КН́ИГА ПѢ́СНЬ ПѢ́СНЄи̑ Ц҃РѦ СОЛО́МОНА
Глв̑҇а а҃·
Да ло́бжетъ м̂ѧ ѿ лобза́нїѧ ѹ́стъ свои҆хъ, ꙗ҆́ко бл҃га сесца твоѧ паче вина̀, и҆ во́нѧ ми́ра твое҆го паче всѣхъ а҆рома́тъ.
ми́ро и҆злїѧно и҆мѧ твое, сего ради ѿроковица възлюби́ша т̂ѧ и҆ привлеко́ша̑ т̂ѧ.
въ слѣдъ тебе въ во́ню ми́ра твое҆го тече́мъ·
Въведе мѧ цр҃ь въ ло́жницꙋ свою, възра́дꙋемсѧ и҆ возвесели́мсѧ ѻ҆ тебѣ, възлюбимъ сесца твоѧ, ппаче вина̀ пра́вость възлюбѝ т̂ѧ·
Черна е҆смь аз̑ и҆ добри дщери і҆ерс̑҇лимъскїѧ.
ꙗ҆́ко се́ла кедар̑҇ска, и҆ ꙗ҆́ко ко́жа саломон꙽.
не зри́те мене ꙗ҆́ко а́зъ е҆смь ѹ҆чрьмена, ꙗ҆ко при́зрѣ мѧ слн҃це·
Сн҃ове мт҃ре моеа сварѧхꙋсѧ ѻ҆ мнѣ.
положи́ша м̂ѧ стража ѹ҆ виногра́дѣхъ, винограда моего не сохранихъ·
Възвѣстѝ м̂и е҆гоже възлюбѝ дш҃а моѧ, гдѣ пасе́ши и҆ где ѻ҆почива́еши въ полꙋднѐ.
да не когда бꙋдꙋ ꙗ҆́ко ѻ҆блага́ющасѧ по ста́дехъ дрꙋговъ твоих̑.
А҆ще не ѹ҆вѣде самꙋю тебе до́брꙋ въ жена́хъ, и҆зыидѝ ты̀ въ пѧта́хъ па́ствъ, и҆ па́си ко́злища твоѧ ѹ҆ кꙋщеи па́стыр꙽скихъ.
ко́ни моѝ въ колесни́цы фараѻ́новѣ, ѹ҆подобих̑ тѧ близъ мене.
чт̂о ѹ҆крашен̑҇ни ланиты твоѝ ꙗ҆́ко го́рлицы, вы́ѧ твоѧ ꙗ҆́ко монисте·
Подо́бїе злата сътворим̑ ти съ пестротами сребра̀·
До́ндеже цр҃ь на восклоне́нїи е҆го, ма́сть драгаѧ дасть во́ню свою.
вѧза́нїе стак̑҇ти сестры̀ моеѧ, посреди сесцꙋ мои҆хъ въдвори́тсѧ.
грезнъ ѿ ки́пра сестра̀ моѧ мнѣ въ виногра́дѣ гад̑дове·
Се е҆си добра̀ и҆́скрьнѧа моѧ, с̂е е҆си добра̑ ѻ҆́чи твоѝ голꙋби́не·
Сѐ е҆сть добръ братъ мои и҆ е҆ще красенъ, ѻ҆́дръ на́шъ съ ѻ҆сѣне́нїемъ.
прекла́ди до́мꙋ на́шего ке́дровыѧ, и҆ столѧ кипари́снаѧ·
Глв̑҇а, в҃·
Азъ цвѣтъ полны́и и҆ кри́нъ ѹ҆долныи.
ꙗ҆ко кри́нъ въ тернїи, та́ко и́скрьнѧа моѧ посредѣ дще́реи·
Ꙗ҆ко ꙗ҆́блонь посредѣ древесъ лѣсныхъ, та́ко бра́тъ мои посредѣ сн҃овъ·
под̑ сѣнь е҆го въсхотѣхъ и҆ сѣдо́хъ, и҆ плод̑ е҆го сла́докъ въ горъта́ни мое҆мъ.
воведѣте м̂ѧ в домъ вина̀, вчини́те на мѧ любовь.
