І҆СА́ИꙖ ПРРо̑КЪ

ГЛАВА̀ ПЄр̑ВАꙖ

Видѣнїе е҆же ви́дѣ і҆саїа сн҃ъ а҆мо́совъ.
е҆же ви́дѣ на і҆ѹ҆де́ю, и҆ на і҆ерс̑҇ли́мъ.
въ дн҃и ѻ҆ѕїевы, і҆ѻ҆а҆ѳа́мовы, и҆ а҆ха́зовы і҆ е҆зекїины, и҆же црс̑҇твова́ша въ і҆ѹ҆де́и·

Слы́ши нб҃о, и҆ внꙋши земле, ꙗ҆́ко г҃ь гл҃а·

Сн҃ы родихъ, и҆ възнесо́хъ.
сїи же ѿвръго́шасѧ менѐ·

Позна̀ во́лъ стѧжа́вшаго и҆̀, і҆ ѻ҆селъ ꙗ҆́сли господи́на свое҆го, і҆и҆л҃ь же мене не позна̀, и҆ лю́дїе моѝ не разꙋмѣша менѐ·

ѽ лю́тѣ, страно грѣшна.
лю́дїе по́лни грѣховъ.
племѧ̀ ѕло́е, сн҃ове безако́ннїи.
ѻ҆ста́висте г҃а, и҆ раз꙽гнѣ́васте ст҃го і҆и҆л҃ева.
ѿврати́стесѧ воспѧ́тъ.
чт̂о и҆ е҆щѐ ѹ҆ꙗ҆звлѧ́етесѧ, прилага́юще безако́нїѧ·

Всѧ́ка глава въ бо́лѣзнь, и҆ всѧ́ко срд̑це в печа́ль.
ѿ но́гꙋ и҆ до главы̀, нѣсть в немъ цѣ́лости.
ни стрꙋпꙋ, н̂и ꙗ҆́звѣ, ниже ра́нѣ гни́ющи, нѣсть пластыра̀ приложи́ти, н̂и ма́сла н̂и ѻ҆бѧза́нїа·

Землѧ̀ ва́ша пꙋ́ста, гра́ди ваши ѻ҆гнем̑ пож꙽жени, странꙋ̀ вашꙋ пред̑ вами чю́ждїи поꙗ҆да́ют꙽.
и҆ ѻ҆пꙋстѣ́етъ расы́пана ꙗ҆́ко в расы́панїи вра́гъ.
ѻ҆ста́вит̑сѧ дщ̂и сїѻ́нѧ ꙗ҆́ко кꙋщ́а въ виногра́дѣ, и ꙗ҆́ко страж̑ба во ѻ҆́вощи, ꙗ҆́ко град̑ вою́емъ·

І҆ а҆ще не бы̀ г҃ь саваѻ́ѳ꙽ ѻ҆ста́вилъ нам̑ сѣмене.
ꙗ҆́ко содо́ма бы́ли бы́хомъ.
и҆ гомо́рѣ ѹ҆подоби́лисѧ бы́хомъ·

Слы́шите сло́во гн҃е кнѧ́ѕи содо́мъстїи.
внемли́те гл҃ъ бж҃їи лю́дїе гомо́рстїи·

Чт̂о ми мно́жество жрътвъ вашихъ гл҃етъ г҃ь.
по́лнъ е҆смь вс̂есож꙽женїѧ ѻ҆́внѧ, и҆ ло́ѧ а҆́гньча, и҆ кро́ве ю҆́ньча и҆ ко́злїѧ не хощꙋ.
і҆дѣ́же а҆ще прихо́дите ꙗ҆ви́ти ми сѧ·

Кт̂о бо в꙽зыска сих̑ ѿ рꙋќъ ва́ших̑.
ходи́ти по дворꙋ мое҆мꙋ не прило́жите·

І҆ аще принесете м̂и мꙋкꙋ̀ пшени́чнꙋ всꙋе.
кади́ло ме́рьзость м̂и ес̑҇·

Новомѣсѧчїѧ ва́ша, и҆ сꙋ́боты, и҆ вели́ка дн҃е не прїемлю.
по́стъ и҆ праз̑нованїѧ и҆ праз̑ники ва́ша воз̑ненавидѣ дш҃а моа·

Бы́сте м̂и до сытости.
ксемꙋ̀ не ѹ҆и҆мꙋ грх̑ѣ ва́ших̑·

Є҆гда̀ воздви́гнете рꙋ́цѣ ваши къ мнѣ̀, ѿвращꙋ ѻ҆́чи своѝ ѿ васъ.
и҆ а́ще ѹ҆мно́жите мо́льбꙋ, не послꙋш́аю васъ.
рꙋ́ки б̂о ваша по́лны кро́ве·

И҆змы́итесѧ и҆ чи́сти бꙋдете, ѿи҆мѣте лꙋка́въство ѿ дш҃ъ ваших̑ пред̑ ѻ҆чима мои҆ма·

престанѣте ѿ злоб̑҇ ваших̑·

Наѹ҆чи́тес̑҇ до́бро твори́ти.
възыщите сꙋ́да.
и҆збави́те ѻ҆биди́маго, сꙋдите си́рꙋ и҆ ѻ҆правдите вдови́цꙋ·

И҆ прїидѣте да сѧ съвопрашаем̑ гл҃етъ г҃ь.
и҆ а́ще бꙋдꙋт꙽ грѣси ва́ши ꙗ҆́ко чрьвле́ни, т̂о ꙗ҆́ко снѣгъ ѹ҆бѣлю ѧ҆̀.
и҆ а́ще л̂и бꙋ́дꙋтъ ꙗ҆ко багоръ, т̂о ꙗ҆́ко во́лнꙋ ѹ҆бѣлю·

И҆ а҆ще хо́щете и҆ послꙋша́ете мене, бл҃гаѧ зем̑ли снѣсте.
а҆ще ли же не хо́щете ни послꙋша́ете мене, мечь вы поꙗ҆́сть.
ѹ҆ста б̂о гн҃ѧ гл҃аша с̂и·

Како бы́сть блд̑ꙋница град̑ вѣрныи сїѻнъ по́лнъ сꙋда, в нем̑же пра́вда ѹ҆спѐ.
в нем̑ же нн҃ѣ ѹ҆бїицы·

Сребро̀ ва́ше не потребно, корче́мници твоѝ мешают̑ вино̀ с водо́ю·

Кнѧѕи твоѝ не покарѧ́ют̑сѧ ѻ҆бещницы та́тем꙽, лю́бѧще м꙽зд̑ꙋ погонѧ́ще ѿдаа́нїе.
си́ротамъ не сꙋдѧ́ще, и҆ сꙋ́дꙋ вдови́цъ не вне́млюще·

Сего ради с̂е гл҃етъ влд̑ка г҃ь саваѻ́ѳъ.
ѽ горе крѣпким̑ въ і҆и҆л҃и.
не преста́етъ б̂о ꙗ҆́рость моѧ на проти́вныѧ, и҆ сꙋдъ ѿ вра́гъ мои҆хъ сътворю̀·

И҆ наведꙋ рꙋкꙋ мою̀ на тѧ и҆ разъжегꙋ въ чистотꙋ̀.
не покарѧ́ю҆щаѧсѧ погꙋблю̀.
и҆ ѿи҆мꙋ всѣхъ безако́нныхъ ѿ тебе, и҆ всѣхъ гръдыхъ смирю̀.
и҆ приста́влю сꙋдїѧ твоѧ ꙗ҆́ко и҆ прежде, и҆ совѣтники твоѧ ꙗ҆́ко и҆спе́рва·

И҆ по си́хъ прозове́шисѧ гра́дъ пра́вед̑ныи, ма́ти градовомъ вѣрныи сїѻ́нъ·

Съ сꙋдомъ б̂о сп҃сꙋтсѧ плѣ́нницы е҆го, и҆ съкрꙋшат̑сѧ безако́ннїи и҆ грѣшницы въкꙋпѣ.
и҆ ѻ҆ста́вившеи г҃а сконъча́ютсѧ·

Зане́ же постыдѧ́тсѧ ѻ҆ и́долѣхъ своихъ, ꙗ҆́же са́ми смышлѧхꙋ·

И҆ посрамѧт̑сѧ ѻ҆ садх̑ѣ и҆хъ ꙗ҆́же възлюбиша.
бꙋдт̑ꙋ б̂о ꙗ҆́ко дꙋбъ ѿметнꙋвъ своѧ̀ ли́ствїѧ, и҆ ꙗ҆́ко врьтоград̑ воды̀ не и҆мы́и·

И҆ бꙋдет̑ крѣпость их̑, ꙗ҆ко паздерїе из̑гребное, и҆ дѣла и҆хъ ꙗ҆́ко и҆́скры ѻ҆́гнены.
и҆ съж꙽гꙋтсѧ безако́н꙽ницы и҆ грѣшницы въкꙋпѣ, и҆ не бꙋдетъ ѹ҆гаша́ѧй·

Глв̑҇а, в҃·

Сло́во бы́вшее къ і҆саїѝ сн҃ꙋ а҆мо́совꙋ, ѻ҆ і҆ѹ҆де́и, і҆ ѻ҆ і҆е҆рлс̑҇имѣ·

Ꙗ҆́ко бꙋдетъ въ послѣднѧѧ дн҃и ꙗ҆вле́на гора̀ гн҃ѧ·

И҆ до́мъ бж҃їи на врьсѣхъ го́рьскихъ, и҆ възвысит̑сѧ превы́ше хо́лмовъ·

И҆ прїидꙋтъ на ню̀ вс̂и ꙗ҆зы́цы, и҆ по́идꙋтъ лю́дїе мно́ѕи, и҆ рекꙋтъ.
прїидѣте да в꙽зы́идемъ на горꙋ̀ гн҃ю, и҆ в до́мъ б҃а і҆а́ковлѧ.
и҆ възвѣсти́тъ нам̑ пꙋть свои, и҆ по́идем̑ по немꙋ̀·

ѿ сїѻ́на б̂о и҆зы́идетъ зако́нъ, и҆ сло́во гн҃е и҆з꙽ і҆ерс̑҇лі́ма.
и҆ раз꙽сꙋ́дитъ по́средѣ ꙗ҆зык̑҇ и҆ ѻ҆бличи́тъ лю́ди мно́ги·

И҆ раскꙋю́тъ меча̀ своѧ̀ на лемеша̀, и҆ ко́пїѧ своѧ̀ на срьпы̀.
и҆ не въз꙽дви́гнꙋтъ ꙗ҆зы́къ на ꙗ҆зы́къ меча̀, и҆ не навы́кнꙋтъ ктомꙋ̀ ратова́тисѧ·

И҆ нн҃ѣ до́ме і҆а́ковль, прїидѣте да ходимъ свѣтомъ гн҃имъ.
и҆зведѐ бо лю́ди своѧ̀ до́мъ і҆а́ковль·

Ꙗ҆́ко напо́лнисѧ страна̀ их̑ ꙗ҆́коже и҆ пре́жде вол꙽хвова́нїѧ, ꙗ҆́ко и҆ноплеме́н꙽никъ, и҆ чада и҆ноплеме́н꙽на роди́шасѧ и҆м꙽·

Напо́лни бо сѧ страна̀ и҆хъ сребра̀ и зла́та, и҆ не бѧ́ше числа̀ съкро́вищ꙽ и҆хъ.
и҆ напо́лнисѧ землѧ̀ их̑ ко́неи, и҆ не бѧ́ше числа̀ ѻ҆рꙋжїю и҆х·

И҆ напо́лнисѧ землѧ̀ мр́ьзостеи дѣлъ рꙋ́кꙋ и҆хъ, и҆ поклони́шасѧ ꙗ҆́же сътвори́ша прь́сты и҆хъ.
преклони́сѧ чл҃къ, и҆ смири́сѧ мꙋжъ.
и҆ не претрьплю̀ и҆мъ·

И҆ нн҃ѣ вълѣзете в꙽ ка́менїе, и҆ съкры́етесѧ в꙽ зе́млю, ѿ лица̀ страха гн҃ѧ, и҆ ѿ сла́вы крѣпости е҆го.
е҆гда въста́нетъ погꙋби́ти зе́млю·

ѻ҆́чи б̂о гн҃и высо́ци, а҆ чл҃къ смире́нъ.
и҆ ѻ҆бни́зѣетъ высота̀ чл҃ча, и҆ възнесетсѧ г҃ь е҆ді́нъ въ дн҃ь ѻ́нъ·

дн҃ь б̂о г҃а саваѻ́ѳа на всѧ́кого досади́телѧ и҆ горди́ваго, и҆ на всѧ́каг̑҇ высо́каго, и҆ на высо́це глѧ даю҆щаго, и҆ смирѧт̑сѧ.
и҆ на всѧ́къ ке́дръ лива́ньскїи высо́къ и҆ превознесе́нъ.
и҆ на всѧ́къ дꙋбъ желꙋ́дѧ васа́ньска.
и҆ на всѧ́кꙋ горꙋ̀ высокꙋ, и҆ на всѧ́къ хо́лмъ высо́къ.
и҆ на всѧк̑҇ сто́лпъ высокъ, и҆ на всѧ́кꙋ стѣнꙋ̀ высо́кꙋ.
и҆ на всѧ́къ кора́бль морьскїи и҆ на всѧко видѣнїе доброты̀ корабле́и·

И҆ смири́тсѧ всѧкъ чл҃къ, и҆ падет̑сѧ высота̀ чл҃ча.
и҆ възнесет̑сѧ г҃ь е҆дин̑҇ въ дн҃ь ѻ҆́нъ·

И҆ рꙋкотворе́наѧ всѧ̀ съкры́ютъ, вне́сше в пеще́ры и҆ въ рас꙽сѣ́лины ка́менїѧ, и҆ в꙽ верте́пы зе́мныѧ, ѿ лица̀ стра́ха гн҃ѧ, и҆ ѿ сла́вы крѣпости е҆го.
е҆гда въста́нетъ погꙋби́ти зе́млю·

В то́и дн҃ь и҆зло́житъ чл҃къ мр́ьзостнаѧ своѧ̀ сребренаѧ и҆ зла́таѧ.
ꙗ҆́же сътворѝ покланѧ́тисѧ сꙋ́етнымъ, и҆ нетопыремъ но́щным꙽.
ꙗ҆́ко влѣсти в рас꙽сѣлины твердаго ка́мене, и҆ въ пещеры ка́менїѧ, ѿ лица̀ страха гн҃ѧ, и҆ ѿ сла́вы крѣ́пости е҆го, е҆гда въста́нетъ погꙋби́ти зе́млю·

Ѹ҆ста́вити вамъ ѿ чл҃ка, е҆мꙋже е҆сть дыха́нїе в но́здрѧхъ.
ꙗ҆́ко преминѧ́етсѧ симъ·

Глв̑҇а, г҃·

Се̂ влд̑ка г҃ь саваѻ́ѳъ, ѿи҆мет̑ ѿ і҆ѹ҆де́ѧ и҆ ѿ і҆ерс̑҇лима крѣпкаго, и҆ крѣ́пкꙋю си́лꙋ хлѣ́ба, и҆ си́лꙋ воды̀, и҆споли́на и҆ крѣ́пка, и҆ чл҃ка ра́тника, и҆ сꙋдїю и҆ прро̑҇ка, и҆ смотрели́ва, и҆ ста́рца, и҆ пѧтьдесѧт̑ника, и҆ ди́вна совѣтника, и҆ премꙋдра хꙋдо́жника, и҆ ра́зꙋмна послꙋш́ника.
и҆ поста́влю ю҆́ноша кнѧ́ѕѧ и҆хъ, и҆ рꙋга́тели ѻ҆блада́ютъ и҆́ми·

И҆ падт̑ꙋ лю́дїе чл҃къ къ чл҃кꙋ, и҆ чл҃къ къ бли́жнемꙋ свое҆мꙋ.
ѻ҆бразит̑сѧ ѻ҆́трокъ ѻ҆ ста́рца, и҆ без̑че́стныи ѻ҆ чс̑҇тнм̑ѣ·

Ꙗ҆́ко и҆ме́тсѧ чл҃къ бра́та свое҆го, и҆ при́сныи ѿц҃а свое҆го, гл҃ѧ, ри́зꙋ и҆́маши, старѣ́ишина намъ бꙋ́ди, и҆ пи́ща моѧ̀ ѿ тебѐ да бꙋдетъ.
и҆ ѿвѣща́въ в꙽ то́и дн҃ь речет̑, не бꙋдꙋ старѣ́ишина, нѣ́сть б̂о в домꙋ̀ моем̑ ни хлѣ́ба ни ри́зы.
не бꙋ́дꙋ старѣ́ишина лю́демъ си́мъ·

Ꙗ҆́ко ѻ҆пꙋстѣсѧ і҆ерс̑҇ли́мъ, і҆ѹ҆де́ѧ разори́сѧ.
и҆ ꙗ҆зы́цы и҆хъ съ безако́нїемъ не покарѧ́ютсѧ гв҃и·

Зане́же смири́сѧ сла́ва и҆хъ, и҆ стꙋдъ лица и҆хъ противи́сѧ и҆мъ.
грѣ́хъ же свои ꙗ҆́ко содо́м꙽скїи възвѣстиша и҆ ꙗ҆ви́ша·

Го́ре дш҃и и҆хъ, занѐ ѹ҆мы́слиша совѣтъ лꙋкавъ в себѣ, ре́кше.
свѧ́жем̑ правди́ваго, ꙗ҆́ко непотре́бенъ намъ е҆сть.
ѹ҆бо пло́ды дѣ́лъ свои҆хъ поꙗ҆дѧ́тъ·

Го́ре безако́нникꙋ, ѕла́а б̂о приключаютсѧ е҆мꙋ по дѣ́лом̑ е҆го·

Лю́дїе мои приста́вницы ва́ши пожира́ютъ васъ, и҆ постиза́ющеи ѻ҆блада́ютъ ва́ми·

Лю́дїе мои блажа́щеи васъ льстѧ́тъ в̂ы, и҆ стеѕѧ̀ но́гъ вашихъ възмꙋща́ютъ·

Но нн҃ѣ ѹ҆стро́итсѧ г҃ь на сꙋ́дъ, и҆ поста́витъ на сꙋ́дѣ лю́ди своѧ̀.
самъ г҃ь на сꙋ́дъ прїидет̑ съ ста́рцы людїи, и҆ съ кнѧ́ѕи и҆хъ.
вы же чт̂о запали́сте виногра́дъ мои, и҆ раз꙽грабле́нїе ѹ҆бо́гихъ в домо́хъ вашихъ.
почто̀ вы ѻ҆бидите лю́ди моѧ̀, и҆ лица̀ ѹ҆бо́гихъ ѻ҆срамлѧ́ете·

Гл҃етъ г҃ь саваѻ́ѳъ.
сїе же гл҃етъ г҃ь, поне́же възнесо́шасѧ дще́ри сїѻ́нѧ, и҆ ходи́ша высо́кою вы́ею.
и҆ помиза́нїем̑ ѻ҆́чнѣм꙽ и҆ стꙋпа́нїемъ но́гъ, ри́зы влекꙋща подолꙋ, и҆ нога́ма кꙋп́но красꙋ́ющасѧ.
и҆ смири́тъ г҃ь кнѧги́нѧ дщи сїѻ́нѧ.
и҆ г҃ь ѿкры́етъ сличе́нїе их̑ в то́и дн҃ь·

И҆ ѿи҆метъ г҃ь сла́вꙋ риз̑ и҆хъ, и҆ красоты и҆хъ, и҆ в꙽плета́нїа зла́таѧ на главѣ̀, и҆ тресны риз̑ныа, и҆ мс̑҇ца гривен꙽ныа, и҆ срачи́ца тон꙽кїа, и҆ красꙋ ли́чнꙋю, и҆ състрое́нїе красы̀ сла́вныѧ, и҆ ѻ҆брꙋчи, и҆ пер꙽стни, и҆ мони́ста, и҆ запѧ́стїѧ, и҆ хꙋдо́ж꙽наѧ ѹ҆серѧ́ѕѧ, и҆ багрѧ́ница, и҆ пребагрѧнаа, и҆ ѹ҆тва́рь храмнꙋю·

и҆ свѣтлаѧ лако́ньскаѧ, и҆ синеты̀, и҆ чер꙽влени́ца, и҆ синетꙋ̀ съ зла́том̑ претыка́нꙋ, и҆ тончица преи҆маны зла́томъ·

И҆ бꙋ́детъ въ во́нѧ мѣсто до́брыѧ, смра́дъ, и҆ в по́ѧса мѣ́сто ѹ҆́жемъ препоѧ́шетесѧ.
и҆ въ ѹ҆твари мѣсто златыѧ ꙗ҆́же на главѣ̀ плѣшъ прїимъши дѣлес̑҇ твоих̑ ра́ди и҆ въ ри́зы мѣсто багрѧни́чныѧ, препоѧ́шешисѧ въ врѣти́ще.
и҆ сн҃ъ тво́и добрѣи е҆гоже любилъ е҆си под̑ ме́чем꙽ паде́тъ, и҆ крѣпцыи ва́ши под̑ мечем̑ падꙋть.
і҆ изнемогꙋть и҆ вожделѣют̑ лежа́лница ѹ҆тва́рїи ва́шихъ.
и҆ ѻ҆ста́неши е҆ді́нъ, и҆ въ землѧ плѣненъ бꙋдеши·

Глв̑҇а, д҃·

I и́мꙋтьсѧ сед̑мь же́нъ за мꙋжа е҆ді́наго гл҃юще.
хлѣ́бъ на́шъ ꙗ҆́сти бꙋдемъ, и҆ въ ры́зы наша да сѧ ѻ҆дѣе́м꙽·

То́чїю да сѧ наречетъ и҆́мѧ твое на на́съ, и҆ ѿвръзи ѹ҆кори́знꙋ на́шꙋ·

Въ то́и дн҃ь просвѣтитъ г҃ь въ свѣте съ сла́вою на землѝ, ꙗ҆́ко възнести и҆ просла́вити ѻ҆ста́нокъ ѻ҆́трокъ і҆и҆л҃евъ.
и҆ бꙋ́дет꙽ ѻ҆ста́выи въ сїѻ́нѣ, и҆ ѻ҆ста́выи въ і҆ерс̑҇ли́мѣ, ст҃и прозовꙋтсѧ вс̂и, и҆же сꙋть въпи́сани на жи́знь въ і҆ерс̑҇ли́мѣ·

Ꙗ҆́ко ѻ҆мы́етъ г҃ь сквернꙋ сн҃овъ і҆и҆л҃евъ и҆ дще́рь сїѻ́нь, и҆ кро́вь і҆ерс̑҇ли́мъскꙋ ѻ҆цыститъ ѿ среды их̑.
дх҃омъ сꙋд꙽нымъ и҆ дх҃омъ ва́рнымъ·

И́ прїидетъ г҃ь, и҆ бꙋдетъ всѐ мѣсто го́ры сїѻ́нѧ.
и҆ вс̂ѧ ꙗ҆́же ѻ҆́крс̑҇тъ еѧ̀ ѻ҆сѣнит̑ ѻ҆́блакъ въ дн҃е.
и҆ ꙗ҆́ко ды́ма, и҆ свѣта ѻ҆́гнена горѧ́ща въ но́щи, все́ю сла́вою покры́етсѧ.
и҆ бꙋдетъ въ сѣни ѿ зно́а и҆ въ кро́вѣ, и҆ въ съкровѣ ѿ же́стости до́жда·

Глв̑҇а, е҃·

Въспо́ю възлю́блен꙽номꙋ пѣснь, възлю́бленаго мое҆го·

Виноград̑ бы́сть възлю́бленномꙋ на холмѣ, на мѣ́стѣ бла́ѕѣ·

И҆ ѻ҆гражденїемъ ѻ҆градихъ и҆ ѹ҆колихъ, и҆ насади́хъ ло́зꙋ и҆збран꙽нꙋ.
и҆ созда́хъ сто́лпъ среди е҆го, и҆ пред̑точилїе и҆ско́пахъ в немъ·

И҆ ждахъ да сътвори́тъ гро́здїе, сътвори́ же те́рнїе·

І҆ нн҃ѣ чл҃къ і҆ѹ́динъ, и҆ живꙋщїѝ въ і҆ерс̑҇ли́мѣ, сꙋди́те мн̂ѣ и҆ виногра́дꙋ мое҆мꙋ.
чт̂о сътворю виногра́дꙋ мое҆мꙋ, и҆ не сътворих̑ е҆мꙋ.
зане́же ждахъ да сътвори́тъ гро́здїе, н̂о сътворѝ тернїе·

Нн҃ѣ ѹ҆бо възвѣщꙋ ѹ҆жѐ вамъ, чт̂о сътворю виногра́дꙋ мое҆мꙋ, ѿи҆мꙋ ѻ҆гражденїе е҆го и҆ бꙋ́детъ на разъграбленїе.
и҆ разорю стѣнꙋ е҆го, и҆ бꙋдетъ въ попра́нїе.
и҆ ѻ҆ста́влю виноград̑ мо́и, и҆ не порѣжет̑сѧ ни́же покопа́етсѧ, и҆ възы́идет̑ в немъ ꙗ҆́ко на цѣлизнѣ те́рнїе.
и҆ ѻ҆́блакомъ заповѣмъ е҆же не ѻ҆дождити на не́го·

Виноград̑ б̂о г҃а саваѻ҆ѳа, до́мъ і҆и҆л҃евъ е҆сть.
и҆ чл҃къ і҆ѹ́довъ, но́въ са́дъ возлю́бленъ·

Жда́хъ да сътвори́тъ сꙋдъ, и҆ сътвори безако́нїе и҆ во́пль и҆ неправд̑ꙋ·

Го́ре приближа́ющим̑ до́мъ къ до́мꙋ, и҆ село̀ к꙽ селꙋ, да бли́жнемꙋ ѿи́мꙋть чт̂о.
е҆да̀ всели́стесѧ е҆ді́ни на́ зем̑ли·

Слыша бо сѧ с̂е въ ѹ҆́ши г҃а саваѻ́ѳа.
а҆ще б̂о и҆ бꙋ́дꙋтъ до́мове мно́ѕи, ѻ҆пꙋстѣ́ютъ вели́ци же и҆ до́брїи, и҆ не бꙋ́дꙋтъ живꙋщеи в них̑·

И҆дѣже б̂о възорютъ і҃, воло́въ, по́жнетъ г҃ спꙋды.
и҆ всѣ́ѧи і҃, спꙋ́дъ, и҆ сътворит̑ мѣ́ры тр̂и·

Го́ре въста́ющим̑ заѹ́тра гонѧ́щимъ сикеръ.
ждꙋщимъ вечера, вино̀ б̂о пож꙽жетъ ѧ҆̀.
съ гꙋсльми б̂о и҆ прегꙋ́дницами, и҆ тѵм̑па́ны, и҆ свирѣльми вино̀ пїю́ще·

А҆ дѣлъ гн҃ихъ не вѣ́дѧтъ, и҆ дѣлесъ рꙋкꙋ е҆го не сматрѧ́ютъ·

Ѹ҆бо плене́ни бы́ша лю́дїе моѝ, занѐ не вѣ́дѧтъ г҃а.
и҆ мно́жество бы́сть мертвыхъ глада ра́ди, и҆ жа́жди во́дныѧ·

И҆ раз꙽ширѝ а́дъ дш҃ꙋ свою, и҆ разве́рѕе ѹ҆ста своѧ не преста́ти.
и҆ снидꙋтъ сла́внїи и҆ велицїи и҆ бога́тїи, и҆ гꙋби́тели их̑, и҆ веселѧ́исѧ в немъ·

И҆ смири́тсѧ чл҃къ, и҆ ѻ҆бесчеститсѧ мꙋжъ.
и҆ ѻ҆́чи высо́ко глѧдающеи ѻ҆бнизѣтасѧ·

И҆ възнесетсѧ г҃ь саваѻ҆́ѳъ сꙋдомъ, и҆ б҃ъ ст҃ыи прославитсѧ пра́вдою·

И҆ напасꙋтсѧ расточе́нїи ꙗ҆́ко ю́нцы, и҆ пꙋстынѧ ѻ҆ста́нокъ а҆́гньцы поꙗ҆дѧ́тъ·

Го́ре привлача́ю҆щимъ грѣхѝ ꙗ҆́ко ѹ́жемъ до́лгом̑, и҆ ꙗ҆́ко и́гомъ стѧгнꙋтымъ.
ю҆ница безако́нїѧ и҆хъ гл҃юща, скоро да приближи́тсѧ.
е҆же е҆мꙋ сътвори́ти да ви́димъ.
и҆ да прїидетъ совѣтъ ст҃ого і҆и҆л҃ева, да разꙋмѣ́емъ·

Го́ре гл҃ющимъ ѕлꙋ̀ добро̀, и҆ добрꙋ̀ ѕло̀.
полага́ющимъ т꙽мꙋ̀ свѣтъ, а҆ свѣтъ т꙽мꙋ̀.
полага́ющим̑ го́ркое сла́дко, а҆ сла́дкое го́рко.

Го́ре мꙋдрым̑ в себѣ, и҆ пред̑ собо́ю хи́трымъ·

Го́ре крѣпкимъ ва́шимъ вино̀ пїющим̑, и҆ вельмо́жамъ че́рплющимъ сике́ра.
ѻ҆правда́ющимъ нечести́ва м꙽зды̀ ра́ди, и҆ пра́вдꙋ пра́ведныхъ ѿмещꙋщимъ·

Сего ради ꙗ҆́коже погарает̑ те́рнїе главнѧ́ми ѻ҆́гнеными, и҆ погори́тъ пла́менемъ разгорѣвшим̑сѧ ко́рень и҆хъ ꙗ҆ко прь́сть бꙋдетъ, и҆ цвѣтъ и҆хъ ꙗ҆́ко пра́хъ взы́идет̑·

Не въсхотѣша б̂о зако́на г҃а саваѻ́ѳа, и҆ сло́во ст҃ого і҆и҆л҃ева прогнѣваша·

И҆ възъꙗ҆ри́сѧ г҃ь саваѻ́ѳъ гнѣ́вомъ на лю́ди своѧ, и҆ положѝ рꙋкꙋ свою на нихъ и҆ поразѝ и҆хъ.
и҆ раз̑гнѣвасѧ на́ горы и҆ бы́ша мр҃твцы̀ и҆хъ ꙗ҆́ко гно́и посреди пꙋтѝ.
и҆ въ всѣхъ сихъ не ѿврати́сѧ ꙗ҆́рость е҆го н̂о и҆ еще рꙋка̀ е҆го высо́ка·

Въздви́гнетъ ѹ҆бо зна́менїе страна́мъ да́лнимъ, и҆ съвоздви́жетъ ѧ҆̀ ѿ конецъ землѝ.
и҆ с̂е ско́ро ле́гце прїидт̑ꙋ не въза́лчютъ, ни трꙋдѧтсѧ, ни въздрѣмлютъ, ни поспѧ́тъ, ни распоꙗ҆́шꙋтъ по́ѧсъ свои҆хъ ѿт̑ чресл꙽ свои҆хъ, ни раз꙽слабѧ́тсѧ възвꙋзы сапо́гомъ и҆хъ.
стрѣлы и҆хъ ѻ́стры сꙋть, и҆ лꙋцы и҆хъ напрѧ́жени.
копы́та ко́немъ и҆хъ, ꙗ҆́ко тве́рдъ ка́мень намѣни́шасѧ.
колеса̀ колесни́цамъ и҆хъ ꙗ҆́ко бꙋрѧ ѹ҆стремлѧютсѧ.
рыка́нїе их̑ ꙗ҆́ко льво́ве.
и҆ пред̑ста́ютъ ꙗ҆́ко льви́чища.
і҆ и҆мет̑ и҆ возопїетъ ꙗ҆́ко ѕвѣръ і҆ и҆звержет̑, и҆ не бꙋдетъ ѿе҆́млющаго и҆̀.
и҆ возопїетъ их̑ ра́ди в то́и дн҃ь, ꙗ҆́ко звк̑҇ꙋ мо́рѧ мꙋтѧ́щасѧ.
и҆ възрѧ́тъ на́ землю, и҆ с̂е т꙽ма̀ же́стока въ недоѹ҆мѣнїи и҆хъ·

Глв̑҇а, ѕ҃·

И бы́сть в лѣто въ неже ѹ҆мрѣтъ і҆ѻ҆ѕїѧ цр҃ь.
видх̑ѣ г҃а саваѻ́ѳа, сидѧ́ща на прс̑҇тлѣ высо́цѣ и҆ превознесе́нѣ.
и҆ по́лнъ до́мъ сла́вы е҆го.
и҆ серафи́ми стоѧ́хꙋ ѻ҆́крс̑҇тъ е҆го шесть кры́лъ е҆ді́номꙋ, и҆ шесть кры́лъ дрꙋгомꙋ.
двѣма ѹ҆бо покрива́хꙋ лица̀ своѧ, двѣма же но́ги своѧ, а҆ двѣма лѣта́хꙋ.
и҆ възыва́хꙋ дрꙋгъ къ дрꙋгꙋ гл҃ѧ.
ст҃ъ, ст҃ъ, ст҃ъ, г҃ь саваѻ́ѳъ, и҆спо́лнь всѧ̀ землѧ̀ сла́вы е҆го·

И҆ взѧ́сѧ завѣ́са над̑две́рнѧѧ ѿ гла́са и҆же въпїѧхꙋ, и҆ до́мъ напо́лнисѧ ды́ма·

И҆ рекохъ, ѽ ѻ҆каѧ́нныи а҆зъ, ꙗ҆́ко сподоби́хсѧ чл҃къ сы́и и҆ нечи́сты ѹ҆стнѣ̀ и҆мы́и.
и҆ среди людїи нечи́сты ѹ҆стнѣ̀ и҆мꙋщи а҆зъ живꙋ̀.
и҆ г҃а саваѻ́ѳа ви́дѣхъ ѻ҆чи́ма мои́ма·

И҆ пꙋсти́сѧ къ мнѣ̀ е҆ді́нъ ѿ серафим̑ и҆ в рꙋцѣ̀ и҆мѣѧ́ше ѹ́гль горѧ́щъ.
е҆го́же клеща́ми взѧтъ ѿ ѻ҆лтарѧ̀ и҆ прикоснꙋсѧ ѹ҆стѣхъ моих̑, и҆ рече.
с̂е прикоснꙋ́хсѧ ѹ҆стна́хъ твои҆хъ и҆ ѿвръжена бꙋдт̑ꙋ безаконїѧ твоѧ, и҆ грѣхѝ твоѧ ѻ҆чи́ститъ·

И҆ слы́шахъ глс̑҇а гн҃ь гл҃ющъ.
кого̀ пꙋщꙋ̀ и҆л̂и кт̂о и҆де́тъ к лю́демъ симъ.
и҆ реко́хъ, с̂е а҆зъ пꙋсти́ мѧ, и҆ рече.
и҆дѝ и рцы̀ лю́демъ сим̑.
ѹ҆ши́ма ѹ҆слы́шите и҆ не разꙋмѣ́ете.
и҆ ви́дѧще ѹ҆вѣдите, и҆ не и҆мате ви́дѣти.
ѻ҆дебелѣ́ бо срд̑це людїи си́хъ, и҆ ѹ҆ши́ма свои҆ма тѧ́жко слы́шаша и҆ ѻ́чи своѝ смѣжи́ша.
е҆да когда ѻ҆чи́ма ѹ҆зрѧ́тъ, и҆ ѹ҆ши́ма ѹ҆слы́шатъ, и҆ срд̑цемъ разꙋмѣю́тъ и҆ ѻ҆братѧт̑сѧ, і҆ и҆сцѣлю̀ ѧ҆̀·

И҆ рекох̑ доко́́лѣ г҃и, рече же.
дондеже ѻ҆пꙋстѣ́ютъ гра́ди невселе́нїемъ, и҆ домо́ве небы́тїемъ чл҃чемъ, и҆ землѧ̀ ѻ҆ста́нетъ пꙋста̀.
и҆ посемъ ѹ҆дали́тъ б҃ъ чл҃ки, и҆ ѻ҆ста́вшїи на землѝ ѹ҆мно́жатсѧ.
и҆ е҆ще на не́и е҆сть десѧти́ны по́лъ и́на.
и҆ па́ки бꙋдет̑ на собра́нїе, ꙗ҆́ко дꙋбъ и҆ желꙋ́дь е҆гда и҆спадетъ и҆с плюски своеѧ.
племѧ̀ ст҃о ѹ҆ стоѧ́нїе е҆го·

Глв̑҇а, з҃·

И бы́сть въ дн҃и а҆ха́зовы, і҆ѻ҆а҆ѳа́млѧ, сн҃а і҆ѻ҆ѕїина, цр҃ѧ і҆ѹ́дина.
взы́иде раі҆си́мъ, цр҃ь а҆ра́мль.
и҆ факе́и, сн҃ъ ромелїе́въ, цр҃ь і҆и҆л҃евъ, на і҆ерс̑҇лим꙽, вое҆ва́ти на́нь, и҆ не мого́ша вое҆ва́ти на́нь.
и҆ съвѣсти́ша в до́мъ двд҃овъ гл҃ющемъ, съвѣща́лсѧ е҆сть а҆ра́мъ съ е҆фре́мом̑.
і҆ ѹ҆жасе́сѧ дш҃а е҆го, и҆ дш҃а людїи е҆го.
ꙗ҆́коже в дꙋбра́вѣ дꙋ́бъ вѣтромъ поколѣбле́тсѧ·

И҆ рече г҃ь къ і҆са́їи, и҆зыиди въ срѣте́нїе а҆ха́зово т̂ы, и҆ ѻ҆ста́выи и҆а҆сꙋ́въ сн҃ъ твои, къ кꙋпелѣ вы́шнѧго пꙋтѝ села̀ гнаѳе́ѻ҆ва.
и҆ рече́ши е҆мꙋ снабди́сѧ и҆ ѹ҆молкнѝ, и҆ не бо́исѧ, и҆ да не ѻ҆слабѣ́ет꙽ дш҃а твоѧ̀ ѿ дво́ю древесꙋ главе́ннꙋю кꙋрѧ́щꙋсѧ.
е҆гда б̂о гнѣ́въ ꙗ҆́рости мое҆ѧ̀ бꙋ́детъ па́ки и҆сцѣлю̀.
сн҃ъ же а҆ра́мль, и҆ сн҃ъ ромелїевъ, ꙗ҆́ко совѣща́ста совѣтъ зо́лъ ѻ҆ тебѣ гл҃ще·

взы́идемъ въ і҆ѹ҆де́ю, и҆ съгл҃авше с ни́ми ѻ҆брати́мъ ѧ҆̀ к себѣ̀, и҆ въцр҃им̑ в ни́хъ сн҃а тавелїева·

Се̂ гл҃етъ г҃ь саваѻ́ѳъ.
не събꙋ́детсѧ совт̑ѣ се́и, ни ѹ҆ста́витсѧ.
н̂о глава̀ а҆ра́мꙋ дама́скъ, а҆ глава̀ дама́скꙋ раа҆сим̑.
н̂о е҆ще ше́стьдесѧ́тъ и҆ пѧ́ть лт̑ѣ, ѻ҆скꙋдѣ́етъ црс̑҇тво е҆фре́мово ѿ людїи.
глава̀ же е҆фрем́ови сама́ръ, и҆ глава̀ сама́рска сн҃ъ ромелїѻ́въ.
и҆ а́ще не вѣ́рꙋете, и҆ не и҆́мате разꙋмѣти·

И҆ приложи г҃ь гл҃ати къ а҆ха́зꙋ, рекїи.
просѝ себѣ̀ зна́менїѧ ѿ г҃а б҃а твое҆го, въ глꙋбинꙋ и҆ли въ высотꙋ·

И҆ рече а҆ха́зъ, не прошꙋ ниже и҆скꙋшꙋ г҃а·

И҆ рече і҆са́їа, слы́ши ѹ҆бо до́ме двд҃овъ.
е҆да̀ ма́лъ вам̑ е҆сть трꙋ́дъ даѧ́ти чл҃комъ, т̂о ка́ко гв҃и даете трꙋ́дъ·

Сего ради да́сть г҃ь самъ зна́менїе вамъ·

Се дв҃ца въ чре́вѣ за́́чнетъ, и҆ роди́тъ сн҃ъ, и҆ прозове́ши и҆мѧ е҆мꙋ е҆м꙽манꙋи҆лъ·

Ма́сло и҆ ме́дъ снѣ́сть, пре́жде да́же не разꙋмѣ́етъ, и҆ не и҆зво́литъ ѕл̂а, и҆ събере́тъ бл҃гое.
занѐ пре́же ѹ҆вѣде́нїа дѣтищꙋ бл҃га и҆ ѕл̂а, ѿи҆детъ ѕло́ба ꙗ҆́ко и҆збра́ти бл҃гое·

І҆ и҆збꙋдт̑е землѧ̀ е҆ѧ́же т̂ы бои҆шисѧ ѿ лица сею̀ дво́ю цр҃ю·

Но наведе́тъ г҃ь на́ тѧ, и҆ на лю́ди твоа, и҆ на до́мъ ѿц҃а твое҆го дн҃и.
и҆же не сꙋть е҆щѐ пришлѝ, ѿ негоже дн҃е ѿи҆метъ е҆фре́ма ѿ і҆ѹ́ды цр҃ь а҆сѷрїиск꙽·

И҆ бꙋ́детъ в то́и дн҃ь, позвиждетъ г҃ь мꙋхамъ, и҆же владѣ́ютъ ча́стїю рѣкѝ е҆гѷпет̑скїѧ, и҆ пче́лы ꙗ҆́же е҆сть въ стра́нѣ а҆сѷрїистѣ.
и҆ прїидꙋтъ вс̂и и҆ почї́ютъ на гра́динах̑ стра́нъ, и҆ в пеще́рахъ, и҆ въ все́и рас꙽сѣ́линѣ, и҆ въ всѧ́комъ дре́ве·

В то́и же дн҃ь побръснетъ г҃ь бри́чемъ вели́комъ, и҆ напое́номъ ѻ҆б꙽ ѻ́нꙋ стра́нꙋ рѣкѝ цр҃ѧ а҆сѷрїиска.
главꙋ̀ и҆ вла́сы но́жныѧ, и҆ бра́дꙋ ѻ҆стриже́тъ·

И҆ бꙋ́детъ въ то́и дн҃ь, кормѧ́и чл҃къ ю҆́нцꙋ ѿ воло́въ и҆ дв̂ѣ ѻ҆вцы.
и҆ бꙋ́детъ ѿ мно́жества мле́чнаго ма́сло и҆ ме́дъ ꙗ҆́сти, всѧ́къ ѻ҆ста́выи на землѝ·

И҆ бꙋ́детъ в то́и дн҃ь, всѧ́ко мѣ́сто и҆дѣж́е а҆ще бꙋ́детъ ты́сѧща ло́зъ виногра́да, по ты́сѧщи вѣ́дръ, цѣли́зною бꙋ́дꙋтъ и҆ те́рнїемъ.
съ стрела́ми стрѣлѧ́юще вни́дꙋтъ во́нь.
ꙗ҆́ко цѣли́зною и҆ те́рнїемъ бꙋдетъ вс̂ѧ землѧ̀·

И҆ всѧ́ка гора̀ ѻ҆ре́маѧ въз꙽ѻре́тсѧ, и҆ не на́идетъ та́мо стра́хъ.
бꙋдетъ б̂о по цѣли́знѣ и҆ по те́рнїю па́ства ѻ҆вцѝ, и҆ попра́нїе волꙋ́е·

Глв̑҇а, и҃·

И реч̑҇ г҃ь къ мнѣ̀, прїимѝ себѣ сви́токъ но́въ вели́къ.
и҆ въпиши в не́мъ писа́лом̑ чл҃чем̑.
ꙗ҆́коже бы́стро сътвори́ти плѣ́нь плѣне́нїю, приспѣл꙽ б̂о е҆сть.
и҆ по́слꙋхи м̂и сътвори и҆звѣстни чл҃цы, ѹ҆́рїѧ жерца̀, и҆ заха́рїю сн҃а варахїи҆на.
и҆ пристꙋпи́хъ къ проро́чицы, и҆ зача̀ въ ѹ҆тро́бѣ и҆ породѝ сн҃а.
и҆ рече г҃ь мнѣ̀.
прозови и҆мѧ е҆мꙋ, ско́ро под̑ви́гни, ѻ҆стрѣ плѣни.
занѐ пре́же позна́нїѧ дѣтищꙋ призыва́ти ѿц҃а и҆ли мт҃ре, и҆ прїиметъ си́лꙋ дама́ска, и҆ плѣ́нъ самарїискъ прд̑е цр҃емъ а҆сѷрїискомъ·

И҆ приложи г҃ь гл҃ати къ мнѣ̀ е҆щѐ, гл҃ѧ.
и҆́мже не и҆зво́лиша лю́дїе сїи воды̀ силоа́млѧ текꙋщаѧ ти́сѣ.
н̂о и҆зво́лиша и҆мѣти раа҆со́на сн҃а рамелїева цр҃ѧ в ни́х꙽.
сего ради с̂е възво́дитъ г҃ь на́ вы водꙋ рѣкѝ, си́лнꙋ и҆ мно́гꙋ цр҃ѧ а҆сѷрїиска и҆ сла́вꙋ е҆го.
и҆ взы́идетъ на всѧ́кꙋ де́бръ ва́шꙋ, и҆ ѻ҆бы́идетъ вс̂ѧ гра́ды ваша, и҆ ѿи҆метъ ѿ і҆ѹ҆де́ѧ чл҃къ.
и҆же мо́жетъ главꙋ̀ въздви́гнꙋти, и҆л̂и си́лно чт̂о съверши́ти.
и҆ бꙋдет̑ по́лкъ е҆го, ꙗ҆́коже не съмѣстѝти ширинам̑ страны̀ твое҆ѧ·

С на́ми б҃ъ ѹ҆вѣдите страны̀ и҆ повинитесѧ.
послꙋшаите до конца̀ землѝ.
крѣпи́вшеисѧ повини́тесѧ, а҆ще б̂о па́ки ѹ҆крѣплѧ́етесѧ, т̂о па́ки повини́тесѧ.
и҆же совт̑ѣ а҆ще совѣща́ете, расы́плетъ и҆̀ г҃ь.
и҆ сло́во е҆же а҆ще въз꙽гл҃ете, т̂о не пребꙋдет̑ въ вас̑҇.
ꙗ҆́ко с на́ми б҃ъ·

Та́ко гл҃етъ г҃ь не покарѧ́ющимсѧ, крѣ́пкою рꙋко́ю.
и҆ хоже́нїю пꙋтѝ людїи си́хъ гл҃юще, е҆да̀ когда̀ речетѐ жесто́ко.
всѐ б̂о е҆же а҆ще рекꙋтъ лю́дїе сїи жесто́ко е҆сть.
стра́ха же и҆хъ не ѹ҆бо́итесѧ, ни възмѧтѣтесѧ.
г҃а си́лъ, того ѻ҆сщ҃аите.
и҆ то́и бꙋдетъ вамъ въ бо́ѧзнь.
и҆ а́ще бꙋдеши на него ѹ҆пова́ѧ, то́и бꙋдетъ т̂и въ ѻ҆сщ҃енїе и҆ ника́коже ѻ҆ ка́мень прет꙽кне́шисѧ, н̂и ꙗ҆́ко ѻ҆ ка́мень паде́нїѧ до́мъ же і҆а́ковль, въ прꙋ́глѣ и҆ в раздо́лїи сѣдѧ́щеѝ въ і҆ерс̑҇лимѣ.
сего ради и҆знемо́гꙋтъ в ни́хъ мно́ѕи, и҆ падꙋтъ и҆ съкрꙋшатсѧ.
и҆ прибли́жатсѧ, и҆ плѣнѧ́тсѧ чл҃цы въ ѹ҆тверже́нїи сꙋще·

Тогда̀ ꙗ҆вле́ни бꙋдꙋтъ зна́мена́ющїи зако́нъ, ꙗ҆́ко не ѹ҆чи́тисѧ·

И҆ речетъ, пождꙋ б҃а ѿвра́щ꙽шаго лицѐ своѐ ѿ до́мꙋ і҆а́ковлѧ, и҆ ѹ҆пова́ѧ бꙋ́дꙋ на́нь·

Се аз̑, и҆ дѣти ꙗ҆́же м̂и да́лъ б҃ъ·

И҆ бꙋдꙋтъ зна́менїѧ и҆ чюдеса̀ въ і҆и҆л҃и ѿ г҃а саваѻ́ѳа, и҆же в꙽сели́сѧ на горѣ̀ сїѻ́нъ·

И҆ а́ще рекꙋтъ ва́мъ, проси́те ѹ҆тро́бныхъ влъхвова́нїи, и҆же ѿ землѧ̀ гласѧ́щихъ.
т꙽щеславꙋющих̑, и҆ ѿ чре́ва гл҃ющихъ.
не ꙗ҆зы́къ л̂и ѹ҆бо къ б҃ꙋ, ꙗ҆́же ничесо̀ въпраша́ет꙽ ѻ҆ живыхъ и҆ мр҃твыхъ.
зако́нъ б̂о на по́мощь да́сть.
да рекꙋтъ не ꙗ҆́ко с̂е сло́во, ѻ҆ не́мже нѣ́сть м꙽зд̑ы̀ да́ти ѻ҆ немъ·

И҆ прїидетъ на́ вы жесток̑҇ гла́дъ.
и҆ бꙋ́детъ е҆гда̀ въз꙽а҆́лчете ско́рбни бꙋдете.
и҆ ѕл̂ѣ речете кнѧ́ѕю, и҆ ѿч҃ествꙋ·

И҆ възрѧ́тъ на́ нб҃о го́рѣ, и҆ на́ землю ни́зꙋ призрѧт̑.
и҆ с̂е ѿчаѧ́нїе тѣснота и҆ тма̀, печал̑҇ и҆ тꙋга̀, и҆ сꙋмра́кь ꙗ҆́коже не ви́дѣти.
и҆ не ѻ҆скꙋдѣ́етъ и҆же въ тѣснотѣ сы́и до вре́мене·

Глв̑҇а, ѳ҃·

Се̂ пре́же и҆спїи, ско́ро сътвори странѣ заѹ҆ло́нѣ, землѝ неѳали́мовѣ.
и҆ про́чїи и҆же при мо́ри живꙋщеи, и҆ ѻ҆бонꙋ̀ странꙋ̀ і҆ѻ҆рдана, стра́ны галиле́ѧ ꙗ҆́зы́комъ·

Лю́дїе ходѧ́щеи въ тмѣ̀, видѣша свѣтъ вели́къ.
живꙋщеи въ стра́нѣ и҆ в сѣни см҃ртнѣи, свѣтъ просвѣтит̑сѧ на́ вы·

Множа́е людїи, ꙗ҆́же и҆зведѐ въ весе́лїе.
и҆ възвеселѧ́тсѧ пред̑ тобо́ю, ꙗ҆́ко ра́дꙋющеисѧ въ жа́твꙋ, и҆ ꙗ҆́ко дѣлѧ́щеи коры́сть.
ꙗ҆́ко ѿꙗ҆́тьсѧ ꙗ҆ре́мъ лежа́и на них̑, и҆ же́злъ и҆же на выи и҆хъ.
же́злъ б̂о погонѧ́ющих̑ расы́па, ꙗ҆́ко и҆ въ дн҃и при мадїа́мѣ·

Ꙗ҆́ко всѧ́кꙋ ѻ҆де́жꙋ събра́ннꙋю ле́стїю, и҆ ри́зꙋ съ прибы́ткомъ и҆стѧжт̑ꙋ.
и҆ въсхотѧ́тъ да бы́ша и҆ ѻ҆гнемъ съж꙽же́ны были·

Ꙗ҆́ко ѻ҆тро́ча роди́сѧ нам̑ сн҃ъ, и҆ да́стьсѧ намъ·

Є҆мꙋже вла́сть бы́сть на рамѣ е҆го·

И҆ нарѣцает̑сѧ и҆мѧ е҆го вели́ка совѣта а҆гг҃лъ.

