѣ и҆ не бѣ̀ гла́са·

И҆ рече и҆лїѧ̀ ѳезви́тѧнинъ проро́комъ безстꙋдным̑ гл҃ѧ ѻ҆ста́нете ѿ нн҃ѣ і҆ а́зъ сътворю̀ жрътвꙋ мою̀, и҆ ѹ҆ста́ша и҆ ѹ҆млъко́ша·

И҆ рече и҆лїѧ̀ к лю́демъ пристꙋпите къ мн̂ѣ.
пристꙋпиша вс̂и лю́дїе к немꙋ̀ и҆ прїꙗ҆́тъ, в҃і, ка́менїи по числꙋ̀ колѣнъ і҆и҆л҃евъ, ꙗ҆коже гл҃а к немꙋ̀ г҃ь гл҃ѧ і҆и҆л҃ь бꙋдет̑ и҆́мѧ твоѐ·

И҆ създа̀ ѻ҆лта́рь въ и҆мѧ гн҃е і҆ и҆сцѣлѝ ѻ҆лта́рь гн҃ь раско́пан꙽ныи и҆ сътворѝ мо́ре въмѣща́ю҆ще дв̂ѣ мѣ́рѣ сѣмене ѻ҆́крс̑҇тъ ѻ҆лтарѧ̀·

И҆ въскладѐ дрова̀ на ѻл̑҇тар̑҇ и҆же сътвори.
и҆ растеса̀ на ѹ́ды вс̂ѧсъжига́емаѧ, и҆ възложѝ на дрова̀·

И҆ рече и҆лїѧ̀ прїимѣте м̂и д҃ водоно́сы воды̀.
и҆ възлива́ите на вс̂есъж꙽же́наѧ и҆ дрова̀.
и҆ сътвори́ша та́ко.
и҆ рече ѹ҆двои́те и҆ ѹ҆двои́ша.
и҆ рече ѹ҆троите и҆ ѹ҆трои́ша и҆ прохожа́ше вода̀ ѻ҆́крс̑҇тъ ѻ҆лтарѧ̀ и҆ мо́ре и҆спо́лнь воды̀·

И҆ възопѝ и҆лїѧ на́ нб҃о и҆ рече.
г҃и бж҃е а҆враа́мов̑҇ и҆саа́ковъ і҆а́ковль послꙋшаи мене г҃и послꙋшаи мене дне́сь ѻ҆гне́мъ.
да дне́сь разꙋмѣ́ютъ вс̂и лю́дїе сїѝ ꙗ҆́ко ты̀ е҆си г҃ь б҃ъ е҆ді́нъ і҆и҆л҃евъ и҆ а́зъ ра́бъ твои и҆ тебѐ ради сътвори́х꙽ дѣла̀ с̂и·

Послꙋшаи м̂ѧ г҃и послꙋшаи менѐ ѻ҆гне́мъ, и҆ да разꙋмѣ́ют꙽ вс̂и лю́дїе сїѝ ꙗ҆́ко ты̀ е҆си е҆ді́нъ г҃ь б҃ъ и҆ ты̀ ѻ҆брати́лъ е҆си срд̑ца людїи сихъ въ слѣдъ·

И҆ спадѐ ѻ҆́гнь ѿ г҃а с нб҃се и҆ поꙗ҆́сть вс̂ѧсъжига́емаѧ и҆ дрова̀ и҆ ка́менїе и҆ пе́рсть, и҆ во́дꙋ ꙗ҆́же бѣ̀ в мо́ри вс̂ѧ полиза̀ ѻ҆́гнь·

И҆ падо́ша вс̂и лю́дїе ни́цы и҆ рѣша въи́стиннꙋ г҃ь то́и е҆сть б҃ъ<.>

И҆ реч̑҇ и҆лїѧ̀ к лю́дем̑ поима́ите про̑҇ро́ки ваа́ловы да ни е҆дін̑҇ скры́етсѧ ѿ них̑.
и҆ прїѧ́ша и҆ ведѐ ѧ҆̀ и҆лїѧ̀ на пото́къ ки́совъ, и҆ закла̀ их̑ т̂ꙋ·

И҆ рече и҆лїѧ̀ къ а҆ха́вꙋ взы́иди ꙗ҆́жъ и҆ пїи.
ꙗ҆́ко глс̑҇а е҆сть дожде́внаг̑҇ и҆схожде́нїѧ·

И҆ възы́иде а҆ха́въ ꙗ҆́сти и҆ пи́ти і҆ и҆лїѧ̀ взы́иде на каръми́лъ и҆ прекло́ньсѧ на́ землю и҆ положѝ лицѐ своѐ междꙋ̀ колѣнома свои́ма·

И҆ рече ѻ҆тро́чищꙋ свое҆мꙋ в꙽зы́иди, и҆ възрѝ пꙋте́мъ мо́рским̑.
и҆ възы́иде и҆ възрѣ̀ ѻ҆тро́чищъ и҆ рече нѣ́сть ничто́же.
и҆ рече и҆лїѧ̀ т̂о ты̀ ѻ҆брати́сѧ седми́жды·

И҆ бы́сть ꙗ҆́ко ѻ҆брати́сѧ се́дмое.
и҆ с̂е ѻ҆́блак꙽ ма́лъ ꙗ҆ко нога́ма мꙋжескама възносѧ̀ во́дѣ ѿ мо́рѧ.
и҆ рече взы́иди и҆ рцы̀ а҆ха́вови въпрѧжи колесни́цꙋ свою.
и҆ сни́ди да тебе не ѻ҆бы́идетъ до́ждъ·

И҆ бы́въ до́здѣ и҆ до́здѣ, и҆ нб҃о примрачи́сѧ ѻ҆́блаки и҆ дх҃омъ.
и бы́сть дождъ ве́лїи.
и҆ пла́часѧ и҆дѐ а҆ха́въ до і҆и҆л҃ѧ·

И҆ рꙋка̀ гн҃ѧ быс̑҇ на и҆лїи.
и҆ стѧ́гл꙽ чре́сла своѧ и҆ течѐ пред̑ а҆ха́вомъ до і҆и҆л҃ѧ·

Глв̑҇а, ѳ҃і·

И возвѣстѝ а҆ха́въ и҆е҆заве́ли женѣ свое́й вс̂е.
е҆ли́ко сътворѝ і҆лїѧ̀.
ꙗ҆ко и҆збѝ пророки ѻ҆рꙋжїемъ·

И҆ посла̀ е҆заве́ль къ и҆лїѝ и҆ рече, ты ли еси и҆лїѧ̀, а҆́з же и҆е҆заве́ль.
сїѧ да сътворѧтъ м̂и бо́ѕи.
и҆ с̂и да приложатъ м̂и ꙗ҆́ко в с̂еи҆ же ча́съ ѹ҆́тро положꙋ дш҃ꙋ твою ꙗ҆́коже дш҃ꙋ е҆ді́ног̑҇ ѿ си́хъ·

И҆ ѹ҆боѧ́сѧ и҆лїѧ̀.
и҆ востав̑҇ и҆́де дш҃а ради свое́ѧ.
и҆ прїиде въ вир꙽савїю землю̀ і҆ѹ́динꙋ.
и҆ ѻ҆ста́ви ѻ҆тро́чища свое҆го т̂ꙋ·

