ЧЄТВЄ́РТЫИ КНИ́ГИ ЦРс̑҇ТВЪ

ГЛАВА̀· А҃

И ѿстꙋпѝ моа́въ ѿ і҆и҆л҃ѧ по ѹ҆мрътвїи а҆ха́вли.
и҆ ѻ҆хоѕїѧ́ же впадѐ ѿ ѻ҆кна̀.
и҆же в го́рницы е҆го въ самарїи.
и҆ разболѣсѧ ѕѣ́ло.
и҆ посла̀ послы̀ и҆ рече к ним̑ и҆дѣте и҆ въпроси́те ѹ҆ ваа́ла скве́рнаго бо́га а҆ка́рскихъ а҆ще жив̑҇ бꙋдꙋ ѿ бо́лезни мое́ѧ сеѧ·

І҆ и҆до́ша въпраша́ти е҆го ради.
и҆ а҆гг҃лъ гн҃ь рече къ и҆лїѝ ѳезви́тѧнинꙋ гл҃ѧ.
въста́въ і҆ и҆дѝ на срѣте́нїе посло́мъ ѻ҆хоѕїѧ́ цр҃ѧ самарїиска.
и҆ гл҃еши к нимъ и҆л̂и нѣсть б҃а въ і҆и҆л҃и ꙗ҆́ко грѧдетѐ въпраша́ти ваа́ла, скве́рнаго бога в꙽ каро́нѣ·

И҆ сего ради си́це гл҃етъ г҃ь, на ѻ́дръ на́ньже воз̑ше́лъ е҆си т̂ꙋ не и́маши слѣсти с него ꙗ҆́ко т̂ꙋ и҆́маши см҃ртїю ѹ҆мрѣти.
і҆ и҆дѐ и҆лїѧ̀, и҆ рече к ни́мъ·

И҆ ѻ҆брати́шасѧ послы̀ к немꙋ·

ѻ҆́нже рече им̑ чт̂о ꙗ҆́ко възврати́стесѧ·

И҆ рѣша к немꙋ мꙋжъ възы́иде въ срѣте́нїе намъ, и҆ рече к на́мъ, възврати́тесѧ и҆дѣте къ цр҃ю посла́вшемꙋ вы̀ и҆ гл҃ѣте к немꙋ̀, си́це гл҃етъ г҃ь и҆л̂и нѣ́сть б҃а въ і҆и҆л҃и да вы̀ грѧдете въпраша́ти ваа́ла скве́рнаго бо́га въ каронѣ.
сего ради на ѻ҆дрѣ̀ на немже ты̀ лежи́ши не и́маши слѣсти с не́го, н̂о тꙋ̀ и҆́маши см҃ртїю ѹ҆мрѣти·

И҆ рече к ни́мъ цр҃ь гл҃ѧ.
како́въ бѧ́ше мꙋжъ то́и въше́дыи въ срѣте́нїе ва́мъ и҆ гл҃авыи вам̑ словеса̀ сѝ·

И҆ рѣша к немꙋ̀ мꙋжъ косма́тъ, и҆ по́ѧсъ ѹ҆смѧ́нъ ѻ҆ чре́слѣхъ е҆го.
и҆ рече цр҃ь, и҆лїѧ̀ ѳеѕви́тѧнинъ се́и е҆сть·

И҆ посла̀ к немꙋ старѣишинꙋ пѧ́тьдесѧ́тника.
и҆ н҃, мꙋжъ е҆го и҆ вшед̑ше прїидо́ша к не́мꙋ.
и҆ с̂е и҆лїѧ̀ бѣ̀ сѣдѧ̀ връхꙋ горы̀.
и҆ гл҃а пѧтьдесѧ́тникъ к немꙋ.
и҆ рече зовет̑ т̂ѧ цр҃ь чл҃че бж҃їи сни́ди·

И҆ ѿвѣща̀ и҆лїѧ̀ и҆ рече къ пѧтьдесѧ́тникꙋ.
а҆ще е҆смь чл҃къ бж҃їи.
т̂о да сни́дет̑ ѻ҆́гнь с нб҃си и҆ снѣсть т̂ѧ, и҆ н҃ твою̀ с тобо́ю.
и҆ сни́де ѻ҆́гнь с нб҃си и҆ снѣсть и҆̀, и҆ н҃ мꙋжъ с ни́мъ·

И҆ приложѝ цр҃ь посла́ти к немꙋ дрꙋга́го пѧтьдесѧ́тника, и҆ н҃ мꙋжъ с ним̑ и҆ вшед̑ и҆ гл҃а пѧтьдесѧ́тник̑҇ к немꙋ и҆ рече чл҃че бж҃їи.
си́це гл҃етъ цр҃ь пот꙽ща́всѧ сни́ди·

И҆ ѿвѣща́въ и҆лїѧ̀ гл҃а к немꙋ и҆ рече.
а҆ще чл҃къ бж҃їи а́зъ е҆смь т̂о да сни́детъ ѻ҆́гнь с нб҃се и҆ да снѣсть т̂ѧ, и҆ н҃ мꙋжъ с тобо́ю.
и҆ сни́де ѻ҆́гнь с нб҃се и҆ снѣсть и҆̀.
и҆ н҃ мꙋжъ е҆го·

И҆ приложѝ цр҃ь е҆щѐ посла́ти тре́тїꙗ҆го старѣ́ишинꙋ.
пѧтьдесѧ́тника, и҆ н҃. мꙋжъ с ним̑.
и҆ прїиде к немꙋ̀ пѧтьдесѧ́тникъ тре́тїи.
и҆ поклони́сѧ на колѣнꙋ свое́ю пред̑ и҆лїе́ю, и҆ молѝ е҆го и҆ гл҃а к немꙋ, и҆ рече чл҃че бж҃їи с̂е гото́ва е҆сть дш҃а моѧ̀ пред̑ тобо́ю.
и҆ дш҃а ра́бъ твои҆хъ сихъ н҃. пред̑ ѻ҆чи́ма твои́ма·

Се бо сни́де ѻ҆́гнь с нб҃се и҆ поꙗ҆́сть ѻ҆́ба пѧтьдесѧ́тника старѣишаѧ, съ н҃ е҆ю.
и҆ с̂е ѹ҆бо гото́ва е҆сть дш҃а рабъ твои҆хъ пред̑ ѻ҆чи́ма твои́ма·

И҆ гл҃а а҆гг҃лъ бж҃їи къ и҆лїѝ и҆ рече.
сниди с ни́мъ не ѹ҆бо́исѧ ѿ лица̀ и҆хъ, и҆ въстав̑҇ и҆лїѧ̀ и҆ сни́де с нимъ къ цр҃ю и҆ гл҃а к немꙋ̀ и҆ рече, си́це гл҃етъ г҃ь понеже посла̀ послы̀ въпраша́ти ваа́ла сквернаго бога в каро́нѣ.
ꙗ҆́ко да не бы́ти б҃ꙋ въ і҆и҆л҃и е҆гоже словесѝ можа́ше въпраша́ти, сего ра́ди на ѻ҆дрѣ̀ на не́мже ты̀ лежи́ши т̂ꙋ нн҃ѣ не и́маши слѣсти с него н̂о смр҃тїю ѹ́мреши·

И҆ ѹ́мре по гл҃ꙋ гн҃ю, е҆же гл҃а рꙋкою и҆лїиною.
и҆ про́чаѧ словесъ ѻ҆хозі́ин̑҇ е҆ли́ко сътворѝ.
не сѐ л̂и пи́сана въ кни́гахъ словесъ дн҃їи цр҃ь.
і҆и҆л҃евъ·

И црс̑҇твова̀ и҆ѻ҆ра́мъ въ мѣсто е҆го над̑ і҆и҆л҃емъ, в꙽ самарїи.
в лѣто, в҃ е, и҆ѻ҆ра́ма сн҃а и҆ѻ҆сафа́това цр҃ѧ і҆ѹ́дина поне́же не и҆мѣ̀ сн҃а ѻ҆хозїѧ·

И҆ про́чаѧ словесъ ѻ҆хозї́инъ е҆лико сътворѝ, не сѐ л̂и пи́сана въ кн́игахъ дн҃їи цр҃ь і҆и҆л҃евъ·

Глв̑҇а, в҃·

И бы́сть внегда̀ взѧ́ти г҃ꙋ и҆лїю̀ въ ви́хрѣ ꙗ҆́ко на́ нб҃о.
і҆ и҆дѧ́ше и҆лїѧ̀ і҆ е҆лисе́и ѿ гал̑҇га́лъ·

И҆ рече и҆лїѧ̀ къ е҆лисе́е҆ви сѣди ѹ҆бо здѣ̀ ꙗ҆́ко г҃ь посла̀ м̂ѧ до веѳи́лѧ.
и҆ рече і҆е҆лисе́и жи́въ г҃ь и҆ жива̀ дш҃а твоѧ̀ а҆ще ѻ҆ста́влю т̂ѧ.
и҆ прїидо́ста до веѳи́лѧ·

И҆ прїидо́ша сн҃ы про̑҇рческїѧ и҆же в꙽ веѳиле къ е҆лисе́ю и҆ рѣша к немꙋ разꙋмѣ́еши л̂и, ꙗ҆́ко възима́етъ г҃ь господи́на твое҆го ве́рхꙋ главы̀ твое́ѧ ѿ тебѐ, и҆ рече і҆е҆лисе́и и҆ а́зъ разꙋмѣ́хъ молчи́те·

И҆ рече е҆мꙋ и҆лїѧ̀, сѧ́ди ѹ҆бо здѣ ꙗ҆́ко г҃ь посла̀ м̂ѧ въ е҆рихонъ.
и҆ рече і҆е҆лисе́и жи́в꙽ г҃ь, и҆ жива дш҃а твоѧ̀ ꙗ҆́ко не ѻ҆ста́влю т̂ѧ.
и҆ прїидо́ста до і҆е҆рихо́на·

И҆ приближи́шасѧ сн҃ове про̑҇ркъ и҆же въ е҆рихо́нѣ къ і҆е҆лисе́ю, и҆ рѣша е҆мꙋ разꙋмѣ́еши л̂и ꙗ҆́ко дне́сь възе́млет̑ г҃ь господи́на твое҆го свы́ше главы̀ твое҆ѧ ѿ тебѐ.
и҆ рече и҆б̂о и҆ а́зъ разꙋмѣ́хъ молчите·

Рече же и҆лїа̀ къ і҆е҆лисееви сѣдѝ здѣ̀ ꙗ҆ко г҃ь посла̀ м̂ѧ до і҆ѻ҆рда́на.
и҆ рече і҆е҆лисе́и живъ г҃ь и҆ жива̀ дш҃а твоѧ̀ ꙗ҆́ко не ѻ҆ста́нꙋ тебѐ.
и҆ поидо́ста ѻ҆́ба·

И҆ н҃ мꙋж꙽ ѿ сн҃овъ про̑҇рчъ, и҆ ста́ша проти́вꙋ и҆здалеча, и҆ сїѝ ѻ҆́ба ста́ста при і҆ѻ҆рда́нѣ·

И҆ прїꙗ҆́ть и҆лїѧ̀ ми́лоть свою сви́тъ ю҆̀ и҆ ѹ҆да́ри и҆̀ въ во́дꙋ и҆ растꙋписѧ вода̀ сюдꙋ и҆ сю́дꙋ, и҆ проидо́ста ѻ҆́ба по́ сꙋхꙋ·

И҆ бы́сть прешед̑шима и҆́ма, и҆ рече и҆лїѧ̀ къ і҆е҆лисе́е҆ви, просѝ чт̂о сътворю̀ т̂и.
прежде дажде не взѧт̑ бꙋдꙋ ѿ тебѐ, и҆ рече і҆е҆лисе́и да бꙋдетъ ѹ҆бо дх҃ъ и҆же въ тебѣ̀ сꙋгꙋ́бъ въ мнѣ̀·

И реч̑҇ и҆лїѧ̀ ѻ҆жести́лъ е҆си проси́ти.
и҆ рече а҆ще ѹ́зриши м̂ѧ въспрїе́млема ѿ тебѐ бꙋдетъ т̂и та́ко.
а҆ще л̂и не ѹ́зриши не и́мать т̂и бы́ти·

И҆ быс̑҇ и҆́ма и҆дꙋщема и҆дѧ́ста и҆ гл҃аста.
и҆ с̂е колесни́ца ѻ҆́гненаѧ и҆ ко́ни ѻ҆́гненїи.
и҆ раздѣли́ша междꙋ̀ ѻ҆бѣма.
и҆ взѧ́тъ бы́сть и҆лїѧ̀ ви́хромъ ꙗ҆ко на́ нб҃о·

І҆ е҆лесе́и зрѧ́ше и҆ въпїѧ́ше ѿч҃е ѿч҃е колесни́ца і҆и҆л҃ева и҆ ко́н꙽ницы е҆ѧ̀, и҆ не ви́дѣ е҆го ктомꙋ̀.
и҆ ꙗ҆́тсѧ і҆е҆лисе́и за ри́зы своѧ̀ и҆ растерза̀ ѧ҆̀, въ дв̂ѣ растерза́нїи·

И҆ взѧ́тъ ми́лоть и҆лїи҆нꙋ і҆е҆лисе́и пад̑шꙋю на нем̑ и҆ възврати́сѧ і҆е҆лисе́и и҆ ста̀ на́ брезѣ і҆ѻ҆рдановѣ·

И҆ прїꙗ҆́ть і҆е҆лисе́и ми́лоть и҆лїи́нꙋ ꙗ҆́же падѐ на верхꙋ е҆го и҆ ѹ҆да́ри въ во́дꙋ и҆ не растꙋпи́сѧ вода̀ и҆ рече гдѐ б҃ъ и҆лїи́нъ.
и҆ ѹ҆да́ри і҆е҆лисе́и втори́цею и҆ растꙋпи́сѧ вода̀ сю́дꙋ и҆ сю́дꙋ.
і҆ е҆лисе́и про́иде по́ сꙋхꙋ·

И҆ ви́дѣша и҆̀ сн҃ове про̑҇рчи и҆же и҆ въ е҆рихо́нѣ проти́вꙋ.
и҆ рѣша с̂е почива́ет꙽ дх҃ъ и҆лїи́нъ на і҆е҆лисе́ю.
и҆ прїидо́ша на срѣте́нїе е҆мꙋ.
и҆ поклони́шасѧ е҆мꙋ до землѧ̀·

И҆ рѣша к нем́ꙋ с̂е нн҃ѣ съ ѻ҆́троки твои́ми, н҃, мꙋжи сн҃овъ си́лныхъ.
и҆ да шед̑ше взы́щꙋтъ господина твое҆го, е҆да ка́ко дх҃ъ гн҃ь възе́мъ положи́лъ и҆̀ на и҆ѻ҆рда́нѣ на ве́рхꙋ горы̀.
и҆л̂и на ве́рхꙋ хо́лма.
и҆ рече і҆е҆лисе́и не посылаите·

И҆ принꙋ́диша и҆̀ до́ндеже ѹ҆крѣпи́шасѧ.
и҆ рече пошлѣте и҆ посла́ша, н҃. мꙋжъ і҆ и҆ска́ша г҃ дн҃и и҆ не ѻ҆брѣто́ша е҆го·

И҆ възврати́шасѧ к немꙋ.
и҆ то́и бѣ̀ сѣдѧ́и въ е҆рихо́нѣ.
и҆ рече і҆е҆лисе́и к ни́мъ не гл҃ахъ л̂и к вам̑ не посыла́ите, и҆ рѣша мꙋжїе гра́да къ і҆е҆лисе́ю·

Се жи́тїе гра́да бл҃го ꙗ҆́коже ты̀ господи́не ви́диши н̂о во́ды ѕлы̀, и҆ землѧ̀ непло́дна·

И҆ рече і҆е҆лисе́и принесѣте м̂и водоно́съ но́въ и҆ всы́плете во́нь со́ль.
и҆ взе́мше и҆ принесо́ша к немꙋ.

І҆ и҆зы́иде і҆е҆лисе́и на и҆схо́дища во́днаѧ и҆ всы́па т̂ꙋ со́ль, и҆ рече си́це гл҃етъ г҃ь и҆сцѣли́хъ во́ды сїѧ.
и҆ ѹ҆жѐ не бꙋдетъ ѿ неѧ ктомꙋ̀ смр҃ти и҆ неплод̑ства·

І҆ и҆сцѣли́шасѧ во́ды до дн҃е сего, по гл҃ꙋ і҆е҆лисе́е҆вꙋ и҆же гл҃а·

И҆ възы́иде ѿтꙋдꙋ въ веѳи́ль.
и҆ в꙽ходѧ́щꙋ е҆мꙋ пꙋте́мъ и҆ с̂е дѣти ма́лы і҆ и҆зыидо́ша и҆з гра́да и҆ рꙋга́хꙋсѧ е҆мꙋ и҆ рѣша е҆мꙋ грѧдѝ плѧши́ве грѧдѝ<.>

И҆ ѻ҆зрѣвсѧ въ слѣдъ себѐ и҆ ви́дѣ ѧ҆̀, и҆ проклѧ́тъ ѧ҆̀ и҆́менемъ гн҃имъ.
и҆ с̂е и҆зыдо́стѣ дв̂ѣ медвѣ́дицы ѿ лꙋга и҆ растерго́ша и҆̀ ѿ нихъ, м҃в, ѻ҆тро́чища·

І҆ и҆дѐ ѿтꙋдꙋ въ горꙋ̀ карми́льскꙋю, и҆ ѿтꙋдꙋ възврати́сѧ в꙽ самарїю·

Глв̑҇а, г҃·

Иѻ҆ра́мъ сн҃ъ а҆хавов̑҇ црс̑҇твова̀ надъ і҆и҆л҃емъ въ самарїѝ.
в лѣто и҃і и҆ѻ҆сафа́та цр҃ѧ і҆ѹ́дина.
и҆ црс̑҇твова̀ лѣтъ в҃і·

И҆ сътворѝ лꙋка́вное пред̑ ѻ҆чи́ма гн҃има.
н̂о не ꙗ҆́ко ѿц҃ъ и҆ мт҃и е҆го и҆ разрꙋши ка́пища ваалова ꙗ҆́же бѣ̀ сътворилъ ѿц҃ъ е҆го.
н̂о то́кмо въ грѣсѣхъ і҆е҆ровоа́ма сн҃а нава́това и҆же съгрѣшѝ въ і҆и҆л҃и.
прилѣпи́сѧ и҆ не ѿстꙋпѝ ѿ него·

И҆ мо́са цр҃ь моа́вль б̂ѣ пригонѧ́ѧ на и҆схо́дьбꙋ цр҃еви і҆и҆л҃евꙋ, р҃, ты́сѧщ̑҇ а҆́гнѧтъ, р҃, ты́сѧщъ ѻ҆́вновъ и҆ съ рꙋнесы̀ и҆хъ·

И҆ бы́сть по ѹ҆мрътвїи а҆ха́вли.
и҆ ѿвръжесѧ цр҃ь моа҆́вль цр҃ѧ і҆и҆л҃ева·

И҆зы́иде цр҃ь и҆ѻ҆ра́мъ въ дн҃и ѻ҆́ны ѿ самарїѧ и҆ съглѧда̀ і҆и҆л҃ѧ·

І҆ и҆дѐ и҆ посла къ и҆ѻ҆сафатꙋ цр҃ю і҆ѹ҆динꙋ гл҃ѧ.
цр҃ь моа́вль ѿврьжесѧ менѐ а҆́ще и҆́деши со мно́ю на́ брань на моа́ва.
и҆ рече взы́идꙋ си́це мнѣ̀ ꙗ҆́коже и҆ тебѣ̀.
и҆ ꙗ҆́коже лю́дїе моѝ, та́ко лю́дїе твоѝ.
ꙗ҆кож̑ ко́ни моѝ, та́ко ко́ни твоѝ·

И҆ реч̑҇ кои́мъ пꙋте́мъ в꙽зы́идемъ, и҆ рече пꙋте́мъ пꙋсты́нѧ е҆до́мъскїѧ·

И҆дѐ цр҃ь і҆и҆л҃евъ, и҆ цр҃ь і҆ѹ́динъ, и цр҃ь е҆до́мль, і҆ и҆до́ша пꙋтем̑ се́дмь дн҃їи, и҆ не бѣ по́лкꙋ воды̀, и҆ скотꙋ е҆го пи́ти·

И҆ рече ѻ҆́трокомъ своим̑ цр҃ь і҆и҆л҃евъ ѽ ꙗ҆́ко затворѝ г҃ь г҃, сїѧ цр҃ѧ и҆дꙋща преда́ти в рꙋцѣ моа́вли·

И҆ рече и҆ѻ҆сафа́тъ к немꙋ цр҃ь і҆ѹ́динъ.
а҆́ще не бꙋдетъ про̑҇рка гн҃ѧ.
и҆ въпро́симъ г҃а им̑.
и҆ ѿвѣща̀ е҆ді́нъ ѻ҆трокъ цр҃ѧ і҆и҆л҃ева.
здѣ̀ ес̑҇ і҆е҆лисе́и сн҃ъ и҆ѻ҆сафа́товъ.
и҆же възлива̀ во́дꙋ на рꙋ́цѣ и҆лїи́нѣ·

И҆ реч̑҇ и҆ѻ҆сафа́тъ е҆сть на то́мъ гл҃ъ гн҃ь, и҆ сни́де к немꙋ̀ цр҃ь і҆и҆л҃евъ и҆ѻ҆сафа́т꙽ цр҃ь і҆ѹ́динъ, и҆ цр҃ь е҆до́мескъ·

И҆ реч̑҇ і҆е҆лисе́и къ цр҃ю і҆и҆л҃евꙋ.
чт̂о мнѣ̀ и҆ тебѣ̀ прїидѝ нн҃ѣ къ про̑҇ркомъ ѿц҃а твое҆го, и҆ къ про̑҇ркомъ мт҃ре свое́ѧ.
и҆ рече е҆мꙋ цр҃ь і҆и҆л҃евъ сего л̂и ради събрал̑҇ е҆сть г҃ь трїи цр҃евъ преда́ти ѧ҆̀ в рꙋцѣ моа́вли·

И рече і҆е҆лисе́и жи́в꙽ г҃ь си́лъ и҆же пред̑стою пред ни́мъ ꙗ҆́ко не лица̀ и҆ѻ҆сафа́това стыжꙋсѧ.
и҆л̂и възрѣ́въ на́ тѧ ѹ҆сꙋмню́сѧ·

Но с̂е ви́ждь приведѝ м̂и пѣве́цъ.
и҆ бы́сть е҆гда̀ пѣва́ше пѣве́цъ.
и҆ бы́сть рꙋка̀ гн҃ѧ на не́мъ·

И҆ рече та́ко гл҃етъ г҃ь сътвори́те пото́ки сїѧ глꙋбо́кїѧ·

Ꙗ҆́ко та́ко гл҃етъ г҃ь не преста́нетъ дх҃ъ и҆ не преста́нет̑ до́ждъ.
и҆ пото́цы сїѝ напо́лнѧтсѧ воды̀ и҆ пі́ете в̂ы, и҆ стѧжа́нїѧ ва́ша и҆ ско́ты ва́ша·

И҆ ле́гко сѝ бꙋдетъ пред̑ ѻ҆чи́ма гн҃има.
и҆ преда́мъ моа́ва в рꙋки ва́ши·

И҆ побѣди́те всѧкъ гра́дъ твердъ.
и҆ вс̂ѧ дре́ва бл҃га низложи́те, и҆ всѧ́къ и҆сто́чникъ воды̀ разгради́те.
и҆ всѧ́кꙋ ча́сть бл҃гꙋ разбі́ете ка́менїемъ и҆ бы́сть заѹ́тра ꙗ҆́ко въсхожда́хꙋ къ жрътвѣ.
и҆ с̂е во́ды и҆дѧ́хꙋ пꙋтем̑ е҆дом̑ским꙽.
і҆ и҆спо́лнисѧ воды̀ землѧ̀·

И҆ вс̂и моа҆ви́тѧне слы́шаша ꙗ҆́ко възыидо́ша тр̂и цр҃и побѣ́дꙋ на́ нѧ.
и҆ събра́шасѧ вс̂и ѿ ю́нотъ и҆же препоꙗ҆са́хꙋсѧ ѻ҆рꙋжїѝ и҆ вы́шед̑ше и҆ ста́ша ѹ҆ предѣла·

И҆ ѹ҆рани́ша заѹ́тра и҆ слн҃це въсїѧ̀ на во́ды.
и҆ ви́дѣ моа́въ проти́вꙋ на вода́хъ ꙗ҆́ко лꙋча крова́вы·

И҆ рече кро́вь си е҆сть ѿ ѻ҆рꙋ́жїѧ би́ша б̂о сѧ сꙋть ѹ҆жѐ цр҃и и҆ ѹ҆би́лъ е҆сть мꙋжъ и҆́скренѧго своег̑҇ и҆ с̂е нн҃ѣ грѧде́тъ на кори́сть моа́влю и҆ въста́вше внидо́ша въ по́лкъ і҆и҆лв꙽ і҆и҆л҃ьтѧ́не въста́вше и҆зби́ша моа҆́влѧны, и҆ побѣго́ша пред ни́ми·

И҆ вшед̑ше в зе́млю и҆хъ гра́ды разби́ша.
и҆ всѧ́кꙋ ча́сть бл҃гꙋ наверго́ша мꙋжи ка́менїѧ.
і҆ и҆сполниша ѧ҆̀ и҆ всѧ́къ и҆сто́чник̑҇ воды̀ разгради́ша и҆ всѧ́ко дре́во бл҃го и҆с꙽сѣко́ша и҆ до ѻ҆ста́вшихъ стѣ́нъ ка́меныхъ не разбїе́ных̑.
и҆ ѻ҆б꙽стꙋпиша пращ̑҇ницы и҆ разби́ша ѧ҆̀·

И҆ видѣ цр҃ь моа́вль ꙗ҆́ко ѹ҆крѣписѧ над̑ ними бра́нь, и поꙗ҆́тъ со собо́ю з҃ сотъ мꙋжъ держащихъ ѻ҆рꙋжїѧ хотѧ̀ бити на цр҃ѧ е҆до́млѧ, и҆ не возмого́ша·

И҆ поѧт̑ сн҃а свое҆го прь́венца и҆же црс̑҇твова́ти и҆мѣѧ́ша в него мѣ́сто, и҆ сътвори жр́ътвꙋ, и҆ възнесѐ вс̂есъж꙽же́наѧ на стѣна́хъ.
и҆ бы́сть мѧте́жъ въ і҆и҆л҃и вели́къ, и҆ възрати́шасѧ ѿ ни́хъ, и҆ прїидо́ша в зе́млю свою·

Глв̑҇а, д҃·

И жена̀ б̂ѣ е҆ді́на ѿ сн҃овъ пророчъ.
и҆ возопѝ къ і҆е҆лисе́е҆ви гл҃юще.
ра́бъ тво́и, а҆ мо́и мꙋжъ ѹ҆́мре, а҆ т̂ы вѣ́си ꙗ҆́ко ра́бъ б̂ѣ боѧ́сѧ г҃а.
и҆ зае́мникъ нѣ́кїи прїиде.
взѧ́ти сн҃а моѧ̀ ѻ҆́ба себѣ̀ в рабо́тꙋ·

И҆ рече е́й і҆е҆лисе́и чт̂о да сътворю т̂и повж̑ѣ м̂и.
чт̂о и́маши нн҃ѣ в до́мꙋ.
ѻ҆наж̑ рече нѣ́сть ѹ҆ рабы̀ твое́ѧ ничто́же в домꙋ̀.
н̂о то́кмо ма́ло і҆е҆ле́ѧ в꙽ сосꙋдѣ, и҆ реч̑҇ к не́и прїиди.
і҆ и҆спросѝ себѣ̀ внѣ̀ ѿ всѣхъ сꙋсѣ́дъ твои҆хъ сосꙋды пра́зны и҆ не ѹ҆ма́ли·

И҆ вшед̑ши затво́риши две́рѣ ѻ҆ себѣ, и҆ ѻ҆ сн҃ꙋ твое́ю и҆ влѣе́ши ѿ і҆е҆ле́ѧ твое҆го во всѧ̀ сосꙋ́ды сїѧ и҆ наполне́ное во́змеши·

І҆ и҆дѐ ѿ него̀ и҆ сътвори та́ко.
и҆ затворѝ ѻ҆ себѣ̀ две́ри и҆ ѻ҆ сн҃ꙋ свое́ю.
и҆ т̂а приближи́шасѧ к не́и и҆ лѣѧ́ста с не́ю·

И҆ е҆гдаж̑ и҆сполни́шасѧ вс̂ѧ сосꙋ́ды.
и҆ рече сн҃ома свои́ма, приближи́та м̂и е҆щѐ сосꙋ́дъ.
и҆ рѣста е́й, нѣ́сть е҆щѐ сосꙋ́да, и҆ ста̀ і҆е҆ле́и·

И҆ прешед̑ възвѣсти чл҃кꙋ бж҃їю.
и҆ рече і҆е҆лисе́и и҆дѝ и҆ прода́ждь сїи і҆е҆ле́и.
и҆ заплатѝ лише́вникомъ своим̑.
и҆ т̂ы и҆ сн҃а твоа̀ жи́ва бꙋ́дета ѿ ѻ҆ста́вшаго і҆е҆ле́ѧ·

И҆ бы́сть въ е҆ді́нъ дн҃ь и҆ ми́мои҆дѐ і҆е҆лисе́и въ сома́нъ.
и҆ т̂ꙋ жена̀ ве́лїѧ, и҆ ѹ҆дръжа и҆̀ снѣсти хлѣбъ, и҆ бы́сть е҆мꙋ въходи́ти.
і҆ и҆схо́дити множи́цею и҆ ѹ҆клонѧ́шесѧ та́мо ꙗ҆́сти хлб̑҇ѣ.

