Библия (1581). [29] Иеремия

И҆Є҆РЄМИ́Ѧ ПР҃ОРКЪ

ГЛАВА̀· А҃

Словеса̀ і҆е҆ремїи прро̑҇ка, сн҃а хел̑҇кїева, ѿ сщ҃ен꙽ник꙽ и҆же быша̑ въ а҆наѳотѣ, в꙽ землѝ венїами́новѣ·

И҆же бы́сть сло́во гн҃е к немꙋ въ дн҃и ѻ҆сїѧ, сн҃а а҆ммо́нѧ цр҃ѧ і҆ѹ́дина, въ г҃і, лѣто црс̑҇тва е҆го·

И҆ бы́сть въ дн҃и і҆ѻ҆а҆ки́ма сн҃а ѻ҆сїина, цр҃ѧ і҆ѹ́дина.
даж̑ до сконча́нїѧ а҃і лѣта, седекїѧ цр҃ѧ і҆ѹ́дина.
да́же до преселе́нїѧ і҆ерс̑҇лим̑скаго.
въ мс̑҇ць, е҃·

И҆ бы́сть сло́во гн҃е къ мнѣ̀ рекꙋщи·

Пре́же не́же създах̑ т̂ѧ въ чре́вѣ познахъ т̂ѧ, и҆ пре́же не́же и҆зы́идеши ѿ ма́тери с̂и ѻ҆ст҃их̑ т̂ѧ, и҆ прро̑҇ка въ ꙗ҆зы́ки да́хъ т̂ѧ.
и҆ реко́хъ, сыи влд̑ко г҃и, с̂е не вѣмъ гл҃ати и҆же ѻ҆́трокъ е҆смь.
и҆ реч̑҇ г҃ь къ мнѣ̀, не моѕѝ гл҃ати и҆же ѻ҆́трокъ е҆смь.
ꙗ҆́ко на всѧ̀ и҆же послю̀ т̂ѧ и҆де́ши, и҆ всѧ̀ е҆ли́ка же повелю̀ тебѣ̀ гл҃еши.
не ѹ҆бо́исѧ ѿ лица̀ их̑, ꙗ҆́ко с тобо́ю е҆смь да и҆зба́влю т̂ѧ, рече г҃ь.
и҆ посла̀ г҃ь рꙋкꙋ свою̀ и҆ прикоснꙋсѧ ѹ҆сто́мъ мои҆мъ, и҆ рече къ мнѣ̀.
се да́хъ словеса моѧ̀ въ ѹ҆ста̀ твоѧ̀.
и҆ се поста́вихъ т̂ѧ дне́сь на ꙗ҆зы́ки и҆ на црс̑҇тва.
да и҆стор꙽гнеши и҆ разори́ши, и҆ расточи́ши и҆ раз꙽дрꙋши́ши, и҆ съзида́еши и҆ насади́ши·

И҆ бы́сть сло́во гн҃е къ мнѣ̀ рекꙋщи, чт̂о т̂ы ви́диши і҆е҆ремїа·

И҆ реко́хъ, же́злъ бдѧ́щь а҆зъ ви́жꙋ.
и҆ реч̑҇ г҃ь къ мнѣ̀, бл҃го ви́дѣлъ е҆си, и҆же хощꙋ аз̑ бдѣти на словеси мое҆мъ да сътворю т̂о·

И҆ быс̑҇ сло́во гн҃е ко мнѣ в꙽торицею гл҃ѧ, чт̂о т̂ы ви́диши.
и҆ реко́хъ, горне́ць кипѧ́щь а҆зъ ви́жꙋ, и҆ лице е҆го ѿ лица̀ сѣвера.
и҆ рече г҃ь къ мнѣ̀, ѿ сѣвера ꙗ҆ви́тсѧ лꙋка́во на вх̑сѣ ѻ҆бита́ющих̑ на землѝ.
зане с̂е а҆зъ съзовꙋ всѧ̀ племе́на црс̑҇твъ сѣ́верных̑, рече г҃ь.
и҆ прїидꙋтъ и҆ поста́витъ е҆дінъ ко́жд̑о престо́лъ свои, въ вхо́дѣхъ вра́том꙽ і҆е҆рлс̑҇мꙋ, и҆ на всѣхъ стѣна́хъ е҆го ѻ҆́крестъ, и҆ на всѣхъ гра́дѣхъ і҆ѹ́диныхъ.
и҆ въз꙽гл҃ю сꙋди моѝ с ни́ми на всѧ̀ лꙋка́в꙽ства и҆хъ, и҆же ѻ҆ста́виша м̂ѧ.
и҆ пожро́ша бого́мъ чю́ждим꙽ и҆ поклони́шасѧ дѣ́ломъ рꙋ́кꙋ свое҆ю·

Ты же препоѧши чре́сла твоѧ и҆ ста́ни, и҆ гл҃и к ним̑ всѧ̀, и҆же а҆зъ заповѣ́даю тебѣ̀.
не ѹ҆бо́исѧ ѿ лица̀ и҆хъ, ни б̂о боѧ́тисѧ тебѣ сътворю̀ лица̀ и҆хъ.
а҆зъ б̂о да́хъ т̂ѧ дне́сь въ гра́дъ твердъ, и҆ въ сто́лпъ желѣ́зныи, и҆ въ стѣны мѣ́дѧны на все́и землѝ цр҃їи і҆ѹ́динъ, нача́л꙽ницы е҆го и҆ сщ҃енницы, и҆ лю́ди зе́мъстїи, и҆ бранѧ́тсѧ на́ тѧ и҆ не премо́гꙋт꙽.
и҆же с тобо́ю а҆зъ е҆смь рече г҃ь, да и҆зба́влю т̂ѧ·

Глв̑҇а, в҃·

И бы́сть сло́во гн҃е къ мнѣ̀ рекꙋщи.
и҆ди и҆ възопѝ въ ѹ҆́ши і҆ерс̑҇лимꙋ рекꙋщи, сїа рече г҃ь, въспомѧнх̑ꙋсѧ е҆смь к тебѣ ми́лꙋющи ю҆́ность твою, и҆ любы̀ ѻ҆брꙋче́нїѧ твое҆го, когда̀ слѣдова́лъ е҆си менѐ в꙽ пꙋсты́ни и҆же не просѣ́етсѧ.
ст҃ыи і҆и҆л҃ь г҃ꙋ перве́нцы пло́довъ е҆го, вси и҆же пожираютъ е҆го съгрѣша́ютъ.
зла́ѧ прїидꙋтъ на них̑, рече г҃ь·

Ѹ҆слы́шите сло́во гн҃е дом̑ і҆а́ковль, и҆ вси племе́на до́мꙋ і҆и҆л҃ева·

Сїѧ рече г҃ь, чт̂о ѻ҆брѣто́ша ѿц҃ы ваши на́ мѧ безако́н꙽но, и҆же ѹ҆далишас̑҇ ѿ менѐ, и҆ ходи́ша по сꙋетѣ, и҆ ѻ҆сꙋети́шасѧ, и҆ не реко́ша гд̂ѣ е҆сть г҃ь, и҆же и҆зыити нас̑҇ сътвори́лъ ѿ землѧ̀ е҆гѷпет̑скїѧ.
и҆же преве́лъ нас̑҇ по пꙋсты́ни, по землѝ не ѻ҆бита́ннои и҆ не пꙋтнѣи, по землѝ жа́ж꙽днѣи, и҆ ѻ́бразомъ смрьтным̑, по землѝ по не́и же не и҆сходил̑҇ мꙋ́жъ ни ѻ҆бита́лъ чл҃къ·

И҆ въведо́хъ вас̑҇ въ зе́млю кармели, да и҆зъꙗ҆ди́те плод̑ е҆го, и҆ бл҃гаѧ того.
и҆ въшед̑ши ѻ҆скверни́ли е҆стѐ зе́млю мою и҆ достоѧ́нїе мое поста́вили е҆стѐ в꙽ поноше́нїе.
сщ҃енницы не реко́ша, гдѣ е҆сть г҃ь, и҆ держа́щїи зако́нъ не вѣдѣша м̂ѧ.
и҆ пасты́ри престꙋпи́ли сꙋть на́ мѧ, и҆ прро̑҇цы прро̑҇чествова́ша въ ваа́ла, і҆ и́доломъ послѣдоваша<.>

Сего ра́ди е҆ще сꙋдом̑ препрю́сѧ с вами реч̑҇ г҃ь, и҆ съ сн҃ы ва́шими препрюсѧ̀·

Преи҆дѣте въ ѻ҆стро́вы хетим̑, и҆ види́те.
и҆ в кедар̑҇ посли́те, и҆ смотри́те велми а҆ще сътворено е҆сть таковѣ.
а҆ще премѣнили ꙗ҆́зыцы бг҃ы своѧ̀, і҆ и҆стинно тїи не сꙋть бози·

Люд̑и̑е бо моѝ премѣниша сла́вꙋ мою на и҆́дола·

Ѹ҆страши́тесѧ нб҃са ѻ҆ то́м꙽, и҆ вра́та е҆го ѹ҆ны́ите вельми, реч̑҇ г҃ь.
дво́е б̂о ѕл̂о сътвори́ша лю́ди мои, менѐ ѻ҆ста́виша и҆сто́чникъ воды̀ жи́вы, і҆ и҆скопа́ша себѣ̀ кладен꙽ца разоре́ны и҆же съдръжа́ти не възмогт̑ꙋ воды.
е҆да̀ рабъ е҆сть і҆и҆л҃ь, и҆ли домоча́дець.
вскꙋ́ю сътворенъ е҆си въ плѣне́нїе, на не́го рыка́ша льво́ве, и҆ възда́ша глас̑҇ свои.
поста́виша зе́млю е҆го въ пꙋсты́ню, и҆ гра́ди е҆го съж꙽же́ни сꙋть, и҆ нѣсть и҆же ѻ҆бита́ютъ въ ни́хъ.
сн҃ове же мем̑ѳе́и, и҆ тафне́и, разори́ша тебѐ даже до пробо́ра.
е҆да̀ ли не то сътворе́но е҆сть тебѣ, и҆же ѻ҆пꙋсти́лъ е҆си г҃а б҃а твое҆го в то вре́мѧ и҆же вожд̑а́ше т̂ѧ по пꙋтѝ.
и҆ нн҃ѣ чт̂о тебѣ̀, и҆же хо́щеши на пꙋтѝ е҆гѷтет̑стѣмъ, да пїеши во́дꙋ мꙋтнꙋ.
и҆ чт̂о тебѣ̀ с пꙋтемъ а҆сѷрїиским̑, да пїеши во́дꙋ рѣ́чнꙋю.
ѻ҆бличат̑ т̂ѧ лꙋка́в꙽ства твоѧ, и҆ ѿше́ствїе твое запрети́тъ тебѣ.
вѣж́дь и҆ ви́дѣ ꙗ҆́же ѕл̂о и҆ го́рко е҆сть ѿпꙋсти́ти тебѣ г҃а б҃а твое҆го, и҆ не быти страхꙋ е҆го пред̑ тобо́ю, рече г҃ь силъ.
ѿ вѣка съкрꙋши́лъ е҆си и҆́го мое, раздра́л꙽ е҆си ѹ҆́зы моа, и҆ ре́клъ е҆си, не слꙋжꙋ.
въ всѧ́къ б̂о хо́лмъ въз꙽дви́гнꙋтыи и҆ по всѧ́комꙋ дре́вꙋ листвѧнꙋ т̂ы распростре́ши блꙋ́дъ.
а҆зъ же насадих̑ т̂ѧ виноград̑ и҆з꙽бранъ, всѧ́ко сѣмѧ и҆́стин꙽но, како б̂о превраще́нъ е҆си мнѣ̀ въ стропот̑ныи виногрд̑а чюжд̑їи·

А҆ще ѹ҆мы́ешисѧ нитромъ, и҆ ѹ҆мно́жиши тра́вы бориѳовы.
поро́чна е҆си въ безако́нїи твое҆мъ пред̑ мно́ю, рече г҃ь б҃ъ.
како гл҃еши нѣсмь поро́чна, по ваа́лꙋ не ходи́ла е҆смь.
видѣ пꙋти твоѝ въ ѹ҆долѣ е҆н꙽нонъ, ви́жд̑ь чт̂о сътворила е҆си.
ходокъ лег꙽кїи нарѧжаю҆щи пꙋтѝ своа̀.
ѻ҆нагръ ѻ҆бы́чен꙽ въ пꙋсты́ни, въжделѣ́нїе дш҃а свое́ѧ привлеклъ вѣтръ люб꙽ви свое́ѧ.
ничто́же ѻ҆братитъ е҆ѧ.
вс̂и и҆же и҆щт̑ꙋ е҆ѧ не ѻ҆скꙋдѣютъ, в не́мощехъ еѧ̀ ѻ҆брѧ́щт̑ꙋ еѧ̀.
въз꙽дръжи но́гꙋ твою̀ ѿ наго́ты, и҆ горта́нь твои ѿ жа́жд̑и.
и҆ рекла е҆си, ѿчаа́хсѧ н̂и вочто́же сътворю.
и҆ възлю́бихъ и҆́стин꙽но чю́ждихъ, и҆ по тѣхъ похожꙋ.
ка́ко постыдѣсѧ та́ть е҆гда̀ и҆зымает̑сѧ та́ко посты́дни сꙋть до́мъ і҆и҆л҃евъ тїи, и҆ цр҃и и҆хъ нача́лницы и҆ сщ҃ен꙽ницы и҆ про̑҇рцы их̑, рекꙋщи дре́вꙋ, ѿц҃ъ мо́и е҆си т̂ы, и ка́мени, ты м̂ѧ родил̑҇ е҆си.
ѿврати́ша ѿ менѐ стопы̀ а҆ не лице.
и҆ въ времѧ ѻ҆слабленїѧ свое҆го рекꙋтъ, въста́ни і҆ и҆зба́ви на́съ·

Гдѣ̀ сꙋть бо́ѕи твоѝ ꙗ҆́же сътвори́лъ е҆си тебѣ̀, да въста́нꙋтъ і҆ и҆зба́вѧт꙽ т̂ѧ въ вре́мѧ ѻ҆слабле́нїѧ твое҆го.
по число́мъ б̂о гра́дом̑ твоим̑, бѣхꙋ бо́ѕи твоѝ, ѽ і҆ѹ́до.
что хо́щете съ мно́ю сꙋдомъ прѣти, вси ѻ҆ста́вили е҆сте м̂ѧ, реч̑҇ г҃ь.
сꙋе́тно б̂о бихъ сн҃ы ва́ша, наказа́нїѧ не въспрїѧ́ша.
пожре ме́чь ва́шъ прро̑҇кы ва́ша, ꙗ҆́ко ле́въ и҆ гꙋби́тель ро̑ ва́ш꙽.
в꙽немлите сло́во гн҃е, е҆да ли е҆ді́ненїе сътворе́нъ е҆смь і҆и҆л҃ю, и҆ли землѧ̀ неплод̑на.
вскꙋ́ю б̂о рече по́лкъ мо́и.
ѿидо́хом̑, и҆ не прїидем̑ ѿселе к тебѣ̀.
е҆да ли забꙋ́детъ дв҃а красотꙋ свою̀, и҆ли ѻ҆брꙋ́чница мони́ста пе́рьсїи своих̑.
лю́дїе бо моѝ забы́ша менѐ дн҃и безъчислени·

Чт̂о си́лꙋешисѧ бл҃гъ показа́ти пꙋть твои, и҆ на и҆ска́нїе любви, и҆же наипаче лꙋка́въствъ твоих̑ наѹ҆чи́ла е҆си пꙋти твоѧ̀, и҆ въ кри́лх̑ѣ твои҆хъ ѻ҆брѣтена е҆сть кро́вь дш҃ъ ѹ҆богихъ и҆ непови́н꙽ныхъ.
не в ро́вх̑ѣ ѻ҆брѣтохъ их̑.
н̂о въ всѣхъ и҆же вы́ше памѧтова́хъ, и҆ рекла е҆си.
безъ грѣха и҆ непови́нна а҆зъ е҆смь, и҆ сего ради ѿврати́сѧ ꙗ҆́рость твоѧ̀ ѿ мене.
с̂е а҆зъ сꙋдомъ прѣчю с тобо́ю, сего ради чт̂о рекла е҆си, не съгрѣших̑ ко́ль гнюсна сътворе́на е҆си ѕѣ́ло ѿвраща́ющи пꙋтѝ твоѧ̀·

И҆ ѿ е҆гѷпта постыди́шис̑҇, ꙗ҆́ко постыдѣна е҆си ѿ а҆сꙋра.
и҆же і҆ ѿ тоа̀ и҆зы́идеши, и҆ рꙋцѣ твоѝ бꙋдꙋтъ на главѣ̀ твое́и.
ꙗ҆́ко съкрꙋшѝ г҃ь надѣа́нїе твое, и҆ ничто и҆́маши преспѣва́нно·

Глв̑҇а, г҃·

Въ ѻ҆бщеи притчи гл҃етсѧ.
а҆ще ѿпꙋстит꙽ мꙋжъ женꙋ̀ свою̀, и҆ ѿходѧ́щи ѿ него въведет̑ мꙋжа и҆́наго, е҆да ли ѻ҆братит̑сѧ к неи ктомꙋ̀.
е҆да̀ не поро́чна бꙋ́детъ и҆ сквернена жена̀ т̂а·

Тыж̑ съблꙋди́ла е҆си съ любов꙽ными мно́гими, ѻ҆баче ѻ҆брати́сѧ къ мнѣ̀, рече г҃ь, азъ воспрїимт̑ꙋ т̂ѧ.
въз꙽дви́гни ѻ҆́чи твоѝ на ѹ҆правленїе и҆ виждъ нн҃ѣ гдѣ̀ простерта е҆си, на пꙋтехъ сѣдѧ́щи ждꙋщихъ ꙗ҆́ко раз̑бо́иникъ въ пꙋсты́ни.
и҆ ѻ҆скверни́ла е҆си зе́млю въ любодѣѧ́них̑, и҆ въ лꙋкав̑҇ствѣхъ твои҆хъ.
сеѧ̀ ради ве́щи въз꙽дръжа́ны сꙋть ка́плѧ дожд̑евныа и҆ роса̀ вече́рнѧ, и҆ не бы́сть.
челож̑ жены̀ блѧди́вы сътворено е҆сть тебѣ̀, не хотѣла е҆си постыдѣтисѧ·

Сего ради въ толи́цѣ ѿселѣ въз꙽зови м̂ѧ ѿц҃ъ мои, во́ждь дв҃ьства мое҆го т̂ы е҆си.
е҆да л̂и раз̑гнѣ́ваешис̑҇ въ вѣки, и҆л̂и насто́иши до конца.
с̂е гл҃ала е҆си, и҆ сътвори́ла е҆си зла́ѧ и҆ могла е҆си·

И҆ рече г҃ь къ мнѣ̀ въ дн҃и і҆ѻсїѧ цр҃ѧ.
е҆да̀ ви́дѣлъ е҆си и҆же сътвори сꙋпоста́т̂а і҆и҆л҃ь.
и҆детъ сама̀ себѣ̀ на всѧкꙋ горꙋ̀ высо́кꙋ, и҆ под̑ всѧко дре́во листвѧно, и҆ ѻ҆блꙋдъствована е҆сть т̂ꙋ.
і҆ е҆гда̀ сътворѝ сїа, рекох̑ ко мнѣ ѻ҆братисѧ, и҆ нѣсть ѻ҆бращена·

И҆ ви́дѣ престꙋпница сестра еѧ̀ і҆ѹ҆де́ѧ и҆же того ради чт̂о ѻ҆блꙋжена бы́сть сꙋпоста́та і҆и҆л҃ева, ѿпꙋстих̑ еѧ̀, и҆ дахъ е́й кни́гꙋ распꙋс꙽тнꙋю.
и҆ не ѹ҆боѧ́сѧ престꙋпница і҆ѹ҆де́ѧ сестра̀ еѧ̀, н̂о и҆де и҆ съблꙋдила е҆сть е҆ще и҆ та̀.
и҆ легостїю блꙋженїѧ свое҆го ѻ҆сквер꙽ни землю, и҆ съблꙋдила е҆сть съ ка́менемъ и҆ съ древом̑, и҆ въ всѣхъ сих̑ нѣсть ѻ҆бращена ко мнѣ̀, престꙋпница сестра еѧ̀ і҆ѹ҆де́ѧ въ всемъ срд̑цы свое҆мъ.
н̂о въ л꙽жꙋ, рече г҃ь·

И҆ рече г҃ь къ мнѣ̀ ѻ҆правдала дш҃ꙋ свою сꙋпоста́та і҆и҆л҃ь, подо́бїем꙽ престꙋп́ницы і҆ѹ҆де́и.
и҆дѝ и҆ възъпѝ словеса̀ т̂а проти́вꙋ сѣ́вера, и҆ рече́ши·

ѻ҆братис̑҇ сꙋпоста́та і҆и҆л҃ь, рече г҃ь.
и҆ не ѿвра́щꙋ лицѐ моѐ ѿ ва́съ ꙗ҆́ко ст҃ъ а҆з꙽ рече г҃ь, и҆ не прогнѣ́ваюсѧ въ вѣкы·

ѻ҆ба́че вѣжд̑ъ безако́нїе твое, и҆же въ г҃а б҃а твое҆го престꙋпи́ла е҆си.
и҆ расточи́ла е҆си пꙋти твоѧ̀ чю́жд̑им꙽, под̑ всѧ́кымъ дре́вомъ ли́ствѧнымъ.
и҆ гла́са мое҆го не слы́шала е҆си, реч̑҇ г҃ь.
ѻ҆брати́тесѧ сн҃ове ѿвраща́ющеисѧ рече г҃ь.
ꙗ҆́ко аз̑ мꙋжъ ва́шъ, и҆ поимꙋ в̂ы е҆ди́ного ѿ град̑, и҆ дв̂а ѿ племене.
и҆ въведꙋ̀ ва́съ въ сїѻ́нъ, и҆ да́мъ вам̑ пасты́ри по срд̑цꙋ мое҆мꙋ, и҆ пасꙋтъ ва́съ разꙋмомъ и҆ ѹ҆че́нїемъ·

Є҆гдаж̑ ѹ҆множе́ни бꙋ́дете и҆ възрастетѐ въ землѝ въ дн҃и т̂ѣ, рече г҃ь.
не рект̑ꙋ да́лѣ, кїѻ́тъ завѣта гн҃ѧ.
ни в꙽зы́детъ на срд̑це, ни въспомѧнꙋтсѧ того, ни л̂и посѣти́тсѧ, ниже бꙋдетъ да́ле.
въ вре́мѧ т̂о въз꙽зовт̑ꙋ і҆е҆рс̑҇ли́ма прс̑҇тлъ гн҃ь, и҆ съберт̑ꙋсѧ к немꙋ вс̂и ꙗ҆́зы́ци въ и҆мѧ̀ гн҃е, въ і҆ерс̑҇лим̑.
и҆ не похо́дѧт̑ въ строптив꙽ствѣ срд̑ца свое҆го ѕлѣ́ишаго·

Въ дн҃ехъ тѣхъ и҆де́тъ дом̑ і҆ѹ́динъ к꙽ до́мꙋ і҆и҆л҃евꙋ, и҆ прїидт̑ꙋ в꙽кꙋпѣ ѿ землѧ̀ сѣверны, и҆ къ землѝ ю҆́же да́хъ ѿц҃емъ ва́шим̑.
а҆́з꙽ же рѣхъ, ка́ко положꙋ т̂ѧ въ сн҃ове, и҆ възд̑амъ тебѣ зе́млю пожелѣнїа, достоѧ́нїа пресвѣтла вои҆н꙽ством̑ ꙗ҆зы́ческим꙽·

и҆ реко́хъ, ѿц҃а въз꙽зове́ши м̂ѧ, и҆ по мнѣ̀ вни́ти не преста́неши.
н̂о ка́ко а҆́ще не по́мнитъ жена̀ любо́вника свое҆го.
та́ко не помнѣлъ м̂ѧ дом̑ і҆и҆л҃евъ, рече г҃ь·

Глс̑҇а в꙽ пꙋтехъ слы́шанъ е҆сть, пла́чъ и҆ рыда́нїе сн҃овомъ і҆и҆л҃евом꙽, ꙗ҆́ко без꙽зако́ненъ сътвори́ша пꙋть сво́и.
забвени сꙋть г҃ꙋ б҃ꙋ свое҆мꙋ·

Въз꙽врати́тесѧ сн҃ове ѿвраща́ющеисѧ, і҆ и҆сцѣлю ѿвраще́нїа ва́ша·

Се м̂ы и҆де́мъ к тебѣ, т̂ы бо е҆си г҃ь б҃ъ нашъ·

И҆стин꙽но л꙽жи́ви бы́ша хол̑҇ми, и҆ мно́жество гора́мъ.
и҆стин꙽но въ г҃а б҃а на́шего спс̑҇нїе і҆и҆л҃ево·

Стꙋдъ и҆зъꙗ҆́л꙽ трꙋ́дъ ѿц҃ъ на́шихъ ѿ ю́ности на́шеѧ.
стада и҆хъ и҆ скоты и҆хъ, сн҃ве и҆хъ и҆ дще́ри и҆хъ.
спи́мъ в꙽ постыдѣнїи нашемъ, и҆ покры́етъ насъ безгла́сїе на́ше.
ꙗ҆́ко г҃ꙋ б҃ꙋ на́шемꙋ съгрѣши́хомъ м̂ы и҆ ѿц҃ы на́ши, ѿ ю́ности нашеѧ да́же до сего дн҃е.
и҆ не слы́шахомъ гла́са г҃а б҃а на́шего·

Глв̑҇а, д҃·

Аще въз꙽врати́шисѧ і҆и҆л҃ь рече г҃ь, къ мн̂ѣ ѻ҆братис̑҇.
а҆ще ѿи́меши съгрѣше́нїѧ твоѧ, ѿ лица̀ моег̑҇ не подви́жешисѧ.
і҆ клене́шисѧ, живетъ гь въи́стин꙽нѣ и҆ в сꙋдѣ и҆ въ пра́вдѣ.
и҆ блс̑҇вѧтъ е҆го ꙗ҆зы́цы и҆ въс꙽хва́лѧтъ·

Сїѧ б̂о рече г҃ь, мꙋжꙋ і҆ѹ́динꙋ и҆ ѻ҆бита́телю і҆ерс̑҇ли́млю.
понови́те себѣ поле, и҆ не хощи́те сѣѧ́ти на трънїи.
ѻ҆брѣж́тесѧ въ г҃а, и҆ ѿи҆мѣте препꙋ́сїѧ срд̑цъ ва́ших̑ мꙋжи і҆ѹ́дины, и҆ ѻ҆бита́тели і҆ерс̑҇ли́мꙋ.
не ѹ́бо и҆схо́дит̑ ꙗ҆́ко ѻ́гнь гнѣвъ мои, и҆ разгоритсѧ.
и҆ не бꙋдет̑ ктомꙋ ѹ҆гаси́ти, ради лꙋка́в꙽ствъ помышле́нїи ва́ших̑.
възвѣсти́те въ і҆ѹ҆де́и, и҆ въ і҆ерс̑҇ли́мѣ слыша́нїе сътворите, гл҃ите, и҆ въспо́ите трꙋбо́ю на землѝ.
възопїите крѣпко, и҆ рьцѣте.
съвокꙋпи́тесѧ и҆ вни́демъ въ грады твер꙽ды, дви́гнете зна́мѧ въ сїѻ́нъ·

Съкрѣпи́тесѧ не хо́щете ста́ти, и҆же лꙋка́во а́з꙽ и҆зведꙋ ѿ сѣвера, і҆ сътренїе вели́ко·

Взы́иде ле́въ ѿ ло́жа свое҆го, и҆ хи́щ꙽никъ люд̑скїи въз꙽дви́жесѧ.
и҆зше́лъ е҆сть ѿ мѣста свое҆го да поста́витъ зе́млю твою въ пꙋсты́ню, и҆ гра́ди твоѝ ѻ҆пꙋстѣютъ ѻ҆ста́вшеи безъ ѻ҆бита́телѧ·

На то́мъ препоѧшитесѧ врѣтищем̑, пла́чите и҆ рыда́ите, и҆же нѣсть ѻ҆браще́нъ гнѣвъ ꙗ҆́рости гн҃ѧ ѿ васъ·

И҆ бꙋдетъ въ дн҃ь тои рече г҃ь, поги́бнет̑ срд̑це цр҃ево и҆ срд̑ца нача́лникомъ, и҆ ѹ҆жаснꙋтсѧ сщ҃енницы, и҆ прро̑҇цы мыслїю възнесꙋтсѧ.
и҆ рекохъ, ѻ́хъ ѻ́хъ ѻ҆́хъ, г҃и бж҃е.
е҆да ѻ҆больсти́лъ е҆си люди сїа, і҆ерс̑҇ли́ма рекꙋщи, ми́ръ бꙋдет̑ вамъ.
и҆ с̂е прїиде мечь да́же до дш҃а.

Въ времѧ т̂о речетсѧ лю́дем꙽ симъ і҆ерс̑҇ли́мꙋ, вѣтръ горѧ́щїи по пꙋтехъ и҆же сꙋть по пꙋсты́ни пꙋтѝ дщери людїи моих̑, не к꙽ вѣѧнїю ни къ ѻ҆чище́нїю.
дх҃ъ по́лнъ ѿ си́хъ прїиде мнѣ.
и҆ нн҃ѣ а҆зъ, възъгл҃ю сꙋды моѝ с ни́ми.
с̂е ꙗ҆́ко ѻ́блак꙽ възы́идет꙽, и҆ ꙗ́ко ви́хръ колеса̀ е҆го быстрѣе ѻ҆рло́въ ко́ни е҆го·

Го́ре нам̑ ꙗ҆́ко ѻ҆пꙋстѣхомъ.
ѹ҆мыи ѿ лꙋка́въства срд̑це твое і҆ерс̑҇лимъ, да сп҃сенъ бꙋдеши.
доко́лѣ поживꙋтъ в꙽ тебѣ помышле́нїѧ бѣдны.
глас̑҇ б̂о възвѣще́ныи ѿ да́на, и҆ вѣдомъ сътворѧ́ющи и҆́долъ ѿ горы̀ е҆фрѣмлѧ<.>

Рцѣте ꙗ҆зы́комъ, сѐ слышано ес̑҇ въ і҆ерс̑҇ли́мѣ, стра́жи прїити ѿ зем̑лѧ̀ да́лнѧѧ, и҆ да́ти на гра́ды і҆ѹ́дины гла́съ свои·

ꙗ҆́ко стра́жи селнїи сътворе́ни сꙋть нань ѻ́крс̑҇тъ, ꙗ҆́же м̂ѧ къ гнѣвꙋ прогнѣваша, реч̑҇ г҃ь·

Пꙋтѝ твоѧ и҆ помышле́нїѧ твоѧ сътвори́ша тебѣ сїѧ.
т̂а лꙋка́ваа твоѧ ꙗ҆же го́рка, и҆же прикоснꙋсѧ срд̑цꙋ твое҆мꙋ·

Чрево мое чрево мое болѣ м̂ѧ, чю́въства срд̑ца мое҆го смꙋще́ни сꙋть въ мн̂ѣ.
не ѹ҆молчю ꙗ҆́ко гласъ трꙋбы̀ ѹ҆слы́шала дш҃а моѧ во́пль ра́ти.
сътренїе на сътре́нїе възва́но бысть, ѻ҆пꙋстѣн꙽на е҆сть всѧ землѧ̀.
ѹ҆стремлен꙽но и҆ ѻ҆пꙋстѣн꙽но жи́лище мое скоро ко́жи мое.
и҆ доко́лѣ зрю̀ бѣжа́ща, слы́шꙋ гласъ трꙋбы̀.
и҆же бꙋѝ лю́ди моѧ мене не позна́ша.
сн҃ове безꙋмни сꙋть и҆ бѣсны.
мꙋдры сꙋть да сътворѧ́ютъ ѕла́ѧ, бл҃гоже твори́ти не позна́ша·

Зрх̑ѣ зе́млю, и҆ сѐ праз̑на бы́сть и҆ непотребна.
и҆ нб҃съ, и҆ не бѣ свѣтлость в нихъ.
ви́дѣхъ го́ры и҆ се гиба́хꙋсѧ, и҆ всѝ хлъми възмꙋти́шасѧ.
възрх̑ѣ, и҆ се не бѣ чл҃ка.
и҆ все летѧ́щее нб҃си ѿи́де.
зрѣхъ и҆ с̂е карме́ль пꙋстъ, и҆ вси гра́ди е҆го разоре́ни сꙋть ѿ лица гн҃ѧ, и҆ ѿ лица̀ гнѣва ꙗ҆́рости е҆го·

Сїа б̂о реч̑҇ г҃ь, пꙋста̀ бꙋдетъ всѧ землѧ̀, н̂о и҆стлѣнїѧ не сътворю̀.
въс꙽плачет̑ землѧ̀ и҆ поскорбѧ́тъ нб҃са съвы́ше, сего рад̑и̑ и҆же гл҃алъ е҆смь·

Помы́слих̑, и҆ не жалѣхъ того, ни ѿвраще́нъ е҆смь ѿ него.
ѿ гла́са ꙗ҆здѧ́щихъ, и҆ посыла́ющихъ стрѣ́лы бѣжитъ всѧк̑҇ гра́дъ, и въшли сꙋть в꙽ щѣли.
всѝ гра́ди ѻ҆ста́влени сꙋть, и҆ не ѻ҆битает̑ в нихъ чл҃къ.
ты́ же запꙋстѣн꙽на чт̂о сътвори́ши.
е҆гда ѻ҆блече́шисѧ въ багрѧни́цꙋ, и҆ ѹ҆краше́на бꙋдеши мони́сты зла́тыми, і҆ и҆спестри́ши сти́бїем̑ ѻ҆́чи твоѝ, сꙋетно ѹ҆краша́ешисѧ, ѹ҆ничижи́ша б̂о тѧ любо́вницы твоѝ, дш҃ꙋ твою пои́щт̑ꙋ.
гласъ б̂о ꙗ҆́ко родѧ́щїѧ слы́шахъ, тѣсноты̀ ꙗ҆́ко ѻ҆тро́чица родѧ́щи.
гласъ дще́ри сїѻ́нѧ междꙋ мрꙋщими, и҆ рас꙽простира́ющи рꙋцѣ своѝ.
го́ре мнѣ и҆же ѻ҆скꙋдѣ дш҃а моѧ·

ѹ҆бїеныхъ ради·

Глв̑҇а, е҃·

Ýбыидѣте пꙋтѝ і҆ерс̑҇лим̑скїа, и҆ възри́те, и҆ промы́слите, і҆ и҆щѣте на площа́дѣхъ е҆го.
и҆ егда̀ ѻ҆брѧ́щете мꙋжа творѧ́ща сꙋдъ, і҆ и́щꙋща вѣры, и҆ млс̑҇рдъ бꙋдꙋ е҆мꙋ.
да а́ще па́ки рекꙋтъ живет̑ г҃ь, и҆ т̂о лжи́во кленꙋтсѧ·

Ги҃ ѻ́чи твоѝ зрѧ́тъ вѣрꙋ.
би́лъ е҆си и҆хъ, и҆ не болѣша.
съкрꙋшилъ е҆си их̑, и҆ ѿринꙋли въсприѧ҆ти наказа́нїе.
ѻ҆жести́ша лица̀ своѧ выше ка́мени, и҆ не хотѣша ѻ҆брати́тисѧ.
а҆з же рѣхъ, ѹ҆́бо ѹ҆боги сꙋть и҆ бꙋ́и, не вѣдꙋщи пꙋтѝ гн҃ѧ, и҆ сꙋда б҃а свое҆го.
и҆дꙋ̀ бо къ дръжа́внымъ и҆ гл҃ю и҆мъ, тїи б̂о позна́ша пꙋть гн҃ь, и҆ сꙋдъ б҃а свое҆го.
и҆ сѐ на́ипаче сїи съкрꙋши́ша и́го, и҆ растерго́ша ѹ҆́жи.
сего ра́ди поби́лъ их̑ ле́въ ѿ лѣса, и҆ во́лкъ къ ве́черꙋ погꙋби и҆хъ.
па́рдосъ бдѧ́щъ на гра́дх̑ѣ и҆хъ, и҆ всѧкъ же и҆сходѧщ꙽ ѿ нихъ бꙋдетъ ꙗ҆т꙽, и҆же многа сꙋть престꙋпленїа и҆хъ, покрѣплены сꙋть ѿвращенїѧ и҆хъ.
на кое҆мъ млс̑҇рдъ тебѣ быти могꙋ.
сн҃ве твоѝ ѻ҆ставиша мѧ, и҆ кленꙋт꙽сѧ в꙽ тѣхъ и҆же не сꙋт꙽ бози.
насытих̑ и҆хъ и҆ съблꙋдишѧ, и҆ в домѣ блꙋд꙽нѣмъ блꙋд꙽стовахꙋ.
кони любов꙽ницы на жены, и҆ ѻ҆реве сътворени сꙋт꙽.
е҆динъ кождо к женѣ и́скренѧго свое҆го ржа́ше.
е҆да ли на сих̑ не посѣщꙋ рече г҃ь.
и҆ въ ꙗ҆зы́цехъ не м꙽сти́т ли сѧ дш҃а моѧ, възы́идете на стѣны и҆хъ, и҆ разоритѐ, и҆стлѣнїѧ не сътвори́те.
во́змете ѿра́сли е҆го, и҆же не сꙋть гн҃и.
престꙋпле́нїемъ б̂о престꙋпи́лъ е҆сть на мѧ домъ і҆и҆л҃евъ, и҆ дом̑ і҆ѹ́динъ, реч̑҇ г҃ь.
ѿвръго́шасѧ г҃а и҆ реко́ша, нѣсть тои.
ни прїидетъ на нас̑҇ ѕл̂о, ме́ча и҆ гла́да не ѹ҆́зримъ.
прро̑҇ки бы́ша на вѣтръ гл҃али, и҆ ѿвѣтъ не бы́сть в ни́хъ.
сїѧ б̂о слꙋ́чатсѧ тѣмъ·

Сїѧ рече г҃ь си́лъ.
и҆же гл҃али е҆стѐ сло́во т̂о.
с̂е а҆зъ даю̀ словеса̀ моѧ̀ въ ѹ҆ста̀ твоѧ̀ въ ѻ҆́гнь, и҆ лю́ди сїѧ въ дре́ва и҆ пожре́тъ и҆хъ·

Се̂ а҆зъ наведꙋ̀ на вас̑҇ ꙗ҆зы́ки и҆здале́ча до́ме і҆и҆л҃евъ, рече г҃ь.
ꙗ҆зы́къ си́лныи, ꙗ҆зы́къ старыи, е҆го́же ꙗ҆зы́ка не ѹ҆вѣси ни възразꙋмѣ́еши чт̂о гл҃ет꙽.
тꙋ́лъ е҆го ꙗ҆́ко гро́бъ ѿвер꙽стъ, вс̂и крѣ́пцы.
і҆ и҆зъꙗ҆дѧ́тъ кла́сы твоа̀ и҆ хлѣбъ твои, и҆ пожре́тъ сн҃овъ твои҆хъ и҆ дще́рїи твои҆хъ.
ста́до твое и ско́ты твоѧ̀ и҆зъꙗ́сть, виногра́дъ твои и҆ смо́квы твоѧ̀.
и҆ съкрꙋшитъ гра́ды твоѧ твер꙽ды, в них̑же т̂ы и҆́маши дръзнове́нїе мече́мъ.
ѻ҆ба́че въ дн҃ехъ тѣ́хъ реч̑҇ г҃ь, не сътворю вас̑҇ въ истлѣнїе·

да а҆ще речетѐ, почто̀ сътворѝ г҃ь б҃ъ на́шъ намъ сїѧ всѧ̀.
рече́ши к ни́мъ, ка́ко ѻ҆ста́висте м̂ѧ, и҆ послꙋжи́сте богом̑ чю́ждимъ в землѝ ва́шеи.
та́ко послꙋжи́те бого́мъ чю́ждимъ в꙽ землѝ не ва́шеи.
възвѣсти́те сїѧ до́мꙋ і҆а́ковлю, и҆ ѹ҆слы́шанїе сътвори́те въ і҆ѹ́дѣ рекꙋщи·

Слы́ши по́лче бꙋ́и, и҆же не и҆́маши срд̑ца.
и҆же и҆мѣю҆ще ѻ҆́чи не ви́дите, и҆ ѹ҆́ши и҆ не слы́шите·

Мене б̂о не ѹ҆боите ли сѧ рече г҃ь, и҆ ѿ лица̀ мое҆го не разболи́тесѧ.
и҆же положи́хъ пѣсо́къ предѣ́лъ мо́рѧ за́повѣдь вѣ́чнꙋ, и҆же не ми́мои҆детъ.
и҆ съдви́гнꙋтсѧ і҆ и҆знемо́гꙋтъ, и҆ надмꙋтсѧ во́лны е҆го и҆ не пре́идꙋтъ того.
лю́дем же сим̑ бы́сть срд̑це невѣ́рно и҆ жесто́ко, ѿи҆до́ша и҆ поидо́ша.
и҆ не реко́ша въ срд̑цы свое҆мъ, ѹ҆боимысѧ г҃а б҃а на́шего.
и҆же да́сть намъ до́жд̑ь ра́нъ и҆ по́зден꙽ въ вре́мѧ своѐ, и҆сполне́нїе лѣтнїе жа́твы стрегꙋщи намъ·

Безако́нїѧ на́ша ѹ҆клони́ша сїа, и҆ грѣхѝ на́ша въз꙽дръжа́ша бл҃го ѿ нас̑҇.
и҆же ѻ҆брѣте́ны сꙋть в лю́дехъ моих̑ нечестиви лови́теле, ꙗ҆́ко пти́чныи лове́ць сѣти ставлѧющи, и҆ поножы на зацѣпле́нїе мꙋжемъ.
ꙗ҆́ко пом꙽ча по́лна пти́ць, та́ко до́мы их̑ по́лны ле́сти.
сего ради възвели́чени сꙋть и҆ ѻ҆богаще́ни.
ѹ҆ты́ли сꙋть и҆ ѹ҆тол꙽стѣли, и҆ ми́мои҆до́ша слове́съ мои҆хъ злѣише.
прю̀ вдови́цы не сꙋди́ша, прю̀ си́ра не ѹ҆пра́виша, и҆ сꙋ́да ѹ҆бо́гим̑ не сꙋдиша·

Є҆да̀ сихъ ра́ди не посѣщꙋ рече г҃ь, и҆ли на лю́дехъ таковх̑ѣ не м꙽сти́тсѧ дш҃а моѧ̀·

Ѹ҆́жасъ и҆ чюдеса сътворе́на сꙋть на землѝ.
прро̑҇цы прро̑҇чествова́ша л꙽жꙋ, и сщ҃ен꙽ницы плеска́хꙋ рꙋка́ми свои҆ми, и лю́дїе мои възлюби́ша такова.
чт̂о бо сътво́ритсѧ въ послѣ́днѧѧ е҆го·

Глв̑҇а, ѕ҃·

Ѹ҆тверди́тесѧ сн҃ове вениами́нови посредѣ і҆ерс̑҇ли́ма, и҆ въ каѳекꙋи въстрꙋбите трꙋбо́ю, и҆ на веѳахаремъ въз꙽дви́гнете хорꙋговь.
ꙗ҆же ѕл̂о ви́дѣно е҆сть ѿ сѣвера, и҆ сътре́нїе вели́ко.
кра́снѣи и҆ въ стра́нъствѣ живꙋщеи ѹ҆подоби́лъ е҆смь дще́рь сїѻ́нѧ, к неи прїидꙋтъ пасты́рїе и҆ стада и҆хъ·

Ѹ҆глꙋби́ша в неи ѻ́крс̑҇тъ, пасе́тъ е҆ді́нъ ко́ждо и҆хъ и҆же под̑ рꙋкꙋ свое҆ю сꙋть.
ѻ҆ст҃ите нань бра́нь, съвоста́ните и҆ възы́идемъ въ полꙋдни·

Го́ре намъ и҆же ѹ҆клони́сѧ дн҃ь, и҆же должае сътворе́ны сꙋть сѣни вечернїи·

Въста́ните і҆ и҆зы́идемъ в꙽ нощи, и҆ расточим̑ домы̀ е҆го·

И҆же сїѧ рече г҃ь сил꙽.
посѣцѣте дре́во е҆го, ѿврьзите ѻ҆́крс̑҇тъ і҆ерс̑҇лима тыны̀.
сѐ е҆сть град̑ посѣще́нїѧ, всѧ́ка клевета̀ посреди е҆го.
ꙗ҆́ко стꙋде́нꙋ сътвори́тъ и҆сто́чникъ во́дꙋ свою, тако стꙋде́но сътворѝ лꙋка́въство свое·

Безако́нїѧ и҆ па́кости слы́шатсѧ в неи, предо мно́ю всегда не́мощь и҆ ꙗ҆́зва·

Ѹ҆чи́сѧ і҆ерс̑҇лиме да не ѿи҆детъ дш҃а моѧ ѿ тебе, да не положꙋ тѧ пꙋстꙋ зе́млю не ѻ҆бита́ннꙋ·

Сїѧ рече г҃ь си́лъ.
даже до гро́зда съберꙋтъ ꙗ҆́ко въ виногра́дѣ ѻ҆ста́нки і҆и҆л҃ьски.
ѻ҆братѝ рꙋкꙋ твою ꙗ҆ко торгатель ко́шницы.
комꙋ възъгл҃ю, и҆ комꙋ свѣдѣтельствꙋюсѧ да слы́шат̑.
с̂е неѻ҆брѣзаны ѹ҆жеса̀ их̑, и҆ слы́шати не мо́гꙋтъ·

Сѐ сло́во гн҃е бы́сть к ни́мъ в꙽ поноше́нїе, и҆ не въспрїимт̑ꙋ того.
сего ради ꙗ҆́рости гн҃ѧ и҆сполнихсѧ ѹ҆трꙋди́хсѧ тръпѧ́щи·

И҆злїю на мало́е внѣ, и҆ на събра́нїе ю҆́ношъ въкꙋпѣ.
мꙋжъ б̂о съ женою ꙗ҆́тъ бꙋдет̑, и҆ ста́рецъ съ и҆спол꙽неным̑ дн҃їи.
и҆ преидꙋтъ домы̀ и҆хъ къ чю́ждимъ, и҆ полѧ̀ и҆ же́ны та́коже.
и҆же прострꙋ рꙋкꙋ мою на ѻ҆бита́ющих̑ зе́млю, рече г҃ь.
ѿ меншаг̑҇ паки даж̑ до бо́лшаго, всѝ сребролюбїю ѹ҆чат̑сѧ и҆ ѿ про̑҇рка даже до сщ҃енн꙽ика, вси творѧтъ ле́сть.
и҆ цѣлѧ́хꙋ сътре́нїѧ дщерїи людїи мои҆хъ, съ лестїю рекꙋщи, ми́ръ ми́ръ, и҆ не бѣ ми́ръ.
стꙋдни сꙋть и҆же поноше́нїе сътвори́ша.
чт̂о на́ипаче постыдѣнїем̑ непостыдѣни, и҆ посрами́тисѧ не вѣдѧтъ.
сеѧ ради ве́щи падꙋтъ промежъ рꙋшаю҆щихъ, и҆ въ времѧ посѣще́нїѧ свое҆го разрꙋшат̑сѧ, рече г҃ь.
сїѧ рече г҃ь, стоите на пꙋте́хъ и҆ ви́дѣте, и҆ въпроси́те ѿ стезь дре́внихъ, и҆хже бꙋдетъ пꙋть бл҃гъ.
и҆ ходи́те по ни́хъ, и҆ ѻ҆брѧ́щете прохлажде́нїе дш҃амъ вашимъ.
и҆ реко́ша, не ходи́мъ.
и҆ поста́вихъ на вас̑҇ стра́жа.
и҆ реко́хъ, слы́шите гла́съ трꙋбы̀.
и҆ реко́ша, не ѹ҆слы́шимъ.

Сего ради слы́шите ꙗ҆́зы́цы, и҆ позна́йте събра́нїе, коли́ко аз̑ сътворю̀ им̑.
слы́ши землѧ̀, сѐ аз̑ и҆зведꙋ ѕлаѧ на по́лкъ сїи пло́дъ помышле́нїѧ их̑, и҆же слове́съ мои҆хъ не послꙋшаша, и҆ зако́нъ мои ѿврьгоша.
въскꙋю мнѣ кади́ло ѿ сава приносите, и҆ касїа бл҃гимъ ѻ҆бонѧ́нїем̑ ѿ землѧ̀ далнѧа.
всесъж꙽же́нїа ваша не сꙋть ѹ҆го́дна, и҆ закла́нїѧ ва́ша не ѹ҆годи́ша мнѣ·

Сего ради рече г҃ь, се а҆зъ дамъ на лю́ди сїи разрд̑ꙋше́нїе, и҆ раздрꙋша́ютъ в нихъ ѿц҃ы и҆ сн҃ове вкꙋпѣ сосѣдъ, і҆ искренїи поги́бнꙋт꙽.

Сїѧ рече г҃ь.
сѐ лю́ди прїидꙋтъ ѿ землѧ̀ сѣверьски, и҆ ꙗ҆зы́къ вели́къ въста́нетъ ѿ конець землѧ.
стрѣлꙋ̀ и҆ щи́тъ въсхи́тѧтъ, мꙋчитель ес̑҇ и҆ не ѹ҆млс̑҇рдитсѧ.
глс̑҇а е҆го ꙗ҆́ко мо́ре възшꙋмит̑, и҆ на ко́ни възы́идꙋтъ ѹ҆гото́вани ꙗ҆́ко мꙋжъ на ѻ҆полче́нїе на тѧ дщи сїѻ́нѧ.
слы́шахомъ слх̑ꙋ е҆го, безъ въздержа́нїѧ сꙋть рꙋцѣ на́ши, ско́рбь ѻ҆бъѧ́тъ насъ болѣзнїи ꙗ҆́ко родѧ́щаѧ.
не хощѣте и҆сходи́ти на ни́вы ни и҆сходѣте на пт̑ꙋ.
ꙗ҆́ко мечь врага̀, и҆ страхъ ѻ҆́крс̑҇тъ.
дще́ро людїи мои҆хъ препоѧ҆шисѧ вре́тищемъ, и҆ посы́плисѧ пе́пелом̑.
пла́чъ е҆ді́нородныи, сътворѝ себѣ плаче́мъ горким̑.
и҆же ѹ҆стремле́но прїидетъ запꙋстѣнїе на ва́съ.
и҆скꙋси́телѧ дахъ тебе на люди моѧ крѣпка, и҆ вѣси і҆ и҆скꙋсиши пꙋтѝ их̑.
всѝ тїи нача́лницы ѹ҆кланѧ́ющїи ходѧ́щи льсти́во.
мѣдь и҆ желѣзо всѝ растлѣни сꙋть.
ѻ҆скꙋдѣ надꙋтїе на ѻ́гнь, и҆стлѣ ѻ́лово, в сꙋетꙋ̀ надымал̑҇ над꙽ми́тель, лꙋка́въства б̂о и҆хъ не сꙋть и҆стлѣни.
сребро ѿмѣтно зовѣтѐ их̑, и҆же г҃ь ѿврьглъ тѣхъ·

Глв̑҇а, з҃·

Сло́во и҆же бы́сть къ і҆еремїи ѿ г҃а гл҃ющи, ста́ни въ вра́тѣхъ домꙋ гн҃ѧ.
и҆ проповѣждь тꙋ̀ сло́во т̂о, и҆ гл҃и.

