ПЛ́АЧЬ И҆Є҆РЄМИ́Є҆ВЪ
ГЛАВА̀ А҃
И҆ быс̑҇ по плѣненїи і҆и҆л҃вѣ, и҆ по ѻ҆пꙋстѣнїи і҆ерс̑҇ли́мли.
сѣде і҆еремїѧ плача, и҆ пла́касѧ·
пла́чь се́и по і҆ерс̑҇ли́мѣ·
и҆ рече.
А҆лефъ·
Ка́ко сѣде е҆дин̑҇ гра́де, ѹ҆мно́женыи люд̑ми.
бы́сть ꙗ҆ко вдови́ца, ѹ҆мно́женыи въ странах꙽.
владѧ́и страна́ми, бысть повине́нъ·
Бе́тъ·
Плача пла́касѧ в но́щи, и҆ слезы е҆го на лани́тꙋ е҆го.
и҆ нѣсть ѹ҆тѣша́юща е҆го, ѿ всѣхъ любѧщихъ е҆го.
вс̂и дрꙋжа́щесѧ с ни́мъ ѿвръго́шасѧ е҆го, и҆ бы́ша е҆мꙋ вра́ѕи·
Ги́мель·
Пресели́сѧ і҆ѹ́да ѿ смиренїѧ е҆го, и҆ ѿ мно́жества рабо́ты е҆го.
сѣде в꙽ странах̑ и҆ не ѻ҆брѣте поко́ѧ.
вс̂и женꙋще́и е҆го пости́гнꙋша и҆̀ среди стꙋжа́ющих̑.
да́летъ·
Пꙋтїе сїѻ́ни рыда́ша, ꙗ҆́ко нѣсть ходѧ́щихъ по нихъ въ празд̑никъ.
вс̂ѧ вра́та е҆го погꙋблена, жерцы е҆го възды́шют꙽, дѣви́цы е҆го ведо́мы, и҆ са́мъ ѻ҆горчева́ѧ въ себѣ̀·
Ге·
Бы́ша стꙋжа́ющеи е҆мꙋ въ зача́ло.
и вра́ѕи е҆го гоб꙽зъствꙋ́ютъ.
ꙗ҆́ко г҃ь смири и҆̀, мно́жеством̑ нече́стїѧ е҆го.
младе́нцы е҆го ѿи҆доша плѣне́ни пред̑ лицемъ стꙋжа́ющаго·
Ва́фъ·
И҆ ѿꙗ҆́сѧ ѿ дщерїи сїѻ́нѧ всѧ̀ лѣпота еѧ̀.
бы́ша кнѧ́ѕи е҆го, ꙗ҆́ко ѻ҆́вни не и҆мꙋщеи па́жити.
и҆ хожд̑а́хꙋ не съ крѣпостїю пред̑ лице́мъ гонѧ́щаго·
Заи҆́нъ·
Помѧнꙋ і҆ерс̑҇лим̑ дн҃и смиренїѧ свое҆го, и дн҃и безако́нїѧ свое҆го, и҆ вс̂ѧ похо́ти своа, е҆же и҆мѣа́ше во́ дн҃и прьвыѧ.
е҆гда̀ въпаде въ рꙋ́цѣ стꙋжа́ющаго, и҆ не бѣ̀ помага́ющаго е҆мꙋ.
видѣвше вра́ѕи е҆го посмѣа́шасѧ въ преселе́нїе е҆го·
Гетъ·
Грѣхомъ съгрѣшѝ і҆ерс̑҇ли́мъ, того ра́ди въ мѧтежъ бы́сть.
вс̂и славѧ́щеи е҆го смириша и҆̀, ви́дѣша б̂о срам̑ е҆го.
се́и же въздыха́ѧ ѻ҆братисѧ воспѧтъ·
Тетъ·
Нечистота е҆го пред̑ нога́ма е҆го, не поменꙋ послд̑ѣнихъ свои҆хъ.
и҆ снесе пресилнаѧ, и҆ нѣсть и҆же ѹ҆тѣшит̑ и҆̀·
ви́ждь г҃и смиренїе мое, ꙗ҆́ко възвели́чисѧ вра́гъ·
І҆ѻ҆дъ·
Рꙋ́кꙋ свою протре стꙋжа́ѧи на всѧ̀ ѹ҆твари е҆го, видѣ б̂о страни въшед̑ша въ ст҃ыню е҆го.
и҆́мже повелѣхъ не внити въ собо́ръ тво́и·
ка́фъ·
Вс̂и лю́дїе е҆го въздышꙋще, и҆́щꙋтъ хлѣ́ба.
да́ша драга́а своа въ пищꙋ, ꙗ҆́ко ѻ҆брати́ти дш҃ꙋ.
