Библия (1581). [14] 2 Паралипоменон

ВТОРЫ́И КНИ́ГИ ПАРАЛИПОМЄ́НОн̑

ГЛАв̑҇· А҃

И ѹ҆крѣпи́сѧ соло́монъ сн҃ъ двд҃въ въ црс̑҇тво своѐ.
и҆ г҃ь е҆го б̂ѣ с ни́мъ.
и҆ възвели́чи е҆го въ вы́шиню.
повелж̑ѣ соло́монъ всемꙋ і҆и҆л҃ю, ты́сꙋщникомъ и҆ сот̑никомъ, и҆ во́жемъ и҆ сꙋдїѧмъ.
и҆ всѣмъ нача́лником̑ пред̑ і҆и҆л҃емъ, и҆ нача́лникомъ ѿч҃ествъ.
і҆ и́де соло́монъ съ всм̑ѣ мно́жеством̑.
въ вы́шнїи гаваѻ́нъ, и҆дѣже б̂ѣ скѷнїѧ, свѣдѣ́нїѧ гн҃ѧ.
и҆же сътворѝ моѷсїи рабъ бж҃їи въ пꙋсты́ни.
кїѻт̑ же гн҃ь принеслъ дв҃дъ.
ѿ гра́да карїаѳїа҆ри́ма въ мѣсто и҆же ѹ҆гото́ва е҆мꙋ.
гд̂ѣ пот꙽кнꙋлъ жили́ще.
т̂о е҆сть въ і҆ерс̑҇ли́мѣ.
ѻ҆лта́рь же мѣдѧн̑҇ и҆же съдѣла́лъ б̂ѣ веселее҆ль сн҃ъ ѹ́рїе҆въ сн҃а ѹ҆́рова.
т̂ꙋ бы́сть пред̑ жили́щемъ гн҃имъ·

И҆ възыска̀ е҆го соло́монъ, и҆ вс̂ѧ цр҃ковъ·

Възнесѐ же т̂ꙋ соло́монъ на ѻ҆лтари мѣ́дѧномъ пред̑ гм҃ъ въ хра́мѣ свѣдѣ́нїѧ.
и҆ принесе е҆мꙋ ты́сѧщꙋ приноше́нїи·

И҆ в тꙋ же но́щъ, ꙗ҆́ви́сѧ г҃ь соло́монꙋ и҆ рече е҆мꙋ.
просѝ чт̂о хо́щеши да дам̑ тебѣ̀.
рече же соло́монъ къ б҃ꙋ.
т̂ы сътворил̑҇ е҆си съ дв҃домъ ѿц҃емъ моим̑ млс̑҇рдїе вели́ко.
и҆ поста́вилъ м̂ѧ е҆си цр҃ѧ в него̀ мѣсто.
и҆ нн҃ѣ ѹ҆бо г҃и б҃е да и҆спо́лнит̑сѧ сло́во твое е҆же ѻ҆бѣщал̑҇ е҆си дв҃дꙋ ѿц҃ꙋ мое҆мꙋ.
т̂ы бо менѐ сътвори́лъ цр҃ѧ над̑ люд̑ми твои́ми мно́гими, ꙗ҆́коже пра́хъ земныи.
нн҃ѣ же да́и мн̂ѣ прем̀ꙋдрость и҆ ра́зм̑ꙋ да внїидꙋ і҆ и҆зы́дꙋ пред̑ люд̑ми твои́ми симѝ.

Кт̂о бо мо́жетъ сїѝ лю́ди твоѧ достои́но сꙋди́ти·

Рече же б҃ъ къ соло́монꙋ.
и҆же т̂о на́ипаче ѹ҆годи́ло срд̑цꙋ твое҆мꙋ.
и҆ не проси́лъ е҆си богат̑ства, ниже потребныхъ, и҆ сла́вы.
н̂иже дш҃ъ, и҆же т̂ѧ ѻ҆би́диша.
н̂о ни дн҃и възыска̀ живота̀ мно́га.
н̂о проси́лъ е҆си́ премꙋдрости.
и҆ ра́зꙋма да сꙋди́ти мо́жеши лю́ди моѧ̀.
над̑ которыми поста́вихъ т̂ѧ цр҃ѧ.
премꙋдрость и҆ ра́зꙋмъ да́на сꙋть тебѣ̀.
бога́т꙽ство же и҆ потребнаѧ.
и҆ сла́вꙋ дамъ тебѣ̀.
та́ко да ни е҆ді́нъ въ цр҃ехъ.
ни пре́же тебѐ ни по тебѣ̀.
бꙋдет̑ подобенъ тебѣ̀·

Прїиде же соло́монъ ѿ вы́шнѧго гаваѻ́на въ і҆ерс̑҇ли́мъ.
пред̑ жили́щемъ свѣдѣ́нїѧ.
и҆ црс̑҇твова над̑ і҆и҆л҃емъ·

И҆ собра̀ себѣ̀ соло́мон̑҇ колесни́цы и҆ конники.
и҆ бы́ша е҆мꙋ, ҂а҃, и҆ у҃, колесниц̑҇, и҆ ҂в҃і, ко́нникъ·

И҆ сотвори их̑ бы́ти на поса́дехъ колесни́чныхъ.
и҆ лю́дїе съ цр҃емъ въ і҆ерс̑҇лимѣ.
възда́сть же цр҃ь сребро̀, и҆ зла́то і҆ерс̑҇лимꙋ.
ꙗ҆ко ка́менїе, и҆ ке́дри, въ і҆ѹ҆де́и, ꙗ҆́ко черни́чїе.
и҆же растꙋтъ въ по́лехъ мно́жество вели́ко·

И҆схоженїе же ко́неи соло́моновыхъ и҆зъ е҆гѷпта, цѣною кꙋпцов̑҇ црс̑҇кихъ.
и҆схожда́хꙋ бо и҆ кꙋпова́хꙋ, и҆ възношахꙋ ѿ е҆гѷпъта.
ѻ҆рꙋжїе за ҂а҃, сре́бръникъ.
и҆ ко́нь за р҃, и҆ н҃, сре́бреникъ.
та́коже и҆ ѿ всѣхъ црс̑҇твъ хетѳе́искихъ.
и҆ ѿ цр҃еи сѷрїискихъ рꙋка́ма и҆хъ приношена быва́хꙋ·

Глв̑҇а, в҃·

Повелѣ же соло́монъ соѕида́ти до́мъ и҆́мени гн҃ю.
и҆ полатꙋ себѣ̀.
и҆ собра̀ цр҃ь соло́монъ.
҂о҃, мꙋже́и носѧ́щих̑ бремена.
и҆ ҂п҃, и҆же сѣкт̑ꙋ камень въ горах̑.
предъставле́ных̑ же до и҆хъ, ҂г҃, и҆ х҃·

Посла же соло́мон̑҇ къ хира́мꙋ цр҃ю тѷрьскꙋ гл҃ѧ·

Ꙗ҆́ко сътвори́лъ е҆си съ дв҃домъ, ѿц҃емъ мои҆мъ, и҆ посла́лъ е҆си е҆мꙋ дре́ва ке́дрова да соѕи́ждетъ себѣ̀ до́мъ.
в не́мже б̂ы е҆мꙋ ѻ҆бита́ти.
и҆ с̂е а́зъ сн҃ъ е҆го.
соѕида́ю до́мъ и́мени г҃а б҃а мое҆го, да ѻ҆сщ҃аю е҆го е҆мꙋ, къ покаже́нїю ѳемїама пред̑ нимъ, и҆ кади́ти и҆ а҆рома́ты.
и҆ къ предъложе́нїю хлѣ́ба вѣчномꙋ.
и҆ къ всѐсож꙽же́нїю ѹ҆́тро и҆ къ ве́черꙋ, и҆ въ сꙋбо́ты и҆ но́выхъ лꙋнъ.
и҆ пра́зниковъ г҃а б҃а на́шего въ вѣ́ки и҆же повелѣна сꙋть і҆и҆л҃еви.
и҆ до́мъ и҆же соѕида́ю вели́къ е҆сть.
вели́къ б̂о е҆сть б҃ъ нашъ над̑ въсѣми бо́ги·

И҆ кт̂о возмо́жетъ да соѕи́ждетъ е҆мꙋ досто́инъ домъ.
а́ще б̂о нб҃о и҆ нб҃о нб҃си прїѧ́ти не мо́гꙋтъ сла́вы е҆го.
кт̂о ли а́зъ е҆смъ да могꙋ̀ созъда́ти е҆мꙋ домъ.
н̂о то́лко да сож꙽жетсѧ ѳимїамъ предъ ни́мъ.
нн҃ѣ ѹ҆бо пошлѝ мн̂ѣ мꙋ́жа ѹ҆чена, и҆же вѣсть дѣ́ла твори́ти, въ зла́тѣ, и҆ сребрѣ̀, и҆ мѣ́ди, и҆ желѣзѣ, и҆ порфи́ре и҆ въ чръвле́нїи, и҆ си́нетою.
і҆ и҆же зна́етъ рѣ́зати рѣзь.
съ тѣми ѹ́модѣ́лники коих̑ со мно́ю имѣю, и҆ въ і҆ѹ҆де́и, и҆ въ і҆ерс̑҇ли́мѣ.
и҆хъже ѹ҆гото́ва дв҃дъ ѿц҃ъ мой·

Но и҆ дре́ва ке́дрова пошлѝ м̂и, и҆ пе́вгова, и҆ смере́кова, ѿ лива́на.
вѣмъ б̂о и҆же рабѝ твоѝ, ѹ҆мѣ́ютъ сѣщ́и дре́ва ѿ лива́на·

И҆ бꙋдꙋтъ рабѝ моѝ со рабы̀ твои́ми да ѹ҆гото́ваютъ мн̂ѣ дре́ва мно́га·

домъ б̂о е҆гоже жела́ю съѕидати вели́къ е҆сть ѕѣ́ло, и пресла́вленъ.
и҆ с̂е дѣ́лателемъ и҆же сѣкꙋтъ дре́ва дам̑ в пи́щꙋ, п꙽шени́цы коры мѣ́ры.
҂к҃. і е҆ле́ѧ са́ты мѣ́ры, ҂к҃·

Рече же хира́мъ цр҃ь тѷрьскїи, по гра́мотам̑ и҆́хже посла соло́монꙋ, гл҃ѧ.
ꙗ҆́ко възлюбѝ б҃ъ лю́ди своѧ̀.
того ради тебѣ црс̑҇твова̀ти сътворѝ над̑ ни́ми и҆ придалъ гл҃ющи.
блс̑҇венъ г҃ь б҃ъ і҆и҆л҃евъ.
и҆же сътворѝ нб҃о и҆ землю и҆же дасть дв҃дꙋ цр҃ю сн҃а премꙋдра.
и ѹ҆че́на, и҆ ѹ́мна, и҆ разꙋмна.
да соѕи́ждетъ домъ г҃ꙋ и҆ пола́тꙋ себѣ̀·

И҆ нн҃ѣ послах̑ ѹ҆бо тебѣ̀ мꙋжа мꙋдра и҆ свѣ́дꙋща ра́зꙋмъ хира́ма раба̀ мое҆го.
сн҃а жены̀ ѿ дще́рїи да́новыхъ, е҆мꙋже ѿц҃ъ бы́сть тѷръ, и҆же вѣсть дѣ́лати въ зла́тѣ, и҆ сребрѣ̀, мѣ́ди и҆ желѣзѣ.
и҆ мрамо́рѣ, и҆ дре́вѣ, и҆ вытыка́ти въ порфи́рѣ, и҆ вис꙽со́нѣ, и҆ въ чръвлени́ци.
рѣ́зати всѧкꙋю рѣ́зь.
и҆ вы́разꙋмѣти всѧ́ко разꙋмѣнїе.
е҆ли́коже въдаси е҆мꙋ, съ рꙋкодѣ́лники твои́ми, и҆ съ ѹ́модѣ́лники господи́на мое҆го, дв҃да ѿц҃а твое҆го·

И нн҃ѣ ѹ҆бо п꙽шеницꙋ и҆ ꙗ҆чме́нь, і҆ е҆леи, и҆ вино̀.
ꙗ҆́же ѻ҆беща́лъ е҆сѝ господи́не мой, пошлѝ рабо́мъ твои҆мъ.
мы́ же сѣчем̑ древа ѿ лива́на на всѧ́кꙋ потребꙋ твою.
и҆ по́слем̑ тїи плоты по мо́рю въ ѻ҆пїю, твое же бꙋдетъ приводи та въ і҆ерс̑҇ли́мъ·

И҆ собра̀ соло́монъ всѣхъ мꙋже́и прише́льцовъ, и҆же бѣхꙋ въ землѝ і҆и҆л҃евѣ.
по сочте́нїю ꙗ҆́же почита́лъ дв҃дъ ѿц҃ъ е҆го и҆ ѻ҆брѣте́ни сꙋть, рн҃г, ты́сѧщи, и҆ х҃. сътвори́ же ѿ и҆хъ, ҂о҃. и҆же рамены бре́мѧ но́сѧтъ.
и҆ ҂п҃, и҆же ка́менїе ѿ го́ръ сѣкꙋща.
҂г҃, и҆ х҃, пред̑ста́тели дѣ́ломъ люд꙽скимъ·

Глв̑҇а, г҃·

Нача̀ соло́монъ соѕида́ти домъ гн҃ь въ і҆ерс̑҇ли́мѣ, на горѣ̀ морїѧ.
и҆дѣже ꙗ҆́ви́сѧ г҃ь дв҃дꙋ ѿц҃ꙋ е҆го, въ мѣстѣ.
и҆же ѹ҆гото́ва дв҃дъ на̀ гꙋмнѣ ѻ҆рна́на е҆ѹ҆се́ѧ.
нача́ же соѕида́ти мс̑҇ца в꙽тора́го, лѣта четверта́го црс̑҇тва свое҆го.
и҆ сїѧ сꙋть ѻ҆снова́нїѧ и҆же поста́ви соло́монъ, да ѕи́ждетъ домъ бж҃їи·

дол꙽готꙋ̀ лако́тъ въ мѣрꙋ прьвꙋю, ѯ҃. въ широтꙋ̀ лако́тъ, к҃. и҆ притво́ръ пред̑ челомъ, и҆же дръжа́шесѧ в꙽ должинꙋ по мѣ́ри ширины̀ домꙋ лакотъ, к҃. па́ки высота̀, р҃к, лакотъ б̂ѣ.
и҆ позлати е҆ѧ̀ внꙋтръ зла́томъ чистѣ́ишимъ до́мъ же бо́лшїи сплотѝ дска́ми ке́дровыми, и҆ позлатѝ зла́томъ чи́стымъ.
и҆зваѧ же на нем꙽ подо́бїѧ фи́ников̑҇.
и҆ ꙗ҆ко мрежицы промежъ себѐ сплета́ющисѧ·

И҆ ѹ҆красѝ хра́мъ ка́менїемъ драгим̑ сла́вно.
и҆ позлатѝ зла́том̑ и҆же ѿ фарони́ма.
и҆ стѣ́ны е҆го, и҆ вра́та, и҆ ѻ́кна, и҆ две́ри, и҆ вы́рѣза херꙋви́мы на стѣнах̑.
сътвори́ же и҆ домъ ст҃ыхъ ст҃аѧ.
дол꙽жинꙋ е҆го по ширинѣ до́мꙋ лакот̑, к҃. ширынꙋ̀ та́коже, к҃, лако́тъ.
и҆ дъскъ зла́тыхъ сплелъ е́й ꙗ҆́ко тала́нтъ, х҃, и҆ гво́зди сътвори зла́ты, ра́вно ва́гою.
та́ко да е҆динъ гво́здь си́кль пѧтидесѧ́ти вѣ́сѧт̑сѧ.
го́рницы же сплелъ зла́томъ, и҆ сътвори па́ки в до́мꙋ ст҃ых̑ ст҃аѧ.
херꙋви́ма дв̂а дѣ́ло дре́ва негнїюща.
и сплете и҆хъ зла́томъ, и҆ кри́лѣ херꙋви́момъ, и҆ долгота̀, к҃ лакотъ.
и҆ е҆ді́но крило̀ и́мать, лакотъ, е҃. приты́чꙋщисѧ стѣна́мъ до́мꙋ·

И҆ дрꙋго́е крыло̀ и҆мѣю́щи, е҃, лакот̑, прикаса́ющисѧ дрꙋго́мꙋ херꙋви́мꙋ кры́ла.
кры́лѣ же ѻ́бѣю херꙋви́мꙋ сею̀ просте́рти бѧхꙋ, по локотъ к҃, тїи же стоѧ́хꙋ воздвиже́нѣ на но́ѕѣ и҆хъ, и҆ лица и҆хъ бѧхꙋ ѻ҆браще́ни къ да́лнемꙋ до́мꙋ·

сътвори́ же запо́нꙋ ѿ синетъ и҆ багрѧницы, чръвленицы, и҆ вис꙽со́на.
и҆ сотка̀ на не́и подо́бїѧ херꙋви́момъ.
пред̑ две́рми па́ки цр҃кви дв̂а столпа̀ сътворѝ, и҆же л҃е, лако́тъ и҆мѣа́хꙋ высотꙋ̀.
па́ки главы̀ и҆хъ, е҃, лако́тъ·

И҆ е́ще ꙗ҆́ко мре́жи въ ст҃аѧ ст҃ыхъ, и҆ нало́жи и҆хъ главы̀ стол꙽по́мъ.
и҆ ши́покъ сътворѝ, р҃, и́хже на мре́жи наложи́лъ.
тїи же столпы̀ поста́ви пред̑ лицемъ цр҃кви.
е҆ді́наго ѻ҆деснꙋ́ю а҆ дрꙋгаго ѻ҆шꙋ́юю.
то́йже ѻ҆деснꙋ́ю б̂ѣ.
прозва̀ и́мѧ е҆го и҆справле́нїе.
і҆ и́же ѻ҆ лѣвꙋ́ю прозва̀ и҆мѧ е҆го крѣ́пость·

Глв̑҇а, д҃·

Сътвори́ же и҆ ѻ́лтарь мѣдѧн̑҇ к҃, лако́тъ въ долготꙋ̀, и҆ к҃, лако́тъ въ широтꙋ̀.
и҆ і҃, лако́тъ въ высотꙋ̀, мо́ре паки мѣ́дѧно сълїѧ́но сътвори, і҃, лакотъ.
ѿ гꙋ́бы до гꙋ́бы.
крꙋ́гло по ѻ́крс̑҇тъ.
и҆ е҃, лакот̑ и҆мѣю́ще въ высотꙋ̀, и҆ ве́рвица и҆же е҆сть и҆зъвнѣ̀, л҃, ла́ктеи, и҆же ѻ҆бъѧ́ше ѻ́крс̑҇тъ е҆го подо́бїе же воло́во бысть под̑ нимъ.
и҆ і҃, лакотъ нѣ́котораго, и҆знꙋтръ рѣ́занїѧ.
ѻ҆бъдръжа́щи ѹ҆мыва́лницꙋ.
ꙗ҆ко ѻ҆ двх̑ѣ стра́нъ гꙋ́бы мо́рскїѧ ѻ҆бхожа́хꙋ.
воло́ве же бѧ́хꙋ лїѧны.
и҆ т̂о мо́ре, на в҃і хъ во́лѣхъ наставле́но б̂ѣ.
и҆́хже тр̂и смотрѧ́хꙋ къ сѣ́верꙋ, і҆ и́нїи тр̂и къ за́падꙋ·

Паки трїе къ полꙋ́дню, и҆ тр̂и къ восто́кꙋ·

И҆мѣю҆ще мо́ре наставле́но.
зад̑нѧѧ волом̑ бѧ́хꙋ внꙋтри под̑ мо́ремъ, и҆ толъстота̀ е҆го, и҆мѧше мѣ́рꙋ дла́нꙋю, и҆ гꙋ́ба е҆го б̂ѣ, ꙗ҆́ко гꙋ́ба потирꙋ и҆зваѧ́н꙽на ꙗ҆́ко ѿра́сли кри́на въмѣща́ющи же, ҂г҃, мѣръ, и҆ съвръшѝ·

Сътвори́ же ѻ҆мывалницъ, і҃, и҆ поста́ви, е҃, на де́снои.
и҆ е҃, на́ лѣво.
ѻ҆мыва́ютъ в ни́хъ вс̂ѧ, и҆же въ вс̂есъж꙽же́нїѧ приноси́ма бѧ́хꙋ.
и҆ ѻ҆чища́ти, и҆ море да ѻ҆мы́ют̑сѧ сщ҃е́нницы в не́мъ.
сътвори́ же и҆ подъсвѣщникъ зла́тыхъ.
і҃. по разъсꙋже́нїю и҆хъ и҆ постави ѧ҆̀ въ цр҃кви.
е҃, ѻ҆деснꙋ́ю.
и҆ е҃, ѻ҆ лѣвꙋ́ю.
и҆ сътворѝ столо́въ, і҃, и҆ поста́вї ѧ҆̀ въ цр҃кви.
е҃, ѻ҆деснꙋ́ю.
и҆ е҃, ѻ҆ лѣвꙋ́ю и҆ ѳїѧ́лъ же зла́тыхъ, сътворѝ, е҃. и҆ сътворѝ, па́ки дво́ръ сщ҃енником̑.
и҆ дворъ вели́кїи, и҆ две́ри двора̀.
и҆ ѻ҆ко́нца и҆хъ, помѣ́дена мѣ́дїю.
па́ки мо́ре поста́ви ѿ десны́ѧ страны̀ проти́вꙋ восто́кꙋ къ полꙋ́дни·

Сътвори́ же хи́рам꙽, ѹ҆дицы мѧсныѧ и҆ кади́лныцы и҆ сковрадꙋ жрътвенꙋю, и҆ вс̂ѧ сосꙋды е҆го·

И҆ съвръши хирам̑ творити вс̂е дѣ́ло, и҆же нача твори́ти соло́монъ цр҃ь въ домꙋ̀ бж҃їи столпа̀ дв̂а.
и҆ ꙗ҆́ко стро́ки солїѧ́ны дв̂ѣ на глава́хъ стол꙽по́въ, и҆ мре́жица дв̂ѣ и҆же покрыва́ти главы̀ над̑ строка́ми гла́вными.
и҆ зво́нъковъ малы́хъ зла́тыхъ, у҃, въ двѣ мре́жи.
и҆ ши́п꙽ковъ зла́тыхъ, у҃, по два чины на мре́жи е҆ді́нои, и҆же защи́щати дв̂ѣ стро́ки.
и҆же над̑ глава́ми стол꙽повъ.
и҆ под̑ставъки па́ки сътворѝ, и҆ коры́та мѣ́дѧны сътворѝ над̑ подъставками, и҆ море е҆ді́но.
и҆ воло́въ, в҃і, под̑ море и҆ котлов̑҇, и҆ ѹ҆дицъ на мѧ́со·

И҆ вс̂ѧ сосꙋды их̑ ꙗ҆́же сътвори хирам̑, и҆ принесѐ соло́монꙋ въ до́мъ гн҃ь, ѿ мѣ́ди чистѣ́ишїѧ.
въ стра́нѣ і҆ѻрда́на сли́лъ и҆хъ цр҃ь, въ гли́нѧни землѝ.
въ домꙋ сокхо́ѳовѣ.
и҆ саридаѳа́евѣ.
и҆ сътворѝ соло́монъ вс̂ѧ сосꙋды, безъчислены ѕѣло.
та́ко да не вѣстьсѧ тѧ́гость мѣ́ди·

Сътвори́ же соло́монъ вс̂ѧ сосꙋ́ды до́мꙋ бж҃їѧ, и҆ ѻ҆лта́рь зла́тъ, и҆ столы̀.
и҆ на ни́хъ хлѣбы̀ пред̑ложе́нїѧ.
и҆ под̑свѣщники же со свѣти́лники свои҆ми да свѣтѧтъ пред̑ ст҃аѧ ст҃ыхъ.
по чинꙋ̀ ѿ зла́та чистѣ́иши.
и҆ свѣтлѣнїѧ нѣ́которого и҆ свѣти́лники и҆хъ, и҆ фїѧ́лы, и҆ кади́лницы.
и҆ клѣщицъ зла́тыхъ.
вс̂е ѿ зла́та чистѣ́иша съдѣ́лана сꙋть.
и҆ две́ри цр҃кви внꙋтренѣѧ, и҆же въ ст҃аѧ ст҃ыхъ.
и҆ двери цр҃ков꙽ныѧ и҆з꙽ зла́та.
и҆ съвръшено е҆сть вс̂е дѣло, и҆же сътворѝ соло́монъ въ домꙋ̀ гн҃и·

Глв̑҇а, е҃·

И вънесѐ ѹ҆бо соло́монъ вс̂ѧ ст҃аѧ дв҃да ѿц҃а свое҆го.
и҆ сребро̀ и҆ зла́то, и҆ вс̂ѧ съсꙋды.
и҆ поста́ви въ сокро́вищи до́мꙋ гн҃ѧ·

Посе́м же събра̀ бо́лшерод̑нїи і҆и҆л҃ѧ, и҆ всѣхъ нача́лникъ колѣнъ.
и҆ вожо́въ ѿч҃ествъ сн҃овъ і҆и҆л҃евъ, въ і҆ерс̑҇ли́мъ, да възведꙋтъ кїѻ́тъ завѣта гн҃ѧ.
ѿ гра́да двд҃ва, и҆же е҆сть въ сїѻ́нѣ.
и҆ прїидо́ша ѹ҆бо къ цр҃ю вс̂и мꙋж́и і҆и҆л҃евы.
въ дн҃ь пра́здныи, сїи е҆сть мцс̑҇а сед̑ма́го.
и҆ прїидо́ша вс̂и ста́рцы і҆и҆л҃евы.
и҆ взѧ́ша левѷти кїѻ́тъ, и҆ внесо́ша е҆го, и҆ скѷнїю свѣдѣнїѧ, и҆ вс̂ѧ съсꙋ́ды ст҃аѧ.
и҆же бѧ́хꙋ въ скѷнїи·

И҆ внесо́ша и҆хъ сщ҃енницы съ левѷты·

Цр҃ь же соло́монъ, и҆ вс̂е мно́жество сн҃овъ і҆и҆л҃евъ, и҆ вс̂и боѧ́щїисѧ, и҆же бѧ́хꙋ събра́ни пред̑ кїѻ́томъ.
пожрѧ́хꙋ ѻ҆́внїи и҆ воло́ве, без꙽числе́но, и҆ съразꙋмѣва́емо·

И҆ вънесо́ша сщ҃ен꙽ницы кїѻ́тъ завѣта гн҃ѧ въ мѣ́сто е҆го, и҆же е҆сть къ мл҃тве́никꙋ цр҃кви ст҃аа ст҃ых̑.
под̑ кри́лѣ херꙋви́мом̑, и҆ бѧ́хꙋ херꙋви́ми простира́юще кри́лѣ свои, над̑ мѣ́стомъ и҆дѣ́же поста́вленъ бы́сть кїѻ́тъ.
и҆ покрыва́хꙋ херꙋви́ми над̑ кїѻ́томъ, и҆ над̑ носи́лами е҆го вы́ш꙽ше.
и҆ бо́льши бѧ́хꙋ носи́ла, и҆ видѧ́хꙋ главы̀ носил̑ ѿ ст҃ыхъ.
в лицѐ мл҃тве́ницы, и҆ не видѧ́хꙋсѧ внѣ.
бы́сть б̂о кїѻ́тъ т̂ꙋ да́же и҆ до настоѧ́щаго дн҃и·

Ничто́же бы́сть и҆́но въ кїѻ́тѣ, то́кмо дв̂ѣ скрижа́ли, и҆́хже положѝ моѷсїи въ хори́вѣ, е҆гда зако́нъ да́сть г҃ь сн҃омъ і҆и҆л҃евымъ, и҆сходѧ́щимъ и҆з꙽ землѝ е҆гѷпта·

И҆ бы́сть и҆сходѧ́щимъ сщ҃ен꙽никомъ ѿ ст҃ыхъ, вси б̂о сщ҃ен꙽ницы и҆же т̂ꙋ ѻ҆брѣто́шасѧ, ѻ҆сщ҃енни сꙋть, и҆ е҆щѐ в т̂о вре́мѧ, въ вс̂едн҃евнꙋ́ю слꙋж́бꙋ чи́нъ проме́жꙋ и҆хъ не бѣ̀ раздѣле́нъ, левѷты же пѣвцы съ сн҃ьми а҆са́фовыми бѧ́хꙋ, и҆ съ е҆ма́номъ, и҆ съ диѳꙋмом̑, и҆ сн҃ове и҆хъ и҆ бра́тїа и҆хъ, ѻ҆блече́ны в ри́зы лнѧ́ны, въ кѵм꙽ва́лы, и҆ ѱал̑҇ты́ры, и҆ гꙋс́ли, съглаша́хꙋ стоѧ́ще пред̑ ѻ҆́лтаремъ, и҆ с ни́ми жерцо́въ р҃к, трꙋбѧ́ще трꙋба́ми·

И҆ бы́сть е҆ді́нъ гла́съ въ трꙋбле́нїи, и҆ въ хал꙽мо́нїи, и҆ въ воз꙽глаше́нїи, гласъ е҆ді́нъ, е҆же хвали́ти, і҆ и҆сповѣда́тисѧ гв҃и, и҆ е҆гда възд̑виго́ша гла́съ въ трꙋба́хъ, и҆ кѷм꙽ва́лехъ, и҆ ѻ҆рга́нехъ въспѣва́ющихъ·

И҆ начаша гл҃ати, и҆сповѣдаитесѧ гв҃и ꙗ҆́ко бл҃гъ ꙗ҆́ко въ вѣ́ки млс̑҇ть е҆го.
и҆спо́л꙽нисѧ до́мъ бж҃їи ѻ҆́блака, не мого́ша сщ҃енницы ста́ти, и҆ слꙋжи́ти рад̑и̑ м꙽глы, напо́лни бо сѧ сла́ва гн҃ѧ до́мꙋ бж҃їи·

Глв̑҇а, ѕ҃·

Тогда соло́монъ рече, г҃ь ѻ҆беща́лъ е҆сть да ѻ҆бита́етъ въ м꙽глѣ̀, а҆́з꙽ же създа́хъ до́мъ и҆́мени е҆го ст҃омꙋ, да ѻ҆бита́етъ т̂ꙋ въ вѣки·

И҆ ѻ҆братѝ цр҃ь лицѐ своѐ и҆ блс̑҇ви вс̂е мно́жество і҆и҆л҃ѧ, пред̑ста̀ и҆ реч̑҇, блс̑҇венъ г҃ь б҃ъ і҆и҆л҃евъ, и҆же гл҃алъ е҆сть ѹ҆сты̀ свои́ми къ дв҃дꙋ ѿц҃ꙋ мое҆мꙋ, и҆ в рꙋ́кꙋ е҆го съвершѝ гл҃ющи, ѿ дн҃е во́ньже и҆зведо́хъ лю́ди моѧ̀ ѿ землѧ̀ егѷпет̑скїѧ, не и҆збра́хъ гра́да.
ѿ всѣ́хъ колѣнъ і҆и҆л҃евыхъ, да съзи́ждетсѧ в не́мъ до́мъ и҆́мени мое҆мꙋ т̂ꙋ, ниже и҆збра́хъ никото́раго и҆но́го мꙋж́а бы́ти кнѧ́ѕь в лю́дехъ мои҆хъ і҆и҆л҃ѧ, но и҆збра́хъ і҆ерс̑҇ли́мъ да бꙋдетъ и҆́мѧ мое в не́мъ·

І҆ и҆збра́х же дв҃да бы́ти над̑ людмѝ мои́ми і҆и҆л҃емъ, е҆гдаже во́лѧ бы́сть дв҃да ѿц҃а мое҆го, да съзи́ждетъ до́мъ и҆́мени г҃а б҃а і҆и҆л҃ева.
рече г҃ь к немꙋ, и҆же сїѧ бы́сть во́лѧ твоѧ̀ да съзи́ждеши до́мъ и҆́мени моемꙋ, добро̀ б̂о сътвори́лъ е҆си, таковꙋ̀ и҆мѣти во́лю, но не ты̀ съзи́ждеши мн̂ѣ до́мъ, н̂о сн҃ъ твои и҆же и҆зы́иде ѿ чре́слъ твои҆хъ, то́й съзи́ждетъ до́мъ и҆́мени мое҆мꙋ·

съверши б̂о г҃ь сло́во своѐ и҆же гл҃а, и҆ аз̑ въста́хъ в꙽ мѣ́сто дв҃да ѿц҃а мое҆го, и҆ сѣ́хъ на прс̑҇тлѣ е҆го ꙗ҆́коже гл҃алъ ес̑҇, г҃ь, и҆ създа́хъ до́мъ и҆́мени г҃а б҃а і҆и҆л҃ева, и҆ поста́вихъ в꙽ не́мъ кїѻ́тъ в꙽ не́м꙽же е҆сть завѣтъ гн҃ь, и҆же завѣща̀ съ сн҃ы і҆и҆л҃евыми, и҆ ста̀ прд̑е ѻ҆́лтаремъ гн҃имъ.
ѿ сꙋпроти́вꙋ в꙽сего мно́жества і҆и҆л҃ѧ.
и҆ прострѐ рꙋ́цѣ своѝ·

Сътвори б̂о соло́монъ стоа́ло мѣдѧно, и҆ поста́ви е҆го посреди двора̀ ст҃аго, и҆мѣ́ющи, е҃, лакот̑ дол꙽готꙋ.
и҆ е҃ ширинꙋ̀, и҆ г҃, лакти въ высотꙋ̀.
и҆ ста̀ на не́мъ преклонѝ колѣ́нѣ проти́вꙋ в꙽сего мно́жества і҆и҆л҃ѧ·

И҆ дла́ни на́ нб҃о въздви́гъ, и҆ рече·

Ги҃ б҃е і҆и҆л҃евъ, нѣ́сть подо́бенъ тебѣ б҃ъ на́ нб҃си, и҆ на землѝ, съхранѝ чи́нъ и҆ млс̑҇ть съ рабы̀ твои́ми.
и҆же хо́дѧтъ пред̑ тобо́ю всѣмъ срд̑цемъ свои҆мъ.
и҆же пода́лъ е҆си рабꙋ̀ твое҆мꙋ дв҃дꙋ, ѿц҃ꙋ мое҆мꙋ.
е҆ли́каже гл҃а к немꙋ гл҃ѧ.
и҆ гл҃а ѹ҆сты̀ твои҆ми.
дѣ́ломъ съверши́лъ е҆си, ꙗ҆́ко и҆ настоѧ́щее вре́мѧ·

И҆ нн҃ѣ ѹ҆бо г҃и б҃е і҆и҆л҃евъ, и҆спо́лни рабꙋ̀ твое҆мꙋ а҆ ѿц҃ꙋ мое҆мꙋ дв҃дꙋ.
е҆ли́каже ре́клъ е҆си к немꙋ гл҃ющи, и҆ гл҃алъ е҆си ѹ҆сты̀ твои҆ми, і҆ и҆спо́лни ѹ҆сты̀ твои҆ми.
ꙗ҆́ко въ дн҃ь сїи гл҃ѧ.
не ѻ҆скꙋдѣ́етъ ѿ тебѐ мж̑ꙋ предо мно́ю сѣдѧ́и на прс̑҇толѣ двд҃вѣ.
то́кмо а҆́ще съхранѧ́тъ сн҃ове твоѝ пꙋтѝ моѧ̀.
ходи́ти въ зако́нѣ мое҆мъ, ꙗ҆́ко и҆ т̂ы ходи́лъ е҆си предо мно́ю, и҆ нн҃ѣ г҃и б҃е і҆и҆л҃евъ ѹ҆крѣпи́сѧ сло́во твое е҆же гл҃ал̑҇ е҆си рабꙋ̀ твое҆мꙋ дв҃дꙋ·

Ꙗ҆́ко а҆́ще и҆́стин꙽нѣ б҃ъ ѻ҆бита́етъ съ чл҃ки на землѝ.
а҆ще нб҃о и҆ нб҃о нб҃си не довлѣют̑ т̂и.
ко́лько на́ипаче до́мъ се́и е҆го́же създа́хъ, н̂о то́кмо възрѝ на моле́нїе раба̀ твое҆го, и҆ мл҃тви.
г҃и б҃е мои, и҆же ѹ҆слы́шати мл҃твы моа̀.
ꙗ҆́же и҆злїа ра́бъ твой пред̑ тобо́ю днс̑҇е.
да ѿверзе́ши ѻ҆́чи твои на до́мъ то́и дн҃ь и҆ но́щь.
на мѣ́стѣ се́мъ, на кото́ромъ ѻ҆беща́л꙽сѧ е҆си.
да призове́тсѧ и҆мѧ твоѐ.
и҆ ѹ҆слы́шиши моли́твꙋ е҆ю́же ра́бъ твой мо́литсѧ в нем̑, и҆ ѹ҆слы́ши проше́нїе раба̀ твое҆го и҆ людїи твои҆хъ і҆и҆л҃ѧ.
и҆же а҆́ще помо́лѧтсѧ на мѣ́стѣ то́мъ, и҆ т̂ы ѹ҆слы́ши ѿ жили́ща твое҆го и҆же е҆сть ѿ нб҃съ.
и҆ ѹ҆слыши, и҆ млс̑҇тивъ бꙋди.
а҆́ще съгрѣши́тъ мꙋж́ъ къ и҆́скренемꙋ свое҆мꙋ, и҆ прїиметъ клѧ́твꙋ е҆го ра́ди, и҆же клѧти е҆го и҆ прїидет̑ и҆ проклине́тъ пред̑ ѻ҆́лтаремъ в домꙋ̀ то́мъ, и҆ т̂ы ѹ҆слы́ши ѿ нб҃си.
и҆ сътворѝ сꙋ́дъ рабо́мъ твои҆мъ.
и҆же възда́ти безако́н꙽номꙋ грѣ́хъ е҆го на главꙋ̀ е҆го, и҆́стин̑҇нꙋю.
и҆ м꙽сти́ши пра́веднаго.
възда́ющи кое҆мꙋждо по пра́вдѣ е҆го а҆́ще ѻ҆долѣ́нъ бꙋ́детъ лю́дїе твоѝ і҆и҆л҃ь ѿ вра́гъ.
а҆́ще съгрѣша́тъ тебѣ̀.
и҆ ѻ҆брати́в꙽шесѧ съдѣла́ютъ покаѧ́нїе.
и҆ въпро́сѧтъ и҆́мени твое҆го, и҆ бꙋ́дꙋтъ ѹ҆моли́ти тебѐ на мѣ́стѣ то́мъ.
и҆ т̂ы ѹ҆слы́ши съ нб҃съ, и҆ млс̑҇тивъ бꙋди грѣхо́мъ людїи твои҆хъ і҆и҆л҃ѧ.
і҆ и҆зведи и҆хъ въ зе́млю ю҆́же да́лъ е҆си им̑, и҆ ѿц҃емъ и҆хъ.
а҆́ще заключи́ши нб҃о до́жда не и҆злѣти грѣ́хъ ра́ди людїи твои҆хъ.
и҆ ѹ҆мо́лѧтъ тебѐ въ мѣстѣ то́мъ.
и҆сповѣда́ютсѧ и҆́мени твое҆мꙋ, и҆ ѻ҆братѧ́тсѧ ѿ грѣ́хъ свои҆хъ, е҆гда̀ и҆хъ смири́ши·

