Библия (1581). [21] Иов

КНИ́ГА І҆Ѡ҆ВЪ

ГЛАВА ПЄР̀ЬВА́Ꙗ

Мꙋжъ бѣ̀ въ земли хꙋсъ и҆менем̑ і҆́ѻвъ·

Бѣ чл҃къ то́и, и҆́стиненъ непоро́ченъ пра́веденъ, бл҃гочести́в꙽, ѹ҆далѧа́сѧ ѿ всѧког̑҇ ѕл̂а дѣанїа<.>

Бысть же е҆мꙋ сн҃овъ сед̑мь, и҆ дще́рѧ тр̂и.
и҆ б̂ѣ скот̑ е҆го, ѻ҆ве́цъ, ҂з҃, вельблюд̑, ҂г҃. сꙋпрꙋ́гъ воло́вых̑, е҃ сот̑.
и҆ ѻ҆сли́ць пасо́мыхъ пѧ́ть сот̑ стад̑·

и҆ слꙋж́ба е҆мꙋ многа ѕѣ́ло, и҆ дѣ́ла ве́лїа ѻ҆ нем̑ бѣша на землѝ·

И҆ бѧше чл҃къ то́и до́бра ро́дꙋ, ѿ востокъ слн҃чъных꙽·

Съходѧ́ще же сѧ сн҃ове е҆го къ себѣ, и҆ творѧ́хꙋ пиръ по всѧ̀ дн҃и, пое҆млющесѧ въкꙋпѣ, и҆ тр̂и сестры своа, ꙗ҆́сти и҆ пити с ни́ми·

е҆гда же скончахꙋсѧ дн҃їе пи́ра.
посыла і҆́ѻ҆въ, и҆ чищаше их̑·

въста́ю҆щи заѹ҆́тра, приноша́ше за нихъ жрътвы по числꙋ и҆хъ, и҆ телецъ е҆ді́нъ ѻ҆ грѣсѣхъ за дш҃а их̑·

Гл҃аше б̂о і҆́ѻвъ, е҆гда како сн҃ове мои въ ра́зꙋмѣ свое҆мъ ѕл̂о помы́слиша къ б҃ꙋ.
та́ко ѹ҆бо творѧше і҆́ѻвъ по всѧ̀ дн҃и·

И҆ е҆гда бысть ꙗ҆́ко се́и дн҃ь.
и҆ с̂е прїидо́ша а҆́гг҃ли бж҃їѝ, пред̑ста́ти пред̑ гм҃ъ, и҆ дїа́волъ прїиде с ни́ми·

И҆ рече г҃ь дїа́волꙋ, ѿкꙋдꙋ прїиде.
и҆ ѿвѣща дїа́волъ и҆ реч̑҇ гв҃и·

ѻ҆бхождь зем̑лю, и҆ прохо́жд̑ь под̑нбс̑҇нꙋю прїидохъ·

И҆ реч̑҇ е҆мꙋ г҃ь, помы́слил̑҇ ли е҆си ѹ҆бо на раба̀ мое҆го і҆́ѻва, ꙗ҆́ко нѣсть чл҃ка такова̀ ѿ сꙋщих̑ на́ зем̑ли непоро́чна пра́вед̑на и҆́стинна бл҃гочести́ва, ѹ҆далѧ́асѧ ѿ всѧкаго ѕл̂а дѣа́нїѧ·

ѿвѣща же дїа́волъ, пред̑ гм҃ъ и҆ рече.
е҆гда̀ тꙋне чтетъ і҆́ѻвъ г҃а.
не ты̀ л̂и ѻ҆гради внѣшнѧа е҆го и҆ внꙋтренѧѧ до́мꙋ е҆го, и҆ вс̂е сꙋщее ѻ҆́крс̑҇тъ е҆го·

дѣ́ла же рꙋкꙋ е҆го блс̑҇вил̑҇ е҆си, и҆ ско́ты е҆го мно́ги сътвори́лъ е҆си на землѝ.
н̂о послѝ рꙋкꙋ твою̀ и҆ косни́сѧ въ всѐ е҆же и́мать.
а҆ще ѹ҆бо въ лице т̂ѧ блс̑҇ви́тъ·

Тогда̀ рче г҃ь дїаволꙋ, с̂е все е҆лико е҆сть е҆го предаю въ рꙋ́цѣ твоѝ, само́го же не косни́сѧ·

І҆ и҆зыиде дїа́волъ ѿ лица̀ гн҃ѧ·

И҆ б̂ѣ ꙗ҆́ко се́и дн҃ь, сн҃ве і҆́ѻ҆вови и҆ дще́рѧ е҆го ꙗ҆дѧ́хꙋ и҆ пїа́хꙋ вино̀, въ домꙋ̀ бра́та свое҆го старѣ́ишаго·

И҆ с̂е вѣстникъ прїиде къ і҆́ѻ҆вꙋ, и҆ реч̑҇ е҆мꙋ.
сꙋпрꙋ́гъ воловъ ѻ҆рѧхꙋ, и҆ ѻ҆слицы пасѧ́хꙋ близъ их̑, и҆ пришед̑ше плѣнѧ́ющеи плѣниша и҆хъ, и҆ рабы̀ ѹ҆би́ша мечем꙽, а҆́з же ѻстах̑ е҆ді́нъ, и҆ прїидохъ възвѣсти́ти тебѣ̀·

Є҆щѐ семꙋ гл҃ющꙋ прїиде дрꙋгыи вѣстникъ и҆ рече къ і҆́ѻ҆вꙋ.
ѻ҆́гнь падѐ съ нб҃се на́ землю и҆ пожъже ѻ҆́вца, и҆ пасты́рѧ поꙗ҆́сть та́кожд̑е, а҆́з же ѻ҆стахъ е҆ді́нъ, и҆ прїидохъ възвѣстити тебѣ·

Є҆ще же семꙋ̀ гл҃щꙋ прїиде дрꙋгїи вѣ́стникъ и҆ реч̑҇ къ і҆́ѻ҆вꙋ.
кон꙽ницы сътвори́ша че́ты тр̂и, и҆ ѻ҆быидоша вельблю́ды и҆ плѣни́ша их̑, и҆ рабы̀ ѹ҆би́ша мечем꙽, а҆з же ѻ҆стах̑ е҆ді́нъ, и҆ прїидо́хъ възвѣстити тебѣ·

Є҆ще же и҆ семꙋ̀ гл҃ющꙋ, и҆́нъ вѣстникъ прїиде гл҃ѧ къ і҆́ѻ҆вꙋ.
сн҃омъ твои҆мъ и҆ дще́рѧмъ, ꙗ҆дꙋщ́имъ и҆ пїющимъ ѹ҆ бра́та и҆хъ старѣ́ишаго, и҆ вънеза́пꙋ вѣтръ вели́къ наи҆де ѿ пꙋстынѧ, и҆ коснꙋсѧ въ четы́ри ѹ҆́глы храмины, и҆ падѐ хра́мина на дѣти твоѧ̀ и҆ ѹ҆мроша, а҆́з же ѻ҆ста́хъ е҆ді́нъ, и҆ прїидохъ възвѣсти́ти тебѣ·

И҆ с̂е ѹ҆слы́ша і҆́ѻ҆въ въста̀ и҆ растерѕа ри́зы своа̀, и҆ постриже вла́сы главы своеѧ, и҆ посы́па пр́ьстїю.
и҆ пад̑ на́ землю поклони́сѧ гв҃и и҆ рече.
а҆зъ б̂о на́гъ и҆зыидохъ ѿ чре́ва мт҃ре мое́ѧ, на́гъ и҆ пои҆дꙋ·

Гь҃ да́сть и҆ г҃ь взѧ̀, ꙗ҆коже и҆зволи́сѧ гв҃и, та́ко и҆ бысть, бꙋ́ди и҆мѧ гн҃е блс̑҇ве́но въ вѣки·

ѿ всѣхъ си́хъ слꙋчившихсѧ е҆мꙋ, ничи́мже і҆́ѻ҆въ съгрѣши пред̑ бм҃ъ, н̂и въ ѹ҆стнꙋ своею и҆ не да́сть безꙋмїа б҃ꙋ·

Глв̑҇а, в҃·

Бысть же а҆ки се́и дн҃ь, и҆ прїидоша а҆гг҃ли бж҃їѝ пред̑ста́ти пред̑ гм҃ъ.
и҆ дїа́волъ прїиде посредѣ и҆хъ.
и҆ рече г҃ь дїа́волꙋ ѿкꙋдꙋ прїиде·

тогда̀ реч̑҇ дїа́волъ пред̑ гм҃ъ.
ѻ҆бхожд̑ь вс̂ю зе́млю, и҆ прохо́ждь под̑нбс̑҇нꙋю и҆ прїидохъ·

И҆ рече г҃ь къ дїа́волꙋ, помы́слилъ е҆си ѹ҆бо на раба̀ мое҆го і҆́ѻ҆ва.
ꙗ҆́ко нѣсть такова ѿ сꙋщихъ на́ земли, чл҃ка подо́бна е҆мꙋ незлоби́въ правди́въ и҆́стиненъ бл҃гочестивъ ѹ҆далѧ́асѧ ѿ всѧкаго ѕл̂а, е҆ще же и҆ незлобїѧ дръжит̑сѧ·

Ты же рече, и҆мѣнїе е҆го погꙋби́ти вътще.
ѿвѣща же дїа́волъ гв҃и реч̑҇.
ко́жꙋ за ко́жꙋ и҆ всѧ̀ е҆ли́ка и́мать чл҃къ дасть за дш҃ꙋ свою.
и҆ ника́кож̑ н̂о послѝ рꙋкꙋ свою, и҆ косни́сѧ пло́ти и҆ ко́стеи е҆го, а҆ще ѹ҆бо въ лице т̂ѧ блс̑҇витъ·

Рече же г҃ь дїа́волꙋ, с̂е предаю т̂и е҆го, то́кмо дш҃ꙋ е҆го съблюдѝ·

И҆зыиде же дїа́волъ ѿ лица̀ гн҃ѧ и҆ порази і҆́ѻ҆ва гно́емъ лю́тым̑, ѿ главы̀ и҆ до но́гꙋ.
и҆ взѧ̀ і҆́ѻвъ чрепъ да ѻ҆стрꙋга́ет꙽ гно́и свои, и҆ сѣдѧ́ше на гно́ищи внѣ гра́да·

Времени́ же мно́гꙋ минꙋвшꙋ.
рече к немꙋ жена̀ е҆го гл҃ѧ доко́лѣ тръпи́ши, с̂е пожд̑ꙋ времѧ е҆щѐ ма́ло ча́ѧ надѣа҆нїѧ сп҃се́нїѧ мое҆го.
се б̂о потреби́сѧ ѿ землѧ̀ памѧть твоа.
сн҃ове твоѝ и҆ дще́рѧ мое҆го чре́ва печа́ли и҆ болѣзни, и҆́хже вотще родих̑ съ болѣзнїю·

Ты же самъ въ гноѝ и҆ червех̑ сѣди́ши ѻ҆бнощъ внѣ безъ покро́ва·

А҆́з же преходѧ́щи рабо́таѧ, мѣсто ѿ мѣста, ѻ҆бходѧ́щи и҆ до́мъ ѿ до́мꙋ, ча́юще солне́чнаго захожденїѧ, да почі́ю ѿ болѣзни и҆ трꙋда и҆же м̂ѧ нн҃ѣ ѻ҆бдержат̑.
н̂о рцы̀ нѣ́кїи гл҃ъ къ г҃ꙋ и҆ ѹ́мри.
ѻ҆́н же възрѣвъ на ню̀ и҆ рече, чт̂о ты̀ а҆ки е҆ді́на ѿ безꙋмных̑ же́нъ с̂е гл҃а.
а҆ще бл҃гаѧ прїѧ́хом꙽ ѿ рꙋкѝ гн҃ѧ, ѕлаго не сътерпим̑ ли·

ѿ всѣхъ си́хъ прилꙋчи́вшихсѧ е҆мꙋ, ничи́мъже съгрѣши і҆́ѻ҆въ пред̑ гм҃ъ бм҃ъ ѹ҆стна́ма и҆ не да́сть безꙋмїа б҃ꙋ·

Слы́шавше же трїе дрꙋѕи е҆го вс̂е ѕло́е нашед̑шее на́нь, прїидо́ша кождо ѿ свое́ѧ страны̀ к немꙋ.
е҆лифа́съ ѳема́ньскїи цр҃ь.
вельда́дъ савхеискїи мꙋчи́тель.
софарь минѣискїи цр҃ь.
и҆ прїидо́ша к немꙋ въкꙋпѣ ѹ҆тѣшити и҆̀ и҆ посѣти́ти е҆го.
ви́дѣвше же е҆го и҆здале́ча и҆ не познаша̑·

И възопи́ша гла́сомъ велїимъ въспла́кашасѧ растерзавше ко́ждо ѻ҆деждꙋ свою̀, и҆ посы́павше пе́рьстїю главы̀ своѧ̀.
сѣдѣша ѹ҆ него сед̑мь дн҃їи и҆ сед̑мь но́щїи, и҆ никто́же ѿ них̑ воз꙽гл҃а к немꙋ словесѐ.
ви́дѧхꙋ б̂о ꙗ҆́звꙋ лю́тꙋ сꙋщꙋ и҆ вели́кꙋ ѕѣло·

Глв̑҇а, г҃·

Посемъ ѿвръзе і҆́ѻ҆въ ѹ҆ста̀ своѧ.
и҆ проклѧ́тъ дн҃ь свои гл҃ѧ.
да поги́бнетъ дн҃ь воньже родих̑сѧ, и҆ но́щь в нюж̑ рѣша, с̂е е҆сть мꙋж́ескъ полъ.
т̂а но́щь бꙋ́ди тма̀.
и҆ да не и҆зыщет̑ г҃ь съвыше е҆ѧ̀, и҆ да не прїидет̑ на ню̀ свт̑ѣ, и҆ да прїимет̑ ю҆̀ тма̀ и҆ стѣнь смр҃тныи, да прїидет̑ на ню̀ сꙋмрак̑҇ и҆ да проклѧт̑ бꙋ́ди дн҃ь то́и, и҆ т̂ꙋ нощ̑҇ да пости́гнет̑ тма̀.
не бꙋ́ди въ дн҃и лѣта н̂и бꙋди въчтенъ въ дн҃и мс̑҇ць.
нощ̑҇ т̂а бꙋди болѣзнь, и҆ не прїиди на ню̀ веселїе и҆ ра́дость.
н̂о да проклинет̑ е҆ѧ̀ проклина́ѧи того дн҃е, и҆же и҆́мать начина́ти вели́кїи кит̑.
да помер꙽кнт̑ꙋ и҆ ѕвѣзды то́ѧ но́щи, и҆ да не стерпит̑ н̂и на свт̑ѣ да не прїидет̑.
и҆ да не призрит̑ деньни́ца въсїѧ́ющи, ꙗ҆́ко не затвори вра́та чрева мт҃ре мое́а·

но ѿгна̀ ѹ҆бо бо́лѣзнь ѿ ѻ҆чїю мое́ю.
почто б̂о въ ѹ҆тробѣ не ѹ҆мрох̑.
и҆ ꙗ҆ко и҆с чрева из̑шед̑ и҆ а́бїе не гибохъ.
почто́ же м̂ѧ срѣтоста колѣни.
почто́ же със꙽сах̑ сесца.
нн҃ѣ ѹ҆бо а҆ще ѹ҆снꙋлъ бых̑ ѹ҆молчꙋ, почил̑҇ бых̑ съ цр҃ьми съвѣтники землѧ̀ и҆же хвалѧхꙋсѧ ѻ҆рꙋжїи, и҆л̂и съ кнѧ́ѕи и҆мже много злато и҆ наполни́ша до́мы своа сребра̀.
и҆л̂и ꙗ҆́кож̑ и҆́звергъ и҆злазѧ и҆з ложе́снъ мт҃ре.
и҆ли ꙗ҆́ко младенцы и҆же не ви́дѣша свѣта·

Тꙋ нечьсти́вїи раждего́ша̑сѧ ꙗ҆́ростїю гнѣ́ва.
т̂ꙋ почи́ша претрꙋжд̑енїи тѣломъ.
въкꙋпѣ же вѣчнїи не слы́шаша гла́са събира́ющаго да́нь.
ма́лъ и҆ вели́къ т̂ꙋ е҆сть, и҆ рабъ боѧ́исѧ господи́на свое҆го.
почто б̂о да́нъ е҆сть сꙋщим̑ въ го́рести свт̑ѣ, и҆ болѣзненам̑ дш҃амъ животъ, и҆же жела́ют̑ смр҃ти и҆ не полꙋча́ют̑.
и҆скопова́юще ꙗ҆́ко съкровища, ѻ҆брадованиж̑ быва́ютъ а҆ще ѹ҆лꙋчатъ.
смр҃ть б̂о мꙋж́ꙋ поко́и, затво́ритъ б̂о б҃ъ ѻ҆ немъ.
прьвѣе б̂о бра́шна мое҆го въздыха́нїе м̂и прїиде.
слежꙋ же а҆зъ ѻ҆дръжи́мъ стра́хомъ.
стра́хъ б̂о ѻ҆ нем же сѧ ѹ҆жасахъ прїиде м̂и.
и҆ е҆гоже боѧ́хсѧ срѣте м̂ѧ.
н̂и ѹ҆мирих̑ н̂и ѹ҆молчахъ, н̂и почихъ, наи҆де м̂и гнѣ́въ·

Глв̑҇а, д҃·

Ѿвѣща́ же е҆лиѳа́съ фема́нитинъ гл҃ѧ.
е҆гда̀ мно́жицею гл҃ано т̂и бысть въ трꙋдѣхъ.
крѣпость же гл҃ъ твои҆хъ кто̀ стерпи́тъ.
а҆ще бо ты̀ наѹ҆чилъ е҆си мно́ги, и҆ рꙋцѣ немо́щнаго ѹ҆тѣшилъ е҆си.
немо́щныѧ же въздви́глъ е҆си словесы, колѣнома же немо́щныхъ дръзостїю ѻ҆бложи́лъ е҆си.
нн҃ѣ же прїиде на́ тѧ бо́лезнь и҆ коснꙋ ти сѧ, тыж̑ потща́сѧ.
коѐ ѹ҆бо не страх̑ л̂и твои е҆сть въ безꙋмїе, и҆ наде́жа твоѧ̀ и҆ злоба пꙋти твое҆го.
помѧни́ же ѹ҆бо кт̂о чи́стъ сы́и поги́бе, и҆л̂и когда̀ и҆́стиннїи вс̂и и҆с корене поги́боша̑, ꙗ҆́коже видх̑ѣ ѻ҆рꙋщихъ зло́бою, и҆ сѣ́ющїи же ѧ҆̀ печа́ли по́жнт̑ꙋ себѣ̀.
ѿ повелѣнїѧ гн҃ѧ поги́бнꙋт꙽.
ѿ дх҃а гнѣва е҆го и҆счезнꙋтъ.
сила львова, гла́съ же льви́ца, хвале́нїе же змїево ѹ҆гасѐ·

Мравїи льва погꙋбѝ, зане же не и҆мѣа́ше бра́шна.
лви́чищаж̑ львовы ѻ҆ста́виша дрꙋ́гъ дрꙋга.
а҆ще л̂и гл҃ъ кїи и҆́стиненъ б̂ѣ въ словесѣхъ твои҆хъ.
никое҆ же ѹ҆бо ѿ сих̑ бы т̂ѧ срѣло ѕло́е.
коѐ ѹ҆бо не прїиметъ ли м̂и ѹ҆́хо вла́сти, ѿ него́же стра́хомъ и҆ гла́сомъ но́щнымъ напада́ѧ стра́хъ на чл҃кы.
гроза же м̂ѧ срѣте и҆ трепетъ, и҆ ѕѣло ко́сти моа сътрѧсѐ·

И҆ дх҃ъ на лице м̂и наи҆де.
ѹ҆страшиша же ми сѧ вла́си и҆ плъти, въстах̑ и҆ не разꙋмх̑ѣ.
видх̑ѣ и҆ не бѣ̀ ѻ҆бличїѧ пред̑ ѻ҆чима мои́ма, н̂о дх҃ъ и҆ глас̑҇ слы́шах̑.
чт̂о б̂о е҆гда̀ чи́стъ бꙋдетъ чл҃къ пред̑ бм҃ъ.
и҆л̂и ѿ дѣлъ своихъ бес поро́ка мꙋжъ·

А҆ще на рабы̀ своа не вѣрꙋет̑, на а҆гг҃лы своѧ жестоко.
чт̂о помы́слилъ на живꙋщих же въ берныхъ хлѣвинах̑, ѿ них̑ же и҆ сами ѿ того же бернїа е҆смы̀.
порази и҆хъ ꙗ҆́коже мо́лїе, и҆ ѿ ѹ҆тра да́же до́ вечера ꙗ҆́ко не сꙋть.
зане же не мого́ша себѣ помощѝ погибо́ша.
дꙋ́нꙋ же ѹ҆бо на нѧ і҆ и҆схоша.
погибо́ша зане же не и҆мѣѧхꙋ премꙋдрость·

Глв̑҇а, е҃·

Призови́ же а҆ще т̂ѧ ѹ҆слы́шитъ, и҆л̂и а҆ще кого ст҃ых̑ а҆гг҃лъ ѹ҆́зриши.
безꙋмнаг̑҇ б̂о ѹ҆бїетъ гнѣвъ, заблꙋжд̑ьшаго же ѹ҆морит̑ рвенїе·

А҆́зъ же ви́дѣхъ безꙋмныѧ коренїе пꙋстѧща, н̂о а҆бїе поꙗ҆дено бысть и҆хъ бра́шно·

далече да бꙋ́дꙋтъ сн҃ове их̑ ѿ сп҃се́нїѧ, да и҆стрѧсꙋтсѧ при дверех̑ хꙋждъших̑, и҆ не бꙋ́детъ и҆зима́ѧи·

Ꙗ҆́же б̂о ѻ҆ни събраша, правед̑ницы ꙗ҆́дѧ́тъ.
са́ми же ѿ золъ не и҆зѧ́ти бꙋдꙋтъ, и҆змо́ждана бꙋди крѣпость их̑.
не и́мать б̂о ѿ землѧ̀ и҆зыти трд̑ꙋ, н̂и ѿ горъ проѕѧ́бнꙋти бо́лѣзни, н̂о чл҃къ ражд̑а́етсѧ трꙋдомъ, птищи же ѻ҆рли высо́ко па́рѧтъ·

Ника́коже н̂о а҆зъ помолю́сѧ бв҃и, г҃а же всѣхъ влд̑кꙋ призовꙋ̀, творѧ́щаго ве́лїѧ и҆ неи҆слд̑ѣнаѧ, сла́вна же і҆ изрѧд̑на и҆́мже нѣсть числа̀·

да́ющаго до́ждь на́ землю, пꙋща́юща же во́дꙋ на под̑нбс̑҇нꙋю·

Творѧщаг̑҇ же смире́ныѧ на высотꙋ, и҆ поги́б꙽шаѧ въздвиза́ющаго·

Расточающаго совѣты лꙋка́вых̑, и҆ не и́мꙋть сътвори́ти рꙋки их̑ и҆́стины·

Разꙋмѣва́ѧи въ мꙋдрости премꙋдрыѧ, совѣты же мно́гоплетенныхъ ѹ҆дивѝ·

Въ дн҃ехъ срѧ́щетъ их̑ тма, въ полꙋ́дне же да ѻ҆сѧ́жꙋтъ ꙗ҆́коже в но́щи·

И҆ да поги́бнꙋтъ на́ брани, немощныи же да и҆зы́идетъ и҆з рꙋки си́лна·

Бꙋ́ди же немо́щномꙋ надежда, непра́вед̑наго же ѹ҆ста загражд̑ена бꙋ́дꙋтъ·

Бл҃женъ же чл҃къ е҆гож̑ ѻ҆бли́чит̑ б҃ъ.
наказанїѧ же вседръжителѧ не ѿвраща́исѧ, то́и б̂о болѣти тво́ритъ, и҆ па́ки ѹ҆строит̑.
поразит̑ л̂и и҆ рꙋцѣ е҆го и҆сцѣлисте·