ви́ждь г҃и, и҆ знамена́и ꙗ҆́ко бых̑ нечиствова́нъ·
Ла́медъ·
Вс̂и и҆же къ вамъ проходѧ́щеи пꙋть да сѧ ѻ҆бра́тѧтъ и҆ да ви́дѧт꙽.
а҆ще е҆сть бо́лѣзнь, ꙗ҆́ко болѣзнь моѧ̀.
поне́же и҆збра̀ м̂ѧ ꙗ҆ко виноград̑, ꙗ҆кож̑ гл҃а г҃ь въ дн҃ь ꙗ҆рости свое́ѧ·
Мемъ·
С высоты свое́ѧ и҆спꙋсти ѻ҆́гнь въ кости моѧ̀.
и наѹ҆чи м̂ѧ, и҆ препѧ̀ сѣти нога́мъ мои́мъ, и҆ ѻ҆брати м̂ѧ въспѧтъ.
да́сть м̂ѧ г҃ь въ погꙋбленїе ве́сь дн҃ь болѣзнꙋю́щь·
Нꙋнъ·
Ѹ҆бꙋди́сѧ и҆́го на нечествова́нїа моа̀ въ рꙋ́кꙋ мое́ю, съплетошасѧ и҆ възыидо́ша на вы́ю мою̀.
ѿнемо́жесѧ въ мнѣ крѣпость моѧ, ꙗ҆́ко даде г҃ь въ рꙋкꙋ мое́ю болѣзнь и҆ не возмогꙋ ста́ти·
Самехъ·
Ѿѧ̀ вс̂ѧ крѣп꙽киѧ моа̀ г҃ь ѿ среды мое́ѧ.
призва на мѧ го́дъ, ꙗ҆́коже съкрꙋшити и҆збра́нныѧ моа̀.
точило и҆збра̀ г҃ь дв҃ицы дщери і҆ѹ́динѣ·
А҆и́нъ·
Сего ради а҆зъ пла́чю, и҆ ѻ́чи моѝ и҆злїастѣ во́дꙋ.
ꙗ҆́ко ѹ҆далисѧ ѿ мене ѹ҆тѣша́ѧи м̂ѧ и҆ ѻ҆браща́ай дш҃ꙋ мою и҆ погибо́ша сн҃ве моѝ ꙗ҆́ко воз̑може враг̑҇.
Фе·
Въздѣ рꙋцѣ своѝ сїѻнъ, и҆ нѣсть иже ѹ҆тѣшитъ и҆̀.
заповѣ́да г҃ь на і҆а́кова, ѻ́крс̑҇тъ е҆го врагѝ е҆го.
и҆ бы́сть і҆ерс̑҇лимъ ꙗ҆́ко ѻ҆скверне́на кровоточе́нїемъ в꙽ нихъ·
Ца́ди·
Пра́веденъ е҆сть г҃ь, ꙗ҆́ко ѹ҆ста̀ е҆го ѻгорчих꙽.
слы́шите ѹ҆бо вси лю́дїе, и҆ ви́дѣте бо́лѣзнь мою.
двц҃а моѧ и҆ ю́ноты ѿи҆до́ша плѣнены·
Ко́фъ·
Позва́хъ и҆зволеныѧ моѧ, и҆ тїи же преѻ҆бѣдиша м̂ѧ.
жръцы моѝ и҆ ста́рцы моѝ во́ градѣ ѻ҆скꙋдѣша, ꙗ҆́ко възыска́ша пи́щꙋ себѣ да ѹ҆крѣпѧт̑ дш҃а своѧ, и҆ не ѻбрѣто́ша·
Ре́шъ·
Ви́ждь г҃и ꙗ҆́ко пекꙋсѧ, и҆ ѹ҆троба моѧ смѧте́сѧ въ мнѣ.
и҆ превратис̑҇ срд̑це мое, ꙗ҆́ко горести и҆сполних̑сѧ.
внѣ погꙋбѝ мечь, а҆ в꙽ домꙋ смр҃ть·
Ши́нъ·
Слы́шаша ѹ҆бо въздыха́нїе мое, и҆ нѣсть ѹ҆тѣшителѧ мнѣ.
вс̂и вра́ѕи мои ѹ҆слы́шавше зла́ѧ моѧ, и҆ пора́довашасѧ, ꙗ҆́ко т̂ы сътворил̑҇ е҆си.
приведѝ дн҃ь ѹ҆тѣше́нїѧ, и҆ бꙋдꙋтъ подо́бни м̂и·
Та́фъ·
Да прїидетъ все безако́нїе и҆хъ пред̑ тѧ.
и҆ погꙋбѝ и҆хъ ꙗ҆́коже и҆ мене ради всѣхъ грѣховъ мои҆хъ.
