Библия (1581). [17] 3 Ездры

ТРЄ́ТЇЄ КНИ́ГИ Є҆ЗДРЫ

ГЛАВА̀· А҃

Вторы́е кни́ги е҆́здры прро̑҇ка, сн҃а зара́їе҆ва.

сн҃а а҆зарїева сн҃а е҆лихїева сн҃а са́данїева сн҃а садокова, сн҃а а҆хитова сн҃а а҆хїева, сн҃а финее҆сова, сн҃а гее҆лїева, сн҃а а҆марїева, сн҃а а҆фїе҆ва.
сн҃а маримо́това.
сн҃а а҆рна́ева сн҃а ѻ҆зїева, сн҃а вори́ѳова.
сн҃а а҆висе́ева.
сн҃а финее҆сова.
сн҃а е҆леа҆за́рова.
сн҃а а҆а҆ро́нова, ѿ колѣ́на левѷи и҆же быс̑҇ ю҆́зникомъ в꙽ землѝ мед̑скои, въ црс̑҇тво а҆ртаѯерѯа цр҃ѧ прь́скаго·

Бы́сть сло́во гн҃е къ мнѣ си́це, и҆дѝ и҆ възвѣсти лю́демъ мои҆мъ дѣ́ла их̑, и҆ лꙋка́в꙽ствїе и҆хъ е҆же сътвори́ша, да възвѣстѧ́тъ и҆хъ сн҃овомъ своим̑ ꙗ҆́ко грѣхѝ рож꙽шихъ и҆хъ ѹ҆мно́жишасѧ.
поне́же менѐ ѻ҆ста́виша, и҆ жрѧ́хꙋ бг҃омъ чю́ждимъ·

Є҆да ли не а҆́зъ и҆зведо́хъ их̑ и҆з꙽ землѝ е҆гѷпет꙽скїѧ ѿ до́мꙋ рабо́ты<.>

Тїи же прогнѣ́ваша м̂ѧ, и҆ совѣти моѝ ѹ҆ничижи́ша·

Того же ра́ди ѻ҆стрижѝ вла́сы главы̀ твое҆ѧ, и҆ верзи на ни́х꙽ всѧ ѕла́ѧ, и҆же не послꙋшаша зако́на мое҆го, и҆ лю́дїе же бѣша ненаказа́н꙽ни и҆ доко́лѣ же трьплю̀ и҆мъ, и҆́мже и҆з꙽ꙗ҆ви́хъ всѧ̀ бл҃гаѧ·

Низложих̑ и҆хъ ради мно́жество цр҃еи, и҆ порази́хъ фараѻ́на съ люд̑ми е҆го, и҆ съ всѣми во́и е҆го·

И҆ всѧ̀ ꙗ҆зы́ки ѿ лица̀ и҆хъ погꙋби́хъ, и҆ на въсто́цѣ же двѣ ѻ҆́бласти людїи тѷрскихъ и҆ сидо́н꙽скихъ распраши́хъ и҆ поби́хъ всх̑ѣ враго́въ их̑, ты же гл҃и к ни́мъ си́це·

Та́ко гл҃етъ г҃ь, а҆́зъ в̂ы преведо́хъ скво́ѕѣ мо́ре, и҆ ѹ҆гото́вахъ вамъ пꙋть бл҃гъ и҆значала, и҆ дахъ ва́мъ моѷсїѧ во́жда, и҆ а҆а҆ро́на въ і҆ере́ѧ, и҆ да́хъ вамъ свѣтъ въ сто́лпѣ ѻ҆́гненѣ, и҆ сътвори́хъ въ васъ чюдеса̀ ве́лїѧ, вы же мене забы́сте, реч̑҇ г҃ь·

Та́ко гл҃ет̑ г҃ь вседержи́тель, крастели бы́ша вам̑ въ знаменїе, и҆ да́хъ вам̑ по́лкы въ защище́нїе, вы же и҆ та́мо ропта́сте.
и҆ не радова́стесѧ ѻ҆ и҆мени мое҆мъ, побѣды ради враго́въ ва́ших̑ н̂о ропта́сте да́же и҆ до нн҃ѣ, и҆ где ст̑ꙋ бл҃гости и҆же вамъ творѧ́хъ·

Є҆да ли не въ пꙋсты́ни, въ вре́мѧ в не́же а҆лка́сте въ а҆л꙽чбѣ въпїю́щи къ мнѣ̀ гл҃ѧ, чесо ра́ди и҆зведе нас̑҇ въ пꙋсты́ню сїю погꙋби́ти·

Лꙋчше бо б̂ѣ намъ рабо́тати е҆гѷптѧномъ, нежели ѹ҆мрѣти въ пꙋсты́ни се́и·

Є҆да ли не млрс̑҇дова́хъ ѻ҆ слеза́хъ ва́шихъ, и҆ не дахъ л̂и ва́мъ маннꙋ въ пищꙋ, и҆ ꙗ҆до́сте хлѣбъ а҆гг҃лъскїи·

Є҆гдаж̑ бѣсте жаждꙋще, не разсѧде ли сѧ ка́мень, и҆ потеко́ша ва́мъ ѻ҆билъны во́ды, не ли́ствїемъ л̂и защитѧ́хъ в̂ы ѿ зно́ѧ, и҆ не да́хъ л̂и ва́мъ въ наслѣдїе зе́млю ѻ҆билнꙋ, і҆ не и҆згнах̑ лѝ ѿ лица ва́шего ханане́ѻв̑҇ и҆ ферезеѻ́въ, и҆ филистимлѧнъ, и что́ же боле́и вам̑ сътворю̀ рече г҃ь·

Та́ко гл҃тъ г҃ь вседръжи́тель, е҆гда̀ бѣ́сте въ пꙋсты́ни, на рѣцѣ а҆м꙽море́истѣ и҆ жа́ждꙋщи и҆ хꙋлѧще и҆мѧ мое, н̂о не пож꙽гохъ в̂ы ѻ҆гнемъ хꙋле́нїѧ ради ва́шего.
н̂о влага́ющи дре́во въ во́дꙋ сътворих̑ вам̑ во́дꙋ слад̑кꙋ.
что́ же бо́лее сътворю т̂и ѽ і҆а́кове, не въсхотѣлъ б̂о е҆си послꙋшати і҆ѹ́до.
прїидꙋ б̂о къ прочїимъ ꙗ҆зы́комъ и҆мже да́мъ и҆мѧ мое да съблюдꙋтъ зако́нъ мои.
понеже в̂ы ѻ҆ста́висте м̂ѧ, и҆ а́зъ ѻ҆ста́влю в̂ы.
и҆ просѧщим̑ ва́мъ млс̑҇ти, не ѹ҆милю́сѧ.
и҆ е҆гда̀ въз꙽звоте м̂ѧ и҆ а́зъ не ѹ҆слы́шꙋ в̂ы.
рꙋ́цѣ б̂о ва́ши по́лны кро́ви, но́ѕѣ же ва́ши ско́ры на ѹ҆бїенїе, и҆ ѻ҆ста́висте не менѐ, н̂о себѐ гл҃ет̑ г҃ь.
та́ко гл҃етъ г҃ь вседръжи́тель, е҆да̀ л̂и аз̑ не моли́хъ ва́съ ꙗ҆́коже ѿц҃ъ сн҃ы, и҆ ꙗ҆ко мт҃и дще́рїи, и҆ли ꙗ҆́ко доѧ́щїѧ ѻ҆тро́чатъ свои҆хъ.
да бꙋ́дете м̂и въ лю́ди, и҆ а́зъ вам̑ въ б҃а, и҆ в̂ы мн̂ѣ въ сн҃ы, и҆ а́зъ ва́мъ въ ѿц҃а·

Собирахъ в̂ы ꙗ҆ко коко́шъ птенца своѧ̀ под̑ кри́лѣ своѝ.
нн҃ѣ же чт̂о сътворю вам̑ ѿве́ргꙋ в̂ы ѿ лица̀ мое҆го.
и҆ е҆гда̀ принесете жрътвꙋ, ѿвра́щꙋ ѿ вас̑҇ лицѐ мое.
възненави́дѣхъ б̂о пра́здники ва́ша и҆ новомѣсѧчїѧ, и҆ ѻ҆брѣза́нїѧ ва́ша.
послах̑ б̂о къ ва́мъ рабы моѝ про̑҇рки их̑же ꙗ҆́сте и҆ ѹ҆би́сте, и҆ телеса̀ их̑ на ча́сти раз꙽сѣко́сте, и҆́хже кро́ви а҆́зъ възы́щꙋ гл҃етъ г҃ь·

Та́ко гл҃ет̑ г҃ь вседръжи́тель, дом̑ ва́шъ пꙋстъ бꙋдт̑е і҆ и҆звръгꙋ в̂ы ꙗ҆́коже вѣтръ возмѣта́етъ прах̑.
и҆ сн҃ы ва́ша не ро́дѧт̑ чад̑.
поне́же ѻ҆ста́виша за́повѣди моѧ̀, и҆ лꙋка́вое сътвори́ша предо мно́ю.
да́мъ домы̀ ва́ша лю́демъ грѧдꙋщимъ, и҆же не слы́шаша м̂ѧ ѹ҆вѣрѧтъ и҆ пред̑ ни́ми же чюдесъ не твори́хъ, ѻ҆ни сътворѧт̑ е҆ли́ка повелѣхъ, не вѣдꙋще про̑҇ркъ моих̑, воз̑гнꙋша́ют̑сѧ лꙋка́въствъ всои҆хъ·

Нн҃ѣ же хощꙋ̀ възвѣстити сла́вꙋ лю́дїи грѧдꙋщихъ, и҆хже ѻ҆́троки веселѧ́тсѧ съ радостїю, ѻ҆чи́ма б̂о е҆стественыма не видѣша м̂ѧ, дх҃ом̑ же вѣрꙋ́ютъ е҆же гл҃ахъ·

Нн҃ѣ же зрѝ бра́те какова сїѧ сла́ва, и҆ ви́жд̑ь лю́дїе приходѧ́щїа ѿ восто́ка сл҃нца и҆́мже а҆́зъ да́мъ сла́вꙋ, а҆враа́млю, і҆саа́ковꙋ, і҆а́ковлю і҆ѻ҆сїі҆нꙋ, а҆мо́совꙋ михеи҆нꙋ.
і҆ѻ҆и́левꙋ.
а҆вдїинꙋ.
і҆ѻ́нинꙋ.
наѹ́мовꙋ.
а҆в꙽вакꙋмовꙋ.
софо́нїинꙋ, а҆гге́инꙋ.
захарїинꙋ.
и҆ малахїи҆нꙋ.
и҆же нарицаетсѧ а҆гг҃лом꙽ гн҃имъ·

Глв̑҇а, в҃·

Та́ко гл҃етъ г҃ь, а҆зъ и҆зведо́хъ лю́ди сїѧ и҆з работы̀, и҆ да́хъ и҆мъ повеле́нїа рабы̀ мои҆ми про̑҇рки, и҆́хже послꙋшати не въсхотѣша, и҆ ѿвр́ьгоша совѣты моѧ, мт҃и и҆же родѝ и҆хъ гл҃а и҆мъ, и҆дѣте сн҃ы поне́же вдови́ца ѻ҆ста́влена е҆смь.
въспита́хъ вы съ ра́достїю, погꙋбих̑ же в̂ы съ ско́рбїю, ꙗ҆ко съгрѣши́сте г҃ꙋ б҃ꙋ ва́шемꙋ творѧ́щи лꙋка́вое пред нимъ·

Нн҃ѣ же чт̂о сотворю̀ с ва́ми.
а҆зъ вдови́ца ѻ҆ста́вленаѧ, и҆дѣте же сн҃ы и҆ проси́те ѿ г҃а млс̑҇ти а҆́з же свѣдѣтельствꙋ́ю ѿч҃е на мт҃ръ сн҃овъ твои҆хъ и҆же завѣта мое҆го съхрани́ти не въсхотѣша, в꙽да́ждь и҆хъ на посрамощенїе и҆ мт҃ръ и҆хъ на расхище́нїе, да не ѹ҆мно́житсѧ ктомꙋ ро́дъ и҆хъ·

І҆ и҆мена и҆хъ да расточат̑сѧ въ ꙗ҆зы́ки, и҆ да бꙋдꙋт꙽ потреблены ѿ лица̀ землѧ̀, занѐ възгордѣша завѣтомъ мои҆мъ.
ѹ҆вы̀ тебѣ а҆с꙽сѷрїѧ съкрива́ющи в себѣ̀ непра́ведныѧ·

Въспомѧнѝ ро́де лꙋка́выи чт̂о сътворих̑ содо́мꙋ и҆ гомо́рꙋ, и҆хже землѧ̀ въ жꙋпелѣ и҆ въ хо́лмѣхъ пе́пелныхъ·

Такоже и҆ тх̑ѣ накажꙋ и҆же м̂ѧ не послꙋшаша̑, гл҃етъ г҃ь вседръжи́тель·

Та́ко гл҃етъ г҃ь къ е҆́здрѣ, възвѣсти лю́демъ мои҆мъ, ꙗ҆́ко да́мъ им̑ црс̑҇тво і҆ерс̑҇ли́м꙽ско е҆же и҆мѣхъ да́ти і҆и҆л҃ю.

И҆ сътворю̀ себѣ по́средѣ и҆хъ сла́вꙋ и҆ да́мъ и҆мъ вѣчныѧ ѻ҆би́тели, и҆же ѹ҆гото́вахъ в нача́лѣ.
дре́во живо́тное да бꙋдетъ и҆мъ въ бл҃гоѹ҆ха́нїе.
и҆ не и҆́мꙋть дѣлати ниже трꙋди́тисѧ.
и҆дѣте и҆ ѻ҆дръжите моли́те же да ѹ҆кратѧ́тсѧ вам̑ дн҃и тїи продлъжа́щїисѧ·

Бди́те б̂о понеже вамъ ѹ҆гото́вано црс̑҇твїе, засвѣдѣтельствꙋи нб҃омъ и҆ земле́ю.
и҆же потреби́хъ ѕл̂о, и҆ сотворихъ бл҃гаѧ, ꙗ҆́коже а҆зъ живꙋ̀ гл҃ет̑ г҃ь.
мт҃и ѻ҆бои҆мѝ сн҃ы твоѧ̀, и҆ въспита́и и҆хъ съ веселїемъ ꙗ҆́ко голꙋби́ца, и҆ ѹ҆твердѝ но́ѕѣ твоѝ ꙗ҆́ко сто́лпъ, понеже тебѐ и҆збра́хъ, гл҃етъ г҃ь.
и҆ въскр҃шꙋ ме́ртвыѧ ѿ мѣстъ и҆хъ і҆ и҆зведꙋ и҆хъ ѿ гро́бъ и҆хъ·

Позна́хъ б̂о и҆́мѧ моѐ въ і҆и҆л҃и, ѽ мт҃и сн҃овъ тѣхъ не ѹ҆бо́исѧ ничто́же, а҆́зъ ѹ҆бо тебѐ и҆збра́хъ гл҃етъ г҃ь·

Послю̀ на по́мощ̑҇ рабы̀ моѝ, і҆са́їю, і҆е҆ремїю, и҆́хже совѣтомъ ѻ҆ст҃ихъ, и҆ ѹ҆гото́вахъ тебѣ̀, в҃і, древе́съ разли́чными пло́ды·

И҆ толи́ко же и҆сто́чниковъ текꙋщихъ ме́домъ и҆ мле́комъ, и҆ седмь горъ ѕѣло ве́лїихъ, родѧ́щих̑ ро́жꙋ и҆ кри́нъ, и҆́миже възвеселю̀ сн҃ы твоа·

Творѝ пра́вдꙋ вдови́ци и҆ бꙋ́ди помощникъ си́рꙋ, да́и нищꙋ и҆ защитѝ сиротꙋ̀, и҆ ѻ҆дѣи нагаго прилежѝ немо́щномꙋ, и҆ не посмѣе҆́шисѧ хро́момꙋ, бѣднꙋ помозѝ и҆ слѣпого и҆зведѝ на свѣтъ мои, сокры́и младе́нца и҆ ста́рца междꙋ стѣна́ми твои҆ми·

Є҆гда́ же ѻ҆брѧ́щеши мр҃тва знамена́ющи погребѝ е҆го·

И҆ да́мъ тебѣ прь́вое сѣде́нїе въ воскрс̑҇нїе ме́ртвыхъ·

Потръпи́те же лю́дїе моѝ, и҆ ѹ҆мири́тесѧ прїидет̑ б̂о поко́и твои·

ѽ бл҃гаѧ дои́лице въспита́и ча́да твоѧ, и҆ ѹ҆твердѝ но́ѕѣ и҆хъ, да ни е҆ді́нъ ѿ ра́бъ и҆хже тебѣ да́хъ поги́бнет꙽ понеже а҆зъ ѿ числа̀ твое҆го възыщꙋ̀ и҆хъ.
не преста́ни же, е҆гда прїидетъ дн҃ь ско́рби и҆ печа́ли·

Тогда̀ про́чїи въспла́чꙋтсѧ смꙋща́ю҆щисѧ, ты́ же възра́дꙋешисѧ и҆мѣ́ющи вс̂ѧ и҆зоби́лно·

Зазрѧт̑ б̂о тебѣ̀ ꙗ҆зы́цы и҆ ничто́же ѹ҆спѣ́ютъ гл҃етъ г҃ь.
защи́тѧтъ тебе рꙋцѣ моѝ, и҆ не ѹ́зрѧтъ сн҃ы твоѝ вѣчнаго мꙋче́нїѧ·

Весели́сѧ ма́ти съ ча́ды твои́ми, понеже а҆зъ сп҃сꙋ т̂ѧ гл҃етъ г҃ь·

Въспомѧни́ же ча́да твоѧ спѧ́щїѧ понеже а҆зъ и҆зведꙋ и҆хъ ѿ стра́нъ землѧ̀ и҆ по млс̑҇ти мое́и с ними сътворю̀, млс̑҇тив̑҇ ѹ҆бо е҆смь гл҃етъ г҃ь вседръжи́тель·

ѻ҆бои҆ми́ же ча́да твоѧ дондеже а҆зъ прїидꙋ̀ и҆ млс̑҇рдъствꙋ́ю ѻ҆ нихъ.
и҆сто́чники ѹ҆бо моѝ и҆зобилꙋютъ, и҆ блд̑ть моѧ не ѻ҆скꙋдѣ́етъ·

а҆́зъ е҆́здра взѧ́хъ повеле́нїе ѿ г҃а на горѣ̀ ѻ҆ри́въ, і҆ идо́хъ къ і҆и҆л҃ьтѧномъ, къ ни́м же е҆гда прїидо́хъ небрего́ша м̂ѧ, и҆ ѹ҆ничижи́ша заповѣдь гн҃ю сегоже ради гл҃ю ва́мъ ꙗ҆зы́цы е҆же слы́шите и҆ разꙋмѣ́ите, и҆ ча́ите па́стырѧ ва́шего и҆же да́сть ва́мъ поко́и вѣчныи, понеже ѻ́нъ ѹ҆же близ̑ е҆сть, і҆ и́мать прїити въ и҆сконча́нїи вѣка·

Бꙋдѣте же гото́вы к꙽ возда́нїю црс̑҇твїѧ, свт̑ѣ б̂о вѣчныи въз꙽сїѧ́етъ на́ вы въ вѣки·

Бѣжи́те сѣни вѣка сего и҆ наслади́тесѧ весе́лїѧ сла́вы ва́шеѧ, а҆́зъ свѣдѣтельствꙋю сп҃сителемъ мои҆мъ·

преда́ныи да́ръ прїимете и҆ веселитесѧ бл҃годарѧ́ще призва́вшаго в̂ы въ црс̑҇тво нбс̑҇ное.
въста́нѣте же и҆ сто́ите, и҆ сматрѧ́ите число̀ зна́мена́ныхъ на́ бракъ гн҃ь възврати́вшихсѧ ѿ сѣни вѣка сего, и҆ взѧ́ша̑ преи҆спрещре́нно ѻ҆дѣнїе ѿ г҃а.
прїимѝ число̀ твое сїѻ́не и҆ ѻ҆деждѝ и҆хъ ѻ҆дѣꙗ҆́нїемъ бѣлымъ и҆же и҆спо́лниша за́конъ гн҃ь, и҆спо́лнь б̂о число̀ ча́дъ твои҆хъ, и҆́хже жела́ше·

Молю̀ и҆ крѣпость бж҃їю да бꙋдт̑ꙋ ѻ҆сщ҃енны лю́дїе твоѝ призва́ныи и҆з нача́ла, а҆зъ е҆́здра видѣхъ в꙽ сїѻ́нѣ не сочте́ныи со́ньмъ людїи, и҆же вс̂и пою́ще славѧ́ще г҃а.
посредѣ же и҆хъ б̂ѣ ю҆́ноша высоча́ишїи во́зрастомъ пач̑҇ всѣхъ, и҆же полага́ше вѣнцы̀ на главꙋ кое҆го́ждо, а҆з же дивих̑сѧ ѕѣло и҆ въпроси́хъ а҆́гг҃ла гл҃ѧ, чт̂о сꙋть сїи г҃и.
ѻ҆́н же ѿвѣща̀, сїи сꙋть и҆же совлек̑҇шїисѧ соѻ҆дѣꙗ҆нїи сме́ртных̑ и҆ ѻ҆бле́кшїисѧ въ бесме́ртныѧ, и҆ нн҃ѣ вѣнча́ютсѧ и҆ прїемлют̑ фꙋни́ки и҆же и҆сповѣдаша и҆мѧ̀ гн҃е·

И҆ па́ки въпросих̑ а҆гг҃ла ѻ҆ ю́ноши.
кт̂о б̂ѣ и҆же полага́ше на них̑ вѣнца̀, и҆ свѣти́лники в рꙋцѣ предаѧ́ше.
ѻ҆́н же ѿвѣща̀, с̂е ес̑҇ сн҃ъ бж҃їи, е҆гоже и҆сповѣда́ша въ вѣцѣ сем̑·

И҆ ѕѣло м̂и чесны бы́ша и҆же съ крѣпостїю воѻ҆рꙋжа́шас̑҇ за и҆мѧ̀ гн҃е·

И реч̑҇ м̂и а҆гг҃лъ и҆дѝ и҆ возвѣстѝ сїа лю́дем̑ моим̑, кацы̀ и҆ ко́ль ве́лїа вїдл̑҇ѣ е҆си чюдеса̀ гн҃ѧ·

Глв̑҇а г҃·

Лѣта, л҃ го, разоренїе гра́да̑ е҆гда̀ бѣхъ въ вавѷлонѣ и҆ лежахъ на ѻ҆́дрѣ скорбѧ́щи, прихожда́хꙋ же м̂и мышленїѧ.
ꙗ҆ко ви́дѣхъ ѻ҆пꙋстѣнїе сїѻ́на, и҆ мно́жество ве́лїе живꙋщихъ въ вавѷлонѣ, и҆ того ради бых̑ ѕѣло смꙋщенъ въ срд̑ци, и҆ нача́хъ ѹ҆милен꙽ными словесы гл҃ати къ вы́шънемꙋ, ѽ влд̑ко г҃и.
т̂ы са́мъ реклъ е҆си ѿ нача́ла полага́ющи ѻ҆снова́нїѧ зе́мли, и҆ повелѣлъ е҆си лю́дем꙽ е҆гда̀ далъ а҆да́мꙋ плоть мр҃твенꙋ, и҆же б̂ѣ дѣ́ло рꙋкъ твои҆хъ, и҆ въдх҃нꙋлъ е҆си во́нь дх҃ъ животенъ, и҆ бы́сть живъ пред̑ тобо́ю, и҆ въвел̑҇ е҆си е҆го в ра́и е҆же насади десница твоа̀, прежд̑е неже проѕѧ́бе землѧ̀.
и҆ завѣща е҆мꙋ съхранити заповѣди твоѧ̀ и҆же престꙋпи ѧ҆̀·

Того ради преда́лъ е҆си и҆̀ и҆ ро́дъ е҆го въ смр҃ть, и҆ ѹ҆мно́жи́сѧ мно́жество ꙗ҆зы́къ людїи им̑же нѣсть числа̀.
и҆ е҆гда̀ кои҆ждо род̑ послѣдова по́хотемъ своим̑, съдѣлова́ющи ди́внаѧ пред̑ тобо́ю.
гордѧ́щи повеленїем̑ твоим̑.
пакиж̑ во времѧ навел̑҇ е҆си на них̑ потопъ.
и҆ потребил̑҇ е҆си живꙋщих̑ на землѝ.
и҆ бысть въ е҆ді́нокождо же и҆хъ ꙗ҆ко а҆да́мъ ѹ́мретъ, токмо ѻ҆ста́вил̑҇ е҆си е҆ді́ного ноа и҆ с꙽ сѣменем̑ е҆го, и҆з негоже роди́шасѧ всѣ правед̑нїи.
и҆ ꙗ҆́ко начаша мно́житисѧ на землѝ живꙋщи, и҆ раз̑мно́жисѧ число̀ сн҃овъ но́евыхъ, и҆з ни́хже лю́дїе и҆ ꙗ҆зы́цы мно́ѕи и҆зыидо́ша·

Съгрѣшенїѧ послд̑ѣнихъ, превъзыидо́ша непра́вдꙋ прежни́хъ.
и҆ бы́ша лꙋка́ви пред̑ тобо́ю.
ѻ҆баче же и҆збра́лъ е҆си себѣ̀ з них̑ мꙋж́а е҆мꙋже и҆мѧ бы́сть а҆враам̑ е҆гоже възлю́билъ е҆си.
и҆ сказа̀ е҆мꙋ хотѣнїѧ своѧ̀, и҆ сътворѝ с ни́мъ завѣтъ вѣчныи, ѻ҆бѣща́ющи не ѻ҆стави́ти наслѣдъствїѧ е҆го·

Є҆гда́ же даде е҆мꙋ і҆саа́ка, і҆ и҆саа́кꙋ даде і҆а́кова і҆ и҆сава, и҆збрал̑҇ е҆си себѣ̀ і҆а́кова, і҆сава же ѿве́рже, и҆ раз꙽мно́жисѧ і҆а́ковъ въ мно́жество ве́лїе·

