ВТОРЫ́И КНИ́ГИ Є҆ЗДРЫ
ГЛАВА̀ А҃
И сътвори́лъ і҆ѻ҆сїѧ па́схꙋ въ і҆ерс̑҇ли́мѣ г҃ꙋ б҃ꙋ свое҆мꙋ.
и҆ пожрѣт꙽ па́схꙋ, д҃і дн҃ѧ лꙋнѣ̀, прь́ваго мс̑҇ца.
поставлѧ́ющи сщ҃ен꙽ники по слꙋже́нїю дн҃е кое҆гождо, и҆ в ри́зы ѻ҆дѣѧ́нны въ цр҃кви гн҃и·
И҆ рече левѷтом̑ сщ҃ен꙽нымъ рабо́мъ і҆и҆л҃евымъ, да ѻ҆ст҃ѧтъ себѐ гв҃и на воставле́нїе ст҃аго кїѻ́та гн҃ѧ, въ до́мъ и҆же созда́лъ соло́монъ сн҃ъ дв҃да цр҃ѧ, не бꙋдетъ б̂о вамъ взѧ́ти на ра́мена е҆го·
И҆ нн҃ѣ послꙋжи́те г҃ꙋ ва́шемꙋ и҆ слꙋжите ꙗ҆зы́кꙋ е҆го і҆и҆л҃ю, и҆ ѹ҆гото́ваитесѧ по се́лѣхъ и҆ колѣнехъ ва́ших꙽, по писа́нїю дв҃да цр҃ѧ і҆и҆л҃ва и҆ по вели́чествꙋ соло́мона сн҃а е҆го, и҆ ста́н꙽те вс̂и въ цр҃кви.
по ѹ҆ча́стїю кнѧѕїи ѿч҃ества ва́шего левѷтовъ и҆же стоѧ́тъ пред̑ бра́тїею ва́шею сн҃овъ і҆и҆л҃евъ.
по чинꙋ̀ пожрѣте па́схꙋ, и҆ жрътвꙋ ѹ҆гото́ваите бра́тїѧмъ ва́шимъ, и҆ сътвори́те па́схꙋ по за́повѣди гн҃и и҆же да́но е҆сть моѷсїю·
И҆ да́лъ и҆ѻ҆сїѧ на па́схꙋ въ наро́дъ и҆же ѻ҆брѣте́нъ е҆сть т̂ꙋ, а҆́гнъцовъ, и҆ ѻ́вновъ ҂л҃. те́лцовъ ҂г҃. сїѧ ѿ црс̑҇тва дана сꙋть, по ѻ҆бѣща́нїю людем̑ и҆ сщ҃енником̑ и҆ левѷтом̑, и҆ дадѐ хелкїѧ, и҆ заха́рїѧ, и҆ сїи́лъ приставницы жрътвы, жръцемъ на па́схꙋ·
ѻ҆ве́цъ число́мъ, ҂в҃, и҆ те́лцовъ, х҃, и҆ е҆хонїѧ, и҆ саме́їѧ наѳанаи́лъ, бра́тїѧ и҆ а҆савїѧ, и҆ ѻ҆хїель, и҆ѻ҆ра́мъ, ты́сѧщеи нача́лницы да́ша левѷтомъ на па́схꙋ, ѻ҆ве́цъ, ҂е҃, те́лцов, е҃ сот̑·
И҆ сїѧ е҆гда сътворѧ́хꙋ мꙋжествено.
ста́ша сщ҃енницы и҆ левѷти, и҆мѣю҆щи ѻ҆прѣсноки по колѣнахъ, и҆ по ча́сти кн҃ѕьствꙋ ѿц҃ь.
пред̑ людмѝ приноша́хꙋ г҃ꙋ.
по тѣхъ и҆же въ кни́ѕѣ моѷсїѻвѣ пи́сана сꙋть, тако и҆ ѹ́трени и҆спеќоша па́схꙋ ѻ҆гнемъ ꙗ҆́коже подоба́ше, и҆ приноше́нїе свари́ша въ коно́бѣхъ мѣдѧных̑.
и҆ в горнъцѣх꙽, съ бл҃говоле́нїемъ, и҆ принесо́ша всѣмъ и҆же бѧ́хꙋ ѿ наро́да·
И҆ по си́хъ ѹ҆готоваша себѣ̀ и҆ бра́тїамъ свои҆мъ сн҃овом̑ а҆аро́ним̑, і҆ере́и б̂о възноша́ющи бѧ́хꙋ тꙋ́чнаѧ до полꙋ́нощи.
а҆ левѵти наготоваша̑ себѣ, и҆ жерцемъ бра́тїѝ свое́и сн҃ом̑ а҆аро́ним̑.
пѣвцы́ же цр҃ковнїи бѧ́хꙋ по чинꙋ̀ и҆хъ по за́повѣди двд҃вѣ.
и҆ а҆са́ѳъ, и҆ заха́рїѧ, и҆ е҆д꙽динꙋмъ и҆же бѧ́хꙋ ѿ цр҃ѧ.
и҆ вра́тари по е҆ді́ныхъ две́рехъ, та́ко да не престꙋпа́етъ е҆ді́нъ ко́ждо свое́и слꙋжбы.
бра́тїѧ б̂о и҆хъ ѹ҆гото́ваше и҆ тм̑ѣ·
И҆ сконча́на бы́сть и҆же пристоѧхꙋ на ѻ҆сщ҃енїе гн҃е.
в то́и дн҃ь сътвори́ша па́схꙋ.
и҆ приноси́ти приноше́нїе на жръто́вникъ по за́повѣди цр҃ѧ и҆ѻ҆сїѧ·
И҆ сътвори́ша сн҃ове і҆и҆л҃ви и҆же ѻ҆брѣте́ни сꙋть въ вре́мѧ т̂о па́схꙋ.
и҆ дн҃ь пра́здникъ ѻ҆прѣсночныхъ по дн҃їи се́дмь.
и҆ нѣсть празно́вано па́схꙋ та́ко въ і҆и҆л҃и.
ѿ вре́мени само́ила про̑҇рка, и҆ всѣхъ цр҃еи і҆и҆л҃евъ, не празнова́ша таковы́е па́схи.
каковꙋ̀ сътвори́лъ и҆ѻ҆сїѧ и҆ сщ҃енницы, и҆ левѵти і҆ и҆ѹ҆де́ѧ и҆ весь і҆и҆л҃ь, и҆же ѻ҆брѣте́ни сꙋть въ постоѧ҆́нїихъ і҆ерс̑҇лимъскихъ·
Въ и҃і, лѣто црс̑҇твꙋ́ющꙋ и҆ѻ҆сїи празд̑нована бы́сть пасха сїѧ, и҆ ѹ҆пра́влена сꙋть дѣла и҆ѻ҆сїева пред̑ гм҃ъ е҆го въ срд̑цы по́лномъ бл҃гоче́стїѧ·
І҆ и҆же ѻ҆ нем꙽ вс̂ѧ пи́сана сꙋть въ прь́выхъ вре́менехъ ѻ҆ и҆хъ и҆же съгрѣшѝ и҆ безъчествова̀ проти́вꙋ г҃а на всѧ́къ ꙗ҆зык̑҇ и҆ црс̑҇тво, і҆ и́же ѻ҆скорбѣша е҆го въ разꙋмѣ·
И҆ словеса̀ гн҃ѧ въста́ша на і҆и҆л҃ѧ, и҆ по всемꙋ̀ дѣѧ́нїю семꙋ̀ и҆ѻ҆сїинꙋ·
Възы́иде фараѻ́нъ цр҃ь е҆гѷпет꙽скїи, грѧдꙋщи въ карка́мꙋ ѻ҆полча́ѧсѧ на е҆фра́тъ, і҆ и҆зы́иде на сꙋпроти́вїе томꙋ̀ и҆ѻ҆сїѧ.
и҆ посла̀ цр҃ь е҆гѵпет꙽скїи к немꙋ, гл҃ющи·
Чт̂о мнѣ̀ и҆ тебѣ е҆сть цр҃ю і҆ѹ́динъ нѣсмь посла́нъ ѿ г҃а да ѻ҆плъчꙋсѧ проти́вꙋ тебе, н̂о на е҆фра́тъ бра́нь моѧ е҆сть·
И҆ нн҃ѣ г҃ь со мно́ю е҆сть и҆ г҃ь поспѣша́ѧи м̂и е҆сть.
ѿстꙋпѝ ѿ менѐ, не съпротивлѧ́исѧ гв҃и, и҆ нѣсть ѻ҆браще́нъ и҆ѻ҆сїѧ на колесни́цꙋ е҆го, н̂о ѻ҆плъча́ти е҆го насилова́шесѧ.
не вне́млющи же сло́вꙋ і҆еремїа про̑҇рка ѿ ѹ́стъ гн҃ихъ·
Но поста́ви проти́вꙋ е҆го бра́нь на́ поли магед꙽до́ньстемъ, и҆ снидо́ша нача́лницы къ цр҃ю и҆ѻ҆сїю·
И҆ рече цр҃ь ѻ҆́троком꙽ свои҆мъ, и҆зведи́те м̂ѧ ѿ ѻ҆плъче́нїѧ.
и҆знемо́глъ б̂о е҆смь ѕѣло.
и҆ въско́рѣ и҆зне́мше е҆го ѻ҆́троки ѿ ѻ҆плъче́нїѧ.
и҆ възше́лъ на колесни́цꙋ вторꙋ́ю свою, и҆ прише́лъ въ і҆ерс̑҇лим꙽ и҆ животъ премѣнѝ·
И҆ погребе́нъ ѹ҆ ѿч҃а гро́ба, и҆ вс̂ѧ і҆ѹ҆де́ѧ тꙋжа́хꙋ и҆ рыда і҆е҆ремїѧ прро̑҇къ и҆ѻ҆сїѧ ра́ди.
и҆ пред̑сѣда́лники съ жена́ми их̑ пла́кахꙋ е҆го да́же до сего дн҃и·
И҆ да́но е҆сть т̂о бы́ти сътворе́но всегда̀ на ве́сь род̑ і҆и҆л҃евъ·
Сїѧ же спи́сана сꙋть въ кни́ѕѣ сло́въ црс̑҇твъ і҆ѹ́динъ.
и҆ по е҆ді́номꙋ ко́ждо сътворе́нїѧ и҆ дѣѧ́нїа и҆ѻ҆сїѧ и҆ е҆го словеса̀, и҆ ра́зꙋмъ е҆го въ зако́нѣ гн҃и.
и҆ всѧ́ка же сътворе́наѧ ѿ него і҆ и҆же и҆ до нн҃ѣ.
пи́сана ст̑ꙋ въ кни́ѕѣ црс̑҇тва і҆и҆л҃ѧ і҆ѹ́дина·
И҆ прїе́мши ѿ ро́да е҆хо́нїѧ сн҃а і҆ѻ҆сїи҆на.
и҆ поста́виша цр҃ѧ въ і҆ѻ҆сїѧ ѿц҃а е҆го мѣ́сто·
Сꙋща, въ л҃г, лѣта.
и҆ црс̑҇твова̀ над̑ і҆ѹ́дою, и҆ нд̑а і҆ерс̑҇лимом̑ мцс̑҇ы, г҃·
І҆ и҆зѧ́тъ е҆го цр҃ь е҆гѷпет꙽скїи да не црс̑҇твꙋетъ въ̀ і҆ерс̑҇лимѣ.
и҆ поста́ви наро́дꙋ і҆ѹ́динꙋ да даю́тъ да́нь, р҃, тала́нтъ сребра̀, і҆ е҆ді́нъ тала́нтъ зла́та·
И҆ поста́ви цр҃ь е҆гѷпет꙽скїи и҆ѻа҆ки́ма бра́та е҆го цр҃ѧ і҆ѹ́дѣ і҆ерс̑҇лимꙋ, и҆ свѧза̀ и҆ѻа҆кимъ велмо́жи и҆ зараки́ма и҆ бра́та е҆го, и҆ приведе въ е҆гѷпетъ·
Лѣтъ же бы́сть и҆ѻ҆а҆ки́ма, к҃е, е҆гда̀ црс̑҇твова́ти нача̀ в землѝ і҆ѹ́динѣ і҆ерс̑҇лимѣ и҆ сътворѝ лꙋка́вое пред̑ гм҃ъ.
на не́гоже сни́де навходоносо́ръ цр҃ь вавѷло́ньскїи и҆ свѧза́лъ е҆го мѣ́дѧными ю҆́зами.
и҆ приведе е҆го въ вавѷлонъ·
И҆ сщ҃ен꙽ные съсꙋ́ды гн҃ѧ взѧ̀ навходоносо́ръ и҆ принеслъ, и҆ ѻ҆ст҃илъ е҆̀ въ хра́мѣ свое҆мъ въ вавѷло́нѣ·
А҆ и҆же ѻ не́мъ гл҃емаѧ ѻ҆ нечистотѣ е҆го, и҆ ѻ҆ без̑чи́н꙽ствѣ пи́сано въ кни́ѕѣ вре́менъ цр҃ьства·
И҆ црс̑҇твова̀ и҆ѻ҆а҆ки́мъ сн҃ъ е҆го в него мѣ́сто·
Є҆гда же поста́вленъ е҆сть б̂ѣ лѣтъ и҃і.
црс̑҇твова же мцс̑҇ы г҃. и҆ дн҃їи, і҃, въ і҆ерс̑҇лимѣ.
и҆ сътвори лꙋка́вое пред̑ гм҃ъ.
И҆ по лѣтѣ посыла́ющи навходоносо́рꙋ, и҆ пресели е҆го въ вавѷло́нъ, въкꙋ́пѣ съ сщ҃енным̑м̑ съсꙋдомъ гн҃имъ·
И҆ поста́ви седекїа цр҃ѧ і҆ѹ҆де́и і҆ерс̑҇лимꙋ, е҆гда̀ бы́сть лѣто к҃а·
Црс̑҇твова же лѣтъ а҃і.
и҆ сътворѝ лꙋка́вое пред̑ гм҃ъ, и҆ нѣсть посрамле́нъ ѿ словес̑҇ и҆же рече́ни сꙋть ѿ і҆еремїѧ про̑҇рка ѿ ѹ́стъ гн҃ихъ.
и҆ заклѧ́сѧ ѿ цр҃ѧ навходоносо́ра на и҆мѧ гн҃е, и҆ клѧ́твы ѿстꙋпѝ, и҆ ѻ҆жестѝ вы́ю свою и҆ срд̑це свое.
и҆ престꙋпи́лъ е҆сть зако́ннаѧ г҃а б҃а і҆и҆л҃ва и҆ кнѧ́зи людїи гн҃ихъ, ве́лїе безаконїе сътвори́ша.
и҆ престꙋпи́ша паче всѣхъ нечисто́тъ ꙗ҆зы́ческих̑.
и҆ ѻ҆скверни́ша цр҃ковь гн҃ю и҆же ст҃а бы́сть въ і҆ерс̑҇лимѣ·
И҆ посла̀ б҃ъ ѿц҃ъ и҆хъ а́гг҃ла свое҆го и҆ призва̀ и҆хъ ꙗ҆́ко миловаше и҆хъ и҆ жили́ще свое, тїи же порꙋга́шасѧ им̑·
И҆ вънь же дн҃ь гл҃алъ ес̑҇ г҃ь.
бѧ́хꙋ и҆грающи пророки е҆го, и҆же до ꙗ҆́рости прогнѣ́ванъ е҆сть на ꙗ҆зы́ки свои.
ради безъчи́н꙽ства и҆хъ·
И҆ повелѣ̀ се́и и҆тѝ на них̑ цр҃емъ хал꙽де́искимъ.
тїи ѹ҆би́ша ю҆́ноша и҆хъ мече́м꙽, ѻ҆́крс̑҇тъ и҆ ст҃ѣи цр҃кви и҆хъ.
и҆ не ѻ҆прости́ша ю҆́ношъ и ста́рца и҆ дв҃ы и҆ ю́ноша·
Но всѣ преда́ни сꙋть въ рꙋкꙋ и҆хъ, и҆ вс̂ѧ сщ҃ен꙽ныѧ сосꙋды гн҃ѧ мала́ѧ и҆ вели́каа сосꙋ́ды кїѻта.
