КНИ́ГА НЄЄ҆МИ́Ѧ

ГЛ҃ВА ПЄр̑ВАꙖ

И бы́сть въ мс̑҇ць хаселе́фъ лѣта, к҃, и҆ а́зъ бѣхъ въ сꙋсан ави́рѣ.
и҆ прїиде къ мн̂ѣ а҆нанїѧ е҆ді́нъ ѿ бра́тїи мои҆хъ, съ мꙋжи і҆ѹ́довы.
и҆ въпросих̑ и҆хъ ѻ҆ ѻ҆ста́вших꙽ и҆же ѻ҆ста́ша ѿ плѣне́нїѧ і҆ерс̑҇лі́мова и҆ реко́ша м̂и ѻ҆ста́вшїи ѿ плѣне́нїѧ т̂ꙋ под̑ вла́стїю въ ѻ҆злобле́нїи велі́цѣ сꙋть и҆ въ поношенїи.
и҆ стѣ́ны і҆ерс̑҇лі́ма разоре́ны сꙋть, и҆ вра́та е҆го съж꙽же́на сꙋть ѻ҆гнем̑·

Є҆гда́ же слы́шах̑ словеса̀ т̂а.
и҆ сѣдъ и҆ пла́кахъ и҆ тꙋжи́хъ дн҃и мно́ги.
и҆ бѣхъ постѧ́сѧ и҆ молѧ́сѧ пред̑ лице́мъ б҃а нбс̑҇наго.
и҆ рекохъ, молю т̂ѧ г҃и бж҃е нб҃си крѣпкїи вели́кїи и҆ стра́шныи и҆же храни́ши завѣтъ, и҆ млс̑҇рдїе с тѣмѝ и҆же тебе лю́бѧтъ, и҆ хранѧ́щимъ повеле́нїѧ твоѧ̀.
да бꙋдꙋтъ ѹ́ши твоѝ слы́шащи и҆ ѻ́чи твоѝ ѻ҆тво́рени да слы́шатъ мл҃твꙋ раба̀ твое҆го, е҆ю́же а҆́зъ молю́сѧ пред̑ тобо́ю дн҃есь дн҃ь и҆ но́щъ.
за сн҃ы і҆и҆л҃евы рабѝ твоѝ, и҆сповѣда́юсѧ за грѣхи сн҃въ і҆и҆л҃евъ, и҆́же съгрѣши́ша пред꙽ тобо́ю·

І҆ а́зъ и҆ до́мъ ѿц҃ь мои҆хъ съгрѣши́хомъ тебѣ̀.
сꙋ́етне прельще́ни е҆смы, и҆ не съхрани́хомъ за́повѣдеи твоих̑, и҆ чи́ны и҆ сꙋдовъ и҆же повелѣ моѷсїи ра́бъ твой·

Помѧнѝ ѹ́бо словеса̀ и҆же повелѣ моѵсїю рабꙋ̀ твое҆мꙋ гл҃ющи·

Є҆гда престꙋ́пите а҆́зъ расточꙋ̀ в̂ы в꙽ лю́ди·

И҆ а́ще ѻ҆брати́тесѧ ко мнѣ̀ и҆ съхранитѐ за́повѣди моѧ, и҆ сътворитѐ ѧ҆̀.
и҆ а҆ще бꙋдет̑ раз꙽сѣѧ́нїе ва́ше ѿ кон̑҇ца̀ нб҃си до конца̀, ѿтꙋ́дꙋ съберꙋ̀ в̂ы.
и҆ въведꙋ в̂ы в мѣсто ꙗ҆́же и҆збра́хъ и҆ вселит̑сѧ и҆́мѧ мое т̂ꙋ·

И҆ тїи раби твоѝ и҆ людїе их̑же и҆скꙋпѝ, въ крѣпости твое́и вели́цѣи, и҆ рꙋко́ю твое́ю ѕѣлною, не ѹ҆̀ б̂о г҃и, н̂о бꙋди ѹ́хо твоѐ внима́ѧй въ мл҃твꙋ раба̀ твоег̑҇ и҆ на мл҃твꙋ рабо́мъ твои҆мъ.
и҆же хотѧ́тъ боѧ́тисѧ и҆́мени твое҆го.
и ѹ҆прави ѹ́бо рабꙋ̀ твое҆мꙋ днесь, и҆ да́и е҆мꙋ млс̑҇ть пред̑ мꙋжемъ симъ и҆ а́зъ б̂о бы́хъ виночрь́пчїѧ цр҃евъ·

Глв̑҇а, в҃·

Бы́сть въ мс̑҇ць ниса́нъ, въ лѣто, к҃ е, а҆ртаѯе́рѯа цр҃ѧ, и҆ вино̀ б̂ѣ предо мною и҆ взѧ́хъ вино̀ и҆ да́хъ цр҃ю.
и҆ не бысть вино̀ предо мно́ю занѐ ѿдадох̑ цр҃ю почрьпа́нїе.
и҆ не бѣ̀ дрꙋга́го пред̑ ни́мъ, рече же м̂и цр҃ь чт̂о ра́ди лицѐ твое ско́рбно е҆сть.
и҆ нѣ́си веселѧсѧ.
и҆ нѣ́сть с̂е то́кмо ѕло́ба срд̑ца·

И҆ ѹ҆боѧ́хсѧ ѕѣло и҆ реко́хъ цр҃ю, цр҃ю въ вѣки живѝ.
чт̂о ра́ди не пла́четъ лицѐ мое.
понеже град̑ до́мъ гробо́въ ѿц҃ь моих̑ ѻ҆пꙋстѣ̀ и҆ вра́та е҆го съж꙽же́ны сꙋть ѻ҆гнем̑·

И҆ рече м̂и цр҃ь·

Кое́ѧ ради ве́щи въспомина́еши ѻ҆ сих꙽.
и҆ помолих̑ г҃а б҃а нб҃си, и҆ реко́хъ къ цр҃ю.
цр҃ю а҆ще ви́дит̑сѧ бл҃го, и҆ ѹ҆годенъ л̂и е҆сть раб꙽ твой пред̑ лицемъ твои҆мъ, да по́слешъ менѐ въ і҆ѹ҆де́ю въ́ градъ гроб̑҇ ѿц҃ь мои҆хъ и҆ съзи́ждꙋ е҆го·

Речеж̑ м̂и цр҃ь, и҆ цр҃ца, и҆же сидѧ́ше близ̑ е҆го.
да́же до кое҆го вре́мени бꙋдетъ пꙋть твой.
и҆ когд̑а ѻ҆брати́шисѧ, и҆ ѹ҆слади́хсѧ пред̑ лицемъ цр҃евымъ, и҆ посла̀ м̂ѧ·

И҆ положи́хъ е҆мꙋ времѧ и҆ реко́хъ цр҃ю, а҆ще ви́дитсѧ бл҃го, посла́нїе да́ждь мн̂ѣ къ вое҆во́дамъ стра́нъ за рѣко́ю, да приведт̑ꙋ менѐ дондеже прїидꙋ̀ въ і҆ѹ҆де́ю·

и҆ посла́нїе къ а҆са́фꙋ стра́жꙋ лꙋга цр҃ева.
да да́сть м̂и лѣсъ да ѹ҆крѣпи́ти могꙋ̀ вра́та столпа̀ до́мꙋ.
и҆ стѣ́ны гра́дныѧ и҆ дом̑ и҆же вни́дꙋ во́нь·

И҆ да̀ м̂и цр҃ь рꙋко́ю б҃а мое҆го бл҃гаѧ со мно́ю·

И҆ прїидо́хъ к вое҆во́дамъ стра́нъ за рѣко́ю.
и҆ да́хъ им̑ посла́нїе цр҃ево, и҆ посла́ же цр҃ь со мно́ю нача́лницы си́лныи и҆ ко́нницы, и҆ слы́шаше санавал꙽ла́тъ а҆ронитис̑҇ и҆ товїи рабъ а҆манїевъ.
и҆ ѻ҆скорбле́ни сꙋть ѻ҆ѕлобле́нїемъ вели́кимъ.
ꙗ҆́ко прихо́дитъ чл҃къ и҆же и҆́щетъ преспѣва́нїѧ сн҃овомъ і҆и҆л҃евымъ.
и҆ прїидо́хъ въ і҆ерс̑҇лимъ и҆ бы́хъ т̂ꙋ г҃ дн҃и·

И҆ въста́хъ но́щїю мꙋжиж̑ малы со мною, и҆ никомꙋже възвѣсти́хъ ꙗ҆́ко б҃ъ е҆сть въ срд̑ци моем̑, сътвори́ти съ і҆и҆л҃емъ.
и҆ ско́тъ не бы́сть со мно́ю.
то́кмо скот̑ на нем̑же сѣдѧ́хъ.
и҆ внидо́хъ въ врата до́лꙋ но́щїю, къ ѹ́стїю и҆сточника смоко́вничнаго.
и҆ къ вра́томъ гнои҆ным̑, и҆ помышлѧ́хъ стѣнꙋ̀ і҆ерс̑҇ли́мъскꙋю разоре́нꙋ и҆ вра́та е҆го сконча́ны ѻ҆гнем̑, и҆ прїидох̑ къ вра́томъ ключа̀, и҆ к꙽ кꙋпели цр҃евѣи.
и҆ не бы́сть мѣсто скотꙋ̀ на не́мже сѣдѧ́хъ да прои́дет̑, и҆ влѣзо́хъ по пото́кꙋ но́щїи и҆ помышлѧ́хъ стѣнꙋ̀, и҆ ѻ҆браще́нъ прїидох̑ къ вра́томъ до́лꙋ и҆ ѻ҆братих̑сѧ.
стрегꙋщїи же не вѣдѧ́хꙋ кꙋдѣ а҆зъ и҆дꙋ и҆л̂и чт̂о творю̀.
н̂о і҆ѹ҆де́ѻмъ и҆ сщ҃н꙽еникомъ и҆ держа́внымъ и҆ правителемъ про́чїимъ.
и҆же сътворѧ́хꙋ дѣло даже до тогда̀, ничесож̑ сказа́хъ и҆ рекохъ и҆мъ.
в̂ы зна́ите ѻ҆злобле́нїе сїе в꙽ которомъ е҆смы̀.
и҆же і҆ерс̑҇ли́мъ ѻ҆пꙋщенъ и҆ вра́та е҆го сконча́ны сꙋть ѻ҆гне́мъ, прїидѣте и҆ съзи́ждемъ стѣны і҆ерс̑҇лимꙋ и҆ не бꙋдемъ е҆ще поношени, и҆ сказа́хъ и҆мъ рꙋкꙋ б҃а мое҆го и҆же е҆сть бл҃га со мною и҆ словеса̀ цр҃ева и҆же гл҃а мн̂ѣ, и҆ реко́хъ.
въстанемъ и҆ съзи́ждем̑, и҆ ѹ҆крѣпле́ни сꙋть рꙋки их̑ въ бл҃го.
слы́шаша же санавал꙽ла́тъ а҆ронит꙽, и҆ товїѧ ра́бъ а҆манїевъ и҆ гиса́мъ а҆рави́тинъ.
и҆ посмѣѧ́шасѧ нам̑.
и҆ прїидо́ша къ намъ и҆ ѹ҆ничижи́ша̑.
и҆ реко́ша, ка́ѧ е҆сть сїѧ ве́щь ю҆́же творитѐ.
е҆гда сꙋпроти́вꙋ цр҃ю ѿмѣта́етесѧ, и҆ възда́хъ и҆мъ словеса̀ и҆ реко́хъ к ним̑, б҃ъ нб҃си, то́и б҃ъ на́шъ, и҆ пособлѧ́етъ нам̑, и҆ мы̀ рабѝ е҆го е҆смы̀ въстанем̑ и҆ съзидаем̑.
ва́м же нѣсть ча́сти и҆ прича́стїѧ и҆ па́мѧти въ і҆и҆л҃и·

Глв̑҇а, г҃·

И въста̀ е҆лїасꙋвъ сщ҃ен꙽никъ вели́кїи, и҆ бра́тїа е҆го и҆ сщ҃енницы, и҆ съзида́ша врата ста́дныѧ.
сїи ѻ҆ст҃иша их̑ и҆ положи́ша вра́та е҆ѧ̀·

и҆ да́же до р҃, лако́тъ стоѧ́тъ.
ѻ҆ст҃иша е҆го даже къ столпꙋ̀ а҆намеи́лю.
и҆ близь е҆го съзида́ша мꙋжи е҆рихо́на, и҆ бли́зь и҆хъ съзида̀ закъхꙋръ, сн҃а а҆манїина.
вра́та же ры́бнаа съзида́ша сн҃ове а҆сана́евы, сїѝ сплетоша и҆хъ и҆ поста́виша вра́та е҆го и҆ заворы и҆ верїѧ их̑.
и҆ бли́зъ их̑ съѕида̀ а҆порамо́ѳъ сн҃ъ ѹ́рїинъ, сн҃а а҆ккꙋсова, и҆ близ̑ е҆го соѕида̀ мосолла́мъ, сн҃ъ врахїевъ сн҃а е҆мазевилѧ.
и҆ бли́зъ е҆го соѕида̀ данꙋ́и, сн҃ъ ваа́новъ.
и҆ бли́зъ е҆го соѕда́ша ѳекꙋи҆ны.
дръжавнїи же и҆хъ не положиша и҆́го свое в꙽ дѣло г҃а б҃а свое҆го·

и҆ вра́та стары́е соѕида́ше и҆ѻ҆а́да, сн҃ъ фасековъ.
и҆ масꙋлла́мъ сн҃ъ васодїевъ·