И҆ бысть е҆гда̀ и҆звелъ е҆си и҆зъ е҆гѷпта сѣмѧ е҆го, приведѐ и҆̀ къ горѣ сїнаѝ, преклони́лъ е҆си нб҃са и҆ смири землю.
поколѣба́лъ е҆си вселе́нꙋю, и҆ трепета́ти сътвори́лъ е҆си безднѣ.
и҆ воз̑мꙋтилъ е҆си ми́ръ.
и҆ проидет̑ сла́ва твоѧ̀ вра́ты четвертыми, ѻ҆гнем̑ и҆ земнымъ трѧсе́нїемъ и҆ вѣтромъ, и҆ мра́зомъ·

да дасѝ зако́нъ сѣмени і҆а́ковлю, и҆ ро́дꙋ і҆и҆л҃евꙋ прилѣжа́нїе·

Точїю не ѿꙗ҆́лъ е҆си срд̑це лꙋка́во да законъ твои сътвори́тъ в ни́хъ приѻ҆брѣтенїе, срд̑це б̂о лꙋка́во носѧ̀ пр́ьвыи а҆да́мъ, престꙋпѝ и҆ побѣжен̑҇ бысть, и҆ та́ко вс̂и и҆же ѿ него роди́шасѧ, и҆ б̂ѣ всегда недꙋ́гъ съпрѧжен̑҇ съ зако́номъ въ срд̑цахъ члч҃ескихъ лꙋка́вна ради коренѧ, тако и҆же чт̂о б̂ѣ бл҃го преста.
и҆ чт̂о бѣ̀ ѕл̂о наста̀ и҆ преидо́ша времена̀ и҆ сконъча́шасѧ лѣта.
и҆ въздви́глъ е҆си себѣ̀ раба̀ и҆мене́мъ дв҃да.
е҆мꙋже повелѣ соѕида́ти град̑ и҆́мени твое҆мꙋ, и҆ приноси́ти т̂ꙋ ѳимїѧм̑ и҆ жертвꙋ·

И҆ е҆гда̀ б̂ѣ мно́га лѣта, живꙋщїа въ том̑ гра́дѣ, ѿстꙋпи́ша послѣдꙋ́юще лꙋка́вомꙋ мышленїю а҆да́мовꙋ, и҆ вс̂ѧ наслд̑ѣствїа е҆го.
поне́же и҆ са́ми бы́ша срд̑цем̑ лꙋка́ви.
того́ же ра́ди гра̑ твои предалъ е҆си в рꙋки вра́гъ твоих̑, ни л̂и лꙋчша́ѧ сътвори́ша и҆же ѻ҆бита́ют꙽ въ вавѷлонѣ.
и҆ того ради владѣ́ют꙽ сїѻ́номъ·

И҆ бы́сть е҆гда̀ прїидо́хъ зд̂ѣ и҆ ви́дѣхъ непра́вды и҆́мже нѣсть числа̀.
и҆ мно́гихъ съгрѣша́ющихъ ви́дѣ дш҃а моѧ̀ да́же до л҃ лѣта, и҆ ѹ҆жасесѧ срд̑це моѐ и҆же ви́дѣхъ мно́жество престꙋ́пныхъ, и҆ како е҆си им̑ тръпѣлъ съгрѣшающимъ, ѿпꙋща́ющи тм̑ѣ и҆же лꙋка́вое творѧ́хꙋ, и҆ погꙋби́лъ е҆си лю́дїе твоѝ съхранил̑҇ же е҆си враги твоа.
не возвѣщающи никомꙋ́же, вои҆́стиннꙋ не вѣм꙽ како сїѧ вразꙋмѣти и́мамъ, е҆да сꙋть дѣла добрѣ́ишаѧ вавѷлонскїѧ нежели сїѻ́ньскїѧ, е҆гда̀ позна́ша тебѐ прочїѝ ꙗ҆зы́цы паче і҆и҆л҃ѧ.
и҆ кацыи ꙗ҆зы́цы ѹ҆вѣри́ша свѣдѣтельствꙋ твое҆мꙋ ꙗ҆коже і҆а́ковль, тх̑ѣ б̂о м꙽зд̑а не и҆зъꙗ҆влѧ́етсѧ.
и҆ трꙋдъ и҆хъ не тво́ритъ кори́сти.
поне́же живꙋщи и҆ ходѧ́щи по́средѣ ꙗ҆зы́къ ви́дѣхъ ѧ҆̀ процвѣта́юща.
чтоже и҆же не въспомѧнꙋша повелѣнїи твоих̑.
нн҃ѣ же и҆змѣрѝ на мѣрилехъ лꙋка́въствїе на́ше съ лꙋка́в꙽ствїемъ прочїихъ живꙋщихъ на землѝ, и҆ нигдѣ̀ не ѻ҆брѧ́щетсѧ и҆мѧ твое толи́ко въ і҆и҃ли.
и҆ е҆гда̀ не съгрѣши́ша пред̑ тобо́ю живꙋщїи на землѝ·

И҆лѝ ко́и ꙗ҆зы́къ та́ко въздръжа́лъ за́повѣди твоа̀.
въи́стиннꙋ толи́ко сїѝ съхранѧ́ше повеленїѧ твоа̀, а҆ не ꙗ҆зы́цы·

Глв̑҇а, д҃·

Тогда̀ ѿвѣща̀ къ мнѣ̀ а҆гг҃лъ е҆мꙋже и҆мѧ ѹ҆рїи҆лъ, и҆же по́слан̑҇ б̂ѣ къ мнѣ, и҆ рече м̂и въ ѹ҆́жасѣ и҆стꙋпѝ срд̑це твоѐ въ вѣ́цѣ семъ, поне́же хо́щеши и҆спыта́ти пꙋти вы́шнего, а҆з же ѿвѣщах̑·

Та́ко е҆сть г҃и мо́и, ѻ҆́н же къ мнѣ̀ рече си́це.
тр̂и пꙋтѝ по́сланъ е҆смь показа́ти тебѣ и҆ тр̂и подо́бїѧ пред̑ста́вити пред̑ тобо́ю.
ѿ ни́х꙽же е҆гда̀ м̂и е҆ді́нꙋ и҆з꙽ꙗ҆ви́ши.
а҆́зъ ти покажꙋ̀ пꙋть е҆го́же жела́еши ви́дѣти.
и҆ наѹ҆чю т̂ѧ ѿкꙋ́дꙋ въ срд̑це лꙋка́во прихо́дитъ, и҆ реко́хъ възвѣстѝ г҃и мои, и҆ рече, и҆дѝ і҆ и҆зва́жи м̂и ѻ҆гнѧ̀ тѧ́гость, и҆ли и҆з꙽мѣ́ри дыха́нїе вѣтра, и҆ли въз꙽врати въспѧ́ть дн҃ь и҆же ми́мои҆дѐ·

А҆́з꙽ же ѿвѣща́хъ, е҆гда̀ ли сїа чл҃къ сътво́ритъ, е҆же т̂ы хо́щеши ѿ мене ѹ҆вѣ́дити;
ѻ҆́нже реч̑҇, въпрошꙋ̀ ли т̂ѧ ка́ко е҆сть мно́го жили́ща посред̑и̑ мо́рѧ, и҆ли ка́ко мно́го и҆сто́чникъ ѿ нача́ла бе́здны, и҆ли и҆сто́чниковъ на ѻ҆крꙋзѣ нбс̑҇нѣмъ, и҆ли чт̂о сꙋть предѣлы ра́иски, и҆ бꙋ́деши ѿвещати и҆ въ бе́зднꙋ не снидох̑ ни во а҆́дъ па́ки, ни на нб҃са нико́лиже възыидо́хъ·

Нн҃ѣ же ѻ҆ се́мъ не въпроси́хъ т̂ѧ, толи́ко ѻ҆ ѻ҆гнѝ и҆ вѣтрѣ, и дн҃и во́ньже е҆си пребыва́лъ, и҆ без꙽ си́хъ ве́щеи бы́ти не мо́жеши, ты же ѻ сихъ ничт̂о ми ѿвѣща̀·

И҆ па́ки м̂и рече, чт̂о е҆сть твое҆го, и҆ чт̂о с тобо́ю и҆зрастѐ, зна́ти не мо́жеши·

И҆ ка́коже сїи сꙋ́дъ твой възмо́жетъ ѻ҆бъꙗ҆́ти пꙋтѝ вы́шнѧго, и҆ли свѣтъ и҆з꙽внꙋ̀ растлѣ́нъ, ка́ко и҆́мать разꙋмѣти растлѣ́нїе е҆же а҆зъ зрю̀.
и҆ реко́хъ къ немꙋ, лꙋчши дабы е҆смы̀ не бы́ли, нежели бы́ти живꙋще въ ѕлѣ̀ и҆ претрьпѣвати невѣ́дꙋще чесо̀ ра́ди·

ѻ҆́нъ же ѿвѣща̀ м̂и, прїидох̑ къ нѣ́кои пꙋсты́ни, и҆деже древа совѣтъ сътвори́ша гл҃ющи, прїидѣте і҆ и́демъ и҆ двигнемъ бра́нь на́ море да пред̑ на́ми побѣ́гнетъ·

И҆ да сътво́римъ себѣ и҆́ныѧ дꙋбра́вы·

Та́коже и҆ волны̀ мо́рскїи совѣтъ сътвори́ша гл҃юще.
поидимъ и҆ двигнѣмъ бра́нь на лѣсы по́льныѧ, да побѣди́вши и҆хъ въспрїимемъ себѣ и҆́ное мѣсто·

Мышле́нїѧ же лѣсовъ б̂ѣ пра́зна.
поне́же прїиде ѻ҆́гнь и҆ пож꙽же их̑, та́коже и҆ во́лнъ мо́рьскихъ, поне́же въздержа̀ и҆̀ пѣсо́къ и҆ не дадѐ им̑м̑·

И҆ е҆гда̀ бы е҆си бы́лъ сꙋдїѧ и҆хъ, кое҆го бы е҆си ѿ сихъ ѻ҆правда́лъ, и҆ли ви́нна сътвори́лъ·

ѿвѣща́хъ а҆зъ, въи҆́стиннꙋ въ совѣтъ сꙋетенъ въда́шасѧ, понеже землѧ̀ да́на лѣсом̑, и҆ мо́рю мѣ́сто, е҆же ноша́ше во́лны е҆го, ѻ҆́н же рече къ мнѣ, пра́во рассꙋди́лъ е҆си, чесоже ради себе не сꙋ́диши, поне́же ка́ко землѧ̀ дꙋбра́вамъ и҆ мо́ре же волнамъ свои҆мъ да́но е҆сть, та́коже и҆же ѻ҆бита́ютъ на землѝ·

Толи́ко вещи зе́мныѧ разꙋмѣва́ют̑, а҆ е҆же на́ нб҃си і҆ и́же на высотѣ̀ и҆хъ,<.>

И҆ ѿвѣща́хъ си́це, молю́ ти сѧ г҃и, мн̂ѣ да́стьсѧ ѹ҆́мъ разꙋмѣнїѧ, не бо̀ хотѣхъ въпроси́ти ѻ҆ вы́шних̑ твои҆хъ.
но ѻ҆ сихъ и҆же всегда̀ в нас̑҇ быва́ютъ, чесо ра́ди і҆и҆л҃ь да́нъ въ порꙋга́нїе ꙗ҆́зы́комъ·

И҆ чесо̀ ра́ди лю́дїе твоѝ възлю́бленїи да́ны ꙗ҆зы́комъ нечести́вымъ·

И҆ чесо̀ ра́ди зако́нъ ѿц҃ъ на́шихъ в па́гꙋбꙋ, из̑веде́нъ бы́сть и҆ расмотре́нїе писа́нїи не сꙋть·

Чесо ра́ди вездѣ ѻ҆бита́ем꙽ ꙗ҆́ко гꙋсе́ница, живꙋщи въ вели́цем̑ стра́сѣ и҆ ѹ́жасѣ.
и҆ недосто́ины е҆смы̀ млс̑҇ти твое҆ѧ наслѣди́ти·

И҆ чт̂о сътворимъ съ и҆менемъ своим̑, е҆гоже м̂ы нарица́емъ, сїа сꙋть е҆го́же а҆зъ въпраша́ю, ѻ҆́н же рече, коли́ко бо́леи въпраша́ти и҆́маши, толи́ко бо́ле и҆ ѹ҆диви́шисѧ·

Поне́же нꙋж́но прилежитъ вѣ́къ проитѝ, и҆ не възмо́жеши разꙋмѣти чт̂о пра́вед̑ным̑ ѻ҆бѣща́нна сꙋть·

Поне́же непра́вды і҆спо́лнь вѣкъ се́и и҆ немощеи.
а҆ ѻ҆ нем̑м̑же въпраша́еши възвѣщꙋ тебѣ, насѣѧшасѧ лꙋка́в꙽ствїа, и҆ не ѹ҆̀ прїиде поги́бель е҆го, и҆ е҆гда̀ ли не възвратит̑сѧ е҆же сѧ насѣѧ̀, и҆ не погꙋби́тсѧ мѣ́сто и҆де́же насѣ́ѧно лꙋка́в꙽ство, не прїидетъ гдѣ насѣѧ́но е҆сть бл҃го, поне́же зе́рно сѣ́мени зла́го, е҆же въсѣѧ́но въ срд̑це а҆да́мово, и҆з нача́ла ка́ко мно́го ѕл̂а родѝ и҆ до нн҃ѣ.
и҆ родит̑ да́же до жа́твы, воньмѝ самъ себѣ̀, ка́ко мно́го ѹ҆мно́жи пло́да ѕла́го зе́рно сѣмени лꙋка́ва, и҆ гдѣ бꙋ́дꙋтъ не съчте́ныѧ лꙋка́в꙽ства посѣ́ены, ка́ко бꙋ́детъ ве́лїе пожа́тїе ѹ҆гото́вано.
не ѿвѣщахъ гл҃ѧ, когда, и҆ въ кое вре́мѧ сїа бꙋ́дꙋтъ, и҆ чесо ра́ди кра́т꙽ки и҆ не бл҃ги лѣта на́ша, ѻ҆́нже рече не бꙋ́ди ско́ръ паче вы́шнѧго, поне́же въсꙋе прилежи́ши е҆го превы́шити и҆же ѹ҆́жасъ твои мно́гъ, е҆да̀ не въпраша́ша дш҃а пра́вед̑ныхъ ѻ҆ тацх̑ѣ ве́щах̑ въ затворе́нїю свое҆мъ гл҃ѧ·

доко́лѣ та́ко надѣ́ющисѧ бꙋ́демъ, и҆ е҆гда̀ прїидꙋтъ намъ пло́ды жа́твы на́шеѧ въспрїѧ́тїе м꙽зды̀·

а҆рхаа҆гг҃лъ же ѹ҆рїи҆лъ ѿвѣща̀ м̂и.
е҆гда̀ и҆спо́лнитсѧ число̀ сѣмени въ васъ, ꙗ҆́ко въ скала́хъ вѣ́къ, мѣ́рꙋ мѣри́л꙽ времена и҆ число́мъ съчте часы̀, и҆ не въсколѣба̀ ни възбꙋдѝ, да́же и҆спол̑҇нитсѧ пред̑рече́ннаѧ мѣ́ра·

И҆ ѿвѣща́хъ гл҃ѧ, ѽ влд̑ко г҃и.
н̂о и҆ м̂ы сих̑ исполнены нече́стїа, и҆ нас̑҇ ради е҆гда ли не прїидетъ жа́тва пра́ведных̑, ра́ди грѣхо́въ ѻ҆бита́ющих̑ на землѝ, ѻ҆́нже рече, и҆ди и҆ въпроси и҆мꙋщаѧ въ чре́вѣ, е҆гда ли носи́вши ѳ҃ мс̑҇цеи възмо́жетъ живо́тъ е҆ѧ̀ в себѣ съдрьжа́ти пло́дъ, и҆ а́зъ ѿвѣщах̑, въи҆́стиннꙋ не възмо́жетъ·

ѻ҆́нже ѿвѣща̀, въ преи҆спод̑нихъ ѻ҆би́тели дш҃ъ сꙋть подо́бныѧ животꙋ.
поне́же ка́ко родѧ́щаѧ хо́щетъ въско́рѣ роди́ти, та́кожде сїи хо́щꙋтъ да ѿдадꙋтъ и҆мъ вданое, из нача́ла же възвѣщꙋ, і҆ и҆з꙽ꙗ҆влю тебѣ̀ е҆го́же хо́щеши сматрѧ́ти, и҆ ѿвѣщах̑ е҆гда ли ѻ҆брѣто́хъ блгд̑ть пред̑ тобо́ю·

И҆ е҆гда ли възмо́жно сїѧ и҆ а́з꙽ъ же досто́и҆нъ ли покажи м̂и, е҆гда̀ ли бо́леи е҆сть вре́мени прїидꙋщаго нежели преидꙋщаго, и҆ли преидꙋщаго, нежели прїидꙋщаго·

Вѣ́мъ бо е҆же преиде, того же не вѣ́мъ чт̂о прїити и҆́мат̑·

ѻ҆́н же реч̑҇ ста́ни ѻ҆деснꙋ́ю менѐ, аз̑ же тебѣ̀ и҆з꙽ꙗ҆влю при́т꙽чею, и҆ ста́хъ и҆ ви́дѣхъ и҆ с̂е пе́щь горѧ́щаѧ про́идет̑ предо мно́ю.
е҆гда же пла́мень преста̀, и҆ ды́мъ е҆щѐ ѻ҆ста̀ посемъ проиде же предо мно́ю ѻ҆́блакъ и҆сполнь воды̀.
и҆з него́же сѧ и҆спꙋсти до́ждь ве́лїи.
и҆ е҆гд̑а про́иде стремленїе дожда, ѹ҆мно́жишасѧ на нем̑ ка́плѧ.
и҆ реч̑҇ къ мнѣ̀.
внима́и себѣ̀, ꙗ҆́ко растет̑ дожд̑ь на́ипач̑҇ неже ка́пли, и҆ ѻ́гнь неже ды́мъ·

Та́ко бо́льшаѧ е҆сть мѣ́ра неже пре́иде, преѹ҆мно́жиша же ка́плѧ и҆ дым̑.
и҆ си́це молих̑сѧ, е҆да лѝ а́зъ та́ко дол̑҇го жи́ти и́мам̑, и҆ли чт̂о и́мать прїити в та̀ времена̀ и҆ ѿвѣща́ ми гл҃ѧ·

Ѡ҆ зна́менїѧхъ си́хъ и҆же м̂ѧ въпраша́еши, ѿ ча́сти могꙋ т̂и гл҃ати, толи́ко нѣсмь по́сланъ да повѣмъ тебѣ̀ ѻ҆ животѣ̀ твоем̑ н̂о не свѣмъ·

Глв̑҇а, е҃·

Ѡ зна́менихъ же прїидетъ вре́мѧ, и҆же живꙋщїи на землѝ ѻ҆бремене́ни да́ньми ве́лїими, и҆ съкры́етсѧ пꙋть пра́вды, и҆ бꙋдетъ црс̑҇тво непло́дно ѿ вѣры·

И҆ ѹ҆множитсѧ непра́вда бо́леи нежели нн҃ѣ ви́диши, и҆ нежели е҆си слы́шалъ, землѧ̀ в ню́же вни́деши, і҆ ю́же ви́диши и҆же нн҃ѣ црс̑҇твꙋ́етъ, ѹ҆зрѧт̑ е҆ѧ̀ ѻ҆пꙋстѣнꙋ, и҆ да́сть л̂и тебѣ вы́шнїи жи́вꙋ бы́ти.
ѹ҆́зриши по тре́теи трꙋбѣ и҆же въско́рѣ сл҃нце възсїѧ́етъ в нощи, и҆ лꙋна три́щи на днь.
и҆ ка́паетъ кро́вь ѿ дре́ва, и҆ ка́мень дасть гла́съ свои.
и҆ възъшата́ютсѧ лю́дїе, и҆ то́и бꙋдетъ црс̑҇твова́ти е҆гоже сѧ ненадѣ́ютъ живꙋщїи на землѝ.
и҆ пти́цы пре́идт̑ꙋ ѿ мѣста свое҆го.
и҆ мо́ре содом̑ское ры́бы ѿме́щетъ, и҆ да́сть гла́съ нощъ и҆же мно́зїи не зна́ша, и҆ вс̂и ѹ҆слы́шат̑ гласъ е҆го, и҆ трꙋси бꙋдт̑ꙋ по мѣстехъ мно́ѕѣхъ.
и҆ ѻ́гнь без̑престани ѻ҆пꙋститсѧ.
и҆ ѕвѣрїе польстїи преселѧ́тсѧ, и҆ же́ны болѣзнивыѧ родѧтъ ди́внаѧ.
и҆ въ сла́дкихъ вода́хъ сла́ны ѻ҆брѧ́щꙋтсѧ, и҆ прїатели всѣхъ сами собою ѻ҆полчают̑сѧ.
и҆ съкрысѧ тогда ѹ҆́м꙽ и҆ ра́зꙋмъ разлꙋчитсѧ в꙽ храни́лищи свое҆мъ, і҆ и҆зы́щетсѧ ѿ многихъ и҆ не ѻ҆брѧ́щетсѧ·

Непра́вда же и҆ невъздержанїе ѹ҆мно́житсѧ на зем̑лѝ.
и҆ вопроситъ странꙋ ближнїю свою, и҆ речетъ, ни ли по тебѣ преидетъ правда правость творѧщи.
и҆ т̂о ѿмещꙋтсѧ, и҆ бꙋдетъ в то̀ времѧ ѹ҆поваю҆тъ чл҃ци и҆ не воспрїимꙋтъ трꙋдѧт̑сѧ и҆ не ѹ҆правлѧ́ютъ пꙋти и҆хъ.
сїѧ зна́менїѧ повелѣно гл҃ати тебѣ, ѿпꙋщено е҆сть мнѣ, и҆ а́ще помоли́шисѧ па́ки и҆ въспла́чешисѧ ꙗ҆́ко и҆ нн҃ѣ.
и҆ пости́шисѧ седмь дн҃їи е҆ще бо́леи ѹ҆слы́шиши и҆ возбнв̑҇ꙋ и҆ тѣло моѐ ѹ҆страшис̑҇ ѕѣло, и҆ дш҃а моѧ ѹ҆трꙋди́сѧ ꙗ҆́ко и҆щезѐ.
держа̀ м̂ѧ и҆же прїиде а҆гг҃лъ и҆же гл҃аше в꙽ м̂ѧ и҆ ѹ҆крѣпѝ м̂ѧ, и҆ поста́ви м̂ѧ на нога́хъ.
и҆ бы́сть в но́щь в꙽торꙋ́ю и҆ прїиде къ мн̂ѣ салаѳїель во́жъ лю́демъ, и҆ рече мн̂ѣ гдѣ̀ бѧ́ше.
и҆ въскꙋю лице твое ско́рбно.
и҆л̂и не вѣси ꙗ҆́ко тебѣ въвѣре́нъ е҆сть і҆и҆л҃ь въ странѣ̀ преселе́нїѧ их̑.
въста́ни б̂о и҆ вкꙋсѝ хлѣба.
и҆ не ѻ҆пꙋстѝ насъ ꙗ҆́ко па́стыръ ста́до свое в рꙋки влъкомъ лꙋка́вымъ.
и҆ реко́хъ е҆мꙋ, и҆ди ѿ менѐ.
и҆ не приближишис̑҇ ко мнѣ и҆ ѹ҆слы́шалъ ꙗ҆ко реко́хъ.
и҆ ѿи́де ѿ менѐ, а҆ а́зъ пости́хсѧ дн҃їи сед̑мь стенѧ́щи и҆ пла́чющи.
ꙗ҆́ко мн̂ѣ заповѣда ѹ҆рїель а҆гг҃лъ.
и҆ бы́сть по дн҃и седмихъ.
и҆ па́ки помышле́нїе срд̑ца мое҆го трꙋдно бѧ́ше мн̂ѣ ѕѣло и҆ въспрїѧ̀ дш҃а моѧ дх҃ъ ра́зꙋменъ и҆ па́ки нача̀ гл҃ати пред̑ вы́шнимъ словеса̀, и҆ рѣхъ.
ѽ влд̑ко г҃и ѿ всх̑ѣ дꙋбра́въ зем꙽скихъ и҆ ѿ всѣхъ дре́въ е҆го и҆збра́лъ е҆си виногра́дъ е҆ді́ныи.
ѿ всѣхъ зе́мль вселе́нныѧ и҆збра́лъ е҆си себѣ ѹ҆до́лїе е҆ді́но.
и҆ ѿ всѣхъ цвѣтъ селныхъ и҆збра́лъ е҆си себѣ кри́нъ е҆ді́нъ.
и҆ ѿ всѣхъ бе́зд꙽нъ мо́рьских̑ и҆сполнилъ е҆си себѣ и҆сто́чник̑҇ е҆дїнъ.
и҆ ѿ всѣхъ созида́нїи гра́дов̑҇ ѻ҆ст҃илъ е҆си себѣ сїѻ́нъ, и҆ ѿ всѣхъ сътворе́нїи летѧ́щихъ и҆меновалъ е҆си себѣ голꙋби́цꙋ е҆ді́нꙋ, и҆ ѿ всѣх꙽ сътворе́нїи скота̀ прови́дѣлъ е҆си себѣ ѻ҆вцꙋ̀ е҆ді́нꙋ, и҆ ѿ всѣхъ ѹ҆мно́женыхъ лю́дїи и҆зыска́лъ е҆си себѣ лю́ди е҆ді́ны.
и҆ ѿ всѣхъ и҆скꙋше́нъ зако́нъ, да́лъ е҆си семꙋ е҆гоже желл̑҇ѣ е҆си людїи·

И҆ нн҃ѣ г҃и въскꙋю преда́лъ е҆си е҆ді́нъ мно́гимъ.
и҆ ѹ҆гото́валъ е҆си на е҆ді́нъ ко́рень мно́ги и҆́ныѝ, и҆ расточи́лъ е҆си е҆ді́нъ твои въ мно́зѣхъ и҆ потопта́ша е҆го, и҆же проти́вꙋ гл҃ющаго во́ли твое́и.
е҆ще твои҆хъ завѣтъ не вѣровахꙋ.
и҆ а́ще ненавидѧ́ще ненави́дѣлъ е҆си лю́ди твоѧ̀.
твои҆ми рꙋка́ми и҆́маши наказа́ти·

