КНИГА ПРЄМРд̑ОСТЬ И҆СꙊСА СН҃А СЇРА́ХОВА
Глв̑҇а, а·
Всѧка премꙋдрость ѿ г҃а, и҆ с ним̑ е҆сть въ вѣки.
пѣска мо́рьскаго и҆ каплѧ дождевъныѧ, и҆ дн҃и вѣка кт̂о и҆зочтетъ.
высотꙋ нб҃се, и҆ широтꙋ земли, и҆ безднꙋ, и҆ премꙋдрость кт̂о и҆слѣдитъ.
прежде всх̑ѣ създасѧ премꙋдрость, и҆ разꙋмъ мꙋдрости ѿ вѣка·
Ко́рень премꙋдрости комꙋ ѿкрысѧ, и҆ коварьство е҆ѧ кт̂о разꙋмѣ.
е҆ді́нъ е҆сть премꙋдръ страшенъ ѕѣло, сѣдѧ́и на престолѣ свое҆мъ г҃ь.
сам꙽ създа̀ ю҆̀, и҆ ви́дѣ и҆зочте ю҆̀, и҆ пролїа ю҆̀ на всѧ̀ дѣла своѧ съ всѧ́кою пло́тїю, по данїю е҆го и҆ дарова ю҆̀ любѧ́щим̑ е҆го·
Страхъ гн҃ь сла́ва и҆ похвала и҆ веселіе, и҆ вѣнецъ ра́дости.
страх꙽ гн҃ь възвесели́тъ срд̑це, и҆ дасть веселїе и҆ ра́дость и҆ долгодн҃ьствїе·
Боѧщемꙋсѧ г҃а бл҃го бꙋдетъ на послѣди, и҆ въ дн҃ь сконча́нїѧ е҆го ѻ҆брѧ́щетъ блгд̑ть·
Нача́ло премꙋ́дрости боѧ́тисѧ б҃а, и҆ съ вѣрными въ ложеснѣхъ създасѧ им̑·
И҆ съ чл҃ки ѻ҆снова́нїе вѣчно ѹ҆гнезди, и҆ съ сѣменемъ и҆хъ ѹ҆вѣритрсѧ.
насыще́нїе премꙋдрости боѧ́тисѧ г҃а, и҆ ѹ҆по́итъ их̑ ѿ плод̑ свои҆хъ·
Весь до́мъ еѧ̀ и҆спол̑҇нитъ желанїи, и҆ сосꙋды ѿ жит̑ еѧ̀.
вѣнец꙽ мꙋдрости страхъ гн҃ь, възъцвѣта́ѧи ми́ръ, и҆ здравїю и҆сцѣлеленїе и҆ ви́дѣ и҆ сочте ю҆̀·
хꙋдожество и҆ вѣдѣнїе ра́зꙋма ѻ҆дожди, и҆ сла́вꙋ дръжащихъ ю҆̀ възнесе·
Ко́рень премꙋдрости боѧ́тисѧ г҃а, и҆ вѣтви еѧ̀ долгодн҃ьствїе·
не мо́жет̑ ꙗ҆́рость неправед̑на ѻ҆правди́тисѧ, часть б̂о ꙗ҆́рости е҆го паденїе е҆мꙋ·
до времени сътръпитъ долготръпеливыи, и҆ напо́слѣдь воздасть е҆мꙋ веселїе.
до времене съкры́етъ словеса̀ своѧ, и҆ ѹ҆стни вѣрныхъ и҆сповѣдѧтъ ра́зꙋмъ е҆го·
Въ сокровищех̑ премꙋдрости притча хꙋдожества, ме́рзость же грѣшникꙋ бл҃гочестїе·
Вожделѣвъ премꙋдрости съблюди за́повѣди, и҆ г҃ь т̂и ю҆̀ подасть·
Премꙋдрость б̂о и҆ наказа́нїе страх̑ гн҃ь, и҆ бл҃говоленїе е҆го вѣра и҆ кротость·
Не противи́сѧ стра́хꙋ гн҃ю, и҆ не пристꙋпи к немꙋ срд̑цемъ сꙋгꙋ́бым꙽, не под̑сꙋжд̑а́исѧ ѹ҆сты̀ чл҃ческими, и҆ ѹ҆стнамъ свои҆мъ во́нми·
Не възносисѧ да не ѿпа́деши, и҆ наведеши дш҃и свое́и безъчестїе.
и҆ ѿкры́етъ г҃ь та́ины твоѧ, и҆ посредѣ со́нма низложит̑ т̂ѧ.
ꙗ҆́ко не пристꙋпилъ е҆си стра́хꙋ гн҃ю, и҆ срд̑це твое и҆сполнь лꙋкавъства·
Глв̑҇а, в҃·
Чадо а҆ще пристꙋпа́еши работати гв҃и бг҃ꙋ, ѹ҆готови дш҃ꙋ свою въ и҆скꙋшенїе·
Ѹ҆прави срд̑це свое и҆ сътръпи, и҆ не тщисѧ въ времѧ наведенїѧ.
прилѣписѧ е҆мꙋ и҆ не ѿстꙋпи, да възра́стеши на послѣдокъ твои·
Вс̂е е҆лико а҆ще нанесено т̂и бꙋдет꙽ прїими, и҆ во измѣненїю смиренїа свое҆го длъготръпи·
Ꙗ҆́ко въ ѻ҆гни и҆скꙋшает̑сѧ зла́то, и҆ чл҃ци прїѧ́тни въ пещи смире́нїѧ·
Вѣрꙋи е҆мꙋ и҆ застꙋпитъ т̂ѧ, и҆ ѹ҆пра́ви пꙋтѝ своѧ и҆ ѹ҆пова́и нань·
Боѧ́щїисѧ г҃а пождѣте млс̑҇ти е҆го, и҆ не ѹ҆клони́тесѧ да не падете·
Боѧ́щїисѧ г҃а вѣрꙋите е҆мꙋ, и҆ не и́мать ѿпа́сти м꙽зда ва́ша·
Боѧ́щїисѧ г҃а надѣ́итесѧ на бл҃гаѧ, и҆ веселїе вѣка и҆ млс̑҇ть·
Возрите на древнѣа ро́ды и҆ ви́дите, кт̂о ѹ҆бо вѣрова гв҃и и҆ посты́дѣсѧ·
ли кт̂о пребы́сть въ стра́сѣ е҆го ѻ҆стависѧ.
и҆л̂и кт̂о призва е҆го и҆ презрѣ и҆̀·
Зане щедръ и҆ млс̑҇тивъ г҃ь, и҆ ѻ҆ставлѧет̑ грѣхи, и҆ сп҃сет̑ въ времѧ скорби·
Го́ре срд̑цем̑ страшливом̑ и҆ рꙋкам̑ ѻ҆слабле́нам̑, и҆ грѣшникꙋ ходѧ́щꙋ на двѣ̀ стеѕи·
Горе срд̑цꙋ ѻ҆слабленꙋ ꙗ҆́ко не вѣрꙋет̑, сего ради непокровенно бꙋдет̑·
Го́ре вамъ погꙋбльшим̑ тръпенїе, и҆ чт̂о сътворите е҆гда посѣтитъ г҃ь·
Боѧ́щїисѧ г҃а не противѧт̑сѧ гл҃омъ е҆го, и҆ любѧ́щїи е҆го съхранѧ́тъ пꙋти е҆го.
боѧ́щїисѧ г҃а пои́щт̑ꙋ бл҃҃говоленїѧ е҆го, и҆ любѧ́щїи е҆го и҆полнѧт̑сѧ закона·
Боа́щїисѧ г҃а ѹ҆готовѧт̑ срд̑ца своа, и҆ пред̑ нимъ смирѧ́тъ дш҃а своѧ.
да въпадем̑сѧ в рꙋцѣ гн҃и, а҆ не в рꙋцѣ чл҃чески.
ꙗ҆́ко б̂о вели́чїе е҆го та́ко и млс̑҇ть е҆го·
Глв̑҇а, г҃·
Мене ѿц҃а послꙋша́ите ча́да и҆ сице твори́те да сп҃сетесѧ.
г҃ь бо просла́ви ѿц҃а на ча́дех̑, и҆ сꙋдъ мт҃рнь ѹ҆тверди на сн҃ѣхъ·
Чтыи ѿц҃а ѻ҆цыстит̑ грѣхи, и҆ ꙗ҆́ко сокровѣщꙋѧ́и прославлѧ́ѧи ма́терь свою.
чты́и ѿц҃а възвесели́тсѧ ѻ҆ чадѣхъ, и҆ въ дн҃ь мо́льбы е҆го послꙋшанъ бꙋдетъ·
Прославлѧ́ѧи ѿц҃а долгодн҃ьствовати бꙋдет̑, и҆ послꙋша́ѧ г҃а поко́ит̑ мт҃рь свою.
ꙗ҆́коже влд̑кама послꙋжитъ рождьшима е҆го·
дѣломъ и҆ словомъ чт̂и ѿц҃а твое҆го, да наи́дет̑ т̂и блс̑҇ве́нїе ѿ него̀.
блс̑҇венїе б̂о ѿч҃е ѹ҆твръжаетъ до́мы чад̑, клѧ́тва же матернѧ и҆скоренева́етъ ѻ҆снова́нїѧ·
Не сла́висѧ въ бесчестїи ѿц҃а твое҆го , нѣсть бо т̂и слава въ бесчестїи.
сла́ва б̂о чл҃кꙋ ѿ чести ѿц҃а е҆го, и҆ поношенїе ча́домъ ма́ти въ без̑славїи·
Ча́до застꙋпи въ старости ѿц҃а своег̑҇ и не ѻ҆скорби е҆го въ животѣ е҆го·
а́ще и҆ разꙋмомъ ѻ҆скꙋдѣваѐтъ прощенїе и҆мѣи, и҆ не ѻ҆без꙽чести е҆го все́ю крѣпостїю свое́ю·
Млс̑҇ть б̂о ѿч҃а не забвена бꙋдетъ, и҆ въ грѣхъ мѣсто приѕиждетъ т̂и сѧ.
въ дн҃ь скобри твоеѧ въспомѧнет̑ т̂и сѧ.
ꙗ҆́ко тает̑ лед̑ ѿ зноѧ, сице растают̑ ти сѧ грѣхи·
Ко́ль хꙋленъ ѻ҆ставлѧ́ѧи ѿц҃а, и҆ проклѧт̑ гм҃ъ раздража́ѧи мт҃рь свою·
Чадо дѣ́ла своа съ кротостїю препроважда́и, и҆ чл҃ком̑ прїѧ́тном꙽ възлю́бленъ бꙋдеши·
Є҆лма великъ е҆си толма смирѧ́исѧ , и҆ пред̑ гм҃ъ ѻ҆брѧ́щеши блгд̑ть·
Ꙗ҆́ко ве́лїѧ си́ла гн҃ѧ, и҆ смиренными сла́витсѧ·
Вы́ш꙽ше себе не и҆щи, и҆ крѣпша себе не и҆спыта́и.
ꙗ҆́же т̂и повелѣва́ютъ сїѧ разꙋмѣва́и, нѣсть б̂о тѝ потреба та́иных꙽·
Въ и҆збытцѣ дѣлъ своих̑ не распыта́и, вѧще б̂о ра́зꙋма чл҃ческаго показа́но ти бысть·
Мно́ги б̂о прельсти мнѣнїе и҆хъ, и҆ мнѣнїе лꙋка́вно погꙋби со́вѣсть и҆хъ·
И҆ любѧи бѣдꙋ впада́етъ в ню.
срд̑це жесто́ко ѻ҆злоби́тсѧ на послѣ́дь·
Срд̑це жесто́ко ѻ҆тѧготи́тсѧ болѣзньми, и҆ грѣшникъ приложитъ грѣхи на грѣхи·
Наведе́нїѧ велича́ваго нѣсть и҆сцѣле́нїѧ, са́дъ б̂о лꙋкав̑҇ствїа въкорени́сѧ в немъ·
Срд̑це разꙋми́ваго разꙋмѣетъ при́тчю, и҆ ѹ҆́хо послꙋшли́во въжелѣ́нїе премд̑ꙋраго·
ѻ҆́гнь палѧщъ ѹ҆гаситъ вода̀, и҆ млс̑҇тыни ѻ҆чиститъ грѣхи·
Възда́ѧи блгд̑ти помни́мъ быва́етъ прс̑҇но, и҆ въ врѣмѧ паде́нїѧ свое҆го ѻ҆брѧщетъ ѹ҆тверже́нїе·
Глв̑҇а, д҃·
Ча́до живота̀ ни́щаго не лиши, и҆ не ѹ҆мини ѻ҆́чїю просли́вꙋ·
дш҃и а҆́лчющи не ѻ҆скорби, и҆ не разгнѣваи мꙋ́жа в нищетѣ е҆го·
Срд̑це раздраже́ное не превъзмꙋти, и҆ не неси ми́мо требꙋ́ющаго даа́нїѧ·
И҆ раба̀ скорбѧща не ѿрѣ́и, и҆ не ѿврати лица свое҆го ѿ ни́щаго·
ѿ требꙋющаго не ѿврати ѻ҆́чїю, и҆ не да́ждь мѣста чл҃кꙋ клѧти т̂ѧ·
Кленꙋщемꙋ б̂о тѧ в го́рести дш҃а е҆го, мльбы ѹ҆слы́шитъ сътвори́выи е҆го·
Прїѧ́телѧ събо́рищꙋ твори себе, и҆ кнѕю смирѧи главꙋ свою·
Приклони ѹ҆́хо свое ни́щемꙋ, и҆ ѿвѣщаи е҆мꙋ въ кро́тости ми́рно·
И҆зми ѻ҆биди́маго и҆з рꙋки ѻ҆бидѧщаго и҆̀, и҆ не и҆знемага́и е҆гда сꙋди́ши·
Бꙋди си́рымъ ꙗ҆́ко ѿц҃ъ, и҆ в мꙋж́а мѣсто мт҃ри и҆хъ·
и бꙋдеши ꙗ҆́ко сн҃ъ вы́шнѧго, и҆ възлю́битъ т̂ѧ паче мт҃и твоѧ·
Премꙋдрость сн҃ы своѧ възнесе, и҆ застꙋпает̑ и҆скꙋщих̑ е҆ѧ·
Любѧ́и е҆ѧ̀ лю́битъ жи́знь, и҆ ѹ҆тренюю҆ще к неи и҆сплънѧтсѧ житїѧ весе́ла·
дръжа́исѧ еѧ̀ наслѣдитъ сла́вꙋ, и҆дѣже ѹ҆бо вхо́дитъ блс̑҇вит̑ и҆̀ г҃ь·
Слꙋжа́щи е́и слꙋжат̑ ст҃омꙋ, и҆ любѧ́щих̑ ю҆̀ лю́бит̑ г҃ь.
послꙋшаѧи е҆ѧ сꙋдѝтъ ꙗ҆зы́ки, и҆ внима́ѧи е́и вселитсѧ надѣѧ́сѧ.
а҆́ще вѣ́рꙋеши наслѣди́ши ю҆̀, и҆ въ ѻ҆дръжа́нїи бꙋдет̑ ро́дъ е҆го·
Ꙗ҆́ко развраще́но хо́дитъ с нимъ въ прьвыхъ.
бо́ѧзнь же и҆ страх̑ наведетъ на́нь, и҆ помꙋчитъ е҆го в наказа́нїи свое҆мъ, дондеже вѣ́рꙋ и҆ме́тъ дш҃и е҆го.
и҆скꙋситъ е҆го въ ѻ҆правда́нїихъ еѧ̀, и҆ па́ки възрати́тсѧ прѧ́мо к немꙋ и҆ възвесели́тъ и҆̀.
и҆ ѿкры́етъ е҆мꙋ та́ины своѧ.
а҆́ще заблꙋ́дитъ ѻ҆ста́вит̑ е҆го, и҆ преда́сть е҆го в рꙋцѣ паде́нїѧ е҆го·
Соблюдѝ вре́мѧ и҆ съхрани́сѧ ѡ лꙋка́ваго, и҆ ѻ҆ дш҃и свое́и не постыди́сѧ·
Є҆сть б̂о стꙋдъ наводѧ́и грѣхъ, и҆ е҆сть стꙋдъ сла́ва и блгд̑ть<.>
И҆ не прїимѝ лица̀ на дш҃ꙋ свою, и҆ не срамлѧисѧ ѻ҆ паде́нїи свое҆мъ·
не возбранѝ словесѐ въ времѧ сп҃сенїѧ, словомъ б̂о познана бꙋдет̑ премꙋдрость и҆ наказа́нїе гл҃анїемъ ꙗ҆зы́ка.
не прерѣка́и проти́вꙋ и҆́стинны, ѻ҆ ненаказа́нїи свое́мъ срамѧ́исѧ·
Не стыди́сѧ и҆сповѣда́ти грѣхѝ своѧ и҆ не понꙋжда́и быстрины̀ рѣчныѧ·
и҆ не под̑стели́сѧ мꙋжꙋ бꙋю, и҆ не ѻ҆бини́сѧ лица̀ си́лнаго.
до см҃рти подвиза́исѧ по и́стин꙽нѣ, и҆ г҃ь б҃ъ побо́рет по тебѣ·
Не бꙋди ско́ръ ꙗ҆зы́комъ свои҆мъ, и҆ лѣни́въ и҆ слабъ в дѣлѣх꙽ свои҆хъ·
не бꙋди ꙗ҆́ко ле́въ въ домꙋ свое҆мъ, и҆ велича́ѧсѧ въ рабех̑ своих̑·
Не бꙋди рꙋка̀ твоѧ просте́рта на взѧ́тїе, и҆ на ѿда́нїе съгбе́на·
Глв̑҇а, е҃·
Не належѝ и҆мѣнїи свое҆мъ, и҆ не рцѝ самодово́лно ми е҆сть.
не послѣдꙋ́и дш҃и свое́и и҆ крѣпости свое́и ходи́ти въ по́хотехъ срд̑ца твое҆го.
и҆ не рцѝ кто́ мѧ преможетъ, г҃ь б̂о м꙽стѧ́и ѿм꙽стит̑ т̂и.
не рцы съгрѣши́хъ и҆ что́ ми бы́сть, г҃ь б̂о е҆сть долготерпе́ливъ.
ѻ҆ ѻ҆цище́нїи безъ стра́ха не бꙋди, прилагати грѣхѝ на грѣхѝ·
И҆ не рцѝ щедрота̀ е҆го мно́га е҆сть, мно́жество грѣхъ моих̑ ѻ҆цисти́тъ·
Млс̑҇ть бо и҆ гнѣвъ ѹ҆ него, и҆ на грѣшницѣхъ бꙋдетъ ꙗ҆́рос̑҇ е҆го·
Не медлѝ ѻ҆брати́тисѧ къ г҃ꙋ, и҆ не ѿлага́и дн҃ь ѿ дн҃е.
внеза́пꙋ б̂о и҆зы́идетъ гнѣвъ гн҃ь, и҆ въ времѧ мести поги́бнеши·
Не ѹ҆поваи на и҆мѣнїѧ непра́ведна, ничто́же б̂о пользꙋ́еши въ дн҃ь наведе́нїѧ·
Не вѣ́и всѧ́цѣмъ вѣтромъ, и҆ не ходѝ всѧцѣмъ пꙋтемъ неподо́бнымъ, си́це грѣшникъ двоꙗ҆́зы́ченъ.
бꙋди ѹ҆тверженъ въ ра́зꙋмѣ свое҆мъ, и҆ е҆дїно ти бꙋди сло́во твое·
Бꙋди скоръ в꙽ послꙋшанїи свое҆мъ, и длъготръпѣ́нїемъ ѿвѣщава́и ѿвѣтъ·
А҆ще е҆сть в тебѣ разꙋмъ ѿвѣща́и и҆́скренемꙋ, а҆ще ли ни то бꙋ́ди рꙋка̀ твоѧ на ѹ҆стѣхъ твои҆хъ·
Ꙗ҆́ко сла́ва и҆ бесче́стїе в꙽ бесѣдѣ, и҆ ꙗ҆́зыкъ чл҃чь паденїе е҆мꙋ·
Не словѝ шепот̑ник̑҇ и҆ ꙗ҆зы́комъ свои҆мъ не ѹ҆ловлѧ́и·
ѻ҆ та́ти бо стꙋдъ е҆сть, и҆ зазо́ръ лꙋка́въ ѻ҆ двоꙗ҆зы́чнѣмъ.
ѻ҆ вели́цѣ и҆ ѻ́ ма́лѣ разꙋмѣва́и·
Глв̑҇а, ѕ҃·
И въ дрꙋга мѣсто не бꙋди враг̑҇ и҆мѧ б̂о лꙋка́во стꙋдъ и҆ поноше́нїе наслѣдитъ, сеи грѣшникъ двоꙗ҆зы́ченъ.
не възноси себе совѣтомъ дш҃и своеѧ·
Ли́ствїе свое поꙗ҆сѝ и҆ пло́дъ свои погꙋби́ши, и҆ ѻ҆ста́виши себе ꙗ҆ко древо сꙋхо·
дш҃а лꙋка́ва погꙋбитъ стѧжа́вшаго ю҆̀, и҆ ра́дос̑҇ враго́мъ е҆го сътвори́тъ·
Горта́нь сла́докъ ѹ҆мно́житъ дрꙋги своѧ, и ꙗ҆зы́къ доброгл҃ивъ ѹ҆мно́житъ добрꙋ бе́сѣдꙋ·
Смирѧ́ющїисѧ с тобо́ю да бꙋдꙋтъ мно́ѕи, совѣтнициж̑ твоѝ е҆дїнъ ѿ ты́сѧщъ.
а҆ще притѧжа́еши дрꙋга въ и҆скꙋше́нїи, стѧжѝ е҆го и҆ не ско́ро ѹ҆вѣрисѧ е҆мꙋ.
е҆сть б̂о дрꙋгъ въ времѧ е҆го, и҆ не пребꙋдетъ въ времѧ ско́рби твоеѧ·
И҆ е҆сть дрꙋгъ пременѧ́ѧисѧ въ вра́га, и҆ сва́ръ поноше́нїѧ твое҆го ѿкрыет̑·
И҆ е҆сть дрꙋгъ ѻ҆бѣщникъ трапе́зам̑, и҆ не пребꙋдетъ въ времѧ скорби твоеа и҆ в добрѣ̀ твое҆мъ бꙋдетъ ꙗ҆́ко ты̀, и҆ на рабѝ твоѧ дерза́етъ·
А҆ще смире́нъ бꙋдеши бꙋдетъ на́ тѧ, ѿ лица̀ твое҆го съкры́етсѧ.
ѿ вра́гъ своих̑ ѿлꙋчи́сѧ, и҆ ѿ дрг̑҇ꙋ своих̑ внима́и.
дрꙋгъ вѣренъ кровъ крѣпокъ, ѻ҆брѣты́и же е҆го ѻ҆брѣте сокровище·
дрꙋгови вѣрнꙋ нс̑҇ѣ и҆змѣ́ны, и҆ нѣсть мѣрила добротѣ̀ е҆го·
дрꙋгъ вѣрен̑҇ ѹ҆тѣ́ха е҆сть жи́тїю, и҆ боѧ́щїисѧ г҃а ѻ҆брѧ́щꙋтъ е҆го·
Боѧ́щїисѧ г҃а пра́вѧтъ дрꙋжбꙋ е҆го, ꙗ҆́коже б̂о сам̑ тако и҆́скренїи е҆го·
Ча́до ѿ ю́ности свое́и и҆збери наказа́нїе, и҆ до сѣдины ѻ҆брѧ́щеши премꙋдрость·
Ꙗ҆́коже ѻ҆рѧ́и и ꙗ҆́коже сѣѧи пристꙋпѝ к неи, и҆ пождѝ бл҃гихъ пло́дъ е҆ѧ.
въ дѣла́нїю бо еѧ ма́ло потрꙋди́шисѧ, и҆ ꙗ҆́сти бꙋдеши плоды еѧ·
ꙗ҆́ко стропот̑на е҆сть ѕѣло ненака́занымъ, и҆ не пребꙋдетъ в неи безꙋменъ.
ꙗ҆́ко камень и҆скꙋше́нїѧ крѣпокъ бꙋдетъ на не́м꙽ и҆ не замедлитъ ѿврещѝ еѧ̀·
Премꙋдрость б̂о по и́мени е҆ѧ е҆сть, и не многимъ е҆сть ꙗ҆́влена·
Слы́ши чадо и҆ прїими во́лю мою, и҆ не ѿврьзи совѣта мое҆го.
и҆ въведѝ но́ѕѣ своѝ въ ѻ҆ко́вы е҆ѧ, и҆ въ гри́внꙋ е҆ѧ вы́ю свою.
Под̑ложѝ ра́мо свое и҆ носи ю҆̀, и҆ не мрьзис̑҇ ѹ҆зи́лищами еѧ·
Всею̀ дш҃ею свое́ю пристꙋпи к неи, и всею си́лою свое́ю съблюди пꙋтѝ еѧ·
И҆зъслѣдѝ и҆ възыщѝ и҆ познана ти бꙋдетъ, и҆ е́м꙽сѧ за ню не ѻ҆ста́ви еѧ.
напослѣдокъ б̂о ѻ҆брѧ́щеши покои еѧ̀, и҆ ѻ҆брати́тсѧ тебѣ на веселїе·
И҆ бꙋдꙋтъ т̂и пꙋта еѧ̀ на поко́и крѣпости, и҆ гри́вны еѧ на ѻ҆дѣѧ́нїе сла́вы красота́ бо зла́та еѧ на не́и, и҆ ѹ́зы еѧ̀ и҆зви́тїе и҆а҆ки́н꙽ѳово·
Въ ѻ҆дежд̑ꙋ сла́вы ѻ҆блече́шисѧ ею̀, и҆ вѣнецъ ра́дости възложи́ши на сѧ·
А҆ще въсхо́щеши ча́до нака́занъ бꙋдеши и҆ а́ще вдасѝ дш҃ꙋ свою кова́ренъ бꙋдеши·
А҆ще възлюби́ши слꙋ́хати прїимеши, и҆ а́ще приклониши ѹ́хо твое премꙋдръ бꙋдеши·
Въ мно́жествѣ старецъ става́и, и҆ а́ще кто премꙋдръ ѿ нихъ томꙋ прилѣпи́сѧ·
Всѧ́кꙋ по́вѣсть ст҃ꙋ въсхо́щи слы́шати, и҆ при́тчи ра́зꙋма да не ѹ҆бѣжа́тъ тебе·
А҆ще ѹ́зриши разꙋми́ва ѹ҆тренюи к не́мꙋ, и҆ степени сте́зь е҆го да трет̑ нога̀ твоа.
Размышлѧ́и въ повеле́нїихъ гн҃ихъ, и҆ в за́повѣдехъ е҆го ѹ҆чи́сѧ присно·
То ѹ҆твердитъ срд̑це твое и҆ жела́нїе премꙋдрости дано т̂и бꙋдетъ·
Глв̑҇а, з҃·
Не творѝ ѕла̀ и҆ не пости́гнет꙽ т̂ѧ ѕло̀, ѿт̑стꙋпѝ ѿ непра́вды и҆ ѹ҆клонит̑сѧ ѿ тебе;
Сн҃е не сѣи на бразнахъ непра́вды, и҆ не и́маши пожа́ти и҆хъ седми́цею·
Не просѝ ѹ҆ г҃а влд̑чества, ни ѿ цр҃ѧ сѣда́нїа сла́вы.
не ѻ҆правда́и себе пред̑ бм҃ъ, и҆ паче цр҃ѧ не мꙋдри́сѧ·
Не просѝ да бꙋдеши сꙋдїи, е҆да немочѝ начнеши неправды ѿлꙋчи́ти·
да не когда ѹ҆бои́шисѧ лица̀ си́лнаго, и҆ положи́ши соблазнъ въ пра́вости твое́и·
Не съгрѣша́и въ мно́жествѣ гра́да, и҆ не низложѝ себе въ народѣ.
не свѧжѝ двои́цею грѣха̀, и҆ ни е҆ді́номꙋ же непови́ненъ бꙋдеши·
Не рцѝ на мно́жество да́ров̑҇ мои҆хъ възри́тъ, и҆ приносѧ́ще ми б҃ꙋ вы́шнемꙋ прїиметъ·
Не и҆знемага́и въ мл҃твѣ своеи, и҆ млс̑҇тыню творѝ не презри·
Не рꙋга́исѧ чл҃кꙋ сꙋщꙋ в го́рести дш҃и е҆го, е҆сть б̂о смирѧ́и и҆ възносѧ́и·
Не ѻ҆рѝ лжа̀ на бра́та свое҆го, ниже дрꙋгꙋ тогож̑ сътворѝ.
не въсхотѝ лга́ти всѧ́коѧ лжѣ̀, во́и҆нъство б̂о еѧ не на бл҃го·
Не чти́сѧ въ мно́жествѣ ста́рецъ, и҆ не повторѝ сло́ва въ мл҃твѣ свое́и.
не възненави́ди трꙋдна дѣла, и҆ дѣла́нїѧ ѿ вы́шнѧго създана.
не премѣни себе къ мно́жествꙋ грѣшникъ, смирѝ дш҃ꙋ свою ѕѣло, помѧни ꙗ҆́ко гнѣвъ не замедлитъ, ꙗ҆́ко мес̑҇ нечести́ваго ѻ҆́гнь и҆ червъ·
Не и҆змѣни дрꙋга не приѻ҆брѣте́нїѧ ради, ни бра́та прс̑҇на зла́томъ сꙋфирским̑.
не лиши́сѧ жены премꙋдры и҆ бл҃гы, и҆б̂о блгд̑ть еѧ паче зла́та·
Не ѻ҆злобѝ раба̀ дѣ́лающа въ и҆́стиннѣ, ниже нае́мника дѣлающа дш҃ею своею·
Раба̀ разꙋми́ва да лю́битъ дш҃а твоѧ, и҆ не лишѝ е҆го свободы̀·
Є҆сть ли т̂и ско́тъ посѣща́и е҆го, и҆ а́ще т̂и бꙋдетъ ключи́мо да пребꙋдет̑ ти.
сꙋть л̂и ти ча́да накажѝ ѧ҆̀, и҆ преклонѝ ѿ ю́ности вы́ю и҆хъ·
Сꙋть л̂и т̂и дще́ри внима́и тѣлꙋ их̑ и҆ не ѹ҆тѣша́и к нимъ лица̀ свое҆го.
Вы́дѧи дще́рь и҆ бꙋдеши съврьшивъ дѣло вели́ко, и҆ мꙋжеви разꙋми́вꙋ да́ждь ю҆̀·
Є҆сть л̂и т̂и жена̀ по дꙋши не и҆жденѝ еѧ̀·
Всѣмъ срд̑цемъ своим̑ просла́ви ѿц҃а свое҆го, и҆ матернѣ болѣзни не забꙋди·
Помѧнѝ ꙗ҆́ко тѣма̑ рожденъ е҆си, и чт̂о и҆ма въздасѝ то е҆же възе́мъ ѿ них̑·
Всею дш҃ею своею говѣи гв҃и, і҆е҆реи е҆го чтѝ·
Всею силою своею възлюбѝ сътворшаг̑҇ т̂ѧ, и҆ слꙋжи́тель е҆го не ѻ҆ста́ви·
Бо́исѧ г҃а и҆ просла́ви і҆ере́ѧ.
и҆ да́ждь ча́сть е҆го ꙗ҆́коже заповѣдано ти ѿ нача́ла, и҆ ѻ҆ согрѣше́нїи.
и҆ даѧ́нїе мы́ш꙽ца, и҆ жрътвꙋ ст҃ыни, и҆ нача́токъ ст҃ыхъ, и҆ ни́щемꙋ прострѝ рꙋкꙋ свою.
да съблюдетсѧ блс̑҇венїе твое, блгд̑ть даннаѧ пред̑ всѧ́кимъ живы́мъ, и҆ над̑ мр҃твьцемъ не възъбранѝ блгд̑ти.
и҆ не лиши́сѧ ѿ пла́чющихъ, и҆ съ сѣтꙋю́щими сѣтꙋи·
Не лѣни́сѧ посѣща́ти болѧ́ща, и҆ сими б̂о възлю́бленъ бꙋдеши.
въ всѣхъ словесехъ свои҆хъ помина́и послѣднѧѧ своѧ, и҆ въ вѣки не съгрѣши́ши·
Глв̑҇а, и҃·
Не свари́сѧ съ чл҃комъ си́лным̑, да не когда впадеши в рꙋцѣ е҆го·
Не тѧжи́сѧ съ чл҃ком꙽ бога́тымъ, да не когда̀ ѹ҆тѧготи́тъ т̂и мѣрꙋ·
Мно́гихъ б̂о погꙋбѝ зла́то, и҆ срд̑ца цр҃емъ ѹ҆клонѝ·
Не свари́сѧ съ чл҃комъ ꙗ҆зы́чномъ, и҆ не наклада́и на ѻ́гнь е҆го дро́въ·
И҆ не и҆гра́и съ ненака́занымъ, да не прїимꙋтъ безъче́стїѧ прародители твоѝ.