и҆ црс̑҇кїа ковче́ги възем̑ши принесо́ша во вавѷлон̑҇.
и҆ заж꙽го́ша дом̑ гн҃ь, и҆ разори́ша стѣны і҆ерс̑҇лі́ма.
и҆ столпы̀ е҆го сож꙽го́ша ѻ҆гнем̑·
И҆ сконча́шас̑҇ вс̂ѧ честнѣ́ишаѧ е҆го, ни въчто́же и҆зведо́ша.
и҆ про́чїи ѿ меча̀ ведо́ша въ вавѷлон̑҇·
И҆ бѣша рабѝ е҆го и҆ сн҃омъ е҆го даже до црс̑҇тва прь́скаго, въ наплъне́нїе слове́съ гн҃ихъ ѿ ѹ́стъ і҆е҆ремїѧ.
доко́лѣ бл҃говоли́тъ землѧ̀ сꙋбо́ты своѧ.
всѐ вре́мѧ ѻ҆пꙋстѣнїѧ свое҆го, сꙋбот̑ствовахъ въ и҆сполне́нїе лѣтъ·
Глв̑҇а, в҃·
Црс̑҇твꙋющи кѷрꙋ цр҃ю пр́ьскомꙋ пр́ьваго лѣта, въ скоча́нїе сло́ва гн҃ѧ, ѹ҆сты̀ і҆е҆ремїѧ въздвиг̑҇ г҃ь дх҃ъ кѷра цр҃ѧ пр́ьска, и҆ проповѣ́да вс̂е црс̑҇тво свое, въкꙋпѣ по писа́нїю гл҃ющи·
Сїѧ рече кѷръ цр҃ь пр́ьскїи г҃ь менѐ поста́ви цр҃ѧ вселеннѣи г҃ь і҆и҆л҃евъ г҃ь вы́шнїи.
и҆ назнамена̀ мн̂ѣ созда́ти е҆мꙋ до́мъ въ і҆ерс̑҇лимѣ и҆же е҆сть въ і҆ѹ҆де́и·
А҆́ще кт̂о е҆сть васъ ѿ лю́дїи е҆го.
да бꙋ́детъ г҃ь е҆го с ни́мъ, и҆ да възы́идетъ въ і҆ерс̑҇лим̑м̑, и҆же е҆сть въ і҆ѹ҆де́и да соѕиждꙋтъ до́мъ гн҃ь·
Се́и г҃ь и҆же всели́сѧ въ і҆ерс̑҇ли́мѣ.
е҆ли́цы ѹ҆бо ѻ҆́крс̑҇тъ мѣста ѻ҆бита́ютъ да помо́гꙋтъ им̑.
і҆ и҆же сꙋть въ мѣстѣ томъ съ зла́том̑ и҆ сребромъ, с꙽ да́ньми и҆ с ко́ньми и҆ ско́ты, и҆ всѣмъ и҆же ѻ҆бѣща́нїю ставлѧ́ютсѧ въ ꙗ҆́вленїе гн҃е и҆же е҆сть въ і҆ерс̑҇лимѣ·
И҆ стоѧ́ще нача́лницы колѣномъ ѿ чинъ і҆и҆ѹ́диныхъ ѿ колѣна венїаминова.
и҆ сщ҃е́нницы и҆ левѷти, и҆ вс̂и и҆́хже въздви́же дх҃ъ гн҃ь, възыити и҆ созда́ти до́мъ гн҃ь и҆же е҆сть въ і҆ерс̑҇ли́мѣ·
І҆ и҆же бѣша ѻ҆́крс̑҇тъ е҆го помого́ша въ всемъ зла́тѣ и҆ сребрѣ̀, и҆ ко́нехъ и҆ ско́тѣхъ, въ ѻ҆бѣща́нїи мно́жество мно́го их̑же чю́въство воста̀·
И҆ кѷръ цр҃ь възда̀ сосꙋды сщ҃е́нныѧ гн҃и и҆же пренеслъ нав꙽ходоносоръ цр҃ь вавѷлоньскїи ѿ і҆ерс̑҇ли́ма.
и҆ постави и҆хъ въ и҆́долници своей.
и҆ взѧ̀ т̂а кѷръ цр҃ь пр́ьскїи, и҆ преда̀ ѧ҆̀ миѳрида́тꙋ и҆же б̂ѣ над̑ скро́вищемъ е҆го·
Тѣмже преда́на сꙋть а҆васа́рꙋ вла́стелю і҆ѹ҆де́искꙋ.
и҆́хже сїе число̀·
Бѣ возлива́лницъ зла́тых̑, ҂а҃. и҆ возлива́лниц̑҇ сребрѧ́ныхъ, ҂а҃. кади́лнцъ сребрѧ́ных̑, к҃ѳ.
ѳїѧлъ зла̂тыхъ, л҃·
И҆ паки сребрѧ́ных̑, ҂в҃, у҃ и҆ і҃. і҆ и́ных̑ сосꙋдъ, ҂а҃. всѣх же сосꙋдъ принесе́ныхъ зла́тыхъ и҆ сребрѧ́ныхъ, ҂е҃, и҃ со́тъ, и҆ ѯ҃ѳ.
принесены же санавасаромъ, въкꙋ́пѣ с тѣми и҆же ѿ плѣненїѧ вавѷлоньска въ і҆ерс̑҇лим̑·
Въ вре́менѣхъ же а҆ртаѯеркса цр҃ѧ пр́ьскаго.
возписаша е҆мꙋ ѿ сихъ и҆же ѻ҆бита́хꙋ въ і҆ѹ҆де́и і҆ерс̑҇ли́мѣ.
велемосъ, и҆ миѳрида́тъ, и҆ тавелїи, и҆ раѳи́мъ, и҆ вее҆лътеѳ꙽мосъ, и҆ семелїи писе́цъ.
и҆ прочїи ѿ си́хъ и҆же на чиновенїе, ѻ҆бита́щїи в самарїи и҆ по прочих̑ мѣстѣх.
под̑пи́санное посла́нїе цр҃ю а҆ртаѯерѯꙋ господи́нꙋ ѻ҆́троки твоѝ раѳимъ лѣтопи́сецъ и҆ савелїи писе́цъ, и҆ прочїѝ совѣта твое҆го.
и҆ сꙋдїи и҆же въ е҆г꙽кили сѷрїи и҆ ѳеникїи·
И҆ нн҃ѣ зна́но да бꙋ́детъ господи́нꙋ цр҃ю̀, ꙗ҆́ко і҆ѹ҆де́е и҆же възыидо́ша ѿ ва́съ к на́мъ грѧдꙋщїи въ і҆ерс̑҇ли́мъ град̑.
ѿмѣтны и҆ стропътивыѝ соѕида́тели тор꙽жища, и҆ съставлѧ́ютъ стѣны и҆хъ и҆ цр҃ковъ въздвизают꙽, да а́ще ѹ҆бо град̑ то́й соѕижде́тсѧ и҆ стѣны скончаны бꙋдꙋтъ·
Не то́кмо да́ни не потръпѧтъ даѧти.
н̂о е҆щѐ и҆ цр҃емъ съпротивѧ́тсѧ, и҆же и҆ съдѣла́етсѧ цр҃кви ради пра́во и҆мѣти разсꙋжали е҆смо̀, н̂о и҆ не пре́зрѣти си́х꙽.
н̂о зна́но сътвори́ти господи́нꙋ на́шемꙋ цр҃ю·
да а́ще ви́дитсѧ т̂и цр҃ю.
да и҆́щетсѧ въ кни́гахъ ѿц҃ъ твоих̑·
И҆ ѻ҆брѧ́щеши въ лѣтопи́сцах̑ пи́сано ѻ҆ тѣхъ, и҆ зна́еши ꙗ҆́ко град̑ то́й быс̑҇ ѿмѣтник̑҇, и҆ цр҃їи гра́ды смꙋща́ющи.
і҆ѹ҆де́е ѿмѣтникы и҆ ѻ҆плъченїе сътворѧ́ющи ѻ҆ не́мъ ѿ́ вѣка.
е҆ѧ́же ради вины̀ град̑ то́й разоре́нъ бы́сть·
И҆ нн҃ѣ ѹ҆бо зна́но т̂и тво́римъ господи́не цр҃ю, ꙗ҆́ко а҆́ще град̑ се́й создан̑҇ бꙋдет̑ и҆ томꙋ̀ стѣны ѹ҆правлен꙽ныи бꙋдꙋтъ·
И҆сход̑ тебѣ не бꙋ́детъ въ села̀ самарїѝ и финикїѝ·
Тогда̀ возписа̀ цр҃ь раѳи́мꙋ и҆же писа̀ слꙋченїѧ и҆ вее҆лтеѳмꙋ и҆ самелїю писцꙋ, и҆ про́чимъ въчиненымъ на созрѣнїе ѻ҆бита́ющимъ въ самарїѝ и҆ сѷрїѝ, и҆ финикїи и҆же под̑пи́сана и҆мъ сꙋть.
чтохъ посла́нїе ꙗ҆́же посла́сте къ мнѣ·
Повелх̑ѣ ѹ҆бо възыска́ти и҆ ѻ҆брѣтено е҆сть ꙗ҆́ко град̑ то́и ѿ нача́ла цр҃емъ противлѧ́ющъсѧ.
и҆ чл҃ци ѿмѣтници.
и҆ ѻ҆плъче́нїе в не́мъ сътворѧ́ющи.
и҆ цр҃и крѣпча́иши и҆ жесто́ки бѣхꙋ въ і҆ерс̑҇ли́мѣ властвꙋю́щи и҆ да́ни наклада́ющи на килїю и҆ сѷрїю и҆ финикїю·
Нн҃ѣ ѹ҆бо повелѣхъ воз̑бра́нити чл҃къ тѣхъ соѕида́ти град̑ и҆ пред̑вѣ́дѣти да ничто́же бо́ле сїи сътворѧ́тъ.
н̂о ни да въсходѧтъ въ множа́иша лꙋка́в꙽ства да е҆́же цр҃емъ трд̑ꙋ вноси́ти·
Тогда̀ пречита́на сꙋть и҆же ѿ цр҃ѧ а҆ртаѯерѯа ꙗ҆́же напи́сана бы́сть раѳи́мꙋ и҆ самелїю писъцꙋ.
і҆ и҆же с тѣми съпоставле́ни бѣхꙋ въпрѧ́гши потща́нно прїидо́ша въ іерс̑҇лим̑ с ко́н꙽ники и҆ наро́да мно́жеством̑ ве́лїим̑·
Нача́шаж̑ соѕида́ющи въздръжати.
и҆ праз̑ны ста́хꙋ ѿ соѕида́нїѧ цр҃кви въ і҆ерс̑҇ли́мѣ.
да́же до вто́раго лѣта црс̑҇тва да́рїѧ цр҃ѧ пр́ьскаго·
Глв̑҇а, г҃·
Цр҃ь же да̀рїи сътворѝ вечерю вели́кꙋ всѣмъ и҆же под̑ ни́м꙽, и҆ всѣмъ и҆же ѿ до́мꙋ ро́да е҆го, и҆ перьсид̑скимъ вое҆во́дамъ, и҆ во́иномъ.
и҆ всѣм꙽ вельможамъ мидїискомъ, и҆ намѣстникомъ и҆ сꙋдїа́мъ.
и҆ ѹ҆прави́телемъ и҆же под̑ тѣми ѿ и҆нъдѣѝ да́же до е҆ѳїѻ́пїѧ, на рк҃з вое҆вод̑.
и҆ е҆гда̀ ꙗ҆до́ша и҆ пи́ша и҆ насыти́вшесѧ въз꙽врати́шасѧ·
Тогда̀ да́рїи цр҃ь воз꙽ше́дъ въ ло́жницꙋ свою̀, и҆ поспа́въ.
и҆ въ снѣ бы́сть·
Тогда̀ тїи трїе ю҆́ноша теле́снїи, и҆ стра́жи и҆же стрежа́хꙋ тѣло цр҃ево·
Реко́ша дрꙋ́гъ дрꙋгꙋ, глаго́лемъ е҆ді́нъ ко́ждо на́съ сло́во і҆ и҆же превысѝ.
и҆ е҆го́же ꙗ҆вит̑сѧ сло́во мꙋдрѣише дрꙋга́го.
дадѐ е҆мꙋ цр҃ь да́рїи да́ры вели́кїѧ и҆ побѣдꙋ вели́кꙋ.
и҆ перфирою ѻ҆дѣѧ́нъ бꙋ́детъ и҆ въ зла́тѣ пи́ти, и҆ на зла́тѣ да сѣди́тъ.
и҆ колеса̀ зла́томъ позлащены и҆ кида́ръ шидѧ́ныи, и҆ гри́вна ѻ҆́крс̑҇тъ выѝ, и҆ въ вто́ромъ мѣстѣ сѧ́детъ ѿ да́рїѧ, ра́ди премꙋ́дрости свое́ѧ, и҆ племѧ дарїево прозовет̑сѧ·
Тогда̀ въписа́вши е҆ді́нъ ко́ждо своѐ сло́во знаменова́ша.
и҆ под̑ложи́ша под̑ воз꙽гла́вїе да́рїа цр҃ѧ.
и҆ реко́ша·
Є҆гд̑а воста́нет цр҃ь дади́мъ т̂о писа́нїе наше.
і҆ и́же ѻ҆сꙋди́тъ цр҃ь, и҆ тр̂и вельмо́жи перьстїи ꙗ҆́ко сло́во е҆го мꙋдрѣ́ише е҆сть.
томꙋ̀ да да́стьсѧ побѣда, ꙗ҆ко пи́сано е҆сть.
е҆ді́нъ написа̀.
си́лно е҆сть вино̀.
и҆ дрꙋгїи написа̀ силнѣ́и е҆сть цр҃ь.
тре́тїи написа̀ силнѣ́ише сꙋть же́ны.
на всѣ́х же побѣжда́етъ и҆́стинна·
Є҆гда въста̀ цр҃ь.
взѧ́ша писа́нїѧ своѧ и҆ да́ша е҆мꙋ, и҆ прочтѐ ѧ҆̀.
и҆ посла̀ съзва̀ всѣхъ вельмо́жъ ми́д꙽ских̑ и҆ прьскихъ вое҆во́дъ, и҆ намѣстник̑҇ и҆ ѹ҆правителеи.
и҆ сѣдо́ша въ собо́рѣ и҆ чте́на сꙋть пи́сма пред̑ ни́ми·
И҆ реч̑҇ позови́те ю҆́ношъ.
и҆ тїи и҆звестѧт̑ словеса̀ своѧ.
и҆ зва́ни сꙋть и҆ внидо́ша.
и҆ рече и҆мъ възвѣсти́те нам꙽ ѻ҆ тѣхъ и҆же пи́сана сꙋть·
И҆ нача̀ прьвыи и҆же гл҃а ѿ крѣпости вина̀.
и҆ рече си́це, ѽ мꙋжи коль премагает̑ вино̀ всѣхъ чл҃къ, и҆же пїютъ е҆го.
ѿлꙋ́читъ ѿ ѹ҆ма̀.
паки же и҆ цр҃ю сътворѧ́етъ ѹ́мъ сꙋ́етенъ, паки рабомъ свобо́днымъ, и҆ ѹ҆богимъ и҆ бога́тымъ, и҆ всм̑ѣ ѹ́мы ѻ҆братит̑ безъстра́шны и҆ ве́селы.
и҆ не памѧтꙋ́етъ в꙽сеѧ ско́рби и҆ долго́въ, и҆ вс̂ѧ срд̑ца сотворѧ́етъ бога́ты, и҆ не памѧтꙋ́етъ цр҃ѧ ни вельмо́жи.
и҆ все по тала́н꙽томъ гл҃ати сътворит̑ и҆ не памѧтꙋ́етъ е҆гда̀ пїютъ дрꙋж꙽бы ни бра́тъства.
н̂о немно́го пото́мъ прїимꙋтъ ме́чи, и҆ е҆гда̀ ѿ ви́н꙽ного.
