ДВ҃ДА ПР҃РОКА И҆ ЦР҃Ꙗ ПѢ́СНЬ
КАѲ А҃
ѱлом̑ двд̑въ а҃, неѻ҆пи́санъ ѿ е҆вреи·
Блаже́нъ мꙋж꙽, и҆́же не йде на совѣтъ нечести́выхъ, и҆ на пꙋтѝ грѣш́ных̑ не ста̀, и҆ на сѣда́лищи гꙋби́тель не сѣ́де·
Но въ зако́нѣ гн҃и во́лѧ е҆го.
и҆ въ зако́нѣ е҆го поѹ҆чи́т꙽сѧ дн҃ь и҆ но́щъ·
И҆ бꙋ́деть ꙗ҆́ко дре́во сажено прї и҆схо́дищихъ во́дъ, и҆́же пло́дъ свои да́стъ въ вре́мѧ своѐ.
и҆ ли́стъ е҆го не ѿпаде́тъ,<.>
И҆ всѧ̀ е҆ли́ка а҆́ще твори́тъ, ѹ҆спѣетъ·
Не та́ко нечести́вїи, не та́ко·
Но ꙗ҆́ко пра́хъ е҆го́же възмѣта́ет꙽ вѣтръ, ѿ лица̀ землѝ·
Сего̀ ра́ди не въскре́снꙋтъ нечести́вїи на сꙋдъ, ни грѣшницы въ совт̑ѣ пра́вед̑ныхъ·
Ꙗ҆́ко съвѣ́сть г҃ь пꙋть пра́вед̑ныхъ, и҆ пꙋть нечести́выхъ поги́бнетъ·
ѱалом̑ двд̑въ, в҃·
Въскꙋю шата́шасѧ ꙗ҆́зы́ци, и҆ лю́дїе поѹ҆чи́шасѧ тъще́тнымъ;
Пред̑ста́ша цр҃їе зем꙽стїи, и҆ кнѧ́ѕи събрашасѧ въкꙋпѣ, на г҃а и҆ на х҃а е҆го̀·
Растръгнемъ ѹ҆зы и҆хъ, и҆ ѿве́ржемъ ѿ насъ и҆́го и҆хъ·
Живы́и на́ нб҃сехъ посмѣе҆тсѧ и҆́мъ, и҆ г҃ь порꙋга́етсѧ и҆́мъ·
тогда̀ въз꙽гл҃етъ къ ни́мъ гнѣвомъ свои҆м꙽, и҆ ꙗ҆ростїю свое҆ю смꙋтитъ ѧ҆̀·
А҆́з꙽ же поста́вленъ е҆смь цр҃ь ѿ него̀, над̑ сиѡ́номъ горꙋ ст҃ꙋю его̀, възвѣща́ѧ повелѣнїе гн҃е·
г҃ь реч̑҇ къ мнѣ̀, сн҃ъ ми е҆си т̂ы, А҆́зъ дне́сь роди́хъ тѧ·
проси ѿ мене, и҆ да́мъ ти ꙗ҆́зы́ки достоѧ́нїе твоѐ,<.>
И҆ ѻ҆́держа́нїе твоѐ конца земли·
ѹ҆пасе́ши ѧ҆̀ па́лицею желѣзною, ꙗ҆́ко съсꙋды скꙋде́льничѧ съкрꙋши́ши ѧ҆̀·
И҆ нн҃ѣ цр҃їе разꙋмѣйте, накажитесѧ вси сꙋдѧщеѝ землѝ·
Рабо́таи҆те гв҃и съ стра́хомъ, и҆ ра́дꙋитесѧ е҆мꙋ съ трепетомъ·
Прїимѣте наказа́нїе, да не когда̀ прогнѣвае҆тсѧ г҃ь, и҆ поги́бнете ѿ пꙋти пра́вед̑наг̑҇·
е҆гда̀ възгори́тсѧ въско́рѣ ꙗ҆́рость ег̑҇·
бл҃же́ни въси надѣющеѝсѧ на́нь·
ѱлом̑ двд̑въ г҃, вънегда̀ ѿбѣгаше ѿ лица а҆весалома сн҃а свое҆го·
Ги҃, что́сѧ ѹ҆мно́жиша стꙋжаю҆щеи҆ ми;
Мно́ѕи въста́ютъ на́ мѧ·
мно́ѕи гл҃ют꙽ дш҃и моеи, нѣсть сп҃се́нїа е҆мꙋ ѻ҆ бѕ҃ѣ е҆го·
ты́ же г҃и застꙋпникъ мои е҆сѝ, сла́ва моѧ, и҆ възносѧ главꙋ мою̀·
Гла́сомъ мои҆мъ къ г҃ꙋ възва́хъ, и҆ ѹ҆слы́ша мѧ ѿ горы ст҃ыѧ свое҆ѧ̀·
а҆́з же ѹ҆снх̑ꙋ и҆ спа́хъ, Въста́хъ, ꙗ҆́ко г҃ь застꙋпитъ мѧ·
не ѹ҆бою҆сѧ ѿ темъ лю́дїи, ѻ҆́крестъ нападающих̑ на́ мѧ·
въскрс̑҇нѝ г҃и, сп҃и́ мѧ бж҃е мо́и·
ꙗ҆́ко ты порази въсѧ вражд̑ꙋющаѧ ми въсꙋе, зꙋбы грѣшникомъ съкрꙋши́лъ е҆си·
Гн҃е е҆сть сп҃се́нїе, и҆ на людехъ твои҆х꙽ блгс̑҇лвѐнїе твое·
Сла́ва· ѱлом̑ двд̑въ д҃. Въ конецъ, пѣ́снеи·
Вънегда̀ възвах̑, ѹ҆слы́ша мѧ бг҃ъ пра́вды мое҆ѧ·
въ скорби распространи́л꙽ мѧ е҆си·
ѹ҆щедри мѧ и҆ ѹ҆слы́ши молитвꙋ мою·
Сн҃ве члвчс̑҇тїи, доко́лѣ тѧжкосе́рдїи;
въскꙋю лю́бите сꙋетнаѧ и҆ и́щете лжа;
и҆ ѹ҆вѣдите, ꙗ҆́ко ѹ҆диви г҃ь прпд̑бнаго своег̑҇.
г҃ь ѹ҆слы́шит мѧ, вънегда̀ воз̑зовꙋ къ немꙋ·
гнѣ́ваитесѧ, и҆ не съгрѣша́ите·
ꙗ҆́же гл҃ете въ срд̑цыхъ ва́шихъ, на ло́жихъ ва́шихъ ѹ҆милитесѧ·
пожрите жертвꙋ пра́вдѣ, и҆ ѹ҆пова́ите на г҃а·
Мно́ѕи гл҃ют꙽, кто ꙗ҆́витъ на́мъ бл҃га́ѧ;
зна́менасѧ на на́съ свѣтъ лица̀ твое҆го г҃и, да́лъ е҆си весе́лїе въ срд̑цы мое҆мъ·
ѿ плода пшеница, вина̀ і҆ е҆ле́ѧ свое҆го ѹ҆мно́жишасѧ·
въ мирѣ въкꙋпѣ ѹ҆снꙋ, и҆ почїю·
ꙗ҆́ко ты г҃и е҆ді́наго на ѹ҆пова́нїе въсели́лъ мѧ е҆си.
ѱлом̑ двд̑въ е҃· ѻ҆ наслд̑ѣствꙋющыхъ.
Гл҃ы моѧ внꙋши г҃и, разꙋмѣи зва́нїе мое, воньмѝ глс̑҇а мл҃твы мое҆ѧ, цр҃ю мо́й и҆ бж҃е мой·
Ꙗ҆́ко к тебѣ помолю́сѧ г҃и, заѹ҆́тра ѹ҆слы́ши глс̑҇а мои·
Заѹ҆́тра пред̑ста́нꙋ ти, и҆ ѹ́зриши мѧ, ꙗ҆́ко бг҃ъ не хотѧ безако́нїе ты е҆си·
Не прїидетъ к тебѣ лꙋка́внꙋѧѝ, ни пребꙋдꙋтъ же зако́нопрестꙋ́пницы пред̑ ѻ҆чи́ма твои́ма·
Възненавидѣлъ е҆си всѧ творѧ́щаѧ безако́нїе, погꙋбиши всѧ гл҃ющаѧ лжꙋ·
Мꙋж́а кро́ви и҆ льстива гнꙋша́е҆тъсѧ г҃ь·
А҆́зъ же мно́жествомъ млс̑҇ти твоеѧ, внидꙋ в до́мъ твой, поклоню́сѧ къ црк҃ви ст҃ѣи твоей, въ стра́сѣ твое҆мъ·
г҃и наста́ви мѧ пра́вдою твое҆ю, вра́гъ мои҆хъ ра́ди и҆спра́ви пред̑ собо́ю пꙋть мо́и·
Ꙗ҆́ко нѣсть въ ѹ҆стѣхъ их̑ и҆́стины, срд̑це и҆́хъ сꙋе́тно·
Гро́бъ ѿвръстъ горта́нь и҆́хъ, ꙗ҆́зы́ки свои҆ми льща́хꙋ, сꙋди и҆мъ бж҃е·
да ѿпадꙋтъ ѿ мы́слеи свои҆хъ, по мно́жествꙋ нече́стїѧ и҆́хъ и҆зрини ѧ҆̀, ꙗ҆́ко прогнѣваша тѧ г҃и·
И҆ възвеселѧ́тсѧ вси ѹ҆пова́ющей на́ тѧ·
Въ вѣ́ки възра́дꙋютсѧ и҆ всели́шисѧ в них̑·
и҆ похва́лѧтсѧ ѻ҆ тебѣ вси любѧ́щеѝ и҆́мѧ твое, Ꙗ҆́ко ты блгс̑҇ви́ши пра́вед̑ника.
г҃и, ꙗ҆́ко ѻ҆рꙋжїемъ блг҃оволенїѧ вѣнча́лъ е҆си насъ·
ѱлом̑ двд̑въ ѕ҃, В конец̑҇ въ пѣснех̑ ѻ҆ ѡ҆́смых̑·
Ги҃, да не ꙗ҆́ростїю твое́ю ѻ҆бличиши менѐ, ниже гнѣвомъ твои҆мъ пока́жеши менѐ·
Поми́лꙋи мѧ г҃и, ꙗ҆́ко не́мощен̑҇ е҆смь.
и҆сцѣли́ мѧ г҃и, ꙗ҆́ко смѧтошасѧ ко́сти моѧ·
И҆ дш҃а моѧ̀ смꙋти́сѧ ѕѣло̀, и҆ ты г҃и доко́лѣ;
ѻ҆братѝ г҃и, і҆ и҆зми дш҃ꙋ мою̀·
Сп҃си́ мѧ ра́ди млс̑҇ти твое҆ѧ̀.
ꙗ҆́ко нѣсть въ сме́рти помина́ѧй тебѐ, въ а҆́дѣ же кто и҆сповѣсть ти сѧ;
ѹ҆трꙋди́хсѧ въздыха́нїемъ мои҆мъ,<.>
И҆ змы́ю на всѧ́кꙋ но́щъ ло́же моѐ, слеза́ми мои҆ми посте́лю мою̀ ѻ҆мочю̀·
смꙋтисѧ ѿ ꙗ҆́рости ѻ҆́ко мое, ѻ҆бетъшах̑ въ всѣхъ вра́ѕѣхъ мои҆хъ.
ѿстꙋпи́те ѿ мене всѝ творѧ́щеи́ безако́нїе, ꙗ҆́ко ѹ҆слы́ша г҃ь глс̑҇а пла́чѧ мое҆го̀·
ѹ҆слы́ша г҃ь моле́нїе мое, г҃ь мл҃твꙋ мою прїѧ́тъ·
да постыдѧ́тсѧ и҆ смѧтꙋтсѧ вси вра́ѕи моѝ, възвратѧ́тсѧ и҆ ѹ҆стыдѧ́тсѧ ѕѣло въско́рѣ·
Сла́ва· ѱлом̑ двд̑въ, з҃, е҆го́же въспѣтъ гв҃и ѻ҆ словесѣхъ хꙋсі́евъ, сн҃а е҆мені́ина·
Ги҃ б҃е мой на́ тѧ ѹ҆пова́хъ, сп҃си м̂ѧ ѿ всѣхъ гонѧ́щихъ м̂ѧ, і҆ и҆зва́ви м̂ѧ·
да не когда̀ похи́ти́тъ ꙗ҆́ко ле́въ мою̀, ни сꙋщ́ꙋ и҆збавлѧ́ющꙋ, ниже сп҃са́ющꙋ·
г҃и б҃е мой а҆́ще сътвори́хъ с̂е, а҆́ще е҆сть непра́вда въ рꙋ́кꙋ моею, а҆ще въздахъ възда́ющимъ м̂и ѕл̂а, да ѿпадꙋ̀ ѹ҆бо ѿ вра́гъ мои́хъ то́щь·
да пожене́т꙽ ѹ҆бо вра́гъ дш҃ꙋ мою, и҆ пости́гнет꙽, и҆ попере́тъ в зе́млю живо́тъ мой, и҆ сла́вꙋ мою в пе́рсть всели́тъ·
Въскрс̑҇ни г҃и гнѣвомъ твои́мъ, възнесисѧ въ концыхъ вра́гъ твои҆́хъ·
И҆ въста́ни г҃и бж҃е мой по велѣнїемъ и҆мже заповѣда, и҆ со́нмъ людїи ѻ҆бы́детъ т̂ѧ.
и҆ ѻ҆ то́мъ на высотꙋ̀ ѻ҆брати́сѧ.
г҃ь сꙋ́дитъ людемъ·
Сꙋди м̂и г҃и по пра́вдѣ моей, и҆ по незло́бѣ моей на мѧ·
Да сконча́етсѧ зло́ба грѣшных̑, и҆ і҆спра́виши правед̑наго, и҆спыта́ѧ срд̑ца и҆ ѹ҆тро́бы бж҃е·
праведна по́мощъ моѧ ѿ б҃а сп҃са́ющаго пра́выѧ срд̑цемъ·
Бг҃ъ сꙋди́тель пра́веденъ, и҆ крѣпокъ и҆ долготерпелив̑҇, и҆ не гнѣвъ наводѧ̀ на всѧк̑҇ дн҃ь·
А҆́ще не ѻ҆братите́сѧ, ѻ҆рꙋжїе свое ѻ҆циститъ, лꙋкъ свой напрѧжѐ, и҆ ѹ҆гото́ва и҆̀·
и҆ въ немъ ѹ҆гото́ва съсꙋ́ды сме́ртныѧ̀, стрѣ́лы своѧ̀ съгорѧ́щими съдѣ́ла·
Се̂ болѣ̀ непра́вдꙋ, зача́тъ болѣзнь, и҆ родѝ безако́нїе·
ро́въ и҆зры̀, и҆ і҆скопа и҆̀, и҆ впадетсѧ въ ѧ҆́мꙋ, ю҆́же съдѣ́ла·
ѻ҆брати́т꙽сѧ болѣзнь е҆го на главꙋ е҆го, и҆ на ве́рхъ е҆го непра́вда е҆го сни́детъ·
И҆сповѣмсѧ гв҃и по пра́вдѣ е҆го, и҆ пою и҆́мени гн҃ю вы́шне́мꙋ·
ѱаломъ двд̑въ, и҃· Въ конецъ ѻ҆ точи́лехъ,
Ги҃ г҃ь на́шъ, ꙗ҆́ко чю́дно и҆́мѧ твое по все́й землѝ·
Ꙗ҆́ко взѧ́тсѧ велелѣп́ота твоѧ̀ превы́ше нб҃съ·
И҆зъ ѹ҆стъ младе́нецъ и҆ с꙽сꙋщ́ихъ съвер꙽ши́лъ еси хвалꙋ, вра́гъ твои҆хъ рад̑и̑, разрꙋши́ши врага̀ и҆ ме́стника·
Ꙗ҆́ко ѹ҆зрю̀ нб҃са, дѣ́ла пе́р꙽стъ твои́хъ, лꙋнꙋ и҆ ѕвѣзды, ꙗ҆́же ты ѻ҆снова̀·
Что̀ е҆сть чл҃къ ꙗ҆́ко по́мниши и҆̀, и҆ли сн҃ъ чл҃чь, ꙗ҆́ко посѣща́еши и҆̀;
ѹ҆ма́лилъ е҆си и҆̀ ма́ломъ чи́мъ ѿ а҆́гг҃лъ, сла́вою и҆ че́стїю вѣнча́лъ е҆си е҆го, и҆ поста́вилъ е҆си е҆го над̑ дѣ́лы рꙋкꙋ твоею̀·
вс̂ѧ покори́лъ е҆си под̑ ноѕѣ е҆го, ѻ҆вца̀ и҆ волы всѧ̀, е҆ще́ же и҆ скоты полскїа·
Пти́ца нбс̑҇ныѧ, и҆ ры́бы морскы́ѧ, преходѧ́щаѧ стеѕѧ̀ морскїѧ·
г҃и г҃ь нашъ, ꙗ҆́ко чю́дно и҆́мѧ твое по все́й землѝ·
Слв̑҇а· ѱа́лом̑, дввд̑ъ ѳ҃· В коне́цъ ѻ҆ таи́нных̑ сн҃а.
каѳ̑҇ в҃·
Исповѣм꙽сѧ тебѣ г҃и всѣмъ срд̑цемъ мои́мъ, повѣмъ всѧ чюдеса̀ твоѧ̀·
Възвеселю́сѧ и҆ възра́дꙋюсѧ ѻ҆ тебѣ, пою̀ и҆мени твое҆мꙋ вы́шнїи·
Внегда̀ възврати́тисѧ врагꙋ мое҆мꙋ въспѧ́ть, и҆знемо́гꙋтъ и поги́бнꙋтъ ѿ лица твое҆го·
ꙗ҆́ко сътвори́лъ е҆си сꙋ́дъ мои и҆ прю̀ мою.
сѣлъ е҆си на престо́лѣ сꙋдѧ́и правдꙋ·
Запрѣтилъ е҆си ꙗ҆́зы́комъ, и҆ поги́бе нечести́выи.
и҆́мѧ е҆го потреби́лъ е҆си въ вѣкъ, и҆ въ вѣкъ вѣка·
Врагꙋ ѻ҆скꙋдѣша ѻ҆рꙋжїѧ в коне́цъ, и҆ гра́ды разрꙋши́лъ е҆си·
Поги́бе па́мѧть е҆го с шꙋ́момъ, и҆ г҃ь въ вѣки пребыва́етъ·
ѹ҆готова на сꙋ́дъ престо́лъ свой, и҆ то́и сꙋдит̑ вселе́ннѣи в пра́вдꙋ, сꙋди́тъ лю́демъ в пра́вдꙋ·
и бы́сть г҃ь прибѣжище ѹ҆бо́гомꙋ, помощни́къ въ бл҃го времѧ в печѧ́лехъ·
И҆ да ѹ҆пова́ютъ на́ тѧ зна́ющеи и҆́мѧ твое, ꙗ҆́ко не ѻ҆ста́вил̑҇ е҆си възыска́ющихъ т̂ѧ г҃и·
По́ите гв҃и живѹ́щемꙋ в сїѻ́нѣ, възвѣсти́те въ ꙗ҆́зы́цехъ начинанїѧ е҆го·
ꙗ҆́ко възыскаѧ кро́ви и҆хъ помѧнꙋ̀, не забы̀ зва́нїѧ ѹ҆бо́гих̑·
Поми́лꙋи м̂ѧ г҃и, ви́жд̑ь смире́нїе мое ѿ вра́гъ мои҆хъ.
възносѧ́и м̂ѧ ѿ вра́тъ сме́ртныхъ, ꙗ҆́ко да възвѣщꙋ всѧ̂ хвалы̀ твоѧ̀, въ вратх̑ѣ дще́рѧ сїѻ́нѧ·
Възра́дꙋемсѧ ѻ҆ сп҃се́нїи твое́мъ, ѹ҆глѣбо́ша ꙗ҆́зыцы в па́гꙋбѣ, ю҆́же сътвори́ша·
въ сѣти се́й, ю҆́же съкры́ша ѹ҆вѧзѐ нога̀ и҆хъ·
Зна́емъ е҆сть г҃ь сꙋдбы̀ творѧ̀, въ дѣлех̑ рꙋ́кꙋ своею ѹ҆вѧзѐ грѣшникъ·
да възвратѧ́тсѧ грѣшницы въ а́дъ, вси ꙗ҆́зы́цы забыва́ющеѝ бг҃а·
ꙗ҆́ко не до конца забве́нъ бꙋ́детъ ни́щїи, и҆ терпѣнїе ѹбо́гихъ не поги́бнетъ до конца·
Въскрс̑҇ни г҃и да не крѣпи́тсѧ чл҃къ.
да сꙋдѧ́тсѧ ꙗ҆́зы́цы прд̑е тобо́ю·
Поста́ви г҃и законодавца над̑ ни́ми, да разꙋмѣют̑ ꙗ҆́зы́цы, ꙗ҆́ко чл҃цы сꙋть·
Вскꙋ́ю г҃и ѿстоѧ̀ дале́че, пре́зриши въ бл҃го вре́мѧ въ печа́лехъ;
въ го́рдости нечести́ваго възгара́етсѧ ни́щїи, ѹ҆вѧза́ютъ в совѣтехъ ꙗ҆́же помышлѧ́ютъ·
Ꙗ҆́ко хвали́мъ е҆сть грѣшныи в по́хотехъ дш҃а своеѧ̀,<.>
И҆ ѻ҆бидѧѝ блгс̑҇вимъ·
Разрд̑ажѝ г҃а грѣшныи, по мно́жестꙋ гнѣва свое҆го не възы́щетъ·
нѣсть бг҃а пред̑ ни́мъ, ѻ҆сквернѧ́ютсѧ пꙋтїе е҆го на всѧ́ко вре́мѧ·
ѿе́млютсѧ сꙋдбы твоѧ ѿ лица̀ е҆го, всѣмъ враго́мъ свои҆мъ ѻ҆долѣ́ет꙽·
Реч̑҇ бо въ срд̑ци своем̑, не подви́жꙋсѧ ѿ рода в ро́дъ без꙽ зла·
Є҆мꙋже клѧ́твы ѹ҆ста е҆го по́лна сꙋть, и҆ го́рести и҆ льсти, под̑ ꙗ҆́зы́комъ е҆го трꙋдъ и҆ болѣзнь·
Присѣди́тъ въ лови́телех̑ съ бога́тыми, в таи́нных̑ ѹ҆би́ти непови́ннаго·
ѻ҆́чи е҆го на ни́щаго призира́етѣ, ло́витъ в таи́нных̑ ꙗ҆́ко ле́въ въ ѻ҆гра́дѣ свое́й·
Ло́витъ въсхити́ти ѹ҆бо́гаго, въсхити́ти ни́щаго, внегда привлещї и҆̀·
въ сѣти свое́й смиритъ и҆̀, прекло́нитсѧ и҆ падетъ, е҆гда ѹ҆долѣ́етъ ѹ҆бо́гим̑·
Рече б̂о въ срд̑ци своемъ, забы бг҃ъ, ѿврати лице свое, да не ви́дитъ до конца·
Въскрс̑҇ни г҃и бж҃е мой, да възнесе́тсѧ рꙋка твоѧ, не забꙋди ни́щихъ свои҆хъ до конца̀·
Чесо̀ радид̑ прогнѣва нечести́выи бг҃а;
реч̑҇ бо в срд̑цы свое́мъ, не взы́щетъ·
види́ши.
ꙗ҆́ко ты болѣзнь и҆ ꙗ҆́рость сматрѧ́еши, да преда́нъ бꙋ́детъ въ рꙋцѣ твоѝ·
тебѣ ѻ҆ста́вленъ е҆сть ни́щїи, си́рꙋ ты бꙋ́ди помо́щникъ·
съкрꙋшѝ мы́шцꙋ грѣшномꙋ и҆ лꙋка́вомꙋ.
взы́щетсѧ грх̑ѣ е҆го, и҆ не ѻ҆брѧ́щетсѧ·
г҃ь цр҃ь в꙽ вѣкъ, и҆ въ вѣкъ вѣка, поги́бнете ꙗ҆́зы́цы ѿ землѧ е҆го·
Жела́нїе ѹ҆бо́гихъ ѹ҆слы́шалъ е҆си г҃и, ѹ҆гото́ванїе срд̑ца и҆хъ внѧтъ ѹ҆́хо твое·
сꙋдѝ си́рꙋ и҆ смире́нꙋ, да не приложит̑ потомъ велича́тисѧ чл҃къ на зем̑лѝ·
Въ конецъ, ѱлом̑ двд̑въ, і҃·
На́ г҃а ѹ҆пова́хъ, ка́ко речет̑ дш҃и мое́и, превита́и по гора́мъ ꙗ҆́ко пти́ца;
ꙗ҆́ко с̂е грѣшницы напрѧго́ша лꙋкъ, ѹ҆гото́ваша стрѣ́лы въ тꙋлѣ, състрѣлѧ́ти въ мра́цѣ пра́выѧ срд̑цем̑·
Зане ꙗ҆́же ты съвершѝ, ѻ҆ни разд̑рꙋши́ша·
пра́вед̑никъ же что сътворѝ;
г҃ь въ цр҃кви ст҃ѣй своей.
г҃ь, на нб҃си прс̑҇тлъ е҆го·
ѻ҆́чи е҆го на ни́щаго призира́етѣ, вѣжди е҆го и҆спыта́етѣ сн҃ы чл҃чьскїа·
г҃ь и҆спыта́етъ пра́вед꙽наго, и҆ нечести́ваго.
любѧ́и же непра́вдꙋ, ненави́дитъ свою дш҃ꙋ·
ѻ҆дожди́тъ на грѣшники сѣти.
ѻ҆́гнь и҆ жꙋ́пелъ и҆ дꙋхъ бꙋ́ренъ, ча́сть ча́ша и҆хъ·
Ꙗ҆́ко пра́веденъ г҃ь, и҆ пра́вды възлюби, пра́ваѧ видѣ лице е҆го·
Слав̑҇ въ въ конец̑҇ ѻ҆ ѡ҆смѣй ѱлом̑ двд̑въ а҃і·
Сп҃си мѧ г҃и, ꙗ҆́ко ѻ҆скꙋдѣ преподобныи, ꙗ҆́ко ѹ҆ма́лишасѧ и҆́стины ѿ сн҃о́въ чл҃чьскихъ,<.>
Сꙋе́тнаѧ гл҃а ко́ждо къ и҆скренемꙋ свое҆мꙋ·
ѹ҆стны льсти́выѧ въ срд̑ци, и҆ въ срд̑ци гл҃аша зла́ѧ·
Потреби́тъ г҃ь всѧ ѹ҆стны льсти́выа, и ꙗ҆́зы́къ велерѣ́чивъ, ре́кшаѧ, ꙗ҆́зы́къ нашь възвели́чимъ, ѹ҆стны̀ на́ша при на́съ сꙋть.
кто намъ г҃ь е҆сть;
страсти ра́ди ни́щихъ и҆ въздыха́нїа ѹ҆бо́гихъ, нн҃ѣ въскрс̑҇нꙋ гл҃еть г҃ь·
положꙋсѧ въ сп҃се́нїе, не ѻ҆бинꙋ́ѧсѧ ѻ҆ немъ·
Словеса̀ гн҃ѧ, словеса̀ чи́ста.
сребро̀ раждеже́но, и҆скꙋше́но землѝ, ѻ҆чище́но седмори́цею·
Ты г҃и съхрани́ши ны, и҆ съблюде́ши ны ѿ рода сего, и҆ въ вѣки·
ѻ҆крс̑҇тъ нечести́вїи хо́дѧтъ, по высотѣ твое́й ѹ҆мно́жилъ е҆си сн҃ы чл҃ческиѧ·
В коне́цъ, ѱлом̑, двд̑въ, в҃і·
Доколѣ г҃и забꙋ́деши мѧ до кон꙽ца̀;
доко́лѣ ѿвраща́еши лице свое ѿ менѐ;
доко́лѣ положꙋ совѣты въ дш҃и моей, болѣзни въ срд̑ци мое҆мъ дн҃ь и но́щь;
доколѣ възнесе́тсѧ врагъ мой на мѧ;
при́зри, и҆ ѹ҆слы́ши мѧ г҃и бж҃е мои·
просвѣтѝ ѻ҆́чи моѝ, да не когда̀ ѹ҆снꙋ в сме́рть, да не когда̀ рече́тъ вра́гъ мой, ѹ҆крѣпих̑сѧ на́нь·
стꙋжа́ющеѝ ми възра́дꙋютсѧ, а҆ще сѧ подви́жꙋ, а҆зъ же на млс̑҇ть твою ѹ҆повахъ·
Възра́дꙋетсѧ срд̑це мое ѻ҆ сп҃се́нїи твое́мъ.
въспою гв҃и бл҃годѣѧ҆вшемꙋ мн̂ѣ, и҆ пою̀ и҆́мени гн҃ю вы́ш꙽немꙋ·
Въ конец̑҇ ѱа́лом̑, двд̑въ, г҃і·
Рече безꙋменъ въ срд̑цы сво́емъ, нѣсть бг҃а·
растлѣша, и҆ ѻ҆мрази́шасѧ в начина́них̑, нѣсть творѧѝ бл҃госты́нѧ, нѣсть до е҆ді́наго·
г҃ь съ нб҃се приниче на́ сн҃ы чл҃ческїѧ, ви́дѣти, а҆ще е҆сть разꙋмѣва́ѧѝ, и҆ли взыска́ѧѝ бг҃а·
вси ѹ҆клони́шасѧ, вкꙋпѣ неключи́ми быша.
нѣсть творѧй бл҃госты́нѧ, нѣсть до е҆ді́наго·
нѝ ли разꙋмѣютъ вс̂и дѣ́лающей безако́нїе, снѣда́ющеѝ лю́ди моѧ въ мѣсто хлѣба·
г҃а не призва́ша.
та́мо ѹ҆боѧшасѧ стра́ха, и҆дѣже не бѣ стра́ха·
Ꙗ҆́ко г҃ь в ро́дѣ пра́вед̑ныхъ.
съвѣтъ ни́щаго посрами́сте, ꙗ҆́ко г҃ь ѹ҆пова́нїе е҆го е҆сть·
Кто да́сть ѿ сїѻ́на сп҃се́нїе і҆и҆л҃во;
внегда̀ възрати́тъ г҃ь плѣне́нїе людїи свои҆хъ, Възра́дꙋетсѧ і҆а́ковъ, и҆ възвесели́тсѧ і҆и҆л҃ь·
слав̑҇<.> Въ конец̑҇, ѱлом̑, двд̑въ, д҃і·
Ги҃, кто̀ ѻ҆бита́етъ въ жили́щи твое́мъ;
лѝ кто всели́тсѧ въ ст҃ꙋ́ю го́рꙋ твою;
ходѧ́и бес поро́ка, и҆ дѣ́лаѧй пра́вдꙋ, гл҃ѧѝ и҆стинꙋ въ срд̑цы своемъ, и҆же не ѹ҆льсти ꙗ҆́зыком̑ своим̑·
и҆ не сътворѝ и҆́скренемꙋ свое҆мꙋ ѕла̀, и҆ поноше́ниѧ не приѧ́тъ на бли́жнѧа своѧ̀·
ѹ҆ничиже́нъ е҆сть пред ни́мъ лꙋка́выи, боѧ҆́щаѧ же сѧ г҃а сла́вит̑·
Клены́исѧ и҆́скренемꙋ свое҆мꙋ.
и҆ не ѿмѣа́ѧсѧ.
сребра̀ свое҆го не да́стъ в ли́хвꙋ, и҆ м꙽зды̀ на непови́нных̑ не приѧ́тъ·
Творѧ́и сїа, не подви́житсѧ въ вѣ́ки·
Столпописа́нїе·ѱало́мъ, двд̑въ, е҃і·
Съхранѝ мѧ г҃и, ꙗ҆́ко на тѧ ѹ҆повахъ·
рѣхъ гв҃и, г҃ь мои е҆си ты, ꙗ҆́ко бл҃гых̑ мои҆хъ не требꙋ́еши·
Ст҃ы́мъ и҆же сꙋтъ на землѝ е҆го ѹ҆дивѝ г҃ь, всѧ хотѣнїа своѧ в ни́хъ·
ѹ҆мно́жишасѧ не́мощи и҆хъ, по си́хъ ѹ҆скори́ша·
не съберꙋ събо́ры их̑ ѿ кровїи, ни помѧнꙋ же и҆ме́нъ и҆́хъ ѹ҆стна́ма мои́ма·
г҃ь ча́сть достоа́нїа мое҆го, и҆ ча́ша моеѧ̀.
ты е҆си ѹ҆строа́й достоѧ́нїе мое мнѣ̀·
ю҆жа допадо́ша ми въ держа́вныхъ·
и҆бо достоа́нїе мое держа́вно ми е҆сть·
Блгс̑҇влю г҃а вразꙋми́вшаго мѧ, е҆ще же и҆ до́ нощи показа мѧ ѹ҆тро́ба моѧ̀·
пред̑зрѣхъ г҃а предо мною вы́нꙋ, ꙗ҆́ко ѻ҆деснꙋю мене е҆сть, да сѧ не подви́жꙋ·
Сего ра́ди възвесели́сѧ срд̑це мое, и҆ възра́довасѧ ꙗ҆́зыкъ мо́и, е҆ще́ же и҆ плоть моѧ̀ всели́тсѧ на ѹ҆пова́нїе·
Ꙗ҆́ко не ѻ҆ста́виши дш҃ꙋ мою въ а҆дѣ, ни даси же преподо́бномꙋ свое҆мꙋ ви́дѣти и҆стлѣнїа·
Сказалъ ми е҆си пꙋтѝ живота̀, и҆спо́лниши мѧ весе́лїа с лнцем̑ твои҆мъ.
красота в десници твоей в коне́цъ·
Моли́тва двд҃ва. ѕ҃і·
Ѹ҆слы́ши г҃и пра́вдꙋ мою̀, вънмѝ моле́нїе мое·
внꙋшѝ мл҃твꙋ мою, не въ ѹ҆стна́хъ льсти́вахъ·
ѿ лица твое҆го сꙋдба̀ моѧ и҆зы́детъ, ѻ҆́чи мои да видѣта правоты·
и҆скꙋси́лъ е҆си срд̑це мое, посѣти́лъ е҆си но́щїю.
и҆скꙋсилъ мѧ е҆си, и҆ не ѻ҆брѣтесѧ въ мнѣ̀ непра́вда·
ꙗ҆́ко да не въз꙽гл҃ют꙽ ѹ҆ста̀ моѧ̀ дѣ́лъ чл҃чьскихъ, за словеса ѹ҆сте́нъ твои҆хъ а҆́зъ съхранихъ пꙋтѝ жестоки·
съвершѝ стопы моа̀ въ стезѧхъ твои҆хъ да не подви́жꙋт꙽сѧ стопы̀ моѧ̀·
А҆́зъ възва́хъ ꙗ҆́ко ѹ҆слы́ша м̂ѧ б҃е.
приклонѝ ѹ҆хо твое мнѣ, и҆ ѹ҆слы́ши гл҃ы моѧ·
ѹ҆дивѝ млс̑҇ти твоѧ, сп҃сааѝ ѹ҆пова́ющихъ на́ тѧ·
ѿ проти́вѧщихсѧ десници твоей, съхранѝ мѧ г҃и ꙗ҆́ко ѕѣницꙋ ѻ҆́ка·
Въ кровѣ крилꙋ твоею покры́еши мѧ, ѿ лица нечести́выхъ ѻ҆стра́стьшихъ мѧ·
Вра́ѕи моѝ дш҃ꙋ мою̀ ѹ҆держаша, тꙋкъ свои затвори́ша, ѹ҆ста их̑ гл҃аша горды́ню·
и҆згонѧ́щеи мѧ нн҃ѣ ѻ҆быдоша мѧ, ѻ҆́чи своѝ възложи́ша ѹ҆клони́ти на́ землю·
ѻ҆бьѧ́ша мѧ ꙗ҆́ко ле́въ гото́въ на ловъ, и҆ ꙗ҆́ко ски́менъ ѻ҆бита́ѧ въ скро́вищихъ·
Въскрс̑҇нѝ г҃и, предварѝ ѧ҆̀, и҆ запни им̑·
и҆зми дш҃ꙋ мою ѿ нечести́выхъ, ѻ҆рꙋжїа твоѧ ѿ рꙋкъ врагъ твои҆хъ·
г҃и, ѿ маль ѿ землѧ раздѣли ѧ҆̀ в животѣ и҆хъ, и҆ съкрове́ныхъ твои҆хъ и҆спо́лнисѧ ѹ҆тро́ба и҆хъ·
насы́тишасѧ сн҃ов̑҇, и҆ ѻ҆ста́виша ѻ҆ста́нки младе́нцемъ свои́мъ·
А҆́зъ же пра́вдою ꙗ҆́влю́сѧ лицꙋ твоемꙋ, насы́щꙋсѧ вънегда̀ ꙗ҆́ви́т ми сѧ сла́ва твоѧ·
Слав̑҇. в꙽ конец̑҇ ѻ҆трока гн҃ѧ двд̑ва, ꙗ҆́же гл҃а гв҃и словеса̀ пѣ́сни сеѧ̀, в꙽ дн҃ь воньже и҆зба́ви е҆го г҃ь и҆з рꙋкъ всх̑ѣ врагъ е҆го, и҆ і҆з рꙋкѝ саѹ҆лѧ и҆ реч̑҇. з҃і.
каѳ̑҇ г҃·
Възлю̀блю тѧ г҃и крѣ́пости моѧ̀.
г҃ь ѹ҆тверже́нїе мое, и҆ прибѣжище мое, и҆ і҆зба́витель мой·
бг҃ъ мой помо́щ꙽никъ мой, и҆ ѹ҆пова́ю на́нь·
Защи́титель мой, и҆ рогъ сп҃се́нїѧ мое҆го, и҆ застꙋ́пникъ мой·
Хвалам̑ призовꙋ г҃а, и҆ ѿ вра́гъ моих̑ сп҃сꙋ́сѧ·
ѻ҆держа́ша мѧ болѣзни сме́ртныѧ, и҆ пото́ци безако́нїѧ смꙋти́ша мѧ·
Болѣзни а҆́довы ѻ҆быдо́ша мѧ, пред̑вари́ша мѧ сѣти сме́ртныѧ·
И҆ вънегда̀ скорбѣти ми призвахъ г҃а, и҆ къ бг҃ꙋ мое҆мꙋ възвах̑·
ѹ҆слыша ѿ цр҃кве ст҃ы́ѧ свое҆ѧ гла́съ мои, и҆ во́пль мой пред̑ ни́мъ вни́детъ въ ѹ҆ши е҆го·
и҆ подви́жасѧ и҆ трепетна бы́сть зем̑лѧ̀, и҆ ѻ҆снова́нїѧ го́ръ смꙋти́шасѧ, и҆ подвиза́шасѧ.
ꙗ҆́ко прогнѣвасѧ на́ нѧ бг҃ъ·
в꙽зы́де ды́мъ гнѣвомъ е҆го, и҆ ѻ҆́гнь ѿ лица е҆го въспланет̑сѧ, ѹ҆́глїа възгорѣшасѧ ѿ него·
И҆ преклонѝ нб҃са, и҆ сни́де, и҆ примракъ под̑ нога́ма е҆го·
и҆ възы́де на херꙋви́мъ, и҆ летѣ, възлетѣ на крилꙋ вѣтреню, и҆ положѝ тмꙋ за кровъ свой, ѻ҆крс̑҇тъ е҆го селе́нїе е҆го, темна̀ вода̀ въ ѻ҆блацехъ въздꙋш́ных̑·
ѿ ѻ҆блиста́нїѧ пред̑ ним̑ ѻ҆́блацы проидо́ша, град̑ и҆ ѹ́глїе ѻ҆гненно·
И҆ възгремѣ съ нб҃се г҃ь, и҆ вы́шнїи да́сть глас̑҇ свой·
пꙋстѝ стрѣлы, и҆ разгна ѧ҆̀, и҆ мол̑҇нїѧ ѹ҆множи, и҆ смꙋти их̑·
и҆ ꙗ҆́ви́шасѧ и҆сто́чницы воднїи, и҆ ѿкры́шасѧ ѻ҆снова́нїѧ вселе́нныѧ·
ѿ запреще́нїа твое҆го г҃и, ѿ дъхнове́нїа дх҃а гнѣва твое҆го·
посла̀ свы́ше, и҆ прїа́тъ мѧ, въспрїѧт̑ м̂ѧ ѿ водъ мно́гъ·
И҆зба́витъ мѧ ѿ вра́гъ мои҆хъ си́лных̑, и҆ ѿ ненави́дѧщихъ м̂ѧ, ꙗ҆́ко ѹ҆крѣпи́шасѧ па́че мене·
Предвари́ша мѧ въ дн҃ь ѻ҆злобле́нїѧ мое҆го, и҆ бы́сть г҃ь ѹ҆тверже́нїе моѐ·
и҆ и҆зведе м̂ѧ на широтꙋ.
и҆зба́витъ мѧ, ꙗ҆́ко въсхотѣ мѧ·
и҆ възда́стъ м̂и г҃ь по пра́вдѣ моей, и҆ по чи́стотѣ рꙋкꙋ мое҆ю̀ възда́стъ ми·
ꙗ҆́ко съхраних̑ пꙋтѝ гн҃ѧ, и҆ не нече́ствовахъ ѿ бг҃а мое҆го·
ꙗ҆́ко вс̂ѧ сꙋдбы̀ е҆го предо мно́ю, и҆ ѻ҆правда́нїѧ е҆го не ѿстꙋпи́ша ѿ мене·
и҆ бꙋ́дꙋ непороченъ с ни́мъ, и҆ съхраню́сѧ ѿ безако́нїѧ мое҆го·
и҆ възда́сть м̂и г҃ь по пра́вдѣ моей, и҆ по чи́стотѣ рꙋкꙋ моею, пред̑ ѻ҆чи́ма е҆го·
Съ прпд̑бным̑ прпд̑бнъ бꙋ́деши, и҆ съ мꙋжемъ непови́нномъ непови́ненъ бꙋдеши, и҆ съ и҆збра́ннымъ и҆збра́нъ бꙋ́деши, и҆ съ стропти́вымъ раз꙽врати́шисѧ·
ꙗ҆́ко ты люди смире́ныѧ сп҃се́ши, и҆ ѻ҆́чи гордыхъ смири́ши·
Ꙗ҆́ко ты просвѣща́еши свѣти́лникъ мой г҃и, б҃е мой просвѣща́еши тмꙋ мою̀·
ꙗ҆́ко тобо́ю и҆зба́влюсѧ ѿ и҆скꙋше́нїѧ, и҆ ѻ́ бз҃ѣ моемъ прелѣзꙋ стѣнꙋ·
Бг҃ъ мой, непоро́ченъ пꙋтъ е҆го, словеса̀ гн҃ѧ ражд̑еже́на.
защи́титель е҆сть всѣм꙽ ѹ҆пова́ющимъ на́нь·
ꙗ҆́ко кт̂о бг҃ъ ра́звѣ г҃а;
и҆ли кт̂о бг҃ъ ра́звѣ бг҃а на́шего;
бг҃ъ препоа́са мѧ си́лою, и҆ положѝ непоро́ченъ пꙋть мои·
Съверша́а но́ѕѣ моѝ ꙗ҆́ко е҆ле́ни, и҆ на высо́ких̑ поставлѧ́а м̂ѧ·
наѹ҆ча́а рꙋцѣ моѝ на́ брань, и҆ положи лꙋкъ мѣдѧнъ мы́шцамъ мои҆мъ·
и҆ да́лъ м̂и е҆си защище́нїе сп҃се́нїа, и҆ десни́ца твоѧ̀ прїѧтъ мѧ·
и҆ наказа́нїе твое, и҆спра́витъ м̂ѧ в ко́нецъ, и҆ наказа́нїе твое т̂о мѧ наѹ҆чи́тъ·
ѹ҆ши́рил꙽ е҆си стопы моа подо мно́ю, и҆ не и҆знемо́жетѣ плеснѣ моѝ·
поженꙋ врагы моѧ̀, и҆ пости́гнꙋ ѧ҆̀, и҆ не възвращꙋсѧ до́ндеже сконча́ютсѧ·
ѻ҆скорблю и҆хъ, и҆ не възмо́гꙋтъ ста́ти, падꙋтъ под̑ нога́ма мои́ма·
И҆ препоѧ́сал꙽ м̂ѧ е҆си си́лою на́ брань, спѧ́лъ е҆си въсѧ воста́ющаѧ на мѧ под̑ мѧ·
и҆ вра́г꙽ мои҆хъ да́лъ ми е҆си хребе́тъ, и҆ ненави́дѧщаѧ мѧ потреби́лъ е҆си·
възва́ша, и҆ не бѣ сп҃са́ѧѝ.
къ г҃ꙋ, и҆ не ѹ҆слы́шаше и҆хъ·
и҆ і҆стню и҆хъ ꙗ҆́ко прах̑ пред̑ лицемъ вѣтрꙋ, ꙗ҆́ко бренїе пꙋти погла́жд̑ꙋ и҆хъ·
И҆зба́витъ мѧ ѿ прерѣка́нїа людїи, поста́виши мѧ въ главꙋ ꙗ҆́зы́комъ·
людїе и҆́хже не видѣх꙽, поработа́ша м̂и, въ слꙋхъ ѹ҆ха ѹ҆слы́шаша м̂ѧ.
сн҃ове чюжїи сълга́ша м̂и, сн҃ове чюжїи ѻ҆бетша̀ша, и҆ ѻ҆хромо́ша ѿ сте́ѕь свои҆́хъ·
Жи́въ г҃ь, и҆ блгс̑҇ве́нъ бг҃ъ·
и҆ възнсе́тсѧ бг҃ъ сп҃се́нїѧ моего̀·
бг҃ъ даѧѝ ѿмще́нїе мн̂ѣ, и҆ повинꙋѧѝ люди под̑ мѧ, и҆зба́витель мой ѿ вра́гъ моих̑ гнѣвли́выхъ·
ѿ въста́ющих̑ на́ мѧ възнесе́ши м̂ѧ, ѿ мꙋжа непра́ведна и҆зба́виши м̂ѧ·
Сего рад̑и̑ и҆сповм̑ѣ́сѧ тебѣ въ ꙗ҆́зыцех̑ г҃и, и҆ і҆мени твое҆мꙋ пою·
Велича́а сп҃се́нїа цр҃ева, и҆ творѧ млс̑҇ть х҃ꙋ свое҆мꙋ, дв҃дꙋ и҆ сѣмени е҆го до́ вѣка·
Сла́ва· В коне́цъ, ѱало́мъ двд҃въ, и҃і·
Нб҃са повѣдꙋютъ сла́вꙋ бж҃їю, творе́нїе же рꙋкꙋ е҆го възвѣща́етъ твердь·
дн҃ь дн҃и ѿрыга́етъ гл҃ъ, и҆ нощъ но́щи възвѣща́етъ ра́зꙋмъ·
нѣ́ сꙋть рѣчи ни словеса, и҆́хже не слы́шатсѧ гла́си и҆́хъ·
Въ всю̀ зе́млю и҆зы́де вѣщанїе ихъ, и҆ в кон꙽ца вселе́нныѧ гл҃ы и҆хъ·
въ слн҃ци положи селе́нїе свое, и то́и ꙗ҆́ко женихъ и҆сходѧ̀ ѿ черто́га свое҆го·
Възрадꙋетсѧ ꙗ҆́ко и҆споли́нъ тещѝ пꙋть, ѿ конца нб҃съ и҆схо́дъ е҆го.
и҆ срѣтенїе е҆го до конца̀ нб҃съ, и҆ нѣ́сть и҆же ѹ҆кры́етсѧ тепло́ты е҆го·
зако́нъ гн҃ь непоро́ченъ, ѻ҆браща́а дш҃а.
свѣдителство гн҃е вѣрно, ѹ҆мꙋдрѧ́а младе́нца·
ѻ҆правда́нїа гн҃ѧ пра́ва, веселѧщаѧ срд̑це, за́повѣдь гн҃ѧ свѣтла, просвѣща́ющи ѻ҆́чи·
страх̑ гн҃ь чистъ, пребываѧ въ вѣкъ вѣка·
сꙋдбы̀ гн҃ѧ и҆стин꙽ны, ѻ҆правда́нны въкꙋ́пѣ, въжд̑елѣнны па́че зла́та, и҆ ка́мене че́стна мно́га, и҆ сла́жд̑ьша пач̑҇ ме́да и҆ со́та·
и҆бо ра́бъ тво́и хранит̑ и҆́хъ.
внегда̀ съхрани́ти и҆́хъ въздаѧ́нїе мно́го·
грѣхопаде́нїа кт̂о разꙋмѣ́етъ;
ѿ таинныхъ мои҆хъ ѻ҆чи́сти м̂ѧ, и҆ ѿ чюжд̑ихъ пощади раба̀ твое҆го·
А҆́ще не ѹ҆долѣ́ютъ ми, тогда̀ непорочен꙽ бꙋ́дꙋ, и҆ ѻ҆чи́щꙋсѧ ѿ грѣха̀ велика·
и҆ бꙋ́дꙋтъ въ бл҃говоле́нїе словеса̀ ѹ҆стъ мои҆хъ, и҆ поѹ҆че́нїе срд̑ца мое҆го предъ тобою вы́нꙋ·
г҃и помо́щниче мой, и҆ і҆зба́вителю мой·
В конецъ ѱлом̑ двд҃въ, ѳі·
Ѹ҆слы́шитъ т̂ѧ г҃ь в дн҃ь печа́ли, защи́титъ т̂ѧ и҆́мѧ бг҃а і҆а́ковлѧ·
после́тъ ти по́мощъ ѿ ст҃ого, и҆ ѿ сїѻ҆на застꙋ́питъ т̂ѧ·
помѧне́тъ всѧ́кꙋ же́ртвꙋ твою̀, и҆ всѧсъжже́нїа твоѧ тꙋ́чна бꙋди·
да́жд̑ь т̂и г҃ь по́ срд̑цꙋ твоемꙋ, и҆ ве́сь совѣтъ твой и҆спо́лнитъ·
възра́дꙋемсѧ ѻ҆ сп҃се́нїи твоемъ, и҆ въ и҆мѧ г҃а бг҃а на́шего възвели́чимсѧ·
и҆сполнитъ г҃ь вс̂ѧ проше́нїа твоѧ·
нн҃ѣ познах̑, ꙗ҆́ко спс̑҇лъ е҆сть г҃ь х҃а свое҆го·
ѹ҆слы́шит̑ е҆го, съ нб҃сѐ ст҃го свое҆го, въ си́лахъ сп҃се́нїе десни́ца е҆го·
сїи на колесни́цахъ, и҆ сїи на коних̑, мы же въ и҆мѧ г҃а бг҃а на́шего призове́мъ·
Тїи спѧ́ти бы́ша, и҆ падо́ша.
мы же въста́хомъ и҆ и҆спра́вихомсѧ·
г҃и, сп҃си цр҃ѧ, и҆ ѹ҆слы́ши ны, во́нже дн҃ь а҆́ще призовемъ т̂ѧ·
ѱалом̑ двд҃въ, к҃·
Ги҃ си́лою твоею̀ възвесели́тсѧ цр҃ь, и҆ ѻ҆ сп҃се́нїи твоемъ възра́дꙋетсѧ ѕѣло̀·
жела́нїе срд̑ца е҆го да́лъ е҆си е҆мꙋ, и҆ хотѣнїе ѹ҆стнꙋ е҆го нѣси лишилъ е҆го·
ꙗ҆́ко прд̑евари́лъ е҆си е҆го блгс̑҇ве́нїемъ бл҃госты́ннымъ, поло́жилъ е҆си на главѣ е҆го вѣнец̑҇ ѿ ка́мене чтс̑҇на·
Живота̀ проси́лъ е҆сть ѿ тебе, и҆ дал꙽ е҆си е҆мꙋ долготꙋ дн҃їи въ вѣкъ вѣка·
ве́лїа сла́ва е҆го сп҃се́нїемъ твои҆мъ, сла́вꙋ и҆ велелѣпїе възложиши на́нь·
ꙗ҆́ко дасѝ е҆мꙋ блгс̑҇ве́нїе въ вѣкъ вѣка, възвесели́ши е҆го ра́достїю съ лицемъ твои҆мъ·
Ꙗ҆́ко цр҃ь ѹ҆пова́етъ на́ г҃а, и҆ млс̑҇тїю вы́шнѧго не подви́жит꙽сѧ·
ѻ҆брѧ́щетсѧ рꙋка твоѧ̀ всѣм꙽ врагомъ твои҆мъ, десни́ца твоѧ ѻбрѧ́щетъ вс̂ѧ ненавидѧщаѧ тебе·
ꙗ҆́ко положи́ши и҆хъ ꙗ҆́ко пещь ѻ҆́гненнꙋ въ времѧ лица твоего, г҃ь гнѣ́вомъ своимъ смꙋтитъ ѧ҆̀, и҆ снѣсть и҆́хъ ѻ҆́гнь·
пло́дъ и҆́хъ ѿ землѧ погꙋби́ши, и҆ сѣмѧ и҆хъ ѿ сн҃о́въ члчс̑҇кых̑·
Ꙗ҆́ко ѹ҆клониша на́ тѧ зла́ѧ, помыслиша совѣты и҆́хже не възмого́ша съста́вити·
ꙗ҆́ко положи́ши ѧ҆̀ хребе́тъ въ и҆збы́тцѣхъ твои҆хъ, ѹ҆гото́ваеши лице и҆хъ·
Възнеси́сѧ г҃и си́лою твоею̀, въспое҆мъ и҆ пое҆мъ си́лы твоѧ·
Слав̑҇· В коне́цъ, ѻ҆ застꙋпле́нїи ѹ҆тренемъ. ѱало́мъ, двд҃въ, к҃а·
Бж҃е бж҃е мой вонмѝ м̂и, въскꙋ́ю ѻ҆ста́ви мѧ;
дале́че ѿ сп҃се́нїа мое҆го словеса̀ грѣхопаде́нїи мои҆хъ·
бж҃е мои въз꙽зовꙋ въ днех̑, и҆ не ѹ҆слы́шиши.
и҆ в нощи, и҆ не в безꙋ́мїе мнѣ·
ты же въ ст҃ѣмъ живе́ши, хвала і҆ил҃ва·
на́ тѧ ѹ҆пова́ша ѿц҃ы на́ши.
ѹ҆пова́ша, и и҆зба́вилъ е҆си и҆хъ·
к тебѣ възва́ша, и҆ сп҃сошасѧ.
на́ тѧ ѹ҆пова́ша, и҆ не постыдѣшасѧ·
А҆зъ же е҆смь че́рвь, а҆ не чл҃къ.
поноше́нїе чл҃комъ, и҆ ѹ҆ничиже́нїе лю́демъ·
Вс̂и ви́дѧщеѝ мѧ порꙋга́ша ми сѧ, гл҃аша ѹ҆стна́ми, покива́ша главꙋ̀·
ѹ҆пова̀ на г҃а, да и҆зба́витъ и҆̀.
да сп҃се́тъ е҆го, ꙗ҆́ко хо́щетъ е҆го·
ꙗ҆́ко ты е҆си и҆з꙽тръгїи мѧ из чре́ва, ѹ҆пова́нїе мое ѿ сосцꙋ мт҃ре моеѧ.
к тебѣ приве́рженъ е҆смь ѿ ложе́снъ, ѿ чрева мт҃ре моеѧ̀ бг҃ъ мой е҆си ты·
не ѿстꙋпѝ ѿ мене, ꙗ҆́ко ско́рбь бли́зъ, ꙗ҆́ко нѣ́сть помага́ющаго м̂и·
ѻ҆быдо́ша м̂ѧ телцы мно́ѕи, ю҆нъцы тꙋчънїи ѻ҆держа́шѧ мѧ·
ѿверзо́ша на́ мѧ ѹ҆ста своѧ̀, ꙗ҆́ко ле́в꙽ въсхища́ѧ и҆ рыка́ѧ·
ꙗ҆́ко вода̀ и҆злїа҆сѧ, и҆ раз̑сыпашасѧ всѧ ко́сти моѧ·
бысть срд̑це мое ꙗ҆́ко во́скъ та́а, посредѣ чре́ва мое҆го·
и҆́сше ꙗ҆́ко скꙋде́ль крѣпость моѧ, и҆ ꙗ҆́зы́къ мой прильпе гор꙽та́ни мое҆мꙋ, и҆ в пе́рсть сме́рти съве́лъ мѧ е҆си·
ꙗ҆́ко ѻ҆быдо́ша мѧ ѱи мно́ѕи, со́нмъ лꙋка́выхъ ѻ҆держа́ша мѧ·
и҆скопа́ша рꙋцѣ мои и҆ но́ѕѣ моѝ, и҆счето́ша всѧ ко́сти моѧ.