И҆ рече жена̀ к꙽ мꙋж́ꙋ свое҆мꙋ.
с̂е ѹ́бо разꙋмѣхъ ꙗ҆́ко чл҃къ бж҃їи ст҃ъ се́й.
и҆же ми́мохо́дит̑ скво́ѕѣ н̂ы при́сно·

И҆ сътворим̑ ѹ҆бо е҆мꙋ пола́тꙋ мѣ́сто ма́ло.
и҆ поста́вимъ е҆мꙋ ѻ҆́дръ и҆ трапе́зꙋ, и҆ прс̑҇тлъ и҆ свѣщни́къ.
и҆ бꙋдет̑ внегда̀ в꙽ходи́ти е҆мꙋ к на́мъ и҆ ѹ҆клони́тсѧ та́мо·

И҆ бы́сть во е҆ді́нъ дн҃ь и҆ вни́де т̂ꙋ, и҆ ѹ҆клони́сѧ въ го́ръницꙋ и҆ спа̀ т̂ꙋ·

И҆ рече къ гиѻ҆зїю ѻ҆тро́чищꙋ свое҆мꙋ.
призови м̂и сꙋмантѧны́ню сїю.
и҆ призва ю҆̀, и҆ ста̀ пред̑ нимъ·

И҆ рече е҆мꙋ р꙽цы ѹ҆бо е́й.
с̂е ѹ҆диви́ла е҆си нам̑ вс̂е дн҃евное сі́е.
чт̂о подоба́етъ м̂и твори́ти т̂и.
а҆́ще е҆сть т̂и сло́во къ цр҃ю, и҆ли къ кнѧ́ѕю си́лѣ.
ѻ҆на́ же рече нѣ́сть.
посредѣ людїи своих̑ аз̑ е҆смь живꙋщ́и·

И҆ рече къ гиѻ҆зїю чт̂о подоба́етъ сътвори́ти е́й.
и҆ реч̑҇ гиѻ҆зїи ѻ҆́трочище е҆го ѕѣло сн҃а нѣсть ѹ҆ неѝ.
а҆ мж̑ꙋ еѧ̀ ста́ръ·

И҆ реч̑҇ призови ю҆̀.
и҆ призва ю҆̀ и҆ ста̀ при две́рехъ·

И҆ рече і҆е҆лисе́и к не́и.
во времѧ с̂е и҆ въ ча́съ сїи бꙋ́деши л̂и жи́ва.
т̂ы зачне́ши сн҃а ѻ҆наж̑ рече н̂и г҃и не солъжѝ рабѣ свое́й·

И҆ зача́тъ въ чре́вѣ жена̀ сн҃ъ и҆ родѝ во вре́мѧ с̂е и҆ въ ча́съ сі́и, ꙗ҆коже гл҃а к не́и і҆е҆лисе́и·

И҆ растѧ́ше ѻ҆тро́чищ̑҇.
и҆ бы́сть е҆гда̀ и҆зы́иде ѻ҆́трок̑҇ къ ѿц҃ю свое҆мꙋ къ жнꙋщим̑·

И҆ рече къ ѿц҃ю свое́мꙋ глава̀ м̂и боли́тъ.
и҆ рече къ ѻ҆́трокꙋ несѝ и҆̀ к꙽ ма́тери е҆го и҆ несѐ и҆̀ къ ма́тери е҆го.
и҆ лежа́ше на колѣ́нꙋ е҆ѧ̀ до полꙋ́ дн҃и и҆ ѹ́мре·

ѻ҆на́ же вознесе и҆̀ и҆ положѝ на ѻ҆́дрѣ чл҃ка бж҃їѧ.
и҆ затворѝ ѻ҆ нем̑ и҆ и҆зы́иде·

И҆ призва̀ мꙋж́а своего и҆ ре́че е҆мꙋ послѝ м̂и ѹ҆́бо е҆ді́ного ѿ ѻ҆́трокъ и҆ еді́ного ѿ ѻ҆слѧт̑, и҆ текꙋ̀ до чл҃ка бж҃їа и҆ возвращꙋ ѧ҆̀·

И҆ рече чт̂о ꙗ҆ко и҆́деши к не́мꙋ и с̂е дньс̑҇ не но́въ мс̑҇ць, ниже сꙋбо́та.
ѻ҆на́ же рече ми́ръ·

И҆ ѻ҆сѣдла ѻ҆слѧ̀ свое и҆ реч̑҇ къ ѻ҆тро́чищꙋ свое҆мꙋ ведѝ и҆ ходѝ не ѹ҆дръжи менѐ, да всѧ́дꙋ ꙗ҆́коже рекꙋ т̂и·

І҆ и҆дѐ и҆ прїиде до чл҃ка бж҃їѧ въ го́рꙋ карми́льскꙋю.
и҆ бы́сть ꙗ҆́ко ви́дѣ еѧ̀ і҆е҆лисе́и грѧдꙋщꙋю.
и҆ рече къ гиѻ҆зїю ѻ҆тро́чищꙋ свое҆мꙋ.
с̂е ѹ҆бо сꙋман꙽тѧныни грѧде́тъ·

Тецы̀ ѹ҆бо въ срѣте́нїе е́й, и҆ рцы е́й ми́ръ тебѣ̀.
и҆ тече во срѣте́нїе е́й, и҆ рече е́й ми́ръ тебѣ̀, ми́ръ мꙋж́ꙋ твое҆мꙋ, ми́ръ ѻ҆тро́чищꙋ.
ѻ҆на́ же реч̑҇ ми́ръ·

И҆ прїиде къ і҆е҆лисе́ю въ го́рꙋ и҆ е́мсѧ за но́ѕѣ е҆го и҆ прибли́жисѧ гиѻ҆зїи и҆ хотѧ̀ ѿринꙋти ю҆̀.
и҆ реч̑҇ і҆е҆лисе́и, ѻ҆ста́ви еѧ̀ ꙗ҆́ко дш҃а еѧ̀ прискор̑҇бна е҆сть нн҃ѣ.
и҆ г҃ь ѹ҆таѝ ѿ менѐ и҆ не възвѣсти мнѣ̀·

И҆ рече жена̀ е҆да̀ проси́хъ сн҃а ѹ҆ г҃а мое҆го, ꙗ҆ко реко́хъ не прелсти менѐ·

И҆ реч̑҇ і҆е҆лисе́и къ гиѻ҆зїю, препоѧ́ши чре́сла своѧ̀ и҆ возмѝ же́злъ мо́и въ рꙋцѣ своѝ, і҆ и҆дѝ.
и҆ ꙗ҆́ко а҆́ще ѻ҆брѧ́щеши мꙋ́жа не блс̑҇ви е҆го.
и҆ а́ще блс̑҇вит̑ т̂ѧ мꙋжъ не ѿвѣща́и е҆мꙋ.
и҆ возложѝ же́злъ мо́и на лицѐ ѻ҆тро́чищꙋ·

И҆ реч̑҇ мт҃и ѻ҆тро́чища жи́въ г҃ь и҆ жива̀ дш҃а твоа̀ а҆́ще ѻ҆ста́нꙋ тебѐ и҆ въста̀ і҆е҆лисе́и і҆ и҆дѐ въ слд̑ѣ е҆ѧ·

Гиѻ҆зїи же ѹ҆преди и҆̀ и҆ возложи же́злъ на лицѐ ѻ҆тро́чищꙋ.
и҆ не бѣ гла́са ни послꙋша́нїѧ.
и҆ възврати́сѧ въ срѣте́нїе е҆го и҆ повѣ́да е҆мꙋ гл҃ѧ, не въста̀ ѻ҆тро́чищъ·

И҆ вни́де і҆е҆лисе́и въ хра́мъ, и҆ с̂е ѻ҆тро́чищъ ѹ҆мры́и положе́нъ б̂ѣ на ѻ҆́дрѣ е҆го·

И вни́де і҆е҆лисе́и в до́мъ.
и҆ затворѝ две́ри ѿ ѻ҆бо́ю само́ю.
и҆ помоли́сѧ г҃ꙋ, и҆ възы́де и҆ лѧ́же на ѻ҆тро́чищи.
и҆ положѝ ѹ҆ста̀ своѧ̀ на ѹ҆стх̑ѣ е҆го.
и҆ ѻ́чи своѝ на ѻ́чи е҆го.
и҆ рꙋ́цѣ своѝ на рꙋ́цѣ е҆го, и҆ пле́снѣ своѝ на пле́снꙋ е҆го.
и҆ дꙋнꙋ на́нь і҆ и҆дѐ ѻ҆ не́мъ и҆ разъгорѣ ѧ пло́ть ѻ҆тро́чищꙋ·

И҆ ѻбрати́сѧ и҆ ѻ҆бходѝ в꙽ хра́мѣ сю́дꙋ и сю́дꙋ.
и҆ възы́де и҆ преклони́сѧ на ѻ҆тро́чища сед̑мижды.
и҆ ѿвр҃ъзе ѻ҆тро́чищъ ѻ́чи своѝ·

И҆ воз꙽пи і҆е҆лисе́и къ гиѻ҆зїи, и҆ рече.
призови м̂и сꙋман꙽тѧны́ню сїю.
и҆ възва ю҆̀ и҆ вни́де к не́мꙋ.
и҆ рече е́й і҆е҆лисе́и прїими сн҃ъ тво́и·

И҆ вни́де жена̀ и҆ падѐ на́ ногꙋ е҆го и҆ поклони́сѧ е҆мꙋ до землѧ̀, и҆ поꙗ҆́тъ сн҃а свое҆го и҆зы́де·

І҆ е҆лисе́и, возврати́сѧ в꙽ галга́лы.
и҆ б̂ѣ гла́дъ в꙽ землѝ то́й.
и҆ сн҃ове про̑҇рчи сѣдѧ́хꙋ пред̑ нимъ.
и҆ рече і҆е҆лисе́и ѻ҆тро́чищꙋ свое҆мꙋ, наста́ви ко́нобъ ве́лїи, и҆ сварѝ варе́нїе сн҃омъ проро́чим̑·

І҆ и҆зы́де е҆ді́н꙽ ѿ них̑ на село̀ собра́ти ѕелїа ди́вїа и҆ ѻ҆брѣтъ виноград̑ на селѣ̀, и҆ набра̀ в не́мъ ꙗ҆́блока ди́вїѧго, по́лнꙋ ри́зꙋ свою̀, и҆ всы́па в коте́лъ на сваре́нїе.
ꙗ҆ко не разꙋмѣша·

И҆ принесе мꙋжем̑ ꙗ҆́сти.
и҆ бы́сть ꙗ҆дꙋщим̑ и҆мъ ѿ варе́нїѧ.
и҆ с̂е возопи́ша и рѣша смр҃ть ес̑҇ въ коно́бѣ чл҃че бж҃їи, не мого́ша ꙗ҆́сти·

И҆ рече возми́те мꙋкѝ и҆ въсы́пте в꙽ коно́бъ.
и҆ рече і҆е҆лисе́и къ гиѻ҆зїю ѻ҆́трочищꙋ свое҆мꙋ, и҆знесѝ лю́демъ да ꙗ҆дѧт̑.
и҆ не бы́сть ктомꙋ̀ лꙋка́ваго гла́са ѻ҆ коно́бѣ·

И҆ мꙋжъ прїиде ѿ веѳарылисы, и҆ принесѐ къ чл҃кꙋ бж҃їю прьвород̑ныи хлб̑҇ѣ ѧ҆чныи, к҃. и҆ смо́квы.
и҆ рече да́ите лю́демъ да ꙗ҆дѧ́тъ·

И рече ѻ҆́трокъ е҆го не довлѣ́етъ с̂е пред̑ сто́мъ мꙋж́ъ.
и҆ реч̑҇ лю́демъ да́ждъ ѧ҆̀ да ꙗ҆дѧ́тъ, ꙗ҆́ко си́це гл҃етъ г҃ь да ꙗ҆дѧ́тъ и҆ ѻ҆ста́нет̑ и҆́мъ·

И҆ ꙗ҆до́ша и҆ ѻ҆ста по гл҃ꙋ гн҃ю и҆же гл҃а і҆е҆лисе́и·

Глв̑҇а, е҃·

И нее҆ма́нъ кнѧ́ѕь си́лныхъ а҆сѷрїи б̂ѣ мꙋж́ъ ве́лїи пред̑ господи́номъ своим̑, и҆ ди́вен̑҇ в ли́цѣ.
ꙗ҆́ко е҆го ра́ди да́сть г҃ь сп҃се́нїе сѷрїѝ.
и҆ сїи мж̑ꙋ б̂ѣ ве́лїи и҆ си́ленъ, н̂о ѕѣло б̂ѣ прокаже́нъ·

И҆ ѿ сѷрїи и҆зыйдо́ша во́ини ма́ли.
и҆ плѣни́ша ю́нотъкꙋ ма́лꙋ ѿ зе́мли і҆и҆л҃евы, и҆же пред̑ жено́ю нее҆ма́новою слꙋжа̀·

И҆ реч̑҇ госпо́жи свое́и по́лезно б̂ы господи́нꙋ мое҆мꙋ было̀ а҆́ще б̂ы бы́лъ ѹ҆ про̑҇рка бж҃їѧ и҆же въ самарїи.
то́й б̂о ѻ҆чи́ститъ ѿ прока́зы е҆го·

И҆ шед̑ши возвѣсти́ господи́нꙋ свое҆мꙋ и҆ рече.
та́ко, и҆ та́ко гл҃а ю҆́нотъка ꙗ҆́же е҆сть ѿ землѧ̀ і҆и҆л҃евы·

Рече же цр҃ь сѷрїискїи къ нее҆ма́нꙋ, прїиди и҆ вни́ди, и҆ пошлю̀ кни́гꙋ къ цр҃ю і҆и҆л҃евꙋ, і҆ и҆дѐ и҆ взѧ̀ в рꙋ́цѣ своѝ, і҃, тала́нтъ сре́бра.
и҆ ҂ѕ҃, зла́тник꙽, и҆ і҃, рѝзъ и҆змн̑҇ѣ кра́снъ·

И҆ внесѐ кни́гꙋ къ цр҃ю і҆и҆л҃евꙋ гл҃ѧ с̂е нн҃ѣ ꙗ҆́ко прїиде кни́га сїѧ к тебѣ̀ с̂е послах̑ к тебѣ нее҆ма́на раба̀ моег̑҇, да ѻ҆чи́стиши и҆̀ ѿ прока́зы е҆го·

И҆ бы́сть ꙗ҆ко прочтѐ кни́гꙋ цр҃ь і҆и҆л҃евъ разд̑ра ри́зы своа̀ и҆ реч̑҇.
е҆да̀ азъ бог̑҇ е҆смь ѹ҆мрътви́ти и҆ жи́вотвори́ти, ꙗ҆́ко се́й посла̀ къ мнѣ̀ да ѻ҆чищꙋ̀ мꙋж́а ѿ прока́зы е҆го, н̂о про́чїе разꙋмѣ́ите и҆ ви́дите ꙗ҆́ко с̂е і҆ и́щетъ вины̀ къ мнѣ̀·

И҆ бысть ꙗ҆́ко ѹ҆слы́ша і҆е҆лисе́и ꙗ҆ко раздра̀ ры́зы своѧ цр҃ь і҆и҆л҃евъ.
и҆ посла̀ къ цр҃ю іи҆л҃евꙋ гл҃ѧ почт̂о раздра̀ ры́зы своѧ̀.
да прїидет̑ къ мнѣ нн҃ѣ нее҆ма́нъ и҆ да разꙋмѣет̑ ꙗ҆́ко е҆сть про̑҇ркъ въ і҆и҆л҃и·

И҆ прїиде нее҆ма́нъ на ко́нехъ и҆ на колесни́цахъ.
и҆ ста̀ при две́рехъ до́мꙋ і҆е҆лисе́ева·

И҆ посла̀ і҆е҆лїсе́и посла̀ к не́мꙋ гл҃ѧ.
шед̑ и҆змы́исѧ седми́цею въ і҆ѻ҆рда́ни.
і҆ и҆змѣни́т꙽ ти сѧ пло́ть и҆ ѻ҆чи́ститсѧ·

И҆ разгнѣ́васѧ нее҆ма́нъ ѿи҆дѐ и҆ реч̑҇, с̂е ѹ҆бо гл҃ахъ ꙗ҆́ко и҆зы́идетъ ко мнѣ̀ и҆ ста́нетъ и҆ призове́тъ и҆́менемъ б҃а свое҆го.
и҆ возло́житъ рꙋ́кꙋ свою̀ на мѣ́сто, и҆ ѻ҆чи́ститъ прока́зꙋ·

То нѣ́сть л̂и ѹ҆́нше а҆ва́на и҆ фарфа́на рѣкѝ дама́сковѣ па́че і҆ѻ҆рда́на, и҆ вс̂ѧ во́ды і҆и҆л҃евы.
т̂о не и́мамъ л̂и шед̑ и҆змы́тисѧ в ни́хъ, и҆ ѻ҆чи́щꙋсѧ и҆ ѹ҆клони́сѧ гнѣ́венъ і҆ и҆дѐ·

И҆ приближи́шасѧ ѻ҆́троцы е҆го и҆ рѣша е҆мꙋ гл҃юще.
а҆́ще б̂ы ве́лїе сло́во гл҃алъ про̑҇ркъ теб̂ѣ не бы л̂и сътворѝлъ е҆си ꙗ҆́коже с̂и, с́и же рече к тебѣ̀ и҆змы́исѧ и҆ ѻ҆чи́стишисѧ·

И҆ сни́де нее҆ман̑҇ и҆ погрꙋзи́сѧ въ і҆ѻ҆рда́нѣ сед̑мери́цею.
по гл҃ꙋ і҆е҆лисе́ѧ.
и҆ ѻ҆брати́сѧ пло́ть е҆го ꙗ҆́ко пло́ть ѻ҆троча́те мла́да и҆ ѻ҆цысти́сѧ·

И҆ возврати́сѧ па́ки къ іе҆лисе́ю то́й са́мъ, и҆ вс̂е ѻ҆плъче́нїе е҆го.
и҆ пришед̑ ста̀ пред̑ нимъ.
и҆ рече, а҆́зъ нн҃ѣ разꙋмѣхъ ꙗ҆́ко нѣ́сть б҃а въ все́и землѝ.
н̂о то́кмо въ і҆и҆л҃и.
то с̂е ѹ҆жѐ прїими блс̑҇венїе ѿ раба̀ свое҆го·

И҆ рече і҆е҆лисе́и жи́въ г҃ь и҆же пред̑стою̀ пред̑ ним̑.
а҆́ще прїимꙋ чт̂о, и҆ нꙋжда́ше и҆̀ взѧти и҆ не послꙋша е҆го н̂и взѧ̀·

И҆ рече нее҆ма́нъ а҆́ще ли, не хо́щеши взѧ́ти т̂о да́ждъ м̂и рабꙋ̀ твое҆мꙋ бре́мѧ сꙋпрꙋ́гома м꙽щима.
ѿ землѧ се́ѧ чрьме́ныѧ, ꙗ҆́ко не сътвори́тъ ѿсе́лѣ ра́бъ тво́и вс̂есожъже́нїѧ и҆ жрътвы богом̑ и҆́нѣмъ, н̂о г҃ꙋ е҆ді́номꙋ·

Ѡ҆ гл҃ꙋ же сем̑ и҆ словесѝ се́мъ да ѿпꙋститъ г҃ь рабꙋ̀ твое҆мꙋ, внегда̀ вни́детъ господи́нъ мо́и в до́мъ рем꙽ма́новъ на поклоне́нїе е҆мꙋ, и҆ та́мо почїе҆тъ в рꙋ́кꙋ мое́ю, и҆ поклоню́сѧ в до́мꙋ рем꙽ма́ни, е҆гда̀ кланѧ́тисѧ е҆мꙋ в до́мꙋ рем꙽ма́ни.
и҆ да ѻ҆чи́ститъ ѹ҆бо г҃ь раба̀ твое҆го ѻ҆ словесѝ се́мъ·

И҆ рече і҆е҆лисе́и къ нее҆ма́нꙋ.
и҆дѝ с ми́ром̑ и҆ ѿи҆дѐ ѿ не́го въ хавра́ньскꙋ зе́млю·

И҆ реч̑҇ гиѻ҆зїи ѻ҆тро́чищъ і҆е҆лисеѻ́въ.
се господи́нъ мо́и.
ѿра́ди нее҆ма́нꙋ сѷрѧни́нꙋ семꙋ̀.
не взѧ́ти ѿ рꙋкѝ е҆го и҆же принесѐ.
жи́въ г҃ь ꙗ҆́ко и҆́мамъ тещѝ въ слд̑ѣ е҆го и҆ возмꙋ̀ ѿ не́го нѣ́что·

И҆ течѐ гиѻ҆зїи въ слд̑ѣ нее҆ма́новъ·

и҆ ви́дѣ е҆го нее҆ма́нъ текꙋща въ слд̑ѣ е҆го.
и҆ възврати́сѧ съ колесни́ца на срѣте́нїе е҆мꙋ.
и҆ рече гиѻ҆зїи ми́ръ т̂и, сїи же рече ми́ръ·

Господи́нъ мо́и посла̀ м̂ѧ гл҃ѧ.
с̂е нн҃ѣ прїидо́ста ко мнѣ дв̂а ѻ҆тро́чища ѿ го́ры е҆фре́млѧ ѿ сн҃овъ пророчъ, да́ждъ ѹ҆бо рече е҆ю̀ ради тала́нтъ сре́бра, и҆ дв̂ѣ и҆змѣ́нѣ ри́зъ·

И҆ рече нее҆ман̑҇ возмѝ нн҃ѣ дв̂а тала́нта сре́бра.
и҆ взѧ̀ дв̂а тала́нта во два̀ мѣшца и҆ дв̂ѣ и҆змѣ́нѣ ри́зъ.
и҆ възложи на́ два ѻ҆тро́чища своѧ̀.
і҆ и҆до́ша пред̑ ним̑ и҆ прїидо́ша в сꙋмра́ки, и҆ взѧ́тъ ѿ рꙋкꙋ ею̀ и҆ сокры̀ въ хра́мѣ, и҆ ѿпꙋсти мꙋжа·

И҆ са́мъ вшед̑ пред̑ста̀ господи́нꙋ свое҆мꙋ, и҆ рече к немꙋ і҆е҆лисе́и ѿкꙋдꙋ прїиде гиѻ҆зїи.
и҆ реч̑҇ гиѻ҆зїи не и҆сходи́лъ ра́бъ тво́и ника́може·

И҆ реч̑҇ к не́мꙋ і҆е҆лисе́и нѣ́сть л̂и ходи́ло срд̑це моѐ с тобо́ю, и҆ ви́дѣ ꙗ҆́ко возвраща́лъсѧ мꙋжъ с колесни́ца е҆го въ срѣтенїе тебѣ̀.
и҆ нн҃ѣ прїѧл̑҇ е҆си сре́бро и҆ ри́зы взѧлъ е҆си себѣ̀.
да кꙋ́пиши за ни́хъ верто́грады, и҆ масли́ны и҆ виногра́ды, и҆ ѻ́вца и҆ волы̀.
и҆ ѻ́трокы и҆ ѻ҆трокови́ца·

И҆ прока́за нее҆ма́нова да прильнетъ на тебѣ̀, и҆ на сѣмени твоем̑ во вѣки.
і҆ и҆зы́де ѿ лица̀ е҆го прокаженъ ꙗ҆́ко снѣ́гъ·

Глв̑҇а, ѕ҃·

И рѣша сн҃ове про̑҇рчи къ і҆е҆лисе́ю с̂е ѹ҆бо мѣсто и҆дѣже м̂ы живе́мъ проти́вꙋ тебѐ.
тѣ́сно е҆сть на́мъ·

То да и҆де́мъ нн҃ѣ до і҆ѻ҆рда́на.
и҆ да во́змемъ ѿтꙋдꙋ мꙋжъ по беръвнꙋ̀ е҆ді́номꙋ, и҆ да сътвори́мъ себѣ т̂ꙋ ѻ҆би́телища пребыва́ти т̂ꙋ.
и҆ сїи рече и҆дѣте·

И҆ рече е҆ді́нъ грѧд̑и̑ и҆ са́мъ съ рабы̀ свои҆ми, и҆ сїи рече аз̑ и҆дꙋ̀·

І҆ и҆дѐ с ни́ми и҆ дошед̑ше до і҆ѻ҆рда́на сѣко́ша дре́во·

И҆ е҆гда е҆ді́нъ ѿсѣка́ше бер꙽вно̀, и҆ с̂е желѣ́зо спадѐ с топори́ща и впадѐ в꙽ во́дꙋ.
и҆ възопѝ и҆ рече ѽ господи́не мои и҆ сѝ е҆заа́х·

И рече чл҃къ бж҃їи гдѐ падѐ, и҆ показа̀ е҆мꙋ мѣ́сто.
ѻ҆́нъ же вломѝ дре́во и҆ в꙽ве́рже и҆̀ т̂ꙋ.
и҆ въсплы̀ желѣзо·

И҆ рече возмѝ са́мъ, и҆ сїи просте́ръ рꙋкꙋ свою̀ и҆ взѧт̑ е҆̀·

И҆ цр҃ь сѷрскїи б̂ѣ вою́ѧ на і҆и҆л҃ѧ, и҆ совѣща̀ съ ѻ҆́троки свои҆ми гл҃ѧ.
на мѣ́сто нѣ́кое і҆е҆лмо́не преи҆дꙋ̀·

И҆ посла̀ і҆е҆лисе́и къ цр҃ю і҆и҆л҃евꙋ гл҃ѧ съхранѝ не преитѝ на мѣ́сто с̂е.
ꙗ҆́ко т̂ꙋ сѷрѧ́не залѧго́ша·

И҆ посла̀ цр҃ь і҆и҆л҃евъ на мѣсто ѻ҆ не́мже реч̑҇ е҆мꙋ і҆е҆лисе́и, соблюде́сѧ ѿтꙋдꙋ ни е҆ді́ною ни два́жды·

И҆ смꙋти́сѧ срд̑це цр҃ю сѷрскꙋ ѻ҆ словесѣ семъ.
и҆ призва̀ ѻ҆́троки своѧ̀ и҆ рече к ни́мъ, не возвѣща́ете м̂и кт̂о предае́тъ м̂ѧ в рꙋцѣ цр҃ю і҆и҆л҃евꙋ·

И҆ рече е҆ді́нъ ѿ ѻ́трокъ е҆го.
н̂и господине мо́и цр҃ю, ꙗ҆́ко про̑҇ркъ і҆е҆лисе́и и҆же въ і҆и҆л҃и возвѣща́етъ цр҃ю і҆и҆л҃вꙋ вс̂ѧ словеса̀ ꙗ҆́же а҆́ще гл҃еши въ сокро́вищи ло́жница свое́ѧ·

И҆ рече и҆дѣте и҆ ѹ҆вѣдѣте гдѣ̀ е҆сть с̂е.
и҆ посла́въ приведꙋ и҆̀, и҆ возвѣсти́ша е҆мꙋ гл҃юще се е҆сть во е҆вдоѳаи́ме·

И҆ посла̀ та́мо ко́нѧ и҆ колесни́ца и҆ си́лꙋ тѧ́жкꙋ, и҆ прїидо́ша но́щїю и҆ ѻ҆бъꙗ҆́ша гра́дъ·

И҆ ѹ҆ранѝ заѹ́тра раб̑҇ і҆е҆лисе́ѻ҆въ, и҆ въста́въ и҆зы́иде, и҆ с̂е си́ла ѻ҆бъстꙋпѝ град̑ и҆ ко́ни и҆ колесни́ца, и҆ рече ѻ҆́трокъ е҆го к немꙋ ѽ господине чт̂о сътвори́мъ·

И҆ рече і҆е҆лисе́и не бо́исѧ ꙗ҆́ко бо́лїи е҆сть со на́ми, па́че не́же и҆же съ ни́ми·

И҆ помоли́сѧ і҆е҆лисе́и и҆ рече, г҃и ѿвръзѝ нн҃ѣ ѻ҆́чи ѻ҆́трока свое҆го и҆ ѹ́зрит̑, и҆ ѿвръ́зе ѻ҆́чи ѻ҆тро́чища и҆ ви́дѣ и҆ с̂е гора̀ и҆спо́лнь ко́нь и҆ колесни́ца ѻ҆́гньна ѻ҆́крс̑҇тъ і҆е҆лисе́ѧ·

И҆ снидо́ша к немꙋ и҆ помоли́сѧ і҆е҆лисе́и къ г҃ꙋ.
и҆ рече, поразѝ ѹ҆бо ꙗ҆зы́къ се́и невидѣ́нїем꙽ и҆ поразѝ и҆хъ невидѣ́нїемъ по гл҃ꙋ і҆е҆лисе́е҆вꙋ·

И҆ рече к ни́мъ і҆е҆лисе́и, не сѐ пꙋть и҆ не сѐ гра́дъ.
грѧди́те по мн̂ѣ и҆ ведꙋ̀ в̂ы къ мꙋж́еви е҆гоже и҆́щете в̂ы.
и҆ ведѐ ѧ҆̀ в꙽ самарїю·

И҆ бы́сть е҆гда̀ внидо́ша въ самарїю, и рече і҆е҆лисе́и ѿвръзѝ ѹ҆бо и҆мъ г҃и ѻ҆́чи и҆хъ и҆ да ви́дѧтъ.
и҆ ѿвръзѐ г҃ь ѻ҆́чи и҆хъ и҆ ви́дѣша.
и҆ с̂е бѧ́хꙋ посредѣ самарїѧ·

И҆ рече цр҃ь і҆ил҃евъ къ і҆е҆лисе́ю ꙗ҆́ко ви́дѣ ѧ҆̀ а҆́ще поражꙋ̀ ѧ҆̀ пораже́нїемъ ѿч҃е·

И҆ рече і҆е҆лисе́и не порази́ши.
н̂о ток̑҇мо е҆же е҆си плѣнил̑҇ ѻ҆рꙋжїемъ си́мъ, и҆ лꙋкомъ свои҆мъ и҆збїе́ши.
предложѝ и҆мъ хлѣбы и҆ во́дꙋ да ꙗ҆дѧ́тъ.
и҆ да пі́ютъ.
и҆ да и҆дꙋтъ къ господи́нꙋ свое҆мꙋ·

И҆ пред̑ложѝ и҆мъ предъложе́нїе ве́лїе и҆ ꙗ҆́ша и҆ пи́ша.
и҆ ѿпꙋстѝ ѧ҆̀ і҆ и҆до́ша къ господинꙋ свое҆мꙋ, и҆ не приложи́ша ктомꙋ̀ приходи́ти и҆с꙽ сѷрїѧ въ зем̑лю і҆и҆л҃евꙋ·

И бы́сть по сихъ.
и҆ събра̀ сн҃ъ а҆де́ровъ цр҃ь а҆сѷрїискїи, вс̂е ѻ҆полче́нїе свое.
и҆ вше́дъ ѻ҆бъсѣде самарїю·

И҆ бы́сть гла́дъ вели́къ въ самарїѝ, и҆ с̂е ѻ҆бъсѣдо́ша ю҆̀·

до́ндеже бы́сть глава̀ ѻ҆сло́ва за н҃, си́кль сребра̀, и҆ четве́ртаѧ ча́сть мѣры гно́ю голꙋби́наго, за е҃ си́кль сребра̀·

И҆ бы́сть цр҃ь і҆и҆л҃въ ходѧ̀ по стѣна́мъ.
и҆ жена̀ нѣ́каѧ возопѝ к немꙋ гл҃ющи, сп҃си м̂ѧ господине мои цр҃ю·

И҆ рече е́й а҆ще тебе не спс̑҇ает̑ г҃ь, ка́ко а҆зъ сп҃сꙋ тѧ.
е҆да̀ ѿ гꙋмна̀ и҆л̂и ѿ точи́ла·

И҆ рече е́й цр҃ь что̀ т̂и е҆сть, ѻ҆на́ же ѿвѣща̀, и҆ рече, сїѧ жена̀ къ мн̂ѣ речѐ да́ждь ми сн҃ъ твои да и҆ ꙗ҆ди́мъ и҆̀ дне́сь.
а҆ ѹ́тро мое҆го сн҃а з꙽ꙗ҆ди́мъ.
і҆ и҆спеко́хомъ сн҃а мое҆го і҆ и҆з꙽ꙗ҆до́хомъ и҆̀.
и҆ рѣхъ ко не́и въ дн҃ь вторы́и.
да́ждь сн҃а твое҆го і҆ и҆з꙽ꙗ҆ди́мъ и҆̀, и҆ съкры̀ сн҃а свое҆го·

И҆ бы́сть ꙗ҆́ко слы́ша цр҃ь і҆и҆л҃евъ словеса̀ жены̀.
и҆ раздра̀ ри́зы своѧ.
и҆ хожда́ше по стѣнѣ̀.
и҆ ви́дѣша лю́дїе вре́тище на пло́ти е҆го внꙋтръ·

И҆ рече цр҃ь сїѧ да сътвори́тъ м̂и б҃ъ и҆ с̂и да приложи́тъ м̂и а҆ще бꙋдетъ і҆е҆лисе́и съ главо́ю свое́ю днесь·

І҆е҆лисе́и же сѣдѧ́ше в домꙋ̀ свое҆мъ.
и҆ ста́рцы сидѧ́хꙋ с нимъ, и҆ посла̀ цр҃ь мꙋжа пред̑ лицемъ своим̑ и҆ преже да́же прїитѝ посла́вшемꙋ к немꙋ.
и҆ то́и рече къ ста́рцемъ.
не вѣсте л̂и ꙗ҆́ко посла̀ сн҃ъ ѹ҆бїици сего̀, да ѿсѣчетъ главꙋ̀ мою.
и҆ ви́дите до́ндеже прїидетъ посе́лъ.
ѹ҆тверди́те две́ри и҆ печа́лна сътвори́те и҆̀ ѹ҆ две́рїи.
не то́потъ л̂и но́гꙋ господина е҆го въслѣдъ е҆го·

И҆ е҆щѐ е҆мꙋ гл҃ющꙋ с ни́ми.
и҆ с̂е посе́л꙽ сни́де к немꙋ, и҆ пости́же и҆̀ цр҃ь и҆ реч̑҇, с̂е сѝ ѕло́ба ѿ г҃а.
т̂о потръплю̀ гв҃и ксемꙋ̀·

Глв̑҇а, з҃·

И рече і҆е҆лисе́и слы́шите слово гн҃е.
си́це гл҃етъ г҃ь ꙗ҆́ко в ча́съ сїи ѹ́тро.
мѣра мꙋкѝ пшени́чны бꙋдетъ за си́кль е҆ді́н꙽, и҆ дв̂ѣ мѣрѣ ꙗ҆чме́ню за си́кль е҆дїнъ, въ вра́тх̑ѣ самарїѧ·

И҆ ѿвѣща̀ триста́тъ, на него́же цр҃ь въспочива́ше рꙋцѣ своѝ.
и҆ рече къ і҆е҆лисе́ю.
с̂е а҆ще ѻ҆тво́ритъ г҃ь и҆ хлѧ́би нбс̑҇ныѧ.
т̂о не бꙋдетъ гл҃ъ се́и.
і҆е҆лисе́и рече с̂е т̂ы ѹ́зриши ѻ҆чи́ма свои҆ма.
и҆ ѿтꙋдѣ не и҆́маши ꙗ҆́сти·

И҆ бѧ́хꙋ д҃ мꙋжи прокаже́ни при вра́техъ гра́да и҆ рече мꙋжъ къ и́скренемꙋ сѝ чт̂о мы̀ сѣди́мъ здѣ̀ дондеже ѹ́мрем̑·

А҆ще речемъ вни́демъ во́ градъ.
т̂о гла́дъ е҆сть во́ граде.
и҆ ѹ́мремъ та́мо.
а҆ще л̂и сѣди́мъ здѣ̀ т̂о и҆ та́ко ѹ́мремъ.
и҆ нн҃ѣ и҆демъ, и҆ внїидемъ въ по́лкъ сѷрїискїи, а҆ще живѧт̑ н̂ы жи́ви бꙋ́демъ.
а҆ще л̂и ѹ҆мрътвѧ́тъ н̂ы, т̂о ѹ́мрем̑.