потопле́нїѧ въста́нꙋтъ.
не по́мнѧтъ чт̂о сътвори́ша, ѽ мꙋжи не премага́етъ л̂и вино̀, и҆же та́ко мы́слитъ сътвори́ти·
И҆ ѹ҆млъча̀ гл҃авыи си́це·
Глв̑҇а, д҃·
И нача́ть вторы́и гл҃ати, ре́кїи ѻ҆ крѣпости црс̑҇тѣи·
ѽ мꙋжи не премага́ютъ л̂и чл҃цы зе́млю и҆ мо́ре въздръжатъ, и҆ всѧ и҆же в нихъ сꙋть·
Цр҃ь же над̑ все премага́етъ и҆ господ̑ствꙋ́етъ всѣмѝ, и҆ влд̑чьствꙋе҆тъ и҆́ми, и҆ вс̂ѧ е҆ли́ка е҆же рече́тъ тѣмъ сътворѧ́ютъ·
И҆ аще после́тъ тѣхъ къ бра́ни тво́рѧтъ бра́нь.
и҆дꙋтъ и҆ сътры́ютъ го́ры и҆ стѣны, и҆ столпы̀, закала́ютсѧ и҆ закала́ютъ, и҆ цр҃ево сло́во не престꙋпа́ютъ.
и҆же а҆ще побѣдѧ́тъ принесꙋтъ цр҃ю всѧ̀ е҆ликоже плене́на бꙋдетъ·
Та́коже і҆ и́ныхъ си́цевых̑ і҆ е҆ли́ци же не вою́ютъ ни ѻ҆плъча́ютсѧ н̂о дѣ́лаютъ зе́млю.
паки е҆гда бꙋдꙋтъ сѣѧ́ти зажина́ющи принесꙋтъ да́ни цр҃евы·
И҆ е҆дін̑҇ дрꙋга́го преспѣва́етъ и҆ прино́сѧт̑ да́нь цр҃ю.
и҆ то́и е҆ді́нъ са́мъ е҆сть а҆ще гл҃етъ ѹ҆бїите, ѹ҆бїютъ.
и҆ а́ще гл҃етъ ѿпꙋсти́те, ѿпꙋстѧтъ.
и҆ гл҃ет꙽ порази́те, пора́зѧтъ.
и҆ гл҃етъ разори́те, разорѧ́тъ.
гл҃етъ съзида́ите, созида́ютъ.
гл҃етъ посѣщи́те, посѣца́ютъ.
гл҃етъ насади́те, наса́дѧтъ.
и҆ весь народ̑ и҆ си́лы е҆го послꙋшаю҆тъ само́го·
И҆ посе́мъ то́и ꙗ҆́сть и҆ пїетъ и҆ спит̑.
тїи же стрегꙋтъ ѻ҆́крс̑҇тъ е҆го, и҆ не мо́гꙋтъ поитѝ е҆ді́нъ ко́ждо сътвори́ти дѣ́ла своѧ̀.
н̂о на гл҃ъ послꙋшни сꙋть е҆мꙋ.
ѽ мꙋжи ка́ко не премо́жетъ цр҃ь и҆же та́ко сѧ слы́шит̑ и҆ ѹ҆млъча̀·
Тре́тїи же рече ѿ жены̀ и҆ ѿ и҆́стин꙽ны, и҆ т̂о е҆сть зорова́вель и҆ нача̀ гл҃ати.
ѽ мꙋжи не велик̑҇ л̂и е҆сть цр҃ь, и҆ мно́ѕи чл҃цы.
і҆ и҆ вино̀ премо́жет꙽.
кто́ же е҆сть властвꙋѧ́и и҆́ми, и҆ кт̂о господ̑ствꙋѧй и҆́ми.
не же́ны л̂и.
роди́ша б̂о же́ны цр҃ѧ и҆ всѣхъ людїи, и҆же властвꙋ́ютъ мо́ремъ и҆ земле́ю.
и҆ ѿ тх̑ѣ рожде́ни сꙋть.
и҆ тїи въздои́ша и҆хъ и҆же насади́ша виногра́ды ѿ кото́рыхъ вино̀ сътвори́тсѧ.
и҆ тїи сътворѧ́ю҆тъ ри́зы кра́сны всѣмъ чл҃комъ, и҆ тїи сътворѧ́ютъ сла́вꙋ чл҃комъ.
и҆ не мо́гꙋтъ чл҃цы ѿлꙋчи́тисѧ ѿ женъ.
а҆ще съвокꙋпѧтъ сребро̀ и҆ зла́то и҆ всѧ́кꙋ ве́щь красоты.
и҆ ви́дѧтъ женꙋ̀ е҆ді́нꙋ до́брѣ ѻ҆дѣѧ́н꙽нꙋ и҆ доброзра́чнꙋ всѧ̀ сїѧ ѻ҆ставлѧ́ю҆щи ѻ҆ не́и вне́млютъ, и҆ ѻ҆тво́реными ѹ҆стна́ми зрѧ́тъ ю҆̀.
и҆ еѝ жела́ют꙽ вс̂и, на́ипаче зла́та и҆ сребра̀, и҆ всѧ́коѝ ве́щи предраго́и·
Чл҃къ ѿц҃а свое҆го ѻ҆ста́витъ, и҆же въздои́лъ е҆го, и҆ свою̀ странꙋ̀, и҆ приложи́тсѧ къ женѣ̀.
и҆ съ жено́ю ѻ҆ставлѧ́етъ дш҃ꙋ, и҆ ниже ѿц҃а памѧтꙋ́етъ ни мт҃ри, ниже страны̀ и҆ сїе подоба́етъ вамъ разꙋмѣти, ꙗ҆́ко же́ны властвꙋ́ютъ ва́ми.
не болѣзнꙋ́ете л̂и, и҆ трꙋжа́етесѧ, и҆ вс̂ѧ жена́мъ даетѐ и҆ прино́сите·
И҆ прїемъ чл҃къ ѻ҆рꙋжїе свое, і҆ и҆дет̑ на пꙋть сътвори́ти разбо́и ѹ҆бїиства и҆ татьбы̀, и҆ мо́ре съ кораблѧ́ми пла́вати и҆ рѣ́ки, и҆ льва̀ ви́дит̑, и҆ въ мра́къ вни́детъ.
е҆гда̀ разбо́и сътвори́тъ и҆ прелестѝ и҆ ѹ҆кра́дет꙽ възлюблен꙽нои свое́и прино́ситъ·
И҆ па́че лю́битъ чл҃къ женꙋ̀ свою и҆ вы́ше нежели ѿц҃а и҆ ма́терь, и҆ мно́ѕи безꙋмни сътворе́ни сꙋть ра́ди же́нъ свои҆хъ.
и҆ рабѝ сътворе́ни сꙋть ради тѣхъ, и҆ заблꙋди́ша̑ и҆ закла́ни сꙋть, и҆ съгрѣши́ша рад̑и̑ же́нъ·
И҆ нн҃ѣ вѣрꙋете мн̂ѣ не вели́къ л̂и е҆сть цр҃ь въ вла́сти свое́и, не всѣ́ ли страны̀ не смѣ́ютъ ѻ҆сѧза́ти е҆го, ви́дѣхъ б̂о а҆пами́нь дщ̂и варта́кова ди́внаго нало́жницꙋ цр҃вꙋ сѣдѧ́щи близь цр҃ѧ ѻ҆деснꙋ́ю, и҆ ѿе҆млющꙋ дїади́мꙋ ѿ главы̀ е҆го, и҆ наставлѧ́ющи на себѐ, и҆ по лани́те бїѧ́ше цр҃ѧ ѿ лѣвыѧ рꙋкѝ, и҆ свы́ше того̀, ѻ҆тво́реныма ѹ҆стна́ма, зрѧ̀ е҆ѧ, и҆ а́ще посмѣ́етсѧ пред ни́мъ, смѣе́тсѧ и҆ ѻ́нъ·
А҆́ще же раз̑гнѣ́вана бꙋде́т꙽ на́нь, ѹ҆тѣша́етъ ю҆̀, до́ндеже гл҃етъ съ ни́мъ·
ѽ мꙋжи нс̑҇ѣ л̂и крѣпча́ише же́ны ꙗ҆́ко си́це тво́рѧт̑·
И҆ тогда̀ цр҃ь и҆ вельмо́жи смотрѧ́хꙋ дрꙋгъ на́ дрꙋга·
И҆ нача́тъ гл҃ати ѿ и҆́стинны, ѽ мꙋжи не крѣпки л̂и сꙋтꙋть же́ны, вели́ка е҆сть землѧ̀ и҆ высо́ко е҆сть нб҃о, и҆ бы́стро тече́нїе слн҃чное, ꙗ҆́ко ѻ҆брати́тъ в꙽коло нб҃са и҆ паки притечетъ в꙽ мѣсто свое въ е҆ді́нъ дн҃ь, не възвели́ченъ л̂и е҆сть и҆же сїѧ тво́рит̑.
і҆ и́стин꙽на вели́ка и҆ крѣпча́иши па́че всѣх꙽.
вс̂ѧ зем̑лѧ̀ и҆́стиннꙋ въз꙽зыва́ет꙽.
нб҃о па́ки ю҆̀ блс̑҇витъ.
и҆ вс̂ѧ дѣла прекланѧ́ют̑сѧ и҆ трепе́щꙋтъ е҆ѧ̀, и҆ нѣсть с не́ю ѻ҆би́да ниже вино̀ ѻ҆би́дитъ.
ниже и҆зоѻ҆би́дитъ цр҃ь, непра́вед̑ни жены̀ непра́ведни всѧ сн҃ы чл҃ческїѧ.
и҆ непра́ведна тѣхъ вс̂ѧ дѣла̀ и҆ нѣсть в нихъ и҆́стинны, и҆ въ свое́и непра́вости поги́бнꙋтъ·
І҆ и́стин꙽на же живе́тъ и҆ пребыва́етъ въ вѣки.
и҆ живетъ, и҆ въздержи́тъ въ вѣкъ вѣка·
Нѣсть пред̑ ею̀ прїѧтїѧ лица̀ ни ро́зности.
н̂о и҆же пра́ва тво́рит꙽ ѻ҆ всемъ непра́выхъ и҆ лꙋка́выхъ ѻ҆грѣба́етсѧ.
и҆ вс̂ѣ бл҃говолѧ́тъ въ дѣлехъ е҆ѧ̀·
И҆ нѣсть в сꙋдѣ е҆ѧ̀ ничто́же ѻ҆би́дливо н̂о сїѧ крѣпость, и҆ црс̑҇тво, и҆ вла́сть, и҆ вели́чество, всѣмъ вѣком̑·
Блс̑҇венъ б҃ъ и҆́стин̑҇ныи и҆ преста̀ гл҃ати.
и҆ вс̂и лю́дїе возопи́ша, и҆ реко́ша.
вели́ка е҆сть и҆́стинна и҆ премага́етъ·
Тогда̀ цр҃ь рече е҆мꙋ въспросѝ е҆же хо́щеши множа́е и҆же пи́сана сꙋть, и҆ да́мъ тебѣ·
Поне́же ѻ҆брѣте́нъ е҆си мꙋдрѣ́ишїи, и҆ бли́же менѐ да сѧ́деши и҆ племѧ̀ мое прозове́шисѧ·
Тогда̀ рече цр҃ю помѧнѝ ѻ҆бѣща́нїе твоѐ и҆же ѻ҆бѣща́лъ е҆си създа́ти і҆ерс̑҇лим꙽ въ дн҃ь кото́рыи црс̑҇тво прїѧлъ е҆си·
И҆ всѧ̀ съсꙋды и҆же прїѧта сꙋть ѿ і҆ерс̑҇лі́ма ѿпꙋстѝ и҆же ѿлꙋчи́лъ кѷръ когда заклѧ̀ вавѷло́нъ.
и҆ въсхотѣ ѿсла́ти т̂ѣ тꙋ̀.
ты́ же восхо́тѣ̀ съзида́ти цр҃ковь по сож꙽же́нїи и҆дꙋмѣ́и, когда ѻ҆пꙋстѣна е҆сть і҆ѹ҆де́а ѿ халдѣи·
И҆ нн҃ѣ т̂о е҆сть чт̂о прошꙋ̀ господи́не.
и҆ чт̂о прошꙋ̀ т̂о е҆сть вели́чество ѿ тебѐ, молю̀ ѹ́бо да сътвори́ши ѻ҆бѣща́нїе чт̂о ѻ҆бѣща́лъ е҆си цр҃ю нбс̑҇номꙋ и҆зъ ѹ́стъ твои҆хъ сътвори́ти·
Тогда въста̀ цр҃ь да́рїи и҆ ѻ҆блобыза̀ е҆го, и҆ написа̀ посла́нїе къ всѣмъ дрьжа́вным꙽ е҆го, и҆ вое҆во́дамъ и҆ намѣстникомъ и҆ вельмо́жамъ, да и҆зведꙋтъ е҆го и҆же с ним̑ всѝ въсходѧ́щи съзида́ти і҆ерс̑҇лимъ, и҆ всѣмъ намѣстникомъ и҆же бѧ́хꙋ в сѷрїи и҆ фи́никїи.
и҆же въ лива́нѣ.
написа̀ посла́нїе, да приво́зѧтъ дре́ва ке́дрова, ѿ ливана въ і҆ерс̑҇лі́мъ.
да съзи́ждꙋтъ гра́д꙽·
писа же и҆ всѣмъ і҆ѹ҆де́ѻм̑ въ свободꙋ̀ и҆же въсхожа́хꙋ ѿ црс̑҇тва въ і҆ѹ҆де́ю, и҆ всѣмъ вла́стелемъ и҆ вельможа́мъ и҆ намѣстником̑, не прїити на две́ри и҆хъ, и҆ всю̀ странꙋ̀ и҆же и҆спроси́ша бы́ти безъ да́ни и҆мъ.
і҆ и҆дꙋме́и да ѻ҆ставлѧ́ютъ страны̀ и҆же въздръжа́тъ і҆ѹ҆де́искїѧ·
И҆ въ създа́нїе хра́ма дати по е҆ді́нѣхъ лѣтехъ тала́нтъ, к҃. даже доколѣ създа́сѧ.
и҆ на ѻ҆сщ҃енїе всѐсъж꙽женїю съжещѝ на всѧкъ дн҃ь ꙗ҆́ко и҆мѣ́ютъ за́повѣдь.
и҆ныхъ талан꙽тъ з҃і, приносѧтъ по е҆ді́ныхъ лѣтехъ.
и҆ всѣмъ и҆же въсходѧт̑ ѿ вавѷло́на съгража́ти град̑.
дабы̀ была̀ свобода̑ толи́ко и҆мъ ꙗ҆́коже сн҃обомъ и҆хъ, и҆ всѣмъ сщ҃ен꙽никомъ и҆же пре́идт̑ꙋ писа́л же и҆ коли́чьства.
и҆ пресщ҃еннꙋ ри́зꙋ повелѣ̀ да́ти в коеи слꙋжаше.
и҆ левѷтомъ писа̀ дати м꙽здꙋ̀ да́же до дн҃е кото́рого съврьшит̑сѧ до́мъ і҆ерс̑҇лі́мъ и҆ ѹ҆стро́итсѧ.
и҆ всѣмъ стрегꙋщимъ гра́да писа̀ да́ти и҆мъ жре́бїи, и҆ ѻ҆броки.
и҆ ѿпꙋсти́лъ вс̂ѧ сосꙋды и҆же ѿлꙋчил̑҇ кѷръ ѿ вавѷло́на и҆ вс̂ѧ е҆ли́каже рече кѷръ сътвори́ти и҆ ѻ́нъ въчинѝ твори́ти и҆ посла́ти въ і҆ерс̑҇лимъ·
И҆ е҆гда и҆зы́иде ю҆́ноша се́и.
въздви́гнꙋвъ лицѐ на́ нб҃о проти́вꙋ і҆ерс̑҇ли́мꙋ блс̑҇вити цр҃ѧ нбс̑҇наго.
и҆ рече ѿ тебѐ е҆сть побѣда.
