Библия (1581). [32] Варух

ВАРꙊх̑ ПР҃ОРКЪ

ГЛАВА̀ ПЄр̑ВАѦ

Сїѧ словеса̀ кни́гъ ꙗ҆́же написа̀ варꙋхъ сн҃ъ нирїинъ, сн҃а маа҆се́ева, сн҃а седекїина̑ сн҃а а҆садее҆ва, сн҃а хел꙽кїина въ вавило́нѣ.
въ десѧ́тое лѣто, в꙽ седмыи дн҃ь мс̑҇ца·

в лѣто в неже взѧ́ша халдѣи і҆ерс̑҇лі́ма, и҆ пож꙽го́ша и҆̀ ѻ҆гнемъ·

И҆ почтѐ варꙋхъ словеса̀ кни́гъ сих̑ въ ѹши і҆ехонїинѣ сн҃а і҆ѻ҆а҆ки́млѧ цр҃ѧ і҆ѹ́дина.
и҆ въ ѹ́ши всѣхъ людїи приходѧ́щихъ къ книгамъ, и҆ въ ѹ́ши си́лныхъ и҆ сн҃овъ цр҃ьскь, и҆ въ ѹши ста́рчестѣ и҆ въ ѹ́ши всѣхъ лю́дїи, ѿ ма́ла и҆ до вели́ка и҆хъ, всѣхъ живꙋщихъ въ вавѷлонѣ на рѣцѣ сѷдъ·

и҆ пла́кахꙋсѧ и҆ а҆лка́хꙋ, и҆ молѧ́хꙋ мл҃твы пред̑ гм҃ъ·

Посемъ събраша сребро ꙗ҆́коже кого́ждо можа́ше рꙋка, и҆ посла́ша въ і҆ерс̑҇лі́мъ ко і҆ѻ҆а҆ки́мꙋ жерцꙋ вели́комꙋ, сн҃ꙋ хел̑҇кїинꙋ сн҃а сало́млѧ къ жръцемъ, и҆ къ всѣмъ лю́демъ и҆же сѧ ѻ҆брѣтоша с ни́мъ въ і҆ерс̑҇лі́мѣ.
вънегда взѧ̀ сосꙋды хра́ма гн҃ѧ и҆знесеныѧ ѿ хра́ма, възврати́ти на землю і҆ѹдинꙋ, і҃ дн҃ь мс̑҇ца сиванъ.
сосꙋды сребрѧны ꙗ҆́же сътвори седекїѧ сн҃ъ і҆ѻ҆сїинъ цр҃ь і҆ѹ́динъ.
по преселенїи навходоносорꙋ цр҃ю вавѷлоньскꙋ, і҆ехонїю, и҆ кнѧѕѧ, і҆ ѹ́з꙽ники, и҆ си́лныѧ, и҆ люди землѧ ѿ і҆ерс̑҇лима, и҆ въведѐ ѧ̀ свѧ́заны въ вавѷло́нъ.
и҆ рекоша, с̂е посла́хомъ к вамъ сребро, да кꙋпите на сребрѣ всесъж꙽же́нїѧ за грѣх꙽, и҆ ѳимїамъ.
и҆ сътвори́те требꙋ, и҆ възнесѣте на требникъ г҃а б҃а на́шего.
и҆ моли́тесѧ за жи́тїе навходоносо́рово цр҃ѧ вавѷлоньска, и҆ за житїе вал꙽таса́ра сн҃а е҆го.
да бꙋдꙋтъ дн҃їе и҆хъ ꙗ҆́ко и҆ днїе нбс̑҇нїи на землѝ.
да дасть г҃ь крѣпость намъ, да просвѣти́тъ ѻ́чи на́ши.
и҆ да живе́мъ под̑ сѣнїю навходоносо́ровою, и҆ под̑ сѣнїю валтаса́рею сн҃а е҆го.
да рабо́тае҆мъ и́ма дн҃и мно́ги, и҆ ѻ҆брѧ́щемъ блгд̑ть пред̑ нима.
и҆ моли́тесѧ за на́съ къ гв҃и б҃ꙋ нашемꙋ, ꙗ҆́ко съгрѣшихомъ гв҃и б҃ꙋ на́шемꙋ.
и҆ не ѿврати́сѧ ꙗ҆́рость гн҃ѧ, и҆ гнѣвъ е҆го ѿ насъ до сего дн҃е·

