КНИ́ГА ПРЄМд̑РОСТЬ СОЛОМО́НА

Глв̑҇а а҃·

Възлюбите пра́вдꙋ сꙋдѧ́щеи зе́млю.
мꙋдръствꙋ́ите ѻ҆ г҃ѣ въ бл҃госты́ни, и҆ въ про́стости срд̑ца възы́щете е҆го.
ꙗ҆́ко ѻ҆брѧ́щетсѧ не и҆скꙋша́ющимъ е҆го, ꙗ҆ви́т꙽ же сѧ не невѣ́рꙋющимъ е҆мꙋ.
стропти́ваѧ б̂о помышле́нїѧ ѿлꙋча́ютъ ѿ б҃а, и҆скꙋше́на же си́ла ѻ҆бличи́тъ безꙋм꙽ныхъ.
ꙗ҆́ко въ ѕло̂ хꙋдожнꙋ дш҃ꙋ не внидетъ премꙋдрость, ни ѻ҆битает̑ в телеси пови́ннемъ грѣхом̑.
ст҃ыи б̂о дх҃ъ наказа́нїѧ ѿбѣжи́тъ л꙽сти́ва, и҆ ѿи҆метсѧ ѿ помышле́нїи безразꙋмныхъ, и҆ ѻ҆бличит̑сѧ ѿ находѧщаго безако́нїѧ.
чл҃колю́бенъ б̂о дх҃ъ премꙋдрости, и҆ не и҆звини́тъ проклѧ́того ѿ ѹ҆стенъ е҆го.
ꙗ҆́ко внꙋтрьних̑ е҆го свѣдѣтель е҆сть б҃ъ, и҆ срд̑цꙋ е҆го и҆зыска́тель и҆́стиненъ, и҆ ꙗ҆зы́ка слы́шатель.
ꙗ҆́ко дх҃ъ гн҃ь и҆спо́лни вселе́ннꙋю, и҆ съдръжа́щаго вс̂ѧ ра́зꙋма и҆́мать глс̑҇а·

Сего ра́ди вѣща́вшаго безако́ннаѧ не мо́жетъ ѹ҆таи҆ти, и҆ ни ми́мои҆детъ е҆го ѻ҆блича́ющїи сꙋдъ.
въ разволе́нїих̑ б̂о нечести́выхъ и҆стѧза́нїе бꙋдетъ, слове́съ же е҆го слы́шанїе къ г҃ꙋ прїидет̑, въ ѻ҆бличе́нїе безако́нїи е҆го.
ꙗ҆́ко ѹ҆хо рве́нїѧ слы́шитъ вс̂ѧ, и҆ го́рко ропта́нїе не кры́етсѧ.
храни́тесѧ ѹ҆бо ѿ ропта́нїѧ неполе́зна, и҆ ѿ ѻ҆болга́нїѧ щади́те ꙗ҆зы́къ, ꙗ҆́ко вѣща́нїе та́ино т꙽ще не и҆дет̑.
ѹ҆ста же лжꙋщихъ ѹ҆бива́етъ дш҃ю·

Не вожделѣите смр҃ти въ блꙋже́нїи живота̀ ва́шего, не и҆звлека́ите поги́бели дѣ́лы рꙋ́къ ва́ших꙽·

Ꙗ҆́ко б҃ъ смр҃ти не сътвори, ни весели́тсѧ ѻ҆ поги́бели живыхъ.
създа б̂о въ е҆же бы́ти вс̂ѧ.
и҆ сп҃сены наро́ды ми́рꙋ.
ни бо е҆сть в ни́хъ врачева́нїа и҆стребле́нїю, ниже а҆́дꙋ црс̑҇твїе на землѝ.
пра́вда б̂о без꙽смр҃тна ес̑҇, непра́вда же смр҃ти снабдѣ́нїе.
нечести́вїи же рꙋка́ма и҆ словесы призва́ша ю҆̀, дрꙋги́ню въмѣни́ша ю҆̀.
себѣ бы́ти попол̑҇знꙋшасѧ, и҆ сꙋпрꙋз꙽ство положи́ша к неи, ꙗ҆́ко досто́ини сꙋть ѻ҆́ноѧ ча́сти бы́ти·

Глв̑҇а, в҃·

Реко́ша б̂о в себѣ помышлѧ́ющїи непра́вед̑не.
мал̑҇ е҆сть и҆ с нꙋждею живо́тъ на́шъ, и҆ нѣ́сть и҆сцѣле́нїѧ в концы чл҃честѣ, и҆ нѣ́сть познан꙽ раздрѣше́ныи ѿ а҆́да.
ꙗ҆ко ни ѿ чегоже рожд̑е́ны е҆смы, и҆ по сихъ бꙋ́демъ ꙗ҆́ко не бы́хомъ.
ꙗ҆́ко ды́мъ дыха́нїе въ но́здрехъ на́ших̑, и҆ сло́во ꙗ҆́ко и҆́скра въ воздвигне́нїе срд̑ца на́шего.
е҆иже ѹ҆га́сши пе́пелъ бꙋ́дет̑ тѣ́ло на́ше, и҆ дх҃ъ разлїетсѧ ꙗ҆́ко мѧ́кокъ воздх̑ꙋ·

І҆ и҆мѧ на́ше въ забве́нїе прїе́млетсѧ во вре́мѧ, и҆ никто́же помѧне́тъ дѣ́лъ на́ших̑·

И҆ пре́идет̑ живот̑ на́шъ ꙗ҆́ко стопы ѻ҆́блака, и҆ ꙗ҆́ко м꙽гла разд̑рѣшит̑сѧ и҆же погоне́на ес̑҇ ѿ лꙋчъ слн҃чных̑ и҆ теплотою е҆го ѻ҆тѧгчи́вшисѧ·

Вре́мѧ на́ше е҆сть ꙗ҆́ко стѣнь прохода, и҆ нѣ́сть ѻ҆браще́нїѧ конца на́шего.
ꙗ҆́ко запеча́танъ е҆сть и҆ никт̂о ѻ҆брати́тсѧ·

прїидѣте ѹ҆бо и҆ поживем̑ въ сꙋщих̑ бл҃гих̑, ѹ҆бл҃жимсѧ зда́нїем꙽ ꙗ҆́ко ю҆́ность ско́ре.
вина дража́ишаго и҆ ми́ра во́ина и҆сполъним̑сѧ, и҆ да не про́идет̑ дасъ цвт̑ѣ вре́мени.
вінчаем̑ насъ ро́жами преже неже ѹ҆вѧнт̑ꙋ, н̂и е҆дїн꙽ ѹ҆ насъ лꙋчъ бꙋдет̑, и҆же не про́идет̑ блꙋженїа нашего.
никто ва́съ ѿлꙋченъ бꙋдет̑ блꙋженїа нашег̑҇ вездѣ ѻ҆ста́вим̑ совт̑ѣника веселїѧ, ꙗ҆ко сїѧ е҆сть ча́сть наша и҆ с̂е е҆сть жре́бїи наш꙽.
наси́лїе сътворим̑ ѹ҆бо́гꙋ правед̑нꙋ, и҆ не пощадимъ вдовицы, ниже ста́рца почтем̑ сѣдинъ многолѣтных̑.
да бꙋдет̑ же намъ крѣпость зако́нъ правдѣ, не крѣпкое б̂о неключимо ѻ҆брѧ́щетсѧ.
ѹ҆ловимъ ле́стїю правед̑наго, ꙗ҆́коже неключимъ е҆сть намъ, и҆ проти́вит̑сѧ дѣ́ломъ нашимъ, и҆ поноситъ намъ грѣхы зако́на, і҆ и҆зно́ситъ на на́съ грѣхи приѻ҆бщенїа на́шего.
възвѣща́етъ себе ра́зꙋмъ бж҃їи и҆мѣти, и҆ сн҃а бж҃їа себе и҆менꙋе́тъ·

и҆ бысть намъ на ѻ҆бличенїе помышленїи.
тѧ́жекъ е҆сть намъ та́коже къ видѣнїю, ꙗ҆́ко неподобно ес̑҇ и҆́ным̑ жи́тїе е҆го, и҆ пременени сꙋть стеѕи е҆го·

Въ порꙋга́нїе въмѣни́хом̑сѧ е҆мꙋ и҆ въздръжитсѧ ѿ пꙋтїи на́шихъ ꙗ҆́ко ѿ нечистотъ·

И҆ бл҃житъ послд̑ѣнѧѧ правед̑ных̑, и҆ славитсѧ ѿц҃а и҆мѣти себѣ б҃а.
ви́димъ б̂о а҆́ще словеса̀ е҆го и҆́стинна сꙋть, і҆ и҆скꙋсим̑ ꙗ҆́же въ и҆схожд̑енїю е҆го·

А҆ще б̂о е҆сть и҆́стинныи сн҃ъ бж҃їи въспрїимет̑ е҆го, і҆ и҆зба́витъ е҆го ѿ рꙋкъ противѧ́щих̑сѧ.
досажденїемъ и҆ мꙋкою и҆спытаем̑ е҆го, да ѹ҆вѣмы чс̑҇ть е҆го, и҆ ѻ҆сꙋдим̑ межд̑ꙋ ѕло́бою е҆го.
смр҃тїю поно́сною ѻ҆сꙋдимъ е҆го, бꙋдетъ б̂о е҆мꙋ расмотренїе ѿ словесъ е҆го·

Сїѧ помы́слиша и҆ съблазни́шасѧ, ѻ҆слѣпи б̂о их̑ ѕло́ба и҆хъ.
и҆ не ѹ҆вѣдѣша та́инъ бж҃їихъ, ниже м꙽зды ѹ҆пова́ша преподобїѧ, ни́же сꙋди́ша чести дш҃ам̑ непоро́чным̑·

Ꙗ҆́ко б҃ъ създа чл҃ка в неи҆стлѣнїе, и҆ во ѻ́браз̑ подобїа свое҆го сътвори е҆го·

За́вистїю же дїа́волею смр҃ть внїиде въ ми́ръ, и҆скꙋшают̑ же е҆го и҆же ѻ҆́ного ча́сти сꙋть·

Глв̑҇а, г҃·

Правед̑ныхъ дш҃а в рꙋцѣ бж҃їи не прикоснетсѧ и҆хъ мꙋ́ка.
непщевани бы́ша въ ѻ҆́чїю безꙋмныхъ ѹ҆мрѣти, въмѣнисѧ ѕло́ба и҆сход̑ и҆хъ·

и҆ ѿ нашествїѧ сокрꙋшенїе.
ѻ҆ни́ же сꙋть въ ми́рѣ, и҆б̂о пред̑ лицем̑ члчс̑҇кимъ а҆ще и҆ мꙋкꙋ прїимꙋтъ, ѹ҆пова́нїѧ и҆хъ бесмр҃тїѧ и҆сполнь·

Въма́лѣ наказа́ни быша и҆ вели́каа въспрїимт̑ꙋ.
ꙗ҆́ко б҃ъ и҆скꙋси их̑, и҆ ѻ҆брѣте их̑ досто́ины себѣ.
и҆ ꙗ҆́ко зла́то въ горънилѣ и҆скꙋси и҆хъ, и҆ ꙗ҆́ко вс̂еплод̑нꙋ жрътвꙋ прїѧтъ и҆хъ.
и҆ въ времѧ посѣщенїѧ и҆хъ въсїѧ́ютъ, ꙗ҆́ко и҆скры по стеблїю потект̑ꙋ·

Сꙋдѧт̑ ꙗ҆зы́комъ и҆ ѻ҆блада́ютъ люд̑ми, и҆ воцр҃итсѧ в нихъ г҃ь въ вѣки·

И҆ надѣю҆щїисѧ на́нь разꙋмѣют̑ и҆́стин꙽нꙋ, и҆ вѣрнїи въ любви пребꙋ́дꙋтъ е҆мꙋ·

Ꙗ҆́ко блгд̑ть и҆ ми́лость въ прпд̑бныхъ е҆го, и҆ посѣщенїе во и҆збранных̑ е҆го·

Нечестивїи же ꙗ҆́ко помы́слиша прїимꙋтъ безъчестїе, и҆же неради́ша правед̑наго, и҆ ѿ г҃а ѿстꙋпи́ша·

Премꙋ́дрос̑҇ б̂о и҆ наказа́нїе ѹ́ничижаѧи нечестенъ е҆сть, и҆ празд̑но ѹ҆пова́нїе и҆хъ и҆ трꙋды безъплод̑на, неключима е҆сть дѣ́ла и҆хъ·

Же́ны и҆хъ нечꙋв꙽ствены сꙋть, и҆ лꙋка́вы чада их̑, проклѧ́то рожденїе их̑·

Ꙗ҆́ко бл҃жена е҆сть непло́ды неѻ҆сквръненаѧ, и҆же не позна̀ ло́жа на грѣхъ.
и҆́мать плод̑ въ посѣщенїи дш҃ъ·

И҆ е҆внꙋхъ и҆же не съдѣла в рꙋкꙋ свое́ю безаконїа, н̂и помысли́выи на г҃а лꙋкаваѧ·

да́сть б̂о сѧ е҆мꙋ вѣры блгд̑ть и҆збра́нна, и҆ жребїи в꙽ хра́мѣ бж҃їи ѹ҆год̑нѣишїи·