И҆ въста́вше тмо́ю внидо́ша в по́лкъ сѷрїискїи.
и҆ внидо́ша срѣдѝ по́лка сѷрїиска.
и҆ с̂е не бѣ мꙋжа т̂ꙋ.
и҆ г҃ь слы́шано сътворѝ полкꙋ сѷрїискꙋ.
гла́съ ѻ҆рꙋжїѧ.
и҆ гла́съ ко́нь и҆ глс̑҇а си́лы вели́ки.
и҆ рече мꙋжъ къ братꙋ свое́мꙋ с̂е нн҃ѣ наꙗ҆́лъ е҆сть на на́съ цр҃ь і҆и҆л҃евъ цр҃ѧ хетъѳе́иска и҆ цр҃ѧ е҆гѷпет꙽ска прїитѝ на на́съ·

И҆ въста́вше въ нощи бѣжа́ша и҆ ѻ҆ста́виша сѣни своѧ и҆ ко́ни и҆ ѻ҆слы̀ своа ꙗ҆́коже е҆сть въ станꙋ̀ и҆ ꙗ҆́коже бѣхꙋ са́ми же бѣжа́ша дш҃а ради свое́ѧ·

И҆ снидо́ша прокаже́ни с̂и до срѣди пол̑҇ка и внидо́ша в сѣнь е҆дїнꙋ, и҆ ꙗ҆́ша и҆ пи́ша, и҆ взѧ́ша ѿтꙋ́дꙋ сребро̀ и҆ зла́то, и҆ ѻ҆де́жда.
ше́дше съкры́ша и҆ па́ки възврати́вшесѧ и҆ внидо́ша въ дрꙋгꙋю сѣнь и҆ взѧ́ша ѿтꙋ́дꙋ и҆ съкры́ша·

И҆ рече мꙋжъ кождо къ и́скренемꙋ своемꙋ.
не бл҃го м̂ы тво́римо дне́сь, дн҃ь б̂о сїи дн҃ь бл҃говѣще́нїѧ е҆сть.
а҆ мы̀ молчим̑ и҆ а́ще пребꙋдемъ до свѣта ѹ́трꙋ, ѻ҆брѧ́щет꙽ насъ безако́нїе, нн҃ѣ прїидемъ и҆ вни́демъ и҆ възвѣсти́мъ в домꙋ̀ цр҃евѣ·

И҆ внидо́ша и҆ возопи́ша ко вра́томъ гра́да.
и҆ возвѣсти́ша им̑ гл҃юще.
внидо́хомъ в по́лкъ сѷрїискїи и҆ с̂е не бы́сть т̂ꙋ мꙋжа ни гласа чл҃ча.
н̂о то́кмо ко́ни привѧ́зани, и҆ ѻ҆слѧ́та и҆ сѣни и҆хъ ꙗ҆́коже сꙋть·

И҆ вра́тницы возопи́ша и҆ возвѣсти́ша в домꙋ̀ цр҃евѣ внꙋтръ·

И҆ въста́въ но́щїю цр҃ь.
и҆ рече къ ѻ҆́троком̑ свои́мъ возвѣщꙋ ѹ́бо ва́мъ нн҃ѣ ꙗ҆́же сътвориша нам̑ сѷрѧ́не.
разꙋмѣша ꙗ҆́ко гла́дни е҆смы и҆зыидо́ша и҆с꙽ станꙋ̀, и҆ сокры́шасѧ на селѣ гл҃ще ꙗ҆́ко и҆зы́идꙋтъ и҆з꙽ гра́да і҆ и҆ме́мъ ѧ҆̀ живы.
и҆ во́ градъ вънидемъ·

И҆ ѿвѣща́въ е҆дїнъ ѿ ѻ́трокъ е҆го рече.
да по́имꙋтъ нн҃ѣ е҃ ѿ ко́нь ѻ҆ста́вших̑ и҆же сꙋть ѻ҆ста́ли зд̂ѣ.
с̂е б̂о сꙋть толико всѣхъ ѹ҆ мно́жествѣ і҆и҆л҃ѧ, ѻ҆ста́вльшихъсѧ.
и҆ по́слемъ та́мо и҆ ѹ́зримъ·

И҆ поꙗ҆́ша дв̂а всад̑ника и҆ посла̀ цр҃ь і҆ил҃евъ въ слѣдъ цр҃ѧ сѷрска, гл҃ѧ и҆мъ грѧдѣте, и видѣте·

І҆ и҆зыидо́ша по нем̑ до і҆ѻ҆рда́на.
и҆ с̂е пꙋть бѧ́ше ве́сь и҆спо́лнь ѻ҆де́ждъ и҆ ѻ҆рꙋжїѧ и҆же поверго́ша сѷрѧ́не, внегда̀ ѹ҆страшитисѧ им̑.
и҆ возвратишасѧ послы̀ и҆ возвѣстиша с̂е цр҃ю·

І҆ и҆зыидо́ша лю́дїе и҆ раз̑гра́биша вс̂и станы̀ сѷрски.
и҆ быс̑҇ мѣ́ра мꙋкѝ пшеничны за сикль е҆дин̑҇, и҆ дв̂ѣ мѣ́рѣ ꙗ҆чме́ню за сикль по гл҃ꙋ гн҃ю·

И цр҃ь приста́ви триста́та на не́мже цр҃ь ѻ҆почива́ше рꙋка́ма е҆го ѹ҆ вра́тъ.
и҆ попра́ша е҆го лю́дїе при вра́тѣхъ.
и҆ ѹ́мре ꙗ҆́ко гл҃а чл҃къ бж҃їи и҆же гл҃а е҆гда посе́лъ прїиде к немꙋ·

И҆ бы́сть ꙗ҆́коже гл҃а чл҃къ бж҃їи гл҃ѧ къ цр҃ю дв̂ѣ мѣ́рѣ ꙗ҆́ч꙽ме́ню за сикль е҆динъ.
и҆ мѣ́ра мꙋки п꙽шенич̑҇ны за сик꙽ль.
бꙋдет̑ бо ре́че ꙗ҆́ко въ сеи ча́съ ѹ҆́тро во вра́тѣхъ самарїѧ·

И҆ ѿвѣща же тристат̑ і҆е҆лисе́ю.
и҆ реч̑҇ а҆ще г҃ь ѻ҆тво́ритъ хлѧ́би нбс̑҇ныѧ.
и҆ не бꙋдетъ гл҃ъ се́и.
и҆ рече і҆е҆лисе́и с̂е ѹ́зриши ѻ҆чи́ма свои҆ма а҆ ѿтꙋдꙋ не и́маши ꙗ҆сти·

И҆ бы́сть та́ко и҆ попра́ша и҆̀ лю́дїе ѹ҆ врат̑ и҆ ѹ́мрет̑·

Глв̑҇а, и҃·

И посе́мъ гл҃а і҆е҆лисе́и к꙽ женѣ̀ е́иже въскр҃еси сн҃а гл҃ѧ.
въста́ни ты̀, и҆ до́мъ твои.
і҆ и҆дѝ.
и҆ пребыва́и и҆дѣже а҆ще мо́жеши.
ꙗ҆́ко нарече г҃ь гла́дъ на́ землю.
и҆ с̂е ѹ҆бо прїидет̑ на седмь лѣтъ·

И҆ въставши жена̀ сътворѝ т̂о по гл҃ꙋ і҆е҆лисе́евꙋ.
і҆ и҆дѐ т̂а сама̀ и҆ дом̑ е҆ѧ.
и҆ всели́сѧ в зе́млю и҆ноплеме́нникъ, з҃, лѣтъ·

И҆ быс̑҇ по скон꙽ча́нїи, з҃ ми лѣтъ възврати́сѧ жена̀ ѿ и҆ноплеме́нникъ во́ град̑ и҆ прїиде возопи́ти къ цр҃ю ѻ҆ домꙋ̀ свое҆мъ и҆ ѻ҆ се́лехъ свои҆хъ, и҆ гл҃а цр҃ь къ гиѻ҆зїю́ ѻ҆́трокꙋ і҆е҆лисе́евꙋ чл҃кꙋ бж҃їю гл҃ѧ.
и҆сповѣж́дь м̂и нн҃ѣ вели́каѧ ꙗ҆́же сътворѝ і҆е҆лисе́и·

И҆ бы́сть е҆мꙋ и҆сповѣда́ющꙋ цр҃еви, ꙗ҆́ко жи́ва сътворѝ сн҃а ѹ҆мръшаго и҆ с̂е жена̀ е́йже въскр҃еси і҆е҆лисе́и сн҃а еѧ̀ въпию҆́щи цр҃еви ѻ҆ домꙋ̀ свое́мъ и҆ ѻ҆ се́лехъ свои҆хъ, и҆ рече гиѻ҆зїи господи́не цр҃ю сїѧ е҆сть жена̀ и҆ сїи сн҃ъ еѧ̀ е҆гоже жи́ва сътворѝ і҆е҆лисе́и·

И҆ въпросѝ цр҃ь женꙋ̀ и҆сповѣ́да е҆мꙋ.
и҆ да́сть е́й цр҃ь ско́пца е҆ді́наго гл҃ѧ, возвратѝ е́й ꙗ҆́же е҆ѧ вс̂ѧ сꙋть.
и҆ вс̂ѧ пло́ды села̀ еѧ̀.
ѿ дн҃ѧ того̀ во́ньже ѻ҆ста́ви зе́млю и҆ досе́лѣ·

И҆ прїиде і҆е҆лисе́и в дама́скъ, и҆ сн҃ъ а҆деровъ цр҃ь сѷръскїи разболѣл꙽сѧ бѧ́ше.
и҆ возвѣсти́ста е҆мꙋ гл҃юще, прїиде чл҃къ бж҃їи до здѣ̀·

И҆ рече цр҃ь къ а҆заи́лю прїимѝ в рꙋкꙋ твою да́ръ і҆ и҆дѝ въ срѣте́нїе чл҃кꙋ бж҃їю.
и҆ вопросѝ г҃а и҆м꙽ гл҃ѧ а҆ще м̂и жи́вꙋ быти ѿ бо́лѣзни сеѧ̀·

І҆ и҆де а҆заи́ль на срѣте́нїе е҆мꙋ взем̑ше да́ръ в рꙋкꙋ свое҆ю.
и҆ вс̂ѧ бл҃гаѧ дама́скова ꙗ҆́ко можа́хꙋ носи́ти м҃. вельблю́дъ и҆ пришед̑ ста̀ пред нимъ, и҆ реч̑҇ къ і҆е҆лисе́ю сн҃ъ твои сн҃ъ а҆де́ровъ цр҃ь сѷрскъ.
посла̀ м̂ѧ к тебѣ гл҃ѧ, бꙋ́дꙋ ли жи́въ ѿ бо́лѣзни сеѧ̀·

И҆ реч̑҇ к немꙋ і҆е҆лисе́и, и҆дѝ и҆ рцы̀ е҆мꙋ живѧ̀ живе́ши.
н̂о показа м̂и г҃ь ꙗ҆́ко смр҃тїю ѹ́мретъ·

И҆ посе́мъ пред꙽ста́ви лице своѐ и҆ возложѝ рꙋкꙋ закрыва́ѧсѧ и҆ пла́касѧ чл҃къ бж҃їи·

И рече а҆заи́ль чт̂о ꙗ҆́ко господинъ мои пла́четъ.
ѻ҆́нже рече ꙗ҆́ко сътвори́ши ѕл̂о сн҃омъ і҆и҆л҃евымъ.
гра́ды и҆хъ и҆ждеже́ши ѻ҆гнем̑ и҆збран̑҇ныѧ и҆хъ и҆збїеши ѻ҆рꙋжїем̑, и҆ младе́нца и҆хъ и҆збїе́ши, и҆ ꙗ҆́же во чревѣ и҆мѣ́ютъ и҆здави́ши·

И҆ реч̑҇ а҆заи́ль чт̂о е҆сть е҆да л̂и а҆зъ рабъ твой пес̑҇ ꙗ҆́ко сътвори́тъ гл҃ъ се́и.
и҆ рече і҆е҆лисе́и показа̀ м̂и т̂ѧ г҃ь црс̑҇твꙋю҆ща сѷрїею·

И҆ ѿи҆де ѿ і҆е҆лисе́ѧ и҆ вни́де къ господинꙋ свое҆мꙋ, и҆ рече е҆мꙋ цр҃ь чт̂о т̂и рече і҆е҆лисе́и.
ѿвѣща̀ рече м̂и і҆е҆лисе́и живѧ̀ живе́ши·

И бы́сть поѹ́трїѧ и҆ прїѧт̑ маха́мꙋ и҆ намочѝ во во́дꙋ и҆ возложѝ на лице е҆го и҆ ѹ́мре.
и҆ црс̑҇твова̀ а҆заи́ль в него мѣсто·

Въ лѣто, е҃ ѐ.
и҆ѻ҆ра́ма сн҃а а҆ха́влѧ цр҃ѧ і҆и҆л҃ва.
нача̀ црс̑҇твова́ти и҆ѻ҆рам̑ сн҃ъ и҆ѻ҆сафа́товъ цр҃ь і҆ѹ́динъ, сы́и, л҃ и҆ двою лѣтꙋ.
б̂ѣ в нѧ́же црс̑҇твова́ти е҆мꙋ.
и҆ и҃ лт̑ѣ црс̑҇твова̀ въ і҆ерс̑҇ли́мѣ·

И҆ ходѝ въ пꙋтѝ цр҃ь і҆и҆л҃евъ, ꙗ҆́коже сътворѝ дом̑ а҆ха́вль б̂ѣ б̂о дщѝ а҆ха́влѧ жена̀ е҆мꙋ и҆ сътворѝ лꙋкавное пред̑ гм҃ъ·

И҆ не хотѧ́ше г҃ь расточи́ти і҆ѹ́ды дв҃да рад̑и̑ раба̀ свое҆го.
ꙗ҆́коже рече дати е҆мꙋ свѣти́лникъ сн҃ом꙽ е҆го въ вс̂ѧ дн҃и·

И҆ въ дн҃и же е҆го ѿвръже́сѧ е҆до́мъ ѿ под̑ рꙋкꙋ і҆ѹ́динꙋ.
и҆ црс̑҇твова̀ са́мъ ѻ҆ себѣ, і҆ и҆зы́иде и҆ѻ҆ра́мъ въ сиром̑ и҆ всѧ колесни́ца с ни́мъ.
и҆ бы́сть е҆мꙋ въста́вшꙋ и҆збѝ е҆до́мъ.
въста́вшихъ на́ нѧ кн҃ѕѧ колесни́цъ.
и҆ бѣжа́ша лю́дїе въ сокро́вище своѐ·

И҆ та́ко ѿстꙋпѝ е҆до́мъ и҆ повинꙋсѧ под̑ рꙋкꙋ і҆ѹ́динꙋ до дн҃е сего.
тогда̀ ѿвръжесѧ ло́вна въ времѧ т̂о·

И҆ про́чихъ словесъ и҆ѻра́мль и҆ всѧ̀ е҆ли́ко сътворѝ.
не сѐ л̂и пи́сана въ кни́гахъ слове́съ дн҃їи цр҃ь і҆ѹ́дин꙽·

И ѹ́мре и҆ѻ҆ра́мъ и҆ погребе́нъ бы́сть съ ѿц҃ы свои́ми въ́ градѣ двд҃вѣ.
и҆ црс̑҇твова̀ ѻ҆хозїѧ сн҃ъ его в него мѣсто·

В лѣто, в҃і.
и҆ѻ҆ра́ма сн҃а а҆ха́влѧ цр҃ѧ і҆и҆л҃ева.
црс̑҇твова́ти нача̀ ѻ҆хозїѧ сн҃ъ и҆ѻ҆ра́мль·

И҆ к҃в, лѣта бы́сть ѻ҆хозїѝ егда нача цр҃ъствова́ти.
и҆ лѣто е҆дїно црс̑҇твова̀ въ іерс̑҇ли́мѣ.
и҆́мѧ б̂ѣ мт҃ри е҆го гоѳолїѧ дщѝ зам̑врїи́на цр҃ѧ і҆и҆л҃ва·

И҆ хожда́ше по пꙋте́мъ домꙋ а҆ха́влѧ и҆ сътворѝ лꙋка́вое пред̑ гм҃ъ, ꙗ҆́коже и҆ домъ а҆ха́вль зѧ́ть б̂о бѣ̀ домꙋ а҆ха́влѧ·

І҆ и҆дѐ и҆ѻ҆ра́мъ сн҃ъ а҆ха́вль на́ брань на заи́лѧ цр҃ѧ и҆ноплемен̑҇нича въ раме́ѳъ гала́дъскїи.
и҆ ꙗ҆зви́ша сѷрѧ́не и҆ѻ҆ра́ма·

И҆ възврати́сѧ и҆ѻ҆ра́мъ цѣли́тисѧ въ і҆и҆л҃ь ѿ ꙗ҆́звъ и҆́миже ꙗ҆зви́ша и҆̀ въ ромоа́ѳѣ.
е҆гда брани́сѧ съ а҆заи́лемъ цр҃емъ сѷрским̑ и҆ сего ради хозїѧ́ сн҃ъ и҆ѻ҆ра́мль цр҃ь і҆ѹ́динъ сни́де ви́дѣти и҆ѻ҆ра́ма сн҃а а҆ха́влѧ въ і҆и҆л҃и ꙗ҆́ко болѧ́ше се́и·

Глв̑҇а, ѳ҃·

Іе҆лисе́и про̑҇ркъ призва̀ е҆ді́ного ѿ сн҃овъ про̑҇рчъ, и҆ рече е҆мꙋ препоꙗ҆шѝ чре́сла своѧ̀, и҆ возмѝ ро́гъ свои съ і҆е҆ле́ѻ҆мъ в рꙋцѣ твоѝ.
і҆ и҆дѝ в рамоѳ̑҇ гала́дъскїи·

И҆ вни́деши та́мо и҆ ѹ́зриши и҆ѹ́ѧ сн҃а и҆ѻ҆сафа́та сн҃а и҆а҆месї́ева.
и҆ вни́деши к не́мꙋ.
і҆ и҆зведе́ши и҆̀ ѿ срѣды бра́тїѧ е҆го.
и҆ в꙽веде́ши и҆̀ внꙋтреню клѣть.
и҆ прии҆́мъ і҆е҆ле́и ѿ ро́га и҆ възлїи на главꙋ̀ ег̑҇ и҆ рцы̀ си́це гл҃етъ г҃ь пома́захъ т̂ѧ на црс̑҇тво і҆и҆л҃ю и҆ посемъ ѿвръзеши две́ри и҆ да бѣжи́ши, и҆ не пребꙋди та́мо·

І҆ и҆дѐ ѻ҆тро́чищъ про̑҇ркъ въ рама́ѳꙋ гала́дъскꙋю и҆ вни́де и҆ с̂е кнѧ́ѕь си́лныхъ сѣдѧ́хꙋ, и҆ реч̑҇ сло́во м̂и е҆сть к тебѣ ѽ кнѧ́же.
и҆ рече и҆ѹ́е къ комꙋ̀ ѿ всѣхъ насъ, и҆ рече к тебѣ̀ кнѧ́же·

И въста́въ и҆дѐ с ним̑ в домъ, и҆ възлїѧ̀ і҆е҆ле́и на главꙋ̀ е҆го и҆ рече е҆мꙋ, си́це гл҃ет꙽ г҃ь б҃ъ і҆и҆л҃въ пома́захъ т̂ѧ на црс̑҇тво лю́дем꙽ гн҃им̑ въ і҆и҆л҃и·

И҆ да потреби́ши домъ а҆ха́вль господина свое҆го ѿ лица̀ моег̑҇ и҆ ѿм꙽сти́ши кро́вь ра́бъ мои҆хъ про̑҇рк꙽ и҆ кро́ве всѣхъ рабъ гн҃ь ѿ рꙋкѝ і҆е҆заве́лины, и҆ ѿ рꙋкѝ всего до́мꙋ а҆ха́влѧ и потреби́ша домъ а҆ха́вовъ надѣю҆щасѧ на стѣны.
и҆ съдръжа́щасѧ и҆ ѹ҆се́льшаꙗ҆сѧ въ і҆и҆л҃и·

И҆ преда́мъ до́мъ а҆ха́вль.
ꙗ҆́коже домъ і҆е҆ровоа́мль сн҃а нава́това.
и҆ ꙗ҆́ко и҆ домъ ваа҆сїинъ сн҃а а҆хїина·

І҆е҆заве́ль снѣдѧ́тъ ѱѝ в ча́сти і҆и҆л҃евѣ.
и҆ не бꙋдет̑ погрѣба́ющаго е҆ѧ̀·

И҆ посем̑ ѿвръзе две́ри, и҆ ѹ҆бѣжа̀·

И҆ѹ́е же и҆зы́иде къ ѻ҆́троком̑ господина свое҆го, и҆ рѣша е҆мꙋ ми́ръ.
чт̂о ꙗ҆ко въходѝ привѣтникъ се́и к тебѣ̀.
и҆ рече и҆мъ вы̀ вѣсте мꙋжа и҆ ле́сть е҆го.
и҆ рѣша непра́ведно е҆сть а҆ще не възвѣсти́ши намъ.
възвѣстѝ ѹ҆бо нам̑.
и҆ рече и҆ѹ́е к нимъ.
та́ко и҆ та́ко рече къ мнѣ̀ гл҃ѧ, си́це гл҃етъ г҃ь пома́зах̑ т̂ѧ на црс̑҇тво і҆и҆л҃ево·

И҆ сїи слы́шавше теко́ша спѣшни и҆ взѧ̀ ко́ждо ри́зы своѧ̀.
и҆ положи́ша под ни́мъ.
понеже на е҆ді́ном̑ ѿ степе́нїи сѣдѧхꙋ и҆ въстрꙋби́ша в ро́гъ и҆ рѣша цр҃ь быс̑҇ и҆ѹ́е·

И҆ възврати́сѧ и҆ѹ́е сн҃ъ и҆ѻ҆сафа́товъ сн҃а а҆месїе́ва.
ко и҆ѻ҆ра́мꙋ и҆ѻ҆ра́мъ са́мъ стрежа́ше рамо́ѳа гала́дъскаго.
то́и самъ и҆ весь і҆и҆л҃ь ѿ лица̀ а҆заи́лѧ цр҃ѧ а҆сѷрїиска·

И҆ возврати́сѧ и҆ѻ҆рам̑ цр҃ь цѣли́тисѧ въ і҆и҆л҃ь, ѿ ꙗ҆́зв꙽ и҆́миже ѹ҆ꙗ҆зви́ша и҆̀ сѷрѧне на́ брани.
е҆гда бра́сѧ съ а҆заи́лемъ цр҃емъ а҆сѷрїискимъ.
и҆ рече и҆ѹ́е а҆ще е҆сть дш҃а ва́ша со мно́ю.
т̂о не и҆зыидѣте ѿ гра́да, и҆ да не бѣжи́те, и҆ възвѣсти́ти въ і҆и҆л҃и·

И҆ пот꙽ща́всѧ и҆ по́иде и҆ѹ́е и҆ сни́де въ і҆и҆л҃ь, ꙗ҆́ко и҆ѻ҆ра́мъ цр҃ь і҆и҆л҃евъ цѣлѧ́шесѧ въ і҆и҆л҃и ѿ стрѣле́нїи и҆́миже ѹ҆стрѣли́ша и҆̀ ра́ма и҆ въ рама́ѳѣ, е҆гда побѣди́сѧ, съ а҆заи́лемъ цр҃ем꙽ сѷрьскимъ.
ꙗ҆ко тои б̂ѣ си́ленъ и҆ мꙋжъ си́лныхъ ѹ҆спѐ т̂ꙋ.
и҆ ѻ҆хозїа цр҃ь і҆ѹ́дин̑҇ прїиде ви́дѣти и҆ѻ҆рама·

И҆ стра́жъ и҆зы́иде на сто́лпъ въ і҆и҆л҃и и҆ ви́дѣ пра́хъ и҆ѹ́е҆въ е҆гда и҆тѝ е҆мꙋ и҆ рече пра́хъ а҆зъ ви́жꙋ.
и҆ рече и҆ѻ҆рам̑ всадѝ мꙋжа на ко́нь и҆ пошлѝ проти́вꙋ и҆мъ и҆ рцы̀ и҆мъ ми́ръ·

І҆ и҆дѐ всад̑ник̑҇ ко́нныи на срѣте́нїе е҆мꙋ.
и҆ рече та́ко гл҃етъ цр҃ь а҆ще ми́ръ.
и҆ рече и҆ѹ́е, чт̂о ты̀ е҆си и҆ ми́ръ твои, ѻ҆брати́сѧ въ слѣдъ мене.
и҆ възвѣстѝ стра́жъ гл҃ѧ, прїиде посе́лъ до не́го и҆ не възврати́сѧ·

И҆ посла̀ всад̑ника конна́го втора́го.
и҆ прїиде к немꙋ и҆ рече.
та́ко рече цр҃ь ми́ръ л̂и е҆сть и҆ рече и҆ѹ́е, что ты̀ и҆ ми́ръ твои възврати́сѧ въ слд̑ѣ мене·

И҆ рече страж̑ прїиде до него и҆ не възвратисѧ.
и҆ во́жъ ведѧ́ше и҆ѹ́ѧ сн҃а и҆а҆месїина ꙗ҆ко въ премѣ́нѣ бы́сть·

И҆ рече и҆ѻ҆ра́мъ въпрѧзѣте и҆ въпрѧго́ша колесни́цꙋ.
і҆ и҆зы́иде и҆ѻ҆рам̑ цр҃ь і҆и҆л҃въ и҆ ѻ҆хозїѧ цр҃ь і҆ѹ́динъ.
и҆ мꙋжи и҆хъ съ ѻ҆рꙋжїемъ свои҆мъ.
і҆ и҆зыидо́ша на срѣте́нїе и҆ѹ́ѧ и҆ ѻ҆брѣто́ша и҆̀ на ча́стѣ навꙋѳѣѧ҆нѣ́и і҆и҆л҃ьтѧни́на·

И҆ бы́сть ꙗ҆́ко ви́дѣ и҆ѻ҆ра́мъ и҆ѹ́ѧ.
и҆ рече а҆ще ми́ръ и҆ѹ́е.
и҆ рече и҆ѹ́е чт̂о ты̀ и҆ ми́ръ твои доко́лѣ е҆ще блꙋдныѧ е҆заве́ле ма́тере твое́ѧ, и҆ ча́рове е҆ѧ мно́гїѧ·

И҆ ѹ҆вратисѧ и҆ѻ҆ра́мъ на бѣжа́нїе.
и҆ рече къ ѻ҆хозїю лесть ѻ҆хозїе·

И҆ взѧ́тъ и҆ѹ́е в рꙋцѣ своѝ стрѣлꙋ.
и҆ ѹ҆стрѣ́ли и҆ѻ҆ра́ма посрѣди пле́щꙋ е҆го.
і҆ и҆зы́иде стрѣла̀ под̑ срд̑це е҆го.
и҆ преклони́сѧ на колѣна своѧ и҆ ѹ́мре·

И҆ рече и҆ѹ́е къ вадека́ртꙋ приста́вникꙋ свое҆мꙋ возмѝ и҆̀.
въверзѝ е҆го в꙽ ча́сти навꙋѳе́ѧ і҆и҆л҃ьтѧни́на.
ꙗ҆́ко по́мню а҆зъ и҆ ты̀, в꙽сѣдшїѝ на сꙋпрꙋ́гъ и҆до́хом꙽ въ слѣдъ а҆ха́ва ѿц҃а е҆го.
и҆ г҃ь гл҃а ѻ҆ немъ гласомъ си́мъ гл҃ѧ·

Со кро́вїю навꙋѳѣ́евою и҆ кро́вїю сн҃овъ е҆го и҆же ви́дѣхъ, вче́ра рече г҃ь въздам̑ е҆мꙋ въ части се́и рече г҃ь и҆ нн҃ѣ ѹ҆бо въземъ въверзѝ и҆̀ на ча́сти се́и по гл҃ꙋ гн҃ю·

И҆ ѻ҆хозїѧ цр҃ь і҆ѹ́динъ ви́дѣвъ и҆ побѣже пꙋтем̑ веѳъѧ҆ним̑.
и҆ гна̀ по не́мъ и҆ѹ́е, и҆ рече в себѣ̀ не и҆́мамъ ѻ҆ста́вити е҆го, и҆ ѹ҆да́ри и҆̀ ѻ҆рꙋжїемъ.
е҆гда в꙽ходѧ́щꙋ е҆мꙋ къ га́и е҆же е҆сть и҆е҆влаа́мъ.
и҆ ѹ҆бѣжа̀ въ македо́нъ, и҆ ѹ́мре т̂ꙋ·

И҆ възложи́ша и҆̀ ѻ҆́троцы е҆го на колесни́цꙋ и҆ везо́ша и҆̀ въ і҆ерс̑҇ли́м.
и҆ погребо́ша и҆̀ въ́ гробѣ е҆го въ́ градѣ двд҃вѣ·

Въ а҃і, лѣто і҆е҆ровоа́ма цр҃ѧ і҆и҆л҃ева.
црс̑҇твова̀ ѻ҆хозїа над̑ і҆ѹ́дою·

И҆ прїиде и҆ѹ́е до е҆зре́ли гра́да.
и҆ е҆заве́ль ѹ҆слы́шавши нама́за лице свое и҆ ѹ҆красѝ главꙋ̀ свою, и҆ приника́ше ѻ҆кно́мъ·

І҆ и҆ѹ́е в꙽хожда́ше въ́ градъ и҆ рече а҆ще е҆сть миръ, зм꙽врїю ѹ҆бїи́ца господина свое҆го·

И҆ възрѣ лицемъ свои҆мъ на ѻ҆кно̀ и҆ видѣ ю҆̀.
и҆ рече кто ты̀ е҆си сни́ди сѣмо.
и҆ преклони́стасѧ к немꙋ дв̂а скопца̀·

И рече и҆ѹ́е прободѣта ю҆̀.
и҆ прободо́ша ю҆̀.
и҆ ѻ҆кропи́шасѧ кро́вїю еѧ̀ стѣ́ны, и҆ попра́ша ю҆̀ ко́ни·

И҆ вни́де и҆ѹ́е и҆ ꙗ҆́сть и҆ пи́тъ.
и҆ рече и҆ѹ́е съхрани́те нн҃ѣ проклѧ́тꙋю сїю, и҆ погребе́те ю҆̀ ꙗ҆́ко дщ̂и цр҃ѧ е҆сть·

І҆ и҆до́ша погрестѝ еѧ̀ и҆ не ѻ҆брѣто́ша еѧ̀ ничто́же и҆́но.
н̂о то́кмо ло́бъ е҆ді́нъ, и҆ дла́ни рꙋкꙋ и҆ но́гꙋ.
и҆ възъвра́щ꙽шесѧ възвѣсти́ша е҆мꙋ с̂е.
и҆ рече и҆ѹ́е, с̂е сло́во гн҃е е҆сть, е҆же гл҃а рꙋко́ю раба̀ свое҆го и҆лїѝ ѳезви́тѧнина гл҃ѧ.
въ ча́сти и҆е҆зре́лѧ и҆зъꙗ҆дѧ́тъ ѱѝ пло́ть и҆е҆заве́линꙋ·