И҆ почти́те кни́ги сїѧ ꙗ҆́же посла́хомъ к вам꙽, и҆сповѣда́ти в꙽ домꙋ гн҃и въ дн҃ь пра́знд̑ика, въ дни годныѧ.
и҆ да речете г҃ꙋ б҃ꙋ нашемꙋ пра́вда, а҆ намъ стыдѣнїе лицем꙽.
ꙗ҆́ко и҆ до сего дн҃е чл҃кꙋ і҆ѹ́динꙋ, и҆ живꙋщимъ въ і҆ерс̑҇ли́мѣ, цр҃емъ на́шим̑ и҆ кн҃ѕем̑, на́шим̑ и҆ жрьцем̑ нашим̑ и҆ прро̑҇ком꙽ нашимъ, и҆ ѿц҃емъ нашимъ.
е҆же съгрѣшихомъ пред̑ гм҃ъ, и҆ не вѣровахомъ, не ѹ҆пова́юще нань.
и҆ не покори́хомсѧ е҆мꙋ, и не послꙋшахомъ гла́са г҃а б҃а нашего, ходи́ти въ повеленихъ е҆го, ꙗ҆́же даде пред̑ лицем꙽ нашимъ, ѿ дне во́ньже и҆зведе ѿц҃а наша ѿ землѧ̀ е҆гѷпет꙽ски, и҆ до сего дн҃е, бѣхомъ непокарѧ́ѧсѧ гв҃и б҃ꙋ нашемꙋ, и҆ ѿмета́хомъ ꙗ҆́ко непослꙋшати гласа е҆го.
и҆ прилпе насъ ѕло̀ и҆ клѧ́тва.
ю҆́же съчини г҃ь моѷсїѻви ѻ҆́трокꙋ свое҆мꙋ, въ дн҃ь во́ньже и҆зведе г҃ь ѿц҃а наша ѿ землѧ̀ е҆гѷпет̑ски, да́ти намъ землю кипѧ́щꙋ мле́комъ и҆ ме́домъ, ꙗ҆́ко и҆ сїи дн҃ь.
и҆ не послꙋшахомъ гласа г҃а б҃а нашег̑҇, по всѣмъ словесемъ прро̑҇чемъ, ꙗ҆́же посла̀ к на́мъ, и҆ сꙋдїамъ нашим꙽.
и҆ хожда́хомъ ко́ждо на́съ по ра́зꙋмꙋ срд̑ца свое҆го зла́го, рабо́тати богом꙽ и́нѣмъ, сътвори́ти зл̂о пред̑ ѻ҆чи́ма г҃а б҃а нашего·

Глв̑҇а, в҃·

И ѹ҆ста́ви г҃ь слово свое е҆же гл҃а к намъ, и҆ къ сꙋдїамъ на́шим̑, сꙋди́вшим̑ въ і҆и҆л҃и.
и҆ къ цр҃емъ на́шимъ, и҆ къ кнѧѕемъ на́шимъ.
и҆ къ всемꙋ чл҃кꙋ і҆и҆л҃евꙋ і҆ и҆ѹ́динꙋ, навести на ны ѕл̂о велїе, е҆же не сътвори́сѧ под̑ всимъ нб҃сем꙽, ꙗ҆́коже сътвори́сѧ въ і҆ерс̑҇лимѣ.
по в꙽писа́нїю въ зако́нѣ моѷсїѻвѣ ꙗ҆́ко ꙗ҆сти нам̑ плоть чл҃чскꙋ сн҃а свое҆го, и҆ плоть дще́рѧ своеѧ·

и҆ дадѐ ѧ҆̀ повин꙽ны всѣмъ црс̑҇твомъ ꙗ҆́же ѻ́крс̑҇тъ насъ, на ѹ҆коризнꙋ, и҆ въ непрохожде́нїе, и҆ въ всѣхъ лю́дех̑ и҆же ѻ҆́крс̑҇тъ нас̑҇ а́може н̂ы расѣѧ́ г҃ь·

тамо бы́хомъ и҆ споди а҆ не врьхꙋ, въ подножіе а҆ не въ главꙋ.
ꙗ҆́ко съгрѣшихом̑ гв҃и б҃ꙋ нашемꙋ, не послꙋшанїемъ гласа е҆го·

Гв҃҃и б҃ꙋ на́шемꙋ правда, нам꙽ же и҆ ѿц҃емъ нашимъ стыдѣнїе лицем꙽, ꙗ҆́ко и҆ до сего дн҃е.
е҆же гл҃а г҃ь на нас̑҇ всѐ ѕл̂о, е҆же прїиде на н̂ы.
занѐ не моли́хом̑сѧ лицꙋ гн҃ю, ѿврати́тисѧ комꙋждо ѿ ра́зꙋма срд̑ца свое҆го ѕлаго.
и҆ ѹ҆бꙋди́сѧ г҃ь ѻ҆ ѕло́бѣхъ, и҆ приведе на насъ сїѧ е҆же постиже н̂ы.
ꙗ҆ко пра́веденъ г҃ь ѻ҆ всѣхъ дѣлесех̑ е҆го, е҆же заповѣда намъ.
мы́ же не послꙋшахомъ гласа е҆го, ходи́ти въ повеле́нихъ е҆го, ꙗ҆́же дадѐ пред̑ лицемъ нашимъ·