И҆ то́й сам̑ и҆́де въ пꙋсты́ню дн҃ь и҆ пришед̑ сѣде подъ смерчїем꙽, и҆ просѝ дш҃и свое́и смр҃ти и҆ рече, довлѣе҆тъ м̂и.
возмѝ ѹ҆бо нн҃ѣ ѿ менѐ дш҃ꙋ мою̀ г҃и.
ꙗ҆́ко нѣсть а҆́зъ лꙋ́чшїи ѿц҃ъ мои҆хъ·

И҆ лѧ́же и҆ ѹ҆спѐ под̑ са́дом̑, и҆ с̂е а҆гг҃лъ гн҃ь коснꙋ́сѧ е҆мꙋ.
и҆ рече е҆мꙋ воста́ни ꙗ҆́ждъ.
и҆ и҆ възрѣвъ и҆лїѧ, и҆ с̂е ѹ҆ воз̑гла́вїѧ е҆го ѻ҆прѣснокъ пырѧ́нъ, и҆ чва́нец̑҇ воды̀.
и҆ въста́въ ꙗ҆́сть и҆ пи́тъ, и҆ возврати́всѧ ѹ҆спѐ·

И҆ воз̑врати́сѧ а҆гг҃лъ гн҃ь втори́цею и҆ коснꙋ́сѧ е҆мꙋ и҆ реч̑҇ е҆мꙋ въста́въ ꙗ҆ждъ ꙗ҆́ко дале́ко т̂и е҆сть пꙋть·

И҆ воста́въ и҆ ꙗ҆́де и҆ пи́тъ, і҆ и҆дѐ въ крѣпости ꙗ҆́ди то́ѧ, м҃ дн҃їи и҆ м҃, но́щїи, до горы̀ бж҃їа хори́вы·

И҆ вни́де т̂ꙋ во вертепъ, и҆ ѻ҆бита т̂ꙋ.
и҆ с̂е а҆́гг҃лъ гн҃ь прїиде к немꙋ̀.
и҆ рече чт̂о ты здѣ̀ и҆лїѧ·

И҆ реч̑҇ и҆лїѧ̀ ревнꙋѧ поревнова́хъ по г҃ѣ вседръжи́тели.
ꙗ҆́ко ѻ҆ста́виша т̂ѧ сн҃ове і҆и҆л҃ви.
и҆ ѻ҆лтарѧ̀ твоѧ раскопа́ша.
и҆ про̑҇ркы твоѧ и҆зби́ша ѻ҆рꙋжїемъ, и҆ ѻ҆стах̑ а́зъ е҆ді́нъ.
і҆ и҆щꙋтъ дш҃а мое́ѧ и҆зѧти ю҆̀·

И҆ рече и҆зы́ди ѹ҆́тро и҆ ста́ни пред̑ гм҃ъ въ горѣ̀ се бо ми́мохо́дитъ г҃ь.
и҆ с̂е дх҃ъ вели́къ крѣпок̑҇ раста́а го́ры и҆ съкрꙋша́ѧ ка́менїе в горѣ̀ пред̑ гм҃ъ.
н̂о не в꙽ дꙋсѣ г҃ь и҆ по дꙋ́сѣ трс̑҇ꙋ.
и҆ не въ трꙋ́сѣ г҃ь·

И҆ по трꙋ́сѣ ѻ҆́гнь.
и҆ не въ ѻ҆гнѝ г҃ь.
и҆ по ѻ҆гнѝ гла́съ свѣта то́нка.
и҆ т̂ꙋ г҃ь·

И҆ бы́сть ꙗ҆́ко ѹ҆слы́ша и҆лїѧ̀.
и҆ покры̀ лицѐ своѐ ми́лотїю свое́ю.
и҆ шед̑ ста̀ пред̑ връте́помъ.
и҆ с̂е к не́мꙋ бысть глас̑҇ и҆ рече чт̂о ты здѣ̀ и҆лїѧ̀·

И҆ рече и҆лїѧ̀ ревнꙋѧ́ поревнова́хъ по г҃ѣ вседръжи́тели.
ꙗ҆ко ѻ҆ста́виша завт̑ѣ тво́и сн҃ве і҆и҆л҃еви.
и҆ ѻ҆лтарѧ̀ твоа̀ разрꙋши́ша.
и҆ проро́ки твоѧ̀ и҆зби́ша ѻ҆рꙋж́їемъ, и҆ ѻ҆ста́хъ а҆́зъ е҆ді́нъ.
і҆ и҆щꙋтъ дш҃а мое́ѧ и҆зѧ́ти ю҆̀·

И҆ рече г҃ь к не́мꙋ, възврати́сѧ и҆дѝ пꙋтемъ свои҆мъ.
і҆ и҆зы́деши на пꙋть пꙋсты́ни дама́сковы.
и҆ пома́жеши а҆заи́ла на црс̑҇тво въ сѷрїи·

І҆ и҆ѹ́ѧ сн҃а а҆масїина пома́жеши на црс̑҇тво над̑ і҆и҃лем̑.
і҆ е҆лисе́ѧ сн҃а а҆сафа́това, ѿ велимаѹ́ли пома́жеши про̑҇рка в себѐ мѣ́сто·

И҆ бꙋдꙋтъ сп҃са́емаго, ѿ ѻ҆рꙋж́їѧ а҆заи́лива ѹ҆бїетъ и҆̀ и҆ѹ́ѧ.
и҆ сп҃се́наго ѿ ѻ҆рꙋж́їѧ и҆ѹ́и҆на, ѹ҆биет̑ і҆е҆лисе́и·

И҆ сохраню̀ ѻ҆ста́нокъ въ і҆и҆л҃и, ҂з҃, мꙋжъ.
вс̂ѧ колѣ́на и҆же не прекло́нъшаѧ, ваа́лꙋ.
и҆ всѧка ѹ҆ста̀ ꙗ҆́же не моли́шасѧ е҆мꙋ·

І҆ и҆де ѿтꙋ́дꙋ и҆ ѻ҆брѣте і҆е҆лисе́ѧ сн҃а а҆сафа́това.
и҆ се́й ѻ҆раше двѣмана́десѧтьма сꙋпрꙋга́ма воло́въ пред̑ ни́мъ.
и҆ то́й сам̑ по дво́юна́десѧть сꙋпрꙋ́гꙋ.
и҆ прїиде и҆лїѧ̀ к немꙋ̀.
и҆ свержетъ ми́лоть свою̀ на́нь·

И҆ ѻ҆ста́ви і҆е҆лисе́и волы̀ и҆ течѐ въ слд̑ѣ и҆лїѝ.
и҆ рече молю т̂ѧ да ѻ҆блобыжꙋ̀ ѿц҃а мое҆го и҆ мт҃рь мою̀ і҆ и҆дꙋ̀ въ слд̑ѣ тебѐ.
и҆ рече е҆мꙋ и҆дѝ.
и҆ възврати́сѧ ꙗ҆́ко нѣсть т̂и ѹ҆жѐ дѣ́ла·

И҆ возврати́сѧ ѿ него̀ и҆ поѧт̑ сꙋпрꙋ́гы волов̑҇, и҆ закла̀.
і҆ и҆спечѐ ѧ҆̀ сосꙋ́ды воло́вными, и҆ дасть людем̑ и҆ ꙗ҆до́ша.
и҆ востав̑҇ и҆дѐ въ слд̑ѣ и҆лїѝ и҆ слꙋжа́ше е҆мꙋ·

Глв̑҇а, к҃·

И сн҃ъ а҆де́ровъ цр҃ь сѷръскїи бѧ́ше собра̀ вс̂ю си́лꙋ свою̀.

