Библия (1581). [19] Иудифь

КНИ́ГА І҆Ю҆ДИ́ѲЬ

ГЛВ҃А ПЄр̑ВА́А

Арфаѯа́тъ б̂о цр҃ь мед̑скїи ѻ҆бьѧ мно́ги ꙗ҆зы́ки подъ црс̑҇тво свое<.>

И҆ то́и созда̀ град̑ си́лныи ѕѣ́ло, е҆гоже и҆менова̀ е҆к꙽ваѳа́нисъ.
ѿ ка́менїи четвероѹ҆го́лных꙽ те́саныхъ сътворѝ стѣ́ны е҆го, въ высотꙋ лакотъ, о҃, и҆ въ широтꙋ̀ лакоть, л҃. столпы̀ же е҆го поста́ви въ высотꙋ̀, ла́котъ, р҃, четвероѹ҆го́лны б̂о их̑ сътворѝ.
простра́нъство же и҆хъ ѿ мѣста до мѣ́ста, к҃, стꙋ́пенїи нога́ма.
поста́ви же вра́та е҆го ме́ждꙋ столпомъ·

И҆ славѧ́шесѧ ꙗ҆ко си́лныи въ си́лꙋ во́и свои҆хъ, и҆ въ сла́вꙋ колесни́ць свои҆хъ·

Въ лѣто б̂о в҃і, црс̑҇тва свое҆го.
навходоносо́ръ цр҃ь а҆сѷрїискїи, и҆же црс̑҇твова в ниневїѝ гра́дѣ вели́цѣмъ вое҆ва проти́вꙋ а҆рфаѯа́тꙋ·

И҆ ѻ҆бъшед̑ е҆го на́ поли вели́цѣ, и҆же и҆менꙋет̑сѧ рагав̑҇ ѹ҆ рѣки е҆фрата, и҆ ти́гра, и҆ а҆досона, на́ поли е҆рїѻ́хъ цр҃ѧ̀ е҆ликорьска·

Тогда̀ възвышено е҆сть црс̑҇тво навходоносо́рово и҆ срд̑це е҆го възнесесѧ ѕѣло, и҆ посла̀ къ всѣмъ и҆же ѻ҆бита́хꙋ в киликїѝ, и҆ въ дама́сцѣ, и҆ ливанѣ, и҆ къ ꙗ҆зы́комъ и҆же сꙋть в꙽ кармелїѧ и҆ кеда́рѣ, и҆ къ ѻ҆бита́телем꙽ галиле́искимъ на́ поли вели́цѣ е҆здрелонѣ, и҆ къ всѣм꙽ и҆же бѧхꙋ въ самарїѝ ѻ҆бо́нꙋ странꙋ̀ і҆ѻ҆рда́на, даже и҆ до і҆ерс̑҇ли́ма, и҆ все́и земли е҆се́иско́и.
до́ндеже прїидетъ до го́ръ е҆ѳїѻ́пъскихъ.
къ тѣмъ же всѣмъ посла̀ послы̀ навходоносоръ цр҃ь а҆сѷрїискїи.
и҆же вс̂и е҆дїнодꙋшно противи́шасѧ, и҆ ѿпꙋстиша и҆хъ пра́здны и҆ без̑ чести ѿи҆до́ша·

Тогда̀ раз̑гнѣ́васѧ навходоносоръ цр҃ь на всѝ земли тїи.
заклѧ́сѧ престо́ломъ црс̑҇тва свое҆го, да м꙽стит̑сѧ ѿ всѣхъ стра́нъ си́хъ·

Глав̑҇, в҃·

Лѣта, г҃і, навходоносо́ра цр҃ѧ, к҃в дн҃е, мс̑҇ца пр́ьваг̑҇·

Бы́сть сло́во въ домꙋ̀ навходоносо́ра цр҃ѧ а҆сѷрїиска да м꙽ститсѧ.
и҆ возва̀ всѣхъ старѣишинъ и҆ вое҆водъ и҆збра́нныхъ свои҆хъ.
і҆ и҆мѣ с ни́ми та́инꙋ совѣта свое҆го, повѣда помышленїе своѐ в немъ быти.
да повинитъ всю̀ землю свое҆мꙋ црс̑҇твꙋ, и҆ речен꙽ное ѹ҆год̑но бы́сть всѣмъ·

И҆ възва̀ навходоносоръ цр҃ь ѻ҆лофе́рна нача́лника вое́мъ своим̑, и҆ рече е҆мꙋ·

И҆зыиди на всѣ црс̑҇тва запад̑ныѧ, проти́вꙋ сихъ наипаче и҆же ѹ҆ничижи́ша повеленїе мое.
да не ѿпꙋ́ститъ ѻ҆́ко твое н̂и е҆ді́номꙋ црс̑҇твꙋ, всѧкъ же град̑ ѹ҆тверженъ покори́шъ мн̂ѣ·

Тогда ѻ҆лофе́рнъ возва вое҆во́ды и҆ правители людеи си́лы а҆сѷрїискїѧ.
и҆ съчита мꙋжїи хра́брыхъ къ бра́ни ꙗ҆́коже повелѣ е҆мꙋ цр҃ь, ҂р҃, и҆ ҂к҃. пѣшецъ вои҆нникъ, и҆ ко́нникъ стрѣл꙽цовъ, ҂в҃і·

И҆ повелѣ пред̑и҆тѝ всемꙋ воиньствꙋ въ мно́жествѣ безъ числа̀ вер꙽блюд̑.
и҆ си́мъ ꙗ҆́же довлѣют̑ во́и мно́жества пи́ща воло́въ и҆ ско́товъ, ста́да же ѻ҆́вчаѧ и҆́мже не бѣ̀ числа̀.
ѻ҆би́лїе ѿ все́ѧ сѷрїѧ въ прохо́дъ свои ѹ҆гото́вати повелѣ, зла́та б̂о и҆ сребра̀ ѿ до́мꙋ цр҃ева взѧ̀ съ собою мно́го ѕѣ́ло.
і҆ и҆зы́де то́и и҆ вс̂е во́иньство съ колесни́цами и҆ конники и҆ съ стрѣлцы, и҆же покры́ша лице земли ꙗ҆́ко прꙋѕи·

Є҆гда же преи҆де предѣ́лы а҆сѷрїискїѧ.
прїидетъ къ вели́кимъ горамъ а҆́нге, и҆же сꙋть ѻ҆шꙋ́юю киликїѝ.
і҆ и҆зыиде въ всѧ̀ гра́ды их̑, и҆ ѻ҆бьѧ̀ вс̂ѧ ѻ҆держа́нїа·

Разрꙋши же град̑ мелоѳитъ богат̑ ѕѣло.
и҆ плени́ же вс̂и сн҃ове ѳарси́съ.
и҆ сн҃ве и҆змаи҆ли и҆же бѧхꙋ проти́вꙋ лица̀ пꙋсты́ни, и҆ къ ю́гꙋ земли хеллонъ.
и҆ прешед̑ е҆фра́тъ·

И҆ прїиде въ месопота́мїю, и҆ съкрꙋши вс̂и гра́ды вели́цы и҆же бѧ́хꙋ т̂ꙋ ѿ пото́ка ма́мъврїиска, да́же прїиде къ мо́рю.
и҆ ѻ҆бьѧ предѣлы и҆хъ ѿ киликїѧ даже до конца ꙗ҆ѳетъ и҆же сꙋть къ ю́гꙋ.
и҆зведе же всѣхъ сн҃овъ мадїамль, и҆ плѣнѝ вс̂е бога́тество и҆хъ.
всх̑ѣх же противлѧ́ющих̑сѧ е҆мꙋ и҆збѝ мечем̑·

И҆ посемъ прїиде на́ поле дама́ска въ дн҃и жа́твы, и҆ пож̑же сѣ́аннаѧ вс̂ѧ.
всѣх же древъ и҆ виноград̑ повелѣ посещи.
и҆ нападе страхъ е҆го на всѣхъ ѻ҆бита́ющихъ на́ земли·

Глв̑҇а, г҃·

Тогда́ же посла́ша мꙋжїе послы̀ своѧ ѿ всѣхъ гра́довъ и҆ предѣлъ, цр҃їе и҆ кнѧ́ѕи, сѷрїистїи, и҆ месопотамїи и҆ сѷрїи, сова́ла, и҆ ливїѧ, и҆ киликїѧ, и҆же пришед̑ши къ ѻ҆лофе́рнꙋ реко́ша.
да преста́нетъ гнѣвъ твои и҆же е҆сть над̑ на́ми.
лꙋчше б̂о е҆сть да жи́ви сꙋщи слꙋжимъ навходоносо́рꙋ цр҃ю вели́комꙋ, и҆ под̑рꙋчни бꙋдемъ тебѣ, нежели ѹ́мремъ со и҆мѣнїемъ нашимъ непокори́вшесѧ·

Всѧ́къ градъ на́шъ и҆ дръжа́нїе, всѝ го́ры и҆ хлъми и҆ по́лѧ и҆ ста́да̑ воло́въ и҆ ѻ҆ве́ць и козло́въ, ко́нїи же и҆ вельблю́довъ, и҆ вс̂ѧ бога́тъства наша и҆ домоча́дцы пред̑ тобо́ю сꙋть, бꙋдт̑ꙋ всѧ̀ по сꙋдꙋ твое҆мꙋ.
та́кож̑ и҆ мы и҆ сн҃ове наши рабѝ твоѝ е҆смы̀.
прїиди́ къ намъ господине ми́рне и҆ владѣи работою нашею ꙗ҆́ко годѣ т̂и е҆сть·

Тогда̀ сошед̑ше з го́ръ в са́дники в си́лѣ вели́цѣ, и҆ ѻ҆бьѧ́тъ всѧкъ гра́дъ, и҆ всѧ̀ ѻ҆бита́ющаѧ на земли.
ѿ всѧ́кого же гра́да взѧ̀ себѣ помо́щниковъ мꙋжїи крѣпких̑ і҆ и҆збра́нныхъ къ бра́ни.
толи́ко же стра́хъ велїи на страны̀ сїѧ нападѐ ꙗ҆́ко веѣмъ гра́домъ, ѻ҆бита́ющїи нача́лницы и҆ чс̑҇тни въкꙋпѣ съ гража́ны и҆зыидо́ша въ срѣте́нїе е҆мꙋ на пꙋть.
прїемлющи е҆го со вѣнцы̀ и҆ со свѣща́ми.
въспѣва́ющи и҆ веселѧ́щесѧ в тим꙽па́нѣхъ и҆ трꙋбах̑.
сїѧ б̂о творѧ́щи сверѣпьства срд̑ца е҆го ѹ҆кроти́ти возмого́ша, ꙗ҆́же и҆ гра́ды и҆хъ разорѝ, и҆ лѣсы̀ и҆хъ моли́твеныѧ посѣчѐ, заповѣда б̂о е҆мꙋ навходоносо́ръ цр҃ь.
да всѣхъ бого́въ зе́м꙽скихъ и҆стреби́тъ, токмо да то́и са́мъ нарече́тсѧ бо́г꙽.
и҆ ѿ тѣхъ роже́нїи и҆же ѻ҆лофе́рновѣ си́лѣ покорѧтсѧ.
проходѧ́щи же сѷрїю сова́льскꙋю и҆ вс̂ю а҆п꙽памїю, и҆ месопотамїю.
прїиде къ и҆дꙋме́ѻм̑ в зе́млю гаваѻ́тъскꙋ, и҆ пленѝ гра́ды и҆хъ, и҆ пребысть т̂ꙋ тридесѧть дн҃їи в ни́х же собра́ти повелѣ̀ всѝ во́и си́лы свое́ѧ·

Глв̑҇а, д҃·

Тогда слы́шащи сїѧ сн҃ове і҆и҆л҃еви, и҆же ѻ҆бита́хꙋ въ землѝ і҆ѹ́динѣ, ѹ҆страшишасѧ ѕѣло ѿ лица̀ е҆го.
тре́петъ и҆ ѹ́жасъ нападѐ на них̑.
да не тоже сътворит̑ і҆ерс̑҇лі́мꙋ и҆ цр҃кви гн҃и.
и҆же сътвори прочимъ гра́домъ и҆ хра́момъ и҆хъ.
и҆ посла́ша̑ по все́и самарїи ѻ҆́крс̑҇тъ даж̑ до е҆ри́хона и҆ ѻ҆блего́ша вси връси го́ръ.
и҆ стѣна́ми ѻ҆гради́ша ѹ́лицы и҆хъ.
и҆ собра́ша ѻ҆би́лїѧ въ ѹ҆готованїе ѻ҆полъче́нїѧ·

Сщ҃енъникъ же і҆елеа҆ки́мъ писа̀ къ всѣмъ, и҆же бѧ́хꙋ противꙋ е҆з꙽дрело́на, и҆же е҆сть противъ по́лѧ вели́каго бли́зъ дотаим̑, и҆ всѣмъ по кои́хъ пꙋть бы́ти можа́ше, да ѻ҆блѧгꙋтъ го́ры и҆́миже пꙋть бы́ти можа́ше къ і҆ерс̑҇лі́мꙋ.
и҆ тꙋ̀ да стрегꙋтъ гдѣ̀ тѣснота̀ пꙋть бы́ти можа́ше межд̑ꙋ го́ръ.
и҆ сътвори́ша та́ко сн҃ове і҆и҆л҃еви ꙗ҆́кож̑ повелѣ̀ и҆мъ сщ҃енникъ гн҃ь і҆елїаким̑.