Не поносѝ чл҃кꙋ ѻ҆браща́ющꙋсѧ ѿ грѣха̀, помѧнѝ ꙗ҆́ко всѝ е҆смы̀ въ ѻ҆питемиꙗ҆́хъ·
Не бещестѝ чл҃ка въ ста́рости е҆го, и҆б̂о и҆ ты̀ са́мъ състарѣе҆шисѧ·
Не ра́дꙋисѧ ѻ҆ мр҃твецѝ, помѧнѝ ꙗ҆́ко всѝ ѹ҆мира́емъ·
Не пре́зри повѣсти премꙋдрыхъ, и҆ въ при́тчахъ и҆хъ живѝ.
ꙗ҆́ко ѿ ни́хъ навы́кнеши наказа́нїе, и҆ слꙋжи́ти вельмо́жам̑·
Не ѿстꙋпа́и ѿ за́повѣдеи ста́рецъ, и҆б̂о тїи навыко́ша ѿ ѻ҆ц҃ь свои҆хъ.
ꙗ҆́ко ѿ них̑ навы́кнеши ра́зꙋма, и҆ въ времѧ потребно възд̑а́ти ѿвѣтъ·
Не въз꙽гнѣща́и ѹ́глїе грѣшникꙋ, да не и҆згори́ши ѻ҆гнем̑ пла́мени е҆го.
не въста́ни ѿ лица̀ досади́телева, да не положи́ши ꙗ҆́ко влаꙗ҆́нїе въ ѹ҆стѣхъ твои҆хъ·
Взаи҆мъ не даи чл҃кꙋ крѣпльшꙋ себе и а́ще дасѝ бꙋди ꙗ҆́ко и҆ погꙋби́въ·
И҆ не порꙋча́исѧ выше си́лы свое҆ѧ, и҆ аще порꙋчишисѧ ꙗ҆́ко вдаѧ пецисѧ.
не сварисѧ съ сꙋдїею, по сла́вѣ б̂о е҆го сꙋдѧтъ е҆мꙋ·
Съ дръзом̑ не ходѝ на пꙋть, ꙗ҆́ко да не ѻ҆тѧготи́тсѧ на тѧ.
се́и бо творитъ по во́ли своеи и҆ бꙋ́естїю е҆го поги́бнеши·
И҆ со ꙗ҆́ростивымъ не свари́сѧ, и҆ не и҆дѝ с ни́м꙽ сквозѣ пꙋсты́ню·
пред̑ ѻ҆чи́ма б̂о е҆го кро́вь ꙗ҆́ко ничто́же е҆сть, і҆ и҆дѣже нѣсть по́мощи т̂ꙋ низложит̑ т̂ѧ·
Съ бꙋим̑ совѣта не творѝ, не и́мать б̂о совѣта дръжа́ти·
Пре̑ чюжи́мъ не творѝ ничто́же та́ино, не вѣси б̂о чт̂о сътворит̑ ти·
Всѧкомꙋ чл҃кꙋ не ꙗ҆влѧ́и срд̑ца свое҆го, е҆гда не възно́ситъ ти хвалы̀·
Глв̑҇а, ѳ҃·
Не ревнꙋ́и женѣ̀ ꙗ҆́дръ твои҆х꙽ ни наѹ҆чѝ на себѐ самого наказа́нїѧ лꙋка́ва.
не да́ждь женѣ̀ дш҃и своеѧ̀, е҆же наи҆тѝ е́и на крѣпость твою·
не срѣта́и жены̀ блꙋдницы, да не ка́ко впаде́ши в сѣти еѧ·
Къ спѣва́ющеи не примѣша́исѧ, да нѣкако ѹ҆вѧ́знеши в начина́нихъ еѧ̀·
дѣвы не глѧдаи да не когда̀ съблазни́шисѧ въ похотехъ и҆хъ·
Не да́ждь любодѣ́ицам꙽ дш҃а своеѧ, да не погꙋби́ши наслѣдїѧ свое҆го.
не преглѧда́и стн̑҇ѣ гра́дꙋ, и҆ въ пꙋстыхъ е҆го не блꙋдѝ.
ѿвратѝ ѻ́ко свое ѿ жены̀ кра́сныѧ, и҆ не глѧдаи чюжїѧ доброты̀·
Въ добротѣ же́ньстеи мно́ѕи съблазни́шасѧ, и҆ ѿ сеѧ дрꙋжбы ꙗ҆́ко ѻ҆́гнь раз̑гарѧ́етсѧ·
С мꙋжа́тицею ѿню́дъ не сѣдѝ, и҆ не медлѝ съ нею в домꙋ̀.
е҆гда не когда̀ ѹ҆клонитсѧ дш҃а твоа на ню̀, и дх҃омъ си поплъзнешисѧ на па́гꙋбꙋ·
Не ѻ҆ставлѧ́и дрꙋга старого, новы́и бо нѣсть точенъ е҆мꙋ.
вино̀ новое дрꙋгъ но́въ, а҆ще ѻ҆бет̑ша́е҆тъ со веселїемъ и҆спїеши себѣ·
Не ренꙋи сла́вѣ грѣшника, не вѣ́си б̂о чт̂о бꙋдетъ конецъ е҆го·
Не и҆зволи и҆зволе́нїѧ нечести́выхъ, помѧнѝ ꙗ҆́ко даже до а́да не ѻ҆правда́ютсѧ.
дале́че ѿстꙋпѝ ѿ чл҃ка и҆же и҆́мать вла́сть ѹ҆бива́ти, и҆ не боѧ́тисѧ начнеши страха смр҃тна.
и҆ а҆ще пристꙋпиши не съгрѣша́и, да не ѿи҆мет̑ живота̀ твое҆го·
Познава́и ꙗ҆ко по́средѣ сѣти минꙋ́еши, и҆ по забра́лом̑ града хо́диши.
по крѣпости твое́и сматрѧ́и и҆́скренѧго свое҆го, и҆ съ премꙋдрыми съвѣщава́и.
съ разꙋми́выми бꙋди размышле́нїе твое, и҆ всѧ̀ по́вѣсть твоѧ в зако́нѣ вы́шнѧго.
мꙋжи пра́веднїи да вече́рѧютъ с тобо́ю, и҆ въ стра́сѣ гн҃и бꙋди хвала твоѧ.
в рꙋка́хъ хꙋдогихъ дѣло похва́лено быва́етъ, и҆ старѣи людїи премꙋдръ въ словеси свое҆мъ·
Стра́шенъ въ́ градѣ своем̑ мꙋжъ ꙗ҆зы́чен꙽, и дръзыи словесы̀ възненави́дѣнъ бꙋдетъ·
Глв̑҇а, і҃·
Премꙋдръ сꙋдїѧ ка́жет̑ лю́ди своѧ, и҆ влд̑чьство разꙋмиваго ѹ҆чинено бꙋдетъ.
Ꙗ҆́коже бꙋдꙋтъ сꙋдїѝ лю́дем̑ е҆го, таки и҆ слꙋ́гы е҆го.
и ꙗ҆́коже бꙋдетъ влд̑ка гра́дꙋ, тацы и҆ вс̂и живꙋщїи в немъ·
Цр҃ь ненаказанъ погꙋблѧ́етъ лю́ди своѧ, и҆ грады ѹ҆селѧ́ютсѧ премꙋдростїю силныхъ·
В рꙋцѣ гн҃и власть земли, и подобнаго въздви́гнетъ въ времѧ на не́и.
в рꙋцѣ гн҃и бл҃гое ше́ствїе мꙋжа, и҆ на лице кни́жника возложатъ сла́вꙋ свою.
во всѧ́кои пра́вдѣ не дръжи гнѣ́ва на и҆скренѧго свое҆го, и҆ не твори ничесоже въ дѣлехъ досажденїѧ·
Възненавидѣна пред̑ бм҃ъ и҆ чл҃кы гордыни, и҆ ѿ ѻ́боих̑ престꙋпит̑ непра́вед̑не·
Црс̑҇тво ѿ ꙗ҆зы́ка въ ꙗ҆зы́къ преводи́тсѧ непра́вды дѣльма, и҆ досажденїѧ и҆мѣнїи.
почто сѧ гордитъ землѧ и҆ пепелъ, ꙗ҆́ко въ животѣ и҆звергохъ ѹ҆тро́бꙋ е҆го·
длъгꙋю бо́лесть ѿсѣка́етъ вра́чъ, и҆ цр҃ь дньс̑҇ а҆ ѹ́тро ѹ҆́мретъ, и҆ е҆гда ѹ҆́мретъ чл҃къ наслѣдѧт̑ и҆̀ и҆ гади и҆ ѕвѣри и҆ чрьвїе·
Нача́токъ горды́ни чл҃кꙋ ѿстꙋпа́ющꙋ ѿ г҃а, и҆ ѿ сътворшаго и҆̀ ѿстꙋпи срд̑це е҆го, ꙗ҆́ко нача́токъ горды́ни грѣхъ, и҆ дер̑҇жа́и е҆го ѻ҆дръжитъ сквернꙋ·
Сего ради не прослави г҃ь наведе́нїѧ, и҆ и҆ разврати е҆̀ до конца·
Прс̑҇тлъ кнѧзе́и низложи́ г҃ь, и посади смиренныѧ в нихъ мѣсто·
Ко́рень ꙗ҆́зы́къ и҆сторже г҃ь, и҆ всади смиренныѧ в нихъ мѣсто·
Зе́млю ꙗ҆зык̑҇ разврати г҃ь, и҆ погꙋби ихъ до ѻ҆снова́нїѧ землѧ̀.
погꙋби ю҆̀ и҆зѧтъ ѿ нихъ, и҆ престави ѿ землѧ па́мѧть и҆хъ·
Несозда́на бысть чл҃комъ гордыни, н̂и гнѣвъ ꙗ҆́рости рожд̑енїем̑ же́нъ·
Сѣмѧ чс̑҇тно коѐ сѣмѧ чл҃че, сѣмѧ чс̑҇тное кое боѧ́щесѧ г҃а.
сѣмѧ без̑честное коѐ сѣмѧ чл҃че сѣмѧ безъчестное коѐ престꙋпа́ю҆щее за́повѣди·
Посредѣ бра́тїа старѣи и҆хъ че́стен꙽, и҆ боѧ́щисѧ г҃а пред̑ ѻ҆чима е҆го·
Бога́тъ и҆ сла́венъ и҆ нищъ, похва́ла и҆хъ страхъ гн҃ь.
неправед̑но е҆сть ѹ҆карѧ́ти нища разимива, и҆ не подобно е҆сть слави́тꙋ мꙋжа грѣшника·
Вельмо́жа и҆ сꙋдїѧ и҆ силнїи сла́вни бꙋдꙋт꙽, и҆ нѣсть и҆хъ н̂и е҆ді́нъ вѧ́щїи боа́щагосѧ г҃а.
рабꙋ разꙋмивꙋ свобод̑нїи поработают̑.
и҆ мꙋжъ хи́тръ не поропщетъ.
не мꙋдри́сѧ твори́ти дѣ́ла свое҆го, и҆ не сла́ви себе въ времѧ тꙋги·
Лꙋче дѣлаѧ́и въ всем̑, неже ходѧ́и и славѧ́исѧ и҆ лишаѧ́сѧ хлѣ́ба·
Ча́до кро́тостїю просла́ви дш҃ꙋ свою, и҆ дажд̑ь е́и честь противꙋ са́нови еѧ̀·
Съгрѣша́ющаго въ дш҃ꙋ е҆го кт̂о ѻ҆правдит̑, и҆ли кт̂о просла́витъ бечествꙋ́юща животъ сво́и·
Ни́щїи славим̑ е҆сть хꙋдожества ради свое҆го, и҆ бога́тыи славимъ е҆сть богатьства ради свое҆го·
Прославлѧ́и же сѧ в нищетѣ, и҆ въ бога́тьствѣ коликощи.
и҆ прославленыи въ богатьствѣ и҆ в нищетѣ коликощи·
Глв̑҇а, а҃і·
Премꙋдрость смиренаго възнесетъ главꙋ̀ е҆го, и҆ посредѣ вельмо́жъ поса́дит̑ е҆го·
Не похвали чл҃ка въ красотѣ е҆го, и не бꙋ́ди т̂и ме́рзок̑҇ чл҃к꙽ видѣнїемъ е҆го·
Ма́ла е҆сть въ пернатых̑ пчела, и҆ начатокъ сла́дости плод̑ еѧ̀.
въ ѻ҆дѣа́нїи ры́з꙽ не похвали́сѧ, и҆ въ дн҃ь сла́вы не превъзносисѧ.
ꙗ҆́ко ди́вна дѣ́ла гн҃ѧ, и҆ не ѹ҆таѧт̑сѧ дѣ́ла е҆го пред̑ чл҃кы·
Мно́ѕи мꙋчи́тели сѣдоша на землѝ, незна́емыиж̑ ѹ҆вѧ́зесѧ вѣнцем꙽.
мно́ѕи силнїи ѹ҆корени бы́ша ѕѣло, и҆ сла́вни сꙋще предани бы́ша в рꙋки и҆́нх̑ѣ·
Пе́рвѣе неже и҆спыта́еши не зазираи, разꙋмѣи прьвѣе тогда́ же запрѣща́и·
Пр́ьвѣе даже не слы́шиши не ѿвѣщаваи, и҆ не влага́исѧ въ средꙋ бесѣды·
ѻ҆ вещи ꙗ҆́же т̂и нѣсть на потребꙋ не тѧжи́сѧ, и҆ на сꙋдѣ грѣшникъ не сѣда́и·
Чадо вс̂ѧ дѣа́нїѧ да не бꙋдꙋтъ ѻ҆ мноѕѣ, а҆ще ѹ҆мно́жиши не не бꙋ́деши пови́ненъ.
и҆ а́ще с̂е го́ниши не пости́гнеши, и҆ не ѹ҆течеши бѣжа̀·
Є҆сть трꙋжда́ѧисѧ и҆ потѧ́сѧ и҆ тщасѧ, и҆ тольма па́че лиша́ѧсѧ·
Є҆сть сла́бъ требꙋѧ застꙋпленїѧ, лиша́ѧисѧ ѹ҆крѣплѧет̑сѧ и҆ нищета и҆зобилꙋ́етъ.
и҆ ѻ́чи гн҃и призрѣста е҆мꙋ въ бл҃гаѧ, и҆ въздви́же и҆̀ ѿ смире́нїа е҆го.
и҆ възнесе гла́вꙋ е҆го, и҆ диви́шасѧ ѻ҆ немъ мно́ѕи·
добро̀ и҆ зл̂о животъ и҆ смр҃ть нищета и҆ богатьство ѿ г҃а е҆сть·
даанїе гн҃е пребыва́етъ бл҃говѣрным̑, и҆ бл҃говоленїе е҆го ѹ҆пра́вит̑сѧ въ вѣки.
е҆сть богатѧ́исѧ ѹ҆держа́нїем꙽ и҆ скꙋпостїю свое́ю, и҆ сїѧ часть м꙽зды ег̑҇.
внегда̀ рещи е҆мꙋ ѻ҆брѣтохом̑ поко́и, и҆ нн҃ѣ ꙗ҆́мъ ѿ бл҃гъ мои҆хъ.
и҆ не вѣсть коѐ времѧ прїидетъ, и҆ ѻ҆ста́вит̑ ѧ҆̀ и҆́нѣмъ и҆ ѹ́мрет̑.
стани въ завѣтѣ свое҆мъ и҆ бесѣдꙋи в немъ, и҆ в дѣлѣ свое҆мъ ѻ҆бетшаи, не дивисѧ дѣлом̑ грѣшника.
вѣрꙋи же гв҃и и҆ пребыва́и въ трꙋдѣ свое҆м꙽.
ꙗ҆́ко ѹ҆добно е҆сть пред̑ ѻ҆чима гн҃има, внезаа́пꙋ ѻ҆богати́ти ни́щаго·
Блс̑҇ве́нїе гн҃е на м꙽здѣ правед̑наго, и҆ въ ча́съ скоръ процветꙋтъ блс̑҇венїѧ е҆го·
Не рцы ка́ѧ м̂и потреба е҆сть, и҆ кое м̂и добро̀ ѿселѣ бꙋдетъ·
Не рцы довлѣет̑ м̂и чимъ ѿселе ѻ҆злоблю́сѧ.
въ дн҃ь до́бръ нѣсть воспомина́нїе зла̀, въ дн҃ь же золъ помѧнет̑сѧ добро̀·
Ꙗ҆́ко ѹ҆добно е҆сть пред̑ бм҃ъ въ дн҃ь смр҃ти возда́ти чл҃кꙋ проти́вꙋ пꙋти е҆го·
ѻ҆злобленїе времени забы́тїе тво́рит̑ пи́ща, и҆ въ сконча́нїе чл҃ка ѿкрытїе дѣ́ла е҆го·
Прежд̑е смр҃ти не блажѝ н̂и е҆ді́ного же, и҆б̂о ча́ды е҆го познан̑҇ бꙋдет̑ мꙋж́ъ·
Не всѧ́кого чл҃ка въведи въ до́мъ свои, мно́га б̂о сꙋть лаѧ́нїѧ льстиваго.
ꙗ҆́коже рѧ́бка ло́витсѧ в кошницы, та́коже срд̑це гордаго·
Ꙗ҆́коже съглѧд̑никъ назира́етъ пада́нїѧ, до́брое б̂о на́ зло ѻ҆браща́ѧ под̑садꙋ тво́рит꙽, и҆ на добры́ѧдѣтели възложи́тъ порокъ·
ѿ и҆скры ѻ҆гненыѧ ѹ҆множа́етсѧ ѹ́глїе, и҆ чл҃къ грѣшникъ на кровь чюжꙋ жела́ет꙽·
Блюдисѧ ѿ злодѣѧ зло̀ б̂о съдѣвает̑, е҆гда некогда порокъ да́сть т̂и въ вѣки·
Всели тꙋждаго въ до́мъ свои и҆ развратитъ мѧтежем̑, и҆ тꙋжда т̂ѧ сътворитъ твои҆хъ т̂и·
Глв̑҇а, в҃і·
Аще добро̀ сътвори́ши разꙋмѣи комꙋ твори́ши, и҆ бꙋдетъ блгд̑ть бл҃гым̑ твоим̑·
добро̀ сътвори бл҃говѣрномꙋ, и҆ ѻ҆брѧ́щеши въздаа́нїе, да а҆ще не ѿ него̀ то ѿ вы́шнѧго.
не бꙋдетъ добро̀ прилежа́щемꙋ въ зл̂о, и҆ не пода́ющемꙋ млс̑҇тыни.
даждь бл҃говѣрномꙋ и҆ не застꙋпа́и грѣш꙽ника, добро̀ сътвори смиренномꙋ а҆ не да́ждь нечести́вомꙋ·
Възбранѝ хлѣба е҆мꙋ и҆ не да́ждь е҆го, да не тм̑ѣ т̂ѧ премо́жетъ·
сꙋ́гꙋба б̂о зл̂а ѻ҆брѧ́щеши въ всѣхъ блазѣхъ ꙗ҆же а҆ще сътвори́ши е҆мꙋ·
Ꙗ҆́ко вы́шнїи възненавидѣ грѣшники и҆ нечестивым̑ возда́сть ме́сть·
даждь бл҃гомꙋ и҆ не застꙋпа́и грѣшника.
не мщенъ бꙋ́детъ въ бла́ѕѣ дрꙋгъ, и҆ не скрыет̑сѧ въ злы́хъ врагъ.
е҆гда̀ въ добрѣ бꙋдетъ мꙋжъ, вра́ѕи е҆го в печа́ли сꙋть, и҆ въ злѣ̀ е҆го дрг̑҇ꙋ разлꙋчит̑сѧ·
Не и҆́ми вѣры врагꙋ свое҆мꙋ въ вѣки, ꙗ҆́коже б̂о мѣ́дь ѻ҆ржа́вѣе҆тъ тако и҆ зло́ба е҆го.
и҆ а́ще смиритсѧ т̂о пои҆детъ пони́кши ѻ҆ста́ви дш҃ꙋ свою̀, и҆ хранисѧ ѿ него.
и҆ бꙋдеши е҆мꙋ ꙗ҆́ко ѻ҆цыщено зерцало, и҆ разꙋмѣ́еши ꙗ҆́ко не до конца ѻ҆ржавѣлъ.
не поста́ви е҆го ѹ҆ себѐ, да не възринꙋвъ т̂ѧ ста́нет̑ на мѣстѣ твоем̑·
не посади е҆го ѻ҆де́снꙋю себѐ, да не пои҆́щетъ когда̀ сѣда́лища твоего.
и҆ на по́слѣдь разꙋмѣ́еши словеса̀ моа̀, и҆ ѻ҆ гл҃ѣ моем̑ ѹ҆милишисѧ·
Не съвѧ́зꙋи два́щи грѣха, въ е҆ді́номъ б̂о не и҆звинишисѧ.
кт̂о поми́лꙋетъ ѻ҆баа́нники и҆ змїемъ ѹ҆секнена, и҆ всѣхъ пристꙋпа́ющихъ къ ѕвѣрем̑·
Та́коже ходѧ́щаго съ мꙋжемъ грѣшникомъ, и҆ примѣша́ющагосѧ грѣсехъ е҆го·
Ча́съ с тобо́ю пребꙋдет̑, и҆ а҆ще ѹ҆клони́шисѧ не сътръпит̑.
ѹ҆стнама свои́ма ѹ҆сладитсѧ враг̑҇, и҆ мно́го пошепчетъ, и҆ речетъ добро̀ гл҃ѧ·
ѻ҆чима свои́ма прослезитсѧ и҆ срд̑цемъ свои҆мъ съвѣтꙋ́етъ вринꙋти т̂ѧ в ровъ, и҆ е҆гда ѻ҆брѧ́щетъ времѧ не насы́титсѧ кро́ве·
А҆ще срѧ́щетъ т̂ѧ зло̀, т̂ꙋ ѻ҆брѧ́щеши е҆го прьвѣе себѐ, и҆ ꙗ҆ко помага́ѧ проразитъ пѧ́тꙋ твою.
покива́етъ главо́ю свое́ю и҆ въсплещетъ рꙋка́ма свои́ма, и҆ мно́го пошепчетъ и҆змѣнитъ лице е҆го·
Глв̑҇а, г҃і·
Касаѧ́сѧ пеклѣ ѻ҆чернит̑сѧ, и҆ ѻ҆бща́ѧсѧ гордомꙋ точенъ е҆мꙋ бꙋдет̑·
Бремене па́че себе не въздвижи, и҆ крѣпльшꙋ и҆ богатѣ́ишꙋ себѐ не ѻ҆бща́исѧ·
Кое́ причастїе горнъцꙋ с котломъ, то́и б̂о приразитсѧ и то́и съкрꙋшит̑сѧ·
бога́тыи ѻ҆би́дꙋ тво́ритъ и҆ се́и приразгнѣва́етсѧ, ни́щїи б̂о ѻ҆би́димыи самъ примолит̑сѧ.
а҆ще ключимъ бꙋ́деши кꙋе҆тъ на́ тѧ, а҆ще лишенъ бꙋдеши ѻ҆ста́витъ т̂ѧ.
а҆ще л̂и и҆́маши поживет̑ с тобо́ю, і҆ и҆стощитъ т̂ѧ и҆ самъ не поболитъ.
а҆ще требѣ бꙋдетъ т̂и ѿльститъ т̂ѧ и҆ въсмѣе҆тъ ти сѧ, и҆ да́сть т̂и надеждꙋ въз꙽гл҃етъ т̂и до́брѣ·
И҆ речет̑ т̂и е҆́сть л̂и тѝ чт̂о требѣ, и҆ посрамит̑ т̂ѧ бра́шномъ свои҆мъ, до́ндеже и҆стощитъ т̂ѧ два́щи и҆ли трищи.
и҆ напослѣдок꙽ порꙋга́етъ ти сѧ, потом̑ ѻ҆зрит̑ т̂ѧ и҆ ѻ҆ста́витъ т̂ѧ, и҆ главо́ю свое́ю покива́етъ на́ тѧ·
Внима́и и҆ не заблꙋди, да не смиришисѧ въ веселїи свое҆мъ·
Є҆гда̀ т̂ѧ си́лныи призовет̑ ѿстꙋпа́и, и҆ толи́ко пач̑҇ призовет̑ т̂ѧ.
не напада́и да не ѿринешисѧ, и҆ не ста́и ѿдалече да не забвен̑҇ бꙋдеши.
не належи ра́венъ бы́ти с ним̑, и҆ не вѣрꙋи множа́ишимъ словесемъ е҆го.
мно́гою бе́сѣдою и҆скꙋситъ т̂ѧ, и҆ ꙗ҆́ко смѣѧ́сѧ и҆спыта́етъ т̂ѧ·
Без̑млс̑҇тивъ е҆сть не съблюда́ѧи словес̑҇, и҆ не пощадитъ ѻ҆слабити ѻ҆ зло́бѣ и҆ ѻ҆ ѹ́зах̑·
Съблюди и҆ внима́и ѕѣло, ꙗ҆́ко с паденїемъ свои҆мъ хо́диши·
Всѧко животно лю́битъ подобнаго себѣ, и҆ всѧкъ чл҃къ и҆скренѧго свое҆го·
Всѧка пло́ть по родꙋ сѧ събира́етъ, и подобнѣмъ себѣ прилепит̑сѧ мꙋжъ·
Ка́ѧ ѻ҆бщина во́лкꙋ съ а҆́гнецемъ, та́коже и҆ грѣшникꙋ съ бл҃говѣрнымъ·
Кїи ми́ръ ѹ҆е́нѣ съ ѱом꙽, и҆ кїи ми́ръ бога́томꙋ съ ѹ҆бо́гимъ·
Ловъ львовъ ѻ҆нагри въ пꙋсты́ни, та́коже па́жити бога́тымъ ѹ҆богїи·
Мерзоко го́рдомꙋ смиренїе, сице мерзокъ бога́томꙋ ни́щїи.
богат̑ колѣ́блѧсѧ ѹ҆твержае҆тсѧ дрꙋги, ѹ҆богїи же спадесѧ прирѣѧнъ бꙋдетъ дрꙋ́ги·
Бога́тꙋ съблажньшꙋсѧ мно́ѕи застꙋпници гл҃аша, и҆зреченнаѧ и҆ ѻ҆правда́ша е҆го.
ѹ҆богїи же съблазнисѧ и҆ припретиша е҆мꙋ, и҆звѣща ра́зꙋмъ и҆ не даша е҆мꙋ мѣста·
Бога́тыи возъгл҃а и҆ вс̂и ѹ҆молча́ша, и҆ слово е҆го възнесоша до ѻ҆блакъ·
Ѹ҆богїи возъгл҃а и҆ вс̂и рѣша кт̂о сеи е҆сть, а҆ще прет̑кнетсѧ пакы возвратѧтъ и҆̀.
добро̀ е҆сть богат̑ство в немже нѣсть грѣха, и҆ паки зл̂о е҆сть нищета въ ѹ҆стх̑ѣ нечестивыхъ.
срд̑це чл҃ческо и҆змѣнѧ́етъ лице свое, любо на добро̀ любо на зло̀.
слѣдъ сръдеченъ въ добрѣ лицѐ тихо, и҆зъѻ҆брѣтенїе прит̑чеи послꙋшанїѧ съ трꙋдомъ·
Глв̑҇а, д҃і·
Блж҃енъ мꙋж́ъ и҆же не съблазни́тсѧ ѹ҆стна́ма свои҆ма, и҆ не ѹ҆мили́сѧ в꙽ печа́ли грѣха.
бл҃женъ е҆мꙋже не зазрѣ дш҃а е҆го, і҆ и́же не спаде ѿ наде́жди свое҆ѧ.
мꙋж́еви хꙋ́лнꙋ не лѣ́по е҆сть бога́т꙽ство, и҆ чл҃кꙋ зави́дливꙋ не лѣ́по е҆сть ѻ҆но·
Събира́ѧи б̂о дш҃а своѧ и҆́нѣмъ събира́етъ, и҆ въ добрѣ е҆го и҆нїи насладѧ́тсѧ·
И҆же себѣ ѕол̑҇ комꙋ до́бръ бꙋ́детъ, и҆ не възвеселит̑сѧ въ все́мъ и҆мѣ́нїи свое҆мъ·
Зазри́вомꙋ себѣ нѣсть злѣ́иша, и҆ с̂е възда́нїе зло́бы е҆го·
А҆ще и҆ добро тво́ритъ в забы́тїи тво́ритъ, и҆ на послѣ́дь и҆знесе́тъ зло́бꙋ свою·
Лꙋка́въ е҆сть завидѧ́и ѻ҆́комъ, и҆ ѿвраща́ѧи лице и҆ презрѧи дш҃а·
ѻ҆́ко лихои҆́мца не насыща́етсѧ ча́сти, и҆ ѻбида лꙋка́ва и҆з꙽сꙋша́етъ дш҃ꙋ·
ѻ҆́ко лꙋка́во зави́дливо и҆ ѻ҆ хлѣбѣ, и҆ на трапе́зѣ е҆го скꙋденъ·
Ча́до ꙗ҆́коже и҆́маши добро твори себѣ, и҆ приноше́нїѧ гв҃и досто́ино принеси·
Помѧни ꙗ҆́ко смр҃ть не замедлитъ, и҆ завѣтъ а҆довъ не показа́нъ т̂и быс̑҇·
даже не ѹ҆мерши т̂ы добро сътвори дрꙋ́гꙋ, и по крѣ́пости свое҆и простри и҆ да́жд̑ь е҆мꙋ.
не лиши́сѧ ѿ дн҃е добра, и҆ ча́сть жела́нїѧ бл҃га да не пре́идетъ тебе·
Не и҆́нѣмъ л̂и ѻ҆ста́виши притѧжа́нїѧ твоѧ и҆ трꙋды твоа.
въ раздѣле́нїе жре́бїа да́ждь и҆ възми, и҆ просвѣти дш҃ꙋ свою, ꙗ҆́ко нѣсть въ а҆́дѣ и҆ска́ти пи́ща·
Всѧ́ка плот̑ ꙗ҆́ко ри́за ѻ҆бет꙽ша́етъ, завѣтъ б̂о ѿ вѣка смр҃тїю ѹ҆морѧ́етъ.
Ꙗ҆́ко ли́стъ расплоща́ѧсѧ на древѣ частѣ, ѻ҆́въ ѹ҆бо спадаетъ дрꙋгїи прозѧбает̑·
та́коже и҆ ро́дъ пло́ти и҆ кро́ви.
ѻ҆́въ ѹ҆мира́етъ ѻ҆́въ же роди́тсѧ.
всѧ́ко дѣ́ло гнїю́ще прехо́дитъ, и҆ дѣ́лаѧи с ни́мъ ѿидетъ·
Бл҃женъ мꙋж́ъ и҆же ѹ҆́мретъ въ премд̑ꙋрости, і҆ и́же въ ра́зꙋмѣ свое҆мъ препи́раетсѧ·
Размышлѧ́а пꙋти е҆ѧ въ срд̑цы своем̑, и҆ въ сокро́вищихъ е҆ѧ̀ разꙋмѣет̑сѧ·
И҆зыди въ слѣдъ е҆ѧ̀ ꙗ҆́ко слѣдникъ и҆ на пꙋтѣхъ е҆ѧ̀ присѧди·
Принича́ѧ скво́ѕѣ ѻ҆ко́нце е҆ѧ̀, и҆ на две́рехъ е҆ѧ̀ спослꙋша́и·
ѻ҆бита́ѧи близъ до́мꙋ е҆ѧ̀, и҆ въбїет꙽ ко́лъ въ стѣнꙋ е҆ѧ̀·
Поста́ви скѷнїю свою въскра́и е҆ѧ̀, и҆ ѻ҆битает̑ въ ѻ҆би́тели бл҃гих̑·
Положи́тъ ча́да своѧ въ покро́вѣ е҆ѧ, и҆ под̑ вѣтми е҆ѧ̀ въдво́ритсѧ·
Покры́етсѧ е҆ю ѿ зно́ѧ, и҆ въ сла́вѣ еѧ̀ ѻ҆бита́ти бꙋдетъ·
Глв̑҇а, е҃і·
Боѧ́исѧ г҃а сътво́ритъ сїе, и҆ держа́и зако́нъ пости́гнет̑ ю҆̀.