шестижды ѿ бѣдъ и҆зметъ т̂ѧ, въ седмѣм же не косне́тъ ти сѧ ѕло·

Въ гла́дѣ и҆зба́вит꙽ тѧ ѿ смр҃ти, на бра́ни же и҆з рꙋки желѣ́за и҆зрѣшит̑ тѧ, и҆ ѿ бича ꙗ҆зы́ка съкрыет̑ т̂ѧ, и҆ не ѹ҆бои́шисѧ ѿ ѕолъ находѧ́щихъ ѿ мꙋжа гл҃ющаго ничтоже бл҃го·

Непра́веднымъ и҆ без̑зако́н꙽нымъ посмѣ́ешисѧ, ѿ дивїаго же ѕвѣри не ѹ҆бои́шисѧ.
зане съ ка́менїем꙽ дївним̑ завѣт꙽ твои, и҆ ѕвѣрїе б̂о дивїи ѹ҆мирѧт꙽ ти сѧ.
потомъ разꙋмѣе҆ши ꙗ҆́ко ѹ҆мири́т ти сѧ до́мъ, жи́тїе же хра́ма твое҆го не и́мать съгрѣшити·

Разꙋмѣ́еши же ꙗ҆́ко мно́го сѣмѧ твое, ча́да же твоа бꙋдꙋтъ ꙗ҆́коже всѐ бы́лїе се́лное.
вни́деши же ѻ҆богати́вшисѧ въ́ гроб꙽, ꙗ҆́ко пшини́ца съзрѣла въ времѧ по́жата.
или ꙗ҆́коже сто́гъ гꙋмна въ времѧ съвезенъ·

Се сїѧ си́це и҆зъслѣдихомъ, сїѧ же е҆сть е҆же слышахом̑, ты же разꙋмѣи себѣ̀ чт̂о сътвори́лъ е҆си·

Глв̑҇а, ѕ҃·

Ѿвѣща же і҆́ѻвъ и҆ рече.
а҆ще кто вѣ́дыи поста́витъ ми гнѣтъ, бо́лѣзни же моѧ възе́млет̑ на мѣрила въкꙋпѣ, и҆ пѣска̀ мо́рскаго тѧжча́иша бꙋдꙋтъ.
н̂о ꙗ҆коже словеса̀ моа хꙋ́лена сꙋть, стрѣ́лы б̂о гн҃ѧ въ тѣлѣ мое҆мъ сꙋть, и҆́хже ꙗ҆́рость и҆спива́етъ ми кро́вь, е҆гда̀ начнꙋ̀ гл҃ати бодꙋтъ м̂ѧ.
что̀ б̂о е҆гда во́т꙽ще возреве́тъ ді́вїи ѻ҆се́лъ, н̂о бра́шна просѧ̀.
а҆́ще ли же и҆ возревет̑ во́лъ въ ꙗ҆́слехъ и҆мѣ́ѧ бра́шно.
ꙗ҆́сть ли сѧ хлѣбъ безъ со́ли, и҆л̂и е҆сть въкꙋше́нїе т꙽щи́ми словесы̀.
не мо́жетъ б̂о м̂и преста́ти дш҃а, смра́дъ б̂о зрю̀.
и҆ бра́шно свое во́ню льво́вꙋ, а҆ще б̂о да́сть, и҆ прїидет̑ ми проше́нїе, и҆ наде́ждꙋ мою да́сть г҃ь наче́нъ г҃ь да ѹ҆ꙗ҆зви́тъ, до концаж̑ да не ѹ҆бїетъ м̂ѧ·

Бꙋ́ди же ми град̑ гро́бъ на не́мже на забра́лехъ скаках̑, на не́мъ не постыжꙋсѧ не солгах̑ б̂о слове́съ ст҃ыхъ б҃ꙋ мое҆мꙋ·

Ка́ѧ б̂о крѣпость моѧ ꙗ҆́ко тер꙽плю и҆л̂и кое ми времѧ, ꙗ҆ко не сте́рпитъ м̂и дш҃а.
е҆да̀ крѣпости ка́менїѧ крѣпость моа, и҆л̂и пло́ти моа сꙋть мѣдѧны и҆л̂и не ѹ҆пова́хъ к немꙋ·

По́мощ꙽ же ѿ мене ѿстꙋпѝ, ѿврь́же мѧ млс̑҇ть посѣще́нїе же гн҃е призрѣ м̂ѧ, и҆ не възрѣша на́ мѧ бли́жнїи моѝ.
ꙗ҆́кож̑ пото́къ пресѣца́ѧ, и҆л̂и ꙗ҆́ко влъны преи҆до́ша м̂ѧ, и҆же сѧ менѐ бл҃го боѧ́хꙋ.
нн҃ѣ нападо́ша м̂и, ꙗ҆коже снѣ́гъ и҆ ле́дъ сме́рзъсѧ.
ꙗ҆́коже и҆ста́етъ теплотѣ̀ бы́вши, не позна́сѧ е҆же бѣ̀, та́коже и҆ а́зъ ѻ҆ста́вленъ бы́хъ всѣмѝ, погибо́хъ же и҆ бездо́мокъ бы́хъ·

Ви́дите пꙋтѝ ѳема́нъскїѧ, гостинница савонѧ призрѧщенїи.
стꙋда длъжни бꙋдт̑ꙋ ѻ҆ градх̑ѣ и҆ ѻ҆ и҆мѣ́нїих̑ надѣ́ющїисѧ.
и҆ вы́ же ѹ҆́бо наи҆до́сте мн̂ѣ безъми́лостивно, ꙗ҆́кож̑ видѣвши мои стрꙋпъ ѹ҆боѧ́стесѧ.
что̀ б̂о, е҆гда чт̂о ѹ҆ ва́съ проси́хъ.
и҆л̂и ва́шеѧ крѣпости требꙋ́ю, ꙗ҆́ко спс̑҇ти м̂ѧ ѿ рꙋкѝ вра́гъ.
и҆л̂и и҆з рꙋкѝ си́лныхъ и҆зба́вите м̂ѧ.
наѹ҆чи́те м̂ѧ, а҆з же ѹ҆млъчю̀·

А҆ще чт̂о прельсти́хсѧ скажи́те м̂и.
н̂о ꙗ҆́коже подо́бно е҆сть злꙋ̀ и҆́стин꙽наго гл҃и.
не ѿ ва́съ б̂о крѣпости прошꙋ̀.
ниже ѻ҆бличе́нїе жела́ше, словесы̀ м̂ѧ ѹ҆ста́витъ.
ниже вѣща́нїѧ вашего словес̑҇ трьплю̀ ра́звѣ ꙗ҆́ко на си́ра наска́чете, напада́ете же на дрꙋга ва́шего·

Нн҃ѣ же възрѣвъ на лица̀ ваша не солжꙋ̀.
сѧ́дѣте же и҆ не бꙋдетъ непра́ведно, и҆ горта́нь мои не разꙋмꙋ л̂и поѹ҆ча́етсѧ·

Глв̑҇а, з҃·

Не и҆скꙋше́нїе л̂и жи́тїе чл҃кꙋ на землѝ.
и҆ ꙗ҆́коже м꙽зды̀ дн҃ь жи́знь е҆го, и҆л̂и ꙗ҆́коже ра́бъ боѧисѧ г҃а свое҆го и҆ лꙋчи въ сѣнь.
и҆л̂и ꙗ҆́коже нае҆мник̑҇ жды́и м꙽зды̀ своеѧ.
та́коже и҆ а́зъ стерпѣхъ мс̑҇ца т꙽ща̀, но́щи же бо́лѣзни да́ны ми сꙋть.
а҆ще ѹ҆снꙋ̀ гл҃ю когда дн҃ь, е҆гда́ же въста́нꙋ паки когда ве́черъ.
и҆спо́лнъ же болѣзни быва́ю ѿ ве́чера до ѹ҆́тра·

Мѧте́т же ми сѧ тѣло во гноѝ и҆ чръвехъ, таю́ же грꙋдїе землѧ̀ ѿ гно́а стрꙋжа̀.
жи́тїе мое лжѣ̀ е҆сть бе́сѣды, поги́бе же вът꙽ще наде́жа.
помѧни́ же ѹ҆бо ꙗ҆ко дх҃ъ ми живот̑, и҆ ктомꙋ̀ не възвратитсѧ ѻ҆́ко мое ви́дѣти бл҃го, не ѹ́зритъ ѻ́ко ви́дѧщаго м̂ѧ·

ѻ҆́чи твоѝ на мн̂ѣ и҆ ктомꙋ̀ нѣсмь.
ꙗ҆коже ѻ҆́блакъ ѻ҆чищен̑҇ ѿ нб҃си, а҆ще б̂о чл҃къ сни́де въ а́дъ, ктомꙋ̀ не взы́идет̑, ни възвратит̑сѧ ктомꙋ въ свои дом̑, ни и҆́мать е҆го позна́ти ктомꙋ мѣсто е҆го·

И҆ аз̑ б̂о не пощажꙋ̀, ѹ҆сты̀ мои҆ми възъгл҃ю въ бѣдѣ сыи.
ѿвръзꙋ го́ресть дш҃а ѻ҆держи́мꙋю.
кое ѹ҆бо, море л̂и е҆сть и҆л̂и ѕмїи.
ꙗ҆́ко ѹ҆чини́лъ е҆си на́ мѧ хране́нїе.
реко́хъ, ꙗ҆́ко ѹ҆тѣшитъ м̂ѧ ѻ҆́дръ мои, и҆ вознесꙋ же к себѣ е҆ді́нъ слово на ло́жи моем̑.
ѹ҆страша́еши м̂ѧ со́нїѧми, и҆ видѣнїемъ сна̀ прежаса́еши м̂ѧ·

И҆змѣни́ши ѿ дх҃а дш҃ꙋ мою, ѿ сме́рти же ко́сти моѧ.
не поживꙋ̀ б̂о въ вѣки да длъготръплю̀ ѿстꙋпѝ ѿ менѐ, т꙽щѐ бо житїе мое.
что б̂о е҆сть чл҃къ, ꙗ҆́ко възвели́чилъ е҆си е҆го, и҆л̂и ꙗ҆́ко внима̂еши ѹ҆момъ к немꙋ, и҆л̂и посѣще́нїе твори́ши е҆мꙋ до ѹ́тра, и҆ на поко́и е҆го сꙋдиши доко́лѣ не ѻ҆ста́виши мене, ниже предае́ши мѧ, до́ндеже пожрꙋ̀ сли́ны моѧ̀ въ бо́лѣзни·

А҆ще а҆зъ съгрѣши́хъ, что́ ти могꙋ съдѣла́ти.
съвѣды́и ѹ҆мъ чл҃чь, почто́ мѧ е҆си положи́лъ противꙋ тебѣ.
е҆смь же на́ тѧ бре́мѧ, и҆ почто̀ нѣси сътвори́лъ, безако́нїѧ мое҆го забы́ти, и҆ ѻ҆чище́нїе грѣха̀ мое҆го·

Нн҃ѣ же в зе́млю ѿи҆дꙋ, ѹ҆тренюѧ же нѣсмь ѹ҆же·

Глв̑҇а, и҃·

Ѿвѣща же велда́дъ савхе́т꙽скїи гл҃ѧ.
доко́лѣ гл҃еши сїѧ, дх҃ъ многогл҃ивъ въ ѹ҆стѣхъ твои҆хъ·

Є҆гда г҃ь ѻ҆бидитъ сꙋдѧ́и, и҆л̂и сътвори́выи вс̂е возметъ пра́вдꙋ·

и҆л̂и сн҃ове твоѝ съгреши́ша пред̑ ним̑, пꙋсти́лъ в рꙋцѣ и҆хъ безако́нїѧ их̑, ты́ же заѹ҆трѧ́и къ г҃ꙋ молѧ́сѧ·

А҆ще чистъ е҆си і҆ и́стиненъ, мл҃твꙋ твою ѹ҆слы́шитъ·

Ѹ҆строит꙽ же т̂и жи́тїе пра́вды, бꙋдꙋт꙽ же прьваѧ твоѧ ма́ла, послѣ́днѧѧ же твоѧ бес числа̀·

Въпросѝ ѹ́бо прьвыи и҆хъ ро́дъ, и҆слѣди же по ро́дꙋ ѿц҃ь.
вчера́шнїи б̂о е҆смь и҆ не вѣмъ, сѣнь б̂о е҆сть по землѝ наше житїе, не л̂и сїѧ наѹ҆чи́тъ тѧ, и҆ възвѣстѧ́тъ т̂и ѿ срд̑ца і҆ и҆знест̑ꙋ словеса̀·

Є҆да ни́четъ рого́зъ без̑ воды̀, и҆л̂и расте́тъ вино безъ напое́нїѧ.
е҆ще сꙋщее в ко́рени не по́жнетсѧ, прьвїе пи́тїѧ всѐ бы́лїе не и҆схне́тъ л̂и·

Та́ко ѹ҆бо бꙋдꙋтъ послѣднѧа всх̑ѣ, забыва́ющихъ г҃а.
наде́жд̑а б̂о нечести́ваго поги́бнетъ, не ѹ҆селен꙽ б̂о бꙋдетъ до́мъ е҆го, паѹ҆чи́на же събꙋдетсѧ хра́мъ е҆го.
а҆ще под̑пре́т꙽ хлѣвинꙋ̀ свою не ста́нетъ, и҆мет̑ же е҆мꙋ не сте́рпитъ.
мо́кръ б̂о е҆сть слн҃цемъ, и҆ ѿ гно́ѧ е҆го лѣторасль и҆зыидетъ.
на собо́рѣ ка́менїѧ спи́тъ, по́средѣ же до́брна ка́менїа поживе́тъ.
а҆ще же и҆ пожрет̑ мѣсто солже́тъ е҆го, не вѣ́дѣ л̂и такова̀.
ꙗ҆́ко развраще́нїе нечести́ва таково̀, ѿ землѧ́ же и҆́ного прозѧ́бнетъ·

Гь҃ б̂о не ѿринетъ незлоби́ваго, всего́ же да́ра нечести́ваго не прїимет̑.
и҆́стин꙽на же ѹ҆ста̀ и҆спо́лнит̑ смѣха̀, ѹ҆стны́ же и҆хъ и҆сповѣда́нїѧ.
вра́зи же и҆хъ ѻ҆блекꙋтсѧ въ стꙋдъ, жи́тїе же нечести́ваго не бꙋдетъ·

Глв̑҇а, ѳ҃·

Ѿвѣща і҆́ѻ҆въ и҆ реч̑҇, вои҆́стин̑҇нꙋ вѣдѣ ꙗ҆́ко та́ко е҆сть.
ка́ко б̂о чл҃къ пра́веденъ ѹ҆ г҃а.
а҆ще б̂о хо́щетъ прѣтисѧ с нимъ, не послꙋшает̑ е҆го да не пререче́тъ, къ е҆ді́номꙋ словеси е҆го и҆зъ ѹ҆стнꙋ̀.
премꙋдръ б̂о ес̑҇ мы́слїю, крѣпокъ же и҆ вели́къ.
кто же́стокъ бы́въ, прѧ́мо е҆мꙋ стерпѣлъ.
ѻ҆бет꙽ша́ѧи го́ры, не вѣдѧтъ превраща́ѧи ѧ҆̀ гнѣ́вомъ.
трѧсы́и подънбс̑҇нꙋю ѿ ѻ҆снова́нїѧ, столпи же сѧ дви́жат̑.
гл҃ѧи слн҃цꙋ и҆ не въсхо́дитъ, на звѣзды же назнаменаетъ.
простры́и е҆ді́нъ нб҃о и҆ ходѧ̀ по́ морю ꙗ҆ко по землѝ·

творѧ́и власожельца, и҆ проход̑ню нарек̑҇ т̂ꙋ, ра́и ю҆жь наложа̀.
творѧ́и ве́лїѧ и҆ неи҆слѣ́дованнаа, сла́вна же і҆ и҆зрѧ́дна, и҆мже нѣ́сть числа̀.
а҆ще прїидет̑ ко мнѣ̀ не и҆́мамъ ви́дѣти, и҆ а́ще ми́мои҆де́тъ м̂ѧ и҆ ни ка́ко разꙋмѣхъ.
а҆ще и҆змѣни́тъ кто̀ възврати́тъ, и҆л̂и кт̂о речет꙽ е҆мꙋ чт̂о сътвори́лъ е҆си.
ты б̂о ѿвратѝ гнѣвъ, прегнꙋш́асѧ им̑ кѷти под̑нбс̑҇ныѧ·

А҆ще м̂ѧ ѹ҆слы́шитъ, и҆л̂и разъсꙋ́дитъ гл҃ы моѧ.
а҆ще пра́веденъ сы́и, но ѹ҆слы́шитъ ми.
сꙋдꙋ е҆го помолю́сѧ, а҆ще же взовꙋ̀ и҆ не ѹ҆слы́шитъ, и҆ не и҆мꙋ̀ вѣры ꙗ҆́ко ѹ҆слы́ша гл҃ы моѧ.
да не м꙽гло́ю м̂ѧ потреби́тъ, мно́га же м̂и сътре́нїѧ сътворѝ въсꙋ́е.
нѣсть б̂о ми ѿд꙽хнꙋти, и҆сполни же м̂ѧ го́рести ꙗ҆́ко б̂о крѣпостїю дръжи́тъ.
кт̂о ѹ҆бо сꙋдꙋ е҆го противитсѧ.
а҆ще б̂о бꙋдꙋ пра́ведникъ, ѹ҆ста̀ моѧ нече́стїе творѧтъ.
а҆ще бꙋдꙋ непоро́ченъ, лꙋка́въ бꙋдꙋ.
а҆ще б̂о без꙽честїе сътвори́хъ не вѣмъ дш҃ею мое҆ю, ра́звѣ ꙗ҆́ко ѻ҆тѧ́тъ м̂и ес̑҇ живо́тъ.
тѣм꙽же рѣхъ, вели́ка и҆ си́лна гꙋбитъ гнѣвъ, ꙗ҆́ко лꙋка́вїи въ смр҃тнои вла́сти.
н̂о праведънїи насмѣва́ютсѧ, преда́ни б̂о сꙋть в рꙋцѣ нечести́выхъ, лица сꙋдїи е҆го покрива́етъ, а҆ще л̂и не сам̑ кт̂о е҆сть.
жи́тїе же мое лжа̀ е҆сть текꙋщаго ѿбѣго́ша и҆ не ви́дѣша.
и҆л̂и е҆сть корабле́мъ слѣдъ пꙋтѝ, и҆л̂и ѻ҆рла̀ летѧ́ща и҆́щꙋща ꙗ҆́ди.
а҆ще б̂о рече забꙋдꙋ гл҃ѧ, вни́кнꙋвъ лице́мъ въз꙽дхнꙋ̀, и҆ движа́сѧ въ сѣни съ ѹ҆ды.
вѣ́дѣ б̂о ꙗ҆́ко непови́нна м̂ѧ ѻ҆ста́виши.
понеже нечести́въ е҆смь, почто́ же не ѹ҆мро́хъ.
а҆ще б̂о и҆змы́юсѧ снѣ́гомъ, и҆ ѻ҆чи́щꙋсѧ рꙋка́ма чи́стыми.
пости́жнѣ въ сквернѣ ѻ҆мочи мѧ, ѻ҆ме́рзѣ ж́е мѧ ѻ҆дежда.
а҆ще б̂о чл҃къ е҆си проти́вꙋ мн̂ѣ е҆мꙋже ѿпрю́сѧ, да прїидемъ вкꙋпѣ на сд̑ꙋ.
а҆ сꙋдѧ бы хода́таи намъ бы́лъ ѻ҆блича́ѧ, и съслꙋшаѧ междꙋ ѻ҆бѣма.
да ѿи҆метъ ѿ мене же́злъ, бо́ѧзнь же е҆го да не смꙋща́етъ менѐ, и҆ не ѹ҆бою́сѧ, н̂о възъгл҃ю·

Глв̑҇а, і҃·

Не съвѣ́дѣ б̂о си́це, трꙋжа́ю҆сѧ дш҃ею мое҆ю стенѧ̀, и҆ спꙋщꙋ на́нь гл҃ы моѧ·

Въз꙽гл҃ю и҆хъ го́рестїю дш҃а моеѧ ѻ҆дръжи́мъ, и҆ рекꙋ къ гв҃и не ѹ҆чи м̂ѧ безъчествовати, и҆ почто́ ми си́це сꙋди́лъ е҆си.
и҆л̂и добро́ ти е҆сть а҆ще непра́вдою, ꙗ҆́ко ѿре́клъ е҆си дѣла рꙋкꙋ твое́ю, совт̑ѣ же нечести́выхъ внѧ́лъ е҆си.
и҆л̂и ꙗ҆ко ви́дѣвыи ви́диши, и҆л̂и ꙗ҆́коже зрит̑ чл҃къ ѹ́зриши.
и҆л̂и жи́тїе твое чл҃чьско е҆сть, и҆л̂и лѣта твоѧ мꙋжнѣ.
ꙗ҆́ко взыска́лъ е҆си безако́нїѧ мое҆го, и҆ грѣхѝ моѧ и҆с꙽слѣди́лъ е҆сѝ вѣси бо ꙗ҆́ко нечествова́хъ, н̂о кто̀ е҆сть и҆зима́ѧ и҆з рꙋкꙋ твое́ю.
рꙋцѣ твоѝ сътвори́ста м̂ѧ и҆ създа́ста м̂ѧ.
потом̑ же прело́жъ м̂ѧ поразѝ.
помѧнѝ ѹ҆бо бре́нїе м̂ѧ създа̀, в зе́млюж̑ паки възвраща́еши м̂ѧ.
и҆л̂и не ꙗ҆́коже мле́ко и҆змолзе, насырилъ же м̂ѧ е҆си ра́вно сырꙋ.
ко́жею и҆ пло́тїю м̂ѧ ѻ҆блечѐ, костьми́ же и҆ жи́лами съши́лъ м̂ѧ е҆си.
живот̑ же и҆ млс̑҇ть положѝ ѹ҆ менѐ, посѣщенїеж̑ твое съхра́нитъ мои дх҃ъ.
сїѧ и҆мѣѧи въ тебѣ вѣ́дѣ ꙗ҆́ко всѐ мо́жеши, не ѿмага́ет же сѧ ѿ тебе ничто́же.
а҆ще съгрѣшꙋ̀ съхри́ниши м̂ѧ, ѿ безако́нїѧ же не безъвин̑҇на м̂ѧ сътвори́ши.
а҆ще б̂о нечести́в꙽ бꙋдꙋ лю́тѣ мн̂ѣ, а҆ще же бꙋдꙋ пра́ведникъ, не могꙋ̀ възникнꙋти и҆спо́лнь б̂о е҆смь нечестїѧ·

