Библия (1581). [24] Екклесиаст

КНИ́ГА Є҆КЛЄСИꙖст̑ СИРЄч̑ ЦРК҃ВНЇИ

ЦР҃Ѧ соло́мона гл҃ы собо́рника сн҃а дв҃два цр҃ѧ і҆и҆л҃ева въ і҆ерс̑҇лі́мѣ·

Глв̑҇а, а҃·

Сꙋ́ета сꙋе́тъствїи, реч̑҇ соборник̑҇ сꙋ́ета сꙋе́т꙽ствїи, всѧческаѧ сꙋ́ета.
чт̂о из̑ѻ҆билїе чл҃кꙋ въ всем̑ трꙋдѣ е҆го е҆же трꙋдит̑сѧ под̑ слн҃чною·

Род̑ минꙋет̑ и҆ ро́дъ прихо́дит̑, а҆ землѧ̀ въ вѣки стоит̑·

И въсходит̑ сл҃нце и҆ въ мѣсто свое влечетъсѧ, сїе въсїѧва́етъ і҆ и҆де́тъ къ ю́гꙋ, ѻ҆бъхо́дитъ къ сѣверꙋ, и҆ ѻ҆бхо́дитъ ѻ҆́крс̑҇тъ.
и҆де́тъ дх҃ъ, и҆ ѻ́крс̑҇тъ е҆го ѻ҆браща́етсѧ дх҃ъ·

Вс̂и пото́цы и҆́дꙋтъ въ мо́ре, и҆ море нѣсть насыща́ѧсѧ·

Но въ мѣсто а́може пото́цы и҆́дꙋтъ, и҆ та́мо тїи сѧ въз꙽вра́ща́ютъ и҆тѝ·

Всѧ̀ словеса̀ трꙋдна, не възможет̑ мꙋжъ гл҃ати и҆ не насы́титсѧ ѻ҆́ко зрѣти, ни и҆спо́лнитсѧ ѹ҆́хо слыша́нїѧ·

Чт̂о бы́вшее то́е бꙋдꙋщемꙋ, и҆ чт̂о сътвореное тое твори́момꙋ·

И҆ нѣсть всѐ но́во под̑ слнч҃ною, и҆же възъгл҃етъ и҆ речетъ.
сїе но́во е҆сть ѹ҆жѐ бы́сть въ вѣцехъ бы́вшихъ прежде на́съ.
нѣсть па́мѧть прьвымъ, и҆ послѣднимъ бы́вшимъ.
нѣсть и҆мъ па́мѧть съ бꙋдꙋщими на послѣде.
а҆зъ собо́рникъ бы́хъ цр҃ь і҆и҆л҃евъ въ і҆ерс̑҇лі́мѣ, въда́хъ срд̑це мое възыска́ти, и҆ съсѣти́ти въ мꙋдрости, ѻ҆ всѣхъ быва́ющихъ под̑ нб҃семъ·

Ꙗ҆́ко попече́нїе лꙋкаво даде б҃ъ сн҃омъ члчс̑҇кимъ пещи́сѧ ѻ҆ немъ.
ви́дѣхъ всѧческа́ѧ сътворе́нїѧ, сътворе́ннаѧ под̑ нб҃семъ.
и҆ с̂е всѧ̀ сꙋть сꙋ́ет꙽ства, і҆ и҆зволе́нїе дх҃а·

Разъвраще́нно не можетъ ѹкраситисѧ, и҆ лише́нїе не мо́жет̑ сѧ съчестѝ.
гл҃ахъ а҆зъ въ срд̑цы моем̑, е҆же гл҃ати сѐ азъ възвеличихсѧ.
приложи́хсѧ мꙋдрости па́че всѣхъ, и҆же бы́ша преже мене въ і҆ерс̑҇ли́мѣ.
и҆ срд̑це мое въдах̑ вѣ́дѣти премꙋдрос̑҇ и҆ разꙋмъ.
и҆ срд̑це мое ви́дѣ много мꙋдрости и҆ ра́зꙋма.
прит̑ча и҆ хи́трости разꙋмх̑ѣ а҆́зъ, ꙗ҆́ко и҆ сѐ е҆сть и҆зволе́нїе дх҃а.
ꙗ҆́ко въ мно́жествѣ мꙋдрости мно́жество ра́зꙋма, и҆ приложи́выисѧ ра́зꙋмꙋ, приложит̑ бо́лѣзнь·

Глв̑҇а, в҃·

Рекохъ а҆зъ въ срд̑цы мое҆мъ, прїиди ѹ҆бо да тѧ и҆скꙋшꙋ въ весе́лїи, и҆ ви́ждь въ бл҃ѕѣ и҆ се бы́сть сїе сꙋ́етъство смѣхꙋ рекохъ подвиже́нїе, и҆ веселїю чт̂о сїе твориши.
и҆ созрѣх꙽ да срд̑це мое ѻ҆с та́витъ ѿ вина̀ пло́ть мою, и҆ срд̑це мое наста́витъ м̂ѧ мꙋдрости.
и҆ еже дръжа́ти въ весе́лїи.
дондеже ви́жꙋ кое бл҃го сн҃омъ чьчс̑҇кимъ, е҆же творѧтъ под̑ слн҃цем̑.
число дн҃їи живота̀ и҆хъ, и҆ възвели́чихъ творе́нїе мое.
създа́хъ ми домы, и҆ насади́хъ виногра́ды, и҆ сътворихъ ѻ҆гра́ды и҆ сады̀.
и҆ насади́х꙽ в нихъ древесъ всѧ́кого плода.
сътворихъ м̂и кꙋпели во́дныѧ, е҆же напаѧти ѿ нихъ прозѧбенїе древес̑҇·

притѧжа́хъ рабъ и҆ рабы́нѧ, и҆ домочадци бы́ша м̂и·

И҆ стѧжа́нїе скота̀ и҆ ста́дъ мно́го ми бы́сть, паче всх̑ѣ бы́вшихъ преже мене въ і҆ерс̑҇ли́мѣ.
и҆ събрах̑ же ми злато и҆ сребро, і҆ и҆мѣнїѧ цр҃ьска и҆ стран̑҇ска.
сътворих̑ же ми пою҆щихъ и҆ пою҆щаѧ, и҆ пи́ща сн҃овъ чл҃чъ, виночръпца и҆ виночръпица.
и҆ възвели́чихсѧ и҆ приложи́хсѧ мꙋдрости паче, всѣхъ бы́вшихъ прежде мене въ і҆ерс̑҇ли́мѣ.
и҆ мꙋдрость моѧ ѹ҆ста́вимисѧ, и҆ все е҆гоже въпроси́ста ѻ҆́чи моѝ и҆ не ѿѧ́хъ ѿ нихъ.
и҆ не възбрани́хъ срд̑цꙋ мое҆мꙋ ѿ всѧ́кого весе́лїѧ.
ꙗ҆́ко срд̑це мое възвесели́сѧ въ всѧ́комъ трꙋдѣ мое҆мъ·