и҆ ѿ тебѐ е҆сть премꙋ́дрость, и҆ свѣтло́сть.
и҆ а́зъ ра́бъ твои е҆смь.
блс̑҇венъ е҆си и҆же да́лъ е҆си мн̂ѣ премꙋдро́сть.
и҆ тебѣ и҆сповѣмсѧ г҃и б҃е ѿц҃ь наших̑ и҆ прїѧ посла́нїе і҆ и҆зы́иде въ вавѷло́нъ.
и҆ прїиде и҆ възвѣсти бра́тїи свое́и и҆же бы́ша въ вавѷло́нѣ·
И҆ блс̑҇виша б҃а ѿц҃ь свои҆хъ, ꙗ҆ко да́лъ имъ ѿпꙋще́нїе, и҆ прохлаже́нїе.
да възы́идꙋтъ и҆ съзи́ждꙋтъ і҆ерс̑҇лім̑, и҆ цр҃ковь и҆дѣже и҆мено́вано е҆сть і҆́мѧ е҆го в немъ.
и҆ възра́довашасѧ с мꙋсикїею и҆ веселїемъ дн҃їи се́дмь·
Глв̑҇а, е҃·
По си́х꙽ же и҆збра́ни сꙋть да въсхо́дѧтъ нача́лницы се́лнїи по домох̑ и҆ колѣ́нахъ своих̑.
и҆ же́ны их̑, и҆ сн҃ове, и҆ дще́ри и҆ рабы̀, и҆ рабы́нѧ и҆хъ, и҆ ско́ты и҆хъ·
да́рїи же цр҃ь посла́лъ та́кожд̑е с ни́ми конникъ ҂а҃, до́ндеже и҆зведꙋтъ и҆хъ въ і҆ерс̑҇лимъ с ми́ром̑.
и҆ с мꙋсикїе҆ю, и҆ с тимпа́ны, и҆ трꙋба́ми.
и҆ вс̂ѧ бра́тїа и҆хъ бѧ́хꙋ и҆гра́ю҆щи, и҆ сътворѝ и҆хъ взыити въкꙋпѣ с ни́ми·
И҆ сїа сꙋть и҆мена̀ мꙋжїи и҆же взыидо́ша по се́лохъ свои҆хъ и҆ по колѣ́нохъ и҆ въ ча́сти.
кнѧ́ѕьства их̑ сщ҃енницы.
сн҃ове ѳинее́совы сн҃а а҆а҆ронѧ.
і҆сꙋсъ сн҃ъ и҆ѻ҆седе́ковъ.
и҆ѻ҆а҆ки́мъ сн҃ъ зороваве́левъ сн҃ъ салаѳїи́лева.
ѿ до́мꙋ двд҃ва.
ѿ колѣ́на фаре́сова.
колѣ́на же і҆ѹ́дина и҆же гл҃алъ е҆сть да́рїю цр҃ю пе́рскомꙋ словеса̀ ди́вна, въ второе лѣто црс̑҇тва е҆го мцс̑҇а ниса́нъ а҃ го дн҃ѧ·
Сꙋть же тїи въсходѧ́щїи же ѿ і҆ѹ҆де́ѧ ѿ плѣна преселенїю, кои҆́хъ пресели нав꙽ходоносо́ръ цр҃ь вавѷло́ньскїи въ вавѷлон̑҇.
и҆ ѻ҆брати́сѧ въ і҆ерс̑҇лимъ, и҆ въ про́чꙋю і҆ѹ́де́ю, и҆ е҆ді́нъ ко́ждо же въ́ грд̑а свои, и҆же прїидо́ша.
и҆ съ зороваве́лем̑ і҆ и҆сꙋсомъ.
и҆ нее҆мїе҆м꙽, и́ заха́рїе҆м꙽, реи҆сеем̑ е҆ниниѻ́сомъ, мардохее҆мъ, вее҆льсаромъ.
со а҆съфаро́сомъ.
съ рее҆лїе҆мъ, съ рои҆момъ.
съ ваа́ном̑.
и҆ ѿ нача́лникъ и҆хъ, число̀ и҆хъ ѿ ꙗ҆зык̑҇ и҆хъ, и҆ нача́лницы и҆хъ.
сн҃овъ форосовых꙽, ҂в҃, и҆ ро҃в.
сн҃овъ сафа́товыхъ, у҃, о҃ в҃. сн҃овъ а҆ресовыхъ, ѕ҃ со́тъ, н҃ѕ.
сн҃овъ фаа҆рамоа́въ, ҂в҃, и҃ со́тъ и҆ в҃і.
сн҃овъ и҆ламовыхъ, тисѧща, с҃н и҆ д҃·
Сн҃ове заѳꙋ́и, ѳ҃ со́тъ.
м҃ и҆ е҃. сн҃ове корве́ѻвы, з҃ сот̑, и҆ е҃. сн҃ове ванїи҆ны, ѕ҃ со́тъ м҃и.
сн҃ове виваи҆ны, ѕ҃ сот̑ и҆ к҃г.
сн҃ове сада́совы, ҂г҃, с҃, и҆ к҃в·
Сн҃ове а҆доника́новы, ѕ҃, со́тъ ѯ҃, и҆ з҃. сн҃ове ваі҆и҆ны, ҂в҃, ѯ҃ и҆ ѕ҃. сн҃ове а҆динꙋ́евы.
у҃ н҃ и҆ д҃. сн҃ове а҆тир езекїевы, ч҃ и҆ в҃. сн҃ове чила́новы, и҆ а҆зита́совы, ѯ҃ и҆ з҃·
Сн҃ове а҆зꙋра́новы, у҃ л҃ и в҃. сн҃ове а҆нанїевы, р҃ и҆ а҃. сн҃ове а҆ро́мовы.
сн҃ове ва́с꙽сины, т҃ и҆ к҃в.
сн҃ове а҆рсифꙋри́ѳъ, р҃ и҆ в҃ сн҃ове мети́ровы, ҂г҃, и҆ е҃. сн҃ове е҆к꙽веѳ꙽ломо́новы, р҃, и к҃г.
сн҃ове е҆к꙽нетофа́совы, н҃, и҆ е҃. сн҃ове е҆ѯанаво́ѳовы, р҃н и҆ и҃. сн҃ове е҆к꙽веѳ꙽само́совы, м҃в.
сн҃ове карїаѳїарїѻ́съ, к҃е·
Сн҃ове е҆к꙽кафирас̑҇ и виро́ѳовы, з҃ со́тъ, и҆ м҃г.
сн҃ове е҆к꙽пи́ровы, з҃ сот̑.
сн҃ове хадїа́совы.
и҆ а҆мидїевы, у҃, и҆ к҃в.
сн҃ове ѿ кира́ма, и҆ гав꙽диса, ѕ҃ со́тъ и҆ к҃а.
Сн҃ове ѿ макало́на, р҃ и҆ к҃в.
сн҃ове ѿ витолїѧ, н҃ и҆ в҃. сн҃ове нифи́совы р҃, и҆ н҃ѕ.
сн҃ове кала́молалꙋе́вы, и҆ ѻ҆нꙋсовы, з҃ со́тъ, и҆ к҃е.
сн҃ове и҆е҆рехꙋ, т҃ и҆ м҃е.
сн҃ове а҆наа́зъ, ҂г҃ т҃ и҆ л҃, жерцы̀.
сн҃ове и҆е҆д꙽дꙋевы, сн҃а і҆и҆сꙋева, съ сн҃ы санаси́вовыми, ѳ҃ со́тъ и҆ о҃в.
сн҃ове ѿ мирꙋ́ѳа ҂а҃, и҆ н҃в.
сн҃ове фасаро́новы, ҂а҃, и҆ м҃з.
сн҃ы кармїевы, а҆и́зъ·
Левѷти же сн҃ове и҆е҆сꙋе́вы, и҆ кад̑ми́ловы, и҆ ван꙽нꙋе҆вы, и҆ сꙋ́иевы, о҃д·
Сн҃ове ст҃о пѣвцы̀, сн҃ове а҆са́фовы, р҃, м҃и.
две́рницы же, сн҃ве салꙋмовы.
сн҃ове и҆а҆та́ловы, сн҃ове тол̑҇ма́новы, сн҃ове даковїевы.
сн҃ове тита́евы, сн҃ове самїевы, всѣ́хъ р҃ и҆ л҃ѳ.
и҆ ст҃ыхъ слꙋжи́телеи.
сн҃ове а҆са́фовы, сн҃ове а҆сифа́евы, сн҃ве таваѻ́ѳовы, сн҃ове кира́совы, сн҃ове сꙋ́довы.
сн҃ве фалее҆вы.
сн҃ове лавана́евы.
сн҃ове а҆грава́евы, сн҃ове а҆кꙋа́евы.
сн҃ове ѹ҆та́е҆вы.
сн҃ове кита́вовы, сн҃ове а҆гава́е҆вы, сн҃ове сива́їевы, сн҃ове а҆на́ни, сн҃ове каѳꙋа҆евы·
Сн҃ове гед̑дꙋ́ровы.
сн҃ове а҆и҆рꙋе́вы.
сн҃ве деса́новы.
сн҃ове нои҆ва́евы, сн҃ове хасева́евы.
сн҃ове газира́евы, сн҃ове а҆зїевы, сн҃ове финее҆совы, сн҃ове а҆сарае҆вы, сн҃ове васъѳаїевы, сн҃ове а҆сана́евы, сн҃ове менїевы, сн҃ове нафисїевы.
сн҃ове а҆кꙋе҆вы, сн҃ове а҆кифа́евы.
сн҃ове а҆сꙋровы сн҃ове фараки́мовы, сн҃ове васало́ѳовы сн҃ве мее҆дїи҆ны.
сн҃ве кꙋѳа́евы.
сн҃ве хорса́евы, сн҃ы харкꙋ́совы.
сн҃ове а҆сирари, сн҃ве ѳомїевы.
сн҃ве наси́ѳовы сн҃ове а҆ти́фа.
сн҃ы ѻ҆́трокъ соло́моновыхъ.
сн҃ы а҆сап꙽фїѻ́новы.
сн҃ы фари́ра, сн҃ы и҆е҆и́ли, сн҃ы лозо́ни, сн҃ы и҆здаи҆левы.
сн҃ы сафе́ѳовы, сн҃ы а҆їа сн҃ы фаѳ꙽ре́ѳъ.
сн҃ы савїи, сн҃ы сароѳїевы, сн҃ы масїа́совы, сн҃ы га́ровы.
сн҃ы а҆д꙽дꙋсовы.
сн҃ы сꙋва́совы, сн҃ы а҆фераевы.
сн҃ове варади́совы.
сн҃ове саватовы.
сн҃ове а҆л꙽ло́мовы.
всѣ́хъ ст҃о слꙋжи́телеи и҆ сн҃овъ ѻ҆́трокъ соло́моновыхъ, т҃ и҆ о҃в·
Сїи въсходѧ́ще ѿ ѳермеле́ѳа, и҆ ѳерса́са, вож̑ и҆хъ, хараа҆ѳала́ръ, и҆ а҆а҆ла́ръ, и҆ не мого́ша възвѣсти́ти ѿч҃ествъ своих̑ и҆ ро́довъ, ꙗ҆́ко ѿ і҆и҆л҃ѧ сꙋть.
сн҃ы лада́новы сн҃а да́нова, сн҃ы некода́новы, ѕ҃ со́тъ и҆ н҃в.
и҆ ѿ жерцо́въ творѧ́щїихъ жре́чество не ѻ҆брѣто́шасѧ·
Сн҃ове ѻ҆вдїи҆ны.
сн҃ове а҆ко́совы.
сн҃ове а҆д꙽дꙋсовы и҆же поа́лъ а҆вгїю женꙋ ѿ дще́реи верзеле́евыхъ.
и҆ назва́на е҆сть на и҆мѧ е҆го.
и҆ сихъ пои҆́щеши въ писа́нїи бы́тїѧ въ съчте́нїю и҆ не ѻ҆брѧ́щеши.
и҆ не повелѣно и҆мъ сщ҃ен꙽ства твори́ти·
И҆ рече́ и҆мъ и҆ нее҆мїѧ и҆ а҆т꙽ѳа́рїѧ, да не причаща́ют̑сѧ е҆же слꙋжи́ти, до́ндеже въста́нетъ а҆рхїере́и да́нъ въ и҆звѣствова́нїе, і҆ истин꙽нꙋ.
вси же бѧ́хꙋ ѿ і҆и҆л҃ѧ, ѿ в҃і лѣтъ, и҆ ни́жеи, ҂м҃, ҂в҃, т҃ѯ ра́звѣ ра́бъ и҆ рабы́нь.
ра́бъ тх̑ѣ и рабы́нь, ҂з҃, тм҃з·
Пѣвцы̀ и҆ пѣсницы, с҃, и҆ м҃е.
вельблюд̑, ул҃е.
ко́нїи, ҂з҃ л҃ѕ.
м꙽скѝ с҃ м҃е.
под̑ꙗ҆́ре́мникъ ҂е҃ е҃ со́тъ, и҆ к҃е.
и҆ ѿ пред̑ста́телеи по се́лѣхъ.
е҆гда̀ прїидо́ша въ цр҃ковь бж҃їю.
и҆же въ е҆ерс̑҇лимѣ нача́ша ѻ҆бновлѧ́ти и҆ въздвиза́ти цр҃ковь в мѣсто е҆го по свое́и си́лѣ, и҆ даѧти въ цр҃ковь сокро́вище.
дѣ́ло пресщ҃ен꙽но, зла́та мна́съ, ҂а҃. и҆ мнас̑҇ сребра̀, ҂е҃. и҆ ри́зъ сщ҃енныхъ, р҃. и҆ всели́шасѧ сщ҃ен꙽ницы и҆ левѷти, и҆же и҆зыидо́ша ѿ народа въ і҆ерс̑҇лимъ и҆ въ странꙋ.
и҆ пресщ҃енныи пѣвцы и҆ две́рницы, и҆ ве́сь і҆и҆л҃ь въ страна́хъ своих̑·
Настоѧ́щꙋ же сед̑момꙋ мцс̑҇ꙋ, е҆гда̀ бы́ша сн҃ове і҆и҆л҃еви е҆ді́нъ ко́ждо въ свои҆хъ ве́щехъ събра́шасѧ е҆ді́нодꙋшно.
въ дво́ръ и҆же бы́сть пред̑ вра́ты въсто́чными·
И҆ въста і҆сꙋсъ сн҃ъ и҆ѻ҆седе́ковъ.
и҆ братїѧ е҆го сщ҃ен꙽ницы.
и҆ зороваве́ль сн҃ъ салаѳїи́левъ и҆ бра́тїѧ и҆хъ.
ѹ҆гото́ваша ѻ҆́лтарь б҃ꙋ і҆и҆л҃евꙋ.
да възносѧтъ на не́мъ вс̂есъж꙽же́нїе, ꙗ҆́коже въ кни́ѕѣ моѷсїѧ чл҃ка бж҃їѧ пи́сана сꙋть.
и҆ събра́ша себѣ̀ ѿ и́ныхъ ро́дъ землѝ.
и҆ въздви́гнꙋша жертовникъ, в мѣсто е҆го ꙗ҆́ко вра́жда бѧ́хꙋ и҆мъ, и҆ премого́ша и҆хъ вси ꙗ҆зыцы зе́м꙽стїи.
и҆ приноша́хꙋ приношенїе по вре́мени и҆ съж꙽же́нїе гв҃и ѹ҆́тренее, и҆ вече́рнее, и҆ сътвори́ша кꙋщи и҆ дн҃ь вели́ка пра́здника, ꙗ҆ко повелѣно в зако́нѣ.
и҆ же́ртва на всѧ́къ дн҃ь ꙗ҆́ко подоба́ше б̂ѣ.
и҆ посе́мъ възноше́нїѧ ѹ҆ставле́ны, и҆ приноше́нїе сꙋбо́тамъ и҆ новомѣсѧчїа́мъ·
И҆ дн҃їи вели́кихъ пра́здникъ всѣмъ ѻсщ҃еннымъ, и҆ чтоже ѻ҆бѣща́хꙋ г҃ꙋ ѿ новомѣсѧчїа седма́го мцс̑҇а нача́ша приноше́нїе въздаа́ти б҃ꙋ.