Ловим̑ б̂о е҆смь а҆ки ле́въ на ѹ҆бїенїе, па́ки же прело́жъ м̂ѧ лю́тѣ ѹ҆биваа́ше.
ѻ҆бновлѧ́ѧ на́ мѧ пыта́нїе моѐ, гнѣ́в же вели́къ възложѝ на́ мѧ, наведе́ же на́ мѧ и҆скꙋше́нїе, почто̀ м̂ѧ и҆з чре́ва и҆знесѐ и҆ не ѹ҆мро́хъ, ѻ҆́ко мене не вѣ́дѣ.
ꙗ҆́кож̑ и҆ быхъ а҆ки не бы́въ, и҆ почт̂о б̂о и҆з чре́ва въ гроб̑҇ не снидох̑.
и҆л̂и не ма́ло е҆сть вре́мѧ жи́зни моеѧ, ѻ҆ста́ви мене почити ма́ло даже не и҆дꙋ̀, ѿню́дꙋже сѧ не възвращꙋ̀.
въ зе́млю те́мнꙋ и҆ мрач̑҇нꙋ въ зе́млю т꙽мы̀ вѣчныѧ ѝдѣже нс̑҇ѣ свѣтъ, ни ви́дѣти живота члс̑҇чка·

Глв̑҇а, а҃і·

Ѿвѣща же софа́рь минѣ́искїи и҆ рече.
гл҃ѧи мно́го и҆ ѹ҆слы́шитъ, и҆л̂и на ѹ҆мѣ и҆мѣа мѣни́тсѧ бы́ти пра́веденъ блс̑҇венъ рожде́ныи ѿ жены̀, и҆ малолѣтенъ.
не мно́гъ словесы бꙋди, нѣсть б̂о и҆же ѿвѣща́ет꙽ ти, не гл҃и б̂о ꙗ҆́ко чи́стъ е҆смь дѣлы, и҆ бес поро́ка пред̑ нимъ.
н̂о ꙗ҆́коже ѹ҆бо г҃ь възгл҃етъ к тебѣ̀, и҆ ѿврьзетъ ѹ҆стнѣ̀ своѝ с тобо́ю, пото́мъ възвѣстит̑ ти си́лꙋ премꙋдрости.
ꙗ҆ко сꙋгꙋбъ бꙋдетъ противꙋ тебѐ·

И҆ тогда разꙋмѣ́еши, ꙗ҆́ко досто́ино ти сѧ събы́сть ѿ г҃а, и҆хже съгрѣшил̑҇ си.
и҆л̂и слѣдъ гн҃ь ѻбрѧ́щеши, и҆л̂и въ послѣднѧѧ ѻ҆ста́ви ꙗ҆́же сътворѝ вседръжи́тель.
высо́че нб҃о, и҆ чт̂о сътвори́ши, глꙋблеж̑ а҆́да чт̂о съвѣси, и҆л̂и дале мѣры зе́мныѧ, и҆ли ширины мо́рьскїѧ.
а҆ще же раз꙽врати́тъ вс̂е, кт̂о речетъ е҆мꙋ чт̂о сътвори́лъ е҆си, то́и б̂о вѣсть дѣ́ла безаконникъ, ви́дѣвъ же нелѣ́паѧ не позритъ.
чл҃къ же и҆́нако плавает̑ словесы̀, земны же рожд̑е́ны ѿ жены̀, ра́венъ ѻ҆слꙋ̀ пꙋсты́нномꙋ·

А҆ще б̂о ты̀ чи́сто положи́лъ е҆си срд̑це своѐ.
въздѣжеши же рꙋцѣ своѝ к немꙋ̀, а҆ще чт̂о безако́нїе е҆сть в рꙋкꙋ твое҆ю далече сътвори ѿ себѐ, непра́вдаж̑ въ животѣ твое҆мъ да не в꙽селит̑сѧ·

Тако б̂о ти въсїѧ́етъ лице ꙗ҆́ко вода̀ чиста, съвлечеши же с̂и сквернꙋ и҆ не ѹ҆бои́шисѧ.
и҆ трд̑ꙋ забꙋ́деши ꙗ҆ко волнꙋ̀ мимошед̑шꙋ, и҆ не ѹ҆страшишисѧ.
моли́тва же т̂и а҆ки де́ньница, ѿ пладне же възыидетъ т̂и жи́знь·

Ѹ҆пова́ѧ же бꙋдеши ꙗ҆́ко бꙋ́дет̑ т̂и надежд̑а, ѿ тꙋги́ же и҆ ѿ промышленїѧ ꙗ҆́вит̑ ти сѧ ми́ръ·

Ѹ҆млъкнеши б̂о и҆ не бꙋдет̑ борѧ́и ти сѧ, преда́емїи же тебѣ̀, мно́го ти сѧ мо́лѧтъ·

Сп҃се́нїе же и҆хъ ѻ҆ста́нет̑, надежа бо ихъ пагꙋба.
ѻ҆́чи же нечьстивыхъ и҆ста́етѣ·

Глв̑҇а, в҃і·

Ѿвѣща же и҆ѻ҆въ и҆ реч̑҇.
тм̑ѣже и҆ в̂ы е҆сте чл҃цы, и҆ли с ва́ми сконча́етсѧ премд̑ꙋрость·

И҆ ѹ҆ мене срд̑це е҆сть ꙗ҆́коже и ѹ҆ вас̑҇.
пра́веденъ б̂о мж̑ꙋ и҆ непоро́ченъ, бы́сть на порꙋга́нїе·

Въ вре́мѧ б̂о нарочитовано бы́сть напа́стьми и҆нѣми.
домо́мъ же е҆го плѣне́номъ бы́ти безако́нными·

Ника́коже никтоже да ѹ҆пова́етъ, лꙋка́въ сыи непови́ненъ бы́ти, е҆лицы разгнѣ́вающеи г҃а, ка́ко не бꙋдет̑ ли пыта́нїе и҆хъ·

Но въпроси четвероно́гъ а҆ще ти рекꙋтъ, и҆ли пти́ца нбс̑҇ныѧ а҆ще ти възвѣстѧ́тъ, повѣжд̑ь земли а҆ще ти ска́жетъ, і҆ и҆сповѣдѧ́тъ т̂и ри́бы мо́рьскїѧ·

Кт̂о не разꙋмѣ въ все́мъ се́мъ, ꙗ҆́ко рꙋка гн҃ѧ сътворѝ сїѧ всѧ̀, не в рꙋцѣ ли е҆го дш҃а всѣхъ живыхъ, и҆ дꙋхъ всѧ́кого чл҃ка·

Ѹ҆́хо ѹ҆бо словеса̀ раз̑сꙋжда́етъ, горта́нь же бра́шна въкꙋше́нїе·

Въ мно́го вре́мѧ премꙋдрость, въ мно́ѕѣ же жи́тїи свѣде́нїе.
ѹ҆ него премꙋ́дрость и҆ си́ла, ѹ҆ того совѣтъ и҆ ра́зꙋмъ·

А҆ще низложитъ кт̂о съзи́жд̑етъ, а҆ще затворитъ на чл҃ки кт̂о ѿверзет̑·

А҆ще възбранитъ во́дꙋ и҆с꙽сꙋшитъ землю, а҆ще ли ѻ҆слабитъ погꙋбит̑ ю҆̀ развра́щъ·

Ѹ҆ него дръжа́ва и҆ крѣ́пость, того вѣдѣнїе и҆ ра́зꙋмъ.
проводѧ́и совѣтники плѣне́ны, сꙋдїѧ же землѝ ѹ҆дивѝ·

Посажа́ѧи цр҃ѧ на прс̑҇толѣ, ѻ҆бѧза́ѧи по́ѧсомъ чре́сла и҆хъ·

ѿпꙋщаѧ жерца плн̑҇ѣники, силныѧ же землѝ разврати·

И҆змѣнѧ́ѧи ѹ́стны вѣ́рныхъ, ра́зꙋмъ же ста́рецъ разꙋмѣ·

И҆злива́ѧи бесче́стїе на кн҃ѕѧ, смиреныѧж̑ и҆сцѣли·

ѿкрыва́ѧ глꙋбо́каѧ ѿ тмы̀, и҆знесе же на свт̑ѣ сѣ́нь сме́рътнꙋю.
прелща́а ꙗ҆́зыкы и҆ погꙋблѧ́а их̑, низлага́ѧ страны̀ и҆ наставлѧ́ѧ и҆хъ.
и҆змѣнѧ́ѧ срд̑ца кн҃ѕь зе́мъныхъ, и҆ прельсти б̂о и҆хъ пꙋте́мъ и҆мже не вѣ́дѧхꙋ.
да ѻ҆сѧ́жꙋт꙽ тмꙋ̀ а҆ не свѣтъ, заблꙋ́дѧт꙽ же ꙗ҆́ко пїѧ́нїи·

Глв̑҇а, г҃і·

Все с̂е ви́дѣ ѻ҆́ко мое, и҆ слы́ша ѹ҆хо мое, и҆ вѣдѣ е҆ли́коже и҆ в̂ы вѣ́сте·

И҆ не неразꙋмв̑҇ѣ е҆смь въ вас̑҇ ника́кожд̑е же.
н̂о а҆зъ къ г҃ꙋ мое҆мꙋ воз̑г҃лю, ѻ҆бличю же пред̑ ни́мъ, а҆ще хо́щет̑·

Вы̂ же е҆сте вра́чеве неправди́ви, и҆ цѣли́теле злы́хъ, бꙋ́ди же вамъ молъча́ти, и҆ събꙋ́детсѧ вамъ въ премꙋ́дрость·

Слы́шите ѻ҆бличе́нїе ѹ҆́стъ мои҆хъ, сꙋдꙋ же ѹ҆стнꙋ моею вънми́те·

Коѐ ѹ҆бо пред̑ бм҃ъ лѝ гл҃ите, и҆ пред̑ ним̑ вѣща́ете лꙋка́во.
и҆ли сꙋмните́сѧ, в̂ы са́ми сꙋдїѧ бꙋдете, добро б̂о а҆́ще и҆слѣдит̑ вас̑҇.
а҆ще б̂о всѐ творѧ́щеи прело́житесѧ ем̑, ничто́же мнѣи ѻ҆бличи́те в̂ы, а҆щеж̑ и҆ та́и лицемъ съѹ҆диви́тесѧ.
коѐ ѹ҆бо, не движенїе л̂и е҆го ѹ҆стра́шит̑ ва́съ самѣхъ·

Бо́ѧзнь же ѿ него нападетъ на́ вы, ѿи́дет꙽ же велича́нїе ва́ше ра́вно пепелꙋ, тѣло же бер꙽нено.
ѹ҆млъчи́те да и҆спо́лнюсѧ и҆ почїю ѿ гнѣ́ва, прїимъ плоти своѧ́ зꙋбы, и҆ дш҃ꙋ же мою положꙋ въ рꙋ́цѣ·

А҆ще м̂ѧ и҆́метъ си́лныи понеже и҆ нача, а҆ще же гл҃ю и҆ ѻ҆бличю пред̑ ним̑, и҆ с̂е ми сѧ съблюдетъ на сп҃се́нїе, не внидет̑ б̂о пред̑ ним̑ лесть·

Послꙋша́ите гл҃ъ мои҆хъ, възвѣщꙋ б̂о ва́мъ слы́шащем̑.
с̂е а҆зъ бли́зь е҆смь сꙋ́да мое҆го, вѣдѣ аз̑ ꙗ҆́ко пра́веденъ ꙗ҆́влю́сѧ·

Кт̂о бо̀ е҆сть ѻ҆би́денъ мно́ю, ꙗ҆́ко нн҃ѣ ѹ҆молчю і҆ и҆щезнꙋ.
дво́е же м̂и сътвориши, тогда ѿ лица̀ твое҆го не съкры́юсѧ.
и҆ рꙋкꙋ ѿ менѐ ѹ҆да́ли, стра́х же тво́и да не ѹ҆жасает̑ м̂ѧ·

Посе́м же възовеши, а҆́з же т̂ѧ ѹ҆слы́шꙋ.
и҆ли воз꙽гл҃еши, аз̑ же т̂и дам̑ ѿвѣтъ.
коли́ки сꙋть грѣхѝ моѝ и҆ безаконїѧ моѧ̀, наѹ҆чи мѧ коѝ сꙋть·

Почто̀ та́иши ѿ менѐ, мни́ши же м̂ѧ проти́вна сꙋща тебѣ.
или ꙗ҆ко ли́стъ дви́жемъ вѣтромъ бои́шисѧ, и҆ли ꙗ҆́ко вѣтвїю носи́мꙋ вѣтромъ противлѧ́еши ми сѧ·

Ꙗ҆́ко писа́лъ е҆си на́ мѧ ѕл̂о, ѻ҆бложил̑҇ же м̂и е҆си ю҆́ностьныѝ грѣхи, положил̑҇ же м̂и е҆си но́гꙋ на възбра́ненїе, съхрани́лъ же м̂и е҆си дѣ́ла вс̂ѧ, в коренїѧ же но́гꙋ мое́ю прїиде.
и҆же ѻ҆бет̑ша́етъ ра́вно мѣхꙋ, и҆ли ꙗ҆ко ри́за мо́льми и҆зъꙗ҆де́на·

Глв̑҇а, д҃і·

Чл҃къ б̂о рожен꙽ ѿ жены̀ ма́лолѣтен̑҇, и҆спо́лнь гнѣ́ва.
и҆ли ꙗ҆́ко цвт̑ѣ процвѣты́и ѿпаде, ѿбѣжа же ꙗ҆ко стѣнь и҆ не постоит̑.
с̂е и҆ ѻ҆ сем̑ словеси сътвори́лъ е҆си, внити пред̑ т̂ѧ сꙋдомъ.
кто̀ б̂о чи́стъ бꙋдетъ ѿ скверны, и҆ никто́же, а҆ще и е҆ді́нъ дн҃ь житїе е҆го на землѝ.
и҆сщете́ни же мс̑҇цы е҆го ѿ него, въ лѣте положи́лъ е҆си и҆ не престꙋ́пит̑.
ѿстꙋпѝ ѿ него̀ да ѹ҆млъкнет꙽, і҆ и҆зво́литъ жи́тїе ꙗ҆́коже нае҆́мникъ·

Є҆сть б̂о дре́вꙋ надежда, а҆ще б̂о посѣче́но бꙋдет꙽, паки процвѣтъ, и҆ лѣтора́сль е҆го не ѻ҆скꙋдѣ́етъ·

А҆ще б̂о състарѣет̑сѧ въ землѝ ко́ренъ е҆го, а҆ще же на ка́мени сконча́етсѧ стебло е҆го, ѿ во́нѧ воды̀ процвѣте·

Сътвори́т же жа́твꙋ, ꙗ҆́ко мла́до сажд̑ено.
мж̑ꙋ же ѹ҆меръ ѿи́де, пад̑ же чл҃къ пото́мъ не бꙋ́детъ.
лѣты ѻ҆скꙋдѣ́етъ мо́ре, рѣка́ же ѻ҆пꙋстѣвшїи и҆сше, и҆ чл҃къ спа́выи не въста́нетъ.
до́ндеже не бꙋдетъ нб҃о съшвено, и҆ не въспрѧнꙋтъ ѿ сна̀ и҆хъ·

А҆ще ѹ҆бо во а́дѣ бы̀ м̂ѧ съхрани́лъ, съкры́лъ же м̂ѧ бы̀, до́ндеже преста́нетъ гнѣвъ тво́и.
и҆ въчини́ши вре́мѧ, в неже па́мѧть сътвори́ши м̂и·

А҆ще ѹ҆бо ѹ҆́мре чл҃къ жи́въ бꙋдет̑, скон꙽чавъ дн҃и лѣтъ свои҆хъ.
тръплю до́ндеже па́ки бꙋдꙋ·

Посем же възовеши, а҆́з же ѹ҆слы́шꙋ т̂ѧ, дѣлаж̑ рꙋкꙋ твое́ю не ѿвраща́исѧ.
и҆счел же е҆си хи́трости моѧ̀ и҆ ничто́же т̂ѧ преи́детъ грѣхъ мои҆хъ·

Запечатлѣлъ же ми е҆си безако́нїѧ въ меш꙽цѣ, назнамена́лъ же е҆си а҆ще чт̂о без̑ во́лѧ престꙋпихъ.
и҆ ра́звѣ гора̀ пада́ющи распадесѧ, и҆ ка́мень ѻ҆бет̑ша́етъ ѿ мѣста свое҆го.
ка́мень е҆гоже ѻ҆глади́ша во́ды, и҆ потопи́ша во́ды въ знаки перьсть землѧ̀.
и҆ тер꙽пѣнїе члчс̑҇ко погꙋби́лъ е҆си, въвъзринл̑҇ꙋ е҆си до конца ѻ҆тиде.
приставил̑҇ е҆си лице, і҆ и҆спꙋстилъ, мно́гом же бы́вшемъ сн҃омъ е҆го не вѣсть.
а҆ще и҆ ма́ло их̑ бꙋдет̑ не съвѣстьсѧ н̂о плоти е҆го болѣша, дш҃а же е҆го сѣтова̀·

Глв̑҇а, е҃і·

Ѿвѣща же е҆лифа́съ ѳеманитинъ гл҃ѧ.
а҆ще ѹ҆бо премꙋрыи ѿвѣтъ дасть ра́зꙋма дх҃ъ, и҆ наполни бо́лѣзнь чрева·

ѿблюда́а гл҃ы и҆ми́же не подоба́етъ, и҆ словесы и҆миж̑ ника́ѧ же потреба, е҆ѧ́же и҆ т̂ы ѿвер̑҇глъ е҆си стра́хъ, сконча́лъ е҆си гл҃ы та́ки пред̑ гм҃ъ.
повиненъ е҆си гл҃ы ѹ҆стъ твои҆хъ, не раз꙽сꙋди́лъ е҆си гл҃ъ силныхъ.
ѻ҆бличают̑ т̂ѧ ѹ҆ста̀ твоа, а҆ не аз̑, и҆ ѹ҆стнѣ твоѝ на тѧ послꙋшествова́стѣ·

Чт̂о бо̀ е҆да̀ пр́ьвѣе чл҃къ роженъ е҆си, и҆ли пр́ьвїе хлъмъ съгꙋстл̑҇ѣсѧ е҆си, и҆ състрое́нїа гн҃ѧ слы́шалъ е҆си, и҆ совѣтника ли тѧ поста́ви б҃ъ·

Прїиде л̂и на́ тѧ премꙋ́дрость.
что бо вѣси е҆гоже не вѣмы, и҆ли чт̂о разꙋмѣ́еши т̂ы е҆гоже не разꙋмѣе҆м꙽.
и҆ли ста́ръ и҆ ветохъ е҆си в нас̑҇, старѣи ѿц҃а твое҆го дн҃ьми.
мала и҆хъже съгрѣши ѹ҆раненъ е҆си, велика превели́чно воз̑гл҃а.
чт҃о смѣло срд̑це твое.
и҆ли что̀ понесостѣ ѻ҆́чи твоѝ, ꙗ҆ко ꙗ҆́рость раздра̀ пред̑ гм҃ъ·

И҆знесе же и҆зъ ѹ́стъ та́ка словеса̀.
кт̂о бы сы̀ чл҃къ ꙗ҆ко бꙋдетъ непоро́ченъ, и҆ли ꙗ҆́ко бꙋ́дыи правед̑никъ рожд̑енъ ѿ жены̀·

А҆ще до ст҃ыхъ не вѣрꙋетъ, нб҃о же нечи́сто пред̑ нимъ·

ѻ҆ста́ни же мер̑҇зкїи нечи́стыи мꙋжъ, пїѧи непра́вды ра́вны пое́нїю.
възвѣщꙋ же т̂и послꙋша́и менѐ, ꙗ҆́же ѹ҆бо ви́дѣхъ възвѣщꙋ т̂и.
ꙗ҆́же премꙋдрїѝ рект̑ꙋ и҆ не ѹ҆таиша ѿц҃ы и҆хъ·

тѣмже самѣмъ да́на бысть землѧ, и҆ не на́иде и҆ноплеменникъ на́ нѧ·

Вс̂е жи́тїе нечьсти́ва въ печа́ли, лѣтаж̑ и҆сщетена да́на си́лнꙋ страх же е҆го въ ѹ́ши е҆мꙋ.
е҆гда̀ мнит̑ ѹжѐ въ ми́рѣ бы́ти, прїиде дн҃ь развраще́нїѧ е҆го.
да не вѣрꙋетъ ѿврати́тисѧ ѿ тмы̀, заповѣ́данъ б̂о ю҆́же въ рꙋцѣ желѣза.
ѹчиненъ бо е҆сть въ бра́шно неꙗ҆сытомъ, вѣсть же въ себѣ̀ ꙗ҆́ко ждетъ стерва.
дн҃ь же теменъ ѹ҆страшит̑ е҆го, бѣда же и҆ скорбъ прїимет̑ и҆̀.
ꙗ҆́ко во́инъ предъстоѧ́и и҆ падет̑, ꙗ҆́ко въздѣ рꙋцѣ пред̑ гм҃ъ·

Пре̑ гм҃ъ же вседръжи́телемъ ѻ҆жестисѧ.
тече же пред̑ ни́мъ ѹ́кори́зною вели́къ на плещꙋ щит̑ е҆го, ꙗ҆ко покры̀ лице своѐ тꙋ́комъ е҆го.
и҆ сътвори ѻ҆метꙋ стегнꙋю, хвалаж̑ е҆го ѹ҆кори́зна·

да вселит̑ же сѧ во гра́дехъ пꙋ́стѣхъ, вни́дет же в домы̀ невселенныѧ·

А҆ е҆же ѻ҆нѝ ѹгото́ваша, и҆нїи ѿнесꙋть.
ни́же ѻ҆богати́тсѧ, ни́же ѻ҆ста́нетъ и҆мѣнїе е҆го.
не и́мать положи́ти на́ землю сѣни, н̂и и҆збѣжит же тм̂ы.
проѕѧбенїе е҆го да ѹ҆сꙋшит̑ вѣтръ, да ѿпадетъ цвѣтъ е҆го, да не вѣритъ ꙗ҆́ко сътръпит̑ тще б̂о събꙋдет̑сѧ е҆мꙋ·

Сѣченїе е҆го пр́ьвѣе да сътлѣе҆тъ, и҆ лѣтора́сль е҆го не ѻ҆блиственѣет̑.
да ѻ҆бои҆манъ бꙋдет̑ ꙗ҆коже пародок̑҇ прьвѣе ꙗ҆годы, да ѿпадет̑ же ꙗ҆́ко цвт̑ѣ масли́чїа.
послꙋшьство б̂о нечести́ваго смр҃ть, и҆ ѻ҆гнь же да пож̑жет̑ домы̀ м꙽здои҆́мецъ·

Въ чревѣ же прїимет̑ бо́лѣзнь, събꙋдет̑ же сѧ е҆мꙋ тщета, чрево же е҆го да под̑и҆мет̑ лесть·