Тїи и҆сплетоша и҆хъ, и҆ поста́виша вра́та е҆го и҆ заво́ры и҆ верїѧ.
и҆ близ̑ и҆хъ соѕида́ша малтїѧ гаваѻ́ннинъ, и҆ е҆варонъ, миронаѳитъ мꙋ́жи ѿ гаваѻ́на, и҆ маа́съфа до сенїѧ кнѧ́ѕѧ.
и҆же бы́сть ѻ҆бо́нꙋ странꙋ̀ за рѣко́ю.
и҆ близ̑ е҆го соѕида̀ ѻ҆зїиль сн҃ъ а҆рахїевъ зла́тарь.
и҆ близ̑ е҆го соѕида̀ а҆нанїѧ, дорокеи́ма·

И҆ простро́ша і҆ерс̑҇ли́мъ да́же до стѣны̀ торго́выѧ ширѣишїи.
и҆ бли́зъ е҆го соѕида̀ рафаїѧ сн҃ъ а҆сꙋ́рь нача́лникъ сред̑нїе стогны і҆ерс̑҇лимъскїа.
и҆ близ̑ е҆го соѕида̀ и҆е҆де́ѧ сн҃ъ е҆рима́ѳовъ проти́вꙋ до́мꙋ е҆го.
и҆ бли́зъ е҆го соѕида̀ а҆т꙽тꙋѳъ сн҃ъ а҆саванїинъ, по́лъ ча́сти ѹ҆́гла.
и҆ соѕида̀ мельхїѧ сн҃ъ е҆и҆рамовъ.
и҆ а҆сꙋ́въ сн҃ъ фаа́товъ до столпа̀ пека́реи·

И҆ бли́зъ и҆хъ соѕида̀ саллꙋмъ сн҃ъ а҆лои́съ.
нача́лникъ по́лꙋ ча́сти сто́гны і҆ерс̑҇лимъскїѧ, то́й и҆ дще́ри е҆го·

И҆ врата до́лнѧѧ соѕида̀ а҆ннꙋмъ и҆ ѻ҆бита̂телищное.
тїѝ соѕида́ша и҆хъ.
и҆ поста́виша вра́та их̑ и҆ заво́ры и҆ верїѧ.
и҆ ҂а҃, лакот̑ во стенѣ̀ да́же до вра́тъ грѧзныхъ.
и҆ вра́та грѧ́знаѧ съзида̀ мелхїа сн҃ъ риха́въ нача́лникъ стогны̀ виѳакрам̑скїѧ.
то́и и҆ сн҃ы е҆го.
и҆ положи́лъ вра́та е҆го и҆ заво́ры и҆ ве́рїѧ.
и҆ вра́та и҆сто́чника съзида̀ соло́монъ сн҃ъ халезе́ѻ҆въ нача́лникъ села̀ мае́сфа.
то́и съзида̀ е҆ѧ̀ и҆ ѹ҆тверди·

и҆ поста́ви вра́та е҆го и҆ заво́ры и҆ ве́рїа·

и҆ стѣнꙋ кꙋ́плїи ко́жаныхъ до сто́гны цр҃евы.
и҆ да́ждь до стꙋпнїи и҆же и҆схо́дѧтъ ѿ гра́да двд҃ва·

По нем̑ съѕида̀ нее҆мїѧ сн҃ъ завꙋ́ховъ нача́лникъ по́лꙋ ча́сти.
виѳ꙽сꙋровы да́же до врьте́па гро́ба двд҃ва, и҆ да́же до рыба́рица и҆же вели́комъ дѣ́ломъ създа́на е҆сть.
и҆ да́ждь до до́мꙋ си́лнаго·

Поне́мъ съзида́ша левѷти.
раѹ́м꙽ сн҃ъ ваннаи́мъ.
поне́мъ съзида́ше а҆са́вїа началникъ по́лꙋ части сто́гны кеи́лы сто́гны е҆го.
и҆ поне́мъ съѕида́ша бра́тїа и҆хъ.
венїи сн҃ъ а҆дана́довъ нача́лникъ по́лꙋ ча́сти кеи́лы.
и҆ съзида̀ близ̑ е҆го а҆зꙋръ сн҃ъ і҆ѻ҆сꙋе҆в꙽, сн҃ъ ма́сѳа мѣ́рꙋ весе́лꙋю.
проти́вꙋ въсхо́да крѣплѣ́ишаго ѹ҆́гла.
и҆ поне́мъ съѕида́ше варꙋхъ сн҃ъ завꙋе҆в꙽ и҆ мѣ́рꙋ вто́рꙋю.
и҆ ѿ ѹ҆́гла да́же до вра́тъ до́мꙋ сꙋ́вовыхъ, сщ҃енника вели́каго·

Поне́мъ съѕида́ше меримꙋ́ѳъ сн҃ъ ѹ҆́рїи сн҃а а҆к꙽кꙋсова мѣ́рꙋ вторꙋ́ю ѿ вра́тъ до́мꙋ сꙋ́вова, до постигне́нїѧ до́мꙋ сꙋ́вова·

И҆ поне́мъ съзида́ша сщ҃енницы, мꙋж́и ѿ польскаго і҆ѻ҆рда́на.
по тѣх́ъ съзида̀ венїами́нъ, и҆ а҆сꙋ́въ.
проти́вꙋ домо́в꙽ свои҆хъ·

И҆ по тѣх́ъ созда̀ а҆за́рїа сн҃ъ маа҆сїевъ сн҃а а҆на́нїина бли́зꙋ до́мꙋ свое҆го.
по не́мъ създа̀ ванꙋ́и сн҃ъ а҆да́довъ мѣ́рꙋ вторꙋ́ю ѿ до́мꙋ а҆за́рїѧ да́жедо ѹ҆клоне́нїѧ и҆ да́же до ѹ҆́гла.
ѳала́ха сн҃а ѹ҆за́и҆на проти́вꙋ ѹ҆клоне́нїѧ, и҆ сто́лпъ и҆же възвыси́сѧ ѿ до́мꙋ цр҃ева высо́ко, т̂о е҆сть въ дворѣ̀ темни́цы.
понем̑ фада́їѧ сн҃ъ форо́совъ.
и҆ наѳини́ми и҆же ѻ҆бита́хꙋ въ ѻ҆ѳа́лѣ да́же до вертогра́да вра́тъ во́дных̑ къ въсто́кꙋ.
и҆ стол̑҇пъ и҆же възвыси́сѧ.
по ни́хъ създа́ша ѳекꙋе́ни мѣрꙋ вторꙋ́ю ѿ страны̀ стол̑҇па̀ вели́каго и҆ высо́каго да́же до стѣны̀ цр҃кви.
въ вы́шнѧа же къ вра́том̑ коне́вымъ съзида́ша сщ҃енницы, е҆ді́нъ ко́ждо же проти́вꙋ до́мꙋ свое҆го.
по ни́хъ съзида̀ сад̑дꙋ́къ сн҃ъ е҆м꙽ми́рь проти́вꙋ до́мꙋ свое҆го.
и҆ поне́мъ създа́ше сама́їе сн҃ъ сехенїевъ стра́жъ вра́тъ въсто́чныхъ.
поне́мъ съѕида́ше а҆нанїѧ сн҃ъ селемїев̑҇ и҆ а҆ино́мъ сн҃ъ селфе ше́стыи мѣ́рꙋ вторꙋ́ю.
по ни́хъ създа̀ мисꙋл꙽ла́мъ сн҃ъ варахїевъ.
проти́вꙋ съкро́вищницы свое҆ѧ·

поне́мъ созда́ше мелхїе сн҃ъ сарафїевъ да́же до до́мꙋ виѳанаѳїева.
и҆ щиты прода́ющи проти́вꙋ вра́тъ сꙋ́дныхъ.
и҆ да́же до го́рницы ѹ҆́гла.
и҆ внꙋтрѝ го́рницы ѹ҆́глы въ вра́тѣх꙽ стад̑ныхъ.
съзида́ша сн҃ове кова́ческїѧ, и҆ щитопрода́вницы·

Глв̑҇а, д҃·

И бы́сть е҆гда слы́шаше санавал꙽ла́тъ, и҆же съзида́емъ стѣ́ны, лꙋка́вно бѣ е҆мꙋ, и҆ гнѣ́васѧ ѕѣло.
и҆ посмѣꙗ҆сѧ і҆ѹ҆де́ѻмъ·

И҆ рече пред̑ бра́тїею свое́ю, сїѧ си́ла сомо́ров̑҇, и҆ рече чт̂о і҆ѹ҆деѝ сїю сътворѧ́ютъ свои гра́дъ, н̂о пожира́ютъ л̂и, и҆л̂и възмо́гꙋтъ дн҃есь, ѻ҆ста́вѧт̑ ка́менїе съ пра́хом̑ бы́ти земли сож꙽же́нней, и҆ товїѧ а҆мани́тѧнин̑҇, близ̑ е҆го прїиде, и҆ рече и҆мъ саме́ние, близ̑ е҆го прїиде, и҆ рече и҆мъ саме́ние пожираютъ, и҆л̂и ꙗ҆дѧ́тъ ѿ мѣста их̑, не възы́идетъ л̂и лиси́ца, и҆ разорит̑ стѣнꙋ̀ ка́менеи их̑·

И҆ рече нее҆мїѧ, слы́ши б҃е нашъ, ꙗ҆́ко сътворе́ни е҆смы̀ въ смѣѧ́нїе·

ѻ҆братѝ поноше́нїе и҆хъ на главꙋ̀ и҆хъ.
и҆ да́и им̑ въ посмѣѧ́нїе в зе́млю плѣне́нїѧ, не покры́и безако́нїѧ их̑·

Бы́сть же е҆гда слы́шаше санавалат̑, и҆ товїѧ, и҆ а҆равїи и҆ а҆мони́ты, ꙗ҆́ко и҆зведе́на бы́сть щѣ́ль стѣны̀ і҆ерс̑҇ли́скїа, занѐ почаша междꙋ разбїенїѧ дѣлати, гнѣвахꙋсѧ ѕѣло·

И҆ събра́ни сꙋть вс̂и въкꙋпѣ, да прїидꙋтъ и҆ ѻ҆плъча́тсѧ проти́вꙋ і҆ерс̑҇лима·

И҆ моли́хомъ б҃а нашего, и҆ поста́вихом̑ на стра́жи, на стѣнѣ̀ дн҃ь и҆ но́щъ, проти́вꙋ и҆хъ·

Рече же і҆ѹ́да, и҆стомле́на е҆сть си́ла вра́гъ, и҆ зем̑лѧ̀ мно́га е҆сть, и҆ мы̀ не мо́жемъ съзида́ти стѣнꙋ̀·

И҆ реко́ша ѻ҆скорблѧ́ю҆щїѝ на́съ, да не зна́ютъ и҆ не вѣдѧт̑ до́ндеже прїидемъ посредѣ и҆хъ, и҆ ѹ҆бїемъ и҆хъ, и҆ преста́ти сътвори́мъ дѣло·

Бы́сть же грѧдꙋщимъ і҆ѹ҆де́ѻ҆мъ, и҆же ѻ҆бита́хꙋ бли́зь и҆хъ, гл҃ющи намъ, въсходѧтъ ѿт̑ всѣхъ ꙗ҆́зы́къ на́ ны·

И҆ поста́вихъ въ мѣсто послѣ стн̑҇ѣ въ закрове́нїи, и҆ поста́вихъ лю́ди по чинꙋ̀ с ме́чи и҆ с꙽ сꙋлицами и҆ лꙋ́ки, и҆ ви́дѣхъ и҆ въста́хъ.
и҆ реко́хъ къ державнѣ́ишимъ и҆ старѣ́ишинам̑.
и҆ къ про́чимъ ча́стемъ наро́да·

Не бо́итесѧ ѿ лица̀ и҆хъ.
г҃а на́шего вели́каго и҆ стра́шнаго, въспомина́ите и҆ ѻ҆полчи́тесѧ за бра́тїю ва́шꙋ сн҃овъ ва́шихъ и҆ дще́ри ва́ши и҆ же́ны ва́ши и҆ домовъ ва́шихъ.

Бы́сть же е҆гда̀ ѹ҆слы́шаша враѕи на́ши, ꙗ҆́ко ꙗ҆влен̑҇ бы́сть на́мъ совѣтъ и҆хъ, разорѝ б҃ъ ꙗ҆́же съвѣща́ша.
и҆ ѻ҆брати́хом̑сѧ вс̂и на стѣ́ны е҆ді́нъ кождо же къ дѣ́лꙋ свое҆мꙋ·

И҆ бы́сть ѿ дн҃и того.
по́лъ въчине́ныхъ ю҆́ношъ и҆ дѣ́лахꙋ дѣ́ло.
и҆ полови́на и҆хъ ѹ҆гото́вана бы́сть къ бра́ни.
и҆ сꙋ́личницы и҆ щи́тни и҆ лꙋ́ки и҆ ѻ҆рꙋж́ницы и҆ нача́лницы за всѣмъ до́момъі҆ѹ́динымъ съѕида́ющи стѣ́ны, и҆ носѧ́щїи бремена̀ съ ѻ҆рꙋж́їемъ е҆ді́нꙋ рꙋ́кꙋ свою творѧ́хꙋ дѣ́ло и҆ дрꙋго́ю держа́хꙋ ме́чъ.
съзида́ющимъ же е҆ді́номꙋ комꙋж́до ме́чъ бы́сть ѻ҆поѧ́санъ при бе́дрꙋ е҆го.
и҆ съзида́хꙋ и҆ трꙋбѧхꙋ трꙋба́ми бли̑ и҆хъ.
и҆ реко́хъ къ державнѣ́ишимъ и҆ къ старѣ́ишинамъ, и҆ къ про́чимъ ча́стемъ наро́да дѣ́ло вели́ко е҆сть и҆ простра́нно.
и҆ м̂ы ѿлꙋче́ни е҆смы̀ на стѣнѣ дале́че е҆ді́нъ ѿ дрꙋга́го.
и҆ въ мѣ́стѣ и҆дѣж́е ѹ҆слы́шите гла́съ трꙋ́бныи, та́мо тецѣте к на́мъ.
и҆ б҃ъ на́шъ ѻ҆полчи́тсѧ ѻ҆ нас̑҇.
и҆ мы̀ т̂о сътворѧ́емъ дѣ́ло.
и҆ по́лъ насъ держа́хꙋ сꙋ́лицы ѿ восхо́да зорѝ.
до́ндеже взы́идꙋтъ ѕвѣ́зды.
въ вре́мѧ же т̂о реко́хъ по́лкомъ.
е҆ді́нъ ко́ждо съ ѻ҆́трокомъ свои҆мъ да пребыва́етъ въ среди і҆ерс̑҇лима.
и҆ да бꙋдт̑ꙋ вамъ стра́жа в но́щи и҆ дн҃ь на дѣла́нїе а҆́з же и҆ бра́тїѧ моѝ и҆ ѻ́троцы мои, и҆ стра́жи и҆же бѧ́хꙋ послѣ менѐ, не снима́хомъ ѻ҆дѣѧ́нїѧ на́ша т̂ꙋ, ни е҆ді́нъ ѿ мꙋж́ъ·