ѹ҆тверди́те м̂ѧ въ ми́рехъ, положите м̂ѧ въ ꙗ҆блоцехъ, ꙗ҆́ко ѹ҆ѧзъвле́нна е҆смь любо́вїю а҆зъ.
шꙋи́ца е҆го под̑ главо́ю м̂и, и҆ десни́ца е҆го ѻ҆бы́иметъ м̂ѧ·
Заклѧх̑ вы̀ д꙽щери і҆ерс̑҇лим꙽лѧ, въ си́лахъ и҆ крѣпостехъ села̀.
а҆ще воста́нете и҆ въста́вите любо́вь дондеже въсхо́щет꙽·
Гла́съ бра́та мое҆го, сѐ та́ко прїиде скача̀ на́ горы и҆ прескача̀ на хлъмы.
подо́бенъ е҆сть братъ мои сернѣ̀, и҆л̂и мла́дꙋ е҆́лени на гора́хъ веѳи́льских̑.
сѐ сїи стоѧ́ше за стѣно́ю на́шею, преглѧда́ѧ ѻ҆ко́нцемъ проглѧда́ѧи сквозе мрежꙋ.
ѿвѣща́етъ бра́т꙽ мои и҆ гл҃етъ мн̂ѣ·
Въста́ни и҆ прїидѝ ближнѧѧ моѧ до́браѧ моѧ голꙋби́це моѧ.
ꙗ҆́ко с̂е зима̀ пре́иде, до́ждъ ѿи́де и҆ про́иде въ себѣ.
цвѣти ꙗ҆ви́шасѧ на землѝ, времѧ ѿрѣзанїѧ приспѣ.
гла́съ го́рлицы слы́шанъ въ землѝ на́шеи, смо́квы и҆знесе цвѣтъ свои.
виногра́ди зрѣю҆ще даша во́ню·
въста́ни и҆ прїидѝ ближнѧѧ моѧ добраѧ моѧ.
грѧдѝ и҆ прїидѝ ты̀ голꙋбице моѧ въ покро́въ, каменъ близъ пред̑стѣнїѧ·
ꙗ҆́ви́ ми зра́къ твои, и҆ ѹ҆слы́шанъ сътвори м̂и глс̑҇а твои, ꙗ҆́ко гла́съ твой сла́докъ и҆ ѻ́бразъ твои красе́нъ·
И҆мѣте намъ ли́си малы́ѧ гꙋбѧ́щїа виногра́ды.
и҆ виногра́ди наши призрева́ютъ·
Бра́тъ мои мн̂ѣ и҆ а́зъ е҆мꙋ.
пасы́и въ кри́нахъ, до́ндеже д꙽хнетъ дн҃ь, дви́гнꙋтсѧ сѣни.
ѻ҆братисѧ ѹ҆подобѝсѧ брате мои сернѣ и҆л̂и мла́дꙋ е҆́леню, на́ горы ѻ҆́крс̑҇т꙽ныѧ·
Глв̑҇а, г҃·
На ло́жи мое҆мъ в нощи и҆сках꙽ е҆гоже възлюбѝ дш҃а моѧ.
и҆ска́хъ е҆го и҆ не ѻ҆брѣтохъ е҆го, възва́хъ е҆го и҆ не послꙋша мене·
въста́нꙋ ѹ҆бо и҆ ѻ҆быидꙋ̀ въ́ градѣ, и҆ на тръжищехъ и҆ на стогнахъ, пои҆щꙋ̀ е҆гоже възлювѝ дш҃а моѧ.
пои҆ска́хъ е҆го и҆ не ѻ҆брѣто́хъ, зва́хъ и҆̀ и҆ не послꙋша мене·
ѻ҆брѣто́ша м̂ѧ стрегꙋщїи и҆ ѻ҆бъходѧ́щїи въ́ градѣ·
Ви́дѣсте л̂и е҆гоже възлюбѝ дш҃а моѧ·
и҆ ꙗ҆́ко ма́ло преидохъ ѿ них̑ и҆ ѻ҆брѣтохъ е҆гоже възлюбѝ дш҃а моѧ.