и҆ цр҃ковь гн҃ѧ не бы́сть е҆щѐ създа́на.
и҆ да́ша сре́бреники, пищꙋ и҆ питїе, камена́ремъ и҆ ков̂аче́мъ съ ра́достїю.
и҆ да́ша кара сидѧ́номъ, и҆ тѷрѧномъ да привезꙋтъ и҆мъ ѿ лива́на дре́ва ке́дрова.
и҆ сътво́рѧтъ расте́съ въ ѻ҆п꙽пїискомъ приста́нищи.
по прави́ломъ и҆же пи́сано бы́сть и҆мъ ѿ кѷра цр҃ѧ пе́рьскаво·
И҆ въ в꙽торо́е лѣто грѧдѧ́хꙋ лю́дїе въ хра́мъ бж҃їи въ і҆ерс̑҇лимъ.
мцс̑҇а в꙽тора́го.
и҆ нача̀ зороваве́ль сн҃ъ салаѳїи́левъ.
і҆ и҆сс̑҇ꙋ сн҃ъ і҆ѻ҆седе́ковъ и҆ бра́тїа и҆хъ, и҆ сщ҃ен꙽ницы, и҆ левѷти, и҆ всѝ и҆же прїидо́ша ѿ плене́нїѧ въ і҆ерс̑҇лим̑·
И҆ нача́ша зда́ти хра́мъ бж҃їи.
новомѣсѧчїа втора́го мцс̑҇а, втора́го лѣта е҆гда̀ прїдо́ша въ і҆ѹ҆де́ю і҆ерс̑҇лимъ·
И҆ поста́виша левѷты ѿ к҃, лѣтъ на дѣло гн҃е.
и҆ ста̀ і҆сꙋсъ и҆ сн҃ы и҆ бра́тїѧ е҆го вс̂и, и҆ кад̑мїи́ль бра́тъ.
и҆ сн҃ы мадїамовы, и҆ сн҃ы и҆ѻ҆да́евы, е҆лїадꙋм꙽скаго, съ сн҃ъми и҆ братїами и҆хъ.
всѝ левѵти е҆дїнодꙋшно дѣла призира́тели.
сътворѧ́ющи дѣ́ло в домꙋ̀ гн҃и.
и҆ ста́ша сщ҃енницы ѻ҆блече́ни в ри́зы съ трꙋба́ми, и҆ мꙋси́ками.
и҆ левѷти сн҃ове а҆са́фовы и҆мѣю҆ща кѷм꙽ва́лы въсхвалѧ́ющи г҃а, и҆ блс̑҇вѧ́щи по дв҃дꙋ цр҃ю і҆и҆л҃евꙋ·
И҆ поѧ́хꙋ пѣснь г҃ꙋ ꙗ҆́ко сла́дость е҆го и҆ чс̑҇ть въ вѣки на всемъ і҆и҆л҃и·
И҆ вс̂и лю́дїе трꙋбо́ю въспѣша.
и҆ прогласи́ша̑ вели́кимъ гла́сомъ въсхвалѧ́ющи г҃а на въздвиже́нїе до́мꙋ гн҃ѧ·
И҆ прїидо́ша ѿ сщ҃ен꙽никъ и҆ левѷтъ и҆ пред̑стоѧ́щихъ по се́лѣхъ ста́рецъ и҆же ви́дѣша прежнїи до́мъ.
и҆ на сѐ съзида́нїе възрѣша съ пла́чемъ и҆ во́племъ вели́кимъ.
и҆ мно́ѕи съ трꙋба́ми и҆ ра́достїю гла́са ве́лїѧ, ꙗ҆ко да лю́дем̑ не слы́шати трꙋбъ пла́ча ради лю́д꙽ска·
Народ̑ б̂о бы́сть трꙋбѧ́щи ѕѣло.
та́ко да дале́че слы́шитсѧ.
и҆ слы́шаша вра́зи колѣна і҆ѹ́дина и҆ венїами́нова.
и҆ прїидо́ша позна́ти гла́съ трꙋбныи.
и҆ позна́ша ꙗ҆́ко и҆же ѿ плене́нїѧ съзида́ютъ цр҃ковь г҃ꙋ б҃ꙋ і҆и҆л҃евꙋ·
И҆ пристꙋпльше къ зорова́велю і҆ и҆сꙋсꙋ и҆ предъста́телемъ се́лъ, и҆ реко́ша и҆мъ·
Съзида́емъ въкꙋ́пѣ с ва́ми.
також̑ и҆ послꙋшае҆мъ г҃а б҃а на́шего, и҆ е҆мꙋ жертвꙋ́ем꙽ ѿ дн҃їи а҆васаре́ѳа цр҃ѧ а҆сѷрьскаго.
и҆же преселѝ насъ здѣ̀.
и҆ реч̑҇ и҆мъ зорова́вель і҆ и҆сꙋсъ и҆ нача́лницы се́лъ і҆и҆л҃евыхъ.
нѣсть вамъ и҆ нам̑ съзида́ти до́мъ г҃ꙋ б҃ꙋ нашемꙋ.
мы̀ б̂о са́ми съзи́ждемъ г҃ꙋ б҃ꙋ і҆и҆л҃вꙋ прилѣжне.
ꙗ҆́коже повелѣ нам̑ кѷръ цр҃ь прь́скїи·
Ꙗ҆́зы́цы же зе́м꙽стїи пребыва́ющїи въ і҆ѹ҆де́и, стꙋжа́хꙋ па́кости тврѧ́ще, дѣло съзида́ти и҆ противо со́вѣтне настоѧ́хꙋ възъбранѧ́юще е҆же съвръши́тисѧ дѣлꙋ съзида́нїѧ въ всѐ вре́мѧ живота̀ кѷра цр҃ѧ.
и҆ продо́лжиша лѣтѣ дв̂ѣ, да́же до да́рїева црс̑҇тва·
Глв̑҇а, ѕ҃·
Въ вто́рое же лѣто црс̑҇тва дарїева, про̑҇рчьствова а҆г꙽ге́ѧ, и҆ захарїѧ сн҃ъ а҆д꙽дои҆нъ пророцы і҆ѹ҆де́и ради и҆же во і҆ѹ҆деи и҆ въ і҆ерс̑҇ли́мѣ и҆́менемъ г҃а б҃а і҆и҆л҃ева на ни́хъ·
Тогда̀ ст̂а зоровавель сн҃ъ салаѳїилевъ, і҆ и҆сс̑҇ꙋ сн҃ъ і҆ѻ҆седе́ков꙽·
Нача́ша соѕи́дати дом̑ гн҃ь и҆же е҆сть въ і҆ерс̑҇ли́мѣ.
со сꙋщими про̑҇рци гв҃и помага́ющꙋ им̑·
В то́же времѧ прїиде к ни́мъ си́нъ воево́да сѷрїискїи, и҆ феникїискїи, и҆ саѳравꙋзаньскїи и҆ дрꙋѕи е҆го, и҆ реко́ша и҆мъ·
Чїе повелѣнїе вамъ до́мъ сїи соѕидати и҆ кро́въ то́и, і҆ и́на вс̂ѧ съвръша́ете.
и҆ кт̂о сꙋть строи́тели и҆же сїѧ соѕида́ютъ.
и҆мѣша блгд̑ть ѿ г҃а посѣще́нїѧ быв꙽шаго на них̑ и҆же б̂ѣ въ плѣненїи, старци і҆ѹ҆де́истїи.
и҆ не възбрани́ша соѕидати.
до́ндеже назнаменꙋ́етсѧ да́рїю ѻ҆ всѣхъ тѣхъ.
и҆ ѿвѣща́нно бꙋдет̑ ѻ҆́бразъ же посла́нїи и҆же посла́ша да́рїю·
Сисенис̑҇ вое҆вода сѷрїйскїи и҆ феникїискїи и҆ саѳравꙋза́ньскїи, и҆ дрꙋѕи и҆же въ сѷрїѝ и҆ финикїѝ намѣстници.
цр҃ю да́рїю целова́нїе.
всѧ̀ зна́на да бꙋдт̑ꙋ гн҃ꙋ на́шемꙋ цр҃ю, ꙗ҆ко е҆гда прїидохом̑м̑ въ стра́нꙋ і҆ѹ҆де́искꙋ, и҆ внидо́хомъ въ і҆ерс̑҇ли́мъ град̑.
ѻ҆брѣто́хомъ ѿ плѣне́нїа ста́рцовъ і҆ѹ҆де́скихъ въ і҆ерс̑҇ли́мѣ гра́дѣ соѕида́ющїи до́мъ гн҃ь вели́къ но́въ ѿ ка́менїи кра́сных̑ полага́юще и҆ чтс̑҇ных̑ и҆ древа на стѣна́х꙽.
и҆ дѣла т̂а съ прилежа́нїемъ творѧтъ, и҆ преспѣвает̑ дѣ́ло въ рꙋка́хъ и҆х꙽, и҆ въ все́и сла́вѣ и҆ любезнѣише съвръша́ют̑·
Тогда̀ въпроси́хомъ старцевъ гл҃ющи.
чїе повелѣнїе вамъ соѕида́ти до́мъ се́и и҆ дѣла т̂а ѻ҆снова́ете·
Сегоже рад̑и̑ въпроси́хомъ их̑ да вѣдомо сътво́рим̑ тебѣ̀.
и҆ напи́шемъ т̂и чл҃къ предъста́телеи.
і҆ и҆ме́нем̑ писа́нїѧ и҆спроси́хом̑ ѿ ни́хъ·
И҆ тїѝ ѿвѣща́ша на́мъ гл҃ющи.
мы е҆смѝ рабѝ гн҃и и҆же сътвори нб҃о и҆ зе́млю.
и҆ соѕида́шесѧ сїи до́мъ пре́же лт̑ѣ тх̑ѣ мно́гих̑ ѿ цр҃ѧ і҆и҆л҃ева вели́каго и҆ крѣпкаго.
и҆ сконча́сѧ·
И҆ ꙗ҆́ко ѿц҃ы на́ши прогнѣва́ша и҆ съгрѣши́ша къ б҃ꙋ і҆и҆л҃вꙋ нбс̑҇номꙋ, преда́лъ их̑ въ рꙋ́кꙋ навходоносо́рꙋ цр҃ю вало́ньскомꙋ.
цр҃ѧ халъде́иска.
до́мъ же то́и разарѧющи сож꙽го́́ша.
и҆ лю́ди плениша і҆ и҆зведо́ша въ вавѷлонъ·
Въ пр́ьвое лѣто црс̑҇твꙋю́щꙋ кѷрꙋ цр҃ю вавѷлоньскомꙋ писалъ кѷръ цр҃ь дом̑ то́и соѕида́ти.
и҆ сщ҃е́нные сосꙋ́ды зла́тые и҆ сре́брѧные и҆же и҆знесѐ навходоносор̑҇ ѿ до́мꙋ и҆же е҆сть въ і҆ерс̑҇ли́мѣ.
и҆ поставѝ ѧ҆̀ въ свое҆мъ ка́пищи.
па́ки взѧ́лъ т̂а кѷръ цр҃ь ѿ хра́ма и҆же бысть въ вавѷлонѣ и҆ преда и҆хъ зоровавелю и҆ санаваса́рꙋ вое҆водѣ.
и҆ повелѣно ес̑҇ е҆мꙋ ѿнесши да возносѧ́тъ сїе сосꙋды.
и҆ пред̑ста́вѧтъ въ цр҃ковь и҆же ес̑҇ въ і҆ерс̑҇ли́мѣ.
и҆ цр҃ковь бж҃їю сїю соѕида́ти въ мѣстѣ еѧ̀·
Тогда̀ санаваса́ръ, ѻ҆́нъ пришед̑ положѝ ѻ҆снова́нїе до́мꙋ гн҃ѧ и҆же е҆сть въ і҆ерс̑҇ли́мѣ и҆ ѿ ѻ҆́ного до нн҃ѣ ѕиждетсѧ.
и҆ не прїѧ́тъ сконча́нїа·
Нн҃ѣ ѹ҆бо а҆́ще сꙋди́тсѧ ѿ тебѐ ѽ цр҃ю, пои҆́щет̑сѧ въ цр҃ьскихъ кни́гохрани́лницах̑ кѷра цр҃ѧ.
и҆же сꙋть въ вавѷлонѣ·
И҆ а́ще ѻбрѣтено бꙋ́детъ совѣтъ кѷра цр҃ѧ нача̀ т̂ꙋ бы́ти строе́нїю до́мꙋ гн҃ѧ и҆же е҆сть въ і҆ерс̑҇ли́мѣ, и҆ сꙋди́тъсѧ ѿ господи́на цр҃ѧ на́шего, да напи́шеши ѻ҆ тѣхъ на́мъ·
Тогда̀ да́рїи цр҃ь повелѣ̀ възыска́ти въ цр҃ьскихъ кни́гохранителницахъ и҆же въ вавѷло́нѣ·
И҆ ѻ҆брѣтено быс̑҇ въ витанеѝ странѣ тиваръстѣи въ е҆ди́ном̑м̑ лѣтописци, в не́мже напи́сана бѣхꙋ т̂а.
лѣто пр́ьвое, црс̑҇твꙋющꙋ кѷрꙋ цр҃ю.
кѷръ цр҃ь повелѣ̀ до́мъ гн҃ь и҆же е҆сть въ і҆ерс̑҇ли́мѣ соѕида́ти.
и҆дѣже жрѧ́хꙋ ѻ҆гнемъ безъпреста́ни.
е҆го́же высота̀ бꙋ́детъ лако́тъ, ѯ҃. и҆ ширина̀ лако́тъ, ѯ҃. стѣна̀ ка́мени тесаного покровъ дре́вѧнъ ѿ дщиц꙽ новы́хъ е҆ді́нъ, и҆ расхо́ды да́ти ѿ до́мꙋ кѷра цр҃ѧ.
сщ҃енные же сосꙋды въ до́мъ гн҃ь толи́ко зла́тнаѧ, ꙗ҆́кож̑ сре́бренаѧ и҆же взѧ́лъ навходоносоръ ѿ до́мꙋ гн҃ѧ и҆же е҆сть въ і҆ерс̑҇ли́мѣ, и҆ принеслъ въ вавѷлонъ, да поста́вѧт̑ в꙽ домꙋ̀ въ і҆ерс̑҇лі́мѣ и҆деже б̂ѣхꙋ поста́влена пре́жде.
да поста́вѧт̑сѧ та́мо·
И҆ повелѣ же цр҃ь прїлежати сисен̑҇нѣ вое҆водѣ сѷрїискꙋ и҆ финикеискꙋ и҆ сатравꙋза́ньскꙋ и҆ дрꙋгом̑ е҆го и҆же ѹ҆чинени бѧ́хꙋ в сѷрїѝ, и҆ финекїи намѣстницы да не воз̑бранѧют̑ того̀ мѣ́ста ѻ҆́трокꙋ кѷровꙋ зороваве́лю, нача́лника же і҆ѹ҆де́и, и҆ ста́рецъ і҆ѹ҆де́искихъ.
до́мъ гн҃ь ѻ҆́нъ соѕида́ти.
и҆ а́зъ б̂о повелх̑ѣ по в꙽семъ соѕида́ти.
и҆ съ прилежа́нїемъ зрѣти да помо́гт̑ꙋ и҆же сꙋть ѿ плене́нїѧ і҆ѹ҆деѻм̑ дон꙽деже съвръши́тсѧ хра́мъ гн҃ь.
и҆ ѿ да́ни ѹ҆до́лїи сѷрїѝ и феникїѝ.
любовне повелѣ даѧ́ти тѣмъ чл҃ком̑ на жр́ътвꙋ гн҃ю зороваве́лю приста́вникꙋ.
