Библия (1581). [20] Есфирь

КНИ́ГА Є҆СѲЄ́РЬ

ГЛВ҃А ПЄ́РВА̀Ꙗ

В лѣто второ́е црс̑҇тва а҆ртаѯе́рѯа вели́кого.
въ прьвыи дн҃ь мс̑҇ца ниса́на, со́нъ ви́дѣ мардохе́и сн҃ъ и҆а҆ровъ семе́ие҆въ, ѿ племени венїами́нѧ.
чл҃къ і҆ѹ҆деѧни́нъ ѻ҆бита́ѧи въ сꙋсѣ гра́дѣ.
чл҃къ вели́къ слꙋжа въ дворѣ цр҃евѣ.
бѣ же ѿ плѣне́нїѧ е҆гоже плѣни навходоносо́ръ цр҃ь вавѷло́ньскїи ѿ і҆ерс̑҇лима, съ е҆хонїемъ цр҃ем̑ и҆ѹ҆де́искимъ·

И҆ си́цево б̂ѣ видѣнїе сна̀ е҆го и҆же видѣ, и҆ се гла́съ ѹ҆жасныи, и҆ гро́мныи трꙋсъ, и҆ смѧте́нїе на землѝ·

И҆ се дв̂а ѕмїа вели́ки гото́ви прїидо́ша межд̑ꙋ собо́ю борю́щесѧ·

И҆ бы́сть гла́съ и҆хъ вели́къ, и҆ гла́сомъ и҆хъ ѹ҆готовисѧ всѧ́къ ꙗ҆зы́къ на́ брань, да и҆стребѧ́тъ род̑ пра́вед̑ныхъ·

И҆ се дн҃ь тмы̀ и҆ мра́ка, ско́рбь и҆ тѣснота и҆ ѻ҆злобле́нїе и҆ смѧте́нїе велїе на землѝ, и҆ възмꙋти́сѧ всѧ́къ ꙗ҆зы́къ пра́веденъ боѧ́щесѧ зло́бы е҆го, и҆ ѹ҆готови́шасѧ на поги́бель и҆ возопи́ша къ г҃ꙋ.
ѿ во́плѧ же их̑ быс̑҇ зна́менїе, а҆кѝ ѿ ма́лаг̑҇ и҆сточ̑҇ника рѣка велїѧ вода мно́га, и҆ свѣтъ и҆ сл҃нце воз̑сїѧ, и҆ смире́ннїи възнесо́шасѧ, и҆ поꙗдо́ша сла́вныхъ·

И҆ възбнꙋвъ мардохе́и видѣвыи со́нїе сїе е҆же б҃ъ въсхотѣ̀ сотвори́ти.
и҆ дръжа́ше со́нїе сїе въ срд̑цы си, и҆ въ всѧ́комъ словесѝ хотѧше разꙋмѣти е҆̀ даже до нощи, и҆ ѹ҆мол̑҇ча̀ мардохе́и въ дворѣ со гава́ѳомъ и҆ ѳа́рром꙽ двѣма е҆внꙋхома цр҃евома, и҆же стрежа́хꙋ дво́рь.
и҆ слы́ша помышле́нїѧ и҆ совѣты и҆хъ и҆спыта̀, и҆ разꙋмѣ̀ ꙗ҆́ко гото́вѧтъ рꙋцѣ свои ѹ҆би́ти цр҃ѧ а҆ртаѯе́рѯа.
и҆ сказа̀ цр҃ю ꙗ҆́же ѻ҆на̀ помышлѧ́ютъ, і҆ и҆спыта̀ ѧ҆̀ цр҃ь, і҆ и҆сповѣда́шасѧ, и҆ повѣшени бы́ша.
и҆ написа̀ цр҃ь словеса̀ сїѧ на па́мѧть, и҆ мардохе́ѧ написа̀ ѻ҆ словесе́хъ си́хъ.
и҆ повелѣ̀ цр҃ь мардохе́ю слꙋжити въ дворѣ̀, и҆ да́сть е҆мꙋ да́ры сего ради.
и҆ бѣ̀ а҆ма́нъ, а҆мада́ѳовъ, вꙋге́ѻвъ сла́венъ пред̑ цр҃емъ, и҆ въсхотѣ̀ ѻ҆злоби́ти мардохе́ѧ и҆ людїи е҆го, двꙋхъ ради е҆внꙋховъ цр҃евыхъ·

И҆ бы́сть по словесе́хъ сихъ въ днех̑ а҆ртаѯе́рѯа.
сїи а҆ртаѯе́рѯъ ѿ синдикїѧ, и҆же ѻ҆блада̀ рк҃з, страна́ми и҆ндѣ́искими·

Въ дни же ты́ѧ е҆гда сѣде на столѣ црс̑҇тва свое҆го а҆ртаѯе́рѯъ, в сꙋса́нѣ гра́дѣ.
въ тре́тїе же лѣто црс̑҇тва свое҆го, сътворѝ пи́ръ вельмо́жамъ свои҆мъ, и҆ прочимъ ꙗ҆зы́ком̑, прьскимъ и҆ ме́дъскимъ сла́внымъ и҆ нача́лнымъ.
и посемъ е҆гда̀ показа̑ бога́т꙽ства и҆ честь црс̑҇тва свое҆го·

По показа́нїи же бога́тества црс̑҇тва свое҆го, и҆ красоты̀ весе́лїѧ свое҆го въ р҃п днїи.
е҆гда́ же и҆спол꙽нѧ́ше дни пи́рꙋ, сътворѝ цр҃ь всѣмъ лю́демъ е҆ли́коже и҆хъ ѻ҆брѣтѐ в сꙋса́нѣ, ѿ вели́ка даже и҆ до ма́ла.
бы́сть же пи́р꙽ по седмь днїи въ дворѣ̀ цр҃евѣ ѹ҆краше́немъ вис꙽со́н꙽ными зеле́ными завѣсами ѹ҆чине́ными на ѹ́жахъ си́нѧтныхъ и҆ чрьвлени́чныхъ, въ крꙋзехъ зла́тыхъ и҆ сре́брѧныхъ.
на столпѣхъ ло́жа зла́та и҆ сребрѧна, и҆ намо́щена ка́менїемъ змарагдовым̑ и҆ пини́нъским꙽ и҆ мраморомъ бѣлым̑, и҆ плащени́цы съ пестрота́ми различ̑҇ными, и҆ ꙗ҆́ко и҆зрастающаѧ на них̑ вѣтвїа ши́пковъ·

И҆ сосꙋды зла́ты и҆ сре́брѧны и҆ ка́менїи а҆н꙽ѳракїискими и҆ киликїискими предълежа́ща цѣно́ю злата тала́нт꙽, ҂л҃. и҆ вина̀ мно́го е҆гож̑ са́мъ цр҃ь пїѧ́ше.
и҆ пи́тїе с̂е не по ѹ҆ставле́нномꙋ зако́нꙋ бы́сть·

Та́ко б̂о ѹ҆ста́въ б̂ѣ цр҃евъ на всѣх꙽ старѣ́ишинахъ до́мꙋ свое҆го.
и҆ заповѣда̀ и҆кономомъ сотвори́ти во́лю мꙋжем꙽.
та́кожде и҆ а҆сти́нь цр҃ца сътворѝ пи́ръ жена́мъ в домꙋ̀ цр҃вѣ е҆гда̀ цр҃ь а҆ртаѯе́ѯъ въ дн҃ь седмыи ѹ҆добрѧ́ше мысль свою во винѣ̀, и҆ реч̑҇ а҆манꙋ, и҆ ваза́нꙋ, и҆ ѳа́рꙋ и҆ вара́зꙋ и҆ заѳал꙽ѳа́вꙋ, и҆ а҆вата́зꙋ, и҆ ѳара́вꙋ, седьми́мъ е҆внꙋхомъ, и҆же слꙋжа́хꙋ пред̑ цр҃емъ.
привестѝ а҆сти́нь цр҃цꙋ предъ него, е҆же въцрс̑҇тви́ти е҆ѧ̀, и҆ възложи́ти на ню̀ вѣне́ць цр҃ьскїи, и҆ пока́зати еѧ̀ всѣмъ началъствꙋю҆щимъ ꙗ҆зы́комъ, занѐ прекра́сна бысть, и҆ не послꙋша е҆го а҆сти́нь цр҃ца пои҆тѝ со е҆внꙋхи.
и҆ ѻ҆печали́сѧ цр҃ь и҆ прогнѣвасѧ, и҆ гнѣвъ е҆го раждеже́сѧ в немъ.
и҆ рече бли́жнимъ свои҆мъ, си́це рече а҆сти́нь, сего рад̑и̑ ѹ҆бо сътвори́те зако́нъ и҆ сꙋдъ ѻ҆ сем̑ и҆ пристꙋпи́ша к немꙋ а҆ркесе́и и҆ сарсоѳе́и и҆ малисе́ар꙽, нача́лницы прь́скїи и҆ ме́д꙽скїи, и҆же видѧхꙋ лицѐ цр҃ево і҆ и҆же сѣдѧ́хꙋ прьвѣе близъ цр҃ѧ.
и҆ възвѣстиша е҆мꙋ по зако́нꙋ чт̂о подоба́етъ сътвори́ти цр҃ци а҆сти́ни и҆же не сътворѝ повеле́нїѧ цр҃ѧ а҆ртаѯе́рѯа, не прїиде б̂о со е҆внꙋхи.
и҆ рече мꙋхеи пред̑ цр҃емъ и҆ болѧры, не цр҃ѧ е҆ді́наго посрамѝ а҆сти́нь цр҃ца, н̂о и҆ всѧ̀ кнѧ́зѧ и҆ нача́лники и҆же предъ цр҃емъ·

