ЗАЧА́ЛО ПР́ИТЬЧАМЬ СОЛО́МОНИМЬ
Глв̑҇а, а҃·
При́тча соло́монѧ сн҃а дввд̑а и҆же црс̑҇твова въ і҆ил҃ьтѣх꙽·
разꙋмѣти прмд̑рость и҆ наказа́нїе.
разꙋмѣти же словеса̀ мꙋ́дростїи·
Прїа́ти же и҆зви́тїе словесъ, и҆ разреше́нїе гада́нїи·
Разꙋмѣти же пра́вдꙋ и҆ и́стиннꙋ, и҆ сꙋдъ и҆справлѧ́ти·
да да́стъ незло́бивымъ хꙋдож꙽ство·
ѻ҆́трокꙋ же ю́нꙋ, чю́в꙽ствїе, и҆ прмд̑рость·
сего послꙋшавъ мꙋ́дрыи, премꙋдрѣе бꙋ́детъ·
А҆ разꙋ́мныи, строи́телство стѧ́житъ·
разꙋмѣ́етъ же при́тча и҆ те́мно сло́во.
гл҃анїа же премд̑рыхъ и҆ гада́нїа·
Нача́ло прмд̑рости страхъ гн҃ь·
ра́зꙋм꙽ же, бл҃гъ всѣмъ творѧ́щим̑ ю҆̀·
Бл҃говѣ́рїе же на б҃а, и҆ нача́ла чю́в꙽ствїа·
прмд̑рость же и҆ наказа́нїе, нечести́вїи ѹ҆ничижа́ютъ·
Слы́ши сн҃ꙋ наказа́нїе ѿц҃а твоего, и҆ не ѿри́ни наказа́нїа мт҃ре твоеѧ·
Вѣне́цъ бо блгд̑ти прїимеши на твоем꙽ връсѣ, и҆ гри́внꙋ зла́тꙋ ѻ҆ своей выи·
Сн҃е да не прельстѧ́тъ тебе мꙋжи нечестивїи, не въсхощѝ же а҆́ще ѹ҆молѧтъ т̂ѧ гл҃ющи.
пои҆дѝ с на́ми причасти́сѧ крови, покры́емъ же в землѝ мꙋжа пра́вед̑на без꙽ пра́вды.
по́жрем꙽ же е҆го, ꙗ҆́ко а́дъ жива·
и҆ во́змемъ па́мѧть е҆го ѿ землѧ̀, стѧжа́нїе е҆го мно́го прїимемъ.
и҆спо́лнимъ домы наша коры́стїю, жре́бїи же тво́и положѝ с на́ми.
ѻ́бще же влагалище стѧ́жемъ всѝ, и҆ вре́тище е҆ді́но да бꙋ́детъ всѣмъ намъ·
Не ходѝ в пꙋть с ними, ѹ҆клони же но́гꙋ твою ѿ стезъ и҆хъ·
Но́гы бо и́хъ, на зло̀ ри́щꙋтъ, и҆ ско́ры сꙋть на проли́тїе крове·
Не бес пра́вды бо пропина́ютсѧ мрежа пернатымъ, тїи бо ѹ҆бїе́нїю ѻ҆бща́ютсѧ, събира́ют̑ себѣ злаа·
разрꙋше́нїе же мꙋже́и законопрестꙋп꙽никъ зл̂а·
Се̂ сꙋть пꙋтїе всх̑ѣ творѧ́щихъ безако́нїе, нечестїем꙽ бо, дш҃ю свою̀ ѿе́млютъ·
прмд̑рость въ и҆схо́дищихъ пое҆тсѧ.
в пꙋтехъ же дръзнове́нїе в꙽во́дитъ·
На връсѣх꙽ же стѣ́нъ забра́лныхъ проповѣ́дꙋе́тсѧ, въ вра́тѣхъ же силныхъ присѣди́тъ, и҆ въ вра́тѣхъ гра́да дерза́ющи гл҃етъ·
е҆ли́ко ѹб̂о лѣтъ незло́бивїи дръжат̑сѧ пра́вды не постыдѧ́тсѧ.
а҆ безꙋ́мнїи, досаже́нїю сꙋть по́хотницы, нечести́вїи бы́вше·
Възненавидѣша чю́в꙽ствїе, и҆ пови́нни бышѧ ѻ҆бличе́нїемъ·
Се̂ пред̑лага́ю вамъ, мое҆го дх҃а гл҃анїе.
наѹ҆чю же вас̑҇ мое҆мꙋ словеси·
Поне́же звах̑ и҆ не послꙋшасте мене, простира́хъ словеса̀ и҆ не внима́стѣ.
но ѿмѣта́сте моѧ̀ совѣти, и҆ мои́хъ ѻ҆бличе́нїи не внима́сте·
Тѣм꙽же и҆ а́зъ вашеи поги́бели посмѣю́сѧ, пора́дꙋю же сѧ всегда̀, а҆́ще прїидетъ вамъ погы́бель.
и҆ли ꙗ҆́ко млъва на вы внезаа҆пꙋ разоре́нїе подобно бꙋ́рїи прїидет̑, и҆л̂и е҆гда̀ вамъ прїидетъ печа́ль и҆ гра́дꙋ ѻ҆бъстоѧ́нїе·
Бꙋдетъ бо е҆гда̀ призове́те мѧ, а҆́з꙽ же не послꙋшаю вас̑҇.
взы́щꙋтъ мене злїи и҆ не ѻ҆брѧ́щт̑ꙋ·
Възненавидѣшѧ бо прмд̑рость·
и҆ страха гн҃ѧ, не и҆зво́лишѧ·
Не хотѧ́хꙋ бо внима́ти мои҆хъ совѣтъ, подража́хꙋ бо моѧ̀ ѻ҆блече́нїа.
тѣм꙽же ѹ҆бо снѣ́дѧтъ своих̑ пꙋтїи плоды̀, и҆ свое́ѧ не́чести насы́тѧтсѧ.
занѐ б̂о ѻ҆би́дѧхꙋ младыѧ ѹ҆бїе́ни бꙋдт̑ꙋ, и҆спыта́нїе нечестивыѧ, гꙋ́бит꙽·
Слꙋшаай же менѐ всели́тсѧ на ѹ҆пова́нїе, и҆же без꙽млъствит̑ без꙽ стра́ха, ѿ всѧкого зла·
Глв̑҇а, в҃·
Сн҃е, а҆́ще прїимъ гл҃ы моѧ и҆ за́повѣди в себѣ с꙽кры́еши·
Послꙋшаетъ премꙋ́дрости твоѐ ѹ́хо.
и҆ приложи́ши срд̑це свое ра́зꙋмꙋ·
Приложи́ша и҆ в наказа́нїе сн҃ꙋ твое҆мꙋ.
а҆́ще бо премꙋ́дрость призове́ши и҆ ра́зꙋмꙋ дасѝ глас̑҇ твои.
чю́в꙽ства же в꙽зы́щеши, гла́сомъ великымъ·
И҆ а́ще взы́щеши еѧ̀, ꙗ҆́ко сребра ꙗ҆́ко сокровища пои́щеши еа̀·
тогда разꙋмѣеши боꙗ҆знь гн҃ю и҆ ра́зꙋмъ бж҃їи ѻ҆брѧ́щеши·
ꙗ҆́ко г҃ь дает̑ премꙋ́дрость, и҆ ѿ лица̀ е҆го позна́нїе, и҆ ра́зꙋмъ·
и҆ щади́тъ и҆справлѧ́ющимъ сп҃снїе.
защища́етъ же ше́ствїа и҆хъ, съхранитъ пꙋть ѻ҆правда́нїи.
и҆ пꙋть хва́лѧщимъ е҆го съхранитъ·
Тогда̀ разꙋмѣ́еши правдꙋ и҆ сꙋдъ, и҆ і҆справиши всѧ твоѧ бл҃гаѧ·
А҆́ще бо прїидетъ премꙋ́дрость в꙽ твоѐ помышле́нїе, а҆ чю́в꙽ство дш҃и твоеи добро быти и҆зво́литсѧ·
Совѣтъ до́бръ съхранитъ тѧ, смышле́нїе же преподобно съблюде́тъ тѧ.
да и҆зба́витъ тѧ ѿ пꙋтѝ зла, и҆ ѿ чл҃ка гл҃юща, ничто́же вѣрно·
А҆ ѻ҆ста́вльшеи пꙋтѝ пра́выѧ ходи́ти пꙋтемъ непра́вымъ, и҆ веселѧ́щихсѧ ѻ҆ злых̑ и҆ ра́дꙋющесѧ ѻ҆ сверше́нїи зла.
и́хже пꙋти стропо́тни, скривлена колеса̀ и҆хъ дале́че тѧ створѧ́тъ ѿ пꙋтѝ пра́ва.
и҆ чю́жда ѿ пра́вед̑ныѧ мы́сли·
Сн҃е да не пости́гнетъ тѧ золъ совт̑ѣ ѻ҆ставлѧ́а ѹ҆че́нїе ю҆́ности, и҆ забывыи завѣтъ бж҃їи.
положи́лъ бо е҆́сть при смерти домъ свои, и҆ въ а́дъ съ безꙋ́мными колеса̀ своѧ·
Вси ходѧ́щеи по немъ не възвратѧ́тсѧ, ниже пости́гнꙋтъ сте́зъ пра́вед̑ных꙽·
ни бо пости́гнетъ их̑ лѣта живота·
А҆́ще бо бышѧ ходили в пꙋтѝ бл҃гы, ѻ҆брѣ́ли ѹ҆бо бышѧ стезѧ̀ пра́вед̑ных꙽ гла́дкы·
Бла́зи бꙋдꙋтъ жи́тели на землѝ, незло́бивїи же ѻ҆ста́нꙋтъ на не́и·
ꙗ҆́ко пра́вїи насе́лѧтъ зем̑лю, прпд̑бнїи ѻ҆ста́нꙋтъ на не́и·
Пꙋтїе нечести́выхъ ѿ землѧ̀ погы́бнꙋт꙽, законопрестꙋ́пницы же, и҆зри́нꙋт꙽сѧ ѿ неѧ̀·
Глв̑҇а, г҃·
Сн҃е мои гл҃ы зако́на не забыва́й.
гл҃ы же моѧ̀, да съблюде́тъ твое срд̑це·
длъготꙋ̀ бо житїѧ̀, и҆ лѣта жи́зни и҆ ми́ра приложитъ ти·
Млс̑҇тынѧ и҆ вѣ́ра, да не ѻ҆ста́нꙋтъ тебѐ, приложи́ же ѧ҆̀ на своей вы́и.
и҆ напиши ѧ҆̀ на скрижа́ли срд̑ца твоего и҆ ѻ҆брѧ́щеши бл҃годать.
И҆ помышлѧ́и до́брое пред̑ бм҃ъ и҆ чл҃ки.
бꙋ́ди же ѹ҆пова́ѧ всѣмъ срд̑цемъ на б҃а·
А҆ своею премꙋ́дростїю не велича́исѧ.
въ всх̑ѣ пꙋте́хъ твоих̑ зна́и еѧ̀ да и҆спра́витъ пꙋти твоѧ̀·
Не бꙋ́ди мꙋдръ ѻ҆ себѣ, бо́и же сѧ б҃а и҆ ѹ҆клони́сѧ ѿ всѧ́кого зла̀·
Тогда̀ и҆сцѣле́нїе бꙋдет꙽ тѣ́лꙋ твоемꙋ, и҆ прилежа́нїе ко́стем̑ твои҆мъ·
Чтѝ г҃а ѿ пра́вед̑ных꙽ твои҆хъ трꙋдо́въ, и҆ нача́ткы да́и е҆мꙋ ѿ пра́вед̑ныхъ твои҆хъ плодъ.
да и҆спо́лнѧтсѧ жи́тницѧ твоѧ̀ мно́жествомъ пшени́цѧ, вино́ же точила твоѧ да и҆стача́ютъ·
Сн҃е не пренемага́и в зако́нѣ гн҃и, ни ѻ҆слабѣ́и ѿ него̀ ѻ҆блича́емъ·
Є҆го́же бо лю́битъ г҃ь, того̀ и҆ нака́зꙋе҆тъ, и҆ бїе́тъ всѧ́кого сн҃а ѿц҃ъ е҆го́же прїе́млетъ·
Блаженъ чл҃къ и҆же ѻ҆брѣте прмд̑рость.
и҆ смертенъ и҆же ѹ҆вѣдѣ прмд̑рость·
Лꙋ́че бо тꙋ кꙋпова́ти, не́жели зла́та и҆ сребра̀ сокро́вища.
дража́иши е҆сть ка́менїа многоцѣ́ннаго·
Не проти́витсѧ е́и ничтоже лꙋкаво, зна́чна е҆сть всѣмъ приближа́ющимсѧ е́и·
Всѧ́ко же, недосто́йно е́и е҆сть.
долгота̀ б̂о житїѧ̀ и҆ лѣта живота̀, в꙽ десници е҆ѧ̀.
и҆ в шꙋ́ици е҆ѧ̀, богат̑ство и҆ сла́ва·
ѿ ѹ҆́стъ е҆ѧ̀ и҆схо́дит꙽ пра́вда, зако́нъ же и҆ млс̑҇ть на ꙗ҆́зы́цѣ но́ситъ·
Пꙋтїе е҆ѧ̀, пꙋтїе добри.
и҆ всѧ стезѧ е҆ѧ̀ ми́рны·
дрѣво живо́тное е҆сть, всѣмъ дръжа́щимсѧ е҆ѧ̀.
и҆ въскланѧ́ющесѧ на ню, ꙗ҆́ко на́ г҃а, тве́рда·
б҃ъ прмд̑ростїю зе́млю ѻ҆снова, ѹ҆гото́ва же нб҃са мꙋ́дростїю.
ра́зꙋмомъ же е҆го, бе́здны съкрꙋши́шѧсѧ, ѻ҆́блацы же поточи́ша ро́сы·
Сн҃е не ѿпадѝ, съблюди́ же мои совт̑ѣ и҆ помышле́нїе·
да поживе́тъ дш҃а твоѧ, и҆ блгд̑ть бꙋдетъ при вы́и твое́й·
Бꙋ́дет̑ же и҆сцѣле́нїе пло́темъ твои҆мъ, и҆ приложе́нїе ко́стемъ твои҆мъ·
да хо́диши надѣѧсѧ в ми́ре, въ все́мъ пꙋтѝ твоемъ.
а҆ нога̀ твоа не по́ткнетсѧ·
А҆́ще бо сѣди́ши, без̑ боꙗ҆́зни бꙋ́деши.
а҆́ще ли спи́ши, сладокъ со́нъ твои·
и҆ не ѹ҆бои́шисѧ страха нашед̑ша на тѧ·
н̂иже ѹ҆стрѣмле́нїа ѿ нечести́выхъ нашед̑ша.
г҃ь бо бꙋдетъ на всѣхъ пꙋте́хъ твои҆хъ, и҆ ѹ҆тведи́тъ но́гꙋ твою да не по́ткнешисѧ·
Не ѿи҆ми бл҃готвори́ти требꙋ́ющемꙋ, е҆гда̀ и҆́мать рꙋка твоѧ̀ помага́ти.
не рцѝ ѿше́дъ възвращꙋ́сѧ и҆ ѹ́трѣе да́м꙽·
Си́лнꙋ ти сꙋщꙋ бл҃готвори́ти, не вѣси бо что творитъ находѧ́и·
Не кꙋ́и на́ дрꙋга свое҆го зла̀, прише́лца сꙋща и҆ ѹ҆пова́юща на тѧ·
Не враждꙋ́и на чл҃ка безꙋма̀, да нѣ́что на тѧ съдѣе́тъ зло̀·
Не стѧжѝ злыхъ мꙋ́жїи поноше́нїе, ни възревнꙋи пꙋтемъ и҆хъ·
Нечи́стъ бо пред̑ гм҃ъ всѧ́къ законопрестꙋ́пникъ·
с пра́вед̑ными же не счетава́етсѧ·
Клѧ́тва гн҃ѧ в домѣхъ нечести́выхъ·
двори́ же правед̑ныхъ блс̑҇вѧ́тсѧ·
г҃ь го́рдымъ проти́витсѧ·
смире́нымъ же даетъ блгд̑ть·
Сла́вꙋ прмд̑рїи наслѣ́дѧт̑·
нечести́вїи же възно́сѧт̑ досаже́нїе·
Глв̑҇а, д҃·
Ѹслы́шите дѣти наказа́нїе ѿч҃е.
и҆ вне́млѣте разꙋмѣва́ти помышле́нїе·
даръ бл҃гъ даю̀ вамъ, сло́ва моего не ѻ҆ставлѧ́ите·
Сн҃ъ бо быхъ и҆ а́зъ послꙋшливъ ѿц҃ꙋ, и҆ възлю́бленъ сыи пред̑ лице́мъ матере.
ꙗ҆́же гл҃аста и҆ ѹ҆чѧста мѧ·
да ѹ҆твержа́етсѧ наше слово в꙽ твоем̑ срд̑ци.
съхранѧ́и заповѣди и҆ не забыва́и·
стѧжи разꙋм꙽, не ѹ҆клонисѧ ѿ гл҃ъ ѹ҆стъ моих̑·
ниже пре́зри гл҃анїе моих̑ ѹ҆́стъ, не ѻ҆ста́ви его и҆ и҆ме́тсѧ тебе.
похощи е҆мꙋ и҆ съблюде́т꙽ тѧ·
Нача́токъ премд̑рости стѧжа́ти премꙋдрость, и҆ въ всѧ́комъ стѧжа́нїи твоемъ, стѧжѝ разꙋмꙋ·
взы́щи е҆го и҆ възнесе́тъ тѧ.
почтѝ е҆ѧ̀ да тѧ ѻ҆быи҆метъ, да да́стъ главѣ твоеи, вѣне́ць блс̑҇внъ·
вѣнце́м꙽ же пи́щномъ защи́титъ тѧ·
Слы́ши сн҃е и҆ прїи҆ми моа словеса̀, и҆ ѹ҆мно́жатсѧ лѣта живота̀ твое҆го.
да ти бꙋ́дꙋтъ мно́зи пꙋти животꙋ̀·
пꙋте́мъ бо прмд̑рости ѹ҆чю тѧ, наставлѧ́ю же тебѐ на тече́нїа праваѧ·
а́ще бо хо́диши, не за́пнꙋтсѧ стопы твоѧ̀·
а҆́ще ли тече́ши, не трꙋди́шисѧ·
И҆ми́сѧ по мое наказа́нїе, не ѿпꙋсти́сѧ·
съхрани ѧ҆̀ себѣ в животъ твои·
на пꙋть нечести́вых꙽ не наидѝ·
не възревнꙋ́и пꙋтем̑ законопрестꙋ́пникъ·
на не́м꙽же мѣ́стѣ а҆́ще во́ѧ берꙋтъ, не наи҆ди на то̀, ѹ҆клони́сѧ ѿ нихъ и҆ ра́зньстви·
не ѹ҆снꙋтъ бо а́ще зл̂а не сотворѧ́тъ, ѿи́метсѧ со́нъ ѿ них̑ и҆ не спѧт꙽·
тѝ б̂о пита́ютсѧ пищею нечести́вою, вино́м꙽ же нечести́вомъ ѹ҆пивают̑сѧ·
пꙋти же пра́вед̑ныхъ ꙗ҆́ко ѻ҆́гнь свѣтѧщесѧ прехо́дѧтъ и҆ просвѣща́ютъ до́ндеже напра́витсѧ дн҃ь·
а҆ пꙋтїе нечести́выхъ те́мни, не вѣ́дѧтъ бо ѻ҆ что̀ претыка́ютсѧ·
Сн҃е, моих̑ гл҃ъ внима́и, к мои́мъ же словесем꙽ прилагаи ѹ҆́хо твое.
да не ѻ҆скꙋдѣютъ и҆сто́чницы твоѝ·
хранѝ ѧ҆̀ въ твоемъ срд̑ци животъ бо сꙋть, ѻ҆брѣтающимъ ѧ҆̀, и҆ все́й плоти твоеи бꙋдетъ и҆сцѣле́нїе·
всѣмъ храненїем̑ блюди твое срд̑це, ѿ си́хъ бо сꙋть и҆схо́дища животꙋ·
ѿи҆ми ѿ себѐ стропти́ва ѹ҆ста, и҆ ѻ҆би́дливы ѹ҆стны, ꙗ҆́ко далече ѿ тебѐ сотворѝ·
ѻ́чи твоѝ, пра́во да зри́та·
и҆ вѣ́цѣ твоѝ да помавае҆та пра́вед̑наа, пра́ва тече́нїа творѝ твои́ма нога́ма·
И҆ пꙋти твоѧ̀ и҆справлѧ́и·
не ѹ҆клони́сѧ ни на́ десно ни на шꙋ́е·
Възрати́ же но́гꙋ твою ѿ пꙋтѝ зл̂а·
пꙋтѝ б̂о десны́е, вѣ́сть г҃ь.
раз꙽враще́ни же сꙋть, и҆же ѻ҆шꙋ́юю̀·
Ты́ же права сотворѝ тече́нїа твоѧ̀·
хожде́нїа твоѧ̀, в ми́рѣ вари́тъ·
Глв̑҇а, е҃·
Сн҃е мои прмд̑рость внима́и, к мои́мъ же словесемъ прилага́и твое ѹ҆хо.