И нн҃ѣ г҃и б҃е і҆и҆л҃евъ, и҆же и҆зведе люд̑и̑ своѧ и҆з꙽ землѧ̀ е҆гѷпет꙽ски, рꙋкою крѣпкою и҆ мыш꙽цею высокою, зна́менїи и҆ чюдесы, и҆ си́лою вели́кою, и҆ сътворѝ себѣ и́мѧ ꙗ҆ко сеи дн҃ь.
съгрѣшихомъ нечествова́хом꙽, неправдова́хомъ г҃и б҃е нашъ, ѻ҆ всѣхъ ѻ҆правданихъ твои҆хъ.
да ѻ҆брати́тсѧ ѹ҆бо ѿ насъ ꙗ҆́рость твоѧ, ꙗ҆́ко ѻ҆ста̀ насъ ма́ло въ странахъ, а́може расѣ́ѧ насъ·

Ѹ҆слы́ши г҃и мл҃твꙋ нашꙋ, и҆ прошенїе на́ше, і҆ и҆зба́ви насъ себе ра́ди.
и҆ да́ждь нам̑ блгд̑ть пред̑ лицемъ пресели́вшихъ насъ.
да ѹ҆вѣсть всѧ̀ землѧ̀, ꙗ҆́ко т̂ы г҃ь б҃ъ нашъ, и҆ ꙗ҆́ко и́мѧ твое прозва́сѧ на і҆и҆л҃и, и҆ на племени е҆го·

Ги҃ при́зри и҆з домꙋ ст҃аго свое҆го на насъ, и҆ приклонѝ ѹ́хо твое, и҆ ѹ҆слы́ши на́съ·

И҆ ѿврьзи г҃и ѻ́чи своѝ и҆ ви́ждь, ꙗ҆ко не ѹ҆мрьшїи и҆же во а́дѣ и́хже взѧ́сѧ дх҃ъ и҆хъ ѿ ѹ҆тро́бъ их̑ въздадѧтъ тебѣ сла́вꙋ, и҆ ѻ҆правда́нїе гв҃и.
н̂о дш҃а пекꙋщїасѧ ѻ҆ вели́чествѣ зла̀, и҆же хо́дитъ преклони́всѧ и҆ болѧ̀, и҆ ѻ́чи ѻ҆скꙋдѣю҆щїи, и҆ дш҃а а́лчꙋщаѧ въздадѧ́т꙽ тебѣ сла́вꙋ, и҆ правдꙋ г҃и.
ꙗ҆́ко не по ѿц҃ъ на́шихъ, н̂и цр҃еи на́шихъ ѻ҆правле́нїи и҆злива́емъ мл҃твы, и҆ полага́емъ млс̑҇ть на́шꙋ пред̑ лицемъ твои҆мъ г҃и б҃е на́шъ.
ꙗ҆́ко преѻ҆долѣваше ꙗ҆́рости свое́и, и҆ гнѣвꙋ свое҆мꙋ на нас̑҇.
ꙗ҆́коже гл҃а в рꙋцѣ ѻ́трок꙽ свои҆хъ прро̑҇къ, гл҃ѧ·

Тако рече г҃ь, приклоните рамена своѧ, и҆ послꙋжи́те цр҃ю вавѷлон꙽скомꙋ.
и҆ сѧдѣте на землѝ ю́же дахъ ѿц҃емъ вашимъ·

І҆ а́ще не послꙋшаете гласа гн҃ѧ, порабо́тати цр҃ю вавѷлон꙽скꙋ.
ѻ҆скꙋденїе сътворю и҆з гра́дъ і҆ѹ́дин꙽ и҆ внѣѹ҆дѣ і҆ерс̑҇лима.
и҆ ѿи҆мꙋ ѿ вас̑҇ гласъ весе́лїѧ, и҆ гласъ радова́нїѧ.
глс̑҇а жениха̀, и҆ глс̑҇а невѣсты.
и҆ бꙋдетъ всѧ землѧ̀ в непрохожде́нїе ѿ живꙋщихъ на неи·

и҆ не послꙋшахом̑ гласа твое҆го, слꙋжи́ти цр҃ю вавѷлон̑҇скꙋ.
и҆ ѹ҆ста́ви словеса̀ своѧ, ꙗ҆́же гл҃а в рꙋцѣ ѻ́трокъ свои҆хъ про̑҇ркъ.
ꙗ҆́коже и҆знестѝ ко́сти цр҃ь нашихъ, и҆ ко́сти ѿц҃ъ нашихъ ѿ мѣста их̑.
и҆ с̂е сꙋть и҆звержены зно́емъ дневным̑ и҆ стꙋденїю но́щною, і҆ и҆зомро́ша бо́лезньми злы́ми, гла́домъ и҆ мечем꙽ и҆ ѻ҆пꙋстѣнїемъ.
и҆ положѝ домъ, в немже нарет̑сѧ и́мѧ твое в немъ, ꙗ҆́ко и҆ сеи дн҃ь.
зло́бы ради домꙋ і҆и҆л҃ева, и҆ домꙋ і҆ѹ́дина.
и҆ сътвори в насъ г҃и бж҃е нашъ по все́и тихотѣ твоеи, и҆ по все́и щедротѣ твоеи вели́цеи.
ꙗ҆́коже гл҃а в рꙋцѣ раба̀ твоег̑҇ моѷсїѧ, въ дн҃и в нѧ́же заповѣдавшꙋ е҆мꙋ тебѣ, въписати зако́нъ твои пред̑ сн҃ы і҆и҆л҃евыми, гл҃ѧ·