Глв̑҇а, ѕ҃і·

Ѿвѣща́ же і҆́ѻвъ и҆ рече.
слы́шахъ си́це, мно́го тѣшителе зо́лъ вс̂и.
что́ бо е҆да чи́нъ е҆сть словесы̀ дх҃а, и҆л̂и кꙋ́ю ти па́кость сътворитъ.
ꙗ҆́коже ѿвѣща́еши, и҆ а҆зъ ꙗ҆́коже в̂ы въз꙽гл҃ю.
а҆ще же под̑лежа́ла̑ дш҃а ва́ша за мою̀, а҆ще наскаках̑ на́ вы словесы̀, покива́а главо́ю на вы.
бꙋди же крѣпость въ ѹ҆стѣхъ моих̑, движе́нїа же ѹ҆стнꙋ̀ мое́ю не пощажꙋ̀ а҆ще б̂о възгл҃ю не возболю лѝ ра́ны, н̂о сътворю̀ с̂и трꙋдъ.
а҆ще ли же ѹ҆молчю̀, чт̂о ме́ншими ѹ҆ꙗ҆зве́нъ бꙋдꙋ.
нн҃ѣ же престꙋжена м̂ѧ сътворѝ бꙋѧ́ согни́вша.
и҆ ѧ́тъ м̂ѧ и҆ въ послꙋшество бых꙽, и҆ въста̀въ мн̂ѣ лжа̀ моѧ.
прѧмо лицꙋ̀ мое҆мꙋ ѿвѣща̀, гнѣвенъ быв̑҇ низложи м̂ѧ.
въскрежета̀ зꙋбы на́ мѧ, стрѣ́лы и҆скꙋсникъ е҆го нападо́ша на́ мѧ.
стрѣла́ми ѻ҆чїю наскака̀, и҆ ѻ҆стрїем̑ поразѝ м̂ѧ въ колѣнѣ, вкꙋпѣ натеко́ша на мѧ, предасть б̂о м̂ѧ г҃ь в рꙋки непра́ведных̑, на нечести́выѧж̑ поврь́же м̂ѧ, ѹ҆мирѧ́юща рас꙽сы́па м̂ѧ.
и҆́мъ м̂ѧ за вла́сы и ѻ҆борва̀.
поста́ви м̂ѧ а҆ки стра́жа, ѻ҆быидо́ша м̂ѧ ѻ҆рꙋжїи бодꙋще въ и҆стеси моѝ.
не щадѧ́ще и҆злїѧша на зем̑лю же́лчь мою̀, низложи́ша м̂ѧ стрп̑҇ꙋ на стрꙋпъ, теко́ша къ мнѣ могꙋщеи.
врѣтище соши́ша на ко́жꙋ мою, и҆ мо́щь же моѧ ѹ҆гасѐ.
и҆ чре́во мое съгорѣ̀ ѿ пла́ча, на вѣждꙋ же мое́ю стѣнь, непра́ведно же ни е҆ді́но в рꙋкꙋ мое́ю.
мл҃тва же моѧ чи́ста землѧ̀ да не покры́еть кро́ви пло́ти моеѧ, ни бꙋди мѣсто во́плѧ мое҆го.
и҆ нн҃ѣ е҆сть сѐ на нб҃сехъ по́слꙋхъ мои, свѣдѣтель же м̂и на вы́шнихъ.
да прїидетъ м̂и мо́льба къ г҃ꙋ, пред̑ ним же да ка́плет̑ м̂и ѻ҆́ко.
бꙋди же ѻ҆бличе́нїе мꙋжꙋ пред̑ гм҃ъ, и҆ сн҃ꙋ чл҃ческомꙋ бли́жнемꙋ е҆го.
лѣта и҆сче́тена прїидо́ша, пꙋте́мъ и҆мже не възвращꙋсѧ по́идꙋ·

Глв̑҇а, з҃і·

Тлѣ́ю же дх҃омъ носимъ, прошꙋ ж́е гроба и҆ не ѹ҆лꙋча́ю молю̀ творѧ́и, и҆ чт̂о сътворю̀.
ѹ҆крадо́ша же м̂и и҆мѣнїе чю́жїи, кто̀ е҆сть сѐ в рꙋкꙋ же моею свѧ́занъ бꙋди.
ꙗ҆́ко срд̑ца и҆хъ съкры́лъ е҆си ѿ мꙋдрости, сего ради не вознесе́ши и҆хъ в ча́сти възвѣсти́тъ ѕло́бы.
ѻ́чи же на сн҃ехъ и҆ста́ѧста·

Положи́ же м̂ѧ притчею въ странах̑, смѣхꙋ же бых̑ и҆мъ.
ѻ҆слѣпо́сте б̂о ѻ҆́чи мои ѿ гнѣва̑ повое́ванъ быхъ во́и свои҆ми.
чю́до бых̑ и҆́стинным̑ ѻ҆ сихъ, пра́ведникъ же на безако́нника въста́етъ.
да ѹ҆крѣпит же сѧ вѣрныи на своем̑ пꙋтѝ, чи́стыи же рꙋка́ма да прїиметъ де́рзость.
н̂и и҆́накоже, н̂о всѝ ѹ҆твержа́итесѧ и҆ прїидете, не бо̀ ѻ҆брѣта́ю въ ва́съ и҆́стинны.
дн҃їе моѝ преи҆до́ша въ тече́нїи.
преторго́ша же сѧ ѹ́дове срд̑ца мое҆го.
но́щь въ дне мѣсто положи́хъ, и҆ свѣтъ бли́зъ ѿ лица̀ т꙽мы̀, а҆ще б̂о стерплю̀ а҆́дъ м̂и е҆сть до́мъ.
и҆ в сꙋмра́цѣ лежа́нїѧ м̂и е҆сть, и҆ посте́лѧ.
смр҃ть прозва́хъ себѣ ѿц҃а быти, мт҃рь же и҆ сестрꙋ ми гно́ѧ.
гдѣ ѹ҆бо е҆ще е҆сть м̂и надеж́да, и҆л̂и бл҃гъ свои҆хъ ѹ҆зрю̀.
и҆л̂и со мно́ю въ а́дъ сни́дꙋтъ, и҆л̂и вкꙋпѣ на прьсть сни́демъ·

Глв̑҇а, и҃і·

Ѿвѣща же валъда́дъ савхети́нъ гл҃ѧ.
доко́лѣ не преста́неши, пождѝ да и҆ мы̀ възъгл҃емъ.
и҆ почт̂о а҆ки четвероно́жныѧ ѹ҆молъча́хомъ пред̑ тобо́ю пребыс̑҇ т̂и гнѣвъ.
что б̂о а҆ще т̂ы ѹ҆мреши не ѹ҆селе́нна л̂и бꙋдет̑ под̑нбс̑҇наѧ, и҆л̂и развратѧт̑сѧ го́ры ѿ ѻ҆снова́нїѧ, и҆ свѣтъ нечести́ваго ѹ҆га́снетъ, и҆ не събꙋдетсѧ им̑ пла́мы, свѣтъ е҆го тма̀ в жи́тїи, свѣти́лникъ же в немъ ѹ҆га́снетъ.
да ѹ҆ло́вѧтъ ме́ншины и҆мѣнїѧ е҆го погрѣши́тъ же е҆го совѣтъ, и҆ да сѧ въвержетъ нога̀ е҆го въ прꙋ́гло, мре́жею пови́тъ да прїидꙋтъ нань прꙋгла, да ѹ҆крѣпи́тъ на́нь жа́ждꙋщих꙽.
съкры́ же сѧ в землѝ ѹ́же е҆го, и прїѧтїе е҆го на стезѝ.
ѻ҆́крс̑҇тъ да погꙋбѧ́тъ е҆го бо́лѣзни, мно́зи же ѻ҆ ноѕѣ̀ е҆го да прїидꙋтъ гла́домъ тѣсном꙽, паде́нїе же е҆го ѹ҆гото́васѧ е҆мꙋ и҆зрѧ́дно, поꙗ҆де́но же бꙋди вс̂е паде́нїе но́гꙋ е҆го.
да поѧ́сть же красотꙋ̀ е҆го смр҃ть, ѻ҆тръже́но бꙋди ѿ жи́тїѧ е҆го и҆сцѣле́нїе.
да и҆мет̑ е҆го бѣда̀, вина̀ цр҃ьскаѧ.
да всели́тсѧ въ хра́мѣ свое҆мъ в нощи свое́и, раз꙽сѣѧна бꙋди лѣпота̀ е҆го жꙋпелом̑ ѻ҆гнем̑ под ним̑.
ко́ренїѧ е҆го да и҆схнꙋтъ сверха да нападет̑ пож꙽же́нїе ѻ҆гнѧ̀.
па́мѧтъ е҆го поги́бнетъ ѿ землѧ̀, и҆ бꙋди и҆мѧ е҆го на лицѐ внѣшнее.
да ѿринетъ е҆го ѿ свѣта въ т꙽мꙋ̀, и҆ не бꙋдетъ зна́емъ в лю́дехъ е҆го.
ни сп҃сетсѧ въ подънбс̑҇нѣи дом̑ е҆го, н̂о въ свои҆хъ е҆мꙋ да поживꙋтъ и҆́нїи.
на́нь въздохнꙋша послѣднїи, прьвых же ꙗ҆́тъ чю́до.
сїи сꙋть домове непра́ведникъ, се же мѣсто невѣдꙋщихъ б҃а·

Глв̑҇а, ѳ҃і·

Ѿвѣща́ же і҆́ѻвъ и҆ рече.
доколѣ притрꙋ́днꙋ съътвори́те дш҃ꙋ мою, и҆ низложи́сте м̂ѧ словесы̀.
разꙋмѣи́те то́кмо, ꙗ҆́ко б҃ъ сътворѝ м̂ѧ си́цева, тѧ́жѣте м̂ѧ, не стыдѧ́щисѧ нале́жите м̂и.
и҆ ѹ́бо въи́стиннꙋ а҆зъ прельсти́хсѧ, ѹ҆ мене́ же не въдворѧ́етсѧ лестець, гл҃ти сло́во мое е҆же не подоба́етъ.
словеса́ же моѧ съблажнѧ́ютсѧ и҆ не въ вре́мѧ.
ѻ҆стани же ꙗ҆́ко на мѧ велича́етесѧ.
наскака́ете же м̂и словесы поно́сными.
разꙋмѣ́ите ѹ҆бо ꙗ҆́ко г҃ь е҆сть мои, ѹ҆тверже́нїе свое на мѧ възнесѐ.
с̂е смѣхъ поноше́нїѧ не възъгл҃ю, и҆ възопїю и҆ нигдѣ же сꙋдъ.
ѻ҆́крс̑҇тъ ѻ҆гражден̑҇ е҆смь, и҆ не и҆́мамъ минꙋти.
пред̑ лицем꙽ же мои҆мъ тмꙋ̀ положѝ, сла́вꙋ же ѻ҆ мн̂ѣ съвлече, ѿѧ́т꙽ же вѣнець ѿ главы̀ моеа.
разтерза́ же м̂ѧ ѻ҆́крс̑҇тъ и҆ ѿи҆дох̑, посѣче́ же ꙗ҆ко дре́во надежд̑ꙋ мою̀.
лю́тѣ гнѣво сътворѝ м̂и и҆мѣ же м̂ѧ ꙗ҆ко вра́га.
въкꙋпѣ прїидо́ша и҆скꙋше́нїѧ е҆го на́ мѧ, на пꙋтехъ же мои҆хъ ѻ҆быидо́ша м̂ѧ пред̑сѣдѧ́щеи.
и҆ бра́тїѧ моѧ ѿстꙋпи́ша ѿ мене, позна́ша чю́жа неже мене.
и҆ дрꙋзи моѝ немлс̑҇тиви бы́ша, не прїѧша м̂ѧ бли́жнїи моѝ и҆ вѣдꙋще и҆́мѧ мое забы́ша м̂ѧ.
сосѣди до́мꙋ и҆ рабынѧ моѧ̀, ꙗ҆́ко и҆ноплеме́нникъ бых̑ пред̑ ними.
раба̀ свое҆го възва́хъ и не послꙋша, ѹ҆стаж̑ моѧ молѧ́хꙋсѧ, и҆ слꙋжа́хꙋ женѣ̀ мое́и.
призыва́х же ласкаѧ сн҃ы под̑ложниць моих̑, ѻни́ же мене въ вѣк꙽ ѿринꙋша.
е҆гда̀ въста́нꙋ, на мѧ гл҃ют꙽.
ме́рзокъ бывъ вѣдꙋщим̑ м̂ѧ и҆хже люби́хъ въста́ша на́ мѧ.
въ кожи мое́и согни́ша пло́ти моѧ̀, ко́сти же моѧ в зꙋбѣхъ съдръжат̑.
поми́лꙋите м̂ѧ поми́лꙋите м̂ѧ ѽ дрꙋзи, рꙋка б̂о гн҃ѧ коснꙋвшїи м̂ѧ е҆сть.
почто́ же м̂ѧ го́ните, ꙗ҆́коже и҆ г҃ь.
ѿ пло́ти же мое́ѧ не насыща́е҆тесѧ·

Кт̂о ѹ҆бо да́сть да бы́ша написана словеса моѧ.
и҆ положи́ти и҆хъ въ кни́гахъ въ вѣкъ, въ писа́нїи желѣзнѣ ѻко́вѣ, и҆л̂и в ка́мени въваѧ́ти.
ви́дѣ б̂о ꙗ҆ко прс̑҇носꙋще ес̑҇ и҆же и҆́мать разори́ти по землѝ, въздви́гнꙋти ко́жꙋ мою въздвиза́ющꙋюсѧ, ѿ г҃а же сїе быс̑҇ м̂и.
и҆ е҆же азъ въ себѣ съвѣдѣ, ꙗ҆́же ѻ҆́ко мое видѣ а҆ не и́нъ, и҆ все́ же ми сконча́сѧ в ло́нѣ.
а҆ще же и҆ речете чт̂о речемъ пред̑ ни́мъ, и҆ ко́рень словеси ѻ҆брѧ́щем̑ на немъ.
ѹ҆бо́ите же сѧ и҆ вы̀ ѿ покрове́нїѧ, ꙗ҆́рость б̂о на безако́н꙽ныѧ на́идетъ, и҆ тогда ѹ҆вѣдѧтъ гд̂ѣ и҆хъ е҆сть ве́щь·

Глв̑҇а, к҃·

Ѿвѣща же съфаръ минѣи҆нъ и҆ рече.
не тако мнх̑ѣ с̂е ти рещи проти́вꙋ, и҆ не разꙋмѣ́ете ли паче нежели а҆́зъ·

Наказа́нїе срамле́нїѧ мое҆го ѹ҆слы́шꙋ, и҆ дх҃ъ ѿ ра́зꙋма ѿвѣщева́етъ м̂и·

Є҆гда̀ с̂е разꙋмѣ́ютъ лѣта, ѿ негоже положенъ чл҃къ быс̑҇ на землѝ·

Весе́лїе б̂о нечести́выхъ паде́нїе силꙋ и҆́мать.
ѻ҆брадова́нїе же безако́нникъ па́гꙋба·

А҆ще възы́идꙋтъ на́ нб҃о да́ры е҆го, же́ртва же е҆го ѻ҆́блацх̑ѣ сѧ ко́снетъ·

Є҆гда̀ мни́тсѧ ѹ҆же ѿве́рженъ, тогда̀ поги́бнет̑ до конца̀.
ви́дѣвшїи же е҆го рекꙋтъ гд̂ѣ е҆сть.
ꙗ҆́коже со́нъ ѿ тѣ́ла вн̂ѣ ѻ҆брѧ́щет̑сѧ, ѿлетѣ же а҆ки мечта́нїе но́щное.
ꙗ҆́ко презрѣ̀ и҆ не приложи́тъ, и҆ ктомꙋ̀ не приближитъ е҆го мѣсто е҆го·

Сн҃ы их̑ да погꙋбѧтъ ме́ншины, и҆ рꙋцѣ е҆го пожгꙋтъ бо́лѣзнь.
и҆ ко́сти е҆го и҆спо́лнѧтсѧ ю҆́ности е҆го, и҆ с ни́мъ на пе́рсти ѹ҆сне́тъ·

А҆ще ѹ҆слади́тсѧ въ ѹ҆стх̑ѣ е҆го ѕло́ба, съкрыет̑ ю҆̀ под̑ ꙗ҆зы́комъ свои҆мъ.
не постыди́тсѧ и҆ не ѻ҆ста́витъ е҆ѧ̀, и҆ съберет̑ ю҆̀ посредѣ горта́ни свое҆го.
не възмо́жетъ помощи себѣ, ꙗ҆́дъ а҆спидь въ чре́вѣ е҆го·

Бога́тьство бес пра́вды събира́емо и҆з꙽блю́етсѧ, і҆ и҆з꙽ хлѣвины е҆го да и҆звлече́тъ и҆̀ а҆гг҃лъ·

Ꙗ҆́рос̑҇ же ѕмїевꙋ да със꙽сетъ, да ѹ҆бїет̑ же е҆го ꙗзы́къ ѕмии́нъ·

да не ѹ҆зритъ ѿ дое́нїа прибыт̑кꙋ, ниже прибыт̑кꙋ ме́да и҆ ма́сла, вътще и҆ всꙋе трꙋди́сѧ бога́тьство ѿ негоже не въкꙋсит̑·

Ꙗ҆́коже клоки несожьва́емы и҆ не пожерты, в꙽ поги́бель не́мощных̑ домы съкрꙋшѝ·

жи́тїе же разграби и҆ не поста́ви, нѣсть спс̑҇нїѧ и҆мѣнїю е҆го·

Въжд̑елѣ́нїе е҆го не спс҃етъ е҆го, нѣсть ѻ҆ста́нка бра́шнꙋ е҆го·

Сего ради не процвѣтет̑ е҆мꙋ бл҃гаѧ, и҆ е҆гда же мни́тъ ѹ҆же и҆спо́лнь бы́ти ѻ҆скорблѧ́е҆тсѧ.
всѧ́ка же бѣда на́нь прїидет̑, а҆ще ка́ко и҆спо́лнитъ чре́во е҆го·

напꙋститъ на́нь гнѣ́въ и҆ не ѹ҆цѣлѣет̑, и҆ ꙗ҆́рость гнѣ́ва ѹ҆бꙋдитъ и҆̀ на болѣзнь.
ѿ рꙋки желѣ́зны да ѹ҆стрѣлитъ е҆го лꙋкъ мѣ́дѧнъ, и҆ да про́идет̑ сквоѕѣ тѣло е҆го стрѣла̀·

Но ни ѕвѣзды же въ жи́тїи е҆го, да похо́дѧтъ на́нь стра́си.
и҆ всѧ́ка же тма̀ на́нь пребꙋ́ди, и҆ да поѧ́сть и҆̀ ѻ҆́гнь раждеже́ныи·

да ѻ҆ѕлобитъ до́мъ е҆го приходень, и҆ да ѿкры́етъ н҃бо безако́нїа его.
и҆ землѧ̀ да въста́нетъ на́нь, да и҆з꙽влечетъ до́мъ е҆го па́гꙋба до кон꙽ца̀·

дн҃ь гнѣ́ва да прїидетъ на́нь, сїѧ ча́сть чл҃ка нечести́ваго ѿ г҃а, и҆ стѧжа́нїе сꙋщаго е҆мꙋ ѿ стра́ха·

Глв̑҇а, к҃а·

Ѿвѣща́ же и҆ѻ҆въ и҆ рече.
послꙋшаите послꙋшаите словес̑҇ моих̑ да бꙋдетъ м̂и ѿ васъ ѹтѣше́нїе с̂е·

Клѣнете м̂ѧ а҆з꙽ же въз꙽гл҃ю, та́же не посмѣете ми сѧ.
чт̂о бо е҆гда̀ чл҃чьско м̂и ѻ҆бличе́нїе, и҆ли почто̀ не ꙗ҆рю́сѧ·

възрѣвшїи на́ мѧ ди́витесѧ, рꙋ́кꙋ полож꙽ше на лани́тѣ·

А҆ще же въспомѧнꙋ̀ тщꙋсѧ, ѻ҆бдержатъ бо плоть мою болѣзни·

Почто̀ нечести́вїи живꙋтъ, ѻ҆бет꙽ша́ша же въ бога́тьствѣ.
сѣ́мѧ и҆хъ по дш҃и, ча́да же и҆хъ пред̑ ѻ҆чи́ма.
домове и҆хъ гоб꙽зи сꙋть, страхъ нигдѣже, ра́ны же ѿ г҃а нѣ́сть на них̑, и҆ли говѧ́до и҆хъ не и҆зве́рже.
сп҃сена же бы́сть их̑ и҆мꙋщїѧ въ чре́вѣ и҆ не съблазнит̑сѧ, пребыва́ют꙽ же ꙗ҆́ко ѻ҆́вца вѣ́чныѧ·

дѣти же и҆хъ преди възыгра́ют꙽, и҆ възе́мше пѣсни́цꙋ и гꙋсли, веселѧт̑сѧ гла́сомъ пѣсни·

Сконча же сѧ въ бл҃гихъ жи́тїе и҆х꙽, и҆ въ покои а҆довѣ ѹ҆спо́ша.
и҆ гл҃ютъ гв҃и ѿстꙋпи ѿ насъ, пꙋтїи твои҆хъ вѣдѣти не хощем̑.
чт̂о пости́жно ꙗ҆́ко порабо́таем̑ емꙋ, и҆ ка́ѧ по́лза ꙗ҆́ко срѧ́щемъ и҆̀.
в рꙋ́кꙋ бо и҆хъ б̂ѣ бл҃гое, и҆ дѣлъ же нечести́выхъ не зри́тъ·

никтоже н̂о и҆ нечести́выхъ свѣти́лницы ѹ҆га́снꙋтъ, на́идет꙽ же и҆мъ развраще́нїе, болѣзнь же и҆хъ прїиметъ ѿ гнѣ́ва·

Бꙋдꙋт же а҆ки пле́вы пред̑ вѣтромъ, и҆ли ꙗ҆́коже пра́хъ е҆гоже взѧ́тъ ви́хоръ, да ѻ҆скꙋдѣ́ютъ сн҃ов̑҇ и҆мѣ́нїе е҆го, да възда́сть проти́вꙋ и҆хъ и҆ разꙋмѣ́ютъ да ѹ҆зрита ѻ҆́чи е҆го свое ѹ҆бїе́нїе, ѿ г҃а же да не сп҃сетсѧ.
ꙗ҆ко во́лѧ е҆го с ни́мъ въ домꙋ̀ е҆го, и҆ число̀ мс̑҇ць е҆го раздѣлишасѧ·

А҆ще ѹ҆бо не г҃ь ли е҆сть наѹ҆ча́ѧи разꙋмꙋ и҆ хи́трости, тожде мꙋдрых̑ разсꙋжда́етъ, то́жде да ѹ҆́мретъ ѻ҆держа́нїемъ безꙋмїѧ свое҆го·

всѧк же добро прїемлѧи и гобзѧ́а, ѹ҆тро́ба же е҆го и҆спо́лнь тꙋ́ка, мо́згъ же разлива́етсѧ.
ѻ҆́н же ѹ҆́мрет̑ го́рестїю дш҃а, не ꙗ҆ды́и ничто́же бл҃га·

вкꙋпѣ же на земли спѧ́тъ, гно́и же и҆хъ покры̀.
тѣмже вѣдѣ васъ, ꙗ҆́ко дерзо́стїю належите ми.
ꙗ҆́ко речете гдѣ е҆сть до́мъ кнѧ́жь, и҆ гдѣ е҆сть покро́въ сѣнїи нечс̑҇ти́вых̑.
въпроси́те ми́моходѧ́щаѧ пꙋтем̑, и҆ зна́менїѧ их̑ не тꙋжда сътвори́те·

Ꙗ҆́ко въ дн҃ь па́гꙋбы полегчи́тсѧ нечести́выи, и҆ въ дн҃и гнѣ́ва е҆го ѿведен꙽ бꙋдетъ·