И҆ бы́сть е҆гда̀ гл҃алъ е҆смь словеса̀, и посла́нъ е҆сть а҆гг҃лъ и҆же пре́жде прїиде къ мн̂ѣ въ проходѧ́щꙋю но́щь.
и҆ рече м̂и ѹ҆слы́ши м̂ѧ и҆ наѹ҆чю т̂ѧ.
и҆ вон̑҇ми мѝ и҆ пред̑ложꙋ̀ пред̑ тобо́ю, и҆ реко́хъ.
гл҃и г҃и мои.
и҆ рече къ мн̂ѣ, ѕѣло въ ѹ҆жасѣ ѹ҆ма̀ сътворе́нъ е҆си ради і҆и҆л҃ѧ.
и҆л̂и наи́паче възлюби́лъ е҆си е҆го, неже сътвори и҆̀.
и҆ рѣхъ к не́мꙋ нѝ г҃и, н̂о болѧ́щи гл҃алъ е҆смь.
мꙋ́чатъ б̂о сѧ лѧ́двїѧ моѧ по всѧ̀ ча́сы и҆́щꙋщи взѧ́ти стезю̀ вы́шнѧго.
и҆ взыска́ти ча́сть сꙋ́да е҆го.
и҆ рече къ мн̂ѣ, не мо́жеши.
и҆ реко́х꙽, почто̀ г҃и, и҆ почто̀ родих̑сѧ и҆л̂и въскꙋ́ю не сътвори́сѧ ѹ҆тро́ба мт҃ри моеѧ мн̂ѣ гро́бъ, да не ви́дх̑ѣ трꙋда і҆а́ковлѧ и҆ безъси́лїѧ ра́ди і҆и҆л҃ева.
и҆ рече къ мн̂ѣ.
сочтѝ м̂и сїе и҆же е҆гда̀ не прїидо́ша.
и҆ соберѝ м̂и раскро́пленыѧ ка́пли, и҆ ѻ҆зеленѝ м̂и сꙋхїѧ цвѣты, и҆ ѿврьзѝ м̂и запертыѧ храни́лища, і҆ и҆зведѝ м̂и затворе́ны в ни́хъ вѣтры, покажѝ м̂и гла́сꙋ ѻ҆́бразъ, и҆ тогда покажꙋ̀ т̂и трꙋдъ и҆же жеда́еши ви́дѣти и҆ рѣхъ, ѽ влд̑ко г҃и, кто́ бо е҆сть и҆же можетъ сїѧ ви́дѣти.
то́кмо и҆же съ чл҃ки ѻ҆бита́нїѧ не и҆́мать·

А҆́з же безꙋменъ и҆ ка́ко могꙋ гл҃ати ѻ҆ си́хъ и҆же менѐ въспро́сиши.
и҆ рече къ мнѣ̀ ка́ко не мо́жеши сътвори́ти е҆ді́нъ ѿ си́хъ и҆же гл҃ана сꙋть та́ко не мо́жеши ѻ҆брѣсти сꙋдъ мо́и.
и҆лѝ въ ко́нецъ любо́въ ю҆́же лю́демъ ѻ҆бѣщахъ·

И҆ рѣхъ чт̂о сътворѧт̑ и҆же предо мно́ю бы́ша.
і҆ и́же с на́ми і҆ и҆же по на́съ.
и҆ гл҃а къ мнѣ̀, вѣнцꙋ подобенъ сꙋдъ мо́и.
ꙗ҆́ко не послд̑ѣни́мъ по́зднаѧ, та́ко не пр́ьвым̑ ско́раѧ·

И҆ ѿвѣщахъ и҆ реко́хъ.
не могаше сътвори́ти и҆же сътворени сꙋть і҆ и҆же сꙋть і҆ и҆же приходѧ́ще сꙋть въ е҆ді́но да бы́стрѣе сꙋдъ тво́и пока́жеши·

И҆ ѿвѣща къ мнѣ̀ и҆ рече.
не мо́жетъ тща́ти творе́нїе на тво́рца, и҆ н̂и снестѝ вѣка и҆хъ и҆же в немъ сътво́рени сꙋть въ е҆ді́но и҆ рѣхъ·

Ка́ко гл҃еши рабꙋ̀ твое҆мꙋ.
ꙗ҆́ко ѻ҆живлѧю҆щи ѻ҆живи́лъ е҆си, ѿ тебѐ сътво́рена творе́нїѧ въ е҆ді́но.
и҆же б̂о снесло сътворе́нїе.
мо́жетъ и҆ нн҃ѣ носи́ти настоѧ́щее въ е҆ді́но·

И҆ реч̑҇ къ мнѣ̀ въпросѝ живота женьска.
и҆ гл҃еши к не́и.
и҆ а́ще ро́диши, въскꙋю по времени, моли б̂о еѧ̀ да ро́дитъ десѧт̑ въ е҆ді́но.
и҆ реко́хъ не бо мо́жетъ, н̂о по времени·

И҆ рече къ мнѣ̀.
и҆ аз̑ дахъ матриси земъстѣи и҆ си́мъ и҆же просѣѧ́ни сꙋть на не́и по времени и҆́мже б̂о ѻ҆́бразомъ мла́денецъ не ро́дитъ т̂а и҆же ста́ра сꙋть·

Та́ко а҆́зъ раз꙽смотрих̑ ѿ себѐ сътвореныи вѣкъ.
и҆ па́ки въспроси́хъ.
и҆ рекохъ е҆гда̀ ѹ҆жѐ да́еши м̂и пꙋть гл҃ю пред̑ тобо́ю.
и҆́мже мт҃и на́ша ѻ҆ не́иже гл҃алъ е҆си мн̂ѣ, е҆щѐ млада е҆сть ѹ҆жѐ ста́рости приближа́етсѧ.
и҆ ѿвѣща къ мнѣ̀ и҆ реч̑҇.
въспросѝ еѧ̀ и҆же ро́дит̑·

И҆ речетъ тебѣ̀.
гл҃еши б̂о е́и.
въскꙋю коих̑ роди́ла е҆си нн҃ѣ.
нѣ сꙋть подо́бни тѣмъ и҆же пред̑ тобо́ю.
н̂о мен꙽ши во́зрастом꙽.
и҆ речетъ тебѣ т̂а и҆нїи сꙋть и҆же въ ю́ности силы рожд̑ени сꙋть.
і҆ и҆нїи же по времени ста́рости ѻ҆скꙋдѣ́ющи матриси роди́шасѧ разꙋмѣи б̂о и҆ т̂ы ꙗ҆́ко ме́нши во́зрастомъ е҆стѐ ѿ тѣхъ и҆же преже вас̑҇ і҆ и҆же по ва́съ мен꙽ши неже в̂ы, ꙗ҆́ко ѹ҆жѐ състарѣю́щее сътворенїе и҆ крѣпостѝ ю҆́ноши преминꙋющи·

И҆ рекох̑ молю г҃и а҆́ще ѻ҆брѧ́щꙋ блгд̑ть пред̑ ѻ҆чима твои́ма.
покажи рабꙋ̀ твое҆мꙋ и҆́мже посѣтиши сътворе́нїе своѐ·

Глв̑҇а, ѕ҃·

И реч̑҇ къ мнѣ̀, ѿ нача́ла ѻ҆крꙋже́нїа землѝ.
и҆ пре́же ѻ҆снова́нїѧ предѣ́лъ, и҆ пре́же нежели ды́шꙋщи събра́нїѧ вѣтромъ, и҆ нежели шꙋмѣша гла́сы гро́мныѧ.
и҆ пре́же нежели блиска́хꙋсѧ свѣтлости и҆ блиста́нїи.
и҆ нежели ѹ҆твръди́шасѧ ѻ҆снова́нїѧ ра́искаѧ.
и҆ нежели видѣшасѧ кра́снїи цвѣти.
и҆ пре́же нежели ѹ҆крѣпи́шасѧ си́лы гиблющїисѧ.
и҆ нежели събра́шасѧ без꙽числе́наа во́инъства а҆гг҃льскаѧ.
нежели възнесе́нїѧ въ высотꙋ̀ въздꙋ́хꙋ.
и҆ пре́же нежели и҆менова́хꙋсѧ мѣры тврьд̑ныа и҆ нежели въскꙋри́шасѧ пе́щи въ сїѻ́нѣ.
и҆ нежели достиго́шасѧ настоѧ́щїи лѣта.
и҆ пре́жд̑е нежели ѻ҆чюжд̑ахꙋсѧ и҆хъ, и҆же нн҃ѣ съгрѣша́ют꙽.
а нежели назнамена́ни бы́ша тїи, и҆же вѣ́рꙋ събира́ша·

Тогда же а҆зъ мыслѧхъ и҆ сътворе́на сꙋть чресъ мене самаго а҆ не ѿ и҆наго.
а҆ наконе́цъ бꙋдетъ мно́ю а҆ не ѿ и҆́наго.
и҆ ѿвѣщах̑ и҆ реко́х꙽.
коѐ бꙋ́детъ разлꙋче́нїе вре́менъ.
и҆ли когда пе́рвомꙋ коне́цъ, а҆ дрꙋго́мꙋ нача́ло.
и҆ рече къ мнѣ ѿ а҆враа́ма да́же до і҆саа́ка.
е҆гда роже́нї сꙋть ѿ него і҆а́ковъ і҆ и҆са́въ.
рꙋка̀ і҆а́ковлѧ держа́ше ѿ нача́ла пѧтꙋ і҆са́вовꙋ.
коне́цъ б̂о вѣ́ка сего і҆са́в꙽, а҆ дрꙋга́го нача́ло і҆а́ковъ.
чл҃ча рꙋка̀ междꙋ пѧты̀ и҆ рꙋкꙋ.
и҆но не хощи и҆ска́ти е҆́здра.
и҆ ѿвѣща́хъ и҆ рекох̑.
ѽ влд̑ко г҃и а҆ще ѻ҆брѣто́хъ блгд̑ть пред̑ ѻ҆чи́ма твои҆ма.
молю̀ тѧ̀ да пока́жеши рабꙋ̀ твое҆мꙋ коне́цъ зна́менїи твои҆хъ.
и҆́х꙽же ча́сть показа́лъ е҆си мнѣ но́щи проходѧ́щїа и҆ ѿвѣща̀, и҆ рече м̂и.
въста́ни на но́гꙋ твою и҆ ѹ҆слы́ши глас̑҇ и҆сполнѣ́ишїи шꙋма.
и҆ бꙋ́детъ ꙗ҆́ко поколѣба́тисѧ, и҆ не поколѣбле́тсѧ мѣ́сто на не́м꙽же стои́ши·

И҆ сего ра́ди е҆гда гл҃етъ т̂и не ѹ҆жаса́исѧ.
не бо̀ ѻ҆ концы̀ сло́во, и҆ ѻ҆ ѻ҆снова́нїи землѝ разꙋмѣ́етсѧ.
не бо̀ ѻ҆ тыхъ вещехъ сло́во сътрѧсет̑сѧ и҆ съдвигнетсѧ.
вѣсть б̂о ꙗ҆́ко коне́цъ и҆хъ и́мать и҆змѣни́тисѧ·

И҆ бы́сть е҆гда̀ слы́шах̑, воста́хъ на но́ѕѣ моѝ и҆ слы́шахъ.
и҆ с̂е глас̑҇ гл҃ющи и҆ шꙋмъ е҆го ꙗ҆́ко шꙋмъ вод̑ мно́гъ, и҆ рече, с̂е дн҃їе прїидꙋтъ, и҆ бꙋдетъ е҆гда̀ приближа́тисѧ начнꙋ да посѣщꙋ ѻбита́ющихъ на землѝ.
и҆ е҆гдаж̑ взыска́ти начнꙋ на нихъ и҆́же непра́вдꙋ побѣди́ша неправдою свое́ю·

И҆ е҆гда и҆спо́лнит̑сѧ смире́нїе сїѻ́не, и҆ е҆гда назнаменꙋ́етсѧ вѣкъ и҆же начне́тсѧ преитѝ·

Сїѧ зна́менїа сътворю̀, кни́ги разгнꙋтсѧ предъ лицемъ дръжа́вы и҆ вс̂и ѹ҆́зрѧтъ въкꙋпѣ.
и҆ лѣтца младе́нцы гл҃юще гла́сы свои́ми.
и҆ бремена́ты незрѣлы ро́дѧтъ младенець.
трема̀ и҆ четырма мс̑҇цы, живꙋтъ и҆ въздви́жт̑ꙋсѧ.
и҆ ско́ро ꙗ҆́влѧ́ют̑сѧ мѣ́ста ѻ҆сѣа́на, котора́ѧ же не сꙋть ѻ҆сѣѧ́на.
и҆ по́лна храни́лища ско́ро ѻ҆брѧ́щт̑ꙋсѧ пра́здны, и҆ трꙋба̀ въстрꙋбитъ съ шꙋмомъ ю҆́же е҆гда̀ вс̂и ѹ҆слы́шат̑, ско́ро ѹ҆жа́снꙋтсѧ·

И҆ бꙋ́детъ в то̀ вре́мѧ възбранѧт̑сѧ прїѧ́тели прїѧ́телю ꙗ҆ко враѕи.
и҆ ѹ҆жаснет̑сѧ того̀ землѧ̀.
и҆ жи́лы и҆сто́чником̑ стоа́тъ и҆ не въстекꙋтъ въ ча́сѣхъ тре́хъ.
и҆ бꙋ́детъ всѧ́къ и҆же ѻ҆ста́вленъ бꙋдетъ ѿ всѣхъ си́хъ ꙗ҆коже пред̑рекох̑.
то́и сп҃сетсѧ.
и҆ ѹ́зритъ сп҃сенїе моѐ и҆ коне́цъ вѣка ва́шего.
и҆ ѹ́зрѧт̑ и҆же въспрїѧтны сꙋть лю́ди.
и҆́же см҃рти не вкꙋси́ша ѿ рожд̑енїѧ свое҆го.
и҆ премени́тсѧ срд̑це въ ѻ҆бита́ющих̑.
и҆ ѻ҆брати́тсѧ въ чю́в꙽ство и҆́ное, загла́дитъ б̂о сѧ лꙋка́вое, и҆ пога́сит̑сѧ лесть.
процвитет꙽ же вѣра, и҆ побѣдит̑сѧ растлѣнїе.
и҆ ꙗ҆́вит̑сѧ и҆́стинна и҆же без̑ пло́да быс̑҇ дн҃и толи́ки·

И҆ бысть е҆гда м̂и гл҃а, и҆ с̂е ти́хо въсмотрѣхъ на́нь пред̑ ни́м꙽ же стоѧ́хъ и҆ рече къ мнѣ̀.
с̂е прїидо́хъ к тебѣ, показати вре́мѧ пришед̑шеи но́щи·

А҆́ще б̂о паки возмоли́шисѧ.
и҆ па́ки пости́шисѧ, з҃, дн҃їи.
па́ки тебѣ̀ возвѣщꙋ сед̑мъ бо́льшаа вещи по дн҃и которомъ слы́шах̑.
слы́шанъ б̂о е҆сть глас̑҇ твой пред̑ вы́шнимъ.
ви́дит̑ б̂о крѣпкїи ѹ҆правленїе твое.
и҆ прови́дѣ чистотꙋ̀ ю҆́же ѿ ю́ности твое́ѧ и҆мѣлъ е҆си·

И҆ сего ради посла́ мѧ показа́ти тебѣ вс̂и ве́щи сїѝ, повѣ́дахъ тебѣ, вѣ́рꙋи и҆ не бо́исѧ, и҆ не моѕи тща́тисѧ съ пр́ьвыми времены мы́слити сꙋе́тнаѧ.
да не прибли́жишисѧ послд̑ѣнихъ временх̑ѣ·

И҆ бысть по си́хъ плакахсѧ па́ки, и҆ та́коже постѧ́хсѧ сед̑мь дн҃їи.
да и҆спо́лню тр̂и неде́ли и҆же реч̑҇ны сꙋть мн̂ѣ·

И҆ бы́сть въ ѻ́смꙋю но́щь, срд̑це мое скорбѧ́шесѧ паки въ мнѣ̀, и҆ начах̑ гл҃ати пред̑ вы́шнимъ, распала́шесѧ б̂о дх҃ъ мо́и ѕѣ́ло.
и҆ дш҃а моѧ̀ ѹ҆ныва́шесѧ.
и҆ реко́хъ.
ѽ г҃и гл҃ющи гл҃алъ е҆си ѿ нача́ла сътворе́нїѧ въ пр́ьвыи дн҃ь гл҃ющи.
да бꙋдет̑ нб҃о и҆ землѧ и҆ твое слово дѣ́ло съвръшено·

И҆ бысть тогда дх҃ъ и҆ тма̀ ѻ҆́крс̑҇тъ ношашесѧ молча́нїе.
шꙋмъ гла́са члч҃а не бѣ сътво́ренъ ѿ тебе·

Тогда̀ гл҃алъ е҆си ѿ съкровищъ твоих̑ возда́ти свѣтъ свѣтлыи, и҆же ѻ҆свѣти дѣ́ла твоа.
и҆ въ дн҃ь вто́рыи созда́лъ е҆си дх҃ъ дръжа́вы.
и҆ повелѣлъ е҆си е҆мꙋ да раздѣ́литъ, и҆ раздѣленїе сътво́ритъ ме́ждꙋ во́дъ.
да ча́сть нѣ́каѧ вы́ше ѿстꙋ́питъ, и҆ часть вто́раѧ ни́зꙋ пребыва́етъ.
и҆ въ тре́тїи дн҃ь повелѣлъ е҆си водам̑ съвокꙋпи́тисѧ въ сед̑мꙋю ча́сть землѝ.
ше́сть б̂о ча́стїи ѻ҆сꙋши́лъ е҆си и҆ съхранѝ.
е҆же бы̀ пред̑ тобо́ю слꙋжи́ли, и҆ дѣ́ла насѣѧ́на ѿ́ бг҃а.
сло́во б̂о твое и҆зыиде, и҆ дѣ́ло скоро сотворѧ́шесѧ·

И҆зыиде б̂о скоро плод̑ мно́жество безмѣрно.
и҆ жела́нїе въкꙋшенїю разли́чни и҆ цвѣты лицъ непремѣн꙽ны.
и҆ ѻ҆бонѧнїе ѻ҆бонѧнїю неи҆з꙽слѣдова́ны.
въ дн҃ь тре́тїи сїѧ сътворена сꙋть.
в четве́ртыи же дн҃ь повелѣлъ е҆си солне́чнеи быти свѣтлости, лꙋнѣ̀ свѣтъ, и҆ ѕвѣзда́мъ раз꙽смотренїе.
и҆ повелѣлъ е҆си и҆мъ да слꙋж́ат꙽ прише́ствїю созда́нномꙋ чл҃кꙋ·

Въ пѧ́тыи же дн҃ь реклъ е҆си сед̑мои части гд̂ѣ быс̑҇ вода̀ собра́на, да сътво́рѧт̑ живо́тнаѧ и҆ летѧ́щаѧ и҆ рибы·

И҆ та́ко сътворѧ́шесѧ вода̀ нѣма и҆ бездꙋшна, и҆же бж҃їимъ мановенїемъ повелева́хꙋсѧ живо́тнаѧ сътворѧ́шесѧ.
да ѿ сего̀ ди́внаѧ твоа̀ ро́дове провѣща́ют̑·

И҆ тогда̀ съхрани́лъ е҆си дв̂ѣ дꙋшѝ, и҆мѧ е҆ді́нои назва́лъ е҆си е҆но́хъ.
і҆ и́мѧ вто́рои назва́лъ е҆си левїаѳа́мъ·

И҆ разлꙋчил̑҇ е҆си е҆ді́наго ѿ дрꙋга́го.
не бо̀ можа́ше сед̑ма́ѧ ча́сть гдѣ̀ бысть вода̀ собра́на снести и҆хъ.
и҆ да́лъ е҆си е҆но́хꙋ е҆ді́нꙋ часть и҆же ѻ҆сꙋше́на е҆сть, тре́тїи дн҃ь да ѻ҆бита́етъ на не́и·

Гдѣ̀ сꙋть го́ръ ты́сѧща.
а҆ левїаѳамꙋ же да́лъ е҆си сед̑мꙋю часть мокра̀.
и҆ дръжа́лъ е҆си е҆го да бꙋ́дет̑ в пожре́нїе и҆́хже хо́щеши и҆ когда̀ хо́щеши·

Въ шесты́и же дн҃ь повелѣлъ е҆си зем̑лѝ да створи́тъ пред̑ тобо́ю ско́ты ѕвѣри и҆ га́ды и҆ над̑ тѣми ве́щ꙽ми сътвори́лъ е҆си а҆да́ма.
е҆гоже поста́вилъ е҆си вожа̀ и҆ кнѧ́ѕѧ на всѣхъ сътворе́нїи и҆же сътвори́лъ е҆си.
и ѿ него̀ ро́дим̑сѧ м̂ы всѝ и҆́хже и҆збра́лъ е҆си лю́ди·

Сїѧ же вс̂ѧ реко́хъ пред̑ тобо́ю г҃и и҆же ради насъ създа́лъ е҆си свѣтъ·

ѻ҆ста́н꙽цы же ꙗ҆́зычестїи ѿ а҆да́ма рождени реклъ е҆си им̑ ничтоже бы́ти, ꙗ҆́ко слинѣ подо́бни сꙋть.
и҆ ꙗ҆ко капленїе ѿ сосꙋда ѹ҆подобил̑҇ е҆си мно́жество их̑.
и҆ нн҃ѣ г҃и с̂е тїѝ ꙗ҆зы́цы и҆же нивъчто́же в꙽мѣне́ни сꙋть, нача́ша̑ владѣти на́ми и҆ пожира́ти на́съ·

Мы́ же лю́дїе твоѝ и҆́хже возда́лъ е҆си пр́ьвороже́ны е҆ді́наго роже́наго возлю́блен꙽наго твое҆го.
преда́ны е҆смы̀ въ рꙋкахъ и҆хъ.
и҆ а́ще ради нас̑҇ сътво́рен̑҇ бы́сть свѣт꙽.
въскꙋю достоа́нїе не въздръжим̑ с вѣком̑, доко́лѣ сїѧ бꙋдет̑·

Глв̑҇а, з҃·

И бы́сть е҆гда̀ сконча́хъ гл҃ъ слове́съ сих̑, посла́нъ е҆сть къ мнѣ̀ а҆́гг҃лъ.
и҆же послан̑҇ бы́сть къ мнѣ̀.
въ прежнѧѧ нощи и҆ рече къ мнѣ воста́ни е҆́здра, и҆ слы́ши словеса̀ их̑же прїидо́хъ гл҃ати тебѣ̀.
и҆ рекохъ, гл҃и г҃и мо́и·

И҆ рече къ мн̂ѣ.
мо́ре поста́влено е҆сть въ простра́н꙽нѣ мѣстѣ да бы́сть глꙋбо́ко и҆ без̑мѣрно·

Бꙋ́детъ же е҆мꙋ и҆ вход̑ в тѣснѣ мѣ́стѣ поста́вленъ, дабы подо́бно рѣкам̑.
кт̂о бо хотѧ́щи хо́щетъ вънитѝ в мо́ре и҆ ви́дѣти е҆го и҆ли господовати и҆мъ.
а҆́ще не про́идетъ тѣсноты въ ширинꙋ ка́ко прїити мо́жетъ, и҆ па́ки и҆́но·

Град̑ созда́нъ е҆сть и҆ поста́влен̑҇ на мѣстѣ по́лстм̑ѣ е҆сть же пол꙽нъ всѣхъ бл҃гомъ.
въсход̑ е҆го тѣ́снъ и҆ въ стромленїѝ поста́вленъ бысть ѻ҆деснꙋю б̂о ѻ҆́гнь, ѻ҆шꙋю́ю во́да глꙋбока.
стеѕѧ же е҆сть е҆дна токъмо междꙋ и҆хъ поста́влена.
и҆же б̂ѣ междꙋ ѻ҆гнем̑ и҆ водо́ю, е҆дин̑҇ ток꙽мо стꙋпень чл҃чїи можаше воместити.
сего ради а҆́ще дастьсѧ град̑ сїи чл҃кꙋ въ достоѧ́нїе.
и҆ не прїидет̑ л̂и никогд̑а выше положенаг̑҇ стремленїа, како прїимет̑ достоанїе свое и҆ рекох̑, та́ко г҃и.
и҆ реч̑҇ ко мнѣ та́ко е҆сть і҆и҆л҃ь ча́сть ра́ди и҆хъ б̂о сътвори́лъ вѣ́къ и҆ ко́гда престꙋпи́лъ е҆сть а҆да́мъ положе́нїе мое.
сꙋжде́но бы́сть чт̂о сътво́рено е҆сть.
и҆ бы́сть входы томꙋ вѣ́кꙋ тѣ́сны и҆ болезне́ны и҆ трꙋ́дны.
ма́ло же и҆ лꙋка́вы и҆ бѣднымъ по́лни, и҆ трꙋ́домъ вели́ким̑ и҆ вели́кимъ дѣ́ломъ под̑пе́рты.
и҆же бо́льши вѣ́кꙋ вхо́ды простра́нны и҆ станови́ты.
и҆ сътворѧ́ющи безъсмр҃тныи пло́дъ.
а҆ще б̂о входѧ́ще не бы́ша въшлѝ и҆же живꙋтъ.
тѣсна и҆ сꙋетна сїѧ, не възмогꙋтъ прїѧ́ти и҆же сꙋть пред̑ставленна.
и҆ нн҃ѣ б̂о въскꙋ́ю т̂ы смꙋти́шисѧ е҆гда̀ бꙋ́дешъ растлѣ́нъ.
и҆ чт̂о мѧтешисѧ т̂ы е҆гда̀ бꙋ́дешъ смр҃тенъ и҆ въскꙋ́ю не прїѧ́лъ е҆си въ срд̑цы твоем̑ чт̂о е҆сть прише́ствїе н̂о что̀ настоѧ́щее.
ѿвѣщах̑ и҆ рѣ́хъ.
влд̑ко г҃и, се расмотри́лъ е҆си зако́нъ твои.
ꙗ҆́ко пра́веднїи въслѣдꙋ́ютсѧ, нечести́выи же поги́бнꙋтъ.
пра́вед̑нїи же но́сѧтъ тѣснотꙋ ѹ҆пова́ющи простра́ннаѧ·