И҆ сїѧ бы́сть ча́сть моѧ ѿ всего трꙋда̑ мое҆го, и҆ призрѣхъ а҆зъ на всѧ̀ творе́нїѧ ꙗ҆́же сътвори́ста рꙋцѣ моѝ, и҆ въ трꙋдѣ в немже трꙋди́хсѧ творити.
и҆ се всѧ̀ сꙋета и҆зволенїе дх҃а.
и҆ нѣсть ѻ҆ ѻ҆би́лїе под̑ слн҃чною.
и призрѣхъ а҆́зъ ви́дѣи мꙋдрость и҆ лес̑҇ и҆ безꙋмїе, ꙗ҆́ко кт̂о чл҃къ и҆же по́идет̑ въ слѣдъ совѣта, всѧ е҆ли́ка же сътворѝ въ немъ.
и҆ видѣхъ а҆зъ ꙗ҆́коже е҆сть и҆зъѻ҆би́лїе мꙋдрости паче безꙋмїѧ, ꙗ҆́ко и҆зъѻ҆би́лїе свѣта паче т꙽мы̀·

Мꙋдраго ѻ҆́чи въ главѣ е҆го, и҆ безꙋмныи въ тмѣ̀ хо́дитъ.
и҆ ѹ҆ви́дѣхъ а́зъ ꙗ҆́ко слꙋча́и слꙋчитсѧ всѣмъ си́мъ.
и҆ рѣхъ а҆зъ въ срд̑ци мое҆мъ, ꙗ҆́ко слꙋчаи безꙋмнаго и҆ мнѣ слꙋчитсѧ.
и҆ въскꙋю ѹ҆мꙋдрихсѧ а҆зъ, тогда лише гл҃ахъ въ срд̑ци мое҆мъ.
чесо ради безꙋмныи ѿ и҆збы́тка гл҃етъ, ꙗ҆ко и҆ се сꙋета.
ꙗ҆́ко нѣсть па́мѧти мꙋдраго съ безꙋмнымъ въ вѣки.
и҆ ꙗ҆ко ѹ҆жѐ въ дни грѧдꙋщаѧ всѧ̀ забве́на бы́ша.
и҆ ка́ко ѹ҆́мретъ мꙋдрыи съ безꙋмнымъ.
и҆ възненави́дѣхъ животъ, ꙗ҆́ко лꙋка́вно мнѣ сътворе́нїе сътворено под̑ слн҃цемъ·

ꙗ҆́ко всѧческа́а сꙋета и҆зволенїе дх҃а.
и҆ възненави́дѣхъ аз̑ всѧческаѧ ми́ра и҆ трꙋдъ мои, е҆гоже а҆зъ трꙋдихъ под̑ слн҃цемъ.
ꙗ҆́ко ѻ҆ставлѧ́ю е҆го чл҃кꙋ бꙋдꙋщемꙋ по мнѣ, и҆ кт̂о вѣсть мꙋдръ ли бꙋдетъ и҆ли безꙋменъ.
и҆ ѻ҆блада́ти ли и҆́мать всѣмъ трꙋдомъ моим̑.
е҆же трꙋди́хсѧ и҆ мꙋдровахъ под̑ слн҃цемъ, и҆ се же сꙋета·

И҆ ѻ҆братихсѧ а҆зъ ѿрещисѧ срд̑цꙋ мое҆мꙋ ѻ҆ всемъ трꙋдѣ, е҆же трꙋдих̑ под̑ слн҃цем̑.
ꙗ҆́ко е҆сть чл҃къ и҆же трꙋдъ е҆го въ мꙋдрости и҆ въ ра́зꙋмѣ и҆ въ мꙋжествѣ·

И҆ чл҃къ иже не трꙋ́дитсѧ ѻ҆ немъ дасть е҆мꙋ ча́сть е҆го, и҆ сїе сꙋ́ета и҆ лꙋка́въство ве́лїе.
ꙗ҆́ко быва́етъ чл҃кꙋ въ всемъ трꙋдѣ е҆го и҆ въ и҆зволе́нїю срд̑ца е҆го, и҆же трꙋжа́е҆тсѧ под̑ слн҃цемъ.
Ꙗ҆́ко вси дн҃и е҆го болезнїи и҆ ꙗ҆рости попече́нїи е҆мꙋ, и҆бо въ нощи не спи́тъ срд̑це е҆го, и҆ сїеж̑ сꙋ́ета е҆сть.
и҆ нѣсть бл҃го чл҃кꙋ н̂о то́кмо ꙗ҆́же ꙗ҆́сть и҆ пїетъ и҆ показа́ти дш҃и свое́и бл҃го въ трꙋде своемъ.
и҆ се же ви́дѣхъ а҆зъ ꙗ҆́ко ѿ рꙋки бж҃їѧ е҆сть.
ꙗ҆́ко кт̂о ꙗ҆́сть и҆ пїетъ ра́звѣ е҆го.
ꙗ҆́ко чл҃кꙋ бл҃гꙋ пред̑ лицемъ е҆го дасть мꙋдрость и҆ ра́зꙋмъ и҆ веселїе.
и҆ съгрѣша́ющемꙋ да́лъ е҆сть попече́нїе поитѝ и҆ събра́ти, е҆же да́ти бл҃гомꙋ пред̑ лицемъ бж҃їимъ, ꙗ҆́коже и҆ се сꙋ́ета и҆зволе́нїе дх҃а·

Глв̑҇а, г҃·

Всѣмъ годъ и҆ времѧ всѧ́кои ве́щи под̑ слн҃чьною.
вре́мѧ роди́ти, и҆ вре́мѧ ѹ҆мрѣти.
времѧ сади́ти, и҆ времѧ растръѕа́ти сажд̑еное.
времѧ ѹ҆би́ти, и҆ времѧ цѣли́ти.
и҆ времѧ раз꙽дрꙋшити, и҆ созда́ти.
вре́мѧ пла́катисѧ, и҆ времѧ смѣѧ́тисѧ.
времѧ рыда́ти, и҆ времѧ ликова́ти.
времѧ раскида́ти ка́менїе, и҆ времѧ събра́ти.
времѧ ѻ҆дѣѧ́тїѧ, и҆ времѧ тръпѣти ѿ ѻ҆скꙋдѣнїѧ.
времѧ възыска́ти, и҆ времѧ погꙋби́ти.
времѧ храни́ти и҆ времѧ и҆зѧ́ти.
времѧ раздра́ти и҆ времѧ съши́ти.
времѧ молча́ти и҆ времѧ гл҃ати.
времѧ възлюби́ти и҆ времѧ ненави́дѣти.
времѧ бра́ни, и҆ времѧ ми́ра·

Чт̂о и҆зъѻ҆билїе творѧ́щаго в ни́х же спѣшит̑.
ви́дѣхъ попеченїе всѧческое е҆же да́сть б҃ъ сн҃омъ чл҃ческим̑, е҆же пещисѧ в нем꙽, всѧческаѧ ꙗ҆́же сътвори до́бры сꙋть во времѧ е҆го·

И҆б̂о всѧческаѧ вѣковъ далъ е҆сть въ срд̑це и҆хъ.
ꙗ҆́ко не ѻ҆брѧ́щетъ чл҃къ сътворенїѧ ꙗ҆́же сътворѝ б҃ъ ѿ нача́ла и҆ до конца·

Разꙋмх̑ѣ ꙗ҆́ко нѣсть бл҃го в ни́хъ, н̂о токмо е҆же весели́тисѧ, и҆ е҆же творити бл҃го въ животѣ своем̑·

И҆бо всѧкъ чл҃къ и҆же пїет̑ и҆ ꙗ҆́сть, ви́дитъ бл҃гое во всемъ трꙋдѣ своем̑, се даѧ́нїе бж҃їе е҆сть·