да съхрани́ши мы́сль бл҃гꙋ·
Чю́в꙽ствїе же моею ѹ҆стнꙋ̀ заповѣдаю тебѣ·
Не внима́и злѣ женѣ мед̑ бо ка́плетъ ѿ ѹ҆сте́нъ жены любодѣ́ици·
Ꙗ҆́же въ врѣмѧ наслажда́етъ твой горта́нь послѣ́ди же ѹ҆бо го́рчїе жо́лчи ѻ҆брѧ́щеши·
И҆зоѻ҆стре́нъ па́че меча ѻ҆бою҆дꙋ ѻ҆стра·
Безꙋмїа бо но́ѕѣ низво́дѧтъ прилѣплѧ́ющаѧ҆сѧ е́й смертїю въ а́дъ·
стопы̀ же е҆ѧ̀ не ѹ҆твержа́ютсѧ·
На пꙋти бо живо́тны не нахо́дитъ, блꙋ́дна же тече́нїѧ е҆ѧ̀ и҆ не бл҃горазꙋ́мна·
Ны́нѣ же сн҃е послꙋш́аи мене, и҆ не ѿвръзи моѧ̀ словеса̀·
дале́че ѿ неѧ сътвори́ ти пꙋть твои, и҆ не приближи́сѧ къ две́ремъ до́мꙋ е҆ѧ̀·
да не предаси и҆́нѣмъ живота̀ твое҆го, и҆ твое҆го живота̀ неми́лостивомъ·
да не насытѧт̑сѧ и҆́нїи твое҆а крѣ́пости, а҆ трꙋ́ды же твои въ домы тꙋ́ждаѧ внидꙋтъ·
И҆ раска́ешисѧ напослѣдокъ твои, внегда̀ ѹ҆бо и҆стрꙋтсѧ пло́ти тѣ́ла твое҆го, и҆ рече́ши ка́ко възненавидѣ́хъ наказа́нїе.
и҆ ѿ ѻ҆бличе́нїи ѹ҆клони́сѧ срд̑це мое, и҆ не послꙋш́ах̑ гла́са наказа́ющаго м̂ѧ, и҆ къ ѹ҆ча́щемꙋ м̂ѧ не прилагах̑ ѹ҆́ха мое҆го·
Въ ма́лѣ бых̑ ѕолъ всѧкомꙋ, посредѣ цр҃кве и҆ со́нмища·
Сн҃е пїи во́ды ѿ свои҆хъ съсꙋ́дъ, и҆ ѿ свои҆хъ стꙋде́нецъ і҆ и҆сто́чникъ, да прелива́ютсѧ тебѣ во́ды ѿ твое҆го и҆сто́чника.
и҆ въ твоѧ̀ пꙋтѝ да прохо́дѧт̑ твоѧ̀ во́ды, да бꙋ́дꙋтъ тебѣ е҆ді́номꙋ сꙋщꙋ, и҆ да никтоже тꙋжд̑ь причаститсѧ тебѣ, і҆ и҆сто́чникъ твое҆ѧ воды̀ да бꙋ́детъ тебѣ свои·
И҆ весели́сѧ съ жено́ю ꙗ҆́же ѿ ю́ности твое҆ѧ, е҆лень любви и҆ жре́бѧ твоих̑ блгд̑тїи да бесѣдꙋетъ тебѣ.
твоѧж̑ да послѣдꙋетъ тебѣ, и҆ да е҆сть с тобо́ю въ всѧ́ко вре́мѧ·
Въ все́и любви съпребыва́ѧи, и҆ ѹ҆мно́женъ бꙋ́деши.
не мно́гъ бꙋ́ди тꙋ́ждїи, не́же ѻ҆бѧ́тъ бꙋди рꙋка́ма не твое҆а.
пред̑ ѻ҆чи́ма б̂о сꙋть бж҃їима пꙋтїе мꙋж́ꙋ, всѧ же тече́нїѧ е҆го съзира́етъ·
зако́нопрестꙋпле́нїѧ б̂о мꙋ́жа ѹ҆лавлѧ́ютъ, плѣни́цами же грѣ́хъ свои҆хъ ко́ждо затѧза́етсѧ·
Сеи скончава́етсѧ съ ненаказа́нными, ѿ мно́жества же свое҆го жи́тїѧ и҆звръжетсѧ.
и҆ погиба́етъ за безꙋ́мїе·
Глв̑҇а, ѕ҃·
Сн҃е а҆ще порꙋча́еши за свое҆го дрꙋ́га, предаси свою̀ рꙋ́кꙋ вра́гꙋ·
Сѣть б̂о крѣ́пка мꙋжꙋ свои ѹ҆стнѣ, и҆ ѹ҆вѧзает̑ ѹ҆стна́ми своихъ ѹ҆́стъ·
Творѝ сн҃е ꙗ҆́же а҆зъ заповѣ́даю т̂и и҆ сп҃сешисѧ, и҆деши б̂о въ рꙋ́цѣ злы́хъ за свои дрꙋ́гъ, бꙋди не ѻ҆слабѣѧ·
Прогнѣ́ваи же дрꙋ́га свое҆го е҆гоже спорꙋчи, не да́ждь сна̀ свои҆ма ѻ҆чи́ма, ни въздрѣмли вѣкома свои҆ма·
да сп҃сешисѧ а҆ки серна̀ ѿ тенета̀, и҆ а҆ки пти́ца ѿ склепцы̀·
И҆дѝ къ мравїи ѽ лѣ́ностиве и҆ възревнꙋ́и ви́дѣвъ пꙋти е҆ѧ̀, и҆ бꙋ́ди тоѧ̀ мꙋдрѣ́и, ѻ҆на б̂о тѧжа́нїю не сꙋщꙋ, ни нꙋдѧ́щаго и҆мꙋщи ни под̑ вла́стїю сꙋщи, гото́витъ с̂и в꙽ жат̑вꙋ пи́щꙋ, и҆ мно́го же въ лѣто тво́рит꙽ ѹ҆гото́ванїе·
И҆ли и҆ди къ б꙽челѣ, и҆ ѹ҆вѣжд̑ъ ꙗ҆́ко тѧжа́телница е҆сть, тѧжа́нїе же ꙗ҆́ко пречи́сто тво́рит̑, е҆ѧ́же ѹ҆си́лїе цр҃и и҆ про́стїи къ зрд̑а́вїю прилага́ютъ, и҆ люби́ма же е҆сть всѣми и҆ сла́вима.
понѐ сꙋщи си́лою не́мощна, н̂о прмд̑ростїю почте́на пред̑видѣсѧ·
доко́лѣ ѽ лѣ́ностиве възлежи́ши, ко́гда же ѿ сна̀ въста́неши·
Ма́ло ѹ҆бо спи́ши, мало же сѣди́ши, ма́ло дрѣ́млеши, ма́ло же ѻ҆бїе́млеши рꙋка́ма свои҆ма пр́ьси·
Пото́м же на́идетъ тебѐ а҆ки зо́лъ спꙋтникъ ѹ҆бо́жество, и҆ нищета а҆ки бл҃гъ ходе́цъ теча̀·
А҆ще ли нелѣни́въ бꙋдеши, прїидетъ ꙗ҆́ко и҆сто́чникъ жа́тва твоѧ̀, и҆ нищета̀ ꙗ҆́ко зо́лъ ходецъ ѿ тебѐ ѿи҆́детъ·
Мꙋжъ безꙋ́менъ, и҆ зако́нопрестꙋпенъ по́идетъ въ пꙋти не бл҃ги·
То́и е҆сть намиза́ѧи ѻ҆́комъ, и҆ кле́плетъ ного́ю, и҆ ѹ҆чи́т꙽ же помаа́нїа пе́рстомъ·
Развраще́но же срд̑це кꙋетъ ѕл̂о на всѧ́ко времѧ, тако́въ и҆ мѧте́жь съставлѧет̑ гра́дꙋ·
Сего ра́ди прихо́дитъ внезаа́пꙋ поги́бель е҆мꙋ, раз꙽сѣче́нїе и҆ съкрꙋше́нїе неи҆сцѣ́лно·
Ꙗ҆́ко ра́дꙋетсѧ ѻ҆ всх̑ѣ и҆́х꙽же ненави́дитъ б҃ъ, съкрꙋшает̑ же сѧ за не ѻ҆цѣще́нїе дш҃и·
ѻ҆ко досади́телевѣ ꙗ҆зы́къ непра́веденъ, рꙋцѣ же пролива́ющи кро́вь пра́вед̑наго.
срд̑це кꙋ́ющее мы́сли ѕл̂ы, и҆ но́ѕѣ подвиза́ющисѧ ѕл̂о твори́ти и҆скоренѧ́тсѧ·
Раждиза́етъ л꙽жа свѣдѣтель непра́веденъ, и҆ насыла́етъ сꙋды посредѣ бра́тїѧ·
Сн҃е хранѝ зако́ны ѿц҃а твое҆го, и҆ не ѿвръзи наказа́нїѧ мт҃ре свое҆ѧ.
навѧжи же ѧ҆̀ на свою дш҃ꙋ прс̑҇но, и҆ ѻ҆бѧжи ѧ҆̀ ѻ҆ свое́и вы́и·
Внегда̀ хо́диши води ю҆̀ и҆ с тобо́ю да бꙋдетъ, е҆гда же спи́ши да храни́тъ т̂ѧ, и҆ въста́ющꙋ т̂и гл҃етъ с тобо́ю·
Занѐ свѣти́л꙽никъ за́повѣдь зако́нна и҆ свѣтъ, и҆ пꙋть живо́тныи ѻ҆бличе́нїе и҆ наказа́нїе.
е҆же съхрани́ти т̂ѧ ѿ жены̀ мꙋжа́ты, и҆ ѿ наважде́нїѧ ꙗ҆зы́ка тꙋж́даго·
Сн҃е да не ѻ҆долѣ́ет꙽ т̂и по́хоть тꙋж́деѧ доброты, ни ѹ҆ловленъ бꙋ́ди твои҆ма ѻ҆чи́ма·
Ниже да въсхити́шисѧ ѿ вѣ́и е҆ѧ̀, цѣна б̂о любодѣ́ицѣ ꙗ҆́ко е҆ді́наго хлѣ́ба, занѐ жена мꙋжемъ чс̑҇тнымъ дш҃а ѹ҆лавлѧ́етъ·
Ввѧ́жетъ ли кт̂о ѻ҆́гнь в на́дра ри́зъ своих̑ не вож꙽жет̑ л̂и, и҆ли настꙋ́пит̑ кт̂о на ѹ҆́глїѧ ѻ҆́гнена но́гꙋ же свое҆ю не ѻ҆жже́тъ л̂и.
та́ко и҆же вшедъ къ женѣ̀ мꙋжа́тѣ, не без мꙋ́ки бꙋ́дет̑ ниже прикаса́ѧсѧ е́и·
Не ди́вно а҆ще кт̂о впаде́тъ крады́и, кра́детъ б̂о да насы́титъ дш҃ꙋ свою а҆́лчющꙋ·
А҆́ще же впаде́тъ и҆скꙋпитсѧ сед̑ми́цею, и҆ вс̂е и҆мѣ́нїе да́въ и҆зба́витъ себѐ·
А҆ прелюбодѣ́и за скꙋ́дость ѹ҆ма̀ поги́бель дш҃и свое́и съдѣва́етъ·
Болѣзни же и҆ досажде́нїе тръпи́тъ, тогда̀ поноше́нїе е҆го въ вѣ́къ не потреби́тсѧ·
И҆спо́лнь б̂о рве́нїѧ ꙗ҆́ростнаго мꙋжꙋ е҆ѧ̀, не пощади́тъ въ дн҃ь сꙋ́да.
не и҆змѣни́тъ же ни е҆ді́ною м꙽здо́ю вра́жды, ниже разрѣши́тсѧ мно́гими дарми·
Глв̑҇а, з҃·
Сн҃е храни моѧ̀ словеса̀, моѧж̑ за́повѣди съкры́и въ себѣ·
Сн҃е чти г҃а и҆ ѹ҆крѣпи́шисѧ ра́звѣ же е҆го не бо́исѧ и҆́ного.
хранѝ моѧ̀ за́повѣди и҆ поживе́ши, и҆ словеса̀ же моѧ ꙗ҆́ко ѕѣни́цы ѻ҆́чїю.
ѻ҆бложи́ е҆ю своѧ̀ персты, напиши́ же ѧ҆̀ на скрижа́ли срд̑ца свое҆го.
нарци же прмд̑рость сестрꙋ себѣ, а҆ мꙋдрость зна́емꙋ сотвори себѣ̀.
да т̂ѧ соблюдет̑ ѿ жены̀ тꙋждеѧ и҆ лꙋка́вы, а҆ще т̂ѧ словесы̀ бл҃ги ѻ҆гл҃ати начнет̑ ѻ҆ко́нцемъ б̂о и҆з до́мꙋ е҆ѧ на пꙋтѝ прини́чꙋщи, е҆гоже а҆ще ѹ҆́зритъ безꙋмныхъ ча́дїи, ю҆́нотꙋ скꙋдоѹ҆́мна проходѧ́щаго ми́мо ѹ҆́глъ распꙋтїѧ до́мꙋ е҆ѧ̀·
и҆ гл҃ющи в те́мныи ве́черъ, внегда̀ ѹ҆покое́нїе бꙋдетъ но́щное и҆ мра́чное·
Жена же срѧ́щет̑ е҆го зра́къ и҆мꙋщи прелюбодѣ́иничь, ꙗ҆́же творитъ ю҆́ныхъ парити срд̑ца.
въскры́лена же е҆сть и҆ несы́тна, в домꙋ же безъ ѹ҆молче́нїѧ но́ѕѣ е҆ѧ̀.
вре́мѧ нѣ́кое вн̂ѣ глꙋ́митсѧ, вре́мѧ же на раз꙽пꙋтїи҆хъ на всѧ́комъ ѹ҆́глѣ ло́витъ·
Пото́мъ прїим̑ши ло́бжетъ е҆го, бестꙋдным꙽ же лицем̑ прорече́тъ к немꙋ.
жрътва ми́рна мѝ е҆сть, днс̑҇е въздаю мл҃твы моѧ̀·
Сего ра́ди и҆зыидо́хъ въ стрѣте́нїе тебѣ, любѧ́щи лице твое ѻ҆брѣто́хъ т̂ѧ·
Претыка́нїемъ е҆смь попѧ́ла ѻ҆́дръ мои, ковра́ми же сꙋгꙋ́быми постлах̑ ꙗ҆́же ѿ е҆гѷпта·
Желтѧни́цею посы́пала е҆смъ клѣть свою̀, и҆ до́мъ мои кори́цею·
Прїиди да наслади́весѧ любвѝ до ѹ҆́тра, грѧди да насладим̑сѧ любо́вїю по́хоти.
нѣ́сть б̂о мꙋжа мое҆го в домꙋ̀, и҆зы́иде на пꙋть да́лече·
дово́лно сребра̀ взѧ̀ съ собою, и҆ за мно́ги дн҃и възврати́тсѧ въ до́мъ свои·
И҆ прельсти же и҆̀ мно́гою бесѣдою, тенета́ми ѹ҆стнꙋ е҆ѧ̀ въ блꙋдъ въведе и҆̀·
ѻ҆́н же а҆́бїе послѣдꙋѧ е́и ꙗ҆́коже во́лъ на заколе́нїе веде́тсѧ, и ꙗ҆́ко пе́съ на ѹ҆́зы·
и҆л̂и ꙗ҆ко е҆лень врежден̑҇ стрѣлою въ ꙗ҆́тра.
и҆ поспѣша́ет꙽ же сѧ ꙗ҆́ко пти́ца въ сѣть, не вѣдыи ꙗ҆́ко ѻ҆ дш҃и течет̑·
Нн҃ѣ же сн҃е послꙋш́аи менѐ, и҆ внимаи гл҃ы ѹ҆́стъ мои҆хъ, да не ѹ҆кло́нитсѧ в пꙋтѝ е҆ѧ̀ срд̑це твое.
и҆ да не прелсти́шисѧ въ ѻ҆мѣнахъ е҆ѧ̀·
Мно́ги б̂о ѹ҆ꙗ҆зви́вши низведѐ, и҆ бесчисле́ни сꙋть и҆́х꙽же ѹ҆би́ла е҆сть·
Пꙋтїе а҆́дови домъ е҆ѧ̀, низводѧ́щи въ скро́вища смрътнаѧ·
Глв̑҇а, и҃·
Тѣ́мже т̂ы прмд̑рость проповѣждь, да мꙋдрость тебѐ послꙋш́ает̑.
и҆ на высо́ких̑ б̂о краих̑ е҆сть, посредѣ же сте́ѕь стоѧ́ше, и҆ при вра́тѣхъ си́лныхъ присѣди́тъ.
въ вхо́дх̑ѣ же пое́тсѧ·
Васъ ѽ чл҃ци молю, и҆ въдаю мои гласъ сн҃омъ чл҃ческим̑.
разꙋмѣ́ите незло́биви кова́рство, и҆ ненаказа́нїи приложите срд̑це.
послꙋш́аите мене прчс̑҇тна б̂о рекꙋ, и҆знесꙋ ѿ ѹ҆стен̑҇ моих̑ пра́ваа.
ꙗ҆ко и҆́стиннѣ поѹ҆чит̑сѧ горта́нь мои, мрьз꙽ски же предо мно́ю ѹ҆стны̀ льсти́выѧ·
Съ пра́вдою вс̂и гл҃и ѹ҆́стъ мои҆хъ, ничесо́же в ни́хъ стропо́тна, ни развраще́на·
Всѧ преди разꙋмѣва́ющим̑, и҆ пра́ва ѻ҆брѣта́ющимъ ра́зꙋмъ·
Прїимѣте наказа́нїе а҆ не сребро̀, и ра́зꙋмъ па́че зла́та и҆скꙋшена, и҆стѧзꙋи́те же вѣденїе паче сребра̀ чи́ста·
Лꙋчше б̂о прмд̑рость ка́менїа мно́гоцѣнна, всѧко же драго́е недосто́ино е҆ѧ̀ е҆сть·
А҆зъ прмд̑рость всели́хъ совт̑ѣ и҆ ра́зꙋмъ и҆ смы́слъ, а҆зъ призва́хъ·
Стра́хъ гн҃ь ненави́дитъ непра́вды, досажде́нїѧ же и҆ горды́ню и҆ пꙋтїи лꙋка́выхъ, възненавидѣхъ же а҆зъ пꙋти развраще́нныѧ злы́хъ·
Мои ес̑҇ совѣтъ и҆ ѹ҆твержд̑енїе, моѧ̀ мꙋ́дрость моѧ же и҆ крѣ́пость·
Мно́ю цр҃їе црс̑҇твꙋютъ, и҆ си́лнїи пи́шꙋтъ пра́вдꙋ·
Мно́ю велмо́жи велича́ют̑сѧ, и҆ мꙋчи́теле мно́ю дръжа́тъ зем̑лю·
И а́зъ любѧ́щаѧ м̂ѧ люблю̀, и҆щꙋщеи же менѐ ѻ҆брѧ́щꙋтъ блгд̑ть·
Бога́тьство и҆ сла́ва моѧ е҆сть, и҆ стѧжа́нїе мно́гихъ и҆ пра́вда.
лꙋче е҆сть плоди тїи паче зла́та, и҆ ка́менїа дра́га, мои́ же пло́ди лꙋ́че сребра̀ и҆збра́нна·
Въ пꙋтѝ пра́вед̑ныхъ хождꙋ, и҆ посредѣ сте́ѕь и҆́стинны живꙋ, да раздѣлю любѧ́щим̑ м̂ѧ и҆мѣ́нїа, и҆ сокро́вища их̑ и҆спо́лню бл҃гихъ·
А҆ще възвѣщꙋ вамъ быва́ющаѧ на всѧ́къ дн҃ь, помѧнꙋ ꙗ҆́же ѿ вѣка и҆счести, г҃ь създа м̂ѧ в нача́токъ пꙋтїи свои҆хъ.
в дѣ́ла е҆го пре́жде вѣ́къ ѻ҆снова мѧ, пре́жде сътворе́нїѧ землѝ, и҆ пре́жде сътворе́нїѧ бе́здны·
Пре́жде потече́нїѧ и҆сто́чникъ во́дныхъ.
пре́жде да́же не ѹ҆тверди́шасѧ го́ры, пре́жд̑е всх̑ѣ хо́лмъ ражд̑а́етъ м̂ѧ.
г҃ь сътворѝ страны и҆ не вселен̑҇ныа, и҆ ко́нца вселе́н꙽ныѧ под̑нбс̑҇ною.
внегда же готовѧ́ше нб҃о с ни́мъ бѣхъ.
е҆гда же разлꙋча́ше прс̑҇тлъ свои на вѣтрехъ.
вънегдаже крѣ́пки творѧ́ше вы́шнѧѧ ѻ҆́блаки, и҆ ꙗ҆́ко тве́рды полага́ше и҆сто́чники под̑нбс̑҇нѣи·
Є҆гда же полага́ше мо́рю ѹ҆стро́и е҆го, и҆ во́ды не пре́идꙋтъ бреговъ е҆го.
и҆ крѣ́пки творѧше ѻ҆снова́нїѧ землѝ, бѣ́хъ к немꙋ подо́бна.
а҆зъ бѣ́хъ ра́довашесѧ на всѧ́къ же дн҃ь, веселѧ́хсѧ пред̑ лицемъ е҆го въ всѧ́ко вре́мѧ.
е҆гда̀ веселѧ́шесѧ вселе́ннꙋю скончав̑҇, и҆ веселѧ́шесѧ ѻ҆ сн҃охъ чл҃ческихъ·
нн҃ѣ же ѹ҆бо ча́да послꙋшаите мене, и҆ бл҃жены и҆же пꙋтѝ моѧ̀ съхранѧт̑.