а҆ще не послꙋшаете гла́са мое҆го, мно́жество сїе вели́ко и҆ мно́го, ѻ҆братитсѧ в ма́лъ ꙗ҆зы́къ, занѐ а҆зъ расѣ́ю ѧ҆̀.
разꙋмѣ́хъ б̂о ꙗ҆́ко не и́мт̑ꙋ послꙋшати мене, ꙗ҆́ко лю́дїе жестоковы́ини сꙋть, и҆ ѻ҆братѧ́тсѧ къ срд̑цꙋ свое҆мꙋ на землѝ преселе́нїѧ их̑.
и҆ ѹ҆вѣдѧтъ ꙗ҆ко а҆зъ г҃ь б҃ъ и҆хъ.
и҆ дамъ и҆мъ срд̑це и҆ разꙋмѣютъ, и҆ ѹ́ши и҆ ѹ҆слы́шатъ.
и҆ похвалѧт꙽ м̂ѧ на землѝ преселе́нїѧ и҆хъ, и҆ помѧнꙋтъ и҆́мѧ мое.
и҆ ѻ҆братѧт̑сѧ ѿ хрепта̀ свое҆го жестокаго, и҆ ѿ ѕлоб̑҇ свои҆хъ.
ꙗ҆́ко помѧнт̑ꙋ пꙋть ѿц҃ъ свои҆хъ, съгрѣша́ющихъ пред̑ гм҃ъ.
и҆ възвращꙋ ѧ҆̀ на землю е҆юже клѧх̑сѧ ѿц҃емъ и҆хъ, а҆враа́мꙋ, і҆саа́кꙋ, і҆ и҆а́ковꙋ, и҆ съвладѣ́ютъ ею̀.
и҆ ѹ҆мно́жꙋ ѧ҆̀, и҆ не ѹ҆ма́лѧтсѧ.
и҆ ѹ҆ста́влю и҆мъ завѣтъ вѣченъ, ꙗ҆́коже бы́ти и҆мъ мн̂ѣ б҃ꙋ, и҆ тїи бꙋдꙋтъ мн̂ѣ лю́дїе.
и҆ не подви́гнꙋ ктомꙋ людїи свои҆хъ і҆и҆л҃ѧ съ зем̑лѧ̀ ю҆́же дахъ и҆мъ·

Глв̑҇а, г҃·

И нн҃ѣ г҃и вседръжи́телю б҃е і҆и҆л҃евъ.
дш҃а в꙽ тѣснотѣ и҆ дх҃ъ въ стꙋже́нїи възопѝ к тебѣ.
ѹ҆слы́ши г҃и и҆ поми́лꙋи, ꙗ҆́ко е҆си б҃ъ млрс̑҇дъ, и҆ помилꙋи нас̑҇.
ꙗ҆́ко съгрѣши́хомъ пред̑ тобо́ю.
ꙗ҆́ко т̂ы пребыва́ѧи въ вѣ́къ, и҆ не поги́бнемъ въ вѣ́ки·

Ги҃ вседержи́телю б҃е і҆и҆л҃евъ, ѹ҆слы́ши мл҃твꙋ ѹ҆мер꙽шихъ і҆и҆л҃евъ, и҆ сн҃овъ съгрѣши́вшихъ пред̑ тобо́ю, и҆ не послꙋшаша глас̑҇ г҃а б҃а и҆хъ, и҆ прильпе нас̑҇ ѕл̂о.
не помѧнѝ непра́вдъ ѿц҃ь нашихъ, н̂о помѧни рꙋ́кꙋ свою і҆ и҆мѧ свое в с̂е вре́мѧ.
ꙗ҆́ко т̂ы г҃и б҃е нашъ, и҆ похва́лимъ т̂ѧ г҃и.
ꙗ҆ко того ради да́лъ е҆си стра́хъ свои въ срд̑це наше, ꙗ҆́ко призва́ти и҆мѧ твое, и҆ похва́лим꙽ т̂ѧ въ преселе́нїи на́шем̑.
ꙗ҆́ко ѻ҆брати́хомъ въ срд̑це наше всю̀ непра́вдꙋ ѿц҃ъ наших̑ съгрѣши́вших꙽ пред̑ тобо́ю·