и҆ срѧ́щет̑ е҆го ꙗ҆́ко мт҃и, и҆ ꙗ҆́ко жена̀ дѣв꙽ства прїимет̑ и҆̀·
Ѹ҆хлѣби́тъ е҆го хлѣбом̑ ра́зꙋма, и҆ водо́ю премꙋдрости напои́тъ и҆̀·
Ѹ҆тверди́тсѧ на не́и и҆ не преклони́тсѧ, и҆ до неѧ приста́нетъ и҆ не постыди́тсѧ, и҆ възд̑ви́гнетъ и҆̀ паче и҆́скренихъ е҆го.
посреди цр҃кви раздви́гнетъ ѹ҆ста е҆го·
весе́лїе и҆ вѣнець ра́дости, и҆мѧ вѣчно наслѣ́дитъ·
Не пости́гнꙋтъ е҆ѧ̀ чл҃цы неразꙋмивїи, и҆ чл҃цы грѣшнїи не ѹ҆зрѧ́тъ е҆ѧ̀.
дале́че е҆сть ѡ гръды́ни, и҆ мꙋж́и л꙽жі́ви не и҆мꙋть помѧнꙋти е҆ѧ̀·
Нѣсть кра́сна пѣ́снь въ ѹ҆стѣхъ грѣшника, ꙗ҆́ко не ѿ г҃а посла́на бы́сть·
Премꙋдростїю б̂о речена бꙋдетъ пѣснь, и҆ г҃ь напра́вит꙽ е҆го·
Не рцы ꙗ҆́ко г҃а ради ѿстꙋпих̑, и҆́хже б̂о възненавидѣ не сътвориши·
Не рцы ꙗ҆́ко самъ м̂ѧ прелсти, не требꙋетъ б̂о мꙋ́жа грѣшника·
Всѧ́кꙋ мерзость възненавидѣ̀ г҃ь, и нѣсть лю́ба боѧ́щимсѧ е҆го.
самъ и҆спе́рва сътвори чл҃ка, и҆ ѻ҆ста́ви е҆го в рꙋцѣ и҆зволенїа е҆го·
А҆ще хо́щеши съблюде́ши за́повѣди, и҆ вѣрꙋ сътвори́ши бл҃говоле́нїѧ.
пред̑ложи́лъ т̂и ѻ҆́гнь и҆ во́дꙋ, и҆ на не́же хо́щеши просре́ши рꙋ́кꙋ твою·
Пред̑ чл҃ком̑ живо́тъ и҆ смр҃ть, и҆ еже а҆ще изво́лит̑ да́стьсѧ е҆мꙋ·
Ꙗ҆́ко многа премꙋдрость гн҃ѧ, крѣ́покъ си́лою и҆ зрѧ́и всѧ.
ѻ́чи е҆го на боѧ́щихсѧ е҆го, и҆ то́и позна́етъ всѧ́ко дѣ́ло чл҃ческо·
Не заповѣда ни е҆ді́номꙋже беществова́ти, и҆ не да́сть ѻ҆сла́бы ни е҆ді́номꙋ же съгрѣша́ти·
Ча́до не люби мно́жество неключи́мыхъ·
Глв̑҇а, ѕ҃і·
Не весели́сѧ ѻ҆ сн҃ехъ нечести́выхъ, а҆ще ѹ҆мно́жатсѧ не весели́сѧ ѻ҆ нихъ, а҆ще нѣсть стра́ха гн҃ѧ с ни́ми.
не ѹ҆вѣрꙋи животꙋ и҆хъ не належи на мѣсто и҆хъ.
лꙋче б̂о е҆ді́нъ пра́вед̑никъ нежели ты́сꙋща грѣшникъ, и҆ ѹ҆мрѣти бес ча́дъ, неже ли и҆мѣти ча́да нечести́ва·
ѿ е҆ді́наго б̂о ра́зꙋмна ѹ҆селит̑сѧ град̑, колѣ́но же безако́нныхъ запꙋстѣет̑·
Мно́га сицеваѧ видѣ ѻ҆́ко мое, и҆ крѣпльша сего ѹ҆слы́ша ѹ҆́хо мое·
Въ собо́рищи грѣшныхъ възгори́тсѧ ѻ҆́гнь, и҆ въ ꙗ҆зы́цѣ непокори́вѣ възгори́тсѧ гнѣ́въ·
Не ѹ҆моли́сѧ б҃ъ ѿ дре́внихъ и҆споли́новъ, и҆же ѿстꙋпи́ша крѣпостїю свое҆ю.
не пощадѣ ѻ҆́крс̑҇тъ жили́ща ло́това, их̑же ѻ҆мерзи за горды́ню и҆хъ.
не поми́ловасѧ ꙗ҆зы́къ па́гꙋбы поги́бшихъ грѣхи свои҆ми.
и҆ та́ко ше́сть со́тъ ты́сѧщъ пѣшецъ, съшед̑шихсѧ въ жестосердїи свое҆мъ.
а҆ще бꙋдетъ е҆ді́нъ жесто́кїи, не ди́вно е҆сть а҆ще непови́ненъ бꙋ́детъ.
млс̑҇ть б̂о и҆ гнѣ́въ ѹ҆ него, си́ленъ ѹ҆мо́мъ л̂и бы́ти и҆злива́ѧ гнѣвъ по мно́зѣи млс̑҇ти е҆го.
та́коже и҆ мно́го ѻ҆бличе́нїе е҆го, мꙋжеви по дѣ́ломъ е҆го сꙋдит̑·
и҆ не ѹ҆бѣже хище́нїемъ грѣшныи, и҆ терпѣ́нїе бл҃говѣ́рнаго не лише́но бꙋдетъ·
Всѧ́ка млс̑҇тыни сътво́рит̑ мѣсто, ко́ждо по дѣ́ломъ свои҆мъ ѻ҆брѧ́щетъ·
Не рцы ꙗ҆́ко ѿ г҃а съкры́юсѧ, е҆да свы́ше кт̂о мѧ помѧнет̑, в лю́дехъ мно́жаишихъ незна́нъ бꙋдꙋ, чт̂о бо̀ е҆сть дш҃а моѧ въ бесчислен̑҇нѣ тва́ри·
Се нб҃о, и҆ нб҃о нб҃си бж҃їе, безд̑на и҆ землѧ̀ посѣще́нїемъ е҆го подвижа́тасѧ.
въкꙋпѣ го́ры и҆ ѻ҆снова́нїѧ землѝ, е҆гда възри́тъ на́ нѧ тре́петомъ сътрѧсꙋтсѧ.
и҆ ѿ них̑ не расмыслитъ срд̑це, и҆ пꙋть е҆го кт̂о помы́слитъ, и҆ бꙋрю е҆ѧ́же не ѹ҆зрит̑ чл҃къ, и҆ мно́жаиша же дѣлъ е҆го въ сокрове́нныхъ·
дѣ́ла пра́вды е҆го кт̂о възвѣсти́тъ, и҆ли кт̂о стръпи́тъ.
дале́че б̂о завѣта, ѹ҆малѧ́ѧисѧ срд̑цемъ размышлѧ́ет꙽ сїа, и҆ мꙋжъ безꙋменъ и҆ развраще́нъ раз̑мышлѧ́етъ бꙋ́ѧѧ·
Послꙋшаи мене ча́до и҆ наѹ҆чи́сѧ хꙋдо́жествꙋ, и҆ на словеса̀ моѧ внима́и срд̑цемъ своим̑·
И҆зъꙗ҆влѧ́ю в мѣрꙋ наказа́нїе, и҆ съ испыта́нїем̑ възвѣщꙋ̀ хꙋдо́жество.
Сꙋдомъ гн҃имъ дѣла е҆го и҆спрьва, и҆ ѿ сътворе́нїѧ е҆го разнествил̑҇ ча́сть е҆го.
ѹ҆красѝ въ вѣки дѣла е҆го, и҆ нача́ла и҆хъ въ роды и҆хъ·
Ко́ждо и҆́скренѧго свое҆го не ѻ҆скръбѝ, и҆ до́ вѣка не проти́витсѧ гл҃ꙋ е҆го·
И҆ пото́мъ г҃ь на́ землю призрѣ̀, и҆сплъни ю҆̀ ѿ бл҃гъ е҆го.
дш҃а всѧ́кого живо́тна покры̀ лицѐ еѧ, и҆ в꙽ ню възъвраще́нїе и҆хъ·
Глв̑҇а, з҃і·
Гь҃ създа̀ ѿ землѧ̀ чл҃ка, и҆ па́ки възвратѝ е҆го в ню̀, дн҃и числа̀ и҆ вре́мѧ далъ им̑.
и҆ да́лъ и҆мъ власть на не́и сꙋщимъ ꙗ҆́коже ѻ҆нѝ са́ми ѻ҆блечѐ и҆хъ крѣпостїю.
и҆ по ѻ́бразꙋ свое҆мꙋ сътворѝ ѧ҆̀·
И҆ положѝ страх̑ е҆го на всѧ́кои пло́ти, и҆ властельствова́ти ѕвѣрмѝ и҆ скоты и҆ пти́цами.
помышле́нїе и҆ ꙗ҆зы́къ и҆ ѻ́чи и҆ ѹ́ши и҆ срд̑це дадѐ им̑ размышлѧ́ти, хꙋдо́жествомъ ра́зꙋма и҆сплъни ѧ҆̀.
и҆ добро̀ и҆ ѕло̀ показа̀ и҆мъ.
положилъ е҆сть ѻ҆́ко свое на срд̑цехъ и҆хъ, показа́ти и҆мъ вели́чество дѣлъ свои҆хъ с̂и мѧ ст҃ынѣ въсхва́лѧт꙽, да повѣда́ютъ вели́чество дѣлъ е҆го·
Приложи́лъ и҆мъ хꙋдо́жество, и҆ зако́нъ живота̀ наслѣдъстви и҆мъ.
завѣтъ вѣка поста́ви им̑, и҆ сꙋдбы̀ е҆го показа̀ и҆мъ·
Вели́чество сла́вы ви́дѣша ѻ҆чеса̀ и҆хъ, и҆ сла́вꙋ гла́са е҆го слы́ша ѹ́хо и҆хъ·
И҆ рече и҆мъ внемлѣте ѿ всѧ́коѧ непра́вды, и҆ заповѣда и҆мъ комꙋждо ѻ҆ и́скренем̑·
И҆ пꙋтїе и҆хъ пред̑ ним꙽ вы́нꙋ, не ѹ҆кры́ю҆тсѧ ѿ ѻчїю е҆го.
комꙋждо ꙗ҆зы́кꙋ ѹ҆стро́илъ во́жда, и҆ ча́сть гн҃ѧ і҆и҆л҃ь е҆сть.
всѧ дѣла и҆хъ ꙗ҆́ко слн҃це пред̑ нимъ, и҆ ѻ́чи е҆го вынꙋ на пꙋте́х꙽ и҆хъ·
Не ѹ҆кры́шасѧ пра́вды и҆хъ ѿ него, и҆ всѝ грѣсѝ и҆хъ пред̑ гм҃ъ·
Млс̑҇тыни мꙋжа ꙗ҆́ко печа́ть с нимъ, и҆ блгд̑ть чл҃чю ꙗ҆́ко ѕѣницꙋ съблюдет̑.
пото́мъ въста́нетъ и҆ възда́сть им̑ и҆ въздаѧ́нїе и҆хъ на главꙋ̀ и҆хъ възда́сть·
ѻ҆ба́че ка́ющимсѧ да́лъ ес̑҇ възвраще́нїе, и҆ ѹ҆тѣши и҆знемога́ю҆ща тръпѣнїемъ·
ѻ҆братисѧ къ г҃ꙋ и҆ ѿгрѣни́сѧ грѣха̀, помоли́сѧ прѧ́мо лицꙋ̀ и҆ ѹ҆мали претыка́нїѧ.
въсходѧ́и к вы́шнемꙋ и҆ воз̑врати́сѧ ѿ непра́вды, и҆ ѕѣло възненави́ди мрьзость·
Вы́шнѧго кт̂о въсхва́литъ въ а́дѣ въ живы́хъ мѣсто.
и҆ живы́хъ и҆ дающихъ и҆сповѣда́нїе, ѿ мрътвьца ꙗ҆́ко ничтоже сꙋщꙋ поги́бнет̑ и҆сповѣда́нїе.
живы́и и҆ здра́выи въсхва́литъ г҃а·
Ꙗ҆́ко велика млс̑҇ть гн҃ѧ, и҆ ѻ҆цѣще́нїе ѻ҆браща́ющих̑сѧ к немꙋ.
не мо́жет̑ б̂о въ чл҃цѣх꙽ всх̑ѣ бы́ти, ꙗ҆́ко не без꙽см҃рти сн҃ъ члчс̑҇кїи·
Чт̂о свѣтлѣе слн҃ца и҆ т̂о и҆щеза́етъ, и҆ зло помы́слитъ пло́ть и҆ кро́вь.
си́лы б̂о высоты̀ небе́сныѧ са́мъ посѣща́етъ, и҆ чл҃цы всѝ землѧ̀ и пе́пелъ·
Глв̑҇а.
и҃і·
Живы́и въ вѣки създа всѐ ѻ́бще·
Гь҃ е҆ді́нъ ѻ҆правдит̑сѧ, не сътворѝ никомꙋже и҆сповѣда́ти дѣлъ е҆го·
Кт̂о и҆слѣдитъ дѣла е҆го и҆ дръжа́вꙋ вели́чества е҆го кто и҆щетет̑, и҆ кт̂о прило́жит̑ и҆сповѣда́ти млс̑҇ть е҆го·
Нѣсть ни ѹ҆ма́лити ни ѹ҆мно́жити, и҆ нѣсть и҆слѣди́ти чюдесъ гн҃ихъ.
е҆гда сконча́етъ чл҃къ тогд̑а начина́етъ, и҆ е҆гда̀ преста́нетъ тогда ѹ҆кры́етсѧ·
Чт̂о е҆сть чл҃къ и҆ чт̂о е҆сть добродѣтель е҆го, и҆ чт̂о е҆сть блгс̑҇ть, и҆ чт̂о е҆сть ѕло̀ е҆го·
число̀ дн҃їи чл҃кꙋ мно́го лѣтъ р҃, ꙗ҆́ко ка́плѧ морскїѧ воды̀ и҆ число̀ пѣска̀, та́ко мало лѣтъ въ дн҃ь вѣка.
сего ра́ди длъготръпѣ г҃ь на нихъ.
и҆ възлїѧ на́ нѧ млс̑҇ть свою·
И҆ ви́дѣ и҆ позна̀ разъвраще́нїе и҆хъ ꙗ҆́ко ѕло̀, сего ради ѹ҆мно́жи ѻ҆цѣще́нїе е҆го·
Млс̑҇ть чл҃ча на и҆́скренѧг̑҇ свое҆го, млс̑҇ть же гн҃ѧ на всѧ́кꙋ плоть и҆ ѻ҆блича́а и҆ ѹ҆ча и҆ кажа̀ и҆ ѻ҆браща̑ѧ, ꙗ҆́ко па́стыръ ста́до свое.
прїемлющихъ же наказа́нїе ми́лꙋетъ, и҆ т꙽ща́щаѧсѧ ѻ҆ сꙋдба́хъ е҆го·
Ча́до въ бла́ѕѣ не да́ждь поро́ка, и҆ въ всѧ́комъ да́нїи печа́ль словесъ.
не поко́и҆тъ ли ва́ра роса̀, ꙗ҆́ко лꙋче е҆сть сло́во нежели даѧ́нїе.
не се́ ли сло́во па́че даѧ́нїѧ бл҃га, и҆ ѻ҆бо́е ѹ҆ мꙋжа блгд̑тна·
Бꙋ́и неподати́въ поно́сит̑ и҆ даѧ́нїе зави́дливаго мꙋчитъ ѻ҆́ко.
прьвое даже не гл҃еши ѹ҆вѣжд̑ь, и҆ прьвѣе недꙋга врачꙋ́исѧ·
прьвѣе сꙋда пыта́и ѻ҆ себѣ, и҆ в ча́съ посещѣнїѧ ѻ҆брѧ́щеши ѻ҆цѣще́нїе·
Прьвѣе даже в недꙋгъ не впаде́ши смири́сѧ, и҆ въ времѧ грх̑ѣ покажѝ ѻ҆браще́нїе·
И҆ не забꙋди възда́ти въ времѧ молитвꙋ, и҆ не пребꙋди до смр҃ти ѻ҆правди́тисѧ·
Преже да́же сѧ не помоли́ши ѹ҆гото́ви себе, и҆ не бꙋди ꙗ҆́ко чл҃къ и҆скꙋша́ѧ г҃а·
Помѧнѝ гнѣв꙽ въ дн҃ь сконча́нїѧ, и времѧ местѝ въ ѿвраще́нїи въ времѧ гобзины, нищетꙋ и҆ ѹ҆бо́жество въ дн҃ь бога́т꙽ства·
ѿ ѹ́тра до́ вечера и҆змѣнѧ́е҆тсѧ времѧ, и҆ всѐ скоро е҆сть предъ бм҃ъ·
И҆ чл҃къ премꙋдръ ѻ҆ все́мъ бл҃гоговѣенъ бꙋдетъ, и҆ въ дн҃и вне́мли ѻ҆ согрѣше́нїи·
Всѧкъ разꙋмив̑҇ позна̀ премꙋдрость, и҆ ѻ҆брѣт꙽шꙋ и҆мъ ю҆̀ да́сть и҆спвѣда́нїе.
разꙋми́вымъ въ словесеохъ и҆ тїи ѹ҆мꙋдри́шасѧ, и҆ ѹ҆множиша при́тча и҆спы́тна ѹ҆дръжа́неи дш҃и·
Въ слд̑ѣ по́хотїи свои҆хъ не ходѝ, и҆ ѿ похотѣнїи свои҆хъ възбранѧ́исѧ.
а҆ще приѻ҆брѧ́щеши дш҃и свое́и бл҃говоле́нїе жела́нїѧ, сътворит̑ тѧ ѻ҆брадова́нїе враго́мъ твои҆мъ·
Не весели́сѧ ѻ҆ мно́зѣи пи́щи, и҆ не свѧжи́сѧ совѣтомъ еѧ.
не бꙋди нищ꙽ совѣтꙋѧи наказа́нїе трꙋда, и҆ не бꙋдетъ ти ничесоже въ вретищи·
Глв̑҇а, ѳ҃і·
Дѣ́латель пїѧ́нивыи не бꙋдет̑ бога́тъ, и҆ ѹ҆ничижа́ѧи мала́ѧ по ма́ле ѹ҆падетъ.
вино̀ и҆ же́ны ѿвратѧт̑ ѻ҆́чи разꙋмивых꙽, и҆ прилага́ѧисѧ любодѣ́ицахъ дерѕѣи бꙋдетъ.
молеве и҆ червїе наслѣдѧтъ и҆̀, и҆ дш҃а лꙋкава и҆зметсѧ·
Є҆млѧ́и ско́ро вѣрꙋ легокъ срд̑цемъ, и҆ съгрѣшаѧи въ дш҃ꙋ свою съгрѣшает̑·
Веселѧ́исѧ срд̑цемъ позна́нъ бꙋдетъ, и҆ ненавидѧи бесѣдꙋ ѹ҆малитъ зло́бꙋ.
словеси же нико́лиже не повтори, и҆ ничт̂оже не ѹ҆мали́тъ ти сѧ.
на́ дрꙋга и҆ на врага не повѣдаи, и҆ а́ще не бꙋдет̑ тебѣ грѣха не ѿкрыва́и·
Слыша б̂о ѹ҆ тебѐ и҆ соблюдет̑ т̂ѧ, и҆ въ вре́мѧ възненави́дитъ т̂ѧ·
Слы́ша л̂и слово да ѹ҆мретъ с тобо́ю, не ѹ҆бо́исѧ не расторгнетъ тебе.
ѿ лица словесе поболитъ бꙋ́и, ꙗ҆́ко ражда́ющїа ѿ ли́ца младен꙽ца.
стрѣла воньзена въ сте́гно пло́ти, такоже сло́во въ чревѣ бꙋѧ́го·
ѻ҆бличи дрꙋга е҆гда е҆ще нѣсть сътвори́лъ, и҆ е҆же а҆ще сътворилъ да не приложит̑ ктомꙋ̀·
ѻ҆бличи дрꙋга е҆гда когда не реклъ и҆ а́ще реклъ е҆ді́но да не повторит꙽.
ѻ҆бличи дрꙋга многажды б̂о быва́етъ и҆зволенїе, не всѧ́комꙋ словеси е҆мли вѣры·
Є҆сть поплъза́ѧисѧ и҆ не дш҃ꙋю, и҆ кт̂о не съгрѣши ꙗ҆зы́комъ свои҆мъ.
ѻ҆бличи и҆скренѧго свое҆го прежде запрѣщенїѧ, и҆ даждь мѣсто законꙋ вы́шнѧго·
Всѧка премꙋдрос̑҇ страх̑ гн҃ь, и҆ всѧкїѧ премꙋдрости сътворенїѧ закона.
и҆ нѣсть премꙋдрость и҆ хꙋдожъство лꙋкꙋвъства, и҆ нѣсть совѣтꙋ грѣшных̑ мꙋдрости е҆сть лꙋкавъство и҆ т̂о мерзость, и҆ е҆сть безꙋменъ ѹ҆малѧ́аисѧ премꙋдростїю·
Лꙋче е҆сть ѹ҆малѧ́ѧисѧ ра́зꙋмомъ пристрашенъ, нежели и҆ и҆збытъчествꙋѧи мꙋдростїю и҆ престꙋпа́ѧ законъ·
Є҆сть ковар꙽ство и҆спытно и҆ т̂о неправед̑но, и҆ е҆сть раз̑враща́ѧи блгд̑ть и҆звѣщати хотѧ̀ сꙋдъ·
Є҆сть лꙋкавъствꙋ́ѧи и҆ поникъ черното́ю, и҆ внꙋтренѣѧ е҆го и҆сполнь льсти, понича лицемъ и҆ раслꙋша́ѧ, и҆дѣже не позна́нъ бысть варитъ т̂ѧ·
И҆ а́ще не́мощїю крѣпость невъзбраненъ бꙋдетъ съгрѣшати, а҆ще ѻ҆брѧ́щетъ времѧ зл̂о сътворитъ.
ѿ зрака позна́нъ бꙋдет̑ мꙋжъ, и҆ срѣтенїемъ лица̀ познан̑҇ бꙋдетъ ѹ́мныи·
ѻ҆дѣа́нїе мꙋжа и҆ смѣхъ зꙋбовъ и҆ стопы̀ чл҃ка, возвѣститъ ꙗ҆же ѻ҆ немъ·
Є҆сть ѻ҆бличенїе е҆́же нѣсть красно, и҆ е҆сть молча́и и҆ то́и мꙋдръ·
Глв̑҇а, к҃·
Ко́ль добро̀ е҆сть ѻ҆бличити нежелѝ ꙗ҆ри́тисѧ, і҆ и҆сповѣдаѧисѧ ѿ ѹ҆маленїѧ возъбраненъ бꙋдет꙽·
Желанїе скопче растлит̑ л̂и дв҃ицꙋ, та́коже и҆ творѧ̀ нꙋжде́ю сꙋдъбы̀·
Се е҆сть молча́и ѻ҆брѣтаѧ премꙋдрость, и҆ е҆сть ненавидѧ́и мно́ги бесѣды·
Є҆сть молча не и҆́мать б̂о ѿвѣта, и҆ е҆сть молча вѣдыи времѧ·
Чл҃къ премꙋдръ ѹ҆молчитъ до времене, дръз же и҆ безꙋменъ превъсходит̑ времѧ.
ѹ҆множа́ѧ словеса мерзокъ бꙋдетъ, и҆ властелюѧи възненавидѣнъ бꙋдетъ·
Є҆сть бл҃гоѹ҆ханїе въ злыхъ мꙋжеви, и҆ е҆сть и҆зоѻ҆брѣтенїе на ѹ҆маленїе·
Є҆сть даа́нїе е҆же т̂и не бꙋдетъ на ползꙋ, и҆ е҆сть даа́нїе е҆гоже ѿдаа́нїе сꙋгꙋ́бо.
е҆сть ѹ҆маленїе славы ради, и҆ е҆сть е҆же ѿ смиренїѧ възнеслъ главꙋ.
е҆сть кꙋпꙋ́ѧи мно́го маломъ, и҆ възвраща́ѧи ѧ҆̀ сед̑мицею·
Премꙋдрыи словесы прелюбленна сътворитъ себѐ, блгд̑ти же безꙋмных̑ раздѣлѧ́ют̑сѧ·
даа́нїе безꙋмнаго не ползꙋет̑, ѻ҆́чи б̂о е҆го въ е҆ді́ного мѣсто мно́гы·
Мало въда́сть а҆ мно́го поно́ситъ, и҆ ѿвръзетъ ѹ҆ста̀ своѧ̀ ꙗ҆́ко проповд̑ѣник̑҇·
днесь въза́имъ дасть, а҆ ѹ́тро и҆стѧжетъ, ненави́дим̑ чл҃къ таковыи·
Бꙋ́и речет̑ нѣсть м̂и дрꙋга, и҆ нѣсть хвалы бл҃гомъ мои҆мъ·
Ꙗ҆́дꙋщеи хлѣбъ мои, льстивїѝ ꙗ҆зы́комъ.
коликощи и҆ е҆лицы посмѣю́тсѧ е҆мꙋ, паданїе золъ, съ тщанїемъ прїидетъ.
и҆ чл҃къ без꙽хваленъ ба́снь без̑временна, въ ѹ҆стх̑ѣ ненаказан꙽ных̑ прс̑҇но бꙋдетъ.
ѹ҆сты̀ бꙋѧ́го ѿвръзена бꙋ́дꙋтъ притча, не и҆́мать б̂о еѧ̀ рещи въ времѧ еѧ̀·
Є҆сть возъбранѧемыи съгрѣшити ѿ скꙋдости, и҆ въ поко́и свои не ѹ҆малит̑сѧ·
Є҆сть погꙋблѧ́ѧ дш҃ꙋ свою за стд̑ꙋ, и҆ ѿ лица безꙋмиа погꙋ́бит̑ ю҆̀.
е҆сть блгд̑ть стꙋда ѻ҆бѣща́ѧ сїѧ дрꙋгови, и҆ приѻ҆брѣте е҆го врага тꙋне·
Порокъ золъ чл҃кꙋ лжа, и҆ въ ѹ҆стѣхъ ненаказаныхъ прс̑҇но бꙋдет̑·
Ѹ҆не е҆сть тать неже л̂и прс̑҇но лже, ѻ҆́ба же пагꙋбꙋ наслѣдѧтъ.
въ ѻ҆бычаѝ чл҃кꙋ лжа̀ безъчестїе, и҆ стꙋдъ е҆го прс̑҇но с нимъ·
Премꙋ́дрыи словесы и҆зведетъ себѐ, и҆ чл҃къ мꙋдрыи ѹ҆годен̑҇ е҆сть вельмо́жамъ.
дѣлаѧ зе́млю възнесет̑ сто́гъ свои, и҆ ѹ҆гажда́ѧи вельмо́жамъ ѻ҆цыстит̑ неправдꙋ·
Мзда̀ и҆ да́рове ѻ҆слѣпѧт̑ ѻ҆́чи премꙋдрыхъ, и҆ ꙗ҆́коже бразды на ѹ҆стѣх꙽ ѿвратитъ ѻ҆блеченїѧ·
Премꙋдрость съкровена, и҆ съкровище не ꙗ҆влено, ка́ѧ полза е҆сть ѿ ѻ҆́бою е҆го.
лꙋ́че чл҃къ съкрыва́ѧи бꙋ́иство свое, неже л̂и чл҃къ съкрыва́ѧи премꙋдрость свою·
Глв̑҇а, к҃а·
Чадо съгрѣшилъ л̂и е҆си не приложи ктомꙋ, и҆ ѻ҆ пред̑них̑ ти помолисѧ.
ꙗ҆́кож̑ ѿ лица̀ змїи҆на бѣжѝ ѿ грѣха, а҆ще б̂о пристꙋпиши ѹгрызнет̑ т̂ѧ.
зꙋбы лвови зꙋ́бы е҆го, ѹ҆бива́ютъ дш҃и чл҃чи, ꙗ҆́ко мечъ ѻ҆бою́дꙋ ѻ҆́стръ всѧко безако́нїе, ра́нѣ е҆го нѣсть и҆сцѣленїѧ·
Прещенїе и҆ досажденїе ѻ҆пꙋстѣ́ютъ богатьство, та́ко и҆ до́мъ гръдыхъ запꙋстѣе҆тъ·
Моленїе ни́щаго и҆з꙽ ѹ҆стъ до ѹ҆шїю е҆го, и҆ сꙋдъ е҆го съ тща́нїемъ грѧдетъ·
Ненавидѧ́и ѻбличенїѧ въслѣдъ грѣшника, и҆ боѧ́исѧ г҃а ѻ҆братит꙽сѧ срд̑цемъ·
Позна́нъ е҆сть и҆здалеча силныи ꙗ҆зыкомъ, а҆ разꙋмивыи вѣсть в чем꙽ сѧ ползꙋетъ·
Соѕида́ѧи хлѣвинꙋ е҆го чюжимъ и҆мѣнїемъ, ꙗ҆коже събира́ѧи ка́менїе зимѣ·
И҆згрѣби събраны съборъ безаконникъ, и҆ кончина и҆хъ пла́мень ѻ҆́гненъ·
Пꙋть грѣшникъ непотребенъ ѿ ка́менїѧ, и҆ напослѣдокъ е҆го ро́въ а҆́довъ·
Съхранѧ́ѧ зако́нъ ѹ҆дръжитъ помышленїе своѐ, и҆ съвръшенїе страха гн҃ѧ премꙋдрость.
ненаказан̑҇ бꙋдет̑ и҆же не е҆сть коварен꙽, е҆сть коварство ѹ҆множа́и го́рести·
Ра́зꙋмъ премꙋдраго ꙗ҆́ко потопъ ѹ҆мно́житсѧ, и҆ совѣтъ е҆го ꙗ҆́ко и҆сточникъ живота̀·
Ѹ҆троба бꙋ́ѧго ꙗ҆ко сосꙋдъ съкрꙋшенъ, и҆ всѧкаго ра́зꙋма не ѹ҆дръжитъ·
Слово премꙋдро а҆ще ѹ҆слы́шитъ разꙋмныи въсхва́литъ и҆̀, и҆ к꙽ себѣ приложит̑ е҆̀·
Ѹ҆слы́ша бꙋаѧ́исѧ и҆ не годѣ е҆мꙋ быс̑҇ и ѻ҆брати е҆̀ за плещи своѝ·
По́вѣсть бꙋѧ́го ꙗ҆́ко бремѧ на пꙋтѝ, на ѹ҆стнахъ же разꙋмныхъ ѻ҆брѧ́щетъсѧ блгд̑ть·
Ѹ҆ста премꙋдраго похва́лена быва́ютъ въ цр҃кви, и҆ словеса е҆го размышлена бꙋдт̑ꙋ въ срд̑цы·
Ꙗ҆́коже до́мъ разорен̑҇ та́коже бꙋѧ́го премꙋдрость и҆ ра́зꙋмъ, неразꙋмных̑ неи҆спытны гл҃ы.
пꙋта на нога́хъ неразꙋмѣ́ющихъ наказа́нїѧ, и҆ ꙗко рꙋчныѝ ѻ҆ко́вы на рꙋцѣ де́снои·
Бꙋ́и въ смѣхꙋ възнесе глас̑҇ свои, мж̑ꙋ же хꙋдогъ е҆два̀ ма́ло ѻ҆с꙽клабитсѧ·
Ꙗ҆́коже мани́сто зла́то мꙋдромꙋ наказа́ніе, и҆ ꙗ҆́коже ѻ҆брꙋчъ на де́снѣи мы́шци е҆го·
Нога̀ бꙋ́ѧго ско́ра въ хлѣвинꙋ, чл҃къ б̂о мно́гои҆скꙋ́сныи ѹ҆срами́тсѧ ѿ лица̀.
безꙋмныи двер̑҇ми приничет̑ въ хлѣвинꙋ̀, мꙋжъ же наказа́нъ вн̂ѣ ста́нетъ·
Ненаказа́нїе б̂о чл҃кꙋ при дверех̑ послꙋ́шати, мꙋдрыи же ѻ҆жесточитсѧ ради нечестїа.