И҆ възва̀ весь по́лкъ къ г҃ꙋ б҃ꙋ настоѧнїе вели́ко, и҆ смири́шасѧ дш҃ами свои́ми въ по́стѣ и҆ въ мл҃твах̑ ѻ҆нѝ и҆ же́ны и҆хъ·

И҆ ѻ҆блеко́шасѧ сщ҃енн꙽ицы въ вре́тища, и҆ младе́нцы своѧ положи́ша на землѝ противꙋ лица̀ хра́ма гн҃ѧ.
и҆ ѻ҆лта́рь гн҃ь покриша вре́тищи.
и҆ възваша къ г҃ꙋ б҃ꙋ і҆и҆л҃евꙋ е҆ді́нодꙋшно, да не дадꙋтсѧ въ плѣнъ младенцы ихъ, и҆ же́ны и҆хъ въ раздѣле́нїе, и҆ гра́ды их̑ въ и҆стребле́нїе, и҆ ст҃аѧ и҆хъ въ ѻ҆скверне́нїе, да не да́ны бꙋдт̑ꙋ въ порꙋганїе ꙗ҆зы́ком̑·

Тогда е҆лїаким̑ сщ҃енник̑҇ гн҃ь вели́кїи ѻ҆бъхожда́ше весь лю́д꙽ і҆и҆л҃ьскїи, и҆ гл҃а им̑ рекꙋщи·

Вѣсте ꙗ҆́ко ѹ҆слы́шит̑ г҃ь б҃ъ мл҃твы ва́ша, а҆ще живꙋще пребꙋдете въ по́стѣ, и҆ въ мл҃твахъ пред̑ гм҃ъ.
и҆ памѧтъствова́ти и҆́мате моѷсїа раба̀ гн҃ѧ, и҆же лю́ди а҆м꙽мали́тьстїи надѣю́щисѧ въ си́лѣ свое́и, и҆ ѻ҆ вельмо́жъствѣ свое҆мъ, и҆ ѻ҆ во́ехъ свои҆хъ, и҆ ѻ҆ щи́тѣхъ свои҆хъ, и҆ ѻ҆ колесни́цах̑ свои҆хъ, и҆ ѻ҆ вса́дницѣхъ свои҆хъ, не желѣзомъ ѻ҆плъча́ющи, н̂о моли́твами ст҃ыми свои҆ми молѧ́щисѧ ѻ҆долѣлъ.
та́ко да бꙋдꙋтъ всѝ вра́зи і҆и҆л҃еви, а҆́ще прилежите в том̑ дѣлѣ чт̂о нача́сте.
сего ради б̂о ѹ҆че́нїемъ е҆го молѧ́щисѧ пребыва́хꙋ пред̑ лицем̑ гн҃имъ.
такоже и҆ тїи и҆же жрътвꙋ приношахꙋ г҃ꙋ б҃ꙋ, препоꙗ҆́саны въ вре́тища приноша́хꙋ жрътвꙋ гн҃ю, и҆ посы́паша пе́пеломъ на главы своѧ.
и҆ всѣмъ срд̑цем꙽ своим̑ молѧ́хꙋ г҃а б҃а, да посети́тъ лю́ди своѧ і҆и҆л҃ѧ·

Глв̑҇а, е҃·

Възвѣще́но же бы́сть ѻ҆лофе́рнꙋ нача́лникꙋ во́и а҆сѷрїиских̑.
и҆же сн҃ове і҆и҆л҃еви ѹ҆гото́вахꙋсѧ на сꙋпротивленїе на горах꙽ пꙋтїе ѻ҆блего́ша.
и҆ ꙗ҆́ростїю ѕѣло разгорѣсѧ, въ ꙗ҆́рости вели́цѣ·

И҆ възва̀ всѧ̀ кн҃ѕѧ моа́влѧ, и҆ вое҆воды ам̑мони́тьстїи.
и҆ рече и҆мъ.
р꙽цѣте м̂и чт̂о е҆сть лю́дїе сїи.
и҆же гора́ми ѻ҆бладают̑, и҆л̂и и҆же, и҆ каковы и҆ коли́ки сꙋть гра́ды и҆хъ, и҆ какова̀ е҆сть си́ла их̑ и҆л̂и кое бꙋдетъ мно́жество и҆хъ, и҆л̂и кто̀ цр҃ь во́евъ и҆хъ, чесо ради выше всѣхъ и҆же ѻ҆бъдержа́тъ въсто́къ сїи.
погръдѣша на́ми и҆ не и҆зыидо́ша въ срѣте́нїе на́мъ да воспрїимꙋтъ насъ с миромъ·

Тогд̑а а҆хїѻ́ръ вое҆вода всѣмъ сн҃омъ а҆м꙽мо́нимъ ѿвѣща̀, и҆ рече, а҆ще въсхо́щеши слы́шати господи́не мои рекꙋ и҆́стиннꙋ пред̑ тобо́ю, ѻ҆ лю́дехъ сихъ и҆же на гора́хъ ѻ҆бита́ютъ.
и҆ не и҆зы́идетъ сло́во ло́жно ѿ ѹ́стъ моих̑, лю́дїе тїи ѿ колѣна хал̑҇де́иска̑ сꙋть.
тїи пре́жде въ месопота́мїи ѻ҆бита́ша.
ꙗ҆ко не хотѣша послѣдовати бого́мъ ѿц҃ъ свои҆хъ, и҆же ѻ҆бита́ша в землѝ халдѣистѣи, ѻ҆ставлѧ́ющи б̂о чи́ны ѿц҃ъ свои҆хъ и҆же при мно́жествѣ бого́въ бы́ша, н̂о е҆ді́наго б҃а нбс̑҇наго что́ша.
и҆же повелѣ̀ и҆мъ да и҆зы́идꙋтъ ѿтꙋдꙋ и҆ ѻ҆бита́ютъ въ хара́нѣ·

Є҆гда́ же бысть гла́дъ по все́и землѝ тои.
и҆до́ша въ е҆гѷпетъ.
таможе по четыриста лѣтехъ тако ѹ҆мно́жени сꙋть, и҆же множество их̑ не можаше сочте́но бы́ти·

Є҆гда́ же ѻ҆тѧгча́ше и҆хъ цр҃ь е҆гѷпетъскїи работою, въ созида́нїи гра́довъ своих̑ съ бла́та и҆ пли́нѳы·

И҆ възва́ша къ г҃ꙋ б҃ꙋ свое҆мꙋ, сїи же поразѝ всю̀ зе́млю е҆гѷпет꙽скꙋю ꙗ҆́звами разли́чными.
Є҆гда́ же и҆знга́ша и҆хъ е҆гѷптѧне ѿ себе, и҆ преста̀ ꙗ҆́зва ѿ нихъ, и҆ паки и҆хъ въсхотѣ̀ пои҆мати, и҆ къ свое́и работѣ̀ ѻ҆брати́ти.
бѣжа́щимъ же и҆мъ б҃ъ нбс̑҇ныи мо́ре раздѣлѝ та́ко, сюдꙋ и҆ сю́дꙋ и҆ во́ды ꙗ҆́ко стѣны ста́ша.
ѻ҆ни́ же прои҆до́ша̑ по́ сꙋхꙋ посредѣ, мо́рѧ·

Є҆гда́ же постиза́хꙋ и҆хъ е҆гѷптѧне безъчи́слено мно́жество во́и, и҆ та́ко покры̀ и҆хъ вода̀, и҆же не ѻ҆ста̀ ѿ них̑ ни е҆ді́нъ, и҆же дѣло послѣднимъ възвѣсти́ти.
и҆ е҆гда же прои҆до́ша море чрьмное, и҆ внидо́ша въ пꙋсты́ню горы̀ сѷна́и, в ни́хже никогдаже чл҃къ ѻ҆бита́ти възмо́же.
ни сн҃ъ чл҃ческїи когда тамо почѝ.
і҆ и҆сто́чники горкы̀ ѹ҆слаже́ни сꙋть и҆мъ на пи́тїе, и҆ по лѣтехъ четыредесѧ́техъ бра́шно съ нб҃си и҆мѣша.
и҆ гдѣ къгда и҆до́ша без лꙋка и҆ стрл̑҇ѣ без꙽ щи́та и҆ меча̀.
б҃ъ и҆хъ ѻ҆плъча̀ и҆ ѻ҆долѣва́ше, и҆ не бѣ̀ противлѧ́ю҆щагосѧ и҆мъ·

То́кмо когда ѿстꙋпи́ша ѿ слꙋжбы г҃а б҃а свое҆го, и҆ коль кра́тъ поклони́шасѧ бого́мъ чю́ждимъ, ра́звѣ б҃а свое҆го, преда́ни сꙋть въ плѣнъ и҆ в поноше́нїе, ꙗ҆́коже пока́ѧшасѧ и҆же ѿстꙋпи́ша ѿ слꙋжбы г҃а б҃а свое҆го, дадѐ и҆мъ б҃ъ нбс̑҇ныи крѣпость въ ѻ҆долѣнїе, паки же ханане́ѧ цр҃ѧ, и҆ евꙋсе́ѧ, и҆ ферезе́ѧ, и҆ хетѳе́ѧ, и҆ е҆ве́ѧ, и҆ а҆мъморе́ѧ, и҆ всѣхъ силныхъ въ е҆сево́нѣ ѻ҆долѣша, и҆ зе́млю и҆хъ и҆ гра́ды и҆хъ ѻ҆дръжа́ша, и҆ даже доколѣ не съгрѣши́ша пред̑ бм҃ъ своим̑ бы́ша с꙽ си́ми бл҃гаѧ.
б҃ъ б̂о и҆хъ ненави́дитъ безако́нїѧ, и҆же и҆ прежд̑е тѣхъ лѣтъ е҆гда̀ ѿстꙋпи́ша ѿ пꙋтѝ ꙗ҆́же дадѐ и҆мъ б҃ъ, е҆же ходи́ти в не́мъ.
и҆ потребле́ни быша плѣне́нїемъ ѿ мно́гихъ ꙗ҆зы́къ, и҆ мно́зи ю҆́зницы и҆зведе́ни сꙋть в зе́млю не свою·

Нн҃ѣ же възврати́шасѧ к꙽ г҃ꙋ б҃ꙋ свое҆мꙋ ѿ расточе́нїѧ, ꙗ҆́же расточе́ни бы́ша и҆ съе҆дини́шасѧ въ е҆дин꙽ство, и҆ възы́идо́ша на го́ры сїѧ всѧ̀.
и҆ па́ки владѣ́ютъ і҆ерс̑҇лі́мом̑ гдѣ сꙋть ст҃аѧ ст҃ых̑·

Сего ра́ди господине мои възыщѝ а҆ще е҆сть каѧ безаконїѧ и҆хъ пред̑ бм҃ъ и҆хъ.
взы́идемъ к нимъ.
ꙗ҆́ко предаю́щи предасть и҆хъ б҃ъ тебѣ.
и҆ бꙋдꙋтъ повинни под̑ и́го си́лѣ твое́и·

А҆ще л̂и не съгрѣши́ша лю́дїе сїи пред̑ гм҃ъ бм҃ъ свои҆мъ, не мо́жемъ проти́витисѧ и҆мъ.
ꙗ҆ко г҃ь б҃ъ защи́титъ и҆хъ, и҆ бꙋдемъ в поноше́нїе всеѧ землѝ·

И҆ бы́сть е҆гда̀ преста̀ гл҃ати а҆хїѻ́ръ словеса̀ сїѧ, и҆ раз꙽гнѣвашасѧ всѝ вельмо́жи ѻ҆лофе́рновы.
и҆ помышлѧ́хꙋ ѹ҆би́ти е҆го рекꙋщи дрꙋгъ къ дрꙋгꙋ.
кто̀ е҆сть се́и и҆же гл҃етъ да сн҃ове і҆и҆л҃еви могꙋщи проти́витисѧ цр҃ю навходоносо́рꙋ и҆ во́емъ е҆го·

Чл҃цы безъѻ҆рꙋжни и҆ безъси́лнїи неѹ҆че́ни бра́немъ.
да позна́етъ а҆хїѻръ, ꙗ҆́ко ѹ҆слав꙽ствꙋ́етъ нами·