Слы́шите сло́во гн҃е вс̂ѧ і҆ѹ҆де́ѧ, входѧ́щеи по вра́тѣхъ сих̑, да поклони́тесѧ г҃ꙋ.
сїѧ рече г҃ь си́лъ б҃ъ і҆и҆л҃евъ·

Бл҃го твори́те пꙋтѝ ваша и҆ мышле́нїѧ ваша, и҆ ѻ҆бита́ю с ва́ми на мѣстѣ томъ·

Не хощите надѣѧтисѧ въ словесѣхъ лжи́вых̑ рекꙋщи, хра́мъ гн҃ь, хра́мъ гн҃ь, хра́мъ гн҃ь е҆сть·

Ꙗ҆́ко а҆ще бл҃го речете пꙋтѝ ва́ша и҆ мышле́нїѧ ва́ша.
а҆ще сътворите сꙋдъ просредѣ мꙋжа і҆ и́скренѧго е҆го, и҆ прише́лца и҆ си́ра, и҆ вдови́ци не сътвори́те льсти́во.
ни кро́вь неповин̑҇нꙋ и҆злїете в мѣстѣ семъ, и҆ по бо́ѕх̑ѣ чюжих̑ не ходи́те в лꙋка́вствѣ са́ми себѣ.
ѻ҆бита́ю с ва́ми в мѣстѣ се́мъ, въ землѝ ю́же да́хъ ѿц҃ем꙽ вашимъ ѿ вѣка даже и҆ до вѣка с̂е вы̀ надѣетесѧ на сѧ въ словесе́хъ лжи́выхъ, и҆же не требѣ вамъ·

ѹ҆кра́сти, ѹ҆би́ти, блд̑ꙋствовати клѧти́сѧ лжи́во, жрѣти ваа҆лимꙋ и҆ ходи́ти по боѕѣхъ чю́ждихъ и҆хже не вѣсте·

И҆ прїидо́сте и҆ ста́сте предо мною в домꙋ се́м꙽, в не́мже възва́но е҆сть и́мѧ мое.
и҆ рекли е҆сте и҆зба́влени е҆смы, сего ра́ди чт̂о сътвори́хомъ поноше́нїѧ т̂а.
е҆да б̂о пеще́ра разбо́иникомъ сътворе́нъ ес̑҇ до́мъ сїи, в немже възва́но е҆сть и҆́мѧ мое въ ѻ́чїю вашею.
а҆зъ е҆см꙽ а҆зъ е҆смь, а҆зъ ви́дѣхъ, рече г҃ь·

И҆дѣте к мѣстꙋ томꙋ в сило́мъ идеже ѻ҆бита́етъ и҆́мѧ мое ѿ нача́ла и҆ ви́дите чт̂о сътвори́хъ е҆мꙋ лꙋкав̑҇ствъ ра́ди людїи мои҆хъ і҆и҆л҃ѧ.
и҆ нн҃ѣ и҆же сътвори́ли е҆сте всѧ̀ дѣла сїѧ, рече г҃ь.
и҆ гл҃алъ е҆смь къ ва́мъ въ ѹ́трїи въста́ющи, и҆ гл҃ющи, и҆ не слы́шасте.
и҆ зва́хъ васъ, и҆ не ѿвѣща́сте мнѣ.
сътворю̀ до́мꙋ семꙋ в нем꙽же възва́но е҆сть и҆́мѧ мое, и҆ в немже вы̀ и҆́мате дръзнове́нїе.
и҆ мѣсто и҆же да́хъ ва́мъ и҆ ѿц҃емъ вашимъ, ꙗ҆́ко сътвори́хъ сило́мꙋ.
и҆ ѿврьгꙋ васъ ѿ лица̀ мое҆го, ꙗ҆ко ѿверьгох̑ всю бра́тїю ва́шꙋ, все сѣмѧ е҆фремово.
ты́ же не моли́сѧ за лю́ди сїѧ, ни въспрїими за нихъ хвалꙋ и҆ мл҃твꙋ, и҆ не предъстои҆ши мнѣ, и҆же не ѹ҆слы́шꙋ т̂ѧ.
е҆да ви́диши чт̂о сїи творѧтъ въ градѣхъ і҆ѹ́диныхъ, и҆ на площа́дѣхъ і҆ерс̑҇лима.
сн҃ове събира́ют꙽ дрова̀, и҆ ѿц҃ы зажига́ютъ ѻ҆гне́мъ, и҆ же́ны скропѧ́тъ тꙋки да сътворѧтъ хамоны̀ цр҃ци нбс̑҇нѣи, и҆ пожрꙋтъ богомъ чюжим꙽ и҆ мене къ гнѣвꙋ прогнѣ́ваютъ.
е҆да мене къ гнѣвꙋ прогнѣ́ваютъ, рече г҃ь.
е҆да̀ не са́ми себѣ в꙽ постыдѣнїи лица свое҆го.
сего ради та́ко рече г҃ь сѐ ꙗ҆́рость моѧ и҆ прогнѣванїе мое събира́етсѧ на мѣсто т̂о.
на мꙋжи, и҆ на скоты, и҆ на древо страны, и҆ на плод̑ зе́мныи, и҆ възжеже́тсѧ и҆ не ѹ҆га́снетъ·

Сїѧ рече г҃ь си́лъ б҃ъ і҆и҆л҃евъ.
всесъж꙽же́нїѧ ваша преданы жрътвамъ ва́шимъ, і҆ и҆зъꙗ҆ди́те мѧ́са, и҆же не гл҃алъ е҆смь съ ѿц҃ы ва́шими, и҆ не заповѣ́дахъ им̑ въ дн҃ь въньже и҆зведо́хъ их̑ ѿ землѧ̀ е҆гѷпетъски, ѿ сло́ва всесъж꙽же́нїа и҆ жрътвамъ.
н̂о то́кмо заповѣдах̑ и҆мъ рекꙋщи.
ѹ҆слы́шите гла́са мое҆го, и҆ бꙋдꙋ вамъ б҃ъ, и҆ вы̀ бꙋдете мнѣ лю́ди.
и҆ походи́те въ всѧ́комъ пꙋтѝ ꙗ҆́же повелѣхъ вамъ, да бл҃го бꙋдетъ вамъ·

И҆ не слы́шаша ни приклони́ша ѹ́хо свое.
н̂о и҆до́ша в похотѣнїи и стропотъствѣ срд̑ца свое҆го лꙋка́ваго, сътворени же сꙋть въспѧтъ и҆ не на пред̑, ѿ дн҃е ꙗ҆́же и҆зошлѝ сꙋть ѿц҃ы и҆хъ ѿ землѧ̀ е҆гѷпетъскїѧ даже до дне сего.
и҆ послах̑ к ва́мъ всѣхъ ра́бъ мои҆хъ про̑҇рокъ по дне, въста́ющи заѹтра, и҆ посыла́ющи.
и҆ не ѹ҆слы́шаша м̂ѧ, ни приклони́ша ѹ́хо свое.
н̂о ѻ҆жести́ша вы́ю свою, и҆ горши сътвори́ли сꙋть неже ѿц҃ы и҆хъ·

И҆ гл҃еши к ним̑ всѧ̀ словеса̀ сїѧ, и҆ не ѹ҆слышат̑ т̂ѧ.
и҆ воз꙽зовеши и҆хъ, и҆ не ѿвѣща́ютъ тебѣ.
и҆ речеши к нимъ, с̂е е҆сть ꙗ҆зы́къ и҆же не послꙋша гласа г҃а б҃а свое҆го, ни въспрїѧтъ наказа́нїѧ.
поги́бе вѣра, и҆ ѿѧ́та е҆сть ѿ ѹ́стъ и҆хъ.
ѻ҆стризѝ вла́сы твоѝ и҆ ѿмещи, и҆ въспрїими плач̑҇ и҆ рыда́нїе, и҆же ѿвръглъ г҃ь и҆ ѻ҆ста́ви род̑ ꙗ҆́рости своеѧ.
и҆же сътвори́ша сн҃ове і҆ѹ́дины лꙋка́во въ ѻ́чїю моею, рече г҃ь·

Поста́виша пораже́нїѧ своѧ в домꙋ̀ в нем же възва́но е҆сть и҆́мѧ мое, да ѻ҆сквернѧтъ е҆го.
и҆ създа́ша высо́каѧ тофе́ѳъ, и҆же е҆сть в долꙋ̀ сн҃овъ е҆но́нь.
да съжгꙋтъ сн҃ове и҆хъ и҆ дще́ри своѝ ѻ҆гне́мъ.
и҆же не повелх̑ѣ ни помы́слихъ въ срд̑цы мое҆мъ·

Сего ра́ди с̂е дн҃їе прїидꙋтъ, реч̑҇ г҃ь.
и҆ не речетсѧ ктомꙋ тофеѳъ тои до́лъ сн҃овъ е҆но́нихъ, н̂о до́лъ закла́нїѧ, и҆ погребꙋтсѧ в꙽ тофеѳѣ, того ра́ди и҆же не бы́сть мѣсто·

И҆ бꙋдетъ трꙋпїе людїи сихъ въ снѣдь пти́цам̑ нбс̑҇ным꙽, и҆ звѣремъ зе́мнымъ, и҆ не бꙋдетъ ѿгонѧ́ющаго.
и҆ ѹ҆поко́и҆ти сътворю̀ ѿ гра́дъ і҆ѹ́динъ, и҆ ѿ площади і҆ерс̑҇лима, гласъ ра́дости и҆ гла́съ весе́лїѧ, гласъ жениха̀ и҆ глас̑҇ невѣсты, в печа́ли б̂о бꙋдет̑ землѧ̀·

Глв̑҇а, и҃·

Въ времѧ т̂о рече г҃ь.
и҆зве́ргꙋтъ ко́сти цр҃еи і҆ѹ҆диныхъ.
и҆ ко́сти нача́лников̑҇ е҆го.
и҆ ко́сти сщ҃енниковъ и҆ ко́сти прро̑҇къ, и҆ ко́сти и҆же ѻ҆бита́ша въ і҆ерс̑҇лимѣ, ѿ гро́бъ и҆хъ, и҆ прострꙋтъ и҆хъ къ слн҃цꙋ и҆ лꙋнѣ и҆ къ всѣмъ ѕвѣзда́мъ нбс̑҇ным̑ и҆хже възлюби́ша.
і҆ и́мже слꙋжи́ша̑ и҆ въ слѣдъ и҆хъ ходи́ша, і҆ и҆хже взыска́ша и҆ поклонишасѧ·

Не соберт̑ꙋсѧ ни погребꙋтсѧ, н̂о въ гноѝ на лицы̀ землѝ бꙋ́дꙋтъ.
і҆ и҆зберꙋтъ на́ипач̑҇ смр҃ть неже живот̑ всѝ и҆же ѻ҆ста́ша ѿ племени сего стропти́ваго въ всх̑ѣ мѣстехъ и҆же ѻ҆ста́влени сꙋть.
ѿ ни́х же и҆звергохъ ѧ҆̀ рече г҃ь си́лъ.
и҆ речеши к ни́мъ, сїѧ рече г҃ь, е҆да и҆же падетъ не въста́нет̑ л̂и, и҆л̂и ѿверъшїисѧ не ѻ҆брати́тъ л̂и сѧ.
въскꙋю б̂о ѿвраще́нъ е҆сть по́лкъ сїи въ і҆ерс̑҇лимѣ ѿвраще́нїемъ непокори́вымъ.
взѧ́ша лжꙋ, и҆ не хотѣша ѻ҆брати́тисѧ, внимахъ и҆ послꙋшахъ, и҆ никт̂о что̀ бл҃го е҆сть гл҃етъ, ни е҆ді́нъ е҆сть и҆же дѣе҆тъ покаѧ́нїе на грѣсѣ̀ свое҆мъ рекꙋщи, чт̂о сътворихъ.
всѝ ѻ҆браще́ни ст̑ꙋ на тече́нїе свое ꙗ҆́ко ко́нь съ стремле́нїемъ и҆дꙋщъ на ѻ҆полче́нїе.
пилю́к꙽ на нб҃си позна̀ вре́мѧ свое.
го́рлица і҆ ла́стовица и҆ сиконїа съхрани́ша времѧ прише́ствїѧ свое҆го.
людїе же моѝ не позна́ша сꙋда гн҃ѧ, ка́ко речете мы̀ мꙋ́дры е҆смы, и҆ закон̑҇ гн҃ь с на́ми е҆сть.
и҆́стинно лжꙋ̀ дѣ́лалъ е҆сть ѹ҆правле́нїе лжи́во пи́серамъ·

Постыдѣни сꙋть премꙋдрїи.
ѹ҆стра́шени пои҆мани сꙋть, сло́во б̂о гн҃е ѿврьгоша и҆ премꙋдрость ни е҆ді́на ес̑҇ в нихъ.
сего ра́ди дамъ же́ны и҆хъ стра́ннымъ, полѧ̀ и҆хъ преслѣдова́телемъ·

Ꙗ҆́же ѿ менша да́же до бо́лша, вси златолю́бецъ послѣдꙋю҆тъ ѿ про̑҇рка даже до сщ҃енника, всѝ сътворѧтъ лжꙋ̀·

І҆ и҆сцѣлѧ́хꙋ сътре́нїѧ дще́рїи людїи мои҆хъ к постыдѣнїю рекꙋщи, ми́ръ, ми́ръ.
е҆гда не бы́сть ми́ръ·

Постыдѣни сꙋть и҆же гнꙋсьство сътвори́ша, за всѧ̀ сїѧ постыдѣнїю не сꙋть постыдни, и҆ срамитисѧ не вѣдѣша сего ра́ди падꙋтъ междꙋ падающих̑ въ времѧ посѣще́нїѧ свое҆го падꙋтъ рече г҃ь.
събира́ющи съберꙋ и҆хъ реч̑҇ г҃ь, нѣсть гроздъ в лоза́хъ, и҆ не ст̑ꙋ смо́кви въ смоко́вницѣ, ли́стъ ѿпаде, и҆ далъ и҆же престꙋпле́на сꙋть почт̂о сѣдимъ.
съвокꙋпитесѧ и҆ вънидем̑ въ гра̑ запа́сен꙽.
и҆ молчим̑ т̂ꙋ, и҆же г҃ь б҃ъ нашъ молча́ти сътворил̑҇ нас̑҇, и҆ пити далъ намъ во́дꙋ желчи.
съгрѣшихомъ б̂о г҃ꙋ, ждахомъ ми́р꙽ и҆ не бѣ бл҃го.
времѧ врачева́нїѧ.
и҆ с̂е бо́ѧзнь.
ѿ да́на слы́шана е҆сть рза́нїѧ ко́неи и҆хъ.
ѿ гла́са во́плѧ побо́рникъ е҆го подвигнꙋта е҆сть всѧ̀ землѧ̀.
и҆ прїидо́ша и҆ пожро́ша зем̑лю і҆ и҆сполне́нїе еѧ̀.
гра́дъ и҆ ѻ҆бита́ющих̑ в немъ·

И҆же с̂е а҆зъ послю̀ вамъ змїи и҆мже нѣсть заклина́нїѧ і҆ и҆з꙽ѧдѧ́тъ васъ рече г҃ь.
болѣзнь моа надъ бо́лѣзнь, въ мнѣ срд̑це мое пла́чюще.
сѐ глс̑҇а во́плѧ дще́рїи людїи моихъ, ѿ землѧ̀ далеча.
е҆да г҃ь нѣсть в сїѻ́нѣ, и҆л̂и цр҃ь е҆го нѣсть в немъ.
въскꙋ́ю м̂ѧ къ гнѣвꙋ подвиго́сте, и҆ въ и҆зваѧ́ныхъ свои҆хъ и҆ въ сꙋетахъ чюжихъ·

Про́иде жат̑ва сконча́но е҆сть лѣто и҆ м̂ы сп҃сени нѣсмы, надъ сокрꙋше́нїем̑ дще́ри людїи моих̑, съкрꙋше́нъ е҆смь и҆ ско́рбенъ.
ѹ́жасъ ѻ҆бъѧт̑ м̂ѧ, е҆да кле́ѧ нс̑҇ѣ в꙽ галаа́дѣ, и҆л̂и врача нс̑҇ѣ т̂ꙋ, воскꙋю б̂о нс̑҇ѣ и҆сцѣле́на ра́на дще́рїи людїи моих̑·

Глв̑҇а, ѳ҃·

Кт̂о дасть главѣ моеи во́дꙋ и҆ ѻ҆чи́ма мои҆ма и҆сточникъ слезъ.
и҆ пла́чю дн҃ь и҆ но́щь побїеныхъ дще́ри людїи мои҆хъ·

Кто дасть мене въ ѻ҆пꙋстѣнїе ра́знымъ пꙋтемъ.
и҆ ѻ҆ста́вль лю́ди моѧ и҆ ѿи́дꙋ ѿ них̑, и҆же всѝ ѻ҆блꙋдъствова́ни сꙋть.
и҆ мно́жество престꙋпниковъ.
и҆ простро́ша ꙗ҆зы́къ свои ꙗ҆́ко лꙋкъ лжѝ и҆ неи́стинны, съкрѣпи́шасѧ на землѝ.
и҆же ѿ лꙋка́ва на лꙋка́въство и҆зошлѝ сꙋть, и҆ мене не позна́ша рече г҃ь.
е҆ді́нъ кождо же ѿ и́скренѧго свое҆го да стреже́тсѧ, и҆ всѧ́комꙋ бра́тꙋ свое҆мꙋ да не и́мать дръзнове́нїа.
и҆же всѧ́къ бра́тъ льстѧ́щи прельсти́тъ, и҆ всѧкъ дрꙋгъ льсти́ве наско́читъ.
и҆ мꙋжъ бра́та свое҆го посмѣ́ет꙽, і҆ и́стин꙽нꙋ не възгл҃ют꙽.
поѹ҆чи́ша б̂о ꙗ҆зы́къ свои гл҃ати лжꙋ̀, да безако́нно дѣ́ютъ потрꙋжа̑шесѧ, ѻ҆бита́нїа твоа посредѣ льсти въ льстѝ, въздержа́шасѧ вѣдѣти мене, рече г҃ь·

Сего рад̑и̑ рече г҃ь сил̑҇.
сѐ а҆зъ разжегꙋ̀ і҆ и҆скꙋшꙋ̀ их̑.
что̀ б̂о и́но сътворю̀ ѿ лица̀ дще́ри людїи мои҆хъ.
стрѣла̀ ѹ҆ꙗ҆з꙽влѧ́юща ꙗ҆зык̑҇ и҆хъ, льстиво гл҃алъ е҆сть въ ѹ҆стнꙋ своею.
ми́ръ съ прїатели свои҆ми гл҃етъ, и҆ в та́инѣ поста́вит꙽ е҆мꙋ лови́тельства.
е҆да на сих̑ не посѣщꙋ, рече г҃ь.
и҆л̂и на ꙗ҆зы́цх̑ѣ таковѣхъ не м꙽сти́тъ л̂и сѧ дш҃а моѧ.
на гора́хъ въспрїимꙋ̀ пла́чь и҆ тꙋже́нїе, на красотѣ пꙋсты́ни слезе́нїе, ꙗ҆́ко възжеже́на сꙋть.
сего ради и҆же нѣсть мꙋжа преходѧ́ща, и҆ не слы́шаща гла́са владѣюща.
ѿ пти́ца нбс̑҇ныѧ даже до ско́тъ пресели́шасѧ и҆ ѿи҆до́ша.
и҆ дамъ і҆ерс̑҇лимъ в хол꙽мы пѣска, и҆ ложи змїем̑, и҆ гра́ды і҆ѹ҆дины дамъ в꙽ разоре́нїе.
тѣмже не бꙋдетъ живѧи.
кто е҆сть мꙋжъ премꙋдрыи, и҆же възразꙋмѣ́етъ с̂е до негоже сло́во ѹ҆стъ гн҃ихъ бꙋдет꙽ да възвѣстит̑.
т̂о въскꙋю поги́бнет̑ землѧ̀, и҆ съжежена е҆сть ꙗ҆ко пꙋсты́нѧ.
е҆ѧ́же никтоже проходитъ·

Рече г҃ь, и҆же ѻ҆ста́виша зако́нъ мои егоже дахъ им̑.
и҆ не послꙋшаша гласа мое҆го, и҆ не походи́ша по немꙋ.
і҆ и҆до́ша по стропти́въствꙋ срд̑ца свое҆го и҆ по ваа҆лимꙋ, чесо наѹ҆чи́шас̑҇ ѿ ѻ҆ц҃ъ свои҆хъ.
сего ради та́ко рече г҃ь силъ б҃ъ і҆и҆л҃евъ, се а҆зъ напита́ю лю́ди сїѧ пелынемъ, и҆ пи́танїе да́мъ и҆мъ во́дꙋ жел꙽чнꙋю.
и҆ расточю и҆хъ въ ꙗ҆зы́ки, их̑же не зна́ша тїи и҆ ѿц҃ы их̑.
и҆ послю̀ на них̑ мечь, дондеже и҆стлѧт̑сѧ·

Сїа рече г҃ь си́лъ, възыщи́те и҆ зови́те тꙋжъбницы да прїидꙋтъ и҆ к нимъ, и҆же премꙋдрени сꙋть посли́те, и҆ по́идꙋтъ съ тща́нїемъ и҆ прїемлютъ на на́съ пла́чь.
да и҆зведꙋтъ ѻ́чи на́ши сле́зы, и҆ вѣжди на́ши и҆злѣютъ во́ды, зане гла́съ плача слы́шанъ ѿ сїѻ́на·

Ка́ко па́костни бы́хомъ и҆ посты́дни ѕѣло.
и҆же ѻ҆ста́вихомъ зе́млю, ꙗ҆́ко и҆зве́ржены сꙋть жили́ща наша.
тм̑ѣже слы́шите же́ны сло́во гн҃е, и҆ прїе́млите ѹ҆ши́ма вашими ѹ҆че́нїе ѹ́стъ е҆го.
и҆ ѹ҆чи́те дще́ри ва́ши тꙋже́нїю и҆ еді́на ко́ждо и҆скренїю свою плачю.
и҆же възы́иде смр҃ть по ѻ҆кномъ на́шимъ въшла е҆сть в домы̀ на́ша, погꙋби́ти ѻ҆троча́та наша и҆звнꙋ̀, и҆ ю́ноша ѿ пло́щадїи.
гл҃и сїѧ, реч̑҇ г҃ь, и҆ падет̑ мертвечи́на чл҃ча ꙗ҆́ко гнои҆ще на лицы страны̀, и҆ ꙗ҆́ко сѣно за стопа́ми жнꙋщихъ, и҆ нѣсть и҆же съберетъ, сїѧ рече г҃ь.
да не хва́литсѧ мдрыи въ мꙋдрости свое́и, ни да хва́литсѧ крѣпкїи крѣпостїю своею, и҆ да не хва́литсѧ бога́тыи въ бога́т꙽ствѣ свое҆мъ.
н̂о ѻ҆ семъ да хва́литсѧ хвалѧ́исѧ, вѣдѣти и҆ зна́ти м̂ѧ, и҆же а́зъ е҆смь г҃ь.
и҆же творю̀ млс̑҇ть и҆ сꙋдъ, и҆ пра́вдꙋ на землѝ.
сїѧ б̂о ѹ҆го́дна мнѣ, реч̑҇ г҃ь.
се дн҃їе грѧдт̑ꙋ, рече г҃ь.
и҆ посѣщꙋ на всѣхъ и҆же неѻ҆брѣзанꙋ и҆ ѻ҆брѣзанꙋ и҆мꙋть пло́ть, на е҆гѵ́петъ и҆ на і҆ѹ́дꙋ и҆ на е҆до́мъ, и҆ на сн҃ы а҆м꙽мо́нѧ и҆ на моа́ва, и҆ на всѣхъ и҆же стри́жени сꙋть вла́сы, ѻ҆бита́ющеи в пꙋсты́ни ꙗ҆ко всѝ ꙗ҆зы́цы неѻ҆брѣзани плотїю.
весь же до́мъ і҆и҆л҃евъ неѻ҆брѣзаны сꙋть срд̑цемъ·

Глв̑҇а, і҃·

Слы́шите сло́во и҆же гл҃алъ е҆сть г҃ь на вас̑҇ до́ме і҆и҆л҃евъ.
сїѧ рече г҃ь, по пꙋтѝ ꙗ҆зык̑҇ не моѕи́те ѹ҆чи́тисѧ, и҆ ѿ зна́менїи нбс̑҇ныхъ не моѕи́те страши́тис̑҇, и҆́хже стра́шатсѧ ꙗ҆зы́цы.
понеже законы лю́дїи сꙋе҆тны сꙋть.
дре́во б̂о ѿ лѣ́са вы́сѣкъ дѣ́ло рꙋки ѹ҆модѣлника в лаги́рѣ, сре́бромъ и҆ зла́томъ ѹ҆краси того̀, гво́здьми и҆ молоты̀ сложи́лъ да не разорит̑сѧ.
въ подо́бїе фини́кꙋ ско́вана сꙋть и҆ не воз꙽г҃лют̑.
носи́ми но́сѧт̑сѧ, поне́же ходи́ти не возмогꙋтъ, не хощи́те б̂о боа́тисѧ их̑, и҆же н̂и зл̂а могꙋтъ сътвори́ти н̂и добра̀·

Нѣсть подо́бенъ тебѣ г҃и.
вели́къ е҆си т̂ы, и҆ вели́ко и҆мѧ твое въ крѣпости.
кт̂о не ѹ҆бои́тсѧ тебѐ ѽ цр҃ю ꙗ҆зы́комъ.
твоа̀ б̂о че́сть, междꙋ всѣхъ премꙋ́дрыхъ ꙗ҆зы́къ, и҆ въ всѣхъ црс̑҇твѣхъ и҆хъ, ни е҆ді́нъ е҆сть подо́бенъ тебѣ̀·

Та́коже безꙋмни и҆ бꙋ́и и҆скꙋсѧ́тсѧ.
ѹ҆че́нїе сꙋе́тно и҆хъ дре́во е҆сть.
сре́бро и҆звито ѿ тарси́съ прино́сит̑сѧ, и҆ злато ѿ ѻ҆фи́ръ, дѣ́ло ѹ҆модѣ́лникъ и҆ рꙋки зла́тарѧ.
и҆ а҆ѯинѳъ, и҆ перфи̂ра ѻ҆дѣа́нїе и҆хъ.
дѣ́ла ѹ҆модѣ́лникъ вс̂ѧ сїѧ.
г҃ь же б҃ъ и҆́стиненъ е҆сть, то́и б҃ъ живꙋщїи, и҆ цр҃ь вѣ́чныи.
ѿ прогнѣва́нїѧ е҆го съдвигнет̑сѧ землѧ̀ и҆ не сътръпѧ́тъ ꙗ҆зы́цы съгрозенїа е҆го.
та́ко б̂о р꙽цѣте и҆мъ, бо́ѕи и҆же нб҃си и҆ земли не сътвори́ша, да и҆зги́бнꙋтъ ѿ землѧ̀, и҆ ѿ си́хъ и҆же под̑ нб҃сем̑ сꙋть.
творѧ́и же землю̀ въ крѣпости свое́и, строѧ́и вселе́ннꙋю въ премꙋ́дрости свое́и, и҆ мꙋ дростїю свое́ю простертъ нб҃са.
къ гла́сꙋ свое҆мꙋ да́сть мно́жество во́дъ на́ нб҃си, и҆ въз꙽двиѕа́етъ м꙽глы̀ ѿ да́лнѣѧ землѧ.
блиста́нїѧ в꙽ дождь сътворѝ і҆ и҆зведе вѣтръ ѿ съкрови́щъ своих̑ бꙋи сътворонъ е҆сть всѧ́къ чл҃къ ѿ ѹ҆ма свое҆го.
постыдѣнъ е҆сть ѹ҆модѣлникъ въ всѧ́ком̑ и҆зваѧ́нїи, ꙗ҆́ко лжа̀ е҆сть чт̂о слїа, и нѣсть дх҃а в них̑.
сꙋе́тни сꙋть и҆ дѣло смѣ́хꙋ достои́но, въ вре́мѧ посѣщенїѧ свое҆го и҆з꙽ги́нꙋтъ.
нѣсть къ симъ подо́бна ча́сть і҆а́ковлѧ.
и҆же б̂о въѻ҆бразил̑҇ вс̂ѧ, то́и е҆сть, і҆и҆л҃ь жезлъ достоа́нїѧ е҆го·

Гь҃ си́лъ и҆мѧ того.
съберѝ ѿ землѧ̀ постыдѣнїе твое, и҆же ѻ҆бита́еши въ ѻ҆б꙽стоа́нїи, и҆же сїѧ рече г҃ь·

Се̂ а҆зъ далече ѿвръгꙋ ѻ҆бита́тели землѝ в то̀ вре́мѧ, и҆ смꙋщꙋ и҆хъ, та́ко да не ѻ҆брѧ́щꙋтсѧ.

Го́ре мнѣ̀ въ сокрꙋшенїи моем̑, стропти́ва ꙗ҆зва моа̀.
а҆з꙽ же рѣхъ вина̀ сїѧ бо́лѣзнь моа̀ е҆сть, и҆ поношꙋ еѧ̀.
жили́ще мое ѻ҆пꙋстѣн꙽но е҆сть, вс̂и верви́цы моѝ и҆зорва́ны сꙋть.
сн҃ове моѝ и҆зыидо́ша ѿ мене, и҆ нѣсть их̑.
нѣсть и҆же простретъ ктомꙋ̀ покров̑҇ мои, и҆ възд̑ви́гнет꙽ ко́жи моѝ.
и҆же бꙋе́ съдѣа́ша па́стыри, и҆ г҃а не възыска́ша.
сего̀ ради не воз̑разꙋмѣша и҆ всѐ ста́до и҆хъ расточено е҆сть.
глас̑҇ слыша́нїѧ с̂е прїиде, и҆ съдви́гненїе вели́ко ѿ землѧ̀ сѣ́верьски.
да положитъ гра́ды і҆ѹ́да в пꙋсты́ню, ѻ҆бита́нїю змїемъ.
вѣм꙽ г҃и и҆же нѣсть чл҃кꙋ пꙋти е҆го, н̂и мꙋжа е҆сть да хо́дитъ и҆ ѹ҆пра́витъ стопы̀ своа.
накажи м̂ѧ г҃и, ѻ҆баче въ сꙋдꙋ и҆ не въ ꙗ҆́рости твое́и, ни ѹ҆бо ниначто́же приведе́ши м̂ѧ.
и҆злѣ́и прогнѣва́нїе твое на ꙗ҆зы́́ки и҆же не позна́ша т̂ѧ.
и҆ на вла́сти и҆же и҆́мѧ твое не възва́ша.
и҆же снѣдо́ша і҆а́кова, и҆ пожроша е҆го і҆ и҆стлиша того, и҆ лѣпотꙋ е҆го расхити́ша·

Глв̑҇а, а҃і·

Сло́во и҆же бысть ѿ г҃а къ і҆еремїи рекꙋщи·

Слы́шите словеса̀ завѣта сего, и҆ гл҃ите къ мꙋж́емъ і҆ѹ́динымъ, и҆ къ ѻ҆бита́телемъ і҆ерс̑҇ли́м꙽скимъ, и҆ речеши к ни́мъ·

Сїѧ реч̑҇ г҃ь б҃ъ і҆и҆л҃евъ, проклѧт̑ мꙋж́ъ и҆же не послꙋша́етъ завѣта сего словес̑҇.
и҆же заповѣдах̑ ѿц҃емъ ва́шимъ въ дн҃ь, во́ньже и҆зведохъ их̑ ѿ землѧ̀ е҆гѷпет̑ски, ѿ пещи желѣзныа, рекꙋщи·

Ѹ҆слы́шите глас̑҇ мои и҆ сътвори́те вс̂ѧ та̀, и҆же заповѣ́дах̑ вам̑.
и҆ бꙋдете мнѣ̀ въ лю́ди, и҆ а́зъ бꙋдꙋ ва́мъ въ б҃а.
да воз꙽дви́гнꙋ клѧ́твꙋ е҆ю҆́же клѧх̑сѧ ѿц҃емъ ва́ших̑, да́ти ми и҆мъ зе́млю лїющꙋ мле́ко и҆ мед̑и̑, ꙗ҆́ко е҆сть дн҃ь сїи·

И҆ ѿвѣщахъ и рекох꙽, а҆ми́нь г҃и·

И҆ рече г҃ь къ мнѣ̀, въз꙽гласѝ вс̂ѧ словеса̀ сїѧ въ градх̑ѣ і҆ѹ́диных̑, и҆ внѣ̀ і҆ерс̑҇ли́ма рекꙋщи·

Слы́шите словеса̀ завѣта сего и҆ сътвори́те та̀, и҆же свѣдѣтельствꙋа свѣдѣтел꙽ствовах̑ ѿц҃ы вашими, въ дн҃и в нѧ́же и҆зведох̑ и҆хъ ѿ зем̑лѧ̀ е҆гѷпет̑скїа да́же до дн҃е сего̀.
заѹ҆́тра въста́а свѣдѣтельствовах̑ гл҃ѧ·

Слы́шите гла мои и҆ не слы́шаша н̂и приклони́ша̑ ѹ҆́ха свое҆го.
н̂о и҆до́ша е҆ді́нъ ко́ждо въ стропот̑ствѣ срд̑ца свое҆го зла́го.
и҆ възведо́хъ на ни́хъ вс̂ѧ словеса̀ завѣта сего, и҆же заповѣ́дахъ да сътворѧт̑, и҆ не сътвори́ша·

И҆ рече г҃ь къ мнѣ̀, ѻ҆брѣтена е҆сть клѧтва на мꙋж́ех̑ і҆ѹ́диныхъ, и҆ на ѻ҆бита́ющихъ і҆ерс̑҇ли́мом̑.
ѻбрати́лисѧ сꙋть къ безако́нїю пр́ьвомꙋ ѿц҃ъ свои҆хъ и҆же не хотѣша слы́шати словесъ мои҆хъ.
и҆ сїи б̂о и҆доша по́ боѕѣхъ чю́жихъ да слꙋжатъ и҆мъ·

Ни въчто́же сътвори́ша до́мъ і҆и҆л҃евъ, и до́мъ і҆ѹ́динъ завѣтъ мои и҆же завѣщахъ съ ѿц҃ы и҆хъ·

Сего ра́ди сїѧ рече г҃ь.
с̂е а҆зъ наведꙋ на ни́хъ зла́а, ѿ них̑ же и҆зыити не возмо́гт̑ꙋ.
и възопїютъ къ мнѣ̀ и҆ не ѹ҆слы́шꙋ и҆хъ·

І҆ и҆дꙋтъ гра́ды і҆ѹ́дины, и҆ ѻ҆битатели і҆ерс̑҇ли́мꙋ.
и҆ възопїютъ к ни́мъ и҆́м꙽же жрꙋт꙽, и҆ не сп҃сꙋтъ их̑ въ вре́мѧ скор꙽би и҆х꙽.
по числꙋ̀ б̂о градовъ бѣхꙋ бо́ѕи твоѝ і҆ѹ́до, и҆ по числꙋ̀ пꙋтемъ твои҆мъ і҆ерс̑҇ли́ме·

поста́вилъ е҆си ѻ҆́лтари постыд̑ни, ѻ҆лта́ри на пожренїе ваа҆лимꙋ.
ты̀ б̂о не моѕи моли́тисѧ за лю́ди с̂и, и҆ не въспрїими за нихъ хва́лы и моли́твы, не ѹ҆слы́шꙋ б̂о во вре́мѧ во́плѧ их̑ къ мнѣ̀, и҆ въ времѧ ѻ҆злобленїѧ и҆хъ·

Чт̂о е҆сть и҆же възлю́бленыи мо́и въ домꙋ̀ мое҆мъ сътвори срамоты мно́ги·

е҆да мѧ́са ст҃аѧ ѿи҆мт̑ꙋ ѿ тебѐ лꙋлав꙽ства твоѝ, в них̑ же сла́влена е҆си.
масли́на со́чна кра́сна плодови́та зра́чна, възва́лъ и҆мѧ твое.
къ гла́сꙋ гл҃анїѧ вели́ка разгорѣсѧ ѻ҆́гнь в не́и, и҆ съж꙽жена сꙋть плод̑наѧ еѧ̀.
и҆ г҃ь си́лъ и҆же насади тебе, гл҃алъ е҆сть на́ тѧ ѕл̂о за зла́а до́мꙋ і҆и҆л҃ева, и҆ до́мꙋ і҆ѹ́дина.
и҆же сътвори́ша себѣ къ прогнѣва́нїю м̂ѧ, жрꙋщи ваа҆лимꙋ·

Тыж̑ г҃и показа́лъ е҆си мнѣ̀ и҆ познахъ, т̂ы ꙗ҆ви́лъ е҆си мнѣ хотѣнїѧ.
и҆ а́з꙽ ꙗ҆́ко а҆́гнецъ кро́ткїи, и҆же но́ситсѧ къ жрътвѣ.
и҆ не позна́хъ и҆же помы́слиша на́ мѧ совѣты, рекꙋщи.
прїидѣте в꙽ложи́мъ дре́во въ хлѣбъ е҆го, і҆ и҆стреби́мъ е҆го ѿ землѧ живꙋщих꙽ і҆ и҆мѧ е҆го да не помѧнет̑сѧ ктомꙋ̀·

Ты́ же г҃и саваѻ́ѳъ, и҆же сꙋдиши пра́во, і҆ и҆спытаа срд̑ца и҆ ѹ҆тробы, да ви́жꙋ м꙽щенїе твое на нихъ, тебѣ̀ б̂о ѿкры́хъ прю мою̀·

Сего ради сїѧ рече г҃ь къ мꙋжем̑ а҆наѳоѳ꙽ским̑, и҆же и҆́щꙋтъ дш҃ꙋ твою̀.
и҆ рект̑ꙋ, не пророчествꙋ́еши во и҆мѧ гн҃е, и҆ не ѹ҆́мреши въ рꙋка́хъ на́шихъ·

Сего ради сїѧ рече г҃ь си́лъ.
се а҆́зъ посѣщꙋ на ни́хъ, ю҆́ноша их̑ ѹ҆́мрꙋтъ мечем꙽ сн҃ове ихъ и҆ дщери их̑ ѹ҆мрꙋтъ ѿ гла́да, и҆ ѻста́нъки не бꙋ́дꙋтъ ѿ них̑.
наведꙋ б̂о зла́ѧ на мꙋжи и҆наѳоѳѧ въ лѣто посѣщенїѧ и҆хъ·

Глв̑҇а, в҃і·

Пра́веденъ ѹ҆бо т̂ы е҆си г҃и, а҆ще прюсѧ с тобо́ю, ѻ҆ба́че правед̑на въз꙽гл҃ю к тебѣ̀.
въскꙋю пꙋть нечести́вым꙽ прибыва́етъ.
бл҃го е҆сть всѣмъ и҆же престꙋпа́ютъ и҆ безако́нно дѣютъ.
насади́лъ е҆си и҆хъ и҆ ко́рень пꙋстиша, корыстꙋ́ютъ и҆ творѧтъ плод̑.
бли́зъ е҆си т̂ы ѹ҆стъ их̑ и҆ далече ѿ ѹ҆тробы их̑.
и҆ т̂ы г҃и вѣси м̂ѧ видѣлъ мѧ е҆си, і҆ и҆скꙋсилъ е҆си срд̑це моѐ пред̑ тобо́ю.
събери их̑ ꙗ҆ко стадо к꙽ жер꙽твѣ, и҆ ѻ҆ст҃и их̑ въ дн҃ь закла́нїѧ.
доко́лѣ стонетъ землѧ̀, и҆ трава̀ всеѧ̀ землѧ̀ и҆съхнет꙽ ра́ди лꙋка́въства ѻ҆бита́ющихъ на не́и.
и҆стлѣно е҆сть живо́тно и птица.
ꙗ҆́ко реко́ша, не ѹ҆́зритъ послд̑ѣнѣѧ на́ша.
а҆ще с пѣшими текꙋщи ѹ҆трꙋди́лъсѧ е҆си, ка́ко проти́витисѧ мо́жеши с ко́ньми.
е҆гда́ же въ землѝ ми́рнои безъ боа́зни бꙋ́деши, чт̂о сътвори́ши в꙽ горды́ни і҆ѻ҆рда́ньскои.
ꙗ҆́коже и҆ бра́тїѧ твоа̀, и҆ до́мъ ѿц҃а твое҆го.
и҆ е҆щѐ тїи проти́въ ѻ҆полчи́шасѧ тебѣ, и҆ възопи́ша под̑ тобо́ю по́лнымъ гла́сомъ·

Не вѣрꙋи и҆мъ е҆гда гл҃ати бꙋдꙋтъ тебѣ бл҃гаѧ.
ѻ҆ста́вилъ е҆смь до́мъ мои, ѻ҆ста́вихъ достоѧ́нїе мое, дахъ възлю́бленꙋю дш҃ꙋ мою в рꙋкꙋ врагомъ еѧ̀.
бы́сть мнѣ достоѧ́нїе мое ꙗ҆́ко ле́въ в꙽ дꙋбра́вѣ, да́лъ противъ мене глас̑҇ сего ради възненави́дѣхъ е҆го·

е҆да пти́ца разноцвѣтна достоѧ́нїе мое мн̂ѣ, е҆да пти́ца и҆спестрена всѧ·

Прїидѣте събери́тесѧ всѝ звѣри земстїи, потецѣте на пожрѣнїе.
па́стыри мно́ѕи ѻ҆тры́ли сꙋть виногра́дъ мои, потопта́ша ча́сть мою.
да́ша ча́сть мою въжд̑елѣннꙋю в꙽ пꙋсты́ню запꙋстѣнїѧ, поста́виша еѧ̀ в растерза́нїе, стена́ла же на́ мѧ.
разоре́нїемъ разоре́на̑ е҆сть всѧ землѧ̀.
и҆же ни е҆ді́нъ е҆сть и҆же размы́слитъ срд̑цемъ.
въ всѣх꙽ пꙋте́хъ пꙋсты́нѧ.
прїидоша вси па́костницы землѧ̀, и҆же мечь гн҃ь пожрѐ ѿ краѧ землѧ̀ даже до кра́и еѧ̀.
нѣсть ми́ра всеи пло́ти.
посѣ́аша пшени́цꙋ и҆ тер꙽нїе пожа́ша достоѧ́нїе въспрїаша, и҆ не тре́бѣ им̑.
постыди́тесѧ въ пло́дѣхъ ва́шихъ ради гнѣва ꙗ҆́рости гн҃ѧ·

Сїѧ рече г҃ь ѻ҆ всѣхъ сосѣдехъ мои҆хъ стропти́вых̑, и҆же прикаса́ютсѧ достоѧ́нїю и҆же раздѣлихъ лю́демъ моим̑ і҆и҆л҃ю.
се а҆зъ и҆сторгнꙋ и҆хъ ѿ землѧ̀ их̑, и҆ до́мъ і҆ѹ́динъ и҆сто́ргнꙋ ѿ сре́ды их̑ и҆ е҆гда и҆сто́ргнꙋ и҆хъ, ѻ҆бра́щꙋсѧ и҆ ѹ҆млс̑҇рдюсѧ им̑, і҆ и҆зведꙋ и҆хъ къ достоѧ́нїю свое҆мꙋ, и҆ мꙋжа в зе́млю свою.
и҆ бꙋдетъ а҆ще ѹ́чни ѹ҆чат̑сѧ пꙋтемъ людїи мои҆хъ, да присѧ́гнт̑ꙋ въ и҆мѧ мое, жи́въ г҃ь, ꙗ҆́ко ѹ҆чи́ша̑ людїи мои҆хъ клѧтисѧ въ ваа҆лима съзиждꙋтсѧ посредѣ людїи моих̑.
а҆ще ли не послꙋшаютъ, и҆сто́ргнꙋ людїи тѣ́хъ, и҆сторга́нїемъ и҆ погꙋбле́нїемъ.
рече г҃ь·

Глв̑҇а, г҃і·

Си́це рече г҃ь къ мн̂ѣ, и҆дѝ и҆ съдръжи себѣ чресленикъ л꙽нѧ́ныи, и҆ препоѧши того на чре́слѣхъ твои҆хъ, и҆ в꙽ во́дꙋ не вно́сиши того.
и҆ съдръжа́хъ чресленикъ по словесѝ гн҃ю, и҆ положи́хъ ѻ҆крс̑҇тъ чре́слъ мои҆хъ.
и҆ бы́сть сло́во гн҃е къ мн̂ѣ втори́цею рекꙋщи, възмѝ чресленикъ, и҆же съдръжа́лъ е҆си и҆же е҆сть ѻ҆́крс̑҇тъ чреслъ твои҆хъ.
и҆ въста́в꙽ и҆дѝ къ е҆фра́тѣ, и҆ съкры́и того въ рас꙽сѣ́линѣ ка́мен꙽нѣ.
і҆ и҆до́хъ и҆ скрых̑ того въ е҆фра́тѣ, ꙗ҆́ко заповѣда мн̂ѣ г҃ь·

И҆ бы́сть по днехъ мно́ѕх̑ѣ, рече г҃ь къ мнѣ.
въста́ни і҆ и҆дѝ къ е҆фра́тѣ, и҆ възмѝ ѿтꙋдꙋ чре́сленик̑҇ е҆гоже заповѣдахъ тебѣ да съкры́е҆ши и҆̀ тамо.
і҆ и҆до́хъ къ е҆фра́тѣ и҆ копа́хъ, и҆ взѧ́хъ чресленикъ ѿ мѣста и҆дѣже съкры́хъ е҆го·

И҆ с̂е и҆згни́лъ чре́сленикъ, та́ко ꙗ҆́ко ниначто́же бы́ти потребнꙋ е҆мꙋ·

И҆ бысть слово гн҃е къ мнѣ рекꙋщи, сїѧ рече г҃ь.
та́ко согни́ти сътворю̀ горды́ню і҆ѹ́динꙋ, и҆ горды́ню і҆ерс̑҇лі́ма мно́гꙋ.
людїи сихъ стропти́выхъ и҆же не хотѧ́тъ послꙋшати словесъ мои҆хъ, и҆ хо́дѧтъ въ стропти́въстве срд̑ца свое҆го·

И҆доша же по боѕѣхъ чюжихъ, да слꙋжатъ и҆мъ да покланѧ́ютсѧ и҆мъ.
и҆ бꙋдꙋтъ ꙗ҆́ко чресленикъ тои и҆же никче́мꙋ потре́бенъ бѣ̀.
занѐ ꙗ҆́ко придръжит̑сѧ чресленикъ къ чреслом̑ мꙋжа, та́ко съвокꙋпи́хъ мн̂ѣ весь до́мъ і҆и҆л҃евъ и҆ весь до́мъ і҆ѹ́динъ, реч̑҇ г҃ь.
да бꙋдт̑ꙋ мн̂ѣ въ лю́ди и҆ въ и҆мѧ и҆ въ хвалꙋ̀ и҆ въ сла́вꙋ, и҆ не послꙋшаша.
сего ра́ди речеши к нимъ словеса̀ сїѧ, та́ко реч̑҇ г҃ь б҃ъ і҆и҆л҃евъ.
всѧ́къ сосꙋдъ и҆сполнитсѧ вина̀.
и҆ рекꙋтъ к тебѣ, е҆да ли не вѣдѣхомъ, и҆же всѧ́къ сосꙋдъ и҆сполнитсѧ вина̀.
и҆ рече́ши к нимъ, сїѧ рече г҃ь.
с̂е а҆зъ и҆спо́лню сихъ ѻ҆бита́телїи землѝ сеи, и҆ цр҃и иже сѣдѧ́тъ ѿ колѣна двд҃ва на прс̑҇тлѣ е҆го.
и҆ сщ҃енницы и҆ про̑҇рцы и҆ всѣхъ ѻ҆бита́телїи і҆ерс̑҇лима пїѧн̑҇ствомъ.
и҆сторгнꙋ и҆хъ мꙋжа ѿ бра́та е҆го, и҆ ѿц҃ы и҆ сн҃ы в꙽кꙋпѣ, реч̑҇ г҃ь.
не прощꙋ не ѻ҆сла́блю, и҆ не ѹ҆млрс̑҇дюсѧ, е҆же не расторгнꙋти и҆хъ.
слы́шите ѹ҆ши́ма и҆ внемлите, не хощи́те въздви́гнꙋтисѧ ꙗ҆́ко г҃ь гл҃алъ е҆сть дади́те г҃ꙋ б҃ꙋ ва́шемꙋ сла́вꙋ преже даже не помръкнетъ, и҆ преже даже не прет꙽кнꙋтсѧ но́ѕѣ ваши гора́хъ ра́ныхъ.
пожди́те свѣта, и҆ поло́житъ ю҆̀ в сѣнь смр҃ти и҆ въ мра́къ.
да а́ще того не послꙋшае҆те в꙽ та́инѣ.
попла́четъ дш҃а моа ѿ лица̀ гор꙽дыни, и҆ пла́ча восплачет̑ і҆ и҆зведетъ ѻ́ко мое слезꙋ, и҆же пои҆мано е҆сть ста́до гн҃е.
рцы̀ цр҃ю и҆ влд̑цѣ, смири́тесѧ и҆ сѧ́дѣте на землѝ, ꙗ҆́ко взѧ́тсѧ ѿ главы̀ ва́шеѧ вѣнецъ сла́вы ва́шеѧ.
гра́ды ю҆́жные затво́рени сꙋть, и҆ нѣсть и҆же ѻ҆тво́ритъ.
преведенъ е҆сть весь і҆ѹ́да преселе́нїемъ съвръше́номъ.
въздви́гнѣте ѻ́чи ва́ши и҆ ви́дите приходѧ́щаа ѿ сѣвера.
гдѣ̀ ста́до да́ное тебѣ, ско́тъ нарочи́тыи твои.
чт̂о речеши е҆гда посѣтит̑ т̂ѧ ты̀ б̂о наѹ҆чи́лъ е҆си их̑ на тѧ, и҆ наѹ҆чи́лъ на главꙋ твою.
е҆да ли не въспрїимꙋтъ т̂ѧ бо́лезни ꙗ҆́ко женꙋ̀ родѧ́щꙋ.
а҆ще ли рече́ши въ срд̑цы твое҆мъ, почт̂о прїидо́ша ми сїѧ.
ради множествъ безако́нїѧ твое҆го ѿкровена е҆сть сра́мнаѧ твоѧ, ѻ҆сквернены сꙋть стопы̀ твоѧ.
а҆ще можетъ премѣни́ти е҆фїѻ́плѧнинъ ко́жꙋ свою, и҆л̂и ры́сь пестроты̀ своа.
и҆ вы мо́жете бл҃готвори́ти, понеж̑ наѹ҆чи́стесѧ ѕлꙋ̀.
и разрѣю и҆хъ ꙗ҆́ко сте́блїе, и҆же вѣтром̑ въсхитит̑сѧ въ пꙋсты́ню.
сїи жре́бїи твои, и҆ ча́сть мѣры твоеа ѿ мене, реч̑҇ г҃ь.
и҆же забы̀ м̂ѧ и҆ надѣѧсѧ на лжꙋ̀.
тѣмже и҆ а́зъ ѻ҆бнажи́хъ бедры твоа проти́вꙋ лица твое҆го, и҆ ѧви́сѧ срамота̀ твоѧ на горах̑, и҆ на селах̑ ви́дѣх꙽ ме́рзости твоа, и҆ любодѣѧнїа твоа и҆ ра́ненїе твое, срамо́тное блꙋженїа твое҆го.
го́ре тебѣ і҆ерс̑҇лим꙽, ꙗ҆ко не ѻ҆чи́стишисѧ по мнѣ̀ толь бо́рзо·

Глв̑҇а, д҃і·

И бы́сть сло́во гн҃е къ і҆е҆ремїи ѿ слове́съ сꙋхо́тныхъ·

стена́ла і҆ѹ҆деѧ и҆ врата е҆ѧ̀ разрꙋши́шасѧ, и҆ ѻ҆темни́шасѧ на землѝ, и҆ во́пль і҆е҆рс̑҇лима взы́иде·

Бо́лшїи посла́ша ме́ншихъ свои҆хъ к во́дѣ.
прїидо́ша к черпа́нїю и҆ не ѻ҆брѣто́ша воды̀.
и҆ ѿнесоша па́ки съсꙋды своѧ̀ то́щны·

Посты́дни сꙋть и҆ ѻ҆злобле́ни, и҆ покры́ша главы̀ своѧ̀ ради па́кости землѝ, и҆же не прїидет̑ до́жд̑ь на́ землю.
постыже́ни сꙋть нивнїи дѣ́латели, покры́ша главы̀ своѧ̀.
и҆же и҆ е҆ле́ница в ни́вѣ роди́сѧ и҆ ѻ҆ста́вила, и҆же не бѣ трава̀.
и҆ ѻ҆на́гри ста́ша на скалах̑, бра́ша вѣтръ ꙗ҆́ко ѕмїеве.
ѻ҆скꙋдѣша ѻ҆́чи и҆хъ и҆же не бѣ̀ трава̀.
а҆ще безако́нїѧ на́ша ѿвѣща́ютъ нам̑.
г҃и сътвори ради и҆мени твое҆го, ꙗ҆́ко мно́га сꙋть ѿвраще́нїѧ на́ша, тебѣ съгрѣши́хом꙽.
пожда́нїе і҆и҆л҃ево.
сп҃си́телю нашъ въ вре́мѧ ско́рби, въскꙋ́ю ꙗ҆́ко пришле́цъ е҆си на землѝ, и҆ ꙗ҆́ко пꙋтникъ ѹ҆кланѧ́ющсѧ на жи́тїе·

Въскꙋ́ю бы́лъ ꙗ҆́ко мꙋж́ъ прошле́цъ е҆си, и҆ крѣ́пкыи и҆же не мо́жетъ спс̑҇ти·

Ты же в нас̑҇ е҆си г҃и, і҆ и҆мѧ твое възва́но е҆сть на нас̑҇, не ѻ҆ста́ви нас̑҇·

Сїѧ рече г҃ь лю́демъ сим̑, и҆же възлюби, под̑виза́ти но́ѕѣ свои и҆ не покои́шас̑҇, и҆ г҃ꙋ не ѹ҆годи́ша.
нн҃ѣ въспомѧне́тъ безако́нїѧ и҆хъ и҆ посѣтѧ́тъ грѣхѝ и҆хъ·

И҆ рече г҃ь къ мнѣ̀, не хощи молитисѧ за лю́ди с̂и въ бл҃го.
е҆гда постѧ́тсѧ не ѹ҆слы́шꙋ проше́нїѧ и҆хъ.
и҆ а́ще принесꙋт꙽ вс̂есъж꙽же́нїа и҆ жертвꙋ, не въспрїимꙋ и҆хъ.
ꙗ҆́ко мечем̑ и҆ гла́домъ и҆ мо́ром̑ а҆́зъ и҆стлю̀ и҆хъ·

И҆ реко́хъ, ѽ г҃и б҃е прро̑҇цы рекꙋтъ и҆мъ, не ѹ҆зрите меча и҆ гла́дъ не бꙋ́детъ вамъ, н̂о ми́ръ и҆́стинныи да́сть вамъ на мѣстѣ семъ·

И҆ рече г҃ь къ мнѣ̀, л꙽жи́во прро̑҇цы прорица́ютъ въ и҆мѧ мое, не посла́хъ и҆хъ, ни заповѣ́дахъ и҆мъ, ни гл҃алъ е҆смь к ним̑.
видѣ́нїѧ л꙽жи́ва и҆ ѹ҆гада́нїе л꙽сти́во, и҆ прел꙽ще́нїемъ срд̑ца свое҆го прорица́ютъ вамъ·

Сего ради сїа рече г҃ь ѻ҆ прро̑҇цѣхъ, и҆же прро̑҇чествꙋ́ютъ въ и҆мѧ мое, их̑же а҆зъ не посла́хъ.
рекꙋще, мечъ и҆ гла́дъ не бꙋ́детъ на землѝ се́и.
в ме́чъ и҆ глад̑ и҆стлѧт̑т̑сѧ прро̑҇цы тїи.
и҆ лю́дем̑ и҆мже прро̑҇чествꙋ́ютъ бꙋ́дꙋтъ и҆звержени на пꙋте́хъ і҆ерс̑҇лима, ради гла́да и҆ ме́ча.
и҆ не бꙋ́детъ и҆же погреб꙽сти и҆хъ.
тїи и҆ же́ны и҆хъ, сн҃ове и҆ дще́ри и҆хъ, і҆ и҆злѣ́ю на нихъ ѕла́ѧ и҆хъ.
и҆ рече́ши к ни́мъ сло́во сїе, и҆зведꙋтъ ѻ҆́чи мои сле́зы по но́щ꙽ и҆ дн҃ь, и҆ не ѹ҆мо́лкнꙋтъ, ꙗ҆́ко сътре́нїемъ вели́ким̑ сътре́на дв҃а дще́рь людїи мои҆хъ, ꙗ҆́звою ѕло́ю ѕѣ́ло.
а҆ще и҆сходѧ́щъ бꙋдꙋ на ни́вы, с̂е закла́ни мече́мъ.
и҆ а́ще вни́дꙋ въ́ градъ, с̂е просте́рты гла́домъ·

Прро̑҇къ же и҆ сщ҃енникъ ѿи҆до́ша в зе́млю, е҆ѧ́же не вѣдѧ́хꙋ.
Є҆да ли ѿме́щꙋщи ѿве́рглъ е҆си і҆ѹдꙋ, и҆ли сїѻ́нъ в ме́рзость и҆мѣ дш҃а твоа.
въскꙋ́ю б̂о поразил̑҇ е҆си нас̑҇, та́ко да ни е҆ді́но бꙋдетъ и҆сцѣле́нїе·

Пожда́хом̑ мѷра, и҆ нѣсть бл҃го, и҆ вре́мѧ и҆сцѣле́нїѧ, и҆ се смꙋще́нїе·

Позна́хомъ г҃и нече́стїе на́ше безаконїѧ ѿц҃ъ наших̑ ꙗ҆́ко съгрѣши́хомъ к тебѣ̀, не да́и нас̑҇ в꙽ поноше́нїе ради и҆мени твое҆го, ни сътвори намъ доса́ды.
на престо́лъ сла́вы твое҆ѧ въспомѧни, и҆ не разори завѣтъ твои с на́ми.
е҆да̀ сꙋть въ зваѧ́ныхъ ꙗ҆зы́ческихъ и҆же дож꙽дѧт̑, и҆ли нб҃са могт̑ꙋ да́ти ро́сꙋ, а҆ще не т̂ы воли́ши.
е҆да ли не ты е҆си г҃и б҃ъ нашъ е҆гоже жда́хомъ, ты б̂о сътвори́лъ е҆си всѧ сїѧ·

Глв̑҇а, е҃і·

И бы́сть сло́во гн҃е къ мнѣ̀·

а҆ще станꙋтъ моѷсїи и҆ самои҆лъ предо мно́ю, нѣсть дш҃а моѧ к лю́демъ симъ·

и҆зринѝ тѣ́хъ ѿ лица мое҆го і҆ и҆зы́идꙋтъ·

А҆ще ли рект̑ꙋ к тебѣ, гдѣ и҆зы́идемъ.
рече́ши к ни́мъ, сїѧ рече г҃ь.
и҆же къ смр҃ти, къ сме́рти.
и҆же к ме́чю, къ ме́чю.
і҆ и́же къ гла́дꙋ, къ гла́дꙋ.
і҆ и́же къ плене́нїю, къ плене́нїю.
и҆ посѣщꙋ на тх̑ѣ четырми ѻ҆́бразы, рече г҃ь.
ме́чъ на закла́нїе, и҆ ѱы на растерза́нїе, и҆ пти́ца нб҃си, и ѕвѣ́ри зе́мли на пожре́нїѧ и҆ расхище́нїе.
и҆ дамъ и҆хъ в꙽ поги́бель всѣмъ црс̑҇твомъ зе́мнымъ, рад̑и̑ манасїѧ сн҃а е҆зекїина цр҃ѧ і҆ѹ́дина всѣхъ ради и҆же сътвори въ і҆ерс̑҇лимѣ.
кт̂о бо ѹ҆млс̑҇рдит̑сѧ к тебѣ і҆ерс̑҇лиме, и҆ли кт̂о поскорби́тъ за тѧ, и҆ли и҆дет̑ к꙽ моле́нїю за ми́ръ твои.
т̂ы ѻ҆ста́вилъ м̂ѧ е҆си рече г҃ь, и҆ въспѧ́тъ из̑шел̑҇ е҆си.
и҆ прострꙋ рꙋ́кꙋ мою̀ на́ тѧ, и҆ ѹ҆бїю т̂ѧ·

Ѹ҆трꙋдих̑сѧ молѧ́щи.
и҆ расточю и҆хъ вѣѧ́ломъ въ приста́нища зе́м꙽скаѧ.
ѹ҆би́хъ и҆ погꙋби́хъ лю́ди моѧ, и҆ та́ко ѿ пꙋтїи свои҆хъ не сꙋть ѻ҆браще́ни·

Ѹ҆мно́жени сꙋть мнѣ̀ вдови́цы е҆го пач̑҇ пѣ́ска мор꙽скаго, и҆ приведо́хъ и҆мъ на ма́теръ ю҆́ноша гꙋби́телѧ полꙋден꙽наго, посла́лъ на гра́ды стремле́нїемъ гро́знымъ.
и҆знемогла е҆сть и҆же роди сед̑мъ, ѻ҆скꙋдѣ дш҃а е҆ѧ̀.
за́иде е҆й слн҃це е҆гда̀ е҆щѐ бы́сть дн҃ь.
постыдѣ́на е҆сть и҆ посрами́сѧ.
и҆ про́чїи е҆ѧ̀ в ме́чъ дамъ пред̑ врагѝ и҆хъ, рече г҃ь.