слы́шите прмд̑рость и҆ ѹ҆прмд̑ритесѧ, и҆ не престꙋпи́те·
Бл҃аженъ б̂о мꙋ́жъ и҆же послꙋш́аетъ мене, и҆ чл҃къ и҆же пꙋтѝ моѧ̀ храни́тъ, и҆ бдѧ́и при мои҆хъ дверехъ прс̑҇но стрегїи под̑бо́ѧ мои҆хъ вхо́дъ.
и҆схо́ди б̂о мои и҆схо́ди живота, и҆ готоваетсѧ хотѣнїе ѿ г҃а·
А҆ согрѣша́ющеѝ въ мѧ, нечс̑҇твꙋ́етъ въ свою̀ дш҃ю.
и҆ ненавидѧ́щеи менѐ, лю́бѧтъ смерть·
Глв̑҇а, ѳ҃·
Премꙋдрость созда̀ себѣ храм̑, и҆ ѹ҆твердѝ сто́лпъ се́дмь.
закла̀ своѧ жрътве́ннаѧ, и҆ чрьпа̀ в ча́ши свое́и вино̀, и҆ ѹ҆гото́ва свою трапе́зꙋ·
Посла̀ своѧ рабы̀ созыва́ющи съ высо́кимъ проповѣда́нїемъ на чашꙋ гл҃ющи, и҆же е҆сть безꙋменъ да ѹ҆клони́тсѧ къ мнѣ̀·
И҆ хотѧ́щимъ ѹ҆ма̀ рече, прїидѣте ꙗ҆ди́те мои хлѣбъ, и҆ пїите вино̀ е҆же чръпа́хъ вамъ.
ѻ҆ста́вите безꙋмїе и҆ жи́ви бꙋдете, и҆ въ вѣки въцр҃итесѧ·
И҆ възы́щете премꙋ́дрости и҆ поживете, і҆ и҆спра́вите во свѣдѣнїи ра́зм̑ꙋ·
Кажа́и ѕлы́ѧ, прїемлетъ себѣ досажде́нїе.
ѻ҆блича́ѧи же нечести́ва, поро́чна сътвори́тъ себе·
ѻ҆бличе́нїѧж̑ нечести́вымъ мозо́лїе и҆мъ, не ѻ҆блича́и нечести́выхъ да не възненави́дѧт꙽ тебе·
ѻ҆блича́и премꙋ́дра, и҆ възлюби́тъ т̂ѧ.
да́и мꙋ́дрꙋ винꙋ̀, и҆ премд̑ꙋрѣи бꙋдет̑.
сказа́аи же пра́ведномꙋ, и҆ приложит̑ прїимати·
Зача́ло премꙋ́дрости страх̑ гн҃ь, и совѣтъ ст҃ыхъ ра́зꙋмъ·
А҆ е́же разꙋмѣти зако́нъ, помышле́нїѧ ес̑҇ бл҃га.
си́мъ б̂о ѻ҆́бразомъ мно́го поживе́ши лт̑ѣ, и҆ приложат̑ ти сѧ лѣта животꙋ·
Сн҃е а҆ще премрд̑ъ бꙋдеши себѣ прмд̑ръ бꙋдеши і҆ и҆скреним̑ своим̑, а҆ще л̂и ѕо́лъ бꙋдеши е҆ді́нъ почръпеши ѕла́а.
сн҃ъ наказа́нъ премд̑ꙋръ бꙋдетъ, бꙋ́емꙋ же ра́бъство бꙋдет̑.
і҆ и҆же ѹ҆твержа́етсѧ на лжа́хъ, сеи пасе́тъ вѣтры, то́же и҆́сто поженетъ пти́ца парѧ́ща, ѻ҆ста́ви ѹ҆бо пꙋтѝ свое҆го виногра́да.
ше́ствїѧ же свое҆го тѧжа́нїѧ прелесть, и҆ прехо́дит же сквоѕѣ пꙋсты́ню без꙽во́днꙋю, и҆ зе́млю распросте́ртꙋ въ жа́ждахъ събира́етъ рꙋка́ма непложде́нїе·
Жена̀ безм̑ꙋна и҆ безочи́ва, лише́на хлѣба бꙋдетъ.
и҆же не вс̑҇ѣ стꙋда, сѣде при две́рех̑ до́мꙋ свое҆го на столцѝ, ꙗ҆́вѣ на пꙋтехъ призыва́ющи ми́моходѧ́щаѧ.
пꙋть и҆справлѧ́ющихъ въ пꙋтѝ своѧ̀, и҆же е́сть ѿ ва́съ безꙋмнѣи да ѹ҆клони́тсѧ къ мн̂ѣ·
Лише́ным же премꙋдрости повелѣваа гл҃ющи, хлѣб꙽ та́иныхъ въ сла́сть коснѣтсѧ, и҆ во́ды татебны сла́дки пїете.
се́и же не вѣсть ꙗ҆́ко бывыѝ ѹ҆ не́ѧ поги́бнꙋтъ, и҆ во днѣ̀ а҆́да ѻ҆брѣта́ю҆тсѧ·
Но ѿско́чи не замедлѝ на мѣстѣ еѧ, ни напра́ви свое҆го ѻ́ка къ не́и.
та́ко б̂о проидеши ꙗ҆ко во́дꙋ тꙋж́дꙋ, и҆ преидѝ рѣки тꙋждїи.
ѿ воды́ же тꙋждаѧ ѻ҆ша́исѧ, и҆ ѿ и҆сто́чника чю́ждаго не пїи, да мно́га̑ лѣтъ жи́въ бꙋдеши, и҆ прило́жатъ ти сѧ лѣта животꙋ̀·
Глв̑҇а, і҃·
Сн҃ъ премꙋдръ веселит̑ ѿц҃а, сн҃ъ же безꙋменъ печа́ль ма́тери.
нѣсть б̂о по́лѕы ѿ бога́тества безако́нником̑, пра́вдаж̑ и҆зба́вит̑ ѿ смр҃ти.
не гла́домъ замори́тъ г҃ь дш҃а пра́ведныхъ, живо́тъ же нечести́выхъ разорит꙽.
нищета̀ мꙋжа смирѧет̑, рꙋки же в꙽ста́нивыхъ ѻ҆богащают̑сѧ.
сн҃ъ наказа́нъ премꙋдръ бꙋдетъ, безꙋмнаго же слꙋгꙋ прїемлет̑ себѣ·
Сп҃сетсѧ ѿ зно́ѧ сн҃ъ разꙋмивъ, вѣтротлѣ́ненъ же быва́етъ на жа́твѣ сн҃ъ законопрестꙋпенъ·
Блс̑҇венїе гн҃е на главѣ̀ пра́веднаго, ѹ҆ста́ же нечести́ваго покры́етъ пла́чь безго́денъ.
па́мѧть пра́ведныхъ с похва́лами быва́етъ, и҆́мѧж̑ нечести́выхъ поги́бнетъ.
премд̑ръ срд̑цемъ прїиметъ за́повѣди, а҆ ѻ҆сквернен̑҇ ѹ҆стна́ма ѻ҆строптева́ѧ запнетсѧ.
и҆же хо́дитъ про́сто хо́дитъ надѣѧсѧ, развраща́ѧ же пꙋтѝ своѧ не ѹ҆таи́тсѧ.
намиза́а ѻ҆́комъ со ле́стїю събира́етъ мꙋжем꙽ ско́рбь, а҆ ѻ҆блича́ѧ же не ѻ҆бинꙋ́ѧсѧ ми́ръ тво́ритъ.
и҆сто́чникъ живо́тенъ в рꙋцѣ пра́веднаго, ѹ҆ста́ же нечести́ваго покры́етъ па́гꙋба·
Възненавидѣнїе въздви́жетъ побѣдꙋ, всѧ́ же въпре́ки гл҃ющаѧ покры́етъ любы̀.
и҆же ѿ ѹ҆стенъ и҆зно́ситъ премꙋдрость, жеѕлом̑ же біет̑ мꙋжа безъсръдечна·
Премꙋдрїи съкры́ютъ чю́вствїѧ, ѹста́ же не ѻ҆паси́ваго приближа́ютсѧ съкрꙋше́нїю.
стѧжа́нїе бога́тыхъ гра́дъ тве́рдъ, съкрꙋше́нїе же нечести́вых̑ нищета̀.
дѣла пра́ведныхъ живот̑ тво́рѧтъ, пло́д же нечести́выхъ грѣсѝ.
пꙋтѝ живо́тныѧ хранѧ́тъ наказа́нїе, наказа́нїе же неи҆збран̑҇на прельща́етъ·
Покрива́ют̑ вра́жды ѹ҆стны пра́ведныхъ, и҆зносѧ́щеи̑ клеветы̀ безꙋмнѣиши сꙋть.
и҆зъ мно́гъ словесъ не ѹ҆бѣжи́ши грѣха̀, щадѧ́и же гл҃ы разꙋменъ бꙋдетъ.
сребро̀ раждеже́но ꙗ҆зы́къ пра́вед̑наго, срд̑це же нечести́выхъ и҆ще́знетъ.
ѹ҆стны̀ пра́ведныхъ ѹ҆мѣ́ютъ высо́каѧ, а҆ безꙋмнїи же в нищетѣ̀ скон̑҇чава́ютсѧ·
Блс̑҇венїе гн҃е на главѣ̀ пра́веднаго, сїе ѻ҆богаща́етъ и҆ не и҆́мать приложи́тисѧ е҆мꙋ печа́ль въ срд̑цы.
смѣхъ безꙋмныхъ творит̑ зла́ѧ, премꙋдрость же мꙋжеви ражда́етъ мꙋдрость.
поги́бель нечести́выхъ прено́ситсѧ, жела́нїе пра́веднаго прїѧтно.
приходѧ́щиж̑ бꙋри нечести́выи и҆щеза́етъ, праведныи же ѹ҆клони́всѧ поживе́тъ въ вѣки.
ꙗ҆́коже гро́здїе зеле́ное па́кос̑҇ зꙋбо́мъ и҆ ды́мъ ѻ҆чи́ма, та́ко зако́нопрестꙋпле́нїе творѧ́щимъ е҆̀·
Страхъ гн҃ь прилага́етъ дн҃и, дѣла́ же нечести́выхъ ѹ҆малѧ́ютсѧ.
прибли́житсѧ пра́ведныхъ весе́лїе, ѹ҆пова́нїе же нечести́выхъ погибает̑.
ѹ҆твержде́нїе прпд̑бномꙋ бо́ѧзнь гн҃ѧ, съкрꙋше́нїе творѧ́щим̑ ѕла́ѧ.
пра́ведникъ въ вѣки не ѻ҆слабѣ́етъ.
нечести́вїи же не населѧ́тъ землѝ, ѹ҆ста̀ пра́веднаго ка́плютъ премꙋдрость, ꙗ҆зы́къ же непра́вед̑наго погі́бнетъ.
ѹ҆ста̀ пра́ведныхъ ка́плют̑ блгд̑ть, ѹ҆ста же нечести́выхъ ѿвраща́ютсѧ·
Глв̑҇а, а҃і·
Мѣ́рила ле́стна мръзость пред̑ гм҃ъ, мѣ́рило же пра́ведно прїатно е҆мꙋ ес̑҇.
и҆дѣже а҆ще вни́детъ досажде́нїе, т̂ꙋ и҆ ѹ҆коре́нїе, ѹ҆ста́ же смире́нныхъ поѹ҆чат̑сѧ премꙋдрости.
ѹ҆мира́ющи пра́ведникъ ѻ҆ставлѧет̑ попече́нїе, пред̑ворꙋче́на же бꙋдетъ и҆ назнаменова̀ нечести́вых̑ погибель.
кончи́на пра́выхъ наста́вит꙽ и҆хъ, и҆ препина́нїе зако́нопрестꙋпникъ плени́тъ ѧ҆̀.
не ѹ҆спѣетъ и҆мѣнїе въ дн҃ь ꙗ҆́рости, пра́вда же и҆зба́вит꙽ ѿ смр҃ти.
пра́вда непоро́чнаго и҆спра́витъ пꙋтѝ, и҆ безчестїе ѻ҆бы́идет̑ непра́вдꙋ.
пра́вда мꙋжїи пра́выхъ и҆зба́витъ и҆хъ, без꙽совѣтїемъ же ѹ҆ловлѧ́ютсѧ зако́нопрестꙋпнїи.
скон꙽ча́вшꙋсѧ мꙋжꙋ пра́веднꙋ не погибнетъ наде́жда, а҆ похва́ла нечести́выхъ погибнетъ.
пра́ведныи з ло́вища и҆зонре́тъ, в негоже мѣсто предае́тсѧ нечести́выи, зако́н же нечести́въ потреби́тсѧ.
въ ѹ҆стх̑ѣ законопрестꙋпных̑ сѣть гражд̑аном̑, чю́в꙽ствїе же праведныхъ спѣшно.
въ бл҃гих̑ же праведныхъ и҆спра́витсѧ гра́дъ, в поги́бели нечести́выхъ ра́дость.
въ блс̑҇венїѝ пра́вед̑ныхъ възнесе́тсѧ град̑, ѹ҆сты́ же нечести́выхъ раскопа́етсѧ.
подража́етъ гража́ны скꙋдныи мꙋдростію, мж̑ꙋ же мꙋдръ безмо́лвїе въ́дитъ.
мж̑ꙋ дв̂оꙗ҆зыченъ ѿкры́етъ совѣты въ со́ньмищихъ, вѣрныи же дх҃омъ таи́тъ вещи.
и҆мже нѣсть совѣта́ па́дꙋтсѧ а҆ки ли́ствїе, сп҃сенїе же е҆сть въ мно́ѕѣ совѣтѣ.
лꙋка́выи пронырꙋ́етъ е҆гд̑а съчета́етсѧ с пра́веднымъ, ненави́дит же гла́са ѹ҆твержде́на.
жена̀ блгд̑тна възно́ситъ мꙋжꙋ сла́вы, прс̑҇тлъ же досажде́нїѧ ненави́дѧщи пра́вды.
богат̑ства лѣни́вїи скꙋдни быва́ютъ, въстан꙽ни́вїи же ѹ҆тверьжд̑а́ют꙽ богат̑ствомъ дш҃а своѧ.
блгд̑ть тво́рит̑ мꙋ́жъ млс̑҇тивъ, раздрꙋша́етъ же тѣло свое немлс̑҇тивыи.
нечести́выи тво́ритъ дѣла непрїа́знена, сѣмѧ пра́ведныхъ м꙽зда̀ и҆́стин꙽ны.
сн҃ъ пра́веденъ ражд̑а́етсѧ въ жи́знь, гоне́нїе же нечести́выхъ въ смр҃ть.
ме́рзостны гв҃и раз̑враще́нны пꙋтїе, прїѧтни же и҆мъ всѝ непоро́чнїи въ пꙋте́хъ свои҆хъ.
в рꙋкꙋ рꙋцѣ вложь непра́ведне не бꙋдетъ без мꙋкъ ѕлы́хъ, сѣѧвыи же сѣмѧ прїимет꙽ м꙽здꙋ вѣрнꙋ.
ꙗ҆́коже ѹ҆серѧ́зь злат̑ в но́здрехъ свинїи, та́коже и҆ женѣ̀ ѕлоѹ́мнѣ лѣпота̀.
жела́нїе пра́ведныхъ вс̂е бл҃го, наде́жда же нечестивыхъ поги́бнетъ·
Сꙋть и҆же своѧ̀ сѣющеи мно́жае тво́рѧтъ, сꙋть и҆ събира́ющеи тꙋ̀ждѧ скꙋдни.
всѧ́ка дш҃а блс̑҇вена про́ста, мꙋж꙽ же ꙗ҆́ръ не бл҃гоѻ҆́бразенъ.
съдръжа́и пшени́цꙋ проклѧ́тъ людмѝ, блс̑҇венїе же гн҃е на главѣ̀ подаю́щемꙋ·
Творѧ́и бл҃гаѧ и҆́щет꙽ блгд̑ти до́бры, взы́щꙋщего же ѕл̂а ѕло̀ пости́гнет꙽ е҆го.
надѣѧ́исѧ на бога́т꙽ство свое ѹ҆паде́тъ, и҆ застꙋпа́ѧи пра́вдꙋ то́и въс꙽сїѧ́етъ.
не сматрѧ́ѧи своег̑҇ до́мꙋ наслѣ́дитъ вѣтры, порабо́тае҆т же безꙋменъ мꙋдрꙋ.
ѿ пло́да̑ пра́вдѣ прозѧба́етъ древо живота̀, ѿе́млют же сѧ безгода̀ дш҃и зако́нопрестꙋпникъ.
а҆ще пра́ведныи е҆два̀ сп҃сетсѧ, нечестивыи же и҆ грѣшныи гдѣ̀ ꙗ҆ви́тсѧ·
Глв̑҇а, в҃і·
Любѧ́и наказа́нїе лю́битъ чю́в꙽ствїе, а҆ ненавидѧ́и ѻ҆бличе́нїѧ безꙋмен̑҇.
лꙋче ѻ҆брѣты́и блгд̑ть ѿ г҃а, мꙋжъ же зако́нопрестꙋпен̑҇ забвенъ бꙋдетъ·
Не и҆спра́витсѧ чл҃къ ѿ зако́нопрестꙋ́пникъ, ко́ренїѧ же пра́ведныхъ не ѿи́мꙋтсѧ.
жена̀ разꙋми́ва вѣне́ць мꙋжꙋ свое҆мꙋ, ꙗ҆́коже че́рвь въ дре́вѣ, та́кож̑ погꙋбитъ мꙋжа жена̀ любодѣ́ица.
мы́сль пра́ведныхъ сꙋдъ, совѣты же нечести́вых̑ льсти́вы.
словеса̀ нечести́выхъ льсти́вы, ѹ҆ста́ же пра́ва и҆зба́вѧтсѧ.
и҆дѣже ѻ҆брати́тсѧ нечести́выи и҆сче́знетъ, хра́ми же пра́ведныхъ пребыва́ют̑.
ѹ҆ста̀ разꙋмнаго хвали́ма быва́ют̑ ѿ мꙋжа, слабосе́рдъ же порꙋга́нъ бꙋдетъ.
добрѣи мꙋжъ безъ че́сти себѣ слꙋжа̀, ниже и҆же че́сть себѣ ѻ҆блага́етъ, и҆ лише́нъ бꙋдетъ хлѣба.
пра́ведникъ ми́лꙋетъ дш҃а ско́тъ свои҆хъ, ѹ҆тро́ба же нечести́выхъ безъми́лостивна.
дѣлаѧй свою зе́млю насы́тѧтсѧ хлѣба, гонѧ́щеи сꙋ́етнаа скꙋдны ѹ҆мо́мъ.
и҆же е҆сть сла́щь въ винѣ̀ пребыва́ти, въ свои҆хъ тве́рдехъ ѻ҆ста́вит̑ досажде́нїе.
жела́нїѧ нечести́выхъ ѕла̀, а҆ ко́ренїѧ бл҃гихъ въ тве́рдех̑·
за грѣхъ ѹ҆стнꙋ̀ в꙽падетъ в сѣти грѣшникъ, и҆збѣжит же ѿ нихъ пра́ведникъ.
глѧда́ѧи гла́дко поми́лованъ бꙋдетъ, а҆ срѣта́ѧи въ вра́тѣхъ ѻ҆скорби́тъ дш҃а.
ѿ пло́да̑ ѹ҆стнꙋ̀ дш҃а мꙋжꙋ напо́лнитсѧ бл҃гихъ, възданїе же ѹ҆́стъ е҆го да́стьсѧ е҆мꙋ, пꙋтѝ бꙋзꙋмныхъ пра́ви предъ ни́ми.
послꙋшае҆тъ совѣта мꙋдрыи, безꙋмныи же въ прь́выи дн҃ь и҆сповѣсть гнѣвъ свои, досажде́нїе же свое таи́тъ мꙋдрыи, и҆ ꙗ҆вле́нꙋ вѣрꙋ и҆сповѣда́етъ пра́ведныи, а҆ свидѣтель непра́ведныхъ льсти́въ.
сꙋть гл҃ющїи, ꙗ҆́звы тво́рѧтъ ꙗ҆́ко ме́чи, ꙗ҆зы́к же премꙋдрыхъ и҆сцелѧ́ютъ.
ѹ҆стны̀ и҆́стинны и҆справлѧ́ютъ свѣдѣтельство, свѣдѣтель же ско́ръ ꙗ҆зы́къ непра́веденъ е҆сть въ срд̑ци кꙋ́ющемꙋ ѕла́а, хотѧ́щеи же мирꙋ възвеселѧт̑сѧ.
не годѣ е҆сть пра́ведномꙋ ничтож̑ непра́ведно, нечести́вїи же и҆спо́лнѧт̑сѧ зо́лъ.
мръзость гв҃и ѹ҆стны̀ льсти́выѧ, творѧ́и же вѣрно прїѧтенъ е҆мꙋ·
Мꙋжъ разꙋми́въ прс̑҇тлъ чю́въствїю, срд̑це же безꙋмныхъ ѹ҆т꙽кнетсѧ въ клѧтвах̑.
рꙋка и҆збра́нныхъ ѹ҆дръжи́тъ ѹ҆доб̑҇ льсти́вїи же бꙋдꙋтъ въ плѣне́нїе.
стра́шно слово срд̑це мꙋжꙋ пра́веднꙋ смꙋща́ет꙽, вѣсть же бл҃га веселит̑ и҆̀.
разꙋми́въ пра́ведникъ себѣ дрꙋгъ бꙋдетъ, во́лѧ же нечести́выхъ без̑ смотре́нїѧ.
съгрѣша́ющей пости́гнꙋтъ зла́ѧ, пꙋть же нечести́вых̑ прельсти́тъ ѧ҆̀.