и҆ Кт̂о възвѣсти́тъ пред̑ лицемъ е҆го пꙋть е҆го, и҆ самъ сътворѝ кт̂о възда́сть емꙋ.
и҆ то́и въ гро́бъ ѿнесѐсѧ, и҆ на гробѣхъ побдѣ.
ѹ҆слади́сѧ е҆мꙋ дробно каменїе пото́ка.
и҆ въ слѣдъ е҆го всѧ́къ чл҃къ ѿи҆де, и҆ пред̑ ни́мъ бесчисле́нїи.
ка́коже м̂ѧ ѹ҆тѣша́ете въсꙋе, а҆ е҆же мнѣ престати ѿ вас̑҇ ничтоже·

Глв̑҇а, к҃в·

Ѿвѣща же е҆лифа́съ, ѳемани́тинъ и҆ реч̑҇.
ѹ҆бо не г҃ь ли е҆сть наѹ҆ча́ѧи ра́зꙋмꙋ и҆ хи́трости.
чи́мъ б̂о бреже́тъ г҃ь а҆ще ты е҆си дѣ́лы непоро́ченъ, и҆ли походи ꙗ҆́ко про́стъ пꙋть твои, и҆ли сло́во т̂и творѧ ѻ҆бличи́тъ т̂ѧ , и҆ вни́дет̑ ли с тобо́ю на сꙋдъ·

Кое ѹ҆бо, не ѕло́ба ли твоѧ е҆сть мно́га, без̑числе́ни же т̂и сꙋть грѣси·

В заи҆м꙽ б̂о даѧ́ше бра́тїи свое́и въ тщѣ, ѻ҆де́ждꙋ же наги́хъ ѿꙗ҆́лъ е҆си, и҆ воды̀ жа́ждꙋщаѧ не напои́лъ е҆си, и҆ а́лчющаѧ лиши́лъ е҆си хлѣ́ба·

Сꙋди́л꙽ же е҆си нѣкїихъ лицемъ, вселил꙽ же е҆си ѹ҆бо́гихъ на землѝ·

вдови́ца ѿпꙋстилъ е҆си тща̀, сироты ѻ҆ѕлоби́лъ е҆си·

Тѣм꙽же ѹ҆бо ѻ҆быидо́ша т̂ѧ сѣти, и пот꙽ща т̂ѧ ра́ть и҆зрѧд̑на·

Свѣтъ тебѣ тма̀ бы́сть, ѹ҆спо́ша же вода т̂ѧ покры̀·

Не живы́и ли на высо́кихъ презира́ет꙽, възноси́мыѧ же ѹ҆кори́зною смѣри·

И҆ ре́клъ е҆си чт̂о разꙋмѣ крѣ́пкїи, и҆ли на ѻ҆́блацѣ сꙋдитъ·

ѻ҆́блакъ и҆ ѿкрове́нїе е҆го неви́димо бꙋдетъ, и҆ крꙋгъ нб҃си ѻ҆бы́идет̑·

е҆да̀ стеѕю вѣ́чнꙋю съхрани́ши, ю҆́же пра́ша мꙋ́жїе непра́ведни, и҆же ꙗ҆́ти бы́ша без꙽ вре́мене, и҆ рѣка текꙋщи ѿ ѻ҆снова́нїѧ и҆хъ·

гл҃ющи г҃ь чт̂о сътво́ритъ намъ, и҆ли чт̂о нанесе́тъ на́ ны вседржи́тел̑҇·

И҆же и҆спо́лнилъ е҆сть до́мы и҆хъ бл҃гот̑, совѣт꙽ же нечести́вых̑ дале́че ѿ него·

Видѣвше же пра́вед̑ницы въсмѣѧ́шесѧ, непоро́ченъ же глꙋмлѧ́шесѧ.
то́кмо поги́бе и҆мѣ́нїе и҆хъ, и҆ ѻ҆ста́нки и҆хъ поꙗ҆́сть ѻ҆́гнь·

Бꙋди же жесто́къ а҆ще сътерпи́ши, пото́мъ плод̑ твои бꙋдет̑ въ блаѕѣ·

Прїими же и҆з꙽ ѹ҆́стъ е҆го ѻ҆бѣща́нїе, и прїими словеса̀ е҆го въ срд̑цы свое҆мъ·

А҆ще ли же ѻ҆брати́шисѧ и҆ смири́ши себе пред̑ гм҃ъ, и҆ дале́че сътвориши ѿ жи́тїѧ твое҆го непра́вдꙋ·

Положи на пе́рсти въ ка́мени, ꙗ҆коже ка́мень пото́ка сап꙽фи́рова·

Бꙋди же т̂и вседръжи́тель помо́щник꙽ ѿ вра́гъ, чи́ста же възда́сть т̂ѧ ꙗ҆́ко сребро̀ раждеже́но·

Пото́мъ възвесели́шисѧ пред̑ бм҃ъ, и҆ възрѣвъ на́ нб҃о ти́хо·

Помо́льшꙋ же ти сѧ къ немꙋ и҆ ѹ҆слы́шит꙽ т̂ѧ, да́сть же т̂и моли́твы твоѧ възда́ти·

Ѹ҆стро́ит̑ же т̂и жили́ще пра́вды, на пꙋтех̑ же твоих̑ бꙋдетъ свѣтъ·

Ꙗ҆́ко смирѝ себе, и҆ рече́ши възвели́чисѧ, и҆ смире́на ѻ҆чи́ма сп҃сетъ·

І҆ и҆зба́витъ непови́нна, и҆ сп҃саѧ чи́стыма рꙋка́ма с̂и·

Глв̑҇а, к҃г·

Ѿвѣща же і҆́ѻ҆въ и҆ рече.
вѣдѣ ѹ҆бо ꙗ҆́ко и҆з рꙋки мое҆ѧ ѻ҆бличе́нїе мое е҆сть, и҆ рꙋка е҆го тѧ́жка бы́сть на мое҆мъ въздыха́нїи·

Кто же ѹ҆бо вѣ́сть ꙗ҆́ко ѻ҆бращꙋ е҆го, и҆ прїидꙋ на кончи́нꙋ·

Рекꙋ же себѣ сꙋдъ, ѹ҆ста же моѧ испо́лню ѻ҆бличенїѧ·

Разꙋмѣ́ю же и҆сцѣле́нїѧ ꙗ҆́же м̂и реч̑҇, ѻ҆щꙋщꙋ же чт̂о ми възвѣсти́тъ·

И҆ а́ще мно́гою крѣпостїю на́идет̑ м̂и, посем꙽ же не попрети́тъ м̂и·

И҆́стинна же и҆ ѻ҆бличе́нїе ѿ него, и҆знесет̑ же до конца сꙋдъ мои·

На первое б̂о поидꙋ и҆ кто нѣ́смь, а҆ е҆же напослѣдокъ чи́мъ вѣмъ·

шꙋѐ сътво́ршꙋ е҆мꙋ и҆ не разꙋмѣхъ, ѻ҆бложитъ десни́цꙋ и҆ не ѹ҆зрю·

Вѣ́сть бо ѹ҆же пꙋть мои, и҆скꙋси же м̂ѧ ꙗ҆́ко зла́то·

И҆зы́идꙋ же въ заповѣдехъ е҆го, пꙋти б̂о е҆го съхрани́хъ, и҆ не ѹ҆клонюсѧ ѿ за́повѣди е҆го не престꙋплю, в надрѣх꙽ же свои҆хъ съхрани́хъ гл҃ы е҆го·

А҆ще ли и҆ самъ сꙋдилъ тако кт̂о е҆сть рекїи проти́вꙋ е҆мꙋ, е҆же самъ въсхотѣ̀ и҆ сътворѝ·

Сего ради на́нь потща́хъсѧ, ѹ҆ничижи́мъ же ѻ҆ сем̑, попекꙋсѧ ѻ҆ немъ·

ѻ҆ толи́цѣ е҆го пот̑щꙋсѧ, смотрю и҆ ѹ҆бою́сѧ ѿ него·

Гь҃ ѻ҆недꙋжилъ срд̑це мое, вседержи́тель потща̀ м̂ѧ·

Не ви́дѧхъ б̂о ꙗ҆́ко на́идетъ м̂и тма̀, пред̑ лицем꙽ же мои҆мъ покры̀ ѻ҆мра́комъ·

Глв̑҇а, к҃д·

Почто же г҃а ѹ҆таи҆шасѧ ча́си, нечести́вїи же предѣ́лы преидо́ша·

Ста́до съ па́стырем̑ разгра́бльше, под̑е҆ре́мника же сиры ѿведо́ша, и҆ во́лъ вдови́ца ѻ҆брꙋчисѧ·

ѿклони́ша же не́мощныѧ ѿ пꙋти пра вед̑наго, вкꙋ́пѣ же съкры́шасѧ крот̑цїи землѧ̀·

Бы́ша же ꙗ҆́ко и҆ ѻ҆сли на села землѧ̀ паче мене, и҆злѣзше свое҆го чина.
възмо́же хлѣ́бъ их̑ во ю҆́ноша·

ни́вꙋ преже вре́мене свою сꙋщꙋ пожа́ша, не́мощнїи же виноград̑ нечести́выхъ без꙽ мзды и҆ без꙽ бра́шна въздѣла́ша·

На́ги мно́ги ѹ҆спи́ша без̑ риз̑, ѻ҆де́жд̑ꙋ же дш҃ныхъ ѻ҆тъѧ́ша·

Ка́плѧми го́рсками мочатъ, зане же не и҆мѣахꙋ покро́ва в ка́мень сѧ ѻ҆блеко́ша·

Въсхити́ша сиротꙋ ѿ сесца, спад̑шаго же смири́ша, нагїѧ же ѹ҆спи́ша без꙽ пра́вды, а҆лчющихъ же хлѣ́бъ ѻ҆тъѧ́ша·

Въ тѣснинахъ без пра́вды преседѣша, пꙋть же пра́веденъ не вѣдѣша.
и҆же и҆з гра́да и҆з домо́въ своих̑ и҆згони́ми быва́хꙋ, дш҃а же младенецъ въздыха́ше вельми·

Сам꙽ же почто̀ сихъ посѣще́нїѧ не сътвори.
на землѝ сꙋщим꙽ и҆мъ и҆ не разꙋмѣша, пꙋти же пра́вед̑наго не вѣдѣша, ни по гости́нницамъ е҆го ходи́ша·

Разꙋмѣв꙽ же их̑ дѣ́ла, преда́сть и҆хъ въ тмꙋ̀, и҆ въ но́щи бꙋдетъ ꙗ҆́ко та́ть·

ѻ҆́ко прелюбодѣ́ица съхрани тмꙋ̀, гл҃ѧ, не ѹ҆зритъ м̂ѧ ѻ҆́ко, и҆ покрове́нїе лица̀ положѝ·

Прокопа́ша въ тмѣ̀ хлѣ́вины, въ дн҃ехъ назнамена́ша себѣ, и҆ не позна́ша свѣта·

Ꙗ҆́ко въкꙋпѣ заѹ҆́тра им̑ стѣ́нь смр҃ти, ꙗ҆́ко позна́етъ м̂ѧ с̂е бы́ти сѣ́нь смр҃ти, ле́гко е҆сть над̑ лице воды̀·

Проклѧ́та бꙋди ча́сть их̑ по землѝ, да ꙗ҆ви́тъ же сѧ сад̑ и҆хъ на землѝ сꙋха ча́сть·

И҆же бо си́рых̑ разграби́ша, пото́мъ въспомѧнꙋсѧ е҆мꙋ грѣх꙽, ꙗ҆́коже м꙽гла ѿ росы̀ и҆ще́зе·

Възда́но же бꙋди е҆мꙋ е҆же съдѣѧ̀.
съкрꙋше́н꙽ же бꙋ́ди всѧ́къ неправди́въ ꙗ҆ко дре́во неи҆сцѣле́но неплод̑ви б̂о, не добро сътвори и҆ же́ны не поми́ловалъ·

Ꙗ҆́ростїю же разврати не́мощныѧ, сего ра́ди ѹ҆бо не и҆́мать вѣры ꙗ҆́ти на свое жи́тїе·

Болѣ́в же да не даетсѧ и҆сцѣли́ти, н̂о въпадет̑ въ недꙋ́гъ·

Мно́ги б̂о ѻ҆злоби́ла высота е҆го, ѹ҆вѧде же ꙗ҆́ко ѕе́лїе въ теплотѣ, и҆ли ꙗ҆́коже кла́съ ѿ стебла самъ ѿпа́дъ·

Глв̑҇а, к҃е·

Аще ли никтоже е҆сть рекїи лжꙋща м̂ѧ, и҆ положитъ нивъчтоже гл҃ы моѧ̀·

Ѿвѣща же вал꙽дад̑ савхетинъ и҆ рече·

Чт̂о бо пе́рвое сло́во и҆ли стра́хъ ѿ него, творѧ́и всѧческаѧ на вы́шнихъ, да не мни́тъ никтоже ꙗ҆́ко е҆сть превлече́нїе и҆скꙋсникомъ на кого ꙗ҆́же не на́иде пресѣдѣ́нїе е҆го.
ка́ко бꙋдетъ ѻ҆правда́нъ чл҃къ пред̑ бм҃ъ, и҆ли кт̂о ѻ҆чиститъ себе роже́ныи ѿ жены̀·

А҆ще лꙋнѣ̀ повелѣва́етъ и҆ не сїѧ́етъ, ѕвѣзды же нечи́сты сꙋть пред̑ ни́мъ·

Коли́ко же па́че чл҃къ гно́и, и҆ сн҃ъ члчс̑҇къ че́рвь·

Глв̑҇а, к҃ѕ·

Ѿвѣща же і҆́ѻ҆въ и҆ рече·

Кого лю́биши, и҆ли комꙋ хо́щеши помага́ти·

Тѣм꙽же ѹ҆бо не е҆мꙋже ли многа крѣпость, не е҆мꙋже ли мы́шца крѣ́пка есть·

С ким̑ совѣща́ешисѧ, не е҆мꙋже ли мно́га премд̑ꙋрость·

И҆ли кого въслѣ́дъ по́идеши не е҆мꙋже ли мно́га си́ла·

Комꙋ възвѣсти́лъ е҆си гл҃ы, дыха́нїе же чїе е҆сть и҆сходѧ́щее и҆с тебе·

Є҆да̀ щюдове въско́ръ мѧтсѧ под̑ дво́ю съсѣ́дъ е҆го·

На́гъ а҆дъ пред̑ нимъ, и҆ нѣ́сть ѻ҆дежда па́гꙋбѣ е҆го·

Простира́ѧ сѣвера ни на чем̑же, и҆ повѣшаѧ зе́млю ни на ком̑же·

Свѧза́ѧ во́дꙋ на ѻ҆́блацѣхъ свои҆хъ, и҆ не претръжесѧ ѻ҆́блакъ под̑ ни́мъ·

держа лице прс̑҇тла, и҆ простира́ѧ на не́мъ ѻ҆́блакъ свои·

Повеле́нїе ѻ҆крꙋжи на лицы̀ водѣ, до кончи́ны свѣтъ съ тмо́ю·

Сто́лпи нбс̑҇нїи прострѣшасѧ и҆ диви́шасѧ ѿ запреще́нїа е҆го·

Крѣ́постїю ѹ҆стро́и мо́ре, и҆ хи́тростію же постла̀ дно·

Ве́рѣѧ же нбс̑҇ныа ѹ҆боѧ́шасѧ е҆го, повелѣ́нїем̑ же ѹ҆мори ѕмїа проти́вника.
и҆ с̂е сїа ча́сть пꙋти е҆го.
и҆ ѻ҆ ка́пли словеси ѹ҆слы́шимъ в не́мъ, си́лꙋ же гро́ма е҆го кт̂о вс̑҇ѣ и҆ кт̂о ꙗ҆́вѣ да сътво́рит̑·

Глв̑҇а, к҃з·

Еще же приложи і҆́ѻвъ и҆ реч̑҇ пе́рвымъ сло́вомъ.
жи́въ г҃ь, и҆же м̂и си́це сꙋди·

и҆ вс̂едръжи́тель, и҆же ѻ҆горъчи́лъ м̂и дш҃ю·

Є҆ще ли ѹ҆бо дыха́нїю мое҆мꙋ сꙋщꙋ, и҆ дх҃ъ бж҃їи сꙋщїи в но́здрехъ моих̑.
не воз꙽гл҃ите ѹ҆стнѣ мои безако́нїа, ни дш҃а моа поѹ҆чи́тсѧ непра́вдѣ·

Не бꙋди мнѣ̀ правди́вы нарещи васъ до́ндеже ѹ҆мрꙋ·

Не и҆змѣню бо незло́бїѧ мое҆го, пра́вдѣ же внима́ѧ не предам̑сѧ·

Не съвѣдѣ б̂о себе ѕл̂а съдѣлавъ никакож̑.
н̂о а҆ще бы́ша были враѕи м̂и, ꙗ҆́коже развраще́нїе нечестивыхъ.
и҆ въста́ющи на́ мѧ, ꙗ҆́коже пагꙋба безако́нныхъ·

Така́ѧ ѹ҆бо е҆сть наде́жда нечести́вомꙋ, ꙗ҆́ко пребыва́етъ надѣѧ́сѧ къ гв҃и ѹ҆бо сп҃сет̑ ли сѧ.
и҆ли мо́льбꙋ е҆го ѹ҆слы́шитъ б҃ъ, л̂и нашед̑шеи е҆мꙋ бѣдѣ, е҆да и҆́мать кое дерзнове́нїе пред̑ ни́мъ, и҆ли ꙗ҆́ко призва́вшꙋ е҆мꙋ, ѹ҆слы́шит̑ е҆го·

Но възвѣщꙋ вамъ чт̂о е҆сть в рꙋ́кꙋ гн҃ю, е҆же е҆сть ѹ҆ вседержи́телѧ не солжꙋ̀.
се же ѹ҆бо вс̂и вѣсте ꙗ҆́ко т꙽щее т꙽щїи҆мъ досто́итъ.
сїа ча́сть чл҃ка нечести́ваго ѿ г҃а, стѧжа́нїе же си́лно прїидетъ ѿ вседръжи́телѧ на́ нѧ.
а҆ще же мно́ѕи бꙋдꙋтъ сн҃ове е҆го, на заколе́нїе бꙋдт̑ꙋ, а҆ще же възмꙋжа́ютъ приложатсѧ.
живїи же е҆го смр҃тїю ѹ҆мрꙋтъ, и҆ вдови́ца и҆хъ никтоже поми́лꙋетъ·

А҆ще съберетъ ꙗ҆́коже зе́млю сребро̀.
и҆ ра́вно бернїю ѹ҆готовитъ зла́то·

Се вс̂е правдивїи ѻ҆бъдержа́тъ, и҆мѣ́нїе е҆го и҆стовїи по́имꙋтъ.
събы́сть же сѧ до́мъ е҆го ꙗ҆́ко мо́лїе, и҆ ꙗ҆́коже паѹ҆чи́на ꙗ҆́же снабдѣ·

Бога́тыи ѹ҆спнетъ, и҆ не приложитъ, ѻ҆́чи свои ѿверзе и҆ нѣсть срѣто́ша е҆го·

Ꙗ҆́коже вода болѣзни, но́щїю и҆мет̑ и҆̀ примра́къ.
прїиметъ и҆̀ ва́ръ, и҆ ѿи҆детъ, и҆ възвѣетъ е҆го ѿ мѣста е҆го, и҆ повержетъ и҆̀ и҆ не пощадит̑сѧ, и҆з рꙋ́кꙋ е҆го бѣжа́нїемъ ѹ҆бѣжим̑ въспле́щетъ на́нь рꙋка́ма свои҆ма, и҆ повлече́тъ и҆̀ ѿ мѣ́ста е҆го·

Глв̑҇а, к҃и·

Есть б̂о сребрꙋ мѣсто ѿнюдж̑ꙋ быва́етъ, и҆ мѣсто жезла т̂ꙋ ѹ҆дꙋже ѻ҆чища́етсѧ.
желѣзо бо ѿ землѧ̀ ражда́етсѧ, мѣдь же ра́вно ка́менїю сѣчетсѧ·

Чи́нъ положи тмѣ̀, и҆ всѧ́кꙋ кончи́нꙋ самъ и҆спытꙋетъ·

Камы́къ тмы̀, и҆ сѣнь см҃рти, пресече́нїемъ пото́ка ѿ пра́ха.
забыва́ющїи же пꙋть пра́выи изнемого́ша·

ѿ чл҃къ ѻ҆рема землѧ̀ ѿ неѧ и҆зы́идет̑ хлѣ́бъ, под нею сеи ѻ҆брати́сѧ ꙗ҆́ко ѻ҆́гнь·

Мѣсто сапфи́ра ка́менїе е҆ѧ̀, и҆ пе́рсть зла́то е҆ѧ.
стезѧ̀ не позна́ѧ пти́ца, и҆ не презрѣ ю҆̀ ѻ҆́ко неꙗ҆́сыще.
и҆ не пра́ша е҆ѧ̀ сн҃ове велича́выхъ, и҆ не преиде по не́и ле́въ·

На несѣко́мѣ простре рꙋ́кꙋ свою, разврати же и҆с коре́нїѧ го́ры.
во́лны во́дъ въстрѧсе, глꙋби́ны же рѣкъ ѿкры̀, ѿвра́ти же рѣкъ разверзе·

Всѧ́кое же чс̑҇тное видѣ м̂и ѻ҆́ко показа же си́лꙋ свою на свѣтъ·

Премꙋдрость же ѿкꙋ́дꙋ ѻ҆брѣте́сѧ, кое же мѣсто ес̑҇ хи́трости·

Не вѣсть чл҃къ пꙋти еѧ̀, ни ѻ҆брѧ́щет꙽ же сѧ въ чл҃цѣхъ.
безд̑на рече нѣсть мнѣ, и҆ мо́ре рече нѣсть съ мно́ю.
не да́сть ѻ҆бъѧ́ти ѻ҆ не́и, и҆ не преста́нетъ сребро̀ и҆змѣне́нїе е҆ѧ̀·

И҆ неспое́на бꙋдетъ съ зла́томъ сифи́рскомъ, ѻ҆нꙋхи́том̑ чс̑҇тномъ, и҆ сапфи́ромъ·

Не ра́вно бꙋдетъ е҆ѧ̀ зла́то и҆ сткло, і҆ и҆змѣне́нїе е҆ѧ̀ съсꙋ́ди зла́ти превысо́кїѧ, и҆ дѣ́лателе не помѧнꙋтсѧ·

И҆ въвлеци премꙋ́дрость паче внꙋтренѧа, не равно е҆ѧ̀ бꙋдетъ топа́зїѻнъ е҆ѳиѻ́пїѧ, съ зла́томъ чс̑҇тномъ не смѣси́тсѧ·

Премꙋдрость же ѿкꙋдꙋ ѻ҆брѣтесѧ, кое же мѣсто е҆сть смышле́нїѧ·

Ѹ҆таисѧ всего чл҃ка, и҆ ѿ пти́ць нбс̑҇ныхъ съкры́сѧ.
па́гꙋба и҆ смр҃ть реко́ста, слы́шахове же их̑ сла́вꙋ.
б҃ъ бл҃гъ съста́ви е҆ѧ пꙋть, сам꙽ же вѣсть мѣсто е҆ѧ̀.
самъ бо под̑нбс̑҇нꙋю всю прозира́етъ, вѣдыи по землѝ вс̂е е҆же сътвори·

Вѣтръ ѹ҆ставле́нїе, и҆ водѣ мѣрꙋ.
е҆гда̀ сътвори́лъ та́ко вѣдѧ́и, и҆ съчте пꙋть въ ѿтресе́нїи гла́са.
тогда̀ ви́дѣ ю҆̀ и҆сповѣда ю҆̀, ѹ҆готова і҆ и҆зъслѣди и҆ рече чл҃кꙋ.
и҆ се бг҃очс̑҇тїа е҆сть премꙋдрость, а҆ е҆же ѹдали́тисѧ ѿ ѕл̂а е҆сть хи́трость·