ꙗ҆́ко многа сꙋть стенанїѧ моѧ, и҆ срд̑це мое скорби́тъ·
Глв̑҇а, в҃·
А҆́лефъ·
Ка́ко ѻ҆мрачи въ гнѣ́вѣ своем̑ г҃ь дще́рь сїѻ́ню.
съверже съ нб҃се на́ землю сла́вꙋ і҆и҆л҃евꙋ.
и҆ не помѧнꙋ под̑но́жїа но́гꙋ свое҆ю въ дн҃ь гнѣ́ва и҆ ꙗ҆рости свое҆ѧ·
Бе́тъ·
Погрꙋзи г҃ь и҆ не поща́ди всѣ́хъ кра́сныхъ і҆а́ковль.
разори ꙗ҆́ростїю
Ги́мель·
Съкрꙋши въ гнѣ́вѣ ꙗ҆́рости свое҆ѧ вес̑҇ ро́гъ і҆и҆л҃евъ.
ѻ҆брати въспѧ́ть десни́цꙋ е҆го ѿ лица̀ врагꙋ.
и҆ раждеже въ і҆аковѣ ꙗ҆́ко ѻ҆́гнь пла́мы, и҆ потреби вс̂е ѻ҆́крс̑҇тъ·
Да́летъ·
Напрѧже лꙋкъ свои ꙗ҆́ко ра́тникъ, ѹ҆тверди десни́цꙋ свою ꙗ҆́ко сꙋпостат̑.
і҆ и҆зби всѧ кра́снаа ѻ҆́чїю мое҆ю.
в селех̑ дщери сїѻ́нѧ.
разлїѧ ꙗ҆ко ѻ҆́гнь ꙗ҆́рос̑҇ свою̀·
Ге·
Бы́сть г҃ь въ врага мѣ́сто, погрꙋзи і҆и҆л҃ѧ.
погрꙋзи вс̂ѧ сн҃ы е҆го.
расы́па всѧ стѣ́ны е҆го.
и҆ ѹ҆мно́жи дще́ри сїѻ́нѣ, смире́на и҆ смире́нꙋ·
Ва́фъ·
И҆́ прострѐ ꙗ҆́ко виногра́дъ хра́мы е҆го, расы́па празд̑ники е҆го.
забы̀ г҃ь е҆же сътвори в сїѻ́нѣ пра́зд̑ники и҆ сꙋбо́ты.
и҆ разгнѣ́ва запреще́нїемъ гнѣ́ва свое҆го цр҃ѧ и҆ кн҃ѕѧ и҆ жерца̀·
За́инъ·
Ѿри́нꙋ г҃ь тре́бникъ свои, ѿтрѧсе ст҃ынѧ своѧ.
съкрꙋши в рꙋцѣ вра́жїи забра́ла гра́да е҆ѧ̀.
глс̑҇а възд̑а́ша въ домꙋ̀ гн҃и, ꙗ҆́ко въ дн҃ь празд̑ника·
Гетъ·
Помы́сли г҃҃ь расы́пати стѣ́нꙋ дще́ри сїѻ́нѧ.
протѧ́же мѣ́рꙋ.
не ѻбрати́сѧ рꙋка̀ е҆го ѿ попра́нїѧ.
и҆ сѣтова пред̑гражденїе, и҆ гра́дъ въкꙋ́пѣ сѣтова́ста·
Те́тъ·
Врасто́ша въ зе́млю вра́та е҆ѧ̀.
погꙋбѝ и҆ съкрꙋши ве́рїѧ е҆ѧ̀, цр҃ѧ е҆ѧ̀ и҆ кн҃ѕи е҆ѧ̀ въ стра́нахъ.
нѣ́сть в нем̑ зако́на, и҆ прро̑҇цы е҆ѧ̀ не ви́дѣша видѣнїѧ ѿ г҃а·
И҆ѻ́дъ·
Сѣдо́ша на землѝ и҆ ѹ҆молко́ша старѣ́ишины дще́ри сїѻ́нѧ.
въсыпа́ша̑ пер꙽сть на главы̀ своѧ̀, препоѧ҆са́шас̑҇ въ врѣтища.
ѻ҆бнизиша на землѝ старѣ́ишины дще́ри і҆ерс̑҇лимлѧ·
Ка́фъ·
Ѡ҆скꙋдѣ́ста ѻ҆́чи мои слеза́ми, смꙋтис̑҇ срд̑це мое, расы́пасѧ на землѝ сла́ва моѧ, ѻ҆ съкрꙋше́нїи дще́ри людїи мои҆хъ.
внегда̀ ѻ҆скꙋдѣ младе́нець и҆ с꙽сы́и, въ сто́гнахъ град̑ныхъ·
Ламедъ·
Мт҃ремъ свои҆мъ реко́ша, гд̂ѣ пшеница и҆ вино̀.