Глв̑҇а, е҃·

И бы́сть во́пль лю́демъ и҆ жена́мъ и҆хъ, вели́къ стропти́въ бра́тїи своих̑ і҆ѹ҆де́и.
и҆ бѧ́хꙋ и҆же гл҃ахꙋ·

Сн҃ове на́ши и҆ дще́ри на́ши мно́го сꙋть ѕѣ́ло.
и҆ прїимемъ за цѣнꙋ̀ пшени́цꙋ и҆ ꙗ҆дим̑ и҆ живе́м꙽.
і҆ бѧхꙋ и҆же гл҃аша·

Полѧ̀ на́ши и҆ винограды на́ши и҆ домы наша дадим̑ в залог̑҇.
и҆ прїимемъ пшени́цꙋ въ гла́дъ·

І҆ и́нїи гл҃ахꙋ взаи҆мъ прїимемъ.
пѣ́нѧѕи в дани цр҃евѣи.
дае́м꙽ же полѧ̀ на́ши и҆ вигогра́ды, и҆ до́мы на́ша·

И҆ нн҃ѣ ꙗ҆́ко пло́ть бра́тїи на́шихъ, та́ко пло́ти на́ши сꙋть.
и҆ ꙗ҆́ко сн҃ове и҆хъ та́ко и҆ сн҃ове на́ши·

Се̂ мы̀ под̑ни́зим̑ сн҃ы на́ши, и҆ дще́ри на́ши в рабо́тꙋ.
и҆ ѿ дще́рїи сꙋть на́шихъ рабы́ни.
не и҆мѣ́емъ ѿкꙋ́дꙋ мо́жем̑ ѿкꙋпи́ти·

И҆ полѧ̀ на́ши и҆ виногра́ды на́ши и҆нїи въздержа́тъ·

И҆ ѻ҆скорбѣ́хъ ѕѣ́ло е҆гда̀ слы́шахъ во́пль и҆хъ по словесѝ семꙋ̀.
помысли же срд̑це мое въ мнѣ̀.
и҆ запрѣти́хъ державнѣ́ишимъ и҆ старѣ́ишинамъ, и҆ реко́хъ и҆мъ·

Ро́стъ ни е҆ді́ни ѿ бра́тїи на́шихъсъдѣла́ите·

И҆ събра́хъ сꙋпроти́вꙋ и҆мъ содвиже́нїе вели́ко, и҆ реко́хъ им̑.
и҆ м̂ы, ꙗ҆́ко зна́ете ѿкꙋпи́ли е҆смы̀ бра́тїю на́шꙋ і҆ѹ҆де́и, и҆же прода́ни бѧ́хꙋ ꙗ҆зы́ком̑ по може́нїю на́шемꙋ·

И҆ в̂ы бо прода́ите бра́тїа ва́ши и҆ ѿда́стьсѧ вамъ·

И҆ ѹ҆молча́ша не ѻ҆брѣто́ша чт̂о ѿвѣща́ти·

Реко́х꙽ же к ни́мъ, нѣ́сть до́браѧ ве́щъ кою̀ творитѐ в̂ы, чт̂о ради не въ стра́сѣ б҃а на́шего хо́дите.
е҆же не поно́сит̑сѧ на́мъ ѿ ꙗ҆зы́къ враго́въ на́шихъ.
и҆ а́зъ и҆ братїѧ мои, и҆ ѻ́троцы мои заи҆мова́хомъ ѿ ни́хъ мно́ги пѣнѧѕи и҆ пшени́цꙋ·

И҆ реко́хъ ѻ҆ста́вимъ ѹ҆бо прельще́нїе сїе, възда́ите и҆мъ дне́сь полѧ̀ и҆хъ, и҆ виногра́ды и҆хъ, и҆ ма́слины и҆хъ, и҆ до́мы и҆хъ.
н̂о па́че и҆ ѿ пѣ́нѧѕїи пшени́цы.
вина̀ і҆ е҆ле́ѧ и҆́м꙽же не въ пра́во проше́нїе взаконѧ́ете в них̑, да́ите в них̑ мѣ́сто·

И҆ реко́ша въздади́мъ, ѿ ни́хъ ничего въспро́симъ·

Та́коже сътво́рим̑ ꙗ҆́коже гл҃еши·

И҆ възвах̑ сщ҃еников̑҇ и҆ заклѧ́хъ и҆хъ да сътво́рѧтъ по томꙋ̀ чт̂о гл҃ахъ.
на́ипа́че ѻ҆трѧсох̑ нѣ́дра мои и҆ рекох̑.
та́ко ѻ҆трѧсе́тъ б҃ъ всѧ́каго мꙋ́жа и҆же не и҆спо́лнитъ сло́ва того ѿ до́мꙋ е҆го, и҆ ѿ трꙋдовъ и҆хъ.
та́ко ѻ҆трѧсе́нъ и҆ пра́зденъ да бꙋ́детъ.
и҆ рече вс̂е мно́жество а҆ми́нь.
и҆ въсхва́лиша б҃а·

Сътвори́ша лю́дїе ꙗ҆ко бы́сть рече́но.
ѿ дн҃и того во́ньже повелѣ̀ цр҃ь мнѣ̀ да бꙋ́дꙋ во́ждъ въ землѝ і҆ѹ́динѣ, ѿ лѣта к҃ го.
да́же до лѣта, л҃ го, и҆ в҃ го·

А҆ртаѯе́рѯа цр҃ѧ по лѣтх̑ѣ, в҃і тих̑, а҆́зъ и҆ братїѧ моѧ̀ пища и҆же во́ждем̑ възда́тисѧ и҆́мать не ꙗ҆до́хомъ.
и҆ пища и҆же бы́ша пре́же менѐ ѻ҆тѧг꙽чиша на нихъ.
и҆ прїѧ́ша ѿ ни́хъ въ хлѣ́бѣ, и въ винѣ̀, и҆ въ пѣ́нѧѕех̑ всѧкъ дн҃ь, дидра́гмъ.
м҃·

Но и҆ слꙋже́бницы их̑ ѻ҆блада́ша люд̑ми·

А҆́з꙽ же не сътворих̑ та́ко ра́ди стра́ха бж҃їѧ, н̂о па́че в дѣ́ло стѣна́мъ съѕида́хъ, и҆ по́лѧ не кꙋпи́хъ.
и҆ вс̂и ѻ҆́троцы мои събра́ни к дѣ́лꙋ бѧ́хꙋ, і҆ѹ҆де́и же и҆ старѣ́ишинъ, р҃. и҆ н҃ мꙋжїи.
і҆ и́же грѧдѧ́хꙋ к на́мъ ѿ ꙗзы́ъ и҆же въѻ҆́крс̑҇тъ нас̑҇ сꙋть, къ трапепе́зѣ мое́и·

И҆ бѧ́хꙋ ѹ҆гото́вана мнѣ̀ на ко́жд̑о дн҃ь во́лъ е҆ді́нъ, ѻ҆́венъ, ѕ҃, и҆збра́нныхъ.
и҆ козе́лъ бы́сть м̂и.
також̑ и҆ ѿ птиц꙽.
междꙋ десѧти вино̀ гро́знд̑ое, і҆ ина мно́га възда́ѧхꙋ.
на́ипа́че и҆ пища господ̑ствꙋ моемꙋ не в꙽зыска́хъ.
ѕѣ́лна б̂о бѧ́ше рабо́та на лю́дехъ сихъ, ѹ҆тоненъ по́лкъ.
помѧни м̂ѧ б҃е мои въ бл҃го по всѣ́хъ и҆же сътвори́хъ лю́дем̑ тѣ́мъ·

Глв̑҇а, ѕ҃·

Бы́сть же е҆гда̀ слы́ша санавал̑҇ла́тъ и҆ товїѧ, і҆ и҆са́мꙋ а҆рави́т꙽скомꙋ, и҆ про́чимъ враго́мъ на́шимъ, ꙗ҆ко създа́хꙋ стѣнꙋ̀.
и҆ не ѻ҆ста̀ в ни́хъ дх҃ъ.
и҆ а́зъ да́же до вре́мени ѻ҆́ного, две́рїи не поста́вихъ въ вра́тѣхъ.
посла̀ санавал̑҇ла́тъ и҆ сиса́м꙽ къ мнѣ гл҃ющи.
прїиди и҆ събере́мсѧ въкꙋ́пѣ в по́ле на мѣ́сто ѻ҆́но гл҃емое.
тїи же мышлѧ́хꙋ да сътво́рѧтъ м̂и ѕло̀·

И҆ посла́хъ к ни́мъ посло́въ гл҃ющи.
дѣ́ло вели́ко.
а҆́зъ творю̀ и҆ не могꙋ̀ сни́ти, да не преста́нетъ дѣ́ло.
е҆гда же съвершꙋ е҆̀ възы́идꙋ къ ва́мъ·

И҆ посла́ша же къ мнѣ̀ ꙗ҆́ко гл҃ъ се́и, и҆ посла́ша къ мнѣ̀ посе́мъ, и҆ посла̀ къ мнѣ̀ санавала́тъ, е҃ го ѻ҆́трока свое҆го, посла́нїе и҆мѣ́ющи в рꙋ́кꙋ свою̀ пи́санꙋ та́ко·

Въ ꙗ҆зы́цѣхъ слы́шано е҆сть.
и҆ сиса́мъ реч̑҇.
ꙗ҆́ко т̂ы і҆ и҆ѹ҆де́и мы́слите ѿмѣта́тисѧ·

И҆ сего ра́ди т̂ы съѕида́еши стѣ́нꙋ и҆ въздви́гнꙋти себѐ хо́щеши и҆мъ в꙽ цр҃ѧ.
сеа́ же ра́ди вины и҆ про̑҇рки поставлѧ́еши себѣ̀.
да бꙋ́деши въ і҆ерс̑҇лимѣ цр҃емъ и҆ въ і҆ѹ҆де́и.
и҆ нн҃ѣ възвѣстѧтсѧ цр҃ю словеса̀ сїѧ.
сего ра́ди нн҃ѣ прїиди да сътво́римъ совѣтъ въкꙋ́пѣ·

И҆ посла́хъ к ним̑ гл҃ющи, нѣ́сть сътворе́но по словесѝ семꙋ̀ и҆же т̂ы гл҃еши, ꙗ҆́ко ѿ срд̑ца твое҆го т̂ы л꙽же́ши и҆х꙽, ꙗ҆́ко вс̂и страшатъ насъ гл҃ющи, престанꙋтъ рꙋ́ки их̑ ѿ дѣ́ла сего и҆ не сътворит̑сѧ·

Сего ради нн҃ѣ наипаче ѹ҆крѣпи́хъ рꙋ́ки моѝ, и҆ азъ внидо́хъ въ до́мъ семее҆въ сн҃а далаїе҆ва, сн҃а метавеи́лева, и҆ се́и съдержасѧ м̂и и҆ рече·

Съберѣ́мсѧ въ до́мъ бж҃їи среди е҆го, и҆ заключи́мо две́ри е҆го, ꙗ҆́ко прихо́дѧт̑ нощїю да забїютъ т̂ѧ·

И҆ реко́хъ кт̂о е҆сть подо́бенъ мнѣ̀ да бѣжи́т꙽, и҆ кт̂о подо́бенъ ꙗ҆́ко азъ, въни́детъ въ цр҃ковь и҆ живетъ, не вни́дꙋ·

И҆ разꙋмѣ́хъ и҆ с̂е б҃ъ не посла е҆го, ꙗ҆ко прро̑҇чествова сло́во на мѧ, и҆ товїа, и҆ санавал̑҇латъ, наѧ́ша на мѧ наро́дъ да ѹ҆страшꙋсѧ и҆ сътворю̀ тако, и҆ съгрѣшꙋ̀ и҆ да бꙋ́дꙋ и҆мъ въ и҆мѧ лꙋкавое, і҆ и҆мѣ́емъ ѕл̂о, ꙗ҆ко да поно́сѧтъ м̂и, помѧнѝ б҃е товїю и҆ санавал̑҇лата по дѣ́лꙋ их̑ си́цевꙋ, и҆ наѻ҆дїѧ прро̑҇ка и҆ про́чих̑ прро̑҇къ и҆же страшахꙋ мѧ·

И҆ съверше́на е҆сть стѣна, к҃е го, мцс̑҇а е҆лꙋ́ла, въ н҃в дн҃и·

И҆ бы́сть б̂о е҆гда слы́шаша вс̂и враѕи наши, и҆ ѹ҆боѧ́шасѧ вс̂и ꙗ҆зы́цы, и҆же бѧ́хꙋ ѻ҆́крс̑҇тъ насъ, нападѐ страх̑ вели́къ въ ѻ҆́чи и҆хъ, и҆ позна́ша и҆же ѿ г҃а б҃а нашего сътворе́но быс̑҇ дѣ́ло т̂о·