И҆ т̂ы ѹ҆слы́ши съ нб҃се г҃и, и҆ млс̑҇тивъ бꙋ́ди грѣхо́мъ ра́бъ твои҆хъ, и҆ лю́демъ твои҆мъ і҆и҆л҃ю.
и҆ наѹ҆чи и҆хъ пꙋтѝ бл҃гꙋ по немꙋже в꙽нїидꙋтъ·

И҆ да́и до́ждъ землѝ ю҆́же да́лъ е҆си лю́демъ твои҆мъ на въздержа́нїе·

Гла́дъ а҆́ще въсходѧ́щъ бꙋдетъ на́ землю, и҆ гꙋби́тельства и҆ ржа̀ и҆ гꙋсе́ница и҆ кобы́лицы, и҆ прꙋ́зи, и҆ а́ще вразъ ѻ҆скорбѧ и҆хъ, вра́та ѻ҆бъстоѧ́щи гра́дꙋ, и҆ всѧ́кꙋ ꙗ҆́звꙋ и҆ бо́лѣзнь ѿста́ви, и҆ всѧ́ка мл҃тва, и҆ всѧ́ко моле́нїе, а҆́ще бꙋ́детъ кое҆мꙋж́до чл҃кꙋ, и҆ всѣ́мъ лю́демъ твои҆мъ і҆и҆л҃ю да бꙋ́детъ ѹ҆моле́нїе, позна́ю҆щемꙋ ꙗ҆́звы и҆ грѣхъ свой, и҆ прострѐ рꙋ́цѣ свои в꙽ домꙋ се́мъ·

И҆ т̂ы ѹ҆слы́ши съ нб҃се высотѝ готоваго жили́ща твое҆го, и҆ ѻ҆чи́сти, и҆ възда́и е҆ді́номꙋ ко́ждо по пꙋте́мъ е҆го, ꙗ҆́же вѣ́си по срд̑цы е҆го, ты б̂о е҆ді́нъ вѣ́си срд̑ца сн҃овъ чл҃ческихъ, да боѧ́тсѧ ходи́ти въ пꙋте́хъ твои҆хъ, вс̂ѧ дн҃и в нѧ́же живꙋтъ на лицы̀ землѧ̀ ю҆́же да́лъ е҆си ѿц҃емъ на́шимъ, и҆ всѧ́къ чю́ждїи и҆же нѣ́сть ѿ людїи твои҆хъ і҆и҆л҃ѧ, и҆ а́ще прїидетъ ѿ землѧ̀ дал꙽нѣ́иша ра́ди и҆́мени твое҆го вели́каго и҆ ра́ди рꙋкѝ твое҆ѧ̀ си́л꙽ныѧ и҆ мы́ш꙽ца твое҆ѧ высо́кїѧ, и҆ прїидет̑ и҆ помо́литсѧ на мѣ́стѣ се́мъ·

И҆ т̂ы ѹ҆слы́ши ѿ нб҃се ѿ гото́ваго жилища твое҆го, и҆ сътвори́ши по в꙽семꙋ̀ и҆же възове́тъ т̂ѧ пꙋт꙽никъ да ѹ҆вѣ́дѧтъ вс̂и лю́дїе землѝ и҆́мѧ твое·

И҆ боѧ́тсѧ тебѐ ꙗ҆́ко лю́дїе твои і҆и҆л҃ь, и позна́ютъ ꙗ҆́ко и҆мѧ твое възва́но е҆сть на до́мъ се́и, е҆го́же създахъ·

А҆́ще же и҆сходѧ́щъ бꙋ́детъ полкъ твои къ брани противꙋ сꙋпоста́тъ свои҆хъ, по пꙋтѝ и҆́мже по́слеши их̑, и҆ помо́лѧтсѧ тебѣ по пꙋтѝ гра́да сего е҆го́же и҆збра́лъ е҆си, и҆ до́мъ е҆го́же създа́хъ и҆́мени твое҆мꙋ, да ѹ҆слы́шиши ѿ нб҃се мл҃твы и҆хъ и҆ моле́нїе и҆хъ, и҆ сътвориши ѻ҆правле́нїе и҆хъ занѐ съгрѣша́тъ тебѣ, ниже б̂о е҆сть чл҃къ и҆же не съгрѣшитъ, и҆ гнѣвенъ бꙋ́деши и҆мъ, и҆ предасѝ и҆хъ враго́мъ и҆хъ, и҆ плѣнѧтъ и҆хъ, плѣнѧ́ющїи, въ зе́млю вра́гъ въ зе́млю дальнюю и҆ли бли́зъ, и҆ ѻ҆братѧ́тъ срд̑це своѐ въ зе́млю и҆хъ, на не́иже плене́ни бы́ша, и҆ та́мо ѻ҆братѧ́тсѧ, сътво́рѧтъ покаа́нїе, и҆ помо́лѧтсѧ тебѣ̀ на землѝ плѣне́нїѧ и҆хъ гл҃юще съгрѣшихомъ, безако́нїе сътвори́хомъ, непра́вдꙋ съдѣла́хомъ, ѻ҆братѧ́тсѧ к тебѣ̀ всѣ́мъ срд̑цемъ свои҆мъ, и҆ всею̀ дш҃ею свое҆ю.
въ землѝ плѣн꙽шихъ и҆хъ, и҆де́же плѣни́ша и҆хъ.
и҆ помо́лѧтсѧ тебѣ̀ проти́въ пꙋтѝ землѧ̀ свое҆ѧ, ю҆же да́лъ е҆си ѿц҃емъ и҆хъ·

И҆ гра́довъ их̑же и҆збра́лъ е҆си.
и҆ до́мꙋ е҆го́же създа́хъ и҆́мени твое҆мꙋ·

да ѹ҆слы́шиши ѿ нб҃се ѿ гото́ваго жили́ща твое҆го мл҃твꙋ и҆хъ, и҆ моле́нїе их̑·

И҆ сътворѝ сꙋ́дъ, и҆ млс̑҇тививъ бꙋ́ди лю́демъ твои҆мъ, съгрѣш꙽шимъ т̂и·

И҆ нн҃ѣ г҃и да бꙋ́дꙋтъ ѿврз̑ъсты ѻ҆́чи твои и҆ ѹ́ши твоѝ внѧ́ты бꙋдт̑ꙋ къ моле́нїю, и҆же сътвори́тсѧ на мѣ́стѣ се́мъ·

И҆ нн҃ѣ ѹ҆бо въста́ни г҃и б҃е въ поко́и твой.
т̂ы и҆ кїѻ́т꙽ крѣ́пости твое҆ѧ.
и҆ сщ҃ен꙽ницы твои г҃и б҃е ѻ҆блекꙋтсѧ въ спс̑҇нїе, и҆ прпд̑бнїи твоѝ възвеселѧ́тсѧ въ бл҃гихъ.
г҃и б҃е мои не ѿврати́ши лица̀ х҃а твое҆го.
помѧнѝ щедроты̀ двд̑а раба твое҆го·

Глв̑҇а, з҃·

И е҆гда̀ съвръшѝ соло́монъ молѧ́щисѧ.
и҆ ѻ́гнь сни́де с нб҃си, и҆ пожрѐ вс̂есъж꙽же́нїе, и҆ жр́ътвꙋ, и҆ сла́ва гн҃ѧ и҆спо́лни до́мъ.
и҆ не можа́хꙋ сщ҃енницы внїитѝ въ цр҃ков꙽ гн҃ю, въ вре́мѧ ѻ҆́но·

Того ра́ди ꙗ҆́же и҆спо́лни сла́ва гн҃ѧ цр҃ковь, и҆ вс̂и сн҃ове і҆и҆л҃еви видѧ́хꙋ сходѧ́щъ ѻ҆́гнь и҆ сла́вꙋ гн҃ю на до́мъ·

И҆ падо́ша ни́цы на́ землю на помо́стъ просте́ртъ ка́менїемъ, поклони́шасѧ и҆ похвали́ша г҃а ꙗ҆́ко бл҃гъ ꙗ҆́ко въ вѣки млс̑҇ть е҆го·

Цр҃ь же и҆ вс̂и лю́дїе пожро́ша жрътвꙋ пред̑ гм҃ъ.
и҆ пожрѐ цр҃ь соло́монъ жрътвы, воло́въ·

҂к҃, и҆ ҂в҃. ѻ҆́венъ тꙋчных̑, ҂р҃ и҆ ҂к҃, и пресщ҃а весь до́мъ бж҃їи цр҃ь и вс̂и лю́дїе.
сщ҃енницы же стоѧхꙋ въ чи́нх̑ѣ своих̑ и҆ левѷты въ а҆рга́ны поѧ́хꙋ пѣсни гн҃ѧ.
и҆же сътворѝ дв҃дъ цр҃ь ко похвале́нїю г҃а.
ꙗ҆ко бл҃гъ ꙗ҆́ко въ вѣки млс̑҇ть е҆го.
пѣсни двд҃вы пою́ще чиньми свои́ми.
па́ки сщ҃енницы поѧ́хꙋ трꙋба́ми, предъ ни́ми же весь і҆и҆л҃ь стоѧ́ше, ѻ҆ст҃и же соло́монъ среднее двора̀ пред̑ цр҃ьковью гн҃ею.
принесѐ б̂о т̂ꙋ вс̂есож꙽женїѧ и҆ тꙋ́ки, и҆ вс̂есъж꙽же́нїѧ ми́рныѧ.
ꙗ҆́ко ѻ҆лта́рь мѣдѧнъ и҆же сътворѝ соло́монъ не можа́ше прїѧ́ти вс̂есъж꙽же́нїѧ и҆ жрътвы, и҆ тꙋ́ковъ ми́рныхъ·

И҆ сътворѝ соло́мон̑҇ праздник̑҇ въ времѧ ѻ́но, з҃ дн҃їи, и҆ весь і҆и҆л҃ь с ни́мъ.
собра́нїѧ вели́ка ѕѣло ѿ и҆схо́да е҆м꙽ма́ѳъ даже до пото́ка е҆гѷпет꙽ска.
сътвори́ же въ дн҃ь, и҃. въскликнове́нїе, того ради чт̂о пресщ҃а ѻ҆лта́рь, сътворѝ пра́здникъ з҃, дн҃їи.
и҆ въ дн҃ь, к҃г, мс̑҇ца. з҃. ѿпꙋстѝ лю́ди къ жили́щемъ свои҆м꙽ веселѧ́щисѧ и҆ радꙋ́ющисѧ.
на бл҃го.
чт̂о сътворѝ г҃ь дв҃дꙋ и҆ соло́монꙋ і҆и҆л҃ю, лю́демъ свои҆мъ·

Совръши́ же соло́монъ до́мъ гн҃ь, и҆ до́мъ цр҃ѧ, і҆ и҆же въсхотѣ̀ въ срд̑ци свое҆мъ соло́монъ творити в꙽ домꙋ гн҃и, и҆ в꙽ домꙋ̀ свое҆мъ, преспѣва́ло е҆сть, ꙗ҆ви́ же сѧ г҃ь соло́монꙋ но́щїю, и҆ рече е҆мꙋ, слы́шахъ моле́нїе твое.
і҆ и҆з꙽бра́хъ мѣсто т̂о мнѣ̀ в꙽ домꙋ̀ жрътвъ.
а҆ще заключꙋ̀ нб҃о и҆ до́ждъ не и҆злѣе҆тъ, и҆ е҆ще пошлю̀, и҆ повелю̀ кобы́лицамъ пожрѣти зе́млю, и҆ а́ще пошлю̀ гꙋби́тельство на лю́ди моѧ.
и҆ а́ще ѻ҆скръбле́ни бꙋдꙋтъ лю́ди моѝ, на ни́х же възва́но е҆сть и҆́мѧ мое.
и҆ помолѧтсѧ, и҆ взы́щт̑ꙋ лица̀ мое҆го.
и҆ ѻ҆братѧ́тсѧ ѿ пꙋтїи свои҆хъ строп꙽ти́выхъ.
и҆ а́зъ ѹ҆слы́шꙋ ѿ нб҃се.
и҆ млс̑҇тивъ бꙋдꙋ грѣхомъ и҆хъ і҆ и҆сцѣлю̀ зе́млю и҆хъ.
и҆ нн҃ѣ ѻ҆́чи моѝ бꙋдꙋтъ ѿвръсты.
и҆ ѹ́ши моѝ бꙋдꙋтъ послꙋшни къ моле́нїю мѣ́ста сего.
и҆ нн҃ѣ и҆збра́х꙽ и҆ ѻ҆ст҃ихъ до́мъ се́и да бꙋдетъ и҆́мѧ мое т̂ꙋ въ вѣки, и҆ бꙋдꙋтъ ѻ҆́чи моѝ, и҆ срд̑це мое т̂ꙋ вс̂ѧ дн҃и, тыж̑ а҆ще хо́диши предо мно́ю ꙗ҆́ко ходѝ дв҃дъ ѿц҃ъ твой·

И҆ сътвори́ши по всемꙋ̀ ꙗ҆́же повелѣхъ тебѣ̀.
и҆ повеле́нїѧ моѧ̀, и҆ сꙋды моѧ̀ съдръжи́ши·

И҆ въздви́гнꙋ прс̑҇тлъ цр҃ьства твое҆го, ꙗ҆́коже ѻ҆бѣща́хъсѧ дв҃дꙋ ѿц҃ꙋ твое҆мꙋ гл҃щи, не ѿи҆мет̑сѧ ѿ колѣна твое҆го мꙋжъ, и҆же не бꙋдет̑ нача́лник̑҇ на і҆и҆л҃и, а҆ще же сꙋпоста́ти бꙋдете и҆ ѻ҆ста́вите за́повѣди и҆ повелѣнїѧ моѧ и҆же пред̑ста́вихъ вам̑.
и҆ ѿходѧ́ще слꙋж́ите бого́мъ чю́ждим̑ и҆ покло́нитесѧ и҆мъ, и҆стръгнꙋ̀ вас̑҇ ѿ землѧ̀ мое́ѧ кото́рꙋю да́хъ вам̑, и҆ до́мꙋ сего е҆гоже ѻ҆ст҃ихъ, ѿвръгꙋ ѿ лица̀ мое҆го.
и҆ преда́мъ е҆го въ при́тчꙋ и҆ въ ѻ҆́бразъ всѣмъ лю́демъ.
и҆ до́мъ се́и бꙋдетъ въ при́тчю всм̑ѣ приходѧ́щимъ.
и҆ рекꙋтъ ѹ҆жаса́ю҆щесѧ, почто̀ сътворѝ г҃ь та́ко землѝ се́и, и҆ до́мꙋ семꙋ̀, ѿвѣща́ю҆тъ же·

И҆же ѻ҆ста́виша г҃а б҃а ѿц҃ъ свои҆хъ, и҆же и҆зведѐ и҆хъ ѿ землѧ̀ е҆гѷпет꙽скїѧ и҆ прїѧ́ша бо́ги чю́ждїи поклони́шасѧ и҆мъ, и҆ празнова́ша и҆мъ сего ра́ди прїидо́ша на них̑ вс̂ѧ сїѧ ѕла́ѧ·

Глв̑҇а, и҃·

Испо́лньшимъ же сѧ, к҃ ти лѣтомъ.
по созда́нїю соло́монꙋ до́мꙋ гн҃ѧ, и҆ до́мꙋ свое҆го.
гра́ды кото́рыѧ дал̑҇ хирамъ соло́монꙋ созида́ѧ соло́монъ и҆ вселѝ т̂ꙋ сн҃овъ і҆и҆л҃евъ.
прїиде же въ е҆маѳъсꙋва, и҆ въздръжа̀ е҆го.
и҆ създа̀ ѳед꙽мо́ръ въ пꙋсты́ни, и҆ вс̂ѧ гра́ды защитител꙽нѣ́ишїѧ, създав̑҇ въ е҆маѳѣ, състро́и же веѳеро́н꙽ вы́шнїи, и҆ веѳеро́нъ ни́жнїи.
гра́ды стѣна́ты, и҆мѣ́ющи вра́та, и҆ запо́ры, и҆ зам꙽кѝ, валаа́ѳъ па́ки и҆ всѣхъ поса́довъ крѣп꙽ча́ишихъ, и҆же бы́ша соло́мони.
всѣх же поса́дов̑҇ колесни́чныхъ, и҆ поса́довъ ко́нникъ всѧ̀ е҆ли́каже въсхотѣ̀ сътворѝ цр҃ь соло́монъ.
и҆ расмотрѝ, създа̀ въ і҆ерс̑҇ли́мѣ, и҆ в лива́нѣ, и҆ въ все́и вла́сти землѝ свое́ѧ, весь по́лкъ и҆же ѻ҆ста́вленъ бы́сть, ѿ е҆ѳ꙽ѳе́ѧ, и҆ а҆м꙽море́ѧ и҆ ферезе́ѧ, и҆ е҆ве́ѧ, и҆ е҆вꙋсе́ѧ, и҆же не бѧхꙋ ѿ племе́ни і҆и҆л҃ева н̂о бѣша ѿ сн҃овъ и҆хъ послѣ́днихъ кото́рыхъ не ѹ҆би́ша сн҃ове і҆и҆л҃евы.
под꙽ни́зи соло́монъ въ дан꙽никѝ даже до дн҃е сего.
па́ки ѿ сн҃овъ і҆и҆л҃евъ не поста́ви да слꙋжатъ дѣлом̑ цр҃евым̑ тїи б̂о бѧхꙋ мꙋжи бра́нницы, и҆ въе҆во́ды прь́выи и҆ нача́лницы колесни́цамъ, и҆ ко́н꙽никомъ е҆го.
сїи же и҆ нача́лницы воем̑ цр҃ѧ соло́мона бы́ша, и҆ с҃ н҃, приставник̑҇ дѣла над̑ людмѝ·

дще́рь же фараѻ́ню преведѐ соло́монъ ѿ гра́да двд҃ва в до́мъ е҆гоже създа̀ е́й.
рече б̂о цр҃ь да не ѻ҆битает̑ жена̀ моѧ в домꙋ̀ дв҃да цр҃ѧ і҆и҆л҃ева.
того ради и҆же ѻ҆сщ҃енъ е҆сть, вшел̑҇ б̂о е҆сть кїѻ́тъ гн҃ь во́нь, тогда̀ принесѐ соло́монъ вс̂есъж꙽же́нїѧ гв҃и на ѻ҆лтар̑҇ ꙗ҆́же состро́и гв҃и пред̑ хра́момъ по словесѝ ѿ дн҃ѧ до дн҃ѧ носи́ти в꙽ нем по повелѣнїю моѷсїѻ́вꙋ в꙽ сꙋбо́ты и҆ въ новомѣсѧчїа, и҆ въ пра́здники дн҃їи три́щи лѣтомъ, и҆же е҆сть въ великїи пра́з꙽дъникъ ѻ҆прѣснокъ, и҆ въ праз̑дникъ неде́ль, и҆ въ пра́з꙽дник̑҇ кꙋщеи и҆ поста́ви по раз̑сꙋже́нїю дв҃да ѿц҃а свое҆го, и҆ правила сщ҃ен꙽ником̑·

И҆ слꙋже́нїѧ их̑, и҆ левѷты въ страж̑бы̀ и҆хъ.
да хва́лѧтъ и҆ слꙋжатъ пред̑ сщ҃ен꙽ники.
по чинꙋ̀ е҆ді́ного ко́ждо дн҃їи.
и҆ две́рницы в꙽ раздѣле́нїихъ свои҆хъ·

По вратомъ и҆ вра́томъ.
та́ко б̂о повелѣлъ дв҃дъ чл҃къ бж҃їи не престꙋпа́ли сꙋть ѿ за́повѣдїи цр҃евыхъ·

ѻ҆ сщ҃ен꙽ницехъ и҆ левѷтех̑ въ всемъ и҆же повелѣ̀.
и҆ въ сторо́жех̑ сокро́вищемъ всѝ расхо́ды.
ѹ҆гото́вани и҆мѣ̀ соло́монъ.
ѿ того̀ дн҃е и҆же ѻ҆снова̀.
до́мъ гн҃ь даже до дн҃е и҆же съвръшѝ до́мъ гн҃ь·

Тогда̀ и҆де соло́монъ, въ а҆сїѻ́нъ гаве́ръ, и҆ въ е҆ла́ѳъ къ странѣ̀ морѧ чрьмнаго.
и҆же е҆сть въ землѝ дꙋме́искои·

И҆ посла̀ е҆мꙋ хира́мъ рꙋка́ма слꙋ́гъ свои҆хъ кораблѝ, и҆ корабленицы зна́ющїѧ мо́рьскїѧ проходы, и҆ хожда́хꙋ съ рабы̀ соло́моньми въ сафир̑҇.
и҆ взѧ́ша.
ѿтꙋдꙋ, у҃, и҆ н҃, талан꙽тъ зла́та, и҆ принесо́ша къ цр҃ю соло́монꙋ·

Глв̑҇а, ѳ҃·

Цр҃ца же сава̀ е҆гда̀ слы́ша слх̑ꙋ соло́моновъ, и҆ прїиде да и҆скꙋша́етъ е҆го, въ гаданїихъ, въ і҆ерс̑҇ли́мѣ, съ си́лою тѧ́жкою ѕѣ́ло.
и҆ вельблю́ды и҆же ноша́хꙋ, во́ни бл҃говон̑҇ны и҆ зла́та, и҆ ка́менїѧ драга́го, и҆ прїиде къ соло́монꙋ и҆ гл҃ала е҆сть е҆мꙋ всѧ̀ е҆ли́ка бѣша въ срд̑цы е҆ѧ̀, и҆ възвѣстѝ соло́монъ всѧ̀ словеса̀ е҆ѧ̀, и҆ ничт̂о не бы́сть.
е҆же бы не ѻ҆бъꙗ҆вле́но е́й сътвори́лъ.
и҆ ви́дѣ цр҃ца сава̀ премꙋдрость соло́моню, и҆ до́мъ е҆же създа́лъ, и҆ ꙗ҆де́нїе стола̀ е҆го.
и҆ сѣда́лища рабо́мъ и҆ прави́ла слꙋже́бникомъ е҆го, и҆ ри́зы и҆хъ, и҆ ѻ҆дѣѧ́нїѧ и҆хъ.
и҆ под̑ча́шїи е҆го, и҆ вс̂есъж꙽же́нїѧ ꙗ҆́же жрѧ́ше в домꙋ̀ гн҃и·

Не бы́сть ѿ ѹ́жасти да́ле в не́и дх҃ъ, рече же къ цр҃ю, и҆́стинно е҆сть сло́во, е҆же слы́шахъ в꙽ землѝ мое́и, ѻ҆ премꙋдрости твое́и, и҆ словесе́хъ твои҆хъ, и҆ не вѣ́ровахъ повѣда́ющимъ, до́н꙽деже сама̀ прїидо́хъ и҆ ви́дѣша ѻ҆́чи моѝ.
і҆ и҆скꙋси́хъ, и҆ е́два полови́на премꙋ́дрости твое́ѧ мн̂ѣ бысть повѣдана.
приложи́лъ е҆си къ слы́шанїю, ꙗ҆́же слы́шала.
бл҃жени мꙋжи твоѝ.
и҆ бл҃жени рабѝ твоѝ сїи, и҆же пред̑стоѧ́тъ пред̑ тобою на всѧко вре́мѧ.
и҆ слы́шатъ премꙋдрость твою̀, да бꙋдетъ г҃ь б҃ъ твои блс̑҇венъ, и҆же въсхотѣ тебе ѹ҆чини́ти на прс̑҇тлѣ е҆го.
цр҃емъ лю́демъ г҃а б҃а твое҆го.
занѐ възлюбѝ б҃ъ і҆и҆л҃ѧ, и҆ хо́щетъ съхрани́ти е҆го въ вѣки.
того ради поста́ви тѧ над̑ ни́ми цр҃ѧ.
да сътвори́ши сꙋдбы̀ и҆ пра́вдꙋ.
даде́ же цр҃ю.
р҃к, тала́нта зла́та.
и҆ а҆рома́ты мно́ги ѕѣло.
и҆ камени предража́иши·

И҆ не бы́ша а҆рома́ты таковы́ѧ, ꙗ҆́ко сїѧ, и҆же да́сть цр҃ца сава̀ цр҃ю соло́монꙋ.
н̂о и҆ рабы̀ хира́мовы, съ рабы̀ соло́моними.
приноша́хꙋ зла́то ѿ сꙋфи́ра, и҆ дре́ва пе́в꙽гова, и҆ ка́менїе предража́ише·

И҆ сътворѝ соло́монъ цр҃ь, ѿ дре́въ певговыхъ стꙋп꙽нѣ в домъ гн҃ь.
и҆ в до́мъ цр҃евъ, и҆ гꙋсли, и҆ ѱалты́ри пѣснїи.
никогда́ же ви́дѣна сꙋть в꙽ землѝ і҆ѹ́динѣ такова́ѧ.
цр҃ь же соло́монъ дасть цр҃ци савѣ̀ вс̂ѧ, і҆ и҆же въсхотѣла ꙗ҆́же просѝ.
и҆ мно́жае бол꙽ши неже принесѐ к немꙋ̀, ꙗ҆же възврати́сѧ в зе́млю свою съ рабы̀ свои́ми·

Бѣ же тѧ́гость зла́та чт̂о приноша́шесѧ къ соло́монꙋ по е҆ді́на лѣта, хѯ҃ѕ, тала́н꙽тъ зла́та.
ра́звѣ мꙋжїи да́н꙽никъ и҆ кꙋп꙽цо́въ, е҆же приноша́хꙋ·

И҆ всѣхъ ц҃рїи а҆ра́в꙽скихъ, и҆ вла́стелїи земли, и҆же ноша́хꙋ зла́то и҆ сребро̀ соло́монꙋ.
сътвори ѹ҆бо цр҃ь соло́мон꙽, с҃, ко́пїи зла́тых̑ тѧ́гненых̑.
х҃, зла́тыхъ вагѝ, въ е҆ді́ном̑ копїѝ.
и҆ т҃, щи́товъ зла́тыхъ тѧ́гненыхъ тре́ю со́тъ зла́тыхъ тѧ́жесть е҆ді́номꙋ щи́тꙋ.
положи ѧ҆̀ црь въ ѻ҆рꙋжницꙋ ꙗ҆́же бѣ̀ ѻ҆са́жена древомъ лива́новымъ·

Сотвориж̑ цр҃ь прс̑҇тлъ слоно́выхъ зꙋб́овъ вели́къ, и҆ позлатѝ е҆го зла́томъ чистѣ́ишимъ.
и҆ ше́сть же стꙋп꙽неи и҆́миже въсхожа́ше къ прс̑҇тлꙋ позлаще́ни зла́томъ, и҆ мы́шцицы дв̂ѣ тꙋдꙋ и҆ сю́дꙋ.
над̑ прс̑҇тломъ сѣда́лища, и҆ дв̂а льва̀ стоѧ́ща близь мы́шцеи, н̂о и҆́ныхъ.
в҃і, львичищъ стоѧ́ще, на ѕ҃ стꙋпнехъ, ѿ ѻ҆бѣ́ю же странꙋ̀·

И҆ не бы́сть тако́въ прс̑҇тлъ въ всѣхъ црс̑҇твѣхъ.
всѧ́ же сосꙋды цр҃евы бѣхꙋ зла́та, и҆ сосꙋды до́мꙋ ѿ зла́та чистѣ́ишаго.
сребро̀ б̂о въ дн҃ехъ тѣхъ низачтоже мнѧ́шесѧ, занѐ кора́бль цр҃евъ хожда́ше въ ѳарси́съ съ рабы̀ хира́мовыми е҆дини́цею в лѣта трѝ, и҆ прихожда́ше кора́бль ѿ ѳарси́са, по́лонъ зла́та, и҆ сребра̀, и҆ зꙋбовъ слоно́выхъ, и҆ ѻ҆безьѧ́нъ·

Възвели́чисѧ соло́монъ над̑ всѣмѝ цр҃и зе́мными.
бога́тъствомъ и҆ мꙋдростїю·

Вси же цр҃и зем꙽стїи жела́хꙋ ви́дѣти лицѐ соло́моне, и҆ слы́шати премꙋдрость е҆го.
ю҆́же въздасть б҃ъ на́ срд̑це е҆го·

И҆ прино́шахꙋ е҆мꙋ ко́ждо да́ры.
сосꙋды сре́брѧны, и҆ зла́ты, и҆ ѻ҆дѣѧ́нїѧ, и҆ ста́ктꙋ, и҆ кон꙽фекъты, и҆ ѻ҆рꙋжїѧ, и҆ а҆рама́ты, ко́ни и҆ мъскѝ по е҆ді́на лѣта·

И҆ бѣхꙋ же цр҃ю соло́монꙋ, ҂м҃, кобы́лъ въ ста́дехъ.
и҆ ҂і҃, конн꙽икъ.
и҆ поста́ви же и҆хъ въ градх̑ѣ колесни́чныхъ, и҆ съ цр҃емъ въ і҆ерс̑҇ли́мѣ·

И҆ бы́сть воже́мъ на всѣхъ цр҃ѣхъ.
ѿ рѣки е҆фра́та, даже до землѧ̀ и҆ноплеме́нник̑҇.
и҆ даже до предѣлъ е҆гѷпетъскихъ.
толко же мно́жество возда́лъ зла́та̑ сребра̀ і҆ерс̑҇ли́мꙋ ꙗ҆́ко ка́менїѧ, и҆ ке́дри толи́ко мно́жества ꙗ҆́ко черъничїѧ и҆же ража́ютъсѧ въ полех̑.
и҆ приводѧ́хꙋ же е҆мꙋ ко́ни ѿ е҆гѷпта и҆ съ всѣх же стра́нъ.
и҆ про́чаѧ же дѣ́ла соломонѧ прьваѧ и҆ послд̑ѣнѧа пи́сана сꙋть въ словесехъ наѳа́на про̑҇рка, и҆ въ словесехъ а҆хїѧ силони́та.
и҆ въ ви́денїи і҆ѻ҆и́лѧ ви́дѧщаго проти́вꙋ, і҆е҆ровоа́ма сн҃а нава́това·

И҆ цр҃ьствова́ же соло́монъ въ і҆ерс̑҇лимѣ над̑ всѣмъ і҆и҆л҃емъ, м҃, лѣтъ.
ѹ҆спеж̑ соло́монъ съ ѿц҃ы свои҆ми.
и҆ погребо́ша е҆го въ́ градѣ двд҃вѣ·

И҆ црс̑҇твова же ровоам̑ сн҃ъ е҆го в него̀ мѣсто·

Глава̀, і҃·

И прїиде ровоа́мъ въ сихе́мъ.
т̂ꙋ б̂о ве́сь і҆и҆л҃ь снїидесѧ да поста́вѧтъ е҆го цр҃емъ, и҆же е҆гда̀ слы́ша і҆е҆ровоа́мъ сн҃ъ нава́товъ, и҆же б̂ѣ въ е҆гѷптѣ.
пробѣжа́лъ б̂о бѣ̀ та́мо пред̑ цр҃емъ соло́мономъ·

И҆ ѻ҆бита̀ і҆е҆ровоа́мъ въ е҆гѷптѣ.
и҆ ѻ҆брати́сѧ ѿ е҆гѷпта.
и҆ посла́вше призваша е҆го, и҆ прїиде съ всѣмъ і҆и҆л҃емъ·

И҆ гл҃али сꙋть къ цр҃ю, ровоа́мꙋ гл҃ющи.
ѿц҃ъ твои твердѣ́ишимъ и҆́гом̑ на́съ ѹ҆гнетѐ.
т̂ы ле́гъчеи повели ѿц҃а твое҆го, и҆же нам̑ наложи́лъ тѧготꙋ сложе́нїѧ.
и҆ ма́ло ѿ бре́мени ѻ҆б꙽легчѝ, и҆ да слꙋж́имъ тебѣ·

И҆ реч̑҇ и҆мъ поидѣте по тре́хъ дн҃ехъ възврати́тесѧ ко мнѣ̀.
е҆гда же ѿи҆до́ша лю́дїе, нача совѣтъ съ ста́рцы и҆же стоа́хꙋ пред̑ ѿц҃емъ е҆го соло́моном̑, е҆гда е҆щѐ живѧ́ше гл҃ющи.
чт̂о дади́те совѣтъ ѿвѣщати лю́демъ си́мъ.
и҆же рѣша е҆мꙋ.
а́ще ѹ҆годи́ши по́лкꙋ томꙋ̀, и҆ ѹ҆слади́ши и҆хъ словесы̀ ми́лостивными.
слꙋжа́тъ тебѣ всѧ́ко вре́мѧ.
и҆ то́й ѻ҆ста́ви совѣтъ ста́рческъ, и҆ со ѹ҆́ношами дꙋ́мати нача̀, и҆же с ни́мъ въско́ръмлени бѧ́хꙋ.
и҆же бѣхꙋ с ни́мъ въ кнѧже́нїи то́мъ.
рече же къ ни́мъ.
чт̂о сѧ вамъ ви́дитъ.
е҆же ѿвѣща́ти чт̂о и́мамъ по́лкꙋ томꙋ̀, и҆же рѣша мн̂ѣ гл҃юще.
ѻ҆блегчѝ и҆́го, е҆же наложил̑҇ на́ ны ѿц҃ъ твои.
и҆ тїѝ ѿвѣщаша.
ꙗ҆ко юноши воско́ръмлени с ни́мъ на сла́дости.
и҆ реко́ша·

Тако гл҃еши по́лкꙋ, и҆же рече тебѣ.
ѿц҃ъ твои ѻ҆тѧгчил̑҇ и҆́го на́ше, и҆ т̂ы ѻ҆блегчѝ ѻ҆ на́съ.
и҆ тако ѿвѣща́еши и҆мъ.
ме́ншїи прьстъ мо́и толъстѣе е҆сть чреслъ ѿц҃а мое҆го.
ѿц҃ъ мои наложи́лъ вамъ тѧжело, и҆́го.
и҆ а́зъ на́ипаче тѧ́гости приложꙋ̀.
ѿц҃ъ мои би́лъ васъ бичъми а́зъ б̂о бїю васъ скоръпїѻ́ны·

И҆ прїиде і҆е҆ровоа́мъ, и҆ весь по́лкъ къ ровоа́мꙋ въ дн҃ь тре́тїи.
ꙗ҆ко повелѣ̀ им̑ цр҃ь.
да ѻ҆братѧт̑сѧ въ дн҃ь тре́тїи.
ѿвѣща же цр҃ь жесто́ко, и҆ ѻ҆ста́вилъ ровоа́мъ совѣтъ ста́рцем̑.
гл҃алъ же е҆сть по ю́ношъскои во́ли.
ѿц҃ъ мо́и тѧ́жело вамъ наложи́лъ и҆́го.
чт̂о а́зъ тѧже́лѣе сътворю̀.
ѿц҃ъ мо́и би́лъ вас̑҇ плетьмѝ.
и҆ а́зъ б̂о бїю в̂ы скорпїѻ́ны.
и҆ не вѣдѣ ровоа́мъ.
ꙗ҆́ко премѣненїе ѿ б҃а гл҃ѧ.
да съвръши́тсѧ слово е҆го е҆же гл҃а рꙋко́ю а҆хїи хилони́тъскаго.
і҆е҆ровоа́мꙋ сн҃ꙋ нава́товꙋ и҆ ѻ҆ всем̑ і҆и҆л҃ю занѐ послꙋша цр҃ь их̑.
и҆ ѿвѣщаша лю́дїе ко цр҃ю гл҃щи·

Нѣсть намъ ча́сть въ дв҃дѣ ни достоѧ́нїѧ въ сн҃ѣ і҆ѻ҆сѣѻ҆вѣ.
ѻ҆братисѧ въ жили́ща твоа і҆и҆л҃ь.
ты́ же пасѝ домъ твои двд҃вѣ·

І҆ и҆дѐ весь і҆и҆л҃ь в жили́ща своѧ.
и҆ мꙋжи і҆и҆л҃еви и҆же ѻ҆бита́хꙋ въ́ градѣхъ і҆ѹ́диных̑, въцрс̑҇твоваша над̑ ними і҆е҆ровоа́ма·