І҆ и҆сповѣстьсѧ гл҃ъ цр҃цы ꙗ҆́ко съпроти́висѧ цр҃ю.
си́це и҆ днесь мꙋчи́телницы же́ны про́чихъ кн҃ѕеи прьскихъ и҆ ме́д꙽скихъ, ѹ҆слы́шатъ цр҃ю реченнаѧ ѿ неѧ, дръзнꙋтъ та́коже бесчествовати мꙋжїи своих̑ а҆ще лю́бо е҆сть цр҃ю повелѝ црс̑҇кимъ повеле́нїемъ, и҆ да напи́шетъ по ѹ҆ста́вꙋ ме́дъскомꙋ и҆ прьскомꙋ да не бꙋдетъ и҆́нако, ниже да внидетъ ктомꙋ цр҃ца къ немꙋ.
и҆ црс̑҇тво еѧ̀ да предасть цр҃ь лꙋ́чшеи еѧ̀.
и҆ да бꙋдетъ послꙋшанъ ѹ҆ста́въ ѿ цр҃ѧ, и҆же сътвори́тъ въ всемъ црс̑҇твїи е҆го.
и҆ си́це всѧ̀ же́ны възложатъ честь на мꙋжи своѧ̀, ѿ вели́ка да́же и҆ од ма́ла.
и҆ годѣ бысть сло́во предъ цр҃емъ, и҆ вла́стьми.
и҆ сътворѝ цр҃ь ꙗ҆́коже рече е҆мꙋ мꙋхе́и, и҆ посла̀ кни́ги къ всѣмъ вла́стелемъ своим̑, къ вла́сти и҆ власти по гл҃ꙋ и҆хъ.
ꙗ҆́ко да боѧ́тсѧ их̑ же́ны, ѹ҆твердит̑сѧ всѧ́комꙋ мꙋжꙋ вла́сть в домꙋ̀ е҆го, ꙗ҆́коже и҆ ꙗ҆зык̑҇ людїи ко́ждо их̑·

Глв̑҇а, в҃·

И по словесе́хъ сих̑ ѹ҆ста́висѧ цр҃ь ѿ гнѣва.
и҆ не въспомѧнꙋ ктомꙋ̀ а҆сти́ны, въспомина́ѧи е҆ли́ко гл҃а ꙗ҆ко ѻ҆сꙋдѝ еѧ̀.
и҆ рѣша цр҃ви слꙋги е҆го, да взы́щꙋтъ цр҃ю дв҃цы нерастлѣнны кра́сны зракомъ.
и҆ да поста́витъ цр҃ь в꙽зыска́телѧ, въ всѣхъ страна́хъ црс̑҇твїѧ свое҆го.
да съберꙋтъ дв҃цы дѣвъстве́нїи, доброзра́чны, къ сꙋса́нꙋ градꙋ в черто́гъ же́ньскїи.
и҆ да ѿдадт̑ꙋ е҆внꙋхови цр҃евꙋ е҆же стреже́тъ, и҆ да дас̑҇ ѻде́жда и҆ прочїи потре́бы, и҆же ю҆̀ възлю́битъ цр҃ь.
да поста́витъ въ а҆сти́ны мѣсто, и҆ годѣ бы́сть цр҃ю, и҆ сътворѝ та́ко.
и҆ мꙋжъ б̂ѣ і҆ѹ҆де́искїи в сꙋса́нѣ гра́дѣ и́мѧ е҆мꙋ мардохе́и, сн҃ъ а҆и́ровъ, сн҃а симаи҆на, сн҃а ки́сова, ѿ пле́мени вениа҆ми́нѧ, и҆же бѧ́ше плене́нъ ѿ і҆ерс̑҇лі́ма навходосо́ромъ цр҃емъ вавѷлонъскимъ.
и҆ бѧ́ше е҆мꙋ дв҃ца ѿ племенѧ а҆минода́влѧ бра́та ѿц҃а е҆го, и҆́мѧ е́и е҆сѳи́ръ д꙽щѝ ѹ́ѧ е҆го·

и҆ бѧ́ше дв҃ца кра́сна и҆ доброзра́чна.
по преставле́нїи же роди́телеи еѧ̀, прїѧт̑ ю҆̀ мардохе́и въ дщере мѣсто.
и҆ вънегда ѹ҆слы́шанъ бысть гл҃ъ цр҃евъ и҆ зако́нъ е҆го.
собра́ша же дв҃ца мно́ги в сꙋса́нѣ гра́дѣ по рꙋкою га́нѧ.
и҆ бы́сть поѧ́та е҆сѳи́ръ в дом̑ цр҃евъ рꙋко́ю га́нѧ, и҆же бѧ́ше храни́тель женьскїи.
и҆ ѹ҆любѝ цр҃ь дв҃цꙋ ѻ҆чи́ма свои҆ма, и҆ ѻ҆брѣте млс̑҇ть пред̑ нимъ.
и҆ ѹ҆бор꙽зи пристро́ю е́и да́ры даѧ́ти.
и҆ седмь дв҃ць и҆же стоѧ́хꙋ да́ти е́и и҆з до́мꙋ цр҃ева.
и҆ пристроѧ дв҃цѣ еѧ̀ ѹ҆добрѣла в домꙋ̀ же́ньстѣмъ.
и҆ не повѣда е҆сѳи́р꙽ людїи свои҆хъ и҆ ро́дꙋ свое҆го.
мардохе́и б̂о заповѣда е́и не възвѣща́ти, и на всѧ́къ дн҃ь мардохе́и въсхожа́ше противꙋ до́мꙋ же́ньскаго ѹ҆вѣдѣти ми́ръ е҆сѳи́ри чт̂о бы сътвори́ли е́и.
си́це б̂о бѣ̀ времѧ дв҃цъ и҆же вни́ти къ цр҃ю, е҆гда и҆спо́лнит̑сѧ зако́нъ, в҃і мс̑҇ць, ꙗ҆́ко та́ко напол꙽нѧ́хꙋсѧ днїе ѻ҆чище́нїю, ѕ҃ мс̑҇ць, въ а҆рома́тах̑, и҆ въ пристро́ѧх̑ женьских̑ ѕ҃ мс̑҇ць нама́зꙋющисѧ ми́ромъ ѻ҆ле́ѻ҆вымъ, и҆ тогда прихожда́ше къ цр҃еви.
и҆ все и҆же а҆ще рече дадѧ́ше е҆и.
прїитѝ с не́ю и҆з домꙋ же́ньскаго да́же и҆ до до́мꙋ цр҃ева.
и҆ на вечеръ т̂а бѣ̀ приходѧ́щи.
и҆ заѹ́тра б̂ѣ възвраща́ющисѧ к до́мꙋ же́ньскомꙋ къ дрꙋгомꙋ е҆внꙋхꙋ цр҃евꙋ по рꙋцѣ храни́телю ло́жницѣ, и҆ не прихожда́ше па́ки къ цр҃ю.
н̂о е҆гда не бꙋдетъ позва́на и҆́менемъ.
и҆ внегда достꙋпѝ жре́бїи е҆сѳи́ринъ дщери а҆минода́вли, бра́та ѿц҃а мардохе́ѻва и҆же поѧ́лъ ю҆̀ себѣ въ дщери мѣсто, прїитѝ къ цр҃еви ничто́же приложѝ е҆же заповѣда е҆и е҆внꙋхъ храни́тель же́ньскїи.
б̂ѣ б̂о е҆сѳи́ръ ѻ҆брѣта́ющи млс̑҇ть пред̑ всѣми зрѧ́щими еѧ·

И҆ бысть поѧ́та е҆сѳи́ръ къ цр҃ю а҆ртаѯе́рѯꙋ въ в҃і мс̑҇ць и҆же е҆сть а҆да́ръ, в лѣто седмо́е црс̑҇тва е҆го.
и҆ ѻ҆блюбѝ цр҃ь е҆сѳи́ръ па́че всх̑ѣ дв҃ць дв҃ствениц̑҇, и҆ ѻ҆брѣте блгд̑ть пач̑҇ всх̑ѣ и҆ воз̑ложѝ вѣнецъ црс̑҇кїи на главꙋ̀ е҆ѧ.
и҆ сътворѝ цр҃ь пи́ръ вели́къ, всѣм꙽ вельмо́жамъ свои҆мъ, и҆ рабо́мъ своим̑ з҃ днїи, и҆ воз̑несе брак̑҇ е҆сѳи́рин̑҇ и҆ сотворѝ ѹ҆тѣ́хꙋ зем̑лѧ́мъ е҆го, мардохе́и же слꙋжаше въ дворѣ цр҃евѣ.
и҆ е҆сѳи́р же не повѣда́ющи рода свое҆го, н̂и лю́дїи свои҆хъ.
сице б̂о заповѣ́да е́и мардохе́и боѧ́тисѧ б҃а и҆ твори́ти за́повѣди е҆го.
ꙗ҆́коже бѧ́ше ѹ҆твръди́ласѧ с ни́мъ во́ дн҃и т̂ы, е҆сѳи́р же не и҆змѣни ѻ҆бы́чаа свое҆го.
начал̑҇нѣишїи стра́жи ло́жа е҆го, і҆ ѻ҆скорблени бы́ша дв̂а е҆внꙋха, ꙗ҆́ко пред̑почтенъ бы́сть мар꙽дохе́и, и҆ска́хꙋ ѹ҆би́ти а҆ртаѯерѯа цр҃ѧ.
и҆ възвѣсти́ша сло́во мардохею, и҆ сказа е҆сѳи́ри, ѻ҆на́ же повѣда цр҃ю ꙗ҆же навѣтꙋ́ютъ.
цр҃ь же и҆спыта дв̂ꙋ е҆внꙋхов꙽, і҆ и҆сповѣда́шасѧ.
и҆ сего ради ѻ҆бѣси их̑·