Възы́идем̑ на го́ры, и҆ е҆гда по́имани бꙋдꙋтъ си́лнїи и҆хъ тогда̀ и҆ ѻ́нъ с ними же мечемъ прободенъ бꙋдетъ.
да вѣдѧтъ всѝ ꙗ҆зы́цы ꙗ҆́ко навходоносо́р꙽ бо́гъ землѝ е҆сть, и҆ кро́мѣ того нѣсть и҆́ного·

Глв̑҇а, ѕ҃·

Бы́сть же е҆гда̀ преста̀ гл҃ати.
разгнѣ́васѧ ѻ҆лофе́рнъ ꙗ҆́ростїю ве́лїею ѕѣ́ло, рече къ а҆хїѻ́рꙋ.
ꙗ҆́ко прро̑҇чествовал̑҇ е҆си намъ рекꙋщи и҆же лю́ди і҆и҆л҃евы защитѧ́тсѧ ѿ б҃а свое҆го.
а҆зъ покажꙋ тебѣ, ꙗ҆́ко нѣ́сть б҃ъ то́кмо навходоносо́ръ.
е҆гда̀ побїемъ и҆хъ всѣхъ ꙗ҆́ко чл҃ка е҆ді́наго·

Тогда̀ и҆ т̂ы с ними, а҆сѷрїискимъ мече́мъ поги́бнеши, и҆ ве́сь і҆и҆л҃ь с тобо́ю погꙋбле́нїемъ расточа́тсѧ·

И҆ позна́еши ꙗ҆́ко навходоносо́ръ г҃ь е҆сть все́и землѝ.
е҆гда ме́чь воѧ мое҆го про́идет̑ срд̑це твое, и҆ прободе́нъ паде́ши, междꙋ ꙗ҆́звеныхъ людїи і҆и҆л҃ьтьских̑.
и҆ не въста́неши бо́ле до́ндеже и҆стреби́шисѧ с ни́ми·

Па́ки же а҆ще прро̑҇чество твое и҆́стинно ча́еши не и҆змѣни́тсѧ лице твое, и҆ блѣ́дость и҆же ѻ҆́бразъ твои въздержи́тъ ѿидет̑ ѿ тебе, а҆ще словеса̀ моѧ̀ сїа мни́ши и҆спо́лнитисѧ не мо́гꙋтъ·

И҆ позна́еши и҆же вкꙋ́пѣ с ни́ми сїа и҆скꙋси́ши.
занѐ ѿ сего ча́са тѣмъ лю́демъ съдрꙋжи́шисѧ.
да когда̀ досто́ины мое҆го меча̀ мꙋ́ки въспрїе́млютъ, тогда̀ и҆ т̂ы вкꙋ́пѣ м꙽ще́ніем̑ да под̑лежи́ши·

Тогда̀ повелѣ̀ ѻ҆лофе́рнъ рабо́мъ свои҆мъ да пои҆маютъ а҆хїѻ́ра, и҆ ведꙋтъ е҆го въ́ градъ веѳꙋлїю, и҆ предадꙋтъ е҆го в рꙋ́ки сн҃овомъ і҆и҆л҃евым̑·

И҆ взѧ́ша е҆го рабѝ ѻ҆лофе́рновы, и҆до́ша чрезъ по́ле·

И҆ е҆гда же когда̀ приближа́хꙋсѧ къ гора́мъ, и҆зыидо́ша проти́въ и҆хъ пра́щницы·

Тїи же ѹ҆клонѧ́ющисѧ на страны горы̀, и҆ привѧза́ша а҆хїѻ́ра къ дре́вꙋ рꙋка́ма и҆ нога́ма, и҆ та́ко свѧ́зана ѿ ве́рвиць ѻ҆ста́виша е҆го, и҆ ѻ҆брати́шасѧ къ господи́нꙋ свое҆мꙋ·

Сн҃ове же і҆и҆л҃еви и҆сходѧ́ще ѿ веѳꙋлїа, прїидо́ша къ немꙋ, и҆ разрѣши́вше е҆го приведо́ша въ веѳꙋлїю, и҆ поста́виша е҆го посред̑и̑ людїи въпраша́ющи.
чт̂о е҆сть ве́щь сїа и҆же свѧ́зана а҆сѷрїане ѻ҆ста́виша т̂ѧ·

Въ дн҃ехъ сихъ бѧ́хꙋ т̂ꙋ нача́лницы, і҆ѻ҆сїѧ сн҃ъ ми́хов̑҇, ѿ колѣ́на симеѻ́нова, и҆ хармїа и҆же и҆менованъ гоѳонїель, посредѣ ста́рецъ и҆ посредѣ всѣхъ людїи·

А҆хїѻ́ръ повѣ́да вс̂ѧ и҆же ѿ ѻ҆лофе́рна въпрошенъ быс̑҇, и҆ ка́ко лю́дїе ѻ҆лофе́рновы хотѧ́хꙋ того ради словесѝ ѹ҆би́ти е҆го, і҆ и́м꙽же ѻ҆́бразомъ то́и ѻ҆лофе́рнъ разгнѣ́васѧ, повелѣ̀ е҆го сеѧ ра́ди вины преда́ти лю́демъ і҆и҆л҃ьтьскимъ.
да е҆гда̀ ѻ҆долѣ́етъ сн҃овом̑ і҆и҆л҃евом̑.
тогда̀ и҆ менѐ а҆хїѻ́ра разли́чными повелѣ̀ погꙋби́ти мꙋ́ками, сего ра́ди и҆же реко́хъ, б҃ъ нбс̑҇ныи защити́тель и҆хъ е҆сть·

Є҆гда же а҆хїѻ́ръ вс̂ѧ сїѧ възвѣсти, ве́сь по́лкъ па́дъ на лицѐ кла́нѧющесѧ г҃ꙋ б҃ꙋ, и҆ ѻ́бщимъ скорбѣ́нїемъ и҆ пла́чемъ е҆ді́нодꙋшно мл҃твы своѧ̀ г҃ꙋ б҃ꙋ възлїа́ша, гл҃ющи·

Ги҃ б҃е нб҃си и҆ зем̑лѝ ѹ҆зрѝ горды́ню и҆хъ, и҆ при́зри на на́ше смире́нїе, и҆ лицѐ ст҃ымъ твоим̑ воньмѝ, и҆ ꙗ҆́ви ꙗ҆́ко не ѻ҆ста́виши надѣ́ющихсѧ на́ тѧ, а҆ смирѝ надѣ́ющихсѧ ѻ҆ себѣ и҆ ѿ свое́ѧ си́лы славѧщисѧ·

Сконча́ша б̂о плач̑҇ и҆ мл҃твꙋ и҆же ве́сь дн҃ь моли́шасѧ, и҆ ѹ҆тѣшиша а҆хїѻ́ра рекꙋщи.
б҃ъ ѿц҃ъ на́ших̑ е҆гоже т̂ы си́лꙋ проповѣ́да, то́и тебѣ сїѧ да́сть въздаѧ́нїѧ, да и҆хъ на́ипаче т̂ы погибель ѹ҆́зриши·

Є҆гда б̂о г҃ь б҃ъ на́шъ вда́сть сїю свободꙋ рабо́мъ свои҆мъ, бꙋ́детъ и҆ с тобо́ю г҃ь б҃ъ и҆ посредѣ насъ, ꙗ҆́ко го́дѣ тебѣ, та́ко съ твои҆ми всѣми, и҆ живе́ши с на́ми·

Тогда̀ ѻ҆сїѧ е҆гда̀ сконча́сѧ совѣтъ, прїѧ̀ е҆го в до́мъ свои, и҆ сътворѝ вече́рю ве́лїю, и҆ съзва́нымъ всѣмъ презви́теромъ вкꙋ́пѣ, и҆спол̑҇неномъ поще́нїемъ ѹ҆крѣпи́шасѧ·

Посе́мъ па́ки съзва́ни вс̂и лю́дїе всю̀ но́щъ моли́шасѧ въкꙋ́пѣ просѧ́ще по́мощи ѿ г҃а б҃а і҆и҆л҃ева·

Глв̑҇а, з҃·

Ѡлофе́рнъ же въ дрꙋгїи дн҃ь заповѣ́да во́емъ свои҆мъ, да взы́идꙋтъ проти́вꙋ веѳꙋлїѧ·

Бѣша же пѣшец꙽ бра́нных̑ ҂р҃, и҆ ҂к҃. и҆ всад̑ник̑҇, к҃҂в.
кро́мѣ тх̑ѣ мꙋжіи и҆же ѻ҆б꙽ѧ́лъ плѣне́нїемъ, і҆ и҆зведе́ни бѧ́хꙋ ѿ всх̑ѣ предѣ́лъ и҆ ѿ гра́дъ ю҆́ноши всѧ́кїѧ вс̂и сїи ѹ҆готова́шасѧ въкꙋ́пѣ къ бра́ни проти́въ сн҃овомъ і҆и҆л҃евом̑, и҆ прїидо́ша по странѣ горы̀ да́же до верха̀ и҆же зри́тъ на дотаи҆мъ, ѿ мѣста и҆же рече́тсѧ белма да́же до хел꙽꙽мо́на, и҆же е҆сть проти́вꙋ е҆здрелон̑҇·

Сн҃ове же і҆и҆л҃еви ꙗ҆́ко ви́дѣша мно́жество и҆хъ, падо́ша на землѝ посыпа́ющїи пе́пелъ на главы̀ своѧ̀, е҆ді́нодꙋшно молѧ́щисѧ.
да г҃ь б҃ъ і҆и҆л҃евъ млс̑҇ть свою̀ пока́жет̑ на лю́дехъ своих̑·

И҆ прїѧ́ша ѻ҆рꙋж́їѧ своѧ̀ бра́ннаѧ, сѣдо́ша по мѣ́стомъ и҆же тѣсноты пꙋтѧ̀ стезѧ̀ и҆справлѧ́ютъ междꙋ гора́ми.
и҆ бѧ́хꙋ стрегꙋще ве́сь дн҃ь и҆ но́щь·

Тогда ѻ҆лофе́рнъ е҆гда̀ ѻ҆бы́иде ѻ҆́крс̑҇тъ гра́да, и҆ ѻ҆брѣте и҆сто́чникъ и҆же възлїѧ́ше во́дꙋ вожде́нꙋ и҆хъ ѿ страны̀ ю҆́жески вн̂ѣ гра́да водѧшесѧ, и҆ повелѣ̀ пресѣчи трꙋ́бы ѻ҆́ны и҆ми́же вода̀ хожда́ше.
бѧ́хꙋ б̂о недале́че ѿ стѣ́нъ и҆ кла́дѧѕь ѿ них̑же та́ино ви́дѣны бы́ша че́рплюще во́дꙋ на прохлаже́нїе па́че не́же на питїе·

Но сн҃ове а҆м꙽мо́ни, и҆ моа́вли, пристꙋпи́ша къ ѻ҆лофе́рнꙋ рекꙋщи, сн҃ове і҆и҆л҃еви не в копїи, ни въ стрѣлах̑ ѹ҆пова́ютъ, н̂о го́ры защища́ютъ и҆хъ.
и҆ ѹ҆пасꙋть и҆хъ хо́лми, въ стремле́нїи поста́влени·

Сего рад̑и̑ без꙽ брани мо́жеши премощи их̑, поста́ви стра́жи ко кла́дѧѕем̑ да не чр́ъплютъ ѿ ни́хъ воды̀, без꙽ меча̀ б̂о ѹ҆бїеши и҆хъ и҆бо ѹ҆трꙋже́ни сꙋть предадꙋтъ гра́дъ свои кое҆гоже мнѧт̑ и҆же не възможемъ ѻ҆долѣти, занѐ и҆же на гора́хъ поста́вленъ·

И҆ ѹ҆го́дна бы́сть словеса̀ с̂и пред̑ ѻ҆лофе́рном̑, и҆ пред̑ нача́лники е҆го.
и҆ поста́ви ѻ҆́крестъ со́тницы по всѣмъ кла́дѧѕем̑·

Сїа стра́жа, к҃, дн҃їи, бы́сть и҆спол̑҇нена, ѻ҆скꙋдѣша ѹ҆бо събра́нїѧ вод̑ всѣмъ ѻ҆бита́ющимъ веѳꙋлїи, та́ко да не бы́сть внꙋтри гра́да воды̀ ѿкꙋ́дꙋ насыти́тисѧ и҆ ни е҆ді́нъ дн҃ь, понѐ въ мѣ́рꙋ да́шесѧ лю́демъ вода̀ на всѧ́къ дн҃ь·