И҆ посла́ же цр҃ь ровоа́мъ к ни́мъ.
а҆данира́ма и҆же настоѧ́ше да́немъ, и҆ ка́менїемъ поби́ша е҆го сн҃ове і҆и҆л҃вы и҆ ѹ́мре·

И҆ слы́ша цр҃ь ровоа́мъ, пот꙽ща́сѧ възыитѝ на колесни́цꙋ.
и҆ бѣжа̀ въ і҆ерс̑҇лим꙽.
и҆ ѿвръгъсѧ и҆л҃ь ѿ домꙋ двд҃ва да́же до дн҃е сего̀·

Глв̑҇а, а҃і·

Прїиде же ровоа́мъ въ і҆ерс̑҇лим̑.
и҆ съзва̀ до́мъ ве́сь і҆ѹ́динъ, и҆ венїами́нь.
҂р҃, ҂п҃. и҆збран̑҇ныхъ, и҆ бранѧщихъ да воюетъ проти́вꙋ і҆и҆л҃ѧ, и҆ е҆ровоа́ма да ѻ҆братит̑ к꙽ себѣ црс̑҇тво своѐ·

Бы́сть же сло́во гн҃е къ семе́ю чл҃кꙋ бж҃їю гл҃ющи.
гл҃и къ ровоа́мꙋ сн҃ꙋ соло́моню цр҃ю і҆ѹ́динꙋ, и҆ къ в꙽семꙋ̀ і҆и҆л҃ю.
и҆же е҆сть въ і҆ѹ́дѣ, и҆ венїами́нѣ.
сїа рече г҃ь.
не въсходи́те ниже ѻ҆полча́итесѧ проти́вꙋ бра́тїа ва́шеѧ.
ѻ҆брати́тесѧ е҆ді́нъ ко́ждо в до́мъ свой.
занѐ мое҆ю т̂о съдѣла́но е҆сть во́лею.
и҆же е҆гда слы́шаше сло́во гн҃е, възврати́шасѧ.
не поидо́ша проти́вꙋ і҆е҆ровоа́мꙋ.
ѻ҆бита́ же ровоа́мъ въ і҆ерс̑҇лимѣ.
и҆ създа̀ гра́ды стѣна́ты въ і҆ѹ҆де́и.
състро́и же виѳлее́мъ и҆ е҆ѳа́мъ, и҆ ѳекꙋ́е, и҆ веѳ꙽сꙋр́ъ, и҆ съкхо́хъ, и҆ ѻ҆дола́нъ, и҆ ге́ѳъ, и҆ марсаръ, и҆ зи́фъ.
н̂о и҆ а҆дꙋра́мъ, и҆ лахи́съ, и҆ а҆зи́кꙋ, и҆ са́лю.
и҆ е҆ло́нъ, и҆ хевро́нъ, и҆же е҆сть въ і҆ѹ҆де́и.
и҆ въ венїами́нѣ гра́ды ѹ҆правленѣ́иши·

Є҆гда же затворѝ и҆хъ стѣна́ми.
положѝ в ни́хъ нача́лники.
и҆ пи́щамъ ѹ҆ста́вы.
и҆ ѻ҆ле́и и҆ вино̀.
по градꙋ ѻ҆рꙋж́ницы, и҆ щи́том̑ и҆ ко́пїемъ ѹ҆крѣпи́ же и҆хъ вельмѝ ѕѣ́ло.
и҆ црс̑҇твова на і҆ѹ́дѣ и҆ венїами́нѣ·

Сщ҃енницы же и҆ левѷты.
и҆же бѧ́хꙋ въ все́мъ і҆и҆л҃и.
прїидо́ша к немꙋ ѿ всѣхъ предѣ́лъ и҆хъ.
ѻ҆ставлѧ́ющи под̑гра́дїѧ.
и҆ ѻ҆дръжа́нїѧ своѧ̀·

И҆ поидо́ша къ і҆ѹ́дѣ въ і҆ерс̑҇лим̑ того ра́ди е҆же и҆згна́ и҆хъ, і҆е҆ровоам̑, и҆ сн҃ы и҆хъ, е҆же не сщ҃енъствова́ти гв҃и·

И҆ поста́ви себѣ жерцы̀, на высо́кихъ, идоломъ.
и҆ сꙋе́тным̑, и҆ те́л꙽цемъ, и҆́хже сътворѝ і҆е҆ровоам̑.
и҆ съвратѝ ѿ всѣ́хъ колѣ́нъ і҆и҆л҃евых̑ къ и҆́доломъ и҆же въда́ста срд̑це свое да възы́щꙋтъ г҃а б҃а і҆и҆л҃ева, и҆ прихожда́хꙋ пожре́ти жр́ътвъ свои҆хъ.
пред̑ гм҃ъ бм҃ъ ѿц҃ъ свои҆хъ·

И҆ ѹ҆силѧ́хꙋ црс̑҇тво і҆ѹ́дино.
и ѹ҆крѣписѧ ровоа́мъ сн҃ъ соло́монь за тр̂и лѣта.
ходи́ша б̂о въ пꙋтѝ двд̑а, и҆ соло́монѧ ѿц҃а е҆го.
лѣта то́лько тр̂и.
приве́де же ровоа́мъ женꙋ̀ моѻ҆ла́ѳъ.
дще́рь и҆е҆римꙋѳ́ъ, сн҃овъ дв҃довых̑, а҆вигеи́ль же, дще́рь е҆лїа́влю сн҃овъ и҆е҆сай.
ꙗ҆́же породѝ е҆мꙋ сн҃ы.
е҆хꙋ́са, и҆ сам꙽морїѧ, и҆ заа́мъ.
по сихъ же поѧ́тъ себѣ̀ маа́хꙋ дще́рь а҆весало́млю, и҆же родѝ е҆мꙋ а҆вїѧ, и҆ е҆ѳ꙽ѳїа, и҆ зи́зꙋ, и҆ салимо́ѳа·

И҆ възлюби́ же ровоа́мъ маа́хꙋ, дще́рь а҆весало́млю над̑ всѣ́ми жена́ми свои҆ми, и҆ под̑ло́ж꙽ницъ.
ꙗ҆́ко же́нъ, и҃і, и҆мѣ̀, и҆ под̑ло́жницъ, ѯ҃. и҆ родѝ, к҃и, сн҃овъ.
и҆ ѯ҃, дще́рїи·

И҆ поста́ви въ нача́лника ровоа́мъ.
а҆вїѧ сн҃а маа́ха, и҆ кнѧ́ѕемъ над̑ всею̀ бра́тїею свое́ю.
того б̂о и҆ цр҃емъ сътвори́ти помышлѧ́ше, и҆же ра́слъ над̑ всю̀ бра́тїю е҆го, и҆ над̑ всѣми сн҃ы і҆ѹ́дины, и҆ венїами́новыми, и҆ въ всѣ́хъ гра́дѣхъ і҆ѹ́ды, и҆ венїами́на.
и҆ въ всѣхъ гра́дѣхъ стѣна́тых̑.
и҆ въ зда́сть же и҆мъ пи́ща мно́ги.
и҆ мно́гихъ просѝ же́нъ·

Глв̑҇а, в҃і·

Єгда же ѹ҆тверже́но бы́сть црс̑҇тво ровоа́мово.
и҆ ѹ҆крѣпле́но.
ѻ҆ста́ви зако́нъ гн҃ь, и҆ ве́сь і҆и҆л҃ь с ни́мъ·

Бы́сть же въ лѣто, е҃ е, црс̑҇тва ровоа́млѧ занѐ съгрѣши́ша г҃ꙋ.

Възы́иде сꙋаки́мъ цр҃ь е҆гѷпет̑скїи въ і҆ерс̑҇лимъ, съ ты́сѧщїю, и҆ ѻ́смь со́тъ колесни́цъ.
и҆ ѯ҃, ты́сѧщъ, ко́н꙽никъ.
и҆ не бѣ̀ числа̀ наро́дꙋ, ꙗ҆́же прїиде с ни́мъ ѿ е҆гѷпта·

Левѷане, и҆ трогол꙽ди́те, и҆ е҆фїѻ́пи и҆ взѧ́ша гра́ды запа́систы и҆же бѧ́хꙋ въ і҆ѹ҆де́и.
и҆ прїидо́ша да́же до і҆ерс̑҇лима·

Саме́їа же прро̑҇къ вънїиде къ ровоа́мꙋ, и҆ къ нача́лникомъ і҆ѹ́динымъ.
и҆же събра́ни бѧ́хꙋ въ і҆ерс̑҇лим̑, ѿ лица̀ сꙋсаки́мова, рече же к нимъ, сїѧ рече г҃ь, в̂ы ѻ҆ста́висте м̂ѧ, и҆ а́зъ ѻ҆ста́влю вас̑҇ в рꙋ́кꙋ сꙋсаки́ма, ѹ҆боѧ́ша же сѧ нача́лницы і҆и҆л҃евы, и҆ цр҃ь, и҆ реко́ша.
пра́веден̑҇ е҆сть г҃ь.
е҆гда же ви́дѣ г҃ь ꙗ҆́же смире́ны бы́ша, быс̑҇ сло́во гн҃е къ саме́ю гл҃ющи, ꙗ҆́ко смире́ни сꙋть не разорю̀ их̑ дам̑ же и҆мъ въ ма́лѣ спс̑҇нїе, и҆ не ѹ҆ка́плет̑ ꙗ҆́рость моѧ̀ на і҆ерс̑҇лимъ, ѻ҆баче бꙋдт̑ꙋ въ слꙋгѝ да позна́ютъ рабо́ты моѧ̀, и҆ рабо́ты црс̑҇тва землѧ́мъ, и҆ възы́иде сꙋсаки́мъ цр҃ь е҆гѷпет̑скїи, въ і҆ерс̑҇лим̑, и҆ побра̀ съкро́вища, ꙗ҆́же въ домꙋ̀ гн҃и, и҆ до́мꙋ цр҃ева вс̂ѧ в꙽зѧ́тъ, и҆ щи́ты зла́тыѧ и҆́хже сътвори́лъ соло́монъ.
в꙽ них̑ мѣсто сътворѝ ровоам̑ цр҃ь мѣ́дѧны, и҆ поста́ви над̑ ни́мъ сꙋсаки́мъ, цр҃ь е҆гѷпет꙽скїи, нача́л꙽никовъ пред̑ходѧ́щихъ, и҆же стрежа́хꙋ дво́ръ пола́ты·

И҆ бы́сть е҆гда въходитѝ цр҃ю въ до́мъ бж҃їи, вхожд̑ахꙋ и҆ стрегꙋщїѝ и҆ пред̑ходѧ́щїи.
и҆ ѻ҆браща́ющꙋсѧ е҆мꙋ въсхожд̑ахꙋ проти́вꙋ пред̑ходѧ́щїи къ ѻ҆рꙋжници свое҆и.
и҆ вънегда̀ смири́сѧ, ѻ҆браще́на е҆сть ѿ него ꙗ҆́рость гн҃ѧ и҆ ничим̑же ѻ҆скорблен̑҇.
и҆б̂о и҆ въ і҆ѹ́дѣ бѧ́хꙋ словеса̀ бл҃га·

Ѹ҆крѣпи́ же сѧ цр҃ь ровоам̑ въ і҆ерс̑҇лимѣ и҆ црс̑҇твова̀.
м҃ же, і҆ е҆ді́но лѣто бы́сть е҆гда црс̑҇твова́ти нача̀, и҆ и҃і, лѣтъ, црс̑҇твова̀ въ і҆ерс̑҇лимѣ гра́дѣ е҆го́же и҆збра̀ г҃ь.
да и҆менꙋе́тсѧ и҆мѧ е҆го т̂ꙋ ѿ всѣ́хъ колѣ́нъ і҆и҆л҃евых꙽·

И҆мѧ же мт҃ри е҆го на́м꙽ма, а҆м꙽мани́та.
сътвори́ же лꙋка́во, и҆ не и҆спра́ви срд̑ца свое҆го да възы́щетъ г҃а.
словеса же ровоа́мова пе́рваѧ и҆ послд̑ѣнѧа не се́ ли сꙋть пи́сана въ словесе́хъ саме́їѧ прро̑҇ка, и҆ ад̑до ви́дѧщаго, и҆ настоѧнѣишемъ сказа́нїи.
ѻ҆пол꙽ча́хꙋ же сѧ проти́вꙋ себѣ ровоа́мъ, и҆ е҆ровоа́мъ вс̂ѧ дн҃и.
и҆ ѹ҆спѐ ровоа́мъ съ ѿц҃ы свои҆ми.
погребе́нъ же е҆сть, въ гра́дѣ дв҃дѣ.
и҆ црс̑҇твова̀ а҆вїа сн҃ъ е҆го в него мѣ́сто·

Глв̑҇а, г҃і·

Въ лѣто, и҃і.
цр҃ѧ и҆е҆ровоа́ма, црс̑҇твова̀ а҆вїѧ на і҆ѹ҆де́и.
и҆ г҃, лѣта црс̑҇твова̀ въ і҆ерс̑҇лимѣ.
и҆мѧ же мт҃ри е҆го миа҆ха́їѧ дщ̂и ѹ҆рїи́лева ѿ гаваѻ́на, и҆ б̂ѣ бра́нь межи а҆вїею, и҆ е҆ровоа́момъ.
и҆ въполъчи́шасѧ.
а҆вїѧ же и҆мѣа҆ше бран꙽нѣ́ишихъ мꙋже́и и҆збра́нныхъ, ҂м҃. і҆ и҆е҆ровоа́мъ състро́и съпроти́вꙋ е҆го бра́нь, ҂п҃. мꙋже́и, и҆же и҆ тїи и҆збра́нни бѣша.
и҆ къ бра́немъ крѣпча́иши·

Ста́ же а҆вїа на горѣ̀ сомо́ри и҆же бѣ̀ въ предѣле е҆фре́мли и҆ рече.
слы́шите е҆ровоа́мъ и҆ весь і҆и҆л҃ь.
н̂и ли не вѣ́сте ꙗ҆́ко г҃ь б҃ъ і҆и҆л҃евъ.
възда́лъ црс̑҇тво дв҃дꙋ на і҆и҆л҃и въ вѣ́ки, и҆ сн҃овомъ е҆го, завт̑ѣ вѣ́ченъ·

И҆ въста̀ и҆е҆ровоа́мъ сн҃ъ нава́товъ рабъ соло́моновъ сн҃а двд̑а.
и҆ ѿве́ржесѧ ѿ господи́на свое҆го, и҆ събра́ша же сѧ к немꙋ мꙋ́жи сꙋетнѣ́иши сн҃ове законопрестꙋ́пнїи и҆ сопроти́ви́шасѧ проти́вꙋ ровоа́ма сн҃а соло́монѧ<.>

Ровоа́м же бѣ̀ ю҆нѣ́ишїи и҆ срд̑цемъ страшлив̑҇, и҆ не мо́же проти́витисѧ и҆мъ.
и҆ нн҃ѣ ѹ҆бо в̂ы гл҃ете да сопроти́витисѧ мо́жете црс̑҇твꙋ гн҃ю и҆же въздержи́тъ по сн҃овохъ двд҃вых̑ и҆́мате же вели́ко людїи мно́жество и҆ те́лца зла́тыѧ и҆хже сътворѝ вам̑ і҆еровоам̑ въ богѝ.
и҆ не не и҆звергосте л̂и сщ҃ен꙽никовъ гн҃ихъ сн҃овъ а҆аро́нь и҆ левѷтов꙽, и҆ сътвори́сте себѣ̀ жръцы̀ ѿ людїи всеѧ̀ землѧ̀.
и҆ды́и прїидетъ, и҆ напо́лнитъ рꙋкꙋ свою ѿ те́лцовъ, з҃, и҆ ѻ́внѣхъ, з҃ хъ и҆ сътвори́сѧ въ жръца̀ не сꙋщемꙋ богꙋ.
на́шъ же г҃ь б҃ъ е҆сть е҆гоже не ѻ҆ста́вихомъ, сщ҃ен꙽ницы же е҆го слꙋжатъ г҃ꙋ ѿ сн҃овъ а҆а҆ро́нь.
и҆ левѷти сꙋть в чи́нѣхъ свои҆хъ жрꙋще г҃ꙋ, вс̂есъж꙽же́нїѧ, ѹ́тро и҆ предъ ве́черомъ, и҆ ѳимїа́мъ сложе́нїѧ по вс̂ѧ дн҃и приносѧтъ г҃ꙋ, и҆ пред̑лага́ю҆тсѧ хлѣбы на столѣ̀ чистѣ́ишем̑.
е҆сть же под на́ми под̑свѣщникъ зла́тыи, и҆ свѣти́лники е҆го да вжегт̑ꙋсѧ всегда̀ къ ве́черꙋ.
мы̀ б̂о храни́мъ повелѣ́нїѧ г҃а б҃а ѿц҃ъ нашихъ, е҆гоже вы̀ ѻ҆ста́висте.
того ра́ди въ во́нѣ на́шеи б҃ъ е҆сть.
и҆ сщ҃ен꙽ницы е҆го възвꙋча́тъ трꙋба́ми и҆ въз꙽шꙋмѧ́тъ проти́вꙋ ва́мъ.
сн҃ове і҆и҆л҃вы не хо́щете брани́ти проти́вꙋ г҃ꙋ б҃ꙋ ѿц҃ъ ва́шихъ, и҆же нѣсть ва́мъ подо́бно.
сїѧ томꙋ̀ гл҃щꙋ, і҆е҆ровоа́мъ възвратѝ под̑са́дꙋ прїитѝ е́й.
вза́дъ на ни́хъ.
и҆ бы́сть ѿ сꙋпроти́вꙋ і҆ѹ́ды са́мъ.
и҆ под̑са́да съза́ди·

И҆ възврати́шасѧ і҆ѹ҆де́и, и҆ сѐ ви́дѣша бра́нь.
ѿ сꙋпроти́въ и҆ съзад̑и̑ и҆ възопи́ша къ г҃ꙋ.
и҆ сщ҃ен꙽ницы трꙋба́ми пѣти нача́ша.
вси́ же мꙋжи і҆ѹ́дины възгласи́ша.
и҆ с̂е тѣмъ въпїю́щимъ·

И҆ ѹ҆страшѝ б҃ъ і҆е҆рово̀а́ма.
і҆и҆л҃ѧ.
и҆же стоѧ́хꙋ ѿ сꙋпроти́вꙋ а҆вїѧ́ і҆и҆ѹ́ды.
бѣжа́шеж̑ сн҃ове і҆и҆л҃еви ѿ і҆ѹ́ды.
и҆ преда́сть и҆хъ б҃ъ в рꙋкꙋ и҆хъ.
и҆ поразѝ ѹ҆бо и҆хъ а҆вїѧ и҆ лю́ди е҆го ꙗ҆́звою вели́кою и҆ падо́ша ра́нени ѿ і҆и҆л҃ѧ, е҃ со́тъ мꙋже́и крѣпких̑·

И҆ смири́ша же сѧ сн҃ове и҆л҃еви въ вре́мѧ т̂о·

И҆ велмѝ ѹ҆крѣпи́шасѧ сн҃ове і҆ѹ́дины·

Того ради и҆же ѹ҆пова́ша на г҃а б҃а ѿц҃ъ свои҆хъ·

Погна́ша же а҆вїѧ въ слд̑ѣ і҆е҆ровоа́ма, и҆ взѧ̀ гра́ды е҆го.
и҆ виѳе́ль, и҆ ѻ́крс̑҇тныѧ се́ла е҆го, и҆ гесана́и съ се́лами е҆го, і҆ е҆вро́нъ и҆ се́ла е҆го<.>

И҆ не мо́же сꙋпроти́витисѧ і҆е҆ровоа́м꙽ въ вс̂ѧ дн҃и а҆вїѧ, е҆ю́же поразѝ и҆ ѹ́мре.
а҆вїѧ же ѹ҆крѣпи́сѧ, и҆ поѧ́т꙽ жен̑҇, д҃і.
и҆ родѝ, к҃в, сн҃овъ.
и҆ ѯ҃ и҆ в҃ дще́ри.
прочаа же словеса̀ а҆вїа и҆ дѣѧ́нїѧ е҆го, и҆ словеса̀ е҆го.
пи́сана сꙋть ши́рши в꙽ кни́ѕѣ а҆́д꙽до про̑҇рка·

Глв̑҇а, д҃і·

Ѹспе́ же а҆вїѧ съ ѿц҃ы свои҆́ми, и҆ погребо́ша е҆го въ градѣ двд҃вѣ·

Црс̑҇твова́ же а҆́сс꙽а сн҃ъ е҆го в꙽ него мѣсто въ дн҃и же а҆́с꙽сы почѝ землѧ̀ і҆ѹ́дина.
лѣтъ, і҃. и҆ сътворѝ а҆́сса.
бл҃го и҆ ѹ҆годно бы́сть пред̑ гм҃ъ бм҃ъ е҆го, и҆ превратѝ ѻ҆лтари чю́ждаѧ, и҆ слꙋжбы вы́шнѧѧ, и҆ съкрꙋшѝ и҆́долы.
и҆ дре́ва же посѣчѐ.
и҆ повелѣ і҆ѹ́дѣ да взы́щетъ г҃а б҃а ѿц҃ъ свои҆хъ.
и҆ да сътвори́тъ закон̑҇ е҆го и҆ за́повѣди.
и҆ съкрꙋши́ша ѿ всѣхъ гра́довъ і҆ѹ́диных̑ ѻ҆лтарѝ, і҆ и́долы и҆ црс̑҇твова̀ в ми́рѣ крѣп꙽це, въ́ градх̑ѣ і҆ѹ́диныхъ.
смири́ бо сѧ землѧ̀·

създа́ же и҆ поса́ды запа́систы въ і҆ѹ҆де́и.
и҆же поко́ино бы́сть, и҆ ни е҆ді́на въ времена̀ ты̀ бра́нь въста̀, ми́ръ б̂о г҃ꙋ възда́юще е҆мꙋ.
рече же і҆ѹ́да съзи́ждемъ гра́ды сїѧ и҆ ѻ҆гради́мъ стѣ́ны, и҆ ѹ҆крѣпи́мъ столпы̀, и҆ вра́та, и҆ за́мки.
в не́иж̑ землѝ господ꙽ствꙋ́емъ.
ꙗ҆́ко в꙽зыска́хомъ г҃а б҃а ѿц҃ъ на́шихъ.
и҆ възыска́на, и҆ възда́сть на́мъ ми́ръ по ѻ҆́крс̑҇тъ.
съ поспѣш꙽ством̑.
того ради създа́ша, и҆ ни е҆ді́но въ строе҆́нїи помѣша́нїе бы́сть·

И҆мѣ же а҆́с꙽са, во́и.
въ ѻ҆рꙋжїи свои҆хъ, носѧ́щихъ щи́ты.
и҆ ко́пїа ѿ і҆ѹ́ды, ҂т҃. ѿ венїа҆ми́на щи́т꙽никовъ.
и ст̀рѣлцевъ.
҂с҃п.
вс́и же сїи мꙋжи на́ брань крѣпчаиши·

И҆зы́иде же проти́вꙋ и҆хъ зара́и е҆ѳиѻ́плѧнин꙽, съ во́и свои́ми десѧ́тїю сот̑ тма́ми.
и҆ колесни́цъ, ҂т҃, и҆ прїиде да́же до мари́са, и҆ а́сса, и҆зы́иде противꙋ е҆мꙋ.
и҆ ѹ҆строи́ша брань ѹ҆ де́бри на сѣверъ мари́са, и҆ възва̀ а҆́сс꙽а г҃а б҃а и҆ реч̑҇.
помоѕѝ нам̑ г҃и б҃е на́шъ, занѐ на тѧ ѹ҆пова́емъ, и҆ въ твоѐ и҆́мѧ и҆мѣ́ющи неѻ҆бинове́нїе.
прїидо́хом꙽ съпроти́вꙋ того мно́жества·

Ги҃ бж҃е нашъ ты̀ е҆си не премо́жетъ противꙋ тебѐ чл҃къ.
и҆ ѹ҆страшил꙽ г҃ь е҆фиѻ́пы, пред̑ а́с꙽сою і҆ и҆ѹ́дою·

И҆ бѣжа́ше же е҆фїѻ́пы и҆ гна̀ и҆хъ а҆с꙽са и҆ лю́дїе и҆же с ни́мъ да́же до гедо́ра, и҆ падо́ша е҆фїѻ́пы даже до погꙋбле́нїа ꙗ҆́ко г҃ꙋ бїю́щꙋ съкрꙋши́шасѧ.
и҆ пред̑ во́и е҆го ѻ҆полча́ющесѧ.
и҆ взѧ́ша плене́нїѧ мно́га, и҆ порази́ша гра́ды и҆хъ по ѻ҆́крс̑҇тъ гедо́ра.
вели́къ б̂о стра́хъ гн҃ь ѻ҆бъꙗ҆́тъ и҆хъ·

И҆ разори́ша гра́ды, и҆ мног̑҇ плѣнъ и҆з꙽несо́ша.
н̂о и҆ кꙋщи ѻ҆́вцамъ, и҆ а҆мазо́новъ и҆з꙽сѣко́ша.
и҆ взѧ́ша скота̀ бесчи́слено мно́жество и҆ вельблюд̑.
и҆ възврати́шасѧ въ і҆ерс̑҇лимъ·

Глв̑҇а, е҃і·

Аза́рїѧ же сн҃ъ а҆да́довъ, бы́сть в не́мъ дх҃ъ бж҃їи, и҆зы́иде въ срѣтенїе а҆́ссы, і҆ѹ҆де́ѻ҆въ, и҆ венїами́на, и҆ реч̑҇ е҆мꙋ·

Ѹ҆слы́шите м̂ѧ а҆́сса.
и҆ весь і҆ѹ́да, и҆ венїами́нъ.
г҃ь с ва́ми, ꙗ҆́ко бы́сте с ни́мъ.
а҆́ще в꙽зы́щете е҆го, ѻ҆бра́щетсѧ ва́мъ.
а҆́ще же ѻ҆ста́вите е҆го, ѻ҆ста́витъ васъ.
мно́ги дн҃и въ і҆и҆л҃и без꙽бж҃їѧ и҆́стинны, и҆ без꙽ сщ҃енниковъ, и҆ без꙽ ѹ҆чи́тель же, и҆ без̑ зако́на·

Є҆гда же и҆ ѻ҆брати́тъ и҆хъ въ печа́лехъ своих̑.
и҆ възопїютъ къ г҃ꙋ б҃ꙋ і҆и҆л҃евꙋ, ѻ҆брѧ́щетсѧ и҆мъ.
въ вре́мѧ ѻ́но не бꙋдет̑ ми́ръ и҆сходѧ́щемꙋ, ꙗ҆́ко ꙗ҆́рость гн҃ѧ на всѣ́хъ ѻ҆бита́ющих̑ на землѝ·

И҆ ѻ҆полчи́тъ бо сѧ ꙗ҆зы́къ на ꙗ҆зы́къ, и҆ град̑ проти́вꙋ гра́дꙋ, ꙗ҆́ко г҃ь смꙋтит̑ и҆хъ въ всѧ́кои печа́ли.
и҆ в̂ы ѹ҆бо ѹ҆крѣпи́тесѧ.
и҆ не ѻ҆вѧ́жꙋтсѧ рꙋ́ки ва́ши.
бꙋ́детъ б̂о м꙽зда̀ дѣ́ла ва́шего·

И҆же е҆гда слы́ша а҆́с꙽са словеса̀ сїѧ, и҆ прро̑҇чество а҆за́рїѧ прро̑҇ка.
ѹ҆крѣпи́сѧ и҆ ѿѧ́тъ и҆́долы, ѿ всеѧ̀ землѧ̀ і҆иѹ́ды и҆ венїами́на, и҆ ѿ грд̑а и҆́хъже ѹ҆крѣпѝ и҆е҆ровоа́мъ въ горѣ е҆фре́мли·

И҆ ѻ҆сщ҃а ѻ҆́лтаръ гн҃ь и҆же б̂ѣ пред̑ притво́ромъ гн҃имъ.
събра же всего і҆ѹ́дꙋ, и҆ венїами́на.
и҆ пришел̑҇цы ѻ҆бита́ющїи с ни́ми ѿ е҆фрема, и҆ манасїѧ, и҆ ѿ симеѻ́на.
мно́ѕи б̂о к немꙋ прибѣго́ша ѿ і҆и҆л҃ѧ, ви́дѧщи ꙗ҆́же г҃ь б҃ъ е҆го бы́сть с ни́мъ.
е҆гда же прїидо́ша въ і҆ерс̑҇лимъ.
въ мцс̑҇ъ, г҃. в лѣто, е҃і.
црс̑҇тва а҆́с꙽сы·

И҆ пожро́ша г҃ꙋ въ дн҃ь то́и ѿ кори́сти, и҆ плѣне́нїи е҆же возведо́ша волов̑҇, з҃ сот̑ и҆ ѻ́венъ, з҃. тысѧ́щ꙽ и҆ вни́де ѿ зако́на на ѹ҆крѣпле́нїе ми́ра да взы́щт̑ꙋ г҃а б҃а ѿц҃ъ свои҆хъ, и҆ всѣ́мъ срд̑цем꙽, и҆ всею̀ дш҃ею и҆хъ.
и҆ всѧ́къ и҆же речет̑, не взыска́ти г҃а б҃а і҆и҆л҃ева да ѹ́мрет̑, ѿ ме́ньшаго да́же до бо́лшаго.
ѿ мꙋжа да́же до жены̀.
заклѧ́ша же сѧ г҃ꙋ гла́сомъ вели́кимъ, въ восклица́нїи.
и҆ въ звꙋ́кꙋ трꙋ́бномъ.
вси же і҆ѹ҆де́и възра́довашасѧ ѻ҆ клѧ́твѣ.
всѣ́мъ срд̑цемъ свои҆мъ клѧ́шасѧ, и҆ въ все́и воли в꙽зыска́ша е҆го, и҆ ѻ҆брѣте́сѧ и҆мъ·

Пода́сть же и҆мъ г҃ь поко́и по ѻ҆́крс̑҇тъ·

Но и҆ маа́хꙋ мт҃рь свою̀ и҆змѣни́лъ е҆же не бы́ти въ слꙋж꙽бꙋ а҆ста́рта и҆́дола, и҆ съкрꙋшѝ е҆го, в꙽ кꙋ́съ раздробѝ, и҆ сож꙽же въ пото́цѣ ке́дръстѣмъ, ра́звѣ вы́шнѧа ѻ҆ста́ви занѐ бѣ въ і҆ѹ҆де́и и҆ въ і҆и҆л҃и·

Но и҆ срд̑це а҆́с꙽сы бѣ съверше́но въ всѣхъ дн҃ехъ е҆го·

И҆ внесѐ ст҃аѧ дв҃да ѿц҃а свое҆го, и҆ ст҃аа в домꙋ̀ бж҃їи, и҆ сребро̀ и҆ зла́то, съсꙋ́ды и҆ бра́нь не бы́сть съ ни́мъ, да́же до, л҃е҃ го, лѣта црс̑҇тва а҆́ссина·

Глв̑҇а, ѕ҃і·

И въ лѣто, л҃ и҃ е, цр҃ьства е҆го, взы́иде вааса цр҃ь і҆и҆л҃евъ, въ і҆ѹ҆де́ю, и҆ стѣнꙋ̀ ѻ҆бъѧ́ше ра́мꙋ, да ни е҆ді́нъ въ бо́ѧзни можа́ше и҆зыитѝ, и҆ внїитѝ въ црс̑҇тво а҆́с꙽сино и҆ възѧ́тъ же а҆́с꙽са сребро̀ и҆ зла́то ѿ сокро́вищъ до́мꙋ гн҃ѧ, и҆ ѿ сокро́вищъ цр҃ьскихъ·

И҆ посла̀ къ невеа҆давꙋ цр҃ю сѷрьскꙋ, и҆же ѻ҆бита́ше въ дама́сцѣ гл҃ющи, прїими ми́ръ промежи менѐ и҆ тебѐ, и҆ межѝ ѿц҃емъ моим̑, и҆ ѿц҃емъ твои҆мъ, и҆мѣша съглаше́нїе, того ра́ди посла́хъ тебѣ сребро̀ и҆ зла́то, прїиди да разбїемъ ѿ менѐ ваа҆́сомъ цр҃ѧ і҆и҆л҃ева, и҆ ѿи́дет̑ ѿ менѐ, и҆ слы́ша сн҃ъ а҆де́ровъ цр҃ѧ а҆́с꙽сꙋ, и҆ посла̀ нача́лники во́емъ своим̑, къ гра́домъ і҆и҆л҃евымъ, и҆ порази́ша а҆гино́на, и҆ да́на, и҆ а҆велмаи҆нъ, и҆ всѝ поса́ды неѳали́мли стѣна́та, и҆же е҆гда̀ слы́ша ваа́са цр҃ь і҆и҆л҃евъ ѻ҆ста́ви съзида́ти рама́ю и҆ ѻ҆ста́ви дѣ́ло своѐ·

А҆́сса же цр҃ь прїѧ́ть вс̂ю і҆ѹ҆де́ю, и҆ взѧ́ша ка́менїе ѿ ра́ма и҆ лѣ́съ и҆же на съзида́нїе ѹ҆гото́ва а҆́с꙽са·

Създа́ же в ни́хъ гаве́ѧ, и҆ ма́сфꙋ, и҆ въ вре́мѧ ѻ́но прїиде а҆на́нїѧ прро̑҇къ, къ а҆́с꙽сѣ цр҃ю і҆ѹ́динꙋ·

И҆ рече е҆мꙋ е҆же и҆мѣ́лъ е҆си ѹ҆пова́нїе ко цр҃ю сѷрскꙋ, а҆ не къ г҃ꙋ б҃ꙋ твое҆мꙋ·

Того ра́ди ѹ҆шлѝ цр҃ѧ си́рьскаго во́и ѿ рꙋ́кꙋ твое́ю·

Не е҆фиѻ́пи ли, и҆ ливїи бѧ́хꙋ тебѣ̀ въ си́лꙋ мно́гꙋ и҆ въ др́ъзость.
колесни́цъ и҆ ко́нникъ.
и҆ мно́жество ѕѣ́ло·

И҆ вънегда̀ къ г҃ꙋ вѣ́ровалъ е҆си, и҆ преда̀ и҆хъ въ рꙋкꙋ твою̀.
ѻ҆́чи б̂о гн҃и съзира́ющи вс̂ю зе́млю.
и҆ въздаю́тъ крѣ́пость тѣ́мъ, и҆же срд̑цемъ съвръше́номъ вѣ́рꙋютъ во́нь.
бꙋе́ б̂о сътвори́лъ е҆си, и҆ сего ра́ди т̂о е҆щѐ настоѧ́щаго вре́мени на́ тѧ бра́нь въста́нетъ·

Разгнѣ́ва же сѧ а҆́с꙽са на ви́дѧщаго.
повелѣ̀ е҆го в꙽сади́ти во стражи́лницꙋ.
ѕѣ́ло бо сего ра́ди прогнѣ́васѧ и҆ ѹ҆бѝ ѿ людїи во вре́мѧ т̂о мно́гих̑.
дѣла же а҆́с꙽сы пр́ьваѧ и҆ послѣ́днѧа, пи́сана сꙋть въ кни́ѕѣ цр҃еи і҆ѹ́диных̑ і҆и҆л҃ѧ·

Разболѣ́ же сѧ а҆́сса въ лѣто, л҃ѳ.
црс̑҇тва свое҆го.
бо́лѣзнїю ѕелнѣ́ишею на́ ноги, и҆ ни в не́мощи свое́и, възыска̀ г҃а, н̂о вра́чевъ·

И҆ ѹ҆спе же съ ѿц҃ы свои҆ми, и҆ ѹ́мре лѣта, м҃а го, црс̑҇тва е҆го.
и҆ погребо́ша е҆го въ гро́бѣ е҆го.
и҆же и҆скопа̀ въ́ градѣ двд҃вѣ.
положиша же е҆го на посте́лѣ и҆ напол̑҇ниша а҆рама́ты, и҆ ро́ды ми́ра ѹ҆ха́н꙽наго, и҆ сътвори́ша е҆мꙋ погребъ вели́къ ѕѣ́ло·

Глв̑҇а, з҃і·

Црс̑҇твова́ же и҆ѻ҆сафа́тъ сн҃ъ е҆го в꙽ него мѣ́сто, и҆ премога́ше проти́вꙋ і҆и҆л҃ѧ.
и҆ѻ҆сафа́тъ.
поста́ви же ты́сѧщники число́мъ въ всѣх꙽ гра́дѣхъ і҆ѹ́диных꙽.
и҆же бѧ́хꙋ ѻ҆граже́ни стѣна́ми.
пособле́нїе же расмотрѝ в землѝ і҆ѹ́динѣ;
и҆ въ́ градѣхъ е҆фрѣ́мовых̑ и҆́х꙽же побра а҆́сса ѿц҃ъ е҆го.
и҆ бы́сть г҃ь съ и҆ѻ҆сафа́томъ.
ꙗ҆́ко хо́дитъ въ пꙋте́хъ дв҃да ѿц҃а свое҆го пр́ьвыхъ.
и҆ не ѹ҆пова̀ на и҆́долы н̂о на́ б҃а ѿц҃а свое҆го.
и҆ про́иде в повеле́нїи ѿц҃а свое҆го.
а҆ не по грѣхом̑ і҆и҆л҃евым̑·

Ѹ҆крѣпи́ же г҃ь црс̑҇тво в рꙋкꙋ е҆го.
и҆ да́ша вс̂ѧ і҆ѹ҆де́ѧ да́ры и҆ѻ҆сафа́тꙋ, и҆ бы́сть е҆мꙋ бога́т꙽ства, и҆ мно́га сла́ва.
и҆ възнесе́сѧ срд̑це е҆го въ пꙋть гн҃ь.
и҆ па́ки высо́каѧ и҆́долы и҆ лꙋ́ги ѿ і҆ѹ́ды и҆зѧ́тъ·