внегда̀ раслаблѧ́хꙋ ꙗ҆́ко ꙗ҆зве́ни на сто́гнахъ град̑ныхъ.
вънегда̀ расыпа́хꙋсѧ дш҃а и҆хъ в ло́нѣ мт҃ре и҆хъ·
Ме́мъ·
Чт̂о ти совѣтꙋ́ю, и҆ли чт̂о ти сѧ кленꙋ дщи і҆ерс̑҇лим̑лѧ.
кт̂о т̂ѧ сп҃сет̑, и҆ли кт̂о т̂ѧ ѹ҆тѣшитъ дв҃це дщи сїѻ́нѧ.
ꙗ҆́ко възвели́чисѧ ча́ша съкрꙋше́нїѧ твое҆го, и҆ кт̂о т̂ѧ и҆сцѣлитъ·
Нꙋ́нъ·
Прро̑҇цы твои видѣша тебѣ сꙋдѧ́а и҆ безꙋмїе, и҆ не ѻ҆бличи́ша ѻ҆ непра́вдѣ твое́и, ꙗ҆́коже възврати́ти плѣн꙽ники твоѧ̀.
и҆ ви́дѣша тебѣ словеса̀ сꙋѧ́а, і҆ и҆зринове́нїѧ·
Саме́хъ·
Въс꙽плеска́ша рꙋкама ѻ҆ тебѣ вс̂и минꙋющеи пꙋтем꙽, позвизда́ша и҆ покива́ша главою их̑, ѻ҆ дще́ри і҆ерс̑҇лим꙽ли рекꙋще.
с̂е ли гра́дъ вѣнецъ сла́вѣ весе́лїе всеѧ̀ землѧ̀·
А҆́и҆нъ·
Ѿверзо́ша на́ тѧ ѹ҆ста̀ своѧ̀ вс̂и враѕи твои.
позвизда́ша и҆ поскрежета́ша зꙋбы свои҆ми, и҆ рѣша, поглоти́мъ ю҆̀.
ѻ҆ба́че сеи дн҃ь е҆го́же чаѧ́хомъ, ѻ҆брѣто́хом̑ и҆ ви́дѣхом̑·
Фе·
Сътвори г҃ь е҆же помы́сли, скон꙽ча словеса̀ своѧ̀, ꙗ҆́же заповѣ́да ѿ дн҃еи пе́рвыхъ.
разори и҆ не пощадѣ, и҆ възвесели ѻ҆ тебѣ вра́га, и҆ възнесе ро́гъ стꙋжа́ющаго т̂и·
Ца́ди·
Възопи срд̑це и҆хъ къ г҃ꙋ на стѣнах꙽ дще́ри сїѻ́нѧ.
да и҆злїю́тъ ꙗ҆́ко и҆ водоте́чїѧ сле́зы дн҃ь и҆ но́щь.
не да́жд̑ь ѹ҆трезве́нїа себѣ, и҆ да не премолцает̑ ѕѣни́ца ѻ҆́чїю твое҆ю·
Ко́фъ·
Въста́ни стꙋжи въ но́щи въ нача́лѣ страж꙽бѣ твое́и.
и҆ пролїи ꙗ҆́ко во́дꙋ срд̑це свое, пред̑ лицемъ гн҃имъ.
и҆ възд̑ви́гни к немꙋ рꙋцѣ свои, ѻ҆ дш҃ахъ младе́нецъ твои҆хъ расла́бленыхъ гла́домъ, ѿ нача́ла всѣхъ и҆сход̑·
Ре́шъ·
Ви́ждь г҃и и҆ призри, кого е҆си ѻ҆требил̑҇ си́це.
а҆ще и҆з꙽ꙗ҆дѧтъ же́ны пло́дъ ѹ҆тро́бы свое҆ѧ, ѻ҆требле́нїе сътвори съкачи, и҆збїю́тъ младе́нца с꙽сꙋщаѧ со́сца.
а҆ще ѹ҆бїеши въ ст҃ыни гн҃и жерца и҆ прро̑҇ки·
Ши́нъ·
Ѹ҆спо́ста на и҆схо́дехъ зе́мныхъ ѻ҆́трокъ и҆ ста́рецъ, дв҃цы мои и҆ ю́ноты ѿи҆до́ша плѣне́ны, мече́мъ и҆ гла́дом̑ и҆збѝ въ дн҃ь гнѣ́ва твое҆го, свари и҆ не пощадѣ·
Та́фъ·
Призва̀ ꙗ҆́ко и҆ въ дн҃ь пра́зд̑ника ѻ҆бита́нїѧ мое҆го ѻ҆́крс̑҇тъ.
и҆ не бы́сть въ дн҃ь гнѣ́ва гн҃ѧ ѹ҆цѣлѣваѧи, и҆ ѻ҆ста́вленъ.