Бл҃гыхъ б̂о трꙋдовъ плод̑ сла́венъ, і҆ и҆же не ѿпадет̑ ко́ренѧ премꙋ́дрости·

Ча́да же прелюбодѣ́евъ не съвръшена бꙋдт̑ꙋ, и҆ ѿ законопрестꙋ́пнаго ло́жа сѣмѧ и҆щезнетъ·

А҆ще б̂о долгоживотни бꙋдꙋтъ нивочто́же въмѣнѧтсѧ, и҆ въ безъчестїи послд̑ѣнѧѧ ста́рость их̑, а҆ще же ско́ро скончат̑сѧ не и҆мѣ́ютъ ѹ҆пова́нїѧ, н̂и во́ дн҃и позна́нїѧ ѿ ба́снеи.
ꙗ҆зы́ка неправед̑на лю́та сꙋть сконча́нїѧ·

Глв̑҇а, д҃·

Лꙋ́чши безъчад̑ство съ бл҃гочестїемъ, бесме́ртїе б̂о ес̑҇ въ па́мѧти е҆ѧ, ꙗ҆́ко и҆ пред̑ бм҃ъ позна́етсѧ и҆ пред̑ чл҃ки.
сꙋщїи б̂о въспомина́ютъ ю҆̀ и любѧтъ ѿше́дшꙋю и҆ въ вѣце вѣн꙽цено́сно чти́тсѧ.
и҆ нескверны́хъ подви́жникъ т꙽ща́нїе ѻ҆долева́ющи.
многопло́дна нечести́выхъ мно́жества неключи́ма бꙋдт̑ꙋ, и҆ ѿ прелюбодѣѧ́нїи насажде́нное не да́сть ко́ренїем̑ глꙋбинꙋ, ниже крѣ́пко стоѧ́нїе сътворитъ·

А҆ще ѹ҆бо и҆ вѣтви на вре́мѧ процвѣтꙋт꙽, не на крѣпкаго възшед̑шаго ѿ вѣтрꙋ пококолѣблет̑сѧ, и҆ ѿ ѕѣлныхъ вѣтръ и҆скорени́тсѧ.
и҆ съкрꙋшатсѧ вѣтви несконча́ни, и҆ плод̑ и҆хъ неключи́мъ ѻ҆ско́мен̑҇ во ѧ́дь и҆ нивочт̂о потребен̑҇.
ѿ безако́нных̑ б̂о со́нїи ча́да рожде́наѧ, свѣдѣтели сꙋть лꙋка́вствїѧ на роди́тели б̂о и҆спыта́нїѧ и҆хъ·

Пра́ведник же а҆ще пости́гнетъ сконча́тисѧ въ поко́и бꙋдет̑·

Ста́рость б̂о чс̑҇тна не многолѣтна, ниже число̀ лѣтъ и҆зочте́но·

Сѣди́на же е҆сть мꙋдрость чл҃комъ, и҆ во́зрастъ ста́рости жи́тїе непоро́чно.
бл҃гоѹ҆гожде́нъ б҃ꙋ бы́сть и҆ възлюби́сѧ, и҆ живыи межд̑ꙋ грѣшными преложи́сѧ, въсхищенъ бы́сть да не злоба и҆змѣнитъ ра́зꙋма е҆го, и҆л̂и лесть прельсти́тъ дш҃ꙋ е҆го·

Раченїа бо ѕлаѧ ѻ҆мрача́етъ бл҃гаѧ, и҆ жела́нїе по́хоти и҆змѣнѧ́етъ ѹ́мъ незлобивъ.
сконча́всѧ въ ма́лѣ и҆спо́лни лѣта длъга, ѹ҆годна б̂о бѣ̀ гв҃и дш҃а е҆го.
тм̑ѣже пот꙽ща́сѧ ѿ среды лꙋкавствїѧ.
лю́дїе же ви́дѣвше и҆ не разꙋмѣвше, ни положи́ша въ по́мыслѣ таковое, ꙗ҆́ко блгд̑ть и҆ млс̑҇ть въ прпд̑бныхъ е҆го, и҆ посѣще́нїе въ и҆збра́нныхъ е҆го·

ѻ҆сꙋди́т же пра́ведникъ ѹ҆мира́ѧи живы́хъ нечести́выхъ, и҆ ю́ность скон̑҇ча́ющаѧсѧ скоро долголѣтнеи ста́рости непра́веднаго·

Ѹ҆зрѧтъ б̂о конецъ премꙋдраго, и҆ не разꙋмѣютъ чт̂о въсхотѣ ѻ҆ немъ, и҆ въ чт̂о ѹ҆ма́ли е҆го г҃ь·

ѹ҆зрѧтъ и҆ ѹ҆ничижа́тъ е҆го, и҆мже г҃ь посмѣе́тсѧ.
и҆ бꙋдꙋтъ посемъ въ паде́нїе безъчестно, и҆ въ срамотꙋ въ мрътвыхъ въ вк̑҇ѣ·

Ꙗ҆́ко поврьжетъ и҆хъ бꙋ́ихъ на́дменыхъ, и҆ поколѣблетъ и҆хъ ѿ ѻ҆снова́нїѧ, и҆ до послѣди и҆зчезнꙋтъ·

И҆ бꙋдꙋтъ въ бо́лѣзни, и҆ па́мѧть и҆хъ поги́бнетъ.
прїидꙋтъ въ помышле́нїе грѣхъ свои҆хъ, и҆ ѻ҆бли́чат̑ и҆хъ проти́вꙋ безаконїи и҆хъ·

Глв̑҇а, е҃·

Тогда ста́нетъ въ дръзнове́нїи вели́цѣ пра́ведникъ пред̑ лицем̑ стꙋжа́ющим̑ е҆го, и҆ лишающим̑ трꙋдовъ е҆го.
ви́дѧщїи смꙋтѧтсѧ стра́хомъ тѧ́жкомъ, и҆ ѹ҆жаснꙋтсѧ ѻ҆ пресла́вномъ сп҃сенїю.
и҆ рекꙋтъ въ себѣ ка́ющесѧ, и҆ тѣсноты̀ ради маѧ́нїѧ стенѧ́ще.
се́и б̂ѣ е҆гоже и҆мѣхомъ нѣкогда въ посмѣхъ, и҆ въ при́тчꙋ поноше́нїѧ.
безꙋмнїи животъ е҆го въмѣни́хомъ неи́стово и҆ конецъ е҆го безче́стенъ.
ка́ко въмѣни́сѧ въ сн҃ехъ бж҃їих̑, и҆ въ ст҃ых꙽ жребїи е҆го е҆сть·

Ѹ҆бо заблꙋди́хомъ ѿ пꙋтѝ и҆́стиннаго, и҆ пра́вды свѣтъ не ѻ҆блиста̀ нас̑҇.
и҆ слн҃це не въз꙽сїѧ на́мъ, безаконїѧ и҆сплънихомсѧ въ стезѧ́хъ и҆ поги́бели.
и҆ ходи́хом̑ въ пꙋсты́ни непроходи́мыа, пꙋти же гн҃ѧ не ѹ҆вѣдѣхомъ.
чт̂о ползова̀ намъ горды́нѧ, и҆л̂и богат̑ство съ велича́нїемъ чт̂о възда́сть намъ.
преидо́ша вс̂ѧ ѻ҆на ꙗ҆ко сѣнь и҆ ꙗ҆́ко вѣсть претѣка́ющїѧ·

І҆ ꙗ҆ко кора́бль преходѧ́и волны̀ вода́мъ, е҆гоже проходꙋ нѣсть стопы̀ ѻ҆брѣсти, ни пꙋть стезе́и е҆го въ волнах̑.
и҆л̂и ꙗ҆́ко пти́ца прелѣта́ющаѧ по а҆е́рꙋ, е҆ꙗ҆́же ни е҆ді́но ѻ҆брѣтесѧ зна́менїе пꙋтѝ.
ꙗ҆́звꙋ же смꙋщаѧи бїеное, ле́гкїи вѣтръ и҆ сѣкꙋщи нꙋжею пꙋть а҆е́ра.
движе́нїемъ крыл̑҇ прелѣта́етъ, и҆ посе́мъ ни е҆ді́но зна́менїе ѻ҆брѣтесѧ прохо́дꙋ в нем̑·

И҆л̂и ꙗ҆́ко стрѣла̀ и҆спꙋщена на намѣреное мѣсто, и҆ раздѣленыи а҆е́ръ внеза́пꙋ въ себѣ само́мъ заключе́н꙽ е҆сть, ꙗ҆́ко да и҆ не ви́дѣтисѧ прохо́дꙋ е҆го·

Та́ко и҆ мы̀ рожде́ни ѻ҆скꙋдѣваем̑ и҆ чтѝ ѹ҆бо ни е҆ді́наго зна́менїѧ мо́жемъ показа́ти, въ ѕло́бѣ же на́шеи скончи́мсѧ·

И҆бо ѹ҆пова́нїе нечести́выхъ ꙗ҆́ко пра́хъ ѿ вѣт́ра под̑е́млетсѧ.
и҆ ꙗ҆́ко пѣна мѧ́к꙽ка ѿ бꙋрѧ растръгнетсѧ, и҆ ꙗ҆́ко ды́мъ ѿ вѣтра разливает̑сѧ, и҆ ꙗ҆ко па́мѧть прихо́да е҆ді́ного дн҃е пре́иде·

Пра́ведници же въ вѣки живꙋтъ.
и въ г҃ѣ м꙽зда̀ и҆хъ, и҆ помышле́нїе и҆хъ пред̑ вы́шнимъ·

Сего ра́ди прїимꙋть црс̑҇твїе красоты̀, и҆ дїади́мꙋ доброты̀ ѿ рꙋкѝ гн҃ѧ·

Ꙗ҆́ко десни́цею покры́ет̑ и҆хъ, и҆ мы́шцею защи́титъ и҆х꙽·

И прїиметъ ѻ҆рꙋжїе ре́вности е҆го, и въѻ҆рꙋжено сътворитъ създа́нїе на м꙽ще́нїе врагомъ.
и҆ ѻ҆блече́тъ въ бро́нѧ пра́вды, и҆ ѻ҆бложитъ шле́м꙽ сꙋда и҆́стинна·

Прїиметъ щи́тъ непобори́мъ прпд̑бїѧ, поѻ́стрит꙽ же напра́сенъ гнѣвъ въ ѻ҆рꙋжїе, и҆ побо́рет̑ с нимъ ми́ръ на безꙋмныа.

И҆ по́идꙋтъ пра́волꙋчне стрѣлы мол̑҇нїѧ, и҆ ꙗ҆́ко ѿ бл҃гокрꙋжна лꙋ́ка ѻ҆́блачна на намѣрїе перꙋтъ·

И҆ ѿ каменоме́тныѧ ꙗ҆́рости и҆сполнъ падꙋтъ гра́ды, и҆ възнегодꙋ́етъ на нихъ вода̀ морьска́ѧ, рѣ́ки же потекꙋтъ жесточае.
противꙋ тх̑ѣ ста́нетъ дх҃ъ си́лы, и҆ ꙗ҆́ко бꙋрѧ раздѣлитъ ихъ.
и҆ ѻ҆пꙋстошит̑ всю̀ зе́млю безаконїѧ, и҆ ѕло́ба превратитъ прс̑҇толъ си́лныхъ·

Глв̑҇а, ѕ҃·

Слы́шите б̂о цр҃їе и҆ разꙋмѣ́ите, и҆ наѹ҆чи́тесѧ сꙋдїѧ концемъ землѝ.
внꙋши́те съдержа́щїи мно́жества, и҆ гор꙽дѧ́щеисѧ ѻ҆ наро́дѣхъ ꙗ҆зы́къ·

Ꙗ҆́ко дана е҆сть ѿ г҃а держа́ва ва́мъ, и҆ си́ла ѿ вы́шнѧго·

И҆же и҆стѧ́жетъ дѣ́ла ва́ша, и҆ помышле́нїѧ и҆спыта́етъ.
ꙗ҆́ко слꙋ́зи сꙋще црс̑҇тва е҆го не сꙋди́сте пра́во, ни съхрани́сте зако́на, ниже по во́ли бж҃їеи ходи́сте·

Съкрꙋше́нїе ско́ро ꙗ҆вит̑сѧ ва́мъ, ꙗ҆́ко сꙋдъ жесточа́ишїи на тѣхъ въ находѧ́щихъ бывае҆т꙽·

Ма́ла б̂о подаетсѧ млс̑҇ть, си́лнїи же си́лне и҆стѧ́жꙋтсѧ·

Не лишает̑ бо сѧ лица всѣхъ влд̑ка.
ниже ѹ҆срами́тсѧ вельмо́жи.
ꙗ҆́ко ма́ла и҆ вели́ка се́и сътвори, подо́бне же проразꙋмѣва́етъ ѻ҆ всѣхъ.
держа́вным꙽ же крѣпко совѣ́сть и҆спыта́нїе·

К вам̑ б̂о ѽ мꙋчи́тели словеса моѧ, да наѹ҆чи́тесѧ премꙋ́дрости и҆ не падете.
и҆бо съхранѧ́щеи прпд̑бне прпд̑бнаѧ преѹ҆подобѧ́тсѧ.
і҆ и́же наѹ҆ча́ютъ сїа ѻ҆брѧ́щꙋть ѿвѣтъ.
въжделѣ́ите ѹ҆бо словес̑҇ моих̑, възлюби́те и҆ накажи́тесѧ·