Го́ре мн̂ѣ мт҃и моѧ̀, въскꙋ́ю роди́ла е҆си мꙋж́а смꙋти́телѧ, мꙋж́а раз꙽враще́на по все́и землѝ.
не заѧ́хъ ни заѧтъ ѹ҆ менѐ никтож̑, вс̂и кленꙋтъ м̂ѧ, рече г҃ь.
е҆да̀ ѻ҆ста́нцы твои несꙋть въ бл҃го, е҆да̀ не притекꙋ къ тебѣ въ вре́мѧ ѻ҆злобле́нїѧ, и҆ въ вре́мѧ скорбѣ́нїѧ на вра́га.
е҆да̀ ѹ҆вѣща́етсѧ желѣ́зо желѣ́зꙋ ѿ сѣв́ера, и҆ мѣ́дь.
бога́тьства твоѧ̀ и҆ съкро́вища твоѧ̀ в꙽ растръѕа́нїе да́мъ тꙋ́не, въ всѣ́хъ грѣсх̑ѣ твои҆хъ, и҆ въ всѣ́хъ предѣ́лехъ твои҆хъ.
и҆ приведꙋ вра́гъ твои҆хъ ѿ землѧ̀ е҆ѧ́же не вѣси, и҆же ѻ҆́гнь воз̑жеже́нъ е҆сть въ ꙗ҆́рости мое́и, на вас̑҇ згори́тъ.
т̂ы вѣси г҃и, въспомѧни на́ мѧ и҆ посѣти м̂ѧ, и҆ защити м̂ѧ ѿ всѣ́хъ гонѧ́щихъ м̂ѧ.
не хощѝ въ тръпѣ́нїе твое въс꙽прїѧ́ти м̂ѧ, вѣси ꙗ҆́ко тръпѣ́хъ ради тебѐ поноше́нїе.
ѻ҆брѣте́ны ст̑ꙋ словеса̀ твоѧ̀, и҆ поѧ́хъ и҆хъ.
и҆ бы́сть мн̂ѣ сло́во твое в ра́дость и҆ въ весе́лїе срд̑ца мое҆го.
ꙗ҆́ко възва́но е҆сть и҆мѧ твое на мнѣ̀, г҃и б҃е си́лъ.
не сѣдѣ́хъ въ со́нмѣ и҆гра́ющихъ, и҆ сла́венъ е҆смь ѿ лица̀ рꙋ́къ твоихъ.
е҆ді́нъ сѣдѧ́хъ, ꙗ҆́ко го́рести и҆спо́лнилъ м̂ѧ е҆си·

Въскꙋ́ю бы́сть бо́лѣзнь моѧ̀ вѣ́чна, и҆ ꙗ҆́зва моѧ̀ безъ ѹ҆пова́нїѧ, не хо́щетъ и҆сцѣли́тисѧ·

Бы́сть мн̂ѣ ꙗ҆́ко лжа̀ вода́мъ невѣ́рнымъ·

Сего ради сїа рече г҃ь, а҆ще ѻ҆брати́шисѧ ѻ҆бращꙋ т̂ѧ, и҆ пред̑ лицемъ моим̑ ста́неши.
и҆ а́ще ѿлꙋчиши чс̑҇тное ѿ недосто́инаго, ꙗ҆́ко ѹ҆ста̀ моѧ̀ бꙋ́деши.
ѻ҆братѧт̑сѧ тїи к тебѣ, и҆ т̂ы не ѻ҆брати́шисѧ к ни́мъ.
и҆ да́мъ т̂ѧ лю́демъ симъ въ стѣ́нꙋ мѣ́дѧнꙋ крѣ́пкꙋ.
и҆ бранѧ́тъ на́ тѧ, и҆ не възмо́гт̑ꙋ.
и҆же а҆зъ с тобо́ю е҆смь да сп҃сꙋ т̂ѧ і҆ и҆зба́влю т̂ѧ, реч̑҇ г҃ь.
и҆зба́влю ѿ рк̑҇ꙋ злѣи́шихъ, і҆ и҆скꙋплю́ т̂ѧ ѿ рꙋкъ си́лныхъ·

Глв̑҇а, ѕ҃і·

И бы́сть сло́во гн҃е къ мнѣ̀ рекꙋщи.
не по́имеши женꙋ̀, и҆ не бꙋ́дꙋтъ тебѣ сн҃ове, и҆ дше́ри на мѣ́стѣ се́мъ.
и҆же сїѧ рече г҃ь на сн҃ы, и҆ дще́ри, и҆же родѧт̑сѧ на мѣ́стѣ се́м꙽ и҆ на мт҃ри их̑ и҆же роди́ша и҆хъ, и҆ на ѿц҃ы и҆хъ ѿ и҆хже племе́ни сꙋть роже́ни в꙽ землѝ сеи.
смр҃тми многих꙽ не́мощїи и҆зъмрꙋтъ, не ѻ҆пла́чют̑сѧ и҆ не погребꙋт́сѧ, въ смѧте́нїи на лицы̀ землѝ бꙋдꙋтъ.
и҆ мече́мъ и҆ гла́дом̑ растлѧт̑сѧ, и҆ бꙋдетъ трꙋ́пїе и҆хъ въ ꙗ҆́дь пти́цамъ нбс̑҇ным꙽, и҆ ѕвѣ́ремъ зе́мным̑, ꙗ҆́ко сїѧ реч̑҇ г҃ь.
не вни́деши в до́мъ пи́рныи, ни ходи́ши къ пла́чю ниже ѹ҆тѣши и҆хъ.
поне́же в꙽зѧхъ ми́ръ мои ѿ людїи сих̑, рече г҃ь, ми́лости и҆ щедроты.
и҆ ѹ҆мрт̑ꙋ вели́цыи и҆ ма̂лїи в зе́мли се́и, не погребт̑ꙋсѧ ни ѻ҆пла́чютсѧ.
и҆ ни сѧ ѿтерзают̑, ниже плѣшъ сътвори́ша ради и҆хъ.
и҆ не и҆зло́мѧтъ межд̑ꙋ и҆хъ стенѧ́щим̑ хлѣ́ба къ ѹ҆тѣше́нїю на мр҃тва, и҆ не дадꙋтъ и҆мъ пи́тїѧ чаши къ ѹ҆тѣше́нїю ѿц҃а свое҆го и҆ мт҃ре.
и҆ в дом̑ пи́рныи не вни́деши да сѣди́ши с ни́ми и҆ ꙗ҆сѝ и҆ пїеши.
и҆же сїѧ рече г҃ь си́лъ б҃ъ і҆и҆л҃евъ·

Се̂ а҆зъ ѿи҆мꙋ ѿ мѣ́ста сего въ ѻ҆́чїю ва́шею, и҆ въ дн҃ех̑ ва́ших̑ глас̑҇ ра́дости и҆ глас̑҇ весе́лїѧ, глас̑҇ жени́ха и҆ глас̑҇ невѣ́сты.
и҆ е҆гда̀ възвѣсти́ши лю́демъ си́мъ всѧ словеса̀ сїѧ, и҆ рекꙋтъ л̂и к тебѣ̀.
въскꙋ́ю гл҃алъ е҆сть г҃ь на нас̑҇ всѧ́ко ѕл̂о вели́кое т̂о.
ка́а на́ша безако́нїа, и҆ли чт̂о грх̑ѣ наш̑҇ и҆́мже съгрѣши́хом̑ г҃ꙋ б҃ꙋ на́шемꙋ·

Рече́ши к ни́мъ.
поне́же ѻ҆ста́виша м̂ѧ ѿц҃ы ва́ши, рече г҃ь.
і҆ и҆до́ша по бо́ѕѣхъ чюжихъ, и҆ послꙋжи́ша и҆мъ и҆ поклони́шасѧ и҆м꙽.
мене же ѻ҆ста́виша, и҆ зако́нъ мои не съхрани́ша.
н̂о и҆ в̂ы го́рѣе дѣлали е҆стѐ нежели ѿц҃ы ва́ши.
с̂е бо похо́дитъ е҆ді́нъ ко́ждо за ѕла́ѧ срд̑ца свое҆го лꙋка́ваго, да м̂ѧ не слы́шитъ.
и҆зри́нꙋ вас̑҇ ѿ землѧ̀ сеѧ̀ в зе́млю е҆ѧ́же не вѣ́сте в̂ы, ни ѿц҃ы ва́ши.
и҆ слꙋжи́те та́мо бого́м꙽ чюжим̑ дн҃ь и҆ но́щь, и҆же не дадꙋтъ вам̑ поко́ѧ·

Сего ради с̂е дн҃и прїидꙋтъ рече г҃ь.
и҆ не рече́тсѧ ктомꙋ̀, жи́въ г҃ь.
и҆же и҆зве́лъ сн҃овъ і҆и҆л҃евъ ѿ зем̑лѧ̀ е҆гѷпет꙽ски.
н̂о живе́тъ г҃ь и҆же и҆звел̑҇ сн҃овъ і҆и҆л҃евъ ѿ землѧ̀ сѣ́верскы, и҆ ѿ всѣх́ъ зе́мль ѿ них же и҆звергохъ и҆хъ, и҆ приведꙋ их̑ в зе́млю и҆хъ, юже дахъ ѿц҃емъ и҆хъ·

Се̂ а҆зъ послю̀ ры́барѧ мно́ги, рече г҃ь, и҆ ло́вѧтъ их̑.
и҆ посемъ послю̀ и҆мъ мно́ги ло́вцы, и҆ ло́вѧтъ их̑ ѿ всѧ́кїѧ горы, и҆ ѿ всѧ́кого хо́лма, и҆ ѿ пеще́ръ ка́мен꙽ных꙽·

и҆же ѻ҆́чи мои на всѣхъ пꙋте́хъ и҆хъ.
не сꙋть съкрове́ни ѿ лица̀ мое҆го.
и҆ не бы́сть ѹ҆тае́на безако́нїѧ их̑ ѿ ѻ҆́чїю мое҆ю.
и҆ възда́мъ первѣе сꙋгꙋ́быѧ безако́нїѧ и҆ грѣхѝ и҆хъ.
и҆же ѻ҆скверни́ша зе́млю мою̀ въ мр҃твечи́нѣ и҆́долы свои҆ми, и҆ в поноше́нїихъ своих̑ и҆спо́лниша достоѧ́нїе мое·

Гь҃ крѣпость моѧ̀, и҆ ѹ҆тверже́нїе мое и҆ прибѣжище мое въ дн҃ь скорбѣ́нїѧ.
к тебѣ ꙗ҆зы́цы прїидꙋтъ ѿ да́лнихъ зе́мль и҆ рекꙋтъ.
и҆́стин꙽но л꙽жꙋ въздержа́ша ѿц҃ы на́ши сꙋетно, и҆же и҆мъ не требе б̂ѣ.
е҆да̀ сътворитъ себѣ чл҃къ бо́ѕи и҆ тїи не сꙋть бо́ѕи·

Сего ради с̂е аз̑ покажꙋ и҆мъ въ час̑҇ сеи, покажꙋ̀ и҆мъ рꙋ́кꙋ мою, и҆ си́лꙋ мою̀.
и҆ познают̑ и҆же и҆мѧ мнѣ г҃ь·

Глв̑҇а, з҃і·

Грѣхъ і҆ѹ́динъ пи́санъ е҆сть графїею желѣ́зною на ка́мени глад̑цѣ а҆дама́нтовѣ, и҆з꙽бразденъ на простра́нъствѣ срд̑ца и҆хъ, и҆ в ро́зѣхъ ѻ҆́лтарѣ и҆хъ.
е҆гда̀ въспомѧнове́ни бꙋдꙋтъ сн҃ове их̑ по ѻ҆лтарѣхъ своих̑, и҆ лѣ́совъ свои҆хъ, древом же ли́ственымъ на гора́хъ вы́шнихъ, жрꙋще на́ поли.
крѣпости твоѧ и҆ съкро́вища твоѧ въ растерѕа́нїе да́мъ.
и҆ выш꙽нѣѧ твоа̀ грѣхъ ра́ди твои҆хъ въ всѣхъ ко́нцѣхъ твои҆хъ.
и ѻ҆ста́нешисѧ са́мъ ѿ наслѣдїѧ твое҆го, ꙗ҆́же да́хъ тебѣ.
и҆ слꙋжи́ти т̂ѧ сътворю врагомъ твои҆мъ въ землѝ е҆ѧ́же не вѣси.
ꙗ҆́ко ѻ҆́гнь раз꙽жеглъ е҆си въ ꙗ҆́рости мое́и, даже въ вѣкъ разгори́тсѧ.
сїѧ рече г҃ь·

Проклѧ́тъ чл҃къ и҆же надѣ́етсѧ на чл҃ка, и҆ положитъ плод̑и̑ мы́шца свое́ѧ, и҆ ѿ г҃а ѿи́детъ срд̑це е҆го.
бꙋдет̑ б̂о ꙗ҆́ко ми́рисе въ пꙋсты́ни, и҆ не ѹ́зритъ е҆гда̀ прїидетъ бл҃го.
н̂о ѻ҆бита́етъ въ сꙋхотѣ в꙽ пꙋсты́ни, в꙽ землѝ го́рцѣ и҆ неѻ҆бита́ющеи.
блс̑҇ве́нъ мꙋж꙽ и҆же надѣ́етсѧ на́ г҃а, и҆ бꙋдетъ г҃ь дръзновенїе е҆го·

И҆ бꙋдетъ ꙗ҆ко дре́во и҆же преса́дитсѧ на вода́хъ.
и҆же к꙽ мокротѣ поста́витъ коренїе своѐ, и҆ не ѹ҆бои́тсѧ е҆гда̀ прїидетъ зно́и.
и҆ бꙋдетъ ли́стъ е҆го зе́ленъ, и҆ въ вре́мѧ сꙋхо́ты не бꙋдет̑ докꙋчанїа.
никогда̀ преста́нетъ сътвори́ти плод̑.
стропти́во срд̑це чл҃кꙋ, и҆ неи҆спытанно, кт̂о е҆̀ познает꙽.
а҆зъ г҃ь и҆спыта́ѧ срд̑це, і҆ и҆скꙋша́ѧи ѹ҆тро́бы.
и҆же въздаю комꙋдж̑о по пꙋти е҆го, и҆ по пло́домъ ѻ҆брѣтенїѧ е҆го·

Рѧ́бъ ко́рмитъ и҆же не породѝ.
сътвори бога́тьства н̂о не въ сꙋдъ, посредѣ дн҃їи свои҆хъ ѻ҆ста́витъ и҆хъ, и҆ въ послѣ́докъ свои бꙋдетъ безꙋмен̑҇.
прс̑҇тлъ сла́вы высоты̀ ѿ нача́ла, мѣсто ст҃ынѧ на́шеѧ чаѧ́нїе і҆и҆л҃ѧ·

Ги҃ вс̂и и҆же т̂ѧ ѻ҆ста́вѧтъ постыдѧ́тсѧ.
ѿходѧ́щи ѿ тебѐ в꙽ землю препи́шꙋтсѧ, ꙗ҆́ко ѻ҆ста́виша и҆сто́чникъ водам̑ живꙋщимъ г҃а.
и҆сцѣли м̂ѧ г҃и, і҆ и҆сцѣлю, сп҃си м̂ѧ, и҆ сп҃сен̑҇ бꙋдꙋ.
ꙗ҆́ко хва́ла моа̀ т̂ы е҆си·

Се̂ тїи гл҃ютъ ко мнѣ̀, гдѣ е҆сть сло́во гн҃е да прїидетъ.
и҆ а́зъ нѣсмь смꙋщенъ тебѣ̀ па́стырю послѣдꙋ́ющи.
и дн҃ь чл҃комъ не пожелѣхъ, т̂ы вѣси, чт̂о и҆зошло е҆сть ѿ ѹ́стъ моих̑, прѧ́мо пред̑ тобо́ю бы́сть.
не бꙋ́ди же т̂ы мнѣ̀ въ бо́азнь, и҆ ѹ҆пова́нїе мое т̂ы въ дн҃ь ѻ҆злобленїа.
да постыдѧт̑сѧ и҆же м̂ѧ го́нѧт̑, и҆ не постыжꙋсѧ.
ѹ҆страшат̑сѧ тїи, и҆ не ѹ҆страшꙋсѧ а҆́зъ.
наведи на́ них̑ дн҃ь ѻ҆злобленїѧ, и҆ съгꙋ́бымъ сътрѧсе́нїемъ сътрѧси и҆хъ·

Сїѧ рече г҃ь къ мнѣ̀.
и҆дѝ и҆ ста́ни въ вра́тх̑ѣ сн҃овъ людїи моих̑.
по них̑ же въхо́дѧтъ цр҃їе і҆ѹ́дины, і҆ и҆сходѧт̑, и҆ во всх̑ѣ вра́тх̑ѣ і҆ерс̑҇ли́ма.
и҆ речеши к ним̑·

Ѹслы́шите сло́во гн҃е цр҃їе і҆ѹ́дины, и҆ всѧ̀ і҆ѹ҆де́ѧ, вс̂и же ѻ҆битатели і҆ерс̑҇ли́ма, и҆же вхо́дите по вра́тѣхъ си́хъ·

Сїѧ рече г҃ь.
съхрани́те дш҃а ва́ша, и҆ не хо́щете носити тѧготы̀ въ дн҃ь сꙋбо́ты, н̂и вноси́те по вра́тѣхъ і҆ерс̑҇ли́ма, и҆ не хо́щите и҆зринꙋти бременъ въ домѣхъ ва́шихъ въ дн҃ь сꙋбо́тныи, и҆ всѧ́кого дѣ́ла не твори́те.
ѻ҆ст҃ите дн҃ь сꙋбо́тныи, ꙗ҆́коже заповѣ́дах̑ ѿц҃емъ ва́шим̑, и҆ не ѹ҆слыша́ша, н̂и приклони́ша ѹ҆́хо свое, н̂о ѻ҆жести́ша вы́а своа да не ѹ҆слы́шатъ м̂ѧ, и҆ не прїе́млютъ наказа́нїѧ.
и҆ бꙋдет̑ а҆ще ѹ҆слы́шите менѐ, рече г҃ь.
да не възносите бре́менъ по вра́тѣхъ гра́да сего̀ въ дн҃ь сꙋбот̑ныи.
и҆ а́ще ѻ҆ст҃ите дн҃ь сꙋбо́тныи, да не сътвори́те во́нь всѧка́го дѣ́ла.
внидт̑ꙋ по вра́тѣхъ гра́да сего̀, цр҃и и҆ нача́лницы сѣдѧщїи на прс̑҇тлѣ двд҃вѣ.
и҆ въсходѧ́щи на колесѣхъ и҆ конех̑ тїи и҆ нача́лницы их̑ мꙋжи і҆ѹ́дины, и҆ ѻ҆битатели і҆ерс̑҇ли́ма.
и҆ ѻ҆бита́ютъ въ гра́дѣ се́мъ въ вѣки.
и҆ прїидꙋтъ ѿ град̑ і҆ѹ҆динъ ѻ҆́крс̑҇тъ і҆ерс̑҇ли́ма, и҆ ѻ҆бита́етсѧ град̑ сїи въ вѣки.
и҆ прїидꙋтъ ѿ град̑ і҆ѹ́динъ ѻ҆́крс̑҇тъ і҆ерс̑҇ли́ма, и҆ ѿ землѧ венїами́нѧ и҆ ѿ по́льнихъ и҆ ѿ го́рних̑ и҆ ѿ ю́га, носѧ́щи всесож̑женїѧ и҆ заколенїа, и҆ жер꙽твꙋ и҆ ѳемїамъ, и҆ възносѧтъ приноше́нїе въ до́мъ гн҃ь·

А҆ще же не ѹ҆слы́шите мене, да ѻ҆ст҃ите дн҃ь сꙋбо́ты и҆ не но́сите времѧ, и҆ не вносите по вра́тх̑ѣх і҆е҆рлс̑҇има въ дн҃ь сꙋбот̑ныи.
зажгꙋ ѻ҆гнем̑ во вратех̑ ег̑҇.
и҆ пожрет̑ домы̀ і҆ерс̑҇лі́ма въ дн҃ь сꙋбот̑ныи, и҆ не ѹ҆гасѧт̑сѧ·

Глв̑҇а, и҃і·

Сло́во и҆же бы́сть къ і҆еремїи ѿ г҃а рекꙋщи.
въста́ни и҆ възы́иди в до́м꙽ скꙋделничїи, і҆ т̂ꙋ слы́шиши словеса̀ моа̀.

И҆ внидохъ въ до́мъ скꙋде́льничь, и҆ с̂е то́и творѧ́ше дѣ́ло на колесѣ.
и҆ разваленъ е҆сть сосꙋдъ е҆гоже то́и творѧ́ше ѿ гли́ны рꙋка́ми свои́ми.
и҆ ѻ҆брати́всѧ сътвори с того̀ сосꙋдъ и҆́ныи ꙗ҆́ко ѹ҆год̑но въ ѻ́чїю е҆го да сътворитъ·

И҆ бы́сть сло́во гн҃е къ мнѣ̀ рекꙋщи.
е҆да̀ л̂и ꙗ҆́ко скꙋде́л꙽никъ т̂о и҆ не възмогꙋ ва́мъ сътвори́ти до́ме і҆и҆л҃евъ рече г҃ь·

Се̂ ꙗ҆́ко бе́рнїе въ рꙋ́кꙋ скꙋде́лничю.
та́ко в̂ы доме і҆и҆л҃евъ, в рꙋкꙋ мою̀.
ѹ҆стремлено гл҃ю на ꙗ҆зыки и҆ на црс̑҇тва.
да и҆скореню и҆ разорю и҆ расточю и҆̀·

А҆ще покаа́нїе съдѣ́ютъ лю́дїе ѿ лꙋкав̑҇ства свое҆го и҆же гл҃алъ е҆сть на́ нѧ, дѣ́ю і҆ аз̑ покаа́нїе на лꙋка́в꙽ства чт̂о помы́слих̑ да сътворю е҆мꙋ, и҆ скоро гл҃ю ѻ҆ ꙗ҆зы́кахъ и҆ црс̑҇твахъ да соѕиждꙋ и҆ насаждꙋ ѧ҆̀, а҆ще л̂и сътворѧт̑ лꙋка́во пред̑ ѻ҆чи́ма мои́ма.
да не ѹ҆слы́шат꙽ гла́са мое҆го, покаа́нїе дѣ́ю на бл҃го чт̂о гл҃алъ е҆смь да сътворю и҆мъ·

нн҃ѣ б̂о рцы мꙋ́жꙋ і҆ѹ́динꙋ и҆ ѻ҆битателю і҆ерс̑҇ли́ма рекꙋщи·

Сїѧ рече г҃ь.
с̂е а҆зъ совѣща́ю на ва́съ лꙋка́во и҆ помышлю на ва́съ помышленїе.
ѻ҆брати́тесѧ е҆ді́нъ ко́ждож̑ ѿ пꙋтѝ свое҆го зла́го.
і҆ и҆спра́вите пꙋти ва́ша и҆ мышленїѧ ва́ша.
и҆же реко́ша̑ ѿчаѧ́хомсѧ, по помышле́нїихъ б̂о на́шихъ и҆демъ.
и҆ е҆ді́нъ ко́ждо же строптив꙽ство срд̑ца свое҆го лꙋка́во да сътвори́мъ·

Сего ради сїѧ рече г҃ь въпроси́те ꙗ҆зы́ков̑҇, кт̂о слы́ша таковꙋ грозꙋ и҆же сътвори ѕѣ́ло дв҃а і҆и҆л҃ева.
е҆да̀ ѻ҆скꙋдѣ́етъ ѿ ка́мене по́льска снѣгъ лива́новъ, и҆л̂и и҆стръгнꙋти могꙋтъ воды̀ кипѧ́щи и҆ стꙋде́ны и҆злїѧ́ющи.
и҆же забвены е҆сть мнѣ̀ лю́ди мои сꙋе́тво жрꙋще и҆ попира́юще на пꙋтехъ свои҆хъ.
и҆ на сте́ѕѧхъ вѣка да въсходѧ́тъ по ни́хъ пꙋтѝ нетре́нѣмъ, да бꙋ́детъ землѧ̀ и҆хъ въ запꙋстѣнїе и҆ въ звиѕда́нїе вѣ́чное·

Всѧ́къ и҆же пре́идет̑ по не́и почюди́тсѧ, и҆ покива́етъ главо́ю свое́ю.
ꙗ҆́ко вѣтръ горющїи расторгнꙋ и҆хъ пред̑ врагы̀.
хребетъ а҆ не лице покажꙋ и҆мъ въ дн҃ь поги́бели и҆хъ·

И҆ реко́ша прїидѣте помы́слимъ на і҆еремїю совѣтъ, н̂и б̂о и҆зги́нетъ зако́нъ ѿ сщ҃е́нника н̂и совѣтъ ѿ премꙋ́драго.
н̂и сло́во ѿ проро́ка прїидѣте и҆ порази́мъ е҆го ꙗ҆́зы́комъ, и҆ не воньмѣмъ въ всѣхъ словесѣхъ е҆го·

Во́ньми г҃и къ мнѣ и҆ слы́ши гла́съ сꙋпоста́тъ мои҆хъ.
е҆да въздае́т ли сѧ за бл҃го ѕл̂о иже и҆скопа́ша ро́въ дш҃и моеи, помѧни́сѧ и҆же стоѧ́хъ пред̑ тобо́ю да възгл҃ю за ни́хъ бл҃гаѧ, да ѻ҆брѧщꙋ гнѣвъ твои ѿ нихъ.
сего ра́ди да́и сн҃ове их̑ въ гла́дъ, і҆ и҆зведѝ и҆хъ в рꙋкꙋ мечю̀ да бꙋдꙋтъ же́ны и҆хъ безча́дны и҆ вдо́вы, и҆ мꙋжи и҆хъ ѹ҆бїютсѧ сме́ртїю, ю́ноша и҆хъ и҆ско́лютсѧ мечем̑ на ра́ти, да слышитсѧ во́пль ѿ домо́въ и҆хъ·

І҆ и҆зведе́ши на нихъ разбо́иника ѹ҆стремле́но, и҆же и҆скопа́ша мн̂ѣ ровъ да и҆мꙋтъ м̂ѧ, и҆ сѣти съкры́ша нога́мъ мои҆мъ·

Ты́ же г҃и вѣси вс̂ѧ совѣты и҆хъ на́ мѧ въ смр҃ть, не и҆сцѣли́ши безако́нїе и҆хъ ѿ лица̀ твое҆го и҆ грѣхъ и҆хъ да не изгла́дитсѧ, да бꙋдꙋтъ разъдрꙋше́ни пред̑ тобо́ю.
и҆ въ времѧ ꙗ҆́рости твоеѧ съблюдѝ и҆хъ·

Глв̑҇а, ѳ҃і·

Сїѧ рече г҃ь и҆дѝ и҆ возмѝ сосд̑ꙋ скꙋде́лничь ж꙽же́н꙽, ѿ ста́рец̑҇ людїи и҆ ѿ ста́рецъ сщ҃енник̑҇·

і҆ и҆дѝ въ ѹ҆до́лъ сн҃въ е҆н꙽но́них̑.
и҆же е҆сть близь въсхо́да вра́тъ скꙋде́лничихъ.
и҆ проповѣдае҆ши т̂ꙋ словеса̀ и҆же а҆зъ гл҃ю к тебѣ.
и҆ речеши, ѹ҆слы́шите сло́во гн҃е цр҃и і҆ѹ́дины, и҆ ѻ҆бита́тели і҆ерс̑҇лима̑.
сїѧ рече г҃ь си́лъ б҃ъ і҆и҆л҃евъ.
се а҆зъ наведꙋ ѻ҆злобле́нїе на мѣсто сїе.
тако да всѧ́къ и҆же ѹ҆слы́шитъ т̂о, звꙋча́тъ ѹ҆ши е҆го того ради и҆же ѻ҆ста́виша м̂ѧ и҆ чю́же, сътвори́ша мѣсто с̂е.
и҆ пожро́ша на не́мъ богом̑ чюжим̑, и҆хже не вѣдѣша тїи и҆ ѿц҃ы и҆хъ.
и҆ цр҃їе і҆ѹ́дины, і҆ и҆спо́лниша мѣсто сїе кро́ве непови́нныхъ.
и҆ създа́ша вы́шнѧѧ ваа҆лимꙋ на согорѣнїе сн҃овъ своих̑ ѻ҆гнем꙽, въ всесъж꙽же́нїе ваа҆лимꙋ и҆же не заповѣдахъ.
ни гл҃алъ е҆смь ни взы́иде на срд̑це мое.

Сего ради с̂е дн҃їе грѧдꙋтъ рече г҃ь.
и҆ не възове́тсѧ ктомꙋ̀ мѣсто сїе тофе́ѳъ и҆ ѹ҆долъ сн҃овъ е҆нонихъ.
н̂о ѹ҆долъ закла́нїѧ.
и҆ разточю̀ совѣтъ і҆ѹ́дѣ, і҆ и҆ерс̑҇лимꙋ в мѣстѣ се́мъ.
и҆ превращꙋ их̑ мече́мъ предъ врагѝ их̑, и҆ в рꙋкꙋ и́щꙋщих̑ дш҃ъ их̑·

и҆ да́мъ пло́ти и҆хъ ꙗ҆́дь пти́цамъ нбс̑҇нымъ, и҆ звѣремъ зе́мным̑.
и҆ поста́влю град̑ сїи въ ѹ́жасъ и҆ въ звизда́нїе·

всѧ́къ и҆же мимои҆детъ по немъ почюдит̑сѧ, и҆ позви́ждетъ по все́и ра́нѣ е҆го.
и҆ напита́ю и҆хъ пло́тїю сн҃овъ и҆хъ и҆ плотїю дще́рїи и҆хъ, и҆ еді́нъ ко́ждо пло́ти дрꙋга свое҆го снѣсть въ ѻ҆бъстоѧ́нїи и҆ въ тѣснотѣ̀, в не́иже запрꙋтъ их̑ вра́ѕи и҆хъ, и҆же и́щꙋтъ дш҃а и҆хъ·

И҆ съкрꙋши́ши сосꙋдъ пред̑ ѻ҆чи́ма мꙋжїи и҆же и҆дꙋтъ с тобо́ю.
и҆ рече́ши к ни́мъ, сїѧ реч̑҇ г҃ь си́лъ·

Та́ко съкрꙋшꙋ лю́ди сїѧ и҆ гра́дъ сїи, ꙗ҆́ко съкрꙋшитсѧ сосꙋдъ скꙋде́лныи, и҆же не мо́жетъ ктомꙋ въста́витисѧ.
и҆ в тофе́ѳъ погребꙋтсѧ того ради и҆же не бꙋдетъ и҆́ного мѣста на погребе́нїе.
та́ко сътворю̀ мѣстꙋ семꙋ рече г҃ь, и҆ ѻ҆бита́телемъ е҆го да поста́влю гра́дъ тои ꙗ҆́ко тофе́ѳ꙽ и҆ бꙋдꙋтъ домы̀ і҆ерс̑҇лима и҆ домы̀ цр҃їи і҆ѹ́диныхъ.
ꙗ҆́ко мѣсто тофеѳъ нечи́сто, всѣ домы̀ въ и҆хже кро́вѣхъ жро́ша всѣмъ во́емъ нбс̑҇ным꙽ и҆ приноша́хꙋ възлїѧ́нїѧ бого́мъ чюжи́мъ·

Прїиде же і҆еремїѧ ѿ тофе́ѳ꙽, и҆же посла̀ е҆го г҃ь къ про̑҇рчествова́нїю, и҆ ста̀ въ дворѣ̀ до́мꙋ гн҃ѧ, и҆ рече къ всѣмъ лю́демъ.
сїѧ рече г҃ь си́лъ б҃ъ і҆и҆л҃евъ·

Сѐ а҆зъ наведꙋ на град̑ се́и, и҆ на всѧ̀ гра́ды е҆го всѧ̀ ѕла́ѧ, и҆же гл҃алъ е҆смь на́нь.
ꙗ҆ко ѻ҆жести́ша вы́ѧ своѧ да не слы́шатъ слове́съ мои҆хъ·

Глв̑҇а, к҃·

И ѹ҆слы́ша фас꙽сꙋръ сн҃ъ ем̑мер̑҇ сщ҃енник꙽, и҆же поста́вленъ бѣ̀ нача́лникъ в домꙋ̀ гн҃и, і҆еремїю про̑҇рчествꙋ́юща словеса̀ сїѧ.
и҆ ѹ҆да́ри фас꙽сꙋр꙽ і҆еремїю прро̑҇ка, и҆ поста́ви е҆го въ кладꙋ и҆же бѣ̀ въ вра́тѣхъ венїами́нихъ вы́шнихъ в꙽ домꙋ гн҃ѧ.
е҆гда́ же в за̑ѹ́трїи дн҃ь бысть, и҆зве́де фасср̑҇ꙋ і҆еремїю ѿ кла́ды.
и҆ речѐ к немꙋ і҆еремїѧ, не фас꙽сꙋръ възва́ г҃ь и́мѧ твое, н̂о стра́хъ ѿвсю́дꙋ.
и҆же сїѧ рече г҃ь, сѐ а҆зъ да́мъ т̂ѧ въ страх̑ и҆ всѝ дрꙋзи твоѝ.
и҆ разрд̑ꙋша́тсѧ мечемъ вра́гъ свои҆хъ, и҆ ѻ́чи твоѝ ѹ҆зрѧтъ.
и҆ всю̀ і҆ѹ҆де́ю дам̑ в рꙋќꙋ цр҃ѧ вавѷлон꙽ска, и҆ преведе́тъ и҆хъ въ вавѷло́н꙽, и҆ побїетъ и҆хъ мечем̑.
и҆ дамъ все и҆мѣнїе гра́да сего, и҆ вес̑҇ трꙋдъ е҆го.
всю́ же цѣнꙋ̀ е҆го, и҆ всѧ̀ скровища црс̑҇тва і҆ѹ́дина дам̑ в рꙋкꙋ враго́мъ и҆хъ.
и҆ расхитѧ́тъ и҆хъ и҆ во́змꙋтъ и҆ ведꙋтъ въ вавѷлонъ·

Ты́ же фассꙋръ, и҆ всѣ ѻ҆бита́тели до́мꙋ твое҆го и҆дете въ плѣне́нїе, и҆ въ вавѷлон̑҇ прїидеши, и҆ та́мо ѹ́мреши, та́мо же и҆ погребе́шисѧ ты̀ и҆ всѝ дрꙋзи твоѝ, и҆мже прро̑҇чествовалъ е҆си лжꙋ̀·

И҆зве́лъ м̂ѧ е҆си г҃и, и҆ прельще́нъ е҆смь крѣплѣ́иши мене бы́лъ е҆си и҆ възмо́глъ е҆си.
сътворе́нъ е҆смь в꙽ посмѣхъ весь дн҃ь, вси порꙋга́ютсѧ мн̂ѣ, и҆же прежде ѹ҆жѐ гл҃ю възъглашаю҆ще безако́нїе и҆ па́кости възглаша́ю.
и҆ быс̑҇ мн̂ѣ сло́во гн҃е в꙽ поноше́нїе, и҆ в посмх̑ѣ весь дн҃ь.
и҆ рекохъ не въспомѧнꙋ е҆го ниже гл҃ю ктомꙋ во и҆мѧ е҆го·

И҆ быс̑҇ въ срд̑цы мое҆мъ ꙗ҆́ко ѻ́гнь горѧ́щъ, затворенъ же в꙽ костехъ мои҆хъ и҆ ѻ҆скꙋдѣхъ носи́ти не тръпѧ́щи, слы́шахъ бо досади́тельства мно́гимъ и҆ стра́хъ ѻ́крс̑҇тъ, погони́те и҆ пого́ним̑ е҆го ѿ всѣхъ мꙋжїи і҆ и҆же бѣхꙋ ми́рнїи моѝ.
и҆ съхранѧющи странꙋ̀ мою, а҆ще ка́ко прельсти́тсѧ и҆ премо́жемъ нань, и҆ послѣдꙋ́емъ мще́нїю ѿ него.
г҃ь же со мно́ю е҆сть, ꙗ҆́ко брани́тель крѣпкїи·

Сего ра́ди гонѧ́щеи м̂ѧ падꙋтъ, и҆ не́мощни бꙋдт̑ꙋ и постыдѧт̑сѧ ѕѣло, ꙗ҆́ко не разꙋмѣша̑ поноше́нїа вѣчнаго, и҆же никогда̀ и҆з꙽гла́дитсѧ·

И҆ ты̀ г҃и си́лъ, и҆скꙋси́тель пра́веднаго, и҆же и҆ вѣдаеши ѹ҆тро́бы и҆ срд̑це.
молю ти сѧ да ви́ждꙋ мще́нїе твое на нихъ·

тебѣ б̂о ѿкры́хъ прю мою·

По́ите г҃ꙋ хвалите г҃а, и҆же и҆зба́ви дш҃ꙋ ѹ҆бо́гаго ѿ рꙋкъ лꙋкавыхъ·

Проклѧтъ дн҃ь во́ньже родих̑сѧ, дн҃ь воньже породи м̂ѧ мт҃и моѧ, да не бꙋдетъ блс̑҇венъ·

проклѧ́тъ мꙋжъ, и҆же възвѣсти ѿц҃ꙋ мое҆мꙋ, рекꙋщи.
родисѧ тебѣ ѻ҆́трокъ мꙋжескъ, и҆ ꙗ҆́ко радостїю възвесели е҆го.
да бꙋдетъ чл҃къ то́и ꙗ҆́ко сꙋть гра́ди ꙗ҆же превратил̑҇ г҃ь, и҆ не раска́ѧсѧ.
да слы́шит̑ вопль заѹ́тра, и҆ рыданїе въ времѧ полꙋден꙽ное, и҆же мене не ѹ҆бил̑҇ ѿ ма́тери с̂и.
да бы́сть мн̂ѣ мт҃и моа гро́бъ, и҆ чре́сла е҆ѧ̀ зача́тїе вѣчное.
въскꙋю ѿ ма́тери с̂и и҆зше́лъ е҆смь, да вижд̑ꙋ трꙋдъ и҆ болѣзни, и҆ растлѧт̑сѧ въ постыдѣнїе дн҃и моѝ·

Глв̑҇а, к҃а·

Сло́во и҆же бы́сть ѿ г҃а къ і҆еремїи.
когда̀ посла̀ к немꙋ цр҃ь седекїа, фас꙽сꙋра сн҃а гол̑҇кїа, и҆ софо́нїа сн҃а манасїа сщ҃е́нника рекꙋщ́и·

Въспроси за на г҃а, и҆же навходоно́соръ цр҃ь вавѷло́ньскїи ѻ҆полчи́сѧ на нас̑҇.
а҆ще ѹ҆бо сътвори́тъ г҃ь с на́ми по всѣмъ чюдесем̑ свои҆мъ, да ѿи́детъ ѿ нас̑҇·

И҆ рече і҆еремїѧ к ни́мъ.
та́ко рцѣте седекїи, сїѧ рече г҃ь б҃ъ і҆и҆л҃евъ·

Се̂ аз̑ ѻ҆бращꙋ сосꙋды бран̑҇ныѧ, и҆же сꙋть въ рꙋка́хъ ва́ших̑, и҆́миже в̂ы ѻ҆полча́етесѧ на цр҃ѧ вавѷло́ньска и҆ и҆ халде́иска, и҆же ѻ҆б꙽стоѧ́тъ ва́съ ѻ҆́крс̑҇тъ стѣ́нъ.
и҆ съберꙋ т̂а по́средѣ гра́да сего̀, и҆ поборю а҆́зъ вас̑҇ въ рꙋкꙋ простертꙋ, и҆ в꙽ мы́шцꙋ крѣпкꙋ, и҆ въ ꙗ҆́рости и҆ въ гнѣвѣ вели́цѣ.
и҆ побїю ѻ҆бита́тели гра́да сего, чл҃комъ и҆ звѣремъ гꙋби́тельство вели́ко да мрꙋтъ·

И҆ посе́мъ рече г҃ь, да́мъ седекїа цр҃ѧ і҆ѹ́дина и҆ рабы̀ е҆го и҆ лю́ди е҆го і҆ иже ѻ҆ста́влени сꙋть въ гра́дѣ семъ ѿ гꙋби́тельства и҆ меча и҆ гла́дом̑ в꙽ рꙋ́кꙋ навходоносо́рꙋ цр҃ю вавѷлон̑҇скꙋ, и҆ в рꙋкꙋ врагомъ их̑, и҆ в рꙋ́кꙋ и҆́щꙋщих̑ дш҃а их̑, и҆ побїет̑ и҆хъ ѻ҆́стрїем꙽ меча̀, и҆ не ѹ҆́кло́нитсѧ, ни́же простит̑ ни́же ѹ҆млрс̑҇дитъсѧ.
и҆ къ лю́демъ си́мъ речеши·

Сїѧ рече г҃ь б҃ъ, с̂е а҆́зъ даю̀ пред̑ ва́ми пꙋть живот̑ныи и҆ пꙋть смр҃тныи.
и҆же ѻ҆бита́етъ во гра́дѣ семъ ѹ҆́мретъ мечемъ и҆ гла́домъ и҆ гꙋби́тельствомъ.
и҆же и҆сходѧ́щь бꙋ́детъ и҆ прибѣжи́тъ къ халдѣ́ѻм꙽ и҆же ѻ҆б꙽стоѧ́тъ ва́съ, жи́въ бꙋдет̑.
и҆ бꙋдетъ е҆мꙋ дш҃а е҆го ꙗ҆́ко плѣнъ.
поста́вихъ б̂о лице моѐ на град̑ сїи и҆ въ зло̀ и҆ не въ бл҃го, рече г҃ь.
въ рꙋ́кꙋ цр҃ѧ вавѷло́ньска да́стьсѧ, и҆ съж꙽жет̑ е҆го ѻ҆гнемъ, и҆ до́мъ цр҃ѧ і҆ѹ́дина·

Слы́шите сло́во гн҃е до́ме двд̑въ.
реч̑҇ г҃ь, сꙋди́те заѹ҆́тра сꙋдъ, і҆ изба́вите си́лою ѹ҆гнетена ѿ рꙋ́кꙋ клеве́щꙋщаго.
не ѹ҆бо и҆зы́детъ ꙗ҆́рости мое́а ꙗ҆́ко ѻ҆́гнь и҆ съж꙽жетсѧ, и҆ не бꙋдет̑ и҆же пога́сит̑, ради лꙋка́выхъ мыш꙽ленїи ва́шихъ.
с̂е а҆́зъ к тебѣ ѻ҆бита́ющꙋ въ крѣпцѣ и҆ по́лнѣ ѹ҆долїи, рече г҃ь.
и҆же гл҃ете кт̂о побїет꙽ нас̑҇, и҆ кт̂о вни́детъ въ домы̀ на́ша.
и҆ посѣщꙋ на ва́съ по́ плоти мышленїи ва́шим꙽, рече г҃ь.
и҆ въж꙽гꙋ ѻ҆́гнь в лѣсѣ е҆го, и҆ пожретъ вс̂ѧ ѻ҆́крс̑҇тъ е҆го·

Глв̑҇а, к҃в·

Сїѧ рече г҃ь.
вни́ди въ до́м꙽ цр҃ѧ і҆ѹ́дина, и҆ гл҃еши тамо сло́во т̂о, и҆ речеши.
слы́ши сло́во гн҃е цр҃ю і҆ѹ́дин꙽, и҆же сѣди́ши на прс̑҇толѣ двд҃вѣ т̂ы и҆ рабѝ твоѝ и҆ лю́ди твоѧ входѧ́щеи по две́рехъ сих̑·

Сїѧ реч̑҇ г҃ь, твори́те сд̑ꙋ и҆ правдꙋ, і҆ и҆зба́вите си́лою ѹ҆гнетена ѿ рꙋкꙋ клевет̑ника.
и҆ пришелца и҆ си́ра и҆ вдови́цꙋ не хощите ѻ҆скорби́ти, н̂и ѹ҆гнетите безакон̑҇но и҆ кро́вь непови́ннꙋ не и҆злїете на мѣстѣ то́мъ·

А҆ще б̂о творѧ́ще сътворите сло́во т̂о, вни́дꙋтъ по вра́тѣхъ до́мꙋ сего̀ цр҃и сѣдѧ́щїи ѿ ро́да̑ двд̑ва на прс̑҇тлѣ е҆го.
и҆ сѣда́юще на колесни́ца и҆ на конѧ̀, тїи и҆ рабѝ и҆ лю́ди и҆хъ·

И҆же а҆ще не ѹ҆слы́шите словес̑҇ сих꙽, самъ въ себѣ заклѧх̑сѧ рече г҃ь.
и҆же в꙽ пꙋсты́ню бꙋдетъ до́мъ сїи·

И҆же сїа рече г҃ь, на дом̑ цр҃ѧ і҆ѹ́дина.
галаа́дъ т̂ы мнѣ̀ глава лива́ньскаѧ а҆ще не поста́влю тебѐ в꙽ пꙋсты́ню, въ гра́ды не ѻ҆бита́нны, и҆ ѻ҆сщ҃ꙋ на тѧ ѹ҆бива́юща мꙋ́жа и҆ ѻ҆рꙋжїе е҆го.
и҆ посѣкт̑ꙋ и҆з꙽бра́нныѧ ке́дры твоѧ̀, и҆ връгꙋтъ на ѻ҆́гнь.
и҆ преи҆дꙋтъ ꙗ҆зы́цы мно́ѕи по гра́дꙋ семꙋ̀.
и҆ речет̑ е҆ді́нъ ко́ждо и҆с꙽кренемꙋ свое҆мꙋ, въскꙋ́ю сътвори г҃ь та́ко гра́дꙋ семꙋ вели́комꙋ.
и҆ ѿвѣща́ютъ.
сего ради и҆же ѻ҆ста́́виша завѣтъ г҃а б҃а свое҆го, и҆ поклони́шасѧ бо́гомъ чюжд̑имъ и҆ послꙋжи́ша и҆мъ.
не пла́чите мр҃тваго ни жа́лите на́нь пла́чемъ·

пла́чите е҆го и҆же ѿидетъ, и҆же не въз꙽врати́тсѧ ктомꙋ̀, н̂и ѹ҆ви́дит̑ землѧ̀ рожде́нїѧ свое҆го·

И҆же сїѧ рече г҃ь къ селꙋмъ сн҃ꙋ і҆ѻ҆сїинꙋ цр҃ю і҆ѹ́динꙋ, и҆же црс̑҇твова за і҆ѻ҆сїю ѿц҃а свое҆го.
і҆же и҆зшел̑҇ е҆сть ѿ мѣста сего̀, не въз꙽вратит̑сѧ ктомꙋ̀ н̂о в мѣсто т̂о на́ньже преведо́хъ е҆го та́мо ѹ҆́мрет̑, и҆ землю сїю не ѹ́зритъ ктомꙋ̀·