и ѹ҆дръжа́хъ е҆го и҆ не ѻ҆ста́вихъ е҆го дондеже въведо́хъ и҆̀ въ домъ мт҃ре моеѧ, и҆ въ клѣть заче́ншїѧ м̂ѧ·
Заклѧ́хъ васъ дщери і҆ерс̑҇лим꙽скїѧ въ си́лахъ и҆ въ крѣпостѧ́хъ селныхъ, а҆ще дви́жете и҆ въздви́жете любо́вь дон̑҇деже а҆ще хо́щетъ·
Чт̂о сїѧ въсходѧ́щїѧ ѿ пꙋсты́ни.
ꙗ҆́ко стебло̀ ды́митсѧ кадѧ́щее сми́рна и҆ ливан꙽, и҆ ѿ всѣхъ во́нь ми́рова́рца·
Сѐ ѻ́др꙽ соло́монь.
ѯ҃, си́лныхъ ѻ́крс̑҇тъ е҆го ѿ си́лныхъ і҆и҆л҃евъ, вси и҆мꙋщи ѻ҆рꙋжїѧ наѻ́стрени на́ бра́нь, мж̑ꙋ ѻ҆рꙋжїе е҆го на бедрѣ е҆го ѿ ѹ́жаса в нощи·
Носилникъ сотворѝ себѣ цр҃ь соло́монъ ѿ древесъ лива́ньскъ·
столпы̀ е҆го сътворѝ сребрены, въсклоне́нїе е҆го зла́то, въхожде́нїе же е҆го багрѧно внꙋтръ е҆го ка́меное простре́нїе, любо́вь ѿ дщерїи і҆ерс̑҇лим̑ск꙽·
дщерѧ сїѻ́нѧ и҆зыидѣте, и҆ ви́дѣте въ цр҃и соло́монꙋ въ вѣнцы в немъже вынча̀ е҆го мт҃и въ дн҃ь жени́твы е҆го, и҆ въ дн҃ь веселїѧ срд̑ца е҆го·
Глв̑҇а, д҃·
Сѐ е҆си добра̀ бли́жнѧѧ моѧ сѐ е҆си добра̀.
ѻ҆́чи твоѝ голꙋби́не, ра́звѣ замлъчанаго твое҆го.
вла́си твоѝ ꙗ҆́ко стада кози́цъ, ꙗ҆́же ѿкры́шасѧ ѿ галаа́да.
зꙋбы твоѧ ꙗ҆́ко стада̀ постры́женыѧ, и҆же и҆зыдо́ша ѿ кꙋ́пели·
и҆ всѣ двоепло́дны, и҆ без̑родѧ́щїѧ нѣсть в них̑.
ꙗ҆́ко врьвь чрьвлена ѹ҆стѣ̀ твоѝ, и҆ бе́сѣда твоа кра́сна.
ꙗ҆́ко ѻ҆браще́нїе ши́пка ꙗ҆́блоко твое, ра́звѣ замлъчанаго твое҆го.
ꙗ҆ко сто́лпъ дв҃двъ шїѧ твоа, създа́нъ въ ѳалпиѻ́ѳѣ·
ты́сѧща щи́товъ ви́ситъ на нем̑, и҆ всѧ стрѣлы си́лныхъ.
дв̂ѣ се́сца твоѧ ꙗ҆́ко дв̂ѣ мла́ды близньца̀ сръны пасо́мїи въ цвѣтехъ, дон꙽деже д꙽хнет̑тъ дн҃ь, и҆ подви́гнꙋтсѧ сѣни·
Поидꙋ̀ къ горѣ̀ сми́рнеи и ко хлъмꙋ лива́ньскꙋ·
Всѧ̀ добра̀ бли́жнѧѧ моѧ, и҆ поро́ка нѣсть в тебѣ·
грѧдѝ ѿ лива́на невѣсто грѧдѝ ѿ лива́на, прїидѝ и҆ преидѝ и҆з нача́ла вѣры ѿ главы̀ сани́ра и҆ е҆рмона, ѿ ѻ҆гра́дъ льво́выхъ, и҆ ѿ горъ пардале́ѻ҆въ.