Свѣтла и҆ неѹ҆вѧдо́ма е҆сть премꙋдрость, и҆ възмо́жна ви́дитсѧ ѿ любѧ́щих̑ ю҆̀, и҆ ѻ҆брѧ́щетсѧ ѿ и҆́щꙋщихъ ю҆̀.
достизает̑ жела́ющихъ пред̑видѣти·

Ѹ҆рани́выи к не́и не ѹ҆трꙋдит̑сѧ, пред̑тека́ѧ б̂о пред̑ вра́ты его.
е҆же б̂о помы́слити ѻ҆ не́и чю́вство е҆сть съверше́ное, и҆ бдѧ́и е҆ѧ̀ ра́ди въ ско́ре бе̑ печа́ли бꙋдет̑.
ꙗ҆́ко досто́иныхъ е҆ѧ̀ сїѧ ѻ҆бхо́дитъ и҆́щꙋщи, и҆ на стезѧ́хъ пока́жет̑сѧ и҆мъ блгд̑тнѣ.
и҆ въ всем̑ провидѣ́нїи пред̑тече́тъ и҆мъ.
нача́ло б̂о е҆ѧ̀ и҆стиннѣ́ише е҆сть наказа́нїѧ вожд̑елѣ́нїе.
прилежа́нїе же наказа́нїѧ любы, и҆ лю́битъ же хране́нїе зако́на е҆ѧ̀.
хране́нїе же зако́на съверше́нїе нерастлѣнїа е҆сть, нерастлѣнїе же тво́ритъ бли̑ бы́ти б҃ꙋ.
въжд̑елѣ́нїе б̂о премꙋ́дрости възво́дитъ къ црс̑҇твꙋ вѣ́чномꙋ·

А҆ще ѹ҆бо наслажд̑аетесѧ прс̑҇тлы и҆ скѷпетры ѽ мꙋчи́телїе людїи, почтѣт́е премꙋ́дрость да въ вѣ́ки црс̑҇твꙋете·

Чт̂о же е҆сть премꙋ́дрость и҆ ꙗ҆́ко бы́сть, възвѣщꙋ и҆ не ѹ҆таю ѿ васъ та́инъ.
н̂о ѿ нача́ла роже́нїѧ из̑слѣ́жꙋ, и҆ положꙋ на свт̑ѣ ра́зꙋмъ е҆ѧ̀, и҆ не престꙋплю и҆стин꙽ны.
ниже за́вистїю таю҆щи съпꙋтьствꙋю, ꙗ҆́ко се́и не бꙋ́детъ прича́стникъ премꙋ́дрости.
мно́жество же премꙋ́дрыхъ сп҃сенїе ми́рꙋ.
и҆ цр҃ь премꙋ́дръ ѹ҆тверже́нїе е҆сть людем̑·

Сего ради прїимѣте наказа́нїе по словесе́мъ мои҆м꙽, и҆ ползꙋетъ вам̑·

Глв̑҇а, з҃·

Єсмь б̂о и҆ а́зъ чл҃къ смр҃тенъ подо́бенъ всѣмъ, и҆ бывыи ѿ роди́телѧ прежде създа́н꙽наго.
и҆ въ чре́вѣ матерни взѧ́хъ пло́ть, десѧтїю мс̑҇цеи сътолстѣхъ въ кро́ви ѿ сѣмени мꙋж́еска, не ѹ҆слаже́нїю л̂и сна сънидо́хъ·

И҆ а́зъ рожд̑енъ въспрїѧх̑ ѻ҆́бщего а҆е́ра, и҆ в подо́бостра́стнꙋю зе́млю ѹ҆падо́хъ, и҆ перваго гла́са подо́бна всѣмъ и҆спꙋстих̑ пла́чꙋщи.
и҆ в пеленахъ въскормле́нъ е҆смь, и҆ вели́кимъ прилежа́нїемъ.
ни е҆ді́нъ б̂о цр҃ь и҆́но и҆мѣ рожде́нїѧ нача́ло.
е҆ді́нъ бо вход̑ всѣмъ е҆сть в жи́тїе подо́бен꙽ же і҆ и҆схо́дъ·

Сего ради помоли́хсѧ и҆ дана бы́сть мнѣ мꙋ́дрость, и призва́хъ и҆ прїиде на́ мѧ дх҃ъ премꙋ́дрости.
и҆ пред̑сꙋди́хъ ю҆̀ скѵпетръ и҆ престо́лъ, и҆ бога́тество ничт̂оже мнѣхъ бы́ти въ рас꙽сꙋже́нїю тоѧ.
ниже ѹ҆подоби́хъ е҆ѧ̀ ка́мени пречи́стомꙋ, ꙗ҆́ко все зла́то въ сложе́нїи тоѧ пѣсо́къ е҆сть меншїи, и҆ ꙗ҆́ко кал̑҇ мни́тсѧ пред̑ не́ю сребро·

Па́че здра́вїѧ и҆ красоты възлюби́хъ ю҆̀, и҆ пред̑ложи́хъ ю҆̀ за свѣтъ и҆мѣти, ꙗ҆́ко не ѹ҆сыпа́емо е҆сть вѣща́нїе е҆ѧ.
прїидо́ша же мнѣ̀ бл҃га всѧ вкꙋ́пѣ с нею, и҆ без꙽числе́но бога́тьство рꙋко́ю, е҆ѧ·

И҆ възвесели́ же сѧ ѻ҆ всѣхъ ꙗ҆́ко и҆хъ мни́тсѧ премꙋ́дрость, и҆ не видх̑ѣ же е҆ѧ̀ в роже́нїю бы́ти си́хъ, неле́стне наѹ҆чих̑сѧ, без꙽ за́висти подаю, и҆ бога́тьства е҆ѧ̀ не съкры́ю, не конча́емо б̂о е҆сть сокро́вище чл҃ком̑, е҆го́же бл҃гїи къ б҃ꙋ посла́ша въ содрꙋже́нїе, и҆ наказа́нїа ради да́ры съста́влены·

Мнѣ же да́сть б҃ъ гл҃ати ѻ҆сꙋжде́нїѧ и҆ мнѣти досто́ине ѹ҆спѣва́ю҆щихъ·

ꙗ҆́ко тои премꙋ́дрости водитель е҆сть, и҆ премꙋдрымъ и҆справи́тель·

Въ рꙋ́кꙋ б̂о е҆го и҆ мы̀ и҆ словеса̀ наша и҆ всѧ́ка же мꙋ́дрость, и҆ дл̑҇ѣ хꙋдо́жество.
сеи б̂о даде мнѣ и҆же сꙋть ра́зꙋма и҆́стинна, позна́ти съставле́нїе ми́рꙋ, и҆ съдѣла́нїе стихїи.
нача́ло и҆ съверше́нїе и҆ по́лъ вре́менїѧ, ѻ҆́бразъ премѣне́нїе і҆ и҆змѣне́нїе, и҆ съверше́нїе вре́менемъ.
лѣта крꙋ́гъ, и҆ ѕвѣздамъ раз꙽смотре́нїе, е҆стество живо́тныхъ, и҆ гнѣ́въ ѕвѣр́еи.
вѣтровъ нꙋж́дꙋ и҆ помышле́нїѧ чл҃къ, ра́зньство лѣтора́слемъ и҆ си́лы ко́ренїи, и҆ е҆ли́ка же сꙋть съкры́та и҆ непред̑видѣ́нна и҆з꙽ѹ҆чи́хъ.
в сихъ б̂о ѹ҆мохитрецъ наѹчи м̂ѧ премꙋ́дрости.
е҆сть б̂о в то́и дх҃ъ ст҃ъ ра́зꙋма, е҆ді́нород̑ныи, мно́годе́ньныи зра́чныи.
бл҃годви́жныи, пречи́стыи, нескве́рныи и҆́стиненъ, бл҃гъ, любѧ́щъ добро̀, ѻ҆́стръ не възбра́ненъ, бл҃годѣлателенъ, любочл҃ченъ, и҆звѣстныи крѣ́пкїи, без́печа́ленъ, вс̂еси́ленъ вс̂евидѧ́щїи·

Вы́нꙋ въмѣщаѧи дх҃овъ разꙋми́чныхъ чи́стых꙽, зрачнѣ́ишихъ.
всѣхъ б̂о движе́нїи под̑вижнѣ́иша е҆сть премꙋ́дрость·

достиза́етъ и҆ въмѣщает̑ вы́нꙋ ради своеѧ чистоты, мгла б̂о е҆сть си́лы бж҃їа и҆злїѧ́нїе вседержи́телѧ крѣ́пка, и҆ сего ра́ди ничто̀ ѻ҆сквернено на ню прїиде́тъ·

Ѹ҆бѣле́нїе б̂о е҆сть свѣтлости вѣ́чныѧ и҆ зерца́ло непоро́чно бж҃їѧ дѣла́нїѧ, и҆ ѻ́бразъ бл҃госты́нѧ е҆го.
е҆ді́на же сꙋщи всѧ мо́жет̑ и҆ пребыва́ющаа в неи всѧ ѻ҆бновлѧет̑·

И҆ по ро́дѣхъ въ дш҃а прпд̑бныхъ преходѧ́ща, дрꙋ́ги бж҃їѧ и҆ прро̑҇ки поставлѧ́етъ.
ничтоже б̂о възлю́битъ б҃ъ, то́кмо сего и҆же съ премꙋ́дростїю пребывает̑·

Є҆сть б̂о сїѧ краснѣ́иши сл҃нца, и҆ паче всѣхъ ѕвѣздъ положе́нїѧ свѣтꙋ, паче лꙋ́чша ѻ҆брѣтесѧ пре́жнѧѧ.
сего ѹ҆бо въспрїимꙋет̑ но́щь, премꙋ́дрости же не ѹ҆долѣет̑ ѕлоба·

досѧ́жетъ б̂о ѿ конца да́же до конца крѣ́пко, и҆ раз꙽смотрѧ́етъ всѧ̀ бл҃го·

Глв̑҇а, и҃·

Сїю възлюби́хъ и҆ възысках̑ ѿ ю҆́ности моеѧ, и҆ възысках̑ невѣстꙋ води́ти себѣ, и҆ люби́тель бы́хъ красоты тоѧ.
бл҃город̑ства тоѧ сла́витъ съжи́тїе и҆мѣ́ющи бж҃їе, н̂о и҆ всѣхъ влд̑ка възлюби ю҆̀.
ѹ҆чи́тел꙽ница бо е҆сть наказа́нїа бж҃їа, и҆збра́телница дѣ́ла того, и҆ а́ще бога́тьство е҆сть въжделѣ́ннаго притѧжа́нїѧ въ животѣ.
чт̂о премꙋ́дрости богатѣ́ише, е҆ю́же дѣ́лаютсѧ всѧ̀, а҆ще же чꙋв꙽ство дѣ́лаетсѧ, кт̂о е҆ѧ̀ сꙋщихъ лꙋ́чшїи хꙋдо́жникъ е҆сть·

И҆ а́ще пра́вдꙋ възлю́битъ кт̂о, трꙋды сеѧ сꙋть чтс̑҇ны.
трезвѣ́нїю б̂о и҆ премꙋ́дрости ѹ҆читъ и҆ пра́вдѣ и҆ мꙋжества, и҆́хже лꙋ́чши ничтоже е҆сть въ жи́зни чл҃комъ·

И҆ а́ще мно́жествꙋ ѹ҆́ма вожд̑елѣ́етъ кто, вѣдѣти дре́внѧа, и҆ бꙋ́дꙋщаѧ разꙋмѣти.
вѣдѣти вѣтїѧ словесъ и҆ рѣше́нїѧ гада́нїи, зна́менїѧ и҆ чюдесѧ провѣ́дѣ, и҆ съхожде́нїе вре́менъ и҆ вѣ́ковъ·

Сꙋди́хъ ѹ҆бо сїю и҆звести мн̂ѣ къ сожитїю, вѣ́дꙋщи ꙗ҆ко бꙋ́детъ м̂и съвѣтникъ бл҃гихъ, и҆ прїе҆дине́нїе попече́нїи и҆ ско́рби·

И҆ бꙋ́детъ сею сла́ва въ наро́дѣхъ, и҆ честь пред̑ ста́рцы·

ю҆́ноша ѻ҆́стръ ѻ҆брѧ́щꙋсѧ въ сꙋ́дѣ, и҆ въ зра́цѣ си́л꙽ныхъ ѹ҆дивлюсѧ·

Молча́щꙋ м̂и потръпѧт̑, вѣща́ющꙋ м̂и вънмѧт̑·

и҆ гл҃ющꙋ м̂и ѻ҆ мно́ѕѣ, рꙋ́кꙋ положат̑ на ѹ҆ста своѧ·

Сеѧ ради прїимꙋ без꙽смр҃тїе, и҆ па́мѧть вѣ́чнꙋю симъ и҆же по мнѣ ѻ҆ста́влю.
расмотрю лю́ди, и҆ ꙗ҆зы́цы повинꙋтсѧ м̂и.
ѹ҆боѧт̑сѧ мене слы́шавши мꙋчи́тели стра́шнїи, и҆ ѻ҆ мно́жествѣ ꙗ҆́влю́сѧ бл҃гъ и҆ въ бра́ни крѣ́покъ·