тїи же смотриша, и҆ презрѣша мѧ·
раздѣли́ша ри́зы моѧ себѣ, и҆ ѻ҆ ѡ҆де́жд̑и мое́и мета́ша жре́бїа·
Ты же г҃и не ѹ҆да́ли по́мощъ твою ѿ менѐ, на застꙋпле́нїе мое воньмѝ·
и҆змѝ ѿ ѻ҆рꙋжїа дш҃ꙋ мою, и҆ і҆з рꙋкѝ пе́сїа е҆ді́нород̑нꙋю мою·
сп҃сѝ мѧ ѿ ѹ҆́стъ льво́въ, и҆ ѿ ро́гъ е҆ді́норождь, смире́нїе мое·
повѣмъ и҆́мѧ твое бра́тїи мое́и, посредѣ цр҃кве въспою́ тѧ·
боѧ́щеисѧ г҃а въсхвали́те и҆̀, все сѣмѧ і҆а́ковле просла́вите и҆̀·
да ѹ҆бои́т же сѧ ѿ него всѐ сѣмѧ і҆ил҃ево, ꙗ҆́ко не ѹ҆ничижѝ ни негодова̀ мл҃твы ни́щаго·
ни ѿврати же лица свое҆го ѿ менѐ.
и҆ е҆гда̀ възва́хъ къ немꙋ, ѹ҆слы́ша мѧ·
ѻ҆ тебѣ похвала моѧ, в꙽ цр҃кви вели́цѣ и҆сповѣмсѧ тебѣ·
мл҃твы моѧ въздам̑ прд̑е боѧ́щимисѧ е҆го·
ꙗ҆́дѧ́тъ ни́щїи, и҆ насы́тѧтсѧ·
и҆ въсхва́лѧтъ г҃а взыскаю҆щеѝ е҆го, жива бꙋдꙋтъ срд̑ца и҆хъ въ вѣкъ вѣка·
Помѧнꙋтсѧ, и҆ ѻ҆братѧ́тсѧ къ г҃ꙋ вси концы̀ землѧ̀, и҆ покло́нѧтсѧ пред̑ ним̑ всѧ ѿч҃ьствїа ꙗ҆́зы́къ·
Ꙗ́ко гн҃е е҆сть црс̑҇твїе, и то́и ѻ҆блада́етъ ꙗ҆́зы́ки·
ꙗ҆́до́ша и҆ поклони́шасѧ вси тꙋчнїи землѧ, пред̑ ни́мъ пред̑падꙋтъ вси низ꙽ходѧ́щеи въ зе́млю·
и҆ дш҃а моа томꙋ живе́тъ, и҆ сѣмѧ мое порабо́таетъ е҆мꙋ·
Възвѣститъ гв҃и ро́дъ грѧдꙋщ́їи, и҆ възвѣстѧтъ пра́вдꙋ е҆го лю́демъ ро́ждьшимсѧ, и҆́хже сътворѝ г҃ь·
ѱлом̑ двд̑въ, к҃в·
Гь҃ пасе́тъ мѧ, и҆ ничто́же мѧ лиши́тъ, на мѣ́стѣ зла́ч꙽нѣ, та́мо вселѝ мѧ·
на водѣ поко́йнѣ въспита̀ мѧ, дш҃ꙋ мою ѻ҆братѝ·
наста́ви мѧ на стеѕѧ̀ пра́вы, и҆мени ра́ди е҆го·
А҆́ще бо и҆ пойдꙋ посредѣ сѣнїи сме́ртныхъ, не ѹ҆бою́сѧ зла, ꙗ҆ко ты съ мною е҆си·
Же́злъ твой и҆ па́лица твоѧ, та мѧ ѹ҆тѣшиста·
ѹ҆готовалъ е҆си предо мно́ю трапе́зꙋ, пред̑ стꙋжа́ющимъ мѝ·
ѹ҆мастил̑҇ е҆си е҆ле́ѻ҆мъ главꙋ̀ мою̀, и҆ ча́ша твоѧ̀ ѹ҆поѧ́ющи мѧ ꙗ҆́ко держа́вна·
и҆ ми́лость твоѧ̀ пожене́тъ мѧ, всѧ дн҃и живота̀ мое҆го·
И҆ вселити ми сѧ в꙽ дом̑ гн҃ь в долготꙋ̀ дн҃їи·
ѱлом̑ двд̑въ к҃г, въ е҆ді́нꙋ ѿ сꙋботъ·
Гн҃ѧ е҆сть землѧ̀, и҆ и҆сполне́нїе еѧ̀.
вселе́н꙽наѧ, и҆ вси живꙋщей на не́й·
то́й на́ морѣхъ ѻ҆снова́лъ ю҆̀ е҆сть, и҆ на рѣках̑ ѹ҆гото́валъ ю҆̀ е҆сть·
кто взыдетъ на́ горꙋ гн҃ю, и҆ли кто ста́нетъ на мѣ́стѣ ст҃ѣмъ е҆го;
непови́ненъ рꙋка́ма и҆ чи́стъ срд̑цемъ, и҆же не прїѧ́тъ на сꙋ́е дш҃ꙋ свою̀, и҆ не клѧ́тсѧ ле́стїю и҆́скренемꙋ свое҆мꙋ·
се́и прїиметъ блс̑҇ве́нїе ѿ г҃а, и҆ млс̑҇тыню ѿ бг҃а сп҃са свое҆го·
сїи ро́дъ и҆́щꙋщих̑ г҃а, и҆́щꙋщих̑ лице бг҃а і҆а́ковлѧ·
Възмѣте врата кнѧ́ѕи ваша, и҆ възмѣтесѧ вра́та вѣ́чнаѧ, и҆ вни́дет̑ цр҃ь славы·
кто е҆сть се́и цр҃ь сла́вы;
г҃ь крѣпокъ и҆ си́ленъ, г҃ь си́ленъ въ бра́ни·
Възмѣте врата̀ кнѧѕи ва́ша, и҆ възмѣтесѧ врата вѣ́чнаа, и҆ вни́детъ цр҃ь сла́вы·
кто е҆́сть се́и цр҃ь сла́вы;
г҃ь си́лам̑, то́и е҆́сть цр҃ь славы·
ѱлом̑ двд̑въ, к҃д. Сла́ва·
каѳ̑҇ д҃
К тебѣ г҃и въздвиго́хъ дш҃ꙋ мою, б҃е мо́и на́ тѧ ѹповах̑, да не постыжꙋ́сѧ въ вѣкъ·
ни посмѣют̑ ми сѧ вра́ѕи моѝ.
и҆бо вси терпѧ́щеѝ тѧ, не постидѧ́тсѧ·
да постыдѧ́тсѧ безако́нꙋющеѝ всꙋ́е·
пꙋтѝ твоа̀ г҃и скажѝ ми, и҆ стезѧ́мъ твои҆мъ наѹ҆чѝ мѧ·
Наста́ви мѧ на и҆стинꙋ твою, и҆ наѹ҆чи мѧ·
ꙗ҆́ко ты е҆си б҃ъ сп҃съ мои, и҆ тебе терпх̑ѣ ве́сь дн҃ь·
помѧнѝ щедро́тъ твоихъ г҃и, и҆ ми́лости твоѧ, ꙗ҆́ко ѿ вѣка сꙋть·
грх̑ѣ ю҆́ности моеѧ̀ и҆ невѣ́денїѧ мое҆го не помѧнѝ.
по млс̑҇ти твоей помѧнѝ мѧ ты, ра́ди блгс̑҇ти твоеѧ г҃и·
бл҃гъ и҆ пра́въ г҃ь, сего ра́ди зако́нополо́житъ съгрѣша́ющимъ на пꙋтѝ·
наста́витъ кроткі́ѧ на сꙋ́дъ, наѹ҆чи́тъ кро́тъкїа пꙋте́мъ свои҆мъ·
Вси пꙋтїе гн҃и млс̑҇ть и҆ и́стинна, възыска́ющимъ завѣта е҆го и҆ свѣдѣнїѧ е҆го·
ра́ди и҆́мени твое҆го г҃и и҆ ѻ҆ци́сти грх̑ѣ мой, мно́гъ бо̀ е҆сть·
кто е҆сть чл҃къ боѧ́и҆сѧ г҃а;
зако́нополо́житъ е҆мꙋ на пꙋти и҆же и҆зво́ли·
дш҃а е҆го въ бл҃гихъ въдворитсѧ, и҆ сѣмѧ е҆го наслѣдит꙽ зе́млю·
держа́ва г҃ь боѧ҆́щим̑сѧ е҆го, и҆ завѣтъ е҆го ꙗ҆́ви́тъ и҆м꙽·
ѻ҆́чи моѝ вы́нꙋ къ г҃ꙋ, ꙗ҆́ко то́и и҆сто́ргнетъ ѿ сѣти но́ѕѣ моѝ·
При́зри на́ мѧ, и҆ поми́лꙋи мѧ, ꙗ҆́ко е҆ді́нородъ и҆ ни́щь е҆смь а҆зъ·
ско́рби срд̑ца моего ѹ҆мно́жишасѧ, ѿ бѣдъ моих̑ и҆зведи мѧ̀·
ви́жд̑ь смире́нїе моѐ и҆ трꙋдъ мой, и҆ ѿпꙋстѝ всѧ̀ грѣхи моѧ̀·
ви́жд̑ь враги́ моѧ, ꙗ҆́ко ѹ҆мно́жишасѧ, и҆ ненавидѣнїемъ непра́ведным възненавидѣша мѧ̀·
съхранѝ дш҃ꙋ мою, и҆ і҆зба́ви мѧ̀.
да не постыжꙋ́сѧ, ꙗ҆́ко ѹ҆повахъ на́ тѧ·
незло́бивїи и҆ пра́вїи прилѣплѧхꙋсѧ мнѣ, ꙗ҆́ко потерпх̑ѣ тѧ г҃и·
изба́ви бж҃е і҆и҆л҃ѧ ѿ всѣхъ скор꙽бїи е҆го·
ѱало́мъ двд҃въ, к҃е·
Сꙋдѝ ми г҃и, ꙗ҆́ко аз̑ незло́бою моею̀ ходи́хъ.
и҆ на́ г҃а ѹ҆пова́ѧ не и҆знемогꙋ̀·
И҆скꙋси́ мѧ г҃и, и҆ и҆стѧжѝ мѧ̀, раждезѝ ѹ҆тро́бы моѧ̀, и҆ срд̑це мое·
ꙗ҆́ко млс̑҇ть твоѧ̀ пред̑ ѻ҆чи́ма мои҆ма е҆́сть, и҆ бл҃го_ѹ҆годи́хъ въ и҆́стинѣ твое́й·
не сѣдо́хъ съ сонмомъ сꙋе҆тнымъ, и҆ съ законопрестꙋ́пными не въни́дꙋ·
възненави́дѣхъ цр҃кви лꙋка́внꙋющихъ, и҆ съ нечести́выми не сѧ́дꙋ·
ѹ҆мы́ю в непови́нныхъ рꙋцѣ моѝ, и҆ ѻ҆бы́дꙋ ѻ҆лта́рь тво́и г҃и·
ѹ҆слы́шати ми глс̑҇а хвалы̀ твоеѧ̀, и҆ повѣдати всѧ̀ чюдеса твоѧ·
г҃и възлюби́хъ бл҃голѣпїе до́мꙋ твоего, и҆ мѣ́сто вселе́нїа сла́вы твоеѧ·
да не погꙋби́ши съ нечести́выми дш҃ꙋ мою, и҆ с мꙋ́жи кро́вїи живот̑ мой.
и҆́хъ же в рꙋ́кꙋ безако́нїѧ, десни́ца и҆хъ спо́лнисѧ м꙽зды·
А҆зъ же незло́бою моею̀ ходих̑, и҆зба́ви мѧ г҃и и҆ поми́лꙋи мѧ·
нога моѧ̀ ста на правотѣ, въ цр҃квахъ блгс̑҇вѧ тѧ г҃и·
ѱлом̑ двд̑въ к҃ѕ, прежд̑е пома́занїѧ·
Гь҃ просвѣще́нїе мое, и҆ сп҃си́тель мои, кого́ сѧ ѹ҆бою;
г҃ь защи́титель животꙋ̀ моемꙋ̀, ѿ кого̀ сѧ ѹ҆страшꙋ;
Внегда̀ приближатисѧ на мѧ злобꙋюще, снѣ́сти плотїи моихъ·
ѻ҆скорблѧ́ющеѝ м̂ѧ и҆ вра́ѕи моѝ, тїи и҆знемого́ша, и҆ падо́ша·
а҆́ще ѻ҆пол꙽чи́тсѧ на́ мѧ по́лкъ, не ѹ҆бои́тъсѧ срд̑це мое·
а҆́ще въста́нетъ на́ мѧ брань, на́нь а҆́зъ ѹ҆пова́ю·
е҆ді́но проси́хъ ѿ г҃а, то взыщꙋ, е҆же жи́ти ми въ домꙋ гн҃и всѧ̀ дн҃и живота́ моего, зрѣти ми красоты̀ гн҃ѧ, и҆ посѣща́ти цр҃ковь ст҃ꙋ́ю е҆го·
ꙗ҆́ко съкры̀ мѧ въ кровѣ свое́мъ, в꙽ дн҃ь зла моего покры̀ мѧ в та́инѣ кро́ва свое҆го·
на ка́мень възнесѐ мѧ, и҆ нн҃ѣ с̂е възнесѐ главꙋ̀ мою на врагѝ моѧ·
ѻ҆быдох̑, и҆ пожрохъ въ кро́вѣ е҆го жертвꙋ хвале́нїѧ и҆ въскликнове́нїѧ, въспою, и҆ пою̀ гв҃и·
ѹ҆слы́ши г҃и глс̑҇а мои, и҆́м꙽же възва́хъ.
поми́лꙋи мѧ, и҆ ѹ҆слы́ши мѧ·
тебѣ рече срд̑це мое, г҃а възы́щꙋ.
възыска̀ тебе лице моѐ, лица̀ твоего г҃и възы́щꙋ·
не ѿврати лица̀ твоего ѿ мене, и҆ не ѹ҆клони́сѧ гнѣ́вомъ ѿ раба̀ твоего·
помощник̑҇ мѝ бꙋди, не ѿри́ни менѐ, и҆ не ѻ҆ста́ви мене б҃е сп҃си́телю мой·
ꙗ҆́ко ѿц҃ъ мои и҆ ма́ти моѧ̀ ѻ҆ста́виста мѧ, г҃ь же въсприѧ́тъ мѧ·
зако́ноположи ми г҃и въ пꙋтѝ твоемъ, и҆ наста́ви мѧ на пꙋть пра́выи, вра́гъ моихъ ра́ди·
не преда́жд̑ь мене въ дш҃ахъ стꙋжа́ющимъ ми, ꙗ҆́ко въста́ша на́ мѧ свѣдѣтеле непра́веднїи, и҆ солга̀ непра́вда себѣ·
вѣрою ви́дѣти бл҃гаа гн҃ѧ, на землѝ живых̑·
потерпѝ г҃а, мꙋжа́исѧ, и҆ да крѣпи́тсѧ срд̑це твое, и҆ потерпѝ г҃а·
слав̑҇ ѱлом̑ двд̑ъ к҃з.
К тебѣ г҃и въз꙽зовꙋ, бж҃е мои не премолчѝ ѿ мене, да не когда̀ премолчи́ши ѿ менѐ, и҆ ѹ҆подо́блюсѧ низходѧ́щим̑ в ровъ.
ѹ҆слы́ши г҃и гласъ моле́нїѧ мое҆го, е҆гда̀ молю́сѧ к тебѣ, внегда̀ въздѣти м̂и рꙋцѣ моѝ к цр҃ькви ст҃ѣи твоеи·
Не привлецы мене съ грѣшники, и҆ съ дѣла́ющими непра́вдꙋ не погꙋби мене, гл҃ющими ми́ръ съ бли́жними свои́ми, зла́ же в꙽ срд̑цых̑ свои҆хъ·
Да́жд̑ь и҆мъ г҃и по дѣл́омъ и҆хъ, и҆ по лꙋка́вствꙋ начина́нїѧ их̑·
По дѣломъ рꙋкꙋ и҆хъ, да́жд̑ь и҆мъ, въздаждъ възданїе и҆хъ и҆́мъ·
Ꙗ҆́ко не разꙋмѣша в дѣла гн҃ѧ, и҆ в дѣла рꙋкꙋ е҆го·
Разори́ши их̑, и҆ не съѕи́ждеши и҆хъ·
блс̑҇венъ г҃ь, ꙗ҆́ко ѹ҆слы́ша гласъ моле́нїѧ мое҆го·
г҃ь помо́щникъ мои, и҆ защи́титель мо́и·
На́нь ѹ҆пова̀ срд̑це моѐ, и҆ помо́же м̂и.
и҆ процъвете плоть моѧ̀, и҆ во́лею мое҆ю̀ и҆сповѣмсѧ е҆мꙋ·
г҃ь ѹ҆тверже́нїе лю́дем꙽ своимъ,<.>
И҆ защититель сп҃се́нїемъ хс̑҇а свое҆го е҆сть·
Сп҃си люд̑и̑ своѧ, и҆ бл҃гослови достоѧ́нїе своѐ, и҆ ѹ҆пасї ѧ҆̀ и҆ възмї ѧ҆̀, до́ вѣка·
ѱлом̑ двд̑въ к҃и· и҆схода сѣннаго.
Принесѣте гв҃и сн҃ове бж҃їи, принесѣте гв҃и сн҃ы ѻ҆́внѧ·
принесѣте гв҃и сла́вꙋ и҆ че́сть, принесѣте гв҃и сла́вꙋ и҆мени е҆го·
Поклони́тесѧ гв҃и въ дворѣ ст҃ѣмъ е҆го·
Глс̑҇а гн҃ь на водах̑.
бг҃ъ сла́вы въз꙽грѣмѣ, г҃ь на вода́хъ мно́гахъ·
гласъ гн҃ь в крѣпости, гласъ гн҃ь в велелѣпотѣ·
Глс̑҇а гн҃ь съкрꙋша́ющаго ке́дры, и҆ сътры́етъ г҃ь ке́дры лїван꙽скїѧ·
И҆ и҆стънит꙽ ѧ҆̀ ꙗ҆́ко теле́ць лѷва́нъскїи, и҆ възлюбленныи ꙗ҆́ко сн҃ъ е҆ді́норожд̑ь·
Гла́съ гн҃ь пресѣца́ющаго пла́мень ѻ҆гнѧ, глс̑҇а́ гн҃ь сътрѧса́ющаго пꙋсты́ню, и҆ сътрѧсе́тъ г҃ь пꙋсты́ню кад̑дїискꙋю·
гла́съ гн҃ь съвръша́ющаго е҆ле́ни, и҆ ѿкры́етъ дꙋбра́вы, и҆ въ цр҃кви е҆го всѧ́къ кт̂о гл҃етъ сла́вꙋ·
г҃ь пото́пъ населѧ́етъ, и҆ сѣди́ть г҃ь цр҃ь въ вѣкъ·
г҃ь крѣпость лю́демъ сво́имъ да́стъ·
г҃ь бл҃гослови́тъ лю́ди своѧ ми́ромъ·
ѱало́мъ двд҃въ к҃ѳ· пѣсни ѻ҆бновленїѧ хра́ма·
Възнесꙋ тѧ г҃и, ꙗ҆́ко подъѧ́т꙽ м̂ѧ, и҆ не възвесели́лъ е҆си вра́гъ моих̑ ѻ҆ мнѣ·
г҃и бж҃е мои, възва́хъ к тебѣ, и҆ і҆сцѣли м̂ѧ·
г҃и възве́лъ е҆си ѿ а҆́да дш҃ꙋ мою, сплс̑҇ъ мѧ е҆си ѿ низ꙽ходѧ́щих̑ в ро́въ·
По́йте гвс̑҇и прпд̑бнїи е҆го, і҆ и҆сповѣ́даите па́мѧт̑ ст҃ынѧ е҆го·
Ꙗ҆́ко гнѣвъ въ ꙗ҆́рости е҆го, и҆ живо́тъ въ во́ли е҆го·
Ве́черъ въдворит̑сѧ плач̑҇, и҆ заѹ҆́тра ра́дость·
А҆́з же рѣхъ въ ѻ҆билїи моем̑, не подви́жꙋсѧ въ вѣкъ.
г҃и во́лею твоею, пода́ждь добро́тѣ моей си́лꙋ·
ѿвратилъ же е҆си лица̀ свое҆го, и҆ бы́хъ смꙋще́нъ·
К тебѣ г҃и въз꙽зовꙋ, и҆ к б҃ꙋ моемꙋ помолю́сѧ.
каѧ́ польза в кро́ви моей, внегда̀ сходи́ти ми въ и҆стлѣнїе;
е҆да̀ и҆сповѣсть ти сѧ пе́рсть, и҆ли възвѣститъ и҆́стинꙋ твою̀;
слы́ша г҃ь, и҆ поми́лова м̂ѧ, г҃ь бы́сть помо́щникъ мой·
ѻ҆братилъ е҆си пла́чъ мой въ ра́дость мнѣ̀, растерза́лъ е҆си вре́тище моѐ, и҆ препоѧ́сал мѧ е҆си весе́лїемъ·
ꙗ҆́ко да въспое́тъ тебѣ сла́ва моѧ̀, и҆ не ѹ҆милю́сѧ.
г҃и бж҃е моѝ, въ вѣки и҆сповѣм ти сѧ·
Слв̑҇а. ѱлом̑ двд̑въ, л҃· В коне́цъ и҆стꙋпленїѧ·
На́ тѧ г҃и ѹ҆пова́хъ, да не постыжд̑ꙋсѧ в꙽ вѣкъ, пра́вдою твоею и҆зба́ви мѧ, и҆ і҆зми́ мѧ·
Приклонѝ къ мнѣ ѹ҆хо твое, ѹ҆скорѝ и҆зѧ́ти мѧ.
бꙋ́ди ми в꙽ бг҃ъ защититель, и҆ въ до́мъ прибѣжища спс̑҇ти м̂ѧ·
ꙗ҆́ко дръжа́ва моа, и҆ прибѣжище мое е҆си ты̀, и҆ і́мени твоего ради наста́виши мѧ, и҆ препита́еши мѧ·
и҆стр́ъгнеши мѧ̀ ѿ сѣти сеа̀ ю҆́же съкры́ша ми, ꙗ҆́ко ты́ е҆си защи́тител̑҇ мои г҃и.
в рꙋцѣ твоѝ предаю дх҃ъ моѝ·
И҆зба́вилъ мѧ е҆си г҃и бж҃е и҆́стинѣ·
Възненави́дѣлъ е҆си хранѧ́щаѧ сꙋ́етнаѧ̀ затще́е, а҆́зъ же на́ г҃а ѹ҆повах̑·
възра́дꙋюсѧ и҆ възвеселю́сѧ ѻ҆ млс̑҇ти твое́й, ꙗ҆́ко призрѣлъ е҆си на смире́нїе моѐ, спс̑҇лъ е҆си ѿ бѣдъ дш҃ꙋ мою·
и҆ нѣ́си менѐ затвори́лъ в рꙋка́хъ вра́жїах̑, поста́вил̑҇ е҆си на пространнѣ но́ѕѣ моѝ.
поми́лꙋй мѧ г҃и, ꙗ҆́ко скоръблю̀.
смꙋти́сѧ ѿ ꙗ҆́рости ѻ҆́ко моѐ, дш҃а моа̀ и҆ ѹ҆тро́ба моѧ̀·
Ꙗ҆́ко и҆счезѐ въ болѣзни живо́тъ мой, и҆ лѣта моѧ̀ въ воздыха́нїихъ·
И҆знеможе ни́щетою крѣпость моѧ̀, и҆ ко́сти моѧ смꙋти́шасѧ·
ѿ всѣхъ вра́гъ мои҆хъ быхъ поношенїе, и҆ съсѣдом̑ моимъ ѕѣло, и҆ стра́хъ зна́емымъ мои҆мъ·
Ви́дѧщеи҆ мѧ во́нъ бѣжа́ша ѿ мене, забвен̑҇ быхъ ꙗ҆́ко ме́ртвъ ѿ срд̑ца·
Быхъ ꙗ҆́ко съсꙋдъ погꙋбленъ, ꙗ҆́ко слы́шах꙽ гажденїе мно́гихъ живꙋщих̑ ѻ҆крс̑҇тъ.
внегда̀ събира́тисѧ и҆мъ вкꙋпѣ на́ мѧ, прїа́ти дш҃ꙋ мою съвѣща́ша·
А҆з꙽ же на тѧ г҃и ѹ҆повах̑·
Рѣхъ ты е҆си бг҃ъ мои, въ рꙋ́кꙋ твоею жрѣбїи мой·
И҆зба́ви мѧ и҆з рꙋки вра́гъ мои҆хъ, и҆ ѿ гонѧ́щихъ мѧ·
Просвѣтѝ лице твое на раба̀ твое҆го, сп҃си мѧ ми́лостїю твое҆ю.
г҃и да не постыжꙋ́сѧ, ꙗ҆́ко призва́х тѧ·
да постидѧтсѧ нечести́вїи, и҆ снидꙋтъ въ а҆́дъ·
Нѣмы да бꙋдѹт̑ ѹ҆стны̀ льсти́выѧ, гл҃ющаѧ на пра́веднаго без꙽законїе, горды́нею и҆ ѹ҆ничиже́нїемъ·
Ко́ль мно́го мно́жество бл҃гости твоеѧ г҃и, ѧ҆́же съкры́лъ еси боѧ́щимсѧ тебѐ.
съдѣ́лалъ е҆си ѹ҆пова́ющимъ на́ тѧ, пред̑ сн҃ы чл҃чьскими·
Съкры́еши их̑, в та́инѣ лица̀ твоего, ѿ мѣте́жа чл҃чьска·
Покры́еши и҆хъ въ кровѣ ѿ пре́рѣканїѧ ѧ҆зы́къ·
Бл҃гослове́нъ г҃ь, ꙗ҆́ко ѹ҆дивѝ млс̑҇ть свою̀ въ градѣ ѻ҆бьстоѧ́нїѧ·
А҆́з же рѣхъ въ и҆з꙽стꙋпле́нїи мое́мъ, ѿверженъ е҆смь ѿ лица̀ ѻ҆́чїю твоею·
Сего ра́ди ѹ҆слы́ша глс̑҇а мл҃твы моеѧ̀, вънегда̀ възва́хъ к тебѣ·
Възлюби́те г҃а вси прпд̑бнїи е҆го, ꙗ҆́ко и҆стины възыска́етъ г҃ь, и҆ въздае́тъ и҆зли́ха творѧ́щимъ гор꙽ды́ню·
Мꙋжа́итесѧ, и҆ да крѣпит̑сѧ срд̑це ва́ше, вси ѹ҆пова́ющеи на́ г҃а·
ѱало́мъ двд҃въ, л҃а, ра́зꙋма·
Блаже́ни, и҆́мже ѿпꙋсти́шасѧ без꙽зако́нїѧ, и҆ і҆́мже прикры́шасѧ грѣсѝ·
Бл҃же́нъ мѹж̑, е҆мꙋже не въмѣни́тъ г҃ь грѣха̀, ниже е҆́сть въ ѹ҆стѣхъ е҆го лесть·
ꙗ҆́ко ѹ҆молчах̑, ѻ҆бет꙽ша́ша ко́сти моѧ̀, зовꙋщꙋ ми ве́сь дн҃ь.
ꙗ҆́ко дн҃ь и҆ нощь ѻ҆тѧготѣ на мнѣ рꙋка твоѧ̀, възврати́хъсѧ на́ страсть е҆гда̀ ѹ҆ньзе́ ми те́рнъ·
Без꙽зако́нїе моѐ познах̑, и҆ грѣха мое҆го не покрых̑·
Рѣхъ, и҆сповѣмъ на́ мѧ без꙽зако́нїе моѐ гв҃и, и҆ ты ѿпꙋсти́лъ е҆си нечестїе срд̑ца мое҆го·
За то̀ помо́литсѧ к тебѣ всѧ́къ преподо́бный, въ вре́мѧ бл҃гопотре́бно·
ѻ҆ба́че в потопѣ во́дъ мно́гъ, к немꙋ не прибли́жатсѧ·
Ты́ еси прибѣжище моѐ ѿ скорби ѻ҆держа́щаѧ мѧ, радости моѧ̀ и҆зба́ви мѧ ѿ ѻ҆быше́дъшихъ мѧ̀·
Въразꙋмлю̀ т̂ѧ, и҆ наставлю т̂ѧ на пꙋть се́и во́ньже по́идеши, ѹ҆твержꙋ на тѧ ѻ҆́чи моѝ·
Не бꙋдѣте ꙗ҆́ко конь и҆ мъскъ, и҆мъже нѣсть ра́зꙋма·
Брозда́ми и҆ ѹ҆здо́ю челюсти и҆хъ въстѧгнеши, не приближа́ющимсѧ к тебѣ·
Мно́ги ра́ны грѣшномꙋ, ѹ҆пова́ющаго же на́ г҃а млс̑҇ть ѻ҆бы́детъ·
Весели́тесѧ ѻ҆ г҃ѣ, и҆ ра́дꙋитесѧ пра́вед̑нїи, и҆ хвали́тесѧ вси пра́вїи срд̑цемъ·
Слв̑҇а· ѱалом̑ двд̑въ. л҃в, неѻ҆пи́санъ ѿ е҆вре́и.
Ра́дꙋйтесѧ пра́веднїи ѻ́ г҃ѣ, пра́вымъ подобает̑ похвала̀·
И҆сповѣдайтесѧ гв҃и въ гꙋ́слех̑, Въ ѱалты́ри десѧтострꙋннм̑ѣ по́ите е҆мꙋ·
въспо́ите е҆мꙋ пѣснь но́вꙋ, до́брѣ по́йте е҆мꙋ съ въсклица́нїемъ·
Ꙗ҆́ко право сло́во гн҃е, и҆ всѧ дѣ́ла е҆го въ вѣрѣ·
Лю́битъ млс̑҇тню и҆ сꙋдъ г҃ь, млс̑҇ти гн҃ѧ и҆сполнь землѧ̀·
Словесе́мъ гн҃имъ нб҃са ѹ҆тверди́шасѧ, и҆ дх҃омъ ѹ҆стъ е҆го всѧ си́ла и҆́хъ·
Събира́ѧ ꙗ҆ко мѣхъ воды мор꙽скїѧ, полага́ѧ въ скро́вищих̑ бе́зд̑ны·
да ѹ҆бои́тъсѧ г҃а всѧ̀ землѧ, ѿ негоже подви́жатсѧ всѝ живꙋщеѝ на вселе́ннѣи·
Ꙗ҆́ко то́и рече, и҆ быша.
то́и повелѣ, и҆ създа́шасѧ.
г҃ь разарѧ́етъ совѣты ѧ҆зы́комъ, ѿмѣта́етъ же мы́сли лю́демъ, и҆ ѿмѣта́етъ совѣты кнѧѕь·
Совѣт же гн҃ь въ вѣки пребыва́етъ, помы́шле́нїѧ срд̑ца е҆го в родъ и҆ родъ·
Бл҃жен꙽ ꙗ҆́зыкъ, е҆мꙋже е҆сть г҃ь бг҃ъ е҆го, лю́ди ѧ҆́же и҆збра̀ въ достоѧ́нїе себѣ·
Съ нб҃сѐ призрѣ̀ г҃ь, видѣ всѧ̀ сн҃ы чл҃чьскїѧ·
Съ гото́ваго жили́ща свое҆го призрѣ̀ на въсѧ̀ живꙋщ́аѧ на землѝ·
създавый на е҆ді́нѣ срд̑ца и҆́хъ, разꙋмѣва́ѧѝ на въсѧ̀ дѣла и҆́хъ·
не сп҃се́тсѧ цр҃ь мно́гою силою, и҆ и҆споли́нъ не сп҃се́тсѧ мно́жеством̑ си́лы своеѧ̀·
ло́жь конь въ сп҃се́нїе, въ мно́жествѣ же си́лы своеѧ̀ не сп҃сет̑сѧ·
с̂е ѻ҆́чи гн҃и на боѧ́щаѧсѧ е҆го, ѹ҆пова́ющаѧ на млс̑҇ть е҆го, и҆зба́вити ѿ съмр҃ти дш҃а и҆́хъ, и҆ препита́ти и҆́хъ въ гладъ·
дш҃а же на́ша чѧ́етъ г҃а, ꙗ҆́ко помо́щъникъ и҆ защи́тникъ на́шь е҆сть·
ꙗ҆́ко ѻ҆ немъ възвесели́тсѧ срд̑це на́ше, и҆ въ и҆мѧ ст҃о́е е҆го ѹ҆пова́хомъ·
бꙋ́ди г҃и млс̑҇ть твоѧ на насъ, ꙗ҆́коже ѹ҆пова́хомъ на́ тѧ·
ѱало́м꙽ двд̑въ л҃г, вънегда и҆змѣнѝ лице свое пред̑ а҆вимеле́ха. и҆ ѿпꙋсти е҆го, и҆ ѿи҆де·
Бл҃гословлю г҃а на всѧ̂ко врѣмѧ, вы́нꙋ хвала̀ е҆го въ ѹ҆стѣхъ мои҆́хъ·
ѻ҆ г҃ѣ похва́литсѧ дш҃а моѧ, да́ ѹ҆слы́шатъ крот̑ці́и, и҆ възвеселѧтсѧ·
възвели́чите г҃а съ мною, и҆ възнесемъ и҆мѧ е҆го въкꙋпѣ̀·
възы́скахъ г҃а, и҆ ѹ҆слы́ша мѧ·
и҆ ѿ въсѣх꙽ скорбїй мои҆хъ и҆зба́ви м̂ѧ·
пристꙋпи́те к немꙋ, и҆ просвѣтитесѧ, и҆ ли́ца ва́ша не постыдѧтсѧ·
с̂е ни́щїи възва̀, и҆ г҃ь ѹ҆слы́ша и҆̀, и҆ ѿ всѣхъ скорбїй е҆го сп҃се и҆̀·
ѻ҆полчитсѧ а҆г҃глъ гн҃ь ѻ҆крестъ боѧ́щихсѧ е҆го, и҆ и҆зба́витъ их̑.
Въкꙋсите, и҆ ви́дите, ꙗ҆́ко бл҃гъ г҃ь.
бл҃же́нъ мꙋжъ, и҆же ѹ҆пова́етъ нань·
бо́итесѧ г҃а въси ст҃їи е҆го, ꙗ҆́ко нѣсть лише́нїѧ боѧ́щим꙽сѧ е҆го·
бога́тїи ѻ҆бнища́ша и҆ възалка́ша.
възыска́ющїѝ же г҃а, не лишатсѧ ѿ въсѧкого бл҃га·
прїидѣте чѧ́да, послꙋшаите мене, стра́хꙋ гн҃ю наѹ҆чю вас̑҇·
кто е҆сть чл҃къ хотѧѝ живот̑, любѧѝ дн҃и ви́дѣти бл҃ги;
ѹ҆держи́ ѧ҆зыкъ свой ѿ зла̀, и҆ ѹ҆стнѣ̀ своѝ е҆же не гл҃ати льсти·
ѹ҆клонисѧ ѿ зла̀, и҆ сътворѝ бл҃го·
възыщѝ ми́ръ, и҆ поженѝ и҆̀.
ѻ҆́чи гн҃и на праведныѧ, и҆ ѹ҆ши́ его въ моли́твꙋ и҆́хъ·
лице́ же гн҃е на творѧ́щаа зла́а, е҆же потреби́ти ѿ зем̑лѧ па́мѧть и҆́х꙽·
възва́ша пра́венїѝ, и҆ г҃ь ѹ҆слы́ша их̑, и҆ ѿ всѣхъ печа́лей их̑, и҆зба́ви и҆́хъ·
бли́зъ г҃ь съкрꙋше́ных̑ срд̑цемъ, и҆ смире́нныѧ дх҃омъ сп҃сет̑·
мно́гы ско́рби пра́веднымъ, и҆ ѿ всх̑ѣ и҆хъ и҆зба́витъ ѧ҆̀ г҃ь·
храни́тъ г҃ь въсѧ ко́сти и҆х꙽, ни е҆ді́на ѿ нихъ, не съкрꙋши́тсѧ·
съмр҃ть грѣшником̑ люта̀, и҆ ненави́дѧщеи пра́веднаго прегрѣшатъ·
и҆зба́витъ г҃ь дш҃а рабъ своихъ, и҆ не прегрѣшатъ въси ѹ҆пова́ющеи на́нь·
Сла́ва ѱало́мъ давы́довъ, л҃д·
Сꙋдѝ г҃и ѻ҆би́дѧщаѧ мѧ, възбранѝ борю́щаѧ мѧ·
прїимѝ ѻ҆рꙋжїе и҆ щитъ, и҆ въста́ни въ по́мощь мою·
и҆зъсꙋни ѻ҆рꙋжїе, и҆ заврѝ съпротив̑҇ гонѧщихъ м̂ѧ·
ръцы дш҃и моеи, сп҃сенїе твое е҆смь а҆́зъ·
да посты́дѧтсѧ, и҆ посрамѧт̑сѧ и҆́щꙋщеи дш҃ꙋ мою·
да възвратѧт̑сѧ въспѧть, и҆ постыдѧтсѧ мыслѧщеи҆ ми зла́ѧ.
да бꙋ́дꙋть ꙗ҆́ко прахъ пред꙽ лицемъ вѣтрꙋ, и҆ а҆́г҃глъ гн҃ь ѻ҆скорблѧ́ѧ и҆́хъ·
бꙋ́ди пꙋть их̑ тма̂ и҆ ползокъ, и҆ а҆́гг҃лъ гн҃ь погонѧ́а и҆́хъ·
ꙗ҆́ко въсꙋ́е съкры́ша м̂и пагꙋбꙋ сѣти своей, въсꙋе поносиша дш҃и моеи·
да прїидетъ е҆мꙋ сѣть ю҆́же не съвѣсть, и҆ лови́тва ю҆́же съкры̀, да ѻ҆бъи́метъ и҆̀, и҆ в сѣть да въпаде́тьсѧ въ ню̀·
дш҃а же моѧ възра́дꙋетсѧ ѻ҆ г҃ѣ, възвеселитсѧ ѻ҆ сп҃се́нїи твоемъ·
въсѧ̀ кости моѧ рекꙋтъ, г҃и г҃и, кт̂о подо́бенъ тебѣ;
и҆збавлѧ́аѝ ні́ща и҆з рꙋкъ крѣпльших꙽ е҆го, и҆ ни́ща и҆ ѹ҆бо́га ѿ расхыща́ющихъ е҆го·
въста́ша ми свѣдѣтеле непра́ведни, ꙗ҆́же не вѣдѧхъ въпрашѧ́хꙋ мѧ·
възда́ша ми лꙋка́ваѧ въз бл҃га́ѧ, и҆ без꙽чѧдїе дш҃и мо́ей·
а҆́зъ же вънегда ѻ҆нѝ стꙋжа́хꙋ ми, ѻ҆бла́чѧх̑сѧ въ врѣтище·
и҆ смирѧхъ посто́мъ дш҃ꙋ мою, и҆ мл҃тва моѧ въ нѣдра́ моѧ вѣзврати́тсѧ·
ꙗ҆́ко бли́ж꙽немꙋ, ꙗ҆́ко братꙋ на́шемꙋ, тако ѹ҆га́жахъ·
ꙗ҆́ко пла́чѧ и҆ сѣтꙋѧ, тако смирѧх̑сѧ·
и҆ на́ мѧ възвесели́шѧсѧ, и҆ събра́шасѧ·
събра́шасѧ на́ мѧ ра́ны, и҆ не чюх̑.
раздѣли́шасѧ, и҆ не ѹ҆мили́шасѧ·
и҆скꙋсі́ша мѧ̀, подража́ша мѧ под̑ража́нїем̑, поскрежета́ша на́ мѧ зꙋбы̀ свои́ми·
г҃и, къгда ѹ҆зриши;
ѹ҆стро́й дш҃ꙋ мою ѿ злодѣ́иства их̑, ѿ ле́въ е҆ді́нороднꙋю мою·
И҆сповѣмсѧ тебѣ въ цр҃кви мно́ѕѣ, в꙽ лю́дехъ тѧж꙽цѣхъ въсхвалю тѧ·
да не възрадꙋют̑ ми сѧ вра́ждꙋющеѝ ми бес пра́вды, ненави́дѧщеѝ м̂ѧ всꙋ́е, и҆ помиза́юще ѻ҆чи́ма·
ꙗ҆́ко мн̂ѣ ѹ҆бо ми́рно гл҃ахꙋ, и҆ на гнѣвъ льстѝ помышлѧ́хꙋ·
и҆ разши́риша на мѧ ѹ҆ста̀ своѧ, рѣша, бл҃гоже бл҃гоже, видѣша ѻ҆́чи на́ши·
ви́дѣлъ е҆си г҃и, да не премолчи́ши, г҃҃и не ѿстꙋпи ѿ мене·
въста́ни г҃и, и҆ вонмѝ сꙋд мой.
бж҃е мой и҆ г҃и мой на прю мою̀·
сꙋди́ м̂и г҃и по пра́вдѣ твое́и·
г҃и бж҃е мои, и҆ да не пора́дꙋютъ ми сѧ·
да не рекꙋтъ въ срд̑цыхъ свои҆хъ, бл҃гоже бл҃гоже дш҃и нашей·
и҆ да не рекꙋтъ, пожремъ и҆̀·
да постыдѧ́тсѧ и҆ посрамѧтсѧ вкꙋпѣ ра́дꙋющеѝсѧ зломъ мои҆́мъ·
да ѻ҆блекꙋт꙽сѧ в стꙋдъ и҆ срамъ велерѣчюю҆щеѝ на мѧ·
да възрадꙋютсѧ и҆ възвеселѧтсѧ хотѧщеи пра́вдѣ моей·
и҆ рекѹт̑ вы́нꙋ да възвели́читсѧ г҃ь, хотѧ́щеѝ миръ рабꙋ е҆го·
и҆ ѧ҆зыкъ мо́и поѹ҆читсѧ пра́вдѣ твое́й, весь дн҃ь хвалѣ твойе·
В конец̑҇ раба бж҃їѧ двд̑а· л҃е.
Рече законопрестꙋ́пныи съгрѣшати в себѣ, нѣ́сть стра́ха бж҃їѧ пред̑ ѻ҆чима е҆го·
ꙗ҆́ко ѹ҆льстѝ пред ни́мъ·
ѻ҆брѣстѝ безаконїе своѐ, и҆ възненави́дѣти·
гл҃ы ѹ҆́стъ е҆го безаконїе и҆ лесть, не въсхотѣ разꙋмѣти да ѹ҆бл҃жит̑·
безаконїе помы́сли на ло́жи своемъ, предъста̀ всѧ́комꙋ пꙋтѝ не бл҃гꙋ, ѻ҆ зло́бѣ же не негодова̀·
г҃и на́ нб҃си млс̑҇ть твоѧ, и҆ і҆стина твоа̀ до ѻ҆́блакъ·
пра́вда твоѧ̀ ꙗ҆́ко го́ры бж҃їѧ, сꙋдбы̀ твоѧ бе́здна мно́га·
чл҃кы и҆ скоты̀ сп҃се́ши г҃и, ꙗ҆́ко ѹ҆мно́жилъ е҆си млс̑҇ть твою бж҃е·
сн҃ове же члчс̑҇тїи въ кровѣ крилꙋ твоею̀ надѣютсѧ·
и҆ ѹ҆пию́тсѧ ѿ ѻ҆би́лїа до́мꙋ твое҆го, и҆ пото́комъ пи́ща твоеѧ напои́ши и҆́хъ·
ꙗ҆́ко ѿ тебе и҆сто́чникъ животꙋ, въ свѣтѣ тво́емъ ѹ҆́зрим̑ свѣтъ·
пробави млс̑҇ть твою вѣ́дꙋщим т̂ѧ, и҆ пра́вдꙋ твою пра́вым̑ срд̑цемъ·
да не прїидетъ мн̂ѣ нога̀ горды́нѧ, и҆ рꙋка̀ грѣшничѧ да не под̑ві́житъ мене.
та́мо падоша всѝ дѣлающеѝ безако́нїе, и҆зринове́ни быша, и҆ не мо́гꙋтъ ста́ти·
Сла́ва ѱлом̑ дввд̑ъ· л҃ѕ·
Не ревнꙋй лꙋка́внꙋющим̑, ниже зави́ди творѧ́щимъ безаконїе·
зане ꙗ҆́ко трава ско́ро и́съшꙋтъ, и҆ ꙗ҆ко зе́лїе злака ско́ро ѿпадꙋтъ·
ѹ҆пова́й на г҃а, и҆ творѝ бл҃госты́ню·
и҆ населѝ зе́млю, и҆ ѹ҆пасе́шисѧ в бога́тьствѣ е҆ѧ̀·
наслади́сѧ гв҃и, и҆ да́стъ т̂и проше́нїе срд̑ца твое҆го.
ѿкры́и къ г҃ꙋ пꙋть твой, и҆ ѹ҆повай на́нь, и҆ тои сътвори́тъ·
и҆ і҆зведе́тъ ꙗ҆́ко свѣтъ пра́вдꙋ твою, и҆ сꙋдбꙋ твою ꙗ҆́ко полꙋдн҃е·
повини́сѧ гв҃и, и҆ ꙋмоли́ и҆̀·
не ревнꙋй спѣющемꙋ пꙋтем̑ свои́м꙽, чл҃кꙋ творѧ́щемꙋ законопрестꙋпле́нїе·
преста́ни ѿ гнѣ́ва, и҆ ѻ҆ста́ви ꙗ҆́рость, не ревнꙋй е҆же лꙋка́в꙽новати·
ꙗ҆́ко лꙋка́внꙋющеѝ потребѧтсѧ·
терпѧ́щеи же г҃а, тїи наслѣдѧтъ зе́млю·
и҆ е҆ще ма́ло, и҆ не бꙋдетъ грѣшника, и҆ възы́щеши мѣ́ста е҆го, и҆ не ѻ҆брѧ́щеши·
праведницы же наслѣдѧ́тъ зе́млю, и҆ насладѧтсѧ ѻ҆ мно́жествѣ ми́ра·
назира́етъ грѣшныи пра́веднаго, и҆ поскреже́щетъ на́нь зꙋбы̀ свои́ми·
г҃ь же посмѣ́етсѧ емꙋ, ꙗ҆́ко про́зритъ, ꙗ҆́ко прїиде дн҃ь е҆го·
ѻ҆рꙋжїе и҆́звлекоша грѣшници, напрѧго́шѧ лꙋкъ своѝ·
състрѣлѧ́ти нища и҆ ѹ҆бо́га, закла́ти пра́выѧ срд̑цемъ.
ѻ҆рꙋжїе и҆́хъ внидетъ въ срд̑ца и҆́хъ, и҆ лꙋ́цы и҆́хъ съкрꙋшатсѧ·
лꙋ́че ма́ло пра́вед̑никꙋ, па́че бога́тъства грѣшныхъ мно́га·
ꙗ҆́ко мы́шца грѣшныхъ съкрꙋшатсѧ, ѹ҆твержа́ет же правед꙽ныѧ г҃ь·
съвѣсть г҃ь пꙋти непоро́чьныхъ, и҆ достоѧ́нїе и҆́хъ, в вѣкъ бꙋдетъ·
не просты̀дѧтсѧ въ времѧ люто, и҆́ въ дн҃ехъ гла́да насытѧт꙽сѧ, ꙗ҆́ко грѣшницы поги́бнꙋт꙽.
вра́ѕи же гн҃и кꙋ́пно, просла́витисѧ им̑ и҆ възнестѝ, и҆́счеза́юще ꙗ҆́ко ды́мъ и҆́счезо́ша·
зае҆́млетъ грѣшныи, и҆ не възвраща́етъ.
пра́ведный же, щедритъ и҆ дае́тъ·
ꙗ҆́ко блс̑҇вѧщеѝ е҆го наслѣдѧт̑ зе́млю, кленꙋщеѝ же е҆го потребѧт̑сѧ.
ѿ г҃а стопы чл҃кꙋ и҆спра́вѧтсѧ, и҆ пꙋтѝ е҆го въсхо́щетъ ѕѣло·
е҆гда сѧ паде́тъ, не разбїе́тсѧ, ꙗ҆́ко г҃ь под̑крѣплѧ́етъ рꙋкꙋ е҆го·
ю҆нѣишїи быхъ, и҆бо съста́рѣхсѧ, и҆ не видѣхъ пра́ведника ѻ҆ста́влена, ниже сѣмени е҆го просѧ́ща хлѣбы·
весь дн҃ь ми́лꙋетъ и҆ възаи́мъ дае́тъ пра́ведныи, и҆ сѣмѧ е҆го въ бл҃гослове́нїи бꙋ́детъ·
ѹ҆клони́сѧ ѿ зла̀, и҆ сътворѝ бл҃го, и҆ всели́сѧ въ вѣкъ вѣка·
ꙗ҆́ко г҃ь лю́битъ сꙋдъ, и҆ не ѻ҆ста́витъ прпд̑бныхъ свои҆хъ, въ вѣкы съхранѧ́тсѧ·
безаконницы же и҆жденꙋтсѧ·
и҆ сѣмѧ нечести́выхъ потреби́тсѧ, правед̑ницы же наслѣдѧть зе́млю, и҆ вселѧт̑сѧ въ вѣкъ вѣка на не́й·
ѹ҆ста̀ правед̑наго поѹ҆чѧ́тсѧ премѹ́дрости, и҆ ѧ҆зык̑҇ е҆го въз꙽гл҃тъ сꙋдъ.
законъ бг҃а е҆го в꙽ срд̑цы е҆го, и҆ не за́пнꙋтсѧ стопы е҆го·
Сматрѧ́етъ грѣшныи пра́вед̑наго, и҆ і́щетъ е҆же ѹ҆мр҃тви́ти е҆го·
г҃ь же не ѻ҆ста́витъ е҆го въ рꙋкꙋ е҆го, ниже ѻ҆сꙋ́дитъ е҆го, е҆гда̀ сꙋ́дит̑ е҆мꙋ·
потер꙽пѝ г҃а, и҆ съхранѝ пꙋти е҆го·
и҆ възнесе́тъ тѧ е҆же наслѣдити зе́млю, вънегда̀ потреблѧ́тисѧ грѣшникомъ, ѹ҆зриши·
ви́дѣхъ нечести́ваго превъзносѧ́щасѧ, и҆ вы́сѧщасѧ, ꙗ҆ко ке́дры лива́н꙽скыѧ·
и҆ мимои҆дохъ, и҆ сѐ не бѣ.
и҆ взыска́хъ е҆го, и не ѻ҆брѣтесѧ мѣ́сто е҆го·
хранѝ незлѻ́бїе, и҆ ви́жд̑ъ правотꙋ̀, ꙗ҆ко е҆сть ѻ҆ста́нокъ чл҃кꙋ ми́рнꙋ, безако́нницы же, потребѧ́тсѧ вкꙋпѣ, ѻ҆ста́нцы же нечести́выхъ потребѧ́тсѧ, сп҃се́нїе же пра́веднымъ ѿ г҃а, и҆ защи́титель и҆мъ е҆сть въ вре́мѧ ско́рби·
помо́жетъ и҆́мъ г҃ь, и҆ і҆зба́витъ их̑, и҆ і҆зметъ и҆хъ ѿ грѣшникъ, и҆ сп҃сетъ и҆хъ, ꙗ҆́ко ѹ҆пова́ша на́нь·
Сла́ва· ѱлом̑ двд̑въ, л҃з·
Вспомина́нїе ѻ҆ сꙋбо́тѣ·
Ги҃ не ꙗ҆ростїю твоею ѻ҆бличѝ мене, ни гнѣвом̑ твои҆мъ покажѝ мене·
ꙗ҆ко стрѣ́лы твоѧ ѹ҆нзо́ша м̂и, и҆ ѹ҆твердил̑҇ е҆си на мнѣ рꙋ́кꙋ твою̀·
нѣсть и҆сцѣле́нїѧ въ плоти мое́й ѿ лица̀ гнѣва твоего, нѣсть мира в ко́стех̑ мои҆хъ ѿ лица̀ грѣхъ мои҆хъ·
ꙗ҆́ко безаконїа моа превзыдо́ша главꙋ̀ мою, ꙗ҆́ко бремѧ тѧ́жко ѻ҆тѧготѣша на мнѣ·
въсмердѣша и҆ съгни́шасѧ ра́ны моѧ, ѿ лица̀ безꙋмїа моего·
Пострадахъ и҆ сми́рихсѧ до конца̀, весь дн҃ь сѣтꙋѧ хождах̑·
ꙗ҆́ко лѧдвїа моѧ напо́лнишасѧ порꙋга́нїй, и҆ нѣсть и҆сцѣле́нїа въ плотѝ мое́й·
ѻ҆злоблен꙽ быхъ и҆ смирих̑сѧ до ѕѣла, рыкахъ ѿ въздыха́нїа срд̑ца моего·
г҃и, пред̑ тобо́ю все желанїе мое, и҆ въздыханїе мое ѿ тебѐ не ѹ҆таи҆сѧ·
срд̑це мое смꙋтисѧ, ѻ҆ста́ви мѧ си́ла моа̀.
и҆ свт̑ѣ ѻ҆чїю моею̀, и҆ той нѣсть съ мною·
Дрꙋ́зи моѝ и҆ і́скрьнїи моѝ, прѧ́мо мнѣ приближишасѧ, и҆ ста́ша·
и҆ бли́ж꙽нїи моѝ ѿдале́че мене ста́ша, и҆ нꙋж꙽дахꙋсѧ и҆щꙋщеѝ дш҃ꙋ мою̀·
И҆ и́щꙋщеѝ ѕлаѧ мн̂ѣ гл҃ахꙋ сꙋе́тнаѧ, и҆ льсти́внаѧ весь дн҃ь поѹ҆ча́хꙋсѧ·
а҆́зъ же ꙗ҆́ко глꙋхъ не слышах̑, и҆ ꙗ҆́ко нѣмъ не ѿверзаѧ ѹ҆стъ своих̑·
и҆ быхъ ꙗ҆́ко чл҃къ не слы́ша, и҆ не и҆мы̀ въ ѹ҆стѣх꙽ свои҆хъ ѻ҆бличе́нїа·
ꙗ҆́ко на тѧ г҃и ѹ҆повах̑, ты ѹ҆слы́шиши г҃и, б҃е мой·
ꙗ҆́ко рѣхъ, да не когда̀ пора́дꙋют̑ ми сѧ вра́ѕи мои́.
и҆ внегда̀ подвижа́тисѧ нога́мъ моим̑, на́ мѧ велерѣчеваша·
Ꙗ҆́ко а҆зъ на ра́ны готовъ, и҆ болѣзнь моа предо мною е҆сть вынꙋ·
Ꙗ҆́ко безако́нїе мое а҆зъ възвѣщꙋ, и҆ попекꙋ́сѧ ѻ҆ грѣсѣ моем̑·
Врази же моѝ живꙋтъ, и҆ ѹ҆крѣпи́шасѧ па́че мене, и҆ ѹ҆мно́жишасѧ ненави́дѧщеѝ м̂ѧ без пра́вды·
Въздаю́щеѝ м̂и зл̂а въз бл҃гаа, ѻ҆болга́хꙋ мѧ, зане гонѧх̑ блс̑҇гты́ню·
Не ѻ҆стави мене г҃и б҃е мой, не ѿстꙋпѝ ѿ мене·
въньмѝ в꙽ по́мощь мою, г҃и сп҃се́нїа мое҆го·
в коне́цъ, ѻ҆ и҆диѳꙋ́мѣ пѣснь двд̑ва, л҃и·
Рѣхъ, съхраню̀ пꙋтѝ моѧ̀, е҆же не съгрѣшати ꙗ҆́зы́ком꙽ мои҆мъ·
положихъ ѹ҆стом̑ мои҆мъ храни́ло, внегда въстати грѣшномꙋ предо мною·
ѻ҆немѣхъ, и҆ смири́хсѧ, и҆ ѹ҆молчах̑ ѿ бл҃гъ, и҆ болѣзнь моа̀ ѻ҆бновисѧ·
съгрѣа́сѧ срд̑це мое въ мнѣ, и҆ в поѹ҆ченїи мое́мъ разгори́тсѧ ѻ҆гнь·
гл҃ахъ ꙗ҆зы́комъ моим̑, скажи м̂и г҃и кончи́нꙋ мою, и҆ число̀ дн҃їи мои҆хъ кое е҆сть, да разꙋмѣю, что̀ лишаюсѧ а҆зъ·
се пѧ́дїю и҆змѣрены положи́лъ е҆си дн҃и моѧ, и҆ съставъ мой ꙗ҆ко ни въчтоже пред̑ тобою·
ѻ҆ба́че всѧческаа сꙋе́та, всѧкъ чл҃къ живыи·
и҆́де ѹ҆бо ѻ҆́бразом̑ ходитъ чл҃къ, ѻ҆ба́че въсꙋе́ мѧте́т꙽сѧ·
съкрывае҆тъ, и҆ не вѣсть комꙋ събираетъ ѧ҆̀·
и҆ нн҃ѣ кт̂о терпѣнїе мое, не г҃ь л̂и;
и҆ състав̑҇ мой ѿ тебе е҆сть·
ѿ всѣхъ безако́нїи моих̑ и҆зба́ви мѧ, поношенїе безꙋ́мномꙋ далъ мѧ е҆си·
ѻ҆немѣхъ, и҆ не ѿверзо́хъ ѹ҆́стъ свои҆хъ, ꙗ҆ко ты сътвори.