ѹ҆сръдны насъ сътворѝ се́стро на́ша невѣсто, ѹ҆сръдны на́съ рътвори́ла е҆си въ еді́ном̑ ѿ ѻ́чїю твоею, и҆ въ е҆ді́номъ мони́стѣ шїѝ твоеѧ.
чт̂о ѹ҆добрѣста се́сца твоѧ сестро моѧ невѣсто, что ѹ҆добрѣста сесца твоѧ па́че вина̀, и҆ во́нѧ ри́зъ твоих̑ па́че всѣхъ а҆ромат̑·
со́тъ и҆скапа́ютъ ѹ҆стнѣ̀ твоѝ не вѣсто, мед̑ и҆ мле́ко под̑ ꙗ҆зы́комъ твоим̑.
и҆ бл҃гово́нїе ри́зъ твоих̑ ꙗ҆́ко бл҃гоѹ҆ханїе ли́вана.
врьтоград̑ заключенъ сестро моа невѣсто, ѻ҆града заключена и҆сточникъ запечатлн̑҇ѣ.
посла́нїѧ твоа са́ди ши́пковъ съ пло́дом̑.
вѣтви дꙋба съзрѣнїе со на́рдом̑, на́рда и҆ кроко́съ.
троть и҆ кенамон̑҇, ѿ всѣхъ древъ лива́ньскихъ.
смир̑҇на и҆ а҆лои съ всѣми прьвыми ми́рами.
и҆сто́чник̑҇ ѻ҆гра́ды, и҆ кла́дѧзь воды̀ живы и҆ вкоренѧ́ющисѧ ѿ лива́на·
Въста́ни сѣвере, и҆ грѧдѝ ю́же, и҆ повѣ́и въ ѻ҆гра́де моем̑, и҆ да тект̑ꙋ а҆рома́ты твоа·
Глв̑҇а, е҃·
Да сни́детъ бра́тъ мои въ ѻ҆гра́дъ свои, и҆ да ꙗ҆́сть ѿ пло́да верха дꙋбо́ваго·
Вънидо́хъ въ ѻ҆гра́дъ мои сестро моѧ невѣсто, ѻ҆бꙋима зми́рнꙋ съ а҆рома́тами мои҆ми.
ꙗ҆до́хъ хлѣ́бъ мои съ ме́домъ моим̑, пи́хъ вино мое съ мле́комъ мои҆мъ·
Ꙗ҆́дите бли́жнїи мои и҆ пїите, и҆ ѹ҆пїитесѧ бра́тїа·
А҆зъ сплю и҆ срд̑це мое бдит̑.
глас̑҇ бра́та мое҆го ѹ҆дарѧет̑ въ две́ри, ѿверзи м̂и сестро моѧ и҆ бли́жнѧѧ моѧ голꙋби́це моѧ съврьше́наѧ моѧ.
ꙗ҆́ко глава моѧ наполънисѧ росы, и҆ вла́сы мои ѻ҆кропи́шасѧ но́щїю·
Съвлекох̑сѧ съ ри́зы моеѧ, и҆ ка́ко ѻ҆блекꙋсѧ в ню·
ѹ҆мых̑ но́ѕи мои, и҆ ка́ко ѻ҆скверню и҆хъ·
Бра́тъ мои посла рꙋ́кꙋ свою ѿ сква́жнѣ, и҆ чре́во мое въстрепета ѿт̑ него.
въстах̑ а҆зъ ѿверсти бра́тꙋ мое҆мꙋ, рꙋ́цѣ мои и҆скапа́ша зми́рнꙋ, и҆ прьсты мои зми́рны по́лны на рꙋках̑ заключе́нїа.
ѿвръзох̑ а҆зъ бра́тꙋ мое҆мꙋ, и҆ брат̑ мои преиде.
дш҃а моѧ и҆зы́иде въ слово е҆го.
възыска́хъ е҆го и҆ не ѻ҆брѣтох̑ е҆го, зва́хъ е҆го и не послꙋша мене.
ѻ҆брѣто́ша м̂ѧ стра́жеве ѻ҆крꙋжа́ющїи град̑, би́ша м̂ѧ и҆ ꙗ҆зви́ша м̂ѧ, взѧ́ша ве́рхнюю ри́зꙋ ѿ мене стра́жїе стѣ́ннїи.