Въходѧ́щи въ до́мъ мои ѹ҆покоюсѧ с нею·

не бо и҆́мать го́рести жи́тїе е҆ѧ̀·

ни бо́лѣзни съжи́тїе тоѧ, н̂о весе́лїе и҆ ра́дость·

Сїѧ помышлѧ́ющи въ мнѣ̀ и҆ печахсѧ въ срд̑цы мое҆мъ, ꙗ҆́ко без꙽смр҃тна е҆сть въ срод̑ствѣ премꙋдрость, и҆ въ содрꙋженїи е҆ѧ̀ ѹ҆слаже́нїе бл҃го, и҆ въ трꙋдѣхъ рꙋ́кꙋ е҆ѧ бога́тьство без̑ ѻ҆скꙋдѣ́нїѧ·

и҆ въ ѻ҆бъѹ҆че́нїю бесѣды е҆ѧ мꙋдрость, и҆ просвѣще́нїе въ приѻ҆бще́нїи слове́съ е҆ѧ·

ѻбхожа́хъ и҆́щꙋщи да въспрїимꙋ ю҆̀.
ѻ҆́трокъ же быхъ разꙋ́менъ, дш҃и же бл҃гїѧ жре́бїи.
паче же бл҃гъ сы́и прїидох̑ въ тѣ́ло нескве́рно·

Познахъ же ꙗ҆́ко не и҆на́ко бꙋдꙋ въздержа́нъ, а҆ще не б҃ъ да́сть·

И҆ сїе кое҆ю мꙋдростїю вѣдѣти кое҆го е҆сть блгд̑ть·

И҆ прїидо́хъ къ г҃ꙋ и҆ моли́хсѧ е҆мꙋ, и҆ реко́хъ ѿ всего срд̑ца мое҆го·

Глв̑҇а, ѳ҃·

Бе҃ ѿц҃ъ и҆ г҃и млс̑҇ти твое҆ѧ, сътвори́выи всѧ сло́вомъ твои҆мъ.
и҆ премꙋдростїю твое҆ю ѹ҆строи́выи чл҃ка.
да владѣ́етъ ѿ тебе сътворе́нными тва́рми.
и҆ да расмо́трит꙽ ми́ръ въ прпд̑бїи и҆ пра́вдѣ, и҆ въ ѹ҆правле́нїи дш҃и сꙋдъ сꙋди́ти.
да́жд̑ь мнѣ̀ престо́лъ твои҆хъ пред̑ста́тел꙽ницꙋ премꙋдрость, и҆ не ѿрини мене ѿ ѻ҆́трокъ твои҆хъ.
ꙗ҆́ко а҆зъ рабъ твои, и҆ сн҃ъ рабы̀ твое҆ѧ·

и҆ чл҃къ не́мощенъ и҆ ма́ловре́мененъ, и҆ ѹ҆маленъ въ ра́зꙋмѣ сꙋда и҆ зако́нъ·

И҆ а́ще ѹ҆бо кт̂о бꙋдетъ съверше́нъ въ сн҃ѣхъ чл҃ческих̑.
а҆ще ѹ҆далит̑сѧ премꙋдрость твоѧ ни въчто́же почте́тсѧ·

Ты же и҆збра́лъ м̂ѧ е҆си цр҃ѧ лю́демъ твои҆мъ, и҆ сꙋдїею сн҃ом̑ твои҆мъ и҆ дще́ремъ·

И҆ ре́клъ м̂и е҆си създа́ти хра́мъ въ горѣ ст҃ѣи твое́и, и҆ въ гра́дѣ ѻ҆бита́нїѧ твое҆го ѻ҆лта́рь·

Подо́бїемъ скѷнїѧ твое҆ѧ ст҃ыѧ;
юже ѹ҆гото́валъ е҆си ѿ нача́ла.
и҆ с тобо́ю премꙋдрость вѣдꙋщїѧ дѣ́ла твоѧ.
и҆же пребы́сть тогда е҆гда ми́ръ твори́лъ е҆си, и҆ видѧ́ше чт̂о ес̑҇ ѹ҆год̑но ѻ҆чи́ма твои҆ма, и҆ чт̂о пра́во въ за́повѣдехъ твоих̑·

Посли ю҆̀ съ нб҃съ ст҃ыхъ, и҆ ѿ прс̑҇тла сла́вы твое҆ѧ·

Посли ю҆̀ да сꙋщи съ мно́ю трꙋдитсѧ, да вѣмъ чт̂о бл҃гоѹ҆го́дно е҆сть пред̑ тобо́ю.
вѣсть б̂о ѻна всѧ̀ и҆ разꙋмѣ́етъ, наста́вит̑ м̂ѧ въ дѣ́лехъ мои҆хъ мꙋдрене, и҆ съхрани́тъ м̂ѧ въ сла́вѣ свое́и.
и҆ бꙋдт̑ꙋ ѹ҆го́дна дѣ́ла моѧ, и҆ рассꙋжꙋ лю́ди твоѧ пра́вед̑не, и҆ бꙋдꙋ досто́инъ престо́ла ѿц҃а мое҆го·

Кт̂о бо чл҃къ позна́етъ совѣтъ бж҃їи, и҆ кт̂о помы́слитъ чт̂о хо́щетъ б҃ъ·

Помышле́нїѧ б̂о смр҃тна боѧзне́на, и҆ недовѣдо́мы провидѣнїа на́ша·

Тѣ́ло б̂о тлѣ́нное ѻ҆тѧгчает̑ дш҃ю, и҆ земное жи́тїе ѻ҆дебелѣвает̑ ѹ҆́мъ, и҆ велїе попеченїе мно́га помышлѧ́юща.
е҆два разꙋмѣваем̑ и҆же на землѝ, и҆ ꙗ҆́же въ рꙋкахъ ѻ҆брѧ́щемъ съ трꙋдомъ·

А҆ ꙗ҆́же на нб҃си кт̂о и҆с꙽слѣди.
во́лю же твою кт̂о позна, а҆ще не ты̀ да́лъ е҆си премꙋ́дрость, и҆ посла́лъ е҆си дх҃а ст҃аго твое҆го ѿ высоты́·

И҆ тако и҆спра́виша стеѕѧ̀ и҆же на землѝ, и҆ ꙗ҆́же тебѣ ѹ҆го́дно наѹ҆чи́ши чл҃цы.
и҆ премꙋ́дростїю твое҆ю и҆сцѣлѣша·

Глв̑҇а, і҃·

Сїѧ прьвозда́нънаго ѿц҃а ми́рꙋ е҆ді́но създа́на съхранѝ, і҆ и҆зведе е҆го ѿ грѣха ег̑҇.
даде́ же е҆мꙋ крѣпость содръжа́ти всѧ́ческаѧ.
ѿстꙋпи́ же ѿ неѧ непра́ведне въ гнѣве е҆го, братоѹ҆бїическими поги́бе ꙗ҆́рос̑҇ми.
сего ра́ди потоплѧ́емꙋ зе́млю, па́ки сп҃се премꙋдрость·

въ составле́нїю древа пра́веднаго съблюдѐ.
сїѧ и҆ во е҆ді́номы́слїи лꙋка́въства ꙗ҆зы́ческа, сотрѧ́сши ѻ҆брѣтѐ пра́веднаго и҆ съхранѝ е҆го непоро́чна б҃ꙋ, и҆ на ча́дѣ млс̑҇ть крѣпкꙋ снабдѝ.
сїѧ пра́вед̑наг̑҇ ѿ погиба́ющихъ нечести́вых̑ и҆зба́ви бѣжа́щаго, ѻ҆гнѧ̀ низходѧ́ща на пѧть гра́дъ, е҆гоже е҆ще свѣдѣтельство лꙋка́въствїѧ дымѧ́щисѧ стоит̑ пꙋсте, и҆ неи҆сконча́ными вре́мены плодоносѧ́ща древеса̀.
и҆ невѣрныѧ дш҃а па́мѧть стоѧ́щи столпъ слан̑҇<.>

Премꙋдрость б̂о ми́моходѧ́щїи не токмо съгрѣши́ша е҆же не вѣдѣти е҆ѧ̀ бл҃га, н̂о и҆ безꙋмїѧ свое҆го ѻ҆ста́виша жи́тїю па́мѧть, в ни́хже согрѣши́ша да не възмо́гꙋтъ ѹ҆таи҆ти.
премꙋдрость же слꙋжа́щих̑ е́и ѿ болезнеи и҆зба́ви.
сїѧ бѣгльца гнѣва бра́та пра́веднаго наста́ви въ стезѧ̀ пра́вы и҆ показа̀ е҆мꙋ цр҃ьствїе бж҃їе.
и҆ да́сть е҆мꙋ ра́зꙋмъ ст҃ыхъ, почтѝ е҆го въ трꙋдехъ, и҆ ѹ҆мно́жи трꙋды е҆го.
въ ѻ҆биде ѻ҆дръжа́щихъ е҆го, пред̑ста̀ е҆мꙋ и҆ ѻ҆богатѝ е҆го, и҆ съхранѝ е҆го ѿ вра́гъ, и҆ ѿ лаѧ́телїи защитѝ е҆го.
и҆ под̑виг̑҇ крѣпокъ дадѐ е҆мꙋ, да ѹ҆вѣсть ꙗ҆́ко всѣхъ силнѣ́и е҆сть бл҃гочестїе·

Сїа проданаго правед̑наго не ѻ҆ста́ви, н̂о и҆ ѿ грѣха̀ и҆зба́ви е҆го·

сни́де же с ним̑ в ро́въ, и҆ въ ѹ́захъ не ѻ҆ста́ви е҆го.
дондеже принесе е҆мꙋ скѵ́петръ цр҃ьствїѧ, и҆ вла́сть на мꙋча́щих̑ е҆го.
и҆ л꙽живых̑ же показа̀ поро́к꙽ сътворших̑ на́нь, и҆ дадѐ е҆мꙋ сла́вꙋ вѣчнꙋю·

Сїѧ людїи пра́ведныхъ и҆ сѣмѧ непоро́чное и҆зба́ви, ѿ ꙗ҆зы́къ ѻ҆скорблѧ́ю҆щихъ.
вни́де въ дш҃ꙋ раба̀ гн҃ѧ, и҆ въста̀ противꙋ цр҃еи стра́шнымъ в чюдесехъ и҆ зна́менїихъ.
и҆ възда̀ прпд̑бнымъ м꙽здꙋ̀ трꙋдовъ и҆хъ, и҆ наста́ви и҆хъ въ пꙋть ди́венъ.
и҆ бысть и҆мъ въ покро́въ днем꙽, и҆ въ пла́мень ѕвѣздъ в нощи.
и҆ проведѐ и҆хъ по морю чрьмномꙋ, и҆ проведѐ и҆х꙽ сквоѕѣ во́дꙋ зѣлнꙋ.
враги же и҆хъ потопѝ, и҆ ѿ глꙋби́нныѧ бездны и҆зврѣ̀ и҆хъ·

Сего ради пра́веднїи взѧ́ша коры́сти нечести́выхъ.
и҆ въспѣша г҃и и҆́мѧ ст҃ое твое, и҆ ѻ҆долѣтелницꙋ рꙋ́кꙋ твою похвали́ша е҆ді́нодꙋшне.
ꙗ҆ко премꙋдрость ѿврьзе ѹ҆ста нѣмыхъ, и҆ ꙗ҆зы́цы младе́нцемъ сътворѝ ꙗ҆́сны·

Глв̑҇а, а҃і·

Ѹ҆пра́ви дѣла и҆хъ в рꙋкꙋ прро̑҇ка ст҃аго.
про́иде пꙋсты́ню неѻ҆бита́ннꙋю, и҆ въ непроходи́мых̑ въдрꙋѕѝ кꙋща.
съпроти́вишасѧ бра́немъ и҆ ѿм꙽сти́ша врагомъ.
воз̑жада́ша и҆ възва́ша тебе, и҆ дана быс̑҇ и҆мъ вода̀ ѿ ка́мени несѣко́ма, і҆ и҆сцѣле́нїе жа́жди ѿ ка́мени жестока.
и҆хже б̂о ради пострада́ша вра́ѕи их̑, сихъ ради сїи недоѹ҆мѣ́ющесѧ бл҃годѣѧ́нїѧ·

За и҆сточникъ ѹ҆бо вѣ́чныѧ рѣки, кро́ви и҆злїѧ́нїе смѧте́нны въ ѻ҆бли́ченїе младен̑҇цеѹ҆бїица̑ по повелѣнїю да́лъ е҆си и҆мъ, гобзꙋю҆щꙋсѧ во́дꙋ без꙽наде́жне показа́лъ е҆си.
за е́же тогда жа́ждꙋщихъ ка́ко проти́вных̑ ѹ҆мꙋчи.
е҆гда б̂о и҆скꙋше́ни, и҆б̂о въ млс̑҇ти наказа́нїи позна́ша како въ гнѣве ѻ҆сꙋжени нечести́вїи мꙋчишасѧ.
си́х же ѹ҆бо ꙗ҆́ко ѿц҃ъ ѹ҆ча́щи и҆скꙋси́лъ е҆си, ѻ́нѣх же ꙗ҆́ко жестокъ цр҃ь ѻ҆сꙋжда́ѧ и҆спыта́лъ е҆си, и҆ ѿстоѧ́щїи же и҆ пред̑стоѧ́щїи та́кожд̑е мꙋчишасѧ.
сꙋгꙋба б̂о и҆хъ прїѧтъ печа́ль, и҆ стена́нїе съ па́мѧтїю минꙋвшихъ·