ѿста́ви ѿ мене ра́ны твоѧ·
ѿ крѣпости бо рꙋки тоеа̀ а҆зъ и҆зчезох̑.
въ ѻ҆бличенїи ѻ҆ безако́нїи показалъ е҆си чл҃ка.
и҆ и҆стаѧ҆лъ е҆си ꙗ҆́ко паѹ҆чи́нꙋ дш҃ꙋ е҆го, ѻ҆ба́че всꙋе всѧкъ чл҃къ·
ѹ҆слы́ши мл҃твꙋ мою г҃и, и҆ моле́нїе мое.
внꙋшѝ слезъ моих̑, не премолчи, ꙗ҆́ко пресе́лник̑҇ а҆зъ ѿ тебе, и҆ пришлец̑҇, ꙗ҆́коже вси ѿц҃и моѝ·
ѻ҆слаби ми, да почїю прежде даже не ѿи҆дꙋ и҆ ктомꙋ̀ не бꙋ́дꙋ·
В коц̑҇ ѱлом̑ двд̑в꙽ л҃ѳ
Терпѧ̀ потерпѣхъ г҃а, и҆ внѧт̑ ми, и҆ ѹ҆слыши м҃лтвꙋ мою·
и҆ възведе мѧ ѿ рова стрс̑҇те́й, и҆ ѿ тимѣнїа глꙋбины̀.
и҆ поста́ви на ка́мени но́ѕѣ моѝ, и҆́спра́ви стопы̀ моѧ·
и҆ вложи въ ѹ҆ста̀ моѧ пѣ́снь но́вꙋ, пѣнїе б҃а на́шего·
ѹ҆зрѧт꙽ мно́ѕи, и҆ ѹ҆́боѧ́тсѧ, и҆ ѹ҆пова́ютъ на́ г҃а·
блаже́нъ мꙋж꙽, е҆мꙋже е҆сть и҆мѧ гн҃е ѹ҆пова́нїе е҆го, и҆ не призрѣв꙽ сꙋе́тнаа, и҆ неи҆стовленїа ло́жна·
мно́га сътворил꙽ е҆си т̂ы г҃и бж҃е мой чюдеса̀ твоа, и҆ помышле́нїем̑ твои҆мъ нѣ́сть кт̂о ѹ҆подо́бит̑ ти сѧ·
Възвѣстих̑ и҆ гл҃ахъ, ѹ҆мно́жишасѧ паче числа·
же́ртвꙋ и҆ приношенїе не въсхотѣ, тѣ́ло же съвершил̑҇ ми е҆си·
всесъжже́нїа и҆ ѻ҆ грѣсѣхъ не взыскал̑҇ е҆си.
тогда рѣх꙽, с̂е прїидꙋ·
въ глави́знѣ книжнѣ пи́шетъ ѻ҆ мнѣ, сътвори́ти во́лю твою б҃е мой въсхотх̑ѣ, и҆ зако́нъ твой посредѣ чрева мое҆го·
бл҃говѣстих̑ пра́вдꙋ в꙽ цр҃кви мно́ѕѣ, с̂е ѹ҆стнѣ моѝ не възбраню.
г҃и т̂ы разꙋмѣ·
пра́вдꙋ твою не съкрых̑ въ срд̑ци мое́мъ, и҆стинꙋ твою и҆ сп҃се́нїе твое рѣхъ·
не съкрых̑ млс̑҇ть твою, и҆ и́стинꙋ твою ѿ со́нма мно́га·
ты же г҃и не ѹ҆да́ли щедро́тъ твои҆хъ ѿ мене, млс̑҇ть твоѧ и҆ и҆стина твоа вы́нꙋ застꙋпи́ста мѧ·
Ꙗ҆́ко ѻ҆держа́ша мѧ зла, и҆мже нѣсть числа̀.
постиго́ша мѧ безако́нїѧ моѧ, и҆ не възмого́хъ зрѣти·
ѹ҆мно́жишасѧ паче власъ главы моеѧ̀, и҆ срд̑це мое ѻ҆ста́ви мѧ·
блг҃оволи г҃и и҆збавити мѧ, г҃и помощѝ м̂и потщисѧ·
да постыдѧтсѧ и҆ посрамѧтсѧ вкꙋ́пѣ и҆щꙋщеѝ дш҃ꙋ мою, и҆зѧтѝ ю҆̀·
да възвратѧтсѧ въспѧть и҆ постыдѧтсѧ хотѧ́щеѝ м̂и злаа·
да прїимꙋтъ а҆́бїе стꙋдъ свой, гл҃ющеѝ м̂и, бл҃гоже бл҃гоже·
да възрадꙋютсѧ и҆ възвеселѧтсѧ ѻ҆ тебѣ, вси и҆щꙋщеѝ тебѐ г҃и·
и҆ рекꙋтъ.
вы́нꙋ да възвели́читсѧ г҃ь, любѧщеѝ сп҃се́нїе твое·
А҆з꙽ же ѹ҆богъ е҆смь и҆ ни́щъ, г҃ь попече́нїе мое·
Помощникъ мой и҆ защититель мои е҆си ты, б҃е мой, не закоснѝ·
Слава· В коне́цъ ѱлом̑ двд̑въ· м҃·
Блаже́нъ разꙋмѣва́ай на ни́ща и҆ ѹ҆бо́га, в꙽ дн҃ь лютъ и҆збавитъ и҆̀ г҃ь·
г҃ь съхранит̑ и҆̀, и҆ живитъ и҆̀, и҆ ѹ҆блажит̑ и҆̀ на землѝ, и҆ не преда́стъ е҆го в рꙋкы врагомъ е҆го·
г҃ь помо́жет̑ е҆мꙋ на ѻ҆дрѣ болѣзни е҆го, все ло́же е҆го ѻ҆братилъ е҆си в болѣзни е҆го·
а҆зъ рѣхъ, г҃и поми́лꙋй мѧ, и҆сцѣлѝ дш҃ꙋ мою, ꙗ҆́ко съгрѣших̑ ти·
враѕи моѝ рѣша мнѣ зла́а, когда̀ ѹ҆мретъ и҆ поги́бнетъ и҆мѧ е҆го;
и҆ вхождаше ви́дѣти, всꙋ́е гл҃аше срд̑це е҆го.
събра̀ безако́нїе е҆мꙋ, и҆схождааше вонъ, и҆ гл҃аше в꙽кꙋ́пѣ·
На́ мѧ шепта́хꙋ вс̂и вра́ѕи моѝ, на́ мѧ помышлѧ́хꙋ зла́ѧ мн̂ѣ·
сло́во зако́нопрестꙋпно въъзложиша на́ мѧ, е҆да̀ спѧѝ не приложитъ въскрс̑҇нꙋти;
и҆бо чл҃къ ми́ра моего наньже ѹ҆повах꙽, ꙗ҆́дыи хлѣбы моа, възвеличи на́ мѧ пѧ́тꙋ·
ты же г҃и поми́лꙋй м̂ѧ и҆ въздви́гни мѧ, и҆ въздамъ и҆м꙽·
ѻ҆ семъ познах̑ ꙗ҆́ко въсхотѣ мѧ, ꙗ҆́ко не възрадꙋ́етсѧ враг̑҇ мой ѻ҆ мн̂ѣ·
Мене же за незло́бїе приѧ́тъ, и҆ ѹ҆тверди́л꙽ мѧ е҆си пред̑ собо́ю в꙽ вѣкъ·
Блгс̑҇ве́нъ г҃ь бг҃ъ і҆ил҃евъ, ѿ вѣка и҆ до́ вѣка.
бꙋ́детъ бꙋ́дет꙽·
в конец̑҇, ра́зꙋм꙽ сн҃в꙽ коре́ѻ҆в꙽, м҃а.
Им꙽же ѻ҆́бразомъ жела́етъ е҆ле́нь на и҆сточникы водны́а, сі́це жела́етъ дш҃а моѧ к тебѣ бж҃е·
възжада дш҃а моѧ к꙽ б҃ꙋ, крѣпкомꙋ, живо́мꙋ·
когда прїидꙋ, и҆ ꙗ҆влюсѧ лицꙋ бж҃їю;
быша сле́зы моѧ мнѣ хлѣбъ дн҃ь и҆ нощ̑҇, внегда гл҃ати м̂и на всѧ́къ дн҃ь, гдѣ е҆сть б҃ъ твой;
Сїа помѧнꙋхъ, и҆ и҆злїахъ на́ мѧ дш҃ꙋ мою, ꙗ҆́ко проидꙋ̀ в мѣсто кро́ва ди́вна, да́же до до́мꙋ бж҃їа, въ гласѣ ра́дованїа, и҆ и҆сповѣданїа шꙋма празнд̑ꙋющаго·
в꙽скꙋ́ю приско́рбна е҆си дш҃е моѧ, и҆ в꙽скꙋю съмꙋща́еши мѧ;
ѹ҆пова́й на́ б҃а, ꙗ҆́ко и҆сповѣмсѧ е҆мꙋ, сп҃се́нїе лицꙋ мое҆мꙋ и҆ б҃ъ мои·
къ мнѣ дш҃а моѧ смꙋтисѧ, сего ради помѧнꙋхъ т̂ѧ ѿ землѧ и҆ѻ҆рда́нскы і҆ е҆рмонїимскы, ѿ горы ма́лы·
безнд̑а бе́зднꙋ призывает̑, въ гласѣ хлѧ́бїи твои҆х꙽·
вс̂ѧ высоты̀ твоѧ̀ и҆ волны̀ твоа по мнѣ преидо́ша·
в дн҃ь заповѣсть г҃ь млс̑҇ть свою, и҆ но́щїю пѣснь е҆го ѿ мене·
мл҃тва б҃ꙋ живота̀ мое҆го, рекꙋ̀ б҃ꙋ, застꙋ́пникъ мой е҆си·
Почто̀ мѧ забы̀, и҆ в꙽скꙋ́ю сѣтꙋа хождꙋ внегда стꙋжа́етъ ми врагъ;
Внегда съкрꙋшахꙋсѧ кости моѧ, понашахꙋ ми враѕи моѝ·
в꙽негда гл҃ати и҆мъ мн̂ѣ на всѧк̑҇ дн҃ь, гд̂ѣ е҆сть б҃ъ твой;
Вскꙋю прискорбна е҆си дш҃е моѧ̀, и҆ в꙽скꙋю смꙋща́еши мѧ̀;
ѹ҆повай на́ б҃а, ꙗ҆́ко и҆сповѣмсѧ̀ е҆мꙋ.
сп҃се́нїе лицꙋ моемꙋ, и҆ б҃ъ мой·
ѱлом̑ двд̑въ м҃в, неѻ҆пі́санъ ѿ е҆вре́й·
Сꙋдѝ ми бж҃е, и҆ разсꙋдѝ прю мою, ѿ ꙗ҆зы́ка непреподо́б꙽на, ѿ чл҃ка неправед̑на и҆ льсти́ва и҆зба́ви м̂ѧ·
Ꙗ҆́ко т̂ы е҆си бж҃е держа́ва моѧ̀, в꙽скꙋ́ю ѿри́нꙋ мѧ, и҆ в꙽скꙋю сѣтꙋѧ хожд̑ꙋ внегда стꙋжа́етъ врагъ;
посли свт̑ѣ твой, и҆ і́стинꙋ твою.
та̀ м̂ѧ наста́виста, и҆ в꙽ведо́ста м̂ѧ в꙽ горꙋ ст҃ꙋ́ю твою, и҆ в꙽ жилѝща твоѧ·
И҆ в꙽ни́дꙋ к꙽ жертвеникꙋ бж҃їю, к꙽ бг҃ꙋ веселѧщемꙋ ю́ность мою·
и҆сповѣмсѧ тебѣ в꙽ гꙋ́слех̑ б҃е, б҃е мой·
Вскꙋю́ прі́ско́рбна е҆си дш҃е моѧ̀, и҆ в꙽скꙋю смꙋща́еши м̂ѧ;
ѹ҆повай на́ б҃а, ꙗ҆́ко и҆сповѣмсѧ е҆мꙋ.
сп҃се́нїе лица̀ мое҆го, и҆ бг҃ъ мой·
Сла́ва· В конец̑҇, сн҃въ коре́ѻв̑҇, разꙋмъ· м҃г·
Бе҃ ѹ҆ши́ма на́шіма ѹ҆слы́шахом̑, и҆ ѿц҃ы на́ши възвѣсті́ша нам꙽·
дѣ́ло, е҆же съдѣ́ла въ дн҃ехъ их̑, въ дн҃ех꙽ пе́рвых̑·
Рꙋка̀ твоѧ̀ ꙗ҆зы́кы потребѝ и҆ насади ѧ҆̀·
ѻ҆зло́би лю́ди, и҆ і҆згна ѧ҆̀·
не ѻ҆рꙋжїем꙽ бо свои҆м꙽ наслѣдиша зе́млю, и҆ мы́шца и҆х꙽ не сп҃сѐ их̑·
н̂о десни́ца твоѧ̀ и҆ мы́шца твоѧ̀, и҆ просвѣщенїе лица твое҆го, ꙗ҆́ко бл҃говолил꙽ е҆си в нихъ·
Ты е҆си сам̑ цр҃ю мой и҆ б҃е мой, заповѣдааѝ сп҃се́нїа і҆а́ковлѧ·
ѻ҆ тебѣ врагы̀ на́ша и҆збодемъ рогы̀, и҆ ѻ҆ и́мени твое҆м꙽ ѹ҆ничижи́м꙽ въста́ющаа на ны·
не на лꙋкъ б̂о мой ѹ҆пова́ю, и҆ ѻ҆рꙋжїе мое не сп҃се́т꙽ мене·
спс̑҇лъ бо е҆си насъ ѿ стꙋжа́ющых̑ нам꙽, и҆ ненавидѧщих̑ насъ посрамилъ е҆си·
ѻ҆́ бѕ҃ѣ похва́лимсѧ весь дн҃ь, и҆ ѻ҆ и́мени твоем̑ и҆сповѣмысѧ въ вѣкы·
Нн҃ѣ же ѿри́нꙋ, и҆ посрамилъ е҆си нас̑҇, и҆ не и҆зы́деши б҃е в си́лахъ на́ших̑·
Възвратил꙽ е҆си нас̑҇ в꙽спѧть при враѕѣх꙽ наших̑, и҆ ненави́дѧщеи насъ расхыща́хꙋ себѣ·
дал꙽ е҆си насъ ꙗ҆́ко ѻ҆вцѧ снѣди, и҆ въ ꙗ҆зы́цехъ раз꙽сѣѧлъ ны е҆си·
ѿдастъ люди своѧ бес цѣны̀, и҆ не бѣ мно́жество в꙽ восклица́них̑ на́ших̑·
Положилъ е҆си нас̑҇ поношенїе съсѣ́домъ на́шим꙽, подража́нїе и҆ порꙋга́нїе сꙋщым̑ ѻ҆крс̑҇тъ насъ·
положилъ е҆си нас̑҇ в꙽ при́тчꙋ въ ꙗ҆́зы́цех̑, покива́нїю главѣ в лю́дех̑·
Ве́сь дн҃ь срам̑ мой предо́ мною е҆сть, и҆ стꙋдъ лица̀ мое҆го покры̀ мѧ·
ѿ гласа понаша́ющих̑ и҆ ѻ҆клевета́ющых̑, ѿ лица̀ вражїѧ и҆ і҆згонѧ́щаго·
Сїа вс̂ѧ прїидо́ша на ны, и҆ не забы́хом꙽ тебѐ, и҆ не непра́вдихом̑ в꙽ завѣтѣ твое́мъ.
и҆ не ѿстꙋпѝ въспѧть срд̑це на́ше, и҆ ѹ҆клонил꙽ е҆си стеѕѧ на́ша ѿ пꙋтѝ твое҆го·
ꙗ҆́ко смирил̑҇ е҆си нас̑҇ на мѣ́стѣ ѻ҆злобле́нїѧ, и҆ прикры̀ н̂ы сѣнь смертнаѧ·
А҆́ще забы́хом꙽ и́мѧ б҃а на́шего, и҆ а́ще въздѣхом̑ рꙋ́ки на́ша к꙽ бг҃ꙋ чюжемꙋ, не бг҃ъ ли взы́щетъ сихъ;
той б̂о совѣсть таи́ннаѧ срд̑ца·
Ꙗ҆́ко тебе ради ѹ҆мерщ꙽вѧ́еми е҆смы весь дн҃ь, в꙽мѣнихомсѧ ꙗ҆́ко ѻ҆вцѧ̀ заколенїа·
в꙽ста́ни, въскꙋ́ю спи́ши г҃и;
въскрс̑҇ни, и҆ не ѿри́ни до конца·
в꙽скꙋю лице твое ѿвраща́еши, забыва́еши ни́щетꙋ на́шꙋ и҆ печаль на́шꙋ;
ꙗ҆́ко смирисѧ в꙽ перьсть дш҃а на́ша, прилпе земли ѹ҆тро́ба на́ша·
Въскрс̑҇ни г҃и, помоѕѝ нам̑, и҆ и҆зба́ви насъ и҆мени ради твое҆го·
В конец̑҇, ѻ҆ и҆змѣнших̑сѧ сн҃в꙽ коре́ѻв̑҇ в꙽ ра́зм̑ꙋ, пѣснь ѻ҆ възлюбленнем̑ м҃д
Ѿры́гнꙋ срд̑це мое сло́во бл҃го, гл҃ю а҆́зъ дѣла моѧ цр҃е́ви·
Ꙗ҆́зык̑҇ мой, трость кни́жника скоропі́сца·
красе́нъ добро́тою паче сн҃въ члчс̑҇кых̑, и҆злїа́сѧ блгд̑дть въ ѹ҆стнах̑ твои҆х꙽, сего ради блс̑҇ви тѧ б҃ъ в꙽ вѣкъ·
Препоѧ́ши ѻ҆рꙋжїе свое по́ бедрѣ твой си́лне·
Красото́ю твоею̀ и҆ добро́тою твоею̀, и҆ налѧци, и҆ ѹ҆спѣва́й, и҆ црс̑҇твꙋй·
и҆́стины рад̑и̑ и҆ кро́тости и҆ пра́вды, и҆ наста́вит̑ тѧ ди́вно десни́ца твоѧ̀·
стрѣлы твоѧ и҆з꙽ѻ҆щре́ны си́лне, людїе под̑ тобою падꙋт꙽, в꙽ срд̑ци врагъ цр҃е́въ·
прс̑҇тлъ твой б҃е в꙽ вѣкъ вѣка, же́злъ пра́вости, же́злъ црс̑҇твїа твоего·
възлюбилъ е҆си правдꙋ, и҆ възненави́дѣ безаконїе·
Сего ради пома́за т̂ѧ бж҃е б҃ъ твой, е҆ле́ѻ҆мъ радости паче прича́стникъ твоих̑·
Змѷрна и҆ стакти и҆ касі́а, ѿ ри́зъ твоих̑, ѿ тѧжести слоновых꙽, и҆з них̑же възвесели́ша т̂ѧ дще́рѧ цре́й въ чс̑҇тѝ твоей·
Пред̑ста цр҃ца ѻ҆деснꙋ́ю тебе, в ри́зах̑ позлаще́ннахъ ѻ҆дѣа́на, преѹ҆краше́нна·
Слы́ши дщѝ, и҆ ви́ждь, и҆ приклонѝ ѹ҆хо твоѐ, и҆ забꙋ́ди лю́ди твоѧ, и҆ домъ ѿц҃а твоего·
И҆ вожделѣет̑ цр҃ь добро́тѣ твой, ꙗ҆́ко той е҆сть г҃ь твой, и҆ поклони́шисѧ е҆мꙋ·
и҆ дщѝ ти́рова съ да́ры, лицꙋ твое҆мꙋ помо́лѧтсѧ бога́тїи людьстїи·
Всѧ̀ сла́ва дщере цр҃е́вы в꙽нꙋт́рь, рѧсны̀ златы́ми ѻ҆дѣа́на преѹ҆краше́на·
приведꙋтсѧ цр҃ю дв҃ы в꙽ слѣдъ еѧ̀, бли́ж꙽нѧа̀ еѧ̀ приведꙋт́сѧ тебѣ, приведꙋт́сѧ въ весе́лїе и҆ радость.
в꙽ведꙋтсѧ в꙽ цр҃ковь цр҃е́вꙋ·
Вмѣ́сто ѿц҃ъ твоих̑ быша сн҃ове твоѝ, ѹ҆ста́виши их̑ кн҃ѕѧ по все́й землѝ·
Помѧнꙋ̀ и҆́мѧ твоѐ во всѧ́ком̑ ро́дѣ и҆ ро́дѣ·
Сего ради людїе и҆сповѣдѧтсѧ тебѣ в꙽ вѣк꙽, и҆ въ вѣк꙽ вѣка·
В конец̑҇, сн҃въ, коре́ѻ҆въ, ѻ҆ таи́нных̑ ѱало́мъ, м҃е·
Бг҃ъ намъ прибѣжище и҆ си́ла, помо́щникъ в꙽ скорбехъ ѻ҆брѣтших꙽ ны ѕѣло·
Сего ради не ѹ҆бои́мсѧ в꙽негда смꙋщае҆тсѧ землѧ, и҆ прелагают̑сѧ го́ры в срд̑цѧ морскаѧ·
Въз꙽шꙋмѣша и҆ смꙋти́шасѧ во́ды и҆х꙽, смꙋти́шасѧ го́ры крѣпостїю е҆го·
Рѣчнаѧ ѹ҆стромле́нїа веселѧтъ град̑ бж҃їи, ѻ҆ст҃илъ е҆сть село̀ свое вы́шнїи·
Бг҃ъ посредѣ̀ е҆го, и҆ не подви́житсѧ, помо́жетъ е҆мꙋ бг҃ъ ѹ҆́тро заѹ҆́тра·
Смꙋтишасѧ ꙗ҆зы́ци, ѹ҆клони́шасѧ црс̑҇твїа, дастъ глас̑҇ свой вы́шнїи, потрѧсе́сѧ землѧ·
г҃ь силъ с на́ми, застꙋ́пник̑҇ нашь бг҃ъ і҆а́ковль·
Прїидѣте, и҆ ви́дѣте дѣ́ла бж҃їѧ, ꙗ҆же положи чюдеса̀ на землѝ, ѿе҆млѧ бра́ни до конца земли·
Лꙋ́къ съкрꙋшит̑, и҆ сло́митъ ѻ҆рꙋжїе, и҆ щиты̀ съж꙽жет̑ ѻ҆гнемъ·
ѹ҆пра́знд̑итесѧ, и҆ разꙋмѣите, ꙗ҆ко а҆зъ е҆смь бг҃ъ.
възнесꙋ́сѧ въ ꙗ҆́зы́цех̑, възнесꙋ́сѧ на зем̑лѝ·
г҃ь си́лъ с нами, застꙋ́пникъ на́шъ бг҃ъ і҆а́ковлъ·
Сла́ва· В конец̑҇ сн҃въ коре́ѻв̑҇. ѱалом̑, м҃ѕ·
кѳ̑҇а з҃·
Вси ꙗ҆зы́цы въсплеща́те рꙋка́ми, въскли́кнѣте бг҃ꙋ гла́сомъ ра́дости.
ꙗ҆́ко г҃ь вы́ш꙽нїи, стра́шенъ, цр҃ь ве́леи по всеи зем̑лѝ, покори люд̑и̑ нам̑, и҆ ꙗ҆зы́кы под̑ ногы на́шѧ·
и҆збра на́м꙽ достоа́нїе свое, добро́тꙋ і҆а́ковлю ю҆̀же възлюбѝ·
в꙽зы́де б҃ъ в꙽ въскликнове́нїи, г҃ь въ гла́сѣ трꙋ́бнѣ·
по́йте б҃ꙋ на́шемꙋ, по́ите.
по́ите цр҃е́ви на́шемꙋ, по́ите·
ꙗ҆́ко цр҃ь всей зем̑ли б҃ъ, по́ите разꙋ́мно·
Въц҃ри́сѧ б҃ъ над̑ ꙗ҆́зы́кы, б҃ъ сѣди́тъ на престо́лѣ ст҃ѣм꙽ свое҆мъ·
Кн҃ѕи люд̑стїи събра́шасѧ съ бм҃ъ а҆враа́млем꙽, ꙗ҆́ко бж҃їи держа́внїи земли ѕѣло̀ възнесо́шасѧ·
Пѣснь ѱалма, сн҃въ коре́ѻвъ, втораго сꙋбо́ты, м҃з·
Ве́леи г҃ь, и҆ хваленъ ѕѣло, в꙽ градѣ бг҃а нашего, в꙽ горѣ ст҃ѣй е҆го, бл҃гокоре́нномъ ра́дованїем꙽ всеѧ̀ землѧ̀, го́ры сїѻ́нскїа ре́бра сѣ́верова, град̑ цр҃ѧ вели́каго·
бг҃ъ в тѧжестех̑ е҆го зна́ем꙽ е҆сть, е҆гда застꙋпа́етъ и҆̀·
ꙗ҆ко с̂е цр҃їе зем꙽стїи събра́шасѧ, снидошасѧ в꙽кꙋ́пѣ·
тїи видѣвше та́ко диви́шасѧ, смꙋти́шасѧ под̑виза́шасѧ, тре́петъ прїа́тъ ѧ҆̀·
т̂ꙋ болѣзни ꙗ҆́ко раждающой, дх҃омъ бꙋрном̑ съкрꙋши́ши кораблѧ̀ ѳарсїискїа·
ꙗ҆́коже слы́шахом꙽, тако и҆ видѣхом̑.
въ градѣ г҃а си́лъ, въ градѣ бг҃а на́шего·
б҃ъ ѻ҆снова̀ и҆̀ в꙽ вѣкъ·
Прїа́хомъ б҃е млс̑҇ть твою, посредѣ людїи твоих̑·
по́ и҆мени твое҆мꙋ бж҃е, та́ко и҆ хвала̀ твоѧ̀ на концых̑ землѧ̀, пра́вды и҆сполнь десни́ца твоѧ·
да възвесели́т꙽сѧ гора сїѻ́нскаѧ, и҆ възрадꙋютсѧ дще́рѧ і҆ю҆де́йскыѧ, сꙋдебъ ради твои҆хъ г҃и·
ѻ҆быдѣте сїѻ́нъ, и҆ прїимѣте и҆̀, възвѣсти́те в꙽ столпх̑ѣ е҆го·
положи́те срд̑ца ва́ша в̂ си́лꙋ е҆го, и҆ раздѣли́те домъ е҆го, ꙗ҆́ко да повѣ́сте в ро́дѣ и҆номъ·
ꙗ҆́ко то́и е҆сть б҃ъ нашъ в вѣкъ, и҆ въ вѣкъ вѣка, то́и ѹ҆пасе́тъ насъ въ вѣ́кы·
В конец̑҇ сн҃въ коре́ѻвъ, ѱалом̑, м҃и·
Ѹ҆слы́шите сїѧ вс̂и ꙗ҆зы́цы, вънꙋши́те вс̂и живꙋщеѝ по вселе́ннѣй·
земнїи же, и҆ сн҃ве члчс̑҇тїи, в꙽кꙋ́пѣ богатъ и҆ ѹ҆богъ·
ѹ҆ста̀ моѧ̀ въз꙽гл҃тюъ премꙋ́дрость, и҆ поѹ҆че́нїе срд̑ца мое҆го ра́зѹм̑·
Приклоню въ притчѧх̑ ѹ҆хо мое, ѿве́рзꙋ въ ѱалты́ри гана́нїе мое, в꙽скꙋю бою́сѧ в꙽ дн҃ь лют꙽;
безако́нїе пѧты̀ моеа̀ ѻ҆быдет̑ м̂ѧ·
надѣющеѝсѧ си́лѣ своей, и҆ мно́жеством̑ бога́т꙽ства свое҆го хвалѧ́щесѧ·
брат̑ не и҆зба́витъ, и҆зба́вить л̂и чл҃къ;
не дастъ бг҃ꙋ и҆змѣны за сѧ, и҆ цѣнꙋ збавле́нїа дш҃а своеа̀, и҆ ѹ҆трꙋди́сѧ в꙽ вѣкъ, и҆ живъ бꙋдет꙽ до конца·
не ѹ҆зритъ па́гꙋбы, е҆гда ви́дитъ премꙋ́дрыѧ ѹ҆мира́ющѧ·
в꙽кꙋ́пѣ безꙋ́менъ и҆ несмы́сленъ поги́бнета, и҆ ѻ҆ста́вѧт̑ чюжи́мъ богатъство свое, и҆ гро́би и҆хъ, жили́ща и҆хъ в꙽ вѣкъ·
селе́нїа и҆хъ в ро́дъ и҆ ро́дъ, нареко́ша и҆мена̀ своѧ на земных꙽·
И҆ чл҃къ въ честѝ сый не разꙋмѣ̀, приложи́сѧ скотомъ несмы́сленымъ, и҆ ѹ҆подобисѧ и҆мъ·
Сей пꙋть их̑ съблазнъ им̑, и҆ по си́х꙽ въ ѹ҆стѣхъ своих̑ бл҃гои҆зво́лѧт̑·
Ꙗ҆́ко ѻ҆вцѧ въ а́дѣ положе́ни сꙋть, смерть ѹ҆пасе́тъ и҆х꙽, и҆ ѻ҆блада́ютъ и҆ми пра́вїи заѹ҆тра, и҆ по́мощъ и҆хъ ѻ҆бетшае҆тъ въ а҆дѣ, ѿ сла́вы своеа̀ и҆зриновени бы́ша·
ѻ҆баче б҃ъ и҆зба́віт̑ дш҃ꙋ мою̀ и҆з рꙋкы а҆́довы, е҆гда прїем̑лет̑ мѧ·
не ѹбо́йсѧ, е҆гда разбога́тѣетъ чл҃къ, и҆ли е҆гда ѹ҆мно́житсѧ сла́ва до́мꙋ е҆го·
Ꙗ҆́ко е҆гда ѹ҆мира́етъ, не ѻ҆ста́вит꙽ ли вс̂ѧ, ниже сни́детъ с ни́мъ слава е҆го.
ꙗ҆́ко дш҃а е҆го во животѣ̀ е҆го блс̑҇ви́тсѧ, и҆сповѣсть ти сѧ е҆гда бл҃го сътвори́ши е҆мꙋ·
вселитсѧ да́же до ро́да ѿц҃ь свои́хъ, да́же до́ вѣка не ѹ́зритъ свѣта·
и҆ чл҃къ въ чс̑҇ти сый не разꙋмѣ, приложи́сѧ скотѣхъ несмы́сленых̑, и҆ ѹ҆подо́бисѧ им̑·
Слав̑҇, ѱлом̑ а҆са́фовъ м҃ѳ·
Бг҃ъ бг҃о́мъ г҃ь гл҃а, и҆ призва зе́млю, ѿ въстокъ сл҃нца до западъ.
ѿ сїѻ́на бл҃голѣпїе красоты е҆го·
Бг҃ъ ꙗ҆вѣ прїидетъ, б҃ъ нашъ, и҆ не премолчи́тъ·
ѻ҆́гнь пред̑ ни́мъ възгори́тсѧ·
и҆ ѻ́крестъ е҆го бꙋ́рѧ ѕѣлна·
Призоветъ нб҃о свы́ше, и҆ землю раз꙽сꙋди́ти лю́ди своѧ·
Съберѣте е҆мꙋ прпд̑бныѧ е҆го, завѣща́ющаѧ завѣт꙽ е҆го ѻ҆ жертвах̑·
и҆ възвѣстѧтъ нб҃са пра́вдꙋ е҆го, ꙗ҆́ко бг҃ъ сꙋдїи е҆сть·
Слы́шите людїе моѝ, и҆ възг҃лю вамъ і҆ил҃ю,<.>
И҆ засвѣдительствꙋю т̂и.
бг҃ъ бг҃ъ твой е҆смь а҆зъ·
не ѻ҆ жертвах꙽ твои҆хъ ѻ҆бличю̀ т̂ѧ, вс̂есож꙽женїа же предо мно́ю сꙋть вы́нꙋ·
не прїимꙋ ѿ домꙋ твоего телцѧ̀, ни ѿ стд̑а твои҆хъ козлы̀·
Ꙗ҆́ко моѝ сꙋть вс̂и ѕвѣ́рїе дꙋбра́внїи, скоти в горахъ и҆ въло́ве·
Позн̂ахъ вс̂ѧ птица небесныѧ, и҆ красота се́льнаа̀ съ мною е҆сть;
А҆́ще вза́лчю, не рекꙋ тебѣ·
моѧ̀ бо е҆сть вселе́н꙽наѧ, и҆ и҆сполне́нїе е҆ѧ̀·
е҆да ѧ́мъ мѧса̀ ю́нча;
и҆ли кро́вь козлїю пїю;
пожрѝ бв҃и жер꙽твꙋ хвалѣ, и҆ възда́ждь вы́шнемꙋ ѻ҆бѣты твоѧ·
И҆ призовѝ м̂ѧ в꙽ дн҃ь печѧ́ли твоеа, и҆ и҆зба́влю т̂ѧ, и҆ просла́виши м̂ѧ·
Грѣшникꙋ же рече бг҃ъ, в꙽скꙋ́ю ты повѣдаеши ѻ҆правд̑анїѧ моѧ, и҆ въспрїе́млеши завѣтъ мои ѹ҆сты̀ твои́ми;
Ты же възненавидѣ наказа́нїе, и҆ ѿврьже словеса моѧ в꙽спѧть;
А҆ще видѧше та́тѧ, теча́ше с нимъ, и҆ съ прелюбодѣе́мъ ѹ҆ча́стїе свое полага́ше·
Ѹ҆ста твоа̀ ѹ҆мно́жиша зло́бꙋ, и҆ ꙗ҆зы́къ твой съплета́ше льще́нїѧ·
Сѣдѧ на брата́ своего клевета́ше, и҆ на сн҃а мт҃ре свое҆ѧ полага́ше събла́знъ·
Сїѧ сътворилъ е҆си, и҆ ѹ҆молчах꙽·
възнепщевалъ е҆си безаконїе, ꙗ҆́ко бꙋдꙋ тебѣ подо́бенъ·
ѻ҆бличю́ т̂ѧ, и҆ предьпоста́влю пред꙽ лицемъ твои́мъ грѣхи твоѧ·
разꙋмѣте же сїѧ̀ забываю́щеѝ бг҃а, да не когда̀ похи́титъ, и҆ не бꙋ́детъ и҆збавлѧаѝ, жертва хвалѣ̀ просла́вит м̂ѧ, и҆ т̂ꙋ пꙋть, и҆мъже ꙗ҆́влѧ е҆мꙋ сп҃се́нїе мое·
В конец̑҇ ѱлом̑ двд̑въ н҃·
внегда прїити к немꙋ наѳа́нꙋ прро̑҇кꙋ·
е҆гда вниде к вирсавеѝ к женѣ ѹ҆рїевѣ·
Поми́лꙋи м̂ѧ бж҃е, по велицей млс̑҇ти твоей·
И҆ по мно́жествꙋ щедро́т꙽ твои҆хъ, ѻ҆цысти безако́нїа моа̀·
наи҆паче ѻ҆мы́и мѧ ѿ безако́нїѧ мое҆го̀, и҆ ѿ грѣха̀ мое҆го̀ ѻ҆чисти м̂ѧ·
ꙗ҆́ко безако́нїе моѐ а҆зъ зна́ю, и҆ грѣх꙽ мой предо мною е҆сть вынꙋ·
тебѣ е҆ді́номꙋ съгрѣшихъ, и҆ лꙋка́вое пред̑ тобою сътворихъ·
ꙗ҆́ко да ѻ҆правди́шисѧ в꙽ слов꙽есѣхъ свои҆хъ, и҆ побѣдиши внегда сꙋдити т̂и·
Се б̂о въ безако́нихъ зачатъ е҆смь, и҆ въ грѣсѣхъ роди м̂ѧ мт҃и моа·
сѐ б̂о и́стинꙋ възлюбилъ е҆си, безвѣстнаѧ и҆ та́иннаѧ премꙋдрости твоеа̀ ꙗ҆́ви́л꙽ м̂и е҆си·
ѻ҆кропи́ши м̂ѧ ѷссо́помъ, и҆ ѻ҆чи́щꙋсѧ.
ѻ҆мые́ши м̂ѧ, и҆ паче снѣга ѹ҆бѣлю́сѧ·
слꙋ́хꙋ мое҆мꙋ даси ра́дость и҆ веселїе, възрадꙋютсѧ костѝ смире́нныѧ·
ѿвратѝ лице твое ѿ грѣхъ мои҆хъ, и҆ всѧ безаконїѧ моа ѻ҆цисти·
Срд̑це чи́сто съѕи́жди въ мнѣ бж҃е, и҆ дх҃ъ пра́въ ѻ҆бновѝ въ ѹ҆тробѣ мое́й·
Не ѿве́рѕи мене ѿ лица твое҆го, и҆ дх҃а ст҃аго твое҆го не ѿи́ми ѿ мене·
воздажд̑ь м̂и ра́дость сп҃се́нїа твое҆го, и҆ дх҃ом꙽ влд̑чномъ ѹ҆тверди́ мѧ·
Наѹ҆чю безако́нныа̀ пꙋтем̑ твои́мъ, и҆ нечести́вїи к тебѣ ѻ҆братѧ́тсѧ·
и҆зба́ви м̂ѧ ѿ кровїи б҃е, бж҃е сп҃се́нїѧ моего, възра́дꙋетсѧ ꙗ҆́зы́къ мой пра́вдѣ твоей г҃и ѹ҆стнѣ мой ѿве́рзеши, и҆ ѹ҆ста̀ моѧ̀ възвѣстѧт꙽ хвалꙋ̀ твою·
Ꙗ҆́ко а҆́ще бы въсхотѣлъ же́ртвѣ, далъ бымъ́ ѹ҆бо·
Всесож꙽же́нїѧ не бл҃говоли́ши.
жрьтва бг҃ꙋ, дх҃ъ съкрꙋшен̑҇·
срд̑це съкрꙋшено и҆ смиренно бг҃ъ не ѹ҆ничижи́тъ·
Ѹ҆блажѝ г҃и бл҃говоле́нїем꙽ твои́мъ сїѻ́на, и҆ да съѕи́ждꙋтсѧ стѣны і҆ерс̑҇ли́мъскїа·
Тогда бл҃говолиши жертвꙋ пра́вдѣ, възноше́нїе и҆ всесъжега́емаѧ·
тогда възложа́тъ на ѻ҆лта́рь твой телцѧ·
Сла́ва. В конец̑҇ разꙋма дввд̑ъ, н҃а.
внегда̀ прїити дои́кꙋ и҆дꙋме́искꙋ, и҆ възвѣстити саѹ҆лꙋ, и҆ рещѝ е҆мꙋ, прїиде двд̑ъ, в дом̑ а҆ві́мелехов̑҇·
Что́ сѧ хва́лиши в꙽ зло́бѣ си́лне, беза́конїе ве́сь дн҃ь;
Непра́вдꙋ ѹ҆мы́сли ꙗ҆́зыкъ твой, ꙗ҆ко бри́тва и҆зъѻ҆щре́на сътворилъ е҆си лесть·
Възлюби́лъ е҆си злобꙋ па́че бл҃гостынѧ, непра́вдꙋ неже гл҃ати правдꙋ·
възлюбилъ е҆си вс̂ѧ гл҃ы потопныа̀, ꙗ҆зыкъ льсти́въ·
Сего ради бг҃ъ разрꙋшит̑ т̂ѧ до конца, въсто́ргнет̑ т̂ѧ, и҆ пресели́тъ т̂ѧ ѿ селе́нїѧ твое҆го, и҆ ко́рень твой ѿ землѧ̀ живыхъ·
ѹ҆зрѧтъ пра́веднїи и҆ ѹ҆боѧ́тсѧ, и҆ ѻ҆ немъ въсмѣю́тсѧ и҆ рекꙋтъ·
с̂е чл҃къ, и҆же не положи бг҃а помощника себѣ·
н̂о ѹ҆пова̀ на мно́жество богат̑ства свое҆го, и҆ възмо́же сꙋетою своею.
А҆зъ же ꙗ҆́ко ма́слина плодови́та в꙽ домꙋ бж҃їи·
Ѹ҆пова́хъ на млс̑҇ть бж҃їю в꙽ вѣкъ, и҆ въ вѣкъ вѣка·
и҆сповѣмсѧ тебѣ в꙽ вѣкъ, ꙗ҆́ко сътворилъ е҆си·
и҆ теръплю̀ и҆́мѧ твое, ꙗ҆́ко бл҃го пред̑ прпд̑бными твои҆ми·
В конецъ, ѻ҆ мае҆ле́ѳѣ, разꙋмъ дввд̑ъ, н҃в·
Рече безꙋ́менъ в꙽ срд̑ци свое́мъ, нѣсть бг҃а·
Растлѣша и҆ ѻ҆мрази́шасѧ в безако́нихъ, нѣсть творѧѝ блгс̑҇ты́нѧ·
б҃ъ съ нб҃се прини́че на́ сн҃ы чл҃ческыа, ви́дѣти, а҆́ще е҆сть разꙋмѣва́а, и҆ли в꙽зыска́ѧ б҃а·
вс̂и ѹ҆клони́шасѧ, в꙽кꙋпѣ непотребни бы́ша.
нѣсть творѧѝ бл҃гое, нѣсть до е҆ді́ного·
Нѝ л̂и разꙋмѣваютъ вс̂и дѣ́лающеѝ безаконїе, снѣда́ющеѝ люди моѧ в꙽ хлѣба мѣсто;
Бг҃а не призва́ша, та́мо ѹ҆страши́шасѧ стра́ха, и҆дѣже не бѣ̀ страха·
Ꙗ҆́ко б҃ъ рассы́па кости чл҃коѹ҆год̑ником꙽.
постыдѣшасѧ, ꙗ҆́ко б҃ъ ѹ҆ничижѝ и҆х꙽·
кт̂о дасть ѿ сїѻ́на сп҃се́нїе і҆ил҃ево;
в꙽негда възвратит̑ б҃ъ плѣне́нїе людїи свои҆хъ, възра́дꙋетсѧ і҆а́ковъ, и҆ възвесели́тсѧ і҆ил҃ь·
В конец̑҇<.> В пѣснех̑ ра́зꙋма дввд̑ъ. в꙽негда прїити ѕифе́ѻм꙽, и҆ ре́щи саѹ҆ло́ви. не се л̂и двд̑ъ кры́етсѧ в꙽ нас̑҇, н҃г·
Бе҃ въ и҆мѧ твое сп҃си́ мѧ, и҆ въ си́лѣ твое́й сꙋдѝ ми·
б҃е ѹ҆слы́ши мл҃твꙋ мою, в꙽нꙋшѝ гл҃ы ѹ҆стъ моих̑·
Ꙗ҆́ко чюжді́и в꙽ста́ша на́ мѧ, и҆ крѣпці́и взыскаша дш҃ꙋ мою̀, и҆ не пред̑ложи́ша б҃а пред̑ собою·
Сѐ б̂о б҃ъ помога́етъ м̂и, и҆ г҃ь застꙋ́пникъ дш҃и мое́й·
ѿврати́тъ зла́ѧ врагом꙽ мои҆мъ, и҆стиною твоею̀ потребѝ их̑·
во́лею пожрꙋ̀ тебѣ, и҆сповѣмсѧ и҆мени твое҆мꙋ г҃и, ꙗ҆́ко бл҃го·
ꙗ҆́ко ѿ всѧ́кыѧ печали и҆зба́ви м̂ѧ, и҆ на врагѝ моѧ възз̑рѣ ѻ҆́ко мое·
В конец̑҇ пѣснех̑, разꙋмъ а҆са́фовъ, н҃д
Внꙋшѝ б҃е мл҃твꙋ мою, и҆ не презрѝ моле́нїа мое҆го.
воньмѝ м̂и, и҆ ѹ҆слы́ши м̂ѧ·
Въз꙽скор꙽бѣх꙽ печалїю моею̀, и҆ смꙋтих̑сѧ ѿ гласа вражїа, и҆ ѿ стꙋженїа грѣшнича·
ꙗ҆́ко ѹ҆клони́ша на мѧ безако́нїе, и҆ въ гнѣвѣ враждова́хꙋ м̂и·
срд̑це мое смꙋти́сѧ въ мнѣ, и҆ страх̑ смерти нападѐ на́ мѧ·
боѧ҆знь и҆ тре́петъ прїиде на́ мѧ, и҆ покры̀ м̂ѧ тм̂а·
и҆ рѣхъ, кто̀ дасть м̂и крилѣ̀ ꙗ҆́ко голꙋби;
и҆ полещꙋ, и҆ почі́ю·
Се̂ ѹ҆да́лихсѧ бѣгаа, и҆ въдворих̑сѧ в꙽ пꙋсты́ни·
чаѧх̑ б҃а сп҃сающаго м̂ѧ, ѿ малодш҃їа, и҆ бꙋ́рѧ·
Потопѝ г҃и, и҆ раздѣлѝ ꙗ҆зы́кы и҆х꙽.
ꙗ҆ко видѣх꙽ безаконїе, и҆ прерѣканїе въ градѣ·
дн҃ь и҆ но́щъ ѻ҆бы́детъ и҆̀ по стѣнам꙽ е҆го, и҆ безако́нїе и҆ трꙋдъ посредѣ е҆го, и҆ непра́вда·
и҆ не ѻ҆скꙋдѣ̀ ѿ пꙋтѝ е҆го ли́хва и҆ лесть·
ꙗ҆́ко а҆ще бы врагъ поносил̑҇ ми, претерпѣлъ бым꙽ ѹ҆бо·
И҆ а́ще бы ненаві́дѧѝ м̂ѧ на́ мѧ велерѣчевалъ, ѹ҆крылъ би сѧ ѿ него·
Ты же чл҃че равнодш҃не, влд̑ко мой, и҆ зна́емый мой·
и҆же кꙋпно наслади́лъ м̂ѧ е҆си бра́шна, в꙽ храмѣ бж҃їи ходи́ховѣ е҆ді́номышле́нїем̑·
да прїидет̑ же смр҃ть на нѧ, и҆ сни́дꙋт꙽ въ а́дъ жи́ви·
ꙗ҆́ко лꙋка́в꙽ство в꙽ жили́щых̑ и҆хъ посредѣ и҆хъ·
А҆зъ к꙽ б҃ꙋ възвахъ, и҆ г҃ь ѹ҆слыша м̂ѧ·
Вечер꙽ и҆ заѹ҆тра и҆ полꙋ́дне повѣмъ и҆ възвѣщꙋ, и҆ ѹ҆слы́шит̑ гласъ мой·
и҆зба́витъ ми́ромъ дш҃ю мою̀ ѿ приближа́ющих꙽сѧ мн̂ѣ, ꙗ҆́ко въ мноѕѣ бѣхꙋ со мною·
ѹ҆слы́шитъ б҃ъ, и҆ смирит̑ и҆хъ, сый прежд̑е вѣкъ·
нѣсть б̂о им̑ и҆змѣне́нїа, ꙗ҆́ко не ѹ҆боѧ́шасѧ б҃а.
про́стретъ рѹ́кꙋ свою на въздаа́нїе.
ѻ҆скверни́ша звѣтъ е҆го, раздѣли́шасѧ ѿ гнѣва лица̀ е҆го, и҆ приблі́жишасѧ срд̑ца их̑·
Ѹ҆мѧ́кнꙋша словеса̀ их̑ паче е҆ле́ѧ, и҆ та сꙋть срѣлы·
Възве́рзи на́ г҃а печа́ль твою и҆ той т̂ѧ препита́етъ·
не дасть в꙽ вѣкъ млъвы правед̑никꙋ·
ты же бж҃е низведе́ши их̑ въ стꙋденецъ и҆стлѣнїа·
мꙋжїе кро́ви и҆ льстѝ, не преполовѧт̑ дн҃і́и своих̑, а҆з же г҃и ѹ҆пова́ю на́ тѧ·
Слав̑҇· в конец̑҇ ѻ҆ людехъ, е҆же ѿ ст҃ых̑ ѹ҆да́леныхъ, двд̑въ, в꙽ столпописанїе, в꙽негда ѹ҆держа́ша и҆̀ и҆ноплеменници в ге́ѳѣ, н҃е·
Каѳ̑҇ и҃·
Помилꙋй м̂ѧ бж҃е, ꙗ҆́ко попра́ м̂ѧ чл҃къ ве́сь дн҃ь борѧ стꙋжѝ м̂и·
Попраша м̂ѧ вра́ѕи моѝ ве́сь дн҃ь, ꙗ҆́ко мноѕи борю́щеѝ м̂ѧ свы́ше·
Въ дн҃е не ѹ҆боюсѧ а҆з же ѹ҆пова́ю на тѧ·
ѻ҆ бз҃ѣ похвалю̀ словеса̀ моѧ, на́ б҃а ѹ҆повах̑, не ѹ҆бою́сѧ, чт̂о сътворит̑ мн̂ѣ плоть·
Ве́сь дн҃ь словесъ мои҆хъ гнꙋша́хꙋсѧ, на мѧ вс̂ѧ помышле́нїа и҆хъ на зло̀·
Вселѧ́тсѧ и҆ съкры́ютъ.
тїи пѧ́тꙋ мою хранѧтъ·
Ꙗ҆́коже потръпѣша дш҃ю мою, ни ѻ҆ че́сом꙽ же ѻ҆ста́виши их̑, гнѣвомъ люди низбїе́ши·
Бж҃е живо́тъ мой възвѣстихъ тебѣ, положилъ е҆си сле́зы моѧ прд̑е собою, ꙗ҆́ко и҆ въ ѻ҆бѣтованїи твое́мъ·
Да възрвратѧтсѧ вра́зи моѝ в꙽спѧть.
во́ньже дн҃ь а҆ще призовꙋ т̂ѧ, с̂е познахъ ꙗ҆́ко б҃ъ мой е҆си ты·
ѻ҆ бз҃ѣ похвалю̀ гл҃ъ, ѻ҆ г҃ѣ похвалю̀ сло́во·
На́ б҃а ѹ҆повах꙽, не ѹ҆боюсѧ чт̂о сътворит̑ мн̂ѣ чл҃къ·
Во мнѣ бж҃е мл҃ивы, ꙗ҆́же възда́мъ хвалѣ̀ твое́й·
Ꙗ҆́ко и҆зѧтъ дш҃ю мою ѿ смр҃ти, ѻ҆́чи моѝ ѿ слез̑, и҆ но́зѣ мой ѿ поплъзнове́нїа·
Бл҃гоѹ҆гожд̑ѹ прд̑е гм҃ъ, въ́ свѣтѣ живыхъ·
В коне́цъ да не растли́ши, двд̑въ, в столпописа́нїе, внегда е҆мꙋ ѿбѣгати ѿ лица саѹ҆лова в пеще́рꙋ. н҃ѕ·
Поми́лꙋи м̂ѧ бж҃е, поми́лꙋй м̂ѧ, ꙗ҆́ко на тѧ ѹ҆пова̀ дш҃а моа̀·
И҆ на сѣнь крилꙋ твоею̀ надѣ́юсѧ, до́ндеже прейдет̑ безако́нїе·
Въз꙽зовꙋ к꙽ б҃ꙋ вы́шнемꙋ, б҃ꙋ бл҃годѣ́авшемꙋ мнѣ·
Посла̀ съ нб҃се, и҆ сп҃сѐ м̂ѧ, дастъ в꙽ поношенїе попира́ющаѧ м̂ѧ·
Посла бг҃ъ млс̑҇ть свою̀, и҆ і́стинꙋ свою, и҆ и҆зѧт̑ дш҃ꙋ мою ѿ среды̀ скѷменъ, поспах̑ смꙋщенъ·
Сн҃ве члчс̑҇тїи, зѹ́бы и҆хъ ѻ҆рꙋжїѧ и҆ срѣ́лы, ꙗ҆зы́къ и҆хъ мечъ ѻ҆́стръ·
Възнеси́сѧ на нб҃са б҃е, и҆ по всей землѝ сла́ва твоѧ·
Сѣть ѹ҆гото́вашѧ ногамъ мои́мъ, и҆ смири́шѧ дш҃ꙋ мою·
И҆скопа́ша прд̑е лицем̑ мои́мъ ꙗ҆́мꙋ, и҆ впадо́шасѧ в н̂ю·
Гото́во срд̑це мое б҃е, гото́во срд̑це моѐ·
пою̀, и҆ въспою̀ в꙽ сла́вѣ мое́и·
Въста́ни сла́ва моа̀, въста́ни ѱалты́рю и҆ гꙋсли, в꙽ста́нꙋ ра́но·
И҆сповѣмсѧ тебѣ в꙽ лю́дех꙽ г҃и, пою̀ тебѣ въ ꙗ҆́ѕы́цех̑·
Ꙗ҆́ко възвели́чисѧ до нб҃съ, млс̑҇ть твоа, и҆ да́же до ѻ́блакъ и҆стинна твоа·
Възнеси́сѧ на нб҃са бж҃е, и҆ по всеи землѝ сла́ва твоа̀·
В конецъ да не растли́ши, двд̑въ в꙽ столпописа́нїе, н҃з·
Аще въи҆стинꙋ ѹ҆бо правд̑ꙋ гл҃ете, пра́ваѧ сꙋди́те сн҃ве чл҃чьстїи·
И҆бо в꙽ срд̑ци безаконїе дѣ́лае҆те на земли, неправдꙋ рꙋ́кы вашѧр съплета́ютъ·
ѿчюжени быша грѣшницы ѿ ложе́снъ, заблꙋдиша ѿ чрева, гл҃ашѧ лжꙋ̀·
Ꙗ҆́рость и҆хъ по подо́бїю змїи́нꙋ, ꙗ҆́ко а҆́спидъ глꙋхїи и҆ затыкааѝ ѹ҆́ши своѝ·
и҆же не слы́шитъ гла́са ѻ҆бава́ющыхъ, ѻ҆баваем̑ ѻ҆бава́етсѧ ѿ премꙋдра·
Бг҃ъ съкрꙋшитъ зꙋбы и҆хъ въ ѹ҆стѣхъ их̑, члѣно́вныа львомъ съкрꙋшилъ е҆сть г҃ь·
ѹ҆ничижа́тсѧ ꙗ҆́ко вода̀ мимотекꙋщїа, напрѧ́жетъ лꙋкъ сво́й дондеже и҆знемогꙋтъ·
Ꙗ҆́ко воскъ растаѧв꙽ ѿи҆мꙋтсѧ.
паде ѻ҆гнь на ни̂хъ, и҆ не видѣша сл҃нца·
Прежд̑е даже разꙋмѣти те́рьнїа вашего ра́мна, ꙗ҆́ко жи́вы, ꙗ҆́ко въ гнѣвѣ по́жретъ и҆хъ·
Възвесели́тсѧ пра́вд̑еникъ, е҆гда ви́дитъ ѿмще́нїе, рꙋцѣ своѝ ѹ҆мы́ет꙽ в꙽ кровѝ грѣшника·
И҆ речетъ чл҃к꙽, а҆ще ѹ҆бо е҆сть плд̑о праведника, ѹ҆бо е҆сть б҃ъ сꙋдѧ̀ и҆мъ на земли·
Сла́ва. В коне́цъ да не растли́ши. двд̑въ. в꙽ столпописа́нїе. е́гда посла̀ саѹ҆лъ, и҆ ѹ҆дръжа̀ домъ е҆го, е҆же ѹ҆морити е҆го· н҃и·
Измѝ м̂ѧ ѿ врагъ мои́хъ б҃е, и҆ ѿ въста́ющих̑ на́ мѧ и҆зба́ви м̂ѧ·
И҆змѝ м̂ѧ ѿ творѧщыхъ безако́нїе, и҆ ѿ мꙋжъ кровїи сп҃си́ м̂ѧ·
Ꙗ҆́ко с̂е ѹ҆лови́шѧ дш҃ꙋ мою, напа́дошѧ на мѧ крѣпцїи·
Ни безаконїе моѐ, ни грѣхъ мой г҃и, без безако́нїа текох̑, и҆ напра́вихъ·
Въстани въ срѣтенїе мое, и҆ вижд̑ь·
И҆ ты̀ г҃и б҃е силъ, бж҃е і҆ил҃евъ·
Вонмѝ посѣтити вс̂ѧ ꙗ҆зы́кы, не ѹ҆щедриши вс̂ѧ дѣлающаѧ безако́нїе·
Възвратѧ́тсѧ на́ вечеръ, й взалчютъ ꙗ҆ко пе́съ, и҆ ѻ҆быдꙋтъ грд̑а·
Сѐ тїи ѿвѣща́ютъ ѹ҆сты̀ свои́ми, и҆ ѻ҆рꙋжїе въ ѹ҆стнах̑ и҆хъ.