Чю́денъ совѣтникъ·

б҃ъ крѣ́покъ властели́нъ, кнѧ́ѕь смире́нїѧ·

ѿц҃ъ бꙋдꙋщаго вѣ́ка.
приведетъ б̂о мирна кнѧѕѧ, и҆ здра́вїе е҆мꙋ.
вели́ка вла́сть е҆го.
и҆ мирꙋ е҆го нѣ́сть конца̀.
на престо́лѣ двд҃вѣ, и҆ на црс̑҇твѣ е҆го сѧ́детъ.
напра́вити и҆̀, и под̑ѧ́ти сꙋдом꙽ и҆ пра́вдою, ѿ нн҃ѣ и҆ до́ вѣка.
р꙽ве́нїе г҃а саваѻ́ѳа сътво́ритъ с̂е·

Смр҃ть посла̀ г҃ь на і҆а́кова, и҆ прїиде на і҆и҆л҃ѧ.
и҆ ѹ҆вѣдѧтъ вс̂и лю́дїе е҆фре́мовы, и҆ сѣдѧ́щеи въ самарїи съ ѹ҆коре́нїемъ, и҆ высо́ким̑ срд̑цем̑, гл҃ющемъ.
пли́нѳы падо́ша.
н̂о грѧди́те да ѹ҆сѣче́мъ ка́менїе, и҆ посѣче́мъ ꙗ҆́годи́чїе и҆ смрѣ́чїе, да съгради́мъ себѣ̀ сто́лпъ·

И҆ поразитъ б҃ъ въста́вшаѧ на горꙋ̀ сїѻ́ню, и҆ на і҆ерс̑҇лимъ, и҆ врагѝ и҆хъ расы́плет̑.
сирїю ѿ въсто́ка слн҃чнаго, и҆ е́ллины ѿ за́пада слн҃чнаго.
поꙗ҆да́ющаѧ і҆и҆л҃ѧ всѣми ѹ҆сты̀·

ѻ҆ всѣхъ си́хъ не ѿврати́сѧ ꙗ҆́рость е҆го, но и҆ е҆ще рꙋка̀ е҆го высо́ка.
и҆ лю́дїе не наврати́шасѧ, до́ндеже ꙗ҆зви́шасѧ.
и҆ г҃а не възыска́ша·

И҆ ѿꙗ҆́тъ г҃ь ѿ і҆и҆л҃ѧ главꙋ̀ и҆ ѻ́шибъ вели́ка и҆ ма́ла, въ е҆ді́нъ дн҃ь.
ста́рца и҆ чюдѧ́щаасѧ лице́мъ, с̂е вла́сть.
и҆ прро̑҇ка ѹ҆ча́ща безако́ннаѧ, с̂е ѻ҆́шибъ.
и҆ бꙋ́дꙋт꙽ блажа́щеи людїе с̂и, льстѧ́ще льстѧт̑, ꙗ҆́ко да поглотѧт̑ ѧ҆̀·

Сего рад̑и̑ ю҆нотами их̑ не възвесели́тсѧ г҃ь, и҆ сиро́тъ и҆хъ и҆ вдови́цъ и҆хъ не поми́лꙋетъ.
ꙗ҆́ко вс̂и безако́нницы, и҆ ѕл̂и.
и҆ всѧ́ка ѹ҆ста̀ гл҃аша непра́вдꙋ·

ѻ҆ всѣхъ сихъ не ѿврати́сѧ ꙗ҆́рость е҆го, н̂о и҆ е҆щѐ рꙋка̀ е҆го высо́ка·

Разгорит̑сѧ ꙗ҆́ко ѻ҆́гнь безако́нїе, и҆ ꙗ҆́ко тро́скотъ сꙋхъ поꙗ҆́стьсѧ ѻ҆гнем̑.
и҆ заж꙽же́тсѧ в частинахъ дꙋбра́въскихъ, и҆ поꙗ҆́сть е҆же ѻ҆́крс̑҇тъ холмъ вс̂е.
ꙗ҆́рости дѣ́лѧ гн҃ѧ погори́тъ вс̂ѧ землѧ̀.
и҆ бꙋ́дꙋтъ лю́дїе ꙗ҆ко ѻ҆гне́мъ пож꙽же́ни.
чл҃къ не поми́лꙋет̑ бра́та свое҆го.
н̂о ѹ҆кло́нитсѧ на десно, ꙗ҆́ко въз꙽а҆́лчетъ.
і҆ и҆зъꙗ҆́сть ѿ лѣ́выхъ, и҆ не насыти́тсѧ.
чл҃къ ꙗ҆ды́и пло́ть мы́шца свое҆ѧ.
из̑ꙗ҆́сть б̂о манасїи е҆фре́мово, и҆ е҆фре́мъ манасїино.
ꙗ҆́ко вкꙋ́пѣ повою́ета і҆ѹ́дꙋ·

И҆ въ всѣхъ сихъ не ѿврати́сѧ ꙗ҆́рость е҆го, н̂о и҆ е҆щѐ рꙋка̀ е҆го высо́ка·

Глв̑҇а, і҃·

Го́ре пи́шꙋщимъ непра́вдꙋ.
пи́шꙋще бо лꙋка́ваѧ пишт̑ꙋ ѹ҆кланѧ́юще сꙋдъ ѹ҆бо́гих̑.
и҆ въсхища́юще сꙋдъ ни́щих̑ людїи мои҆хъ.
ꙗ҆́коже бꙋдет̑ и҆мъ вдова̀ на въсхище́нїе, и҆ сирота̑ на ѻ҆грабле́нїе.
что́ же сътворѧтъ въ дн҃ь присѣще́нїѧ.
печа́ль б̂о ва́м꙽ ѿдале́че прїидет̑.
и҆ к꙽ комꙋ̀ прибѣ́гнете, да ва́мъ помо́жетъ.
гдѣ́ ли ѻ҆ста́вите сла́вꙋ ва́шꙋ, ꙗ҆́ко не въпа́сти въ плѣне́нїе, и҆ под̑ ѹ҆бїеными падꙋтъ.
и҆ ѿ всѣхъ сих̑ не ѿврати́сѧ ꙗ҆́рость е҆го, н̂о и҆ е҆ще рꙋка̀ е҆го высо́ка·

Го́ре а҆сѷрїемъ, же́злъ ꙗ҆́рости моеѧ, и҆ гнѣвъ е҆сть в рꙋкꙋ и҆хъ.
гнѣ́въ мои пꙋщꙋ̀ на странꙋ безако́ннꙋ, и҆ свои҆хъ людїи повелю̀ сътвори́ти плѣнъ и҆ плѣне́нїе.
и҆ попра́ти гра́ды, и҆ положи́тї ѧ҆̀ въ прах̑ с̂е же не та́ко помы́слитъ, и҆ дш҃ею не та́ко намени́тъ.
н̂и и҆змѣни́тъ ѹ́мъ е҆го, ꙗ҆́коже потреби́ти страны̀ не ма́лы.
и҆ а҆ще рꙋкꙋтъ е҆мꙋ, ты́ ли е҆си е҆ді́нъ кнѧ́ѕь, и҆ речет̑.
нѣсм꙽ л̂и взѧ́лъ страны̀, ꙗ҆́же вы́ше вавѷло́на, и҆ хала́нъ и҆дѣже сто́лпъ съграже́нъ бѣ.
взѧ́лъ е҆смь а҆равїю, и҆ дама́скъ и҆ самарїю.
ꙗ҆́коже и҆ сїа взѧх̑ и҆ всѧ страны̀ възмꙋ̀·

Въспла́четесѧ и҆зваѧ́нїи въ і҆ерс̑҇лі́мѣ, и҆ въ самарїи, ꙗ҆коже б̂о сътворих̑ самарїи, и҆ рꙋкотворе́ннымъ еѧ̀, та́коже сътворю̀ і҆ерс̑҇лі́мови и҆ кꙋми́ромъ е҆го·

И҆ бꙋдетъ е҆гда сконча́етъ г҃ь всѧ̀ тва́ри в горѣ̀ сїѻ́нъ, и҆ въ і҆ерс̑҇лі́мѣ наведе́тъ на смы́слъ вели́каго цр҃ѧ а҆сѷрїиска, и҆ на высотꙋ̀ сла́вы ѻ҆чїю е҆го.
рече б̂о, крѣпостїю си́лы моеѧ сътворю̀, и҆ премꙋдростїю ра́зꙋма мое҆го ѿи҆мꙋ̀ предѣ́лы ꙗ҆зы́комъ, и҆ си́лꙋ и҆хъ плѣню̀, и҆ сътрѧсꙋ̀ гра́ды насе́леныѧ.
и҆ вселе́ннꙋю всю̀ ѻ҆бои҆мꙋ̀ рꙋко́ю мое҆ю ꙗ҆́ко гнѣздо̀, и҆ ꙗ҆́ко ѻ҆ста́вленыѧ ꙗ҆́ица възмꙋ̀.
и҆ не бꙋдет̑ никтоже и҆же ѹ҆бѣжи́тъ менѐ, и҆л̂и ѿвѣща́етъ м̂и съпроти́внѣ·

Є҆да просла́витсѧ секи́ра безъ сѣкꙋщаго ею̀, и҆л̂и възнесе́тсѧ пила̀ безъ влача́щаго ю҆̀.
та́коже а҆ще кт̂о во́зметъ же́зль и҆л̂и дре́во, и҆ не та́ко.
н̂о по́слетъ ѓь саваѻ́ѳъ на твою че́сть безъче́стїе, и҆ въ твое́и сла́вѣ ѻ҆гнь горѧ̀ възгорит̑сѧ.
и҆ бꙋдетъ свѣтъ і҆и҆л҃евъ въ ѻ́гнь.
и҆ ѻ҆свѣтитъ и҆̀ ѻ҆гне́мъ горѧ́щемъ, и҆ поѧ́сть ꙗ҆́ко сѣ́но ве́щь·

Въ то́и дн҃ь ѹ҆га́снꙋтъ го́ры и҆ хо́лми и҆ дꙋбра́вы, и҆ поꙗ҆́сть ѿ дш҃а до пло́ти·

И҆ бꙋдетъ бѣжа́и, ꙗ҆́ко бѣжа́нїе ѿ пла́мене горѧ́ща.
и҆ ѻ҆ста́вшеи ѿ них̑ бꙋдꙋтъ в число̀, и҆ дѣтищъ впи́шет̑ ѧ҆̀·

И҆ бꙋдетъ в то́и дн҃ь, не прило́житсѧ посе́мъ ѻ҆ста́нокъ і҆и҆л҃евъ.
и҆ ѹ҆цѣлѣ́вшїи і҆а́ковли, не бꙋдꙋтъ ксемꙋ̀ ѹ҆пова́юще на ѻ҆би́дѣвшаѧ их̑ н̂о бꙋдꙋтъ ѹ҆пова́юще къ б҃ꙋ ст҃омꙋ і҆и҆л҃евꙋ, и҆́стин꙽номꙋ.
и҆ бꙋдетъ ѻ҆ста́нокъ і҆а́ковль къ б҃ꙋ крѣ́пкомꙋ·

І҆ а́ще бꙋ́дꙋтъ сн҃ове і҆и҆л҃еви ꙗ҆́ко пѣсок̑҇ мор꙽скїи, ѻ҆ста́нокъ и҆хъ сп҃сетсѧ.
слово б̂о съврьша́ѧ и҆ съвъкꙋплѧ́ѧ пра́вдою, ꙗ҆́ко сло́во съкраще́но сътвори́тъ г҃ь въ все́и вселе́ннѣи·

Сего ради с̂е гл҃етъ г҃ь саваѻ́ѳъ, не бо́итесѧ лю́дїе моѝ ѿ а҆сѷрїи живꙋщеи въ сїѻ́нѣ.
ꙗ҆ко жезло́мъ пора́зит̑ т̂ѧ, ꙗ҆звꙋ б̂о наведе́тъ на́ тѧ, ꙗ҆́ко ви́дѣти пꙋть е҆гѷпетьскъ, е҆ще б̂о ма́ло и҆ преста́нетъ гнѣвъ.
н̂о ꙗ҆рость моѧ̀ на совѣе и҆хъ·

И҆ въста́витъ б҃ъ на́ нѧ ра́нꙋ, ꙗ҆́ко ꙗ҆́звꙋ мадїам̑лю, и҆ ꙗ҆́рость е҆го по пꙋтѝ и҆же по помо́рїю, на пꙋть и҆же въ е҆гѷпетъ·

И҆ бꙋ́детъ в то́и дн҃ь.
ѿꙗ҆́то бꙋдет̑ вре́мѧ е҆го съ ра́мене твоег̑҇, і҆ и҆́го е҆го ѿ вы́а твое҆ѧ̀, и҆ съгнїет̑ и҆́го ѿ твари е҆ле́а·

Прїидет̑ б̂о въ град̑ а҆г꙽га́и, и҆ минет̑ маге́ддаѻ, и҆ в мах̑ма́сѣ поло́житъ сосꙋ́ды своѧ.
и҆ минет̑ де́бръ, и҆ прїидетъ въ а҆г꙽га́и.
страх̑ прїиметъ ра́ма, гра́дъ саѹ́ловъ пробѣгнетъ дщѝ гали́млѧ, покоритсѧ лаи́са, покори́тсѧ въ е҆нанаѳо́ѳѣ.
ѹ҆жасе́сѧ мадеми́на, и҆ живꙋщїи в гѷвинѣ·

Ѹ҆тѣшите дн҃есь на пꙋтѝ пребы́ти.
ѹ҆тѣшите рꙋко́ю горꙋ̀ дще́рь сїѻ́ню, и҆ хо́лми и҆же въ і҆ерс̑҇лі́мѣ·

Сѐ влд̑ка г҃ь саваѻ́ѳъ, смѧтет̑ сла́вныѧ крѣ́постїю, и҆ высо́кїа ѹ҆кори́зною съкрꙋшат̑сѧ, и҆ смирѧт̑сѧ.
и҆ падт̑ꙋ высо́цїи мечем̑, дꙋбра́ва же съ высо́кими падет̑сѧ·

Глв̑҇а, а҃і·

Изы́иде жезлъ и҆с ко́рене і҆ес꙽се́ѻ́ва, и҆ цвѣтъ процвѣтет̑.
и҆ почїетъ на нем̑ дх҃ъ бж҃їи.
дх҃ъ премꙋдрости, и҆ смы́сла.
дх҃ъ совѣта, и҆ крѣпости.
дх҃ъ видѣ́нїѧ, и҆ бл҃гочестїѧ.
и҆спо́лнитъ и҆̀ дх҃ъ стра́ха бж҃їѧ·

Не по сла́вѣ ѻ҆сꙋдитъ, ни по гл҃анїю ѻ҆бличи́тъ.
н̂о ѻсꙋдитъ смире́нномꙋ сꙋдъ, и҆ ѻ҆бличи́тъ сла́вныѧ на землѝ.
и҆ порази́тъ зе́млю словесе́мъ ѹ҆стъ е҆го.
и҆ дх҃омъ ѹ҆стна́ми ѹ҆бїетъ нечести́ваго.
и҆ бꙋдетъ препоѧ́санъ пра́вдою въ чре́сла е҆го, і҆ и́стинною пома́зана ре́бра е҆го·

И҆ напасе́тсѧ въкꙋпѣ во́лк꙽ съ а́гньцемъ, и҆ ры́сь почїетъ съ ко́злищемъ, и҆ ю́нець со льво́мъ вкꙋпѣ напасꙋтсѧ.
и҆ ѻ҆троча̀ ма́ло поведет̑ ѧ҆̀.
и҆ во́лъ и҆ медвѣдь вкꙋпѣ напасе́тасѧ, и҆ въкꙋпѣ племѧ̀ их̑ бꙋдет̑·

И҆ во́лъ и҆ ле́въ вкꙋпѣ зо́блета плѣвы·

І҆ ѻ҆троча̀ мла́до на пеще́рꙋ а҆́спид̑скꙋ, и҆ на ло́же племене а́спид꙽ска рꙋкꙋ възло́жит꙽.
и҆ не сътворѧтъ ѕл̂а, н̂и възмо́гꙋтъ погꙋби́ти нико́гоже ѹ҆ горы̀ ст҃ыѧ моеѧ.
ꙗ҆́ко напо́лнисѧ всѧ̀ ѹ҆вѣдѣти г҃а, ꙗ҆́ко водѣ̀ мно́ѕѣ покрыти мо́реса·

И҆ бꙋдетъ в то́и дн҃ь ко́рень і҆ес꙽се́ѻвъ, и҆ въставлѧ́е҆мы владѣти страна́ми.
к немꙋ страны̀ надѣ́ютсѧ, и҆ бꙋ́детъ поко́и е҆го чи́стъ·

И҆ бꙋдетъ в то́и дн҃ь, приложитъ г҃ь ꙗ҆́ко показа́ти рꙋкꙋ свою.
и҆ възревнова́ти ѻ҆стан̑҇кꙋ про́чемꙋ людїи, е҆же а҆ще ѻ҆ста́нет꙽ ѡ а҆сѷрїи и҆ ѿ е҆гѷпта, и҆ вавѷло́на, и҆ ефїѻпїѧ, и ѿ е҆лами́ти, и҆ ѿ солне́чныхъ въсто́къ, и҆ ѿ а҆равїѧ·

И҆ воз̑двигнетъ зна́менїе въ страны̀, и҆ съберетъ поги́бшаѧ і҆и҆л҃евы.
и҆ расточе́нныѧ і҆ѹ́дины съберетъ ѿ четырь ѹ́глъ землѝ.
и҆ ѿи҆метсѧ рве́нь ѿ е҆фре́ма, и҆ вра́ѕи і҆ѹ́дины поги́бнꙋтъ.
и҆ ефремъ не възревнꙋет̑ і҆ѹ́дѣ, і҆ѹ́да не зазрит̑ е҆фремꙋ·

И҆ въсперꙋтъ в꙽ кораблихъ и҆ноплемен̑҇никъ мо́ре и҆ногдо́ю повою́ютъ, і҆ и҆же на восто́кы слн҃чныѧ.
і҆ и҆дꙋмею и҆ на моа́ва прь́вое рꙋцѣ възло́жатъ.
сн҃ове же а҆м꙽мо́ни прежде покарѧт̑сѧ, и҆ ѻ҆пꙋститъ г҃ь мо́ре е҆гѷпет꙽ско, и҆ възло́житъ рꙋкꙋ свою на рѣкꙋ̀ вѣтромъ преси́лномъ.
и҆ поразитъ на седмь де́брїи.
ꙗ҆́коже ходи́ти е҆мꙋ ѻ҆бꙋве́нꙋ.
и҆ бꙋ́детъ прохо́дъ лю́дем̑ мои҆мъ ѻ҆ста́вшимъ въ е҆гѷпте.
и бꙋдет̑ і҆и҆л҃ю ꙗ҆́ко и҆ дн҃ь е҆гда и҆зы́иде и҆зъ е҆гѷпта·

Глв̑҇а, в҃і·

И речеши в то́и дн҃ь блс̑҇влю т̂ѧ г҃и, и҆мже раз̑гнѣвасѧ на́ мѧ.
и҆ ѿвратѝ ꙗ҆́рость свою ѿ мене и҆ поми́лова м̂ѧ·

Се б҃ъ мои сп҃съ мои г҃ь, ѹ҆пова́ѧ бꙋдꙋ к немꙋ, и҆ не ѹ҆бою́сѧ.
занѐ сла́ва моѧ и҆ хвала̀ г҃ь, быс̑҇ м̂и на сп҃сенїе·

Почерпѣте во́дꙋ съ весе́лїем꙽, ѿ и҆сточникъ сп҃сенїѧ·

И҆ рече́ши в то́и дн҃ь, хвали́те г҃а, въспо́ите и҆мѧ е҆го.
възвѣсти́те въ ꙗ҆зы́цехъ сла́внаѧ е҆го, помина́ите ꙗ҆́ко възнесе́сѧ и҆мѧ е҆го.
хвалите и҆́мѧ гн҃е, ꙗ҆́ко высо́каѧ сътворѝ.
възвѣсти́те с̂е вс̂е по всеи землѝ·

Весели́тесѧ и҆ ра́дꙋитесѧ живꙋщїи в сїѻ́нѣ, ꙗ҆́ко възнесе́сѧ ст҃ыи і҆и҆л҃въ посреди тебе·

Глв̑҇а, г҃і·

Видѣнїе на вавѷло́на.
е҆же видѣ і҆са́їа сн҃ъ а҆мо́совъ·

На горѣ̀ ра́внѣ въз꙽дви́гнете зна́менїе, възнесете глс̑҇а свои, и҆ не бо́итесѧ.
поѹ҆щаите рꙋко́ю, ѿврьзи́те кнѧѕи.
аз̑ повелю̀, аз̑ же ѧ҆̀ поведꙋ̀.
щюдове и҆дт̑ꙋ сконча́ти ꙗ҆́рости мое҆ѧ, ра́дꙋющесѧ въкꙋпѣ и҆ ѹ҆карѧ́юще·

Глс̑҇а стра́н꙽ мно́гъ на гора́хъ, подобенъ стра́н꙽ мно́гъ.
гласъ цр҃ь, и҆ стра́нъ събра́нъ.
г҃ь саваѻѳ̑҇ заповѣда странѣ̀ въѻ҆рꙋже́неи прїити ѿ землѧ̀ и҆здале́ча, ѿ конца ѻ҆снова́нїѧ нб҃си г҃ь, и҆ въѻ҆рꙋжѝ е҆го сѣчца, расы́пати всю вселе́ннꙋю·

Рыда́ите бли́зъ б̂о дн҃ь гн҃ь.
и҆ съкрꙋше́нїе ѿ б҃а прїидет̑·

Сего ради всѧ́ка рꙋка разъслабѣ́етъ и҆ всѧ́ка дш҃а чл҃ча ѹ҆бои́тсѧ, и҆ смѧтꙋтсѧ послы̀.
и болѣзни прїимꙋтъ ѧ҆̀, ꙗ҆́ко женѣ̀ ражда́ющи.
и҆ поскорбѧ́тъ дрꙋгъ ко́ дрꙋгꙋ и҆ ѹ҆жаснꙋтсѧ, и҆ лице и҆хъ ꙗ҆́ко пла́мы премѣнѧ́тъ·

Сѐ б̂о дн҃ь гн҃ь безъ цѣльбы̀ грѧде́тъ ꙗ҆рости и҆ гнѣва, положи́ти вселе́ннꙋю всю пꙋстꙋ, и҆ грѣшники погꙋби́ти ѿ неѧ·

Звѣзды б̂о нбс̑҇ныѧ и҆ крꙋжи́лїѧ, и҆ всѧ̀ тва́ръ нбс̑҇наѧ свѣта не просиѧ́ют꙽.
и҆ помрьчет̑ слн҃це въсїѧ́ющее и҆ мс̑҇ць не дасть свѣта свое҆го·

и҆ заповѣ́дѣ вселе́ннѣи все́и ѕло̀, и҆ нечести́вымъ грѣхѝ и҆хъ.
и҆ погꙋблю̀ ѹ҆кори́знꙋ безако́нныхъ, и҆ ѹ҆кори́знꙋ презори́выхъ смирю̀·

И҆ бꙋдт̑ꙋ ѻ҆ста́вшеи честнѣ́и, паче нежели злато пож꙽же́ное.
и҆ чл҃къ честенъ бꙋдетъ, паче нежели ка́мень и҆же ѿ сапѳи́ра·

Поколѣблетъ бо сѧ нб҃о, и҆ землѧ̀ потрѧсет̑сѧ и҆з д꙽на̀ свое҆го·

Ꙗ҆́рости дѣлѧ и҆ гнѣ́ва г҃а саваѻ́ѳа, въ дн҃ь е҆гда̀ прїидетъ ꙗ҆рость е҆го·

И҆ бꙋдꙋтъ ѻ҆ста́вшеи ꙗ҆́ко сернъ бѣжа̑ и҆ ꙗ҆́ко ѻ҆вца̀ заблꙋди́вши.
и҆ не бꙋдет̑ събира́ющаго и҆̀.
ꙗ҆́коже чл҃кꙋ в люд̑и̑ своѧ ѻ҆брати́тисѧ, и҆ чл҃кꙋ въ странꙋ̀ свою прїити.
и҆же б̂о а҆ще плѣни́тсѧ повине́тсѧ.
і҆ и҆же събра́ни сꙋть мечемъ падꙋтъ.
и҆ ча́да и҆хъ пред̑ ними разбїютъ.
и҆ домы̀ и҆хъ плѣнѧ́тъ, и҆ же́ны и҆хъ по́имт̑ꙋ·

Сѐ а҆зъ въста́влю на вы ми́ды, и҆ не мѣнѧтъ сребра̀ ни зла́та требꙋют̑·

стрѣле́нїе ю́ношеско съкрꙋша́тъ, и҆ ча́дъ вашихъ не поми́лꙋютъ.
и҆ не пощади́та ѻчи и҆хъ ча́дъ твоих̑·

и҆ бꙋдетъ вавѷло́нъ добрыи и҆ сла́вныи под̑ цр҃и халде́иски.
ꙗ҆коже расы́па б҃ъ содомꙋ и҆ гомо́рꙋ, и҆ не насели́тсѧ въ вѣчное времѧ.
и҆ не вни́дꙋтъ в ни́хъ до многъ рожде́нїи, ни вни́дꙋтъ во́нь а҆равлѧ́не, и҆ пастꙋсѝ не почїютъ в немъ·

И҆ почїютъ т̂ꙋ ѕвѣрїе, и҆ напо́лнѧтсѧ домо́ве гласа.
и҆ почїютъ т̂ꙋ сѷрины, и҆ бѣ́си т̂ꙋ въс꙽плѧ́шꙋтъ.
и҆ ѻ҆нокен꙽таѷры т̂ꙋ въселѧ́тсѧ, и҆ въгнѣздѧ́тсѧ е҆же́ве в домо́хъ и҆хъ·

Глв̑҇а, д҃і·

Скоро и҆́детъ и҆ не ѹ҆мед̑лит꙽.
и҆ поми́лꙋетъ г҃ь і҆а́кова.
и҆ съберет꙽ е҆щѐ і҆и҆л҃ѧ, и҆ почїет̑ на землѝ свое́и.
и҆ прихо́дник̑҇ приложи́тсѧ къ домꙋ̀ і҆а́ковлю.
и҆ по́имꙋтъ ѧ҆̀ страны̀, и҆ въведꙋтъ ѧ҆̀ въ мѣсто и҆хъ и҆ преи҆мт̑ꙋ, и҆ ѹ҆мно́жатсѧ на землѝ бж҃їи в рабы̀ и҆ рабы́нѧ.
и҆ бꙋдꙋтъ плѣнени плѣни́вшеи ѧ҆̀, и҆ владѣти бꙋдт̑ꙋ ѻ҆бладавшеи и҆ми.
и҆ бꙋдетъ в то́и дн҃ь, покои́тъ т̂ѧ г҃ь ѿ болѣзнї и ꙗ҆́рости твое́ѧ, и҆ ѿ рабо́ты жесто́кїѧ, е҆ю҆же рабо́тасте и҆мъ·

И҆ прїиметъ прит̑чю сїю на цр҃ѧ вавѷлоньска, и҆ речеши въ то́и дн҃ь, ка́ко почѝ въземлѧ́и.
и҆ почѝ пот꙽щава́ѧи·

съкрꙋши б҃ъ ꙗ҆ремъ грѣшничъ, ꙗ҆рем̑ кнѧ́ѕь пораѕѝ въ странꙋ̀ ꙗ҆́ростїю, и҆ ꙗ҆́звою без̑ и҆сцѣленїѧ.
поража́ѧ странꙋ̀ ꙗ҆́звою ꙗ҆́рости.
е҆ꙗ҆́же не пощадѣ почѝ ѹ҆пова́ющи·

Вс̂ѧ землѧ да вопїетъ съ весе́лїемъ.
и҆ сла́ва дꙋбравы да сѧ възра́дꙋетъ до тебѐ, и҆ смрѣчїе дꙋбра́вы речет̑.
ѿнелѣ же ѹ҆спѐ, не възы́иде посѣка́ѧи насъ·

А҆́дъ до́лѣ раз꙽гнѣ́васѧ срѣтъ т̂ѧ.
въста́ша с тобо́ю вс̂и щꙋдове ѻ҆блад̑шей зем̑ле́ю·

І҆ и́же въста́ша ѿ прс̑҇толъ свои҆хъ вс̂и цр҃їе стра́ньстїи.
вс̂и ѿвѣща́ютъ и҆ рекꙋтъ тебѣ̀, и҆ т̂ы плѣне́нъ е҆си ꙗ҆коже и҆ м̂ы, и҆ въ нас̑҇ намѣненъ е҆си·

И҆ сни́де сла́ва твоѧ въ а҆́дъ, мно́гое веселїе твое.
под̑ тобо́ю посте́летъ гно́и, и҆ покров̑҇ тво́и че́рвь·

Ка́ко сѧ спаде съ нб҃се ден̑҇ница, въсходѧ́щїа заѹ҆́тра.
съкрꙋшисѧ на землѝ, пꙋща́ѧи къ всѣмъ странам̑·

Ты б̂о рече въ ѹ҆́мѣ свое҆мъ.
на́ нб҃о възы́идꙋ, и҆ вы́ше ѕвѣздъ нбс̑҇ныхъ поста́влю прс̑҇тлъ сво́и.
и҆ сѧдꙋ на горѣ̀ высоцѣ, на гора́хъ высока́хъ ꙗ҆́же на сѣ́веръ.
възыидꙋ вы́ше ѻ҆́блакъ·

и҆ бꙋдꙋ ра́венъ вы́шнемꙋ·

Нн҃ѣ же во а҆́дъ сни́деши, и҆ въ ко́ренїе зем̑лѝ·

И҆ ѹ҆́зрѣвшеи тѧ въчюдѧт̑сѧ ѻ҆ тебѣ и҆ рекꙋтъ.
се́й чл҃къ и҆же разгнѣва̀ вс̂ю зе́млю, потрѧса́ѧи цр҃ѧ.
порѣва́ѧи вселе́ннꙋю вс̂ю, грады расы́па и҆ плѣненыхъ не разд̑рѣши·

Вс̂и цр҃и страньстїи ѹ҆спо́ша в чести.
и҆ чл҃къ въ домꙋ свое҆м꙽.
а҆ ты̀ повръжешисѧ въ гора́хъ ꙗ҆́ко мр҃твецъ.
похꙋленъ съ мно́гими мр҃твъцы и҆сѣче́ными мечемъ.
съходѧ́щимъ во а҆́дъ·

Ꙗ҆́коже и҆ ри́за въ кро́ви намо́чена не бꙋдетъ чи́ста.
та́коже и҆ т̂ы не бꙋ́деши чи́стъ, занѐ зе́млю мою̀ погꙋбѝ, и҆ лю́ди моа̀ и҆зби.
не пребꙋ́деши въ вѣ́чное вре́мѧ·

Племѧ̀ ѕло́е ѹ҆готовѝ ча́да своѧ на ѹ҆бїе́нїе, грѣхи ѿц҃а твое҆го, да не въстант̑ꙋ и҆ прича́стѧтъ с̂и зе́млю, и҆ напо́лнѧтъ зе́млю ра́ти.
и҆ въста́нꙋ на́ нѧ гл҃етъ г҃ь саваѻ́ѳъ.
и҆ погꙋблю̀ и҆мѧ и҆хъ и҆ ѻ҆ста́нокъ и҆ племѧ·

Се̂ гл҃етъ г҃ь.
положꙋ вавѷлона пꙋ́ста ꙗ҆́ко въгнѣзди́тисѧ е҆жемъ, и бꙋ́детъ нивочто́же.
и҆ положꙋ̀ и҆̀ бре́нїю пождь в па́гꙋбꙋ·

Се̂ гл҃етъ г҃ь саваѻ́ѳъ.
ꙗ҆́коже гл҃ахъ та́ко и҆ бꙋ́детъ.
и҆ ꙗ҆́кож̑ совѣща́хъ, та́ко и҆ ѹ҆ста́витсѧ·

Ꙗ҆́ко погꙋби́ти а҆сѷрїю на землѝ мое́и и на гора́хъ мои҆хъ, и҆ бꙋ́детъ въ попра́нїе.
и҆ ѿи́метсѧ ѿ нихъ ꙗ҆ре́мъ и҆хъ, и҆ бре́мѧ их̑ ѿ ра́ма их̑ ѿи́мет̑сѧ·

Се́и совѣтъ и҆же совѣща̀ г҃ь на вселе́ннꙋю всю̀.
и҆ с̂и рꙋка̀ высо́каѧ на всѧ̀ страны вселе́ныѧ.
е҆же б̂о совѣщает̑ б҃ъ, кт̂о разори́тъ, и рꙋкꙋ е҆го высо́кꙋю кт̂о ѿвратит̑·

Въ лѣто в не́же ѹ҆́мре а҆ха́зъ цр҃ь.
бы́сть сло́во с̂е.
не ра́дꙋитесѧ вс̂и и҆ноплеме́нницы.
съкрꙋши б̂о сѧ ꙗ҆́ре́мъ поража́ющаго в̂ы.
ѿ племе́не б̂о змїина и҆зы́идет꙽ поро́дъ а҆спидьскъ, и҆ поро́дъ и҆хъ и҆зы́идетъ змїѧ парѧ́ща·

И҆ напасꙋтсѧ ѹ҆бозїи гм҃ъ.
ни́щїи же чл҃цы въ ми́рѣ почїютъ.
и҆ потребит̑ гладомъ племѧ̀ твое, и҆ ѻ҆ста́нокъ тво́и и҆збїетъ·

Пла́читесѧ вра́та град̑наѧ, да възопїютъ гра́ды възмѧтенїи.
и҆ноплеме́нници вс̂и ꙗ҆́ко ды́мъ ѡ сѣ́вера и҆детъ, и҆ нѣсть л꙽зѣ бы́ти.
чт̂о ли ѿвѣща́ютъ кнѧ́ѕи стра́ньстїи, ꙗ҆́ко г҃ь ѻ҆снова сїѻ́на.
и҆ тѣмъ сп҃сꙋтсѧ смире́нїи въ лю́дехъ·

Глв̑҇а, е҃і·

Сло́во на моа҆вит̑скꙋю зе́млю·

Но́щїю поги́бнетъ моа҆вит̑ска землѧ̀, но́щїю б̂о поги́бнет̑ град̑ моа҆витьскь.
пла́читесѧ въ себѣ̀, поги́бнетъ б̂о лаѻ҆диво́нъ, в нем̑же требник̑҇ вашъ.
та́мо възы́дѣте пла́катисѧ къ наваѷвꙋ моа҆вѷтъскꙋ·

Пла́читесѧ, на все́и главѣ плѣшъ, вс̂ѧ мы́шца ѻ҆сѣ́чены.
на стогнах̑ е҆го препоѧ́шетесѧ въ ꙗ҆ри́ги.
и҆ въспла́четесѧ на храми́нахъ е҆го, и҆ на ѹ҆́лицахъ е҆го, и҆ на распꙋтїи е҆го вс̂и възрыда́ютъ съ пла́чем̑.
ꙗ҆́ко возопи е҆сево́нь, и҆ гл҃а.
до́ндеже ѹ҆слы́шасѧ гла́съ е҆го·

Сего ради чресла̀ моа҆вит̑ска въпїю́тъ, дш҃а е҆ѧ̀ ѹ҆вѣсть.
срд̑це моа́витьскїѧ въпїетъ в не́и до сиго́ра.
ю҆ница б̂о е҆сть третиа҆ки<.>

Въ вошествїи же е҆же к тебѣ пла́чющесѧ възыдт̑ꙋ пꙋтемъ а҆рони́млем꙽, въпїетъ сътренїе и҆ трꙋсъ.
вода̀ неври́млѧ пꙋста бꙋ́детъ, и҆ сѣ́но е҆ѧ̀ ѻ҆скꙋдѣ́ет꙽, сѣ́на бо ѕе́лена не бꙋдет̑·

е҆да си́це хо́щетъ спасе́нъ бы́ти·

Наведꙋ бо на де́брь а҆ра́вскꙋ и҆ во́змт̑ꙋ ю҆̀ съвокꙋпи б̂о во́пль преѣлъ моа҆витьскь, съ а҆галимлемъ, и҆ пла́чь еѧ̀ до кла́дѧѕѧ е҆сали́млѧ.
вода̀ рем꙽мо́нѧ напо́лнитсѧ кро́ви.
наведꙋ̀ б̂о на рем꙽мо́на а҆равлѧны, и҆ во́змꙋть племѧ̀ моа́вле, и҆ а҆рїилево.
и҆ прокъ а҆дамо́нь, пꙋщꙋ а҆ки гад̑ на́ землю·

Глв̑҇а, ѕ҃і·

Єда̀ камы́къ пꙋстъ е҆сть гора̀ сїѻ́нѧ.
бꙋ́деши б̂о а҆ки пти́ца въсперꙋщи птищ̑҇.
ѿꙗ҆ть дщ̂и моа́влѧ проход̑и̑ а҆рно́ни боле совѣщава́ите.
сътворѧ́ите кро́въ желѧ́ е҆ѧ̀ прс̑҇но въ плад̑нꙋю тмꙋ̀ пробѣгнꙋтъ, ѹ҆жа̑снꙋшасѧ.
е҆да̀ и҆спе́рва ѻ҆бита́ютъ тебѣ̀ ѹ҆бѣ́зи моавли бꙋ́дꙋтъ въ покрове́нїе вам꙽, ѿ лица̀ прогонѧ́ща ꙗ҆́ко ѿꙗ҆́сѧ по́мощь твоѧ̀.
и҆ кнѧ́ѕь погиба́етъ попира́ѧи на землѝ.
і҆ и҆спра́витсѧ съ ми́лостїю прс̑҇тлъ, и҆ сѧ́детъ на не́мъ съ и҆стинною въ хра́мѣ двд҃вѣ сꙋдѧ̀ и҆ възыска́ѧ сд̑ꙋ, и҆ подвижа пра́вдою·

Слы́шахомъ ѹ҆кори́знꙋ моа́влю, ѹ҆коре́нъ бы́сть ѕѣ́ло.
презо́рь ѿвръже, не та́ко вол̑҇хвова́нїе твое не та́ко.
въспла́чет̑сѧ моа́въ, въ моа́витьстѣи б̂о всѝ воспла́чют̑сѧ живꙋщи.
и҆́мже въсхотѣ поѹ҆чи́ши, и҆ не ѹ҆срамлѧ́ешисѧ.
дѣти е҆сево́нѧ, пожелѣ́ютъ виногра̑ севама́нь.
пожира́ющеи сратны̀, попоретѐ виногра́ды е҆го до наа҆зира не съвокꙋпи́тесѧ.
попла́ваите пꙋсты́ню, пꙋщенїи ѻ҆ста́ша прои҆до́ша̑ пꙋсты́ню.
сего ради въспла́чют̑сѧ, ꙗ҆́ко пла́чь нази́ревъ виногра́дъ севама́нь.
дꙋ́бїе ти посече е҆сево́нь, и҆ е҆леа́ли.
ꙗ҆́ко на жа́твꙋ твою̀ и҆ на и҆манїе винꙋ̀ поперꙋ е҆̀, и҆ вс̂е падет̑сѧ·

и҆ въздви́гнетсѧ ра́дость и҆ весе́лїе ѿ виногра́да и҆хъ, и҆ въ виногра́дехъ твои҆хъ не възра́дꙋют̑сѧ.
и҆ не и҆згнетꙋтъ вина въ тѣсцѣх꙽, преста́ло б̂о е҆сть·

Сего ради чре́во мое на моа҆ва а҆ки гꙋ́сли въз꙽гласитъ, и҆ ѹ҆тро́ба моа а҆ки град̑ и҆же поновѝ.
и҆ бꙋдетъ ꙗ҆́ко срамлѧ́тисѧ тебѣ, ꙗ҆́ко трꙋ́дисѧ моа́въ ѻ҆ требницѣхъ.
и вни́детъ въ сотворе́нныѧ рꙋка́ма еа̀ ꙗ҆́ко помоли́тисѧ, и҆ не возмо́жетъ и҆зба́вити е҆го·

Се сло́во е҆же гл҃а г҃ь на моа́ва.
е҆гда же гл҃а и҆ н҃нѣ гл҃ю.
въ тре́хъ лѣтех̑ лѣтъ нае҆́мника, похꙋ́литсѧ слава моа́влѧ въ все́мъ бога́тьствѣ мно́ѕѣ.
и҆ ѻ҆ста́вит̑сѧ ѹ҆мненъ и҆ безъ че́сти·

Глв̑҇а, з҃і·

Сло́во е҆же на дама́скъ·

Се̂ дама́скъ во́зметсѧ ѿ град̑ и҆ бꙋдетъ въ паде́нїе ѻ҆ста́вленна въ вѣ́къ, в ло́же па́ствам̑ и҆ въ поко́и.
и҆ не бꙋ́дет̑ гонѧ́щаго.
и҆ къ семꙋ̀ не бꙋдетъ тве́рди ꙗ҆́ко въбѣгнꙋти е҆фремꙋ.
и҆ къ семꙋ̀ не бꙋ́детъ црс̑҇тво въ дама́сцѣ, и҆ прокь сирь, нѣси б̂о ты ѹ҆́н꙽ше сн҃въ і҆и҆л҃евъ, и҆ сла́вы и҆хъ·