Глв̑҇а, к҃ѳ·

Еще же приложи і҆́ѻвъ и҆ рече, пе́рвымъ сло́вомъ, кт̂о мѧ г҃и положитъ на мс̑҇ць, пре́жде дн҃їи и҆хже м̂ѧ г҃ь хранѧ́ше·

Є҆гда свѣтѧшесѧ свѣщникъ е҆го над̑ главою мое҆ю, е҆гда̀ свѣтомъ е҆го хожда́хъ въ тмѣ̀·

Є҆гда̀ бѣ́хъ тѧ́жекъ на пꙋте́хъ, е҆гда̀ г҃ь посѣще́нїе творѧ́ше до́мꙋ мое҆мꙋ·

Є҆гда бѣхъ бога́тъ ѕѣ́ло, ѻ҆́крс̑҇тъ же мене рабѝ.
е҆гда̀ ѻ҆блива́хꙋсѧ пꙋтїе моѝ ма́сломъ, го́ры же мои ѻ҆блива́хꙋсѧ мле́комъ·

Є҆гда̀ и҆схожа́хъ и҆з꙽ ѹ҆́тра въ́ град̑, на стогнахъ же стоѧ́ше ми прс̑҇тлъ.
ви́дѣвше ю҆́ноша съкры́шасѧ, ста́рцы же въста́ша·

Мꙋжїе преста́ша гл҃юще, пе́рсты възло́ж꙽ше на ѹ҆ста·

и҆же слы́шаша бл҃жиша м̂ѧ, и҆ ꙗ҆зы́ки и҆хъ прилпе горта́ни и҆хъ·

Ꙗ҆́ко и҆́хже ѹ҆́хо слы́ша и҆ ѹ҆бл҃жиша м̂ѧ, ꙗ҆́коже ви́дѣвъ м̂ѧ ѹ҆клони́сѧ·

Сп҃сохъ бо ѹ҆бо́гаго ѿ рꙋки си́лнаго, и҆ сиротѣ е҆мꙋже не бѣ помо́щника помогох̑·

Блс̑҇венїе погиба́ющаго на мѧ прїидет꙽, ѹ҆ста же вдови́ча блс̑҇виша м̂ѧ·

Въ пра́вдꙋ же ѻ҆блича́хъ, ѻ҆дѣѧ́х꙽ же сѧ въ сꙋдъ ꙗ҆́ко въ ри́зꙋ сꙋгꙋбꙋ.
ѻ҆́ко бѣхъ слѣпымъ нога́ же хро́мымъ, а҆зъ бых̑ ѿц҃ъ не́мощ꙽ным̑, прю же ю҆же не вѣдѧхъ, і҆ и҆з꙽слѣдих̑·

Сътро́х꙽ же челюсти непра́вед̑ныхъ, ѿ среды же зꙋбъ и҆хъ разграбленїѧ и҆зѧ́хъ·

Рѣ́х же а҆ще въ́зрастъ мои състарѣетсѧ, ꙗ҆́коже стебло фини́ково мно́гїѧ лѣта поживꙋ·

ко́рень разверзесѧ на водѣ, и҆ роса̀ да всели́тсѧ на жа́твѣ мое́и.
сла́ва моа тща̀ съ мно́ю, и҆ лꙋ́къ мои в рꙋце е҆го по́идет̑·

Мене слы́шавше внѧ́ша, ѹ҆молко́ша же ѻ҆ мое҆мъ совѣтѣ·

къ мое҆мꙋ гл҃ꙋ ѹ҆́хо приложи́ша, ѻ҆брадовахꙋ же е҆гда к ни́мъ гл҃ахъ·

Ꙗ҆́коже землѧ̀ жа́ждꙋщїи ча́ющи до́ждѧ, та́коже и҆ сїи моѧ̀ гл҃анїѧ.
а҆ще въсмѣюсѧ к ни́мъ не и҆́мꙋть вѣры ꙗ҆́ти, свѣтъ лица̀ мое҆го не ѿпада́ше·

И҆збрах̑ пꙋть и҆хъ средѣ кн҃ѕь, и҆ вселѧ́хсѧ ꙗ҆́ко цр҃ь въ храбрѣхъ, а҆ки страстенъ ѹ҆мо́мъ ѹ҆тѣшах̑·

Глв̑҇а, л҃·

Нн҃ѣ же порꙋга́ша ми сѧ мен꙽шины, нн҃ѣ ѹ҆ча́тъ м̂ѧ ѿ ча́сти, и҆х꙽же похꙋлѧх̑ ѿц҃а, и҆́х꙽же не сътвори́хъ досто́ины приѻ҆бщи́тисѧ мои҆хъ чре́дъ·

Крѣпость бо рꙋ́къ их̑ вскꙋю мнѣ̀, на нихъ поги́бе сконча́нїе·

Скꙋ́достїю и гла́домъ водѧ́исѧ, бѣжа́щїи безво́денъ сы́и вчера·

Тꙋга̀ и҆ тщета̀ ѻ҆бходѧ́ще, и҆ бы́лїе ѻ҆́стро ѻ҆глажа́юще, и҆́мже ѹ҆тро́бное бра́шно бы́лїе.
нечестнїи же похꙋленїи требꙋ́юще вынꙋ бл҃га.
и҆же ко́ренїе и҆ дре́ва жва́хꙋ ѿ гла́да вели́каго.
въста́ша на́ мѧ та́тїе, и҆хже до́мове бѣша пеще́ры ка́мены, ѿ среды доброгла́сныхъ възопїютъ.
и҆же под̑ хвра́стїемъ дивїимъ живѧ́хꙋ·

Безꙋмныхъ сн҃ове и҆ нече́стно и҆мѧ, и҆ сла́ва ѹгаше́на ѿ землѧ̀.
нн҃ѣ же гꙋсли е҆смь аз̑ и҆мъ, и҆ мене въ пїе́нїе и҆мꙋтъ·

ѻ҆мрази́ша м̂ѧ ѿстꙋпльше дале́че, ѿ лица же мое҆го не пощадѣша плюнове́нїѧ.
ѿвѣзнꙋв꙽ б̂о тꙋлъ свои ѻ҆скръби м̂ѧ, и҆ ѹ҆зд̑ꙋ лицꙋ мое҆мꙋ и҆спꙋсти·

На деснаго ѿраслю въста́ша, но́ѕѣ же е҆го прострет̑·

и҆ пꙋть сътвори на́ мѧ стезѧ па́гꙋбы и҆хъ, сътро́ша стезѧ̀ моѧ·

Съвлеко́ша же м̂и ѻ҆де́ждꙋ, стрѣла́ми свои҆ми ѹ҆стрѣли м̂ѧ·

Сътвори м̂и ꙗ҆коже въсхотѣ.
въ болѣзнехъ смѣри́хсѧ, ѻ҆браща́ют꙽ же ми сѧ печа́ли·

ѿи҆де ми наде́жда ꙗ҆́коже вѣтръ, и҆ ꙗ҆́ко ѻ҆́блакъ спс̑҇нїе мое·

Нн҃ѣ на мѧ разлїетсѧ дш҃а моѧ, и҆ ѻ҆дръжа́т꙽ м̂ѧ дн҃їе печа́лїи·

Но́щїю же ко́сти моѧ разгорѣшасѧ, жилы же моѧ ѻ҆слабѣша·

Мно́гою крѣ́постїю ꙗ҆́т꙽ ми сѧ за ри́зꙋ, ꙗ҆́коже ѻ҆жере́лїе ри́зы мое҆ѧ ѻ҆бъѧ м̂ѧ·

И҆мат̑ же м̂ѧ ра́вно бернїю въ землѝ и҆ попелѣ часть мою·

Възопихъ к тебѣ и҆ не ѹ҆слы́ша мене, ста́ша же смотрѣша мене·

Наидо́ша же на́ мѧ без꙽ млс̑҇ти рꙋко́ю крѣ́пкою ѹ҆ꙗ҆зви́лъ м̂ѧ е҆си·

Въчини́лъ же м̂ѧ е҆си въ печа́лехъ, и҆ ѿверже м̂ѧ ѿ сп҃сенїѧ·

Вѣдѣ б̂о ꙗ҆́ко смр҃ть м̂ѧ и҆стретъ, домъ б̂о всѧ́комꙋ смр҃тнꙋ землѧ̀·

А҆ще бы лѣпо самъ бы себе ѹ҆би́лъ, и҆ли моли́лсѧ быхъ и҆номꙋ дабы ми то сътвори́лъ·

А҆з꙽ же ѻ҆ всѧ́комъ не́мощнм̑ѣ въспла́кахсѧ, възд꙽хнꙋв же ви́дѣв꙽ мꙋ́жа въ бѣдахъ, а҆зъ ѹ҆держюсѧ ѻ҆ блазѣ, и҆ с̂е стрѣто́ша м̂ѧ пач̑҇ дн҃їе ѕло́бнїи·

Срд̑це въсмръдѣ и҆ не ѹ҆молчитъ, вари́ша м̂ѧ дн҃їе нищеты·

Стенѧ ходи́хъ без̑ млъча́нїѧ, стоѧ́хъ же въ събо́рѣ въпїѧ·

Бра́тъ быхъ сири́нъскъ, дрꙋгъ же птиц̑҇·

Ко́жа же моѧ̀ помрачи́сѧ вели́ко, ко́сти же моѧ съгорѣша ѿ теплоты·

Събы́сть же ми сѧ на стра́сть гꙋсли, пѣснь же моѧ на пла́чь мнѣ̀·

Глв̑҇а, л҃а·

Завѣтъ положихъ ѻ҆чи́ма мои҆ма, и҆ не помы́шлю на дв҃цю·

И҆ е҆ще же раздѣли б҃ъ съвы́ше, и прича́стїе пости́жно ѿ вы́шнихъ·

Лю́та па́гꙋба неправди́вомꙋ, и҆ ѻ҆сꙋже́нїе творѧ́щимъ безако́нїѧ·

Не самъ ли ѹ҆зритъ пꙋть мои, и҆ всѧ̀ стопы̀ моѧ̀ и҆счете́тъ·

А҆ще ли ходихъ съ смѣшники, а҆ще ли потщасѧ нога моѧ на ле́сть·

Ста́хъ б̂о на мѣ́рилѣ пра́вед̑нѣ, ви́дѣ же г҃ь неѕло́бїе мое·

А҆ще ѹ҆клони́тсѧ нога моа ѿ пꙋтѝ, а҆ще и҆ въ слд̑ѣ ѻ҆́ка мое҆го и҆де срд̑це мое·

Аще ли рꙋка моѧ прикоснꙋсѧ мзд̑ы, да всѣ́ю ѹ҆бо а҆ и́нїи поꙗ҆дѧ́тъ, бес ко́рене же бых̑ на землѝ·

А҆ще ли же въ слѣдъ жены̀ мꙋжа́ты и҆де мое срд̑це, а҆ще ли же присѣдѧ бых̑ при две́рехъ е҆ѧ̀·

Го́дѣ ѹ҆бо бꙋ́ди и҆ жена̀ моѧ и҆номꙋ мꙋ́жꙋ, младе́нцы же мои смире́ни да бꙋ́дꙋтъ·

Ꙗ҆́рость б̂о гнѣ́ва не ѹ҆держа́нна, е҆же ѻ҆сквръни́ти мꙋжа́тницꙋ, ѻ҆́гнь б̂о е҆сть горѧ ѻ҆ всѧ стра́ны и҆дѣже на́идетъ и҆с ко́ренїа погꙋбитъ·

А҆ще ли же и҆ похꙋлихъ прю̀ раба̀ мое҆го и҆ рабы̀, прѧщемсѧ предо мно́ю·

Чт̂о бо сътворю̀ а҆ще пыта́нїе м̂и сътво́ритъ г҃ь, а҆ще ли же и҆ посѣще́нїе кїи ѿвѣтъ сътворю̀·

Тѣмже ѹ҆бо не ꙗ҆́коже л̂и аз̑ бѣхъ въ чре́вѣ и҆ ѻ҆ни бы́ша, бѣхом̑ же въ семъ чре́вѣ.
немощнїи же а҆ще чт̂о и҆мъ б̂ѣ тре́бѣ не погрѣши́ша, вдови́ча же ѻ҆́ка не пре́зрѣх꙽·

А҆ще ли же и҆ хлѣ́бъ свои ꙗ҆до́хъ е҆ді́нъ, а҆ си́ромꙋ не пода́хъ ли ѿ него·

Ꙗ҆́ко ѿ ю҆́ности мое҆ѧ кормѣхъ ꙗ҆́ко ѿц҃ъ, і҆ и҆з чрева мт҃ре моеѧ наста́вихъ·

А҆ще ли же позрѧхъ нага ги́блюща и не ѻ҆клеко́хъ, немощнѣи же а҆ще не блс̑҇виша м̂ѧ, ѿ стрига же а҆гнець мои҆хъ съгрѣшасѧ пле́щи и҆хъ·

А҆ще въздви́гъ на сиротꙋ рꙋ́кꙋ, надѣюсѧ ꙗ҆́ко мно́га по́мощь ѻ҆ мнѣ ес̑҇·

да ѿстꙋпитъ ѹ҆бо ра́мо мое ѿ вы́ѧ, мы́шца же моѧ ѿ ла́кти да съкрꙋшит̑сѧ·

Стра́хъ б̂о гн҃ь ѻ҆бъѧ м̂ѧ, и҆ ѿ мꙋ́дрости е҆го не сътерплю̀·

А҆ще ѹ҆чини́хъ зла́то въ крѣпость себѣ, а҆ще ли на ка́менїѧ мно́гоцѣннаѧ надѣѧхсѧ·

А҆ще же и҆ възвеселих̑сѧ·

мно́гꙋ м̂и бога́тьствꙋ сꙋщꙋ, а҆ще и҆ на бесчисленѣ положихъ рꙋ́кꙋ мою·

И҆ли не ви́димъ слн҃ца въсїѧвша и҆ заходѧща, лꙋны же ѹ҆малѧющисѧ не на нихъ б̂о е҆сть, а҆ще прельсти́сѧ таи срд̑це мое·

А҆ще же и҆ рꙋкꙋ мою поло́жъ на ѹ҆стѣхъ моих̑ и҆ лобзах̑, и҆ сїе м̂и ѹ҆бо безаконїе да вмѣнит̑сѧ·

ꙗ҆́ко сълга́хъ пред̑ бм҃ъ вы́шнимъ·

А҆ще ли же ѻ҆брадовах̑сѧ ѻ҆ паде́нїи вра́гъ мои҆хъ, и҆ рече срд̑це мое бла́ѕѣ·

да ѹ҆слы́шитъ ѹ҆бо ѹ҆́хо мое клѧтвꙋ мою, шепта́нїемъ ѹ҆бо бꙋ́дꙋ ѿ людїи мои҆хъ зазо́ренъ·

А҆ще и҆ многажды рѣша рабы́нѧ моа, кт̂о ѹ҆бо бы далъ намъ ѿ плоти е҆го насытитисѧ ѕѣло мнѣ̀ бл҃гꙋ сꙋщꙋ.
въ не́же не ѹ҆селѧшесѧ стра́нникъ, две́рь же моѧ всѧкомꙋ пришел̑҇цꙋ ѿврьста б̂ѣ·

А҆ще же ли и҆ съгрѣша́ю во́лею съкры́хъ грѣхъ мои, не посрамихъ бо сѧ мое҆го наро́да мно́жества не и҆сповѣда́тисѧ пред̑ ни́ми·

А҆ще же ли и҆ ѻ҆ста́вих̑ ма́ломо́щь, и҆злѣсти ѿ две́рїи моих̑ тщемъ нѣдромъ, а҆ще не ѹ҆сꙋмнх̑ѣсѧ кт̂о да́сть слы́шащаго на́ мѧ рꙋка же моѧ гн҃ѧ.
а҆ще не боѧ́хсѧ.
писа́нїе же ли и҆мѣхъ на кого, аще възложи́лъ быхъ вѣнецъ четъ их̑.
и҆ а҆ще не раздравъ е҆го и҆ ѿда́хъ, ничтоже възе́мъ ѿ сꙋдлъжника·

А҆ще на́ мѧ землѧ постенѧ, а҆ще и҆ бразды еѧ въсплакашасѧ въкꙋпѣ·

А҆ще ли и҆ си́лꙋ еѧ ꙗ҆до́хъ самъ без̑ цѣны, а҆ще ли и҆ дш҃ꙋ господи́на землѧ поѧхъ и҆ ѻ҆скорби́хъ.
въ пшеницы мѣсто да взы́идетъ м̂и кропи́ви, и҆ въ ꙗ҆чмене мѣсто ѹ҆бо кꙋпинее·

Глв̑҇а, л҃в·

Омолча̀ і҆́ѻвъ словесы, ѹ҆мол̑҇ча́ша же и҆ трїе дрꙋзи е҆го·

е҆ще прорече і҆́ѻвъ бѣ б̂о пра́веденъ пред нимъ·

Разгнѣва же сѧ е҆лиѹ́съ варахи́левъ вꙋзитѧнинъ ѿ ѹ҆жичъства а҆ра́мска а҆всидїискїѧ страны·

Разгнѣва же сѧ на і҆́ѻва ѕѣло, занеже и҆зрече себѐ праведна предъ бм҃ъ·

И҆ на́ три же дрꙋги раз꙽гнѣвасѧ ѕѣло, ꙗ҆́ко не възмогоша ѿвѣща́ти проти́вꙋ пред̑ і҆́ѻвомъ, н̂о нареко́ша е҆го нечести́ва·

Є҆лиѹ́съ же претръпѣ дати ѿвѣтъ і҆́ѻвꙋ, ꙗ҆́ко старѣ́иша е҆го сꙋть дн҃ьми дрꙋзи е҆го.
и҆ ви́дѣ е҆лиѹ́съ, ꙗ҆́ко нѣсть ѿвѣта въ ѹ҆стѣхъ дрꙋговъ е҆го.
и҆ ѹ҆ѧри́сѧ гнѣвомъ свои҆мъ·

ѿвѣща́ же е҆лиѹ́съ варахилевъ вꙋзитѧнинъ и҆ рече·

ю҆́нъ ѹ҆бо е҆смь лѣты.
вы́ же е҆сте старѣ́иши, тѣмже ѹ҆млъча́хъ, ѹ҆боѧ́хсѧ възвѣстити вамъ хитрость свою·

Рѣх же не лѣты е҆сть гл҃ющее, въ мноѕѣхъ б̂о лѣтехъ не вѣдѧт̑ премꙋдрости·

Но дх҃ъ е҆сть въ чл҃цѣхъ, дыха́нїе же вседръжи́телѧ е҆сть ѹ҆ча́щїи·

Не многолѣтни сꙋть премꙋдрости, ниже ста́рцы вѣдѧ́тъ сꙋдъ.
тѣмже рѣхъ послꙋшаите мене, и҆ възвѣщꙋ вамъ е҆же вѣде, внꙋши́те сїа гл҃ы моѧ.
рекꙋ б̂о вамъ послꙋшаю҆щимъ, дондеже и҆ не спыта́ете словесъ, и҆ до васъ съразꙋмѣю·

и҆ с̂е не бѣ і́ѻва ѻ҆блича́ѧи ѿвѣща́ѧи гл҃ꙋ е҆го ѿ васъ.
да не речетѐ ѻ҆брѣто́хомъ премꙋдрость ѿ г҃а, прило́жше чл҃кꙋ повелѣсте гл҃ати тацѣхъ словесъ·

Ѹ҆жаснꙋшасѧ и҆ не ѿвѣща́ша ктомꙋ, ѻ҆бетша́ша ѿ нихъ словеса̀.
претръпѣхъ не гл҃ахъ б̂о ꙗ҆́ко ста́ша и не ѿвѣща́ша, ꙗ҆́ко да ѿвѣща́ю и҆ а́зъ ча́сть·

ѿвѣща́ же е҆лиѹ́съ гл҃етъ·

Па́ки възгл҃ю, и҆сполнь б̂о е҆смь словесъ ѹ҆бива́етъ б̂о м̂ѧ дх҃ъ чрева.
чрево же мое ꙗ҆́ко мѣхъ мъставрюща завѧ́занъ.
и҆л̂и ꙗ҆ко мѣхъ ковачъскїи разши́реныи.
възгл҃ю да почїю ѿврьзꙋ ѹ҆ста̀ с̂и.
н̂о ниж̑ чл҃ка не ѹ҆срамлѧ́юсѧ, не свѣдѣ б̂о подиви́тисѧ лицꙋ.
а҆ще л̂и и҆ мене мо́лїе и҆зъꙗ҆дѧ́тъ, ника́коже·

Глв̑҇а, л҃г·

Но послꙋшаи і҆́ѻве словесъ мои҆хъ, и҆ бесѣдꙋ мою вънꙋшѝ с̂и.
се бо ѿврьзохъ ѹ҆ста̀ моѧ, и҆ възгл҃а ꙗ҆зы́к꙽ мои.
чи́сто срд̑це мое словесы̀, ра́зꙋм же ѹ҆стнꙋ моею чисто разꙋмѣетъ·

Но дх҃ъ бж҃їи сътвори́выи мѧ, дыха́нїе же вседръжи́телѧ поѹ҆ча́ѧ м̂ѧ.
а҆ще можеши да́и же ми ѿвѣтъ, къ семꙋ потерпѝ и҆ ста́ни противꙋ мнѣ, и҆ а́зъ противꙋ тебе·

ѿ бренїѧ растворенъ е҆си ты̀, ꙗ҆́коже и҆ а́зъ ѿ тогоже растворенїѧ е҆сва̀, не стра́хъ мои тѧ смѧтетъ, ниже рꙋка̀ моѧ тѧж̑ка бꙋдетъ на тѧ, ѻ҆ба́че реклъ е҆си въ ѹ́ши моѝ, и҆ гласъ гл҃ъ твои҆хъ ѹ҆слышах̑, зане же гл҃еши чи́стъ е҆смь а҆зъ не съгрѣша́ѧ, непоро́чен же бх̑ѣ и҆ не безаконновахъ.
зазор же на мѧ ѻ҆брѣте, и҆ мнитъ мѧ ꙗ҆́ко проти́вника себѣ.
вложи́ же но́гꙋ мою въ древѣ, и҆ съхрани пꙋтѝ моѧ всѧ̀.
ка́ко б̂о гл҃еши ꙗ҆ко пра́въ е҆смь, и҆ не послꙋша мене вѣченъ б̂о е҆сть и҆же надъ земными.
гл҃еши же чесо ради правды моеѧ не ѹ҆слы́ша слово·

е҆ді́ною б̂о възгл҃етъ г҃ь, и҆ вторѣм꙽ же въ снѣ̀.
и҆л̂и въ поѹ҆че́нїи но́щнѣм꙽, и҆л̂и ꙗ҆ко е҆гда напада́етъ стра́хъ лю́тъ на чл҃ки, на дрѣма́нїе на ложи тогда ѿкры́етъ ѹ҆ма чл҃ческаго, видѣньми стра́ха тацѣми ѹ҆страшивъ·