И҆ повелѣ цр҃ь положи́ти на па́мѧтъ въ цр҃ьстеи кни́гохрани́телницы.
ѻ҆ бл҃гоѹ҆мїи мардохеѻ́вѣ въ похва́лꙋ·

Глв̑҇а, г҃·

И по си́хъ прослави цр҃ь а҆ртаѯерѯъ а҆мана сн҃а а҆мадаѳꙋина вꙋсе́искаго, и҆ възнесе е҆го и҆ пред̑почиташесѧ всх̑ѣ дрꙋговъ е҆го, и҆ вс̂и и҆же въ дворѣ цр҃ѧ поклонѧ́хꙋсѧ е҆мꙋ, си́це б̂о повелѣ цр҃ь твори́ти·

Мар꙽дохеи же не кла́нѧшесѧ е҆мꙋ, и҆ гл҃аша вс̂и рабѝ и҆же въ дворѣ цр҃евѣ мардохе́ю.
мардохе́ю чт̂о ради престꙋпа́еши за́повѣдь цр҃евꙋ, по всѧ же дн҃и гл҃ахꙋ е҆мꙋ и҆ не послꙋшаше и҆хъ·

И҆ възвѣстиша а҆ма́нꙋ, ꙗ҆́ко мардохе́и съпротивлѧ́етсѧ повелѣнїю цр҃вꙋ·

И҆ повѣда и҆мъ мардохе́и ꙗ҆́ко і҆ѹ҆де́ѧнинъ е҆сть.
и҆ ви́дѣ а҆манъ ꙗ҆́ко не покланѧ́етсѧ е҆мꙋ мардохе́и, и҆ раз꙽гнѣ́васѧ ѕѣло·

И҆ въсхотѣ погꙋбити вс̂ѧ і҆ѹ҆де́ѧ, и҆же съ всемъ цр҃ьствѣ а҆ртаѯер꙽ѯовѣ, и҆ сътвори́ти совѣтъ·

В лѣто же, в҃і, црс̑҇тва а҆ртаѯер꙽ѯова меташа жребїи дн҃ь ѿ дн҃ѧ, и мс̑҇ць ѿ мс̑҇ца·

Ꙗ҆́ко погꙋби́ти въ е҆ді́нъ дн҃ь род̑ мардохе́ѻвъ.
и҆ паде жре́бїи въ д҃і дн҃ь мс̑҇ца, и҆же е҆сть а҆даръ.
и҆ гл҃а а҆манъ къ цр҃ю а҆ртаѯерѯꙋ гл҃ѧ, е҆сть лю́ди раз꙽сїаны въ всѣхъ ꙗ҆́зы́цѣхъ, по все́и земли црс̑҇тва твое҆го.
и҆ зако́нъ их̑ и҆ноѿбраз̑ныи и҆ стра́нныи, паче всх̑ѣ ꙗ҆зы́къ.
и҆ зако́на цр҃ьска не слꙋша́ютъ, не наѹ҆стихъ цр҃ю ѻ҆ставити и҆хъ.
и҆ а́ще годѣ е҆сть цр҃ви да повелитъ погꙋби́ти ѧ҆̀·

А҆́з же запишꙋ въ сокровище цр҃ево, ҂і҃, тала́нтъ сребра̀.
и҆ снемъ цр҃ь прьстен̑҇ сво́и съ рꙋки свое́ѧ и҆ да̀ а҆манꙋ, да запечатлѣ́етъ писа́нїе, е҆же напи́санно на і҆ѹ҆деѝ·

И҆ ре́че цр҃ь а҆ма́нꙋ, сребро̀ ѹ҆бо и҆мѣи ты себѣ, людем̑ же сътворѝ ꙗ҆́ко хощеши.
и҆ призва́ни бы́ша писцы̀ цр҃еви, въ г҃і дн҃ь, мс̑҇ца пр́ьваго.
и҆ написа́ша ꙗ҆́коже повелѣ и҆мъ а҆ма́нъ.
вое҆водамъ и҆ нача́лникомъ по всѣхъ стра́нахъ, ѿ и҆ндїискїѧ ѻ҆́бласти, да́же и҆ до е҆фїѻ҆пїѝ, рк҃з, стра́намъ начал꙽ствꙋю҆щимъ над̑ ꙗ҆зыки по и҆хъ ꙗ҆зы́кꙋ, по повелѣнїю а҆ртаѯерѯа цр҃ѧ·

И҆ посла̀ послы̀ съ писанїемъ а҆ма́нъ, въ всѐ црс̑҇тво а҆ртаѯерѯово, да побїют̑ род̑ жидовъскїи въ дн҃ь е҆ді́нъ.
мс̑҇ца в҃і, и҆же е҆сть а҆даръ, и҆ да въсхитѧт̑ и҆мѣнїѧ и҆хъ.
писа́нїе же е҆пистолїи сицево б̂ѣ·

Цр҃ь вели́кїи а҆ртаѯерѯъ, начал꙽ствꙋющим̑, рк҃з, стра́намъ, и҆ под̑ѻ҆бла́стнымъ вла́стелем̑ и҆же ѿ и҆ндїискїѧ землѝ, да́же и҆ до е҆фїѻ҆пїи сїѧ пи́шет̑.
над̑ мно́гими цр҃ьствова ꙗ҆зы́ки, и҆ вс̂ю ѻ҆бъдръжа̀ вселеннꙋю.
и҆ въсхотх̑ѣ не дръзостїю възносим̑ ѻ҆́бласти, н̂о кротостїю и҆ тихостїю всегда̀ правѧ.
без̑мѧте́жна жи́тїѧ ѹ҆стро́ити под̑рꙋчников̑҇ на́ших̑, и҆ црс̑҇твїе свое без̑мол꙽вно и҆ неволнꙋ́емо даж̑ до конецъ соблюда́ѧ·

и҆ ѻ҆бновити жела́емыи всѣмъ чл҃комъ ми́ръ.
и҆ въспроси́вшꙋ м̂и совѣтники моа̀, ка́ко ѹ҆бо мо́щно е҆сть сїе съвръшити.
и҆же ѹ҆ насъ цѣломꙋ́дрїемъ пресловꙋтыи, и҆ въ бл҃говоленїи неи҆змѣнны и҆ твердѣи вѣрѣ ѹ҆твержд̑енъ, и҆ вто́рꙋю часть въ црс̑҇кихъ полꙋчив̑҇, а҆манъ, сказа нам̑ въ всѣхъ по вселеннѣи колѣнахъ смѣша́емыхъ вражебныхъ лю́дехъ нѣ́кихъ, зако́нꙋ съпроти́вныхъ къ всѧ́комꙋ ꙗ҆зы́кꙋ·

И҆ повелѣнїѧ црс̑҇каѧ всегда̀ небрегꙋщих꙽, кое҆ же не тверди́тисѧ е҆же ѿ вас̑҇ непоро́чне прави́мо сънача́лне·

И҆ разꙋмѣвше ꙗ҆́ко се́и ꙗ҆зык̑҇ е҆ді́нъ, съпротивлѧ́етсѧ всегда всѧкомꙋ чл҃кꙋ развращенїемъ.
ѹ҆ставленїемъ же законовъ стра́нныхъ і҆ и҆змѣне́нїем̑.
и҆ вражебнѣ ѹ҆строѧемъ къ на́шимъ повеленїемъ, и҆ ѕлѣиша ѕл̂а съвръша́ѧ, дабы̀ црс̑҇твїе на́ше не полꙋчило тихость и҆ смиренїе·

Повелѣхом̑ ѹ҆бо сказоваемыхъ вамъ, въ гра́мотахъ ѿ а҆ма́на, ѹ҆чиненаго на вещехъ црс̑҇кихъ, и҆ втораго ѿ цр҃ѧ на́шего·

Всѣхъ враговъ со жена́ми и҆ чады ме́чи погꙋбити вс̂еко́ренне, без̑ всѧ́кїѧ ми́лости и҆ пощадѣнїа, въ д҃і дн҃и, в҃і мс̑҇ца и҆же е҆сть а҆даръ, настоѧ́щего лѣта.
да бы́вши дре́вле и҆ нн҃ѣ враѕи въ е҆ді́номъ дн҃и гор꙽ко въ а́дъ шед̑ше·

и҆ въ про́чее времѧ ти́хо и҆ безъмол꙽вно жи́тїе до конца намъ прохо́дит̑.
е҆пистолїи же посла́нїемъ и҆злагахꙋсѧ по странамъ, и҆ повелѣно бы́сть всѣмъ гото́вомъ быти въ ѹ҆реченныи дн҃ь.
цр҃ь же и҆ а҆манъ, пирꙋюще наслажа́хꙋсѧ, град̑ же сꙋса смѧтѧ́шесѧ·