Се гл҃етъ г҃ь саваѻ́ѳъ.
бꙋдетъ въ то́и дн҃ь, поме́рькнетъ сла́ва і҆а́ковлѧ.
и҆ си́лнаѧ сла́вы е҆го потрѧсꙋтсѧ·

И бꙋ́детъ ꙗ҆́ко е҆гда̀ кт̂о събира́етъ жа́твꙋ стоа́щꙋ, и҆ сѣмѧ кла́съ пожина́етъ.
и҆ бꙋ́детъ ꙗ҆́ко е҆гда̀ кт̂о събира́етъ кла́сы въ де́бри твердѣ, и ѻ҆ста́нетъ в не́и сте́блїе.
и҆ли а҆ки зе́рна масли́чна дв̂ѣ и҆л̂и г҃ на концы высо́цѣ, и҆л̂и четы́ри и҆л̂и пѧ́ть на вѣтви еѧ̀ ѻ҆ста́нꙋтъ·

Се гл҃етъ г҃ь б҃ъ і҆и҆л҃евъ.
в то́и дн҃ь ѹ҆пова́ѧ бꙋ́детъ чл҃къ къ сътво́ръшемꙋ и҆̀.
и҆ ѻ́чи е҆го къ ст҃мꙋ і҆и҆л҃евꙋ во́зрѧтъ.
и҆ не бꙋдꙋтъ ѹ҆пова́юще къ требникомъ, н̂и дѣ́лы рꙋкꙋ и҆хъ е҆же сътвори́ста прьсты и҆хъ.
и҆ не ѹ҆́зрѧтъ дꙋбравъ их̑, н̂и гнюсны и҆хъ·

Въ то́и дн҃ь бꙋ́дꙋтъ гра́ди твоѝ ѻ҆ста́влени.
ꙗ҆́коже ѻ҆ста́виша и҆̀ а҆мор꙽реи і҆ еѷвеи ѿ лица сн҃въ і҆и҆л҃ев꙽, и҆ бꙋдꙋтъ пꙋсти·

Занѐ ѻ҆ста́ви бг҃а сп҃са твое҆го, и҆ г҃а по́мощ꙽ника твое҆го не помѧнꙋ̀.
сего ради насади́ши сад̑ невѣренъ, и҆ сѣмѧ невѣрно.
вон꙽же б̂о дн҃ь а҆ще насади́ши заблꙋди́ши·

А҆ще л̂и заѹ҆́тра насади́ши т̂о процвѣтет̑ на жатвꙋ, и҆ во́ньже дн҃ь причастит̑, а҆ки ѿц҃ь б̂о чл҃къ причастит̑ сн҃ы своѧ̀·

ѽ лю́те мно́жествꙋ стран̑҇ мно́гъ а҆ки мо́ре мѧтѧсѧ, та́коже сѧ смѧтет̑.
и҆ ю́гъ б̂о стран̑҇ мно́гъ ꙗ҆ко вода̀ воз̑шꙋмит̑, а҆ки множество во́дъ ꙗ҆зыцы мнози, а҆ки во́ды мно́ги нꙋди́ми сходѧ́ще.
и҆ запретит̑ е҆мꙋ, и҆ дале́че проженет̑ и҆̀.
а҆ки прах̑ плѣвныи вѣ́ющих̑ проти́вꙋ вѣтрꙋ, и҆ ꙗ҆́ко прах̑ ко́лныи бꙋ́рѧ възносѧ́щи·

К ве́черꙋ бꙋдет̑ же́лѧ, и҆ преже заѹ҆́трины.
и҆ не бꙋдет̑ сїѧ ча́сть плѣни́вших̑ в̂ы.
и҆ жре́бїи причасти́вшихъ ва́съ·

Глв̑҇а, и҃і·

Го́ре землѝ е҆ѧ́же кора́бльнаѧ кры́ла ѻ҆бо́нꙋ странꙋ̀ рѣкѝ мѷрьски.
пꙋща́ѧи по́ морю послы̀, и҆ кни́ги по́сланныѧ ве́рхꙋ воды̀.
по́идꙋтъ б̂о вѣ́стницы ле́гцы къ странѣ̀ высо́цѣ и҆ къ лю́демъ стра́нномъ и҆ стра́шном̑.
кт̂о ѻ҆бо́нꙋ странꙋ̀ и҆хъ страна не причаща́ема и҆ попра́на·

Нн҃ѣ рѣки земныѧ вс̂ѧ а҆ки страна̀ насе́лена насе́литсѧ.
страна̀ и҆хъ а҆ки зна́менїе съ го́ръ въз꙽дви́гнетсѧ.
а҆ки гла́съ трꙋбы̀ ѹ҆слы́шанъ бꙋ́детъ·

Ꙗ҆́ко та́ко м̂и рече г҃ь.
ѹ҆тверженїе бꙋдет̑ въ мое҆мъ градѣ.
а҆ки свѣтъ зно́ѧ полꙋденьнаго.
а҆ки ѻ҆́блакъ ро́сныи въ дн҃ь жа́твы.
и҆ бꙋ́детъ пре́же жа́твы е҆гда̀ сконча́етсѧ цвѣтъ.
и҆ гре́знъ зе́ленъ процвѣте́тъ цвѣтъ ки́селъ.
и҆ ѻ҆бъе́млет̑ грезны ма́лыѧ се́рпомъ.
и҆ ло́зїе ѿвръжетъ и҆ посѣчет꙽, и҆ ѻ҆ста́витъ въкꙋпѣ п꙽тицамъ нбс̑҇нымъ и҆ ѕвѣ́ремъ зе́мным̑.
и съберꙋтсѧ на́ нѧ пти́ца нбс̑҇ныѧ, и҆ вс̂и ѕвѣрїе земли на́нь прїидꙋтъ·

Въ то̀ вре́мѧ принесꙋтсѧ да́рове г҃ꙋ саваѻ́ѳꙋ, ѿ лю́дїи ско́рбных̑ и҆ посѣче́ных̑.
и҆ ѿ лю́дїи вели́ких̑, ѿ нн҃ѣ и҆ въ вѣ́чное времѧ.
страна̀ надѣ́ющисѧ и҆ попра́на, ꙗ҆́же е҆сть въ ча́сти рѣчнѣи землѧ своеѧ̀.
на мѣсте и҆дѣже и҆́мѧ г҃а саваѻ́ѳа, въ горѣ̀ сїѻ́нѣ·

Глв̑҇а, ѳ҃і·

Видѣнїе на е҆гѷпта·

Се̂ г҃ь сѣди́тъ на ѻ҆́блацѣ ле́гцѣ.
и҆ прїидетъ въ е҆гѷпетъ, и҆ потрѧсꙋтсѧ рꙋка́ми сътворе́нїи вс̂и е҆гѷпет꙽стїи ѿ лица̀ е҆мꙋ, и҆ срд̑ца и҆хъ покарѧ́тсѧ в ни́хъ, и҆ въста́нꙋтъ е҆гѷптѧ́не на е҆гѷптѧ́ны.
и҆ въѻ҆рꙋжи́тсѧ чл҃къ на бра́та свое҆го, и҆ чл҃къ на бли́жнѧго свое҆го.
и҆ въста́нетъ гра́дъ на гра́дъ.
и҆ зако́нъ на зако́нъ.
и҆ възмѧте́тсѧ дх҃ъ е҆гѷпет꙽скъ в ни́хъ, и҆ совѣтъ и҆хъ расы́плю·

И҆ въпро́сѧтъ бого́въ своих̑ и҆ кꙋми́ръ и҆хъ, и҆ гласѧ́щихъ ѿ землѧ̀, и҆ влъхвова́нїи ѿ ѹ҆тро́бы.
и҆ преда́мъ е҆гѷпетъ в рꙋцѣ чл҃чи властелемъ жесто́комъ, и҆ цр҃и жесто́цы ѻ҆блада́ютъ и҆́ми·

Се гл҃етъ г҃ь саваѻ́ѳъ.
и҆ пїю́тъ е҆гѷпти во́дꙋ ꙗ҆́же на помо́рїи, а҆ рѣка̀ ѻ҆скꙋдѣ́етъ и҆ по́схнетъ.
и҆ ѻ҆скꙋдѣ́ютъ рѣ́ки, и҆ рвени́ца рѣ́чныѧ, и҆ по́схнетъ ве́сь со́нмъ во́дныи.
и҆ въ всѧкомъ лꙋ́ѕѣ тро́стнѣмъ и҆ си́тнѣмъ, и҆ лꙋ́чїе зеле́но, и҆ все е҆же ѻ҆́крс̑҇тъ рѣкѝ, и҆ вс̂е сѣ́емое рѣко́ю по́схнетъ вѣтренымъ расыпа́нїемъ.
и҆ въздохнꙋтъ рыбарїе вси в꙽мещꙋщеи мрежа в рѣкꙋ, и҆ вме́щꙋщеи не́воды, и҆ вме́щꙋщеи ѻ҆ме́ты въжделѣ́ютъ·

И҆ стꙋдъ прїимꙋтъ дѣлающаѧ ле́нъ, и҆ дѣлающаѧ синетꙋ̀.
и҆ бꙋ́дꙋтъ сновꙋю҆щеи съ болѣзнїю, и҆ творѧ́щеи ѻ҆ловинꙋ попекꙋтсѧ, и҆ поболѧ́тъ дш҃а и҆хъ.
и҆ ѹ҆роди́ви бꙋ́дꙋтъ кнѧ́ѕи ѳанеѻ́ви, и҆ мꙋ́дрїи цр҃евы совѣтницы, совѣты и҆хъ ѻ҆бъю҆родѣ́ютъ·

Ка́ко речетѐ цр҃ю сн҃ове смы́сленыхъ, вы сн҃ове цр҃ь первыхъ.
гдѣ сꙋть мꙋдрїи твои, да т̂и совѣстѧ́тъ, и҆ да рекꙋтъ.
чт̂о съвѣща г҃ь саваѻ́ѳъ на е҆гѷпта·

ѻ҆скꙋдѣша кнѧѕи ѳане́ѻви, и҆ възнесо́шасѧ кнѧѕи мем̑фи́т꙽стїи, и҆ прельстѧтъ е҆гѷпта по племе́немъ.
г҃ь чрьпа и҆мъ дꙋх́ъ прельще́нїѧ.
и҆ прельсти́ша е҆гѷпта всѣми дѣлесы̀ и҆хъ, ꙗ҆́коже прельща́етсѧ пїа́ныи, і҆ и҆зблева́выи воспѧт̑·

и҆ не бꙋ́детъ е҆гѷптѧ́номъ дѣ́ла, е҆же бы сътвори́ло главꙋ̀ и҆ ѻ́шибъ.
ре́кше нача́токъ и҆ коне́цъ·

В то́и дн҃ь бꙋдꙋтъ е҆гѷпти а҆ки же́ны въ стра́сѣ и҆ въ трꙋсѣ, ѿ лица̀ рꙋкѝ г҃а саваѻ́ѳа, ю҆́же то́и възложитъ на́ нѧ.
и҆ бꙋдетъ стра́на жидо́въска въ странахъ е҆гѷптѧ́номъ.
всѧк꙽ и҆же а҆ще въспомѧне́тъ ѧ҆̀ и҆мъ, ѹ҆боѧ́тсѧ совѣта ради г҃а саваѻ́ѳа, и҆же съвѣща г҃ь на́ нѧ·

В то́и дн҃ь бꙋ́детъ пѧ́ть гра́дъ въ е҆гѷптѣ, гл҃юще ꙗ҆зы́комъ ханани́т꙽скомъ, и҆ кленꙋщасѧ и҆менемъ гн҃имъ.
грд̑а а҆се́дескъ, прозове́тсѧ е҆ді́нъ грд̑а·

В то́и дн҃ь бꙋ́детъ тре́бникъ гв҃и въ землѝ е҆гѷпет꙽стѣи, и҆ сто́лпъ въ предѣ́лехъ гв҃и.
и҆ бꙋ́детъ въ зна́менїе въ вѣ́къ гв҃и въ землѝ е҆гѷпет꙽стѣ.
ꙗ҆́ко въскричатъ къ гв҃и заѕлѧ́щихъ и҆мъ дѣ́лѧ, и҆ пꙋститъ и҆мъ г҃ь чл҃ка, и҆же сп҃сетъ ѧ҆̀.
сꙋдѧ́и сп҃сетъ ѧ҆̀.
и҆ зна́емъ бꙋ́детъ г҃ь е҆гѷптѧ́номъ, и҆ ѹ҆вѣ́дѧтъ е҆гѷптѧ́не г҃а в то́и дн҃ь.
и҆ сътво́рѧтъ тре́бы и҆ да́ры, и҆ ѻ҆бѣща́ютъ моли́твы гв҃и, и҆ ѿдадѧ́тъ.
и҆ поразит̑ г҃ь е҆гѷптѧ́ны ꙗ҆́звою вели́кою, і҆ и҆сцѣлитъ ѧ҆̀ цѣльбо́ю.
и҆ ѻ҆братѧт̑сѧ къ гв҃и, и҆ ѹ҆слы́шит̑ ѧ҆̀ і҆ и҆сцѣлит̑ ѧ҆̀·

В то́и дн҃ь бꙋдетъ пꙋть е҆гѷптꙋ къ асирїемъ, и҆ вни́дꙋтъ а҆сирїи въ е҆гѷпетъ.
а҆ е҆гѷпти по́идꙋтъ въ а҆сирїю, и҆ рабо́таютъ е҆гѷпти а҆сиріем̑·

В то́и дн҃ь бꙋдетъ і҆и҆л҃ь трижды въ асирїи҆хъ, и҆ въ е҆гѷптѧнех̑.
блс̑҇венъ в зе́млю, ю҆́же блс̑҇ви г҃ь саваѻ́ѳ꙽, гл҃ѧ.
блс̑҇вени лю́дїе мои и҆же въ е҆гѷптѣ, і҆ и́же въ а҆сирїи҆хъ.
и҆ прича́стїе мое і҆и҆л҃ь·

Глв̑҇а, к҃·

В лѣто в не́же преиде наѳа́нъ въ а҆зо́тъ, е҆гда пꙋсти и҆ а҆рна̀ цр҃ь а҆сѷрїискъ, и҆ вое҆ва̀ на а҆зо́тъ, и҆ взѧ̀ и҆̀·

Тогда рече г҃ь къ і҆са́їѝ сн҃ꙋ а҆мо́совꙋ, гл҃ѧ.
и҆дѝ и҆ свер꙽зи врѣтище съ чреслъ свои҆хъ, и҆ санда́лїи своих̑ и҆зꙋ́исѧ, и҆ сътворѝ си́це.
ходѧ̀ на́гъ и҆ бо́съ.
и҆ рече г҃ь, ꙗ҆́коже хо́дит̑ рабъ мо́и і҆са́їа на́гъ и҆ бо́съ, г҃ лѣта бꙋдꙋтъ е҆гѷптѧномъ зна́менїа и҆ чюдеса̀, и҆ еѳїѻ́плѧномъ·

Ꙗ҆́ко такоже ѿведетъ цр҃ь а҆сѷрїискъ плѣнники е҆гѷпет꙽ски и҆ еѳїѻ́пъски, ю҆́ноша и҆ ста́рца, на́ги и҆ бо́сы ѿкрове́ны стыдѣнїи е҆гѷпет꙽ски.
и҆ срамѧ́тсѧ ѻ҆меншавше е҆гѷптѧне съ е҆ѳїѻ́плѧны, и҆миже ѹ҆пова́хꙋ.
бѣша б̂о и҆хъ хвала̀, и҆ рекꙋтъ живꙋщеи въ ѻ́стровѣ се́мъ.
сѐ мы бѣхомъ ѹ҆пова́юще бѣжа́ти к нимъ на по́мощъ.
сїи же не мого́ша и҆збы́ти цр҃ѧ а҆сѷрїиска, то̀ ка́ко мы̀ сп҃семсѧ·

Глв̑҇а, к҃а·

Виденїе пꙋстынѧ·

Ꙗко бꙋ́рѧ сквозѣ пꙋсты́ню про́идетъ, ѿ пꙋ́сты и҆сходѧ́щи землѝ.
стра́шно видѣ́нїе и҆ жестоко повѣдасѧ мн̂ѣ.
ѹ҆карѧ́ѧи ѹ҆карѧет̑, и҆ безакон̑҇наѧ дѣѧи безако́нит̑ на́ мѧ е҆ламите, и҆ послы̀ прьстїи на мѧ и҆дꙋтъ.
нн҃ѣ въздохнꙋ, и҆ ѹ҆тѣшꙋсѧ сам꙽.
сего дѣлѧ наплънишасѧ чресла моѧ раслабленїѧ, и҆ болѣзни прїѧша м̂ѧ а҆ки ражда́ю҆щꙋю.
смѧто́хсѧ ꙗ҆́ко не слы́шати пот꙽ща́хсѧ а҆ки не ви́дѣти.
срд̑це мое мѧте́тсѧ, і҆ безако́нїе погрꙋжа́е҆тъ м̂ѧ.
дш҃а моѧ въ стра́сѣ стоит̑.
Ѹ҆гото́ви трапе́зꙋ, ꙗ҆ди́те и҆ пїите въста́вше кнѧѕи ѹ҆готовите щи́ты.
ꙗ҆́ко та́ко рече г҃ь къ мнѣ.
шед̑ ѹ҆ста́ви себѣ стражбꙋ̀, и҆ е҆гоже а҆ще ѹ́зриши и҆ възвѣстѝ.
и҆ ѹ҆зрх̑ѣ снꙋзника дв̂а, е҆ді́нъ на ѻ҆слѧ́ти, а҆ дрꙋгїи на вельблюдѣ.
послꙋшати послꙋшанїѧ мно́га, и҆ призовѝ ѹ́рїю на стражбꙋ гн҃ю, и҆ рцы̀.
ста́ни весь дн҃ь, ста́ни всю но́щь ѹ҆ по́лчища.
и҆ с̂е самъ грѧдетъ снꙋзнь мꙋжъ, и҆ ѿвѣща́въ рече.
падесѧ паде́сѧ вавѷло́нъ, и҆ вс̂и кꙋми́ры е҆го и҆ всѝ творенїи рꙋка́ми съкрꙋши́шасѧ на зем̑ли<.>

Послꙋшаите ѻ҆ста́нки, и҆ ѻ҆болезненїи послꙋшаите.
е҆же слы́шахъ ѿ г҃а саваѻ́ѳа.
б҃ъ і҆и҆л҃евъ, възвѣстѝ намъ·

Видѣ́нїе на и҆дꙋме́ѧ·

Къ мнѣ̀ зоветъ ѿ сеѵ́ра.
снабди́те забра́ла, снабжꙋ̀ заѹ́тра и҆ но́щїю.
а҆ще и҆́щеши т̂о и҆щѝ, и҆ ко мнѣ̀ прїидѝ·

Въ дꙋбра́вѣ вечеръ прележиши, и҆л̂и на пꙋтѝ деда́нове<.>

Въ срѣте́нїе жа́ждꙋщемꙋ во́дꙋ принесите, живꙋщїи въ странѣ̀ ѳема́новѣ.
съ хлѣбы срѣта́ите бѣжа́щаѧ мно́жества ради ѹ҆бїеныхъ, и мно́жества ради прельщеныхъ, и҆ мно́жества дѣлѧ мечнаго, и҆ мно́жества дѣлѧ стрѣле́цъ протѧже́ныхъ, и҆ мно́жества дѣлѧ падших̑ на сѣ́чи·

Ꙗ҆́ко сице рече г҃ь къ мнѣ.
е҆ще въ е҆ді́номъ лѣте, ꙗ҆́коже в лѣте нае҆мника.
ѻ҆скꙋдѣ́етъ сла́ва сн҃овъ кѷда́рь, и҆ ѻ҆ста́нцы стрл̑҇ѣцев̑҇ си́лныхъ сн҃овъ кѷдарь ѹ҆ме́ншени бꙋдꙋтъ.
ꙗ҆́ко г҃ь гл҃а, б҃ъ і҆и҆л҃евъ·

Глв̑҇а, к҃в·

Видѣ́нїе де́бри сїѻ́ни·

Чт̂о бы́сть тебѣ нн҃ѣ.
ꙗ҆́ко възлѣзосте всѝ на хра́мы т꙽ща̀, напо́лнисѧ гра́дъ въпїющих̑.
ꙗ҆зве́нїи твоѝ не мече́мъ л̂и сꙋть ѹ҆бо ѹ҆ꙗ҆звени.
и҆ мертвъцы̀ твоѝ не ѹ҆мер꙽щве́ни л̂и сꙋть ѹ҆бо ра́тїю.
всѝ кнѧ́ѕи твоѝ побѣ́гнꙋша.
и҆ плененїи жестоцѣ сꙋть свѧ́зани, и҆ крѣпцїѝ в тебѣ дале́че ѿбѣжа́ша.
сего дѣлѧ реко́хъ, не дѣ́ите мене да сѧ го́рцѣ воспла́чю.
не налѧжи́те ѹ҆тѣша́юще м̂ѧ, ѻ҆ съкрꙋше́нїи дщери рожде́нїѧ мое҆го.
ꙗ҆́ко дн҃ь мѧтежен꙽ и҆ па́гꙋбенъ·

И҆ попра́нїѧ льще́нїѧ, ѿ г҃а саваѻ́ѳа, в де́бри сїѻ́ни прельща́ютсѧ.
и҆ ма́лъ и҆ вели́къ тꙋлѧ́ющесѧ въ гора́хъ·

е҆ламитеж̑ взѧ́ша тꙋ́лы·

Въсѧ́дите чл҃цы на ко́нѧ, и҆ събо́ръ по́л꙽чныи.
и҆ бꙋдт̑ꙋ и҆збра́ни де́бри твоѧ̀, и҆ напо́лнѧт̑сѧ ѻ҆рꙋжїѧ, ко́н꙽ницы же застꙋ́пѧтъ бра́та твоѧ.
и҆ ѿкрыютъ вра́та і҆ѹ́дина·

И҆ възрѧ́тъ в то́и дн҃ь въ и҆збра́н꙽ныѧ домы̀ гра́да, и҆ ѿкры́ю҆тъ съкрове́н꙽наѧ до́мовъ конца̀ двд҃ва, и҆ ѹ҆зрѧ́тъ ꙗ҆́ко множа́иши сꙋть·

И҆ ꙗ҆́ко ѿврати́ша во́дꙋ прьвы́ѧ кꙋ́пели въ́ градѣ, и҆ ꙗ҆́ко ѹ҆стро́и҆ша домы̀ і҆ерс̑҇ли́млѧ, на ѹ҆твержд̑е́нїе стѣнѣ̀ гра́днеи.
и҆ сътвористе себѣ во́дꙋ межд̑ꙋ двѣма ѻ҆гра́дома, в꙽нꙋтръѹ́дꙋ паче кꙋ́пели дре́внѧѧ·

и҆ не възрѣсте и҆же и҆спе́рва сътворѝ ю҆̀, и҆ съгра́ждъшаго ю҆̀ не вѣдѣсте·

И҆ прозва̀ г҃ь саваѻ́ѳъ в꙽ то́и дн҃ь плач̑҇ и҆ рыда́нїе.
и҆ ѻ҆бръсе́нїе, и҆ препоѧ҆са́нїе въ врѣтища.
си́ же сътвори́ша ра́дость и҆ весе́лїе, закала́юще тел̑҇ца и҆ полага́юще тре́бы ѻ҆́вцами, ꙗ҆́ко ꙗ҆́сти мѧ́са, и҆ пи́ти вино̀.
гл҃юще ꙗ҆ди́мъ и҆ пїемъ, ѹ́трѣ б̂о ѹ́мрем̑.
се́ же не покрове́н꙽но е҆сть въ ѹ́шїю г҃а саваѻ́ѳа, ꙗ҆́ко не ѻ҆ста́витсѧ грѣх꙽ то́и вамъ, до́ндеже ѹ́мрете·

Си́це гл҃етъ г҃ь саваѻ́ѳъ.
и҆дѝ в кꙋщꙋ к сана́нꙋ строи́телю до́ма.
и҆ рцы̀ е҆мꙋ что́ т̂ы здѣ̀, что́ ли тебѣ здѣ̀, да здѣ̀ е҆си и҆стеса́лъ гро́бъ себѣ, и҆ сътвори́лъ е҆си себѣ на высо́цѣ гробъ, и҆ вписа́лъ е҆си себѣ̀ на камени кꙋщꙋ·

Сѐ ѹ҆бо г҃ь саваѻѳ̑҇, сътре́тъ и҆ свержетъ мꙋжа, и҆ ѿи҆метъ ѹ҆тва́ръ твою, и҆ вѣне́цъ тво́и сла́вныи.
и҆ поврьжетъ т̂ѧ въ странꙋ̀ вели́кꙋ и҆ безъ мѣры, и҆ т̂ꙋ ѹ́мреши.
и҆ поло́житъ ѻ҆рꙋжїе твоѐ доброе въ безъче́стїе, и҆ дом̑ кнѧ́ѕѧ твое҆го въ попра́нїе.
і҆ и҆звержешисѧ ѿ строи́тельства домо́внаго, и҆ ѿ стоѧ́нїѧ твое҆го·

И҆ бꙋдетъ в то́и дн҃ь, призовꙋ̀ раба̀ мое҆го е҆лїаки́ма хел꙽кїева.
и҆ ѻ҆блекꙋ и҆̀ въ ѹ҆тва́ръ твою, и҆ вѣне́цъ твои дамъ е҆мꙋ, и҆ держа́вꙋ твою, и҆ стро́и домо́вныи дамъ в рꙋцѣ е҆го.
и҆ бꙋдет̑ ꙗ҆́ко ѿц҃ъ живꙋщимъ въ і҆ерс̑҇лимѣ, и҆ живꙋщим̑ въ і҆ѹ҆де́и.
и҆ да́мъ е҆мꙋ сла́вꙋ дв҃двꙋ и҆ съвладѣ́етъ, и҆ не бꙋдет̑ съгл҃юща проти́вꙋ·

И҆ дам̑ ключь до́мꙋ двд҃ва на ра́мѣ е҆го, и҆ ѿврьзетъ и҆ не бꙋдет꙽ затворѧ́ющаго.
и҆ затво́ритъ и҆ не бꙋдетъ ѿврьза́ющаго·

И҆ поста́влю кнѧ́ѕѧ на мѣстѣ вѣрнѣ, и҆ бꙋдет̑ на прс̑҇тлѣ сла́внѣ домꙋ ѿц҃а е҆мꙋ·

и҆ бꙋдетъ ѹ҆пова́ѧ к немꙋ всѧкъ сла́венъ в домꙋ ѿц҃а е҆го, и҆ малъ и҆ вели́къ бꙋдетъ, ѻ҆бѣсѧт̑сѧ е҆мъ в то́и дн҃ь·

Сѐ гл҃етъ г҃ь саваѻ́ѳъ подви́гнетсѧ чл҃къ ѹ҆тверженъ на мѣстѣ вѣрнѣ, и҆ паде́тсѧ, и҆ ѿи҆метсѧ сла́ва ꙗ҆́же на немъ, ꙗ҆́ко г҃ь гл҃а·

Глв̑҇а, к҃г·

Видѣнїе на тѷра·

Пла́читесѧ кора́бли кархидон̑҇стїи, ꙗ҆́ко поги́бе и҆ къ семꙋ не прїидт̑ꙋ ѿ землѧ̀ ките́иски приведе́сѧ плѣнена.
комꙋ̀ подо́бни бы́ша живꙋщеи во ѻ҆стровѣ.
кꙋпцы фѷничести преходѧ́ще мо́ре, въ во́дѣ мно́ѕѣ, племѧ кꙋпечьско а҆ки жа́твѣ вноси́мѣ, кꙋпцы стра́ньстїи.
срамлѧ́исѧ сидо́не, ре́че мо́ре.
крѣ́пость же мо́рьскаѧ рече, не болѣхъ н̂и поро́дих̑ ни въскормихъ ю҆́ношъ, н̂и възнесох̑ дв҃ицъ.
е҆гда́ же слы́шано бꙋ́детъ е҆гѷптꙋ, прїимет̑ ѧ҆̀ бо́лѣзнь ѻ҆ тѷре и҆дѣте въ кархидо́нъ.
пла́читесѧ живꙋще въ ѻ҆стровѣ се́м꙽, не бѣ̀ ли с̂е ѹ҆бо ѹ҆коризне вам̑ и҆сперва.
преже плѣненїѧ е҆го кто совѣща̀ с̂е на тѷра.
е҆да̀ точенъ е҆сть и҆л̂и не мо́жетъ.
кꙋпцы е҆го сла́вны, кнѧ́ѕи землѝ.
г҃ь саваѻ́ѳъ совѣща расы́пати вс̂ю ѹ҆кори́знꙋ сла́вныхъ, и҆ похꙋли́ти всего сла́внаго на́ земли.
дѣлаи зем̑лю твою̀, посе́мъ б̂о кора́бли не прїидт̑ꙋ ѿ кархидо́на, и҆ рꙋка твоа̀ къ семꙋ̀ не ѹ҆крѣпѣе҆тъ по́ морю·

Разгнѣ́вавшїѧ цр҃ѧ.
г҃ь саваѻ́ѳъ заповѣ́да ѻ҆ хананеисте, погꙋби́ти крѣ́пость е҆ѧ.
и҆ рект̑ꙋ къ семꙋ̀ не приложи́те ѹ҆карѧ́ти, и҆ ѻ҆би́дѣти дще́ри сїѻ́нѧ.
а҆ще и҆́деши въ скѷтины, и҆ т̂ꙋ не бꙋ́детъ т̂и поко́ѧ.
и҆ на́ землю хал̑҇де́искꙋ, т̂о и҆ та̀ ѻ҆пꙋстѣ́ла а҆сѷрїими, ꙗ҆ко стѣна сѧ е҆и паде.

Пла́читесѧ кора́бли кархидо́ньстїи ꙗ҆́ко погиба́етъ твердь ва́ша.
и҆ бꙋдетъ въ то́и дн҃ь.
ѻ҆ста́вит̑сѧ тѷръ о҃ лѣтъ, ꙗ҆́ко и҆ лѣто црс̑҇ко, ꙗ҆ко и҆ лѣто члчс̑҇ко·

И҆ бꙋ́детъ по сед̑ми десѧть лѣтъ тѷръ ꙗ҆́ко пѣснь блд̑ꙋница, возми гꙋсли, ѻ҆быими гра́ды блꙋ́дница забвена до́брѣ согꙋди·

мно́го спо́и, да т̂и па́мѧть бꙋдет̑·

И҆ бꙋ́детъ по сед̑мидесѧть лѣтъ.
прѣсѣще́нїе сътвори́тъ б҃ъ тѷрꙋ, и҆ па́ки ѹ҆ста́витсѧ ꙗ҆́ко и҆ прежде, и҆ бꙋ́детъ торжищѐ всѣмъ цр҃емъ вселен꙽ныѧ.
и҆ бꙋдетъ еѧ̀ кꙋплѧ и҆ м꙽зда, ст҃о гв҃и.
не тѣм сѧ совокꙋпите, н̂о живꙋщим̑ пред̑ гм҃ъ.
ве́сь кꙋпь еѧ̀ ꙗ҆́сти и҆ пити, и҆ напо́лнитесѧ во ѻ҆дежд̑ꙋ, на па́мѧть пред̑ гм҃ъ·

Глв̑҇а, к҃д·

Се̂ г҃ь расы́плетъ вселе́нꙋю, и҆ ѻ҆пꙋститъ ю҆̀, и҆ ѿкры́ет꙽ лице еѧ̀, и҆ расточитъ живꙋщаа на не́и.
и҆ бꙋдꙋтъ лю́дїе а҆ки жрецъ, и҆ ра́бъ а҆ки господи́н꙽, и҆ раба̀ а҆ки и҆ госпо́жа.
бꙋ́детъ же кꙋпꙋѧ́и, ꙗ҆́ко прода́ѧи.
и҆ длъжныи, а҆ки е҆мꙋже е҆сть до́лженъ и҆ тлѣнїемъ и҆стлѣ́етъ землѧ̀.
ѹ҆ста б̂о гн҃ѧ гл҃аша с̂е·

Пла́касѧ зе́млѧ и҆ земнїи высоцїи.
землѧ̀ б̂о безако́нїе сътво́ри живꙋщихъ ради на не́и·

Поне́же престꙋпи́ша за́кон̑҇ и҆змѣниша за́повѣди, и҆зрꙋшиша завт̑ѣ вѣчныи.
сего ради проклѧ́тїе поꙗ҆́стъ зе́млю, ꙗ҆́ко съгрѣши́ша живꙋще́и на не́и·

Сего ра́ди ѹ҆боѕи бꙋ́дꙋтъ живꙋще́и на землѝ, и҆ ѻ҆ста́нетъ чл҃къ ма́ло.
воспла́чет̑сѧ вино̀ да́ рыда́етъ виноград̑.
въздъхнꙋт꙽ вс̂и ра́дꙋющеисѧ дш҃ею.
преста́ло е҆сть весе́лїе, и҆ бꙋ́бень преста́лъ е҆сть гла́съ, и҆ бога́тьство нечести́вых꙽, преста́лъ е҆сть глас̑҇ гꙋсленыи, и҆ срами́шасѧ не пи́ша вина̀.
горка бы́сть ѻ҆лови́на пї́ющим꙽.
ѻ҆пꙋстѣша вс̂и гра́ди, затво́ритъ хра́мъ ꙗ҆́коже не вни́ти·

Пла́читесѧ ѻ҆ винѣ.
всю́дꙋ преста́ла е҆сть ра́дость всѧ̀ зе́мнаѧ.
и҆ ѻ҆стант̑ꙋ гра́ди пꙋсти, и҆ до́мове ѻ҆ста́влени поги́бнꙋтъ·

с̂е всѐ бꙋ́детъ на́ земли среди стран̑҇.
ꙗ҆коже кт̂о ѻ҆бира́етъ масли́чинꙋ, ѻ҆бы́щꙋтъ ѧ҆̀.
и҆ а́ще ѻ҆ста́нетъ и҆ма́нїе виногра́дꙋ, сїи възопїютъ.
ѻ҆ста́вшеи же на землѝ, възра́дꙋют̑сѧ съ сла́вою гн҃ею.
возмѧте́тсѧ бода̀ мо́рьскаѧ.
сего ра̀ди сла́ва гн҃ѧ въ ѻ҆стро́вѣхъ бꙋ́детъ мо́рьскихъ и҆́мѧ гн҃е просла́влено бꙋ́детъ·

Гь҃ б҃ъ і҆и҆л҃евъ, ѿ ѹ҆глъ земныхъ чюдеса̀ слы́шахом꙽, наде́жа бл҃гочестивомꙋ·

И҆ рекꙋтъ, го́ре хꙋлѧ́щимъ и҆же хꙋ́лѧтъ зако́нъ.
го́ре престꙋпником꙽, и҆же престꙋпили сꙋть за́конъ.
стра́хъ и҆ про́пасть, и҆ прꙋгло на ва́съ живꙋщихъ на землѝ.
и҆ бꙋ́дет꙽ бѣж́ай страха, въпадет̑сѧ въ пропасть.
і҆ и҆злазѧ и҆с пропа́сти, и҆́метсѧ въ прꙋглѣ·

Ꙗ҆́ко две́ри съ нб҃се ѿвръзо́шасѧ, и҆ потрѧ́сꙋтсѧ ѻ҆снова́нїа зем̑наѧ.
мѧте́жем̑ възмѧтетсѧ зем̑лѧ, преклонит̑ и҆ потрѧсет̑сѧ землѧ а҆ки кꙋща ѻ҆гра́ды, и҆ а҆ки пивыи пїанъ сыи падет̑сѧ и҆ не возмо́жет̑ въста́ти, съдолѣ б̂о им̑ безако́нїе·

И҆ бꙋдет̑ въ то́и дн҃ь, наведет̑ г҃ь на ѹ҆тваръ нбс̑҇нꙋю рꙋкꙋ, и҆ на цр҃ѧ зем̑ныѧ и҆ съберꙋтъ събра́нїе е҆го, и҆ затво́рѧт̑ въ тверди и҆ в темницы.
мно́ѕѣми ро́ды бꙋдетъ присѣщенїе их̑, і҆ и҆стают̑ ла́ина и҆ лова́ѧ.
и҆ падет̑сѧ град̑ і҆ и҆змѣнит̑сѧ лꙋна̀ и҆ посрами́тсѧ сн҃це.
ꙗ҆́ко црс̑҇твꙋетъ г҃ь въ сїѻ́нѣ и҆ въ і҆ерс̑҇ли́мѣ.
и пред̑ ста́рцы сла́венъ бꙋдетъ·

Глв̑҇а, к҃е·

Пѣснь·

Ги҃ б҃е мо́и въсхвалю т̂ѧ, въспо́ю и҆́мѧ твое, ꙗ҆́ко сътвори чюд̑наа дѣла·

Совт̑ѣ пра́выи да бꙋ́детъ г҃и·

Ꙗ҆́ко положи гра́ды въ перъсть·

Гра́ды тве́рды ꙗ҆ко па́стисѧ ѻ҆снова́нїю и҆хъ·

Нечести́выхъ гра́ди въ вѣ́ки не съградѧ́тсѧ·

И҆ гра́ди чл҃къ ѻ҆биди́мыхъ въз꙽блс̑҇вѧт̑ т̂ѧ·

Бы́сть б̂о всѧ́комꙋ гра́дꙋ смире́ннꙋ помо́щникъ·

И҆ пренемага́ющимъ недоста́тка ради покро́въ·

ѿ чл҃къ злы́хъ и҆зба́витъ ѧ҆̀·

Покро́въ жа́ждꙋщихъ.
и҆ ѻ҆дше́нїе ѻ҆бидимых̑ чл҃къ·

А҆ки чл҃цы малодш҃ънїи и҆ жа́ждꙋщїи в꙽ сїѻ́нѣ·

ѿ чл҃къ нечести́вых̑ и҆́мже насъ преда̀·

И҆ сътворѝ г҃ь саваѻ́ѳъ всѣмъ страна́мъ.
Ѹ҆ горы̀ сеѧ и҆спїютъ ра́дос̑҇, і҆ и҆спїютъ вино̀·

Пома́жꙋтсѧ бл҃гово́нною ма́стїю в сеи горѣ̀·

Преда́ждь с̂е все страна́мъ, то́и б̂о совт̑ѣ на всѧ страны̀·

И҆ пожре́тъ смр҃ть възмо́гши·

Паки же ѿꙗ҆́тъ б҃ъ всю̀ слезꙋ ѿ всѧкого лица̀·

Поноше́нїе людїи ѿꙗ҆́тъ ѿ всеѧ землѧ̀, ѹ҆ста̀ б̂о гн҃ѧ гл҃аша сїѧ·

И҆ рект̑ꙋ в тои дн҃ь·

Сѐ б҃ъ нашъ к немꙋже надѣꙗ҆́хом̑сѧ·

И҆ веселова́хом̑сѧ ѻ҆ сп҃сѣ на́шем̑<.>

Ꙗ҆́ко поко́и да́сть б҃ъ ѹ҆ горы̀ сеѧ·

И҆ поперет̑сѧ моа҆вит̑скаѧ·

Ꙗ҆́коже потока́ютъ токъ колесни́цею·

И҆ возъдви́гнет̑ рꙋцѣ своѝ·

Ꙗ҆́коже и҆ то́и смирѝ на погꙋбле́нїе·

И҆ смирѝ ѹ҆кознꙋ е҆го, на неже рꙋцѣ възложѝ·

И҆ высотꙋ̀ ѹ҆бѣжи́ща гра́да твое҆го смирит̑.
и҆ ѻ҆бни́зитсѧ до землѧ̀·

Глв̑҇а, к҃ѕ·

Въ то́и дн҃ь въста́вѧтъ пѣснь сїю на землѝ і҆ѹ́динѣ гл҃юще·

Се град̑ тве́рдъ и҆ сп҃съ на́шъ·

Съгради́тъ гра́дъ, и҆ пригра́д꙽·

ѿврьзѣте вра́та, да вни́дꙋтъ лю́дїе·

Снабдѣва́ѧи пра́вдꙋ, и҆ снабдѣва́ѧи и҆́стиннꙋ·

Под̑е́млѧй и҆́стиннꙋ и҆ снабдѣва́ѧй ми́ръ·

Ꙗ҆́ко к тебѣ надѣѧ́хомсѧ г҃и въ вѣкъ·

Бг҃ъ вели́кїи вѣчныи·

и҆же смирив̑҇ сведет̑ живꙋщаѧ въ высо́ких̑·

Гра́ды тверды разори́ши, и҆ ѻ҆бни́зиши ѧ҆̀ до землѧ̀·

И҆ поперꙋтъ ѧ҆̀ но́ги крот̑кихъ и҆ смире́нныхъ·

Пꙋть бл҃гочести́выхъ пра́въ бы́сть·

И҆ ѹ҆творенъ пꙋть бл҃гочести́выхъ·

Пꙋть б̂о гн҃ь сꙋдъ·

Ѹ҆повахомъ къ и҆́мени твое҆мꙋ·

И҆ къ па́мѧти твое́и ю́же помышлѧет̑ дш҃а на́ша·

Ѿ но́щи ѹ́тренюет̑ дх҃ъ мои к тебѣ бж҃е·

Зане свѣтъ повеле́нїѧ твоѧ̀ на землѝ·

Пра́вдѣ наѹ҆чи́тесѧ живꙋщеи на землѝ, помо́лче б̂о нечести́выи·

Не наѹ҆чи́тсѧ пра́вдѣ на землѝ·

Истинны не сътво́рит̑.
да сѧ во́зметъ нечести́выи, да не ви́дитъ сла́вы гн҃ѧ·

Ги҃ высо́ка мы́шца твоѧ̀, и҆ не ѹ҆вѣдѣша·

Ѹ҆вѣдѣвше же ѹ҆срамѧ́тсѧ·

За́висть прїимет̑ лю́ди ненака́заны·

И҆ нн҃ѣ ѻ́гнь сꙋпостат̑т̑ныѧ поꙗ҆́сть·

Ги҃ б҃е нашъ ми́ръ даждь нам̑, вс̂ѧ б̂о въздал̑҇ е҆си нам̑·

Ги҃ бж҃е наш̑҇ прїимѝ н̂ы.
г҃и, раз̑вѣ тебе и҆́наго не вѣмы, и҆мѧ твое наричемъ·

Мр҃твїи б̂о живота̀ не и́мꙋть ви́дѣти·

И҆ вра́чеве же не и́мꙋть въста́ти·

Сего ради наведѐ и҆ погꙋбѝ, и҆ взѧт̑ весь мꙋжескъ полъ и҆хъ·

Приложѝ им̑ ѕла̀ г҃и, приложи ѕла̀ сла́внымъ земли·

Ги҃ въ печа́ли помѧнꙋхом̑ т̂ѧ.
въ печа́ли ма́ло наказа́́нїе твое намъ·

Ꙗ҆́ко болѧ́щїѧ дѣтищемъ приближаетсѧ роди́ти, и҆ ѻ҆ бо́лѣзни свое́и кричи́тъ·

Та́ко быхомъ възлю́бленномꙋ твее҆мꙋ·

Стра́ха ради твое҆го г҃и, въ чревѣ прїѧхомъ, и҆ поболѣ́хомъ и҆ роди́хом̑ дх҃ъ сп҃сенїѧ твое҆го, и҆же сътворѝ на землѝ·

Не паде́мсѧ, н̂о падт̑ꙋсѧ живꙋщїи на землѝ·

Въскр҃снꙋтъ мр҃твїи, и҆ въста́нꙋтъ и҆же въ гро́бѣхъ.
и҆ възра́дꙋютсѧ и҆же на земли·

Роса̀ б̂о ꙗ҆́же ѿ тебе цѣльба̀ и҆мъ е҆сть, землѧ́ же нечестивых̑ паде́тъ·

И҆дѣте лю́дїе моѝ вни́дѣте въ храмъ ва́шъ, затвори́те две́ри своѧ.
съкры́итесѧ ма́ло е҆ли́ко е҆ли́ко, дондеже мине́тъ гнѣвъ гн҃ь·

Се̂ г҃ь ѿ ст҃ого мѣста наво́дитъ гнѣвъ на живꙋщаѧ на землѝ.
и҆ ѿкры́етъ землѧ̀ кро́вь свою, и҆ не покры́етъ и҆збїеныхъ·

Глв̑҇а, к҃з·

Въ то́и дн҃ь наведе́тъ г҃ь ме́чъ ст҃ыи вели́кїи и҆ крѣпкїи, на змїѧ бѣжа́ща и҆ на змїѧ лꙋка́ваго, и҆ ѹ҆бїетъ змїѧ·

В то́и дн҃ь виногра́дъ до́брыи помышленыи съвладꙋ на́нь а҆зъ.
гра́дъ си́лныи гра́дъ вою́емыи, въсꙋ́е напаѧ́ю и҆̀.
плѣне́нъ б̂о бꙋдетъ но́щїю, днїюж̑ паде́тсѧ стѣна̀ е҆го, не бꙋдетъ того и҆же не возмет̑ ѿ не́го·

Кт̂о мѧ приста́витъ стрещѝ на ни́вѣ сте́блїю.
ра́ти дѣлѧ сеѧ похꙋли́хъ и҆̀ нн҃ѣ ѹ҆бо сего ради г҃ь б҃ъ всѧ̀ е҆ли́ка ѻ҆бѣща̀ и҆згори́тъ и҆мъ.
възопїютъ живꙋщеи в немъ·

Сътвори́мъ ми́ръ е҆мꙋ, сътворь ми́ръ.
приходѧ́щїѧ чада і҆а́ковлѧ прозѧбнꙋтъ, и҆ процвѣтетъ і҆и҆л҃ь, и҆ напо́лнитсѧ вселеннаѧ пло́да е҆го·

да ꙗ҆́ко са́мъ поразѝ, и҆ самъ си́це ѹ҆ѧзви́тсѧ.
и҆л̂и ꙗ҆́ко самъ ѹ҆бѝ, та́коже ѹ҆бїенъ бꙋдетъ.
сварѧ́сѧ и҆ ѹ҆карѧ́ѧ ѿпꙋстит̑ ѧ҆̀.
не бѣ ли т̂ы помышлѧ́ѧ дх҃омъ же́стокимъ, ѹ҆би́ти ѧ҆̀ дх҃омъ ꙗ҆́рости·