Възврати чл҃ка ѿ непра́вды, тѣло же е҆го ѿ напада́нїѧ и҆зба́ви.
пощадѣ же дш҃ꙋ е҆го ѿ смр҃ти и҆ не пасти е҆мꙋ на ра́ти.
паки же ѻ҆бличѝ болѣзнїю на ло́жи, и҆ мно́жество ко́сти е҆го ѻ҆сла́бивъ, всѧ́ко же бра́шно и҆ пшени́ца не возмо́же приꙗ҆́ти, а҆ дш҃а е҆го ꙗ҆́ди хо́щетъ.
дондеже съгнїе́тъ плоть е҆го, и҆ пока́жетъ кости е҆го т꙽ща̀.
приближитъ же сѧ на смр҃ть дш҃а е҆го, и҆ живо́тъ е҆го въ а́дъ.
а҆ще бꙋдетъ ты́сꙋщь а҆́гг҃ли смр҃тоносцы, е҆ді́нъ ѿ нихъ не ѹ҆бꙋдетъ е҆го.
а҆ще л̂и разꙋмѣ́етъ срд̑цемъ ѻ҆брати́тисѧ къ б҃ꙋ, повѣсть же чл҃кꙋ свои зазор̑҇, безако́нїѧ же е҆го пока́жетъ.
и҆ застꙋпитъ и҆̀ не впа́сти е҆мꙋ въ смр҃ть ѻ҆бновитъ же тѣло е҆го, ꙗ҆́коже помаза́нїе на стѣнѣ.
ко́сти же е҆го и҆сполнитъ мо́зга, ѹ҆мѧгчи́т же е҆го плоть ꙗ҆коже младенца, и҆ ѹ҆строи҆т же и҆̀ възмꙋжа́вша въ чл҃цѣх꙽ помо́ль же сѧ къ г҃ꙋ, и҆ прїѧ́тъ и҆мъ бꙋдетъ.
внидет же лицемъ чи́стым̑ съ ѻ҆бѣщанїемъ.
възда́сть же чл҃комъ правдꙋ, не сътворитъ ѹ҆бо влд̑ка ничто́же нелѣпо на ме́ншины.
и҆мѣѧи над̑ всѣми ѻ҆дръжа́нїе, не возмѧтетъ пра́веднаго.
и҆ всѣхъ творец꙽, не преѻ҆би́дит̑ свое҆го сътворе́нїѧ·

Посем же тогда зазритъ чл҃къ сам̑ себе гл҃ѧ ꙗ҆же сконча̀, и҆ недосто́ино мꙋчи м̂ѧ ꙗ҆́коже съгрѣших̑<.>

Сп҃си дш҃ꙋ мою не вни́ти въ и҆стлѣнїе, и҆ житїе мое свѣтъ ѹ́зритъ, и҆ с̂е все творитъ крѣпкїи, пꙋтїе три съ мꙋжемъ.
н̂о и҆збави дш҃ꙋ мою ѿ смр҃ти, да животъ мои въ свѣтѣ хва́литъ и҆̀.
внима́и си і҆́ѻве и҆ послꙋшаи мене и҆ премлъчи, и҆ а́зъ въз꙽гл҃ю.
и҆ а́ще сꙋть словеса̀ с̂и ѿвѣща́и ми и҆ гл҃и, хощꙋ б̂о ѻ҆правдити тѧ.
а҆ще л̂и н̂и, но послꙋшаи мене и҆ молчѝ, и҆ наѹ҆чю́ тѧ премꙋдрости·

Глв̑҇а, л҃д·

Ѿвѣща же е҆лиѹ́съ и҆ рече.
послꙋша́ите мене премꙋдрость свѣ́дꙋщеи, внꙋшите с̂и до́брое.
ꙗ҆́ко ѹ́хо словеса̀ и҆скꙋша́етъ, и҆ гор꙽тань въкꙋшенїе бра́шна·

Прю̀ сътворимъ себѣ, и҆ разꙋмѣ́емъ посредѣ себе лꙋчшаѧ·

Ꙗ҆́ко рече і҆́ѻ҆въ праведенъ е҆смь, г҃ь ѿꙗ҆́тъ м̂и сд̑ꙋ сълга́ же сꙋдꙋ мое҆мꙋ, нꙋж́на стрѣла моа̀ безъ непра́вды·

Кт̂о мꙋжъ ꙗ҆́ко і҆́ѻ҆въ, пива́ѧ подража́нїе ꙗ҆кож̑ во́дꙋ·

Не съгрѣша́ѧ н̂и нечествова ни ѿнюдь примѣсивсѧ къ творѧщим̑ безаконїѧ, е҆же ходи́ти съ нечести́выми·

Не рц̂ы бо̀, ꙗ҆ко нѣсть посещенїѧ мꙋж́еви ѿ г҃а·

Тѣмже разꙋми́вїи срд̑цемъ послꙋшаите мене, не бꙋди м̂и пред̑ гм҃ъ безаконнова́ти и҆ пред̑ вседръжи́телемъ възмѧсти пра́вдою.
н̂о възда́етъ чл҃кови ꙗ҆кож̑ тво́ритъ ко́ждо и҆хъ, и҆ на стеѕи мꙋжествѣи ѻ҆брѧ́щетъ и҆̀·

Мнит̑ же г҃а ѕл̂о твори́ти, и҆же сътворѝ зе́млю.
кт̂о же е҆сть творѧ́и под̑нбс̑҇нꙋю, и҆ сꙋщее всѐ·

А҆ще б̂о хо́щет̑ ѹ҆дръжа́ти, и҆ дх҃ъ въ себѣ ѹдръжи́тъ·

Ѹ҆́мретъ всѧка плоть въкꙋпѣ, всѧкъ же чл҃къ въ землю по́идет̑, ѿнюдꙋ же създа́нъ бысть·

А҆ще л̂и не ѹ҆чи́шисѧ послꙋшаи с̂е внꙋши с̂и гласъ глаго́лъ·

Ви́ждь т̂ы творѧ́щаго безаконїе, и гꙋбѧ́щаго лꙋка́вныѧ.
сꙋща вѣчна и҆ праведна нечести́въ гл҃ѧи цр҃еви, зако́нъ престꙋпа́еши, нечестивѣ и҆же кнѧ́ѕем꙽.
і҆ и́же не постыдѣсѧ лица̀ чс̑҇тиаго, н̂и вѣсть честь възложи́ти мꙋж́нымъ, и҆ ѹ҆диви́тисѧ лицемъ и҆хъ·

Тще же им̑ събꙋдет̑сѧ, е҆же възопи́ти и҆ потребова́ти мꙋжа̑ зане бысть безаконникъ смирѧ́ѧ не́мощныѧ.
лиши́ми быва́ютъ свое́ѧ пра́вды не́мощнїи.
хотѧ́щимъ безъ пота́ки дѣѧ́ти цр҃еви и҆ кнѧ́ѕем̑ сего ра́ди тщ̂е и҆мъ събꙋ́детсѧ·

Ꙗ҆́ко чл҃къ дѣльма презрѣша правд̑ꙋ, вс̂е зрѧ́щи б҃ꙋ быва́ющее.
и҆ мѣстꙋ не сꙋщꙋ на негоже не призирает̑·

Призира́ющїѧ бж҃їѧ си́ла, ꙗ҆́ко не на мꙋж́и положитъ е҆щѐ·

Гь҃ б̂о всѣхъ ви́дит̑ постиза́ѧи, не и҆слд̑ѣнаѧ же, и҆ сла́в꙽наѧ і҆ и҆зрѧд̑на, и҆́мже нѣсть числа̀·

Съвѣдыи и҆хъ дѣла, и҆ ѻ҆братитъ нощъ и҆ смири́тсѧ.
ѹ҆га́ситъ нечестивыѧ·

Види́ми же пред̑ нимъ ꙗ҆́ко ѹ҆клони́шасѧ ѿ зако́на бж҃їѧ, ѻ҆правданїи же е҆го не поз̑на́ша·

Нанести нань вопль нищаго, и҆збавленїе ѹ҆богихъ слышитъ.
и҆ съкры́ет꙽ лице и҆ кт̂о ѹ҆́зритъ и҆̀.
и҆ на стран́ꙋ и҆ на чл҃ка въкꙋпѣ, црс̑҇твꙋѧ чл҃комъ ѿ прерѣканїѧ люд̑ска·

Ꙗ҆́ко къ крѣпкомꙋ гл҃ѧи, взѧ́хъ и҆ не заимꙋ безъ себе ѹ҆зрю ты же покаже м̂и.
а҆ще правдꙋ съдѣлахъ не и҆мамъ приложити.
не ѿ себе и҆стѧжи ю҆̀ ꙗ҆́ко ѿрине́ши ꙗ҆ко т̂ы и҆зречеши а҆ не а҆зъ.
и҆ чт̂о разꙋмѣеши гл҃и·

Тѣмже смысленїи срд̑цемъ рекꙋт꙽, се мꙋж́ъ премꙋдръ ѹ҆слыша гл҃ъ мо́и·

І҆́ѻ҆въ же не разꙋмомъ с̂е гл҃а, словеса же е҆го не хи́тростїю ника́коже нн҃ѣ навы́кни і҆ѻ҆ве, не дажд̑ь е҆щѐ ѿвѣта ꙗ҆́коже немꙋдрїи·

да не приложим̑ на грѣхи на́ша, безаконїе же на́ ны намѣ́нитсѧ, мно́га словеса̀ гл҃ющемъ.
и҆ рече пред̑ гм҃ъ·

Глв̑҇а, л҃е·

Ѿвѣща́ же е҆щѐ е҆лиѹ́съ, чт̂о сѐ мнѣлъ е҆си на сꙋдѣ.
т̂ы кто̀ е҆си ꙗ҆́ко реклъ пра́въ е҆смь пред̑ гм҃ъ, и҆ гл҃еши что сътворихъ грѣхъ·

А҆́з же т̂и дам̑ ѿвѣтъ, и҆ тремъ дрꙋгом̑·

Возри на́ нб҃о и҆ ви́жд̑ь, смотри же ѻ҆́блаки ко́ль высоцѣ сꙋть ѿ тебѐ·

А҆ще съгрѣшилъ е҆си чт̂о сътвориши, а҆ще же и҆ мно́го безаконовалъ е҆си чт̂о мо́жеши сътвори́ти·

Поне же ѹ҆́бо пра́веденъ е҆си чт̂о даси е҆мꙋ, ил̂и и҆з рꙋ́ки твое́ѧ во́змет꙽, мꙋж́еви подо́бномꙋ тебѣ нечестїѧ твоѧ, и҆ сн҃ꙋ члчс̑҇комꙋ пра́вда твоѧ·

ѿ мно́жества ѻ҆бажа́еми възовꙋтъ, и҆ възопію ѿ мышцъ мно́гихъ.
и҆ не реч̑҇ гдѣ е҆сть б҃ъ сътвори́выи м̂ѧ, ѹ҆страѧ́ѧи стражда но́щныѧ·

ѿлꙋча́ѧ м̂ѧ и҆ ѿ четвероногъ земныхъ, и҆ ѿ нбс̑҇ныхъ птицъ·

Тꙋ възовт̑ꙋ и҆ не и́мꙋтъ ѹ҆слы́шати ѿ ко́рене лꙋка́выхъ, зла̀ б̂о вѣдѣти не хо́щетъ г҃ь.
самъ б̂о вседръжи́тель види́тель е҆сть творѧ́щихъ безако́нїе, и҆ сп҃сетъ м̂ѧ·

Прїими же сꙋд꙽ пред̑ ни́мъ, а҆ще мо́жеши хвали́ти и҆̀ ꙗ҆́коже е҆сть м̂и нн҃ѣ·

ꙗ҆́ко нѣсть посѣщаѧи гнѣ́ва е҆го, и҆ не позна̀ прегрѣше́нїемъ е҆го ѕѣло.
і҆ и҆ѻ҆въ всꙋе ѿвръза́етъ ѹ҆ста̀ своѧ̀, невидѣнїемъ словеса̀ ѹ҆тѧж꙽чеваетъ·

Глв̑҇а, л҃ѕ·

Прилож꙽ же е҆щѐ е҆лиѹ́съ и҆ реч̑҇·

пожд̑и м̂и ма́ло е҆ще, да т̂ѧ наѹ҆чю.
е҆ще б̂о ѹ҆ мене е҆сть бесѣда, прїимъ хи́трость мою̀ ѿ да́леча.
дѣлы же мои҆ми пра́вдꙋ рекꙋ вои҆́стиннꙋ, и҆ не неправедны гл҃ы, безъ пра́вды разꙋмѣ́еши.
вѣждь же ꙗ҆́ко г҃ь не ѿкры́етъ ѕла́го, си́ленъ крѣпостїю срд̑ца нечести́вых̑ не жи́ва съторит̑ и҆ сꙋдъ ни́щим̑ дасть.
не ѿи́мет̑ ѿ прав꙽диваго ѻ҆́чїю свое́ю, и҆ съ цр҃и на прс̑҇тл꙽ посадит̑ и҆̀, и҆ на побѣдꙋ възнесет̑ е҆го·

свѧзани в рꙋчныхъ ѹ҆́захъ, ꙗ҆ти бꙋдꙋтъ ю҆́жемъ нищеты.
и҆ възвѣститъ им̑ дѣло их̑, и҆ прегрѣшенїе их̑ ꙗ҆ко ѹ҆крѣпѧт̑сѧ.
н̂о правдиваго ѹ҆слы́шит̑, и҆ реч̑҇ ꙗ҆́ко ѻ҆братѧт̑сѧ ѿ непра́вды·

А҆ще ѹ҆бо ѹ҆слы́шат̑ и҆ поработают̑ сконча́ютъ дн҃и своѧ въ бл҃зѣ, и҆ лѣта своѧ̀ въ бл҃голѣпотѣ.
нечести́выхъ же не сп҃сетъ, занѐ не хотѣша вѣдѣти г҃а, и҆ зане же ѹ҆чи́ми и҆ непослꙋшли́ви бѣша.
и҆ лицѐмѣри срд̑цемъ възмꙋтѧт̑ ꙗ҆́рость, и҆ не възъпїютъ ꙗ҆́ко свѧза и҆хъ·

да ѹ́мре́тъ въ ю́ности дш҃а и҆хъ, жи́тїе же и҆хъ бодо́мо а҆гг҃лы·

зане же ѻ҆скорби́ша недꙋжна и҆ не́мощна, сꙋд꙽ же кро́ткыхъ ѿвръжет̑.
и҆ поне́же пресели́л꙽ т̂ѧ ѿ ѹ́стъ врагъ, бе́зд̑на прои҆тїе под̑ не́ю, и҆ сни́де трапе́за твоѧ̀ и҆спо́лнь тꙋ́ка, не ѻ҆скꙋдѣе҆тъ же пра́ведных̑ сꙋдъ, ꙗ҆́рость же на нечести́выѧ бꙋ́детъ.
нечестїѧ ра́ди да́ровъ и҆хъ, и҆хже прїима́хꙋ на непра́вдѣ·

да не ѹ҆клонит̑сѧ во́лею ѹ҆́мъ, мольба въ бѣдѣ сꙋщемъ немощнымъ·

и҆ всѣхъ крѣпѧщих̑сѧ крѣпости не привлеци, взыити лю́демъ в них̑ мѣсто, н̂о съхрани́сѧ·

не съдѣи ѕл̂а, ѿ сихъ б̂о ѿтѧтсѧ ѿ нищеты.
и҆ с̂е крѣпкїи ѹ҆держит̑ крѣпостїю своею.
кт̂о бо е҆сть а҆ки то́и си́ленъ·

Кт̂о е҆сть пыта́ѧи дѣ́лъ е҆го, и҆ли кт̂о рекїи съдѣѧ непра́вдꙋ·

Помѧни ꙗ҆́ко ве́лїа дѣ́ла е҆го сꙋть, и҆миже владѣша мꙋжїе·

Всѧ́къ чл҃къ ви́дѣ ѻ҆́ное, ꙗ҆́ко б̂о до́ми сꙋть чл҃цы·

И҆ с̂е крѣ́пкїи вели́кїи, не ѹ҆вѣмы число̀ лѣтъ е҆го бес конца̀·

Четны же е҆мꙋ сꙋть ка́плѧ дожд̑евныа і҆ и҆злѣ́ютсѧ до́ждемъ въ ѻ҆́блакъ, потекꙋтъ ѻ҆бетша́нїѧ ѻ҆сѣни́ша же ѻ҆́блацы на премно́ги гро́мы·

Вре́мѧ постави скотꙋ.
вѣ́дѧтъ же ло́жа чи́нъ·

ѻ҆ всемъ семъ не диви́т꙽ ли ти сѧ ѹ҆́мъ, ни и҆змѣнѧ́ет꙽ ти сѧ срд̑це ѿ тѣ́ла·

А҆ще разꙋмѣ́еши ѿ просте́ртїѧ ѻ҆́блачнаго и҆ равеньство скѷнїѧ е҆го, с̂е простира́етъ на ню̀ свѣтъ·

И҆ ко́ренїѧ мо́рскаѧ покры̀, тѣми б̂о сꙋ́дитъ лю́демъ, да́сть пи́щꙋ могꙋщемꙋ·

И҆ на рꙋкꙋ покры̀ свѣтъ, и҆ заповѣда ѻ҆ не́и стрѣта́ющемꙋ.
възвѣсти́тъ зань дрꙋгови свое҆мꙋ тва́рь и҆ ѻ҆ непра́вдѣ·

Глв̑҇а, л҃з·

И ѿ сихъ смѧте́сѧ срд̑це мое, и҆ ѿтръжесѧ ѿ мѣста свое҆го·

Послꙋшаи слꙋ́ха, гнѣ́вомъ ꙗ҆́рости гн҃ѧ, и҆ поѹ҆че́нїе и҆з꙽ ѹ҆́стъ е҆го и҆зы́идетъ·

Под̑ всѣмъ нб҃омъ нача́ток̑҇ е҆го, и҆ свѣтъ е҆го на кри́лꙋ землѧ̀·

Въ слѣдъ е҆го възопїетъ гла́сомъ, и҆ възгреми́тъ гла́сомъ ѹ҆коре́нїѧ свое҆го, и҆ не и҆змѣни́тъ е҆ѧ̀ ꙗ҆́ко ѹ҆слы́шитъ гла́съ е҆го·

Възгрѣмит̑ крѣпкїи гла́сомъ свои҆мъ ди́вным̑, ча́съ положи ско́томъ, вѣдѣт꙽ же ло́жныи чи́нъ·

ѻ҆ сихъ всѣхъ не ѹ҆дивит̑ ли сѧ ѹ҆́мъ, и҆ не и҆змѣнит̑ ли сѧ срд̑це ѿ тѣ́ла·

Сътворѝ б̂о ве́лїа и҆́хже не вѣдѣхомъ·

ѹ҆чинѧ́ѧи снѣ́гꙋ бꙋ́ди на землѝ, и҆ зимꙋ дождев̑҇ си́лы е҆го·

В рꙋцѣ всѧ́кого чл҃ка назнамена́етъ, да позна́етъ всѧ́къ чл҃къ свою не́мощь·

Внидо́ша же ѕвѣри под̑ кро́въ, ѹ҆молко́ша же на ло́жи·

ѿ хлѣвины нахо́дѧтъ бо́лѣзни, и҆ ѿ го́ръ зима·

И҆ ѿ дыха́нїѧ крѣпка да́сть мра́зъ, крѣпит̑ же во́дꙋ ꙗ҆́коже хо́щетъ·

І҆ и҆збра́нна ѹ҆страша́етъ ѻ҆́блакъ, прожене́тъ ѻ҆́блакъ свѣтъ е҆го·

И҆ самъ ѻ҆́крестнаѧ развратитъ, е҆гда̀ въсхо́щетъ въ дѣ́ла своѧ, и҆ вс̂е е҆ли́ко заповѣсть и҆мъ·

То ѹ҆чине́но е҆сть ѿ него на землѝ, аще ли на на́ше наказа́нїе, а҆ще ли на́ землю свою, а҆ще на млс̑҇ть ѻ҆брѧ́щетъ и҆̀, внꙋши с̂и і҆́ѻве·

Ста́ни ѹ҆ча́исѧ си́лы гн҃ѧ·

Вѣмъ б̂о ꙗ҆́ко г҃ь положи дѣ́ла своѧ, свѣтъ сътвори ѿ тмы̀·

Съвѣсть же раз꙽сꙋже́нїе ѻ҆́блака, и҆з꙽слѣдова паде́нїе ѕлы́хъ, и҆ твоѧ ѻ҆де́жда те́пла·

Помолча́ете же по земли, ѿ ю҆́га ѹ҆тверже́нїе с ним̑·

Въ ѻ҆бѣща́нїе крѣпкїи, ꙗ҆́ко видѣнїе разли́тїѧ·

Почто наѹ҆чи м̂ѧ чт̂о речемъ е҆мꙋ, и҆ преста́немъ мно́га гл҃юща, е҆да кни́ги и҆ли кни́гичїа ми пред̑стоѧ́тъ, е҆да чл҃ка съставлѧ́ю гл҃ати ѹ҆молчꙋ, всѣми е҆сть невидимъ свѣтъ.
свѣт ли е҆сть въ ѻ҆бет꙽ша́нїи, ꙗ҆́ко е҆же ѿ него на ѻ҆́блацехъ·

ѿ сѣвера ѻ҆́блакъ затворе́нїи, ѻ҆ сихъ ве́лїа сла́ва, и҆ чс̑҇ть ѿ вседержи́телѧ·

и҆ не ѻ҆брѣта́емъ и҆ного подо́бна крѣпости е҆го сꙋдѧ́щемꙋ пра́вдꙋ, не мни́ши ли ѹ҆слы́шати е҆мꙋ·

Тѣ́мже ѹ҆боѧ́тсѧ е҆го чл҃цы, ѹ҆боѧ́т же сѧ е҆го и премꙋдрїи срд̑цем̑·

преста́вшꙋ же е҆лїѹ́сꙋ ѿ бесѣды·

Глв̑҇а, л҃и·

Рече г҃ь і҆́ѻвꙋ, бꙋрею и҆ ѻ҆́блакомъ, кт̂о с̂е е҆сть таѧ́и ѿ мене съвѣтъ.
ѹ҆дръжа́ѧи же гл҃ы въ срд̑цы мене же мни́тсѧ таи́ти·

Препоѧши ꙗ҆́ко мꙋж́ъ чре́сла своѧ, въпрошю же т̂ѧ, ты же м̂и ѿвѣща́и·

Гдѣ б̂ѣ е҆гда̀ ѻ҆сновахъ зе́млю повѣжд̑ь м̂и а҆ще съвѣси ра́зꙋмъ·

кт̂о положи мѣ́ры еѧ̀ а҆ще съвѣси, и҆ли кт̂о нанесы́и ве́рвь на ню̀·

на че́мже сто́лпи еѧ̀ ѹ҆тверже́ни сꙋть, кт̂о же е҆сть вложе́и ка́мень ѹ҆го́лныи на ню̀·

Є҆гда̀ бы́ша ѕвѣзды, въсхвали́ша м̂ѧ гла́сомъ ве́лїемъ вс̂и а҆гг҃ли мои.
загради́хъ же мо́ре вра́ты, е҆гда сѧ раждаа́ше и҆с чре́ва мт҃ре своеѧ и҆схожд̑аше·

Положихъ же е҆мꙋ ѻ҆́блакъ ѻ҆дѣѧ́нїе, те́мность еѧ̀ роди́хъ и҆ положихъ е́и предѣлъ, ѻ҆бложи́въ затворы и҆ вра́ты.
рѣх же е҆мꙋ до сего прїидеши и҆ не преидеши, н̂о в себѣ с̂и съкрꙋша́т ти сѧ во́лны.
и҆ли при тебѣ сътавихъ свѣтъ ѹ҆́тренїи, дн҃ьнница же вѣ́сть чи́нъ свои·