ѹ҆стнѣ же чюж́да сихъ ради възвеселѧтсѧ, словеса же мꙋ́дрыхъ в꙽ мирилѣхъ ста́нꙋтъ·
Въ ѹ҆стх̑ѣ бꙋ́ихъ срд̑ца их̑, ѹ҆ста же премꙋдрых̑ наказана сꙋть·
Кленꙋщ́ꙋ нечести́вомꙋ сатонꙋ, са́мъ кленетъ свою̀ дш҃ꙋ·
Сквернитъ же свою̀ дш҃ꙋ шепти́выи, и҆ въ жилищи възненави́дѣнъ бꙋдетъ·
Глв̑҇а, к҃в·
Ка́мени нечи́стомꙋ точенъ е҆сть лѣни́выи, и҆ всѧ́къ подвижа́ѧи е҆го ѿтрѧсе́тъ рꙋ́кꙋ свою·
Стꙋ́дъ ѿц҃ꙋ ненаказа́нъ сн҃ъ, дщи же на ѹ҆моле́нїе е҆мꙋ бꙋдетъ·
дщи же мꙋдра почте́тъ ѿц҃а свое҆го, а҆ не срамлѧ́ющисѧ печа́ль ѿц҃ꙋ.
ѿц҃а и҆ мꙋжа посрами́тъ дръзаѧ, и҆ ѿ ѻбо́ю беще́стїе прїиметъ·
Ꙗ҆́ко мꙋсике́иска печа́ль, без꙽вре́менна повѣсть.
ра́ны и҆ наказа́нїе въ всѧ́ко вре́мѧ премꙋдрости, ꙗ҆́ко сълѣплѧ́ѧ чре́пїе.
ꙗ҆́ко ѹ҆ча́и бꙋѧ́го, та́ко възбꙋжд̑а́ѧи спѧ́ща ѿ тѧ́жка сна.
повѣда́ѧи дрѣмлющꙋ, повѣда́етъ бꙋ́ю, и҆ на концы рече́тъ чт̂о е҆сть·
Над̑ мр҃твыми пла́чисѧ и҆ще́зе б̂о свт̑ѣ, и҆ бꙋѧго плачисѧ и҆з꙽чезе б̂о ра́зꙋмъ.
слад̑ко е҆сть пла́катисѧ мр҃твьца, ꙗ҆́ко почи́лъ е҆сть.
бꙋѧ́го же лꙋче смр҃ть неже живо́тъ зо́лъ·
Сѣтова́нїе мр҃твъца, з҃, дн҃їи, бꙋѧ́го же и҆ нечести́ваго всѧ̀ дн҃и живота̀ е҆го.
съ безꙋмными не мно́жи слове́съ, и҆ къ неразꙋмивꙋ не ходи·
Храни́сѧ ѿ него да не трꙋда прїимеши, и҆ не ѻ҆скверни́шисѧ въ стѧжа́нїи е҆го.
ѹ҆клони́сѧ ѿ него и҆ ѻ҆брѧ́щеши поко́и, и҆ не ѹ҆ны́еши безꙋмїемъ е҆го·
Па́че ѻ҆́лова чт̂о ѻ҆тѧжчи́тсѧ, н̂о и҆мѧ е҆мꙋ чт̂о е҆сть то́кмо бꙋ́и·
Пѣсо́къ и҆ сол̑҇ и҆ рꙋдꙋ желѣза ле́гко е҆сть понести, паче чл҃ка неразꙋми́ва·
Съключе́нїе древѧ́но на ѹ҆тверже́нїе храми́ны да не расто́ргнетсѧ, та́коже и҆ срд̑це ѹ҆тверже́но на размышле́нїе совѣта въ врѣмѧ не ѹ҆страшитсѧ·
срд̑це ѻ҆снова́но на совѣсти ра́зꙋма ꙗ҆́ко сълѣпле́нїе песо́чно тесаныѧ стѣ́ны·
Ꙗ҆́ко дроблїе ка́менїе на высо́цѣ лежа́щее проти́вꙋ вѣтрꙋ не стерпи́тъ, та́коже срд̑це страши́во въ размышле́нїи бꙋѧ́го прѧ́мо всѧ́комꙋ стра́хꙋ не стерпитъ·
Ѹ҆то́ксѧ въ ѻ҆́ко и҆ точитъ сле́зы, и ѹ҆то́ксѧ въ срд̑це и҆сто́читъ чюв꙽ство·
Вергаѧи камы на пти́цы разлꙋчитъ ѧ҆̀, і҆ и́же поно́ситъ дрꙋ́гꙋ разори́тъ држ̑ꙋбꙋ·
На дрꙋ́га а҆ще и҆звлече́ши ме́чь, не надѣ́исѧ е҆сть б̂о ме́сть ѿ него·
на дрꙋга а҆ще ѿверзе́ши ѹ҆ста не бо́исѧ, стыди́сѧ е҆сть б̂о и҆змѣне́нїе.
нѣсть добра ѿ мꙋ́жа лꙋка́ва, развѣ поноше́нїѧ и҆ горды́нѧ, и҆ ѿкрове́нїе та́ины, и҆ ꙗ҆́звы ле́стны, сихъ ѿбѣжит̑ всѧ́къ дрꙋ́гъ·
Вѣ́рꙋ стѧжи в нищетѣ съ и҆́скренимъ бꙋди, да въ бл҃гих̑ е҆го вкꙋ́пѣ възвесели́шисѧ·
И҆ въ времѧ ско́рби пребыва́и с ни́мъ, да въ наслѣдїе е҆го наслѣди́ши·
Прьвѣе ѻ҆гнѧ и҆ ды́ма пе́щнаго па́ра, та́ко первѣе кро́ве клевета·
дрꙋга застꙋпа́ти не срамѣ́исѧ, и҆ ѿ лица е҆го не съкрыва́исѧ, а҆ще т̂и ключит̑сѧ и҆ ѕл̂о е҆го ради·
всѧ́къ слы́шаѧи съхранитъ ѧ҆̀·
Кт̂о да́сть м̂и въ ѹ҆стѣхъ мои҆хъ храни́лище, и҆ на ѹ҆стѣхъ мои҆хъ печа́тъ кова да не падꙋсѧ ѿ неѧ, и҆ ꙗ҆зы́къ мои да не погꙋбитъ м̂ѧ·
Глв̑҇а, к҃г·
Ги҃ ѿч҃е и҆ влд̑ко живота мое҆го, не ѻ҆ста́ви мене въ совѣтѣ и҆хъ, и҆ не да́ждь ми впа́стисѧ в нѧ̀·
Кт̂о възло́житъ на промышле́нїе мое ра́ны, и҆ на срд̑це мое наказа́нїе премꙋдрости.
да ѻ҆ неразꙋмѣ́нїи мое҆мъ не пощадѧ́тсѧ, и҆ да не ꙗ҆вѧ́тсѧ грѣси и҆хъ·
Ꙗ҆́ко да не ѹ҆мно́жатсѧ невѣдѣ́нїѧ моѧ, и҆ грѣси мои премно́ѕи да не бꙋ́дꙋтъ.
и҆ падꙋсѧ пред̑ сꙋпоста́ты, и҆ порадꙋетъ ми сѧ вра́гъ мои·
Ги҃ ѿч҃е и҆ б҃е живота мое҆го, не да́жд̑ь похотѣ́нїѧ ѻ҆чи́ма мои҆ма, и҆ въжделѣнїе ѿврати ѿ мене.
чре́вꙋѹ҆го́дїѧ и҆ сладосꙋщїѧ да не ѻ҆бы́имꙋтъ м̂ѧ, и҆ бестꙋ́днѣи дш҃и не преда́жд̑ь мене·
Послꙋшаите ча́да, хранѧ́и бо сѧ не поги́бнетъ.
ѹ҆стнама свои҆ма порꙋга́нъ бꙋ́детъ грѣшникъ и҆ клеве́тникъ, и҆ го́рдїи съблазнѧ́тсѧ ѻ҆ нѧ·
въ заклина́нїе не прилага́и ѹ҆́стъ свои҆хъ, и҆ не клени́сѧ и҆менемъ ст҃ымъ·
Ꙗ҆́коже б̂о ра́бъ пыта́емъ прс̑҇но ѿ ра́нъ не ѹ҆мали́тсѧ, та́коже заклина́ѧисѧ и҆менемъ ст҃ымъ ѿ грѣха не ѻ҆чиститсѧ·
Мꙋжъ кленыисѧ мно́га и҆спо́лнитсѧ безако́нїѧ, и҆ не ѿи҆мет̑сѧ ѿ домꙋ е҆го ра́на·
а҆ще съгрѣшит̑ грѣхъ е҆го на не́мъ.
и҆ а́ще презритъ сꙋгꙋбо съгрѣшитъ, и҆ а́ще въ тще клѧ́сѧ не ѻ҆правди́тсѧ.
и҆спо́лнит̑сѧ до́мъ е҆го нанесе́нїи.
е҆сть бесѣда ѻ҆бличе́на смр҃тїю, да не ѻ҆брѧ́щет̑сѧ в наслѣ́дїи і҆а́ковли.
ѿ бл҃говѣрных̑ б̂о вс̂е с̂е ѿстꙋпитъ, и҆ въ грѣхи не въпадꙋтсѧ.
в ненаказа́нїи неѻ҆бличнѣ не наста́ви ѹ҆́стъ свои҆хъ, е҆сть б̂о в немъ мы́сль грѣха.
помѧни ѿц҃а свое҆го и҆ мт҃рь свою, посрѣди б̂о вельмо́жъ сѣди́ши·
е҆гда ка́ко забꙋдешисѧ пред̑ ни́ми, и҆ ѻ҆бы́чаемъ своим̑ ѻ҆бꙋѧ́еши.
и҆ похо́щеши ꙗ҆́ко а҆ще не бы сѧ роди́лъ, и҆ дн҃ь рожде́нїѧ твое҆го не проклина́и.
чл҃къ ѻ҆быча́ѧсѧ словесы поноше́нїѧ, въ всѣхъ дн҃ехъ не и҆́мать наказа́нъ бы́ти.
дв̂а ви́ды ѹ҆мно́жаютъ грѣхи, и҆ тре́тїи наво́дитъ гнѣ́въ·
дш҃а те́пла ꙗ҆́ко ѻ҆́гнь горѧ̀, не ѹ҆га́снетъ до́ндеже и҆сты́нетъ·
Чл҃къ блꙋ́денъ тѣ́лом̑ пло́ти свое҆ѧ, не преста́нетъ до́н꙽деже въж꙽жетъ ѻ҆́гнь·
Чл҃кꙋ блд̑ꙋнꙋ всѧкъ хлѣбъ сладокъ, не преста́нет̑ дондеже ѹ҆́мретъ·
Чл҃къ слазѧ́и съ ѻ҆́дра свое҆го, гл҃ѧ дш҃и свое́и, кт̂о м̂ѧ ви́дитъ.
тма̀ ѻ҆́крс̑҇тъ мене, и҆ стѣны застꙋпѧт̑ м̂ѧ.
и҆ никтож̑ м̂ѧ ви́дитъ, чт̂о страшꙋсѧ, грх̑ѣ мои҆хъ не въспомѧнетъ вышнїи·
и҆ ѻ́чи чл҃честїи страхъ е҆го.
и҆ не разꙋмѣ ꙗ҆́ко ѻ҆́чи гн҃и тма́ми свѣтлѣиши слн҃ца е҆ста̀·
прозира́ющи вс̂ѧ пꙋти чл҃чески, и҆ сматрѧ́ющи въ та́иныхъ мѣстехъ.
преже да́же не созда́но бꙋдет꙽, вс̂е ѹ҆вѣдѣно е҆мꙋ такоже и҆ по скончанїи сеи на пꙋтехъ града м꙽щенъ бꙋ́детъ, и҆дѣже не сꙋмнѣсѧ ꙗ҆́тъ бꙋдет̑.
та́коже и҆ жена̀ ѻ҆ста́вльшїа мꙋжа, и҆ прилѣплѧ́ющисѧ къ и҆́номꙋ·
Пр́ьвое ѹ҆бо ѿ закона вышнѧго ѿстꙋпи.
и҆ второе мꙋж́ꙋ свое҆мꙋ съгрѣши.
и҆ третее блꙋдом꙽ прелюбодѣ́иства, ѿ чюждаго мꙋжа чада сътвори.
да пред̑ соборъ сїѧ и҆зведена бꙋдетъ, и҆ на чадехъ еѧ̀ посещенїе бꙋдетъ.
не ѹ҆коренѧтсѧ чада еѧ̀ въ коронь, и҆ вѣтви еѧ̀ не сътворѧтъ пло́да.
и҆ на клѧтвꙋ ѻ҆ста́вит̑ памѧть свою, и҆ поношенїе еѧ̀ не потребитсѧ.
и҆ ѹ҆разꙋмѣ́ютъ ѻ҆ста́вльшеи, ꙗ҆́ко ничтоже лꙋче страха гн҃ѧ, и҆ ничтоже слаждьшеи то́кмо внимати за́повѣдемъ гн҃имъ·
Глв̑҇а, к҃д·
Премꙋдрость похва́литъ дш҃ꙋ свою, и҆ посредѣ людїи своих̑ въсхвалитсѧ·
въ цр҃кви вы́шнѧго ѿвръзетъ ѹ҆ста̀ своѧ, и҆ прѧ́мо си́лѣ е҆го въсхва́литсѧ.
а҆зъ и҆зъ ѹ҆стъ вы́шнѧго и҆зыдохъ, и҆ ꙗ҆ко м꙽гла покрых̑ зе́млю·
А҆зъ на высокихъ вселих̑сѧ и҆ прс̑҇тлъ мо́и въ столпѣ ѻ҆́блачнѣ·
Крꙋгъ нбс̑҇ныи ѻ҆быдохъ е҆ді́на, и҆ въ глꙋбинѣ бездны походих̑, въ волнѣ мо́рьстеи и҆ въ всеи земли.
и҆ въ всх̑ѣ лю́дехъ и҆ ꙗ҆зы́цѣ стѧжа́хсѧ, съ всѣми сими поко́ѧ и҆скахъ, и въ наслѣдїи нѣкое҆го въдворюсѧ·
Тогда̀ заповѣ́да ми създа́тель всѣхъ, и҆ создавыи м̂ѧ препокои скѷнїю мою, и҆ рече м̂и.
въ і҆а́кове вселисѧ, и҆ въ і҆и҆л҃и наслѣдъствꙋи.
прежде вѣка и҆сперва созда м̂ѧ, и҆ до вѣка не ѻ҆скꙋдѣю·
въ ст҃ѣи скѷнїи пред̑ нимъ послꙋжихъ.
и҆ та́ко в сїѻнѣ ѹ҆твердих̑сѧ, и въ градѣ възлю́бленѣ такоже мѧ препокоѝ, и҆ въ і҆ерс̑҇лимѣ влас̑҇ моа̀.
и ѹ҆коренихсѧ въ лю́дехъ пресла́вных̑, и҆ въ части гн҃и наслѣдїѧ е҆го·
ꙗ҆́ко кедръ възнесохсѧ в ливанѣ, и҆ ꙗ҆́ко кѷпарисъ на горахъ а́е҆рмоньскихъ·
и҆ ꙗ҆ко фѷниѯъ възвысихъсѧ и҆же на приморїи, и ꙗ҆́ко сад̑ шипковъ въ е҆рихонѣ·
и҆ ꙗ҆́ко маслина бл҃голѣпна на́ поли, и҆ възнесох̑сѧ ꙗ҆ко лѣторасль.
и҆ ꙗ҆ко корица, ꙗ҆ко и҆спалтъ а҆ромат да́хъ во́ню, и҆ ꙗ҆́ко змѷрна и҆збранна дахъ бл҃гоѹ҆ханїе.
и҆ ꙗ҆́ко халвани и҆ ноготы, и҆ стакти, ꙗ҆́ко ливаново кꙋренїе въ скѷнїи·
а҆зъ ꙗ҆́ко дꙋбъ распрострх̑ѣ вѣтвїѧ моа̀, и҆ вѣтвиж̑ моѧ вѣтви сла́вы блгд̑ти.
а҆зъ ꙗ҆́ко виноградъ прорастихъ блгд̑ть, и҆ цвѣтъ мо́и плод̑ славы и҆ богат̑ства·
Пристꙋпите къ мнѣ вожделѣю́щїи мене, и҆ ѿ житъ мои҆хъ насытитесѧ·
памѧть б̂о моѧ слаждьши паче меда, и҆ наслѣдїе мое паче сота мед̑вена·
ꙗ҆́дꙋщеи м̂ѧ е҆ще возалчют̑ и҆ пїющеи м̂ѧ е҆щѐ въжаждт̑ꙋсѧ.
слꙋша́ѧи мене не посрамитсѧ, и҆ дѣлаю҆ще ѹ҆ мене не съгрѣшат꙽.
сїѧ всѧ̀ кни́га завѣта б҃а вышнѧго.
закон̑҇ е҆гоже заповѣ́да моѷсїи, наслѣдїѧ събора і҆а́ковлѧ.
насыщаѧ ꙗ҆́ко фисон̑҇ премꙋдрости, и҆ ꙗ҆́ко ти́гръ въ дн҃ь красы.
и҆сполнѧ́ѧи ꙗ҆́ко е҆фратъ разꙋма, и҆ ꙗ҆́коже і҆ѻ҆рданъ въ дн҃и жа́твы·
ꙗ҆́вивыи ꙗ҆ко свѣтъ наказа́нїе, и҆ ꙗ҆́коже гїѻнъ въ дн҃и и҆ма́нїѧ вина·
Не сконча первыи проразꙋмѣти еѧ̀, такоже и҆ послѣднїи не и҆слѣди еѧ̀·
ѿ морѧ б̂о ѹ҆множисѧ раз̑мышленїѧ еѧ̀, и҆ совѣтъ еѧ̀ ѿ велїѧ бездны·
И҆ а́зъ ꙗ҆́ко раскопанїе ѿ рѣки, и҆ ꙗ҆́ко во́дꙋ лїѧ́и и҆зыдох̑ в ра́и.
рѣхъ напою себѣ врьтоград̑, и҆ ѹ҆пою себѣ лѣхꙋ.
и҆ с̂е раскопанїе м̂и бысть рѣкою, и҆ рѣка моѧ быс̑҇ м̂и мо́рем̑·
Є҆ще наказа́нїем̑ ꙗ҆́ко ѹ҆тренюю просвѣщꙋ и҆ проꙗ҆влю ѧ҆̀ до далечѧ·
Є҆ще ѹ҆ченїе ꙗ҆́ко про̑҇рчьство и҆злѣю, и҆ ѻ҆ставлю е҆̀ в роды вѣчны·
Види́те ꙗ҆́ко не себѣ е҆ді́номꙋ трꙋдихсѧ, н̂о и҆ всѣмъ и҆скꙋщимъ еѧ̀·
Глв̑҇а, к҃е·
Треми ѹ҆красихсѧ, и҆ стахъ красна пред̑ гм҃ъ и҆ чл҃кы.
съвокꙋпленїемъ братїи, и҆ любовїю и҆скренихъ·
и҆ мꙋжъ и҆ жена сами себѣ̀ съе҆ді́нени·
Три же виды возненавидѣ дш҃а моѧ, и҆ ѕѣло м̂и ѻ҆мер̑҇зѣ живот̑ их̑.
ѹ҆бога горда, богата л꙽жива, и҆ стара преблꙋдодѣ́ѧ ѹ҆малѧ́ющагосѧ ѹ҆мом̑.
е҆гоже въ ю́ности не събра́лъ е҆си, т̂о како мо́жеши ѻ҆брѣсти въ ста́рости свое́и.
коль е҆сть кра́сенъ сѣдинамъ сꙋдъ, и҆ старцем̑ разꙋмѣти совт̑ѣ·
Прославленым̑ съразꙋмѣнїе и҆ совт̑ѣ.
вѣнецъ старцемъ много различно и҆скꙋство, и҆ похваленїе их̑ страх̑ гн҃ь·
девѧть помышленїи бл҃женыхъ въ срд̑цы мое҆мъ, а҆ десѧтое и҆зрекꙋ ꙗ҆́зы́комъ·
Чл҃къ веселѧ́исѧ ѻ҆ чадехъ живѧи, и҆ зрѧ̀ нападанїѧ врагъ·
Бл҃женъ и҆же живетъ съ женою разꙋмною.
і҆ и҆же ꙗ҆зы́комъ свои҆мъ не поплъзнесѧ.
і҆ и҆же не работа достойномꙋ себѣ·
бл҃женъ и҆же ѻ҆брѣте мꙋдрость.
и҆ пода́ѧ въ ѹ҆́ши послꙋша́ющих̑.
ꙗ҆́ко великъ и҆же мꙋдрость ѻ҆брѣте, н̂о нѣсть паче боа́щагосѧ г҃а.
страхъ гн҃ь паче всего преспѣ, и҆ дръжа́и е҆го комꙋ ѹ҆подобитсѧ·
Всѧкꙋ ꙗ҆́звꙋ и не ꙗ҆́звꙋ срд̑чнꙋю.
и҆ всѧ́кого лꙋкав꙽ства и҆ не лꙋкав꙽ства же́ньскаго.
и҆ всѧкого нанесенїѧ и҆ не нанесенїѧ ненави́дѧщихъ, и҆ всѧкого мщенїѧ и҆ не мщенїѧ вра́гъ·
Нѣсть главы̀ паче главы̀ змїины , и нѣсть ꙗ҆́рости паче ꙗ҆́рости вра́жїѧ·
Жити лꙋче со львомъ и҆ змїем̑ нежели съ женою лꙋкавою.
лꙋкав̑҇ство жены̀ и҆змѣнѧ́етъ зра́къ еѧ̀, и ѻ҆мрачитъ лице своѐ ꙗ҆́ко мед̑ведица средъ
и҆скренихъ свои҆хъ.
възлѧжет̑ мꙋжъ еѧ̀, и҆ слы́шавъ въздохнетъ го́рко·
Мала е҆сть всѧка злоба противꙋ зло́бѣ же́ньстеи, жребїи грѣшника спаде на ню̀·
Въсхожденїе пѣска под̑ ногама старчема, та́ко жена̀ ꙗ҆зы́чна мꙋжꙋ молчаливꙋ·
Не сматрѧ́и на красотꙋ женьскꙋ, и҆ женѣ в добротѣ не въсхощѝ.
гнѣвъ и҆ бестꙋдїе и҆ срамота велика·
а҆ще жена приѻ҆брѣта́емъ мꙋжꙋ свое҆мꙋ.
срд̑це смирено и҆ лице сѣтова́но, и҆ ꙗ҆́зва срд̑чна, жена̀ лꙋкава·
Рꙋцѣ не́мощнїи и҆ колѣни ѻ҆слабленїи, и҆ жена̀ и҆же не бл҃жит̑ мꙋж́а свое҆го·
ѿ жены̀ нача́токъ грѣха, и тою̀ ѹ҆мираем̑ вс̂и.
не дажд̑ь водѣ̀ прохода, н̂и женѣ лꙋкавѣ дръзновенїа.
а҆ще не походит̑ подъ рꙋкою т̂и, ѿсѣци ю҆̀ ѿ плоти твое́ѧ·
Глв̑҇а, к҃ѕ·
Жены̀ добры бл҃женъ е҆сть мж̑ꙋ и҆ число дн҃їи е҆го сꙋгꙋбо.
жена̀ до́блѧ веселитъ мꙋж́а свое҆го, и҆ лѣта е҆го и҆сполнит̑ ми́ромъ.
жена̀ до́бра ча́сть бл҃га, въ части боа́щисѧ г҃а да́на бꙋдетъ·
Богатаго же и҆ ѹ҆бога́го срд̑це бл҃го, въ всѧко времѧ лице ти́хо·
ѿ трехъ же ѹ҆говѣ срд̑це мое , и҆ ѿ лица четвертаго ѹ҆боа́хсѧ, преданїѧ града
, и҆ съборъ наро́да, и҆ ѻ҆бол꙽ганїѧ смерътна вс̂е
вътъще·
Вредъ же срд̑ца и҆ сѣтованїе жена̀ ревнива.
жены ради ревнивы ра́на ꙗ҆зы́чна всѣмъ ѻ҆бща́ющисѧ.
волꙋе и҆́го движимо, жена̀ лꙋкавна.
дръжа́исѧ еѧ̀, ꙗ҆́ко е҆млѧ́исѧ скорпїа·
Гнв̑҇ѣ великъ жена пїѧнива, и҆ стꙋда еѧ̀ не и҆́мать покрыти·
Блꙋдъ женьскь помиза́нїе ѻ҆чима, и҆ бровма еѧ̀ позна́нъ бꙋдет꙽·
Ѡ҆ дщери бестд̑ꙋнѣ ѹ҆тверди стражд̑ꙋ, да не попꙋщенїе ѹ҆бо ѻ҆брѣтъши погꙋбитсѧ·
Въслѣдъ бестꙋдна ѻ҆́ка съхрани́сѧ, и҆ не дивисѧ а҆ще въ т̂ѧ съгрѣшит̑·
Ꙗ҆́ко жажденъ пꙋтникъ ѿвръзетъ ѹ҆ста̀ своа, и҆ ѿ всѧкоѧ во́ды ближ꙽нѣѧ и҆спїет꙽.
и҆ прѧмо всѧкого кола̀ сѧ́детъ, и҆ прѧмо стрѣлѣ ѿкрыет̑ тꙋлъ·
Блгд̑ть женьска възвеселит̑ мꙋжа е҆ѧ, и҆ кости е҆го възвеселитъ хꙋдожество еѧ̀·
даѧ́нїе гн҃е жена̀ молчалива, и҆ нѣсть и҆скꙋпа показанныѧ дш҃а·
Блгд̑ть на блгд̑ти жена̀ стꙋдлива, и҆ нѣсть досто́ина всѧка мѣра ѹ҆дръжаныѧ дш҃а·
Слн҃це въсходѧ на высоких̑ гн҃ихъ, и҆ доброта жены̀ до́брыѧ въ красотѣ до́мꙋ еѧ̀·
Свѣтилникъ сїѧѧ̀ на свѣщницѣ ст҃ѣ, и҆ доброта лица на возрастѣ стоа́щаго·
Столпи злати на под̑столпи и҆хъ сребреных̑, и҆ но́ѕѣ красни на плеснахъ добрѣ стоѧ́щи·
Ѡ҆ дво́емъ печално м̂и бы́сть срд̑це мое, и҆ на третїемъ ꙗ҆́рость м̂и наи҆́де·
Мꙋжъ боре́цъ лиша́ѧсѧ за скꙋдотꙋ, и҆ мꙋжи разꙋмиви а҆ще ѻ҆треблени бꙋдт̑ꙋ, възвращаѧсѧ ѿ правды на грх̑ѣ, г҃ь ѹ҆готови е҆го на меч̑҇ е҆два и҆змет̑сѧ кꙋпецъ ѿ согрѣшенїа·
Глв̑҇а, к҃з·
Не ѻ҆правди́тсѧ корчемникъ ѿ грѣх꙽, за несытость мно́ѕи съгрѣшиша, хотѧи ѹ҆мно́жити ѿвратит̑ ѻ҆́чи·
Посредѣ собрана ка́менїѧ во́нзетсѧ колъ, и҆ посредѣ продаѧнїѧ и҆ кꙋплѧ съвръша́етсѧ грѣх꙽·
А҆ще не дръжи́тсѧ страха гн҃ѧ, съ тща́нїемъ въско́рѣ развратит̑сѧ до́мъ е҆го·
Трѧсенїемъ решета̀ ѻ҆ста́нꙋтъ смети, тако же ѻ҆треби чл҃ческїѧ въ помышленїи е҆го·
Сосꙋды скꙋделнича и҆скꙋша́етъ пещъ, і҆ и҆скꙋшенїе чл҃кеско въ помышле́нїи е҆го·
Въздѣланое древо ꙗ҆влѧ́етъ плод̑ е҆го, такоже сло́во помышленїѧ срд̑це чл҃чьско·
Прежд̑е помышленїа не похвали мꙋжа, се б̂о и҆скꙋшенїе чл҃чьско·
А҆ще го́ниши пра́вдꙋ постигнеши, и҆ ѻ҆блечешисѧ в н̂ю ꙗ҆ко в подиръ сла́вы·
Птицы с подобными себѣ ѻ҆бита́ютъ, і҆ и́стинна къ творѧ́щимъ ю҆̀ ѻ҆братитсѧ.
левъ ло́витъ ловъ, та́коже и҆ грѣси дѣла́ющихъ неправдꙋ·
По́вѣсть бл҃говѣрнаго въи҆́стиннꙋ премꙋдрость, а҆ безꙋменъ ꙗ҆́ко лꙋна и҆змѣнѧ́етсѧ·
Посредѣ безꙋмных̑ съблюди времѧ, и посредѣ разъмышлѧ́ющихъ ѹ҆частисѧ·
По́вѣсти бꙋ́ихъ мерзость и҆ смѣхъ и҆хъ пита́нїе грѣха.
бесѣда много клѧтвенаго, и҆спра́витъ вла́сы, и҆ сваръ е҆го зат̑ченїе ѹ҆шима·
Пролитїе кро́ве сва́ръ гордыхъ, и҆ клеветанїе и҆хъ послꙋша́нїе сꙋе́тно·
ѿкрыва́ѧи та́инꙋ погꙋблѧет̑ вѣрꙋ, и҆ не и́мать ѻ҆брѣсти дрꙋга противꙋ дш҃и свое́и·
Прїими дрꙋга и҆ ѹ҆вѣрисѧ с ни́м꙽, а҆ще л̂и ѿкры́еши та́ины е҆го не и́маши гнати по нем̑·
Ꙗ҆́коже погꙋбит̑ чл҃къ всѧ́каго врага свое҆го, та́ко и҆же погꙋби дрꙋжбꙋ и҆скренѧг̑҇·
Ꙗ҆́коже птицꙋ и҆з рꙋки и҆спꙋстиши, та́коже и҆спꙋстилъ е҆си и҆скренѧго и҆ не ѹ҆лови́ши е҆го.
не жени е҆го ꙗ҆́ко далече ѿстꙋпи, і҆ и҆збѣже ꙗ҆́ко серна ѿ сѣти·
Ꙗ҆́ко е҆сть стрꙋпъ ѻ҆бѧзати, и҆ ѿ клеветы е҆сть и҆зменитисѧ, а҆ ѿкрывъ та́инꙋ не ча́етсѧ.
помиза́ѧ ѻ҆́комъ кꙋе҆тъ зл̂о, и҆ никтоже е҆го ѻ҆ста́вит̑ ѿ е҆го·
Прѧ́мо ѻ҆чи́ма твои́ма насладитъ ѹ҆ста своѧ, и҆ словесемъ твоим̑ подивит̑сѧ·
Послѣди же развратит̑ ѹ҆ста своѧ̀, и въ словесехъ твоих̑ дасть соблазнъ·
Мно́го възненави́дѣхъ и҆ не ѻ҆брѣтох̑ подобна е҆мꙋ, и҆ г҃ь ненави́дит̑ е҆го·
Ве́ргыи ка́мы на высотꙋ на главꙋ̀ свою̀ вержетъ, и ꙗ҆́зва льстива раздѣлит̑ стрꙋпы·
И҆скопава́ѧи ро́въ впадет̑сѧ во́нь, и҆ по́лѧ ча́ѧи сѣть ѹ҆вѧзнет̑ в не́и.
творѧ́и зл̂о въва́литсѧ в нѐ, и҆ не разꙋмѣетъ ѿкꙋдꙋ е҆мꙋ прїидетъ·
поношенїе и҆ порꙋга́нїе гордымъ и҆ м꙽щенїе, ꙗ҆́ко левъ ло́вит̑ нань·
Сѣтїю ѹ҆вѧза́ютъ веселѧ́щеисѧ ѻ҆ паденїи бл҃говѣрныхъ, и҆ болѣзнь погꙋбит̑ ѧ҆̀ преже смр҃ти их̑.
гнѣвъ и҆ ꙗ҆́рость сїи сꙋть мерзость, и҆ мꙋжъ грѣшникъ ѻ҆держанъ и҆́ми бꙋдетъ·
Глв̑҇а, к҃и·
Мьща́ѧ ѿ г҃а ѻ҆брѧ́щет̑ м꙽ще́нїе, и҆ грѣхѝ своѧ ѿдвиза́ѧ ѿдви́гнетъ.
ѻ҆ста́ви непра́вдꙋ и҆́скренемꙋ свое҆мꙋ, и҆ тогда̀ помо́льшꙋ ти сѧ грѣси твоѝ разы́идꙋтсѧ.