Глв̑҇а, д҃·

Мардꙋхе́и же разꙋмѣвъ замышлѧ́емое, и҆ вс̂е е҆же творѧ́ше цр҃ь.
раздра̀ ры́зы своа и҆ ѻ҆блечесѧ въ врѣтище, и҆ посыпасѧ пепелом̑, скочив꙽ въ простран꙽нꙋю ѹ҆́лицꙋ гра́да, и҆ возопив̑҇ во́плем̑ вели́кимъ и горким̑·

Возимает̑сѧ ро́дъ ничто́же пристꙋпи́выи.
и҆ прїи҆де да́же до вратъ цр҃евыхъ, не лѣть б̂о бѣ̀ е҆мꙋ внити въ дво́ръ, въ врѣтище ѻ҆блеченꙋ, и҆ пепеломъ ѻ҆сы́панꙋ сꙋщꙋ.
и҆ въ всѧ́кои странѣ и҆дѣже показа́хꙋсѧ писа́нїѧ цр҃ева, во́пль б̂ѣ и҆ плачъ и҆ рыда́нїе преве́лїе і҆ѹ҆деѻ́мъ, и҆ врѣтище и҆ пепелъ постила́хꙋ себѣ̀·

И҆ внидо́ша дв҃ы къ е҆сѳи́ри цр҃цы и҆ е҆внꙋхи и҆ възвѣсти́ша е́и, и҆ ѹ҆жасе́сѧ цр҃ица ѕѣло бы́вшемꙋ.
и҆ посла̀ ры́зы ѻблещи мар̑҇дохе́ѧ и҆ снѧти вре́тище е҆го, и҆ не въсхотѣ прїѧти·

Є҆сѳи́ръ же призва а҆храѳе́ѧ скопца свое҆го предъстоа́щего е́и, и҆ посла̀ е҆го ѹ҆вѣ́дѣти ѿ мардꙋхе́ѧ и҆стенꙋ, чт̂о е҆сть слꙋчьшеесѧ·

Мардохе́и же сказа е́и бы́вшее, і҆ ѻ҆бѣща́нїе е҆же ѻ҆бѣща̀ а҆ман̑҇ цр҃ю въ съкровищныи до́мъ положи́ти, ҂і҃, тала́нтъ сребра̀, да погꙋби́тъ і҆ѹ҆де́и·

И҆ писа́нїе сложеное въ сꙋса́нѣ гра́дѣ на погꙋбле́нїе и҆хъ, и҆ даде е҆̀ скопцꙋ показа́ти е҆сѳири.
и҆ рече е҆мꙋ заповѣ́дати е́и, и҆тѝ къ цр҃ю и҆ моли́ти е҆го, да ѹ҆млс̑҇ръди́тъ е҆го ѻ҆ лю́дехъ свои҆хъ·

помина́ющи дн҃ь смире́нїѧ свое҆го, ꙗ҆́ко въспитана быс̑҇ въ рꙋцѣ мое́и·

занѐ а҆ма́нъ вто́рыи ѿ цр҃ѧ, гл҃а проти́вꙋ на́мъ на смр҃ть.
призови г҃а и҆ гл҃и цр҃ю ѻ҆ насъ, і҆ и҆зметъ на́съ ѿ го́ркїѧ смр҃ти·

Прїиде же а҆храѳе́и, и҆ повѣда е҆сѳи́ри вс̂ѧ гл҃ы мар꙽дохе́ѻ҆вы·

И҆ рече е҆сѳи́рь къ а҆храѳе́ю и҆ди к мардохею, и҆ рцы е҆мꙋ ꙗ҆ко ѻ҆бы́чаѧ цр҃евы вс̂ѧ вѣси, ꙗ҆́ко всѧ́къ мж̑ꙋ и҆ли жена̀, а҆́ще прїидетъ къ цр҃еви въ внꙋтрьнїи дом̑ не призва́нъ, нѣсть е҆мꙋ сп҃се́нїѧ.
точїю к немꙋже а҆ще простретъ зла́тыи же́злъ, се́и спасенъ бꙋ́детъ.
а҆ а́зъ нѣсмь звана внити къ цр҃ю, с̂е ѹ҆же л҃ дн҃їи.
и҆ възвѣсти а҆храѳе́и мардохе́ю вс̂ѧ гл҃ы е҆сѳи́рины·

И҆ рече мардохе́и къ а҆храѳе́ю, і҆ди и҆ рцы е́и не мнѝ с̂и е҆сѳир̑҇ въ мы̀сли свое́и, ꙗ҆́ко т̂ы е҆ді́на сп҃сешисѧ въ црс̑҇твїи па́че всх̑ѣ і҆ѹ҆де́и.
зане а҆́ще преслꙋшае҆ши в꙽ сїе вре́мѧ ѿ и́нюде сп҃се́нїе и҆ покро́въ бꙋдет̑ і҆ѹ҆де́ѻм̑, ты̑ и҆ до́мъ ѿц҃а твое҆го погибнете.
и҆ кт̂о вѣсть а҆ще въ времѧ сїе црс̑҇твова́ла е҆си.
и҆ посла̀ е҆сѳи́ръ а҆храѳе́ѧ къ мардохе́ю гл҃ющи е҆мꙋ.
и҆дѝ и҆ събери вс̂ѧ і҆ѹ҆де́ѧ, и҆хже ѻ҆брѧ́щеши в сꙋса́нѣ гра́дѣ, и҆ пости́тесѧ мене ра́ди, и҆ не ꙗ҆сте а҆ни пїете по трѝ дн҃и, дн҃ь и҆ но́щь.
а́зъ и҆ слꙋжебницы моѧ̀ такоже не и́мамы ꙗ҆́сти·

И тогда̀ вни́дꙋ къ цр҃ю кро́мѣ за́кона да а́ще и҆ поги́бнꙋти бꙋ́детъ м̂и·

И҆ шед̑ мардохе́и и҆ сътвори́ ꙗ҆́коже заповѣ́да е҆мꙋ е҆сѳи́ръ.
и҆ моли́сѧ гв҃и помина́юще дѣ́ла гн҃ѧ·

И҆ реч̑҇ г҃и г҃и цр҃ю вседръжи́телю, ꙗ҆́ко въ вла́сти твое́и сїе вс̂е е҆сть, и҆ нѣсть противлѧ́ѧисѧ тебѣ никто́же сла́вою свое҆ю, вънегда̀ въсхо́щеши спастѝ і҆и҆л҃ѧ·

Ꙗ҆́ко т̂ы сътворѝ нб҃о и҆ зе́млю, и҆ вс̂е ѹ҆дивлѧ́ющее чл҃ка по́дъ нб҃сем꙽.
и҆ г҃ь е҆си всх̑ѣ, и҆ нс̑҇ѣ и҆же проти́вит̑сѧ тебѣ г҃и, т̂ы всѧ̀ вѣси и҆ ты всѧ̀ знае҆ши г҃и.
ꙗ҆́ко не въ клѧтвѣ, ни́ в гордости, ни́же въ тщесла́вїи сътворих̑ с̂е, е҆же не поклонитисѧ прегордомꙋ а҆ма́нꙋ·

и҆ ꙗ҆́ко бл҃говолѧх̑ бы̀ лобза́ти и҆ плеснѣ но́гъ е҆го, сп҃сенїѧ ради і҆и҆л҃ева.
н̂о сїѧ сътворихъ, да не воздам̑ сла́вы чл҃кꙋ, паче сла́вы бж҃їѧ.
и҆ не поклоню́сѧ никомꙋж́е, ра́звѣ г҃ꙋ мое҆мꙋ, и҆ не сътворю сїѧ въ гордости·

И҆ нн҃ѣ г҃и б҃е цр҃ю пощади лю́ди твоѧ, ꙗ҆ко зазираютъ на́мъ въ поги́бель.
и҆ вожделѣша погꙋби́ти, е҆же и҆знача́ла наслѣдїе твое.
и҆ не презри достоа́нїе твое, е҆же и҆зба́вилъ е҆си себѣ ѿ е҆гѷпта.
ѹ҆слы́ши мл҃твꙋ мою, и҆ ѹ҆млс̑҇рди́сѧ над̑ наслѣдїемъ своимъ.
ѻ҆брати рыда́нїе на́ше въ веселїе, да живꙋще въсхва́лимъ и́мѧ твое г҃и·

и҆ не погꙋби ѹстъ въсхвалѧ́ющихъ тѧ г҃и·

И҆ весь і҆и҆л҃ь вопїа́ше съ воздыха́нїемъ крѣпким꙽, ꙗ҆́ко смр҃ть пред̑ ѻ҆чима и҆хъ е҆сть·

И҆ е҆сѳи́ръ же цр҃ца ѹ҆страшена смр҃ти ради родителеи, прїиде къ г҃ꙋ·

И҆ сне́мъши ры́зы сла́вы свое́ѧ, и҆ ѻ҆блечесѧ в ры́зы тѣсноты и҆ пла́ча.
и҆ в мѣсто мног̑҇цѣныхъ ма́стеи и҆ бл҃гово́нных꙽, пепеломъ и҆ гно́емъ посы́па главꙋ свою и҆ пло́ть свою смирѝ ѕѣло̀.
и҆ кождо мѣсто веселїѧ свое҆го, и҆сполнѝ сплетеных̑ власъ свои҆хъ.
и҆ моли́сѧ г҃ꙋ б҃ꙋ і҆и҆л҃евꙋ·