ꙗ҆́ко кт̂о слы́ша;
И҆ ты г҃и посмѣе́шисѧ и҆мъ, ѹ҆ничижи́ши вс̂ѧ ꙗ҆зы́кы·
дръжа́вꙋ мою к꙽ тебѣ съхраню̀, ꙗ҆́ко т̂ы бж҃е ѕастꙋп́никъ мой е҆си·
Бг҃ъ мой, млс̑҇ть е҆го прд̑евари́т꙽ м̂ѧ, бг҃ъ мой ꙗ҆ви́тъ мн̂ѣ на враѕх̑ѣ мои҆хъ·
Не ѹ҆бі́й и҆хъ, да не когда̀ забꙋ́дꙋтъ законъ твой·
Ражд̑енѝ и҆хъ си́лою твоею̀, и҆ низложи и҆хъ защи́тниче мой г҃и·
Грѣхъ ѹ҆стъ их̑, сло́во ѹ҆стенъ и҆хъ, и҆ ꙗ҆́ти бꙋ́дꙋтъ в꙽ гръдыни своей·
И҆ ѿ клѧ́твы и҆ лжа̀ възвѣстѧтсѧ в кончі́нѣ, въ гнѣвѣ кон꙽чи́ны, и҆ не бꙋ́дꙋтъ·
И҆ ѹ҆вѣдѧт̑ ꙗ҆́ко б҃ъ ѻ҆блада́етъ і҆а́ковомъ, и҆ концы землѧ·
Възвратѧ́тсѧ на́ вечеръ, и҆ взалчютъ ꙗ҆́ко ѱи, и҆ ѻ҆бы́дꙋтъ грд̑а·
Тїи разы́дꙋтсѧ ꙗ҆́сти.
а҆ще ли же не насы́тѧтсѧ, и҆ поропъщꙋтъ·
А҆з же въспою̀ си́лꙋ твою, и҆ възрадꙋюсѧ заѹ҆тра млс̑҇ти твоей·
Ꙗ҆́ко бысть застꙋ́пникъ мой, и҆ прибѣжище мое, в꙽ дн҃ь печа́ли моеа·
Помощникъ мой е҆си, тебѣ пою.
ꙗ҆́ко бг҃ъ застꙋ́пникъ мой е҆си.
бж҃е мой, млс̑҇ть моа̀·
В конецъ, и҆змѣншихъсѧ е҆ще в꙽ столпописа́нїе, двд̑въ, в наказа́нїе, е҆гда зажд̑ежѐ средорѣчїе сѷрїиское и҆ сѷрїа совалъ. и҆ възвратисѧ и҆ѻ҆а́въ, и҆ поразѝ е҆до́ма. въ ю҆доли а҆ло́ни, в҃і, тысꙋщъ· н҃ѳ·
Бе҃ ѿри́нꙋлъ н̂ы е҆си, и҆ низложилъ е҆си нас̑҇, разгнѣвалсѧ е҆си, и҆ ѹ҆щед̑рил̑҇ еси нас̑҇·
Сътрѧ́слъ е҆си зем̑лю, и҆ смꙋтї ю҆̀.
и҆сцѣлѝ съкрꙋше́нїе еа̀, ꙗ҆́ко под̑вижасѧ·
Ꙗ҆́вилъ е҆си лю́демъ своим̑ жестокаа̀, напои́лъ е҆си насъ вино́мъ ѹ҆миле́нїа·
далъ е҆си боѧ́щим꙽сѧ тебе зна́менїе, е҆же ѹ҆бѣжа́ти ѿ лица лꙋкꙋ·
Ꙗ҆́ко да и҆зба́вѧтсѧ възлюбленїи твоѝ, сп҃си десни́цею твоею̀, и҆ ѹ҆слы́ши м̂ѧ·
Бг҃ъ възгл҃а въ ст҃ѣмъ свое́мъ, възра́дꙋюсѧ, и҆ раздѣлю̀ сики́мꙋ, и҆ ю҆долъ жили́щъ размѣрю·
мой е҆сть галаа́дъ, и҆ мой е҆сть манассїи, и҆ е҆фрѣмъ крѣпость главы̀ моеа̀·
И҆ѹ҆́да цр҃ь мой, моа́въ коно́бъ ѹ҆пованїа моего·
На и҆дꙋме́ю прострꙋ̀ сапогъ мой, мнѣ и҆ноплеменници покори́шасѧ·
Кт̂о в꙽ведетъ м̂ѧ въ грд̑а ѻ҆бъстоа́нїа;
и҆ли кт̂о наста́вит꙽ м̂ѧ до ѷдꙋме́ѧ;
не ты ли б҃е ѿрі́нꙋвыѝ насъ;
и҆ не и҆зыдеши бж҃е в силахъ наших̑·
дажд̑ь нам̑ по́мощъ ѿ печали, и҆ сꙋе́тно сп҃се́нїе чл҃чьско·
Ѡ҆́ бз҃ѣ сътворимъ си́лꙋ, и҆ то́и ѹ҆ничижит̑ стꙋжа́ющаѧ нам꙽·
в꙽ конец̑҇ в пѣснех̑ ѱлом̑ двд̑в꙽ ѯ҃·
Ѹ҆слы́ши бж҃е моле́нїе мое, вонмѝ мл҃твѣ мое́й·
ѿ коне́цъ землѧ, к тебѣ въз꙽вахъ, е҆гда ѹ҆ны̀ срд̑це мое, на ка́мень възнесѐ м̂ѧ·
Наста́вилъ м̂ѧ е҆си, ꙗ҆́ко бысть ѹ҆пова́нїе мое, сто́лпъ крѣпости ѿ лица̀ вражїѧ·
Вселюсѧ в꙽ жили́щи твое҆м꙽ в вѣкъ, покры́юсѧ въ кровѣ крилъ твои҆хъ·
ꙗ҆́ко т̂ы б҃е ѹ҆слы́ша мл҃итвы моѧ, далъ е҆си достоа́нїе боѧ́щїмсѧ и́мени твое҆го·
Дн҃ь ѿ дн҃е цр҃е́ви приложи́ши, лѣта его до́ дне ро́да и҆ ро́да·
Пребыва́етъ в꙽ вѣкъ прд̑е бг҃ом̑.
млс̑҇ть и҆ і́стинꙋ е҆го кт̂о в꙽зы́щетъ;
та́ко пою и́мени твое҆мꙋ въ вѣкы, въздати м̂и мл҃твы моа̀ дн҃ь дн҃е·
Сла́ва· В конецъ, ѻ҆ и҆диѳꙋмѣ, ѱлом̑ двд̑въ, ѯ҃а·
Не б҃ꙋ л̂и повинет̑сѧ дш҃а моа̀;
ѿ того б̂о сп҃се́нїе мое·
И҆б̂о то́и бг҃ъ мой, и҆ сп҃съ мой, застꙋ́пникъ мой, не под̑ви́жꙋсѧ паче·
доко́лѣ належитѐ на чл҃ка;
ѹ҆бива́ете вс̂и вы, ꙗ҆́ко стѣнꙋ преклоненꙋ, и҆ плотъ възринове́нъ·
Ѡ҆баче цѣнꙋ мою съвѣща́ша ѿри́нꙋти, теко́шѧ в꙽ жажд̑и·
ѹ҆сты свои́ми блс̑҇вѧ́хꙋ, и҆ срд̑цем꙽ своим̑ кленѧ́хꙋ·
Ѡ҆ба́че бв҃и повинисѧ дш҃е моа̀, ꙗ҆́ко ѿ того̀ трьпѣнїе мое·
И҆бо то́и б҃ъ мой, и҆ сп҃съ мой, застꙋпникъ мой, не подви́жюсѧ·
ѻ҆ б҃зѣ сп҃се́нїе мое, и҆ сла́ва моа·
Бг҃ъ по́мощи моеа̀, и҆ ѹ҆пова́нїе моѐ на́ б҃а.
ѹ҆пова́ите нань весь со́нмъ людїи·
И҆злїа́ите прд̑е нимъ срд̑цѧ ваша, ꙗ҆́ко бг҃ъ помощникъ нашь·
Ѡ҆ба́че сꙋе́тни сн҃ове чл҃чьстїи, лжи́ви сн҃ве члчс̑҇тїи в мѣрилехъ, не ѻ҆пра́вдити тїи ѿ сꙋе́ты в꙽кꙋпѣ·
Не ѹ҆пова̂ите на непра́вдꙋ, и҆ на въсхище́нїе не жела́ите·
Бога́тьство аще течетъ, не прилага́ите срд̑ца·
Є҆ді́ною гл҃а б҃ъ, двое с̂е слы́шахъ.
ꙗ҆́ко дръжа́ва бж҃їа, и҆ твоа̀ г҃и млс̑҇ть·
Ꙗ҆́ко т̂ы въздаси комꙋжд̑о по дѣ́ломъ е҆го·
ѱлом̑ двд̑въ, ѯ҃в.
Внегда̀ быти е҆мꙋ в пꙋстыни и҆ю҆дейстѣи·
Бж҃е, б҃е мой, к тебѣ ѹ҆тренюю·
Възжада тебе дш҃а моа, коль мно́жицею тебѣ плоть моа̀·
в꙽ землѝ пꙋстѣ и҆ непрохо́днѣ и҆ безво́днѣ, та́ко въ ст҃ѣмъ ꙗ҆ви́хъсѧ тебѣ, ви́дѣти си́лꙋ твою, и҆ сла́вꙋ твою·
Ꙗ҆́ко лꙋч́е млс̑҇ть твоа паче животъ, ѹ҆стнѣ моѝ похвали́та т̂ѧ·
Та́ко блс̑҇вѧ т̂ѧ в꙽ животѣ̀ мое́мъ, ѻ҆́ и҆мени твое́мъ въздежꙋ̀ рꙋ́кы моѧ·
Ꙗ҆́ко ѿ тꙋка и масти и҆спо́лнисѧ дш҃а моа̀, и҆ ѹ҆стнѣ ра́дости въсхва́лѧт̑ т̂ѧ ѹ҆ста моа·
А҆́ще поминахъ т̂ѧ на постели моей, на ѹ҆́тренихъ поѹ҆ча́хъсѧ в т̂ѧ·
Ꙗ҆́ко бысть помо́щьникъ мой, и҆ въ кровѣ крилꙋ твоею възра́дꙋю̀сѧ·
Прилпе дш҃а моа̀ по тебѣ, мене же прїатъ десни́ца твоа·
Тїи же всꙋ́е и҆ска́ша дш҃ю мою, в꙽ни́дꙋтъ в꙽ преи҆спод̑нѧа̀ земли·
Предадѧ́тсѧ в рꙋ́кы ѻ҆рꙋжїю, чѧ́сти лисовомъ бꙋдꙋтъ·
Цр҃ь же възвесели́т꙽сѧ ѻ҆ бз҃ѣ, похва́литсѧ всѧкъ кленыѝсѧ и҆мъ·
Ꙗ҆́ко загради́шасѧ ѹ҆ста̀ гл҃ющыхъ непра́вдꙋ·
В конец̑҇ ѱалом̑ двд̑въ, ѯ҃г·
Ѹ҆слы́ши бж҃е глс̑҇а мой, в꙽негда̀ моли́ти ми сѧ к тебѣ·
ѿ страха вра́жїѧ и҆змѝ дш҃ꙋ мою·
Покрыи м̂ѧ ѿ со́нма лꙋка́внꙋю҆щыхъ, ѿ мно́жества дѣ́лающых꙽ неправдꙋ·
и҆же и҆зъѻ҆стрі́шѧ ꙗ҆́ко ѻ҆рꙋжїе ꙗ҆́ѕы́кы своѧ, напрѧгошѧ лꙋкъ свой, вещь го́ркꙋ.
състрѣлѧ́ти в таи́ныхъ непоро́чна, в꙽неза́пꙋ състрѣлѧ́ютъ е҆го, и҆ не ѹ҆боѧт̑сѧ·
ѹ҆тверди́шѧ себѣ сло́во лꙋка́во, повѣдашѧ съкры́ти сѣть·
Рѣша, кт̂о ѹ́зритъ и҆хъ;
и҆спыта́ша безаконїе, и҆зчезо́шѧ и҆спыта́ющеѝ и҆спыта́нїа·
Пристꙋп́итъ чл҃кь, и҆ срд̑це глꙋбоко, и҆ възнесе́тсѧ б҃ъ·
стрѣлы младе́нецъ бы́шѧ ꙗ҆́звы их̑, и҆ і҆знемго́шѧ в нихъ ꙗ҆́ѕы́ци и҆хъ·
Смꙋти́шѧсѧ вс̂и видѧщеѝ и҆хъ, и҆ ѹ҆боа́сѧ всѧ́къ чл҃къ·
И҆ възвѣсти́шѧ дѣла бж҃їа, и҆ творе́нїѧ е҆го разꙋмѣша·
Възвесели́тсѧ правед̑никъ ѻ҆́ г҃ѣ и҆ ѹ҆пова́етъ нань.
и҆ похва́лѧтсѧ вс̂и пра́вїи срд̑цемъ·
Сла́ва· В конецъ, ѱалом̑ пѣснїи двд̑въ. пѣснь и҆е҆ремі́ева, и҆ е҆зекі́илева, людїи прише́лствїа е҆гд̑а хотѧхꙋ и҆ ходи́ти· ѯ҃д·
Каѳ̑҇, ѳ҃·
Тебѣ подоба̀етъ пѣ́снь б҃е в сїѻ́нѣ, и҆ тебѣ възда́стъсѧ млт҃ва въ і҆е҆рс̑҇ли́мѣ·
ѹ҆слы́ши мл҃твꙋ мою, к тебѣ всѧ́ка плоть прїидетъ·
Слоеса́ безако́нникъ премого́ша нс̑҇а, и҆ нече́стїа на́шѧ т̂ы ѻ҆чи́стиши·
блаже́нъ, е҆гоже и҆збра̀, и҆ прї́атъ, всели́ши въ дворы̀ своѧ·
И҆спо́лним꙽сѧ въ бл҃гыхъ до́мꙋ твоего.
ст҃а цр҃к꙽ви твоа, дивна в꙽ пра́вдꙋ·
ѹ҆слы́ши н̂ы б҃е сп҃си́телю нашь, ѹ҆пова́нїе всѣмъ концемъ землѝ, и҆ сꙋщ́имъ в꙽ мо́ри дале́че·
Готоваѧ го́ры крѣпостїю своею, препоѧ́санъ силою, смꙋща́аѝ глꙋбины̀ морскїа̀.
шꙋмꙋ во́лнъ е҆го кт̂о постои́т꙽;
смꙋтѧтсѧ ꙗ҆зы́цы, и҆ ѹ҆боѧ́тсѧ живꙋщеи в концых̑ ѿ зна́менїи твои҆хъ·
И҆схо́ды ѹ҆́трꙋ и҆ ве́черꙋ ѹ҆красиши, посѣтилъ е҆си землю, и҆ ѹ҆поѝ еа̀, ѹ҆мно́жилъ е҆си ѻ҆бога́тити еа̀·
Рѣка́ бж҃їа наплъ́нисѧ водъ·
ѹ҆гото́валъ е҆си пи́щꙋ и҆мъ, ꙗ҆́ко тако е҆сть ѹ҆гото́ванїе, браѕды еа̀ ѹ҆поѝ·
Ѹ҆мно́жи жита еа̀, в꙽ каплѧх̑ еа̀ възвесели́тсѧ въз꙽сїа́ющи·
Блс̑҇ві́ши вѣнецъ лѣтꙋ бл҃гости твоеа̀, и҆ полѧ̀ твоѧ насы́тѧтсѧ тꙋ́ка·
Раз꙽ботѣ́ютъ кра́снаѧ пꙋсты́ни, и҆ радостїю хо́лми препоѧ́шꙋтсѧ·
ѻ҆дѣѧшасѧ ѻ҆внѝ ѻ҆вчїи, і҆ ѹ҆до́лїа ѹ҆мно́жѧтъ пшени́цꙋ, въз꙽зовꙋтъ, и҆бо въспою́тъ·
В конецъ, пѣснь ѱалъма въскресе́нїѧ· ѯ҃е·
Въспо́ите гв҃и вс̂ѧ землѧ, по́йте же и҆́мени е҆го.
дади́те сла́вꙋ хвалѣ е҆го·
Рцѣте б҃ꙋ, коль страшна дѣла твоѧ;
въ мно́жествѣ си́лы твоеа со́лжꙋтъ тебѣ вра́ѕи твоѝ·
Вс̂ѧ землѧ да покло́нит꙽ ти сѧ, и҆ поетъ тебѣ, да пое́тъ же и́мени твое҆мꙋ вы́шне·
Прїидѣте и҆ ви́дите дѣ́ла бж҃їа, ко́ль стра́шенъ в совѣтех̑ паче сн҃овъ члчс̑҇кыхъ·
Ѡ҆браща́ай море в꙽ сꙋшꙋ, в рѣцѣ пройдꙋтъ нога́ми·
т̂ꙋ възвесели́мсѧ ѻ҆ немъ, ѻ҆́блада́ющемꙋ си́лою своею̀ вѣкꙋ·
ѻ҆чи е҆го на ꙗ҆зы́кы призира́етѣ·
Прогнѣвающеѝ да не възно́сѧтсѧ в себѣ·
блс̑҇ви́те ꙗ҆зыцы б҃а на́шего, и҆ ѹ҆слы́шанъ сътвори́те гласъ хвалы е҆го.
поло́жшаго дш҃ꙋ мою в꙽ живо́тъ, и҆ не давшаго в꙽ смѧте́нїе но́гъ мои҆хъ·
Ꙗ҆́ко и҆скꙋси́л꙽ н̂ы е҆си б҃е, ражд̑ежен̂ы, ꙗ҆́коже ражд̑иза́етсѧ сребро̀, в꙽велъ н̂ы е҆си в сѣть·
Положѝ ско́рби на хрептѣ на́шемъ, възведе чл҃ки на главы̀ на́шѧ·
Проидо́хомъ сквозѣ ѻ҆гнь и҆ во́дꙋ, и҆ і҆зведѐ насъ в поко́й·
Вни́дꙋ в домъ твоѝ съ всесъжже́нїемъ.
въздамъ тебѣ мл҃твы моѧ, ꙗ҆́же и҆зреко́ста ѹ҆стнѣ мой, и҆ гл҃ашѧ ѹ҆ста̀ моа в꙽ печали мо́ей.
вс̂есъжже́нїа тꙋчна възнесꙋ тебѣ с кади́ломъ и҆ ѻ҆вны̀, въздамъ тебѣ волы̀ с козлы̀·
Прїидѣте ѹ҆слы́шите и҆ повѣмъ вамъ, всѝ боѧ́щеи́сѧ б҃а, е҆ли́ка сътвори дш҃и моеѝ·
К немꙋ̀ ѹ҆сты̀ мои́ми възвахъ, и҆ възнесохъ пд̑о ꙗ҆́зы́комъ мои҆мъ·
Непра́вдꙋ а҆ще позрѣхъ в꙽ срд̑ци мо́емъ, да не ѹ҆слы́шитъ мене г҃ь·
сего ради ѹ҆слы́ша м̂ѧ бг҃ъ, внѧтъ глс̑҇а моленїѧ моего·
блс̑҇ве́нъ б҃ъ, и҆же не ѻ҆ста́витъ мл҃твꙋ мою, и҆ млс̑҇ть свою ѿ мене·
В конецъ, в꙽ пѣнихъ, ѱало́мъ двд̑въ· ѯ҃ѕ·
Бж҃е ѹ҆щедри н̂ы, и҆ блс̑҇ви́ н̂ы, просвѣти лице твоѐ на ны̀, и҆ поми́лꙋй н̂ы.
позна́ти на землѝ пꙋть твой, въ всѣхъ ѧ҆зы́цехъ сп҃се́нїе твое·
Да и҆сповѣдѧтсѧ тебѣ людїе бж҃е, да и҆сповѣдѧтсѧ тебѣ людїе вс̂и·
да възвеселѧ́тсѧ и҆ възра́дꙋютсѧ ꙗ҆́зы́цы, ꙗ҆́ко сꙋдиши лю́демъ.
правотою, и҆ ꙗ҆ѕы́кы на землѝ наста́виши·
Да и҆сповѣдѧтсѧ тебѣ людїе бж҃е, да и҆сповѣдѧтсѧ тебѣ лю́дїе вс̂и, землѧ дастъ плодъ свой·
блс̑҇вѝ н̂ы б҃е, б҃е нашь, блс̑҇вѝ н̂ы б҃е·
И҆ да ѹ҆боѧт̑сѧ е҆го вс̂и концы зем̑лѧ·
Сла́ва· В конецъ, пѣснїи ѱалом̑ двд̑въ· ѯ҃з·
Да въскрс̑҇нетъ б҃ъ, и҆ разы́дꙋтсѧ враѕи е҆го, и҆ да бѣжатъ ѿ лица е҆го ненави́дѧщей е҆го·
Ꙗ҆ко и҆зчеза́етъ дым̑, да и҆зчезнꙋтъ.
ꙗ҆́ко та́ет꙽ во́скъ ѿ лица ѻ҆гню, та́ко да поги́бнꙋтъ грѣшници ѿ лица̀ бж҃їѧ·
А҆ правед̑ници да възвесѧ́тсѧ, възрадꙋютсѧ прд̑е бг҃ом̑, насладѧ́тсѧ в꙽ весе́лїи·
Въспо́ите б҃ꙋ по́ите и́мени е҆го, пꙋть сътвори́те възшд̑ешемꙋ на за́пады·
г҃ь и҆мѧ е҆мꙋ, и҆ радꙋитесѧ прд̑е ни́мъ·
Смѧтꙋт́сѧ ѿ лица̀ е҆го, ѿц҃а си́рых̑, и҆ сꙋдїа в꙽дови́ц꙽·
Бг҃ъ в мѣстѣ ст҃ѣмъ свое҆мъ·
б҃ъ вселѧ́етъ е҆ді́номысленыа в꙽ домъ, възводѧ̀ ѻ҆кова́ныѧ мꙋжествомъ, такоже прогнѣвающаѧ, живꙋщ́аа въ гробѣхъ·
Бж҃е, е҆гда и҆схожд̑аше прд̑е люд̑мѝ свои́ми, е҆гда мимохожа́ше в꙽ пꙋсты́ни, землѧ потрѧсе́сѧ·
И҆бо нб҃са ка́нꙋша ѿ лица̀ б҃а сїна́ина, ѿ лица б҃а і҆ил҃ева·
До́жд̑ь во́ленъ ѿлꙋчи́ши б҃е достоа́нїю твое҆мꙋ, и҆ і҆знемо́же, ты же съверши ю҆̀·
Живот꙽наѧ твоѧ живꙋтъ на не́й, ѹ҆гото́валъ е҆си блгс̑҇тїю твоею̀ нищемꙋ б҃е·
г҃ь дасть гл҃ъ бл҃говѣствꙋющим̑ си́лꙋ мно́́гꙋ, цр҃ь силъ възлюбленаго, лѣпотою до́мꙋ раздѣли́ти користь·
А҆ще поспитѐ посредѣ предѣлъ, крилѣ̀ голꙋбинѣ посребренѣ, и҆ междора́мїа еа̀ в꙽ блеща́нїи зла́та·
Є҆гда разньстви́тъ нбс̑҇ныи цр҃ѧ на не́й, ѻ҆снѣжа́тсѧ в селмо́нѣ·
Гора бж҃їа, гора тꙋчнаа, гора ѹ҆сы́ренаа, гора тꙋчнаѧ·
Вскꙋ́ю непщꙋе́те горы ѹ҆сы́реныа;
гора ю҆̀же бл҃говоли б҃ъ жити в не́и·
И҆бо г҃ь всели́тсѧ до конца, колесни́ца бж҃їа тмами темъ, ты́сѧщѧ гобзꙋ́ющыхъ·
г҃ь в нихъ в꙽ синаинѣ въ ст҃емъ·
Въз꙽шел꙽ е҆си на высотꙋ̀, плѣнилъ е҆си плѣнъ·
Прїа́лъ е҆си даа́нїе в꙽ чл҃цехъ, и҆бо не покарѧ́ющаа̀сѧ е҆же вселитисѧ·
г҃ь бг҃ъ блс̑҇венъ, блс̑҇венъ г҃ь дн҃ь дн҃е·
Поспѣшитъ намъ б҃ъ сп҃се́нїи нашихъ, б̂ъ нашь, б҃ъ сп҃са́ти, и҆ гн҃ѧ гн҃ѧ и҆сходища смр҃тнаа·
Ѡ҆баче б҃ъ съкрꙋшитъ главы̀ врагъ своих̑, врьхъ власъ преходѧщыхъ в꙽ прегрѣше́них꙽ свои҆хъ·
Рече г҃ь, ѿ васа́на ѻ҆бращꙋ, ѻ҆бращꙋ въ глꙋбинахъ морскых̑.
ꙗ҆́ко да ѻ҆мо́читсѧ нога твоа в꙽ кровѝ, ꙗ҆́зы́къ псовъ твоих̑ ѿ врагъ ѿ него·
Видѣна бы́шѧ шествїа твоа бж҃е, шествїа б҃а мое҆го цр҃ѧ е҆же въ ст҃ем꙽·
Предвари́шѧ кн҃ѕи близъ пою́щих̑, посредѣ дв҃ъ тѷмпа́нницъ·
Въ цр҃квахъ блс̑҇вите б҃а, г҃а ѿ и҆сто́чник̑҇ іил҃евъ·
т̂ꙋ венїами́нь ю́ношѧ въ ѹ҆жасѣ, кн҃ѕи і҆ѹ҆дови влд̑кы и҆хъ, кн҃ѕи завꙋло́ни, кнѧ́ѕи нефѳали́мли·
Заповѣжд̑ь бж҃е си́лꙋ твою, ѹ҆крѣпи бж҃е с̂е, е҆же съдѣла в насъ, ѿ цр҃кви твоеа̀ въ і҆е҆рлс̑҇и́мъ·
Тебѣ̀ принесꙋтъ цр҃їе да́ры, запретѝ ѕвѣремъ тростнымъ·
Со́нмъ ю҆нецъ въ ю́ницѧхъ лд̑юскыхъ, затвори́ти и҆скꙋшеныа сребромъ·
Разрꙋшѝ ꙗ҆́зы́кы хотѧщаѧ бра́немъ·
Прїидꙋтъ молитвеницы ѿ е҆гѷпта, е҆ѳїѻ́пїа прд̑еварѝтъ рꙋка е҆а̀ б҃ꙋ·
Цр҃ьства земна́ѧ по́ите б҃ꙋ, въспо́ите гв҃и·
Възшед̑шемꙋ на́ нб҃о нбс̑҇ное на въсто́кы·
Се̂ дасть гла́сꙋ свое҆мꙋ глс̑҇а си́лы, дади́те сла́вꙋ бв҃и·
На і҆ил҃и велелѣ́пота е҆го, и҆ си́ла е҆го на ѻ҆́блацехъ·
ди́венъ бг҃ъ въ ст҃ых̑ своих̑, б҃ъ і҆ил҃евъ·
То́и дастъ си́лꙋ и҆ дръжа́вꙋ лю́демъ свои҆мъ.
бла́гословенъ бг҃ъ·
Сла́ва· В конецъ, ѱало́мъ дввд̑ъ. ѯ҃и·
Ѡ҆ и҆змѣнших̑сѧ·
Сп҃си м̂ѧ б҃е, ꙗ҆́ко внидоша во́ды до дш҃а моеа̀·
Ѹ҆глѣбох̑ в꙽ тимѣнїа глꙋбины, и҆ нѣсть постоа́нїа.
прїидох̑ въ глꙋбины̀ морскы́а, и҆ бꙋ́рѧ потопѝ м̂ѧ·
Ѹ҆трꙋдих̑сѧ зовы̀, и҆змолче горта́нь мо́и·
И҆зчеѕо́стѣ ѻ҆́чи моѝ, ѹ҆пова́ющꙋ м̂и на́ б҃а мое҆го·
Ѹ҆мно́жишасѧ паче влс̑҇а главы моеа̀, ненави́дѧщеѝ м̂ѧ всꙋе·
Ѹ҆крѣпи́шасѧ враѕи мои, и҆згонѧ́щеѝ м̂ѧ без пра́в꙽ды·
Ꙗ҆́же не въсхищаах̑, тогда въздаѧхъ·
Бж҃е т̂ы ѹ҆вѣдѣ безꙋ́мїе моѐ, и҆ прегрѣше́нїа моѧ ѿ тебе не ѹ҆таи́шѧсѧ·
да не постыдѧтсѧ ѻ҆ мнѣ трьпѧ́щеѝ тебе г҃и, г҃и силъ, ниже посрамѧтсѧ ѻ҆ мнѣ и҆щꙋщеѝ тебе, бж҃е і҆и҆л҃евъ·
Ꙗ́ко тебе ради прїа́хъ поноше́нїе, покры̀ срамота лицѐ мое·
Чю́жь быхъ братїи мое́й, и҆ стра́ненъ сн҃овомъ матере моеа̀·
Ꙗ҆́ко ре́вность до́мꙋ твоего снѣсть м̂ѧ, и҆ поношенїа поно́сѧщих̑ т̂и нападошѧ на́ мѧ·
И҆ покрыхъ посто́мъ дш҃ꙋ мою, и҆ бысть в поноше́нїе мн̂ѣ·
И҆ положих̑ ѻ҆дѣѧнїе мое вретище, и҆ бых̑ и҆мъ в꙽ при́тчю·
Ѡ҆ мнѣ глꙋмлѧ́хꙋсѧ сѣдѧщеѝ въ вратѣх꙽, и҆ ѻ҆ мнѣ поѧ́хꙋ пїющеѝ вино̀·
А҆зъ же мл҃твою моею к тебѣ бж҃е, вре́мѧ бл҃говоленїѧ·
Бж҃е, въ множествѣ млс̑҇ти твоеѧ ѹслыши м̂ѧ·
Въ и҆стинѣ сп҃се́нїа твоего, сп҃си м̂ѧ ѿ бренїѧ, да не ѹ҆глѣбнꙋ·
И҆зба́ви м̂ѧ ѿ ненави́дѧщых̑ м̂ѧ, и҆ ѿ глꙋбо́кых̑ водъ·
да не потопи́тъ мене бꙋ́рѧ вод̑на́ѧ, ниже пожретъ мене глꙋбина, ниже сведетъ ѻ҆ мнѣ ровеникъ ѹ҆стъ свои́х꙽·
Ѹ҆слы́ши м̂ѧ г҃и, ꙗ҆́ко бл҃га млс̑҇ть твоа, по мно́жествꙋ щедро́т꙽ твоих̑ при́зри на мѧ·
Не ѿврати лица твоего ѿ ѻ҆трока твоего, ꙗ҆́ко скорблю̀.
ско́ро ѹ҆слы́ши м̂ѧ, вонмѝ дш҃и мое́й, и҆ і҆зба́ви еа̀·
Врагъ моих̑ ради и҆зба́ви м̂ѧ.
ты̀ б̂о съвѣсѝ поноше́нїе мое, и҆ стꙋд꙽ мой, и҆ срамотꙋ̀ мою·
Пред̑ тобою вс̂и стꙋжа́ющеѝ м̂и, поношенїе прича́ѧ дш҃а моа и страсть·
И҆ ждах̑ и҆же со мною поскорби́тъ, и҆ не бѣ̀.
и҆ ѹ҆тѣша́ющыхъ, и҆ не ѻ҆брѣтохъ·
И҆ дашѧ в снѣдь мою же́лчь, и҆ в жа́жд̑ꙋ мою напои́шѧ м̂ѧ ѻ҆цта̀·
да бꙋ́дет̑ трапе́за их̑ пред̑ ними в сѣть, и҆ въ въздаа́нїе, и҆ в собла́знъ·
Помрачы́тѣсѧ ѻ҆́чи их̑ не ви́дѣти, и҆ хребе́тъ и҆хъ ѿнѫдь слѧцѝ·
Пролѣй на́ нѧ гнѣвъ твой, и҆ ꙗ҆́рость гнѣва твоего пости́гнетъ и҆хъ·
да бꙋ́дет̑ дворъ и҆хъ пꙋстъ, и҆ в жили́щыхъ и҆хъ да не бꙋ́детъ живꙋщаго·
Зане е҆гоже т̂ы поразѝ, тїи погна́шѧ, и҆ к꙽ болѣзни ꙗ҆́звъ моих̑ приложи́шѧ·
Приложи безаконїе къ безако́нїю и҆хъ, и҆ да не вни́дꙋтъ в꙽ пра́вдꙋ твою·
да потребѧ́тсѧ ѡ книгъ живо́тныхъ, и҆ с правед̑ными не напи́шꙋтсѧ·
Ни́щъ и҆ болѧ̀ е҆смь а҆зъ, сп҃се́нїе твое б҃е прїа́тъ м̂ѧ·
Въсхвалю̀ и҆́мѧ б҃а моего с пѣ́снїю, възвели́чю е҆го въ хвале́нїи·
И҆ ѹ҆год̑но бꙋ́детъ б҃ꙋ паче телца̀ ю́на, ро́гы и҆здаю́ща и па́знокти.
да ѹ҆зрѧт̑ ни́щїи, и҆ възвеселѧт̑сѧ·
Взыщате б҃а, и҆ жива бꙋ́детъ дш҃а башѧ·
Ꙗ҆́ко ѹ҆слы́ша ни́щаѧ г҃ь, и҆ ѻ҆кова́ныхъ своих̑ не ѹ҆ничижи́тъ·
да въсхвалѧтъ е҆го нб҃са и҆ землѧ, море, и всѧ живꙋщаѧ в немъ·
Ꙗ҆́ко бг҃ъ сп҃се́тъ сїѻ́на, и҆ съѕи́ждꙋтсѧ гради і҆ю҆де́истїи.
и҆ вселѧтсѧ та́мо, и҆ наслѣдѧтъ и҆̀, и҆ сѣмѧ рабъ твоих̑ ѹ҆дръжит̑ и҆̀·
И҆ любѧщеѝ и́мѧ твое, вселѧтсѧ в немъ·
В конецъ, двд̑въ. в꙽спомина́нїе, въ е҆же сп҃си м̂ѧ г҃и. ѯ҃ѳ·
Бе҃ в꙽ по́мощь мою̀ вонмѝ, г҃и помощи м̂и потщи́сѧ·
да постыдѧ́тсѧ и посрамѧтсѧ и҆щꙋщеѝ дш҃ꙋ мою·
да възвратѧтсѧ в꙽спѧть, и҆ постыдѧтсѧ мы́слѧщеѝ м̂и ѕла́а·
да въз꙽вратѧ́тсѧ а́бїе стыдѧ́щесѧ, гл҃ющеи м̂и, бл҃гоже бл҃гоже·
да възрадꙋютсѧ и҆ възвеселѧ́тсѧ ѻ҆ тебѣ, вс̂и и҆щꙋщеѝ тебе бж҃е·
И҆ гл҃ют̑ вынꙋ, да възвели́читсѧ г҃ь, любѧщеѝ сп҃се́нїе твое·
А́з꙽ же ни́щъ е҆смь и҆ ѹ҆бо́гъ, бж҃е помозѝ м̂и.
помощ꙽никъ мой и҆ і҆зба́витель мой е҆си т̂ы, г҃и не закоснѝ·
Слв̑҇а· ѱлом̑ двд̑въ, сн҃овъ и҆ѻ҆нада́вов̑҇. и҆ пе́рвыхъ плѣнших̑сѧ. неѻ҆пи́санъ ѿ е҆вре́й.·
каѳ̑҇ і҃·
На тѧ г҃и ѹ҆повах̑, да не постыжꙋ́сѧ в꙽ вѣкъ·
Пра́вдою твоею и҆збави м̂ѧ, і҆ измѝ м̂ѧ·
Приклони къ мнѣ ѹ҆хо твое, и сп҃си м̂ѧ·
Бꙋ́ди м̂и в꙽ бг҃ъ защи́титель, и҆ в мѣ́сто крѣпко спасти м̂ѧ·
Ꙗ҆́ко ѹ҆тверженїе моѐ, и҆ прибѣжище моѐ е҆си т̂ы·
Бж҃е мой и҆змѝ м̂ѧ и҆з рꙋкы̀ грѣш꙽наго, и҆з рꙋкы̀ законопрестꙋпнаго, и҆ ѻ҆бидѧщаго·
Ꙗ҆́ко т̂ы е҆си тръпѣнїе мое г҃и, г҃и ѹ҆пованїе мое ѿ ю́ности моеа̀·
В тебѣ ѹ҆твердих̑сѧ ѿ ѹ҆тро́бы, ѿ чрева мт҃ре моеа̀ т̂ы е҆си мой покровитель·
ѻ҆ тебѣ пѣнїе мое вы́нꙋ, ꙗ҆́ко чю́дꙋ бых̑ мно́гымъ.
и҆ ты̀ помощникъ мой крѣпокъ·
да и҆сполнѧтсѧ ѹ҆ста̀ моа̀ похвалы̀, ꙗ҆́ко да въспою сла́вꙋ твою, весь дн҃ь велелѣпотꙋ твою·
Не ѿвръзи мене въ времѧ ста́рости, внегда и҆з꙽чезати крѣпости моей не ѻ҆ста́ви мене·
Ꙗ҆́ко рѣшѧ враѕи моѝ мн̂ѣ, и҆ стрегꙋщеѝ дш҃ꙋ мою совѣща́шѧ в꙽кꙋпѣ, гл҃юще, б҃ъ ѻ҆ста́вилъ е҆сть е҆го.
поженѣте и҆ і҆мѣте е҆го, ꙗ҆́ко нѣсть и҆збавлѧ́аѝ·
Бж҃е мой, не ѹ҆да́лисѧ ѿ мене, б҃е мой в꙽ по́мощ꙽ мою вонмѝ·
да постыдѧ́тсѧ и҆ і҆з꙽че́з꙽нꙋтъ ѻ҆клевета́ющеѝ дш҃ꙋ мою, да ѻ҆блекꙋтсѧ в꙽ стд̑ꙋ и҆ срамъ и҆́щꙋщеѝ ѕла́ѧ мн̂ѣ·
А҆́зъ же всегда ѹ҆пова́ю на́ тѧ, и҆ приложꙋ̀ на всѧ́кꙋ похвалꙋ̀ твою·
Ѹ҆ста̀ моа̀ възвѣстѧ́тъ пра́вдꙋ твою, ве́сь дн҃ь сп҃се́нїе твое·
Ꙗ҆́ко не познах̑ кни́жна, вни́дꙋ в си́лѣ гн҃и.
г҃и помѧнꙋ̀ правдꙋ твою е҆ді́ного·
Бж҃е мой ꙗ҆́же наѹ҆чилъ м̂ѧ е҆си ѿ ю́ности моеа̀, и҆ до нн҃ѣ възвѣщꙋ чюдеса твоѧ, и҆ даже до ста́рости и҆ ма́тор꙽ства·
Бж҃е мой, не ѻ҆ста́ви мене, до́ндеже възвѣщꙋ мы́шцꙋ твою ро́дꙋ всемꙋ грѧдꙋщемꙋ, си́лꙋ твою и҆ пра́вдꙋ твою, б҃е, даже до вы́шних̑, ꙗ҆́же сътвори́лъ м̂и е҆си вели́чїа·
Бж҃е, кто̀ подо́бенъ тебѣ;
е҆ли́кы ꙗ҆́вилъ м̂и е҆си ско́рби мно́гы и҆ ѕлы̀, и҆ ѻ҆бра́щъ ѻ҆живилъ м̂ѧ е҆си, и҆ ѿ безнд̑ъ землѝ възведѐ м̂ѧ·
Ѹ҆мно́жилъ е҆си на мнѣ вели́чествїе твое, и҆ ѻ҆бращъ ѹ҆тѣшилъ м̂ѧ е҆си.
и҆ ѿ безднъ землѝ па́кы възведѐ м̂ѧ·
И҆бо а҆зъ и҆сповѣмсѧ тебѣ в лю́де г҃и, в꙽ сосꙋ́дехъ ѱало́мъскыхъ и́стиннꙋ твою б҃е·
Пою̀ тебѣ в꙽ гꙋ́слех̑, ст҃ыи і҆и҆л҃евъ·
Възра́дꙋетасѧ ѹ҆стнѣ̀ моѝ е҆гда пою̀ тебѣ, и҆ дш҃а моѧ̀ ю҆же е҆си и҆зба́вил꙽·
Є҆ще же и҆ ꙗ҆́зы́къ мой, весь дн҃ь поѹ҆чи́тсѧ пра́вдѣ твоей, е҆гда постыдѧ́тсѧ и҆ посрамѧтсѧ и҆щꙋщеѝ зла́ѧ мн̂ѣ·
Въ соло́монь ѱлом̑ двд̑въ о҃а·
Бе҃, сꙋдъ твой цр҃е́ви дажд̑ь, и҆ правдꙋ твою сн҃ꙋ ц҃ре́вꙋ, сꙋдити лю́демъ твои́мъ в꙽ пра́вдꙋ, и҆ ни́щымъ твоим̑ в сд̑ꙋ·
да въспрїимꙋтъ го́ры ми́ръ людїи, и҆ хо́лми правдꙋ·
Сꙋдитъ ни́щимъ люд̑скымъ, и҆ сп҃се́т꙽ сн҃ы ѹ҆бо́гых̑·
И҆ смиритъ клеветника̀, и҆ пребꙋ́детъ съ сл҃нцемъ, и҆ пре́жде лꙋны̀ ро́да родовъ·
Снидетъ ꙗ҆́ко дожд̑ь на рꙋно̀, и҆ ꙗ҆́ко ка́плѧ ка́плющїа на землю·
Восїа́етъ въ дн҃ехъ е҆го правда, и҆ мно́жество ми́ра, дондеже ѿи́метсѧ лꙋна̀·
И҆ ѻ҆блада́етъ ѿ морѧ до́ морѧ, и҆ ѿ рѣкъ до конецъ вселе́нныа·
Пред̑ ни́мъ припа́даютъ е҆ѳїѻ́плѧне, и вра́ѕи е҆го пръсть поли́жꙋтъ·
Цр҃їе ѳарсїистїи и҆ ѻ́строви да́ры принесꙋтъ·
Цр҃їе а҆ра́в꙽стїи и҆ са́ва да́ры приведꙋтъ·
И҆ покло́нѧтсѧ е҆мꙋ вс̂и цр҃їе зем̑стїи, вс̂и ꙗ҆́ѕы́цы порабо́таютъ е҆мꙋ·
Ꙗ҆́ко и҆зба́ви ни́ща ѿ си́лна, и҆ ѹ҆бо́га е҆мꙋже не бѣ помощника·
Пощади́тъ ни́ща и҆ ѹ҆бо́га, и҆ дш҃а ѹ҆бо́гыхъ сп҃се́тъ·
ѿ ли́хвы и҆ ѿ непра́вды и҆зба́вит̑ дш҃ѧ и҆хъ, и҆ че́стно и́мѧ е҆го пред̑ ни́ми·
И҆ живъ бꙋ́детъ, и҆ дастьсѧ е҆мꙋ ѿ злата а҆равїиска, и҆ помо́лѧтсѧ ѻ҆ нем̑ вы́нꙋ·
Ве́сь дн҃ь блс̑҇вѧ́тъ и҆̀, бꙋ́дет꙽ ѹ҆твеженїе на зем̑лѝ, на ве́рхъ го́ръ·
Превъзнесе́тсѧ паче лѷвана плод̑ е҆го, и҆ процвѣтꙋтъ ѿ града ꙗ҆ко трава земна́а·
Бꙋ́детъ и́мѧ е҆го блс̑҇ве́но въ вѣки, прежд̑е сл҃нца пребыва́етъ и́мѧ е҆го·
и҆ блс̑҇вѧтсѧ ѻ҆ немъ вс̂ѧ колѣна зем̑на́ѧ, вс̂и ꙗ҆́ѕы́цы ѹ҆блажѧ́тъ и҆̀·
блс̑҇ве́нъ г҃ь б҃ъ і҆и҆л҃евъ, творѧ́и чюдеса̀ е҆ді́нъ·
И҆ блс̑҇ве́но и́мѧ сла́вы е҆го, в꙽ вѣкъ, и҆ въ вѣкъ вѣка·
І҆ и҆спо́лънитсѧ сла́вы е҆го вс̂ѧ землѧ.
бꙋ́дет꙽ бꙋ́дет·
Сла́ва·<.>
И҆ зъѻ҆ста́шѧ пѣнїа двд̑ва сн҃а и҆е҆с꙽се́ѻ҆ва.
ѱлом̑ а҆са́фовъ, о҃в·
Ко́ль бл҃гъ б҃ъ і҆ил҃евъ, пра́вым̑ срд̑цемъ·
Мнѣ же в꙽ма́лѣ не подвижѧ́стѣсѧ ноѕѣ, в꙽ма́лѣ не пролїа́шѧсѧ стопы моѧ·
Ꙗ҆́ко възревновахъ на безако́нныѧ, ми́ръ грѣшникомъ зрѧ̀·
Ꙗ҆́ко нѣсть въсклоненїѧ в꙽ смерти и҆хъ, и҆ ѹ҆тверженїе в ра́нѣ их̑·
В трꙋдѣхъ члчс̑҇кыхъ нѣ́ сꙋть, и҆ съ чл҃кы не прїимꙋтъ ра́нъ, сего ради ѹ҆дръжа̀ и҆хъ гръдыни до конца̀·
ѻ҆дѣ́ашѧсѧ непра́вдою и҆ нече́стїемъ свои́мъ, и҆зы́детъ ꙗ҆́ко и҆с тꙋка непра́вда их̑·
Преидо́ша в꙽ любовь срд̑ца, помы́слишѧ и҆ гла҃шѧ в꙽ лꙋка́в꙽ствѣ, непра́вдꙋ в꙽ высотꙋ̀ гл҃аша·
Положи́шѧ на нб҃сѝ ѹ҆ста̀ своѧ, и҆ ꙗ҆́зыкъ их̑ пре́иде по землѝ·
Сего ради ѻ҆братѧ́тсѧ людїе моѝ сѣмо, и҆ дн҃їе и҆сполнь ѻ҆брѧ́щꙋтсѧ в них̑·
И҆ рѣшѧ, како ѹ҆вѣдѣ б҃ъ, и҆ а́ще е҆сть ра́зꙋмъ в꙽ вы́шнемъ;
с̂е сїи грѣшници, и҆ гобзꙋюще в꙽ вѣкъ ѹ҆дръжа́шѧ богат̑ство·
И рх̑ѣ, е҆да всꙋ́е ѻ҆пра́вдихъ срд̑це мое, и҆ ѹ҆мыхъ в непови́нныхъ рꙋцѣ моѝ·
И҆ быхъ ꙗзвенъ весь дн҃ь, и҆ ѻ҆бли́чник꙽ мой на ѹ҆трених̑·
А҆́ще гл҃ахъ повм̑ѣ та́ко, с̂е ро́дꙋ сн҃овъ твоих̑ е҆мꙋже ѻ҆бѣщах̑сѧ и҆ непщевахъ разꙋмѣти·
Се̂ трꙋдъ е҆сть предо мною, до́ндеже вни́дꙋ въ ст҃и́ло бж҃їе, и҆ разꙋмѣю в꙽ послд̑ѣнѧа их̑·
ѻ҆баче за лще́нїа и҆хъ положил̑҇ и҆мъ е҆си ѕлаѧ, низложилъ ѧ҆̀ е҆си в꙽негда разгръдѣти·
Ка́ко бы́шѧ в꙽ запꙋстѣнїе внеза́пꙋ;
и҆зчеѕо́шѧ, погибо́шѧ за безаконїе свое·
Ꙗ҆́ко со́нїе въста́ющаго, г҃и въ градѣ твоем̑ ѻ҆бразъ их̑ ѹ҆ничижи́ши·
Ꙗ҆́ко ражд̑еже́сѧ срд̑це моѐ, и҆ ѹ҆тро́бы моа̀ и҆змѣнишѧсѧ·
И҆ а́зъ ѹ҆ничиженъ, и҆ не разꙋмѣхъ, ско́тенъ бых̑ ѹ҆ тебѐ, и҆ азъ вы́нꙋ с тобою·
Ѹ҆дръжалъ е҆си рꙋ́кꙋ деснꙋю мою, и҆ съ совѣтомъ твои́мъ наста́вилъ м̂ѧ е҆си, и҆ съ сла́вою прїа́тъ м̂ѧ·
Чт̂о б̂о ми е҆сть на нб҃си, и҆ ѿ тебе что̀ въсхотх̑ѣ на зем꙽лѝ;
и҆зчезѐ срд̑це мое и҆ плоть моа, б҃е срд̑ца моего, и҆ часть моѧ б҃е мои въ вѣкы·
Ꙗ҆́ко с̂е ѹ҆далѧ́ющеѝсѧ ѿ тебѐ поги́бнꙋтъ, потребилъ е҆си всѧ́кого любы̀ дѣющаго ѿ тебѐ·
Мнѣ же прилѣплѧ́тисѧ бв҃и бл҃го е҆сть, полага́ти на́ г҃а ѹ҆пованїе мое·
Възвѣсти́ти м̂и вс̂ѧ хвалы̀ твоѧ, въ вратѣх꙽ дщере сїѻ́нѧ·
ра́зꙋма а҆са́фова, ѻ҃г·
Вскꙋю б҃е ѿри́нꙋ до конца, разгнѣвасѧ ꙗ҆́рость твоа на ѻ҆вцѧ̀ па́ствы твоеа̀;
помѧнѝ со́нмъ твой, и҆же стѧжа̀ и҆спе́рва, и҆зба́вилъ е҆си же́злъ достоа́нїа твоего·
Гора сїѻ́нъ с̂и ꙗ҆́же всели́сѧ в ней, въздви́гни рꙋцѣ твоѝ на гръды́нѧ их̑ вконецъ·
Є҆ли́ка лꙋка́внова врагъ въ ст҃ѣмъ твоемъ, и҆ въсхвали́шѧсѧ ненавидѧщеѝ т̂ѧ, посредѣ пра́здника твое҆го·
Положиша ѕна́менїа своѧ зна́менїѧ, и не позна́шѧ, ꙗ҆́ко въ и҆схо́дѣ превы́ше·
Ꙗ҆́ко в꙽ дꙋбра́вѣ дре́вѧнѣ, секи́рами разсѣко́шѧ двери е҆го вкꙋ́пѣ, сѣчивомъ и҆ ѻ҆скордомъ разрꙋшишѧ и҆̀·
Вжего́шѧ ѻ҆гнемъ ст҃и́ло твое, на земли ѻ҆скверни́ша жили́ще и́мени твоего·
Рѣшѧ в꙽ срд̑цых̑ своихъ ю́жикы и҆хъ вкꙋ́пѣ, прїидѣте и҆ ѿста́вимъ всѧ пра́здникы бж҃їа ѿ землѧ·
Зна́менїа и҆хъ не видѣхом̑, нѣсть ктомꙋ̀ прро̑҇ка, и҆ нас̑҇ не позна́етъ ктомꙋ·
доко́лѣ б҃е понашает꙽ врагъ, раздража́етъ проти́вныи и́мѧ твое до конца̀;
в꙽скꙋ́ю ѿвраща́еши рꙋ́кꙋ твою, и҆ десни́цꙋ твою ѿ среды̀ ꙗ҆дръ твоих̑ в коне́цъ;
б҃ъ же цр҃ь нашь прежд̑е вѣкъ, съдѣ́ла сп҃се́нїе посредѣ землѧ·
Ты ѹ҆твердилъ е҆си си́лою твоею̀ море.
ты сте́рлъ е҆си главы змїе́мъ в꙽ водѣ·
Ты̂ съкрꙋшилъ е҆си главꙋ змїе́вꙋ, далъ е҆си того бра́шно лю́демъ е҆ѳїѻ́пскымъ·
Ты̀ растръже и҆сто́чникы и҆ пото́кы, т̂ы и҆ссꙋшѝ рѣки и҆ѳа́м꙽скыа·
Твой е҆сть дн҃ь, и҆ твоа е҆сть но́щъ.
т̂ы съвершѝ зарѧ̀ и҆ сл҃нце·
Ты̂ сътвори вс̂ѧ предѣлы землѝ, лѣто и҆ ве́снꙋ, т̂ы сътворилъ е҆си их̑, помѧнѝ сїа·
Враг꙽ поносѝ гв҃и, и лю́дїе безꙋ́мнїи разрд̑ажишѧ и҆́мѧ твое·
Не преда́жд̑ь ѕвѣре́мъ дш҃ѧ и҆сповѣдающаѧ ти сѧ, дш҃ъ ѹ҆бо́гых̑ твоих̑ не забꙋ́ди до кон̑҇ца·
Призри на завѣтъ твой, ꙗ҆́ко и҆сполнишѧсѧ помраче́нїи землѧ домо́въ непра́ведныхъ·
да не въз꙽врати́т꙽сѧ смиренъ сра́мленъ.
ни́щъ и҆ ѹ҆бо́гъ въсхвалита и́мѧ твое·
Встани б҃е, сꙋди пр̂ю твою, помѧни поноше́нїе твое е҆же ѿ безꙋ́мнаго весь дн҃ь·
Не забꙋ́ди гла́са мл҃твеникъ твоих̑, гръды́ни ненавидѧщыхъ тѧ в꙽зыде вы́нꙋ·
Слв̑҇а· в꙽ конецъ дн҃е растли́ши.
ѱлом̑ пѣ́сни а҆са́фовъ, о҃д·
Исповѣмысѧ тебѣ бж҃е, и҆сповѣмысѧ тебѣ, и҆ призовемъ и́мѧ твое·
Повѣм вс̂ѧ чюдеса твоа, е҆гда прїимꙋ вре́мѧ, а́зъ пра́воты сꙋжд̑ꙋ·
Разтаасѧ зем̑лѧ, и вси живꙋщеѝ на не́й·
А҆зъ ѹ҆твердих̑ столпы̀ еа̀·
Рѣхъ безако́ннꙋющымъ, не безако́ннꙋите.
и҆ съгрѣшѧ́ющым̑, не възноси́те ро́га·
Не въздви́жите на высотꙋ̀ ро́га ва́шего, и҆ не гл҃ите на́ б҃а непра́вдꙋ·
Ꙗ҆́ко ни ѿ сходъ ни ѿ запад̑, ни ѡ пꙋстъ горъ, ꙗ҆́ко б҃ъ сꙋди́и е҆сть·
Сего смирѧ́етъ, и҆ сего възно́ситъ.
ꙗ҆́ко ча́шѧ в рꙋцѣ гн҃и вина̀ нерастворе́на и҆сполнь растворе́нїа, и҆ ѹ҆клонѝ ѡ сеа̀ в сїю, ѻ҆баче дро́ждїе е҆го не и҆скы́дашѧсѧ·
И҆спїю́тъ вс̂и грѣшнїи землѧ, а҆зъ же възрадꙋюсѧ в꙽ вѣкъ, пою̀ б҃ꙋ і҆а́ковлю·
И҆ вс̂ѧ ро́гы грѣшныхъ сломлю̀, и҆ възнесе́тсѧ рогъ пра́веднаго·
В конецъ, в пѣснехъ ѱлом̑ а҆са́фовъ, пѣснь къ а҆ссѷрїю. о҃е·
Вѣдомъ въ і҆ю҆де́ѝ б҃ъ, въ і҆ил҃и велїе и́мѧ е҆го·
И҆ бысть в꙽ ми́рѣ мѣсто е҆го, и҆ жили́ще е҆го в сїѻ́нѣ·
Тꙋ съкрꙋши крѣпости лꙋкъ, щит̑, и҆ ѻ҆рꙋжїе и брань·
Просвѣща́еши т̂ы ди́вно ѿ го́ръ вѣчныхъ, смꙋти́шѧсѧ вс̂и неразꙋ́мнїи срд̑цемъ·
Ѹ҆снꙋшѧ сномъ свои́мъ, и҆ не ѻ҆брѣто́шѧ ничтоже, вс̂и мꙋжїе бога́тьства рꙋ́къ своих̑·
ѿ запрещенїѧ твоего б҃е і҆а́ковль, въздрѣма́шѧ всд̑ѣшеѝ на конѧ·
Ты̂ страшенъ е҆си, и҆ кто проти́вꙋ станетъ т̂и;
ѿтолѣ гнѣвъ твой.