И҆ с̂е е҆сть знаменїе, ѹ҆ме́рши и҆е҆заве́ли, ꙗ҆́ко и҆ гно́и на лицы̀ села̀ в ча́сти и҆е҆зре́левѣ.
ꙗ҆́ко не рещѝ ксемꙋ с̂е е҆сть и҆е҆заве́ль·

Глв̑҇а, і҃·

И а҆ха́вꙋ бѣша ѻ҃ сн҃овъ въ самарїи.
и҆ написа̀ кни́гꙋ и҆ѹ́е.
и҆ посла̀ въ самарїю къ кнѧ́ѕемъ самарїи́скомъ и҆ къ ста́рцемъ, и҆ къ ѹ҆го́днымъ а҆ха́влимъ всѣмъ гл҃ѧ, и҆ нн҃ѣ ꙗ҆́ко прїидетъ кни́га сїѧ къ ва́мъ, съ ва́ми б̂о сн҃ове господина ва́шег̑҇.
и҆ съ ва́ми колесни́ца и҆ ко́ни.
и҆ гра́ды тве́рды и҆ ѻ҆рꙋжїѧ·

И҆ ѹ́зрите бл҃гаго и҆ пра́ваго въ сн҃ѣхъ господина ва́шего.
и҆ поста́вите е҆го на прс̑҇тлѣ ѿц҃а е҆го.
и҆ вою́ете ѻ҆ до́м꙽ господина ва́шего·

И҆ ѹ҆боѧ́шасѧ ѕѣло.
и҆ рѣша с̂е дв̂а цр҃ѧ не възмого́ста ста́ти проти́вꙋ лицꙋ̀ е҆го.
т̂о ка́ко м̂ы ста́немъ·

И҆ посла́ша и҆же над̑ до́момъ і҆ и҆же над̑ градомъ.
и҆ ста́рцы и҆ ѹ҆го́дницы къ и҆ѹ́е цр҃ю гл҃ще ѻ҆́троцы мы̀ твоѝ е҆смы.
и҆ е҆лико а҆ще рече́ши к на́мъ т̂о сътвори́мъ не ѹ҆̀ въцрс̑҇твимъ мꙋжа.
н̂о бл҃гое пред̑ ѻ҆чи́ма твои́ма сътвори́мъ·

И҆ написа̀ к ни́мъ и҆ѹ́е кни́гꙋ вторꙋю гл҃ѧ а҆ще е҆сте вы̀ моѝ и҆ гла́са мое҆го вы̀ послꙋшае҆те, ѿсѣцыте главы̀ сн҃омъ господи́на ва́шего.
и҆ принесе́те ѧ҆̀ къ мн̂ѣ в се́и же час̑҇ ѹ́тро до е҆зре́лѧ, и҆ б̂ѣ сн҃овъ цр҃евыхъ о҃ мꙋж꙽ си́ же мꙋжи гра́да въскорми́ша и҆х·

И҆ бы́сть ꙗ҆́ко прїиде к ни́мъ кни́га.
и҆ поꙗ҆́ша сн҃ы цр҃евы і҆ и҆скла́ша ѧ҆̀ всх̑ѣ о҃, мꙋжъ, и҆ въложи́ша главы̀ и҆хъ въ ко́шницы, и҆ посла́ша и҆хъ к немꙋ въ і҆и҆л҃ь, и҆ прїиде посолъ и҆ възвѣстѝ е҆мꙋ гл҃ѧ·

Принесо́ша гла́вы сн҃овъ цр҃ѧ.
и҆ рече положи́те ѧ҆̀ хо́лмами двѣма при вра́тѣхъ града до заѹ́тра·

И҆ бы́сть заѹ́тра.
и҆ ше́дъ ста̀ въ вра́тѣхъ гра́да.
и҆ рече и҆ѹ́е къ всѣмъ лю́демъ, пра́ведни вы̀ сꙋть е҆сте.
сѐ б̂о а҆зъ е҆смѝ и҆ възврати́лъсѧ на господина мое҆го и҆ ѹ҆бих̑ и҆̀ сїѧ же всѧ̀ кт̂о поразѝ·

ѻ҆ба́че в̂ы ви́дѣсте ꙗ҆́ко не паде́тъ никто́же кро́мѣ словесѐ гн҃ѧ на землѝ.
ꙗ҆ко гл҃а г҃ь на до́мъ а҆ха́вль.
се б̂о г҃ь сътворѝ е҆ли́ко гл҃а рꙋко́ю раба̀ свое҆го и҆лїѝ·

І҆ и҆збѝ и҆ѹ́е всѧ̀ ѻ҆ста́вшаѧ в домꙋ̀ а҆хавли въ і҆и҆л҃и и҆ всѧ вельмо́жа е҆го.
и҆ зна́емыѧ е҆го, и҆ жръцы̀ е҆го, ꙗ҆́ко не ѻ҆ста́ти в них̑ ѻ҆стан̑҇кꙋ·

И҆ въста́въ и҆дѐ въ самарїю са́мъ.
въ веѳака́ль па́стыр꙽скїи при пꙋтѝ·

И҆ с̂е ѻ҆брѣтѐ та́мо бра́тїю ѻ҆хозїинꙋ цр҃ѧ і҆ѹ́дина, и҆ рече кт̂о вы̀ е҆сте.
и рѣша бра́тїѧ ѻ҆хозїина м̂ы е҆смы̀·

И҆ снидо́хомъ поздравити сн҃ы цр҃вы и҆ сн҃ы силныхъ·

И҆ рече поимѣте ѧ҆̀ жи́вы і҆ и҆зъсѣче́те ѧ҆̀ въ веѳека́лѣ, м҃в, мꙋжа.
и҆ не ѻ҆ста̀ ѿ них̑ мꙋжа ни е҆ді́ного·

І҆ и҆дѐ ѿтꙋ́дꙋ и҆ ѻ҆брѣтѐ и҆ѻ҆нада́ва сн҃а риха́влѧ на пꙋтѝ на срѣте́нїе е҆мꙋ.
и блс̑҇ви и҆̀.
и҆ рече к немꙋ и҆ѹ́е.
а҆ще е҆сть срд̑це твоѐ съ срд̑цемъ мои҆мъ пра́во ꙗ҆́коже и҆ срд̑це моѐ с тобо́ю, и҆ рече и҆ѻ҆нада́въ е҆сть.
и҆ рече и҆ѹ́е а҆ще е҆сть т̂о да́ждь м̂и рꙋкꙋ твою̀, и҆ да́въ е҆мꙋ рꙋкꙋ свою и҆ възведѐ и҆̀ на колесни́цꙋ свою·

И҆ реч̑҇ к немꙋ поидѝ со мно́ю, и҆ ви́ждь ка́ко поревнова́хъ по г҃ѣ саваѻ҆́ѳѣ.
и҆ посади и҆̀ на колесни́цꙋ свою·

И҆ вни́де въ самарїю.
і҆ и҆збѝ вс̂ѧ ѻ҆ста́вшаѧ а҆ха́влѧ въ самарїи.
ꙗ҆ко не ѻ҆ста́ти никомꙋже по гл҃ꙋ гн҃ю.
и҆же гл҃а къ и҆лїѝ·

И҆ събра̀ и҆ѹ́е всѧ лю́ди и҆ рече к ни́мъ.
а҆ха́въ порабо́та лю́ди ваа҆́лꙋ ма́ло.
і҆ и҆ѹ́е порабо́тати и҆́мать мно́го·

И҆ вс̂и проро́цы ваа́ловы и҆ вс̂и рабы̀ е҆го, и҆ жръца̀ е҆го призовѣте къ мн̂ѣ, да не потаи́тсѧ ни е҆ді́нъ мꙋжъ нигде́же, ꙗ҆́ко жрътвꙋ хощꙋ̀ сътвори́ти вели́кꙋ ваа́лꙋ.
и҆ всѧкъ и҆же потаи́тсѧ не бꙋдетъ жи́въ.
и҆ с̂е и҆ѹ́е цр҃ь сътворѝ ле́сть, хотѧ̀ погꙋби́ти слꙋжа́щихъ ваа́лꙋ.
и҆ реч̑҇ и҆ѹ́е ст҃ите жрътвꙋ ваа́лꙋ.
и҆ слꙋженїе е҆го.
и҆ проповѣдаша·

И҆ посла̀ и҆ѹ́е въ весь і҆и҆л҃ь.
и҆ рече гл҃ѧ.
и҆ нн҃ѣ вс̂и събери́тесѧ рабѝ ваа́лови и҆ вс̂и жръцы̀ е҆го и҆ вс̂и про̑҇рцы е҆го.
да никто́же ѻ҆ста́нетъ ꙗ҆́ко жрътвꙋ вели́кꙋ творю̀ ваа́лꙋ.
і҆ и҆же ѻ҆ста́нет̑ не и́мать жи́въ бы́ти.
и҆ прїидо́ша рабѝ ваа́ловы.
и҆ вс̂и жръцы̀ е҆го.
и҆ вс̂и проро́цы е҆го.
и҆ не ѻ҆ста̀ ни е҆ді́н꙽ мꙋжъ и҆же не прїиде.
и҆ внидо́ша въ хра́мъ ваа́ловъ.
и҆ напо́лнисѧ хра́м꙽ ваа́ловъ ѿ кра́ѧ до кра́ѧ·

И рече и҆ѹ́е и҆же бѧ́хꙋ над̑ ѻ҆деждами, и҆знесѣте ѻ҆де́ждꙋ рабомъ всѣмъ ваа́ловымъ.
і҆ и҆знесѐ им̑ ри́зы·

И҆ вни́де и҆ѹ́е и҆ѻ҆нада́въ сн҃ъ риха́вль въ хра́минꙋ ваа́ловꙋ.
и҆ рече рабо́мъ вааловымъ, пои҆щѣте и҆ съгледа́ите е҆да̀ е҆сть гд̂ѣ ра́бъ гн҃ь въ ва́съ.
и҆ вы́шлите всѣхъ рабо́въ гн҃ихъ ѻ҆брѣтших̑сѧ т̂ꙋ·

И҆ бы́сть тако ꙗ҆́коже гл҃а и҆ѹ́е.
и҆ ꙗ҆́ко не бѣ̀ ра́бъ гн҃ь.
н̂о то́кмо е҆ді́ни рабѝ ваа́лови·

И҆ вни́де сътвори́ти жрътвꙋ и҆ вс̂есъж꙽же́нїѧ.
і҆ и҆ѹ́е вн̂ѣ хра́ма поста́ви себ̂ѣ, п҃, мꙋжъ свои҆хъ съ ѻ҆рꙋжїемъ.
и҆ рече и҆мъ и҆ѹ́е аще вы̀ и҆ е҆ді́нъ мꙋжъ гонзе́тъ ѿ мꙋжъ сих̑ и҆хже а҆зъ и҆зведо́хъ в рꙋцѣ ва́ши.
то дш҃ꙋ ва́шꙋ положꙋ̀ за дш҃ꙋ е҆го·

И҆ бы́сть ꙗ҆́ко сконча̀ творѧ́ше вс̂есъж꙽же́нїѧ.
и҆ рече и҆ѹ́е пред̑ри́щꙋщимъ и҆ триста́томъ, вшед̑ше и҆збїите и҆̀ и҆ да ни е҆ді́нъ мꙋжъ и҆збꙋдетъ ѿ них̑ і҆ и҆зби́ша ѧ҆̀ ѻ҆рꙋжїем̑.
и҆ повръгоша ѧ҆̀ пред̑текꙋщаѧ во́ини и҆ триста́ты.
і҆ и҆до́ша да́же до до́мꙋ ваа́лова·

І҆ и҆знесо́ша ѻ҆де́ждꙋ ваа́ловꙋ и҆ съж꙽го́ша ю҆̀.
и҆ съби́ша тѣло ваа́лово и҆ съкрꙋши́ша въ пра́хъ до дн҃и сего·

И҆ погꙋбѝ и҆ѹ́е храм̑ ваа́ловъ ѿ і҆и҆л҃ѧ·

Но то́кмо грѣховъ і҆е҆ровоа́ма сн҃а нава́това, и҆́миже съблазнѝ грешити і҆и҆л҃ѧ.
не ѿстꙋпѝ и҆ѹ́е ѿ послѣдних̑ и҆хъ кла́нѧю҆щесѧ ю҆́ницамъ зла́тым̑ ꙗ҆́же въ веѳи́ли и҆ въ да́нѣ·

И҆ рече г҃ь къ и҆ѹ́еви понеже ꙗ҆́ко ѹ҆блж҃и и҆ сътвори́ ти ѹ҆го́днаѧ мн̂ѣ пред̑ ѻ҆чи́ма мои҆ма.
и҆ всѧ̀ ꙗ҆́же сътворѝ по срд̑цꙋ мое҆мꙋ сътвори́лъ е҆си до́мꙋ а҆ха́влю сего ради да́же до четве́ртаго ро́дꙋ твое҆го сѧ́дꙋтъ на прс̑҇тлѣ въ і҆и҆л҃и·

И҆ѹ́е не съхранѝ ходи́ти по и҆́мени г҃а б҃а і҆и҆л҃ева всѣмъ срд̑цемъ своим̑.
не ѿврати́сѧ ѿ грѣхъ і҆е҆ровоа́ма сн҃а нава́това, и҆же въ грѣхъ въведѐ і҆и҆л҃ѧ·

Въ дн҃и же ѻ҆́ны нача̀ г҃ь пꙋща́ти на і҆и҆л҃ѧ, і҆ и҆збѝ ѧ҆̀ а҆заи́ль въ всѣхъ предѣлехъ і҆и҆л҃евыхъ·

ѿ і҆ѻ҆рдана на въсто́къ слн҃ца всю̀ зе́млю галаа́дъскꙋю, и҆ гадїинꙋ, и҆ рꙋви́мовꙋ.
и҆ манасїинꙋ ѿ а҆рои́ра даже до ѹ́стїѧ а҆рно́ньска, и҆ галаад̑ска и҆ васа́ньска·

И҆ про́чаѧ словесъ и҆ѹ́евыхъ вс̂ѧ ꙗ҆́же сътворѝ.
и҆ вс̂ѧ си́ла е҆го и҆ събра́нїе е҆го е҆же събра̀.
т̂о не се́ ли напи́сана въ кни́зѣ словес̑҇ дн҃їи цр҃ь і҆и҆л҃евъ·

И҆ ѹ́мре и҆ѹ́е и҆ погребе́нъ бы́сть съ ѿц҃ы свои́ми въ самарїи́.
и҆ црс̑҇твова̀ и҆а҆ха́з꙽ в него̀ мѣ́сто сн҃ъ е҆го·

И҆ въ дн҃и в нѧ́же и҆ѹ́е црс̑҇твова̀ въ самарїи бы́сть, к҃и, лѣтъ·

Глв̑҇а, а҃і·

И гоѳолїѧ мт҃и и҆ѻ҆хозїина, ви́дѣвши ꙗ҆́ко ѹ҆мрѣт꙽ сн҃ъ е҆ѧ̀, и҆ воста̀ и҆ погꙋби всѧ́ко сѣмѧ цр҃ево·

И҆ѻ҆саве́ѧ же дщ̂и цр҃ѧ и҆ѻ҆рама сестра̀ ѻ҆хозїина поѧ и҆ѻа́са сн҃а бра́та своег̑҇.
и ѹ҆краде и҆̀ средѣ сн҃овъ цр҃евых̑ и҆збїеныхъ, того и҆ дои́лицꙋ е҆го съкрыи въ клѣти постельнеи твердѣ, и҆ ѹ҆таѝ ѿ лица гоѳолїина, и҆ не ѹ҆мрътвиша е҆го·

И б̂ѣ с не́ю кры́емъ въ до́мꙋ гн҃и, ѕ, лѣтъ.
и҆ гоѳо́лїѧ б̂ѣ црс̑҇твꙋ́ющи в зе́мли то́й·

И҆ въ сед̑мое лѣто посла̀ и҆ѻ҆да́и жрецъ.
и҆ поѧ́тъ тысꙋщни́ки.
хори́ма и҆ расима и҆ възведе ѧ҆̀ къ себѣ̀ въ дом̑ гн҃ь, и҆ завѣща и҆мъ завѣтъ гн҃ь.
и҆ заклѧтъ и҆хъ пред̑ гм҃ъ, и҆ показа̀ и҆мъ и҆а҆до́ѧ сн҃а цр҃ьска·

И҆ заповѣ́да и҆мъ гл҃ѧ с̂е сло́во да сътвори́те тре́тїѧ ча́сть ѿ вас̑҇ да сни́дет̑ в сꙋбо́тꙋ.
и҆ да стре́жете стра́жбꙋ до́мꙋ цр҃ва·

И҆ третїѧ часть ѹ҆ вратъ ѹ҆ две́рїи пꙋти, и҆ третїѧ часть ѹ҆ вратъ соза́ди протекꙋщих̑, и҆ ѹ҆стреже страж̑бꙋ до́мꙋ·

И҆ дв̂а нача́лника ѿ ва́съ всѧ́къ и҆сходѧи в сꙋбо́тꙋ.
и҆ да хранѧт̑ страж꙽бꙋ до́мꙋ гн҃ѧ съ цр҃ем̑<.>

И҆ ѻ҆стꙋпи́те цр҃ѧ ѻ҆́коло, ко́ждо ѻ҆рꙋжїе своѐ и҆мы́и в рꙋкꙋ, і҆ и҆сходѧ́и въ пред̑ѻ҆гра́дїе да ѹ҆́мретъ.
и бꙋдете съ цр҃емъ е҆гда̀ въходи́ти е҆мꙋ і҆ и҆сходи́ти·

И҆ сътвори́ша со́тникы вс̂ѧ е҆ли́ка заповѣ́да и҆ѻ҆да́и смысле́ныи.
и҆ поѧ̀ ко́ждо мꙋжа своѧ̀ и҆же и҆мѣа́ше входи́ти въ сꙋбо́тꙋ.
съ тыми и҆же и҆мѣꙗ҆́хꙋ ѿходи́ти в꙽ сꙋбо́тꙋ.
и҆ вни́доша къ и҆ѻ҆да́ю жерцꙋ·

И да́сть жре́цъ сот̑никомъ пред̑ходѧ́щаѧ, и҆ копїѧ цр҃ѧ дв҃да.
и҆же быша в до́мꙋ гн҃и·

И бѣша в рꙋках̑ вое҆вод̑ и҆ пред̑ходѧ́щих̑ и҆ сътвориша сотники, и҆ пред̑ходѧщїи по всемꙋ̀ е҆ли́ко заповѣ́да им̑ жрецъ·

И҆ собра̀ жрецъ гн҃ь вс̂ѧ лю́ди землѧ во до́мъ гн҃ь.
и҆ ста́ша пред̑рищꙋщїи ко́ждо их̑ ѻ҆рꙋжїе и҆мы́и в рꙋцѣ свое́и.
ѿ страны̀ до́мꙋ десно́ѧ.
да́же до страны̀ до́мꙋ шꙋе҆ѧ жрътвеныѧ.
и҆ по до́мꙋ цр҃ѧ ѻ҆́коло·

І҆ и҆зведе сн҃а цр҃ева.
и҆ возложи на́нь вѣнецъ цр҃ьскыи.
и҆ свѣдѣнїе.
и҆ въцр҃и е҆го и҆ пома́за е҆го и҆ плеска́ли рꙋка́ма.
и҆ рѣша да́ живет̑ цр҃ь·

И҆ слы́ша гоѳолїѧ глас̑҇ предътекꙋщ́их꙽ люде́и.
и҆ вни́де къ наро́дꙋ в до́мъ гн҃ь·

И҆ ви́дѣ и҆ с̂е цр҃ь стоа́ше на столпѣ по сꙋ́дꙋ.
и҆ бѧ́хꙋ пред̑ цр҃ем꙽ пѣсни и҆ трꙋ́бы.
и҆ вс̂и лю́дїе радꙋющесѧ, и҆ трꙋ́бѧще въ трꙋ́бы.
и҆ раздра̀ гоѳолїѧ ри́зы своѧ̀.
и҆ въз꙽пи и҆ рече, зра́да зра́да·

И҆ заповѣ́да и҆ѻ҆да́и жрецъ тысѧщником꙽, и҆ вла́стелемъ си́лы.
и҆ рече к ни́мъ и҆зведѣте ю҆̀ во́нъ ѿ пригра́ды, и҆же а҆́ще кт̂о и҆зы́детъ по неи смр҃тїю да ѹ́мретъ ѿ ѻ҆рꙋжїѧ, понеже рече жрец̑҇, не ѹ҆мрътвѣте е҆ѧ̀ въ до́мꙋ гн҃и·

И҆ възложи́ша на ню̀ рꙋцѣ, і҆ и҆зведо́ша ю҆̀ скопцы̀ пꙋтемъ и҆схода к не́и до́мꙋ цр҃ева и҆ ѹ́мре т̂ꙋ·

И завѣща и҆ѻ҆да́и завѣтъ ме́ждꙋ гм҃ъ и҆ междꙋ цр҃емъ, и҆ междꙋ люд̑ми, ꙗ҆́ко бы́ти имъ въ лю́ди гн҃ѧ·

И҆ внидо́ша вс̂и лю́дїе землѧ̀ в до́мъ ваа́ловъ, и҆ разбиша и҆̀, и҆ жрътвеники е҆го, и҆ ѻ҆бра́зы е҆го съкрꙋши́ша до́брѣ.
и҆ маѳа́на жръца ваа́лова ѹ҆би́ша пред̑ лицемъ жрътвеника.
и҆ поста́ви жрецъ вла́стелѧ в꙽ до́мꙋ гн҃и·

И҆ прїѧ́ша со́тъники, хорима и҆ раси́ма, и҆ вс̂ѧ лю́ди землѧ.
і҆ и҆зведѐ цр҃ѧ ѿ до́мꙋ гн҃ѧ.
и҆ внидо́ша пꙋтемъ вра́тъ пред̑текꙋщихъ до до́мꙋ цр҃ева и҆ посади́ша и҆̀ на прс̑҇толѣ цр҃евѣ·

И҆ възрадовашасѧ вси лю́ди землѧ̀ то́ѧ.
и҆ град̑ ѹ҆млъча, и҆ гоѳолїю ѹ҆мрътви́ша ѻ҆рꙋжїем̑ въ до́мꙋ цр҃евѣ·

Цр҃ь же б̂ѣ и҆ѻ҆а́са, въ сед̑ми, лѣтѣхъ е҆гда̀ нача црс̑҇твовати·

Глв̑҇а, в҃і·

Въ лѣто сед̑мое, и҆ѹ́ѧ.
цр҃ьствова и҆ѻ҆а́съ.
и҆ м҃, лт̑ѣ, црс̑҇твова въ і҆ерс̑҇ли́мѣ.
и҆мѧ бѣ мт҃ри е҆го а҆вїѧ.
вирсавїѧ·

И сътворѝ и҆ѻ҆а́съ пред̑ ѻ҆чи́ма гн҃има ѹгод̑наѧ, въ вс̂ѧ дн҃и в нѧ́же просвѣти е҆го и҆ѻ҆да́и і҆е҆ре́и·

То́кмо высоких̑ не преста́виша.
т̂ꙋ е҆щѐ кадѧ́хꙋ и҆ жрѧ́хꙋ лю́дїе на высо́ких̑·

И҆ рече и҆ѻ҆а҆съ къ жѐрцем̑ вс̂е сребро̀ ст҃ое внесе́ное в до́мъ гн҃ь.
и҆ сребро̀ со цѣно́ю мꙋжа.
и҆ всѧ́ко сребро̀ е҆же а́ще възы́идет̑ на срд̑це мꙋжꙋ внестѝ в до́мъ гн҃ь·

И҆ да прїимꙋтъ е҆̀ на сѐ жръцы и҆ мꙋжъ ѿ преда́нїѧ свое҆го.
и҆ тїѝ да строѧ́тъ ведекъ въ все́мъ.
и҆дѣже а҆́ще ѻ҆брѧ́щет̑сѧ сокрꙋшено́е веде́ка·

И҆ бы́сть въ к҃г е, лѣто цр҃ю и҆ѻ҆а́сꙋ, и не ѹ҆строи́ша жръцы веде́ка хра́ма·

И призва̀ цр҃ь и҆ѻ҆даѧ жерца и ста́рца и҆ рече к ни́мъ.
чт̂о се ꙗ҆ко не построи҆сте веде́ка хра́мꙋ.
и҆ нн҃ѣ ѹ҆жѐ не прїима́ите сребра̀.
ѿ продажѣ ва́шеѧ.
ꙗ҆́ко в꙽ ведекъ хра́мꙋ да́сте и҆̀·

И҆ совѣща́шасѧ жръцы не прїѧ́ти сре́бра ѿ лю́дїи, на строе҆нїе веде́ка хра́мꙋ·

И҆ взѧ̀ и҆ѻ҆да́и жрецъ кїѻ́тъ е҆дин̑҇.
и содѣла̀ ковче́жецъ дъсками е҆мꙋ, и да́сть е҆го и҆е҆зеѻ҆ви в домꙋ мꙋжа до́мꙋ гн҃ѧ.
и даша жръцы хранѧ́щїи число всего̀ сребра̀, е҆же ѻ҆брѣтесѧ в домꙋ гн҃и·

И бы́сть ꙗ҆́ко ви́дѣша и҆же мно́го е҆сть сре́бра въ ковчеѕѣ.
и҆ възы́иде писчїи цр҃евъ, и҆ жрец̑҇ вели́кїи и҆ чи́сленикъ.
и҆ ѿкры́ша і҆ и҆счетоша сре́бро ѻ҆брѣтъшее въ домꙋ̀ гн҃и·

И҆ даша сре́бро ѹ҆гото́ванное в рꙋцѣ творѧ́щемꙋ на сосꙋды до́мꙋ гн҃ю.
и҆ даша и҆̀ древодѣлѧмъ и҆ дѣ́лателемъ ѕиждꙋщимъ в домꙋ гн҃и·

И҆ ко́лющимъ и҆ хꙋдо́жникомъ.
и҆ сѣкꙋщим꙽ ка́менїѧ на кꙋпле́нїе дре́вꙋ.
и҆ каменїѧ те́санаго на строенїе веде́ка хра́мꙋ гн҃ю·

І҆ и҆на всѐ е҆ли́ко раздаѧ́ти хра́мꙋ на ѹ҆твръже́нїе·

Токмо не твори́шасѧ хра́мꙋ гн҃ю две́ри сре́брены, гвоздїе фїа́лы.
и҆ трꙋбы, н̂и вс̂ѧ сосꙋды зла́ты, и҆ сосꙋ́ды сре́брены ѡ сре́бра принесе́наго в до́мъ гн҃ь.
н̂о творѧ́щимъ дѣ́ла дадѧт̑ ѧ҆̀, и҆ сїи ѹ҆тверди́ша и҆мѝ до́мъ гн҃ь·

и҆ не сочитахꙋ, и҆́м꙽же даѧ́хꙋ сре́бро в рꙋ́ки.
дати творѧ́щимъ дѣ́ло.
занѐ вѣрно тво́рѧтъ·

И҆ сре́бро за грѣхи, и҆ сребро за престꙋпленїе.
понеже внесе́но бысть в до́мъ гн҃ь да бꙋ́детъ жерцемъ·

Тогда̀ възы́иде а҆заи́лъ цр҃ь сѷрьскїи.
и҆ вое҆ва на геѳы и҆ прїатъ и҆̀ а҆заи́лъ и҆ разбѝ и҆̀.
и҆ ѻ҆брати а҆заи́лъ лице свое, и҆ възы́ити хотѧ на і҆ерс̑҇ли́мъ·

И҆ взѧ́тъ и҆ѻ҆а́съ цр҃ь і҆ѹ́дин꙽ вс̂ѧ ст҃ыѧ.
и҆же ѻ҆ст҃и и҆̀ и҆ѻ҆сафатъ и҆ѻ҆а҆рамъ, и҆ ѻ҆хозїѧ ѿц҃и е҆го цр҃и і҆ѹ́дини.
и ст҃аѧ е҆го и҆ вс̂е зла́то ѻ҆брѣтшее҆сѧ въ хра́мѣ гн҃ѣ, и҆ въ сокрови́щехъ до́мꙋ цр҃ѧ.
и҆ посла̀ а҆заи́лю цр҃ю сѷрьскꙋ·

И҆ про́чаѧ словесъ и҆ѻ҆асинъ, и҆ вс̂ѧ е҆ли́ко сотворѝ.
не се л̂и пи́сана бы́ша въ кни́ѕе словес̑҇ дн҃їи цр҃ь і҆ѹ́динъ·

И҆ воста́ша ѻ҆́троцы е҆го.
и҆ совѣща́ша совѣтъ велик̑҇.
и҆ ѹ҆би́ша и҆ѻ҆а́са в꙽ хра́мѣ махои҆невѣ и҆же въ саа҆лѣ, и҆е҆зеха́ра сн҃а е҆мꙋа́хова.
и҆ е҆зевꙋѳа сн҃а исовира.
рабы̀ их̑ и҆зби́ша и҆хъ и҆ ѹ҆мро́ша, и҆ погребо́ша и҆хъ съ ѿц҃ы и҆хъ въ гра́дѣ дв҃двѣ.
и҆ црс̑҇твова а҆масїа́съ сн҃ъ е҆го въ него̀ мѣ́сто·

Глв̑҇а, г҃і·

Въ лѣто, к҃г е, и҆ѻ҆а́са сн҃а а҆хозїина цр҃ѧ і҆ѹ́дина, цр҃ьствова и҆ѻ҆аха́зъ сн҃ъ и҆ѹев̑҇ в꙽ самарїи, з҃і лѣтъ·

И сотворѝ лꙋка́вое пред̑ ѻ҆чима гн҃има.
и҆ нача̀ ходи́ти по пꙋте́мъ і҆еровоа́млимъ сн҃а нава́това, и҆же съгрѣши́ти воведѐ і҆и҆л҃ѧ.
и҆ не ѻ҆стасѧ ѕло́бы то́ѧ·

И҆ разгнѣ́васѧ г҃ь гнѣ́вомъ на і҆и҆л҃ѧ.
и҆ въда́сть и҆хъ в рꙋ́цѣ а҆заи́лю цр҃ю а҆сѷрьскꙋ, и҆ в рꙋцѣ сн҃а а҆дерова сн҃а а҆заи́лева во всѧ дн҃и.