Въ тре́тїе же лѣто црс̑҇тва свое҆го.
посла̀ нача́лник̑҇ свои҆хъ, и҆ сн҃овъ си́лныхъ, и҆ а҆вдїю и҆ заха́рїю, и҆ наѳанаи́ла, и҆ михе́а.
да ѹ҆ча́тъ въ́ градѣхъ і҆ѹ҆диных̑.
и҆ с ни́ми левѷти самꙋ́иѧ, и҆ наѳананїѧ, и҆ вав꙽дїѧ, и҆ а҆сїи́лѧ, и҆ семирамо́ѳа, і҆ и҆ѻ҆наѳа́на, и҆ а҆донїю, и҆ товїю левѷты і҆ и́же с ни́ми и҆ е҆лиса́мꙋ, и҆ ѻ҆ра́ма жръца̀.
ѹ҆ча́хꙋ же лю́ди въ і҆ѹ҆де́и, и҆мѣ́ющи кни́гꙋ зако́на гн҃ѧ и҆ ѻ҆б꙽ходѧ́хꙋ вс̂и гра́ды і҆ѹ҆дины ѹ҆ча́хꙋ лю́ди·

Того ра́ди сътворе́нъ быс̑҇ стра́хъ гн҃ь на всѣ́хъ црс̑҇твахъ зе́мъских꙽.
и҆же бѧ́хꙋ по ѻ҆́крс̑҇тъ і҆ѹ҆де́и.
не смѣа́хꙋ бранити проти́вꙋ и҆ѻ҆сафа́та.
н̂о и҆ ѿ и҆ноплеме́нникъ и҆ѻ҆сафа́тꙋ да́ры приноша́хꙋ.
сребро̀ и҆ да́ры.
а҆ра́ви же привожахꙋ ѻ҆́венъ и҆ ѻ҆вец̑҇ ҂з҃, и҆ з҃ со́тъ.
и҆ козел̑҇ толи́коже, възрасте же и҆ѻ҆сафа́тъ и҆ възвели́чисѧ да́же до вы́шнихъ.
и҆ създа̀ въ і҆ѹ҆де́и до́мы ꙗ҆́ко столпы̀.
и҆ мно́га дѣ́ла ѹ҆гото́ва в поса́дѣхъ і҆ѹ́диных̑ и҆ мꙋ́жи же бра́нницы и҆ крѣ́пцы бѧ́хꙋ въ і҆ерс̑҇лимѣ, и҆́м꙽же т̂о число̀ по домом̑, и҆ ѻ҆би́телїи и҆хъ е҆ді́ныхъ·

Въ і҆ѹ҆дѣ нача́лники во́емъ е҆дꙋна́съ во́жд̑ъ.
и҆ с ни́мъ крѣпча́иша мꙋ́жи, ҂т҃, и҆ пото́мъ и҆ѻ҆а҆нна́нъ нача́лникъ, и҆ с ни́мъ, ҂с҃, и҆ ҂п҃, пото́м꙽ же а҆масїа сн҃ъ захарїевъ пресщ҃енъ г҃ꙋ, и҆ с ним̑, ҂п҃, мꙋже́и си́лныхъ, томꙋ̀ послѣдоваше хра́бры къ бра́немъ·

ѿ венїами́на, е҆лїа́да, и҆ с ни́мъ дръжа́щихъ лꙋ́къ и҆ щи́тъ, ҂н҃, си́лных̑·

Пото́мъ па́ки и҆ѻ҆задавъ, и҆ с ни́мъ ҂р҃, и҆ ҂п҃, си́лни къ бра́ни, тїи вс̂и бѧ́хꙋ въ рꙋ́кꙋ цр҃евꙋ, кромѣ и҆́ных̑ чт̂о постави цр҃ь на посадѣхъ стѣнатыхъ, въ все́и і҆ѹ҆де́и·

Глв̑҇а, и҃і·

И бы́сть и҆ѻ҆сафа́тꙋ бога́тъство, и҆ сла́ва мно́га, и҆ поѧт̑ женꙋ в домꙋ̀ а҆ха́вли, и҆ племени сложенъ е҆сть а҆хавлю, и съниде же по лѣтех̑ к немꙋ съвръше́не въ самарїю, и҆ е҆го прише́ствїю, ѹ҆бѝ а҆ха́въ ѻ҆́вны, и҆ волы̀ мно́ги, томꙋ и҆ людемъ и҆же прїидо́ша с ни́мъ, помоли́ же сѧ томꙋ, да взы́идетъ въ рамо́ѳъ галади́т꙽скїи·

Реч̑҇ же а҆ха́въ цр҃ь і҆и҆л҃евъ, къ и҆ѻ҆сафа́тꙋ цр҃ю іѹ́динꙋ, прїидѝ съ мно́ю въ рамо́ѳъ галаа҆ди́т꙽скїи·

к немꙋ то́и ѿвѣща̀, ꙗ҆́ко а҆́зъ и҆ ты̀, ꙗ҆́ко лю́дїе твоѝ та́ко и҆ лю́дїе моѝ, с тобо́ю же бꙋдемъ въ бра́ни·

И҆ реч̑҇ и҆ѻ҆сафа́тъ цр҃ю і҆и҆л҃евꙋ, совѣща́исѧ молю̀ т̂ѧ, пред̑стоѧ́щимъ словесе́м꙽ г҃ꙋ, и҆ събра б̂о цр҃ь і҆и҆л҃евъ прро̑҇ковъ, у҃, мꙋже́и, и҆ рече къ ни́мъ, а҆́ще въ рамо́ѳъ галаад̑скїи къ бра́ни пои҆тѝ и҆мамы, и҆ли поко́итисѧ, и҆ тїи рѣша, в꙽зы́иди, и҆ преда́сть б҃ъ въ рꙋ́кꙋ цр҃евꙋ·

Рече же иѻ҆сафатъ ни л̂и нѣсть т̂ꙋ прро̑҇ка гн҃ѧ, е҆ще да ѿ того па́ки въпро́симъ, и҆ рече цр҃ь і҆и҆л҃евъ къ и҆ѻ҆сафа́тꙋ, е҆сть мꙋжъ е҆ді́нъ и҆́м꙽же мо́жетъ въпроси́ти г҃а, н̂о а҆́зъ ненави́жꙋ е҆го, и҆же не прорица́етъ мнѣ̀ бл҃га, н̂о ѕло̀ въ всѐ вре́мѧ е҆го, сїи михе́ѧ сн҃ъ и҆е́мла·

Реч̑҇ же и҆ѻ҆сафа́тъ не гл҃и цр҃ю тѣ́мъ ѻ҆бы́чаемъ·

И҆ възва̀ цр҃ь і҆и҆л҃евъ е҆ді́ного ѿ е҆внꙋ́хъ, и҆ рече е҆мꙋ, зови в꙽бо́рзѣ михе́ю сн҃а и҆е́мла, па́ки цр҃ь і҆и҆л҃евъ, и҆ ѻ҆сафа́тъ цр҃ь і҆ѹ́динъ, ѻ҆́ба сѣдѧ́хꙋ на прс̑҇тлѣ, ко́ждо и҆ ѻ҆блече́ни красото́ю цр҃ьскою, сѣдѧ́хꙋ же на простра́н꙽ствѣ близ̑ вра́тъ самарїиских̑, вс̂и же прро̑҇цы прро̑҇чествова́хꙋ пред̑ ни́ми, седекїа б̂о сн҃ъ хана́на, сътвори е҆мꙋ ро́га желѣ́зна, и҆ рече·

Сїѧ реч̑҇ г҃ь, тѣми попере́ши сѷрїю, до́ндеже съкрꙋшиши е҆ѧ, вс̂и же прро̑҇цы та́коже прорица́хꙋ, и҆ гл҃ахꙋ, взы́иди въ рамо́ѳъ галаа́дъ и҆ преспѣва́еши, и҆ преда́стъ и҆хъ въ рꙋ́кꙋ цр҃евꙋ, посо́лъ же и҆де къ званїю михе́ѧ, рече е҆мꙋ, с̂е словеса̀ всѣхъ прро̑҇къ е҆ді́нѣми ѹ҆сты бл҃га цр҃еви възвѣща́ютъ.
прошꙋ ѹ҆бо и҆ тебѐ да сло́во твое ѿ е҆го не ѹ҆далитсѧ.
гл҃и же бл҃га е҆мꙋ, и҆ ѿвѣща михе́ѧ.
живе́тъ г҃ь и҆же чт̂о е҆лико рече́тъ мнѣ б҃ъ мо́и с̂е гл҃ю.
прїиде б̂о къ цр҃ю.
е҆мꙋже цр҃ь рече, михе́ѧ.
и҆ти л̂и и҆́мамъ въ рамо́ѳъ галаа́дъ къ бране́нїю, и҆ли поко́ити·

К немꙋже то́и ѿвѣща̀, и҆зы́идете вс̂ѧ бо преспѣва́нїѧ прїидꙋтъ т̂и, и҆ предадꙋтсѧ врагѝ в рꙋ́ки ва́ша.
реч̑҇ же цр҃ь е҆мꙋ па́ки.

Множи́цею тебе заклина́ю ѧ҆̀.
да мнѣ не гл҃еши то́кмо, чт̂о и҆́стинно е҆сть въ и҆мѧ гн҃е.
и҆ то́и рече.
ви́дѣхъ ве́сь і҆и҆л҃ь расточе́нъ въ гора́хъ ꙗ҆́ко ѻ҆́вца без꙽ па́стырѧ·

И҆ рече г҃ь, не и҆́мꙋть сїи господи́на, да ѻ҆брати́тсѧ е҆ді́нъ ко́ждо в до́мъ свои в꙽ ми́рѣ·

И҆ рече цр҃ь і҆и҆л҃евъ къ и҆ѻ҆сафа́тꙋ.
ни л̂и рѣхъ тебѣ ꙗ҆́ко не прорицает̑ се́и мнѣ̀ ничтоже бл҃га, н̂о ѕл̂о.
и҆ рече михе́ѧ, не та́ко слы́шите ѹ҆бо сло́во гн҃е.
ви́дѣхъ г҃а сѣдѧ́ща на прс̑҇тлѣ е҆го, и҆ вс̂и во́и нбс̑҇ныѧ пред̑стоѧ́щи е҆мꙋ ѻ҆деснꙋю и҆ ѻ҆шꙋ́юю·

И҆ рече г҃ь кт̂о прельсти́тъ а҆ха́ва цр҃ѧ і҆и҆л҃ева, да взы́идетъ и҆ паде́тъ въ рамо́тѣ галаад̑скомъ.
и҆ гл҃аше е҆ді́нъ та́ко, і҆ и́нъ реч̑҇ та́ко.
и҆зы́иде дх҃ъ и҆ ста̀ пред̑ гм҃ъ и҆ рече.
аз̑ прельщꙋ̀ е҆го, е҆мꙋже г҃ь в꙽ чемъ рече прельсти́ши.
и҆ то́и ѿвѣща̀.
ѿи҆дꙋ и҆ бꙋ́дꙋ дх҃ъ л꙽жи́въ въ ѹ҆ста̀ всм̑ѣ прро̑҇комъ е҆го·

Рече же г҃ь прельсти́ши л̂и и҆ премо́жеши л̂и, и҆зы́иди и҆ сътворѝ та́ко·

И҆ нн҃ѣ ѹ҆бо с̂е г҃ь дадѐ дх҃ъ л꙽жи́въ въ ѹ҆ста̀ всѣмъ про̑҇рком꙽ твои́мъ си́мъ.
и҆ г҃ь гл҃алъ е҆сть ѻ҆ тебѣ̀ ѕло̀.
и҆ пристꙋпи́ же седекїѧ сн҃ъ ханаа́на.
и҆ ѹ҆да́ри михе́ю в лани́тꙋ.
и҆ рече е҆мꙋ кои́мъ пꙋтем̑ про́иде дх҃ъ гн҃ь ѿ мене е҆же гл҃ати тебѣ·

Рече же михе́ѧ.
т̂ы то̀ ѹ҆́зриши въ дн҃ь ѻ́нъ.
когда̀ входѧ́щъ бꙋ́деши къ ло́жницѣ.
ѿ ложница да ѹ҆кры́ешисѧ.
повелѣ́ же цр҃ь і҆и҆л҃евъ гл҃ющи възми́те михе́ю и҆ веди́те е҆го къ и҆м꙽ми́рꙋ нача́лникꙋ гра́да.
и҆ къ и҆а́сꙋ кн҃ѕю сн҃ꙋ цр҃евꙋ.
и҆ гл҃ите сїѧ гл҃етъ цр҃ь.
поста́вите того в꙽ темни́цꙋ.
и҆ дади́те е҆мꙋ хлѣ́ба ма́ло, и҆ воды̀ по ѻ҆скꙋ́дꙋ до́ндеже ѻ҆бращꙋсѧ в꙽ ми́рѣ рече же михе́ѧ.
а҆́ще ѻ҆брати́шисѧ въ ми́рѣ.
нѣ́сть г҃ь гл҃алъ мнѣ̀, и҆ рече·

Слы́шите вс̂и лю́дїе.
того ради в꙽зыиде цр҃ь і҆и҆л҃евъ, и҆ ѻ҆сафат̑ цр҃ь і҆ѹ́динъ въ рамо́ѳ꙽, и҆ галаа́дъ·

Рече же цр҃ь і҆и҆л҃евъ къ и҆ѻ҆сафа́тꙋ.
пременѝ на́ мѧ ри́зы твоѧ̀.
и҆ та́ко къ ѻ҆полче́нїю и҆дꙋ̀.
ты же ѻ҆блеци́сѧ в ри́зы моѧ̀.
премени же цр҃ь і҆и҆л҃евъ ри́зы и҆́де къ бра́ни·

Цр҃ь же си́рьскїи повелѣ̀ вожем̑ ко́н꙽никъ своих̑ гл҃ющи.
не ѻ҆полча́итесѧ проти́вꙋ ме́ншаго, и҆ли проти́вꙋ бо́льшаго.
то́кмо проти́вꙋ само́го цр҃ѧ і҆и҆л҃ева.
и҆ бы́сть е҆гда ви́дѣша нача́лницы ко́н꙽ником̑ и҆ѻ҆сафа́та, гл҃аша цр҃ь і҆и҆л҃евъ ес̑҇ се́и.
и҆ ѻбыидо́ша е҆го вою́юще.
і҆ѻ҆сафат̑ же възопѝ къ г҃ꙋ.
и҆ г҃ь послꙋша е҆го и҆ ѻ҆брати и҆хъ ѿ него.
и҆ бы́сть е҆гда б̂о ви́дѣша вое҆во́ды ко́нникъ ꙗ҆́ко не бы́сть цр҃ь і҆и҆л҃евъ.
ѻ҆ста́виша е҆го.
слꙋчи́ же сѧ да е҆ді́нъ ѿ людїи стрѣлцꙋ не вѣдꙋщи и҆спꙋстѝ и҆ поразѝ црѧ і҆и҆л҃ева промежꙋ въздыха́нїѧ, и҆ пан꙽цы́рѧ и҆ ѻ́нъ под̑ча́шемꙋ свое҆мꙋ рече.
ѻ҆братѝ рꙋ́кꙋ твою̀ і҆ и҆зведѝ м̂ѧ ѿ бра́ни ꙗ҆́ко пораже́нъ е҆смь.
и҆ сконча́но е҆сть ѻ҆полченїе в꙽ дн҃ь то́и, и҆ цр҃ь і҆ил҃евъ б̂ѣ стоѧ̀ в꙽ колесни́цы свое́и.
проти́вꙋ сирїѻм̑ даж̑ до́ вечера и҆ ѹм̑ре заходѧщꙋ слн҃цꙋ·

Глв̑҇а, ѳ҃і·

Възврати́ же сѧ и҆ѻ҆сафа́тъ цр҃ь і҆ѹ́динъ въ до́мъ сво́и ми́рно въ і҆ерс̑҇лимъ.
е҆гоже срѣтѐ е҆вꙋ̀ сн҃ъ а҆на́нїи.
ви́дѧщаго и҆ рече к немꙋ.
нечести́вꙋ л̂и дае́ши по́мощь.
и҆л̂и ненави́димаго ѿ г҃а дрꙋжбꙋ съклада́е҆ши·

И҆ рече е҆мꙋ і҆ѹ́е, сего ра́ди не бы́сть на́ тѧ гнѣвъ гн҃ь.
ꙗ҆ко и҆́на бл҃га дѣла ѻ҆брѣте́на сꙋть в꙽ тебѣ̀.
занѐ ѿѧ́лъ е҆си кꙋми́ры ѿ зем̑лѧ̀ і҆ѹ́дины·

І҆ и҆спра́вилъ е҆си срд̑це твоѐ възыска́ти г҃а б҃а ѿц҃ъ твои҆х꙽·

И҆ всели́сѧ ѹ́бо и҆ѻ҆сафат̑ въ і҆ерс̑҇лі́мѣ.
па́ки же и҆зыиде к лю́демъ ѿ вирсавїи даже до горы̀ е҆фрѣмлѧ.
и҆ възвратѝ и҆хъ къ г҃ꙋ б҃ꙋ ѿц҃ъ свои҆хъ·

И҆ поста́ви же сꙋдїѝ земли въ всѣхъ гра́дѣхъ і҆ѹ́диныхъ запа́систыхъ по кое҆мꙋждо мѣстꙋ.
и҆ повелѣ сꙋдїам̑ ви́дите рече чт̂о творитѐ.
не б̂о чл҃ческїи сътвори́те сꙋдъ, н̂о гн҃ь.
и҆ чт̂о е҆ли́ка же сꙋ́дите, въ ва́съ преи҆збꙋдетъ·

И҆ да бꙋ́детъ стра́хъ гн҃ь с ва́ми при́сно.
и҆ съ любле́нїемъ всѧ твори́те·

Нѣсть б̂о пред̑ гм҃ъ бм҃ъ нашимъ безако́нїе.
ниже дивле́нїѧ лицꙋ̀.
ни прїѧ́ти м꙽зды̀·

Въ і҆ерс̑҇ли́мѣ же поста́ви и҆ѻ҆сафа́тъ левѷты и҆ сщ҃енницы, и҆ нача́лники ѻ҆би́телемъ ѿ і҆и҆л҃ѧ.
да сꙋдъ и҆ ве́щ꙽ гн҃ю сꙋ́дѧтъ жи́телемъ въ і҆ерс̑҇лі́мѣ повелѣ же и҆мъ гл҃ющи.
та́ко дѣлаи҆те въ стра́сѣ гн҃и, и҆ вѣрнѣ, и҆ срд̑цемъ съвръше́нымъ·

Всѧ́кꙋю вещь и҆же прїидетъ к ва́мъ бра́тїи ва́шихъ.
и҆же ѻ҆бита́ютъ въ́ градѣхъ и҆хъ.
промежꙋ кро́вїю кро́вь гдѣ̀ коли́же въпроше́нїе бꙋдетъ ѿ зако́на ѿ за́повѣди.
ѿ чи́новъ ѿ ѻ҆правда́нїи покажи́те и҆мъ да не съгрѣша́ютъ гв҃и.
и҆ не прїидетъ ꙗ҆́рость на ва́съ и҆ на бра́тїю ва́шꙋ.
та́ко б̂о дѣ́лающе не съгрѣшитѐ.
а҆марїѧ́ же сщ҃енникъ а҆рхїе҆ре́и ва́ш꙽.
сїи же къ б҃ꙋ пред̑стоѧ́ти пред̑ста́нет̑·

И҆ па́ки завадїѧ сн҃ъ и҆зма́ель.
и҆же е҆сть во́жъ въ домꙋ̀ і҆ѹ́динѣ, и҆же къ цр҃евꙋ чи́нꙋ пред̑стои́тъ.
и҆ кни́жники левѷты пред̑ ва́ми, ѹ҆крѣпи́тесѧ и҆ дѣла́ите любѧ́щи, и҆ бꙋдетъ г҃ь с ва́ми въ бл҃гихъ·

Глв̑҇а, к҃·

По си́х же прїидо́ша сн҃ове моа́вли, и҆ сн҃ове а҆м꙽мо́ни, и҆ с ни́ми ѿ а҆м꙽мони́тъ, къ и҆ѻ҆сафа́тꙋ на ѻ҆полче́нїе, прїидо́ша же по слы̀ и҆ сказа́ша и҆ѻ҆сафа́тꙋ гл҃ющи.
и҆де́тъ проти́вꙋ тебѐ вели́ко мно́жество ѿ тх̑ѣ мѣстъ и҆же замо́рїѧ сꙋть и҆ ѿ сѵрїѧ.
и҆ с̂е състо́ѧтсѧ въ а҆сан꙽ѳама́рѣ и҆же е҆сть и҆е҆н꙽га́д꙽ди.
и҆ѻ҆сафа́тъ же стра́хомъ ѹ҆страше́нъ, всего себѐ въдасть къ моле́нїю г҃а.
и҆ проповѣда по́стъ въ все́и і҆ѹ҆де́и·

И҆ собра́нъ же е҆сть і҆ѹ́да къ моле́нїю г҃а.
н̂о и҆ вс̂и ѿ посадовъ свои҆хъ прїидо́ша къ ѹ҆моле́нїю е҆го·

Є҆гда́ же ста́ше и҆ѻ҆сафа́тъ въ среди наро́да і҆ѹ́ды въ і҆ерс̑҇лі́мѣ в домꙋ̀ гн҃и предъ дворо́мъ скѷнїи, и҆ рече·

Ги҃ бж҃е ѿц҃ъ нашихъ, не ты̀ л̂и е҆си б҃ъ на нб҃си го́рѣ.
и҆ властвꙋ́еши всѣми црс̑҇твы ꙗ҆зы́къ.
и҆ в рꙋкꙋ твою е҆сть крѣпость и҆ си́ла.
никто́же тебѣ мо́жетъ сꙋпроти́витисѧ, ни л̂и ты̀ е҆си б҃ъ нашъ и҆скорени́выи вс̂ѧ живꙋщаѧ в землѝ се́и, предъ людмѝ твои́ми і҆и҆л҃емъ·

И҆ да́лъ е҆си е҆ѧ̀ сѣмени а҆вра́млю възлю́бленомꙋ твое҆мꙋ въ вѣки.
и҆ всели́ша же сѧ на не́и, и҆ ѹ҆строи́ша в не́и ст҃ительство и҆́мени твое҆мꙋ гл҃ющи·

А҆ще нападꙋтъ на́ ны ѕла́ѧ.
мечь и҆ сꙋд꙽ и҆ гꙋби́тельство и҆ гла́дъ, ста́немъ предъ до́момъ симъ пред̑ тобо́ю, ꙗ҆́ко възва́но е҆сть и҆́мѧ твое в домꙋ̀ сем̑ и҆ възопїемъ к тебѣ̀.
ѿ ско́рбеи нашихъ, и҆ ѹ҆слы́ши и҆ сп҃си насъ·

И҆ нн҃ѣ ѹ҆бо се сн҃ове а҆м꙽мони, и҆ моавли, и҆ гора̀ сеи́ръ, сквозе нѧ́же не и҆зво́лилъ е҆си і҆и҆л҃ю да проидꙋтъ, когда и҆схожа́хꙋ ѿ е҆гѷпта, н̂о ѹ҆клони́шасѧ ѿ ни́хъ, и҆ не ѹ҆би́ша их̑ и҆ с̂е сїи ѿ сꙋпроти́въ дѣлаю҆тъ, и҆ насилꙋ́ютсѧ и҆згони́ти насъ ѿ ѻ҆дръжа́нїѧ нашего е҆же преда́лъ е҆си намъ бж҃е нашъ·

Сего ради не сꙋди́ши и҆хъ, въ насъ б̂о нѣсть толи́ка крѣпость, да мо́жемъ семꙋ̀ мно́жествꙋ съпроти́вити.
е҆же нападѐ на́ ны, н̂о и҆ не вѣмы чт̂о съдѣла́ти, и҆́мамы и҆мъ, н̂о ѻ҆́чи наши ѹ҆правлѧ́емъ к тебѣ̀, и҆ вс̂ѧ і҆ѹ҆де́а стоѧ́ше пред̑ гм҃ъ, и҆ ча́да и҆хъ, и҆ же́ны и҆хъ·

Бѣ же и҆ѻ҆зїи́ль сн҃ъ заха́рїи҆нъ, сн҃овъ ване́ѧ, сн҃овъ е҆гїиль сн҃овъ маѳа́нїѧ левѷтина, ѿ сн҃овъ а҆са́фовъ, на не́мже бы́сть дх҃ъ гн҃ь въ среди наро́да и҆ рече, вънмите весь і҆ѹ́да, і҆ и҆же ѻ҆бита́ете въ і҆ерс̑҇ли́мѣ.
и ты̀ цр҃ь і҆ѻ҆сафа́тъ·

Сїѧ рече г҃ь ва́мъ, не хо́щꙋ не бо́итесѧ ни ѹ҆жаса́итесѧ сего мно́жества наро́да.
нѣсть б̂о ва́ше ѻ҆плъче́нїе н̂о бж҃їе.
заѹ́тра и҆дѣте проти́вꙋ их̑, и҆сходѧ́щи б̂о сꙋть по щѣ́ли и҆́менем꙽ а҆ви́съ, и҆ ѻ҆брѧ́щете и҆хъ на вер꙽хъ пото́ка и҆же е҆сть противꙋ пꙋстыни і҆е҆рꙋи́ль.
не б̂о бꙋдетъ ва́мъ и҆же вое҆ва́ти, н̂о то́кмо съ ѹ҆пова́нїемъ сто́ите, и҆ ѹ́зрите по́мощъ гн҃ю на ва́съ.
і҆ѹ́да і҆ерс̑҇лі́мъ не боитесѧ ни ѹ҆жаса́итесѧ, заѹ́тра и҆зыитѝ проти́вꙋ и҆хъ, и҆ г҃ь с ва́ми·

И҆ѻ҆сафа́тъ ѹ҆бо і҆ѹ́да и҆ вс̂и ѻ҆бита́ющеи въ і҆ерс̑҇лі́мѣ падо́ша просте́рти на́ землю пред̑ гм҃ъ и҆ поклони́шасѧ гв҃и·

Па́ки левѷти ѿ сн҃овъ каа́ѳовъ въста́ша, и҆ ѿ сн҃овъ кор꙽ре́ѻвъ хвали́ти г҃а б҃а і҆и҆л҃ева гла́сомъ великомъ въ высотꙋ̀.
и҆ ѹ́трѣ въста́ша ра́но і҆ и҆зыдо́ша въ пꙋсты́ню ѳекꙋ́е.
и҆ вънегда и҆сходи́ти и҆мъ, ста́въ и҆ѻ҆сафа́тъ по́средѣ и҆хъ и҆ възопѝ и҆ реч̑҇.
ѹ҆слы́шите м̂ѧ мꙋжи і҆ѹ́дины, и҆ всѝ ѻ҆бита́ющїи въ і҆ерс̑҇лі́мѣ.
вѣрꙋите въ г҃а б҃а вашего, и҆ ѹ҆вѣри́тесѧ, вѣрꙋите про̑҇рком꙽ е҆го, и҆ вс̂ѧ прїидꙋтъ преспѣва́ющи, и҆ съвѣтова̀ съ людмѝ, и҆ поста́ви ѱал꙽мопѣвци, и҆ хвалѧ́щихъ и҆сповѣда́тисѧ и҆ хвали́ти, ст҃аѧ, вънегда̀ и҆зыити проти́вꙋ си́лы·

И҆ гл҃ахꙋ и҆сповѣда́итесѧ гв҃и ꙗ҆́ко бл҃гъ ꙗ҆́ко въ вѣки млс̑҇ть е҆го.
е҆гда́ же нача́ша хвале́нїѧ і҆ и҆сповѣда́нїѧ, ѻ҆братѝ г҃ь вое҆ва́ти сн҃овомъ а҆м꙽мо́нимъ на моа́ва и҆ горꙋ̀ сїи́ръ.
и҆зъшед̑шихъ да ѻ҆полча́ютсѧ проти́вꙋ і҆ѹ́ды, и҆ пораже́ни сꙋть.
и҆же сн҃ове а҆м꙽мо́ни и҆ моа́вли въста́ша сꙋпроти́вꙋ ѻ҆бита́ющих̑ въ горѣ̀ сїи́ри, да побїют̑ и҆х꙽ и҆ съкрꙋшат̑, и҆ ꙗ҆́ко сконча́ша на ѻ҆бита́ющих̑ въ сїи́ре·

Па́ки ѻ҆браще́ни проме́жꙋ собо́ю и҆сѣчахꙋсѧ ранами·

І҆ѹ́да же прїиде на созира́нїе ѿ пꙋсты́ни, и҆ възрѣ̀ и҆ ви́дѣ мно́жество, и҆ с̂е вс̂и ме́ртвы па́дше на́ землю.
ниже бы́ти кое҆го и҆же сме́рти мо́глъ ѹ҆и҆тѝ·

І҆ и҆зы́иде и҆ѻ҆сафа́тъ и҆ вс̂и лю́ди с ни́мъ къ и҆знѧ́тїю и҆ съвлаче́нїю ме́ртвыхъ·

ѻ҆брѣто́ша же скота̀ мно́го и҆ ѻ҆дежа, и҆ коры́сти, и҆ съсꙋды предража́иша, и҆ въсхити́ша въ нихъ·

И҆ бы́ша събира́юще коры́сти, по трѝ дн҃и, ꙗ҆́ко многи бѧ́хꙋ.
дн҃ѧ же четве́ртаго собра́хꙋсѧ въ ѹ́доль блс̑҇венїѧ.
и҆б̂о тꙋ̀ блс̑҇виша г҃а·

Сего ра́ди прозва́ша мѣсто т̂о ѹ́доль блс̑҇венїа, даже до сего дн҃е, ѻ҆братишасѧ вс̂и мꙋжи і҆ѹ́дины, въ і҆ерс̑҇ли́мъ.
и҆ѻ҆сафа́тъ во́жъ и҆хъ съ весе́лїемъ вели́кимъ·

Того ради чт̂о да́сть им̑ г҃ь ра́дость ѿ вра́гъ и҆х꙽ и҆ внидо́ша же въ і҆ерс̑҇ли́мъ съ ѱалтырѧми и҆ гꙋсльми и҆ трꙋба́ми въ до́мъ гн҃ь.
и҆ бы́сть стра́хъ гн҃ь на вс̂ѧ црс̑҇тва зе́м꙽скаѧ, е҆гда слы́шати им̑ ꙗ҆́ко ѻ҆полъчи́сѧ г҃ь сꙋпроти́вꙋ враго́в꙽ і҆и҆л҃евыхъ·

Ѹ҆поко́и же сѧ црс̑҇тво и҆ѻ҆сафатово.
и҆ възда́сть е҆мꙋ г҃ь ми́ръ по ѻ҆́крс̑҇тъ.
и҆ црс̑҇твова̀ и҆ѻ҆сафат̑ на і҆ѹ҆де́и сы́и.
л҃е лѣтъ, е҆гда̀ цр҃ьство прїѧ̀·

И҆ к҃е, лт̑ѣ, црс̑҇твова̀ въ і҆ерс̑҇ли́мѣ·

І҆ и́мѧ ма́тери е҆го а҆зꙋ́ва дщ̂и сал꙽лїи́на.
и҆ хожда́ше въ пꙋти ѿц҃а свое҆го а҆́с꙽сы·

И҆ не ѹ҆клони́сѧ ѿ него творѧ́ше и҆же ѹ҆го́дна бѧ́хꙋ пред̑ гм҃ъ.
ѻ҆ба́че вы́шнѧѧ не и҆зѧ́лъ, и҆ е҆ще лю́дїе не ѹ҆пра́виша срд̑ца свое҆го къ г҃ꙋ б҃ꙋ ѿц҃ъ свои҆хъ.
и҆ про́чаѧ же дѣѧ́нїѧ и҆ѻ҆сафатова прь́ваѧ и҆ послѣднѧѧ, с̂е пи́сана сꙋть въ словесех̑ і҆ѹ́ѧ сн҃а а҆нанїи́на, и҆же написа̀ кни́гꙋ цр҃еи і҆и҆л҃евъ·

И҆ посемъ нача̀ прїѧтельство и҆ѻ҆сафа́тъ, цр҃ь і҆ѹ́динъ.
съ ѻ҆хозїею цр҃емъ і҆и҆л҃евым̑.
и҆ ѻ҆нъ безаконова̀.
сего ра́ди, е҆же сътворѝ ѿи҆тѝ къ немꙋ, да сътворѧ́тъ кораблѝ и҆же и҆дꙋтъ въ ѳарси́съ.
и҆ сътвори́шаж̑ во́иско морско́е въ а҆зїѻ́нъ гаверъ·

Про̑҇рчествова́ же е҆лїезе́ръ сн҃ъ додїа́ ѿ мареси́са на и҆ѻ҆сафа́та гл҃ющи, и҆же и҆мѣлъ е҆си любо́вь съ ѻ҆хозїею поразѝ г҃ь лю́ди твоѧ̀.
и҆ съкрꙋшѝ кораблѧ̀ твоѧ̀.
и҆ не можа́ше пои҆тѝ въ ѳарси́съ·

Глв̑҇а, к҃а·

И ѹ҆спе і҆ѻ҆сафат̑ съ ѿц҃ы свои҆ми, и҆ погребе́нъ е҆сть с ни́ми въ́ градѣ двд̑вѣ.
црс̑҇твова же і҆ѻ҆ра́мъ сн҃ъ е҆го с него̀ мѣ́сто.
и҆же и҆мѣ бра́тїю сн҃ы і҆ѻ҆сафа́товы ѿц҃а свое҆го, ѕ҃. а҆зарїю, і҆ и҆и́лѧ, и҆ заха́рїю, и҆ а҆за́рїю, и҆ ми́хаи҆лѧ, и҆ сафа́тїю·

Вс̂и сїи сн҃ве, і҆ѻ҆сафа́товы цр҃ѧ і҆ѹ́дина и҆ да́сть же и҆мъ ѿц҃ъ их̑ мно́ги да́ры, сребра̀ и҆ зла́та.
и҆ ѻ҆рꙋжїѧ съ гра́ды запаси́стыми въ і҆ѹ҆деѝ.
и҆ црс̑҇тво же предаде і҆ѻ҆ра́мꙋ, того̀ ради и҆же се́й бысть прьве́нецъ.
и҆ воста́ же і҆ѻ҆рам̑ на црс̑҇тво е҆го.
и҆ ѹ҆крѣпи́сѧ и҆збѝ всю̀ братїю свою̀ мече́мъ.
и҆ нѣ́кои҆хъ ѿ нача́лникъ і҆ѹ́динъ·

Трѝдесѧт̑ и҆ дво́ю лѣтъ сыи і҆ѻ҆ра́мъ.
е҆гда̀ нача̀ црс̑҇твова́ти.
и҆ ѻ́смь лт̑ѣ црс̑҇твова въ і҆ерс̑҇ли́мѣ, и҆ ходи́ же въ пꙋте́хъ црс̑҇тва і҆и҆л҃ева, ꙗ҆́ко съдѣ́ла домъ а҆ха́вль.
дщ̂и бо а҆ха́влѧ бысть жена̀ е҆го, и҆ сътворѝ ѕло́е пред̑ гм҃ъ, и҆ не хотѣ же г҃ь и҆скорени́ти до́мꙋ двд҃ва ра́ди завѣта и҆же завѣща̀ съ дв҃дом̑, и҆ ꙗ҆коже да да́сть е҆мꙋ свѣти́лникъ, и҆ сн҃омъ е҆го въ всѧ́ко вре́мѧ·

Въ дн҃ех̑ ѻ҆́нѣхъ ѿвръжесѧ е҆до́мъ не бы́ти под̑рꙋ́ченъ і҆ѹ́дѣ, и҆ поста́ви себѣ̀ цр҃ѧ, е҆гда же прои́де і҆ѻ҆ра́мъ съ нача́лники свои҆ми и҆ всимѝ ко́н꙽ники и҆же бѣхꙋ с ним̑, и҆ воста но́щїю и҆ пораѕѝ е҆до́мъ и҆же ѻ҆бы́иде ѻ҆́крс̑҇тъ е҆го·

И҆ нача́лникъ колесни́чныхъ е҆го, и҆ ѿбѣго́ша лю́дїе в꙽ селе́нїѧ и҆хъ, и҆ ѿвръжесѧ е҆до́мъ, да не бꙋдет̑ под̑ вла́стїю і҆ѹ́диною, даже до дн҃е сего̀·

Того б̂о вре́мени и҆ ло́вна ѿи҆дѐ да не бꙋдет꙽ под̑ рꙋкꙋ е҆го, занѐ ѻ҆ста́ви г҃а б҃а ѿц҃ь свои҆хъ.
н̂о наи҆паче се́и҆ вы́шнѧа съдѣлалъ е҆сть въ́ градѣхъ і҆ѹ́диных̑·

и҆ блꙋди́ти сътворѝ ѻ҆битающих̑ въ і҆ерс̑҇лимѣ·

И҆ прельсти і҆ѹ́дꙋ, и҆ прїиде к немꙋ писа́нїе ѿ и҆лїѝ про̑҇рка гл҃ѧ.
сїѧ рече г҃ь б҃ъ дв҃да ѿц҃а твое҆го.
ꙗ҆́ко не ходи́лъ е҆си в пꙋтѝ і҆ѻ҆сафа́та ѿц҃а твое҆го, и҆ въ пꙋтехъ а҆́ссы цр҃ѧ і҆ѹ́дина.
н̂о ходи́лъ е҆си въ пꙋтехъ цр҃еи і҆и҆л҃евыхъ.
и҆ блꙋди́ти сътворилъ е҆си і҆ѹ́дꙋ.
и҆ ѻ҆бита́ющихъ въ і҆ерс̑҇лимѣ, ꙗ҆́ко съблꙋ́ди до́мъ а҆ха́вовъ.
и҆ бра́тїю твою̀ дом̑ ѿц҃а твое҆го, лꙋчши тебѐ поби́лъ е҆си·