и҆ въшед̑ ѻ҆бъсѣ́де самарїю, и҆ с ни́мъ, л҃в, цр҃ѧ.
и҆ вс̂и кон̑҇ницы и҆ ѻ҆рꙋж́ницы.
и҆ вшед̑ше ѻ҆бъсѣ́доша самарїю.
и҆ побѣжа́хꙋсѧ ѻ҆ ню̀.
и҆ посла̀ къ а҆ха́вꙋ цр҃ю і҆и҆л҃евꙋ во́ град̑·

И҆ рече к немꙋ.
сице гл҃етъ сн҃ъ а҆де́ровъ.
сре́бро твоѐ и҆ зла́то твоѐ мое е҆сть.
и҆ же́ны твоа̀ и҆ ча́да твоѧ и҆ до́браѧ моѧ̀ сꙋть·

И ѿвѣща̀ цр҃ь і҆и҆л҃евъ и҆ рече.
ꙗ҆́коже гл҃а г҃и мо́и цр҃ю тво́и е҆смь а́зъ, и҆ вс̂е е҆же и́мам̑·

И҆ па́ки в꙽тори́цею прїидо́ша послы̀ къ а҆ха́вꙋ и҆ рѣша.
си́це гл҃ет꙽ сн҃ъ а҆де́ров̑҇.
а҆зъ посылах̑ к тебѣ̀ гл҃ѧ сре́бро твоѐ и҆ злато твоѐ и҆ же́ны твоѧ̀ и҆ ча́да твоѧ̀ да́жд̑ь мн̂ѣ·

Ꙗ҆́ко в се́и же ча́съ ѹ҆тро пꙋщꙋ̀ ра́бы̀ моѧ̀ к тебѣ̀.
і҆ и҆зыщꙋтъ дом̑ тво́и и҆ до́мъ ѻ҆́трокъ твои҆хъ, и҆ бꙋ́дꙋтъ помышлѧ́емаѧ ѻ҆́чїю и҆хъ.
на них̑же а҆́ще возло́жатъ рꙋ́кы своѧ̀ т̂о да во́змꙋтъ·

И҆ призва цр҃ь і҆и҆л҃евъ вс̂ѧ ста́рца землѧ̀.
и҆ реч̑҇ чт̂о мы́слите нн҃ѣ ви́дите ꙗ҆́ко то́й ѕл̂ѣ про́сит̑.
посыла́ѧ б̂о ко мнѣ гл҃етъ, ѻ҆ женах̑ мои҆хъ, и҆ ѻ҆ сн҃ѣхъ моих̑, и҆ ѻ҆ дще́рех̑ мои҆хъ.
и҆ ѻ҆ сре́брѣ мое҆мъ и҆ златѣ мое҆мъ и҆ не послꙋшаи ни восхощи да́ти.

И҆ рѣша е҆мꙋ ста́рцы и҆ лю́ди вс̂и не послꙋшаи ни восхощи да́ти.
и҆ сего ра́ди рече послом̑ сн҃а а҆де́рова р꙽цѣте господи́нꙋ ва́шемꙋ.
всего е҆ли́коже дѣ́льма посыла́лъ е҆си къ рабꙋ̀ свое҆мꙋ преже того̀ сътворю̀.
а҆ сего̀ гла́са не мо́гꙋ т̂и сътвори́ти.
и҆ прїимъше ѿвѣтъ мꙋж́а а҆де́рова воз̑вратишасѧ съ си́ми словесы̀·

И҆ па́ки посла̀ к не́мꙋ сн҃ъ а҆де́ровъ гл҃ѧ.
с̂е да сътворѧ́тъ м̂и бо́ѕи.
и҆ с̂и приложи́тъ м̂и.
а҆́ще не сътвори́тъ да и҆ пръсть самарїиска не бꙋ́детъ всѣмъ лю́демъ пѣш́им̑·

И҆ ѿвѣща̀ цр҃ь і҆и҆л҃евъ и҆ реч̑҇.
да не хва́лит̑сѧ дово́лно слꙋ́кы, ꙗ҆́ко и҆ про́стыи·

И҆ бы́сть е҆гда̀ ѿвѣща̀ е҆мꙋ сло́во с̂е.
и҆ б̂ѣ и҆спивалъ са́мъ то́й.
и҆ цр҃и и҆же бѣхꙋ с ним̑ во со́нмѣхъ.
и҆ рече ѻ҆́троком̑ своим̑ сътвори́те лѣ́ствица, и҆ приста́вите гра́дѣ·

И҆ с̂е про̑҇ркъ е҆ді́нъ прїиде къ а҆ха́вꙋ цр҃ю і҆и҆л҃евꙋ.
и҆ рече сїи гл҃етъ г҃ь и҆же ви́диши ве́сь народ̑ се́й вели́кїи.
и҆ с̂е а҆́зъ да́мъ и҆хъ днс̑҇ь в рꙋ́цѣ твоѝ.
и҆ разꙋмѣ́еши ꙗ҆ко аз̑ е҆смь г҃ь.

И҆ рече а҆ха́въ въ че́мъ.
и҆ рече.
си́це гл҃етъ г҃ь въ ѻ́троцѣхъ и҆ кнѧ́ѕь землѧ̀.
и҆ рече а҆ха́въ кт̂о соберет̑ бра́нь.
и҆ реч̑҇ т̂ы·

И҆ созрѣ а҆ха́въ ѻ҆́трокъ кнѧ́ѕь землѧ̀ то́ѧ.
и҆ бысть их̑, с҃ л҃ и҆ в҃. и҆ по сих̑ сочтѐ лю́ди вс̂ѧ, и҆ б̂ѣ сн҃овъ си́лных̑, ҂з҃·

І҆ и҆зы́де в полꙋ́дн҃е, и҆ сн҃ъ а҆де́ров̑҇ пїѧнъ б̂ѣ ѕѣло въ сокхо́тѣ.
са́мъ и҆ цр҃и, и҆же с ни́мъ, л҃в, цр҃ѧ.
помо́щника е҆мꙋ·

І҆ и҆до́ша ѻ҆́троцы вое҆водъ землѧ̀ тоѧ въ пе́рвыхъ, сїи́ же и҆же посла̀ сн҃ъ а҆де́ровъ възвѣсти́ша цр҃ю сѷрскꙋ гл҃ще, мꙋж́и сꙋть и҆зышли ѿ самарїѧ·

И҆ рече и҆мъ а҆́ще и҆ на мир̑҇ и҆зышли сꙋть т̂о пои҆мете ѧ҆̀ жи́вы и҆ а́ще л̂и на́ брань сꙋть и҆зышли т̂о жи́во ѧ҆̀ пои҆мѣте, да и҆но́гда бы́ша не и҆сходили и҆з꙽ гра́да·

И҆ тїи и҆зыдо́ша ѿ гра́да ѻ҆́троцы вое҆водъ страны̀ то́ѧ, и҆ си́ла въ слд̑ѣ и҆хъ·

И҆ бѣша ко́ждо проти́вника себѣ̀, и҆ бѣжа а҆сѷрїѧ, и҆ погна их̑ і҆и҆л҃ь, и҆ гонзе то́кмо сн҃ъ а҆де́ров꙽ цр҃ь сѷрьскїи на конѧ̀ пресѣдаа·