И҆ въ дн҃и тїи мно́ѕи державнѣ́ишїи въ і҆ѹде́и посланїа послаша к товїѝ и҆ ѿ товїѧ посланїѧ грѧдѧ́хꙋ к ним̑, мно́ѕи б̂о бѧ́хꙋ въ і҆ѹ҆де́и и҆мѣ́ющи въ клѧ́твѣ е҆го, ꙗ҆́ко зѧ́ть б̂ѣ сехенїевъ сн҃а и҆ѹ҆рае҆ва, і҆ѻ҆аннаѳан̑҇ сн҃ъ е҆го прїѧ̀ дще́рь месол꙽ла́мовꙋ сн҃а варахїева въ женꙋ̀, и҆ словеса е҆ѧ̀ бѣ́хꙋ къ мнѣ̀ гл҃ющи, и҆ словеса моѝ ѿносѧ́щи е҆мꙋ и҆ послаше посланїе товїѧ да ѹ҆страшитъ менѐ·

Глв̑҇а, з҃·

И бы́сть е҆гда̀ създа́на е҆сть стѣна̀, и҆ положи́хъ две́ри и҆ счита́хъ две́рницы.
и҆ пѣв꙽цы и҆ левѷти, повелѣхъ а҆нанїи бра́тꙋ мое҆мꙋ, и҆ а҆на́нїи начал̑҇никꙋ домꙋ ви́рова ѿ і҆ерс̑҇лима·

То́и б̂о бѣ ꙗ҆ко мꙋжъ и҆́стинен̑҇.
и҆ боꙗ҆́сѧ б҃а па́че про́чихъ·

И҆ реко́х꙽ и҆мъ, да не ѿверзꙋтсѧ вра́та і҆ерс̑҇лим̑м̑скаѧ до́ндеже възы́идетъ слн҃це·

И҆ ещѐ и҆мъ бдѧ́щим̑, да заключат̑сѧ вра́та, и҆ засꙋ́нꙋты да бꙋтъ засо́вами, и҆ поста́вихъ стра́жи ѿ ѻ҆бита́ющих̑ въ і҆ерс̑҇лимѣ.
мꙋжъ е҆ді́нъ ко́жд̑о во стра́жи свое́й.
и҆ мꙋжъ ко́жд̑о проти́вꙋ до́мꙋ свое҆го град̑ же бы́сть широ́къ ѕѣло и҆ вели́к꙽.
и҆ людїи ма́ло посреди е҆го.
и҆ не бѧ́хꙋ домы̀ созда́ны б҃ъ же да́лъ въ срд̑це мое и҆ събра́хъ держа́внѣишихъ кнѧзе́и и҆ наро́дъ въ собо́ръ пꙋти и҆ ѻ҆брѣто́хъ кни́гꙋ съвокꙋпле́ннаго пꙋтѝ, и҆же възыидо́ша прь́вое.
и҆ ѻ҆брѣто́хъ пи́сано в не́и, и҆ тїи сн҃ове и҆́стин꙽нїи.
и҆же въсходѧ́щїи ѿ плѣне́нїѧ, преселе́нїѧ и҆хже преселѝ навходоносо́ръ цр҃ь вавѷлоньскїи.
и҆ ѻ҆брати́шасѧ въ і҆ерс̑҇лимъ и҆ і҆ѹ҆де́ю мꙋжъ е҆ді́нъ кож̑до въ градъ свой.
съ зорова́велем̑, і҆е҆сꙋе҆м꙽, і҆ нее҆мїем̑ и҆ а҆за́рїѧ, и҆ вее҆льманае҆ма́нъ, мардохе́и, веа҆сан̑҇, масаѳара́ѳъ, е҆́з꙽дра, въг꙽гꙋа́и.
и҆ наѹ́мъ, ваа́на.
масѳа́ръ·

Число̀ мꙋжїи людїи і҆и҆л҃евъ, сн҃ове фаро́совы, ҂в҃, ро҃в.

Сн҃ове сафатїевы т҃, о҃в·

Сн҃ове и҆ре́евы, х҃, н҃в.

Сн҃ове фаа҆ѳ꙽моа́вовы·

Сн҃овъ и҆ѻ҆сꙋ́евыхъ і҆ѻ҆а́вовыхъ. ҂в҃, х҃ и҆ и҃і.

Сн҃ове е҆ла́мовы, ҂а҃, с҃, н҃д·

Сн҃ове соѳꙋ́евы, и҃ ст̑о, м҃е·

Сн҃ове заха́ие҆вы, з҃, сотъ, ѯ҃·

Сн҃ове венꙋ́ие҆вы, х҃, м҃и·

Сн҃ове зак꙽хꙋ́ие҆вы, х҃, ѕ҃ десѧт̑.
сн҃ве ванꙋевы х҃, м҃и.
сн҃ве виреі҆е҆вы, х҃, к҃и.
сн҃ве гетадовы, ҂в҃, тк҃в.
сн҃ве а҆доникамли, х҃ ѕ҃, десѧт̑, з҃. сн҃ве гавꙋі҆е҆вы, ҂в҃, ѕ҃, десѧт̑ з҃. сн҃ве и҆дини, х҃ н҃д, Сн҃ове а҆ти́ри.
и҆ сн҃ове е҆зехїевы ѳ҃. со́тъ, и҃·

Сн҃ове и҆самїевы тк҃и·

Сн҃ове васа́їевы тк҃д·

Сн҃ове а҆ри́фовы, рв҃і·

Сн҃ове а҆се́новы, с҃ к҃г.

Сн҃ове гаваѻ́ни, л҃·

Сн҃ове веѳалее҆́мовы, рк҃и·

Сн҃ове а҆то́фовы н҃ѕ.

Сн҃ове а҆наѳо́ѳовы, рк҃и·

Сн҃ве а҆замо́ѳовы мꙋжи ви́ѳовы, м҃в.
мꙋжи карїаѳїари́мовы и҆ фи́ровы и҆ виро́ѳовы з҃. сотъ, м҃г.
мꙋжи а҆ра́ма и҆ гава́ѧ, х҃, к҃а.
мꙋжи махима́совы рк҃в.
мꙋжи веѳи́ли и҆ ха́и, рк҃г.
мꙋжи а҆навїѧ дрꙋга́го, н҃в.

Сн҃ове мегево́са дрꙋга́го, р҃н и҆ ѕ҃. и҆ мꙋжи и҆лама́евы, ҂а҃ сн҃в·

Сн҃ове і҆а҆ра́мовы т҃к·

Сн҃ове и҆ери́ховы, тм҃е·

Сн҃ове лодади́довы и҆ ѻ́новы, з҃ со́тъ к҃а·

Сн҃ове а҆на́на, ҂г҃, ѳ҃ сот̑ л҃·

Сщ҃енницы, сн҃ове иѻ҆да́їевы в домꙋ̀ и҆есꙋѧ́, ѳ҃ сотъ, о҃г·

Сн҃ове е҆м꙽ми́ровы, ҂а҃, н҃в·

Сн҃ове фас꙽сеѹ́ровы ҂а҃, см҃з·

Сн҃ове и҆ра́мовы, ҂а҃ з҃і<.>

Левѷти же сн҃ове и҆ѻ҆сꙋ́евы кадмїи́льскаго·

Сн҃ове ѹ҆дꙋи́ли, о҃д.
пѣвцы́ же сн҃ове а҆са́фовы, рк҃и.
две́рницы же, сн҃ове сел꙽лꙋмли·

Сн҃ове а҆ти́ровы·

Сн҃ове талмо́ни.
сн҃ове а҆къкꙋ́вовы.
сн҃ове ти́товы.
сн҃ове савїины, рл҃и, сн҃ове наѳи́мли.
сн҃ове и҆́лины.
сн҃ове а҆сꙋфовы.
сн҃ове заваѻ҆до́вы.
сн҃ове кирасовы.
сн҃ове сиса́и҆ны.
сн҃ове фадони, сн҃ове лава́ни.
сн҃ове а҆га́вовы.
сн҃ове а҆кꙋ́вовы.
сн҃ове ѹ҆та́евы, сн҃ве кита́рсовы, сн҃ве га́вовы.
сн҃ове селме́ины.
сн҃ове а҆нановы.
сн҃ове саде́ины.
сн҃ве гаа́ровы.
сн҃ове раа҆хїины.
сн҃ове раа҆со́ни.
сн҃ве нехо́довы, сн҃ове е҆гиза́мли.
сн҃ове а҆́зины.
сн҃ве фе́совы.
сн҃ове висїины сн҃ове меи҆но́новы.
сн҃ове нефоса́ины.
сн҃ове вак꙽вꙋковы.
сн҃ове а҆хи́фовы.
сн҃ове а҆рꙋрины.
сн҃ове васало́ѳовы.
сн҃ове мїидины.
сн҃ове а҆даса́ни, сн҃ове варкꙋвовы.
сн҃ове васалоѳовы.
сн҃ове ми́дины.
сн҃ове а҆даса́ни, сн҃ве варкꙋвли, сн҃ове сисара́ѳовы.
сн҃ове ѳима́евы.
сн҃ове нисїины, сн҃ове а҆ти́ѳївы.
сн҃ове рабо́въ соло́моновых̑ сн҃ове сꙋти, сн҃ове сафара́товы.
сн҃ове фери́дины.
сн҃ове лели́лины.
сн҃ове дорко́ни.
сн҃ове гадаи́ли.
сн҃ве фараха́совы, сн҃ове сава́и҆ни.
сн҃ве имꙋмини всѝ, и҆ наѳине́и.
и҆ сн҃ове слꙋгъ соло́моновыхъ, тч҃в·

И҆ сїи сꙋть и҆же в꙽зошлѝ ѿ ѳелме́ла ѳелар̑҇са хирꙋвъ, и҆ро́нъ.
и҆еми́ръ.
и҆ не мого́ша сказати до́мꙋ ѿц҃ь свои҆хъ сѣмени и҆хъ, ѿ і҆и҆л҃ѧ л̂и быша и҆ сн҃ове далѣ́иѧ, сн҃ове вꙋ́евы, сн҃ве товїины сн҃ве некодае҆вы, х҃, м҃в.
ѿ сщ҃ен̑҇ник̑҇.
сн҃ве и҆ѻ҆вїины, сн҃ове а҆к꙽кꙋсовы.
сн҃ове верзел꙽ла́ины, ꙗ҆́ко поꙗ҆́ли ѿ дще́рїи герзел꙽ла́иныхъ, галаа҆ди́тина же́ны.
и҆ прозва́шасѧ по и́менехъ си́хъ·

Сїи в꙽зыска́ша писа́нїѧ и҆хъ в числѣ̀, и҆ не ѻ҆брѣто́шасѧ і҆ и҆зве́ржени сꙋть ѿ сщ҃енства·

Рече же а҆ѳерсаѳа и҆мъ, да не ꙗ҆дѧ́т꙽ ѿ ст҃аѧ ст҃ыхъ, до́ндеже въста́нет̑ сщ҃енникъ ѹ҆че́нъ и҆ наказа́нъ·

И҆ бы́сть весь собо́ръ, ꙗ҆́ко мꙋжъ еді́нъ, ҂м҃, ҂в҃, т҃, и҆ ѕ҃ десѧ́тъ.
безъ рабъ и҆ рабынь, и҆хже бѧ́хꙋ, ҂з҃, тл҃з, и҆ междꙋ и҆ми пѣвцы̀ и пѣвни́цы, сл҃ѕ.
и҆ ко́ни и҆хъ х҃, л҃з, и҆ м꙽скѝ и҆хъ, см҃е, вельблюди и҆хъ, х҃ л҃е.
ѻ҆слѝ их̑, ҂ѕ҃. з҃ сот̑ к҃.<.>

И҆ ѿ ча́сти нача́лных̑ ѿч҃ествъ да́ша въ дѣло а҆рѳасаста́рови.
и҆ да́ша въ сокро́вище, зла́тыхъ, ҂а҃ и҆ фїа́лъ н҃, и҆ ри́зъ жре́ческихъ, л҃·

И҆ ѿ нача́лникъ ѻ҆би́телныхъ да́ша въ сокро́вище дѣла зла́та, дра́гмъ ҂к҃·

И҆ сребра̀ мна́съ, ҂в҃, и҆ т҃, и҆ да́ша про́чїи лю́ди злата дра́гмъ, ҂к҃, и҆ сребра̀ мна́съ, ҂в҃, и с҃, и҆ ри́зъ сщ҃енническихъ, ѯ҃з·

ѻ҆биташаж̑ сщ҃енницы и҆ левѷти, и҆ две́рницы, и҆ пѣвцы̀, и҆ про́чїи наро́дъ и҆ наѳине́и и҆ весь і҆и҆л҃ь въ гра́дѣхъ своих̑·

Глв̑҇а, и҃·

И пришед̑ мс̑҇ць седмыи, сн҃веж̑ і҆и҆л҃евы бѧ́хꙋ въ́ градѣхъ свои҆хъ·

Собра́н же весь полкъ ꙗ҆́ко мꙋжъ е҆ди́нъ, на простра́нъство и҆же е҆сть пред̑ вра́ты во́дными и҆ реко́ша е҆́з꙽дрѣ пи́сарю, да несет̑ кни́гꙋ зако́на моѷсїѻва.
и҆́мже повелѣ̀ г҃ь і҆и҆л҃ю, и҆ принесѐ б̂о е҆́з꙽дра сщ҃енникъ зако́нъ пред̑ мно́жествомъ мꙋже́и и҆ же́нъ, всѣм же и҆же можа́хꙋ разꙋмѣти·

Въ день прь́выи мс̑҇ца седмаго, и҆ чтѐ в немъ ꙗ҆́вно на пространъствѣ и҆же бы́сть пред̑ вра́ты во́дными ѿ ѹ́тра да́же до полꙋдне, пред̑ мꙋжи и҆ жена́ми и҆ премꙋдрыми, и҆ ѹ́ши всего по́лка бѧхꙋ внѧ́ты къ кни́ѕѣ·