Се г҃ь порази́тъ т̂ѧ ꙗ҆́звою вели́кою съ люд̑ми твои҆ми·

И҆ сн҃овъ твои҆хъ, и҆ же́нъ твои҆хъ.
и вс̂ѧ ѹ҆крашенїѧ твоѧ̀.
ты́ же и҆знемо́жеши строптивою бо́лезнїю чрева.
до́ндеже и҆зыидꙋтъ внꙋтрънѧѧ твоѧ̀ ѿ дн҃їи до дн҃и, и҆ въздви́же г҃ь сꙋпроти́вꙋ на і҆ѻ҆ра́ма и҆ноплеме́нники и а҆ра́вовъ, и҆ мꙋ́рины, ѿ е҆фїѻ́пїѧ.
и҆ възыидо́ша въ землю і҆ѹ́динꙋ и҆ премого́ша е҆ѧ̀, и҆стръго́ша же вс̂ѧ съкро́вища и҆же ѻ҆брѣто́ша въ домꙋ цр҃евѣ.
найпаче же сн҃овъ е҆го, и҆ дще́ри е҆го и҆ жены е҆го·

И҆ не ѻ҆ста́сѧ е҆мꙋ сн҃ъ ток̑҇мо і҆ѻ҆хаз̑ меншїи сн҃овъ е҆го.
и҆ над̑ всѣми си́ми пораѕѝ е҆го г҃ь.
чре́ва бо́лезнїю неи҆сцѣ́лною.
е҆гда же ѿ дн҃їи въ дн҃ь, и҆ е҆гда̀ прїиде час̑҇ дн҃їи.
дв̂а дн҃и і҆ и҆зы́де чре́во е҆го съ бо́лезнїю, и҆ ѹ́мре въ раз꙽слабленїи лю́томъ·

И҆ не сътвори́ша е҆мꙋ лю́ди по ѻ҆бы́чаю сож꙽женїа слꙋжбы ꙗ҆ко творѧхꙋ большим̑ своим̑, и҆ л҃в, лѣтъ бысть е҆гда̀ црс̑҇твова́ти нача̀.
и҆ и҃, лѣтъ црс̑҇твова̀ въ і҆ерс̑҇ли́мѣ.
ходи же непра́во и҆ погребо́ша е҆го въ́ градѣ дв҃двѣ.
ѻ҆баче не въ гро́бѣ црс̑҇комъ·

Глв̑҇а, к҃в·

Поста́ви же ѻ҆бита́ющїи і҆ерс̑҇лі́мꙋ ѻ҆хозїю сн҃а е҆го ме́ншаго цр҃ѧ в него мѣсто.
всѝ б̂о бо́лше род̑нїи и҆же прежде е҆го бѣхꙋ ѹ҆би́ша разбо́иницы а҆рав̑҇скїѝ и҆же напада́хꙋ гра́ды црс̑҇твова ѻ҆хозїѧ сн҃ъ і҆ѻ҆рамовъ цр҃ь і҆ѹ́дин̑҇, м҃в, лѣтъ.
бысть ѻ҆хозїѧ е҆гда̀ црс̑҇твовати нача̀.
и҆ е҆ді́но лѣто цр҃ьствова въ і҆ерс̑҇ли́мѣ·

І҆ и́мѧ мт҃ри е҆го гоѳолїѧ дщ̂и марїѧ̀.
н̂о и҆ се́й ходи́лъ е҆сть по пꙋтѝ до́мꙋ а҆ха́влѧ.
мт҃и б̂о е҆го б̂ѣ совѣща́ющи да грѣшит̑ и҆ сътвори́ лꙋка́вое пред̑ гм҃ъ, ꙗ҆́ко домъ а҆ха́вовъ.
сїи б̂о быша е҆мꙋ совѣтницы·

По см҃рти же ѿц҃а е҆го въ погꙋбленїе е҆го.
ходи б̂о в꙽ совѣте их̑.
и҆ по́иде съ і҆ѻ҆ра́момъ сн҃омъ а҆хавовым̑ цр҃ем̑ і҆и҆л҃вым̑ на́ брань.
проти́вꙋ азайлю цр҃ѧ сѷрьска въ рамо́ѳъ галаад̑скїи.
и҆ ѹ҆рани́ша стрелъцы і҆ѻ҆ра́мовы.
и҆ възвратисѧ и҆ѻ҆ра́мъ да и҆сцѣлит̑сѧ въ і҆е҆срае҆ль ѿ ра́нъ.
и҆́миже рани́ша ег̑҇ сѷрѧне в рамо́ѳѣ.
внегда̀ бра́тисѧ е҆мꙋ съ а҆заи́лемъ цр҃емъ сѷръским̑·

Ѡ҆хозїѧ же сн҃ъ і҆ѻ҆рамль цр҃ь і҆ѹ́дин̑҇.
сни́де да посѣтитъ і҆ѻ҆ра́ма сн҃а а҆хаа́зова въ і҆е҆срае҆ль разболѣ бо сѧ.
во́лѧ б̂о бысть бж҃їѧ проти́вꙋ ѻ҆хозїѝ.
да прїиде къ і҆ѻ҆ра́мꙋ.
и҆ е҆гда̂ и҆зыити е҆мꙋ, и҆зы́иде с ни́мъ і҆ѻ҆рам̑ противꙋ і҆и҆ѹ́ѧ сн҃а а҆месїина.
е҆гоже пома́за г҃ь въ домъ а҆хавовъ.
и҆ бысть ꙗ҆́ко ѿмъсти і҆и҆ѹ́е домꙋ а҆ха́влю, и҆ ѻ҆брѣте нача́лникы і҆ѹ́дины.
и҆ сн҃ов̑҇ и҆ бра́тїю ѻ҆хозїинꙋ, и҆ слꙋжащихъ ѻ҆хозїѝ и҆ ѹ҆бѝ их̑·

И҆ ѹ҆бѝ і҆и҆ѹ́е и҆ѻ҆ра́ма и҆ бѣжа ѻ҆хозїѧ.
и҆ рече і҆и҆ѹ́е, е҆же възыска́ти ѻ҆хозїю, и҆ ꙗ҆́ша е҆го врачꙋ́ющасѧ в꙽ самарїи.
и҆ приведоша е҆го къ і҆ѹ́еви, и҆ ѹ҆бѝ е҆го, и҆ погребо́ша е҆го, рѣша б̂о ꙗ҆́ко сн҃ъ і҆ѻ҆сафа́товъ е҆сть.
и҆же взыска̀ г҃а всѣмъ срд̑цем꙽ е҆го.
и҆ не бысть в домꙋ̀ ѻ҆хозїине крѣпости ѻ҆ црс̑҇тве е҆же цр҃емъ быти кое҆мꙋ̀·

И҆ гоѳолїѧ мт҃и ѻ҆хозїина ви́дѣ ꙗ҆́ко мр҃твъ бысть сн҃ъ еѧ̀.
і҆ и҆зги́бе сѣмѧ цр҃ьско в꙽ домꙋ̀ і҆ѹ́дине·

И҆ѻ҆саве́ѳъ же дщ̂и цр҃ева въста́вши та́и, и҆ ѹ҆кра́де і҆ѻ҆а́сса сн҃а ѻ҆хозїина ѿ среди сн҃овъ цр҃ьскихъ е҆гда̀ ѹ҆бивахꙋ и҆хъ·

И҆ съкры е҆го с кормилице́ю е҆го в хра́мѣ постелнм̑ѣ·

А҆ и҆ѻ҆савеѳ̑҇ и҆же съкры е҆го б̂ѣ дщ̂и цр҃ѧ и҆ѻ҆рам̑лѧ·

Сестра̀ ѻ҆хозїина, жена же і҆ѻ҆да́ѧ а҆рхїере́ѧ.
и҆ того ради гоѳолїѧ не ѹ҆бѝ е҆го·

И҆ бысть с ни́ми в꙽ домꙋ бж҃їи съкрытъ, ѕ҃, лѣтъ.
и҆ црс̑҇твова̀ гоѳолїѧ на землѝ въ лѣта тїѝ·

Глв̑҇а, к҃г·

Въ лѣто же сед̑мое, ѹ҆крѣпи́сѧ і҆ѻ҆да́и.
прїѧтъ сот̑ники и҆ а҆зарїю и҆же е҆сть сн҃ъ і҆ѻ҆роа́мль, і҆ и҆зма́елѧ сн҃а і҆ѻ҆на́нѧ, и҆ а҆за́рїю сн҃а ѻ҆ви́дова, и҆ а҆масїю сн҃а а҆даи҆е҆ва, і҆ е҆лисафа́на сн҃а захарїина, и҆ внїиде с ни́м꙽ в до́мъ гн҃ь·

И҆же ѻ҆бходѧще і҆ѹ҆де́ю собрахꙋ левѷты ѿ всѣхъ гра́довъ и҆ѹ́диныхъ, и҆ нача́лницы ѻ҆би́телеи і҆и҆л҃евых̑·

И҆ прїидоша въ і҆ерс̑҇лим̑, и҆ завѣщаша вс̂и събра́вшисѧ, завѣт꙽ цр҃ьскїи, в꙽ домꙋ̀ бж҃їи и҆ показа и҆мъ цр҃ѧ, рече же к нимъ і҆ѻ҆да́и, с̂е сн҃ъ цр҃евъ да въцр҃итсѧ.
ꙗ҆ко гл҃алъ е҆сть г҃ь на домъ двд҃въ.
и҆ с̂е е҆сть слово е҆же сътвори́сте нн҃ѣ.
тре́тїа часть ѿ васъ да и҆зыидетъ въ сꙋбо́тꙋ сщ҃ен꙽никовъ и҆ левѷтовъ и҆ въ вра́та вход̑ныѧ.
и҆ третїѧ часть къ домꙋ̀ цр҃евꙋ, и҆ тре́тїѧ ча́сть къ вра́томъ сред̑ним.
и҆ вс̂и прочїи лю́дїе да бꙋдт̑ꙋ въ дворѣхъ до́мꙋ гн҃ѧ·

Никтоже и҆́нъ да вни́детъ въ до́мъ гн҃ь.

Токмо сщ҃ен꙽ницы и҆ левѷти і҆ и҆же слꙋжат̑ ѿ левѷтъ.
тїи то́кмо вни́дꙋтъ ꙗ҆́ко ѻ҆сщ҃ен꙽ни сꙋть, и҆ вс̂и про́чїи лю́дїе въздръжат̑ стра́жꙋ гн҃ю·

Левѷти же ѻ҆быидꙋтъ цр҃ѧ, и҆мѣющи е҆ді́нъ ко́ждо ѻ҆рꙋжїа своѧ въ рꙋкꙋ свое҆ю̀.
и҆ а́ще кт̂о въходѧщъ бꙋдет̑ въ цр҃ковъ да ѹ҆бїетсѧ.
и бꙋдꙋтъ же съ цр҃емъ въходѧ́щеи і҆ и҆сходѧщеи с ним̑ сътвори́ша б̂о левѷти и҆ весь і҆ѹ́да.
по вс̂ѧ и҆же повелѣ і҆ѻ҆да́и жрецъ.
и҆ прїѧ́ша кождо мꙋ́жы и҆же подъ ни́ми бѣ́хꙋ.
ѿ нача́ла сꙋботы, и҆ до и҆схода сꙋботы.
зане не разорѝ и҆ѻ҆дае жрец̑҇ слꙋ́жбы по всѧ̀ дн҃и ѹ҆чине́ное·

дасть і҆ѻ҆да́е сщ҃енникъ со́тникомъ, по чи́нꙋ поста́вленымъ, ме́чи и҆ щи́ты, и҆ бро́нѧ цр҃ѧ дв҃да ꙗ҆́же ѻ҆сщ҃а в домꙋ̀ гн҃и.
и҆ поста́ви же вс̂и лю́ди дръжа́щїи ме́чи ѻ́стры ѿ десны́а страны̀ цр҃кви, даже до лѣ́выѧ страны̀ цр҃кви ѻ҆лтарѧ̀ и҆ домꙋ цр҃ева ѻ҆крс̑҇тъ.
і҆ и҆зведо́ша сн҃а цр҃ева.
и҆ наложи́ша е҆мꙋ дїадимꙋ и҆ свѣдѣтельство зако́нꙋ и҆ поста́виша е҆го ц҃рем̑ и҆ пома́за е҆го і҆ѻ҆да́и жрецъ, и҆ сн҃ове е҆го и҆ возопи́ша е҆мꙋ и҆ реко́ша.
живѝ цр҃ю.
и҆же е҆гда̀ ѹ҆слы́ша гоѳолїѧ глас̑҇ людїи текꙋщих̑ і҆ и҆сповѣда́ющих̑ и҆ хвалѧ́щихъ цр҃ѧ.
и҆ вни́де къ цр҃ю въ цр҃квъ гн҃ю.
і҆ е҆гда же ви́дѣ цр҃ѧ стоа́ща на степе́ни е҆го восхо́да, начал̑҇ницы же и҆ народи ѻ́крс̑҇тъ е҆го.
всѝ лю́дїе зем̑стїи радꙋю҆щисѧ и҆ звꙋча́хꙋ трꙋ́бы.
и҆ пою́щих̑ въ ѻ҆рга́ны мꙋсикїю и҆ хвалѧ́щих̑ хва́лꙋ·

Растерзаж̑ ри́зы своа гоѳолїа и҆ възопї и҆ рече.
ловле́нїе ловленїе.
и҆зыиде же і҆ѻ҆да́и а҆рхїере́и къ сотникомъ и҆ нача́лникомъ во́иномъ рече им̑.
и҆зведѣте ю҆̀ во́нъ цр҃кви і҆ и҆зыидѣте въ слд̑ѣ е҆ѧ̀, и҆ да ѹ҆бїетсѧ внѣ̀ мечемъ.
повелѣ б̂о сщ҃ен꙽никъ да не ѹ́мретъ в꙽ домꙋ̀ гн҃и.
и҆ да́ша е́й поко́и на мало до́ндеже вънидо́ша въ вра́та ко́нник̑҇ до́мꙋ цр҃ева.
ѹ҆би́ша е҆ѧ̀ т̂ꙋ·

И҆ завѣща̀ и҆ѻ҆да́и завѣтъ проме́жꙋ е҆го всѣхъ лю́дїи и҆ цр҃ѧ.
даб̂ы бы́ли лю́дї гн҃ѧ·

И҆ внидо́ша же вс̂и лю́дїе землѧ̀ в꙽ до́мъ ваа́ловъ и҆ разориша е҆го, и҆ ѻ҆лта́ри е҆го і҆ и҆до́лы е҆го съкрꙋши́ша и҆ матѳа́на же жерца̀ ваа́лова ѹ҆би́ша̑ пред̑ ѻ҆лта́ремъ е҆го·

И҆ нача̀ і҆ѻ҆да́и жрецъ дѣ́ла въ домꙋ̀ гн҃и.
под̑ рꙋ́кꙋ сщ҃е́нниковъ и҆ левѷтовъ.
и҆ поста́ви повсѧ̀дн҃евное слꙋженїе жер꙽цевъ, и҆ левѷтовъ.
и҆́хже раздѣли дв҃дъ въ домꙋ̀ гн҃и, и҆ се́й принесе вс̂ѧсъж꙽женїѧ гв҃и.
ꙗ҆́ко пи́санно е҆сть въ зако́нѣ моѷсїѻ́вѣ·

Въ ра́дости и҆ пѣнїѝ, по расмотренїю двд҃вꙋ.
и҆ поста́виша же две́рники въ вра́тѣхъ до́мꙋ гн҃ѧ.
и҆ да не вни́дет̑ в ню̀ нечи́стъ въ всѧ́кои вещи·

И҆ прїѧ҆ша же сотъники и҆ крѣпкїѧ мꙋж́а, и҆ нача́лники людїи, и҆ всѝ лю́дїе землѝ.
и҆ сътвори́ша сни́ти цр҃ю ѿ до́мꙋ гн҃ѧ.
и҆ въни́де по́средѣ вра́тъ внꙋтрънихъ въ до́мъ цр҃евъ.
и҆ посади́ша е҆го на прс̑҇тлѣ цр҃ьстѣмъ·

И҆ възвесели́ша же сѧ вс̂и лю́дїе земъстїи.
и҆ град̑ ѹ҆поко́исѧ.
и҆ гоѳолїѧ ѹ҆бїена е҆сть мече́мъ·

Глв̑҇а, к҃д·

Сед̑мь лѣтъ б̂ѣ і҆ѻ҆а́съ е҆гда̀ црс̑҇твовати нача̀.
м҃ лт̑ѣ, црс̑҇твова̀ въ і҆ерс̑҇ли́мѣ.
и҆мѧж̑ мт҃ри е҆го савїѧ ѿ вирса́вїа.
сътвори́ же і҆ѻ҆а́съ ѹ҆годно пред̑ гм҃ъ, вс̂ѧ дн҃и і҆ѻ҆даа сщ҃енника.
и҆ поѧт̑ же себѣ̀ і҆ѻ҆да́и жены дв̂ѣ.
ѿ них̑же родѝ сн҃ы и҆ дще́ри·

И҆ посе́мъ възы́иде на срд̑це і҆ѻ҆а́сꙋ да ѹ҆кра́ситъ до́мъ гн҃ь.
и҆ собра̀ сщ҃ен꙽никы и҆ левѷты, и҆ рече и҆мъ·

Идѣте къ гра́дом̑ і҆ѹ́диным꙽.
и҆ соберите ѿ всего̀ і҆и҆л҃ѧ сребреники къ ѻ҆бновленїю цр҃кви б҃а на́шего, ѿ лѣта до лѣта.
пот꙽ща́н꙽но же т̂о сътвори́те.
левѷти же не потъща́шасѧ·

И҆ възва́ же цр҃ь і҆ѻ҆да́ѧ нача́лника и҆ рече е҆мꙋ.
почт̂о не принꙋжа́еши левѷтовъ е҆же принести ѿ і҆ѹ́ды и҆ ѿ і҆ерс̑҇ли́ма, и҆же поста́влено ес̑҇ ѿ моѷсїа раба̀ гн҃ѧ, ꙗ҆́ко собра̀ і҆и҆л҃ѧ въ скѷнїю свѣдѣнїѧ·

Гоѳолїѧ б̂о б̂ѣ нечести́ваѧ и҆ сн҃ове е҆ѧ̀ разори́ша до́мъ бж҃їи.
и҆ ѿ всѣхъ и҆же сщ҃ен꙽на бы́ша цр҃кви бж҃їи, ѹ҆красѝ и҆́ми кꙋми́ра·

И҆ повелѣ ѹ҆бо цр҃ь да сътворѧ́тъ ковче́гъ влага́нїе сребра̀ ѿ людїи.
и҆ да поста́вѧтъ близ̑ врат̑ гн҃ихъ и҆зъ внꙋ.
и҆ да повѣ́даютъ въ і҆ѹ҆де́и и҆ въ і҆ерс̑҇лимѣ.
и҆ да принесꙋт꙽ г҃ꙋ чт̂о поста́ви моѷсїи ра́бъ бж҃їи, над̑ всѣмъ і҆и҆л҃емъ въ пꙋсты́ни·

И҆ да́ша вс̂и нача́лницы, и҆ вс̂и лю́дїе.
и҆ вношахꙋ и҆ влага́хꙋ въ ковчегъ и҆же повелѣ̀ цр҃ь поста́вити г҃ꙋ, до́н꙽деже напо́лниша·

И҆ быс̑҇ е҆гда̀ принесоша ковчегъ, къ повеле́нымъ цр҃евымъ рꙋ́кама левѷт꙽скими·

И҆ ꙗ҆́ко вѣдѣхꙋ и҆же напо́лнисѧ сребра̀ ковчегъ, въхожда́ше пи́саръ цр҃евъ и҆ поста́вленыи великїи жрецъ, и҆ выбирали и҆с ковчега сре́бреники·

Паки ковчег̑҇ въноша́хꙋ къ мѣстꙋ е҆го, та́коже творѧхꙋ ѿ дн҃и до дн҃и, и҆ собра́ни ст̑ꙋ без̑чи́слены сре́бреники, и҆ возда́сть ѧ҆̀ цр҃ь і҆ѻ҆да́и жрецъ тм̑ѣ и҆же творѧ́хꙋ дѣла до́мꙋ гн҃ѧ, и҆ наи҆ма́хꙋ каменосѣч꙽ца, и҆ дре́водѣлѧ, да ѹ҆строѧ́ют̑ до́мъ гн҃ь, и҆ ковачѝ желѣ́зꙋ и҆ мѣди да ѹ҆крѣпи́тъ до́мъ гн҃ь, и҆ творѧ́хꙋ творѧщїи дѣла разꙋмно·

И҆ возводѧхꙋсѧ стѣны мно́гостїю дѣ́ла въ рꙋкꙋ и҆хъ, и҆ стро́иша до́мъ гн҃ь въ стоа́нїе пре́жнее е҆го, и҆ крѣп꙽ча́е т̂ꙋ стоѧ́ти сътвори́ша·

Є҆гда же съвръши́ша вс̂ѧ дѣла, принесо́ша пред̑ цр҃ѧ и҆ къ і҆ѻ҆да́ю про́чꙋю ча́сть сре́бреникъ, ѿ ни́хже сътворени быша сосꙋ́ды цр҃ковныѧ, сосꙋды въ слꙋженїе вс̂есож꙽женїа, и҆ кади́лницы и҆ прочаѧ сосꙋды зла́ты и҆ сребрѧны·

И҆ приноша́хꙋсѧ вс̂есож꙽женїѧ в до́мъ гн҃ь без꙽преста́ни вс̂ѧ дн҃и и҆ѻ҆да́ѧ·

И҆ състарѣ́ же сѧ и҆ѻ҆да́и по́лнъ дн҃їи, и҆ у́мре сы́и, р҃л, лѣтъ, при сконча́нїю е҆го.
и҆ погребо́ша е҆го въ́ градѣ двд҃вѣ съ цр҃и.
того ра́ди чт̂о сътворѝ бл҃го съ і҆и҆л҃емъ и҆ съ до́момъ е҆го·

И҆ бы́сть по сконча́нїю и҆ѻ҆да́ѧ и҆до́ша начал̑҇ницы і҆ѹ́дины.
и҆ поклони́шасѧ цр҃ю и҆ послꙋжи́ша, и҆ ѻ҆пꙋсти́ша цр҃ковь г҃а б҃а ѿц҃ъ свои҆хъ.
и҆ слꙋжа́хꙋ а́ста́р꙽тꙋ і҆ и҆стꙋка́нным꙽·

И҆ бы́сть ꙗ҆́рость гн҃ѧ проти́вꙋ і҆ѹ́ды і҆ерс̑҇лима ра́ди того грѣха̀ въ дн҃ь то́и, и҆ посла же къ ни́мъ прро̑҇ки да ѻ҆братѧтсѧ къ г҃ꙋ, и҆ не послꙋшаша, и҆ засвѣдител̑҇ствова́хꙋ и҆мъ, и҆ не послꙋшаша, и҆ дх҃ъ бж҃їи ѻ҆блече а҆за́рїю сн҃а и҆ѻ҆да́е҆ва сщ҃енника, и҆ ста̀ пред̑ людмѝ и҆ реч̑҇ и҆мъ, сїѧ рече г҃ь, почто̀ престꙋпа́е҆те повеле́нїѧ гн҃ѧ, не бл҃гоѹ҆годи́тсѧ, ꙗ҆́ко ѻ҆ста́висте г҃а, и҆ ѻ҆ста́витъ ва́съ, и҆ събра́вшисѧ сꙋпроти́вꙋ е҆мꙋ и҆ поби́ша и҆̀ ка́менїемъ по повеле́нїю и҆ѻ҆а́са цр҃ѧ·

Въ дворѣ̀ до́мꙋ гн҃ѧ, и҆ не въспомѧнꙋ и҆ѻ҆а́съ цр҃ь млрс̑҇дїѧ и҆же сътвори и҆ѻ҆да́и ѿц҃ъ е҆го с нимъ.
н̂о ѹ҆бѝ сн҃а е҆го, и҆же е҆гда̀ ѹ҆мира́ше и҆ рече, да ви́дитъ и҆ сꙋдит̑ г҃ь·

И҆ бы́сть по съверше́нїю лѣта.
въстаста проти́вꙋ е҆го во́и сѷрскїи, и҆ прїидо́ша въ і҆ѹ҆де́ю и҆ въ і҆ерс̑҇лимъ, и҆ ѹ҆би́ша вс̂ѧ нача́лники людїи въ цр҃кви, и҆ ве́сь плѣ́нъ и҆хъ посла́ша цр҃ю въ дама́скъ.
занѐ ѕѣ́ло ма́ло прїиде число̀ сѷрїиско.
и҆ б҃ъ преда́сть в рꙋ́цѣ и҆хъ без꙽чи́сленое мно́жество си́лъ ѕѣ́ло.
сего ра́ди и҆же ѻ҆ста́виша г҃а б҃а ѿц҃ъ свои҆хъ·

И҆ на и҆ѻ҆а́са же сътвори сꙋ́дъ.
и҆ ѿи҆дꙋщи ѻ҆ста́виша е҆го въ бо́лезни вели́цѣ.
въста́ша же проти́вꙋ е҆мꙋ рабѝ е҆го на м꙽ще́нїе кро́ви а҆за́рїины сн҃а и҆ѻ҆да́ѧ сщ҃енника.
и҆ ѹ҆би́ша е҆го на посте́ли е҆го и҆ ѹ́мре, и҆ погребо́ша е҆го въ градѣ двд҃вѣ, н̂о не въ гро́бѣхъ цр҃ьскихъ·

Съпроти́вльшїи же сѧ е҆мꙋ заваѳъ сн҃ъ сема́ѳа а҆мани́тѧнина.
і҆ и҆ѻ҆зава́ѳъ сн҃ъ семариѳовъ моа҆ви́тѧнинъ·

И҆ сн҃ове е҆го вс̂и, и҆ пристꙋпи́ша к немꙋ, е҃, и҆ ѹ҆би́ша е҆го, и҆ про́чаѧ сло́въ е҆го с̂е напи́сана сꙋть въ лѣтопи́сцꙋ црс̑҇ком̑·

Глв̑҇а, к҃е·

Црс̑҇твова же а҆масїѧ сн҃ъ е҆го в него мѣсто.
к҃е, лѣтъ бысть а҆масїѧ е҆гда̀ црс̑҇твовати нача̀.
и҆ к҃ѳ лѣтъ, црс̑҇твова въ і҆ерс̑҇лимѣ, и҆мѧж̑ мт҃ри е҆го і҆ѻ҆а҆да́ень ѿ і҆ерс̑҇ли́ма·

И҆ сотвори́ же бл҃го пред̑ гм҃ъ, ѻ҆баче не въ срд̑ци съвръшенѣ·

И҆ бысть е҆гда̀ ѹ҆твръди себѣ̀ црс̑҇тво, и҆ ѹ҆мерътви рабы̀ е҆го, и҆же погꙋби́ша цр҃ѧ ѿц҃а е҆го·

Сн҃овъ же и҆хъ не поби, ꙗ҆́ко пи́сано е҆сть в꙽ кни́ѕѣ закона моѷсїѻ́ва, и҆дѣже повелѣ г҃ь гл҃ющи, не ѹ҆бїютсѧ ѿц҃ы за сн҃овъ, ни́же сн҃ове за ѿц҃ы, н̂о е҆ді́нъ ко́ждо въ грѣсѣ свое҆мъ ѹ́мрет̑·

И҆ собра̀ а҆масїѧ домъ і҆ѹ́динъ, и҆ поста́ви и҆хъ по ѻ҆би́телемъ и҆хъ въ ты́сꙋщники и҆ со́тники, во всю і҆ѹ҆де́ю и҆ венїамина и҆ почте и҆хъ ѿ к҃, лѣтъ и҆ выш꙽ше, ѻ҆брѣте же их̑, ҂л҃, ю́ношъ и҆же и҆зыити на ѻ҆полченїе си́лныхъ, и҆же дръжа́тъ ко́пїѧ и҆ щиты·

Є҆ще же наѧ̀ за нае́мъ ѿ і҆и҆л҃ѧ, р҃, хра́брыхъ въ силѣ, за, р҃, тала́нтъ сребра̀·

И҆ прїиде же чл҃къ бж҃їи к немꙋ гл҃ѧ.
ѽ цр҃ю да не и҆сходи́тъ с тобо́ю сила і҆и҆л҃ева, нѣсть б̂о г҃ь съ і҆и҆л҃емъ.
и҆ всѣми сн҃ы е҆фре́млими, да а́ще ѹ҆бо мни́ши ѹ҆крѣпитисѧ с ними, премощѝ тебе сътвори́тъ г҃ь врагомъ, б҃ъ б̂о е҆сть и҆ по́мощи и҆ въ бѣжа́нїе ѻ҆братити, рече же а҆масїѧ къ чл҃кꙋ бж҃їю, чт̂о ѹ҆бо сътворю̀ ѻ҆ стѣ̀ тала́нтъ и҆же дахъ во́иномъ і҆и҆л҃евым̑·

И҆ ѿвѣща̀ е҆мꙋ чл҃къ бж҃їи.
и́мать г҃ь гд̂ѣ тебѣ дати мо́жетъ множа́е тѣхъ.
и҆ ѿлꙋчи ѹ҆бо а҆масїѧ во́и и҆же прїидо́ша к немꙋ ѿ е҆фре́ма.
и҆ възврати́шасѧ въ мѣсто их̑.
и҆ тїи проти́вꙋ і҆ѹ́ди раз̑гнѣ́вашасѧ ѕѣло и҆ възвратишас̑҇ во стра́нꙋ свою̀ въ гнѣвѣ ꙗ҆́рости·

И҆ а҆масїа ѹ҆повающи из̑веде лю́ди своа̀, і҆ и҆дѐ въ ѹ́доль солинам̑, и҆ пораѕи т̂ꙋ сн҃овъ сѷиръ, ҂і҃, и҆ ҂і҃, мꙋже́и жи́во по́имаша сн҃ве іѹ́дїни.
и҆ приведо́ша на щѣлю нѣ́которыа стѣны̀.
съвръго́ша же и҆хъ ѿ высоты̀ стремотычь и҆же вс̂и рас꙽сѣдо́шасѧ.
и҆ во́и и҆же ѿсла̀ а҆масїѧ да не и҆дꙋтъ с ни́мъ на́ брань.
разыидо́шасѧ въ гра́ды і҆ѹ́дины ѿ самарїѧ даже до веѳоро́на.
и҆ ѹ҆биша ѿ ни́хъ, ҂г҃. и҆ плѣниша плѣнъ вели́къ·

И҆ бы́сть възврати́сѧ а҆масїѧ по закла́нїи и҆дꙋмеѻ́мъ, и҆ принесѐ себѣ̀ бого́въ сн҃ов꙽ сѷи́ръ, и҆ поста́ви и҆хъ въ бо́ги себѣ̀ и҆ покланѧ́шесѧ и҆мъ, и҆ тѣ́мъ кадѧ́ше ѳемїа́мъ.
и҆ бы́сть гнѣ́въ гн҃ь на а҆масїю.
и҆ посла̀ к немꙋ прро̑҇ка и҆же гл҃а е҆мꙋ.
почто̀ поклони́лсѧ е҆си богом̑ и҆же не и҆зба́виша людїи своих̑ ѿ рꙋ́кꙋ мое҆ю.
и҆ бы́сть е҆гда то́и гл҃аше к немꙋ, ѿвѣща̀ е҆мꙋ е҆да̀ совѣтникъ цр҃евъ е҆си, воньми да не пробїю т̂ѧ, и҆ ѹ҆мол꙽че прро̑҇къ.
ви́жꙋ рече чт̂о промы́сли г҃ь ѹ҆би́ти т̂ѧ и҆же сътвори́л꙽ е҆си сѐ ѕл̂о, и҆ не послꙋша́еши совѣта мое҆го·

И҆ съвѣща̀ а҆масїѧ цр҃ь і҆ѹ́динъ.
и҆ посла̀ къ і҆ѻ҆а҆сꙋ сн҃ꙋ і҆ѻ҆а҆хазовꙋ сн҃ꙋ і҆и҆ѹ́и҆нꙋ, цр҃ю і҆и҆л҃евꙋ гл҃щи прїиди да видимсѧ промежи собо́ю въ лицѐ.
и҆ѻ҆а́съ посла̀ посе́лъ гл҃ющи ко а҆масїю цр҃ю і҆ѹ́динꙋ, тернъ и҆же ес̑҇ в лива́нѣ.
посла̀ ко ке́дрꙋ ливан̑҇скꙋ гл҃ющи да́и дще́рь твою̀ сн҃ꙋ мое҆мꙋ женꙋ̀.
и҆ с̂е прїидꙋтъ ѕвѣрїе и҆же в꙽ дꙋбра́вѣ лива́нстѣи.
и҆ проидоша ѕвѣрїе и҆ потоп̑҇та́ша кардосъ, гл҃еши с̂е поразих̑ и҆дꙋменеа і҆ е҆до́ма.
и҆ въздвиза́етсѧ срд̑це твое въ горды́ню, сѣди же въ до́мꙋ твоем̑, почто̀ лꙋка́во сꙋпротивꙋ тебе прогнѣва́еши, паде́ши т̂ы, і҆ и҆ѹ́да с тобо́ю·

Не хотѣ послꙋшати а҆масїѧ, занѐ гн҃ѧ бысть во́лѧ.
да предастьсѧ в рꙋкы і҆ѻ҆а́сꙋ ради бого́в꙽ ѿц҃ъ и҆дꙋменеи҆скихъ·

И҆ възы́иде і҆ѻ҆а́съ цр҃ь і҆и҆л҃евъ.
и҆ проме́жꙋ собо́ю възда́ша пред̑стоа́нїе·

А҆масїѧ же цр҃ь і҆ѹ́динъ въ веѳсамесе и҆же е҆сть і҆ѹ́динъ.
паде же і҆ѹ́да пред̑ і҆и҆л҃емъ, и҆ бѣжа ко́ждо въ жили́ще свое·

И҆ а҆масїю цр҃ѧ і҆ѹ́дина сн҃а і҆ѻ҆а́сова сн҃а и҆ѻ҆хазова.
ꙗ҆́тъ і҆ѻ҆а́съ цр҃ь і҆и҆л҃евъ въ веѳсамесѣ, и҆ въведе и҆̀ въ і҆ерс̑҇лим̑·

И҆ разори́ша стѣны е҆го ѿ врат̑ е҆фремль даже до ѹ́глꙋ, у҃, лакотъ.
все́ же зла́то и҆ сребро̀ и вс̂ѧ сосꙋ́ды и҆же ѻ҆брѣте в домꙋ̀ гн҃и и҆ въ ст҃аа ст҃ых̑.
и҆ во сокровищех̑ домꙋ̀ цр҃ева.
и҆ сн҃овъ рад̑ных̑ и҆звел̑҇ въ самарїю·

Жи́лъ же а҆масїѧ сн҃ъ и҆ѻ҆а́сов̑҇ цр҃ь і҆ѹ́дин꙽.
по ѹ҆мр҃твїѝ і҆ѻ҆а́са сн҃а і҆ѻ҆а҆хазова цр҃ѧ і҆и҆л҃ева е҃і, лѣтъ.
и҆ про́чаѧ же сло́веса а҆масїина, пр́ьваѧ и҆ послд̑ѣнѧѧ, пи́сана сꙋть в꙽ кни́ѕѣ црс̑҇твъ і҆ѹ́ды іи҆л҃ѧ<.>

И҆ въ вре́мѧ е҆гда̀ а҆масїѧ ѿстꙋпѝ ѿ г҃а, и҆ възложи́сѧ на не́го възложе́нїе съпротивно, и҆ побѣже ѿ і҆е҆рс̑҇ли́ма въ лахисъ, и҆ посла́ша въ слд̑ѣ е҆го в꙽ лахи́съ, и҆ ѹ҆би́ша е҆го т̂ꙋ.
ѿнесошаж̑ е҆го на ко́нехъ, и҆ погребо́ша е҆го съ ѿц҃ы е҆го въ́ градѣ двд҃вѣ·

Глв̑҇а, к҃ѕ·

Взѧ́ша же вс̂и лю́дїе і҆ѹ́дини сн҃а е҆го ѻ҆зїю, ѻ҆́нже бѣ̀ лѣтъ, ѕ҃і.
и҆ поста́виша е҆го цр҃ѧ въ мѣ́сто а҆масїѧ ѿц҃а е҆го, то́и созда̀ е҆лаѳ̑҇.
и҆ се́и възвратѝ е҆го вла́сти і҆ѹ́динѣ по ѹ҆спе́нїи цр҃ѧ съ ѿц҃ы е҆го, ѕ҃і ти лѣтъ бы́сть і҆ѻ҆зїѧ, е҆гда̀ црс̑҇твова́ти нача̀.
и҆ н҃в, лѣтѣ црс̑҇твова̀ въ і҆ерс̑҇ли́мѣ·

І҆ и́мѧ мт҃ри е҆го, и҆е҆хилїѧ, ѿ і҆ерс̑҇ли́ма, сътворѝ что бысть прѧ́мо въ ѻ҆́чїю гн҃и.
по всѧ и҆же сътворѝ а҆масїѧ ѿц҃ъ е҆го.
и҆ бѣ възыска́ѧ г҃а въ дн҃и заха́рїѧ разꙋмѣю́щаго въ стра́сѣ гн҃и, и҆ въ дн҃и е҆го възыска̀ г҃а, и҆спра́ви е҆го въ всх̑ѣ г҃ь.
и҆зы́иде и҆ ѻ҆полчи́сѧ проти́вꙋ и҆ноплеме́нникомъ и҆ разорѝ стѣнꙋ̀ ге́ѳскꙋ.
и҆ стѣнꙋ̀ и҆а҆вни́въ и҆ стѣнꙋ̀ а҆зо́та·

И҆ създа́ же гра́дъ въ а҆зо́тѣ и҆ въ и҆ноплеме́нницех̑, и҆ помо́же е҆мꙋ б҃ъ проти́вꙋ и҆ноплеме́нникомъ и҆ проти́вꙋ а҆ра́вомъ, и҆же ѻ҆бита́хꙋ въ скала́хъ, и҆ проти́вꙋ мине́ѻ҆мъ, и҆ да́ша мине́и да́нь ѻ҆зїе҆ви.
и҆ прослы̀ и҆́мѧ е҆го да́же до вхо́да е҆гѷпет꙽скаго, поне́же ѹ҆крѣпи́сѧ до высоты̀, създа́ же ѻ҆зїѧ столпы̀ въ і҆ерс̑҇лі́мѣ и҆ над̑ вра́ты ѹ҆́гла.
и҆ над̑ враты до́лними.
и҆ про́чїи в то́и стѣнѣ̀ страны̀ ѹ҆крѣпѝ и҆хъ и҆ ѹ҆стро́и столпы̀ въ пꙋсты́ни.
і҆ и҆скопа̀ кла́дези мно́ги.