Сего ради ѿврьжетсѧ безако́нїе і҆а́ковле е҆же е҆сть блс̑҇венїе е҆го.
е҆гда ѿврьгꙋ грѣхъ е҆го, е҆да̀ поло́житъ всѧ̀ камы́ки требникъ кꙋмир꙽скъ съкрꙋше́ны а҆ки пра́хъ дро́бенъ.
и҆ не пребꙋдетъ дꙋбїе и҆хъ, и҆ кꙋми́ры и҆хъ посѣчени а҆ки дꙋбра́ва ѕѣло·

Вселе́ннаѧ па́ства расла́блена бꙋдет꙽, а҆ки па́ства попꙋщена.
и҆ бꙋдꙋтъ на мно́га лѣта, тоже почїютъ, и҆ по вре́мени не бꙋдетъ в неи травы̀ занѐ посхнетъ·

Же́ны грѧдꙋща с позо́ра прїидѣте, не сꙋть б̂о лю́дїе и҆мꙋще смы́слъ.
сего ради не поми́лꙋетъ сътвори́выи ѧ҆̀, и҆ създа́выи не ѻ҆ста́витъ и҆мъ·

И҆ бꙋдетъ в то́и дн҃ь, загради́тъ г҃ь ѿ р꙽веница рѣчны́ѧ, до водоте́чи е҆гѷпет꙽ски.
вы́ же съберете сн҃ы і҆и҆л҃евы по е҆ді́номꙋ е҆ді́номꙋ·

И҆ бꙋдетъ в тои дн҃ь, въстрꙋбѧтъ трꙋбо́ю вели́кою.
и҆ прїидꙋтъ погꙋблѧ́еми въ странѣ̀ а҆сѷрїистеи, и҆ погꙋблѧ́еми въ е҆гѷптѣ.
и҆ покло́нѧтсѧ гв҃и ѹ҆ горы̀ ст҃ыѧ въ і҆ерс̑҇ли́мѣ·

Глв̑҇а, к҃и·

Го́ре вѣнцꙋ̀ ѹ҆кори́зньномꙋ.
наи́мницы е҆фремовы, цвт̑ѣ ѿпады́и ѿ сла́вы.
на версѣ горы̀ вели́кїѧ пїѧни безъ вина̀.
се крѣпко и҆ же́стоко ꙗ҆́рость гн҃ѧ а҆ки гра́дъ и҆спꙋщаем̑ не и҆мыи завѣтїа, нꙋжею спꙋща́ем꙽ ꙗ҆́ко воды̀ вели́ко мно́жество подира́ѧ странꙋ̀ землѝ сътвори́тъ поко́и.
рꙋка́ма и҆ нога́ма поперетсѧ вѣнец̑҇ ѹ҆кори́зньныи наи́мницы е҆фремовы·

И҆ бꙋдетъ ѿпады́и цвѣтъ и҆ сла́вы на врьсѣ горы̀ высо́кїѧ, а҆ки прьвыи плодъ смок꙽винъ.
ви́дѣвыи же, и҆ преже в꙽зѧтїѧ в рꙋцѣ е҆го въсхо́щетъ пожрѣти и҆̀·

В тои дн҃ь бꙋдетъ г҃ь саваѻ́ѳъ, вѣнецъ надежа спле́теныи сла́вою ѻ҆ста́вшим̑ лю́демъ.
и҆ ѻ҆ста́вѧтсѧ дх҃омъ сꙋднымъ на сꙋдъ, и҆ крѣпость въз꙽бранѧ́ѧ погꙋби́ти ѧ҆̀·

Сїи б̂о вином̑ сꙋть прельще́ни, прельсти́шасѧ ѻ҆ловинъ дѣлѧ.
жрецъ, и҆ про̑҇ркъ ѹ҆жасо́стасѧ.
вина̀ ради потрѧсошасѧ, ѿ пїѧ́нъства ѻ҆ловин꙽наго прел꙽сти́шасѧ·

Сѐ е҆сть видѣнїе, проклѧ́тїе поꙗ҆́сть па́ки совѣтъ то́и совѣтъ лиха́го дѣлѧ и҆мѣнїѧ·

Комꙋ совѣсти́хомъ ѕл̂о, и҆л̂и комꙋ повѣда́хомъ вѣсть, ѿдое́нїи мле́комъ, ѿторженїи ѿ со́са.
печа́ль къ печа́ли прїемли наде́жꙋ къ наде́жи.
и҆ еще ма́ло ѕло́бїю ѹ҆сте́нною ꙗ҆зы́комъ и҆́нѣмъ, ꙗ҆́ко съгл҃ютъ лю́дем̑ си́мъ рекꙋще и҆мъ.
с̂е паки а́лчномꙋ и҆ сѐ съкрꙋше́нїе, и҆ не въсхотѣша слы́шати.
и҆ бꙋдетъ и҆мъ слово г҃а б҃а, печа́ль къ печа́ли, надежда къ наде́жди.
е҆ще ма́ло, е҆ще ма́ло, да и҆дꙋтъ и҆ падꙋтсѧ въспѧ́тъ, и҆ въ бѣдꙋ въпадꙋтъ и҆ съкрꙋшат̑сѧ, и҆ плѣне́ни бꙋдꙋтъ·

Сего дѣлѧ слы́шасте слово гн҃е мꙋжи печа́лни и҆ кнѧ́ѕи лю́дъстїи и҆же въ і҆ерс̑҇лимѣ<.>

Ꙗ҆́ко рекосте сътвори́хомъ завѣтъ со а́домъ, и҆ съ сме́ртїю заложе́нїе·

Бꙋрѧ носи́ма а҆ще ми́мои҆детъ, не прїидетъ на на́съ.
приложи́хом꙽ лжꙋ̀ надежꙋ нашꙋ, и҆ лжею покры́хом̑сѧ·

Сего ради та́ко гл҃етъ г҃ь, се а҆зъ вложꙋ̀ въ ѻ҆снова́нїе сїѻ́не ка́мень многоцѣненъ, и҆збра́нъ, краеѹ҆го́ленъ, честенъ, въ ѻ҆снова́нїе е҆мꙋ.
и҆ вѣрꙋѧй во́нь не постыди́тсѧ.
и҆ положꙋ̀ сꙋдъ въ надежꙋ, млс̑҇ть же мою в꙽ мѣры·

И҆ ѹ҆пова́ю҆щеи вът꙽ще лже́ю, ꙗ҆́ко не минет꙽ васъ бꙋрѧ·

Є҆д̂а и҆ ѿврьжетъ залог̑҇ ѿ васъ смр҃тныи, и҆ надежа ва́ша ꙗ҆́же къ а́дꙋ не пребꙋдетъ.
бꙋрѧ и҆дꙋщїѧ а҆ще мимои҆детъ, бꙋдет̑ е́й в꙽ попра́нїе, и҆ егда ми́мои҆де́тъ прїиметъ васъ·

Заѹ́тра заѹ́тра минетъ дн҃ь, и в нощи бꙋдет꙽ надежа ѕл̂а·

Наѹ҆чи́тесѧ слы́шати тꙋжа́щеи, не мо́жемсѧ котора́ти.
сами же и҆знемага́емъ ꙗ҆́кож̑ събра́ти ны̀·

Ꙗ҆́коже гора̀ нечести́выхъ въста́нетъ, и҆ бꙋдет̑ въ дебри гаваѻ́ньстѣ, съ ꙗ҆́ростїю сътвори́тъ дѣла своѧ̀, го́рести дѣла.
и҆ ꙗ҆́рость же е҆го чюжа бꙋдетъ, и҆ гнѣвъ е҆го чю́жъ·

И҆ вы не ра́дꙋитесѧ, да не възмо́гꙋтъ на́ вы вѧ́жꙋщеи.
занѐ сконча́ны и҆ съкраще́ны ве́щи слышахъ ѿ г҃а саваѻ́ѳа, ꙗ҆́же сътвори́тъ по всеи землѝ·

Внꙋши́те и҆ слы́шите глас̑҇ мои, вънемлѣте и҆ слы́шите словеса моѧ.
е҆д̂а весь дн҃ь хощетъ ѻ҆рѧ́и ѻ҆ра́ти и҆л̂и сѣмѧ ѹ҆готовати, преже въздѣла́нїѧ зе́мнаго.
н̂о е҆гда ѹ҆бо ѹ҆мѧкчи́тъ ве́рхъ е́и, тогда всѣет̑ ма́ло кꙋколи́ца, и҆ кѷми́на.
потом̑ же в꙽сѣет̑ пшени́цꙋ, и҆ ꙗ҆чме́нь, и҆ пы́ро, въ предѣлехъ твои҆хъ.
и҆ нака́жешисѧ сꙋдомъ б҃а твое҆го, и҆ възра́дꙋе҆шисѧ.
не съ жесто́тою бо сѧ и҆стреблѧет̑ кꙋколи́ца.
и҆ колоко́льное не ѻ҆бы́идетъ кѷми́на.
н̂о жеѕломъ и҆степетсѧ кꙋколи́ца.
а҆ кѷми́нъ с꙽ хлѣ́бомъ снѣстьсѧ.

Не въ вк̑҇ѣ б̂о а҆зъ разгнѣваюсѧ на́ вы, и҆ гласъ гнѣва мое҆го не попере́тъ васъ·

Сѐ ѿ г҃а саваѻ́ѳа и҆зы́иде.
чюдеса̀ совѣща́ите, възнесѣте т꙽щѐ ѹ҆тѣше́нїе·

Глв̑҇а, к҃ѳ·

Го́ре гра́дꙋ а҆рїи́левꙋ, на́нь же дв҃дъ вое҆ва̀.
събери́те жи́та ѿ го́да до года.
ꙗ҆́сть б̂о в꙽кꙋпѣ съ моа́вомъ, за ѕоль а҆рїи́лю.
и҆ бꙋдетъ крѣпос̑҇ е҆го и҆ богат̑ство мн̂ѣ, и҆ ѻ҆бсѧ́дꙋ тѧ а҆ки дв҃дъ, и҆ поста́влю ѻ҆́крстъ тебѐ пра́ща, и҆ съгражꙋ столпы̀.
и҆ смирѧ́тсѧ словеса̀ твоѧ до землѧ̀, и в зе́млю вни́дꙋтъ словеса̀ твоѧ.
и҆ бꙋдетъ гла́съ твои, а҆ки гласѧ́щихъ ѿ землѧ̀, и҆ къ земли ѿнемо́жетсѧ гла́съ твои·

И҆ бꙋдетъ ꙗ҆́ко прьсть под̑ ко́лы бога́тъство нечести́выхъ, и а҆ки пра́хъ летѧ́и·

и҆ бꙋдетъ в꙽ часѣ в꙽неза́пь, ѡ г҃а саваѻ́ѳа.
присѣще́нїе б̂о бꙋдетъ съ гро́момъ и съ трꙋсомъ, и҆ гла́сомъ вели́комъ.
бꙋрѧ грѧдꙋщи, и҆ пла́мы ѻ́гньнъ попалѧ́ѧ·

И҆ бꙋдетъ а҆ки ви́дѧи со́нїѧ спѧ̀, бога́т꙽ство стра́н꙽ всѣхъ.
и҆же вое҆ва́ша на і҆ерс̑҇ли́ма и҆ вси събра́нїи на́нь.
и заѕлѧ́ющеи е҆мꙋ бꙋдꙋтъ, а҆ки въ снѣ ꙗ҆дꙋщеи и҆ пїющеи, въста́вшем же то́щъ их̑ со́нъ.
Ꙗ҆́коже жа́ждѧи въ снѣ̀ и҆ пїет̑ въс꙽прѧнꙋв же е҆ще жа́ждет̑, дш҃а же е҆го вотще надѣѧ́сѧ.
та́ко бꙋдет꙽ бога́т꙽ство всѣхъ стра́нъ, е҆ли́кож̑ и҆хъ вое҆ва̀ на горꙋ̀ сїѻ́ню·

ѻ҆слабѣ́ите и҆ ѹ҆жаснитесѧ, и҆ ѹ҆пїитесѧ не ѻ҆ловиною ни вино́мъ.
ꙗ҆́ко напоѝ в̂ы г҃ь дх҃омъ покаѧ́нїѧ, и҆ смѣжит̑ ѻ҆́чи их̑, и҆ прро̑҇комъ их̑, и҆ кнѧ́ѕем̑ и҆х꙽, ви́дѧщеи съкрове́наѧ·

И҆ бꙋдꙋтъ вам̑ всѧ сѝ словеса̀, а҆ки словеса кни́гъ печатлѣнных꙽.
е҆мꙋже а҆ще дасть ѧ҆̀ чл҃кꙋ ѹ҆мѣ́ющꙋ книга́мъ, гл҃юще.
почти с̂е, и҆ речетъ.
не могꙋ̀ почестѝ, печатлѣнны б̂о сꙋть.
и дадѧ́тсѧ кни́ги сїи мꙋжꙋ не ѹ҆мѣю҆щꙋ кни́гамъ, и҆ речетсѧ е҆мꙋ почти с̂е, и҆ речет̑.
не могꙋ почестѝ·

И҆ рече г҃ь, приближа́ютсѧ лю́дїе си мн̂ѣ ѹ҆сты̀ свои́ми, и҆ ѹ҆стна́ми и҆хъ чтꙋтъ м̂ѧ, а҆ срд̑це и҆хъ далеч̑҇ е҆сть ѿ мене.
въ т꙽ще же чтꙋтъ м̂ѧ наѹ҆ча́юще за́повѣди чл҃чески, и҆ ѹ҆че́нїѧ·

Сего ради с̂е а҆зъ приложꙋ ꙗ҆́ко преста́вити лю́ди с̂и.
и҆ погꙋблю̀ премꙋдрость премꙋдрыхъ, и҆ ра́зꙋмъ разꙋмныхъ съкры́ю·

Го́ре творѧ́щимъ глꙋбоче совѣтъ, а҆ не гм҃ъ·

Го́ре творѧ́щимъ совѣтъ ѻ҆та́и, и бꙋдꙋтъ въ т꙽мѣ̀ дѣла их̑.
и҆ рекꙋтъ, кт̂о ны ви́дѣ, и҆л̂и кт̂о ны̀ разꙋмѣ ꙗ҆же мы̀ творимъ.
не ꙗ҆́ко л̂и ѹ҆бо гли́на горньча́рска намѣни́тсѧ, е҆да речетъ зданїе създа́вшемꙋ, нѣ́си ты м̂ѧ създал̑҇.
и҆л̂и творе́нїе сотво́ршемꙋ, неразꙋмна м̂ѧ сътворѝ·

Но̀ е҆ще ма́ло, и҆ прибли́житсѧ лива́нъ а҆ки гора̀ хермель, и҆ хермель в лꙋгъ намени́тсѧ·

И҆ ѹслы́шатъ въ дн҃ь ѻ҆нъ глꙋсїи словеса кни́гъ си́хъ, і҆ и҆же въ тмѣ̀ і҆ и҆же въ м꙽глѣ̀, ѻ҆́чи слѣпы́хъ ѹ҆́зрѧтъ.
и҆ възрадꙋютсѧ ни́щїи гм҃ъ съ ра́достїю, и҆ ѿчаѧ́вшеисѧ чл҃цы напо́лнѧтсѧ весе́лїѧ·

И҆щеѕѐ безако́нникъ, и҆ поги́бе гръдыи, и҆ потреби́шасѧ безаконꙋ́ющеи ѕло́бою, и҆ творѧ́щеи съгрѣша́ти чл҃ки въ словѣ.
всѧ́ же ѻ҆блича́ющаѧ при вратехъ претыка́нїе полага́ютъ, и҆ поползо́ша в непра́вдѣ пра́веднаго<.>

Сего ра́ди та́ко гл҃етъ г҃ь на до́мъ і҆а́ковль, и҆же нарече ѿ а҆враа́ма.
не нн҃ѣ постыди́тсѧ і҆а́ковъ, н̂и нн҃ѣ лице е҆го и҆змѣни́тсѧ.
н̂о е҆гда̑ ви́дѧт̑ ча́да и҆хъ дѣла моѧ, мене ради ѻ҆ст҃ѧтъ и́мѧ мое, и҆ ѻ҆ст҃ѧт̑ ст҃ого і҆а́ковлѧ, и҆ б҃а і҆и҆л҃ева ѹ҆боѧт̑сѧ·

И҆ разꙋмѣ́ютъ льстѧ́щеисѧ дх҃омъ смышле́нїѧ, и҆ ропщꙋщеи наѹ҆ча́тсѧ послꙋшати.
и҆ ꙗ҆зы́цы нѣмꙋ́ющеи наѹ҆чат̑сѧ гл҃ати миръ·

Глв̑҇а, л҃·

Го́ре чада ѿврьгшаѧсѧ·

Се̂ гл҃ет̑ г҃ь, сътвори́сте совт̑ѣ не мно́ю, и҆ завѣты не дх҃ом̑ мои҆мъ, приложи́ти грѣхи къ грѣхомъ.
и҆дꙋщеи сни́дꙋтъ въ е҆гѷпетъ, мене же не въпрашаша, ꙗ҆ко помощи фараѻ́ном꙽, и҆ застꙋпи́тисѧ е҆гѷптѧнъми.
бꙋдетъ же вамъ поро́въ фараѻ́на постыдѣнїе, и҆ ѹ҆пова́ющимъ къ е҆гѷптꙋ ѹ҆кори́зна.
ꙗ҆́ко сꙋть в та́инѣ старѣишины, вѣстныцы зл̂и въ т꙽ще трꙋ́дѧтсѧ къ лю́демъ, и҆же не ѹ҆спѣ́ютъ, и҆мъ, н̂и на́ помощъ, н̂и на по́лзꙋ, н̂о на стд̑ꙋ и҆ на ѹ҆кориз̑нꙋ·

Видѣнїе четвероно́гихъ, и҆же въ пꙋсты́ни·

Въ печа́ли и҆ въ тꙋѕѣ̀ левъ и҆ львичищ̑҇.
ѿтꙋдꙋ и҆ а́спидъ и҆ племѧ̀ а҆́спидъ парѧ́щих̑, и҆же несѧхꙋ на ра́мꙋ и҆ на вельблю́дехъ бога́тьство их̑, къ странѣ и҆же не бы́сть и҆мъ въ по́мощъ н̂о на стꙋ́дъ и҆ ѹ҆кори́знꙋ.
е҆гѷптѧны въ тще и҆ въ сꙋ́е ѹ҆спѣваютъ вам̑.
совѣсти и҆мъ ꙗ҆́ко тщета ѹ҆тѣше́нїе ва́ше·

Нн҃ѣ ѹ҆бо сѣдъ въпиши с̂е въ д꙽скꙋ, и҆ въ кни́ги, ꙗ҆ко бꙋдет꙽ с̂е въ дн҃и вре́менъ и҆ въ вѣкъ.
ꙗ҆́ко лю́дїе непокори́ви сꙋть, сн҃ове же лжи́вїи, и҆же не похотѣша слы́шати за́кона бж҃їѧ.
и҆же гл҃ютъ прро̑҇комъ, не повѣда́ите на́мъ дрꙋга́го прельщенїѧ, да ны съврати́те съ пꙋти сего.
ѿи҆мѣте ѿ насъ пꙋть, и҆ ѿи́мѣте ѿ на́съ сꙋ́дъ і҆и҆л҃евъ·

Того̀ ради си́це гл҃етъ г҃ь ст҃ыи і҆и҆л҃евъ, ꙗ҆ко не покори́стесѧ словесемъ си́мъ, и҆ надѣ́астесѧ къ л꙽жи.
и҆ ꙗ҆́ко поропта́сте, и҆ ѹ҆пова́ѧ бы́сте къ словеси семꙋ̀·

Того ради бꙋ́детъ ва́мъ сїи грѣхъ, ꙗ҆́ко стѣна̀ пада́ющисѧ внеза́пꙋ, и҆ гра́да тверда плѣне́на в не́мже въско́ре бꙋ́детъ паде́нїе.
бꙋ́детъ ꙗ҆́ко сокрꙋше́нїе сосꙋ́да гли́нена и҆ ѿ гли́ны да дро́бно, ꙗ҆́коже не ѻ҆брѣсти и҆мъ чрѣпа.
в немже ѻ҆́гнь во́змеши, и҆ во́ньже влїеши воды̀ ма́ло·

Та́ко гл҃етъ г҃ь ст҃ыи і҆и҆л҃евъ.
е҆гда̀ возврати́шисѧ и҆ въздохнеши, т̂о тогда̀ сп҃сешисѧ, и҆ разꙋмѣ́еши где е҆си бы́лъ е҆гда̀ ѹ҆поваше сꙋи҆ми·

Тща̀ крѣ́пость ва́ша бы́сть, и҆ не хотѣсте послꙋ́шати.
н̂о реко́сте, къ конемъ прибѣ́гнемъ, того ради побѣ́гнете, и҆ речете на ско́рыѧ воз̑сѧдем̑·

Того ради т꙽щи бꙋдт̑ꙋ гонѧ́щеи в̂ы.
гла́сомъ е҆ді́наго пробѣгнет̑ ты́сѧща и҆ гла́сомъ пѧтѝ пробѣгнꙋтъ мно́ѕи.
до́ндеже ѻ҆ста́влени бꙋ́дете а҆ки поста́въ на́ горѣ, и҆ ꙗ҆́ко зна́менїе носѧ на холмѣ̀.
па́ки пребꙋдетъ б҃ъ щедрова́ти вамъ.
и҆ сего ради възнесе́тсѧ ꙗ҆́ко помилова́ти ва́съ зане сꙋдїи г҃ь б҃ъ на́шъ е҆сть.
где л̂и ѻ҆ста́вите сла́вꙋ вашꙋ·

Бл҃жени вс̂и пребыва́ющеи в него, зане лю́дїе ст҃їи въ сїѻ́нѣ вселѧ́тсѧ.
і҆ерс̑҇лим̑ же пла́чем̑ въспла́касѧ, поми́лꙋи м̂ѧ·

поми́лꙋетъ т̂ѧ гла́съ крыча́нїѧ твое҆го, е҆гда̀ ѹ́зрѣ послꙋша́юща тебѐ·

И҆ да́сть б҃ъ вам̑ хлб̑҇ѣ печа́л꙽ныи, и҆ во́дꙋ тѣснꙋю.
и҆ ктомꙋ̀ не приближа́тсѧ к тебѣ льстѧ́щеи т̂ѧ ꙗ҆́ко ѻ҆́чи твоѝ ѹ҆́зрѧтъ льстѧ́щаѧ т̂ѧ, и҆ ѹ́ши твоѝ ѹ҆слы́шатъ словеса̀ прельсти́вшихъ т̂ѧ съза́ди, и҆же гл҃ютъ.
с̂е пꙋть и҆дѣмъ по не́мꙋ, и҆л̂и на десно л̂и на́ лѣво·

И҆ ѿвръже́ши кꙋми́ры посребре́ныѧ и позлаще́н꙽ныѧ, и҆ на дро́бно сътвори́ши, и разлїеши ꙗ҆́ко во́дꙋ скверна́выѧ, и҆ а҆ки мотыла ѿвръжеши ѧ҆̀·

Тогда̀ бꙋдетъ до́ждъ сѣмени землѧ̀ твоеѧ̀, и҆ хлѣбъ жи́та̑ землѧ̀ твое҆ѧ̀ бꙋ́де и҆зъѻ҆би́ла бл҃гъ.
и напасꙋтсѧ ско́ти твоѝ въ то́и дн҃ь на мѣстѣ бла́ѕѣ и҆ простра́н꙽нѣ.
ю҆́н꙽цы ва́ши и҆ воло́ве дѣ́лаю҆щеи зем̑лю, наꙗ҆дѧт̑сѧ плѣвъ смѣшенъ съ ꙗ҆чме́немъ и҆звѣ́ѧномъ·

И҆ бꙋ́детъ на всѧ́кои горѣ̀ высо́цѣ, и на всѧ́комъ хо́лмѣ прозра́чнѣ вода̀ текꙋщ́и.
въ то́и дн҃ь, е҆гда̀ поги́бнт̑ꙋ мно́ѕи, и҆ е҆гда̀ падꙋтсѧ стол꙽пи·

И҆ бꙋдетъ свѣтъ мѣ́сѧчъ а҆ки свѣтъ слн҃чь и҆ свѣтъ слн҃чь бꙋдетъ сед̑мори́цею, въ то́и дн҃ь е҆гда̀ и҆сцѣлитъ г҃ь съкрꙋшенїе людїи своих̑, и҆ болѣзнь ꙗ҆́звы твое́ѧ и҆сцѣ́литъ·

Се̂ и҆мѧ гн҃е вре́менемъ и҆́детъ мно́гомъ, горѧ́щи ꙗ҆́рость съ сла́вою сло́во ѹ҆стенъ е҆го.
сло́во гнѣ́ва по́л꙽но, гнѣвъ же ꙗ҆́рости ꙗ҆́ко ѻ҆́гнь попали́тъ, и҆ дх҃ъ е҆го а҆ки вода̀ в꙽ дебри влекꙋщи прїидет̑ до вы́ѧ.
и҆ раздѣ́литсѧ ꙗ҆ко смѧ́сти страны̀ ѻ҆ прельщенїи сꙋи҆мъ.
и҆ проженетъ ѧ҆̀ пре́лесть тща̀, и҆ прїимет̑ ѧ҆̀ пред̑ лици и҆хъ·

Є҆да при́сно е҆сть вамъ ра́доватисѧ, и҆ въходи́ти въ ѻ҆сщ҃енїа моа прс̑҇но, а҆ки празнꙋ́ющем̑ и ꙗ҆́ко веселѧ́щем̑сѧ вни́ти съ сопѣлїю въ го́рꙋ гн҃ю къ б҃ꙋ і҆и҆л҃евꙋ.
и҆ слы́шанꙋ сътво́ритъ б҃ъ сла́вꙋ гла́са своег̑҇, и҆ ꙗ҆́рость мы́шца свое́ѧ, показа́ти съ ꙗ҆́ростїю и҆ съ гнѣ́вомъ.
и҆ с пла́менемъ попалѧ́ющемъ, и҆ съ трѧсновенїемъ бѣ́дномъ, и҆ ꙗ҆́ко вода̀ и҆ град̑ съходѧ̀ нꙋ́жею·

Гла́сомъ б̂о гн҃им꙽ ѹ҆менша́ютъ ꙗ҆́звою а҆сѷрїи, е҆ю҆́же а҆ще пораѕит̑ ѧ҆̀.
и҆ бꙋдетъ ѻ҆́крс̑҇тъ ѿнꙋ́дꙋже б̂ѣ е҆мꙋ наде́жа помышлѧ́ти, е҆ю́же то́и ѹ҆пова́ше, съ сопѣльми и҆ гꙋ́сльми ратꙋ́ютъ на́нь ѿ премѣне́нїѧ·

Не преже б̂о дн҃ь въспро́ситсѧ ѿ тебѐ.
е҆да и҆ тебѣ ѹ҆гото́васѧ црс̑҇твова́ти въ дебрѝ глꙋбо́цѣ, и҆ древеса лежа́ща ѻ҆́гнь и҆ древеса мно́га.
ꙗ҆рость б̂о гн҃ѧ а҆ки дебръ ка́мы́комъ горѧ́щемъ жего́ма·

Глв̑҇а, л҃а·

Го́ре сходѧ́щемъ въ е҆гѷпет꙽ на по́мощъ, ѹ҆пова́ющим꙽ ко́ньми и҆ ѻ҆рꙋж́їемъ, е҆сть б̂о мно́го.
и҆ ко́н꙽ническо мно́жество мно́го.
и҆ не бѣша ѹ҆пова́ли къ ст҃мꙋ і҆и҆л҃евꙋ, и҆ б҃а не възыскаша.
то́и же премꙋ́дръ привожа́ше ѕл̂о, и҆ сло́во е҆го не похꙋ́лит꙽сѧ.
и҆ въста́нет̑ на домы̀ чл҃къ ѕлых̑, и҆ на наде́жꙋ их̑ т꙽щꙋю.
е҆гѷпетъска чл҃ка, а҆ не б҃а, ко́ньски пло́ти, и҆ не бꙋ́детъ по́мощи·

Гь҃ же наведе́тъ рꙋ́кꙋ свою̀ на́ нѧ, и҆ трꙋ́дѧтсѧ помага́ющеи.
и҆ всѝ и҆ногдою погы́бнꙋт꙽, ꙗ҆коже рече мнѣ г҃ь·

Ꙗ҆́коже възреветъ ле́въ, и҆ льви́чищъ ѻ҆ лови́твѣ ю҆же и҆ме́тъ, и҆ възопїетъ ѻ҆ не́и, до́ндеже напо́лнѧт̑сѧ го́ры гла́са е҆го.
и҆ ѹ҆менши́шасѧ, и҆ мно́жества ꙗ҆́ростнаго ѹ҆боа́шесѧ·

Си́це сни́дет̑ г҃ь саваѻ́ѳъ вое҆ва́ти на́ горꙋ сїѻ́ню, и҆ на́ горы е҆го, ꙗ҆́ко пти́ца парѧ́ща.
си́це защитит̑ г҃ь і҆ерс̑҇ли́ма, і҆ и҆зба́вит̑ и҆ потво́ритъ и҆ сп҃сетъ·

Ѡ҆брати́тесѧ совѣщава́ющей глꙋбо́къ совѣт꙽ безако́ненъ.
ꙗ҆ко въ то́и дн҃ь ѿвръгꙋтсѧ чл҃цы ѿ кꙋми́ръ свои҆хъ сре́бреныхъ и҆ златыхъ, ꙗ҆́же сꙋть сътворили рꙋ́ки и҆хъ·

И҆ падетъ а҆сѷръ не мече́мъ чл҃чьскомъ, н̂и меч̑҇ мꙋж́ескъ потреби́тъ и҆̀, и҆ пробѣ́гнетъ не ѿ лица̀ ме́чю.
ю҆́ноты же бꙋдꙋтъ въ ѹ҆мен꙽шенїе, ка́менем̑ б̂о ѻ҆бы́имт̑ꙋсѧ ꙗ҆́ко ѻ҆граже́нїемъ, и҆ пови́н꙽ни бꙋдꙋтъ.
и҆ бѣжай плѣненъ бꙋдет̑·

Се̂ гл҃ет̑ г҃ь.
бл҃жен̑҇ и҆же и́мать племѧ̀ въ сїѻ́нѣ, и҆ ѹ́жики въ і҆ерс̑҇ли́мѣ·

Глв̑҇а, л҃в·

Се б̂о цр҃ь правди́въ црс̑҇твꙋет̑.
и҆ кнѧѕи съ сꙋдомъ владѣти начнꙋтъ·

И҆ бꙋдетъ чл҃къ кры́ай словеса своа.
и҆ съкры́етсѧ ꙗ҆ко во́дныи поток̑҇, и҆ ꙗ҆ви́тсѧ въ сїѻ́нѣ ꙗ҆́ко рѣка и҆сточникъ текꙋщи сла́вныи въ земли жа́ждꙋщеи.
и҆ ксемꙋ̀ не бꙋдꙋтъ ѹ҆пова́юще чл҃кы.
н̂о ѹ҆́ши дадѧ́тъ на послꙋша́нїе, и҆ срд̑це и҆знемо́гших̑сѧ во́ньметъ послꙋш́ати.
и҆ ꙗ҆зы́цы нѣмꙋ́ющихъ ско́ро наѹ҆чат̑сѧгл҃ати ми́ръ.
и҆ къ семꙋ не рекꙋтъ ю҆роди́вомꙋ владѣти.
и҆ къ семꙋ не рекꙋтъ слꙋгы̀ твоа помолчи·

Ю҆́родъ б̂о ю҆роди́вѣ совѣщава́етъ, и҆ срд̑це е҆го тще разꙋмѣ́етъ съвръшевати безако́ннаѧ, и҆ гл҃ати къ гв҃и пре́лесть ꙗ҆ко раз꙽сѣѧ́ти дш҃а а҆́л꙽чны, и҆ дш҃а жа́ждꙋща тща̀ сътвори́ти·

Совт̑ѣ б̂о злы́хъ безако́н꙽наѧ съвѣщавает̑, расы́пати смиренныѧ словесы̀ непра́вед̑ными, и҆ расы́пати словеса̀ смире́ныхъ на сꙋ́дѣ·

Бл҃гочс̑҇тивїи же смы́сленѣ совѣща́ша, то́и же совѣтъ ѹ҆ста́нет̑·

Же́ны бога́тыѧ въста́ните и҆ слы́шите гла́съ мо́и, дще́ри с наде́жд̑ею слы́шите словеса̀ моа.
дн҃е лѣтнѧ па́мѧть сътворите въ бо́лѣзнъ с наде́ждею.
потребит̑сѧ и҆ма́нїе ви́н꙽ное, ѹ҆ста̀ сѣмѧ и҆ събира́нїе к семꙋ̀ не прїидетъ·

Ѹ҆жаснитесѧ съжали́те с̂и ѹ҆пова́вшаѧ, съвлецѣтесѧ на́гы бꙋ́дете препоѧ́шите чре́сла своа въ ꙗ҆риги, и҆ по персемъ бїитесѧ.
ѿ селѣ помышленїѧ, и҆ ѻ҆ виноград̑нѣмъ пло́дѣ.
на землѝ людїи мои҆хъ те́рнїе и҆ бы́лїе възни́кнет̑, и҆ ѿ всего̀ до́мꙋ ра́дость въсхити́тсѧ·

Град̑ бога́тъ до́мове ѻ҆ста́влени, бога́тьство град̑ное и҆ до́мы похотѣны ѻ҆ста́вѧтъ, и҆ бꙋдт̑ꙋ вс̂и пеще́ры до́ вѣка.
ра́дость ѻ҆слом̑ дивїимъ, па́ствы пастꙋш꙽скы·

До́ндеже на́идетъ на́ вы дх҃ъ ѿ вы́ш꙽нѧго, и҆ бꙋ́детъ пꙋ́стъ хермель.
херме́ль же въ дꙋбра́вꙋ намѣни́тсѧ и҆ почие҆ть въ пꙋсты́ни сꙋдъ, и҆ правда въ карми́ль всели́тсѧ·

И҆ бꙋдт̑ꙋ дѣлеса пра́вед̑наѧ ми́ръ, и҆ ѹ҆дръжит̑ пра́вда поко́и, и҆ ѹ҆пова́юще бꙋдꙋтъ до́ вѣка.
и҆ вселѧт̑сѧ лю́дїе е҆го въ гра́дѣ ми́рне, и҆ вселѧ́тсѧ ѹ҆пова́юще и҆ почїютъ съ бога́тьством̑·

Град̑ же а҆ще сни́детъ, т̂о не на́ вы прїидет̑·

И҆ бꙋдꙋтъ живꙋщ́еи въ дꙋбра́вахъ, ѹ҆пова́юще ꙗ҆́ко и҆же на по́лихъ.
блаже́ни сѣю́щеи при всѧ́кои водѣ̀, и҆дѣже во́лъ и҆ ѻ҆се́лъ попира́етъ·

Глв̑҇а, л҃г·

Го́ре ѻ҆би́дѧщимъ ва́съ.
вас̑҇ никтоже ѻ҆би́дитъ, и҆ хꙋлѧи же ва́съ не хꙋ́литъ.
плѣнени бꙋдꙋтъ хꙋлѧ́щеи васъ и҆ предадѧ́тсѧ, и҆ ꙗ҆́ко мо́леве въ ри́зѣ ѹ҆меншатсѧ·

Ги҃ поми́лꙋи ны, к тебѣ б̂о ѹ҆пова́хом꙽<.>

Бы́сть племѧ непокарѧ́ющихсѧ въ па́гꙋбꙋ, сп҃съ же н̂ы въ вре́мѧ печа́лно·

Гла́сомъ стра́ха твое҆го ѹ҆жасошасѧ лю́дїе, ѿ стра́ха твое҆го раз̑сѣа́шас̑҇ страны.
нн҃ѣ же съберет̑сѧ плѣн꙽ вашъ, вели́ка и҆ мала.
ꙗ҆́коже а҆ще кт̂о съберетъ прꙋ́гы, та́ко сѧ нарꙋга́ютъ ва́мъ·

Ст҃ъ б҃ъ живѧ́и въ вы́шних꙽.
напо́лнисѧ сїѻ́нъ сꙋ́да и҆ правды.
законом̑ предадѧт̑сѧ.
во и҆менїихъ сп҃съ на́шъ.
т̂ꙋ премꙋдрость и҆ хи́трость и҆ бл҃гоче́стїе къ гв҃и, с̂е сꙋть съкро́вища пра́вды·

Се ѹ҆бо въ стра́сѣ ва́шемъ тїи ѹ҆боѧ́тсѧ, и҆́хже сѧ боѧ́сте възопїютъ ѿ ва́съ·

Вѣстницы б̂о пꙋстѧт̑сѧ горцы плачющесѧ молѧ́щасѧ ми́рꙋ, ѻ҆пꙋстѣют̑ б̂о сих̑ пꙋтїе·

Преста̀ страх̑ стра́ньскъ, и҆ завт̑ѣ иже к ним̑ въземлет̑сѧ, и҆ не намѣни́те их̑ чл҃къ.
желѣ землѧ, и҆ посрамлен̑҇ лꙋгъ быс̑҇ а҆ки саро́нь·

Ꙗ҆́влена бꙋдет̑ гали́леѧ, и҆ кар꙽миль.
нн҃ѣ въскрс̑҇нꙋ гл҃етъ г҃ь.
нн҃ѣ прославлю́сѧ.
нн҃ѣ възнесꙋсѧ.
нн҃ѣ ѹ҆зрите, нн҃ѣ почю́е҆те т꙽ща крѣ́пость дх҃а ва́шег̑҇, ѻ҆́гнь в̂ы попалитъ.
и бꙋ́дꙋтъ страны̀ пож꙽жены, а҆ки тернїе на ни́вѣ разъме́тано и҆ пож꙽жено.
ѹ҆слы́шатъ да́лнїи е҆же сътворихъ, гл҃етъ г҃ь.
ѹ҆вѣдѧт̑ приближа́ющеисѧ крѣ́пость мою̀.
ѿстꙋпи́ша и҆же въ сїѻ́нѣ безако́нницы, прїиметъ трꙋсъ нечестивыѧ·

Кт̂о со́вѣститъ ва́мъ ꙗ҆́ко ѻ҆́гнь горитъ, кт̂о совѣститъ ва́мъ мѣсто вѣчно́е·

Ходѧ́и въ пра́вдѣ гл҃ѧи правы́и пꙋть, ненавидѧ́и безако́нїѧ и҆ непра́вды, и҆ рꙋцѣ ѿтрѧса́ѧи ѿ м꙽зды.
ѻ҆тѧж꙽чава́ѧи ѹ҆́ши, да не слы́шит̑ сꙋда̀ кро́внаго, смѣжа́ѧи ѻ҆́чи да не ѹ҆́зритъ непра́вды.
се́и в꙽селит̑сѧ въ высо́цѣ пещерѣ ка́мене крѣпка.
хлѣбъ сѧ е҆мꙋ да́сть, и҆ вода̀ е҆го вѣрна.
цр҃ѧ съ сла́вою ѹ҆́зрите.
и҆ ѻ́чи ваши ѹ҆зрѧт̑ землю и҆здалече, дш҃а ваша поѹ҆чи́тсѧ страхꙋ̀·

Гдѣ̀ сꙋть кни́гочїѧ, гдѣ сꙋть совѣщава́ющеи, гдѣ̀ е҆сть съчита́ѧи смѧта́ющаѧ ма́лы и҆ вели́ки лю́ди.
и҆́мже не совѣща́ша, ни глꙋ́боким̑ гла́сомъ ѹ҆жѐ, ꙗ҆́ко не слы́шати лю́дїи и҆скаженїи.
и҆ нѣсть слы́шащемꙋ смышле́нїѧ·

Се сїѻн̑҇ град̑ сп҃съ нашъ, ѻ҆́чи твоѝ ѹ҆́зрита і҆ерс̑҇ли́ма град̑ бога́тыи.
хра́ми не поколѣ́блютсѧ н̂и подви́гнꙋтсѧ, ко́лїе хра́ма е҆го въ вѣ́чное вре́мѧ, и҆ ѹ́жа е҆го не претръгнꙋтсѧ.
ꙗ҆́ко и҆мѧ гн҃е вели́ко ва́мъ.
мѣсто вамъ бꙋдет̑ рѣкѝ, рвени́ца широ́ки и҆ простра́нны.
не пои҆дете по семꙋ̀ пꙋтѝ н̂и корабль пловыи.
б҃ъ б̂о мо́и вели́къ е҆сть не минетъ менѐ г҃ь.
сꙋдїи наш̑҇ г҃ь, кнѧ́ѕь наш̑҇ г҃ь, цр҃ь на́шъ г҃ь, то́и насъ сп҃сетъ·

Прерва́шасѧ ѹ҆́жа твоѧ̀, ꙗ҆́ко не ѹкрѣпѝ нѣдро твое.
преклони́сѧ не поло́житъ нѣдръ, не въздви́гнетъ зна́менїѧ.
до́ндеже преда́стьсѧ на плѣненїе·

Тѣмже ѹ҆бо мно́ѕи хро́мїи плѣнь сътворѧт̑.
и не рекꙋтъ трꙋжда́емсѧ лю́дїе живꙋщеи в не́мъ, ѻ҆ста́ви бо сѧ и҆мъ грѣхъ·

Глв̑҇а, л҃д·

Приведѣте страны̀, и҆ слы́шите кнѧ́ѕи.
да слы́шит̑ землѧ̀ и҆ живꙋщеѝ на не́и.
занѐ ꙗ҆́рость гн҃ѧ на всѧ̀ страны̀, и гнѣ́въ на число̀ и҆хъ.
ꙗ҆́ко погꙋби́ти ѧ и҆ преда́ти ѧ҆̀ на сѣ́чь.
и҆ ꙗ҆зве́нїи и҆хъ повергт̑ꙋсѧ и҆ мертвъцы, и҆ в꙽зы́идетъ и҆хъ смрад̑.
и намо́кнꙋтъ предѣ́ли кровїю и҆хъ, и҆ възмꙋтѧ́тсѧ всѧ̀ си́лы нбс̑҇ныѧ.
и҆ съвье́тсѧ нб҃о а҆ки сви́токъ.
и҆ вс̂ѧ ѕвѣзды спадꙋтъ, ꙗ҆́ко ли́ствїе съ лозы̀, и҆ ꙗ҆́коже спа́даетъ ли́ствїе съ смоквичїѧ·

Ѹ҆пи́сѧ ме́чь мои на́ нб҃си.
се́и на и҆дꙋме́ю сни́детъ, и҆ на лю́ди па́гꙋбныѧ съ сꙋ́домъ.
меч̑҇ гн҃ь насыти́сѧ кро́ве, растол꙽стѣ ло́емъ а҆́гньчимъ, и ѿ ло́ѧ ко́злѧ и҆ ѻ́внѧ.
ꙗ҆́ко тре́бы гв҃и въ восо́рѣ, и҆ сѣ́чь ве́лїи въ и҆дꙋме́и.
и҆ падꙋтъ с ни́ми висо́цїи ѻ҆́вни и҆ ю́нцы, и҆ ѹ҆пїет̑сѧ землѧ̀ ѿ кро́ве, и҆ ѿ тꙋ́ка и҆хъ насыти́тсѧ.
дн҃ь б̂о сꙋда гн҃ѧ, и҆ лѣто ѿдаѧ́нїѧ сꙋ́да сїѻ́нѧ.
и҆ ѻ҆братѧ́тсѧ де́бри е҆го въ смолꙋ̀, и҆ землѧ̀ е҆го в горѧ́щїи камы́къ.
и҆ бꙋ́детъ землѧ̀ е҆го горѧ́щи ꙗ҆́ко смола̀, дн҃їю и҆ но́щїю, и҆ не ѹ҆га́снетъ въ вѣ́чное вре́мѧ.
и҆ взы́идетъ ды́мъ е҆ѧ̀ высо́че, в роже́нїѧ ѻ҆пꙋстѣ́етъ.
и҆ въгнѣздѧт̑сѧ в не́мъ пти́ца, и҆ е́жеве, со́вы, и҆ вра́нове.
и҆ възло́жатъ на́нь ѹ҆́же землемѣ́рно пꙋсты́нѧ.
и҆ ѻ҆нокен꙽таѷри вселѧ́тсѧ в не́мъ.
кнѧ́ѕи е҆го не бꙋ́дꙋтъ, цр҃и б̂о е҆го и҆ кн҃ѕи и҆ велмо́жа е҆го бꙋ́дꙋтъ въ па́гꙋбꙋ·

И҆ възни́кнетъ въ гра́дѣхъ их̑ те́рнїе и дꙋ́бїе, и҆ въ твердѣ́лехъ е҆го.
и҆ бꙋдетъ село ѕмїемъ, и҆ сели́ще пти́цамъ.
и҆ срѧ́щꙋтсѧ бѣ́си съ ѻ҆нокен꙽та́ѷры, и҆ възопїют̑ дрꙋ́гъ къ дрꙋ́гꙋ.
т̂ꙋ почїю́тъ ѻ҆нокетаѷры, ѻ҆брѣто́ша б̂о себѣ поко́ище.
тꙋ сѧ въгнѣзди́тъ е҆́жь.
и҆ сп҃се землѧ̀ дѣти своѧ̀ съ ѹ҆тверже́нїемъ.
т̂ꙋ е҆ле́ни стрѣто́шасѧ, и҆ ѹ҆ви́дѣша лица̀ своѧ̀ въкꙋпѣ, число́мъ минꙋша, и҆ е҆ді́нъ ѿ ни́хъ не поги́бе, дрꙋ́гъ дрꙋ́га не възыска, ꙗ҆́ко г҃ь заповѣда и҆мъ, и҆ дх҃ъ е҆го събра̀ е҆ѧ̀.
то́и же в꙽вержет̑ и҆мъ жре́бїѧ, и҆ рꙋка̀ е҆го раздѣлитъ жирова́ти въ вѣ́чное вре́мѧ, причасти́тъ в ро́дъ роже́нїи почїют̑ в нем̑·

Глв̑҇а, л҃е·

Ра́дꙋисѧ пꙋсты́ни жа́ждꙋщїѧ.
да сѧ веселꙋе́тъ пꙋсты́ни, и҆ да процвѣте́тъ ꙗ҆́ко цвѣтець, и҆ процвѣте́тъ.
и҆ възвесели́тсѧ пꙋсты́ни і҆ѻ҆рда́нска, и҆ сла́ва лива́нова да́стьсѧ е́и, и҆ чс̑҇ть кар ми́лова, и҆ ѹ́зрѧтъ лю́дїе моѝ сла́вꙋ гн҃ю, и҆ высотꙋ̀ бж҃їю·

ѹ҆крѣпи́тесѧ рꙋ́ки расла́блены, и҆ колѣ́на расы́пана.
моли́тесѧ т꙽щи́вїи ѹ҆мо́мъ крѣпи́тесѧ, не бо́итесѧ·