І҆ и҆зыиде цр҃ь і҆и҆л҃евъ, и҆ поѧт̑ вс̂ѧ ко́нѧ и҆ колесница, и҆ побѣди ѧ҆̀ ꙗ҆́звою вели́кою въ сѵ̀рїѝ·

И҆ прїиде про̑҇ркъ къ цр҃ю і҆и҆л҃евꙋ, и҆ рече крѣписѧ и҆ разꙋмѣи, и҆ виждь чт̂о сотвориши ꙗ҆́ко преходѧ́щꙋ лѣтꙋ семꙋ̀, сн҃ъ а҆де́ров̑҇ цр҃ь а҆сѷрїискїи прїидет̑ на́ тѧ·

И҆ ѻ҆́троцы цр҃ѧ а҆сѷрїиска рѣша е҆мꙋ, б҃ъ го́ръ б҃ъ і҆ил҃въ, а҆ не б҃ъ ѹ҆до́лнїи, сего ра́ди ѹ҆крѣписѧ па́че насъ н̂о а҆́ще ли побѣдимъсѧ с ни́ми на́ поли ѹ҆крѣпимсѧ на́ нѧ по гл҃ꙋ же семꙋ̀ сътвори, и҆ распꙋсти цр҃ь ко́гождо на мѣсто своѐ, и҆ поста́ви в ни́хъ мѣсто вое҆во́ды і҆ и҆змѣним̑ т̂и силꙋ, по силѣ ѿпад̑шїи ѿ тебѐ, и҆ ко́нѧ в ко́нь мѣсто, и҆ ѻ҆рꙋжїѧ въ ѻ҆рꙋж́їѧ мѣсто, и҆ побѣдимъсѧ с ни́ми ѹ҆до́бъ, и҆ ѹ҆крѣпимсѧ паче и҆хъ·

И҆ послꙋша гла́са и҆хъ и҆ сотвори та́ко, и҆ бысть минꙋвши лѣтꙋ томꙋ̀, сочтѐ сн҃ъ а҆де́ровъ сѷрїю, и҆ възы́де въ саѳе́кꙋ на́ брань на і҆ил҃ѧ·

И҆ сн҃ове і҆ил҃еви съглѧда́вшесѧ и҆дѧ́хꙋ на срѣтенїе и҆́мъ, и҆ въполчишасѧ і҆ил҃ьтѧне противꙋ и҆мъ, ꙗ҆́ко дв̂ѣ ста́дѣ ко́зъ, и҆ сѷрѧни и҆сполниша зе́млю·

И҆ прїиде чл҃къ бж҃їи, и҆ рече къ цр҃ю і҆ил҃евꙋ, сице гл҃етъ г҃ь, поне́же рече сѷрїѧ б҃ъ го́ръ, г҃ь б҃ъ і҆и҆л҃евъ, и҆ не б҃ъ ѹ҆до́лнїи, да́мъ си́лꙋ вели́кꙋю сїю в рꙋ́цѣ твоѝ, и҆ разꙋмѣ́еши ꙗ҆ко г҃ь е҆смь а҆́зъ·

И҆ ѻ҆полчи́шасѧ тїѝ противꙋ и҆мъ сед̑мь дн҃їи, и҆ бы́сть въ дн҃ь сед̑мыи приближишасѧ побѣдѣ, и҆ побѣди́ша і҆и҆л҃ьтѧне сѷрѧн꙽, р҃ ҂к, пѣшцев̑҇, въ а҃ дн҃ь·

И҆ бѣжа́ша ѻ҆став̑҇шїи во а҆ѳе́кꙋ град̑, и҆ падѐ стѣна̀, на к҃ ҂з, мж̑ꙋ збывших̑, сн҃ъ же а҆деров̑҇ бѣжа и҆ вни́де въ храм̑ лож꙽чныи внꙋтренїи·

И҆ рѣша к немꙋ ѻ҆́троцы е҆го, с̂е нн҃ѣ вѣмы ꙗ҆́ко цр҃и до́мꙋ і҆и҆л҃ева млс̑҇тиви сꙋть.
да возло́жимъ нн҃ѣ врѣтища на чре́сла наша и҆ ѹ́жа на вы́ѧ наша.
і҆ и҆зы́дем̑ къ цр҃ю і҆и҆л҃евꙋ да неглѝ живит̑ дш҃а на́ша·

И҆ препоꙗ҆́сашасѧ въ врѣтища по чре́слом̑ своим̑ и҆ возложи́ша ѹ҆́жа на вы́ѧ своѧ.
и҆ прїидо́ша къ цр҃ю і҆и҆л҃евꙋ и҆ рѣша, раб̑҇ тво́и сн҃ъ а҆деровъ гл҃етъ да живе́т꙽ дш҃а моѧ.
и҆ сїи реч̑҇, а҆́ще е҆сть и҆ е҆щѐ жи́въ братъ м̂и е҆сть·

И҆ мꙋж́и ѹ҆кроти́шасѧ и҆ ѹ҆тѣши́ша, прїем̑ше сло́во ѿ ѹ҆стъ е҆го.
и҆ рѣша бра́тъ т̂и е҆сть сн҃ъ а҆де́ровъ.
и҆ рече и҆дѣте и҆ приведѣте и҆̀.
і҆ и҆зы́де к немꙋ сн҃ъ а҆де́ров꙽.
и҆ възведо́ша и҆̀ к немꙋ на колесни́цꙋ·

И҆ реч̑҇ к немꙋ, гра́ды ꙗ҆́же б̂ѣ прїѧ́лъ ѿц҃ъ мо́и, ѿ ѻ҆ц҃а твое҆го ѿда́мъ т̂и.
и҆ на и҆схо̑ сотвори́ши ѧ҆̀ себѣ̀ в дама́сцѣ.
ꙗ҆́коже положѝ ѿц҃ъ мо́и в самарїѝ.
и҆ а́зъ въ завѣтѣ пꙋщꙋ т̂ѧ.
и҆ положѝ е҆мꙋ завѣтъ и҆ ѿпꙋсти и҆̀·

И҆ чл҃къ е҆ді́нъ ѿ сн҃овъ про̑҇рчь рече къ бли́жнемꙋ сѝ по словесѝ гн҃ю побїи м̂ѧ ѹ҆́бо.
и҆ не хотѧ́ше поби́ти е҆го чл҃къ·

И҆ реч̑҇ к немꙋ поне́же не послꙋш́а гла́са гн҃ѧ.
с̂е ты нн҃ѣ ѿи́деши ѿ менѐ и҆ расхитит̑ т̂ѧ ле́въ и҆ ѿи́де ѿ него.
и҆ ѻ҆брѣте и҆̀ ле́въ и҆ порази и҆̀·

И҆ ѻ҆брѣте чл҃ка и҆́ного и҆ реч̑҇ побїи м̂ѧ нн҃ѣ.
и҆ поби и҆̀ чл҃къ и҆ поби́выи, сокрꙋши и҆̀·

І҆ и҆дѐ про̑҇ркъ и҆ став̑҇ ѹ҆ цр҃ѧ і҆и҆л҃ева на пꙋтѝ і҆ и҆змѣнисѧ посы́павъ ѻ҆́чи своѧ̀ пра́хом̑·