Ста же е҆́з꙽дра писе́цъ на стꙋ́пню древенꙋ, и҆же сътворил̑҇ гл҃анїе.
и҆ ста́ша бли́зь е҆го, матаѳїѧ, и҆ саме́ѧ, и҆ а҆нїѧ, и҆ ѹ́рїѧ и҆ хелкїѧ.
и҆ маа҆сїѧ ѻ҆деснꙋю е҆го·

И҆ к лѣвои ѳа́да, и҆ мисаи́лъ, и҆ мелхїѧ, и҆ ѻ҆са́мъ, и҆ а҆сева́дъма, заха́рїѧ, и҆ месолам̑·

И҆ разгнꙋвъ е҆́з꙽дра кни́гꙋ пред̑ всѣми людмѝ, ꙗ҆́ко се́и б̂ѣ над̑ людми и҆ быс̑҇ е҆гда разгиба́ше ю҆̀.
ст̂а весь полкъ и҆ блс̑҇ви е҆з꙽дра г҃а б҃а гласомъ вели́ким̑ и҆ ѿвѣщавъ весь полк꙽.
и҆ рече ами́нь и҆ въздви́гше рꙋцѣ своѝ, и҆ прекло́нъшесѧ, и҆ поклони́шасѧ б҃ꙋ, просте́рты на землѝ·

И҆ паки и҆сꙋ́и, и҆ ваана́на, и҆ саравїи бѧ́хꙋ разꙋмѣваю҆ще, и҆ а҆канъ, и҆ савасте́и, камъпти́съ.
аза́рїѧ, и҆ѻ҆заве́дъ, ани фанесъ·

Левѷти молчанїе сътворѧ́хꙋ въ людех̑ на слы́шанїе зако́на·

Людїе же стахꙋ на стꙋпню свою, и что́ша въ кни́зѣ зако́на бж҃їѧ да стро́чно и҆ ꙗ҆́вно къ разꙋмѣнїю, и҆ разꙋмѣша лю́дїе е҆гда чтѧ́шесѧ·

Рече же нее҆мїѧ.
і҆ е́здра сщ҃енникъ и҆ писе́цъ и҆ левѷти толкꙋ́ющїи всм̑ѣ лю́демъ, и҆ рече всѣмъ людемъ.
день сщ҃енъ е҆сть г҃ꙋ б҃ꙋ нашемꙋ, не печалꙋите и҆ не плачите, понеж̑ б̂о плакаша вс̂и лю́дїе е҆гда слы́шахꙋ словеса зако́на, и҆ речетъ и҆мъ·

И҆дѣте ꙗ҆дѣте тꙋ́ки и҆ пїите вино̀ медови́то, и҆ посли́те части и҆мъ.
и҆же не ѹ҆гото́ваша себѣ ꙗ҆ко ст҃ъ день гн҃ь е҆сть, и҆ не печа́лꙋите и҆б̂о радость гн҃ѧ сїѧ си́ла наша е҆сть·

Левѷти же мол꙽чанїе творѧ́хꙋ въ всѣхъ лю́дехъ рекꙋщи, молчи́те ꙗ҆́ко день ст҃ъ е҆сть и҆ не тꙋжи́те, абїе весь полкъ ѿи́де да ꙗ҆́сть и҆ піет̑ и҆ после́тъ части.
и҆ сътвори́ти весе́лїе вели́ко.
ꙗ҆́ко разꙋмѣша словеса и҆же ѹ҆чаше и҆хъ·

И҆ въ день вторы́и събрани сꙋть кнѧзи ѻ҆би́телем꙽, вс̂и лю́дїе, и҆ сщ҃енницы и҆ левѷти къ е҆́з꙽дре писцꙋ̀ да претолкꙋ́ет꙽ и҆мъ словеса зако́ннаѧ·

И҆ ѻ҆брѣто́ша пи́сано въ зако́нѣ и҆же повелѣ̀ г҃ь рꙋко́ю моѷсїѻ҆вою, да ѻ҆битаю́т꙽ сн҃ове і҆и҆л҃евы в꙽ жили́ще въ день праз꙽дника, мс̑҇ца седмаго, да проповѣда́ютъ и҆ прорекꙋтъ гла́сомъ всѣ́мъ посад̑нымъ своим̑ въ і҆ерс̑҇лимѣ гл҃ющи·

И҆ рече е҆́здра и҆сходи́те въ горꙋ̀.
и҆ принеси́те вѣтви масли́чны.
и҆ ѿра́сли дре́ва краснѣ́ишаго, и҆ ѿра́сли мерсовы, и҆ вѣтви фини́чески.
и҆ ѿра́сли дре́ва дꙋбра́внаго.
сътворѧ́ти кꙋщи, ꙗ҆́ко пи́сано е҆сть·

І҆ и҆зыидо́ша вс̂и лю́дїе и҆ принесо́ша.
сътвори́ша же себѣ̀ жили́ще е҆ді́нъ ко́ждо и҆хъ въ сокро́вищихъ свои҆хъ, и҆ въ дворх̑ѣ свои҆хъ, и въ дво́рѣхъ до́мꙋ бж҃їѧ.
и҆ на простра́н꙽ствѣ вра́тъ вод̑ныхъ.
и҆ на простра́нствѣ вра́тъ е҆фраи́ма·

И҆ сътвори́ша ве́сь со́ньмъ и҆же и҆зыидо́ша ѿ плѣне́нїѧ жили́ща, и҆ ѻ҆бита́ша в꙽ жили́щихъ.
ꙗ҆́ко не сътвори́ша ѿ дн҃їи і҆сꙋса сн҃а на́в꙽вѷна такова, сн҃ове і҆и҆л҃еви да́же до дн҃е того·

И҆ бы́сть весе́лїе вели́ко ѕѣ́ло.
и҆ чтѧ́хꙋ въ кни́ѕѣ зако́на бж҃їа, на всѧ́къ дн҃ь, ѿ дн҃е пе́рваго да́ждь до послд̑ѣнѧго·

И҆ сътвори́ша пра́здникъ.
з҃, дн҃їи, и҆ въ дн҃ь, и҃ и събра́нїѧ по ѻ҆бы́чаю·

Глв̑҇а, ѳ҃·

Въ дн҃ь же, к҃д.
мс̑҇ца сего, собра́шасѧ сн҃ове і҆и҆л҃еви въ по́стѣ и҆ въ врѣтищахъ.
и҆ пер꙽сть на глава́хъ и҆хъ.
и҆ ѿлꙋчено е҆сть сѣмѧ сн҃въ і҆и҆л҃евъ ѿ всѧ́каго сн҃а чюжда·

И҆ ста́ша и҆сповѣ́дахꙋ грѣхи своѧ, и҆ безаконїа ѿц҃ъ своих̑.
и҆ ста́ша на стоа́нїю их̑.
и҆ что́ша въ кни́ѕѣ зако́на г҃а б҃а свое҆го.
и҆сповѣда́хꙋсѧ и҆ покланѧ́хꙋсѧ г҃ꙋ б҃ꙋ свое҆мꙋ·

И҆ ста́ша же на стꙋпню левѷтом̑ і҆е҆сꙋ́е, и сн҃ы ка́дьмии҆ли саха́нїа саравїа и҆ сн҃ове ханани.
и҆ вопїахꙋ гла́сом̑ вели́ким̑ къ г҃ꙋ б҃ꙋ свое҆мꙋ·

И҆ реко́ша левѷти и҆е҆сꙋ́е, и҆ кад̑мїил̑҇.
воста́ните и҆ блс̑҇ви́те г҃а б҃а на́шего ѿ́ вѣка да́же до́ вѣка.
и҆ блс̑҇вѧт̑ и҆мѧ сла́вы твое́ѧ.
и҆ вознесꙋтъ въ всѧ́ко блс̑҇венїе и҆ хва́лꙋ·

И҆ ре́че е́здра.
т̂ы самъ г҃и е҆ді́нъ.
т̂ы сътворѝ нб҃о, и҆ нб҃о нб҃ное.
и҆ вс̂ѧ во́и и҆хъ, и҆ землю̀ и҆ вс̂ѧ ꙗ҆же в не́и сꙋть.
мо́рѧ и҆ вс̂ѧ ꙗ҆́же в ни́хъ е҆сть.
и҆ т̂ы ѻ҆живи́ши вс̂ѧ сїѧ.
и҆ во́и нбс̑҇нїи тебѣ сѧ покланѧ́ютъ·

Ты̀ г҃и б҃е и҆же и҆збра́лъ е҆си а҆враа́ма.
і҆ и҆звелъ е҆си е҆го ѿ селе́нїѧ халде́искаго, и҆ положи́лъ е҆си и҆мѧ е҆го а҆враа́мъ·

И҆ ѻ҆брѣлъ е҆си срд̑це е҆го вѣрно пред̑ тобо́ю.
и҆ завѣщал̑҇ е҆си с ни́мъ ми́ръ, дати е҆мꙋ зе́млю ханане́искꙋ, и҆ хетъѳе́искꙋ, и҆ а҆м꙽море́искꙋ, и҆ ферезе́искꙋ, і҆ е҆вꙋсе́искꙋ и҆ гергесе́искꙋ, и҆ сѣмени е҆го·

И҆ напо́лнилъ е҆си словеса̀ твоа̀ ꙗ҆́ко пра́веденъ е҆си.
и҆ видѣлъ е҆си ѻ҆злобле́нїе ѿц҃ъ на́шихъ въ е҆гѷп꙽тѣ·

Во́пль же и҆хъ ѹ҆слы́шалъ е҆си на́ морѣ чрьмнм̑ѣ.
и҆ далъ е҆си зна́менїе и҆ чюдеса̀ въ е҆гѷптѣ, на фараѻ́на и҆ на всѧ̀ рабы̀ е҆го, и҆ на всѝ лю́дїе землѝ е҆го·

Позна́лъ б̂о е҆си и҆ жестоко сътвори́шасѧ против̑҇ и҆хъ.
и҆ сътвори́лъ е҆си себѣ̀ и҆мѧ·

Ꙗ҆́ко въ то́й дн҃ь и҆ море раздѣлъ е҆си пред̑ ни́ми.
и҆ пройдо́ша по́средѣ мо́рѧ по́ сꙋхꙋ·

И҆ гони́тели же их̑ въверглъ е҆си въ глꙋби́нꙋ, ꙗ҆́ко ка́мень въ во́дѣ ѕѣ́лнѣ.
и҆ въ столпѣ ѻ҆́блачнѣ водил̑҇ е҆си и҆хъ во́ дн҃и.
и҆ во столпѣ ѻ҆́гненѣ в но́щи, дабы́ сѧ ѻ҆свѣща́лъ им̑ пꙋть по не́мꙋже и҆до́ша·

И на́ горꙋ же сина́искꙋю съшелъ е҆си, и҆ гл҃алъ е҆си с ни́ми съ нб҃се·

И҆ да́лъ е҆си им̑ сꙋдїѝ пра́вы, и҆ зако́нъ и҆́стинныи.
чи́ны и҆ повеленїѧ бл҃га·

И҆ сꙋбо́тꙋ ст҃ꙋю твою ꙗ҆ви́лъ е҆си им̑ и҆ повелѣнїе и҆ чи́ны, и҆ за́конъ повелѣлъ е҆си и҆мъ въ рꙋ́кꙋ моѷсїѻвꙋ раба̀ твое҆го.
хлѣбъ же съ нб҃си да́лъ е҆си и҆мъ въ а҆лчъбѣ и҆хъ въ сы́тость и҆мъ.
и҆ во́дꙋ и҆с ка́мени и҆звелъ е҆си и҆мъ жаждꙋщимъ и҆мъ·

И҆ реклъ е҆си им̑ да вни́дꙋтъ и҆ въздръжа́тъ зе́млю, на ню́же простерлъ рꙋ́кꙋ твою̀ дати им̑·

Сїи же и҆ ѿц҃и на́ши го́р꙽до съдѣла́ша ѻ҆жесточи́ша вы́ѧ своѧ.
и҆ не слы́шаша за́повѣдїи твои҆хъ.
и҆ не хотѣша слы́шати и҆ не сꙋть въспомѧнꙋли ди́внаѧ твоа̀ и҆же сътвори́лъ е҆си и҆мъ.
и҆ ѻ҆жест́ѣ вы́ѧ и҆хъ и҆ да́ша главꙋ̀ да ѻ҆бра́тѧт̑сѧ на рабо́тꙋ свою̀ въ е҆гѷпетъ·

Ты́ же б҃е и҆сцѣли́тель, грѣхо́въ защити́тель, и҆ млс̑҇рдъ длъготрьпеливъ, и҆ мно́гомлс̑҇тивъ не ѻ҆ста́виши их̑·

И҆ е́ще же сътвори́ша себѣ̀ те́льцы слїаны, и҆ реко́ша.
сїи сꙋть бо́ги твоѝ и҆же и҆зведоша т̂ѧ ѿ е҆гѷпта.
сътвори́ша же раз̑дра́женїе ве́лїе·

Тыж̑ въ млс̑҇рдїи твое҆мъ мно́ѕѣмъ не ѻ҆ста́вилъ е҆си и҆хъ въ пꙋсты́ни.
сто́лпъ ѻ҆́блачныи не ѹ҆кло́ни ѿ нихъ въ дн҃и да и҆зведетъ ихъ по пꙋтѝ.
и҆ стол̑҇пъ ѻ҆́гненыи въ но́щи, да ска́жетъ и҆мъ пꙋть по не́мꙋже и҆до́ша·

И҆ дх҃ъ твой бл҃гыи да́лъ е҆си и҆же наѹ҆читъ их̑, и҆ ма́ннꙋ твою не ѻ҆скꙋдѣлъ е҆си ѿ ѹ́стъ и҆хъ.
и҆ во́дꙋ да́лъ е҆си и҆мъ во жа́ждꙋ и҆хъ·