заклѧ́хъ в̂ы дще́ри іерс̑҇лим̑скїѧ в си́лахъ и҆ въ крѣ́постех̑ села·
а҆ще ѻ҆брѧ́щете бра́та мое҆го възвѣсти́те е҆мꙋ, ꙗ҆́ко ѹ҆ꙗ҆звле́нна любо́вїю а҆зъ е҆смь·
Чт̂о бра́тъ твои ѿ бра́та, до́браѧ въ женах̑, чт̂о брат̑ твои ѿ бра́та, ꙗ҆́ко та́ко заклѧ̀ нас̑҇·
Бра́тъ мои бѣлъ и҆ красенъ, и҆збра́н꙽ ѿ те́мъ.
глава е҆го зла́та глава̀.
вла́сы е҆го широ́ки и҆ че́рны ꙗ҆́ко вра́нъ.
ѻ҆́чи е҆го ꙗ҆́ко голꙋби́не на и҆сполненїе вод̑, и҆змове́ни въ мле́цѣ, сѣдѧ́щїи въ наполне́нїи во́дъ·
лани́ты е҆го ꙗ҆́ко фїѧ́лы а҆рома́тъ прозѧба́ющи бл҃гово́нїе·
ѹ҆стнѣ е҆го кри́ны ка́плющїи зми́рны по́лны.
рꙋцѣ е҆го крꙋглѣ зла́тѣ, наполнены де́рзости·
чре́во е҆го бꙋква слоно́ва на ка́мени сап꙽фи́рове.
лы́ста е҆го стлъпи мармꙋровы, ѻ҆снова́ни на степе́нех̑ зла́тых̑.
ви́дъ е҆го ꙗ҆́ко лива́нъ и҆збра́нъ, и҆ ꙗ҆́ко ке́дрове.
горта́нь е҆го сла́дость и҆ ве́сь въжд̑елѣ́нїѧ, сїи бра́тъ мои, и҆ сїи бли́жнїи мои дще́ри і҆ерс̑҇лимлѧ·
Где ѿи҆де бра́тъ тво́и до́браѧ въ женах̑ ка́мо призрѣ бра́тъ твои, и҆ възы́щемъ е҆го с тобо́ю·
Глв̑҇а, ѕ҃·
Бра́тъ мои сни́де въ ѻ҆гра́дꙋ е҆го.
и҆ въ мѣ́ста а҆рома́т꙽, па́ствити въ ѻ҆гра́дех꙽, и҆ събира́ти кри́ны.
а҆зъ бра́тꙋ мое҆мꙋ и҆ бра́тъ мои мнѣ, пасы́и въ кри́нехъ·
до́браѧ и҆ бли́жнѧѧ моѧ ꙗ҆́ко бл҃говоле́нїе, кра́сна ꙗ҆́ко і҆ерс̑҇лимъ.
ѹ҆жа́стъ ꙗ҆́ко вчине́не.
ѻ҆брати ѻ҆́чи твои прѧмо мнѣ ꙗ҆́ко тїи въскрили́ста м̂ѧ.
вла́си твои ꙗ҆́ко ста́дъ ко́зїи҆хъ и҆же възыидо́ша ѿ галаа́да.
зꙋбы твои ꙗ҆́ко ста́да постриже́ны и҆же взыидо́ша ѿ кꙋпели, вс̂и близньствꙋющїи и҆ бещад̑ныѧ нѣсть в ни́хъ.
ꙗ҆́ко вервь червле́на ѹ҆стнѣ твои, и҆ бесѣ́да твоѧ кра́сна ꙗ҆ко ѻ҆броще́нїе ши́пка ꙗ҆́блонь твоѧ, кро́мѣ замолча́наго твое҆го.
ѯ҃, сꙋть цр҃ць, и҆ п҃, нало́жницъ, и҆ ю́нот̑ и҆мже нѣсть числа.
е҆ді́на е҆сть голꙋби́ца моѧ, съврьше́наѧ моѧ е҆сть ма́тери е҆ѧ̀, и҆збра́на роди́вшеи ю҆̀.
ви́дѣша ю҆̀ дще́ри сїѻ҆скїѧ и҆ блс̑҇виша ю҆̀.