Разꙋмѣхъ ꙗ҆́ко всѧ̀ е҆ли́ка сътвори б҃ъ, сїѧ бꙋдꙋтъ въ вѣкъ.
къ тѣмъ нѣсть приложи́ти, и҆ ѿ сихъ нѣсть ѹ҆таи҆ти.
и҆ б҃ъ сътвори да ѹ҆боѧ́тьсѧ ѿ лица е҆го, бы́вше ѹ҆же е҆сть.
и҆ е҆ли́коже е҆сть быти и҆ ѹ҆же быша, и҆ б҃ъ възы́щетъ гони́маго·

И҆ е҆щѐ ви́дѣхъ под̑ слн҃цемъ мѣсто сꙋ́дное, т̂ꙋ нечести́выи.
и҆ мѣсто правед̑но т̂ꙋ бл҃гочестивыи·

И҆ рѣхъ а҆зъ въ срд̑цы мое҆мъ, съ правед̑нымъ и҆ съ нечести́вымъ сꙋди́тъ б҃ъ.
и҆ ꙗ҆́ко времѧ всѧ́кои ве́щи, и҆ на всѧкомъ сътворе́нїю.
т̂ꙋ рѣхъ а҆зъ въ срд̑цы мое҆мъ ѻ҆ гл҃анїи сн҃овъ чл҃ческихъ, ꙗ҆́ко рассꙋди́тъ и҆хъ б҃ъ.
и҆ е҆же показати ꙗ҆́ко сїи ско́ти сꙋть, и҆б̂о и҆ тм̑ѣ ꙗ҆́ко слꙋчаи сн҃овъ чл҃ческъ.
и҆ слꙋча́и скотьскїи, слꙋча́и в них̑.
ꙗ҆ко смр҃ть сего, тако и҆ смр҃ть сего и҆ дх҃ъ во всх̑ѣ.
и҆ что и҆зли́ше и҆́мат̑ чл҃къ паче скота̀ ничтож̑, ꙗ҆́ко всѧческаѧ сꙋета, вс̂ѧ и҆дт̑ꙋ въ е҆ді́но мѣсто.
вс̂ѧ быша ѿ перьсти и҆ вс̂и въ прьсть възвращают̑сѧ.
и҆ кт̂о вѣсть дх҃ъ сн҃овъ чл҃ческихъ, а҆ще въсходи́ти е҆мꙋ го́рѣ.
и҆ дх҃ъ ско́тьскїи е҆же съходи́ти е҆мꙋ до́лꙋ въ землю.
и҆ ви́дх̑ѣ ꙗ҆́ко нѣсть бл҃го, н̂о токмо е҆же възвесели́тсѧ чл҃къ въ творенїих̑ е҆го, ꙗ҆́ко сїѧ ча́сть е҆го.
ꙗ҆́ко кто приведет̑ е҆го ви́дѣти в ни́хъ, и҆же а҆ще бꙋдет̑ чт̂о с ними·

Глв̑҇а, д҃·

И ѻ҆братихсѧ а҆зъ и҆ ви́дѣхъ вс̂ѧ ѻ҆клевета́нныѧ быва́ющаѧ под̑ слн҃цемъ·

И҆ с̂е сле́зы ѻ҆клевета́нныхъ, и҆ нѣсть им̑ ѹ҆тѣша́ющаго.
и҆ ѿ рꙋкъ ѻ҆бидѧ́щих̑ и҆хъ нѣсть крѣпость.
и҆ похва́лихъ всѣхъ ѹ҆мръшихъ, паче живыхъ.
е҆ли́коже и҆хъ живи сꙋть доселѣ.
и҆ бл҃го паче ѻ҆́бою се́ю, и҆же кт̂о е҆ще не бы́сть і҆ и́же не ви́дѣ сътворенїа лꙋка́вого сътвореннаго под̑ слн҃цемъ·

И҆ видх̑ѣ а҆зъ весь трꙋдъ.
и҆ всѧко мꙋж́ество сътворенаго.
ꙗ҆́ко сътворенїѧ мꙋжеви ѿ подрꙋга свое҆го.
и҆ се сꙋе҆та и҆зволенїе дх҃а·

Безꙋмныи ѻ҆бъѧт̑ рꙋцѣ свои и снѣсть плоть свою̀.
бл҃го е҆сть и҆спол꙽ненїе горьсти покоѧ, па́че и҆сполненїа двою гор꙽стїю трꙋда, і҆ и҆зволенїе дх҃а·

И҆ ѻ҆братих̑сѧ а҆зъ и҆ ви́дѣхъ сꙋет꙽ство по слн҃цем̑.
е҆сть е҆ді́нъ и нѣсть вторыи, ни сн҃ъ же н̂и братъ нѣсть е҆мꙋ.
и҆ нѣсть кон꙽ца всемꙋ трꙋдꙋ е҆го.
ниже ѻ҆́ко е҆го не насыща́етсѧ богат̑ства.
и҆ комꙋ̀ аз̑ трꙋждаюсѧ, и҆ лиша́ю дш҃ꙋ мою ѿ бл҃гостыни.
и҆ се же сꙋ́ета и҆ попеченїе лꙋка́вно е҆сть.
бл҃га дв̂а паче е҆ді́наго, и҆́маже е҆сть м꙽зда бл҃га въ трꙋдѣ их̑.
ꙗ҆́ко а҆ще падетсѧ е҆ді́нъ ею̀ въздви́гнет̑ дрꙋгїи прича́стника свое҆го·

и҆ го́ре томꙋ е҆ді́номꙋ е҆гд̑а сѧ падетъ, и҆ не бꙋдет̑ вто́рого въздви́гнꙋти е҆го·

И҆ а́ще ѹ҆снета дв̂а тепло и҆́ма бꙋдетъ, а҆ е҆ді́нъ ка́ко съгрѣе́тсѧ·

И҆ а́ще ѹ҆крѣпитсѧ е҆ді́нъ, дв̂а станета противꙋ е҆мꙋ̀.
и вервь треплены не скоро растор̑҇гнет̑сѧ<.>

Бл҃гъ рабъ нищъ и҆ мꙋдръ, пач̑҇ стара цр҃ѧ и҆ безꙋмна.
и҆же не разꙋмѣ вни́мати е҆щѐ.
ꙗ҆́ко и҆з домꙋ ю҆́жникъ и҆зыидетъ црс̑҇твовати, ꙗ҆́ко и҆ въ црс̑҇твѣ е҆го родитсѧ ни́щъ·

И҆ ви́дѣхъ вс̂ѧ живꙋщаѧ, и҆ ходѧ́щаѧ под̑ слн҃це съ ю҆́нымъ вторы́мъ.
и҆же въста́нетъ в него мѣсто.
и҆ нѣсть попеченїѧ всѣмъ лю́демъ, всѣмъ и҆же пред̑ ни́ми быша.
и҆б̂о послд̑ѣнїи не възвеселитсѧ ѻ҆ немъ·

ꙗ҆́ко и с̂е сꙋе́та і҆ и҆зволенїе дх҃а·

и҆ съхрани но́гꙋ свою е҆гда̀ а҆ще и́деши въ до́мъ бж҃їи и҆ бли́зъ ѹ҆слы́шати, паче да́нїи безꙋмныхъ жрътва твоа·

ꙗ҆́ко не сꙋть повѣда́ющїи твори́ти бл҃гое·

Глв̑҇а, е҃·

Не потщасѧ ѹ҆сты свои҆ми, и҆ срд̑це твое да не ѹ҆скоритъ и҆знести сло́во пред̑ лицемъ бж҃їимъ·