чл҃къ на чл҃ка съхранѧ́етъ гнѣвъ, и ѿ г҃а и҆щетъ и҆сцѣле́нїѧ·
На чл҃ка подо́бна себѣ не имать млс̑҇ти, а҆ ѻ҆ грѣсе́хъ свои҆х꙽ мо́литсѧ·
Са́мъ сы́и пло́ть и҆ хранитъ гнѣвъ, кт̂о ѻ҆цыстит̑ грѣхѝ е҆го·
помѧнѝ послѣднѧѧ растлѣнїе и смр҃ть, и҆ преста́ни вражд̑овати·
И҆ пребыва́и в за́повѣдех̑ помина́ѧи ѧ҆̀ и҆ не възненави́ди ближнего.
и҆ въ завѣте вы́шнѧго, презрѝ невѣ́ждьство·
ѻ҆ста́нисѧ ѿ сва́ра, и҆ ѹ҆малиши грѣхѝ.
чл҃къ б̂о ꙗ҆́ръ раждизает̑ сва́ръ, и҆ мꙋжъ грѣшникъ възмѧтет̑ дрꙋги, и҆ посреди ми́рныхъ вло́жит꙽ клеветꙋ̀·
Ꙗ҆́кова̀ ве́щи ѻ҆гнѧ̀ та́ко и҆ пла́мень разгори́тсѧ, и҆ ꙗ҆кова̀ крѣпость бꙋдетъ сва́ра такоже и҆ гнв̑҇ѣ разгори́тсѧ·
Ꙗ҆кова́ же крѣпость чл҃ча такоже ꙗ҆́рость е҆го бꙋдетъ·
и҆ ꙗ҆́коже бога́т꙽ство е҆го въздви́жет̑ гнѣвъ е҆го.
рве́нїе натощно вжигае ѻ҆́гнь, и҆ сва́ръ напра́сенъ пролива́ет꙽ кро́вь·
А҆ще възд꙽ме́ши и҆́скрꙋ възгори́тсѧ, и҆ а́ще въсплю́неши на ню̀ ѹ҆га́снетъ·
Та́коже и҆ ѻ҆бо́е и҆зъ ѹ҆стъ твои҆хъ исхо́дитъ·
Шепо́тника и҆ двоꙗ҆́зы́чника подобает̑ клѧтѝ, мно́ги б̂о ми́рны сꙋще погꙋби́ло.
ꙗ҆зы́къ тре́тїи мно́ги потрѧ́слъ, и҆ разлꙋчи ѧ҆̀ ѿ ꙗ҆зы́ка во ѧзы́ки<.>
И҆ грады твръды разорѝ, и҆ домы̀ вельмо́жамъ разъврати·
Ꙗ҆́зыкъ тре́тїи и҆ же́ны доблѧ и҆згна̀, и҆ лишѝ ѧ҆̀ ѿ трꙋдъ и҆хъ·
Послꙋшаѧ е҆го не и́матъ ѻ҆брѣсти поко́ѧ не и́мать ѹ҆сели́тисѧ без꙽млъвы·
Ꙗ҆́зва бична́ѧ стрꙋпы творитъ, ꙗ҆́зва же ꙗ҆́зы́чнаѧ съкрꙋшает̑т̑ ко́сти.
Мно́ѕи падо́ша ѻ҆́стрїемъ меча̀, н̂о не ꙗ҆́ко па́дшеи ꙗ҆́зы́комъ·
Бл҃жен̑҇ и҆же ѹ҆кры́етсѧ ѿ него, и҆же никтож̑ про́иде въ ꙗ҆рости е҆го.
і҆ и҆же не возвле́къ и҆́га е҆го, и҆ ѹ҆зами е҆го не свѧзанъ бы́сть·
и́го б̂о е҆го и҆́го желѣзно, и҆ ѹ́зы е҆го ѹ́зы мѣдѧны.
и҆ смр҃ть е҆го смр҃ть лю́та, и па́че лꙋче е҆го е҆сть а́дъ.
не ѻ҆бладает̑ бл҃говѣр꙽ными и въ пла́мени е҆го не съгорѧт̑.
ѻ҆ста́вльшеи г҃а впадꙋтсѧ во́нь, и҆ на нихъ възгори́тсѧ и҆ не ѹ҆га́снетъ·
По́сланъ бꙋдетъ на́ нѧ ꙗ҆́ко ле́въ, и҆ ꙗ҆́ко па́рдꙋсъ погꙋбитъ ѧ҆̀·
Ви́ждь и҆ ѻ҆градѝ стѧжа́нїе свое те́рнїемъ.
сребро̀ свое и҆ зла́то свое стѧжѝ·
и҆ словесемъ свои҆мъ сътворѝ и҆́го и҆ мѣ́рꙋ, и҆ ѹ҆стомъ свои҆мъ сътворѝ две́ръ и҆ заво́рꙋ.
внима́и е҆гда̀ ка́ко поплъзне́шисѧ и҆мъ, не пади́сѧ прѧ́мо ловѧ́щемꙋ·
Глв̑҇а, к҃ѳ·
Творѧ́и млс̑҇ть в꙽заи́мъ да́стъ и҆́скренемꙋ, и҆ ѹ҆крѣплѧ́ѧи рꙋкꙋ свою съблюде́тъ за́повѣди.
да́ждь взаи́мъ и҆́скренемꙋ въ времѧ требова́нїѧ е҆го, и҆ па́ки възда́ждь и҆́скренемꙋ въ времѧ.
ѹ҆твердѝ сло́во и҆ ѹ҆вѣрисѧ с ни́мъ, и҆ въ всѧ́ко времѧ ѻ҆брѧ́щеши потре́бꙋ твою·
Мно́ѕи ꙗ҆́ко ѻ҆брѣте́нїе мнѣша заи҆мова́нїѧ и҆ зада́ша трꙋдъ помо́щникомъ их̑·
дондеже во́зметъ ѻ҆блобыза́етъ рꙋцѣ е҆го, и҆ на и҆мѣнїе и҆́скренѧго смири́тъ гласъ·
И҆ въ времѧ въздаѧ́нїѧ превлечетъ вре́мѧ, и҆ възда́сть словеса̀ ѹ҆ны́нїю, и҆ вре́мѧ вини́тъ.
а҆ще же възмо́жет̑ е҆два̀ полъ принесе́тъ, и҆ въмѣни́тъ е҆̀ ꙗ҆́ко ѻ҆брѣте́нїе.
а҆ще лѝ н̂и лишен̑҇ е҆сть и҆мѣнїа е҆го, и҆ стежа̀ и҆̀ врага̀ не тꙋнѐ·
Клѧ́твы и҆ клеветы̀ възда́сть е҆мꙋ, и҆ въ сла́вы мѣсто възда́сть е҆мꙋ беще́стїе·
Мно́ѕи ѹ҆бо за лꙋкав꙽ство ѿвръго́шасѧ, и҆ лиши́тисѧ тꙋнѐ бл҃гои҆зво́лиша·
ѻ҆ба́че на смире́нем̑ длъготръпѝ, и҆ млс̑҇тынею не пре́зри е҆го.
за́повѣди ради застꙋпѝ нищаг̑҇, и҆ по нищетѣ̀ е҆го не ѿвратѝ е҆го тща̀<.>
Погꙋбѝ сребро̀ бра́та ради и҆ дрꙋга, и да не ѻ҆ръжа́вїетъ подъ ка́менемъ въ па́гꙋбꙋ·
Положѝ съкро́вище свое по за́повѣдемъ вы́шнѧго, и҆ по́льза т̂и бꙋдетъ нежели зла́томъ.
затворѝ млс̑҇тыню въ клѣтехъ своих̑, и҆ та̀ и҆зме́тъ т̂ѧ ѿ всѧ́кого ѻ҆злобле́нїѧ·
Па́че щи́та тве́рда и҆ паче копїѧ тѧ́жка, проти́вꙋ врагꙋ побо́ретъ по тебѣ.
мꙋжъ бл҃гопорꙋчникъ бꙋдетъ и҆́скренемꙋ, и҆ погꙋби́выи стꙋдъ ѻ҆ста́вит̑ е҆го.
блгд̑ти порꙋче́нїѧ не забꙋди, да́сть б̂о дш҃ꙋ свою за тѧ·
до́брое порꙋче́нїе ѿвраща́етъ грѣшникъ, і҆ и҆же бес хвалы̀ мы́слїю ѻ҆ста́витъ и҆зба́вльшаго и҆̀.
Порꙋче́нїе мно́ги погꙋбѝ не направѧ́ющихсѧ, и҆ подвиза̀ и҆ми ꙗ҆́ко влънами морьскими·
Мꙋжа си́лны преселѝ, и҆ заблꙋди́ша въ ꙗ҆зы́цѣхъ тꙋждихъ·
Грѣшныи в порꙋче́нїе въпадаетъ, и҆ гонѧ́и пра́знд̑ьство въпадетъ въ сꙋдъ.
застꙋпѝ и҆́скренѧго с̂и проти́вꙋ си́лѣ свое́и, и҆ внима́и себѣ и҆ не впади́сѧ·
Нача́токъ животꙋ̀ вода̀ и҆ хлѣбъ, и҆ риза и҆ до́м꙽ покрыва́ѧи стꙋдъ·
Лꙋче жи́тїе ни́щаго под̑ кро́вомъ ѻ҆грады, нежели бра́шна добра̀ въ тꙋждихъ·
ѻ҆ ма́лѣ и҆ ѻ҆ вели́це хвалꙋ̀ и҆мѣи, животъ зол̑҇ ѿ до́мꙋ в домъ, і҆ и҆дѣже живе́ши не ѿвръзеши ѹ҆стъ своих̑.
накорми́ши и҆̀ и҆ напои́ши и҆̀ бес хвалы̀, и҆ надъ си́мъ ѕло̀ ѹ҆слы́шиши·
Пристꙋпѝ прише́лче и҆ ѹ҆красѝ трапезꙋ, и҆ е҆щѐ и҆ рꙋко́ю твое́ю ѹ҆хлѣби мѧ.
и҆ злѣзи прише́лче ѿ лица̀ сла́вы, прїиде б̂о мн̂ѣ го́стемъ бра́тъ, и҆ требѣ е҆сть хлѣвина̀.
ѕѣло сѐ е҆сть тѧ́жко чл҃кꙋ и҆мꙋщꙋ ра́зꙋмъ, запреще́нїе хлѣвины̀ и҆ поноше́нїе заи́мника·
Глв̑҇а, л҃·
Любѧ́и сн҃а свое҆го ѹ҆части́т꙽ е҆мꙋ ра́ны, да възвеселит̑сѧ напослѣдо́къ свои·
Кажа́и сн҃ъ свои наслади́тсѧ послѣди ѻ҆ немъ, и҆ посредѣ зна́емыхъ ѻ҆ немъ похва́литсѧ·
Ѹ҆ча̀ сн҃ъ свои възревнитъ врага̀, и҆ пред̑ дрꙋги ѻ҆ немъ възра́дꙋетсѧ.
ѹ҆мретъ ѿц҃ъ е҆мꙋ и҆ ꙗ҆́ко не ѹ́мре, подобна б̂о себѣ ѻ҆ста́ви по себѣ.
в животѣ свое҆мъ ви́дѣвъ и҆̀ и҆ възвеселисѧ, и҆ на ѹ҆мрѣтїи свое҆мъ не ѻ҆скръби́сѧ·
Проти́вꙋ врагом̑ ѻ҆стави ме́стника, и҆ дрꙋгомъ възда́юща блгд̑ть·
ѻ҆ дш҃ахъ сн҃овъ ѻ҆бѧ́жетъ стрꙋпы своѧ, и҆ ѻ҆ всѧ́комъ во́пли възмѧте́тсѧ ѹ҆троба е҆го·
Ко́нь не ѹ҆ченъ сверѣпъ и҆де́тъ, и҆ сн҃ъ самовлъныи блꙋдникъ бꙋдетъ.
накажѝ ча́да и҆ ѹ҆дивит̑ т̂ѧ, и҆граѧи с ни́мъ и҆ сътвори́тъ ти печа́ль·
Не смѣ́исѧ с ним̑ да не поболи́ши ѻ҆ нем̑, и҆ напослѣдокъ сотне́ши сѝ зꙋбы·
Не да́ждь е҆мꙋ вла́сти въ ю́ности, съкрꙋши ре́бра е҆го дондеже мла́дъ ес̑҇ е҆гда̀ ка́ко ѻ҆жестѣвъ и҆ не покори́тъ ти сѧ.
накажѝ сн҃ъ свои и҆ дѣлаи ѻ҆ немъ, да не въ бестꙋдїе е҆го пот̑кнешисѧ·
Лꙋ́че е҆сть ни́щъ и҆ крѣпок̑҇ съ здра́вїемъ, нежели богат̑ и҆ ѹ҆ра́нен꙽ тѣломъ своим̑·
Здра́вїе и҆сцѣлно лꙋче е҆сть всѧ́кого зла́та, и҆ тѣло здра́во нежели богат̑ство бесчи́слено.
нѣсть богат̑ство лꙋче здра́вїѧ теле́снаго, и҆ нѣсть веселїѧ паче ра́дости срчд̑ныѧ·
Лꙋче е҆сть смр҃ть паче живота̀ горка, и҆ нежели недꙋг꙽ дол̑҇гїи·
Мно́го добро̀ просы́пано пред̑ ѹ҆сты̀ затво́реными, пред̑ложе́нїѧ бра́шна пред̑лежа́ща ѹ҆ гроба̀·
Ка́ѧ по́льза и҆́долꙋ ѿ жрътвы, не и́мать б̂о ꙗ҆́сти ни ѻ҆бонѧ́ти.
та́коже и҆згони́мыи гм҃ъ, зрѧ́и ѻ҆чи́ма и҆ стенѧ̀.
ꙗ҆́ко е҆внꙋхъ ѻ҆сѧза́ѧи деви́цꙋ и҆ възъстенѧ́етъ, та́ко творѧ́и по нꙋжди сꙋды.
не да́ждь печа́ли дш҃и свое́и, и҆ не ѻ҆скорбѝ себе совѣтомъ свои҆мъ.
Весе́лїе срчд̑но живо́тъ чл҃ка, и҆ радова́нїе мꙋжеско длъгоденьствїе·
Любѝ дш҃ꙋ свою и҆ тѣши срд̑це свое и҆ печа́ль ѿ себе ѿрини дале́че.
мно́ги б̂о печа́ль ѹ҆бѝ, нѣсть по́льза в не́и.
рве́нїе и҆ ꙗ҆́рость ѹ҆малѧ́ютъ дн҃и, и҆ прежде вре́мене печа́ль ста́рость наво́дитъ·
Глв̑҇а, л҃а·
Бдѣ́нїе бога́тества растает̑ пло́ти, и҆ печа́ль е҆го ѿго́нит̑ со́нъ.
печа́ль бдѣнїѧ и҆спро́ситъ дрѣма́нїе, и҆ недꙋгъ лютъ ѿи҆маетъ со́нъ.
трꙋдитсѧ бога́тыи въ собира́нїи бога́тества, и҆ въ поко́и насыщает̑сѧ пи́щеи свои҆хъ·
Трꙋдит̑сѧ ѹ҆богъ ѹ҆мале́нїемъ жи́тїѧ, и҆ в поко́и требꙋѧ бꙋдетъ·
Любѧ́и зла́то не ѻ҆правди́тсѧ, и҆ гонѧ́и растлѣнїѧ самъ насы́титсѧ.
мно́ѕи спадо́шасѧ ѕла́та ра́ди, и҆ бы́сть па́гꙋба̑ прѧмо лицꙋ е҆го.
древо претыка́нїѧ е҆сть всѣмъ и҆́скꙋщимъ е҆го, и҆ всѧ́къ безꙋмливъ поги́бнетъ им̑·
Бл҃женъ богат̑ и҆же ѻ҆брѣте́сѧ бес поро́ка, і҆ и҆же въ слѣдъ зла́та не и҆де.
кто е҆сть и҆ да ѹ҆бл҃ажим̑ е҆го, сътвори́ б̂о ди́вна в лю́дехъ свои҆хъ.
кто и҆скꙋше́нъ и҆мъ бы́сть и҆ съвръшисѧ, и҆ да бꙋдетъ на похвале́нїе.
и҆ кт̂о мо́глъ престꙋпникъ бы́ти и҆ не престꙋпѝ, и҆ ѕл̂о сътвори́ти и҆ не сътворѝ.
да ѹ҆твердѧ́тсѧ бл҃гинѧ е҆го, и҆ млс̑҇тынѧ е҆го и҆сповѣсть събра́нїе·
Сѣде ли на велицѣ трапезѣ не раздви́гни горта́ни на неи, и҆ не рцы̀ мно́го на не́и е҆сть·
Помѧнѝ ꙗ҆́ко ѕл̂о е҆сть ѻ́ко лꙋка́во, лꙋка́внѣе ѻ́ка чт̂о е҆сть созда́но, сего ради ѿ всѧ́ка̑ лица̀ слезит̑·
и҆деже а҆ще ѹ҆зри́ши не простира́и рꙋки и҆ не гнетисѧ с ним̑ въ соли́ло, разꙋмѣи е҆же е҆сть и҆́скренѧго ѿ себе само́го.
и҆ ѻ҆ всѧ́кои ве́щи размышлѧ́и.
ꙗ҆́ждь ꙗ҆ко чл҃къ прд̑ележа́щее ти, и҆ не раз̑греба́и да не възненави́денъ бꙋдеши.
преста́ни прьвїе ради наказа́нїѧ, и҆ не ꙗ҆́ждь лише сы́ти, да не прет꙽кне́шисѧ·
А҆ще сѧ́деши по́среди мно́гихъ ча́дїи, не прострѝ рꙋкѝ своеѧ прьвѣе и҆хъ·
Ꙗ҆́ко нака́заное чл҃кꙋ дово́лно е҆сть мало́е, и҆ на ѻ҆дрѣ е҆го не стра́жет̑ ѕла̀·
Со́нъ здра́вїѧ ѻ҆ чре́вѣ мѣрнѣ, въста́въ заѹ́тра и҆ дш҃а е҆го с ни́мъ.
трꙋдъ бде́нїѧ и҆ скорбь, и҆ чрево боле съ мꙋжемъ несы́тымъ.
и҆ а҆ще и҆ ѻ҆нꙋдилъсѧ е҆си бра́шномъ, въста́ни ѿ трапе́зы и҆ почїеши·
Послꙋшаи мене ча́до не ѹ҆ничижѝ мене, и҆ напослѣдокъ ѻ҆брѧ́щеши словеса̀ моѧ.
въ всѣхъ дѣлѣхъ свои҆хъ бꙋди бы́стръ, и҆ всѧ́къ недꙋгъ не и҆́мать пристꙋпи́ти к тебѣ·
Бога́таго хлѣбы блс̑҇вѧтъ ѹ҆стны, и҆ послꙋшьство доброты̀ е҆го вѣрно.
и҆ на скꙋпаг̑҇ по хлѣбѣхъ поро́пщетъ гра́дъ и҆ послꙋшество ѕло́бы его и҆́стое·
В винѣ не мꙋжа́исѧ, мно́ги б̂о погꙋбѝ вино̀<.>
Пе́щь и҆скꙋшает̑ желѣзо въ кале́нїи, такоже и҆ срд̑це вино̀ въ сва́рѣ го́рдых̑·
Ра́вно животꙋ̀ чл҃комъ вино̀, а҆ще пїеши е҆̀ въ мѣрꙋ е҆го·
Кїи животъ ѹ҆морѧ́ющемꙋсѧ вино́мъ, сїе бо на весе́лїе чл҃комъ създа́но е҆сть·
Вино̀ пива́емо въ времѧ дово́лно.
го́ресть дш҃амъ мно́го вино̀ пива́емо.
съ гнѣвомъ и҆ клевето́ю ѹ҆мно́житъ ꙗ҆́рость безꙋмнаго.
пїѧнъство на претыка́нїе, ѹ҆малѧ́ѧ крѣпость и҆ притворѧ́ѧ стрꙋпїѧ·
В пи́рѣ вина̑ не ѻ҆блича́и и҆́скренѧго, и҆ не ѿврьзи е҆го въ веселїи е҆го.
словесѐ поно́сна не рцы̀ е҆мꙋ, и҆ не ѻ҆скръбѝ е҆го въ и҆стѧза́нїи·
Глв̑҇а, л҃в·
Старѣ́ишинꙋ л̂и тѧ̀ поста́виша не възносѝ себе, н̂о бꙋди в нихъ ꙗ҆́ко е҆ді́нъ ѿ них̑ попеци́сѧ и҆ми, и тако сѧ́ди и҆ всю потре́бꙋ свою сътворь възлѧ́зи.
да възвесели́шисѧ и҆хъ ра́ди, и҆ красоты̀ дѣлма прїимеши вѣнецъ.
гл҃и старѣ́ишино подобает̑ бо ти, и҆спы́тною хи́тростїю.
и҆ не възбранѝ мꙋсикїи и҆дѣже послꙋшанїе бꙋдетъ, не и҆зносѝ бесѣды и҆ без̑ вре́мени не мꙋдри́сѧ.
печатлѣнъ а҆н꙽ѳра́ѯъ на мани́стѣ зла́тѣ, и҆ раз̑сꙋже́нїе мꙋси́ковъ въ пи́тїи вина.
и҆ ѹ҆краше́нїемъ зла́томъ печа́ть жезла̀, пѣти е҆мꙋ си́це подо́бно рещѝ винꙋ̀.
гл҃и ю́ноше а҆ще ти е҆сть потре́ба, е҆два и҆ два́щи а҆ще въпрошенъ бꙋдеши, и҆ е҆ді́немъ сло́вомъ ѻ҆ мно́ѕѣ и҆зъгл҃и.
бꙋди ꙗ҆́ко вѣдыи и҆ въ кꙋпе молча̀.
по́средѣ велмо́жъ не ра́венъ сѧ твори, і҆ и́номꙋ гл҃ющꙋ не ѕѣло прилежѝ.
преже гро́ма млънїи варѧ́етъ, и҆ пред̑ стыдли́ваго варѧ́етъ блгд̑ть, въ времѧ въста́ни и҆ не послѣди, в до́мъ ѿи҆дѝ а҆ не ѹ҆ныва́и.
т̂ꙋ и҆гра́и и҆ творѝ помышле́нїѧ твоѧ, и҆ не съгрѣша́и сло́вомъ го́рдымъ·
И҆ ѻ҆ си́хъ блс̑҇ви сътворъшаго тѧ, и҆ ѹ҆поева́ющего т̂ѧ ѿ бл҃гъ е҆го·
Боѧ́сѧ г҃а пождетъ наказа́нїѧ, и҆ ѹ҆треню́юще ѻ҆брѧ́щꙋтъ бл҃говоле́нїе.
и҆ща́и зако́на насы́тит̑сѧ е҆го, и҆ сꙋмнѧ́исѧ соблазни́тсѧ ѻ҆ немъ·
Боѧ́щїисѧ г҃а ѻ҆брѧ́щꙋтъ сꙋдъ, и҆ ѻ҆правда́нїѧ ꙗ҆́ко свѣтъ и҆з꙽ внѣ̀ възгорѧ́тсѧ.
чл҃къ грѣшник꙽ ѹ҆клонитсѧ ѿ ѻ҆бличе́нїѧ, и҆ по во́ли свое́и ѻ҆брѧ́щетъ подо́бъство.
мж̑ꙋ совѣтникъ не презритъ размышле́нїѧ, и҆ тꙋждь и҆ го́рдъ не ѹ҆бои́тсѧ стра́ха, по сътворе́нїи с нимъ·
Без̑ совѣта ничесо́же не творѝ, и҆ е҆гда сътвори́ши не раска́исѧ·
На пꙋтѝ паде́нїѧ не ходѝ, и҆ не претыка́исѧ ѻ҆ ка́мени·
не вѣрꙋи пꙋтѝ в немъ же сѧ не претыка́еши, и҆ ѿ ча́дъ своих̑ хранисѧ·
Въ всѧ́цѣмъ дѣлѣ не вѣрꙋи дш҃и своеи, се б̂о е҆сть съблюде́нїе зако́на·
Вѣ́рꙋѧи зако́нꙋ вънмитъ за́повѣдем̑, и҆ ѹ҆пова́ѧи гв҃и не ѹ҆ма́литсѧ·
Глв̑҇а, л҃г·
Боѧ́щагосѧ г҃а не срѧ́щетъ ѕл̂о, а҆ще и҆ в напа́сть впадетъ па́ки и҆зметъ е҆го·
Мꙋж́ъ премꙋдръ не възненави́дит꙽ зако́на, сꙋмнѧи же сѧ в немъ ꙗ҆́ко въ бꙋри кора́бль·
Чл҃къ разꙋмивъ вѣрꙋ и҆мет̑ зако́нꙋ, и҆ зако́нъ е҆мꙋ вѣренъ.
ꙗ҆́ко въпроше́нїе пра́вед̑ныхъ пригото́ви сло́во, и҆ та́ко ѹ҆слы́шиши.
съчета́и наказа́нїе, и҆ то́гда ѿвѣщаи·
Ко́ло колесное ѹ҆тро́ба бꙋѧго, и҆ ꙗ҆́коже ѻ҆сь врьтѧ́щисѧ помышле́нїе е҆го.
кон꙽на ꙗ҆жде́нїѧ ꙗ҆́ко дрꙋ́гъ зазривъ под̑ всѧ́цѣмъ ꙗ҆здѧ́щимъ р꙽жетъ·
Почто дн҃ь дн҃е преспѣва́етъ, и҆ всѧк̑҇ свѣтъ дн҃е лѣта ѿ слн҃ца, ра́зꙋмом̑ гн҃имъ разлꙋчи́стасѧ·
И҆змѣни вре́мѧ и҆ пра́зники, ѿ них̑ възнесъ и҆ ст҃и, и҆ ѿ ни́хъ положи́ в число дн҃їи.
и҆ чл҃цы вс̂и ѿто́лѣ.
и҆ ѿ землѝ създа́нъ бы́сть а҆да́мъ, мно́жеством̑ хꙋдо́жества г҃ь раздѣли ѧ҆̀ и҆змѣни пꙋти их̑.
ѿ ни́хъ блс̑҇ви и҆ възнесе, и҆ ѿ ни́хъ ст҃и и҆ к себѣ приближи·
ѻ҆ нихъ клѧ́тсѧ и҆ смири, и҆ съврати и҆хъ ѿ стоѧ́нїѧ и҆хъ.
ꙗ҆́ко бре́нїе скꙋде́лника в рꙋцѣ е҆го, вс̂и пꙋтїе е҆го по и҆зволе́нїю е҆го, та́ко и҆ чл҃цы в рꙋцѣ сътво́ршаго и҆̀, възда́ти им̑ по сꙋдꙋ е҆го.
ꙗ҆́ко проти́вꙋ зло́мꙋ бл҃гое, и҆ проти́вꙋ смр҃ти живо́тъ, та́ко проти́вꙋ бл҃говѣ́рномꙋ грѣшник̑҇.
и҆ си́це възри въ всѧ дѣ́ла вы́шнѧго дво́е дво́е е҆ді́нꙋ проти́вꙋ е҆ді́ного.
а҆зъ же послѣж́де бдѣхъ и҆ наслѣди́хъ и҆хъ ꙗ҆́коже ѿ нача́тка, ꙗ҆́коже побира́ѧи въ слѣ́дъ и҆мателѧ вин̑҇наго, въ блс̑҇венїе гн҃е достиго́хъ, и҆ ꙗ҆́ко и҆матель напо́лнихъ точи́ло.
и҆ смотри́те ꙗ҆́ко не себѣ е҆ді́номꙋ трꙋди́х꙽сѧ, н̂о всѣмъ и҆скꙋщим̑ наказа́нїа·
Послꙋшаите мене вельмо́жа людїи, и҆ вла́стеле събо́ра внꙋши́те.
сн҃ꙋ и҆ бра́тꙋ, женѣ и҆ дрꙋ́гꙋ свое҆мꙋ, не да́ждь вла́сти на себѣ в꙽ животѣ своем̑.
и҆ не да́ждь и҆номꙋ и҆мѣ́нїѧ свое҆го, да не раска́ешисѧ требꙋѧ́и и҆хъ ради·
до́ндеже жи́въ е҆си и҆ дыха́нїе в тебѣ, не и҆змѣни себѣ всѧ́кои пло́ти.
лꙋче б̂о е҆сть да́ ти сѧ мо́лѧтъ ча́да твоа, нежели тебѣ зрѣти в рꙋцѣ чад̑ твоих̑·
Въ всѣхъ дѣлехъ свои҆хъ бꙋ́ди преспѣва́ѧ, не да́ждь поро́ка на сла́вꙋ свою.
въ дн҃ь сконча́нїѧ дн҃и живота свое҆го, и҆ въ врѣмѧ смр҃ти твое́и разда́и и҆мѣ́нїе свое·
Сы́тости и҆ жезлїе и҆ брѣмѧ ѻ҆слꙋ, хлѣ́бъ и҆ наказа́нїе и҆ дѣ́ло рабо́ви·
Кажи раба ѻ҆брѧ́щеши поко́и, ѻ҆слаби рꙋ́кꙋ е҆мꙋ і҆ и҆ска́ти начне́тъ свободы·
И҆́го и҆ реме́нь вы́ю преклонѧет̑, и҆ рабꙋ лꙋкавꙋ ѹ҆́зы и҆ ра́ны възложи, възри е҆го в дѣ́ло да не празд̑нꙋетъ.
мно́ѕѣи б̂о зло́бѣ наѹ҆читъ пра́знд̑ьство, ѹ҆стро́и е҆го въ дѣ́лѣхъ ꙗ҆́коже подобает̑ е҆мꙋ.
а҆ще не послꙋшаетъ всади и҆̀ въ ѻ҆ко́ва, и҆ не бꙋ́ди и҆зли́ха над̑ всѧ́кою пло́тїю, и҆ без꙽ сꙋда не сътвори ничесоже·
А҆ще т̂и е҆сть ра́бъ бꙋди ꙗ҆́коже и҆ т̂ы, и҆ ꙗ҆́ко кро́вїю стѧжа́лъ е҆си.
а҆ще т̂и е҆сть ра́бъ и҆мѣи и҆̀ ꙗ҆́ко бра́та, ꙗ҆кож̑ б̂о дш҃а твоѧ ѹ҆сꙋмни́шисѧ е҆го.
а҆ще ѻ҆злоби́ши е҆го, и҆ въста́въ ѿбѣжи́тъ, ки́мъ пꙋтемъ пои҆́щеши е҆го не вѣси·
Глв̑҇а, л҃д·
Неразꙋми́вꙋ мꙋж́еви тщи и҆ лжи сꙋть наде́жди, и҆ со́нїа вперѧ́ютъ безꙋмныа·
Ꙗ҆́коже е҆млѧ́исѧ за стѣнь и҆ гонѧ́и вѣтры, та́коже е҆млѧ́и вѣ́рꙋ сно́мъ, сїе на сїе со́нъ ѹ҆зрѣ́нїѧ·
Прѧ́мо лицꙋ подо́бїе лица, ѿ нечи́стаго что сѧ ѻ҆чи́стит̑, и҆ ѿ лжа ка́ѧ и҆́стинна.
волшве́нїѧ и҆ ѻ҆баѧ́нїѧ и҆ со́нїѧ сꙋет꙽ство сꙋть.
и҆ ꙗ҆́коже болѧ́щꙋ срд̑цꙋ мечта́нїѧ быва́ютъ, а҆ще не ѿ вы́шнѧго посла́но бꙋдетъ на посѣще́нїе.
не да́ждь их̑ срд̑цꙋ свое҆мꙋ, мно́гихъ б̂о прельсти со́нъ, и҆ ѿпадо́ша надѣющесѧ на нѧ.
без꙽ лжа съверши́тсѧ зако́нъ, и҆ премꙋ́дрости въ ѹ҆стѣхъ вѣрныхъ съверше́нїе·
Мꙋж́ъ ѹ҆ченъ много ѹ҆вѣсть, и҆ мно́го и҆скꙋси́въ и҆сповѣсть ра́зꙋмъ·
И҆же не и҆скꙋси́сѧ ма́ло вѣсть, заблꙋди́выи же ѹ҆мно́жит꙽ кова́ръство.
мно́го ви́дѣхъ в заблꙋже́нїи мое҆мъ, и҆ вѧ́ще слове́съ мои҆х꙽ ра́зꙋмъ мои·
Мно́гащи до смр҃ти в бѣдꙋ впадо́хъ, и҆ сп҃сенъ быхъ сих̑ ради·
дх҃ъ боѧ́щихсѧ г҃а поживет̑, наде́жда бо и҆хъ на сп҃сающаго ѧ҆̀·
Боѧ́исѧ г҃а ничи́м꙽же постыди́тсѧ, и҆ не ѹ҆страшит̑сѧ то́и бо наде́жд̑а е҆мꙋ.