не ѹ҆лꙋчитъ льсти́выилови́твы, стѧжа́нїе же добро̀ мꙋжъ бл҃гъ·
В пꙋте́хъ пра́ведных̑ живо́тъ, пꙋтїе же враждꙋ́ющихъ въ смр҃ть·
Глв̑҇а, г҃і·
Сн҃ъ хꙋдо́женъ послꙋшли́въ ѿц҃ꙋ, сн҃ъ же ѻ҆слꙋшли́въ поги́бель.
ѿ плод̑ пра́вед̑наго снѣсть сн҃ъ бл҃гъ, дш҃а же зако́нопрестꙋпникъ гибнт̑ꙋ безъ го́да.
и҆же хранит̑ своѧ ѹ҆ста̀ блюде́тъ свою̀ дш҃ꙋ, а҆ не ѻ҆паси́выи ѹ҆стна́ма ѹ҆страши́тъ себѐ.
въ по́хотехъ е҆сть всѧкъ нетѧ́гъ, рꙋки же въстанъливых̑ въ прилежа́нїи.
словесе непра́вед̑на ненави́дитъ пра́вед̑никъ, нечьсти́выи же стыдит̑сѧ и҆ не и́мать дръзнове́нїѧ.
пра́вда съхрани́тъ без̑злоби́выѧ, нечьсти́важ̑ блѧди́ва тво́ритъ грѣхъ·
Сꙋть богатѧ́ще себѐ ничесоже и҆мꙋще, и҆ сꙋть смирѧ́ющесѧ въ мно́ѕѣ богат̑ствѣ·
И҆збавле́нїе мꙋ́жꙋ дш҃и свое е҆го бога́тьство, ни́щїи же не постоит̑ въ запрѣще́нїи.
свѣтъ пра́вед̑ником̑ прс̑҇но, свѣтъ же нечьсти́выхъ ѹ҆гаснетъ·
дш҃а же льсти́выхъ блꙋ́дѧт̑ въ грѣсѣхъ, пра́веднїи же щедрꙋ́ют꙽ и҆ ми́лꙋютъ.
ѕлы́и же съ досажде́нїем̑ тво́ритъ ѕла́ѧ, себѣ же разꙋмѣ́ющїи премꙋ́дрїи сꙋть·
И҆мѣнїе поспѣшно съ безаконїемъ ѹ҆мале́нно быва́етъ, собира́ѧи же себѣ съ бл҃гочестїемъ и҆зобилитъ·
Пра́вед̑ныи щедри́тъ и҆ да́етъ, лꙋче есть подвиѕа́ти срд̑це ѻ҆браща́ющесѧ, и҆ на ѹ҆пова́нїе ведꙋщ́е, дре́во б̂о животно е҆сть жела́ніѧ до́бра.
и҆же не послꙋша́етъ ве́щи и҆ ве́щь не послꙋш́аетъ е҆го, а҆ боѧ́исѧ за́повѣди се́и здрав̑҇ствꙋетъ·
Сн҃ꙋ лꙋка́вомꙋ ничто̑ е҆сть бл҃го, рабꙋ же мꙋдрꙋ поспѣют̑сѧ дѣ́ла въ бл҃гое, і҆ и҆справѧ́тсѧ е҆мꙋ пꙋтїе е҆го.
за́повѣди мꙋдрꙋ и҆сточ꙽никъ живота̀, несмыслѧи же ѿ сѣти ѹ҆́мретъ.
разꙋмъ бл҃гъ да́етъ блгд̑ть, разꙋмѣти же зако́нъ мы́сли е҆сть бл҃ги, пꙋтїе же низъмꙋдрꙋ́ющихъ въ погибели.
ра́бъ хꙋдог̑҇ дѣ́етъ с ра́зꙋмомъ, безꙋмныи же и҆сходатаитъ себѣ мꙋ́кꙋ·
Цр҃ь дръзъ въпадетъ въ ѕло, совѣт же мꙋдрыхъ и҆зба́витъ е҆го.
нищета и҆ безъчестїе ѿе́млетъ наказанїе, хранѧ́и же ѻ҆бличенїе просла́вит̑сѧ·
Жела́нїѧ бл҃говѣрныхъ наслаждают̑ дш҃ꙋ, дѣ́ла же нечьсти́выхъ дале́че ѿ ра́зꙋма·
Ходѧ́и же съ премꙋдрым̑ премꙋ́дръ бꙋдетъ, а҆ ходѧ́и же съ безꙋмными позна́нъ бꙋдетъ.
съгрѣша́ющаѧ пости́гнет̑ ѕл̂о, а҆ пра́вед̑ныѧ же пости́гнꙋтъ бл҃гаѧ·
Бл҃гъ мꙋжъ наслѣ́дитъ сн҃ы сн҃овъ, щади́т же сѧ правед̑нымъ богатество нечьсти́вых̑·
Правед̑нїи скончаю҆т꙽ въ бога́тьствѣ лѣта мно́га, нечести́вїи же поги́бнꙋтъ въско́рѣ·
И҆же щадит̑ же́ѕлъ свои ненави́дит̑ сн҃а свое҆го, а҆ любѧ и҆̀ прилж̑ѣно наказꙋет̑·
Правед̑ныи ꙗ҆ды́и насыщает̑ дш҃ꙋ свою̀, дш҃а же нечести́вых̑ ненасыще́ни·
Глв̑҇а, д҃і·
Премꙋ́дрыѧ же́ны созда́ша хра́мы, а҆ безꙋмныѧ раскопа́ша рꙋка́ма свои҆ма·
Ходѧ́и пра́во бои́тсѧ г҃а, а ѻ҆строптеваѧи пꙋтѝ своѧ̀ ѹ҆коре́нъ бꙋ́детъ·
И҆зъ ѹ҆стъ безꙋмныхъ же́ѕлъ досажде́нїѧ, ѹ҆стны же правед̑ныхъ хранѧт̑ себѐ·
И҆дѣже нѣсть воловъ ꙗ҆́сли празд̑ны, а҆ и҆дѣже жи́та мно́га ꙗ҆́вѣ волꙋ̀ крѣпость·
Свѣдѣтель вѣренъ не лжет̑, раждиѕа́етъ же л꙽жа свѣдѣтель неправеденъ.
възы́щеши премꙋдрости въ злы́хъ и҆ не ѻ҆брѧ́щеши е҆ѧ̀, чю́вство же ѿ мꙋдрыхъ ѹ҆до́бно·
Вс̂ѧ проти́вна сꙋть мꙋжѐви безꙋмнꙋ, ѻ҆рꙋ́жїе же чю́в꙽ствїю ѹ҆стны премꙋдрыхъ·
Премꙋ́дрость хꙋдо́гихъ разꙋмѣетъ пꙋти и҆хъ, ненаказа́нїе же нечьсти́выхъ лестно·
домо́ве безако́нныхъ длъжнꙋ́ютъ ѻ҆цѣщенїѧ, домове же правед̑ныхъ прїѧ́тни·
Срд̑це мꙋж́ꙋ чю́вствено ѻслаблѧ́ет꙽ дш҃ꙋ е҆го, е҆гда́ же веселит̑сѧ не примѣша́етсѧ печа́ль досажде́нїѧ·
домо́ве же нечьсти́выхъ и҆зчезнꙋтъ, скровища же и҆справлѧ́ющих̑ пребыва́ютъ·
Є҆́сть пꙋть и҆же мни́тсѧ чл҃комъ пра́въ быти, послд̑ѣнѣѧ же е҆го прїидт̑ꙋ во дно а҆́дꙋ.
къ весе́лїемъ не прилагает̑сѧ печа́ль, кончи́на же ра́дости въ пла́чь прихо́дитъ·
Пꙋтїи свои҆хъ насы́тит̑сѧ дръзосердъ, ѿ замышленїѧ же своег̑҇ мꙋж́ъ бл҃гъ·
Незлоби́въ вѣ́рꙋ и҆метъ всѧ́комꙋ словесѝ, кова́рен же прихо́дитъ в покаа́нїе·
Премꙋдръ ѹ҆боа́всѧ ѹ҆кло́нит̑сѧ ѿ зла, а҆ безꙋмныи надѣѧ́всѧ себѣ смѣша́етсѧ съ безако́нными·
На́глодꙋшенъ мꙋ́жъ безъ совѣта тво́ритъ, мж̑ꙋ же мꙋдръ длъготръпитъ·
Раздѣлѧ́ютъ безꙋмнїи ѕло́бꙋ, ковар꙽ни же ѹ҆дръжа́тъ чю́в꙽ствїе·
Въсполъзнꙋтсѧ ѕлїи прд̑е бл҃гими и нечестивїи послꙋжатъ при две́рахъ пра́вед̑ных̑·
дрꙋѕи възненави́дѧтъ дрꙋги ни́щїа, дрꙋѕи же бога́тымъ мно́ѕи·
Ѹ҆корѧ́ѧи ѹ҆богаго съгрѣшит̑, милꙋѧи же ни́щаго бл҃женъ·
Блꙋдѧ́ще непра́вед̑нїи дѣ́лают̑ ѕлаѧ, млс̑҇ть же і҆ и́стиннꙋ дѣ́лают̑ бла́ѕїи·
Не свѣдѧ́тъ млс̑҇ти і҆ и́стинны дѣ́лателе ѕло́мъ, млс̑҇тыни же и҆ вѣра претворѧ́ютъ бл҃гимъ ѻ҆ всемъ пекꙋщисѧ е҆ді́но е҆сть бл҃го, и҆ слащїи и҆ безъ печа́ли въ ѻ҆скꙋде́нїи бꙋ́дет꙽·
Вѣнецъ премꙋ́дрыхъ бога́тьствїе и҆хъ, жи́тїе же безꙋмныхъ ѕл̂о·
Изба́витъ ѕлꙋ̀ дш҃ꙋ свѣдѣтель вѣренъ, ражд̑иѕает̑ л꙽жа свѣдѣтель льсти́въ·
Въ стра́сѣ гн҃и ѹ҆пова́нїе крѣпости, ча́домъ же свои҆мъ ѻ҆ста́вит̑ ѹ҆твръженїе ми́рꙋ·
Страх̑ гн҃ь и҆сто́чникъ животен꙽, тво́рит̑ же ѹ҆кланѧ́тисѧ ѿ сѣти смр҃тныѧ·
Въ мно́ѕѣ ꙗ҆зы́цѣ сла́ва цр҃ю̀, въ ѻ҆скꙋдѣнїи же люд̑стѣ съкрꙋше́нїе си́л꙽номꙋ·
Тръпели́въ мꙋж́ъ мно́гъ въ мꙋдрости, а҆ ма́лодꙋшенъ крѣпок꙽ безꙋма̀·
Крѣпкодꙋшенъ мж̑ꙋ срд̑цꙋ вра́чь, червъ же ко́стемъ срд̑це чювствено·
ѻ҆клевета́ѧи ѹ҆богаг̑҇ раздража́етъ сътво́ршаго и҆̀, а҆ и́же чтетъ и҆ ми́лꙋетъ ни́щаго чте́тъ сътво́ршаго и҆̀·
Зло́бою свое́ю ѿринетсѧ нечести́выи, надѣѧ́и же сѧ въ г҃а свои҆мъ прпд̑бїемъ пра́веденъ·
Въ срд̑цы бла́ѕѣ мꙋж́ꙋ почива́етъ премꙋдрость, въ срд̑ци же безꙋмнѣ не позна́етсѧ·
Пра́вда възно́ситъ племѧ̀, ѹ҆малѧ́ют же сѧ лю́дїе грѣхѝ.
прїѧ́тъ быва́етъ цр҃емъ слꙋга̀ разꙋменъ, свои҆м же бл҃гоѻ҆браще́нїемъ ѿи҆метъ досажденїе.
гнѣв꙽ гꙋби́тъ и҆ мꙋдрыѧ, ѿвѣт же смиренъ ѿи́метъ ꙗ҆́рость·
Глв̑҇а, е҃і·
Сло́во же́стоко въздви́жетъ гнѣвъ.
ꙗ҆зы́къ же мꙋ́дрых̑ доброѹ҆́менъ, ѹ҆ста́ же нечести́выхъ повѣ́дѧт̑ ѕл̂о·
На всѧком̑ мѣстѣ ѻ҆́чи гн҃и блюдета̀, ѕлыѧ́ же и҆ бл҃гыѧ·
И҆сцѣленїе ꙗ҆зы́ка дре́во животно, съблюда́ѧи же и҆спо́лнит̑сѧ дх҃а·
Безм̑ꙋныи порꙋга́етсѧ наказа́нїю ѿц҃а свое҆го, хранѧ́и же за́повѣди хꙋдо́женъ ес̑҇·
Въ мно́ѕѣи пра́вдѣ крѣ́пость мно́га, а нечести́вїи же ѿ землѧ̀ поги́бнт̑ꙋ·
въ дворх̑ѣ пра́вед̑ных̑ крѣпость мно́га, пло́ди же нечести́вых̑ погибают̑·
ѹ҆ста премꙋ́дрых̑ свѧзꙋ́ютъ чю́въствїѧ, срд̑це же безꙋмных̑ не тве́рдо·
Жертвы безꙋмныхъ мръ́зость гв҃и, моли́твы же и҆справлѧ́ющихъ прїѧты им̑.
мръз́ость гв҃и пꙋтїе нечести́вых̑, гонѧ́щаѧ же правдꙋ лю́бит̑·
Наказанїе неѕлоби́ваго позна́вает̑сѧ ѿ ми́моходѧ́щих̑, а҆ ненавидѧ́щїи ѻ҆бличенїа сконча́ютсѧ сра́мно·
А҆́дъ и пагꙋба ꙗ҆́вѣ ѿ г҃а, ка́ко не срд̑ца л̂и чл҃ческа·
Не възлю́битъ б̂о ненаказа́н꙽ныи ѻ҆блича́ющих̑ е҆го, съ премꙋ́дрыми же не побе́сѣдꙋетъ·
Срд̑цꙋ веселѧ́щꙋсѧ лицѐ цвите́тъ, въ скорбиж̑ сꙋще дрѧ́хло е҆сть·
Срд̑це пра́во и҆́щет̑ чю́въствїѧ, ѹ҆ста же ненаказа́ных̑ разꙋмѣют̑ въ ѕло·
Вс̂ѧ лѣта ѻ҆́чи ѕлы́хъ ча́ютъ ѕла̀, до́брїи же безъмолъствꙋю при́сно·
Лꙋче ма́ла ча́сть съ бо́ѧзнїю гн҃ею, не́жели бога́тьствїѧ ве́лїѧ безъ бо́ѧзни·
Лꙋчше ѹ҆чрежд̑енїе ѕе́лїемъ с любо́вїю и҆ блгд̑тїю, неже пред̑ставле́нїе те́лца̑ съ вра́ждою·
Мꙋж́ъ ꙗ҆́ръ притварѧет̑ сва́ры, терпеливыи же и҆ грѧдꙋщаѧ ѹ҆кротит̑.
тръпели́въ мж̑ꙋ ѹ҆кротит̑ сꙋдъ, нечести́выи же възъдвиѕает̑ па́че·
Пꙋтїе лѣни́вых̑ постла́ни тер꙽нїем̑, а҆ борзых̑ глад̑цы·
Сн҃ъ премꙋдръ веселит̑ ѿц҃а, сн҃ъ же безꙋмен̑҇ подража́етъ мт҃рь свою̀·
Несмы́сленои стеѕѝ скꙋ́дость ѹ҆ма̀, мꙋж́ъ же мꙋ́дръ и҆справлѧ́а хо́дит̑·
Прилага́етъ б̂о помышленїа не чтꙋщимъ соньмищ꙽, въ срд̑цихъ же совѣтныхъ пребываетъ совѣтъ·
Не и́мать послꙋша́ти ѕлыи е҆го, ниже речетъ съвершена ничесоже до́бра и҆ ѻ҆бъщенїѧ·
Пꙋтїе живота̀ раз̑мышленїѧ разꙋмнаго, да ѹ҆клони́всѧ ѿ а́да сп҃сетсѧ·
до́мы досадитель разорѧет̑ г҃ь, ѹ҆твержае же предѣлы вдовиц̑҇·
Мръзость гв҃и мы́сль непра́вед̑на, бескверныхъ реченїѧ пречи́ста·
Гꙋбит же себе м꙽здои҆́мецъ, не любѧж̑ м꙽зды̀ и҆́мать спс̑҇тисѧ·
Млс̑҇тынѧ и҆ вѣра ѻ҆чища́ютъ грѣсѝ, бо́ѧзнїюж̑ гн҃ею ѹ҆кланѧ́етсѧ всѧ́къ ѿ ѕла̀.
срд̑ца правед̑ныхъ поѹ҆ча́ютсѧ вѣрѣ, ѹ҆ста́ же нечести́въхъ ѿвѣща́ютъ ѕл̂о·
Прїѧ́ти гм҃ъ пꙋтїе правед̑ных̑ мꙋж́ъ, тѣмже и҆ сихъ ради вра́ѕи дрꙋѕи быва́ютъ·
далече ѿстоит̑ б҃ъ ѿ нечести́выхъ, моли́твъ же правед̑ныхъ послꙋшает̑·
Лꙋче ма́ло прїѧтїе съ пра́вдою, нежели мно́га жи́та с непра́вдою·
Срд̑це мꙋж́ꙋ мы́слитъ праведнаѧ, да ѿ бг҃а и҆спра́вѧт̑сѧ стопы е҆го·
Зрѧ́и ѻ҆чи́ма пра́вѣ веселит̑ срд̑це, вѣсть же бл҃га бл҃житъ ко́сти·
Послꙋша́ѧи ѻ҆бличенїи живота, посредѣ премꙋ́дрых꙽ въдворѧ́етсѧ, и҆же не прїемлетъ наказа́нїѧ ненави́дитъ себѐ.
съблюда́ѧи же ѻ҆бличе́нїе лю́битъ свою̀ дш҃ꙋ.
бо́ѧзнь гн҃ѧ наказа́нїе и҆ премꙋдрость, и҆ нача́ло сла́вы ѿвѣщает̑ е́и.
пред̑и҆́детъ же смиреным̑ сла́ва·
Глв̑҇а, ѕ҃і·
Чл҃чьско е҆сть мысль ѹ҆готови́ти, и҆ гн҃е ес̑҇ ꙗ҆зы́ки стро́ити·
Вс̂и пꙋтїе чл҃честїи знаеми сꙋть прд̑е ѻ҆чїма е҆го, мѣрител̑҇ ес̑҇ дх҃ом̑ б҃ъ·
ѿкры́и гв҃и дѣ́ла твоѧ̀, і҆ и҆спра́вѧтсѧ помышле́нїѧ твоѧ̀·
Вс̂ѧ дѣ́ла смире́ннаго ꙗ҆́вѣ пред̑ гм҃ъ, нечс̑҇ти́вїи же въ дн҃ь ѕо́лъ поги́бнꙋтъ·
Ме́рзо́къ пред̑ гм҃ъ всѧ́къ высо́косе́рдыи, в꙽ рꙋкꙋ же рꙋ́цѣ вло́жь непра́вед̑ныи не и҆звине́тсѧ·
Нача́токъ пꙋтѝ бл҃гомꙋ твори́ти пра́вед̑ное, и҆ прїѧ́та же ѿ б҃а паче же́ртвы жре́нїа·
И҆щаи г҃а ѻ҆брѧ́щетъ ра́зꙋмъ съ правдою, и҆ пра́во и҆́щꙋщеи е҆го ѻ҆брѧ́щꙋтъ миръ·
Вс̂ѧ дѣ́ла гн҃ѧ съ правдою, храни́т꙽ же сѧ мꙋж́ъ нечс̑҇ти́въ въ дн҃ь ѕолъ·
Врѧженїѧ въ ѹ҆стна́хъ цр҃евахъ, в сꙋдищи же не прелстѧт̑сѧ ѹ҆ста е҆го·
Ꙗ҆́ко превѣса мѣ́рила тако и҆ правда ѹ҆ б҃а, дѣла е҆го мѣрила праведна·
Мръзость цр҃еви творѧ́и ѕла́ѧ, съ пра́вдою б̂о готоваетсѧ прс̑҇тлъ нача́ла·
Прїѧ́ты цр҃емъ ѹ҆стны̀ пра́вед̑ныхъ, словеса же пра́выхъ лю́витъ г҃ь·
Ꙗ҆́рость цр҃ева посо́лъ смрътенъ, мꙋж́ъ же прмд̑ръ и҆зба́витсѧ ѿ него·
Въ свѣтѣ живо́тнѣ сн҃ъ цр҃евъ, прїѧ́тїи же е҆го ꙗ҆́ко ѻ҆́блакъ по́зденъ·
Ѹ҆гнѣжде́нїѧ прмд̑рости и҆зволенънѣ́иши паче злата, вселе́нїѧ же мꙋ́дрости дра́жаиши сребра̀·
Пꙋтїе живо́тнїи ѹ҆кланѧ́ютсѧ ѿ ѕла̀, долгота̀ б̂о жи́тїѧ пꙋтїе пра́вед̑ни·
Прїемлѧ́и накаѕа́нїе въ бл҃гихъ бꙋдетъ, хранѧ́и же ѻ҆бличе́нїѧ ѹ҆мꙋдри́тсѧ·
И҆же хранит̑ своѧ̀ пꙋтѝ съблюде́тъ свою дш҃ꙋ, любѧ́и же живо́тъ свои щади́тъ своѧ̀ ѹ҆ста̀ пре́жд̑е съкрꙋше́нїѧ·
Варѧ́етъ досажд̑е́нїе, пре́жд̑е паде́нїѧ ѕл̂омышле́нїѧ·
Лꙋ́че кротъкодш҃енъ съ смире́нїемъ, нежели и҆же раздѣлѧет̑ коры́сть съ досади́тели·
Разꙋми́въ въ ве́щехъ ѻ҆брѣта́тель бл҃гимъ, надѣѧи же сѧ на г҃а бл҃жен̑҇·
Разꙋмныѧ и҆ прмд̑рыа ѕлы̀ наричют̑, бл҃года́тни же въ словесѣхъ па́че послꙋш́ани бꙋ́дꙋтъ·
Исто́чникъ живо́тенъ мысль стѧжавшїи, наказа́нїе безꙋм́ныхъ ѕл̂о·
Срд̑це прмд̑раго разꙋмѣ́етъ ꙗ҆́же ѻ҆ свои҆хъ е҆мꙋ ѹ҆́стъ, въ ѹ҆стна́хъ же носит̑ ра́зꙋмъ·
Сотове медовии словеса̀ до́бра, сла́сть же их̑ и҆сцѣле́нїе дш҃и·
Сꙋть пꙋтїе мни́ми пра́ви сꙋще мꙋжꙋ, послѣ́днѧѧ же е҆го зрѧ́тъ во дно̀ а҆́дꙋ·
Мꙋ́жъ же въ трꙋ́дѣхъ трꙋжа́етъ себе, и҆знꙋжа́етъ себѣ поги́бель·
Стропти́выи въ ѹ҆стнах̑ свои҆хъ но́ситъ себѣ поги́бель, мж̑ꙋ же безꙋ́менъ копа́етъ себѣ ѕл̂о, и҆ въ ѹ҆стнꙋ свою събирает̑ себѣ ѻ҆́гнь·
Мꙋжъ же стропти́въ распалѧет̑ ѕл̂о, и҆ за́рю лестнꙋ възгнѣща́етъ и҆мъ и҆ разлꙋча́етъ дрꙋ́ги·
Мꙋж́ъ же зако́нопрестꙋ́пенъ и҆скꙋшает̑ дрꙋ́ги и҆ наво́дитъ и҆хъ пꙋтѝ не бл҃ги·
ѹ҆твержа́ѧи ѻ҆́чи свои мы́слитъ развраще́ннаѧ, е҆млѧ́и же сѧ за ѹ҆стнꙋ свою нарица́етъ вс̂ѧ ѕла́а, се́и пе́щь е҆сть зло́бѣ·
вѣне́цъ хваленъ ста́рости, въ пꙋтех̑ же пра́ведных̑ ѻ҆брѣта́етсѧ·
Лꙋ́чи мꙋж́ъ долготерпе́ливъ паче крѣ́пкаго, мꙋ́жъ мꙋдрость и҆мѣѧи паче дѣлателѧ вели́каго, а҆ держа́и гнѣ́въ паче низ̑взѧ́того гра́да·
В нѣдра вхо́дѧтъ вс̂ѧ сїѧ пра́вед̑ным̑, ѿ г҃а же вс̂ѧ пра́вед̑на·
Глв̑҇а, з҃і·
Лꙋ́че хлѣбъ съ сла́стїю въ ми́рѣ, нежели дом̑ и҆спо́лнен꙽ бл҃гимъ мно́гимъ, и҆ непра́ведномъ заколе́нїемъ со сва́ромъ.