Ꙗ҆́ко б҃ъ на нб҃си го́рѣ и҆ т̂ы на землѝ до́лꙋ·

ѻ҆ семъ да бꙋ́дꙋтъ словеса твоа ма́ла.
ꙗ҆́ко прихо́дитъ со́нїе въ мно́жествѣ и҆скꙋса, и҆ гла́съ безꙋмнаго въ мно́жествѣ словесъ·

Ꙗ҆́коже а҆ще ѻ҆бѣща́еши ѻ҆бѣтъ къ б҃ꙋ, не ѹ҆медли ѿда́ти е҆̀·

Ꙗ҆́ко нѣсть хотѣ́нїе въ безꙋмїе.
т̂ы ѹ҆бо е҆ли́ко ѻ҆бѣщавсѧ ѿда́жд̑ь, бл҃го е҆же не ѻ҆бѣщаватисѧ нежели ѻ҆бѣща́вшисѧ не ѿда́ти·

Не да́и же ѹ҆стенъ своих̑ съгрѣши́ти плоти свое҆и, да не рече́ши пред̑ лицемъ бж҃їи҆мъ ꙗ҆́ко неви́дима е҆сть·

да не прогнѣва́етсѧ б҃ъ ѻ҆ гла́сѣ твое҆мъ, и҆ растлитъ творе́нїѧ рꙋ́къ твоих̑·

ꙗ҆́коже въ мно́жествѣ со́нїи и҆ сꙋетъстви и҆ словесъ мно́гъ·

Ты ѹ҆бо б҃а бо́исѧ.
а҆ще ѻ҆би́дꙋ ни́щаго и расхище́нїе сꙋда пра́вед̑наго ви́диши въ стра́нѣ, не диви́сѧ ѻ҆ вещи.
ꙗ҆́ко высо́кїи над̑ высо́кимъ съхрани́тсѧ, и выситсѧ на ни́хъ и҆зоѻ҆би́лїе землѧ̀·

над̑ всѧ́кою страною е҆сть цр҃ь съдѣѧн̑҇·

любѧ́и сребро̀ не насыти́тсѧ сребра̀.
и҆ кт̂о възлюби въ мно́жествѣ и҆хъ.
пло́ды, и҆ се же сꙋета.
въ мно́жествѣ бл҃госты́нѧ, ѹ҆мно́жишасѧ ꙗ҆дꙋщїи ю҆̀·

И҆ кое мꙋжество е҆же ѿ сеѧ ꙗ҆́ко нача́ло ви́дѣти ѻ҆чи́ма е҆го·

Со́нъ сла́докъ рабꙋ а҆ще ма́ло и҆ли мно́го снѣсть, и҆ насы́щ꙽шемꙋсѧ богатѣти.
ꙗ҆́ко нѣсть ѻ҆ставлѧ́ѧи е҆го поспа́ти·

е҆сть недꙋ́гъ е҆гоже ви́дѣхъ под̑ слн҃цем̑.
бога́тьство храни́мо ѿ него въ зло́бꙋ е҆мꙋ, и҆ поги́бнетъ бога́тьство ѻ҆́но в попече́нїи лꙋка́внѣ.
и҆ роди сн҃а, и҆ нѣсть в рꙋцѣ ничтоже·

Ꙗ҆́коже и҆зы́иде ѿ чре́ва мт҃ри свое҆ѧ на́гъ възвраща́етсѧ и҆ти ꙗ҆́коже и҆ прїиде, и҆ ничтоже прїиметъ въ трꙋдѣ своем̑·

да по́идетъ въ рꙋцѣ е҆го и҆ се же ѕо́лъ недꙋ́гъ.
ꙗ҆́коже б̂о прїидетъ та́ко ѿи҆детъ, и҆ чт̂о и҆зоѻ҆би́лїе е҆го, и҆же трꙋдитъ на вѣтеръ.
и҆б̂о вс̂и дн҃и е҆го въ тмѣ и҆ въ пла́чи, и҆ въ ꙗ҆́рости мно́ѕѣ и҆ в недꙋзѣ и҆ въ гнѣ́вѣ·

Се ви́дѣхъ а҆зъ бл҃гое е҆же е҆сть добро е҆же ꙗ҆́сти и҆ е҆же пи́ти.
и҆ е҆же ви́дѣти блгс̑҇ты́ню въ все́м꙽ трꙋдѣ е҆гоже и҆ спѣши́тъ под̑ слн҃цемъ число̀ дн҃їи живота̀ е҆го, и҆хже да́лъ е҆сть е҆мꙋ б҃ъ, ꙗ҆ко сїа ча́сть е҆го е҆сть.
и҆б̂о всѧ́къ чл҃къ е҆же да́лъ е҆сть е҆мꙋ б҃ъ бога́тьство и҆мѣнїе и҆ вла́сть на не́мъ и҆ ꙗ҆́сти ѿ них̑, и҆ прїѧ́ти ча́сть е҆го и҆ възвесели́тисѧ ѻ҆ трꙋдѣ свое҆мъ·

Сїе даѧ́нїе бж҃їе е҆сть ꙗ҆́ко не мно́ги помѧнꙋти дн҃и живота свое҆го.
ꙗ҆́ко б҃ъ печа́ль е҆го въ весе́лїи срд̑ца е҆го·

Глв̑҇а, ѕ҃·

Єсть лꙋкав꙽ствїе е҆же ви́дх̑ѣ под̑ слн҃цемъ, и҆ мно́го е҆сть ѿ чл҃ка·

Мꙋж́ъ и҆же да́сть е҆мꙋ б҃ъ бога́т꙽ство і҆ и҆мѣнїе и҆ сла́вꙋ·

И҆ нѣсть лиша́ѧи дш҃и е҆го ѿ всѣхъ их̑же въжделѣетъ·

И҆ не да́сть е҆мꙋ б҃ъ вла́сти ѿ него ꙗ҆́сти ꙗ҆́ко чюж̑ мꙋжъ ꙗ҆́сти и҆́мать ѿ него·

и҆ се же сꙋета и҆ недꙋгъ ѕо́лъ е҆сть.
а҆ще пребꙋдетъ мꙋжъ, р҃, лѣтъ, и҆ мно́га поживетъ, и҆ мно́ѕи бꙋдт̑ꙋ дн҃їе лѣтъ е҆го.
и҆ дш҃а е҆го не насытит̑сѧ ѿ бл҃госты́нѧ и҆ погребе́нїѧ не быс̑҇ е҆мꙋ·

и҆ рѣхъ бл҃га паче е҆го и҆зверга, ꙗ҆́ко въ сꙋетѣ прїиде и҆ въ тмꙋ и҆дет̑, и҆ въ тмѣ и҆мѧ е҆го покрыетсѧ.
и҆ слн҃ца же не ви́дѣ ни́же разꙋмѣ поко́ѧ·

Сїе па́че сего и҆ житъ ты́сѧща лт̑ѣ по всемꙋ, блгс̑҇тынѣ не ви́дѣ.
е҆да̀ не въ е҆ді́но л̂и мѣсто вс̂ѧ и҆дт̑ꙋ.
ве́сь трꙋдъ чл҃чъ въ ѹ҆ста е҆го, и҆ дш҃а же е҆го не и҆спо́лнитсѧ·

ꙗ҆коже и҆зъѻ҆билїе чл҃кꙋ мꙋдромꙋ па́че безꙋмнаго, поне́же нищъ ви́дѣ ходи́ти проти́вꙋ животꙋ.
бл҃го видѣнїе ѻ҆́чїю па́че ходѧ́щаго дш҃ею.
и҆ с̂е сꙋе҆т꙽ствїе изволенїе дх҃а·