боѧ́щемꙋсѧ г҃а бл҃жена е҆сть дш҃а, чи́м сѧ ѻ҆держит̑ и҆ кт̂о е҆мꙋ бы́сть ѹ҆тверже́нїе·
ѻ҆́чи гн҃и на любѧ́щаѧ е҆го, защище́нїе си́лы, и҆ ѹ҆тверже́нїе крѣ́пости, покро́въ ѿ вара и҆ покро́въ ѿ полꙋдн҃е, хране́нїе ѿ претыка́нїѧ, и҆ по́мощь ѿ паданїѧ, въздвиѕаѧи дш҃ꙋ, и҆ просвѣщаѧи ѻ҆́чи, ѻ҆цыще́нїе даѧ живота и҆ блс̑҇венїе.
жрѧ́и ѿ непра́вды приноше́нїе пороч̑҇но, и҆ нѣсть въ бл҃говоле́нїе поро́ки безако́нникъ.
и҆ не бл҃говоли́тъ вы́шнїи ѻ҆ приноше́нїи нечести́выхъ, ни мно́жествомъ же́ртвъ ѻ҆цыстит̑ грѣхъ.
ꙗ҆́ко жрѧи сн҃а прд̑е ѿц҃мъ е҆го приносѧи жрътвы ѿ и҆мѣнїѧ ѹ҆бо́гихъ.
хлѣ́бъ ѹ҆бо́гимъ живо́тъ ѹ҆бо́гихъ.
ꙗ҆́ко кро́ви лиша́ѧи е҆го чл҃къ, и҆ ꙗ҆́ко ѹ҆бива́ѧ и҆́скренѧго и҆же ѿе҆́млетъ е҆мꙋ поживе́нїе.
и҆ ꙗ҆́ко пролива́ѧ кро́вь, ѹ҆дръжа мздꙋ ѿ нае́мникъ.
е҆ді́нъ съзидаѧ, и҆ е҆ді́нъ разарѧѧ, чт̂о ѹ҆спѣетъ н̂ы бо́леи то́кмо трд̑ꙋ.
е҆ді́номꙋ молѧщꙋсѧ а҆ дрꙋго́мꙋ проклина́ющꙋ, кое҆го глс̑҇а ѹ҆слы́шитъ влд̑ка
.
и҆змыва́ѧисѧ ѿ мертвъца, и҆ па́ки прикасаѧсѧ е҆мъ, ка́ѧ по́лза е҆сть е҆мꙋ ѿ ба́нѣ.
та́коже и҆ чл҃къ постѧисѧ ѻ҆ дѣлехъ свои҆хъ, и҆ па́ки ходѧи тоже творѧ, мо́льбꙋ е҆го кт̂о ѹ҆слы́шитъ, и҆ чт̂о ѹ҆спѣ смире́нїемъ свои҆мъ·
Глв̑҇а, л҃е·
Съблюда́ѧ зако́нъ ѹ҆мно́жит̑ приноше́нїе, и҆ ꙗ҆́ко жрѧи сп҃сенїю внима́а за́повѣдем̑·
възда́ѧи блгд̑ть, и҆ приносѧи ꙗ҆́ко смидалъ приносит̑, и҆ творѧи млс̑҇тыню ꙗ҆́ко и҆ жрѧи жрьтвꙋ хвале́нїа·
Бл҃говоле́нїе гн҃е е҆же ѿстꙋпи́ти ѿ грѣха, и҆ ѻ҆цыще́нїе ес̑҇ ѿстꙋпи́ти ѿ непра́вды·
Не ꙗ҆́ви́сѧ пред̑ гм҃ъ то́щь, все б̂о сѐ за́повѣди ради·
Приноше́нїе пра́вед̑наго похвалитъ ѻ҆лтарѧ, и҆ бл҃гоѹ҆ха́нїе е҆го пред̑ вы́шнимъ·
Жрътва мꙋжа пра́веднаго прїѧтна, и҆ па́мѧть е҆ѧ не забве́на бꙋдетъ.
ѻ҆́комъ бл҃гомъ просла́ви г҃а, и҆ не ѹ҆мали ѿ нача́тка рꙋки твое҆ѧ.
въ всѧкомъ даꙗ҆́нїи ѹ҆кроти лице свое, и҆ весе́лїемъ ѻ҆ст҃и десѧти́нꙋ.
да́ждь вы́шнемꙋ по даꙗ҆́нїю е҆го, и҆ ѻ҆́комъ бл҃гомъ ѻ҆чище́нїе рꙋки·
Ꙗ҆́ко г҃ь въздаѧи е҆сть, и҆ сед̑ми́цею възда́сть т̂и·
да́ръ б̂о без̑ трꙋда не прїемлетъ, ни приближи́т꙽ бо сѧ жрътвѣ непра́вед̑наго.
ꙗ҆ко г҃ь сꙋдїѧ е҆сть, и҆ нѣсть ѹ҆ него сла́вы лица.
не прїиметъ л̂и лица ѻ҆ ѹ҆бо́зѣмъ, и҆ мл҃твꙋ ѻ҆бидимаго ѹ҆слы́шитъ·
Не и҆́мать презрѣти мл҃твы сираго ни вдови́цы, е҆гда и҆звѣща́етъ бесѣдꙋ·
Не сле́зы л̂и вдови́цѣ по лани́тама текꙋтъ, и҆ во́пль на снес꙽шаго е́и·
Ѹ҆толѧ́и бл҃говоле́нїемъ прїѧ́тъ бꙋдетъ, и҆ мл҃тва е҆го до ѻ҆́блакъ до́идетъ.
мл҃тва смиреннаго про́иде ѻ҆́блаки, до́ндеже пристꙋпит̑ не ѹ҆тѣшит̑сѧ.
и҆ не и҆́мать ѿстꙋпи́ти до́ндеже посѣти́тъ вы́шнїи.
сꙋдит̑ въ пра́вдꙋ, и҆ сътво́рит꙽ сꙋдъ, и҆ г҃ь не замедлит̑.
и҆ не и҆́мать длъготръпѣти на них̑, до́ндеже съкрꙋшитъ чре́сла немлс̑҇тивыхъ·
И҆ ꙗ҆зы́ком̑ възда́сть месть, донеле потреби́ти мно́жество досади́тель.
и҆ скѷпетры непра́вед̑ныхъ съкрꙋшитъ.
до́ндеже възда́сть чл҃кꙋ по дѣѧ́нїю е҆го, и҆ по дѣ́ломъ чл҃ческомъ и҆ по помышле́нїю и҆хъ.
до́ндеже сꙋди́тъ сꙋдомъ людемъ свои҆мъ, и҆ възвесели́тъ ѧ҆̀ и҆же сꙋть въ млс̑҇ти е҆го.
кра́сна е҆сть млс̑҇ть въ дн҃ь ско́рби е҆го, ꙗ҆́кож̑ и҆ ѻ́блацы дождевни въ вре́мѧ без꙽до́ждїѧ·
Глв̑҇а, л҃ѕ·
Помилꙋи н̂ы влд̑ко б҃е всѣхъ и҆ възри, и҆ наложи стра́хъ твои на всѧ ꙗ҆зы́ки.
въздви́гни рꙋ́кꙋ твою на ꙗ҆зы́ки тꙋжда, и҆ да ѹ҆зрѧтъ си́лꙋ твою·
Ꙗ҆́коже пред̑ ни́ми ѻ҆ст҃исѧ в насъ, та́коже пред̑ на́ми възвели́чисѧ на ни́х꙽.
и҆ да позна́ютъ т̂ѧ, ꙗ҆́коже и҆ м̂ы позна́хомъ тѧ.
ꙗ҆́ко нѣсть б҃а ра́звѣе тебе г҃и·
ѻ҆бнови зна́менїа, и҆ змѣни чюдеса, просла́ви рꙋ́кꙋ и҆ деснꙋ́ю мы́шцю твою·
Въздви́гни ꙗ҆́рость и҆злѣи гнѣ́въ, изми сꙋперника и҆ сътри вра́га.
потщи вре́мѧ и҆ помѧни заклина́нїе, и҆ да и҆сповѣдѧ́тъ вели́чїа твоѧ·
Гнѣ́вомъ ѻ҆гнѧ поꙗ҆де́нъ бꙋдетъ сп҃саѧ́исѧ, ѻ҆злоблѧ́ющїи лю́ди твоѧ да ѻ҆брѧ́щꙋтъ пагꙋбꙋ.
Съкрꙋши главы кн҃ѕь вра́гъ на́ших꙽ гл҃ющихъ нѣсть ра́звѣ насъ.
събери всѧ колѣ́на і҆а́ковлѧ.
свѣтло срд̑це и҆ бл҃гоѻ҆брашнѣ, и҆ ѻ҆ ꙗ҆́ди свое҆и попече́тсѧ·
Поми́лꙋи люди г҃и наречен꙽ныѝ и҆менемъ твои҆мъ, і҆и҆л҃ь е҆гоже первенцемъ ѹ҆подоби́лъ е҆си·
Ѹ҆щедри град̑ ст҃ыни твое҆ѧ і҆ерс̑҇лимъ, грд̑а поко́ища твое҆го.
и҆спо́лни сїѻ́на взѧ́ти словеса твоѧ, и҆ ѿ сла́вы свое҆ѧ лю́ди своѧ·
да́ждь свѣдѣтельство тва́ри свое҆и и҆ сꙋщимъ ѿ нача́ла, и҆ въздви́гни прро̑҇чествїѧ сꙋщаѧ ѻ҆ и҆мени твое҆мъ, да́жд̑ь мздꙋ терпѧ́щимъ тебе, и҆ прро̑҇цы твои вѣрни бꙋ́дꙋтъ.
послꙋшаи г҃и мо́льбы мл҃твеникъ твои҆хъ.
по блс̑҇гве́нїю а҆а҆ро́ню ѻ҆ людехъ твои҆хъ·
И҆ разꙋмѣ́ютъ вс̂и сꙋщїи на землѝ, ꙗ҆ко г҃ь б҃ъ вѣком̑.
всѧко брашно ꙗ҆сть чрево, е҆сть же бра́шно бра́шна добрѣе.
горта́нь вкꙋша́етъ бра́шна ло́ва, та́ко срд̑це разꙋми́во словеса ло́жна·
Срд̑це стропти́во да́сть печа́ль, и҆ чл҃къ мно́гоѹ҆мѣтель възда́сть е҆мꙋ.
всѧ́каго мꙋжеска по́лꙋ прїимет̑ жена, е҆сть же дщи дще́ре лꙋ́чше.
доброта же́ньска ѹ҆кроти́тъ лице, и҆ над̑ все жела́нїе чл҃ческо преспѣетъ.
а҆ще е҆сть на ꙗ҆зы́цѣ е҆ѧ̀ млс̑҇ть и҆ кро́тость, нѣсть мꙋжъ е҆ѧ̀ точенъ сн҃омъ чл҃ческимъ·
Приводѧ́и женꙋ начина́етъ стѧжанїѧ, помо́щника по себѣ самомъ столпа покою̀.
и҆дѣже не бꙋдетъ преграды расхыщено бꙋдет̑ и҆мѣнїе, і҆ и҆дѣже не бꙋдетъ жены̀ воздохнетъ заблꙋжда́ѧ.
кт̂о бо̀ вѣрꙋетъ въѻ҆рꙋженꙋ разбо́иникꙋ находѧ́щꙋ ѿ град̑ во град̑·
Такоже и҆ чл҃кꙋ не и҆мꙋщꙋ гнѣзда, и҆ ѻ҆бита́ющꙋ и҆деже ѻ҆бвечери́тсѧ·
Глв̑҇а, л҃з·
Всѧкъ дрꙋгъ речет̑ дрꙋжих̑сѧ е҆мꙋ и҆ а́зъ, н̂о е҆сть дрꙋгъ и҆менемъ точїю дрꙋгъ.
печаль не пребыва́етъ л̂и до смр҃ти, прїѧ́тель и҆ дрꙋгъ претварѧ́асѧ въ врагъ.
ѽ лꙋкаво помышленїе ѿкꙋдѣ сѧ и҆звали, покрыти сꙋшꙋ лестїю·
Прїѧтель ѻ веселїи дрꙋжни ра́дꙋетсѧ, и҆ въ времѧ скорби и҆здалеча бꙋдетъ·
прїꙗ҆́тель со дрꙋгом̑ трꙋждает̑сѧ чрева рад̑и̑, и҆ противꙋ бра́ни во́зметъ ко́пїе·
Не забꙋ́ди дрꙋга въ дш҃и свое́и, и҆ не непомина́и е҆го во и҆мѣнїи свое҆мъ·
Всѧкъ совѣтникъ ѿи҆мет̑ совѣтъ, н̂о е҆сть совѣща́ѧи ѻ҆ себѣ.
ѿ совѣт꙽ника храни дш҃ꙋ свою, и҆ разꙋмѣи пр́ьвѣе чт̂о е҆мꙋ потреба е҆сть, сам̑ б̂о себѣ совѣщава́етъ·
Є҆гда̀ како възложитъ на́ тѧ жребїи, и҆ речетъ т̂и до́брѣ т̂и пꙋть е҆сть.
и станет̑ прѧмо ви́дѣти чт̂о бꙋдетъ т̂и,<.>
Не совѣщава́и с под̑зира́ющимъ т̂ѧ.
и҆ ѿ зазрѧщих̑ т̂ѧ съкрыи совѣтъ.
съ жено́ю ѻ҆ ревности еѧ̀, и҆ съ страш꙽ливымъ ѻ҆ брани·
Съ кꙋпцемъ ѻ҆ преложенїи, и҆ съ кꙋпꙋ́ющимъ ѻ҆ проданїи·
съ завид̑ливымъ ѻ҆ похваленїи, и҆ не съ млс̑҇тивымъ ѻ҆ помилованїи.
съ лѣнивымъ ѻ҆ всѧком̑ дѣлѣ, и҆ с нае҆́мникомъ лѣтошнимъ ѻ҆ съвер̑҇шенїи.
рабꙋ̀ лѣни́вꙋ ѻ҆ мно́ѕѣ дѣ́ланїи.
и҆ не належи н̂о ѻ҆ сихъ ѻ всемъ совѣща́нїи.
но съ мꙋжемъ бл҃говѣрном̑ прс̑҇но бꙋ́ди, е҆гоже а҆ще позна́еши съблюдꙋща за́повѣди, и҆же въ дш҃и е҆го ꙗ҆́коже въ твое́и дш҃и.
и҆ а́ще съгрѣшиши поболитъ с тобо́ю·
и҆ совѣтъ срд̑чнъ поста́ви, нѣсть б̂о тѝ вѣрнѣ́ишаго еѧ̀.
дш҃а б̂о мꙋжа възвѣщает̑ нѣкогда разꙋмне, нежел̂и се́дмь блюститель на высотѣ сꙋдѧщи стража дѣльма·
И҆ ѻ҆ всемъ семъ помолисѧ вы́шнемꙋ, да ѹ҆правитъ въи҆́стиннꙋ пꙋть твои.
начатокъ всѧкого дѣла слово, и҆ пр́ьвѣе всѧкого дѣланїѧ совт̑ѣ·
Слд̑ѣ и҆змѣненїѧ срд̑чнъ, на четыри ча́сти и҆сходитъ.
на добро̀ и҆ зл̂о на живот̑ и҆ смр҃ть, и҆ владыи и҆́ми вы́нꙋ ꙗ҆зы́къ е҆сть·
Є҆сть мꙋжъ коваренъ наказа́тель мно́гимъ, и҆ свое́и дш҃и е҆сть неключимъ·
Є҆сть премꙋдрѧ́ѧисѧ въ словесе възненавидимъ, се́и всѧкоѧ пища лишенъ бꙋдетъ.
не дана б̂о бысть е҆мꙋ ѿ г҃а блгд̑ть, ꙗ҆ко всѧкоѧ премꙋдрости лишенъ бысть.
е҆сть премꙋдръ свое́и дш҃и, и҆ плоды ра́зꙋма е҆го въ ѹ҆стѣхъ вѣрны·
Мꙋжъ премꙋдръ лю́ди своа нака́жет̑, и҆ плоды ра́зꙋма е҆го вѣрны·
Мꙋжъ премꙋдръ и҆сполнитсѧ блс̑҇венїѧ, и҆ ѹ҆бл҃жатъ е҆го вс̂и зрѧщеи·
Живот̑ мꙋжа в число дн҃їи, и҆ дн҃и і҆и҆л҃еви без̑численїи·
Премꙋдръ въ свои҆хъ лю́дехъ наслѣдитъ вѣрꙋ, и҆ сѣмѧ е҆го живо бꙋдетъ въ вѣкъ·
Ча́до въ животѣ свое҆мъ и҆скꙋси дш҃ꙋ свою, и҆ виждь чт̂о е́й е҆сть зл̂о и҆ не даждь е́й.
не ключитъ б̂о сѧ вс̂е всѣмъ, и҆ не всѧка дш҃а въ всемъ бл҃говолит̑·
Не пресыщаисѧ въ все́и пищи, и҆ не разлива́исѧ на различїе брашна·
И҆б̂о въ мно́ѕѣ бра́шнѣ недꙋгъ бꙋдет̑ и пресыщенїе до скорби дои҆детъ·
Пресыщенїемъ б̂о мно́ѕи ѹ҆мроша, и внимаѧ́и же приложит̑ животѣ·
Глв̑҇а, л҃и·
Чт̂и врача противꙋ потребѣ чтс̑҇и е҆го г҃ь б̂о созда е҆го·
ѿ вы́ш꙽нѧго бо е҆с и҆сцѣленїе, и҆ ѿ цр҃ѧ прїиметъ даръ·
Хꙋдожество врача възнесет̑ главꙋ е҆го, и҆ пред̑ вельмо́жами ѹ҆дивим̑ бꙋдетъ·
Гь҃ созда̀ ѿ землѧ̀ врачеванїе, мꙋжꙋ мꙋ́дрꙋ не ѹ҆мръзитъ и҆́ми.
не ѿ древа л̂и ѻ҆сладисѧ вода̀, да позна́на бꙋдетъ крѣпость е҆го.
то́и далъ е҆сть хꙋдожество чл҃комъ славитисѧ чюдесемъ е҆го.
Тѣми ѹ҆врачева и҆ ѿѧтъ болѣзни и҆хъ.
ми́роварецъ си́ми сострои́тъ примѣшенїе.
и҆ не сконча́ютсѧ дѣ́ла е҆го и҆ миръ ѿ него е҆сть на лицы землѝ·
Чадо въ бо́лезни свое́и не презри, н̂о молисѧ гв҃и и҆ то́и т̂ѧ и҆сцѣлит꙽.
ѿстꙋпи прегрѣшенїѧ направи рꙋцѣ и҆ ѿ всѧкого грѣха ѻ҆цысти срд̑це свое.
даждь бл҃гоѹ҆ханїе и҆ памѧть смидалъ и҆ ѹ҆мастѝ приношенїе, и҆ дажд̑ь мѣсто врачꙋ.
г҃ь б̂о е҆го созда̀, и҆ да не ѹ҆далитъ ти сѧ требѣ бо т̂и е҆сть.
е҆сть б̂о времѧ е҆гда̀ въ рꙋкꙋ е҆го бл҃гоѹ҆ханїе, и҆б̂о и҆ сїи гв҃и мо́лѧтсѧ да ѹ҆пра́витъ и҆мъ поко́и, і҆ и҆сцѣленїе живота.
съгрѣшенїѧ же ради пред̑ сътворшим̑ е҆го, въпадетъ въ рꙋцѣ вра́чю·
Чадо над̑ мр҃твецемъ и҆сточѝ сле́зы, и ꙗ҆́коже ѕлѣ̀ стража̀ начнѝ плача̀·
и҆ ꙗ҆́коже досто́ит̑ е҆мꙋ съкры́и тѣло е҆го, и҆ не пре́зри погребе́нїѧ е҆го·
го́рекъ сътворѝ пла́чь и҆ рыда́нїе тепло.
и҆ сътворѝ сѣтова́нїе ꙗ҆́коже е҆мꙋ досто́итъ, дн҃ь е҆ді́нъ и҆ два хꙋле́ніа ра́ди.
и҆ ѹ҆тѣшисѧ печа́ли дѣлма ѿ печа́ли б̂о смр҃ть быва́етъ, и҆ печаль срчд̑наѧ слѧчетъ крѣпость.
въ нанесе́нїи пребыва́етъ печа́ль, и҆ жи́тїе ни́щаго въ срд̑ци·
Не да́ждь въ печа́ль срд̑ца свое҆го ѻ҆стави е҆го, помѧнѝ послѣднѧа не забꙋди.
нс̑҇ѣ б̂о ти възвраще́нїѧ, и҆ по́льзы е҆мꙋ не сътвори́ши, себѣ же зазлиши·
помѧнѝ ѹ҆ста́въ е҆го ꙗ҆́ко си́це.
ꙗ҆ко вчера̀ твоѧ мн̂ѣ, а҆ тебѣ днс̑҇ь<.>
В поко́и мр҃твъца конча́и па́мѧть е҆го и ѹ҆тѣшисѧ ѻ немъ въ и҆схо́дѣ дш҃и е҆го·
Премꙋдрость кни́жника въ времѧ пра́зденьства, и҆ ѹ҆малѧ́ѧсѧ дѣѧ́нїемъ свои҆мъ ѹ҆премꙋдритсѧ<.>
Что́ сѧ ѹ҆мꙋдритъ дръжа̀ ра́ло, и҆ хвалѧ́исѧ ѻ҆стно́мъ.
гонѧ̀ волы̀ и҆ възвраща́ѧсѧ в дѣлѣхъ е҆ю, и҆ повѣсть е҆го въ сынѣхъ телчихъ.
и҆ срд̑це е҆го дасть въспроврещи бразд̑ꙋ, и҆ бдѣнїе е҆го на насыще́нїе ю҆́нець·
Та́ко всѧ́къ древодѣлѧ и҆ хꙋдо́жник̑҇, и҆же но́щи ꙗ҆́ко дн҃и проважда́етъ.
дѣ́лающи и҆стꙋка́нїѧ печа́тїи, и҆ прилежа́нїе е҆го и҆змѣни́ти разли́чїѧ·
срд̑це свое дасть вподоби́ти живописа́нїѧ, и҆ бдѣнїе е҆го е҆сть сконча́ти дѣло·
Такоже и҆ кова́чь седѧ близъ на́ ковални, съглѧда́ѧ дѣло желѣза.
кꙋре́нїе ѻ҆гнѧ̀ ѹ҆дрꙋчитъ тѣло е҆го, и҆ теплото́ю пещи ѹ҆трꙋдитсѧ·
гла́сомъ мла́та приклонитъ ѹ́хо е҆го, и҆ прѧ́мо подо́бїю сосꙋда ѻ́чи е҆го.
срд̑це е҆го вдас̑҇ на сконча́нїе дѣла, и҆ бдѣнїе е҆го ѹ҆красити до конца·
Такоже и҆ скꙋделник̑҇ сѣдѧ на дѣлѣ свое҆мъ, и҆ вертѧ̀ нога́ма коло·
и҆же в печа́ли лежи́тъ вынꙋ в дѣлѣ свое҆мъ, и҆ в числѣ все дѣла́нїе е҆го.
мы́шцею е҆го въѻ҆бразитъ брьнїе, и҆ пред̑ нога́ма преклонитъ крѣпость свою.
срд̑це свое вдас̑҇ сконча́ти сосꙋдъ, и҆ бдѣ́нїе е҆го и҆стреби́ти пещь·
Вси сїи рꙋка́ма свои҆ма̑ надѣ́ютсѧ, и҆ кождо в дѣлѣ свое҆мъ премꙋдрѧ́етсѧ·
бес тѣхъ не ѹ҆сели́тсѧ градъ, и҆ не вселѧ́тсѧ ни похо́дѧтъ, и҆ въ собо́рищи не похо́дѧт̑.
на прс̑҇тлѣ же сꙋдїи не сѧ́дꙋтъ, и҆ завѣта сꙋдꙋ не размы́слѧтъ.
не и́мт̑ꙋ и҆звѣща́ти наказа́нїѧ и҆ сꙋда, и҆ въ при́тчах̑ не ѻ҆брѧщꙋтсѧ.
н̂о то́кмо създа́нїе вѣка ѹ҆твердѧ́тъ, и҆ моле́нїе и҆хъ в дѣла́нїихъ хꙋдожества ра́звѣ вдающаго дш҃ꙋ свою, и҆ размышлѧ́ющаго в зако́нѣ вы́шнѧго·
Глв̑҇а, л҃ѳ·
Премꙋдрость всѣхъ древних̑ и҆зы́щетъ, и҆ въ прро̑҇чьствїи непразд꙽на бꙋдꙋтъ·
Повѣсть мꙋжїи и҆менитыхъ съблюдетъ, и҆ въ и҆зви́тїе притчь вни́детъ·
Съкровенїе при́т꙽чь и҆зы́щетъ, и҆ въ гада́нїи прит̑чь поживетъ·
Посредѣ вельможъ поживет̑, и҆ прд̑е старѣишинꙋ ꙗ҆вит̑сѧ·
В землю тꙋждихъ ꙗ҆зы́къ проидет꙽ добро б̂о и҆ ѕло̀ въ чл҃цехъ и҆скꙋсѝ.
срд̑це свое дасть ѹ҆тренева́ти къ г҃ꙋ сътвор꙽шемꙋ е҆го и҆ прд̑е вышнимъ помо́литсѧ.
и҆ ѿврьзетъ ѹ҆ста̀ своа на мл҃твꙋ, и҆ ѻ҆ грѣсѣхъ свои҆хъ помо́литсѧ·
А҆ще б̂о г҃ь велїи въсхо́щетъ, дх҃омъ ра́зꙋма и҆сполнит̑сѧ·
То́и ѻдожди́тъ гл҃ы премꙋдрости своеѧ, и҆ въ мл҃твѣ и҆сповс̑҇ѣсѧ гв҃и·
То́и ѹ҆пра́витъ совѣтъ е҆го и҆ хꙋдо́жество, и҆ въ сокровен꙽ных꙽ е҆го размы́шлено вꙋдетъ.
и҆ то́и и҆звѣща́етъ наказа́нїе ѹ҆че́нїѧ е҆го, и҆ зако́номъ завѣта гн҃ѧ похва́литсѧ.
въсхва́лѧтъ ра́зꙋмъ е҆го мно́ѕи, и҆ до́ вѣка не поги́бнет꙽·
Не ѿи́детъ па́мѧть е҆го, і҆ и́мѧ е҆го поживе́тъ в ро́дъ и҆ ро́дъ·
Премд̑ꙋрос̑҇ е҆го повѣствꙋ́ютъ ꙗ҆зы́цы, и҆ хвалꙋ̀ е҆го и҆сповѣсть цр҃ковь·
А҆ще пребꙋдетъ и́мѧ, ѻ҆ста́витъ нежели ты́сꙋщи, и҆ а҆ще преста́нетъ е҆ді́но сътворитъ себѣ·
И҆ е҆ще размы́слив꙽ и҆сповѣмъ, и҆ ꙗ҆́коже лꙋны̀ по́лъ наплънихсѧ·
Послꙋшаите мене прпд̑бнїи сн҃ове, и҆ прозѧбнете ꙗ҆́ко ши́пка прозѧба́ющїа на пꙋстѣ селѣ·
И҆ ꙗ҆́коже лива́нъ дади́те во́ню, и҆ процвѣтет̑ цвт̑ѣ ꙗ҆́ко кри́нъ.
дадите воню и҆ въспо́ите пѣснь, блс̑҇вите г҃а ѻ҆ всем̑ дѣлѣ.
дади́те и́мени е҆го вели́чїе и҆сповѣда́итесѧ въ хвале́нїи е҆го·
пѣсньми ѹ҆стенъ и҆ въ гꙋслех̑, и҆ си́́це речете въ и҆сповѣда́нїи·
дѣ́ла гн҃ѧ всѧ ꙗ҆́ко добра ѕѣ́ло, и҆ всѧ́ко повелѣ́нїе въ врѣмѧ свое бꙋдетъ.
и҆ нѣсть рещи чт̂о с̂е на что̀ с̂е.
все б̂о въ врѣмѧ свое пои҆ска́но бꙋдетъ.
сло́вомъ е҆го бꙋдетъ ꙗ҆́ко и҆сто́чникъ воды̀, и҆ гл҃омъ ѹ҆́стъ е҆го прїѧ́тїѧ во́днаѧ·
Повелѣ́нїемъ е҆го вс̂е бл҃говоле́нїе, и҆ нѣсть и҆же ѹ҆малитъ сп҃сенїе е҆го·
дѣ́ло всѧ́коѧ пло́ти пред̑ ни́мъ, и҆ нѣсть ѹ҆кры́тисѧ ѿ ѻ҆́чїю е҆го·
ѿ вѣкъ на вѣ́къ призрѣ, и҆ ничтоже нѣсть ди́вно пред̑ ни́мъ·
Нѣ́сть рещи что̀ с̂е на что̀ с̂е, все б̂о на потре́бꙋ е҆го създа́на бы́сть·
Блс̑҇венїе е҆го ꙗ҆́ко рѣка навод̑ни́сѧ, и҆ ꙗ҆́ко пото́пъ сꙋшꙋ напо́и.
си́це гнѣ́въ е҆го ꙗ҆зы́цы наслѣдѧт̑, и҆же ѻ҆брати во́дꙋ на сла́нꙋ·
Пꙋти е҆го прпд̑бным̑ пра́ви, та́ко безако́нникомъ претыка́нїѧ·
Бл҃го бл҃гимъ създа́но быс̑҇ и҆спе́рва, та́коже грѣшнымъ ѕл̂о·
Нача́ток̑҇ всѧ́коѧ потребы житїа чл҃ча, ѻ҆́гнь, и҆ вода̀, и҆ желѣ́зо, и҆ со́ль, и҆ крꙋпы, пшени́ца, и҆ мед̑, и҆ мле́ко, кро́вь грозно́вꙋ, и҆ ма́сло и҆ ри́за.
вс̂е с̂е вѣ́рнымъ на бл҃го, си́це и҆ грѣшникомъ преврати́тсѧ на ѕл̂о·
Є҆сть дх҃ъ и҆же създа́нъ бы́сть на ме́сть, и҆ ꙗ҆́ростїю свое҆ю ѹ҆тверди́ша ра́ны и҆мъ·
Въ врѣмѧ конча́нїа и҆злѣют꙽ крѣпость, и҆ ꙗ҆́рость сътво́ршаго их̑ и҆злѣютъ.
ѻ҆́гнь и҆ грд̑а и҆ гла́дъ и҆ смерть, вс̂е сѐ създа́но бы́сть на ме́сть.
зꙋ́бы ѕвѣрїи, и҆ скорпїи, и҆ е҆хи́дни, и҆ ко́пїе м꙽стѧ́щее нечести́выѧ на па́гꙋбꙋ·
в꙽ за́повѣдехъ е҆го възвеселѧ́тсѧ, и҆ по земли на потре́бꙋ ѹ҆гото́вѧтсѧ, и҆ въ вре́мѧ свое не и҆мт̑ꙋ преити сло́ва·
Сего ради и҆сперва ѹ҆твердих̑сѧ, и҆ размыслихсѧ, и҆ въ писа́нїи҆х꙽, ѻ҆ста́вихъ всѧ дѣла гн҃ѧ бл҃га·
и҆ всю потребꙋ въ врѣмѧ е҆го пода́сть.
и҆ нѣсть рещи сїе сего ѕлѣе, все б̂о въ времѧ на ѹ҆гоженїе бꙋдет̑·
и҆ нн҃ѣ всм̑ѣ срд̑цемъ и҆ ѹ҆сты, въспо́ите и҆ блс̑҇вите и҆мѧ гн҃е·
Глв̑҇а, м҃·
Непра́зньство ве́лїе създа́но бы́сть всѧ́комꙋ чл҃кꙋ, і҆ и́го тѧжко на сн҃ехъ а҆да́млѣх̑·
ѿ дн҃е и҆схо́да ѿ чрева мт҃ре и҆хъ, до дн҃е погребе́нїѧ въ мт҃ръ всѣхъ.
помышле́нїѧ и҆хъ и҆ стра́ха срд̑чнаго, примышле́нїе чаѧнїѧ дн҃ь сконча́нїѧ.
ѿ сѣдѧщаго на прс̑҇тлѣ сла́вы, и҆ до смиреннаго на землѝ и҆ пепелѣ.
ѿ носѧщаг̑҇ багрѧнаа и҆ вѣнець, и҆ до носѧщаго льнѧнꙋ·
За́висть и҆ ꙗ҆́рость и҆ мѧтежъ и҆ мол̑҇вꙋ и҆ стра́хъ смр҃ти, и҆ вра́жда и҆ рве́нїе.