Се̂ м̂ы дне́сь въ преселенїи нашемъ, а҆може н̂ы расы́па на ѹ҆кори́знꙋ, и҆ на клѧ́твꙋ, и҆ на ѹ҆держа́нїе, по всѣмъ непра́вдамъ ѿц҃ъ нашихъ, и҆же ѿстꙋпи́ша ѿ тебе г҃и б҃е нашъ·

Слы́ши і҆и҆л҃ю за́повѣди живота, в꙽нꙋши разꙋмѣти смышле́нїе.
чт̂о е҆сть і҆и҆л҃ю, чт̂о ꙗ҆́ко на землѝ вра́жїи, ѻ҆бет꙽ша на землѝ чю́ждеи, ѻ҆сквернависѧ съ мр҃твыми, намѣни́сѧ съ сꙋщими въ а҆дѣ.
ѻ҆ставѝ и҆сто́чникъ премꙋдрости·

А҆ще б̂ы въ пꙋть бж҃їи ходи́лъ, жи́лъ б̂ы въ ми́ре въ вре́мѧ вѣчное.
разꙋмѣ́и гд̂ѣ е҆сть смышле́нїе, гд̂ѣ е҆сть крѣ́пость, гд̂ѣ е҆сть мꙋ́дрость.
ꙗ҆́ко разꙋмѣти и҆ногдою гд̂ѣ е҆сть до́лго жи́тїе и҆ жи́знь, гд̂ѣ е҆сть свѣтъ ѻ҆чныи и҆ ми́ръ.
кт̂о ѻ҆брѣте мѣ́сто е҆ѧ̀, и҆ кт̂о вни́де въ и҆мѣнїе е҆ѧ̀.
гд̂ѣ сꙋть кн҃ѕи стра́ньстїи, и҆ владꙋщеи ѕвѣ́ремъ зе́мным̑, и҆гра́ющеи пти́цами нбс̑҇ными.
и҆ хранѧ́щеи зла́то и҆ сребро̀, и҆мже ѹ҆поваша чл҃цы, и҆ нѣ́сть кон꙽ца тѧжа́нїю и҆хъ.
ꙗ҆́ко съдѣлова́ющеи сребро̀ и҆ пекꙋщеисѧ, и҆ нѣ́сть ѻ҆брѣте́нїа дѣлесе́мъ и҆хъ, погибо́ша и҆ въ а́дъ снидо́ша, і҆ и́ни въ нихъ мѣ́сто въста́ша.
ю҆нѣ́ишїи ви́дѣша свт̑ѣ, и҆ всели́шасѧ на землѝ.
пꙋти же хи́трос꙽тнаго не ѹ҆вѣ́дѣша, ни разꙋмѣша сте́ѕь е҆ѧ̀, ниже сн҃ве и҆хъ прїѧ́ша, ѿ пꙋтѝ их̑ дале́че бы́ша.
и҆ не слы́шаша въ ханаа́нѣ, ни ꙗ҆ви́сѧ въ ѳема́ни.
сн҃ве а҆га́рини възыска́ющеи ра́зꙋма и҆же на земли, кꙋпцы мера́ни, и҆ ѳема́ни, и҆ басносло́вцы и҆ възыска́теле разꙋма.
пꙋти же премꙋ́дрости не ѹ҆вѣдѣша, ни помѧнꙋша сте́ѕь е҆ѧ̀·

ѽ і҆и҆л҃ю ꙗ҆́ко вели́къ до́мъ бж҃їи, и҆ до́лго мѣ́сто вла́сти е҆го, вели́ко и҆ нѣ́сть конца, высо́къ и҆ без мѣ́ры.
т̂ꙋ бы́ша щꙋдове нарочити, бы́вшеи и҆спе́рва ѕѣло вели́цы, ѹ҆мѣ́юще рать.
не сих̑ и҆збра̀ б҃ъ, ни пꙋтѝ хи́тростнаго даде им̑.
и҆ погибо́ша, занѐ не и҆мѣша мꙋ́дрости·

Кт̂о възы́иде на́ нб҃о и҆ взѧ̀ ю҆̀, и҆ кт̂о снесе ю҆̀ ѿ ѻ҆́блакъ.
кт̂о пре́иде на ѻ҆́нꙋ странꙋ мо́рѧ, и҆ ѻ҆брѣте ю̀, и҆ взе́млетъ ю҆̀ над̑ зла́то и҆збра́нно.
нѣ́сть вѣ́дꙋща пꙋти е҆ѧ̀, ни помышлѧ́ющаго сте́ѕь е҆ѧ̀.
н̂о вѣ́дыи вс̂е вѣсть ю҆̀, и҆ ѻ҆брѣте ю҆̀ смы́сломъ свои҆мъ.
сътвори́выи зе́млю въ вѣчное вре́мѧ, и҆ напо́лни ю҆̀ скота̀ двоно́жна, и҆ четвероно́жна.
пꙋща́ѧи свѣтъ і҆ и҆детъ.
призва и҆̀, и҆ послꙋша е҆го съ тре́петомъ.
и҆ ѕвѣзды просвѣти́шасѧ въ вре́менехъ своих̑, и҆ възвесели́шас̑҇.
призва ѧ҆̀, и҆ реко́ша, прїидо́хомъ.
и҆ просвѣти́ша съ весе́лїемъ, сътво́ршемꙋ ѧ҆̀·