И҆же чт̂о бысть ѹ҆жѐ и҆меновасѧ и҆мѧ е҆го, и҆ познасѧ е҆же е҆сть чл҃къ, и҆ не возмо́жетъ сꙋди́тисѧ съ крѣпча́ишимъ па́че себѐ.
ꙗ҆́ко сꙋть словеса̀ мно́га ѹ҆множа́юще сꙋ́етꙋ·

Глв̑҇а, з҃·

Єже чт̂о и҆зли́ше чл҃кꙋ, ꙗ҆́ко кт̂о вѣсть чт̂о бл҃го чл҃кꙋ въ животѣ̀ е҆го.
число̀ дн҃їи живота̀ сꙋ́етьства е҆го, и҆ сътвори ѧ҆̀ въ стѣ́нѣ.
ꙗ҆ко кт̂о възвѣститъ чл҃кꙋ чт̂о бꙋдетъ по немъ под̑ слн҃цем̑.
бл҃го и҆мѧ па́че е҆ле́ѧ бл҃га, и҆ дн҃ь смр҃тныи пач̑҇ дн҃ѧ бытїѧ е҆го·

Бл҃го ходи́ти въ до́мъ пла́ча нежели ходи́ти въ дом̑ пи́ра, поне́же сїе конецъ всѧ́комꙋ чл҃кꙋ, и҆ живыи да́сть бл҃го въ срд̑це е҆го.
бл҃га ꙗ҆́рость па́че смѣ́ха, ꙗ҆́ко въ ѕлобѣ лица̀ ѹ҆блажи́тсѧ срд̑це.
срд̑це мꙋ́дрыхъ в домꙋ̀ пла́ча, и҆ срд̑це безꙋмныхъ въ домꙋ̀ веселїѧ.
бл҃го е҆же слы́шати запрещенїе премꙋдра, па́че мꙋжа слы́шащаго пѣснь безꙋмныхъ.
Ꙗ҆́коже б̂о гла́съ тернїѧ под̑ котлом̑, та́ко смѣхъ безꙋмнаг̑҇, и҆ с̂е же сꙋета·

Ꙗ҆́коже клевета льститъ мꙋ́драго, и҆ раз̑слаблѧ́етъ срд̑це бл҃город̑ствїѧ е҆го.
бл҃га послд̑ѣнѧѧ словесъ па́че нача́ла е҆го·

Бл҃гъ тръпели́в꙽, па́че высоких̑ дх҃ом̑.
не тщисѧ въ дꙋсѣ свое҆мъ ꙗ҆ри́тисѧ, ꙗ҆́ко ꙗ҆́рость в нѣдрехъ безꙋмныхъ почива́етъ·
да не речеши чт̂о быс̑҇ ꙗ҆́ко дн҃їе древнїи бѣша бла́ѕи па́че сихъ, ꙗ҆́ко не въ мꙋдрости вопросил̑҇ е҆си ѻ҆ сем̑·

Бл҃га мꙋдрость съ раздѣленїемъ по жре́бїю, і҆ и҆зъѻ҆билїе ви́дѧщимъ слн҃це.
ꙗ҆́ко въ стѣнѣ еѧ̀ мꙋдрость, ꙗ҆́ко стѣнь сребра̀.
и҆зъѻ҆билїе ра́зꙋмꙋ премꙋдрость , премꙋдрость ѻ҆живлѧ́етъ и҆же ѹ҆ неѧ̀·

Ви́ждь сътворенїѧ бж҃їѧ, ꙗ҆́ко кт̂о мо́жетъ ѹ҆краси́ти е҆же а҆ще б҃ъ разъвратит̑.
въ дн҃ь бл҃гостынѧ е҆го живи въ бла́ѕѣ, и҆ ви́жд̑ь въ дн҃ь зло́бы.
вижд̑ь съ си́мъ съ гласи сихъ е҆же сътвори б҃ъ ѻ҆ гл҃ѣх꙽.
да не ѻ҆брѧ́щетъ чл҃къ за не́ю ничто́же.
всѧческаѧ ви́дѣхъ во́ дн҃и сꙋе́тьствїѧ мое҆го, е҆сть пра́вед̑ныи погиба́ѧи въ свое́и правдѣ, и҆ е҆сть нечьстивыи пребыва́ѧи въ свое́и ѕло́бѣ·

Не бꙋди правди́въ вельми, ни мꙋдрисѧ и҆зъѻ҆билне, е҆да̀ когда из̑ѹ҆мѣе́шисѧ.
и҆ не бесчествꙋи мно́го, и҆ не бꙋ́ди жесток̑҇, да не ѹ҆́мреши не въ времѧ свое.
бл҃го т̂и е҆сть съдръжа́тисѧ ѻ҆ сем̑, и҆ ѿ сего ѹ҆бо не ѻ҆скверни рꙋкѝ свое́а, ꙗ҆́ко боа́щимсѧ б҃а и҆зыидꙋтъ вс̂ѧ·

Премꙋдрость помо́жетъ мꙋ́дромꙋ, паче десѧти ѻ҆блада́ющих̑ во́ градѣ.
ꙗ҆́ко нѣсть чл҃къ пра́веденъ на землѝ, и҆же сътворит̑ бл҃гое и҆ не съгрѣшит̑·

И҆ всѧ̀ ѹ҆бо словеса и҆́хже възгл҃ютъ нечетивїи и҆ не вложи срд̑ца свое҆го, да не ѹ҆слы́шиши раба̀ свое҆го кленꙋща тебе.
ꙗ҆́ко многа́жды слꙋкꙋ́ют꙽ тобо́ю ѻ҆бхожд̑енїемъ ѻ҆злобит̑ мно́гим̑ срд̑це твое, ꙗ҆́ко да и҆ т̂ы клѧлъ е҆си дрꙋгїѧ мно́гїѧ.
вс̂ѧ сїѧ и҆скꙋсихъ въ мꙋдрости, и҆ рѣхъ ѹ҆мꙋдрꙋсѧ и҆ сїѧ ѹ҆дали́сѧ ѿ мене.
далече паче нежели бѣа́ше, и҆ бездны глꙋбинꙋ кт̂о ѻ҆брѧ́щетъ ю҆̀.
и҆ ѻ҆крꙋжихъ а҆з꙽ и҆ срд̑це мое е҆же разꙋмѣти, е҆же съсѣтити и҆ е҆же възыска́ти мꙋдрости и҆ ра́зꙋма.
и҆ е҆же разꙋмѣти нечьстиваго , безꙋмїе и҆ ѻ҆жесточенїе и҆ лесть.
и҆ ѻ҆брѣта́ю а҆зъ женꙋ гор꙽ча́ишꙋ паче смр҃ти, ꙗ҆коже е҆сть ловитва, и҆ сѣти срд̑ца еѧ̀ и҆ съѹ́зъ в꙽ рꙋкꙋ еѧ̀.
бл҃гїи пред̑ лицемъ бж҃їим̑ и҆звинет̑сѧ ѿ неѧ, и҆ съгрѣша́ѧи ѻ҆бъѧт̑ бꙋдетъ ѿ неѧ·