и҆хже въскорми́хъ и҆ въздои́хъ, вра́гъ мои погꙋби́лъ е҆̀·
Глв̑҇а, г҃·
А҆́лефъ·
Азъ мꙋ́жъ видѧ нищетꙋ мою, жезлом̑ ꙗ҆́рости е҆го на́ мѧ.
поѧ̀ м̂ѧ и҆ ведѐ въ тмꙋ а҆ не въ свѣтъ.
ѻ҆ба́че на мнѣ ѻ҆брати рꙋ́кꙋ свою ве́сь дн҃ь·
Бе́тъ·
Ѡ҆бет꙽ши пло́ть мою и҆ ко́жꙋ мою, и҆ ко́сти моѧ съкрꙋши.
съгради на́ мѧ, и҆ ѻ҆бъѧ̀ главꙋ мою̀, и҆ трꙋдих̑сѧ.
въ те́мных̑ посади м̂ѧ ꙗ҆́ко и҆ мр҃твеца вѣ́чныѧ·
Ги́мель·
Ѡ҆гради м̂ѧ и҆ не и҆зы́идꙋ, ѹ҆тѧж꙽чи ѻ҆ко́вы моа.
се же ꙗ҆ко въскричꙋ и҆ возопїю, ѻ҆гради мл҃твꙋ мою.
въз꙽град̑и̑ пꙋти моѧ, загради стеѕѧ̀ моѧ и҆ възмѧте·
Далетъ·
Бысть ꙗ҆́ко мед̑вѣдь ловѧ́и, присѣдѧ́и ми ꙗ҆́ко и҆ ле́въ въ съкровеныхъ.
гна̀ ѿстꙋпи́вша и҆ покои м̂ѧ, и҆ положи м̂ѧ поги́бша.
напрѧже лꙋкъ свои, и҆ поста́ви м̂ѧ ꙗ҆́ко зна́менїе на стрѣлѧнїе·
Ге·
И҆́спꙋсти въ лѧдвїѧ моа стрѣлы тꙋла свое҆го, и҆ быхъ въ смѣхъ всм̑ѣ лю́демъ, пѣснь и҆хъ весь дн҃ь.
насыти м̂ѧ горести, напои҆ мѧ жел꙽чи.
Вафъ·
И҆́зъѧ̀ числомъ зꙋбы моа̀, напита мѧ пепеломъ.
ѿринꙋ ѿ ми́ра дш҃ꙋ мою̀, и҆ забых̑ бл҃готы.
и҆ рѣх꙽ поги́бе побыть моа̀ и҆ надежда моѧ ѿ г҃а·
Заи́нъ·
Помѧни нищетꙋ мою̀, и҆ ѻ҆тогнанїѧ мое҆го.
го́ресть и҆ желчь мою помѧнꙋхъ, и҆ стꙋжит̑ с̂и въ мнѣ̀ дш҃а моѧ̀.
сїѧ въспомина́ѧ въ срд̑ци моем̑ на́ бг҃а надѣа́тисѧ бꙋ́дꙋ·
Гетъ·
Млс̑҇ть гн҃ѧ ꙗ҆́ко не погибо́хомъ, не минꙋша б̂о щедроты е҆го.
позна́хъ въ ѹ҆́трїи ꙗ҆́ко мно́га е҆сть вѣра твоа.
ча́сть моа г҃ь, реч̑҇ дш҃а моа.
сего рад̑и̑ пождꙋ е҆го·
Тетъ·
Бл҃гъ г҃ь надѣющимсѧ на́нь, дш҃и ищꙋщеи е҆го.
бл҃го е҆сть надѣѧ́тисѧ съ молча́нїемъ сп҃сенїѧ бж҃їѧ.
бл҃го е҆сть мꙋжꙋ е҆гда̀ въздви́гнетъ ꙗ҆рем̑ въ ю҆́ности свое́и·
І҆ѻ́дъ·
Сѧ́детъ е҆ді́нъ и҆ ѹ҆млъкнетъ, ꙗ҆ко въздви́гнꙋ на́ сѧ.
поло́житъ въ пра́хꙋ ѹ҆ста̀ своа, е҆гда̀ ка́ко бꙋдет̑ надежда.
пода́сть лани́тꙋ свою̀ бїю҆щемꙋ, насыти́тисѧ ѹ҆кори́знъ·
Кафъ·
Ꙗ҆́ко не въ вѣкъ ѿринетъ г҃ь.
ꙗ҆ко смиривыи поми́лꙋетъ по мно́жествꙋ млс̑҇ти е҆го.
не ѿвѣща ѿ срд̑ца свое҆го, и҆ смири сн҃ы мꙋж́ески·
Ламедъ·
Ꙗ҆́коже смирити под̑ ноѕѣ е҆го вс̂ѧ ѹ҆́зники земныѧ.