Тогда̀ снидо́шасѧ къ ѻ҆сїи ю҆́ноши и҆ вс̂и мꙋж́и и҆ же́ны и҆ ѻ́троки вс̂и вкꙋ́пѣ е҆ді́ногла́сно реко́ша, сꙋ́дитъ г҃ь б҃ъ междꙋ на́ми и҆ тобо́ю, ꙗ҆́ко сътвори́лъ е҆си на нас̑҇ ѕла́ѧ, не хотѧ́щи гл҃ати ми́рнаѧ съ а҆сѷрїѧ́ны, и҆ того ра́ди преда̀ нас̑҇ б҃ъ в рꙋ́кꙋ и҆хъ·

Тѣ́мже нѣсть и҆же помо́жетъ е҆гда̀ пред̑ ѻ҆чи́ма и҆хъ въ жа́ждѣ скончаем̑сѧ, и҆ в погꙋбле́нїе вели́ко·

И҆ нн҃ѣ събери́те всѣхъ и҆же въ́ градѣ сꙋть, да во́лею вс̂и предади́мсѧ лю́демъ ѻ҆лофе́рновымъ·

Лꙋ́че е҆сть намъ да быхом̑ сꙋще живи въ плѣне́нїи хвали́ли г҃а б҃а, неже ѹ҆́мремъ, и҆ бꙋ́демъ въ поноше́нїе всѣмъ лю́демъ, да не ви́димъ жены на́ша и҆ мла́денцы на́ша мр҃тви, пред̑ ѻ҆чи́ма на́шима·

днс̑҇е въ свѣдѣтельство прїемлем̑ нб҃о и҆ зе́млю, и҆ б҃а ѿц҃ъ на́ших̑, и҆же м꙽стит̑сѧ намъ по грѣхомъ на́шимъ, да ѹ҆же преда́ите град̑ в рꙋ́кꙋ во́емъ ѻ҆лофе́рновымъ, да бꙋ́детъ коне́цъ на́шъ кра́токъ въ ѹ҆стахъ меча̀, и҆же дол꙽ѕѣе сътворит̑сѧ ѿ сꙋхоты жа́жд̑и·

И҆ е҆гда̀ сїа реко́ша бы́сть пла́чь и҆ рыда́нїе ве́лїе въ лю́дехъ всѣхъ, по мно́ги ча́сы е҆ді́нымъ гла́сомъ възопи́ша къ г҃ꙋ б҃ꙋ рекꙋщи.
съгрѣши́хомъ съ ѿц҃ы на́шими, неправо дѣѧхомъ, и҆ без꙽законова́хомъ·

Ты̂ г҃и и҆же кро́токъ е҆си поми́лꙋи нас̑҇, и҆ въ твоем̑ наказа́нїи м꙽сти безако́нїѧ на́ша, и҆ не преда́и и҆сповѣдающихъ т̂ѧ, лю́демъ и҆же не вѣ́дѧтъ т̂ѧ.
да не рекꙋтъ междꙋ ꙗ҆зы́къ, гд̂ѣ е҆сть б҃ъ и҆хъ, и҆ е҆гда̀ тѣ́мъ во́племъ, и҆ тѣмъ пла́чемъ ѹ҆трꙋ́ждьшесѧ, ѻ҆слабле́ни молча́хꙋ, тогда̀ въста̀ ѻ҆сїѧ ѻ҆блїѧ́нъ слеза́ми рече, ра́вни дш҃ею бꙋ́дите бра́тїе, е҆щѐ пѧти дн҃їи жде́мъ ѿ г҃а б҃а млрс̑҇дїѧ, да ꙗ҆́рос̑҇ свою̀ ѿсѣче́тъ, и҆ да́сть сла́вꙋ и҆мени свое҆мꙋ·

А҆ще ли же по пѧти дн҃ех̑ не прїидетъ помощъ, сътвори́мъ сїа словеса̀ и҆же гл҃аста·

Глв̑҇а, и҃·

И бы́сть е҆гда̀ слы́ша сїѧ словеса̀ і҆ю҆ди́ѳъ в꙽дови́ца, и҆же б̂ѣ дщи мера́рина, сн҃а и҆доѯова, сн҃а і҆ѻ́сифлѧ.
сн҃а ѻсїина, сн҃а е҆лаи҆на, сн҃а и҆а҆мино́рова, сн҃а гедеѻ́нова, сн҃а раѳаи́мова, сн҃а а҆хи́това, сн҃а мел̑҇хїева сн҃а е҆на́нова, сн҃а венаѳа́нова, сн҃а салаѳїи҆лева, сн҃а симеѻ́нова, сн҃а рꙋви́мова·

И҆ мꙋж́ъ е҆ѧ̀ бы́сть манаси́съ, и҆же ѹ҆́мре въ дн҃и жа́твы ꙗ҆чме́нѧ·

Настоѧ́ше б̂о над̑ привѧза́ющаѧ рꙋкоѧ́ти в по́ли.
и҆ прїиде зно́и на главꙋ̀ е҆го, и҆ ѹ҆́мре въ бетꙋлїи гра́дѣ свое҆мъ, и҆ погребе́нъ быс̑҇ т̂ꙋ съ ѿц҃ы свои҆ми·

Бѣ же і҆ю҆ди́ѳъ ѻ҆ста̀ жена̀ е҆го вдови́цею ѹ҆же лѣта тр̂и и҆ мс̑҇ць, ѕ҃. и҆ на вы́ш꙽ше до́мꙋ свое҆го сътвори́ла себѣ та́ино жили́ще, в не́м꙽же съ ѻ҆трокови́цами свои҆ми затворе́на живѧ́ше·

І҆ и҆мѣ́ющи на чре́слѣхъ свои҆хъ вре́тище, постѧ́шесѧ вс̂ѧ дн҃и живота̀ свое҆го, кро́мѣ сꙋбо́ты, и҆ новомѣ́сѧчїѧ.
и҆ празд̑ник̑҇ до́мꙋ і҆и҆л҃ева·

Бѣ же лѣ́па ѻ҆бразом̑ ѕѣ́ло, е́иже мꙋ́жъ свои ѻ҆ста́вилъ бога́тьства мно́га, и҆ домоча́дцы ѹ҆мно́жены, и҆ ѻ҆держа́нїе, воло́въ и҆ ѻ҆вецъ и҆ ста́дъ мно́гихъ по́лна·

И҆ б̂ѣ сїѧ въ все́мъ сла́вна, ꙗ҆́ко боѧ́шесѧ г҃а б҃а ѕѣ́ло.
не бѣ и҆же кт̂о г҃лет̑ ѻ҆ не́и сло́во ѕл̂о·

Сїѧ б̂о е҆гда̀ слы́ша ꙗ҆́ко ѻ҆сїа сщ҃енникъ ѻ҆бѣща̀ по пѧти дн҃ехъ преда́ти гра́дъ, и҆ посла̀ къ презви́теромъ хабри и҆ харми.
и҆ прїидо́ша къ не́и, и҆ рече и҆мъ, чт̂о е҆сть с̂е и҆же и҆зво́ли и҆ѻ҆сїѧ, да предас̑҇ град̑ а҆сирїѻ҆мъ, а҆ще ли межд̑ꙋ пѧти дн҃їи не прїидетъ вамъ по́мощь.
и҆ кто е҆сте в̂ы и҆же и҆скꙋша́ете г҃а б҃а.
и҆ нѣ́сть сїе сло́во и҆же млс̑҇ть призовет̑, н̂о на́ипаче ꙗ҆́рость въз꙽бꙋ́дитъ, и҆ гнѣ́въ вож꙽же́т꙽·

Положи́сте в̂ы вре́мѧ млс̑҇ти гн҃ѧ, и к воли ва́шеи дн҃ь поста́вили е҆сте е҆мꙋ·

Но̂ ꙗ҆́же тръпе́ливъ е҆сть г҃ь, сего ради пока́емсѧ того.
и҆ ѿпꙋще́нїѧ е҆го и҆злїѧ́нїемъ сле́знымъ и҆спро́симъ.
не м꙽сти́тъ г҃ь б҃ъ та́ко ꙗ҆́ко чл҃къ, ни гнѣ́ваетсѧ ꙗ҆́ко сн҃ъ чл҃чь·

И҆ сего ра́ди смири́мъ е҆мꙋ̀ дш҃и на́ши, и҆ дх҃омъ съкрꙋше́ннымъ и҆ смире́ннымъ слꙋжа́ще е҆мꙋ, речем̑ же съ пла́чемъ г҃ꙋ б҃ꙋ, да по во́ли свое́и сътво́ритъ с на́ми млс̑҇ть свою̀.
да ꙗ҆́ко съскорбле́но е҆сть срд̑це на́ше въ го́рдости и҆хъ, та́коже да на́шим̑ смире́нїемъ ѹ҆тѣшимсѧ.
ꙗ҆́ко нѣсмы послѣдовали грѣхꙋ ѿц҃ъ на́ших̑, и҆же ѻ҆ста́виша б҃а свое҆го, и҆ поклони́шасѧ богом̑ чю́ждимъ·

Є҆гоже ра́ди грѣха да́ни сꙋть въ погꙋбле́нїе меча̀ и҆ въ расхище́нїе, и҆ въ стыдѣ́нїе врагомъ свои҆мъ·

Мы́ же и҆́ного б҃а не вѣмы кромѣ е҆го, по́ждемъ смире́нне ѹ҆тѣшенїѧ е҆го, и҆ възы́щет̑ кровь нашꙋ ѿ ꙗ҆звле́нїа вра́гъ на́шихъ.
и҆ сми́ритъ вс̂и ꙗ҆зы́цы, е҆ли́цы въста́ютъ на́ ны.
и҆ сътвори́тъ и҆хъ безъ чести г҃ь б҃ъ на́шъ·

И҆ нн҃ѣ бра́тїѧ в̂ы и҆же е҆сте презви́тери въ лю́дехъ бж҃їихъ, на вас̑҇ възы́щт̑ꙋсѧ дш҃а и҆хъ·

Сего ради ва́шими прещенїи въздви́гнете срд̑ца и҆хъ, да въспомина́ютъ на и҆скꙋше́нїе ѿц҃ъ на́шихъ.
и҆скꙋше́ни сꙋще и҆спра́вѧт̑ слꙋженїе г҃ꙋ б҃ꙋ свое҆мꙋ.
воспомина́юще памѧт̑ни быти на сїе ка́ко ѿц҃ъ наш̑҇ а҆враа́мъ и҆скꙋшенъ е҆сть·

И҆ по мно́ѕх̑ѣ скꙋшенїихъ дрꙋгъ бж҃їи нареч̑҇сѧ<.>

Та́коже і҆саа́къ, і҆ и҆а́ковъ, и҆ моѷсїи и҆ вс̂и любѧ́щїи г҃а б҃а по мно́ѕѣхъ и҆скꙋшенїихъ и҆зыидо́ша ѿ ми́ра въ вѣрѣ·

Тїи же и҆же и҆скꙋшенїѧ не прїѧ́ша, съ стра́хомъ гн҃имъ, и҆ нетръпѣнїи свое҆мъ, в поношенїе роп꙽танїе свое приноси́ли пред̑ гм҃ъ и҆стреблени сꙋть ѿ гꙋби́телѧ и҆ ѿ змїи погибо́ша·

Сего ради и҆ м̂ы не м꙽стим̑сѧ сихъ ра́ди ве́щеи и҆хже тръпим̑.
н̂о мнѧ́щи за грѣхи наши сїѧ стра́жд̑емъ и҆ боим̑сѧ страда́нїа малѣ́иша сꙋть ꙗ҆́звы бж҃їѧ.
и҆же прїидо́ша раби е҆го къ на́шемꙋ и҆справле́нїю, а҆ не погꙋбленїю.
и҆ рече и҆ѻ҆сїѧ и҆ презви́тери, вс̂ѧ и҆же гл҃ала е҆си и҆́стинна сꙋть.
и҆ нѣсть въ словесѣхъ твоих̑ н̂и е҆ді́но хꙋленїе·

Нн҃ѣ б̂о моли за насъ, ꙗ҆́ко жена̀ ст҃а е҆си, и҆ бл҃гочестива.
и҆ рече и҆мъ і҆ю҆ди́ѳъ, вѣсте б̂о ꙗ҆́ко ѿ б҃а сꙋть ꙗ҆́же рекох̑·

Та́коже і҆ и҆скꙋси́те, ѿ́ бг҃а л̂и сꙋть сїѧ, ꙗ҆́же помы́слихъ сътвори́ти·

И҆ моли́тесѧ да крѣпокъ сътвори́тъ г҃ь б҃ъ совѣтъ мо́и·

Ста́ните в̂ы ѹ҆ забра́ла но́щи сеѧ, и҆ а́зъ и҆зыдꙋ съ а́брою мое́ю.
и҆ моли́тесѧ, да ꙗ҆́ко рекли е҆сте, въ дн҃и пѧть да посѣтит̑ г҃ь лю́ди своа і҆и҆л҃ѧ·