Сеи б҃ъ нашъ, не намѣни́тсѧ и҆́нъ къ немꙋ.
ѻ҆брѣте всѧ́къ пꙋть хи́трости, и҆ дадѐ і҆а́ковꙋ ѻ҆́трокꙋ свое҆мꙋ, і҆и҆л҃ю възлюблен꙽номꙋ ѿ него.
потом̑же на земли ꙗ҆висѧ, и҆ съ чл҃кы поживѐ·

Глв̑҇а, д҃·

Сїѧ кни́ги ѻ҆ за́повѣдехъ бж҃їи҆хъ, и҆ зако́нъ бывааи въ вѣкъ.
вс̂и держа́щеи ѧ҆̀ въ жи́тїе, а҆ ѻ҆ста́вївшеи ѧ҆̀ ѹ҆мрꙋтъ.
ѻ҆брати́сѧ і҆а́кове, і҆ и҆ми́сѧ по нѧ̀, ходи по просвеще́нїю прѧ́мо свѣтꙋ е҆ѧ̀.
не да́ждь и҆́номꙋ сла́вы свое҆ѧ, и҆ достоѧ́нїѧ свое҆го странѣ чю́жд̑еи·

бл҃жени е҆смы і҆и҆л҃ю, ꙗ҆́ко ѹ҆го́днаѧ гв҃и съвѣстна намъ сꙋть·

Ра́дꙋитесѧ лю́дїе мои па́мѧть і҆и҆л҃ева.
продани бы́сте въ страны не на па́гꙋбꙋ.
н̂о и҆мже разгнѣ́васте б҃а, преда́ни бы́сте сꙋпоста́томъ.
разгнѣ́васте б̂о сътво́ршаго вас̑҇ б҃а вѣ́чнаго.
тре́бы поло́жше бѣсомъ, а҆ не б҃ꙋ.
забы́сте б̂о г҃а пита́ющаго вас̑҇.
съжали́сте въскорми́вшемꙋ вас̑҇ і҆ерс̑҇лимꙋ.
ви́дѣ б̂о нашед̑шїи вамъ гнѣ́въ ѿ б҃а, и҆ рече.
слы́шите ѻ҆́крс̑҇тнїи сїѻ́ни, наведе б̂о м̂и г҃ь сѣтова́нїе вели́ко.
ви́дѣхъ б̂о людїи мои҆хъ плѣне́нїе сн҃въ мои҆хъ и҆ дще́рь, е҆же наведе и҆мъ вѣ́чныи·

корми́хъ б̂о ѧ҆̀ съ веселїемъ, и҆спꙋсти́хъ же ѧ҆̀ съ пла́чемъ.
никтоже да сѧ не ра́дꙋетъ ѻ҆ мнѣ вдови́цы, и҆ ѻ҆ста́вленꙋ ѿ мно́гъ.
ѻ҆пꙋстѣхъ грѣ́хъ ради ча́дъ мои҆хъ.
понеже с꙽клони́шасѧ ѿ зако́на бж҃їѧ.
и҆ ѻ҆правда́нїи е҆го не позна́ша, и҆ не ходи́ша въ пꙋть за́повѣдеи бж҃їихъ, и҆ ни стеѕѧ́ми наказа́нїѧ въи҆́стинꙋ пра́вдою не настꙋпи́ша.
да прїидт̑ꙋ ѻ҆́крс̑҇тнїи сїѻ́ни, и҆ помѧнѣте плѣне́нїе сн҃овъ мои҆хъ и҆ дще́рїи, е҆же наведе и҆мъ вѣ́чныи·

Приведе б̂о на́ нѧ странꙋ и҆здале́ча.
странꙋ без꙽ сра́ма, і҆ и́ноꙗ҆зы́чнꙋ.
и҆же не срами́шасѧ ста́рца, ни поми́ловаша ѻ҆троча́те.
и҆ ѿведо́ша любе́зныѧ вдови́ца, и҆ ѿ дще́ръ е҆ді́нъ запꙋстѣхъ·

А҆з꙽ же ка́ко мо́щенъ помощи вамъ.
наведы́и б̂о вамъ ѕл̂о, изба́витъ вас̑҇ ѿ рꙋ́къ вра́гъ вашихъ·