И҆же б̂о нечести́во сътвори́ша.
и҆ тѣсноты̀ пострада́ша и҆ простра́ннаѧ не ѹ҆зрѧтъ.
и҆ реч̑҇ ко мнѣ̀ нѣ́сть сꙋдїи па́че б҃а ни ра́зꙋмъ над̑ вы́шнѧго.
поги́бнꙋтъ б̂о мно́ѕи настоѧ́щїи.
ꙗ҆́же не по́мнитсѧ и҆же пред̑ставле́нъ е҆сть бж҃їи зако́нъ.
повелѣва́ющи б̂о повелѣ̀ б҃ъ грѧдꙋщим̑.
когда прїидо́ша чт̂о сътворѧ́ющи живꙋтъ.
и҆ чт̂о въздержа́щи да не въз꙽казнѧ́тсѧ тїи б̂о не сꙋть совѣтова́нїи проти́вишасѧ е҆мꙋ.
и҆ положи́ша себѣ помышле́нїа сꙋетнаа.
и҆ пред̑ста́виша себѣ ѻ҆бхоженїе грѣхов̑҇.
и҆ вы́ше гл҃аше вы́шнемꙋ не бы́ти.
и҆ пꙋтѝ е҆го не позна́ша, и҆ зако́нъ е҆го ѹ҆ничижи́ша, и҆ ѻ҆бѣща́нїе е҆го ѿверго́ша.
и҆ в зако́нѣ е҆го вѣры не и҆мѣша и҆ дѣ́ла е҆го не съверши́ша.
того ра́ди е҆́здра пра́зденъ пра́здным꙽.
и҆ по́лн꙽ по́лнымъ, с̂е вре́мѧ прїидетъ и҆ бꙋдетъ когда прїидꙋтъ зна́менїѧ, и҆же пред̑реко́хъ тебѣ̀.
и҆ ꙗ҆ви́тсѧ жена̀ и҆ ꙗ҆влѧ́ющи пока́жетсѧ и҆же нн҃ѣ покрыва́етсѧ землѧ̀ и҆ всѧ́къ и҆же и҆збавле́нъ е҆сть ѿ пред̑рече́ныхъ лꙋка́выхъ.
тои ѹ҆зри́тъ ди́внаѧ моѧ̀.
ѿкры́етъ бо сѧ сн҃ъ мои і҆с҃ с тѣми и҆же с ни́мъ сꙋть.
и҆ ѹ҆блажа́тсѧ и҆же ѹ҆ставле́ни сꙋть в лѣтѣхъ у҃. и҆ бꙋ́детъ по лѣтѣхъ сихъ и҆ ѹ҆́мрет̑ сн҃ъ мои х҃с.
и҆ вс̂и и҆же дыха́нїе и҆мт̑ꙋ чл҃цы.
и ѻ҆брати́тсѧ вѣ́къ въ дре́внее молъча́нїе, дн҃їи се́дьмъ·

ꙗ҆́ко въпрьвыхъ сꙋдѣхъ тако да никт̂о ѻ҆ста́нетсѧ, и҆ бꙋдетъ по дн҃ехъ седмѝ и҆ възбꙋ́дитсѧ·

чт̂о не е҆щѐ бди́тъ вѣкъ и҆ ѹ҆мретъ растлѣнъ.
и҆ землѧ̀ въздае́тъ и҆же на не́и спѧ́тъ.
и҆ пра́хъ и҆же на нем꙽ млъча́нїе ѻ҆бита́етъ, и҆ храни́лища въздаю́тъ, и҆же в ни́хъ преда́ни сꙋть дш҃и·

И҆ ѿкры́етсѧ вы́шнїи на прс̑҇тлѣ сꙋдїѧ и҆ про́идꙋтъ бѣды, и҆ длъжнаѧ събира́ютсѧ.
сꙋдїѧ же самъ ѻ҆ста́нетъ, и҆́стинна ста́нет̑ и҆ вѣра възмо́жетъ.
и҆ дѣло въслѣдꙋ́етсѧ и҆ м꙽зды̀ ска́жꙋтсѧ и҆ пра́вды бдѧ́тъ, и҆ непра́вды не владꙋю҆тсѧ.
и҆ реко́хъ.
прьвыи а҆враа́мъ ради содо́млѧнъ моли́лъсѧ.
и҆ моѷсїи за ѿц҃ы в пꙋсты́ни съгрѣш꙽ша.
і҆ и҆же по не́мъ за і҆и҆л҃ѧ въ дн҃и а҆ха́за и само́ила, и҆ дв҃дъ за съкрꙋше́нїе.
и҆ соло́монъ за и҆хъ и҆же прїидо́ша въ ѻ҆сщ҃енїе, і҆ и҆лїѧ за тѣхъ и҆же до́жд̑ъ прїѧша и҆ за мѐртва да ѻ҆живи́тъ.
і҆ е҆зекїѧ за́ люди въ дн҃и сенахери́ма и мно́зи за мно́гихъ.
а҆ще б̂о нн҃ѣ когда тлѣнно възрасло̀.
и҆ непра́вда ѹ҆мно́жена е҆сть.
и҆ моли́шасѧ пра́вїи за нечести́выхъ.
въскꙋю нн҃ѣ та́ко не бꙋдетъ, и҆ ѿвѣща̀ къ мн̂ѣ и҆ рече.
настоѧ́щемꙋ вѣкꙋ нѣсть конца̀, слава в немъ безъпреста́ни пребыва́етъ.
ради того молишасѧ за не́мощны.
дн҃и б̂о сꙋдныи, бꙋдет̑ коне́цъ вре́мени сего.
и нача́ло вре́мени прише́ствїа бесме́ртнаго в нем̑же проше́лъ растлѣнна ѿрѣше́нїѧ е҆сть толкова́нїѧ, ѿсѣче́но е҆сть невѣрїе.
възрасте́ же пра́вда въз꙽сїѧна е҆сть и҆́стинна тогда б̂о никто́же мо́жет꙽ спс̑҇ти е҆го и҆же поги́бе.
ни ѿрѣши́ти и҆же свѧза̀, и҆ ѿвѣща́хъ и҆ реко́хъ.
сѐ сло́во мое прьвое и послѣднее, ꙗ҆ко лꙋчши быс̑҇ не да́ти зем̑лю а҆да́мꙋ и҆л̂и е҆гда ѹ҆же дана бысть въздержа́ти е҆го да не съгрѣши́тъ.
чт̂о б̂о требѣ е҆сть чл҃комъ в настоѧ́щем̑ жи́тїи и҆ въ ско́рби.
и҆ мерътвымъ ѹ҆пова́ти ка́знемъ.
ѽ чт̂о сътвори́лъ а҆да́ме·

а҆ще б̂о ты̀ съгрѣши́лъ е҆си нѣсть сътворе́но е҆ді́но твое паде́нїе, н̂о и҆ на́ше и҆же ѿ тебѐ прїидо́хом꙽.
что́ бо требѣ нам̑ а҆ще ѻ҆бѣща́но е҆сть бесмр҃тъное вре́мѧ.
мы́ же смр҃тнаѧ дѣла съдѣловаем̑, и҆ ꙗ҆́ко пред̑речено е҆сть нам̑ вѣчныѧ ѹ҆пова́нїѧ.
мы̀ б̂о стропти́вы и҆ сꙋ́етни сътворе́ни е҆смы̀.
и҆ ꙗ҆́ко пред̑ста́влена сꙋть намъ жили́ща здравле́ни и҆ станови́ты.
мы б̂о лꙋка́во жилѝ е҆смы̀.
и҆ ꙗ҆́ко пред̑ставле́на е҆сть сла́ва вышнѧ́го защити́ти их̑ и҆же поздѣ̀ пожи́ша.
мы же стропо́тныѧ пꙋтѝ ходи́хом̑.
и҆ ꙗ҆́ко повѣстьсѧ ра́и е҆мꙋже плодъ нерастлѣнъ пред̑стои҆тъ, в не́мъже е҆сть станови́таѧ и҆ враче́внаѧ.
мы́ бо не вни́демъ въ небл҃года́рных̑ б̂о мѣстехъ пожи́хомъ.
и҆ ꙗ҆́ко на звѣзда́хъ свѣтѧ́тъ лица̀ и҆хъ и҆же въздержа́нїѧ и҆мѧ́хꙋ.
наши б̂о лица на мра́цѣхъ черныхъ, ни б̂о помы́слихомъ живꙋщи когда безако́нно творѧ́щи чт̂о и҆мамы по сме́рти терпѣти.
и҆ ѿвѣща̀, и҆ рече·

Си̂ е҆сть помышле́нїе подвигненїе чт̂о подви́гнетъ и҆же на землѝ рожде́нъ е҆сть чл҃къ, да а҆ще ѻ҆би́женъ бꙋдетъ да тръпи́тъ чт̂о ре́клъ е҆си.
а҆ще же победи́тъ прие́млетъ чт̂о гл҃ю ꙗ҆́ко се́и е҆сть живот̑ ꙗ҆́же моѷсїи рече е҆гда̀ жи́тъ, к лю́демъ гл҃ющи, и҆зберѝ себѣ живо́т꙽ и҆ да живе́шъ.
не вѣроваша же е҆мꙋ н̂о ни по не́мъ про̑҇ркомъ, н̂о ни мн̂ѣ и҆же гл҃алъ е҆смь и҆мъ.
ꙗ҆́ко не бы́сть скорбъ въ погꙋбле́нїе и҆хъ, ꙗ҆́ко прише́ствїе е҆сть ра́дости на них̑ и҆хже совѣтно е҆сть сп҃сенїе.
и҆ ѿвѣща́хъ и҆ рекохъ·

Вѣмъ г҃и ꙗ҆́ко званъ е҆си вышнїи милосердъ, чт̂о любитсѧ тѣми и҆же жи́тїе сътворѧ́ютъ по зако́нꙋ е҆го, и҆ тръпели́въ е҆сть, ꙗ҆́ко терпѣнїемъ подае́тъ си́мъ и҆же съгрѣши́ша ꙗ҆ко свои́ми дѣлы.
въздатель е҆сть ꙗ҆́ко б̂о да́ти хо́щетъ за пра́во и҆спроше́нїе.
и҆ мно́го млс̑҇рдъ всѣмъ ꙗ҆́же настоѧ́ще сꙋть, і҆ и́же минꙋша і҆ е҆же бꙋдꙋще сꙋть·

А҆ще б̂о не ѹ҆мно́жит̑ млс̑҇рдїѧ свое҆го, не ѻ҆живе́тсѧ вѣкъ с тѣмѝ и҆же въслѣдѧ́хꙋ на́нь, и҆ дает̑ ꙗ҆́ко а҆ще не да́сть ѿ блгс̑҇ти свое́ѧ, да ѻ҆блегча́тсѧ сїи и҆же въ безако́нїе сътвори́ша ѿ свои҆хъ безако́нїи, не възмо́жетъ десѧто ты́сѧщнаѧ ча́сть ѻ҆живи́ти чл҃комъ.
и҆ сꙋдїѧ а҆ще невѣдѣтъ симъ и҆же ѻ҆чище́ни сꙋть сло́вомъ е҆го, и҆ ѻ҆чи́ститъ мно́жество рве́нїѧ не ѹ҆̀ б̂о ѻ҆ста́вили бы сѧ въ бесчи́сленное мно́жество то́кмо ма́ло ѕѣло·

Глв̑҇а, и҃·

И ѿвѣща̀ къ мн̂ѣ и҆ рече.
се́и вѣкъ сътвори́лъ вы́шнїи мно́гихъ ради.
прише́ствїѧ же ради ма́ла, гл҃ю пред̑ тобо́ю подо́бное е҆́здра.
какоже въспро́сиши землѝ и҆ речет̑ т̂и ꙗ҆ко дасть землѝ мно́го болши гд̂ѣ сътворѧ́тъ скꙋде́лницы.
ма́ло же пра́хъ гдѣ̀ зла́то бꙋдетъ.
та́ко и҆ дѣѧ́нїе настоѧ́щаго вѣка.
мно́ѕи б̂о сътворе́ни сꙋть ма́ло же спс̑҇етсѧ·

И҆ ѿвѣща́хъ и҆ реко́хъ, дш҃е моѧ пожрѝ разꙋмѣнїе и҆ поглотѝ мдрс̑҇ть поне́же ѻ҆беща́ла е҆си слꙋшати.
и҆ про̑҇рчествова́ти хотѧ́щи.
не бо̀ да́но е҆сть тебѣ пространъство, токмо жи́ти.
ѽ г҃и а҆ще не ѿпꙋстиши рабꙋ̀ твое҆мꙋ да мо́лимсѧ пред̑ тобо́ю.
и҆ дае́ши намъ сѣмѧ въ срд̑це и҆ чю́в꙽ство слꙋжбѣ гд̂ѣ пло́д꙽ сътвори́тсѧ.
гд̂ѣ жи́ти возмо́жет꙽ всѧ́къ растлѣнъ и҆же носи́ти мѣсто чл҃кꙋ.
е҆ді́нъ б̂о е҆си и҆ е҆ді́но сътворе́нїе мы̀ е҆смы рꙋкꙋ твое́ю, ꙗ҆́ко гл҃алъ е҆си.
и҆ ка́ко мн̂ѣ въ матриси созда́но е҆сть тѣло и҆ подаю́щи съста́ви.
съдръжи́тсѧ въ ѻ҆гнѝ и҆ водѣ̀ твоѐ творе́нїе.
и҆ ѳ҃ мс̑҇ць, стра́ждетъ твое създа́нїе, и҆ твое сътворе́нїе и҆же в не́и сътворе́но ес̑҇ т̂о и҆же чт̂о съхрани́тъ, и҆ в꙽ чем̑ съхрани́тсѧ, и҆ ѻ҆́бѣ же съхранѧ́тсѧ.
съхране́ное же никогда па́ки ѻ҆братит̑ матриѯъ и҆же в не́и расто́ша·

Повелѣлъ б̂о е҆си ѿ их̑ съста́въ чт̂о е҆сть со́сецъ възда́ти млека плод̑ со́сецъ да ко́рмитсѧ т̂о чт̂о създа́но е҆сть да́же до вре́мени нѣкое҆го·

И҆ па́ки расмо́трит̑ е҆го своемꙋ млс̑҇рдїю, и҆ воспита́лъ е҆си е҆го твое́и пра́вдѣ.
и҆ наѹ҆чи́лъ е҆си е҆го зако́нꙋ твое҆мꙋ, и҆ наказа́лъ е҆си е҆го твое҆мꙋ ра́зꙋмꙋ.
и҆ ѹ҆мрътвиши е҆го ꙗ҆́ко свое сътворе́нїе, и҆ паки ѻ҆живи́ши е҆го ꙗ҆́ко е҆ді́но дѣло.
а҆ще б̂о погꙋби́ши е҆го и҆же толи́кими трꙋды създа́нъ е҆сть твои҆мъ повеле́нїемъ възмо́жно ес̑҇ нарѧжа́ти, да чт̂о сътворѧ́шесѧ съхрани́тсѧ.
и҆ нн҃ѣ г҃и гл҃ю ѻ҆ всѧ́ком чл҃цѣ ты̀ на́ипаче вѣси и҆ ѻ҆ людех̑ твои҆хъ ради ѻ҆ них꙽же болѣзнꙋю, и҆ ѻ҆ наслѣдїи твое҆м꙽ е҆гоже а҆́зъ рыда́ю и҆ ради і҆и҆л҃ѧ кое҆го ско́рбенъ е҆смь.
и҆ і҆а́кова ради е҆гоже а҆́зъ болѣзнꙋ́ю·

Сего ради начнꙋ̀ моли́ти пред̑ тобо́ю за мѧ и҆ за и҆хъ ꙗ҆́ко ви́жꙋ паде́нїе наше и҆же ѻ҆битае҆мъ на зе́мли.
н̂о слы́шахъ скорѣе сꙋдїю и҆же пришестве́нъ е҆сть·

Сего ради ѹ҆слы́ши гла́съ мои и҆ разꙋмѣи сло́во мое и҆ гл҃ю пред̑ тобо́ю·

Нача́токъ словес̑҇ е҆́з꙽дринъ, пре́жде неже во́зметсѧ, и҆ рѣхъ, г҃и и҆же ѻ҆бита́еши въ вѣки.
е҆гоже ѻ҆́чи въздви́гнꙋты на́ивышъшей а҆е́ра.
и҆ е҆гоже прс̑҇тл꙽ без̑цѣ́нныи ес̑҇ и҆ сла́ва неи҆спыта́нна.
е҆мж̑ꙋ пред̑стоѧт̑ во́и а҆гг҃лъстїи съ тре́петомъ.
и҆хже съхране́нїе вѣтромъ и҆ ѻ҆гне́м꙽ ѻбращаетсѧ.
е҆гоже слово и҆́стин̑҇но и҆ гл҃анїе силно, и҆ повелѣнїе крѣпко и҆ разъсмотре́нїе стра́шно.
е҆го́же ѻ҆́бразъ сꙋхи сътворѝ бе́здны, и҆ въ гнѣванїе растли́ти сътворѝ го́ры.
і҆ и́стин꙽нꙋ свѣдѣтельствꙋ́етъ.
ѹ҆слы́ши мл҃твꙋ раба̀ твое҆го.
и҆ въ ѹ҆шеса прїими моле́нїе скꙋделѧ твое҆го.
когда б̂о жи́въ гл҃ю, и҆ когд̑а разꙋмѣ́ю ѿвѣща́ю.
ни раз꙽смо́тришъ людїи твои҆хъ грѣсѝ.
н̂о и҆же тебѣ въи҆́стиннѣ слꙋ́жатъ.
ни воньми нечести́ва ꙗ҆зы́комъ ѹ҆че́нїѧ.
н̂о и҆же твое свѣдѣтельство съ бо́лѣзнїю съхрани́ша.
не помы́слиши и҆же пред̑ тобо́ю л꙽жи́во пожи́ша.
н̂о помѧни́ сїа и҆же ѿ во́ли твое҆ѧ стра́х꙽ позна́ша.
неже хо́щеши погꙋби́ти и҆же ско́томъ ѻ҆бы́чаи и҆мѣша.
н̂о раз꙽смотри тѣ́хъ и҆же зако́нъ твои ѻ́би́лно ѹ҆чи́ша.
ни прогнѣвасѧ нань и҆же ѕвѣ́реи горши ѻ҆сꙋждени сꙋть.
н̂о възлюби́ши и҆хъ и҆же всегда̀ въ пра́вдꙋ твою надѣютсѧ и҆ сла́вꙋ.
ꙗ҆́ко м̂ы и҆ ѿц҃ы на́ши таковы́ми моры̀ и҆щезнемъ.
ты же ра́ди нас̑҇ грѣшных̑ млс̑҇рдъ въз꙽зове́шисѧ.
а҆ще б̂о жела́еши да нас̑҇ ми́лꙋеши.
тогда̀ млрс̑҇дъ нарече́шисѧ.
мы же не и҆мѣ́ющи дѣла пра́вды.
пра́ведни б̂о и҆́х꙽же сꙋть дѣ́ла мно́га преставлена.
ѿ и҆́стин꙽ныхъ дѣ́лъ прїимꙋтъ м꙽здꙋ.
чт̂о е҆сть чл҃къ да е҆го прогнѣва́еши и҆ли род̑ раз꙽стлѣ́нъ да та́ко ѻ҆горче́нъ бꙋдеши ѿ него.
въи҆́стиннꙋ б̂о никто̀ ѿ роже́ныхъ е҆сть и҆же нечести́во сътвори́лъ, и҆ ѿ надѣ́ющихъ и҆же не съгрѣши́лъ.
в꙽ то́мъ б̂о възвѣсти́тсѧ пра́вда твоѧ̀ и҆ бл҃гости твоѧ̀ г҃и, е҆гда̀ млрс̑҇дъ бꙋ́деши и҆мъ и҆же не и҆мѣ́ютъ сꙋщества бл҃гим̑ дѣлом̑ и҆ ѿвѣща̀ къ мнѣ̀, и҆ рече.
пра́во гл҃алъ е҆си нѣ́котораѧ и҆ по словесехъ твои҆хъ та́ко и҆ бꙋ́детъ.
ꙗ҆́ко не и҆́стиннꙋ помы́шлю на зда́нїе и҆хъ и҆же съгрѣши́ша пред̑ смр҃тїю пред̑ сꙋдомъ и҆ погꙋбле́нїемъ.
н̂о ѹ҆блажꙋсѧ на пра́веднемъ скꙋде́лѣ и҆ помѧнꙋсѧ прехоже́нїе же и҆ сп҃се́нїе и҆ м꙽зды̀ прїѧ́тїе, ка́ко б̂о гл҃алъ е҆смь та́ко и҆ е҆сть.
ꙗ҆́ко б̂о ра́таи сѣ́ет꙽ на землѝ сѣмена̀ мно́га, и҆ сажде́нїѧ мно́жество сади́тъ.
н̂о не въ вре́мѧ вс̂ѧ и҆же сѣа́на сꙋть сп҃сетсѧ.
н̂о ни всѧ̀ и҆же саже́на сꙋть въсто́ргнꙋтсѧ.
та́ко и҆же въ вѣцѣ сѣѧ́ни сꙋть не вс̂и сп҃сꙋтсѧ·

И҆ ѿвѣща́хъ и҆ реко́хъ.
а҆́ще ѻ҆брѣтох̑ блгд̑ть гл҃ю, ка́ко сѣ́мѧ ра́таю а҆ще не въсхо́дитъ и҆ли не прїе́млетъ во вре́мѧ до́ждѧ твое҆го, и҆ли а҆ще растлѣ́но бꙋ́детъ множе́нїем̑ дождѧ та́ко и҆ поги́бнет꙽.
и҆ та́ко б̂о чл҃къ и҆же рꙋкою твое҆ю създа́нъ бы́сть.
и҆ т̂ы е҆мꙋ ѻ҆́бразъ и҆менова̀.
ꙗ҆́ко подо́бенъ е҆си е҆мꙋ, и҆ е҆го ра́ди всѧ̀ създал̑҇ е҆си.
и҆ ѹ҆подоби́лъ е҆си сѣмѧ ра́таю.
не прогнѣ́ваисѧ на на́съ.
н̂о простѝ лю́ди твоѧ.
и҆ поми́лꙋи наслѣ́дїе твое.
ты же сътворе́нїе твое поми́лꙋеши·

И҆ ѿвѣща̀ къ мнѣ̀ и҆ рече, и҆же сꙋть настоѧ́щаѧ настоѧ́щим̑, і҆ и́же бꙋ́дꙋщаѧ бꙋ́дꙋщимъ.
мно́го тебѣ ѻ҆ста́нетъ да можеши възлюби́ти мое сътворе́нїе над̑ мѧ.
тебѣ же частѣ́ише и҆ то скрьнѣ́иши.
непра́ведни же нико́гда.
н̂о и҆ в се́мъ ди́венъ е҆си пред̑ вы́шним꙽, ꙗ҆́ко смирил̑҇сѧ е҆си подоби́тсѧ тебѣ.
и҆ не ѻ҆скꙋди́лсѧ е҆си да междꙋ пра́вед̑ных̑ мно́го сла́вишисѧ.
бѣдъ ра́ди мно́гихъ и҆ нищеты сътворѧ́ют̑сѧ им̑, и҆́же ѻбита́ютъ вѣ́къ напослѣдокъ иже на мно́гꙋ горды́ню въсходи́ша·

Ты же паки вразꙋмѣ́и и҆ ѿ таковых̑ твою̀ в꙽зы́щи славꙋ.
вамъ б̂о ѻ҆творенъ е҆сть ра́и, насажде́но е҆сть дре́во живо́тное ѹ҆гото́вано е҆сть бꙋдꙋщаго вре́мени ѹ҆множе́нїе.
създа́нъ е҆сть гра́дъ и҆скꙋше́нъ е҆сть поко́и, съверше́на е҆сть бл҃госты́нѧ и҆ съверше́на премꙋ́дрость, ко́рень лꙋка́въ знамена́нъ е҆сть ѿ васъ.
не́мощь и҆ ко́рь ѿ ва́съ съкры́тъ е҆сть.
и҆ на а́да бѣжи́тъ растлѣ́нїе на забве́нїе, проидо́ша болѣзни́ви, и҆ ꙗ҆вле́н꙽ е҆сть на коне́цъ съкро́вищъ без꙽смрътныхъ.
не хощи б̂о приложи́ти на и҆́щꙋщихъ ѿ ѹ҆множе́нїѧ и҆хъ и҆же поги́бнꙋтъ.
и҆же и҆ тїи прїе́млюще свобо́дꙋ ѹ҆ничижи́ша вы́шнѧго и҆ зако́на е҆го не помні́ша, и҆ пꙋти е҆го ѻ҆ста́виша.
па́че же пра́веднїи е҆го попра́ша.
и҆ реко́ша въ срд̑цы свое҆мъ нѣ́сть б҃а.
и҆бо вѣдѧще ꙗ҆́ко мрꙋтъ·

Ꙗ҆́ко б̂о вас̑҇ прїе́млють и҆же пред̑рече́на сꙋть.
та́ко и҆хъ зна́ите и҆ мꙋче́нїѧ и҆же ѹ҆гото́вана сꙋть.
ни бо тѣ́хъ чл҃ка погꙋби́ти.
н̂о и҆ тїи и҆же сътворе́ни сꙋть ѻ҆скверниша и҆мѧ е҆го, и҆же сътвори и҆хъ.
и҆ небл҃года́рни бы́ша е҆мꙋ и҆же ѹ҆гото́валъ и҆мъ живот̑·

Кое҆ѧ ради ве́щи сд̑ꙋ мои нн҃ѣ приближает̑сѧ.
и҆же не всѣмъ показах̑ то́кмо тебѣ, и҆ тебѣ таковыхъ малыхъ·

И҆ ѿвѣща́хъ и҆ реко́хъ.
с̂е нн҃ѣ г҃и показа́лъ е҆си мнѣ̀ мно́жество зна́менїи и҆же начне́ши твори́ти въ послѣднїи час̑҇, н̂о не показал̑҇ е҆си мнѣ въ кое вре́мѧ·

Глв̑҇а, ѳ҃·

И ѿвѣща̀ къ мнѣ̀ и҆ рече.
мѣрѧ́щи мѣ́ры вре́мѧ в себѣ само́м꙽.
и҆ бꙋдетъ е҆гда̀ видѧщи е҆гда про́идетъ ча́сть нѣ́которыхъ зна́менїи и҆же пред̑речена сꙋть·