Четы́ридесѧ́ть лѣтъ препита́лъ е҆си и҆хъ въ пꙋсты́ни, ничто́же и҆мъ ѻ҆скꙋдѣ, ѻ҆дѣа́нїѧ их̑ не състарѣшасѧ.
и҆ сапо́ги их̑ не разрд̑ашасѧ·

И҆ да́лъ е҆си им̑ црс̑҇тва и҆ люди и҆ преча́сти и҆мъ по жре́бїю.
и҆ въздръжаше зе́млю сїѻ́ню.
и҆ зе́млю цр҃ѧ е҆сево́нѧ.
и҆ зе́млю і҆ѻ́га цр҃ѧ савана и҆ ѹ҆мно́жилъ е҆си сн҃ы их̑ ꙗ҆ко ѕвѣзды нбс̑҇ныѧ·

І҆ и҆звелъ е҆си и҆хъ въ зе́мли ѻ҆ ни́х же гл҃алъ е҆си ѿц҃емъ и҆хъ и҆ наслѣ́диша ю҆̀.
и҆ смири́лъ е҆си пре ни́ми ѻ҆бита́ющїи зе́млю ханане́и, и҆ дал꙽ е҆си их̑ въ рꙋ́кꙋ их̑.
и҆ цр҃и и҆хъ и҆ лю́ди зе́мли да сътво́рѧтъ им̑ ꙗ҆́ко ѹ҆год̑но тѣмъ·

И҆ прїѧ́ша гра́ды высо́кїѧ и҆ въздръжа́ша до́мы по́лны всѣхъ бл҃гихъ, и҆ во́ды ѻ҆гра́жены ка́менїем̑, и҆ виногра́ды и҆ масли́ны.
и҆ всѧ́ко дре́во снд̑ѣно въ мно́жество·

И҆ ꙗ҆до́ша и҆ насыти́шасѧ и҆ ѹ҆тол꙽стѣша и҆ разширѣшасѧ въ бл҃гости се́й вели́цѣи.
і҆ и҆змѣни́шасѧ и҆ ѿстꙋпи́ша ѿ тебѐ и҆ повръго́ша зако́нъ твой за́ди пло́ти и҆х꙽.
и҆ про̑҇рки твоа̀ и҆зби́ша, и҆же засвѣдѣтельствовахꙋ и҆мъ да ѻ҆братѧ́тсѧ к тебѣ̀·

И сътвори́ша же хꙋ́лы вели́ки.
и҆ далъ е҆си и҆хъ в рꙋ́кꙋ ѻ҆скорблѧ́ющих꙽, и҆ ѻ҆зло́биша и҆хъ.
и҆ въ вре́мѧ печа́ли свое́ѧ възопи́ша к тебѣ̀, и҆ т̂ы съ нб҃си ѹ҆слы́шалъ е҆си и҆ по щедрота́мъ твои҆мъ мно́гимъ.
далъ е҆си и҆мъ сп҃сенїе и҆же сп҃се и҆хъ ѿ рꙋкъ вра́гъ их̑·

И҆ е҆гда̀ покои́шасѧ ѻ҆бращени сꙋть, да сътво́рѧтъ лꙋкаво пред̑ тобо́ю·

И҆ ѻ҆ста̂вилъ е҆си их̑ в рꙋка́хъ вра́гъ и҆хъ и҆ нача́льствова́ша и҆́ми.
и҆ па́ки ѻ҆брати́шасѧ, и҆ возопи́ша к тебѣ̀·

Ты́ же ѿ нб҃се послꙋшалъ е҆си і҆ и҆зба́вилъ е҆си и҆хъ въ щедрота́хъ твои҆хъ мно́ѕѣхъ, и҆ свѣдѣтельствовалъ е҆си и҆мъ.
да ѻ҆братѧ́тсѧ къ зако́нꙋ твое҆мꙋ.
ѻ҆ниж̑ възгордѣша и҆ не ѹ҆слы́шаша·

Но въ повеленїи твое҆мъ и҆ въ сꙋдъбахъ твои҆хъ съгрѣшиша.
и҆же сътворит̑ чл҃къ и҆ живетъ в них̑.
и҆ даша пле́щи е҆же не послꙋшати, и҆ вы́ю свою̀ ѻ҆жесточи́ша и҆ не слы́шаша·

И҆ продолжил̑҇ на ни́хъ лѣта мно́га, и҆ свѣдѣтельствовалъ е҆си и҆мъ съ дх҃омъ твоим̑.
и҆ про̑҇рчьствъ про̑҇ркъ твоих̑ не внѧ́ша·

И҆ предалъ е҆си ихъ в꙽ рꙋ́кꙋ лю́дем̑ земъскимъ.
въ млс̑҇рдїих же твоих̑ мно́ѕх̑ѣ не сътвори́лъ е҆си, въ сконча́нїе.
н̂и ѻ҆ста́вил̑҇ е҆си их̑ ꙗ҆́ко б҃ъ ꙗ҆ко силенъ млс̑҇тив̑҇ ще́дръ защитель е҆си т̂ы·

И҆ нн҃ѣ б҃е на́шъ вели́кїи дръжа́вныи и҆ стра́шныи.
стрегꙋщїи завѣт꙽, и҆ млс̑҇ти не ѿврати лица̀ твое҆го·

Всѧ́каго трꙋ́да и҆же ѻ҆брѣлъ нас̑҇ и҆ цр҃и на́ша и҆ нача́лницы на́ши и҆ сщ҃ен̑҇ницы на́ши и҆ про̑҇рци наша.
и҆ ѿц҃ы на́ша, и҆ вс̂и лю́дїе твоѝ.
ѿ дн҃и цр҃евъ а҆с꙽сꙋ́ръ даж̑ на́ дн҃ь то́й·

И҆ т̂ы пра́въ е҆си во всх̑ѣ и҆же прїидо́ша на на́съ и҆ ꙗ҆́ко и҆́стин꙽ною сътвори́лъ е҆си на́мъ·

Мы́ же нечести́во съдѣлахомъ.
и҆ цр҃и на́ша, и҆ нача́лницы наша, и҆ сщ҃е́нницы на́ша.
и҆ ѿц҃ы на́ша не сътвори́ша зако́на твое҆го, и҆ не в꙽нима́ша повеле́нїи твоих̑.
и҆ свѣдѣтельства твое҆го и҆же свѣдѣтельствовалъ е҆си в них̑·

И҆ тїи въ црс̑҇твїи твое҆мъ бл҃гомъ.
и въ бл҃гости твое́и мно́ѕѣ ꙗ҆́же далъ е҆си и҆мъ.
и҆ в зе́млѝ ширѣ́ишеи и҆ тꙋчнои и҆же далъ е҆си пред̑ ними не послꙋжи́ша тебѣ.
и҆ не ѻ҆брати́шасѧ ѿ начина́нїи свои҆хъ стропти́вых̑·

Се м̂ы днс̑҇ь рабѝ е҆смы и҆ зе́млю ю҆́же далъ е҆си ѿц҃емъ на́шимъ ꙗ҆́сти плод̑ еѧ̀ цр҃емъ.
и҆хже да́лъ е҆си намъ за грѣхи на́ша, и҆ пло́тьми на́шими да владычествꙋю́тъ.
и҆ въ скотехъ на́шихъ е҆ли́ко ѹ҆год̑но тво́рѧтъ, и҆ въ печа́ли вели́цѣ е҆смы̀·

Над̑ всѣми си́ми м̂ы са́ми, полага́емъ вѣрꙋ и҆ пи́шемъ, и҆ печата́ютъ вс̂и нача́лницы на́ша.
и҆ левѷти на́ша и҆ сщ҃е́ннцы на́ша·

Глв̑҇а, і҃·

И ѹ҆ знамена́телех꙽ же бы́ша сїѝ.
нее҆мїѧ, артасаста сн҃ъ а҆халїевъ, и҆ седекїѧ сн҃ъ а҆́раїѧ.
а҆зарїѧ, и҆ е҆ремїѧ, фасꙋръ, а҆марїа, мел̑҇хїѧ, а҆т꙽ти́съ, саванїѧ, маллх̑ꙋ, і а҆рамъ, мерамꙋ́ѳъ, а҆вдїѧ, данїиль, ганаѳонъ, варꙋхъ, месꙋл꙽ламъ, а҆вїѧ.
мїаминь, маа҆зїѧ, мелга̀, самаїѧ.
сїѝ сщ҃е́нницы·

Па́ки же левѷти, і҆сꙋсъ сн҃ъ а҆зарїѧ ваван̑҇нꙋ.
и҆ ѿ сн҃въ надад̑, кад̑мигель.
и҆ бра́тїа е҆го сафа́нїа, ѻ҆дꙋїа калитан̑҇ ѳалїа а҆нанъ, миха роѻд̑, а҆севїѧ, какхоръ, саравїѧ, севанїѧ, ѻ҆дїѧ·

Сн҃ове а҆ва́ни.
венꙋнїевы, началники людїи, форо́съ, фаа҆ѳмоа́въ, и҆ламъ, заѳꙋїѧ·

Сн҃ы ван꙽нїи, а҆зга̑ веваи, а҆а҆нїѧ, ваг꙽го́ѧ, и҆дин атиръ.
е҆зекїѧ, а҆зꙋръ, ѻ҆дꙋвїѧ, и҆самъ, висїѧ, ри́ѳъ, анаѳо́ѳъ, новаи, меа҆хвисъ, месꙋламъ, и҆зи́ръ, месои, е҆ви́ль, садꙋ́къ.
и҆е҆ддꙋѧ́, фалтїѧ, ананїѧ, ѻ҆сїе, ананїѧ, а҆сꙋвъ, а҆до́и, фалаѧ́, совикъ раѹ́мъ, а҆е҆савана, масиа҆лъ, и҆ а҆гїѧ, е҆нанъ, и҆намъ, малꙋхъ, реѹ́мъ, ваа́на, и҆ про́чїи ѿ людїи·

Сщ҃е́нницы и҆ левѷти, и҆ две́рницы, и҆ пѣвцы наѳанне́и.
и҆ вс̂ѧ и҆же прихо́дитъ ѿ ꙗ҆зы́къ зе́м꙽скихъ къ зако́нꙋ бж҃їю же́ны и҆хъ, и҆ сн҃ове и҆хъ, и҆ дще́ри и҆хъ и҆ всѧ́къ вѣдѧи.
и҆ разꙋмѣѧ́и и҆ ѹ҆крѣплѧайсѧ на братїю свою.
и҆ проклинаѧ их̑.
и҆ внидо́ша въ клѧт̑вꙋ, и҆ в꙽ проклѧтїе е҆же ходити въ зако́нѣ бж҃їѝ, и҆же данъ е҆сть рꙋкою моѷсїѧ раба̀ бж҃їа·

да сътворѧтъ и҆ съзранѧт̑ вс̂ѧ повелѣнїѧ гн҃ѧ.
и҆ сꙋды е҆го е҆же не да́ти дще́реи на́шихъ лю́демъ зе́м꙽скимъ и҆ дщере́и и҆хъ не во́змемъ сн҃овомъ на́шимъ·

Лю́дїе же землѝ и҆же възно́сѧтъ вс̂ѧ продаа́нїѧ, и҆ вс̂ѧ на потребꙋ въ дн҃и сꙋбо́ты да прода́ют꙽ не въспрїимемъ ни́же кꙋ́пимъ ѿ них̑ в сꙋбо́ты н̂и въ дн҃ь ст҃ыи·

И҆ ѻ҆ста́вимъ лѣто сед̑мое.
и҆ дѣа́нїе всѣхъ рꙋкъ ѻ҆ста́вимъ, и҆ поста́вим̑ межи на́ми даа́ти на́мъ тре́тїѧ ча́сть дидра́гмы на лѣто на дѣ́ло до́мꙋ б҃а на́шего.
въ хлѣбы пред̑ставле́нїѧ, и҆ въ жертвы повсѧ̀дне́вныѧ, и҆ всѐсож̑женїе при́сное·

Сꙋбо́тъ но́вомѣсечных̑ въ пра́зницѣхъ и҆ въ ст҃аѧ ꙗ҆́же за грѣхъ да помолѧт̑сѧ за і҆и҆л҃ѧ, и҆ во все подобїе до́мꙋ б҃а на́шего, и҆ жре́бїи посла́хомъ на приноше́нїе древесъ междꙋ сщ҃енникъ и҆ левѷтъ и҆ лю́дїи, и҆ да възно́сѧтъ в до́мъ б҃а на́шего.
по до́мѣхъ ѿц҃ъ на́шихъ ѿ вре́мени по времени, ѿ лѣта до лѣта сожега́ти на ѻ҆́лтари г҃а б҃а на́шего.
ꙗ҆́ко пи́сано е҆сть въ зако́нѣ·

И҆ да прино́симъ прьвород̑ное землѝ на́шеѧ.
и҆ пр́ьвыхъ всѣхъ плод̑ всѧкаго дре́ва, ѿ лѣта до лѣта.
въ до́мъ гн҃ь и҆ прьвенци сн҃овъ на́шихъ и҆ ско́тъ на́ших̑ ꙗ҆́ко пи́сано е҆сть в зако́нѣ·

И҆ пр́ьвых̑ волъ на́шихъ, и҆ пр́ьвыхъ ѻ҆вчатъ на́шихъ приноси́ти въ до́мъ б҃а на́шего сщ҃е́нникомъ, и҆же слꙋжатъ въ домꙋ̀ б҃а нашего.
и҆ прь́вы̑ пи́щъ наших̑, и҆ плод̑ всѧ́каго дре́ва, і҆ е҆ле́ю да прино́симъ сщ҃е́нникомъ въ съкро́вище до́мꙋ б҃ꙋ нашемꙋ.
и҆ десѧти́нꙋ землѝ нашеѧ левѷтомъ·