Го́ре и҆же съѕида́етъ до́мъ сво́и въ непра́вдѣ, и҆ го́рницы своѝ не въ сꙋ́дъ.
дрꙋ́га свое҆го погнететъ сꙋе́тно, и зм̑ды не възда́сть е҆мꙋ.
и҆же рече съѕиждꙋ себѣ до́мъ простра́ненъ, и҆ го́рницы широ́ки, и҆же ѻ҆тво́ритъ себѣ ѻ҆кна̀.
и҆ сътвори сво́ды кедровы, пи́шетъ же черв꙽цемъ·

е҆да̀ л̂и црс̑҇твꙋе́ши ꙗ҆́ко подоби́шис̑҇ ке́дрꙋ.
ѿц҃ъ твои не ꙗ҆де л̂и и҆ не пи́т꙽, и҆ твори сꙋдъ и҆ пра́вдꙋ, тогда̀ е҆гда̀ бл҃го бѣ е҆мꙋ.
сꙋдилъ прю̀ ѹ҆бо́гаго, и҆ требꙋ́ющаг̑҇ въ бл҃го своѐ, не сего л̂и рад̑и̑ и҆же позна м̂ѧ, рече г҃ь.
твои́ же ѻ҆́чи и҆ срд̑це къ скꙋпости и҆ къ кро́ви не повин꙽нѣи и҆злїѧ́нїю, и҆ къ ѻ҆клевета́нїю, и҆ къ тече́нїю лꙋка́вым꙽ дѣлом̑·

Сего ради сїѧ реч̑҇ г҃ь, къ і҆ѻ҆а҆кимꙋ сн҃ꙋ і҆ѻ҆сїинꙋ цр҃ю і҆ѹ́динꙋ.
не пла́чютъ е҆го, го́ре бра́те, и҆ го́ре се́стро.
не въспоют̑ е҆мꙋ, го́ре господи́не, и҆ го́ре нарочи́те.
погребе́нїемъ ѻ҆́слимъ погребе́тсѧ, смра́денъ і҆ и҆зверженъ вн̂ѣ вра́тъ і҆ерс̑҇ли́ма·

Възы́иди на ливан̑҇ и҆ възопїи, і҆ въ васанъ дажд̑ь глас̑҇ тво́и.
възопїи къ приходѧ́щим̑, и҆же сътрени сꙋть вс̂и любовнїи твоѝ.
гл҃алъ е҆смь к тебѣ въ ѹ҆множенїи твоем̑, реклъ е҆си не ѹ҆слы́шꙋ.
с̂е е҆сть пꙋть твои ѿ ю́ности твое́ѧ, и҆же не послꙋша гла́са мое҆го·

Вс̂и па́стыри твоѝ пасꙋтъ вѣтръ, и҆ любо́внїи твоѝ въ плѣненїе по́идꙋтъ.
и҆ тогда̀ посты́дишисѧ и҆ посрами́шисѧ ѿ всѧ́каго лꙋка́въства твое҆го.
и҆же сѧ́деши въ ливанѣх, и҆ ѹ҆гнѣздишисѧ въ ке́дрѣхъ.
ка́ко постенал꙽ е҆си и҆же е҆гда̀ прїидо́ша тебѣ бо́лѣзни, ꙗ҆́ко бо́лѣзни родѧ́щїѧ.
живꙋ а҆зъ рече г҃ь.
и҆же аще бꙋдет̑ и҆е҆хо́нїа сн҃ъ і҆ѻ҆а҆кима цр҃ѧ і҆ѹ́дина, прьстен̑҇ въ рꙋкꙋ деснꙋ́ю мою̀, ѿто́лѣ и҆стор̑҇гнꙋ е҆го.
и҆ дам̑ тебе въ рꙋкꙋ и҆́щꙋщим̑ дш҃ꙋ твою̀, и҆ въ рꙋкꙋ и҆́хже т̂ы бои́шисѧ лица̀.
и҆ въ рꙋ́кꙋ нав꙽ходоносора цр҃ѧ вавѷло́ньска, и҆ въ рꙋкꙋ хал̑҇деѻм̑.
и послю т̂ѧ и҆ мт҃рь твою̀ и҆же роди т̂ѧ въ зе́млю чю́ждꙋ, в не́иже рожд̑е нѣсте, тꙋ же ѹ҆́мрете.
и҆ в꙽ землю̀ в нюже тїи възвд̑ижютъ дш҃ꙋ свою̀ да воз̑вратѧт̑сѧ т̂ꙋ, и҆ не ѻ҆братѧт̑сѧ·

е҆да̀ сосꙋдъ скꙋдел꙽ничь и҆ съкрꙋшенъ мꙋжъ се́и е҆хо́нїѧ.
е҆да̀ сосꙋдъ бе̑ всѧ́кого хотѣнїѧ.
въскꙋю ѿрине́ни сꙋть то́и и҆ сѣмѧ е҆го, и҆ повержени сꙋть въ землю е҆ꙗ҆́же не ви́дѣша.
зе́мле зе́мле, зе́мле слы́ши словеса̀ гн҃ѧ·

Сїѧ рече г҃ь, напиши мꙋж́а сего̀ неплод̑на мꙋжа, и҆же во́ дн҃ехъ свои҆хъ не преспѣва́етъ.
ни б̂о бꙋдет̑ ѿ сѣмени е҆го мꙋж꙽ и҆же сѧ́дет̑ на прс̑҇тлѣ двд҃вѣ, и҆ влас̑҇ и҆́мыи ктомꙋ̀ въ і҆ѹ́дѣ·

Глв̑҇а, к҃г·

Горе пасты́ремъ и҆же растача́ютъ и҆ растерза́ют̑ ста́да паствы мое҆ѧ, рече г҃ь.
сего ради сїѧ рече г҃ь б҃ъ і҆и҆л҃евъ къ пасты́рем꙽, и҆же пасꙋть лю́ди моа.
в̂ы расточи́ли е҆стѐ ста́до мое, и҆ поверго́сте е҆̀҆̀, и҆ не посѣти́сте е҆го.
с̂е а҆зъ посѣщꙋ на вас̑҇ лꙋкав꙽ство мышле́нїи ва́ших̑, рече г҃ь.
и҆ а́зъ съберꙋ ѻ҆стан꙽ки ста́да мое҆го ѿ всѣ́хъ земль, в нѧ́же и҆зверго́хъ их̑ та́мо.
и҆ ѻ҆брѧщꙋ их̑ к꙽ селе́нїемъ и҆хъ, и҆ воз̑растт̑ꙋ и҆ ѹ҆множатсѧ.
и҆ въздвигнꙋ над̑ ни́ми пасты́рѧ и҆ ѹ҆пасꙋтъ и҆хъ.
не ѹ҆боѧ́тсѧ ктомꙋ̀ и҆ не ѹ҆жаснт̑ꙋсѧ, и҆ ни е҆ді́нъ и҆щет̑сѧ ѿ числа, рече г҃ь·

Се дн҃їе грѧдꙋтъ рече г҃ь.
и҆ възд̑ви́гнꙋ двд҃ꙋ сѣ́мѧ пра́вед̑но, и҆ црс̑҇твꙋет꙽ цр҃ь, и҆ премꙋ́дръ бꙋ́дет꙽, и҆ сътво́рит̑ сꙋдъ и҆ пра́вдꙋ на землѝ.
въ дн҃ехъ тх̑ѣ сп҃сетсѧ і҆ѹ́да, і҆и҆л҃ь пребꙋдетъ в наде́жди.
и҆ с̂е е҆сть и҆мѧ и҆же воз̑зовт̑ꙋ е҆го г҃ь пра́веденъ нашъ·

Сего ради с̂е дн҃їе прїидꙋтъ рече г҃ь, и҆ не рекꙋт꙽ ктомꙋ живет꙽ г҃ь, и҆же и҆зве́лъ сн҃ы і҆и҆л҃евы ѿ землѧ̀ е҆гѷпет꙽ски.
н̂о живе́тъ г҃ь и҆же и҆зведѐ и҆ преве́лъ сѣмѧ до́мꙋ і҆и҆л҃ева ѿ зем̑лѧ̀ сѣвер꙽ски, и҆ ѿ всх̑ѣ зе́мль в нѧ́же и҆зверго́хъ и҆хъ та́мо ѻ҆бита́ютъ в꙽ землѝ свое́и·

Къ проро́комъ, сътре́но е҆сть срд̑це мое въ мнѣ̀, и҆ потрепета́ша всѧ ко́сти моа.
бы́хъ ꙗ҆́ко мꙋж́ъ пїѧ́н꙽, и҆ ꙗ҆́ко чл҃къ е҆гоже ѻ҆долѣ вино̀, ѿ лица̀ гн҃ѧ, и҆ ѿ лица̀ сло́въ ст҃ыхъ е҆го.
иже блꙋжд̑енїем̑ испол̑҇нена е҆сть землѧ̀.
и҆ ѿ лица̀ проклѧ́тїѧ пла́касѧ землѧ̀, и҆с꙽ше́на быс̑҇ по́лнаѧ пꙋсты́ни.
бы́сть тече́нїе и҆хъ лꙋка́во, и҆ крѣ́пости и҆хъ не съгла́сны.
прро̑҇къ же и҆ сщ҃ен꙽никъ с꙽кврънены сꙋть.
и҆ в домꙋ̀ мое҆мъ ѻ҆брѣтох̑ лꙋка́въство их̑, рече г҃ь.
того ради пꙋть и҆хъ бꙋ́детъ ꙗ҆́ко по́лзокъ въ тмах̑, пот꙽кнꙋт꙽ бо сѧ и҆ разд̑рꙋшат̑сѧ в не́мъ.
принесꙋ б̂о на ни́хъ ѕла́ѧ лѣто посѣще́нїа и҆хъ, рече г҃ь.
и въ прро̑҇цехъ самарїи видѣхъ бꙋ́иство, и҆ прро̑҇чествова́хꙋ въ ваали́ма, и҆ прелща́хꙋ лю́ди моѧ̀ і҆и҆л҃ѧ.
и҆ въ прро̑҇цѣх꙽ і҆ерс̑҇лима ви́дѣхъ подо́бїе блꙋдѧщихъ и҆ пꙋть лжи́въ.
и҆ съкрѣпи́ша рꙋки стропти́вымъ, да не ѻ҆брати́тсѧ е҆ді́нъ ко́ждо ѿ лꙋка́въства свое҆го.
и҆ бы́ша мн̂ѣ вс̂и содо́млѧне, и҆ ѻ҆бита́тели е҆го ꙗ҆́ко гомо́рѧне·

Сего рад̑и̑ та́ко рече г҃ь си́лъ къ прро̑҇комъ.
с̂е а҆зъ напита́ю их̑ пелыне́мъ, и҆ напою и҆хъ же́лчїю.
ѿ прро̑҇ковъ б̂о і҆ерс̑҇лима и҆зошло е҆сть скверненїе на всю зе́млю·

Сїѧ реч̑҇ г҃ь си́лъ, не хо́щите послꙋшати слове́съ прро̑҇къ, иже прро̑҇чествꙋ́ютъ вам̑ и҆ прельща́ютъ ва́съ.
видѣ́нїе срд̑ца свое҆го гл҃ютъ, не ѿ ѹ҆́стъ гн҃ихъ.
рекꙋтъ симъ и҆же хꙋлѧтъ м̂ѧ, гл҃ал̑҇ е҆сть г҃ь, ми́ръ бꙋдетъ вамъ.
и҆ всм̑ѣ и҆же хо́дѧтъ въ строптив꙽ствѣ срд̑ца свое҆го реко́ша не прїидет̑ на нас̑҇ лꙋка́во.
кт̂о бо бы́сть в꙽ совѣтѣ гн҃и, и҆ ви́дѣ и҆ слы́ша словеса̀ е҆го, кт̂о помы́сли сло́во того и҆ слы́ша·

Се ви́хръ ꙗ҆́рости гн҃ѧ и҆зы́идет̑, и҆ бꙋ́рѧ растор꙽гающаа на главꙋ̀ нечести́выхъ прїидетъ.
не въз꙽врати́тсѧ ꙗ҆́рость гн҃ѧ да́же доко́лѣ сътво́ритъ, и҆ да́же доко́лѣ съверши́тъ помышле́нїе срд̑ца свое҆го·

въ послд̑ѣнѧѧ дн҃и съразꙋмѣ́сте совт̑ѣ е҆го.
не послах̑ прро̑҇ки, а҆ ѻ҆ни теча́хꙋ.
не гл҃ах꙽ к ним̑, и҆ тїи прро̑҇чествовахꙋ.
а҆ще бы ста́ли въ совѣтѣ мое҆мъ, и҆ възвѣсти́ли словеса̀ моѧ̀ лю́демъ моим̑.
ѿврати́лъ бых̑ ѹ҆бо ѧ҆̀ ѿ пꙋтѝ их̑ зла́го, и҆ ѿ помышле́нїи и҆хъ стропти́вых̑·

Є҆да̀ мни́ши ꙗ҆́ко то́чїю ѿ близ̑ка б҃ъ а҆зъ е҆смь рече г҃ь, а҆ не б҃ъ ѿдале́ча.
а҆ще ѹ҆таи́тсѧ мꙋж́ъ въ съкрове́ных̑, а҆ а́зъ не ѹ҆зрю е҆го, рече г҃ь.
е҆да̀ нб҃о и҆ зе́млю не а҆зъ наполнѧ́ю рече г҃ь.
слы́шахъ и҆же реко́ша прро̑҇цы прро̑҇чествꙋ́юще въ и҆мѧ мое лжꙋ̀, и рекꙋще.
ви́дѣхъ сонъ видѣхъ сонъ.
доколѣ т̂о е҆сть въ срд̑цы прро̑҇ковъ прорица́ющихъ лжꙋ̀, и҆ прро̑҇чествꙋ́ющихъ лще́нїемъ срд̑ца свое҆го, чт̂о хотѧ́ще твори́ти, да забꙋдꙋтъ люди моѧ̀ и҆мѧ мое ради со́нїѧ и҆х꙽, и҆же вѣщают̑ е҆ді́нъ ко́ждо и҆́с꙽кренемꙋ свое҆мꙋ.
ꙗ҆́ко забы́ша ѿц҃ы их̑ и҆мени мое҆го, ради ваа҆ла·

Прро̑҇къ и҆же и҆́мать сновидѣ́нїе, вѣщает꙽ сновидѣ́нїе.
і҆ и́же и҆́мать слово мое, гл҃етъ сло́во мое и҆́стинно.
чт̂о плѣвелъ къ пшени́цѣ рече г҃ь.
е҆да̀ словеса̀ моѧ̀ не сꙋть ꙗ҆́ко ѻ҆́гнь горѧ́щїи рече г҃ь, и҆ ꙗ҆́ко мла́тъ сътры́ющи ка́мень·

Сего ради с̂е а҆зъ къ прро̑҇комъ рече г҃ь, и҆же кра́дꙋт꙽ словеса̀ моѧ̀ е҆ді́нъ ко́ждо ѿ и҆́скренѧго свое҆го·

Се а҆зъ къ прро̑҇ком̑ рече г҃ь, и҆же въспрїе́млютъ ꙗ҆́зы́ки своѧ̀, и҆ гл҃ют̑ реч̑҇ г҃ь.
с̂е а҆зъ на прро̑҇ки мечта́юща лжꙋ̀ реч̑҇ г҃ь.
и҆же провѣща́ша т̂а, и҆ прельсти́ша лю́ди моѧ въ лжꙋ̀ свою̀, и҆ в чюдесех̑ свои҆хъ, ꙗ҆́ко а҆зъ не посла́хъ их̑, ни заповѣдахъ им̑.
ѻ҆ни же ничтоже ѹ҆пѣша лю́демъ симъ реч̑҇ г҃ь.

А҆ще бо въспро́сѧт̑ по́лкъ то́и, и҆ли прро̑҇къ и҆ли сщ҃енникъ рекꙋщи.
чт̂о е҆сть бре́мѧ гн҃е.
рече́ши к ни́м꙽, в̂ы е҆стѐ бре́мѧ.
ѿмещꙋ и҆́стин꙽но вас̑҇ рече г҃ь.
и҆ прро̑҇къ и҆ сщ҃енник꙽, и҆ по́лкъ и҆же речет̑ бре́мѧ гн҃е, посѣщꙋ на мꙋжа того и҆ на до́мъ е҆го·

Се гл҃ите е҆ді́нъ кожд̑о, къ и҆́скренемꙋ и҆ къ бра́тꙋ свое҆мꙋ, чт̂о ѿвѣща г҃ь, и҆ чт̂о гл҃алъ е҆с г҃ь.
и҆ бремѧ гн҃е ктомꙋ не помѧне́тсѧ.
и҆же бремѧ бы́сть е҆ді́номꙋ комꙋжд̑о слово е҆го.
и҆ преврати́лъ е҆си словеса г҃а б҃а живаго, г҃а си́лъ б҃а нашег̑҇.
сїа р꙽цы къ про̑҇ркꙋ, чт̂о ѿт̑вѣща тебѣ г҃ь, и҆ чт̂о гл҃а г҃ь.
а҆ще же речете бре́мѧ гн҃е, сего ради та́ко рече г҃ь, и҆же рекли е҆сте гл҃ъ сеи бремѧ гн҃е.
и҆ послахъ к вамъ рекꙋщи, нее гл҃ите бремѧ гн҃е.
сего ради с̂е а҆зъ возмꙋ̀ васъ носѧщи, и҆ ѻ҆ста́влю васъ и҆ град̑ ꙗ҆же да́хъ вамъ, и҆ ѿц҃емъ вашимъ ѿ лица̀ мое҆го.
и҆ дамъ в꙽ поноше́нїе вѣчное, и҆ въ срамотꙋ̀ вѣчнꙋю, и҆же никогда в꙽ забве́нїе загла́дитсѧ·

Глв̑҇а, к҃д·

Показа мн̂ѣ г҃ь, и҆ с̂е дв̂ѣ ко́шницы полны смоквїи поста́влены пред̑ хра́момъ гн҃им̑.
понеже провелъ навходоносо́ръ цр҃ь вавѷло́нъскїи е҆хонїю сн҃а і҆ѻ҆а҆ки́мова цр҃ѧ і҆ѹ́дина и҆ нача́лники е҆го, и҆ златокꙋзньца и҆ затвори́телѧ ѿ і҆ерс̑҇лима, преведе их̑ въ вавѷло́нъ·

Ко́шница е҆ді́на смо́кви добры̀ и҆мѣ́ющи ѕѣло, ꙗ҆́ко ѻ҆бы́чаи смо́квемъ бы́ти прьвыхъ вре́менъ.
и҆ ко́шница е҆ді́на смокви злы̀ ѕѣло, и҆хже ꙗ҆́сти не можа́хꙋ того ради и҆же бѣхꙋ злѝ·

И҆ рече г҃ь къ мнѣ, чт̂о ты̀ ви́диши і҆еремїе.
и҆ рекох꙽ смо́кви.
смокви бл҃ги, бл҃ги ѕѣло, и҆ ѕлїи ѕлѝ ѕѣло, и҆хже ꙗ҆́сти не можа́хꙋ, сего ради и҆же сꙋть ѕлѝ.

И҆ бысть слово гн҃е къ мн̂ѣ рекꙋщи, сїѧ рече г҃ь б҃ъ і҆и҆л҃евъ.
ꙗ҆́коже смокви сїѧ бл҃ги, та́ко позна́ю преселе́нїе і҆ѹ́дино, их̑же послах̑ ѿ мѣста сего в꙽ землю халдѣискꙋ въ бл҃го.
и҆ поста́влю ѻ́чи моѝ на нихъ на ѹ҆тѣше́нїе, и҆ преведꙋ и҆хъ паки в꙽ зе́млю сїю, и҆ съзи́ждꙋ их̑ и҆ не разорю̀.
и҆ насажд̑ꙋ и҆хъ, и҆ не и҆сторгнꙋ.
и҆ дамъ и҆м꙽ срд̑це да ѹ҆вѣдѧтъ м̂ѧ ꙗ҆ко а҆зъ е҆смь г҃ь·

И҆ бꙋдꙋтъ мн̂ѣ в лю́ди, и҆ а҆зъ бꙋдꙋ и҆мъ въ б҃а.
и҆же ѻ҆братѧтсѧ къ мн̂ѣ всѣмъ срд̑цемъ свои҆мъ·

И ꙗ҆́коже смо́кви злѣиши и҆хже ꙗ҆сти не можа́хꙋ, сего ради и҆же сꙋть ѕлѝ<.>

Сїѧ ре г҃ь.
та́ко да́мъ седекїю цр҃ѧ і҆ѹ́дина, и҆ нача́лники е҆го, и҆ ѻ҆ста́вшихъ ѿ і҆ерс̑҇лима и҆же ѻ҆ста́ша въ градѣ семъ, і҆ и҆же ѻ҆бита́ют꙽ въ землѝ е҆гѷпетъстеи·

И҆ дамъ и҆х꙽ въ востꙋжанїе и҆ ѻ҆злобле́нїе, всѣмъ црс̑҇твомъ земнымъ въ поноше́нїе и҆ въ при́тчю, и҆ въ пререка́нїе и҆ въ проклѧ́тїе въ всх̑ѣ мѣстѣхъ, ѿ которых̑ и҆звергох̑ и҆х꙽.
и҆ послю на ни́хъ мечь и҆ гладъ и҆ па́гꙋбꙋ, дон̑҇деже и҆стлѧт̑сѧ ѿ землѧ̀ ю҆же дахъ и҆мъ и҆ ѿц҃ем꙽ их̑

Глв̑҇а, к҃е·

Сло́во иже бы́сть къ і҆еремїи ѻ҆ всѣхъ лю́дехъ і҆ѹ́диных̑.
в лѣто четве́ртое и҆ѻ҆а҆кима̑ сн҃а і҆ѻ҆сїина цр҃ѧ і҆ѹ҆дина.
то е҆сть лѣто прьвое навходоносора цр҃ѧ вавѷлонъска·

И҆ гл҃ал꙽ е҆сть і҆еремїѧ про̑҇ркъ къ всѣмъ лю́дем̑ і҆ѹ́диным꙽, и҆ къ всѣмъ ѻ҆бита́телем̑ і҆ерс̑҇лима рекꙋщи.
ѿ третїѧгонадесѧте лѣта, і҆ѻсїа сн҃а а҆м꙽мо́нѧ цр҃ѧ і҆ѹ́дина даже до дн҃е сего.
т̂о е҆сть третее и҆ к҃ лѣто.
бы́сть слово гн҃е къ мн̂ѣ, и҆ гл҃ахъ к꙽ ва́мъ ѿ нощи въста́ющи и҆ гл҃ющи и҆ не слы́шасте.
и҆ посла̀ г҃ь к꙽ вамъ всѣхъ рабъ свои҆хъ про̑҇ркъ въста́ющи заѹ́тра посыла́ю҆щи, і҆ не слы́шасте, ни приклонисте ѹ҆шеса̀ ваша да слы́шите е҆гд̑а гл҃аше, ѻ҆братитесѧ е҆ді́нъ кождо ѿ пꙋтѝ свое҆го зла́го, и҆ ѿ злѣишихъ помышленїи вашихъ.
и҆ ѻ҆бита́ете в꙽ земли ю҆же г҃ь дасть вамъ, и҆ ѿц҃емъ вашимъ ѿ вѣка даже и҆ до́ вѣка.
и҆ не хощите и҆тѝ по боѕѣхъ чюждихъ е҆же слꙋжи́ти им̑, и҆ покланѧ́тисѧ им̑ ни мене къ гнѣвꙋ прозовѣте в꙽ дѣлх̑ѣ рꙋкꙋ ва́шею, и҆ не ѻ҆злоблю̀ вас̑҇.
и҆ не послꙋшасте мѧ, рече г҃ь.
е҆же не подвиза́ти м̂ѧ къ гнѣвꙋ в꙽ дѣлех̑ рꙋкꙋ вашею в лꙋка́въствѣ вашемъ·

Того ради сїѧ рече г҃ь си́лъ, иже не послꙋшасте словесъ мои҆хъ.
с̂е а҆зъ послю и҆ въспрїимꙋ всѧ племена сѣверьска, реч̑҇ г҃ь.
и҆ навходоносора цр҃ѧ вавѷлоньска раба моего.
и҆ приведꙋ и҆хъ на землю сїю, и҆ на ѻ҆бита́тели еѧ, и҆ на всѧ ꙗ҆зы́ки и҆же ѻ҆́крс̑҇тъ е҆го сꙋть, и҆ ѹ҆бїю их̑ и҆ поста́влю и҆хъ въ ѹ҆́жасъ, и҆ въ звизда́нїе и҆ въ запꙋстѣнїе бѣчное.
и҆ погꙋблю̀ ѿ нихъ гласъ ра́дости, и҆ гла́съ веселїѧ, гла́съ жениха̀, и҆ глс̑҇а невѣсты глас̑҇ жерновенъ, и҆ свт̑ѣ свѣтилника̑.
и҆ бꙋдетъ всѧ землѧ е҆го в꙽ запꙋстѣнїе и҆ въ ѹ҆́жасъ.
и҆ послꙋжатъ вси ꙗ҆зы́цы сїи цр҃ю вавѷло́ньскꙋ, о҃ лѣтъ.
е҆гда же и҆сполнени бꙋдꙋтъ о҃ лѣтъ.
посѣщꙋ на цр҃ѧ вавѷлоньска, и҆ на люди сїи, реч̑҇ г҃ь, безако́нїа и҆хъ, и҆ на землю халдеискꙋ.
и҆ положꙋ т̂ꙋ въ запꙋстѣнїе вѣчное, и҆ приведꙋ на́ землю т̂ꙋ всѧ̀ словеса̀ моѧ, и҆же гл҃алъ е҆смь проти́вꙋ еѧ, всѐ и҆же пи́сано ес̑҇ въ кни́ѕѣ се́и.
и҆ е҆ли́каже про̑҇рчьствова і҆еремїа на всѧ̀ ꙗ҆зы́ки и҆же слꙋжи́ша и҆мъ, е҆гда бѣша ꙗ҆зы́цы мно́зи, и҆ цр҃и вели́цы·

и҆ възда́мъ и҆мъ по дѣломъ и҆хъ, и҆ по творе́нїю рꙋкꙋ и҆хъ·

Є҆лико прорече і҆еремїѧ до всх̑ѣ стран̑҇·

Та́ко гл҃етъ г҃ь б҃ъ і҆и҆л҃евъ.
възмѝ ча́шꙋ вина̀ несмѣше́наго сего ѿ рꙋки мое҆ѧ.
да напои҆ши всѧ̀ страны̀ к нимъже а҆зъ послю̀ т̂ѧ.
і҆ и҆спїют꙽ і҆ и҆зблю́ютъ.
и҆ ѻ҆бꙋѧ́ютъ ѿ лица̀ мечю̀, е҆гоже а҆зъ пꙋщꙋ средѣ и҆х꙽.

И҆ взѧ́хъ ча́шꙋ ѿ рꙋки гн҃ѧ, и҆ напоих̑ всѧ̀ страны̀, к ни́мже посла̀ мѧ г҃ь.
на і҆ерс̑҇лимъ и҆ на гра́ды і҆ѹ́дины, и҆ на цр҃ѧ е҆го и҆ на кнѧ́зѧ е҆го.
ꙗ҆́ко положи́ти ѧ҆̀ въ ѻ҆пꙋстѣнїе, и҆ в꙽ непрохожд̑енїе, и҆ въ звизда́нїе.
и҆ фараѻ́на цр҃ѧ е҆гѷпет꙽ска, и҆ дѣти е҆го, и҆ вел̑҇мо́жа е҆го.
и҆ всѧ̀ лю́ди е҆го, и҆ всѧ̀ примѣсники ег̑҇.
и҆ всѧ̀ цр҃ѧ и҆ноплеменник̑҇ а҆скало́на, и҆ га́зꙋ, и҆ а҆к꙽кро́на, и҆ ѻ҆станокъ ха́зовъ, і҆ и҆дꙋмеѧ, и҆ моа҆вит꙽скꙋю, и҆ сн҃ы а҆м꙽мо́нѧ.
и҆ всѧ̀ цр҃ѧ тѷрски, и҆ цр҃ѧ сѷдо́ньски, и҆ цр҃ѧ ѻ҆бонꙋ странꙋ морѧ.
и҆ деда́н꙽, и҆ ѳема́н꙽, и҆ росъ, и҆ всего ѻ҆стрижена пред̑ лицемъ е҆го.
и҆ всѧ̀ цр҃ѧ е҆ла́м꙽ски и҆ всѧ̀ цр҃ѧ прьски, и҆ всѧ цр҃ѧ ѿ восто́чїѧ далнѧѧ и҆ бли́жнѧѧ, кого́жд̑о къ бра́тꙋ е҆го.
и҆ всѧ̀ црс̑҇тва на лицы̀ землѧ̀, и҆ рече́ши.
та́ко рече г҃ь сил̑҇ б҃ъ і҆и҆л҃евъ.
пїите и҆ ѹ҆пїитесѧ і҆ и҆з꙽блю́ите, и҆ падетесѧ и҆ не въста́нете ѿ лица̀ меча̀, е҆гоже а҆зъ послю среди васъ·

И҆ бꙋдетъ е҆гда не въсхотѧ́тъ прїѧ́ти ча́ша ѿ рꙋки твоеѧ ꙗ҆́коже пи́ти, рече́ши си́це.
та́ко рече г҃ь, пїюще пїете, ꙗ҆ко въ градѣ в не́мже сѧ намѣни и҆́мѧ мое, и҆ а҆зъ начнꙋ зазлѧ́ти.
и҆ вы̀ ѻ҆чище́нїемъ не ѻ҆чи́ститесѧ.
ꙗ҆́ко меча̀ а҆зъ позыва́ю на всѧ̀ сидѧ́щаѧ на земли.
ты́ же прорече́ши до нихъ всѧ̀ словеса̀ сѝ, и҆ речеши.
г҃ь ѿ въсто́ка прїидетъ, ѿ ст҃аго свое҆го да да́сть гла́съ свои.
слово проречетъ ѿ мѣста свое҆го, си же ꙗ҆́ко и҆ емлюще ѿвѣща́ютъ, и҆л̂и на сѣдѧ́щаѧ на земли.
т̂ꙋ потребле́нїе нача̀ ѿ землѧ̀, ꙗ҆́ко сосꙋдъ въ странахъ г҃ꙋ сътвори́тсѧ къ всеи пло́ти.
нечести́вїи же ѿда́шас̑҇ мечю̀, гл҃етъ г҃ь<.>

Та́ко гл҃етъ г҃ь, сѐ ѕло и҆детъ ѿ страны̀ на странꙋ.
и҆ ви́хоръ вели́къ и҆схо́дитъ ѿ конца̀ земли.
и҆ бꙋдꙋт꙽ ꙗ҆зве́нїи ѿ г҃а въ дн҃ь гн҃ь, ѿ ча́сти землѧ̀ и҆ до ча́сти землѧ̀, не въкопают̑сѧ въ гнои, на лицы̀ землѧ̀ бꙋдꙋтъ.
въс꙽кли́чете пастꙋсѝ, и҆ възопїите, и҆ въс꙽плачете ѻ́вни ѻ́вчїи ꙗ҆́ко сконча́шасѧ дн҃їе ва́ши на заколенїе.
и҆ падетѐ ꙗ҆́ко ѻ́вни и҆з꙽бран̑҇нїи.
и҆зги́бнетъ бѣжа́нїе ѿ пастꙋхъ, и҆ сп҃сенїе ѿ ѻ́венъ ѻ́вчихъ.
гла́съ во́плѧ пастꙋш꙽ска, и҆ кличъ ѻ҆вецъ и҆ ѻ́венъ, ꙗ҆́ко потребитъ г҃ь па́жит̑ и҆хъ.
и҆ премлъкнет̑ доброта̀ ми́ра ѿ лица̀ ꙗ҆́рости гнѣва гн҃ѧ·

ѻ҆ста́ви ѧ҆̀ а҆ки левъ ста́ю свою, ꙗ҆́ко быс̑҇ землѧ̀ и҆хъ в꙽ непрохоже́нїе ѿ лица̀ меча̀ великаго·

Глв̑҇а, к҃ѕ·

В нача́токъ сн҃а і҆ѻ҆сїина цр҃ѧ і҆ѻ҆а҆кима.
бы́сть сло́во с̂е ѿ г҃а·

Та́ко рече г҃ь ста́ни въ дворѣ домꙋ гн҃ѧ.
и҆ проповѣси всемꙋ і҆ѹ́дѣ в꙽ходѧ́щимъ кла́нѧтисѧ в до́мъ гн҃ь всѧ̀ словеса̀ ꙗ҆́же съчиних̑ тебѣ проповѣда́ти и҆мъ, не ѹ҆ими словесѐ.
негли послꙋшавше ѻ҆братѧ́тсѧ ко́ждо ѿ пꙋтѝ свое҆го зла́го.
и҆ почїю ѿ ѕло́бы е҆же мы́шлю сътвори́ти им̑ ѕлых̑ ради хꙋдо́жествъ и҆хъ.
и҆ рече́ши, та́ко рече г҃ь.
а҆ще не послꙋшае҆те мене, ꙗ҆коже ходи́ти в꙽ зако́ны моѧ.
ꙗ҆́же дахъ пред̑ лицемъ ва́шим꙽ в꙽ послꙋшанїе словесъ ѻ́трокъ мои҆хъ про̑҇ркъ.
ꙗ҆́же а́зъ посылаю к вам̑ и҆зъ ѹ́тра, и҆ посла́хъ и҆ не послꙋшасте мене.
и҆ дамъ домъ сїи ꙗ҆́ко и҆ силꙋа҆ма.
и҆ гра́дъ сеи дамъ въ клѧ́твꙋ всѣмъ страна́мъ всеѧ землѧ·

И҆ слы́шаша жръцы и҆ лжѝ прро̑҇цы, и҆ всѝ лю́дїе, і҆еремїю гл҃юща в домꙋ̀ гн҃и<.>

И҆ бысть і҆еремїи премлъкнꙋвшꙋ, все е҆ли́ко съчини е҆мꙋ г҃ь гл҃ати всѣм꙽ лю́демъ.
и҆ ѧ́ша і҆ермїю жръцы̀ и҆ лжи прро̑҇ци, и҆ вси лю́дїе гл҃юще, см҃ртїю да ѹ́мрет꙽.
ꙗ҆́ко прорече и́менемъ гн҃имъ гл҃ѧ, ꙗ҆́ко и҆ силꙋа́мъ бꙋдетъ сеи до́мъ, и҆ гра́дъ се́и ѻ҆пꙋстѣетъ ѿ живꙋщих̑.
и҆ събра́шасѧ всѝ лю́дїе на і҆еремїю въ домꙋ гн҃и.

И҆ послꙋшаша кнѧ́ѕи і҆ѹ́дины словес̑҇ сихъ, и҆ в꙽зыдоша ѿ домꙋ цр҃ва в дом̑ гн҃ь, и҆ сѣдоша въ пред̑дверїи вратъ домꙋ гн҃ѧ.
и҆ рѣша жерьцы и҆ л꙽꙽жѝ про̑҇рцы кн҃ѕем̑ и҆ всм̑ѣ людем̑ гл҃ще.
сꙋд꙽ смр҃тныи чл҃кꙋ семꙋ, ꙗ҆́ко прорече на сеи град̑, ꙗ҆́коже слы́шасте въ ѹ́ши ва́ши·

И҆ рече і҆еремїѧ къ кнѧѕемъ и҆ всѣмъ лю́демъ гл҃ѧ.
г҃ь посла м̂ѧ прорещи на до́мъ сеи, и҆ на град̑ сеи всѧ̀ словеса̀ ꙗ҆же слы́шасте.
и҆ нн҃ѣ ѹ́ньша сътвори́те пꙋтѝ ва́ша, и дѣлеса̀ ва́ша, и҆ послꙋшаите гл҃а г҃а б҃а ва́шего.
и҆ ѻ҆ста́витсѧ г҃ь ѿ ѕлоб̑҇ ю҆же гл҃а на вы·

и҆ се а́зъ в рꙋкꙋ ва́шею, сътвори́те ми ꙗ҆́коже сѧ строит̑ ꙗ҆́коже ѹ҆не вамъ ꙗ҆́влѧ́етсѧ.
н̂о разꙋмѣ́юще да разꙋмѣ́ете, ꙗ҆́ко а҆ще ѹ҆бїете м̂ѧ в̂ы, кро́вь непови́ннꙋ дае҆те сами на́ сѧ, и҆ на гра́дъ се́и, и҆ на живꙋщаѧ в немъ.
ꙗ҆́ко по и́стин̑҇нѣ посла мѧ г҃ь гл҃ати к꙽ ва́мъ, въ ѹ́ши ва́ши всѧ̀ словеса̀ с̂и.
и҆ рѣша кнѧѕи и҆ вси людїе къ жръцемъ, и҆ къ всѣмъ лжи́мъ про̑҇ркомъ.
нѣсть чл҃кꙋ семꙋ сꙋдъ смр҃тныи, ꙗ҆́ко во и҆мѧ г҃а нашего гл҃а к꙽ намъ·

И҆ въста́ша мꙋжи ѿ ста́рецъ зе́мныхъ, и҆ рѣша всемꙋ събо́рꙋ люд̑скомꙋ гл҃ще.
михе́ѧ мораѳи́тъскїи, б̂ѣ въ дн҃и і҆езекїѧ цр҃ѧ і҆ѹ́дина, и҆ рече всѣмъ лю́демъ і҆ѹ́диномъ гл҃ѧ·

Та́ко реч̑҇ г҃ь.
сїѻ́нъ ꙗ҆́ко ни́ва разоре́тсѧ, и і҆е҆рс̑҇лимъ ꙗ҆́ко кꙋща пꙋдъска бꙋдет̑, и҆ гора ды́мнаѧ бꙋдетъ в лꙋгъ дꙋбрав꙽скь.
е҆да ѹ҆бива́а ѹ҆би и҆̀ е҆зекїа цр҃ь і҆ѹ́динъ, и҆ всѝ лю́дїе і҆ѹ́дины.
не ѹ҆боѧ́ша ли сѧ ѹ҆бо г҃а, и҆ ꙗ҆́ко моли́шасѧ лицꙋ гн҃ю.
и҆ ѻ҆ста́висѧ г҃ь ѿ ѕло́бы ꙗ҆́же гл҃алъ б̂ѣ на́ нѧ.
и҆ мы̀ сътвори́хомъ ѕло́бы велики на дш҃а наша.
и҆ бѣ чл҃къ прорица́ѧ и́менем̑ гн҃имъ, ѹ́рїѧ сн҃ъ саме́ѻвъ ѿ кариа҆ѳїари́ма.
и҆ прорече ѻ҆ землѝ се́и, по всѣмъ словесе́мъ і҆еремїиномъ.

И҆ слы́ша цр҃ь і҆ѻа҆кимъ, и҆ вси кн҃ѕи всѧ словеса̀, і҆ и҆скахꙋ да и҆̀ ѹ҆бїют꙽.
и҆ слы́ша ѹ́ріѧ и҆ ѹ҆боѧсѧ и҆ бѣжа̀, и҆ прїиде въ е҆гѷпет̑.
и҆ посла̀ цр҃ь мꙋжа въ е҆гѷпет̑, і҆ и҆зведоша и҆̀ ѿтꙋдꙋ и҆ приведоша къ цр҃ю, и҆ порази и҆̀ мечем̑ и҆ въврьже и҆̀ въ гробъ сн҃овъ людїи е҆го<.>

Развѣ рꙋка хикама сн҃а сафанїина бѣ съ і҆еремїею, ꙗ҆́ко не преда́ти е҆го в рꙋцѣ людїи е҆го, да не ѹ҆бїют̑ е҆го·

Глв̑҇а, к҃з·

В начат꙽ке црс̑҇тва і҆ѻ҆а҆ки́ма сн҃а і҆ѻ҆сїина цр҃ѧ і҆ѹ́дина<.>

Бы́сть сло́во сїе къ і҆еремїи ѿ г҃а гл҃ѧ·

Та́ко рече г҃ь, сътворѝ себѣ ѹ́зы и҆ кла́ды и҆ възложѝ на вы́ю свою, и҆ да послеши ѧ҆̀ къ цр҃ю и҆дꙋме́искꙋ, и҆ къ цр҃ю моа́в꙽скомꙋ, и҆ къ цр҃ю сн҃овъ а҆м꙽мо́нь.
и҆ къ цр҃ю тѷрьскꙋ, и҆ къ цр҃ю сидо́ньскꙋ, в рꙋкꙋ посло́мъ и҆хъ, и҆дꙋщим̑ въ і҆ерс̑҇лимъ въ срѣте́нїе е҆мꙋ къ седекїи цр҃ю і҆ѹ́динꙋ.
и҆ съчини и҆мъ къ господемъ и҆хъ рещи·

Та́ко рече г҃ь б҃ъ і҆и҆л҃евъ, тако р꙽ците къ господем̑ свои҆мъ.
а҆́зъ сътвори́хъ зе́млю и҆ чл҃ка, и҆ скотъ е҆же на лицы землѝ, крѣпостїю своею вели́кою, и҆ мы́шцею своею высо́кою.
и҆ дамъ ю҆̀ е҆мꙋже бꙋдетъ м̂и лю́бо пред̑ ѻ҆чи́ма мои́ма.
тѣмже и҆ нн҃ѣ а҆зъ да́хъ всю̀ землю сїю в рꙋ́цѣ навходоносо́рꙋ цр҃ю вавѷлон̑҇скꙋ, да е҆мꙋ рабо́таютъ.
ктомꙋ̀ и҆ звѣрь пол꙽скїи да́хъ дѣлати е҆мꙋ.
и҆ послꙋжатъ е҆мꙋ всѝ ꙗ҆зы́цы, и҆ сн҃ꙋ е҆го, и҆ сн҃ꙋ сн҃а е҆го.
до́ндеже не пришелъ часъ землѝ е҆го и҆ е҆го самого ҆҇.
и҆ послꙋжатъ е҆мꙋ мно́ѕи народи и҆ цр҃и вели́цы.
страна же и҆ црс̑҇тво и҆же а҆ще не в꙽дежꙋтъ вы́ѧ своеѧ въ ѧрем̑ цр҃ѧ вавѵло́ньска, мечемъ и҆ гла́домъ посѣщꙋ и҆хъ, рече г҃ь.
дондеже скон꙽ча́ютсѧ в рꙋцѣ е҆го·

Вы́ же не послꙋшаите про̑҇ркъ свои҆хъ, и҆ влъхвꙋю҆щихъ вамъ, и҆ видѧщихъ сонїѧ ва́мъ.
ни чарова́нїи вашихъ, ни врачевъ ва́шихъ гл҃ющихъ вамъ.
не послꙋжите цр҃ю вавѷлонскꙋ, ꙗ҆ко лжꙋ прорица́ютъ тїи вамъ.
ꙗ҆́коже ѹ҆дали́тисѧ вамъ ѿ землѧ вашеѧ и҆звер꙽гли васъ е҆же поги́бнꙋти вам̑·

страна же ꙗ҆́же въклонитъ вы́ю свою въ ꙗ҆ремъ цр҃ѧ вавѷлон꙽ска, и҆ послꙋжитъ е҆мꙋ.
ѻ҆ста́влю ю҆̀ на землѝ е҆го, гл҃етъ г҃ь.
и҆ ѻ҆ра́ти бꙋдетъ ю҆̀ и҆ всели́тсѧ на неи.
и҆ къ седекїи цр҃ю і҆ѹ́динꙋ гл҃ахъ по всѣмъ словесе́мъ си́мъ гл҃ѧ.
въклони́те вы́ѧ ва́ша под̑ и́го цр҃ѧ вавѷлоньска, и҆ слꙋжи́те е҆мꙋ и҆ людемъ е҆го, и҆ жи́ви бꙋдете.
почто ѹ҆мира́ете, т̂ы и҆ лю́дїе твоѝ мечемъ, и҆ гладомъ, и҆ мо́ромъ.
ꙗ҆́коже рече г҃ь къ страна́мъ, не хотѧ́щимъ слꙋжи́ти цр҃ю вавѷло́н꙽скꙋ.
не послꙋшаите словъ прро̑҇ковъ гл҃щих̑ вамъ, не послꙋжи́те цр҃ю вавѷлонъскꙋ, ꙗ҆́ко непра́ведно тїи прори́чют̑ вамъ·

ꙗ҆ко не посла́хъ и҆хъ рече г҃ь.
тїи же прорица́ютъ и́мѧ мое ѻ҆ непра́вдѣ, ꙗ҆́коже погꙋбити в̂ы.
и҆ поги́бнете в̂ы, и҆ про̑҇рцы ваши прорица́ю҆щеи вамъ ѻ҆ неправдѣ л꙽жею.
ва́мъ и҆ всѣмъ лю́демъ симъ, и҆ жръцемъ гл҃ахъ рекїи.
та́ко рече г҃ь, не послꙋшаите словесъ прро̑҇ческъ, прорица́ю҆щихъ ва́мъ, и҆ гл҃ющихъ.
сѐ сосꙋди до́мꙋ гн҃ѧ ѻ҆браща́ютсѧ ѿ вавѷлона па́ки нн҃ѣ въско́рѣ.
ꙗ҆́ко ло̑ пророкꙋ́ютъ вамъ, сего ради не послꙋшаите и҆хъ.
н̂о слꙋжи́те цр҃ю вавѷлонъскꙋ да жи́ви бꙋдете.
въскꙋю под̑дава́ете мѣсто сїе въ пꙋсты́ню.
а҆ще сꙋть про̑҇рцы, и҆ е́сть сло́во гн҃е в нихъ, да преста́нꙋтъ г҃ꙋ вс̂едръжи́телю, да не прїидꙋтъ сосꙋди ѻ҆ста́вшаѧсѧ в домꙋ гн҃и, и҆ в домꙋ̀ цр҃ѧ і҆ѹ́дина, и҆ въ і҆ерс̑҇лимѣ, до вавѷло́на·

Та́ко б̂о гл҃етъ г҃ь вседръжитель къ столпомъ и҆ ко ѹ҆мыва́лницы и҆ къ под̑ставкомъ, и҆ къ про́чимъ сосꙋдомъ ѻ҆ста́вшим̑сѧ в꙽ мѣсте сем̑, и҆хже не взѧ̀ навходоносо́ръ цр҃ь вавѷлонъскїи.
е҆гда преселѝ і҆ехонїю сн҃а і҆ѻ҆а҆кѷмова цр҃ѧ і҆ѹ́дина и҆зъ і҆ерс̑҇лі́ма̑ въ вавѷлонъ, и҆ всѝ старѣ́ишины і҆ѹ́дины і҆ и҆ерс̑҇лимлѧ·

Та́ко б̂о гл҃етъ г҃ь вседръжитель б҃ъ і҆ил҃ев꙽, къ сосꙋдом̑ ѻ҆ста́вшим̑сѧ в꙽ домꙋ̀ гн҃и, и҆ въ домꙋ̀ і҆ѹ́динѣ и҆ въ і҆ерс̑҇лѣмѣ.
въ вавѷлонъ пренесꙋтсѧ, и҆ та́мо бꙋдꙋтъ да́же до дн҃е посѣще́нїѧ свое҆го гл҃етъ г҃ь.
и҆ повелю̀ принестѝ ѧ҆̀, и҆ въз꙽врати́ти въ градъ се́и

Глв̑҇а, к҃и·

И бы́сть в четвертое лѣто, црс̑҇твꙋ́ющꙋ седекїи цр҃ю і҆ѹ҆динꙋ, в꙽ пѧтыи мс̑҇ць.