Тогда̀ разꙋмѣ́еши ꙗ҆́ко томꙋ̀ е҆сть вре́мѧ в кое́мъ начина́етъ вы́шнїи посѣти́ти вѣ́къ чт̂о ѿ е҆го сътворе́нъ бы́сть.
и҆ когда ѹ҆зрѧтъ въ вѣ́цѣ гиба́нїѧ мѣстом̑ и҆ людемъ смꙋще́нїе тогда̀ разꙋмѣеши ꙗ҆́ко ѿ сих̑ бысть вы́шнїи гл҃анъ.
ѿ дн҃и и҆же бы́ша пред̑ тобо́ю ѿ нача́ла та́ко б̂о все чт̂о сътворе́но е҆сть въ вѣ́къ.
нача́ло и҆́мать та́коже и҆ скон꙽ча́нїю.
и҆ сконча́нїе е҆сть ꙗ҆вле́нно·

та́ко и҆ вы́шнѧго времена̀ нача́ла и҆маютъ ꙗ҆вле́нна в чюдесѣ́хъ и҆ си́лных̑ и҆ сконча́ни и҆ въ дѣѧ́нїе и҆ зна́менїа.
и҆ бꙋдетъ всѧ́къ и҆же сп҃сенъ сътворен̑҇ бꙋдетъ і҆ и́же мо́жетъ и҆збѣжа́ти по дѣ́ломъ свои҆мъ и҆ по вѣ́рѣ в кото́рꙋю вѣ́ровалъ е҆си ѻ҆ста́нетсѧ ѿ пред̑рече́ныѧ бѣды.
и҆ ѹ҆срѧ́щетъ спс̑҇нїе мое в землѝ мое́и и҆ въ предѣ́лехъ моих̑.
ꙗ҆́ко ѻ҆ст҃илсѧ е҆смь ѿ вѣка и҆ тогда̀ ѹ҆млрс̑҇дѧтсѧ и҆же нн҃ѣ ѿстꙋпи́ли сꙋть пꙋтїи мои҆хъ.
и҆ въ мꙋче́нїихъ поживꙋтъ.
тїи и҆же и҆хъ поверго́ша въ забве́нїе и҆же б̂о не позна́ша м̂ѧ живꙋщаго бл҃готворе́нїѧ наслѣди́ти и҆же ѻ҆горчиша зако́нꙋ мое҆мꙋ е҆гда̀ е҆ще бѧ́хꙋ и҆мѣ́ющи свободꙋ и҆ е҆гда̀ е҆щѐ бы́сть и҆мъ ѻ҆творено покаѧ́нїа мѣ́сто.
не възразꙋмѣша н̂о ѹ҆ничижи́ша.
симъ требѣ по смр҃ти въ мꙋче́нїи позна́ти.
и҆ не хощи е҆ще и҆ска́тель бы́ти ка́ко нечести́ви мꙋ́чатсѧ.
н̂о взыщи ка́ко пра́вед̑нїи сп҃сꙋтсѧ і҆ и́х꙽же вѣ́къ, и҆ ра́ди кото́рыхъ вѣкъ, и҆ е҆гда·

И҆ ѿвѣща́хъ и҆ реко́хъ, дре́внее гл҃алъ е҆смь, и҆ нн҃ѣ гл҃ю и҆ послѣ гл҃ю, ꙗ҆́ко мно́ѕи сꙋть и҆же поги́бнт̑ꙋ нежели и҆же сп҃сꙋтсѧ·

ꙗ҆́ко ѹ҆мно́жатсѧ во́лны на ка́плю·

И҆ ѿвѣща къ мнѣ̀ и҆ рече.
какова̀ ни́ва таково и҆ сѣ́мѧ, и҆ каковы цвѣти таковы̀ и҆ пестроты.
и҆ каковъ дѣлатель таково и҆ дѣ́ло.
каковъ ра́таи такова и҆ мѧкота.
ꙗ҆́ко времѧ бы́сть вѣ́ка·

И҆ нн҃ѣ е҆гда̀ быхъ ѹ҆готовающїи тѣ́мъ и҆же нн҃ѣ сꙋть, пре́же неже бы́сть вѣ́къ во́нже ѻ҆бита́ша.
и҆ никто́же проти́вꙋ рече мнѣ·

Тогда̀ всѧ́къ и҆же нн҃ѣ сътво́ритсѧ въ ми́ръ т̂о ѹ҆гото́ванно, и҆ ми́ра не ѻ҆скꙋдѣ́ющи, зако́нъ не и҆с꙽слѣдован꙽.
растлѣни сꙋть жи́тїѧ и҆хъ, и҆ промысли въ вѣк꙽.
и҆ с̂е бы́сть бѣда ра́ди помышле́нїа и҆же в не́мъ прїидо́ша.
и҆ видх̑ѣ и҆ ѻ҆прости́лъ е҆мꙋ ѕѣло, и҆ съкры̀ мнѣ ꙗ҆́годꙋ ѿ гро́зда, и҆ сажде́нїе ѿ колѣ́на мно́га.
поги́бнетъ б̂о мно́жество и҆же без̑ ве́щи рожде́но е҆сть.
и҆ съхрани́тсѧ ꙗ҆́годица моѧ̀ и҆ сажде́ница моѧ̀, и҆же вели́кимъ трꙋдомъ съверши́лъ·

Ты же а҆ще и҆ е҆ще въспрїимеши, з҃, дн҃їи и҆́нѣхъ, н̂о не пости́шисѧ в ни́х꙽, и҆деши на́ поле цвѣтное гдѣ до́мъ нѣ́сть създа́нъ, и҆ ꙗ҆си токмо ѿ цвѣтъ по́льскихъ и҆ мѧ́съ не вкꙋси́ши, и҆ вина̀ не пїеши, н̂о то́кмо цвѣтъ.
възмоли́ши вы́шнѧго без̑преста́ни, и҆ прїидꙋ и҆ гл҃ю с тобо́ю·

І҆ и҆до́хъ ꙗ҆́кож̑ рече мнѣ на́ поле и҆же зове́тсѧ а҆рда́ѳъ, и҆ сѣдох̑ та́мо ѹ҆ цвѣтъ и҆ ѿ тра́въ польских̑ ꙗ҆до́хъ, и҆ бы́ша мѝ пита́нїе и҆хъ в сы́тость·

И҆ бы́сть по сед̑ми дн҃ехъ и҆ а́зъ лежа́хъ на сенѣ.
и҆ срд̑це мое паки смꙋщашесѧ ꙗ҆́ко и҆ преже.
ѿвръзена сꙋть ѹ҆ста моѧ̀, и҆ начах̑ гл҃ати пред̑ вы́шнимъ и҆ реко́хъ.
ѽ г҃и т̂ѧ нам̑ показꙋ́ющи, показа́лсѧ е҆си ѿц҃емъ на́шимъ въ пꙋсты́ни.
чт̂о не поперетсѧ непло́дное когда бѧ́хꙋ и҆сходѧ́ще ѿ е҆гѷпта.
и҆ гл҃юще ре́клъ е҆си.
т̂ы і҆и҆л҃ю послꙋшаи м̂ѧ и҆ сѣ́мѧ і҆а҆ковле́, во́нми слове́съ моих̑.
с̂е бо а҆зъ сѣ́ю сѣмена на ва́съ зако́нъ мои, и҆ сътворитъ въ васъ пло́дъ, и҆ просла́витесѧ в не́мъ по вѣкꙋ·

И҆же ѿц҃ы ва́ши прїе́млюще зако́нъ не съдръжа́ша, и҆ зако́ннаѧ моѧ̀ не съхрани́ша, и҆ бы́сть плод̑ зако́нъ неродѧ́щи.
не бо можа́ше ꙗ҆́ко твои бы́сть, и҆́же ꙗ҆́ко прїа́ша погибо́ша, не съхранѧ́ющи чт̂о в нихъ сѣ́ѧно бы́сть·

И҆ с̂е ѻ҆бы́чаи е҆сть, да е҆гда̀ прїе́млетъ землѧ̀ сѣ́мѧ, и҆ли кора́бль мо́рѧ, и҆ли сосꙋ́дъ нѣ́кїи пи́ща, и҆ли питїѧ·

Є҆гда бы́сть сконча́но т̂о в ни́хъ сѣѧ́но е҆сть, и҆ли в че́мъ поста́влено е҆сть вкꙋ́пѣ, т̂о что̀ сѣѧно, и҆ли поста́влено е҆сть, и҆ли и҆же прїѧ́та сꙋть и҆стребѧ́тсѧ.
и҆ въспрїѧ́та ѹ҆же не пребывает̑ пред̑ нами, н̂о намъ та́ко не сътворе́но бы́сть·

Мы̀ б̂о и҆же зако́нъ прїѧли е҆смы̀, съгрѣша́ющи заблꙋди́хомъ, и҆ срд̑це наше чт̂о въспрїѧ́ е҆го, ꙗ҆ко закон꙽ не поги́бнетъ.
н̂о пребыва́етъ въ свое҆мъ трꙋдѣ·

И҆ е҆гда гл҃ахъ сїѧ въ срд̑цы мое҆мъ.
възрѣ́хъ ѻ҆чи́ма мои́ма, и҆ ви́дѣхъ женꙋ въ деснѣ́и стра́нѣ.
и҆ с̂е сїѧ рыда́ше и҆ пла́каше съ гла́сомъ вели́ким̑, и҆ дш҃ею болѧ́ше ѕѣло, и҆ ѻ҆дѣѧ́нїе е҆ѧ̀ раздра́но, и҆ пепелъ на главѣ̀ е҆ѧ̀·

И҆ ѻ҆ста́вихъ помышле́нїе в кото́рых̑ бых̑ мыслѧщи.
и҆ ѻ҆брати́хсѧ к не́и и҆ реко́хъ е́и.
ѻ҆ чем̑ пла́чеши и҆ чт̂о боли́ши дш҃ею рече къ мнѣ̀, ѻ҆ста́ви м̂ѧ г҃и мои да въспла́чю себѐ.
и҆ приложꙋ болѣзни ꙗ҆́ко ѕѣло ѻ҆горчи́хсѧ дш҃ею и҆ смире́на е҆смь ѕѣ́ло·

И҆ рекохъ, чт̂о стра́жд̑еши рц̂ы м̂и.
и҆ рече къ мнѣ̀, неплод̑на быхъ раба̀ твоѧ̀ и҆ не роди́хъ.
и҆мѣ́ющи лѣтъ, л҃. а҆зъ б̂о пое҆ді́ны ча́сы и҆ пое҆ді́ны дн҃и лѣтъ, л҃, си́хъ.
въз꙽молю́сѧ вы́шнемꙋ дн҃ь и҆ но́щь·

И҆ бы́сть по л҃, лѣтехъ, ѹ҆слы́ша м̂ѧ б҃ъ рабꙋ̀ свою̀, и҆ ви́дѣ смире́нїе мое, и҆ внѧ́тъ скорбѣ́нїе мое.
и҆ да́сть мн̂ѣ сн҃а, и҆ ѹ҆блажи́сѧ на́нь ѕѣ́ло а҆зъ и҆ мꙋ́жъ мои, и҆ вс̂и гража́не мои.
и҆ почти́хомъ ѕѣ́ло крѣпкого.
и҆ въскорми́хъ е҆го с трꙋдомъ вели́кимъ·

И҆ бы́сть е҆гда̀ растѧ́ше и҆ прїидетъ прїѧ́ти женꙋ̀, сътвори́лъ дн҃ь пирныи·

Глв̑҇а, і҃·

И бы́сть е҆гда вни́де сн҃ъ мои въ чръто́гъ свои.
па́дъ и҆ ѹ́мре, и҆ преврати́хомъ всѧ свѣтлаѧ·

И҆ въста́ша̑ вс̂и гража́не моѝ въ ѹ҆тѣше́нїи мое́мъ, и҆ почи́хъ да́же до дрꙋга́го дн҃е до но́щи·

И҆ бысть е҆гда̑ вс̂и почива́хꙋ да мѧ ѹ҆тѣшатъ да поко́юсѧ·

И҆ въстахъ но́щїю и҆ бѣжа́хъ и҆ прїидо́хъ ꙗ҆́ко ви́диши на то́мъ по́ли, и҆ помышлѧ́ю ѹ҆жѐ не възврати́тисѧ въ́ градъ.
н̂о тꙋ̀ стоѧ́ти, и҆ не ѧ́сти и҆ не пи́ти, н̂о без꙽преста́ни рыда́ти и҆ пости́тисѧ до́ндеже ѹ҆мрꙋ̀·

И҆ ѻ҆ста́вилъ словеса̀ в ни́х же бѣ́хъ, и҆ ѿвѣща̀ съ ꙗ҆́ростїю к не́и, и҆ реко́хъ бꙋ́ѧ паче всх̑ѣ же́нъ.
не ви́диши пла́чь на́шъ і҆ и҆же на́мъ слꙋчи́сѧ, ꙗ҆́ко сїѻ́нъ мт҃и на́ша вс̂ѧ ско́рбїю скорби́тсѧ.
и҆ смире́нїю смирена е҆сть и҆ пла́четъ ѕл̑҇ѣнѣ́иши·

И҆ нн҃ѣ ꙗ҆ко вс̂и рыда́емъ и҆ ско́рбни е҆смы̀, ꙗ҆́ко всѣ ско́рбни е҆смы̀, ты́ же скорби́ши ѻ҆ е҆ді́нѣмъ сн҃ѣ·

Въпросѝ б̂о землѝ и҆ речетъ тебѣ, ꙗ҆ко сїѧ е҆сть и҆же и҆́мать рыда́ти паде́нїѧ, толи́кимъ на не́и ражда́ютсѧ.
и҆ ѿ неѧ̀ ѿ нача́ла вс̂и рожде́нїи, и҆́ныи прїидꙋтъ.
и҆ сѐ близ꙽ко в꙽сѣхъ в꙽ поги́бель хо́дѧтъ і҆ и҆стребле́нїѧ бꙋдетъ мно́жества их̑ и҆ кто̀ б̂о и҆́мать рыда́ти н̂о и҆ паче токмо сїѧ и҆же толи́ко мно́жество поги́бе, неже ты̀ и҆же за е҆ді́наго болѣзнꙋ́еши·

А҆ще же рече́ши мн̂ѣ ꙗ҆́ко нѣсть пла́чь мои подо́бен̑҇ землѝ ꙗ҆́ко плодъ чре́ва мое҆го поги́бе.
е҆гож̑ в꙽ печа́ли породи́хъ и҆ со бо́лѣзнїю родѝ землѧ́ же по пꙋтѝ землѝ, и҆дет꙽ же в꙽ неѧ̀ мно́жество настоѧ́щее.
како слꙋчи́сѧ и҆ а́зъ тебѣ рекꙋ, ꙗ҆́ко ты̀ съ трꙋдомъ роди́ла е҆си, та́ко и҆ зем̑лѧ̀ да́сть плод̑ свои чл҃кꙋ ѿ нача́ла е҆мꙋ и҆же сътвори́лъ еѧ̀.
нн҃ѣ б̂о въздержѝ сама̀ себѣ бо́лѣзнь твою̀.
и҆ крѣпко носѝ и҆же тебѣ слꙋчи́шасѧ паде́нїѧ.
а҆ще б̂о ѻ҆правди́ши предѣлы бж҃їи и҆ совѣты е҆го·

Прїемлеши вре́мѧ и҆ въ таковы́хъ похва́лишисѧ вни́ди б̂о въ́ градъ къ мꙋжꙋ свое҆мꙋ, и҆ рече къ мнѣ̀, не сътворю̀ ни вни́дꙋ въ́ градъ н̂о здѐ ѹ҆мрꙋ̀.
и҆ пред̑ста́вих̑ гл҃ати к не́и, и҆ реко́хъ.
не мозѝ сотвори́ти сѐ сло́во, н̂о и҆зво́ли по совѣтꙋ мое҆мꙋ, коли́ко паде́нїе сїѻ́на ѹ҆тѣшиши ради болѣзни і҆ерс̑҇лі́ма·

Ви́диши б̂о ꙗ҆ко ѻ҆сщ҃енїе на́ше ѻ҆пꙋстѣ̀.
и҆ ѻ҆лта́рь нашъ сътре́нъ ес̑҇.
и҆ цр҃ковь наша разоре́на е҆сть·

и҆ ѱал̑҇ты́рь нашъ смире́нъ е҆сть, и҆ пѣснь ѹ҆млъча̀, и҆ ра́дость свѧ́зана е҆сть, и҆ свѣща свѣтилника на́шего погаше́на е҆сть.
и҆ кїѻ́тъ завѣта на́шего ѻ҆браще́нъ е҆сть, и҆ ст҃аѧ на́ша̑ и҆змѣне́на сꙋть і҆ и́мѧ чт̂о възва́но е҆сть на нас̑҇ близко ѻ҆скверненїѧ е҆сть, и҆ свободы наши ѹ҆коре́нїе тръпѣли сꙋть.
и҆ сщ҃ен꙽ницы пож꙽же́ни сꙋть.
и҆ левѷти наши въ плене́нїе и҆до́ша.
и҆ дв҃цы наши ѻ҆скверне́ни сꙋть.
и҆ же́ны наша наси́лїе тръпѣша.
и҆ пра́веднїи на́ши въсхище́ни сꙋть и҆ ѻ́троцы наша и҆зги́бнꙋша і҆ ю́ноши наши слꙋжи́ша.
и҆ крѣпци наши и҆знемого́ша·

И҆ чт̂о всѣмъ на́ипа́че знамена́нїе сїѻ́на.
ꙗ҆́ко и҆зы́иде ѿ сла́вы своеѧ.
ꙗ҆́же и҆ преда́нъ е҆сть в рꙋка́хъ и҆же насъ ненави́дѣша·

Ты́ бо ѿрѣ́еши твоѝ ско́рби мно́ги.
и҆ ѿложѝ ѿ себѐ мно́жество бо́лѣзнїи да тѧ̀ възлю́битъ крѣпкїи и҆ поко́и сътвори́тъ тебѣ вы́шнїи покое́нїе трꙋда·

И҆ бы́сть е҆гда̀ гл҃ахъ е́и лице́ сѧ сїѧ́ше ско́ро, и҆ ѻ́бразъ блиста́нїе сътворѧше видѣнїе е҆ѧ̀·

да бы́хъ ѹ҆жа́сенъ ѕѣло к не́и.
и҆ помышлѧ́хъ чт̂о бысть сїе.
и҆ сѐ ско́ро ѿпꙋстѝ шꙋ́мъ гла́сомъ вели́кимъ стра́хомъ по́лнымъ да въздвига́шесѧ землѧ̀ ѿ жены̀ съ шꙋ́момъ·

И҆ ви́дѣхъ с̂е на́ипаче жена̀ не ꙗ҆влѧ́шесѧ мн̂ѣ н̂о гра́дъ созида́шесѧ и҆ мѣсто показа́шесѧ ѿ ѻ҆снова́нїѧ вели́кихъ, и҆ ѹ҆страши́хсѧ и҆ возопих̑ гла́сомъ вели́кимъ, и҆ реко́хъ гдѣ̀ е҆сѝ ѹ҆рїель а҆гг҃лъ и҆же ѿ начала прїиде къ мн̂ѣ.
ꙗ҆́ко то́и м̂ѧ сътворѝ прїитѝ въ мно́жествѣ ѹ҆жаса ѹ҆ма̀ сего·

И҆ бысть коне́цъ мои в растлѣнїе, и мл҃тва моѧ в꙽ поноше́нїе, и҆ е҆гда бы́хъ гл҃ющи сїѧ.
с̂е прїиде къ мн̂ѣ и҆ ви́дѣ м̂ѧ, и҆ сѐ бы́сть поставле́нъ ꙗ҆ко мр҃твъ и҆ ра́зꙋмъ мои ѻ҆чюжде́нъ бы́сть, и҆ дръжа̀ десни́цꙋ мою, и҆ въскрѣпѝ м̂ѧ и҆ постави м̂ѧ на́ нозѣ моѝ.
и҆ рече м̂и чт̂о тебѣ е҆сть и҆ въскꙋю ѻ҆скорбе́нъ е҆сть ра́зꙋмъ твой, и҆ чю́вство срд̑ца твое҆го.
и҆ въскꙋ́ю въскорби́шисѧ и҆ реко́хъ ꙗ҆́ко ѻ҆ста́вилъ м̂ѧ е҆си и҆ а́з꙽ сътвори́хъ по словесе́мъ твои҆мъ, и҆ взыидо́хъ на́ поле и҆ сѐ ви́дх̑ѣ и҆ ви́жꙋ чт̂о не могꙋ провѣща́ти.
и҆ рече къ мн̂ѣ, ста́ни ꙗ҆ко мꙋжъ и҆ въздви́гнꙋ т̂ѧ.
и҆ рекохъ, гл҃и г҃и мои и҆ не ѻ҆ста́ви м̂ѧ ꙗ҆ко да не в сꙋетѣ̀ ѹ҆мрꙋ̀.
ꙗ҆́ко ви́дѣхъ и҆же не свѣдѧхъ, и҆ слы́шꙋ и҆же не свѣмъ и҆л̂и чю́вство мое лже́тъ, и҆ дш҃а моѧ мечта́нїе видѧ.
нн҃ѣ б̂о помолю́ ти сѧ да ска́жеши рабꙋ̀ твое҆мꙋ въ ѹ́жасѣ семъ.
и҆ ѿвѣща̀ къ мн̂ѣ и҆ рече слы́ши м̂ѧ, и҆ наѹ҆чꙋ̀ тѧ̀ и҆ рекꙋ̀ тебѣ ѻ҆ кои́хъ бои́шисѧ ꙗ҆́ко вы́шнїи ѿкры́етъ тебѣ та́ины вели́ки.
видѣ правъ пꙋть твои, ꙗ҆́ко безъпреста́ни скорби́шисѧ за лю́ди твоѧ̀, и҆ ѕѣло рыда́еши сїѻ́на ради.
тꙋ б̂о ра́зꙋмъ видѣнїѧ и҆же тебѣ ꙗ҆ви́сѧ прежде ма́ло.
е҆ѧ́же ви́дѣл꙽ е҆си рыда́ющи нача́лъ е҆си ѹ҆тѣша́ти е҆ѧ̀.
нн҃ѣ же ѹ҆жѐ лица̀ же́ньска не ви́диши.
н̂о ꙗ҆ви́сѧ тебѣ гра́дъ созида́ти и҆ ꙗ҆́ко провѣща́ше тебѣ ѿпаде́нїе сн҃а еѧ̀.
с̂е е҆сть ѿрѣше́нїе·

се жена̀ ю҆́же ви́дѣлъ е҆си сїѧ е҆сть сїѻ́нъ, и҆ ꙗ҆ко речетъ тебѣ и҆же и҆ нн҃ѣ позри́ши, ꙗ҆́ко град̑ създа́нъ.
и҆ ꙗ҆́ко речетъ тебѣ и҆же безъпло́дна быс̑҇, лѣтъ, л҃, и҆ чт̂о бѧ́хꙋ лѣта л҃, къгда не бы́сть в немъ е҆ще жрътва прино́шена·

И҆ бысть по лѣтех̑ л, созда̀ соло́монъ град̑.
и҆ принесѐ приноше́нїе, тогда е҆гда родѝ непло́ды сн҃а, и҆ чт̂о т̂и рече ꙗ҆ко въспи́та е҆го съ трꙋдомъ, т̂о бы́сть.
ѻ҆битанїе въ і҆ерс̑҇лимѣ, и҆ ꙗ҆́ко рече тебѣ да сн҃ъ мои грѧдꙋщи въ свои чрътогъ мрътвъ бы́сть, и҆ слꙋчи́сѧ е҆мꙋ паде́́нїе.
т̂о бы́сть и҆же сътворе́но е҆сть паде́нїе і҆ерс̑҇лім̑ско и҆ с̂е ви́дѣлъ е҆си подо́бїе е҆ѧ̀.
и҆ ꙗ҆́ко сн҃а рыда́ше, нача́лъ е҆си ѹ҆тѣша́ти е҆ѧ̀.
и҆ ѿ сихъ и҆же слꙋчи́шасѧ сїѧ бѧ́хꙋ тебѣ ѻ҆тво́рена.
и҆ нн҃ѣ ви́дѣ вы́шнїи ꙗ҆́ко дш҃ею ско́рбенъ е҆си.
и҆ ꙗ҆́ко всѣмъ срд̑цемъ терпи́ши за́нь ꙗ҆ви́сѧ тебѣ свѣтлость сла́вы е҆го и҆ красота̀ лѣпоты̀ е҆го·

Сего б̂о ради рекох̑ тебѣ да живе́ши в по́ли гд̂ѣ нѣсть до́мъ създа́нъ.
вѣм꙽ б̂о а҆зъ ꙗ҆́ко вы́шнїи начина́ше тебѣ показа́ти сїѧ.
сего ра́ди реко́хъ тебѣ да прїидеши на ни́вꙋ гдѣ̀ нѣсть ѻ҆снова́нїѧ съзида́нїю.
ни б̂о можа́ше дѣло бл҃го творе́нїе чл҃ческо въздержа́ти въ мѣстѣ гдѣ начина́шесѧ вы́шнїи гра́дъ показа́ти.
ты́ бо не бо́исѧ ни ѹ҆стра́шитсѧ срд̑це твое, н̂о вни́ди и҆ ви́ждь свѣтлость и҆ вели́чества създа́нїѧ.
коли́ко възмо́жно е҆сть тебѣ видѣнїе ѻ҆чесе́мъ ви́дѣти.
и҆ посе́мъ слы́шиши коли́ко прїемлетъ слыша́нїе ѹ҆шесе́мъ твои҆мъ слы́шати.
ты̀ блж҃нъ е҆си на мно́ѕѣхъ и҆ зва́нъ е҆си пред̑ вы́шнѧго ꙗ҆́ко и҆ ма́ло.
но́щъ и҆же заѹ́тра бꙋдꙋщи пребыва́е҆ши т̂ꙋ, и҆ пока́жетъ тебѣ вы́шнїи та̀ видѣнїѧ бо́льши и҆же сътвори́тъ ѻ҆бита́ющим̑ на землѝ ѿ послѣднихъ днїи.
и спахъ т̂ꙋ но́щь и҆ дрꙋгꙋю ꙗ҆́ко рече мн̂ѣ·

Глв̑҇а, а҃і·

И ви́дѣхъ со́нъ и҆ с̂е въсхожа́ше ѿ мо́рѧ ѻ҆релъ е҆мꙋже бѧ́хꙋ, в҃і, кри́лъ пернатых̑ и҆ главы̀ тр̂и·