Тїѝ левѷти десѧти́нꙋ прїемлютъ во всх̑ѣ гра́дѣхъ дѣлъ нашихъ·

Бꙋдет̑ же сщ҃е́нникъ сн҃ъ а҆а҆ро́новъ, съ левѷты въ десѧти́нахъ левѷтомъ.
и҆ левѷти приносѧтъ десѧтꙋю ча́сть, десѧти́ны свое́ѧ в до́мъ б҃а нашего, въ до́мъ съкро́вищныи б҃а нашего.
ꙗ҆́ко въ съкро́вища принест̑ꙋ сн҃ы і҆и҆л҃евы.
и҆ сн҃ове левѷтъстїи пр́ьвины, п꙽шени́цы и҆ вина̀ і҆ е҆ле́а·

И҆ т̂ꙋ бꙋдт̑ꙋ сосꙋ́ди гн҃и, и҆ сщ҃е́нницы и҆ пѣвцы и҆ дверни́цы.
и҆ не ѻ҆ста́вимъ до́мꙋ б҃а на́шего·

Глв̑҇а, а҃і·

Ýбита́ша же нача́лници людїи въ і҆ерс̑҇ли́мѣ, и҆ прочїѝ наро́ди посла́ша жребїи.
да во́змꙋтъ е҆ді́нꙋ часть ѿ десѧтѝ.
да пребыва́етъ въ і҆ерс̑҇ли́мѣ гра́дѣ ст҃ѣмъ, и҆ де́вѧть частїи въ́ градх̑ѣ·

Блс̑҇виша же лю́дїе всѣхъ мꙋж́їи и҆же себѣ̀ во́лею возда́ша.
да ѻ҆бита́ютъ въ і҆ерс̑҇ли́мѣ·

Сїи б̂о сꙋть нача́лницы вла́сти и҆же ѻ҆бита́ша въ і҆ерс̑҇ли́мѣ.
и҆ въ гра́дѣ і҆ѹ́довѣ·

Ѡ҆бита́ же е҆ді́нъ ко́ждо въ дръжа́вѣ свое́и, и҆ въ гра́дѣхъ і҆и҆л҃ѧ.
сщ҃ен꙽ницы левѷти цр҃ковнїи слꙋ́ги, и҆ сн҃ове рабъ соло́моновыхъ·

И҆ въ і҆ерс̑҇ли́мѣ ѻ҆бита́ша ѿ сн҃овъ і҆ѹ́довых̑, и҆ сн҃ов꙽ венїаминь·

ѿ сн҃ов же і҆ѹ́довых̑ а҆ѳе́ей сн҃ъ а҆зїинъ, сн҃ъ захарїинъ, сн҃ъ самирїи, сн҃ъ сафатїевъ.
сн҃ъ масеи́ль·

ѿ сн҃въ фаресъ, и҆ малїа сн҃ъ варꙋховъ, сн҃ъ хала́за.
сн҃ъ ѻ҆зїѧ.
сн҃ъ а҆даїѧ.
сн҃ъ і҆ѻ҆а҆ри́мов̑҇.
сн҃ъ заха́рїевъ.
сн҃ъ силонїевъ·

Вс̂и сн҃ове фаре́совы, и҆же ѻ҆бита́ша въ і҆ерс̑҇ли́мѣ.
у҃, ѯ҃, мꙋ́жи крѣпки·

Си́же сꙋть сн҃ове венїамини.
сел꙽лон̑҇ сн҃ъ месꙋла́евъ.
сн҃ъ и҆ѻ҆а́дъ.
сн҃ъ вадаїѧ.
сн҃ъ колїѧ.
сн҃ъ масїевъ.
сн҃ъ е҆ѳїель.
сн҃ъ і҆ѻ҆саїѧ·

И҆ по нем̑ е҆ваи́ль, сел꙽ла́и, ц҃, к҃и.
і҆ и҆ѻ҆ве́ль сн҃ъ зе́хри пред̑ста́тель над̑ ни́ми і҆ѹ́да, сн҃ъ а҆сана́евъ, ѿ гра́да вто́раг̑҇ и҆ ѿ сщ҃е́нникъ.
и҆ а҆дїѧ сн҃ъ и҆ѻ҆а҆ри́мов̑҇ ꙗ҆хи́нь, саре́ѧ сн҃ъ е҆л꙽хина.
сн҃ъ месꙋла́мовъ.
сн҃ъ садо́ковъ.
сн҃ъ марїѻ́ѳъ.
сн҃ъ е҆то́въ, преди до́мꙋ бж҃їю·

И҆ братїа их̑ дѣ́лающи дѣло цр҃квї и҃ сот̑, к҃в.
и а҆даїѧ сн҃ъ е҆роа́ма, сн҃а валалїина.
сн҃а нама́сова·

Сн҃ы заха́рїины.
сн҃ъ васеѳꙋровъ.
сн҃ъ мельхїѧ и҆ бра́тїа е҆го нача́лници ѿц҃ем̑, с҃, м҃в·

И҆ месе́и сн҃ъ е҆зрїевъ.
сн҃а месарими́ѳова.
сн҃а е҆м꙽ме́рѧ и҆ бра́тїѧ и҆хъ си́лны ѕѣло, рк҃и·

И҆ пред̑ста́тель их̑ сокрїиль сн҃ъ си́лныхъ, и҆ ѿ левѷтъ, саме́ѧ сн҃ъ ѻ҆сꙋвовъ.
сн҃ъ е҆зрїевъ.
и҆ маѳанїа сн҃ъ михаев̑҇.
і҆ и҆ѻ҆вид̑ сн҃ъ самꙋи҆е҆въ, сп҃д.
и҆ дверъницы, а҆к꙽кꙋвъ теламинъ, и҆ бра́тїѧ и҆хъ и҆же стрежахꙋ врат̑, рѻ҃в·

ѿ нача́лникъ левѷтъскихъ сн҃ъ ванїевъ.
и҆ сн҃ъ ѻ҆зїевъ.
сн҃ъ а҆вїевъ.
сн҃ъ миха́евъ.
и҆ ѿ сн҃овъ а҆са́фовых̑, пою́щих̑ пред̑ дѣломъ до́мꙋ бж҃їѧ.
ꙗ҆́ко заповд̑ѣ цр҃ьска б̂ѣ на них̑, и҆ фаѳаїа.
сн҃ъ васиза̀ до рꙋкѝ цр҃евы всѧ́коѧ рад̑и̑ потребы людїи.
и҆ къ дворомъ и҆же сꙋть на селехъ их̑·

и҆ ѿ сн҃овъ і҆ѹ́диных̑ и҆же ѻ҆бита́ша в корїаѳарѣвоцѣ и҆ в осꙋе́, и҆ въ вирсавїѝ.
и҆ дво́ры их̑, лахи́съ и҆ се́ла их̑.
и҆ пребыва́ше ѹ҆ вер꙽савы·

Сн҃ове же венїами́ни ѿ гавада махама́съ, ѹ҆модѣ́лныи, и҆ ѿ левѵт̑ ча́сти і҆ѹ҆де́и и҆ венїамини·

Глв̑҇а, в҃і·

Сїи же сꙋть сщ҃енницы и҆ левѷти и҆же въсходѧ́щїи съ зороваве́лемъ сн҃омъ салаѳїи́левымъ.
і҆ и҆сꙋсара́и, и҆е҆ремїѧ, е҆́здра, а҆марїѧ мꙋл꙽лꙋ́хъ, сел꙽хе́нїа.
тїи началницы сщ҃енникомъ и҆ бра́тїѧ и҆хъ въ дн҃и и҆сꙋ́а и҆ левѷти же і҆и҆сꙋѧ, ванꙋ́и, кадмїи́ль, саравїа, и҆ѻ҆да́и, маѳ꙽ѳа́нїѧ, при рꙋка́хъ и҆хъ, и҆ бра́тїѧ и҆хъ, въ повседн҃евномъ слꙋже́нїи·

И҆е҆сꙋ́ѧ же родѝ и҆ѻ҆а҆ки́ма, и҆ѻ҆а҆ки́мъ родѝ, е҆лиа҆сива, е҆лиа҆си́въ родѝ и҆ѻ҆а҆да́ѧ.
и҆ѻ҆а҆да́и родѝ и҆ѻ҆наѳа́на, і҆ и҆ѻ҆наѳа́нъ родѝ а҆ддꙋѧ.

Въ дн҃и же и҆ѻ҆а҆ки́ма бра́тїа е҆го бѧ́хꙋ сщ҃ен꙽ницы и҆ нача́лницы ѻ҆би́телем̑, сара́їѧ, маа҆рїа, і҆е҆ремїа, а҆нанїа, е҆́здра, месола́мъ, а҆марїѧ, и҆ѻ҆нъна́мъ, а҆малꙋхъ, и҆ѻ҆наѳа́нъ, сел꙽хенїѧ, и҆ѻ́сифъ, а҆ра́и, мана́съ, марїѻ́ѳъ, е҆л꙽ке́и, а҆дада́и, и҆ заха́рїа, ганаѳо́ѳъ, месола́мъ, а҆вїа, зехри́мъ, венїами́нъ, керо́съ, е҆фелетїе҆въ, валга́съ, мамꙋ́и, семенїа, и҆ѻ҆а҆наѳан̑҇, и҆а҆рим̑, маѳана́и е҆дїѻ, ѻ҆́з꙽зи, села́їѧ, кал꙽ла́їа, кавеѳъ, е҆лкїа, а҆савїа, и҆ѻ҆наѳан̑҇, сае҆лъ·

Левѷти въ дн҃и е҆лїаси́ва, и҆ѻ҆а́да, иѻ҆на́нъ, и҆дꙋѧ.
пи́саны началницы ѻ҆би́телем꙽.
и҆ сщ҃енницы въ црс̑҇тво да́рїѧ пе́рьскаго.
и҆ сн҃ове левѷи нача́лницы ѻ҆би́телемъ пи́сани въ кни́ѕѣ слове́съ дн҃їи.
и҆ да́же до дн҃и и҆ѻ҆на́нъ сн҃а е҆лїа҆си́въ.
и҆ нача́лницы левѷтомъ.
а҆равїѧ, и҆ саравїѧ, и҆ ѻ҆сꙋ́и.
и҆ сн҃ы кад̑ми́ловы, и҆ бра́тїѧ их̑ по кра́тѣхъ свои҆хъ да въсхва́лѧтъ и҆сповѣдѧтъ по за́повѣди двд҃вѣ мꙋж́а бж҃їѧ, въздержа́тъ ра́вно по чинꙋ̀, ѿ дн҃и до дн҃и·

И҆ вънегда̀ събра́ти м̂и две́рники.
въ дн҃и и҆а҆ки́ма сн҃а и҆е҆сꙋева.
сн҃а и҆ѻ҆седе́кова, и҆ въ дн҃и нее҆мїе҆вы, и҆ е́здры сщ҃ен꙽ника и҆ писъца̀.
и҆ въ ѻ҆бновле́нїи стѣны̀ і҆ерс̑҇лимъски.
и҆ взыска́ша левѷти ѿ всѣхъ мѣ́стъ свои҆хъ, да възведꙋтъ и҆хъ въ і҆ерс̑҇лимъ.
и҆ сътво́рѧт̑ ѻ҆бновленїе и҆ весе́лїе, в дѣѧ́нїе и҆ хвале́нїе пѣсни, и҆ в кимъва́ли и҆ свирили и҆ гꙋсли.
и҆ събра́ни же сꙋть сн҃ове пѣснемъ, и҆ ѿ градъ ѻ҆́крс̑҇тъі҆ерс̑҇лима и҆ ѿ се́лъ нетꙋѳа́та и҆ ѿ до́мꙋ галга́лъ и҆ ѿ страны̀ е҆ва̀ и҆ а҆змавет̑.
ꙗ҆́ко се́ла съзида́хꙋ себѣ̀ пѣвцы̀ ѻ҆́крс̑҇тъ і҆ерс̑҇лима и҆ ѻ҆чищени сꙋть сщ҃ен̑҇ницы и҆ левѷти.
и҆ ѻ҆чисти́ша лю́ди и҆ вра́та и҆ стѣ́ны въсходи́ти же сътвори́лъ нача́лницы і҆ѹ́дины на стѣ́ны, и҆ поста́вихъ два кли́роса хвалы̀ ра́ди вели́кїѧ.
и҆ проидо́ша на десно на стѣнꙋ̀ къ вра́том̑ грѧ́знымъ.
і҆ и҆до́ша за ни́ми ѻ҆ѳа́їа и҆ полови́на ча́сти нача́лникъ і҆ѹ́диныхъ и҆ а҆за́рїа, и҆ е́здра и҆ мисолла́мъ і҆ѹ́да.
и҆ венїами́нъ, и҆ самела́їа, і҆е҆ремїѧ·

И҆ ѿ сн҃овъ сщ҃енникъ въ трꙋба́хъ.
заха́рїа сн҃ъ и҆ѻ҆наѳа́нов̑҇.
сн҃ъ сама́їѧ, сн҃ъ маѳа́нїѧ, сн҃ъ миха́їѧ, сн҃ъ зам꙽хꙋръ, сн҃ъ а҆са́фовъ, и҆ бра́тїа е҆го сама́їа и҆ ѻ҆зїил̑҇.
и҆ гело́нъ, и҆а҆ма́їѧ, наѳанаи́ль, і҆ѹ́да, и҆ а҆на́ни·

Є҆же хвали́ти въ пѣ́снехъ дв҃да мꙋ́жа бж҃їа·

И҆ е́здра пи́сецъ пред̑ ни́ми на вра́тх̑ѣ хвали́ти проти́въ и҆хъ, и҆ възошлѝ на стꙋпни гра́да двд҃ва на въсхо́дъ стѣны̀ на дом̑ двд҃въ.
и҆ да́же до вра́тъ во́дныхъ, къ въсто́кꙋ.
и҆ клиросъ вторы́и хвалꙋ̀ възда́ющи и҆дѧше ѿ сꙋпротивъ и҆хъ·