ю҆́нцы и҆ ѻ́вны и҆ а҆гньци·
Та́коже и҆ пшеницꙋ, и҆ со́ль, и҆ вино̀, и҆ е҆ле́и, вы́нꙋ на всѧ́ко вре́мѧ, ꙗ҆́кож̑ сщ҃е́нницы и҆же сꙋть въ і҆ерс̑҇ли́мѣ рекꙋтъ, на всѐсож꙽же́нїе по всѧ̀ дн҃и безъ пога́шенїѧ.
да принесꙋтсѧ возлїѧнїѧ вы́шнемꙋ б҃ꙋ за цр҃ѧ и҆ ѻ́троки е҆го.
и҆ да мо́лѧт̑ за и҆хъ живо́тъ.
и҆ да въз꙽вѣсти́тсѧ и҆ не престꙋпле́но бꙋ́детъ ничто́же ѿ си́хъ и҆же пи́сана сꙋть·
А҆́ще же солжетъ кт̂о да прїиметсѧ древо ѿ своих̑ и҆́стинных̑ и҆ да ѻ҆́бѣсит̑сѧ.
и҆ бл҃гаѧ тѣхъ цр҃ю припи́шꙋтсѧ.
сего ради и҆ г҃ь е҆мꙋ и҆мѧ възва́но е҆сть тꙋ и҆стребит̑ всѧ́кого цр҃ѧ и҆ ꙗ҆зы́ки и҆же рꙋ́кꙋ свою простретъ въздръжа́ти, и҆л̂и лꙋка́во въздръжа́ти дом̑ гн҃ь то́и и҆же е҆сть въ і҆ерс̑҇ли́мѣ.
а҆з же да́рїи цр҃ь повелѣхъ без꙽ всего̀ сїа сътворити·
Глв̑҇а, з҃·
Тогда̀ сисинїи пр́ьвыи по цр҃и вое҆вода сѷрїѝ, и҆ финикїи, и҆ саѳравꙋза́нїи, и҆ съ дрꙋ́гими послꙋша́ющими тх̑ѣ, и҆же ѿ да́рїѧ цр҃ѧ бѧ́хꙋ им̑ повелѣна, настоѧ́хꙋ сщ҃еннымъ ст҃ым̑ дѣ́ломъ, потща нѣише содѣлова́ющи, съ ста́рци і҆ереѻ́въ, и҆ нача́лници ст҃ыхъ.
и҆ преспѣва́ша сщ҃е́нна ст҃аа дѣла, прорица́ющи б̂о аг꙽ге́ѧ и҆ захарїѧ про̑҇рци, и҆ съвръши́ша сїѧ по заповѣди г҃а б҃а і҆и҆л҃ева.
се́и совт̑ѣ кѷра и҆ дарїѧ, и҆ а҆ртаѯерѯа цр҃еи пр́ьскихъ.
до шеста́го лѣта да́рїѧ цр҃ѧ пр́ьскаго·
И҆ съвръшенъ бы́сть дом̑ ст҃ыи на́шъ да́же до третїѧ́го и҆ двадесѧтаго дн҃е, мцс̑҇а а҆до́ра·
Шестаг̑҇ лѣта да́рїѧ цр҃ѧ, и҆ сътвори́ша сн҃ве і҆и҆л҃еви и҆ сщ҃е́нницы и҆ левѷти.
и҆ прочїѝ, и҆же бѣхꙋ ѿ плѣне́нїѧ, и҆же наставлени сꙋть.
по тѣхъ и҆же напи́сана сꙋть в꙽ кни́ѕѣ моѷсїѻ҆вѣ·
И҆ принесо́ша въ ѻ҆бновленїе цр҃кви гн҃и.
ю҆́нецъ, р҃, ѻ҆́венъ, с҃,.
а҆гнецъ, у҃. и҆ козлов̑҇ за грѣхи в꙽сего̀ і҆и҆л҃ѧ в҃і.
по числꙋ ѿ колѣна і҆и҆л҃ва, в҃і·
И҆ ста́ша сщ҃е́н꙽ницы и҆ левѷти, ѻ҆дѣа́н꙽ны въ ри́зы по колѣнохъ на дѣ́ло г҃а б҃а і҆и҆л҃ева, по кни́ѕѣ моѷсїѻвѣ.
и҆ вратари по е҆ді́ныхъ ко́ждо две́рехъ.
и҆ съдѣ́аша сн҃ове і҆и҆л҃еви с тѣми и҆же бѧхꙋ ѿ плѣненїѧ па́схꙋ, д҃і, лꙋнѣ мс̑҇ца пр́ьваго·
Ꙗ҆́ко ѻ҆ст̀ишасѧ сщ҃е́н꙽ницы и҆ левѷти.
в꙽кꙋпѣ и҆ вс̂и сн҃ве плѣне́ныи, ꙗ҆́ко ѻ҆чисти́шас̑҇ и҆ пожро́ша̑ па́схꙋ всм̑м̑ѣ сн҃омъ плѣне́ным̑, вс̂и въкꙋпѣ ѻ҆чисти́шас̑҇.
и҆ пожроша па́схꙋ всѣмъ сн҃овом̑ и҆ племенемъ, и҆ бра́тїам̑ и҆хъ сщ҃енником̑ и҆ себѣ̀ сами·
И҆ ꙗ҆до́ша сн҃ове і҆и҆л҃еви и҆же бѧ́хꙋ ѿ плѣненїѧ всѝ и҆ ѻ҆ста́вшїи ѿ сквернъ зем̑лѧ̀ то́ѧ и҆щꙋщи г҃а.
и҆ просвѣща́ша дн҃ь пра́зникъ ѻ҆прѣ́снокомъ сед̑мь дн҃їи пирꙋ́ющи пред̑ гм҃ъ, и҆же ѻ҆братѝ совт̑ѣ цр҃ѧ а҆сѷрьскаго в нем̑, ѹ҆твръди́ти рꙋ́кꙋ и҆мъ на дѣ́ла г҃а б҃а і҆и҆л҃ева·
Глв̑҇а, и҃·
И посемъ бы́сть црс̑҇твꙋ́ющꙋ а҆ртаѯерѯꙋ цр҃ю пр́ьскомꙋ.
пристꙋпи е҆́здра сн҃ъ сарїин̑҇ е҆зерїевъ хелкїевъ.
сн҃овъ солꙋньмовъ, сад̑доковъ, а҆хитовъ, а҆мерїевъ, е҆зїевъ, мемероѳъ, а҆ре́евъ, саѹ҆и҆евъ, вокъка евъ, а҆висꙋмовъ, финее҆съ, е҆леа҆зара, а҆а҆ро́нъ пр́ьваго сщ҃ен꙽ника.
То́и е҆́здра в꙽зы́де ѿ вавѷлона, ꙗ҆ко пи́сецъ и҆ ѹ́менъ сы́и в꙽ зако́нѣ моѷсїѻ҆вѣ и҆же да́нъ е҆сть ѿ г҃а і҆и҆л҃ева·
И҆ далъ е҆мꙋ цр҃ь сла́вꙋ, и҆ ꙗ҆́ко ѻ҆брѣлъ бл҃годаа́нїе въ в꙽семъ достоанїѝ и҆ желанїи пред̑ ни́мъ·
И҆ в꙽зыидо́ша в꙽кꙋпѣ с ни́мъ ѿ сн҃овъ і҆и҆л҃евъ и҆ сщ҃енник̑҇ и҆ левѷтъ.
и҆ сщ҃енно пѣв꙽цевъ цр҃ковных̑, и҆ вратарїи, и҆ рабѝ цр҃ковныа въ і҆ерс̑҇лимѣ·
Лѣта сед̑маго црс̑҇твꙋю҆щꙋ а҆ртаксерѯꙋ въ пѧ́тыи мс̑҇ць·
То лѣто сед̑мое е҆сть црс̑҇твꙋ и҆сходѧ́щїи ѿ вавѷлона новомѣ́сѧчныи пр́ьваго мс̑҇ца.
прїидо́ша въ і҆ерс̑҇ли́мъ, по да́нномꙋ им̑ по́спѣхꙋ в꙽ пꙋть ѿ г҃а, въ си́хъ б̂о е҆́здра вели́ко наказа́нїе въздръжа́ше.
дабы̀ не ѻ҆пꙋсти́лъ н̂икто им̑ и҆же бы́сть ѿ зако́на гн҃ѧ, и҆ повеленїи и҆хъ наѹча́щи весь і҆и҆л҃ь всеѧ̀ пра́вды и҆ сꙋ́да.
припада́ющаго пи́сан꙽наго повелѣнїѧ ѿ а҆ртаѯерѯа цр҃ѧ къ е҆́здрѣ сщ҃ен꙽никꙋ и҆ четцꙋ зако́на гн҃ѧ·
Є҆мꙋже е҆сть под̑писа́нїе под̑лежа́щее.
цр҃ь а҆ртаѯерѯъ, е҆зд̑рѣ сщ҃е́нникꙋ и҆ четцꙋ зако́на гн҃ѧ цѣлованїе чл҃колю́бїе а҆́зъ сꙋдѧ́и, повелх̑ѣ хотѧщим̑ ѿ ꙗ҆зы́ка і҆ѹ҆де́искаго, съ волею бл҃гою, ѿ сщ҃е́нникъ и҆ левѵт̑ и҆же сꙋть въ црс̑҇твїи мое҆м꙽, и҆тѝ с тобо́ю въ і҆ерс̑҇ли́мъ до і҆и҆л҃ѧ·
Є҆ли́ци ѹ҆бо въжделѣ́ютъ пои҆ти с тобо́ю, да събира́ютсѧ и҆ да по́идꙋтъ ꙗ҆́коже ѹ҆год̑но мн̂ѣ, и҆ сед̑мим̑ дрꙋгомъ мои҆м꙽ совѣтникомъ да посѣтѧ́тъ, и҆же дѣю́тсѧ въ і҆ѹ҆деѝ і҆ и҆ерс̑҇ли́мѣ дръжа́щи ꙗ҆́ко е҆сть въ зако́нѣ гн҃и.
и҆ да вно́сѧтъ да́ры г҃ꙋ і҆и҆л҃евꙋ, и҆же ѻ҆бѣщахъ, а҆́з же и҆ прїѧ́тели въ і҆ерс̑҇лим̑.
и҆ вс̂е зла́то и҆ сребро̀ чт̂о ѻ҆брѣтено бꙋ́детъ въ странѣ̀ въ ва́вилонѣ.
г҃ꙋ въ і҆ерс̑҇лимѣ съ даро́ваным̑ ѿ ꙗ҆зы́къ въ цр҃ковь г҃а б҃а их̑ и҆же е҆сть въ і҆ерс̑҇ли́мѣ·
да и҆збере́тсѧ т̂о зла́то и҆ сребро̀ къ ю́нцемъ, и҆ ѻ́вномъ и҆ а́гнецем̑, і҆ и҆же тѣмъ послѣдꙋ́ютъ·
да принесꙋтъ жрътвы г҃ꙋ на ѻ́лтарь г҃а б҃а и҆хъ и҆же есть въ і҆ерс̑҇ли́мѣ·
И҆ всѧ̀ е҆ли́каж̑ хо́щеши съ бра́тїею твоею съсътвори́ти зла́то и҆ сребро̀, совръши по во́ли и҆ по повелѣнїю г҃а б҃а твое҆го.
и҆ сщ҃ен̑҇наа ст҃аа сосꙋ́ды гн҃ѧ и҆же дана̀ сꙋть тебѣ̀, къ дѣ́лꙋ домꙋ г҃а б҃а твое҆го и҆же ес̑҇ въ і҆ерс̑҇ли́мѣ.
да положи́ши пред̑ гм҃ъ бм҃ъ твои҆мъ въ і҆ерс̑҇ли́мѣ·
И҆ про́чаѧ е҆ли́ка же а҆́ще тебѣ потребна бꙋ́дꙋтъ къ дѣломъ хра́мꙋ б҃а твое҆го.
да дасѝ ѿ црс̑҇каго сокро́вища а҆́зъ б̂о а҆ртаѯерѯъ цр҃ь повелѣ̀ стра́жемъ съкро́вища сѷрїискаго, и҆ финикїискаго, да е҆ли́коже пи́шет̑ е҆́здра сщ҃е́н꙽никъ и҆ чтецъ зако́на гн҃ѧ вы́шнѧго, любе́знѣ́ише да дастьсѧ е҆мꙋ, да́же до сребра̀ тала́нтъ, р҃.<.>
Та́коже и҆ до пшеницы, спꙋ́довъ р҃. и вина̀ до мѣръ, р҃. і҆ и́на е҆ли́ка же ѿ мно́жества вс̂ѧ по зако́нꙋ бж҃їю, да съвръши́тсѧ с поспѣшенїем꙽ бг҃ꙋ вы́шнемꙋ.
да не въста́нет̑ гнѣвъ на црс̑҇тво цр҃ево, и҆ сн҃овъ сн҃овомъ е҆го·
Ва́м же речетсѧ и҆ всѣмъ сщ҃е́н꙽ником̑ и левѷтомъ, и҆ щ҃е́ннымъ пѣвцемъ и҆ вра́тникомъ и҆ ра́бомъ цр҃кви и кꙋп꙽цем̑м̑, и҆ писцевъ цр҃кви то́ѧ·
Ни е҆ді́на да́нь, ниже е҆ді́ны и҆́ныѧ тѧготы̀ да не наставѧт̑сѧ и҆ ни́же и́мать никтож̑ ѻ҆́бласти ста́влѧти им̑м̑ ничто́же·
Ты же е҆́здра по премꙋдрости бж҃їей, поста́ви сꙋдїѧ да сꙋдѧтъ въ все́и сѷрїѝ и҆ финикїѝ.
и҆ всх̑ѣ и҆же зако́на б҃а твое҆го не зна́ютъ, і҆ и҆же зна́ют꙽ ѹ҆чѝ·
да и҆ вс̂и и҆же престꙋпѧ́тъ закон̑҇ бж҃їи и҆ црс̑҇кїи.
т꙽ще́но да ѻ҆сꙋдѧтсѧ, и҆ли смр҃тїю и҆ли мꙋче́нїем̑ и҆ли сре́бром̑ во забра́нїе, и҆ли из̑гна́нїем̑.
и҆ реч̑҇ е҆́здра писе́ц꙽·
Блс̑҇ве́нъ сам̑ е҆ді́нъ г҃ь б҃ъ ѿц҃ь моих̑ и҆же дал̑҇ сїю во́лю в꙽ срд̑це цр҃ево, просла́вити дом̑ е҆го и҆же е҆сть въ і҆ерс̑҇ли́мѣ.
и҆ менѐ бл҃гочествова пред̑ цр҃ем̑, и҆ совт̑ѣников꙽, и҆ прїѧтелїи и҆ вельмо́жъ е҆го·
И҆ а́зъ крѣпокъ срд̑цемъ сътворе́нъ бы́хъ по по́мощи г҃а б҃а мое҆го·
И҆ собрах̑ ѿ і҆и҆л҃ѧ мꙋж́и да въкꙋпѣ в꙽зыидꙋтъ е҆мꙋ.
и҆ тїи сꙋть пред̑статели по свое҆мꙋ ѿч҃ьствꙋ и҆ нача́лъствъ чс̑҇тныхъ и҆же со мно́ю и҆сходѧщїи ѿ вавѷлона въ црс̑҇тво а҆ртаѯер̑҇ѯа цр҃ѧ, ѿ сн҃овъ финее҆совых̑, гиръсо́нъ.
ѿ сн҃овъ и҆ѳара́мовых̑, гемаи҆лъ.
ѿ сн҃въ двд̑вых̑ лат꙽тс̑҇ꙋ сн҃ъ сехенїевъ.
ѿ сн҃овъ фаре́совых, заха́рїѧ, и҆ с ним̑ ѻ҆пи́саных̑ мꙋжїи, р҃н·
И҆ ѿ сн҃овъ фало́моновыхъ, а҆велїѧ, и е҆нїа́съ заха́рїин꙽, и҆ с ни́мъ мꙋж́їи с҃о.
ѿ сн҃овъ заѳꙋевъ, сехонїѧ е҆зеи҆левъ.