Ꙗ҆́тисѧ за кри́лꙋ землѧ̀, ѿтрѧсти нечести́выѧ ѿ неѧ·

и҆ли т̂ы бре́нїе взе́мъ ѿ землѝ създа́лъ е҆си живо́тно, и҆ гл҃иваго посади́лъ е҆си на землѝ·

ѿꙗ҆́лъ же ѿ нечс̑҇тивыхъ свт̑ѣ, мы́шцꙋ же велича́вых̑ съкрꙋши л̂и·

прїиде же ли на и҆сто́чники мо́рѧ, стопа́ми же ли по безднѣ ходи́лъ е҆си·

ѿвръза́ют же ли ти сѧ стра́хомъ вра́та смр҃ти, вра́тницы же ли а҆́довы ви́дѣвше т̂ѧ ѹ҆боѧ́шесѧ.
ѹ҆вѣси ли же широтꙋ под̑нбс̑҇ныѧ, повѣ́ж же ми коли́ка е҆сть.
въ коеи же землѝ вселѧ́етсѧ свѣтъ, тѣ́мже кое е҆сть мѣсто·

а҆ще ѹ҆бо веде́ши м̂ѧ въ предѣ́лы и҆хъ, а҆ще же ли и҆ вѣси стеѕѧ̀ и҆хъ·

Вѣ́м б̂о ꙗ҆́ко тогда̀ роже́нъ е҆си, число же лѣтъ твои҆хъ мно́го·

Прїиде ли въ сокро́вищих̑ снѣга, съкро́вища же гра́да видѣ ли·

щадит̑ же ли ти сѧ в ча́съ вра́гъ, и҆ли въ дн҃ь ра́ти и҆ сва́ра·

ѿкꙋ́ды же ли и҆схо́дит̑ сла́на, е҆ю́же разсыпа́етсѧ ю҆́гъ на под̑нбс̑҇нꙋю·

Кт̂о же ли ѹ҆готовалъ до́ждю ве́лїю пролїѧ́нїе, пꙋть же мол̑҇нїина гро́ма.
ѻ҆дожди́ти зе́млю на не́иже нѣсть мꙋж́а, и҆ пꙋсты́ню и҆деже чл҃ка нѣсть в не́и·

Насыти́ти непроходи́мꙋ неселе́нꙋ, прозѧбнꙋти и҆схо́да зла́ка·

Кт̂о е҆сть до́ждю ѿц҃ъ, кт̂о же е҆сть рождїи дꙋ́ги, грꙋдїе росное, и҆с чїего чре́ва и҆схо́дит̑ ле́дъ, сла́нꙋ же на нб҃се кт̂о родилъ, і҆ и҆схо́дитъ ꙗ҆́ко вода̀ текꙋщїа.
лице нечести́ва кт̂о ѿтрѧ́слъ е҆сть.
разꙋмл̑҇ѣ же ли е҆сѝ соѹ́зъ власо желищ̑҇, и҆ ѻ҆граже́нїе крꙋжи́лицъ ѿве́рзлъ е҆си.
и҆ли ѿвръзе́ши ѕвѣздꙋ въ вре́мѧ еѧ̀, и҆ вече́рню ѕвѣздꙋ вла́сы еѧ̀ привлече́ши ли·

Съвѣси же ли премѣне́нїѧ нбс̑҇ныѧ, и҆ли быва́ющее въкꙋпѣ под̑ нб҃семъ·

Призове́ши ли ѻ҆блакъ гла́сом̑, и҆ трѧсенїемъ во́дꙋ, послꙋшает꙽ ли т̂и.
по́слеши же ли блѣски и҆ по́идꙋт꙽, рекꙋ же ли т̂и чт̂о е҆сть·

Кт̂о же да́лъ е҆сть жена́мъ тка́нїѧ премꙋ́дрость, и҆ли и҆з мечта́нїа мно́гїа хи́трость·

Кт̂о же четы́и ѻ҆́блаки премꙋ́дростїю, нб҃о же на́ землю преклони́лъ·

Разлїѧ же сѧ ꙗ҆́ко землѧ̀ пра́шна, прилѣпил̑҇ же е҆сть ꙗ҆́коже камы́къ на четы́ри ѹ҆́глы·

Глв̑҇а, л҃ѳ·

Ѹ҆ло́виши ли льво́мъ ꙗ҆́дь, и҆ дш҃а ѕмїевы насыти́ши ли·

ѹ҆боѧ́т꙽ бо сѧ на ло́жих̑ свои҆хъ, сѣдѧт꙽ же и҆ в берълозѣ а҆́лчюще·

Кт̂о же вра́нꙋ ѹ҆гото́ва пи́щꙋ, пти́щь б̂о е҆го къ г҃ꙋ възва́ша, заблꙋжа́юще бра́шна и҆́щꙋще·

А҆ще разꙋмѣ́лъ е҆си вре́мѧ рожества коѕел̑҇ на ка́мени, ѹ҆храни́л꙽ же ли е҆ще в꙽ бо́лѣзни е҆ленѧ.
челъ же ли е҆си мс̑҇ца и҆хъ, мно́го роже́номꙋ и҆хъ бо́лезни разрѣши́лъ ли е҆си·

Въскорми́лъ же ли е҆си пте́нца вн̂ѣ стра́ха и҆ без꙽ бо́лѣзни·

паче же ли и҆хъ ѿпꙋсти́ши да съберт̑ꙋсѧ ча́да и҆хъ, и҆ ѹ҆мно́жатсѧ въ животѣ, и҆зы́идетъ и҆ не възврати́тсѧ в них̑·

Кт̂о же е҆сть пꙋсти́выи ѻ҆сла̀ дивїаго свободѣ, ѹ҆́зы же е҆го кт̂о разрѣшил̑҇·

положи же жи́тїе е҆го пꙋсты́ню, и҆ вселе́нїе е҆го въскра́и мо́рь·

смѣѧ́сѧ мно́гꙋ наро́дꙋ гра́да, зазо́ра же да́н꙽ническа не слы́ша·

посѣти́тъ гнѣвомъ па́жить свою, и҆ въ слд̑ѣ всѧ́къ зла́къ и҆́щетъ.
похо́щетъ же т̂и і҆ и́нъ ро́гъ порабо́тати, и҆ли спа́ти въ ꙗ҆́слехъ твоих̑·

привѧ́жеши же реме́нь и҆́гꙋ е҆го, и҆ прожене́тъ т̂и бра́зды на́ поли.
надѣеши ли сѧ на́нь ꙗ҆́ко мно́га крѣпость е҆го, пꙋсти́ши же ли на́нь дѣ́ла своѧ̀·

Вѣрꙋеши же ли ꙗ҆́ко възда́сть т̂и сѣмѧ, внесет̑ же ли т̂и въ гꙋмно·

Кри́лома веселѧ́щесѧ е҆ла́сса, а҆ще зачнетъ а҆сад̑да и носса·

ꙗ҆́ко ѻ҆ста́витъ на́ земли ꙗ҆́ица своѧ, и҆ персть съгрѣетъ·

и҆ забы на́га и҆ разметъ, и҆ ѕвѣрь се́льныи попере́тъ и҆̀·

ѻ҆жести же ча́да своѧ, ꙗ҆́ко не въ тще трꙋди́тсѧ без̑ стра́ха·

Ꙗ҆́ко премолча́лъ бо е҆си премꙋ́дрость б҃ъ, и҆ не раздѣли́лъ е҆си въ ра́зꙋмѣ·

На вре́мѧ же высоты възнесе́тъ, посмѣетсѧ коню и҆ сѣдѧ́щемꙋ на не́мъ·

И҆ли вложи́лъ е҆си коню си́лꙋ, ѻ҆бле́клъ же ли е҆си на вы́и е҆го стра́хъ·

ѻ҆бложи ли на́нь ѻ҆рꙋж́їе, сла́вою же перси е҆го де́рзость, копысаѧ на́ поли и҆гра́етъ, і҆ и҆схо́дит̑ на́ поле крѣпостїю·

Срѣта́ющїим̑ стрѣла́мъ посмѣва́етсѧ, и҆ не ѿврати́тсѧ ѿ желѣ́за·

На не́мъ б̂о и҆гра́етъ лꙋ́къ и҆ ме́чь, и҆ гнѣ́вомъ потребит̑ зе́млю·

И҆ не и҆́мать вѣры ꙗ҆́ти до́ндеже въстрꙋ́битъ трꙋба, трꙋбѣ же трꙋбѧ́щи гл҃етъ бла́ѕѣ, и҆здале́ча же ѻ҆бонѣва́етъ ра́ть, с пи́скомъ и҆ во́племъ·

И҆ твое҆ю хи́тростїю стои҆тъ ꙗ҆́стребъ, просте́ръ кри́лѣ, недвижимъ зрѧ на ю҆́гъ·

Твои҆м꙽ же ли повеле́нїемъ възносит̑сѧ ѻ҆ре́лъ.
неꙗ҆сы́т꙽ же на гнѣздѣ своем̑ вселѧ́етсѧ, на кра́и камы́ка въ съкрове́нѣ.
тꙋ же сы́и проситъ бра́шна, и҆здале́ча ѻ҆́чи е҆го блюде́та·

пти́щы же е҆го калѧ́ютсѧ въ кро́ви, и҆деже а҆ще бꙋдꙋтъ мр҃твцы а҆бїе ѻ҆брѣта́ютсѧ·

И҆ ѿвѣща г҃ь къ і҆́ѻвꙋ и҆ реч̑҇, не сд̑ꙋ съдово́ленъ сꙋди́ши, ѻ҆блича́ѧ б҃а ѿвѣща́етъ е҆мꙋ·

Ѿвѣща же і҆́ѻвъ гв҃и и҆ рече.
почто е҆ще а҆зъ прюсѧ ѹ҆чимъ и҆ ѻ҆блича́емъ ѿ б҃а слы́шати такова́ѧ.
ничтоже сы́и.
а҆зъ же кїи ѿвѣтъ дам̑ к семꙋ, рꙋ́кꙋ положꙋ на ѹ҆стх̑ѣ с̂и·

Є҆ді́ною гл҃ахъ, ѻ҆ вторѣм же не приложꙋ·

Глв̑҇а, м҃·

Па́ки ѿвѣща г҃ь и҆ рече къ і҆́ѻвꙋ ѿ ѻ҆́блака.
н̂и, н̂о препоѧши ꙗ҆́ко мꙋж́ъ чре́сла своѧ, въпрошю же т̂ѧ ты же м̂и ѿвѣща́и·

Не ѿверзи сꙋда мое҆го, ниже мни и҆на́ко т̂и сътвори́ша мене, и҆ли да ꙗ҆ви́шисѧ правдив̑҇·

И҆ли мы́шца т̂и е҆сть на г҃а, и҆ли гла́сом̑ ꙗ҆́коже ѻ҆́нъ грими́ши.
прїими же высотꙋ и҆ си́лꙋ, въ сла́вꙋ же и҆ въ че́сть ѻ҆блеци́сѧ·

Пꙋсти же а҆гг҃лы гнѣвом̑, и҆ всѧ́кого же ѹ҆ко́рника смирѝ.
и҆ велича́ва же ѹ҆гаси, съгно́и же нечс̑҇ти́выѧ·

А҆бїе съкры́и же въ землѝ внѣ въкꙋпѣ.
личеса их̑ без̑че́стїа и҆спол̑҇ни, съкры́и же въ землѝ вн̂ѣ, и҆сповѣмъ ѹ҆бо ꙗ҆́ко мо́жет̑ десни́ца твоѧ̀ спс̑҇ти·

Но ѹ҆бо с̂е е҆сть ѕвѣрь ѹ҆ тебе, травꙋ же а҆ки воло́ве ꙗ҆́сть·

Се ѹ҆бо е҆сть крѣпость е҆го на чре́сла е҆го, си́ла же е҆го на пꙋпѣ чре́ва е҆го·

Поста́ви б̂о ѻ҆́шибъ ꙗ҆́ко кипари́съ, жи́лы же е҆го ꙗ҆́ко ѹ҆́же съплете́ны сꙋть·

Ре́бра же е҆го ре́бра мѣдѧна, хребе́тъ же е҆го желѣ́зо льѧ́но·

Є҆же е҆сть нача́ток̑҇ зда́нїѧ гн҃ѧ, сътворенъ порꙋга́нъ бы́ти а҆гг҃лы е҆го·

Въшед̑ же на́ горꙋ ѻ҆́стрꙋ сътвори ра́дость четвероно́гом̑ въ тарта́ре·

Под̑ всѧ́комъ дре́вомъ спи́тъ, при рого́зѣ и҆ тро́стїю и҆ зе́лїю ѻ҆горсти́вши·

ѻ҆сѣнѧ́ет꙽ же е҆го дре́во вели́ко съ лѣтора́сльми, и҆ вѣѧ ве́рбїѧ·

А҆ще бꙋдетъ пово́нь не ѻ҆щꙋти́тъ, ѹ҆пова́етъ ꙗ҆́ко прирази́тсѧ і҆ѻ҆рда́нъ въ ѹ҆ста е҆го.
пред̑ ѻ҆чи́ма е҆го прїиметъ и҆̀, жесто́къ быва́ѧ, прободе́тъ но́здри е҆го·

Извлече́ши ли ѕмїѧ ѹ҆́дицею, и҆ли ѻ҆бложи́ши ѻ҆гла́въ ѻ҆ но́здрѣхъ е҆го, и҆ли вдеже́ши кольце в но́здри е҆го, ши́лом꙽ же проверти́ши ли ѹ҆стнꙋ е҆го·

Възгл҃етъ же ли т̂и млс̑҇тивыи, и҆ли стреже́шъ кро́т꙽кїи·

Сътворит̑ же ли завѣтъ с тобо́ю, по́имеши же ли е҆го раба̀ вѣ́чна·

Поигра́еши же ли с ни́мъ ꙗ҆́коже съ пти́цею, и҆ли свѧ́жеши и҆̀ ꙗ҆́ко пти́цꙋ на́ поли·

Пита́ют꙽ ли же сѧ ѻ҆ не́мъ стра́ны, раздѣлѧ́ет꙽ же и҆ ꙗ҆зы́цы фини́ки·

Все же плава́ющее сни́детсѧ, принесет̑ же е҆ді́ною҆́зно ѻ҆́шибъ е҆го, и҆ въ кораблех̑ рыбари е҆го·

Възложи́ши же на́нь рꙋ́кꙋ.
поне вра́чба е҆го на тѣ́лѣ е҆го, и҆ ктомꙋ не бꙋ́ди·

Не ви́дѣлъ е҆си е҆го не гл҃емыхъ диви́лсѧ е҆си, не бои́ши ли сѧ ꙗ҆́ко ѹ҆готови ми сѧ·

Глв̑҇а, м҃а·

Кт̂о бо е҆сть и҆же ми сѧ проти́витъ, и҆ли противлѧ́ѧсѧ сътерпи́тъ, и҆ли не всѧ̀ под̑нбс̑҇наѧ моѧ е҆сть·

Не ѹ҆молчю е҆го ради, и҆ сло́во си́лы поми́лꙋет̑ ра́внаго е҆го·

Кт̂о ѿкрыет̑ лице ѻ҆блече́нїа е҆го, в꙽ согбе́нїа срд̑ца е҆го кт̂о ѹ҆бо вни́дет̑·

две́ри лицю е҆го кт̂о ѿверзет̑, ѻ҆́крс̑҇тъ зꙋбъ е҆го страх̑·

ѹ҆тро́ба е҆го щи́та мѣдѧна, съюз̑ же е҆го ꙗ҆́коже змирит̑ камы́къ, е҆ді́нъ дрꙋѕѣмъ прилипа́емъ, дх҃ъ же не про́идет̑ е҆го·

Ꙗ҆́ко мꙋж́ъ же бра́тѣ свое҆мъ прилѣпитсѧ, съдръжит̑сѧ и҆ не ѿтръгнетасѧ·

Вод̑хнове́нїем꙽ е҆го просвѣти́тсѧ свѣтъ, ѻ҆́чи же е҆го видѣ́нїе дн҃ьница, и҆з꙽ ѹ҆́стъ е҆го и҆схо́дѧтъ свѣща горѧ́щаѧ·

и҆ връжени быва́ют̑ ѻ҆́дри желѣ́зни и҆ ѻ҆́гнени·

и҆з но́здрїи же е҆го и҆схо́дит̑ ды́мъ пе́щи горѧ́ща ѻ҆гнем̑ и҆ ѹгльми·

дш҃а же е҆го ꙗ҆́ко ѹ҆́глїе, и҆ ꙗ҆́ко пла́мы из̑ ѹ҆́стъ е҆го и҆схо́дит̑·

На вы́и же е҆го всѧ дѣ́лаетсѧ си́ла пред̑ ним̑ течет̑ па́гꙋба·

пло́ти же телесе е҆го прилипа́ютъ·

лѣетъ на́нь и҆ не движитсѧ.
срд̑це е҆го не под̑ви́житсѧ а҆ки камы́къ, стоит̑ же а҆ки наковално непобѣди́мо.
ѻ҆бра́щьшꙋ же сѧ е҆мꙋ страх̑ ѕвѣремъ четвероно́гим̑ по земли ска́чющемъ·

А҆ще срѧ́щет̑ и҆дꙋща, ничтоже не сътво́рѧт̑ е҆мꙋ, ко́пїе воньзе́но и҆ бра́нѧ.
и҆мат̑ б̂о желѣ́зо а҆ки плѣвы, мѣдь же а҆ки дре́во гни́ло·

Не ѹ҆стрелит̑ е҆го лꙋ́къ метенъ, и҆́мать б̂о пра́щꙋ а҆ки сѣно·

А҆ки сте́блїе вмѣни́шасѧ е҆мꙋ мла́тове, рꙋгает̑ же сѧ трꙋсꙋ ѻ҆́гненꙋ·

ло́же е҆го ѻ҆стни ѻ҆стри, всѧ́ко же зла́то мо́рско пред̑ ним̑ ꙗ҆́коже бе́рнїе без꙽числе́на·

Въжига́етъ бе́зднꙋ ꙗ҆́коже въ ѻ҆гни, и҆́мать же мо́ре ꙗ҆́ко потребле́нїе, и҆ преи҆спод̑нѧѧ бе́здны ꙗ҆́коже плѣ́нника, и҆мѣлъ б̂о безд̑нꙋ в꙽ похожде́нїе·

Нѣсть ничто́же по земли то́чно е҆мꙋ сътворено порꙋга́нъ бы́ти а҆гг҃лы мои҆ми·

Все высо́ко зрит̑, сам̑ же цр҃ь всм̑ѣ сꙋщимъ въ водах̑·

Глв̑҇а, м҃в·

Ѿвѣща же і҆́ѻвъ и҆ реч̑҇ къ г҃ꙋ·

вѣмъ все ꙗ҆́ко мо́жеши, не немо́жна же т̂и ничто́же·

кт̂о бо е҆сть таѧи тебе совт̑ѣ, щадѧ́ же словеса̀ и҆ тебе мнит̑сѧ таи҆ти·

Кт̂о же възвѣстит̑ м̂и их̑же не видх̑ѣ, ве́лїа и҆ ди́внаа и҆́х꙽же не свѣдх̑ѣ·

Послꙋшаи мене г҃и да и҆ а҆зъ въз꙽гл҃ю, въпрошю же т̂ѧ ты же м̂ѧ наѹ҆чи·

слꙋхомъ б̂о ѹ҆́ха ѹ҆слы́шах̑ т̂ѧ пе́рвѣе, нн҃ѣ же і҆ ѻ҆́ко мое ви́дѣ т̂ѧ·

тѣ́мже блѧдослових̑сѧ сам̑ и҆ ѹ҆страших̑сѧ, мню̀ себе землѧ и҆ пепелъ·

Быс̑҇ же е҆гда гл҃а г҃ь гл҃ы сїѧ і҆́ѻвꙋ·

Реч̑҇ г҃ь е҆лиѳа́сꙋ фемани́тинꙋ·

съгрѣши́лъ е҆си т̂ы, и҆ ѻ҆́ба дрꙋ́га твоѧ.
не гл҃аста б̂о предо мно́ю ничто́же и҆стова, ꙗ҆́ко рабъ мои і҆́ѻв̑҇·

Нн҃ѣ же поимѣте сед̑мь телець и҆ сед̑мь ѻ҆́венъ.
і҆ и҆дите къ рабꙋ мое҆мꙋ і҆́ѻвꙋ и҆ сътво́рит̑ жрътвꙋ за вы̀.
і҆́ѻвъ же раб̑҇ мои помо́лит̑сѧ за васъ, то́чїю б̂о лице е҆го прїимꙋ, а҆ще не е҆го ра́ди погꙋбилъ бых̑ ѹ҆бо вас̑҇·

не гл҃аста б̂о и҆́стиннѣ на раба̀ мое҆го і҆́ѻва·

И҆ ѿи҆́де же е҆лиѳа́съ фемани́тинъ, и валдад̑ савхетинъ, и҆ софа́ръ минеи҆нъ, и҆ сътвори́ша ꙗ҆́коже повелѣ и҆ма г҃ь.
и҆ ѿпꙋсти грѣхи и҆мъ і҆́ѻва ради·

Гь҃ възрасти і҆́ѻва, молѧщꙋ же сѧ е҆мꙋ ѻ҆ дрꙋзехъ своих̑, и҆ ѿпꙋсти и҆мъ грѣхи и҆хъ.
и҆ дасть г҃ь сꙋгꙋбо е҆лико б̂ѣ прежд̑е і҆́ѻвꙋ·

Слы́шаша же всѧ бра́тїѧ е҆го, и҆ вс̂и се́стры е҆го, всѧ бы́вшаѧ е҆мꙋ·

и҆ прїидо́ша к немꙋ вс̂и е҆ли́цы знаа́хꙋ е҆го первѣе, ꙗ҆́д꙽шеи и҆ пи́вшеи ѹ҆ него.
ѹ҆тѣши́ша е҆го, и҆ диви́шасѧ ѻ҆ всем̑ е҆же наведе б҃ъ на́нь·

да́сть же е҆мꙋ ко́жд̑о а҆гницꙋ е҆ді́нꙋ, и҆ д҃, драх̑мы зла́та незнаменована·

Гь҃ же блс̑҇ви послд̑ѣнѧѧ і҆́ѻвꙋ неже преж̑нѧѧ·

Бѣ же скот̑ е҆го ѻ҆вець, ҂д҃і, вельблюд̑, ҂ѕ҃, и҆ сꙋпрꙋгъ воло́въ, ҂а҃, и҆ ѻ҆сли́ць стад̑ных̑, ҂а҃·

Роди́ша же сѧ е҆мꙋ сн҃овъ сед̑мь, и дщери тр̂и·

Прозва̀ первꙋю дн҃ь, и҆ вторꙋю касїа тре́тїю же а҆малфеи ро́гъ.
и҆ не ѻ҆брѣто́шасѧ подо́бнїи в лѣпотѣ дщерїи і҆́ѻвовых̑ въ под̑нбс̑҇нѣи.
да́сть же і҆́ѻвъ дщерем̑ своим̑ наслѣдїе въ бра́тїи их̑·

Жит̑ же і҆́ѻвъ по ꙗ҆́звѣ то́и, лт̑ѣ, р҃, и҆ о҃·

Всх̑ѣ же лт̑ѣ жи́тъ, см҃и·

и҆ ви́дѣ і҆́ѻвъ сн҃ы своѧ, и҆ сн҃ы сн҃овъ своих̑, даже до четве́ртаго колѣ́на·

и҆спо́лнь дн҃їи·

Конецъ кни́гъ і҆́ѻвовыхъ.
и҆́мать в себѣ глав̑҇, м҃в·