И҆ рече г҃и мои цр҃ю на́шъ, т̂ы са́мъ е҆ді́нъ помоѕи м̂и е҆ді́нои.
не и҆мѣ́ющеи по́мощи ра́звѣ тебе, ꙗ҆́ко бѣда моѧ на рꙋкꙋ мою̀.
а҆́зъ слы́шахъ ѿ роженїѧ мое҆го, въ племени ѿч҃ества мое҆го.
ꙗ҆́ко т̂ы г҃и прїѧ і҆и҆л҃ѧ ѿ всх̑ѣ ꙗ҆зы́къ, и҆ ѿц҃ъ на́шихъ ѿ всѣхъ праѿц҃ъ их̑ в наслѣдїе вѣчное, и҆ сътвори́лъ е҆си им̑ е҆ли́ка гл҃а·

И҆ нн҃ѣ съгрѣшихомъ пред̑ тобо́ю, и преда́лъ е҆си нас̑҇ в рꙋцѣ вра́гъ на́шихъ, зане́ же сла́вихомъ бо́ги и҆хъ.
пра́веденъ е҆си г҃и, и҆ нн҃ѣ не довлѣют̑ л̂и въ горести рабо́ты на́шеѧ.
н̂о положи́лъ е҆си рꙋцѣ их̑ на рꙋки и҆́дол̑҇ и҆хъ, и҆зѧти заповѣдь ѹ҆стъ твоих̑ и҆ погꙋби́ти наслѣдїе твое, и҆ запечатлѣти ѹ҆ста хвалѧ́щих̑ т̂ѧ, и҆ ѹ҆гасити сла́вꙋ хра́ма твое҆го, и҆ ѻ҆лта́рь твои.
и҆ ѻ҆твори́ти ѹ҆ста̀ ꙗ҆зыкомъ, въ ѹ҆гожденїѧ сꙋе́тнаѧ и҆ ѹ҆диви́ти цр҃ѧ плотнаго въ вѣки.
не преда́и г҃и скѷпетра твое҆го и҆же не сꙋть.
и҆ да не посмѣ́ютсѧ въ паде́нїи на́шемъ·

Но ѻ҆брати совѣтъ и҆хъ на́ нѧ, наченшаго на на́съ ѿм꙽сти, и҆ въ притчю положѝ·

Помѧни г҃и и҆ позна́и въ времѧ скорби на́шеѧ, и҆ мене сподоби дръзновенїѧ·

Цр҃ю и҆ б҃е всѧкоѧ блгс̑҇ти дръжителю, да́жд̑ь сло́во ѹ҆́мно въ ѹ҆стнахъ моих̑ пред̑ львомъ, и҆ премѣни срд̑це е҆го в ненавиденїе, вою́ющихь на ны въ и҆стребленїе е҆го, и҆ с ни́мъ совѣтꙋ́ющих̑·

На́съ же и҆змѝ рꙋко́ю твое́ю, и помоѕи м̂и е҆ді́нои не и҆мѣющеи никогож̑, токмо тебе г҃и·

Всѣхъ ра́зꙋмъ и́маши и҆ вѣси, ꙗ҆́ко възненави́дѣхъ сла́вꙋ безако́нных꙽, и҆ гнꙋша́юсѧ ложа неѻ҆брѣзан꙽ныхъ, и҆ всѧ́кого и҆ноплеменника·

Ты вѣси нꙋж́ꙋ мою̀ ꙗ҆́ко възгнꙋшасѧ зна́менїѧ го́рдости мое́а.
и҆же е҆сть на главѣ мое́и во дн҃ех̑ виденїѧ мое҆го, възгнꙋша́юсѧ е҆го ꙗ҆́ко рꙋ́бищъ поскверненыхъ, и҆ не ношꙋ е҆го въ дн҃ь молча́нїѧ мое҆го.
и҆ не ꙗ҆́сть раба̀ твоѧ ѹ҆ трапе́ѕы а҆ма́новы, и҆ не просла́вѧх̑сѧ въ пирѣ цр҃евѣ, ни́же пїѧх̑ вино треби́щъ и҆́дольских̑, и҆ не възвесели́сѧ раба̀ твоѧ во дн҃ь премѣненїѧ да́же до нн҃ѣ·

Точїю ѻ҆ тебѣ на тѧ б҃е а҆враа́мовъ, б҃е могїи на всѣхъ ѹ҆слы́ши гла́съ безнадежных̑ і҆ и҆збави на́съ ѿ рꙋки лꙋкавнꙋю҆щих̑.
і҆ и҆зми мѧ ѿ стра́ха мое҆го·

Глв̑҇а, е҃·

И бысть по трехъ дн҃ехъ е҆гд̑а преста̀ моли́тисѧ, съвлечесѧ съ ри́зъ скорбныхъ, и҆ ѻ҆блечесѧ в ри́зы свѣтлыа.
и҆ бысть добро̀зрачна призыва́ющи всѐвид̑ца б҃а и҆ сп҃сителѧ·

И҆ взѧ̀ двѣ̀ дв҃цѣ съ собою̀ да и҆дет꙽ пред̑зрѧ́щи е҆ді́на, дрꙋга́ѧ же послѣдꙋю҆щи да ѻ҆блегчает̑ ри́зы еѧ̀.
и҆ сїѧ и҆мꙋщи мла́дость красоты свое́ѧ, и҆ лице еѧ̀ ѻ҆съсклаблѧ́ющисѧ ꙗ҆́ко прелюбивѣиша, н̂о срд̑це еѧ̀ стенѧ́ше ѿ стра́ха, и҆ прошед̑ше вс̂ѧ двери ста̀ пред̑ цр҃емъ·

Цр҃ь же седѧ́ше на прс̑҇толѣ црс̑҇тва свое҆го, ѻ҆болченъ въ ри́зы зла́ты съ ка́менїем꙽ мно́гоцѣнным̑, и҆ бѧ́ше стра́шенъ ѕѣло̀.
и҆ възведъ лице свое ѻ҆гневид̑но, и҆ ѕѣлною ꙗ҆́ростїю възрѣ.
и҆ паде цр҃ца і҆ и҆змѣни́сѧ лице еѧ̀ съ ѻ҆слабленїемъ, и҆ преклони́сѧ на главꙋ̀ двцы предъи҆дꙋщеи.
і҆ и҆змѣни б҃ъ дх҃ъ цр҃евъ въ смиренїе, и҆ потща́всѧ сни́де съ престола свое҆го, и҆ въспрїѧ́тъ еѧ̀ любе́зно рꙋкама свои́ма, дондеже ста̀ и҆ ѹ҆тѣши ю҆̀ гл҃ы мирными·

И҆ реч̑҇ е́и чт̂о ти е҆сть е҆сѳи́ръ, а҆зъ е҆смь ꙗ҆́ко бра́тъ твои, дръза́и не ѹ҆́мреши, ꙗ҆́ко ѻ҆б꙽ще повеленїе на́ше е҆сть.
пристꙋпи и взѧ̀ зла́тыи жезлъ цр҃ь възложи на вы́ю еѧ̀,
и ѻ҆блобыза жезлъ е҆сѳи́ръ, и҆ рече гл҃и м̂и·

И҆ реч̑҇ е҆мꙋ вижꙋ т̂ѧ господи́не мои ꙗ҆ко агг҃ла бж҃їѧ, и смѧте́сѧ срд̑це мое ѿ стра́ха сла́вы твое́ѧ,
ꙗ҆́ко ди́венъ е҆си господи́не, и҆ лицѐ твое блгд̑ть ве́лїю и҆́мать·

И҆ е҆гда̀ бесѣ́довати е́и к немꙋ, паде ѡ ѻ҆слабле́нїѧ е҆ѧ̀·

И҆ цр҃ь смѧте́сѧ, и҆ вси рабы̀ е҆го ѹ҆тѣшахꙋ е҆ѧ·

И҆ рече цр҃ь, чт̂о хо́щеши е҆сѳиръ, и чт̂о проше́нїе твое, бꙋдет̑ т̂и да́же и҆ до по́лꙋ црс̑҇тва мое҆го·

И҆ рече е҆сѳи́рь дн҃ь мое҆го празнова́нїѧ, а҆ще ѹ҆бо го́дѣ е҆сть да прїидеши цр҃ю съ а҆ма́номъ на пи́ръ, е҆же творю̀ дне́сь·

И҆ рече цр҃ь ѹ҆борзи́те и҆тѝ по а҆ма́на, да сътво́римъ сло́во е҆сѳи́рино·

И҆ прїидо́ста ѻ҆́ба на пи́ръ е҆же сътвори е҆сѳи́рь·

На пирꙋ же реч̑҇ цр҃ь къ е҆сѳи́ри чт̂о ти е҆сть е҆сѳи́рь цр҃це, и҆ чт̂о е҆сть мы́сль проше́нїѧ твое҆го.
дамъ т̂и и҆ до по́лꙋ црс̑҇тва мое҆го, и҆ сътво́римъ тебѣ е҆лико хо́щеши·

И҆ реч̑҇ е҆сѳи́рь проше́нїе мое и мы́сль моѧ̀, а҆ще ѻ҆брѣто́хъ блгд̑ть пред̑ цр҃емъ.
да прїидетъ цр҃ь и҆ а҆ма́нъ заѹ҆́тра на пи́ръ, е҆гоже сътворю̀ па́ки има·