Є҆гда б̂о слы́шахꙋ свои҆хъ ради мꙋче́нїи бл҃годѣѧныхъ и҆хъ, съра́зꙋмѣва́ли г҃а·

Въ ѿложе́нїи б̂о дре́вле рече́наго ѿстꙋпи́ша смѣю́щасѧ, на концы̀ слꙋче́нїю ѹ҆диви́шасѧ.
неподо́бнаѧ пра́веднымъ жада́юще, за помышле́нїѧ же безꙋмныхъ непра́вда и҆хъ.
в ни́хже блазнѧ́щесѧ честова́хꙋ безъслове́сныѧ пресмыка́ю҆щїисѧ, и҆ звѣреи лю́тых꙽·

Послал̑҇ е҆си и҆мъ мно́жество без꙽слове́сныхъ животных꙽ въ ѿм꙽ще́нїе, да познают̑ ꙗ҆́ко и҆́миже съгрѣши́ша си́ми же и҆ мꙋчатсѧ·

Не невъзможна б̂о всесил꙽наѧ рꙋка̀ твоѧ̀, ꙗ҆́же сътворѝ ми́р꙽ ѿ несоѻ҆бра́зныѧ ве́щи.
и҆ посла̀ и҆мъ мно́жество медвѣ́деи, и҆л̂и ѹ҆давле́нїѧ льво́ва, и҆л̂и новороженых̑ гнѣва по́лныхъ и҆ незна́емыхъ ѕвѣреи, и҆л̂и ѻ҆́гнь ды́шꙋщъ, и҆л̂и ды́ма вонѧ́юща прилага́ющи.
и҆л̂и стра́шны ѿ ѻ́чїю и҆́скры насыла́ющи.
и҆хже не то́кмо па́кость можа́ше и҆стребити, н̂о и҆ ѻ́бразъ ѹ҆боѧ́сѧ погꙋби́ти.
и҆ безъ тѣхъ е҆ді́нѣмъ дх҃омъ па́сти мого́ша, ѿ сꙋда го́нени, и҆ развѣа́ни ѿ дх҃а си́лы твоеѧ, н̂о всѧ в мѣ́рꙋ и҆ число̀ и҆ превѣ́съ расмотри́лъ е҆си.

Мно́го б̂о мощи тебѣ па́че е҆сть всегда, и҆ державѣ мы́шца твоеѧ кт̂о съпроти́витсѧ.
и҆же ꙗ҆́ко стра́жнк꙽ въ превѣсе тако весь ми́ръ пред̑ тобо́ю, и҆ ꙗ҆́ко ка́плѧ росы̀ ѹ́тренїѧ сходѧ́щїѧ на́ землю.
ми́лꙋеши же всѣхъ ꙗ҆ко всѧ̀ мо́жеши, и҆ презира́еши грѣхѝ чл҃комъ въ покаѧ́нїе.
лю́биши же сꙋщаѧ вс̂ѧ, и҆ ничто́же гнꙋша́еши и҆же сътвори́лъ е҆́си, ни б̂о ненави́дѧщи чт̂о ѹ҆краси́лъ е҆си.
ка́коже пребысть сїе а҆ще ты̀ не и҆зво́ли, и҆л̂и е҆же не нарече́но ѿ тебѐ съхрани́сѧ.
щади́ши же всѧ̀ ꙗ҆́ко твоѧ сꙋть влд̑ко дш҃елю́бныи·

Глв̑҇а, в҃і·

Нетлѣ́нныи б̂о дх҃ъ твои ес̑҇ въ всѣхъ.
тѣмже заблꙋжа́ющихъ по ма́лѣ ѻ҆блича́е҆ши, и҆ в ни́хже съгрѣша́ют̑ въспомина́ѧ ѹ҆чи́ши, да премѣни́вшесѧ ѕло́бы вѣрꙋют̑ в т̂ѧ г҃и.
и҆ дре́внихъ б̂о ѻ҆бита́телеи землѝ ст҃ыѧ твоеѧ, възненави́дѣлъ е҆си ради дѣѧ́нїи злы́хъ.
вол꙽швенїи и҆́хже творѧ́хꙋ, и҆ жрътвы не прпд̑бныхъ.
и҆ чадоѹ҆бїец꙽ немлс̑҇тивыхъ, и҆ ѹ҆тробоꙗ҆́дцовъ члчс̑҇кихъ плотеи и҆ кровопїицевъ ѿ среды ст҃ых̑ і҆ и́стинныхъ твои҆хъ.
и҆ господїи ро́довъ дш҃ъ беспо́мощ꙽ныхъ въсхотѣлъ е҆си погꙋби́ти рꙋками ѿц҃ъ на́шихъ.
да досто́ино прїиметсѧ преселенїе ѻ́трокъ бж҃їихъ, и҆же ѹ҆ тебе всѣхъ дра́жїе е҆сть землѧ̀.
н̂о и҆ си́мъ ꙗ҆́ко чл҃комъ прости́лъ е҆си посла́лъ же е҆си пред̑текꙋщихъ во́и твои҆хъ ꙗ҆́ко ѻ҆́сы, да тѣхъ пома́лꙋ и҆стребѧ́тъ·

Не неси́ленъ бѣше въ бра́ни покори́ти нечести́выхъ пра́веднымъ, и҆л̂и звѣремъ сверѣпымъ, и҆л̂и сло́вꙋ же́стокꙋ по е҆дїномꙋ потреби́ти·

Сꙋдѧ́щи же пома́ле даѧ́ше мѣсто покаѧ́нїю, не невѣдѧщи ꙗ҆́ко лꙋка́въ е҆сть родъ и҆хъ и҆ е҆стестве́наѧ ѕло́ба и҆хъ, и҆ ꙗ҆́ко не премени́тсѧ помышле́нїе их̑ въ вѣки.
сѣмѧ б̂о бѣ̀ про́клѧто ѿ нача́ла, ниже боꙗ҆́щисѧ кого ѿпꙋще́нїе дава́ше грѣхомъ и҆хъ.
кт̂о б̂о речетъ тебѣ, чт̂о сътвори́лъ е҆си, и҆л̂и кт̂о постоитъ проти́вꙋ сꙋдꙋ твое҆мꙋ кт̂о по́имет̑ тебе ѻ҆ ꙗ҆зы́цехъ поги́бшихъ их̑же ты̀ сътвори, и҆л̂и кт̂о въ пред̑ста́нїе ти прїи́детъ ѿмщаѧ ѻ҆ ѻ҆би́дѧщихъ чл҃цехъ.
нѣсть б̂о и҆нъ б҃ъ ра́звѣ тебе и҆же ради́тъ ѻ҆ всѣхъ.
да пока́жеши ꙗ҆́ко не непра́во сꙋди́лъ е҆си, ниже цр҃ь и҆л̂и мꙋчи́тель пред̑ тобою възыска́ти могꙋтъ и҆хж погꙋби́лъ е҆си·

Пра́веденъ сы́и, пра́во всѧ̀ раз꙽смотрѧ́е҆ши.
неполе́знаго же мꙋчитисѧ ѻсꙋдиши, и҆ чю́жда твори́ши зе́мныѧ си́лы·

Крѣпость б̂о твоѧ ѻ҆правда́нїю нача́ло, и҆ еже всѣхъ тебе владычествовати и҆ всѣхъ щадѣти творитъ.
крѣпость б̂о пока́жеши невѣрꙋющемꙋ въ си́лѣ съврьше́нѣи, и҆ въ невѣдꙋщихъ дрьзость ѻ҆бличиш̑҇ ты́ же влд̑ко си́лныи въ кро́тости сꙋдиши, и҆ съ вели́кимъ щаде́нїемъ разъсматрѧ́еши нас̑҇·

С тобо́ю б̂о е҆сть е҆гда хо́щеши мощѝ, наѹ҆чил̑҇ же е҆си лю́ди своѧ си́цевых̑ ра́ди дѣл꙽, ꙗ҆́ко подоба́етъ пра́ведномꙋ бы́ти чл҃колю́бцꙋ.
и҆ въ бл҃гоѹ҆пова́нїи сътвори́лъ е҆си сн҃ы твоѧ, ꙗ҆́ко дае́ши ѻ҆ грѣсехъ покаѧ́нїе·

А҆ще б̂о вра́г꙽ ѻ҆́трокъ твои҆хъ и҆ длъжных̑ смр҃ти, и҆ съ си́цевыми мꙋчилъ е҆си въ имѣнїемъ и҆ млс̑҇тїю, даѧ́и лѣта и҆ мѣсто и҆́миже и҆змѣнѧ́тсѧ ѕло́бы.
с коли́кимъ прилежа́нїемъ сꙋди́лъ е҆си сн҃ы твоѧ.
и҆хже ѿц҃емъ клѧ́твы завѣща́нїѧ далъ е҆си бл҃гихъ въздержа́нїи.
насъ ѹ҆бо наказꙋѧ, врагѝ наша т꙽ма́ми бїеши.
да бл҃госты́ню твою помышлѧ́ем̑ сꙋдѧ́щи, сꙋди́ми же ча́емъ млс̑҇ти.
ѿню́дꙋже и҆ непра́ведныхъ въ безꙋмїи жи́вших̑ живо́тъ.
своиствеными и҆хъ мрь́зостѧми мꙋчилъ е҆си·

И҆б̂о въ заблꙋже́нїе пꙋтїи должа́е блꙋди́ша, богѝ мнѣша ꙗ҆́же въ животныхъ, врагом̑ безъче́стна, младенецъ безм̑ꙋныхъ м꙽щенїе лжꙋще·

Тѣмже ꙗ҆́ко ѻ҆троком̑ безъслове́сным̑ сꙋдъ в꙽ порꙋга́нїе посла́лъ е҆си.
и҆же порꙋга́ньми запреще́нїѧ не наѹ҆чи́шасѧ, досто́ина сꙋда бж҃їѧ и҆скꙋсѧт̑·

В них̑ же б̂о сїи страдахꙋ нꙋжда́хꙋсѧ ѻ҆ сихъ и҆хже мнѧ́хꙋ богѝ.
в ни́хъ мꙋчи́ми бѣша вѣдꙋще е҆гоже прежде ѿмѣта́хꙋсѧ знати б҃а и҆́стиннаго позна́ша·

Тѣм꙽же и҆ конецъ ѻ҆сꙋжде́нїѧ ихъ прїиде на нѧ·

Глв̑҇а, г҃і·

Сꙋе́тниж̑ ѹ҆бо вс̂и чл҃ци, в них̑же не под̑лежит̑ премꙋдрость ѻ҆́ бѕ҃ѣ.
и҆ ѿ ви́димых꙽ бл҃гъ не мого́ша вразꙋмѣти сꙋщаго.
н̂и дѣлахъ вне́млющи познаша хитрьца.
но и҆ли ѻ҆́гнь, ил̂и дх҃ъ, и҆ли скоръ воздꙋхъ, и҆ли вѣнецъ ѕвѣзда́мъ, и҆ли зѣлнꙋю во́дꙋ, и҆ли свѣтила нбс̑҇ныѝ стро́ители ми́рꙋ, бл҃гы възакони́ша, их̑же красотою ѹ҆слажа́ющесѧ боги мнѣша·

да ѹ҆вѣдѧтъ колико сих̑ влд̑ка лꙋчши.
красоты б̂о родонача́лникъ созда ѧ҆̀.
а҆щеж̑ си́лѣ и҆ дѣа́нїю ѹ҆дивлѧют̑сѧ, да разꙋмѣют̑ ѿ них̑ колико сътворивыи сїѧ силнѣишїи ес̑҇.
ѿ велі́чества б̂о красоты и҆зда́нїи неи҆згл҃ан꙽ныи рододѣлатель их̑ вѣдт̑ѣсѧ.
н̂о ѻ҆бач̑҇ ѻ҆ сих̑ е҆сть ѹ҆ничиженїе ма́ло, и҆бо са́ми сїи въскорѣ прельщают̑сѧ бг҃а и҆́щꙋщи и҆ хотѧщи ѻ҆брѣсти.
въ дѣлех̑ б̂о е҆го живꙋще ислѣдꙋют̑, и҆ совѣтꙋют̑сѧ зра́комъ ꙗ҆́ко бл҃га ви́димаѧ, паки ни́же сїи прощени, а҆ще б̂о толикаго возмогоша вѣ́дѣти, да могꙋтъ съзрѣти вѣ́къ.
си́хже влд̑ки како скоро не ѻ҆брѣтоша.
ѻ҆каа́ни же сꙋть и҆ въ мр҃твыхъ ѹ҆пова́нїа их̑, и҆же призваша бо́ги сѣлъ рꙋк꙽ чл҃ческихъ.
зла́то и҆ сребро̀ хитрости ѹ҆мышленїе, и҆ подобїѧ животных̑, и҆ли ка́мени неключи́маго дѣло рꙋки дре́внеи·