Рече м̂и а҆на́нїѧ сн҃ъ а҆зоров꙽ лжи прро̑҇къ гаваѻ҆нит꙽скїи въ домꙋ̀ гн҃и, пред̑ ѻ҆чима жреческама и҆ всѣхъ людїи, гл҃ѧ·

Та́ко рече г҃ь вседержи́тель б҃ъ і҆и҆л҃евъ, съкрꙋших̑ ꙗ҆ремъ цр҃ѧ вавѷлоньска.
е҆ще дво́ю лѣтꙋ дн҃и, ѿраꙋ а҆зъ в с̂е мѣсто вс̂ѧ сосꙋды до́мꙋ гн҃ѧ, е҆же взѧ̀ навходоносоръ цр҃ь вавѷлоньск꙽ ѿ мѣста сего и҆ пренесе и҆̀ до вавѷлона.
и҆ е҆хонїю сн҃а і҆ѻ҆а́кимова цр҃ѧ і҆ѹ́дина, и҆ вс̂е и҆с꙽селенїе і҆ѹ́дино в꙽шед̑шее въ вавѷлон̑҇, и҆ ѻ҆бращꙋ въ мѣсто с̂е гл҃етъ.
и҆ съкрꙋшꙋ ꙗ҆ремъ цр҃ѧ вавѷлоньска·

И҆ рече і҆е҆ремїѧ прро̑҇къ къ а҆на́нїи л꙽же прро̑҇кꙋ, пред̑ ѻ҆чи́ма жре́цъ и҆ пред̑ ѻ҆чи́ма всѣхъ людїи стоѧщих̑ в домꙋ̀ гн҃и·

И҆ рече і҆е҆ремїѧ по истиннѣ, та́ко сътво́ритъ г҃ь.
ѹ҆ста́вит̑ г҃ь сло́во твое е҆же т̂ы проричеши, ꙗ҆́коже въз꙽врати́ти съсꙋды до́мꙋ гн҃ѧ, и҆ всѧ и҆с꙽селе́ныѧ и҆з꙽ вавѷло́на в꙽ мѣ́сто с̂е.
ѻ҆ба́че слы́шите сло́во с̂е, е҆же аз̑ гл҃ю въ ѹ҆ши ваши, и҆ въ ѹ҆́ши всѣ́хъ людїи.
прро̑҇цы бы́вшїи пре́жде мене, и҆ пре́жде васъ ѿ вѣка, прореко́шасѧ на мно́ѕи землѝ, и҆ на црс̑҇тва вели́ка ѻ҆ ра́ти, и҆ ѻ҆ погꙋбле́нїи, и҆ ѻ҆ гла́дѣ.
прро̑҇къ прорекїи миръ.
пришед̑шꙋ словꙋ познают̑ прро̑҇ка, е҆гоже посла̀ им̑ г҃ь въ вѣрꙋ·

И҆ взѧ̀ а҆на́нїѧ пред̑ ѻ҆чи́ма всѣ́хъ людїи кла́ды ѿ вы́ѧ і҆е҆ремїи҆ны, и҆ съкрꙋши ѧ҆̀.
и҆ рече а҆на́нїа пред̑ ѻ҆чи́ма всѣ́хъ людїи гл҃ѧ.
си́це рече г҃ь.
та́ко въско́рѣ съкрꙋшꙋ ꙗ҆рем̑ цр҃ѧ вавѷло́н꙽ска съ вы́ѧ всх̑ѣ стра́нъ.
и ѿиде і҆е҆ремїѧ на пꙋть свои·

И҆ быс̑҇ сло́во гн҃е къ і҆е҆ремїи, по съкрꙋше́нїи а҆на́нїинѣ кла́дъ с вы́ѧ е҆го гл҃ѧ, и҆дѝ рцы̀ къ а҆на́нїи гл҃ѧ.
та́ко рече г҃ь кла́ды древѧ́ныѧ съкрꙋши, и҆ сътворю в꙽ тѣ́хъ мѣ́сто кла́ды желѣзны.
ꙗ҆́ко та́ко рече г҃ь, ꙗ҆ре́мъ желѣ́зенъ възложи́хъ на вы́ѧ всѣ́хъ стра́нъ, слꙋжи́ти навходоносорꙋ цр҃ю вавѷло́н꙽скꙋ, и҆ послꙋ́жатъ е҆мꙋ.
ктомꙋ и҆ звѣ́ра зе́мныѧ да́хъ е҆мꙋ.
и҆ рече і҆е҆ремїѧ прро̑҇къ къ а҆нанїи, нс̑҇ѣ тебе посла́лъ г҃ь.
ты же сътвори́лъ е҆си лю́демъ си́мъ ѹ҆пова́ти непра́вдою.
того ради си́це рече г҃ь.
с̂е а҆з꙽ ѿпꙋщꙋ т̂ѧ ѿ лица̀ землѝ, в се́мъ лѣтѣ ѹ҆́мреши, ꙗ҆́ко на г҃а б҃а гл҃а.
и҆ ѹ҆мрѣтъ а҆на́нїѧ л꙽же прро̑҇къ семъ лѣтѣ, мс̑҇ца сед̑маго·

Глв̑҇а, к҃ѳ·

И сїи словеса̀ кни́гъ ꙗ҆́же посла̀ і҆е҆ремїѧ и҆з꙽ і҆ерс̑҇лима къ ста́рцемъ и҆з꙽се́лнымъ, и҆ къ жерце́мъ и҆ л꙽жи́мъ прро̑҇ком꙽ и҆ всѣмъ людемъ е҆же пресели навходоносо́ръ и҆з꙽ і҆ерс̑҇лима до вавѷло́на.
послѣ́ди же шед̑шꙋ і҆е҆хонїю цр҃ю и҆ цр҃цы, и҆ ка́женикомъ.
и҆ всемꙋ свободнꙋ и҆ хи́трꙋ, и҆ съвꙋзникꙋ и҆зъ і҆ерс̑҇лима.
в рꙋ́цѣ е҆леа́́са сн҃а сафа́нѧ, и҆ гамарїѧ сн҃а хел꙽кїина.
е҆гоже посла̀ седекїѧ цр҃ь і҆ѹ҆́динъ къ цр҃ю вавѷлон꙽скꙋ въ вавѷло́нъ гл҃ѧ·

Та́ко рече г҃ь б҃ъ і҆и҆л҃евъ, ѻ҆ и҆з꙽селе́ныхъ ꙗ҆́же и҆з꙽сели и҆з꙽ і҆ерс̑҇лима.
съградите храмины, и҆ всели́тесѧ.
и҆ насади́те ѻ҆гра́ды, и҆ снѣ́сте пло́дъ и҆хъ.
и҆ пои҆мѣте жены, и҆ ча́да сътвори́те сн҃ы и҆ дще́ри.
и҆ приведѣте сн҃омъ вашимъ жены, и҆ дще́ри ваша дади́те за мꙋж́а, и҆ ѹ҆мно́житесѧ а҆ не ѹ҆ма́лите.
и҆ взыска́ите на ми́ръ землѝ, на ню́же в̂ы и҆с꙽селих̑ та́мо·

и҆ моли́те г҃а за нѧ, ꙗ҆́ко в ми́ре и҆хъ бꙋ́детъ ми́ръ вам꙽·

Ꙗ҆́ко та́ко рече г҃ь.
да не препира́ютъ васъ л꙽жїи прро̑҇цы и҆же въ вас̑҇, и҆ да не препира́ютъ васъ вол꙽сви ваши.
и҆ не послꙋшаите сно́въ свои҆хъ ꙗ҆́же в̂ы ви́дите.
ꙗ҆́ко непра́вед̑нѣ тїи прорица́ютъ вамъ въ и҆мѧ мое, а҆ не посла́хъ и҆хъ·

Ꙗ҆́ко та́ко рече г҃ь.
е҆гда̀ бꙋ́детъ сконча́ти вавѷло́нꙋ, о҃ лѣтъ.
посѣщꙋ васъ и҆ ѹ҆ста́влю словеса̀ моѧ̀ на вас̑҇, ꙗ҆́коже възврати́ти лю́ди своѧ̀ на сѐ мѣ́сто.
и҆ помы́шлю на вы помышле́нїе ми́ра а҆ не ѕл̂а, ꙗ҆́коже да́ти вамъ с̂е.
и҆ помоли́тесѧ къ мнѣ̀ и҆ послꙋшаю вас̑҇.
и҆ взы́щете мене, и҆ ѻ҆брѧ́щете м̂ѧ.
ꙗ҆́ко и҆ е҆гда̀ взы́щете менѐ всѣмъ срд̑цемъ, и҆ ꙗ҆влю́сѧ вам̑ гл҃етъ г҃ь.
и҆ приведꙋ па́ки ѹ҆́зники ваша, и҆ съберꙋ вас̑҇ съ всѣ́хъ стра́нъ и҆ съ всх̑ѣ гра́довъ в нѧже и҆згнах̑ васъ, гл҃етъ г҃ь.
и҆ възврати́тисѧ повелю̀ вамъ ѿ гра́дъ до него́же превести вас̑҇ повелѣ́хъ.
поне́же реко́сте, въста́витъ намъ г҃ь прро̑҇ки въ вавѷло́нѣ·

Та́ко б̂о рече г҃ь къ цр҃ю сѣдѧ́щꙋ на прс̑҇тлѣ двд҃вѣ, и҆ къ всѣмъ лю́демъ живꙋщимъ въ гра́дѣ том̑, и҆ бра́тїѧмъ вашимъ не и҆з꙽шед̑шим̑ с ва́ми до преселе́нїѧ·

Та́ко гл҃етъ г҃ь вседержи́тель.
с̂е а҆зъ послю̀ на́ нѧ ме́чъ, и҆ гла́дъ, и҆ мо́ръ, и҆ положꙋ ѧ҆̀ ꙗ҆́ко смо́квы хꙋдыа, и҆же не мо́гꙋт꙽ ꙗ҆́стисѧ, понеже ѕѣ́ло хꙋ́ды бы́ша̑·

и҆ сътрꙋ ѧ҆̀ мече́мъ и҆ гла́домъ и҆ мо́ром̑, и҆ да́мъ ѧ҆̀ в꙽ погꙋбле́нїе всѣмъ црс̑҇твїем̑ зе́мнымъ въ проклѧ́тїе.
и҆ в подивле́нїе и҆ в꙽ посмѣ́хъ и҆ в порꙋга́нїе всм̑ѣ странамъ.
междꙋ и҆миже и҆звергох̑ ѧ҆̀, занѐ не послꙋшаша слове́съ моих̑ гл҃етъ г҃ь, ꙗ҆́же послах̑ к ни́мъ рабы̀ мои҆ми прро̑҇ки в нощи въста́ѧ и҆ посыла́ѧ, и҆ не послꙋшасте гл҃етъ г҃ь.
сего ради вы слы́шите сло́во гн҃е все преведе́нїе, е҆же в̂ы слах̑ и҆з꙽ і҆ерс̑҇лима въ вавѷло́нъ·

Та́ко гл҃етъ г҃ь вседержи́тель б҃ъ і҆и҆л҃евъ, на а҆хиа҆в꙽ва сн҃а кꙋлїева, и҆ на седекїю сн҃а маа҆сїѻ҆ва, и҆же прорицают̑ вамъ въ и҆мѧ мое л꙽жи́ве.
с̂е а҆зъ даю̀ ѧ҆̀҆̀ в рꙋцѣ навходоносо́ра цр҃ѧ вавѷло́н꙽ска, и҆ побіет̑ ѧ҆̀ пред̑ ѻ҆чи́ма ва́шима.
и҆ възмꙋтъ ѿ ни́хъ клѧ́твꙋ въ всѣхъ и҆с꙽се́лницх̑ѣ і҆ѹ҆́динѣхъ въ вавѷло́нѣ гл҃юще, сътвори ти г҃ь, ꙗ҆́коже седекїи сътворѝ, и҆ а҆хїа҆в꙽вꙋ.
ꙗ҆́коже и҆ждеже цр҃ь вавѷлон꙽скъ въ ѻ҆гни, безако́нїѧ ради е҆же сътвори́ста въ і҆ерс̑҇лимѣ, и҆ любодѣѧ́хꙋ съ жена́ми гража́нъ своих̑.
и҆ сло́во съгл҃аша въ и҆мѧ мое л꙽жи́ве, е҆го́же не повелѣ́хъ и҆мъ.
а҆зъ же е҆смь сꙋдїѧ и҆ по́слꙋхъ гл҃етъ г҃ь.
и҆ къ самеи е҆лами́тинꙋ рече́ши·

Та́ко гл҃етъ г҃ь вседержи́тель б҃ъ і҆и҆л҃евъ, сего ради поне́же посла́лъ е҆си въ и҆мѧ мое посла́нїѧ къ всѣмъ лю́демъ и҆же въ і҆ерс̑҇лимѣ.
и҆ к꙽ софо́нїи сн҃ꙋ маа҆сѣ́ѻвꙋ жерцꙋ, и҆ къ всѣмъ жерцемъ гл҃ѧ.
г҃ь да́лъ т̂ѧ е҆сть жерца̀ въ мѣ́сто и҆ѻда́е жер꙽ца.
бы́ти приста́вникꙋ в꙽ домꙋ гн҃и, всемꙋ чл҃кꙋ прори́чющꙋ, и҆ всемꙋ чл҃кꙋ неи҆стовꙋ́ющꙋ, и҆ в꙽даси и҆̀ в꙽ затво́ръ, и҆ в꙽ кла́дꙋ.
и҆ нн҃ѣ почто̀ не запрети́сте і҆е҆ремїи, и҆же ѿ а҆наѳоѳа прорица́ющемꙋ вамъ.
ꙗ҆́ко того ради посла̀ к на́мъ въ вавѷло́нъ гл҃ѧ.
дале́че е҆сть ча́съ, съгради́те хра́мы и҆ всели́тесѧ.
и҆ насади́те ѻ҆гра́ды, и҆ снѣсте плод̑ и҆хъ.
и҆ прочтѐ кни́ги софо́нїѧ въ ѹ҆́ши і҆е҆ремїинѣ·

И҆ бы́сть сло́во гн҃е къ і҆е҆ремїи гл҃ѧ, посли къ и҆с꙽се́лникомъ гл҃ѧ.
та́ко рече г҃ь на саме́ѧ е҆ламити́на, е҆льма же прорече вамъ саме́а, а҆з꙽ же нѣсмь посла́лъ е҆го, и҆ ѹ҆пова́ти сътвори вамъ непра́вдою.
того ради си́це рече г҃ь, се а҆зъ посѣщꙋ на саме́а и҆ на родъ е҆го.
и҆ не бꙋ́детъ чл҃къ е҆го среди вас̑҇, ꙗ҆́коже ви́дѣти бл҃гаа ꙗ҆́же азъ сътворю вамъ гл҃етъ г҃ь, занѐ сълга̀ на г҃а·

Глв̑҇а, л҃·

Сло́во бы́вшее къ і҆е҆ремїи ѿ г҃а гл҃ѧ.
та́ко реч̑҇ г҃ь б҃ъ і҆и҆л҃ев̑҇.
въпиши всѧ̀ словеса̀ въ кни́ги, ꙗ҆́же въписахъ а҆зъ к тебѣ.
ꙗ҆́ко се дн҃їе грѧдт̑ꙋ рече г҃ь, и҆ въз꙽вращꙋ и҆с꙽селе́нїе людїи мои҆хъ і҆и҆л҃ѧ і҆ и҆ѹ́ды, рече г҃ь.
и҆ възвращꙋ ѧ҆̀ на́ землю ю́же да́хъ ѿц҃емъ и҆хъ, и҆ съвладꙋть е҆ю·

и҆ си словеса ꙗ҆́же гл҃тъ г҃ь ѻ҆ і҆и҆л҃и и҆ ѻ҆ і҆ѹ́дѣ, та́ко рече г҃ь.
гласъ стра́шенъ ѹ҆слы́шите, стра́хъ и҆ нѣсть мира.
въпраша́ите и҆ ви́дѣте, а҆ще сѧ е҆сть родилъ мꙋжескь полъ.
и҆ ѻ҆ стра́сѣ и҆мже и҆мꙋтъ чресла̀ и҆х꙽ сп҃сенїе.
и҆мже ви́дѣхъ всего чл҃ка, и҆ рꙋцѣ е҆го на чреслехъ его, и҆з꙽врати́шасѧ лица въ златени́цꙋ.
ѽ люте ꙗ҆́ко великъ дн҃ь тои, и҆ нѣсть подо́бна е҆мꙋ.
и҆ вре́мѧ тѣсно е҆сть і҆а́ковꙋ, и҆ потомъ сп҃сетсѧ·

В то́и дн҃ь рече г҃ь, съкрꙋшꙋ ꙗ҆ре́мъ с вы́ѧ и҆хъ, и҆ ѹ́зы и҆хъ растор꙽꙽гнꙋ.
и҆ не послꙋжатъ тїи ктомꙋ чюжд̑имъ, н̂о послꙋжатъ тїи г҃ꙋ б҃ꙋ свое҆мꙋ.
и҆ дв҃да цр҃ѧ въста́влю и҆мъ.
сего рад̑и̑ т̂ы не бо́исѧ ра́бе мои і҆а́кове гл҃етъ г҃ь, ни ѹ҆страша́исѧ і҆и҆л҃ю.
ꙗ҆́ко с̂е а҆зъ и҆зведꙋ т̂ѧ и҆з꙽ землѝ да́лнеѧ, и҆ племѧ твое из̑ земли плѣненїѧ их̑·

и҆ въз꙽врати́тсѧ па́ки і҆а́ковъ и҆ почїетъ, и҆ всего добра̀ и҆сполнь бꙋдет̑·

и҆ не бꙋдетъ ѹ҆страша́ѧи т̂ѧ.
ꙗ҆́ко а҆зъ с тобо́ю е҆смь гл҃етъ г҃ь, сп҃са́аи т̂ѧ.
ꙗ҆́ко сътвори́хъ сконча́нїе въ всѣхъ странах̑ в нѧже разсѣах̑ т̂ѧ.
тебе же не сътворю въ сконча́нїе, н̂о накажꙋ т̂ѧ в сꙋдꙋ, дабы не бы́лъ ви́дѣнъ себѣ невин꙽ныи.
ꙗ҆ко та́ко гл҃ет̑ г҃ь, неи҆сцѣлно съкрꙋше́нїе твое, преѕла̀ ра́на твоѧ.
нѣсть сꙋдїѧ сꙋда твое҆го на бо́лѣзнь и҆з꙽врачева́сѧ ползы нѣсть тебѣ.
всѝ дрꙋзи твоѝ забы́ша т̂ѧ.
ни въпро́сѧтъ т̂ѧ, ꙗ҆́ко ꙗ҆́звою вра́жїею порази́хъ т̂ѧ наказа́нїемъ ѹ҆тверженомъ.
мно́жества ради непра́вды твоеѧ ѹ҆мно́жишасѧ грѣси твоѝ.
чт̂о въпїеши ѻ҆ съкрꙋше́нїи свое́мъ.
неи҆сцѣлна е҆сть бо́лѣзнь твоѧ, мно́жества̑ ради непра́вды твоеѧ, и҆ тве́рдыхъ ради грѣхъ твои҆хъ сътвори́хъ т̂и сїѧ всѧ.
того ра́ди всѝ ꙗ҆дꙋщеи тѧ̀ и҆зъе҆дени бꙋдꙋтъ, и҆ всѝ вра́зи твоѝ въ плѣненїе ѿведꙋтсѧ.
и҆ погꙋблѧ́ющеи т̂ѧ погꙋбѧтсѧ.
и҆ бꙋдꙋтъ разъграблѧ́ющеи т̂ѧ въ раз꙽грабле́нїе.
ꙗ҆́ко ѻ҆бѧжꙋ срамъ твои, и҆ ѿ ꙗ҆́звъ твои҆хъ и҆з꙽врачꙋю т̂ѧ рече г҃ь.
ꙗ҆́ко и҆зверженꙋ называ́хꙋ тѧ сїѻне, с̂е е҆сть сеи и҆же не имѣ възыска́ющаго е҆го·

Та́ко гл҃ет̑ г҃ь, с̂е а҆зъ възвраще́нїе и҆с꙽селе́нїѧ і҆а́ковлѧ, и҆ плѣн꙽ники е҆го поми́лꙋю.
и҆ въз꙽гради́тсѧ град̑ въ высотꙋ̀ свою и҆ хра́мъ по чинꙋ̀ е҆го ѹ҆твердитсѧ.
і҆ изыидꙋтъ и҆з него поющеи, глас̑҇ и҆гра́ющихъ.
и҆ ѹ҆мно́жꙋ ѧ҆̀, и҆ не ѹ҆малѣ́ютъ.
и҆ вни́дꙋтъ сн҃ове и҆хъ ꙗ҆́ко и҆ прежде, и҆ свѣдѣнїѧ и҆хъ пред̑ лицемъ мои҆мъ и҆спра́вѧтсѧ.
и҆ посѣщꙋ на всѧ̀ стꙋжа́ющаѧ и҆мъ.
и҆ бꙋдетъ крѣплѣ́иши е҆го на́ нѧ, и҆ кнѧѕь е҆го и҆з него и҆зы́идетъ.
и҆ съберꙋ ѧ҆̀ и҆ ѻ҆братѧт̑сѧ къ мн̂ѣ.
кто́ бо е҆сть тои и҆же приложитъ срд̑це свое ѻ҆брати́тисѧ къ мн̂ѣ рече г҃ь·

И҆ бꙋдете м̂и в люди, и҆ а́зъ ва́мъ бꙋдꙋ въ б҃а.
ꙗ҆́ко гнѣвъ гн҃ь и҆зыиде ꙗ҆́ръ, и҆зыиде гнѣвъ ѻ҆браща́емъ на нечести́выѧ прїидетъ.
и҆ не ѿвратит̑сѧ гнѣвъ ꙗ҆́рости гн҃ѧ, дондеже сътворитъ и҆ въста́витъ мышле́нїѧ срд̑ца̑ е҆го.
въ послд̑ѣнѧѧ дн҃и позна́ете ѧ҆̀·

Глв̑҇а, л҃а·

Въ то́и часъ рече г҃ь, бꙋдꙋ въ б҃ъ родꙋ і҆и҆л҃евꙋ, и҆ тїи бꙋдꙋтъ м̂и в люди, та́ко реч̑҇ г҃ь.
ѻ҆брѣто́хъ то́плъ въ пꙋсты́ни съ и҆зги́бшими ѿ меча̀.
и҆дѣте и҆ не потреби́те і҆и҆л҃ѧ г҃ь и҆здалеча ꙗ҆вит̑сѧ е҆мꙋ, и҆ любо́вїю вѣчною възлюби́хъ т̂ѧ.

Того дѣлѧ въвлеко́хъ т̂ѧ въ щедроты.
ꙗ҆́ко въз꙽граждꙋ тѧ, и҆ възградит̑сѧ дв҃а і҆и҆л҃ева.
возмеши тѷмпа́ны своа, і҆ и҆зы́идеши съ собо́ром̑ и҆гра́ющих̑.
е҆ще наса́дите виногра́ды в꙽ горѣ̀ самарїистеи, насажа́юще наса́дите·

и҆ дон̑҇деже час̑҇ не прїидет̑ не бꙋдт̑ꙋ вина̀ събирати и҆ похва́лите ꙗ҆́ко е҆сть дн҃ь възда́нїа, ѿвѣщава́ющихъ въ гора́хъ е҆фрѣмовыхъ·

Въста́ните, и҆ взыидѣте въ сїѻ́нъ къ гв҃и б҃ꙋ на́шемꙋ.
ꙗ҆́ко та́ко рече г҃ь і҆а́ковꙋ, възвесели́тесѧ и҆ въс꙽кликнѣте на главꙋ стран̑҇.
слы́шано сътвори́те и҆ похвали́те.
р꙽цѣте сп҃се г҃ь лю́ди своѧ ѻ҆ста́нокъ і҆и҆л҃ѧ.
с̂е а҆зъ ведꙋ ѧ҆̀ ѿ сѣ́вера, и҆ съберꙋ ѧ҆̀ ѿ конца̀ землѝ.
межд̑ꙋ и҆ми же бꙋ́дꙋтъ слѣ́пи и҆ хро́ми, тѧго́тна и҆ ража́ющаѧ в꙽кꙋпѣ, наро́дъ вели́къ възвраща́ющихсѧ сѣ́мо.
съ пла́чем̑ прїидꙋтъ, и съ ѹ҆тѣше́нїемъ и҆зведꙋ ѧ҆̀.
и҆ преведꙋ ѧ҆̀ чресъ прꙋ́ды во́дъ по пꙋтѝ пра́вꙋ, и҆ не заблꙋ́дѧтъ по немꙋ.
ꙗ҆́ко а҆зъ бх̑ѣ і҆и҆л҃еви въ ѿц҃ъ, и҆ е҆фрѣмъ первенецъ м̂и е҆сть·

Слы́шите страны сло́во гн҃е, и҆ съвѣсти́те въ ѻ҆́стровѣхъ да́лнихъ.
и҆ рцѣте, развѣѧ́выи і҆и҆л҃ѧ събере́тъ и҆̀ и҆ снабди́тъ и҆̀, ꙗ҆́ко па́стыръ ста́до свое.
ꙗ҆́ко и҆зба́ви г҃ь і҆а́кова, і҆ и҆зѧт̑ и҆̀ ѿ рꙋки силнѣ́ишь е҆го.
и҆ прїидꙋтъ и҆ възвеселѧ́тсѧ в꙽ горѣ сїѻ́нъ, и҆ прїидꙋтъ къ бл҃готамъ гн҃им꙽, на зем̑лѧ̀ пшени́ци и҆ вина̀, и҆ пло́да и҆ ско́та, и҆ ѻ҆вецъ.
и҆ бꙋ́детъ дш҃а и҆хъ ꙗ҆́ко и҆ дре́во плод̑но, и҆ не въза́лчютъ потом̑.
тогда̀ въздра́дꙋютсѧ дв҃ца в꙽ собо́рѣ ю҆́нот̑стѣ, и҆ стра́цы възра́дꙋют̑сѧ·

и҆ ѻ҆бращꙋ желю и҆хъ на ра́дость, и҆ сътворю и҆хъ весе́лы.
възвели́чю и҆ ѹ҆пою дш҃ꙋ жре́ческꙋ сн҃овъ левїи҆нъ, и҆ лю́дїе мои бл҃готъ мои҆хъ насытѧт̑сѧ·

Та́ко рече г҃ь.
глс̑҇а в ра́мѣ слы́шанъ бы́сть плач̑҇ и҆ рыда́нїе и҆ во́пль.
рахи́ль пла́чющисѧ ѻ҆ сн҃охъ своих̑, и҆ не хотѧ́ше ѹ҆тѣши́тисѧ ꙗ҆́ко нс̑҇ѣ и҆хъ·

Та́ко рече г҃ь, да почїетъ гла́съ твои ѿ пла́ча, и҆ ѻ҆чи твои ѿ сле́зъ, ꙗ҆́ко е҆сть м꙽зда дѣлесе́мъ твои҆м꙽, гл҃етъ г҃ь.
и҆ възвратѧт̑сѧ ѿ землѧ̀ вра́жїѧ.
и҆ е҆сть наде́жд̑а послѣднимъ твои҆м꙽, гл҃етъ г҃ь.
и҆ навратѧ́тсѧ сн҃ове твои до своих̑ стран̑҇, слы́ша слы́шахъ е҆фрѣма преселе́на.
наказа́лъ мѧ е҆си г҃и, и҆ не наста́вих̑сѧ а҆зъ.
ꙗ҆́ко и҆ телецъ не наѹ҆чи́хсѧ.
ѻ҆брати мѧ и҆ ѻ҆бращꙋсѧ, ꙗ҆́ко т̂ы г҃ь б҃ъ мои.
ꙗ҆́ко послѣжд̑е плѣне́нїѧ мое҆го покаѧ́хсѧ, и҆ послѣжде разꙋмѣ́нїѧ въстенахъ.
въ дн҃ь срамле́нїи сказа́хъ тебѣ, ꙗ҆́ко прїѧ́хъ ѹ҆кори́знꙋ ѿ ю́ности мое҆ѧ.
сн҃ъ любе́зен̑҇ мн̂ѣ е҆фрѣмъ, ѻ҆тро́ча пита́ѧсѧ.
ꙗ҆́ко е҆лма же словеса̀ моѧ в немъ, па́мѧтїю помѧнꙋ и҆̀, того ра́ди потща́хсѧ к немꙋ.
ми́лꙋѧ поми́лꙋю и҆̀ рече г҃ь·

Поста́висѧ самъ сїѻ́не, сътвори мꙋче́нїе.
напра́ви срд̑це свое на пꙋть пра́въ, и҆мже и҆де.
възврати́сѧ дв҃це і҆и҆л҃ева, ѻ҆брати́сѧ въ гра́ды своѧ желѣ́ющи.
доко́лѣ ѿвраща́ешисѧ дщи нечистова́на.
ꙗ҆́ко създа г҃ь сп҃съ въ насажд̑енїе но́во, в не́мже сп҃сенїи ѻ҆бита́ютъ чл҃цы·

Та́ко рече г҃ь, е҆ще рекꙋтъ сло́во въ жидов꙽стеи и҆ въ гра́дѣхъ е҆ѧ̀, е҆гда̀ ѻ҆бращꙋ и҆с꙽селе́нїе е҆го.
блс̑҇ви т̂ѧ г҃ь лѣпото пра́вды, горо ст҃аѧ.
и҆ живꙋщеи въ і҆ѹ҆де́и, и҆ въ всѣхъ градх̑ѣ е҆ѧ̀ вкꙋпѣ, тѧжа́теле и҆ пасты́ри.
ꙗ҆́ко ѹ҆поих̑ всѧ́кꙋ дш҃ꙋ жа́ждꙋщꙋ, и҆ всѧ́кꙋ дш҃ꙋ а҆́лчющꙋ насытихъ.
того ради въста́хъ и҆ ви́дѣхъ, и҆ сон̑҇ ми сла́докъ бы́сть·

Се̂ дн҃їе грѧдт̑ꙋ гл҃етъ г҃ь, и҆ всѣ́ю і҆и҆л҃ѧ і҆ и҆ѹ́дꙋ племѧ̀ чл҃че, и҆ племѧ̀ ско́тїе·

и҆ бꙋдет̑ ꙗ҆́коже бдѣ́хъ на́ нѧ потреби́ти и҆ зазли́ти.
та́коже ѹ҆бꙋждꙋсѧ до них̑ съгражд̑ати и҆ насажд̑ати, рече г҃ь·

В ты дн҃и не рекꙋтъ ктомꙋ, ѿц҃ы ꙗ҆до́ша ки́село, а҆ зꙋ́бы дѣтемъ ѻѻ҆ско́минишасѧ.
н̂о ко́ждо свои҆мъ грѣхомъ ѹ҆́мретъ.
и҆ ꙗ҆́д꙽шемꙋ ки́село ѻ҆ѻ҆скоминѧ́тсѧ зꙋ́бы е҆го·

Се дн҃їе грѧдꙋтъ гл҃етъ г҃ь, и҆ завѣщаю до́мꙋ і҆и҆л҃евꙋ и҆ до́мꙋ і҆ѹ́динꙋ завѣтъ нов꙽, не по завѣтꙋ и҆же завѣща́хъ ѿц҃емъ и҆х꙽, въ дн҃ь во́ньже поѧвшꙋ ми за́ рꙋкꙋ и҆хъ, и҆ възвестѝ ѧ҆̀ ѿ землѧ̀ е҆гѷпет꙽ски.
ꙗ҆́ко тїи не пребы́ша в꙽ завѣтѣ мое҆мъ, и҆ а́зъ не брего́хъ и҆хъ гл҃етъ г҃ь.
ꙗ҆́ко с̂е завѣтъ и҆же завѣщаю до́мꙋ і҆и҆л҃вꙋ по́ дн҃ехъ тѣхъ гл҃етъ г҃ь.
даю зако́ны моѧ въ ѹ҆́мы и҆хъ, и҆ на срд̑цыхъ и҆хъ напишꙋ ѧ҆̀.
и҆ бꙋдꙋ и҆мъ въ б҃ъ и҆ тїи бꙋдꙋтъ ми в лю́ди.
и҆ не наѹ҆ча́тъ ко́ждо бли́жнѧго свое҆го, ни кожд̑о бра́та свое҆го гл҃ѧ, позна́и г҃а.
ꙗ҆́ко вс̂и позна́ютъ м̂ѧ ѿ мала́го их̑ до вели́каго.
ꙗ҆́ко млс̑҇тивъ бꙋдꙋ непра́вдамъ и҆хъ, и҆ грѣхи и҆хъ не помѧнꙋ ктомꙋ·

А҆ще възнесе́тсѧ нб҃о на высотꙋ реч̑҇ г҃ь, и҆ а́ще смирит̑сѧ по́ждь землѧ̀ ни́зꙋ, и҆ а́зъ не ѿвергꙋ ро́да і҆и҆л҃ева, ѻ҆ всем̑ е҆же сътвори реч̑҇ г҃ь·

Та́ко рече г҃ь, да́выи слн҃це въ свѣтъ дн҃и, мс̑҇ць и҆ ѕвѣзды на свт̑ѣ нощи.
и҆ во́пль на мори, и҆ възшꙋмѣша во́лны е҆го.
г҃ь вседержи́тель и҆мѧ е҆мꙋ.
а҆ще премо́л꙽кнꙋтъ сїи сꙋди ѿ лица̀ мое҆го рече г҃ь, т̂о и҆ ро́дъ і҆и҆л҃евъ премол꙽кнетъ бы́ти стра́нѣ пред̑ лицемъ мои҆мъ всѧ дн҃и·

Се̂ дн҃їе грѧдꙋтъ рече г҃ь, и҆ съгради́тсѧ градъ гв҃и ѿ сꙋна а҆намеи҆л꙽лѧ до врат̑ ѹ҆го́лных̑·

і҆ и҆зы́идетъ размѣре́нїе е҆го проти́вꙋ и҆мъ до моги́лъ гари́въ, и҆ ѻ҆бы́имет̑сѧ ѻ҆́крс̑҇тъ и҆збо́рными камы́ки, и҆ ве́сь а҆с꙽саримо́ѳ꙽, до водоте́чи нахал꙽ смрѣчнаго, до ѹ҆́го́лныхъ вра́тъ ко́ньских̑ въсто́чное ѻ҆сщ҃енїе гв҃и.
и҆ ктомꙋ не посѣче́тъ, и҆ не потреби́тсѧ ктомꙋ въ вѣ́ки·

Глв̑҇а, л҃в·

Сло́во бы́вшее къ і҆е҆ремїи ѿ г҃а гл҃ѧ, в꙽ десѧ́тое лѣто седекїи цр҃ѧ і҆ѹ́дина.
т̂о лѣто ѻ҆́смоенадесѧте, нав꙽ходоносо́рꙋ цр҃ю вавѷлоньскꙋ.
си́ла же цр҃ѧ вавѷлоньска ѻ҆строжи ѻ҆ і҆ерс̑҇ли́мѣ.
і҆еремїа же стрегомъ бѧше въ дворѣ темни́чнемъ, ꙗ҆же е҆сть въ дворѣ цр҃ѧ і҆ѹ́дина.
в не́иже затвори и҆̀ седекїа цр҃ь, гл҃ѧ, почто т̂ы прорица́еши, гл҃ѧ, та́ко реч̑҇ г҃ь, с̂е а҆́зъ даю се́и град̑ въ рꙋцѣ цр҃ѧ вавѷленьска, и҆ во́зметъ и҆̀.
и҆ седекїѧ цр҃ь і҆ѹ́динъ не ѹ҆цѣлѣетъ ѿ рꙋкꙋ хал꙽дѣискꙋ.
ꙗ҆́ко преда́нїем̑ предас̑҇ѧ въ рꙋцѣ цр҃ѧ вавѷлоньска.
и҆ съгл҃ет꙽ ѹ҆сты̀ свои́ми къ ѹ҆стомъ е҆го, и҆ и҆ ѻ́чи е҆мꙋ ѻ҆́чи е҆го ѹ҆́зрита.
и҆ въ вавѷлонъ вни́дет̑ седекїѧ, и҆ т̂ꙋ сѧ́дет̑ до́ндеже посѣщꙋ е҆го, гл҃ет꙽ г҃ь.
а҆ще ж̑ ли вое҆ва́ти бꙋ́дете на халдѣи, ничесоже ѹ҆спѣете·

И҆ рече і҆еремїѧ, бы́сть сло́во гн҃е ко мнѣ̀ гл҃ѧ.
с̂е а҆намеи́лъ сн҃ъ сало́мль бра́та ѿц҃а твоег̑҇ и҆́детъ к тебѣ, гл҃ѧ.
прикꙋпи село̀ мое е҆же въ е҆наѳо́ѳѣ, ꙗ҆́ко тебѣ сꙋдъ прїѧ́ти въ притѧжа́нїе е҆же кꙋпити е҆̀ и҆ прїиде къ мнѣ̀ а҆намеи́лъ сн҃ъ сало́мль брата ѿц҃а мое҆го, по словесѝ гн҃ю въ дворъ темнич̑҇ныи, и҆ реч̑҇ м̂и.
прикꙋпи себѣ̀ село̀ мое е҆же въ е҆наѳо́ѳѣ в꙽ земли венїаминѣ.
ꙗ҆́ко тебѣ сꙋдъ прикꙋпити, ты б̂о старѣи.
и҆ разꙋмѣхъ ꙗ҆́ко сло́во гн҃е е҆сть.
и҆ прикꙋпихъ село̀ а҆намеи́ле сн҃а бра́та ѿц҃а мое҆го ѿ а҆наѳо́ѳа.
и҆ поста́вихъ е҆мꙋ сед̑мьна́десѧть си́кль сребра̀, и҆ въписа́хъ в꙽ кни́ги и҆ знаменахъ, и҆ поста́вихъ по́слꙋхи, и҆ поста́вихъ сребро̀ въ превѣснѧхъ.
и҆ взѧх̑ книги скꙋпленїѧ, почтеныа и҆ зна́менаныа и҆ въпрошанїѧ и҆ ѿвѣта, и҆ во́лѧ прида́нїѧ, и҆ кни́гꙋ ѿве́рзенꙋ.
и҆ да́хъ кни́ги кꙋпленїѧ варꙋхови сн҃ꙋ нирїинꙋ сн҃а маа́геѻ҆ва, пред̑ ѻ҆чи́ма а҆намеи́лѧ сн҃ꙋ бра́та ѿц҃а мое҆го.
и҆ пред̑ ѻ҆чима стоа́щихъ по́слꙋх꙽, и҆ въписа́вшихъ въ кни́ги скꙋпленїѧ.
и пред̑ ѻ҆чима всѣхъ жидо́въ, сѣдѧ́щих̑ въ дворѣ темни́чномъ.
и҆ съчинихъ варꙋхꙋ пред̑ ѻ҆чима и҆хъ гл҃ѧ·

Тако рече г҃ь вседержи́тель, возмѝ кни́ги сїѧ скꙋпленыѧ почтеныѧ, и҆ въложи ѧ҆̀ въ сосꙋдъ гли́нѧнъ, да пребꙋдꙋтъ дн҃и множа́иша.
ꙗ҆́ко та́ко реч̑҇ г̂ь·

Є҆ще притѧ́жꙋтсѧ хра́ми и села и҆ виногра́ды на се́и земли·

И҆ молих̑сѧ къ гв҃и по да́нїи кни́гъ прикꙋпленїѧ варꙋхꙋ сн҃ꙋ нирїинꙋ гл҃ѧ.
ѻ҆ сꙋщїи г҃и г҃и, т̂ы сътвори нб҃о и зем̑лю крѣпостѣю твое́ю вели́кою, и҆ мы́ш꙽цею твое́ю высо́кою.
не потаи́тсѧ ѿ тебе ничтоже, творѧ́и млс̑҇ть въ тысꙋща.
и҆ ѿда́ѧи грѣхи ѿч҃а в нѣдра̑ чад̑ и҆хъ с ни́ми, б҃ъ великїи и҆ крѣпкїи б҃ъ вели́ка совѣта и҆ си́ленъ дѣлесы, б҃ъ вели́къ и҆ вседръжи́тель, вели́ко и҆мененъ г҃ь.
ѻ҆́чи твоѝ на пꙋтех̑ сн҃в꙽ чл҃чь, да́ти комꙋждо по пꙋти е҆го.
и҆же сътворѝ зна́менїѧ и҆ чюдеса въ земли е҆гѷпетъстѣ до сего дн҃е.
и҆ въ і҆и҆л҃и и҆ въ лю́дехъ.
и҆ сътворѝ и҆мѧ себѣ̀ ꙗ҆ко сїи дн҃ь.
і҆ и҆зведе лю́ди своѧ̀ і҆и҆л҃ѧ и҆з꙽ землѧ е҆гѷпетъски зна́менїи и҆ чюдесы, рꙋкою крѣ́пкою и҆ мы́шцею высо́кою, и҆ видѣнїи вели́кими.
и҆ дасть и҆мъ сїю зе́млю, кипѧщꙋю мле́комъ и҆ ме́дом꙽, е҆ю́же клѧт̑сѧ ѿц҃емъ их̑·

и҆ внидо́ша и҆ прїѧ́ша ю҆̀.
и҆ не послꙋша́ша гла́са твое҆го и҆ въ заповѣ́дехъ твоих̑ не ходи́ша.
всѐ е҆же заповеда̀ им̑ не сътвори́ша, и҆ сътвори́ша събы́тисѧ семꙋ всемꙋ<.>

Се наро́дъ и҆дет̑ на се́и гра́дъ взѧти е҆го.
и҆ гра́дъ вда́нъ е҆сть в рꙋцѣ хал̑҇деистѣ, и҆ в рꙋцѣ вою́ющимъ нань ѿ лица̀ мечю и҆ гла́дꙋ и҆ морꙋ.
ꙗ҆́коже гл҃а та́ко и҆ быс̑҇·

А҆ ты̀ ко мнѣ гл҃еши, притѧжи себѣ село сребро́мъ.
и҆ вписа́хъ в꙽ книги и҆ знаменах̑, и҆ послꙋшествовахъ послꙋхи, градъ же предас̑҇ѧ в рꙋцѣ халдеистѣ·

И҆ бысть сло́во гн҃е къ мнѣ гл҃ѧ.
а҆зъ г҃ь б҃ъ всеи пло́ти.
е҆да ѿ мене ѹ҆таи́тсѧ чт̂о.
сего рад̑и̑ та́ко рече г҃ь б҃ъ і҆и҃лев̑҇, ѿда́нъ преда́стьсѧ сеи гра́дъ в рꙋцѣ цр҃ѧ вавѷло́н꙽ска, и҆ во́зметъ и҆̀.
и҆ прїидꙋтъ халде́и вою́ющеи на се́и гра́дъ, и҆ пожгꙋтъ и҆̀ ѻ҆гне́мъ, и҆ хра́мъ пожгꙋтъ, и҆ в нихже кади́ша̑ на хра́минахъ свои҆хъ ваа́лови.
и҆ возлїѧша възлїѧнїѧ богомъ и́нѣмъ ꙗ҆́коже разгнѣвати мѧ.
ꙗ҆́ко бѣша сн҃ове і҆и҆л҃еви и҆ сн҃ове і҆ѹ́дины, е҆ді́ни творѧ́ще ѕл̂о пред̑ ѻ҆чима мои́ма ѿ ю́ности и҆хъ.
подвиза́ющеи м̂ѧ доселѣ на гнѣвъ в꙽ дѣлехъ рꙋкъ свои҆хъ рече г҃ь.
ꙗ҆́ко на гнѣвъ мои и҆ на ꙗ҆́рость мою б̂ѣ гра́дъ сеи, ѿ негоже дн҃е съгради́ша и҆̀ до сего дне ѿста́вити и҆̀ ѿ лица̀ мое҆го.
ѕло́бы ра́ди сн҃овъ і҆и҆л҃евъ, і҆ и҆ѹ́динъ.
ꙗ҆́ко сътвори́ша̑ разгнѣвати м̂ѧ, и҆ цр҃и и҆хъ и҆ кн҃ѕи и҆хъ, и҆ вельмо́жа и҆хъ и҆ жръцы и҆хъ и҆ проро́цы и҆х꙽, мꙋжи і҆ѹ́дини живꙋщеи въ і҆ерс̑҇лимѣ.
и҆ ѻ҆брати́ша хребетъ и҆хъ къ мн̂ѣ а҆ не лицѐ.
и҆ наказа́хъ ѧ҆̀ и҆зъ ѹ́тра, и҆ не послꙋшаша прїѧти наказа́нїѧ.
и҆ положи́ша ѻ҆скверне́нїа и҆хъ в꙽ домꙋ, и҆деже наречесѧ и҆́мѧ мое в нечистота́хъ и҆хъ.
и҆ съгради́ша требища ваалꙋ, ꙗ҆́же въ дебри сн҃а е҆н꙽наа́мова, ꙗ҆́коже вноси́ти сн҃ы и҆хъ и҆ дще́ри и҆хъ моло́хꙋ е҆гоже нѣсмь заповѣда́лъ и҆мъ.
и не възы́иде на срд̑це мое, ꙗ҆́коже сътвори́ти ѻ҆гнꙋше́нїѧ того, на согрѣшенїе і҆ѹ́дѣ·

И҆ нн҃ѣ та́ко реч̑҇ г҃ь б҃ъ і҆ил҃ев̑҇ до гра́да, е҆мꙋже т̂и гл҃еши преда́тисѧ въ рꙋ́цѣ цр҃ѧ вавѷлоньска, мечем̑ и҆ гла́домъ и҆ ѻ҆пꙋщенїемъ·

Се̂ а҆зъ съберꙋ ѧ҆̀ ѿ всеѧ̀ землѧ, и҆дѣже рас꙽сѣѧ́хъ ѧ҆̀ въ гнѣвѣ мое҆мъ, и҆ ꙗ҆рости мое́и, и҆ въ раз꙽гнѣ́ванїи велїемъ.
и҆ ѻ҆бращꙋ ѧ҆̀ на сѐ мѣсто, и҆ посажꙋ ѧ҆̀ ѹ҆пова́нѣ.
и҆ бꙋдꙋтъ м̂и въ лю́ди и҆ а́зъ бꙋ́дꙋ и҆мъ въ б҃а.
и҆ да́мъ и҆мъ пꙋть и҆́нъ, и҆ срд̑це и҆́но, боѧ́тисѧ менѐ вс҃ѧ дн҃и, и҆ на бл҃готꙋ и҆мъ и҆ ча́домъ и҆хъ по нихъ.
и҆ завѣща́ю им̑ завѣтъ вѣ́чныи, е҆гоже не ѿвращꙋ по нихъ.
и҆ стра́хъ мо́и дамъ въ срд̑це ихъ, ꙗ҆коже не ѿстꙋпити и҆мъ ѿ мене, и҆ посѣщꙋ ꙗ҆коже ѹ҆блажити ѧ҆̀.
и҆ насажꙋ ѧ҆̀ в се́и земли съ вѣрою, и҆ съ всѣмъ срд̑цемъ мои҆мъ, и҆ съ всею̀ дш҃ею мое҆ю·

Ꙗ҆́ко та́ко рече г҃ь, и҆ ꙗ҆́коже наведохъ на лю́ди моѧ̀ сїѧ вс̂ѧ зло́бы сїѧ вели́кїа.
та́кож̑ а҆́зъ наведꙋ на сїа вс̂ѧ бл҃готы, ꙗ҆́же а҆́зъ съгл҃ахъ к ни́мъ.
и҆ ѻ҆блада́ют꙽ села на земли ю҆́же т̂ы гл҃еши, непроход̑но е҆сть ѿ чл҃ка и҆ скота.
и҆ предашасѧ в рꙋцѣ халде́истѣ.
и҆ притѧжт̑ꙋсѧ села сребром̑, и҆ въпи́шеши в꙽ кни́ги, и҆ знамена́еши, и҆ послꙋшиши по́слꙋхи.
въ зе́мли венїѧми́нѣ, и҆ ѻ́крс̑҇тъ і҆ерс̑҇ли́ма, и҆ въ градх̑ѣ і҆ѹ́динѣх꙽, и҆ въ градх̑ѣ горьских̑, и҆ въ градѣх꙽ по́льскихъ, и҆ въ градх̑ѣ наге́въ.
ꙗ҆́ко въз꙽вращꙋ и҆с꙽селенїа и҆хъ гл҃ет̑ г҃ь·

Глв̑҇а, л҃г·

И бы́сть сло́во гн҃е къ і҆еремїи второе, то́и же бѧ́ше е҆щѐ свѧ́занъ въ ро́вѣ темничнем̑ гл҃ѧ·

Та́ко рече г҃ь, творѧ́и зе́млю, и҆ простира́ѧ ю҆̀ ꙗко и҆спра́вити ю҆̀, г҃ь и҆мѧ е҆мꙋ·

възопїи къ мнѣ̀ и҆ ѿвѣща́ю ти, и҆ совѣстꙋю тебѣ вели́ко и҆ крѣп꙽ко, е҆гоже нѣси разꙋмѣлъ.
ꙗ҆́ко та́ко рече г҃ь б҃ъ і҆и҆л҃евъ ѻ҆ домохъ гра́да сего, и҆ ѻ҆ хра́мѣхъ цр҃ѧ і҆ѹ́дина, растерзаныхъ на ѻ҆стро́гъ и҆ на забра́ла.
ꙗ҆кож̑ проти́витисѧ къ халдѣ́емъ, и҆ наполни́ти и҆̀ мр҃твъ чл҃къ, ꙗ҆́же побих̑ въ гнѣ́вѣ мое҆м꙽, и҆ въ ꙗ҆́рости мое́и.
и҆ ѿвратих̑ лице свое ѿ них̑, ѻ҆ всх̑ѣ ѕлобах̑ и҆хъ·

Се а҆́зъ наведꙋ на нѧ срастенїе, і҆ и҆сцѣленїем̑ из̑врачюю ѧ҆̀.
и҆ ꙗ҆влю и҆мъ послꙋшати і҆ и҆зврачю́ю ѧ҆̀, и҆ сътворю и҆мъ ми́ръ и҆ вѣрꙋ.
и҆ ѻ҆бращꙋ и҆с꙽селе́нїе і҆ѹ́дино, і҆ и҆с꙽селенїе і҆ерс̑҇ли́мле, и҆ съгражд̑ꙋ ѧ҆̀ ꙗ҆́ко и҆ прежд̑е.
и҆ ѻ҆чищꙋ ѧ҆̀ ѿ всѣхъ непра́вдъ и҆хъ ꙗ҆́же съгрѣши́ша ми.
и҆ млс̑҇тивъ бꙋдꙋ всм̑ѣ непра́вдамъ их̑, и҆миже ѿстꙋпи́ша ѿ мене, и҆ погордѣша мно́ю.
и҆ бꙋдет꙽ въ веселїе и҆ въ хва́лꙋ, и҆ въ величїе всѣмъ лю́демъ землѧ̀.
ꙗ҆́же ѹ҆слы́шатъ вс̂ѧ бл҃готы, ꙗ҆́же а҆зъ творю.
и҆ ѹ҆боѧт̑сѧ и҆ разгнѣвают̑сѧ ѻ҆ всх̑ѣ бл҃готах̑, и҆ ѻ҆ всем̑ мире, и҆же аз̑ творю им̑·

Та́ко рече г҃ь, е҆ще ѹ҆слы́шитсѧ в семъ мѣсте, е҆мꙋже в̂ы гл҃ете, пꙋсто е҆сть ѿ чл҃къ и҆ ѿ скота въ гра́дѣхъ і҆ѹ́динѣхъ, и҆ внѣ і҆ерс̑҇ли́ма ѻ҆пꙋстѣвшихъ, понеже нѣсть чл҃ка н̂и скота.
гла́съ веселїѧ, и҆ гла́съ ра́дости.
глас̑҇ женѧ́щагосѧ, и҆ гла́съ невѣстенъ·

гла́съ гл҃ющих̑ и҆сповѣда́итесѧ гв҃и вседръжи́телю ꙗ҆ко бл҃гъ г҃ь, ꙗ҆́ко в꙽ вѣкъ млс̑҇ть е҆го.
и҆ принесꙋтъ да́ры похваленїѧ въ дом̑ гн҃ь, ꙗ҆́ко възвращꙋ вс̂е и҆с꙽селе́нїе землѧ тоѧ̀ по пе́рьвомꙋ, рече г҃ь·

Та́ко гл҃етъ г҃ь си́лъ, е҆щѐ бꙋдетъ на се́мъ мѣстѣ пꙋстѣмъ, и҆́мже нѣсть чл҃ка н̂и скота̀, въ всх̑ѣ градх̑ѣ е҆го ѻ҆бителницъ, пастх̑ꙋ поставлѧ́ю҆щь па́ствы, а҆ въ градх̑ѣ горных̑, и҆ въ градх̑ѣ по́льских̑, и҆ въ градх̑ѣ наге́въ, и҆ въ землѝ венїаминѣ, и҆ въ ѻ҆крс̑҇тъныхъ і҆ерс̑҇ли́ма, и҆ въ гра́дѣхъ і҆ѹ́динѣхъ, е҆щѐ поидꙋтъ ѻ҆́вца къ рꙋцѣ чтꙋщаго, гл҃ет г҃ь·

Се дн҃їе грѧдт̑ꙋ рече г҃ь, и҆ въставлю сло́во бл҃го, е҆же гл҃ахъ къ домꙋ і҆и҆л҃евꙋ, и҆ къ до́мꙋ і҆ѹ҆динꙋ.
въ тѣхъ дн҃ехъ и҆ въ то́и час̑҇, с꙽плоди́тисѧ повелю двд̑вꙋ пло́дꙋ пра́вед̑нꙋ, и҆ сътворитъ сꙋдъ и҆ пра́вдꙋ на землѝ.
въ тѣхъ дн҃ехъ спасенъ бꙋ́етъ і҆ѹ́да, і҆и҆л҃ь пребꙋдет̑ въ наде́жди.
и҆ с̂е е҆сть и҆мѧ, и҆́мже нарекꙋтъ и҆̀, г҃ь пра́ведныи на́шъ·

Та́ко б̂о рече г҃ь, не погибнет̑ ѿ дв҃да мꙋжъ сѣдѧ́и на прс̑҇тлѣ до́мꙋ і҆и҆л҃ева.
и҆ ѿ жрецъ и҆ ѿ левѷтовъ не поги́бнет꙽ мꙋжъ ѿ лица мое҆го, приносѧи всесож̑женїе и҆ ѻ҆сщ҃ен꙽наѧ, и҆ побѣднаѧ приношенїѧ по всѧ̀ дн҃и·

И҆ бы́сть сло́во гн҃е къ і҆еремїи гл҃ѧ.
та́ко гл҃етъ г҃ь, мо́жетъ л̂и прерꙋшитисѧ завѣтъ мо́и съ дн҃емъ, и҆ завѣт꙽ мо́и съ нощїю, е҆же не бы́ти дн҃ю и҆ но́щи въ ча́съ свои.
и҆ завѣтъ мо́и бꙋдет꙽ мощѝ прерꙋшитисѧ съ дв҃домъ рабом̑ мои҆м꙽, е҆же не бы́ти ѿ него̀ сн҃ꙋ цр҃ьствꙋ́ющꙋ на прс̑҇тлѣ е҆го, и҆ левѷти и҆ сщ҃ен꙽ници рабѝ моѝ.
ꙗ҆́коже сочтены бы́ти не могꙋтъ ѕвѣзды нбс̑҇ныѧ, н̂и и҆змѣренъ бы́ти пѣсок꙽ мор꙽скїи.
та́ко ѹ҆мно́жꙋ сѣмѧ раба̀ мое҆го дв҃да, и҆ левѷты слꙋже́бники моа̀·

И҆ бы́сть сло́во гн҃е къ мнѣ̀ гл҃ѧ, е҆да̀ не ви́дѣлъ е҆си чт̂о рекоша лю́дїе сїи гл҃юще.
дв̂а наро́да их̑же и҆зволи г҃ь завержены сꙋть, и҆ люд̑ми мои́ми погор꙽дѣша.
сего ради ꙗ҆́ко да не бꙋдет̑ ктомꙋ народ̑ пред̑ ними·

Та́ко рече г҃ь не положихъ л̂и ѹ҆бо завѣта межд̑ꙋ дн҃емъ и҆ но́щїю, и҆ зако́новъ нб҃ꙋ и҆ землѝ.
тогда̀ сѣмѧ і҆а́ковле, и҆ двд̑а раба̀ мое҆го ѿвръгꙋ.
е҆же не прїѧ́ти ѿ сѣмене е҆го кнѧѕеи сѣмене а҆враам̑лѧ, і҆ и҆а́ковлѧ.
ꙗ҆́ко па́ки приведꙋ ѻ҆бращенїе и҆хъ, и҆ поми́лꙋю ѧ҆̀·

Глв̑҇а, л҃д·

Сло́во е҆же бы́сть къ і҆еремїи ѿ г҃а, е҆гда навходоносо́ръ цр҃ь вавѷлоньскь, и҆ вс̂и во́и е҆го, и҆ всѧ̀ землѧ̀ вла́сти е҆го, и҆ вс̂и лю́дїе вое҆ва́хꙋ на і҆ерс̑҇ли́ма, и҆ на всѧ̀ гра́ды і҆ѹ́дины, гл҃ѧ·

Та́ко рече г҃ь б҃ъ і҆и҆л҃евъ, и҆ди къ седекїи цр҃ю і҆ѹ́динꙋ, и҆ речеши е҆мꙋ.
тако рече г҃ь, преда́нїемъ преда́стьсѧ се́и град̑ в рꙋцѣ цр҃ѧ вавѷлоньска, и҆ во́змет̑ и҆̀҆̀ и҆ пож꙽жет̑ и҆̀ ѻ҆гнем̑.
и҆ т̂ы не ѹ҆цѣлѣе҆ши ѿ рꙋкꙋ е҆го, и҆ ꙗ҆тїем̑ и҆́мешисѧ, и҆ в рꙋцѣ е҆го даси́сѧ и҆ ѻ́чи твоѝ ѻ҆́чи е҆го ѹ҆́зрита, и҆ ѹ҆ста твоа съ ѹ҆сты е҆го съгл҃ютъ, и҆ въ вавѷлонъ вни́деши.
н̂о ѻ҆баче слы́ши сло́во гн҃е седекїѧ цр҃ю і҆ѹ́динъ·

Та́ко рече г҃ь к тебѣ̀, не ѹ҆́мреши ѿ меча̀, н̂о въ ми́ре ѹ҆́мреши.
и҆ ꙗ҆́коже сѧ сꙋть пла́кали ѿц҃ъ твои҆х꙽ црс̑҇твова́вших̑ прежд̑е тебе, пла́чют̑сѧ и҆ тебе.
ѽ г҃и, и҆ лю́тѣ г҃и.
и҆ въспла́чютсѧ и҆ тебе, ꙗ҆́ко сло́во съгл҃ахъ рече г҃ь·

И҆ гл҃а і҆еремїа прро̑҇къ къ седекїи цр҃ю і҆ѹ́динꙋ, вс̂ѧ словеса̀ с̂и въ і҆ерс̑҇ли́мѣ.
и҆ си́ла цр҃ѧ вавѷлоньска вое҆ва на і҆ерс̑҇ли́ма, и҆ на гра́ды і҆ѹ́дины нерасы́паныѧ, лахис̑҇, и҆ а́ѕика.
ꙗ҆́ко т̂а ѻ҆ста́ста во́ градѣхъ і҆ѹ́динѣхъ, гра́ды тве́рды·