Се̂ б҃ъ на́шъ, сꙋдъ възда́сть.
то́и прїидетъ и҆ сп҃сетъ нас̑҇·

Тогда̀ ѿверзꙋтсѧ ѻ҆́чи слѣпы́мъ, и ѹ́ши глꙋхихъ ѹ҆слы́шатъ.
тогда̀ ско́читъ хромыи ꙗ҆́ко е҆́лень, и҆ ꙗ҆́сенъ бꙋ́детъ ꙗ҆зы́къ гꙋгни́выхъ.
ꙗ҆́ко проторже́сѧ вода̀ в пꙋсты́ни, и҆ де́бръ в землѝ жа́ждꙋщеи.
и҆ безвод̑наѧ бꙋ́детъ въ бла́та, и҆ на жа́ждꙋщеи землѝ и҆сто́чникъ вод̑ныи бꙋ́детъ·

Тꙋ бꙋ́детъ в꙽селе́нїе пти́цамъ, и҆ стаѧ вельбꙋ́домъ, и҆ лꙋ́ѕи.
и҆ т̂ꙋ бꙋдетъ пꙋть чи́стъ, и҆ пꙋть ст҃ъ нарече́тсѧ.
и҆ не минет̑ тꙋдꙋ нечи́стыи.
рас꙽сѣѧ́нїи же по́идꙋтъ по немꙋ, и҆ не заблꙋдѧтъ.
и҆ не бꙋдетъ т̂ꙋ льва̀, ни ѿ ѕвѣ́реи ѕлы́хъ не взы́детъ на́ нѧ, и҆ не ѻ҆брѧ́щетсѧ т̂ꙋ.
н̂о по́идꙋтъ по немꙋ и҆збавле́нїи и҆ събра́нїи гм҃ъ, ѻ҆братѧт̑сѧ и҆ прїидꙋтъ въ сїѻ́нъ с ра́достїю, и҆ ра́дость вѣ́чнаѧ над̑ главо́ю и҆хъ.
над̑ главо́ю б̂о и҆хъ хвала̀ и҆ весе́лїе, и҆ ра́дость прїиметъ ѧ҆̀, ѿбѣже бо́лѣзнь и҆ печа́ль и҆ въздыха́нїе·

Глв̑҇а, л҃ѕ·

И бы́сть в четве́ртоена́десѧте лѣто црс̑҇твꙋ́ющꙋ е҆зекїи.
взы́иде сенахери́мъ цр҃ь а҆сѷрїискъ, на гра́ды тве́рды жидо́в꙽ски, и҆ взѧ̀ ѧ҆̀.
и҆ посла̀ цр҃ь а҆сѷрїискъ раѱа́ка ѿ лахи́съ въ і҆ерс̑҇лимъ къ цр҃ю е҆зекїи съ си́лою вели́кою, и҆ ста̀ ѹ҆ веде́нїѧ вод̑наго, кꙋ́пѣли вы́шнѧа, на пꙋтѝ села̀ гнаѳе́ѻва·

І҆ и҆зы́иде к немꙋ е҆лїаки́мъ сн҃ъ хел꙽кїевъ сам꙽чїи, и҆ съмна́съ кни́гъчїи, і҆ и҆ѻ҆а́хъ а҆са́фовъ па́мѧтопи́счїи·

И҆ рече и҆мъ раѱа́къ, р꙽цѣте е҆зекїи.
се гл҃етъ цр҃ь вели́кїи, цр҃ь а҆сѷрїискъ, чимъ ѹ҆пова́ѧи е҆си, совѣтомъ л̂и, и҆ли словесы̀ ѹ҆стными по́лкъ быва́етъ.
и҆ нн҃ѣ чи́мъ ѹ҆пова́еши, ꙗ҆́ко не покори́шасѧ мнѣ̀ жезло́мъ л̂и тростѧномъ съкрꙋше́нымъ тѣмъ, и҆ли е҆гѷптомъ.
и҆же а҆ще на́нь въсклонитсѧ влѣ́зетъ в рꙋ́цѣ е҆го и҆ прободе и҆̀.
та́ко е҆сть фараѻ́нъ цр҃ь е҆гѷпет꙽скїи, и҆ вс̂и ѹ҆пова́ющеи к немꙋ·

А҆ще гл҃ете мнѣ̀ на г҃а б҃а на́шего ѹ҆пова́емъ.
не сеи л̂и е҆сть и҆же ѿѧт̑ ѿ е҆зекїа высо́каѧ и҆ тре́бища е҆го, и҆ заповѣда і҆ѹ́дѣ і҆ и҆рс̑҇лимꙋ пред̑ ѻ҆лтаре симъ моли́тесѧ дне́сь.
т̂о нн҃ѣ под̑да́итесѧ господи́нꙋ мое҆мꙋ цр҃ю а҆сѷрїискꙋ, и҆ дам̑ вам̑ дв̂ѣ ты́сѧщї ко́нь.
а҆ще мо́жете да́ти всѣда́ющаа на ни́хъ.
не́гли ка́ко мо́жете ѿврати́ти в꙽ лицѐ вое҆во́ды е҆ді́ного, рабѝ сꙋть ѹ҆пова́юще е҆гѷптѧ́н꙽ми, конемъ, и҆ ко́н꙽никомъ·

И҆ нн҃ѣ е҆гда̀ без꙽ господа е҆смы̀ пришли на странꙋ сїю вое҆ва́ти на ню̀.
г҃ь ре ко мнѣ̀ в꙽зы́иди на зем̑лю сїю и҆ погꙋби ю҆̀·

И҆ реч̑҇ к немꙋ е҆лїаким̑, и҆ съмнас̑҇ кни́гъчїи, и҆ ѻ҆а́хъ, гл҃и к꙽ рабо́мъ свои҆мъ сѷръски, ѹ҆слы́шимъ б̂о м̂ы, а не гл҃и к нам̑ жидо́в꙽ски.
и҆ въскꙋ́ю гл҃еши въ ѹ҆́ши чл҃комъ сѣдѧ́щимъ на гра́дѣ·

И҆ реч̑҇ раѱа́къ к ни́мъ, е҆да л̂и къ господинꙋ ва́шемꙋ и҆л̂и к ва́мъ, пꙋсти́лъ м̂ѧ е҆сть господи́нъ мои гл҃ати словеса с̂и, а҆ не къ чл҃комъ и҆же сѣдѧт̑ на гра́дѣ, да ꙗ҆дѧ́тъ моты́ла, и҆ пїю́тъ мо́чь с ва́ми вкꙋ́пѣ.
и ста́въ раѱа́къ, и҆ възопи́ гла́сомъ ве́лїимъ жидо́в꙽ски, и҆ рече·

Слы́шите словеса̀ цр҃ѧ вели́каго, цр҃ѧ а҆сѷрїиска·

Се̂ гл҃етъ цр҃ь, да не льсти́тъ ва́съ е҆зекїѧ словесы̀.
ꙗ҆́же не възмо́гꙋт꙽ и҆зба́вити васъ, и҆ да не гл҃етъ вамъ е҆зекїѧ ꙗ҆́ко и҆зба́витъ в̂ы б҃ъ.
и҆ не преда́стьсѧ гра́дъ сїи в рꙋцѣ цр҃ѧ а҆сирїиска, не послꙋшаите е҆зекїи·

Се̂ гл҃етъ цр҃ь а҆сѷрїискъ.
а҆ще хо́щете блс̑҇вени бы́ти.
т̂о и҆злѣзите къ мнѣ̀, и҆ ѻ҆бъе҆млете ко́ждо виноград̑ сво́и и҆ смо́квинїе, и҆ пїете ѿ пото́ка свое҆го.
до́ндеже прїидꙋ и҆ поимꙋ в̂ы на́ землю, и҆же а҆ки ва́ша землѧ̀, землѧ̀ пшени́цы и҆ винꙋ̀, и҆ хлѣ́бы и҆ виногра́дъ·

да не льсти́тъ ва́съ е҆зекїѧ гл҃ѧ, б҃ъ вашъ и҆зба́вит̑ в̂ы.
е҆да и҆зба́виша бо́ѕи ко́жд̑о странꙋ̀ свою̀ ѿ рꙋ́кꙋ цр҃ѧ а҆сѷрїиска.
гдѣ̀ е҆сть бо́гъ е҆маѳовъ, и҆ а҆рфаѳо́въ, гдѣ̀ е҆сть б҃ъ гра́да сем꙽фарꙋема.
е҆да̀ възмого́ша и҆зба́вити самарїю ѿ рꙋ́кꙋ моею.
кт̂о ѿ бо́гъ ꙗ҆́зы́къ всѣхъ сих̑ и҆зба́ви зе́млю свою̀ ѿ рꙋ́кꙋ мое҆ю, и҆ ꙗ҆́ко и҆зба́витъ б҃ъ і҆ерс̑҇лима ѿ рꙋ́кꙋ моею·

И҆ помол꙽кнꙋша, и҆ никтож̑ не ѿвѣща̀ е҆мꙋ словесѐ, повелѣ́нїа дѣлѧ цр҃ва, ꙗ҆́ко никто́же да не ѿвѣща́етъ·

И҆ вни́де е҆леа҆ки́мъ хелкїевъ самчїи, и҆ съмна́съ кни́гъчїи, и҆ ѻ҆а҆хъ а҆са́фовъ памѧтопи́счїи, къ е҆зекїи, в растерза́ныхъ ри́захъ, и҆ повѣда́ша е҆мꙋ словеса̀ раѱа́кова·

Глв̑҇а, л҃з·

И бы́сть внегда̀ слы́ша цр҃ь е҆зекїѧ, растер꙽за̀ ри́зы, и҆ ѻ҆блече́сѧ въ вре́тище, и҆ вни́де въ хра́мъ гн҃ь.
и҆ пꙋсти е҆лїаки́ма самчїю, и҆ съмнꙋ̀ кни́гъчїѧ, и҆ ста́рца жре́чески ѻ҆болче́ны въ врѣтища.
къ і҆саїи прро̑҇кꙋ сн҃ꙋ а҆мо́совꙋ, и҆ рече е҆мꙋ̀·

Се̂ гл҃етъ е҆зекїѧ.
дн҃ь печа́ли и҆ ѹ҆кори́зны и҆ ѻ҆бличе́нїѧ и҆ гнѣ́ва въ дне́шнїи дн҃ь.
ꙗ҆́ко прїиде бо́лѣзнь ража́ющеи, крѣ́пости же не и҆мꙋщи роди́ти·

да ѹ҆слы́шитъ г҃ь б҃ъ твои словеса̀ раѱа́кова, ꙗ҆́же е҆сть пꙋстил̑҇ цр҃ь а҆сѷрїискъ господи́нъ е҆го, ѹ҆корити б҃а жива́го, и҆ ѹ҆кори́ти словесы̀ ꙗ҆́же слы́ша г҃ь б҃ъ твои.
и҆ да моли́шисѧ къ гв҃и б҃ꙋ твое҆мꙋ, ѻ҆ ѻ҆ста́вших̑ сих̑·

И҆ прїидо́ша ѻ҆́троцы цр҃евы къ і҆саїи.
и рече и҆мъ і҆саїа, си́це рцѣте къ господи́нꙋ ва́шемꙋ·

Се̂ гл҃етъ г҃ь.
не бо́исѧ ѿ слове́съ ꙗ҆́же е҆си слы́шалъ, и҆миже ѹ҆кори́ша м̂ѧ послы̀ цр҃ѧ а҆сѷрїиска·

Се̂ а҆зъ вложю̀ во́нь дх҃ъ, и҆ ѹ҆слы́шавъ вѣ́сть възврати́тсѧ на́ землю свою̀, и҆ поразит̑сѧ мече́мъ на свое́и землѝ·

И҆ ѻ҆брати́сѧ раѱа́къ, и҆ ѻ҆брѣте цр҃ѧ а҆сѷрїискаго ѻ҆блежа́ща ломна́мъ.
и҆ ѹ҆слы́ша цр҃ь а҆сѷрїискъ, ꙗ҆́ко прише́лъ е҆сть ѳарака цр҃ь мѷрскъ вое҆ва́ти на́нь, и҆ ѹ҆слы́шавъ ѻ҆брати́сѧ·

И҆ пꙋсти послы̀ къ е҆зекїи гл҃ѧ.
си́це рцѣте е҆зекїи цр҃ю жидо́в꙽скꙋ, да не льсти́т꙽ б҃ъ твои тебѐ на негож̑ ѹ҆поваѧ е҆си, гл҃ѧ.
ꙗ҆́ко не преда́стьсѧ і҆ерс̑҇лимъ в рꙋ́цѣ цр҃ѧ а҆сѷрїиска.
и҆ли нѣ́си слы́шалъ, чт̂о сꙋть сътвори́ли цр҃и а҆сѷрїистїи все́и землѝ, ка́ко погꙋби́ша.
е҆да̀ и҆зба́виша страны бо́ѕи их̑, ꙗ҆́же погꙋби́ша ѿт̑ц҃ы мои, гоза́нъ, и҆ харра́нъ, и҆ расемъ, и҆же сꙋть въ стра́нѣ ѳее҆маѳи.
гд̂ѣ сꙋть цр҃и е҆маѳови, и҆ а҆рфа́ѳови, и҆ гра́ды е҆сфарꙋма, а҆нагꙋга́нса·

И҆ взѧ̀ е҆зекїа кни́ги ѿ посло́въ и҆ прочтѐ ѧ҆̀.
и҆ вни́де въ храм̑ гн҃ь, и҆ ѿве́рзе ѧ҆̀ прд̑е гм҃ъ, и҆ помоли́сѧ е҆зекїѧ къ гв҃и гл҃ѧ·

Ги҃ саваѻ́ѳе б҃е і҆и҆л҃евъ, сѣдѧ́и на херꙋви́мѣ, т̂ы е҆ді́нъ цр҃ь е҆си всемꙋ̀ цр҃ьствꙋ зе́мномꙋ.
т̂ы сътвори нб҃о и҆ зе́млю.
приклонѝ г҃и ѹ҆́хо твое, ѹ҆слы́ши г҃и, ѿве́рзи г҃и ѻ҆́чи твоѝ, и҆ при́зри г҃и, и҆ ви́жд̑ь, и҆ слы́ши всѧ̀ словеса̀ ꙗ҆́же пꙋсти́лъ е҆сть сенахерим̑, ѹ҆карѧ́а б҃а жива́го.
по и҆́стиннѣ б̂о г҃и, пꙋстꙋ сътвори́ша цр҃и а҆сѷрїистїи всю̀ зе́млю, и҆ стра́ны и҆хъ.
и҆ въвръго́ша кꙋми́ры и҆хъ въ ѻ҆́гнь, не бѣша б̂о боѕи, н̂о дѣло рꙋ́къ чл҃чь, дре́во, ка́менїе, и҆ погꙋби́ша ѧ҆̀·

Ты же г҃и б҃е нашъ сп҃сы н̂ы ѿ рꙋ́кꙋ и҆хъ, да ѹ҆вѣдѧтъ вс̂ѧ црс̑҇твїѧ зе́мнаѧ, ꙗ҆́ко т̂ы е҆си г҃ь б҃ъ е҆ді́нъ·

И҆ пꙋсти́сѧ і҆саїа сн҃ъ а҆мо́совъ къ е҆зекїи, и҆ рече е҆мꙋ·

Се̂ гл҃етъ г҃ь б҃ъ і҆и҆л҃евъ, слы́шахъ е҆же моли́сѧ къ мнѣ̀ ѻ҆ сенахери́мѣ цр҃и а҆сѷрїисти·

Се̂ сло́во е҆же гл҃а ѻ҆ немъ б҃ъ, похꙋлѝ т̂ѧ и҆ порꙋга́сѧ тебѣ дв҃це дщи сїѻ́нѧ, на тѧ главо́ю покива дщи і҆ерс̑҇лимлѧ.
кого ѹ҆кори и҆ разгнѣ́ва, и҆ли к꙽ комꙋ̀ прострѐ гла́съ свои, и҆ не въздви́же на высотꙋ̀ ѻ҆́чїю свое҆ю къ ст҃мꙋ і҆и҆л҃вꙋ ꙗ҆́ко посла́ми ѹ҆кори г҃а.
т̂ы бо рече, мно́жествомъ ѻ҆рꙋж́їѧ а҆зъ възыидох̑ на высотꙋ го́ръ, и҆ напослѣ́докъ дꙋбра́вы, и҆ посѣко́хъ высотꙋ̀ е҆ѧ̀, и҆ добротꙋ кѷпари́совꙋ.
и҆ внидо́хъ въ высотꙋ ча́сти дꙋбрав꙽ски, и҆ положи́хъ мо́стъ, і҆ и҆скази́хъ во́ды, и҆ весь събо́ръ вод̑ныи·

Не слы́шала ли е҆си ѹ҆бо и҆спе́рва, е҆же а҆зъ сътвори́хъ ѿ первыхъ дне́и ѻ҆бѣщахъ.
нн҃ѣ же ѹ҆каза́хъ расы́пати страны въ твердынѧхъ и҆хъ.
и҆ живꙋщаѧ въ твердыхъ гра́дѣхъ, и҆ѻ҆брати́хъ рꙋ́цы і҆ и҆схо́ша, и҆ бы́ша сꙋси а҆ки сѣ́но на клѣтехъ, и҆ а҆ки тро́скотъ·

нн҃ѣ же поко́и твои, і҆ и҆сход̑ твои, и҆ вход̑ твои, а҆зъ съвѣдѣ, и҆ ꙗ҆́рость твою е҆ю́же разгнѣ́васѧ.
и҆ гнѣвъ твои взы́иде къ мнѣ̀, и҆ вложꙋ прито́къ в но́здри твоѧ̀, и҆ ѹ҆здꙋ въ ѹ҆ста̀ твоѧ̀, и҆ възвращꙋ т̂ѧ пꙋтемъ и҆́мже е҆си прише́лъ·

Се же тебѣ̀ зна́менїе, ꙗ҆́ждь сего лѣта е҆же е҆си всѣ́ѧлъ, а҆ во второ́е лѣто е҆же ѿ себе растет̑, а҆ въ тре́тее насѣѧ́вше пожнете.
и҆ насади́те виногра́ды, и҆ снѣ́сте пло́ды и҆хъ.
и҆ бꙋдꙋтъ ѻ҆ста́вшеи въ і҆ѹ҆де́и, прони́кнꙋтъ ко́ренїѧ до́лꙋ, и҆ сътворѧтъ съверхꙋ пло́дъ.
ꙗ҆́ко ѿ і҆ерс̑҇лима бꙋдꙋт꙽ ѻ҆ста́вленїи, ѿ горы̀ сїѻ́нѧ.
рве́нїе г҃а саваѻ́ѳа сътвори́тъ с̂е·

Сего рад̑и̑ си́це гл҃етъ г҃ь, на цр҃ѧ а҆сѷрїиска, не вни́детъ в сїи градъ, ни въстрѣлитъ вонь стрѣлы̀, ни възло́жит꙽ нань щи́та, ни ѻ҆гради́тъ ѻ҆́крс̑҇тъ е҆го ѻ҆гражденїѧ.
н̂о пꙋтемъ им̑же е҆сть прише́лъ, тѣмже сѧ ѻ҆братит̑ и҆ въ градъ се́и не вни́дет꙽·

Сѐ гл҃ет̑ г҃ь.
защищꙋ градъ се́и, ꙗ҆́ко спс̑҇ти е҆го мене ради, и҆ дв҃да раба̀ мое҆го·

І҆ и҆зы́иде а҆гг҃лъ гн҃ь, і҆ и҆збѝ ѿ пол̑҇ка а҆сѷрїиска, р҃, и҆ п҃, и҆ пѧ́ть ты́сѧщъ.
и҆ въста́вше заѹ́тра ѻ҆брѣтоша всѧ̀ телеса̀ ме́ртва.
и҆ ѻ҆брати́всѧ ѿи҆де сенахери́мъ цр҃ь а҆сѷрїискъ, и҆ всели́сѧ в ниневїю.
и҆ внегда̀ бы́сть покланѧ́тисѧ е҆мꙋ, в домꙋ̀ несереховѣ бо́гꙋ е҆го.
а҆драмеле́хъ и҆ сарасаръ, сн҃ове е҆го ѹ҆би́ша и҆̀ мече́мъ.
тїи же ѹ҆бѣжа́ша въ а҆рме́нїю.
и҆ црс̑҇твова̀ а҆сорда́нъ сн҃ъ е҆го в него мѣсто·

Глв̑҇а, л҃и·

Бысть же в т̂о времѧ, разъболѣсѧ е҆зекїѧ до смр҃ти.
и҆ прїиде к немꙋ і҆саїа про̑҇ркъ сн҃ъ а҆мо́совъ.
и҆ рече к немꙋ<.>

Се̂ гл҃етъ г҃ь, ѹ҆стро́и ѻ҆ домꙋ̀ свое҆м꙽ ѹ҆мира́еши б̂о т̂ы и҆ не бꙋдеши жи́в꙽.
и҆ ѻбрати и҆е҆зекїѧ лице свое къ стѣнѣ̀, и҆ моли́сѧ къ гв҃и гл҃ѧ·

Помѧнѝ г҃и ка́ко ходих̑ пред̑ тобою съ и҆́стинною, срд̑цемъ и҆́стиннымъ, и҆ ѹ҆го́днаѧ пред̑ тобо́ю сътвори́хъ.
и҆ пла́касѧ е҆зекїѧ гла́сомъ великомъ·

И҆ быс̑҇ сло́во гн҃е къ і҆саїи гл҃ѧ, и҆дѝ и҆ рцы̀ къ е҆зекїи·

Сѐ гл҃етъ г҃ь б҃ъ дв҃да ѿц҃а твое҆го.
ѹ҆слы́шахъ мл҃твꙋ твою, и҆ ви́дѣхъ сле́зы твоѧ.
с̂е прилага́ю къ лѣтомъ твои҆мъ, лт̑ѣ е҃і.
и҆ ѿ рꙋкꙋ цр҃ѧ а҆сѷрїиска и҆зба́влю т̂ѧ, и҆ град̑ се́и, и҆ защищꙋ и҆̀·

Сеж̑ тебѣ зна́менїе ѿ г҃а, ꙗ҆ко б҃ъ сътвори́тъ гл҃ъ се́и ꙗ҆коже гл҃а.
с̂е аз̑ ѻ҆бращꙋ̀ сѣнь степенеи ꙗ҆́же сни́де слн҃це, десѧть степенеи домꙋ ѿц҃а твоего, и҆ възвращꙋ̀ слн҃це десѧть степенеи, их̑же сни́де сѣнь, и҆ в꙽зы́иде слн҃це десѧть степенеи, их̑же сни́де сѣнь·

Мл҃тва е҆зекїѧ цр҃ѧ і҆ѹ́дина, е҆гда заболѣ̀, и҆ въста̀ ѿ недꙋга свое҆го.

А҆зъ рекохъ въ высотѣ̀ дн҃їи мои҆хъ идꙋ въ вра́та а́дова, ѻ҆ста́влѧ́ѧ лѣта про́чаѧ·

Реко́хъ ксемꙋ, не ѹ҆зрю̀ сп҃сенїѧ бж҃їѧ на зем̑лѝ живых̑.
ксемꙋ не ѹ҆зрю̀ чл҃ка съ живꙋщими ѻ҆ста́хъ ѿ срод꙽ства мое҆го, ѻ҆ставих̑ прочее живота̀ мое҆го·

И҆зы́иде ѿи҆де ѿ мене, ꙗ҆́ко расы́паѧи кꙋщꙋ пот꙽кнꙋвъ·

дх҃ъ мои въ мн̂ѣ быс̑҇, а҆ки платно дѣлаемо приближающис̑҇ ѹ҆рѣзати.
в то́и дн҃ь преда́хсѧ до заѹ́тра а҆ки льво́ви·

Та́ко ко́сти моѧ съкрꙋшѝ, ѿ дн҃е б̂о до нощи преда́нъ быхъ·

Ꙗ҆́ко ла́стовица та́кож̑ въщебечю, и҆ ꙗ҆́ко го́лꙋбъ та́ко поѹ҆чю́сѧ·

И҆щезо́сте б̂о ѻ́чи моѝ ꙗ҆́ко възира́ти на высотꙋ̀ нбс̑҇нꙋю къ г҃ꙋ, и҆же и҆зба́ви мѧ, и҆ ѿврьже бо́лѣзни дш҃а моеѧ·

Ги҃ ѻ҆ тои б̂о съвѣсти́сѧ тебѣ.
и҆ въздви́глъ е҆си дыха́нїе мое, и҆ ѹ҆тѣшивсѧ ѻ҆жи́х꙽·

Въздви́же б̂о дш҃ꙋ мою, да не поги́бнет̑, и҆ заверже за мѧ всѧ грѣхѝ·

Не похва́лѧтъ бо тебе и҆же въ а́дѣ, ни ѹ҆мръшїи възъблс̑҇вѧтъ т̂ѧ·

И҆ не надѣ́ютсѧ и҆же въ а́дѣ млс̑҇ти твоеѧ·

Живїи же блс̑҇вѧтъ т̂ѧ ꙗ҆коже и҆ а́зъ.
ѿ днесь б̂о дѣти сътворю̀, ꙗ҆́же съвѣстѧ́тъ пра́вдꙋ твою.
г҃и сп҃сенїѧ мое҆го, и҆ не почїю блс̑҇вѧ т̂ѧ съ пѣснїю всѧ дн҃и живота̑ мое҆го, прѧ́мо домꙋ бж҃їю·

И҆ рече і҆саїа къ е҆зекїи, возмѝ г҃и молю тѧ̀ ѿ смо́квїи, и҆ сътеръ приложѝ, и҆ цѣлъ бꙋдеши.
и҆ рече е҆зекїѧ, се́ ли зна́менїе ꙗ҆́ко взы́идꙋ в до́мъ г҃а б҃а·

Глв̑҇а, л҃ѳ·

В т̂о вре́мѧ посла̀ меродах̑ сн҃ь лаа҆да́нь, цр҃ь вавѷло́ньскь книги и҆ послы̀ и҆ да́ры е҆зекїи·

Слы́ша б̂о ꙗ҆́ко болл̑҇ѣ е҆сть до смр҃ти, и҆ въста̀.
и҆ ѻ҆брадова́сѧ е҆зекїѧ ра́достїю вели́кою·

И҆ показа и҆мъ хра́мъ во́нь, и҆ бл҃говонїѧ и҆стак꙽ти, и҆ ѳимїѧма и҆ сребра̀ и҆ зла́та, и҆ всѣхъ хра́мъ и҆ сосꙋдъ газ̑ских꙽, и҆ всѐ е҆ли́коже бѣше въ сокро́вищи его.
и҆ не ѻ҆ста̀ ничтож̑ е҆гоже не показа и҆мъ е҆зекїѧ въ домꙋ̀ свое҆мъ·

И҆ прїиде і҆саїа прро̑҇къ къ е҆зекїи цр҃҃ю, и҆ рече к немꙋ.
чт̂о гл҃ют̑ сїи мꙋж́и, и҆ ѿкꙋдꙋ прїидо́ша к тебѣ.
и҆ рече е҆зекїѧ, ѿ землѧ̀ и҆здалеча пришли сꙋть къ мнѣ̀ ѿ вавѷло́на·

И҆ рече і҆саїа, чт̂о видѣша въ домꙋ̀ твое҆мъ·

И҆ рече е҆зекїѧ, вс̂е е҆лико въ домꙋ̀ моем̑ ви́дѣша.
и҆ нѣсть въ домꙋ̀ мое҆мъ е҆гоже не сꙋть ви́дѣли, н̂о і҆ е҆же въ ри́зницахъ мои҆хъ·

И҆ рече е҆мꙋ і҆саїа, послꙋша́и словесѐ г҃а саваѻ́ѳа·

Се дн҃їе грѧдт̑ꙋ гл҃ть г҃ь, и҆ възмꙋтъ вс̂е е҆же в домꙋ̀ твоем̑ и҆ е҆ликож̑ събра́ша ѿц҃ы твоѝ и҆ до дне́ш꙽нѧго дн҃е, въ вавѷлонъ прїидетъ, и҆ ничесо́же не ѻ҆ста́вѧтъ·

Рече же г҃ь.
ꙗ҆́ко и҆ ѿ чад̑ твои҆хъ ꙗ҆́же е҆си родил̑҇ пои҆́мꙋтъ, и҆ сътворѧт꙽ ка́женики въ домꙋ̀ цр҃ѧ вавѷло́ньска·

И҆ рече е҆зекїѧ къ і҆саїи, бл҃го слово гн҃е е҆же е҆сть гл҃алъ, да бꙋ́детъ ѹ҆бо ми́ръ и҆ правда въ дн҃и моѧ̀·

Глв̑҇а, м҃·

Ѹ҆тѣша́ите ѹ҆тѣша́ите лю́ди моа̀ жерцы гл҃тъ б҃ъ, гл҃ите въ срд̑ци і҆ерс̑҇ли́мꙋ, ѹтѣша́ите и҆̀, ꙗ҆́ко напо́лнисѧ смиренїе е҆го, расы́пасѧ грѣхъ е҆го, ꙗ҆́ко прїѧ́тъ ѿ рꙋки гн҃ѧ сꙋгꙋбы грѣхи своѧ̀·

Глас̑҇ въпїющаг̑҇ въ пꙋсты́ни, ѹ҆готова́ите пꙋть гн҃ь, пра́вы сътвори́те стеѕѧ бг҃а на́шего·

Всѧ́ка де́брь напо́лнитсѧ, и҆ всѧка гора̀ и҆ хо́лмъ ѻ҆бнизѣ́етъ.
и҆ бꙋ́дет̑ вс̂е кривое въ пра́во, и҆ ѻ҆строаво́е въ пꙋти глад̑ки.
и҆ ꙗ҆́ви́тсѧ сла́ва гн҃ѧ.
и҆ ѹ́зритъ всѧка пло́ть сп҃сенїе бж҃їе, ꙗ҆ко г҃ь гл҃а·

Гла́съ въпїю́щаго възопїи, и҆ рекохъ чт̂о възопїю, всѧка пло́ть сѣно, и҆ всѧка сла́ва чл҃ча ꙗ҆́ко цвѣтъ тра́вныи.
пос꙽ше трава́, и҆ цвѣтъ ѿпадѐ, а҆ гл҃ъ б҃а на́шего пребꙋ́детъ в꙽ вѣки·

На́ горꙋ высокꙋ възы́ди бл҃говѣствꙋи сїѻ́нꙋ, възвыша́и крѣ́постїю глас̑҇ сво́и·

Бл҃говѣствꙋ́ѧи і҆ерс̑҇ли́мꙋ, и҆ возвыси́те не бо́итесѧ·

Рцы̀ гра́дов̑҇ і҆ѹ́диномъ с̂е б҃ъ ва́шъ, с̂е г҃ь крѣпостїю и҆́дет̑, и҆ мы́ца е҆го съ вла́стїю.
с̂е м꙽зда е҆го с ни́мъ, и҆ дѣ́ло е҆го предъ ни́мъ.
а҆ки пастꙋхъ ѹ҆пасетъ па́ствꙋ свою, и҆ мы́шцею свое́ю съберет꙽ а҆́гньца, і҆ и҆мꙋща въ ѹ҆тро́бѣ ѹ҆тѣшитъ·

Кт̂о и҆змѣри го́рстїю во́дꙋ, и҆ нб҃о пѧ́дїю, и҆ всю зе́млю го́рьстїю.
кт̂о поставѝ го́ры въ мѣрꙋ, и҆ хо́лми а҆ки въ ꙗ҆рмѣ·

Кт̂о разꙋмѣ ѹ҆́мъ гн҃ь, и҆ли кт̂о е҆мꙋ совѣтникъ бы́сть, и҆же поѹ҆ча́етъ и҆̀ и҆л̂и къ комꙋ̀ совѣща, и҆ поѹ҆чи и҆̀·

Кт̂о ли ѹ҆каза е҆мꙋ сꙋдъ, и҆л̂и пꙋть смышленїѧ ѹ҆каза̀ е҆мꙋ.
и҆ли кт̂о преже да́сть е҆мꙋ, да сѧ воздасть е҆мꙋ·

Се всѧ̀ страны̀ ꙗ҆́ко ка́плѧ ѿ ка́ди, и҆ ꙗ҆́ко претѧженїе превѣсьнъ намѣни́шасѧ е҆мꙋ.
а҆ дꙋбра́ва непостиж꙽на на съж꙽женїе.
и҆ вс̂е четвероно́жное непости́жно на всѐсъж꙽женїе.
и҆ вс̂ѧ страны̀ ꙗ҆́ко нивъчто́же сꙋть, и҆ въ ничтоже въмѣни́шасѧ·

Комꙋ̀ ѹ҆подоби́сте г҃а, и҆ кое҆мꙋ подо́бїю ѹ҆подоби́сте е҆го.
е҆да̀ б̂о ѻ҆́бразъ сътвори древодѣлѧ, и҆л̂и зла́тарь слїѧвъ зла́то позлати и҆̀, и҆л̂и подо́бїемъ сътворѝ е҆го.
дре́во б̂о негнїющее и҆збира́етъ дре́водѣлѧ, и҆л̂и мꙋдръ и҆спытꙋе́тъ ка́ко поста́витъ ѻ҆́браз̑ е҆го, да сѧ не поколѣ́блет̑.
не разꙋмѣсте л̂и, не слы́шасте л̂и, не възвѣсти л̂и сѧ вамъ и҆спе́рва, не разꙋмѣсте л̂и ѻ҆снова́нїѧ землѝ·

Съдръжа́и крꙋгъ землѝ, и҆ живꙋщаа на не́и а҆ки прꙋ́ги.
пропныи нб҃о ꙗ҆ко кома́рю и҆ простерь е҆̀ ꙗ҆́ко покров̑҇ вселѧ́тисѧ·

да́выи кнѧ́ѕѧ н̂и вочто́же владѣти и҆ землю а҆ки н̂ичто́же сътворѝ.
не насѣ́ютъ б̂о, н̂и наса́дѧтъ, и҆ не въкорени́тсѧ въ землѝ ко́ренїе их̑.
дъхнꙋ на нихъ вѣтръ и҆ посхо́ша, и҆ бꙋрѧ а҆ки плѣвы прїиметъ и҆хъ·

Нн҃ѣ ѹ҆бо комꙋ̀ м̂ѧ ѹ҆подобисте, и възнесꙋ́сѧ рече ст҃ыи.
возри́те на высотꙋ̀ ѻ҆чима ва́шима, и҆ ви́дите кт̂о сътворѝ сїѧ вс̂ѧ·

Носѧ́и по числꙋ̀ тва́рь свою̀, и҆ всѧ̀ по и҆мени призоветъ.
ѿ мно́гїѧ сла́вы и҆ въ дръжа́вѣ крѣ́пости е҆го, ничто́же ѹ҆та́исѧ ѿ тебѐ·

Почто̀ рече і҆а́кове, и҆ чт̂о гл҃а і҆и҆л҃ю, ѹ҆та́исѧ пꙋть мо́и ѿ бг҃а, и҆ б҃ъ мо́и ѿвръглъ е҆сть сꙋдъ и҆ ѿстꙋпил̑҇.
нн҃ѣ же не разꙋмѣ, а҆́ще б̂ы не слы́шалъ е҆си·

Бг҃ъ вѣчныи, г҃ь ѹ҆строи́выи конца землѝ.
не въза́лчетъ ниже ѹ҆трꙋ́дитсѧ, ниже е҆сть и҆зъѻбрѣт̂енїѧ премꙋдрости е҆го·

да́ѧи а҆́лчющимъ крѣпость, и҆ небо́лѣзнымъ скорбь.
възалчютъ б̂о ѻ҆́троцы, и҆ ѹ҆трꙋ́дѧт̑сѧ ю҆́ноты, і҆ и҆збраннїи не крѣпцы бꙋдт̑ꙋ<.>

Терпѧ́щеи г҃а и҆змѣнѧт̑ крѣ́пость.
ѻкрилатѣ́ютъ ꙗ҆́ко ѻ҆рли текꙋтъ и҆ не ѹ҆трꙋ́дѧтсѧ·

Глв̑҇а, м҃а·

Понови́тесѧ къ мнѣ̀ ѻ҆́строви, кн҃ѕи б̂о и҆змѣнѧт̑ ѻ҆́бласть.
да сѧ приближатъ и҆ да гл҃ют̑ вкꙋ́пѣ, тогда̀ сꙋ́дъ да совѣстꙋ́ютъ·

Кт̂о въста́ви ѿ въсто́къ пра́вдꙋ.
призыва ѧ҆̀ запѧ́ть но́гꙋ е҆го, и҆ по́идетъ.
станет꙽ же пред̑ странами, и҆ цр҃ѧ ѹ҆жаси́тъ.
и҆ пове́ржетъ на землѝ меча и҆хъ, и҆ а҆ки плѣвы ѿве́ржены лꙋцы ихъ, и҆ прожене́тъ ѧ҆̀, и҆ по́идет̑ с ми́ромъ.
пꙋть но́гꙋ е҆го кт̂о съдѣла, и҆ сътвори с̂е призыва́ѧ, призыва́ѧи ѿ рожде́нїи и҆спе́рва·

А҆зъ б҃ъ пе́рвыи, и҆ въ приходѧ́щее аз̑ е҆смь.
ви́дѣша ꙗ҆зы́цы, и ѹ҆боѧ́шасѧ кон꙽цы зе́мнїи, приближи́шасѧ и҆ прїидо́ша вкꙋ́пѣ.
сꙋдѧ́и ко́ждо бли́жнемꙋ помощи бра́тꙋ, и҆ речетъ.
ѹ҆крѣпи мꙋ́жъ дре́водѣ́лѧ, и҆ ковач̑҇ бїѧ мла́томъ, вкꙋ́пѣ прокова́ѧ·

ѻ҆ воли же речетъ спое́нїе добро̀ е҆сть.
ѹ҆тверди́ша е҆̀ въ гво́здѣхъ, и҆ положатъ е҆̀ и҆ не подвигнетсѧ·

Ты же і҆и҆л҃ю рабе мои і҆акове, е҆гоже и҆з꙽бра́хъ, племѧ̀ а҆враа́мле е҆гоже възлюби́хъ.
е҆гоже под̑ѧхъ ѿ конець зе́мныхъ, и҆ ѿ стра́жбы е҆ѧ̀ призвах̑ т̂ѧ, и҆ реко́хъ т̂и.
ра́бъ мои е҆си і҆ и҆збра́хъ т̂ѧ, и҆ не ѻ҆ста́вихъ тебе.
не бо́исѧ, с тобо́ю б̂о е҆смь.
не прелща́исѧ, а҆зъ б̂о е҆смь б҃҃ъ твои.
ѹ҆крѣпи́выи т̂ѧ, и҆ помого́хъ т̂и, и҆ ѹ҆тверди́хъ т̂ѧ десни́цею свое҆ю пра́вед̑ною·

Се̂ постыдѧ́тсѧ и҆ посрамѧ́тсѧ вс̂и сꙋпротивѧ́щеисѧ тебѣ̀.
бꙋдꙋтъ б̂о ꙗ҆́ко не сꙋщеи, и҆ поги́бнꙋтъ вс̂и сꙋперницы твои.
възы́щеши и҆хъ, и҆ не ѻ҆брѧ́щеши.
чл҃кы и҆же порꙋга́ютсѧ тебѣ, бꙋдꙋтъ б̂о а҆ки не бы́вшеи, и҆ не бꙋдꙋтъ ратѧ́щеисѧ с тобо́ю·

Ꙗ҆́ко а҆зъ б҃ъ твои держа́и т̂ѧ за десницꙋ твою, гл҃ѧи тебѣ.
не бо́исѧ і҆а́кове малы́и і҆и҆л҃ю, а҆зъ помогох̑ т̂и гл҃ет̑ г҃ь, и҆збавлѧ́аи т̂ѧ ст҃ыи і҆и҆л҃ев꙽·

Се̂ сътворих̑ т̂ѧ а҆ки колеса̀ ко́лнаѧ но́ва, верхꙋща пи́лным̑ ѻ҆́бразомъ.
і҆ и҆звержеши го́ры, и҆ ѻ҆бтон꙽чи́ши хо́лмы.
и҆ а҆ки пра́хъ положи́ши і҆ и҆звѣ́еши, и҆ вѣтръ воз̑мет̑ ѧ҆̀, и҆ бꙋ́рѧ развѣ́етъ ѧ҆̀·

ты же възвесели́шисѧ въ ст҃ыхъ і҆и҆л҃ю, и҆ възра́дꙋют̑сѧ ѹ҆бо́ѕїи, и҆ не и҆мꙋщеи пои҆́щꙋтъ б̂о воды̀, и҆ не бꙋ́детъ, ꙗ҆зы́къ и҆хъ ѿ жа́жди и҆с꙽хнꙋлъ е҆сть·

А҆зъ г҃ь б҃ъ, послꙋшаю ѹ҆бо́гихъ і҆и҆л҃евъ, и҆ не ѻ҆ста́влю и҆хъ.
н̂о ѿверзꙋ на рогахъ рѣки, и҆ среди по́лѧ и҆сто́чники.
и҆ сътворю пꙋсты́ню въ лꙋ́ги, и҆ жа́ждꙋщꙋю зе́млю въ водоте́чахъ.
положꙋ̀ в꙽ вꙋзвод̑нѣи землѝ с꙽мрѣчїе, и҆ зелени́чїе, и҆ ми́рътꙋ и҆ кѷпари́съ, и҆ топо́ль.
да ѹ҆зрѧт̑ и҆ разꙋмѣ́ютъ, и҆ помы́слѧтъ, и҆ пристꙋ́пѧтъ въкꙋ́пѣ.
ꙗ҆́ко рꙋка гн҃ѧ сътвори с̂е вс̂е, и҆ ст҃ыи і҆и҆л҃евъ ѹ҆каза́лъ е҆сть.
приближа́етсѧ сд̑ꙋ вашъ гл҃етъ г҃ь б҃ъ.
приближи́шасѧ совѣти ваши гл҃етъ цр҃ь і҆а́ковль.
да сѧ приближатъ и҆ съвѣстѧт̑ вам̑, е҆мꙋ́же е҆сть събы́тисѧ.
а҆ще пе́рвое кое е҆сть рцѣте, да приста́влю ѹм̑, и҆ разꙋмѣ́емъ чт̂о послѣ́днее, чт̂о л̂и приходѧ́щее рцѣте намъ, и҆ съвѣстите намъ грѧдꙋщ́ее послѣжд̑е и҆ ѹ҆вѣмъ ꙗ҆́ко бо́ѕи е҆сте.
бл҃го сътвори́те и҆ зазли́те, и҆ почюди́мсѧ и҆ ѹ́зримъ въкꙋпѣ.
ꙗ҆́ко ѿкꙋдꙋ е҆сте в̂ы, и҆ ѿкꙋдꙋ дѣ́ло ваше, ѿ землѧ̀ гнꙋшенїе и҆з꙽бра́выи в̂ы.
а҆́зъ же съста́вихъ и҆же ѿ сѣ́вера, і҆ и́же ѿ востокъ сл҃нчныхъ призовꙋтсѧ и҆мени мое҆мꙋ.
да прихо́дѧтъ кнѧ́ѕи ꙗ҆ко бла́то, и҆ ꙗ҆́ко горньчарь первыи гли́нꙋ, та́ко же сѧ поперете.
кт̂о б̂о възвѣститъ е҆же и҆спе́рва да ѹ҆вѣмы, ꙗ҆́же и҆спе́рва и҆ речемъ, ꙗ҆́ко и҆́стин꙽на ес̑҇.
и҆ нѣсть проповѣда́ющаго, н̂и слы́шаща слове́съ нашихъ.
зача́токъ сїѻ́нꙋ дамъ, і҆ерс̑҇лима ѹ҆тѣшꙋ въ пꙋть, ѿ стра́нъ б̂о сих̑ н̂и е҆ді́нъ же, и҆ ѿ кꙋми́ръ и҆хъ нѣсть и҆же совѣсти́тъ.
и҆ а́ще въпрошꙋ их̑ ѿкꙋдꙋ е҆сте, т̂о не ѿвѣща́ютъ м̂и.
сꙋть б̂о творѧ́щеи ва́съ, и҆ прельща́ю҆щеи ва́съ·

Глв̑҇а, м҃в·

Іа́ковъ ра́бъ мо́и, и҆ под̑и҆мꙋ и҆̀ і҆и҆л҃ь и҆збра́нныи мо́и, прїѧт̑ и҆̀ дш҃а моѧ̀.
дахъ дх҃ъ мо́и нань, сꙋдъ ꙗзы́комъ възвѣстит꙽.
н̂и възопїетъ ни прельстит̑, и҆ не ѹ҆слы́шит̑сѧ внѣ̀ глас̑҇ е҆го·

Тро́сти съкрꙋше́ны не сътрет̑ и҆ льна кꙋрѧ́щасѧ не ѹ҆гаситъ, н̂о въ и҆́стиннꙋ и҆знесетъ сꙋдъ.
просвѣтитсѧ и҆ не потꙋ́хнетъ, до́ндеже положитъ на́ земли сꙋда, и҆ на и҆мѧ е҆го ꙗ҆зы́цы надѣ́ютсѧ·

Сице гл҃ет̑ г҃ь б҃ъ, сътвори́выи нб҃о и҆ поста́влеи е҆̀, ѹ҆тверже́и зе́млю и҆ ꙗ҆́же на не́и.
и҆ дааи дыха́нїе людемъ и҆же на не́и, и҆ дх҃ъ ходѧ́щим̑ на не́и·

А҆́зъ г҃ь б҃ъ призвахъ т̂ѧ пра́вдою.
и҆ прїимꙋ т̂ѧ по рꙋкꙋ, и҆ ѹ҆крѣплю т̂ѧ.
и҆ дахъ т̂ѧ въ завѣтъ ро́дꙋ въ свѣт꙽ странамъ ѿвръсти ѻ҆́чи слѣпымъ і҆ и҆звести ѿ ю́зъ свѧза́ныѧ, і҆ и҆зъ до́мꙋ темница сѣдѧщаа во т꙽мѣ·

А҆зъ г҃ь б҃ъ с̂е е҆сть и҆́мѧ мое.
сла́вы мое́ѧ и҆́номꙋ не да́мъ, н̂и доброты мое́ѧ и҆стꙋка́н꙽нымъ.
ꙗ҆́же и҆з нача́ла с̂е грѧдꙋтъ, и҆ но́ваѧ и҆же а҆́зъ възвѣщꙋ, и҆ преже възвѣщенїѧ повѣдасѧ ва́мъ.
въспо́ите гв҃и пѣснь но́вꙋ, вла́сть е҆го сла́витсѧ і҆ и́мѧ е҆го ѿ ко́нець землѝ.
съходѧ́щеи въ мо́ре и҆ плава́ющеи по не́мꙋ ѻ҆́строви и҆ живꙋщеи в них̑·