цр҃цы и҆ нало́жницы въсхвали́ша ю҆̀·
кт̂о сїѧ приника́ющи ꙗ҆́ко ѹ҆́тро, добра ꙗ҆́ко лꙋна̀, и҆збра́н꙽на ꙗ҆́ко слн҃це, въ ѹ҆́жасти ꙗ҆́ко вчине́на·
Въ ѻ҆град̑ ѻ҆рѣховъ съниде ви́дѣти, и въ пло́ды пото́ка.
ви́дѣти а҆ще въсцвѣте виноград̑, и҆ възрасто́ша л̂и ши́пки.
та́мо дам̑ сесца моѧ тебѣ·
Не разꙋмѣ дш҃а моѧ, положи м̂ѧ на колесни́цы а҆минода́вли·
Ѡ҆брати́сѧ ѻ҆брати́сѧ сꙋлами́тино, ѻ҆брати́сѧ и҆ ѹ҆зримъ въ тебѣ·
Глв̑҇а.
з҃·
Кт̂о ви́дитъ ѹ҆ сꙋламитине приходѧ́щеи ꙗ҆́ко ли́ки по́лка·
Чт̂о красишасѧ стопы твоѧ въ ѻ҆бꙋтїи твое҆мъ дще́рѧ а҆минода́вовы.
чи́ны бедрꙋ твою подо́бни ѹ҆серѧ́зѧм̑ дѣ́лъ рꙋ́къ хꙋдо́жника·
пꙋпъ твои ꙗ҆́ко ча́ша и҆сточена, не требꙋющїѧ черпа́нїа·
чре́во твое ꙗ҆́ко стог̑҇ пшени́цы, затворена въ кри́нахъ.
дв̂а се́сца твоѧ, ꙗ҆́ко дв̂ѣ мла́ды близни́ца се́рнїи.
шїѧ твоѧ ꙗ҆́ко сто́лпъ слоно́въ.
ѻ҆́чи твои ꙗ҆́ко е҆зеро въ е҆сево́нѣ, въ вра́тах̑ дще́ри мно́гих̑.
но́здри твои ꙗ҆́ко сто́лпъ лива́нескъ, смотрѧ́и лице дама́скꙋ.
глава̀ твоѧ на тебѣ ꙗ҆́ко карми́лъ гора, заплете́нїе главы̀ твое҆ѧ ꙗ҆́ко багрѧница цр҃ьска, свѧза́на въ прериста́нїих̑·
что ѹ҆краси́сѧ, и҆ чт̂о ѻ҆слади́сѧ любы въ пи́щахъ твои҆хъ·
с̂е вели́чество твое ѹ҆подоби́сѧ фини́кꙋ, и҆ се́сца твоѧ грезно е҆го·
Рекох̑ взы́идꙋ на фини́къ, и҆ ѹ҆держꙋ высотꙋ е҆го·
И҆ бꙋ́дета се́сца твоѧ дв̂а ꙗ҆ко грезно́ве виногра́да, и҆ во́нѧ но́зд̑рїи твоих̑ ꙗ҆́ко ꙗ҆́бло́ка.
и҆ горта́нь твои ꙗ҆́ко вино бл҃го·
Ходѧ́и бра́тъ мои ѹ҆ пра́вости, дово́ленъ въ ѹ҆стнꙋ мое҆ю и҆ въ зꙋбѣхъ·
А҆зъ бра́тꙋ мое҆мꙋ и҆ къ мнѣ възвраще́нїе е҆го·
Прїиди бра́те мои, и҆зы́идевѣ на село, въдвори́вѣсѧ въ селе́хъ·
ѹ҆рани́вѣ въ виногра́дѣхъ, видѣвѣ а҆ще процвѣте виногра́дъ, и҆ възрасте л̂и преспѣѧ́нїе, възрасто́ша л̂и ши́п꙽ки.
та́мо да́мъ тебѣ се́сца моѧ.
ман꙽драгоре да́ша во́ню е҆го при две́рехъ на́ших꙽.