с꙽ нб҃сѐ слы́шанъ сътворилъ е҆си сꙋдъ·
Землѧ̀ ѹ҆боасѧ и҆ ѹ҆молча, в꙽негда въстати на сд̑ꙋ б҃ꙋ, спс̑҇тѝ вс̂ѧ крот꙽кы́ѧ землѝ·
Ꙗ҆́ко помышленїе члчс̑҇ко и҆сповѣстьсѧ тебѣ, и҆ ѻ҆ста́нокъ помышленїѧ пра́зднꙋетъ т̂и·
Помоли́тесѧ и҆ въздади́те гв҃и б҃ꙋ на́шемꙋ, вс̂и и҆же ѻ҆́крестъ е҆го принест̑ꙋ дары страшно́мꙋ и҆ ѿе́млющемꙋ дꙋхы кн҃ѕемъ, страшномꙋ паче цр҃їи земныхъ·
В концъ, ѻ҆ і҆дїѳꙋмѣ, ѱлом̑ а҆са́фовъ, о҃ѕ·
Гла́сомъ моим̑ къ г҃ꙋ възвах̑, гла́сомъ мои к꙽ б҃ꙋ, и҆ внѧт꙽ м̂и·
в꙽ дн҃ь печа́ли моеа б҃а в꙽зысках̑, рꙋка́ма мои́ма но́щїю пре нимъ, и҆ не прелщен꙽ быхъ·
ѿврьжесѧ ѹ҆тѣшитисѧ дш҃а моа̀, помѧнꙋхъ б҃а, и҆ възвеселих̑сѧ·
Въз꙽скорбѣх꙽, и҆ пренемо́же дх҃ь мой·
Предвари́стѣ стражбы ѻ҆́чи моѝ·
Смꙋтих̑сѧ, и҆ не гл҃ах꙽·
Помы́слих̑ дн҃и пе́рвыа, и҆ лѣта вѣчнаѧ помѧнꙋхъ, и҆ поѹ҆чих̑сѧ·
Но́щїю срд̑цемъ мои́мъ глꙋмлѧх̑сѧ, и тꙋжаше дꙋхъ мой·
Є҆да въ вѣкы ѿри́нет̑ г҃ь, и҆ не приложитъ бл҃говолити па́кы, и҆ли до конца млс̑҇ть свою ѿсѣчет̑;
сконча гл҃ы ѿ рода в родъ·
Є҆да забꙋдетъ ѹ҆щедрити б҃ъ, и҆ли ѹ҆дръжит̑ въ гнѣвѣ свое́мъ щедро́ты своа;
и рѣхъ, нн҃ѣ начахъ.
си и҆змѣна десни́ца вы́шнѧго·
Помѧнꙋхъ дѣла гн҃ѧ.
ꙗ҆́ко помѧнꙋ̀ ѿ зачала чюдесъ твоих̑, и҆ поѹ҆чюсѧ въ всх̑ѣ дѣлех̑ твоих̑, и҆ в начинаних̑ твои́хъ поглꙋмлюсѧ·
Бж҃е, въ ст҃емъ пꙋть твой·
Кт̂о б҃ъ ве́лїи, ꙗ҆́ко б҃ъ нашъ;
т̂ы е҆си б҃ъ творѧ́ѝ чюдеса̀·
Позна́нꙋ сътворил̑҇ е҆си в лю́дехъ си́лꙋ твою, и҆зба́вилъ е҆си мы́шцею твоею лю́ди твоѧ, сы́ны і҆а́ковлѧ, и҆ і҆ѻ́сифовы·
Видѣша т̂ѧ во́ды б҃е, видѣшѧ т̂ѧ во́ды, и҆ ѹ҆боа́шѧсѧ·
Смꙋти́шѧсѧ бе́з꙽дны, мно́жествомъ шꙋма водъ.
глс̑҇а да́шѧ ѻ҆́блацы·
И҆бо стрѣ́лы твоѧ прехо́дѧтъ глс̑҇а грома твоего в колеси·
ѻ҆свѣти́шѧ млънїа твоа вселе́ннꙋю, подвижасѧ, и трепет꙽на бысть землѧ·
В мо́ри пꙋтїе твоѝ, и стезѧ твоѧ в꙽ водах̑ мно́гах꙽, и҆ стопы твоѧ не позна́ютсѧ·
Наставил̑҇ е҆си ꙗ҆́ко ѻ҆вцѧ люди твоѧ, рꙋко́ю моѷсе́ѻвою и҆ а҆а҆ро́нею·
Слв̑҇а. ра́зꙋм꙽ а҆са́фовъ, о҃з·
кѳ̑҇а а҃і·
Внемлѣте лю́дїе моѝ зако́нъ мой, приклони́те ѹ҆хо ва́ше въ гл҃ы ѹ҆стъ мои́хъ·
ѿвръзꙋ въ притчѧх̑ ѹ҆ста̀ моа, провѣща́ю гана́нїа и҆спе́рва, е҆ли́ка слы́шахомъ, и҆разꙋмѣхомъ ѧ҆̀, и҆ ѿц҃ы на́ши повѣдаша намъ.
не ѹ҆таи́сѧ ѿ чѧдъ и҆хъ в род꙽ и́нъ·
Възвѣща́юще хвалы гн҃ѧ, и҆ си́лы е҆го, и҆ чюдеса е҆го ꙗ҆́же сътвори.
и҆ възд̑ви́же свд̑ѣнїе въ і҆а́ковѣ, и҆ закон̑҇ положѝ въ і҆ил҃и·
Є҆ли́ка заповѣда ѿц҃емъ на́шимъ, сказа́ти ѧ҆̀ сн҃овом̑ свои́мъ, ꙗ҆́ко да позна́етъ родъ и́н꙽, сн҃ве родѧщеѝсѧ, и҆ въста́нꙋтъ и҆ повѣдѧтъ ѧ҆̀ сн҃вомъ свои҆м꙽·
Ꙗ҆́ко да поло́жѧтъ на́ б҃а ѹ҆пова́нїе своѐ, и҆ не забꙋ́дꙋтъ дѣлъ бж҃їих̑, и҆ за́повѣди е҆го в꙽зы́щꙋтъ·
Ꙗ҆́ко да не бꙋ́дꙋт꙽ ꙗ҆́коже ѿц҃ы и҆хъ, родъ стропти́въ и҆ прегръчева́а, род̑ и҆же не и҆спра́ви срд̑ца свое҆го, и҆ не ѹ҆вѣ́ри съ бм҃ъ дх҃а свое҆го·
Сн҃ове е҆фрѣмли напрѧза́юще и҆ спѣюще лꙋкы, въз꙽врати́шѧсѧ в꙽ дн҃ь бра́ни·
Не съхрани́шѧ завѣта бж҃їа, и҆ в законѣ е҆го не и҆зволиша ходи́ти·
И҆ забыша бл҃годѣѧнїи е҆го и҆ чюде́съ е҆го, и҆́хъже ꙗ҆́вѝ и҆мъ.
пред̑ ѿц҃ы их̑ ꙗ҆́же сътворѝ чюдеса̀, в꙽ землѝ е҆гѵ́пет꙽стѣй, на́ поли танеѻ́си·
Разве́рзе мо́ре, и҆ проведѐ их̑, пред̑ста́ви во́ды ꙗ҆́ко мх̑ѣ·
И҆ наста́ви ѧ҆̀ ѻ҆́блакомъ въ дн҃е, и҆ всю̀ нощъ просвѣще́нїем̑ ѻ҆гнѧ̀·
Разве́рзе ка́мень в꙽ пꙋсты́ни, и҆ напои и҆хъ ꙗ҆́ко в꙽ без꙽днѣ мно́ѕѣ·
И҆ і҆зведе во́дꙋ и҆с ка́мене, и҆ низведѐ ꙗ҆ко рѣкы во́ды.
и҆ приложи́шѧ е҆ще съгрѣшѧ́ти е҆мꙋ·
Прегръчи́шѧ вышнѧго в꙽ безводнѣ, и҆ іскꙋси́шѧ б҃а в꙽ срд̑цых̑ свои́х꙽, въспроси́ти бра́шна дш҃ѧмъ свои́мъ·
И҆ клевета́шѧ на́ б҃а, и҆ рѣшѧ.
е҆да възмо́жетъ б҃ъ ѹ҆гото́вати трапе́зꙋ в꙽ пꙋсты́ни;
понеже поразѝ ка́мень, и҆ потеко́шѧ воды, и҆ пото́цы навод̑ни́шѧсѧ·
Є҆да и҆ хлѣбъ мо́жет̑ да́ти, и҆ли ѹ҆готовати трапе́зꙋ лю́демъ свои́мъ;
сего ради слы́ша б҃ъ и҆ презрѣ, и҆ ѻ́гнь възгорѣсѧ въ і҆а́ковѣ, и҆ гнѣв꙽ в꙽зы́де на і҆ил҃ѧ·
Ꙗ҆́ко не вѣ́ровашѧ бв҃и, ни ѹ҆пова́ша на сп҃се́нїе е҆го·
И҆ заповѣда ѻ҆блакомъ свы́ше, и҆ двери нб҃сѐ ѿве́рзе·
И҆ ѻ҆дожди и҆мъ ма́ннꙋ ꙗ҆сти, и҆ хлѣбъ нбс̑҇ный дасть и҆м꙽·
Хлѣбъ а҆́гг҃льскїи ꙗ҆дѐ чл҃къ, бра́шно посла̀ и҆мъ до ѻ҆билїа·
Възд̑ви́же ю҆гъ с꙽ нб҃сѐ, и҆ наведѐ си́лою своею ли́вꙋ, и҆ ѻ҆дождѝ на́ нѧ ꙗ҆́ко прах̑ плоти, и҆ ꙗ҆́ко песо́къ морскїи пти́цѧ перна́ты, и҆ нападо́шѧ посредѣ ста́на и҆хъ, ѻ҆́крестъ жили́щъ и҆хъ·
И҆ ꙗ҆до́шѧ, и҆ насы́тишѧсѧ ѕѣло.
и҆ жела́нїе и҆хъ принесѐ и҆мъ, не лиши́шѧсѧ ѿ жела́нїи своих̑·
Є҆ще бра́шнꙋ сꙋщꙋ въ ѹ҆стѣхъ и҆хъ, и҆ гнѣвъ бж҃їи взыде на нѧ·
И҆ ѹ҆бѝ мно́жайшаѧ и҆хъ, и҆ и҆збра́ннымъ і҆ил҃евомъ запѧтъ·
Въ всѣхъ сихъ съгрѣши́шѧ е҆ще, и҆ не вѣ́роваша чюдесемъ е҆го·
И҆ і҆зчеѕо́шѧ в сꙋе́тѣ дн҃їе и҆хъ, и҆ лѣта и҆х꙽ съ тща́нїемъ·
Є҆гда ѹ҆бива́ше их̑, тогда в꙽зыска́хꙋ е҆го.
и҆ възвраща́ахꙋсѧ, и҆ ѹтреневахꙋ к꙽ б҃ꙋ·
И помѧнꙋшѧ, ꙗ҆ко б҃ъ помощникъ и҆мъ е҆сть, и҆ б҃ъ вы́шнїи и҆зба́витель и҆мъ е҆сть·
И҆ възлюби́шѧ е҆го ѹ҆сты̀ свои́ми, и҆ ꙗ҆зы́комъ свои҆мъ солга́шѧ е҆мꙋ·
Срд̑це же и҆хъ не бѣ̀ пра́во с нимъ, ни ѹ҆вѣ́ришѧсѧ в завѣтѣ е҆го,<.>
То́иже е҆сть ще́дръ, и҆ ѻ҆ци́ститъ грѣхы их̑, и҆ не растлитъ.
и҆ ѹ҆множитъ въз꙽врати́ти ꙗ҆рость свою, и҆ не ражд̑еже́т꙽ всего гнѣва своего·
И҆ помѧнꙋ ꙗ҆́ко плоть сꙋть, дх҃ъ ходѧ и҆ не ѻ҆браща́асѧ·
Коль краты прогнѣвашѧ и҆̀ в꙽ пꙋсты́ни, раздра́жишѧ и҆̀ в꙽ земли без꙽во́днѣ;
и҆ ѻ҆брати́шѧсѧ, и҆ і҆скꙋси́шѧ б҃а, и҆ ст҃го і҆ил҃ева прогнѣваша·
И҆ не помѧнꙋша рꙋкы е҆го дн҃е, воньже изба́ви и҆хъ и҆з рꙋкы̀ ѻ҆скръблѧ́ющаго·
Ꙗ҆́коже положи въ е҆гѷптѣ ѕна́менїѧ своѧ, и҆ чюдеса̀ своѧ на́ поли танеѻ́си·
И҆ преложи в꙽ кро́вь рѣкы их̑, и҆ и҆сто́чникы и҆хъ, ꙗ҆ко да не пию́т꙽·
Посла̀ на́ нѧ пе́сїа мꙋхы, и҆ поѧдо́шѧ ихъ.
и҆ жѧ́бы, и҆ растлѝ и҆хъ·
И҆ дастъ ржѣ плодъ и҆хъ, и҆ трꙋды̀ и҆х꙽ прꙋгомъ·
И҆ ѹ҆бѝ градо́мъ виногра́ды и҆хъ, и҆ трънїе и҆хъ мра́зомъ.
и҆ преда́сть градꙋ̀ скоты̀ их̑, и і҆мѣнїе их̑ ѻ҆гню̀·
Посла̀ на́ нѧ гнѣвъ ꙗ҆́рости своеа̀, ꙗ҆́рость и҆ гнѣвъ и҆ ско́рбь, посла́нїе а҆́гг҃лы лꙋка́выми·
Пꙋть сътвори́ти стезю гнѣвꙋ своемꙋ, и҆ не пощадѣ ѿ смр҃ти дш҃ѧ и҆хъ и҆ скоты̀ и҆хъ в꙽ смр҃ти затворѝ·
И҆ порази всѧк̑҇ пръвенецъ в꙽ землѝ е҆ги́петъстѣи, ѿ начатка всѧ́кого трꙋда̀ и҆хъ, в селе́них̑ ха́мовых̑·
И҆ въздви́же ꙗ҆́ко ѻ҆в꙽цѧ̀ лю́ди своѧ, и възведѐ ѧ҆̀ ꙗ҆́ко ста́до в꙽ пꙋсты́ни·
И҆ наста́ви ѧ҆̀ на ѹ҆пованїе, и҆ не ѹ҆страши́шѧсѧ, и҆ врагы̀ и҆хъ покры̀ мо́ре·
И҆ введѐ ѧ҆̀ в꙽ горꙋ ст҃нѧ своеа, гора̀ с̂и, ю҆же стѧжа̀ десни́ца е҆го·
И҆ і҆згна̀ ѿ лица̀ и҆хъ ꙗ҆́ѕы́ки, и҆ по жребїю дастъ и҆мъ ю́жемъ дѣло мѣрномъ.
и҆ вселѝ в селехъ их̑ колѣна і҆ил҃ева·
И҆ і҆скꙋси́ша, и҆ прогнѣвашѧ б҃а вы́шнѧго, и҆ свѣдѣнїа е҆го не съхрани́ша·
И҆ ѻ҆брати́шасѧ, и҆ ѿверго́шасѧ, ꙗ҆́коже и҆ ѿц҃ы их̑, преврати́шѧсѧ в꙽ лꙋкъ развращенъ·
И҆ прогнѣвашѧ и҆̀ в꙽ холмѣхъ своих̑, и҆ въ и҆стꙋка́нныхъ своих̑ раздражишѧ и҆̀·
Слы́ша б҃ъ, и҆ презрѣ, и҆ ѹ҆ничижѝ ѕѣло і҆ил҃ѧ·
И҆ ѿри́нꙋ ски́нїю силом꙽скꙋю, селе́нїе е҆же всели́сѧ в꙽ чл҃цехъ·
И҆ предастъ в꙽ плѣнъ крѣпость и҆хъ, и҆ добро́тꙋ их̑ в рꙋ́кы враго́мъ·
И҆ затворѝ въ ѻ҆рꙋжїи люди своѧ, и҆ достоа́нїе своѐ презрѣ·
ю҆ношѧ и҆хъ поꙗ҆́сть ѻ́гнь, и҆ дв҃ы их̑ не ѻ҆сѣтоганы быша·
Сщ҃енницы их̑ ѻ҆рꙋжїемъ падошѧ, и҆ вдови́цѧ и҆хъ не ѻ҆пла́каны бышѧ·
И҆ въста̀ ꙗ҆́ко спѧ̀ г҃ь, ꙗ҆ко си́ленъ и҆ шꙋменъ ѿ вина̀·
И҆ поразѝ врагы̀ своѧ в꙽спѧть, поноше́нїе вѣ́чно дастъ и҆хъ·
И҆ ѿри́нꙋ селе́нїе і҆ѻ́сифово, и҆ колѣно е҆фрѣмово не и҆збра̀·
И҆ і҆збра̀ колѣно і҆ю́дово, го́рꙋ сїѻ́ню, ю́же възлюбѝ·
И҆ созда̀ ꙗ҆́ко и҆норо́гъ ст҃ы́ню свою̀, на землѝ, ѻ҆снова̀ ю҆̀ в꙽ вѣкъ·
И҆ і҆збра̀ дв҃да раба̀ свое҆го, и҆ въспрїат̑ и҆̀ ѿ стадъ ѻ҆́вчих̑·
ѿ дои́лицъ поѧ́тъ е҆го, пастѝ і҆а́кова раба̀ свое҆го, і҆и҆л҃ѧ достоа́нїе свое·
И҆ ѹ҆пасѐ их̑ в незло́бїи срд̑ца своего, и҆ в ра́зꙋмѣхъ рꙋкꙋ своею̀ наставилъ и҆хъ е҆сть·
Слв̑҇а· ѱлом̑ а҆са́фовъ, ѻ҃и·
Бе҃, прїидо́ша ꙗ҆́ѕы́цы в꙽ достоѧ́нїе твое, ѻ҆скверни́шѧ цр҃ковь ст҃ꙋю твою·
Положи́ша і҆ерс̑҇ли́ма ꙗ҆ко ѻ҆во́щное храни́лище, положишѧ трꙋпїа рабъ твоих̑ бра́шно пти́цамъ нбс̑҇ным̑, плоти прпд̑бных̑ твои́хъ ѕвѣремъ земнымъ·
пролїа́ша кровь и҆хъ ꙗ҆́ко во́дꙋ ѻ҆́крестъ і҆ерс̑҇ли́ма, и҆ не бѣ погреба́аѝ·
Бы́хомъ поноше́нїе съсѣдомъ на́шимъ, подража́нїе и҆ порꙋганїе сꙋщымъ ѻ҆́крстъ нас̑҇·
доко́лѣ г҃и прогнѣваешисѧ до конца, ражд̑еже́тсѧ ꙗ҆́ко ѻ҆́гнь рвенїе твое;
пролѣи гнѣвъ твой на ꙗ҆ѕы́кы не зна́ющаѧ̀ тебе, и҆ на црс̑҇твїѧ ꙗ҆́же и́мени твое҆го не призваша·
Ꙗ҆́ко поꙗ҆́до́ша і҆а́кова, и҆ мѣсто е҆го ѻ҆пꙋсти́ша·
Не помѧнѝ на́шихъ безако́нїй пе́рвыхъ·
Ско́ро да пред̑варѧтъ н̂ы щедро́ты твоѧ г҃и, ꙗ҆́ко ѻ҆бнищахомъ ѕѣло·
Помозѝ нам̑ б҃е сп҃си́телю нашъ·
Славы ради и҆́мени твое҆го г҃и и҆змѝ насъ·
И҆ ѻ҆цысти грѣхы на́шѧ, ради и҆́мени твое҆го·
да не когда рекꙋтъ ꙗ҆́ѕы́цы, гдѣ̀ е҆сть б҃ъ и҆хъ;
и҆ ѹ҆вѣстьсѧ въ ꙗ҆́ѕы́цех̑ пред̑ ѻ҆́чима нашима, ѿмщенїе кро́ве рабъ твоих̑ пролиты́ѧ·
да вни́детъ пред̑ т̂ѧ въздыха́нїе ѻ҆кованыхъ·
По вели́чїю мышца твоеа, снабдѝ сн҃ы ѹ҆мр҃щве́ных̑·
Възда́жд̑ь съсѣдомъ нашымъ сед̑мори́цею в꙽ нѣдра и҆хъ поноше́нїе и҆хъ, и҆́мже поноси́ша т̂ѧ г҃и·
Мы же людїе твоѝ, и҆ ѻ҆вца па́жити твоеа̀·
И҆сповѣмысѧ тебѣ б҃е в꙽ вѣкъ, в родъ и҆ ро́дъ възвѣстім̑ хвалꙋ твою·
В конецъ, ѻ҆ и҆змѣншихсѧ свѣдѣнїе, а҆са́фово, ѱлом̑ ѻ҆ а҆ссѷрїи ѻ҃ѳ·
Пасы́и і҆ил҃ѧ вонмѝ, наставлѧ́аѝ ꙗ҆́ко ѻ҆вча̀ і҆ѻ́сифа·
Сѣдѧѝ на херꙋві́мѣ ꙗ҆ви́сѧ, пред̑ е҆фрѣмомъ, и҆ венїами́номъ и҆ мана сїемъ·
Въз꙽дви́гни си́лꙋ твою, и҆ прїидѝ спастѝ насъ·
Бж҃е ѻ҆брати н̂ы, и҆ просвѣтѝ лице твое, и҆ сп҃се́мсѧ·
г҃и б҃е сил꙽, доко́лѣ гнѣ́ваешисѧ на мл҃твꙋ ра́бъ твоих̑;
пита́еши насъ хлѣбомъ слезным꙽, и҆ пои́ши насъ слеѕъ в мѣ́рꙋ·
положилъ е҆си насъ в꙽ прерѣканїе съсѣ́дом̑ на́шымъ, и҆ вра́ѕи на́ши подражаша насъ·
г҃и б҃е силъ ѻ҆братѝ н̂ы, и҆ просвѣтѝ лице твое, и҆ сп҃се́ни бꙋдем꙽·
Виноградъ и҆зъ е҆гѷпта пренесѐ, и҆з꙽гналъ е҆си ꙗ҆́ѕы́ки, и҆ насадилъ е҆си и҆̀·
пꙋть сътворилъ е҆си пред̑ ни́мъ, и҆ насади коренїа е҆го, і҆ и҆сполни землю·
Покры̀ го́ры сѣнь е҆го, и҆ сте́блїа е҆го ке́дры бж҃їа·
Про́стретъ ро́зги е҆го до́ морѧ, и҆ да́же до рѣкъ ѿрасли е҆го·
Вскꙋ́ю разорѝ ѻ҆пло́тъ е҆го, и҆ ѻ҆бъи҆маютъ и҆̀ вс̂и мимоходѧ́щеѝ пꙋтемъ;
ѻ҆зоба̀ и҆̀ ве́прь ѿ лꙋга, і҆ и́нокъ ди́вїи поѧ́лъ и҆̀ е҆сть·
Бж҃е силъ ѻ҆брати же, и҆ призри съ нб҃се, и҆ ви́жд̑ь·
И҆ посѣтѝ виноградъ сеи, и҆ свершѝ е҆го.
е҆гоже насади десни́ца твоа̀·
И҆ на сн҃ы чл҃чьскыа, ꙗ҆́же ѹ҆крѣпилъ е҆си себѣ.
пож꙽женъ ѻ҆гнемъ и҆ раско́панъ·
ѿ запрѣщенїѧ лица твоего погы́бнꙋт꙽·
Бꙋди рꙋка̀ твоа̀ на́ мꙋжа десни́ца твоѧ, и҆ на́ сн҃а чл҃ча е҆гоже ѹ҆крѣпилъ е҆си себѣ.
и҆ не ѿстꙋпимъ ѿ тебе, живи́ши н̂ы, и҆ і́мѧ твое призовемъ·
г҃и бж҃е силъ ѻ҆братѝ н̂ы, и҆ ꙗ҆́вѝ лице твое, и҆ сп҃се́ни бꙋдемъ·
В конец꙽, ѻ҆ точи́лех̑, ѱлом̑ пѣснїи а҆са́фов꙽, п҃·
Радꙋитесѧ б҃ꙋ помощникꙋ на́шемꙋ, въскли́кнѣте б҃ꙋ і҆а́ковлю·
Прїимѣте ѱлом̑, и҆ дади́те тѷмпанъ, ѱал꙽ты́рь красе́нъ съ гꙋ́сльми·
Въз꙽трꙋби́те новомѣсѧчною трꙋбою, в наро́читыи дн҃ь пра́зд̑ника ва́шего·
Ꙗ҆́ко повелѣ́нїе і҆ил҃ево е҆сть, и сд̑ꙋба̀ б҃а і҆а́ковлѧ·
свѣдѣнїе въ і҆ѻ́сїфѣ положѝ е҆мꙋ, в꙽негда и҆зыти е҆мꙋ ѿ землѧ̀ е҆ги́петскыа·
Ꙗ҆́зы́ка е҆гоже не вѣ́дѧше, ѹ҆слыша, ѿѧ́тъ ѿ бремене хребе́тъ е҆го·
Рꙋцѣ е҆го в꙽ кошѝ порабо́тастѣ, в скорби призва̀ м̂ѧ и҆ і҆збавих̑ т̂ѧ·
ѹ҆слы́шах̑ тѧ в та́инѣ бꙋр꙽нѣ·
И҆скꙋсих̑ т̂ѧ на водѣ̀ прерѣка́нїа·
Слы́шите людїе моѝ, и҆ засвд̑ѣтельствꙋю вам̑·
І҆ил҃ю а҆́ще послꙋшаеши мене, не бꙋ́дет̑ в тебѣ б҃ъ новъ, ниже покло́нїшисѧ бо́гꙋ чюже́мꙋ·
А҆́зъ б̂о е҆смь г҃ь бг҃ъ твои, и҆зведы́ѝ т̂ѧ ѿ землѧ̀ е҆гѷпет̑скыѧ·
Разши́ри ѹ҆ста̀ твоѧ, и҆ і҆спо́лню ѧ҆̀·
И҆ не послꙋшашѧ людїе моѝ гласа мое҆го, и҆ і҆ил҃ь не внѧт̑ м̂и·
И҆ ѿпꙋстих̑ и҆хъ по начина́нїю срд̑цъ их̑, поидꙋтъ в꙽ начина́них̑ своих̑·
А҆ще бы́шѧ людїе мои послꙋшали мене, і҆ил҃ь а҆́ще б̂ы в꙽ пꙋтѝ моа ходилъ, ни ѻ҆ чесо́мьже ѹ҆бо врагы̀ е҆го смирилъ быхъ, и҆ на стꙋжа́ющаа и҆мъ възложилъ бым̑ рꙋ́кꙋ мою·
Вра́ѕи гн҃и сълга́ша е҆мꙋ, и҆ бꙋ́детъ времѧ их̑ в꙽ вѣкъ·
И҆ напита и҆хъ ѿ тꙋка пшени́чна, и҆ ѿ ка́мене меда насы́ти и҆хъ·
Сла́ва, ѱлом̑, а҆сафовъ, п҃а·
Бг҃ъ ста̀ в сонмѣ бого́въ, посредѣ же бого́въ разсꙋ́дит̑·
доко́лѣ сꙋ́дите неправдꙋ, и҆ лицъ грѣшничь ѻ҆бинꙋетесѧ;
сꙋди́те си́рꙋ и҆ ѹ҆богꙋ, смире́на и҆ нища ѻ҆правдайте·
И҆з꙽мѣте ни́ща и ѹ҆бога, и҆з рꙋкы̀ грѣшнича и҆зба́вите и҆̀·
Не ѹ҆вѣдѣша ниже разꙋмѣшѧ, въ тмѣ̀ хо́дѧт̑·
да подви́жѧтсѧ вс̂ѧ ѻ҆снова́нїа зем̑лѝ·
А҆́зъ рѣхъ, бо́ѕи бꙋ́дѣте и҆ сн҃ве вы́шнѧго вс̂и.
вы же ꙗ҆́ко чл҃цы ѹ҆мира́ете·
и҆ ꙗ҆́ко е҆ді́нъ ѿ кнѧѕь па́даете·
Въскрс̑҇ни б҃е сꙋдѝ землѝ, ꙗ҆́ко ты наслѣдиши въ всѣхъ ꙗ҆́ѕы́цех̑·
Пѣснь ѱа́лма аса́фова п҃в·
Бж҃е, кт̂о ѹ҆подо́битсѧ тебѣ;
не премолчѝ, ни ѹ҆кротѝ б҃е·
Ꙗ҆́ко с̂е вра́ѕи твоѝ възшꙋмѣша, и҆ ненави́дѧщеѝ т̂ѧ въздвиго́шѧ главꙋ.
на́ люди тво ѧ лꙋка́вновашѧ во́лею, и҆ съвѣщаша на ст҃ы́а твоѧ·
Рѣша, прїидѣте, и҆ потребимъ ѧ҆̀ ѿ ꙗ҆́зы́къ, и҆ не помѧне́тсѧ и́мѧ і҆ил҃ево ктомꙋ·
Ꙗ҆́ко съвѣща́шѧ е҆ді́номышле́нїемъ в꙽кꙋпѣ, на́ тѧ завт̑ѣ завѣщашѧ·
Селе́нїа и҆дꙋме́йска, и҆ і҆смаилите, моа́въ, и҆ а҆гарѣне.
гевалъ, и҆ а҆м꙽мо́нъ, и҆ а҆мали́к꙽.
и҆ноплеме́нницы съ живꙋщими в тѷрѣ·
И҆́бо и҆ а҆ссꙋръ прїиде с ни́ми, бышѧ в꙽ застꙋпле́нїе сн҃во́мъ лотовомъ·
Сътворѝ и҆м꙽ ꙗ҆́ко мадїа́мꙋ, и҆ сиса́рѣ, ꙗ҆́ко и҆а҆ві́мꙋ в꙽ потоцѣ ки́ссовѣ·
Потреби́шасѧ въ а҆ендо́рѣ, быша ꙗ҆́ко гной зем̑ныѝ·
Положи кн҃ѕѧ и҆хъ ꙗ҆́ко ѻ҆ри́ва и҆ зи́ва и҆ зиве́е и҆ салмана, вс̂ѧ кн҃ѕѧ их̑, и҆же рѣшѧ, да наслѣдимъ себѣ ст҃и́ло бж҃їе·
Бж҃е мой положи их̑ ꙗ҆́ко коло, ꙗ҆́ко трость пред̑ лице́мъ вѣтрꙋ·
Ꙗ҆́ко ѻ҆гнь попалѧаѝ дꙋбра́вы, ꙗ҆́ко пламень пожига́аѝ го́ры.
тако пожене́ши ѧ҆̀ бꙋ́рею твоею̀, и҆ гнѣвомъ твои́мъ смꙋти́ши ѧ҆̀·
И҆спо́лни лицѧ̀ и҆хъ безче́стїа, и҆ в꙽зы́щꙋтъ и҆́мени твое҆го г҃и·
да постыдѧтсѧ, и҆ смѧтꙋт꙽сѧ въ вѣкъ вѣка, и҆ посрамѧ́тсѧ, и҆ поги́бнꙋтъ·
И҆ ѹ҆вѣдѧтъ, ꙗ҆́ко и҆́мѧ тебѣ г҃ь, т̂ы е҆ді́нъ вы́шнїи по все́й землѝ·
В конецъ, ѻ҆ точи́лех̑, сн҃овъ коре́ѻв꙽, ѱлом̑, п҃г·
Ко́ль възлюбленна се́ла твоа, г҃и силъ·
Желаетъ и҆ скон꙽чева́етсѧ дш҃а моа въ дворы̀ гн҃ѧ·
Срд̑це мое и҆ плоть моа възрадовастасѧ ѻ҆́ бѕ҃ѣ живѣ·
Ибо птица ѻ҆брѣте себѣ хра́минꙋ, и҆ го́рьлица гнѣздо себѣ, идѣже положи птенцѧ своа·
ѻ҆лтарѧ твоа г҃и силъ, цр҃ю мой и҆ б҃е мой·
Блаже́ни живꙋщеѝ в꙽ домꙋ̀ твое́мъ, въ вѣк꙽ вѣка въсхва́лѧтъ т̂ѧ·
Блаже́нъ мꙋжъ, е҆мꙋже е҆сть застꙋпле́нїе е҆го ѿ тебе, въсхожде́нїа в꙽ срд̑цы свое́мъ положѝ.
въ юдо́ли плачевнѣ, в мѣстѣ и҆дѣже положѝ·
И҆́бо блс̑҇ве́нїе дастъ за́конъ дааѝ·
Поидꙋтъ ѿ си́лы в си́лꙋ, ꙗ҆́ви́тсѧ б҃ъ бого́м꙽ в сїѻ́нѣ·
г҃и б҃е си́лъ ѹ҆слы́ши мл҃твꙋ мою̀, внꙋшѝ б҃е і҆а́ковль·
Защи́тниче нашь ві́жд̑ь б҃е, и҆ призри на лицѐ х҃а твое҆го·
Ꙗ҆́ко лꙋче дн҃ь е҆дінъ въ дворѣхъ твоих̑ паче ты́сѧщъ·
И҆зво́лихъ примѣта́тисѧ в домꙋ б҃а мое҆го, паче неже жи́ти м̂и в се́лѣхъ грѣшничих꙽·
Ꙗ҆́ко млс̑҇ть и҆ і́стинꙋ лю́битъ г҃ь, б҃ъ блгд̑ть и҆ сла́вꙋ дастъ, г҃ь не лиши́т꙽ бл҃гаѧ ходѧ́щихъ незло́бїе҆мъ·
г҃и бж҃е силъ, бл҃же́нъ чл҃къ ѹ҆поваѧѝ на тѧ·
В конецъ, сн҃о́въ коре́ѻвъ, ѱлом̑, п҃д·
Бл҃говолилъ е҆си г҃и зем̑лю твою, възвратилъ е҆си плѣнъ і҆а́ковль·
ѻ҆ста́вилъ е҆си безако́нїа лю́демъ твои́мъ, покрылъ е҆си вс̂ѧ грѣхы их̑·
Ѹ҆кроти́лъ е҆си весь гнѣвъ твой, въз꙽вратилъ е҆си ѿ гнѣва ꙗ҆́рости твоеа·
Възвратѝ насъ б҃е сп҃се́нїи наших̑, и҆ възврати ꙗ҆́рость твою ѿ насъ·
Є҆да̀ въ вѣкы прогнѣваешисѧ на ны;
и҆ли про́стреши гнѣвъ свой ѿ рода в родъ;
б҃е т̂ы ѻ҆бращь живи́ши н̂ы, и҆ людїе твоѝ възвеселѧ́тсѧ ѻ҆ тебѣ·
Ꙗ҆́вѝ намъ г҃и млс̑҇ть твою, и҆ сп҃се́нїе твое да́жд̑ь намъ·
Ѹ҆слы́шꙋ что̀ речетъ ѻ҆ мнѣ г҃ь б҃ъ, ꙗ҆́ко речетъ ми́ръ на люд̑и̑ своѧ̀ и҆ на прпд̑бныѧ своѧ, и҆ на ѻ҆браща́ющаѧ срд̑цѧ к꙽ немꙋ·
ѻ҆баче бли́зъ боа́щимсѧ е҆го сп҃сенїе е҆го, всели́ти сла́вꙋ в꙽ землю нашꙋ·
Млс̑҇ть и҆ і́стина срѣто́стасѧ, пра́вда и҆ ми́ръ ѻ҆блобыза́стасѧ·
И҆стина ѿ землѧ восїа, и҆ пра́вда съ нб҃се прини́че·
И҆́бо г҃ь дасть бл҃гость, и҆ землѧ на́шѧ дасть пло̑ свой·
Пра́вда пред̑ ни́мъ пред̑и́дет̑, и҆ положитъ в пꙋть стопы̀ своѧ·
Сла́ва. молитва двд̑ва, п҃е·
кѳ̑҇а, в҃і·
Приклонѝ г҃и ѹ҆хо твое, и҆ ѹ҆слы́ши м̂ѧ, ꙗ҆́ко ни́щъ и҆ ѹ҆бо́гъ е҆смь а҆́зъ·
съхрани дш҃ꙋ мою, ꙗ҆́ко прпд̑бен̑҇ е҆смь.
сп҃сѝ раба твое҆го б҃е мой ѹ҆повающаго на тѧ·
Поми́лꙋй м̂ѧ г҃и, ꙗ҆́ко к тебѣ въз꙽зовꙋ весь дн҃ь·
Възвеселѝ дш҃ꙋ раба̀ твоего, ꙗ҆́ко к тебѣ взѧхъ дш҃ꙋ мою̀·
Ꙗ҆́ко т̂ы г҃и бл҃гъ, и҆ длъготрьпѣливъ, и҆ мно́гомлс̑҇тив꙽ всѣмъ призыва́ющим̑ т̂ѧ·
Внꙋшѝ г҃и мл҃твꙋ мою̀, и вонмѝ гла́сꙋ моле́нїа мое҆го·
В дн҃ь печали моеа̀ възвах̑ к꙽ тебѣ, ꙗ҆́ко ѹ҆слы́ша м̂ѧ·
Нѣсть подобенъ тебѣ в꙽ бѕ҃ѣхъ г҃и, и нѣсть по дѣ́ломъ твои́мъ·
Всѝ ꙗ҆́зы́цы, е҆ли́ко сътворѝ прїидꙋть, и҆ покло́нѧтсѧ пред̑ тобою г҃и, и҆ просла́вѧтъ и҆́мѧ твое·
Ꙗ҆́ко ве́лїй е҆си т̂ы, и҆ творѧѝ чюдеса̀ т̂ы е҆си б҃ъ е҆ді́нъ·
Наста́ви м̂ѧ г҃и на пꙋть твой, и҆ поидꙋ въ и́стинѣ твое́й·
да възвесели́тсѧ срд̑це мое, боѧ́тисѧ и́мени твое҆го·
Исповѣмсѧ тебѣ г҃и б҃е мой всѣмъ срд̑цемъ моим̑, и҆ просла́влю и́мѧ твое в вѣкъ·
Ꙗ҆́ко млс̑҇ть твоѧ ве́лїа на мнѣ, и҆зба́ви дш҃ꙋ мою ѿ а́да преи҆спод̑нѧго·
б҃е зако́нопрестꙋпници въста́шѧ на́ мѧ, и҆ со́нмъ дръжѧв꙽ныхъ в꙽зыска́ша дш҃ꙋ мою, и҆ не пред̑ложишѧ тебе пред̑ собою·
И҆ т̂ы г҃и б҃е мой щедръ и҆ млс̑҇тивъ, длъготрьпѣливъ и҆ мно́гомлс̑҇тивъ, и҆ і́стинен꙽·
Призри на́ мѧ, и҆ поми́лꙋй м̂ѧ.
даждь дръжа́вꙋ твою ѻ҆́трокꙋ твоемꙋ, и҆ сп҃сѝ сн҃а рабы̀ твоеа̀·
Сътвори со мною зна́менїе въ бл҃го, и҆ да ви́дѧт꙽ ненави́дѧщеѝ м̂ѧ, и҆ постыдѧт̑сѧ·
Ꙗ҆́ко т̂ы г҃и помо́же м̂и, и҆ ѹ҆тѣшил̑҇ м̂ѧ е҆си·
Сн҃овъ коре́ѻвъ, ѱало́мъ пѣсни· п҃ѕ·
Ѡснова́нїа е҆го на горах̑ ст҃҃ых̑·
Лю́битъ г҃ь врата сїѻ́нѧ, паче всх̑ѣ селе́нїи и҆а́ковлих̑·
Пресла́внаѧ гл҃ашѧсѧ ѻ҆ тебѣ гра́де бж҃їи·
Помѧнꙋ раа́въ и҆ вавило́на, свѣдꙋщих꙽ м̂ѧ·
И҆ с̂е и҆ноплеме́нницы, и҆ тѵ́ръ и҆ лю́дїе е҆ѳїѻ́пстїи, сїи бы́ша т̂ꙋ·
ма́ти сїѻ́нъ речетъ, чл҃къ.
и҆ чл҃кь роди́сѧ в немъ, и҆ тои ѻ҆снова и҆̀ вы́шнїи·
г҃ь повѣсть в꙽ кни́гах̑ лю́демъ, и҆ кн҃ѕе́м꙽ симъ бывшымъ в немъ·
Ꙗ҆́ко веселѧ́щимсѧ всѣмъ жили́ще ѹ҆ тебѐ·
Пѣснь ѱалма сн҃овъ кореѻвъ,<.> В конецъ, ѻ҆ маеле́ѳѣ ѿвѣщати. разꙋм꙽ е҆ѳа́ма і҆ил҃ьтенина· п҃з·
Ги҃, б҃е сп҃се́нїа мое҆го, въ дн҃е възвахъ, и҆ в нощи пред̑ тобою·
да вни́детъ пред̑ тѧ мл҃тва моа, приклонѝ ѹ҆хо твоѐ к꙽ моленїю мое҆мꙋ·
Ꙗко испо́лнисѧ золъ дш҃а моа̀, и҆ живо́тъ мой а́дꙋ прибли́жисѧ·
Привмѣненъ бых̑ с низ̑ходѧ́щыми в ровъ·
Быхъ ꙗ҆́ко чл҃кь без помощи, в꙽ мр҃твых̑ свободь·
Ꙗ҆́ко ꙗ҆́ѕвенїи спѧщеѝ въ гробѣхъ, и҆́хъже не помѧнꙋлъ е҆си ктомꙋ.
и҆ тїи ѿ рꙋкы твоеа̀ ѿрїновени бышѧ·
Положи́шѧ м̂ѧ в ро́вѣ преи҆спод̑немъ, в те́мныхъ и҆ сѣни смр҃тънѣй·
На мнѣ̀ ѹ҆тверди́сѧ ꙗ҆́рость твоѧ, и всѧ̀ волны̀ твоѧ наведѐ на мѧ·
Ѹ҆далилъ е҆си ѕна́емых̑ мои҆х꙽ ѿ мене, положи́шѧ м̂ѧ ме́рзость себѣ·
Преданъ быхъ, и҆ не и҆схождаахъ, ѻ҆чи моѝ и҆знемого́стѣ ѿ ни́щеты·
Възвахъ к тебѣ г҃и весь дн҃ь, въздѣхъ к꙽ тебѣ рꙋцѣ̀ моѝ·
Є҆да мр҃твыми твори́ши чюдеса̀, ли вра́чеве въскресѧ́тъ, и҆ і҆сповѣдѧ́тсѧ тебѣ;
е҆да повѣсть кт̂о въ гробѣ млс̑҇ть твою, и҆ і́стинꙋ твою в꙽ поги́бели;
е҆да позна́на бꙋ́дꙋтъ во тмѣ̀ чюдеса̀ твоѧ, и҆ пра́вда твоа̀ в зем̑лѝ забве́ннѣй;
и҆ а́зъ к꙽ тебѣ г҃и възъвахъ, и҆ ѹ҆́тро мл҃тва моа̀ прд̑еварит꙽ т̂ѧ·
Вскꙋю г҃и ѿрѣеши дш҃ꙋ мою, ѿвращаеши лицѐ свое ѿ мене;
ни́щъ е҆смь а҆зъ, и҆ въ трꙋдѣхъ ѿ ю́ности моеа̀·
Възне́съ же смирихсѧ, и҆ і҆знемогохъ·
На мнѣ̀ преи҆доша гнѣви твоѝ, ѹ҆страшенїа твоѧ въз꙽мꙋтишѧ м̂ѧ, ѻ҆быдоша м̂ѧ ꙗ҆́ко вода.
весь дн҃ь ѻ҆дръжа́шѧ м̂ѧ в꙽кꙋ́пѣ·
Ѹ҆далилъ е҆си ѿ мене дрꙋга и҆ і́скренѧго, и҆ ѕна́емых̑ мои́хъ ѿ страсте́й·
Сла́ва· Ра́зꙋма е҆ѳа́ма, і҆ил҃ьтѧнина, п҃и·
Ми́лости твоѧ г҃и въ вѣкы въспою, в рд̑о и҆ ро́дъ възвѣщꙋ и́стиннꙋ твою у҆сты̀ мои́ми·
Ꙗ҆́ко рече, в꙽ вѣкъ ми́лость съѕи́жд̑етсѧ, на нб҃сех̑ ѹ҆гото́ваетсѧ и́стина твоа·
Завѣщах̑ завѣтъ и҆збра́ннымъ мои́м꙽, клѧхсѧ дв҃дꙋ рабꙋ̀ мое҆мꙋ до́ вѣка·
Ѹ҆готоваю сѣмѧ твое, и҆ съѕи́жд̑ꙋ в рд̑о и҆ ро́дъ прс̑҇тлъ твой·
И҆сповѣдѧт̑ нб҃са чюдеса̀ твоѧ, г҃и, и҆́бо и́стинꙋ твою в꙽ цр҃кви ст҃ых꙽·
Ꙗ҆́ко кт̂о въ ѻ҆блацехъ сравнитсѧ гв҃и, ѹ҆подо́бит̑сѧ гв҃и в꙽ сн҃охъ бж҃їихъ;
бг҃ъ прославлѧ́емъ в꙽ совѣтехъ ст҃ыхъ, ве́леи и҆ стра́шенъ е҆сть над̑ всѣми ѻ́крестными е҆го·
г҃и б҃е силъ, кт̂о подо́бенъ тебѣ;
си́ленъ е҆си г҃и, и҆ і́стина твоа ѻ҆́крестъ тебѐ·
Ты̀ владѣ́еши дръжа́вою мор꙽ско́ю, възмꙋще́нїе же вол̑҇н꙽ е҆го т̂ы ѹ҆кротиши·
Ты̀ смирилъ е҆си ꙗ҆ко ꙗ҆́звена гордаго, мы́шцею си́лы твоеа разгналъ е҆си врагы твоѧ·
твоѧ сꙋтъ нб҃са, и҆ твоѧ̀ е҆сть зем꙽лѧ.
вселе́ннꙋю и҆ концѧ̀ еа̀ т̂ы ѻ҆сновалъ е҆си, сѣверъ и҆ мо́ре т̂ы създа̀·
Ѳаво́ръ и҆ е҆рмо́нъ ѻ и҆мени твое́мъ възрадꙋетасѧ.
твоѧ мы́шца съ си́лою·
да ѹ҆тверди́тсѧ рꙋка̀ твоа̀, възнесе́тсѧ десница твоа·
Пра́вда и҆ сꙋдба̀, ѹ҆готованїе престола твое҆го·
Млс̑҇ть и҆ і́стина пред̑и́дета пред̑ лицемъ твои́мъ·
Бл҃же́ни людїе вѣдꙋщеѝ въскликнове́нїе·
г҃и въ свѣтѣ лица твоего по́идꙋтъ, и҆ ѻ и҆мени твоемъ възрадꙋютсѧ весь дн҃ь, и҆ пра́вдою твоею възнесꙋтсѧ·
Ꙗ҆́ко похвала̀ си́лы их̑ т̂ы е҆си, и҆ въ бл҃говоленїи твое́мъ възнесе́тсѧ ро́гъ наш꙽·
Ꙗ҆́ко гн҃е е҆сть застꙋпленїе, и҆ ст҃го і҆ил҃ева цр҃ѧ на́шего·
Тогда гл҃алъ е҆си в꙽ видѣнїи сн҃ово́мъ твои́мъ, и҆ речѐ, положихъ по́мощъ на си́лнаго, възнесох̑ и҆збра́ннаго ѿ людїи моих̑·
ѻ҆брѣтохъ дв҃да раба̀ мое҆го, е҆ле́ѻм꙽ ст҃ымъ мои́мъ пома́захъ и҆̀·
И҆бо рꙋка̀ моа̀ застꙋ́питъ и҆̀;
и҆ мы́шца моа̀ ѹ҆крѣпитъ и҆̀·
Ничтоже ѹ҆спѣетъ врагъ на́нь и сынъ безако́нїѧ не приложитъ ѻ҆зло́бити е҆го·
И҆ссѣкꙋ ѿ лица е҆го врагы̀ е҆го, и҆ ненави́дѧщаѧ е҆го побѣждꙋ·
И҆ і́стина моѧ̀ и млс̑҇ть моа̀ с ни́мъ, и҆ ѻ҆ и́мени моем꙽ възнесе́тсѧ рогъ е҆го·
И положꙋ на мори рꙋ́кꙋ е҆го, и҆ на рѣкахъ десницꙋ е҆го·
Тои въз꙽зове́тъ м̂ѧ, ѿц҃ь мой е҆си т̂ы, бг҃ъ мой, и҆ застꙋпникъ сп҃се́нїа моего·
И҆ а́зъ первенца положꙋ и҆̀, высока̀ паче цр҃е́й земных̑·
В вѣкъ съхраню̀ е҆мꙋ млс̑҇ть мою, и҆ завт̑ѣ мой вѣ́ренъ е҆мꙋ·
И положꙋ въ вѣкъ вѣка сѣмѧ е҆го, и҆ престо́лъ е҆го ꙗ҆́ко дн҃їе нб҃ꙋ·
А҆ще ѻ҆ста́вѧтъ сн҃ове е҆го законъ мой, и҆ в сд̑ꙋбахъ моих̑ не по́идт̑ꙋ.
а҆ще ѻ҆правданїа моѧ ѻ҆сквернѧтъ, и҆ заповѣди моѧ не съхранѧтъ, посѣщꙋ̀ жезло́мъ безако́нїа и҆хъ, и҆ ранами непра́вды и҆хъ·
Млс̑҇ть же мою не разорю̀ ѿ нихъ, ни приврежд̑ꙋ въ и́стинѣ моей·
Ни ѻ҆скверню же завѣта мое҆го, и҆ і҆сходѧщаѧ ѿ ѹ҆стъ мои́хъ не ѿврьгꙋсѧ·
Є҆ді́ною клѧхса в꙽ ст҃о́е мое, а҆ще дв҃дꙋ солжꙋ·
Сѣмѧ е҆го в꙽ вѣкъ пребꙋ́детъ, и҆ прс̑҇то́л꙽ е҆го ꙗ҆́ко слн҃це предо мною, и҆ ꙗ҆́ко лꙋна̀ съверше́на в вѣкъ, и҆ свѣдѣтель на нб҃си вѣ́ренъ·
Ты̀ же ѿринꙋ, и҆ ѹ҆ничижи, негодова пома́занаго твое҆го·
Разорилъ е҆си завѣтъ раба̀ твое҆го, ѻ҆сквернилъ е҆си на землѝ ст҃ыню е҆го.
разорилъ е҆си вс̂ѧ ѻ҆пло́ты е҆го·
Положилъ е҆си тве́рдаѧ е҆го страхъ·
Расхищѧ́хꙋть и҆̀ вс̂и мимоходѧщеѝ пꙋтемъ, бысть поноше́нїе съсѣдомъ своим̑·
Възвы́силъ е҆си десни́цꙋ стꙋжѧ́ющых̑ е҆мꙋ, въз꙽веселилъ еси вс̂ѧ врагы е҆го·
Възвратилъ е҆си по́мощъ ѻ҆рꙋжїа его, и҆ не застꙋпѝ е҆го в꙽ браны·
Разорилъ е҆си ѿ ѻ҆чище́нїа е҆го, прс̑҇тлъ е҆го на́ землю поврьже·
Ѹ҆ма́лилъ е҆си дн҃и вре́мени е҆го, ѻ҆блїа́лъ е҆си и҆̀ стꙋдомъ·
доко́лѣ г҃и ѿвраща́ешисѧ в꙽ коне́ць, ражд̑ежетсѧ ꙗ҆́ко ѻ҆гнь гнѣвъ твой;
помѧнѝ, кі́и мой състав꙽, е҆да б̂о всꙋе създа̀ вс̂ѧ сн҃ы члчс̑҇кыа;
кт̂о е҆сть чл҃кь, и҆же поживетъ, и҆ не ѹ́зрит꙽ смерти, и҆зба́витъ дш҃ꙋ свою и҆з рꙋкы̀ а́довы;
гдѣ сꙋть млс̑҇ти твоѧ древнѧа г҃и, ꙗ҆́же клѧтсѧ дв҃дꙋ въ и́стинѣ твоей;
помѧни г҃и поноше́нїе раб̑҇ твоих̑, е҆же ѹ҆дръжа в꙽ надрѣ мое́мъ мно́гы ꙗ҆́зы́кы·
Є҆же поноси́шѧ вра́ѕи твоѝ г҃и, е҆же поноси́шѧ и҆змѣне́нїе х҃а твоего·
Блс̑҇ве́нъ г҃ь в꙽ вѣкъ.
бꙋ́детъ, бꙋ́детъ·
Слв̑҇а· Мл҃тва моѷсе́а чл҃ка бж҃їа, п҃ѳ·
Ги҃ прибѣжище бысть нам꙽, в род̑ и҆ ро́дъ·
прежд̑е да́же горамъ не быти, и҆ създатисѧ земли и҆ вселе́ннѣй, и҆ ѿ вѣка и҆ до вѣка т̂ы е҆си·
Не възврати чл҃ка въ смире́нїе.
и҆ ре́клъ е҆си, ѻ҆брати́тесѧ сн҃ове члчс̑҇тїи·
Ꙗ҆́ко ты́сѧща лѣтъ пред̑ ѻ҆чи́ма твои́ма г҃и, ꙗ҆́ко дн҃ь вчера́шнїи и҆же ми́мои́де, и҆ стра́жа нощнаа·
Ѹ҆ничиже́нїа и҆хъ е҆ще бꙋ́дꙋтъ·
Ѹ҆тро ꙗ҆́ко трава̀ ми́мои́детъ, ѹ҆тро процвѣте́тъ и҆ пре́идетъ, на вечеръ ѿпадетъ, ѻ҆жестѣ́етъ, и҆ і҆схнет̑·
Ꙗ҆́ко и҆счезо́хомъ гнѣвомъ твои́мъ, и҆ ꙗ҆́ростїю твоею смꙋти́хомсѧ·
Положилъ е҆си безако́нїа наша пред̑ собою, вѣкъ нашь в꙽ просвѣщенїе лица твоего·
Ꙗ҆́ко вс̂и дн҃їе наши ѻ҆скꙋдѣша, и҆ гнѣвомъ твои́мъ и҆зчеѕо́хомъ·
Лѣта нашѧ ꙗ҆́ко паѹ҆чи́на паѹ҆ча́хꙋсѧ, дн҃їе лѣтъ нашихъ в них̑ же сед̑мьдесѧтъ лѣтъ.
а҆́ще же в си́лахъ, ѻ҆смъдесѧтъ лѣтъ.
и҆ множае и҆х꙽ трꙋдъ и҆ болѣзнь·
Ꙗ҆́ко прїиде кротость на ны, и҆ нака́жемсѧ·
Кто̀ съвѣсть дръжа́вꙋ гнѣва твоего, и҆ ѿ страха твоего ꙗ҆́рость твою и҆зчестѝ;
десни́цꙋ твою та́ко скажѝ м̂и, и҆ ѻ҆коаанныа срд̑цемъ в꙽ мꙋ́дрости·
ѻ҆брати г҃и доко́лѣ, и҆ ѹ҆моленъ бꙋ́ди на рабы̀ своѧ·
И҆спо́лнихомсѧ заѹ́тра млс̑҇ти твоѧ г҃и, и҆ възрадовахомсѧ и҆ възвеселихомсѧ·
Въ всѧ̀ дн҃и нашѧ възвеселихомсѧ, за дн̂и в꙽ нѧже смирилъ н̂ы е҆си, лѣта в нѧ́же видѣхомъ злаѧ·
И҆ призри на рабы̀ своѧ и на дѣ́ла твоѧ, и҆ наста́ви сн҃ы их̑·
И҆ бꙋ́ди свѣтлость г҃а б҃а на́шего на насъ, и҆ дѣ́ла рꙋкъ на́шихъ и҆справи на насъ, и҆ дѣло рꙋкъ наших꙽ и҆спра́ви·
Хвала̀ пѣснїи двд̑въ. неѻ҆пи́санъ ѿ е҆вре́й, ч҃·
Живый в по́мощи вы́шнѧго, въ кровѣ б҃а нбс̑҇наго въдворитсѧ·
Рече́тъ гв҃и, застꙋ́пникъ мой е҆си, и҆ прибѣжище мое, б҃ъ мой, и҆ ѹ҆поваю нань·
Ꙗ҆́ко тои и҆зба́витъ т̂ѧ ѿ сѣти ло́вча и҆ ѿ словесѐ мѧте́жна·
Пле́щма свои́ма ѻ҆сѣнитъ т̂ѧ, и҆ под̑ крилѣ̀ е҆го надѣ́ешисѧ·
ѻ҆рꙋжїе ѻ҆бы́детъ т̂ѧ и҆стина е҆го, не ѹбои́шисѧ ѿ страха нощна́го, ѿ стрѣлы̀ летѧщаа въ дн҃е, ѿ вещи въ тмѣ преходѧ́щаѧ, ѿ срѧ́ща и бѣса полꙋдн҃ьнаго·
Падетъ ѿ страны̀ твоеа̀ ты́сѧща, и҆ тма̀ ѻ҆деснꙋю тебѐ, к тебѣ же не прибли́житсѧ·
ѻ҆ба́че ѻ҆чи́ма свои́ма смо́триши, и҆ въздаа́нїе грѣшникомъ ѹ҆зриши·
Ꙗ҆́ко т̂ы г҃и ѹ҆пова́нїе мое, вы́шнѧго положил꙽ е҆си прибѣжище твое,<.>
Не прїидетъ к тебѣ ѕл̂о, и҆ ра́на не прибли́житсѧ тѣлеси твое҆мꙋ·
Ꙗ҆́ко а҆гг҃ломъ свои́мъ заповѣсть ѻ҆ тебѣ, съхранити т̂ѧ въ всѣхъ пꙋтехъ твоих꙽·
На рꙋках̑ възмꙋтъ т̂ѧ, да не когда пре́ткнеши ѻ҆ камень ногы твоеа·
На а́спидꙋ и҆ васили́ска настꙋ́пиши, и҆ попере́ши лва̀ и҆ змїа·
Ꙗ҆́ко на мѧ ѹ҆пова, и҆ і҆зба́влю и҆̀.