Ра́дꙋисѧ пꙋсты́ни и҆ вс̂ѧ еѧ̀ ѻ҆гра́ды и҆ живꙋщеи въ кѷдарѣ.
възра́дꙋютсѧ живꙋще́и на ка́мени ѿ верхъ го́рныхъ възопїют̑.
дадѧт̑ гв҃и сла́вꙋ, нра́вы е҆го до́брыѧ въ ѻ҆стро́вѣхъ възвѣстѧ́тъ·

Гь҃ б҃ъ си́лъ и҆зы́идетъ, и҆ съкрꙋшитъ ра́ть.
въз꙽дви́гнет꙽ рве́нїе, и҆ възопїет꙽ на враги своа̀ съ крѣ́постїю.
помолча́хъ, е҆да̀ ѹ҆бо и҆ всегда̀ помолчю и҆ претръплю, тръпѣхъ ꙗ҆́ко ражд̑а́ющїѧ.
потреблю и҆ посꙋшꙋ въкꙋ́пѣ пꙋ́сты сътворю̀ го́ры и҆ хо́лми, и҆ всѧ́кꙋ травꙋ̀ и҆с꙽сꙋшꙋ.
и положꙋ рѣки въ ѻ҆́стровы.
и҆ лꙋги и҆с꙽сꙋшꙋ.
и҆ наведꙋ слѣпы́ѧ на пꙋть е҆гоже не ви́дѣша, и҆ стеѕѧ их̑же не зна́ютъ ходи́ти по ни́мъ сътворю̀ и҆мъ·

Сътворю̀ им̑ т꙽мꙋ на свѣтъ, и҆ стро́потное въ право́е.
с̂е гл҃ю ꙗ҆́же сътворю̀ и҆ не ѻ҆ста́влю их̑, гл҃етъ г҃ь.
сїи же воз̑врати́шасѧ въспѧ́тъ·

Срамлѧ́итесѧ стыдѣ́нїем̑ ѹ҆пова́ющеи и҆зваѧ́ными гл҃ющеи сълїѧ́нным̑, вы̀ е҆сте бо́ѕи наши·

Глꙋсїи слы́шите, и҆ слѣпїѝ про́зрите и҆ ви́дѣте.
т̂о кто̀ слѣпъ н̂о рабѝ моѝ, и҆ глꙋсїи н̂о владꙋщеи и҆́ми.
и҆ ѻ҆слѣ́поша рабѝ бж҃їи.
ви́дѣсте многа́жды, и҆ не снабди́сте.
ѿвръзенѣ ѹ҆́ши и҆мꙋщи и҆ не слы́шасте.
г҃ь б҃ъ хотѣ да ѻправдит̑сѧ и҆ возвели́чит̑ хвалꙋ̀·

И҆ видх̑ѣ и҆ бы́ша лю́дїе съблꙋждени и́ раз꙽граблени.
прꙋ́гло б̂о вложихъ вездѣ, и҆ в домохъ въкꙋп́ѣ и҆же съкры́ша ѧ҆̀ бы́ша въ плѣнъ.
и҆ не бы́сть ѿи҆ма́ющаго раз̑грабленїа, и҆ не бѣ гл҃ющаго въ ва́съ ѿдаждь·

Кт̂о въ ва́съ и҆же внꙋши́тъ с̂е, и҆ послꙋша́ет꙽ въ грѧдꙋщаѧ.
кт̂о да́сть на раз꙽грабленїе і҆а́кова, і҆и҆л҃ѧ плѣнѧ́ющи е҆го.
не б҃ъ л̂и ѹ҆бо е҆мꙋже съгрѣшиша, и҆ не и҆зволиша в꙽ пꙋти е҆го ходи́ти, н̂и послꙋшати за́кона е҆го.
и наведѐ на́ нѧ гнѣвъ ꙗ҆́рости свое́ѧ, и ѹ҆крѣпи на́ нѧ ра́ть и҆ палѧ́щеи е҆го ѻ҆́крс̑҇тъ.
и҆ не ѹ҆вѣдѣша ко́ждо и҆хъ, и҆ не положи́ша на ѹ́мѣ·

Глв̑҇а, м҃г·

И нн҃ѣ си́це гл҃етъ г҃ь б҃ъ, сътвори́выи т̂ѧ і҆а́кове, създа́выи т̂ѧ і҆и҆л҃ю, не бо́исѧ ꙗ҆ко и҆зба́вихъ т̂ѧ.
прозвах̑ и҆мѧ твое мо́и е҆си т̂ы.
и҆ а́ще минꙋ́еши по водѣ т̂о с тобо́ю е҆смь, и҆ рѣки не покрыют̑ тебе·

И҆ а́ще скво́ѕѣ ѻ҆́гнь про́идеши не сож꙽жешисѧ, и҆ пла́мень не ѻ҆палитъ тебе.
ꙗ҆́ко а҆зъ г҃ь б҃ъ твои, ст҃ыи і҆и҆л҃евъ сп҃са́ѧи т̂ѧ·

Сътворихъ премѣнꙋ твою е҆гѷпта, и҆ мѷры и҆ сѷинꙋ за тѧ.
ѿнели́ же че́стенъ бы́сть предо мно́ю и҆ просла́висѧ, и҆ аз̑ т̂ѧ възлюбих̑.
дамъ чл҃ки по тебѣ̀, и҆ кн҃ѕѧ по главѣ̀ твое́и·

Не бо́исѧ ꙗ҆́ко с тобо́ю е҆смь.
ѿ восто́къ приведꙋ племѧ̀ твое, и҆ ѿ за́пада съберꙋ т̂ѧ.
рекꙋ сѣверꙋ приведи, и҆ восто́чнꙋ не возъбранѧ́и.
приведи сн҃ы моѧ̀ ѿ землѧ̀ далнѧѧ, и҆ дще́ры моа ѡ кра́и зем̑ных̑ вс̂ѧ, и҆ призываютъ и҆мѧ мое.
въ сла́вꙋ б̂о свою̀ ѹ҆готовахъ и҆ создах̑ и҆̀ и҆ сътворих̑ и҆̀, і҆ изведох̑ люди слѣпы, и҆ ѻ́чи сꙋть та́коже слѣ́пы, и҆ глꙋси ѹ҆́ши и҆мꙋща.
вс̂и ꙗ҆́зы́цы събра́шас̑҇ въкꙋпѣ, и҆ съберꙋтсѧ кнѧ́ѕи ѿ них̑·

Кт̂о совѣсти́тъ с̂е, и҆л̂и е҆же и҆спр́ьва кт̂о совѣститъ ва́мъ.
да и҆зведꙋтъ свѣдѣтелѧ своа̀ и да сѧ ѻ҆правдѧт̑, и҆ да рект̑ꙋ и҆́стин꙽но и҆ да послꙋшают̑ и҆х꙽.
бꙋдете м̂и по́слꙋси, и҆ а́зъ послх̑ꙋ гл҃ет̑ г҃ь б҃ъ.
и҆ ра́бъ е҆гож̑ и҆з꙽брах̑, да ѹ҆вѣсте и҆ вѣрꙋете м̂и.
и҆ ѹ҆вѣсте ꙗ҆́ко а҆зъ е҆смь, предо мно́ю нѣсть был̑҇ и҆́нъ б҃ъ, и҆ по мнѣ̀ не бꙋ́детъ.
а҆́зъ б҃ъ, и҆ не бꙋ́дет꙽ ра́звѣ мене сп҃са́ѧи совѣстихъ и҆ сп҃сохъ ѹ҆корихъ, и҆ не бѣ̀ въ ва́съ чю́ждего.
в̂ы мнѣ̀ по́слꙋси, и҆ а́зъ по́слꙋхъ, гл҃етъ г҃ь б҃ъ·

Є҆ще и҆спе́рва, и҆ нѣсть и҆же ѿ рꙋ́кꙋ мое́ю ѿи́метъ, сътворю̀ и҆ кт̂о вовратитъ е҆̀·

Та́ко гл҃етъ г҃ь б҃ъ, и҆збавивыи в̂ы ст҃ыи і҆и҆л҃евъ.
ва́съ рада пꙋщꙋ въ вавѷлон̑҇, и҆ въставлю̀ вс̂ѧ бѣжа́щаѧ, и҆ халде́и въ кораблех̑ свѧ́жꙋтсѧ·

А҆зъ г҃ь б҃ъ ст҃ыи ваш̑҇, оіказа́выи і҆и҆л҃ѧ цр҃ѧ ва́шего·

Си́це гл҃етъ г҃ь, да́ѧи пꙋть по́ морю, и҆ по во́дѣ си́лнѣ сте́ѕѧ.
и҆зводѧ́и ѻ҆рꙋжїе и҆ конѧ̀ и҆ народ̑ мно́гъ.
и҆ ѹ҆спо́ша и҆ не въста́нꙋтъ, ѹ҆гасо́ша аки прѧ́диво ѹ҆га́шен꙽но.
не помина́ите прьвых̑ и҆ ветхих̑ не помышлѧ́ите.
с̂е сътворю но́ваѧ, нн҃ѣ просїают̑сѧ и҆ ѹ҆вѣсте ѧ҆̀.
и҆ сътворю в꙽ пꙋсты́ни пꙋть и҆ въ безвод̑нѣи рѣки·

Блс̑҇вѧтъ м̂ѧ ѕвѣрїе по́льстїи сѷрини, и҆ дще́ри пти́ча.
ꙗ҆́ко дахъ въ пꙋсты́нѣ водꙋ и҆ рѣки въ безвод̑нѣи, напои҆ти род̑ мо́и и҆з꙽бра́нныи.
и҆ лю́ди моа̀ ꙗ҆́же прострох꙽, нравы моа̀ и҆сповѣдова́ти·

Не призвах̑ л̂и нн҃ѣ ѹ҆бо тебе і҆а́кове, и не трꙋди́тисѧ сътворих̑ т̂и і҆и҆л҃ю·

Не приведѐ б̂о мнѣ ѻ҆вецъ требы твое҆ѧ, и҆ не просла́ви мене въ требахъ твои҆хъ.
н̂и трд̑ꙋна сътворихъ тѧ въ дꙋбра́вѣ, и҆ не притѧжа мнѣ цѣною ѳимїама, ни ло́ѧ требъ твоих̑ въсхотѣхъ.
н̂о въ грѣсѣхъ твои҆х꙽ и҆ в꙽ неправдахъ твои҆хъ трꙋди м̂ѧ·

А҆́зъ е҆смь, а҆зъ е҆смь, потира́ѧи безако́нїѧ твоа мене ради, и҆ грѣхъ твоих̑ не помѧнꙋ.
тыж̑ помѧнѝ и҆ да сѧ съпривѐ, гл҃и т̂ы преже безако́нїѧ своа̀ да сѧ ѻ҆правдиши.
ѿц҃ы ва́ши пр́ьвое грѣши́ша, и҆ вещ꙽цы твоѝ безакониша къ мнѣ̀, и҆ ѻ҆скверниша кнѧ́ѕи ст҃аѧ моа̀.
и҆ дахъ погꙋбити і҆а́кова, і҆и҆л҃ѧ въ ѹ҆кори́знꙋ·

Глв̑҇а, м҃д·

Нн҃ѣ же слы́ши ра́бе мои і҆а́кове, и҆ възлю́бленыи і҆и҆л҃ю е҆гож̑ и҆збрахъ·

Сице гл҃етъ г҃ь б҃ъ.
сътвори́выи т̂ѧ, и҆ создавыи т̂ѧ въ ѹ҆тробѣ е҆щѐ сꙋщꙋ т̂и помо́же т̂и·

Не бо́исѧ ра́бе мо́и і҆а́кове, и҆ възлю́бленныи і҆и҆л҃ю е҆гоже и҆з꙽брахъ.
ꙗ҆́ко а҆зъ да́мъ во́дꙋ въ жа́ждꙋ ходѧ́щимъ въ безъво́днѣи, наложꙋ дх҃ъ мои на племѧ твое, и҆ блс̑҇венїѧ моа на ча́да твоѧ̀ и҆ проѕѧбнт̑ꙋ а҆ки трава средѣ во́ды и҆ ꙗ҆́ко верба подолгъ рѣки текꙋща·

Се́и речетъ бж҃їи е҆смь, и҆ се́и възопїетъ къ и҆мени і҆а́ковлю.
и҆ дрꙋгыи напишет꙽ъ гл҃ѧ, бж҃їи е҆смь къ и҆мени і҆и҆л҃ю·

Сице гл҃етъ б҃ъ цр҃ь і҆и҆л҃въ, и҆збавле́и е҆го б҃ъ саваѻѳ̑҇·

А҆зъ б҃ъ пр́ьвыи а҆з же посемъ, ра́звѣ мене нѣсть б҃а ктомꙋ ꙗ҆́коже аз̑ да ста́ни и҆ призови и҆ ѹ҆готови м̂и, ѿнелѣ же сътворихъ чл҃ка въ вѣкъ.
и҆ грѧдꙋщаѧ пред̑ прише́ствїемъ да совѣстѧт꙽ ва́мъ.
не покрыва́ите, и҆ не съблꙋди́те.
не и҆спр́ьва ли внꙋшисте и҆ совѣстихъ ва́мъ.
по́слꙋси в̂ы е҆сте, а҆ще ес̑҇ б҃ъ ра́звѣ мене.
и҆ не бѣ тогда̀ зда́ющихъ и҆ ваѧ́ющихъ, вс̂и тщи творѧ́щеи по́мыслы свои҆ми и҆же не ѹ҆спѣ́ютъ и҆мъ.
н̂о срамѧт̑сѧ вс̂и соѕида́ющи б҃а, и҆ ваѧ́ющїи без꙽ ѹ҆спѣха, и҆ вс̂и ѿкꙋдꙋ же бы́ша и҆схоша·

И҆ глꙋсїи ѿ чл҃къ съберѣтесѧ вс̂и, и҆ ста́нете въкꙋпѣ, посрамлѧ́и҆тесѧ и҆ ѹ҆врати́тесѧ въкꙋпѣ·

ꙗ҆́ко наѻ҆стри дре́водѣлѧ сѣ́чиво, те́слою съдѣла е҆̀ на гла́внѧх̑, и҆ длатомъ съдолбе е҆̀, съдѣла е҆̀ крѣпостїю мы́шца е҆го.
и҆ воза́лчетъ і҆ и҆знемо́жет꙽, и҆ не напїетсѧ воды̀·

И҆збра́в꙽ древодѣлѧ дре́во поста́ви е҆̀ в мѣрꙋ, и҆ начерта́въ сътвори е҆̀.
и҆ сътвори е҆́ ꙗ҆́ко ѻ҆́бразъ мꙋжескъ, и҆ ꙗ҆́ко красꙋ чл҃чю.
поста́ви е҆̀ в домꙋ̀ е҆же посѣче древо в꙽ дꙋбра́вѣ, е҆же насади г҃ь, и҆ до́ждь продожд̑и.
даже бꙋдет̑ чл҃ком̑ на ж꙽женїе, и҆ взѧ̀ ѿ него̀ съгрѣсѧ, і҆ и҆ж꙽жегше ѧ҆̀ и҆спеко́ша и҆́ми хлѣбы.
и҆ съ ѻ҆ставшаго же сътвориша бо́ги, и҆ покланѧ́ютсѧ и҆мъ.
и҆ сътвори́ша и҆зваѧ꙽нна, и҆ прекланѧют̑сѧ и҆мъ.
пол̑҇ е҆го и҆жжеглъ е҆сть ѻ҆гнемъ, и҆ полъ же е҆го съж꙽же на ѹ́глїе і҆ и҆спече в них̑ хлѣбы̀, и҆ верхꙋ их̑ и҆спече мѧ́со и҆ ꙗ҆де и насыти́сѧ.
и҆ съгрѣ̀ вс̂ѧ, реч̑҇.
слад̑ко мнѣ ꙗ҆ко съгрѣхъсѧ, и҆ ви́дѣхъ ѻ҆́гнь.
и҆ съ ѻ҆ста́вшаго же сътвори бо́га и҆зваѧ́на, преклонѧет̑сѧ е҆мꙋ, и҆ покланѧ́етсѧ и҆ мо́литсѧ е҆мꙋ, гл҃ѧ, и҆збави м̂ѧ ꙗ҆́ко б҃ъ мо́и е҆си т̂ы.
не ѹ҆вѣ́дѣша смы́слит̂и, ꙗ҆́ко ѻ҆темнѣстѣ ѻ҆́чи их̑ глѧ́дати, и҆ разꙋмѣти срд̑цемъ их̑.
и҆ не помы́сли въ дш҃и свое́и, н̂и ѹ҆вѣдѣ смышленїем꙽.
ꙗ҆́ко по́лъ е҆го и҆ж꙽жеглъ е҆сть ѻ҆гнемъ, і҆ и҆спеклъ ес̑҇ въ ѹ҆́глїех̑ е҆го хлѣ́бы, і҆ и҆спеклъ мѧ́са и҆ ꙗ҆́лъ е҆сть.
и ѻ҆ста́в꙽шее е҆го въ ме́рзость сътворѝ, и҆ покла́нѧю҆тсѧ е҆мꙋ.
ѹ҆вѣждь ꙗ҆́ко пе́пелъ е҆сть срд̑це их̑ и прельща́ютсѧ, и҆ н̂и е҆ді́нъ мо́жетъ дш҃а свое́ѧ и҆зба́вити.
ви́дѣте и҆ не рцѣте ꙗ҆́ко л꙽жа въ десницы мое́и·

Помѧни сїѧ і҆а́кове і҆и҆л҃ю, ꙗ҆́ко ра́бъ мои е҆си т̂ы.
сътворих̑ т̂ѧ раба̀ мое҆го і҆и҆л҃ю и҆ т̂ы не забываи мене.
се б̂о потрох̑ ꙗ҆ко ѻ҆́блак безако́нїѧ твоѧ̀, и҆ ꙗ҆́ко примракъ грѣхи твоѧ̀.
ѻ҆брати́сѧ къ мнѣ̀ і҆ и҆зба́влю т̂ѧ·

Ра́дꙋитесѧ нб҃са ꙗ҆́ко помилова б҃ъ і҆ил҃ѧ.
въстрꙋби́те ѻ҆снова́нїѧ зе́мнаѧ, възопїите го́ры съ веселїемъ, и҆ холми и҆ всѧ́ко дре́во е҆же насадихъ.
ꙗ҆́ко и҆зба́ви б҃ъ і҆а́кова і҆и҆л҃ь просла́витсѧ·

Си́це гл҃ет̑ г҃ь и҆збави́выи т̂ѧ и҆ созд̑авыи т̂ѧ ѿ чре́ва.
а҆зъ г҃ь съвер꙽ша́ѧи вс̂е, протѧгох̑ нб҃о е҆ді́нъ и҆ ѹ҆твердих̑ зем̑лю.
кт̂о и҆́нъ рас꙽сы́плетъ зна́менїѧ ѹ҆тробныхъ влъхвова́нїи и҆ волшъбы ѿ срд̑ца.
ѿвращаѧ мꙋ́дрыѧ воспѧтъ и҆ совѣты и҆хъ ѻ҆бꙋа́ѧ.
и҆ ѹ҆ставлѧ́а гл҃ы раба̀ свое҆го, и҆ совѣтъ вѣстител̑҇ твои҆хъ съвръша́ѧи·

Гл҃ѧ і҆ерс̑҇ли́мꙋ насели́шисѧ.
и҆ гра́домъ і҆ѹ҆де́искимъ, ꙗ҆ко възгради́тесѧ и҆ пꙋсты́нѧ е҆го просїѧ́ютсѧ·

Гл҃ѧи безд̑нѣ ѻ҆пꙋстѣе́ши, и҆ рѣки твоа̀ посꙋшꙋ.
гл҃ѧи кѷрꙋ смы́слити, и҆ вс̂ѧ волѧ моа̀ сътвориши·

Гл҃ѧи і҆ерс̑҇ли́мꙋ воз̑гради́шисѧ, и храм̑ ст҃ыи мо́и ѻ҆снꙋю̀·

Глв̑҇а, м҃е·

Си́це гл҃етъ г҃ь б҃ъ, пома́зан̑҇номꙋ свое҆мꙋ кѷрꙋ.
е҆гоже держа́хъ по десни́цꙋ, повинꙋти пред̑ нимъ страны̀, и҆ крѣпость црс̑҇кꙋ разрꙋшю.
ѿвръзꙋ пред̑ нимъ вра́та, и҆ гра́ди не затво́рѧтсѧ.
а҆зъ пре нимъ поидꙋ̀ и҆ го́ры ѹ҆равна́ю.
вра́та мѣденаѧ съкрꙋшꙋ, и҆ верїѧ желѣзныѧ слом̑лю.
и҆ да́мъ т̂и и҆мѣнїѧ те́мнаѧ и҆ съкрове́наѧ, и҆ неви́димаѧ ѿврьзꙋ тебѣ.
да ѹ҆вѣси ꙗ҆́ко а҆зъ г҃ь б҃ъ, прозыва́ѧ и҆́мѧ твое, б҃ъ і҆и҆л҃евъ.
раба̀ дѣлѧ мое҆го і҆а́кова, і҆и҆л҃ѧ и҆з꙽бра́ннаго мое҆го·

А҆зъ призовꙋ т̂ѧ и҆́менемъ твои҆мъ, и҆ прїимꙋ т̂ѧ, ты́ же не позна̀ мене ꙗ҆ко аз̑ г҃ь б҃ъ, и҆ нѣсть ра́звѣ мене е҆ще б҃а, и҆ не позна̀ мене.
да бы́ша ѹ҆вѣдѣли и҆же ѿ восток̑҇ слн҃чныхъ, і҆ и҆же ѿ за́пада ꙗ҆́ко нѣсть ра́звѣ мене·

А҆зъ г҃ь б҃ъ и҆ нѣсть по се́мъ.
а҆зъ ѹ҆стро́ивыи свѣтъ, и҆ сътвори́выи тмꙋ̀.
творѧ́и ми́ръ, и҆ зиждѧ́и ѕл̂о, а҆зъ г҃ь б҃ъ творѧ́и всѐ с̂е.
да сѧ радꙋетъ нб҃о свы́ше, и҆ ѻ́блаци да кро́пѧтъ пра́вдꙋ.
да прозѧ́бнетъ землѧ̀, и҆ да прорасти́тъ млс̑҇ть, и҆ пра́вда прозѧ́бнетъ въкꙋпѣ.
а҆зъ е҆смь г҃ь съгради́выи тѧ, творѧ́и лꙋчшаа ѹ҆гото́вахъ ꙗ҆́ко гли́нꙋ скꙋде́лничꙋ не ѻ҆рѧи л̂и възорет̑ зе́млю весь дн҃ь.
е҆да речетъ гли́на скꙋде́лникꙋ, чт̂о твори́ши, ꙗ҆́ко не дѣлае҆ши, ниже и́маши рꙋкꙋ.
гл҃ѧи ѿц҃ꙋ, чт̂о роди́ши, и҆ мт҃ри, чим̑ поболиши·

Ꙗ҆́ко та́ко гл҃етъ г҃ь б҃ъ ст҃ыи і҆и҆л҃въ сътвори́выи грѧдꙋщаѧ.
въпраша́ите менѐ ѻ҆ сн҃охъ мои҆хъ, и҆ ѻ҆ дще́рехъ мои҆хъ, и҆ ѻ҆ дѣлесехъ рꙋкꙋ моею заповѣдите мн̂ѣ·

Азъ сътвори́хъ землю, и҆ чл҃ка на неи.
а҆з꙽ рꙋкою мое҆ю ѹ҆тверди́хъ нб҃о, а҆зъ всѣмъ звѣзда́мъ заповѣдахъ.
аз̑ въста́вихъ съ пра́вдою цр҃ѧ, и҆ всѝ пꙋтїе е҆го пра́вы.
се́и възградитъ гра́дъ мои, и҆ плѣн꙽ники людїи моих̑ възврати́тъ, не по м꙽здѣ ни по да́рꙋ рече г҃ь саваѻ́ѳъ·

Сице гл҃етъ г҃ь саваѻ́ѳъ, трꙋди́сѧ е҆гѷпетъ, и҆ кꙋплѧ е҆ѳїѻ́пъски, и҆ саваи́мъстїи мꙋжи высо́цыи, на тебе прїидꙋтъ и҆ тебѣ бꙋдꙋтъ рабѝ.
и҆ въ слѣдъ тебе поидꙋтъ свѧзани ѹ́зами рꙋчны́ми, и҆ прїидꙋтъ к тебѣ, и҆ покло́нѧтъ ти сѧ, и҆ тебѣ помо́лѧт̑сѧ, ꙗ҆́ко в тебѣ б҃ъ е҆сть.
и҆ рект̑ꙋ, нѣсть б҃а ра́звѣ тебе, ты б̂о е҆си б҃ъ, и҆ не вѣдѣхомъ, б҃ъ і҆и҆л҃евъ и҆ сп҃съ.
постыдѧ́тсѧ и҆ посрамѧ́тсѧ вс̂и противѧщеисѧ е҆мꙋ, и҆ по́идꙋтъ въ стꙋдѣ·

Поновлѧ́итесѧ къ мн̂ѣ ѻ́строви і҆и҆л҃еви, сп҃саитесѧ ѿ г҃а сп҃сенїемъ вѣчным̑.
не постыдѧт̑сѧ ни посрамѧ́тсѧ даже до́ вѣка.
занѐ та́ко гл҃етъ г҃ь б҃ъ вседръжи́тель сътвори́выи нб҃о.
се́и б҃ъ сътвори́выи зе́млю, и҆ сказа́въ ю҆̀.
то́и раздѣли ю҆̀, не вът꙽ще сътвори ю҆̀, н̂о на вселе́нїе създа ю҆̀·

А҆зъ е҆смь б҃ъ и҆ нѣсть ксемꙋ̀.
не ѻ҆таи гл҃ахъ ни въ те́мнѣ мѣсте зе́мльнѣ·

нѣсмь ре́клъ племени і҆а́ковлю в꙽сꙋ́е, проси́те сего·

а҆зъ е҆смь г҃ь гл҃ѧи пра́вдꙋ, и҆ съвѣствꙋѧ и҆́стин꙽нꙋ·

Събери́тесѧ и҆ прїидѣте, съвѣща́итесѧ въкꙋпѣ сп҃сае҆мїи ѿ стра́нъ·

не разꙋмѣша въз꙽дви́жꙋщеи дре́во и҆зваѧ́нїѧ и҆хъ, и҆ молѧ́щесѧ а҆ки богомъ, ѻ҆ни же не мо́гꙋтъ спс̑҇ти.
ни съвѣстѧ́тъ да сѧ прибли́жатъ да ѹ҆вѣдѧт̑ въкꙋпѣ.
кт̂о слы́шана сътвори сїѧ и҆спе́рва, тогда̀ съвѣсти́сѧ и҆мъ.
не а́зъ л̂и г҃ь б҃ъ, и҆ нѣсть и҆́наго ра́звѣ мене.
ѻ҆брати́тесѧ къ мн̂ѣ и҆ сп҃сетесѧ и҆же ѿ краа зе́мнаго.
а҆зъ е҆смь б҃ъ, и҆ нѣсть и҆́наго.
кленꙋсѧ собо́ю, а҆ще не и҆зы́детъ и҆зъ ѹ́стъ мои҆хъ пра́вда, словеса̀ моѧ не въз꙽вратѧ́тсѧ.
ꙗ҆́ко мн̂ѣ покло́нитсѧ всѧ́ко колѣно, і҆ и҆сповѣстьсѧ всѧ́къ ꙗ҆зы́къ бв҃и, гл҃ѧ, пра́вда и҆ слава к немꙋ̀ прїидет̑.
и҆ посрамѧ́тсѧ всѝ ѿлꙋча́ющеисѧ ѿ г҃а.
ѻ҆правдѧ́тсѧ и҆ ѻ҆ бѕ҃ѣ просла́вит̑сѧ все племѧ̀ сн҃овъ і҆и҆л҃евъ·

Глв̑҇а, м҃ѕ·

Паде́сѧ ви́лъ, и҆ съкрꙋши́сѧ даго́нъ.
бы́ша ваѧ́нїѧ их̑ въ звѣ́ри, и҆ въ ско́тъ.
задѣ́ите ѧ҆̀ свѧ́зана ꙗ҆́ко бре́мѧ трꙋжа́ющꙋсѧ, и҆ раслабѣвшꙋ и҆ а́лчющꙋ и҆ не могꙋщꙋ вкꙋпѣ.
и҆же не възмогꙋтъ ѹ҆цѣлѣти ѿ ра́ти, тїи бо плѣне́ни приведо́шасѧ·

Послꙋшаите мене до́ме і҆а́ковль, и҆ весь ѻ҆ста́нокъ і҆и҆л҃евъ.
въз꙽движемїи ѿ чрева, и҆ наказа́емїи ѿ дт̑ѣска до ста́рости·

А҆зъ е҆смь, и҆ дон꙽деже състарѣ́етесѧ, т̂о а́зъ е҆смь.
а҆з꙽ тер꙽плю̀ вамъ, а҆зъ сътвори́хъ, а҆зъ посла́блю, аз̑ подоимꙋ и҆ сп҃сꙋ вы̀·

Комꙋ м̂ѧ ѹ҆подоби́сте, ви́дѣте ѹ҆хи́тристе прельща́ющеисѧ слага́ющеи зла́то и҆з мѣха.
и҆ сребро̀ въ превѣснѧхъ мѣрѧ́ще въ мѣрꙋ.
нае́мъши златарѧ сътвори́ша рꙋчнꙋю тва́рь, и҆ преклони́вшесѧ покла̑нѧ́ютсѧ е҆мꙋ.
въздви́жꙋтъ ѧ҆̀ на ра́мѣхъ и҆ хо́дѧтъ, а҆ще же положатъ ѧ҆̀ на мѣсте, т̂о т̂ꙋ лежат̑ не подвижꙋтсѧ.
і҆ и҆же а҆ще възопїет̑ к немꙋ, т̂о не ѹ҆слы́шитъ печали е҆го, ни сп҃сетъ е҆го·

Помѧните сїѧ и҆ въздохнѣте, пока́итесѧ прельсти́вшесѧ ѻ҆брати́тесѧ срд̑цем̑.
и҆ помѧнѣте прьваѧ ѿ вѣка, ꙗ҆́ко аз̑ е҆смь б҃ъ, и҆ нѣсть ктомꙋ ра́звѣ мене.
проповѣда́ѧи прежде послѣднѧѧ, прежде даже не бꙋдетъ т̂и а҆бїе събꙋдꙋтсѧ, и҆ реко́хъ.
весь совѣтъ мои ста́нетъ, и҆ вс̂е е҆ли́ко совѣща́ю сътворю̀.
добра ѿ восто́къ пти́ца, и҆ ѿ землѧ̀ и҆здале́ча ѻ҆ нихже совѣща́хъ.
гл҃ахъ, и҆ приведохъ.
стѧжахъ, и҆ сътвори́хъ приведохъ и҆̀, и҆ блгоѹ҆годи́хъ пꙋть е҆го·

Послꙋшаите мене погꙋбльшеи срд̑це далнїи ѿ пра́вды.
приближи́хъ пра́вдꙋ мою, и҆ не ѹ҆далѧет̑сѧ и҆ сп҃сенїе е҆же ѿ мене не ѹ҆медлю.
дах̑ в сїѻ́нѣ сп҃сенїе і҆и҆л҃ю въ прославленїе·

Глв̑҇а, м҃з·

Сни́ди сѧ́ди на землѝ дѣво дщѝ вавѷлонѧ.
вни́ди въ т꙽мꙋ̀ дщѝ халде́иска, ꙗ҆́ко не приложи́ши к семꙋ прозыва́тисѧ млада и҆ ю́на.
возмѝ жерновы смелѝ мꙋкꙋ̀.
ѿкрыи покровъ твой, ѿкры́и сѣди́ны възсꙋчѝ голени преидѝ рѣки.
ѿкры́е҆тсѧ стыдѣнїе твое, ꙗ҆вѧ́тсѧ ѹ҆кори́зны твоѧ, пра́ведное ѿ тебе възмꙋ̀, ксемꙋ не преда́мъ чл҃ком꙽.

Рече и҆зба́вивыи т̂ѧ г҃ь саваѻ́ѳъ, и́мѧ е҆мꙋ ст҃ыи і҆и҆л҃евъ.
сѧ́ди ѹ҆миле́на, вни́ди въ т꙽мꙋ дщѝ халъдѣ́иска, ксемꙋ не прозове́шисѧ крѣпость црс̑҇твꙋ.
разгнѣвахсѧ на лю́ди моѧ, ѻ҆скверни́хъ прича́стїе мое.
а҆зъ же подах̑ ѧ҆̀ в рꙋкꙋ твою, ты́ же не да̀ и҆мъ млс̑҇ти, ста́речь ꙗ҆ре́мъ ѹ҆тѧжчи́ла е҆си ѕѣло.
и҆ рекла̀ е҆си, въ вѣкъ бꙋдꙋ владꙋща тобою.
не помы́слила е҆си сего въ срд̑цы свое҆мъ, ни помѧнꙋ́ла е҆си послѣдних̑·

Нн҃ѣ же слы́ши с̂е ю́наѧ сѣдѧ́щаа ѹ҆пова́ющаа.
гл҃ющаа въ срд̑цы свое҆мъ, а҆зъ е҆смь и҆ нѣсть и́ноѧ.
не сѧ́дꙋ вдово́ю, и҆ не позна́ю сиротъства.
нн҃ѣ же ѻ҆бо́е т̂о на тѧ прїидетъ в꙽неза́пꙋ въ е҆ді́нъ дн҃ь, вдо́в꙽ство и҆ бесча́дїе.
прїидет̑ внеза́пꙋ на́ тѧ вол꙽шебъствомъ твоим̑, и҆ крѣпостїю вол꙽хвъ твои҆хъ ѕѣло надѣѧ́нїемъ ѕлобы твоеѧ·

Ты̀ б̂о рече а҆зъ е҆смь и҆ нѣсть и҆́ноѧ, вѣжд̑ь ꙗ҆́ко смышле́нїе си́хъ, и҆ блꙋженїе твое бꙋ́детъ тебѣ сра́мъ.
и҆ рече срд̑цемъ свои҆мъ, а҆зъ е҆смь и҆ нѣсть и҆́ноѧ.
и҆ прїидетъ на́ тѧ па́гꙋба, и҆ не ѹ҆вѣси про́пасти ѹ҆паде́шисѧ в ню.
и҆ прїидетъ на́ тѧ печа́ль и҆ не възмо́жеши чи́ста бы́ти, и҆ прїидетъ на тѧ внеза́пꙋ па́гꙋба и҆ не ѹ҆вѣси.
ста́ни ѹ҆бо нн҃ѣ съ вол꙽хвы твои҆ми, и҆ съ мно́гими ча́ры твои҆ми, и҆́мже сѧ наѹ҆чи и҆зъ ю́на, а҆ще възмо́гꙋтъ т̂и помощѝ, трꙋди́сѧ в꙽ совѣтехъ свои҆хъ·

да ста́нꙋтъ и҆ спасꙋтъ т̂ѧ звѣздочет꙽цы нб҃си, смотрѧ́щеи звѣздъ да ти совѣстѧт̑, чесомꙋ е҆сть на тѧ прїитѝ.
с̂е всѝ ꙗ҆́ко х꙽вра́стїе ѻ҆гнем̑ погорѧ́тъ, и҆ не ѿи҆мꙋтъ дш҃а своеа ѿ пла́мене, ꙗ҆ко и҆́маши главнѧ̀ ѻ҆́гнены сѣ́сти на нихъ.
с̂и бꙋдт̑ꙋ тебѣ по́мощъ, трꙋди́сѧ въ преложенїе твое ѿ ю́ности твоеѧ.
чл҃къ сам сѧ прельститъ, тебѣ же не бꙋдетъ сп҃сителѧ·

Глв̑҇а, м҃и·

Слы́ши сїѧ до́ме і҆а́ковль, прозва́нїи и҆́менемъ і҆и҆л҃евым̑ і҆ и҆зшед̑шеи и҆зъ і҆ѹ́ды.
кленꙋщеисѧ и́менемъ г҃а б҃а і҆и҆л҃ева, помина́ющеисѧ не съ и́стинною ни съ пра́вдою, и҆ придержа́щїисѧ и҆мени гра́да ст҃го, и҆ къ б҃ꙋ і҆и҆л҃евꙋ ѹ҆твержа́ющесѧ·

г҃ь саваѻ́ѳъ и́мѧ е҆мꙋ·

Прь́ваѧ лѣта совѣстихъ, і҆ и҆зъ ѹ́стъ мои҆хъ и҆зы́иде, и҆ слы́шано бысть.
внеза́пꙋ сътворихъ и҆ наиде.
вѣдѧ ꙗ҆́ко жестокъ е҆си, и жи́ла желѣзна вы́ѧ твоѧ, и҆ чело твое мѣдѧно.
и҆ совѣсти́хъ т̂и прьваѧ, прежде пришествїа на тѧ, и҆ слы́шано тебѣ сътвори́хъ.
не рцы̀ ꙗ҆́ко кꙋми́ры мн̂ѣ сътвори́ша сїѧ, и҆ не рцы̀ ꙗ҆́ко и҆зваѧ́нїи и҆ слїѧнїи заповѣдаша мн̂ѣ.
слы́шасте все вы̀ и҆ не разꙋмѣсте.
н̂о и҆ слы́шано тебѣ сътвори́х꙽ новаѧ ѿ нн҃ѣ е҆мꙋже бы́ти, и҆ не рече нн҃ѣ бꙋдет̑ а҆ не прежде, и҆ не въ прьвыѧ дн҃и слы́шал̑҇ е҆си с̂е.
не рцы ꙗ҆́ко вѣдѣ сїѧ, ни вѣдѣлъ е҆си, ни разꙋмѣлъ е҆си и҆сперва, нѣси ѿврьзлъ ѹ́шїю свое҆ю.
вѣдѣхъ б̂о ꙗ҆́ко похꙋлѧ̀ похꙋли́ши, и҆ безако́нникъ е҆ще ѿ чрева прозовешисѧ.
и҆́мени мое҆го ра́ди покажꙋ т̂и ꙗ҆́рость мою, и҆ сла́внаѧ моѧ наведꙋ̀ на́ тѧ, да не потреблю̀ тебе.
сѐ прода́хъ т̂ѧ не сребра̀ ра́ди и҆збра́х же т̂ѧ ис пе́щи ѹ҆бо́жества.
мене ра́ди сътворю̀ т̂и ꙗ҆́ко мое и́мѧ ѻ҆сквернѧет̑сѧ, и҆ сла́вы своеѧ и́номꙋ не да́мъ·

Послꙋшаи мене і҆а́кове і҆и҆л҃ю е҆гоже а҆зъ призыва́ю а҆зъ е҆смь прьвыи, а҆зъ же е҆смь въ вѣк꙽.
и҆ рꙋка̀ моѧ ѻ҆снова̀ зе́млю, и҆ десни́ца̑ моѧ ѹ҆твердѝ нб҃о.
призовꙋ̀ ѧ҆̀ и҆ ста́нꙋтъ въкꙋпѣ, и҆ съберꙋтсѧ всѝ и҆ ѹ҆слы́шатъ.
кт̂о и҆мъ съвѣсти́тъ сїѧ, любѧ́ тѧ сътвори́хъ во́лю твою въ вавѷлонѣ, взѧ́ти племѧ̀ халде́иско.
а҆зъ гл҃ахъ, а҆з꙽ възва́хъ, и҆ приведо́хъ и҆̀, и҆ ѹ҆годих̑ пꙋть е҆го.
пристꙋпи́те къ мн̂ѣ и҆ слы́шите сїѧ, и҆сперва нѣѣсмь ѻ҆та́и гл҃алъ.
ѿ того ча́сꙋ прьвеи неже былѝ, т̂о тꙋ̀ бѣхъ·

И҆ нн҃ѣ г҃ь посла̀ м̂ѧ, и҆ дх҃ъ е҆го·

Тако гл҃ет̑ г҃ь, и҆зба́вивыи тѧ ст҃ыи і҆и҆л҃евъ.
а҆зъ е҆смь г҃ь б҃ъ твои, наказах̑ т̂ѧ ꙗ҆́коже ѻ҆брѣсти тебѣ пт̑ꙋ по немꙋже поидеши.
и҆ а́ще бы послꙋшалъ за́повѣдїи моих̑, т̂о бы́л бы ѹ҆бо а҆ки рѣка̀ ми́ръ твои и҆ пра́вда твоа ꙗ҆ко волна̀ морьска́а и҆ было б̂ы ѹ҆бо ꙗ҆ко пѣсок̑҇ сѣмѧ твоѐ, і҆ и҆с꙽ча́дїа чре́ва твое҆го ꙗ҆́ко пе́рсть зем̑наа.
и҆ нн҃ѣ не потреби́шисѧ ниж̑ поги́бнет̑ і҆мѧ твоѐ предо мно́ю.
и҆зы́ди ѿ вавѷлона бѣжа ѿ хал̑҇д́еи.
глас̑҇ ра́дости совѣстите и҆ да слы́шано сїе бꙋдет̑, възвѣстите даж̑ до послд̑ѣних̑ зем̑ли.
гл҃ите ꙗ҆́ко і҆зба́вилъ ес̑҇ г҃ь раба̀ своег̑҇ і҆а́кова.
и҆ а́ще вожа́ждт̑ꙋ в꙽ пꙋсты́ни приведет̑ их̑ и҆ во́дꙋ і҆с ка́мени і҆зведет̑ и҆мъ, раз̑сѧдет̑сѧ ка́мен̑҇ и҆ потечет̑ вода̀ и҆ пїют̑ лю́дїе моѝ.
нс̑҇ѣ ра́доватисѧ нечести́вым̑ гл҃ет̑ г҃ь·

Глв̑҇а, м҃ѳ·

Послꙋшаите менѐ ѻ҆́строви, и҆ внима́ите страны̀.
вре́менемъ до́лгомъ ста́вит̑сѧ, гл҃етъ г҃ь.
ѿ чре́ва мт҃ре мое҆ѧ наречѐ и҆мѧ моѐ.
и҆ положи ѹ҆ста̀ моѧ̀ ꙗ҆́ко ме́чь ѻ҆́стръ.
и҆ под̑ кровомъ рꙋкѝ свое҆ѧ съкры̀ м̂ѧ.
и҆ положи м̂ѧ ꙗ҆́ко стрѣлꙋ и҆збра́ннꙋ, и҆ в тꙋ́лѣ свое҆мъ съкры̀ м̂ѧ.
и҆ реч̑҇ м̂и, ра́бъ мои е҆си т̂ы і҆и҆л҃ю, и҆ в тебѣ просла́влюсѧ·

А҆з꙽ же реко́хъ, вът꙽щѐ трꙋди́х꙽сѧ и҆ всꙋе, и҆ ни в чесо́мъже да́хъ крѣ́пость мою.
сего ради сꙋ́дъ мои прд̑е гм҃ъ, и҆ трꙋ́дъ мои прд̑е бм҃ъ мои҆мъ·

И҆ нн҃ѣ та́ко гл҃етъ г҃ь, създа́выи м̂ѧ ѿ чре́ва раба̀ себѣ̀, ꙗ҆́ко събра́ти і҆а́кова, і҆и҆л҃ѧ к немꙋ съберꙋ.
и҆ просла́влюсѧ пред̑ гм҃ъ, и҆ б҃ъ мои бꙋдетъ мн̂ѣ крѣ́пость·

И҆ реч̑҇ м̂и, ве́лїе т̂и е҆сть ꙗ҆́ко прозватисѧ рабꙋ̀ мое҆мꙋ, ꙗ҆́ко въста́вити племена і҆а́ковлѧ, и҆ ѻ҆стан꙽ки і҆и҆л҃вы ѻ҆брати́ти·

Се̂ да́хъ т̂ѧ въ завт̑ѣ ро́домъ и҆, въ свѣтъ ꙗ҆зы́комъ, ꙗ҆́ко бы́ти тебѣ сп҃сꙋ да́же до конца̀ землѝ·

Та́ко гл҃етъ г҃ь, и҆зба́вивыи т̂ѧ б҃ъ і҆и҆л҃евъ.
ѻ҆ст҃ите хꙋлѧ́щаго дш҃ꙋ е҆го, мерзѧ́щаго по ꙗзы́кох̑, рабх̑ѣ кнѧ́ж꙽ских̑.
цр҃їе ѹ҆́зрѧт̑ и҆̀, и҆ въстант̑ꙋ кн҃ѕи, и҆ покло́нѧт̑сѧ е҆мꙋ г҃а ради.
ꙗ҆́ко вѣренъ е҆сть ст҃ыи і҆и҆л҃евъ і҆ и҆збра́выи т̂ѧ·

Та́ко гл҃етъ г҃ь, въ вре́мѧ прїѧ́тно послꙋшах̑ тебѐ, и҆ въ дн҃ь сп҃сенїѧ помогох̑ т̂и.
и҆ сътворих̑ т̂ѧ, и҆ дах̑ т̂ѧ въ завт̑ѣ вѣчныи стра́нам̑.
ꙗ҆́ко ѹ҆стро́ити зем̑лю, и наслѣди́ти наслѣдїе пꙋстынѧ.
гл҃юще ѹз̑нико и҆зы́идѣте, и҆же въ тмѣ ѿкрыитесѧ.
на всх̑ѣ пꙋтех̑ напасꙋтсѧ, и҆ на всѣхъ стеѕѧ па́житъ их̑.
не въза́лчют̑ ни въжажт̑дꙋ, ни порази и҆хъ зно́и, н̂и слн҃це·

Но ми́лꙋѧ и҆хъ ѹ҆тѣшит꙽, и҆ скво́зѣ и҆сто́чники вод̑ныѧ проведе́тъ ѧ҆̀.
и҆ положꙋ̀ всѧ́кꙋ горꙋ в꙽ пꙋть, и҆ всѧ́кꙋ стеѕю на па́ствꙋ им̑·

Се̂ сїи и҆здале́ча прїидт̑ꙋ, сїи ѿ сѣ́вера, а҆ ѻ́нїи ѿ мо́рѧ, а҆ дрꙋѕїи ѿ землѧ̀ пе́рски·

Ра́дꙋитесѧ нб҃са, и҆ весели́сѧ землѧ.
да ѿвръзꙋтъ го́ры весе́лїе и҆ хо́лми ра́дость, ꙗ҆́ко поми́лова б҃ъ лю́ди своѧ, и҆ смире́нныѧ лю́дїи свои҆хъ ѹ҆тѣшитъ·