И҆ ви́дѣхъ и҆ с̂е простира́ше кри́лѣ своѝ на все́и землѝ, и҆ вс̂и вѣтри нбс̑҇нїи надыхахꙋ в него̀ и҆ собира́хꙋсѧ·

И҆ ви́дѣхъ и҆ ѿ пе́рїѧ е҆го родѧхꙋсѧ сꙋпротивъ перїе, и҆ тїи сътворѧ́хꙋ в пер꙽натыхъ дро́бныхъ и҆ малых̑, і҆ и҆же гла́вы его бѧ́ше поко́ини, и҆ сред̑нѧѧ глава̀ бы́сть бо́лши и҆́нѣхъ гла́въ, н̂о та̀ покоѧ́шесѧ с ни́ми·

И҆ ви́дх̑ѣ и҆ се̂ ѻ҆релъ летѧ́ше на пѣрїи свое҆мъ.
и҆ црс̑҇твова на́ земли, и҆ на живꙋщих̑ на не́и.
и҆ ви́дѣхъ ꙗ҆́ко повиновена е҆мꙋ бысть всѧ под̑нбс̑҇аѧ.
и҆ никто е҆мꙋ противлѧ́шесѧ.
ни е҆дин̑҇ ѿ твари и҆же е҆сть на́ земли·

И҆ ви́дѣхъ и҆ с̂е воста̀ ѻ҆релъ на но́кти своѝ, и҆ пꙋсти гла́съ перїемъ свои҆мъ гл҃ющи.
не хо́щите всѝ вкꙋпѣ бди́ти, спѣте е҆ді́нъ ко́ждоже въ мѣстѣ свое҆мъ и҆ по времѧ бди́те.
главы́ же по́слѣ да съхранѧт̑сѧ·

И҆ ви́дѣхъ, и҆ с̂е глас̑҇ не и҆схожд̑а́ше ѿ главы̀ е҆го, н̂о ѿ среды тѣла е҆го, и҆ чтохъ проти́внїи перїа е҆го и҆ сихъ бѧ́ше ѻ҆́смь·

И҆ ви́дѣх꙽ и҆ с̂е ѻ҆деснꙋю странꙋ̀ воста е҆ді́но перо и҆ црс̑҇твова на все́и землѝ·

И҆ бысть е҆гда̀ црс̑҇твова́ше прїидетъ е҆мꙋ конец̑҇ и҆ не ꙗ҆ви́сѧ мѣсто е҆го, і҆ и́но воста̀, и҆ црс̑҇твова́ше, то́и мно́го дръжа вре́мѧ.
и҆ бысть е҆гда̀ црс̑҇твова́ше и҆ грѧдѧ́ше конецъ е҆го.
да не ꙗ҆ви́тсѧ ꙗ҆́ко прь́выи.
и҆ с̂е гла́съ ѿпꙋщенъ томꙋ̀ гл҃ющи·

Слы́шите и҆же толи́ко вре́мѧ дръжа́лъ е҆си зе́млю.
сїѧ завѣща́ю тебѣ̀ пре́же нежѐ начне́ши не ꙗ҆ви́тисѧ, нѣкт̂о по тебѣ въздер̑҇жи́тъ времѧ твоѐ н̂о ни по́лъ е҆го.
и҆ въздвижесѧ тре́тїи дръжа́ти кнѧ́ѕьство ꙗ҆́ко и҆ прь́выи и҆ не ꙗ҆ви́сѧ и҆ то́и·

И҆ та́ко слꙋча́шесѧ и҆ всѣхъ и҆́нѣхъ и҆ е҆ді́нымъ кнѧ́ѕьство носи́ти, и҆ паки никогда̀ ꙗ҆ви́тисѧ, и҆ ви́дѣхъ и҆ с̂е въ вре́мѧ сѣдѧ́щи пе́рїѧ въздвига́хꙋсѧ ѻ҆де́снꙋю странꙋ̀ да дръжат̑ и҆ тїи кнѧ́ѕьство, и҆ ѿ тх̑ѣ бы́ша и҆же дръжа́хꙋ, н̂о ско́ро не ꙗ҆влѧ́хꙋсѧ.
и҆же и҆ нѣкоторїи ѿ ни́хъ воздвига́хꙋсѧ н̂о не дръжахꙋ кнѧ́зьства·

И ви́дѣхъ посе́мъ, и҆ с̂е не ꙗ҆ви́шасѧ, в҃і, кри́лъ, и҆ дв̂а кри́лѣта.
и ничто̀ бѧ́ше ѻ҆ста́ло въ тѣлѣ ѻ҆рлѝ токмо дв̂ѣ главѣ̀ поко́юща и҆ ше́сть крилати·

И҆ ви́дѣхъ и҆ с̂е ше́сть перна́тыхъ раздѣле́ни сꙋть дво́е.
и҆ пребы́ша под̑ главо́ю чт̂о е҆сть на де́снѣи странѣ̀.
и҆же четы́ре пребыва́ше въ мѣ́стѣ свое҆мъ·

И҆ ви́дѣхъ и҆ с̂е сїѧ под̑кри́лїа мышлѧхꙋ възд̑вигнꙋти и҆ дръжа́ти кнѧз̑ство.

И҆ ви́дѣхъ и҆ с̂е е҆ді́на въздви́жена ес̑҇ н̂о ско́ро не ꙗ҆ви́сѧ.
и҆ вто́рыѧ скорѣ́ише неже пр́ьвїи не ꙗ҆ви́шасѧ·

И҆ ви́дѣхъ и҆ с̂е дв̂а и҆же свы́ше къ себѣ са́ми помышлѧ́хꙋ и҆ тїѝ црс̑҇твова́ти.
и҆ в нем̑ е҆гд̑а помышлѧ́хꙋ с̂е е҆ді́нъ покоющꙋ главꙋ̀, и҆же бысть сред̑нїи и҆ въз꙽бнѧ́ше.
сїѧ б̂о бысть двѣма главам̑ бо́льшаѧ·

И҆ ви́дѣхъ ꙗ҆ко съвръше́ны сꙋть дв̂ѣ главы̀ съ собо́ю, и҆ с̂е ѿвраще́на е҆сть глава̀ с тѣми и҆же с не́ю бѧхꙋ.
и҆ снѣдь дв̂ѣ под̑крилѧта и҆же помышлѧхꙋ црс̑҇твова́ти·

Сїѧ же глава̀ ѹ҆страши вс̂ю зе́млю, и҆ владѧ́ше на не́и тѣмъ и҆же ѻ҆бладают̑ землю съ трꙋ́достїю мно́гою.
и҆ си́л꙽ныхъ дръжа̀ селенїѧ зем꙽скаѧ на всѣхъ крилх̑ѣ и҆же бы́ша·

И҆ ви́дѣх꙽ посемъ, и҆ с̂е пол̑҇ главы̀ ско́ро не ꙗ҆́ви́сѧ и҆ т̂о ꙗ҆́ко кри́лѣ.
ѿлꙋчи́ша же сѧ дв̂ѣ главы̀ и҆же и҆ т̂ѣ та́коже црс̑҇твова́ша̑ на́ земли и҆ на ни́хъ и҆же ѻ҆бита́ютъ в не́мъ·

И҆ ви́дѣхъ и҆ с̂е пожрѐ главꙋ̀ ѻ҆деснꙋю странꙋ̀ и҆же ѻ҆шꙋ́юю·

И҆ слы́шахъ глас̑҇ гл҃ющъ м̂и.
зрѝ проти́въ тебѐ.
и҆ знаменаи чт̂о ѹ҆́зриши·

И҆ ви́дѣхъ и҆ с̂е ꙗ҆ко левъ прогнѣ́ванъ ѿ лѣ́са ры́щꙋщъ.
и҆ ви́дѣхъ ꙗ҆́ко посыла́ше гла́съ члчс̑҇кїи къ ѻ҆рлꙋ рекꙋщи·

Слы́ши т̂ы и҆ гл҃ю тебѣ, и҆ речет̑ вы́шнїи тебѣ.
н̂и ли ты е҆си и҆же на и҆звышилъ ѿ четы́рех̑ животныхъ и҆же сътворих̑.
црс̑҇твова́ти въ вѣцѣ мое҆мъ.
и҆ да по них̑ прїидетъ конецъ вѣка их̑·

И҆ четвер̑҇тыи грѧдꙋщи побѣди́лъ всѧ̀ живо́тнаѧ и҆же прїидо́ша.
и҆ си́лою дръжал̑҇ вѣкъ съ трепетомъ мно́гимъ, и҆ вс̂ю вселеннꙋю съ трꙋ́достїю стропти́во всели́лсѧ толи́кимъ вре́менемъ селенїи зем꙽скихъ с лестїю·

И҆ сꙋди́лъ е҆си зе́млю не съ и́стинною.
смꙋтил̑҇ б̂о е҆си кро́т꙽кихъ.
и҆ възразилъ е҆си поко́ющихъ.
и҆ възлюбилъ ло́жных꙽ и҆ разорилъ е҆си жили́ща и҆хъ и҆же плодѧ́хꙋ.
и҆ смири́лъ е҆си стѣны их̑ и҆же тебѐ не побѣди́ша·

И҆ възыидетъ ѹ҆коре́нїе твое к вы́шнемꙋ, и҆ гордынѧ твоа̀ къ крѣпкомꙋ.
и҆ възрѣ вы́шнїи го́рдаѧ времена̀.
и҆ с̂е сконча́на сꙋть, и҆ безако́нїѧ е҆го съвръше́на сꙋть·

Сего ради не ꙗ҆ви́сѧ т̂ы ѻ҆рел̑҇ и҆ кри́лѣ твоѝ гро́зныѧ, и҆ крилѧ́та твоа̀ стропти́выѧ и҆ гла́вы твоа лꙋкавыа, и҆ нокти твоа строптивыѧ, и҆ вс̂е тѣло твоѐ сꙋе́тное дабы сѧ прохлади́ла вс̂ѧ землѧ̀, и҆ ѻ҆братиласѧ свобод̑на ѿ твое́ѧ си́лы.
и҆ ѹ҆повает̑ сꙋдїи млс̑҇рдїю е҆го и҆же сътвори е́й·

Глав̑҇, в҃і·

И бысть е҆гда̀ гл҃аше левъ словеса̀ сїѧ къ ѻ҆рлꙋ.
и҆ ви́дх̑ѣ и҆ се чт̂о ѻ҆ста глава̀.
и҆ не ꙗ҆ви́шасѧ четы́ре кри́лѣ, и҆же к немꙋ прїидо́ша и҆ въз꙽двигошасѧ да црс̑҇твꙋют̑·

И҆ бы́сть црс̑҇тво и҆хъ скꙋдно, и҆ молвы по́лно.

И҆ видх̑ѣ и҆ с̂е т̂а не ꙗ҆влѧ́шесѧ.
и҆ вс̂е тѣло ѻ҆́рлее въж꙽жига́шесѧ и҆ ѹ҆страшисѧ землѧ̀ ѕѣ́ло.
и҆ а́зъ ѿ молвы во ѹ҆́жасѣ па́мѧти.
и҆ ѿ вели́ка страха бдѣхъ·

И҆ рѣхъ дꙋ́хꙋ мое҆мꙋ, се ты̀ пода́лъ е҆си мнѣ̀ т̂о.
в꙽ то́мъ чт̂о пыта́еши пꙋтѝ вы́шнѣго.
с̂е е҆ще трꙋденъ е҆смь дш҃ею.
и҆ дх҃омъ мои҆мъ и҆знемо́женъ е҆смь ѕѣло, и҆ ма́ла е҆сть въ мнѣ̀ си́ла ѿ мно́жества бо́ѧзни ꙗ҆́же ѹ҆страших̑сѧ но́щи се́ѧ·

Нн҃ѣ б̂о помолю́сѧ вы́шнемꙋ да м̂ѧ ѹ҆крѣпи́тъ да́же до конца·

И҆ рекох̑ влд̑ко г҃и а҆́ще ѻ҆брѣтох̑ блгд̑ть пред̑ ѻ҆чи́ма твои́ма, и҆ а́ще ѻ҆правда́нъ е҆смь пред̑ тобо́ю паче мно́жества·

И҆ а́ще и҆стин꙽но в꙽зы́идетъ моле́нїе моѐ пред̑ лицемъ твои҆мъ, въскрепи́ мѧ.
и҆ ꙗ҆́ви мн̂ѣ рабꙋ твое҆мꙋ толкова́нїе, и҆ разлꙋченїе видѣ́нїѧ гро́знаго того̀ и҆сполнѣ́ише ѹ҆тѣшиши дш҃ꙋ мою.
досто́ино б̂о мене и҆мѣлъ е҆си показа́ти мн̂ѣ времена послд̑ѣнѧѧ·

И҆ реч̑҇ къ мнѣ̀, с̂е е҆сть толкова́нїе видѣнїѧ сего.
ѻ҆рла̀ ꙗ҆же ви́дѣлъ е҆си въсходѧ́ща ѿ мо́рѧ.
т̂о е҆сть црс̑҇тво чт̂о видѣно е҆сть въ видѣнїи данила бра́та твое҆го.
н̂о нѣсть е҆мꙋ протол̑҇кова́н꙽но.
ꙗ҆же а́зъ нн҃ѣ тебѣ̀ протол̑҇кꙋю·

Се дн҃и прїидꙋтъ.
и҆ воста́нет̑ црс̑҇тво на́ земли.
и҆ бꙋ́дет̑ бо́ѧзни вѧ́щши всм̑ѣ црс̑҇твом̑, и҆же быша преже е҆го·

Црс̑҇твꙋют̑ же в нем̑ цр҃и, в҃і, е҆ді́нъ по е҆дїномꙋ, и҆же вто́рыи начнет̑ црс̑҇твова́ти.
и҆ то́и воздержит̑ наи҆пач̑҇ вре́мѧ на дванадесѧте·

Сїа ес̑҇ толкова́нїѧ, в҃і.
кри́лъ ꙗ҆́же ви́дѣлъ е҆си.
и҆ ꙗ҆́же слышалъ е҆си глас̑҇ и҆́же гл҃анъ быс̑҇ не ѿ гла́въ е҆го и҆сходѧ́щ꙽ н̂о ѿ средины тѣла е҆го, с̂е е҆сть тлъкова́нїе·

Ꙗ҆́ко послѣ̀ вре́мени црс̑҇тва того ро́дѧт̑сѧ р꙽ве́нїѧ не ма́ла.
и҆ поги́бнетъ, ꙗ҆́ко да падетъ и҆ не падетъ тогда̀, н̂о паки положи́тсѧ въ своѐ нача́ло.
ꙗ҆ко ви́дѣлъ е҆си под̑крилецъ ѻ҆́смь съвокꙋплѧ́ющи кри́лѣ своѝ·

Сїѧ е҆сть толкова́нїѧ.
въскрс̑҇нꙋтъ в том̑ ѻ҆́смь цр҃їи их̑же бꙋдт̑ꙋ времена легъча́ишеи лѣта скоро зва́нныи, дво́е б̂о ѿ тх̑ѣ ро́дѧт̑сѧ.
приближа́ющи же вре́мени по́лъ, четыре съхранѧтсѧ въ вре́мѧ·

Є҆гда̀ приближа́тисѧ начнет̑ вре́мѧ е҆го да сконча́етсѧ·

дво́е б̂о на концы съдръжат̑сѧ.
и҆ ꙗ҆́ко ви́дѣлъ е҆си три гла́вы покоюща с̂е е҆сть тол꙽кова́нїе·

Въ послд̑ѣнїи е҆го въздви́гнетъ вы́шнїи тр̂и црс̑҇тва.
и҆ призоветъ в꙽ нѐ мно́га.
и҆ господꙋ́ютъ землею.
і҆ и҆же ѻ҆бита́ютъ в не́и с трꙋдомъ мно́гимъ на всѣхъ и҆же бы́ша пред̑ си́мъ·

Сего ради тотѣ зва́ни сꙋть главы̀ ѻ҆рли.
сїи б̂о бꙋдꙋтъ и҆же преглавѧтъ нечьсти́выхъ е҆го.
и҆же съвръшатъ послд̑ѣнѧѧ е҆го.
и҆ ꙗ҆́ко ви́дѣлъ е҆си главꙋ̀ бо́льшꙋю не ꙗ҆влѧ́ющꙋсѧ·

Се е҆сть толкова́нїе е҆го.
ꙗ҆́ко е҆ді́нъ ѿ нихъ на ѻ҆́дрѣ своем̑ ѹ҆́мретъ, и҆ б̂о с мꙋченїемъ.
ꙗ҆́же дво́е и҆же приспѣва́ютъ, ме́чъ и҆хъ поꙗ҆́сть.
е҆ді́нъ б̂о мечъ поꙗ҆́сть и҆же с нимъ.
н̂о бо тꙋ̀ мечъ напослѣдокъ падетъ·

Ꙗ҆́ко ви́дѣлъ е҆си дво́е под̑кри́лїѧ въсходѧ́щи на главы̀ и҆же ес̑҇ ѻ҆ деснꙋ́ю странꙋ̀ с̂е е҆сть тол̑҇кованїе.
сїи сꙋть и҆же съдръжа́лъ вы́шнїи въ конецъ свои҆хъ, т̂о е҆сть црс̑҇тво скꙋдное и҆ ско́рбеи по́лно·

ꙗ҆́ко ви́дѣлъ е҆си льва̀ кое҆го ѿ лѣса възбꙋдѧ́ща и҆ ры́чюща и҆ гл҃юща къ ѻ҆рлꙋ̀, и҆ ѻ҆блича́ющи е҆го, и҆ непра́вды того по всѣхъ словесехъ е҆го, ꙗ҆́ко слы́шалъ е҆си, с̂е е҆сть вѣтръ е҆гоже съдръжа́лъ вы́шнїи въ концы к ни́мъ, и҆ нечести́выхъ и҆хъ ѻ҆бличи́тъ тѣхъ, и҆ ѿтрѧсе́тъ пред̑ тѣми лести и҆хъ, поста́вит̑ б̂о и҆хъ на сꙋдѣ живы́и.
и҆ бꙋдетъ е҆гда ѻ҆бличи́ти и҆хъ тогда̀ пока́жетъ и҆хъ.
и҆же ѻ҆станокъ людїи мои҆хъ и҆зба́витъ съ бѣдо́ю и҆же съхранени сꙋть на концыхъ мои҆хъ, и҆ ѹбл҃житъ и҆хъ, доко́лѣ же не прїидетъ конецъ дн҃и сꙋ́днаго, ѻ҆ коем̑же гл҃ахъ тебѣ ѿ нача́ла.
се́и со́нъ чт̂о ви́дѣлъ е҆си сїѧ толкова́нїѧ.
т̂ы бо самъ досто́инъ бы́лъ е҆си, зна́ти та́инꙋ вы́шнѧго·

Того б̂о ра́ди пиши всѧ т̂а въ кни́гꙋ и҆же ви́дѣлъ е҆си.
и҆ поста́ви е҆ѧ̀ в мѣсто съхра́нно.
и҆ ѹ҆чи́ши е҆ѧ̀ мꙋ́дрымъ ѿ людїи твоих̑ и҆́х꙽же срд̑це вѣ́си мощи прїѧ́ти и҆ дръжати та́инꙋ сїю·

Ты же е҆ще потерпи и҆́ныхъ дн҃їи, з҃. да тебѣ̀ пока́жетсѧ чт̂о же ви́дѣно бꙋдетъ вы́шнемꙋ показа́ти тебѣ, и҆ ѿи́де ѿ мене·

И҆ бы́сть е҆гда̀ слы́шитъ ве́сь по́лкъ ꙗ҆́ко проидо́ша, з҃, дн҃їи а҆зъ не бы́хъ ѻ҆бращенъ къ гра́дꙋ·

И҆ събра́шасѧ вс̂и ѿ ме́ньша да́же до бо́льшаго.
и҆ прїидоша ко мнѣ і҆ реко́ша мї гл҃юще.
чт̂о съгрѣши́ли е҆смы̀ тебѣ и҆ чт̂о непра́во съдѣѧ́хомъ на́ тѧ, ꙗ҆́ко ѻ҆ставлѧ́ющи насъ сѣлъ е҆си на мѣ́стѣ то́мъ·

Ты б̂о намъ вы́ше е҆си ѿ всѣхъ лю́дїи ꙗ҆́ко гро́здъ ѿ виногра́да.
и҆ ꙗ҆́ко свѣти́лникъ въ мѣсто мра́чно, и҆ ꙗ҆́ко приста́нище и҆ кора́бль сп҃сенъ е҆сть ѿ бꙋ́рѧ·

И҆ли не довлѣ́ютъ намъ лꙋка́ваѧ и҆же ключа́ютсѧ·

А҆ще б̂о ты насъ ѻ҆ста́виши.
коли́ко бы́сть намъ лꙋ́чши а҆ще быхомъ съж꙽же́ни и҆ м̂ы, сож꙽же́нїемъ сїѻ́на.
ни б̂о мы е҆смы лꙋ́чши тѣ́хъ и҆же та́мо ѹ҆мро́ша.
и҆ пла́каша гла́сомъ вели́кимъ·

И҆ ѿвѣщах̑ к ни́мъ и҆ реко́хъ.
надѣ́исѧ і҆и҆л҃ь, и҆ не моѕи скорбѣти т̂ы до́мъ і҆а́ковль, е҆сть б̂о па́мѧть ва́ша пред̑ вышним̑, и҆ крѣ́пкїи нѣ́сть забве́нъ вам̑ в напа́сти, а҆зъ б̂о не ѻ҆ста́вихъ ва́съ ни ѿи҆до́хъ ѿ васъ, н̂о прїидо́хъ в сїе мѣсто да молю́сѧ за печа́ль сїѻ́на, да взыщꙋ млрс̑҇дїе за смире́нїе ст҃ыни вашеи·

И҆ нн҃ѣ и҆дѣте е҆ді́нъ ко́ждо же в до́мъ свои, и҆ а́зъ прїидꙋ к ва́мъ по дн҃ехъ сихъ, и҆детъ по́лкъ ꙗ҆́ко рекох̑ е҆мꙋ, въ градъ·

А҆з꙽ же сѣдо́хъ на́ поли, з҃, дн҃їи ꙗ҆́коже м̂и повелѣ, и҆ ꙗ҆до́хъ цвѣтъ то́кмо ѿ ни́въ, и҆ ѿ травъ сътворе́на бысть мнѣ̀ пи́ща въ дн҃ехъ тѣ́хъ·

Глв̑҇а, г҃і·

И бысть по дн҃ехъ седми, и҆ ѹ҆снꙋхъ сно́мъ но́щїю, и҆ с̂е ѿ морѧ вѣтръ въста́ше да смꙋти́тъ вс̂и волны е҆го·

И҆ ви́дѣхъ и҆ с̂е възмога́ше тои чл҃къ съ тысѧщми нбс̑҇ными.
и҆ гдѣ лице свое ѻ҆браща́ше да въз꙽рит̑, трепетахꙋ вс̂ѧ и҆же под ни́мъ видѧхꙋсѧ, и҆ гдѣ колиже и҆схожда́ше глс̑҇а ѿ ѹ҆́стъ е҆го съжиза́хꙋсѧ вс̂и и҆же слышахꙋ гла́съ е҆го.
ꙗ҆́ко поваетъ землѧ̀ когда слы́ша ѻ҆́гнь·

И҆ ви́дх̑ѣ посе́мъ и҆ с̂е събирашесѧ мно́жество людїи и҆́хже не бѣ число̀ ѿ четырехъ вѣтръ нбс̑҇ныхъ.
да възбранѧтъ чл҃ка и҆же и҆з꙽ше́лъ ѿ мо́рѧ·

И҆ ви́дх̑ѣ и҆ се самъ себѣ и҆скопа́ше горꙋ великꙋ и҆ летѣ на ню̀.
ꙗ҆́же взыска́лъ ви́дѣти странꙋ и҆ли мѣсто ѿколѣ и҆зваѧ́на бы́сть гора̀, и҆ не мого́хъ·

И҆ посе́м꙽ ви́дѣхъ и҆ се всѝ и҆же събра́ни сꙋть къ немꙋ да поборт̑ꙋ е҆го и҆ боѧ́хꙋсѧ ѕѣло, паче смѣѧ́хꙋ погна́ти, и҆ се ꙗ҆́ко ви́дѣхъ стремле́нїѧ мно́жество грѧдꙋщи ни въздви́же рꙋ́кꙋ свою, ни ѻ҆рꙋ́жїе держа́ше, никоторого съсꙋда бра́ннаго, то́кмо ꙗ҆́ко ви́дѣхъ, ꙗ҆́ко ѿпꙋсти ѿ ѹ҆́стъ свои҆хъ, ꙗ҆́ко дхнове́нїе ѻ҆гнѧ̀, и҆ ѿ ѹ́стъ е҆го ꙗ҆́ко дх҃ъ пла́менъ, и҆ ѿ ꙗ҆зы́ка е҆го посылаше и҆́скры, и҆ непостоѧ́нїе, и҆ съе҆дине́ни сꙋть вс̂ѧ вкꙋпѣ сїа дъхнове́нїе ѻ҆гнѧ и҆ дх҃ъ пла́мы, и҆ мно́жество непостоѧ́нїѧ, порази мно́жество на ѹ҆стремле́нїе и҆же ѹ҆гото́вана бысть ѻ҆полча́тисѧ, и҆ пож꙽же всѣхъ, і҆ и҆ско́рони.
и҆же неви́дѣно бысть ѿ неі҆счисленна мно́жества, а҆ще то́кмо прах̑ и҆ дыма во́нѧ·

И҆ ви́дѣхъ, и҆ ѹ҆страшихъсѧ, и҆ пото́мъ ви́дѣхъ того чл҃ка сходѧ́ща ѿ горы, и҆ зовꙋща къ себѣ мно́жество и҆ное ми́рное, и҆ пристꙋпа́ше к немꙋ лица члч҃ески мно́ѕѣ нѣ́кимъ ра́дꙋющимъсѧ, и҆ нѣ́кимъ скорбѧ́щимъ, нѣ́кїи б̂о привѧза́ны нѣ́кїи вѣдꙋщи ѻ҆ нихъ и҆же приношахꙋсѧ, і҆ и҆знемого́хъ ѿ мно́жества стра́ха, и҆ възбꙋдихсѧ и҆ рекохъ, т̂ы ѿ нача́ла показа́лъ е҆си рабꙋ̀ твое҆мꙋ чюдеса̀ сїа, и҆ досто́ина м̂ѧ и҆мл̑҇ѣ е҆си да прїимеши мл҃твꙋ мою.
и҆ нн҃ѣ покажи мнѣ е҆ще толкова́нїе снꙋ̀ семꙋ ꙗ҆́ко б̂о мню̀ в чюв꙽ствѣ мое҆мъ, го́ре и҆же ѻ҆ставле́ни бꙋдꙋтъ въ дн҃и тїи, и҆ наипа́че го́ре симъ и҆же не сꙋть ѻ҆ста́влени, и҆же б̂о нѣ сꙋть ѻ҆ста́влени скорби бѧ́хꙋ·