ра́бъ смы́сленъ ѹ҆дръжи́тъ господина несмы́слена, въ бра́тїю же раздѣли́тъ и҆мѣнїе на ча́сти·
Ꙗ҆́коже и҆скꙋша́етсѧ въ ѻ҆гнѝ сребро̀ и҆ зла́то, та́ко и҆збра́н꙽ныхъ срд̑ца ѿ г҃а.
ѕлы́и послꙋшает̑ ꙗ҆зыка законопрестꙋпна, пра́ведныи же не внимаетъ ѹ҆сте́нъ л꙽жи́выхъ.
рꙋга́ѧсѧ ѹ҆бо́гомꙋ, раздражаетъ сътво́ршаго и҆̀.
и҆ ра́дꙋѧ же сѧ ги́бнꙋщемꙋ не и҆звине́тсѧ, ми́лꙋѧи же поми́лованъ бꙋдетъ·
Вѣне́ць ста́рости сн҃ы сн҃овъ, похвалаж̑ дѣтемъ ѿц҃ы и҆хъ·
Вѣрномꙋ весь ми́ръ бога́тествъ, невѣрномꙋ же ниже е҆ді́нъ пѣ́нѧѕь.
не сподоби́тесѧ безꙋмномꙋ ѹ҆стнѣ̀ въ вѣ́рꙋ, ни пра́веднаго ѹ҆стнѣ̀ въ лжꙋ̀.
м꙽зда̀ блгд̑ть е҆сть ѹ҆ча́щимъ, и҆дѣже а҆ще ѻ҆братѧ́тсѧ поспѣ́етсѧ и҆м꙽·
И҆же таи́т꙽ ѻ҆би́ды и҆́щетъ любвѐ, і҆ и҆же ненави́дитъ съкрыва́ти разъдрꙋша́етъ дрꙋжбы и҆ домы̀·
Съкрꙋша́етъ преще́нїе срд̑це мꙋдраго, безꙋмныи же и҆ бїе́мъ не чю́етъ ра́нъ.
прекосло́вїѧ въздви́жетъ всѧ́къ ѕлы́и, г҃ь же а҆́гг҃ла неми́лостивна по́слетъ на́нь·
Въпада́етъ въ печа́ль мꙋжꙋ смы́сленꙋ, безꙋмнїи же размышлѧ́ютъ ѕла́ѧ·
И҆же въздае́тъ ѕло́е въз до́брое, не подви́жетсѧ ѕло̀ и҆з до́мꙋ е҆го.
вла́сть даю́тъ сло́вомъ нача́ло пра́вды, преди же повѣда́етъ ѹ҆бо́жество и҆ тѧ́жесть и҆ сва́ръ.
и҆же сꙋдитъ непра́ведне пра́веднаго, непра́веднаго же пра́ведне, нечи́стъ и҆ мръзокъ ѿ г҃а.
въскꙋ́ю бѧ́ше и҆мѣнїе безꙋмномꙋ, стѧжа́ти премꙋдрости безъсръдыи не мо́жетъ.
и҆же възно́ситъ до́мъ свои, и҆́щетъ съкрꙋше́нїа, а҆ ѻ҆строптева́ѧисѧ въ наѹ҆че́нїе в꙽пада́етъ въ ѕла́ѧ·
Въ всѧ́ко времѧ да и҆́маши дрꙋги, бра́тїѧ же въ бѣдах̑ пособи́ви быва́ите·
сего б̂о ра́ди блгд̑ти быва́ютъ.
мж̑ꙋ же безꙋменъ въспле́щетъ ра́дꙋѧсѧ себѣ, ꙗ҆́коже порꙋча́ѧисѧ и҆зрꙋчитъ дрꙋга свое҆го, се́и же въ е҆го ѹ҆стнꙋ̀ ѻ҆́гнь събира́етъ.
грѣхолю́бецъ ра́дꙋетсѧ сва́ром꙽, а҆ жестосръдыи не ѹ҆срѣщет̑ бл҃гих꙽.
мꙋж꙽ же премѣн꙽ныи ꙗ҆зы́ком̑ в꙽падаетъ въ ѕло̀, срд̑це же безꙋмнаг̑҇ бо́лѣзнь стѧжа́вшомꙋ е҆̀.
не веселит̑сѧ ѿц҃ъ ѻ҆ сн҃ѣ ненаказан̑҇нѣ, сн҃ъ же мꙋдръ веселит̑ мт҃рь свою.
срд̑це же весе́ло бл҃гъ нра́въ тво́рит̑, мꙋжꙋ же скърбли́вꙋ засы́шꙋтъ ко́сти.
прие҆́млющꙋ м꙽здꙋ̀ бес пра́вды в нѧ́дра, не поспѣю́тсѧ пꙋтїе въ пра́вдꙋ.
нечести́вїи же ѹ҆клонѧ́ютъ пꙋтѝ пра́выѧ, лицѐ разꙋмно мꙋжа премꙋдра, ѻ҆́чи же бизꙋмныхъ на кон̑҇цих̑ землѝ.
гнѣвъ ѿц҃ꙋ сн҃ъ безꙋменъ, и҆ бо́лѣзнь ро́ж꙽шеи е҆го.
т꙽щеты̀ твори́ти мꙋжꙋ пра́веднꙋ не добро̀, ниже прпд̑бно кова́ти ко́ва могꙋтем̑ ѻ҆ пра́ведныхъ.
и҆же щади́тъ гл҃ъ и҆спꙋститъ же́стокъ ра́зꙋмъ, тръпели́въ же мꙋжъ мꙋдръ лꙋчши и҆́щꙋщаго наѹ́ки.
несмы́сленнꙋ въпро́шьшꙋ ѻ҆ премꙋдрости, премꙋдрость въмѣни́т ли сѧ е҆мꙋ.
ди́вна б̂о кто̀ себе сътво́рь непщева́нїемъ мꙋдръ бы́ти·
Глв̑҇а, и҃і·
Вины̀ и҆́щетъ мꙋжъ хотѧ̀ ѿлꙋчитисѧ ѿ дрꙋга, на всѧ́ко же вре́мѧ поноси́мъ быва́етъ.
не требꙋетъ премꙋдрости мꙋжъ скꙋдоѹ́менъ, занѐ па́че во́дитсѧ безꙋмїемъ.
е҆гда̀ прїидетъ нечести́выи въ глꙋбинꙋ̀ ѕо́лъ неради́тъ, нахо́дит꙽ же е҆мꙋ досажде́нїе и҆ поноше́нїе.
вода̀ глꙋбо́ка сло́во въ срд̑ци мꙋжꙋ, водаж̑ въска́чꙋщїѧ и҆сто́чникъ живо́тен꙽.
чюди́тисѧ лицꙋ̀ нечести́вомꙋ не добро̀, ниже прпд̑бно ѹ҆кланѧ́ти пра́веднаго на сꙋдѣ·
Ѹ҆стны̀ безꙋмнаго приво́дѧтъ е҆го на ѕло̀, ѹ҆ста́ же е҆го дръ́зость сме́рти призыва́етъ·
Ѹ҆стнѣ̀ безꙋмнаго съкрꙋша́ютъ е҆го, ѹ҆стны́ же е҆го сѣть дш҃и·
Лѣни́ва низлага́етъ стра́хъ, дш҃и же мꙋжїи жена́мъ подобнымъ, възъа́лчетъ·
Не и҆сцѣлѧ́ѧи себе ѻ҆ свои҆хъ дѣлехъ, дрꙋгъ е҆сть ѻ҆глажда́ющемꙋ себе·
И҆з вели́чества крѣпости и҆́мѧ гн҃е, къ немꙋ же притѣка́юще пра́ведницы сп҃саютсѧ·
И҆мѣнїе бога́тꙋ мꙋжꙋ градъ тве́рдъ, сла́ва же е҆го весе́лїе повѣда́етъ·
Прежде сокрꙋше́нїѧ възно́ситсѧ срд̑це мꙋжꙋ, и҆ пре́жде сла́вы смирѧ́етсѧ·
И҆же ѿвѣща́етъ сло́во прежде слы́шнїѧ стꙋдъ е҆мꙋ быва́етъ и҆ поноше́нїе·
Гнѣвъ мꙋжа ѹ҆кротит̑ ра́бъ мꙋдръ, малодш҃на же чл҃ка кт̂о ѹ҆кро́тит꙽·
Срд̑це мꙋ́драго стѧжетъ чюв꙽ствїе, ѹ҆́ши же прмд̑рыхъ и҆́щета гада́нїи·
дѣланїе чл҃ка пространи́тъ и҆̀, и҆ съ си́лнымъ посажд̑а́ютъ е҆го·
Пра́вед̑ныи хꙋли́мъ е҆сть ѿ ѕлы́хъ въ правословїи, ꙗ҆́коже е҆гда̀ ѻ҆брѧщетъ сꙋпостат̑ ѻ҆бличае҆тсѧ.
пречистыѧ гл҃ы ѹ҆ставлѧетъ молчали́выи, си́лныѧ же нарица́етъ непослꙋшливыѧ·
Брат̑ ѿ бра́та застꙋпаем̑ е҆сть, ꙗ҆́ко град̑ тве́рдъ и҆ высо́къ, ѹ҆крѣплѧет꙽ же сѧ ꙗ҆́ко ѻ҆сно́вано црс̑҇тво·
ѿ пло́да ѹ҆сте́нъ свои҆хъ мꙋж́ъ насыща́етъ чре́во свое, ѿ плода же ѹ҆стнꙋ е҆го насытѧтсѧ·
Смр҃ть и живот̑ в рꙋ́кꙋ ꙗ҆зы́ка, дръжа́щеи же е҆го снѣдѧтъ пло́дъ е҆го·
И҆же ѻ҆брѧщетъ женꙋ̀ до́брꙋ, ѻ҆брѣте блгд̑ть, прїѧлъ же е҆сть ѿ г҃а кро́тость·
И҆же и҆зго́нитъ женꙋ до́брꙋ, и҆зго́нитъ бл҃гаѧ·
дръжа́и же любодѣ́ицꙋ, безꙋ́менъ и҆ нечи́стъ·
Безꙋ́мїе мꙋж́а и҆стлѣва́етъ пꙋти е҆го, и҆ б҃а вини́тъ въ срд̑цы своем̑·
Съ моле́нїи гл҃етъ ѹ҆бо́гїи, и҆ бога́тыи ѻ҆без̑сла́вит̑ смѣшнѣ·
Мꙋж́ъ любо́венъ къ дрꙋж꙽бѣ, паче дрꙋ́гъ бꙋдет̑тъ неже бра́тъ·
Глв̑҇а, ѳ҃і·
Лꙋ̀че е҆сть ѹ҆бо́гъ ходѧ́и въ простотѣ̀ свое́и, неже бога́тъ ѹ҆мꙋча́ѧ ѹ҆стнѣ̀ своѝ·
И҆дѣже нѣ́сть ѹ҆че́нїа дш҃и, нѣсть добро̀, і҆ иже скоръ е҆сть нога́ми потъкне́тсѧ·
Неразꙋ́мїе мꙋж́а гꙋ́битъ пꙋть е҆го, б҃а же вино́вна тво́ритъ срд̑цемъ·
бога́тьство прилагает̑ дрꙋги мно́ги, нищета же и҆ ѿ сꙋщаго дрꙋѓа ѹ҆лишаетъ·
Свѣдѣтель ло́жъ без мꙋки не бꙋ́детъ, ѻ҆клевета́ѧи же без꙽ пра́вды не ѹ҆бѣжит̑ е҆ѧ̀·
Мно́зи же ѹ҆гажда́ютъ пред̑ лице́мъ цр҃емъ, всѧ́къ же ѕо́лъ быва́етъ в꙽ поноше́нїе мꙋж́еви·
Всѧ́къ и҆же ѹ҆бо́гаго бра́та ненави́дитъ, ѿ заповѣди дале́че бꙋ́детъ·
Помышле́нїѧ бл҃га приближа́ютсѧ вѣ́дꙋщимъ е҆ѧ, и҆ мꙋж́ъ же мꙋ́дръ ѻ҆брѧщет̑ ю҆̀·
Мно́го творѧ́и ѕл̂а ѻ҆брѧ́щетъ ѕло́бꙋ, а҆ и҆же раздражает̑ словеса̀ не сп҃сетсѧ·
Събира́ѧи мꙋ́дрость лю́битъ себѐ, а҆ и҆же съхранѧ́етъ прмд̑рость ѻ҆брѧ́щетъ бл҃гаѧ·
Свѣдѣтель ложъ не без мꙋ́ки бꙋдетъ, а҆ и҆же ѹ҆бо раз̑жд̑иза́етъ ѕло́бꙋ поги́бнетъ ѿ неѧ·
Не по́лза е҆сть безꙋ́мномꙋ пи́ща, аще рабъ начнетъ съ досажде́нїемъ наси́льствовати·
Млс̑҇тивъ мꙋж́ъ долготерпе́ливъ дш҃ею, похва́ла же е҆го ми́мохо́дит̑ зако́нопрестꙋпныѧ·
Цр҃во преще́нїе, подо́бно рыка́нїю льво́вꙋ.
ꙗ҆́коже роса̀ на сѣ́но, та́коже тихомꙋ незло́бїе·
Стд̑ꙋ е҆сть ѿц҃ꙋ сн҃ъ ненаказа́нъ, и҆ нечи́сты мл҃твы ѿ ѹ҆́стъ блꙋдника·
до́мъ и҆мѣ́нїе раздѣлѧ́ютъ ѿц҃ы сн҃омъ, ѿ г҃а съчета́етсѧ жена̀ мꙋ́жеви.
стра́хъ съдръжи́тъ ма́лъ жена̀, дш҃а же лѣни́выхъ възъа́лчют̑·
И҆же хранит̑ за́повѣди съблюда́етъ свою дш҃ꙋ, а҆ нерадѧ́и ѻ҆ свои҆хъ пꙋтех̑ поги́бнет̑·
Ми́лꙋѧи ни́ща взаи҆мъ даетъ бв҃и, по даѧ́нїю же е҆го възда́сть е҆мꙋ·
наказа́и сн҃а свое҆го та́ко бꙋдетъ въ бл҃го ѹ҆пова́ѧ, в꙽ досажд̑енїи же не възносит̑сѧ дш҃ею своею·
ѕл̂оѹ҆менъ мꙋ́жъ мно́го ѿщети́тсѧ, а҆ще ли гꙋби́тель е҆сть дш҃ꙋ свою приложитъ·
Слꙋшаи сн҃е ѿц҃а свое҆го наказа́нїе, да мꙋдръ бꙋдеши на послѣдокъ свои·
Мно́ги мы́сли въ срд̑цы мꙋж́ꙋ, совт̑ѣ же гн҃ь въ вѣ́ки пребыва́етъ·
Пло́дъ мꙋжеви млс̑҇тыни, лꙋче же ни́щь пра́веденъ, не́же бога́тъ ло́жъ·
Страх̑ гн҃ь живот̑ мꙋж́еви, а҆ бестра́шныи въдвори́тсѧ на мѣ́стехъ·
И҆деже не блюде́тсѧ ра́зꙋмъ, съкрываѧи в нѣдрехъ рꙋ́цѣ свои непра́вед̑но, н̂и въ ѹ҆ста своѧ донесе е҆ѧ̀·
Гꙋби́телю раны прїе́млющꙋ, безꙋм́ныи коварнѣи бꙋдетъ·
А҆ще же ѻ҆блича́еши мꙋж́а мꙋдра, разꙋмѣетъ чю́в꙽ствїе·
Без꙽чествꙋѧи ѿц҃а и҆ ѿрѣѧ́и мт҃рь свою, срамотꙋ прїимет̑ и҆ поноше́нїе·
Сн҃ъ не послꙋшаѧ наказа́нїѧ ѿц҃а свое҆го, поѹ҆ча́етсѧ словесе́мъ ѕло́мъ·
Вырꙋча́ѧ ѻ҆́трока несмы́слена, досажда́етъ ѻ҆правда́нїю·
Ѹ҆ста же нечьсти́выхъ пожрꙋтъ сꙋды, готоваютсѧ не трꙋжа́ющимсѧ ра́ны, и҆ мꙋче́нїѧ подо́бно неразꙋмѣва́ющимъ·
Глв̑҇а, к҃·
Неви́нно вино̀, и҆ проклѧ́то ес̑҇ пїѧнъство·
И҆ всѧ́къ ходѧ́и бꙋ́е, не бꙋдетъ премꙋдръ.
недале́че е҆сть преще́нїе цр҃ево ꙗ҆́рости льво́вы, раздража́ѧи же е҆го и҆ примѣша́ѧисѧ е҆мь съгрѣша́етъ въ свою дш҃ꙋ.
сла́ва мꙋжꙋ ѿвраща́тисѧ ѿ клеветы̀, и҆ всѧ́къ безꙋменъ с таковым꙽ сплета́етсѧ.
поноси́мъ быва́етъ лѣни́выи не ѹ҆срамлѧет̑сѧ, такоже и҆ зае҆млѧ́и пшени́цꙋ в жа́твꙋ·
Вода̀ глꙋбо́ка совѣтъ въ срд̑ци мꙋжꙋ, мꙋж꙽ же премꙋдръ и҆зче́рплетъ ю҆̀.
вели́къ е҆сть чл҃къ и҆ дра́гъ мꙋжъ творѧ́и млс̑҇ть, мꙋжа же вѣрна дѣло ѻ҆брѣстѝ.
и҆же бес поро́ка живе́тъ въ пра́вдꙋ, бл҃жены и҆ дѣти ѻ҆ста́витъ своѧ·
Є҆гда̀ цр҃ь пра́веденъ на прс̑҇тлѣ сѧ́детъ, не ста́нетъ проти́вꙋ ѻ҆́чїю е҆го ничто́же лꙋка́во·
Кто же сѧ похва́литъ чи́сто и҆мѣти срд̑це, и҆л̂и кт̂о дръзнетъ чи́стъ быти ѿ грѣхъ.
ѕлословѧ́щихъ ѿц҃а и҆л̂и мт҃рь, ѹ҆гаша́етъ свѣти́лникъ свои.
ѕѣни́цама же ѻ҆́чїю свое́ю ѹ́зритъ т꙽мꙋ̀ ча́сть поспѣш꙽ша въ прьвыхъ, и҆ на послѣдокъ не блс̑҇витсѧ.
не рцы м꙽сти́ти вра́га свое҆го, н̂о пожди г҃а да ти помо́жет̑.