И҆ бы́сть ꙗ҆́ко и҆дѧ́ше цр҃ь и҆ се́и҆ вопїѧ́ше ко цр҃ю и҆ реч̑҇, раб̑҇ твои и҆зы́де на́ воинꙋ бра́ни.
и҆ с̂е мж̑ꙋ приведѐ ко мнѣ̀ мꙋжа.
и҆ реч̑҇ ко мнѣ̀ сохранѝ мꙋ́жа сего̀.
а҆́ще ли ѿрешив̑҇сѧ ѿско́чит̑ и҆ бꙋ́детъ дш҃а твоѧ̀ за дш҃ꙋ е҆го.
и҆л̂и тала́нтъ ѿдасѝ сре́бра·

И҆ бы́сть ꙗ҆́ко призрѣ ра́бъ тво́и и҆ здѣ̀.
и҆ зд̂ѣ и҆ сего не бы́сть и҆ рече к не́мꙋ цр҃ь і҆и҆л҃евъ с̂е е҆сть сꙋдъ тво́и е҆же са́мъ ѻ҆сꙋдѝ·

И҆ се́й пот꙽ща́всѧ ѿꙗ҆тъ пра́хъ ѿ ѻ҆чїю свое́ю.
и позна и҆̀ цр҃ь і҆и҆л҃евъ ꙗ҆́ко ѿ про̑҇ркъ сїи е҆сть·

И рече к не́мꙋ, та́ко гл҃етъ г҃ь поне́же взѧтъ т̂ы мꙋж́а ѕвѣрїи сверепїиша ѿ рꙋ́кꙋ твое́ю.
и҆ да е҆сть дш҃а твоѧ̀ въ дш҃а е҆го мѣ́сто.
и҆ люд̑и̑ твоѝ въ лю́ди е҆го мѣ́сто·

І҆ и҆дѐ цр҃ь і҆и҆л҃евъ в до́мъ сво́и раслабленъ и҆ печа́ленъ·

Глв̑҇а, к҃а·

И бы́сть по гл҃ѣхъ си́хъ.

виноград̑ б̂ѣ навꙋѳее҆въ і҆и҆л҃ьтѧни́на при гꙋмнѣ̀ а҆ха́вли, цр҃и самарѣ́истѣ·

И҆ рече а҆ха́въ къ навꙋѳѣю гл҃ѧ.
да́ждь м̂и виноград̑ твои.
и҆ бꙋ́детъ м̂и ѻ҆град̑ ѕе́лїю, ꙗ҆́ко близ̑ е҆сть до́мꙋ мое҆го, и҆ да́мъ т̂и виноград̑ и҆́нъ па́че сего̀.
и҆ а́ще ли бꙋ́детъ не ѹ҆год̑но пред̑ тобо́ю.
т̂о дам̑ т̂и сре́бро и҆змѣ́нꙋ виногра́дꙋ твое҆мꙋ, и҆ бꙋ́детъ м̂и виноград̑ ѕе́лїю·

И҆ рече навꙋѳѣ́и къ а҆ха́вꙋ.
да не бꙋ́детъ м̂и с̂е ѿ г҃а б҃а мое҆го да́ти наслѣ́дїе ѿц҃ъ мои҆хъ тебѣ̀·

И҆ прїиде а҆ха́въ в до́мъ свои засмꙋще́нъ и҆ ѻ҆скръбленъ ѻ҆ словесѝ е҆же гл҃а к не́мꙋ навꙋѳе́и і҆и҆л҃ьтѧнин̑҇.
и҆ е҆же рече не дам̑ наслѣдїѧ ѿц҃ъ моих̑ тебѣ̀.
и҆ бы́сть дх҃ъ а҆ха́вль смꙋщен̑҇ и҆ ѹ҆спѐ на ѻ́дрѣ своем̑, и҆ покры̀ лице своѐ, и҆ не ꙗ҆́сть хлѣба·

И҆ вни́де и҆е҆завель жена̀ е҆го к не́мꙋ, и҆ реч̑҇ к не́мꙋ что̀ с̂е дх҃ъ тво́и е҆сть смꙋще́нъ, и҆ не ꙗ҆сѝ ты хлѣ́ба·

И҆ рече к неи и҆ а҆хав̑҇ ꙗ҆ко гл҃ах̑ навꙋѳе́ю і҆и҆л҃ьтѧнинꙋ гл҃ѧ.
да́ждь м̂и виноград̑ тво́и на сре́брѣ, и҆ а́ще хо́щеши да́м꙽ т̂и виноград̑ и҆́нъ в него мѣ́сто, и҆ рече м̂и не да́мъ наслѣ́дїѧ ѿц҃ъ мои҆хъ·

И҆ рече к не́мꙋ и҆е҆заве́ль жена̀ е҆го.
т̂ы ли нн҃ѣ тво́риши та́ко цр҃ю і҆и҆л҃евъ.
н̂о воста́въ ꙗ҆жъ хлѣбъ и҆ молча бꙋ́ди, а́зъ дам̑ т̂и виноград̑ навꙋѳеев̑҇ і҆и҆л҃ьтѧнина·

И҆ напи́савши кни́гꙋ на и́мѧ а҆ха́вле и҆ запечатлѣ ѧ҆̀ печа́тїю е҆го.
и посла̀ кни́гꙋ къ ста́рцемъ и҆ свобод̑нымъ, живꙋщимъ с навꙋѳе́емъ·

И҆ пи́сано бѣ же въ кни́ѕѣ та́ко.
пости́тесѧ постомъ, и҆ посади́те навꙋѳе́ѧ вы́ше всѣхъ людїи·

И҆ приведѣте пред онь дв̂а мꙋж́а сн҃а зако́нопрестꙋпныхъ.
и҆ т̂а свѣдѣтельствꙋ́ета на́нь гл҃юще.
ꙗ҆́ко не блс̑҇ви б҃а и҆ цр҃ѧ.
і҆ и҆звед̑ше е҆го и҆ побїите и҆̀ ка́менїемъ.
и҆ да ѹ́мретъ·

И҆ сътвори́ша та́ко мꙋж́и гра́да е҆го старѣ́иши.
и҆ свобод̑ницы живꙋщїѝ въ гра́дѣ е҆го.
ꙗ҆́коже посла̀ к ни́мъ и҆е҆заве́ль, ꙗ҆́кож̑ пи́сано бѧ́ше въ кни́гах̑, и҆же пꙋсти к ним̑·

И҆ нареко́ша по́стъ и҆ посади́ша навꙋѳе́ѧ на челѣ̀ лю́дїи·

И҆ прїидо́ста дв̂а мꙋж́а сн҃а зако́нопрестꙋпных̑.
и҆ сѣдоста подлѣ е҆го, и҆ свѣдѣтельва́ста на́нь мꙋж́и воста́вшаѧ на навꙋѳе́ѧ пред̑ всѣми люд̑ми гл҃ще.
се́й не блс̑҇ви б҃а и҆ цр҃ѧ.
і҆ и҆зведо́ша и҆̀ во́нъ и҆з гра́да.
и҆ побиша и҆̀ ка́менїем̑ и҆ ѹ́мре·

И҆ посла́ша къ и҆е҆заве́ли гл҃юще.
побїенъ бы́сть навꙋѳе́и и҆ ѹ́мретъ·

И҆ бысть ꙗ҆́ко ѹ҆слы́ша и҆е҆заве́ль, гл҃ющихъ ꙗ҆́ко побїе҆нъ навꙋѳе́и и҆ ѹ́мре.
и҆ рече а҆ха́вꙋ, воста́ни наслѣдꙋй виноград̑ навꙋѳе́евъ і҆и҆л҃ьтѧнина, и҆же не взѧ́тъ т̂и сре́бра.
и҆ ѹ҆же нѣ́сть навꙋѳе́и жи́въ, н̂о ѹ́мре·