и҆ ѹ҆клонити сꙋдъ мꙋж́ескь пред̑ лицемъ вы́шнѧго.
ѻ҆сꙋдити чл҃ка е҆гда сꙋдитъ е҆мꙋ г҃ь нѣсть реклъ·
Мемъ·
Кт̂о е҆сть то́и и҆же речетъ быти аще л̂и г҃ь не повелитъ.
и҆зъ ѹ́́стъ вы́шнѧго не и҆зыидетъ ѕл̂о и҆ добро.
чт̂о роп꙽щетъ чл҃къ живыи мꙋжь ѻ҆ грѣсѣ свое҆мъ·
Нꙋнъ·
И҆зыска́сѧ пꙋть на́шъ і҆ и҆спыта́сѧ, и҆ да сѧ наврати́мъ до г҃а.
въздвигнѣмъ срд̑ца наша къ б҃ꙋ высокомꙋ на рꙋкꙋ на́шею.
м̂ы бо съгрѣшихом̑ и҆ нечествова́хомъ.
сего ради ты моленїѧ не ѹ҆слы́шиши·
Самехъ·
Покры̀ ꙗ҆́ростїю и҆ ѿгна н̂ы, ѹ҆би и҆ не поща́ди.
покрысѧ ѻ҆́блакомъ, да не доидетъ к тебѣ моли́тва.
ѻ҆межити м̂ѧ и҆ ѿринꙋти положѝ на средѣ людїи·
А҆и́нъ·
Ѡ҆́ко мое погрѧзнꙋ и҆ не ѹ҆мол꙽кнꙋ, ꙗ҆́ко не бы́ти ѹ҆трезвенїю.
до́ндеже прикло́нитсѧ и҆ ви́дитъ г҃ь съ нб҃се.
ѻ҆́ко мое закрыва́етсѧ ѻ҆ дш҃и мое́и, па́че всѣхъ дще́рь град̑ныхъ·
Фе·
Ѿверзо́ша на́ ны ѹ҆ста своѧ̀ вс̂и вра́ѕи на́ши.
стра́хъ и҆ ѹ́жасъ бы́сть намъ, възд̑виженїе и съкрꙋшенїе.
и҆стеченїѧ вод̑наѧ и҆злѣе́тъ ѻ҆́ко мое ѻ҆ съкрꙋшенїи дще́ри лю́дїи мои҆хъ·
Цади·
Ловѧ́ще ѹ҆ловиша м̂ѧ ꙗ҆́ко п꙽тицꙋ враѕи моѝ тꙋне.
ѹ҆мори́ша въ пото́цѣ жи́знь мою̀, и҆ возложи́ша на́ мѧ камы́къ.
возлїѧсѧ вода̀ вы́ше главы̀ мое́ѧ, рх̑ѣ, ѿриновенъ е҆смь·
Кофъ·
Призвах̑ и҆мѧ твое г҃и и҆с пото́ка долнѧго, гла́съ мои ѹ҆слы́ша.
не покрыи ѹ҆́шїю свое́ю на молбꙋ мою̀, на́ помощь мою приближи́сѧ въ дн҃ь вон꙽же призвах̑ т̂ѧ, реч̑҇ м̂и не бо́исѧ·
Решъ·
Сꙋди г҃и прю̀ дш҃а мое́ѧ, и҆зба́ви жи́знь мою̀.
ви́дѣлъ е҆си г҃и неправд̑ꙋ и҆хъ на мнѣ̀, расꙋди сд̑ꙋ мо́и.
вѣси все ѿмщенїе их̑, и҆ вс̂ѧ помышленїа и҆хъ на́ мѧ·
Шинъ·
Слы́ша ѹ҆коризны и҆хъ и҆ совѣты их̑ на́ мѧ.
ѹстенъ воста́ющих̑ на́ мѧ, и҆ поѹ҆ченїе и҆хъ на́ мѧ ве́сь дн҃ь.
сѣденїе и҆хъ и҆ въста́нїе и҆хъ призри г҃и, а҆́зъ е҆смь пѣснь и҆хъ·
Та́фъ·
Ѿдаси и҆мъ г҃и ѿда́нїе по дѣ́ломъ рꙋкꙋ и҆хъ.
ѿда́си и҆мъ застꙋпленїе срд̑ца мое҆го трꙋдъ.
т̂ы ѧ҆̀ прожене́ши въ гнѣвѣ, и҆ потреби́ши ѧ҆̀ подъ нб҃семъ г҃и·
Глв̑҇а, д҃·
А҆́лефъ·
Ка́ко потемнѣ зла́то, и҆змѣни́сѧ сребро̀ до́брое.