И҆ а́зъ по не́мъ и҆ полови́нꙋ ча́сти людїи по стѣнѣ̀, и҆ на столпѣ̀ ѹ҆ри́мли.
и҆ да́же до стѣны̀ пространнѣ́иши, и҆ на вра́тѣхъ е҆фраи́ма.
и҆ на вра́тѣхъ стары́хъ, и҆ на вра́тх̑ѣ ры́бных꙽.
и сто́лпъ анамеи́лѧ, и҆ ѿ сто́лпъ е҆ма́ѳъ и҆ да́же до вра́тъ стад̑ныхъ.
и҆ поста́виша въ вра́тѣхъ стра́жїи·

Ста́ша же дв̂а кли́роса хвалѧ́ще в домꙋ̀ бж҃їи, и҆ а́зъ и҆ по́лъ ча́сти, во́и съ мно́ю·

И҆ сщ҃енницы е҆лїаки́мъ, маа҆сїѧ, венїами́нъ, махе́ѧ, е҆лиѻ҆на, и҆ заха́рїа, и҆ а҆нанїѧ, и҆ семе́їѧ, и҆ е҆леа҆за́ръ, и҆ ѻ҆зїа и҆ ѻ҆а҆нна́нъ, и҆ мелхїѧ, и҆ е҆ламїи, и҆ е҆зꙋръ·

И҆ слы́шаша пѣвцы̀ и҆ е҆зра́и҆ѧ.
и҆ съглѧда́ша и҆ въжделѣша и҆ пожро́ша въ дн҃ь то́и, же́ртвы вели́кїи, и҆ възвесели́шасѧ.
ꙗ҆́ко б҃ъ б̂о възвесели́лъ и҆хъ весе́лїемъ вели́ким̑.
н̂о и҆ же́ны и҆хъ и ча́да их̑ ра́довахꙋсѧ.
и҆ слы́шано бы́сть весе́лїе т̂о въ і҆ерс̑҇лмѣ дале́че·

Въсчита́ша же въ дн҃ь то́и мꙋж́и над̑ сокро́вищемъ до́мꙋ гн҃ѧ.
нача́лныхъ пло́довъ, и҆ къ десѧти́нам̑.
да внꙋтръ вно́сѧтъ по ни́хъ нача́лницы град̑ски бл҃годѣѧ́нїи.
сщ҃енником̑ и҆ левѷтом̑.
ꙗ҆́ко весе́лїе б̂ѣ въ і҆ерс̑҇лимѣ и҆ въ і҆ѹ҆де́и.
въ сщ҃енницѣхъ и҆ въ левѷтѣхъ пред̑стоѧщи·

И съхрани́ша въздръжа́нїе б҃ꙋ свое҆мꙋ, и҆ въздержа́ша ѻ҆чище́нїѧ и҆ пѣвцовъ, и҆ две́рниковъ, по повеле́нїю дв҃да и҆ соло́мона сн҃а е҆го·

И҆ ꙗ҆́ко въ дн҃и двд҃вы и҆ѻ҆а҆сафа́тъ ѿ нача́ла бѧ́хꙋ поста́влени пѣвцемъ старѣишины, въ пѣсни хвалѧ́щи и҆сповѣдꙋ́ющи б҃ꙋ·

И҆ весь і҆и҆л҃ь въ дн҃и зорова́велѧ и҆ въ дн҃и нее҆мїѧ даѧ́хꙋ ча́сти пѣвцем̑ и҆ две́рникомъ ѿ дн҃и до дн҃и бра́шно.
и҆ ст҃ѧхꙋ левѷти.
и҆ левѵти ст҃ѧхꙋ сн҃овъ а҆аро́новыхъ·

Глв̑҇а, г҃і·

Въ дн҃ь же то́и чте́но е҆сть въ кни́ѕѣ моѷсїѻвѣ, слы́шащимъ лю́дем꙽.
ѻ҆брѣте́но е҆сть пи́сано в не́и да не и҆́мт̑ꙋ влѣсти а҆мони́ти, и҆ моа҆ви́ти въ цр҃ковь бж҃їю даже до́ вѣка.
того ради и҆же не въстрѣтоша сн҃въ і҆и҆л҃евъ съ хлѣбомъ и҆ водо́ю·

І҆ и҆зведо́ша на нихъ валаа́ма на проклѧ́тїе и҆хъ, и҆ ѻ҆брати́лъ б҃ъ нашъ проклѧт̑ство на блс̑҇венїе·

И҆ бы́ст же е҆гда̀ слы́шахꙋ зако́нъ, ѿлꙋчи́ша всѣхъ чꙋжихъ ѿ і҆и҆л҃ѧ.
и҆ на то́мъ бы́сть и҆лїаси́въ сщ҃енникъ.
и҆же бы́сть пред̑ста́тель въ сокро́вищномъ домꙋ̀ б҃а нашего.
и҆ прїѧтель, товїѧ, сътворѝ себѣ сокро́вище вели́ко.
и҆ т̂ꙋ бѧ́хꙋ пред̑ нимъ предъставлѧ́ющи да́ры и҆ ѳемїа́мъ и҆ сосꙋды и҆ десѧти́нꙋ, пшени́цꙋ вино̀ і҆ еле́и.
ча́сти левѷтомъ и҆ пѣвцемъ и҆ вѣрным̑ и҆ прь́выѧ сщ҃ен꙽ническїѧ ча́сти, въ всѣх же тѣхъ не бы́хъ въ і҆ерс̑҇лимѣ ꙗ҆́ко въ лѣто трисо́тное, к҃ е, а҆ртаѯе́рска цр҃ѧ вавѷлон꙽ска, прїидо́хъ къ цр҃ю, и҆ въ конецъ дн҃їи моли́хсѧ цр҃ю·

И҆ прїидо́хъ въ і҆ерс̑҇лимъ и҆ разꙋмѣхъ ѕл̂о чт̂о сътвори́лъ е҆лїаси́въ товїи, да сътво́рѧт̑ е҆мꙋ сокровище въ притво́рѣ до́мꙋ бж҃їѧ.
и҆ ѕло̀ ми ви́дѣлосѧ ѕѣло·

І҆ и҆зве́ргъ вс̂ѧ сосꙋды до́мꙋ товїева во́нъ ѿ сокро́вища̑ и҆ реко́хъ и҆ ѻ҆чи́стиша сокро́вище·

И҆ па́ки поста́вихъ сосꙋды въ домꙋ̀ бж҃їи, жрътвꙋ и҆ ѳимїа́мъ, и҆ позна́хъ ꙗ҆́ко ча́сти левѵт̑скїѧ не бы́ша да́ны·

И҆ побѣго́ша е҆ді́нъ къж́до въ странꙋ̀ свою левѷты и҆ пѣвцы̀ творѧ́ще дѣло и҆хъ.
и҆ котора́хꙋсѧ съ страти́гами, и҆ реко́хъ чесо ради ѻ҆стависѧ дом̑ бж҃їи, и҆ събра́лъ и҆хъ·

И҆ повелѣвъ ста́ти въ стоѧ́нїи своих̑ и весь і҆ѹ́да приноша́ше десѧти́нꙋ, пшени́цы и҆ вина̀ и҆ е҆ле́ѧ въ закро́вы, под̑ рꙋкꙋ селемїѧ сщ҃ен꙽ника, и҆ садо́ка писца̀, и҆ фада́їѧ ѿ левѷтъ, и҆ в рꙋки и҆хъ·

А҆на́нъ сн҃ъ захꙋровъ, сн҃ъ маѳа́нїевъ, ꙗ҆ко вѣрны и҆скꙋшени сꙋть надъ ни́ми на ча́сти бра́тїи своих̑·

Въспомѧнѝ м̂ѧ бж҃е мой того ради и҆ да не ѻ҆скꙋдѣет̑ млс̑҇ть моѧ̀ ꙗ҆́же сътвори́хъ в домꙋ б҃ꙋ мое҆мꙋ и҆ в чи́нѣхъ е҆го·

Въ дн҃ехъ тѣхъ ви́дѣхъ въ і҆ѹ́дѣ млатѧ́щих̑ лны̀ въ сꙋбо́тꙋ.
носѧ́щихъ кро́шницы.
и҆ напрата́ющи на ѻ҆слѧ́та вино, и҆ гро́здїе, и҆ смо́кви, и҆ всѧ́ко бре́мѧ приноша́хꙋ въ і҆ерс̑҇лимъ, въ дн҃и сꙋботныи·

И҆ свѣдѣтельствова́хъ и҆мъ да въ дн҃ь которыи прода́ти подоба́етъ да продаю́тъ.
и҆ тѷрѧ́не ѻ҆бита́ша в неи възносѧ́щи ры́бы и҆ вс̂ѧ прода́ннаѧ, и҆ продавахꙋ в сꙋбо́ты.
сн҃овомъ і҆ѹ́диным̑ въ іерс̑҇лі́ме и҆ ѻ҆бличѝ держа́внѣиших̑ въ і҆ѹ҆деѝ и҆ рѣхъ и҆мъ·

Чт̂о сїѧ ве́щь ѕла̀ и҆же в̂ы творитѐ.
и҆ сквернитѐ дн҃ь сꙋбо́тныи, нѝ л̂и сїѧ сътвори́ша ѿц҃ы наши.
і҆ и҆зве́лъ б҃ъ на́шъ на ни́хъ и҆ на нас̑҇ всѐ ѕл̂о то̀, и҆ на гра́дъ се́и·

И҆ вы̀ приложи́сте ꙗ҆́рости на і҆и҆л҃ѧ сквернѧ́щи сꙋбо́тꙋ·

Бы́сть же е҆гда̀ поко́ишасѧ вра́та і҆ерс̑҇лі́м꙽скаѧ въ дн҃ь сꙋбо́тныи реко́хъ, и҆ запро́ша̑ двери.
и҆ повелѣлъ да не ѿврьза́ютъ и҆хъ даже по сꙋбо́тѣ, и҆ ѿ ѻ҆тро́къ мои҆хъ поста́вихъ на вра́тахъ да ни е҆ді́нъ вно́ситъ бре́мѧ въ дн҃ь сꙋбо́тныи·

И҆ ста́ша потре́бницы и҆ прода́ющи вс̂ѧ прода́н꙽наѧ внѣ̀ і҆е҆рс̑҇лима.
е҆дїнощи и҆ два́щи свѣдѣтел̑҇ствова́хъ и҆мъ, и҆ реко́хъ и҆мъ·

Чт̂о вы̀ пребыва́ете ѹ҆ стѣны̀, а҆́ще втори́цею т̂о сътворитѐ рꙋкꙋ послю̀ на ва́съ.
того̀ ради ѿ вре́мени того не прїидо́ша въ сꙋбо́тꙋ·

И҆ реко́х же левѷтом̑ и҆же бѧ́хꙋ ѻ҆чище́ни дабы̀ пришла̀ съхрани́ти вра́та и҆ ст҃ити дн҃ь сꙋбо́тныи, и҆ сего ради въспомѧнѝ м̂ѧ бж҃е, и҆ простѝ м̂и по мно́жествꙋ млс̑҇ти твое҆ѧ·

Но и҆ въ дн҃ехъ тѣхъ ви́дѣхъ і҆ѹ҆деи водѧ́щїи же́ны а҆зотїискїѧ а҆монитѧны и҆ моа҆вит̑скїѧ.
и҆ сн҃ове и҆хъ ѿ по́лꙋ ча́сти гл҃ахꙋ а҆зо́т꙽скимъ ꙗ҆́зы́комъ и҆ не ѹ҆мѣѧ́хꙋ гл҃ати і҆ѹ҆де́искїи·

И҆ запрети и҆мъ и҆ проклѧ̀, и҆ поразѝ ѿ ни́хъ мꙋжїи и҆ ѻ҆плеши́лъ терза́ющи и҆хъ.
и҆ клѧлъсѧ на́ б҃а да не дают̑ дщерїи свои҆хъ сн҃овомъ и҆хъ и҆ не прїемлютъ ѿ дще́рїи и҆хъ сн҃овомъ свои҆мъ·

Ни въ то́мъ л̂и ѻ҆бы́чаи съгреши́лъ соло́мон̑҇ цр҃ь і҆и҆л҃евъ.
і҆ и́стинно въ ꙗ҆зы́цехъ мно́ѕѣхъ не бы́сть цр҃ь подо́бенъ е҆мꙋ.
и҆ възлюбленъ б҃ꙋ свое҆мꙋ быс̑҇ и҆ поста́вилъ е҆го б҃ъ цр҃емъ над̑ всѣм꙽ і҆и҆л҃емъ, и҆ того б̂о и҆зведо́ша на грх̑ѣ же́ны чю́ждїи.
нѝ л̂и мы̀ непослш̑҇ꙋни сътворѧ́емъ ѕло̀ вели́ко, т̂о да престꙋпа́емъ ѿ б҃а на́шего, і҆ и҆зведем̑ же́ны и҆ноплеме́нничи ѿ сн҃ов же і҆ѻ҆да сн҃а и҆ельто́вова сщ҃енника вели́каго зѧ́тѧ санавалаина ѹ҆рони́тина е҆гоже ѿгони́лъ ѿ себѐ·

Въспомѧнѝ г҃и бж҃е мои противъ и҆хъ и҆же сквернѧ́тъ сщ҃енъство.
прави́ло же сщ҃ен꙽ническо и҆ левѷт꙽ско·

Сего рад̑и̑ ѻ҆чи́стилъ и҆хъ ѿ всѣхъ чю́ждихъ нечисто́тъ, и҆ поста́вихъ чи́ны сщ҃ен꙽никомъ и҆ левѷтомъ.
е҆ді́номꙋ ко́ждо слꙋжбꙋ е҆го, и҆ въ сложе́нїе древѧное.
въ временехъ поста́вленыхъ·

И҆ въ прьвѣ́иших̑ помѧнѝ м̂ѧ бж҃е мои въ бл҃го а҆ми́нь·

Коне́цъ кни́ѕе нее҆мїи·

И҆́мать в себѣ, глв̑҇а, г҃і·