Се сїѧ ѻ҆брѣтохъ рече соборникъ, е҆ді́нꙋ е҆ді́нои и҆же ѻ҆брѣсти по́мыслъ, е҆гоже възыска дш҃а моа, и҆ не ѻ҆брѣтохъ.
и҆ чл҃ка е҆ді́наго ѿ тысꙋщи ѻ҆брѣтохъ, и҆ жены въ всѣхъ сихъ не ѻ҆брѣтох̑.
ѻ҆баче с̂е сїе ѻ҆брѣтохъ, е҆же сътвори б҃ъ чл҃комъ правымъ.
и҆ сїи възыскаша помы́словъ мно́гихъ.
кт̂о вѣдѣ мꙋдрость, и҆ кт̂о вѣсть разрѣшенїе глаго́ла·

Глв̑҇а, и҃·

Мꙋ́дрость чл҃кꙋ просвѣща́ет꙽ лице е҆го, и҆ безъстꙋдныи възненави́дѣнъ бꙋ́детъ лицемъ свои҆мъ·

Ѹ҆ста̀ цр҃ѧ съхрани, и҆ ѻ҆ словесехъ клѧтвы бж҃їѧ не тщисѧ, ѿ лица бо е҆го по́идеши, не ста́ни въ словесѣ лꙋкавнѣ.
ꙗ҆́ко вс̂ѧ е҆же а́ще въсхо́щет̑ сътворитъ, ꙗ҆коже цр҃ь съвладѣ, и҆ кт̂о речетъ е҆мꙋ чт̂о тво́риши.
хранѧи за́повѣдь, не ѹ҆вѣсть гл҃а лꙋкавна·

И҆ времѧ сꙋда вѣсть срд̑це мꙋдраго.
ꙗко всѧкои ве́щи е҆сть вре́мѧ сꙋ́да, ꙗ҆ко ра́зꙋмъ чл҃ка мно́гъ е҆сть на нем̑.
ꙗ҆́ко нѣсть вѣдѧ́щаго чт̂о бꙋ́дꙋщее, и҆ ꙗ҆́коже бꙋдетъ и҆ кт̂о възвѣстит̑ е҆̀.
нѣсть чл҃ка владꙋщаго въ дꙋсѣ возбрани́ти съ дх҃ом̑, и҆ нѣсть владꙋщаго въ дн҃ь смр҃ти.
и҆ нѣсть посла въ дн҃ь бра́ни, и҆ не сп҃сет̑ безъчестїе сꙋщаго в не́и.
и҆ вс̂е сїе ви́дѣх꙽, и҆ въдах̑ срд̑це мое въ всѐ сътворенїе еже сътворено е҆сть под̑ слн҃цем̑.
вс̂ѧ е҆лика ѻ҆блада́лъ е҆сть чл҃къ въ чл҃цѣ е҆же ѻ҆злоби́ти е҆го·

И҆ тогда̀ ви́дѣх꙽ нечьсти́выѧ въ гробы несомы, и҆ ѿ ст҃ого и҆доша и҆ похва́лиша въ градѣ, ꙗ҆́ко сїе сътвори́ша.
и҆ се же сꙋета, ꙗ҆́ко нѣсть и҆збавленїѧ быва́ющаго ѿ творѧ́щихъ лꙋкавое въскорѣ, сего ради ѹ҆вѣрисѧ срд̑це сн҃овъ чл҃ческихъ в нихъ е҆же сътворити лꙋка́вое.
и҆же съгрѣши сътворилъ е҆сть лꙋкавое, ѿтолѣ и҆ ѿ долготы их̑.
и҆б̂о и҆ ви́дѣхъ а҆зъ ꙗ҆́ко бꙋдетъ бл҃го боа́щим̑сѧ б҃а, да боѧт̑сѧ ѿ лица е҆го.
и҆ не бꙋдет̑ бл҃го нечьстивомꙋ, и҆ не предолжатъ дн҃їи въ сѣни, и҆же нѣсть боѧ́исѧ ѿ лица бж҃їѧ·

Є҆сть сꙋе́та ꙗ҆́же сътворена е҆сть на землѝ.
ꙗ҆́ко сꙋть правед̑нїи и҆ ꙗ҆ко достиѕа́етъ на них̑ ꙗ҆ко сътворенїе нечестивыхъ·

и҆ сꙋть нечестивїи ꙗ҆́ко достиѕа́етъ на нихъ ꙗ҆́ко сътворенїе правед̑ных꙽, рѣхъ ꙗ҆́ко и҆ с̂е сꙋета.
и҆ похвалих̑ азъ съ веселїемъ, ꙗ҆́ко нѣсть бл҃го чл҃кꙋ под̑ слн҃цемъ н̂о токмо е҆же ꙗ҆́сти и҆ пити и е҆же веселитисѧ.
и҆ т̂о прибытокъ е҆го трꙋдови, дн҃їе живота̀ е҆го их̑же далъ е҆сть е҆мꙋ б҃ъ под̑ слн҃цем̑.
в них же дахъ срд̑це мое разꙋмѣти мꙋдрость, и҆ е҆же вѣдѣти попеченїе сътвореное на́ земли·

И҆ во дн҃и и҆ в но́щи сна во ѻ́чїю свое́ю нѣсть видѧ́и·

и вѣдѣхъ вс̂ѧ сътворенїѧ бж҃їѧ ꙗ҆ко не мо́жетъ чл҃къ и҆зъѻ҆брѣсти, съ сотворенїемъ сътворе́номъ подъ слн҃цемъ·

Є҆лико а҆ще трꙋ́дитсѧ чл҃къ ѻ҆брѣсти, и҆ не ѻ҆брѧ́щетъ.
е҆ли́коже а҆ще речет̑ мд̑ꙋрыи разꙋмѣти, и҆ не возмо́жетъ ѻ҆брѣсти.
ꙗ҆́ко вс̂е сїе вдахъ въ срд̑це мое, и҆ срд̑це мое вс̂е сїе вѣдѣ·

Глв̑҇а, ѳ҃·

Ꙗко правед̑нїи и҆ мꙋдрїи, и҆ дѣла́нїѧ и҆хъ въ рꙋкꙋ бж҃їю.
и҆ любовъ же и҆ нена́висть нѣсть чл҃къ видѧ́и вс̂ѧ, пред̑ лицемъ и҆хъ сꙋе́та.
въ всѣхъ слꙋча́и правед̑номꙋ и҆ нечьстивомꙋ, бл҃гомꙋ и҆ зломꙋ, и҆ чи́стомꙋ и҆ нечи́стомꙋ, и҆ жрꙋщемꙋ, и҆ не жрꙋщемꙋ.
ꙗ҆́коже бл҃гыи и҆ ꙗ҆́ко съгрѣша́ѧи, и҆ ꙗ҆коже кленыисѧ и҆ ꙗ҆кож̑ боѧ́исѧ клѧ́твы·

Се лꙋкаво въ всем̑ твореномъ под̑ слн҃цемъ, ꙗ҆́ко слꙋча́и всѣхъ.
и҆ срд̑це сн҃въ чл҃ческихъ и҆спол̑҇нисѧ лꙋкав꙽ствїа, и҆ гордость и҆ лесть въ срд̑цехъ и҆хъ и҆ въ животѣ их̑, и҆ по нихъ къ мр҃твымъ·

Ꙗ҆́ко кт̂о и҆же причаща́етсѧ къ всѣмъ живымъ, е҆сть надежда.
ꙗ҆́ко песъ живъ сїи бл҃гъ паче льва мр҃тва.
Ꙗ҆́ко живїи разꙋмѣют̑ ꙗ҆́ко ѹ́мрꙋтъ, мр҃твїи же не сꙋть вѣдꙋщеи ничто́же, и҆ ктомꙋ нѣсть и҆мъ м꙽зды, ꙗ҆́ко забвена е҆сть памѧть и҆хъ.
и҆ любовь их̑ и҆ не́нависть и҆хъ и҆ рвенїе их̑ ѹ҆жѐ поги́бе, и҆ части нѣсть и҆мъ въ вѣки, въ всем̑ творенїи под̑ слн҃цем̑·