Разꙋмѣ́ю нн҃ѣ и҆же сꙋть преставле́нна в послд̑ѣнѣѧ дн҃и, и҆ ѹ҆срѧ́щт̑ꙋ и҆хъ, н̂о и҆ тїи и҆же ѻ҆ста́влени сꙋть·

Сего ради прїидо́ша б̂о бѣди вели́кїи ѿ потре́бных̑ мно́гих̑, ꙗ҆́ко пока́жꙋтъ со́нїѧ сїѧ.
и҆б̂о легъча́ише е҆сть погиба́ющи прїити в сем̑ неже прїи҆тѝ всемъ ꙗ҆́ко ѻ҆́бла́къ ѿ вѣка, и҆ нн҃ѣ ви́дѣти и҆же слꙋчат̑сѧ в꙽ послѣднѧѧ времена̀·

И҆ ѿвѣща̀ къ мн̂ѣ и҆ рече, и҆ видѣнїю толкова́нїе рекꙋ тебѣ̀.
и҆ ѻ҆ кои́хъ гл҃алъ е҆си ѿврьзꙋ т̂и.
ꙗ҆ко ѻ҆ сихъ ре́клъ е҆си.
и҆же ѻ҆ста́влени сꙋть.
с̂е е҆сть тол꙽кова́нїе и҆же ѿи́метъ бѣдꙋ̀ в то̀ вре́мѧ то́и сѧ съхранѝ и҆же в бѣдꙋ̀ впадо́ша сїи сꙋть и҆же и҆мѣ́ютъ дѣла и҆ вѣрꙋ къ крѣплѣ́ишемꙋ·

Вѣси б̂о ꙗ҆́ко бо́лши ѹ҆блаже́ни сꙋть и҆же ѻ҆ста́влени паче тѣхъ и҆же мер̑҇тви сꙋть·

Сїѧ толкова́нїѧ видѣнїю.
ꙗ҆́же ви́дѣлъ е҆си мꙋжа въсходѧ́ща ѿ срд̑ца мо́рьскаго.
то́и е҆сть е҆гоже въздержа̀ вы́шнїи мно́га времена.
и҆же самъ себѣ и҆зба́витъ сътворе́нїе свое то́и раз꙽смотри́тъ и҆же ѻ҆ста́влени сꙋть·

И҆ ꙗ҆́ко ви́дѣл꙽ е҆си ѿ ѹ́стъ е҆го и҆сходи́ти ꙗ҆́ко дх҃ъ и҆ ѻ́гнь и҆ непостоѧ́нїе.
и҆ ꙗ҆ко не дръжа́ше ѻ҆рꙋ́жїѧ и҆ ни сосꙋда бра́ннаго нападетъ б̂о стремле́нїе е҆го мно́жество и҆же прїидо́ша ѻ҆полчи́ти е҆го.
сѐ е҆сть толкова́нїе.
сѐ днѝ прїидт̑ꙋ къгда начнетъ вы́шнїи и҆зба́вити и҆хъ и҆же на землѝ сꙋть.
и҆ прїидет꙽ въ ѹ́жасъ па́мѧти на ни́хъ и҆же ѻ҆бита́ютъ зе́млю.
і҆ и́ные и҆нымъ помышлѧ́ютъ възбрани́ти, град̑ гра́да и҆ мѣсто мѣста.
и҆ ꙗ҆зы́цы на ꙗ҆зы́цѣхъ и҆ црс̑҇тво на црс̑҇тво·

И҆ бꙋдетъ е҆гда сътвори́ти сїѧ и҆ слꙋчатсѧ зна́менїѧ и҆же пре́жде показа́хъ т̂и.
и҆ тогда̀ ѿкры́етсѧ сн҃ъ мои е҆гоже ви́дѣлъ е҆си ꙗ҆́ко мꙋжа въсходѧща·

И҆ бꙋдетъ къгда ѹ҆слы́шатъ вс̂и ꙗ҆зы́цы гла́съ е҆го.
и҆ ѻ҆ста́витъ е҆ді́нъ къждо же въ странѣ̀ свое́и бра́нь свою что и҆́мать дрꙋгъ къ дрꙋгꙋ·

И҆ събере́тсѧ въ е҆ді́но мно́жество без꙽числе́но.
ꙗ҆́ко хотѧ́щи прїитѝ и҆ ѻ҆плъча́ти е҆го.
то́иже ста́нетъ на глави́цѣ горы̀ сїѻ́на·

Сїѻ́н же прїидет̑ и҆ ꙗ҆ви́тсѧ всѣмъ ѹ҆гото́вана і҆ и҆ създа́на ꙗ҆́ко ви́дѣлъ е҆си горꙋ̀ и҆скопа́ннꙋ без рꙋкꙋ то́иже сн҃ъ мои ѻ҆блачи́тъ.
и҆же наидо́ша ꙗ҆зы́цы нечестивыхъ сих̑ и҆же и҆скꙋси́лъ е҆си, приближишасѧ ради лꙋка́ва помышле́нїа и҆хъ.
и҆ мꙋче́нїѧ и҆х же начнꙋтъ мꙋчити и҆же подобни сꙋть пла́мени и҆згꙋбѧтъ и҆хъ безъ трꙋдости.
по зако́нꙋ и҆же ѻ҆гню̀ подобенъ е҆сть, и҆ ꙗ҆ко ви́дѣлъ е҆си събира́ющи к себѣ и҆́ное мно́жество ми́рное.
сїи сꙋть десѧть колн̑҇ѣ иже плене́ни сътворе́ни бы́ша ѿ землѝ своеа, въ дни и҆ѻ҆сїѧ цр҃ѧ е҆гоже плѣни велъсамланаза́ръ цр҃ь а҆сѷрьскїи и҆ приве́лъ и҆хъ за рѣкꙋ̀.
и҆ преведени сꙋть в землю и҆́нꙋю.
тїи же себѣ да́ша совѣтъ то́и да ѻ҆ста́вѧт̑ мно́жество ꙗ҆́зы́къ.
и҆ дабы̀ прошлѝ в да́лнюю странꙋ̀ гдѣ̀ не бы́сть сѣмѧ чл҃чско·

И҆л̂и тꙋ̀ сохранити закон̑҇наѧ своѧ и҆же не бы́ша дръжа́ще въ странѣ̀ свое́и.
по вхо́дѣ же тѣснотъ рѣкѝ и҆е҆фра́та внидо́ша.
сътвори́лъ б̂о и҆мъ тогда̀ вы́шнїи зна́менїѧ и҆ поста́вилъ жи́лы рѣчныа доко́лѣ про́идꙋтъ.
понеже странѣ̀ бысть пꙋть мно́гъ пꙋтьствовати лѣ́то е҆ді́но и҆ полъ, и҆же страна̀ т̂а зоветсѧ а҆саре́ѳъ·

Тогда̀ ѻ҆бита́ша̑ тамо даже до послѣднѧго вре́мени·

И҆ нн҃ѣ па́ки начнꙋть прїти, па́ки вы́шнїи поста́вит̑ жи́лы рѣчны́ѧ, да могꙋтъ проитѝ, сїѧ ради ви́дл̑҇ѣ е҆си мно́жество с ми́ромъ.
н̂о и҆же ѻ҆ста́влени сꙋть ѿ людїи твои҆хъ сїи сꙋть и҆же ѻ҆брѧ́щꙋтсѧ внꙋтрѝ предѣлъ мои҆хъ.
сътворе́но б̂о бꙋдет̑ когда начнетъ погꙋби́ти мно́жество и҆хъ и҆же събрани сꙋть ꙗ҆зы́цы защити́тъ и҆хъ и҆же премого́ша людїи.
и҆ тогда пока́жет̑ и҆мъ велїе мно́жество чюде́съ, и҆ реко́хъ а҆зъ.
влд̑ко г҃и с̂е м̂и покажѝ чт̂о ради ви́дѣхъ мꙋжа въсходѧ́ща ѿ срд̑ца мо́рьскаго.
и҆ рече мнѣ.
ꙗ҆́ко не мо́жеши сїѧ и҆спытати и҆л̂и зна́ти и҆же сꙋть въ глꙋбинѣ мо́ръстѣи, та́ко не мо́жетъ кождо ви́дѣти на землѝ сн҃а мое҆го, и҆л̂и и҆хъ и҆же с ни́мъ сꙋть, то́кмо въ вре́мѧ днїи·

Сїѧ е҆сть тлъкова́нїѧ сонїи и҆же ви́дѣлъ е҆си.
и҆ чт̂о ради просвѣщенъ е҆си здѣ е҆дин̑҇.
ѻ҆ста́вилъ б̂о е҆си твоѧ.
и҆ ѻ҆́крс̑҇тъ мене ѹ҆празднилъ е҆си за́конъ і҆ и҆ска́лъ е҆си.
животъ б̂о твои разъсмотри́лъ е҆си въ премꙋдрости и҆ чюв̑҇ство твое зва́лъ е҆си мати.
и҆ того ради показа́хъ тебѣ мзды̀ предъ вы́шнимъ.
бꙋдетъ б̂о по и́нѣхъ трехъ дн҃ехъ к тебѣ и҆́наѧ гл҃ю.
и҆ распространю т̂и тѧжкаѧ и҆ ди́внаа і҆ и҆дохъ и҆ прїидо́хъ на́ поле мно́го славѧ́ще и҆ хва́лѧще вы́шнѧго ѻ҆ ди́вных̑ и҆же по временѣхъ сътворѧ́ше и҆ ꙗ҆́ко съдръжит̑ с̂е.
і҆ иже сꙋть въ временх̑ѣ сътворе́на и҆ сѣдо́хъ т̂ꙋ три дн҃и·

Глав̑҇, д҃і·

И бысть въ третїи дн҃ь, и҆ аз̑ сѣдохъ под̑ дꙋбомъ.
и҆ с̂е глас̑҇ и҆зыиде проти́въ м̂ѧ ѿ кꙋпи́ны и҆ реч̑҇.
е҆́здра, е҆́здра.
и҆ рекохъ с̂е а҆́зъ г҃и, и҆ воста́хъ на́ ноѕѣ моѝ, и҆ рече къ мнѣ.
ѿкрыва́ющи ѿкровенъ е҆смь на кꙋпи́нѣ.
и҆ гл҃ахъ моѷсїю, когда̀ слꙋжаше лю́дїе моѝ въ е҆гѷптѣ и҆ посла́хъ е҆го, і҆ и҆зведохъ лю́ди моа ѿ е҆гѷпта.
и҆ приведохъ и҆хъ на́ горꙋ сина́искꙋ.
и҆ въздръжа́хъ е҆го пред̑ собо́ю дн҃и мно́ги.
и҆ провѣщахъ е҆мꙋ чюдеса̀ мно́га, и҆ показа́хъ е҆мꙋ вре́мена та́ины и҆ конецъ.
и заповѣдах̑ е҆мꙋ гл҃щи, сїѧ въ ꙗ҆́вленїе сътвориши словеса̀, и҆ сїѧ скры́еши.
и҆ нн҃ѣ тебѣ рекꙋ зна́менїа ꙗ҆́же показах̑ сонїѧ и҆же видл̑҇ѣ е҆си, и҆ толкованїа и҆же ты вѣдѣ в срд̑ци твоем̑ преста́ви еѧ̀.
т̂ы б̂о въспрїимеши ѿ всх̑ѣ ѿврати́ши, ѻ҆ста́нокъ совѣтомъ мои҆мъ и҆ съ подобными твои́ми.
доко́лѣ не сконъча́ютъ времена.
ꙗ҆́ко вѣкъ погꙋбѝ ю҆́ность свою.
и҆ времена приближают̑сѧ ста́рѣтисѧ·

На дванадесѧть б̂о ча́сти раздѣле́нъ е҆сть вѣкъ.
и҆ проидо́ша е҆го десѧтыѧ и҆ по́лъ десѧтыѧ ча́сти, свыше же сꙋть е҆го за пол꙽десѧтыѧ части·

Нн҃ѣ б̂о ѹ҆стро́иши дом̑ твои.
и҆ накажи лю́ди твоѧ и҆ ѹ҆тѣши смиреных̑ и҆хъ.
и҆ ѿвѣща, ѹ҆жѐ растлѣно и҆ ѿпꙋсти ѿ себѐ смер̑҇тное помышленїе.
и҆ ѿверзи ѿ себѐ тѧ́гости люд̑скїѧ.
и҆звлеци ѿ себѐ не́мощное е҆стество·

И҆ преста́ви въ е҆ді́нꙋ странꙋ̀ смꙋща́ющаа т̂ѧ помышленїѧ, и҆ тщи́сѧ пресели́тисѧ ѿ временъ и҆хъ, и҆же б̂о ви́дѣлъ е҆си нн҃ѣ слꙋчи́тисѧ ѕла́ѧ, паки тѣмъ го́ршаѧ сътворѧ́тъ.
когда̀ б̂о невоз̑мо́женъ сътворитсѧ вѣкъ ѿ ста́рости·

Зане б̂о ѹ҆мно́жит̑сѧ на ѻ҆бита́ющих̑ зла́ѧ.
ѹ҆дали бо сѧ далече и҆́стинна и҆ приближисѧ л꙽жа.
ѹ҆жѐ б̂о тщит̑сѧ прїити ꙗ҆же ви́дѣлъ е҆си видѣнїе·

И҆ ѿвѣщахъ, и҆ рекохъ пред̑ тобо́ю г҃и.
се б̂о а́зъ и҆дꙋ̀ ꙗ҆́ко повелѣлъ е҆си мн̂ѣ.
и҆ покажꙋ настоѧ́щимъ лю́демъ и҆же ро́дѧтсѧ, кт̂о наѹ҆читъ ѧ҆̀.
поста́вленъ б̂о е҆сть вѣкъ въ тмѣ̀, і҆ и́же ѻ҆бита́ютъ в немъ безъ свѣтлости·

Ꙗ҆́ко закон̑҇ твои заж꙽женъ е҆сть.
да никто знает̑ и҆же ѿ тебѐ съворе́на сꙋть.
и҆ли и҆же начнꙋтсѧ дѣ́ла·

А҆́ще б̂о ѻ҆брѣтох̑ блгд̑ть пред̑ тобо́ю, посли въ мѧ̀ дх҃ъ ст҃ъ.
да напишꙋ вс̂ѧ что сътворено е҆сть въ вѣцѣ ѿ нача́ла и҆же быша въ зако́нѣ твое҆мъ пи́сана, да мо́гт̑ꙋ чл҃ци ѻ҆брѣсти стеѕю и҆же въсхо́тѧт̑ жити въ послд̑ѣнихъ вре́менехъ да жи́вꙋтъ·

И҆ ѿвѣща̀ къ мнѣ и рече.
шед̑ше събери лю́ди и҆ речеши к ним̑.
да не възыщꙋтъ тебе дн҃и, м҃·

Ты же ѹ҆гото́ви себѣ дщиць пиѯовъ мно́го, и҆ воз̑мѝ съ собо́ю сарїа, даврїа, селемїа, а҆ха́на, и҆ а҆сїелѧ.
пѧ́ть их̑ и҆же ѹ҆готованы сꙋть к писа́нїю ско́ро.
и҆ прїидеши сѣмо и҆ а́зъ възж꙽гꙋ въ срд̑ци твоем̑ свѣти́лникъ разꙋма, и҆ не ѹ҆га́снет̑.
дондеже сконча́ют̑сѧ и҆же начнеши писа́ти.
и҆ когда̀ съвръшиши нѣ́каѧ ꙗ҆вествено сътво́риши·

Нѣкото́раѧ мꙋ́дрымъ съкровенно предасѝ.
в заѹ́трїи б̂о сїи часъ начнеши писа́ти·

І҆ и҆до́хъ ꙗ҆́коже м̂и повелѣ̀.
и собрахъ вс̂и люд̑и̑ и҆ рекохъ·

Слы́ши і҆и҆л҃ь словеса̀ сїѧ ѻ҆пꙋтьствова́ни сꙋть ѿц҃ы на́ши, ѿ нача́ла въ е҆гѷпетъ і҆ и҆збавлени сꙋт̑ ѿто́лѣ·

И҆ прїѧ́ша за́конъ животныи е҆гоже не съхрани́ша.
и҆же и҆ в̂ы по нихъ престꙋ́пни е҆стѐ.
и҆ дана ва́мъ е҆ст землѧ въ жре́бїи.
и҆ зем̑лѧ сїѻ́нъ, и҆ ѿц҃ы ва́ши и҆ в̂ы безако́нїе сътво́рше.
и҆ не въздръжа́сте пꙋти и҆же повелѣ ва́мъ вы́шнїи.
и҆ пра́выи сꙋдїѧ е҆гда̀ ѿꙗ҆́лъ ѿ ва́съ въ времѧ ꙗ҆же да́но бысть·

И҆ нн҃ѣ в̂ы здѣ е҆сте и҆ бра́тїѧ ваша въ ва́съ сꙋть.
а҆́ще б̂о повелите чюв꙽ствꙋ ва́шемꙋ и҆ поѹ҆чи́те срд̑це ва́ше живы съдръжа́ни бꙋ́дете.
и҆ по смр҃ти млс̑҇ти въслѣдите, сꙋдъ б̂о по смр҃ти прїидетъ къгда паки ѻ҆живемъ·

И҆ тогда̀ правед̑нымъ и҆мена̀ ꙗ҆влѧ́ютсѧ и҆ нечьстивымъ сътворена пока́жꙋтсѧ.
къ мнѣ̀ б̂о никто пристꙋпа́етъ нн҃ѣ, ни възы́ще мене да́же до м҃, дн҃и.
и҆ прїѧх̑ пѧ́ть мꙋж́їи ꙗ҆ко заповѣ́да мн̂ѣ, і҆ и҆дохомъ въ по́ле, и҆ пребы́хом̑ т̂ꙋ·

И҆ бысть в заѹ҆́трїи и҆ с̂е глас̑҇ възва мѧ гл҃ѧ.
е҆́здра ѿвръзи ѹ҆ста̀ твоа и҆ пїи и҆́мже т̂ѧ напою̀.
и҆ ѻ҆творих̑ ѹ҆ста моа̀, и҆ с̂е ча́ша пол̑҇на въздашесѧ мн̂ѣ, сїѧ бы́сть пол̑҇на ꙗ҆́ко во́ды, свт̑ѣ еѧ̀ ѻ҆гню подобен̑҇, и҆ прїѧ́хъ и҆ пихъ, и҆ в неи е҆гда̀ пїѧх̑ срд̑це мое смѧтѧшесѧ ра́зꙋмомъ, и҆ въ персехъ мои възрастѧше премꙋдрость.
и҆ дх҃ъ мо́и содръжашесѧ памѧтїю.
ѿвръсты ѹ҆ста моѧ̀ и҆ нѣсть затворены ктомꙋ·

Вы́ш꙽нїи даде ра́зꙋмъ пѧти́мъ мꙋжем̑.
и҆ писа́ша ꙗ҆́же гл҃ахꙋсѧ ѹ҆жа́снѣи но́щи и҆́хже невѣдѧхꙋ.
но́щїю же ꙗ҆дѧ́хꙋ хлѣбъ.
а҆́з же по дн҃и гл҃ахъ.
и҆ по нощи не молча́х꙽.
и҆ написа́ни сꙋть за м҃, дн҃їи.
кни́ги, с҃д·

И҆ быс̑҇ е҆гда̀ съвръши́шасѧ, м҃, дн҃їи.
гл҃а вы́шнїи рекꙋщи.
пр́ьваѧ и҆же писал̑҇ е҆си въ ꙗ҆вѣ поставѝ.
и҆ да чтꙋтъ досто́инїи и҆ недостоинїи.
послд̑ѣнѧѧ же сед̑мьдесѧть съдръжи́ши да предаси и҆хъ мꙋдрымъ ѿ людїи твоих̑.
в тѣхъ б̂о е҆сть ко́рень разꙋма и҆ премꙋдрости и҆сто́чник꙽, и҆ ѹ҆мѣнїѧ рѣка.
и҆ сътвори́хъ та́ко·

Глв̑҇а, е҃і·

Се гл҃и въ ѹ҆́ши лю́демъ моим̑ словеса̀ прро̑҇чества.
и҆же дам̑ въ ѹ҆ста̀ твоѧ̀, рече г҃ь.
и҆ сътворѝ ꙗ҆́ко въ хартїи да напи́шꙋтсѧ ꙗ҆́ко вѣ́рны і҆ и́стинны сꙋть.
не бо́исѧ ѿ помысле́ныхъ на́ тѧ, и҆ ни смꙋтѧт̑ т̂ѧ невѣ́рнїи рекꙋщи.
ꙗ҆́ко всѧ́къ невѣренъ в невѣ́рїи свое҆мъ ѹ҆́мретъ.
с̂е а҆зъ наведꙋ ре́че г҃ь на селенїе землѝ ѕла́ѧ, ме́чь и҆ глад̑ и҆ смр҃ть и҆ погꙋбле́нїе, и҆же поскверни́ша безако́нїемъ всю̀ зе́млю, и҆ напо́лнена е҆сть дѣ́лъ и҆хъ льсти́выхъ·

Сего ра́ди реч̑҇ г҃ь.
ѹ҆же не ѹ҆молчю ѻ҆ нечестїахъ и҆хъ ꙗ҆же безако́нно съдѣлова́ютъ.
ни потерплю̀ и҆мъ, и҆же ѕлѣ тво́рѧтъ·

Се̂ кро́вь непови́нна и҆ ско́рбна въпїе́тъ къ мнѣ̀.
и҆ дш҃а пра́вед̑ныхъ въпїю́тъ без̑преста́ни.
ѿм꙽ща́ѧ ѿм꙽щꙋ̀ и҆мъ рече г҃ь.
и҆ въспрїимꙋ всѧ́кꙋ кровь непови́ннꙋю ѿ тѣ́хъ къ мнѣ̀·

Се̂ лю́ди моѧ̀ ꙗ҆́ко ста́да къ заколе́нїю ведꙋтсѧ.
ѹ҆же не терплю̀ того и҆же ѻ҆бита́ти и҆мъ въ землѝ е҆гѷпет̑стѣи.
н̂о и҆зведꙋ ѧ҆̀ рꙋко́ю си́лною и҆ мы́шцею высо́кою·

И҆ поражꙋ̀ е҆гѷпет̑ ка́знїю ꙗ҆́ко и҆ пре́же, и растлю̀ всю̀ зе́млю е҆го.
поскорби́т꙽ е҆гѷпетъ, и҆ ѻ҆снова́нїѧ е҆го ка́знїю и҆збїе́на бꙋ́дꙋтъ·

И҆ наказа́нїе второ́е наведе́тъ и҆мъ б҃ъ.
и҆ въспла́чют̑ дѣ́латели дѣ́лающїи зе́млю.
ꙗ҆́ко ѻ҆скꙋдѣ́ютъ сѣмена̀ их̑ ѿ ржа̀ и҆ гра́да, и҆ ѿ ѕвѣзды стра́шныѧ·

Го́ре свѣтꙋ і҆ и́же ѻ҆бита́ютъ в не́мъ.
и҆же приближи́сѧ ѻ҆рꙋж́їе и҆ съкрꙋше́нїе и҆хъ.