Вы́ же не хо́щꙋ да пои҆́щете дѣа́нїе мое.
и҆ доколѣ не ѿвѣща́ю ва́мъ ничт̂о и҆́но, сътвори́те то́кмо мл҃твꙋ за́ мѧ къ г҃ꙋ б҃ꙋ на́шемꙋ·

И҆ рече к не́и ѻ҆сїѧ нача́лник̑҇ і҆ѹ҆де́и.
и҆дѝ въ ми́ре, и҆ г҃ь бꙋдетъ с тобо́ю, въ ѿмщенїе вра́гомъ на́шимъ, и҆ ѻ҆браща́ющисѧ ѿи҆до́ша ѿ не́ѧ·

Глв̑҇а, ѳ҃·

Ѿше́д꙽шимъ же и҆мъ тогда̀ вни́де і҆ю҆ди́ѳъ въ мл҃твеник̑҇ свои.
и҆ ѻ҆блече́сѧ въ вре́тище посы́па пе́пелъ на главꙋ̀ свою.
и҆ падѐ ни́ць пред̑ гм҃ъ въпїѧше рекꙋщи.
г҃и бж҃е ѿц҃а моег̑҇ симеѻ́на и҆же да́лъ е҆си е҆мꙋ ме́чь, въ ѻ҆тъм꙽ще́нїе и҆ноплеме́нникомъ, и҆же растлители бы́ша въ ск꙽ве́рности свое́и.
и҆ ѻ҆бнажи́ша пло́ть дв҃ы въ стꙋдъ.
и҆ да́лъ е҆си же́ны их̑ въ плѣне́нїе.
и҆ дще́ри и҆хъ в пои҆ма́нїе.
и҆ весь плѣнъ на разделе́нїе рабо́мъ твоим̑ и҆же ревнова́ли ре́вность твою.
помози́ ми молю́ тѧ г҃и бж҃е мои мнѣ вдови́цѣ.
ты́ бо сътвори́лъ е҆си преж̑нѧѧ.
і҆ и́на по тѣхъ помы́слилъ е҆си и҆ бы́сть сїе е҆же реклъ е҆си·

Всѝ б̂о пꙋтїе твоѝ ѹ҆гото́вани сꙋть, и҆ твоѝ сꙋдбы̀ въ твое҆мъ провѣдѣнїи поста́вилъ е҆си.
ѹ́зри на станы̀ а҆сѷрїискїѧ нн҃ѣ·

Ꙗ҆́коже нѣкогда при́зрѣлъ е҆си на плъки е҆гѷпет꙽скїѧ е҆гда̀ за рабы̀ твои́ми ѻ҆рꙋжнїи теча́хꙋ.
надѣю́щисѧ в колесѣхъ и҆ въ ко́нницѣхъ свои҆хъ, и҆ въ множествѣ брани́телеи.
н̂о при́зрѣлъ е҆си на во́ѧ и҆хъ.
и҆ тмы̀ ѹ҆медли́ша их̑, и҆ потопѝ и҆хъ бе́з꙽дна, и҆ во́ды покры́ша и҆хъ·

Тако да бꙋдꙋтъ и҆ тїи г҃и бж҃е.
и҆же надѣ́ютсѧ на мно́жество своѐ, и҆ в колесѣхъ свои҆хъ.
и҆ во вса́дницѣхъ и҆ въ стрѣла́хъ своих̑ и҆ в сꙋлицахъ сла́вѧтсѧ·

И҆ невѣ́дѧт̑ ꙗ҆́ко ты̀ е҆си г҃ь б҃ъ нашъ, и҆же сокрꙋши́ши бра́ни ѿ нача́ла, и҆ г҃ь ѹ҆бо и҆́мѧ е҆сть тебѣ·

Възъдви́гни мы́ш꙽цꙋ твою̀ ꙗ҆ко ѿ нача́ла, и҆ съкрꙋши си́лꙋ и҆хъ в си́лѣ твое́и·

да паде́тъ крѣпость и҆хъ въ гнѣвѣ твое҆мъ.
и҆же ѻ҆бѣща́ютсѧ ѻ҆скверъни́ти ст҃аѧ твоѧ.
и҆ погꙋби́ти завѣтъ и҆́мени твое҆го, и҆ ѿꙗ҆́ти мечем꙽ свои҆мъ ро́гъ прс̑҇тла твое҆го.
сътворѝ г҃и да мечемъ и҆́стовымъ е҆го, горды́нѧ ѿсѣче́тсѧ, и҆ да ѹ҆ло́витсѧ ѻ҆чи́ма свои́ма на́ мѧ.
и҆ да ѹ҆ꙗ҆зви́ши е҆го лѣ́пыми гл҃ъми ѹ́стъ мои҆хъ.
да́и же м̂и въ срд̑ци дръзнове́нїе, да ѹ҆ничижꙋ̀ того си́лꙋ, и҆ ѻ҆бращꙋ̀ е҆го.

Бꙋдетъ б̂о сїе въ па́мѧть и҆́мени твое҆мꙋ, е҆гда рꙋка же́ньска ѹ҆бїетъ е҆го.
нѣсть б̂о въ мно́жествѣ си́ла твоѧ г҃и, ни в ко́нехъ си́лныхъ во́лѧ твоѧ, ниж̑ го́рдїи ѿ нача́ла ѹ҆годи́ша тебѣ.
н̂о смире́ннїи и҆ кротцїи всегда̀ тебѣ ѹ҆годи́ша моле́нїем̑·

Бж҃е нб҃семъ и҆ творче во́дъ.
и҆ г҃и всего сътворе́нїѧ.
ѹ҆слы́ши м̂ѧ бѣднꙋю молѧ́щꙋсѧ, и҆ твое́ѧ си́лныѧ млс̑҇ти ча́ющи.
въспомѧнѝ г҃и на завѣтъ твои.
и҆ да́и слово въ ѹ҆ста̀ моѧ̀, и҆ въ срд̑ци мое҆мъ совѣтъ ѹ҆крѣпѝ, да до́мъ твои въ ст҃ыни пребывает̑.
и҆ вс̂и ꙗ҆зы́цы позна́ютъ ꙗ҆́ко ты̀ е҆си б҃ъ е҆ді́нъ, и҆ нѣсть и҆́наго развѣ тебе·

Глв̑҇а, і҃·

Бы́сть же е҆гда преста̀ въпи́ти къ г҃ꙋ.
въста̀ ѿ мѣста на не́м꙽же лежа̀ просте́р꙽та къ г҃ꙋ б҃ꙋ възва́ же а҆́брꙋ свою.
и҆сходѧщи въ до́мъ свои и҆ совлече с꙽ себе вре́тище и҆ ѻ҆де́ждꙋ вдовства свое҆го и҆ ѹ҆мы̀ тѣло свое.
и҆ пома́засѧ мастьми и҆ ми́ромъ бл҃говоннымъ, и҆ распростре вла́сы главы̀ свое́ѧ.
и҆ наста́ви ми́трꙋ на главꙋ̀ свою.
и҆ ѻ҆блечесѧ ѻ҆дѣа́нїем̑ бл҃гостынѧ свое́ѧ, и҆ на но́ѕѣ своѝ плесници прїа и҆ нарам̑ницꙋ швенꙋ цвѣтїем̑ и҆ ѹ҆серѧзи и҆ перьстени и҆ всѣми красотами свои́ми ѹ҆краси́сѧ е́йже и҆ г҃ь даде красотꙋ.
и҆ ꙗ҆́ко вс̂ѧ сїѧ сложенїѧ не ѿ похо́ти блд̑ꙋства, н̂о ѿ преподо́бїѧ·

И҆ сего ради г҃ь съпоспѣшествова красотѣ еѧ̀.
да не то́щною красото́ю всѣмъ ѻ҆чесемъ ꙗ҆ви́тсѧ.
и҆ възложи на а́брꙋ ѻ҆трокови́цꙋ свою, лагвицꙋ вина́ и҆ сосꙋдъ і҆е҆ле́ѧ, и҆ крꙋпъ, и҆ смокви и҆ хлъбъ и҆ сы́ръ, і҆ и҆доста.
е҆гда же прїидо́ста къ вра́томъ гра́да, и҆ ѻ҆брѣте ждꙋща і҆ѻ҆сїю, и҆ презви́теры град̑ски.
ви́дѣвше ю҆̀ ѹ҆жасошасѧ дивѧ́щесѧ ѕѣло красотѣ еѧ̀.
ѻ҆баче ничтож̑ въпроси́ша ю҆̀, н̂о пꙋсти́ша ю҆̀ проити рекꙋщи.
б҃ъ ѿц҃ъ на́шихъ да дасть тебѣ блгд̑ть.
и҆ весь совѣтъ срд̑ца твое҆го, свое́ю си́лою да ѹ҆крѣпит̑ и҆ да славит̑сѧ ѻ҆ тебѣ і҆ерс̑҇ли́мъ, и҆ да бꙋ́детъ и҆мѧ твое в꙽ числѣ прпд̑бных̑ и҆ пра́вед̑ныхъ·

И҆ реко́ша вс̂и сꙋщїѝ т̂ꙋ е҆ді́ногла́сно.
бꙋ́ди т̂о бꙋ́ди.
і҆ю҆ди́ѳъ же молѧ́щисѧ г҃ꙋ б҃ꙋ прои҆де сквоѕѣ вра́та и҆ а́бра еѧ̀·

Бы́сть же е҆гда̀ схожда́ше съ горы̀, слн҃цꙋ въсходѧ́щꙋ и҆ срѣтоша ю҆̀ стра́жи а҆сѷрїистїи.
и҆ ꙗ҆́ша ю҆̀ рекꙋщи, ѿкꙋ́дꙋ грѧдеши и҆ ка́мо и҆де́ши.
ѻ҆на́ же ѿвѣща дщ̂и е҆смь е҆врѣ́иска.
сего ради и҆збѣгохъ ѿ лица̀ их̑, ꙗ҆́ко бꙋ́дꙋщаѧ проразꙋмѣхъ ꙗ҆́ко дадꙋтсѧ вам̑ въ плѣненїе·

Того ра́ди и҆же ѹ҆ничижи́ша вас̑҇, не восхотѣша б̂о предатисѧ ва́мъ.
дабы ѻ҆брѣли млс̑҇ть пред̑ ѻ҆чи́ма ва́шима, и҆ мышлѧх̑ в но́щь сїю сама̀ въ себѣ рекꙋщи·

И҆дꙋ̀ къ лицꙋ̀ кнѧ́зѧ ѻ҆лофе́рна да скажꙋ е҆мꙋ таинаѧ и҆хъ.
и҆ покажꙋ е҆мꙋ и҆́мже прих́одомъ мо́жетъ ѻ҆бъꙗ҆́ти и҆хъ.
та́ко да не поги́бнет̑ н̂и е҆ді́нъ ѿ во́и е҆го·

И҆ е҆гда̀ ѹ҆слы́шахꙋ словеса̀ сїа смотрѧхꙋ лица̀ еѧ̀, и҆ б̂ѣ ѻ҆чи́ма их̑ ди́вно.
и҆ чюдѧ́хꙋсѧ красотѣ еѧ̀ ѕѣло.
и҆ реко́ша к не́и, съхрани́ла е҆си живо́тъ свои сего ради ꙗ҆ко си́цевъ ѻ҆брѣла е҆си совѣтъ, да и҆́деши къ господи́нꙋ на́шемꙋ·

И҆ сїѧ вѣждь ꙗ҆ко е҆гда̀ пред̑ста́неши пред̑ ни́мъ бл҃го тебѣ бꙋ́детъ, и҆ бꙋ́деши любезнѣиши въ срд̑цы е҆го·

Ведо́ша же еѧ̀ къ станꙋ ѻ҆лоферновꙋ.
и҆ е҆гда̀ вни́де пред̑ лице е҆го, а҆́бїе ѹ҆ꙗ҆зви́сѧ ѻ҆лофернъ видѣнїем꙽·

Реко́ша же к не́мꙋ ѻ҆́троцы е҆го, кт̂о ѹ҆ничижит̑ лю́ди е҆врѣ́иски и҆же та́ки кра́сны же́ны и҆мѣ́ютъ.
да ка́ко не возмо́жемъ ѻ҆полча́тисѧ проти́вꙋ их̑·

Ви́дѧщиж̑ і҆ю҆диѳ̑҇ ѻ҆лофе́рна сѣдѧ́щи под̑ завѣсою и҆же бы́сть ѿ перфи́ры и҆ зла́та і҆ и҆зма̑рагда и҆ ка́менїемъ драгимъ сплетена.
и възрѣвше въ лице е҆го и҆ поклони́сѧ е҆мꙋ пад̑ши на́ землю.
и҆ въздвиго́ша ю҆̀ рабѝ ѻ҆лоферновы по повелѣнїю господи́на свое҆го·