Прїиди и҆ ꙗ҆́жъ въ веселїи хлѣбъ свои, и҆ пїи во бла́ѕѣ срд̑цы вино̀ свое, ꙗ҆ко ѹ҆же бл҃говоли б҃ъ творенїѧ твоа.
во всѧко времѧ да сꙋть ризы твоѧ бѣлы, и҆ е҆ле́и на главѣ твое́и да не ли́шитсѧ·

Ви́жд̑ь живот̑ съ жено́ю ю҆же возлюбилъ е҆си, въ всѧ̀ дн҃и живота̀ ю҆́ности твое́а.
да́ннаа т̂и под̑ слн҃цем̑, вс̂ѧ дн҃и сꙋе́тьствїѧ твое҆го.
ꙗ҆́ко с̂е часть твоѧ̀ въ животѣ твоем̑, и҆ въ трꙋдѣ твоем̑ и҆́мже т̂ы трꙋди́сѧ под̑ слн҃цем̑·

Вс̂ѧ е҆ли́ка ѻ҆брѧ́щет̑ рꙋка̀ твоа сътворити ꙗ҆́ко си́ла твоѧ сътвори.
ꙗ҆́ко нѣсть сътворенїе и҆ помышленїе и҆ ра́зꙋмъ и҆ мꙋдрость во а́дѣ, а҆́може т̂ы и҆деши тамо·

И҆ ѻ҆братих̑сѧ и҆ ви́дѣхъ под̑ слн҃цемъ, ꙗ҆́ко си́мъ легкимъ теченїе и҆ симъ си́лнымъ бра́нь, и҆ ѹ҆бо семꙋ мꙋдромꙋ хлѣбъ, и҆ симъ б̂о разꙋмнымъ бога́тьство, и҆ симъ б̂о вѣ́дꙋщимъ блгд̑ть, ꙗ҆́ко времѧ и҆ слꙋча́и слꙋчитсѧ всѣмъ симъ.
ꙗ҆́ко ѹ҆бо не разꙋмѣ чл҃къ времени своег̑҇, ꙗ҆́ко ры́бы ѹ҆ловлѧ́емы въ мрежи ѕл̂ѣ и҆ ꙗ҆́ко птица ѹ҆ловлѧ́емы в сѣти, и҆ ꙗ҆ко сїи ѹ҆ловлѧ́емы сн҃ы чл҃ческїѧ сꙋть въ времѧ лꙋкаво, внегда̀ нападетъ на́ нѧ внеза́пꙋ·

И҆ сїю же мꙋдрость ви́дѣхъ под̑ слн҃цемъ, и҆ вели́къ е҆сть ко мнѣ град̑ ма́лъ и҆ мꙋжїи в немъ мало, прїидетъ на нѧ цр҃ь вели́къ и҆ ѻ́крс̑҇тъ ѻ҆блѧ́же, и҆ съдѣла́етъ ѻ҆ нем꙽ ѻ҆гра́ды ве́лїѧ.
и҆ ѻ҆брѣте же в немъ мꙋжа ни́ща и҆ мꙋдра, и҆ се́и сп҃сетъ град̑ мꙋдростїю свое́ю, и҆ чл҃къ не помѧнове́нъ е҆сть съ мꙋжем̑ ни́щимъ ѻ҆ немъ·

И҆ рѣхъ а҆зъ бл҃га мꙋдрость паче си́лы.
и҆ мꙋдрость ни́щаго ѹ҆ничижена, и҆ словеса̀ е҆го не сꙋть послꙋша́ема·

Словеса мꙋдрых̑ въ покоѝ слы́шат̑сѧ, паче клича ѻ҆блада́ющих̑ въ безꙋмїи·

Бл҃га мꙋдрость паче сосꙋдъ ратиых̑, и҆ съгрѣша́ѧи е҆ді́нъ погꙋбит̑ блгс̑҇тыню мно́гꙋ·

Глв̑҇а, і҃·

Мꙋ́хи ѹ҆мръшїи съгноѧ́ют꙽ е҆ле́ѧ сладость.
честнѣи ма́ло мꙋдрости, па́че сла́вы безꙋмїѧ вели́ка.
срд̑це мꙋ́драго ѻ҆деснꙋ́ю е҆го, а҆ срд̑це безꙋмнаго ѻ҆шꙋ́юю е҆го·

И́ въ пꙋтьж̑ безꙋмныи ꙗ҆́ко и҆́детъ, срд̑це е҆го лиша́етсѧ и҆ ꙗ҆́же помышлѧ́етъ, вс̂ѧ безꙋмна сꙋть·

А҆ще дх҃ъ владѣю҆щаго възыидетъ на́ тѧ, мѣста свое҆го не ѻ҆ста́ви, ꙗ҆́ко и҆сцѣленїе ѹ҆ста́витъ грѣхи велики·

Є҆сть лꙋкав꙽ство е҆же ви́дѣхъ под̑ слн҃цемъ, е҆же невольно и҆зыиде ѿ лица владѣю҆щаго·

данъ безꙋмныи на высотах̑ великихъ, и҆ богатїи въ смиренных̑ сѧдꙋтъ·

Ви́дѣхъ рабы̀ на конех̑, и҆ кнѧѕи идꙋщи ꙗ҆́ко рабы на землѝ.
копа́ѧ ꙗ҆́мꙋ впадетъ в ню̀, и҆ ѻ҆треблѧ́ющаго ѻ҆градꙋ ѹ҆грызнетъ и҆̀ змїѧ.
і҆ и҆зима́ѧи камы поболи́тъ ѿ них̑, секїи дрова̀ бѣдꙋ прїемлет̑ в нихъ.
а҆ще спадетъ сѣчи́во, и҆ сам̑ лицем꙽ смѧтесѧ, и҆ си́ла ѿнеможет̑, и҆зъѻ҆би́лїе же мꙋж́ꙋ мꙋ́дрость·

А҆́ще сѣкнетъ змїѧ не въ шептѣ, и нѣсть ѻ҆билїѧ ѻ҆бава́ющемꙋ.
словеса ѹ҆стъ мꙋдрых̑ блгд̑ть, ѹ҆стныж̑ безꙋмнаго потоплѧют̑ е҆го·

Начало словесъ е҆го безꙋмїе, и҆ послд̑ѣнѧѧ ѹ҆стъ е҆го гордость лꙋка́ва.
безꙋмныи ѹ҆мно́жит꙽ словеса̀·

Не разꙋмѣ чл҃къ чт̂о бывшее, и҆ что бꙋдꙋщее чт̂о зади е҆го и҆ кт̂о възвѣстит̑ е҆мꙋ.
ѹ҆спѣхъ безꙋмных̑ ѹ҆трꙋдитъ их̑, и҆же не разꙋмѣ и҆ти въ́ град̑·

Го́ре тебѣ гра́де в нем̑же цр҃ь тво́и ю҆́нъ, и҆ кнѧ́ѕи твоѝ рано ꙗ҆дѧт̑.
бл҃жена т̂ы зе́мле и҆же цр҃ь тво́и сн҃ъ свобод̑ныѧ, и҆ кнѧ́ѕи твоѝ въ времѧ ꙗ҆дѧтъ въ силе и҆ не постыдѧт̑сѧ·