Сло́во бы́вшее къ і҆еремїи ѿ г҃а, по сконча́нїи цр҃ѧ седекїѧ завѣтъ къ лю́демъ и҆же въ і҆ерс̑҇ли́мѣ.
ꙗ҆́ко позва́ти ѿпꙋщенїе, ꙗ҆́коже и҆спꙋстити комꙋждо рабъ свои҆хъ и҆ рабꙋ̀ свою̀, жидови́на и҆ жидовыню сво́бодь, ꙗ҆́коже не рабо́тати мꙋжꙋ і҆и҆л҃ѧ.
и҆ ѻ҆брати́шасѧ вс̂ѧ вельмо́жа и҆ вс̂и лю́дїе въстꙋпи́вшеи въ завѣтъ, ꙗ҆́коже пꙋстити комꙋждо ра́бъ свои, и҆ комꙋждо рабꙋ̀ свою свобод̑, и҆ ктомꙋ е҆же не владѣти и҆́ми.
сего ради послꙋшаша и҆ пꙋстиша, и҆ ѻ҆брати́шасѧ воспѧть.
и҆ въздръжа́ша па́ки рабы и҆ рабы́нѧ своѧ, и҆́хже пꙋстиша свобод̑, и҆ взѧ́ша въ рабы̀ и҆ рабы́нѧ·

И҆ бы́сть сло́во гн҃е къ і҆еремїи ѿ г҃а гл҃ѧ.
та́ко рече г҃ь б҃ъ і҆и҆л҃евъ, а҆́зъ завѣщах̑ завѣтъ ѿц҃емъ ва́шим̑, въ дн҃ь вон꙽же и҆зба́вихъ ѧ҆̀ ѿ землѧ е҆гѷпетьски и҆з до́мꙋ рабо́тна, гл҃ѧ.
ꙗ҆ко скон꙽чае҆тсѧ, ѕ҃ лѣтъ, да пꙋсти́ши бра́та свое҆го жидови́на, и҆же продан꙽ е҆сть тебѣ.
и҆ да дѣ́лает̑ т̂и, ѕ҃ лт̑ѣ, и҆ да пꙋстиши свобод̑ ѿ себе·

и҆ не послꙋша́ша мене ѿц҃ы ва́ши, н̂и приклони́ша ѹ҆́ха свое҆го.
и҆ ѻ҆братистесѧ в̂ы дне́сь, сътвори́ти пра́ваѧ пред̑ ѻ҆чима мои́ма, ꙗ҆́коже позвати комꙋждо проще́нїе бли́жнемꙋ свое҆мꙋ.
и҆ сконча́ша завѣтъ пред̑ лицемъ моим̑ въ домꙋ, и҆дѣже наречесѧ и҆мѧ моѐ в нем̑.
и҆ ѿврати́стесѧ и҆ ѻ҆сквернисте завт̑ѣ мо́и, ꙗ҆кож̑ ѻ҆брати́ти комꙋж̑до ра́бъ свои и҆ рабꙋ свою̀, ꙗ҆́же бѣсте и҆спꙋстили свобод̑ дш҃ꙋ их̑.
покори́сте ѧ҆̀ ꙗ҆́коже бы́ти ва́мъ въ рабы̀ и҆ въ рабы́нѧ·

Того ради си́це реч̑҇ г҃ь, в̂ы не послꙋшасте менѐ позвати проще́нїа ко́ждо бра́тꙋ свое҆мꙋ, и҆ ко́ждо бли́жнемꙋ свое҆мꙋ.
с̂е а҆́зъ зовꙋ проще́нїе ва́мъ на ме́чъ, и҆ на смр҃ть и҆ на глад̑.
и҆ да́мъ в̂ы на раз̑сыпа́нїе всм̑ѣ црс̑҇твомъ зе́мнымъ, и҆ да́мъ мꙋжа престꙋпи́вшаѧ завѣтъ мо́и, и҆ не хранѧ́щаѧ слове́съ завѣта мое҆го, к ним̑ же и҆зво́лиша пред̑ лицемъ моим̑.
те́льца е҆же сꙋть раз꙽сѣкли на двѣ странѣ̀, и҆ ході́ша межд̑ꙋ разд̑ѣ́леными е҆го.
кнѧ́ѕи і҆ѹ́дины, и҆ кн҃ѕи і҆ерс̑҇ли́мли, и҆ вельмо́жѧ и҆ жерцы, и҆ вс̂и люд̑и̑ земли, ходѧ́щаѧ межд̑ꙋ раздѣленым̑ те́льцемъ.
и҆ да́мъ ѧ҆̀ въ рꙋки врагом̑ и҆хъ, и въ рꙋки и҆́щꙋщихъ дш҃ꙋ их̑.
и бꙋдꙋтъ трꙋпи их̑ ꙗ҆́дь птицамъ нбс̑҇ным̑ и҆ ѕвѣремъ зе́мнымъ·

Седекїю же цр҃ѧ жидов꙽ска, и҆ кнѧ́ѕѧ е҆го, да́мъ в рꙋцѣ врагомъ и҆хъ, и҆ в рꙋкꙋ стрегꙋщихъ дш҃и и҆хъ.
и҆ въ рꙋкꙋ во́иска цр҃ѧ вавѷлоньска, ѿбѣгающих̑ ѿ них̑.
се а҆зъ съчинѧю реч̑҇ г҃ь, и҆ ѻ҆бращꙋ ѧ҆̀ въ землю сїю, и҆ повоюют̑ на́ нѧ, и҆ во́змт̑ꙋ ю҆̀ и҆ пожгт̑ꙋ ю҆̀ ѻ҆гнем̑, и҆ гра́ды і҆ѹ́дины, дам̑ ѧ҆̀ в꙽ непрожд̑енїе ѿ жївꙋщих̑·

Глв̑҇а, л҃е·

Сло́во бы́вшее къ і҆еремїи ѿ г҃а, въ дн҃и і҆ѻ҆а́кима сн҃а і҆ѻ҆сїина цр҃ѧ і҆ѹ́дина, гл҃ѧ·

И҆ди въ до́мъ раха́винъ и҆ възови ѧ҆̀, и҆ ведї ѧ҆̀ въ до́мъ гн҃ь въ е҆ді́нъ ѿ дво́ровъ, и҆ напои́ши ѧ҆̀ виномъ.
и҆ приведо́хъ е҆зонїю сн҃а і҆еремїина, сн҃а хавасїина и҆ бра́тїю е҆го, и҆ сн҃ы е҆го, и ве́сь дом꙽ раха́винъ.
и҆ въведохъ ѧ҆̀ въ до́мъ гн҃ь, въ хра́мъ и҆мѣнїѧ сн҃҃овъ а҆нанїинъ, сн҃а годо́лїина чл҃ка бж҃їѧ.
и҆же е҆сть близъ до́мꙋ кнѧ́жа, вы́ше до́мꙋ маа҆сеѻ́ва, сн҃а сеело́млѧ стрегꙋщаго дво́ръ.
и҆ поста́вихъ пред̑ ни́ми кор꙽чагъ вина и҆ ча́ша, и҆ рекохъ пїите·

И҆ реко́ша не пїемъ вина, ꙗ҆́ко і҆ѻ҆надавъ сн҃ъ рах́авль ѿц҃ъ наш̑҇ заповѣ́да намъ рекїи.
не пїите вина̀ в̂ы, и҆ сн҃ове ва́ши до́ вѣка.
и҆ храминъ не съградитѐ, и҆ сѣмене не сѣите, и҆ виногра́дъ да не бꙋдетъ вам̑.
н̂о въ кꙋщахъ да живете вс̂ѧ дн҃и живота̀ ва́шего.
да живете дн҃и мно́ги на́ земли, на неиже ходи́те в̂ы·

и҆ послꙋшахомъ словесе і҆ѻ҆нада́влѧ ѿц҃а на́шего.
ꙗ҆́коже не пи́ти вина всѧ̀ дн҃и живота на́шего, м̂ы и҆ же́ны на́ша, и҆ сн҃ове на́ши, и҆ дще́ри на́ша.
ꙗ҆́коже не съгражд̑ати храминъ жи́ти та́мо.
винограда же и҆ нивы и҆ сѣмене не бы́сть на́мъ, и҆ жихомъ въ кꙋщахъ.
и҆ послꙋша́хом̑ и҆ сътворихомъ по всемꙋ е҆ли́ко заповѣда на́мъ і҆ѻ҆а҆нада́въ ѿц҃ъ на́шъ.

И҆ быс̑҇ е҆гда̀ прїиде навходоносо́ръ цр҃ь вавѷлоньскїи на́ землю на́шꙋ, и҆ рекохомъ, в꙽шед̑ше да вни́демъ въ і҆ерс̑҇лим̑ ѿ лица̀ халдѣ́иска, и҆ ѿ лица си́лы сѷр꙽ски, и҆ всели́хомсѧ т̂ꙋ·

И҆ бы́сть сло́во гн҃е къ і҆еремїи гл҃ѧ.
та́ко гл҃ет̑ г҃ь, и҆дѝ и҆ рцы чл҃кꙋ і҆ѹ́динꙋ, и҆ живꙋщимъ въ і҆ерс̑҇ли́мѣ.
е҆да̀ не воспрїмете л̂и наказа́нїа послꙋшати слове́съ мои҆хъ.
ѹ҆ста́виша сло́во сн҃ве і҆ѻ҆а҆нада́вли сн҃а рахав̑҇лѧ, е҆же заповѣда сн҃омъ свои҆мъ, ꙗ҆́коже не пи́ти вина̀ и҆ не пи́ша.
а҆́з же гл҃ахъ к꙽ ва́м꙽ заѹ҆́тра и҆ вечеръ, и҆ не послꙋшаста мене.
и҆ посылахъ к вам̑ рабы̀ своѧ̀ про̑҇рки, гл҃ѧ·

ѻбрати́тесѧ ко́ждо ѿ пꙋтѝ свое҆го зла́го, и҆ ѹ҆́н꙽ша сътвори́те дѣ́ла своѧ, и҆ не ходи́те въ слд̑ѣ бо́говъ и҆́нѣхъ ꙗ҆́ко слꙋжи́ти и҆мъ.
и҆ вселю васъ на́ землю ю҆же да́хъ ва́мъ и҆ ѿц҃емъ ва́шимъ, и҆ не приклони́сте ѹ҆шїю свое́ю и҆ не послꙋша́сте·

И҆ ѹ҆ста́виша сн҃ове і҆ѻ҆а҆нада́вли сн҃а раха́влѧ за́повѣдь ѿц҃а свое҆го, е҆же заповѣ́да и҆мъ.
а҆ лю́дїе моѝ не послꙋшаша менѐ.

Сего ра́ди си́це рече г҃ь.
се а҆зъ наведꙋ на і҆ѹ҆дꙋ, и҆ на всѧ̀ живꙋщаа въ і҆ерс̑҇ли́мѣ вс̂е зло̀, е҆же съгл҃ах꙽ на́ нѧ.
того рад̑и̑ и҆же гл҃ахъ к ним̑, и не послꙋша́ша.
възыва́хъ ѧ҆̀, и҆ не ѿвѣща́ша м̂и.
н̂о до́мꙋ раха́влю речѐ і҆еремїѧ.
та́ко рече г҃ь б҃ъ вседръжи́тель, е҆́льмаже послꙋшаша сн҃ове і҆ѻ҆а҆нада́вли за́повѣди ѿц҃а свое҆го, твори́ти е҆ли́ко заповѣ́да и҆мъ ѿц҃ъ их̑.
не ѻ҆скꙋдѣ́етъ мꙋжъ ѡ сн҃овъ і҆ѻ҆а҆нада́вль сн҃а рахавлѧ, стоѧ пред̑ лицемъ мои҆мъ в̂сѧ̀ дн҃и землѧ̀·

Глв̑҇а, л҃ѕ·

И бы́сть въ лѣто д҃ е і҆ѻ҆а҆кимле, сн҃а і҆ѻ҆сїина цр҃ѧ і҆ѹ́дина.
бы́сть сло́во гн҃е къ і҆еремїи гл҃ѧ·

Возмѝ себѣ̀ рого́зъ кни́жныи, и҆ въпиши вонь вс̂ѧ словеса̀ ꙗ҆́же съгл҃ахъ к тебѣ, на і҆и҆л҃ѧ и҆ на і҆ѹ́дꙋ, и҆ на всѧ̀ страны̀, ѿ негоже дн҃е гл҃авшꙋ м̂и к тебѣ̀.
ѿ дн҃и і҆ѻ҆сїи цр҃ѧ і҆ѹ́дина и҆ до сего дн҃е.
неглѝ ѹ҆слы́шитъ до і҆ѹ́дов̑҇ вс̂е ѕло̀, е҆же а҆зъ мы́шлю сътвори́ти и҆мъ.
да сѧ ѻ҆братѧ́тъ ѿ пꙋтѝ свое҆го зла́го, и҆ млс̑҇тивъ бꙋдꙋ непра́вдамъ и҆хъ и҆ грѣхомъ их̑·

И҆ возва̀ і҆еремїа варꙋха сн҃а нирїина, и вписа̀ варꙋхъ ѿ ѹ́стъ і҆еремїинъ вс̂ѧ словеса̀ гн҃ѧ ꙗ҆́же съгл҃а к немꙋ, в рогоз̑ кни́жныи.
и҆ заповѣда і҆еремїѧ варꙋхꙋ гл҃ѧ.
менѐ стрегт̑ꙋ и҆ не могꙋ вни́ти въ дом̑ гн҃ь.
н̂о вни́ди т̂ы и҆ почтѝ в рого́зѣ сем̑, в не́мже написал̑҇ е҆си ѿ ѹ́стъ моих̑ словеса̀ гн҃ѧ, въ ѹ҆́ши люд̑стѣ в домꙋ̀ гн҃и въ дн҃ь а҆л꙽ка́нїѧ.
и҆ въ ѹ҆́ши всемꙋ до́мꙋ і҆ѹ́динꙋ приходѧ́щим̑ ѿ град̑ свои҆х꙽, да почтеши им̑.
е҆гда падетъ моли́тва и҆хъ пред̑ лицем̑ гн҃имъ, и҆ ѻ҆братѧт̑сѧ ѿ пꙋти и҆хъ зла́го·

Ꙗ҆́ко вели́ка ꙗ҆́рость и҆ гнѣвъ гн҃ь, и҆же съгл҃а на лю́ди сїа.
и҆ сътворѝ варꙋхъ сн҃ъ ни́рїинъ, по всемꙋ̀ е҆ли́ко заповѣда е҆мꙋ і҆еремїѧ прро̑҇к꙽, почте въ кни́гахъ словеса̀ гн҃ѧ въ домꙋ̀ гн҃и·

И҆ бы́сть въ пѧтое лѣто і҆ѻ҆аки́ма цр҃ѧ і҆ѹ́дина, в꙽ девѧ́тыи мс̑҇ць.
заповѣ́даша а҆л꙽ка́нїе пред̑ лицемъ гн҃имъ всѣмъ лю́демъ въ і҆ерс̑҇ли́мѣ, и҆ всемꙋ̀ мно́жествꙋ, е҆же сни́десѧ ѿ град̑ і҆ѹ́динъ въ і҆рс̑҇ли́мъ.
и҆ почита́ше варꙋхъ въ кни́ѕѣ словеса̀ і҆еремїина въ домꙋ̀ гн҃и, в꙽ домꙋ гамарїевѣ сн҃а сафа́нѧ кни́гъчїѧ, въ дво́рѣ вы́шнем̑ въ пред̑верїи врат̑ до́мꙋ гн҃ѧ но́ваго, въ ѹ҆́ши всѣхъ лю́дїи·

И҆ слы́ша михе́ѧ сн҃ъ гамарїевъ сн҃а сафа́нѧ, вс̂ѧ словеса̀ гн҃ѧ ѿ кни́гъ.
и҆ сни́де въ до́мъ цр҃евъ, и҆ въ до́мъ кни́жника.
и҆ с̂е тꙋ всѝ кнѧ́ѕи сѣдѧ́хꙋ, е҆лиса́ма книг꙽чїи, и҆ далеа сн҃ъ семелїевъ, і҆ѻ҆а҆наѳа́н꙽ сн҃ъ а҆хоров̑҇̀ и҆ гамарїѧ сн҃ъ сафа́нь, и҆ седекїа сн҃ъ а҆нанїи́нъ, и҆ вс̂и кнѧ́ѕи.
и҆ съвѣсти им̑ михе́ѧ вс̂ѧ словеса̀, ꙗ҆́же слы́ша чтꙋща варꙋха въ ѹ҆́ши лю́демъ·

И҆ посла́ша вс̂и кнѧ́ѕи къ варꙋхꙋ сн҃ꙋ ни́рїинꙋ, і҆ѹ҆де́ина сн҃а наѳанїина, сн҃а семелїина, сн҃а хꙋсїина, гл҃юще.
кни́ги ꙗ҆́же почита́е҆ши въ ѹ҆́ши лю́демъ, возми ѧ҆̀ въ рꙋ́кꙋ свою и҆ прїиди.
и҆ взѧ̀ варꙋхъ сн҃ъ нирїинъ кни́ги в рꙋкꙋ своею, и҆ сни́де к ним̑·

и҆ реко́ша е҆мꙋ, паки почтѝ въ ѹ҆ши наши.
и҆ почте варх̑ꙋ въ ѹ҆́ши и҆х꙽.
и҆ быс̑҇ ꙗ҆ко слы́шаша вс̂ѧ словеса̀, совѣщашас̑҇ ко́ждо къ бли́жнемꙋ свое҆мꙋ, и҆ рѣша варꙋхꙋ.
възвѣстѧ́ще възвѣстим̑ цр҃ю всѧ словеса̀ с̂и·

и҆ въпрашаша варꙋха гл҃юще, ѿкꙋдꙋ е҆си въписал̑҇ вс̂ѧ словеса с̂и.
и҆ реч̑҇ варх̑ꙋ ѿ ѹ́стъ і҆еремїинъ.
и҆сповѣ́да м̂и вс̂ѧ словеса̀ с̂и, а҆́з же писа́хъ въ кни́ги·

И҆ реко́ша кнѧ́ѕи варꙋхꙋ, шед̑ съкры́исѧ т̂ы і҆ и҆еремїа, и҆ чл҃къ да не ѹ҆вѣсть гдѣ̀ в̂ы е҆ста.
и҆ внидо́ша къ цр҃ю въ дворъ.
кни́гиж̑ в꙽даша снабдѣти в꙽ домꙋ̀ е҆лисама́ни книг꙽чїа.
и҆ совѣсти́ша цр҃ю вс̂ѧ словеса̀.
и҆ посла̀ цр҃ь і҆ѹ҆де́ина в꙽зѧти кни́ги.
и҆ взѧ ѧ҆̀ ѿ домꙋ̀ е҆лисама́нѧ.
и҆ почте і҆ѹ҆де́инъ въ ѹ́ши цр҃евы, и҆ въ ѹ҆́ши всѣхъ кнѧ́ѕь стоащихъ ѹ҆ цр҃ѧ.
цр҃ь же сѣдѧ́ше въ храмѣ зи́мнм̑ѣ, въ девѧ́тыи мс̑҇ць.
и҆ поста́влено б̂ѣ пред̑ ни́мъ ѻ҆́гнище со ѻ҆́гнемъ·

И҆ быс̑҇ чтꙋщꙋ і҆ѹ҆де́инꙋ, тре́тїи рѧдъ и четвертыи, раз꙽дробї ѧ҆̀ бри́твою книг꙽чїѧ, и҆ възмета́ше на ѻ҆гненое ѻ҆́гнище.
до́ндеже сконча́сѧ ве́сь рого́зъ на ѻ҆́гненомъ ѻ҆́гнищи·

И҆ не ѹ҆жасо́шасѧ и҆ не растер꙽заша ризъ свои҆хъ, цр҃ь и҆ вс̂и ѻ҆́троцы е҆го слы́шавшїи вс̂ѧ словеса̀ с̂и.
е҆н꙽наѳан꙽ же и҆ далеа, и҆ гамарїа́, и҆ годолїа, гл҃аша цр҃ю, ꙗ҆́коже не сожещи рого́за.
и҆ не послꙋша и҆хъ·

И҆ повелѣ цр҃ь і҆е҆ремеи́лю сн҃ꙋ а҆мале́ховꙋ, і҆ сарае҆ви сн҃ꙋ е҆́зрилевꙋ, и҆ селемїю сн҃ꙋ а҆вда́евꙋ.
да и҆зымꙋт꙽ варꙋ́ха книг꙽чїѧ, і҆ и҆еремїю прро̑҇ка.
н̂о съкры ѧ҆̀ г҃ь·

И҆ бысть сло́во гн҃е къ і҆еремїи потомъ ꙗ҆́ко сож꙽же цр҃ь рого́зъ, и҆ вс̂ѧ словеса̀ ꙗ҆́же въписа̀ варꙋхъ ѿ ѹ́стъ і҆еремїинъ гл҃ѧ.
паки возмѝ рого́зъ дрꙋгїи, и҆ въпиши вс̂ѧ словеса̀ сꙋща́ѧ в рого́зѣ, и҆же сож̑же цр҃ь і҆ѻ҆а҆ким̑·

И къ і҆ѻ҆а҆кимови рече́ши.
та́ко рече г҃ь, т̂ы сож꙽же сїѧ кни́ги, гл҃ѧ, почто̀ въписа в нѧ̀, гл҃ѧ въходѧ̀ вни́детъ цр҃ь вавѷлоньскь, и҆ потребитъ зе́млю сїю, и҆ потребит̑ с не́ѧ чл҃ки и҆ ско́тъ·

Того ра́ди си́це реч̑҇ г҃ь на і҆ѻ҆а҆ки́ма цр҃ѧ і҆ѹ́дина, не бꙋдет̑ е҆мꙋ сѣдѧ́щаго на столѣ двд҃вѣ.
и҆ бꙋдетъ тѣ́ло е҆го мр҃твое поврьжено на зноѝ де́ньнѣмъ, и҆ на мра́зѣ но́щнѣмъ.
и҆ посѣщꙋ на́нь, и҆ на рожд̑енїе е҆го и҆ на ѻтроки е҆го.
и҆ наведꙋ на́ нѧ и҆ на живꙋщ́аѧ въ і҆ерс̑҇ли́мѣ, и҆ на́ землю і҆ѹ́динꙋ вс̂е зло̀.
е҆же съгл҃ахъ на́ нѧ и҆ не послꙋшаша·

И҆ взѧ̀ варꙋх꙽ рогоз̑ дрꙋгїи, и҆ в꙽писа̀ вонь ѿ ѹ҆́стъ і҆е҆ремїинъ вс̂ѧ словеса̀ кни́гъ ꙗ҆́же сож̑же і҆ѻ҆а҆ки́мъ, и҆ е҆щѐ приложи́шасѧ е҆мꙋ словеса̀ множа́иша неже пр́ьвѣи·

Глв̑҇а, л҃з·

И црс̑҇твова седекїѧ сн҃ъ і҆ѻ҆сїин̑҇ въ і҆ехонїи мѣсто сн҃а і҆ѻ҆а҆ки́мова, е҆гоже поста́ви нанав꙽ходоносоръ цр҃ь вавѷлонъскїи, црс̑҇твовати въ і҆ѹ҆де́и.
и҆ не послꙋша тои ни ѻ́троцы е҆го, ни лю́дїе землѧ̀ словесъ гн҃ь, ꙗ҆́же гл҃а в рꙋцѣ і҆еремїинѣ·

И҆ посла̀ цр҃ь седекїѧ і҆ѻ҆а҆хас꙽са сн҃а сел꙽мїина, и҆ софо́нїѧ сн҃а мас꙽сеа жрьца, къ і҆еремїи прро̑҇кꙋ, гл҃ѧ, молѝ за ны къ гв҃и.

І҆еремїѧ же про́стъ проиде средъ гра́да̑ не въведо́ша б̂о е҆го въ храмъ темни́чныи.
и҆ си́ла фараѻ́нѧ и҆зыиде и҆зъ е҆гѷпта.
и҆ слы́шавше халде́и ѻ҆бле́гшен і҆ерс̑҇лимъ слꙋхъ и҆хъ, ѿстꙋпи́ша ѿ і҆ерс̑҇лима·

И бысть слово гн҃е къ і҆еремїи гл҃ѧ.
та́ко рече г҃ь б҃ъ і҆и҆л҃евъ, та́ко р꙽цѣте цр҃ю і҆ѹ́динꙋ посла́вшемꙋ ва́съ къ мнѣ въпроси́ти мѧ.
с̂е си́ла фараѻ́нѧ и҆зшед̑шїа вамъ на пощъ, ѻ҆братѧ́тсѧ па́ки до землѧ е҆гѵпет꙽ски.
и҆ въз꙽вратѧ́тсѧ халде́и, и҆ вою́ютъ на градъ се́и и҆ во́змꙋтъ и҆̀ и҆ пожгꙋтъ и҆̀ ѻ҆гнем꙽.
ꙗ҆́ко та́ко рче г҃ь, не прелща́ите дш҃ь свои҆хъ гл҃юще, ѿходѧ́ще ѿи́дꙋтъ ѿ насъ хал꙽деи, ꙗ҆́ко не ѿи́дꙋт꙽.
и҆ а́ще побїете всю си́лꙋ халдѣискꙋ, воюющихъ на вы.
и҆ ѻ҆ста́нꙋтъ нѣціи ꙗ҆звени кождо на мѣсте свое҆мъ, и҆ въста́вше пож꙽гꙋтъ градъ ѻ҆гнем̑·

И҆ бысть ꙗ҆ко взыиде си́ла хал꙽деиска ѿ і҆ерс̑҇лима, ѿ лица си́лы фараѻ́нѧ.
и҆зы́иде і҆еремїѧ и҆зъ і҆ерс̑҇лима, и҆тѝ в землю венїами́ню.
и҆ раздѣли та́мо и҆мѣнїе пред̑ гражд̑а́ны.
ꙗ҆́коже бы́ти е҆мꙋ та́мо въ вра́техъ венїаминх̑ѣ.
и҆ бысть въ среди людїи т̂ꙋ чл҃къ, ѹ́ него же ѻ҆бита̀ і҆а҆рꙋїа сн҃ъ селемїин꙽ сн҃а а҆нанїина.
и҆ взѧ̀ і҆е҆ремїю гл҃ѧ, къ халдеемъ ты̀ бѣжи́ши.
и҆ рече і҆еремїа, лжа̀, н̂и, не къ хал̑҇дїемъ аз̑ бѣжꙋ, и҆ не послꙋша е҆го.
и҆ взѧ̀ и҆а҆рꙋїа і҆еремїю, и҆ приведе и҆̀ къ кн҃ѕем̑·

и҆ разгнѣвашасѧ кн҃ѕи на і҆еремїю и҆ би́ша и҆̀, и҆ посла́ша и҆̀ в꙽ домъ і҆ѻ҆наѳа́нь кни́гочїѧ, ꙗ҆́ко того сътвори́ша̑ над̑ хра́момъ темни́чнымъ.
и҆ прїиде і҆еремїѧ въ хра́мъ ровныи и҆ в꙽ херрет̑, и҆ сѣде т̂ꙋ дн҃и мно́ги·

И҆ посла седекїѧ и҆ призва и҆̀, и҆ въпраша и҆̀ цр҃ь ѻ҆таи, а҆ще е҆сть сло́во ѿ г҃а.
и҆ рече е҆мꙋ, е҆сть.
и҆ рече, в рꙋцѣ цр҃ѧ вавѵлонска предаси́сѧ.
и҆ рече і҆еремїѧ цр҃ю, чимъ преѻ҆бидихъ т̂ѧ и҆ ѻ́троки твоѧ и҆ люди сїѧ, ꙗ҆ко ты̀ вдае́ши м̂ѧ въ хра́мъ темни́чныи.
т̂о гдѣ сꙋть прро̑҇ци ва́ши прорица́вшеи вамъ и҆ гл҃ющеи, ꙗ҆́ко не прїидет̑т̑ цр҃ь вавѵлонъскъ на васъ и҆ на зе́млю сїю.
нн҃ѣ же послꙋшаи молю ти сѧ г҃и мои цр҃ю, да падетъ млс̑҇ть твоа пред̑ лицемъ мои҆мъ.
и҆ не посыла́и мѧ паки до до́мꙋ и҆ѻ҆наѳа́нѧ книгочїѧ да не ѹ҆мрꙋ та́мо.
и҆ повелѣ цр҃ь, и҆ въвергоша и҆̀ въ хра́мъ темни́чныи.
и҆ даѧ́хꙋ е҆мꙋ хлѣбъ е҆ді́нъ на дн҃ь и҆з꙽внꙋ, и҆же работаю́тъ, кромѣ варе́нїѧ.
дондеже сконча́шасѧ хлѣби и҆з꙽ гра́да, и҆ сѣде і҆еремїѧ въ дворѣ̀ темни́чнемъ·

Глв̑҇а, л҃и·

И слы́ша сафотеи сн҃ъ наѳан̑҇ и҆ годолїѧ сн҃ъ наа҆схо́ровъ, і и҆ѻ҆а҆ха́лъ сн҃ъ селмїинъ, и҆ фас꙽сꙋръ сн҃ъ мелхїевъ, словеса̀ ꙗ҆́же і҆еремїѧ гл҃а къ всѣмъ лю́дем̑ гл҃ѧ·

Та́ко реч̑҇ г҃ь, сѣдѧ́и въ градѣ семъ ѹмретъ мечем̑ и҆ гла́домъ и҆ моромъ.
и҆сходѧ́и же къ хал꙽дѣемъ, живи́тсѧ.
и҆ бꙋдет꙽ дш҃а е҆го на ѻ҆брѣте́нїе и҆ живи́тсѧ.
ꙗ҆ко та́ко рече г҃ь.
преда́нїемъ предастьсѧ гра́дъ се́и в рꙋцѣ си́лы цр҃ѧ халдеиска, и҆ во́зметъ и҆̀·

И҆ реко́ша цр҃ю, да ѹ́мретъ чл҃къ тои.
ꙗ҆́ко сеи раслаблѧ́етъ рꙋцѣ мꙋжїи борѧ́щихъ ѻ҆ста́вшихъ въ градѣ, и҆ рꙋцѣ всѣхъ людїи, гл҃ѧ к нимъ по словесемъ си́мъ.
ꙗ҆́ко чл҃къ сеи не проповѣдаетъ лю́демъ мира, н̂о ѕл̂о.
и҆ рече цр҃ь седекїѧ, сѐ тои в рꙋкꙋ ва́шею, ꙗ҆́ко не можа́ше цр҃ь проти́вꙋ и҆мъ.
и҆ взѧ́ша і҆еремїю, и҆ въвергоша и҆̀ въ ровъ мелхїинъ сн҃а а҆мале́хова, и҆же бѧше въ дворѣ̀ тем̑ничнемъ и҆ въвѣсиша и҆̀ ю́жи в ровъ, в ровѣ же не бѧ́ше воды̀ н̂о ти́на, и҆ бѧ́ше в꙽ ти́нѣ і҆еремїѧ·

И҆ слы́ша а҆в꙽демелех̑ мꙋринъ, и҆ то́иже бѣше въ дворѣ̀ цр҃еви, ꙗ҆ко въверго́ша і҆еремїю в ровъ.
цр҃ь же в꙽ тои ча́съ сѣдѧ́ше въ вра́техъ венїами́нѣхъ.
і҆ и҆зы́иде а҆в꙽демеле́хъ ѿ домꙋ цр҃ева, и҆ рече къ цр҃ю гл҃ѧ.
г҃и мои цр҃ю ѕл̂о сътвори, ꙗ҆́ко ѹ҆би́ти повелѣ чл҃ка сего ѿ лица̀ гладꙋ, ꙗ҆ко нѣсть хлѣба въ гра́дѣ к꙽семꙋ.
и҆ повелѣ цр҃ь а҆в꙽демелехꙋ гл҃ѧ, пои҆мѝ съ собо́ю ѿсю́дꙋ придесѧть мꙋжь, і҆ и҆з꙽влеци і҆еремїю и҆з рова да не ѹ́мретъ.
и҆ поѧ́ть а҆в꙽демеле́хъ мꙋжа, и҆ прїиде въ дом꙽ цр҃ев под̑зем꙽ныи.
и҆ взѧ̀ ѿтꙋдꙋ ветхи по́рты, и҆ ветха ѹ́жа, и҆ въверже ѧ҆̀ къ і҆еремїи в ровъ.
и҆ рече к немꙋ, положѝ сїѧ под̑ ѹ́жи.
и҆ сътвори і҆еремїѧ сице.
і҆ и҆звлеко́ша и҆̀ ѹ́жи, і҆ и҆зѧ́ша и҆̀ ѿ ро́ва.
и҆ сѣде і҆еремїѧ въ дворѣ темни́чнемъ·

И҆ посла̀ цр҃ь и҆ възва̀ к꙽ себѣ і҆еремїю в домъ а҆саласїиль, и҆же в꙽ домꙋ гн҃и.
и҆ рече е҆мꙋ цр҃ь, въпраша́ю тѧ словесе е҆дїного, и҆ не ѹ҆таѝ ѿ ммене словесѐ.
и҆ рече і҆еремїѧ цр҃ю, а҆ще повѣмъ т̂и, т̂о не смр҃тїю л̂и ѹ҆мори́ши мѧ.
и҆ а҆ще съвѣща́ю ти, т̂о не послꙋшаеши мене.
и҆ клѧ́сѧ е҆мꙋ цр҃ь гл҃ѧ, жи́въ г҃ь, и҆же сътворѝ намъ дш҃ꙋ сїю ꙗ҆́ко не ѹ҆бїю тѧ.
ни предамъ в рꙋцѣ чл҃къ сихъ стрегꙋщихъ т̂ѧ, на смр҃ть.
и҆ рече і҆ремїѧ тако рече г҃ь.
а҆ще и҆зыидыи и҆зы́идеши къ вое҆во́дамъ цр҃ѧ вавѷлон꙽ска, жива̀ бꙋдетъ дш҃а твоѧ.
и҆ гра́дъ сеи не пожже́тсѧ ѻ҆гнемъ, и҆ жи́въ бꙋдеши т̂ы, и҆ до́мъ тво́и.
а҆ще л̂и не и҆зы́идеши къ кнѧѕемъ цр҃ѧ вавѷлонъска, преда́стьсѧ гра́дъ сеи в рꙋцѣ халде́истѣ.
и҆ пожгꙋтъ и҆̀ ѻ҆гнемъ, и҆ ты̀ не ѹ҆цѣлѣ́еши·

И҆ рече цр҃ь і҆еремїи, а҆зъ слово и́мам̑ ѿ жидо́въ бѣжа́вшихъ въ хал꙽деѧ, не преда́ти м̂ѧ в рꙋцѣ и҆хъ, и҆ клѧли́ ми сѧ сꙋть.
и҆ рече і҆еремїѧ, не предадѧ́тъ тебе.
послꙋшаи ѹ҆бо словесе гн҃ѧ е҆же а҆зъ гл҃ю тебѣ, и҆ ѹ́не ти бꙋдетъ, и҆ жива̀ бꙋдетъ дш҃а твоѧ.
и҆ а́ще не хо́щеши т̂ы и҆зыитѝ.
сѐ слово е҆же сказа мн̂ѣ г҃ь и҆ се всѧ̀ же́ны ѻ҆ста́вленыѧ в꙽ домꙋ цр҃ѧ і҆ѹ́дина, и҆зведꙋтсѧ къ кнѧ́ѕемъ цр҃ѧ вавѷлон̑҇ска.
тїи же гл҃хꙋ, прельсти́ша т̂ѧ, и҆ премогоша т̂ѧ мꙋжи ми́рницы твоѝ.
и҆ възмогт̑ꙋ прел̑҇ще́нїемъ но́ѕѣ своѝ ѿврати́ти ѿ тебе.
и҆ же́ны твоѧ и҆ ча́да твоѧ и҆зведꙋтъ къ хал꙽дѣемъ, и҆ ты̀ не ѹ҆цѣлѣ́еши.
ꙗ҆́ко рꙋко́ю и҆мешисѧ цр҃ѧ вавѷлонъска, и҆ гра́дъ сеи пож꙽же́тсѧ·

И҆ реч̑҇ е҆мꙋ цр҃ь, чл҃къ да не ѹ҆вѣсть словесъ сих̑, да не ѹ́мреши т̂ы.
и҆ а҆ще слы́шат̑ кн҃ѕи ꙗ҆́ко гл҃ах̑ с тобо́ю.
и҆ прїидт̑ꙋ и҆ рекꙋтъ т̂и, чт̂о гл҃а к тебѣ цр҃ь, повѣжд̑ь нам̑ и҆ не ѹ҆таи ѿ на́съ и҆ не ѹ҆бїем̑ тебе.
и҆ что гл҃а к тебѣ цр҃ь да речеши им̑, помещꙋ а҆зъ ми́лованїе мое пред̑ лицемъ цр҃евомъ, ꙗ҆ко да не въз꙽вратитъ мене в꙽꙽ до́мъ і҆ѻ҆а҆наѳа́нь ѹ҆мрѣти та́мо·

И҆ прїидо́ша всѝ кнѧ́зи къ і҆еремїи, и҆ въпраша́ша и҆̀.
и҆ повѣда̀ и҆мъ по всѣм꙽ словесемъ си́мъ, ꙗ҆́же заповѣда е҆мꙋ цр҃ь.
и҆ ѹ҆мол꙽кнꙋша ꙗ҆́ко нс̑҇ѣ слы́шано сло́во гн҃е.
и҆ сѣде і҆еремїѧ въ дворѣ темни́чнем̑, дондеже в꙽зѧ́ша і҆ерс̑҇лим̑·

Глв̑҇а, л҃ѳ·

И бы́сть въ девѧ́тое лѣто седекїѧ цр҃ѧ і҆ѹ́дина, въ мс̑҇ць і҃. прїиде нав꙽ходоносо́ръ цр҃ь вавѷлон꙽скъ, и҆ всѧ̀ си́ла его на і҆ерс̑҇лимъ, и҆ вое҆вахꙋ на́нь.
и҆ въ пер꙽военадесѧте лѣто седекїѧ, въ мс̑҇ць четвер꙽тыи пѧтыи дн҃ь мс̑҇ца расы́пасѧ градъ.
и҆ в꙽нидо́ша всѝ кн҃ѕи цр҃ѧ вавѵлон̑҇ска, и҆ сидѣша въ вра́техъ среднихъ.
ни́ргелъ, сараса́ръ, самага́дъ, и҆ навꙋхаса́ръ, и҆ навꙋсари́съ, и҆ нагар̑҇га́съ, и҆ насеръ, равама́гъ, и҆ про́чаѧ вое҆во́ды цр҃ѧ вавѵлонъска·

И҆ е҆гда ѧ҆̀ ѹ҆зрѣ седекїѧ цр҃ь і҆ѹ́динъ, и҆ всѣ мꙋжи рат꙽нїи и҆збѣгоша.
і҆ и҆зыидо́ша в нощи ѿ града по пꙋтѝ загра́ды цр҃евы, и҆ скво́зѣ вра́та е҆же бѣ междꙋ двою стѣнъ, і и҆зыидо́ша в꙽ пꙋть пꙋсты́ни.
и҆ гна́ша ѧ҆̀ во́инъство хал꙽дѣиско, и҆ постиго́ша̑ седекїю на́ поли пꙋсты́ни е҆рихо́нъ, и҆ е҆м꙽ше приведо́ша к꙽ навходоносо́рови цр҃ю вавѵло́нъскꙋ до ревлата.
е҆же е҆сть в꙽ землѝ е҆ма́ѳъ, и҆ рече к немꙋ сꙋды.
и҆ поби́лъ цр҃ь вавѷлонъскїи сн҃ы седекїины в ревла́тѣ пред̑ ѻ҆чи́ма е҆го.
и҆ всѧ вельмо́жа і҆ѹ́дины побѝ цр҃ь вавѷлонъскїи.
ѻ́чи же седекїи изѧ́тъ, и҆ ѻ҆кова̀ е҆го пꙋты, и҆тѝ въ вавѷлонъ.
дом꙽ же цр҃евъ, и҆ домы̀ всѣхъ людїи пож꙽гоша халде́и ѻ҆гнем̑ и҆ стѣнꙋ і҆ерс̑҇лимъскꙋ преврати́ша·

и҆ ѻ҆ста́нокъ людїи ѻ҆ста́вшихъ въ градѣ, и҆ ѹ҆бѣг꙽шаѧ и҆же ѹ҆теко́ша к немꙋ, і҆ и҆збы́токъ людїи ѻ҆ста́вших꙽, пресели навꙋзарда́нъ вое҆во́да̑ во́инъ до вавѷлона, и҆ ѿ людїи ѹ҆богихъ ничто́же не и҆мꙋщихъ, не плѣнѝ навꙋзарда́нъ вое҆во́да во́инъ в꙽ землѝ і҆ѹ́динѣ.
и҆ даде и҆мъ виногра́ды и҆ рве́ники в то́и дн҃ь·

И҆ заповеда̀ нав꙽ходоносо́ръ цр҃ь вавѷлонъскїи ѻ҆ і҆еремїи про̑҇рцѣ, навꙋзарда́нови вое҆во́дѣ во́и, и҆ рече.
возмѝ е҆го и҆ положѝ нань ѻ́чи твоа, и҆ ничто́же е҆мꙋ не сътворѝ ѕл̂а, н̂о ꙗ҆́коже въсхо́щет̑ та́ко сътвори е҆мꙋ.
сего ра́ди посла̀ навꙋзарда́нъ вое҆во́да во́инъства, а҆на́вꙋ, и҆ сес꙽вана, и҆ рав꙽саке́са, и҆ нир̑҇ге́ла, и҆ насера, и҆ равама́га, и҆ про́чаѧ вое҆во́ды цр҃ѧ вавѷлонъска.
и҆ посла́ша, и҆ поѧша і҆еремїю ѿ двора̀ темни́чнаго.
и҆ да́ша и҆̀ къ годолїи сн҃ꙋ а҆хика́мовꙋ сн҃а сафа́нѧ, і и҆зведо́ша и҆̀ и҆ сѣде средѣ людїи·

И҆ къ і҆еремїи быс̑҇ слово гн҃е, въ дворѣ темни́чнемъ гл҃ѧ, и҆дѝ и҆ рцы къ а҆в꙽демеле́хꙋ мꙋринꙋ, гл҃ѧ.
та́ко рече г҃ь б҃ъ іи҆л҃евъ.
сѐ а҆зъ приношꙋ словеса̀ моа на градъ сеи, на ѕло̀ а҆ не на бл҃го.
и҆ бꙋдꙋ пред̑ лицемъ твои҆мъ в꙽ тои дн҃ь і и҆зба́влю т̂ѧ в꙽ тои дн҃ь.
и҆ не дамъ тебе в рꙋцѣ чл҃къ, их̑же т̂ы бои́шисѧ ѿ лица̀ и҆хъ.
ꙗ҆́ко и҆збавлѧ́ѧ сп҃сꙋ т̂ѧ, и҆ мечемъ не паде́ши.
и҆ бꙋдет̑ дш҃а твоѧ на ѻ҆брѣте́нїе, ꙗ҆́ко ѹ҆пова̀ къ мн̂ѣ, рече г҃ь·

Глв̑҇а, м҃·

Сло́во бывшее къ і҆еремїи ѿ г҃а послѣжде попꙋще́нїи навꙋзарда́нѣ а҆рхимахи́ра.
е҆гда в꙽зѧ̀ е҆го свѧзанаго пꙋты ѿ сре́ды всх̑ѣ шед̑ших̑ ѿ і҆ерс̑҇ли́ма и҆ ѿ і҆ѹ́ды, и҆ ведени бы́ша̑ до вавѷлона.
и҆ поѧ и҆̀ а҆рхимахиръ, и҆ рече е҆мꙋ.
г҃ь б҃ъ твои съгл҃алъ е҆сть ѕл̂о на се мѣсто, и҆ приведе.
и҆ сътвори г҃ь ꙗ҆́коже рече, занѐ съгрѣшисте е҆мꙋ, и҆ не послꙋшасте словес̑҇ е҆го, и҆ бысть вамъ гл҃ъ сеи·

Сего ради нн҃ѣ се разрѣши́хъ т̂ѧ днесь ѿ ѹ́зъ ꙗ҆же на рꙋкꙋ твое́ю.
а҆ще т̂и е҆сть добро прїити со мно́ю въ вавѵлон̑҇ пои҆дѝ, и҆ положꙋ ѻ́чи своѝ на тѧ.
а҆ще ли же н̂и, ѻ҆ста́ни здѣ.
и҆ сѐ всѧ землѧ̀ пред̑ лицемъ твои҆мъ е҆сть чт̂о и҆зволиши.
идѣже въсхо́щеши и҆тѝ, та́мо и҆дѝ, а҆ со мно́ю не и҆дѝ.
но пребыва́и ѹ҆ годолїѧ сн҃а а҆хика́мова сн҃а сафа́нѧ.
е҆гоже поста́ви цр҃ь вавѵлонъскъ в꙽ землѝ і҆ѹ́динѣ, и҆ живѝ с нимъ среди людїи.
всѣми бл҃готами пред̑ ѻ҆чи́ма твои́ма ꙗ҆́кож̑ ходи́ти, и҆ ходи·

И҆ дадѐ е҆мꙋ а҆рхимахи́ръ пи́щꙋ и҆ да́ры, и҆ пꙋсти и҆̀ и҆ прїиде і҆еремїѧ къ годолїи сн҃ꙋ и҆а҆хи́камовꙋ въ масифат̑, и҆ сѣде средѣ людїи ѻ҆ста́вшихъ на землѝ·

И҆ егда ѹ҆слы́шаша вое҆во́ды си́лы, ꙗ҆́же на селѣ тїи и҆ си́лы и҆хъ.
ꙗ҆́ко поста́вилъ е҆сть цр҃ь вавѵлон꙽скїи годолїю сн҃а а҆хи́камова властели́на над̑ землею, и҆ ꙗ҆́ко предадѐ е҆мꙋ мꙋжи и҆ же́ны и҆ дѣти, и҆ ѿ ѹ҆богихъ зем̑ли, и҆же не преве́дени быша до вавѷло́на.
прїидо́ша къ годолїи въ масифат̑, и҆смаи҆лъ сн҃ъ наѳанїинъ, и҆ѻ҆а҆на́нъ сн҃ъ карїевъ, и҆ сареа҆съ сн҃ъ ѳанее҆меѳовъ, и҆ сн҃ове ѻ́ѳи, и҆же бѣша с꙽ неѳофа́ѳы, и҆ ехонїѧ сн҃ъ мата́ѳы тїи и҆ мꙋжи и҆хъ.
и҆ клѧ́сѧ и҆мъ годолїѧ, и҆ дрꙋгомъ и҆хъ гл҃ѧ.
не ѹ҆бо́итесѧ ѿ лица ѻ́трокъ халде́искъ.
н̂о вселитесѧ на землѝ, и҆ слꙋжи́те цр҃ю вавѷлонъскꙋ, и҆ ѹ́не вамъ бꙋдетъ.
и҆ се а҆зъ сѣжꙋ въ масифа́ѳѣ ста́ти противꙋ лицꙋ халде́искꙋ и҆же а҆ще прїидꙋтъ на васъ.
вы́ же съберѣте вино̀ и҆ ѻ́вощь и҆ съберѣте ма́сло, и҆ вълїите въ сосꙋды своѧ.
и҆ всели́тесѧ въ гра́ды ꙗ҆́же ѹ҆дръжа́сте.
и҆ всѝ жи́дове и҆же в землѝ моа́вли, и҆ въ сн҃ѣхъ ам̑мо́нихъ, і҆ и҆же въ и҆дꙋме́и, і҆ иже въ всеи землѝ.
слы́шавше ꙗ҆́ко да́лъ е҆сть цр҃ь вавѷло́нъскъ ѻ҆ста́нокъ въ і҆ѹ́дѣ.
і҆ ꙗ҆́ко поста́вилъ е҆сть над̑ ни́ми годолїю сн҃а а҆хикамова сн҃а сафа́нова.
и҆ прїидоша всѝ жи́дове со всх̑ѣ мѣстъ до нихже бѣхꙋ ѹ҆бѣгли.
и҆ прїидо́ша̑ к꙽ годолїи в꙽ землю і҆ѹ́динꙋ в꙽ масифат̑ и҆ събра́ша вино̀ и҆ ѻ́вощь мно́го ѕѣло и҆ масло·

І҆ѻ҆а҆ннан꙽ же сн҃ъ карїевъ и҆ всѧ вое҆во́ды си́лы ꙗ҆́же на селѣхъ, прїидо́ша к꙽ годолїи в꙽ масифа́тъ, и҆ реко́ша е҆мꙋ.
вѣждь ꙗ҆ко вели́са цр҃ь сн҃овъ а҆м꙽мо́нь, посла к тебѣ исма́ила порази́ти дш҃ꙋ твою·

и҆ не вѣрова и҆мъ годолїѧ.
и҆ѻ҆а҆н꙽нан̑҇ же рече годолїи ѻ҆таи въ масифаѳѣ гл҃ѧ, да и҆дꙋ ѹ́бо и҆ побїю и҆сма́ила сн҃а наѳа́нѧ, никто́же да не ѹ҆вс̑҇ѣ.
е҆да ка́ко пораѕѧ́тъ дш҃ꙋ твою, и҆ расы́плетсѧ весь і҆ѹ́да събра́ныи к тебѣ, и҆ поги́бнетъ ѻ҆ста́нокъ і҆ѹ́дин꙽.
и҆ рече годолїѧ ко і҆ѻ҆а҆н꙽на́нꙋ не сътворѝ дѣтели тоѧ, ꙗ҆́ко лжꙋ̀ т̂ы гл҃еши ѻ҆ и҆сма́илѣ·

Глв̑҇а, м҃а·

И бы́сть въ седмыи мс̑҇ць, прїиде и҆сма́илъ сн҃ъ наѳанїи҆нъ, сн҃а е҆леа҆са́нѧ ѿ рода̑ цр҃ѧ, и҆ вельмо́жи цр҃евы, и҆ десѧть мꙋжь с нимъ къ годолїи въ масифа́ѳъ.
и҆ ꙗ҆́до́ша т̂ꙋ в꙽кꙋпѣ хлѣбъ.
и҆ въста̀ и҆сма́илъ, и҆ десѧть мꙋжь и҆же с нимъ, и҆ поби́ша годолїю, е҆гоже поста́ви цр҃ь вавѵлонъскъ над̑ земле́ю, и҆ всѧ̀ жидовы и҆же бѣша с ни́мъ в масифа́ѳѣ и҆ всѧ̀ хал꙽деа и҆же сѧ ѻ҆брѣто́ша т̂ꙋ, и҆ мꙋжїи вои҆н꙽ныхъ побилъ е҆сть и҆сма́илъ·

И бы́сть въ вторы́и дн҃ь по ѹ҆бїенїи годолїевѣ, и чл҃къ не ѹ҆вѣдѣ прїидоша мꙋжи ѿ сихем̑ма, и ѿ салим̑ма, и҆ ѿ самарїа п҃ мꙋжь, ѻ҆бръсе́нами глава́ми, и҆ растерза́нами ри́зами пла́чющесѧ, и требꙋ и҆ ѳимїамъ в рꙋкꙋ ихъ, ꙗ҆́коже в꙽нестѝ въ до́мъ гн҃ь·

І҆ и҆зы́иде проти́вꙋ им̑ и҆сма́илъ, тїи же и҆дѧ́хꙋ и҆ пла́кахꙋсѧ.
и҆ егда срѣте́сѧ с ни́ми рече к нимъ вни́дите к꙽ годолїю.
и҆ быс̑҇ въшед̑шимъ и҆мъ среди гра́да, и҆з꙽сѣче ѧ҆̀ и҆сма́илъ ѹ҆ кла́дѧзѧ тои и҆ мꙋжи и҆же бѣша с нимъ·

І ѻ҆брѣтесѧ десѧть мꙋжїи тꙋ̀, и҆ рѣша и҆сма́илꙋ, не ѹ҆бїи насъ, ꙗ҆́ко сꙋть намъ и҆мѣнїѧ на ни́вахъ, пшени́ца̑ и҆ ꙗ҆чмене и҆ медо́ве и҆ масла.
и минꙋ и҆̀ не ѹ҆би и҆хъ средѣ бра́тїѧ и҆хъ.
и҆ кладѧзь же во́ньже въве́рже исма́илъ всѧ̀ ꙗ҆́же и҆збѝ, с̂е кла́дѧзь вели́къ ес̑҇ и҆же сътвори цр҃ь а́с꙽са ѿ лица̀ ваа́са цр҃ѧ і҆и҆л҃ева, се́и наполни и҆сма́илъ ꙗ҆ѕвеныхъ.
и҆ ѻ҆братѝ и҆сма́илъ вс̂ѧ лю́ди ѻ҆ста́вшаѧ въ масифа́ѳѣ, и҆ дщеры цр҃евы и҆ всѧ̀ лю́ди ѻ҆ста́вшаа въ масифа́ѳѣ, ꙗ҆́же б̂ѣ порꙋчи́лъ а҆рхимахи́ръ годолїи сн҃ꙋ а҆хикамовꙋ.
и҆ поѧ и҆сма́илъ сн҃а наѳанѧ и҆ ѿи́де на ѻ҆нꙋ странꙋ сн҃овъ а҆м꙽мо́нь<.>