покры́ю и҆̀, ꙗ҆ко позна и́мѧ моѐ·
Въз꙽зоветъ къ мнѣ, и҆ ѹ҆слы́шꙋ и҆̀, с нимъ е҆смь в꙽ скорби·
И҆змꙋ̀ и҆̀, и҆ просла́влю е҆го·
долготꙋ дн҃їи и҆спо́лню и҆̀, и҆ ꙗ҆́влю е҆мꙋ сп҃се́нїе моѐ·
Слв̑҇а· ѱлом̑ пѣсни в꙽ дн҃ь сꙋбо́тныи· ч҃а·
кѳ̑҇а г҃і·
Бл҃го е҆сть и҆сповѣдатисѧ гв҃и, и҆ пѣти и́мени твоемꙋ вы́шне.
възвѣщати за ѹ҆тра млс̑҇ть твою, и҆ і́стинꙋ твою на всѧ́кꙋ нощь.
в꙽ десѧтострꙋннемъ ѱалты́ри, с пѣснїю в꙽ гꙋ́слехъ·
Ꙗ҆́ко възвеселилъ м̂ѧ е҆си г҃и в тва́ри твоей, и҆ в дѣлехъ рꙋ́кꙋ твоею възрадꙋюсѧ·
Ꙗ҆́ко възвели́чишѧсѧ дѣла твоѧ г҃и, ѕѣло̀ ѹ҆глꙋби́шѧсѧ помышле́нїа твоа·
Мꙋжъ безꙋ́менъ не позна́етъ, и҆ неразꙋмивъ, не разꙋмѣетъ сихъ·
Є҆гда прозѧбошѧ грѣшницы ꙗ҆́ко трава̀, и҆ проникоша вси дѣ́лающеѝ безако́нїе, ꙗ҆́ко да потребѧтсѧ въ вѣкъ вѣка·
Ты же вышнїи в꙽ вѣкъ г҃и·
Ꙗ҆́ко с̂е враѕи твоѝ г҃и, ꙗ҆́ко с̂е вра́ѕи твоѝ поги́бнꙋт꙽, и҆ разы́дꙋтсѧ вс̂и дѣ́лающеѝ безако́нїе·
И҆ възнесе́т꙽сѧ ꙗ҆́ко и҆норо́га рогъ мой, и҆ ста́рос̀ть моа въ е҆леи масти́тѣ·
И҆ възрѣ ѻ҆́ко мое на врагы̀ моѧ, и҆ въстающаа на́ мѧ, лꙋка́внꙋющаѧ ѹ҆слы́шитъ ѹ҆хо моѐ·
Пра́ведникъ ꙗ҆́ко фѷниѯъ процвѣтетъ, ꙗ҆́ко ке́дръ и҆же в лѷванѣ ѹ҆мно́житсѧ·
Насаждени в домꙋ гн҃и, въ дворх̑ѣ б҃а на́шего процвѣтꙋтъ·
Є҆ще ѹ҆мно́жатсѧ в꙽ ста́рости масти́тѣ, и҆ бл҃гопрїе́млюще бꙋдꙋтъ, да възвѣстѧтъ·
Ꙗ҆́ко правъ г҃ь б҃ъ нашь, и҆ нѣсть неправды в немъ·
В дн҃ь сꙋбо́тныи, в꙽негда насели́сѧ землѧ.
хвала̀ пѣсни двд̑вы, ч҃в·
Гь҃ въцр҃исѧ, в лѣпотꙋ сѧ ѻ҆блечѐ·
ѻ҆блече́сѧ г҃ь в си́лꙋ, и҆ препоѧ́сасѧ.
и҆́бо ѹ҆твер꙽дѝ вселе́ннꙋю, ꙗ҆́же не под̑вижитсѧ·
Готовъ прс̑҇тлъ твой ѿто́лѣ, ѿ вѣка ты е҆си·
Въздвигошѧ рѣки г҃и въздвигошѧ рѣкы̀ глс̑҇а свой·
Во́змꙋтъ рѣкы стрꙋгы своѧ ѿ гласовъ вод̑ мно́гъ·
ди́вны высоты мор꙽скыа, ди́венъ в꙽ высокых̑ г҃ь·
Свѣдѣнїа твоѧ ѹ҆вѣришасѧ ѕѣло, до́мꙋ твоемꙋ подобает꙽ ст҃ы́ни г҃и, в꙽ долготꙋ дн҃їи·
ѱлом̑ дввд̑ъ, четвори́ца сꙋботы. неѻ҆пи́санъ ѿ е҆вреи· ч҃г·
Бг҃ъ ѿм꙽ще́нїи г҃ь, бг҃ъ ѿм꙽щенїи не ѻ҆бинꙋлсѧ е҆сть·
Възнеси́сѧ сꙋдѧѝ землѝ, въздажд̑ь въздаа́нїе гордым̑·
доко́лѣ грѣшници г҃и, доколѣ грѣшницы въсхва́лѧтсѧ;
провѣща́ютъ, и҆ възгл҃ють неправдꙋ, възгл҃ютъ вс̂и дѣ́лающеѝ безако́нїе·
Люди твоа г҃и смири́ша, и҆ досто́анїе твое ѻ҆зло́биша·
Вдови́цꙋ и҆ си́ра ѹ҆мори́шѧ, и҆ пришельца ѹ҆би́ша·
И҆ рѣшѧ, не ѹ҆зритъ г҃ь.
ниже разꙋмѣетъ б҃ъ і҆аковль·
Разꙋмѣите же безꙋ́мнїѝ в людехъ, и҆ бꙋ́ии нѣкогда ѹ҆мꙋдритесѧ·
Насаждеѝ ѹ҆хо, не слы́шитъ л̂и;
и҆ли създа́выи ѻко, не сматрѧетъ ли;
наказааѝ ꙗ҆́ѕыки, не ѻ҆бличи́тъ л̂и, ѹ҆чаѝ чл҃ка ра́зꙋмꙋ;
г҃ь съвѣсть помыш꙽ле́нїѧ члчс̑҇ка, ꙗ҆́ко сꙋть сꙋе́тна·
Блаже́нъ чл҃къ, е҆гоже а҆ще накажеши г҃и, и҆ ѿ зако́на твое҆го наѹ҆чи́ши и҆̀·
ѹ҆кроти́ти е҆го ѿ дн҃їи лютъ, до́ндеже и҆зры́етсѧ грѣшномꙋ ѧ́ма·
Ꙗ҆́ко не ѿри́нетъ г҃ь людїи свои҆хъ, и҆ достоѧнїа свое҆го не ѻ҆ста́витъ, дон꙽деже пра́вда ѻ҆брати́тъсѧ на сꙋ́дъ, и҆ близъ еа̀ вс̂и правїи срд̑цемъ·
кт̂о въста́нетъ м̂и на лꙋкавнꙋющаа̀, и҆ли кт̂о съпрд̑еста́нетъ м̂и на дѣ́лающаѧ безако́нїе;
а҆ще не г҃ь помо́глъ б̂ы ми в ма́лѣ вселиласѧ б̂ы въ а́дъ дш҃а моа·
А҆ще гл҃ахъ под̑вижасѧ нога̀ моа·
Млс̑҇ть твоа г҃и помага́ше м̂и·
По мно́жествꙋ болѣзнїи мои҆хъ в꙽ срд̑ци мое́мъ, ѹ҆тѣшенїа твоѧ възвесели́шѧ дш҃ꙋ мою·
да не пребꙋ́детъ тебѣ престолъ безако́нїа, съѕидааѝ трꙋдъ на повелѣнїе·
ѹ҆ловѧ́тъ на́ дш҃ꙋ правед̑ничꙋ, и҆ кро́вь непови́ннꙋю ѻ҆сꙋ́дѧтъ·
И҆ бысть мн̂ѣ г҃ь в꙽ прибѣжище, и҆ б҃ъ мой в꙽ помощъ ѹ҆пова́нїа моего·
и҆ въздастъ и҆мъ г҃ь безако́нїе и҆хъ, и҆ по лꙋка́в꙽ствїю их̑ погꙋбитъ и҆хъ г҃ь б҃ъ·
Сла́ва· Хвала пѣснїи дввд̑ъ. неѻ҆пи́санъ ѿ е҆врей, ч҃д·
Прїидѣте възрадꙋемсѧ гв҃и, въскли́кнемъ б҃ꙋ, сп҃си́телю на́шемꙋ·
Прд̑еваримъ лице е҆го въ и҆сповѣданїи, и҆ въ ѱалмѣхъ въскли́кнемъ е҆мꙋ·
Ꙗ҆́ко б҃ъ ве́лей г҃ь, и҆ цр҃ь ве́лей по все́й земли·
ꙗ҆́ко в рꙋцѣ е҆го вс̂и концы̀ землѧ̀, и҆ высоты̀ го́ръ того ст̑ꙋ·
Ꙗ҆́ко того̀ е҆сть мо́ре, и҆ той сътвори е҆̀, и҆ сꙋ́шꙋ рꙋцѣ е҆го създа́стѣ·
Прїидѣте покло́нимсѧ, и҆ припадемъ е҆мꙋ, и҆ въсплаче́мсѧ прд̑е гм҃ъ сътвор꙽шим꙽ насъ·
Ꙗ҆́ко той е҆сть б҃ъ нашь, и҆ мы̀ людїе па́ствы е҆го, и҆ ѻ҆вцѧ рꙋкы̀ е҆го.
днс̑҇е а҆ще глс̑҇а е҆го ѹ҆слышите, не ѻ҆жести́те срд̑цъ вашихъ, ꙗ҆́ко въ прогнѣванїи, по дн҃и и҆скꙋшенїа в꙽ пꙋсты́ни, воньже и҆скꙋси́ша м̂ѧ ѿц҃ы ваши·
И҆скꙋси́ша м̂ѧ, и҆ видѣшѧ дѣ́ла моа.
четы́редесѧтъ лѣтъ негодовах̑ ро́да того·
И҆ рѣхъ, прнс̑҇о блꙋдѧтъ срд̑цемъ, тїи же не позна́шѧ пꙋтїи мои́хъ·
ꙗ҆́ко клѧх̑сѧ въ гнѣвѣ моем̑, а҆ще внидꙋтъ в꙽ покои мой·
Хвала̀ пѣснїи дввд̑ъ, в꙽негда храмъ ѕида́шесѧ по плененїи. неѻ҆писанъ ѿ е҆вре́и҆, ч҃е
Въспо́ите гв҃и пѣснь новꙋ, въспо́ите гв҃и вс̂ѧ землѧ·
въспо́ите гв҃и, блс̑҇вите и́мѧ е҆го·
Бл҃говѣстите дн҃ь, ѿ дн҃е сп҃се́нїе бж҃їе·
Възвѣсти́те въ ꙗ҆ѕы́цехъ сла́вꙋ е҆го, въ всх̑ѣ лю́дехъ чюдеса е҆го·
Ꙗ҆́ко ве́леи г҃ь и҆ хва́ленъ ѕѣло, стра́шенъ е҆сть нд̑а всѣми бо́гы·
Ꙗ҆́ко вси бо́ѕи ꙗ҆зы́къ бѣ́сове, г҃ь же нб҃са сътвои·
И҆сповѣданїе и҆ красота прд̑е ни́мъ, ст҃ы́ни и҆ велелѣпїе въ ст҃и́лѣ е҆го·
Принесѣте гв҃и ѿч҃ьствїа ꙗ҆ѕыкъ, принесѣте гв҃и славꙋ и҆ честь·
принесѣте гв҃и сла́вꙋ и́мени е҆го·
Прїимѣте жрътвы, и҆ входи́те в꙽ дворы е҆го·
поклони́тесѧ гв҃и в꙽ дворѣ̀ ст҃емъ е҆го·
да подви́житсѧ ѿ лица̀ е҆го вс̂ѧ землѧ̀·
Рцѣте въ ꙗ҆ѕы́цехъ, ꙗ҆ко г҃ь въцр҃и́сѧ·
И҆бо и҆справи вселе́ннꙋю ꙗ҆же не под̑ви́житсѧ, сꙋдитъ лю́демъ пра́востїю·
да възвеселѧт̑сѧ нб҃са̀, и҆ радꙋетсѧ землѧ·
да подви́житсѧ мо́ре и҆ і҆сполненїе еа̀·
възрадꙋют̑сѧ полѧ и҆ вс̂ѧ ꙗ҆же на нихъ·
Тогда възрадꙋют̑сѧ вс̂ѧ дре́ва дꙋбравнаѧ, ѿ лица гн҃ѧ, ꙗ҆́ко грѧдетъ, ꙗ҆́ко грѧдетъ сꙋди́ти земли·
Сꙋдити вселеннѣй в꙽ правдꙋ, и҆ лю́демъ и҆стинною своею҆·
ѱало́мъ дввд̑ъ,. е҆гда землѧ̀ е҆мꙋ населѧшесѧ. неѻ҆пи́санъ ѿ е҆врей, ч҃ѕ·
Гь҃ воцр҃и́сѧ, да радꙋетсѧ землѧ, да веселѧ́тсѧ ѻ҆́строви мно́ѕи·
ѻ҆блакъ и҆ примракъ ѻ҆крестъ е҆го, правда и҆ сꙋдьба и҆справленїе престо́ла е҆го·
ѻ҆гнь прд̑е ни́мъ прд̑еи́детъ, и҆ попа́литъ ѻ҆крестъ врагы е҆го·
Ѡ҆свѣти́ша млънїа е҆го вселе́ннꙋю, видѣ и҆ под̑вижасѧ землѧ·
Го́ры ꙗ҆́ко воскъ раста́ѧша ѿ лица гн҃ѧ, ѿ лица г҃а всеѧ землѧ·
Възвѣсти́шѧ нб҃са пра́вдꙋ е҆го, и҆ видѣшѧ вс̂и людїе сла́вꙋ е҆го·
Да посты́дѧтсѧ вси, кланѧющеѝсѧ и҆стꙋка́ннымъ , хвалѧ́щеѝсѧ ѻ҆ и҆долѣхъ свои҆хъ·
Поклони́тесѧ е҆мꙋ в꙽си а҆гг҃ли е҆го·
Слыша и҆ възвесели́сѧ сїѻ́нъ и҆ възрадовашасѧ дщерѧ і҆ю҆де́йскыѧ, сꙋде́бъ ради твои҆хъ г҃и·
Ꙗ҆́ко т̂ы г҃ь вышнїи нд̑а всею земле́ю, ѕѣло превъзнесе́сѧ нд̑а всѣми бо́гы·
Лю́бѧщей г҃а, ненавиди́те ѕл̂а·
Хранитъ г҃ь дш҃ѧ преподобных̑ свои҆хъ , и҆з рꙋкы̀ грѣшнича и҆зба́витъ и҆хъ·
Свѣтъ восїа правд̑еникꙋ, и҆ правымъ срд̑цемъ весе́лїе·
Възвесели́тесѧ праведнїи ѻ҆ г҃ѣ, и҆ и҆сповѣдайте памѧт̑ ст҃ы́нѧ е҆го·
Слв̑҇а. ѱлом̑ дввд̑ъ, ч҃з·
Въспо́ите гв҃и пѣснь но́вꙋ, ꙗ҆́ко ди́вна сътвори г҃ь·
спасе е҆го десни́ца е҆го, и҆ мы́шца ст҃а́а е҆го·
Ꙗ҆́ви́ г҃ь сп҃се́нїе свое, прд̑е ꙗ҆́зы́кы ѿкры̀ пра́вдꙋ свою·
Помѧнꙋ̀ млс̑҇ть свою̀ і҆а́ковꙋ, и҆ і́стины своеа̀ до́мꙋ і҆ил҃евꙋ·
Видѣшѧ вс̂и концы̀ землѧ сп҃се́нїе б҃а на́шего·
въскли́кнѣте бв҃и всѧ землѧ̀, въспо́ите и҆ радꙋитесѧ и҆ по́ите·
по́ите гв҃и в꙽ гꙋ́слехъ в гꙋслех̑, и гла́сѣ ѱалом̑стѣ, в꙽ трꙋбахъ кова́ным̑, и҆ гла́сомъ трꙋбы̀ ро́жаны·
въстрꙋбите прд̑е цр҃емъ гм҃ъ·
да под̑ви́жит꙽сѧ мо́ре и҆ і҆сполне́нїе е҆го, вселе́ннаа и҆ вс̂и живꙋщеѝ на не́й·
Рѣкы̀ въспле́щꙋтъ рꙋками вкꙋ́пѣ, го́ры възрадꙋютсѧ ѿ лица гн҃ѧ, ꙗ҆́ко грѧдет꙽, ꙗ҆ко прїиде сꙋдити землѝ·
Сꙋдити вселе́ннѣй в꙽ правдꙋ, и҆ людемъ пра́востїю·
ѱлом̑ дввд̑ъ, ч҃и·
Гь҃ въц҃ри́сѧ, да гнѣваютсѧ людїе·
Сѣдѧ́и на херꙋви́мѣ, да подви́житсѧ землѧ·
г҃ь в꙽ сїѻ́нѣ великъ, и҆ высокъ е҆сть нд̑а въсѣми люд̑ми·
да и҆сповѣдѧтсѧ и҆мени твое҆мꙋ вели́комꙋ·
ꙗ҆ко стра́шно и҆ ст҃о е҆сть, и҆ честь цр҃е́ва, сꙋдъ лю́бит̑·
Ты ѹ҆готова пра́вины̀, сꙋд꙽ и҆ правдꙋ въ і҆а́ковѣ т̂ы сътворѝ·
Възносите г҃а б҃а нашего, и҆ кла́нѧитесѧ пд̑оножїю но́гꙋ е҆го ꙗ҆ко ст҃ъ е҆сть·
Моѷсїи і҆ а҆а҆ро́нъ въ і҆ереѻ́х꙽ е҆го, и҆ самꙋилъ в призыва́ющих̑ и҆мѧ е҆го·
призыва́хꙋ г҃а, и҆ той послꙋшаше и҆хъ.
в꙽ столпѣ̀ ѻ҆́блачнѣ гл҃аше к ним꙽·
Ꙗ́ко хранѧхꙋ свѣдѣнїа е҆го, и҆ повелѣнїа его ѧ҆же дастъ и҆мъ·
г҃и б҃е нашь т̂ы послꙋшаше и҆хъ.
бж҃е т̂ы млс̑҇тивъ бываше и҆мъ, и҆ мща́ѧ на всѧ начина́нїа их̑·
Възноси́те г҃а б҃а нашего, и҆ покланѧйтесѧ в꙽ горѣ̀ ст҃ѣй е҆го, ꙗ҆ко ст҃ъ г҃ь б҃ъ нашь·
ѱало́мъ дввд̑ъ, въ и҆сповѣданїе, ч҃ѳ·
Въскли́кнѣте бв҃и вс̂ѧ землѧ̀ рабо́таите гв҃и в꙽ весе́лїи·
внидѣте пре ним꙽ в ра́дости, ѹ҆вѣдите, ꙗ҆́ко г҃ь той е҆сть бг҃ъ нашь·
Той сътвори насъ, а҆ не мы.
мы же людїе е҆го, и ѻ҆вцѧ па́жити е҆го·
Внидѣте въ врата его въ и҆сповѣданїи, в꙽ дворы̀ е҆го в꙽ пѣнїи҆хъ·
И҆сповѣдаитесѧ е҆мꙋ, хвалите и҆мѧ е҆го.
ꙗ҆́ко бл҃гъ г҃ь, въ вѣкь ми́лость е҆го, и҆ да́же до́ рода и҆ ро́да и́стинна е҆го·
ѱалом̑ двд̑въ, р҃·
Ми́лость и҆ сꙋ́дъ въспою тебѣ г҃и, пою̀ и҆ разꙋмѣю в пꙋтѝ непоро́чнѣ·
Когда прїидеши ко мн̂ѣ;
прехожах̑ в незло́бїи срд̑ца мое҆го, посредѣ̀ до́мꙋ мое҆го·
Не прд̑елага́хъ прд̑е ѻ҆чи́ма мои́ма вещь законопрестꙋ́пнꙋ, творѧщаѧ престꙋпле́нїе възненави́дѣхъ·
Не прилпе мн̂ѣ срд̑це лꙋка́во, ѹ҆кланѧ́ющагосѧ ѿ мене лꙋка́ваго не познахъ·
ѻ҆клевета́ющаго та́й и҆скренѧго свое҆го, сего и҆згонѧхъ·
Гръдымъ ѻ́комъ и҆ несы́тымъ срд̑цемъ, с си́мъ не ꙗ҆дѧ́хъ·
ѻ҆́чи мои на вѣрныа̀ землѝ посаждати их̑ с꙽ собою·
ходѧ́и по пꙋтѝ непоро́чнꙋ, сей м̂и слꙋжаше·
Не живѧше посредѣ до́мꙋ мое҆го, творѧѝ горды́ню·
Гл҃ѧѝ неправеднаа, не и҆справлѧ́ше прд̑е ѻ҆чи́ма мои́ма·
Въ ѹ҆трїа и҆збивахъ вс̂ѧ грѣшныѧ землѝ, потребити ѿ града гн҃ѧ вс̂ѧ дѣлающаѧ безако́нїе·
Слв̑҇а, мл҃тва ѹ҆бо́гаго е҆гда ѹ҆ны́етъ, и҆ прд̑е бг҃омъ пролѣе́т꙽ мольбꙋ свою̀, р҃а.
каѳ̑҇ д҃і·
Ги҃, ѹ҆слы́ши мл҃твꙋ мою̀, и҆ во́пль мой к꙽ тебѣ̀ да прїидетъ·
Не ѿврати лица твое҆го ѿ менѐ·
Во́ньже дн҃ь а҆ще скорблю̀ приклонѝ ко мн̂ѣ ѹ҆хо твое·
Воньже дн҃ь а҆ще призовꙋ т̂ѧ, ско́ро ѹ҆слы́ши мѧ·
Ꙗ҆́ко и҆зчеѕо́шѧ ꙗ҆́ко дымъ дн҃їе моѝ, и҆ ко́сти моѧ ꙗ҆́ко сꙋши́ло съсхошѧсѧ·
ѹ҆ѧ́звенъ быхъ ꙗ҆́ко трава̀, и҆ і́сше срд̑це моѐ, ꙗ҆ко забыхъ снѣ́сти хлѣбъ мой·
ѿ гла́са въздыханїа мое҆го, прилпе кость моа пло́ти моей·
ѹ҆подобихсѧ неꙗ҆́сыти пꙋстыннѣй, бых̑ ꙗ҆ко нощный вранъ на ныри́щи·
Забдѣхъ, и҆ бых꙽ ꙗ҆ко пти́ца ѻ҆со́бѧщїасѧ на здѣ̀·
Весь дн҃ь понашѧхꙋ м̂и вра́ѕи мой, и҆ хвалѧ́щеи м̂ѧ мною кленѧ́хꙋсѧ·
Зане пе́пелъ ꙗ҆́ко хлѣбъ ꙗ҆дѧхъ, и҆ питїе мое съ плачемъ растворѧхъ·
ѿ лица гнѣва твое҆го и҆ ꙗ҆́рости твоеа̀, ꙗ҆ко възнесъ низвер꙽же м̂ѧ·
дн҃їе мо́и ꙗ҆́ко сѣнь ѹ҆клони́шасѧ, и҆ а҆зъ ꙗ҆́ко сѣно и҆схох̑·
ты̀ же г҃и в꙽ вѣкъ пребыва́еши, и҆ па́мѧт̑ твоа в род̑ и҆ родъ·
т̂ы въскр҃съ ѹ҆ще́дриши сїѻ́на ꙗ҆ко вре́мѧ ѹ҆щедрити е҆го, ꙗ҆́ко прїиде вре́мѧ·
Ꙗ҆ко бл҃говоли́шѧ рабѝ твоѝ ка́менїе е҆го, и҆ пе́рсть е҆го ѹ҆щед̑рѧтъ·
и҆ ѹ҆боѧт̑сѧ ꙗ҆зы́цы и҆мени гн҃ѧ, и҆ вси цр҃їе зем̑стїи сла́вы твоеа̀·
Ꙗ҆́ко съѕиждетъ г҃ь сїѻ́на, и҆ ꙗ҆́вит̑сѧ въ сла́вѣ своей·
Призрѣ̀ на мл҃твꙋ ѹ҆бо́гыхъ, и҆ не ѹ҆ничижи моленїѧ и҆хъ·
да напишꙋтсѧ сїи в родъ и҆нъ, и҆ лю́дїе ѕи́ждемїи въсхва́лѧтъ г҃а·
ꙗ҆́ко призрѣ с высоты ст҃ы́а своеа̀, г҃ь съ нб҃се на́ землю призрѣ̀·
Ѹ҆слы́шати въздыха́нїе ѻ҆кованныхъ, разрѣши́ти сн҃ы ѹ҆мръщвеных̑·
Възвѣсти́ти в꙽ сїѻ́нѣ и́мѧ гн҃е, и҆ хвалꙋ̀ е҆го въ і҆ерс̑҇ли́мѣ·
внегда събратисѧ лю́демъ в꙽кꙋ́пѣ, и҆ цр҃їе работати гв҃и·
ѿвѣща е҆мꙋ на пꙋти крѣпости е҆го, ѹ҆мале́нїе днїи моих̑ възвѣстѝ ми·
Не възведи́ мене въ преполовле́нїе дн҃їи мои҆хъ, в рд̑о и҆ ро́дъ лѣта твоѧ·
в꙽ нача́лѣхъ т̂ы г҃и землю ѻ҆снова̀, и҆ дѣ́ла рꙋкъ твои҆хъ сꙋть нб҃са·
т̂а поги́бнꙋтъ, ты же пребыва́еши·
И҆ всѝ ꙗ҆́ко ри́за ѻ҆бетшѧ́ютъ, и҆ ꙗ҆ко ѻ҆де́ждꙋ съвѣ́еши и҆хъ, и҆ і҆змѣнѧ́т꙽сѧ·
Ты же то́жде еси, и҆ лѣта твоа не ѻ҆скꙋдѣютъ·
Сн҃ве рабъ твои҆х꙽ в꙽селѧтсѧ, и҆ сѣмѧ и҆хъ въ вѣкъ и҆спра́витсѧ·
ѱалом̑ дввд̑ъ, р҃в·
Блс̑҇вѝ дш҃е моа г҃а, и҆ вс̂ѧ внꙋтренѧа꙼ моѧ и́мѧ ст҃о́е е҆го·
блс̑҇ви дш҃е моа г҃а, и҆ не забывай всѣхъ въздаѧ́нїи е҆го, ѻ҆чищающаго вс̂ѧ безаконїа твоѧ, и҆сцѣлѧ́ющаго вс̂ѧ недꙋ́гы твоѧ, и҆збавлѧ́ющаго ѿ и҆стлѣнїа животъ твой·
Вѣнча́ющаго т̂ѧ млс̑҇тїю и҆ щедро́тами, и҆сплънѧ́ющаго въ бл҃гыхъ жела́нїе твое·
ѻ҆бнови́тсѧ ꙗ҆́ко ѻ҆рлꙋ ю́ность твоа·
Творѧи́ млс̑҇тыню г҃ь, и҆ сꙋдбꙋ̀ всѣмъ ѻ҆би́димымъ·
Сказа́ пꙋтѝ своѧ моѷсе́ѻ҆ви, сн҃вомъ і҆ил҃евом̑ хотѣнїа своа·
ще́дръ и҆ млс̑҇тивъ г҃ь, длъготръпѣливъ, и҆ мно́гомлс̑҇тивъ·
Не до конца̀ прогнѣва́етсѧ, ни в꙽ вѣкъ враждꙋе҆тъ.
не по безаконїемъ нашимъ сътворилъ е҆сть намъ, ни по грѣхо́м꙽ нашимъ въздалъ е҆сть намъ·
Ꙗ҆́ко по высотѣ нбс̑҇нѣй ѿ землѧ, ѹ҆твръди́лъ е҆сть г҃ь млс̑҇ть свою на боѧ́щихсѧ е҆го·
Є҆ли́ко ѿстоѧ́тъ въстоцы ѿ запд̑а, ѹ҆далилъ е҆сть ѿ насъ безаконїѧ нашѧ·
ꙗ҆́коже ще́дритъ ѿц҃ь сн҃ы, ѹ҆ще́дритъ г҃ь боѧ́щих̑сѧ е҆го·
Ꙗ҆́ко тои позна създа́нїе на́ше, помѧнꙋ̀ ꙗ҆́ко пе́рсть е҆смы·
члк҃ъ, ꙗ҆́ко трава днїе е҆го, ꙗ҆́ко цвѣтъ се́лныи та́ко ѻ҆цвѣтетъ·
ꙗ҆́ко дх҃ъ про́идет̑ в немъ, и҆ не бꙋ́детъ, и҆ не позна́ет꙽ ктомꙋ̀ мѣста свое҆го·
Млс̑҇ть же гн҃ѧ ѿ вѣка и҆ до́ вѣка на боѧ́щих̑сѧ е҆го и҆ пра́вда е҆го на сн҃ехъ сн҃въ, хранѧ́щихъ завѣтъ е҆го, и҆ помнѧщихъ за́повѣди е҆го твори́ти ѧ҆̀·
г҃ь на нбс҃и ѹ҆готова престо́лъ свой, и҆ црс̑҇тво е҆го всѣми ѻ҆блада́етъ·
блс̑҇вите г҃а вс̂и а҆́гг҃ли е҆го, си́лнїи крѣпостїю творѧ́щеѝ сло́во е҆го, ѹ҆слы́шати гласъ словесъ е҆го·
блс̑҇ви́те г҃а вс̂ѧ си́лы е҆го, слꙋгы е҆го творѧщеѝ во́лю е҆го·
блс̑҇ви́те г҃а вс̂ѧ дѣла е҆го, на всѧком̑ мѣстѣ влд̑чьства е҆го, блс̑҇ви дш҃е моа г҃а·
Сла́ва· ѱлом̑ дввд̑ъ· ѻ҆ мирьстѣмъ бы́тїи, р҃г·
Блс̑҇ви дш҃е моа̀ г҃а·
г҃и б҃е мой възвели́чилъсѧ е҆си ѕѣло·
въ и҆сповѣданїе и҆ велелѣпотꙋ сѧ ѻ҆блечѐ·
ѻ҆дѣ́асѧ свѣтом̑ ꙗ҆́ко ри́зою, пропина́ѧ нб҃о ꙗ҆ко ко́жꙋ·
Покрыва́аѝ водами превы́спренѧа своѧ, полага́ѧѝ ѻ҆́блакы на въсхоже́нїе свое·
ходѧѝ на крилꙋ вѣтреню, творѧѝ а҆́гг҃лы своѧ дх҃ы, и҆ слꙋгы̀ своѧ ѻ҆гнь палѧщъ·
ѻ҆сновааѝ землю на тверди еа̀, не приклонит̑сѧ въ вѣкъ вѣка, бе́знд̑а ꙗ҆ко ри́за ѻ҆дѣа̀нїе еа̀, на горахъ ста́нꙋтъ во́ды·
ѿ запрѣщенїа твое҆го побѣгнꙋтъ, ѿ гласа гро́ма твое҆го ѹ҆страшатсѧ·
Въсхо́дѧтъ горы, и҆ нисхо́дѧтъ полѧ̀ в꙽ мѣсто е҆же ѻ҆сновалъ е҆си и҆мъ·
Предѣлъ положи, е҆гоже не пре́идꙋт꙽, ниже ѻ҆братѧ́тсѧ покрыти зе́млю·
Посылаѧѝ и҆сто́чникы в꙽ де́брехъ, посредѣ̀ горъ про́йдꙋтъ во́ды·
Напаѧ́ютъ вс̂ѧ звѣрѧ се́лныа, ждꙋтъ ѻ҆на́гри в꙽ жаждꙋ свою̀·
На ты̀ пти́цѧ небесныа привита́ютъ, ѿт̑ среды ка́менїѧ дадѧ́тъ гласъ·
напаа́а го́ры ѿ превы́спренихъ свои҆хъ, ѿ плода̀ дѣлъ твои҆хъ насы́титсѧ землѧ·
Прозѧба́а па́жить ското́мъ, и҆ травꙋ на слꙋж́бꙋ чл҃ком꙽, и҆звести хлѣбъ ѿ землѧ̀, и҆ вино̀ веселит̑ срд̑це чл҃кꙋ·
ѹ҆мастити лицѐ е҆леѻ҆мъ, и҆ хлѣбъ срд̑це чл҃кꙋ ѹ҆крѣпи́тъ·
Насы́тѧт꙽сѧ дре́ва полска́ѧ, ке́дри лива́н꙽стїи и҆хже е҆си насадилъ·
т̂ꙋ пти́цѧ въгнѣздѧт̑сѧ, е҆роди́ево жили́ще ѻ҆блада́етъ и́ми·
Го́ры высо́кыа е҆ленем̑, камень прибѣжище за́ꙗцемъ·
Сътворилъ е҆си лꙋнꙋ̀ въ времена, слн҃це позна̀ запд̑а свой·
положѝ тмꙋ̀ и҆ бысть нощь, в не́иже про́идт̑ꙋ вс̂и ѕвѣ́рїе дꙋбра́внїи·
Ски́мни рыка́юще въсхити́ти, и҆ і҆спроси́ти ѿ б҃а пи́щꙋ себѣ·
Восїа слн҃це, и҆ събра́шѧсѧ, и҆ в ло́жахъ свои́хъ лѧ́гꙋтъ·
И҆зы́детъ чл҃кь на дѣ́ло своѐ, и҆ на дѣланїе своѐ до́ вечера·
Ꙗ҆́ко възвели́чишасѧ дѣ́ла твоѧ г҃и, вс̂ѧ премꙋ́дростїю сътворилъ е҆си·
И҆сполнисѧ землѧ тва́ри твоеа̀, с̂е мо́ре вели́ко и҆ простра́нно·
т̂ꙋ га́ди, и҆мже нѣсть числа̀, живо́тна малаѧ с꙽ вели́кими·
т̂ꙋ кораблѐ препла́ваютъ, змі́и се́и, е҆гоже създа̀ рꙋга́тисѧ е҆мꙋ·
Вс̂ѧ к꙽ тебѣ чѧютъ, да́ти пищꙋ и҆мъ въ́ бл҃го вре́мѧ.
да́вшꙋ тебѣ и҆мъ, съберꙋтъ·
ѿвръзшꙋ тебѣ рꙋкꙋ, всѧ́ческаѧ и҆сполнѧтсѧ бл҃гости·
ѿвра́щꙋ же тебѣ лице, възмѧтꙋтсѧ·
ѿи́меши дх҃ъ и҆хъ, и҆ і҆сче́знꙋтъ, и҆ в꙽ пе́рсть свою вз꙽вратѧтсѧ·
послеши дх҃ъ свой, и҆ съѕи́ждꙋтсѧ, и҆ ѻ҆бнови́ши лице землѝ·
Бꙋ́ди сла́ва гн҃ѧ въ́ вѣкы·
Възвеселитсѧ г҃ь ѻ҆ дѣлехъ свои҆хъ·
Призира́аѝ на́ землю, и творѧ ю҆̀ трѧсти́сѧ.
прикаса́ѧѝсѧ горах̑, и҆ възды́мѧтсѧ·
въспою гв҃и в животѣ̀ мое҆мъ, пою̀ б҃ꙋ мое҆мꙋ дондеже е҆смъ·
да наслади́тсѧ е҆мꙋ бесѣда моа̀, а҆з же възвеселюсѧ ѻ҆ г҃и·
скончѧ́ютсѧ грѣшницы ѿ землѧ̀, и҆ безако́нницы ꙗ҆ко не быти и҆мъ·
блс̑҇ви́ дш҃е моа̀ г҃а·
Слв̑҇а. а҆ллилꙋйа, р҃д·
Исповѣ́даитесѧ гв҃и, и҆ призыва́ите и́мѧ е҆го·
Възвѣсти́те въ ꙗ҆́зы́цех̑ дѣ́ла е҆го, Въспо́ите е҆мꙋ, и҆ по́ите е҆мꙋ·
Повѣдите вс̂ѧ чюдеса̀ е҆го, хвали́тесѧ въ и҆мѧ ст҃ое е҆го·
да возвесели́тсѧ срд̑це и́щꙋщих̑ г҃а·
в꙽зыща́те г҃а, и҆ ѹ҆тверди́тесѧ·
в꙽зыща́те лица е҆го вынꙋ, помѧнѣте чюдеса е҆го ю҆̀же сътворѝ·
Чюдеса е҆го, и҆ сꙋдбы̀ ѹ҆стъ е҆го·
сѣмѧ а҆враа́мле раби е҆го, сн҃ве і҆а́ковли и҆збра́ннїи е҆го·
То́и г҃ь бг҃ъ нашъ, по все́й землѝ сꙋдбы е҆го·
Помѧнꙋ̀ в꙽ вѣкъ завѣтъ свои, слово е҆же заповѣда в ты́сѧща родо́въ·
Є҆же завѣща̀ а҆враа́мꙋ, и҆ клѧ́твꙋ свою і҆саа́кꙋ·
И҆ поста́ви ѧ҆̀ і҆а́ковꙋ в꙽ повелѣнїе, и҆ і҆ил҃ю в꙽ завѣтъ вѣченъ·
Гл҃ѧ, тебѣ дам꙽ зе́млю ханаа́ню, ю҆же достоа́нїа ва́шего·
Зане быти и҆мъ ма́ломъ число́мъ, и҆ не мно́ѕи пришельцы в не́й.
и҆ преидо́ша ѿ ꙗ҆зы́ка въ ꙗ҆ѕыкъ, и҆ ѿ црс̑҇твїа в лю́ди и́ны·
Не ѻ҆ста́ви чл҃ка ѻ҆би́дѣти их̑, и҆ ѻ҆бличѝ ѻ҆ них̑ цр҃ѧ̀·
Не прикасайтесѧ помаза́номꙋ мое҆мꙋ, и҆ въ прро̑҇цехъ моих̑ не лꙋка́внꙋите·
И҆ призва̀ глад̑ на́ землю, всѧ́ко ѹ҆тверженїе хлѣбное сътры̀·
Посла̀ предъ ними чл҃ка, в꙽ рабъ проданъ бысть і҆ѻ́сифъ·
Смири́ша въ ѻ҆ко́вахъ но́ѕѣ е҆го, желѣзо про́иде дш҃а е҆го.
до́ндеже прїиде слово е҆го, сло́во гн҃е ражд̑еже и҆̀·
Посла цр҃ь и҆ разрѣшѝ и҆̀ кн҃ѕѧ людїи, и҆ ѻ҆ста́ви е҆го·
Ѹ҆ста́ви е҆го господи́на до́мꙋ свое҆мꙋ, и҆ кнѧ́ѕѧ всемꙋ стѧжа́нїю свое҆мꙋ, наказати кн҃ѕѧ е҆го ꙗ҆ко себѐ, и҆ старцѧ е҆го ѹ҆мꙋ́дрити·
И҆ вни́де і҆ил҃ь въ е҆гі́пет̑, и҆ і҆а́ковъ пришельствова в зе́млю ха́мовꙋ·
И҆ возрастѝ люди своа ѕѣло, и҆ ѹ҆крѣпѝ и҆̀ паче врагъ е҆го·
Превратѝ срд̑це и҆хъ, възненави́дѣти лю́ди е҆го, лесть сътвори́ти в рабѣхъ е҆го·
Посла̀ моѷсе́ѧ раба̀ свое҆го, и҆ а҆аро́на, е҆гоже и҆збра̀ себѣ·
Положи в нихъ словеса̀ зна́менїи е҆го, и҆ чюдесъ е҆го в꙽ землѝ ха́мовѣ·
Посла̀ тмꙋ̀, и҆ померче, ꙗ҆ко прегръчиша словеса̀ е҆го.
преложи во́ды и҆хъ в꙽ кровь и҆ і҆зморѝ ры́бы ихъ·
Въскипѣ̀ землѧ и҆хъ жѧ́бами, въ скро́вищихъ цр҃і́и и҆хъ·
Речѐ и҆ прїидо́шѧ песїа мꙋхы и҆ скни́пы въ всѧ предѣлы и҆хъ·
Положи дожда и҆хъ грады, ѻ҆гнь попалѧ́ющь в земли и҆хъ·
И҆ пораѕѝ винограды и҆хъ, и҆ смокви и҆хъ, сътры всѧ́ко древо предѣлъ и҆хъ·
Рече, и҆ прїидо́шѧ прꙋѕи, и҆ гꙋсе́ница, и҆́мже не бѣ числа̀.
и҆ снѣдо́ша всѧкꙋ травꙋ̀ в землѝ их̑.
и҆ поꙗ҆до́ша всѧ́къ плод̑ землѧ их̑·
И҆ пораѕѝ всѧкъ прьвенец꙽ в землѝ и҆хъ, ѿ нача́тка всѧкого трꙋда̀ и҆хъ·
И҆зведѐ их̑ съ сребром̑ и҆ зла́томъ и҆ не бѣ̀ в колѣнехъ их̑ болѧѝ·
Възвесели́сѧ е҆гипетъ въ и҆схожденїи и҆хъ, ꙗ҆́ко нападѐ страх̑ и҆хъ на́ нѧ·
Распро́стретъ ѻ҆́блакъ в покровъ им̑, и҆ ѻ҆гнь просвѣти́ти им̑ но́щїю·
Проси́шѧ, и҆ прїидо́ша крастели, и҆ хлѣба нбс̑҇наго насы́ти их̑·
Разверз꙽е камень и҆ потеко́ша воды̀, и҆ потеко́ша въ безвод̑ных̑ рѣкѝ·
Ꙗ҆́ко помѧнꙋ̀ сло́во ст҃ое свое е҆же къ а҆враа́мꙋ рабꙋ̀ свое҆мꙋ.
и҆ і҆зведѐ лю́ди своа в радости, и҆ і҆збра́нныѧ своѧ в꙽ веселїи·
И҆ дастъ им̑ страны̀ ꙗ҆ѕы́къ, и҆ трд̑ꙋ людїи наслѣдоваша.
ꙗ҆́ко да съхранѧт̑ ѻ҆правд̑анїа е҆го и҆ закона е҆го възыщт̑ꙋ·
Слв̑҇а. А҆ллилꙋйа, р҃е·
каѳ̑҇, е҃і·
Исповѣ́даитесѧ гв҃и, ꙗ҆ко бл҃гъ, ꙗ҆́ко в꙽ вѣкъ млс̑҇ть е҆го·
Кт̂о и҆з꙽гл҃етъ си́лы гн҃ѧ слы́шаны сътворит꙽ вс̂ѧ хвалы̀ е҆го;
Блаже́ни хранѧ́щеи сꙋдъ, и҆ творѧщеѝ правд̑ꙋ въ всѧ́ко вре́мѧ·
Помѧни насъ г҃и въ бл҃говоле́нїи людїи твои́хъ, посѣтѝ насъ спс҃е́нїемъ твоимъ·
Ви́дѣти въ бл҃гости и҆збра́нныа твоѧ, възвесели́тисѧ в꙽ весе́лїи ꙗ҆ѕы́ка твое҆го, хвали́тисѧ съ достоа́нїемъ твои́м꙽·
Съгрѣши́хомъ съ ѿц҃ы на́шими, безако́нновахом꙽, не ѻ҆прав꙽дихом̑·
ѿц҃ы на́ши въ еги́птѣ не разꙋмѣшѧ чюде́съ твои҆хъ, ни помѧнꙋ́ша мно́жества млс̑҇ти твое́ѧ·
И҆ прогнѣваша въсходѧще в꙽ черьмно́е море и҆ спасе и҆хъ имени своего ради, да зна́ема бꙋдетъ си́ла е҆го·
И҆ запрѣти чрьмномꙋ мо́рю, и҆ і҆з꙽сѧче.
и҆ наста́ви ѧ҆̀ в꙽ безднѣ ꙗ҆́ко в꙽ пꙋсты́ни, и҆ сп҃се и҆хъ и҆з рꙋкы̀ ненави́дѧщыхъ, и҆ і҆збави их̑ и҆з рꙋкы̀ врага̀·
Покры вода̀ стꙋжа́ющаѧ и҆мъ, ни е҆ді́нъ ѿ нихъ не и҆збысть·
И҆ вѣ́роваша словеси е҆го, и҆ въспѣша хвалꙋ е҆го, ѹ҆скори́шѧ, забы́шѧ дѣлъ е҆го, не стрьпѣша совѣта е҆го·
И҆ похотѣшѧ жела́нїю в꙽ пꙋсты́ни, и҆ і҆скꙋси́шѧ б҃а в꙽ безвод̑нѣ.
и҆ дастъ и҆мъ прошенїе и҆хъ, посла̀ сы́тость в꙽ дш҃ѧхъ их̑·
И҆ прогнѣвашѧ моѷсе́ѧ в꙽ станꙋ, а҆а҆ро́на ст҃го гн҃ѧ·
ѿврьзесѧ землѧ̀, и҆ пожрет꙽ даѳа́на, и҆ покры̀ на со́нмищи а҆виро́на·
И҆ ражд̑еже́сѧ ѻ҆́гнь в꙽ со́нмѣ их̑, пла́мень попалѝ грѣшники.
и҆ сътвори́шѧ телецъ в꙽ хори́вѣ, и҆ поклони́шѧсѧ и҆стꙋка́нномꙋ·
И҆ и҆змѣни́шѧ славꙋ е҆го в꙽ подо́бїе телца̀ ꙗдꙋщаго травꙋ̀.
и҆ забы́шѧ ба҃ сп҃са́ющаго и҆хъ, сътворшаго ве́лїа въ е҆ги́птѣ чюдеса̀ в землѝ ха́мовѣ, страшна в꙽ мо́ри чрьмнѣм꙽·
И҆ рече потребити и҆хъ, а҆ще не бы̀ моѷсїи и҆збра́нныи е҆го сталъ в꙽ сокрꙋшенїе пред нимъ, възврати́ти ꙗ҆рость е҆го да не погꙋбитъ и҆хъ·
И҆ ѹ҆ничижи́шѧ зе́млю жела́ннꙋю, не ѧ҆́ша вѣ́ры словесѝ е҆го,<.>
И҆ поропта́ша в селенихъ свои҆хъ, не ѹ҆слы́шашѧ гла́са гн҃ѧ·
и҆ възд̑ви́же рꙋкꙋ свою̀ на́ нѧ, низложи́ти и҆хъ в пꙋстыни, и҆ низложи́ти сѣмѧ и҆хъ въ ꙗ҆зы́цехъ, и҆ расточи́ти ѧ҆̀ въ страны̀.
и҆ причасти́шѧсѧ во е҆льфегор꙽, и҆ снѣдо́ѧша жрътвы мр҃твыхъ·
И҆ прогнѣвашѧ и҆̀ в꙽ начина́нихъ свои҆хъ, и҆ ѹ҆мно́жисѧ в нихъ паденїе·
И҆ ста фѵнее́съ, и҆ ѹ҆годѝ, и҆ преста̀ сѣчь, и вмѣнисѧ е҆мꙋ в꙽ пра́вдꙋ, в рд̑о и҆ ро́дъ до́ вѣка·
И҆ прогнѣваша и҆̀ на водѣ прерѣка́нїѧ, и҆ ѻ҆ѕло́бленнъ бы́сть моѷсїи их̑ ра́ди, ꙗ҆́ко ѻ҆горчи́шѧ дх҃ъ е҆го, и҆ ра́зньствова ѹ҆стна́ма своима·
Не потреби́шѧ ꙗ҆зы́кы ꙗ҆́же рече г҃ь и҆мъ, и҆ смѣси́шѧсѧ въ ꙗ҆зы́цехъ, и҆ навыко́ша дѣла и҆хъ, и҆ порабо́ташѧ и҆стꙋка́нным̑ и҆хъ, и҆ бы́сть и҆мъ в събла́знъ·
И҆ пожро́ша сн҃ы своѧ и҆ дще́рѧ своѧ бѣсовомъ·
И҆ пролїа́ша кро́вь непови́ннꙋ, кро́вь сн҃овь свои́хъ и҆ дще́рїи, ꙗ҆́же пожро́ша и҆стꙋка́нным̑ ханаанскимъ·
И҆ ѹ҆бїена бы́сть землѧ и҆хъ кро́вьми, и҆ ѻ҆скверни́сѧ в꙽ дѣлехъ и҆хъ, и҆ съблꙋди́ша в начина́них̑ свои҆хъ·
и҆ разгнѣ́васѧ ꙗ҆́ростїю г҃ь на́ люди своѧ, и҆ ѻ҆мразѝ достоа́нїе свое.
и҆ преда́стъ и҆хъ в рꙋ́кы врагом̑, и҆ ѻ҆блада́шѧ и́ми ненави́дѧщеи их̑·
И҆ стꙋжи́шѧ и҆мъ вра́ѕи и҆х꙽, и҆ смири́шѧсѧ под̑ рꙋка́ми и҆хъ·
Множицею и҆зба́ви и҆хъ, тїи же разгнѣвишѧ и҆̀ совѣтомъ свои́мъ, и҆ смири́шѧсѧ въ безако́нихъ свои҆хъ·
И҆ ви́дѣ г҃ь в꙽негда̀ скорбѣти и҆мъ, в꙽негда ѹ҆слы́шаше моленїе и҆хъ·
И҆ помѧнꙋ̀ завѣт꙽ свой, и҆ раскаа́сѧ по мно́жествꙋ млс̑҇ти своеа·
И҆ дастъ ѧ҆̀ в꙽ щедро́ты прд̑е всѣми плѣни́вшими ѧ҆̀·
Сп҃си насъ г҃и б҃е нашь, и҆ съберѝ н̂ы ѿ ꙗ҆зыкъ, и҆сповѣда́тисѧ и́мени твое҆мꙋ ст҃мꙋ, хвали́тисѧ въ хвалѣ твое́й·
Блс̑҇венъ г҃ь б҃ъ і҆и҆л҃евъ, ѿ вѣка и҆ до́ вѣка, и҆ рекꙋтъ вс̂и лю́дїе, бꙋдетъ бꙋдет̑·
Слв̑҇а, а҆ллїлꙋїа, р҃ѕ·
Исповѣда́ите гв҃и, ꙗ҆ко бл҃гъ ꙗ҆ко в꙽ вѣкъ млс̑҇ть е҆го.
да рекꙋтъ и҆зба́вленїи гм҃ь и҆хже и҆зба́ви и҆з рꙋки врагъ, и҆ ѿ стра́нъ собра̀ и҆хъ, ѿ востокъ и҆ запд̑а, и҆ сѣвера и҆ мо́рѧ·
Заблꙋди́шѧ в꙽ пꙋсты́ни безвод̑нѣ, пꙋтѝ гра́да ѻ҆би́телна не ѻ҆брѣто́ша а҆́лчюще и҆ жа́ждꙋще, дш҃ѧ и҆хъ в них̑ и҆зчеѕе·
И҆ възва́шѧ къ г҃ꙋ внегда̀ скорбѣти и҆мъ.
и҆ ѿ бѣдъ и҆хъ и҆зба́ви и҆хъ·
И҆ наста́ви и҆хъ на пꙋть пра́въ, внити въ градъ ѻ҆би́телныи да и҆сповѣдѧтсѧ гв҃и млс̑҇ти е҆го, и҆ чюдеса̀ е҆го сн҃ово́мъ члчс̑҇кымъ·
Ꙗ҆́ко насы́тилъ е҆сть дш҃ꙋ тщꙋ̀, и҆ дш҃ꙋ а҆л꙽чющꙋ и҆спо́лни бл҃гъ·
Сѣдѧ́щаѧ въ тмѣ и҆ сѣ́ни смр҃тнѣй, ѻ҆кова́ныхъ ни́щетою и҆ желѣ́зомъ·
Ꙗ҆́ко разгнѣва́шѧ словеса̀ бж҃їѧ, и҆ совѣтъ выш꙽нѧго раздра́жиша·
И҆ смири́сѧ в꙽ трꙋдѣхъ срд̑це и҆хъ, и҆знемого́шѧ, и҆ не бѣ пома́гаѝ.
и҆ възва́шѧ къ г҃ꙋ внегда скорбѣти и҆мъ.
и҆ ѿ бѣ́дъ их̑ сп҃се и҆хъ·
И҆зведе их̑ и҆з꙽ тмы̀ и҆ сѣни см҃рътныа, и҆ ю́зы и҆хъ разтръза̀·
Да и҆сповѣдѧтсѧ гв҃и млс̑҇ти е҆го, и҆ чюдеса̀ е҆го сн҃вом꙽ члчс̑҇кымъ·
Ꙗ҆́ко съкрꙋшѝ врата̀ мѣднаѧ, и҆ вереа̀ желѣ́зныа сломѝ·
Въспрїа́тъ и҆хъ ѿ пꙋти безако́нїи и҆хъ, безако́нїи б̂о ради своих̑ смири́шѧсѧ·
Всѧ́кого брашна въз꙽гнꙋшѧсѧ дш҃а их̑, и҆ прибли́жишѧсѧ до вратъ смр҃тныхъ·
И҆ възва́шѧ къ г҃ꙋ внегда скорбѣти и҆мъ, и҆ ѿ бѣд꙽ и҆хъ сп҃се и҆хъ·
Посла̀ сло́во свое и҆ і҆сцѣли и҆хъ, и і҆зба́ви и҆хъ ѿ поги́бели их̑·
да и҆сповѣдѧтсѧ гв҃и млс̑҇ти е҆го, и҆ чюдеса̀ е҆го сн҃вомъ члчс̑҇кымъ·
И҆ по́жрт̑ꙋ е҆мꙋ жрътвꙋ хвалѣ̀, и҆ да повѣдѧт꙽ дѣ́ла е҆го в ра́дости·
Сходѧ́щеѝ в꙽ мо́ри в꙽ кораблих̑, творѧ́щеи дѣ́ланїа в꙽ водах̑ мно́гах꙽, тїи видѣша дѣ́ла гн҃ѧ, и҆ чюдеса̀ его въ глꙋбинѣ̀·
Рече и҆ ста̀ дꙋхъ бꙋ́ренъ, и҆ възнесо́шѧсѧ волны̀ его·
Въсхо́дѧтъ до нб҃съ, и҆ низхо́дѧтъ до безд̑нъ·
дш҃ѧ и҆хъ в꙽ злыхъ та́ѧше.
смꙋти́шасѧ, под̑виза́шасѧ ꙗ҆ко пїа́ныи, и҆ вс̂ѧ мꙋ́дрость и҆хъ поглаще́на бысть·
И҆ възваша къ г҃ꙋ в꙽негда̀ скорбѣти и҆мъ, и҆ ѿ бѣдъ и҆х꙽ и҆зведѐ и҆хъ·
и҆ повелѣ бꙋ́ри, и҆ ста в тишинꙋ, и҆ ѹ҆млъко́шѧ волны̀ е҆го·
и҆ възвесели́шѧсѧ, ꙗ҆ко ѹ҆млъко́ша и҆ наста́вї ѧ҆̀ в꙽ приста́нище хотѣнїа свое҆го·
да и҆сповѣдѧтсѧ гв҃и млс̑҇ти е҆го, и҆ чюдеса́ е҆го сн҃овомъ члчс̑҇кымъ·
да възнесꙋтъ е҆го въ црк҃ви лд̑юстѣй, и҆ на сѣда́лищи ста́рецъ въсхва́лѧт꙽ е҆го·
положилъ е҆сть рѣкы̀ в пꙋсты́нѧ, и҆ і҆схо́дища вод̑наа в жа́жд̑ꙋ.
землю плодоно́снꙋю в꙽ слати́нꙋ, ѿ зло́б꙽ живꙋщых̑ на не́й.