И҆ въста́нетъ ꙗ҆́зыкъ къ бра́ни и҆ меч̑҇ в рꙋкꙋ и҆хъ.
бꙋдетъ б̂о въ непостоꙗ҆нїе чл҃комъ.
і҆ и́ны и҆́нымъ възмага́ющи, и҆ нерадѧ́тъ цр҃ѧ свое҆го, и҆ нача́лникъ пꙋтѝ дѣлъ свои҆хъ въ дѣлесех̑ свои҆хъ·

Въсхо́щетъ б̂о чл҃къ въ́ градъ и҆тѝ и҆ не възмо́жетъ горды́нѧ б̂о и҆хъ ради гра́ды смꙋтѧт̑сѧ.
и҆ домы̀ съкрꙋша́тсѧ, и҆ чл҃цы боѧ́тсѧ.
не ѹ҆млс̑҇рди́тсѧ чл҃къ къ и҆́скренемꙋ свое҆мꙋ, на разоре́нїе домо́въ и҆хъ въ ѻ҆рꙋжїе, и҆ на расторже́нїе сꙋщества и҆хъ.
гла́да ради хлѣбнаго и҆ скорбѣнїѧ мно́га.
с̂е а҆зъ соберꙋ рече г҃ь, вси цр҃їе зе́м꙽стїи къ мн̂ѣ ѻ҆брати́ти, и҆же сꙋть ѿ восто́ка и҆ ю́га ѿ сѣвера и҆ лива́на къ ѻ҆браще́нїю себѣ.
и҆ възда́ти и҆же възда́ша тѣмъ.
ꙗ҆́ко сътворѧ́ютъ даже до днесь и҆збра́ннымъ мои҆мъ.
та́ко сътворю̀ и҆ възда́мъ в нѧ́дра и҆хъ.
сїѧ рече г҃ь б҃ъ, не прости́тъ десни́ца моѧ грѣшникомъ.
и҆ не преста́нетъ мечъ на пролїѧ́ющих̑ кро́вь непови́ннꙋю на землѝ·

И҆зы́иде ѻ҆́гнь ѿ гнѣва е҆го.
и҆ пожретъ ѻ҆снова́нїѧ зе́м꙽сти, и҆ грѣшники ꙗ҆́ко хвра́стїе заж꙽же́но.
го́ре си́мъ и҆же съгрѣша́ютъ и҆ не въздержа́тъ за́повѣдеи мои҆хъ, рече г҃ь, не ѻ҆прощꙋ̀ и҆мъ.
ѿидѣте ѿ мене сн҃ове безако́нїѧ не мози́те ѻ҆скверни́ти ст҃ыни мое́ѧ.
ꙗ҆́ко совѣ́сть г҃ь всѣх꙽ и҆же съгрѣша́ютъ е҆мꙋ.
сего ради преда́лъ и҆хъ въ смр҃ть и҆ в заколе́нїе ѹ҆жѐ б̂о прїидо́ша на ѻ҆́крс̑҇тъ землѝ лꙋка́выѧ.
и҆ пребꙋдете в ни́хъ, не и҆зба́витъ б̂о ва́съ б҃ъ, и҆же съгрѣши́сте пред нимъ·

Се видѣнїе гро́зное и҆ лице е҆го ѿ восто́ка.
і҆ и҆зы́идꙋтъ рожде́нїе ѕмїевъ а҆ра́вскихъ на колесни́цахъ мно́гихъ.
ꙗ҆́ко дыха́нїе вѣтровъ число̀ и҆хъ понесет̑сѧ на землѝ да ѹ҆боѧ́тсѧ и҆ трепе́щꙋт꙽ всѝ, и҆же и҆хъ ѹ҆слы́шатъ кармоньстїи преле́стницы въ гнѣвѣ.
і҆ и҆зы́идꙋтъ ꙗ҆́ко вепрѝ ѿ лꙋгъ.
и҆ прїидꙋтъ в си́лꙋ вели́кꙋ.
и҆ постоѧтъ въ бра́ни с ни́ми.
и҆ пленѧ́тъ ча́сть землѝ а҆сѷрьскоѝ, и҆ посемъ и҆знемо́гꙋтъ ѕмїеве въспомина́юще на рожденїе свое.
и҆ ѻ҆братѧ́тсѧ съвоздыха́ющи в си́лѣ вели́цѣ на постиза́нїе и҆хъ.
с̂и смꙋтѧ́тсѧ и҆ ѹ҆млъча́тъ в си́лѣ и҆хъ.
и҆ ѻ҆братѧ́тъ но́ѕѣ своѝ на бѣжа́нїе ѿ ѻ́бласти а҆сѷрьскїѧ насе́лницы ѻ҆бъстоа҆тъ их̑ и҆ сконча́етъ е҆ді́наго ѿ нихъ.
и҆ бꙋдет̑ бо́ѧзнь и҆ стра́хъ въ плъце и҆хъ застꙋпле́нъ, и҆ котора́нїе въ цр҃ехъ их̑.
с̂е ѻ҆́блакъ ѿ восто́ка и҆ сѣвера до полꙋдне.
и҆ ѻ́бразы и҆хъ гро́зны ѕѣло по́лны гнѣва и҆ бꙋри.
и҆ сразѧ́тсѧ междꙋ собо́ю, и҆ сразѧт̑ ѕвѣздꙋ мно́гꙋ на землѝ и҆ звѣздꙋ и҆хъ.
и҆ бꙋдетъ кро́вь ѿ меча̀ даже до ѹ҆тро́бы.
и҆ гно́и чл҃ческїи даже до седла вельблю́ждѧ.
и҆ бꙋдетъ бо́ѧзнь и҆ стра́хъ мно́гъ на землѝ.
и҆ ѹ҆стра́шатсѧ и҆же ѹ́зрѧ́ть гнѣвъ се́и.
и҆ тре́пет̑ прїиметъ и҆хъ.
и҆ посемъ въздви́гнꙋтсѧ бꙋрѣ мно́зи ѿ полꙋдни и҆ сѣвера, и҆ ча́сть и҆́на ѿ за́пада.
и҆ премо́гꙋтъ вѣтри ѿ восто́ка.
и҆ ѻ҆тво́ри́тъ ѻ҆́блакъ е҆гоже въздви́же въ гнѣвѣ.
и҆ ѕвѣзда̀ на сотворе́нїе стра́ха ѿ восто́чна вѣтра и҆ за́пада подви́гнетсѧ.
и҆ въздви́гнꙋтсѧ ѻ҆́блацы ве́лїи ѕѣлни и҆ по́лни гнѣва.
и҆ ѕвѣзда̀ да ѹ҆стра́шитъ всю зе́млю и҆ ѻ҆бита́ющихъ на неи.
и҆ възлѣ́ютъ на всѧко мѣсто высо́ко.
и҆ въздви́гнꙋтъ ѕвѣздꙋ̀ стра́шнꙋ ѻ҆гне́мъ и҆ гра́домъ и҆ мечемъ летѧ́щимъ.
и҆ во́ды мно́ги даже и҆сполнѧтсѧ вс̂ѧ по́лѧ.
и҆ всѝ и҆сто́чницы и҆сполне́нїем̑ водъ мно́гъ.
и҆ съкрꙋша́тсѧ гра́ды и҆ стѣны.
и҆ го́ры и҆ хлъми и҆ ѹ҆до́лїѧ и҆ лѣсъ дꙋбра́вныи, и҆ сѣна̀ лꙋжныѧ и҆ ѻ҆би́лїе и҆хъ·

И҆ про́идꙋтъ непоколѣбле́ми до вавѷло́на, да съкрꙋшат̑ е҆го.
и҆ сберꙋтсѧ к не́мꙋ и҆ ѻ҆бы́идꙋт꙽ е҆го.
і҆ и҆злїют꙽ъ ѕвѣздꙋ и҆ всю̀ ꙗ҆́рость нань.
и҆ по́идетъ пра́хъ и҆ дым̑ да́же до нб҃си, и҆ всѝ и҆же ѻ҆́крс̑҇тъ възрыда́ют̑ е҆го·

І҆ и҆же по немъ ѻ҆ста́нꙋтъ послꙋжатъ е҆мꙋ и҆же ѹ҆стра́ши и҆хъ.
и҆ ты̀ а҆сїѧ съгласна въ ѹ҆пова́нїе вавѷло́на и҆ въ славꙋ подо́бїѧ е҆го, го́ре тебѣ бѣднѣи, и҆ сего ра́ди и҆же ѹ҆подоби́сѧ е҆мꙋ, и҆ ѹ҆краси́ла е҆си дще́ри твоѧ въ дръзновенїи любодѣѧнїи, къ ѹ҆гожде́нїю и҆ славле́нїю в любо́вныхъ твои҆хъ, и҆же с тобо́ю похотѣша всегда̀ блꙋди́ти.
ненавидѣнїемъ наслд̑ѣствова́на е҆си въ всѣхъ дѣлехъ е҆го и҆ в начина́нїи е҆го сего ради рече г҃ь.
послю̀ на тѧ ѕла́ѧ, вдо́в꙽ство ѹ҆бо́жество и҆ глад̑ и҆ мечь и҆ гꙋби́тельство, на разоре́нїе домо́въ твои҆хъ, ѿ порꙋше́нїѧ и҆ смр҃ть и҆ славꙋ си́лы твое́ѧ.
ꙗ҆ко цвѣтъ и҆схне́тъ и҆ е҆гда̀ въста́нет꙽ зно́и и҆же по́сланъ е҆сть на тѧ.
и҆знемо́жеши ꙗ҆ко ѹ҆бо́жеиша ꙗ҆зве́на и҆ наказана ѿ женъ да не ѹ҆дръжат̑ тебе си́лнїи и҆ любо́вницы, ни а҆́зъ та́ко възлю́блю т̂ѧ рече г҃ь.
а҆ще б̂ы не закла́ла и҆збра́нныхъ моих̑ въ всѧ́ко времѧ, възвыша́ющи на пораже́нїе рꙋкѝ, и҆ рекꙋщи на смр҃ть и҆хъ.
е҆гда̀ ѹ҆пи́сѧ въскрасѝ лѣпотꙋ̀ лица̑ твое҆го.
м꙽зда̀ блꙋже́нїѧ твое҆го в нѧ́дра́хъ твои҆хъ.
сего ради възда́нїе прїимеши, ꙗ҆́ко сътвори́ши и҆збра́ннымъ мои҆мъ речетъ г҃ь, та́ко сътвори́тъ тебѣ б҃ъ и҆ предас̑҇ т̂ѧ въ ѕла́ѧ, и҆ сн҃ове твоѝ гла́домъ поги́бнꙋтъ, ты́ же мечем̑ паде́ши, и҆ гра́ди твоѝ съкрꙋша́тсѧ.
и҆ вс̂и твоѝ в по́ли ѻ҆рꙋжїемъ падꙋтъ, і҆ и҆же сꙋть в гора́хъ гла́домъ поги́бнꙋтъ, и҆ ꙗ҆сти бꙋдꙋтъ мѧ́са своа ѿ гла́да хлѣба, и҆ кро́вь пїютъ ѿ жа́жди воды·

Не бл҃гополꙋчне по мо́ри прїидеши, и҆ паки прїимеши ѕло́е.
и҆ въ и҆сше́ствїи поразѧ́тъ гра́дъ сꙋ́етїемъ, і҆ и҆скорени́тъ нѣкꙋю ча́сть землѝ твое́ѧ, и҆ ча́сть сла́вы твое́ѧ и҆стреби́тъ, и҆ па́ки къ вавѷло́нꙋ превраще́нномꙋ навраща́ю тѧ и҆ бꙋдеши и҆мъ ꙗ҆́ко хвра́стїе, и҆ тїи бꙋдꙋтъ тебѣ ꙗ҆́ко ѻ҆́гнь, и҆ пожре́т꙽ тебе и҆ гра́ди твои и҆ зе́млю твою, и҆ го́ры твоѝ, и҆ всѝ дꙋбра́вы твоѝ и҆ лѣсы̀ плодоно́сныи ѻ҆гне́мъ пож꙽жт̑ꙋ сн҃ове твоѝ въ плене́нїе поведꙋтъ, и҆ кинсонъ твои въ плѣне́нїи и҆мѣют̑ и҆ сла́вꙋ лица̀ твое҆го и҆стреби́тъ·

Глв̑҇а, ѕ҃і·

Го́ре тебѣ вавѷло́нъ и҆ а҆сїѧ, го́ре тебѣ е҆гѷпетъ и҆ сѷрїѧ препоꙗ҆ши́тесѧ вре́тищем꙽ и҆ власѧни́цею.
и҆ пла́чите сн҃овъ ва́ших̑ и҆ болѣзнꙋите ꙗ҆́ко прибли́жисѧ съкрꙋше́нїе ва́ше, по́сланъ е҆сть въ ва́съ ме́чь, и҆ кто̀ е҆сть и҆же ѿврати́тъ е҆го, по́сланъ е҆сть въ васъ ѻ҆́гнь и҆ кто̀ е҆сть и҆же ѹ҆га́ситъ е҆го, по́слана сꙋть въ вас̑҇ ѕла́ѧ, и҆ кто̀ е҆сть и҆же ѿме́щет̑ еѧ̀.
ни л̂и ѿженетъ кт̂о льва̀ а́лчꙋща в лѣсъ, л̂и ѹ҆га́ситъ ѻ҆́гнь въ хвра́стїи скоро когда начнет꙽ згара́ти, и҆л̂и ѿме́щет̑ кт̂о стрѣлꙋ̀ ѿ стрѣлца̀ крѣпко пꙋщенꙋ, г҃ь крѣпкїи по́слет̑ ѕла́ѧ, и҆ кт̂о е҆сть и҆же ѿгонитъ ѧ̀ и҆зы́идетъ ѻ́гнь ѿ гнѣва е҆го, и҆ кто е҆сть и҆же ѹ҆га́ситъ е҆го, блиста́нїѧ кт̂о не ѹ҆бои́тсѧ, възгрѣми́тъ кт̂о не ѹ҆жаснетсѧ, г҃ь запретит̑, и҆ кое ѻ҆снова́нїе не потрѧсе́тсѧ ѿ лица̑ е҆го, землѧ̀ сътрѧсетъ ѻ҆снованїѧ своѧ, и҆ море влънꙋ́ѧсѧ волна́ми ѿ глꙋбины̀ и҆ стрꙋ́и е҆го во́змꙋт̑сѧ, и҆ ры́бы е҆го ѿ лица̀ гн҃ѧ, и҆ ѿ сла́вы си́лы е҆го.
ко́ль крѣпка десни́ца е҆го ꙗ҆́же лꙋкъ напрѧжѐ, и҆ стрѣлы е҆го ѻ҆́стры и҆же ѿ него по́слютсѧ не ѻ҆скꙋдѣют̑.
е҆гда а҆ще начнꙋтсѧ посыла́ти въ предѣлы зем̑стїи·

Се послю̀ на́ тѧ зла́ѧ и҆ не ѻ҆братѧ́тсѧ до́ндеже прїидетъ на́ землю, ѻ҆́гнь възгорит̑сѧ и҆ не ѹ҆га́снетъ до́ндеже сконча́етъ ѻ҆снова́нїѧ землѝ.
и҆мже ѻ҆́бразомъ не ѿврати́тсѧ стрѣла̀ по́сланна ѿ возмо́жна стрѣлца, тако не ѿвратѧ́тсѧ ѕлаѧ, ꙗ҆́же по́сланна бꙋдт̑ꙋ на́ землю.
го́ре мн̂ѣ, го́ре мн̂ѣ, кт̂о м̂ѧ и҆зба́витъ во́ дни ты́ѧ.
нача́ло бо́лѣзнемъ и҆ мно́зѣхъ стена́нїи, нача́ло гла́да и҆ мно́ги поги́бели, нача́ло бра́немъ и҆ ѹ҆боѧт̑сѧ вла́сти, нача́ло ѕлы́мъ и҆ трепещт̑ꙋ всѝ.
въ времѧ же сїе чт̂о сътворю̀ е҆гда̀ прїидꙋтъ ѕла́ѧ, с̂е гла́дъ и҆ ка́знь, и҆ ско́рбь и҆ тѣснота по́сланы сꙋть, бїенїѧ въ ѹ҆правле́нїе, и҆ въ всѣхъ сих̑ не ѻ҆братѧт̑сѧ ѿ безако́нїи своихъ.
ни бїенїѧ памѧт̑ствова́ти бꙋдꙋтъ всегда̀.
с̂е бꙋдетъ ѻ҆би́лїе нивъчто́же на землѝ·

Та́ко да мнѧ́тъ себѣ бы́ти ѹ҆правле́нъ мир̑҇ и҆ тогда̀ възрастꙋтъ зла́ѧ на зем̑лѝ ме́чь, гла́дъ, и҆ вели́ко стыдѣнїе.
ѿ гла́да б̂о мно́зи и҆же ѻ҆бита́ютъ на зе́мли, поги́бнт̑ꙋ.
и҆ ме́чь и҆згꙋбитъ про́чихъ и҆же ѻ҆ста́нꙋтъ ѿ гла́да·

И҆ мер꙽твїѝ ꙗ҆́ко мотыла̀ ѿмещꙋтсѧ.
и҆ не бꙋдетъ и҆же ѹ҆тѣшитъ и҆хъ, ѻ҆пꙋстѣ́етъ б̂о землѧ̀, и҆ гра́ды е҆ѧ̀ разоре́ны бꙋдт̑ꙋ·

и҆ не ѻ҆ста́нетсѧ и҆же стѧ́жет̑ зе́млю, и҆ кт̂о посѣ́етъ еѧ̀·

дре́во дасть пло́ды, и҆ кт̂о въсторга́етъ е҆̀.
гро́здїе зрѣло бꙋдет̑ и҆ кт̂о пото́пчетъ е҆̀ бꙋдꙋтъ б̂о мѣста вели́ка ѻ҆пꙋстѣнїѧ·

Въсхо́щетъ б̂о чл҃къ чл҃ка ви́дѣти, и҆ли гласъ е҆го слы́шати.
занѐ ѻ҆ста́нꙋтъ ѿ гра́да і҃, и҆ дв̂а ѿ ни́вы и҆же съкры́ютсѧ в гꙋсты́хъ дꙋбра́вах̑ и҆ в разсѣлинах̑ ка́менныхъ.
и҆мже ѻ҆́бразомъ е҆гда ѻ҆ставлѧ́ютсѧ в ма́слинахъ, и҆ еді́ных꙽ древесехъ, трѝ и҆л̂и четы́ре маслины, и҆л̂и ꙗ҆́ко въ виногра́дѣ въсторгано гро́зд̑їе ѻ҆ставлѧ́ютсѧ, ѿ тѣхъ и҆же любѧ́щи виноград̑ и҆щꙋтсѧ·

Та́ко ѻ҆ста́влѧ́ютсѧ въ дни тїи тр̂и и҆л̂и четы́ре и҆спыта́ющихъ домы̀ и҆хъ в꙽ мечь.
и҆ ѻ҆ста́влена бꙋдет꙽ зем̑лѧ, и҆ ни́вы еѧ̀ състарѣют̑сѧ, и҆ пꙋтѝ еѧ̀ и҆ всѝ стезѧ̀ еѧ̀ те́рнїемъ зарастт̑ꙋ, зане́ же не про́идꙋтъ чл҃цы по нимъ.
въспла́чꙋтъ дв҃ы не и҆мѣющи ѻ҆брꙋчника, въспла́чꙋтъ же́ны не и҆мѣю҆щи мꙋжа, въспла́чꙋтъ дщери их̑ не и҆мѣющи по́мощи, ѻ҆брꙋчники их̑ въ бра́ни сконча́ютсѧ.
и҆ мꙋжи и҆хъ въ гла́дъ и҆стребѧ́тсѧ·

Слы́шите сїѧ и҆ позна́ите еѧ̀ рабѝ гн҃и.
с̂е сло́во гн҃е прїимѣте е҆̀, не вѣрꙋите бого́мъ ѻ҆ нихже рече г҃ь.
с̂е приближа́ю҆тсѧ зла́ѧ немедлѧ́щи, и҆мже ѻ҆́бразомъ бремена́та е҆гда ро́дитъ, во ѳ҃ мс̑҇ць сн҃а свое҆го, приближа́ющисѧ ча́съ рожде́нїѧ еѧ̀.
преже часъ дв̂ꙋ и҆ли трехъ болѣзни ѻ҆бдержа́т꙽ чрево еѧ̀, и҆сходѧ́щъ младенецъ ѿ чре́ва не жда̀ ни е҆ді́ныѧ чрьты.
також̑ не постоѧ́тъ зла́ѧ въсходѧ́щи на́ землю, и҆ вѣкъ въстонетъ.
и҆ бо́лезни въздержа́ть и҆̀·

Слы́шите слово лю́дїе моѝ.
ѹ҆гото́ваитесѧ на погна́нїе, и҆ въ злы́хъ та́ко бꙋдете ꙗ҆ко прише́лцы.
кт̂о предастъ ꙗ҆́ко и҆же бѣжи́тъ, и҆ кт̂о кꙋпитъ ꙗ҆ко и҆же погꙋбитъ, кт̂о торгꙋ́ет꙽ ꙗ҆́ко и҆же стѧжа́нїѧ не прїиметъ, и҆же съзидает̑ ꙗ҆́ко жи́ти не и҆́мать, и҆же посѣ́етъ ꙗ҆ко и҆же не по́жнетъ.

Та́ко і҆ и́же виноград̑ рѣжетъ ꙗ҆ко не въсто́ргнетъ.
и҆же посѧ́гнетъ, тако ꙗ҆́ко ча́дъ не сътвори́т꙽, и҆же не посѧ́гнетъ, та́ко ꙗ҆ко вдо́вы·

Сего ради и҆же трꙋдѧт̑сѧ неключи́мо трꙋдѧтсѧ.
плод̑ б̂о и҆хъ и҆ноплемен̑҇ники пожнꙋтъ.
и҆ вс̂ѧческа́ѧ и҆хъ въсхитѧ́тъ, и҆ домы̀ превратѧт̑.
и҆ сн҃овъ и҆хъ плен́ѧтъ и҆же въ плене́нїи и҆ гра́дꙋ ро́дѧтъ рожде́нїѧ своѧ.
та́коже и҆ кꙋплю дѣющїи въсхище́нїемъ и҆же ѹ҆красѧт̑ гра́ды и҆ домы̀ своѧ̀, и҆ держа́нїе и҆ живо́тнїи своѝ, толи́ко наипа́че възненави́жꙋ и҆хъ за грѣхѝ и҆хъ, рече г҃ь.
ка́ко ненави́дит̑ блꙋдница женꙋ̀ мꙋдрꙋ и҆ бл҃гꙋ ѕѣло, та́ко ненави́дитъ пра́вдꙋ безако́нїе е҆гда ѹ҆краситсѧ, и҆ повинꙋетъ еѧ̀ в лице, е҆гда прїидетъ и҆же защити́тъ взы́щꙋщи всѧ́къ грѣхъ на землѝ.
сего ради не мози́те подо́битисѧ е́й ни дѣломъ еѧ̀.
ꙗ҆ко е҆ще ма́ло, и҆ во́зметсѧ безако́нїе ѿ землѧ̀, и҆ пра́вда црс̑҇твꙋетъ на ва́съ, не гл҃етъ грѣшникъ себе не съгрѣша́ти, ꙗ҆́ко ѹ҆́глїе ѻ҆́гнено възгори́тсѧ на главѣ̀ е҆го.
и҆же речет̑ не съгрѣши́хъ предъ бм҃ъ и҆ сла́вы е҆го.
с̂е г҃ь совѣсть всѧ̀ дѣла члс̑҇чка и҆ начина́нїе и҆хъ и҆ помышле́нїе и҆хъ и҆ срд̑ца и҆хъ·

Рече б̂о бꙋди землѧ̀, и҆ бы́сть.
бꙋди нб҃о и҆ бы́сть, и҆ словесем̑ е҆го звѣзды сътворены сꙋть, и҆ зна́етъ число звѣздъ, и҆же възы́щетсѧ ѿ бездны и҆ сокро́вищъ и҆хъ.
и҆же и҆змѣрилъ е҆сть мо́ре и҆ зачатїе е҆го.
и҆же запрѐ море посредѣ во́дъ.
и҆ повѣси зе́млю на водахъ словесемъ своим̑.
и҆же простре нб҃о ꙗ҆́ко ка́ма́рꙋ на вода́хъ ѻ҆снова̀ е҆го.
и҆же поста́ви в пꙋсты́ни и҆сто́чники во́дныѧ, и҆ на връхꙋ̀ го́ръ бла́та на пꙋще́нїе рѣкъ ѿ възвыше́на ка́мени, да напаѧ́ют̑ зе́млю, и҆же сътворѝ чл҃ка и҆ положѝ срд̑це е҆го посредѣ тѣла и҆ вложѝ е҆мꙋ дх҃ъ, и҆ живо́тъ и҆ ра́зꙋмъ и҆ дыха́нїе.
б҃ꙋ вседръжи́телю и҆же сътворѝ всѧ̀, і҆ и҆спыта́етъ всѧ̀ сокровен̑҇наа, въ сокрове́нїи землѝ, то́и зна́етъ начина́нїе ва́ше, і҆ и҆же помы́слите въ срд̑цыхъ ва́шихъ, съгрѣша́ющи и҆ хотѧщи ѹ҆таи́ти грѣхѝ ва́ша.
сего ради г҃ь и҆спыта́ющи и҆спыта̀ всѧ дѣла ваша·

И҆ приведетъ вас̑҇ всѣхъ, и҆ ме́рзъци бꙋдете е҆гда про́идꙋт꙽ грѣсѝ ва́ши пред̑ чл҃ки, и҆ без꙽зако́нни бꙋдꙋт꙽ и҆же пови́нни ста́нꙋт꙽ въ дн҃ь то́и, чт̂о сътворитѐ, л̂и како съкры́ете грѣсѝ ва́ши пред̑ бм҃ъ и҆ а́гг҃лы е҆го.
с̂е сꙋдїѧ б҃ъ.
бо́итесѧ е҆го, ѻ҆ста́нитесѧ ѿ грѣхъ ваших̑.
и҆ забꙋдите безако́нїа ва́ша творити и҆хъ въ вѣкъ, и҆ б҃ъ и҆зведе́тъ вас̑҇, і҆ и҆зба́витъ ѿ всѧ́каго скорбѣнїѧ.
с̂е бо възгара́естѧ ѻ҆́гнь на ва́съ, ꙗ҆зы́цы мно́зи, и҆ въсхитѧт̑ нѣких꙽ ѿ ва́съ, и҆ зако́лют꙽ на жер꙽твꙋ и҆́долом̑ і҆ и҆же и҆зво́лѧтъ бꙋдетъ и҆мъ в посмѣхъ и҆ в поноше́нїе и҆ въ попра́нїе·

Бꙋдетъ б̂о мѣста мѣстꙋ, и҆ ѿ сосѣднихъ гра́довъ въста́нт̑ꙋ мно́ѕи на боѧ́щихсѧ г҃а·

Бꙋдꙋтъ ꙗ҆́ко безꙋмни и҆ нико́мꙋ пращающи, на раз̑дра́нїе и҆ запꙋстѣнїе боѧ́щимсѧ г҃а.
и҆же ѻ҆пꙋстѧтъ и҆ расхитѧ́тъ стѧжа́нїѧ и҆хъ, и҆ ѿ домо́въ их̑ и҆згонѧт̑.
тогда ꙗ҆ви́тсѧ и҆скꙋше́нїе и҆збран̑҇ных̑ мои҆хъ, ꙗ҆́ко зла́то и҆скꙋситсѧ ѿ ѻ҆гнѧ̀·

Слы́шите възлю́бленїи моѝ рече г҃ь, с̂е пред̑ вами дни ско́р꙽бни, и҆ ѿ всѣхъ и҆зба́влю вас̑҇, не бо́итесѧ не сꙋмнѧ́итесѧ, ꙗ҆́ко б҃ъ водїтель ваш̑҇ е҆сть, і҆ и҆же въздержа́ти за́повѣди и҆ повелѣнїѧ моѧ, рече г҃ь б҃ъ.
да не ѻ҆тѧгча́тъ ва́съ грѣсѝ ва́ши ни воздви́гнꙋтсѧ безако́нїѧ ва́ша, го́ре и҆же съти́снꙋтсѧ ѿ грѣхъ свои҆хъ, и҆ ѻ҆тѧгча́тсѧ ѿ безако́нїи свои҆хъ.
и҆мже ѻ҆́бразомъ ни́ва сти́снетсѧ ѿ дꙋбра́вы и҆ те́рнїѧ ѻ҆сѧ́жетъсѧ стезѧ̀ е҆ѧ̀, по кое́мъ не про́идет̑ чл҃къ.
и҆ затвори́тсѧ, и҆ по́слет̑сѧ на пож꙽же́нїе ѻ҆гню̀·

Коне́цъ г҃, кни́гъ е҆́здриныхъ и҆́мать в себѣ глв̑҇а, ѕ҃і·