и҆ въ врѣмѧ поко́ѧ на ло́жи, со́н꙽ но́щныи и҆змѣни́тъ ра́зꙋмъ е҆го·
Мало ꙗ҆́ко ничесоже на поко́и, и҆ ѿ того въ снѣ ꙗ҆́ко въ дн҃е блюде́нїѧ.
възмꙋще́нїе видѣ́нїемъ срд̑ца свое҆го, ꙗ҆́ко ѹ҆бѣжавъ ѿ лица бра́ни.
и҆ въ вре́мѧ сп҃сенїѧ свое҆го въста, и҆ дивѧ́сѧ ни на е҆диномъ же стра́сѣ съ всѧ́кою пло́тїю ѿ чл҃ка и҆ до ско́та.
и҆ на грѣш꙽ныхъ сед̑ми́цею, к си́мъ смр҃ть и҆ кро́вь и҆ рве́нїе и҆ ѻ҆рꙋж́їѧ нанесе́нїѧ, гла́дъ и҆ съкрꙋше́нїе и҆ ра́ны.
на безако́нных̑ създа́но бы́сть с̂е всѐ, и҆ сихъ ра́ди бы́сть пото́пъ·
Вс̂е е҆ли́ко ѿ землѧ̀ в землю възвраща́етсѧ, и҆ ѿ воды̀ в мо́ре възврати́тсѧ.
и҆ всѧ́къ да́ръ и҆ непра́вда и҆стреби́тсѧ, и҆ вѣ́ра въ вѣ́ки ста́нетъ.
і҆ и҆мѣ́нїе непра́вед̑ныхъ ꙗ҆́ко рѣка и҆схнетъ, и҆ ꙗ҆коже громъ вели́къ въ до́ждь възгрѣмит̑·
Є҆гда разгнетъ рꙋцѣ възвеселит̑сѧ, та́ко престꙋпа́ющеи на конча́нїе и҆щезнꙋтъ·
И҆щадїѧ нечести́вых̑ не ѹ҆мно́жатъ вѣтвїѧ, и҆ коренїѧ нечести́выхъ на кра́и камы́ка т̂ꙋ тнетъ.
на всѧ́кои водѣ и҆ на́ брезѣ рѣки, первѣе всѧ́коѧ травы и҆стръза́ни бꙋдꙋтъ·
Блгд̑ть ꙗ҆́ко ра́и въ блс̑҇венїихъ, а҆ млс̑҇тыни въ вѣ́къ пребꙋ́детъ·
Живо́тъ дово́лнаго дѣлателѧ ѹ҆слади́тсѧ, и҆ паче ѻ҆бо́его ѻ҆брѣта́ѧи съкро́вище·
Ча́да и҆ създа́нїе гра́да ѹ҆твердѧт̑ и҆мѧ, и҆ пач̑҇ ѻ҆бо́его жена непороч̑҇на вменит̑сѧ·
Вино и҆ мꙋсика веселѧ́тъ срд̑це, и҆ пач̑҇ ѻ҆́бое҆го възлюбленїе премꙋдрости·
Свирѣль и҆ прегꙋдницѣ ѹ҆сладѧ́тъ ѹ҆́ды, и҆ паче ѻ҆́бое҆го ꙗ҆зы́къ сла́док̑҇·
Блгд̑ть и҆ добротꙋ възлю́битъ ѻ҆́ко твое, и҆ па́че ѻ҆́бое҆го злак̑҇ сѣмене·
Прїѧ́тель и҆ дрꙋгъ срѣта́юща въ времѧ, и҆ паче ѻ҆́бое҆го жена̀ с мꙋжемъ·
Братїѧ и҆ по́мощь въ времѧ скорби, и҆ паче ѻ҆́бое҆го ми́лостыни и҆зба́вит̑·
Зла́то и҆ сребро̀ поста́вита но́гꙋ, и҆ паче ѻ҆́бое҆го совѣт꙽ и҆зволенъ бꙋдет̑·
И҆мѣнїе и҆ крѣ́пость възноси́та срд̑це и паче ѻ҆́бое҆го страхъ гн҃ь·
Нѣсть въ страсѣ гн҃и ѹ҆маленїѧ, и҆ нѣсть и҆скати на немъ по́мощи·
Страх̑ гн҃ь ꙗ҆ко ра́и бл҃говоненїѧ, и҆ пач̑҇ все́ѧ славы покры е҆го·
Чадо живо́томъ просли́вомъ не ходи, лꙋче е҆сть ѹ́мрѣти нежели проси́ти·
Мꙋжъ зрѧ̀ на чюжꙋ̀ трапезꙋ, нѣсть живот̑ е҆го въ числѣ живота̀.
ѻ҆сквернитъ дш҃ꙋ свою тꙋждими бра́шны, мꙋж꙽ хꙋдогъ и҆ наказа́нъ съхранитсѧ·
Въ ѹ҆стѣхъ же нестыд̑ливаго прошенїе ѹ҆слади́тсѧ, и҆ во чревѣ е҆го ѻ҆́гнь възгоритсѧ·
Глв̑҇а, м҃а·
Ѡ смр҃ти ꙗ҆́ко горка т̂и ес̑҇ па́мѧть, чл҃кꙋ ми́рнꙋ въ и҆мѣнїи е҆го живꙋщꙋ·
Мꙋжеви не пекꙋщꙋсѧ и҆ бл҃го полꙋчнꙋ ѻ҆ всемъ, и҆ е҆щѐ въз꙽мага́ющꙋ прїа́ти пи́щꙋ·
ѽ смр҃ти ꙗ҆́ко до́бръ сꙋдъ тво́и е҆сть чл҃кꙋ требꙋ́ющꙋ, и҆ ѹ҆малѧ́ющꙋсѧ крѣпостїю·
Послѣднею ста́ростїю, и҆ пекꙋщꙋсѧ ѻ҆ всемъ.
и҆ противлѧ́щꙋсѧ и҆ погꙋбльшꙋ трьпенїе·
Не бо́исѧ сꙋда̑ смр҃ти, помѧни пр́ьвыѧ твоа̀ и҆ послд̑ѣнѧѧ·
Се е҆сть сꙋдъ гн҃ь всѧ́кои пло́ти, и҆ почто сѧ ѿметеши бл҃говоленїѧ вы́шнѧго, а҆ще десѧть, а҆ще р҃, а҆ще ҂а҃ лѣтъ, нѣсть во а҆де ѻ҆бличенїѧ живота̀·
Ча́да бꙋдꙋтъ мерзка ча́да грѣшник꙽, и҆ живꙋщаѧ съ преселенїи нечестивыхъ·
Ча́да грѣшнаго поги́бнетъ наслѣдїе, и҆ и҆ съ сѣменемъ их̑ вы́нꙋ поноше́нїе·
ѿц҃а нечести́ва ѻ҆мерзѧ́тъ ча́да, ꙗ҆́ко е҆го ради поноше́нїе прїимꙋть·
Го́ре вамъ мꙋжи нечестивїи, и҆же ѻ҆ста́висте законъ б҃а вы́шнѧго.
І҆ а́ще родите́сѧ на клѧ́твꙋ ро́дитесѧ и҆ а́ще ѹ҆́мрете клѧ́твѣ раздѣлени бꙋдете·
Все е҆ли́ко ѿ земли въ землю пои́деть, та́кожде нечестивїи ѿ клѧ́твы въ па́гꙋбꙋ·
Сѣтова́нїе чл҃къ въ пло́ти и҆хъ, и҆мѧ же грѣш꙽ниче не бл҃го потребит̑сѧ.
пекїисѧ ѻ҆ и́мени, то б̂о тѝ пребыва́етъ пач̑҇ ти́сѧщь съкровища зла́та·
Бл҃га жи́тїѧ числ́о дн҃їи, и҆ до́бро и҆мѧ въ вѣки пребꙋдетъ.
наказа́нїе ми́ром̑ съблюдите ча́да.
премꙋдрость же съкровенна и҆ съкровище не ꙗ҆влено, ка́ѧ по́лза ѿ ѻ́бою е҆го·
Лꙋче е҆сть чл҃къ съкрыва́ѧи бꙋ́иство свое, нежели чл҃къ съкрыва́ѧи премꙋ́дрость свою̀·
Тѣм꙽же ѹ҆бо посрами́тесѧ гл҃омъ мои҆мъ.
нѣсть ѹ҆бо срамъ всѧкъ съхранити бл҃гое, и҆ не всѐ всм̑ѣ вѣрою и҆зволитсѧ·
Стыди́тесѧ ѿц҃а и҆ мт҃ре ѻ҆ блꙋде, и҆ ѿ си́лнаго и҆ властели́на ѻ҆ лжи.
ѿ сꙋдїѧ и҆ кнѕ҃ѧ ѻ҆ съгрѣшенїи, ѿ събо́ра и҆ людїи ѻ҆ безако́нїи.
ѻ҆бещника и҆ дрꙋ́га ѻ҆ неправдѣ.
и҆ ѿ мѣста̀ и҆дѣже живе́ши ѻ҆ тат̑бѣ, і҆ ѿ и҆стин̑҇ны бж҃їа и҆ завѣта, и҆ ѻ҆ пр́ьвосѣда́нїи на трапеѕѣ, и҆ ѿ прельщенїѧ взѧ́тїѧ и҆ даа́нїѧ, и҆ целꙋ́ющихъ ѻ҆ молча́нїи·
И҆ ѿ видѣнїа жены блꙋдницы, и҆ ѻ҆ ѿвращенїи ѿ ѹ҆жична лица̀, и҆ ѻ҆ ѿꙗ҆́тїи ча́сти, и҆ даа́нїи.
і҆ ѻ҆ смотренїи жены̀ мꙋжа́ты и҆ ѿ ѻ҆бльщенїи рабы е҆ѧ̀, и҆ ѻ҆ прихо́де къ ѻ҆́дрꙋ еѧ̀.
ѻ҆ словесехъ поно́сныхъ на́ дрꙋга, и҆ не поноси́ти да́вши·
Глв̑҇а, м҃в·
Нѐ вторити сло́ва ниже послꙋша́нїѧ, и҆ ѿкровенїю та́иныхъ словесъ, и҆ бꙋ́деши стыд̑ливъ і҆ и́стиненъ, и҆ ѻ҆брѣта́ѧ блгд̑ть пред̑ всѧцм̑ѣ чл҃комъ·
Не стыдисѧ ѻ҆ сихъ, и҆ не прїими лица̀ съгрѣшати.
Ѡ҆ зако́нѣ вы́шнѧго и҆ завѣтѣ, и҆ ѻ҆ сꙋдѣ ѻ҆правд̑а́ти нечестива.
ѻ҆ словесѝ ѻ҆бщи и҆ ѻ҆ пꙋтницѣ, и҆ ѻ҆ даа́нїи наслѣдїѧ дрꙋ́га.
і҆ ѻ҆ и́стиннм̑ѣ мѣрилѣ и҆ мѣре.
и҆ ѻ҆ приѻ҆брѣтенїи мно́гаго и҆ мала́го;
и҆ ѻ҆ различенїи проданїа и҆ кꙋпли, и҆ ѻ҆ наказанїи мно́ѕѣ чади, и҆ рабꙋ̀ лꙋкавꙋ ребра̀ ѻ҆кровави́ти.
на женѣ лꙋка́вѣ добро̀ ес̑҇ печа́ть·
І҆ и́дѣже мно́ги рꙋки сꙋть затвори, е҆же а҆ще предаси в число̀ и҆ мѣрꙋ.
даждь и҆ возмѝ вс̂е писа́нїемъ.
ѻ҆ наказа́нїи неразꙋмивѣмъ и҆ бꙋе́мъ, и҆ въ послѣ́днюю ста́рость сꙋжденꙋ съ ю́ношами.
и҆ бꙋ́деши наказа́нъ і҆ и́стиненъ, і҆ и҆скꙋшенъ пред̑ всѧцм̑ѣ живꙋщим̑·
дщ̂и ѿц҃а смотрелива вос꙽хлащена, бдѣнїе и҆ печа́ль ѿго́нит̑ со́нъ.
въ ю҆́ности еѧ̀ никогда̀ презрит̑сѧ, и҆ съ живꙋщ́ими да никогда̀ възненавидѣна бꙋдетъ въ дв҃ьствѣ е҆да̀ ка́ко ѻ҆сквернит̑сѧ, и҆ въ ѿчихъ еѧ̀ непра́зна бꙋдетъ.
и҆ съ мꙋжемъ сꙋщи да не когда̀ престꙋпитъ, и҆ съ живꙋщ́ими да не когда̀ страждь не бꙋ́детъ.
ѻ҆ дщери безъстꙋднѣи сътвори блюденїе, е҆да̀ ка́ко сътвори́ши ѻ҆брадова́нїе врагом̑ и҆ бесѣдꙋ, въ гра́дѣ ѿлꙋчена людїи и҆ посрамитъ т̂ѧ в наро́дѣ мно́ѕѣ·
Не зри на добротꙋ̀ всѧкаго чл҃ка, и҆ посредѣ женъ не съчета́исѧ.
ѿ ри́зъ б̂о и҆схо́дѧтъ мо́леве, и҆ ѿ жены̀ лꙋка́въство.
лꙋче ѕло́ба мꙋж́еска, нежел̂и добродѣтель женьска.
и҆ жена̀ не срамѧ́щаѧсѧ поношенїе·
Помѧнꙋ ѹ҆бо дѣ́ла гн҃ѧ, ꙗ҆́же видх̑ѣ исповѣмъ въ словесх̑ѣ гн҃ихъ дѣ́ла е҆го·
Сл҃нце свѣтѧ́сѧ на всѧ̀ призрѣ, и҆ сла́вы е҆го и҆спо́лнь дѣ́ла е҆го·
Не сътвори л̂и ст҃ымъ г҃ь и҆сповѣдати вс̂ѧ чюдеса̀ е҆го, ꙗ҆же ѹ҆тверди г҃ь вседръжитель, ѹ҆тверди́тисѧ всемꙋ̀ сла́вою е҆го·
Безднꙋ и҆ срд̑це и҆слѣди, и҆ въ коварьствѣ и҆хъ ра́з꙽мысли·
Разꙋмѣ б̂о г҃ь всѧкꙋ совѣсть и҆ призрѣ на зна́менїе вѣ́ка.
възвѣща́ѧ мимошед̑шаѧ и҆ бꙋдꙋщаѧ, и҆ ѿкрыва́етъ слѣдъ та́иных̑·
Не преиде е҆го всѧко помышленїе, и҆ не ѹ҆таит̑сѧ ѿ него̀ ни е҆ді́но сло́во.
величїе премꙋ́дрости своеѧ̀ ѹ҆краси, и҆же ес̑҇ прежде вѣкъ и҆ на́ вѣки.
ни приложис̑҇ ни ѹ҆мали́сѧ и҆ не потребова ни е҆ді́ного совѣтника·
Ко́ль сꙋть вс̂ѧ дѣла е҆го въжделѣна, и҆ до и҆скры е҆сть ви́дѣти·
Вс̂е сїе живетъ и҆ пребыва́етъ на вѣкъ, въ всѣхъ дѣлехъ и҆ вс̂е послꙋша́ет꙽.
и҆ всѐ сꙋгꙋбо е҆дїно пред̑ е҆ді́нем̑, и҆ не сътвори ни е҆ді́ного же скꙋдна·
Є҆ді́но ѿ е҆ді́наго ѹ҆тверди бл҃гаѧ, и҆ кт̂о насытитсѧ зрѧ̀ сла́вꙋ е҆го·
Глв̑҇а, м҃г·
Възвышенїе высоты̀ ѹ҆твер꙽женїе ѻ҆чищенїѧ.
зракъ нб҃си видѣнїем̑ сла́вы, слн҃це въ ꙗ҆вленїе проповѣда́ѧ въ и҆сход̑, съсꙋдъ ди́венъ дѣло вы́шнѧго.
препладенїемъ свои҆мъ и҆сꙋша́етъ странꙋ̀, и҆ прѧ́мо ва́рꙋ е҆го кт̂о постои́тъ.
пещь стрегꙋщїѧ дѣла и҆ вара, трегꙋ́бо слн҃це жегыи горы.
кꙋренїе ѻ҆́гнено дымъ, и҆ простираѧ лꙋча ѻ҆мрача́етъ ѻ҆́чи·
Велїи г҃ь сътвореи е҆го, и҆ словесы свои́ми потща ше́ствїѧ·
И҆ лꙋна̀ всѣм꙽ въ свое времѧ ꙗ҆влѧ́етъ лѣта, и҆ зна́менїе вѣка.
ѿ лꙋны зна́менїе праз̑ника, свѣти́ло ѹ҆малѧ́асѧ на конец̑҇·
Лꙋна̀ по и҆́мени е҆ѧ е҆сть возраста́ющи ди́вно въ и҆змѣненїе.
сосꙋдъ прит̑че́и на высотѣ, на тверди нбс̑҇нѣи свѣтѧ́щисѧ·
И҆ доброта̀ нбс̑҇наѧ сла́ва ѕвѣ́зднаѧ, красота свѣтѧщисѧ на высоких̑ гн҃ихъ·
Словесы ст҃ыхъ ста́нꙋтъ ѻ҆сꙋжденїѧ, и҆ не и҆мꙋтъ ѻ҆слабити въ хранилищихъ и҆хъ·
Виждь дꙋгꙋ̀ и҆ блс̑҇ви сътворшаго и҆̀, ѕѣло кра́сна свѣтенїемъ свои҆мъ.
ѻ҆крꙋжи нб҃о ѻ҆крꙋженїем̑ сла́вы.
рꙋцѣ вы́шнѧго простросте е҆̀.
повеленїем̑ е҆го потщасѧ снѣгъ, и҆ въскорѧе҆тъ молнїѧ сꙋдебъ е҆го·
Сего ради ѿвер꙽зошасѧ съкровища, и҆ па́рѧт̑ ѻ҆́блацы ꙗ҆ко птицы.
величїемъ свои҆мъ ѹ҆крѣпѝ ѻ҆́блаки, и҆ съкрꙋши ка́менїе град̑ное.
и҆ возрѣнїемъ е҆го подви́жат̑сѧ го́ры, и҆ волею е҆го възлѣет̑ ю҆́гъ·
Глас̑҇ гро́ма е҆го поносѝ земли, и҆ бꙋрѧ сѣверова и҆ вихоръ вѣтра·
ꙗ҆ко птица парѧ́щи сы́плет̑ снѣгъ, и҆ ꙗ҆́коже прꙋѕи спаденїа е҆го.
добротѣ бѣ́лости его подивисѧ ѻ҆́ко, и҆ ѻ҆ дожд̑енїи е҆го ѹ҆жаснет̑сѧ срд̑це.
и҆не́и ꙗ҆́ко со́ль на земли сы́плетъ, и҆ сме́ръз꙽шисѧ быва́етъ на концы ѻ҆стра̀.
стꙋден꙽ вѣтръ сѣверъ възвѣ́етъ, и҆ смеръзнетсѧ ледъ ѿ воды̀.
на всѧ́ко събо́рище вод̑ное ѻ҆бита́етъ, и҆ ꙗ҆́ко въ бронѧ ѻ҆блечетсѧ водо́ю.
поѧ́сть го́ры и҆ пꙋсты́нѧ пож꙽жетъ, и҆ ѹ҆гаситъ травꙋ̀ ꙗ҆ко ѻ҆́гнь.
и҆сцѣленїе вс̂е тща́нїемъ м꙽гла, и҆ роса̀ срѣтаю҆щи ѿ ва́ра ѹ҆тишитсѧ·
Мыслїю е҆го преста̀ без꙽дна, и҆ насади е҆и г҃ь ѻ҆токи·
Плава́ющїи мо́ре повѣдают̑ бѣдꙋ е́ѧ̀, и҆ слꙋхомъ ѹ҆шїи на́шихъ чюдимсѧ.
и҆ т̂ꙋ сꙋть сла́вна и҆ чюд̑на дѣ́ла е҆го, пестростїю всѧкаго живот̑наго, ки́тове е҆го ради созда́ни.
бл҃гоѹ҆ха́нїе кончи́на е҆го, и҆ сло́вомъ е҆го сож꙽жетсѧ вс̂е·
Мно́го и҆́мамы рещи и҆ не и҆́мамы постигнꙋти, и҆ сконча́нїе словесъ всего и҆мъ·
Славѧще гдѣ ѹ҆крѣпимсѧ, то́и б̂о великъ паче всѣхъ дѣлъ своих̑·
Стра́шенъ г҃ь и҆ ѕѣ́ло великъ, и҆ чюд̑но моженїе е҆го·
Славѧ́ще г҃а възнесѣтесѧ, е҆ли́ко а҆ще мо́жете приспѣет̑ б̂о и҆ е҆ще.
възносѧщїи е҆го ѹ҆мно́житесѧ крѣпостїю, и҆ не трꙋди́тесѧ не и҆́мате б̂о пости́гнꙋти.
кт̂о вѣдѣ е҆го і҆ и҆сповѣсть, и҆ кт̂о възвеличитъ е҆го ꙗ҆́коже е҆сть·
Мно́го съкровено е҆сть вѧ́щеи сего, ма́ло б̂о видѣхомъ дѣлъ е҆го.
всѐ б̂о сътвори г҃ь, и҆ бл҃говѣрнымъ да́сть премꙋдрость·
Глв̑҇а, м҃д·
Въсхва́лимъ ѹ҆бо мꙋж́а сла́вны, и҆ ѿц҃а на́ша в꙽ бытїи·
Мно́гꙋ славꙋ созда̀ г҃ь величїѧ свое҆го, ѿ вѣ́ка господ̑ствꙋю҆ще въ црс̑҇твїих̑ своих̑.
и҆ мꙋжи и҆менити си́лою, совѣща́ваю҆щїи ра́зꙋмом̑ и҆х꙽·
Провѣща́ющеи въ про̑҇рцѣхъ старѣишины лю́демъ въ мы́слехъ, и҆ ра́зꙋмомъ книж̑ства лю́дїи премꙋдрости словеса.
наказа̑нїемъ их̑ и҆скꙋще гласа мꙋсѷкїиска, и҆ повѣда́юще по́вѣсти въ кни́гах̑·
Мꙋжи бога́тїи дарова́нїи крѣ́постїю ми́рно живꙋще въ жили́щехъ своих̑.
вс̂и сѝ въ родѣх꙽ просла́влени бы́ша, и҆ въ дн҃ехъ их̑ похва́ла·
Сꙋть в них̑ и҆же ѻ҆ста́виша и҆мѧ и҆сповѣ́дати хвалы̀.
и҆ сꙋть и҆же не ѻ҆ста́виша па́мѧти, и҆ погибо́ша ꙗ҆́ко не сꙋщеи.
И҆ бы́ша ꙗ҆ко не бывше, и҆ чада и҆хъ по нихъ, н̂о сїи мꙋжи ми́лостивїи, их̑же пра́вды не забвены бы́ша.
съ сѣменемъ и҆хъ пребꙋдетъ добро̀, наслѣдїе и҆щадїѧ и҆хъ.
въ завѣтѣ е҆сть сѣмѧ их̑, и҆ ча́да и҆хъ их̑ ради, до́ вѣка пребꙋдетъ сѣмѧ и҆хъ, и҆ сла́ва и҆хъ не потребитсѧ.
телеса̀ и҆хъ въ ми́рѣ погребена бы́ша, а҆ и҆мена и҆хъ живꙋтъ в ро́ды·
Премꙋдрость их̑ и҆сповѣдѧ́тъ лю́дїе, и҆ похвалꙋ их̑ и҆сповѣсть цр҃кви·
Є҆нох̑ ѹ҆годи гв҃и, и҆ преложи ѻ҆́браз̑ покаѧ́нїѧ ро́домъ·
Но́е ѻ҆брѣтесѧ съвръшенъ и҆ пра́веденъ, и҆ въ времѧ гнѣ́ва бысть и҆змѣненїе·
Сего ради быс̑҇ ѻ҆ста́нокъ земли, е҆гда̀ бысть потопъ.
завѣти вѣка положени бы́ша̑ с нимъ, да не потреби́тсѧ по томъ всѧ́ка пло́ть·
А҆враа́мъ вели́кїи ѿц҃ъ мно́жествꙋ ꙗ҆зы́къ, и҆ не ѻ҆брѣтесѧ точенъ въ славѣ.
и҆же съблюд꙽ зако́нъ вы́шнѧго, и҆ бысть въ завѣтѣ с ним꙽.
и҆ на пло́ти е҆го поста́ви завѣтъ, и҆ въ напа́сти ѻ҆брѣтесѧ вѣренъ·
Сего ради клѧтвꙋ поста́ви с нимъ, блс̑҇витисѧ ꙗ҆зы́комъ ѻ҆ сѣмени е҆го·
Ѹ҆мно́жити е҆го ꙗ҆́ко перьсть землѝ, и҆ ꙗ҆́ко ѕвѣзды въздвигнꙋти сѣмѧ е҆го.
и҆ ѻ҆блада́ти и҆мъ ѿ мо́рѧ до мо́рѧ, и҆ ѿ рѣкъ до ко́нець земли·
І҆ ѻ҆ и҆сацѣ положи си́це, а҆враа́ма ради ѿц҃а е҆го.
влс̑҇ве́нїе всѣмъ чл҃комъ завѣща.
и҆ преста̀ на главѣ̀ і҆а́ковли.
позна̀ е҆го блс̑҇ве́нїи свои́ми, и҆ дасть е҆го въ наслѣдїе, и҆ ѿлꙋчи ча́сти е҆го на колѣнъ в҃і·
Раздѣли и҆̀ и҆зведе ѿ него мꙋжа млс̑҇ти, ѻ҆брѣта́юща блгд̑ть предъ всѧ́кою пло́тїю·
Глв̑҇а, м҃е·
Възлю́бленна бм҃ъ и҆ чл҃ки моѷсїѧ, е҆мꙋже памѧть въ блс̑҇венїихъ·
Ѹ҆подобил̑҇ е҆сть е҆го сла́вѣ ст҃ыхъ, и҆ възвели́чи е҆го въ стра́сѣ вра́гъ, въ словесѣхъ е҆го ѕна́менїѧ ѹ҆ста́ви·
просла́ви е҆го пред̑ лицемъ цр҃ьскимъ, и҆ заповѣда е҆мꙋ к лю́дем̑ е҆го.
и҆ показа е҆мꙋ сла́вꙋ свою·
Вѣрою и҆ кротостїю ѻ҆ст҃и е҆го, і҆ и҆збра̀ е҆го ѿ всѧкоѧ плоти·
Ѹ҆слы́шанъ сътвори́лъ е҆си е҆мꙋ гласъ свои, и҆ воведе е҆го въ м꙽глꙋ̀.
и҆ дасть е҆мꙋ пред̑ лицемъ людїи, зако́нъ жизни хꙋдо́жества.
наѹ҆чи́ти і҆а́кова завѣтꙋ, и҆ сꙋдба́мъ е҆го і҆и҆л҃ѧ·
А҆а҆ро́на̑ въздви́же ст҃а, подо́бна е҆мꙋ ѿ колѣна левѷина.
поста́ви е҆мꙋ завт̑ѣ вѣка, и҆ дасть е҆мꙋ і҆ере́иство людїи ѹ҆бл҃жилъ е҆го е҆сть ѹ҆краше́нїемъ.
и҆ препоѧса е҆го ѻ҆деждею сла́вы, ѻ҆блече е҆го въ совръше́нїе хвале́нїа ѹ҆твердѝ е҆го сосꙋды крѣпости.
ѻстегньми и҆ поди́ремъ и҆ е҆поми́дою.
и҆ ѻкрꙋжь е҆го ши́пки зла́тыми, и҆ звонцы̀ мно́гими ѻ҆́крс̑҇тъ глашати гла́съ стꙋпа́нїѧ е҆го.
слы́шанъ глс̑҇а твори́ти въ цр҃кви въ памѧть сн҃ом꙽ людїи е҆го.
ѻ҆дежа свѣтла съ зла́том̑ и҆ а҆ки́нъѳомъ, и҆ перфи́рою, дѣлом꙽ пестромъ дѣлано.
словны сꙋда и҆звѣствоваїне и́стины.
и҆стка́но дѣломъ хꙋдожничемъ, ка́менїи многоцѣнными, и҆стꙋка́нїемъ печати свѧзани зла́том̑.
ка́мен꙽наго дѣлателѧ на па́мѧть въ писа́нїю, и҆стꙋка́нно по числꙋ колѣнъ і҆и҆л҃въ·
Вѣнець зла́тъ верхꙋ клобꙋка̀, и҆ ѻ҆блъкше печати ст҃ын꙽ныа.
похвала̑ чс̑҇ти дѣло крѣпости, въжделѣнно ѻ҆чїю краси́ма·
Красна прежде е҆го не быша такова́ѧ до вѣка.
не ѻ҆блечесѧ и҆ноплеменникъ, точїю сн҃ове е҆го, и҆ внꙋчата е҆го прс̑҇но.
жрътвы и҆хъ пожръты по всѧ дн҃и прс̑҇но дважды·
И҆сполни моѷсїи рꙋцѣ, и҆ пома́за е҆го е҆леѻ҆мъ ст҃ым꙽ бысть е҆мꙋ на завѣтъ вѣченъ, и҆ сѣмени е҆го въ дн҃и вѣка·
Слꙋжи́ти е҆мꙋ вкꙋпѣ и҆ сщ҃енъствова́ти, и҆ блс̑҇вити люди е҆го и҆менемъ е҆го·
И҆збра̀ е҆го ѿ всѣхъ живых̑, принести жрътвꙋ гв҃и, ѳимїа́мъ и҆ бл҃гоѹ҆ха́нїѧ на па́мѧть, на ѻ҆цыще́нїе людемъ твои҆мъ.
дасть е҆мꙋ заповѣди своѧ въ вла́сть в завѣтѣ сꙋде́б꙽.
наѹ҆чити і҆а҆кова свѣдѣтельствїем̑ и҆ зако́ном̑ е҆го призва́ти і҆и҆л҃ѧ·
Въста́ша нань тꙋждїи, и҆ възревнова́ша е҆мꙋ в пꙋсты́ни, мꙋжи и҆же ѻ҆ дафа́нѣ, и҆ а҆виро́нѣ, и҆ с немъ коре́ѻв̑҇ въ ꙗ҆́рость и҆ гнѣвъ.
ви́дѣ г҃ь и҆ не бл҃говолѝ, и҆ сконча́шасѧ ꙗ҆́ростїю и҆ гнѣвомъ·
Сътворѝ зна́менїѧ погꙋби́ти ѧ҆̀ ѻ҆гнемъ пла́мене их̑·
И҆ приложѝ а҆а҆ро́нови сла́вꙋ, и҆ дасть е҆мꙋ наслѣдїе, нача́тки жи́тъ раздѣлѝ е҆мꙋ.
хлѣбъ ѹ҆готови на сы́тость прежде, и҆б̂о жрътвы гн҃и и҆зъꙗ҆дѧ́тъ, ꙗ҆́же дасть е҆мꙋ и҆ сѣмени е҆го·
ѻ҆баче въ земли людїи не наслѣдъствитъ, и҆ в людехъ не бꙋдетъ е҆мꙋ ча́сти, то́и б̂о часть твоѧ и҆ наслѣдїе.
и҆ финеѻ́съ сн҃ъ е҆лїаза́ровъ тре́тїи въ сла́вѣ, ревнꙋѧй страхꙋ гн҃ю.
і҆ е҆же посрами́ти лю́ди е҆мꙋ.
блгс̑҇тїю во́лѧ дш҃а е҆го и҆ помоли́сѧ за і҆и҆л҃ѧ·
Сего рад̑и̑ поста́вленъ е҆мꙋ бысть завѣтъ ми́ренъ, повели́тель ст҃ъ лю́демъ свои҆мъ, даже бꙋдет̑ е҆мꙋ и҆ сѣмени е҆го сщ҃енъства вели́чество въ вѣки·
И҆ завѣтъ дв҃дꙋ сн҃ꙋ і҆е҆сеѻ҆вꙋ ѿ колѣна і҆ѹ҆дова, наслѣдъство цр҃ьско сн҃а ѿ сн҃а е҆ді́наго.
достоа́нїе а҆а҆ро́нꙋ и҆ сѣмени е҆го.
да да́сть нам̑ премд̑ꙋрость въ срд̑цих̑ наших̑, сꙋдити лю́демъ е҆го въ правдꙋ.
да не потреби́тсѧ бл҃гаѧ и҆хъ, и҆ сла́ва их̑ в ро́ды и҆хъ·
Глв̑҇а, м҃ѕ·
Крѣпокъ на бра́нехъ і҆сꙋсъ нав꙽вїинъ, и҆ в моѷсїѧ мѣсто бысть въ про̑҇рцѣхъ.