Рече же сїѻ́нъ, ѻ҆ста́ви м̂ѧ г҃ь, и б҃ъ забы̀ м̂ѧ.
е҆да̀ забꙋ́детъ мати ѻ҆тро́ча свое, ꙗ҆́ко не поми́ловати и҆сча́дїѧ чре́ва свое҆го.
а҆ще же и҆ забꙋдетъ т̂о жена̀, н̂о а҆зъ не забꙋ́дꙋ тебѐ гл҃етъ г҃ь·

Се̂ в рꙋ́кꙋ мое҆ю въписа́хъ гра́ды твоѧ̀, и҆ предо мно́ю е҆си прс̑҇но.
и҆ въскорѣ въз꙽гради́шисѧ и҆миж̑ разори́сѧ.
и҆ потребив꙽шеи т̂ѧ и҆зы́идꙋтъ и҆с тебѐ·

Въз꙽дви́гни ѻ҆́крс̑҇тъ ѻ҆́чи твои и҆ ви́ждь всѧ̀, с̂е събра́шасѧ и прїидо́ша к тебѣ̀·

Жи́въ а҆зъ гл҃етъ г҃ь, ꙗ҆́ко всѧ ѧ҆̀ ѻ҆блече́ши.
и҆ възложи́ши на́ нѧ ꙗ҆́ко ѹ҆тва́ръ невѣ́стьскꙋ.
ꙗ҆́ко и҆ пꙋста́а твоѧ̀ и҆ расы́панаѧ и҆ пад̑шаасѧ, нн҃ѣ ѹ҆тѣснѣ́ютъ ѿ всели́вшихсѧ.
и҆ ѹ҆далѧт̑сѧ ѿ тебѐ смири́вшеи т̂ѧ·

Рекꙋтъ б̂о въ ѹ҆́ши твои сн҃ове твоѝ и҆хъже погꙋбѝ, тѣ́сно намъ е҆сть мѣ́сто, сътвори м̂и мѣ́сто да сѧ вселю̀·

И҆ рече́ши въ срд̑цы свое҆мъ, кт̂о м̂и породи ѧ҆̀, кт̂о л̂и ѧ҆̀ въскорми мн̂ѣ, а҆зъ б̂о без꙽ча́дъ, и҆ въ вдо́в꙽ствѣ ѻ҆ста́хъ е҆ді́нъ.
сїи же мнѣ̀ гд̂ѣ бы́ша.
та́ко гл҃етъ г҃ь·

Се̂ въздви́гнꙋ въ страны рꙋ́кꙋ мою, и҆ въ ѻ҆́стровы зна́менїе мое.
и҆ прїимꙋтъ сн҃ы твоѧ в ло́нѣ, и҆ дще́ри твоѧ на пле́щꙋ во́змꙋтъ.
и҆ бꙋдт̑ꙋ цр҃е дои҆теле твои, и҆ кнѧги́нѧ коръми́теле твои.
и҆ до землѧ̀ ни́цы покло́нѧт̑ ти сѧ, и пра́хъ но́гꙋ твое҆ю ѻ҆бли́жꙋтъ.
и҆ ѹ҆вѣ́си ꙗ҆́ко а҆зъ г҃ь б҃ъ и҆ не посрамѧт̑сѧ ѹ҆пова́ющеи на́ мѧ·

Є҆да во́змет̑ кто ѿ щꙋ́да плѣн꙽, и҆л̂и а҆ще кт̂о плѣнит̑ непра́вед̑нѣ сп҃сет꙽ л̂и сѧ.
занѐ та́ко гл҃етъ г҃ь·

А҆ще кт̂о плѣнит̑ щꙋда да по́имет̑ плѣнъ, прїемлѧ же ѿ крѣ́пкаго сп҃сет̑ л̂и сѧ·

А҆з꙽ же прю̀ твою раз꙽сꙋжю, и҆ а́зъ сн҃ы твоѧ̀ и҆зба́влю.
и҆ зазли́вшїи тебѐ и҆з꙽ꙗ҆дѧт̑ пло́ть свою̀, і҆ и҆спїю́тъ ꙗ҆́ко вино̀ но́во кро́вь свою, и҆ ѹ҆пїю́тсѧ.
и҆ ѹ҆вѣ́сть всѧ́ка плот̑, ꙗ҆́ко а҆зъ и҆зба́вивыи т̂ѧ, и҆ под̑емлѧ́и крѣ́пость і҆а́ковлю·

Глв̑҇а, н҃·

Та́ко гл҃етъ г҃ь.
сїѧ кни́ги ѿпꙋще́нїѧ мт҃ре ва́шеѧ, и҆миже ѿпꙋстихъ ю҆̀.
и҆ли комꙋ во до́лгъ прода́хъ в̂ы, с̂е грѣхи свои҆ми продастесѧ.
и҆ безако́нїи ради вашихъ ѿпꙋстих̑ матеръ вашꙋ.
чт̂о ꙗ҆́ко прїидо́хъ и҆ не бѣше чл҃ка, позва́хъ и҆ не бѣ послꙋшающаг̑҇.
да и҆л̂и не может̑ рꙋка̀ моѧ̀ и҆зба́вити, и҆ли не могꙋ ѿꙗ҆́ти·

Се̂ запреще́нїемъ свои҆мъ и҆скажю̀ мо́ре, и҆ положꙋ рѣ́ки пꙋсты.
і҆ и҆с꙽хнꙋтъ ры́бы и҆хъ не сꙋщи водѣ, и҆ ѹ҆мрꙋтъ жа́ждею.
и ѻ҆блекꙋ нб҃о въ тмꙋ̀, и҆ положꙋ а҆ки врѣтище ѻ҆де́ждꙋ е҆го·

Гь҃ даде м̂и ꙗ҆зы́къ наѹ҆че́нїѧ, ꙗ҆́коже разꙋмѣти въ вре́мѧ е҆гда̀ лѣ́по е҆сть рещи сло́во.
положи м̂ѧ заѹ҆тра, приложи м̂и ѹ҆́хо слы́шати.
и наказа́нїе гн҃е ѿверзает̑ ѹ҆́ши мои, а҆з же не съпротивлю́сѧ, ни проти́вꙋ гл҃ю.
хребе́тъ свои дах̑ на ра́ны, и҆ лани́тѣ мои на заѹ҆ше́нїе, и҆ лица свое҆го не ѿвратих̑ ѿ стꙋда заплева́нїѧ.
и҆ г҃ь помо́щникъ м̂и бы́сть, сего ради не ѹ҆срами́хсѧ.
н̂о положи́хъ лицѐ свое а҆ки тве́рдъ камы́къ, и разꙋмѣхъ ꙗ҆́ко не и҆мамъ постыди́тисѧ, занѐ приближает̑сѧ ѻ҆правда́выи м̂ѧ·

Кт̂о прѧ́исѧ съ мно́ю, да съпроти́витсѧ мнѣ̀.
и҆ кт̂о прѧ́исѧ съ мно́ю, да приближит̑сѧ къ мнѣ̀·

Се̂ г҃ь помо́жетъ м̂и, кт̂о ѻ҆злобитъ м̂ѧ.
с̂е вс̂и в̂ы ꙗ҆́ко ри́за ѻ҆бет̑ша́ете, и҆ ꙗ҆́ко мо́ль из̑ꙗ҆́сть в̂ы.
кт̂о въ вас̑҇ боѧ́исѧ г҃а да послꙋшает̑ глас̑҇ ѻ҆́трока е҆го.
ходѧ́щеи въ тмѣ̀ и҆ нѣсть в них̑ свѣта.
надѣ́итесѧ на и҆мѧ гн҃е, и҆ ѹ҆твер꙽дитесѧ ѻ҆ бѕ҃ѣ·

Се вси в̂ы ѻ҆́гнь раждиза́ете, и҆ ѹ҆крѣплѧ́ете пла́мен̑҇.
хо́дите свѣтом̑ ѻ҆гнѧ̀ ва́шего, и҆ пламенем̑ е҆гоже ражд̑его́сте.
мене ради бы́ша сїа вам̑, в꙽ печа́ли ѹ҆с꙽пнете·

Глв̑҇а н҃а·

Послꙋшаите менѐ наслѣдꙋющеи пра́вдꙋ, и҆ възыска́ющеи г҃а.
възри́те на твердыи камы́къ, и҆же и҆с꙽сѣко́сте.
и҆ в раздо́ль пото́ка и҆же и҆скопа́сте·

Възри́те на а҆враа́ма ѿц҃а ва́шего, и҆ на сар꙽рꙋ породи́вшꙋю в̂ы.
ꙗ҆́ко е҆ді́нъ б̂ѣ и҆ призвах̑ и҆̀, и҆ блс̑҇вих̑ и҆̀, и҆ възлюби́хъ и҆̀, и҆ ѹ҆мно́жихъ и҆̀.
и҆ т̂ѧ нн҃ѣ ѹ҆тѣшꙋ сїѻ́не, ѹ҆тѣшихъ б̂о всѧ̀ твоѧ пꙋсты́нѧ.
и҆ поста́влю пꙋсты́ню е҆го ꙗ҆́ко ра́и гн҃ь.
ра́дость и҆ весе́лїе ѻ҆брѧ́щꙋтъ в нем̑, и҆сповѣда́нїе и҆ гла́съ хвале́нїѧ·

Послꙋшаите менѐ людїе моѝ послꙋшаите, и҆ цр҃и къ мнѣ̀ внꙋши́те, ꙗ҆́ко зако́нъ ѿ менѐ и҆зы́идетъ, и сд̑ꙋ мои на свѣтъ странамъ.
приближа́етсѧ ско́ро пра́вда моѧ, и҆зы́идет̑ сп҃сенїе мое, и҆ къ мы́шцы мое́и страны надѣют̑сѧ.
мнѣ ѻ҆́строви терпѧт̑, и҆ к꙽ мышцы мое́и надѣ́ютсѧ·

Въз꙽двигнѣте на́ нб҃о ѻ҆́чи ваши, и поглѧди́те по землѝ долꙋ.
поне́же нб҃о ꙗ҆́ко ды́мъ ѹ҆тверди́сѧ, и҆ землѧ̀ ꙗ҆́ко ри́за ѻ҆бет̑ша́етъ, живꙋщеи же на землѝ ꙗ҆́ко и҆ то и҆зъмрт̑ꙋ.
сп҃сенїе же мое въ вѣ́къ бꙋ́детъ, и҆ пра́вда моѧ не ѻ҆скꙋдѣ́етъ·

Послꙋшаите мене вѣдѧщеи сꙋдъ, людїе мои и҆мже зако́нъ мои въ срд̑цы вашемъ.
не бо́итесѧ ѹ҆коре́нїѧ чл҃ча, и҆ по хꙋле́нїю и҆хъ не покарѧ́итесѧ.
ꙗ҆́ко риза б̂о ѻ҆бет̑ша́етъ лѣтомъ, и҆ ꙗ҆́ко сꙋкно̀ из̑ꙗ҆́стьсѧ мо́льми.
а҆ пра́вда моѧ̀ въ вѣ́ки бꙋдетъ, и҆ сп҃съ мои въ ро́дъ и҆ ро́дъ·

Въста́ни въста́ни і҆ерс̑҇лиме, и҆ ѻ҆блецисѧ въ крѣ́пость мы́шца свое҆ѧ.
въста́ни ꙗ҆́ко в нача́токъ дн҃е, ꙗ҆́ко ро́дъ вѣ́чныи.
нѣ́си л̂и т̂ы побѣдил꙽ го́рдаго, и҆ ѹ҆ꙗ҆́звил̑҇ ѕмїѧ.
не т̂ы л̂и посꙋши мо́ре, во́дꙋ бе́здны мно́жество.
и҆же положи глꙋби́ны мо́рьскїа въ пꙋть проход̑ныи, и҆збавле́ным꙽ и҆ ѿꙗ҆́тымъ.
гм҃ъ б̂о възвратѧт̑сѧ, и҆ прїидꙋтъ въ сїѻ́нъ съ ра́достїю, и҆ съ весе́лїемъ вѣ́чнымъ.
на главѣ̀ б̂о и҆хъ весе́лїе и҆ хвала̀, и҆ ра́дость прїиметъ ѧ҆̀.
ѿбѣже бо́лѣзнь и҆ печа́ль и҆ въздыха́нїе·

А҆зъ е҆смь а҆зъ е҆смь ѹ҆тѣша́ѧи т̂ѧ.
разꙋмѣ́и кого бл҃го страхова́вшисѧ ѹ҆боѧ чл҃ка смр҃тна и҆ сн҃а чл҃ча, и҆же ꙗ҆́ко трава̀ посо́хша.
и҆ забы̀ б҃а създавшаго т̂ѧ, сътво́ршаго нб҃о, и҆ ѻ҆снова́вшаго зе́млю.
и҆ боꙗ҆́шасѧ прс̑҇но всѧ̀ дн҃и лица̀ ꙗ҆́рости стꙋжа́ющаго тебѣ̀·

Ꙗ҆ко б̂о и҆зво́ли ѹ҆годи́ти.
и҆ нн҃ѣ гд̂ѣ ꙗ҆́рость стꙋжа́ющаго тебѣ.
сп҃са́ющꙋ бо сѧ тебѣ̀, не ѻ҆ста́нетъ ни премедлит̑·

Ꙗ҆́ко а҆зъ б҃ъ твои.
смꙋща́ѧи мо́ре, и҆ възглаша́ѧи во́л꙽ны е҆го.
г҃ь саваѻ́ѳъ и҆мѧ мнѣ̀.
положꙋ словеса̀ моѧ̀ въ ѹ҆стѣхъ т̂и, и҆ под̑ сѣ́нїю рꙋкѝ мое҆ѧ покры́ю т̂ѧ, е҆ю́же поста́вихъ нб҃о, и҆ ѻ҆снова́хъ зе́млю.
и҆ речетъ сїѻ́нъ, лю́дїе мои е҆стѐ в̂ы.
въста́ни въста́ни въскреснѝ і҆ерс̑҇лиме, и҆спи́выи ча́шꙋ ꙗ҆́рости ѿ рꙋкѝ гн҃ѧ·

Ча́шꙋ б̂о разоре́нїѧ и҆спи́тїе ꙗ҆́рости и҆спѝ, і҆ и҆стощѝ.
и҆ не бы́сть ѹ҆тѣша́ѧи тебѐ ѿ всѣ́хъ чад̑ твои҆хъ ꙗ҆́же породи.
и҆ не бы́сть под̑емлющаго рꙋкѝ твое҆ѧ, ни ѿ всх̑ѣ сн҃овъ твои҆хъ ꙗ҆́же възнесе.
дво́е с̂е сꙋпротивлѧютсѧ тебѣ̀.
кто сѧ пожалитъ с тобо́ю.
раскаже́нїе, и҆ съкрꙋше́нїе, глад̑, и҆ ме́чь·

Кт̂о т̂ѧ ѹ҆тѣшитъ.
сн҃ове л̂и и҆же не посты́жни сѣдѧ́щеи на кра́и всемꙋ̀ и҆схо́дꙋ.
ꙗ҆́ко зе́лїе в полы ва́рено, и҆же и҆спо́лнь ꙗ҆́рости гн҃ѧ, расы́пани г҃мъ бм҃ъ·

Сего ради нарече́сѧ смире́нъ, и҆ пїѧ́нъ не вино́мъ.
та́ко гл҃етъ г҃ь б҃ъ, сꙋдѧ́и лю́демъ свои҆мъ.
с̂е в꙽зѧх̑ ѿ рꙋкѝ твое҆ѧ ча́шꙋ расыпа́нїѧ, и҆спитїе ꙗ҆́рости мое҆ѧ, и҆ не приложи́ши к꙽семꙋ пи́ти е҆ѧ̀.
и҆ вложꙋ ѧ҆̀ в рꙋ́цѣ преѻ҆бѣдившихъ т̂ѧ, и҆ смири́вших̑ т̂ѧ, и҆же рекоша дш҃и твое́и.
преклони́сѧ да мине́мъ, и҆ положи ра́вно землѝ пле́щи свои, кро́мѣ ми́моходѧ́щихъ·

Глв̑҇а, н҃в·

Въста́ни въста́ни сїѻ́не, ѻ҆блеци́сѧ въ крѣ́пость свою сїѻ́не, и҆ ѻ҆блеци́сѧ въ сла́вꙋ свою і҆ерс̑҇лиме гра́де ст҃ыи, к꙽семꙋ не приложитъ проити скво́ѕѣ т̂ѧ, и҆же неѻ҆брѣ́занъ и҆ нечистъ.
и҆ сътрѧсѝ прахъ и҆ въста́ни сѧ́ди і҆ерс̑҇ли́ме, съвлеци ѹ҆́зꙋ ча́ши свое́ѧ плѣненаѧ дщи сїѻ́нѧ.
ꙗ҆́ко с̂е гл҃етъ г҃ь, тꙋне прода́ни бы́сте, и҆ безъ цѣны и҆збави́стесѧ·

Та́ко гл҃етъ г҃ь.
въ е҆гѷпетъ снидо́ша лю́дїе моѝ пр́ьвое, ѻ҆бита́ти та́мо, и҆ въ а҆сѷрїю бѣдо́ю приведо́ша̑сѧ.
и҆ нн҃ѣ чт̂о зде е҆сте, с̂е гл҃етъ г҃ь.
ꙗ҆́ко взѧ́шасѧ лю́дїе мо́и тꙋне чюди́тесѧ и҆ пла́читесѧ гл҃етъ г҃ь, васъ ра́ди прс̑҇но и҆мѧ моѐ хꙋ́литсѧ въ странах̑·

Сего ради позна́ютъ лю́дїе моѝ и҆мѧ мое въ то́и дн҃ь, ꙗ҆́ко а҆зъ самъ е҆смь, аз̑ гл҃ѧ, и҆ прїидох̑ ꙗ҆ко времѧ на́ горы.
ꙗ҆ко но́ѕѣ бл҃говѣствꙋющих̑ вѣсть ми́ра, ꙗ҆́ко бл҃говѣствꙋѧ́и бл҃госты́ню.
ꙗ҆́ко слы́шано сътворю̀ сп҃сенїе твое, гл҃ѧ, сїѻ́не црс̑҇твꙋет꙽ въ тебѣ̀ б҃ъ тво́и.
ꙗ҆́ко глас̑҇ снабдѧ́щих̑ т̂ѧ възнесѐсѧ, и҆ гла́сомъ въкꙋпѣ възрадꙋют̑сѧ.
ꙗ҆́ко ѻ҆́чи къ ѻ҆чи́ма възрита, е҆гда̀ поми́лꙋетъ г҃ь сїѻ҆́на·

да и҆злїютъ бл҃горадова́нїе пꙋсты́нѧ і҆ерс̑҇ли́млѧ, ꙗ҆ко помилова и҆̀ г҃ь, і҆ и҆зба́ви і҆ерс̑҇ли́ма.
и҆ ꙗ҆ви́тъ г҃ь мы́шцꙋ свою̀ ст҃ꙋю пред̑ всѣми стра́нами.
и҆ ѹ́зрѧтъ вс̂и ꙗ҆зы́цы сп҃се́нїе б҃а на́шего·

ѿстꙋпи́те ѿстꙋпи́те и҆зы́идѣте ѿсю́дꙋ, и҆ нечистотамъ не прикаса́итесѧ.
и҆зы́идѣте ѿ среды е҆го, ѿлꙋчи́тесѧ възд̑вижꙋщеи сосꙋ́ды гн҃ѧ.
ꙗ҆́ко не с꙽ мѧте́жем̑ и҆зыидете, н̂и ѹ҆бѣжа́нїемъ ѿи́дете.
по́идетъ б̂о пред̑ ва́ми г҃ь, и҆ събира́ѧи в̂ы г҃ь б҃ъ і҆и҆л҃евъ·

Се̂ разꙋмѣ́етъ ѻ҆́трокъ мо́и и҆ възнесетсѧ и҆ просла́вит̑сѧ ѕѣло.
ꙗ҆коже б̂о въстант̑ꙋ на́ тѧ мно́ѕи, та́ко ѻ҆́бесла́витсѧ ѿ чл҃къ видѣнїе твоѐ, и҆ сла́ва твоѧ̀ ѿ сн҃овъ чл҃чь·

Та́ко б̂о ѹ҆дивѧт̑сѧ ѻ҆ тебѣ ꙗ҆́зы́цы мно́ѕи, и҆ заи҆́мꙋтъ цр҃їе ѹ҆ста̀ своѧ.
ꙗ҆́ко и҆́мже не возвѣсти́сѧ ѻ҆ немъ ѹ҆́зрѧтъ, і҆ и́же не слы́шаша разꙋмѣ́ютъ·

Глв̑҇а, н҃г·

Ги҃, кт̂о вѣрова̀ слꙋ́хꙋ на́шемꙋ, и҆ мы́ш꙽ца гн҃ѧ комꙋ сѧ ꙗ҆́ви.
совѣсти́хомъ предъ нимъ ꙗ҆́ко по́ле, ꙗ҆́ко ко́рень въ землѝ жа́ждꙋщеи.
нѣсть ѻ҆́браза̑ е҆мꙋ н̂и сла́вы.
и҆ ви́дѣхомъ е҆го, и҆ не и҆мѣа́ше видѣнїѧ н̂и доброты̀.
н̂о видѣнїе е҆го безъче́стно, ѹ҆мале́но паче сн҃овъ чл҃чьских̑.
чл҃къ въ ꙗ҆́звѣ сы́и и҆ ѹ҆мѣѧ тръпѣти мꙋ́кꙋ.
не ѿвратисѧ лице е҆го, без̑ че́сти бы́сть и҆ не въмѣни́сѧ·

Се́и грѣхи на́ша под̑е҆млетъ, и҆ ѻ҆ насъ поболѣ.
и҆ м̂ы възмѣни́хом̑ е҆го въ бо́лѣзни сꙋща и҆ въ ꙗ҆звѣ и҆ въ зазленїи.
то́и же ꙗ҆́звен̑҇ бы́сть грх̑ѣ ради наших̑, и҆ мꙋ́ченъ быс̑҇ безаконїи ради на́шихъ·

Наказа́нїе смире́нїѧ на́шего на́нь, ꙗ҆́звою е҆го м̂ы и҆сцѣли́хом̑ вс̂и.
ꙗ҆́ко ѻ҆́вца заблꙋди́хомъ, ходѧ̀ чл҃къ пꙋтемъ свои҆мъ прельсти́сѧ.
и҆ г҃ь преда́сть е҆го грѣхъ ради на́шихъ, то́иже заѕлѣнїа ради не ѿвръза́етъ ѹ́стъ свои҆хъ·

Ꙗ҆́ко ѻ҆́вча на заколе́нїе ведесѧ, и҆ ꙗ҆́ко а҆́гнецъ пред̑ стрегꙋщим̑ е҆го безъгла́сенъ.
та́коже не ѿвръза́етъ ѹ҆́стъ свои҆хъ.
въ смире́нїи е҆го сꙋдъ е҆го в꙽зѧтсѧ, род̑ же е҆го кт̂о и҆сповѣстъ.
ꙗ҆́ко въземле́тсѧ ѿ землѧ живот̑ е҆го.
ѿ безако́нїи людїи моих̑ прїиде на смр҃ть·

И҆ да лꙋкавыа въ мѣсто погребенїа е҆го, и҆ богатыѧ въ мѣсто смр҃ти е҆го.
ꙗ҆́ко безаконїѧ не сътворѝ, н̂и ѻ҆брѣтесѧ ле́сть въ ѹ҆стѣхъ е҆го.
и҆ хо́щет̑ г҃ь ѻ҆чи́стити е҆го ѿ ꙗ҆́звы·

А҆́ще да́сте ѻ҆ грѣсѣхъ дш҃а ва́ша, ѹ҆́зрите сѣмѧ до́лгоживо́тно.
и҆ хо́щетъ г҃ь ѿꙗ҆́ти бо́лезнь ѿ дш҃а е҆го, ꙗ҆ви́ти е҆мꙋ свѣтъ и҆ създа́ти ра́зꙋмъ.
ѻ҆правда́ти пра́вед̑наго до́брѣ слꙋжа́ща мно́гомъ, и҆ грѣхи и҆хъ то́и въз꙽двигнетъ·

Сего ради то́и наслѣ́дит꙽ мно́гихъ, и крѣпкихъ раздѣ́литъ кори́сть.
зане предана бы́сть на смр҃ть дш҃а е҆го, и҆ съ безако́нными въмѣни́сѧ.
то́и б̂о грѣхи мно́гих̑ възнесѐ, и҆ грх̑ѣ ради их̑ преда́стьсѧ·

Глв̑҇а, н҃д·

Възвесели́сѧ непло́ды неража́ю҆щїа.
воз꙽гласи, и҆ възопїи не болѣ́вшїѧ.
ꙗ҆́ко мно́га ча́да пꙋсты́а па́че ниже л̂и и҆мꙋщїѧ мꙋжа·

Ре́че б̂о г҃ь разшири мѣсто хра́ма свое҆го, и҆ дворовъ твои҆хъ пот꙽кни и҆ не пощади, продолжи ѹ҆́жа своѧ̀ и҆ колца своа.
ѹ҆крѣпи́сѧ е҆ще на́ десно и҆ на лѣ́во прострисѧ, и племѧ̀ твое преи҆́метъ страны̀.
и҆ гра́ды ѻ҆пꙋстѣвшаѧ населитъ.
не бо́исѧ ꙗ҆́ко ѻ҆срами́сѧ·

Ни ѿвратисѧ ꙗ҆́ко ѹ҆кори́сѧ, ꙗ҆́ко срамленїе вѣ́чное забꙋ́деши, и҆ ѹ҆коризны вдов꙽ства твое҆го не помѧнеши ктомꙋ̀, ꙗ҆́ко г҃ь творѧ́и т̂ѧ.
г҃ь саваѻ́ѳъ и҆мѧ е҆мꙋ, и҆збави́выи т̂ѧ.
то́и б҃ъ і҆и҆л҃евъ все́и земли прозовет̑сѧ·

Не ꙗ҆́ко л̂и женꙋ̀ ѻ҆ста́вленꙋ, і҆ и҆знемогшꙋ призва т̂ѧ г҃ь, не ꙗ҆́ко ли женꙋ̀ и҆зъ ю́на ненави́дѣнꙋ.
реч̑҇ б҃ъ тво́и, въ времѧ ма́ло ѻ҆ста́вих̑ т̂ѧ, н̂о съ млс̑҇тїю вели́кою поми́лꙋю т̂ѧ.
въ ꙗ҆́рости ма́лѣ ѿвратих̑ лице своѐ ѿ тебе, н̂о млс̑҇тїю вѣ́чною поми́ловах̑ т̂ѧ·

Рече и҆збави́выи т̂ѧ г҃ь ѿ повони ꙗ҆же при но́и, с̂е ми е҆сть ꙗ҆коже клѧ́хъсѧ е҆мꙋ в то̀ времѧ, ꙗ҆́ко на́ землю не раз꙽гнѣ́ватисѧ пред̑ тобо́ю къ семꙋ̀, н̂и ꙗ҆́ростїю свое́ю го́ры преста́вити, и҆ холми твоѝ не подви́гнт̑ꙋсѧ<.>

Та́кождеже и҆ ѿ мене млс̑҇ть моѧ̀ не ѻ҆скꙋдѣ́етъ тебѣ̀, и҆ завт̑ѣ ми́ра твое҆го не преста́витсѧ.
рече б̂о г҃ь ми́лꙋѧи т̂ѧ смирен꙽наго и҆ расыпа́наг̑҇ с̂е ѹ҆тѣши́шисѧ.
с̂е аз̑ ѹ҆готова́ю тебѣ а҆н꙽фраѯъ камы́къ тво́и, и҆ ѻ҆снова́нїю твоемꙋ сап꙽фиръ.
и҆ забра́ломъ твои҆мъ и҆а҆спи́съ, и҆ вра́томъ твои҆мъ камы́къ криста́ль, и҆ ѻ҆граженїю твое҆мꙋ камы́къ и҆з꙽бранныи.
и҆ вс̂ѧ сн҃ы твоа наѹ҆чены бм҃ъ, и҆ въ мно́ѕѣ ми́рѣ ча́да твоѧ̀, и҆ пра́вдою въз꙽гради́шисѧ.
ѹ҆дали́сѧ ѿ неправед̑наго, и҆ не ѹ҆бои́шисѧ, и҆ трꙋсъ не приближи́тсѧ тебѣ.
с̂е прихо́ди прїидꙋтъ тебѣ мно́ю, и҆ к тебѣ прибѣгнꙋтъ·

Се̂ а҆зъ съгражꙋ т̂ѧ, не ꙗ҆́ко кꙋзнецъ раздыма́ѧ главнѧ̀ і҆ и҆зносѧ съсꙋ́дъ на дѣ́ло.
а҆зъ б̂о съградихъ т̂ѧ не на па́гꙋбꙋ расы́пати ве́сь сосꙋдъ расыпа́ющъ.
и҆ на́ тѧ не бл҃гоѹ҆гожꙋ, и҆ ве́сь глас̑҇ и҆же на́ тѧ въста́нетъ на прю ѻ҆долѣе́ши и҆мъ всѣмъ.
пови́ннїи же твои бꙋдꙋтъ в немъ.
с̂е е҆сть прича́стїе слꙋжа́щим̑ гв҃и.
и҆ в̂ы бꙋ́дете мнѣ̀ правди́ви гл҃етъ г҃ь·

Глв̑҇а, н҃е·

Жа́ждꙋщеи и҆дѣте на́ водꙋ, и҆ ели́коже ва́съ не и́мать сребра̀, шедше кꙋпи́те и҆ пїите безъ сре́бреныѧ цѣны̀ вино̀, и҆ тꙋкъ.
въскꙋю цѣните сребро̀ не въ хлѣбы, и҆ трд̑ꙋ вашъ не въ сы́тость.
послꙋшаите и҆ снѣсте бл҃гаѧ, и҆ наслади́тсѧ въ бл҃гихъ дш҃а ва́ша.
внемлѣте ѹ҆ши́ма ва́шима, и҆ послѣдꙋ́ите пꙋтемъ моим̑.
послꙋшаите мене, да живетъ въ бл҃гихъ дш҃а ва́ша.
и҆ завѣща́ю вамъ завѣтъ вѣченъ, прпд̑бна дв҃да и҆ вѣрна·

Сѐ послꙋшество въ страны̀ да́хъ е҆го, кн҃ѕѧ и҆ повели́телѧ въ ꙗ҆зы́цех̑.
с̂е ꙗ҆зы́цы и҆же не вѣдѧтъ тебе призовт̑ꙋ т̂ѧ, и҆ лю́дїе и҆же не вѣдѧт̑ тебе к тебѣ прибѣгнꙋтъ, г҃а ради твое҆го, и҆ ст҃го і҆и҆л҃ева ꙗ҆́ко просла́вил̑҇ т̂ѧ ес̑҇·

Възыщѣте г҃а, и҆ внегда̀ ѻ҆брѣсти вамъ того призовѣте, и҆ внегда приближа́етсѧ к ва́мъ.
да ѻ҆ста́вит̑ нечести́выи пꙋтѝ своѧ, и҆ мꙋжъ безако́ненъ совѣты своѧ.
и҆ да ѻ҆брати́тсѧ къ г҃ꙋ, и҆ поми́лꙋетсѧ.
ꙗ҆́ко паче мно́жае ѻ҆ста́витъ грѣхѝ ва́ша·

Не сꙋть б̂о совѣти моѝ, ꙗ҆́коже совѣти ва́ши, ни ꙗ҆́ко пꙋтїе ва́ши, пꙋтїе моѝ, гл҃етъ г҃ь.
н̂о е҆ли́ко ѿстоит̑ нб҃҃о ѿ землѧ̀, та́ко ѿстои҆тъ пꙋть мой ѿ пꙋтїи ва́ших̑ и҆ ра́зꙋми ва́ши ѿ ра́зма мое҆го.
ꙗ҆́коже б̂о а҆ще сни́детъ до́ждь и҆ снѣг꙽ с нб҃се, и҆ не въз꙽врати́тсѧ до́ндеже напоитъ зе́млю, і҆ и҆зрасти́тъ и҆ прозѧ́бнетъ·

И҆ да́сть сѣмѧ сѣю҆щемꙋ, и҆ хлѣбъ въ снѣдь.
та́ко бꙋдетъ гл҃ъ мои и҆же а҆ще и҆зы́идет̑ и҆зъ ѹ́стъ мои҆хъ, не възвратит̑сѧ ко мн̂ѣ то́щъ, до́ндеже сконча́еть всѐ е҆ли́ка въсхотѣхъ, і҆ и҆спра́влю пꙋтѝ твоѧ и҆ заповѣди моѧ, съ весе́лїемъ б̂о и҆зыидѣте, и҆ со ра́достїю наѹ҆чи́тесѧ.
го́ры б̂о и҆ хо́лми възопїютъ ждꙋще васъ съ ра́достїю·

и҆ всѧ́ко дре́во польское въспле́щетъ вѣтвьми.
и҆ възни́кнетъ въ драчїѧ мѣсто кѷпари́съ, и҆ въ стволїѧ мѣсто възы́идетъ ми́рта.
и҆ бꙋдетъ г҃ь въ и҆мѧ и҆ въ зна́менїе вѣчное, и҆ не ѻ҆скꙋдѣ́етъ·

Глв̑҇а, н҃ѕ·

Се гл҃етъ г҃ь, снабди́те сд̑ꙋ сътвори́те пра́вдꙋ.
близ̑ б̂о е҆сть спс̑҇нїе мое, прїидѣте и҆ млс̑҇ть моѧ ѿкры́етсѧ.
бл҃женъ мꙋжъ творѧ́и с̂е, и҆ чл҃къ дръжа́и ѿ них̑.
и҆ снабдѣваѧи сꙋбо́тъ не ѻ҆скверни́ти, и҆ блюды́и рꙋцѣ своѝ не твори́ти непра́вды·

да не гл҃етъ и҆ноплемен꙽никъ прилѣжа́ гв҃и, е҆д̂а ѿлꙋчитъ м̂ѧ г҃ь ѿ людїи свои҆хъ.
и҆ да не гл҃етъ кажени́къ ꙗ҆́ко а҆зъ е҆смь древо сꙋхо·

Сѐ гл҃ет꙽ г҃ь каженикомъ, е҆ликоже и҆хъ а҆ще снабдѧ́тъ сꙋбо́ты моѧ.
и҆ съберт̑ꙋ е҆же а҆зъ хощꙋ, и҆ держа́тъ завѣт꙽ мой.
дамъ и҆мъ в домꙋ̀ мое҆мъ и҆ въ градѣ мое҆мъ мѣсто и҆мени́то, ѹ́не сн҃овъ и҆ дще́рь, и҆́мѧ вѣчно дам꙽ и҆мъ, и҆ не ѻ҆скꙋдѣ́етъ·

И҆ноплемен꙽никомъ прилежа́щимъ гв҃и рабо́тати е҆мꙋ, и҆ люби́ти и҆́мѧ гн҃е, ꙗ҆́ко бы́ти е҆мꙋ рабо́мъ и҆ рабы́нѧм̑.
и҆ всѧ̀ снабдѧ́щїѧ сꙋбо́ты моѧ и҆ не ѻ҆сквернавлѧ́ющаѧ, и҆ дръжа́щаѧ завѣтъ мои.
въведꙋ ѧ҆̀ въ горꙋ̀ ст҃ꙋю мою, и҆ възвеселю ѧ҆̀ въ домꙋ̀ мл҃твы мое҆ѧ.
всѐсъж꙽же́нїѧ и҆хъ и҆ тре́бы бꙋдꙋтъ прїѧты на требницѣ мое҆мъ·

домъ б̂о мои дом̑ мл҃твы нари́чет̑сѧ всѣмъ ꙗ҆зы́ком̑, гл҃етъ г҃ь събира́ѧи расѣѧ́ныѧ і҆и҆л҃евы, ꙗ҆́ко съберꙋ̀ нань събо́ръ·

Всѧ̀ звѣри дивїѧ прїидѣте, и҆зъꙗ҆дѣте вс̂ѧ звѣ́ри дꙋбра́вныѧ.
ви́дите ꙗ҆́ко вс̂и ѻ҆слѣпоша, не размѣша смы́слити всѝ.
ѱѝ нѣми не възмогт̑ꙋ ла́ѧти ви́дѧще сны̀ на ло́жи любѧ́ще дрема́ти.
и҆ ѱѝ безъ срама дш҃ею не вѣдѧще сы́тости и҆ сꙋть лꙋка́ви не вѣ́дѧще смы́сла, вс̂и въ пꙋтех̑ их̑ въслѣ́дѧтъ.
кождо въ свои пꙋть ѹ҆клони́шасѧ в раз꙽вращен꙽наѧ, ѿ пр́ьваго даже и҆ до послѣднѧго.
прїидѣте да во́змемъ вино̀, и҆ наплъним̑сѧ пїѧ́нъства, и҆ бꙋдетъ ꙗ҆ко днс̑҇ь тако и҆ заѹ́тра и҆ мно́го потомꙋже·

Глв̑҇а, н҃з·

Ви́дите ꙗ҆ко многажды пра́вдивыи погиба́етъ, и҆ никт́оже не пожида́етъ срд̑цем̑ и҆ мꙋжи пра́вдивїи ѿе́млют̑сѧ, и҆ никто́же разꙋмѣ́ет̑, ѿ лица̀ б̂о неправдѣ взѧ́сѧ правди́выи·

И҆ бꙋдетъ с ми́ромъ погребенїе е҆го, и҆ взѧ́сѧ ѿ среды·

Вы́ же прїидѣте сѣмо сн҃ове безаконнїи племѧ̀ любодѣѧ и҆ блꙋдница.
ки́мъ въспита́стесѧ, и҆ на кого ѿврьзо́сте ѹ҆ста̀ ва́ша, и҆ на кого ѻ҆бори́сте ꙗ҆́зы́къ вашъ.
нѣсте л̂и вы ѹ҆бо чада па́гꙋбы племѧ̀ безакон꙽но·

Молѧ́щеисѧ къ кꙋми́ромъ под̑ дꙋбїем̑ ча́стом, закала́юще ча́да своѧ в де́брехъ среди ка́менїѧ.
т̂о твоѧ ча́сть, с̂е твое прича́стїе.
и҆ тѣм꙽ пролїѧ възлїанїѧ, и҆ тм̑ѣ принесе требы.
ѻ҆ сем̑ ѹ҆бо не раз꙽гнѣ́ваю л̂и сѧ на горѣ высо́цѣ и҆ възнесе́нѣ, т̂ꙋ тебѣ ло́же, и҆ та́мо възнесе тре́бы.
и҆ за под̑бо́и дверїи твоихъ положѝ па́мѧть свою.
ѽ ты̀, ꙗ҆́ко а҆ще ѿ мене ѿстꙋпиши, боле чт̂о прїимеши.
възлюбѝ лежа́щаѧ с тобою, ѹ҆мно́жи блꙋже́нїе твое с ни́ми.
и҆ многи сътвори и҆же далече ѿ тебе, и҆ пꙋстѝ послы̀ предѣлъ ради твои҆хъ, и҆ смири́сѧ до а́да.
мно́гими пꙋтьмѝ твои҆ми трꙋди́сѧ, и҆ не рече да премол꙽кнꙋ крѣпѧ́щисѧ, ꙗ҆́ко сътворѝ с̂е·

Сего ради не помолѝ м̂и сѧ·

Ты̀ кого бл҃гочте́ши ѹ҆боѧ́сѧ, и солга̀ м̂и, и҆ не помѧнꙋ мене.
не прїѧ менѐ въ ѹ҆мѣ, ни въ срд̑це твое.
и҆ аз̑ т̂ѧ ви́дѣвъ, презрю̀.
и҆ мене сѧ не ѹ҆боѧ̀, и҆ а҆зъ и҆сповѣдѣ пра́вдꙋ мою и҆ ѕло́бы твоѧ ꙗ҆́же не ѹ҆спѣют̑ тебѣ.
е҆гда възопїеши, да тѧ и҆зба́витъ въ печа́лехъ твои҆хъ.
сїѧ бо всѧ̀ вѣтръ возметъ, и҆ ѿнесетъ бꙋрѧ.
а҆ держа́щеисѧ мене притѧ́жꙋтъ зе́млю, и҆ причастѧ́тъ горꙋ ст҃ꙋю.
и҆ рекꙋт꙽, потреби́те пред̑ лицемъ е҆го пꙋтѝ, и҆ ѿврьзѣте препо́нꙋ ѿ пꙋтѝ людїи мои҆хъ·

Сѐ гл҃етъ г҃ь вы́шнїи и҆же живе́тъ въ высо́кихъ, въ вѣкъ ст҃ъ въ ст҃ыхъ почива́ѧ.
і и҆знемо́гшимъ даѧ тръпѣнїе, и҆ даѧи живо́тъ съкрꙋшенымъ срд̑цем̑.
не въ вѣкъ ѿмщꙋ ва́мъ, ни до кон̑҇ца раз꙽гнѣваюсѧ на вы.
дх҃ъ б̂о ѿ мене и҆зы́идетъ, и҆ дыха́нїе вс̂е а҆зъ е҆см꙽ сътвори́лъ·

Грѣха̀ ра́ди въ ма́лѣ чт̂о съжали́хъ е҆мꙋ и҆ зазлихъ е҆го, и҆ ѿврати́хъ лицѐ свое ѿ него, и҆ съжалѝ с̂и, и҆ пои҆де дрѧ́хлъ въ пꙋтѝ своѧ.
пꙋтѝ е҆го видх̑ѣ, і҆ и҆сцѣлих̑ и҆̀, и҆ ѹ҆тѣшихъ и҆̀.
и҆ да́хъ е҆мꙋ ѹ҆тѣшенїе и́стин꙽но, ми́ръ на ми́ръ, сꙋщимъ далече, и҆ близъ.
и҆ рече г҃ь, и҆сцѣлю ѧ҆̀.
неправди́вїи же възмѧтꙋтсѧ, и҆ почи́ти не возмо́гꙋтъ.
нѣсть сѧ ра́довати нечести́вым̑, рече г҃ь б҃ъ·

Глв̑҇а, н҃и·

Възопїи крѣ́постїю, и҆ не пощадѝ.
ꙗ҆́ко и҆ трꙋ́бꙋ възнеси глас̑҇ свои, и҆ възвѣсти лю́демъ мои҆мъ грѣхѝ их̑, и҆ до́мꙋ і҆а́ковлю безако́нїѧ ихъ.
менѐ дн҃ь дн҃е и҆́щꙋтъ, и҆ разꙋмѣти пꙋтѝ моѧ̀ хотѧ́тъ.
ꙗ҆́ко лю́дїе сътвори́вшеи пра́вдꙋ, и҆ сꙋ́да б҃а свое҆го не ѻ҆ста́вившеи·

Про́сѧт̑ ѹ҆ менѐ нн҃ѣ сꙋда правди́ва, и҆ приближи́тисѧ къ г҃ꙋ хотѧт̑, гл҃юще.
чт̂о ꙗ҆́ко пости́хомсѧ, и҆ не ѹ҆зрѣ.
и҆ смири́хом̑ дш҃а на́ша, и҆ не ѹ҆ви́дѣ.
въ дн҃и бо поще́нїи ваших̑ ѻ҆брѣта́ете во́лѧ своѧ, и҆ всѧ̀ под̑рꙋ́чники ваша томитѐ.
а҆ще в сꙋ́дѣ и҆ сва́рѣхъ пости́тесѧ, и҆ бїете п꙽ха́юще смире́н꙽на.
въскꙋ́ю м̂и пости́тесѧ, ꙗ҆́ко дне́сь ѹ҆слы́шанꙋ бы́ти съ во́племъ гла́сꙋ вашемꙋ.
не си́цеваго по́ста а҆зъ и҆з꙽бра́хъ, и҆ дн҃е, во́нже смирит̑ чл҃къ дш҃ꙋ свою̀.
а҆ще и҆ слѧче́ши ꙗ҆́ко се́рпъ вы́ю свою̀, и҆ врѣтище и҆ пе́пелъ постелеши.
т̂о ни та́ко нарече́тъ ми сѧ по́стъ прїѧ́тенъ, не такаго б̂о по́ста а҆зъ и҆з꙽бра́хъ, гл҃етъ г҃ь.
н̂о разрѣша́и всѧ́къ съѹ́зъ непра́вды, і҆ и҆справлѧ́ѧи развраще́нїѧ нꙋ́жныхъ бре́менъ.
ѿпꙋсти плѣне́ныѧ на свобо́дꙋ, и҆ всѧ́ко въписа́нїе непра́ведно раздери.
раз꙽драблѧ́и а҆́лчющимъ хлѣ́бъ свои, и҆ ни́щаѧ без꙽кро́вныѧ въведи въ до́мъ свои.
а҆ще ви́диши на́га ѻ҆дежи, и҆ сꙋщаѧ ѿ свое҆го племе́ни не презрѝ.
тогда̀ б̂о просвѣти́тсѧ тебѣ̀ ра́но свѣтъ твои, і҆ и҆сцѣле́нїѧ твоѧ̀ ско́ро въсїѧ́ютъ.
и҆ пред̑и҆детъ пред̑ тобо́ю пра́вда твоѧ̀, и҆ сла́ва бж҃їѧ ѻ҆бы́имет꙽ т̂ѧ.
тогда̀ възове́ши, и҆ б҃ъ ѹ҆слы́шитъ т̂ѧ.
и҆ е҆щѐ гл҃ющꙋ т̂и, речет̑, с̂е прїидо́хъ.
а҆ще же ѿимеши ѿ себѐ ѹ҆́зы, и рꙋкобїенїе, и҆ гл҃ъ роп꙽та́нїѧ.
и҆ даси а҆лчющим̑ хлѣ́бъ ѿ всеѧ̀ дш҃а твое҆ѧ, и҆ дш҃ꙋ смире́нꙋ насы́тиши.
тогда̀ въсїѧ́етъ въ тмѣ свт̑ѣ твои, и҆ тма̀ твоѧ̀ бꙋ́детъ ꙗ҆́ко полꙋ́дне.
и҆ бꙋ́детъ б҃ъ твои с тобо́ю прс̑҇но, и҆ насыти́шисѧ ꙗ҆́коже помышлѧ́етъ дш҃а твоѧ̀.
и҆ ко́сти твоѧ̀ раз꙽блажа́ютъ, и҆ бꙋ́дꙋтъ ꙗ҆́ко градина напое́на, и҆ ꙗ҆́ко и҆сто́чникъ е҆мꙋ́же не ѻ҆скꙋдѣ́етъ вода̀.
и҆ ко́сти твоѧ̀ прозѧ́бнꙋтъ ꙗ҆́ко трава̀, и҆ раз꙽блажа́ютъ, и҆ наслѣдѧ́тъ роже́нїа роже́нїи.
и҆ въз꙽градѧ́тсѧ пꙋсты́нѧ твоѧ̀ вѣ́чныѧ, и҆ бꙋ́дꙋтъ ѻ҆снова́нїѧ твоѧ̀ вѣ́чнаѧ роже́нїем̑ роже́нїи.
и҆ прозове́шисѧ гради́тель прегра́дам̑, и҆ стеѕѧ̀ ꙗ҆́же посреди и҆сказиши·