Въ лѣности смирит̑сѧ стропъ, и҆ въ празнествѣ рꙋкꙋ прока́плетъ храмина.
въ смх̑ѣ тво́рѧтъ хлѣбъ и҆ вино и҆ е҆ле́и, е҆́же веселити живыѧ.
и҆ сребра̀ послꙋшают̑ всѧческаѧ.
въ со́вѣсти ѹ҆бо свое́и не клѣни цр҃ѧ, и҆ въ клѣти ложницы свое́и не клѣни бога́таго, ꙗ҆́ко птица нбс̑҇наа донесет̑ глас̑҇ тво́и, і҆ и҆мѣ́ѧи кры́лѣ возвѣстит̑ слово твое·

Глв̑҇а, а҃і·

Послѝ хлѣбъ твои на лицѐ водѣ̀, ꙗ҆́ко въ множествѣ днїи ѻ҆брѧ́щеши е҆го.
дажд̑ь ча́сть седмимъ и҆ ѻ҆смим̑, ꙗ҆́ко не вѣси чт̂о бꙋдетъ лꙋка́во на землѝ·

А҆ще и҆сполнѧт̑сѧ ѻ҆́блацы дожда на́ землю и҆зливают̑·

И҆ а́ще падетъ древо на ю́гъ и҆л̂и аще на сѣверъ, и҆дѣже падет̑ та́мо бꙋдетъ·

Блюды́и вѣтра не сѣ́ет꙽, и҆ сматрѧ́и въ ѻ҆́блакъ не пожнетъ.
в ни́хже нѣсть вѣдыи чт̂о пꙋть бꙋдетъ дх҃а, ꙗ҆́ко ко́сти ражда́ю҆щаѧ въ чревѣ, та́ко не разꙋмѣ́ет꙽ дѣлъ бж҃їихъ е҆лика же сътвори́тъ всѧческаѧ.
во заѹ́трїи сѣѧ́и сѣмѧ свое, и҆ въ дн҃ь да не ѻ҆ставлѧ́ет꙽ рꙋка твоѧ·

Ꙗ҆ко не вѣси кое ѹ҆лꙋчит̑сѧ с̂е л̂и и҆л̂и ѻ́но, и҆ а́ще л̂и ѻ҆бое в꙽кꙋпѣ·

Бл҃го и҆ сла́дко свѣтъ, и҆ бл҃го ѻ҆чи́ма зрѣти съ сл҃нцемъ.
ꙗ҆ко а҆ще лѣта мно́га живе́тъ чл҃къ, и҆ ѻ҆ всѣхъ сих̑ възвесели́тсѧ.
помѧнꙋтсѧ дн҃и т꙽мы̀ ꙗ҆́ко мнози бꙋдꙋтъ.
вс̂е грѧдꙋщее сꙋ́ета·

Весели́сѧ ю҆ното въ ю́ности свое́и, и҆ да ѹ҆бл҃жит̑ тѧ срд̑це твое въ дн҃ь ю́ности твоеѧ·

И҆ ходи в꙽ пꙋтех̑ срд̑ца твое҆го непоро́чен̑҇, и не въ видѣнїю ѻ҆́чїю свое́ю·

И҆ разꙋмѣи ꙗ҆ко ѿ всѣхъ си́хъ приведет̑ тѧ б҃ъ на сꙋдъ·

Глв̑҇а, в҃і·

И ѻ҆ста́ви ꙗ҆́рость ѿ срд̑ца твоег̑҇ и҆ преведѝ лꙋкавство ѿ плоти твоеѧ·

Ꙗ҆́ко ю́ность и҆ безꙋмїе сꙋета.
и҆ помѧнѝ сътворшаго т̂ѧ въ дн҃ь ю́ности твоеѧ, дондеже не прїидꙋтъ днїе ѕлобы твоеѧ.
и҆ приспѣ́ютъ лѣта в нихже речеши нѣсть м̂и в нихъ хотѣнїѧ, до́ндеже не померъкнетъ слн҃це и҆ свт̑ѣ и҆ лꙋна̀ и҆ звѣзды, и҆ ѻ҆братѧт̑сѧ ѻ҆блаци поза́ди дожда.
въ дн҃ь вънь же подви́жꙋтсѧ стра́жїе до́мꙋ, и҆ развратѧт̑сѧ мꙋжїе си́лы.
и҆ ѹ҆празнѧтсѧ ме́лющїи ꙗ҆́ко и҆знемогоша, и҆ помрачат̑сѧ глѧда́ющаѧ въ сква́жнѧхъ, и҆ зарворѧт̑ две́ри на тръжищи, в немощи гласа ме́лющїѧ·

И҆ въста́нет̑ на глас̑҇ пти́ца, и смирѧ́тсѧ всѧ дщерѧ пѣсныѧ.
и҆б̂о на высотꙋ̀ ѹ́зрѧтъ, и҆ ѹ́жасъ на пꙋтѝ.
и҆ процвѣтетъ клѧпышъ и҆ ѻ҆тол꙽стѣ́етъ ѻ҆кри́да, и҆ раз꙽дрꙋшитсѧ всѧкъ кипари́съ.
ꙗ҆ко и҆дет̑ чл҃къ в домъ вѣка е҆го, и҆ ѻ҆быидо́ша на тръжищи пла́чющїи.
дондеже не преврати́тсѧ ю҆же сребра̀ и҆ не сокрꙋшит̑сѧ и҆скꙋса злат̑наѧ.
и҆ сокрꙋшат̑сѧ водоно́сы ѹ҆ и҆сто́чника е҆го, и҆ сло́мит̑сѧ ко́ло въ колїѝ.
и҆ въз꙽вратитсѧ прь́сть на́ землю ꙗ҆́коже б̂ѣ, и҆ дх҃ъ въз꙽вратитсѧ къ б҃ꙋ и҆же е҆сть далъ е҆мꙋ·

Сꙋ́ета сꙋ́етъствїи рече собо́рникъ, всѧческа́ѧ сꙋ́ета, и҆ ли́ш꙽шее.
ꙗ҆́ко бы́сть собо́рникъ мд̑ꙋръ, и҆ ꙗ҆́ко сказа̀ съ чл҃комъ ра́зм̑ꙋ.
и҆ ѹ́хо и҆слѣдит̑ красоты̀ при́точныѧ, многа възыска̀ собо́рникъ е҆же ѻ҆брѣсти словеса̀ хотѣнїѧ, и҆ напи́сана пра́востїю словеса̀ и҆́стинны·

Словеса̀ мꙋдрыхъ ꙗ҆́ко ѻ҆стны воло́выѧ, и҆ ꙗ҆́ко гвоздїе раждеже́ни, и҆же ѿ сложе́нїѧ да́ни бы́ша ѿ па́стырѧ е҆ди́наго и҆зъѻ҆би́лїе вели́ко ѿ нихъ·

Сн҃е мои храни кни́ги мно́ги сътворити нѣсть б̂о конца̀, и҆ ѹ҆ченїи мно́го трꙋда плоти·

конецъ же словꙋ все послꙋшаи.
б҃а боисѧ и҆ за́повѣди е҆го хранѝ, ꙗ҆́ко того всѧкъ чл҃къ·

Ꙗ҆́ко все сътворе́нїе приведетъ б҃ъ на сꙋдъ, въ всѧкомъ презренїю а҆ще л̂и бл҃го а҆ще л̂и лꙋка́во·

Коне́цъ кни́зе е҆клесїастове.
и҆́мать в себѣ, глв̑҇а, в҃і·