вс̂и пло́дове кра́ѧ но́ваѧ до вет̑хих̑ бра́те мои съблюдох̑ т̂и·
Глв̑҇а, и҃·
Кт̂о да́сть т̂и бра́те мои съсꙋща се́сца мт҃ре мое҆ѧ·
ѻ҆брѣто́хъ т̂ѧ внѣ̀ цѣлꙋю т̂ѧ.
и҆ ктомꙋ̀ не ѹ҆ничижат̑ мене.
ѻ҆быимꙋ т̂ѧ и҆ въведꙋ т̂ѧ въ до́мъ мт҃ре мое҆ѧ, и҆ въ ло́жницꙋ заче́ншїѧ м̂ѧ.
тꙋ м̂ѧ наѹ҆чи́ши, напою т̂ѧ вина̀ съ во́нѧми строе́наго, и҆ пи́тїѧ пото́ка мое҆го·
шꙋи́ца е҆го под̑ главою м̂и, и҆ десни́ца е҆го ѻ҆бы́иметъ м̂ѧ·
Клѧх̑ в̂ы дще́ри і҆ерс̑҇лимлѧ в си́лахъ и҆ въ крѣпости села·
Чт̂о дви́жете и҆ възд̑виза́ете любо́вь до́ндеже а҆ще хо́щет̑·
Кт̂о сїѧ въсходѧ́щїѧ ѹ҆бѣлена, и҆ ѹ҆твержа́ема ѻ҆ братѣ е҆ѧ·
ѿ ѻ҆́блока въста́вихъ т̂ѧ, та́мо поболѣ мт҃и твоѧ, та́мо поболѣ рожд̑еиша т̂ѧ·
Положи́ша м̂ѧ ꙗ҆́ко печа́ть на срд̑цы твое҆м꙽, и҆ ꙗ҆ко печа́ть на мы́ш꙽цы твое́и.
занѐ крѣ́пка ꙗ҆́ко смр҃ть любы, жесто́ка ꙗ҆́ко а҆дъ за́висть.
кри́ла е҆ѧ̀ ꙗ҆́ко ѻ҆́гнь пла́менѧ ѹ҆́глїе ѻ҆́гнено, пла́мы е҆ѧ̀.
вода̀ мно́га не мо́жетъ ѹ҆гаси́ти любве, и҆ рѣ́ки не пото́пѧтъ е҆ѧ.
а҆ще да́сть мꙋж́ъ вс̂е и҆мѣ́нїе свое въ любви, ѹ҆ничиже́нїемъ ѹ҆ничижа́тъ е҆го·
Сестра на́ша ма́ла и҆ се́сцꙋ не и҆́мать.
чт̂о сътво́римъ сестрѣ на́шеи въ дн҃ь во́н꙽же а҆ще гл҃ати бꙋдетъ е́и·
А҆ще стѣна е҆сть съградим̑ на неи стрѣхи сре́брѧныѧ·
а҆ще две́ръ е҆сть напи́шемъ на не́и дъскꙋ ке́дровꙋ·
А҆зъ стѣна и҆ се́сца моѧ ꙗ҆́ко сто́лпъ.
а҆зъ бѣхъ въ ѻ҆́чїю е҆го, ѻ҆брѣта́ющи ми́ръ·
Виногра́дъ быхъ соло́монꙋ въ вее҆ламо́нѣ, и҆ да́сть виногра́дъ свои стрегꙋщимъ е҆го.
мꙋж́ъ принесет̑ въ пло́дѣ е҆го ты́сѧщꙋ сребрени́къ.
Виногра́дъ мои предо мно́ю, ты́сѧща соло́монѧ, и҆ дв̂ѣстѣ стрегꙋщих̑ пло̑ е҆го·
Сѣдѧ́и въ ѻ҆гра́дехъ мно́гихъ, и҆ дрꙋгїѧ въемлющїѧ, глс̑҇а твои ѹ҆слы́ши м̂и·
Бѣга́и бра́те мои и҆ ѹ҆подоби́сѧ сернѣ, и҆ли ю҆́нцемъ ѻ҆ле́нѧм̑ на горы а҆рома́т꙽ских̑·
Конецъ кни́гъ пѣснеи пѣснѧмъ.
И҆́мать в себѣ, глв̑҇а, и҃·