мѣри́ло ма́ло и҆ вели́ко, и҆ мѣра бѣдно ра́вна, нечи́ста е҆сть пред̑ гм҃ъ ѻ҆боѧ, и҆ творѧ́и их̑ та́ко в животѣ̀ свое҆мъ прет꙽кне́тсѧ·
ю҆́нота съ прпд̑бнымъ и҆спра́витъ пꙋтѝ своѧ, ѹ́хо слы́шитъ и҆ ѻ́ко ви́дитъ г҃ь дѣла́ѧи ѻ҆боѧ·
Не любѝ клевета́нїѧ да не ѿпаде́ши, ѿврьзи ѻ҆́чи своѝ и҆ насыща́исѧ хлѣба.
мръ́зость гв҃и сꙋгꙋба мѣра, и҆ мѣри́ло льсти́вно нѣсть ѿ него прїѧтно.
ѿ г҃а же и҆справлѧ́ютсѧ стопы̀ мꙋжеви, съгрѣша́ѧи же како ѹ҆бо разꙋмѣ́етъ пꙋтѝ е҆го.
сѣть мꙋжеви ско́ра своа ѻ҆свѧща́ти, по моли́твѣ б̂о покаꙗ҆́нїе быва́етъ.
вѣѧтель нечести́вымъ е҆сть цр҃ь мꙋдръ, и҆ нало́жит̑ на́ нѧ ко́ло·
Свт̑ѣ гн҃ь ѻ҆зарѧет̑ дш҃а чл҃ком̑ і҆ помышленїа, і҆же и҆́щет̑ насыщенїа чре́вꙋ свое҆мꙋ.
млс̑҇тыни и҆́стїн꙽на съхране́нїе цр҃ю, и҆ ѻ҆бы́идетъ прс̑҇тлъ е҆го въ пра́вдꙋ.
лѣпо е҆сть ю҆́нота́м꙽ премꙋдрости чю́в꙽ство, сла́ва же ста́рцемъ сѣди́ны.
съкрꙋше́нїѧ и҆ досажде́нїѧ ѹ҆тыка́ютсѧ ѕлы́х꙽, ꙗ҆́звы же въ сокро́вищехъ чре́ва·
Глв̑҇а, к҃а·
Ꙗкоже ѹ҆стремле́нїе во́дное, та́ко и҆ срд̑це цр҃ево в рꙋцѣ̀ бж҃їи·
И҆ а́може а҆ще въсхо́щет̑ ѻ҆брати́ти, та́мо ѹ҆клонитъ е҆̀·
Всѧ́къ мж̑ꙋ ꙗ҆влѧетсѧ пред̑ собо́ю пра́веденъ, и҆спыта́ет же срд̑ца г҃ь.
твори́ти пра́вдꙋ і҆ и́стин꙽нꙋ гл҃ати и҆зволено ѿ б҃а, па́че нежелѝ жрътвꙋ кро́вьнꙋю.
велича́въ мꙋжъ, на досажде́нїе дрьзосръ́дъ·
Свѣти́ло же нечести́вых꙽ грѣсѝ, и҆ всѧ̀ помышле́нїѧ и҆збыт̑кꙋ съсѣца́ютсѧ, и҆ не споспѣша́ютсѧ то́кмо всѧ́ко въ лише́нїе.
дѣлаѧи сокро́вища ꙗ҆зы́комъ лжи́вымъ, сꙋетна го́нитъ на сѣти сме́ртны.
и҆ всегꙋби́тельство на нечести́выа ѹ҆стремлѧ́етсѧ, не хотѧ́тъ б́о дѣѧти пра́веднаѧ.
къ стропо́тным̑ стропо́тнаѧ пꙋтѝ посыла́етъ б҃ъ, прчс̑҇та б̂о и҆ пра́ва дѣла е҆го.
лꙋ́че жи́ти въ ѹ҆глѣ̀ на ѧ́снѣ, нежелѝ въ пова́пленнѣ с непра́вдою, и҆ въ хра́минѣ про́стѣ.
дш҃а нечести́выхъ не поми́лꙋетсѧ ни ѿ е҆ді́наго чл҃ка, тщетꙋ̀ прїемлюще гꙋби́телю мд̑ръ бꙋдетъ незлоби́выи.
разꙋмѣ́ѧиж̑ премꙋдрыи прїиметъ ра́зꙋмъ, разꙋмѣва́етъ пра́ведныи срд̑ца нечести́выхъ, и҆ досажд̑а́етъ нечести́вым̑ ѻ҆ ѕлѣ̀.
и҆же затыка́етъ ѹ́ши своѝ не послꙋшати не́мощнаго, и҆ то́и призоветъ и҆ не бꙋдетъ послꙋшаѧи е҆го.
даѧ́нїе та́ино ѿвращает̑ гнѣвы, щадѧ́и же дары въздви́жет̑ ꙗ҆́рость крѣпкꙋ.
весе́лїе пра́ведныхъ творит̑ сꙋды, и҆ прпд̑бны же нечистъ ѿ злодѣющихъ.
мꙋж꙽ же блꙋдѧ ѿ пꙋтѝ пра́ведна, в сонмищи и҆споли́нъ почїетъ.
и҆ мꙋжъ скꙋденъ любитъ веселїе, любѧ́и же вино̀ и҆ еле́и, не ѻ҆богатит̑сѧ, ѻ҆требїе же праведникꙋ безаконникъ.
лꙋче жи́ти въ землѝ пꙋсте, неже жи́ти со женою сварли́вою и҆ ѧзы́чною и҆ гнѣвливою.
съкро́вище въжделѣнно почїетъ въ ѹ҆стах̑ премꙋдрꙋ, безꙋмнїи же мꙋжи пожира́ют̑ е҆го.
пꙋть пра́вды и҆ млс̑҇тынѧ, ѻ҆брѧ́щетъ животъ и҆ сла́вꙋ·
Град̑ ѹ҆твержа́етъ мꙋжъ премꙋдръ, и҆ раздрꙋша́етсѧ ѹ҆тверже́нїе на неж̑ надѣѧ́шасѧ нечести́вїи·
И҆же хранитъ своѧ ѹ҆ста̀ и҆ ѧзы́къ, соблюдаетъ ѿ печа́ли дш҃ꙋ свою.
дръзыи и ѻ҆плазивъ и҆ ѧростивъ гꙋби́тельство нарица́етсѧ, и҆же непра́вдꙋ мы́слит̑ законопрестꙋпникъ е҆сть.
По́хоти лѣни́ваго ѹ҆бива́ютъ, не волите б̂о рꙋцѣ е҆го творити ничтож̑.
нечестивъ жела́етъ весь дн҃ь по́хоти злы̀, пра́ведныи же ми́лꙋетъ и щедрꙋетъ неща́дне.
жрътвы нечестивыхъ мръзость гв҃и, и҆бо безако́нно прино́сѧтъ ѧ҆̀.
свѣдѣтель б̂о ло́жъ поги́бнет̑, мꙋжъ послꙋшли́въ съхранѧ́ѧи речетъ.
нечести́въ мꙋжъ безъчестно стои҆тъ лицем̑, пра́выи же самъ разꙋмѣ́етъ пꙋтѝ своѧ.
нѣсть премꙋдрость, нѣсть мꙋжество, и҆ нѣсть совѣтъ къ нечести́вомꙋ.
ко́нь готовает̑сѧ въ дн҃ь бра́ни, а҆ ѿ г҃а же по́мощь·
Глв̑҇а, к҃в·
Изволенѣ́иши же е҆сть и҆мѧ добро, неже бога́тъство мно́го, и҆ лꙋче сребра и҆ злата блгд̑ть бл҃га.
бога́тъ и҆ нищ̑҇ срѣто́ста дрꙋгъ дрꙋга, ѻ҆́ба же е҆сть г҃ь сътворилъ.
хꙋдо́гъ ви́дѣвъ лꙋка́ваго въ мꙋкахъ крѣпко самъ наказꙋетсѧ, безꙋмнїи же мимошед̑ше ѻ҆т꙽щети́шасѧ·
ро́дъ премꙋдрости бо́ѧзнь гн҃ѧ, и҆ бога́т꙽ствїе и҆ сла́ва живо́тъ.
влъчецъ и҆ сѣть на пꙋтехъ стропо́тныхъ, хранѧ́и же свою дш҃ꙋ и҆збѣжи́тъ ѿ нихъ.
бога́тїи ѹ҆богими ѻ҆блада́ю҆тъ, и҆ рабѝ гм҃ъ длъгъ ѿдаю́тъ сѣ́ѧвыи злое пожнетъ злое, ранꙋ же дѣлы свои́ми съвръшитъ.
мꙋ́жа ти́ха да́телѧ лю́бит̑ г҃ь, сꙋ́етных̑ же дѣлъ е҆го не въспомѧнет̑.
ми́лꙋѧй же ни́щаго са́м сѧ препита́етъ, свои б̂о хлѣбъ пода́сть ѹ҆бо́гомꙋ·
Побѣжденїе и҆ честь престраѧ́етъ даѧи да́ры, дш҃ꙋ же погꙋблѧ́етъ притѧжа́ныхъ ради.
и҆ждени ѿ сонмища гꙋби́телѧ, и҆зы́идетъ с нимъ побѣжденїе, е҆гда б̂о сѧ́дет̑ в сонмищи всѣмъ досажда́етъ·
Лю́битъ г҃ь прпд̑бныхъ срд̑ца, прие҆млеми же е҆мꙋ вси непорочнїи въ пꙋтехъ своих̑.
ѹ҆стна́ма пасет̑ цр҃ь лю́ди своѧ, ѻ҆́чи же гн҃и соблюда́ютъ чю́вствїе.
досажа́етъ сло́вомъ законопрестꙋпныи вины̀ и҆́щетъ и҆ гл҃етъ лѣнивыи, ле́въ на стезѧ́хъ, на пꙋтех же разбо́иницы.
ꙗ҆ма глꙋбо́ка ѹ҆ста̀ законопрестꙋпныхъ, възненавидѣныи же ѿ г҃а въпадетсѧ в ню.
сꙋть пꙋтїе злїи пред̑ мꙋжемъ, и҆ не лю́бит̑ възврати́тисѧ ѿ ни́хъ.
възвратити же сѧ подоба́етъ ѿ пꙋтѝ стропо́тна зла̀·
Невѣждествомъ възгори́тсѧ срд̑це ю́наго, жезлъ и҆ наказа́нїе далече ѿ него.
ѻ҆бидѧ́и же ѹ҆бога мно́го себѣ ѕла сътвори́т꙽, и҆ дае́тъ бога́томꙋ на ни́щемъ.
ко словесемъ мꙋдрыхъ прилага́и свое ѹ́хо и҆ ѹ҆слы́ши моа словеса̀, свое же срд̑це поста́ви к нимъ да разꙋмѣеши ꙗ҆́ко добра сꙋть.
и҆ а́ще вложиши ѧ҆̀ въ срд̑це твое, възвеселѧтъ тебе съ твои҆ма ѹ҆стнама.
бꙋды ты на г҃а ѹ҆пова́ѧ, и҆ наѹ҆читъ т̂ѧ пꙋтемъ свои҆мъ.
ты́ же напиши ѧ҆̀ себѣ на ѹ҆строе́нїе, на совѣтъ и҆ чю́вство и҆ ра́зꙋмъ, на широтꙋ срд̑ца твое҆го.
наѹ҆чю бо т̂ѧ и҆́стинномꙋ словеси, и҆ разꙋма и҆́стиннаго послꙋшати, на ѿвѣты словесемъ и҆́стиннымъ, въпрашающимъ т̂ѧ.
не ѹ҆карѧ́и ни́ща занѐ ѹ҆богъ е҆сть, и҆ не досаждаи не́мощномꙋ въ вра́тѣхъ.
г҃ь б̂о сꙋдитъ е҆мꙋ сꙋдомъ, и҆зба́ви свою невещественꙋю дш҃ꙋ·
Не быва́и дрꙋгъ мꙋжꙋ гнѣвли́вꙋ, и҆ со дрꙋгомъ жестосръдным̑ не съчета́исѧ.
е҆гда когда наѹ҆чишисѧ пꙋтем̑ е҆го, прїимеши тенето свое́и дш҃и.
не вдаисѧ въ порꙋче́нїе стыдѧсѧ лица̀ е҆да б̂о не бꙋдеши и҆мѣти чим̑ и҆скꙋпи́тисѧ, и҆ во́змт̑ꙋ посте́лю ꙗ҆́же под̑ ребры твои҆ми.
не прелага́и предѣлъ вѣчныхъ, ꙗ҆же положи́ша ѿц҃ы твоѝ.
прозрива чл҃ка и҆ снажѧ въ дѣле своем̑, цр҃еви подоба́етъ пред̑стоѧ́ти, и҆ не стоѧ́ти пред̑ мꙋжемъ немощнымъ·
Глв̑҇а, к҃г·
Аще сѧ́деши вече́рѧти на трапезѣ си́лнаго, разꙋмѣва́ѧ разꙋмѣва́и предъставле́ннаѧ ти.
и҆ наложѝ рꙋкꙋ твою вѣдыи ꙗ҆́же чт̂о си́цево, подоба́етъ б̂о тебѣ ѹ҆краша́ти себе.
а҆ще ли насыщнѣ́ишїи е҆си не хощи слаждъшим̑ е҆го, сицева́а б̂о и҆́мать животъ лжи́выхъ.
не належи ѹ҆бо́гъ сы́и съ бога́тымъ, ѿ свое҆го помышле́нїѧ въстѧза́исѧ.
а҆ще б̂о ѹ҆стреми́ши на него ѻ҆́ко свое никогдаже ꙗ҆вит̑сѧ, съдѣланѣ б̂о е҆ста е҆мꙋ кри́лѣ ꙗ҆ко ѻ҆рлꙋ̀, и҆ ѻ҆бращает̑сѧ пристꙋпа́ющемꙋ к немꙋ.
не вечерѧи съ мꙋжемъ ревни́вомъ, ни похощи пи́щамъ е҆го.
и́мже б̂о ѻ҆́бразомъ а҆ще кт̂о поглоти́тъ кла́сы, сице ꙗ҆́сти и҆ пити с нимъ, ниже къ себѣ въведе́ши е҆го, ниже снѣси хлѣбъ свои с нимъ и҆зблюетъ б̂о и҆̀.
и҆ ѻ҆сквернитъ словеса̀ твоѧ добраѧ.
въ ѹ҆шїю безꙋмнаго ничтоже гл҃и, да не когда̀ подража́ти начнетъ разꙋмнаѧ словеса̀ твоѧ.
Не прелага́и предѣлъ вѣчныхъ, въ стѧжа́нїе сирота́мъ не вниди.
и҆збавлѧ́ѧ б̂о и҆хъ г҃ь крѣпокъ е҆сть, и҆ разъсꙋдит̑ сꙋдъ и҆хъ с тобою.
да́ждь въ наказа́нїе срд̑це твое, ѹ҆́ши же своѝ ѹ҆готоваи словесемъ чю́въственымъ.
не ѿрѣи младенца нака́зовати, а҆ще б̂о жезломъ бїеши е҆го и҆ не ѹ́мретъ ѿ него.
ты́ же ѹ҆бо бїѧй е҆го жезломъ, дш҃ꙋ же е҆го и҆збавиши ѿ злы̀ см҃рти·
Сн҃е а҆ще премꙋдро бꙋдетъ срд̑це твое, възвеселиши и҆ мое срд̑це.
и въ поѹ҆че́нїе словесъ твоѝ ѹ҆стнѣ̀ к мои҆ма ѹ҆стна́ма, а҆ще пра́ва бꙋдета·
да не ревнꙋетъ срд̑це твое грѣшникомъ, н̂о въ бо́ѧ҆зни гн҃и бꙋди весь дн҃ь.
а҆ще б̂о съблюдеши ѧ҆̀ бꙋдꙋтъ ти внꙋци, и҆ ѹ҆пова́нїе твое не ѿстꙋпитъ·
Слꙋшаи сн҃е и҆ премꙋдръ быва́и, і҆ и҆справлѧ́и мы́сль срд̑ца твое҆го·
Не бꙋди винопїи́ца, ниже прилага́исѧ мѧ́съ кꙋпова́нїю.
всѧ́къ б̂о пїѧница и҆ любодѣи ѻ҆бнища́ютъ, и҆ ѻ҆блечетасѧ в растерза́ннаѧ, и҆ съкръпленаѧ и҆ всѧ соннаѧ·
Слꙋшаи сн҃е рождъшаго т̂ѧ, и҆ не неради е҆гда состарѣ́етсѧ твоѧ мати.
и҆́стин̑҇нꙋ стѧжѝ, и҆ не ѿрини мꙋдрости и҆ ѹ҆че́нїѧ и҆ ра́зꙋма.
добрѣ въспитѣет̑ ѿц҃ъ пра́веденъ, ѻ҆ сн҃ѣ же премꙋдрѣ весели́тсѧ дш҃а е҆го.
да весели́тсѧ ѿц҃ъ и҆ мт҃и ѻ҆ тебѣ, и҆ да радꙋе҆тсѧ рождъшїѧ т̂ѧ.
даждь ми сн҃е твое срд̑це, твои҆ же ѻ҆́чи моѧ пꙋтѝ да соблюда́ета.
ꙗ҆́ма глꙋбо́ка тꙋждїи домъ, и҆ стꙋденець тѣснъ тꙋждь.
тако б̂о въскорѣ поги́бнетъ, и҆ всѧк̑҇ законопрестꙋпник̑҇ ѻ҆тѧ́тъ бꙋдет̑·
Комꙋ лютѣ, комꙋ млъва, комꙋ сꙋди, комꙋ тꙋга̀ и҆ поносъ, комꙋ сокрꙋшенїе вът꙽ще, комꙋ сини ѻ҆́чи, не пребыва́ющимъ л̂и въ винѣ̀, и҆ назира́ющим̑ гдѣ когда пи́рове быва́ют̑.
не ѹ҆пиваитесѧ вино́мъ, н̂о бесѣдꙋите чл҃комъ пра́веднымъ, и҆ бесѣдꙋите въ проходехъ·
А҆ще б̂о на ча́шꙋ и҆ стъклѧни́цꙋ даси ѻ҆́чи своѝ, послѣди же походиши нажаи тръна.
послѣди же ꙗ҆́ко ѿ змїѧ сѣченъ простретсѧ, и҆ ꙗ҆́ко ѿ кера́ста разлїетсѧ ꙗ҆́дъ.
ѻ҆́чи твоѝ е҆гда ѹ҆́зрита женꙋ тꙋждꙋ, и҆ ѹ҆ста̀ твоѧ̀ тогда рекꙋтъ стропо́тнаѧ.
и҆ раста́еши ꙗ҆́ко въ срд̑ци мо́рѧ, и҆ ꙗ҆́ко кръмчїи въ мно́зѣ вълне́нїи.
речеши же би́ша м̂ѧ и҆ не поболѣхъ, и҆ порꙋга́ша ми сѧ а҆з же не разꙋмѣхъ·
когда ѹ҆́тро бꙋдетъ да пришедъ и҆спрошꙋ̀ с ни́ми же сни́дꙋ·
Глв̑҇а, к҃д·
Сн҃ꙋ мои не ревнꙋи ѕлы́мъ мꙋжемъ, ни въжделѣ́и бы́ти с ни́ми.
лжа́мъ б̂о поѹ҆ча́етсѧ срд̑це и҆хъ, и҆ болѣзнь ѹ҆стнами и҆хъ гл҃ютъ.
съ премꙋдростїю ѕижд̑етсѧ хра́мъ, и҆ съ разꙋмомъ и҆справлѧ́е҆тсѧ.
и҆ съ чю́вствїемъ и҆сполнѧ́ют̑сѧ съкровища, ѿ всего честна богат̑ства и҆ добра·
Лꙋчшїи премꙋдръ крѣпкаго, мꙋжъ мꙋдрость и҆мѣѧи тѧжа́телѧ вели́ка.
съ ѹ҆правле́нїем̑ быва́етъ бра́нь, по́мощь же срд̑цемъ съвѣтнымъ.
прмꙋдрость и҆ мы́сль бл҃га, въ вра́тѣхъ премꙋдрыхъ.
смысленыи же не ѹ҆клонитсѧ ѿ зако́на гн҃ѧ, н̂о въмѣнѧ́ютсѧ въ собо́рехъ, ненаказа́нїи ѹ҆стрѣта́ю҆тсѧ въ смр҃ти, ѹ҆мира́ет же безꙋмныи въ грѣсехъ.
нечистота̀ мꙋжа гꙋби́телѧ ѻ҆сквернѧ́етъ, въ дн҃ь ѕолъ и҆ въ дн҃ь печа́ли дондеже ѻ҆скꙋдѣетъ.
и҆збавлѧ́ѧи ведо́мыа на смр҃ть, и҆скꙋпꙋ прострѣти не щади.
а҆ще ли же речеши не съвѣдѣ сего, разꙋмѣи ꙗ҆́ко г҃ь всѣхъ срд̑ца съвѣ́сть.
и҆ създа́выи дыха́нїе всм̑ѣ се́и вѣсть всѧческаѧ, и҆же въздасть комꙋждо противꙋ дѣломъ е҆го.
ꙗ҆́ждь медъ сн҃ꙋ бл҃гъ б̂о е҆сть сотъ, да наслади́тсѧ горта́нь твои.
сице бо разꙋмѣетъ премꙋдрость твоѧ дш҃а, а҆ще бо ѻ҆брѧ́щеши бꙋдетъ добро̀ ѹ҆мрътвїе твое, и҆ ѹ҆пова́нїе твое не ѻ҆ста́витъ тебе.
не приведи нечести́ваго въ жи́ръ пра́веднаго, ни прельща́исѧ бес꙽сы́тостїю чрева.
седмицею б̂о пад̑ пра́ведныи въста́етъ, нечести́вїи же и҆знемогꙋтъ въ ѕлы́хъ.