И҆ бы́сть ꙗ҆́ко ѹ҆слы́ша а҆ха́въ ꙗ҆́ко ѹ҆бїенъ бы́сть навꙋѳе́и і҆и҆л҃ьтѧнинъ.
и҆ све́рже ри́зы своа и҆ ѻ҆блече́сѧ въ врѣти́ще.
и҆ бысть по си́хъ и҆ въста́въ і҆ и҆де а҆ха́въ въ виноград̑ навꙋѳе́ѧ і҆и҆л҃ьтѧнина наслѣдити и҆̀·

И҆ рече г҃ь ко и҆лїѝ ѳезви́тѧнинꙋ гл҃ѧ, въста́въ и҆ сни́ди на срѣте́нїе а҆ха́вꙋ цр҃ю і҆и҆л҃евꙋ, и҆же в꙽ самарїи.
се бо се́й въ виногра́дѣ навꙋѳе́евѣ, ꙗ҆ко сни́де т̂ꙋ прїѧ́ти е҆го·

И҆ речеши е҆мꙋ гл҃ѧ си́це гл҃етъ г҃ь.
поне́же т̂ы ѹ҆бѝ навꙋѳе́ѧ.
и҆ прїѧ́тъ виноград̑ е҆го.
сего ради гл҃етъ г҃ь.
на мѣстѣ и҆дѣж́е полиза́ша ѱѝ кро́вь е҆го т̂ꙋ поли́жт̑ꙋ и҆ кро́вь твою̀.
и҆ блд̑ꙋница и҆змы́ют̑сѧ въ кро́ви твое́й·

И҆ реч̑҇ а҆ха́въ къ и҆лїѝ ѻ҆брѣте ли м̂ѧ враже мои.
и҆ реч̑҇ и҆лїѧ ѻ҆брѣто́хъ поне́же т̂ы всꙋе́ разъждежесѧ.
и сътворѝ лꙋка́вное пред̑ гм҃ъ, въ раз꙽гнѣ́вати и҆̀·

Си́це гл҃етъ г҃ь с̂е а҆́зъ наведꙋ на́ тѧ ѕла́ѧ.
и҆ попалю̀ за́днѧѧ твоѧ̀.
и҆ расточꙋ̀ вс̂ѧ а҆ха́вова ѹ҆вращ꙽шагосѧ ѿ менѐ кро́мѣ.
и҆ съдръжи́мыѧ, и҆ ѻ҆ста́вшаѧ въ і҆и҆л҃и·

И҆ преда́мъ до́мъ твои ꙗ҆́ко до́мъ и҆е҆ровоа́ма сн҃а нава́това·

и҆ ꙗ҆́коже до́мъ ваа́синъ сн҃а а҆ха́и҆на ѻ҆ прогнѣванїихъ, и҆́миже мѧ прогнѣ́ва.
и҆ съгрѣшѝ въ і҆и҆л҃и·

И҆ е҆заве́ль рече гл҃етъ г҃ь ѱѝ снѣдѧтъ ю҆̀ в꙽ пе́рвое паде́нїе въ і҆ил҃и·

И҆ ѹ҆мръшихъ а҆ха́влихъ и҆ въ гра́дѣ снѣдѧт̑ ѱѝ.
и҆ ѹ́мръшаѧ е҆го на́ поли снѣдѧт̑ пти́ца нбс̑҇ныѧ·

И҆ в сꙋе́тѣ т̂ы е҆си а҆ха́вѣ.
поне́же нача́тъ твори́ти лꙋка́вое пред̑ гм҃ъ.
ꙗ҆́ко превратѝ и҆е҆заве́ль жена̀ е҆го·

И҆ ѻ҆мрази́сѧ ѕѣ́ло в мерз꙽скихъ, по все́мъ ꙗ҆́же сътвори́ша в самарїи.
и҆́хже и҆стощѝ г҃ь ѿ лица сн҃овъ і҆и҆л҃евъ·

И҆ внегда̀ слы́ша а҆ха́въ словеса̀ с̂и.
склони́сѧ пред̑ лицем̑ гн҃имъ, і҆ и҆дѧ́ше пла́часѧ, и҆ сверже ри́зы своѧ̀ и҆ препоѧ́сасѧ вре́тищемъ по тѣлꙋ свое҆мꙋ и҆ пости́сѧ и҆ б̂ѣ ѻ҆блечен̑҇ въ вре́тище ѿ дн҃и во́ньже ѹ҆бѝ навꙋѳе́ѧ і҆и҆л҃ьтѧнина·

И҆ хожда́ше скорбенъ и҆ бы́сть гл҃ъ гн҃ь рꙋко́ю раба̀ е҆го и҆лїѝ ѻ҆ а҆ха́вѣ·

И҆ рече г҃ь ви́дѣхъ ꙗ҆́ко склони́сѧ а҆ха́въ предо мно́ю.
сего ра́ди не наведꙋ зло́бы е҆го во́ дн҃и е҆го.
н̂о во́ дн҃и сн҃а е҆го наведꙋ ѕло́бꙋ на до́мъ е҆го·

Глв̑҇а, к҃в·

И прїиде в꙽ самарїю и҆ сѣде, г҃, лѣта.
и҆ не бѣ̀ бра́ни ме́жд̑ꙋ сѷрїе҆ю, и҆ ме́ждꙋ і҆и҆л҃емъ·

И бысть въ лѣто тре́тїе, и҆ сниде и҆ѻ҆сафа́тъ цр҃ь і҆ѹ́динъ къ цр҃ю і҆и҆л҃евꙋ·

И҆ реч̑҇ цр҃ь і҆и҃лев̑҇ къ ѻ́трокомъ свои҆мъ.
вѣсте л̂и ꙗ҆́ко моѧ̀ е҆сть рема́ѳа галад̑ска, и҆ м̂ы молчи́мъ прїѧ́ти ю҆̀ ѿ рꙋки цр҃ѧ сѷрїиска·

И҆ рече цр҃ь і҆ил҃евъ къ і҆ѻ҆сафа́тꙋ а҆́ще възы́идеши с на́ми на́ брань въ рама́ѳꙋ галад̑скꙋю, и҆ рече і҆ѻ҆сафа́т꙽ ꙗ҆́коже и҆ а́зъ та́коже и т̂ы, ꙗ҆коже лю́ди моѝ та́коже и҆ лю́дїе твоѝ, ꙗ҆́коже ко́ни моѝ та́кож̑ и҆ ко́ни твоѝ·

И҆ рече и҆ѻ҆сафат̑ цр҃ь і҆ѹ́динъ къ цр҃ю і҆и҆л҃евꙋ.
въпро́симъ ѹ҆бо днс̑҇ь г҃а·

И҆ собра̀ цр҃ь і҆и҆л҃евъ вс̂ѧ про̑҇рки.
ꙗ҆́ко у҃, мꙋжъ.
и҆ рече цр҃ь и҆мъ а́ще и҆дꙋ̀ в рема́ѳъ галад̑скїи, и҆л̂и ѻ҆ста́влю.
и҆ рѣша взы́иди и҆ даѧ̀ пода́сть т̂и г҃ь в рꙋ́цѣ твоѝ цр҃ѧ·