Глав̑҇, а҃і·

Тогда̀ ѻ҆лофернъ рече ко і҆ю҆ди́ѳѣ, ра́достна бꙋ́ди дш҃ею и҆ не ѹ҆жасаисѧ въ срд̑ци твоем̑ ꙗ҆́ко а҆́зъ никогда́же поби́хъ мꙋ́жа и҆же хотѧ́ше слꙋжи́ти навходоносо́рꙋ цр҃ю·

А҆́ще не бы̀ лю́дїе твоѝ ѹ҆ничи́жиша менѐ, не въздви́гнꙋлъ б̂ы копїѧ мое́го на ни́хъ·

Нн҃ѣ же рци м̂и кое́ѧ ра́ди вины ѿи́де ѿ ни́хъ, и҆ ѹ҆годно тебѣ да прїидеши к на́мъ·

И҆ реч̑҇ е҆мꙋ і҆ю҆диѳ̑҇ прїими словеса̀ рабы́нѧ твое́ѧ господи́не мо́и.
ꙗ҆́ко а҆ще сътвори́ши по словесем̑ рабы́нѧ твое́ѧ, и҆ г҃ь б҃ъ сътворит̑ съвръше́нно дѣло с тобо́ю.
жи́въ е҆сть вои҆стин꙽нꙋ навходоносор꙽ цр҃ь зе́мъскїи, и҆ живет̑ си́ла е҆го и҆же е҆сть въ тебѣ къ ѿм꙽щенїю всѣмъ лю́демъ лꙋка́вымъ·

Ꙗ҆́ко не ток̑҇мо чл҃ци послꙋжа́тъ е҆мꙋ тебе ради.
н̂о и҆ ѕвѣрїе польстїи послꙋшают̑ е҆го·

Възвѣсти б̂о сѧ мꙋ́дрость твоа всм̑ѣ ꙗзы́комъ, и҆ просла́висѧ въ все́и вселеннѣи ꙗ҆́ко ты е҆ді́нъ бл҃гъ и҆ си́ленъ въ всемъ црс̑҇твѣ е҆го, и҆ наказа́нїе твое всѣмъ вла́стемъ проповѣдает̑сѧ, и҆ не пота́итсѧ чт̂о гл҃алъ е҆сть а҆хїѻ́рꙋ, ни́же т̂о вѣстьсѧ чт̂о е҆мꙋ повелѣлъ е҆си сътвори́ти.
вѣсть б̂о г҃ь б҃ъ на́шъ и҆же прогнѣва́хомъ и҆̀ въ грѣсѣхъ на́шихъ, и҆же гл҃аше про̑҇рки свои҆ми к лю́демъ, да́ предасть и҆хъ в рꙋки врагомъ за грѣхи и҆хъ·

и҆ ꙗ҆́ко зна́ютъ сн҃ове і҆и҆л҃еви и҆же прогнѣва́ша г҃а б҃а свое҆го·

Сего ради стра́хъ твои на ни́хъ е҆сть, и҆ наипа́че паки гла́дъ тръпѧ́тъ, и҆ за ѻ҆скꙋденїе же вод̑ныа, ради жа́жды съ ме́рътвыми съчета́ютъсѧ·

Па́ки и҆ сїѧ совѣтꙋ́ютъ да ѹ҆бїютъ ско́ты своѧ, и҆ пїютъ кро́вь и҆хъ, и҆ ст҃аѧ г҃а б҃а свое҆го и҆же заповѣ́да не ѻ҆сѧза́ти, пшени́цы вина̀ і҆ еле́ѧ и҆ сїѧ помы́слиша возда́ти, и҆ хотѧт̑ раздаѧ́ти въ снѣдь, и҆хже ни рꙋками бы сѧ и҆мѣли ѻ҆сѧза́ти·

Сего ради ꙗ҆́ко сїѧ творитъ, и҆́стин꙽но е҆сть да в꙽ погꙋбле́нїе дадꙋтсѧ.
и҆же а҆зъ раба̀ твоѧ позна́ющи и҆збѣго́х꙽ ѿ нихъ, и҆ посла́ мѧ г҃ь б҃ъ сїѧ тебѣ възвѣсти́ти·

А҆́зъ б̂о раба̀ твоа молю́сѧ г҃ꙋ б҃ꙋ и҆ нн҃ѣ сꙋще прд̑е тобо́ю, да и҆зы́идетъ раба̀ твоѧ и҆ помо́лит̑сѧ г҃ꙋ б҃ꙋ, и҆ речѐ мн̂ѣ.
е҆гда̀ възда́сть и҆мъ за грѣхѝ и҆хъ, и҆ прише́дши възвѣщꙋ̀ тебѣ·

Тако да а́зъ приведꙋ̀ тебе посредѣ і҆ерс̑҇ли́ма, і҆ и́маши вс̂и лю́ди і҆и҆л҃евы ꙗ҆́ко ѻ҆́вцы, и҆хже нѣсть па́стырѧ.
и҆ не ла́етъ ни е҆дін̑҇ пе́съ противꙋ тебе, ꙗ҆́ко сїѧ мн̂ѣ речена сꙋть по провидѣнїю бж҃їю·

И҆ ꙗ҆ко разгнѣ́васѧ на нихъ г҃ь б҃ъ их̑, сего ради по́слана е҆смь възвѣсти́ти тебѣ·

Ѹ҆го́дны же всѧ̀ словеса̀ сїа предъ ѻ҆лофе́рномъ и҆ ѻ́троки е҆го, и҆ дивѧ́хꙋсѧ премꙋдрости е҆ѧ̀ гл҃ахꙋ дрꙋгъ къ́ дрꙋгꙋ, нѣсть та́ка жена̀ на землѝ на смотрѣнїе, и҆ въ красотꙋ и҆ в чю́в꙽ство словесе́мъ·

И҆ рече к не́и ѻ҆лофе́рнъ, бл҃го сътвори б҃ъ твои и҆же посла̀ тебе прежде людїи, да дасѝ и҆хъ в рꙋки на́ша·

И҆ ꙗ҆́ко бл҃га е҆сть ѻ҆бѣща́нїѧ твоѧ, а҆ще сътвори́тъ сїѧ мн̂ѣ б҃ъ твои, т̂о бꙋдет̑ и҆ б҃ъ мои.
и҆ ты̀ в домꙋ̀ навходоносо́ровѣ вели́ка бꙋдеши, і҆ и́мѧ твое прославитсѧ по все́и землѝ·

Глв̑҇а, в҃і·

Тогда̀ повелѣ̀ ѻ҆лофе́рнъ ѻ҆́трокомъ свои҆мъ, да въведꙋтъ і҆ю҆ди́ѳъ, въ сокро́вищнаѧ храни́лища·

И҆ повелѣ̀ т̂ꙋ пребы́ти е́и, и ѹ҆ста́ви чт̂о и҆мѣша да́ти ꙗ҆́сти ѿ стола̀ е҆го, е҆мꙋже ѿвѣща̀ і҆ю҆ди́ѳъ и҆ рече, нн҃ѣ не възмогꙋ̀ ꙗ҆́сти ѿ сих꙽ е҆же мн̂ѣ повелишъ даѧ́ти, да не прїидетъ на́ мѧ со́блазнъ, ѿ сих̑ и҆же принесо́хъ съ собо́ю да ꙗ҆́мъ.
и҆ реч̑҇ е́и ѻ҆лофе́рнъ а҆ще ѻ҆скꙋдѣют̑ тебѣ сїа ꙗ҆́же принесе́на сꙋть с тобою, чт̂о сътво́рим̑ тебѣ.
и҆ рече і҆ю҆ди́ѳъ жива̀ ес̑҇ дш҃а твоѧ господи́не мои, ꙗ҆́ко не снѣмъ всѧ̀ сїѧ раба̀ твоѧ̀, до́ндеж̑ сътвори́тъ г҃ь б҃ъ рꙋкою мое҆ю сїѧ ꙗ҆́же помы́слихъ·

И҆ въведоша еѧ̀ ѻ҆́троцы е҆го в꙽ жили́ще и҆же заповѣ́да і҆ и҆спроси́ла е҆гда вни́де, да дае́тсѧ е́и свобода̀ в꙽ нощи прежде свѣтлости и҆сходи́ти во́нъ на мл҃твꙋ и҆ помоли́тисѧ г҃ꙋ б҃ꙋ·

И҆ заповѣ́да ѻ҆лофе́рнъ стра́жемъ свои҆мъ, да ꙗ҆́ко ѹ҆го́дно бꙋдетъ е́и и҆зы́идет̑ и҆ вни́дет̑, помоли́тисѧ г҃ꙋ б҃ꙋ свое҆мꙋ по три дн҃и·

І҆ и҆схожд̑аше в но́щи въ ѹ҆до́л꙽ къ веѳꙋлїи, и҆ ѹ҆мыва́шесѧ въ и҆сто́чницѣ жи́вемъ·

И҆ ꙗ҆́ко въсхожд̑аше молѧ́ше г҃а б҃а і҆и҆л҃ева, да и҆спра́вит̑ пꙋть е҆ѧ̀ на и҆збавле́нїе лю́демъ своим̑.
и҆ входѧ́щи чи́ста пребыва́ше в꙽ жили́щи, до́ндеже прїиметъ пи́щꙋ свою въ ве́черъ·

И҆ бы́сть въ четве́ртыи дн҃ь, сътворѝ ѻ҆лофе́рнъ вече́рю рабо́мъ свои҆мъ, и҆ рече къ вага́вꙋ е҆внꙋ́хꙋ свое҆мꙋ, и҆дѝ и҆ молѝ е҆вре́ѧныню, да во́лею и҆зво́литъ ѻ҆бита́ти со мно́ю·

Поно́сно б̂о е҆сть пред̑ а҆сѷрїаны, а҆ще жена посмѣ́етъ мꙋжа недѣ́юща, и҆ неѻ҆сѧза́на ѿ него и҆зыидет꙽·

Тогда вни́де вага́въ къ і҆ю҆ди́ѳѣ и҆ рече, не ѹ҆сра́мисѧ блага́ѧ ѻ҆трокови́це вни́ти къ господи́нꙋ мое҆мꙋ, да прїимеши честь пред̑ лице́мъ е҆го, и҆ ѧсѝ с ни́мъ и҆ пїеши вино̀ въ весе́лїи·

Є҆мꙋже і҆ю҆ди́ѳъ ѿвѣща̀, ка́ѧ е҆смь да проти́влюсѧ господи́нꙋ мое҆мꙋ, все е҆же бꙋдетъ пред̑ ѻ҆чи́ма е҆го бл҃го и҆ ѹ҆го́дно сътворю̀.
а҆ е́же чт̂о люби́мо е҆мꙋ т̂о и҆ мн̂ѣ бꙋдетъ прїѧтно вс̂ѧ дн҃и живота̀ мое҆го.
и҆ въста̀ ѹ҆краси́сѧ ѻ҆дѣꙗ҆́нїемъ свои҆м꙽, и҆ вшед̑ши ста̀ пред̑ лицемъ е҆го.
срд̑це же ѻ҆лофе́рново смꙋщено б̂ѣ, зане възгорѣсѧ по́хоть е҆го.
и҆ рече к не́и ѻ҆лофе́рнъ, пїи нн҃ѣ и҆ ѧ́жъ въ блгс̑҇ти, ꙗ҆́ко ѻ҆брѣ́ла е҆си ми́лость предо мною.
и҆ реч̑҇ і҆ю҆ди́ѳъ пи́ти и҆́мамъ господи́не, ꙗ҆ко възвели́чена е҆сть дш҃а моѧ днс̑҇ь паче всѣхъ дн҃їи мои҆хъ.
и҆ взѧ̀ и҆ ꙗ҆́сть и҆ пи́тъ пред ни́мъ, ѹ҆гото́ван꙽наѧ е́и ѿ рабы́нѧ еѧ̀·

И҆ въжделѣ́нъ бы́сть ѻ҆лофе́рнъ к не́и, пит̑ же вина̀ мно́го ѕѣло, ꙗ҆́ко та́ко никогда̀ пи́тъ въ животѣ̀ свое҆мъ·

Глв̑҇а, г҃і·

Єгда же бы́сть ве́черъ тща́шасѧ ѻ҆́троцы е҆го въ станы̀ воѧ̀, и҆ заключѝ вага́въ две́ри ло́жница и҆ ѿи́де·

Бѧ́хꙋ же вс̂и преможе́ни ѿт̑ вина̀.
и҆ю́диѳъ же е҆ді́на б̂ѣ в ло́жницѣ, и҆ ѻ҆лофе́рнъ лежа́ше въ посте́ли ѕѣ́ло пїѧ́нъ и҆ ѹ҆спѐ крѣп́ко·

Рече же и҆юди́ѳъ ѻ҆трокови́цы свое́и, да стои҆тъ вн̂ѣ пред̑ ло́жницею и҆ стреже́тъ·