И҆ помоли́сѧ и҆ѻ҆а҆хазъ лицю гн҃ю.
и҆ ѹ҆слы́ша и҆̀ г҃ь ꙗ҆ко ви́дѣ скорбъ і҆и҆л҃евꙋ.
е҆ю́же ѻ҆скорби цр҃ь сѷрїискїи·

И҆ да́сть и҆мъ сп҃сенїе г҃ь.
і҆ и҆збыша ѿ рꙋкꙋ а҆сѷрьскꙋ.
и҆ въсели́шасѧ сн҃ве і҆и҆л҃ви в села своа̀ ꙗ҆́коже и҆ преже·

Но то́кмо не ѿстꙋпи́ша ѿ грх̑ѣ до́мꙋ і҆е҆ровоа́млѧ сн҃а наватова и҆же съгрѣшити въведѐ і҆и҆л҃ѧ.
по нем̑ ходѧ́хꙋ и҆ принесо́ша кꙋмиръ, и҆же бѣ въ самарїи·

Ꙗ҆́ко не ѻ҆ста́вишасѧ а҆хазꙋ лю́дїе.
н̂о то́кмо, н҃, ко́нникъ.
и҆ і҃, колесни́ць, и҆ л҃ пѣшецъ.
ꙗ҆́ко и҆згꙋбилъ бѧ́ше и҆хъ цр҃ь сѷрїискїи.
и҆ положи ѧ҆̀ ꙗ҆́ко прахъ на попра́нїе·

и҆ про́чаѧ словесъ и҆ѻ҆ахазовыхъ и҆ вс̂ѧ е҆ли́ко сътворѝ, и҆ вс̂ѧ си́ла е҆го.
не с̂е ли пи́сана бы́ша въ кни́ѕѣ слове́съ дн҃їи цр҃ь і҆и҆л҃евъ·

И҆ ѹ́мре и҆ѻ҆а҆хаз꙽ и҆ погребенъ бы́сть съ ѿц҃ы своими в꙽ самарїи.
и҆ црс̑҇твова и҆ѻ҆а́съ сн҃ъ е҆го в꙽ него́ мѣ́сто·

Въ лѣто, л҃ѳ е, и҆ѻ҆а́са цр҃ѧ і҆ѹ́дина црс̑҇твова и҆ѻ҆а́съ сн҃ъ а҆хазовъ над̑ і҆и҆л҃емъ в꙽ самарїи, ѕ҃і, лѣтъ·

И҆ сътвори лꙋка́вое пред̑ гм҃ъ и҆ не ѿстꙋпи ѿ грѣхъ всх̑ѣ і҆е҆ровоа́мль сн҃а нава́това и҆же съгрѣшити воведе і҆и҆л҃ѧ.
по тѣмъже и҆ то́й хождаше·

И҆ про́чаѧ слове́съ и҆ѻ҆а́совых̑ и҆ вс̂ѧ е҆ли́ка сътворѝ, и҆ вс̂ѧ си́ла е҆го ꙗ҆́же сътворѝ съ а҆масѣем̑ цр҃емъ і҆ѹ́динымъ.
т̂о не се л̂и сїѧ писана быша въ кни́ѕѣ словес̑҇ дн҃їи цр҃ь і҆и҆л҃евъ·

И҆ ѹ́мретъ и҆ѻ҆а́съ и҆ погребе́нъ бысть съ ѿц҃ы свои́ми въ самарїи съ сн҃ъми і҆и҆л҃евыми·

І҆ е҆ровоам̑ же сѣде на престо́лѣ е҆го·

І҆ е҆лисе́и разболѣсѧ бо́лезнїю свое́ю, е҆ю́же и҆ ѹ́мре.
и҆ прїиде к немꙋ и҆ѻ҆а́съ цр҃ь і҆и҆л҃евъ.
и҆ пла́касѧ над̑ лицем̑ е҆го и҆ рече.
ѿч҃е ѿч҃е, колесни́ца і҆и҆л҃ева и҆ снꙋзници е҆ѧ·

И҆ реч̑҇ е҆мꙋ і҆е҆лисе́и возмѝ лк̑҇ꙋ и҆ стрѣлꙋ.
и҆ взѧт̑ пред̑ ним̑ лꙋкъ и҆ стрѣлꙋ·

И҆ реч̑҇ цр҃ю возложи рꙋкꙋ свою на лк̑҇ꙋ·

И҆ возложи и҆ѻ҆ас̑҇ рꙋкꙋ свою на лк̑҇ꙋ.
і҆е҆лисе́и возложи рꙋкꙋ свою̀ верхꙋ рꙋкꙋ цр҃евꙋ·

И҆ рече ѿвръзи ѻ҆кно ꙗ҆́же е҆сть на восто́къ и҆ ѿверзе.
и҆ рече і҆е҆лисе́и стрѣли, и҆ стрѣли цр҃ь и҆ рече і҆е҆лисе́и сїѧ стрѣла спс̑҇нїѧ гн҃ѧ·

и҆ стрѣла сп҃са́ющаго въ сѷрїи.
и҆ побѣди́ши сѷрїю, на ѳекꙋ даже до сконча́нїѧ·

И҆ рече е҆мꙋ і҆е҆лисе́и возмѝ лк̑҇ꙋ и҆ взѧ́тъ.
и҆ рече цр҃ю і҆и҆л҃евъ.
ѹ҆да́ри ного́ю на́ землю, и҆ ѹ҆да́ри цр҃ь три́жды и҆ ста̀·

И҆ ѻ҆скорбѣ чл҃къ бж҃їи ѻ҆ немъ и҆ рече.
а҆́ще б̂ы ѹ҆дарилъ е҆си пѧти́щи, и҆л̂и шести́щи.
тогда̀ б̂ы е҆си попралъ сѷрїю до сконча́нїѧ.
и҆ нн҃ѣ побѣди́ши сѷрїю толи́ко трищи·

И҆ ѹ́мре і҆е҆лисе́и, и҆ погребо́ша и҆̀·

Во́ини же ѿ моа́ва в꙽неза́пꙋ прїидо́ша въ зе́млю.
настава́ющꙋ лѣтꙋ томꙋ̀·

И҆ бысть и҆мъ погрѣба́ющимъ тѣло мꙋжа мрътва.
и҆ с̂е ви́дѣша во́и внезапꙋ.
и҆ поверго́ша мꙋжа во́ гробѣ і҆е҆лисеѻ́вѣ.
и҆ впаде тѣло чл҃ка мр҃тва и҆ прикоснꙋ́сѧ ко́стемъ і҆е҆лисеѻ́вымъ.
и҆ ѻ҆жи мж̑ꙋ и҆ ста̀ на но́гꙋ свое҆ю·

А҆заи́лъ же ѻ҆скор̑҇блѧше і҆и҆л҃ѧ, во всѧ̀ дн҃и а҆хазовы·

И҆ поми́лова ѧ҆̀ г҃ь и҆ ѹ҆щедри ѧ҆̀.
и҆ призри на́ нѧ завѣта ради свое҆го и҆же съ а҆враа́момъ і҆саа́комъ і҆ и҆а́ковомъ.
и҆ не хотѧ́ше г҃ь потребити их̑ ниже ѿвръже и҆хъ ѿ лица своего·

И҆ ѹ́мре а҆заи́лъ цр҃ь сѷрьскїи и҆ црс̑҇твова адеръ сн҃ъ его в него̀ мѣ́сто·

И҆ возврати́сѧ и҆ѻ҆а́съ сн҃ъ а҆хазовъ.
и҆ прїѧ́тъ град̑ ѿ рꙋкы а҆деровы сн҃а а҆заи́лева.
ꙗ҆́же б̂ѣ прїѧ́лъ ѿ рꙋкꙋ и҆ѻ҆а҆хаза ѿц҃а е҆го въ бра́ни.
трижды б̂о побѣди е҆го и҆ѻ҆а́съ.
и҆ възврати грады і҆и҆л҃ѧ·

Глв̑҇а, д҃і·

И бысть в лѣто вто́рое, и҆ѻ҆а́са сн҃а а́хазова цр҃ѧ і҆и҆л҃ева црс̑҇твова амесїѧ сн҃ъ и҆ѻ҆а́сов̑҇ цр҃ь і҆ѹ́динъ·

Сы́и к҃е лт̑ѣ б̂ѣ е҆гда̀ црс̑҇твовати е҆мꙋ·

к҃ѳ, лт̑ѣ црс̑҇твова въ і҆ерс̑҇ли́мѣ.
и҆́мѧ б̂ѣ мт҃ри его і҆ѻ҆а́дина ѿ і҆ерс̑҇ли́ма·

И҆ сотвори ѹ҆год̑ное пред̑ ѻ҆чи́ма гн҃има то́кмо не ꙗ҆́ко двд̑ъ ѿц҃ъ е҆го, раз̑вѣ по в꙽семꙋ ꙗ҆́же сотвори ѿц҃ъ е҆го и҆ѻ҆а́съ·

То́кмо высоких̑ не разрд̑ꙋши е҆щѐ лю́дїе колѧ́хꙋ и҆ жрѧхꙋ на высоких̑·

И҆ быс̑҇ ꙗ҆ко ѹ҆твръди́сѧ црс̑҇тво е҆го в рꙋкꙋ е҆го.
і҆ и҆збѝ рабы̀ своа̀.
ѹ҆бившаа ѿц҃а е҆го·

И҆ сн҃ы ѹ҆бїицъ тх̑ѣ не и҆збѝ, ꙗ҆́кож̑ пи́сано в꙽ кни́зѣ зако́на моѷсїина.
и҆же заповѣ́да г҃ь гл҃ѧ.
да не ѹ҆мира́ют̑ ѿц҃ы за сн҃ы.
и҆ сн҃ове не ѹ҆мира́ют̑ за ѿц҃а.
н̂о кож̑до за сво́и грх̑ѣ да ѹ́мрет̑·

Сїи же ѹ҆бѝ е҆дома въ гмелѣ, ҂і҃.
и҆ взѧт̑ ка́мень ѿ бра́ни.
и҆ нареч̑҇ и҆́мѧ е҆мꙋ и҆е҆ѳои́ль до днешнег̑҇ дн҃и·

Тогда̀ посла̀ а҆месїа послы̀ ко і҆а́сꙋ сн҃ꙋ і҆ѹ́евꙋ цр҃ю і҆и҆л҃вꙋ гл҃ѧ.
прїиди да сѧ ви́дим̑ в꙽ лице·

И҆ посла̀ и҆ѻ҆ас̑҇ цр҃ь і҆и҆л҃ев̑҇ къ а҆месїю цр҃ю і҆ѹ́динꙋ гл҃ѧ.
те́рнъ и҆же в꙽ ливанѣ посла̀ къ ке́дрови сꙋщемꙋ в ливанѣ гл҃ѧ.
да́ждь дще́рь свою̀ сн҃ꙋ мое҆мꙋ в꙽ женꙋ и҆ пришед̑ши ѕвѣрїе лꙋжнїи и҆же в꙽ ливанѣ, и҆ попра́ша те́рнїе·

Побѣдил̑҇ е҆си и҆дꙋме́ѧ.
и҆ възнесе́сѧ срд̑це твоѐ и҆ слави́шисѧ въ домꙋ̀ сѣдѧ свое҆мъ.
да чт̂о велича́ешисѧ ѕло́бою свое́ю.
и҆ па́деши т̂ы і҆ и҆ѹ́да с тобо́ю·

И҆ не послꙋша а҆месїѧ.
и҆ възы́иде и҆ѻ҆асъ цр҃ь і҆и҆л҃евъ, и҆ ви́дѣстасѧ лицемъ сїи.
и҆ а҆месїѧ цр҃ь і҆ѹ́динъ.
въ веѳъса́ме і҆ѹ́динѣ·

И҆ падѐ і҆ѹ́да предъ лицемъ і҆и҆л҃евым̑.
и҆ бѣжа́ша мꙋжи ко́ждо въ домы̀ своѧ̀·

И҆ а҆месїю сн҃а і҆ѻ҆а́сова.
сн҃а ѻ҆хозїина цр҃ѧ і҆ѹ́дина ꙗ҆́тъ и҆ѻ҆а́съ сн҃ъ а҆хазовъ цр҃ь і҆и҆л҃ев꙽ въ ваѳъсами́се, и҆ прїиде въ і҆ерс̑҇лим̑.
и҆ пришед̑ разбѝ стѣнꙋ і҆ерс̑҇ли́мꙋ ѿ врат̑ е҆фрѣмль до вра́тъ ѹ҆голныхъ.
у҃, лакотъ·

И҆ взѧтъ сребро и҆ зла́то и҆ вс̂ѧ сосꙋды ѻ҆брѣтеныѧ в до́мꙋ гн҃и и҆ въ сокрови́щихъ до́мꙋ цр҃ева.
и҆ сн҃ы смѣш꙽шаѧ҆сѧ и҆ възврати́сѧ в꙽ самарїю·

И҆ про́чаѧ словъ и҆ѻ҆а́совыхъ, е҆ли́ко сътворѝ въ силѣ е҆го.
ꙗ҆коже бра́сѧ съ а҆месїемъ цр҃емъ і҆ѹ́диным̑.
не с̂е л̂и сїѧ напи́сана въ кни́ѕе словес̑҇ дн҃їи цр҃ь і҆и҆л҃евых꙽·

И҆ ѹ́мре и҆ѻ҆а́съ съ ѿц҃ы свои́ми.
и҆ положенъ бы́сть въ самарїи съ цр҃и і҆и҆л҃евы.
и҆ црс̑҇твова і҆еровоа́мъ сн҃ъ е҆го в него̀ мѣсто·

И҆ житъ а҆месїѧ сн҃ъ и҆ѻ҆а́совъ цр҃ь і҆ѹ́динъ.
по ѹ҆мрътвїи и҆ѻ҆а́са сн҃а а҆хазова цр҃ѧ і҆и҆л҃ева, е҃і, лт̑ѣ·

И҆ про́чаѧ сло́въ а҆месїѻ́выхъ и҆ вс̂ѧ е҆ли́ка сътворѝ.
не с̂е ли сїѧ напи́сана въ кни́ѕе сло́въ дн҃їи цр҃ь і҆ѹ҆диныхъ·

И҆ возврати́шасѧ на него въ і҆ерс̑҇лим̑.
и҆ бѣжа в лахи́сы.
и҆ посла́ша въ слд̑ѣ е҆го в лахи́сы, и҆ ѹ҆би́ша и҆̀ т̂ꙋ·

И҆ възѧ́ша и҆̀ на ко́ни и҆ погребенъ бысть съ ѿц҃ы свои́ми въ і҆ерс̑҇ли́мѣ въ́ градѣ двд҃вѣ·

И҆ поѧ́ша вс̂и лю́дїе і҆ѹ́дини, а҆за́рїю.
и҆ то́й б̂ѣ, ѕ҃і, лт̑ѣ.
и҆ поста́виша и҆̀ цр҃емъ въ ѿц҃а е҆го мѣсто а҆месїѧ·

То́и же созда̀ е҆ло́ѳа, и҆ възврати и҆̀ і҆ѹ́дѣ, по ѹ҆мр҃твїи цр҃ѧ ѿц҃а е҆го·

В лѣто, е҃і, и҆ а҆месїа сн҃а и҆ѻ҆а́сова цр҃ѧ і҆ѹ́дина.
црс̑҇твоваж̑ і҆еровоа́мъ сн҃ъ и҆ѻ҆асовъ над̑ і҆и҆л҃емъ в самарїи, м҃а, лѣто·

И҆ сътворѝ лꙋка́вое пред̑ гм҃ъ, не ѻ҆ста́ви б̂о н̂и е҆ді́ного грѣха і҆е҆ровоам̑лѧ сн҃а наватова, и҆же съгрѣшити въведе і҆и҆л҃ѧ·

И҆ то́й приврати предл̑҇ѣ і҆и҆л҃евъ ѿ въхода е҆ма́ѳова даже до мо́рѧ а҆рави́т꙽скаго, по гл҃ꙋ г҃а б҃а і҆и҆л҃ева.
и҆же гл҃а рꙋко́ю раба̀ свое҆го и҆ѻ҆на́ѧ сн҃а а҆маѳїи́на про̑҇рка.
и҆же ѿ ге́ѳа хофе́рова·

Ꙗ҆́ко видѣ г҃ь смире́нїе і҆и҆л҃ево го́рко ѕѣло и҆ ма́ло б̂ѣ ѻ҆дръжи́мыхъ.
и҆ въсхита́емыхъ.
и҆ въско́рмленых̑.
и҆ не б̂ѣ помага́ющаго і҆и҆л҃ю·

И҆ не гл҃а г҃ь и҆скорени́ти сѣмене і҆и҆л҃ева под̑ всею нбс̑҇ною.
и҆ сп҃се ѧ҆̀ рꙋко́ю і҆е҆ровоа́млею сн҃а и҆ѻ҆а́совымъ·

И҆ про́чаѧ сло́въ і҆е҆ровоа́мовыхъ и҆ всѧ̀ е҆ли́ка сътворѝ и҆ си́ла е҆го е҆лика повое҆ва̀, и҆ е҆ли́ко ѻ҆братѝ дама́скꙋ.
і҆ е҆ма́ѳъ і҆ѹ́дѣ въ і҆и҆л҃и.
не сѐ л̂и сꙋть пи́сана въ кни́зѣ сло́въ дн҃їи цр҃еи і҆и҆л҃евыхъ·

И҆ ѹмретъ і҆е҆ровоам̑, и҆ положен̑҇ бы́сть съ ѿц҃ы свои́ми со цр҃и і҆и҆л҃евыми·

и҆ црс̑҇твова̀ а҆за́рїѧ сн҃ъ а҆месїин̑҇ въ ѿц҃а свое҆го мѣсто·

Глв̑҇а, е҃і·

В лѣто, к҃з.
і҆е҆ровоа́ма цр҃ѧ і҆и҆л҃ева.
црс̑҇твова̀ а҆за́рїѧ сн҃ъ а҆месїи́нъ цр҃ь і҆ѹ́дин̑҇.
ѕ҃і, лѣтъ б̂ѣ е҆гда нача̀ црс̑҇твова́ти, и҆ н҃в лѣтѣ, црс̑҇твова̀ въ і҆ерс̑҇ли́мѣ.
и҆́мѧ б̂ѣ мт҃ри е҆го е҆хелїѧ, ѿ і҆ерс̑҇ли́ма·

И҆ сътворѝ бл҃гое пред̑ ѻ҆чи́ма гн҃има, по всемꙋ е҆ли́ко сътворѝ ѿц҃ъ е҆го а҆месїѧ·

То́кмо высо́кихъ не разорѝ, и҆ е҆ще лю́дїе колѧ́хꙋ и жрѧ́хꙋ на высо́ких̑·

И҆ пꙋстѝ г҃ь гнѣвъ на цр҃ѧ и҆ бы́сть прокажен̑҇ до смр҃ти свое҆ѧ.
и҆ црс̑҇твова̀ в домꙋ̀ а҆пфꙋ́совѣ, и҆ѻ҆а҆ѳа́мъ сн҃ъ цр҃ѧ.
б̂ѣ над̑ до́момъ сꙋдѧ̀ лю́демъ землѧ̀ тоѧ·

И҆ про́чаѧ слове́съ а҆за́рїѧ.
и҆ всѧ̀ е҆ли́ка сътворѝ не сѐ л̂и сїѧ напи́сана въ кни́зѣ словъ дн҃їи цр҃ь і҆ѹ́диныхъ.
и҆ ѹ́мре а҆за́рїѧ и҆ погребо́ша и҆̀ съ ѿц҃ы е҆го въ́ градѣ двд҃вѣ.
и҆ црс̑҇твова̀ и҆ѻ҆а҆ѳа́мъ сн҃ъ ег̑҇ в него мѣ́сто·

В лѣто, к҃з.
а҆за́рїѧ цр҃ѧ і҆ѹ́дина, црс̑҇твова̀ а҆за́рїѧ сн҃ъ і҆е҆ровоа́мль въ і҆и҆л҃и.
и҆ в самарїи ѕ҃, мс̑҇ць.
и҆ сътворѝ лꙋка́вое предъ ѻ҆чи́ма гн҃има, ꙗ҆́коже сътвори́ша ѿц҃ы е҆го.
не ѿстꙋпѝ ѿ всѣ́хъ грѣх꙽ і҆е҆ровоа́мль сн҃а нава́това, и҆же съгрѣши́ти въведѐ і҆и҆л҃ѧ·

И҆ въста̀ на́нь селꙋмъ сн҃ъ и҆а҆ви́совъ, і҆ и҆е҆вдаа́мъ и҆ во́и и҆хъ ѹ҆би́ша и҆̀ и҆ ѹ́мре.
и҆ селꙋмъ црс̑҇твова̀ в него мѣсто·

И҆ про́чаѧ словъ а҆за́рїевых̑, сѐ е҆сть напи́сана в꙽ кни́зѣ гл҃ъ дн҃їи цр҃ь і҆и҆л҃евых̑·

Се́же слово гн҃е е҆же гл҃а къ и҆ѹ́е рекїи сн҃ове четвертїи сѧ́дꙋтъ на прс̑҇тлѣ і҆и҆л҃евѣ, и҆ бы́сть та́ко·

И҆ селꙋмъ сн҃ъ и҆а҆ви́совъ црс̑҇твова̀ въ іи҆л҃и въ лѣто л҃ѳ е, а҆за́рїѧ цр҃ѧ і҆ѹ́дина.
црс̑҇твова́ же селꙋмъ мс̑҇ць дн҃їи въ самарїи·

И҆ в꙽зы́иде манаа́мъ сн҃ъ гадїинъ, ѿ ѳереси́лы.
и҆ прїиде в самарїю и҆ ѹ҆бѝ салꙋма сн҃а и҆а҆ви́сова въ самарїи, и҆ ѹ҆мр҃тви и҆̀.
и҆ са́мъ црс̑҇твова в мѣсто е҆го·

И҆ про́чаѧ слове́съ селꙋмовыхъ.
и҆ ѻ҆браще́нїе ег̑҇ и҆мже ѻ҆браща́сѧ с̂е сꙋть пи́сана въ кни́зѣ гл҃ъ дн҃їи цр҃ь і҆ѹ́диных̑·

Тог̑҇да̀ разбѝ манаи́мъ ѳе́рсꙋ, и҆ всѐ е҆же б̂ѣ в не́и, и҆ предѣ́лъ е҆го ѿ ѳерси́ла.
понеже не ѿвръзо́ша е҆мꙋ, и҆ разбѝ и҆х꙽ и҆ вс̂ѧ и҆же в них̑, и҆ сꙋщаѧ непра́здны тогда̀ и҆збѝ·

В лѣто л҃ѳ е.
а҆за́рїа цр҃ѧ і҆ѹ́дина.
црс̑҇твова̀ манаи́мъ сн҃ъ гадїинъ въ і҆и҆л҃и, і҃, лѣтъ въ самарїи·

И҆ сътворѝ лꙋка́вое пред̑ ѻ҆чи́ма гн҃има.
въ всѧ дн҃и своѧ̀ и҆ не ѿвръжесѧ ѿ всѣхъ грѣхъ і҆е҆ровоа́ма сн҃а нава́това.
и҆же съгрѣшити въведѐ і҆и҆л҃ѧ·

Въ дн҃и же е҆го взы́иде фꙋ́ла цр҃ь а҆сѷрїискїи на зем̑лю і҆и҆л҃евꙋ, и҆ мана́имъ да́сть фꙋ́лѣ ты́сѧщꙋ тала́нтъ сребра̀ да бꙋдетъ рꙋка е҆го с ни́мъ·

И҆ възложѝ манаи́м꙽ да́нь на і҆и҆л҃ѧ.
ѿ всѣхъ си́лныхъ, да́ти цр҃ю сѷрскꙋ.
н҃, си́кль сребра̀ мꙋжꙋ кое҆мꙋждо.
и҆ възврати́сѧ цр҃ь сѷръскъ.
и҆ не стоѧ̀ т̂ꙋ въ земли то́и·

И҆ прочаѧ сло́въ манаи́мовыхъ и҆ вс̂ѧ е҆ли́ка сътворѝ.
не се́ ли сїѧ напи́сана въ кни́зѣ словъ цр҃еи і҆и҆л҃евых̑·

И҆ ѹ́мре манаи́мъ и҆ погребе́нъ быс̑҇ съ ѿц҃ы свои́ми.
и҆ црс̑҇твова̀ факїа́съ сн҃ъ е҆го в него мѣ́сто·

В лѣто, н҃ а҆за́рїѧ цр҃ѧ і҆ѹ́дина, црс̑҇твова́ же факї́асъ сн҃ъ манаи́мль въ і҆и҆л҃и въ самарїи, лѣтъ, в҃·

И҆ сътворѝ лꙋкавое пред̑ ѻ҆чи́ма гн҃има, и҆ не ѿстꙋпѝ ѿ всѣхъ грѣхъ і҆е҆ровоа́мль сн҃а нава́това, и҆же съгрѣши́ти въведѐ і҆и҆л҃ѧ·

И҆ възвра́тисѧ нань факе́и сн҃ъ ромелі́инъ триста́тъ е҆го.
и҆ ѹ҆бѝ и҆̀ в самарїи бли́зь до́мꙋ цр҃ева.
съ а҆рга́вомъ и҆ съ а́рїемъ.
и с ни́ма.
н҃, мꙋжъ ѿ галади́товъ и҆ ѹ҆би́ша и҆̀ и҆ црс̑҇твова̀ в него̀ мѣсто·

И҆ про́чаѧ сло́въ факеси́ѻ҆вых̑, и҆ всѧ̀ е҆лика сътворѝ сѐ сꙋть пи́сана въ кни́ѕѣ гл҃ъ цр҃еи і҆и҆л҃евых̑·

Въ лѣто н҃в е, а҆за́рїа цр҃ѧ і҆ѹ́дина.
црс̑҇твова̀ ѳаке́и сн҃ъ ромелїи́нъ въ і҆и҆л҃и въ самарїи, к҃, лѣтъ·

И҆ сътворѝ лꙋка́вое пред̑ ѻ҆чи́ма гн҃има.
и҆ не ѿстꙋпѝ ѿ всѣхъ грѣхъ і҆е҆ровоа́мль сн҃а нава́това и҆же съгрѣши́ти въведѐ і҆и҆л҃ѧ·

Въ дн҃и же ѳаке́ѧ цр҃ѧ і҆и҆л҃ва прїиде ваглафал꙽ласа́ръ цр҃ь а҆сѷрїискїи.
и҆ взѧ̀ а҆гїю, и а҆велъве́ѳа и҆ маа́хꙋ и҆ а҆ѻ́ха.
и҆ кене́зꙋ, и҆ а҆со́ра и҆ галаа́дъ и҆ галиле́ю, и҆ всю зе́млю неѳали́млю.
и҆ поведѐ ѧ҆̀ в сѷрїю·

И҆ въста̀ ѻ҆сїѧ́ сн҃ъ и҆лаи́нъ.
на ѳаке́ѧ сн҃а ромелїи́на, и҆ поразѝ и҆̀ и҆ ѹ҆мрътви и҆̀, и҆ црс̑҇твова̀ в него мѣ́сто въ к҃ е, лѣто.
и҆ѻ҆ха́ма сн҃а ѻ҆хоѕїи́на·

И҆ про́чаѧ словъ фаге́нных̑.
и҆ вс̂е е҆ли́ко сътворѝ сѐ сїѧ напи́сана въ кни́зѣ словъ цр҃еи і҆и҆л҃евыхъ·

Въ лѣто.
в҃ е, факе́ѧ сн҃а ромелїина цр҃ѧ і҆и҆л҃ева.
црс̑҇твова̀ и҆ѻ҆а҆ѳа́мъ сн҃ъ ѻ҆хоѕїи҆нъ цр҃ь і҆ѹ́дин̑҇·

Сы́и, к҃е, лт̑ѣ.
е҆гда̀ нача̀ црс̑҇твова́ти.
и҆ ѕ҃і, лѣтъ црс̑҇твова въ і҆ерс̑҇лимѣ.
и҆́мѧ б̂ѣ мт҃ри е҆го і҆е҆рꙋ́са дщи садо́кова·

И҆ сътворѝ ѹ҆годное пред̑ ѻ҆чи́ма гн҃има по всемꙋ̀ ꙗ҆́же сътворѝ ѿц҃ъ е҆го а҆за́рїѧ·

То́кмо высокихъ не разорѝ.
и҆ е҆щѐ лю́ди колѧ́хꙋ и҆ жрѧ́хꙋ въ высо́кихъ·

Тоиж̑ създа́лъ двери хра́мꙋ гн҃ю вы́шнѧа и҆ про́чаѧ сло́въ и҆ѻ҆а҆ѳа́мовых̑, и҆ вс̂е е҆ли́ко сътворѝ.
не се́ ли сїѧ напи́сана въ кни́зѣ гл҃ъ дн҃їи цр҃еи і҆ѹ́диных̑·

И҆ въ дн҃и ѻ҆́ны нача́тъ г҃ь посыла́ти на і҆ѹ́дꙋ роса́на цр҃ѧ сѷрска.
и҆ факе́а сн҃а ромелїи́на·

И҆ ѹ́мре и҆ѻ҆а҆ѳа́мъ и҆ погребе́нъ бы́сть съ ѿц҃ы свои́ми въ́ градѣ дв҃да ѿц҃а свое҆го.
и҆ црс̑҇твова̀ а҆ха́зъ сн҃ъ е҆го в него̀ мѣсто·

Глв̑҇а, ѕ҃і·

В лѣто, з҃і, факе́ѧ сн҃а ромелїи́на.
црс̑҇твова̀ а҆ха́зъ сн҃ъ и҆ѻ҆а҆ѳама цр҃ѧ і҆ѹ́дина·

Сы́и.
к҃, лѣтъ.
а҆ха́зъ е҆гда нача̀ црс̑҇твова́ти, и҆ з҃і лт̑ѣ въ і҆ерс̑҇ли́мѣ црс̑҇твова̀ и҆ не сътворѝ ѹ҆го́дное пред̑ ѻ҆чима г҃а б҃а свое҆го.
вѣрно ꙗ҆́ко и҆ дв҃дъ ѿц҃ъ ег̑҇·

И҆ ходѝ въ пꙋтѝ і҆е҆ровоа́ма сн҃а нава́това цр҃ѧ і҆и҆л҃ева, и҆ ксемꙋ и҆ сн҃а своег̑҇ ѻ҆ст҃и ѻ҆гне́мъ по мръзостѧхъ ꙗ҆зы́ковъ, и҆хже ѿѧт̑ г҃ь ѿ сн҃овъ і҆и҆л҃ев꙽·

И҆ пожрѣтъ и҆ кади́лъ на высо́кихъ и на хлъмѣхъ.
и҆ под̑ всѣмъ дре́вомъ часты́мъ·

Тогда̀ взы́иде раа҆со́н꙽ цр҃ь сѷрскъ, и҆ факе́и сн҃ъ ромелїи́нъ цр҃ь і҆и҆л҃евъ въ і҆ерс̑҇ли́мъ на́ брань.
и҆ мно́го побѣжа́хꙋсѧ съ а҆ха́зом̑.
и҆ не можа́хꙋ е҆мꙋ что сътворити·

Въ времѧ ѻ́но възврати́сѧ цр҃ь сѷрскїи раа҆со́нъ, въ і҆е҆ла́мъ сѷрїю.
і҆ и҆згна̀ і҆ѹ҆де́ѧ и҆зъ е҆ла́да, і҆ и҆дꙋме́и, и҆ прїидо́ша въ е҆ла́ѳъ, и҆ ѹ҆сели́шасѧ т̂ꙋ до дн҃е сего̀·

И҆ посла̀ а҆ха́зъ послы̀ и҆ къ веглафал꙽ласа́рꙋ цр҃ю а҆сѷрїискꙋ гл҃ѧ, рабъ твои и҆ сн҃ъ твои а҆́зъ е҆смь, взыи҆дѝ.
и҆ ѿи҆мѝ м̂ѧ ѿ рꙋкѝ цр҃ѧ сѷрска и҆ ѿ рꙋкꙋ цр҃ѧ і҆и҆л҃ева, въста́вшаѧ на́ мѧ·

И҆ прїѧ́тъ а҆ха́зъ зла́то и҆ сребро̀ ѻ҆брѣт꙽шее҆сѧ въ сокро́вищихъ до́мꙋ гн҃ѧ.
и҆ въ сокро́вищи до́мꙋ цр҃ева.
и҆ посла̀ цр҃ю да́ры·

И҆ послꙋша и҆̀ цр҃ь а҆сѷрїискъ и҆ взы́иде цр҃ь а҆сѷрїискїи в дама́скъ, и҆ прїꙗ҆́тъ е҆го і҆ и҆зведе е҆го.
и҆ раа҆со́на цр҃ѧ ѹ҆бѝ·

І҆ и҆дѐ цр҃ь а҆ха́въ на срѣте́нїе веглафал꙽ласарꙋ цр҃ю а҆сѷрїискꙋ в꙽ дама́скъ.
и҆ ви́дѣ жрътве́никъ и҆же в дама́сцѣ, и҆ посла̀ цр҃ь а҆ха́зъ къ ѹ́рїю і҆е҆ре́ю подо́бїе жрътве́ника.
и҆ число на все подо́бїе е҆мꙋ·

И҆ създа̀ ѹ́рїѧ і҆е҆ре́и жрътве́никъ по всемꙋ̀ ꙗ҆́же посла̀ цр҃ь а҆ха́зъ ѿ дама́ска.
и҆ ви́дѣ цр҃ь жрътве́никъ.
и҆ взы́иде на́нь.
и҆ покадѝ всесъж꙽же́нїе е҆го, и҆ жрътвꙋ е҆го, и҆ по́пелъ е҆го, и҆ пролїѧ кро́вь ми́рнꙋю на жрътве́никъ.
ѻ҆лтар꙽ же мѣ́дѧныи, и҆же пред̑ гм҃ъ принесе пред̑ лицѐ до́мꙋ гн҃ѧ, и҆ ѿ среды жрътве́ника, и҆ ѿ сре́ды до́мꙋ гн҃ѧ.
и҆ поста́ви и҆̀ ѻ҆ е҆ді́нꙋ странꙋ̀ жрътве́ника и҆же на сѣверъ·

И҆ заповѣ́да цр҃ь а҆ха́зъ ѹ́рїеви і҆е҆ре́ю гл҃ѧ в꙽ жертвеницѣ велицм̑ѣ приноша́и всесож꙽же́нїа ѹ́тренѧѧ.
и҆ жрътвꙋ вечер꙽нюю̀ и҆ всѧ̀сож꙽женїа цр҃ева и҆ жертвꙋ е҆го и҆ всесъж꙽же́нїѧ всх̑ѣ людїи, и҆ жрътвꙋ людїи.
и҆ по́пелъ их̑.
и҆ всѧ́ка кро́вь всесож꙽же́ных̑.
и҆ всѧ́кꙋ кро́вь жрътвенꙋю и҆злїе́ши на нем̑.
и҆ ѻ҆лтар̑҇ мѣ́дѧн̑҇.
и҆ да бꙋде м̂и на въход̑ заѹ́тра·

И҆ сотворѝ ѹ́рїа і҆е҆реи по всемꙋ̀ е҆ли́ко заповѣда е҆мꙋ а҆хаз̑·

І҆ и҆с꙽сѣчѐ а҆хаз̑ цр҃ь спое́нїа под̑ста́вов̑҇ и҆ взѧт̑ ѿ него ба́ню и҆ мо́ре.
низложѝ ѿ воло́въ мѣ́дѧных̑ и҆же бѣша под̑ ним̑, и҆ вда́сть им̑ хоже́нїе ка́мено.