И҆дѣте ча́да и҆дѣте, а҆зъ б̂о ѻ҆ста̑ пꙋстъ.
съвлеко́хъ ри́зы ми́рныѧ, ѻ҆блекох̑ же сѧ въ ꙗ҆ри́гъ моле́нїѧ мое҆го, и҆ възопїю къ вѣ́чномꙋ въ дн҃и моѧ·

Радꙋитесѧ ча́да, и҆ възопїите къ б҃ꙋ, і҆ и҆зба́витъ вас̑҇ ѿ наси́лїѧ рꙋки вра́жїѧ.
а҆зъ б̂о и҆спе́рва надѣѧ́хсѧ къ вѣ́чномꙋ ѻ҆ сп҃сенїи вашемъ, и҆ прїиде м̂и ра́дость ѿ ст҃го въ помилова́нїе.
прїидетъ вамъ въ ско́рѣ ѿ вѣчнаго сп҃са на́шего.
и҆спꙋстих̑ б̂о в̂ы съ а҆лка́нїемъ и҆ пла́чемъ, ѿда́сть же м̂и б҃ъ вас̑҇ съ ра́достїю и҆ весе́лїемъ въ вѣкъ·

Ꙗ҆́коже б̂о нн҃ѣ ви́дѣша сосѣди сїѻ́ни ва́ше плѣненїе ѿ бг҃а, та́кожде же ѹ҆́зрѧтъ въско́рѣ сп҃҃се́нїе ва́ше въ бѕ҃ѣ.
ꙗ҆́же наведетъ ва́мъ съ сла́вою вели́кою, и҆ съ ѻ҆сщ҃е́нїемъ въ вѣ́чнаго·

Ча́да тръпи́те ѿ бг҃а нашед̑шїи ва́мъ гнѣ́въ.
гонѝ б̂о тѧ вра́гъ тво́и, и҆ ѹ́зриши па́гꙋбꙋ е҆го въскорѣ, и҆ на выю е҆го въстꙋпи́ши·

Младїи моѝ ходи́ша въ пꙋти жестоки, въсхити́шасѧ ꙗ҆́ко и҆ ста́до въсхище́но врагѝ·

Радꙋитесѧ ча́да, възопїите къ б҃ꙋ.
бꙋдетъ б̂о вам̑ ѿ навед̑шаго па́мѧть.
Ꙗ҆́коже б̂о бы́сть ѹ́мъ ва́шъ прельститисѧ вамъ ѿ бг҃а, десѧтижд̑ы сꙋгꙋби́те ѻ҆брати́вшесѧ, в꙽зы́щите е҆го.
наведы́и б̂о ва́мъ ѕл̂о, наведет̑ ва́м вѣ́чное веселїе сп҃сенїемъ ва́шимъ·

Радꙋ́исѧ і҆ерс̑҇ли́ме, ѹ҆тѣшитъ т̂ѧ нарекїи тебе.
грѣшнїи погы́бнꙋтъ зазлившеи тебѐ, и҆ ѻ҆брадова́вшеисѧ паденїю твое҆мꙋ, м꙽щенїе бꙋдетъ над̑ ними.
грѣшни гради и҆́мже порабо́таша ча́да твоа, грѣшна прїи҆мшїа сн҃ы твоа.
ꙗ҆́коже б̂о сѧ ѻ҆брадова твое҆мꙋ паде́нїю, та́кожде же попечетсѧ свои҆мъ ѻ҆пꙋстѣнїемъ.
а҆ плѣнит̑сѧ веселїе мно́го на рождьства еѧ̀, и҆ вели́чїе е҆ѧ бꙋдет̑ въ ры́данїе, ѻ҆́гнь б̂о наи҆дет̑ на́ нѧ ѿ вч̑҇ѣнаго въ дн҃и многи.
и҆ населит̑сѧ бѣсы въ мно́го вре́мѧ.
поглѧда́и на восток̑҇ і҆ерс̑҇ли́ме, и҆ ви́ждь веселїе градꙋщее тебѣ ѿ бг҃а·

Се и҆дꙋтъ сн҃ве твоѝ ꙗ҆́же и҆спꙋсти, грѧдꙋтъ събра́ни ѿ востока до за́падꙋ.
словесемъ ст҃го ра́дꙋющесѧ сла́вою бж҃їею·

Глв̑҇а, е҃·

Съвлеци і҆ерс̑҇ли́ме ры́зы желѣн꙽ныѧ и҆ заѕлѣнїѧ твое҆го.
и҆ ѻ҆блецисѧ в лѣпотꙋ сла́вы ꙗ҆́же тебѣ бы́сть ѿ бг҃а въ вѣкъ.
ѻ҆деждисѧ въ ѻ҆крил̑҇ правды ꙗ҆́же ѿ бг҃а.
возложи вѣнецъ на главꙋ̀ свою̀ сла́вы вѣ́чнаго.
б҃ъ б̂о ꙗ҆ви́тъ все́и под̑нбс̑҇нѣи твое просвѣтенїе.
прозоветъ б̂о сѧ ѿ бг҃а и҆мѧ твое въ вѣки, ми́ръ правды и҆ сла́ва бл҃гочестїѧ·