А҆ще же кт̂о веще сѣчецъ текто́н꙽, ѿ лѣса древо право ѿсѣчет̑ и҆ ѻ҆тешет̑ бл҃гоѹ҆чне вс̂ю корꙋ̀ е҆го, и҆ хитръствꙋѧ бл҃голѣпне сътворит̑ добр꙽ сосд̑ꙋ въ съжитїе живота, проданїе же дѣ́ла на ѹ҆готова́нїе бра́шна и҆здав꙽ насытис̑҇.
і҆ и҆змѣнено е҆же ѿ них̑ ни въчтож̑ бл҃гопотребно, древо кри́во сꙋчїа пол̑҇но, прїим̑ и҆зваа съ расꙋжденїем̑ мед̑лѣнїѧ свое҆го.
и҆ во и҆скꙋсѣ ра́зꙋма и҆зъѻ҆бра́зи е҆го, и҆ ѹ҆подоби е҆го ѻ҆́бразꙋ чл҃чꙋ, и҆ли нѣкое҆мꙋ живот̑номꙋ.
и҆ помаза е҆го шарами разли́кими и҆ ѻ҆чер꙽мни ма́сть е҆го, и҆ всѧкъ порокъ и҆же на немъ е҆сть низма́за.
и҆ сътвори е҆мꙋ досто́ино ѻ҆бита́нїе, и҆ на стѣнѣ поста́ви е҆̀, и҆ ѹ҆крѣпивши желѣзом̑ да не ѹ҆бо падетъ прозрѣ е҆̀.
вѣ́дыи ꙗ҆́ко не мо́жет̑ помощи себѣ, и҆б̂о и҆́дол̑҇ е҆сть, и҆ требѣ е҆сть е҆мꙋ помощи.
ѻ҆ притѧжанїѧх же и҆ ѻ҆ брацх̑ѣ е҆го и҆ чадѣхъ молѧсѧ, не стыди́тсѧ къ безъдꙋшномꙋ гл҃ѧ.
и҆ ѻ҆ здра́вїю ѹ҆бо не́мощнаго призыва́етъ, и҆ за живот̑ мрътваго мо́лит̑т̑, и҆ въ помо́щъ неключи́мꙋ призовет̑.
і҆ ѻ҆ пꙋтьше́ствїи про́ситъ и҆́же ходи́ти не мо́жет꙽, и҆ притѧжанїи и҆ дѣа́нїю и҆ рꙋкотвер꙽женїѧ некрѣпкаго рꙋками и҆ мꙋжества про́ситъ ѿ него̀, и҆же всх̑ѣ е҆сть не́мощнѣи·

Глв̑҇а, д҃і·

Плы́ти паки кт̂о помы́слит̑, и҆ сверѣпыѧ волны̀ преходи́ти.
носѧ́щаго е҆го кораблѧ̀ тлѣннѣишаго дре́ва призыва́етъ·

ѻ҆́ное же ѹ҆бо похотѣнїе къ снабдѣнїю смы́слилъ, хи́трец же мꙋ́дростїю содѣла·

Ты же ѿч҃е състроа́еши поразꙋмѣнїе, ꙗ҆́ко далъ е҆си и҆ въ мори пꙋть, и҆ въ волнах̑ стеѕю крѣпча́ишꙋ показꙋющи ꙗ҆́ко си́ленъ е҆си ѿ всѧ́кого спасти, да а҆́ще и҆ безъ хꙋдожества кт̂о възыидетъ.
хо́щеши же да не бꙋдꙋтъ празни дѣла премꙋ́дрости твое́а, сего ради и҆ мало́мꙋ дре́вꙋ, въвѣрѧ́ютъ чл҃цы дш҃а своа·

и҆ преходѧ́ще влъны корабльцемъ и҆збавле́ни сꙋть.
и ѿ нача́ла б̂о погибшихъ го́рдых̑ гиган̑҇товъ·

Ѹ҆пова́нїе мира въ корабльци и҆збѣжа, ѻ҆ста́ви вѣкꙋ сѣмѧ рожденїѧ, рꙋкою твое́ю ѹ҆строе́но·

Блс̑҇витъ б̂о сѧ дре́во и҆́мже быва́етъ ѻ҆правда́нїе, рꙋкотворенїе же проклѧто е҆сть і҆ и҆же сътвори е҆го.
ꙗ҆́ко е҆же содѣла тлѣнное, б҃а и҆менова.
въ равне б̂о ненави́дима сꙋть б҃ꙋ нечествꙋѧ́и и҆ нечестїе е҆го.
и҆б̂о сътвореное съ сотворшимъ ѹ҆мꙋ́читсѧ·

Сего ради и҆ въ и҆́долехъ ꙗ҆зы́ческихъ не бꙋдетъ расмотренїе, ꙗ҆́ко въ сътворенїю бж҃їем̑ въ мръзость сътворени сꙋть.
и҆ въ соблазнъ дш҃амъ чл҃ческим̑, и҆ в сѣть нога́мъ бꙋи҆хъ.
начало б̂о блꙋженїа е҆сть вънима́нїе и҆́долехъ, ѻ҆брѣтенїе и҆хъ ради тлѣнїе живота̀ е҆сть·

ниже б̂о бѣ̀ ѿ нача́ла, ниже бꙋдетъ въ вѣки.
тщесла́вїе б̂о чл҃къ вни́де въ ми́ръ, и҆ сего ради кратокъ и҆хъ конецъ въмѣнисѧ·

Го́рькимъ б̂о пла́чемъ сѣтꙋ́ѧ ѿц҃ъ скоро восхищенаго чада ѻ҆́браз̑ сътвори·

Є҆гоже тогда̀ чл҃ка мр҃тва.
нн҃ѣ ꙗ҆́ко б҃а чествова́ша.
и҆ предаде под̑рꙋчнымъ та́ины и҆ жрътвы·

потомъ въ времѧ възмо́же нечестивыи ѻ҆быча́и ꙗ҆́ко законъ съхраненъ е҆сть, и҆ мꙋчителеи повеленїемъ чествова́хꙋсѧ и҆зваѧ́ннаѧ.
и҆́хже в лице не могꙋще чествовати чл҃цы далнѧго ради ѻ҆бита́нїѧ, и҆здалеча же ѻ҆́бразъ и҆зъѻ҆браженъ и҆знесенъ е҆сть ꙗ҆влѧ́ющи ѻ҆́бразъ цр҃евъ е҆гоже чествовати сътвори́ша.
да ѿстоѧ́щаго ꙗ҆́ко настоа́щаго чествꙋ́ютъ съ прилежанїемъ.
въ повеленїе за́кона и҆ не разꙋмѣ́ющих̑ хꙋдожника и҆змѣнѧше любочестїе.
се́и б̂о хотѧ ѹ҆годи́ти дръжателю принꙋдисѧ хи́тростїю свое́ю да подобїе на́ипаче въѻ҆бразитъ·

Мно́жество же чл҃къ и҆з꙽влечено блгд̑ти дѣланїѧ ради.
въ ма́лѣ чествованаго чл҃ка, и҆ нн҃ѣ б҃а въмѣни́ша.
и҆ сїе бысть жи́тїю въ лаѧ́нїе, ꙗ҆́ко ласканїю и҆л̂и мꙋчительствꙋ послꙋжи́ша чл҃цы, ꙗ҆́ко не ѻ҆бщено и҆мѧ ка́менїем̑ и҆ древомъ ѻ҆бложи́ша·

Посемъ и҆ не довлѣша прельщатисѧ ѻ бж҃їю ра́зꙋмѣ, но и҆ въ велицѣ живꙋще безꙋмїи бра́ни, сицеваѧ зла́ѧ миръ и҆менꙋют̑.
и҆ли сн҃оѹ҆бїиство жрꙋще, и҆ли съкровеныѧ жрътвы творѧ́ще, и҆ли неи҆стовъства ѿ и҆ных̑ сложенїи подобїѧ приводѧ́ще.
ниже живота ниже браковъ чи́сто е҆ще съхранѧ́тъ, е҆теръ е҆тераго и҆ли дреколемъ ѹ҆бива́етъ, и҆ли блюдѧ́щи ѻ҆скор꙽блѧет̑.
всѧ же смѣшена сꙋть, кро́вь и҆ ѹ҆бїиство, татьба, и҆ лесть, и҆стлѣнїе, и҆ невѣръствїе, и҆ смꙋщенїе, заклинанїе, молва, бл҃гых̑ блгд̑ти не в꙽спомѧновенїе, дш҃амъ ѻ҆скверненїе, роженїю премѣненїе, бракомъ бесчинїе, прелюбодѣа́нїе стꙋдодѣ́анїе·

Не и҆менована б̂о и҆́доломъ слꙋженїѧ, начало всѣмъ злы́мъ и҆ вина и҆ конецъ е҆сть.
и҆ли е҆гда̀ веселѧтсѧ неи҆стов̑҇ствꙋ́ютъ, и҆ли пророкꙋют̑ ло́жнаѧ, и҆ли живꙋтъ неправед̑не, и҆ли заклина́ютсѧ скоро.
бездꙋшным̑ б̂о и҆́долом̑ надѣ́ютсѧ, ѕл̂ѣ кленꙋщесѧ во льсти низъмꙋдрꙋюще преподобїе.
не бо си́ла кленꙋщихъ, н̂о съгрѣша́ющимъ сꙋдъ приходитъ вы́нꙋ за престꙋпленїе неправед̑нымъ·

Глв̑҇а, е҃і·

Ты же б҃ъ нашъ бл҃гъ и҆стинен̑҇ е҆си, долготръпеливъ и҆ ми́лостивъ расмотрѧ́ѧ вс̂ѧ.
и҆б̂о а҆ще съгрѣшае҆м꙽ твоѝ е҆смы̀ вѣдꙋще дер̑҇жа́вꙋ твою.
и҆ а́ще не съгрѣша́емъ вѣмы ꙗ҆́ко тебѣ въмѣнихомсѧ.
позна́ти б̂о тебе вс̂есъвръшена е҆сть пра́вда, и҆ вѣдѣти си́лꙋ твою ко́рень е҆сть бесмр҃тїѧ·

Ниже б̂о прельсти на́съ чл҃къ ѕл҃охи́трьныхъ помышленїе, ниже сѣнїю пи́саныи.
трд̑ꙋ бес плода ѻ҆́бразъ и҆зваѧнъ различными виды, и҆же дасть безꙋмномꙋ похотѣнїе, и҆ любѧтъ мр҃твых̑ ѻ҆бразовъ виды безъ дш҃ѧ.
тѣмже лꙋкавымъ любители достоини смр҃ти сꙋть, и҆же творѧтъ таковаѧ ꙗ҆́коже чествꙋютъ и҆миже дѣиствꙋютъ и҆хже любѧтъ·

И҆бо скꙋделникъ мѧ́къкїѧ землѧ̀ мнꙋщи съ трꙋдомъ дѣла́етъ, ко и҆зъѻ҆билїю насъ кое҆гождо.
но ѿ сего же бренїѧ созда, и҆ ꙗ҆́же чи́стыхъ дѣлъ слꙋженїѧ сосꙋды и҆ съпротивныѧ же всѧ̀ подобне.
сих̑ же и҆ на кое҆гождо е҆сть потреба, сꙋдїѧ е҆сть бренодѣ́латель.
и҆ зл̂отрꙋдникъ бога сꙋетна ѿ сегоже творитъ бренїѧ·

И҆же въ ма́лѣ преже ѿ земли сътворенъ бысть, и҆ по ма́лѣ и҆́детъ и҆з неѧ́же въспрїѧ́тъ бы́сть дш҃ею домъ·

тѧжетно е҆сть и҆хъ прилежа́нїе, не помышлѧ́а ꙗ҆́ко бꙋдетъ твори́ти·

ниже ꙗ҆́ко крато конечно житїе и҆́мат̑, зла́тодѣлателемъ и҆ сребро̀лїѧтелемъ, и҆ мѣ́ди зда́телемъ подоби́сѧ, и҆ сла́вꙋ мнитъ и҆же хи́тре дѣла́етъ·

Пепелъ б̂о е҆сть срд̑це е҆го, и҆ землѧ̀ про́ста ѹ҆пова́нїе е҆го, и҆ бренїѧ хꙋж꙽ши животъ е҆го, ꙗ҆́ко не ѹ҆вѣде създа́вшаго е҆го, и҆ вод̑хнꙋвшаго е҆мꙋ дш҃ꙋ дѣлателнꙋ.
и҆ въд꙽хнꙋвшаго дх҃ъ животныи.
н̂о въмѣниша порꙋга́нїе быти животъ на́шъ, и҆ житїе вс̂е ѹ҆празнено е҆сть на приѻ҆брѣтенїе·

Подоба́етъ б̂о рещи ѿнꙋдꙋже а҆ще и҆ ѿ зл̂а приѻ҆бристи.
се́и б̂о паче всх̑ѣ вѣдѣ ꙗ҆́ко съгрѣша́етъ, вещи зе́мленыѧ съкрꙋшены сосꙋды і҆ и҆зваѧ́нїѧ рододѣлныхъ.
всѣ же пребезꙋмнѣишїи и҆ безъчестнѣиши, паче дш҃и младен̑҇ца, вра́ѕи людїи твои҆хъ понꙋди́вшїи их꙽.
ꙗ҆́ко вс̂ѧ и҆́долы ꙗ҆зы́чески мени́ша бо́ги, и҆́мже ниже ѻ҆́чїю бы́ти въ виденїе, ниже но́здри въ привлеченїе а҆́е҆ра, ниже ѹ́ши слꙋшати ниже перъсты рꙋкъ въ ѻ҆сѧѕа́нїе, и҆ но́ги и҆хъ пра́зны ко хожд̑енїю.
чл҃къ б̂о сътвори и҆хъ, и҆ дꙋхъ въза́именыи созда и҆хъ.
н̂и е҆ді́нъ б̂о чл҃къ мо́жетъ себѣ подобна б҃а создати, смр҃тенъ же сы́и, мр҃тва дѣ́лаетъ рꙋка́ма безако́нныма·