и҆ с ним̑ мꙋ́жїи, т҃. ѿ сн҃овъ а҆динови́ѳъ, і҆ѻ҆наѳꙋ́искаго, и҆ с ним̑ мꙋж́їи, с҃и.
ѿ сн҃овъ и҆ламовыхъ, і҆е҆сїа гоѳолїевъ.
и҆ с ни́мъ мꙋжїи о҃, ѿ сн҃овъ сафатїевыхъ, зарїѧ, махаи́льскїи и҆ с ни́мъ мꙋжїи, п҃. ѿ сн҃овъ і҆ѻ҆а҆в꙽вадїѧ, и҆е҆зи́лꙋ.
и҆ с ним̑ мꙋж́їи, св҃і.
ѿ сн҃овъ вани́довыхъ а҆саламо́ѳъ сн҃ъ е҆саѳїевъ.
и҆ с ни́мъ мꙋжїи, р҃ѯ, и҆ ѿ сн҃овъ вавїев꙽, захарїѧ, виваїа́скїи.
и҆ с нимъ мꙋжїи к҃и.
ѿ сн҃овъ а҆ста́ѳъ, и҆ѻ҆а́н꙽нъ, а҆ката́нъ, и҆ с нимъ мꙋжїи, р҃і.
ѿ сн҃овъ а҆доника́мовыхъ послѣднїи и҆ сїѧ сꙋть и҆мена̀ и҆хъ.
е҆лифала́мъ сн҃ъ е҆ве́ль и҆ ѻ҆ме́їа.
и҆ с ни́мъ мꙋжїи о҃. и҆ ѿ сн҃овъ ваѹ҆дїевыхъ и҆стакꙋр꙽скаго.
и҆ с ни́мъ мꙋжїи о҃. и҆ събра и҆хъ к рѣцѣ̀ и҆же нарица́етсѧ ѳеран̑҇ и҆ ѻ҆полчишасѧ тридне́вно здѣ̀·
и҆ поѹ҆чѝ и҆хъ, и҆ ѿ сн҃овъ сщ҃енникъ и҆ ѿ левѷтъ, не ѻ҆брѣто́хъ та́мъ.
и҆ посла̀ къ е҆леа҆зарю и҆ се прїидо́ша и҆ мазма́нꙋ, и҆ а҆лнаѳа́нꙋ и҆ самеа́ю, и҆ ѻ҆ри́вꙋ, наѳа́нꙋ, и҆ е҆ната́нꙋ, и҆ мосолъламо́нꙋ, води́телеи ѹ҆ченыхъ·
И҆ рекохъ и҆мъ да прїидꙋтъ къ дадею вожꙋ, и҆же бысть пред̑ мѣстомъ храни́лницы и҆ заповѣдавыи и҆збра́ти дод꙽де́ю, и҆ бра́тїи е҆го, и҆ тѣмъ и҆же въ мѣстѣ хранилникомъ.
да по́слетъ на́мъ и҆же сщ҃е́нъство въздадѧ́тъ в до́мъ г҃а б҃а на́шего.
и҆зведо́ша нам̑ по рꙋцѣ ѕѣлнѣ г҃а б҃а на́шего мꙋж́и ѹ҆чены.
ѿ сн҃овъ моѻ҆лы.
сн҃овъ левїинъ.
сн҃овъ і҆и҆л҃евыхъ.
севевїѧ, сн҃овъ и҆ бра́тїи, и҃і.
а҆з꙽вїѧ.
и҆ а҆минъ.
ѿ сн҃овъ сн҃овомъ хананее҆вымъ.
и҆ сн҃овъ и҆хъ мꙋ́жїи, к҃·
И҆ ѿ тѣхъ и҆же въ цр҃кви слꙋжа́хꙋ ꙗ҆́же да́де давы́дъ.
и҆ тїѝ нача́лницы къ дѣла́нїю левѷтъ цр҃кви слꙋжа́щи, с҃к·
Всѧж̑ и҆мена знаменова́н꙽на сꙋть въ писа́нїихъ.
и҆ ѻ҆бѣщахъ т̂ꙋ по́сть и҆ ю́ношамъ пред̑ гм҃ъ бм҃ъ на́шимъ.
да възы́щемъ ѿ него̀ бл҃гїи пꙋть нам̑ і҆ и҆же с на́ми бѣхꙋ.
и҆ сн҃омъ на́шим꙽ и҆ скотомъ.
ѹ҆срамих̑ бо сѧ въспроси́ти ѿ цр҃ѧ пѣшихъ и҆ ко́н꙽никъ провод̑никовъ, ради без̑скорбїѧ проти́вꙋ сꙋпоста́тъ на́шихъ·
Рекох̑ б̂о цр҃ю̀, ꙗ҆́ко си́ла г҃а на́шего е҆сть с ни́ми и҆же и҆́щꙋтъ е҆го всѣмъ жела́нїемъ.
и҆ паки возмолили е҆смы̀ г҃а б҃а на́шего по си́хъ·
И҆ бл҃го прошенїе на́ше полꙋчихом̑.
и҆ ѿлꙋчихъ ѿ народ̑ пред̑ста́тель и҆ сщ҃ен꙽никъ мꙋж́їи, в҃і.
и҆ е҆сельвїю, и҆ а҆самїю и҆ с ни́мъ ѿ братїи их̑ мꙋ́жїи, і҃. и҆ поставих̑ и҆хъ надъ зла́том̑м̑ и҆ сре́бром̑ и҆ сосꙋды сщ҃ен꙽ными домꙋ б҃а нашего.
и҆же даде цр҃ь и҆ совѣтницы е҆го и҆ нача́лницы.
весь же і҆и҆л҃ь ста́выи.
преда́хъ и҆мъ сребра̀ талан̑҇тъ х҃н.
и҆ сосꙋдъ сребрѧ́ных̑ тала́н꙽тъ, р҃. и҆ зла́та талан꙽тъ, р҃. и҆ сосд̑ꙋ позлащеных̑, к҃. и҆ сосд̑ꙋ мѣ́дѧныхъ ѿ и҆збран꙽ныа мѣ́ди блещащасѧ златовид̑не, в҃і, и҆ рекохом̑ и҆мъ.
и҆ в̂ы ст҃и е҆сте г҃ꙋ.
и҆ сосꙋды сꙋть ст҃ы.
и҆ зла́то и҆ сребро̀ ѻ҆бѣща́нно ес̑҇ г҃ꙋ бг҃ꙋ ѿц҃ь нашихъ.
бди́те и҆ съхраните до́ндеже въздади́те вы̀ ѿ наро́дъ предъста́телемъ и҆ сщ҃ен꙽никомъ и҆ левѷтомъ и҆ нача́л꙽никомъ гра́довъ і҆и҆л҃евъ въ і҆ерс̑҇ли́мѣ въ сосꙋдохранителницы до́мꙋ б҃а нашего.
и҆ тїи же прїѧ́ша сщ҃ен꙽ницы и҆ левѷти зла́то и҆ сребро̀ и҆ сосꙋды.
възнесоша въ і҆ерс̑҇лім̑ въ цр҃ковь гн҃ю·
І҆ и҆до́хомъ ѿ рѣкѝ ѳе́ра, дн҃ѧ в҃і, мс̑҇ца, а҃. внидо́хом̑ въ і҆ерс̑҇лимъ съ крѣпкою рꙋко́ю г҃а нашего и҆же съ на́ми, і҆ и҆збави насъ г҃ь ѿ и҆схо́да пꙋтѝ ѿ всѣхъ вра́гъ, и҆ прїидо́хомъ въ і҆ерс̑҇лимъ.
и҆ е҆гда бысть здѣ тре́тїи дн҃ь, въ д҃ же дн҃ь мѣ́рено зла́то и҆ сребро̀, и҆ предано е҆сть в до́мъ г҃а б҃а нашего.
мармо́ѳѣ сн҃ꙋ и҆ѻ҆рїинꙋ сщ҃ен꙽ничю.
и҆ с ни́мъ был̑҇ е҆леа҆за́ръ сн҃ъ финее́сов̑҇.
и҆ бѧ́хꙋ с ни́ми савадо́съ сн҃ъ и҆сꙋсов꙽ и҆ моиѳъ саван꙽ни сн҃ъ, котлы́ же числом̑ и҆ к мѣрѣ всм̑ѣ, пи́сана е҆сть вс̂ѧ вага̀ и҆хъ в то́и ча́съ·
І҆ и҆же прїидо́ша ѿ плѣне́нїѧ.
принесо́ша жрътвꙋ б҃ꙋ і҆и҆л҃евꙋ, ю҆́нець в҃і.
за весь і҆и҆л҃ь.
ѻ́венъ ѕ҃, а҆гнецъ, о҃в, козло́въ в҃і.
за сп҃сенїе, вс̂ѧ въ жрътвꙋ гн҃ю, и҆ ѿда́ша заповѣди цр҃вы и҆ ц҃ревымъ расмотри́телем̑ и҆ е҆па́р꙽хом̑, селъ сѷрїи и҆ финикїи, и҆ чествоваша̑ ꙗ҆зы́ки и҆ цр҃ковь гн҃ю, и҆ съвръше́но симъ пристꙋпи́ша къ мнѣ предъста́тели рекꙋщи.
не ѿлꙋчи́сѧ ро́дъ і҆и҆л҃евъ·
И҆ нача́лницы, и҆ сщ҃енницы, и҆ левѷти, и҆ноплеме́ннїи ꙗ҆зы́цы, и҆ ро́ди зе́м꙽стїи, и҆ нечистоты̀ ѿ ро́довъ ханане́ѻвъ, и҆ хетъѳе́ѻвъ, и҆ ѳерезе́ѻвъ, и҆ е҆вꙋсе́ѻвъ и҆ моа҆ви́товъ, и҆ е҆гѷптѧнъ і҆ и҆дꙋме́ѻвъ, и҆ сложе́ни б̂о сꙋть дще́ри и҆хъ и҆ сн҃ове и҆хъ, и҆ мѣша́но е҆сть сѣмѧ ст҃ое къ и҆ноплемен꙽ником̑ ꙗ҆зык̑҇ зем꙽скихъ, и҆ ча́стницы быша пред̑ста́тели и҆ вельмо́жи безако́нїѧ сего ѿ нача́ла ве́щи и҆ скоро посе́мъ слы́шахъ т̂а, раздра́хъ ѻ҆дѣѧ́нїѧ и҆ сщ҃еннꙋю ризꙋ, и҆ раз̑дира́юще вла́сы главы̀ и҆ бра́ды, и҆ седѣхъ ско́рбенъ и҆ печаленъ, и҆ събра́шесѧ къ мнѣ̀ е҆ли́коже тогда̀ придвиза́хꙋсѧ въ сло́во г҃а б҃а і҆и҆л҃ева со мно́ю пла́чющи на безако́нїе т̂о, и҆ сѣдѧх̑ ско́рбен̑҇ даже до вечернеи жрътвы, и҆ въстах̑ ѿ поста раздра́на и҆мѣ́ющи ѻ҆дѣѧ́нїѧ и҆ сщ҃еннꙋю ри́зꙋ, и҆ преклоних̑ колѣнѣ и҆ простира́ющи рꙋцѣ къ г҃ꙋ реко́хъ·
Ги҃ постыдѣхсѧ и҆ ѹ҆срами́х꙽сѧ пред̑ лице́мъ твои҆мъ.
грѣси б̂о наши ѹ҆мно́жишасѧ на глава́хъ на́шихъ.
и҆ безако́нїѧ на́ша въздвиго́шасѧ да́же до нб҃си е҆щѐ ѿ вре́менъ ѿц҃ъ на́шихъ е҆смы̀ въ вели́цѣ грѣсѣ да́же до дн҃е сего.
и҆ ра́ди грѣ́хъ на́ших̑ и҆ ѿц҃ъ на́ших̑ е҆смы̀ преда́ни съ бра́тїѧми на́шими съ цр҃ьми и҆ съ сщ҃ен꙽ники на́шими цр҃емъ зе́м꙽нымъ въ ме́чь.
и҆ плѣне́нїе и҆ въ грабле́нїе съ стꙋде́нїемъ да́же до дне́шнѧго дн҃е·
И҆ нн҃ѣ коли́ко е҆сть чт̂о слꙋчи́сѧ на́мъ млрс̑҇дїе ѿ тебѐ г҃и б҃е.
и҆ ѻ҆ста́ви намъ ко́рень, і҆ и҆мѧ в꙽ мѣсто ст҃ое твое е҆же ѿкры́ти свѣтлость.
в꙽ домꙋ̀ г҃а б҃а на́шего, дати намъ пи́щꙋ въ всѐ вре́мѧ рабо́ты на́шеѧ, и҆ е҆гда̀ слꙋжа́хомъ не бы́хомъ ѻ҆ста́влени ѿ г҃а б҃а на́шего, но постави насъ въ бл҃годаѧ́нїе пред̑ цр҃емъ пе́рьскимъ дати намъ пи́щꙋ, и҆ прославити цр҃ковь г҃а нашего, и҆ съѕидати пꙋсты́ню сїѻ́ньскꙋ дати намъ неподвижи́мꙋ въ і҆ѹ҆де́и і҆ерс̑҇лимѣ, нн҃ѣ чт̂о рече́мъ г҃и и҆мѣ́ющи сїѧ, престꙋпи́хомъ б̂о повеле́нїѧ твоѧ̀ ꙗ҆́же далъ е҆си в рꙋ́ки ѻ҆́трокомъ твоим̑ прро̑҇комъ гл҃ющи·
Ꙗ҆́ко землѧ̀ е҆сть в ню́же въхо́дите въздержати достоѧ́нїе е҆ѧ̀, землѧ̀ ѻ҆сквернена е҆сть поро́комъ и҆ноплеме́нныхъ зе́мль, и҆ нечисто́тъ и҆хъ и҆спо́лнишасѧ, и҆ нн҃ѣ дще́ри ваша не сложи́те сн҃омъ и҆хъ, и҆ дще́ри и҆хъ не прїемли́те сн҃овомъ вашимъ, и҆ не в꙽зыщи́те ми́ръ и҆мѣти с ни́ми въ всѐ вре́мѧ, да ѹ҆крѣпи́в꙽шесѧ ꙗ҆ди́те предо́брыа землѝ, и҆ достоѧ́нїе раздѣлѧ́ите сн҃овомъ вашим̑ даже до́ вѣка·
І҆ и́же слꙋчатсѧ нам̑, всѧ̀ сътво́рѧтсѧ ради дѣ́лъ на́ших̑ лꙋка́вых̑, и҆ вели́кихъ грѣ́хъ на́ших̑, т̂ы бо г҃и ѻ҆блег꙽чи́лъ грѣхѝ на́ша, и҆ да́лъ е҆си на́мъ сїи ко́рень, и҆ па́ки ѻ҆брати́лисѧ е҆смы̀ престꙋпи́ти зако́н꙽наа твоѧ̀, ꙗ҆́ко помѣша́емсѧ нечистота́ми и҆ноплеме́нныхъ ꙗ҆зы́къ зе́мъскихъ, не гнѣ́ваеши ли сѧ погꙋби́ти насъ до́ндеже не ѻ҆ста́нетсѧ ко́рень і҆ и҆мѧ на́ше·
Ги҃ б҃е і҆и҆л҃евъ и҆́стинен̑҇ е҆си, и҆ ѻ҆ста́ б̂о сѧ ко́рень да́же до дне́шнѧго дн҃е·
Се нн҃ѣ е҆смы̀ пред̑ тобо́ю въ безако́нїих̑ на́шихъ, нѣсть па́ки ста́ти пред̑ тобо́ю в си́хъ·
И҆ е҆гда̀ пребыва́ше и҆сповѣда́ющисѧ е҆́здра, пла́чющи на земли ниць просте́ртъ пред̑ цр҃ковїю·
Съвокꙋпишасѧ пред̑ ним̑ ѿ і҆ерс̑҇лима народ̑ вели́къ ѕѣ́ло, мꙋж́и и҆ же́ны и҆ ю́ноша и҆ ю́ноши, пла́чь б̂о бы́сть вели́къ в то́мъ мно́жествѣ, и҆ възопѝ и҆е҆хонїѧсъ и҆е҆л꙽левъ ѿ сн҃овъ і҆и҆л҃ев꙽, рече е҆́здрѣ, м̂ы ѹ҆ г҃а б҃а съгрѣши́хомъ и҆же възлюби́хомъ нам̑ сва́дьбꙋ жены̀ и҆ноплеме́нных̑ ѿ ꙗ҆зы́къ землѝ·
И҆ нн҃ѣ ѹ҆бо е҆сть над̑ тобо́ю ве́сь і҆и҆л҃ь, в си́хъ б̂о да бꙋ́детъ клѧ́тва ѿ г҃а.