И҆ ста и҆ю҆ди́ѳъ пред̑ посте́лею молѧ́щисѧ съ слеза́ми, и҆ дви́жꙋще ѹ҆стна́ми.
въ молча́нїи рекꙋщи, ѹ҆крѣпи м̂ѧ г҃и б҃е і҆и҆л҃евъ, и҆ при́зри в сїи ча́съ на дѣ́ло рꙋ́къ моих̑, ꙗ҆́коже ѻ҆бѣща́лъ е҆си і҆ерс̑҇ли́мꙋ гра́дꙋ твое҆мꙋ възвели́чити, да съвершꙋ сїе ꙗ҆́же ѹ҆мы́слихъ, ѹ҆пова́юще възмо́жно бы́ти тобо́ю семꙋ·

И҆ е҆гда̀ сїе рече, пристꙋ́пль къ столпꙋ и҆же бы́сть ѹ҆ главы̀ посте́ли е҆го, и҆ ме́чь е҆го и҆же на не́мъ привѧ́занъ висѧ́ше и҆звлечѐ·

Є҆гда же и҆звлече ꙗ҆́тъ за власы главы̀ е҆го и҆ рече, ѹ҆крѣпи м̂ѧ г҃и в сїи час̑҇·

И҆ ѹ҆да́ри два́жды въ вы́ю е҆го, и҆ ѿсѣче главꙋ̀ е҆го, и҆ взѧ̀ завѣсꙋ ѿ столповъ, и҆ ѻ҆бвѝ трꙋпъ е҆го без꙽ главы̀·

И҆ пома́лѣ и҆зы́иде вн̂ѣ, и҆ дадѐ главꙋ̀ ѻ҆лофе́рновꙋ рабы́ни свое́и, и҆ повелѣ̀ вложи́ти ю҆̀ в꙽ пїрꙋ свою̀·

І҆ и҆зыидо́ста дво́е по ѻ҆бы́чаю свое҆мꙋ вн̂ѣ по́лка ꙗ҆́ко на мл҃твꙋ, и҆ проидо́ста стра́жи до́ломъ ѻ҆́крс̑҇тъ, и҆ прїидо́ста къ вра́томъ град̑ским̑·

И҆ въпїѧ́ше и҆юди́ѳъ и҆здале́ча къ стра́жемъ стѣ́ннымъ гл҃юще, ѿверзи́те вра́та ꙗ҆́ко с на́ми е҆сть г҃ь б҃ъ и҆же сътворѝ си́лꙋ въ і҆и҆л҃и·

И҆ бы́сть е҆гда̀ ѹ҆слы́шаша мꙋ́жи глас̑҇ е҆ѧ̀, и҆ възва́ша презви́теръ град̑скихъ·

И҆ притеко́ша к не́и ѿ ма́ла да́же и҆ до вели́ка.
ꙗ҆́ко не ѹ҆пова́хꙋ ктомꙋ ви́дѣти е҆ѧ̀·

И҆ въже́гши свѣти́лники ѻ҆быидо́ша ю҆̀ ѻ҆крс̑҇тъ вс̂и·

ѻ҆на же въстꙋпи́вши на вы́ш꙽шее мѣ́сто повелѣ̀ сътвори́ти молча́нїе·

Є҆гдаж̑ вс̂и молча́хꙋ рече и҆ю҆ди́ѳъ, хвали́те г҃а б҃а на́шего и҆же не ѻ҆ста́ви ѹ҆пова́ющихъ на́нь, и҆ менѐ рабꙋ̀ свою напол̑҇нилъ млс̑҇ти свое҆ѧ, ю҆же ѻ҆бѣща̀ до́мꙋ і҆и҆л҃евꙋ, и҆ закла́лъ рꙋко́ю мое҆ю вра́га людїи свои҆хъ в сїю но́щь·

І҆ и҆зѧ́т꙽ ѿ пи́ры главꙋ ѻ҆лофе́рновꙋ и҆ показа̀ и҆м꙽, рекꙋщи, с̂е глава̀ ѻ҆лофе́рнова нача́лника во́и а҆сѷрїискихъ·

И҆ с̂е покрыва́ло е҆го под̑ ни́мже лежа́ше пїѧ́нъ, и҆дѣже порази е҆го рꙋко́ю же́ньскою г҃ь б҃ъ на́шъ·

Но жи́въ г҃ь б҃ъ ꙗ҆́ко съхрани м̂ѧ а҆гг҃лъ е҆го, е҆гда̀ та́мо и҆дѧ́хъ и҆ бѣ́хъ та́мо, та́коже е҆гда̀ възврати́хсѧ сѣ́мо.
и҆ не попꙋсти м̂ѧ г҃ь б҃ъ рабꙋ̀ свою̀ ѻ҆сквер̑҇ни́ти, и҆ непови́ннꙋ грѣха̀ ѻ҆братѝ м̂ѧ к вамъ, ра́дꙋющꙋсѧ въ ѻ҆долѣнїи е҆го, и҆ въ ѿше́ствїи мое҆мъ, и҆ ѻ҆ и҆збавле́нїѝ ва́шем̑·

И҆сповѣда́итесѧ е҆мꙋ вси ꙗ҆́ко бл҃гъ, ꙗ҆́ко в꙽ вѣ́къ млс̑҇ть е҆го·

Вси же поклони́шасѧ гв҃и реко́ша к не́и.
блс̑҇ви т̂ѧ г҃ь б҃ъ в си́лѣ свое́и и҆же тобо́ю нивъчто́же и҆зведе враги на́ша·

ѻ҆сїѧ же нача́лникъ людїи і҆и҆л҃евъ рече к не́и, бл҃жена е҆си т̂ы дщи гм҃ъ бм҃ъ вы́шнимъ паче всх̑ѣ же́нъ на землѝ·

Блс̑҇венъ г҃ь б҃ъ и҆же сътворѝ нб҃о и҆ зе́млю, и҆же и҆справи тебѐ въ ѿсѣче́нїе главы̀ нача́лника вра́гъ на́шихъ, і҆ и́же днес̑҇ и҆мѧ твое та́ко възвели́чилъ, да не ѿи҆детъ хвала̀ твоѧ̀ ѿ ѹ҆́стъ члчс̑҇кихъ, да въспомина́ютъ си́лꙋ гн҃ю въ вѣ́ки, и҆же не пощадѣ́ла е҆си живота̀ свое҆го, печа́ли ради и҆ ско́рбїи ро́да твое҆го, н̂о въспомогла̀ е҆си паде́нїю пред̑ лицем̑ г҃а б҃а на́шего·

И҆ реко́ша вси лю́дїе бꙋ́ди т̂о бꙋ́ди т̂о·

Тогда̀ а҆хїо́ръ возва́нъ прїиде, и҆ рече е҆мꙋ и҆ю҆ди́ѳъ, г҃ь б҃ъ і҆и҆л҃евъ е҆мꙋже т̂ы свѣдѣтельствова́лъ е҆си ꙗ҆́ко ѿм꙽сти́тъ врагом̑ своим̑꙽, се́и е҆сть и҆же ѿсѣклъ главꙋ̀ всѣ́мъ невѣ́рнымъ в сїю но́щь рꙋко́ю мое҆ю.
и҆ да позна́еши ꙗ҆́ко тако е҆сть, се глава̀ ѻ҆лофе́рнова, и҆же противле́нїемъ горды́нѧ свое҆ѧ ѹ҆ничижѝ б҃а і҆и҆л҃ева, и҆ тебѣ смр҃тїю претѧ́ше, рекꙋщи, е҆гда̀ плѣне́ни бꙋ́дꙋтъ лю́дїе і҆и҆л҃евы, тогда̀ повелю̀ мече́мъ пробости ребра твоѧ̀.
ви́дѧщи же а҆хїѻ́ръ главꙋ̀ ѻ҆лофе́рновꙋ ѹ҆жасе́сѧ страхомъ ве́лїемъ, и҆ паде лице́м꙽ на землѝ и҆ смѧ те́сѧ дш҃а е҆го·

Посе́м же е҆гда бы́сть в себѣ, припадѐ к нога́ма і҆ю҆ди́ѳинима поклони́сѧ е́и и҆ рече.
блс̑҇вена ты̀ гм҃ъ бм҃ъ твои҆мъ въ все́мъ жили́щи і҆а́ковли, ꙗ҆́ко въ всѣхъ ꙗ҆зы́цехъ и҆же ѹ҆слы́шатъ и҆́мѧ твое.
възвели́читсѧ и҆́ми г҃ь б҃ъ і҆и҆л҃евъ тебе ра́ди·

Глв̑҇а, д҃і·

Рече же і҆ю҆ди́ѳъ къ всѣмъ лю́демъ, ѹ҆слы́шите м̂ѧ бра́тїе възвѣ́сите главꙋ̀ сїю на стѣна́хъ на́шихъ.
и҆ е҆гда̀ възы́идетъ сл҃нце, возмѣте ко́ждо васъ ѻ҆рꙋжїе свое і҆ и҆зыидѣте внеза́пꙋ.
не ꙗ҆́ко сходѧ́ще съ горы̀ н̂о ꙗ҆́ко въчинѧ́щесѧ на них̑.

Тогда стра́жїе понꙋжде́ни бꙋдꙋт꙽, да бѣжа́тъ къ нача́лникꙋ свое҆мꙋ возбꙋди́ти е҆го на ѻ҆полъче́нїе.
е҆гдаж̑ вое҆во́ды притекꙋтъ къ ло́жницы ѻ҆лофе́рновѣ и҆ ѻ҆брѧ́щꙋтъ е҆го безъгла́вна пови́та во кро́вѣ е҆го, нападет̑ на ни́хъ стра́хъ.
е҆гда же позна́ете бѣжащихъ и҆хъ, и҆дѣте же по ни́хъ дер꙽зновенно, ꙗ҆ко г҃ь б҃ъ съкрꙋшит꙽ под̑ но́ги ва́ша·

Тога̀ а҆хїѻ́ръ видѣ си́лꙋ ꙗ҆же сътвори г҃ь б҃ъ і҆и҆л҃евъ, ѻ҆ста́вль совѣтъ ꙗ҆зы́ческъ, и҆ вѣрова г҃ꙋ б҃ꙋ, и҆ ѻ҆брѣзасѧ.
приложе́н꙽ е҆сть к лю́демъ і҆и҆л҃евымъ, и҆ всѐ наслѣдїе ро́да е҆го, даже до дне́шнѧго дн҃е·

А҆бїе же е҆гда възы́иде сл҃нце і҆ и҆звѣ́сиша на стѣна́хъ главꙋ̀ ѻ҆лофе́рновꙋ.
и҆ взѧ̀ ко́ждо мꙋжъ ѻ҆рꙋжїе свое, і҆ и҆зыидо́ша со велики́м꙽ звꙋкомъ и҆ во́племъ·

Сїе же ви́дѧще стра́жи, притеко́ша къ ло́жницы ѻ҆лофе́рновѣ·

І҆ и́же бѣхꙋ въ стане́хъ приходѧ́щи пред̑ вхоже́нїем꙽ ло́жницы перꙋщи нога́ми да възбꙋдѧтъ е҆го, звꙋкъ хотѧще творѧ́хꙋ, да не ѿ тх̑ѣ и҆же възбꙋжд̑а́хꙋ е҆го.
но ѿ шꙋмѧ́щихъ възбнет̑ ѻ҆лофернъ ни е҆ді́нъ б̂о смѣѧ́ше ло́жницꙋ нача́лника а҆сѷрїискаго ѿвръсти, и҆л̂и вни́ти·

Но е҆гда прїидо́ша вое҆во́ды е҆го, и҆ ты́сѧщники и всѝ большїи старѣишины во́и а҆сѷрїискихъ, реко́ша посте́лникомъ, вни́дѣте и҆ възбꙋди́те е҆го.
ꙗ҆́ко и҆зошлѝ мы́ши и҆с пещер̑҇ свои҆хъ дръзнꙋша поѹ҆сти́ти насъ на ѻ҆плъче́нїе·

Тогда е҆внꙋхъ вагав̑҇ вни́де въ ло́жницꙋ е҆го ста̀ пред̑ запо́ном̑ и҆ плеска́ше рꙋка́ма.
мнѧ́ше б̂о е҆го спѧ́ща съ і҆юди́ѳою.
н̂о е҆гда̀ ничтож̑ слы́ша, пристꙋпѝ бли́зъ запо́ны и҆ въздви́глъ ю҆̀.
и҆ ви́дѣ трꙋпъ ѻ҆лофе́рновъ безъ главы̀ въ свое́и кро́ви лежа́щь на землѝ.
възопѝ гла́сомъ ве́лїимъ съ пла́чемъ, и҆ раздра̀ ѻ҆дѣнїе свое·

И҆ вше́дъ въ ста́нъ и҆дѣже бѣ̀ і҆ю҆диѳъ и҆ не ѻ҆брѣтѐ еѧ̀.
і҆ и҆збѣже внѣ̀ к лю́демъ и҆ рече, е҆ді́на̑ жена̀ е҆вре́иска сотворѝ срамотꙋ̀ в домꙋ̀ цр҃ѧ навходоносо́ра.
се б̂о ѻ҆лофе́рнъ лежи́тъ на землѝ безъгла́венъ·