а҆ще падетъ враг̑҇ твои не ѻ҆бра́дꙋисѧ е҆мꙋ, въ соблажненїи же е҆го не възноси́сѧ.
ꙗ҆́ко ѹ҆́зритъ г҃ь и҆ не годѣ е҆мꙋ бꙋдетъ, и҆ ѿврати́тъ ꙗ҆́рость свою ѿ него.
не ра́дꙋисѧ ѻ҆ ѕлодѣющих̑, и҆ не ревнꙋи пꙋтемъ грѣшныхъ, не пребꙋдт̑ꙋ б̂о внꙋци лꙋка́вныхъ, свѣтило же нечести́вых̑ ѹ҆га́снетъ.
бо́исѧ б҃а сн҃ꙋ и҆ цр҃ѧ, и҆ ни еді́номꙋ же и҆хъ противисѧ.
внезапꙋ б̂о стѧжетъ нечести́выи, мꙋче́нїѧ бо ѻ҆бою кт̂о и҆звѣсть.
слова хранѧ́исѧ сн҃ъ погибельства кромѣ бꙋдетъ, прие҆млѧи же прїѧтъ себе.
ничтоже ложно цр҃еви да гл҃етсѧ, и҆ ни е҆ді́на же ложъ ѿ ѧзы́ка е҆го да и҆зы́идетъ.
мечъ е҆сть ꙗ҆зы́къ цр҃евъ а҆ неплотѧнъ, и҆же а҆ще преда́нъ бꙋдетъ съкрꙋши́тсѧ, а҆ще б̂о раздражит̑сѧ ꙗ҆́рость е҆го съ жи́лами, чл҃ки гꙋбит̑ и҆ ко́сти чл҃чески поѧда́етъ.
и҆ съжиза́етъ ꙗ҆ко пла́мень, ꙗ҆ко неѧдо́мом̑ бы́ти пте́нцам̑ ѻ҆́рлимъ.
моих̑ словесъ сн҃ꙋ бо́исѧ, и҆ прїим̑ ѧ҆̀ пока́исѧ·
И҆ сеж̑ ва́мъ смы́сленным̑ приразꙋмѣти.
срамлѧ́тисѧ лица на сꙋдѣ не добро.
рекꙋщи нечести́вꙋ пра́веден̑҇ е҆сть, проклѧ́тъ б̂о ѿ людїи бꙋ́детъ и҆ възненавидѣнъ въ ꙗ҆зы́цехъ.
и҆ ѻ҆блича́ющїи же добрѣ́иших̑ ꙗ҆вѧ́тсѧ, на нѧ́же прїидетъ блс̑҇венїе бл҃го·
И҆ ѹ҆стнѣ же възлю́бѧтъ ѿвѣща́ющаго словеса бл҃га·
Готоваи въ и҆сход̑ дѣѧ́нїа своѧ, и҆ ѹ҆готовисѧ на село.
и҆ ходи въ слд̑ѣ мене и҆ съзи́ждеши храм̑ мои·
Не бꙋ́ди свѣдѣтель л꙽живъ на свое҆го граждани́на, ни пространѧ́исѧ свои҆ма ѹ҆стна́ма.
не рци и҆мже ѻ҆бразом̑ сътвори м̂и ѿда́мъ е҆мꙋ и҆ ѿмщꙋ и҆мже м̂ѧ преѻ҆би́дѣ.
ꙗ҆́ко тѧжа́нїе мꙋж́ъ безꙋ́мных̑ и҆ ꙗ҆́ко виноград̑, сице и҆ чл҃къ хꙋдоѹ҆́мныи.
а҆ще ѻста́виши и҆хъ ѻ҆лѧдѣетъ, и҆ траво́ю порастетъ ве́сь.
и҆ бꙋ́детъ ѻ҆ста́вленъ, и҆ ѻ҆гра́ди же ка́менїи е҆го раскопа́ютсѧ.
послѣ́ди аз̑ покаѧв̑҇сѧ, ѹ҆зрѣвъ и҆збрати наказа́нїе·
Мало дрѣмлю ма́ло же сплю, ма́ло же ѻ҆бїемлю рꙋка́ма пе́рьси.
а҆ще же с̂и твори́ши, прїидетъ преди грѧдꙋщи нищета твоѧ, и҆ скꙋдота твоѧ ꙗ҆́ко бл҃гъ теча·
Си̂ наказа́нїѧ соло́монѧ нерасмотрен꙽наѧ.
ꙗ҆́же написа́ша дрꙋзи і҆е҆зекїини цр҃ѧ і҆ѹ҆де́иска·
Глв̑҇а, к҃е·
Сла́ва бж҃їѧ кры́ти сло́во, сла́ва же цр҃ева чти́ти повелѣнїѧ е҆го·
Нб҃о высоко землѧ же глꙋбока, срд̑це же цр҃ево не ѻ҆блично.
кꙋи неи҆скꙋшено сребро и҆ ѻ҆цѣсти́тсѧ и҆ бꙋдет̑ ѻ҆цѣще́нїе вс̂е.
ѹ҆бива́и нечести́выа пред̑ лицемъ цр҃евомъ, і҆ и҆спра́виши въ правдꙋ прс̑҇тлъ е҆го.
не горди́сѧ пред̑ лицемъ цр҃евомъ, и҆ на мѣстѣ си́лных̑ не стани·
Лꙋче б̂о т̂и е҆сть е҆гда̀ речетъ възыити къ себѣ, неже ли смири́тисѧ пред̑ лицемъ си́лнаго.
ꙗ҆́же ви́дѣста ѻ҆́чи твои гл҃и, не припа́даи в꙽ тѧ́жꙋ ско́ро, да не раска́ешисѧ послѣде.
внегда т̂ѧ ѹ҆бо про́сит̑ дрꙋ́гъ твои, въстꙋпа́и въспѧ́ть, не неради да не поноситъ ѹ҆бо тебѣ дрꙋгъ·
А҆ сва́ръ твои и҆ вражд̑а твоа не ѿстꙋпит̑, но бꙋ́детъ т̂и ра́вна съ смр҃тїю·
Блгд̑ть и҆ любы свобожд̑ает̑, в них꙽ же ѹ҆тверди себе да не в꙽ поноше́нїи бꙋдеши.
н̂о съхрани пꙋти своѧ̀ до́брѣ и҆змѣне́ны.
ꙗ҆́коже ꙗ҆́блоко зла́то въ ѹ҆серѧ́зи съ сардїискимъ каменемъ, си́це рещи сло́во приѹ҆краша́ющимъ е҆̀·
И ꙗ҆́коже въ ѹсерѧ́зи зла́томъ ка́мень мно́гоцѣнныи вѧ́жетсѧ, си́це сло́во премꙋ́дро въ бл҃го ѹ҆́хо послꙋшно·
Ꙗ҆́коже и҆схо́дище снѣ́га въ жа́твꙋ зно́ѧ ползꙋетъ, та́ко вѣстникъ вѣренъ послꙋшавших̑ е҆го дш҃ъ б̂о хотѧ́щихъ е҆мꙋ пользꙋетъ.
ꙗ҆́коже вѣтри и҆ ѻ́блацы и҆ дождеве ꙗ҆влѧ́ющїисѧ.
та́ко и҆ хвалѧ́ющеисѧ ѻ҆ да́нїю ло́жном̑.
въ долготерпе́нїи бл҃го поѹ҆ченїе цр҃ево, ꙗ҆зык̑҇ же мѧ́кокъ съкрꙋша́етъ ко́сти·
Мед̑ ѻ҆брт̑ѣ ꙗ҆́жд̑ь дово́лно, да не насы́щьсѧ и҆зблю́еши·
не ѹ҆чащаи вносити но́гꙋ твою къ дрꙋ́гꙋ свое҆мꙋ, е҆да ка́ко насы́щсѧ тебе възненави́дит̑ т̂ѧ·
дреко́ль и҆ ме́чь и҆ стрѣла ѻ҆́стра не без꙽ грѣха, та́ко и҆ мꙋж́ъ свѣдѣтельствꙋѧи на дрꙋга свое҆го свѣдѣтельство лъже.
пꙋти зла́го и҆ стопы законопрестꙋпнаго поги́бнт̑ꙋ въ дн҃ь зо́лъ.
ꙗ҆́коже ѻ҆́цетъ неполезно вре́дови, и҆ ды́мъ ѻ҆чи́ма, та́ко припад̑ши стра́сть въ тѣ́ло срд̑це ѻ҆скръблѧ́етъ.
ꙗ҆́ко же мо́леве в ри́зѣ и҆ чрьвїе въ дре́вѣ, та́ко мꙋж́ꙋ ско́рбь пакоствꙋетъ срд̑це·
А҆ще а҆лчетъ враг̑҇ твои насыщаи, а҆ще ли жа́жд̑етъ напаѧ́и е҆го.
с̂е бо творѧ ѹ҆́глїе ѻ҆́гньное събира́еши на главꙋ е҆го, г҃ь же възда́сть тебѣ бл҃гаѧ·
Вѣтръ сѣверныи въздви́жетъ ѻ҆́блаки, лице же бестꙋдно ꙗ҆зы́къ раздража́етъ·
Лꙋче жи́ти въ ѹ҆́глѣ на ꙗ҆́снѣ, неже въ храминѣ ѻ҆́бще съ жено́ю клевети́вою·
Ꙗ҆́коже вода̀ стꙋде́на дш҃и жа́ждꙋщи бл҃гопрїѧ́тна, та́коже вс̑҇ѣ бл҃га ѿ землѧ̀ дале́ча.
ꙗ҆́коже и҆сто́чникъ засыша́емъ и҆схо́дища водѣ гꙋ́битъ, та́ко не лѣпо правед̑никꙋ па́сти пред̑ нечести́вымъ·
Ꙗ҆́сти ме́дъ мно́го не добро, хранити же подобает̑ словеса мно́га·
Ꙗ҆́коже храм̑ стѣна́ми разоре́нами неѻ҆гражд̑енъ, та́ко мꙋж́ъ чт̂о творѧ без̑ совѣта·
Глв̑҇а, к҃ѕ·
Ꙗкоже снѣ́гъ в лѣтѣ и҆ до́жд̑ь въ жа́твꙋ, та́ко нѣсть безꙋмномꙋ чести.
ꙗ҆́ко пти́ца лѣтают̑ и҆ вра́бїеве, та́ко клѧ́тва тща не на́идет̑ ни на е҆ді́наго же·
Ꙗ҆́коже би́чъ коню и҆ ѻ҆сенъ ѻ҆слꙋ, та́ко жезлъ ꙗ҆зы́кꙋ законопрестꙋпнꙋ.
не ѿвѣщаи безꙋмнꙋ по ѕло́бѣ е҆го, да не подо́бенъ е҆мꙋ бꙋ́деши.
н̂о ѿвѣщаи безꙋмномꙋ къ безꙋмїю е҆го, да не ꙗ҆влѧетсѧ мꙋ́дръ ѻ҆ себѣ.
ѿ пꙋтїи свои҆хъ поноше́нїе тво́ритъ, и҆же посыла́етъ сло́во вѣстникомъ безꙋмнымъ.
ѿи҆метъ ше́ствїе е҆го лестно и҆ зако́нопрестꙋпно, и҆з꙽ ѹ́стъ безꙋмных̑ не ключи́тсѧ при́тча·
И҆же привѧза́етъ ка́мень въ пра́щи, подо́бенъ е҆сть дающемꙋ безꙋмномꙋ сла́вꙋ·
Трьнїе прозѧба́етъ в рꙋ́кꙋ пїѧ́ници, рабо́та же в рꙋка́хъ безꙋмныхъ.
мно́го трꙋжд̑а́етсѧ всѧ́ка пло́ть безꙋмных̑, съкрꙋша́ет꙽ же сѧ съста́въ и҆хъ·
Ꙗ҆́ко пе́съ и҆же възврати́тсѧ паки на своѧ блевоти́ны и҆ мрьзо́къ бꙋ́детъ, та́ко безꙋ́мныи своею ѕло́бою възвра́щсѧ на свои҆хъ грѣсехъ почїет꙽.
е҆сть стꙋ́дъ наводѧи грх̑ѣ, и҆ е҆сть стꙋдъ слава и҆ блгд̑ть·
Видх̑ѣ мꙋж́а непщева́вша себе мд̑ꙋра быти, ѹ҆пова́нїе же ѹ҆бо и҆́мать паче безꙋмныхъ себе·
Гл҃етъ лѣни́выи посланъ на пꙋть, ле́въ въ пꙋтехъ разбо́иницы же на стогнах̑.
ꙗ҆ко две́рь ѻ҆бращаетсѧ на сте́жаи, та́коже лѣни́выи на ло́жи свое҆мъ·
Съкрыва́етъ лѣни́выи рꙋ́кꙋ в на́дра своѧ, не мо́жетъ е҆ѧ̀ внести въ ѹ҆ста своа.
мꙋдрѣи себѣ лѣни́выи ꙗ҆влѧ́етсѧ въ насыщенїи до носѧ́щаго вѣсть·
Ꙗ҆́коже дръжа́и за ѻ҆пашъ ѱа, та́ко застꙋпа́ѧ тꙋждь сꙋдъ·
Ꙗ҆́коже и҆скꙋше́нїи пред̑лага́юще словеса въ чл҃цѣхъ, противѧ́ѧи же сѧ словеси прежде пот꙽кнетсѧ.
та́ко вс̂и въмꙋжа́юще свои҆хъ дрꙋгъ, е҆гда же ꙗ҆вѧт̑сѧ гл҃ютъ ꙗ҆́ко и҆гра́ѧ съдѣѧх̑·
въ мно́ѕѣхъ дре́вехъ си́ла ѻ҆гневи, а҆ и҆дѣже нѣсть скоро гнѣ́вна премол꙽ча́етъ сва́ръ·
ѻ҆съ жа́ра горꙋщи и҆мъ ѹ҆́глемъ и҆ дрова ѻ҆гневи, мж̑ꙋ же клевети́въ въ мѧтежи сва́ръ.
словеса ѹ҆тѣша́ющихъ мѧ́к꙽ка, си же бїютъ въ сокро́вищихъ ѹ҆тро́бы·
сребро даемо ле́стїю ꙗ҆́ко и҆скꙋде́ль мнит̑сѧ, ѹ҆стны̀ глад̑ки срд̑це покры́ютъ скръбно.
ѹ҆стна́ма же вс̂е ѻ҆бещаваетъ, пла́четъ на лицы вра́гъ, въ срд̑цы же съдѣва́етъ ле́сть·
А҆ще т̂ѧ мо́литъ вра́гъ ве́лїимъ гла́сомъ не вѣрꙋи е҆мꙋ, сед̑мь б̂о е҆сть лꙋкавъствїи въ дш҃и е҆го.
даѧ́и вра́ждꙋ съставлѧ́етъ ле́сти, ѿкры́ет꙽ же своа ле́сти бл҃горазꙋмныи на со́нмищи.
изрываѧи ꙗ҆́мꙋ и҆скренемꙋ свое҆мꙋ въпадет̑сѧ в ню̀, валѧ же камы на́ сѧ валитъ.
ꙗ҆зы́къ лжи́въ ненави́дит̑ и҆́стинны, ѹ҆ста непостоѧ́нна тво́рѧтъ нестрое́нїе·
Глв̑҇а, к҃з·
Не хвалисѧ на ѹ҆тренѧѧ, не вѣси б̂о чт̂о приживетъ находѧ́и·
да хва́литъ т̂ѧ и҆́скренїи а҆ не твоѧ ѹ҆ста̀, тꙋждїи а҆ не твоѝ ѹ҆стнѣ·
Тѧжко ка́мень и҆ жестоносно пѣсок̑҇, гнѣв же безꙋмна́го тѧ́жїи ѻ҆́бое҆го·
безъмилостивна ꙗ҆́рость и҆ ѻ́стръ гнѣвъ, н̂о ничтоже поста́витъ рвенїе·
Лꙋчше ѻ҆бличенїа ѿкровена та́иныѧ любве.
достовѣрнѣ́иши сꙋть стрꙋпи дрꙋга, нежели во́лнаа лобзанїѧ вра́га·
дш҃а въ сы́тости сꙋщи сотами рꙋга́етсѧ, дш҃и же ни́щетнѣи и҆ горкое бл҃го ꙗ҆влѧет̑сѧ·
Ꙗ҆́коже когда̀ пти́ца ѿлетит̑ ѿ гнѣзда свое҆го, тако чл҃кꙋ поработи́въшꙋсѧ е҆гда ѹ҆страни́тсѧ ѿ свои҆хъ мѣстъ.
мѷры и҆ виномъ и҆ кадилом̑ краситсѧ срд̑це, растръза́ет же сѧ ѿ бѣды дш҃а.
дрꙋга свое҆го и҆л̂и дрꙋга̑ ѿч҃а не ѻ҆ставлѧи, въ дом же бра́та свое҆го не вниди без̑ времени.
лꙋчше дрꙋгъ близ̑ неже брат̑ да́ле живыи.
премꙋдръ бꙋди сн҃ꙋ да веселит̑сѧ срд̑це твое, и҆ ѿврати ѿ себѐ поносли́ва словеса̀.
хитрыи ѕлых̑ находѧ́щего ѹ҆крыва́етсѧ, безꙋмнїи же и҆ нашед̑шꙋю тщетꙋ стѧ́жꙋтъ.
ѿи҆ми ры́зꙋ е҆го прїиде б̂о досажда́ѧи, и҆же чꙋждаѧ погꙋблѧ́ет꙽.
и҆же а҆ще блс̑҇вит̑ дрꙋга ѹ҆́тро ве́лїемъ гла́сомъ, кленꙋщего ничесоже разньствова́ти непщꙋетъ.
ка́плѧ и҆згонѧ́тъ чл҃ка въ дн҃ь зи́менъ и҆с хра́ма свое҆го, також̑ и҆ жена̀ клеветива и҆с꙽ свое҆го до́мꙋ.
сѣверъ жесто́къ вѣтръ, и҆менем̑ же прїѧ́тенъ нарица́етсѧ·
Желѣзо желѣза ѻ҆́стрит̑, мꙋжъ же мꙋж́еви лице раздража́етъ.
и҆же садитъ смоко́вницꙋ снѣсть ѿ плода е҆ѧ̀, а҆ и҆же хранитъ г҃а свое҆го честенъ бꙋдетъ·
Ꙗ҆́коже сꙋть не подо́бна лица лицем̑, си́це же и҆ срд̑ца чл҃чи.
а҆́дъ и҆ погибель не насыща́ютсѧ, також̑ ѻ҆́чи чл҃чески несы́тѣ.
мръзость гв҃и ѹ҆твержа́ющеи ѻ҆́чи, и҆ ненаказа́ннїи неѹ҆дръжани ꙗ҆зы́ка.
и҆скꙋшенїе сребрꙋ и҆ зла́тꙋ раждеженїе, мж̑ꙋ же и҆скꙋша́етсѧ ѹ҆сты̀ хвалѧ́щих꙽ е҆го·
Срд̑це безако́нника възы́щетъ ѕл̂а, срд̑це же пра́во възыска́етъ ра́зꙋма.
аще бїеши безꙋмнаго по́средѣ сонмища срамлѧ е҆го, не ѿи́меши ѹ҆бо безꙋмїѧ е҆го.
разꙋмне разꙋмѣва́и дш҃ꙋ ста́да свое҆го, и҆ наста́виши срд̑це свое въ своа ста́да·
ꙗ҆́ко не въ вѣки мꙋж́еви дръжава и҆ крѣпость, ниже предают̑ ѿ рода в род̑.
прилежи по́лных̑ зла́цѣхъ, и҆ по́жнеши травꙋ̀, и҆ събери сѣмѧ дꙋбра́вное.
да и́маши ѻ҆́вца въ ѻ҆дѣнїе, чт̂и по́ле да бꙋдꙋть т̂и а҆́гньци·
Сн҃е ѿ мене и҆́маши реченїа крѣпка, въ жизнь свою, и҆ въ жизнь твои҆мъ ѹ҆год̑никомъ·
Глв̑҇а, к҃и·
Бѣгаетъ нечести́выи н̂и е҆ді́номꙋ же гонѧ́щꙋ, пра́ведъныи же ꙗ҆́ко ле́въ надѣѧ́сѧ.
за грѣхи нечести́выхъ сꙋ́ди воста́ютъ, мꙋжъ же хꙋдог̑҇ ѹгаситъ ѧ҆̀, а҆ дръзыи въ нечестїе ѻ҆клевета́етъ нищаѧ·
Ꙗ҆́ко до́жд̑ь хлѧбныи неполезенъ, та́ко ѻ҆ста́вивше зако́нъ и҆ хва́лѧт̑ нечестїе.
любѧ́щїи же зако́нъ ѻ҆градѧт̑ ѻ҆ себѣ стѣнꙋ̀·
Мꙋж́и ѕлїи не разꙋмѣвают̑ сꙋ́да, и҆щꙋщеи же г҃а разꙋмѣва́ютъ ѻ҆ всемъ.
лꙋче ни́щъ ходѧ́и въ и҆стиннѣ, нежели богатъ ло́жъ·
Хранит̑ законъ сн҃ъ разꙋмныи, а҆ и́же пасет̑ несы́тость досажа́етъ ѿц҃ꙋ свое҆мꙋ.
наполнѧ́ѧ бога́тьство свое съ лихвами и҆ прибыт̑ки, милꙋющемꙋ ни́щаѧ събира́ет꙽ е҆̀·
Ѹ҆клонивыи ѹ҆́хо свое не послꙋшати зако́на, и҆ се́и мл҃твꙋ свою възмерьз꙽ствова.