И҆ ѻ҆снова́нїе по́дне и҆же създа́но быс̑҇ в домꙋ̀ гн҃и.
и҆ въхо́дъ цр҃евъ и҆же во́нь възвратѝ в до́мъ гн҃ь, ѿ лица̀ цр҃ѧ а҆сѷрїиска·

И҆ про́чаѧ сло́въ а҆ха́зовыхъ и҆же сътворѝ, не се́ ли сїѧ написана въ кни́зѣ цр҃еи і҆ѹ́диныхъ·

И҆ ѹ҆спѐ а҆ха́зъ съ ѿц҃ы свои́ми.
и҆ погребе́нъ бы́сть съ ѿц҃ы свои҆ми въ́ градѣ двд҃вѣ.
и҆ црс̑҇твова̀ е҆зекїѧ сн҃ъ е҆го в него мѣ́сто·

Глв̑҇а, з҃і·

В лѣто, в҃і, а҆ха́за цр҃ѧ і҆ѹ́дина, црс̑҇твова̀ ѻ҆сїѧ и҆лаи́нъ в꙽ самарїи над̑ і҆и҆л҃ем꙽ ѳ҃, лѣтъ·

И҆ сътворѝ лꙋка́вое пред̑ ѻ҆чима гн҃има.
н̂о не та́ко ꙗ҆́ко цр҃и і҆и҆л҃еви.
и҆же бѣша пре́жде е҆го·

И҆ възы́иде на́нь саламанаса́ръ цр҃ь а҆сѵрїискъ.
и҆ быс̑҇ е҆мꙋ ѻ҆сїѧ раб̑҇, и҆ дава́ше е҆мꙋ да́нь·

И҆ ѻ҆брѣте цр҃ь а҆сѷрїискъ въ ѻ҆сїи непра́вдꙋ зане́же посла̀ послы̀ къ сисо́рꙋ цр҃ю е҆гѷпет꙽скꙋ.
и҆ не принесѐ да́ни цр҃ю а҆сѷрїискꙋ лѣта того.
и҆ пои҆ма̀ е҆го цр҃ь а҆сѷрїискъ въ халъде́и, и҆ затвори е҆го въ хра́мѣ темни́чнѣ·

И҆ прїиде цр҃ь а҆сѷрїискъ в зе́млю е҆го, и҆ прїиде в самарїю.
и҆ вое҆ва̀ ю҆̀ три лѣта·

И҆ в лѣто, ѳ҃ е, ѻ҆сїево прїꙗ҆́тъ цр҃ь а҆сѵ́рьскїи самарїю.
и҆ заве́дени бы́ша і҆и҆л҃ьтѧ́не въ а҆сѷрїю.
и҆ посади́ша и҆хъ въ е҆ла́и, и҆ на наво́рѣ рѣцѣ̀ гоза́ни въ предѣлехъ ми́д꙽скихъ·

И҆ с̂е бы́сть и҆же съгрѣши́ша сн҃ове і҆и҆л҃еви къ г҃ꙋ б҃ꙋ свое҆мꙋ и҆звед̑шемꙋ и҆хъ и҆з꙽ землѧ̀ е҆гѷпетъскїѧ ѿ рꙋкꙋ фараѻ́нѧ цр҃ѧ е҆гѷпет̑ска и҆ ѹ҆боꙗ҆́шасѧ бог̑҇ и҆́нѣх꙽·

И҆ ходи́ти нача́ша по преда́нїем̑ ꙗзыкъ, и҆́хже и҆стребѝ г҃ь ѿ лица̀ сн҃овъ і҆и҆л҃евъ и҆ цр҃и і҆и҆л҃еви е҆ли́ко сътвори́ша, і҆ е҆ли́ко премени́ша сн҃ове і҆и҆л҃еви словесы̀.
не та́ко ꙗ҆́ко по г҃ѣ б҃ꙋ и҆хъ, и҆ създа́ша себѣ̀ высо́каѧ въ всѣхъ гра́дѣхъ свои҆хъ ѿ сто́лпъ стрегꙋщихъ.
и҆ до гра́дъ тверъды́хъ·

И҆ поста́виша себѣ̀ кꙋмиры.
и меръска бѧ́ше на всѧ́цм̑ѣ хо́лмѣ высоцѣ, и҆ под̑ всѧ́комъ дре́вомъ ча́стымъ·

И҆ кажахꙋ т̂ꙋ всѣхъ на высо́ких̑ ꙗ҆́коже и҆ ꙗ҆зы́цы.
ꙗ҆́же ѹ҆да́ли г҃ь ѿ лица их̑, и҆ сътвори́ша ѻ҆́бща ѕло́бы, и҆ начаша̑ прогнѣ́вати г҃а, и҆ послꙋжи́ша и҆́долом̑ ꙗ҆́же рече и҆мъ г҃ь.
не сътвори́те гл҃а сего гв҃и·

И҆ засвѣдѣтельствова г҃ь въ і҆и҆л҃и и҆ въ і҆ѹ́дѣ.
рꙋка́ми всѣхъ про̑҇ркъ е҆го, и҆ всѣмъ ви́дѧщимъ е҆го гл҃ѧ.
ѻ҆брати́тесѧ ѿ пꙋтїи ва́ших̑ лꙋка́выхъ.
и҆ съхрани́те за́повѣди моа и҆ ѻ҆правда́нїѧ моа.
и҆ весь за́кон̑҇ и҆же заповѣ́дахъ ѿц҃емъ ва́шимъ, и҆ е҆ли́коже послахъ рꙋка́ма ра́бъ моих̑ про̑҇ркъ.
и҆ не послꙋшаша и҆ ѻ҆жести́ша̑ выю свою, ꙗ҆́ко и҆ ѿц҃ы и҆хъ и҆же не вѣроваша г҃ꙋ б҃ꙋ свое҆мꙋ·

И҆ погордѣша за́повѣдїю е҆го, и҆ завѣтомъ е҆го.
и҆́мже завѣща ѿц҃емъ и҆хъ и҆ свѣдѣтельства е҆го е҆ли́коже засвѣдѣтельствова и҆мъ не съхрани́ша.
і҆ и҆до́ша въ слд̑ѣ сꙋе́тныхъ.
и҆ ѻ҆сꙋе́тишасѧ паче ꙗ҆зы́къ сꙋщихъ ѻ҆́крс̑҇тъ и҆хъ, ѻ҆ нихже заповѣ́да г҃ь е҆же не сътворѝ по семꙋ·

И҆ ѻ҆ста́виша за́повѣди г҃а б҃а свое҆го.
и҆ сътвори́ша себѣ дв̂ѣ ю҆́ницы слиты.
и҆ сотвори́ша кꙋмиры и҆ поклони́шасѧ все́и твари ꙗ҆́же на небесѣ, и҆ послꙋжи́ша ваа́лꙋ·

И҆ пред̑вождахꙋ сн҃ы своа и҆ дще́ри своѧ чресъ ѻ҆́гнь.
и҆ влъш꙽влѧхꙋ влъшвова́нїем꙽ и҆ вражахꙋ.
и҆ разжизахꙋсѧ е҆же сътвори́ти лꙋка́въство, пред̑ ѻ҆чи́ма гн҃има е҆же прогнѣ́вати е҆го·

И҆ разъгнѣ́васѧ г҃ь на і҆и҆л҃ѧ ѕѣло и҆ ѿринꙋ их̑ ѿ лица своег̑҇.
и҆ не ѻ҆ста то́к꙽мо колѣно і҆ѹ́дино·

І҆ и҆ѹ́да та́коже не съхрани пꙋти г҃а б҃а свое҆го.
и҆ хождахꙋ по преда́нїемъ і҆и҆л҃евом̑ ꙗ҆́же сътвори́ша и҆ ѿвръго́шасѧ г҃а·

И҆ разгнѣ́васѧ г҃ь на всѐ колѣно і҆и҆л҃ево и҆ смꙋти ѧ҆̀.
и҆ дасть ѧ҆̀ в рꙋ́ки расхища́ющим̑ ѧ҆̀.
дон̑҇деже ѿвръже ѧ҆̀ ѿ лица свое҆го·

Ꙗ҆́ко ѿторжесѧ і҆и҆л҃ь ѿ до́мꙋ дв҃два и҆ поста́виша себѣ црс̑҇твовати і҆е҆ровоа́ма̑ сн҃а нава́това.
и҆ ѿринꙋ і҆еровоа́мъ і҆и҆л҃ѧ ѿ г҃а, и҆ съблазни и҆хъ съгрѣшити грѣхом̑ вели́ким̑·

И҆ хождахꙋ сн҃ове і҆и҆л҃еви по всемꙋ грѣхꙋ і҆е҆ровоа́млю.
и҆же сътвори, и҆ не ѿстꙋпиша ѿ них̑·

до́ндеже ѿвр́ъже г҃ь і҆и҆л҃ѧ ѿ лица свое҆го.
ꙗ҆́кож̑ гл҃а рꙋко́ю всх̑ѣ ра́бъ своих̑ пророк̑҇.
і҆ и҆зведен̑҇ бысть і҆и҆л҃ь ѿ все́ѧ землѧ̀ свое́ѧ въ а҆сѷрїѧны до́ дн҃е сего·

И҆ въведе цр҃ь а҆сѷрїискїи лю́ди ѿ вавило́на и҆же ѿ рꙋѳа, и҆ ѿ а҆и҆ѧ.
и҆ ѿ е҆ма́ѳа, и҆ сеѳарꙋе́ма.
и҆ вселе́ни быша во гра́дех̑ самарїиских̑, въ сн҃овъ мѣсто і҆и҆л҃въ и҆ наслѣди́ша самарїю.
и҆ ѹ҆сели́шасѧ въ́ градѣхъ е҆ѧ·

И҆ бысть въ пр́ьвое сѣденїе и҆хъ не ѹ҆боѧ́шасѧ б҃а.
и҆ пꙋсти на́ нѧ г҃ь львы.
и҆ бѧхꙋ ѹ҆бива́ющи ѧ҆̀·

И҆ рѣша цр҃ю а҆сѷрїискꙋ гл҃ще ꙗ҆зы́ки и҆же приведе и҆ посади ѧ҆̀ во́ градѣхъ самарїискихъ, не разꙋмѣша сꙋда бж҃їѧ земли.
и҆ посла в нихъ г҃ь львы, и҆ с̂е бы́ша ѹ҆бива́юще и҆хъ ꙗ҆́ко не разꙋмѣша сꙋда бж҃їѧ землѝ·

И҆ заповѣ́да цр҃ь а҆сѷрїискїи гл҃ѧ ѿведите та́мо е҆ді́наго жерца̀ ѿ плене́ных̑ да и҆дꙋтъ и҆ да вселѧт̑сѧ та́мо.
и҆ да просвѣтит̑ и҆хъ сꙋ́дом̑ бж҃їим̑ земли·

И воведо́ша е҆ді́ного жерца е҆гож̑ поѧ́ша ѿ самарїѧ.
и҆ сѣде въ веѳилѣ.
и҆ б̂ѣ просвѣща́ѧ жре́цъ их̑.
ꙗ҆ко да ѹ҆боѧт̑сѧ г҃а·

И҆ бѣша творѧ́ще ꙗ҆зы́цы боги и҆х.
и҆ поста́виша ѧ҆̀ въ хра́мх̑ѣ на высоких꙽, и҆хже сътвори́ша самарѧне ꙗ҆зыцы въ гра́дѣхъ и҆х.
в них̑ же бѣша живꙋщеи пр́ьвїе мꙋжи вавилон̑҇стїи.
сътвори́ша сокхоѳъ.
и҆ вениѳ̑҇ и҆ мꙋжи хꙋ́ѳовы сътвори́ша гиге́ль.
и҆ мꙋжи сема́ѳови сътвори́ша а҆симаѳ̑҇·

И҆ е҆ве́и сътвори́ша валазеръ.
и҆ ѳарахъ, и҆ сепѳо́рим̑ и҆дѣже съжегахꙋ сн҃ы своа̀ ѻ҆гнемъ.
а҆нъдрамескъ, и҆ а҆намелехꙋ бо́гомъ.
сепфарꙋ, е҆мем̑лимъ·

И҆ бѧ́хꙋ боа́щесѧ б҃а, и҆ всели́ша мерскїѧ своѧ въ хра́мы на высокихъ, и҆́хже сътвори́ша въ самарїи ꙗ҆́зы́къ кое҆гождо гра́да.
в нем̑же живѧ́ше кого́ждо и҆хъ·

И҆ бѣша боѧ҆щесѧ г҃а.
и҆ сътвори́ша в них̑ жерца̀ въ высокихъ.
и҆ сътвори́ша себѣ въ хра́мѣхъ высо́ких̑, и҆ г҃а боѧ́тисѧ.
і҆ и҆доломъ слꙋжахꙋ.
по сꙋдꙋ ꙗ҆зы́ков̑҇, их̑же из̑гнаша ѿтꙋдꙋ даже до дн҃е сего тїи творѧ́хꙋ по сꙋ́дꙋ их̑ не боѧ́хꙋсѧ г҃а и҆ не творѧ́хꙋ по ѻ҆правда́нїемъ их̑, и҆ по сꙋ́дꙋ их̑ и҆ по за́конꙋ.
и҆ по за́повѣди е҆ю́же заповѣ́да сн҃омъ і҆а́ковлимъ.
идѣже и҆ нарече и́мѧ е҆мꙋ і҆и҆л҃ь·

И҆ положи г҃ь съ ни́ми завт̑ѣ.
и҆ заповѣда и҆мъ гл҃ѧ.
не ѹ҆бо́итесѧ бо́гъ и҆́нх̑ѣ, и҆ не поклони́тесѧ и҆мъ.
и҆ не послꙋ́жите и҆мъ, и҆ не пожре́те им̑·

Но то́кмо гв҃и, и҆же и҆зведе в̂ы и҆з꙽ землѧ е҆гѷпта крѣпостїю вели́кою и҆ мышцею высо́кою.
того ѹ҆бо́итесѧ и҆ томꙋ поклони́тесѧ.
и҆ томꙋ пожре́те, и҆ ѻ҆правда́нїѧ е҆го и҆ сꙋ́ды е҆го и҆ зако́нъ е҆го, и҆ за́повѣди ꙗ҆́же написа̀ ва́мъ хранити, творити ѧ҆̀ по в꙽сѧ дн҃и, и҆ завѣтъ и҆же завѣща с ва́ми не забыва́ите и҆ не ѹ҆бо́итесѧ бо́гъ и҆́ных̑.
и҆ не ѹ҆бо́итесѧ богъ чꙋж́дихъ·

Но то́кмо г҃а б҃а ва́шего ѹ҆бо́итесѧ, и҆ то́и и҆зметъ в̂ы ѿ всѣхъ вра́гъ ва́шихъ·

И҆ не послꙋшаша сего̀, и҆ ходиша въ безако́нїи первом꙽.
и҆ бѧхꙋ ꙗ҆зыцы сїи боѧ́щесѧ г҃а, і҆ и҆зваѧ́ным̑ свои҆мъ слꙋжа́хꙋ, та́коже и҆ сн҃ы их̑.
и҆ сн҃ове сн҃овъ их̑.
ꙗ҆коже сътвориша ѿц҃ы их̑, та́ко творѧт̑ и҆ до сего дн҃е·

Глв̑҇а, и҃і·

И бы́сть в лѣто, г҃ е.
і҆ѻ҆сие҆во сн҃а и҆лаи҆на цр҃ѧ і҆ил҃ева.
црс̑҇твова е҆зекїѧ сн҃ъ а҆хазов̑҇ цр҃ѧ і҆ѹ́дина.
сы́и к҃е, лт̑ѣ б̂ѣ, е҆гда̀ нача̀ црс̑҇твовати, и҆ к҃ѳ, лѣтъ црс̑҇твова въ і҆ерс̑҇лимѣ.
и҆мѧ б̂ѣ мт҃ри его а҆вꙋѳа дщ̂и захарїина·

И҆ се́и сътвори ѹ҆год̑ное предъ ѻ҆чи́ма гн҃има, по в꙽семꙋ ꙗ҆коже сътвори ѿц҃ъ е҆го дв҃дъ·

То́и б̂о раз̑дрꙋши высокаѧ.
и҆ съкрꙋши вс̂ѧ ка́пища і҆ и҆скорени кꙋмиры и҆ змїю̀ мѣдѧ́нꙋю, ю҆́же сътвори моѷсїи.
ꙗ҆́ко и҆ до дн҃їи тѣхъ сн҃ове і҆и҆л҃еви бѣхꙋ кадѧ́ще е́й.
назва же и҆мѧ е҆го нее҆ста́нъ·

ѻ҆ г҃и б̂о бѕ҃ѣ і҆и҆л҃евѣ ѹ҆пова и҆ по немъ не бы́сть подо́бна е҆мꙋ въ цр҃ихъ і҆ѹ́диныхъ.
и҆ въ бы́вшихъ прежде е҆го·

И҆ прилѣписѧ гв҃и и не ѿстꙋпи ѿ него.
и҆ съхрани за́повд̑и̑ѣ е҆го е҆ли́ко заповѣ́да моѷсїи·

И҆ б̂ѣ г҃ь с ни́мъ и҆ на всѧ̀ и҆же твори призира́ше.
и҆ сопротивисѧ цр҃ю а҆сѷрїискомꙋ.
и҆ не порабо́та е҆мꙋ·

И҆ то́й побѣди и҆ноплемен̑҇ники до га́зы.
и҆ до предѣлъ е҆ѧ.
ѿ столпа стражили́щънаго, и҆ до град̑ твръдых꙽·

И҆ бы́сть въ времѧ, д҃ е цр҃ѧ и҆е҆зекїѧ.
сїе же лѣто сед̑мо́е и҆ѻ҆сїеви сн҃ꙋ и҆лаи҆нꙋ цр҃ю і҆и҆л҃евꙋ, възы́иде саламанасаръ цр҃ь а҆сѷрїискъ на самарїю.
и҆ побѣди́сѧ мно́го ѻ҆ не́и·

И҆ прїѧ́тъ и҆̀ ѹ҆ конца тре́хъ лѣтъ.
въ ѕ҃ е, лѣто и҆е҆зекїево.
и҆ сїе же б̂ѣ лѣто и҆ѻ҆сїево цр҃ѧ і҆и҆л҃ва, потребисѧ самарїѧ.
і҆ и҆зведе цр҃ь а҆сѷрїискїи самарѧ́не въ а҆сѷрїю.
и҆ посади ѧ҆̀ въ а҆ла́и и҆ въ а҆во́рѣ при рѣцѣ газо́нѣ.
и҆ въ предѣлех̑ мид̑ских̑·

Понеже не послꙋшаша гла́са г҃а бг҃а свое҆го.
и҆ престꙋпиша завѣтъ е҆го вс̂е е҆ли́ко заповѣ́да и҆мъ моѷсїи рабъ гн҃ь.
и҆ не послꙋшаша и҆ не сотвориша̑·

И҆ въ д҃і, лѣто, цр҃ѧ и҆е҆зекїѧ възы́иде сенахири́мъ цр҃ь а҆сѷрїискїи на всѧ̀ гра́ды і҆ѹ́дины тве́рдыѧ, и҆ и҆ взѧтъ ѧ҆̀·

И посла̀ е҆зекїѧ цр҃ь і҆ѹ́динъ послы̀ къ цр҃ю а҆сѷрїискꙋ в лахис̑҇ гл҃ѧ.
съгрѣших̑ воз̑врати́сѧ ѿ мене.
а҆́ще м̂и велиши ѹ҆жѐ чт̂о даѧ́ти, т̂о ѹ҆же да́ю ти.
и҆ возложи цр҃ь а҆сѷрїискїи да́нь великꙋ на и҆е҆зекїѧ цр҃ѧ і҆ѹ́дина.
да да́сть, т҃, тала́нтъ сребра̀.
и҆ л҃, талан̑҇товъ зла́та·

И҆ да́сть и҆е҆зекїѧ вс̂е сребро̀ ѻ҆брѣтъшеесѧ въ домꙋ̀ гн҃и.
и҆ въ сокровищех̑ до́мꙋ цр҃ева·

Во времѧ же ѻ҆но с꙽сѣче и҆е҆зекїѧ цр҃ь і҆ѹ́динъ две́ри хра́ма гн҃ѧ и҆ ѹ҆твръженїѧ ꙗ҆́же б̂ѣ позлатил̑҇ и҆е҆зекїѧ цр҃ь і҆ѹ́динъ.
и҆ дасть и҆хъ цр҃ю а҆сѷрїискꙋ·

И҆ посла̀ цр҃ь а҆сѷрїискъ ѳарѳа́на и҆ равосана.
и҆ равсака ѿ лахи́са, въ і҆ерс̑҇лим̑ къ цр҃ю и҆е҆зекїю съ силою тѧ́жкою ѕѣло.
и҆ взыидо́ша̑ и҆ прїидоша ко і҆ерс̑҇ли́мꙋ и҆ ста́ша ѹ҆ и҆сто́чника кꙋпели.
свы́ше, е҆же е҆сть на пꙋтѝ села̀ чевни́чного·

И҆ возопи́ша къ и҆е҆зекїю.
і҆ и҆зы́иде к ним̑ е҆леа҆ким̑ сн҃ъ селкїинъ строи́тель и҆ сомна́съ кни́гочїи.
и҆ѻ҆а́съ сн҃ъ і҆ѻ҆сафа́товъ въспомина́ѧи·

И҆ рече к ни́мъ раѱак̑҇.
и҆дѣте нн҃ѣ къ и҆е҆зекїи, и҆ рцѣте.
си́це гл҃етъ цр҃ь вели́кїи цр҃ь а҆сѷрїискїи.
чт̂о е҆сть ѹ҆пова́нїе сїе е҆мꙋже ѹ҆пова́еши·

Гл҃еши толи́ко сло́во ѹ҆стнама на совѣт꙽ и҆ си́ла на́ брань.
подоба́етъ т̂о нн҃ѣ ѹ҆же на кого̀ надѣѧ́сѧ ѿвръглъ е҆си менѐ·

Нн҃ѣ ви́дѣ надѣ́ешисѧ т̂ы на жезлъ тростѧны́и и҆ сло́мленыи е҆гѷпет꙽скїи.
е҆гда̀ а҆́ще подо́претсѧ мꙋж́ъ ею̀ вни́детъ въ рꙋкꙋ е҆го, и҆ заизетъ ю҆̀.
та́ко и҆ фараѻ́нъ цр҃ь е҆гѵпет̑скъ всм̑ѣ надѣ́ющимсѧ нань сътвори́тъ·

И҆ а́ще м̂и речете на́ г҃а б҃а надѣ́емсѧ н̂о нѣ́сть ли с̂е та́ко ѿстꙋпи ѿ е҆зекїѧ высо́каѧ е҆го и҆ жрътвеники е҆го.
и҆ рече і҆ѹ́дѣ і҆ерс̑҇ли́мꙋ поклони́тесѧ пред̑ жрътвеникомъ си́мъ въ і҆и҆л҃и·

И нн҃ѣ пот̑щи́тесѧ и҆тѝ къ господи́нꙋ мое҆мꙋ цр҃ю а҆сѷрїискꙋ.
и҆ дасть т̂и, ҂в҃, ко́нь.
а́ще мо́жеш имѣти всад̑ники на́ нѧ·

И҆ ка́ко ѻ҆брати́ши лицѐ по́не е҆пархꙋ е҆ді́номꙋ ра́бъ господи́на моег̑҇ ме́нших꙽.
и҆ ѹ҆вѣрил꙽сѧ е҆си са́мъ е҆гѷптꙋ, на ѻ҆рꙋжїѧ и҆ ко́нѧ·

Нн҃ѣ ѹ҆бо не безъ господи́на взыидохомъ на мѣ́сто с̂е и҆стощити е҆̀, рече б̂о господи́нъ къ мнѣ̀ в꙽зы́иди на́ землю сїю и҆ расточи ю҆̀·

И҆ реч̑҇ е҆леа҆кимъ сн҃ъ хелекїинъ, и҆ сомънасъ.
и҆ѻ҆а́съ, къ раѱа́кꙋ.
гл҃и нн҃ѣ къ ѻ́трокомъ симъ а҆сѷрїискимъ, ꙗ҆́ко слы́шимъ м̂ы.
а҆ не гл҃и к на́мъ і҆ѹ҆де́скїи, въ ѹ́ши лю́деи си́хъ и҆же на стѣнѣ·

И҆ рече к нимъ раѱа́къ, е҆да̀ къ господи́нꙋ твое҆мꙋ и҆ли к тебѣ̀ посла́лъ мѧ е҆сть господи́нъ мо́и гл҃ати словеса̀ сїѧ.
н̂о не къ мꙋжемъ сѣдѧщим̑ на стѣнѣ.
ꙗ҆́ко ꙗ҆́сти и҆мъ гно́и сво́и и҆ пити им̑ се́чъ свою съ ва́ма вкꙋпѣ·

И҆ стоѧ̀ раѱа́къ.
и҆ възопѝ гла́сомъ вели́комъ і҆ѹ҆де́искїи, гл҃а.
и҆ рече слы́шите словеса̀ вели́ког̑҇ цр҃ѧ а҆сѵрїиска·

Си́це гл҃ет꙽ цр҃ь да не соблаж̑нѧет̑ васъ цр҃ь и҆е҆зекїѧ.
ꙗ҆́ко не възмо́жет̑ ва́съ изѧти и҆з рꙋки мое́ѧ·

И҆ да не ѹ҆вѣритъ васъ и҆е҆зекїѧ на г҃а гл҃ѧ, и҆землѧ ѧ҆̀ и҆змет̑ в̂ы г҃ь.
и҆ не и́мать преда́тисѧ град̑ се́й в рꙋцѣ цр҃ю а҆сѵрїискꙋ·

Не послꙋшаите и҆е҆зекїа.
ꙗ҆́ко си́це гл҃ъ цр҃ь а҆сѷрїискъ сътвори со мно́ю блс̑҇ве́нїе і҆ и҆зыидѣте къ мнѣ̀.
и҆ да пїетъ мꙋжъ ѿ виногра́да свое҆го.
и҆ мꙋжъ въкꙋси́тъ ѿ смоко́въ своих̑.
и҆ да пїетъ во́дꙋ ѿ ръвенїѧ свое҆го·

до́ндеже пришед̑ поимꙋ̀ в̂ы въ зе́млю такꙋ.
ꙗ҆́коже е҆сть землѧ́ ва́ша.
землѧ̀ пшени́ца и҆ вина̀ землѧ̀ и҆ хлѣбомъ, и҆ виногра́довъ.
землѧ̀ ма́слинамъ и҆ маслꙋ, и҆ пчелам̑.
и҆ живи бꙋ́дете и҆ не ѹ́мрете.
и҆ не послꙋш́аите и҆е҆зекїѧ, ꙗ҆́ко прельща́етъ в̂ы гл҃ѧ г҃ь н̂ы и҆зба́витъ·

Є҆да̀ и҆збавлѧ́юще и҆зба́виша бо́ѕи.
ꙗ҆́зы́къ ко́ждо их̑ въ свою̀ странꙋ̀ и҆з рꙋки цр҃ѧ а҆сѵрїиска·

Гд̂ѣ е҆сть бо́гъ е҆маѳов̑҇.
и҆ а҆рфа́довъ.
гд̂ѣ е҆сть богъ серапфарꙋе́мовъ, и҆ мїана, и҆ а҆ва.
е҆да̀ и҆зба́висѧ самарїѧ.
и҆з рꙋкꙋ мое́ю съ свои́ми бо́гами и҆хъ·

Є҆гда̀ и҆збы́ша землѧ̀ их̑ ѿ рꙋки мое́ѧ, и҆ ка́ко и҆з꙽мет̑ г҃ь і҆ерс̑҇ли́ма и҆з рꙋкѝ мое́ѧ.
и҆ ѹ҆молко́ша лю́дїе, и҆ не ѿвѣща́ша е҆мꙋ сло́ва ꙗ҆́ко заповѣ́да и҆мъ цр҃ь гл҃ѧ.
не ѿвѣща́ти е҆мꙋ ничтоже·

И҆ вни́де е҆леа҆кимъ сн҃ъ хелекїинъ строи́тель.
и҆ съмнасъ кни́гочїи.
и҆ѻ҆а́съ сн҃ъ и҆ѻ҆сафатовъ, въспомина́ѧ къ и҆е҆зекїи раз꙽дра́вше ри́зъ своѧ, и҆ възвѣсти́ша е҆мꙋ словеса̀ раѱа́кова.