Того ра́ди ꙗ҆́же и҆мѧ́ше мно́ги скоты̀, толико в꙽ поле́хъ ꙗ҆́кож̑ и҆ въ пꙋсты́ни·

Виногра́ды же и҆мѣ̀ и҆ виногра́дники на горах̑ и҆ въ карми́лѣ, бѣ̀ б̂о чл҃къ полетѧжа́тельствꙋ вдан̑҇.
бы́сть же ѻ҆зї́и си́ла творѧ́щїѧ бра́нь, и҆же и҆схожд̑ахꙋ къ ѻ҆полъченїю на́ брань.
и҆ въходѧ́щи по чинꙋ̀ въ число̀·

И҆ б̂ѣ число̀ и҆хъ под̑ рꙋкꙋ і҆и́лѧ пи́сарѧ и҆ маа҆сїѧ сꙋдїи, и҆ под̑д̑ рꙋкꙋ а҆нанї́и.
и҆же бѣ̀ ѿ вое҆во́дъ цр҃евых̑.
все́ же число̀ нача́лником꙽ по ѻ҆би́телем̑ свои҆мъ мꙋже́и крѣпкихъ на́ брань ҂в҃, х҃·

И҆ под ни́ми всѣхъ во́и ҂т҃. ҂з҃. и҆ е҃ со́тъ·

Сїи творѧ́хꙋ бра́нь въ си́ле крѣ́пцѣ.
ѿ цр҃ѧ противꙋ сꙋпоста́тъ вое҆ва́хꙋ.
ѹ҆гото́ва же и҆мъ ѻ҆зїѧ все́и си́ле, щиты, и҆ копїѧ, и҆ шле́мы и҆ бро́нѧ, лꙋки же и҆ пра́щи на мета́нїе ка́менїѧ, и҆ сътворѝ въ і҆ерс̑҇ли́мѣ разли́чныѧ ви́ды хꙋдо́жества ѹ҆хꙋдожестве́нны.
е҆же бы́ти въ столпѣхъ, и҆ въ ѹ҆́глх̑ѣ стѣна́мъ да ме́щꙋтъ стрѣлы, и҆ ка́менїѧ велїѧ.
и҆ слы́шано бы́сть хꙋдо́жество е҆го до дале́че.
занѐ ѹ҆диви́сѧ помага́ти е҆мꙋ г҃ь до́ндеже ѹ҆крѣпи́сѧ, и҆ е҆гда ѹ҆крѣпи́сѧ възъдвижесѧ срд̑це е҆го, на погꙋбле́нїе е҆го и҆ ѻ҆би́дѣ г҃а б҃а свое҆го, и҆ вни́де въ цр҃ковь гн҃ю покади́ти хотѧ̀ надъ ѻ҆лтарем̑ ѳимїа́ма·

И҆ вни́де по нем̑ заха́рїѧ сщ҃енник꙽, и҆ с ним̑ сщ҃енницы гн҃и, п҃, мꙋжеи крѣпча́ишихъ.
сꙋпроти́вишасѧ цр҃еви и҆ѻ҆зїеви и҆ реко́ша е҆мꙋ, нѣсть твои чи́нъ і҆ѻ҆зїе да кади́ши ѳїмїа́момъ гв҃и, н̂о сщ҃енникомъ т̂о е҆сть сн҃овомъ а҆аро́нимъ и҆же ѻ҆сщ҃ени сꙋть к томꙋ̀ ѻ҆бы́чаю слꙋже́нїѧ да ка́дѧтъ.
и҆зыидѝ ѿ сщ҃енъства ꙗ҆́ко ѿстꙋпи́лъ е҆си ѿ г҃а.
и҆же не вмѣни́тсѧ тебѣ въ славꙋ т̂о ѿ г҃аб҃а.
прогнѣ́ва же сѧ і҆ѻ҆зїѧ, и҆ держа́щи в рꙋкꙋ е҆го кади́ло да кадитъ въ хра́мѣ, и҆ вънегда раз̑ꙗ҆ри́сѧ ѻ́нъ на жръцы гн҃ѧ до́мꙋ.
и҆ а́бїе в꙽зошла̀ проказа на чело̀ е҆го.
пред̑ сщ҃енники в домꙋ̀ гн҃и, на ѻ҆лтарѝ ѳемїа́нномъ.
и҆ е҆гда́ же ѹ҆зрѣ е҆го заха́рїѧ а҆рхїе҆ре́и.
и҆ вс̂и про́чїи сщ҃ен꙽ницы ви́дѣша и҆ сѐ прокаже́нъ на челѣ̀ е҆го·

И҆згна́ша е҆го ѿтꙋдꙋ, н̂о и҆ то́и ѹ҆бо т꙽ща́сѧ и҆зыитѝ.
ꙗ҆́ко ѻ҆бличѝ е҆го г҃ь·

Бы́сть же ѻ҆зїѧ цр҃ь прокаженъ да́же до дн҃е смр҃ти е҆го и҆ ѻ҆бита́ше в домꙋ̀ ѿлꙋче́нѣ по́лнъ прокаже́нїѧ в че́мъ и҆згна́нъ бы́сть ѿ до́мꙋ гн҃ѧ·

І҆ и҆ѻ҆а҆ѳа́мъ сн҃ъ е҆го держа̀ црс̑҇тво е҆го сꙋдѧ̀ лю́ди зем̑стїи и҆ про́чаѧ же словеса̀ ѻ҆зїи пе́рвыѧ и҆ послд̑ѣнѧа, напи́саны ѹ҆ і҆са́їа сн҃а а҆мо́сова про̑҇рка.
ѹ҆спе́ же и҆ѻ҆зїѧ съ ѿц҃ы свои҆ми, и҆ не погребо́ша е҆го въ по́лѣ црс̑҇кихъ гробо́въ, того ра́ди и҆же бы́сть прокаженъ.
и҆ црс̑҇твоваж̑ и҆ѻ҆а҆ѳа́мъ сн҃ъ е҆го в него̀ мѣсто·

Глв̑҇а, к҃з·

Два́десѧ́ть и҆ пѧтѝ лѣтъ бы́сть и҆ѻ҆а҆ѳа́мъ е҆гда̀ црс̑҇твова́ти нача̀, и҆ ѕ҃і, лѣтъ црс̑҇твова̀ въ і҆ерс̑҇ли́мѣ и҆́мѧ мт҃ри е҆го и҆е҆рꙋса дщѝ садо́кова, и҆ сътвори́ же чт̂о право е҆сть пред̑ гм҃ъ по всѧ и҆же сътворѝ и҆ѻ҆зїѧ ѿц҃ъ е҆го.
ра́звѣ чт̂о не вни́де въ цр҃ковь гн҃ю.
и҆ е҆щѐ лю́дїе съгрѣша́хꙋ.
то́и създа̀ вра́та до́мꙋ гн҃ю высо́ка, и҆ въ стѣнѣ е҆го положѝ ѻ҆рꙋжїѧ.
и҆ гра́ды же създа̀ на горахъ і҆ѹ́диныхъ, и҆ на лѣсехъ дворы̀ и҆ столпы̀·

И҆ тои ѻ҆полчи́сѧ противꙋ цр҃ѧ сн҃овъ а҆ммо́нь.
и҆ ѻ҆долѣ̀ е҆го.
и҆ дава́хꙋ е҆мꙋ сн҃ове а҆м꙽мо́ни на е҆дїно лѣто по р҃ тала́нтъ сребра̀.
и҆ ҂і҃. коры̀ мѣры пшени́цы, и҆ толико же мѣръ ꙗ҆чме́нѧ сїѧ е҆мꙋ приноша́ше цр҃ь сн҃овъ а҆м꙽мо́нь на лѣто, въ а҃ е лѣто, и҆ в҃ е, и҆ г҃ е·

И҆ ѹ҆крѣплен̑҇ же е҆сть и҆ѻ҆а҆ѳа́мъ, того ра́ди чт̂о ѹ҆правлѧ́ше пꙋтѝ своѧ пред̑ гм҃ъ бм҃ъ свои҆мъ.
и҆ про́чаѧ же словеса̀ и҆ѻ҆а҆наѳа́на и҆ всѣхъ ѻ҆полче́нїи е҆го и҆ дѣла пи́сана сꙋть въ кни́ѕѣ цр҃ь і҆ѹ́диных̑ і҆и҆л҃евыхъ, к҃е, лѣтъ бысть, е҆гда̀ црс̑҇твова́ти нача̀, и҆ ѕ҃і, лт̑ѣ црс̑҇твова̀ въ і҆ерс̑҇ли́мѣ, ѹ҆спе́ же и҆ѻ҆а҆ѳа́мъ съ ѿц҃ы свои́ми.
и҆ погребо́ша е҆го въ́ градѣ двд҃вѣ.
и҆ црс̑҇твова̀ а҆ха́зъ сн҃ъ е҆го в него мѣсто·

Глв̑҇а, к҃и·

Два́десѧти и҆ е҃ тѝ лѣтъ б̂ѣ а҆ха́зъ е҆гда црс̑҇твовати нача̀.
и҆ ѕ҃і лт̑ѣ црс̑҇твова̀ въ і҆ерс̑҇ли́мѣ.
не сътворѝ пра́во пред̑ гм҃ъ, ꙗ҆́ко дв҃дъ ѿц҃ъ е҆го.
н̂о ходѝ въ пꙋтѝ цр҃еи і҆и҆л҃евыхъ.
н̂о и҆ ѻ҆́бразы и҆зваѧ́ны сътвори, і҆ и́доломъ и҆хъ пожрѐ.
въ землѝ е҆до́мли, и҆ проведѐ сн҃овъ свои҆хъ сквозѣ ѻ҆́гнь по ме́рзостѧ́хъ ꙗ҆зы́къ и҆хже ѹ҆бѝ г҃ь въ прише́ствїи сн҃овъ і҆и҆л҃евъ.
ѻ҆сщ҃а же ѳимїа́мъ и҆ съжига́ше на высо́ких̑ и҆ на хол̑҇мѣх꙽·

И҆ под̑ всѧ́кимъ дре́вомъ ли́ствѧным̑.
и҆ преда́сть же е҆го г҃ь б҃ъ е҆го в рꙋкꙋ цр҃ѧ сѷрска.
и҆же поразѝ е҆го, вели́к же плѣнъ взѧ̀ ѿ е҆го црс̑҇тва.
и҆ приведѐ в дама́скъ, и҆ въ рꙋки цр҃ѧ і҆и҆л҃ева преда̀ е҆го, и҆ пораже́нъ ꙗ҆́звою вели́кою, и҆ плени́ша е҆го.
и҆ ѹ҆би́ же факе́е сн҃ъ ромелїе́въ цр҃ь і҆и҆л҃евъ ѿ і҆ѹ́ды, ҂р, въ дн҃ь е҆ді́нъ всѣхъ мꙋже́и бра́нниковъ.
того ради и҆же ѻ҆ста́виша г҃а б҃а ѿц҃ъ свои҆хъ·

Того́ же вре́мени ѹ҆бѝ зе́хри мꙋжъ си́ленъ ѿ е҆фрема а҆масїю сн҃а цр҃ева и҆ е҆врика́ма вое҆во́дꙋ до́мꙋ е҆го, и҆ е҆лка́на же вто́раго ѿ цр҃ѧ·

Плени́ша же сн҃ове і҆и҆л҃еви ѿ братїи свои҆хъ ѻ҆смь со́тъ же́нъ, ѻ҆́трокъ и҆ дв҃ицъ.
плѣнъ мно́гъ приведо́ша ѿ нихъ в самарїю, в꙽ то времѧ бѣ̀ т̂ꙋ про̑҇рк꙽ гн҃ь и҆́менемъ ѻ҆ди́дъ и҆же и҆зыиде въ срѣте́нїе во́емъ грѧдꙋщимъ въ самарїю, и҆ рече и҆мъ.
с̂е гнѣвъ г҃а б҃а ѿц҃ъ на́ших꙽, проти́вꙋ і҆ѹ́ды, преда̀ и҆хъ в рꙋки ва́ша, и҆ ѹ҆би́сте и҆хъ немлс̑҇рдно.
тако да до нбс̑҇и дости̂гнꙋ, ва́ше немрс̑҇дїе, и҆ нн҃ѣ сн҃ове і҆ѹ́дини і҆ерс̑҇лимовы хощетъ вамъ под̑ни́зити въ рабы̀ и рабы́нѧ не се́ ли а҆зъ е҆смь с ва́ми, свѣдѣтел̑҇ствова́ти г҃ꙋ б҃ꙋ ва́шемꙋ.
н̂о слы́шите совѣтъ мо́и, и҆ ѿведи́те плѣне́ныхъ и҆хже и҆зведо́сте ѿ бра́тїѧ ва́шеѧ, ꙗ҆́ко вели́ка ꙗ҆́рость гн҃ѧ наста́нет̑ ва́мъ, и҆ въста́ша б̂о мꙋжи ѿ нача́лникъ сн҃овъ е҆фрѣмль а҆за́рїѧ сн҃ъ и҆ѻ҆н꙽на́нь.
и҆ варахїѧ сн҃ъ васал꙽лимо́ѳ꙽, е҆зекїѧ сн҃ъ селлꙋмовъ, и҆ а҆масїѧ сн҃ъ е҆л꙽да́и, проти́вꙋ ты́мъ и҆же грѧдꙋтъ ѿ ѻ҆плъче́нїѧ, и҆ реко́ша и҆мъ не възведите зд̂ѣ плѣне́нїѧ къ ва́мъ занѐ съгрѣши́хомъ, г҃ꙋ.
почт̂о в̂ы хо́щете приложи́ти къ грѣхомъ на́шимъ.
и҆ ве́тхаѧ съвокꙋпи́ти безако́нїѧ наша, вели́къ б̂о грѣхъ нашъ и҆ гнѣвъ и҆ ѧ́рость гн҃ѧ на і҆и҆л҃ѧ.
и҆ ѻ҆ста́виша же мꙋ́жи і҆и҆л҃евы и҆ бран̑҇ницы плѣнъ и҆ вс̂ѧ ꙗ҆́же в꙽зѧ́ша предъ нача́лники и҆ пред̑ всѣмъ мно́жестомъ и҆ ста́ша же мꙋжи и҆же назва́шасѧ въ и҆мѧ гн҃е·

И҆ в꙽зе́млюще плѣне́ных̑ и҆ вс̂и и҆же на́зи бѧ́хꙋ ѻ҆блеко́ша ѿ коры́стеи, е҆гда́ же ѻ҆дѣѧ́хꙋ и҆хъ, и҆ ѻ҆бꙋша и҆ честь творѧхꙋ бра́шномъ и҆ пи́тїемъ, и҆ пома́заша же ради трꙋда, и҆ възда́ша и҆мъ под̑ѧ҆рем̑ники ко́ждо и҆же ходи́ти не мого́ша, и҆ бѣша сла́бы тѣломъ, възложи́ша и҆хъ на ско́тъ и҆ ѿведо́ша въ е҆рихо́нъ гра́дъ фини́ческїи къ бра́тїи и҆хъ.
и҆ възврати́ша в꙽ самарїю.
въ вре́мѧж̑ ѻ҆́но посла́лъ цр҃ь а҆ха́зъ къ цр҃ю а҆сѷрїискꙋ.
просѧщи по́мощи е҆мꙋ, и҆ въ ѻ҆но́мъ смѧте́нїи съпроти́вишасѧ и҆дꙋме́ане, и҆ порази́ша мно́ги ѿ і҆ѹ́ды.
и҆ взѧ́ша плѣнъ вели́к꙽, І҆ и҆ноплн꙽е́ницы приложи́шасѧ по гра́дом̑ пол꙽скимъ и҆ къ полꙋдни і҆ѹ҆де́и·

И҆ взѧ́ша ваѳсами́съ, и҆ ꙗ҆же в домꙋ̀ бж҃їи, и҆ ꙗ҆́же в домꙋ̀ црс̑҇комъ, и҆ кнѧѕе́и.
и҆ да́ша цр҃ю а҆и҆ло́нъ.
и҆ гадирон̑҇ и҆ сок꙽хо́хъ, и҆ вс̂ѧ ꙗ҆́же ѻ҆́крс̑҇тъ е҆го.
и҆ гам꙽за́и съ под̑селе́нїи е҆го.
и҆ ѳа́мнꙋ съ прилежа́щими поса́дами е҆го, и҆ всели́шасѧ т̂ꙋ, ꙗ҆ко смирѝ г҃ь і҆ѹ҆де́ю ра́ди а҆ха́за цр҃ѧ і҆ѹ́дина.
того ради и҆же ѻ҆бнажи́сѧ е҆го по́мощи.
и҆ въ ѹ҆ничиже́нїи и҆мѧ́ше г҃а·

И҆зведе же проти́вꙋ е҆мꙋ ѳеглаа҆таѳаласа́ра цр҃ѧ а҆сѷрїиска и҆же ѻ҆ѕлобѝ е҆го.
и҆ преселѝ и҆же бѧ́хꙋ въ дама́сцѣ въ мадїа́мы.
и҆ ѿ сѷрїи преселѝ въ дама́скъ пребыва́ти·

И҆ е҆ді́но сꙋпротивѧ́щи ѿпꙋстѝ.
сего ра́ди взѧ̀ а҆ха́зъ сꙋщаѧ въ домꙋ̀ гн҃и и҆ в домꙋ̀ црс̑҇комъ и҆ ѹ҆ нача́лниковъ.
и҆ дасть цр҃ю а҆сѷрїискꙋ, и҆ не бы́сть на помощ꙽ е҆мꙋ.
н̂о на́ипаче къ печа́ли е҆го·

И҆ приложѝ ѿстꙋпи́ти ѿ г҃а, рече б̂о цр҃ь а҆ха́зъ възыщꙋ̀ бого́въ дама́сковыхъ бїю́щих̑ м̂ѧ, и҆ рече, бо́ѕи цр҃ѧ а҆сѵ́рїика пособлѧ́ютъ и҆м꙽, и҆ сим̑ пожрꙋ̀ и҆ а́зъ чт̂о, и҆ бꙋдꙋтъ м̂и въ по́мощъ сїи.
н̂о сїи бы́ша къ паденїю е҆го и҆ всего̀ і҆и҆л҃ѧ·

И҆ вы́ставилъ а҆ха́зъ вс̂ѣ сосꙋды до́мꙋ бж҃їѧ.
и҆ съкрꙋшѝ их̑ и҆ затверди́лъ вра́та до́мꙋ бж҃їѧ·

И҆ сътворѝ себѣ̀ тре́бники въ всѣхъ ѹ́глѣхъ і҆ерс̑҇ли́ма.
и҆ въ всѣхъ гра́дѣхъ і҆ѹ́диныхъ.
сътворѝ ѻ҆лтари на высо́кихъ на съж꙽же́нїе ѳемїа́ма, и҆ раз̑гнѣ́ва г҃а б҃а ѿц҃ь свои҆хъ·

И҆ про́чаѧ же словесъ е҆го и҆ всѣхъ дѣлъ е҆го пе́рвыхъ и҆ послѣд꙽нихъ.
с̂е пи́сана сꙋть въ кни́ѕѣ црс̑҇твъ і҆ѹ́ды.
і҆ и҆и҆л҃ѧ.
и҆ ѹ҆спе́ же а҆ха́зъ съ ѿц҃ы свои́ми.
и҆ погребо́ша е҆го въ́ градѣ двд҃вѣ, не бо̀ принесо́ша въ гро́бѣхъ цр҃еи і҆и҆л҃евыхъ.
црс̑҇твова́ же и҆е҆зекїѧ сн҃ъ е҆го в него мѣ́сто·

Глв̑҇а, к҃ѳ·

Іе҆зекїѧ е҆гда црс̑҇твова́ти нача̀, к҃е, лѣтъ бы́сть, и҆ к҃ѳ, лѣтъ црс̑҇твова̀ въ і҆ерс̑҇ли́мѣ.
и҆́мѧ мт҃ри е҆го а҆вїѧ дщѝ заха́рїи.
сътвори́ же ѹ҆го́дно пред̑ гм҃ъ, по всѧ̀ и҆же творѧ́ше дв҃дъ ѿц҃ъ е҆го.
и҆ бы́сть е҆гда ста̀ на црс̑҇твѣ е҆го, въ мс̑҇ць прь́выи, ѿвръзе две́ри до́мꙋ гн҃ѧ.
и҆ ѻ҆бновѝ и҆хъ и҆ въведѐ сщ҃ен꙽ники и҆ левѷты.
и҆ събра̀ и҆хъ на площа́ди въсто́чнѣи.
и҆ рече къ ни́мъ.
ѹ҆слы́шите м̂ѧ левѷти и҆ ѻ҆ст҃итесѧ нн҃ѣ и҆ ѻ҆чи́стите до́мъ г҃а б҃а ѿц҃ь на́шихъ.
і҆ и҆знеси́те вс̂ю нечистотꙋ̀ ѿ ст҃ительства·

Ꙗ҆́ко съгрѣши́ша̑ ѿц҃ы на́ши, и҆ сътвори́ша лꙋка́во предъ гм҃ъ бм҃ъ на́шимъ.
и҆ ѻ҆ста́виша е҆го, и҆ ѿврати́ша лицѐ своѐ ѿ жили́ща г҃а б҃а на́шего.
и҆ възда́ша̑ хребет̑, и҆ затвори́ша вра́та хра́мꙋ, и҆ погаси́ша свѣти́лники.
и҆ ѳимиа́ма же не вож꙽го́ша, и҆ всесъж꙽же́нїѧ не принесо́ша ст҃омꙋ б҃ꙋ і҆и҆л҃евꙋ·

Соподвиго́ша же гнѣвъ гн҃ь на і҆ѹ҆де́ю и҆ на і҆ерс̑҇ли́мъ, и҆ преда́сть и҆хъ в꙽ подвиже́нїе и҆ погꙋбле́нїе, и҆ на звизда́нїе.
ꙗ҆́ко вы̀ ви́дите ѻ҆чи́ма ва́шими, и҆ с̂е падо́ша ѿт̑ц҃ы на́ши мечемъ, и҆ сн҃ове на́ши и҆ дще́ри на́ши и҆ сꙋпрꙋги наши плѣне́ни ве́дени сꙋть въ зе́млю не свою̀, и҆ нн҃ѣ ѹ҆бо сꙋть в не́и·

И҆ нн҃ѣ ѹ҆бо положи́те на срд̑ца ва́ша да поста́вите завѣт꙽ съ гм҃ъ бм҃ъ і҆и҆л҃евымъ.
и҆ ѿвратит̑ ѿ на́съ гнѣвъ ꙗ҆́рости свое́ѧ·

И҆ н҃нѣ не лиша́итесѧ ꙗ҆́ко вас̑҇ и҆збра̀ г҃ь да стои҆тѐ пред ним̑, и҆ слꙋж́ите е҆мꙋ и҆ бы́ти е҆мꙋ слꙋжа́ще и҆ кадѧ́ще·

И҆ въста́ша левѷти мааѳ̑҇ сн҃ъ а҆масїев̑҇ і҆ и҆ѻ҆и́ль сн҃ъ заха́рїев̑҇ ѿ сн҃овъ каа́дъдовых̑ и҆ ѿ сн҃овъ мерарїи́ных̑.
кис̑҇ сн҃ъ а҆вдїев꙽, і҆ а҆за́рїа сн҃ъ и҆лае҆и́левъ.
и҆ ѿ сн҃ов꙽ же герсо́на.
и҆ѻ҆дад̑ сн҃ъ земна̀.
и҆ ѻ҆а҆дамъ, сїи сн҃ы и҆ѻ҆а҆ха́и, ѿ сн҃овъ е҆лисафа́мъ.
сама́ри.
і҆ и҆и́ль·

И҆ ѿ сн҃овъ же а҆са́фовыхъ.
заха́рїѧ, и҆ маѳ꙽ѳа́нїѧ.
и҆ е҆ще ѿ сн҃овъ а҆мъма́нь і҆и́ль, и҆ семе́и.
н̂о и҆ ѿ сн҃овъ и҆диѳꙋмль.
самаѳїѧ, и҆ ѻ҆зїи́ль·

Събра́ша же бра́тїю свою̀, и҆ ѻ҆ст҃ишасѧ, и҆ внидо́ша̑ по за́повѣди цр҃евѣ и҆ по повеле́нїю гн҃ю да ѻ҆чи́стѧт̑ дом̑ бж҃їи сщ҃ен꙽ницыж̑ внидо́ша внꙋтрь цр҃кви гн҃ѧ да ѻ҆чи́стѧт̑ ю҆̀ и҆ снесо́ша всю̀ нечистость ю҆́же внꙋтрї до́мꙋ гн҃ѧ наи҆до́ша, и҆ въ дворѣ̀ до́мꙋ гн҃ѧ.
е҆же взѧ́ша левѷти и҆знесо́ша к пото́кꙋ ке́дрьскꙋ во́нъ, и҆ нача́ша же въ а҃ дн҃ь мс̑҇ца но́ваго а҃ го ѻ҆чища́ти.
и҆ въ дн҃ь и҃ того́ж꙽ мс̑҇ца внидо́ша въ притво́ръ до́мꙋ цр҃кви гн҃ѧ, ѻ҆чи́стиша же цр҃ковь гн҃ю въ дн҃ь и҃, и҆ въ дн҃ь ѕ҃і, мс̑҇ца того́же и҆же нача́ша съврьши́ша.
и҆ внидо́ша внꙋтрь къ і҆е҆зекїи цр҃ю и҆ реко́ша к немꙋ ѻ҆чи́стихомъ весь до́мъ бж҃їи и҆ ѻ҆лта́рь вс̂есъж꙽же́нїѧ и҆ сосꙋды е҆го и҆ стол̑҇ предложе́нїѧ съ всѣмѝ съсꙋды е҆го и҆ вс̂ѧ сосꙋды цр҃кви ꙗ҆же ѻ҆сквернѝ цр҃ь а҆ха́зъ въ црс̑҇тво своѐ въ ѿстꙋпле́нїи свое́мъ·

И҆ с̂е ѹ҆гото́вана сꙋть и҆ ѻ҆чище́на вс̂ѧ пред̑ ѻ҆лтаре́мъ гн҃имъ·

И҆ въста́в же ѕѣло ра́но і҆е҆зекїѧ цр҃ь и҆ събра̀ всѧ̀ нача́лники гра́да и҆ възы́иде в до́мъ гн҃ь.
и҆ принесѐ ю҆́нець.
з҃, и҆ ѻ́венъ, з҃, а҆́гнец̑҇ з҃, и҆ козе́лъ ѿ ко́зъ за грѣхѝ, за цр҃ѧ, за сщ҃енїе, и҆ за і҆и҆л҃ѧ.
рече же сщ҃ен꙽никомъ сн҃омъ а҆аро́ним꙽, и҆ да възы́идꙋтъ на ѻ҆лта́рь гн҃ь жренїѧ те́лча, ѹ҆би́ша б̂о ю҆́нець и҆ взѧ́ша кро́вь сщ҃енницы.
и҆злїѧ́ша т̂ꙋ на ѻ҆лта́рь, и҆ ѹ҆би́ша е҆щѐ ѻ҆́вен̑҇ и҆ кро́́вь на ѻ҆лта́рь възлїѧ́хꙋ.
и҆ пожроша а҆́гнець и҆ възлїѧ́ша на ѻ҆лта́рь кро́вь и҆ приведо́ша козе́лъ за грѣхи пред̑ цр҃ѧ и҆ цр҃кви, възложи́ша же рꙋки своа на них̑, и҆ пожро́́ша их̑ сщ҃еницы и҆ покропи́ша кро́вїю их̑ пред̑ ѻ҆лтарем̑ и҆ ѻ҆чи́стиша за грѣхѝ всего̀ і҆и҆л҃ѧ.
занѐ за всего і҆и҆л҃ѧ повелѣ̀ цр҃ь всесож̑же́нїе за грѣхѝ пожре́ти.
поста́ви же левѷты в домꙋ гн҃и, съ ким̑ва́лы, и ѱалты́рми, и҆ гꙋсльмѝ по за́повѣди двд̑а цр҃ѧ и га́да ви́дѧщаг̑҇ и҆ наѳа́на про̑҇рка съ цр҃ем̑.
ꙗ҆́ко гн҃е повелѣнїе быс̑҇ рꙋка́ма про̑҇ркъ е҆го.
ста́ша же левѷти держа́щи ѻ҆гра́ны двд҃вы, и҆ сщ҃енницы трꙋбы.
и҆ повелѣ і҆е҆зекїа да принесꙋтъ всесож꙽же́нїѧ на ѻ҆лта́рь и҆ е҆гда же приноша́хꙋсѧ всесъж꙽же́нїѧ нача́ша хвалы̀ пѣти гв҃и.
и҆ звꙋча́ти трꙋба́ми, и҆ в ро́зныѧ ѻ҆рга́ны и҆же дв҃дъ цр҃ь і҆и҆л҃евъ ѹ҆гото́ва.
и҆ пѣвцы̀ и҆ тїи и҆же держа́хꙋ трꙋбы бѣша ѹ҆ строе́нїи свое҆мъ пою҆ще, до́ндеже съвръши́шасѧ всесъж꙽же́нїѧ.
е҆гда́ же сконъча́но бы́сть приноше́нїе, прекло́н꙽сѧ цр҃ь и҆ вси и҆же бѧ́хꙋ с ни́мъ.
и҆ поклони́шасѧ гв҃и.
повелѣ же і҆е҆зекїѧ цр҃ь и҆ кн҃ѕи левѷтьстїи да въсхва́лѧтъ г҃а словесы̀ двд҃выми і҆ и҆а҆сафа про̑҇рка и҆же хвали́ша г҃а въ весе́лїи и҆ падоша и поклони́шасѧ гв҃и·

І҆е҆зекїѧ же па́ки сїѧ приложѝ, и҆ рече и҆спо́лните нн҃ѣ рꙋки ва́ша г҃ꙋ, и҆ приведи́те и҆ приноси́те жрътвы и҆ хвалы̀ в домꙋ гн҃и.
и҆ принесѐ всѐ мно́жество жрътвы и҆ хвалы въ до́мъ гн҃ь.
и҆ всѧк꙽ и҆же бл҃говолѝ срд̑цемъ всесъж꙽же́нїѧ и҆ бы́сть число̀ всесъж꙽же́нїи ꙗ҆́же принесѐ събра́нїе ю҆́нець, о҃, ѻ҆́венъ р҃, а҆́гнець, и҃ со́тъ.
всѧ̀ сїѧ гв҃и и҆ ѻ҆ ѻ҆чище́нїи те́лцовъ, х҃. и҆ ѻ́вец꙽ ҂г҃·

Но сщ҃енницы ѹ҆бо не мно́ѕи бѧ́хꙋ, и не можа́хꙋ ѻ҆дира́ти ко́жъ всесож̑же́нїѧ гдѣ̀ и҆ левѷти и҆ бра́тїа и҆хъ помого́ша и҆мъ, дондеже и҆спо́лнисѧ дѣло.
и҆ дон꙽деже ѻ҆ст҃ишасѧ жръцы̀.