сїе же е҆гда слы́шаша начал̑҇ницы си́лы а҆сѵрїискїѧ, растерза́ша ри́зы своѧ и҆ несно́сенъ стра́хъ и҆ тре́петъ падѐ на ни́хъ, и҆ смѧте́сѧ срд̑це и҆хъ презѣлне·

И҆ бы́сть во́пль си́ленъ ѕѣло посредѣ стано́въ и҆хъ·

Глв̑҇а, е҃і·

Єгда́ же ѹ҆слы́шаша вс̂и во́и а҆сѷрїистїи ѻ҆лофе́рна ѹ҆сѣче́на.
ѿиде ѹ́мъ и҆ совт̑ѣ ѿ них̑, и҆ толи́ко трепетом̑ стра́хом̑ содви́гнени.
бѣ́гъство в защищенїе прїемлюще.
та́ко да ни е҆ді́нъ гл҃аше съ и҆́скренимъ своим̑, н̂о ѹ҆клони́вше главы и҆ ѻ҆ста́виша вс̂ѧ, и҆збѣжати тща́хꙋсѧ ѿ е҆вре́и, и҆хже въѻ҆рꙋже́ныхъ противꙋ себе прїитѝ слы́шаша.
бѣго́ша по пꙋтех̑ по́льскихъ и҆ стезѧ́хъ хо́лъм꙽скихъ.
ви́дѧщи б̂о сн҃ове і҆и҆л҃еви бѣгꙋщихъ въслѣдоваша и҆хъ, трꙋбѧ́ще въ трꙋбы и҆ въпїѧхꙋ въ слѣдъ и҆хъ.
а҆сѷрїѧне же не сое҆дине́ни бѣжа́хꙋ стрем̑ гла́въ.
сн҃ве же і҆и҆л҃еви е҆ді́номысльно погонѧ́щи порази́ша всѣхъ, и҆хже постиго́ша.
посла́ же і҆ѻ҆сїѧ послы̀ по всѣмъ гра́домъ и҆ странам̑ і҆и҆л҃евым̑ и҆ всѧ́ка страна̀ и҆ гра́дъ и҆збра́нны ю҆́ноша посла̀ въ слѣдъ и҆хъ, и҆ пости́гше и҆хъ и҆зби́ша ѧ҆̀ мече́мъ, и҆ прїидо́ша на кра́и предѣлъ свои҆хъ.
ѻ҆ста́вшїи же въ веѳꙋлїи гра́ди, възыидо́ша на станы̀ а҆сѵрїискїѧ.
и҆ плѣнъ и҆ коры́сти бѣжа́щихъ во́и взѧ́ша, и҆ ѻ҆богати́шасѧ ѕѣло.
ѻ҆долѣвшїи же ѻ҆брати́шасѧ ко веѳꙋлїи, всѧ́ же плѣне́наа их̑ взѧ́ша съ собо́ю.
та́ко ꙗ҆́ко не бѣ числа̀ ѻ҆вца́мъ и҆ ско́томъ и҆ всѣмъ дви́жꙋщимсѧ, ѿ ма́ла даже и҆ до вели́ка вси ѻ҆богатѣша ѿ плѣне́нїѧ и҆х꙽.
и҆ѻ҆а҆ки́м꙽ же а҆рхїере́и ѿ і҆ерс̑҇лима прїиде въ веѳꙋлїю съ всѣми презви́теры свои҆ми.
ви́дѣти і҆юди́ѳъ, ѻ҆на́ же е҆гда и҆зы́иде противꙋ и҆хъ.
блс̑҇виша ю҆̀ всѝ е҆ді́ногла́сно рекꙋщи.
ты̀ е҆си похва́ла і҆ерс̑҇лимꙋ, ты̀ весе́лїе і҆и҆л҃ю, ты̀ че́сть людїи нашихъ.
ты̀ сътвори́ла е҆си ѕѣло мꙋжески, и҆ ѹ҆крѣпле́но е҆сть срд̑це твое.
ꙗ҆ко чистотꙋ̀ възлюбила е҆си, и҆ по мꙋжи своем̑ и҆́ного не вѣси·

Того ради и҆ рꙋка̀ гн҃ѧ ѹ҆крѣпѝ т̂ѧ, и҆ бꙋдеши блс̑҇вена въ вѣки·

И҆ рече весь по́лкъ, бꙋди т̂о бꙋди.
въ три́десѧтих же днехъ е҆два̀ со́браны сꙋть користи во́и а҆сѷрїискихъ, людмѝ і҆и҆л҃евыми.
всѧ́ и҆же бѧхꙋ ѻ҆лофе́рнова, ѿ злата и҆ сребра̀ и҆ ѻ҆дѣѧ́нїе свѣтло и҆ ка́менїе драгое и҆ всѧ сосꙋды и҆ строе́нїе, сїѧ всѧ ѿда́ша лю́дїе і҆ю҆диѳи.
и҆ та́ко вси сн҃ове і҆и҆л҃еви ра́довахꙋсѧ съ жена́ми и҆ ча́ды, и҆гра́юще въ ѻ҆рга́ны и҆ гꙋсли·

Глв̑҇а, ѕ҃і·

Тогда̀ и҆ю҆ди́ѳъ похвали г҃а, и҆ въспѣ пѣ́снь сїю рекꙋщи.
начни́те г҃ꙋ въ тим̑па́нѣхъ, по́ите б҃ꙋ нашемꙋ въ кимъвалх̑ѣ, въспо́ите е҆мꙋ пѣснь но́вꙋ.
ра́дꙋитесѧ пред̑ ним̑, и҆ призываите и҆ мѧ е҆го·

Гь҃ сокрꙋша́а бра́ни, г҃ь и҆мѧ е҆го.
и҆же поста́ви станы своа посред̑и̑ людїи своих̑, е҆же и҆зба́вити на́съ ѿ рꙋ́кꙋ всѣхъ вра́гъ на́ших̑·

Прїиде а҆сꙋръ ѿ горъ ѿ сѣ́вера, въ мно́жествѣ крѣ́пости свое҆ѧ.
е҆гоже мно́жество ѹ҆ста́ви рѣ́ки и҆ ко́ни и҆хъ покры́ша ѹ҆до́лїѧ·

Рече же съжгꙋ̀ предѣ́лы моѧ̀, и҆ ю́ноша моа ѹ҆би́ти мече́мъ, и҆ младе́нцы моѝ дати въ расхище́нїе, и҆ дв҃ы въ плѣне́нїе·

Но б҃ъ всемогїи запѧ е҆мꙋ, и҆ предалъ е҆го в рꙋ́цѣ женѣ, и҆ посрами е҆го·

Ꙗ҆́ко не паде си́лныи и҆хъ ѿ ю҆́ноши, а҆ни сн҃ове крѣпча́ишихъ рꙋ́къ порази́ша е҆го, а҆ни велицыи гига́нти ста́ша проти́вꙋ е҆мꙋ.
н̂о и҆ю҆ди́ѳъ дщи мерарина в лѣпотѣ лица свое҆го ѹ҆ꙗ҆зви е҆го·

Съвлече́сѧ ѻ҆дѣѧ́нїа вдо́въства, и҆ ѻ҆блече́сѧ въ ѻ҆дѣѧ́нїе весе́лїѧ, в ра́дость сн҃омъ і҆и҆л҃евым̑.
пома́за лице свое ма́стїю, и҆ съплете власы главы̀ свое҆ѧ под̑ ми́трꙋ на прелще́нїе е҆го, плесни́цы е҆ѧ̀ въсхити́ша ѻ҆́чи е҆го.
красота̀ е҆ѧ̀ ѹ҆лови дш҃ꙋ е҆го.
и҆ ѿсѣче мече́мъ главꙋ̀ е҆го·

Ѹ҆страши́шасѧ лю́дїе прьстїи крѣ́пости е҆ѧ, и҆ лю́дїе мед̑стїи дерзости е҆ѧ̀·

Тогда̀ възопи́ша по́лки а҆сирїистїи, внегда̀ ꙗ҆ви́шасѧ смире́нїи моѝ погиба́юще жа́ждею.
сн҃ове ю҆́нотъ поби́ша и҆хъ, и҆ ꙗ҆́ко ѻ҆́трокъ бѣжа́щихъ закла́ша и҆хъ, і҆ и҆згибо́ша въ ѻ҆полче́нїи пред̑ лицемъ г҃а б҃а мое҆го.
пѣ́снь въспоем̑ влд̑цѣ г҃ꙋ пѣснь но́вꙋ пои҆мъ б҃ꙋ на́шемꙋ·

А҆дона́и г҃ь вели́къ е҆си т̂ы, и҆ пресвѣтелъ в си́лѣ, е҆гоже ѻ҆долѣти никтоже мо́жетъ.
тебѣ слꙋжитъ все творе́нїе твое.
ꙗ҆́ко рече и҆ бы́ша посла дх҃ъ свои и҆ създа́шасѧ.
и҆ нс̑҇ѣ противлѧ́ющагосѧ гла́сꙋ твое҆мꙋ·

Горы ѿ ѻ҆снова́нїѧ дви́гнꙋтсѧ съ водами, ка́менїе ꙗ҆́ко во́скъ раста́етъ пред̑ лице́мъ твои҆мъ·

И҆ боѧ́щїи же сѧ тебе г҃и, вели́цы бꙋдꙋт꙽ пред̑ тобо́ю вы́нꙋ·

Го́ре ꙗ҆зы́кꙋ въста́ющемꙋ на лю́ди моѧ̀.
г҃ь ѹ҆бо всемогїи ѿмще́нїе възда́стъ и҆мъ.
и҆ въ дн҃ь сꙋдныи посѣти́тъ и҆хъ, даѧ̀ ѻ҆́гнь и҆ че́рвь въ пло́ть и҆хъ, да жгꙋщисѧ терпѧ́тъ въ вѣ́ки·

И҆ бы́сть по ѻ҆долѣ́нїи, и҆ вси лю́дїе снидо́шас̑҇ въ і҆ерс̑҇лимъ поклони́тисѧ г҃ꙋ б҃ꙋ·

И҆ а́бїе по ѻ҆чище́нїи принесо́ша всѧсож꙽же́нїѧ, и҆ жрътвы ѻ҆бѣща́нїѧ·

И҆ю҆ди́ѳъ же всѧ съсꙋды бра́нныѧ ѻ҆лофе́рновы ꙗ҆́же да́ша е́и людїе, и҆ завѣсꙋ ю҆́же сама взѧ̀ дадѐ въ проклѧ́тїе вѣчнаго въспомина́нїѧ·

И҆ бы́ша лю́дїе веселѧ́щесѧ ра́достїю по чи́нꙋ ст҃ыхъ, и҆ три мс̑҇цы ра́дость сего ѻ҆долѣ́нїѧ празнова́ша съ и҆ю҆ди́ѳою·

По днехъ же сих̑ е҆ді́нъ ко́жд̑о ѻ҆брати́сѧ въ своѧ си·

И ю҆ди́ѳъ вели́ка бы́сть въ виѳꙋлїи и҆ просла́висѧ и҆́мѧ еѧ̀ въ все́и землѝ і҆и҆л҃евѣ·

Поне́же дана̀ бы́сть е́и чистота къ красотѣ е҆ѧ̀, и҆ не позна̀ мꙋж́а во всѧ дн҃и живота свое҆го, по ѹ҆мертвїи манасеи мꙋж́а е҆ѧ̀·

И҆ въ дн҃и пра́здника хожда́ше съ вели́кою сла́вою·

Пребы́сть же в домꙋ мꙋж́а свое҆го лѣтъ, р҃е, и҆ ѻ҆ста́ви а҆́брꙋ рабꙋ̀ свою̀ свобод̑нꙋ·

И҆ ѹ́мре і҆ѹ҆ди́ѳъ и҆ погребе́на со мꙋж́емъ своим̑ въ виѳꙋлїи·

И҆ пла́кашасѧ е҆ѧ̀ вси лю́дїе, з҃, дн҃їи·

Въ всѣхъ же дн҃ехъ живота̀ е҆ѧ̀, не бысть смꙋща́ющаго людїи і҆и҆л҃евыхъ·

Но и҆ по смр҃ти е҆ѧ лѣта многа·

дн҃ь же пра́зд̑ника сего ѻ҆долѣ́нїа ѿ е҆вре́и в число̀ ст҃ымъ дн҃емъ прие́млетсѧ, и҆ празнꙋетсѧ и҆ми да́же и҆ до днесь·

Коне́цъ кни́ѕѣ и҆ю҆ди́ѳъ, и҆́мать в себѣ, глав̑҇, ѕ҃і·