И҆ слы́ша с̂е и҆ѻ҆а҆н꙽на́нъ сн҃ъ карїев꙽, и всѧ вое҆во́ды си́лы ꙗ҆́же с ни́мъ, всѐ ѕл̂о е҆же сътвори и҆сма́илъ·

и҆ приведоша всѧ во́ѧ своѧ, і҆ и҆дѧ́хꙋ вое҆ва́ти нань.
и҆ ѻ҆брѣтоша и҆̀ на водѣ̀ мно́ѕѣ в꙽ гаваѻ́нѣ.
и҆ бысть е҆гда ви́дѣша всѝ лю́дїе, и҆же со и҆сма́илем̑, і҆ѻ҆а҆нна́на сн҃а карїева, и҆ всѧ̀ вое҆во́ды си́лы и҆же бы́ша с ним꙽, ра́довахꙋсѧ.
и҆ ѻ҆брати́шас̑҇ всѝ лю́дїе, и҆хже пои҆ма̀ и҆сма́илъ в꙽ масифа́ѳи.
и възврати́вшесѧ ѿи́де къ и҆ѻ҆а҆нна́нꙋ·

и҆сма́и҆л꙽ же ѹ҆цѣлѣ со ѻ҆смїю мꙋжъ ѿ лица̑ і҆ѻ҆а҆ннанꙋ, і҆ и҆де къ сн҃омъ а҆м꙽мо́нем̑·

И҆ поѧ і҆ѻ҆а҆ннан̑҇ вое҆воды, и҆ си́лы ꙗ҆́же с ни́м꙽, и҆ всѧ̀ ѻ҆ставшаѧ лю́ди, их̑же па́ки приведоша ѿ и҆сма́ила сн҃а наѳа́нѧ съ масифа́ѳа.
е҆гда же ѹ҆би годолїѧ сн҃а а҆хика́мова, мꙋжа сил̑҇ны на ра́ти, и҆ же́ны и҆ ѻ҆стан꙽ки и҆ каженики, ꙗ҆́же ѻ҆брати ѿ гаваѻ́на.
і҆ идоша и сѣдоша на земли вароха́вѣ хамаам̑лѧ, ꙗ҆́же къ виѳлеѻ́мꙋ.
ꙗ҆́кож̑ ити и҆ в꙽нити въ е҆гѷпет꙽, ѿ лица̀ хал̑҇дѣиска.
ꙗ҆́ко ѹ҆боѧ́шасѧ ѿ лица̀ и҆х꙽, ꙗ҆́ко ѹ҆би и҆смаи́лъ годолїю, е҆гоже поста́ви цр҃ь вавѷло́нъскь на землѝ і҆ѹ́динѣ·

Глв̑҇а, м҃в·

И прїидо́ша всѧ̀ вое҆во́ды си́лы, и҆ѻ҆а҆н꙽на́нъ, і҆ и҆е҆зонїа сн҃ъ масее҆въ, и҆ вс̂и лю́дїе ма́лъ и҆ вели́къ, къ і҆е҆ремїи прро̑҇кꙋ, и҆ реко́ша е҆мꙋ.
да паде́тъ мл҃тва на́ша пред̑ лицемъ твои҆мъ, и҆ моли́сѧ ѻ҆ насъ къ гв҃и б҃ꙋ твое҆мꙋ ѻ҆ ѻ҆ста́вших̑ сихъ, ꙗ҆́ко ѻ҆ста̀ ма́ло насъ ѿ многъ, ꙗ҆́коже и҆ ѻ́чи твои ви́дѧтъ.
и҆ да възвѣститъ нам̑ г҃ь б҃ъ твои пꙋть, по немꙋже по́идемъ, и҆ сло́во е҆же сътворимъ·

И҆ рече и҆мъ і҆е҆ремїа прро̑҇къ, слы́шахъ.
с̂е а҆зъ молю́сѧ гв҃и б҃ꙋ нашемꙋ, и҆ по словесе́мъ вашимъ бꙋ́детъ.
сло́во е҆же ѿвѣща́етъ г҃ь, повѣмъ вамъ, и҆ не потаю̀ ѿ вас̑҇ словесѐ·

Тїи же реко́ша і҆е҆ремїи.
бꙋ́ди г҃ь в нас̑҇ по́слꙋхъ правди́въ и҆ вѣренъ, ꙗ҆́ко по всемꙋ сло́вꙋ е҆же а҆ще по́слетъ г҃ь к на́мъ, та́ко сътво́рим̑, любо добро̀ любо ѕл̂о, гла́са г҃а на́шего к немꙋже м̂ы посыла́емъ т̂ѧ, послꙋшаемъ.
да ѹ҆́не намъ бꙋ́детъ ꙗ҆́ко послꙋшаем̑ гла́са г҃а б҃а нашего·

И҆ е҆гда̀ сконча́сѧ і҃ дн҃їи.
бысть сло́во гн҃е къ і҆е҆ремїи.
и҆ призва̀ и҆ѻ҆а҆ннана, и҆ вое҆во́ды си́лы, и҆же с ни́мъ бы́ша, и҆ всѧ лю́ди ѿ ма́ла и҆ до вели́ка, и҆ реч̑҇ и҆мъ.
та́ко рече г҃ь, к немꙋже посыла́сте м̂ѧ да прострꙋ мл҃твы ваша пред̑ нимъ.
а҆ще сѣдѧ́ще сѣди́те на земли се́и, т̂о въз꙽гражд̑ꙋ вас̑҇, а҆ не разорю.
и҆ насажд̑ꙋ вас̑҇, а҆ не посѣкꙋ.
ꙗ҆́ко почи́хъ ѻ҆ злобахъ ꙗ҆́же сътворих̑ вамъ.
не бо́итесѧ ѿ лица̀ цр҃ѧ вавѷлон꙽ска, е҆го́же в̂ы бои҆тесѧ ѿ лица̀ е҆мꙋ.
не бо́итесѧ рече г҃ь, ꙗ҆́ко а҆зъ с ва́ми е҆смь, ꙗ҆коже и҆збавлѧ́ти вас̑҇, и҆ спс̑҇ти вас̑҇ ѿ рꙋкѝ е҆го.
и҆ да́мъ вамъ млс̑҇ть, и҆ поми́лꙋю вас̑҇, и҆ ѻ҆бращꙋ вас̑҇ на землѧ̀ ва́ша.
и҆ а́ще гл҃ете в̂ы не сѧ́демъ на землѝ сеи, ꙗ҆́коже слы́шати глас̑҇ г҃а б҃а на́шег̑҇, гл҃юще, никогда̀.
н̂о въ зе́млю е҆гѷпет꙽скꙋ да вни́дем꙽, и҆ не ѹ҆зримъ ра́ти, и҆ гла́сꙋ трꙋбнаго не ѹ҆слы́шимъ, и҆ ѻ҆ хлѣбехъ не въз꙽а҆лчемъ, и҆ та́мо вселим̑сѧ·

Того ради слы́шите сло́во гн҃е ѻ҆ста́вшїи і҆ѹ́дини·

Та́ко рече г҃ь вседержи́тель б҃ъ і҆и҆л҃евъ.
а҆ще вы дасте лицѐ ваше вни́ти въ е҆гѵпет̑, и҆ вни́дете та́мо жи́ти.
и҆ бꙋ́детъ ме́чъ е҆го́же в̂ы бои҆те́сѧ ѿ лица̀ е҆го ѻ҆брѧщетъ в̂ы въ е҆гѷп꙽тѣ.
и҆ глд̑а ѻ҆ не́мже в̂ы сло́во и҆́мате ѿ лица̀ е҆мꙋ, пости́гнетъ в̂ы въ слѣ́дъ вас̑҇ въ е҆гѷптѣ, і҆ и҆зъмре́те в̂ы та́мо.
и҆ бꙋ́дꙋт꙽ вс̂и мꙋжи, и҆ вс̂и и҆ноплеме́н꙽ницы положи́вшеи лицѐ свое на́ зем̑лю е҆гѷпет꙽скꙋ жи́ти та́мо, ѻ҆скꙋдѣют̑ гла́домъ и҆ мече́мъ.
и҆ бꙋ́детъ ѿ них̑ ни е҆ді́нъ сп҃саемъ ѿ зло́бы, ꙗ҆́же а҆з꙽ наведꙋ на́ нѧ·

Ꙗ҆́ко та́ко рече г҃ь.
ꙗ҆́коже въскапа̀ ꙗ҆́рость моѧ на живꙋщаѧ въ і҆ерс̑҇лимѣ.
та́коже въска́плет̑ и҆ на вас̑҇ ꙗ҆́рость моѧ, въз꙽шед̑шимъ вамъ въ е҆гѷпетъ.
и҆ бꙋ́дете в꙽ непроходи́маѧ, и҆ повин꙽ни въ клѧт̑вꙋ, и҆ въ ѹ҆кори́знꙋ, и҆ не ѹ҆́зрите к꙽семꙋ мѣ́ста сего·

Сло́во гн҃е на вас̑҇ ѻ҆ста́вшаѧ і҆ѹ́ды, не входи́те въ е҆гѷпет̑.
и҆ нн҃ѣ видѧще ви́дите, ꙗ҆́ко слꙋкова́сте въ дш҃ахъ ваших̑.
посла́вше къ мнѣ и҆ гл҃юще, моли́сѧ за на́съ гв҃и, и҆ по всемꙋ е҆ли́ко съгл҃етъ тебѣ г҃ь сътво́римъ·

и҆ възвѣсти́хъ вам̑ дне́сь, и҆ не послꙋшасте гла́са гн҃ѧ къ все́мъ е҆го́же посла̀ къ ва́мъ.
и҆ нн҃ѣ мече́мъ и҆ гла́домъ и҆ мо́ромъ ѻ҆скꙋдѣ́ете на мѣ́стѣ, на не́же мы́слите и҆тѝ жи́ти та́мо·

Глв̑҇а, м҃г·

И бы́сть ꙗ҆́ко преста̀ і҆е҆ремїа гл҃ѧ к лю́демъ всѧ словеса̀ гн҃ѧ, ꙗ҆́же посла̀ г҃ь к ни́м꙽·

И҆ рече а҆зарїѧ сн҃ъ и҆ѻ҆се́ев꙽, і҆ѻ҆а҆н꙽на́нъ сн҃ъ карїевъ, и҆ вс̂и мꙋжи презори́вїи, къ і҆еремїи гл҃юще, л꙽жеши.
не посла̀ т̂ѧ к на́мъ г҃ь рещи, не въходи́те въ е҆гѷпетъ жи́ти тамо.
но варꙋхъ сн҃ъ нирїин꙽ сважа́етъ т̂ѧ с на́ми, да нас̑҇ в꙽даси в рꙋцѣ халде́истѣ ѹ҆мори́ти нас̑҇, и҆ превести нас̑҇ повелѣ въ вавѷло́нъ.
и҆ не послꙋша ѻ҆а҆н꙽на́нъ, и҆ всѧ вое҆во́ды си́лы, и҆ вс̂и лю́дїе не послꙋшаша гла́са гн҃ѧ жи́ти на землѝ і҆ѹ́динѣ.
и҆ поѧ̀ і҆ѻ҆а҆н꙽на́нъ, и҆ всѧ вое҆во́ды си́лы всѧ̀ ѻ҆ста́вшаа і҆ѹ́дины ѻ҆браще́ныа жи́ти на землѝ і҆ѹ́динѣ.
мꙋж́а си́лныѧ и҆ же́ны и҆ младе́нца, и҆ дще́ри цр҃ѧ, и҆ дш҃а ꙗ҆́же ѻ҆ста́ви навꙋзар꙽да́нъ воево́да си́лы, съ годо́лїем̑ сн҃ом̑ а҆хика́мовымъ сн҃а сафа́нова, і҆е҆ремїю прро̑҇ка, и҆ варꙋха сн҃а нирїи҆на, и҆ внидо́ша въ е҆гѵпетъ, ꙗ҆́ко не послꙋшаша гла́са гн҃ѧ, и҆ в꙽꙽нидо́ша в꙽ тафна́съ·

И҆ бы́сть сло́во гн҃е къ і҆е҆ремїи в꙽ тафна́сѣ гл҃ѧ.
възмѝ себѣ ка́менїе вели́ко, и҆ съкры́и е҆̀ пред̑ вра́ты до́мꙋ фараѻ́нѧ в꙽ тафнасѣ, пред̑ ѻ҆чи́ма мꙋж́ъ і҆ѹ́динъ.
и҆ рече́ши к ни́мъ·

Та́ко гл҃етъ г҃ь, с̂е а҆зъ послю̀, и҆ приведꙋ навходоносо́ра цр҃ѧ вавѷло́нска раба̀ мое҆го.
и҆ поста́вит̑ сто́лъ на ка́мени семъ, е҆же съкрыл̑҇ е҆си, и҆ въз꙽дви́гнетъ ѻ҆рꙋж́їе свое на́ нѧ.
и҆ вни́детъ и҆ поразит̑ в꙽ зе́млю е҆гѷпетъскꙋ.
ꙗ҆́же на смр҃ть т̂о на смр҃ть, и҆ ꙗ҆́же на и҆с꙽селе́нїе т̂о на и҆с꙽селе́нїе, а҆ ꙗ҆́же под̑ ме́чъ т̂о под̑ ме́чъ.
и҆ пож꙽же́тъ ѻ҆гне́мъ до́мы бого́въ и҆хъ, и҆ пожже́тъ ѧ҆̀ і҆ и҆с꙽селит̑ ѧ҆̀.
и҆ покры́етсѧ землѧ̀ е҆гѵпет̑ска, ꙗ҆́коже покрыва́етсѧ пастꙋхъ ри́зою своею.
і҆ и҆зы́иде ѿтꙋ́дꙋ с ми́ромъ.
и҆ съкрꙋши́тъ столпы слн҃чна гра́да и҆же въ е҆н꙽но́нѣ, и҆ до́мы и҆хъ пож꙽жет̑ ѻ҆гне́мъ·

Глв̑҇а м҃д·

Сло́во быв̑҇шее къ і҆е҆ремїи ѿ г҃а, и҆ къ всѣмъ жи́довомъ сꙋщим̑ въ землѝ е҆гѷпетъстѣ, и҆ сѣдѧ́щимъ въ магда́лѣ, и҆ в꙽ тафна́сѣ, и҆ в꙽ мем̑фи́сѣ
и҆ в꙽ землѝ паѳꙋстѣ, гл҃ѧ·

Та́ко гл҃ет̑ г҃ь б҃ъ і҆и҆л҃евъ, в̂ы ви́дѣсте вс̂е ѕло̀ е҆же наведох̑ на і҆ерс̑҇лимъ, и҆ на гра́ды і҆ѹ́дины.
и҆ с̂е пꙋсти сꙋть ѿ живꙋщихъ ѿ лица̀ зло́бы их̑ ю҆́же сътвори́ша.
раз꙽гнѣ́ваша м̂ѧ ходѧ́ще кади́ти бого́мъ чюжд̑имъ и҆хже не ви́дѣсте·

и҆ посла́хъ к꙽ ва́мъ ѻ҆́троки своѧ прро̑҇ки в но́щи заѹ҆́тра, и҆ послах̑ ѧ҆̀ гл҃ѧ.
не сътвори́те дѣтели ѻ҆скверне́нїа сего, е҆гоже възненавидх̑ѣ.
и҆ не послꙋшаша мене, ни приклони́ша ѹ҆́ха свое҆го ѻ҆брати́тисѧ ѿ зло́бъ свои҆хъ, ꙗ҆́коже не кади́ти бого́мъ и҆́нѣмъ.
и҆ въскапа̀ ꙗ҆́рость моѧ̀, и҆ гнѣ́въ мои раз꙽горѣ́сѧ въ вра́тх̑ѣ і҆ѹ́динѣхъ, и҆ вн̂ѣѹ҆́дѣ і҆ерс̑҇лима.
и҆ бы́ша въ ѻ҆пꙋстѣ́нїе, и҆ в꙽ непроходи́мꙋю до сего дн҃е·

И҆ нн҃ѣ си́це рече г҃ь вседержи́тель, въскꙋ́ю в̂ы твори́те ѕл̂о на дш҃а своѧ, і҆ и҆сс꙽ѣщи вас̑҇ мꙋж́а и҆ же́ны, и҆ младе́нець с꙽сꙋщь ѿ среды і҆ѹ́дины.
ꙗ҆́коже не ѻ҆ста́ти вас̑҇ ни е҆ді́номꙋже, раз꙽гнѣ́вати м̂ѧ в꙽ дѣ́лѣхъ рꙋ́кꙋ ва́шею, и҆ кади́ти бого́мъ и҆́нѣмъ в꙽ землѝ е҆гѷпет̑стѣ в ню́же прїидо́сте жи́ти та́мо.
да и҆сс꙽ѣче́ни бꙋдете, и҆ в꙽ проклѧ́тїе да бꙋ́дете, и҆ на ѹ҆кори́знꙋ въ всѣхъ стра́нахъ земѧ̀.
е҆да̀ забы́сте зло́бъ ѿц҃ь вашихъ, и҆ зло́бъ цр҃еи і҆ѹ́дин꙽, и зло́бъ же́нъ и҆хъ.
и҆ злоб꙽ вашихъ, и҆ зло́бъ же́нъ ваших̑.
ꙗ҆́же сътвори́ша в꙽ землѝ і҆ѹ́динѣ, и҆ вн̂ѣѹ҆́дѣ і҆ерс̑҇лима.
и҆ не ѻ҆ста́стесѧ до сего дн҃е.
и҆ не держа́сте повеле́нїи мои҆хъ, ꙗ҆́же да́хъ пред̑ ѻ҆чи́ма ѿц҃ь вашихъ·

Того ради та́ко гл҃тъ г҃ь, с̂е а҆зъ приста́влю лице свое ва́мъ къ зло́мꙋ, и҆ погꙋблю всѧ лю́ди і҆ѹ́дины.
и҆ прїимꙋ ѻ҆ста́нокъ і҆ѹ́динъ ѻ҆ни́ же поста́виша лица̀ своѧ, е҆же вни́ти в꙽ зе́млю е҆гѷпет̑скꙋ, и҆ жи́ти та́мо.
и҆ загла́дѧтсѧ вс̂ѣ в꙽ землѝ е҆гѷпет꙽стѣ, и҆ падꙋтъ мече́мъ, и҆ гла́домъ ѻ҆скꙋдѣ́ютъ, ѿ ма́ла же и҆ до вели́ка.
и҆ бꙋ́дꙋтъ на ѹ҆кори́знꙋ и҆ в па́гꙋбꙋ, и҆ въ проклѧ́тїе.
и҆ посѣщꙋ сѣдѧ́щихъ в꙽ землѝ е҆гѷпет̑стѣ, ꙗ҆́коже посѣти́хъ на і҆ерс̑҇лим꙽, мечем̑, и҆ гла́домъ, и҆ смр҃тїю.
и҆ не бꙋ́детъ ѹ҆цѣлѣ́вша ни е҆ді́наго же ѿ ѻ҆став꙽шихъ і҆ѹ́диных̑, ѻ҆бита́вшихъ въ землѝ е҆гѵпет꙽стѣ, ꙗ҆́коже възврати́тисѧ на́ землю і҆ѹ́динꙋ.
е҆и́же тїи сѧ надѣ́ютъ дш҃ами свои҆ми, ꙗ҆́коже въз꙽врати́тисѧ та́мо.
не воз̑вратѧ́тсѧ та́мо, ни ѹ҆цѣлѣют̑.

И҆ ѿвѣща́ша і҆е҆ремїи вс̂ѣ мꙋжи разꙋмѣвшеи, ꙗ҆́ко кадѧ́тъ же́ны и҆хъ бого́мъ и҆́нымъ.
и҆ всѧ̀ же́ны съборъ вели́къ, и҆ всѣ лю́дїе сѣдѧ́щеи въ землѝ е҆гѵпет꙽стѣ, въ землѝ паѳор꙽стѣ, гл҃юще.
сло́во е҆же гл҃а к намъ въ и҆мѧ гн҃е, не послꙋшаемъ тебѐ.
ꙗ҆́ко творѧ́ще сътво́римъ вс̂е сло́во е҆же и҆зы́идетъ и҆з꙽ ѹ҆́стъ на́ших̑.
кади́ти цр҃цы нбс̑҇неи, и҆ воз̑лива́ти е́и възлива́нїѧ, ꙗ҆́коже сътвори́хомъ м̂ы и҆ ѿц҃ы наши, цр҃и наши и҆ кн҃ѕи наши, въ гра́дѣхъ і҆ѹ́диныхъ, и҆ внѣѹ́дѣ і҆ерлс̑҇има.
и҆ насыти́хомсѧ хлѣ́бъ, и҆ бл҃го намъ бы́сть, и҆ ѕл̂а не ви́дѣхомъ·

И҆ ꙗ҆ко преста́хомъ кади́ти цр҃цы нбс̑҇нѣи, и҆ възлива́ти възлїѧ́нїѧ.
ѻ҆скꙋдѣ́хомъ хлѣ́бы вс̂и м̂ы, и҆ мече́мъ и҆ гладомъ скон꙽ча́хомсѧ.
и҆ а́ще кадимъ м̂ы цр҃цы нбс̑҇нѣи, и҆ възлїѧ́хомъ е́и възлїѧ́нїа.
е҆гда̀ без мꙋж́ъ нашихъ сътвори́хомъ е́и ѻ҆прѣ́сноки, и҆ възлїѧ́хом̑ е́и възлїѧ́нїѧ·

И҆ рече і҆е҆ремїѧ всѣм꙽ лю́демъ си́лнымъ, и҆ всѣмъ женам̑, и҆ всѣмъ лю́демъ ѿвѣща́вшимъ словеса̀, гл҃ѧ.
не каже́нїе л̂и ѹ҆бо, е҆же кади́те въ гра́дѣхъ і҆ѹ́динѣхъ, и҆ внѣѹ҆́дѣ і҆ерс̑҇ллима, в̂ы и҆ ѿц҃ы ваши, цр҃и ваши и҆ кн҃ѕи ваши, и҆ лю́дїе землѧ̀.
помѧнꙋ г҃ь и҆ възы́иде на срд̑це е҆го.
и҆ не можа́ше г҃ь терпѣти ктомꙋ ѿ лица̀ зло́бы дѣѧ́нїи вашихъ, и҆ ѿ съгнꙋше́нїи ꙗ҆́же сътвори́сте.
и҆ бы́сть землѧ̀ ваша въ ѻ҆пꙋстѣнїе, и҆ в непрохожд̑енїе, и҆ въ клѧ́твꙋ, ꙗ҆́ко да не бꙋ́детъ живꙋща ꙗ҆́коже е҆сть дн҃ь се́и.
ѿ лица̀ и҆мже кажа́сте и҆́доломъ, і҆ и҆ми́же сѣгрѣши́сте гв҃и.
и҆ не послꙋшасте гла́са гн҃ѧ, и҆ въ повеле́нихъ е҆го и҆ в꙽ зако́нѣ, и҆ въ свѣде́нихъ е҆го не ходи́сте.
и҆ пости́гнꙋша вы зло́бы т̂ы ꙗ҆́коже е҆сть се́и дн҃ь.

И҆ рече і҆е҆ремїѧ лю́демъ, и҆ жена́мъ.
слы́шите сло́во гн҃е ве́сь і҆ѹ́да, и҆же ес̑҇ в꙽꙽ землѝ е҆гѷпет꙽стѣ.
та́ко рече г҃ь вседержи́тель б҃ъ і҆и҆л҃ев꙽, гл҃ѧ.
в̂ы и҆ же́ны ваши ѹ҆сты̀ вашими съгл҃асте, и҆ рꙋка́ми вашими сконча́сте гл҃юще.
сътво́римъ и҆сповѣда́нїѧ наша, ꙗ҆́же ѻ҆бѣща́хомъ кади́ти цр҃цы нбс̑҇нѣи, и҆ възлива́ти възлиа́нїѧ е́и.
и҆ пребыва́юще пребы́сте въ ѻ҆бѣтехъ ва́ших̑, и҆ творѧ́ще сътвори́сте·

Того ради слы́шите сло́во гн҃е ве́сь і҆ѹ́да, сѣдѧ́ще въ зем̑лѝ е҆гѷпет꙽стѣ·

Се̂ клѧ́хсѧ и҆менем꙽ мои҆мъ вели́ким̑, рече г҃ь.
а҆ще бꙋдет̑ и҆мѧ мое въ ѹ҆стѣхъ всемꙋ і҆ѹ́дѣ рещи, жи́въ г҃ь б҃ъ, въ все́и землѝ е҆гѷпет꙽стѣ.
ꙗ҆́ко с̂е а҆зъ ѹ҆бꙋдих̑сѧ на́ нѧ съзли́ти им̑, а҆ не съблажи́ти.
и҆ сконча́етсѧ ве́сь і҆ѹ́да, и҆ живꙋщеи в꙽ землѝ е҆гѷпет̑стѣ, мечем̑, и҆ гла́дом̑.
до́ндеже и҆ сконча́ютсѧ.
и҆ ѹ҆цѣлѣвшеи въз꙽вратѧ́тсѧ на́ землю і҆ѹ́динꙋ, ма́ломъ число́мъ.
и҆ ѹ҆вѣдѧт̑ ѻ҆ста́вшеи і҆ѹ́дины, и҆ ѻ҆бита́вшїи в꙽ землѝ е҆гѷпет̑стѣ, ѻ҆бита́ти т̂ꙋ.
сло́во чїе пребꙋ́детъ мое, и҆ли и҆хъ.
се же вамъ зна́менїе, гл҃етъ г҃ь.
ꙗ҆́ко посѣщꙋ а҆зъ на вы̀ въ гра́дѣ сем̑, да ѹ҆вѣ́дите ꙗ҆́ко въи҆́стиннꙋ и҆спо́лнисѧ гл҃ъ мои на вас̑҇ къ зло́мꙋ·

Та́ко рече г҃ь, с̂е а҆зъ предаю фараѻ́на ѹ҆а҆фри́са цр҃ѧ е҆гѷпет꙽ска в рꙋцѣ врагꙋ е҆го, и҆ в рꙋцѣ и҆́щꙋщихъ дш҃а е҆го.
ꙗ҆́коже да́хъ и҆ седекїю цр҃ѧ і҆ѹ́дина, в рꙋцѣ навходоносо́ра цр҃ѧ вавѵлон꙽ска вра́га е҆мꙋ сꙋща, и҆́щꙋща дш҃а е҆го·

Глава, м҃е·

Сло́во е҆же гл҃а і҆е҆ремїа прро̑҇къ къ варꙋ́хꙋ сн҃ꙋ нирїе҆вꙋ, е҆гда̀ в꙽писа̀ словеса с̂и въ кни́ги, ѿ ѹ҆́стъ і҆е҆ремїи҆нъ.
въ четве́ртое лѣто і҆ѻ҆а҆ки́мово сн҃а и҆ѻ҆сїина цр҃ѧ і҆ѹ́дина гл҃ѧ·

Та́ко гл҃етъ г҃ь вседержи́тел̑҇ ѻ҆ тебѣ варꙋше.
ꙗ҆́ко ре́клъ е҆си, ѽ лю́тѣ мн̂ѣ ѽ лю́тѣ мн̂ѣ, ꙗ҆́ко приложи г҃ь трꙋ́дъ на трд̑ꙋ мои.
ѹ҆спох̑ съ стена́нїемъ, поко́ѧ не ѻ҆брѣтох̑·

Та́ко р꙽цы е҆мꙋ, си́це гл҃етъ г҃ь.
с̂е азъ ꙗ҆же аз̑ съгради́хъ, а҆зъ разорю·

и҆ ꙗ҆́же а҆зъ насади́хъ, а҆зъ посѣкꙋ.
ты же себѣ просиши вели́ка, не проси.
ꙗ҆́ко с̂е а҆зъ наведꙋ на всѧ́кꙋ плоть гл҃етъ г҃ь.
и҆ дамъ дш҃ꙋ твою на сп҃се́нїе въ все́мъ мѣ́стѣ, а҆́може а҆ще и҆деши та́мо·

Глв̑҇а, м҃ѕ·

Сло́во е҆же бы́сть къ і҆еремїи прро̑҇кꙋ
ѿ г҃а проти́вꙋ наро́дом̑ къ е҆гѷптꙋ, проти́вꙋ си́лы фараѻ́на нехаѻ҆̀ цр҃ѧ е҆гѷпет̑ска, и҆же бы́сть над̑ рѣко́ю е҆ѵфра́тъ в꙽ картами́съ.
е҆гоже поби навходоносо́ръ цр҃ь вавѷло́нскїи в лѣте четве́ртемъ и҆ѻ҆а҆ки́ма сн҃а і҆ѻ҆сїина цр҃ѧ і҆ѹ́дина.
ѹ҆готовите ѻ҆рꙋ́жїе и҆ щи́тъ, і҆ и҆дѣте на бра́нь.
въпрѧжи́те конѧ, и҆ посади́те всад̑ники.
сто́ите въ шле́мехъ, ѹ҆ста́вите копїѧ, и҆ ѻ҆блечѣтесѧ въ бро́нѧ.
и҆ что̀ ѹ҆бо ви́дѣхъ страшли́вы и҆ хреп꙽ты ѻ҆браща́ющасѧ, крѣп́кїѧ и҆хъ и҆зби́ты.
побѣго́ша ско́ро, не зрѧ́ще въспѧ́ть.
ѿвсю́дꙋ стра́хъ гл҃етъ г҃ь.
не ѹ҆тече́тъ ско́рыи, ниже възмо́жетъ и҆зба́витисѧ крѣ́пкїи.
на по́лъ нощъ близ̑ рѣкѝ е҆ѷфра́тъ побѣжд̑ени сꙋть и҆ падо́ша·

Кт̂о е҆сть то́и и҆же ꙗ҆́ко рѣка̀ въсходитъ, и҆ ꙗ҆́ко пото́цы възд̑ви́жꙋтсѧ во́лны е҆го.
е҆гѷпетъ по подо́бїю рѣкѝ въсхо́дитъ, и҆ ꙗ҆́ко рѣка̀ въсколѣ́блютсѧ во́лны е҆го.
и҆ рече в꙽зы́иди и҆ покры́и зе́млю, погꙋби град̑ и҆ живꙋщаѧ е҆го.
въз꙽сѧ́дите на конѧ, и҆ всели́тесѧ на колесни́цахъ.
и҆ бѣжи́те напред̑ си́лнїи ѿ землѧ̀ мꙋрь, и҆ шле́мы держа́ще щи́ты халдѣ́иски взе́млюще и҆ стрѣлѧ́юще стрѣ́лы.
н̂о дн҃ь се́и г҃а б҃а вседръжи́телѧ, дн҃ь мще́нїѧ, да възметъ побѣ́дꙋ над̑ врагѝ свои҆ми.
пожре́тъ ѧ҆̀ мечь и҆ насыти́тсѧ, и҆ ѹ҆пїетсѧ кро́вїю и҆хъ.
ꙗ҆́ко поби́тїе г҃а вседержи́телѧ въ земли полꙋнощнеи, бли́зъ рѣки е҆ѷфра́тъ·

Вни́ди въ галаа́дъ, и҆ възми те́кли дв҃о дщи е҆гѵфпет꙽ска.
въ сꙋетꙋ ѹ҆мно́жи врачева́нїѧ твоѧ и҆ з꙽дра́вїѧ не бꙋдет꙽ т̂и.
ѹ҆слы́шаша ꙗ҆зы́цы срамотꙋ твою, и҆ пла́чь твои напо́лни зе́млю.
ꙗ҆́ко си́лныи срѣте́сѧ съ си́лнымъ, и҆ ѻ́ба в꙽кꙋ́пѣ падо́ста·

Сло́во е҆же гл҃а г҃ь къ і҆е҆ремїи прро̑҇кꙋ ѻ҆ се́мъ, ꙗ҆́ко и҆мѣ прїити навходоносо́ръ цр҃ь вавѷло́нскїи, и҆ поби́ти зе́млю е҆гѷпет꙽скꙋ.
възвѣсти́те е҆гѷптꙋ, и҆ ѻ҆гласи́те въ магда́лꙋ.
възопїи въ мем꙽фи́съ, и҆ в꙽ тафна́съ повѣдѣте.
сто́и и҆ ѹ҆готовисѧ, ꙗ҆́ко пожре́тъ ме́чъ сїѧ, ꙗ҆́же ѻ҆́крс̑҇тъ тебѐ сꙋть.
почто̀ съгни си́лныи твои, не ста̀, ꙗ҆́ко г҃ь преврати и҆̀.
ѹ҆мно́жи па́дающаѧ, и҆ паде мꙋ́жъ бли́жнемꙋ свое҆мꙋ.
и҆ рекꙋтъ въста́ни, и҆ въз꙽врати́мсѧ к лю́дем꙽ нашимъ, и҆ въ зе́млю рожд̑енїѧ нашего ѿ лица̀ мечю го́лꙋбѧ.
въз꙽зовѣте и҆мѧ фараѻ́на цр҃ѧ е҆гѷпет꙽ска, во́пль приведе ча́съ.
жи́въ е҆смь а҆зъ гл҃етъ цр҃ь, г҃ь вседержи́тель и҆мѧ е҆го.
ꙗ҆́коже ѳаво́ръ на гора́хъ, и҆ ꙗ҆ко карме́ль в мо́ри прїиде.
сꙋ́ды плѣне́нїѧ сътвори себѣ живꙋщаѧ д꙽щи е҆гѷпет꙽ска.
ꙗ҆́ко мем꙽фи́съ въ пꙋсты́ню бꙋ́детъ, и҆ ѻ҆пꙋстѣетъ, и҆ не бꙋ́детъ в не́мъ жи́ти.
ю҆́ница и҆збран꙽на и҆ кра́сна е҆гѷпетъ, погони́тель ѿ полꙋно́щи прїиде е́и.
кꙋпцы е҆ѧ̀ живꙋщеи посреди е҆ѧ̀, ꙗ҆́ко те́лцы тꙋ́чнїи ѻ҆братишасѧ и҆ побѣго́ша вкꙋ́пѣ, и҆ не мого́ша стати, ꙗ҆ко дн҃ь поги́бели и҆хъ прїиде на́ нѧ, и҆ час̑҇ посѣще́нїѧ их̑.
глас̑҇ е҆го ꙗ҆́ко мѣдь звѣца́ти бꙋ́детъ.
ꙗ҆́ко съ си́лою приближи́сѧ, и҆ съ секи́рами прїидт̑ꙋ к немꙋ, ꙗ҆́ко дре́вїе сѣча́ще, посѣкт̑ꙋ лѣ́съ е҆го, гл҃етъ г҃ь.
и҆же не мо́жет̑ съчте́нъ бы́ти.
ѹ҆мно́жишасѧ пач̑҇ прꙋ́говъ, и҆ не бѣ им̑ числа.
посрамле́н꙽на е҆сть дщи е҆гѷпет꙽ска, и҆ дана в рꙋ́цѣ лю́демъ полꙋнощнымъ·

Рече г҃ь вседержи́тель б҃ъ і҆и҆л҃евъ.
се азъ посѣщꙋ на́гъ лꙋкъ а҆леѯан꙽дрїискїи, и҆ на фараѻ́на и҆ на е҆гѵпетъ, и҆ на боги е҆го, и҆ на цр҃ѧ е҆го, и҆ на ѹ҆пова́ющаѧ на́нь.
и да́мъ а҆зъ е҆̀ в рꙋ́цѣ и҆́щꙋщихъ дш҃и и҆хъ, и҆ в рꙋ́кꙋ навходоносо́ра цр҃ѧ вавѵлон꙽ска, и҆ в рꙋцѣ слꙋ́гъ е҆го.
и҆ посе́мъ поживꙋтъ в нем̑ ꙗ҆́ко и҆ пе́рвѣе, гл҃ет̑ г҃ь·

Ты же не бо́исѧ рабе мои і҆а́кове, ни ѹ҆страша́исѧ іил҃ю.
се б̂о а҆зъ тебѐ сп҃сена сътворю и҆здале́ча, и҆ сѣмѧ твое ѿ землѧ̀ плѣне́нїѧ е҆го.
и҆ възвратѧ́сѧ і҆а́ков̑҇ и҆ почїет꙽, и҆ въ спѣ́хъ бꙋ́детъ, и҆ не бꙋ́детъ ѹ҆страшаѧи е҆го·

Ты же не бо́исѧ рабе мои і҆а́кове, гл҃етъ г҃ь, ꙗ҆́ко с тобо́ю е҆смь а҆зъ.
ꙗ҆́ко сътрꙋ аз̑ всѧ ꙗ҆зы́ки, в нѧ́же т̂ѧ и҆звергох꙽, тебе же не сътрꙋ, н̂о накажꙋ тѧ сꙋ́домъ, ниже ꙗ҆́ко неви́нномꙋ ѿпꙋщꙋ тебѣ·

Глв̑҇а, м҃з·

Сло́во гн҃е е҆же бы́сть къ і҆е҆ремїи прро̑҇кꙋ на и҆́ноплемен꙽ник̑҇, пре́же нежели побѝ фараѻ́нъ газа́мъ·

Та́ко гл҃ет̑ г҃ь.
се воды възыидꙋтъ ѿ полꙋнощи, и҆ бꙋ́дꙋтъ ꙗ҆́ко пото́къ волнꙋющїи.
и҆ покры́ют꙽ зе́млю, и҆ ꙗ҆́же на неи.
гра́дъ, и҆ живꙋщаѧ в не́мъ·

Възопїютъ лю́дїе, и҆ въспла́чꙋтсѧ вси живꙋщеи на землѝ, ѿ шꙋ́ма го́рдости въѻ҆рꙋже́ных̑, и҆ во́инъ е҆го ѿ грѣмѣнїѧ колесни́ць е҆го и҆ мно́жества ко́лъ е҆го.
не ѻ҆гледа́хꙋсѧ ѿц҃ы на сн҃ы, ѻ҆пꙋсти́вши рꙋцы прише́ствїѧ ради дн҃е, во́ньже поги́бнꙋтъ вси и҆ноплеме́нницы.
и҆ разме́щет̑сѧ тѵръ и҆ сидо́нъ, съ всѣ́ми про́чими помощники свои҆ми.
ꙗ҆́ко и҆сплени́лъ е҆сть г҃ь палести́ны, ѻ҆стан꙽ки ѻ҆строва кападокїиска.
прїиде плѣш꙽ на газꙋ, ѹ҆молче а҆скало́нъ, и҆ ѻ҆ста́н꙽ки ѹ҆до́лїѧ и҆хъ·

И҆ доко́лѣ сѣщи бꙋ́деши ѽ мечю бж҃їи, и҆ доко́лѣ не ѹ҆покои҆шисѧ.
вни́ди в ножны своѧ, почїи и҆ помолчи.
ка́ко ѹ҆покоит̑сѧ поне́же г҃ь заповѣ́да е҆мꙋ на а҆скало́на, и҆ на сꙋщаѧ за моремъ вла́сти е҆го, и҆ т̂ꙋ съречесѧ с ни́мъ·

Глв̑҇а, м҃и·

Ѡ моа́ви, та́ко рече г҃ь вседержи́тель б҃ъ і҆и҆л҃евъ.
ѽ лютѣ на ва́мꙋ, ꙗ҆́ко погꙋбле́но е҆сть и҆ посрамле́но.
взѧ́сѧ карїаѳїа҆римъ.
посрами́сѧ силнѣ и҆ ѹ҆жасе́сѧ.
нѣсть ктомꙋ весе́лїе въ моа́вѣ.
проти́вꙋ е҆сево́нꙋ мы́слиша ѕл̂о.
прїидѣте и҆ потреби́мъ ѧ҆̀ ѿ ꙗ҆́зы́къ.
сего ради молча ѹ҆таи҆шисѧ, и҆ по́идетъ за тобо́ю ме́чь.
глс̑҇а во́плѧ съ ѻ҆рона́им̑ погꙋбле́нїе и҆ сътре́нїе вели́ко.
сътре́сѧ моа́въ, възвѣсти́те во́пль малы́мъ е҆го.
ꙗ҆́ко по въз꙽ше́ствїи лꙋи́ѳъ пла́ча възы́иде пла́чъ, ꙗ҆́ко на и҆стꙋпованїи ѻ҆ронаи҆мъ вра́зи рыда́нїе сътре́нїѧ слы́шали сꙋть.
бѣжи́те съблюди́те дш҃а ваша, и҆ бꙋ́дете ꙗ҆́ко ди́вїа бы́ль въ пꙋсты́ни.
сего б̂о ради ꙗ҆́ко и҆мѣ́лъ е҆си наде́ждꙋ въ ѻ҆гра́дахъ твои҆хъ и҆ въ сокро́вищих̑ твои҆хъ, т̂ы ѹ҆бо ꙗ҆́тъ бꙋ́деши.
и҆ по́идетъ хамо́съ въ преселе́нїе, сщ҃ен꙽ники е҆го и҆ кн҃ѕи е҆го въкꙋ́пѣ.
и҆ прїидетъ хи́щникъ въ всѧ́къ град̑, и҆ не и҆зба́витсѧ ни е҆ді́нъ гра́дъ.
и҆ поги́бнꙋтъ ѹ҆до́лїѧ, и҆ погꙋ́бѧтсѧ по́лѧ, ꙗ҆́ко ре́клъ е҆сть г҃ь.
да́ите цвѣтъ моа́вꙋ, ꙗ҆́ко ѿцвѣтетъ·

и҆ гра́ди е҆го бꙋ́дꙋтъ пꙋсты и҆ без꙽ живꙋщихъ.
проклѧ́тъ чл҃къ творѧ́и дѣло гн҃е съ небреже́нїем꙽, проклѧт̑ же възбранѧ́ѧи мечꙋ свое҆мꙋ ѿ кро́ве.
плод̑ныи моа́въ б̂ѣ ѿ мла́дости свое҆ѧ, и҆ почѝ въ квасни́цахъ свои҆хъ, ниже прели́сѧ ѿ сосꙋ́да въ сосꙋдъ, ни пресели́сѧ.
сего ради бы́сть сла́дость е҆го в не́м꙽, и҆ во́нѧ е҆го нѣ́сть премѣне́на·

Сего рад̑и̑ се дн҃їе грѧдꙋтъ гл҃ет꙽ г҃ь.
и҆ послю̀ е҆мꙋ зрѧди́телѧ, и҆ простира́телѧ ла́гвицъ е҆го.
и҆ прострꙋ и҆̀ и҆ съсꙋ́ды е҆го и҆змѣ́рю, и҆ ла́гвици е҆го съкрꙋшꙋ.
и҆ посрами́тсѧ моа́въ ѿ хамо́съ, ꙗ҆коже посрамле́нъ е҆сть домъ і҆и҆л҃евъ ѿ веѳил̑҇, в нем̑же и҆мѧхꙋ надежд̑ꙋ.
ка́ко гл҃ете, си́лни е҆смы и҆ мꙋ́жи крѣ́пцы в꙽ бою.
погꙋби́сѧ моа́въ, въ гра́ды е҆го вънидо́ша, і҆ и҆збра́нїи ю҆́ноши е҆го снидо́ша под̑ мечь.
гл҃етъ цр҃ь, г҃ь вседержитель и҆мѧ ег̑҇.
близ̑ е҆сть поги́бель моа́влѧ, да прїидетъ, и҆ ѕл̂о е҆го ско́ро прїидет̑ ѕѣ́ло.
ѹ҆тѣша́ите и҆̀ вси и҆же ѻ҆́крс̑҇тъ е҆го, и҆ вси вѣ́дѧщеи и҆мѧ е҆го.
рците, ка́ко съкрꙋши́сѧ же́злъ крѣ́пости лоза сла́вна.
сни́ди ѿ сла́вы и҆ сѧ́ди въ а҆л꙽ка́нїи жили́ща дще́ри диво́нь, ꙗ҆ко погꙋби́тель моа́в꙽скїи възы́идет̑ к тебѣ, разрꙋшит̑ ѻ҆грады твоѧ·

на пꙋтѝ сто́и, и҆ позри жили́ща а҆рое҆рь.
въспроси бѣжа́щаго, и҆ къ ѹ҆бѣгшемꙋ рцы̀, чт̂о с̂е бы́сть.
посрами́сѧ моавъ, занѐ побѣжен̑҇ е҆сть.
рыда́ите и҆ въпїите възвѣсти́те въ а҆рно́нъ, ꙗ҆ко погꙋби́сѧ моа́въ.
и҆ сꙋ́дъ прїиде на́ зем̑лю по́лнꙋю, на е҆лон̑҇, и҆ на е҆са, и҆ на мефа́ѳъ, и҆ на диво́нъ, и҆ на наво, и҆ на до́мъ девла́таи҆м꙽, и҆ и҆ на карїа҆ѳїа҆ри́мъ, и҆ на ветамꙋлъ, и҆ на карїѻ҆тъ, и҆ на во́зра, и҆ на всѧ̀ грады зем̑ли моав꙽ли, и҆же далече і҆ и҆же близꙋ сꙋть.
ѿсѣченъ е҆сть рогъ моа́вль, и҆ мы́шца е҆го съкрꙋшисѧ, гл҃етъ г҃ь.
ѹ҆поите е҆го ꙗ҆́ко на г҃а въздви́жесѧ.
и҆ ѻ҆бразѝ рꙋкꙋ свою моа́въ въ всемъ развраще́нїи.
и҆ бꙋдетъ в꙽ посмѣхъ тако ѻ́нъ, ꙗ҆́ко в꙽ посмѣхъ былъ тебѣ і҆и҆л҃ь, и҆ въ та́тьствѣ твое҆мъ ѻ҆брѣте е҆го.
тѣмже словесъ ради си́хъ и҆же нань реклъ е҆си, ꙗ҆́тъ веде́нъ бꙋдеши.
ѻ҆ста́вите гра́ды и҆, пребыва́ите на ка́мени живꙋщїи моа҆въстїи.
и҆ бꙋдите ꙗ҆́ко го́лꙋбъ гнѣздѧ́исѧ в꙽ самомъ врьхꙋ сква́жни·

Слы́шахомъ го́рдость моа́влю, высокъ б̂ѣ ѕѣло.
презо́ръство е҆го и҆ ѿврьже́нїе е҆го, възноше́нїе и҆ въздвиже́нїе срд̑ца е҆го а҆зъ вѣмъ, гл҃етъ г҃ь, и҆ похва́лꙋ е҆го.
сего ради ꙗ҆́ко да не ѻ҆ста́нет̑ в немъ крѣпость е҆го, ниже близъ того чт̂о мо́глъ хо́ти сътвори́ти.
сего ради на моа́ва възрыда́ю, и҆ къ всемꙋ моа́вꙋ възопїю, къ мꙋжемъ гли́нѧнѣ стѣнѣ гл҃ющимъ.
ѽ плачю и҆а҆серь.
въспла́чютсѧ виногра́ди сава́ма.
лѣторасли твоѧ прешлѝ сꙋть мо́ре, даже до мо́рѧ и҆а҆серь прїидо́ша.
на жа́твꙋ твою и҆ на ви́нно събира́нїе твое, хи́щник꙽ прїиде.
ѿꙗ҆́та ес̑҇ ра́дость и҆ весе́лїе ѿ кармель, и҆ ѿ земли моав̑҇ли, и҆ вино̀ ѿ точи́лъ побра́хъ.
никогда́ же гнетѧ́и вин꙽нꙋ ꙗ҆́годꙋ по ѻ҆бы́чаю пѣсни не воспое҆тъ, ѿ воплѧ е҆сево́ньска даже до е҆леа҆ле, и҆ а҆е́са, даша гласъ свой.
ѿ сего́ръ даже до ѻ҆ронаи҆мъ ю́ницꙋ трилѣтнꙋ приходѧ́щꙋ.
во́ды же немрим̑ презлы бꙋдꙋтъ.
и҆ ѿи҆мꙋ ѿ моа́ва, гл҃етъ г҃ь, жрꙋщаго на гора́хъ, и҆ ѻ҆свѣща́ющаго богом̑ е҆го·

Того ради срд̑це мое на моа́ва ꙗ҆ко пища́ль мѣдѧна ѕвѣцаѧ бꙋдетъ, и҆ срд̑це мое къ мꙋжем̑ стѣнѣ глинѧнѣ дасть гла́съ пища́льскь.
па́че б̂о сътворѝ нежели възможе, тѣмже погибо́ша.
всѧ́ка ѹ҆бо глава̀ плѣши́ва, и҆ всѧ́ка бра́да ѻ҆бръснетсѧ.
на всѧ́кои рꙋцѣ свѧза́нїе, и҆ на всѧ́комъ хрептѣ̀ стрꙋпъ.
и҆ на всѣхъ хра́минахъ моа́вскихъ, и҆ на стогнах̑ е҆го всѧ́къ пла́чь.
понеже съкрꙋших̑ моа́ва ꙗ҆́ко сосꙋдъ непотребен꙽, гл҃ет̑ г҃ь.
ка́ко побѣдисѧ възопи́ша·

како повѣси главꙋ̀ моа́въ, и҆ посрами́сѧ.
и҆ бꙋдетъ моа́въ в꙽ посмѣхъ и҆ въ при́тчю всѣмъ ѻ́крс̑҇тъ себе·

Та́ко гл҃етъ г҃ь, с̂е ꙗ҆́ко ѻ҆ре́лъ летит̑ и распростре́тъ кры́лѣ своѝ на моа́ва.
взѧ́тъ е҆сть карїѻ́тъ, и҆ ѻ҆гра́ды е҆го ѻ҆бъстои́мы сꙋть.
и҆ бꙋдетъ срд̑це си́лныхъ моа́въских̑ в꙽ то́и дн҃ь, ꙗ҆́ко срд̑це жены̀ родѧщи.
и҆ преста́нет̑ моа́въ бы́ти людми, ꙗ҆́ко на г҃а похвали́сѧ.
стра́хъ и҆ пропасть и҆ сѣть на тѧ ѽ живꙋщїи въ моа́ви, гл҃етъ г҃ь.
кт̂о ѹ҆бѣжитъ ѿ лица̀ страха, в꙽падетъ въ про́пасть.
і҆ и҆злаѕѧ́и и҆с пропасти, и҆ме́тсѧ сѣтїю.
понеже приведꙋ̀ на моа́ва лѣто посѣще́нїѧ и҆хъ, гл҃етъ г҃ь.
въ стѣню е҆сево́нъстѣ ста́ша ѿ сѣти и҆збѣг꙽ше.
ѻ҆́гнь б̂о и҆зы́иде съ е҆сево́нъ, и҆ пла́мень ѿ среди сїѻ́нꙋ и҆ пож꙽же ча́сть моа́ва, и҆ вер꙽хъ сн҃ов꙽ смѧте́нїѧ·

Го́ре тебѣ моа́въ.
погибо́сте лю́дїе хамосъ.
ꙗ҆́ко ѿведо́шасѧ сн҃ы твоѧ и҆ дще́ри твоѧ въ плѣнъ.
и҆ възвращꙋ плѣнъ моа́вль в꙽ послѣднѧѧ дн҃и, гл҃етъ г҃ь·

Даже досе́лѣ сꙋди моа́вли·

Глв̑҇а, м҃ѳ·

Рцы́ же сн҃омъ а҆м꙽мо́нимъ.
тако гл҃етъ г҃ь, е҆да не ст̑ꙋ сн҃ове і҆и҆л҃еви, и҆л̂и наслѣдника нѣсть е҆мꙋ.
почт̂о ѹ҆бо прїа наслѣдїе мелхом꙽ га́дъ, и҆ лю́дїе е҆го въ гра́дѣхъ е҆го живѧ́хꙋ.
сего ра́ди с̂е дн҃їе грѧдꙋт꙽ гл҃етъ г҃ь, и҆ ѻ҆глашꙋ на рав꙽ватъ сн҃овъ а҆м꙽мо́нь ра́тныи звꙋкъ.
и҆ бꙋдетъ въ прах̑ разме́тано, и҆ дще́ри е҆го ѻ҆гне́мъ заж꙽же́ны бꙋдꙋтъ.
и҆ въспрїиметъ і҆и҆л҃ь вла́сть свою гл҃етъ г҃ь.
възопїи е҆сево́нъ, ꙗ҆́ко погꙋби́сѧ га́и.
въпїите дще́ри равваѳ꙽ски, препоѧши́тесѧ вре́тищемъ, рыда́ите и҆ бѣга́ите по забра́лахъ.
ꙗ҆́ко мелхомъ въ плѣнъ ѿведетсѧ, сщ҃ен꙽ницы и҆ кнѧ́ѕи е҆го въкꙋпѣ.
чт̂о хва́лишисѧ въ ѹ҆до́лїѧхъ, снїиде ѹ҆до́лїе твое дщи прекра́сна, ѹ҆повающїѧ бога́т꙽ством̑ свои҆мъ, гл҃ѧ, кт̂о прїидет̑ на́ мѧ<.>

Се а҆зъ приведꙋ̀ на́ тѧ страх̑, гл҃ет̑ г҃ь вседръжи́тель, ѿ всѣхъ сꙋщихъ ѻ҆́крс̑҇тъ тебе.
и҆ расѣ́етесѧ вси ѿ лица̀ ва́шего, и҆ ниже бꙋдетъ събира́юща бѣжа̀.
и҆ посемъ възращꙋ плѣнники сн҃овъ а҆м꙽мо́нь·