Левѷти б̂о легча́ишимъ чи́номъ ѻ҆ст҃ишасѧ не́же сщ҃енницы занѐ бы́ша всесъжъже́нїѧ мно́га тꙋка съвръшенїа сп҃сенїѧ, и҆ жрътвы вс̂есъж꙽же́нїѧ·

И҆ съврьше́на ес̑҇ слꙋжба до́мꙋ гн҃ѧ, възвесели́ же сѧ і҆е҆зекїѧ и҆ вс̂и лю́дїе.
и҆ того ра́ди е҆же слꙋже́нїе гн҃е бы́сть и҆спо́лнено.
внеза́пꙋ б̂о сътвори́ти бы́ти и҆ ѹ҆го́дно бы́сть·

Глв̑҇а, л҃·

Посла́ же къ всемꙋ̀ і҆и҆л҃ю і҆ и҆ѹ́дѣ, написа же и҆ посла́нїѧ къ е҆фрѣмꙋ и҆ манасїи.
дабы̀ пришлѝ къ до́мꙋ гн҃ю въ і҆ерс̑҇ли́мъ и҆ сътвори́ли па́схꙋ г҃ꙋ б҃ꙋ і҆и҆л҃евꙋ, нача̀ совѣтъ цр҃ь съ нача́лники всего̀ мно́жества і҆ерс̑҇ли́ма и҆же позво́лиша, повелѣша да сътво́рѧтъ па́схꙋ мс̑҇ца втораго не б̂о поспѣша сътвори́ти въ вре́мѧ своѐ.
ꙗ҆́ко сщ҃ен꙽ницы не можа́хꙋ ѹ҆довлѣти.
и҆ ѻ҆сщ҃ен꙽ни не бы́ша вс̂и, и҆ лю́дїе не ѹ҆̀ събра́шасѧ въ і҆ерс̑҇ли́м꙽.
ѹ҆го́дно же сло́во цр҃еви, и҆ всемꙋ̀ мно́жествꙋ, и҆ повелѣша да по́слетъ послы̀ въ ве́сь і҆и҆л҃ь ѿ вирсавїи даже до да́на дабы̀ пришлѝ и҆ сътвори́ли па́схꙋ г҃ꙋ б҃ꙋ і҆и҆л҃евꙋ въ і҆ерс̑҇лимѣ, мн҃оѕи б̂о не сътвори́ша.
ꙗ҆́ко в꙽ зако́нѣ напи́сано е҆сть пои҆до́ша гон꙽цы̀ с꙽ посланїѧми ѿ црс̑҇каго повеле́нїѧ и҆ нача́лникъ е҆го, въ ве́сь і҆и҆л҃ь і҆ и҆ѹ҆де́ю, потомꙋ̀ чт̂о цр҃ь бѧ́ше повелл̑҇ѣ проповѣда́ющи, сн҃ове і҆и҆л҃еви ѻ҆братитесѧ къ г҃ꙋ б҃ꙋ а҆враам̑лю и҆саа́ковꙋ і҆ и҆а҆ковлю, и҆ ѻ҆братит̑сѧ къ ѻ҆ста́н꙽кꙋ и҆же и҆збы́ша рꙋкѝ цр҃ѧ а҆сѷрїиска.
не сотвори́ти ꙗ҆коже ѿц҃ы ва́ши и҆ бра́тїѧ, и҆же ѿи҆до́ша г҃а б҃а ѿц҃ь свои҆хъ.
и҆ преда́сть и҆хъ въ погꙋбле́нїе ꙗ҆́ко сїе зна́е҆те не ѻ҆жести́ти вы́ѧ ва́ша ꙗ҆́ко ѿц҃ы ва́ши.
дадите рꙋки ва́ша г҃ꙋ.
и҆ прїидѣте къ ст҃ительствꙋ е҆го ꙗ҆же ѻ҆ст҃и въ вѣки, слꙋжи́те г҃ꙋ б҃ꙋ ва́шемꙋ.
и҆ ѿвратит̑сѧ ѿ ва́съ гнѣвъ ꙗ҆́рости е҆го.
а҆ще б̂о вы̀ ѻ҆браще́ни бꙋдете къ г҃ꙋ т̂о бра́тїѧ ваша и҆ сн҃ове ва́ши ѻ҆брѧ́щꙋт꙽ млс̑҇ть пред̑ гм҃ъ и҆хъ.
и҆х꙽же ведо́ша плѣне́ны.
и҆ ѻ҆братитсѧ в землю сїю.
бл҃гъ б̂о и҆ млс̑҇тивъ е҆сть г҃ь б҃ъ ва́шъ.
и҆ не ѿврати́тъ лица̀ свое҆го ѿ ва́съ.
а҆ще ѻ҆брати́тесѧ к немꙋ, и҆ бѧ́хꙋ гонцы̀ ходѧ́ще скорѣ́ише ѿ гра́да въ́ градъ.
по землѝ е҆фрѣмли и҆ манасїинѣ, даже и҆ до заѹ҆ло́на.
и҆ бы́сть е҆гда̀ посмѣю́щимсѧ и҆ порꙋга́ющимсѧ и҆мъ, н̂о нѣцыѝ мꙋжи ѿ а҆сѷра и҆ манасїа и҆ заѹ҆лона ѹ҆кланѧ́ю҆щи совѣтъ.
прїидо́ша въ іерс̑҇лим̑ ѿ і҆ѹ҆де́ѧ, и҆б̂о бы́сть рꙋка̀ гн҃ѧ да дасть им̑ срд̑це е҆ді́но.
да сътворѧт̑ по повеле́нїю цр҃евꙋ и҆ кнѧ́ѕїи сло́во гн҃е събра́ни же сꙋть въ і҆ерс̑҇лимъ лю́ди мноѕи.
да сътворѧ́тъ пра́здникъ ѻ҆прѣсноком̑ въ мс̑҇ць вторы́и въ соньмѣ мно́гомъ ѕѣло, и҆ въста́ша и҆ разори́ша ѻ҆лтарь и҆же б̂ѣ въ і҆ерс̑҇лимѣ и҆ вс̂ѧ в꙽ ни́х же и҆́доломъ кадѧшесѧ ѳимїа́мъ и҆спрове́ргоша.
и҆ поврьгоша̑ и҆хъ в пото́цѣ ке́дръстѣмъ.
и҆ пожро́ша же пасхꙋ.
д҃і, дн҃ѧ, мс̑҇ца втораго.
сщ҃ен꙽ницы же и҆ левѷти тогда̀ ѻ҆сщ҃ени, и҆ принесо́ша вс̂есъж꙽же́нїе в дом̑ гн҃ь.
и҆ ста́ша же в꙽ чинꙋ̀ свое҆мъ по расмотре́нїю и҆хъ и҆ зако́нꙋ моѷсїѧ чл҃ка бж҃їѧ·

И҆ сщ҃енницы прїемлѧ́хꙋ и҆злїѧ́ннꙋю кро́вь ѿ рꙋкꙋ левѷтьскꙋ, того ра́ди чт̂о мно́гъ наро́дъ ѻ҆сщ҃енъ не бы́сть.
и҆ того ра́ди пожро́ша левѷти па́схꙋ тѣмъ и҆же не можа́шесѧ ѻ҆сщ҃ати г҃ꙋ.
вели́ка па́ки ча́сть людїи ѿ е҆фре́ма и҆ манасїѧ і҆ и҆саха́ра и҆ заѹ҆ло́на и҆же ѻ҆сщ҃енна не бы́сть ꙗ҆́сть па́схꙋ, не по е҆же пи́сано е҆сть, и҆ помоли́сѧ за ни́хъ і҆е҆зекїѧ гл҃ющи.
г҃и бж҃е бл҃гїи ѻ҆цыстѝ всѣмъ, и҆же всѣмъ срд̑цемъ взы́щꙋтъ г҃а б҃а ѿц҃ь своих̑ и҆ да не мни́тсѧ и҆мъ не ѻ҆сщ҃еннымъ сꙋщимъ чт̂о ме́н꙽ши и҆х꙽же ѹ҆слы́ша̑ г҃ь.
и҆ ѹ҆тѣшенъ е҆сть людми.
сътвори́ша же сн҃ове і҆и҆л҃еви и҆же ѻ҆брѣтени сꙋть въ і҆ерс̑҇ли́мѣ, пра́здникъ ѻ҆прѣснокъ.
з҃, дн҃їи въ весе́лїи вели́цѣ хвалѧ́ще г҃а по е҆ді́ны дн҃и·

Левѷти же и҆ сщ҃ен꙽ницы по ѻ҆рга́номъ гн҃имъ и҆же свои чи́нъ съверша́хꙋ.
и҆ гл҃алъ е҆сть і҆е҆зекїѧ къ срд̑цꙋ всѣмъ левѷтомъ.
и҆же и҆мѣхꙋ ра́зꙋмъ бл҃гъ на г҃а.
и҆ сконча́ша, з҃, дн҃їи пра́здника.
жрꙋще жертвы мирныа, и҆ хвалѧ́ще г҃а б҃а ѿц҃ь свои҆хъ·

И҆ совѣтъ сътворѝ собо́ръ твори́ти и҆́нꙋ, се́дмь, дн҃їи пра́здника, и҆ сътвори́ша и҆́нꙋю, з҃. дн҃їи празнꙋ́юще·

Съ ра́достїю б̂о нача̀ і҆е҆зекїѧ цр҃ь съ і҆ѹ́дою, и҆ да́сть ҂а҃, ю҆́нець, и҆, ҂з҃. ѻ҆ве́цъ.
и҆ начал꙽ницы же даша лю́демъ ю҆́нець.
҂а҃, и҆ ѻ҆ве́цъ, ҂і҃. ѻ҆сщ҃ен꙽но б̂о е҆сть сщ҃ен꙽никовъ мно́го мно́жество, и҆ ра́достїю и҆злїѧ́нъ весь наро́дъ і҆ѹ́динъ.
такоже и҆ сщ҃ен꙽ники и҆ левѷти и҆ вс̂е мно́жество и҆же прїидо́ша ѿ і҆и҆л҃ѧ.
и҆ прише́л꙽цы ѿ землѧ̀ і҆и҆л҃евы, и҆ ѻ҆бита́ющи въ і҆ѹ҆де́и·

Бы́сть же вели́ко пра́здньство въ і҆ерс̑҇ли́мѣ каково̀ не бы́сть ѿ дн҃їи соло́мона сн҃а двд҃ва цр҃ѧ і҆и҆л҃ва в꙽ томъ гра́дѣ·

И҆ въста́ша же сщ҃ен꙽ницы и҆ левѷти блс̑҇вѧще б҃а.
и҆ ѹ҆слы́шанъ е҆сть гла́съ их̑ и҆ прїиде моле́нїе в꙽ жили́ще е҆го ст҃ое нбс̑҇ное·

Глв̑҇а, л҃а·

Єгда же сїѧ вс̂ѧ съвръше́на.
и҆зшелъ е҆сть весь і҆и҆л҃ь и҆же ѻ҆брѣтенъ бы́сть въ гра́дх̑ѣ і҆ѹ́диныхъ.
и҆ съкрꙋши́ша ѻ҆́бразы, и҆ посѣко́ша га́и.
и҆ разори́ли сꙋть вы́шнѧѧ и҆ ѻ́лтари разори́ша ѿ всеѧ̀ і҆ѹ҆де́а и҆ венїами́на и҆ ѿ е҆фре́ма же и҆ до манасїѧ, до́ндеже вс̂ѧ и҆спровергоша·

И҆ ѻ҆брати́шасѧ вс̂и сн҃ове і҆и҆л҃еви.
въ ѻ҆дръжа́нїѧ их̑, и҆ гра́ды и҆хъ·

І҆е҆зекїѧ же поста́ви на кождо чи́нъ сщ҃ен꙽ническїи и҆ левѷт꙽скїи, по раздѣленїи их̑ е҆ді́ного ко́ждо по слꙋже́нїю е҆го въ ѹ҆строе҆нїе и҆́стин꙽ное сщ҃ен꙽никомъ и҆ левѷтомъ въ всѐсож꙽женїе и҆ ми́рнаѧ.
дабы̀ слꙋжи́ли і҆ и҆сповѣда́лисѧ, и҆ пѣли же въ вра́тх̑ѣ до́мꙋ гн҃ѧ·

Ча́сть же цр҃ева бысть ѿ и҆́стиннаго е҆го и҆мѣнїѧ да приносит̑сѧ вс̂есож꙽женїе ѹ҆́трѣ в꙽сегда̀ и҆ вечер̑҇, въ сꙋботы же и҆ въ но́вомѣсѧчїѧ и҆ пра́зницѣхъ про́чих̑.
ꙗ҆́ко пи́сан꙽но е҆сть въ законѣ гн҃и·

И҆ заповѣ́да па́ки людемъ и҆ живꙋщимъ въ і҆ерс̑҇ли́мѣ.
дабы̀ далѝ ча́сти сщ҃ен꙽никомъ и҆ левѷтомъ.
да мо́гꙋтъ настоѧ́ти зако́нꙋ гн҃ю.
и҆же е҆гда̀ погласовасѧ въ ѹ҆́ши мно́жествꙋ.
мно́ги сн҃ове і҆и҆л҃еви принесо́ша пшени́ци, и҆ вина̀ і҆ е҆ле́ѧ.
и҆ медꙋ и҆ вс̂ѧ и҆же ро́дитъ землѧ̀, и҆ десѧтины принесо́ша вс̂ѧ ѕѣ́ло мно́го·

Сн҃ове же і҆и҆л҃еви і҆ и҆ѹ́дины и҆же ѻ҆бита́хꙋ въ поса́дѣхъ і҆ѹ́диныхъ, и҆ принесоша и҆ тыи десѧтины ѿ воловъ, и҆ ѻ҆вецъ.
и҆ десѧтинꙋ ѿ коз̑, и҆ пост҃и и҆̀ г҃ꙋ б҃ꙋ свое҆мꙋ·

И҆ вс̂ѧ носѧ́щи сътвори́ша кꙋ́пы мно́ги.
мс̑҇ца третїаго поча́ша кꙋпомъ кла́сти ѻ҆снова́нїѧ.
и҆ мс̑҇ца, з҃ го̀, съвръши́ша и҆хъ·

Є҆гда же входѧ́щи быша.
і҆е҆зекїѧ и҆ нача́лницы е҆го, и҆ ви́дѣша кꙋ́пы.
и҆ блс̑҇ви́ша г҃а и҆ лю́ди і҆и҆л҃евы·

Въпроси́ же і҆е҆зекїѧ сщ҃ен̑҇никовъ и҆ левѷтовъ, ѻ҆ чемъ тако лежахꙋ кꙋ́пы·

ѿвѣща томꙋ̀ а҆зарїѧ сщ҃ен꙽никъ пр́ьвыи, ѿ колѣна садохова гл҃ющи, ѿнелѣже нача́ша приноси́ти прьвѣ́ишаѧ въ до́мъ гн҃ь.
ꙗ҆до́хомъ и҆ насыщахом̑сѧ доволно.
достат̑комъ и҆збыша сїѧ мно́га, того рад̑и̑ ꙗ҆же блс̑҇ви г҃ь лю́ди своѧ̀.
и҆ прочаѧж̑ е҆сть мно́жества сїа ꙗ҆́же ви́диши·

И҆ повелѣ и҆е҆зекїѧ да ѹ҆гото́ваютъ жи́тницы въ домꙋ̀ гн҃и.
и҆же е҆гда̀ сътвори́ша внесо́ша прьвѣи́шаѧ и҆ десѧтины.
и҆ е҆ли́ка же даша вѣрнѣ́ише·

Бѣ же старѣ́ишина их̑ хоненїѧ левѷтинъ.
и҆ семе́и брат̑ е҆го вто́рыи·

По си́х же і҆ и҆и́ль, и҆ ѻ҆хозїѧ, и҆ кенеѳ̑҇ и а҆саи́ль, и҆ е҆римоѳъ, и҆ ѻ҆зава́дъ.
и҆ е҆лїи́ль и҆ ѻ҆самахїѧ, и҆ маа҆ѳъ, и҆ ванаїа́съ, и҆ сн҃ы е҆го приставле́ны по рꙋкꙋ хоненїи и҆ семе́и бра́та е҆го ѿ повелѣнїѧ і҆е҆зекїа цр҃ѧ.
и҆ а҆за́рїа а҆рхїере́а до́мꙋ гн҃ѧ·

Къ нимъ же вс̂ѧ пред̑стоа́хꙋ, и҆ коре́и сн҃ъ е҆м꙽на левѷтъ и҆ дверникъ въсточныхъ вра́тъ приста́вникъ б̂ѣ тѣмъ иже во́лею приноша́хꙋ г҃ꙋ.
прьвѣ́ишаѧ и҆ пресщ҃ен꙽ныхъ въ ст҃аѧ ст҃ых̑·

И҆ под̑ настоѧ́нїе его е҆ді́нъ, и҆ венїаминъ, і҆е҆сꙋе, и҆ семеїѧ, а҆марїѧ же, и҆ сохо́нїѧ въ рꙋкꙋ сщ҃ен꙽никомъ.
да вѣрнѣ́ише раздѣлѧ́ютъ бра́тїи свое́и по слꙋже́нїю на кождо дн҃ь, ча́сти бо́лшимъ и҆ меншимъ·

Про́чихъ мꙋж́еска по́лꙋ ѿ лѣтъ трею и҆ выш꙽ше всѣмъ и҆же въхожда́хꙋ въ цр҃квь гн҃ю.
и҆ чтож̑ по всѧ̀ дн҃и възводѧхꙋ сїе постановенїе въ слꙋжъбꙋ и҆ въздеръжа́нїе.
по раздѣленїихъ своих̑ сщ҃енником̑ по семъꙗ҆мъ.
и҆ левѷтомъ ѿ к҃ тѝ, лѣт꙽, и҆ вы́ш꙽ше по чи́ном̑.
и҆ всемꙋ же мно́жествꙋ, толико же на́мъ колико свобод̑нымъ и҆хъ ѻ҆бѣ́ю же по́ломъ.
вѣрнѣ́ише бра́шна ѿ тѣх꙽ и҆же ѻ҆сщ҃ен꙽на бѣхꙋ въздаа́хꙋсѧ·

Но и҆ сн҃овомъ а҆а҆ро́нимъ по поле́мъ и҆ под̑ гра́ды гра́домъ и҆ е҆ди́ным̑ расмотре́ни бѣша мꙋж́и и҆же ча́сти раздава́ю҆тъ всм̑ѣ по́лꙋ мꙋжескꙋ ѿ сщ҃ен꙽никъ и҆ левѷт꙽.
сътвори б̂о е҆зекїа вс̂ѧ и҆же гл҃ахомъ.
въ все́и і҆ꙋде́и дѣла́лъ же е҆стъ бл҃го и҆ пра́во и҆ и҆сти́н꙽но пред̑ гм҃ъ бм҃ъ своим̑ и҆́же е҆сть всѧ̀ слꙋж́ба слꙋже́нїа до́мꙋ гн҃ѧ по зако́нꙋ и҆ чи́ны.
хотѧ́щи възыска́ти б҃а свое҆го всѣмъ срд̑цемъ свои҆мъ сътвори же и҆ преспѣва́ше·

Глв̑҇а, л҃в·

И по словесе́хъ сих̑, и҆ и҆стин꙽нѣ се́и.
прїи́де сенахерим̑ цр҃ь а҆сѷрїи́скїи и҆ вни́де въ і҆у҆де́ю ѻ҆б꙽стоѧ̀ гра́ды запа́систы хотѧ́щи възѧти и҆хъ·

Є҆гда́ же ви́дѣ і҆е҆зекїа и҆же прихо́дит̑ сенахери́мъ.
проти́вꙋ лица̀ е҆го вое҆ва́ти на і҆ерс̑҇ли́мъ·

Начат̑ съ кнѧ́ѕи е҆го совѣтъ, и҆ мꙋж́и же крѣпча́ишими.
да запира́ютъ главы̀ и҆сто́чникомъ и҆же бѣша вн̂ѣ гра́да·

И҆ быс̑҇ совѣтъ е҆го бл҃гъ.
и҆ собра̀ мно́го мно́жество людїи.
и҆ запроша вс̂и и҆сто́чницы вод̑ныѧ и҆ пото́къ и҆же лїашесѧ по́средѣ града гл҃ющи.
да не прїидет̑ цр҃ь а҆сѷрїискїи ѻ҆брѧ́щетъ вод̑ мно́го и҆ ѹ҆крѣпит̑сѧ·

И҆ ѹ҆крѣпи́сѧ е҆зекїа, и҆ созда̀ вс̂ѧ стѣны и҆же бы́ша рассы́паны.
и҆ столпы̀ на не́и, і҆ и҆зъ внꙋ̀ и҆́нꙋю стѣ́нꙋ·

Въздви́же же разрꙋшенаѧ въ́ градѣ двд҃вѣ.
поправѝ и҆ сътворѝ ѻ҆рꙋжїѝ мно́го и҆ щи́тов̑҇·

И҆ постави же нача́лники бра́немъ над̑ лю́дми въ во́ю.
и҆ созва̀ всѣхъ на пло́щадь до вра́тъ дебрѝ.
и҆ гл҃алъ е҆сть въ срд̑ца их̑ гл҃ющи мꙋжественѣ дѣ́лаите и҆ ѹ҆крѣпи́тесѧ, не ѹ҆страша́итесѧ ни ѹ҆жаса́итесѧ ѿ лица̀ цр҃ѧ а҆сѷрїиска.
и҆ всего̀ мно́жества ли́цъ и҆же сꙋть с ни́мъ·

Ꙗ҆́ко мно́го множа́е с на́ми сꙋть не́же с тѣмъ.
с тѣмъ б̂о е҆сть мы́ш꙽ца пло́тьнаѧ.
с на́ми же г҃ь б҃ъ на́шъ помо́щникъ на́шъ.
и҆ ѻ҆полчи́тъ же сѧ за на́съ·

Ѹ҆крѣплени́ же сꙋть лю́ди словесы̀ і҆е҆зекїѧ цр҃ѧ і҆ѹ́дина·

И҆ посе́мъ посла̀ сенахери́мъ цр҃ь а҆сѷрїискїи рабы̀ своѧ̀ въ і҆ерс̑҇ли́мъ.
и҆ самъ съ всѣмѝ во́и ѻ҆бъстоа́ше лахи́съ.
и҆ посла̀ къ і҆е҆зекїѝ цр҃ю і҆ѹ́динꙋ, и҆ къ всѣмъ людем̑ и҆же бѣхꙋ въ і҆ерс̑҇лимѣ гл҃щи·

Сїѧ гл҃етъ сенахерим̑ цр҃ь а҆сѷрїскїи.
въ чемъ в̂ы ѹ҆поваете сѣдѧ́ще въ ѻб̑҇стоа́нїи і҆ерс̑҇ли́мовѣ.
не́ ли і҆е҆зекїѧ прельща́етъ васъ да преда́сть в̂ы въ смр҃ть, въ глад̑ и҆ жа́ждꙋ.
ѹ҆крѣплѧ́ющи и҆же г҃ь б҃ъ ва́шъ и҆зба́вит̑ васъ ѿ рꙋкꙋ цр҃ѧ а҆сѷрїиска·

Не се л̂и се́й е҆сть і҆езекїѧ и҆же разорѝ вы́шънѧѧ ѻ҆лта́ри е҆го.
и҆ повелѣ і҆ѹ́дѣ і҆ и҆ерс̑҇лимꙋ гл҃ющи.
пред̑ ѻ҆лта́ремъ сим̑ покланѧ́итесѧ.
и҆ в немъ сожига́ите ѳемїа́мъ·

Ни лѝ в̂ы не вѣ́сте чт̂о а҆́зъ сътвори́хъ и҆ ѿц҃ы моѝ всѣмъ зем꙽скымъ людемъ.
и҆ не премого́ша̑ вс̂и бо́ѕи ꙗ҆зы́ковъ и҆зба́вити странꙋ̀ свою̀ ѿ рꙋкꙋ мое́́ю.
кт̂о е҆сть ѿ въсѣхъ бо́говъ ꙗ҆зы́къ си́хъ.
и҆хже и҆скорениша ѿц҃ы моѝ.
не мо́глъ н̂и е҆ді́нъ и҆зба́вити лю́ди своѧ̀ ѿ рꙋ́кꙋ мое́ю.
да ꙗ҆ко мо́жетъ па́ки б҃ъ ваш̑҇ и҆зба́вити васъ ѿ рꙋкѝ мое́ѧ.
и҆ нн҃ѣ васъ да не прельсти́тъ і҆е҆зекїѧ да не ѹ҆пова́ти вас̑҇ сътворит̑ посемꙋ̀, и҆ не вѣ́рꙋите е҆мꙋ·

А҆́ще б̂о ни е҆ді́нъ мо́глъ б҃ъ всѣхъ стра́нъ и҆зба́вити лю́ди своѧ̀ ѿ рꙋкꙋ мое́ю, и҆ ѿ рꙋ́кꙋ ѿц҃ъ мои҆хъ.
н̂и б̂о б҃ъ ва́шъ възъмо́жет꙽ и҆зба́вити вас̑҇ ѿ рꙋкѝ мое́ѧ.
н̂о і҆ и́на мно́га гл҃али сꙋть рабѝ е҆го проти́вꙋ г҃а б҃а, и҆ проти́вꙋ і҆е҆зекїѧ раба̀ е҆го.
и҆ посла́нїѧ же писа̀ поношаѧ г҃а б҃а і҆и҆л҃ева.
и҆ гл҃алъ е҆сть на́нь рекїи·

Ꙗ҆́ко бо́ѕи ꙗ҆зы́къ прочїихъ не мого́ша и҆зба́вити людїи свои҆хъ ѿ рꙋ́кꙋ мое́ю.
та́ко и҆ б҃ъ і҆е҆зекїинъ и҆зба́вити не мо́жетъ людїи е҆го ѿ рꙋкѝ мое҆ѧ·

И҆ на́ипаче възопѝ во́племъ вели́кимъ ꙗ҆зы́комъ і҆ѹ҆де́иским̑ проти́вꙋ людїи, и҆же сѣдѧ́хꙋ на стѣнах̑ і҆ерс̑҇ли́ма да ѹ҆страшит̑ и҆хъ и҆ во́зметъ гра́дъ·

И҆ гл҃алъ же е҆сть проти́вꙋ б҃а і҆и҆л҃ева.
ꙗ҆́ко сꙋпроти́вꙋ бого́въ людїи зе́мъскихъ, дѣ́ла рꙋкъ чл҃ческих̑·

И҆ моли́ша же сѧ сего̀ ра́ди поношенїѧ, і҆е҆зекїѧ цр҃ь і҆ и҆саїѧ сн҃ъ а҆м꙽мосовъ про̑҇ркъ.
и҆ възопи́ша да́же до нб҃си·

И҆ посла̀ г҃ь а҆гг҃ла свое҆го.
и҆же поразѝ всѣхъ мꙋже́и хра́брыхъ и҆ бра́нниковъ.
и҆ нача́лники во́емъ, въ по́лцехъ цр҃ѧ а҆сѷрїиска.
и҆ възвратѝ лице е҆го с поноше́нїемъ на́ землю свою̀·

Є҆гда же въшелъ е҆сть в до́мъ б҃а свое҆го.
сн҃ове и҆же и҆зошлѝ бѣша ѿ чре́ва е҆го погꙋби́ша е҆го мечем̑.
сп҃се же б҃ъ і҆е҆зекїю и҆ ѻ҆бита́ющихъ і҆ерс̑҇ли́мꙋ ѿ рꙋ́кꙋ сенахерима цр҃ѧ а҆сѷрїиска и҆ ѿ рꙋ́кꙋ всх̑ѣ, и҆ пода́сть и҆мъ поко́и по ѻ҆́крс̑҇тъ·

И҆ мно́ѕи приноша́хꙋ жрътвы г҃ꙋ въ і҆ерс̑҇лимѣ, и҆ дары і҆езекїи цр҃ю і҆ѹ́динꙋ и҆же възвышенъ е҆сть по си́хъ предъ всѣми ꙗ҆зы́ки·

И҆ потомъ по́ дн҃ех꙽ тѣх꙽ и҆знемо́же і҆е҆зекїа даже смр҃ти и҆ помоли́сѧ г҃ꙋ.
и҆ ѹ҆слы́ша же и҆ дасть е҆мꙋ зна́менїе, и҆ не по добродѣтели, и҆же даде е҆мꙋ·

Възда́сть і҆е҆зекїи, и҆ въздви́жено е҆сть срд̑це е҆го.
и҆ сотворе́нъ бысть проти́вꙋ е҆го гнѣ́въ и҆ проти́вꙋ і҆ѹ́ды і҆ и҆ерс̑҇лима.
и҆ смире́нъ бысть по си́хъ·

Того ради е҆же възвыше́но бысть срд̑це е҆го.
тако ѻ́нъ ꙗ҆́ко и҆ живꙋщеѝ въ і҆ерс̑҇лі́мѣ.
не прїиде на них̑ ꙗ҆́рость гн҃ѧ во дн҃и і҆е҆зекїины·

И҆ бысть же і҆е҆зекїеви бога́тъство и҆ сла́ва мно́га ѕѣло.
и҆ сокро́вища себѣ̀ мно́ги собра̀ сребра̀ и҆ зла́та.
и҆ ка́менїѧ чс̑҇тнаго, и҆ а҆рома́ты, и҆ ѻ҆рꙋжїа храни́лницы.
и҆ всѣхъ разныхъ сосꙋдовъ вели́къ чи́нъ.
и҆ житници жит̑ пшени́цы и҆ вина̀ и҆ е҆ле́ѧ.
и҆ ꙗ҆сли всм̑ѣ скотом꙽, и҆ ста́н꙽ же ста́домъ и҆ загра́ды ѻ́вцам̑.
и҆ поса́довъ, ѕ҃, созда̀·

И҆мѧ́ше б̂о ста́да ѻ҆ве́цъ и҆ скотовъ безчи́слена·

Того ради чт̂о да́сть е҆мꙋ г҃ь и҆ собра́нїѧ мно́го ѕѣло.
то́й е҆сть і҆е҆зекїѧ, и҆же завре вы́шнїи клю́чъ вод̑ныи сїѻ́на·

И҆ ѻ҆брати и҆хъ съ до́лꙋ к꙽ полꙋ́дню града двд҃ва.
въ всѣхъ дѣлехъ свои҆хъ сътворѝ преспѣва́ѧ и҆же въсхотѣ̀·

И҆ се́й въ посла́нїи кнѧѕе́и вавѷлон꙽скихъ, и҆же посла́ни бѧ́хꙋ к не́мꙋ да вопросѧт̑ е҆го ѻ҆ чюдесѝ и҆же слꙋчи́сѧ на землѝ·

И҆ ѻ҆ста́ви е҆го г҃ь да и҆скꙋси́тъ е҆го ви́дѣти и҆же бѣша въ срд̑ци е҆го·

И҆ про́чаѧ же словесъ і҆е҆зекїа и҆ щедроты е҆го и҆ пи́сана сꙋть въ видѣнїѝ і҆саїѧ проро́ка сн҃а а҆м꙽мосова.
и҆ въ кни́ѕѣ цр҃ьствъ і҆ѹ́ды і҆ и҆и҃лѧ·

И҆ ѹ҆спе же і҆е҆зекїѧ съ ѿц҃ы свои҆ми, и҆ погребо́ша е҆го над̑ гро́бы сн҃овъ двд҃выхъ.
и҆ сла́вꙋ и҆ честь даша е҆мꙋ въ смр҃ти е҆го ве́сь і҆ѹ́да.
и҆ вс̂и и҆же ѻ҆бита́хꙋ въ і҆ерс̑҇лимѣ.
и҆ црс̑҇твова же манасїѧ сн҃ъ е҆го в него̀ мѣсто·

Глв̑҇а, л҃г·

Двадесѧ́ти лѣтъ б̂ѣ манасїѧ е҆гда̀ црс̑҇твова́ти нача̀ и҆ н҃е, лѣтъ, црс̑҇твова̀ въ і҆ерс̑҇лимѣ.
сътвори́ же лꙋка́вое пред̑ гм҃ъ по поноше́нїю ꙗ҆зы́къ и҆́хже и҆спрове́рже г҃ь пред̑ сн҃ы і҆ил҃евы·

И҆ ѻ҆брати́сѧ и҆ воздви́же вы́шнѧа их̑же раскопал̑҇ б̂ѣ е҆зекїа ѿц҃ъ е҆го.
състро́и же ѻ҆лтарѝ ваа҆ли́мꙋ.
и҆ сътворѝ лѣ́сы.
и҆ поклони́сѧ в꙽семꙋ̀ мно́жествꙋ нб҃си.
и҆ почтѝ и҆хъ.
и҆ създа же ѻ҆лтари в домꙋ̀ гн҃и.
ѻ҆ них̑ же гл҃а г҃ь·

Въ і҆ерс̑҇лимѣ бꙋ́детъ и҆́мѧ моѐ въ вѣ́ки.
и҆ създа же жръто́вники всѣмъ во́емъ нбс̑҇нымъ въ двою̀ дво́рѣхъ до́мꙋ гн҃ѧ.
проити же сътворѝ сн҃овомъ свои҆мъ по ѻ҆гню̀ въ ѹ҆до́ли вененони, и҆ вража́ше со жре́бїи.
послѣ́доваше гада́нїемъ, и҆ проклѧ́тымъ вол꙽фова́нїем̑ ѕѣ́ло слꙋжа́ше, и҆мѣ́аше съ собо́ю вол̑҇фы и҆ ѻ҆баа́н꙽ники·

Мно́га же лꙋка́ва дѣ́ла е҆сть сътворил̑҇ пред̑ гм҃ъ да прогнѣ́ваетъ е҆го.
и҆стꙋка́н꙽на же и҆ сълїа́на ѻ҆́бразы поста́ви в домꙋ̀ гн҃и·

ѻ҆ не́мже гл҃алъ е҆сть г҃ь къ дв҃дꙋ и҆ къ соло́монꙋ сн҃ꙋ е҆го гл҃ющи·

Въ домꙋ̀ се́мъ и҆ въ і҆ерс̑҇лимѣ е҆го́же и҆збра́хъ ѿ всѣхъ колѣ́нъ і҆и҆л҃евых̑.

Положꙋ̀ и҆́мѧ моѐ въ вѣ́ки·

И҆ не приложꙋ̀ подви́гнꙋти но́гꙋ і҆и҆л҃евꙋ ѿ землѧ̀ ю҆же преда́хъ ѿц҃емъ и҆хъ·

То́кмо а҆́ще съхранѧ́тъ сътвори́ти и҆же повелѣ́хъ им̑, по всемꙋ̀ зако́нꙋ и҆ чи́нꙋ и҆ сꙋд꙽ба́мъ и҆же заповѣ́дахъ рꙋко́ю моѷсїа·

И҆ прельсти манасїа і҆ѹ҆де́ю и҆ живꙋщихъ въ і҆ерс̑҇лимѣ да сътво́рѧтъ лꙋкавое над̑ всѣми ꙗ҆зы́ки.
и҆́хже и҆спрове́рже г҃ь ѿ лица̀ сн҃овъ і҆и҆л҃евъ·

И҆ гл҃алъ же е҆сть г҃ь на манасїѧ, и҆ на лю́ди е҆го.
и҆ внѧ́ти не въсхотѣша.
того ра́ди наведе на них̑ нача́лники во́и цр҃ѧ а҆сѷрїиска·

И҆же ꙗ҆́ша манасїѧ и҆ свѧза́ша чѣп꙽ми и҆ ѻ҆ко́вы но́жными, и҆ ведо́ша въ вавѷло́нъ.
и҆ ꙗ҆́ко ѹ҆нꙋженъ бы́сть.
помоли́сѧ г҃ꙋ б҃ꙋ свое҆мꙋ, и҆ сътворѝ покаа́нїе ѕѣ́ло пред̑ лицемъ б҃а ѿц҃ь своих̑.
и҆ помоли́сѧ къ немꙋ·

И҆ ѹ҆слы́ша мл҃твꙋ е҆го, и҆ во́пль е҆го.
и въз꙽врати е҆го въ і҆ерс̑҇лимъ на црс̑҇тво е҆го.
и҆ позна̀ манасїа ꙗ҆́ко г҃ь се́и е҆сть б҃ъ.
и҆ посем̑ же създа̀ стѣнꙋ вн̂ѣ гра́да двд҃ва ѿ лива́на къ восто́кꙋ въ пото́цѣ, ѿ в꙽хоже́нїѧ вра́тъ ри́бныхъ.
и҆ възд̑ви́же т̂о ѕѣ́ло·

И҆ поста́ви нача́лники во́емъ въ всѣхъ гра́дехъ і҆ѹ́диныхъ стѣна́тыхъ.
і҆ и҆ ѿꙗ҆́тъ бо́ги чю́джи і҆ и́долы ѿ до́мꙋ гн҃ѧ.
и҆ вс̂ѧ ѻ҆лтарѧ̀ и҆́хже сътворѝ въ горѣ̀ до́мꙋ гн҃ѧ въ і҆ерс̑҇ли́мѣ, і҆ и҆згна̀ вс̂ѧ во́нъ и҆с поса́довъ·

И҆ па́ки въздви́гъ ѻ҆́лтарь гн҃ь.
и҆ пожрѐ на то́мъ жр́ътвы и҆ ми́рнаѧ и҆ хвалꙋ̀.
и҆ заповѣ́да і҆ѹ́дѣ да слꙋжатъ г҃ꙋ б҃ꙋ і҆и҆л҃евꙋ.
ѻ҆ба́че же е҆щѐ лю́дїе жрѧ́хꙋ на высо́кихъ сꙋ́етъномꙋ бо́гꙋ свое҆мꙋ.
и҆ про́чаѧ же дѣѧ́нїа манасїина и҆ моли́тва е҆го и҆же къ б҃ꙋ.
и҆ словеса̀ ви́дѧщихъ ꙗ҆́же гл҃ахꙋ к немꙋ во и҆мѧ г҃а б҃а і҆и҆л҃ева·

Сѐ въ словесе́хъ моли́твы е҆го, и҆ ꙗ҆́ко ѹ҆слы́ша е҆го и҆ всѧ̀ грѣхѝ.
и҆ ѹ҆ничиже́нїе.
и҆ мѣ́ста в нихъ же съзида̀ высо́каѧ, и҆ сътвори лѣ́сы, и҆ ѻ҆́бразы, і҆ и҆зваѧ́н꙽ны, и҆ пре́же не́же сътвори́ покаѧ́нїе.
пи́сана сꙋть въ словесе́хъ ви́дѧщихъ·

Ѹ҆спе́ же манасїѧ съ ѿц҃ы свои҆ми.
и҆ погребо́ша е҆го въ са́дѣ въ домꙋ̀ е҆го·

И҆ цр҃ьствова же в него мѣ́сто сн҃ъ е҆го а҆монъ к҃в, лѣтѣ бы́сть а҆мо́нъ е҆гда̀ црс̑҇твова́ти нача́.
и҆ в҃, лѣта црс̑҇твова въ і҆ерс̑҇лимѣ.
и҆ сътвори́ же лꙋка́вое пред̑ гм҃ъ ꙗ҆́ко творѧ́ше манасїѧ ѿц҃ъ е҆го, и҆ всѣ́мъ и҆́доломъ и҆же манасїа б̂ѣ сътвори́лъ·

Пожрѐ а҆мо́нъ и҆ слꙋжи и҆мъ, и҆ не смири́сѧ пред̑ гм҃ъ ꙗ҆́ко смири́сѧ манасїѧ ѿц҃ъ е҆го занѐ и҆ мно́жае и҆ бол̑҇ши съгрѣши·

Є҆гда же и҆ съпротиви́шасѧ проти́вꙋ е҆го рабѝ е҆го.
ѹ҆би́ша е҆го в домꙋ̀ е҆го·

И҆ па́ки лю́дїе землѝ ѹ҆би́ша тѣхъ и҆же а҆мо́на порази́ша.
и҆ поста́виша лю́дїе землѧ̀ цр҃ѧ і҆ѻ҆сїа сн҃а е҆го в него мѣ́сто·

Глв̑҇а, л҃д·

Ѡсмъ лѣтъ бысть і҆ѻ҆сїѧ е҆гда̀ црс̑҇твова́ти нача̀, и҆ л҃а, лѣто црс̑҇твова въ і҆ерс̑҇лимѣ.
и҆ сътвори́ же чт̂о быс̑҇ пра́во пред̑ гм҃ъ, и҆ ходѝ въ пꙋтех̑ дв҃да ѿц҃а свое҆го.
и҆ не ѹ҆клони́сѧ н̂и на де́сно н̂и на́ лѣво·

Въ і҃ е лѣто црс̑҇тва свое҆го.
и҆ сѐ бо е҆ще б̂ѣ ѻ҆́трок̑҇ нача̀ възыска́ти б҃а ѿц҃а свое҆го дв҃да.
и҆ въ в҃і лѣто црс̑҇тва свое҆го нача̀ ѻ҆чища́ти і҆ѹ҆де́ю, і҆ерс̑҇лимъ.
ѿ высо́ких̑ и҆ лѣ́совъ, і҆ и́доловъ і҆ и҆стꙋка́нных̑·

и҆ разори́ша же пред̑ ни́мъ ѻ҆лтарѧ̀ ваа҆лимлѧ і҆ и́долы иже наставле́ни бѧ́хꙋ съкрꙋше́ни сꙋть, и҆ посѣчѐ га́и, і҆ и҆стꙋка́нныѧ, и҆ сълїѧ́нныѧ.
и҆ съкрꙋшѝ, і҆ и҆стнѝ, и҆ ростопѝ, и҆ поверже пред̑ лице́мъ гро́бовъ, жер꙽твъ и҆хъ, и҆ ко́сти жерцевъ и҆хъ съж꙽же на ѻ҆́лтарѣхъ их̑·

И҆ ѻ҆чисти і҆ѹ́дꙋ і҆ерс̑҇лимъ.
и҆ въ градехъ манасїиных̑ и҆ е҆фрѣмлихъ и҆ симеѻ́нихъ да́же и҆ до неѳали́ма и҆ мѣ́ста и҆хъ, всѧ̀ и҆спрове́рже.
и҆ ѻ҆лтарѝ размета̀, и҆ лѣсы̀ и҆стꙋка́н꙽ныѧ и҆стнѝ въ кꙋсїе.
и҆ всѧ̀ же кꙋми́рницы высо́кїа и҆стнѝ ѿ всеа̀ землѧ̀ і҆и҆л҃евы.
и҆ възврати́сѧ въ і҆ерс̑҇лимъ·