расыпашасѧ камыцы ст҃ни, въ нача́ло всѣхъ и҆сходъ·
Бетъ·
Снове сїѻ́ни честнїи, и҆ ѻ҆дѣа́нїи зла́том̑ прьвым̑.
ка́ко намѣни́шасѧ в꙽ сосꙋды гли́нѧны дѣло рꙋкꙋ скꙋдел꙽ничю.
Гимель·
Сеже змїеве съвлеко́ша със꙽цы, въздои́ша скѷмни их̑.
дще́рѧ лю́дїи моих̑ в꙽ неи҆сцѣленїе ꙗ҆́ко и҆ птица в꙽ пꙋстыни<.>
Далетъ·
Прилпе ꙗ҆́зыкъ с꙽сꙋщаго къ горта́ни его жа́жды ради.
младн꙽ецы проси́ша̑ хлѣба, и҆ нѣсть им̑ разламлѧ́ющаг̑҇·
Ге·
Ꙗ҆́дꙋще и҆ пїюще погибоша̑ во и҆сходх̑ѣ.
кормимїи зерны, ѻ҆дѣшасѧ в꙽ гноѝ.
Вафъ·
И҆́ възвели́чисѧ безаконїе дще́ри лю́дїи моих̑, паче безаконїѧ содо́м꙽ска, разореныхъ въ ѻ҆ко м꙽гновенїи, и҆ не пои҆маша и҆хъ рꙋцы·
Заи́нъ·
Ѡ҆чисти́шасѧ назарѧне еѧ̀ па́че снѣга, и҆ просвѣти́шасѧ па́че мле́ка.
краснѣ́иши ко́сти слоно́вы старыѧ, и҆ ꙗ҆́снѣиши па́че камыка сапфира ѹ҆сѣденїе и҆хъ·
Гетъ·
Потемнѣ па́че сажь ѻ҆́бразъ и҆хъ, не позна́ни бы́ша въ и҆сходѣхъ, прил꙽пе ко́жа и҆хъ ко́стехъ и҆хъ, и҆с꙽ше и҆ быша ꙗ҆́ко дре́во·
Тетъ·
Добрѣи б̂ѣ ꙗ҆́звенымъ мечем̑, нежели погꙋбле́ным̑ гла́домъ.
сїи б̂о сътлѣша ѿ жажди неплод̑ности ради зем̑ли·
І҆ѻдъ·
Рꙋцы женъ ще́дрыхъ свари́ста дѣти и҆хъ, бы́ша ꙗ҆́дь и҆мъ, въ сокрꙋшенїе дще́ри лю́дїи мои҆хъ·
Кафъ·
Скон꙽ча г҃ь ꙗ҆́рость свою̀, и҆злїѧ ꙗ҆́рость гнѣ́ва сое҆го.
и҆ възгори́сѧ ѻ҆́гнь в꙽ сїѻ́нѣ, и҆ поꙗ҆де ѻ҆снова́нїа ег̑҇·
Ламедъ·
Не вѣ́роваша цр҃їе земъстїи, и҆ всѝ живꙋщеи въ вселен꙽нѣи.
ꙗ҆́ко внїиде вра́гъ и҆ стꙋжа́ѧи вра́ты і҆ерс̑҇лим̑ли·
Мемъ·
Ѿ грѣхъ прро̑҇къ е҆го, и҆ неправд̑ъ жрец̑҇ е҆го, и҆же проливают̑ кро́вь правед̑нꙋ·
Нꙋнъ·
Блꙋди́ли сꙋть слѣпїи на сто́гнахъ, и ѻ҆скверни́шасѧ въ кро́вѣ.
внегда̀ не можа́хꙋ прикаса́шасѧ ѻ҆деждах̑ своих̑.
Самехъ·
Ѿстꙋпи́те нечи́стїи, рѣша и҆мъ ѿстꙋпи́те ѿстꙋпи́те, и҆ не прикаса́итесѧ.
ꙗ҆́ко свари́шас̑҇ и҆ въсколѣба́шесѧ.
реко́ша въ странахъ, не прило́жатъ ꙗ҆́коже ѻ҆бита́ти с ни́ми·
А҆и́нъ·
Лице гн҃е ча́сть и҆хъ не приложи́тъ призрити и҆мъ.
лица жреческа не ѹ҆стыдѣшас̑҇, старых̑ не поми́ловаша̑.
Фе·
Є҆́ще сꙋщемъ намъ, ѻ҆скꙋдѣсте ѻ҆́чи наши на по́мощь на́шꙋ всꙋе сматрѧ́щемъ на́мъ, внегда̀ надѣа́хомсѧ странѣ не сп҃са́ющеи·
Цади·
По́лзъки бы́ша стопы на́ша на пꙋтѝ сто́гнъ на́шихъ.