И҆зы́иде а҆ма́нъ ѿ цр҃ѧ ѕѣ́ло ра́достен꙽ и веселъ·

Ви́дѣв же мардохеѧ і҆ѹ҆деѧни́на на дворѣ цр҃евѣ не подвигнꙋвшасѧ, и҆ не кла́нѧющасѧ пред̑ ним̑ и҆ въз꙽ꙗ҆ри́сѧ ѕѣ́ло, и҆ прїиде въ домъ свои.
посла̀ и҆ призва̀ дрꙋги своѧ̀, и҆ зосарꙋ женꙋ̀ свою.
и҆ показа и҆́ма богатьство свое, и҆ сла́вꙋ е҆ю́же възвели́чи е҆го цр҃ь.
и҆ ꙗ҆́ко сотвори е҆го пе́рвомꙋ бы́ти ѹ него, и҆ правити црс̑҇твїе·

И҆ рече а҆ма́нъ, не зва цр҃ца ни е҆ді́наго на пи́ръ съ цр҃емъ н̂о то́чїю мене, и҆ па́ки наѹ҆́трїѧ възва м̂ѧ.
н̂о сїѧ нѣ́сть м̂и ѹ҆год̑на, е҆гда̀ ви́жꙋ мардое́хѧ і҆ѹ҆деѧни́на сѣдѧ́ща на дворѣ цр҃евѣ·

И҆ рече е҆мꙋ зосара жена е҆го и҆ дрꙋ́зи е҆го, пригото́ви дре́во лакот̑ н҃, и҆ заѹ҆́тра рече́ши цр҃еви да повѣситсѧ мардохе́и на не́мъ.
ты же въни́ди съ цр҃емъ на пи́ръ и҆ весели́сѧ·

И҆ го́дѣ бысть е҆мꙋ гл҃ъ се́и, и пригото́ви дре́во·

Глв̑҇а, ѕ҃·

Гь҃ же ѿѧ̀ со́нъ ѿ цр҃ѧ в но́щи ѻ҆́нои, и҆ повелѣ̀ рабꙋ̀ принести кни́ги па́мѧт̑ныѧ дн҃їи, и҆ прочита́ти е҆мꙋ.
и҆ ѻ҆брѣте в ни́хъ пи́сано, и҆же повѣ́да мардохе́и цр҃ю ѻ҆ двꙋ е҆внꙋ́хꙋ цр҃ьскихъ·

Вънегда̀ стрегꙋщимъ и҆мъ и҆же ѹ҆мы́слиша ѹ҆би́ти цр҃ѧ а҆ртаѯе́рѯа.
и҆ рече цр҃ь кꙋю сла́вꙋ и҆ли блгд̑ть сътвори́хомъ мардохе́ю·

И҆ реко́ша ѻ҆́троцы е҆го нѣси сътвори́лъ е҆мꙋ ничто́же·

Вънегда цр҃ю въпроша́ющꙋ ѻ҆ бл҃годѣѧ́нїи мардохе́еви, и҆ се а҆манъ прїиде на дво́ръ·

И҆ рече цр҃ь кт̂о е҆сть на дворѣ, а҆манъ же прїиде рещи цр҃еви, да повѣситъ мардохе́ѧ на древѣ е҆го́же пригото́ва.
и҆ реко́ша ѻ҆́троцы цр҃евѣ·

Се а҆ма́нъ стои҆тъ на дворѣ, и҆ рече цр҃ь да прїидетъ сѣ́мо·

И҆ рече цр҃ь а҆ма́нꙋ чт̂о сътворю̀ мꙋ́жꙋ е҆гоже а҆зъ хощꙋ просла́вити·

И҆ помы́сли а҆ма́нъ въ мы́сли свое́и, комꙋ̀ хо́щетъ цр҃ь сътвори́ти че́сть ра́звѣ менѐ·

Реч̑҇ же цр҃ю мꙋж́а е҆го́же хощетъ цр҃ь просла́вити, да принесꙋтъ ѻ҆́троцы цр҃евы ѻ҆дежд̑ꙋ цр҃ьскꙋ, е҆ю́же цр҃ь ѻ҆блачит̑сѧ и҆ ко́нь на не́м꙽же цр҃ь е҆здитъ·

И҆ да да́стьсѧ е҆мꙋ ѿ преславныхъ дрꙋгъ цр҃евых꙽.
и҆ да ѻ҆блече́тъ мꙋж́а е҆гоже цр҃ь любитъ, и҆ да посадѧ́тъ е҆го на конь, и҆ проповѣстьсѧ на ѹ҆́лицахъ гра́да гл҃ѧ·

Та́ко да бꙋ́детъ всѧкомꙋ чл҃кꙋ е҆гоже цр҃ь възвели́чит̑·

И҆ рече цр҃ь а҆манꙋ до́бре гл҃еши, та́ко сътвори мардехе́ю і҆ѹ҆деѧни́нꙋ, ѹ҆го́дне слꙋжащемꙋ въ дворѣ на́шем̑, да не и҆зменитсѧ гл҃ъ е҆же ре́клъ е҆си·

И҆ взѧ̀ а҆ма́нъ ѻ҆де́ждꙋ и҆ ко́нь, и҆ ѻ҆блече мардохе́ѧ, и҆ възведе е҆го на ко́нь е҆́здити е҆мꙋ по ѹ҆лицахъ гра́да·

И҆ проповѣдаше пред̑ ни́мъ гл҃ѧ, си́це бꙋ́детъ всѧ́комꙋ чл҃кꙋ, е҆гоже хо́щет̑ цр҃ь просла́вити·

И҆ възврати же сѧ мардохе́и въ дво́ръ цр҃евъ, и҆ а҆манъ и҆де в до́мъ свои скорбѧ̀ ско́рбїю ве́лїею и҆ сказа слꙋча́щаѧсѧ е҆мꙋ зосарѣ женѣ свое́и и҆ всѣ́мъ дрꙋгомъ свои҆мъ·

И҆ рѣша е҆мꙋ дрꙋзи е҆го и҆ жена̀, а҆ще есть племени і҆ѹ҆де́искаго мардохе́и, и҆ нача́лъ е҆си смирѧ́тисѧ пред̑ ним̑, падѧ̀ пад̑неши не мо́жеши проти́витисѧ е҆мꙋ, ꙗ҆́ко б҃ъ жи́въ е҆сть с ним̑·

И҆ е҆ще же гл҃ющимъ и҆мъ, и҆ се прїидо́ша е҆внꙋхи, спѣшно зва́хꙋ а҆ма́на на пи́ръ е҆гоже пригото́ва е҆сѳи́рь·

Глв̑҇а, з҃·

Вни́де же цр҃ь и҆ а҆манъ пирова́ти съ цр҃цею·

И҆ рече цр҃ь е҆сѳи́ри, въ вторы́и дн҃ь на пи́рꙋ, чт̂о е҆сть е҆сѳи́рь цр҃це проше́нїе и҆ моле́нїе твое, и҆ да́м꙽ т̂и до по́лꙋ црс̑҇тва мое҆го·

ѿвѣща е҆сѳи́ръ цр҃ца и҆ рече, а҆ще ѻ҆брѣто́хъ блгд̑ть пред̑ ѻчи́ма твои҆ма цр҃ю.
да да́стьсѧ дш҃а моа̀ проше́нїю мое҆мꙋ и҆ лю́дїе моѝ моле́нїю мое҆мꙋ·

Прода́ны бо е҆смы̀, а҆́з же и҆ лю́дїе моѝ на поги́бель и҆ расхище́нїе и҆ во работꙋ̀.
мы́ же и҆ ча́да наши въ рабы̀ и҆ рабы́нѧ, ꙗ҆́ко нѣсть досто́инъ дїѧ́вол̑҇ до́мꙋ цр҃вꙋ.

И҆ рече цр҃ь кт̂о е҆сть се́и, и҆же дерзнꙋ сътвори́ти ве́щъ сїю·

И҆ реч̑҇ е҆сѳи́рь, чл҃къ вра́гъ а҆манъ лꙋка́въ се́и, и҆ а́бїе а҆ма́нъ смѧте́сѧ пред̑ цр҃емъ и҆ цр҃цею·

Цр҃҃ь же въста съ гнѣ́вомъ ѿ пи́ра, і҆ и́де къ ѻ҆гра́дꙋ·

И҆ а҆ма́нъ же молѧ́ше цр҃цꙋ, и҆ млс̑҇ти проша́ше, видѧше б̂о себе въ бѣдахъ сꙋща·

Възврати́ же сѧ цр҃ь ѿ ѻ҆гра́да, а҆ма́нъ же припаде къ нога́ма цр҃цы молѧ́сѧ сѣдѧ́ще е́и на посте́ли, ви́дѣв꙽ же цр҃ь смѧте́сѧ и҆ рече, ꙗ҆́ко и҆ женꙋ̀ понꙋждает̑ в домꙋ̀ мое҆мъ·

А҆ма́н꙽ же слы́шавъ и҆змѣни́сѧ лице е҆го, рече же вꙋгаѳан̑҇ е҆ді́нъ ѿ скопцевъ сеи же вѣдѧ́ше, ви́дѣвъ дре́во пред̑ до́момъ а҆мановым̑, е҆гда̀ призыва́ше е҆го на ѻ҆бд̑ѣ црс̑҇кїи·