Глв̑҇а, ѳ҃і·

И бысть ꙗ҆́ко ѹ҆слы́ша цр҃ь и҆е҆зекїѧ.
раздра ри́зы своа̀, и҆ ѻ҆блечесѧ въ врѣтище и҆ вни́де въ до́мъ гн҃ь·

И҆ посла̀ е҆леа́кима строи́телѧ, и҆ сам̑на́нꙋ кни́гочїѧ.
и҆ старца и҆ жер̑҇ца ѻ҆блече́ны въ врѣтище къ і҆саїи пророкꙋ сн҃ꙋ а҆м꙽мо́совꙋ·

И҆ рѣша е҆мꙋ си́це гл҃етъ и҆е҆зекїѧ дн҃ь скор꙽би и҆ ѻ҆бличенїю.
и҆ прогнѣва́нїю дн҃ь сїи ес̑҇.
ꙗ҆́ко прїидо́ша сн҃ве до не́мощи, и҆ крѣпости нѣсть ража́ющїи·

Є҆да̀ ка́ко послꙋшает̑ г҃ь б҃ъ тво́и всѣхъ слове́съ раѱа́ковыхъ, е҆гоже посла цр҃ь а҆сѷрїискїи, гн҃ъ е҆го поноси́ти б҃ꙋ живо́мꙋ.
и҆ хꙋли́ти словесы̀, и҆́хже слы́ша̑ г҃ь б҃ъ твои.
и҆ прїими мл҃твꙋ ѻ҆стан̑҇кꙋ ѻ҆брѣтъшемсѧ·

И҆ прїидо́ша ѻ҆́троцы цр҃ѧ и҆е҆зекїѧ къ і҆саїи·

И҆ реч̑҇ им̑ і҆саїа.
си́це рцѣте господи́нꙋ вашемꙋ.
та́ко гл҃етъ г҃ь.
не ѹ҆бо́исѧ ѿ лица̀ словесъ и҆́хже слы́ша ꙗ҆́же хꙋлиша м̂ѧ ѻ҆́троцы цр҃ѧ а҆сѷрїиска·

Се а́зъ даю̀ е҆мꙋ дх҃ъ, и҆ ѹ҆слы́шит꙽ възвѣщенїе, и҆ възврати́тсѧ въ зе́млю свою̀.
и҆ низложꙋ е҆го ѻ҆рꙋжїем̑ въ земли е҆го.
и҆ възврати́сѧ раѱак̑҇.
и҆ ѻ҆брѣте цр҃ѧ а҆сѷрїиска побѣжда́ющесѧ ѻ҆ ловнꙋ.
ѹ҆слы́ша б̂о и҆ ѿстꙋпѝ ѿ лахи́са·

И҆ слы́ша ѻ҆ ѳара́кꙋ цр҃и е҆фїѻ́пъстемъ гл҃ы.
с̂е и҆зыиде побѣди́тисѧ хотѧ̀ с тобо́ю.
и҆ възврати́сѧ и҆ посла послы̀ ко и҆е҆зекїю гл҃ѧ·

Та́ко р꙽цѣте и҆е҆зекїю цр҃ю і҆ѹ҆де́искꙋ да тебѐ не возно́ситъ г҃ь б҃ъ тво́и, на́ньже т̂ы надѣ́ешисѧ гл҃ѧ.
не и́мать преда́нъ быти і҆ерс̑҇ли́мъ въ рꙋ́цѣ цр҃ѧ а҆сѷрїиска·

Се т̂ы слы́шалъ е҆си вс̂е е҆ли́ко сътвори́ша цр҃и а҆сѷрїистїи всѣмъ землѧ́мъ ꙗ҆́ко проклѧ́ти их̑.
и҆ т̂ы ли и҆збꙋ́деши·

Ꙗ҆́ко не и҆зба́виша и҆збавле́нїемъ и҆хъ бо́ѕи ꙗ҆зы́къ.
и҆хже расточи́ша ѿц҃ы моѝ газо́нꙋ, и҆ хара́нꙋ, и҆ ѳаре́сꙋ.
и҆ сн҃ы а҆до́нѧ и҆же въ ѳалас꙽саримѣ·

Гд̂ѣ е҆сть цр҃ь е҆ма́ѳовъ, и҆ цр҃ь а҆рфа́довъ.
и҆ гд̂ѣ е҆сть цр҃ь град̑ а҆сафарꙋ и҆ маа́ны, и҆ а́на·

И҆ прїѧ́тъ цр҃ь и҆е҆зекїѧ кни́ги ѿ рꙋкѝ посла̀.
и҆ прочъте ѧ҆̀ и҆ вни́де въ хра́мъ гн҃ь и҆ поплева и҆хъ и҆е҆зекїѧ пред̑ гм҃ъ·

И҆ моли́сѧ и҆е҆зекїѧ пред̑ гм҃ъ.
и҆ реч̑҇ г҃и б҃е і҆и҆л҃евъ сѣдѧ́и на херꙋви́мѣ.
т̂ы е҆си б҃ъ е҆дін̑҇ въ всѣхъ црс̑҇твїихъ землѝ, т̂ы сътвори нб҃о и҆ зе́млю·

Приклонѝ г҃и ѹ́хо твоѐ и҆ ѹ҆слы́ши м̂ѧ.
ѿвер̑҇зѝ г҃и ѻ҆чи твоѝ и҆ ви́ждь.
и҆ ѹ҆слы́ши словеса̀ сенахира́ма ꙗ҆же посла̀ понаша́ѧ тебѣ б҃ꙋ жи́вꙋ·

Ꙗ҆́ко по и́стиннѣ г҃и и҆скази́ша цр҃и а҆сѷрїистїи ꙗ҆зы́ки·

И҆ да́ша бо́ги и҆хъ на ѻ҆́гнь ꙗ҆́ко не бо́ѕи бѣша, н̂о дѣла рꙋкꙋ чл҃чꙋ.
древа и҆ ка́менїѧ и҆ погꙋби́ша ѧ҆̀·

И҆ нн҃ѣ г҃и б҃е сп҃си н̂ы и҆з рꙋкы и҆хъ, и҆ разꙋмѣют̑ вс̂ѧ црс̑҇твїа зе́мли ꙗ҆ко ты е҆си г҃ь б҃ъ е҆ді́нъ·

И҆ посла̀ і҆саїѧ сн҃ъ а҆м꙽мо́сов̑҇ къ и҆е҆зекїи гл҃ѧ.
та́ко гл҃етъ г҃ь б҃ъ си́лъ б҃ъ і҆и҆л҃евъ.
слы́шах̑ ѻ҆ ни́хже моли́сѧ къ мнѣ̀ ѻ҆ сенахири́мꙋ цр҃ю а҆сѷрїискꙋ·

И҆ се сло́во е҆же гл҃а г҃ь ѻ҆ не́мъ.
ѹ҆ничижи т̂ѧ и҆ порꙋга́ ти сѧ дв҃це дщ̂и сїѻ́нѧ, и҆ покива́ѧ главо́ю сниде въ слд̑ѣ тебѐ дщ̂и і҆ерс̑҇ли́млѧ·

Комꙋ̀ поносѝ и҆ кого̀ похꙋли, и҆ на кого̀ вознесе гласъ свои.
и҆ воздви́же на высотꙋ̀ ѻ҆́чи своѝ на ст҃го і҆и҆л҃ева·

рꙋка́ма посе́лъ твои҆хъ поноси́лъ е҆си г҃ꙋ.
и҆ реклъ е҆си съ мно́жествомъ колесни́цъ мои҆хъ, възы́идꙋ а́зъ на вы́шнюю ча́сть горы̀ ливаньскїѧ.
и҆ ѹ҆сѣкꙋ вели́чество ѿ ке́дръ е҆ѧ.
и҆ ѿ собо́рныхъ кѷпариса е҆ѧ.
и҆ прїиде въ ча́съ кончи́ны е҆го в ча́ща корми́льскїѧ·

А҆́зъ сохраних̑ и҆ пїѧх̑ во́дꙋ чꙋжд̑ꙋ и҆скази́хъ стопа́ми но́гъ мои҆хъ.
вс̂ѧ рѣки въ ѻ́коло·

Є҆да̀ не слы́шал̑҇ е҆си ѿ да́внаго ю҆̀ сътворихъ.
ѿ дн҃їи пр́ьвыхъ создахъ ю҆̀ и҆ принесо́хъ ю҆̀.
и҆ бы́сть на взѧтїе, на съграже́нїе воюю́щихъ.
гра́ды твръды и҆ живꙋщїи в нихъ·

И҆знемого́ша рꙋко́ю ѻ҆бита́ющїи и҆ ѹ҆падо́ша и҆ постыдѣшасѧ.
и҆ бы́ша ꙗ҆́ко тра́ва се́лнаѧ и҆ ꙗ҆́ко зла́чна па́жить и҆ли ꙗ҆́ко зла́къ домовы́и.
и҆ попра́нїѧ проти́вꙋ стоꙗ҆́щимъ·

И҆ сѣденїе твоѐ і҆ и҆схо́дъ тво́и, и҆ вход̑ твои разꙋмѣхъ и҆ гнв̑҇ѣ тво́и и҆мже разгнѣ́васѧ на́ мѧ.
и҆ строп꙽ти́вость твоѧ̀ в꙽ни́де во ѹ́ши мои.
и҆ воложꙋ̀ ѹ́дицꙋ мою въ но́здри твоа̀.
и҆ бра́зды въ ѹ҆стна̀ твоѧ.
и҆ возвращꙋ т̂ѧ по пꙋтѝ и҆м꙽же прїидеши им̑·

И҆ се т̂и зна́менїе.
ꙗ҆́жъ сїе лѣто проѕѧба́ющаѧ сама жи́та̑ и҆ въ лѣто второ́е, проѕѧба́ющаѧ са́мо.
и҆ в лѣто тре́тїе, сѣ́ите сѣмена̀ и҆ жнѣте.
садѣте виногра́ды, и҆ да ꙗ҆стѐ плод̑ и҆хъ·

И҆ приложи́тъ сп҃са́емымъ до́мꙋ і҆ѹ́довꙋ, ѻ҆ста́виши и҆ ко́рень до́лѣ, и҆ сътвори плодъ горѣ̀·

Ꙗ҆́ко и҆зъ і҆е҆рс̑҇ли́ма и҆зыиде ѻ҆ста́нокъ и҆ сп҃са́емыи ѿ горы̀ сїѻ́нѧ, ре́вность г҃а си́лъ тво́ритъ с̂е·

Сего рад̑и̑ та́ко гл҃етъ г҃ь сил̑҇ на цр҃ѧ а҆сѷрїиска не и́мать вни́ти въ́ град̑ се́й.
и҆ не и́мать ѹ҆стрелити на нем̑ стрѣлы, ниж̑ и҆мать положити на нем̑ щи́та.
и҆ не и́мать ѻ҆бъѧ́ти е҆го припло́том̑·

Но пꙋтем̑ и҆мже прїиде тм̑ѣже и҆ возвратит̑сѧ и҆ въ́ град̑ не и́мать се́й вни́ти гл҃ет̑ г҃ь·

А҆́зъ б̂о защищꙋ ѻ҆ градѣ сем̑, и҆ сп҃сꙋ е҆го менѐ ради и҆ дв҃да раба̀ мое҆го·

И҆ бысть в нощ̑҇ ѻ҆́нꙋ, и҆ сни́де а҆гг҃лъ гн҃ь и҆ ѹбѝ ѿ пол̑҇ка а҆сѷрїискаго, р҃ п҃, и҆ ҂е.
и҆ въстав̑҇ше ѹ҆́тро и҆ с̂е ѻ҆брѣтоша вс̂ѧ трꙋпїѧ мрътва·

И҆ воста́въ и҆ ѿи́де възвра́щъсѧ, и҆ възврати́сѧ сенахирим̑ цр҃ь а҆сѷрїискїи, и҆ всели́сѧ в꙽ ниневгїю·

И҆ бысть е҆мꙋ кланѧ́ющꙋсѧ, и҆ въ храмѣ месараха бо́га е҆го а҆дремелехъ, и҆ сараса́ръ сн҃ове е҆го ѹ҆би́ста и҆̀ мече́мъ.
са́ми же бѣжа́ста въ а҆рме́нїю.
и҆ въцр҃исѧ а҆сорда́нъ сн҃ъ е҆го в него̀ мѣ́сто·

Глв̑҇а, к҃·

И въ дн҃ехъ ѻ́нѣхъ раз̑болѣ́сѧ и҆е҆зекїѧ цр҃ь до смр҃ти.
и҆ вни́де к немꙋ і҆саїѧ про̑҇ркъ сн҃ъ а҆м꙽мо́совъ.
и҆ реч̑҇ к немꙋ та́ко гл҃етъ г҃ь, заповѣж꙽ до́мꙋ свое҆мꙋ, ѹ҆́мреши б̂о ты̀.
и҆ не бꙋ́деши живъ·

И҆ ѻ҆брати и҆е҆зекїѧ лицѐ свое къ стенѣ̀ и҆ помоли́сѧ къ г҃ꙋ гл҃ѧ·

Помѧни м̂ѧ г҃и, ꙗ҆́ко ѹ҆бо и҆́стин꙽ною ходих̑ пред̑ тобо́ю и҆ срд̑цемъ съвръше́нном꙽, и҆ ѹ҆год̑наѧ пред̑ тобо́ю сътворих̑.
и҆ пла́касѧ и҆е҆зекїѧ пла́чем̑ вели́кимъ·

И҆ бы́сть і҆саїѧ е҆щѐ въ дворѣ вели́цѣ.
и҆ бысть сло́во гн҃е къ немꙋ гл҃ѧ·

Възврати́сѧ и҆ р꙽цы и҆е҆зекїи во́ждꙋ лю́дїи мои҆хъ.
та́ко гл҃етъ г҃ь б҃ъ двд҃въ ѿц҃а твое҆го.
ѹ҆слы́шахъ мл҃твы твоа и҆ ви́дѣхъ сле́зы твоѧ̀.
и҆ с̂е а́зъ ѻ҆ста́влю тебѣ̀.
и҆ въ дн҃ь, г҃, и҆ възы́идеши в дом̑ гн҃ь·

И҆ приложꙋ̀ к лѣтомъ твоим̑.
лт̑ѣ, е҃і·

и҆ ѿ рꙋкѝ цр҃ѧ а҆сѷрїиска и҆зба́влю т̂ѧ и҆ град̑ се́и защищꙋ̀, град̑ се́й мене рад̑и̑ и҆ дв҃да раба̀ мое҆го·

И҆ рече і҆саїѧ да во́змꙋтъ перевѧ́сло смо́квїи, и҆ принесоша смо́кви.
и҆ приложи́ша на вред̑ і҆ и҆сцѣлѣ·

И҆ рече и҆е҆зекїѧ къ і҆саїи чт̂о се зна́менїе, ꙗ҆́ко и҆сцѣлѧ́етъ м̂ѧ г҃ь.
и҆ взы́идꙋ в̂̀ до́мъ гн҃ь въ дн҃ь тре́тїи·

И҆ рече і҆саїѧ с̂е зна́менїе ѿ г҃а ꙗ҆́ко сътворит̑ г҃ь слово е҆́же гла·

хо́щеши л̂и да поидетъ стѣнь, і҃, степе́нїи.
и҆ли возврати́тсѧ, і҃, степе́нїи·

И҆ рече и҆е҆зекїѧ ѹ҆до́бїе стѣ́ни и҆зы́ити, і҃, степе́нїи.
не́же ли возврати́тисѧ, і҃, степе́нїи, воспѧ́тъ·

И҆ възопѝ і҆саїѧ къ г҃ꙋ.
и҆ возврати́сѧ стѣнь по числꙋ̀ назадъ і҃, степе́нїи·

Въ вре́мѧ ѻ҆́но посла̀ маро́дахъвалада́нъ сн҃ъ валада́новъ цр҃ь вавѷлоньскїи, кни́ги и҆ дары къ и҆е҆зекїи.
слы́ша б̂о ꙗ҆́ко разболѣ́сѧ цр҃ь и҆е҆зекїѧ·

И҆ пора́довасѧ цр҃ь и҆е҆зекїѧ ѻ҆ ни́хъ.
и҆ показа и҆мъ весь до́мъ и҆ сокровище своѐ сребра̀ и҆ зла́та̑ и҆ а҆рама́ты, и҆ е҆ле́и бл҃гыи.
и҆ сосꙋ́ды храма, и҆ е҆ли́ко ѻ҆брѣтесѧ въ сокро́вищихъ е҆го.
и҆ не бѣ̀ мѣ́ста е҆гоже не показа и҆мъ и҆е҆зекїѧ в домꙋ̀ своем̑, и҆ въ все́и ѻ҆́бласти свое́и·

И҆ вни́де і҆саїѧ про̑҇ркъ къ и҆е҆зекїю цр҃ю.
и҆ рече к немꙋ, чт̂о гл҃аша мꙋжи сїи и҆ ѿкꙋдꙋ прїидо́ша к тебѣ̀.
и҆ рече и҆е҆зекїѧ ѿ землѧ̀ да́лнѣѧ прїидо́ша къ мнѣ̀ ѿ вавѷлона·

И҆ реч̑҇ чт̂о ви́дѣша въ домꙋ̀ твое҆мъ.
и҆ рече и҆е҆зекїѧ вс̂ѧ е҆ли́ка в домꙋ̀ моем̑ ви́дѣша.
и҆ нѣсть в домꙋ̀ мое҆мъ, е҆гоже и҆мъ не показах̑ н̂о и҆ ꙗ҆́же сꙋть въ сокро́вищихъ моих̑ и҆ т̂а ви́дѣша·

И҆ рече і҆саїѧ къ и҆е҆зекїю, слы́ши сло́во гн҃е.
с̂е дн҃їе грѧдꙋтъ рече г҃ь, взѧ́та бꙋдꙋтъ вс̂ѧ ꙗ҆́же въ домꙋ̀ твое҆мъ, и҆ вс̂ѧ ꙗ҆же събра́ша ѿц҃ы твоѝ до дн҃е сего̀.
вни́дт̑ꙋ въ вавѷлонъ, и҆ не ѻ҆ста́нетъ ничтож̑ рече г҃ь·

И҆ сн҃ы твоѧ̀ ꙗ҆́же ро́дѧтсѧ ѿ тебѐ во́змꙋтсѧ, и҆ бꙋ́дꙋтъ скоп꙽цы в домꙋ̀ цр҃ѧ вавѷлоньскаго·

И҆ реч̑҇ и҆е҆зекїѧ ко і҆саїи.
бл҃го сло́во гн҃е и҆же гл҃а да бꙋ́детъ ми́ръ во́ дн҃и моѧ̀·

И҆ про́чаѧ сло́въ е҆зекїевыхъ, и҆ вс̂ѧ сила е҆го, и҆ е҆лико сътвори.
въдоле́иницꙋ и҆ трꙋ́бы, и҆ воведѐ во́дꙋ во́ град̑.
не с̂е ли сїѧ напи́сана въ кни́ѕѣ гл҃ъ цр҃еи і҆ѹ́диныхъ·

И҆ ѹ́мре и҆е҆зекїѧ и҆ погребенъ бы́сть съ ѿц҃ы свои́ми во́ градѣ двд҃вѣ.
и҆ црс̑҇твова манасїа сн҃ъ е҆го в него̀ мѣ́сто·

Глв̑҇а, к҃а·

Манасїѧ же б̂ѣ, в҃і, лѣтъ, е҆гда нача̀ црс̑҇твовати.
и҆ н҃е, лт̑ѣ црс̑҇твова во і҆ерс̑҇ли́мѣ.
и҆́мѧ мт҃ри е҆го ѻ҆фо́вїѧ·

И҆ сътвори лꙋка́вое пред̑ ѻ҆чи́ма гн҃има.
и хожда́ше въ слд̑ѣ мръз꙽скихъ ꙗ҆зы́ческихъ, и҆́хже и҆скорени г҃ь ѿ сн҃овъ і҆и҆л҃евъ·

И҆ ѻ҆брати́сѧ и созда̀ высо́каѧ ꙗ҆́же б̂ѣ разорил̑҇ ѿц҃ъ е҆го и҆е҆зекїѧ, и҆ въздви́же жрътвеник̑҇ ваа́ловъ.
и҆ сътвори кꙋмиры ꙗ҆коже сътвори а҆ха́въ цр҃ь і҆и҆л҃евъ.
и҆ поклонисѧ все́и тва́ри нбс̑҇нѣи и҆ порабо́та и҆мъ·

И҆ созда ѻ҆лта́рь в домꙋ̀ гн҃и ꙗ҆́коже реч̑҇ г҃ь въ і҆ерс̑҇лимѣ положꙋ̀ и҆́мѧ моѐ·

И҆ сотвори ѻ҆лта́рь все́и тва́ри нбс̑҇нѣи, на́ двꙋ дворах̑ хра́мꙋ гн҃ю·

И҆ ѻ҆свещаше сн҃ы своѧ̀ во ѻ҆гнѝ, и҆ вража́ше и҆ влъшве́нїѧ творѧ́ше, и҆ сътвори во́лнꙋю мр́ъзость.
и҆ ѹ҆мно́жи ꙗ҆вно твори́ти лꙋка́вое пред̑ ѻ҆чима̑ гн҃има и҆ прогнѣ́вати и҆̀·

И҆ положи и҆зваѧ́ныѧ мръз꙽скыѧ бо́гы, въ хра́мѣ ѻ҆ немъ и҆же рече г҃ь къ двд҃ꙋ, и҆ къ соло́монꙋ сн҃ꙋ е҆го, въ хра́мѣ сем̑ въ і҆ерс̑҇ли́мѣ е҆гоже и҆збра́хъ ѿ всѣхъ колѣ́нъ і҆и҆л҃евъ.
положꙋ т̂ꙋ и҆́мѧ моѐ на́ вѣки·

И҆ не приложꙋ подвиѕа́тисѧ но́гы і҆и҆л҃евы ѿ землѧ̀ ю҆́же дах̑ ѿц҃емъ и҆хъ.
а҆́ще тїи съблюдꙋтъ е҆ли́ко заповѣ́дахъ и҆мъ, по все́и за́повѣди и҆же заповѣ́да ра́бъ мо́и моѷсїи·

И҆ не послꙋшаша, и҆ прельсти их̑ манасїѧ.
и҆же сътворѝ лꙋка́вое пред̑ ѻ҆чима гн҃има, паче ꙗ҆зы́къ ꙗ҆́же ѹ҆празд̑ни г҃ь ѿ лица̀ сн҃овъ і҆и҆л҃евъ·

И гл҃а г҃ь рꙋкама ра́бъ свои҆хъ гл҃ѧ·

Поне́же е҆лико сътвори манасїѧ цр҃ь і҆ѹ́динъ мръз꙽скаѧ сїѧ и҆ лꙋка́ваѧ, паче всѣхъ ꙗ҆́же сътвориша а҆м꙽море́и и҆же прежде сего̀ бы́ша прельсти же і҆ѹ́дꙋ въ кꙋмирѣхъ свои҆хъ мр́ъзъскихъ·

Сице гл҃тъ г҃ь б҃ъ і҆ил҃евъ с̂е а҆́зъ наведꙋ̀ ѕла́ѧ на і҆ерс̑҇лимъ и҆ на і҆ѹ́дꙋ, ꙗ҆́ко всѣмъ слы́шащимъ пошꙋми́та ѻ҆́бѣ ѹ҆́ши е҆го·

И҆ воздви́гнꙋ на і҆ерс̑҇ли́мъ мѣ́рꙋ самарїинꙋ и҆ превѣсы до́мꙋ а҆ха́влѧ и҆ ѻ҆треблю̀ і҆ерс̑҇ли́ма ꙗ҆́коже потреблѧ́етсѧ а҆лава́стръ ѿмыва́емыи.
и҆ ѻ҆брати́тсѧ в꙽ лицѐ свое·

І҆ и҆зведꙋ̀
ѻ҆ста́н꙽ки достоа́нїа мое҆го, и҆ преда́мъ и҆хъ в рꙋки вра́гъ и҆хъ.
и҆ бꙋдꙋтъ въ расхищенїе и҆ въ плѣнь всѣмъ врагомъ их̑·

Поне́же сътвори́ша лꙋка́вое пред̑ ѻ҆чима мои҆ма.
и҆ бы́ша прогнѣ́вающи м̂ѧ, ѿ дн҃е во́ньже и҆зведох̑ ѿц҃ы их̑ ѿ зе́млѧ е҆гѷпетъскїѧ и҆ до́ дн҃е сего·

И҆ кро́вь непови́ннꙋ проли манасїа мно́гꙋ ѕѣло до́ндеже наполни́сѧ і҆ерс̑҇лимъ до сы́ти до ѹ҆стъ ра́звѣ грѣха и҆мже съгрѣшити воведѐ і҆ѹ́дꙋ, творѧ́ще лꙋка́вое пред̑ ѻ҆чима гн҃има·

И҆ про́чаѧ словъ манасїин꙽ и҆ вс̂ѧ е҆лика сътворѝ і҆ и҆же съгрѣши.
не с̂е ли сїѧ напи́сана въ книѕѣ гл҃ъ цр҃еи і҆ѹ́диных̑·

И҆ ѹ́мре манасїи, съ ѿц҃ы свои́ми, и погребе́нъ бысть въ вертогра́дѣ до́мꙋ свое҆го въ вертогра́дѣ ѻ҆зїѧ.
и҆ цр҃ьствова а҆м꙽мон̑҇ сн҃ъ е҆го в него̀ мѣсто·

Сы́и, к҃в, лѣтѣ б̂ѣ а҆м꙽мо́нъ, внегда̀ нача̀ црс̑҇твова́ти.
и҆ дв̂ѣ, лѣтѣ црс̑҇твова въ і҆ерс̑҇лимѣ.
и҆́мѧ мт҃ри е҆го месолаа҆мъ дщ̂и а҆рꙋ́сова, ѿ тава́ѧ·

И҆ сътвори лꙋка́вое пред̑ ѻ҆чи́ма гн҃има, ꙗ҆́коже сътворѝ манасїи ѿц҃ъ е҆го·

И҆ ходѝ по всемꙋ̀ пꙋти и҆́мже ходи ѿц҃ъ е҆го.
и҆ порабо́та кꙋми́ромъ и҆́мже порабо́та ѿц҃ъ е҆го, и҆ поклони́сѧ и҆мъ·

И҆ ѻ҆ста́ви г҃а б҃а ѿц҃ъ свои҆хъ, и҆ не ходѝ пꙋтем̑ гн҃имъ·

И҆ въста́ша ѻ҆́троци а҆м꙽мо́нови на́нь, и҆ ѹ҆мрътви́ша цр҃ѧ въ домꙋ̀ е҆го·

Лю́дїе же землѧ̀ тоѧ̀ и҆зби́ша всѣхъ воста́вшихъ на цр҃ѧ а҆м꙽мо́на и҆ въцр҃иша лю́дїе зем̑лѧ̀ тоѧ і҆ѻ҆сїю сн҃а е҆го в него мѣсто·

И҆ про́чаѧ сло́въ а҆м꙽мо́новых̑ и҆же сътвори.
не с̂е л̂и сїѧ напи́сана въ кни́ѕѣ гл҃ъ цр҃еи і҆ѹ҆диных̑·

И҆ погребо́ша и҆̀ въ́ гробѣ е҆го въ вертогра́дѣ ѻ҆зїинѣ.
и҆ црс̑҇твова і҆ѻ҆сїѧ сн҃ъ е҆го в него мѣсто·

Глв̑҇а, к҃в·

Бѣ же, и҃, лѣтъ, і҆ѻ҆сїѧ е҆гда̀ нача̀ црс̑҇твова́ти.
и҆ л҃а, лѣто, црс̑҇твова въ і҆ерс̑҇ли́мѣ.
и҆́мѧ мт҃ри е҆го и҆е҆дїе дщ̂и е҆дѣе́ва ѿ восоро́ѳа·

И҆ сътвори сїи пра́вое пред̑ ѻ҆чи́ма гн҃има.
и҆ ходѝ во всѧ̀ пꙋти двд̑а ѿц҃а свое҆го.
и҆ не ѿврати́сѧ н̂и на де́сно ни на шꙋе́·

И҆ бысть въ и҃і лѣто црс̑҇тва і҆ѻ҆сїина, въ з҃, мс̑҇ць, посла̀ цр҃ь сапфона сн҃а келїи́на сн҃а мосола́млѧ кни́гочїѧ в домꙋ̀ гн҃и гл҃ѧ.
възы́иди къ хелкїи жръцꙋ вели́комꙋ, и҆ запеча́тлѣи сребро̀ внесе́ное в до́мъ гн҃ь.
е҆же собра́ша стрегꙋщїи число̀ ѿ лю́дїи·

И҆ да дадꙋтъ е҆̀ в рꙋ́кы приста́вникомъ и҆же над̑ дѣлесы в꙽ хра́мѣ гн҃и да и҆ тїи дадѧт̑ е҆̀ творѧ́щим̑ дѣла в꙽ домꙋ̀ гн҃и е҆же под̑крѣплѧ́ти прикров̑҇ хра́мꙋ древодѣ́лѧмъ, и҆ ѕи́ждꙋщим̑ ка́менїемъ.
и҆ притѧжа́ющим̑ древо, и҆ ка́менїе те́саное на ѹ҆твръже́нїе покро́вꙋ хра́ма·

Но не прїимахꙋ числа̀ ѿ сребра да́н꙽ного и҆м꙽, ꙗ҆ко вѣ́рно тїи творѧ́хꙋ·

И҆ рече хелкїѧ жрецъ вели́кїи.
ко сапфа́нꙋ кни́гочїи.
кни́гꙋ зако́на бж҃їѧ ѻ҆брѣто́хъ в домꙋ̀ гн҃и.
и҆ да́сть хелъкїѧ сапфа́нꙋ кни́гочїи кни́гꙋ и҆ прочетъ ю҆̀.
и҆ принесѐ къ цр҃ю і҆ѻ҆сїи.
и҆ возвѣсти цр҃еви сло́во и҆ рече.
и҆ сочлѝ сꙋть рабѝ твоѝ сребро̀ ѻ҆брѣтшее҆сѧ в домꙋ̀ гн҃и.
и҆ даша и҆̀ приста́вники в рꙋ́ки творѧ́щим̑ дѣло въ хра́мѣ гн҃и.
и҆ реч̑҇ сапфан̑҇ кни́гочїѧ къ цр҃ю гл҃ѧ.
книгꙋ закона да́сть м̂и хелкїѧ жрецъ.
и҆ прочетъ ю҆̀ сапфан̑҇ пред̑ цр҃емъ·

И҆ бы́сть ꙗ҆́ко ѹ҆слы́ша цр҃ь словеса̀ кни́ги зако́нныѧ.
и҆ раз꙽дра ри́зы своѧ̀ и҆ заповѣ́да цр҃ь хелкїю жръцꙋ, и҆ а҆хика́мꙋ сн҃ꙋ сапфа́ню, и҆ а҆хово́рꙋ сн҃ꙋ михїинꙋ, и҆ сапфа́нꙋ кни́гочїю.
и҆ а҆са́н̂ю рабꙋ̀ цр҃евꙋ гл҃ѧ·

Прїидѣте помолите б҃а ѻ҆ мнѣ̀, и҆ ѻ҆ всѣхъ лю́дехъ.
и҆ ѻ҆ всемъ і҆ѹ́дѣ, ѻ҆ словесѝ кни́жнѣмъ ѻ҆брѣт꙽шимсѧ се́мъ.
ꙗ҆́ко вели́къ гнѣвъ гн҃ь ражде́женыи въ на́съ.
поне́же не слы́шаша ѿц҃ы на́ши словесъ кни́гъ си́хъ творити по всемꙋ̀ писа́нїю ѻ҆ нас̑҇·

І҆ и҆дѐ хелкїѧ жрецъ и҆ а҆хика́мъ, и҆ а҆ховар̑҇, и самъпфа́нъ и҆ а҆саи҆а́съ.
къ е҆ѻ҆да́нѣ про̑҇рчицы женѣ̀ сели́мли, сн҃а ѳекꙋ́ева сн҃а а҆ростꙋе́ва ри́зохрани́телника.
и҆ сїѧ бѧ́ше въ і҆ерс̑҇ли́мѣ чс̑҇тна е҆ді́на.
и҆ гл҃аша к не́и по всемꙋ̀·

И҆ рече и҆мъ си́це гл҃етъ г҃ь б҃ъ і҆и҆л҃евъ.
рцѣте мꙋ́жеви посла́вшемꙋ в̂ы къ мнѣ̀·

Та́ко гл҃етъ г҃ь.
с̂е а҆́зъ наведꙋ̀ ѕла́ѧ на мѣ́сто с̂е, и҆ на живꙋ́щаѧ в не́мъ вс̂ѧ словеса̀ кни́жнаѧ.
ꙗ҆́же прочте цр҃ь і҆ѹ́дин꙽·

Поне́же ѻ҆ста́виша м̂ѧ и҆ жрѧхꙋ бого́мъ дрꙋги́мъ.
ꙗ҆́ко да прогнѣ́ваютъ м̂ѧ дѣлесы̀ рꙋкъ своих̑·

и҆ ражже́сѧ ꙗ҆́рость моѧ̀ на мѣсто с̂е, и҆ не ѹ҆га́снетъ·

И҆дѣте къ цр҃ю і҆ѹ́динꙋ посла́вшемꙋ васъ и҆скати г҃а.
си́це рцѣте е҆мꙋ, та́ко гл҃етъ г҃ь б҃ъ і҆и҆л҃евъ·

Словеса̀ ꙗ҆́же слы́шалъ е҆си.
поне́же ꙗ҆́ко раз̑шири́сѧ срд̑це твоѐ и҆ смири́сѧ пред̑ лицемъ гн҃имъ.
ѹ҆слы́шавше е҆ли́ко гл҃ахъ на мѣсто с̂е и҆ на живꙋщ́аѧ в꙽ немъ бы́ти въ расточе́нїи, и҆ въ проклѧ́тїе.
и҆же раздрал̑҇ е҆си ри́зы своѧ и҆ пла́касѧ предо мно́ю и҆ а́зъ ѹ҆бо ѹ҆слы́шах̑ гл҃ет̑ г҃ь·

Сего ради аз̑ приложꙋ т̂ѧ къ ѿц҃емъ твоим̑ и҆ соберешисѧ въ гро́бъ тво́и в꙽ ми́рѣ.
и҆ не ѹ́зриши ѻ҆чи́ма свои́ма всх̑ѣ ѕлых̑ ꙗ҆́же а҆́зъ и҆́мамъ навестѝ на мѣсто с̂е, и҆ на живꙋщаѧ в не́мъ·

Глв̑҇а, к҃г·

И възвѣсти́ша сїѧ гл҃ы цр҃ви и҆ посла̀ цр҃ь, и҆ собра̀ к себѣ̀ вс̂ѧ ста́рца, і҆ѹ́дины.
і҆ерс̑҇ли́млѧны·

И҆ вни́де цр҃ь въ до́мъ гн҃ь, и҆ всѝ мꙋжи і҆ѹ́дины.
и҆ вс̂и живꙋщїи въ і҆ерс̑҇ли́мѣ с нимъ.
и҆ жръцы̀ и҆ про̑҇рцы.
и҆ вс̂и люд̑е ѿ ма́ла и҆ до велика.
и҆ прочто́ша пред̑ ни́ми словеса̀ кни́жнаѧ завѣта ѻ҆брѣт꙽шагосѧ в домꙋ̀ гн҃и·