Положи́лъ е҆сть пꙋсты́нѧ въ е҆ѕе́ра вд̑она́ѧ, и҆ землю безвод̑нꙋю въ и҆сходища вод̑наа·
И҆ населѝ т̂ꙋ а҆́лчющаѧ, и҆ съста́вишѧ грады ѻ҆би́телны·
И҆ насѣѧшѧ се́ла, и҆ насадишѧ виногра́ды, и҆ сътвори́шѧ плд̑о жи́тенъ·
И҆ блс̑҇вѝ и҆хъ, и҆ ѹ҆мно́жишѧсѧ ѕѣло, и҆ скоты̀ и҆хъ не ѹ҆ма́ли, и҆ ѹ҆ма́лишѧсѧ ѻ҆зло́бишасѧ ѿ печали золъ и҆ болѣзни·
и҆злїа́сѧ ѹ҆ничиженїе на́ кн҃ѕѧ и҆хъ, и҆ ѻ҆блазнѝ их̑ по непроходнѣ, а҆ не по пꙋти·
И҆ помо́же ѹ҆богꙋ ѿ ни́щеты, и҆ положи ꙗ҆ко ѻ҆вца ѿч҃ьствїа·
Ѹ҆́зрѧтъ пра́вїи, и҆ възвеселѧ́тсѧ, и҆ всѧко безако́нїе заградитъ ѹ҆ста̀ своа̀·
Кто̀ премꙋ́дръ, и҆ съхранитъ сих꙽;
и҆ разꙋмѣют̑ млс̑҇ти гн҃ѧ·
Сла́ва· пѣснь ѱалъма дввд̑ъ, р҃з·
Гото́во срд̑це мое б҃е, гото́во срд̑це моѐ.
въспою̀ и҆ пою в꙽ сла́вѣ моей·
Въста́ни сла́ва моа̀, въста́ни ѱалты́рю и҆ гꙋ́сли, въста́нꙋ рано·
И҆сповѣмсѧ тебѣ в людехъ г҃и, пою тебѣ въ ѧ҆ѕы́цѣхъ·
Ꙗ҆́ко ве́лїа верхꙋ̀ нб҃съ млс̑҇ть твоѧ, и҆ до ѻ́блакъ и́стина твоѧ·
Възнеси́сѧ на нб҃са б҃е, и҆ по все́й землѝ сла́ва твоѧ·
ꙗ҆ко да и҆зба́вѧтсѧ възлюбленїи твоѝ, сп҃сѝ десни́цею твоею̀, и҆ ѹ҆слы́ши м̂ѧ·
б҃ъ възгл҃а въ ст҃е́мъ свое҆м꙽, възнесꙋ́сѧ и҆ раздѣлю сики́мꙋ, и҆ ю҆дол̑҇ селе́нїемъ размѣ́рю·
Мой е҆сть галаад̑, и҆ мой е҆сть манасїи, и҆ е҆фрѣм꙽ застꙋпленїе главы̀ моеа̀·
И҆ ю́да цр҃ь мой, моа́въ коно́бъ ѹ҆пова́нїа мое҆го·
На ѷдꙋме́ю наложꙋ̀ сапо́гъ мой мнѣ и҆ноплеме́нницы̀ покори́шѧсѧ·
Кт̂о в꙽ведетъ м̂ѧ въ́ градъ ѻ҆бъстоа́нїа;
и҆ли кт̂о наста́витъ м̂ѧ до ѷдꙋме́а; не ты̀ ли б҃е ѿри́нꙋвыѝ насъ, и҆ не и҆зы́деши б҃е в꙽ силахъ на́шыхъ·
да́жд̑ь намъ по́мощь ѿ печали, и҆ сꙋе́т꙽но сп҃се́нїе члчс̑҇ко·
ѻ҆́ бѕ҃ѣ сътворимъ си́лꙋ, и҆ той ѹ҆ничижитъ врагы̀ наша.
в꙽ конецъ, ѱаломъ дввд̑ъ, р҃и·
Бж҃е хвалꙋ мою̀ не премолчѝ, ꙗ҆́ко ѹ҆ста грѣшнича, и҆ ѹ҆ста̀ льсти́ваго на́ мѧ ѿврьзо́шасѧ·
Гл҃ашѧ на́ мѧ ꙗ҆зы́комъ льсти́вымъ, и҆ словесы̀ ненави́стными ѻ҆быдо́шѧ м̂ѧ, и҆ бра́шѧсѧ со мно́ю тꙋ́не·
Въ мѣсто любвѐ ѻ҆блъга́хꙋ м̂ѧ, а҆з же мл҃твꙋ дѣ́ахъ·
И҆ положи́ша на́ м̂ѧ ѕл̂а въз꙽блага́ѧ, и не́нависть за възлюбле́нїе моѐ·
Поста́ви на́нь грѣш꙽ника, и҆ дїа́волъ да ста́нетъ ѻ҆деснꙋю е҆го·
Внегда̀ сꙋди́тисѧ е҆мꙋ да и҆зы́детъ ѻ҆сꙋже́нъ, и мл҃тва е҆го бꙋ́ди въ грѣхъ·
да бꙋ́дꙋтъ днїе е҆го ма́ли, и҆ е҆пі́скоп꙽ство е҆го прїйметъ и́нъ·
да бꙋ́дꙋтъ сн҃ве е҆го сѷры, и҆ жена̀ е҆го вдова̀·
дви́жащесѧ да преселѧтсѧ сн҃ове е҆го, и҆ въз꙽про́сѧтъ, да и҆згнани бꙋ́дꙋтъ и҆з домовъ свои́хъ·
да взы́щетъ заимода́вецъ всѧ е҆ли́ка сꙋть е҆го, и҆ да въсхи́тѧтъ чꙋжїи трꙋды̀ е҆го·
да не бꙋдетъ е҆мꙋ застꙋ́пника, ниже бꙋ́детъ и҆же ѹ҆ще́дритъ сѷроты е҆го·
да бꙋ́дꙋтъ чѧда е҆го в па́гꙋбꙋ, в род̑ е҆ді́нъ да потребитсѧ и́мѧ е҆го·
да въспомѧне́тсѧ безако́нїе ѿц҃ъ е҆го пред̑ гм҃ь, и҆ грѣхъ ма́тере е҆го да не ѻ҆чи́ститсѧ·
да бꙋдꙋтъ пред̑ гм҃ь вы́нꙋ, и҆ да потреби́тсѧ ѿ землѧ памѧть их̑·
занеже не помѧнꙋ̀ сътворити млс̑҇ть, и҆ погна̀ чл҃ка ни́ща и҆ ѹ҆бога, и҆ смире́на срд̑цемъ ѹ҆мрьтви́ти·
И҆ възлюби клѧ́твꙋ, и҆ прїидетъ е҆мꙋ.
и҆ не въсхотѣ блс̑҇ве́нїа, и҆ ѹ҆да́литсѧ ѿ него·
И҆ ѻ҆блече́сѧ в꙽ клѧтвꙋ ꙗ҆́ко в ри́зꙋ, и҆ вни́де ꙗ҆́ко вода̀ въ ѹ҆тробꙋ е҆го, и҆ ꙗ҆ко е҆лей въ ко́сти е҆го·
да бꙋдет꙽ е҆мꙋ ꙗ҆́ко ри́за в нюже ѻ҆блачи́тсѧ, и҆ ꙗ҆ко по́ѧсъ, и́миже вы́нꙋ ѻ҆поѧ́сꙋетсѧ<.>
Се̂ дѣ́ло ѻ҆блъга́ющихъ м̂ѧ ѿ г҃а, и҆ гл҃ющыхъ лꙋкаваѧ на дш҃ꙋ мою·
И҆ ты г҃и г҃и сътвори со мною и́мени ради своего, ꙗ҆́ко бл҃га млс̑҇ть твоа·
Изба́ви м̂ѧ, ꙗ҆́ко ни́щь и҆ ѹ҆бо́гъ е҆смь а҆з꙽ и҆ срд̑це мое, смꙋтисѧ во мнѣ·
Ꙗ҆́ко сѣнь е҆гда ѹ҆кло́нитсѧ ѿѧх̑сѧ, сътрѧсохсѧ ꙗ҆́ко прꙋ́ѕи·
Колѣнѣ моѝ и҆знемого́стѣ ѿ поста, и҆ плоть моа̀ и҆змѣни́сѧ е҆ле́ѧ ради·
И҆ а́зъ бых̑ поноше́нїе и҆мъ.
видѣшѧ мѧ, покиваша глава́ми свои́ми·
Помозѝ м̂и г҃и бж҃е мой, и҆ сп҃сѝ м̂ѧ по млс̑҇ти твое́й·
и҆ разꙋмѣютъ, ꙗ҆́ко рꙋка твоа̀ си, и҆ т̂ы г҃и сътворилъ е҆си ѧ҆̀·
Проклент̑ꙋ тїи, и҆ ты̀ блс̑҇ви́ши·
Въста́ющеѝ на мѧ постыдѧтсѧ, ра́бъ же твой възвесели́тсѧ·
да ѻ҆блекꙋтсѧ ѻ҆блъга́ющеѝ м̂ѧ в꙽ срамъ, и҆ ѻ҆де́жют꙽сѧ ꙗ҆ко ѻ҆дежею стꙋдо́мъ свои́мъ·
И҆сповѣмсѧ гв҃и ѕѣло̀ ѹ҆сты̀ мои́ми, и҆ посредѣ мно́гъ въсхваю̀ и҆̀·
Ꙗ҆́ко ста̀ ѻ҆деснꙋю ѹ҆бо́гаго, спастѝ ѿ гонѧ́щых꙽ дш҃ꙋ мою̀·
Слв̑҇а, а҆ллїлꙋі꙼а ѱлом̑ двд̑в꙽ р҃ѳ,
каѳ̑҇ ѕ҃і·
Речѐ г҃ь гв҃и моемꙋ, сѣдѝ ѻ҆деснꙋю мене, дондеже положꙋ врагы̀ твоа под̑но́жїе ногама твои́ма·
Же́злъ си́лы по́слетъ т̂и г҃ь ѿ сїѻ́на, и҆ ѹ҆долѣеши посредѣ врагъ твои́хъ·
С тобою началство в꙽ дн҃ь си́лы твоеа̀, въ свѣтлостех̑ ст҃ыхъ твои҆х꙽·
И҆з꙽ чрева прежд̑е дн҃ьни́ца родих̑ т̂ѧ.
клѧтсѧ г҃ь и҆ не раска́етсѧ·
т̂ы і҆ере́й въ вѣкы, чинꙋ мельхиседе́ковꙋ·
г҃ь ѻ҆деснꙋю тебе, съкрꙋшилъ е҆сть въ дн҃ь гнѣва свое҆го цр҃ѧ·
Сꙋ́дитъ въ ꙗ҆ѕы́цехъ, и҆сполнитъ паде́нїа, съкрꙋши́тъ главы̀ на землѝ мно́гым̑·
ѿ пото́ка на пꙋтѝ пїетъ, сего ради възнесе́тъ главꙋ·
А҆ллилꙋйа. р҃і·
Исповѣмсѧ тебѣ г҃и всѣмъ срд̑цемъ мои́мъ, в꙽ совѣтех̑ пра́выхъ и҆ сонмѣ·
Ве́лїа дѣла гн҃ѧ, и҆зы́скана во всх̑ѣ во́лѧхъ е҆го,<.>
И҆ сповѣданїе и҆ велелѣпота дѣ́ло е҆го, и҆ пра́вда е҆го пребыва́етъ въ вѣкъ вѣка·
Памѧть сътворилъ е҆сть чюде́съ свои́хъ·
Ми́лостивъ и҆ щедръ г҃ь, пи́щꙋ далъ е҆ст꙽ боѧ́щимсѧ е҆го·
Помѧне́тъ в꙽ вѣкъ завѣтъ свой, крѣпость дѣлъ своих̑ вѣзвѣстѝ лю́демъ свои҆мъ·
да́ти и҆мъ достоа́нїе ꙗ҆ѕыкъ, дѣ́ла рꙋкъ е҆го и҆стина и҆ сꙋдъ·
Вѣрны всѧ за́повѣди е҆го, ѹ҆тверже́ны въ вѣкъ вѣка, сътворены въ и҆стинѣ и҆ пра́вотѣ·
И҆збавленїе посла̀ лю́демъ свои́мъ·
Заповѣда в꙽ вѣкъ завѣт꙽ свой·
Ст҃о и҆ стра́шно и҆мѧ е҆го·
зача́ло премꙋ́дрости, страхъ гн҃ь.
ра́зꙋмъ же бл҃гъ всѣмъ творѧщымъ его·
Хвала̀ е҆го пребыва́етъ въ вѣк꙽ вѣка·
А҆ллилꙋйа. ра҃і·
Блаже́нъ мꙋжъ боаѝсѧ г҃а, в꙽ за́повѣдехъ е҆го въсхо́щет̑ ѕѣло̀·
Силно на земли бꙋдетъ сѣмѧ е҆го, родъ пра́вых̑ блс̑҇витсѧ·
Сла́ва и҆ бога́т꙽ство в домꙋ е҆го, и҆ пра́вда е҆го пребыва́етъ въ вѣкъ вѣка·
Въсїа̀ во тмѣ̀ свѣтъ пра́вымъ, млс̑҇тивъ и҆ ще́дръ и҆ пра́веденъ·
Бл҃гъ мꙋжъ щедрѧѝ и҆ даа̀, расмо́тритъ словеса своа̀ на сꙋдѣ, ꙗ҆́ко в꙽ вѣкъ не подви́житсѧ·
в꙽ па́мѧть вѣчнꙋю бꙋ́детъ пра́вед̑ник꙽, ѿ слꙋха ѕла̀ не ѹ҆бои́тсѧ, гото́во сръдце е҆го ѹ҆пова́ти на́ г҃а, ѹ҆тверди́сѧ срд̑це е҆го, не ѹ҆бои́тсѧ, дондеже во́з꙽ритъ на врагы̀ своѧ·
расточи, дастъ ѹ҆бо́гымъ, пра́вда е҆го пребыва́е҆тъ въ вѣкъ вѣка, ро́гъ е҆го възнесетсѧ въ сла́вѣ·
Грѣшникъ ѹ҆зрит̑ и҆ прогнѣвае҆тсѧ, ѕꙋбы̀ свои́ми поскреже́щет̑, и҆ раста́етъ.
жела́нїе грѣшника поги́бнет̑·
Слв̑҇а а҆ллилꙋі꙼а· рв҃і
Хвали́те ѻ҆троцы г҃а, хвали́те и҆мѧ гн҃е·
Бꙋди и́мѧ гн҃е блс̑҇ве́но, ѿ нн҃ѣ и҆ до́ вѣка·
ѿ въсто́къ сл҃нца до за́пад꙽, хва́лно и́мѧ гн҃е·
высо́къ над̑ всѣми ꙗзы́кы г҃ь, нд̑а нб҃сы̀ сла́ва е҆го·
Кт̂о ꙗ҆ко г҃ь б҃ъ нашь, на высо́кых̑ живыѝ, и҆ на смиреныа призираа;
на нб҃си и҆ на землѝ·
Въздвиза́аѝ ѿ землѧ̀ ѹ҆бога, и҆ ѿ гно́ища възносѧ̀ ни́ща·
Посадити е҆го с꙽ кн҃ѕѝ, съ кн҃ѕѝ людїи своих̑·
вселѧ́аѝ непло́дове в꙽ дом̑, мт҃рь ѻ҆ чѧдх̑ѣ веселѧ́щꙋсѧ·
А҆ллилꙋйа. рг҃і·
Въ и҆сходѣ і҆ил҃евѣ ѿ е҆ги́пта, до́мꙋ і҆а́ковлѧ и҆з людїи ва́ръваръ, бысть і҆ю҆де́ѧ ст҃ни е҆го, і҆ил҃ь ѻ҆́бласть е҆го·
Мо́ре видѣ̀ и҆ побѣже, и҆ѻ́рданъ възврати́сѧ в꙽спѧт̑·
Го́ры възыгра́шѧсѧ ꙗ҆ко ѻ́вни, и҆ хлъмѝ ꙗ҆ко а҆́гньцы ѻ҆вчїи·
Что т̂и бысть мо́ре ꙗ҆ко побѣже.
и҆ тебѣ и҆ѻ҆рда́ню, ꙗ҆ко възврати́сѧ в꙽спѧть;
го́ры ꙗ҆́ко взыграстесѧ, ꙗ҆ко ѻ҆вни.
и҆ хлъми, ꙗ҆́ко а҆гньцы ѻ҆вчїи;
ѿ лица̀ гн҃ѧ под̑вижасѧ землѧ̀, ѿ лица бг҃а і҆а́ковлѧ, ѻ҆бращшаго ка́мень въ е҆зе́ра вод̑на́ѧ, и҆ несѣко́мыи въ и҆сточникы вд̑оныѧ·
Не намъ г҃и не на́мъ, н̂о и́мени твоемꙋ дажд̑ь сла́вꙋ·
Ѡ҆ млс̑҇ти твое́и, и҆ і́стинѣ твоей, да не когда̀ рекꙋтъ ꙗ҆ѕы́цы, гдѣ е҆сть б҃ъ и҆х꙽;
б҃ъ же наш̑҇ на нб҃си и҆ на землѝ·
Вс̂ѧ е҆ли́ка въсхотѣ̀, сътворѝ·
И҆́доли ꙗ҆́ѕыкъ, сребро̀ и҆ зла́то, дѣ́ла рꙋкъ чл҃чьскъ·
Ѹ҆ста̀ и́мꙋтъ, и҆ не гл҃ютъ·
ѻ҆чи и҆мꙋтъ, и҆ не ви́дѧтъ·
ѹ҆ши и҆мꙋтъ, и҆ не слы́шѧтъ·
Ноздри и҆мꙋтъ, и҆ не ѻ҆бонѧ́ютъ·
Рꙋцѣ и҆мꙋтъ, и҆ не ѻ҆сѧ́жꙋтъ·
Но́ѕѣ и҆мꙋтъ, и҆ не по́идꙋтъ·
Не възгласѧт̑ горта́немъ свои́мъ·
Подо́бни и́мъ да бꙋдꙋтъ творѧщеѝ ѧ҆̀, и҆ в꙽сѝ надѣющеѝсѧ на нѧ·
домъ і҆ил҃евъ ѹ҆пова̀ на г҃а, помощникъ и҆ защи́титель им̑ е҆сть·
дом̑ а҆аро́нь ѹ҆пова̀ на́ г҃а, помощник̑҇ и҆ защи́титель им̑ е҆сть·
Боѧ́щеѝсѧ г҃а ѹ҆пова́шѧ на́ г҃а, помощникъ и҆ защититель им̑ е҆сть·
г҃ь помѧнꙋв꙽ н̂ы, блс̑҇вилъ е҆сть нас̑҇·
блс̑҇вилъ е҆сть дом̑ і҆ил҃ев꙽, блс̑҇вилъ е҆сть домъ а҆а҆ро́нь·
блс̑҇вилъ е҆сть боѧ́щасѧ г҃а ма́лаѧ с꙽ вели́кыми·
приложитъ г҃ь на в̂ы, на́ вы и҆ на сн҃ы вашѧ·
блс̑҇ве́ни в̂ы гв҃и, сътво́ршемꙋ нб҃о и҆ зе́млю·
Нб҃о нб҃си гв҃и, зе́млю же дастъ сн҃овомъ чл҃чьскым̑·
Не мр҃твїи въсхва́лѧт̑ тѧ г҃и, ни вси низходѧщеѝ въ а҆дъ·
н̂о мы̀ живїи блс̑҇ви́мъ г҃а, ѿ нн҃ѣ и҆ до́ вѣка·
А҆ллилꙋйа. рд҃і·
Възлюбихъ, ꙗ҆ко ѹ҆слы́шит̑ г҃ь глс̑҇а моленїа мое҆го·
Ꙗ҆́ко приклонѝ ѹ҆хо своѐ мн̂ѣ, и҆ въ дн҃и моа призовꙋ·
ѻ҆бьѧ́ша м̂ѧ болѣзни см҃ртныа, бѣды̀ а҆довы ѻ҆брѣто́ша м̂ѧ·
Ско́рбь и҆ болѣзнь ѻ҆брѣтохъ, и҆ і́мѧ гн҃е призвах꙽·
ѽ г҃и и҆зба́ви дш҃ꙋ мою·
Млс̑҇тивъ г҃ь и҆ пра́веденъ, и҆ б҃ъ нашь ми́лꙋетъ·
Хранѧ́ѝ младенцѧ г҃ь, сми́рихсѧ и҆ сп҃се м̂ѧ·
Възврати́сѧ дш҃е моѧ в꙽ покой твой, ꙗ҆ко г҃ь бл҃го сътворѝ тебѣ·
ꙗ҆ко и҆зба́ви дш҃ꙋ мою ѡ сме́рти, ѻ҆́чи моѝ ѿ слеѕъ, и҆ но́ѕѣ моѝ ѿ въспополъзнове́нїа·
Бл҃гоѹ҆жд̑ꙋ прд̑е гм҃ь въ странѣ живых̑·
Слв̑҇а. А̀ллїлꙋйа. ре҃і·
Вѣровахъ тѣмже възгл҃ах̑.
а҆з же смирихъсѧ ѕѣло·
А҆з꙽ же рѣхъ въ ѹ҆жасѣ моемъ, всѧкъ чл҃кь ло́жъ·
Чт̂о въздамъ гв҃и ѻ҆ всѣхъ, и҆́хже въздастъ м̂и;
Ча́шꙋ сп҃сенїа прїимꙋ и҆ і́мѧ гн҃е призовꙋ̀·
Мл҃твы моа гв҃и въздамъ прд̑е всѣми лд̑юми е҆го·
Честна прд̑е гм҃ь смр҃ть прпд̑бныхъ е҆го·
ѽ г҃и, а҆зъ ра́бъ твой, а҆зъ ра́бъ твой, и҆ сн҃ъ рабы твоеа̀.
растръза̀ ю҆́зы моѧ·
Тебѣ пожрꙋ жр҃твꙋ хвалѣ, и҆ въ и҆мѧ гн҃е призовꙋ·
Мо́литвы моѧ гв҃и възда́мъ, прд̑е всѣми лд̑юми е҆го.
въ дворѣхъ домꙋ гн҃ѧ, посредѣ тебе і҆ерс̑҇ли́мъ·
А҆́ллилꙋйа. рѕ҃і·
Хвали́те г҃а вс̂и ꙗ҆ѕы́ци, похвали́те е҆го вс̂и лю́дїе.
ꙗ҆ко ѹ҆твердисѧ ми́лость е҆го на насъ, и҆ і́стина гн҃ѧ пребыва́етъ въ́ вѣки·
А҆́ллилꙋйа, рз҃і·
Исповѣдаитесѧ гв҃и, ꙗ҆ко бл҃гъ ꙗ҆ко в꙽ вѣкъ млс̑҇ть е҆го·
да рече́тъ ѹ҆бо домъ і҆ил҃евъ, ꙗ҆ко бл҃гъ, ꙗ҆ко в꙽ вѣкъ млс̑҇ть е҆го·
да рече́тъ ѹ҆бо домъ а҆а҆ро́нь, ꙗ҆ко бл҃гъ, ꙗ҆ко в́ вѣкъ млс̑҇ть е҆го·
да рект̑ꙋ ѹ҆бо вс̂и боѧ́щеѝсѧ г҃а, Ꙗ҆́ко бл҃гъ, ꙗ҆́ко в꙽ вѣкъ млс̑҇ть е҆го·
ѿ скорби призвахъ г҃а, и҆ призва̀ м̂ѧ в꙽ простра́нтво·
г҃ь мн̂ѣ помщникъ, и҆ не ѹ҆бою́сѧ чт̂о сътворитъ мнѣ чл҃к꙽·
г҃ь мн̂ѣ помощникъ, и҆ а҆́зъ въз꙽зрю на врагы моѧ·
Бл҃го е҆сть надѣ́атисѧ на́ г҃а, не́жели надѣ́атисѧ на чл҃ка·
Бл҃го е҆сть ѹ҆повати на́ г҃а, не́же ѹ҆повати на́ кн҃зѧ·
Вс̂и ꙗ҆ѕы́ци ѻ҆быдошѧ м̂ѧ, и҆ і́менемъ гн҃имъ противлѧх̑сѧ и҆мъ·
ѻ҆бышд̑еше ѻ҆быдо́шѧ м̂ѧ, и҆ і́менем̑ гн҃имъ противлѧх̑сѧ им̑·
ѻ҆быдо́ша мѧ ꙗ҆ко пче́лы сот꙽, и҆ раз꙽горѣшасѧ ꙗ҆ко ѻ҆́гнь в꙽ терьнїи, и҆ і́менем̑ гн҃им̑ противлѧх̑сѧ и҆м꙽·
Възриновенъ преклоних̑сѧ па́сти, и҆ г҃ь прїа́т꙽ мѧ·
Крѣпость моа и҆ пѣнї моѐ г҃ь, и҆ бы́сть м̂и въ сп҃се́нїе·
Глс̑҇а ра́дости и҆ сп҃се́нїа в се́лехъ правд̑еникъ·
десни́ца гн҃ѧ сътвори си́лꙋ, десни́ца гн҃ѧ възнес́е м̂ѧ·
десни́ца гн҃ѧ сътворѝ си́лꙋ·
не ѹ҆мрꙋ̀ н̂о живъ бꙋдꙋ, и҆ повѣм꙽ дѣ́ла гн҃ѧ·
Показꙋа наказа̀ м̂ѧ г҃ь, см҃рьти же не предастъ м̂ѧ·
ѿврьзѣте мнѣ врата̀ пра́вды, и҆ вшд̑е в н̂ѧ и҆сповѣмсѧ гв҃и·
Сїи врата гн҃ѧ пра́вд̑енїи вни́дꙋтъ в нѧ·
И҆сповѣмсѧ тебѣ, ꙗ҆ко ѹ҆слы́ша м̂ѧ, и҆ бысть мн̂ѣ въ спасе́нїе·
Ка́мень е҆гоже небрего́шѧ ѕи́ждꙋщей, сей бысть въ главꙋ̀ ѹ҆глꙋ·
ѿ г҃а бысть с̂и, и҆ е҆сть ди́вна въ ѻ҆чїю на́шею·
Сі́и дн҃ь и҆же сътворѝ г҃ь, възрадꙋемсѧ и҆ възвеселимсѧ вонь·
ѽ г҃и сп҃си же, ѽ г҃и поспѣши же·
блс̑҇ве́нъ грѧдыѝ въ и҆мѧ гн҃е, блс̑҇ви́хом̑ в̂ы и҆з домꙋ гн҃ѧ·
б҃ъ г҃ь, и҆ ꙗ҆ви́сѧ намъ·
Съста́вите празд̑никъ въ ѹ҆крашеных̑, до ро́гъ ѻ҆лтаре́выхъ·
б҃ъ мой е҆си т̂ы, и҆ і҆сповѣмтисѧ·
б҃ъ мой е҆си т̂ы, и҆ възнесꙋ̀ т̂ѧ·
и҆сповѣмсѧ тебѣ, ꙗ҆ко ѹ҆слы́ша м̂ѧ, и҆ бысть мн̂ѣ въ сп҃се́нїе·
И҆сповѣдайтесѧ гв҃и ꙗ҆ко бл҃гъ, ꙗ҆ко в꙽ вѣкъ млс̑҇ть е҆го·
Слв̑҇а. А҆ллилꙋйа, ри҃і·
Каѳ̑҇ з҃і·
Блаже́ни непоро́чнїи в꙽ пꙋть, ходѧ́щеѝ в꙽ зако́нѣ гн҃и·
блаже́ни и҆спыта́ющеѝ свѣдѣнїа е҆го, всѣмъ срд̑цемъ в꙽зы́щꙋтъ е҆го·
Не дѣлающеи б̂о безако́нїе в пꙋтех̑ его ходиша·
Ты̂ заповѣда ѕа́повѣди твоѧ, съхранити ѕѣло·
Є҆да и҆спра́вилисѧ бышѧ пꙋтїе моѝ, съхранити ѻ҆правданїа твоа·
Тогда̀ не постыжд̑ꙋсѧ е҆гда призрю̀ на всѧ̀ за́повѣди твоа·
И҆сповѣмсѧ тебѣ в꙽ пра́вости срд̑ца, внегда̀ наѹ҆чи́ти ми сѧ сꙋдбам꙽ пра́в꙽ды твоеа̀·
ѻ҆правданїа твоѧ съхраню̀, не ѻ҆ста́ви мене до ѕѣла·
в чем̑ и҆спра́витъ ю́нный пꙋть свой;
в꙽негда съхранити словеса̀ твоѧ·
Всм̑ѣ срд̑цемъ мои́мъ взыскахъ тебе, не ѿри́ни мене ѿ за́повѣдей твои́хъ·
в꙽ срд̑ци мое́мъ съкрых̑ словеса̀ твоѧ, да не съгрѣшю̀ тебѣ·
Блс̑҇ве́нъ е҆си г҃и, наѹ҆чѝ м̂ѧ ѻ҆правда́нїемъ твои́м꙽·
Ѹ҆стна́ма мои́ма възвѣстихъ всѧ сꙋдбы̀ ѹ҆стъ твои́хъ·
На пꙋтѝ свѣдѣнїи твоих̑ насладихсѧ, ꙗ҆́ко ѻ҆ всѧ́комъ бога́тьствѣ·
В за́повѣдехъ твоих̑ поглꙋмлю́сѧ, и҆ разꙋмѣю пꙋти твоѧ·
Въ ѻ҆правда́нихъ твои́х꙽ поѹ҆чюсѧ, не забꙋ́дꙋ словесъ твоих꙽·
възда́жд̑ь рабꙋ твоемꙋ, живѝ м̂ѧ, и҆ съхраню словеса твоа·
ѿкрый ѻ́чи моѝ, и҆ разꙋмѣю чꙋдеса̀ ѿ зако́на твое҆го·
Пришле́цъ а҆зъ е҆смь на зем̑лѝ, не съкрый ѿ мене ѕа́повѣди твоѧ·
Възлюбѝ дш҃а моа, въжделѣти сд̑ꙋбы̀ твоѧ на всѧ́ко вре́мѧ·
Запрѣтилъ е҆си гръды́мъ, про́клѧти ѹ҆кланѧ́ющеисѧ ѿ за́повѣдей твоих̑·
ѿи́ми ѿ мене поно́съ и҆ ѹ҆ничиже́нїе, ꙗ҆ко свѣдѣнїи твоих̑ взыскахъ·
И҆бо сѣдоша кнѧ́ѕи, и҆ на мѧ клевета́хꙋ.
ра́бъ же твой глꙋмлѧ́шесѧ въ ѻ҆прав꙽да́нихъ твоих̑·
И҆бо свѣдѣнїа твоа поѹ҆че́нїе моѐ е҆сть, и҆ совѣти моѝ ѻ҆правданїа твоа·
Прильпе земли дш҃а моѧ̀, живѝ мѧ по словесѝ твоемꙋ·
пꙋти моѧ и҆сповѣдахъ, и҆ ѹ҆слы́ша м̂ѧ.
наѹ҆чи м̂ѧ ѻ҆правда́нїем꙽ твои́мъ·
Пꙋти ѻ҆правда́нїи твоих̑ вразꙋмѝ м̂ѧ, и҆ поглꙋмлюсѧ в чюдесех̑ твои́хъ·
Въздрѣма̀ дш҃а моа ѿ ѹ҆ны́нїа, ѹ҆твердѝ м̂ѧ в꙽ словесѣхъ твои́хъ·
Пꙋть непра́вды ѿстави ѿ мене, и҆ зако номъ твои́мъ поми́лꙋй м̂ѧ·
Пꙋть и́стинный и҆зволихъ, и҆ сд̑ꙋбы̀ твоѧ не забых̑·
Прилѣпихсѧ свѣдѣнїи твои́хъ, г҃и, не посрамѝ мене·
Пꙋть за́повѣдей твоих꙽ текох̑, е҆гда разши́рилъ е҆си срд̑це мое·
Законополо́жи мн̂ѣ г҃и пꙋть ѻ҆правданїи твои́хъ, и҆ взы́щꙋ и҆̀ вы́нꙋ·
вразꙋмѝ м̂ѧ, и҆ і҆спытаю законъ твой, и҆ съхраню̀ и҆̀ всѣмъ срд̑цемъ мои́мъ·
Настави м̂ѧ на пꙋть за́повѣдей твоихъ, ꙗ҆́ко тои въсхотѣхъ·
Приклонѝ срд̑це мое въ свѣдѣнїа твоа, а҆ не в лихои́м꙽ство·
ѿвратѝ ѻ҆́чи моѝ, не ви́дѣти сꙋе́ты, в пꙋти твое́мъ живѝ м̂ѧ·
Поста́ви рабꙋ твоемꙋ сло́во твое, въ страх̑ твой·
ѿи́ми поноше́нїе мое, е҆же непщевахъ, ꙗ҆́ко сꙋдбы твоѧ бл҃гы·
Се̂ въжделѣхъ за́повѣди твоѧ, в правдѣ твое́й живѝ м̂ѧ·
И҆ да прїидетъ на мѧ млс̑҇ть твоѧ, г҃и, сп҃се́нїе твое по словеси твое҆мꙋ·
И҆ ѿвѣща́ю поношѧ́ющим̑ м̂и сло́во, ꙗ҆́ко ѹ҆повах̑ на словеса твоа·
И҆ не ѿи́ми ѿ ѹ҆стъ мои́хъ словесе и́стинна до ѕѣла̀, ꙗ҆́ко на сꙋдбы твоѧ ѹ҆повахъ·
И҆ сохраню зако́нъ твой всегда, в꙽ вѣкъ, и въ вѣкъ вѣка·
И҆ хождахъ в꙽ широтѣ, ꙗ҆́ко за́повѣди твоѧ в꙽зыскахъ·
И҆ гл҃ахъ ѻ҆ свѣдѣнихъ твоих̑ пред꙽ цр҃и, и҆ не стыдѧх̑сѧ·
И҆ поѹ҆чахсѧ в꙽ за́повѣдехъ твои́хъ, ихже възлюбих̑ ѕѣло̀·
И҆ въздигох꙽ рꙋцѣ моѝ к꙽ заповѣдемъ твои́мъ, и҆́хже възлюбихъ, и҆ глꙋмлѧ́х꙽сѧ въ ѻ҆правданихъ твои́хъ·
Помѧни слове́съ твоихъ рабꙋ твоемꙋ, и́хже ѹ҆пова́нїе далъ м̂и е҆си, та мѧ ѹ҆тѣши въ смиренїи моемъ, ꙗ҆́ко сло́во твое живи м̂ѧ·
Гръдїи законопрестꙋпова́хꙋ ѕѣло̀, ѿ зако́на же твоего не ѹ҆клонихсѧ·
Помѧнꙋхъ сд̑ꙋбы твоѧ ѿ вѣка, г҃и, и҆ ѹ҆тѣшихсѧ·
Печаль прїа́тъ м̂ѧ, ѿ грѣшникъ, ѻ҆ставлѧ́ющыхъ законъ твой·
Пѣта бѣхꙋ мн̂ѣ ѻ҆правда́нїѧ твоѧ, на мѣстѣ пришельствїа мое҆го·
Помѧнꙋхъ в нощѝ и҆мѧ твое г҃и, и съхранихъ законъ твой·
Си̂ бысть мнѣ ꙗ҆ко ѻ҆правда́нїи твои́хъ взыскахъ·
Часть моа̀ е҆си г҃и, рѣхъ съхрани́ти законъ твой·
Помолихсѧ лицꙋ твое҆мꙋ всѣмъ срд̑цемъ моим̑, поми́лꙋй м̂ѧ по словесѝ твоемꙋ·
Помыслихъ пꙋтѝ твоѧ, и҆ възвратихъ но́ѕѣ моѝ въ свѣдѣнїа твоѧ·
ѹгото́вихъсѧ и҆ не смꙋтихсѧ съхрани́ти за́повѣди твоѧ·
ю҆жѧ грѣшникъ ѻ҆бѧза́шѧсѧ мн̂ѣ, и҆ закона твоего не забых꙽·
Полꙋнощи въстаа́хъ, и҆сповѣдатисѧ тебѣ на сꙋдбы̀ правды твоеа̀·
прича́стникъ а҆зъ е҆смь всѣмъ боѧ́щим̑сѧ тебе, и҆ хранѧ́щим̑ за́повѣди твоѧ·
Млс̑҇ти твоеа̀ г҃и и҆сполнь землѧ̀, ѻ҆правданїемъ твои́мъ наѹ҆чи м̂ѧ·
бла́гость сътворилъ е҆си с рабомъ твои҆м꙽ г҃и, по словеси твое҆мꙋ·
Бл҃гости и҆ наказа́нїю и҆ ра́зꙋмꙋ наѹ҆чѝ м̂ѧ, ꙗ҆ко заповѣдемъ твои́мъ вѣ́ровахъ·
Прежд̑е даже не смирихсѧ а҆зъ прегрѣших꙽, сего ради слово твое съхраних·
Бл҃гъ е҆си ты г҃и, и҆ бл҃гостїю твоею̀ наѹ҆чи м̂ѧ ѻ҆правда́нїемъ твои́мъ·
ѹ҆множисѧ на мѧ непра́вда гордых̑;
Аз же всѣмъ срд̑цемъ мои́мъ и҆спыта́ю за́повѣди твоѧ·
ѹ҆сы́рисѧ ꙗ҆́ко млеко срд̑це и҆хъ, а҆з же зако́нꙋ твоемꙋ поѹ҆чихсѧ·
Бл҃го мн̂ѣ, ꙗ҆ко смирилъ мѧ е҆си, да наѹ҆чю́сѧ ѻ҆правда́нїемъ твои́мъ·
Бл҃гъ мн̂ѣ зако́нъ ѹ҆стъ твои́хъ, паче ты́сꙋщъ злата̀ и҆ сребра̀·
Сла́ва·
Рꙋцѣ̀ твоѝ сътвори́ста м̂ѧ, и҆ създа́ста м̂ѧ·
Вразꙋмѝ м̂ѧ, и҆ і҆спыта́ю заповѣди твоѧ·
Боѧ́щеѝсѧ тебе ѹ҆зрѧтъ м̂ѧ, и҆ възвеселѧтсѧ, ꙗ҆ко на словеса твоѧ ѹ҆повах꙽·
Разꙋмѣхъ г҃и, ꙗ҆ко правда повелѣнїа твоѧ и҆ въи҆стинꙋ смирилъ м̂ѧ е҆си·
Бꙋди же млс̑҇ть твоа̀, да ѹ҆тѣшитъ м̂ѧ по словеси твое҆мꙋ раба твоего·
да прїидꙋтъ мн̂ѣ щедро́ты твоѧ, и҆ живъ бꙋ́дꙋ, ꙗ҆ко законъ твой поѹ҆че мое е҆сть.
да постыдѧтсѧ гръдїи, ꙗ҆ко без꙽ пра́вды безаконоваша на́ мѧ.
а҆́з же поглꙋмлюсѧ в꙽ заповѣдехъ твои҆хъ·
да ѻ҆братѧт꙽ м̂ѧ боѧщеѝсѧ тебе, и҆ вѣдꙋщеѝ свд̑ѣнїа твоѧ·
Бꙋди срд̑це мое непоро́чно въ ѻ҆правданих̑ твои҆хъ, ꙗ҆ко да сѧ не постыждꙋ·
И҆счеза́етъ въ сп҃се́нїе твое дш҃а моа, в꙽ сло́во твое ѹ҆повахъ·
И҆зчезо́шѧ ѻ҆́чи моѝ в꙽ сло́во твое, гл҃юще, когда ѹ҆тѣшиши м̂ѧ;
ꙗ҆́ко быхъ ꙗ҆́ко мѣхъ на сланѣ, ѻ҆правда́нїи твои҆хъ не забыхъ·
коли́ко е҆сть днїи раба твое҆го, когда сътвори́ши ѿ гонѧ́щыхъ м̂ѧ сꙋдъ;
повѣдашѧ мн̂ѣ законопрестꙋпницы глꙋмле́нїа, н̂о не ꙗ҆́ко закон꙽ твой г҃и·
Вс̂ѧ за́повѣди твоѧ и҆стина·
Без пра́вды погна́ша м̂ѧ помози м̂и·
Ма́ла не сконча́ша мене на землѝ, а҆з же не ѻ҆ставихъ заповѣди твоѧ·
По млс̑҇ти твоей живи м̂ѧ, и҆ съхраню̀ свѣдѣнїа ѹ҆стъ твои́хъ·
Въ́ вѣкы г҃и сло́во твое пребыва́етъ на́ нб҃си, в род̑ и҆ родъ и҆сти́на твоа·
ѻ҆сновалъ е҆си землю, и҆ пребыва́етъ ѹ҆чиненїемъ твои́мъ.
пребывает̑ дн҃ь, ꙗ҆́ко всѧ́ческаѧ рабо́тна тебѣ·
Ꙗ҆́ко а҆ще не законъ твой поѹ҆ченїе мое е҆сть тогда ѹ҆бо поги́блъ быхъ въ смиренїи моемъ·
Въ вѣкъ не забꙋдꙋ ѻ҆правд̑анїи твои҆хъ, ꙗ҆́ко въ нихъ живи́лъ м̂ѧ е҆си·
Статїѧ, в҃·
Твой е҆смь а҆зъ, сп҃си м̂ѧ, ꙗ҆́ко ѻ҆правда́нїи твоих̑ в꙽зыскахъ·
Мене жда́шѧ грѣшницы, погꙋбити м̂ѧ.
свѣдѣнїа твоѧ разꙋмх̑ѣ·
Всѧкоа кончи́ны видѣхъ конецъ, широка за́повѣдь твоѧ ѕѣло̀·
Коль възлюбихъ законъ твой г҃и, весь дн҃ь поѹ҆ченїе мое е҆сть·
Паче вра́гъ мои́хъ ѹ҆мꙋ́дрилъ м̂ѧ е҆си за́повѣдїю твоею, ꙗ҆́ко в вѣкъ моѧ е҆сть.
па́че всѣхъ ѹ҆чѧщыхъ м̂ѧ разꙋмѣх꙽, ꙗ҆́ко свѣдѣнїа твоа поѹ҆че́нїе мое е҆сть·
Па́че ста́рецъ разꙋмѣхъ, ꙗ҆ко за́повѣди твоѧ взыскахъ·
ѿ всѧ́кого пꙋти лꙋкава възбранихъ ногамъ мои́м꙽, ꙗ҆́ко да съхраню̀ словеса̀ твоѧ·
ѿ сꙋдебъ твои́хъ не ѹ҆да́лихсѧ, ꙗ҆́ко ты законополо́жилъ м̂ѧ е҆си·
Коль слд̑ака грътани моемꙋ словеса̀ твоѧ, паче ме́да ѹ҆сто́мъ мои́мъ·
ѿ заповѣдей твои́хъ разꙋмх̑ѣ, сего ради възненавидѣхъ всѧкъ пꙋть непра́вды·
Свѣтилникъ нога́ма мои́ма законъ твой, и҆ свѣтъ стеѕѧмъ мои́мъ·
Клѧхсѧ, и҆ поста́вихъ съхрани́ти сꙋдбы̀ пра́вды твоеа̀·
Смирихсѧ до ѕѣла, г҃и, живѝ м̂ѧ по словеси твоемꙋ·
Во́лнаѧ ѹ҆стъ мои́хъ бл҃говоли же г҃и, и҆ сꙋдбы̀ твоа наѹ҆чѝ м̂ѧ·
дш҃а моа в рꙋ́кꙋ твоею вы́нꙋ, и҆ зако́на твоего не забыхъ·
Положи́шѧ грѣшницы сѣть мн̂ѣ, и ѿ заповѣдей твои́хъ не заблꙋдих̑·
наслѣдовахъ свѣдѣнїа твоѧ в꙽ вѣк꙽, ꙗ҆ко радованїе срд̑ца моего сꙋть·
ѻ҆братихъ срд̑це мое, сътвори́ти ѻ҆правд̑анїѧ твоѧ в꙽ вѣкъ за въздаа́нїе·
Законопрестꙋпныа възненавидх̑ѣ, законъ же твой възлюбихъ·
Помощникъ мой, и҆ застꙋпникъ мои е҆си т̂ы, на словеса твоѧ ѹ҆повахъ·
ѹ҆клони́тесѧ ѿ мене лꙋка́внꙋющеѝ, и҆ і́спытаю за́повѣди б҃а моего·
Застꙋпѝ м̂ѧ по словесѝ твое҆мꙋ, и҆ жив꙽ бꙋ́дꙋ.
и҆ не посрамѝ мене ѿ чаа́нїа моего·
Помози м̂и и҆ сп҃сꙋсѧ, и҆ поѹ҆чюсѧ въ ѻ҆правда́нихъ твоих̑ вынꙋ·
Ѹ҆ничижилъ е҆си вс̂ѧ ѿстꙋпа́ющаѧ ѿ ѻ҆правда́нїи твоих̑, ꙗ҆́ко неправед̑но помышленїе и́хъ·
Престꙋпа́ющаа непщевахъ всѧ грѣшныѧ земли, сего ради възлюбих̑ свѣдѣнїа твоѧ·
Пригвоздѝ ѿ страха твое҆го плоти моѧ, ѿ сꙋдебъ бо твоих̑ ѹ҆боѧ́хсѧ·
сътворихъ сꙋдъ и҆ пра́вдꙋ, не преда́жд̑ь мене ѻби́дѧщымъ м̂ѧ·
Въспрїимѝ раба̀ твоего въ бл҃го, да не ѻ҆клеветаютъ мене гръдїи·
ѻ҆́чи моѝ и҆счезо́стѣ въ сп҃се́нїе твоѐ, и҆ в꙽ сло́во правды твоеа̀·
Сътворѝ с꙽ рабомъ твои́мъ по млс̑҇ти твоей, и҆ сꙋдбамъ твои́мъ наѹ҆чѝ м̂ѧ·
Рабъ твой е҆смь а҆зъ, вразꙋмѝ м̂ѧ, и҆ наѹ҆чюсѧ свѣдѣнїемъ твои́мъ·
Вре́мѧ сътворити гв҃и, разориша законъ твой·
Сего ради възлюбих̑ за́повѣди твоѧ, паче зла́та и҆ топази́а·
Сего ради къ всѣмъ за́повѣдемъ твои́мъ направлѧхсѧ, всѧкъ пꙋть неправды възненавидѣхъ·
ди́вна свѣдѣнїа твоѧ, сего ради и҆спытаетъ ѧ҆̀ дш҃а моѧ·
Ꙗ҆́вленїе словесъ твои́хъ просвѣщаетъ, и҆ вразꙋмлѧ́етъ младенца·
Ѹ҆ста̀ моѧ̀ ѿвръзохъ, и҆ привлекохъ дх҃ъ, ꙗ҆́ко за́повѣди твоѧ̀ желахъ·
Сла́ва·
Призри на́ мѧ, и҆ поми́лꙋй м̂ѧ, по сꙋдꙋ̀ любѧщих̑ и́мѧ твое·
Стопы̀ моѧ напра́ви по словеси твоемꙋ, и҆ да не ѻ҆долѣетъ м̂и всѧ́ко безаконїе·
И҆зба́ви м̂ѧ ѿ клеветы̀ члчс̑҇кыа, и҆ съхраню̀ за́повѣди твоа·
Лице твое просвѣтѝ на раба твое҆го, и҆ наѹ҆чи м̂ѧ ѻ҆правда́нїемъ твоим̑·
И҆схо́дища вд̑она́ѧ и҆зведо́ста ѻ҆чи моѝ, понеже не съхранихъ законъ твой·
пра́веденъ е҆си г҃и, и҆ пра́ви сꙋдѝ твой·
Заповѣда пра́вдꙋ свѣдѣнїа твоѧ, и҆ і́стинꙋ ѕѣло̀·
и҆ста́ѧла м̂ѧ е҆сть жа́лость твоа, ꙗ҆́ко забы́ша словеса твоѧ вра́ѕи моѝ·
Ражд̑еже́но сло́во твое ѕѣло̀, и҆ рабъ твой възлюби е҆̀·
ю́ноша а҆зъ е҆смь, и҆ ѹ҆ничиженъ, ѻ҆правда́нїи твои҆хъ не забыхъ·
Пра́вда твоа̀ пра́вда в꙽ вѣкъ, и҆ законъ твой и́стина·
Ско́рби и҆ нꙋжд̑а ѻ҆брѣто́шѧ м̂ѧ, за́повѣди твоѧ поѹ҆че́нїе мое·
Пра́вда свд̑ѣнїа твоѧ в꙽ вѣкъ, вразꙋмѝ м̂ѧ, и҆ жи́въ бꙋ́дꙋ·
Възвахъ всѣмъ срд̑цемъ мои́мъ, ѹ҆слы́ши м̂ѧ г҃и ѻ҆правда́нїи твои҆хъ взыщꙋ·
Възва́хъ т̂и, сп҃си м̂ѧ, и҆ съхраню̀ свѣдѣнїа твоѧ·
Прд̑еварихъ в꙽ без̑го́дїи, и҆ възвах̑, на словеса твоѧ ѹ҆повахъ·
прд̑евари́стѣ ѻ҆́чи мои къ ѹ҆трꙋ, поѹ҆читисѧ словесем̑ твоим̑·
Глс̑҇а мой ѹ҆слы́ши г҃и по млс̑҇ти твоеи҆, по сд̑ꙋбѣ твоей живи́ м̂ѧ·
Прибли́жишѧ гонѧщей м̂ѧ безаконїе, ѿ зако́на же твое҆го ѹ҆далишасѧ·
Близъ е҆си т̂ы г҃и, и҆ вс̂и пꙋтїе твоѝ и́стина·
И҆сперва познахъ ѿ свѣдѣнїи твоих̑, ꙗ҆ко в꙽ вѣкъ ѻ҆сновалъ ѧ҆̀ е҆си·
Ви́ждь смире́нїе мое, и҆ і҆зми м̂ѧ, ꙗ҆́ко закона твое҆го не забыхъ·
Сꙋдѝ сꙋдъ мой, и҆ і҆зба́ви м̂ѧ, по словеси твое҆мꙋ живѝ м̂ѧ·
далече ѿ грѣшникъ сп҃се́нїе, ꙗ҆ко ѻ҆правда́нїи твои҆хъ не взыска́шѧ щедро́ты твоа мно́гы г҃и, по сꙋдбѣ твоей живѝ м̂ѧ·
Мн́оѕи и҆згонѧ́щеѝ м̂ѧ и҆ стꙋжа́ющеѝ ми, ѿ свѣдѣнїи твои҆хъ не ѹ҆клонихсѧ.
видх̑ѣ неразꙋмѣва́ющаѧ, и҆ и҆стаа҆хъ, ꙗ҆ко словесъ твои҆хъ не съхрани́ша·
ви́ждь ꙗ҆ко за́повѣди твоѧ възлюбихъ, г҃и, по млс̑҇ти твоей живи м̂ѧ·
Нача́ло словесъ твои́хъ и́стина, и҆ в вѣкъ вс̂ѧ сд̑ꙋбы пра́вды твоеа·
Кнѧѕи погна́шѧ м̂ѧ тꙋ́не, и҆ ѿ словесъ твоих̑ ѹ҆стра́шисѧ срд̑це мое·
Възрадꙋюсѧ а҆зъ ѻ҆ словесехъ твоих̑, ꙗ҆́ко ѻ҆брѣтааѝ користь мно́гꙋ·
Неправдꙋ възненавидѣхъ и҆ ѻ҆мерзѣ м̂и, зако́н꙽ же твой възлюбих̑·
Сед̑ми́цею дн҃емъ хвали́хъ т̂ѧ, ѻ҆ сꙋдбахъ правды твоеа̀·
Ми́ръ мно́гъ любѧщим̑ зако́нъ твой, и҆ нѣсть и҆мъ събла́ѕны·
Ча́ѧхъ спасе́нїе твое г҃и, и҆ заповѣди твоѧ въз꙽любихъ·
Съхранѝ дш҃а моа̀ свѣдѣнїѧ твоѧ, и҆ възлюби ѧ҆̀ ѕѣло̀·
Съхранихъ за́повѣди твоѧ и҆ свѣдѣнїѧ твоѧ, ꙗ҆́ко вс̂и пꙋтїе моѝ прд̑е тобою г҃и·
да прибли́житсѧ мл҃тва моѧ̀ прд̑е тѧ г҃и, по словеси твое҆мꙋ вразꙋмѝ м̂ѧ·
да вни́детъ прошенїе мое прд̑е т̂ѧ г҃и, по словеси твое҆мꙋ и҆зба́ви м̂ѧ·
ѿры́гнꙋтъ ѹ҆стнѣ̀ моѝ пѣнїе, е҆гда̀ наѹ҆чиши мѧ ѻ҆правда́нїем̑ твои́мъ·
Провѣща́етъ ꙗ҆́зы́къ мой словеса̀ твоѧ, ꙗ҆́ко вс̂ѧ за́повѣди твоа правда·
Бꙋди рꙋка твоѧ спс̑҇тѝ м̂ѧ, ꙗ҆́ко за́повѣди твоѧ и҆зволихъ·
Въжд̑елѣхъ сп҃се́нїе твое г҃и, и҆ законъ твой поѹ҆ченїе мое е҆сть·
Жива̀ бꙋдетъ дш҃а моа, и҆ въсхва́литъ т̂ѧ, и҆ сꙋд꙽бы твоѧ помогꙋтъ мн̂ѣ·
Заблꙋдихъ ꙗ҆́ко ѻ҆вча̀ поги́бшее, възыщи раба твоего, ꙗ҆́ко за́повѣди твоѧ не за́быхъ·
Сла́ва· Пѣснь степеннаа̀, рѳ҃і·
Каѳ̑҇, и҃і·
Къ г҃ꙋ внегда скорбх̑ѣ възвах̑, и҆ ѹ҆слы́ша мѧ·
г҃и и҆збави дш҃ю мою ѿ ѹ҆стенъ непра́веденъ, и҆ ѿ зыка льсти́ва·
Чт̂о дастъ ти сѧ, и҆ли чт̂о приложит̑ ти сѧ къ ꙗ҆́зы́кꙋ льсти́вꙋ;
стрѣ́лы си́лнаго и҆зъѻ҆щре́ны, съ ѫ́гльми пꙋсты́нными·
Ѹ҆вы̀ мн̂ѣ, ꙗ҆́ко пришельствїе мое ѹ҆далисѧ, вселихсѧ съ се́лы кѷдарскыми, мно́го прише́лъствова дш҃а моѧ̀·
Съ ненави́дѧщыми ми́ра, бѣхъ ми́ренъ·
Є҆гда гл҃ахъ и҆мъ, борѧ́хꙋ м̂ѧ тꙋ́не·
Пѣснь степе́ннаа, р҃к·
Възведохъ ѻ́чи моѝ в꙽ горы, ѿнꙋ́дꙋ же прїидетъ по́мощь моа·
Помощь моа ѿ г҃а, сътворшаго нб҃о и҆ зе́млю·
Не даждь въ смѧте́нїе ногы̀ твоеа̀, ниже въздрѣмлетъ хранѧѝ т̂ѧ·
Се̂ не въздрѣмлетъ ни ѹ҆снет̑ хранѧѝ і҆ил҃ѧ·
г҃ь съхранитъ т̂ѧ, г҃ь покровъ твой над̑ рꙋкꙋ деснꙋ́ю твою·
Въ дн҃е сл҃це не ѻ҆жеже́тъ тебе, ни лꙋна̀ но́щїю.