И҆ ѻ҆ се́мъ и҆спыта е҆ді́наго ѿ ѻ҆́трокъ и҆ разꙋмѣвъ замышлѧ́емое·

И҆ рече къ цр҃ю, се и҆ дре́во ѹ҆гото́ва ама́нъ мардохе́ю, гл҃авшемꙋ ѻ҆ животѣ цр҃евѣ·

И҆ стои҆тъ в домꙋ а҆ма́новѣ възвыше́но лако́тъ н҃·

И҆ рече цр҃ь да повѣсит̑сѧ а҆ма́нъ на не́мъ.
и҆ повѣше́нъ бы́сть а҆ма́нъ на дре́вѣ е҆го́же ѹ҆гото́ва на мардохе́ѧ·

и҆ тогда̀ цр҃ь ѹ҆тѣшисѧ ѿ ꙗ҆́рости·

Глв̑҇а, и҃·

И въ то́и дн҃ь цр҃ь а҆ртаѯе́рѯъ дарова е҆сѳи́ри, е҆ли́ка бѧхꙋ а҆манова вра́га і҆ѹ҆де́иска·

и҆ мардохе́и призва́нъ быс̑҇ къ цр҃ю.
повѣ́да б̂о е҆сѳи́ръ ꙗ҆́ко сро́дникъ е҆сть е́и.
и҆ снѧ̀ цр҃ь прьстень свои е҆гоже ѿѧ̀ ѹ҆ а҆мана и҆ да́сть мардохе́еви.
и҆ поста́ви е҆сѳи́ръ мардохе́ѧ надъ до́момъ и҆ надъ всѣмъ и҆мѣнїемъ а҆ма́новымъ.
и҆ гл҃а къ цр҃ю и҆ припадѐ пред̑ нога́ма е҆го, и҆ въспла́ка молѧ́щи е҆го, преврати́ти зло́бꙋ а҆ма́новꙋ.
и҆ мы́сль е҆го и҆же бѧ́ше помы́слилъ на и҆ѹ҆де́и.
и҆ прострѐ цр҃ь е҆сѳи́ри же́злъ зла́тъ.
въста́ же е҆сѳи́ръ и҆ ста̀ пред̑ цр҃емъ и҆ реч̑҇, а҆ще го́дѣ ти е҆сть и҆ ѻ҆брѣто́хъ л̂и блгд̑и̑ть пред̑ тобо́ю.
повелѝ да възвратѧ́тъ писа́нїѧ посла́наѧ ѿ а́мана, и҆миже повелѣлъ погꙋби́тп і҆ѹ҆де́а и҆же ѻ҆бита́ютъ въ всемъ црс̑҇твїи твое҆мъ.
ка́ко б̂о могꙋ̀ ви́дѣти ѻ҆злобле́нїе людїи мои҆хъ, и҆ ка́ко сп҃стисѧ въ поги́бели ѿч҃ества мое҆го·

И҆ рече цр҃ь къ е҆сѳи́ри, а҆ще вс̂ѧ и҆мѣнїѧ а҆́манова далъ е҆сми тебѣ и҆ дарова́хъ тѧ, е҆гоже повѣсиша на́ древѣ, ꙗ҆́ко рꙋцѣ възложѝ на і҆ѹ҆де́ѧ.
чт̂о е҆ще про́сиши, напиши́те и҆ вы̀ и҆́менемъ мои҆мъ, ꙗ҆́коже годѣ е҆сть вамъ.
и҆ запечатлѣ́ите пр́ьстьнем̑ печа́тїю мое́ю, и҆ нѣсть проти́витисѧ и҆мъ·

И҆ возва́ни бы́ша пѣсцы̀ цр҃евы въ а҃, мс̑҇ць, и҆же е҆сть нисанъ к҃г, дн҃ь, того́жъ лѣта.
и҆ написа́ша ѻ҆ і҆ѹ҆де́ехъ ꙗ҆́коже заповѣда мардохе́и, къ нача́лникомъ и҆ къ вельмо́жамъ зе́мнымъ, ѿ и҆нъдїискїѧ страны̀ даже до е҆фїѻ́пїи.
рк҃з, вое҆во́дамъ по землѝ и҆ по страна́мъ по их̑ ꙗ҆зы́кꙋ.
напи́сана же бы́ша веле́нїемъ цр҃евым̑ и҆ запечатлѣшасѧ прьстьнемъ е҆го, и҆ посла́ша писа́нїѧ въско́рѣ, а҆бїе же ноша́ше и҆хъ.
и҆ повелѣ̀ и҆мъ жи́ти по зако́номъ и҆хъ въ всѧ́ком꙽ граде, да помага́ютъ и҆мъ да м꙽стѧтсѧ сꙋперникомъ и҆хъ, ꙗ҆коже хотѧ́т꙽, въ дн҃ь е҆ді́нъ по всемꙋ̀ црс̑҇твꙋ а҆ртаѯе́рѯовꙋ, въ г҃і дн҃ь, в҃і мс̑҇ца, е́же е҆сть а҆да́ръ·

Писа́нїе е҆пистолїи си́це б̂ѣ·

Цр҃ь вели́кїи а҆ртаѯерксъ, ѿ и҆ндїѧ даже до е҆фіѻ́пїи, рк҃з, страна́мъ вое҆во́дамъ и҆ кнѧ́ѕемъ, и҆ послꙋша́ющимъ и҆хъ цѣлова́нїе.
мно́ги чл҃цы мно́гїѧ ради блгс̑҇ти, и҆ ѕѣлно честїа бл҃гихъ дѣлъ, скоро възнесшесѧ мирꙋ не возмого́ша носи́ти.
и҆ не точїю и҆справле́нымъ вамъ възыскꙋют̑ зл̂о твори́ти, н̂о и҆ бл҃годѣ́ющимъ и҆мъ начина́ютъ въ престꙋпленїе въпадати.
не то́кмо ѿ чл҃къ возвыша́ютсѧ блгд̑тїю, н̂о и҆ на сою́зъ пребл҃гаго вѣчнаг̑҇ б҃а и҆ всевид̑ца, възносѧ́щесѧ нена́вистїю лꙋкавою, мнѧт̑ ѻ҆клевета́ти правдꙋ.
ради власте́и множицею мно́гихъ, над нимиж̑ поставлѧ́ютсѧ.
и ѹ҆вѣре́н꙽ныхъ дрꙋ́говъ совѣты мы̀ почина́ти начина́емъ.
ꙗ҆́коже и҆ сие поста́вихъ ради прича́стїѧ кро́ви невин꙽ных̑.

Поне́же ѻ҆клевета винами несътръпи́мыми, со лжею лꙋка́вства ѕла́го возлаганїѧ, ꙗ҆́ко презира́ющих̑ показа̀ нам̑, и҆же дръжа́тъ непоколѣби́мо бл҃горазꙋмїе.
и҆ лѣть ва́мъ е҆сть зрѣти, толи́ко въ древнихъ, ꙗ҆коже и҆ въ настоа́щихъ възыска́ющих̑ непрпд̑бно, црс̑҇твїѧ ради тщеты и҆ властелствꙋю҆щихъ.
ꙗ҆ко сътворена по́ чинꙋ, писанїем꙽ пода́хом̑.
тако и҆ в̂ы внимати по сих̑ зрите.
понеж̑ м̂ы преложи́вшесѧ сътвори́хом̑сѧ премѣнными.
сего ради да црс̑҇твїе непоколѣби́мо и҆ съ ми́ром꙽ пребꙋдет̑.
находѧ́щаѧ же проти́вꙋ м̂ы съ ꙗ҆́ростїю ѕѣлною расꙋжаем̑.
ꙗ҆́коже и҆ сего а҆ма́на сн҃а а҆мадаѳꙋева македонѧнина, и҆стин꙽ны чюжд̑аго, и҆ кро́ви перьскїа мно́го не съгла́снаго.
на́шеѧ ради бл҃гости ю҆́же и҆мѣе҆мъ къ всѧ́комꙋ ꙗ҆зы́кꙋ чл҃колю́бїа.
лꙋчисѧ е҆мꙋ страньствꙋѧ, приложи́тисѧ к нам̑ въ толи́ко, ꙗ҆́ко и҆ прозва́нꙋ быти ѿ нас̑҇ ѿц҃емъ, и҆ покланѧ́емꙋ быти ѿ всѣхъ чл҃къ, и҆ вто́рое лице црс̑҇кого престола поста́вленꙋ быти.
го́рдости же дѣльма е҆го мнѣ́лъ насъ нача́ла лишити, и҆ ѿ дх҃а на́шего сп҃са·

Ꙗ҆́коже и҆ бл҃говолѧ́щаго всѣмъ мардохе́ѧ, и҆ неѻ́скверненыѧ е҆сѳи́ри цр҃ьствїѧ ѻ҆бщителницы съ всѣмъ племенем̑ си́хъ, ѕѣло ѹ҆хищре́ннымъ вожделѣнїемъ ꙗ҆ко престꙋпниковъ, и҆спроси́лъ е҆сть въ потребленїе.
и҆ симъ побїенымъ са́мъ ѻ҆́нъ мнѣлъ е҆сть вла́сть перьскꙋю въ македо́нїю пренести, и҆ насъ пꙋ́сты сътвори́ти·