И҆ рече і҆ѻ҆сафат̑ къ цр҃ю і҆и҆л҃евꙋ.
нѣ́сть л̂и здѣ про̑҇рка гн҃ѧ, и҆ въпроси́ли бы́хом̑ г҃а и҆мъ·

И҆ рече цр҃ь і҆и҆л҃евъ къ і҆ѻ҆сафа́тꙋ а҆́ще е҆сть е҆ді́нъ мꙋжъ на вопрошенїе г҃а и҆ а́зъ възненави́дх̑ѣ и҆̀.
ꙗ҆́ко не гл҃етъ ѻ҆ мнѣ̀ до́брѣ н̂о ѕлѣ̀.
михїѧ сн҃ъ и҆е҆м꙽влаа́нь.
и҆ рече цр҃ь і҆ѻ҆сафа́тъ і҆ѹ́динъ не гл҃и цр҃ю тако·

И҆ призва̀ цр҃ь і҆и҆л҃евъ скопца̀ е҆ді́ного, и҆ реч̑҇ ско́ро и҆дѝ по михїѧ сн҃а е҆м꙽влаи́на·

И҆ цр҃ь і҆и҆л҃евъ і҆ѻсафа́тъ цр҃ь і҆ѹ́динъ.
сѣдѧ́ше ко́ждо на прс̑҇тлѣ свое҆мъ во ѻ҆рꙋ́жїи при вра́техъ самарїѧ и҆ вс̂и про̑҇рцы прорицахꙋ пред̑ ними·

И҆ сътворѝ себѣ̀ седекїа сн҃ъ ханаа́нь ро́га желѣз́на и҆ реч̑҇, та́ко гл҃етъ г҃ь си́ма ро́гома сѷрїю сконча́еши.
до́ндеже сконча́ют̑сѧ·

И҆ вс̂и про̑҇рцы прорица́хꙋ та́ко гл҃юще.
възы́иди в рема́ѳъ галад̑скїи.
и҆ наста́вит̑ т̂ѧ и҆ да́сть т̂и г҃ь в рꙋц́ѣ цр҃ѧ а҆сѷрїиска·

И҆ посол̑҇ шед̑ призва́ти михїѧ.
и҆ рече е҆мꙋ гл҃ѧ, с̂е всѝ про̑҇рцы ѹ҆сты е҆ді́ными нн҃ѣ гл҃ютъ до́брѣ ѻ҆ цр҃и, бꙋ́ди и҆ т̂ы въ словесѣхъ си́хъ.
и҆ по словесем̑ сим̑ и҆ гл҃и до́брѣ·

И҆ реч̑҇ михїѧ жи́въ г҃ь.
ꙗ҆ко а҆́ще чт̂о речетъ г҃ь мнѣ̀ с̂и гл҃ю·

И҆ прїиде къ цр҃ю и҆ реч̑҇ е҆мꙋ цр҃ь, михїѧ взы́дꙋ л̂и в рема́ѳꙋ галад̑скꙋю на́ брань и҆л̂и ѻ҆ста́влю.
и҆ рече сїи взы́иди и҆ наста́витъ т̂ѧ г҃ь и҆ вда́сть т̂и в рꙋ́цѣ цр҃ѧ·

И҆ реч̑҇ е҆мꙋ цр҃ь е҆щѐ два́жды а҆́зъ кленꙋ т̂ѧ ꙗ҆́ко да гл҃еши и҆́стиннꙋ пред̑ гм҃ъ·

И҆ рече михїѧ ви́дѣхъ весь і҆и҆л҃ь раз꙽сѣѧ́нъ въ гора́хъ ꙗ҆́ко ста́да и҆́мже нѣсть па́стыра.
и҆ рече г҃ь, не г҃ь си́мъ въ б҃а.
да возврати́тсѧ ко́ждо в до́мъ сво́и с ми́ромъ·

И҆ рече цр҃ь і҆и҆л҃евъ ко і҆ѻ҆сафа́тꙋ цр҃ю і҆ѹдинꙋ не рѣхъ л̂и тебѣ̀ ꙗ҆ко не прори́чет꙽ м̂и се́й до́брѣ, н̂о ѕлѣ̀·

И҆ рече михїѧ не та́ко б̂о и҆ а́зъ слы́шꙋ гл҃ъ гн҃ь не та́ко.
ви́дх̑ѣ г҃а б҃а і҆и҆л҃ева сѣдѧ́ща на прс̑҇тлѣ своем̑.
и҆ вс̂е во́ин꙽ство нбс̑҇ное предъстоѧ́ше е҆мꙋ, ѻ҆де́снꙋю е҆го и҆ ѻ҆шꙋю́ю е҆го·

И҆ рече г҃ь кт̂о прельстит̑ а҆ха́ва цр҃ѧ і҆и҆л҃ева.
и҆ взы́дет̑ и҆ паде́т꙽ в рама́ѳѣ галад̑стѣи, и҆ реч̑҇ се́й та́ко и҆ се́й рече та́ко·

І҆ и҆зы́де дх҃ъ и҆ ста̀ пред̑ гм҃ъ.
и҆ рече а́зъ прельщꙋ и҆̀.
и҆ реч̑҇ к не́мꙋ г҃ь ка́ко.
и҆ реч̑҇ и҆зы́идꙋ и҆ бꙋдꙋ дꙋхъ ло́жъ во ѹ҆стѣхъ всѣхъ про̑҇ркъ е҆го, и҆ реч̑҇ прельстиши и҆̀.
и҆ ѹ҆бо мо́жеши и҆зы́иди, и҆ сътворѝ та́ко·

И҆ с̂е нн҃ѣ да́сть г҃ь дꙋхъ лож̑ во ѹ҆ста всѣхъ про̑҇ркъ твои҆хъ си́хъ.
и҆ г҃ь гл҃а на́ тѧ ѕла́ѧ·

И҆ прїиде седекїѧ сн҃ъ ханаа́нь, и҆ поразѝ михїѧ въ лицѐ.
и реч̑҇ кїи дх҃ъ е҆сть гн҃ь гл҃авыи к тебѣ и҆ рече михїѧ с̂е т̂ы ѹ҆́зриши въ дн҃ь ѻ҆́нъ е҆гда̀ вни́деши въ сокро́вище съкро́вища свое҆го скры́тисѧ т̂ꙋ·

И҆ реч̑҇ цр҃ь і҆и҆л҃евъ пои҆мѣте михе́ѧ и҆ въз꙽врати́те и҆̀ къ а҆монѣ кнѧ́ѕю гра́да, и҆ къ і҆ѻ҆а́сꙋ сн҃ꙋ цр҃евꙋ да и҆̀ поса́дѧтъ в꙽ темни́цы.
и҆ да и҆̀ ко́рмѧтъ хлѣбом̑ печа́лным̑, и҆ водо́ю печа́лною до́ндеже возвра́щꙋсѧ в ми́рѣ·

И҆ рече михїѧ а҆́ще возвраща́ѧ возврати́шисѧ въ ми́рѣ.
т̂о да вѣ́си ꙗ҆́ко нѣ́сть гл҃алъ г҃ь мно́ю.
и҆ рече слы́шите лю́дїе вс̂и.
и҆ взы́де цр҃ь і҆и҆л҃евъ і҆ѻ҆сафат̑ цр҃ь і҆ѹ́дин̑҇ с ни́мъ, и҆ во рема́ѳꙋ галад̑скꙋю·