г҃ь съхрани́тъ т̂ѧ ѿ всѧ́кого ѕл̂а, съхранитъ дш҃ꙋ твою г҃ь·
г҃ь съхрани́тъ в꙽хоженїе твое, и҆ і҆схоже́нїе твое, ѿ нн҃ѣ и҆ до́ вѣка·
Пѣснь степе́ннаа, рк҃а·
Възвесели́хсѧ ѻ҆ рекших̑ мнѣ, в домъ гн҃ь вни́демъ·
Стоѧ́ще бѣхꙋ но́гы нашѧ въ дворѣхъ твои́хъ і҆ерс̑҇ли́мъ·
І҆е҆рс̑҇ли́мъ ѕи́ждемъ ꙗ҆́ко град̑, е҆мꙋже причастїе е҆го вкꙋ́пѣ·
Тамо б̂о взыдоша колѣна, колѣна гн҃ѧ свѣдѣнїе і҆ил҃ево, и҆сповѣдатисѧ и́мени гн҃ю·
Ꙗ҆́ко т̂ꙋ сѣдошѧ прс̑҇тли на сд̑ꙋ, престоли в домꙋ̀ двд̑вѣ·
Вопроси́те же ꙗ҆́же ѻ҆́ мирѣ і҆ерс̑҇ли́мꙋ, и҆ ѻ҆билїе любѧщымъ т̂ѧ·
Бꙋ́ди же миръ в꙽ си́лѣ твоей, и҆ ѻ҆билїе в꙽ столпꙋстѣнахъ твои́хъ·
Ради братїи моих̑ и҆ ближ꙽нихъ мои́х꙽, гл҃ах̑ ѹ҆бо ми́ръ ѻ҆ тебѣ·
домꙋ ради г҃а б҃а нашего, в꙽зыскахъ бл҃гаа тебѣ·
Пѣснь степенаа, рк҃в·
К тебѣ̀ възведохъ ѻ҆́чи моѝ, живꙋщемꙋ на нб҃си·
Се̂ ꙗ҆́ко ѻ҆́чи рабъ в рꙋ́кꙋ господїи свои́хъ, ꙗ҆́ко ѻ҆чи рабыни в рꙋ́кꙋ госпожа̀ своеа̀, та́ко ѻ҆чи на́ши къ г҃ꙋ б҃ꙋ на́шемꙋ, до́ндеже ѹ҆щедрит̑ н̂ы·
Поми́лꙋй нас̑҇ г҃и, поми́лꙋй насъ, ꙗ҆ко по мно́гꙋ и҆сполнихом̑сѧ ѹ҆нишиже́нїа·
По многꙋ и҆сполнисѧ дш҃ѧ на́шѧ, ѹ҆ничиже́нїе гобзꙋ́ющыхъ, и҆ ѹ҆ничиже́нїе гръдым̑·
Пѣснь степе́ннаа рк҃г·
Ꙗ́ко а҆́ще не бы̀ г҃ь в꙽ насъ, да речетъ нн҃ѣ і҆ил҃ь.
ꙗ҆́ко а҆ще не бы г҃ь в꙽ насъ, в꙽негда̀ въста́ти чл҃комъ на́ ны̀, ѹ҆бо живы по́жръли бышѧ нас̑҇, в꙽негда прогнѣватисѧ ꙗ҆́рости е҆го на́ ны·
Ѹ҆бо вода потопила б̂ы насъ, поток꙽ пре́йде дш҃а наша·
Ѹ҆бо пре́иде дш҃а наша во́дꙋ непостоѧннꙋю·
Блс̑҇венъ г҃ь, и҆же не дастъ насъ в꙽ лови́твꙋ ѕꙋбо́мъ и҆хъ·
дш҃а на́шѧ ꙗ҆́ко пти́ца и҆збависѧ ѿ сѣти ловѧщых̑·
Сѣть съкрꙋши́сѧ, и҆ мы и҆збавлени быхом̑·
По́мощъ на́шѧ въ и҆мѧ гн҃е, сътво́ршаго нб҃о и҆ зе́млю·
слв̑҇а, пѣснь степе́ннаа, рк҃д·
Надѣющеѝсѧ на́ г҃а, ꙗ҆ко гора сиѻ́нъ, не подвижитсѧ въ вѣкъ живыѝ въ і҆ерс̑҇ли́мѣ·
Го́ры ѻ҆́крестъ е҆го, и҆ г҃ь ѻ҆́крестъ людїи своих̑, ѿ нн҃ѣ и҆ до́ вѣка·
Ꙗ҆́ко не ѻ҆ста́витъ г҃ь жезла̀ грѣшныхъ, на жребїи правед̑ныхъ, ꙗ҆́ко да не про́стрꙋтъ правед̑нїи в꙽ безако́нїи рꙋкъ своих̑·
Ѹ҆блажѝ г҃и бл҃гым̑, и҆ пра́вымъ срд̑цемъ·
Ѹ҆кланѧ́ющаѧ же сѧ в раз꙽вращенїе поведетъ г҃ь съ дѣлающими безако́нїе, ми́ръ на і҆ил҃ѧ·
Пѣснь степе́ннаа, рк҃е·
Внегда̀ въз꙽вратит̑ г҃ь плѣнъ сїѻ́нъ, бы́хомъ ꙗ҆́ко ѹ҆тѣшени·
Тогда и҆спо́лнишѧсѧ ра́дости ѹ҆ста̀ нашѧ, и҆ ꙗ҆́зыкъ нашь веселїа·
Тогда рекꙋтъ въ ꙗ҆́зы́цехъ, възвели́чилъ е҆сть г҃ь сътворити с ни́ми·
Възвели́чилъ е҆сть г҃ь сътвори́ти с нами, бы́хомъ веселѧ́щесѧ·
Въз꙽врати г҃и плененїе на́ше, ꙗ҆́ко пото́кы ю́гомъ·
Сѣющеѝ слеѕа́ми, радостїю по́жнꙋтъ·
Ходѧ́щеѝ хожд̑аахꙋ, и҆ пла́кахꙋсѧ метающе сѣмена своѧ·
Грѧдꙋще же прїидꙋтъ ра́достїю, в꙽землюще рꙋкоѧ́ти своѧ·
Пѣснь степеннаа, рк҃ѕ·
Аще не г҃ь съзи́жд̑етъ до́мꙋ, всꙋе трꙋди́шѧсѧ ѕи́ждꙋщеи·
А҆ще не г҃ь съхранит꙽ град̑, всꙋе бдѣ̀ стрегїи·
Всꙋе вамъ е҆сть ѹ҆тренева́ти·
Въста́нѣте посѣдани, ꙗ҆дꙋщеѝ хлѣб꙽ болѣзни, внегда дасть възлюбленымъ свои́мъ сонъ·
Се̂ достоа́нїе гн҃е сн҃ове, м꙽зда̀ плода чревна́го·
Ꙗ҆́ко стрѣ́лы в рꙋцѣ си́лнаго, тако сн҃ве ѿѧ́тыхъ·
Блаженъ, и҆же и҆спо́лнитъ жела́нїе свое ѿ нихъ, не постыдѧтсѧ е҆гда гл҃ютъ врагомъ свои́мъ въ вратехъ·
Пѣснь степе́ннаа, рк҃з·
Блаже́ни вс̂и боѧ́щеѝсѧ г҃а, ходѧ́щеѝ в пꙋтехъ его·
Трꙋды̀ плод̑ свои҆хъ снѣ́си, блаже́нъ е҆си, и҆ добро̀ тебѣ бꙋ́детъ·
Жена̀ твоѧ ꙗ҆́ко лоза̀ плодови́та въ странахъ до́мꙋ твоего·
Сн҃ве твоѝ ꙗ҆́ко лѣторасли ма́сличныа ѻ҆́крестъ трапезы твоеа̀·
Се̂ тако блс̑҇ви́тсѧ чл҃къ, боаѝсѧ г҃а·
Блс̑҇ви́тъ т̂ѧ г҃ь ѿ сїѻ́на, и҆ ѹ́зриши бл҃агаѧ і҆ерс̑҇ли́мꙋ вс̂ѧ дн҃и живота̀ твоего·
И҆ ѹ҆зриши сн҃ы сн҃въ твои́хъ, ми́ръ на і҆ил҃ѧ·
Пѣснь степе́ннаѧ, рк҃и·
Мно́жицею бра́шасѧ со мно́ю ѿ ю́ности моеа̀, да рече́тъ нн҃ѣ і҆ил҃ь, мно́жицею бра́шасѧ со мною ѿ ю́ности моеа, и҆бо не премого́шѧ м̂ѧ·
На хрѣбтѣ̀ моемъ дѣ́лаша грѣшници, продлъжи́шѧ безаконїа своѧ·
г҃ь пра́веденъ съсѣчет̑ вы́ѧ грѣшником̑·
да постыдѧтсѧ и҆ възвратѧтсѧ въспѧть вс̂и ненави́дѧщеѝ сїѻ́на·
да бꙋ́дꙋтъ ꙗ҆́ко трава̀ на зда́них꙽, ꙗ҆́же прежд̑е въсртъже́нїа и́сше·
Ꙗ҆́же не и҆спо́лни рꙋкы̀ своеа̀ жнѧѝ, и҆ ло́на свое҆го рꙋкоѧ́ти събира́аѝ·
И҆ не рѣшѧ мимоходѧ́щеи, блс̑҇ве́нїе гн҃е на вы, блс̑҇вихомъ в̂ы въ и҆мѧ гн҃е·
Сла́ва, Пѣснь степе́ннаа, рк҃ѳ·
Из глꙋбины възва́хъ к тебѣ г҃и, г҃и ѹ҆слы́ши глс̑҇а мой·
да бꙋ́дꙋтъ ѹ҆ши твоѝ в꙽немлюще глс̑҇а мл҃твы моеа̀·
А҆ще безаконїа назриши г҃и, г҃и кт̂о постои́тъ;
ꙗ҆́ко ѿ тебѐ ѻ҆цище́нїе е҆сть, и́мени рад̑и̑ твоего потрьпѣхъ т̂ѧ, г҃и, потрьпѣ дш҃а моа в꙽ слово твое, ѹ҆пова̀ дш҃а моа̀ на́ г҃а·
ѿ стража ѹ҆тренѧа до́ нощи, ѿ стража ѹтренѧа да ѹ҆поваетъ і҆ил҃ь на́ г҃а·
Ꙗ҆́ко ѿ г҃а млс̑҇ть, и҆ мно́го ѿ него и҆збавленїе·
И҆ то́и и҆зба́витъ і҆ил҃ѧ ѿ всѣхъ безако́нїи е҆го·
Пѣснь степе́ннаѧ, р҃л·
Ги҃, не възнесе́сѧ срд̑це моѐ, ни възнесо́стѣсѧ ѻ҆чи моѝ·
Ни ходихъ в꙽ вели́кыхъ, ни в дивных паче мене·
А҆ще не смиреномꙋдръствовах꙽, н̂о възнесохъ дш҃ꙋ мою·
Ꙗ҆́ко ѿдое́ное на ма́терь свою̀, ꙗ҆́ко въздасѝ на́ дш҃ꙋ мою·
да ѹ҆пова́етъ і҆ил҃ь на́ г҃а, ѿ нн҃ѣ и҆ до́ вѣка·
Пѣснь степе́ннаѧ, рл҃а·
Помѧнѝ г҃и двд̑а, и҆ вс̂ю кро́тость е҆го·
Ꙗ҆́ко клѧтсѧ гв҃и, ѻ҆бѣщѧсѧ бг҃ꙋ і҆а́ковлю·
А҆ще вселюсѧ в꙽ селенїе до́мꙋ моего, л̂и взы́дꙋ на ѻ҆́дръ посте́лѧ моеа̀, а҆́ще дамъ со́нъ ѻ҆чи́ма мои́ма, и҆ вѣжд̑ама мои́ма дрѣма́нїе, и҆ поко́й скранїѧ́мъ мои́мъ, до́ндеже ѻ҆брѧ́щꙋ мѣсто гв҃и, селе́нїе б҃ꙋ і҆а́ковлю·
Се̂ слы́шѧхомъ ѧ҆̀ въ е҆фраѳѣ, ѻ҆брѣто́хомъ ѧ҆̀ в꙽ полих̑ дꙋбра́вы·
Вни́демъ в селе́нїа е҆го, покло́нимсѧ на мѣстѣ, и҆дѣже стоѧ́стѣ ноѕѣ е҆го·
Въскрс̑҇ни г҃и в꙽ покой твой, т̂ы и҆ кѷво́тъ ст҃ы́нѧ твоеа·
Сщ҃е́нницы твоѝ ѻ҆блекꙋтсѧ правдою, и҆ прпд̑бнїи твоѝ възрадꙋютсѧ, двд̑а ради раба̀ твоего не ѿврати лице пома́занаго своего·
Клѧтсѧ г҃ь дв҃дꙋ и́стиною, и҆ не ѿве́ржетсѧ еа̀·
ѿ плода чре́ва твоего посажꙋ на прс̑҇тлѣ твое́мъ, а҆ще съхранѧт̑ сн҃ве твоѝ завѣтъ мой, и҆ свѣдѣнїа моа̀ сїа и҆́мже наѹ҆чю̀ ѧ҆̀·
И҆ сн҃ве и҆хъ до́ вѣка сѧ́дꙋтъ на прс̑҇тлѣ твоемъ·
Ꙗ҆́ко и҆збра̀ г҃ь сїѻ́на, и҆зволи и҆̀ в жили́ще себѣ·
Се̂ покой мой в꙽ вѣкъ вѣка, зд̂ѣ вселюсѧ, ꙗ҆ко и҆зво́лихъ и҆̀·
Лови́твꙋ е҆го бл҃госло́в꙽ствꙋ́а блс̑҇влю, ни́щаѧ е҆го насы́щꙋ хлѣ́ба·
Сщ҃е́нникы е҆го ѻ҆блекꙋ въ сп҃се́нїе, и҆ прпд̑бнїи е҆го ра́достїю възрадꙋютсѧ·
Тꙋ възращꙋ̀ ро́гъ двд̑ви , ѹ҆гото́ва свѣти́лникъ пома́заномꙋ моемꙋ·
Врагы е҆го ѻ҆блекꙋ̀ стꙋдо́м꙽, на не́м꙽же процвѣтетъ ст҃ыни моѧ·
Пѣснь степе́ннаѧ, рл҃в·
Се нн҃ѣ что̀ добро̀, и҆ли что̀ красно̀, н̂о е҆же жити бра́тїи в꙽кꙋ́пѣ;
ꙗ҆ко мѷро на главꙋ̀, сходѧ́щее на́ брадꙋ, брадꙋ а҆а҆роню·
Сходѧ́щее на ѻ҆ме́ты ѻ҆дежд̑а е҆го·
Ꙗ҆́ко роса̀ а҆ермон꙽скаа, сходѧ́щїа на́ горы сїѻ́нскыа·
Ꙗ҆́ко т̂ꙋ заповѣда г҃ь блс̑҇ве́нїе, живо до́ вѣка·
Пѣ́снь степе́ннаѧ, рл҃г·
Се нн҃ѣ блс̑҇ви́те г҃а вс̂и рабѝ гн҃и , стоѧ́щеѝ въ храмѣ гн҃и, въ дворѣхъ домꙋ б҃а нашего·
В но́щехъ въздѣжи́те рꙋкы ва́шѧ въ ст҃а́а, и҆ блс̑҇ви́те г҃а·
Блс̑҇ви́тъ т̂ѧ г҃ь ѿ сїѻ́на сътвори́выи нб҃о и҆ зе́млю·
Сла́ва, а҆ллилꙋїа, рл҃д·
каѳ̑҇ ѳ҃і·
Хвали́те и́мѧ гн҃е, хвали́те рабѝ г҃а , стоѧ́щеѝ въ храмѣ гн҃и, въ дворѣхъ домꙋ б҃а на́шего·
Хвали́те г҃а, ꙗ҆́ко бл҃гъ г҃ь.
по́ите и́мени его, ꙗ҆ко добро̀·
Ꙗ҆́ко і҆а́кова и҆збра̀ себѣ г҃ь, і҆ил҃ѧ в꙽ достоа́нїе себѣ·
Ꙗ҆́ко а҆зъ познах̑, ꙗ҆́ко ве́лей г҃ь, и҆ г҃ь нашь над̑ всѣми бо́гы·
Вс̂ѧ е҆ли́ка въсхотѣ̀ г҃ь, сътворѝ, на нб҃си и на земли·
В мо́рихъ и҆ въ всх̑ѣ бе́зднахъ·
Възводѧ ѻ҆́блакы ѿ послд̑ѣнихъ земли, млънїю в꙽ до́жд̑ь сътворѝ·
И҆зводѧѝ вѣтры ѿ съкро́вищь своих̑, и҆же порази пе́рвенца е҆гѷпет꙽скыѧ ѿ чл҃ка до скота·
Посла̀ знаменїа и҆ чꙋдеса̀ посредѣ тебе еги́п꙽те, на фараѻ́на и҆ на всѧ̀ рабы̀ е҆го·
И҆же поразѝ ꙗ҆́зы́кы мно́гы, и҆ і҆збѝ цр҃ѧ крѣпкы, сїѻ́на цр҃ѧ а҆мор꙽ре́иска , и ѻ́га цр҃ѧ васанска, и҆ всѧ̀ црс̑҇твїа ханаа́нска·
И дастъ зе́млю и҆хъ достоа́нїе, достоа́нїе і҆ил҃ю лю́демъ свои́мъ·
г҃и и́мѧ твое в꙽ вѣкъ, и҆ па́мѧть твоа̀ в род̑ и҆ ро́дъ·
Ꙗ҆́ко сꙋ́дит̑ г҃ь лю́демъ свои́мъ, и҆ ѻ҆ рабѣхъ своих̑ ѹ҆мо́литсѧ·
И́доли ꙗ҆́зыкъ, сребро̀ и҆ зла́то, дѣ́ла рꙋкъ члчс̑҇къ·
Ѹ҆ста̀ и҆мꙋтъ, и҆ не гл҃ютъ·
ѻ҆чи и҆мꙋтъ, и҆ не ви́дѧтъ·
Ѹ҆́ши и҆мꙋтъ, и҆ не слы́шѧтъ·
Ни б̂о е҆сть дꙋ́ха въ ѹ҆стехъ и҆хъ·
Подо́бни им̑ да бꙋ́дꙋтъ творѧ́щеѝ ѧ҆̀, и҆ всѝ надѣющеѝсѧ на́ нѧ·
до́мъ і҆ил҃евъ, блс̑҇ви́те г҃а·
до́мъ а҆аро́нъ, блс̑҇ви́те г҃а·
до́мъ левїинъ, блс̑҇ви́те г҃а·
Боѧ́щеѝсѧ г҃а блс̑҇ви́те г҃а·
Блс̑҇ве́нъ г҃ь ѿ сїѻ́на, живыѝ въ і҆ерс̑҇ли́мѣ·
А҆ллилꙋїа, рл҃е·
Исповѣдайтесѧ гв҃и, ꙗ҆́ко бл҃гъ, ꙗ҆́ко в꙽ вѣкъ млс̑҇ть е҆го·
И҆сповѣдайтесѧ б҃ꙋ бого́мъ, ꙗ҆́ко в꙽ вѣкъ млс̑҇ть е҆го·
И҆сповѣдайтесѧ гв҃и господе́м꙽, ꙗ҆́ко в꙽ вѣкъ млс̑҇ть е҆го·
Сътво́ршемꙋ чюдеса̀ ве́лїа е҆ди́номꙋ, ꙗ҆́ко в꙽ вѣкъ млс̑҇ть е҆го·
Сътво́ршемꙋ нб҃са ра́зꙋмомъ, ꙗ҆́ко в꙽ вѣкъ млс̑҇ть е́го·
ѹ҆тверди́вшемꙋ зе́млю на водахъ, ꙗ҆́ко в꙽ вѣкъ млс̑҇ть е҆го·
Сотворшемꙋ свѣти́ла ве́лїа е҆ди́номꙋ, ꙗ҆́ко в꙽ вѣкъ млс̑҇ть е҆го·
Сл҃нце въ ѻ҆бласть дн҃и, ꙗ҆́ко в꙽ вѣкъ млс̑҇тъ е҆го·
Лꙋнꙋ и҆ звѣ́зды въ ѻ́бласть но́щи, ꙗ҆ко в꙽ вѣк꙽ млс̑҇ть е҆го·
Пораждьшемꙋ е҆гѷпта с꙽ первенцы е҆го, ꙗ҆́ко в꙽ вѣкъ млс̑҇ть е҆го·
и і҆зведшемꙋ і҆и҆л҃ѧ ѿ среды их̑, ꙗ҆́ко в꙽ вѣкъ млс̑҇ть е҆го·
рꙋко́ю крѣпкою и҆ мы́шцею высо́кою, ꙗ҆́ко в꙽ вѣкъ млс̑҇ть е҆го·
Раздѣльшемꙋ чрьмное мо́ре в раздѣленїе, ꙗ҆́ко в꙽ вѣкъ млс̑҇ть е҆го·
И҆ провед꙽шемꙋ і҆и҆л҃ѧ посредѣ е҆го, ꙗ҆́ко в꙽ вѣкъ млс̑҇ть е҆го·
І҆ и҆стрѧ́сшемꙋ фараѻ́на и҆ си́лꙋ е҆го в мо́ре чермное, ꙗ҆́ко в вѣкъ ми́лость е҆го·
провед̑шемꙋ лю́ди своѧ в пꙋстыни, ꙗ҆́ко в꙽ вѣкъ млс̑҇ть е҆го·
Порази́вшемꙋ цр҃ѧ ве́лїа, ꙗ҆́ко в꙽ вѣкъ млс̑҇ть е҆го·
И҆ ѹ҆бившемꙋ цр҃ѧ крѣпкы́ѧ, ꙗ҆́ко в꙽ вѣкъ млс̑҇ть е҆го.
сїѻ́на цр҃ѧ а҆морре́иска, ꙗ҆́ко в꙽ вѣкъ млс̑҇ть е҆го·
И҆ ѻ́га цр҃ѧ васа́н꙽ска, ꙗ҆́ко в꙽ вѣкъ млс̑҇ть е҆го·
И҆ да́вшемꙋ зе́млю и҆хъ достоа́нїе, ꙗ҆́ко в꙽ вѣкъ млс̑҇ть е҆го·
достоа́нїе і҆и҆л҃ю рабꙋ̀ свое҆мꙋ, ꙗ҆́ко в꙽ вѣкъ млс̑҇ть е҆го·
Ꙗ҆́ко въ смиренїй на́шем̑ помѧнꙋ̀ н̂ы г҃ь, ꙗ҆́ко в꙽ вѣкъ млс̑҇ть е҆го·
И҆ і҆зба́вїлъ н̂ы е҆сть ѿ врагъ на́шихъ, ꙗ҆́ко в꙽ вѣкъ млс̑҇ть е҆го·
дааѝ пи́щꙋ всѧ́кой пло́ти, ꙗ҆́ко в꙽ вѣкъ млс̑҇ть е҆го·
И҆сповѣда́итесѧ б҃ꙋ нбс̑҇номꙋ, ꙗ҆́ко в꙽ вѣкъ ми́лость е҆го·
двд̑въ, и҆ли і҆еремїин̑҇, рл҃ѕ·
На рѣцѣ̀ вавѷло́нстѣй, тамо сѣдохомъ и҆ пла́кахом꙽, внегда помѧнꙋти намъ сїѻ́на·
На ве́рбїи посредѣ̀ еа̀ ѻ҆бѣсихомъ ѻ҆рга́ны наша·
Ꙗ҆́ко т̂ꙋ въпросиша насъ плѣншеѝ насъ, словесъ пѣ́сней, и҆ вед̑шеѝ нас꙽ пѣнїе·
Въспо́ите намъ ѿ пѣ́сней сїѻ́нскыхъ·
Ка́ко въспоемъ пѣ́снь гн҃ю на землѝ чꙋже́й;
а҆ще забꙋ́дꙋ тебе і҆ерс̑҇ли́мъ, забве́на бꙋди десни́ца моа̀·
Прильпнѝ ꙗ҆́зыкъ мой грътани мое҆мꙋ, а҆ще не помѧнꙋ тебе, а҆ще не пред̑ложꙋ і҆ерс̑҇ли́ма ꙗ҆́ко в нача́ло весе́лїа мое҆го·
Помѧнѝ г҃и сн҃ы е҆до́м꙽скыа, в꙽ дн҃ь і҆ерс̑҇ли́мль, гл҃ющаѧ, и҆стоща́те, и́стъща́те до ѻ҆снова́нїи е҆го·
дщѝ вавѷло́нѧ ѻ҆каа́ннаа·
Бл҃женъ и҆же въздасть тебѣ въздаа́нїе твое, е҆же въздасть намъ·
Бл҃же́нъ, и҆же и҆ме́тъ, и҆ разбїетъ младенцѧ твоѧ ѻ҆ ка́мень·
Слв̑҇а, ѱлом̑ двд̑въ, а҆гге́а и҆ заха́рїа, рл҃з·
Исповѣ́мсѧ тебѣ г҃и всѣмъ срд̑цемъ мои́м꙽, и҆ пред̑ а́гг҃лы въспою̀ тебѣ·
Ꙗ҆́ко ѹслы́ша вс̂ѧ гл҃ы ѹ҆стъ моих̑.
Поклоню́сѧ къ цр҃кви ст҃ѣй твоеи, и ісповм̑ѣсѧ и́мени твое҆мꙋ, ѻ҆ млс̑҇ти твое́й и҆ і́стинѣ твоей·
Ꙗ҆́ко възвели́чилъ е҆си ѻ҆ всѣмъ и́мѧ твое ст҃о́е·
Во́ньже дн҃ь а́ще призовꙋ т̂ѧ, ско́ро ѹ҆слы́ши м̂ѧ·
Ѹ҆мно́жиши м̂ѧ в꙽ дш҃и мое́й си́лою твоею̀·
да и҆сповѣдѧтсѧ тебѣ г҃и вс̂и цр҃їе зем꙽стїи, ꙗ҆ко ѹ҆слы́шашѧ всѧ гл҃ы ѹ҆стъ твоих̑·
И въспоютъ в꙽ пѣснехъ гн҃ѧхъ, ꙗ҆́ко велїа сла́ва гн҃ѧ·
Ꙗ҆́ко высокъ г҃ь, и҆ смиренаѧ призирает꙽, и҆ высо́каѧ и҆здале́ча съвѣсть·
А҆ще поидꙋ̀ посредѣ ско́рби, живи́ши м̂ѧ·
На гнѣвъ врагъ моих̑ про́стретъ рꙋкꙋ свою, и҆ сп҃се м̂ѧ десни́ца твоѧ·
г҃ь въздастъ за́ мѧ·
г҃и млс̑҇ть твоѧ в꙽ вѣкъ, дѣла рꙋкъ твоих̑ не презрѝ·
В конецъ, ѱлом̑, двд̑въ, заха́рїа, рл҃и·
Ги҃ и҆скꙋсилъ м̂ѧ е҆си, и҆ познал̑҇ м̂ѧ е҆си·
Ты̂ позна сѣданїе мое, и҆ въста́нїе мое·
Ты̂ разꙋмѣ помышле́нїа моѧ и҆здале́че·
Стеѕю̀ мою и҆ потлаченꙋю мою т̂ы е҆си и҆з꙽слѣдовал̑҇·
И҆ всѧ пꙋтѝ моѧ провидѣ̀, ꙗ҆́ко нѣсть льсти въ ꙗ҆́зыцѣ мое́мъ·
Се̂ г҃и, т̂ы разꙋмѣ всѧ послд̑ѣнѧа и҆ древнѧа·
Ты̂ созда м̂ѧ, и҆ положи на мнѣ рꙋ́кꙋ твою·
Ѹ҆диви́сѧ ра́зꙋм꙽ твой ѿ менѐ, ѹ҆твердисѧ, не възмогꙋ̀ к немꙋ·
Ка́мо пойдꙋ ѿ дх҃а твое҆го, и҆ ѿ лица твоего камо бѣжꙋ;
а҆ще взыдꙋ на́ нб҃о, т̂ы та́мо е҆си, а҆ще сни́дꙋ въ а́дъ, тамо е҆си·
А҆ще возмꙋ крилѣ̀ моѝ ра́но, и вселю́сѧ в꙽ послд̑ѣнихъ морѧ, и҆ та́мо б̂о рꙋка̀ твоа наставитъ м̂ѧ, и҆ ѹ҆дръжитъ м̂ѧ десни́ца твоа·
И҆ рѣхъ, е҆да тма̀ попере́тъ м̂ѧ, и҆ нощъ просвѣщенїе в пи́щи моей·
Ꙗ҆́ко тма̀ не помрачи́тсѧ ѿ тебе, и҆ нощъ ꙗ҆́ко дн҃ь просвѣтитсѧ·
Ꙗ҆́ко тма̀ еа̀, тако и҆ свт̑ѣ еа̀·
Ꙗ҆́ко т̂ы созда̀ ѹ҆тробы моѧ, въспрїѧт̑ м̂ѧ и҆з꙽ чрева ма́тере моеа̀·
И҆сповѣмсѧ тебѣ, ꙗ҆́ко страшно ѹ҆дивилсѧ е҆си·
Чюд̑на дѣ́ла твоѧ, и҆ дш҃а моѧ зна́етъ ѕѣло̀·
Не ѹ҆таи́сѧ ко́сть моа̀ ѿ тебѐ, ю҆̀же сътворил̑҇ е҆си в꙽ та́йнѣ, и҆ съста́въ мои в꙽ преи҆спод̑нихъ землѝ·
Не съдѣ́ланое моѐ видѣста ѻ́чи твоѝ, и҆ въ кни́зѣ твое́й вс̂и напи́шꙋтсѧ·
Въ дн҃е съзи́жд̑ꙋтсѧ, и ничтоже в нихъ·
Мнѣ же ѕѣло̀ че́стни бышѧ дрꙋ́ѕи твоѝ б҃е, ѕѣло ѹ҆тверди́шѧсѧ влд̑чьствїа их̑·
И҆зъчтꙋ̀ и҆хъ, и҆ паче пѣска ѹ҆мно́жатсѧ·
Въстахъ и҆ е҆ще е҆смь с тобою, а҆ще избїе́ши грѣшникы б҃е·
Мꙋжїе кро́ви ѹ҆клони́тесѧ ѿ мене, ꙗ҆́ко ревни́ви е҆сте в помышле́нихъ, прїимꙋтъ в сꙋе́тꙋ грады твоѧ·
Не ненави́дѧщаѧ ли т̂ѧ г҃и възненавидѣхъ, и҆ ѻ҆ враѕх̑ѣ твои́хъ и҆ста́ѧх̑;
съверше́ною ненавистїю възненавидх̑ѣ и҆хъ;
въ врагы бы́шѧ м̂и·
И҆скꙋси мѧ б҃е, и҆ ѹ҆вѣжд̑ь срд̑це моѐ·
И҆ стѧжѝ м̂ѧ, и҆ разꙋмѣй пꙋти моѧ·
И҆ ви́жд̑ь а҆ще пꙋть безаконїа во мнѣ, и наста́ви м̂ѧ на пꙋть вѣ́ченъ·
В конец꙽, ѱлом̑ двд̑въ, рл҃ѳ·
Измѝ м̂ѧ г҃и ѿ чл҃ка лꙋка́ва, ѿ мꙋжа неправед̑на и҆зба́ви м̂ѧ·
И҆же помыслишѧ непра́вдꙋ в꙽ срд̑ци, весь дн҃ь ѻ҆полча́хꙋ брани·
И҆зъѻ҆стри́шѧ ꙗ҆́зыкъ свои ꙗ҆́ко ѕмїи́нъ·
Ꙗ҆́дъ а́спиденъ под꙽ ѹ҆стнами и҆хъ·
Съхранѝ мѧ г҃и и҆з рꙋкѝ грѣшнича, ѿ чл҃къ неправеденъ и҆змѝ м̂ѧ·
И҆же помы́слишѧ запѧтѝ стопы̀ моѧ, съкры́шѧ гръдїи сѣть мн̂ѣ·
И҆ ю́жи препѧшѧ сѣть нога́ма мои́ма, при стезѝ събла́ѕны положи́шѧ м̂и·
Рѣхъ гв҃и, б҃ъ мой е҆си т̂ы, в꙽нꙋши г҃и гласъ моле́нїа моего·
г҃и г҃и си́ла сп҃се́нїа моего, ѻ҆сѣнилъ е҆си над̑ главою моею̀ в꙽ дн҃ь бра́ни·
Не прадажд̑ь мене г҃и ѿ жела́нїа моего грѣшникꙋ·
Помы́слишѧ на́ мѧ, не ѻ҆ста́ви мене, да не когда̀ възнесꙋтсѧ·
Глава̀ ѻ҆крꙋже́нїа и҆хъ, трд̑ꙋ ѹ҆сте́нъ и҆хъ покрыетъ и҆хъ·
Падꙋтъ на них̑ ю́глїа ѻгнена низложи́ши их̑, в꙽ страстех̑, и҆ не постоѧ́тъ·
Мꙋжъ ꙗ҆́зыченъ, не и҆спра́витсѧ на землѝ·
Мꙋж́а неправед̑на зл̂о ѹ҆лови́тъ въ и҆стлѣнїе·
Познахъ ꙗ҆́ко сътворитъ г҃ь сꙋдъ ни́щымъ, и҆ ме́сть ѹ҆бо́гымъ·
ѻ҆баче правед̑нїи и҆сповѣдѧтсѧ и҆мени твоемꙋ, и҆ вселѧ́тсѧ пра́вїи с лицемъ твои́мъ·
Слв̑҇а, ѱлом̑ двд̑въ, р҃м·
Ги҃ възвах̑ к тебѣ, ѹ҆слы́ши м̂ѧ·
Вонми гла́съ мл҃твы моеа̀, е҆гда̀ въз꙽зовꙋ̀ к тебѣ·
дасѧ и҆справитъ молитва моѧ ꙗ҆́ко кади́ло пред̑ тобою, въздѣ́анїе рꙋ́кꙋ моею̀ жрътва вечернаѧ·
Положѝ г҃и храненїе ѹ҆сто́мъ мои́мъ, и҆ две́рь ѻ҆граже́нїа ѻ҆ ѹ҆стнахъ мои́хъ·
Не ѹ҆клони срд̑це мое в꙽ словеса лꙋкав꙽ствїа, непщевати вины̀ ѻ҆ грѣсѣхъ·
Съ чл҃кы дѣ́лающими безаконїе, и҆ не съчета́юсѧ съ избранными и҆хъ·
Пока́жет̑ м̂ѧ правед̑никъ млс̑҇тїю, и҆ ѻ҆бличи́т꙽ мѧ, е҆ле́и же грѣшнаго да не намастит̑ главы̀ моеа̀·
Ꙗ҆́ко е҆ще и҆ мл҃тва моа въ вл҃говоле́нихъ и҆хъ, пожръты бышѧ при ка́мени сꙋдїѧ и҆хъ·
Ѹ҆слы́шатсѧ гл҃и моѝ, ꙗ҆́ко възмо́гшѧ, ꙗ҆́ко тлъща землѝ просѣдесѧ на зем꙽ли.
раз꙽сыпашѧсѧ ко́сти и҆хъ прї а́дѣ·
Ꙗ҆́ко к тебѣ г҃и г҃и ѻ҆́чи моѝ, на тѧ ѹ҆повахъ, не ѿи́ми дш҃ю мою·
Съхрани мѧ ѿ сѣти ю҆̀же съста́вїша м̂и, и҆ ѿ събла́ѕнъ дѣ́лающых̑ безаконїе·
Впадꙋтсѧ въ мре́жѧ своѧ грѣшницы, е҆ді́нъ е҆смь а҆зъ до́ндеже прейдꙋ·
ра́зꙋма двд̑въ. внегда̀ быти емꙋ в꙽ пещерѣ. мл҃тва. рм҃а·
Гла́сомъ моим̑ къ г҃ꙋ възвах̑, гла́сомъ мои́мъ къ г҃ꙋ помолюсѧ·
Пролѣю пред̑ ни́мъ мл҃твꙋ мою, печаль мою пред̑ ни́мъ възвѣщꙋ̀·
Внегда̀ и҆зчезаетъ ѿ мене дꙋхъ мой, и҆ т̂ы позна̀ стезѧ̀ моѧ·
На пꙋтѝ сем꙽, по немꙋже хождаах̑, съкры́шѧ сѣть мнѣ·
сматрѧхъ ѻ҆деснꙋ́ю, и҆ въз꙽глѧ́дахъ, и҆ не бѣ̀ знааѝ мене·
Поги́бе бѣг꙽ство ѿ менѐ, и҆ нѣсть взыска́аѝ дш҃ю мою·
Възвах̑ к тебѣ г҃и, рѣхъ, т̂ы е҆си ѹ҆пованїе мое, часть моа е҆си на землѝ живыхъ·
Воньмѝ мл҃твꙋ мою, ꙗ҆́ко смирих̑сѧ ѕѣло̀·
И҆зба́ви м̂ѧ ѿ гонѧ́щыхъ м̂ѧ, ꙗ҆́ко ѹ҆крѣпи́шѧсѧ паче мене·
И҆зведи и҆с темни́ца дш҃ю мою, и҆сповѣдатїсѧ и҆мени твоемꙋ·
Менѐ жд̑ꙋтъ правед̑ницы, до́ндеже въздасѝ мн̂ѣ·
ѱлом̑ двд̑въ, е҆гда гонѧ́ше и҆̀ а҆весаломъ сн҃ъ е҆го, рм҃в·
Ги҃ ѹ҆слы́ши мл҃твꙋ мою, вънꙋши моле́нїе мое въ и́стинѣ твоей·
ѹ҆слы́ши м̂ѧ в꙽ пра́вдѣ твое́й, и҆ не вни́ди в꙽ сꙋд꙽ с рабомъ твои́мъ, ꙗ҆́ко не ѻ҆пра́вдитсѧ пред̑ тобою всѧк꙽ живыѝ·
Ꙗ҆ко погна̀ врагъ дш҃ю мою, смирилъ е҆сть в землѝ животъ мой·
Посадил꙽ м̂ѧ е҆сть в темных̑ ꙗ҆́ко ме́ртвыа вѣкꙋ, и҆ ѹ҆ны̀ во мнѣ̀ дх҃ь мой·
Въ мнѣ смꙋтисѧ срд̑це мое, помѧнх̑ꙋ дн҃и дре́внѧа·
Поѹ҆чих̑сѧ въ всѣхъ дѣлехъ твои́х꙽, и҆ в дѣлех̑ рꙋкꙋ твоею поѹ҆чах̑сѧ·
Въздх̑ѣ к тебѣ рꙋцѣ моѝ, дш҃а моа̀ ꙗко землѧ̀ безвод̑наа тебѣ·
Ско́ро ѹ҆слы́ши м̂ѧ г҃и, и҆зчеѕѐ дх҃ь мои·
Не ѿвратѝ лица твоего ѿ мене, и҆ ѹ҆подоблюсѧ низходѧ́щим̑ в ров꙽·
Слы́шанꙋ сътвори мн̂ѣ заѹ́тра млс̑҇ть твою, ꙗ҆́ко на́ тѧ ѹ҆повахъ·
Скажѝ м̂и г҃и пꙋть, воньже поидꙋ̀, ꙗ҆́ко к тебѣ взѧх̑ дш҃ю мою̀·
И҆змѝ м̂ѧ ѿ врагъ моих̑ г҃и, к тебѣ прибѣгох꙽, наѹ҆чѝ м̂ѧ творити во́лю твою·
Ꙗко т̂ы е҆си б҃ъ мой, дх҃ь твой бл҃гы́й наста́витъ м̂ѧ на́ землю пра́вꙋ·
И́мени твоего ради г҃и живиши м̂ѧ, пра́вдою твоею и҆зведеши ѿ печали дш҃ꙋ мою, и҆ млс̑҇тїю твоею̀ потреби́ши врагы̀ моѧ·
И҆ погꙋби́ши вс̂ѧ стꙋжа́ющаа дш҃и мое́й, ꙗ҆́ко а҆зъ рабъ твой е҆смь·
Слв̑҇а, ѱлом̑ двд̑въ къ голїа́ѳꙋ, рм҃г·
кѳ̑҇а к҃·
Блвс̑҇енъ г҃ь б҃ъ мой, наѹ҆ча́аѝ рꙋцѣ моѝ на ѻ҆плъченїе, пръсты моа н́а брань·
Млс̑҇ть моѧ и҆ прибѣжище мое, застꙋ́пникъ мой и҆ і҆зба́вител꙽ мой, защи́титель мой, и҆ на́нь ѹ҆повахъ·
Повинꙋ́аѝ люди моѧ подъ мѧ·
г҃и, чт̂о е҆сть чл҃къ, ꙗ҆́ко сказал̑҇сѧ е҆си е҆мꙋ, л̂и сн҃ъ чл҃чь, ꙗ҆́ко вмѣнѧ́е҆ши и҆̀;
чл҃къ сꙋ́етѣ ѹ҆подобисѧ дн҃їе е҆го ꙗ҆́ко сѣнь прехо́дѧтъ·
г҃и преклон̑҇ нб҃са, и҆ сни́ди, косни́сѧ гора́мъ и҆ възды́мѧтсѧ·
Блесни мо́лънїѧ, и҆ ражд̑ене́ши их̑·
послѝ стрѣлы твоа, и҆ смꙋти́ши их̑·
Послѝ рꙋ́кꙋ твою свы́ше, и҆зми м̂ѧ и҆ і҆зба́ви м̂ѧ ѿ вод̑ мно́г꙽, ѿ рꙋкъ сн҃о́въ чꙋжихъ·
и҆хъ же ѹ҆ста̀ гл҃ашѧ сꙋ́етꙋ, и҆ десни́ца и҆хъ десни́ца неправды·
Бж҃е пѣснь но́вꙋ въспою тебѣ, въ ѱалты́ри десѧтострꙋ́ннѣмъ пою тебѣ·
даю́щемꙋ сп҃сенїе цр҃емъ, и҆збавлѧ́ющемꙋ двд̑а раба свое҆го ѿ ѻ҆рꙋжїѧ лю́та·
и҆зба́ви м̂ѧ и҆ і҆змѝ м̂ѧ и҆з рꙋки сн҃о́въ чꙋжихъ·
И҆хже ѹ҆ста̀ гл҃ашѧ сꙋ́етꙋ, и десница их̑ десни́ца непра́вды·
И҆хъ же сн҃ове и҆хъ ꙗ҆́ко новосажд̑ена, въдрꙋжена въ ю́ности своей·
дщерѧ и҆хъ ѹ҆добре́ны, преѹ҆крашены ꙗ҆́ко подобїе цр҃кве·
храни́лищѧ их̑ и҆спо́лнь, ѿрыга́ющѧ ѿ сеѧ въ ѻ҆нꙋ·
ѻ҆вцѧ их̑ мно́гоплодны, мно́жащасѧ въ исхо́дищыхъ своихъ·
Въло́ве их̑ то́лсти, нѣсть паде́нїѧ граде́жꙋ, ни прохо́да, ни во́плѧ в꙽ сто́гнахъ их̑·
Ѹ҆блажи́шѧ лю́дїе и҆м꙽же сїѧ сꙋть.
блаже́ни лю́дїе и́м꙽же г҃ь б҃ъ и҆хъ·
Хвала̀, двд̑ва, рм҃д·
Възнесꙋ̀ т̂ѧ б҃е мой цр҃ю мой.
и҆ блс̑҇вю и҆мѧ твое в꙽ вѣкъ, и҆ въ вѣкъ вѣка·
На всѧкъ дн҃ь блс̑҇вѧ̀ т̂ѧ, и҆ въсхвалю̀ и́мѧ твое в꙽ вѣкъ, и҆ въ вѣкъ вѣка·
Ве́лїй г҃ь и҆ хваленъ ѕѣло̀, и҆ вели́чїю е҆го нѣсть конца̀·
Ро́дъ и҆ ро́дъ въсхва́лѧтъ дѣ́ла твоѧ, и҆ си́лꙋ твою възвѣстѧтъ·
Вели́колѣпїе сла́вы ст҃ы́нѧ твоеѧ̀ възгл҃ютъ, и҆ чюдеса̀ твоѧ повѣдѧтъ·
и҆ си́лꙋ стра́шных̑ твои҆хъ рекꙋтъ, и҆ величїе твое повѣдѧтъ·
Па́мѧть мнѻ́жества бл҃гости твоеа̀ ѿрыгнꙋтъ, и҆ пра̀вдою твоею възра́дꙋютсѧ·
ще́дръ и҆ млс̑҇тивъ г҃ь, долготрьпѣливъ и мнѻ́гомлс̑҇тивъ·
Бл҃гъ г҃ь всѧ́ческымъ, и҆ щедро́ты е҆го на всѣхъ дѣлехъ е҆го·
да исповѣдѧт̑сѧ тебѣ г҃и вс̂ѧ дѣ́ла твоѧ, и҆ прпд̑бнїи твоѝ да блс̑҇вѧтъ т̂ѧ·
Сла́вꙋ црс̑҇твїа твое҆го рект̑ꙋ, и҆ си́лꙋ твою възгл҃ют̑, сказати сн҃овомъ члчс̑҇кым̑ силꙋ твою, и҆ сла́вꙋ великолѣпїа црс̑҇твїа твоего·
Црс̑҇тво твое, црс̑҇тво всѣхъ вѣкъ, и влд̑чество твое въ всѧком̑ родѣ и҆ ро́дѣ·
Вѣ́ренъ г҃ь въ всѣхъ словесехъ своих̑, и҆ прпд̑бнъ въ всѣхъ дѣлехъ своих̑·
Под̑е́млет̑ г҃ь вс̂ѧ низпадающаѧ, и҆ і҆справлѧ́етъ вс̂ѧ низве́рженыа·
ѻ́чи всх̑ѣ на тѧ ѹ҆поваютъ, и҆ т̂ы дае́ши и҆м꙽ пи́щꙋ въ бл҃говре́мѧ·
ѿверза́еши ты рꙋкꙋ твою, и҆ насы́щаеши всѧ́ко живо́тно бл҃говоленїа·
Пра́веденъ г҃ь въ всѣхъ пꙋтехъ своих̑, и прпд̑бнъ въ всѣхъ дѣлехъ своих̑·
Близъ г҃ь всѣм꙽ призывающым̑ и҆̀, всм̑ѣ призыва́ющим̑ и҆̀ въи́стинꙋ·
Во́лю боѧ́щих̑сѧ е҆го сътворитъ, и҆ мл҃твꙋ и҆х꙽ ѹ҆слы́шит̑, и҆ сп҃се́тъ и҆хъ·
Хранитъ г҃ь вс̂ѧ любѧ́щаѧ е҆го, и҆ всѧ грѣшникы потреби́тъ·
Хвалꙋ̀ гн҃ю въз꙽гл҃ютъ ѹ҆ста̀ моа, и да блс̑҇вит̑ всѧ́ка плоть и́мѧ ст҃о́е е҆го, в꙽ вѣкъ и҆ въ вк̑҇ѣ вѣка·
Слв̑҇а, а҆ллїлꙋїа, а҆гге́а, і҆ заха́рїа, рм҃е·
Хвалѝ дш҃е моа г҃а, въсхвалю г҃а в꙽ жївотѣ̀ мое́м꙽·
пою̀ б҃ꙋ моемꙋ, дондеже е҆смь·
Не надѣитесѧ на́ кн҃ѕѧ, на́ сыны члчс̑҇кыа, в них̑же нѣсть сп҃се́нїа·
И҆зы́детъ дх҃ь е҆го, и҆ въз꙽врати́тсѧ в꙽ зем̑лю свою.
в꙽ тои дн҃ь поги́бнꙋтъ вс̂ѧ помышле́нїа е҆го·
Блаже́нъ, е҆мꙋже б҃ъ і҆а́ковль помощник꙽ е҆го, ѹ҆пова́нїе е҆го, на́ г҃а б҃а своего·
Сътво́ршаго нб҃о и҆ зе́млю, мо́ре, и҆ вс̂ѧ ꙗ҆́же в них̑·
Хранѧ́щаго и́стинꙋ в꙽ вѣкъ, творѧ́щаго сд̑ꙋ ѻ҆би́димым̑, даю́щаго пи́щꙋ а҆́лчющым̑·
г҃ь рѣшит̑ ѻ҆кова́нных̑, г҃ь ѹ҆мꙋдрѧет̑ слѣпцѧ·
г҃ь възводїтъ низверже́ныа, г҃ь любит̑ правед̑никы·
г҃ь хранит̑ пришельца, си́ра и҆ вдовꙋ̀ прїе́млет꙽, и҆ пꙋть грѣш꙽ных̑ погꙋби́т꙽·
въцр҃и́тсѧ г҃ь в꙽ вѣк꙽, б҃ъ твой сїѻ́не, в род̑ и҆ родъ·
а҆ллилꙋїа, рм҃ѕ·
Хвали́те г҃а, ꙗ҆́ко бл҃гъ, ѱалом̑ бв҃и на́шемꙋ, да насладит̑сѧ хвале́нїе·
Зижд̑аѝ і҆ерс̑҇ли́ма г҃ь, раз꙽сѣѧннаѧ і҆ил҃ева съберет̑·
И҆сцѣлѧ́аѝ съкрꙋше́ныа срд̑цем꙽, и҆ ѻ҆бѧза́а съкрꙋше́нїа и҆хъ·
И҆зчитааѝ множество ѕвѣздъ, и҆ всм̑ѣ и҆мъ и҆мена̀ нарица́а·
Ве́лей г҃ь нашь, и҆ велїа крѣпость е҆го, и҆ ра́зꙋмꙋ е҆го нѣсть числа·
Прїе́млѧ кроткы́а г҃ь, смирѧ́а же грѣшникы до землѧ·
Начнѣте гв҃и въ и҆сповѣданїи, по́ите бв҃и на́шемꙋ в꙽ гꙋслех̑·
ѻ҆дѣва́ющемꙋ нб҃о ѻ҆блакы, гото́вающемꙋ землѝ дожд̑ь·
Прозѧба́ющемꙋ на горах̑ сѣно, и҆ травꙋ на слꙋж́бꙋ чл҃ком꙽.
дающемꙋ ско́том̑ пи́щꙋ их̑, и҆ птенцем̑ врановом̑ призыва́ющым꙽ и҆̀·
Не в си́лѣ коньстѣи въсхо́щетъ, ни в꙽ лы́стех̑ мꙋжескыхъ бл҃говолитъ·
Бл҃говолитъ г҃ь на боѧ́щых̑сѧ е҆го, и҆ на ѹ҆пова́ющыхъ на млс̑҇ть е҆го·
а҆ллилꙋїа, а҆гге́а, и҆ заха́рїа рм҃з·
Похвалѝ і҆ерс̑҇ли́мъ г҃а, хвалѝ б҃а твоего сїѻ́не·
Ꙗ҆́ко ѹ҆крѣпѝ вереѧ̀ вратъ твоих̑, блс̑҇ви сн҃ы твоѧ в тебѣ·
Ꙗ҆́ко положѝ предѣлы твоа ми́р꙽, и тꙋ́ка пшени́чна насыща́а т̂ѧ·
Посылааѝ сло́во своѐ землѝ, до скорости тече́тъ сло́во е҆го·
даю́щаго снѣгъ свой ꙗ҆́ко во́лнꙋ, м꙽глꙋ̀ ꙗ҆́ко пе́пелъ посыпа́ющаго·
Мета́ющаго го́лоть свой ꙗ҆́ко хлѣбы, проти́вꙋ лицꙋ мра́за е҆го кт̂о постои́тъ;
послетъ сло́во своѐ, и҆ і҆стаетъ ѧ҆̀·
д꙽хне́тъ дх҃ь е҆го, и҆ потекꙋтъ во́ды·
Възвѣщааѝ слово свое і҆а́ковꙋ, ѻ҆правда́нїа и҆ сꙋдбы своѧ і҆ил҃еви·
Не сътворѝ та́ко всѧ́комꙋ ꙗ҆́зы́кꙋ, и҆ сꙋдбы̀ своа не сказа̀ и҆мъ·
Слв̑҇а а҆ллилꙋїа а҆гге́а и҆ заха́рїа рм҃и·
Хвали́те г҃а съ нбс̑҇ъ, хвали́те е҆го в꙽ вы́шних̑·
хвали́те е҆го вс̂и а́гг҃ли е҆го, хвали́те е҆го вс̂ѧ си́лы е҆го·
хвали́те е҆го слн҃це и҆ лꙋна̀, хвали́те е҆го вс̂ѧ ѕвѣзды и҆ свѣтъ·
хвали́те е҆го нб҃са нбс̑҇ъ, и҆ вода̀ ꙗ҆же превы́ше нб҃съ, да въсхва́лѧтъ и́мѧ гн҃е·
ꙗ҆ко тои рече́, и҆ бы́шѧ.
тои повелѣ, и҆ съз꙽да́шасѧ·
Поста́вї ѧ҆̀ в꙽ вѣкъ, и҆ въ вѣкъ вѣка·
повелѣнїе положи, и҆ не ми́мои́детъ·
хвали́те г҃а ѿ землѧ̀, змие́ве и҆ всѧ безнд̑ы·
ѻ҆гнь, грд̑а, снѣгъ, го́лоть, дꙋхъ бꙋ́рен꙽, творѧ́щаѧ сло́во е҆го·
Го́ры, и҆ вси хо́лми.
дре́ва плодоно́сна, и҆ всѝ ке́дри·
ѕвѣрїе и҆ всѝ скотѝ.
га́ды, и҆ пти́цѧ перна́ты·
цр҃їе зем̑стїи҆̀, и҆ всѝ людїе.
кн҃ѕи, и҆ всѝ сꙋдїе земтсїи҆̀·
ю́ношѧ, и҆ дв҃ы.
ста́рцы съ ю́нотами, да въсхва́лѧтъ и҆́мѧ гн҃е, ꙗ҆ко възнесе́сѧ имѧ то́го е҆ди́ного·
и҆сповѣданїе е҆го на землѝ и҆ на нбс̑҇и, и҆ възнесетъ ро́г꙽ люди́и своих̑·
Пѣснь всѣмъ прпд̑бнымъ е҆го, сн҃ово́мъ и҆і҆л҃евомъ, людемъ приближѧ̀ющимсѧ е҆мъ·
а҆ллилꙋїа, рм҃ѳ·
Въспо́йте гв҃и пѣснь но́вꙋ, хваленїе е҆го в꙽ цр҃кви преподо́бныхъ·
да възвесели́тсѧ і҆ил҃ь ѻ҆ сътво́ршемъ е҆го, и҆ сн҃ове сїѻ́ни възрадꙋютсѧ ѻ҆ цр҃и свое́мъ·
да въсхва́лѧтъ и́мѧ е҆го в꙽ ли́цѣ, в꙽ тѷмпанѣ и҆ ѱалтыри да пою́тъ е҆мꙋ·
Ꙗ҆́ко бл҃говолитъ г҃ь в꙽ лю́дехъ своихъ, и҆ възнесе́тъ крот꙽кыа въ сп҃сенїе·
Въсхва́лѧтсѧ преподобнїи в꙽ славѣ, и҆ възрадꙋютсѧ на ло́жехъ свои́х꙽·
Възноше́нїа бж҃їа в꙽ горта́ни и́х꙽, и҆ мечѝ ѻ҆бою́дꙋ ѻ҆стры в рꙋкахъ и҆хъ.
сътворити ѿмще́нїе въ ꙗ҆́зы́цехъ, ѻ҆бличе́нїа в꙽ людехъ·
Свѧза́ти цр҃ѧ их̑ пꙋты, и҆ сла́вныа их̑ рꙋчны́ми ѻ҆ко́вы желѣзными, сътвори́ти в нихъ сꙋдъ напи́санъ·
Сла́ва с̂и е҆сть всѣмъ прпд̑бнымъ е҆го·
а҆ллилꙋїа, р҃н·
Хвали́те бг҃а въ ст҃ыхъ е҆го, хвали́те е҆го въ ѹ҆тверже́нїи силъ е҆го·
Хвали́те е҆го на си́лахъ е҆го, хвали́те е҆го по премно́гомꙋ вели́чествїю е҆го·
Хвали́те е҆го въ гласѣ трꙋб꙽нѣ, хвали́те е҆го въ ѱалты́ри и҆ гꙋслехъ·
Хвали́те е҆го в тѷмпанѣ и҆ ли́цѣ, хвали́те е҆го въ стрꙋнахъ и҆ ѻ҆рганѣхъ·
Хвали́те е҆го в꙽ кѷмвалх̑ѣ доброгла́сныхъ, хвали́те е҆го в꙽ кѷм꙽ва́лѣхъ восклица́нїа·
Всѧ́ко дыханїе да хвали́тъ г҃а·
Сла́ва· Сеи ѱало́мъ ѻ҆собъ пи́санъ, и҆ внѣ̀ числа̀, двд̑въ.
е҆гда е҆ді́нъ бра́сѧ, и҆ ѹ҆би́тъ голїа́ѳа·
Ма́лъ бѣхъ в꙽ братїи моей, и҆ ю҆ннѣишїи в꙽ домꙋ ѿц҃а моего, пасѧхъ ѻ҆вцѧ̀ ѿц҃а мое҆го·
Рꙋцѣ моѝ сътворишѧ ѻ҆рганъ, и҆ пе́рсти моѝ съста́виша ѱалты́рь·
И҆ кто̀ възвѣсти́тъ гв҃и моемꙋ;
самъ г҃ь, самъ ѹ҆слы́шитъ·
Самъ посла̀ а҆́гг҃ла своего, и҆ і҆зѧтъ м̂ѧ ѿ па́ств꙽ ѻ҆́вчых̑ ѿц҃а мое҆го, и҆ пома́за м̂ѧ е҆ле́ѻм̑ пома́занїа своего·
Бра́тїа моѧ добри и҆ вели́цы, и҆ не бл҃говоли в них̑ г҃ь·
Изыдохъ въ срѣтенїе и҆ноплемѐнникꙋ, и҆ проклѧтъ м̂ѧ и́долы свои́ми·
А҆́зъ же и҆сто́ргъ ме́чъ ѿ него, ѻ҆без꙽главихъ е҆го, и҆ ѿꙗ҆́хъ поноше́нїе ѿ сн҃о́въ і҆ил҃евъ·