Мы́ же не ѻ҆брѣта́емъ съгрѣшенїѧ і҆ѹ҆деѻ́въ пра́вед̑ныхъ въ поги́бель.
и҆же не сꙋть ѕл̂одѣла́тели.
н̂о е҆щѐ паче правед̑ными зако́нами ѹ҆строе́ни, и҆же сꙋть вели́каго вышнѧго б҃а жива́го, сн҃ъми.
и҆справлѧ́ющаго прародителеи на́ших̑ црс̑҇твїе въ ѹ҆строе҆нїи бл҃жа́ишемъ нам̑·

И҆ сего ради ѹ҆бо бл҃го твори́те им̑.
не възлагающесѧ на них̑ писаными е҆пистолїѧ́ми ѿ а҆ма́на сн҃а а҆мадаѳꙋева·

Понеже е҆го сего ради лꙋка́въства повелѣхом̑ при вра́техъ сꙋсаньских̑ повѣсити, съ всѣми дома́шними е҆го.
по чинꙋ вседръжи́телѧ б҃а, спѣшно възда́вшаго е҆мꙋ сꙋдъ·

Си́цева писа́нїа е҆пистолїи посла́ни быша, в коюждо стран́ꙋ, съ прпд̑бїемъ дарова́ти і҆ѹ҆де́ѻмъ зако́ны и҆хъ своиственыѧ под̑ѹ҆крѣплѧ́ти.
ꙗко да и҆ съпроти́вльшїисѧ въ времѧ печа́ли и҆хъ, не пребꙋдꙋтъ ѹ҆ ни́хъ, до днѧ, г҃і, мс̑҇ца, в҃і, и҆же е҆сть а҆даръ, в꙽ самы́и дн҃ь, е҆го прежде ѻ҆писа̀ ва́мъ а҆ман̑҇.
ѹ҆твръжа́ѧи же всѧческаѧ б҃ъ, въ мѣсто погꙋбленїа правед̑наго ꙗ҆́зыка, сътвори и҆мъ веселїе·

Сего ради и҆ в̂ы въ па́мѧтехъ ва́шихъ празнованїи, назнаменова́нныи дн҃ь и҆сто́выи всѧческою радостїю тво́рите·

да́же и҆ нн҃ѣ и҆ по си́хъ, въ г҃і дн҃ь, по всемꙋ црс̑҇твꙋ артаѯерѯовꙋ, мс̑҇ца в҃і, е҆же е҆сть а҆да́ръ.
видѣвше сꙋще въ сꙋсѣ и҆ѹ҆дее възра́довашасѧ·

И҆ быс̑҇ и҆мъ просвѣщенїе и҆ веселїе по градом̑ и҆ по странам̑, и҆дѣже а҆ще пред̑ложено быс̑҇ повелѣнїе цр҃ево.
ра́дость и҆ весе́лїе и҆ пирова́нїе і҆ѹ҆де́ѻм̑, и҆ мно́ѕи ѿ ꙗ҆зы́къ ѻ҆брѣза́хꙋсѧ і҆ и҆ѹ҆де́ствова́хꙋ стра́ха ради і҆ѹ҆де́иска·

Глв̑҇а, ѳ҃·

Въ в҃і мс̑҇цъ и҆же ес̑҇ а҆да́ръ въ г҃і дн҃ь, прїидо́ша писа́нїа ѿ цр҃ѧ·

И҆ въ то́и же дн҃ь погибо́ша сꙋпоста́ти і҆ѹ҆деем̑ ни е҆ді́нъ б̂о противѧ́сѧ и҆м꙽ боѧ́сѧ их̑·

Нача́лствꙋ́ющи б̂о странам̑ и҆ власте́лїе црс̑҇тїи и҆ книгочїа почита́хꙋ и҆ѹ҆деа, стра́хъ б̂о мардꙋхе́евъ належа́ше на́ нѧ·

Приложи бо сѧ повелѣ́нїе цр҃ево и҆менова́тисѧ по всемꙋ црс̑҇твїю.
и҆ въ сꙋсанѣ гра́ди поби́ша і҆ѹ҆де́и пѧтьсо́т꙽ мꙋжїи, фарса́на, неста́ина, и҆ дельфо́на, и҆ фасга́на, и҆ фардаѳа́на, и҆ вареа, и҆ сарвака́на, и҆ мармаси́ма, и҆ а҆рꙋфе́ѧ, и҆ а҆рсеѧ, и҆ завꙋѳеѳа́ма, и҆ і҃, сн҃овъ а҆мановыхъ а҆мадаѳꙋева вра́га і҆ѹ҆деѻм̑, и҆же ѿ ѳармаѳе́ѧ, и҆ разграби́ша въ то́и дн҃ь и҆мѣ́нїѧ и҆хъ.
и҆ сказа́ша число̀ и҆збїеныхъ цр҃ю въ сꙋсѣ гради.

И рече цр҃ь къ е҆сѳири и҆збиша і҆ѹ҆деи въ сꙋсѣ гради пѧть сот̑ мꙋже́и, и҆ по ѻ҆́крс̑҇тныхъ стра́нахъ коли́ко мни́ши погꙋби́ша, и҆ чт̂о е҆ще про́сиши и҆ бꙋдетъ т̂и·

И҆ рече е҆сѳиръ къ цр҃ю, да да́стьсѧ такожде і҆ѹ҆де́ѻмъ твори́ти заѹ҆́тра, ꙗ҆́ко да повѣсѧт꙽ і҃ сн҃овъ а҆мановых̑.
и҆ повелѣ цр҃ь та́ко быти, і҆ и҆зложи і҆ѹ҆деѻмъ внѣ гра́да повѣсити телеса сн҃ов꙽ а҆мановых̑·

И҆ събра́шас̑҇ і҆ѹ҆деи и҆же в꙽ сꙋсѣ гра́ди въ д҃і дн҃ь а҆да́ра мс̑҇ца, і҆ из̑би́ша мꙋжїи т҃, и҆ ничтож̑ разграби́ша, про́чїи же і҆ѹ҆де́и и҆же по всемꙋ црс̑҇твїю събра́шасѧ и҆ себѣ пособлѧ́хꙋ и҆ почи́ша ѿ бра́неи, и҆зби́ша ѿ них̑ ҂е҃і, ничтож̑ расхити́ша и҆ почи́ша·

Написа же цр҃ь по всемꙋ црс̑҇твїю свое҆мꙋ, е҆же на́ мори и҆ на землѝ.
и҆ си́лꙋ свою и҆ мꙋжестве́на и҆справле́нїа бога́тество же и҆ сла́вꙋ црс̑҇твїа свое҆го.
се пи́сано е҆сть въ кни́ѕѣ персѧ́номъ и҆ мѣдѧномъ на па́мѧть·

ꙗ҆́ко мардохе́и вторыи б̂ѣ по цр҃и а҆ртаѯерѯѣ, и҆ вели́къ б̂ѣ въ црс̑҇твїи, и҆ преславенъ и҆ люби́мъ ѻ҆ і҆ѹ҆дее҆хъ.
и҆ повѣда́ша съдѣѧ́нънаѧ всемꙋ ꙗ҆зы́кꙋ и҆хъ·

И҆ рече мар꙽дохе́и ѿ б҃а бы́ша сїѧ.
помѧнх̑ꙋ бо ѻ҆ сонїи е҆гоже ви́дх̑ѣ ѻ҆ словесех̑ сихъ.
ниже б̂о преминꙋ ѿ си́хъ рѣчь·

Малыи и҆сточникъ и҆же бысть рѣка и҆ свт̑ѣ и҆ слн҃це, и҆ вода̀ мно́га.
е҆сѳи́ръ ес̑҇ рѣка ю҆́же възлюби цр҃ь, и҆ сътвори цр҃цю, и҆ в҃ ѕмїи аз̑ е҆смь и҆ а҆ман̑҇·

Ꙗ҆́зы́цы же събра́вшесѧ и҆стреби́ти имѧ і҆ѹ҆деѻм̑, и҆ ꙗ҆зы́къ мои се́и е҆сть і҆и҆л҃ь въпїю́ще къ б҃ꙋ и҆ сп҃сошасѧ·

И҆ сп҃се г҃ь лю́ди своѧ̀ і҆ и҆зба́ви нас̑҇ г҃ь ѿ всѣ́хъ ѕолъ сихъ·

И҆ сътвори б҃ъ зна́менїѧ и чюдеса ве́лїѧ ꙗ҆́же не быша въ ꙗ҆зы́цехъ·

И҆ сего ради сътвори в҃ жребїи, е҆динаго лю́демъ бж҃їимъ, и҆ е҆ді́наго всѣмъ ꙗ҆зы́ком̑.
і҆ и҆зыидо́ша в҃ жре́бїи сїи в꙽ час̑҇ и҆ вре́мѧ и҆ въ дн҃ь сꙋда пред̑ гм҃ъ въ всѣхъ ꙗ҆зы́цехъ·

И҆ помѧнꙋ г҃ь б҃ъ лю́ди своѧ, и҆ ѻ҆правда достоѧ́нїе свое, и҆ бꙋдꙋтъ и҆мъ дн҃и сїѧ въ мс̑҇цъ а҆да́ръ въ д҃і, и҆ е҃і мс̑҇ца сего съ собо́ромъ и҆ ра́достїю и҆ съ веселїемъ пред̑ бм҃ъ въ ро̑ въ вѣ́къ въ лю́дех̑ свои҆хъ·

Коне́цъ кни́ѕе е҆сѳи́ри, и҆́мать в себѣ глв̑҇а, ѳ҃·