Лꙋ́че б̂о ес̑҇ е҆го и҆́долъ ꙗ҆́ко се́и ѹ҆бо поживе ѻ҆́н же нико́гда.
и҆ животнаѧ же бѣднаѧ чтꙋт̑сѧ, безꙋмїе б̂о сърас꙽сꙋдное и҆́ных̑ е҆сть хꙋжшее·

Ниже е҆ли́ко вожделѣти ꙗ҆́ко въ животных̑ лица̀ бл҃га бꙋдт̑ꙋ, ѿбѣжа же и҆ бж҃їѧ хвала и҆ блс̑҇ве́нїе е҆го·

Глв̑҇а, ѕ҃і·

Сего ради же и҆ сїи подобнѣ пострадали сꙋть и҆ досто́ине, и҆ мно́жеством̑ ѕвѣреи и҆стреблени сꙋть·

Сего ради мꙋченїѧ ѹ҆бл҃жил̑҇ е҆си лю́ди твоѧ, въ похотѣнїе во́ли стра́нническа въкꙋшенїѧ, пи́щꙋ ѹ҆готовалъ е҆си крастели.
да ѻ҆ни ѹ҆бо вожделѣвшїи пи́ща, показа́нїем꙽ посла́ных̑.
и҆ ѿ нꙋ́жнаго хотѣ́нїѧ ѻ҆братѧт̑сѧ·

Сїи же въ ма́лѣ ни́щи бы́ша, и҆ стра́нна прїимѣша въкꙋше́нїѧ·

Подоба́ше б̂о ѻ҆нѣмъ без꙽ѿвѣтнеи нищетѣ наити мꙋчи́тельствомъ·

Сим̑ же толи́ко показа́ти, ка́ко враги их̑ мꙋ́чишасѧ·

И҆бо тѣмъ на́иде жесто́къ ѕвѣ́реи гнѣвъ, кꙋса́нїемъ сверѣпыхъ и҆стреблѧ́хꙋсѧ ѕмїев꙽·

Но не до конца пребы́сть гнѣвъ твои, въ наказа́нїе же въ ма́лѣ смꙋще́ни сꙋть·

Зна́менїе и҆мѣ́ющи спс̑҇нїю, на въспомѧненїе за́повѣди зако́на твое҆го·

ѻ҆брати́выисѧ ѹ҆бо, не възрѣ́ннаго ради цѣлѧ́шесѧ, н̂о тебе ради всѣхъ сп҃са·

И҆ в сем꙽ же наказал̑҇ е҆си враги на́ша, ꙗ҆́ко т̂ы е҆си и҆збавлѧ́аи ѿ всѧ́кого ѕл̂а, и҆х꙽же б̂о а҆кри́ды и҆ мышица поби́ша кꙋса́нїем̑, и҆ не ѻ҆брѣтесѧ цѣ́льба дш҃амъ и҆хъ ꙗ҆́ко досто́ини бѧ́хꙋ ѿ таковыхъ мꙋчитисѧ, сн҃овъ же твои҆хъ ниже ѕмїевыхъ зꙋбо́въ ꙗ҆́ды ѻ҆долѣша, млс̑҇ть бо твоа приходѧ́ще и҆сцѣлѧ́ше и҆хъ.
въ па́мѧть б̂о словесъ твои҆х꙽ ѹ҆секнѧ́хꙋсѧ, и҆ ско́ро и҆сцѣлѧ́хꙋсѧ, да не въ глꙋбинꙋ в꙽пада́юще забве́нїа, ѿлꙋча́тсѧ твое҆го бл҃годѣѧ́нїѧ.
ниже б̂о зе́лїе ниже ѻ҆бѧза́нїе и҆сцѣли и҆хъ, н̂о сло́во твое г҃и и҆же цѣли́тъ всѧ·

Ты б̂о животꙋ и҆ смр҃ти вла́сть и҆́машъ, і҆ и҆зво́диши да́же до вра́т꙽ а҆́дꙋ и҆ възво́диши.
чл҃къ же ѹ҆бивает̑ зло́бою свое҆ю, и҆сше̑ же дх҃ъ не възврати́тъ, ни призове́тъ дш҃ꙋ и҆же въспрїа́та е҆сть·

твое҆ѧ же рꙋки и҆збежа́ти невъзмо́жно е҆сть.
ѿмѣта́ющи бо сѧ тебе вѣдѣти нечести́вїи, въ крѣ́пости мышца твое҆а бїени сꙋть, стра́нными дожд̑ами и҆ градами и҆ бꙋрѧми гони́ми страда́ша, и҆ ѻ҆гнем̑ растаа́ни·

Пресла́вное б̂о въ всеѹ҆чаща́ющеи водѣ̀ мно́жае дѣлает̑ ѻ҆́гнь.
котора́ющъ б̂о сѧ е҆сть ми́ръ па́че пра́ведныхъ·

Когда ѹ҆бо ѹ҆кротѧ́шесѧ пла́мень, да не съгорѧт̑ и҆же на нечестивыхъ послана бѣхꙋ животнаѧ.
н̂о сїи зрѧ́ще вѣ́дѧтъ ꙗ҆́ко бж҃їѧ сꙋда стражꙋтъ гоне́нїе, нѣкогдаже междꙋ водо́ю ѻ҆гнь палѧ́ше, даже безако́наго землѝ рожде́нїѧ растлит̑.
и҆хже ра́ди а҆гг҃лъскою пи́щею пита́лъ е҆си лю́ди твоа, ѹ҆гото́ванъ хлѣбъ с нб҃се пода́лъ е҆си и҆мъ безъ трꙋда, всеѹ҆слажде́нїе в себѣ и҆мѣ́ющи и҆ всѧ́кꙋ сла́дость бл҃гово́н꙽наго въкꙋше́нїѧ.
съставле́нїѧ же твое҆го и҆ сла́дости твоеѧ сн҃ом̑ показа̀.
и҆ ѹ҆гажда́ющи е҆ді́ного ко́ждо во́ли ꙗ҆́же въсхотѣ, къ чемꙋ же кт̂о хотѧ́ше превраща́шесѧ.
снг̑҇ѣ же и҆ ледъ пребыва́ше си́лꙋ ѻ҆́гненꙋ и҆ не растаѧ́шесѧ, да ѹ҆вѣдѧтъ ꙗ҆́ко плодъ враго́въ и҆стреблѧ́ше ѻ҆́гнь горѧ́щїи, въ́ градѣ и҆ дождѣхъ блиста́ю҆щи·

Сего ра́ди да сѧ паки питают̑ пра́веднїи, и҆ ѻ҆́гнь паки своеѧ силы лиши́сѧ·

творе́нїе б̂о тебѣ творцꙋ слꙋжа́ше, распростира́етсѧ на мꙋкꙋ проти́вꙋ непра́ведныхъ, и҆ легча́е тво́ритсѧ въ бл҃годѣѧнїе ради на тѧ надѣю́щихсѧ.
сего ра́ди и҆ тогда̀ всѧ̀ преѻ҆браже́на всм̑ѣ кормителница, блгд̑ти твоеѧ слꙋжа́ше къ во́ли и҆хъ и҆же ѿ тебе пожелѣни сꙋть.
да наѹ҆ча́тсѧ сн҃ове твоѝ и҆́хже възлюбил̑҇ е҆си г҃и, ꙗ҆́ко не рожде́нїѧ плодо́въ пита́ютъ чл҃ка, н̂о сло́во твое тебѣ вѣ́рющихъ соблюда́етъ.
чт̂о б̂о ѻ҆гне́мъ нерастлѣно скоро ѿ малы́ѧ лꙋча слн҃чныѧ грѣ́емое растаѧ́шесѧ, да зна́емо бꙋдетъ всѣмъ ꙗ҆́ко подоба́етъ дости́гнꙋти слн҃цꙋ къ блс̑҇венїю твое҆мꙋ, и҆ къ въз꙽сїѧнїю свѣта̑ тебѣ поклони́тисѧ·

Не бл҃годарно б̂о ѹ҆пова́нїе ꙗ҆́ко зим̑ныи и҆́неи раста́е҆тъ, і҆ и҆злїетсѧ ꙗ҆́ко вода̀ неключи́ма·

Глв̑҇а, з҃і·

Вели́ци сꙋть сꙋди твоѝ г҃и, и҆ не и҆зъгл҃анны.
сего ра́ди ненаказа́нїи дш҃а съблазни́ша, въспрїѧша б̂о наси́ловати ꙗ҆зы́къ ст҃ыи безаконнїи.
ѹ́зники т꙽мы̀ и҆ долгою но́щїю свѧ́зани и҆ заключе́ни под̑ кровы бѣгльцы вѣчнаго провѣдѣнїѧ лежа́ша·

Ѹ҆таи́ти б̂о мнѧ́щесѧ въ мра́чныхъ грѣсехъ, възвѣсти́сѧ приключе́нїе, и҆ расточе́ни сꙋть ѹ҆жаса́ющесѧ стра́шно, и҆ съ ѹ҆дивле́нїемъ злы́мъ възмꙋщени сꙋть.
ниже б̂о съдръжа́щїи и҆хъ покровъ безъ стра́ха съхранѝ, шꙋ́ми же съходѧ́ще възмꙋща́хꙋ.
и҆ привидѣнїѧ печа́лны ꙗ҆влѧ́ющисѧ.
ѹ́жасъ тѣмъ подавахꙋ.
и҆ ѻ́гнь б̂о ни е҆ді́ныѧ си́лы можаше тѣмъ възда́ти ни звѣ́зды ѿ свѣтлаго пла́мени просвѣти́ти можа́хꙋ т̂ꙋ но́щъ стра́шнꙋю.
ꙗ҆влѧ́ше же сѧ и҆мъ токмо скоръ ѻ҆́гнь стра́ха и҆спо́лнъ, и҆ стра́хомъ побїени тогда и҆же не ви́дѣша ѻ҆ноѧ.
лица̀ ча́ѧхꙋ го́ршаѧ бы́ти и҆хже видѧ́хꙋ·

во́л꙽хвъ же хꙋдо́жества преложе́ни бѧ́хꙋ въ посмѣхъ и҆ премꙋдрꙋющимъ велича́нїѧ ѻ҆бличе́нїе клѧ́твено.
ѻ҆бѣща́ющїи бо сѧ страхи и҆ смꙋще́нїѧ и҆згна́ти ѿ дш҃а болѧщїѧ, сїи съ посмѣхомъ полни стра́хомъ болѧ́хꙋ.
и҆б̂о а҆ще и҆ни кто́ же и҆хъ възмꙋще́не ѹ҆стра́ши и҆ четвероно́гихъ прехо́ди, и҆ змі́ем꙽ звизда́нїѧ въздви́гнени стра́шно погиба́хꙋ.
и҆ а҆е́ра е҆гоже никт̂о ники́м же пꙋтем̑ и҆збѣжа́ти възмо́же ѿмѣта́юща себе ви́дѣти.
нечистота̀ б̂о своистве́не лꙋка́ваѧ свѣдѣтельствꙋ́етъ ѻ҆сꙋжда́ющи.
вы́нꙋ же прїемлюще лю́таѧ, содръжи́ма̑ совѣстїю.
ничтоже б̂о е҆сть страх̑ токмо преда́нїе ѿ по́мощеи помышле́нїѧ.
внꙋтрь же ме́нше сꙋще чаѧ́нїе бо́лшꙋю мни́тъ нечистотꙋ̀ настоѧ́щего мꙋче́нїѧ вины̀.
тм̑ѣже и҆же в немощнꙋю прїидо́ша но́щъ и҆ ѿ не́мощнаго а́да нашед̑шꙋю т꙽мꙋ̀ сно́мъ спѧ́щи.
ꙗ҆же ѹ҆бо чюдесемъ попира́хꙋсѧ привидѣнїи ра́ди, и҆ ꙗ҆́же дш҃и и҆счеза́хꙋ преда́нїѧ.
скоръ б̂о им̑ и҆ ненаде́женъ стра́хъ на́иде.
а҆щеж̑ си́це се́и б̂ѣ тꙋ̀ низпада́ѧ.
съхранѧ́шесѧ ѹ҆ темни́цы безъ желѣ́за заключен̑҇.
а҆ще б̂о землѣ̀ дѣлатель кт̂о бы́сть и҆л̂и па́стыръ, и҆л̂и пꙋсты́ни дѣлатель трꙋдом̑ пред̑ѻ҆бѧт̑ быс̑҇ неи҆збѣж́нꙋю тръпѧше нꙋж́дꙋ.
е҆ді́нымъ б̂о ю҆́жемъ желѣзным̑ тмы̀ вси бѧхꙋ свѧза́ни.
и҆ли дх҃ъ звидза́ющи и҆ли межд̑ꙋ ча́стыхъ древесныхъ вѣтвеи птиченъ шꙋмъ бл҃гъ, и҆ли си́ла во́днаѧ текꙋщи ѕѣ́лне, и҆ли шꙋмъ ѕѣ́лнаго низпаде́нїѧ ка́менеи, и҆ли и҆гра́ющимъ ѕвѣремъ тече́нїе невидимое, и҆ли рыка́нїѧ ѕѣлных̑ ѕвѣреи гла́са, и҆ли ѿзыва́ющсѧ ѿ де́бреи го́рскихъ глас̑҇ ѻ҆скꙋдѣва́ти творѧще и҆хъ стра́хъ·