и҆же льстит̑ пра́выѧ въ пꙋти ѕл̂ы, въ и҆стлѣнїе самъ въпадетъ·
Без꙽законїи же минꙋ́ютъ бл҃гаа, и҆ не въпадт̑ꙋ в нѧ̀.
премꙋдръ быва́етъ ѻ҆ себѣ мꙋжъ богатъ, всѧкъ разꙋмивъ ни зна́ет꙽ е҆го.
за по́мощъ правед̑нымъ мно́га быва́етъ сла́ва, въ градех̑ же нечестивых погибнꙋтъ чл҃ци.
покрыва́ѧи нечестїе свое не поспѣе҆тсѧ въ бл҃гаа, повѣда же ѻ҆бличенїѧ възлю́бленъ бꙋдетъ·
Бл҃женъ мꙋжъ и҆же ѹ҆страшитсѧ всего за говѣнїе, а҆ жестосердъ въпадетъ въ ѕла́ѧ·
Левъ а҆лченъ и҆ влъкъ жажденъ, тако и҆же ѻ҆би́дит̑ нищаѧ и҆ ѹ҆бога·
Цр҃ь скꙋденъ ѹ҆рокомъ великъ клевет̑никъ быва́етъ, а҆ ненавидѧ́и непра́вды долголѣтъ поживетъ.
мꙋжа и҆же въ винѣ смр҃тнѣ вырꙋчаѧ и҆ бѣжа̀ бꙋдетъ, а҆ не ѹ҆твержденъ·
наказаи сн҃а свое҆го и҆ възлюби́т꙽ тѧ, и҆ дастъ лѣпотꙋ твоеи дш҃и, не послꙋша́етъ ѹ҆бо ꙗ҆зы́ка законопрестꙋпна.
ходѧ́и правед̑но поможетъ себѣ, ходѧ́и же въ стропотны пꙋтѝ ѹ҆вѧзнетъ.
дѣла́ѧи свою зе́млю насытитсѧ хлѣба, гонѧ́и же пра́знд̑ьство насытитсѧ нищети·
Мꙋжъ вѣре досто́иныи мно́го блс̑҇вит̑сѧ, ѕлыи же не безъ молъства бꙋдет̑·
и҆же не срамлѧ́етсѧ лица̀ пра́вед̑наго не бл҃гъ, ꙗ҆́ко таковыи за ѹ҆крꙋхъ хлѣба мꙋжа ѿдас̑҇.
подвиѕа́етъ бо ѻбогатитисѧ мꙋжъ зави́дливъ, и҆ не вѣсть ꙗ҆́ко млс̑҇тивыи ѻ҆блада́етъ и҆́мъ.
ѻ҆бличаи чл҃ча пꙋтѝ блд̑гть и҆́мать па́че глад̑ко ꙗ҆зы́чнаго.
и҆же нꙋ́дитъ ѿц҃а и҆ мт҃ерь и҆ мнитсѧ не съгрѣшаѧ, се́и съпричастникъ ес̑҇ мꙋжꙋ нечести́вꙋ·
Несытыи мꙋж꙽ сꙋдитъ непра́вдѣ, а и҆же надѣет̑сѧ на г҃а въ прилежанїи бꙋдетъ.
и҆же надѣ́етсѧ на дерзо срд̑це и҆ таковыи безꙋменъ е҆сть, а҆ иже хо́дитъ въ мꙋдрости сп҃сетсѧ·
И҆же да́ет꙽ ѹ҆богимъ не ѻ҆скꙋдѣет̑, а и́же ѿвраща́етъ ѻ҆́ко свое въ скꙋдотѣ бꙋдет꙽ мно́ѕѣ.
на мѣстѣхъ нечести́выхъ ста́нꙋтъ пра́вед̑нїи, въ поги́бели же и҆хъ и҆сполнѧ́тъ пра́вед̑нїи·
Глв̑҇а, к҃ѳ·
Лꙋче мꙋжъ ѻ҆блича́ѧ мꙋж́а жестовыина , въ ма́лѣ б̂о ползꙋ́ющемꙋ нѣсть
и҆сцѣленїѧ·
Похваленомъ быва́ющимъ пра́вед̑нымъ възвеселѧ́тсѧ лю́дїе, кнѧ́ѕем же нечестивымъ стант̑ꙋ мꙋжїе.
мꙋж́ꙋ любѧщꙋ премꙋдрость веселит̑сѧ ѿц҃ъ е҆го, а и́же пасетъ любодѣица погꙋбитъ бога́тество свое.
цр҃ь пра́веден̑҇ ѻ҆гои́тъ зе́млю, мꙋжъ же зако́нопрестꙋпникъ раскꙋта́етъ.
и҆же содѣва́етъ на лицы свое҆мꙋ дрꙋгꙋ мре́жю, ѻ҆благает̑ ѻ҆ свое́и но́ѕѣ.
согрѣша́ющемꙋ мꙋжꙋ ве́лїѧ сѣть, пра́вед̑нїи же въ ра́дости и҆ въ веселїи бꙋдꙋтъ.
ѹ҆мѣе҆тъ пра́вед̑ныи сꙋдъ творити ѹ҆боги́мъ, а҆ нечестивїи не разꙋмѣютъ ра́зꙋма, и҆ ѹ҆богомꙋ не быти ѹ҆хо разꙋмѣва́юще·
Мꙋжи безаконнїи раждиѕа́ютъ град̑ , мꙋжи же мꙋдрїи възвраща́ют̑ гнв̑҇ѣ·
Мꙋжъ мꙋдръ сꙋдитъ ꙗ҆зы́комъ, мꙋжъ же досади́тель гнѣ́ваѧсѧ посрамлѧ́етсѧ и҆ не ѹ҆бои҆тсѧ.
мꙋжи кро́ви сꙋще причастници възненави́дѧтъ прпд̑бныѧ , пра́вїи же възы́щꙋтъ дш҃а и҆х꙽.
весь гнѣвъ свои и҆зно́ситъ безꙋмныи, премꙋдрыи же съкрыва́етъ въ ча́сти·
Цр҃ю послꙋша́ющꙋ словесе непра́вед̑на, вс̂и под̑ нимъ зако́нопрестꙋпницы.
заи҆модавцꙋ и҆ длъжникꙋ е҆ді́нъ съ дрꙋгимъ съшед̑шемасѧ, посещенїе тво́ритъ ѻ҆бѣма г҃ь.
цр҃ю въи҆́стиннꙋ сꙋдѧ́щꙋ ни́щимъ, прс̑҇тлъ е҆го въ свѣдѣтельствѣ ѹ҆строит̑сѧ.
ꙗ҆́звыж̑ и҆ ѻ҆блеченїѧ да́ютъ мꙋдрость, ѻ҆́трокъ же блꙋдѧ́и срамлѧетъ роди́телѧ своѧ·
Мно́гомъ грѣшником̑ сꙋщимъ мно́ѕи грѣси бывают̑ , пра́вед̑нїи же ѻ҆ немъ пада́ющемъ
ѹ҆страблѧ́ютъ себе·
Наказа́и сн҃а и҆ покои́тъ т̂ѧ, и дасть лѣпотꙋ твое́и дш҃и·
Не бꙋдетъ въ па́мѧть въ ꙗ҆зы́цѣ законопрестꙋпнѣ, а҆ хранѧи законъ блаженъ бꙋдетъ·
Не накажетсѧ словесы рабъ жестокъ, а҆ще б̂о и҆ разꙋмѣет̑ н̂о не послꙋшает̑·
А҆ще л̂и ви́диши мꙋжа напра́сна въ словесѣхъ, и҆ разꙋмѣи ꙗ҆́ко ѹ҆пова́нїе и҆́мать паче е҆го безꙋмныи·
И҆же ласкосердъ бꙋдетъ, ѿ ѻ҆трочины поработитсѧ, послѣди же ѻ҆страститсѧ ѻ҆ сем̑.
мꙋжъ прогнѣвав꙽сѧ побѣжденїе въздвиѕа́ет꙽, и҆ мꙋжъ жестосердъ ѿкрыва́етъ грѣхи.
досажденїе мꙋжа смирѧ́етъ, а҆ смиренныѧ ѹ҆твержа́етъ г҃ь въ сла́вѣ·
И҆же раздѣлѧ́ет꙽ коры́сти съ та́тем̑, ненави́дит꙽ свое́ѧ дш҃а.
а҆ще же присѧѕе прилегши, слы́шавше не повѣдѧтъ ѹ҆боа́вшесѧ·
и҆ постыдѣвшесѧ чл҃къ претъкнꙋтсѧ, надѣѧ́всѧ на г҃а възвеселит̑сѧ.
нечестїе мꙋжꙋ дает̑ соблажненїе, ѹ҆пова́аи же на владꙋщаго сп҃сетсѧ.
мно́ѕи ѹ҆гажда́ютъ пред̑ лицемъ во́ждеи, ѿ г҃а же събыва́етсѧ пра́вда мꙋж́ꙋ·
Мерзость пра́вед̑никꙋ мꙋжъ неправеденъ, мерзость же законопрестꙋпномꙋ и҆справлѧ́ющїисѧ пꙋть.
и҆справлѧ́ѧ пꙋти своа и҆же съ татем̑ причаща́етсѧ, дш҃ꙋ свою заклина́ющаго слꙋша́етъ и҆ не ска́жетъ·
И҆же боит̑сѧ чл҃ка скоро раздрꙋшит̑сѧ, иже ѹ҆пова́етъ на г҃а въздви́гнет̑сѧ.
мно́ѕи възы́щꙋтъ лица нача́лника и҆ сꙋ́ди ѿ г҃а и҆схо́дитъ е҆ді́нымъ.
мер̑҇зѧтсѧ пра́вед̑нїи мꙋжа нечестива, и҆ мерзѧтсѧ нечестивїи и҆́хже пра́ва сꙋть пꙋти.
сн҃ъ сохранѧѧ слово ѿц҃а свое҆го внѣ̀ погꙋбленїа бꙋдет̑.
словеса̀ събира́юща, сн҃ꙋ и҆зъблева́ющꙋ·
Глв̑҇а, л҃·
Сїѧ же гл҃етъ мꙋж꙽ вѣ́рꙋющим̑ бв҃и.
и҆ не преста́ю, безꙋмнѣи б̂о е҆смь ѿ всх̑ѣ чл҃къ, и҆ мꙋдрости чл҃ческїѧ нѣсть во мнѣ·
Бг҃ъ же наѹ҆чи м̂ѧ премꙋдрости, и҆ ра́зм̑ꙋ ст҃ых̑ разꙋмх̑ѣ·
кт̂о в꙽зы́иде на́ нб҃о и҆ сниде.
кт̂о събра вѣтры въ надра.
кт̂о възврати во́дꙋ въ ри́зꙋ.
кт̂о ѹ҆дръжа конецъ весь земли.
кое и҆мѧ е҆го, и҆ кое и҆мѧ ча́домъ е҆го да разꙋмѣю.
всѧ б̂о словеса бж҃їѧ ражд̑еже́на, защищает̑ же самъ боꙗ҆́щаѧсѧ е҆го·
Не приложи́сѧ словесемъ е҆го, да не ѻ҆бличит̑ т̂ѧ и҆ ло́жь бꙋдеши·
двое прошꙋ ѹ҆ тебе не ѿи҆ми ѿ мене блгд̑ти прежд̑е ѹ҆мертвїѧ мое҆го.
сꙋетно сло́во и҆ ложно дале́че мене сътвори·
Бога́тьства и҆ нищеты не да́и же м̂и, съчета́и же м̂и потре́бнаѧ и҆ само дово́лнаѧ·
да не насыщсѧ ло́жь бꙋ́дꙋ, и҆ рекꙋ кт̂о м̂ѧ ви́дит̑.
и҆ли ѻ҆бнища́въ ѹ҆кра́дꙋ, и҆ кленꙋсѧ въ и҆мѧ гн҃е·
Не преда́жд̑ь раба̀ в рꙋ́цѣ господина, да не когда прокленетъ т̂ѧ і҆ и҆зщезнеши·
Ча́до ѕл̂о клене́тъ ѿц҃а, и҆ мт҃еръ не блс̑҇витъ.
ча́до ѕл̂о въ пра́вдꙋ себе ѻ҆сꙋдитъ, и҆схо́да же свое҆го не и҆спра́ви·
Ча́до ѕл̂о высо́цѣ ѻ҆́чи и҆́мат̑ть, вѣкома же свои҆ма възно́ситсѧ·
Ча́до ѕл̂о ме́чъ зꙋ́бы свои и҆́мать, и҆ члено́вы ꙗ҆́ко сѣчи́во е҆же гꙋби́ти и҆ поꙗ҆да́ти смире́нныѧ ѿ землѝ, и҆ ѹ҆бо́гїѧ их̑ ѿ чл҃къ·
Пїѧ́вица и҆мѣ̀ четыри дшери любовїю възлю́блены, и҆ три сїѧ не насыти́шасѧ еѧ̀, и҆ четвер̑҇таѧ не ѹ҆довлисѧ рещи доволно м̂и ес̑҇·
а҆́дъ и҆ по́хоть жены и҆ землѧ ненапое́наѧ водою, и҆ вода и ѻ́гнь не рект̑ꙋ довлѣет̑·
ѻ҆́ко рꙋгаѧ́исѧ ѿц҃ꙋ и҆ досажда́ѧ ста́рости мт҃рьни, да и҆звратѧт̑ е҆̀ вра́ни ѡ дебрїѧ, и҆ да снѣдѧт̑ е҆̀ птенцы ѻ҆рли·
трїе м̂и сꙋть невозможни разꙋмѣти, и҆ четвертаго же не свѣдѣ.
слѣ́да ѻ҆́рлѧ парѧ́ща по воздꙋхꙋ, и҆ пꙋти ѕмїѧ ползѧща̑ по ка́мени, и҆ стеѕѧ кораблѧ пловꙋща по́ морю, и҆ пꙋти мꙋжа въ ю҆́ности е҆го.
та́коже и҆ пꙋти жены̀ любодѣица, е҆гда сътворитъ і҆ и҆змывшисѧ ничто́же рече съдѣѧ грѣшно.
треми трѧсетсѧ землѧ̀, четверътого же не мо́жетъ понести.
а҆ще рабъ въцр҃итсѧ, и безꙋмныи и҆сполнитсѧ пи́щею, и҆ раба̀ а҆ще и҆ждене свою госпождꙋ, и҆ мръзка жена̀ а҆ще ключи́тсѧ добрꙋ мꙋжꙋ.
четыри же сꙋть непщꙋема на землѝ, сїѧ же сꙋть мꙋдрѣ́иша мꙋдрыхъ.
мравїи и҆мже нѣсть крѣпости, и҆ готовают̑ въ жа́твꙋ пи́щꙋ·
И҆ хирогри́ль ꙗ҆зык̑҇ не крѣпокъ, и҆же сътвори́ша на ка́мени домы̀ своѧ.
безъцр҃ьни сꙋть прꙋзи, и вою́ютъ ѿ е҆ді́наго повелѣнїѧ.
добрѣлично и҆ ꙗ҆́щерица рꙋка́ми кренѧщисѧ, и҆ ѹ҆добъ ѹ҆лавлѧ́е҆ма сꙋща, живетъ въ твердехъ цр҃евахъ.
тре́тее же сꙋть е҆же бл҃гочестно ходѧтъ, четвертое же е҆же добрѣ преходитъ.
скѵ́менъ льво́в꙽ крѣпкїи скотъ, и҆же не ѿвраща́е҆тсѧ ни ѹ҆стра́шитсѧ скотъ.
и҆ пѣтель ходѧ в кокошехъ до́брѣ ѹ҆крашенъ, и҆ коѕел̑҇ води́тель ста́дꙋ, и҆ цр҃ь гл҃ѧи к народꙋ въ ꙗ҆зы́цѣ.
а҆́ще въдасѝ себе въ весе́лїе, и простреши рꙋкꙋ свою съ сва́ромъ съкрꙋшенъ бꙋдеши.
мльзи млеко, и҆ бꙋдетъ ма́сло.
а҆ще л̂и ноздри чешеши, и҆зы́идетъ кро́вь.
а҆ще ли и҆зноси́ши словеса̀, и҆зы́идꙋтъ сꙋдїи тѧжа̀·
Глв̑҇а, л҃а·
Моѧ словеса гл҃ютсѧ ѿ б҃а, цр҃ево прро̑҇чество е҆гоже наказа мт҃и е҆го·
Чт̂о ча́до съблюде́ши рече́нїе бж҃їе, прьворо́дне тебѣ гл҃ю сн҃е.
чт̂о ча́до мое҆го чрѣва, чт̂о ча́до моих̑ мл҃твъ.
не да́ждь женѣ свое҆го богат̑ства, и҆ твое҆го ѹ҆ма и҆ жи́тїѧ, и҆ послѣди совѣта.
съ совѣтомъ вс̂е твори, съ совѣтомъ пїи вино·
си́лнїи гнѣвли сꙋть вина̀ да не пїют̑, да не напи́вшесѧ забꙋдт̑ꙋ мꙋдрости, и҆ пра́во сꙋдити не́мощнымъ не възмо́гт̑ꙋ·
да́ите слад̑кое питїе не́мощ꙽ным̑ и҆ вино пи́ти сꙋщимъ въ печалех̑, да забꙋдꙋтъ ѹ҆божїе, и҆ стрс̑҇ти не въспомѧнꙋтъ ктомꙋ·
Сн҃е ѿвръзи ѹ҆ста своѧ̀ словесе́мъ бж҃їим̑ и҆ сꙋди всѣмъ здра́во.
ѿвръзи ѹ҆ста̀ твоѧ и҆ сꙋди пра́ведне, и҆ расꙋжда́и ѹ҆бо́га и҆ не́мощна.
женꙋ̀ до́блю кт̂о ѻ҆брѧ́щетъ, дража́иши е҆сть ка́менїѧ мно́гоцѣнна такова́ѧ, дрьза́етъ на ню срд̑це мꙋж́а е҆ѧ̀·
таковаѧ б̂о до́брыхъ коры́стеи не лиши́тсѧ.
дѣлаетъ б̂о мꙋж́ꙋ свое҆мꙋ вс̂е бл҃го жи́тїе, ѻ҆брѣтша во́лнꙋ и҆ ле́нъ сътвори бл҃гопотре́бно рꙋка́ма свои҆ма·
Бы́сть ꙗ҆́ко и҆ кора́бль кꙋплю дѣ́ющъ, и҆здале́ча събира́етъ себѣ бога́тьство.
и҆ въста́етъ и҆з нощи и҆ дасть бра́шна до́мꙋ, и҆ дѣ́ла рабы́нѧмъ·
Ви́дѣвше же тѧжа́нїе кꙋпова́ше, ѿ пло́да рꙋ́кꙋ свое҆ю насадит̑ тѧжа́нїе.
препоѧса́вши крѣпко чре́сла своѧ, ѹ҆тверди́тъ мы́шци свои на дѣ́ло.
и҆ вкꙋси ꙗ҆́ко добро е҆сть дѣлати, и҆ не ѹ҆гаса́етъ свѣти́лник̑҇ е҆ѧ̀ всю но́щь·
Ла́кти своѧ простира́етъ на полезнаѧ, рꙋцѣ же свои ѹ҆твержа́етъ на вретено.
и҆ рꙋцѣ свои ѿвръза́етъ ѹ҆бо́гꙋ, плод̑ же простретъ ни́щꙋ.
не пече́тсѧ ѻ҆ домꙋ̀ свое҆мъ мꙋ́жъ е҆ѧ̀, е҆гда̀ где замед̑лит̑.
вси б̂о ѹ҆ неѧ ѻ҆дѣни сꙋть, сꙋгꙋ́ба ѻ҆дѣѧ́нїѧ сътвори мꙋж́ꙋ свое҆мꙋ, ѿ виссо́на же и҆ порфи́ры себѣ ѻ҆дѣа́нїа.
в꙽зо́ренъ быва́етъ въ вра́тѣхъ мꙋж́ь е҆ѧ̀, внегда же а҆ще сѧдетъ въ со́нмищи съ ста́рцы жители землѧ̀·
ѻ҆по́ны сътвори и҆ ѿда́сть въ кꙋплю финикїаномъ, ѻ҆поꙗ҆са́нїѧ же хананѣаномъ.
ѹ҆ста же своѧ ѿврьзе смы́сленно и҆ зако́нно, и҆ чи́нъ нарекова ꙗ҆зы́комъ свои҆мъ.
крѣ́постїю и҆ лѣпото́ю ѻ҆блече́сѧ, и҆ весели́сѧ въ дн҃и послѣднїѧ·
Тѣсны стезѧ до́мꙋ е҆ѧ̀, занѐ бра́шна лѣностива не снѣсть.
и҆ ѹ҆ста своѧ ѿвръзе смы́слено и҆ зако́нно, млс̑҇тынѧ же е҆ѧ възд̑ви́гнꙋ чада е҆ѧ̀ и҆ ѻ҆богатѣша, и҆ мꙋжъ е҆ѧ̀ похвали ю҆̀·
Мно́ги дще́рѧ стѧжа́ша бога́тьство, мно́ги сътвори́ша си́лнаѧ.
ты же преспѣѧ́и превъзнесесѧ над̑ всѣми.
лжа ѹ҆гожде́нїѧ и҆ сꙋетны доброты же́ньски нс̑҇ѣ въ тебѣ.
жена б̂о разꙋмна блажена е҆сть, боꙗ҆́знь же гн҃ю сїѧ да хва́литъ.
дади́те е́и ѿ пло́да ѹ҆сте́нъ е҆ѧ̀, и҆ да хва́литсѧ въ вра́тх̑ѣ мꙋжъ е҆ѧ̀·
Конецъ при́тчамъ соло́монимъ·
и҆́мꙋть в себѣ.
гла́въ, л҃а·