А҆ще ѿврати́ши но́гꙋ твою ѿ сꙋбо́тъ е҆же твори́ши во́лѧ своа въ дн҃ь ст҃ыи, и҆ прозове́ши сꙋбо́ты мла́ды ст҃ы бв҃и свое҆мꙋ.
да не въз꙽дви́гнеши ногѝ свое҆ѧ на́ лѣво, н̂и да възгл҃еши словесы̀ на гнѣ́въ и҆зъ ѹ҆́стъ свои҆хъ.
и҆ бꙋ́деши ѹ҆пова́ѧ къ гв҃и, и҆ възведе́тъ т̂ѧ на бл҃готы зе́мныѧ.
и҆ ѹ҆рече́тъ т̂и прича́стїе і҆а́кова ѿц҃а твое҆го.
ѹ҆ста̀ б̂о гн҃ѧ гл҃аше с̂е·

Глв̑҇а, н҃ѳ·

Єда̀ не мо́жетъ рꙋка̀ гн҃ѧ спасти, и҆ли ѻ҆тѧгчи́лъ е҆сть слꙋ́хъ свои не послꙋшати.
н̂о грѣси ваши разлꙋча́ютъ межд̑ꙋ вами, и҆ бг҃ом꙽, и҆ грх̑ѣ ради вашихъ ѿвратѝ лицѐ свое ѿ вас̑҇, ꙗ҆́коже не поми́ловати.
рꙋцѣ б̂о ваши ѻ҆кверне́ни кро́вїю, и ѹ҆стны̀ ва́ша съгл҃аша безако́нїе, и҆ ꙗ҆зы́къ вашъ непра́вдѣ поѹ҆ча́етсѧ.
и҆ никтоже гл҃етъ пра́вды, н̂и е҆сть сꙋ́да и҆́стин꙽на.
ѹ҆пова́ша б̂о къ сꙋи҆мъ, и҆ гл҃ют̑ тща́ѧ·

Ꙗ҆́ко ража́ютъ трꙋ́дъ, и҆ плодѧтъ безако́нїе.
ꙗ҆́и҆ца а҆спид̑ска разби́ша, и҆ поста́въ паѹ́чь ткт̑ꙋ, и҆ хотѧ́тъ ѿ ꙗ҆иць и҆хъ ꙗ҆́сти.
разби за́портокъ е҆го, ѻ҆брѣтѐ, и҆ с̂е в нем̑ васили́скъ.
и҆ поставъ и҆хъ не бꙋдет̑ на ри́зꙋ, и҆ не ѻ҆дежют̑сѧ ѿ дѣ́ла свое҆го.
дѣлеса̀ б̂о и҆хъ, дѣлеса̀ безако́нїѧ.
но́ѕѣ же и҆хъ на ѕло̀ течета, ско́рѣ пролїѧ́ти кро́вь.
и҆ ра́зꙋми и҆хъ, ра́зꙋми ѿ ѹ҆бо́ю.
съкрꙋше́нїе и҆ трд̑ꙋ в пꙋте́хъ и҆хъ.
стеѕѧ̀ б̂о их̑ рас꙽кривле́ны по нимже хо́дѧт꙽, и҆ не вѣдѧт̑ ми́ра.
того ради ѿстꙋпѝ ѿ них̑ сꙋд꙽, и҆ не пости́гнетъ и҆хъ пра́вда.
чаѧ́вшемъ и҆мъ свѣта, бы́сть тма̀.
жда́вше зарь, въ тмѣ̀ походи́ша.
ѻ҆сѧ́жꙋтъ ꙗ҆́ко слѣ́пъ стѣ́нꙋ, и҆ ꙗ҆́ко несꙋще съ ѻ҆чи́ма ѻ҆бъи҆щꙋтъ.
и҆ падꙋтсѧ въ пладни ꙗ҆́ко въ полꙋно́щи, ꙗ҆́ко мр҃тви.
въстенꙋтъ ꙗ҆́ко медьвѣдь, и҆ ꙗ҆́ко го́лꙋбъ въкꙋ́пѣ по́идт̑ꙋ.
жда́хомъ сꙋ́да, и҆ нѣ́сть сп҃сенїѧ, далече ѿстꙋпѝ ѿ нас̑҇.
мно́го б̂о безако́нїе наше пред̑ тобо́ю, и҆ грѣси наши проти́вꙋ ста́ша намъ.
безако́нїѧ бо наша в нас̑҇, и҆ непра́вды на́ша разꙋмѣ́хомъ.
нечествова́хомъ, и҆ сълга́хом꙽, и҆ ѿстꙋпи́хомъ ѿ въслѣже́нїѧ б҃а на́шего.
съгл҃ахомъ непра́вдꙋ, и҆ не покори́хомсѧ.
въ ѹ҆тро́бѣ зача́хомъ, и҆ поѹ҆чи́хом̑сѧ ѿ срд̑ца на́шего словеса̀ непра́вед̑на.
и҆ ѻ҆ста́вихомъ за́ди сꙋ́дъ, и҆ пра́вда дале́че ѿстꙋпѝ.
ꙗ҆́ко и҆знеможе в꙽ пꙋте́хъ и҆хъ и҆́стин꙽на, и҆ пра́вымъ не възмого́ша прїити.
и҆́стин꙽на взѧ́сѧ, и҆ преста́виша ѹ҆мъ свои ꙗ҆́ко смышлева́ти.
и҆ ви́дѣ г҃ь и҆ негодова̀, ꙗ҆́ко не бѣше сꙋ́да.
и҆ ви́дѣ и҆ не бѣше мꙋжа, и҆ размы́сли и҆ не бѣше под̑емлющаго.
и҆ м꙽сти и҆мъ мы́шцею своею, и҆ помилова́нїемъ ѹ҆тверди.
и҆ задѣ́сѧ пра́вдою ꙗ҆́ко щи́томъ, и҆ възложи шле́мъ сп҃сенїѧ на главꙋ̀, и҆ ѻ҆блече́сѧ в ри́зꙋ ѿм꙽ще́нїѧ, и҆ ѻ҆дежею ꙗ҆́ко ѿдава́ѧи ѿдаѧ́нїе, ѹ҆кори́знꙋ сꙋпоста́тнымъ.
и҆ ѹ҆боѧ́тсѧ и҆же ѿ за́пада и҆мени гн҃ѧ, і҆ и҆же ѿ въсто́къ слн҃чныхъ сла́вы е҆го.
прїидетъ б̂о ꙗ҆́ко рѣка̀ бꙋ́рна, гнѣв꙽ ѿ г҃а прїидетъ съ ꙗ҆́ростїю·

И҆ прїидетъ сїѻ́на ради и҆збавлѧ́ѧи, и҆ ѿврати́тъ нечестїе ѿ і҆а́кова.
се же и҆мъ ѿ мене завѣтъ, рече г҃ь.
дх҃ъ мои и҆же е҆сть в тебѣ, и҆ гл҃и ꙗ҆́же азъ да́хъ въ ѹ҆ста̀ твоа, не ѻ҆скꙋдѣ́ют꙽ ѿ ѹ҆́стъ твоих̑, и҆ ѿ ѹ҆́стъ племене твое҆го.
рече б̂о г҃ь, ѿ нн҃ѣ и҆ въ вѣки·

Глв̑҇а, ѯ҃·

Просвѣща́исѧ просвѣща́исѧ і҆ерс̑҇лиме, прїиде бо т̂и свт̑ѣ, и҆ сла́ва гн҃ѧ на тебѣ восїа·

Се̂ тма̀ покры́етъ зе́млю, и҆ примра́къ на ꙗ҆зы́ки.
а҆ в тебѣ̀ ꙗ҆ви́тсѧ г҃ь, и҆ сла́ва е҆го в тебѣ̀ ѻ҆бличит̑сѧ.
и҆ по́идꙋтъ ꙗ҆зы́ци свѣтомъ твои҆мъ, и҆ цр҃їе свѣтлостїю просїѧ́нїѧ твое҆го·

Възведѝ ѻ҆́крс̑҇тъ ѻ҆́чи свои и҆ ви́жд̑ь, събрана ча́да твоѧ̀.
с̂е прїидо́ша вс̂и сн҃ове твои и҆здале́ча, и҆ дще́ри твоѧ̀ на ра́мꙋ въздви́гнꙋтсѧ.
тогда̀ ѹ҆́зриши и҆ възра́дꙋешисѧ, и҆ ѹ҆бои́шисѧ, и҆ ѹ҆жасне́шисѧ срд̑цемъ.
ꙗ҆́ко ѻ҆брати́тсѧ к тебѣ̀ бога́тьство мор꙽ское, и҆ страны̀ людїи.
и҆ прїидꙋтъ тебѣ̀ ста́да вельблюд̑ска, и҆ покрыють т̂ѧ вельблюд̑и̑ мадїа́мли, и҆ гефар꙽стїи.
вс̂и ѿ сава прїидꙋтъ, несꙋще зла́то и҆ ѳимїѧ́мъ бѣ́лъ принесꙋтъ, и҆ сп҃се́нїе ѿ г҃а бл҃говѣстѧ́тъ.
и҆ всѧ̀ ѻ҆вца кѷда́рьскїѧ съберꙋтсѧ тебѣ, и҆ ѻ҆́вни навеѻ҆́ѳ꙽стїи прїидꙋтъ тебѣ̀.
и҆ възнесе́тсѧ прїа́тнаѧ на жерто́вникъ мои, и҆ до́мъ мл҃тви мое҆ѧ просла́витсѧ·

Нѣцїи же ꙗ҆́ко ѻ҆́блацы пловꙋтъ, и҆ ꙗ҆́ко голꙋби съ пте́нцы свои҆ми.

Мене ѻ҆́строви жда́ша, и҆ корабли ѳарсит̑стїи.
въ пе́рвыхъ привести ча́да твоѧ̀ и҆здале́ча, и҆ сребро̀ и҆ зла́то с ни́ми.
и҆мени ради гн҃ѧ ст҃го и҆́мже ст҃ыи і҆и҆л҃евъ сла́венъ е҆сть.

И҆ съзи́ждꙋтъ сн҃ове и҆норо́днїи стѣны твоѧ̀, и҆ цр҃їе и҆хъ слꙋжи́ти бꙋдт̑ꙋ тебѣ̀.
за гнѣ́въ б̂о мои поразих̑ т̂ѧ, и҆ млс̑҇ти ради възлюбих̑ т̂ѧ.
и҆ ѿвер꙽зт̑ꙋсѧ вра́та твоѧ̀ прс̑҇но, дн҃ь и҆ но́щъ не затво́рѧт̑сѧ, въвестѝ к тебѣ̀ си́лꙋ стра́нъ, и҆ цр҃и и҆хъ ведо́ми.
ꙗ҆зы́цы б̂о и҆ цр҃їе и҆же а҆ще не порабо́таютъ т̂и, поги́бнꙋтъ.
и҆ ꙗ҆зы́ци запꙋстѣ́нїемъ запꙋстѣ́ютъ·

И҆ сла́ва лива́нова к тебѣ прїидетъ, кѷпари́сомъ и҆ пе́вгомъ и҆ ке́дромъ въкꙋпѣ просла́вити мѣ́сто ст҃ое мое.
и҆ по́идꙋтъ к тебѣ боѧ́щесѧ сн҃ове смири́вших̑ т̂ѧ, и҆ прогнѣва́вших̑ т̂ѧ.
и҆ нарече́шисѧ град̑ гн҃ь сїѻ́нъ, ст҃го і҆и҆л҃ева.
за е҆же бы́ти т̂и ѻ҆ста́вленꙋ и҆ възненави́дѣнꙋ, и҆ не бѣ̀ помага́ющаго т̂и·

И҆ положꙋ т̂ѧ въ ра́дость вѣ́чнꙋю, и҆ весе́лїе ро́дъ ро́домъ.
и҆ пос꙽се́ши мле́ко стра́ньско, и҆ богат̑ство цр҃еи снѣ́си.
и҆ разꙋмѣ́еши ꙗ҆́ко аз̑ г҃ь сп҃саѧ́и т̂ѧ, і҆ и҆збавлѧ́аи т̂ѧ ст҃ыи і҆и҆л҃евъ·

И҆ въ мѣди мѣ́сто принесꙋтъ т̂и зла́то, и҆ в желѣ́за мѣсто принесꙋтъ т̂и сребро̀.
и҆ въ дре́ва мѣ́сто принесꙋтъ т̂и мѣ́дь, и҆ в ка́менїѧ мѣ́сто желѣ́зо·

И҆ вда́мъ кнѧ́ѕѧ твоѧ̀ в꙽ ми́ръ, и҆ сꙋдїѧ твоѧ̀ въ пра́вдꙋ.
и҆ не ѹ҆слы́шитсѧ посем̑ непра́вда въ землѝ твое́и, ни съкрꙋше́нїе ни трꙋдъ въ предѣ́лехъ твоих̑.
н̂о прозовет̑сѧ сп҃се́нїе забра́ла твоа, и҆ вра́та твоѧ̀ хвала̀.
и҆ не бꙋ́детъ тебѣ̀ слн҃це на свѣтъ дн҃їю, ни просїѧ́нїе лꙋны просвѣтит̑ тебѣ но́щїю.
н̂о бꙋ́детъ тебѣ̀ г҃ь свѣтъ вѣ́чныи, и҆ б҃ъ сла́ва тебѣ.
не за́идет̑ б̂о слн҃це тебѣ, и҆ лꙋна̀ не ѻ҆скꙋдѣ́етъ.
бꙋдет̑ б̂о г҃ъ тебѣ свѣтъ вѣ́чныи·

И҆ напол̑҇нѧтсѧ дн҃їе рыда́нїѧ твое҆го, и҆ лю́дїе твои вси правди́ви, и҆ въ вѣ́къ причастѧ́тъ зе́млю·

снаб꙽жа́юще са́дъ дѣ́ло рꙋ́кꙋ и҆хъ въ сла́вꙋ.
хꙋдыи бꙋ́детъ в ты́сѧща, и҆ мнїи бꙋ́дет꙽ въ странꙋ вели́кꙋ.
а҆зъ г҃ь по вре́мени съберꙋ ѧ҆̀·

Глв̑҇а, ѯ҃а·

Дх҃ъ гн҃ь на мнѣ̀, е҆гоже ради помаза м̂ѧ.
бл҃говѣсти́ти ни́щимъ посла̀ м̂ѧ, и҆сцѣли́ти съкрꙋше́ныѧ срд̑цем̑·

проповѣ́дати плѣн꙽никомъ проще́нїе, и҆ слѣпы́мъ прозре́нїе·

нарещи лѣто гн҃е бл҃гои҆зволе́но, и҆ дн҃ь възда́нїѧ.
ѹ҆тѣшити всѧ̀ пла́чющаа, да́ти пла́чющим̑ сїѻ́на сла́вꙋ въ мѣ́сто пе́пела, пома́занїе весе́лїѧ а҆лчющимъ, ѹ҆краше́нїа сла́вѣ за дх҃ъ ѹ҆ны́нїѧ.
и҆ нарект̑ꙋсѧ ро́дове пра́вды, насаже́нїе гн҃е въ сла́вꙋ.
и҆ съзи́ждꙋтсѧ пꙋсты́нѧ вѣчныѧ, запꙋстѣ́вшїѧ пре́же възд̑ви́гнꙋтъ, ѻ҆бно́вѧтъ гра́ды ѻ҆пꙋстѣвшаѧ в ро́ды·

И҆ прїидꙋтъ и҆нород̑нїи пасꙋще ѻ҆́вца твоѧ, і҆ и҆ноплеме́нницы ратаи твои, и҆ виноград̑ницы.
вы же наречетесѧ жерцы̀ гн҃и, и҆ слꙋ́ги бж҃їѧ.
крѣ́пость ꙗ҆зы́къ поꙗ҆́сте, въ бога́т꙽ствѣ и҆хъ ѹ҆диви́тесѧ.
си́це зе́млю свою̀ втори́цею наслѣдѧт̑, и҆ весе́лїе вѣ́чное над̑ главою и҆хъ·

Аз̑ б̂о е҆смь г҃ь любѧ́и пра́вдꙋ, и҆ ненавидѧ́и грабле́нїѧ ѿ непра́вды.
и҆ да́мъ трд̑ꙋ и҆хъ правди́вымъ, и҆ завт̑ѣ вѣче́нъ завѣща́ю и҆мъ.
позна́етсѧ въ ꙗ҆зы́цѣхъ племѧ̀ и҆хъ, и҆ внꙋцы и҆хъ посреди людїи.
и҆ всѧ́къ видѧ́и ѧ҆̀ позна́етъ ѧ҆̀, ꙗ҆́ко сїи сꙋть сѣмѧ блс̑҇вно ѿ б҃а·

и҆ ра́достїю възра́дꙋютсѧ ѻ҆ г҃и·

да възра́дꙋетсѧ дш҃а моѧ̀ ѻ҆ г҃и, ѻ҆блече бо м̂ѧ въ ри́зꙋ сп҃сенїа, и҆ ѻ҆де́жею весе́лїѧ ѻ҆дѣѧ м̂ѧ.
ꙗ҆́ко на жени́ха възложи на́ мѧ вѣне́ць, и҆ ꙗ҆́ко невѣ́стꙋ ѹ҆краси м̂ѧ ѹ҆тва́рїю.
ꙗ҆́ко землѧ̀ растѧ́щїѧ цвѣтъ свои, ꙗ҆́ко вертогра́дъ сѣмена̀ своѧ прозѧба́ѧ.
та́ко просїѧ́етъ г҃ь пра́вдꙋ, и҆ весе́лїе пред̑ всѣми странами·

Глв̑҇а, ѯ҃в·

Сїѻ́на ради не премолъчю, і҆ерс̑҇ли́ма ради не попꙋщꙋ.
до́н꙽деже ѹ҆бо и҆зы́идет̑ ꙗ҆́ко свѣтъ пра́вда моа̀, и҆ сп҃се́мое ꙗ҆́ко свѣти́ло раж꙽жет̑сѧ·

И҆ ѹ҆́зрѧтъ ꙗ҆зы́цы пра́вдꙋ твою̀, и҆ цр҃їе сла́вꙋ твою̀.
и҆ прозовꙋтъ т̂ѧ и҆́менемъ но́вом̑, е҆же г҃ь и҆менꙋет̑ е҆̀.
и҆ бꙋ́деши вѣнецъ доброты̀ въ рꙋцѣ гн҃и, и҆ глави́зна црс̑҇твїѧ въ рꙋцѣ б҃а твое҆го.
и҆ не прозове́шисѧ късемꙋ̀ ѻ҆ста́вленъ, и҆ землѧ̀ твоа̀ ктомꙋ̀ не нарече́тсѧ пꙋста.
тебѣ̀ б̂о прозовет̑сѧ во́лѧ моа̀, а҆ землѧ̀ твоа̀ вселен꙽наѧ.
и҆ ꙗ҆́ко живы́и ю҆́ноша съ дв҃ою, та́ко воз̑живꙋтъ сн҃ове твоѝ с тобо́ю·

И҆ бꙋ́детъ ꙗ҆́коже ра́дꙋет̑сѧ жени́хъ ѻ҆ невѣсте, та́коже възра́дꙋетсѧ г҃ь ѻ҆ тебѣ̀.
на стѣнах̑ твоих̑ і҆ерс̑҇ли́ме приставихъ стра́жа ве́сь дн҃ь и҆ вс̂ю но́щь, и҆же до кон̑҇ца не премол̑҇кнꙋтъ помина́юще г҃а.
нѣсть б̂о къ ва́мъ подо́бенъ, а҆ще и҆с꙽пра́виши и҆ сътвориши і҆ерс̑҇ли́ме непрезорьство на́ земли·

Клѧ́тсѧ г҃ь десни́цею свое́ю, и҆ крѣ́постїю мы́ш꙽ца свое́ѧ.
а҆ще ктомꙋ̀ ѿда́мъ пшени́цꙋ твою̀ и҆ пи́щꙋ твою̀ врагомъ твои҆мъ.
и҆ а҆ще ктомꙋ и҆спїютъ вино̀ твое сн҃ве чю́ждїи, ѻ҆ нем꙽же трꙋди́лъсѧ е҆си.
н̂о събира́ющеи и҆зъꙗ҆́дѧт̑ е҆̀, и҆ похва́лѧтъ г҃а.
и҆ е́млющеи и҆спїютъ е҆̀ въ стаѧх̑ ст҃ыхъ мои҆хъ·

И҆дѣте вра́ты мои́ми, и҆ пꙋть сътвори́те лю́демъ мои҆мъ.
и҆ ка́менїе е҆же на пꙋтѝ раз꙽мещѣте, и҆ въздви́гнѣте зна́менїе въ страны̀.
сѐ б̂о г҃ь слы́ша̑но сътвори до конца̀ землѝ.
рцѣте дще́ри сїѻ́новѣ, с̂е сп҃ситель тво́и грѧ́детъ, и҆мы́и съ собо́ю м꙽здꙋ, и҆ дѣ́ло пред̑ лицемъ своим̑.
и҆ прозовет̑ ѧ҆̀ лю́ди ст҃ы, и҆зба́влены гм҃ъ.
тыж̑ прозове́шисѧ възыска́нъ гра́дъ, и҆ не ѻ҆ста́вленъ·

Глв̑҇а, ѯ҃г·

Кт̂о се́и прише́дыи ѿ е҆дема, чрьвле́ны ры́зы е҆го ѿ восо́ра.
се́и кра́сенъ въ ѹ҆творе́нїи ѕѣ́ло съ крѣпостїю.
а҆зъ гл҃ѧи пра́вдꙋ, и҆ сꙋд꙽ спс̑҇нїа.
почто̀ чрьвлены ры́зы твоѧ̀, и҆ ѻ҆де́жда твоа̀ ꙗ҆́ко и҆з꙽гнет̑шаго в꙽ ти́сцѣ, и҆спо́лнена гнетѣнїѧ.
и҆ ѿ ꙗ҆зы́къ нѣсть мꙋ́жа со мно́ю, и҆ попрахъ ѧ҆̀ ꙗ҆́ростїю, и҆ сътро́хъ ѧ҆̀ ꙗ҆́ко пр́ьсть и҆ сведо́хъ кровь и҆хъ въ землю·

дн҃ь б̂о ѿданїѧ прїиде на ни́хъ, и҆ лѣто и҆збавленїѧ пристꙋпи́ло е҆сть.
възрѣх꙽, и҆ не бы́сть ни е҆ді́ного же помощ̑҇ника.
и҆ помы́слихъ, и҆ никто́же не под̑ѧ.
і҆ и҆зба́ви ѧ҆̀ мы́ш꙽ца моѧ̀, и҆ ꙗ҆́рость моа̀ настꙋпѝ на́ нѧ.
и҆ попрах̑ ѧ҆̀ гнѣ́вомъ мои҆мъ, и҆ сведо́хъ кро́вь их̑ въ зе́млю·

млс̑҇ть гн҃ю помѧнꙋхъ и҆ нра́вы гн҃ѧ въ всемъ, в них꙽ же г҃ь намъ ѿда́етъ·

Гь҃ сꙋдїи бл҃гъ до́мꙋ і҆и҆л҃евꙋ.
ѿда́етъ намъ по млс̑҇ти свое́и, и҆ по мно́жествꙋ пра́вды е҆го.
и҆ рече, ѹ҆бо лю́дїе моѝ ча́да не бꙋдт̑ꙋ ѿвръжени.
и҆ бы́сть и҆мъ на сп҃се́нїе ѿ всѧ́коѧ печа́ли·

Ни ходата́и н̂и а҆гг҃лъ, н̂о сам̑ г҃ь сп҃се ѧ҆̀.
занѐ лю́бит̑ и҆хъ и҆ щади́тъ их̑.
то́и ѧ҆̀ е҆сть и҆зба́вилъ, и҆ под̑ꙗ҆́лъ ѧ҆̀, и҆ възнеслъ ѧ҆̀ въ всѧ̀ дн҃и вѣка.
тїи же не покори́шас̑҇ и҆ разгнѣ́ваша дх҃ъ ст҃ыи е҆го.
и҆ ѻ҆брати́сѧ и҆мъ на враждꙋ, то́и вое҆ва на́ нѧ.
и҆ помѧнꙋ днѝ вѣчныѧ·

Възведыи ѿ землѧ̀ пасты́рѧ ѻ҆́вцам̑ своим̑·

гдѣ е҆сть в꙽ложи́выи в них̑ дх҃ъ ст҃ыи, и҆ възведы́и десни́цею моѷсїа, мы́ш꙽цею сла́вы е҆го.
ѹ҆крѣпѣ вода̀ ѿ лица̑ е҆мꙋ, сътворити е҆мꙋ и҆́мѧ вѣчно.
и҆ проведе их̑ с꙽квоѕѣ безнд̑ꙋ, ꙗ҆́ко конѧ̀ с꙽квоѕѣ пꙋсты́нѧ, и҆ ѹ҆ не трꙋди́шас̑҇, и҆ ꙗ҆́ко скоты по́ полю.
сниде дх҃ъ ѿ г҃а и҆ настави и҆хъ.
та́ко проведе люд̑и̑ своѧ̀ сътвори́ти тебѣ̀ само́мꙋ и҆́мѧ сла́вно·

Ѡ҆брати́сѧ ѿ нб҃си, и҆ ви́жд̑ь ѿ до́мꙋ ст҃го свое҆го и҆ сла́вы.
гдѣ̀ е҆сть ре́вность твоѧ̀, и҆ крѣ́пость твоѧ̀.
гдѣ̀ е҆сть мно́жество млс̑҇ти твое́ѧ, и҆ щедротъ твои҆хъ, ꙗ҆́ко претръпѣ намъ.
ты̀ б̂о е҆си ѿц҃ъ на́ш꙽, а҆враам̑ не ѹ҆вѣдѣ на́съ, і҆и҆л҃ь не позна̀ нас̑҇.
н̂о ты̀ г҃и ѿц҃ъ наш̑҇ и҆спе́рва, і҆ и҆́мѧ твое на на́съ е҆сть·

чт̂о ѹ҆клони́лъ е҆си на́съ г҃и ѿ пꙋти твое҆го, и҆ ѻ҆жести́лъ е҆си срд̑ца на́ша ꙗ҆́ко не боѧ́тисѧ тебе·

Ѡ҆брати́сѧ ра́бъ твоих̑ ради, и҆ племенъ достоа́нїѧ твое҆го.
да поне ма́ло наслѣ́димъ горы ст҃ыѧ твое́ѧ.
проти́вницы на́ши попра́ша̑ ст҃ыню твою.
быхомъ ꙗ҆́ко и҆спе́рва е҆гда̀ не владѣ на́ми, ни́же б̂ѣ наречен꙽но и҆́мѧ твое на на́съ·

Глв̑҇а, ѯ҃д·

Аще ѿвръзеши нб҃о, трепет̑ прїимꙋтъ ѿ тебе го́ры.
і҆ и҆ста́ютсѧ, ꙗ҆́ко та́етъ во́скъ ѿ лица̀ ѿгню̀.
и҆ пож꙽жет̑ ѻ҆́гнь сꙋпоста́ты твоѧ̀, и҆ ꙗвѣ бꙋ́дет̑ и҆́мѧ гн҃е въ сопроти́вных̑.
ѿ лица твое҆го ꙗ҆́зы́цы възмꙋтѧт̑сѧ.
е҆гда̀ сътвориши сла́внаа, трепетъ прїимꙋтъ ѿ тебѐ го́ры.
ѿ вѣка не слы́шахомъ, ниже ѻ҆́чи на́ши ви́дѣша б҃а ра́звѣ тебе.
и҆ дѣла̀ твоа̀ ꙗ҆́же сътвори́ши тръпѧ́щим꙽ т̂ѧ.
млс̑҇ть б̂о срѧ́щетъ творѧщих̑ пра́вдꙋ, и҆ пꙋтѝ твоа̀ помѧнꙋт꙽·

Се т̂ы раз꙽гнѣ́васѧ, и҆ м̂ы съгрѣшихомъ.
сего ради прельсти́хомсѧ, и҆ бы́хомъ ꙗ҆ко нечи́сти вс̂и мы, ꙗ҆́ко по́ртъ нечи́стъ, вс̂ѧ пра́вда на́ша.
и҆ ѻ҆падо́хомъ ꙗ҆́ко ли́ствїе, безако́нїѧ ради на́шего, ꙗ҆ко вѣтръ прїѧт̑ на́съ.
и҆ нѣсть призыва́ющаго и҆́мѧ твое, и҆ помѧнꙋ н̂ы под̑ѧ́ти т̂ѧ.
ꙗ҆ко ѿврати лицѐ свое ѿ на́съ, и҆ преда́сть н̂ы безако́нїѧ ради на́шего·

И҆ нн҃ѣ г҃и ѿц҃ъ нашъ е҆си т̂ы, мы́ же бе́рнїе, дѣ́ло рꙋкꙋ твое́ю всѝ м̂ы.
не прогнѣва́исѧ на́ ны ѕѣло̀, и҆ не помѧни во вре́мѧ безако́нїи на́шихъ.
и҆ нн҃ѣ призри ꙗ҆́ко лю́дїе твоѝ вси м̂ы·

Град̑ ст҃го твое҆го быс̑҇ пꙋстъ сїѻ҆нъ ꙗ҆ко и҆ пꙋстъ бы́сть і҆ерс̑҇ли́мъ на проклѧ́тїе.
до́мъ ст҃ыи на́шъ и҆ сла́ва ю҆же блс̑҇ви́ша ѿц҃ы на́ши, бы́сть ѻ҆гнемъ пож꙽жена, и҆ всѧ̀ сла́внаѧ падо́шасѧ.
и҆ ѻ҆ всемъ г҃и семъ претръпѣ и҆ премол̑҇ча̀, и҆ смири н̂ы ѕѣ́ло·

Глв̑҇а, ѯ҃е·

Ꙗвле́нъ бы́хъ не и́щꙋщимъ менѐ, ѻ҆брѣто́хсѧ не вопраша́ющимъ ѻ҆ мнѣ.
реко́хъ с̂е е҆смь, странѣ, и҆же не призва́ша и́мени мое҆го.
простро́хъ рꙋцѣ своѝ весь дн҃ь, к лю́демъ не покарѧ́ющимсѧ, и҆ проти́вꙋ гл҃ющемъ.
и҆же не ходи́ша пꙋте́мъ и҆́стин꙽нымъ, н̂о въ слѣдъ грѣхъ свои҆хъ·

Лю́дїе сїи раз꙽гнѣвающеи пред̑ лицемъ мои҆мъ прс̑҇но, тїи требы кладѧхꙋ въ ѻ҆гра́дѣхъ, и҆ кадѧхꙋ въ чре́пѣхъ бѣсомъ и́хже нѣсть.
и҆ въ гро́бѣхъ и҆ в пеще́рахъ лежа́тъ со́нїи ради, и҆же ꙗ҆дѧ́тъ мѧ́са свина́ѧ, и҆ ю́хи требъ, ѻ҆скверне́ни сосꙋди и҆хъ всѝ.
и҆же гл҃ютъ, ѿи҆дѝ ѿ менѐ и҆ не прикосни́сѧ мнѣ̀, ꙗ҆́ко чи́стъ е҆смь.
сѐ ды́мъ ꙗ҆́рости моеѧ, ѻ́гнь гори́тъ в нем̑ всѧ̀ дн҃и.
с̂е пи́шетсѧ предо мно́ю.
не ѹ҆мол̑҇чю дон꙽деже ѿда́мъ в нѣдра и҆мъ грѣхѝ и҆хъ, и҆ грѣхѝ ѿц҃ъ их̑, гл҃етъ г҃ь.
и҆же кажда́хꙋ на гора́хъ, и҆ на холмх̑ѣ ѹ҆кори́ша мѧ.
ѿда́мъ дѣлеса и҆хъ в нѣдра и҆мъ·

Та́ко гл҃етъ г҃ь.
и҆мже ѻ҆бразомъ ѻбрѣта́етсѧ зер̑҇но на гро́знѣ.
и҆ рекꙋт꙽, не погꙋбѝ е҆го, ꙗ҆́ко блс̑҇венїе е҆сть в нем̑.
та́ко сътворю̀ слꙋжа́щаго м̂и ра́ди, и҆ не и́мамъ погꙋби́ти сего ради всѣхъ.
і҆ и҆зведꙋ е҆же и҆зъ і҆а́кова племѧ̀, і҆ и҆же и҆зъ і҆ѹ́ды.
и҆ наслѣдѧтъ горꙋ̀ ст҃ꙋю мою, и҆ причастѧ́тъ и҆збраннїи моѝ и҆ рабѝ моѝ, и҆ вселѧ́тсѧ т̂ꙋ.
и҆ бꙋдꙋтъ в꙽ дꙋбра́вѣ ѻ҆гра́ды ста́домъ, и҆ де́брь а҆хор꙽скаѧ въ поко́ище говѧ́дом̑ людїи моих꙽, и҆же в꙽зыска́ша мене·

Вы́ же ѻ҆ста́вившеи м̂ѧ, и҆ забы́вшей горꙋ ст҃ꙋю мою.
и҆ готоваю҆щеи бѣсом̑ трапе́зꙋ, и҆сполнѧ́юще кꙋми́ромъ растворе́нїѧ.
а҆зъ преда́мъ ва́съ въ ѻ҆рꙋжїе, всѝ в̂ы сѣче́нїем̑ падетѐ·

Ꙗ҆́ко зва́хъ васъ и҆ не послꙋшасте, гл҃ахъ и҆ преслꙋшасте.
и҆ сътвори́сте лꙋка́вое предо мно́ю, и҆ егоже не въсхотѣхъ и҆зво́листе·

Сего ради тако гл҃етъ г҃ь.
с̂е рабо́тающеи ми наꙗ҆дѧт̑сѧ, вы́ же въза́лчете.
с̂е рабо́таю҆щеи ми напїютсѧ, вы́ же въжа́жд̑ете.
с̂е работающеи ми възра́дꙋют̑сѧ вы́ же посрамитесѧ.
с̂е рабо́тающеи ми възвеселѧ́тсѧ въ весе́лїи срд̑ца, вы́ же възопїете въ бо́лезни срд̑ца ва́шего, и҆ ѿ съкрꙋше́нїѧ дх҃ꙋ въспла́четесѧ.
ѻ҆ста́нетъ б̂о и҆́мѧ ва́ше въ насыще́нїе и҆з꙽бра́ннымъ мои҆мъ, ва́съ же и҆збїетъ г҃ь·

Рабо́тающим̑ же е҆мꙋ прозове́тсѧ и́мѧ но́во.
е҆же блс̑҇витсѧ на землѝ, блс̑҇вѧтъ б̂о б҃а и҆стин꙽на.
и҆ кленꙋщеисѧ на землѝ, кленꙋтсѧ бм҃ъ и҆́стин꙽нымъ.
забꙋдꙋтъ б̂о печа́ль свою прьвꙋю, и҆ не възы́идетъ и҆мъ на срд̑це·

Бꙋ́дет̑ б̂о нб҃о но́во, и҆ землѧ̀ но́ва, и҆ не помѧнꙋтъ прьвыхъ.
и҆ не възы́идетъ на срд̑це и҆хъ, н̂о ра́дость и҆ весе́лїе ѻ҆брѧ́щт̑ꙋ на не́и·

Ꙗ҆́ко с̂е а҆зъ творю̀ і҆ерс̑҇ли́мꙋ весе́лїе, и҆ лю́демъ мои҆мъ ра́дость.
и҆ весе́лїе бꙋдꙋ къ і҆ерс̑҇ли́мꙋ, и҆ възра́дꙋюсѧ ѻ҆ лю́дехъ мои҆хъ.
и҆ ксемꙋ не ѹ҆слы́шитсѧ в немъ гла́съ пла́ча, ни гласъ во́плѧ.
и҆ не бꙋдет꙽ т̂ꙋ младе́нецъ ни ста́рецъ, и҆же не наплънитъ лѣтъ свои҆хъ, бꙋдет̑ б̂о ю́ныи ста лѣтъ, ѹ҆мира́ѧи же грѣшникъ ста лѣтъ.
и҆ про́клѧтъ бꙋдетъ·

И҆ съградѧ́тъ домы̀, и҆ вселѧ́тсѧ.
и҆ насадѧт̑ виногра́ды, и҆ тїи и҆зъꙗ҆дѧт̑ жита̀ и҆хъ, и҆ не соградѧ́тъ, и҆ни вселѧт̑сѧ.
и҆ не наса́дѧтъ, і҆ и҆ни и҆зъꙗ҆дѧ́т꙽·

Под ним̑ б̂о дре́ва животнаго бꙋдꙋтъ людїи моих̑ дѣлеса̀, трꙋдъ свои҆хъ ѻ҆бет꙽шат̑.
і҆ и҆збра́ннїи моѝ не трꙋдѧтсѧ вот̑ще и҆ не поро́дѧтъ ча́дъ на проклѧ́тїе.
ꙗ҆́ко племѧ̀ блс̑҇вено е҆сть бм҃ъ, и҆ внꙋцы и҆хъ с ни́ми бꙋдꙋтъ.
и҆ бꙋдетъ преже възва́нїѧ и҆хъ, а҆зъ послꙋшаю и҆хъ.
е҆ще гл҃ещемъ и҆м꙽, рекꙋ что е҆сть·

Тогда̀ во́лци и҆ а́гньцы напасꙋтсѧ вкꙋпѣ, и҆ ле́въ ꙗ҆́ко во́лъ и҆з꙽зо́блетъ плѣвы.
змїѧ̀ зе́млю ꙗ҆́ко хлѣбъ.
не вредѧ́тъ ни и҆сказѧт̑ въ горѣ̀ ст҃ѣи моеи, гл҃етъ г҃ь·

Глв̑҇а, ѯ҃ѕ·

Тако гл҃етъ г҃ь, нб҃о прс̑҇тлъ мои, а҆ землѧ̀ под̑но́жїе но́гꙋ моею.
кїи хра́мъ съгради́те м̂и, и҆л̂и кое мѣсто поко́ища мое҆го.
вс̂е б̂о сътворѝ рꙋка̀ моѧ, и҆ с̂е е҆сть всѐ мое, гл҃етъ г҃ь·

И҆ на кого възрю̀, н̂о на кро́ткаго и҆ молчали́ваго, и҆ трепе́щꙋщаго словесъ моих̑.
безако́нник̑҇ же закала́ѧи телець, ꙗ҆́ко ѹ҆бива́ѧи ѱа̀·

И҆ приносѧ́и крꙋпы̀ пшеничны ꙗ҆́ко кро́вь свиню.
даѧй ѳимїамъ бѣлъ на па́мѧть, ꙗ҆́ко и҆ хꙋлѧ́и·

Сїи б̂о и҆з꙽бра́ша пꙋтѝ своѧ, и҆ ѻ҆гнꙋше́нїѧ и҆хъ ꙗ҆́же дш҃а их̑ и҆зво́ли.
и҆ а҆зъ съберꙋ рꙋга́нїѧ и҆хъ, и҆ грѣхѝ и҆хъ ѿда́мъ и҆мъ.
ꙗ҆ко възва́хъ ѧ҆̀ и҆ не послꙋшаша мене, гл҃ахъ.
и҆ преслꙋшаша.
и҆ сътвори́ша ѕло предо мною, и҆ егоже не хотх̑ѣ и҆зво́лиша·

Слы́шите гл҃ъ гн҃ь, трепещꙋщеи словесе е҆го.
рцѣте бра́тїа ненави́дѧщимъ васъ, и҆ гнꙋша́ющим̑сѧ.
да и́мѧ гн҃е просла́витсѧ, и҆ ꙗ҆вит̑сѧ ра́дость и҆хъ, и҆ ѻ҆ни посрамѧ́тсѧ·

Гла́съ во́плѧ ѿ града, глс̑҇а ѿ хра́ма бж҃їѧ, гласъ гн҃ь ѿда́юща ѿдаа́нїе съпротивѧ́щимсѧ·

Прежде ражд̑а́ю҆щи рожде́нїѧ, прежде пришествїѧ болѣзни рожества ѿбѣже, и҆ породѝ мꙋжескъ полъ.
кто е҆сть слы́шавъ си́цево, кто́ ли ви́дѣвъ си́це а҆ще е҆сть роди́ла землѧ̀ съ бо́лезнїю въ е҆ді́нъ дн҃ь, и҆ роди́сѧ страна̀ е҆ди́ною, ꙗ҆́ко поболѣ̀ и҆ родѝ сїѻ́нъ дѣти своѧ.
а҆зъ же да́хъ наде́жꙋ т̂ꙋ, и҆ не помѧнꙋ мене, рече г҃ь.
не сътворих̑ л̂и ѹ҆бо а҆зъ плодѧ́щеѧ, и҆ непло́две, рече г҃ь·

Радꙋитесѧ въкꙋпѣ съ і҆ерс̑҇лимомъ, и҆ тръжествꙋите в немъ вс̂и любѧ́щеи е҆го.
радꙋитесѧ въкꙋпѣ, ра́дꙋитесѧ всѝ е҆ли́цы пла́касте по нем꙽ да с꙽са́вше насы́титесѧ ѿ сес꙽цъ ѹ҆тѣше́нїѧ е҆го, да с꙽са́вше насы́титесѧ ѿ въхо́да сла́вы е҆го·

Ꙗ҆́ко с̂е гл҃етъ г҃ь, с̂е аз̑ съвращꙋ в нѧ̀ ꙗ҆́ко рѣкꙋ ми́ра, и҆ ꙗ҆́ко пото́къ потоплѧ́ющъ сла́вꙋ ꙗ҆зы́ком̑ дѣти и҆хъ на ра́мꙋ въз꙽дви́гнꙋтсѧ, и҆ на колѣнꙋ ѹ҆тѣшатсѧ.
ꙗ҆́коже кого мт҃и е҆го ѹ҆тѣша́етъ, та́коже и҆ а́зъ ѹ҆тѣшꙋ в̂ы.
и҆ въ і҆ерс̑҇лимѣ ѹ҆тѣшитесѧ, и҆ ѹ҆зрите и҆ възра́дꙋе҆тсѧ срд̑це ваше.
и҆ ко́сти ва́ша ꙗ҆́ко трава̀ прозѧ́бнꙋтъ.
и҆ позна́етсѧ рꙋка̀ гн҃ѧ чтꙋщимъ и҆̀, и҆ въс꙽претит̑ непокарѧ́ющимсѧ·

Се́ бо г҃ь ꙗ҆ко ѻ҆́гнь прїидетъ, и҆ ꙗ҆́ко бꙋрѧ ѻ҆рꙋжїе е҆го.
възда́ти ꙗ҆́ростїю ѿмще́нїѧ своѧ, и҆ запреще́нїе въ пла́мени ѻ́гньнѣ.
ѻ҆гнемъ б̂о гн҃имъ ѻ҆сꙋдит̑сѧ вс̂ѧ землѧ̀, и҆ ѻ҆рꙋжїемъ е҆го всѧ́ка плоть, мно́ѕи ꙗ҆́звени бꙋдт̑ꙋ гм҃ъ·

ѻ҆чистѧ́щеи же сѧ и҆ ѻ҆свѧща́ющеисѧ въ градѣхъ, и҆ пред̑ две́рми.
ꙗ҆́дꙋщеи мѧса свина, и҆ меръзость, и҆ мы́ш꙽, вкꙋпѣ поги́бнт̑ꙋ, рече г҃ь.
а҆з же дѣлеса и҆хъ и҆ разꙋмы их̑, приведꙋ̀ събра́ти вс̂ѧ страны̀ и҆ ꙗ҆зы́ки·

И҆ прїидꙋтъ и҆ ѹ҆зрѧ́тъ сла́вꙋ мою.
и҆ ѻ҆ста́влю на ни́хъ зна́менїѧ, и҆ послю̀ ѿ нихъ спасаемыхъ въ ꙗ҆зы́ки въ тарси́съ·

И҆ въ фꙋдъ, и҆ в лѷдъ, и҆ в мосо́хъ, и҆ въ ѳове́ль, и҆ въ е҆ла́дꙋ, и҆ въ ѻстровы да́лнѧѧ.
и҆же не слы́шаша и҆мени мое҆го, ни ст̑ꙋ видѣли сла́вы моеѧ, и҆ възвѣстѧт̑ сла́вꙋ мою въ ꙗ҆зы́цехъ·

И҆ приведт̑ꙋ бра́тїю вашꙋ ѿ всх̑ѣ странъ, даръ гв҃и, съ ко́ньми и҆ съ ѻ҆рꙋжїемъ, на колесницахъ м꙽щахъ подъ сѣнїю, въ ст҃ыи гра́дъ і҆ерс̑҇лимъ, рече г҃ь.
ꙗ҆́коже принесо́ша сн҃ове і҆и҆л҃еви жрътвы и҆хъ съ ѱалмы̀ въ до́мъ гн҃ь.
и҆ ѿ тѣхъ пои҆мꙋ себѣ жерца̀ и҆ левѷтъ рече г҃ь·

Ꙗ҆́коже б̂о нб҃о но́во, и҆ зем̑лѧ̀ но́ва, е҆же а҆зъ творю̀ пребꙋдетъ предо мно́ю, гл҃етъ г҃ь.
та́ко ста́нет̑ племѧ̀ ва́ше і҆ и́мѧ ва́ше·

И҆ бꙋдет̑ мс̑҇ць ѿ мс̑҇ца, и҆ сꙋбо́та ѿ сꙋбо́ты.
и҆ прїидетъ всѧка пло́ть, поклони́тисѧ предо мно́ю въ і҆ерс̑҇лимѣ, реч̑҇ г҃ь·

І҆ и҆зы́идт̑ꙋ и҆ ѹ҆зрѧтъ трꙋпы члчс̑҇ки, престꙋпи́вшихъ ѻ҆ мнѣ.
чрьвь б̂о и҆хъ не скончаетсѧ, и҆ ѻ́гнь и҆х꙽ не ѹ҆га́снетъ.
и҆ бꙋдꙋтъ въ позо́рь все́и пло́ти·

Коне́цъ кни́гъ прро̑҇ка і҆са́їѝ.
и҆́мать в себѣ̀ гла́въ, ѯ҃ѕ·