И҆ ста̀ цр҃ь ѹ҆ прс̑҇тла свое҆го, и҆ положѝ завт̑ѣ пред̑ гм҃ъ ходи́ти въ слѣдъ г҃а, и҆ храни́ти заповѣди е҆го, и҆ свѣдѣнїѧ е҆го и҆ ѻ҆правда́нїѧ е҆го, по всемꙋ̀ срд̑цꙋ и҆ по все́и дш҃и, въста́вити словеса̀ завѣта сего пи́санаго̀ въ кни́зѣ се́и и҆ ста́ша всѝ лю́дїе въ завѣтѣ гн҃и·

И҆ заповѣда цр҃ь хелкїю жръцꙋ̀ вели́комꙋ, и҆ жръце́мъ вторы́мъ, и҆ хранѧ́щимъ число̀ и҆знестѝ ѿ храма гн҃ѧ всѧ̀ сосꙋды сътворе́ныѧ ваа́лꙋ и҆ все́и тва́ри нбс̑҇неи, и҆ съж꙽жѐ ѧ҆̀ внѣ і҆ерс̑҇ли́ма в садамо́ѳѣ ке́дръстѣ.
и҆ взѧ́тъ пра́хъ и҆хъ въ веѳи́ль·

И҆ съж꙽жѐ хомари́мы ꙗ҆́же созда́ша цр҃и і҆ѹ́дины и҆ кажа́хꙋ въ высо́кихъ и҆ въ́ градѣхъ і҆ѹ́диныхъ и҆ ѻ́крс̑҇тъ і҆ерс̑҇ли́ма.
и҆ кадѧ́щих̑ ваа́лꙋ и҆ слн҃цꙋ и҆ мс̑҇цю.
и҆ мазꙋро́ѳꙋ и҆ все́и тва́ри нбс̑҇нѣи·

І҆ и҆знесѐ кꙋми́ръ и҆с хра́ма гн҃ѧ и҆зъ і҆ерс̑҇ли́ма на поток̑҇ ке́дръскъ и҆ съж꙽жѐ и҆̀ в пото́цѣ ке́дръстѣ и҆ расточѝ въ пра́хъ.
и҆ въвръжѐ пра́хъ и҆хъ въ́ гробы сн҃овъ лю́дъскихъ·

И разъдрꙋшѝ хра́мъ касидимовъ и҆же бѣ̀ въ хра́мѣ гн҃и.
и҆дѣ́же же́ны прѧдѧ́хꙋ ри́зы кꙋми́рꙋ·

И҆ преведѐ вс̂ѧ жръца̀ ѿ гра́дъ і҆ѹ́динъ, и҆ ѻ҆сквернѝ высо́каѧ и҆дѣ́же кадѧ́хꙋ жръцы̀, ѿ да́на до версавїѧ.
и҆ разъдрꙋшѝ хра́мъ вра́тъ и҆же бѣ̀ при две́рехъ вратныхъ и҆ѻ҆сїи кнѧ́ѕѧ град̑наго, и҆же ѻ҆шꙋю́ю в꙽ходѧ́щим̑ двер̑҇ми ѹ҆краше́ными·

Но не вхожда́хꙋ жръцы̀ на высо́кїѧ къ ѻ҆лтарю̀ бж҃їю въ і҆ерс̑҇ли́мъ, н̂о то́кмо ꙗ҆́сти и҆мъ ѻ҆прѣ́сноки по́средѣ бра́тїѧ свое́ѧ·

И҆ ѻ҆сквернѝ тафе́ѳа и҆же въ де́бри сн҃овъ е҆но́млихъ, е҆же не привестѝ мꙋжꙋ сн҃а свое҆го и҆ мꙋжꙋ дще́ри свое́а въ ѻ҆гнѝ сожещѝ моло́хꙋ·

И҆ сож꙽жѐ ко́нѧ ꙗ҆же да́ша цр҃и і҆ѹ́дини слн҃цꙋ въ и҆схо́дѣ хра́мꙋ гн҃ѧ.
на влага́лище наѳа́нꙋ цр҃евꙋ скопцꙋ̀.
въ рафаи́мѣ, и҆ колесни́цꙋ слн҃чнꙋю сож꙽же на ѻ҆гнѝ·

И҆ ѻ҆лтарѧ̀ ꙗ҆́же на пола́тѣ въ го́рницы а҆ха́зовѣ ꙗ҆́же сътвори́ша цр҃и і҆ѹ́дины.
и҆ ѻ҆лтарѧ̀ ꙗ҆́же созда̀ манасїи, въ дво́ю дворꙋ̀ хра́мꙋ гн҃ѧ раскопа̀ ѿтꙋдꙋ цр҃ь и҆ всыпа пра́хъ и҆хъ в꙽ пото́къ ке́дръскъ·

И҆ хра́мъ пред̑ лицемъ і҆ерс̑҇ли́мꙋ ѻ҆деснꙋю горы̀ мосъѳа́ѳовы и҆же созда̀ соло́монъ цр҃ь і҆и҆л҃евъ а҆ста́рѳꙋ и҆́долꙋ ме́рзости сѷдо́ньскїѧ, и҆ хамо́сови и҆́долꙋ сквер̑҇ны моа́вли·

И҆ молхо́лꙋ ме́рзости сн҃овъ а҆м꙽мо́нь, сїе вс̂е ѻ҆сквернѝ цр҃ь·

И҆ съкрꙋшѝ столпы̀.
і҆ и҆скоренѝ га́и.
и҆ наплънѝ мѣ́ста и҆хъ ко́стьми чл҃ческими.
и҆ ѻ҆лта́рь и҆же въ веѳи́лѣ высо́кїи и҆же сътворѝ і҆е҆ровоа́мъ сн҃ъ нава́товъ, и҆же съгрѣши́ти въведѐ і҆и҆л҃ѧ.
и҆ ѻ҆лта́рь то́й вели́кїи раскопа̀ и҆ съкрꙋшѝ ка́менїе е҆го.
и҆ рас꙽сы́па въ пра́хъ, и҆ съж꙽же кꙋми́ры·

И҆ въсклони́сѧ и҆ѻ҆сїѧ и҆ ви́дѣ гро́бы сꙋщаѧ въ́ градѣ т̂ꙋ и҆ посла̀ и҆ взѧ̀ ко́сти ѿ гро́бъ.
и҆ сож꙽жѐ на ѻ҆лтарѝ и҆ ѻ҆сквернѝ и҆̀ по гл҃ꙋ гн҃ю, и҆же гл҃а чл҃къ бж҃їи, е҆гда̀ стоѧ̀ і҆е҆ровоа́мъ въ пра́зникъ пред̑ ѻ҆лтарем̑.

И҆ ѻ҆бра́щсѧ възвед̑ ѻ҆́чи своѝ на гробъ чл҃ка бж҃їѧ гл҃авшаго словеса̀ с̂и.
и҆ рече чт̂о моги́ла ѻ҆на̀ е҆сть ю҆́же аз̑ ви́ждꙋ.
и҆ рѣша е҆мꙋ мꙋжи гра́да, гро́бъ с̂е чл҃ка бж҃їѧ е҆сть и҆же прїиде ѿ і҆ѹ́ды и҆ прогл҃а словеса̀ с̂и ꙗ҆́же сътвори́лъ е҆си ѻ҆лта́рь веѳи́левъ·

И҆ рече небрезете е҆го ничто́же.
да не подви́жетъ ни е҆ді́нъ мꙋжъ ко́сти е҆го.
и҆ ѻ҆ста́виша ко́сти е҆го с костьмѝ про̑҇рческими пришед̑шаго ѿ самарїѧ такоже·

И҆ вс̂ѧ хра́мы высокїа сꙋщаа в꙽ самарїи ꙗ҆́же сътвори́ша цр҃и і҆и҆л҃еви прогнѣваю҆ще г҃а ѿвръже и҆ѻ҆сїѧ и҆ сътворѝ им̑ вс̂ѧ дѣла ꙗ҆́же сотворѝ въ веѳиле·

І҆ и҆скла̀ всѧ жръца̀ въ высо́ких̑.
сꙋщїѧ т̂ꙋ предъ ѻ҆лтармѝ и҆хъ.
и҆ съж꙽жѐ на них̑ ко́сти чл҃ча.
и҆ по семъ възврати́сѧ въ і҆ерс̑҇ли́мъ·

И҆ заповѣда цр҃ь всѣмъ лю́демъ гл҃ѧ.
сътвори́те па́схꙋ гв҃и б҃ꙋ на́шемꙋ.
ꙗ҆́коже пи́шетъ въ кни́гахъ завѣта сего̀·

Ꙗ҆́ко не бы́сть па́сха с̂и ѿ дн҃їи сꙋде́и и҆же сꙋди́ша і҆и҆л҃еви, и҆ въ всх̑ѣ дн҃ехъ цр҃еи і҆и҆л҃евыхъ, и҆ цр҃еи і҆ѹ́диныхъ·

Но то́кмо, въ и҃і лѣто цр҃ѧ иѻ҆сїѧ.
бы́сть па́сха г҃ꙋ въ і҆ерс̑҇лі́мѣ·

И҆б̂о хо́тныѧ и҆ зна́емыа и҆ ѳераѳи́мъ кꙋмиры, и҆ вс̂ѧ дѣла ме́ръзкаѧ бы́вшаѧ въ землѝ і҆ѹ́динѣ.
и҆ въ і҆ерс̑҇ли́мѣ и҆скоренѝ цр҃ь и҆ѻ҆сїѧ.
да ѹ҆твер꙽дѧ́тсѧ словеса̀ зако́н꙽на пи́санна въ кни́зѣ ꙗ҆́же ѻ҆брѣтѐ хел꙽кїѧ жре́цъ въ хра́мѣ гн҃и·

И҆ подо́бенъ е҆мꙋ не бы́сть пред ни́мъ цр҃ь.
и҆же ѻ҆брати́сѧ къ гв҃и всѣмъ срд̑цемъ свои҆мъ и҆ всею̀ дш҃ею свое́ю, и҆ всею̀ си́лою свое́ю по всемꙋ зако́нꙋ моѷсїѻ҆вꙋ.
и҆ по не́мъ не въста̀ подо́бенъ е҆мꙋ никто́же въ цр҃ехъ·

То́кмо не ѻ҆брати́сѧ г҃ь ѿ ꙗ҆́рости гнѣ́ва свое́го вели́каго и҆́мже ѹ҆ꙗ҆ри́сѧ гнѣвомъ на і҆ѹ́дꙋ.
и҆ на прогнѣваю҆щихъ е҆го и҆́мже прогнѣ́ва и҆̀ манасїѧ·

И҆ рече г҃ь с̂е і҆ѹ́дꙋ ѿринꙋ̀ ѿ лица мое҆го ꙗ҆́коже ѿринꙋхъ і҆и҆л҃ѧ и҆ гра́дъ се́и ѿве́ргꙋ е҆гоже и҆збра́хъ і҆ерс̑҇ли́ма.
и҆ хра́мъ ѻ҆ немже рѣхъ.
да бꙋдетъ и҆́мѧ мое т̂ꙋ·

И про́чаа сло́въ і҆ѻ҆сѣ́евыхъ и҆ вс̂е е҆ли́ко сътворѝ не се́ ли сꙋть сїѧ напи́сана въ кни́гах̑ сло́въ цр҃ь і҆ѹ́диныхъ·

Въ дн҃ех же сихъ възы́иде фараѻ́нъ неѻ҆ха́и цр҃ь е҆гѷпет꙽скъ, на цр҃ѧ а҆сѷрїиска на рѣкꙋ̀ е҆в꙽фра́т꙽скꙋ.
і҆ и҆зы́иде цр҃ь и҆ѻ҆сїѧ на срѣте́нїе е҆мꙋ.
и҆ ѹ҆бѝ и҆̀ неѻ҆хаи цр҃ь въ македо́нѣ.
внегда̀ е҆го ѹ҆зрѣ̀·

И възложи́ша и҆̀ на ко́нь ѻ҆́троцы е҆го мертва в макидо́нѣ.
и҆ несо́ша и҆̀ въ і҆е҆рс̑҇лим̑, и҆ погребо́ша и҆̀ въ гро́бѣ въ́ градѣ двд҃вѣ·

И поꙗ҆ша лю́дїе землѧ тоѧ и҆ѻ҆ха́за сн҃а и҆ѻ҆сїина, и҆ пома́заша и҆̀ на црс̑҇тво.
и҆ црс̑҇твова̀ над ни́ми въ ѿц҃а свое҆го мѣсто·

Сы́и, к҃г лѣта б̂ѣ.
и҆а҆ха́зъ внегда̀ нача̀ црс̑҇твова́ти.
и҆ г҃, мс̑҇цы црс̑҇твова̀ въ і҆ерс̑҇ли́мѣ.
и҆́мѧ мт҃ри е҆го а҆мата́на, дщ̂и і҆е҆ремїѧ и҆ѻ҆ли́вна·

И҆ сътворѝ лꙋка́вое пред̑ ѻ҆чи́ма гн҃има.
по всемꙋ̀ е҆ли́коже сътвори́ша ѿц҃ы е҆го и҆ преста́ви и҆̀ фараѻн̑҇ неѻ҆ха́и, и҆ въ рефлаю въ зем̑ли е҆ма́нъскои е҆гда̀ црс̑҇твова̀ въ і҆ерс̑҇ли́мѣ и҆ възложѝ да́нь на́ землю т̂ꙋ.
р҃. тала́н꙽тъ сребра̀.
и҆ р҃, тала́нтъ зла́та.
и҆ поста́ви цр҃емъ фараѻ́н꙽ неѻ҆ха́и над̑ ни́ми.
е҆лїаки́ма сн҃а и҆ѻ҆сїина цр҃ѧ і҆ѹ́дина, въ ѻ҆сїѧ мѣсто ѿц҃а е҆го.
и҆ превратѝ и҆́мѧ е҆мꙋ и҆ѻ҆а҆ки́мъ.
и҆ ѻ҆за́ра.
пое́мъ и҆ въведѐ въ е҆гѷпетъ, и҆ ѹ́мре т̂ꙋ·

И҆ сребро̀ и҆ зла́то да́сть и҆ѻ҆а҆ки́мъ фараѻ́нꙋ и҆ написа̀ е҆щѐ зе́млю даѧ́ти сребро̀ фараѻ́нꙋ, мꙋжемъ.
по ценѣ̀ е҆го да́сть же сребро̀ и҆ зла́то ѿ людїи землѧ̀ тоѧ, фараѻ́нꙋ неѻ҆ха́ю·

Бѣ же.
к҃ и҆ е҃. лѣтъ и҆ѻ҆а҆ки́мꙋ внегда̀ нача̀ црс̑҇твова́ти.
и҆ а҃і лт̑ѣ црс̑҇твова̀ въ і҆ерс̑҇ли́мѣ.
і҆ и́мѧ мт҃ри е҆го и҆е҆лъда́фъ дщ̂и фадѣлѧ ѿ рꙋмы·

И҆ сътворѝ лꙋка́вое пред̑ гм҃ъ по всемꙋ̀ е҆ли́ко же сътвори́ша ѿц҃ы е҆го·

Глв̑҇а, к҃д·

Въ дн҃и же е҆го взы́иде навходоносо́ръ цр҃ь вавило́ньскъ.
и҆ бы́сть е҆мꙋ и҆ѻ҆а҆ки́мъ ра́б꙽ г҃, лѣта.
и҆ ѿврати́сѧ и҆ ѿвръжесѧ е҆го·

И҆ посла̀ г҃ь е҆мꙋ по́ѧсники халде́искїѧ и҆ по́ꙗ҆сники сѷрїискіѧ.
и҆ по́ѧсники моа́влѧ.
и҆ по́ѧсники сн҃овъ а҆м꙽мо́нь.
и҆ посла̀ и҆хъ в зе́млю і҆ѹ́довꙋ на побѣжде́нїе по словесѝ гн҃ю.
и҆же гл҃а ѹ҆сты̀ ра́бъ свои҆хъ про̑҇ркъ·

И҆ по повеле́нїю гн҃ю с̂е прїиде на і҆ѹ́дꙋ и҆же ѿста́вити е҆го ѿ лица̀ свое҆го грѣхъ ради манасїи҆ныхъ, и҆ по всемꙋ е҆лико сътворѝ.
и҆ кро́ви ради непови́нныѧ и҆же пролїѧ̀.
наплъ́ни б̂о і҆ерс̑҇ли́мъ кро́ви непови́нныа.
и҆ сего ради не въсхотѣ̀ г҃ь поми́ловати е҆го·

И҆ прочаѧ сло́въ і҆ѻ҆а҆ки́мовыхъ и҆ вс̂ѧ ꙗ҆́же сътворѝ.
не сѐ л̂и сїѧ напи́сана въ кни́зѣ гл҃ъ цр҃ь і҆ѹ́диныхъ·

И҆ ѹ́мре і҆ѻ҆а҆ки́мъ и҆ погребо́ша и҆̀ съ ѿц҃ы свои́ми·

И҆ црс̑҇твова̀ е҆хонїѧ сн҃ъ е҆го в꙽ него мѣ́сто·

И҆ не приложѝ к꙽ семꙋ̀ цр҃ь е҆гѷпетъскїи и҆зыитѝ и҆зъ землѧ̀ свое́ѧ.
ꙗ҆́ко прїѧ цр҃ь вавѷлоньскъ ѿ пото́ка е҆гѷпет꙽ска, до рѣкѝ е҆фра́тъски.
вс̂ѧ е҆ли́ко бѣша цр҃ѧ е҆гѷпет꙽ска·

И҆ б̂ѣ, и҃і лт̑ѣ і҆е҆хонїи внегда̀ нача̀ црс̑҇твова́ти.
и҆ г҃, мс̑҇цы црс̑҇твова̀ въ і҆ерс̑҇ли́мѣ.
и҆́мѧ мт҃ри е҆го не́с꙽ѳа, дщ̂и е҆ланас꙽ѳа́на ѿ і҆ерс̑҇лима·

И҆ сътворѝ лꙋка́вое пред̑ гм҃ъ, по всемꙋ̀ е҆ли́ко сътворѝ ѿц҃ъ е҆го і҆ѻ҆а҆ки́мъ·

И҆ въ времѧ т̂о взы́иде навходоносо́ръ цр҃ь вавѷлоньскїи на і҆ерс̑҇лимъ.
и҆ бы́сть гра́дъ въ ѻ҆бъдержа́нїи вели́цѣ ѕѣло.
и҆ вни́де навходоносо́ръ цр҃ь вавѷлоньскїи въ і҆ерс̑҇лі́мъ.
и҆ ѻ́троцы е҆го ѻ҆́коло ѻ҆бсѣдѧ́хꙋ гра́дъ·

І҆ и҆зы́иде и҆е҆хонїѧ цр҃ь і҆ѹ́динъ къ цр҃ю вавѷлоньскомꙋ самъ то́и и҆ ѻ́троцы е҆го и҆ мт҃и е҆го.
и҆ кнѧ́ѕи е҆го.
и҆ скопцы̀ е҆го·

И҆ поѧт̑ и҆хъ цр҃ь вавѷло́ньскъ.
въ и҃ е.
лѣто црс̑҇тва е҆го·

І҆ и҆знесе сокро́вища ѿтꙋдꙋ сꙋщаѧ въ хра́мѣ гн҃и, и҆ сокро́вища до́мꙋ цр҃ева.
и҆ взѧ̀ вс̂ѧ сосꙋды зла́тыѧ.
ꙗ҆́же сътворѝ соло́монъ цр҃ь і҆и҆л҃евъ въ хра́мѣ гн҃и по гл҃ꙋ гн҃ю·

И҆ пленѝ і҆ерс̑҇ли́млѧны.
и҆ всѧ̀ кнѧ́ѕѧ, и҆ си́лныѧ крѣпостїю плѣнѝ, ҂і҃.
и҆ всѧ́кого древодѣлѧ и҆ хꙋдо́жники.
и҆ не ѻ҆ста̀ никто́же·

то́кмо маломо́щныѧ землѧ̀ тоѧ̀.

И҆ приведѐ і҆е҆хонїю въ вавѷло́нъ.
и҆ мт҃ръ цр҃евꙋ и҆ же́ны цр҃евы и҆ скопца̀ ег̑҇ и҆ крѣпкїѧ землѧ̀ тоѧ̀ въведѐ ѧ҆̀ на преселе́нїе ѿ і҆ерс̑҇ли́ма въ вавѷло́нъ.
и҆ всѧ̀ мꙋжа си́лныѧ, ҂з҃, и҆ древодѣл꙽ и҆ хꙋдо́жниковъ, ҂а҃, всѝ си́лныи творѧ́щїи бра́нь, и҆ въведѐ и҆хъ цр҃ь вавѷло́ньскъ въ преселе́нїе въ вавѷло́н.
и҆ поста́ви цр҃ь вавѷло́ньскїи цр҃ѧ ваѳ̑҇ѳа́нїю сн҃а е҆го в него̀ мѣсто и҆ преложѝ и҆́мѧ е҆мꙋ седекїа́.
сы́и к҃ и҆ е҆ді́нем̑ лѣтомъ седекїѧ́ внегда нача̀ црс̑҇твова́ти, и҆ а҃і, лѣтъ црс̑҇твова̀ въ і҆е҆рлс̑҇и́мѣ.
і҆ и҆мѧ мт҃ри е҆го а҆мита́ѧ дщ̂и і҆е҆ремі́ина ѿ ло́вны·

И҆ сотворѝ лꙋка́вое пред̑ ѻ҆чи́ма гн҃има по всемꙋ̀ е҆ли́ко сътворѝ і҆ѻ҆а҆ки́мъ.
ꙗ҆́ко ꙗ҆́рос̑҇ б̂ѣ гн҃ѧ на і҆ерс̑҇ли́мѣ и҆ на і҆ѹ́дѣ.
дон̑҇деж̑ ѿвръже ѧ҆̀ ѿ лица̀ свое҆го.
и҆ ѿвръжесѧ седекїѧ цр҃ѧ вавѷло́ньска·

Глв̑҇а, к҃е·

И бы́сть, в лѣто ѳ҃ е црс̑҇тва е҆го въ мс̑҇ць в҃і, въ і҃ дн҃ь мс̑҇ца, прїиде навходоносо́ръ цр҃ь вавѷло́ньскїи, сам̑ и҆ вс̂ѧ си́ла е҆го на і҆ерс̑҇ли́мъ и҆ ѻ҆бъстꙋпѝ и҆̀ ѿвсю́дꙋ.
и҆ созда́ша ѻ҆́крс̑҇т꙽ гра́да бо́иницы.
и҆ бы́сть гра́дъ въ ѻ҆б꙽держа́нїи до а҃і, лѣта црс̑҇тва седекїи́на, ѳ҃ дн҃ѧ мс̑҇ца·

И҆ бы́сть въ́ градѣ гладъ.
и҆ не бы́сть хлѣба лю́демъ землѧ̀ тоѧ̀·

И҆ ѿвръзесѧ гра́дъ.
и҆ вси мꙋжи во́и҆н꙽стїи и҆зыидо́ша но́щїю пꙋтемъ вра́тнимъ.
и҆же посредѣ стѣны̀ ꙗ҆же е҆сть ѹ҆ верътограда цр҃ева, и҆ халъдеи҆ же ѻ҆́крс̑҇тъ града бѣша.
и҆ побѣжа̀ цр҃ь седекїѧ пꙋтемъ а҆ра́вским̑·

И҆ погна̀ си́ла хал꙽де́искаѧ въ слѣ́дъ цр҃ѧ.
и҆ пои҆маша и҆̀ въ а҆раво́ѳѣ е҆рихо́ньстем̑.
и҆ вс̂ѧ си́ла е҆го раз꙽сы́пасѧ ѿ него.
и҆ поѧ́ша цр҃ѧ и҆ приведо́ша и҆̀ къ цр҃ю вавѷло́ньскꙋ въ девла́ѳꙋ.
и҆ гл҃а с ни́мъ сꙋд꙽·

И҆ сн҃ы седекїи́ны и҆скла́ша пред̑ ѻ҆чи́ма е҆го и҆ ѻ́чи седекїи́нѣ и҆зѧт̑.
и҆ ѻ҆слѣпѝ и҆̀ и҆ свѧза̀ и҆̀ ѹ҆́зами, и҆ въведѐ и въ вавѷло́нъ·

Въ мс̑҇ць же е҃, и҆ въ и҃ дн҃ь мс̑҇ца, с̂е е҆сть в лѣто ѳ҃і, навходоносо́ра цр҃ѧ вавѷло́ньска прїиде наѹ҆зарданъ.
а҆рхимахи́ръ рабъ цр҃ѧ вавѵло́ньскаго въ і҆ерс̑҇лимъ·

И҆ заж꙽жѐ хра́мъ гн҃ь и҆ до́мъ цр҃евъ и҆ вс̂ѧ домы і҆ерс̑҇ли́млѧ и҆ всѧ̀ храмы вели́кїѧ съж꙽жѐ а҆рхимахи́ръ·

И҆ стѣ́ны і҆ерс̑҇ли́млѧ ѻ҆́крс̑҇тъ раскопа̀ си́ла халде́искаа·

И҆ ѻ҆ста́токъ людїи и҆збы́вшихъ въ́ градѣ ѻ҆ста́виша, і и҆збѣжавшихъ и҆же и҆збѣжа́ша къ цр҃ю вавѷло́ньскꙋ.
и҆ про́чее ѹ҆тверженїе пренесѐ наѹ҆зар̑҇да́нъ вое҆во́да·

И҆ ѿ ни́щих꙽ землѧ̀ тоѧ̀, ѻ҆ста́ви а҆рхимахи виногра́ды блюстѝ, и҆ врътограды·

И҆ стол̑҇пы̀ и҆же бѣша мѣдѧны въ храмѣ гн҃и и҆ под̑став꙽ки, и҆ мо́ре мѣдѧное сꙋщее в꙽ хра́мѣ гн҃и, и҆ съкрꙋши́ша халде́и и҆ взѧ́ша мѣдь и҆хъ въ вавѷлонъ·

И҆ коно́бы и҆ котлы̀·

и҆ ѹ҆кро́пница и҆ кади́лницы и вс̂ѧ сосꙋды мѣдѧныѧ в ни́х же слꙋжа́хꙋ.
взѧ́ша и҆ свѣща и҆ фїа́лы зла́тыѧ и҆ сре́бреныѧ взѧ а҆рхимахи́ръ столпа дв̂а.
и҆ мо́ре е҆ді́но и҆ под̑ставки ꙗ҆́же сътворѝ соло́монъ храмꙋ гн҃ю, и҆ не бѣ числа̀ мѣди, всѣхъ сосꙋдъ.
и҆ и҃і лакот̑ бы́сть въ высотꙋ столпа̀ е҆ді́ного.
и҆ глава̀ мѣдѧна на стол꙽пꙋ̀.
и҆ высота̀ главѣ̀, г҃, ла́ктѣ.
и҆ на главѣ̀ мре́жа и҆ ши́пки ѻ́крс̑҇тъ вс̂ѧ мѣдѧны по семꙋж̑ и҆ сто́лпъ вторы́и и҆ ши́пки ѻ҆крс̑҇тъ·

И҆ поѧт̑ а҆рхимахиръ сарїи́на жръца̀ старѣ́ишаго, и҆ ѻ҆ѳїні́ю сн҃а втораго и҆ е҃, приста́вникъ стрегꙋщих̑ число̀ мѣди·

И҆ ѿ гра́да взѧ̀ скопца̀ е҆ді́ного.
и҆же б̂ѣ приста́вникъ над̑ мꙋжи борющимисѧ, и҆ е҃, мꙋжъ пред̑стоѧ́щих̑ пред̑ лицемъ цр҃евым̑.
ѻ҆брѣтшихсѧ т̂ꙋ въ́ градѣ, и҆ кни́гочїю кнѧѕе́и си́лныхъ и҆же строѧ́ше лю́ди землѧ̀ то́ѧ.
и҆ ѯ҃, мꙋжъ людїи землѧ̀ то́ѧ.
ѻ҆брѣт꙽ших̑сѧ въ́ градѣ·

И҆ поѧ́тъ ѧ҆̀ наѹ҆зарда́нъ и҆ а҆рхимахиръ и҆ приведе ѧ҆ къ цр҃ю вавѷлоньскомꙋ, въ девлаѳꙋ·

И҆ порази и҆̀ цр҃ь вавѷлоньскїи и҆ ѹ҆мори ѧ҆̀ въ девла́ѳѣ въ землѝ и҆е҆мъма́ѳовѣ.
и҆ пресели́сѧ і҆ѹ́да свы́ше землѧ̀ свое́ѧ·

И҆ лю́дїе ѻ҆ста́вшїи ѿ землѧ і҆ѹ́довы ꙗ҆́же ѻ҆ста́ви нав꙽ходоносо́ръ цр҃ь вавѷлоньскъ, и҆ поста́ви над̑ ними годолїю сн҃а а҆хика́млѧ сн҃а сафа́нѧ·

И҆ слы́шаша вс̂и кнѧ́ѕи, си́лнїи е҆го и҆ мꙋжи е҆го.
ꙗ҆ко ѻ҆ста́ви цр҃ь вавѷлоньскїи годолїю, и҆ прїидо́ша къ годолїи въ ма́сифѳꙋ и҆змаи́лъ сн҃ъ наѳа́нинъ.
и҆ѻ҆нанъ сн҃ъ кари́новъ.
и҆ саре́и сн҃ъ ѳанама́ѳовъ нетофафитъскїи·

и҆ е҆зо́нїѧ сн҃ъ лахаѳа́н꙽ѳовъ сами тїи и҆ мꙋ́жи и҆хъ прїидо́ша·

И҆ клѧ́тсѧ и҆мъ годолїѧ и҆ мꙋж́емъ и҆хъ.
и҆ рече и҆мъ не бо́итесѧ прише́ствїѧ халъдѣѧ.
сѣди́те на земли и҆ рабо́таите цр҃ю вавѷло́ньскомꙋ, и҆ добро̀ бꙋдетъ ва́мъ·

И҆ бы́сть въ мс̑҇ць, и҃, прїиде и҆змаи́лъ сн҃ъ наѳа́нинъ, сн҃а е҆лиса́млѧ ѿ сѣмени цр҃ьска.
и҆ і҃ мꙋжъ с ни́мъ, и҆ побѝ годо́лїю и҆ ѹ́мре.
і҆ѹ҆де́и же и҆ хал̑҇дѣи и҆же с ним̑ бѧ́хꙋ въ масиѳа́ѳѣ·

И҆ воста́ша вс̂и лю́дїе, ѿ ма́ла и҆ до вели́ка.
и҆ кнѧѕѧ си́лныѧ, и҆ внидо́ша въ е҆гѷпетъ·

ꙗ҆́ко ѹ҆боа́шасѧ ѿ лица̀ халде́иска·

И҆ бысть въ лѣто, л҃з е, преселе́нїѧ и҆а́кима цр҃ѧ і҆ѹ́дина, въ і҃ мс̑҇ць.
въ к҃з, дн҃ь мс̑҇ца, възнесе е҆вїалъ марода́хъ, цр҃ь вавѷлоньскъ, въ лѣто црс̑҇тва свое҆го.
главꙋ̀ и҆а́кимовꙋ цр҃ѧ і҆ѹ́дина і҆ и҆зведе е҆го и҆з до́мꙋ темни́ца·

И҆ гл҃а с ни́мъ бл҃го, и҆ да́сть прс̑҇тлъ е҆мꙋ.
съвы́ше прс̑҇тлъ цр҃ь и҆же бѧ́ше с ни́мъ въ вавѷлонѣ·

І҆ и҆змѣни ри́зы е҆го темни́чныѧ.
и҆ ꙗ҆дѧ́ше хлѣбъ с ни́мъ вы́нꙋ, въ всѧ дн҃и живота̀ свое҆го·

И҆ пища е҆го ѿ до́мꙋ цр҃ьска, да́вана вы́нꙋ, и҆ вс̂е и҆зобилїе въ́ дн҃и е҆го.
въ всѧ̀ дн҃и живота е҆го·

Конецъ, д҃, кни́гъ, црс̑҇твъ·

и́мать в себѣ̀ гла́въ, к҃е·