Гл҃етъ г҃ь къ и҆дꙋмеи.
та́ко гл҃етъ г҃ь вседръжи́тель, е҆гда нѣсть к꙽семꙋ мꙋдрости въ ѳема́нѣ.
поги́бе совѣтъ ѿ сн҃овъ, и҆ непотре́бна е҆сть мꙋдрос̑҇ их̑ бѣжи́те и҆ лица ѿвраща́ите снидите во а́дъ живꙋщеи деда́нъ.
зане поги́бель и҆са́влю приведох̑ на́нь, ча́съ посѣще́нїѧ е҆го.
а҆ще бы ѻ҆бъи҆ма́тели вина̀ пришлѝ на́ тѧ, ѹ́бо не ѻ҆ста́вили бы ни грезна̀.
а҆ще ли же та́тїе бы̀ в нощи пришли похити́ли бы т̂о, что̀ довлѣ и҆мъ.
но а҆зъ ꙗ҆ви́хъ и҆са́ва, ѿкры́хъ та́инаѧ е҆го, и҆ не възможетъ ѹ҆таи́тисѧ.
погꙋблено е҆сть сѣмѧ е҆го, и҆ бра́тїѧ е҆го, и҆ сосѣди е҆го, и҆ не бꙋдетъ·

ѻ҆ста́ви си́роты твоѧ, а҆з же и҆мъ повелю̀ жи́вомъ бы́ти, и҆ вдови́цы твоѧ на мѧ ѹ҆пова́ти бꙋдꙋтъ·

Та́ко б̂о гл҃етъ г҃ь, с̂е и҆мже не было сꙋдꙋ, да пїютъ ча́шꙋ, пїюще и҆спїютъ.
ты же ꙗ҆́ко непови́нныи ѻ҆ста́неши.
не бꙋдеши непови́нен꙽, н̂о пїѧ и҆спїеши.
собо́ю б̂о клѧхсѧ гл҃етъ г҃ь, ꙗ҆́ко въ пꙋсты́ню и҆ въ порꙋга́нїе, и҆ въ посмѣхъ и҆ въ проклѧ́тїе бꙋдетъ во́зра, и҆ всѧ гра́ды е҆го бꙋдт̑ꙋ въ пꙋсты́ню вѣчнꙋю·

Слх̑ꙋ слы́шахъ ѿ г҃а, и҆ посолъ во ꙗ҆́зы́ки посланъ е҆сть.
съберѣтесѧ і҆ и҆дѣте противꙋ е҆мꙋ, и҆ въста́нем̑ на ѻ҆плъче́нїе.
ꙗ҆́ко с̂е мала да́хъ т̂ѧ въ странахъ, и҆ порꙋга́нымъ среди людїи·

Противле́нїе твое прельсти́ тѧ, и го́рдость срд̑ца твое҆го.
живѧ́и в꙽ пещерахъ камен꙽нахъ, и҆ похити́ти ѹ҆крѣплѧ́ешисѧ верхꙋ хо́лма.
е҆гда възнесеши ꙗ҆́ко ѻ҆ре́лъ гнѣздо свое, ѿто́лѣ све́ргꙋ т̂ѧ, гл҃етъ г҃ь.
и҆ бꙋдетъ и҆дꙋмеѧ пꙋста̀.
всѧкъ ходѧ́и чрезъ ню̀ подиви́тсѧ, и҆ възъгл҃етъ над̑ всѧкими ꙗ҆́звами е҆ѧ.
ꙗ҆́коже превраще́на е҆сть содо́ма и҆ гомо́ра, и҆ сосѣды е҆ѧ, гл҃ет̑ г҃ь.
не поживетъ та́мо мꙋжъ, ниже пребꙋдетъ в꙽ неи сн҃ъ чл҃чь.
с̂е ꙗ҆́ко ле́въ и҆зыиде съ презо́ръства і҆ѻ҆рда́нѧ ѿ красоты си́лны, ꙗ҆́ко скорѣ повѣмъ е҆мꙋ бѣжа́ти к неи.
и҆ кт̂о бꙋдетъ тако и҆збран̑҇, е҆гоже поста́влю над̑ нею.
кто бо подо́бенъ мнѣ, и҆ кт̂о постои҆тъ предо мною.
кто́ же е҆сть сеи па́стыръ, и҆же съпроти́вит̑сѧ лицꙋ мое҆мꙋ·

Сего ради слы́шите совт̑ѣ гн҃ь, и҆же совѣща на е҆до́ма.
и҆ мышле́нїе е҆го, е҆же помы́сли ѻ҆ живꙋщихъ въ ѳема́нъ.
не свергꙋ л̂и и҆хъ мала ѿ ста́да, и҆ не размещꙋ ли с ни́ми жили́ща и҆хъ.
ѿ гла́са паде́нїа и҆хъ потрѧсесѧ землѧ̀, во́пль на́ мори чрьмнемъ слы́шасѧ гла́са и҆хъ·

Сѐ ꙗ҆́ко ѻ҆ре́лъ възы́идетъ и҆ възлетит̑, и҆ прострет̑ кры́лѣ своѝ над̑ во́зрꙋ.
и҆ бꙋдетъ срд̑це си́лныхъ и҆дꙋме́иских̑ в꙽ тои дн҃ь, ꙗ҆́ко срд̑це жены̀ родѧ́щїа·

Къ дама́скꙋ.
посрами́сѧ е҆ма́ѳъ, и҆ а҆рфа́ѳ꙽, ꙗ҆ко слꙋхъ ѕол̑҇ слы́шаша, възмꙋти́шасѧ на́ мори за попече́нїе ѹ҆покои́тисѧ не возмого́ша.
расторже́сѧ дама́скъ, и҆ ѻ҆брати́сѧ на бѣжа́нїе, тре́петъ ѻ҆бъѧ́ть и҆̀, скорбь и҆ бо́лѣзнь ѻ҆дръжа́шасѧ е҆го ꙗ҆ко ражда́ющꙋю.
ка́ко сꙋть ѻ҆ста́вили градъ славенъ, град̑ ра́дости·

Сего ради падꙋтъ ю́ноша е҆го на сто́гнахъ е҆го, и҆ всѝ мꙋжи во́инъстїи премол꙽кнꙋтъ в꙽ то́и дн҃ь.
гл҃етъ г҃ь вседръжи́тель.
и҆ вожгꙋ̀ ѻ́гнь на стѣнѣ̀ дама́ска, и҆ пож꙽же́тъ забра́ла венада́влѧ·

Къ кеда́рꙋ и҆ къ црс̑҇твом̑ а҆со́рь, и́хже поби навходоносо́ръ цр҃ь вавѷло́ньскїи, та́ко гл҃етъ г҃ь·

Въста́ните и҆ вни́дѣте въ кѷда́ръ, и҆ погꙋбѣте сн҃ы восто́чныѧ.
селе́нїа и҆хъ и҆ стада̀ и҆хъ ѿи҆мꙋ, ко́жа и҆хъ и҆ всѧ сосꙋды и҆хъ, и҆ вельблю́ды и҆хъ пои҆мꙋ себѣ.
и҆ съзовꙋ̀ на́ нѧ стра́х꙽ ѻ҆́крс̑҇тъ·

Бѣжи́те и҆ ѿи҆дѣте въско́рѣ, въ про́пастехъ сѧдите живꙋщеи съ а҆со́рь, гл҃етъ г҃ь.
ꙗ҆́ко совѣща̀ на́ вы навходоносо́ръ цр҃ь вавѷло́нъскїи совѣтъ, и҆ помы́сли на васъ мышле́нїѧ·

Въста́ните и҆ вни́дите к лю́демъ ѹ҆поко́еным꙽, и҆ живꙋщимъ без вре́да, гл҃етъ г҃ь.
ни две́ри ниже заво́ры и́мꙋть, са́ми ѻ҆бита́ют꙽.
и҆ бꙋдꙋтъ вельблю́ди их̑ въ расхище́нїе, и҆ мно́жество скота̀ въ разграбле́нїе.
и҆ рас꙽сѣ́ю ѧ҆̀ всѧ́цѣм꙽ вѣтромъ, понеже ѻ҆стри́жени сꙋть ѻ́крс̑҇тъ.
и҆ ѿ всѣхъ ѻ́крс̑҇тныхъ и҆хъ приведꙋ̀ на́ нѧ поги́бель, гл҃ет̑ г҃ь.
и҆ бꙋдетъ а҆со́рь въ жили́ще змїемъ пꙋсто даже до́ вѣка.
и҆ не ѻ҆ста́нет꙽ тамо мꙋжъ, ниже бꙋдет꙽ живѧ́и в꙽ немъ сн҃ъ чл҃чь·

Сло́во гн҃е е҆же бы́сть къ і҆еремїи про̑҇ркꙋ на и҆ела́мъ, в нача́лѣ црс̑҇тва седекїи цр҃ѧ і҆ѹ́дина, гл҃ѧ·

Тако гл҃ет꙽ г҃ь вседержи́тель, с̂е а҆зъ съкрꙋшꙋ лꙋкъ е҆ла́мль, и возмꙋ̀ силꙋ и҆хъ, и҆ въведꙋ на е҆ла́мъ четы́ри вѣтры ѿ четырехъ стра́нъ нбс̑҇ныхъ, и҆ развѣ́ю ѧ въ всѧ̀ вѣтры т̂ы.
и҆ не бꙋдетъ ꙗ҆зы́ка во́ньже не прїидꙋтъ бѣжа̀ е҆лами́тѧне·

и҆ повелю̀ ѹ҆жаснꙋтисѧ е҆лами́тѧномъ пред̑ враги и҆хъ, и҆ пре лицемъ и́щꙋщих̑ дш҃и и҆хъ.
и҆ приведꙋ̀ на нѧ ѕла́ѧ, гнѣвъ ꙗ҆́рости моеѧ, гл҃етъ г҃ь.
и҆спꙋщꙋ на них̑ ме́чь, дон꙽деже сотрꙋ и҆хъ.
и поста́влю прс̑҇тлъ мое во е҆лам̑.
и҆ погꙋблю̀ ѿтꙋдꙋ цр҃ѧ и҆ кн҃зѧ, гл҃ет̑ г҃ь.
н̂о въ послѣднѧѧ дн҃и повелю̀ възврати́тисѧ плѣнꙋ и҆е҆ла́млю, гл҃етъ г҃ь·

Глв̑҇а, н҃·

Сло́во е҆же реч̑҇ г҃ь ѻ҆ вавѷло́нѣ, и҆ ѻ҆ землѝ халдѣистеи, і҆еремїем̑ прро̑҇ком̑·

Възвѣсти́те въ ꙗ҆зы́цѣхъ и҆ ѻ҆гласи́те·

въздви́гнѣте зна́менїе, възопїите и не съкрива́ите, рцѣте.
взѧ́сѧ вавѷло́нъ посрами́сѧ вее҆ль, побѣди́сѧ мародахъ, посрами́шасѧ и҆зваѧ́нїѧ е҆го, победи́шасѧ кꙋми́ры и҆хъ.
ꙗ҆́ко прїиде на нѧ ꙗ҆зы́къ ѿ полꙋнощи, тои поло́житъ зе́млю е҆го въ пꙋсты́ню, и҆ не бꙋдетъ живѧ́и в немъ ѿ чл҃ка даже и҆ до скота̀.
и҆ воз̑дви́гнꙋшасѧ и҆ ѿи҆до́ша·

Въ ты̀ дн҃и и҆ въ то́и час̑҇, гл҃етъ г҃ь.
прїидт̑ꙋ сн҃ове і҆и҆л҃еви тїи и сн҃ове і҆ѹ́дины въкꙋпѣ, ходѧ́ще и҆ пла́чюще поспѣша́тъ, и҆ г҃а б҃а свое҆го възы́щꙋт꙽.
въ сїѻ́нъ въспытают̑ стеѕѣ, та́мо ѻ҆брати́вши лица своѧ̀.
прїидꙋтъ и҆ прило́жатсѧ къ г҃ꙋ ѻ҆бѣща́нїемъ вѣчномъ, ꙗ҆́ко ни е҆ді́нѣмъ заб꙽венїемъ не сотре́тсѧ.
ѻ́вца поги́бшаѧ бы́ша лю́дїе моѝ.
па́стыри и҆хъ съврати́ша их̑, и҆ сътвори́ша ѧ҆̀ кры́тисѧ по горах̑, съ горы̀ на хо́лмъ ходи́ша, забы́ша поко́ѧ свое҆го.
всѧ́къ ѻ҆брѣты́и ѧ҆̀ ꙗ҆дѐ их̑, и҆ вра́ѕи и҆хъ реко́ша, не съгрѣшихомъ.
сего рад̑и̑ занѐ съгрѣшиша г҃ꙋ лѣпотѣ пра́вды, наде́жд̑и ѿц҃ъ и҆хъ г҃ꙋ.
ѿи҆дѣте ѿ сре́ды вавѷлона, и҆ ѿ зем̑лѧ̀ халде́и и҆зыидѣте, и҆ бꙋдете ꙗ҆́ко ко́злища пред̑ ѻ҆вца́ми.
ꙗ҆ко с̂е а҆зъ въста́влю и҆ приведꙋ въ вавѷлонъ събо́ръ ꙗ҆зы́ковъ велїихъ ѿ землѧ̀ полꙋнощны, и҆ ѹ҆гото́вѧтсѧ нань, и҆ потомъ во́зметсѧ.
стрѣла̀ е҆го ꙗ҆́ко мꙋжа си́лъна вражде́бника, не възврати́тсѧ па́ки пра́здна.
и҆ бꙋдетъ землѧ̀ халдѣиска въ раз꙽грабле́нїе, вс̂и гꙋби́тели е҆ѧ напо́лнѧт̑сѧ, гл҃етъ г҃ь.
занѐ весели́стесѧ и҆ велерѣчева́сте расхища́юще наслѣдїе мое.
и҆злїѧсте бо сѧ ꙗ҆́ко телцы на травꙋ̀, и҆ рыка́сте ꙗ҆́ко во́лъ.
порꙋга́на е҆сть ма́ти ва́ша ѕѣло, и҆ ѹ҆подоби́сѧ пра́хꙋ роди́вшїѧ васъ.
се послѣднѧѧ бꙋдетъ въ ꙗ҆зы́цехъ, и҆ пꙋста̀ и҆ непрохо́дна и҆ сꙋха̀ ѿ гнѣва гн҃ѧ, не поживꙋтъ в неи, н̂о ѻ҆брати́тсѧ всѧ̀ въ пꙋсты́ню.
всѧ́къ ходѧ́и сквозѣ вавѷло́нъ, подивит̑сѧ и҆ позви́ждетъ ѻ҆ всеи ꙗ҆́звѣ е҆го.
ѹ҆готовитесѧ проти́вꙋ вавѵло́нꙋ всѝ ѻ́крс̑҇тнїи.
налѧца́ющеи лꙋкъ вы́ воюите и҆̀.
небрезите стрѣлъ, поне́же пред̑ гм҃ъ съгрѣши·

Възопїите нань, всю́дꙋ дадѐ рꙋкꙋ.
падоша ѻ҆снова́нїа е҆го, сокрꙋши́шас̑҇ стѣны е҆го, ꙗ҆́ко месть гн҃ѧ е҆сть ѿм꙽сти́те е҆мꙋ, ꙗ҆́коже сътворѝ сътвори́те е҆мꙋ·

Потреби́те сѣ́ѧтелѧ ѿ вавѷло́на, и҆ дръжа́щаг̑҇ сер꙽пъ в꙽ годъ жа́твы, ѿ лица̀ меча̀ голꙋби́на.
ко́ждо къ людемъ своим̑ ѻ҆брати́сѧ, и҆ вс̂и до землѧ̀ своеѧ ѹ҆бѣжат̑·

Ста́до растор꙽жено і҆и҆л҃ь, льво́ве и҆знꙋри́ша е҆̀.
прьвѣе ꙗ҆дѐ ѧ҆̀ цр҃ь а҆с꙽сѷрь, сеи же послѣднїи и҆ кости ѻ҆глода̀ е҆мꙋ, навходоносо́ръ цр҃ь вавѷлон꙽скїи·

Сего ради та́ко гл҃ет꙽ г҃ь вседръжи́тель б҃ъ і҆и҆л҃евъ.
с̂е а҆з꙽ посѣщꙋ цр҃ѧ вавѷлон꙽ска и҆ землю е҆го ꙗ҆́коже посѣти́хъ цр҃ѧ а҆с꙽сѷрьска·

и҆ приведꙋ па́ки і҆и҆л҃ѧ въ жили́ще е҆го и҆ ѹ҆пасетсѧ въ карме́лѣ и҆ васанѣ, въ горѣ же е҆фраи́мли и҆ галаа́дѣ насы́титсѧ дш҃а е҆го·

Въ ты̀ дн҃и и҆ въ то́и часъ, гл҃тъ г҃ь, възы́щетсѧ непра́вда і҆и҆л҃ева, и҆ не бꙋдетъ.
и҆ грѣхъ і҆ѹ́динъ, и҆ не ѻ҆брѧ́щет̑сѧ·

ꙗ҆́ко млс̑҇тивъ бꙋдꙋ и҆мъ ѻ҆ставлѧ́ѧи<.>

На́ землю владѣ́ющихъ възыидѝ, и на живꙋщаѧ е҆ѧ посѣти, рас꙽сѣ́и и҆ ѹ҆бїи сꙋщаѧ по ни́хъ, гл҃етъ г҃ь.
и҆ сътворѝ всѧ̀ е҆ли́ка заповѣ́даю по тебѣ.
глс̑҇а бра́ни въ землѝ и҆ сътре́нїе велико·

Ка́ко съкрꙋши́сѧ и҆ сътре́сѧ мла́тъ всеи землѝ.
ка́ко ѻ҆брати́сѧ въ пꙋсты́ню вавѷло́нъ въ ꙗ҆зы́цѣхъ.
въ сѣт́и ѹ҆лових̑ т̂ѧ и҆ плѣне́нъ е҆си вавѷло́не, и҆ не ви́дѣлъ е҆си.
ѻ҆брѣте́нъ е҆си и҆ на́иденъ, понеже разгнѣвалъ е҆си г҃а.
ѿврьзъ г҃ь съкро́вища своѧ, и҆знесъ сосд̑ꙋ гнѣ́ва свое҆го.
ꙗ҆́ко дѣло е҆сть г҃ꙋ вседръжи́телю в꙽꙽ землѝ халдеи́стѣ.
поидѣте к неи ѿ конець землѝ, ѿврьзѣте да внидт̑ꙋ попира́ющеи ю҆̀.
ѿи҆мѣте съ пꙋтѝ ка́менїе, и҆ смещи́те е҆̀ в꙽кꙋп꙽ и҆ погꙋбѣте ю҆̀, и҆ да не ѻ҆ста́нетъ ничто́же.
расѣ́ите всѧ̀ си́лныѧ еа̀ і҆ и҆стꙋпитъ въ закланїе.
горе и҆мъ ꙗ҆́ко прїиде дн҃ь и҆хъ, час̑҇ посѣще́нїѧ и҆хъ·

Гласъ бѣжа́щих̑, і҆ и҆збѣг꙽ших̑ ѿ землѧ вавѷло́нъски.
да възвѣстѧт̑ в сїѻнѣ м꙽ще́нїе г҃а б҃а на́шего м꙽ще́нїе хра́ма е҆го.
възвѣстѣте въ вавѷлонѣ мно́гимъ, всѣмъ налѧца́ющим̑ лꙋкъ.
въкꙋпѣ сто́ите проти́вꙋ е҆мꙋ ѻ́крс̑҇тъ, да не ѹ҆бѣжит̑ ни е҆ді́нъ, и҆ възда́ите е҆мꙋ по дѣлом̑ е҆го.
по всемꙋ̀ е҆ли́ка сътвори, сътвори́те е҆мꙋ, ꙗ҆́ко на г҃а въздви́жесѧ на ст҃аго і҆и҆л҃ева.
сего ра́ди падꙋтъ ю́ноша е҆го на сто́гнахъ е҆го, и҆ всѝ мꙋжи во́инъстїи е҆го ѹ҆мол꙽кнꙋтъ въ тои дн҃ь, гл҃етъ г҃ь.
се а҆зъ на́ тѧ го́рде, гл҃етъ г҃ь б҃ъ вседръжи́тель, ꙗ҆́ко прїиде дн҃ь твои часъ посѣще́нїа твое҆го.
и҆ падетъ го́рдыи и҆ раз꙽дрꙋшитсѧ, и҆ не бꙋдетъ въставлѧ́ѧи е҆го.
и҆ въжгꙋ ѻ́гнь въ гра́дѣхъ е҆го, и҆ пож꙽же́тъ всѧ̀ ѻ́крс̑҇тъ е҆го·

Та́ко гл҃етъ г҃ь вседръжитель, срамотꙋ̀ тръпѧ́тъ сн҃ове і҆и҆л҃еви, и҆ сн҃ове і҆ѹ́дины в꙽кꙋпѣ.
всѝ ѻ҆дръжа́щеи и҆хъ не хо́щꙋтъ ѿпꙋсти́ти и҆хъ.
и҆збави́тель их̑ си́лныи, г҃ь вседръжи́тел̑҇ и҆́мѧ е҆го, сꙋ́домъ възбрани́тъ за нихъ.
да ѹ҆стра́шитъ землю, и҆ потрѧсет̑ жи́тели вавѷлон꙽скими.
и҆ мечь на халдеѝ, гл҃етъ г҃ь, и҆ на жи́тели вавѷлон꙽скїѧ, и҆ на кнѧѕи и҆ на мꙋдрыѧ е҆го.
мечь на вещцы е҆го и҆же бꙋ́и бꙋдт̑ꙋ.
и҆ мечь на силныѧ е҆го, да возбоѧ́тсѧ.
мечь на конѧ е҆го и҆ на колесни́ца е҆го, и҆ на всѧ̀ про́чїѧ лю́ди, и҆же сꙋть посредѣ е҆го, и҆ бꙋдꙋтъ ꙗ҆́ко же́ны.
мечь на съкро́вища е҆го, и҆же расхитѧт̑сѧ.
и҆с꙽ше́нїе на во́ды е҆го бꙋ́детъ, і҆ и҆с꙽шꙋт꙽.
ꙗ҆́ко землѧ̀ и҆зваѧ́нныхъ е҆сть, и҆ завистїю хвалѧ́хꙋсѧ.
сего ра́ди поживꙋть ѕмїеве съ бꙋ́ими и҆ ди́вими люд̑ми, и҆ поживꙋтъ в немъ сѷрини.
и҆ не бꙋ́детъ живꙋща в немъ ктомꙋ въ вѣ́ки, ниже съгради́тсѧ ѿ ро́да в ро́дъ.
ꙗ҆коже преврати г҃ь содо́ма и҆ гомо́ра, и҆ ѻ́крс̑҇тныѧ гра́ды и҆хъ.

Гл҃етъ г҃ь, не пребꙋ́детъ та́мо мж̑ꙋ, ниже поживет̑ в нем̑ сн҃ъ чл҃чь·

Се̂ лю́дїе прїидꙋтъ ѿ полꙋно́щи, и҆ ꙗ҆зыкъ великъ, и҆ цр҃їе мно́ѕѣ въста́нꙋтъ ѿ конець землѧ̀, лꙋ́ки и҆ щи́ты възе́мше, гро́зни сꙋть и҆ немлс̑҇тиви.
глс̑҇а и҆хъ ꙗ҆́ко мо́ре въз꙽шꙋми́тъ.
и҆ на конѧ въз꙽сѧ́дꙋт꙽, ꙗ҆́ко мꙋжъ ѹ҆готовле́нныи на́ брань, проти́вꙋ тебѣ дщи вавѷло́нѧ·

Ѹ҆слы́ша цр҃ь вавѵло́н꙽скїи сла́вꙋ и҆хъ, и҆ ѹ҆вѧдо́ша рꙋ́цѣ е҆го.
ско́рбь ѻбъѧ́тъ е҆го и҆ бо́лѣзнь ꙗ҆́ко ражд̑ающꙋю·

Се̂ ꙗ҆́ко ле́въ и҆зы́иде съ презо́рства і҆ѻ҆рда́нѧ къ красотѣ си́лнѣ, ꙗ҆́ко си́лнꙋ побѣгнꙋти повелю̀ е҆мꙋ к не́и.
и҆ кт̂о бꙋ́детъ и҆збра́нъ е҆го́же а҆зъ пред̑ложꙋ е҆мꙋ.
и кт̂о ѹ҆бо подо́бенъ мн̂ѣ, и҆ кт̂о мо́жетъ стоѧ́ти проти́вꙋ м̂ѧ.
и҆ кт̂о е҆сть па́стыръ се́и, и҆же проти́вит̑сѧ лицꙋ мое҆мꙋ.
тм̑ѣже слы́шите совт̑ѣ гн҃ь, е҆же нача̀ мы́слити на вавѷло́на, и҆ мышле́нїѧ е҆го е҆же ѹ҆мы́сли на́ зем̑лю халдѣ́искꙋ.
а҆ще их̑ не и҆стор꙽гнꙋ ма́ла ѿ ста́дъ, а҆ще не бꙋ́детъ разме́тано въкꙋ́пѣ с ни́ми жили́ще и҆хъ.
ѿ гла́са плѣне́нїѧ вавѷлон꙽скаго потрѧсе́сѧ землѧ̀, и҆ во́пль въ ꙗ҆зы́цех̑ слы́шасѧ·

Глв̑҇а, н҃а·

Та́ко гл҃етъ г҃ь.
се а҆зъ въздви́гнꙋ на вавѷло́нъ, и҆ на живꙋщаѧ в нем꙽, на възд̑ви́гшихъ срд̑це свое на́ мѧ, ꙗ҆́ко вѣтръ гꙋби́телныи.
и҆ послю̀ въ вавѷло́нъ вѣѧ, и҆ възвѣю им̑, і҆ и҆стлю зе́млю е҆го·

поне́же прїиде на́нь ѿвсю́дꙋ въ дн҃ь поги́бели е҆го·

Не налѧца́и налѧца́ѧи лк̑҇ꙋ свои, и҆ не въходѝ въ бро́нѧ ѻболче́ны.
не пощади́те ю҆́ноша е҆го, побїите все во́инъство е҆го.
и҆ падꙋтъ и҆збїе́нїи въ землѝ халдѣ́истеи, и҆ ꙗ҆зве́нїи въ странахъ и҆хъ.
поне́же не бѣ̀ ѻ҆вдов꙽ствова іи҆л҃ь і҆ и҆ѹ́да ѿ б҃а свое҆го г҃а вседръжи́телѧ, н̂о землѧ̀ и҆хъ напо́лнисѧ грѣха̀, ѿ ст҃го і҆и҆л҃ева.
бѣжите ѿ среды вавѵло́на, и҆ сп҃си кождо дш҃ꙋ свою.
не молчи́те ѻ҆ непра́вдѣ е҆го, занѐ мще́нїе е҆сть ѿ г҃а, мзд̑ꙋ тои възда́сть е҆мꙋ.
ча́ша зла́та е҆сть вавѵло́нъ в рꙋцѣ гн҃и, напаѧ́а вс̂ю зе́млю.
ѿ вина̀ е҆го пи́ша вс̂и ꙗ҆зы́цы, сего ради потрѧсо́шасѧ.
внеза́пꙋ падѐ вавѵло́нъ и҆ съкрꙋши́сѧ.
пла́чите по не́мъ.
възмѣте ма́сти къ бо́лѣзни е҆го, да и҆сцѣли́тсѧ·

врачева́хомъ вавѵло́нъ и҆ не и҆сцелѣ·

ѻ҆ста́вимъ и҆̀ і҆ и҆дѣмъ ко́жд̑о въ зе́млю свою.
възы́иде б̂о къ нб҃си сꙋ́дъ е҆го, и҆ възд̑ви́жесѧ къ ѻ҆блакомъ.
и҆знесе г҃ь пра́вды наша.
прїидѣте възвѣсти́мъ въ сїѻ́нѣ дѣ́ло г҃а б҃а на́шего.
наѻ҆стрѣте стрѣ́лы, и҆ напо́лните тꙋ́лы·

Възбꙋди г҃ь дх҃ъ цр҃еи мед̑скихъ, и҆ проти́вꙋ вавѵло́нꙋ мы́сль е҆го, да погꙋ́бит꙽ и҆̀.
поне́же мще́нїе гн҃е е҆сть мще́нїе до́мꙋ е҆го.
на стѣнах̑ вавѵло́н꙽скихъ възд̑ви́гнѣте зна́менїе, ѹ҆ставите стра́жа, възд̑ви́гнѣте стра́жꙋ, ѹ҆гото́вите зало́ги.
ꙗ҆́ко ѹ҆мы́сли г҃ь и҆ сътвори, ꙗ҆́же рече на живꙋщаѧ въ вавѵло́нѣ.
живы́и над̑ вода́ми мно́гами, бога́тъ въ сокро́вищехъ.
прїиде коне́цъ твои час̑҇ пресѣче́нїѧ твое҆го·

Клѧ́сѧ г҃ь вседержи́тель дш҃ею свое҆ю, ꙗ҆́ко напол̑҇ню тебѐ люд̑ми ꙗ҆́ко мши́цею, и҆ въспоет̑сѧ над̑ тобо́ю пѣснь·

Сътвори́выи зе́млю в си́лѣ свое́и, и҆ ѹ҆стро́ивыи вселе́нꙋю въ мꙋ́дрости свое́и, и҆ разꙋмѣ́нїемъ свои҆мъ проп꙽ныи нб҃са·

е҆гда̀ ѻ҆́нъ да́сть глас̑҇, ѹ҆мно́жатсѧ во́ды на нб҃си.
възд̑виза́ѧи ѻ҆́блаки ѿ коне́ць землѧ̀, мо́лнїю в꙽ до́ждь сътвори, и҆зводѧ̀ вѣтрь ѿ сокро́вищь своих̑·

ѻ҆бꙋѧ̀ всѧ́къ чл҃къ ѿ разꙋма, посрами́сѧ всѧ́къ слїѧ́тель въ и҆зваѧ́нїи е҆го.
ꙗ҆́ко ло́жъ е҆сть слїа́нїе е҆го, и҆ нѣсть дх҃а в них̑, сꙋетни сꙋть дѣ́ла и҆ смѣхꙋ досто́ини, въ ча́съ посѣще́нїѧ свое҆го поги́бнꙋтъ.
не ꙗ҆́ко сїе ча́сть і҆а́ковлѧ, н̂о сътвори́выи всѧческаѧ то́и е҆сть, а҆ і҆и҆л҃ь же́злъ достоѧ́нїѧ е҆го, г҃ь вседержи́тель и҆мѧ е҆го.
съкрꙋши́ши сими съсꙋ́ды бра́н꙽ныа.
и҆ а́зъ съкрꙋшꙋ въ тебѣ ꙗ҆зы́ки, и҆ погꙋблю в꙽ тебѣ црс̑҇твїа, і҆ и҆збїю в꙽ тебѣ конѧ и҆ всад̑ники е҆го.
і҆ и҆збїю в꙽ тебѣ колесни́цꙋ, и҆ всѣда́ющаго на ню.
і҆ и҆збїю в꙽ тебѣ мꙋж́а и҆ женꙋ̀.
і҆ и҆збїю в꙽ тебѣ ста́ра и҆ ѻ́трока.
і҆ и҆збїю в꙽ тебѣ ю҆́ношꙋ и҆ дв҃ꙋ, і҆ и҆збїю в꙽ тебѣ па́стырѧ и҆ ста́да е҆го.
і҆ и҆збїю в тебѣ ѻ҆рю́ща и҆ рабо́тна скота е҆го, і҆ и҆збїю в꙽ тебѣ вое҆во́дꙋ и҆ прави́телѧ.
и҆ възда́мъ вавѵло́нꙋ, и҆ всѣмъ жи́телем꙽ халдѣ́искимъ все ѕл̂о, е҆же сътвори́ша въ сїѻ́нѣ пред̑ лицемъ вашим꙽, гл҃етъ г҃ь·

Се̂ а҆зъ на́ тѧ го́ро смертоно́сна, гл҃етъ г҃ь, порꙋша́ѧи всю зе́млю.
и҆ прострꙋ рꙋ́кꙋ мою на́ тѧ, і҆ и҆звер꙽гꙋ т̂ѧ ѿ ка́мени, и҆ да́мъ т̂ѧ въ горꙋ съж꙽же́нїа.
не възмꙋ ѿ тебе ка́мень въ ѹ҆́гол꙽, и҆ ка́мень въ ѻ҆снова́нїе, н̂о потреби́шисѧ въ вѣ́ки, гл҃ет̑ гь.
възд̑ви́гнѣте зна́менїе на зем̑лѝ, въстрꙋби́те трꙋбо́ю въ ꙗ҆зыцх̑ѣ.
пост҃ите над̑ ни́мъ ꙗ҆зы́ки, възвѣсти́те на́нь цр҃еи а҆рарат̑, и҆мен꙽нїи, и҆ а҆стенесъ, въчти́те на́нь во́и, приведѣте конѧ ꙗ҆́ко мши́ца съ жа́лы.
пост҃ите ꙗ҆зы́ки на́нь, цр҃и мед̑ски, и҆ вое҆во́дъ е҆го, и҆ всѣхъ прави́телеи е҆го, и҆ всѧ крѣ́пкїа землѧ̀ е҆го·

И҆ потрѧсе́тсѧ землѧ̀ и҆ смꙋтит̑сѧ.
занѐ въста̀ на вавѷло́нъ мышле́нїе гн҃е, да положитъ зе́млю вавѷло́нъскꙋ пꙋстꙋ и҆ ненаселе́нꙋ.
преста́ша крѣ́пцѣи вавѷло́на ѿ бо́ю, живѧ́хꙋ на поса́дехъ, поги́бе хра́брость их̑, и҆ бы́ша ꙗ҆́ко же́ны.
заж꙽же́ны сꙋть станы е҆го, сътре́ны заво́ры е҆го.
бѣжа́и въ пꙋть текꙋща пости́же.
и҆ посолъ стрѣте посла̀, да възвѣстит̑ цр҃ю вавѷлонъскꙋ, ꙗ҆́ко взѧ́сѧ грд̑а е҆го ѿ кон꙽ца да́же до конца, и҆ броды заста́влени сꙋть, и҆ е҆зе́ра заж꙽же́на ѻ҆гнем̑, и҆ мꙋж́и воинъстїи смꙋще́ни сꙋть·

Та́ко б̂о гл҃етъ г҃ь вседръжи́тель б҃ъ іи҆л҃евъ.
дщ̂и вавѷло́нѧ ꙗ҆ко гꙋмно ча́съ млаченїѧ е҆го, е҆ще ма́ло и҆ прїидет̑ ча́съ жат̑вы е҆го.
снѣде м̂ѧ и҆ пожре м̂ѧ навходоносорь цр҃ь вавѷлоньскь, сътвори м̂ѧ ꙗ҆́ко сосꙋдъ пра́зденъ, пожре м̂ѧ ꙗ҆́ко ѕмїи, наполни чре́во свое тон꙽костїю мое́ю, і҆ и҆з꙽блева м̂ѧ.
неправд̑а на́ мѧ, и҆ пло́ть моѧ̀ на вавѷлонъ, гл҃етъ живы́и въ сїѻ́нѣ.
и҆ кро́вь моа на живꙋщаѧ въ халдѣех̑, рече і҆ерс̑҇лим̑·

Сего рад̑и̑ тако гл҃ет̑ г҃ь, с̂е аз̑ сꙋ́дити бꙋдꙋ прю твою̀, и҆ ѿм꙽щꙋ м꙽щенїе твое, и҆ пꙋсто сътворю̀ море е҆го, и҆с꙽сꙋшꙋ пото́ки е҆го.
и҆ бꙋдетъ вавѷлонъ въ́ гробы жили́ще ѕмїем̑·

чю́до и҆ позвизда́нїе, сего ра́ди да не бꙋдетъ живꙋща.
вкꙋпѣ ꙗ҆ко львове възревꙋтъ.
вла́сы и҆с꙽ себѐ терѕати бꙋдꙋтъ ꙗ҆́ко скѷмни.
въ го́рести их̑ поста́влю пи́тїе и҆хъ, и҆ ѹ҆пою ѧ҆̀ и҆ да ѹ҆снꙋтъ, и҆ спѧть сно́мъ вѣ́чном̑, и҆ не воста́нꙋт꙽, гл҃етъ г҃ь.
ѿведꙋ ѧ҆̀ ꙗ҆́ко а҆гньца на закла́нїе, и҆ ꙗ҆́ко ѻ҆́вны съ козлы̀.
ка́ко взѧ́сѧ сеса́хъ, и҆ ꙗ҆́то сла́вное въ все́и землѝ.
ка́ко бы́сть въ ѹ҆дивленїе вавѷло́нъ въ ꙗ҆́зы́цехъ.
възы́иде на вавѷло́нъ мо́ре, ѿ мно́жества во́лнъ е҆го покры́сѧ.
бы́ша гра́ды е҆го въ ѹ҆дивленїе, землѧ̀ ненаселе́на и҆ пꙋста, землѧ̀ в не́иже никто́же поживетъ, и҆ не пре́иде чресъ ню сн҃ъ чл҃чь·

И҆ посѣщꙋ на вее҆лѧ въ вавѷло́нѣ, і҆ и҆звергꙋ т̂о е҆же поглоти ѿ ѹ҆́стъ е҆го.
и҆ не съберꙋтсѧ вѧ́щ꙽ше к немꙋ̀ ꙗ҆ѕы́цы, ктомꙋ̀ и҆ стѣны вавѷло́ньски падꙋтъ·

И҆зыидѣте ѿ среды е҆го лю́дїе моѝ да сп҃сет̑ кождо дш҃ꙋ свою̀ ѿ гнѣ́ва ꙗ҆́рости гн҃ѧ.
и҆ да не ѹ҆мѧкчит̑сѧ срд̑це ва́ше, и҆ да не ѹ҆бои҆тесѧ слы́ша̑нїѧ, е҆же ѹ҆слы́шитсѧ на́ земли.
и҆ прїидетъ в лѣто слыша́нїе, и҆ по том̑ лѣте слыша́нїе, и҆ непра́вда на́ землю, и҆ вла́сть на власть·

Сего рад̑и̑ с̂е дн҃їе градꙋтъ, и҆ посѣщꙋ на и҆зваꙗ҆́ныѧ вавѷлонѧ, и҆ вс̂ѧ землѧ̀ е҆го посрами́тсѧ, и҆ всѝ ꙗ҆́звенїи е҆го падꙋтъ посредѣ е҆го.
и҆ хвалꙋ̀ въздадꙋтъ над̑ вавѷло́номъ нб҃са и҆ землѧ, и҆ всѧ̀ сꙋщаѧ в꙽ нихъ.
ѿ полꙋ́нощи б̂о прїидт̑ꙋ на́нь хи́щницы, гл҃етъ г҃ь·

И҆ ꙗ҆́коже сътвори вавѷло́нъ пада́ти ꙗ҆звенымъ въ і҆и҆л҃и, та́ко вавѷло́нѧ не падꙋтъ ꙗ҆́звенїи на все́и землѝ·

И҆збѣг꙽шеи меча̀, и҆дѣте и҆ не сто́ите, въспомѧни́те да́лнѧа гн҃ѧ, і҆ерс̑҇ли́мъ възы́иде на срд̑це ва́ше·

Посрами́хом̑сѧ, зане слы́шахомъ рꙋга́нїе.
покры срамота̀ лице на́ше, ꙗ҆́ко прїидо́ша чюжд̑и на ѻ҆сщ҃енїе до́мꙋ гн҃ѧ·

Сего ра́ди с̂е дн҃їе грѧдꙋтъ гл҃ет̑ г҃ь.
и҆ посѣщꙋ на и҆зваѧ́нїа е҆го, и҆ по все́и зе́мли е҆го возревꙋтъ ꙗ҆́звенїи.
въстꙋпитъ л̂и вавѷло́нъ на́ нб҃о, и҆ ѹ҆тверди́тъ на высотѣ̀ крѣпость свою, ѿ менѐ прїидꙋтъ гꙋби́теле е҆го, гл҃етъ г҃ь.
гла́съ во́плѧ вавѷло́ньска, и҆ сътренїе вели́ко ѿ землѧ халдѣ́иски.
ꙗ҆ко погꙋби г҃ь вавѷло́нъ, и҆ сътре ѿ него̀ гла́съ велїи.
и҆ возшꙋмѧ́тъ во́лны е҆го ꙗ҆́ко во́ды мно́ги, даде глас̑҇ шꙋмъ и҆хъ.
ꙗ҆́ко прїиде на́нь.
та́кожд̑е на вавѷлонъ хи́щникъ, і҆ и҆зыма́ни сꙋть си́лнїи е҆го, и҆ ѹ҆вѧде лꙋкъ их̑.
ꙗ҆́ко си́лныи м꙽ститель г҃ь възвращает̑ м꙽здꙋ.
и҆ ѹ҆пою кнѧ́ѕѧ е҆го и҆ мꙋ́дрыѧ е҆го, вое҆во́ды е҆го и҆ прави́телѧ е҆го, и҆ сил꙽ныа е҆го, и҆ ѹ҆снꙋтъ сномъ вѣ́чном̑, и҆ не възбꙋжд̑ꙋ, гл҃ет̑ цр҃ь, г҃ь вседръжи́тель и҆мѧ е҆го.

Та́ко гл҃етъ г҃ь вседръжитель.
стѣна̀ вавѷло́ньска сїѧ преширо́ка под̑копа́нїем̑ под̑копана бꙋдетъ, и҆ вра́та е҆го высо́ки ѻ҆гнем̑ сож꙽жены бꙋдꙋтъ.
и҆ крѣпость лю́дьска в ничтоже, и҆ ꙗ҆зы́цы ѻ҆гнемъ во́змꙋтсѧ и҆ поги́бнꙋт꙽·

Сло́во е҆же завѣща і҆еремїа про̑҇ркъ, сара́еви сн҃ꙋ ни́рїинꙋ сн҃а маа́сїѻва.
внегда̀ и҆́де съ седекїею цр҃емъ въ вавѷлон꙽, в лѣто четве́ртое црс̑҇тва е҆го.
сара́и же бѣ жрець прро̑҇чествїѧ.
и҆ написа̀ і҆еремїѧ вс̂е ѕло̀ е҆же и҆мѣ прїити на вавѷлонъ, въ е҆ді́нꙋ кни́гꙋ вс̂ѧ словеса̀ сїа, ꙗ҆́же пи́сана сꙋть на вавѷлон̑҇.
и҆ рече і҆еремїѧ къ сара́ю, е҆гда̀ вни́деши въ вавѷлон꙽, и҆ ѹ́зриши и҆ проч꙽теши вс̂ѧ словеса сїа, гл҃ѧ.
г҃и т̂ы реклъ е҆си проти́вꙋ гра́дꙋ семꙋ̀ погꙋби́ти и҆̀, и҆ да не бꙋдетъ живѧ́и в немъ ѿ чл҃ка и҆ до ско́та, и҆ да бꙋ́детъ въ вѣ́чнꙋ пꙋсты́ню.
и҆ е҆гда̀ прочте́ши кни́гꙋ сїю, привѧжѝ к не́и ка́мень, и҆ в꙽верзи ю҆̀ по́средѣ е҆ѷфрата, и҆ рцы̀.
та́ко потопи́тсѧ вавѷлонъ, и҆ не въста́нетъ ѿ лица̀ ѻ҆злобле́нїѧ, ꙗ҆́же а́зъ приведꙋ̀ на́нь, и҆ разори́тсѧ·

Даже доселѣ словеса̀ і҆еремїина·

Глв̑҇а, н҃в·

Сꙋщꙋ дв̂ꙋдесѧти и҆ е҆дїномꙋ лѣтꙋ.
бы́сть седекїѧ внегда̀ нача̀ црс̑҇твова́ти.
и҆ црс̑҇твова въ і҆ерс̑҇ли́мѣ, а҃і лѣтъ·

И҆мѧ мт҃ри е҆го а҆мита́ль, дщ̂и і҆еремїина ѿ ло́вна.
и҆ се́и твори зла́ѧ пред̑ ѻ҆чи́ма гн҃има по всемꙋ̀ е҆же творѧше і҆ѻ҆а́кимъ·

Ꙗ҆́ко ꙗ҆́рость гн҃ѧ бы́сть на і҆ерс̑҇ли́мъ и҆ на і҆ѹ́дꙋ, даже і҆ ѿвр́ьже их̑ ѿ лица свое҆го.
и҆ ѿстꙋпи седекїѧ ѿ цр҃ѧ вавѷлоньска·

И҆ бы́сть въ девѧ́тое лѣто црс̑҇тва е҆го, въ десѧ́тыи мс̑҇ць въ десѧтыи дн҃ь мс̑҇ца·

Прїиде навходоно́соръ цр҃ь вавѷлоньскь, и҆ всѧ̀ сила е҆го на і҆ерс̑҇ли́мъ.
и҆ ѻ҆блего́ша и҆̀, и҆ сътвори́ша ѻ҆́крс̑҇тъ е҆го ѻ҆строгъ·

И҆ бы́сть въ ѻ҆блѧженїи гра́дъ даже до е҆ді́нагонадесѧте лѣта црс̑҇тва седекїина.
мс̑҇ца же четвертаго въ ѳ҃ дн҃ь, ѹ҆тверди́сѧ глад̑ въ гра́дѣ, и҆ не бѣа́ше хлѣба лю́демъ землѧ̀.
и҆ просѣко́ша град̑, и҆ вс̂и мꙋжи вои҆нъстїи и҆зыдо́ша но́щїю пꙋтемъ врат̑ и҆же е҆сть межд̑ꙋ двѣма стѣна́ми, ꙗ҆́же бѣа́ше ѹ҆ ѻ҆гра́ды цр҃евы.
хал꙽дѣи же добыва́хꙋ град̑ ѻ҆́крс̑҇тъ лежа́ще.
и҆ ѿи҆до́ша пꙋтемъ во а҆рава, и҆ гна̀ сила халдѣ́иска въ слд̑ѣ цр҃ѧ.
и҆ постиже и҆̀ ѻ҆бонꙋ странꙋ̀ і҆ерихона, и҆ всѝ ѻ҆троцы е҆го расыпа́шесѧ ѿ него̀.
и҆ ꙗ҆́ша цр҃ѧ, и҆ приведо́ша и҆̀ къ цр҃ю вавѷло́ньскꙋ до ревла́та ѻ҆́чи же седекїи и҆злꙋпи и҆ свѧза и҆̀ ѹ҆́зами.
и҆ приведе и҆̀ цр҃ь вавѷлонъскъ въ вавѷлонъ.
и҆ вдас̑҇ и҆̀ въ град̑ же́рнъвар꙽скь, до дн҃е во́ньже ѹ҆́мре·

Въ десѧтыи же дн҃ь пѧ́таго мс̑҇ца.
лѣто т̂о девѧ́тоенадесѧтъ навходоносо́рꙋ цр҃ю вавѷло́ньскꙋ.
прїиде навꙋзарданъ а҆рхимахиръ, и҆же стои́тъ пред̑ лицемъ цр҃ю вавѷлон̑҇скꙋ, въ і҆ерс̑҇ли́мъ.
и҆ пож꙽же храм̑ гн҃ь и҆ до́мъ цр҃евъ, и҆ вс̂ѧ до́мы гражд̑а́ньски, и҆ всѧ́къ хра́мъ вели́къ съж꙽же ѻ҆гнемъ.
и҆ всѧкꙋ стѣ́нꙋ і҆ерс̑҇ли́млю ѻ҆́крс̑҇тъ разори си́ла халде́иска, и҆же бѣа́ше съ а҆рхимахиром̑.
ѻ҆ста́нок꙽ же людїи и҆же ѻ҆ста́ша въ і҆ерс̑҇ли́мѣ, і҆ и҆збѣг꙽шихъ и҆же ѹ҆бѣжа́ша къ цр҃ю вавѷлоньскꙋ, і҆ и́ныхъ людїи заведе навꙋзарда́нъ вое҆во́да въ вавѷлонъ.
толи́ко ѻ҆ста́ви лю́дїи ѹ҆бо́гихъ и҆ рабо́тныхъ, дѣлателе́и виногра́да и҆ ра́таевъ·

Столпы же мѣдѧ́ныа и҆же въ хра́мѣ гн҃и, и҆ стпени, и҆ мо́ре мѣ́дѧное е҆же в꙽ хра́мѣ гн҃и, съкрꙋши́ша халде́и·

и҆ взѧ́ша мѣдь и҆хъ, и҆ ѿнесо́ша въ вавѷлон̑҇, и҆ но́ги и҆ под̑поры, и҆ ѻ́боды и҆ чаша, и҆ рожны и҆ вс̂ѧ сосꙋды мѣ́дѧныѧ, в ни́хъже слꙋжа́хꙋ.
и҆ ѻ҆паница, и҆ пѣсньница і҆ и҆злива́ла и҆ свѣти́ла, и҆ кади́лница и҆ ча́ша.
е҆же б̂ѣ зла́то и҆ сребрено, взѧ̀ а҆рхимахи́ръ.
столпа дв̂а и҆ мо́ре е҆ді́но.
и҆ телецъ, в҃і, мѣдѧнъ, под̑ моремъ, ꙗ҆́же сътвори цр҃ь соло́мон̑҇ въ хра́мѣ гн҃и.
не бѣ̀ мѣры мѣ́ди сосꙋдъ тѣхъ.
столпъ же ѹ҆бо е҆дин̑҇ ко́ждо и҃і, лакти б̂ѣ высота̀.
вервь же, в҃і лакти ѻ҆́крс̑҇тъ е҆го ѻ҆б꙽держаше.
тол꙽стота́ же четы́рь перьстъ ѻ҆́крс̑҇тъ, внꙋтръ же пра́зденъ б̂ѣ, и҆ глава̀ на не́ю мѣ́дѧна, е҃ ла́котъ высота̀ главы̀ ко́ждо вс̂е мѣ́дѧно.

Та́кождеж̑ и҆ второ́мꙋ столпꙋ.
и҆ мрежа̑ зла́та, н҃ пꙋг꙽ъвъ на вѣн꙽ци ѻ҆́крс̑҇тъ вс̂е бѣѧше мѣдѧно·

Та́кожд̑е бы́сть и҆ вторыи сто́лпъ.
и҆ бѣѧ́ше пꙋг꙽въ ч҃ и҆ ѕ҃, е҆ді́на страна.
и҆ бѣше всѣхъ пꙋг꙽въ мре́жных̑ ѻ҆́крс̑҇тъ, р҃·

И҆ взѧ̀ а҆рхимахи́ръ саре́ю жеръца старѣишаго, и жерца софо́нїѧ вто́раго, и҆ тр̂и набдѧ́щаѧ пꙋть.
и҆ ѿ гра́да поѧ̀ каже́ника е҆ді́наго, иж̑ б̂ѣ приста́вникъ мꙋжь во́инъских̑.
и҆ сед̑мь мꙋжь нарочитыхъ, и҆же сѧ ѻ҆брѣтоша пред̑ лицемъ цр҃ю въ градѣ, и҆ кни́гъчїѧ си́лныхъ, и҆ ѹ҆ча́щаго кни́гам꙽, и҆ лю́ди и҆ землѧ̀, и҆ ѯ҃ мж̑ꙋ ѿ лю́дїи землѧ̀ и҆же сѧ ѻ҆брѣто́ша среди гра́да.
и҆ поѧ̀ ѧ҆̀ навꙋзардан̑҇ архимахи́ръ, и҆ приведе ѧ҆̀ къ цр҃ю вавѷлоньскꙋ до ревла́та.
і҆ и҆зби ѧ҆̀ цр҃ь вавѷлоньскъ в꙽ ревла́тѣ въ землѝ и҆и҆ѳамлѣ.
и҆ пренесе́нъ е҆сть і҆ѹ́да ѿ землѧ̀ своа·

Си е҆сть лю́дїе их̑же преселѝ навходоносоръ в сед̑мое лѣто.
жидовъ ҂г҃, и҆ к҃ и҆ г҃. во и҃і лѣто, навходоносоръ и҆зъ е҆рс̑҇ли́ма дш҃ъ ѻ҆смьсотъ л҃в, пресели·

Въ к҃г лѣто навходоносора, пресели навꙋзардан꙽ а҆рхимахи́ръ жидовъ, дш҃ъ сед̑мь сот̑ и҆ м҃е.
всѣх же дш҃ъ ҂д҃ и҆ х҃·

И҆ быс̑҇ въ л҃з лѣто, преселенїѧ іѻ҆а́кима цр҃ѧ і҆ѹ́дина, въ к҃е дн҃ь мс̑҇ца в҃і.
взѧ̀ е҆лемадарахъ цр҃ь вавѷлоньскїи въ пр́ьвое лѣто црс̑҇тва свое҆го, главꙋ̀ і҆ѻ҆а҆ки́ма цр҃ѧ і҆ѹ́дина.
і҆ и҆зведе и҆̀ и҆с꙽ храма в немже стрежа́шесѧ, и҆ гл҃а е҆мꙋ бл҃гаѧ.
и҆ даде сто́лъ е҆го вы́ше цр҃ь, и҆же с ни́мъ въ вавѷлонѣ.
і҆ и҆змѣни ры́зы е҆го темни́чныѧ.
и҆ ꙗ҆дѧ́ше хлѣбъ всегда̀ пред̑ лицемъ е҆го въ всѧ̀ дн҃и живота̀ свое҆го.
и҆ ѹ҆рок̑҇ е҆мꙋ даа́шесѧ всегда̀ ѿ цр҃ѧ вавѷлон̑҇ска, до дн҃е во́ньже ѹ҆́мре въ всѧ̀ дн҃и живота̀ е҆го·

Коне́цъ прро̑҇кꙋ і҆еремїи·

и҆́мать в себѣ̀ главъ, н҃в·