приспѣ конець на́шъ, скон꙽чашасѧ дн҃їе на́ши·
Кофъ·
Скорѣиши быша гонѧ́щеи н̂ы па́че ѻрелъ нбс̑҇ныхъ.
на горахъ гонѧ́хꙋ на́съ, въ пꙋсты́ни пресѣдо́ша нам̑·
Решъ·
Дх҃ъ пред̑ лицемъ на́шимъ бл҃гъ, г҃ь ꙗтъ бы́сть в расы́паных̑ на́ших̑.
е҆гож̑ рѣхом̑ в꙽ сѣни е҆го поживем̑ въ страна́хъ·
Шинъ·
Радꙋ́исѧ и҆ веселꙋ́и дщ̂и и҆дꙋме́иска, живꙋщїѧ на земли.
а҆ на т̂ѧ прїидет̑ ча́ша гн҃ѧ и҆ ѹ҆пїешис̑҇ и ѹ҆же лѣеши·
Тафъ·
И҆́сполни́сѧ безако́нїе твое дщ̂и сїѻ́нѧ.
и҆ не приложꙋ ктомꙋ пресели́ти т̂ѧ.
посѣти́лъ е҆сть непра́вость твою дщ́и е҆до́млѧ, ѿкры нечествованїѧ твоеѧ̀·
Моли́тва і҆еремїи пророка·
Глв̑҇а, е҃·
Помѧни г҃и что бы́сть нам̑.
призри и ви́ждь ѹ҆кори́знꙋ на́шꙋ.
достоа́нїе на́ше ѻ҆бра́тисѧ къ чю́ждимъ, и҆ до́мы на́ша къ и҆ноплемен̑҇никомъ·
Сири бы́хомъ безъ ѿц҃а.
мт҃ри на́ша ꙗ҆́ко вдовы.
во́дꙋ на́шꙋ за сребро̀ пи́хомъ, дрова на́ша за цѣнꙋ кꙋповахом꙽ на вы́ѧ на́ша.
ѿгна́ни бы́хомъ, трꙋди́хомсѧ и҆ не почи́хомъ.
е҆гѷптѧномъ пода́хомъ рꙋци и҆ а҆сѷрѧном꙽, да насы́тѧтъ ны хлѣба.
ѿцы на́ши съгрѣши́ша, и҆ нѣсть и҆хъ, мы́ же безаконїѧ и҆хъ под̑ꙗ҆́хомъ.
рабѝ ѻ҆блада́ша на́ми, и҆збавлѧ́ющаго нѣсть ѿ рꙋкꙋ и҆хъ<.>
В погибели дш҃ь на́шихъ принесохом꙽ хлб̑҇ѣ на́шъ, ѿ лица мечю въ пꙋстыни·
Ко́жа на́ша ꙗ҆́ко пещъ ѻ҆ ча́дѣ ѹ҆жасошасѧ ѿ лица бꙋрнаго гла́да.
же́ны въ сїѻ́нѣ смири́ша, дв҃ица въ́ градѣхъ і҆ѹ́динѣхъ.
кнѧ́ѕи за́ рꙋкꙋ и҆хъ повѣси́шасѧ, ста́рцы не прослави́шасѧ.
и҆збран꙽нїи пла́чь под̑ѧ́ша, и҆ ю́ноша въ кла́дѣ ѿнемогошасѧ, и҆ ста́рцы ѿт̑ врат̑ премол꙽кнꙋша·
Расы́пасѧ ра́дость срд̑ць наших̑.
и҆збраннїи ѿ пѣснїи свои҆хъ ѹ҆молко́ша.
ѻ҆брати́сѧ въ пла́чь лик̑҇ на́шъ.
спадѐ вѣнецъ з꙽ главы̀ на́шеѧ.
го́ре намъ ꙗ҆́ко съгрѣши́хомъ.
ѻ҆ семъ смꙋтисѧ срд̑це на́ше, и҆ помръкнꙋста ѻ҆́чи на́ши, по горѣ сїѻ́нѣ ꙗ҆́ко погы́бе, лиси́ца прои҆до́ша ю҆̀.
Ты́ же г҃и въ вѣки всели́шисѧ, прс̑҇тлъ тво́и в род̑ и҆ род̑·
Въскꙋю въ вѣки забыва́еши на́съ, ѻ҆ста́виши насъ въ продлъженїе дн҃и.
ѻ҆брати н̂ы г҃и къ себѣ, и҆ ѻ҆братим̑сѧ.
поновѝ дн҃и на́ша ꙗ҆коже и҆ прежде.
чт̂о ѿрѣва́ѧ ѿрине́ши нас̑҇, раз̑гнѣвасѧ на́ ны ѕѣ́ло·
Коне́цъ пла́чꙋ, і҆еремїи проро́ка·
и҆́мать в꙽ себѣ гла́въ, е҃·