Въ и҃і, лѣто црс̑҇тва свое҆го.
ѻ҆чище́на землѧ̀ и҆ цр҃ковь гн҃ѧ.
посла же сам̑фа́на сн҃а е҆селїева, и҆ а҆меа҆сїю нача́лника гра́да.
і҆ и҆ѻ҆а́са сн҃а и҆ѻ҆ха́зова памѧтопи́сца, да въздвигнꙋтъ до́мъ г҃а б҃а свое҆го, и҆же прїидо́ша къ хелкїи сщ҃енникꙋ вели́комꙋ прїѧ́ти ѿ него сре́бреники и҆же принесе́ни бѣша до́мꙋ гн҃ю, их̑же събра́ша левѷти и҆ две́рницы ѿ манасїѧ и҆ ѿ е҆фрѣма и҆ нача́лниковъ и҆ всх̑ѣ про́чихъ і҆и҆зра́илѧ.
и҆ ѿ всеѧ̀ і҆ѹ҆де́а и҆ венїами́на, и҆ ѻ҆бита́ющих̑ въ і҆ерс̑҇лимѣ и҆ да́ша в рꙋцѣ и҆хъ и҆же пред̑нїи бѧ́хꙋ дѣ́лателїе в домꙋ гн҃и.
да въздви́гнꙋтъ цр҃ковь.
и҆же и҆ не крѣ́пкаѧ да ѹ҆правлѧ́ютъ.
и҆ тїи да́ша ѧ҆̀ ѹ҆модѣ́лникомъ і҆ и҆звѣ́стникомъ да кꙋпѧтъ ка́менїе четвероѹ҆го́лное, и҆ на дре́ва на раз꙽сѣ́лныѧ съзида́нїѧ, и҆ на покры́тїе до́момъ и҆же разориша цр҃и і҆ѹ́дини.
и҆же вѣрнѣ́ишїе мꙋж́и всѧ̀ сътвори́ша·

Бѧ́хꙋ же пред̑ста́тели дѣ́лателемъ ге́ѳъ, и҆ а҆вдїѧ левѷтинъ ѿ сн҃овъ мера́ри, и҆ заха́рїѧ, и҆ мосол̑҇ла́мъ ѿ сн҃овъ каа́ѳъ и҆же прилежа́хꙋ дѣ́лꙋ.
и҆ вс̂и левѷти, і҆ и́же знахꙋ въ а҆рга́ны пѣти.
над̑ тѣми и҆же по ро́знымъ ѻ҆бы́чае҆мъ бремена̀ ноша́хꙋ.
и҆ над̑ творѧ́щими дѣ́ло дѣла́нїѧ·

И҆ ѿ левѷтъ бѣша писари и҆ сꙋдїи и҆ две́рницы, е҆гда̀ и҆зноша́ти и҆мъ сре́бреники и҆же принесе́ни бѣша въ цр҃ковь гн҃ю·

И҆ ѻ҆брѣтѐ хел̑҇кїа сщ҃енникъ, книгꙋ зако́на гн҃ѧ.
и҆же дана̀ бы́сть под̑ рꙋ́кꙋ моѷсїѧ·

И҆ ѿвѣща̀ хел꙽кїѧ и҆ рече къ сафа́нꙋ писарꙋ.
книгꙋ зако́на ѻ҆брѣто́хъ въ домꙋ̀ гн҃и и҆ дадѐ сафа́нꙋ.
ѻ҆́нъ же несѐ ю҆̀ къ цр҃ю.
и҆ звѣща̀ е҆мꙋ гл҃ющи.
всѧ̀ и҆же да́лъ е҆си в рꙋ́кꙋ рабо́мъ твоим̑ с̂е съверша́ютсѧ.
сребро̀ чт̂о наидо́хомъ в домꙋ̀ гн҃и сълїѧ́хом꙽.
да́но же е҆сть дѣ́лателемъ ѹ҆модѣ́лнымъ, и҆ ро́знаѧ дѣ́ла кꙋ́ющимъ·

И҆ възвѣстѝ сафа́нъ пи́саръ сло́во гл҃ѧ, даде́ м̂и хел꙽кїа сщ҃ен꙽никъ сїю кни́гꙋ.
и҆же сафа́нъ съ цр҃емъ настоѧ́щее почита́ше·

И҆ слы́ша цр҃ь словеса̀ зако́на и҆ растерза̀ ри́зы своѧ̀·

И҆ повелѣ̀ цр҃ь хел꙽кїеви, и҆ а҆хика́мꙋ сн҃ꙋ и҆ѻ҆сафа́новꙋ.
и҆ а҆вдо́нꙋ сн҃ꙋ михе́евꙋ, и҆ сафа́нꙋ пи́сарꙋ, и҆ а҆са́їю рабꙋ̀ цр҃евꙋ гл҃ющи.
и҆дѣте и҆ моли́тесѧ г҃ꙋ за мѧ̀, и҆ за про́чихъ і҆и҆л҃ѧ і҆ и҆ѹ́дꙋ, за всѧ̀ словеса̀ книги сеѧ̀ и҆же ѻ҆брѣте́на е҆сть.
вели́къ б̂о гнѣ́въ раз̑горѣ́сѧ на нас̑҇.
того ра́ди и҆же не съхрани́ша ѿц҃ы на́ши слове́съ гн҃ихъ, да сътво́рѧтъ всѧ̀ и҆же пи́сана сꙋть в то́мъ ѻ҆брѣте́нїи·

І҆ и́де хел꙽кїѧ, и҆ тїи и҆же вкꙋ́пѣ ѿ цр҃ѧ послани бѧ́хꙋ къ ѻ҆л꙽да́нѣ прро̑҇чицы женѣ̀ сел꙽лꙋ́мовѣ, сн҃овъ ѳекꙋе́выхъ сн҃ꙋ е҆серїевꙋ стра́жеи ри́зных꙽.
хранѧ́щеи за́повѣди.
и҆же ѻ҆биташе въ і҆ерс̑҇лимѣ въ маса́нѣ и҆ гл҃али сꙋть е́и по семꙋ̀·

И҆ та̀ ѿвѣща̀ и҆мъ.
сїѧ рече г҃ь б҃ъ і҆и҆л҃евъ.
гл҃ите мꙋж́ꙋ и҆же посла̀ вас̑҇ къ мнѣ̀.
сїѧ рече г҃ь с̂е а҆́зъ наведꙋ̀ ѕла́ѧ на мѣсто с̂е, и҆ на ѻ҆бита́ющих̑ е҆го.
всѧ же проклѧ́тїѧ и҆же пи́сана сꙋть въ кни́ѕѣ то́и, ю҆́же что́ша пред̑ цр҃емъ і҆ѹ́динымъ занѐ ѻ҆ста́виша м̂ѧ.
и҆ кадѧ́хꙋ бого́мъ чю́ждимъ.
да м̂ѧ къ ꙗ҆́рости призовꙋтъ, въ всѣ́хъ дѣлех̑ рꙋ́кꙋ свою̀.
того ра́ди разгорѣ́сѧ гнв̑҇ѣ мо́и на мѣ́сто т̂о и҆ не ѹ҆га́ситсѧ·

И҆ къ цр҃ю же і҆ѹ́динꙋ и҆же посла̀ ва́съ ко г҃ꙋ помоли́тисѧ та́ко гл҃ите е҆мꙋ.
сїѧ рече г҃ь б҃ъ і҆и҆л҃евъ.
ꙗ҆́ко слы́шалъ е҆си словеса̀.
и҆ сꙋмнѣ́сѧ срд̑це твоѐ и҆ смири́л꙽сѧ е҆си предо мно́ю над̑ тѣми и҆же рече́нна сꙋть проти́вꙋ мѣста сего, и҆ ѻ҆бита́ющимъ і҆ерс̑҇лимꙋ.
посрами́ же сѧ лица̀ мое҆го и҆ растерза́лъ е҆си ри́зы твоѧ̀ и҆ пла́калъ е҆си предо мно́ю.
а҆́з꙽ же ѹ҆слы́шахъ т̂ѧ реч̑҇ г҃ь.
с̂е приложꙋ̀ т̂ѧ къ ѿц҃емъ твои҆мъ, и҆ приложи́шисѧ въ гро́бѣ твое҆мъ въ мирѣ.
и҆ не ѹ́зрѧтъ ѻ҆́чи твоѝ всѧ́кого ѕла̀ и҆же а҆́зъ наведꙋ̀ на мѣ́сто сѐ, и҆ на ѻ҆бита́ющихъ е҆го·

Възвѣсти́ша ѹ҆бо цр҃ю всѧ и҆же гл҃а.
и҆ посла̀ цр҃ь и҆ съзва всѣ́хъ бо́лше род̑ныхъ і҆ѹ́диныхъ і҆ерс̑҇лима.
и҆ в꙽зы́иде въ дом̑ гн҃ь.
и҆ вси мꙋ́жи і҆ѹ́дины и҆ живꙋщеи въ і҆ерс̑҇лимѣ.
и҆ сщ҃енницы и҆ левѷты, и҆ ве́сь по́лкъ ѿ ме́ншихъ да́же до бо́льшихъ.
и҆́м꙽же слы́шащимъ в домꙋ̀ гн҃и.
чтѐ цр҃ь вс̂ѧ словеса̀ ѻ҆брѣт꙽шаѧ҆сѧ въ домꙋ̀ гн҃и стоѧ́щи ѹ҆ прс̑҇тла свое҆го.
и҆ завѣща̀ завѣтъ пред̑ гм҃ъ да хо́дѧтъ по немъ, и҆ да съхранѧют̑ повеле́нїѧ е҆го и҆ свѣдѣ́нїѧ е҆го и҆ ѻ҆правда́нїѧ е҆го всѣ́мъ срд̑цемъ свои́мъ, и҆ всею̀ дш҃ею свое҆ю.
твори́ти же и҆же пи́сана сꙋть ꙗ҆́ко словеса̀ ѻ҆брт̑ѣшїисѧ въ кни́зѣ се́и·

Заклѧ́ть же на том̑ всх̑ѣ и҆же ѻ҆брѣте́ни бѧ́хꙋ въ і҆ерс̑҇лимѣ и҆ венїами́нѣ.
и҆ сътвори́ша ѻ҆бита́юще въ і҆ерс̑҇лимѣ по чинꙋ̀ г҃а б҃а ѿц҃ъ свои҆хъ.
ѿꙗ҆́тъ б̂о і҆ѻ҆сїа всѧ̀ поноше́нїѧ ѿ всеѧ̀ землѝ сн҃овъ і҆и҆л҃евъ.
и҆ сътворѝ всѣхъ и҆же ѻ҆ста́вшїи бѧ́хꙋ въ і҆и҆л҃и слꙋжи́ти г҃ꙋ б҃ꙋ свое҆мꙋ всѧ̀ дн҃и живота̀ е҆го, и҆ не ѿидо́ша ѿ г҃а б҃а ѿц҃ъ свои҆хъ·

Глв̑҇а, л҃е·

И сътвори́ же і҆ѻ҆сїѧ въ і҆ерс̑҇ли́мѣ па́схꙋ г҃ꙋ б҃ꙋ свое҆мꙋ, и҆ пожре́на е҆сть па́сха въ д҃і дн҃ь, мс̑҇ца прь́ваго.
и҆ поста́ви сщ҃ен꙽ники въ строи҆́тельстве́хъ и҆хъ, и҆ ѹ҆крѣпѝ и҆хъ да слꙋжатъ г҃ꙋ в домꙋ̀ гн҃и.
и҆ рече левѷтомъ си́лнымъ наѹ҆ча́ти всег̑҇ і҆и҆л҃ѧ ѻ҆ст҃итисѧ г҃ꙋ·

И҆ гл҃алъ е҆сть поста́вити кїѻ́тъ въ ст҃ительство цр҃кви гн҃и, и҆ поста́виша кїѻ́тъ ст҃ыи въ хра́мѣ и҆же създа̀ соло́мон꙽ сн҃ъ двд҃въ цр҃ь і҆и҆л҃евъ.
и҆ реч̑҇ цр҃ь нѣсть носи́ти на ра́мѣ ничтож̑·

И҆ нн҃ѣ ѹ҆бо слꙋжи́те г҃ꙋ б҃ꙋ ва́шемꙋ и҆ лю́дем̑ е҆го і҆и҆л҃ю.
и҆ ѹ҆гото́ваи҆те ва́съ по домо́хъ и҆ племенъ ва́шихъ въ раздѣле́нїихъ е҆ді́ныхъ.
ꙗ҆́ко повелѣ двд̑ъ цр҃ь і҆и҆л҃евъ, и҆ ѻ҆писа̀ соло́монъ сн҃ъ е҆го, и҆ слꙋжи́те въ ст҃ительствѣ по ѻ҆би́телемъ раздѣлени и҆ по домомъ ѿч҃ествъ вашихъ.
съ бра́тїею ва́шею, за сн҃ы людски.
по ча́стемъ ѿч҃ества левѷтъскаго, пожрети па́схꙋ.
и҆ ст҃аѧ ѹ҆гото́ваите бра́тїи ва́шеи е҆же сътвори́ти.
по словесе́мъ и҆же гл҃ъ е҆сть г҃ь рꙋко́ю моѷсїѧ, и҆ нача̀ і҆ѻ҆сїѧ съ сн҃ы лю́дъскими, ѻ҆в꙽цы, и҆ а́гнъцы, и҆ козлы̀ ѿ ко́зъ, вс̂ѧ на па́схꙋ.
и҆ всѣхъ ѻ҆брѣте́ныхъ въ число.
҂л҃, и҆ воло́въ ҂г҃·

Сїѧ ѿ цр҃ева да́нїѧ.
и҆ вое҆воды е҆го во́лею чт̂о ѻ҆бѣща́хꙋ възда́ша лю́демъ и҆ сщ҃ен꙽никомъ и҆ левѷтомъ·

И҆ даде́ же хел꙽кїѧ и҆ заха́рїѧ і҆ и҆и́ль нача́лникꙋ до́мꙋ гн҃ѧ.
да́ша сщ҃ен꙽никомъ къ сотворе́нїю па́схи скота̀ смѣше́на, ҂в҃, и҆ х҃·

и҆ воло́въ, т҃, гонїѧ же и вене́ѧ а҆сїа и҆ наѳанае҆ль бра́тїѧ е҆го, и҆ а҆савїѧ, і҆ и҆и́ль і҆ и҆ѻ҆зава́дъ нача́лницы левѷтомъ възда́ша про́чимъ левѷтом꙽ къ празнова́нїю па́схи.
҂е҃, ѻ҆вецъ, и҆ воло́въ, е҃ со́тъ·

Ѹ҆гото́вано же е҆сть слꙋже́нїе, и҆ сташа сщ҃ен꙽ницы въ чинꙋ̀ свое́мъ.
левѷти же в꙽ ли́цех̑ и҆хъ по цр҃евꙋ повеле́нїю, и҆ пожре́на ес̑҇ пасха.
и҆ пролїѧ́ша сщ҃ен꙽ницы рꙋка́ма свои́ма кро́вь.
и҆ левѷти ѻ҆дира́хꙋ ко́жи в꙽сесъж꙽же́нїи.
и҆ разлꙋчи́ша их̑ да даю́тъ по домо́мъ и҆ ѻ҆би́телемъ е҆ді́нымъ.
и҆ да приносѧтсѧ гв҃и в꙽сесъж꙽же́нїѧ.
ꙗ҆ко пи́сано е҆сть въ кни́ѕѣ зако́на моѷсїѻ҆ва, и҆ тако заѹ́тра ѿ воло́въ сътвори́ша, и҆ пекоша̑ па́схꙋ на ѻ҆гнѝ ꙗ҆́ко в зако́нѣ пи́сано ес̑҇ и҆ ст҃аѧ варѧ́хꙋ въ мѣдницахъ котлѣхъ и҆ гор꙽шцѣхъ, и҆ пот꙽ща́н꙽но раздѣли́ша всемꙋ̀ наро́дꙋ.
себѣ же и҆ сщ҃ен꙽никомъ пото́мъ ѹ҆гото́ваша̑ ꙗ҆́ко въ возноше́нїи в꙽сесъжега́емыхъ и҆ тꙋковъ даже до́ нощи сщ҃енницы бы́ша непра́зни гдѣ̀ и҆ левѷти себѣ и҆ сщ҃ен꙽никомъ сн҃овомъ а҆аро́нимъ ѹ҆гото́ваша послѣ́днимъ.
па́ки пѣвцы̀ сн҃ове а҆са́фовы стоѧ́хꙋ в чинꙋ̀ свое҆мъ по повелѣнїю дв҃да и҆ а҆са́фа, и҆ е҆м꙽ма́на і҆ и҆диѳꙋма про̑҇рковъ цр҃ѧ дв҃да, и҆ нача́лниковъ.
две́рницы б̂о по вра́томъ е҆ді́нымъ въздержа́хꙋ та́ко.
да ни ма́ла б̂о ѿходили ѿ слꙋж́бы.
сего ра́ди и҆ братїѧ и҆хъ левѷти ѹ҆гото́ваша и҆мъ бра́шна.
всѧ̀ б̂о слꙋж꙽ба гн҃ѧ пра́во съврьше́на е҆сть въ дн҃ь то́и, да сътворѧ́тъ па́схꙋ и҆ принесꙋтъ в꙽сесъж꙽же́нїѧ на ѻ҆лта́рь гн҃ь по повелѣнїю цр҃ѧ і҆ѻ҆сїѧ·

Сътвори́ша же сн҃ове і҆и҆л҃ви и҆же ѻ҆брѣте́ни бѧ́хꙋ т̂ꙋ па́сцѣ въ времѧ т̂о.
и҆ пра́зникъ ѻ҆прѣсноком̑, з҃, дн҃їи.
не бы́сть па́сха подо́бна то́и въ і҆и҆л҃и ѿ дн҃и самоила про̑҇рка.
н̂о никото́рыи же ѿ всѣх꙽ цр҃еи і҆и҆л҃вых̑ сътвори́лъ па́схꙋ.
ꙗ҆́ко і҆ѻ҆сїѧ.
и҆ сщ҃енники и҆ левѷти и҆ весь і҆ѹ́да і҆и҆л҃ь.
и҆же ѻ҆брѣте́нъ бы́сть и҆ ѻ҆бита́ющїи въ і҆ерс̑҇лимѣ, въ и҃і лѣто црс̑҇тва і҆ѻ҆сїина, сїѧ па́сха празно́вана бы́сть·

По сихъ всѣхъ и҆хже сътворѝ і҆ѻ҆сїѧ, въ домꙋ̀, и҆ басночре́вныхъ, и҆ въл꙽хвꙋ́ющихъ и҆ кꙋмир̑҇ницы, і҆ и́долы.
и҆ гаѝ ꙗ҆́же бѧ́хꙋ, и҆ въ і҆ерс̑҇лимѣ, и҆ въ і҆ѹ҆де́и, пож꙽жѐ ѻ҆гне́мъ цр҃ь і҆ѻсїѧ, да съвръши́тъ гл҃ы и҆же бѧ́хꙋ напи́саны въ зако́нѣ кни́ги ю҆же ѻ҆брѣтѐ хел꙽кїѧ жре́цъ въ домꙋ̀ гн҃и.
и҆ подо́бенъ е҆мꙋ не быс̑҇ пред ни́мъ, и҆же б̂ы ѻ҆брати́лъсѧ къ г҃ꙋ всѣмъ срд̑цемъ свои҆м꙽, и҆ в꙽сею̀ дш҃ею свое҆ю, и҆ всею̀ крѣпостїю свое҆ю по всемꙋ̀ зако́нꙋ моѷсїѻ҆вꙋ·

И҆ понем̑ не воста̀ подо́бенъ е҆мꙋ.
ѻ҆баче не ѿврати́сѧ г҃ь ѿ ꙗ҆́рости е҆го вели́кїѧ е҆ю́же раз꙽гнѣ́васѧ г҃ь на і҆ѹ҆де́ю, всх̑ѣ ради лꙋка́въствъ е҆ѧ̀·

И҆миже сълꙋка́въствова манасїѧ, и҆ рече г҃ь і҆ и҆ѹ́дꙋ ѹ́бо ѿринꙋ̀ ѿ лица̀ мое҆го·

Ꙗ҆́коже ѿврати́хъ до́мъ і҆и҆л҃евъ.
и҆ ѿвръгꙋ и҆ гра́дъ е҆гоже и҆збра́хъ і҆ерс̑҇лимъ·

И҆ хра́мъ е҆гоже рѣхъ да бꙋдетъ и҆́мѧ моѐ т̂ꙋ·

И҆ взы́иде фараѻ́нъ неѻ҆ха́и цр҃ь е҆гѷпетъскїи на ѻ҆плъче́нїе на цр҃ѧ а҆сѷрїискаго на рѣкꙋ̀ е҆фра́тъ·

І҆ и҆дѐ въ срѣте́нїе е҆мꙋ і҆ѻ҆сїѧ цр҃ь.
ѻ҆́н же посла̀ к немꙋ̀ послы̀ и҆ рече, чт̂о мн̂ѣ и҆ тебѣ̀ цр҃ю і҆ѹ́динъ·

Не проти́вꙋ тебѐ днесь и҆дꙋ вое҆ва́ти, н̂о проти́въ и҆́ного ѻ҆пол̑҇ча́юсѧ.
на е҆гоже мн̂ѣ б҃ъ пот̑щан̑҇но и҆тѝ повелѣ̀.
ѻ҆ста́ви сꙋпроти́вꙋ б҃ꙋ твори́ти и҆же съ мно́ю е҆сть да не ѹ҆бїетъ т̂ѧ.
не хотѣ̀ і҆ѻ҆сїѧ ѻ҆брати́тисѧ ѿ него н̂о ѹ҆гото́ва противꙋ е҆го бра́нь.
ниже послꙋша слове́съ незриха́вовыхъ и҆же ѿ ѹ҆́стъ бж҃їих꙽ но поше́лъ да вою́етъ на поли магед̑до и҆дѣже ѹ҆ꙗ҆зве́нъ ѿ стрѣлецъ цр҃ь і҆ѻ҆сїѧ, и҆ рече ѻ҆́трокомъ свои҆мъ.
и҆зведѣте мене ѿ бра́ни ꙗ҆́ко тѧж̑ко ѹ҆ꙗ҆зве́нъ е҆смь.
і҆ и҆зведо́ша е҆го ѻ҆́троцы е҆го ѿ колесни́цы, и҆ въ дрꙋгꙋ́ю колесни́цꙋ посаждахꙋ е҆го.
и҆же послѣдовахꙋ е҆го ѻ҆бы́чаемъ црс̑҇ким꙽ и҆ привезо́ша е҆го въ і҆ерс̑҇ли́мъ и҆ ѹ́мре и҆ погребе́нъ въ́ гробѣхъ ѿц҃ь свои҆хъ и҆ весь і҆ѹ́да і҆ерс̑҇лим꙽ пла́кахꙋ і҆ѻ҆сїѝ, і҆е҆ремїѧ же възрыда̀ по і҆ѻ҆сїи·

И҆ рѣша всѝ кнѧ́ѕи, и҆ кнеги́ни и҆ѻ҆сїѧ ради.
рыда́юще до дне́сь.
и҆ да́ша е҆го въ за́повѣдь на па́мѧть въ і҆и҆л҃и сѐ пи́сано е҆сть въ рыда́нїи·

И҆ про́чаа же словеса̀ і҆ѻ҆сїи҆на и҆ ѹ҆пова́нїе е҆го бѧ́хꙋ пи́саны въ зако́нѣ гн҃и.
дѣлаж̑ е҆го пр́ьваѧ и҆ послѣднѧѧ сѐ пи́сана сꙋть въ кни́ѕѣ цр҃еи і҆ѹ́диныхъ і҆ и҆и҆л҃евыхъ·

Глв̑҇а, л҃ѕ·

И възѧ́ша лю́дїе землѧ̀ і҆ѻ҆а́хаза сн҃а і҆ѻ҆сїина и҆ пома́за̑ша е҆го.
и҆ поста́виша е҆го цр҃ѧ въ мѣ́сто ѿц҃а е҆го въ і҆ерс̑҇лимѣ.
к҃г, лѣта бысть і҆ѻ҆а́хазъ е҆гда̀ црс̑҇твова́ти нача̀.
и҆ тр̂и мс̑҇цы црс̑҇твова̀ въ і҆ерс̑҇лимѣ·

І҆ и́мѧ мт҃ри е҆го а҆мита́ль, дще́рь і҆е҆римїѹ҆̀ ѿ ло́вны, и҆ сътворѝ лꙋкавое пред̑ гм҃ъ, по всемꙋ̀ ꙗ҆́же сътвори́ша ѿц҃ы их̑·

И҆ плѣнѝ и҆ѻ҆а҆ха́за и҆ ѻ҆кова̀ е҆го, фараѻ́нъ неѻ҆ха́и въ девла́ѳе, въ землѝ е҆ѳа́мли, е҆же не црс̑҇твовати е҆мꙋ въ і҆ерс̑҇ли́мѣ·

И҆ преведе е҆го цр҃ь въ е҆гѷпетъ.
и҆ возложѝ да́нь на землю і҆и҆л҃евꙋ, р҃, тала́н꙽тъ сребра̀, и҆ тала́нтъ зла́та.
и҆ поста́ви фараѻ́нъ неѻ҆хаи в꙽ него̀ мѣ́сто цр҃ѧ е҆лїа҆ки́ма бра́та е҆го над̑ і҆ѹ҆де́ею і҆ерс̑҇ли́момъ.
и҆ превратѝ и҆́мѧ е҆го і҆ѻ҆а҆ким̑, і҆ѻ҆а҆ха́за же пред̑него цр҃ѧ бра́та і҆ѻ҆а҆ки́мова взѧ́тъ фараѻ́нъ неѻ҆ха́и, и҆ въведе е҆го въ е҆гѷпетъ и҆ ѹ́мре т̂ꙋ.
сре́бро же и҆ зла́то дава́хꙋ е҆мꙋ·

Тогда̀ нача̀ землѧ̀ дава́ти да́нь.
е҆же дава́ти сребро̀ во ѹ҆ста̀ фараѻ́нова, и҆ ко́ждо по си́лѣ даа́хꙋ сребро̀, и҆ зла́то ѿ людїи землѧ фараѻ́нꙋ неѻ҆ха́ю·

И҆ к҃е, лѣтъ бысть і҆ѻ҆а́ким̑ е҆гда̀ црс̑҇твова́ти нача̀.
и҆ а҃і, лт̑ѣ, црс̑҇твова̀ въ і҆ерс̑҇лимѣ·

І҆ и́мѧ мт҃ри е҆го зехо́ра дщѝ нирїѹ҆̀ ѿ ра́мы.
сътвори́ же лꙋка́вое пред̑ гм҃ъ по всемꙋ̀ е҆ли́ко сътвори́ша ѿц҃ы е҆го·

И҆ въ дн҃и же е҆го прїиде навъходоносоръ цр҃ь вавѷлоньскїи на́ землю, и҆ б̂ѣ и҆ е҆мꙋ слꙋжа тр̂и лѣта и҆ ѿстꙋпѝ ѿ него·

И҆ посла̀ г҃ь на ни́хъ по́ѧ҆сники хал꙽де́искїѧ, и҆ по́ѧсники сѷрьскїѧ, и҆ по́ѧ҆сники моа́витьскїѧ, и҆ сн҃овъ а҆м꙽моновыхъ, и҆ самарїиских̑.
и҆ не сътвори́ша ничто́же по словесѝ гн҃и, е҆же гл҃а ѹ҆сты̀ про̑҇ркъ е҆го.
ѻ҆ба́че же ꙗ҆́рость гн҃ѧ б̂ѣ на і҆ѹ́дѣ е҆же ѿринꙋти е҆го ѿ лица̀ е҆го, грѣхъ ради манасїи҆ных̑ въ все́мъ ꙗ҆́же сътворѝ.
и҆ въ кро́ви неви́ннѣи е҆же и҆злїѧ і҆ѻ҆а҆ки́мъ.
и҆ напо́лни і҆ерс̑҇лимъ кро́ви неви́н꙽ныѧ.
н̂о тогда̀ не восхотѣ̀ е҆щѐ и҆скорени́ти и҆хъ·

И҆ посе́мъ възы́иде навъходоносоръ цр҃ь вавѷлоньскїи.
и҆ ѻ҆кова е҆го ѻ҆ковами мѣ́дѧными, и҆ приведе е҆го въ вавѷлонъ, и҆ ча́сть сосꙋ́дов꙽ до́мꙋ гн҃ѧ пренесѐ въ вавѷлонъ.
и҆ поста́ви ѧ҆̀ въ цр҃кви свое́и въ вавѷлонѣ·

И҆ про́чаѧ же слове́съ і҆ѻ҆а҆ки́мовыхъ, и҆ вс̂ѧ ꙗ҆́же содѣла́лъ е҆сть.
се сїѧ пи́сана съдръжа́тсѧ въ кни́ѕѣ цр҃еи і҆ѹ́диныхъ·

И҆ ѹ́мре і҆ѻ҆а҆кимъ съ ѿц҆ы свои́ми.
и погребе́нъ бы́сть въ ганозо́ни, со ѿц҃ы е҆го·

И҆ црс̑҇твоваж̑ і҆е҆хонїѧ сн҃ъ е҆го в него̀ мѣ́сто, и҃і, лѣтъ.
бы́сть і҆е҆хо́нїѧ е҆гда̀ црс̑҇твова́ти нача̀.
г҃, мс̑҇цы, и҆ і҃, дн҃їи црс̑҇твова̀ въ і҆ерс̑҇лимѣ, и҆ сътворѝ лꙋка́вое пред̑ гм҃ъ·

Є҆гда же лѣтꙋ крг̑҇ꙋ вратѧ́шесѧ.
посла̀ навъходоносо́ръ цр҃ь, и҆же и҆зведо́ша е҆го въ вавѷлонъ въкꙋпѣ со предра́гими сосꙋды до́мꙋ гн҃ѧ·

И҆ цр҃ем̑ поста́ви седекїю ѹ҆́ѧ е҆го над̑ і҆ѹ́дою і҆ерс̑҇лимомъ.
к҃а, лѣто бы́сть седекїѝ е҆гда̀ црс̑҇твова́ти нача̀.
и҆ а҃і, лѣтъ црс̑҇твова̀ въ і҆ерс̑҇лимѣ·

И҆ сътвори лꙋка́вое въ ѻ҆́чїю г҃а б҃҃а свое҆го.
и҆ н̂и ѹ҆срами́сѧ лица і҆е҆ремїи про̑҇рка гл҃ющаго к немꙋ ѿ ѹ́стъ гн҃ихъ.
ѿ цр҃ѧ же навходоносо́ра ѿт̑и҆де и҆же заклѧ̀ е҆го по́ бѕ҃ѣ, и҆ ѻ҆жестѝ вы́ю свою̀ и҆ срд̑це ѹ҆крѣпѝ да не ѻ҆брати́тсѧ къ г҃ꙋ б҃ꙋ і҆и҆л҃евꙋ.
н̂о и҆ вс̂и нача́лницы і҆ѹ́дины и҆ сщ҃ен꙽ником̑ и҆ лю́ди землѧ̀ престꙋпи́ша безако́н꙽но по всѣхъ поноше́нїихъ ꙗ҆зы́ком̑.
и҆ ѻ҆сквръниша до́мъ гн҃ь и҆же ѻ҆ст҃и себѣ̀ въ і҆ерс̑҇лимѣ·

И҆ посыла́ше г҃ь б҃ъ ѿц҃ъ и҆хъ к ни́мъ ѹ҆сты̀ про̑҇ркъ е҆го ѹ҆треню́юще, и҆ посла̀ вѣстники е҆го·

Того ради да прости́тъ лю́ди и҆ жили́ще своѐ.
и҆ тїи поноша́хꙋ посло́мъ бж҃їимъ.
и҆ ѹ҆ничижахꙋ словеса̀ е҆го·

І҆ и҆грахꙋ про̑҇рки е҆го дондеже сни́детъ гнѣ́въ гн҃ь на лю́ди е҆го·

И҆ бысть ни е҆ді́но помне́нїе, и҆ наведѐ на ни́хъ цр҃ѧ халде́иска·

И҆ побѝ младе́нца и҆хъ мечемъ, въ домꙋ̀ ст҃нѧ е҆го.
не пощадѣ седекїа ю́ных̑, и҆ дв҃ц꙽ не поми́лова, и҆ ста́рца их̑ и҆зведѐ.
и҆ всѣхъ преда́сть въ рꙋки их̑·

И҆ вс̂ѧ сосꙋды до́мꙋ гн҃ѧ ꙗ҆́ко бо́лшаѧ та́ко и҆ ме́ншаѧ, и҆ сокровища цр҃кви и҆ вс̂ѧ сокро́вища цр҃ева.
и҆ началъство, вс̂ѧ приведѐ въ вавѷлонъ·

И҆ зажъго́ша до́мъ бж҃їи.
и҆ разори́ша стѣнꙋ̀ і҆ерс̑҇лимꙋ.
и҆ вс̂и столпы̀ и҆хъ съжго́ша·

И҆ чт̂о предра́го бысть, и҆с꙽тни́ли сꙋть сосꙋдовъ.
и҆ преселѝ про́чаѧ въ вавѷлонъ, и҆ бѣша е҆мꙋ и҆ сн҃ом̑ е҆го въ рабы̀, да́же до црс̑҇тва мид̑скаго·

да съвръшит̑сѧ слово гн҃е ѿ ѹ́стъ і҆е҆ремїинъ.
до́ндеже праз̑нова̀ землѧ̀ сꙋбо́ты своѧ̀.
е҆́же събот꙽ствова́ти вс̂ѧ дн҃и запꙋстѣнїѧ е҆ѧ̀.
сꙋботъствова же до съвръше́нїѧ, сед̑мьдесѧт̑ лѣтъ·

Моли́тва манасїѧ цр҃ѧ і҆ѹ҆де́иска.
е҆гда̀ плѣненъ дръжашесѧ въ вавѷло́нѣ·

Ги҃ вс̂едръжи́телю, б҃е ѿц҃ъ на́шихъ, а҆враа́мовъ, і҆ и҆саа́ковъ, і҆ и҆а́ковль, и҆ сѣмени их̑ правед̑наго, сътвори́выи нб҃о и҆ зе́млю, со всею̀ лѣпото́ю и҆хъ·

И҆ сопныи мо́ре сло́вом̑ повелѣнїа твое҆го, затворивыи без̑днꙋ и҆ запечатлѣвъ ю҆̀ стра́шнымъ и҆ сла́внымъ и́менемъ твои҆мъ, е҆гож̑ вс̂ѧ боѧ́тсѧ и҆ трепещꙋтъ ѿ лица̀ сла́вы твое́а.
ꙗ҆ко непостоа́нна велелѣпота̀ сла́вы твое́ѧ, и҆ не сътрьпим̑ гнѣвъ, е҆же на грѣшникы преще́нїѧ твое҆го, бесчи́слена же и҆ неи҆слѣдованна ми́лость ѻ҆бѣща́нїа твое҆го.
ты̀ б̂о е҆си г҃ь вы́шнїи млс̑҇рдъ, долготръпели́въ и҆ мно́гомлс̑҇тив꙽, и҆ ка́асѧ ѻ҆ ѕло́бахъ чл҃чьскыхъ.
т̂ы г҃и по мно́жествꙋ ми́лости твое́ѧ ѻ҆бѣща̀ покаа́нїемъ ѻ҆ставленїе съгрѣши́вшимъ к тебѣ, и҆ мно́жествомъ щедротъ твои҆хъ наречѐ покаа́нїе грѣшникомъ въ сп҃сенїе·

Ты ѹ҆бо г҃и б҃е праведныхъ, нѣ́си положи́л꙽ покаа́нїе праведнымъ твои҆мъ, а҆враа́мꙋ, і҆ и҆саа́кꙋ, і҆ и҆а́ковꙋ, не съгрѣши́вшим̑ пред̑ тобо́ю, н̂о положил̑҇ е҆си покаа́нїе мнѣ̀ грѣшномꙋ, зане съгрѣших̑ т̂и паче числа̀ пѣска̀ мор̑҇ска́го ѹ҆мно́жишасѧ безаконїѧ моа г҃и ѹ҆мно́жишасѧ, и҆ нѣсмь достоин̑҇ възрѣти, и҆ ви́дѣти высотꙋ нбс̑҇нꙋю ѿ мно́жества непра́вд꙽ моих̑ свѧ́занъ е҆смь мно́гими ю҆́зами желѣзъными, ꙗ҆́ко не възвѣстѝ ми главы̀ моеѧ̀, и҆ нѣсть м̂и въсклоне́нїѧ, зане прогнѣвахъ ꙗ҆́рость твою, лꙋка́вое пред̑ тобою сътвори́въ, и҆ не сътворихъ во́лѧ твое҆ѧ, и҆ не съхранихъ повелѣнїи твои҆хъ.
и҆ нн҃ѣ покланѧ́ю колѣнѣ срд̑ца мое҆го, молю̀ ю҆́же ѿ тебе блс̑҇гть.
съгрѣшихъ г҃и съгрѣшихъ, и҆ безако́нїѧ моа аз̑ съвѣмъ.
н̂о прошꙋ̀ и҆ молюсѧ тебѣ ѿра́ди ми г҃и ѿра́ди м̂и, и҆ не погꙋбѝ менѐ съ безако́ньми мои́ми, ниже въ вѣкъ враждовавъ съблюде́ши ѕол̑҇ мои҆хъ, и҆ не ѻ҆сꙋдѝ менѐ въ преи҆спод̑нихъ земли, зане т̂ы е҆си б҃е б҃ъ ка́ющихсѧ, да и҆ на мнѣ ꙗ҆ви́ши вс̂ю блгс̑҇ть твою, ꙗ҆́ко недостои́на сꙋща сп҃се́ши м̂ѧ, по мно́ѕѣи млс̑҇ти твое́и.
и҆ восхвалю̀ т̂ѧ всегда̀ вс̂ѧ дн҃и живота̀ мое҆го.
ꙗ҆́ко тебѐ поют̑ вс̂ѧ си́лы нбс̑҇ныа и҆ твоа̀ е҆сть сла́ва во́ вѣки, а҆ми́нь·

Коне́цъ вто́рыхъ кни́гъ паралипоме́нонъ.
и́мать в себѣ̀ глв̑҇а л҃ѕ·