И҆ реч̑҇ цр҃ь і҆и҆л҃въ къ і҆ѻ҆сафа́тꙋ цр҃ю і҆ѹ́динꙋ прикры́и м̂ѧ и҆ въни́дꙋ в сѣчъ.
и҆ т̂ы ѻ҆блеци́сѧ въ ризꙋ мою̀.
и҆ прикры́сѧ цр҃ь і҆и҆л҃евъ, и҆ вни́де в сѣчъ·

Цр҃ь б̂о сѷрскїи заповѣ́да кнѧ́ѕем̑ и҆ ѻ҆рꙋжником̑ свои҆мъ, л҃, и҆ двѣма гл҃ѧ.
не побѣди́тесѧ н̂и с вели́кимъ н̂и съ малым̑.
н̂о ток̑҇мо и҆щѣте цр҃ѧ і҆и҆л҃ва е҆ді́ного·

И҆ бы́сть ꙗ҆́ко ѹ҆зрѣша вое҆во́ды и҆ ѻ҆рꙋжникы і҆ѻ҆сафа́та цр҃ѧ і҆ѹ́дина.
и҆ рѣша с̂е е҆сть цр҃ь і҆и҆л҃евъ, и҆ ѻ҆бъстꙋпи́ша и҆ побѣди́шасѧ с ни́ми.
и҆ возопи і҆ѻ҆сафат̑·

И҆ бы́сть ꙗ҆́ко ѹ҆зрѣша вое҆во́ды ѻ҆рꙋж́ныѧ ꙗ҆́ко нѣсть цр҃ь і҆и҆л҃евъ то́й, и҆ воз̑врати́шасѧ ѿ не́го.
и҆ ѻ҆тѧзав̑҇ лꙋ́къ е҆ді́нъ мꙋжъ е҆мꙋже и҆́мѧ е҆восто́гъ ѹ҆стрѣлѝ цр҃ѧ і҆и҆л҃ва ме́ждꙋ воздꙋ́ховъ подлѣ щит̑.
и҆ рече цр҃ь скопцꙋ̀ свое҆мꙋ возвратисѧ і҆ и҆звед̑и̑ мѧ ѿ бра́ни се́ѧ ꙗ҆́ко ꙗ҆́звенъ е҆смь·

И҆ ѹ҆мно́жисѧ бра́нь в то́й дн҃ь.
и҆ цр҃ь б̂ѣ стоѧ̀ со колесни́цею проти́вꙋ сѷрѧн̑҇ ѿ ѹ҆́тра до́ вечера.
и҆ натеко́ста кро́ви по́лни нѧ́дра е҆го и҆з꙽ ꙗ҆́звы и҆ ѹ́мре до́ вечера.
и҆схожа́ше кровь ꙗ҆́звенаѧ ѿ нѧ́дръ по́ колесни́цы·

И҆ вопїѧ̀ проповѣ́дникъ ѻ҆ западѣ сл҃нца гл҃ѧ.
ко́ждо васъ да и҆́детъ въ сво́и град̑, и҆ въ свою̀ зем̑лю ꙗ҆́ко ѹ҆́мре цр҃ь·

И҆ прїидо́ша в самарїю.
и҆ погребо́ша въ самарїѝ цр҃ѧ·

И҆ раздѣли́сѧ кро́вь по всемꙋ̀ цвѣтꙋ самарѣ́искꙋ.
и҆ полизаша̑ сви́ни и҆ ѱѝ кро́вь е҆го.
и҆ блд̑ꙋница и҆з꙽мы́шасѧ въ кро́ви е҆го по гл҃ꙋ гн҃ю и҆же гл҃а·

И҆ про́чаѧ словес̑҇ а҆ха́вовъ и҆ вс̂ѧ ꙗ҆́же сътворѝ.
и҆ храм̑ слоно́выи и҆же сътворѝ и҆ вс̂ѧ града ꙗ҆́же сътворѝ.
не с̂е ли бы́ша пи́сана въ кни́гах̑ словес̑҇ во́ дн҃и цр҃ь і҆и҆л҃евъ·

И҆ ѹ́мре а҆ха́въ и҆ положенъ бы́сть съ ѿц҃ы своими.
и҆ црс̑҇твова ѻ҆хозїѧ сн҃ъ е҆го в него̀ мѣсто·

І҆ѻ҆сафат̑ сн҃ъ а҆сїинъ црс̑҇твова над̑ і҆ѹ́дою, в лѣто, д҃ е, а҆ха́ва цр҃ѧ і҆и҆л҃ева·

Црс̑҇твова же і҆ѻ҆сафа́тъ сн҃ъ а҆сі́инъ.
въ і҆ерс̑҇ли́мѣ лѣтъ, л҃е.
внегда̀ нача̀ црс̑҇твова́ти.
к҃е, лт̑ѣ црс̑҇твова въ і҆ерс̑҇ли́мѣ.
и҆́мѧ мт҃ри е҆го б̂ѣ а҆зꙋ́ва дщ̂и салаи́лѧ·

И҆ хожда́ше по всѣмъ пꙋте́мъ а҆сїиномъ ѿц҃а свое҆го.
и҆ не ѹ҆клони́сѧ ѿ не́го, е҆же твори́ти ѹ҆год̑но пред̑ ѻ҆чи́ма гн҃има·

То́кмо высо́кых̑ не разорѝ е҆щѐ лю́дїе закалахꙋ и҆ жрѧ́хꙋ на высоких̑·

И҆ ѹ҆мири́сѧ і҆ѻ҆сафат̑ съ цр҃емъ і҆и҆л҃вым̑·

И҆ про́чаѧ словес̑҇ і҆ѻ́сафа́тов꙽ и҆ си́лы е҆го ꙗ҆́же сътворѝ.
не с̂е ли пи́сана сꙋть в꙽ кни́зѣ словесъ въ дн҃е цр҃еи і҆ѹ́дин̑҇·

И҆ ѹ́мре і҆ѻ҆сафат̑ съ ѿц҃ы свои́ми.
и҆ погребе́нъ бы́сть ѹ҆ ѿц҃ъ своих̑ во́ градѣ двд҃вѣ ѿц҃а свое҆го.
и҆ црс̑҇твова и҆ѻ҆рам̑ сн҃ъ е҆го в него̀ мѣ́сто·

И҆ ѻ҆хозїѧ сн҃ъ а҆ха́вов̑҇ црс̑҇твова над̑ і҆и҃лемъ в꙽ самарїѝ в лѣто, з҃і, і҆ѻ҆сафата цр҃ѧ і҆ѹ҆дина.
и҆ црс̑҇твова над̑ і҆и҃лем̑ в самарїи, лт̑ѣ в҃·

И҆ сотворѝ лꙋка́вное пред̑ гм҃ъ.
и҆ нача̀ ходи́ти по пꙋтем̑ ѿц҃а свое҆го а҆ха́ва.
и҆ по пꙋтѝ е҆заве́лиными мт҃ри свое́ѧ и҆ во грѣсх̑ѣ до́мꙋ і҆е҆ровоа́млѧ сн҃а наватова.
и҆же согрѣши во і҆и҆л҃и·

И҆ порабо́та ваа́лꙋ и҆ поклони́сѧ е҆мꙋ.
и҆ раз̑гнѣва г҃а б҃а і҆и҆л҃ева па́че всѣхъ бы́вших̑ прежде е҆го·