Всѧ б̂о вселе́ннаѧ свѣтло просвѣща́шесѧ свѣтомъ, несмѣша́нымъ дѣ́ломъ съдержа́шесѧ.
самѣ́м же ѻ҆нѣмъ простира́шесѧ тѧжка но́щь, ѻ҆́бразъ бꙋдꙋщаго и҆хъ въспрїа́тїа тмы̀, і҆ и҆мъ самѣмъ бѧше тѧжча́иша·

Глв̑҇а, и҃і·

Прпд̑бным꙽ же твои҆мъ вели́къ б̂ѣ свѣтъ, и҆́хже ѹ҆бо глс̑҇а слы́шаще ѻ҆́браза же не ви́дѧще·

Зане же ѹ҆бо ѻ҆ни того же не страда́хꙋ блажа́хꙋ т̂ѧ, ꙗ҆́ко не пакоствовани пред̑ѻ҆биди́ми бл҃годарѧ́хꙋ.
и҆ е́же пронестисѧ блгд̑тїю молѧхꙋсѧ·

Сихъ ра́ди ѻ҆гнегорѧ́щїи столпъ во́жд̑а имѣша невѣдо́маго пꙋти ше́ствїѧ.
слн҃ца же без꙽ па́кости любоче́стнаго стра́н꙽ничества пода́лъ е҆си.
досто́ини б̂о ѻ҆ни лиши́тисѧ свѣта, и҆ снабдѣтисѧ въ тмѣ.
и҆же заключе́ныхъ стрежа́хꙋ сн҃овъ твои҆хъ, и҆́хъ же ради въсхотѣ неи҆стлѣненъ зако́на свѣтъ вѣкꙋ да́ти.
совѣтова́вших̑ и҆хъ прпд̑бных̑ ѹ҆бива́ти младенца, и҆ е҆ді́номꙋ преложе́нꙋ ча́дꙋ и҆ сп҃сенꙋ.
въ ѻ҆бличе́нїе их̑ взѧ̀ мно́жество чад̑, и҆ е҆ді́нодꙋшно погꙋби́лъ е҆си въ водѣ̀ ѕѣлнѣи·

ѻ҆на б̂о но́щь провѣдѣсѧ ѿц҃емъ на́шимъ, да и҆́стинно вѣдꙋще и҆мже клѧ́твамъ ѹ҆вѣри́ша вожд̑елѣ́ютъ.
въспрїѧ́то же бы́сть ѿ людїи твои҆хъ.
сп҃сенїе б̂о пра́вед̑ных꙽ вра́гъ же и҆стребле́нїе.
ꙗ҆́ко б̂о ѻ҆бещестилъ е҆си сꙋпоста́ты на́ша, к семꙋ насъ призыва́ющи просла́вилъ е҆си.
съкрове́но б̂о жрѧ́хꙋ прпд̑бнїи ѻ҆тро́ки бл҃гихъ, и҆ зако́на бжс̑҇твеннаго въ съи҆менова́нїе завѣщаша·

Та́коже бл҃гихъ и҆ бѣ́дных̑ въспрїѧ́ти ст҃ых̑, ѿц҃ъ ѹ́же пред̑въспѣва́ющих̑ хва́лꙋ·

Воз̑шꙋмѣ же не подо́бно враго́въ во́пль, и҆ пла́чь слы́шашесѧ пла́чющихъ младе́нецъ·

Сицевою же ме́стїю ра́бъ съ господи́номъ ѻ҆злобле́нъ е҆сть, и҆ ѻ҆полче́ныи чл҃къ цр҃еви подо́бнаѧ пострада·

Є҆ді́нодꙋшно же ѹ҆бо вс̂и въ е҆ді́номъ и҆мени смр҃тном̑, мр҃твых̑ и҆мѣѧ́хꙋ без꙽численыхъ·

Ниже б̂о въ погребе́нїе живы́хъ довлѧше, понеже е҆ді́нымъ м꙽гнове́нїемъ честьнѣ́ишїи ро́дъ и҆хъ и҆стребле́нъ е҆сть.
ѿ всѣхъ б̂о не вѣрꙋюще ради чародѣѧ́нїѧ, и҆ ради первенецъ и҆стребле́нїа и҆сповѣда́́ша лю́ди бж҃їѧ сн҃ы бы́ти.
молча́нїю б̂о съдержа́щꙋ всѣхъ, и҆ но́щь свое҆го тече́нїѧ по́лъ пꙋти и҆мѣше.
всемогꙋще сло́во твое г҃и и҆сходѧ́щи ѿ нб҃си ѿ прс̑҇тлъ црс̑҇кихъ, жесто́къ брани́тель посреди и҆скорене́нїа и҆ земли пред̑ни́де.
ме́чъ ѻ҆́стръ нелицемѣрнаго повелѣ́нїѧ твое҆го носѧ́и, и҆ стоѧ́щи и҆спол̑҇ни вс̂ѧ смр҃ти.
и҆ да́же до нб҃си досѧза́ше стоѧ́щи на землѝ·

Тогда̀ внеза́пꙋ привидѣнїѧ сно́въ лю́тѣ смꙋти́ша и҆хъ, страхи же наидо́ша ненаде́жны.
и҆ и́нъ и҆на́мо въверженъ е҆лѣ жи́въ, е҆ѧ́же ради вины̀ смр҃тїю и҆щеза́хꙋ·

видѣ́нїѧ б̂о и҆хъ смꙋти́ша и҆хъ.
сїе пред̑ѹ҆ча́хꙋ да не вѣдѧще е҆гоже ради ѕл̂а стражꙋще погибо́ша·

Прикоснꙋ же сѧ тогда и҆ пра́вед̑ныхъ и҆скꙋше́нїе смр҃ти, і҆ и҆стлѣ́нїѧ въ пꙋсты бы́сть мно́жество, н̂о не до́лго пребы́сть гнѣвъ·

Потща́ б̂о сѧ мꙋж́ь непоро́ченъ и҆ пред̑брашесѧ, свое҆ѧ слꙋжбы ѻ҆рꙋж́їемъ.
моли́твꙋ и҆ ѳимїѧ́ма ѻ҆цѣще́нїе принесъ, съпроти́въ ста гнѣвꙋ.
и҆ конца наста́вилъ требова́нїѧ, показꙋющи ꙗ҆́ко твои е҆сть ра́бъ.
ѻ҆долѣ же наро́ды не въ си́лѣ теле́снѣи ниже ѻ҆рꙋжїи дѣлаными, н̂о сло́вом̑ повелѣвшаго трꙋжа́тисѧ.
клѧтвы ѿц҃ъ и҆ завѣты помина́ющи хо́лми б̂о ѹ҆ пад̑шихъ дрꙋгъ на́ дрꙋга межд̑ꙋ мр҃твыхъ ста́въ и҆ ѿсѣче гнв̑҇ѣ, и҆ раздѣли ꙗ҆́же къ живы́мъ пꙋть.
въ ѻ҆дежд̑и б̂о подира б̂ѣ весь ми́ръ, и҆ ѿц҃ъ сла́вы на четы́реѹ҆го́лномъ ка́мени и҆зваѧ́нъ, и҆ вели́чество твое въ дїади́мѣ главы е҆го·

Сими прїиде и҆скоренѧа, сїѧ же ѹ҆страши́ша, б̂ѣ бо то́кмо и҆скꙋше́нїе гнѣ́ва дово́лно·

Глв̑҇а, ѳ҃і·

Нечести́вым же до конца̀ без꙽ млс̑҇ти ꙗ҆́рость на́иде·

Прови́дѣ б̂о и҆хъ и҆ бꙋдꙋщаѧ, ꙗ҆ко сїи ѻ҆браще́ннїи еже ѻ҆ста́вити, и҆ съ т꙽ща́нїемъ ѿпꙋсти́ша и҆хъ·

Гна́ша въ слѣд꙽ раска́ѧвшисѧ, е҆ще б̂о въ рꙋка́хъ и҆мѣ́юще рыда́нїѧ, и҆ сѣтꙋ́ющисѧ гробомъ мрт҃вых̑, и҆́нъ себѣ взѧ́ша по́мыслъ безꙋмїѧ.
і҆ и҆хже молѧ́щи и҆згна́ша их̑ а҆ки бѣгльцы гонѧ́хꙋ·

Влеча́ше б̂о и҆хъ къ семꙋ концꙋ досто́ина нꙋжда, и҆ приклю́чшихсѧ не въспомѧнꙋтїе вложѝ·

да́же и҆ прочаѧ мꙋкамъ ко и҆сполне́нїю мꙋче́нїѧ.
лю́ди же твоѧ пресла́вное пꙋтьше́ствїе и҆скꙋсѝ.
ѻ҆ни́ же стра́ннꙋ ѻ҆брѧ́щꙋтъ смр҃ть·

Все́ бо творе́нїе въ свое́мъ е҆мꙋ родꙋ̀ па́ки со выш̑҇ше преѻ҆бразѧ́шесѧ, слꙋжа́щи своиственым̑ повеле́нїемъ, да ѻ́троцы твоѝ съхранѧ́тсѧ неврежде́ни.
ѻ҆́блакъ ѻ҆сенѧ́щїи по́клъ и҆хъ, и҆ вла́жна землѧ̀ сꙋха ꙗ҆ви́сѧ.
и҆з мо́рѧ чермнаго пꙋть безъ прет꙽кнове́нїѧ, и҆ по́ле процвита́ющи ѿ волны зѣлныѧ и҆мже весь ꙗ҆зы́къ про́иде, твое́ю рꙋкою покрове́ни·

Ви́дѧщи ди́внаѧ и҆ чюдеса̀, ꙗ҆ко ко́ни насыти́шасѧ, и҆ ꙗ҆ко а́гньци възра́довашасѧ хвалѧ́ще т̂ѧ г҃и и҆зба́вльшаго и҆хъ·

Въспомѧнꙋсѧ бо е҆ще и҆мъ, иже въ ѻ҆бита́нїю и҆хъ.
ка́ко ѹ҆бо за рожде́нїе живо́тныхъ и҆зведе землѧ скни́фы, и҆ за рыбы ѿри́гнꙋ рѣка̀ мно́жество жа́бъ·

Послѣди же ви́дѣша̑ и҆ новорожд̑енїе птицъ, ꙗ҆́ко похотѣнїемъ и҆зве́дени, проси́ша сла́достьныѧ пи́ща, въ похотѣнїю б̂о в꙽зыидо́ша и҆мъ ѿ мо́рѧ крастели.
мꙋче́нїѧ грѣшнымъ наи҆до́ша не безъ быв̑҇шихъ зна́менїи, по нꙋж́ди гро́ма пра́ведне б̂о пострада́ша по свои҆хъ безако́нїѧхъ.
и҆б̂о лю́тѣишее ненавидѣнїе на страннолю́бца наста́виша̑ и҆нїи б̂о незна́емыхъ не прїемлѧ́хꙋ прише́лецъ, сїи же бл҃годѣтелїю страннолю́бцом̑ слꙋжа́хꙋ, и҆ не ток̑҇мо н̂о е҆же кое расмотре́нїе бꙋдет̑ их̑.
зане насилѧеми въспрїемлѧхꙋ чю́ждих̑.
нѣцыи же съ пра́знествами въспрїем̑лѧ́хꙋ сих̑, ѹ҆жѐ ѻ҆бы́чаемъ приѻ҆бща́ющесѧ пра́ведных̑.
жесточа́ишими ѻ҆ѕлоби́ша бо́лѣзньми.
побїени же сꙋть ѻ҆слѣпле́нїемъ, ꙗ҆́коже и҆ ѻ҆нѝ при две́рех̑ прпд̑бнаго съ ско́рыми покровени бѧхꙋ тма́ми.
ко́ждо же прохода своих̑ две́рїи и҆ска́ше, і҆ и́хъ ра́ди стихїи премѣне́ны.
ꙗ҆́ко въ гꙋслехъ стрꙋны послѣдова́нїю и҆́мени премѣнѧ́тсѧ, и҆ всегда̀ свое҆го шꙋма стрегꙋтъ.
занѐ е҆сть ви́дѣти ѻ҆́бразꙋ бы́вшаго и҆́стиннѣ.
сꙋха́ѧ въ вла́жнаѧ ѻ҆браща́хꙋсѧ, и҆ е҆ли́ка бѣхꙋ пла́вающїа в зе́млю проидѧ́хꙋ.
ѻ҆́гнь можа́ше над̑ во́дꙋ выш꙽ше своеѧ си́лы, и҆ вода̀ ѹ҆гаша́ющꙋ си́лꙋ забы̀ пла́мени ѿ противле́нїѧ и҆стлѣнных꙽ живо́тныхъ.
не трꙋди́ша пло́теи проходѧ́щихъ.
ниже та́ющаго ледоѻ́брзне тлѣненъ ро́дъ нетлѣнныѧ пи́ща.
по всемꙋ̀ г҃и възвели́чилъ е҆си лю́ди твоѧ, и҆ просла́вил̑҇ е҆си и҆ не пре́зрѣлъ е҆си въ все вре́мѧ и҆ на всѧ́ком꙽ мѣсте пред̑стоѧ̀·

Конецъ кни́ѕе премꙋдростемъ соло́монимъ·

И҆́мать в себѣ глв̑҇а, ѳ҃і·