и҆же бы́сть по и҆мени е҆го велик꙽, на сп҃сенїе и҆збран̑҇ных̑ е҆го, м꙽сти́ти въста́ющаѧ нань враги, ꙗ҆́ко да наслѣдъствит̑ і҆и҆л҃ѧ·
И҆же просла́вленъ бы́сть въздвиже́нїемъ рꙋкꙋ е҆го, и҆ внегда̀ простира́ше копїе на гра́ды.
кт̂о преже е҆го си́це ста̀.
сꙋпоста́ты е҆го самъ г҃ь поразѝ, не рꙋкою л̂и е҆го.
въспѧти́сѧ слн҃це, и҆ е҆ді́нъ дн҃ь бысть ꙗ҆́ко дв̂а.
призва̀ вы́шнѧго си́лна, е҆гда ѻ҆скор̑҇блѧ́хꙋ е҆го враѕи ѻ҆́крс̑҇тъ, и҆ послꙋша̑ ег̑҇ велїи г҃ь ка́менїемъ гра́днымъ си́лы крѣпкїѧ.
низверже бра́нь на ꙗ҆зы́ки, и҆ низложе́нїемъ низложѝ проти́вники.
да позна́ютъ ꙗ҆́зы́цы ѻ҆рꙋжїе е҆го, ꙗ҆́ко пред̑ гм҃ъ бра́нь е҆го, въ слѣдъ бо си́лы и҆де вы́шнѧго.
и҆ во́ дни моѷсїѻвы сътвори млс̑҇ть сеи и҆ хале́въ сн҃ъ и҆ефонинъ, ста́ти противꙋ врага, ѹ҆дръжа́ти лю́ди ѿ грѣхъ, и҆ ѹ҆ста́вити ро́потъ лꙋка́въства.
и҆ та̀ дв̂а сꙋщи сп҃сена быста ѿ шести сот̑ ты́сѧщъ пѣш꙽цевъ, въвести их̑ въ наслѣд꙽ствїѧ на́ землю и҆стача́ющи млеко и҆ мед̑·
И҆ дасть г҃ь крѣпость хале́вꙋ, и҆ даже до ста́рости пребы́сть ѹ҆ него.
наи҆ти е҆мꙋ на крѣпость земли, и҆ сѣмени е҆го ѹ҆дръжа̀ наслѣдїе.
ꙗ҆́ко да ви́дѧтъ вси сн҃ове і҆и҆л҃ви, и҆же добро̀ е҆сть ходити въ слѣдъ г҃а.
и҆ сꙋдїѧ кого́ждо и҆менемъ свои҆мъ, е҆ли́ко и҆хъ не любодѣиствова срд̑це, и҆ ели́ко ихъ не ѿврати́шасѧ ѿ г҃а.
бꙋди па́мѧть и҆хъ въ блс̑҇венїи и҆хъ, и҆ ко́сти и҆хъ процветꙋтъ ѿ мѣста свое҆го·
І҆ и҆мѧ и҆хъ пременѧ́емо на сн҃ѣхъ просла́вленыхъ.
Възлюбленъ гм҃ъ свои҆мъ самои҆лъ прро̑҇къ гн҃ь, ѹ҆строи҆вый црс̑҇тво и҆ помаза кнѧѕѧ над̑ людми е҆го.
зако́ном̑ гн҃им꙽ сꙋди со́н꙽мꙋ, и҆ посѣтѝ г҃ь і҆а́кова вѣрою е҆го и҆спыта́нъ бысть про̑҇ркъ.
и҆ позна́нъ бысть въ вѣре вѣренъ видѣнїемъ.
и҆ призва̀ г҃а си́лна е҆гда ѻ҆скорбѧ́хꙋ е҆го вра́ѕи ѻ҆́крс̑҇тъ, приноше́нїем꙽ сꙋща а́гньца млечна.
И възгремѣ с нб҃се г҃ь, и҆ гла́сомъ ве́лїимъ ѹ҆слы́шанъ сътворѝ гласъ свой·
И потребѝ влд̑ки тѷрскїѧ, и҆ всѧ кнѧ́ѕѧ филисти́м꙽скїѧ.
и҆ прежде вре́мене ѹ҆спѣнїа вѣка, свѣдѣтельствова пред̑ гм҃ъ.
ѿ и҆мѣнїи и҆ до сапогъ ѿ всеѧ пло́ти не взѧт̑ не сътворѝ е҆мꙋ поно́са ни е҆дін̑҇ чл҃къ.
и҆ по ѹ҆спѣнїи е҆го про̑҇рчествова̀, и҆ показа̀ цр҃ви смр҃ть свою.
и҆ въздви́же ѿ землѝ гла́съ свой прро̑҇чествомъ, и҆стреби́ти безако́нїѧ людїи·
Глв̑҇а, м҃з·
И по немъ въста̀ наѳа́нъ прро̑҇чествова́ти въ дн҃и двд̑вы<.>
Ꙗ҆́коже тꙋкъ ѿлꙋчен̑҇ ѿ ѻ҆лътарѧ, тако и҆ дв҃дъ ѿ сн҃въ і҆и҆л҃евыхъ.
со львы̀ и҆гра̀ ꙗ҆́ко с козлищи, и҆ с медвѣдьми ꙗ҆́ко съ а́гньцы ѻ҆́вчими въ ю́ности свое́и·
не ѹ҆би́лъ л̂и и҆споли́на, и҆ ѿꙗ҆́ть поноше́нїе ѿ людїи.
е҆гда простретъ рꙋцѣ пра́щею ка́менемъ, низложи́ти горды́ню голїа́довꙋ.
призва́ бо г҃а вы́шнего, и҆ дадѐ въ десницꙋ е҆го крѣпость, низложи́ти чл҃ка си́лна на брани, и҆ въздви́гнꙋти ро́гъ людїи свои҆хъ.
сѐ въ тмах̑ просла́вилъ е҆си, и҆ въсхвали е҆го ѻ҆ блс̑҇венїи е҆гда же носи́ти е҆мꙋ вѣнецъ славы.
г҃ь потреби б̂о враги ѻ҆́крс̑҇тъ и҆ ѹ҆ничижи филисти́млѧны проти́вники до дн҃ешнѧго дн҃е.
съкрꙋшѝ и҆мъ ро́гъ, въ всѧцѣмъ дѣлѣ своем̑ дасть и҆сповѣда́нїе ст҃омꙋ вы́шънемꙋ гл҃ъми славы.
всѣмъ срд̑цем꙽ е҆го въсхвалѝ, и҆ възлюбѝ сътворъшаго и҆̀·
И҆ поста́ви пѣвца̀ прѧмо ѻ҆лтаре́ви, и҆ звꙋкомъ и҆хъ ѹ҆слажа́ти гласъ·
дасть празд̑никомъ бл҃гꙋ лѣпотꙋ, и҆ ѹ҆красѝ времена до кон꙽чины.
въспѣва́ти им̑ и҆́мѧ ст҃ое е҆го, и҆ ѿ ѹ́тра красити въ ст҃илищи<.>
Гь҃ ѿꙗ҆́ть грѣхи е҆го, и҆ възнесе рог̑҇ его въ вѣки·
И҆ дасть е҆мꙋ завѣтъ црс̑҇къ, и҆ прс̑҇тлъ славы въ і҆и҆л҃и·
Посемъ въста сн҃ъ разꙋмиченъ, и҆ сего ради ѻ҆бита̀ въ простран̑҇стве·
Соло́монъ въцр҃исѧ въ дн҃и ми́ра, ꙗ҆́ко б҃ъ препоко́и ѻ҆́крс̑҇тъ.
да съзижд̑етъ домъ въ и҆мѧ е҆го, и҆ да ѹ҆готовитъ ст҃илище въ вѣки.
Ко́ль преѹ҆мꙋдрисѧ въ ю́ности свое́и, и наплънисѧ ꙗ҆́ко рѣка̀ ра́зꙋма, и҆ зем̑лю покры̀ дш҃а твоѧ.
и҆сполнилъ е҆си при́тчамъ гаданїѧ, про́иде и҆́мѧ твое въ ѻ́стровы далече, и҆ възлю́бленъ бысть ѻ҆ ми́рѣ свое҆мъ·
Пѣсньми и҆ прит̑чами и҆ приѻ҆браженїем̑, и въ сказа́нїи подиви́шасѧ страны и҆́менем̑ г҃а б҃а, нареченаго б҃а і҆и҆л҃ева.
събрал̑҇ е҆си ꙗ҆́ко мѣдь зла́то, и҆ ꙗ҆́ко ѻ҆́лово ѹ҆мно́жилъ е҆си сребро̀·
Вдал̑҇ е҆си бока твоѧ̀ жена́мъ, и҆ порабощенъ бысть тѣломъ свои҆мъ и далъ е҆си поро́къ на дш҃ꙋ свою.
и҆ ѻ҆сквернилъ е҆си сѣмѧ свое, нанестѝ гнѣвъ на ча́да своѧ, и҆ ѹ҆милитисѧ ѻ҆ безꙋмїи свое҆мъ.
быти на двою мꙋчительствꙋ, и҆ ѿ е҆фре́ма быти црс̑҇твꙋ непокори́вꙋ·
Гь҃ же не и҆мать ѻста́вити млс̑҇ти свое҆ѧ, и҆ не растлѣет̑ ѿ дѣлъ е҆го.
не и҆стребит̑сѧ ѿ и҆збран̑҇наго е҆го и҆щадїѧ, и҆ сѣмѧ възлюби́вшаго е҆го не и҆зметъ·
І҆а́ковꙋ дасть ѻ҆станокъ, и҆ дв҃дꙋ ѿ него ко́рень.
и҆ почѝ соло́монъ съ ѿц҃ы свои҆ми.
и҆ ѻ҆ста́ви по себѣ ѿ сѣмене свое҆го лю́демъ безꙋмїе, и҆ ѹ҆малѧ́щасѧ ра́зꙋмомъ ровоа́ма, и҆же ѿста́ви лю́ди ѿ совѣта свое҆го·
І҆еровоа́ма сн҃а нава́това, и҆же сътвори́ша съгрѣши́ти і҆и҆л҃ѧ.
и҆ дас̑҇ е҆фремꙋ пꙋть къ грѣхꙋ, и҆ ѹ҆множишасѧ грѣси и҆хъ ѕѣло, ѿстꙋпити и҆́мъ ѿ землѧ̀ свое҆ѧ, и҆ всѧ́ко лꙋкав̑҇ство и҆зыска́ша, дондеже месть прїиде на́ нѧ·
Глв̑҇а, м҃и·
И въста̀ и҆лїѧ про̑҇ркъ ꙗ҆́ко ѻ҆́гнь, и҆ сло́во е҆го ꙗ҆́ко свѣща горѧ́ше.
и҆же нанесѐ на́ нѧ глад̑, и҆ рвенїемъ своим̑ ѹ҆мали ѧ҆̀.
словомъ гн҃имъ ѹ҆дръжа нб҃о, и҆знесѐ та́ко три́щи ѻ҆́гнь·
Ко́ль просла́висѧ чюдесы̀ свои҆ми и҆лїѧ, и҆ кт̂о подобно тебѣ похва́литсѧ.
и҆ въздвиг̑҇ мрътвеца̀ ѿ смр҃ти и҆з꙽ а́да, словом̑ вы́шнѧго·
сведе и҆ цр҃ѧ въ па́гꙋбꙋ, и҆ просла́вленыѧ ѿ ѻ́дръ и҆хъ·
Слы́ша в сиѻ́нѣ ѻ҆бличе́нїе, и҆ в хори́вѣ сꙋдбы̀ ѻ҆правда́нїѧ.
помазаѧи цр҃ѧ на възда́нїе, и҆ про̑҇ркы в нихъ мѣсто по них̑.
Възѧвыисѧ ви́хромъ ѻ҆гненомъ, и҆ колесни́цею ѻ҆́гньныхъ ко́нїи·
Въпи́саны въ ѻ҆бличе́нїе на времена, ѹ҆ста́вити гнѣвъ пред̑ ꙗ҆́ростїю·
и ѻ҆брати́ти срд̑це ѿц҃ъ на сн҃ы, и҆ ѹ҆строи҆ти колѣна і҆а́ковлѧ·
Бл҃жни сꙋть ви́дѣвше т̂ѧ, и҆ любовїю ѹ҆крашени, и҆бо мы̀ жи́тїемъ поживем̑ и҆лїѧ и҆же ви́хромъ покровенъ быс̑҇.
і҆елисе́и и҆сполнисѧ дх҃а е҆го.
и҆ въ дн҃и своѧ не подвизасѧ кнѧ́земъ, и҆ не преможе е҆го никтоже.
всѧко сло́во не превзы́иде е҆го, и҆ въ ѹ҆спенїи про̑҇рчествова тѣло е҆го.
и҆ в животѣ свое҆мъ сътворѝ чюдеса, и҆ на ѹ҆мер̑҇твїи ди́вна дѣла е҆го·
ѻ҆ всемъ сем̑ не раска́ѧшасѧ лю́дїе, и҆ не ѿстꙋпиша̑ ѿ грѣхъ свои҆хъ.
дондеже плене́ни бы́ша ѿ землѧ̀ своеѧ, и҆ расточе́ни бы́ша ѿ земли свое́и по всеи землѝ.
и҆ ѻ҆ста̀ людїи ма́ло, и҆ кн҃ѕь в домꙋ дв҃двѣ.
нѣцїи б̂о ѿ нихъ сътвори́ша̑ ѹ҆годное, и҆ етери ѹ҆мно́жиша грѣхи.
е҆зекїѧ ѹ҆твердѝ град̑ свои, и въведе посреди е҆го во́дꙋ.
и҆скопа̀ желѣзомъ ѻ҆стромъ, и҆ създа̀ сꙋсѣки вода́мъ.
въ дн҃и е҆го взы́иде сенахиримъ, и҆ пꙋстѝ раѱака.
и҆ въздвиже рꙋкꙋ свою на сїѻна.
и҆ възвеличисѧ гордынею свое҆ю.
тогда̀ подвиза́шасѧ срд̑ца и҆ рꙋки и҆хъ, и҆ поболѣша ꙗ҆́ко ражда́ющаѧ·
и҆ помоли́шасѧ г҃ꙋ млс̑҇тивомꙋ, въздѣвше рꙋки своѧ к немꙋ, и҆ ст҃ыи съ нб҃се скоро ѹ҆слы́ша ѧ҆̀.
і҆ и҆збави ѧ҆̀ рꙋкою и҆са́їною·
Поразѝ полки асирїискїѧ, и҆ съкрꙋши ѧ҆̀ а҆гг҃лъ е҆го сътвори́ бо і҆езекїѧ ѹ҆го́дное бв҃и, и҆ ѹ҆крѣписѧ на пꙋтехъ дв҃да ѿц҃а е҆го.
ꙗ҆́же заповѣда і҆саїѧ про̑҇ркъ, ве́лїи и҆ вѣренъ въ про̑҇рцѣхъ·
и҆ въ дн҃и е҆го въспѧти́сѧ слн҃це, и҆ приложѝ живота цр҃еви.
дх҃омъ ве́лїем̑ ви́дѣ послѣднѧѧ, и҆ ѹтѣши сѣтꙋющаѧ въ сїѻ́нѣ до вѣка.
показа̀ бꙋдꙋщаѧ и҆ съкровенаѧ, прежде даже не бꙋдетъ сїѧ·
Глв̑҇а, м҃ѳ·
Па́мѧть и҆ѻ҆сїева въ сложе́нїе ѳимїа́ма, състрое́ное дѣ́ло мѷрова́рника.
въ всѧ́цѣхъ ѹ҆стѣхъ ꙗ҆́ко ме́дъ ѹ҆слади́тсѧ, и҆ ꙗ҆́ко мꙋсическа пѣ́нїѧ в пи́рѣ вина̀.
тои ѹ҆пра́ви всѧ̀ въ ѻ҆браще́нїе людїи, и҆ ѿѧ́тъ ме́рзость безако́нїѧ.
и҆ ѹ҆пра́ви пред̑ гм҃ъ срд̑це е҆го.
въ дн҃и безако́нникъ ѹ҆крѣпи́ пра́вовѣрїе, ра́звѣ дв҃да и҆е҆зекїѧ і҆ѻ҆сїа, вс̂и прегрѣши́ша прегрѣше́нїемъ.
ѻ҆ста́виша б̂о зако́нъ вы́шнѧго е҆гоже и҆ цр҃и і҆ѹ҆́дови ѹ҆клони́шасѧ, да́ша б̂о ро́гъ свои и҆́нѣмъ, и҆ сла́вꙋ свою ꙗ҆зы́кꙋ тꙋждемꙋ·
Пожго́ша и҆збра́нъ гра́дъ ст҃ыни, и ѻ҆пꙋсти́ша пꙋтѝ е҆го, рꙋко́ю і҆еремїиною.
ѻ҆злоби́ша б̂о е҆го, и҆ то́и въ чре́вѣ сщ҃енъ бы́сть прро̑҇къ, и҆скорени́ти и҆ ѻ҆злоби́ти и҆ погꙋбити, та́кожде създа́ти и҆ насади́ти·
І҆езекїиль и҆же ви́дѣ видѣ́нїе сла́вы, ю҆́же показа̀ е҆мꙋ въ ѻ҆рꙋж́їи херꙋви́мъстѣ·
Помѧнꙋ б̂о враги въ бꙋрѣ, и҆ ѹ҆блажи́ти направлѧ́ющих̑ пꙋть.
І҆ ѻ҆бо́юна́десѧте прро̑҇кꙋ да процвѣтꙋтъ ко́сти ѿ мѣстъ свои҆хъ, ѹ҆тѣши б̂о і҆а́кова, и҆зба́вилъ ѧ҆̀ мно́жествомъ крѣ́пости·
Ка́ко възвели́чи зороваве́лѧ, и҆ сеи ꙗ҆́ко печа́ть на деснѣи рꙋцѣ·
Та́кожде і҆сꙋсъ сн҃ъ ѻ҆седе́ковъ, ꙗ҆́же въ дн҃и и҆хъ създа́ста до́мъ, и҆ въздвиго́ста цр҃ковь ст҃ꙋ гв҃и, и҆ ѹ҆готованꙋ въ сла́вꙋ вѣка·
І҆ нее҆мїи на мно́ѕѣ бꙋ́ди па́мѧт̑, и҆ въздви́гшемꙋ намъ стѣ́ны пад̑шаа и҆ поста́вльша две́ри и҆ заво́ры, и҆ въздви́гшаго до́мꙋ распа́лины·
Никтоже създа́нъ бы́сть та́ко ꙗ҆́ко е҆нох̑ на землѝ, то́и б̂о възнесенъ бы́сть ѿ землѧ̀·
І҆ѻ́сифъ же бы́сть мꙋж́ъ во́жд̑ь бра́тїи, и҆ ѹ҆твержд̑е́нїе лю́дем̑.
и҆ ко́сти е҆го посѣще́ны бы́ша.
си́ѳъ и҆ симъ прославле́на бы́ста въ чл҃цх̑ѣ.
и҆ паче всѧ́кого живо́тнаго въ тва́ри а҆да́мъ·
Глв̑҇а, н҃·
Си́монъ сн҃ъ и҆ѻ҆нии́нъ, і҆е҆ре́и вели́кїи, и҆же в животѣ свое҆мъ състро́и до́мъ, и҆ въ дн҃и своѧ̀ ѹ҆тверди цр҃ковь, и҆ тѣмъ ѹ҆твръжд̑е́на бы́сть высота сꙋгꙋ́ба, възд̑виже́нїе высо́ко, на ѻ҆граже́нїи цр҃квнм̑ѣ.
въ дн҃и е҆го ѹ҆ма́лишасѧ сосꙋ́ди вод̑нїи, ꙗ҆́ко ро́въ смире́нїе мо́рско.
пекїисѧ ѻ҆ лю́дехъ свои҆хъ ѿ паде́нїа.
і҆ ѹ҆крѣпи градъ въ ѻ҆бсѣда́нїи.
и҆же просла́вленъ е҆сть в꙽ мѧтежи людїи, въ и҆схо́дѣ до́мꙋ катапета́змы.
ꙗ҆́ко ѕвѣзда ѹ҆́тренѧ посреди ѻ҆́блакъ, а҆ки лꙋна̀ по́лна въ дн҃и, и҆ ꙗ҆́ко сл҃нце сїѧ́а на цр҃ковь вы́шнѧго.
и҆ а҆ки дꙋга свѣтѧ́щисѧ на ѻ҆́блацѣхъ сла́вы, ꙗ҆́ко цвѣтъ ши́пки въ дни кла́са, и҆ ꙗ҆́ко кри́нъ прї и҆схоже́нїи воды, и҆ ꙗ҆́ко стебло лива́ново въ дн҃и жа́твы.
и҆ ꙗ҆́ко ѻ҆́гнь и҆ лива́нъ въ кади́лницы.
и҆ ꙗ҆́коже съсꙋ́дъ зла́тъ че́рствъ, ѹ҆краше́нъ всѧ́цѣмъ ка́менемъ мно́гоцѣ́ннымъ, и҆ ꙗ҆́ко ма́слина и҆зносѧ́щи пло́дъ, и҆ ꙗ҆́ко кѷпарисъ възраста́ѧи до ѻ҆́блакъ, е҆гда̀ прїѧ́ти е҆мꙋ ѻ҆де́ждꙋ сла́вы, и҆ е҆гда̀ ѻ҆блачи́тсѧ въ соверше́нїе хвале́нїѧ, на въсхоже́нїе ѻ҆лтарѧ̀ ст҃го, просла́ви ѻ҆бложе́нїѧ ст҃илища.
внегда̑ принѧ́ти ѹ҆́ды ѿ і҆е҆ре́искъ рꙋ́къ, и҆ самъ стоа̀ при ѹ҆́глѣ ѻ҆лтарѧ̀, ѻ҆́крс̑҇тъ е҆го вѣне́цъ бра́тїи.
ꙗ҆ко прозѧбе́нїе ке́дръско в лива́нѣ, и҆ ѻ҆быидо́ша е҆го ꙗ҆́ко сте́блїе фини́ково, и҆ вс̂и сн҃ове а҆а҆ро́ни въ сла́вѣ и҆хъ.
и҆ приноше́нїе гн҃е въ рꙋка́хъ и҆хъ пред̑ всѣмъ събо́ромъ і҆и҆л҃евомъ, и҆ съверше́нїе слꙋжи́тель на ѻ҆лтарихъ, и҆ ѹ҆краси́ти приноше́нїе вы́шнѧго вседержи́телѧ.
простре на ча́шꙋ рꙋ́кꙋ свою, и҆ взѧ̀ ѿ кро́ве гре́зд̑ныѧ, възлїѧ́ на ѻ҆снова́нїе ѻ҆лтарѧ̀ въ во́ню бл҃гоѹ҆ха́нїѧ вы́шнемꙋ всѣхъ цр҃ви·
Тогда̀ възопи́ша сн҃ове а҆а҆рони трꙋбами кова́ными въстрꙋби́ша, ѹ҆слы́шанъ сътвори́ша глас̑҇ вели́къ, на па́мѧть пред̑ вы́шнимъ·
тогда̀ вс̂и лю́дїе ѻ҆́бще приспѣша, и҆ падо́ша ни́цы на землѝ, поклони́тисѧ гв҃и и҆хъ вс̂едръжи́телю б҃ꙋ вы́шнемꙋ·
И҆ въспѣша пѣвцы гла́сы свои҆ми, въ мно́ѕѣ до́мꙋ ѹ҆слади́ша пѣ́нїе, и҆ моли́шасѧ лю́дїе г҃ꙋ вы́шнемꙋ, мл҃твою премлс̑҇тивомꙋ.
до́ндеже скончает̑сѧ красота гн҃ѧ, и҆ слꙋжбꙋ свою сконча·
Тогда̀ съше́дъ въздви́же рꙋко́ю свою на ве́сь събо́ръ сн҃овъ і҆и҆л҃евъ, вда́ти гв҃и блс̑҇венїе ѿ ѹ҆стенъ своих̑, і҆ и҆мене́мъ е҆го похвали́тисѧ·
и҆ повтори поклони́тисѧ.
прїѧ́ти блс̑҇ве́нїе ѿ вы́шнѧго.
и҆ нн҃ѣ блс̑҇вите б҃а ѻ҆ всемъ.
творѧ́щемꙋ ве́лїѧ всѣхъ возд̑виза́ющемꙋ дн҃и на́ши и҆з ложе́снъ и҆ творѧ́щемꙋ съ на́ми по ми́лости е҆го·
И҆ даждь им̑ весе́лїе срд̑ца, и҆ да бꙋдетъ ми́ръ въ дн҃и на́ша въ і҆и҆л҃и ꙗ҆́кож̑ дн҃и вѣ́ка.
да ѹ҆вѣри́тъ с на́ми млс̑҇ть свою, и҆ въ дн҃и своѧ и҆зба́витъ н̂ы·
дв̂а ꙗ҆зы́ки мерзѧ́ста дш҃и мое́и, а҆ тре́тїи нѣсть ꙗ҆зы́къ·
Сѣдѧ́щїи на гора́хъ сама́рьскихъ и҆ филисти́мы, и҆ людїе бꙋ́и живꙋщїи в сики́мѣхъ·
Наказа́нїе ра́зꙋма и҆ хꙋдо́жества начерта́хъ въ кни́ѕѣ се́и, і҆сꙋсъ сн҃ъ сира́ховъ, а҆леа҆за́рꙋ і҆ерс̑҇лимлѧнинꙋ, и҆же ѻ҆дожди премꙋдрость срд̑ца свое҆го·
Бл҃женъ и҆же в сих̑ поживе́тъ, і҆ и́же ѧ҆̀ положитъ въ срд̑цы свое҆мъ ѹ҆премꙋдритсѧ·
А҆ще б̂о ѧ҆̀ сътво́ритъ ѻ҆ всемъ ѹ҆крѣпит̑сѧ, ꙗ҆́ко свѣтъ гн҃ь слѣдъ его·
Мл҃тва і҆сꙋса, сн҃а сира́хова·
Глв̑҇а, н҃а·
Всповѣм꙽ ти сѧ г҃и цр҃ю, и҆ въсхвалю тебѐ б҃а сп҃са мое҆го, і҆ и҆сповѣда́юсѧ и҆мени твое҆мꙋ, ꙗ҆́ко покрови́тель и҆ помо́щникъ быс̑҇ м̂и.
і҆ и҆скꙋпѝ плот̑ мою ѿ пагꙋбы и҆ ѿ сѣти клеветы ꙗ҆зы́чныа, и҆ ѿ ѹ́стъ дѣлающа лжꙋ̀, и҆ пред̑стоѧ́щим̑ бы́сть помо́щникъ.
и҆зба́ви м̂ѧ по мно́зеи млс̑҇ти и҆мени твое҆го ѿ рыка́нїа гото́ваг̑҇ на ло́в꙽, і҆ и҆з рꙋки и҆́щꙋщих̑ дш҃а мое҆ѧ, и҆ ѿ мно́гих̑ ско́рбїи ꙗ҆́же и҆мх̑ѣ ѿ мно́гих̑ стꙋжа́нїи ѻ҆гненых̑хъ ѻ҆́крс̑҇тъ, и҆ средѣ ѻ҆гнѧ не съжегох̑сѧ, и҆з глꙋби́ны чрѣва а҆́дова, и҆ ѿ ꙗ҆зы́ка нечи́ста, и҆ словес̑҇ ложенъ, къ цр҃ю ѻ҆блъга́нїѧ ꙗ҆зы́ка непра́ведна.
приближи́сѧ и҆ до смр҃ти дш҃а моѧ, и҆ живо́тъ мои б̂ѣ бли́зꙋ а҆да.
и҆ ѻ҆бдержа́ша м̂ѧ всю́дꙋ, и҆ не бѣ̀ сп҃са́ющаго, възрѣхъ на по́мощь чл҃чю и҆ не бѣ̀.
и҆ помѧнꙋхъ млс̑҇ть твою г҃и, и҆ дѣѧ́нїе твое е҆же ѿ вѣка.
ꙗ҆́ко и҆зима́еши терпѧ́щихъ т̂ѧ г҃и, и҆ сп҃аса́еши и҆хъ ѿ рꙋ́къ вра́гъ.
и҆ възнесо́хъ ѿ землѝ моле́нїе мое, и҆збавле́нїѧ ради смр҃тнаго помолих̑сѧ.
и҆ призвах̑ б҃а, ѿц҃а г҃а мое҆го, не ѻ҆ста́ви ти мене въ дн҃и ско́рби, въ вре́мѧ гръдых꙽ без꙽ по́мощи.
и҆ въспо́ю и҆мѧ твое непреста́нно и҆ въспо́ю тѧ и҆сповѣда́нїемъ.
и҆ ѹ҆слы́шалъ е҆си мл҃твꙋ мою, спс̑҇лъ бо м̂ѧ е҆си ѿ па́гꙋбы, и҆зѧ́тъ м̂ѧ ѿ вре́мене лꙋка́вна.
сего ради и҆сповѣм꙽ ти сѧ и҆ въсхва́лю т̂ѧ, и҆ блс̑҇влю и҆мѧ твое г҃и·
Є҆ще ю҆́нъ сы́и пр́ьвѣе да́же не заблꙋжꙋсѧ, и҆ска́хъ премꙋдрости ꙗ҆́вѣ въ мл҃твѣ мое́и, прд̑е цр҃ковїю моли́хсѧ ѻ҆ не́и.
и҆ до послѣдѣ пои҆щꙋ е҆ѧ̀, ѿ цвѣтъ ꙗ҆́ко съзрѣ́юща гро́зда.
възвесели́сѧ срд̑це мое ѻ҆ не́и, на́иде нога моѧ въ пра́вости, ѿ ю҆́ности мое҆ѧ из̑слѣдихъ е҆ѧ̀.
приклонихъ ма́ло ѹ҆́хо мое и҆ прїѧ́х꙽, и҆ мно́го ѻ҆брѣто́хъ себѣ наказа́нїе, прет꙽кнове́нїе бысть м̂и е҆ѧ̀ ради.
да́ющемꙋ м̂и премꙋ́дрость въздам̑ сла́вꙋ, размы́слихъ бо твори́ти ю҆̀, и҆ позавидх̑ѣ бл҃гомꙋ и҆ не постыжꙋсѧ.
сварисѧ дш҃а моѧ ѻ҆ ню̀, и҆ въ сътворе́нїи мое҆мъ и҆спыта́хъ.
рꙋцѣ мои въздѣхъ на высотꙋ.
и҆ невѣдѣ́нїѧ е҆ѧ̀ съразꙋмѣхъ.
дш҃ꙋ мою и҆спра́вих̑ на ню.
срд̑це стѧжа́хъ с не́ю и҆сперва.
и҆ ѻ҆цыщенїемъ ѻ҆брѣто́хъ ю҆̀.
сего ради не ѻ҆ставленъ бꙋ́дꙋ.
и҆ ѹ҆тро́ба моѧ̀ смѧтесѧ и҆́щꙋщи е҆ѧ̀, тѣм꙽же стѧжа́хъ бл҃гостѧжа́нїе.
да́сть г҃ь ꙗ҆зы́къ мои мздꙋ м̂и, и҆ тѣмъ въсхва́лю е҆го.
приближи́тесѧ къ мнѣ ненаказанїи, и҆ въдвори́тесѧ в домꙋ наказа́нїѧ, ꙗ҆́ко лиша́тисѧ гл҃ете въ си́хъ.
и҆ дш҃а ваша жа́ждт̑ꙋ ѕѣло, ѿверзох̑ ѹ҆ста моѧ и҆ гл҃ах̑.
стѧжите себѣ без̑ сребра мд̑ꙋрость, и҆ вы́ю вашꙋ под̑ложи́те под̑ и҆́го е҆ѧ̀.
и҆ да прїимет̑ дш҃а ваша наказа́нїе, бли́зъ е҆сть ѻ҆брѣсти ю҆̀.
ви́дите ѻ҆чи́ма вашима ꙗ҆́ко мало трꙋдих̑сѧ, и҆ ѻ҆брѣтох꙽ себѣ мно́гъ поко́и.
причасти́тесѧ наказа́нїѧ мно́гом̑ число́мъ сребра, и҆ мно́гом̑ зла́томъ стѧжи́те ю҆̀.
да възвеселит̑сѧ дш҃а ва́ша въ млс̑҇ти е҆го и҆ да не постыди́тесѧ въ хвале́нїи е҆го, съдѣла́ите дѣло ваше прежд̑е времене, и҆ да́сть м꙽здꙋ вашꙋ въ времѧ свое·
Конецъ кни́гъ і҆сꙋса сн҃а сира́хова.
и҆́мать в себѣ глв̑҇а, н҃а·