и҆згна́ти всѣ́хъ же́нъ нашихъ, и҆же ѿ и҆ноплеме́нныхъ сꙋть съ ча́ды и҆хъ·
Ꙗ҆́ко тебѣ̀ повелѣ́но е҆сть ѿ бо́лшихъ по зако́нꙋ гн҃ю.
въста́ющи проповѣж́дь, к тебѣ пристои҆тъ дѣ́ло.
и҆ м̂ы с тобо́ю е҆смы̀, мꙋжестве́нно сътвори́мъ, и҆ въстав̑҇ е҆́здра, заклѧ̀ началниковъ сщ҃ен꙽ническихъ и҆ левѷтъ, и҆ всего і҆и҆л҃ѧ сътворити по семꙋ̀ клѧ́шасѧ·
Глв̑҇а, ѳ҃·
И въста̀ е҆́здра ѿ притво́ра цр҃кви и҆детъ въ сосꙋ́дохрани́лницꙋ, и҆ѻ҆анановꙋ сн҃а е҆лїаси́вова, чрез̑ но́щь т̂ꙋ не в꙽кꙋшаше хлѣ́ба, ни пи́тъ воды̀, рыдаѧ на безако́нїѧ мно́жествъ, и҆ бы́сть проповѣданїе въ все́и і҆ѹ҆де́и, і҆ерс̑҇лимѣ, всѣ́мъ и҆же бѧ́хꙋ ѿ плѣне́нїѧ, е҆же въ і҆ерс̑҇лимѣ събра́тисѧ да ко́ждо и҆же не въстече́тъ въ два̀ и҆ли тр̂идн҃и по сꙋ́дꙋ пред̑сѣдѧ́щихъ ста́рецъ.
во́зметсѧ и҆мѣнїе и҆хъ.
и҆ то́и чюжь ѻ҆сꙋди́тсѧ въ мно́жествѣ плѣне́нїѧ.
и҆ събра́ни сꙋть вси и҆же бѧ́хꙋ ѿ колѣ́на і҆ѹ́дина и҆ венїами́нова.
въ г҃. дн҃и.
въ і҆ерс̑҇лим̑.
то́и мс̑҇ць е҆сть ѳ҃, к҃, дн҃ѧ мс̑҇ца·
и҆ сѣдо́ша всѧ̀ мно́жества на простра́н꙽ствїи цр҃ков꙽нѣ дрожа́щи ради зимы̀ настоѧщїѧ·
И҆ въста̀ е҆́здра реч̑҇ и҆мъ.
в̂ы безаконно сътвори́ли е҆сте възлюби́сте вамъ въ сва́дьбꙋ жены̀ и҆ноплеме́н꙽ныхъ, да прида́сте къ грѣхꙋ̀ і҆и҆л҃ѧ·
И҆ нн҃ѣ да́ите и҆сповѣда́нїе вели́чествꙋ сла́вы г҃а б҃а ѿц҃ъ на́шихъ.
и҆ съверши́те во́лю е҆го и ѿлꙋчи́тесѧ ѿ ꙗ҆зы́къ зе́мныхъ, и҆ ѿ же́нъ и҆ноплеме́н꙽ныхъ·
И възопѝ вс̂е мно́жество, и҆ реко́ша гла́сомъ вели́кимъ ꙗ҆́ко ре́клъ е҆си сътворим̑.
н̂о мно́жество вели́ко е҆сть, и҆ вре́мѧ зи́мны.
и҆ не мо́жемъ на пособле́нїе ста́ти.
и҆ т̂о дѣ́ло нѣ́сть намъ е҆ді́наго дн҃е ни двꙋ̀.
мно́го б̂о в том̑ съгрѣши́хомъ, да ста́нꙋтъ же и҆ прд̑еста́тель мно́жество.
и҆ всѣ и҆же с на́ми ѻ҆бита́ютъ.
коли́ко и҆хъ и҆мѣют̑ же́ны и҆ноплеме́нныѧ да бꙋдт̑ꙋ прїа́ти вре́мѧ, и҆ ѿ всѧ́кого мѣста презви́тери и҆ сꙋдїи, до́ндеже ѿрѣшат̑ гнѣ́въ гн҃ь повеле́нїѧ того·
И҆ѻ҆наѳа́съ же сн҃ъ а҆заи҆левъ, и҆ѻ҆зїѧ ѳоканꙋевъ сн҃ъ, прїѧ́ша по семꙋ̀, и҆ мосол̑҇ла́мъ и҆ леви́съ, и҆ сав꙽ватїи въкꙋ́пѣ съдѣла́ни сꙋть с ни́ми·
И҆ поста́виша посемꙋ̀ всѧ̀ и҆же бѧ́хꙋ ѿ плѣне́нїа·
І҆ и҆збра́въ себѣ̀ мꙋжи е҆́здра сщ҃ен꙽никъ нача́лницы ѿ ѻ҆ц҃ъ и҆хъ по и҆менахъ, и҆ засѣдо́ша въкꙋпѣ новомѣсѧчїѧ, і҃, мс̑҇ца, и҆спыта́ти дѣ́ло т̂о, і҆ и҆спыта́но е҆сть коне́чно ѻ҆ мꙋ́жихъ и҆же и҆мѧ́хꙋ же́ны и҆ноплеме́нныи, да́же до новомѣсѧчїѧ пе́рваго мс̑҇ца, и҆ ѻ҆брѣте́ни сꙋть ѿ сщ҃енникъ премѣша́нїи и҆же и҆мѧ́хꙋ же́ны и҆ноплеме́нныи, ѿ сн҃овъ і҆сꙋсовъ сн҃овъ и҆ѻ҆седе́ковых̑ и҆ бра́тїи и҆хъ маѳи́лы и҆ е҆лїаза́ръ, и҆ ѻ҆ри́въ, и҆ ѻ҆а҆да́нъ, и҆ възложи́ша рꙋ́ки да и҆зго́нѧтъ же́ны своѧ̀·
И҆ къ жертвѣ на възноше́нїе ѻ҆́вна за нечистотꙋ свою, и҆ ѿ сн҃овъ е҆м꙽мировъ, а҆на́нїа и҆ завдаи҆ѻ҆нъ, и҆ а҆ни́нъ, и҆ самїѻ́нъ, и҆ е҆реи́ль, и҆ а҆зарїѻ҆нъ, и҆ ѿ сн҃овъ фесꙋровъ е҆линас̑҇ масїа е҆змаил̑҇ и҆ наѳанаил̑҇ і҆ ѻ҆киди́лъ, и҆ тал꙽са́съ.
и҆ ѿ левѵт̑, і҆ѻ҆равадо́съ, и҆ семи́съ, колїѻ́съ, и҆ колита̀, и҆ паѳеѻ́съ, і҆ ѻ҆ѹ҆дасъ, і҆ ѻ҆насъ·
И҆ ѿ сщ҃е́нно пѣвце́въ, е҆лїазꙋвъ, вак꙽хꙋръ.
и҆ ѿ дверник꙽, сал꙽лꙋмꙋсъ, и҆ толванис̑҇, и҆ ѿ і҆и҆л҃ѧ.
ѿ сн҃овъ форо́совъ, і҆ерма́съ, і҆ед꙽дїа и҆ мелхїѧ, и҆ маи҆лъ, і҆ е҆леа́заръ, и҆ а҆сивїѧ, и҆ ван꙽неа́съ·
И҆ ѿ сн҃овъ и҆е҆ла̀, мам꙽ѳанїе, и҆ заха́рїѧ, и҆е҆реи҆лосъ, и҆ е҆ремо́ѳъ, и҆ а҆дъдїѻ́съ·
И҆ ѿ сн҃овъ замоѳовыхъ, е҆лїада, и҆ е҆лисимꙋсъ, ѻ҆ѳонїѧ, и҆а҆римо́ѳъ, саватос̑҇, и҆ сардїѧ·
И҆ ѿ сн҃въ вива́и і҆ѻ҆а́н꙽нъ, и҆ а҆нанїѧ, і҆ и҆ѻ҆сафадосъ, и҆ е҆маѳи́съ·
И҆ ѿ сн҃овъ манїевыхъ, ѻ҆ламо́съ и҆ мамꙋхосъ, и҆е҆д꙽де́и, и҆а́сꙋвъ, и҆ а҆саи́лъ, и҆ е҆ремоѳ̑҇·
И҆ ѿ сн҃въ а҆д꙽динъ, наа҆ѳосъ, и҆ моѻ҆сїѧ, и҆ лакꙋносъ, и҆ наидъ, маѳасенїѧ, и҆ сес꙽ѳиль, и҆ ва́лнꙋи, и҆ манасе́ѧ·
И҆ ѿ сн҃овъ а҆́ны е҆леѻ́нас̑҇, и҆ а҆се́и, и҆ мелхїа и҆ сав꙽ве́и, и҆ сим꙽монъ, хосамеѻ́съ.
И҆ сн҃овъ а҆сомовыхъ, а҆лтане́и, и҆ мат̑ѳїи, и҆ ване́ѧ, и е҆лифалатъ, и҆ манасїѧ, и҆ семе́и·
И҆ сн҃овъ маа́нїин̑҇, е҆ремїѧ, и҆ мом꙽дїи, и҆ ѻ҆маи҆росъ, и҆ и҆ѹ҆и́ль, мама́и, и҆ педїа́съ, и҆ а҆нос̑҇, и҆ равасїѻ́нъ, и҆ е҆насїѻ́съ, и҆ мамнѝ, матанаи҆мъ, и҆ е҆лесїаси́съ, ванꙋсъ е҆лїѧ, лисами́съ, селемїѧ, наѳа́нїи·
И҆ ѿ сн҃овъ ѻ҆зора е҆всеси́съ, е҆зри́ль, а҆заи́лосъ, зам꙽врис̑҇, і҆ѻ҆сифосъ·
И҆ ѿ сн҃овъ е҆́ѳмы, мазитїа, завадаи҆ас̑҇, и҆деѻс̑҇, і҆ѹ҆и́ль, фанеас̑҇·
Вс̂и тїѝ ѿложи́ша себѣ же́ны и҆ноплеменныѧ.
и҆ ѻ҆ста́виша их̑ съ сн҃ьми.
и҆ всели́шасѧ сщ҃е́нницы и҆ левѷти, и҆же бѧ́хꙋ ѿ і҆и҆л҃ѧ въ і҆ерс̑҇ли́мѣ, та́кожде и҆ въ стра́нахъ, новомѣсечїа, з҃, мс̑҇ца·
И҆ бѧ́хꙋ сн҃ове і҆и҆л҃еви въ ѻ҆би́телехъ свои҆хъ.
и҆ собра́нно е҆сть вс̂е мно́жество е҆ді́нодꙋшно.
на простра́нъство и҆же е҆сть ѿ восто́ка врат̑ сщ҃е́нных̑·
И҆ реко́ша е҆́здре а҆рхїере́ю и҆ четцꙋ, да принесетъ зако́нъ моѷсеѻ҆въ и҆же преда́нъ ѿ г҃а б҃а і҆и҆л҃ева·
И҆ принесѐ е҆́здра а҆рхїере́и закон̑҇ всемꙋ̀ мно́жествꙋ.
ѿ мꙋжа да́же до жены̀ и҆ всѣмъ сщ҃е́н꙽никомъ слы́шати зако́нъ новомѣсечїа, з҃, мс̑҇ца.
и҆ чтѧ́ше на простра́ньствѣ и҆же е҆сть пред̑ сщ҃е́н꙽ными вра́ты цр҃ковными.
ѿ ѹ́тра да́же до полꙋ́дни.
пред̑ мꙋж꙽ми же и҆ жена́ми.
и҆ даша всѣхъ чюв꙽ства къ зако́нꙋ·
И҆ ста̀ е҆́здра сщ҃е́нникъ и҆ чтецъ зако́на на древѧном̑ а҆м꙽бо́нѣ, и҆же съдѣла́нъ бы́сть.
и҆ ста́ша при немъ мат꙽гаѳїѧ, и самꙋсъ, и҆ а҆нанїѧ, а҆за́рїѧ, ѹ҆́рїѧ, е҆зекїа, и҆ валаса́ма, и҆ съ десны́ѧ и҆ съ лѣвы́ѧ страны̀, фал̑҇де́и, и҆ саи́ль, мельхїѧ, а҆ѻ҆ѳасꙋвъ, наварїѧ·
И҆ въспрїѧ е҆́зра кни́гꙋ зако́на пред̑ всѣмъ мно́жеством̑ превы́ше б̂о стоѧ́ше въ сла́вѣ предъ всѣми·
И҆ е҆гда̀ ꙗ҆́ви́лъ зако́нъ, всѝ прѧ́мо ста́хꙋ.
і҆ блс̑҇ви е҆́здра г҃а б҃а вы́шнѧг̑҇.
б҃а саваѻ́ѳа всѐдержителѧ и҆ ѿвѣща̀ весь народ̑, а҆ми́нь.
и҆ възъдви́гше го́рѣ рꙋки, и҆ па́дающи на́ земли поклони́шасѧ г҃ꙋ·
І҆сꙋсъ і҆ а҆нс̑҇ꙋ и҆ саравїѧ.
и҆ а҆диносъ, і҆ и҆а́ковъ, и҆ саватеи, и҆ а҆ѳеи, и҆ меа҆не́и, и҆ калитас̑҇, и҆ а҆зарїѧ, і҆ ѻ҆а҆завдо́съ, і҆ а҆нанїасъ, и҆ вїата́съ, левѷти и҆же ѹ҆ча́хꙋ зако́нꙋ гн҃ю.
и҆ въ мно́жествѣ чтѧ́хꙋ зако́нъ гн҃ь, и҆ гл҃ахꙋ въкꙋпѣ и҆же разꙋмѣа́хꙋ чте́нїѧ·
И҆ рече а҆ѳарат̑ е҆́здрѣ а҆рхїере́ю и҆ четцꙋ и левѷтомъ и҆же ѹ҆чахꙋ мно́жество гл҃ющи, дн҃ь се́и ст҃ъ е҆сть г҃ꙋ.
и҆ вс̂и пла́кахꙋ е҆гда̀ слы́шахꙋ зако́нъ.
и҆ реч̑҇ е҆́здра, ѿшед̑ше ѹ҆бо ꙗ҆ди́те т̂ꙋ тꙋчныѧ, и҆ пїите слад̑каѧ, и҆ посли́те ѿ ни́хъ тѣмъ и҆же не и҆мѣ́ютъ.
ст҃ъ б̂о ес̑҇ зд̂ѣ дн҃ь гн҃ь.
и҆ не моѕи́те печа́лни бы́ти.
г҃ь ѹ҆бо просвѣти вас̑҇.
и҆ левѷти воз̑брани́ша всемꙋ̀ сонмꙋ гл҃щи.
дн҃ь се́и ст҃ъ ес̑҇ гв҃и.
не моѕи́те скоръбни бы́ти·
І҆ и҆до́ша вс̂и ꙗ҆́сти и҆ пити и҆ пирова́ти и҆ да́ти ѿ ни́хъ ꙗ҆́же не и҆мѣ́ютъ да пирꙋ́ютъ.
и҆ радова́тисѧ ѕѣло мно́го, е҆щѐ б̂о слове́съ прїа́ша ѹ҆ча́щесѧ по́лезных꙽, и҆ прирасти́шасѧ въ гл҃ехъ и҆́хже ра́ди собрашасѧ·
Конецъ вто́рымъ кни́гамъ е҆́здрынымъ.
и́мать в себѣ̀, глв̑҇а, ѳ҃·