Въста́ни і҆ерс̑҇ли́ме, и҆ ста́ни на высоцѣ, и҆ поглѧда́и на востоки, и҆ ви́ждь събрана ча́да твоа̀ ѿ востокъ сл҃нца до за́пада, словесем̑ ст҃го ра́дꙋющесѧ бж҃їею па́мѧтїю·

И҆зыидоша бо ѿ тебе пѣши ведо́ми враги, въведетъ же ѧ҆̀ б҃ъ к тебѣ несо́мы съ сла́вою, ꙗ҆́ко сн҃ы црс̑҇тва.
сътворѝ б̂о б҃ъ смири́тисѧ все́и горѣ высо́цѣ, и҆ помо́рїю прс̑҇нотекꙋщ́емꙋ и҆ де́бремъ наполни́тисѧ в равень зе́мнꙋю да и҆́детъ і҆и҆л҃ь ѹ҆твер꙽женъ сла́вою бж҃їею.
ѻ҆сѣниша же и҆ дꙋбра́вы и҆ всѧко древо бл҃го во́ньствомъ і҆и҆л҃ю, повелѣнїемъ бж҃їимъ·

Пред̑и҆́детъ б̂о б҃ъ і҆и҆л҃еви съ веселїемъ свѣтомъ сла́вы е҆го, с помилова́нїем꙽ и҆ правдою ꙗ҆же ѿ него̀·

Писа́нїе пꙋщеное къ жидом̑ і҆еремїею прро̑҇ком̑ въ вавѷлон̑҇.
написа́ же и҆̀ варꙋхъ·

Глв̑҇а, ѕ҃·

Грѣ́хъ ради ꙗ҆́же съгрѣшисте пред̑ бм҃ъ, ѿведетесѧ въ вавѷло́нъ плѣне́ни навходоносо́ромъ цр҃емъ вавѷлон꙽скомъ.
въшед̑ше ѹ҆бо въ вавѵлонъ, бꙋдете т̂ꙋ лѣта мно́га времѧ до́лго до седми родовъ·

потом же и҆зведꙋ̀ васъ ѿтꙋдꙋ с миром̑.
н҃нѣ же ѹ́зрите въ вавѷлонѣ богѝ сребрены, и҆ зла́ты, и҆ камен꙽ны, и древѧны на раменах̑ носи́мы, кажꙋще страхъ странам꙽.
не ѹ҆бо́итесѧ ѹ҆бо да не и҆ вы и҆ноплемен꙽никомъ ѹ҆подобите́сѧ, и҆ стра́хъ прїимет꙽ васъ ѿ нихъ.
ви́дѣвшемъ весь наро̑ пред̑ и҆ въ слѣдъ и҆хъ кланѧю҆щасѧ им̑ рцыте ѹ҆бо въ ѹ҆мѣ̀, тебѣ лѣпо ес̑҇ кла́нѧтисѧ влд̑ко.
а҆́гг҃лъ б̂о мои с вами е҆сть, сеи възыска́етъ дш҃ь вашихъ.
ꙗ҆зы́къ б̂о и҆хъ и҆строган꙽ е҆сть древодѣлею, тїи же позлащени и҆ посребре́ни, лжа̀ е҆сть и҆ не могꙋтъ гл҃ати.
и҆ ꙗ҆́ко дв҃цы люби́вѣ красѣ̀, въземлюще зла́то и҆ сътворени ст̑ꙋ.
вѣнца же зла́ты и҆́мꙋть на главахъ свои҆хъ бо́зи их̑·

Тѣмже ѹ҆крада́ют꙽ ѿ нихъ жръцы злато и҆ сребро, и҆ себѣ потребꙋютъ.
даю́т же ѿ него блꙋдницамъ, и҆ же́ны нечи́стыѧ ѹ҆краша́ютъ.
и҆ егда̀ паки възе́млютъ ѿ же́нъ, ѹ҆краша́ютъ богѝ своѧ ꙗ҆́ко чл҃ки ри́зами.
тїи же не и҆збꙋдꙋтъ ѿ ржа̀ и҆ мо́лїѧ.
ѻ҆дѣ́ют же ѧ҆̀ въ багрѧни́цꙋ, ѻ҆тира́юще лица им̑ пра́ха ра́ди иже ѿ хра́ма, и҆же е҆сть множа́и на ни́хъ.
и хорꙋго́вь и҆́мꙋть ꙗ҆́ко чл҃къ, и҆ ꙗ҆́ко сꙋдїѧ странѣ̀, иж̑ съгрѣша́ющаго к немꙋ не ѹ҆бїетъ.
и҆́мꙋть же и҆ ме́чь въ десни́цы и҆ секи́рꙋ, сам̑ же себе ѿ ра́ти и҆ ѿ разбо́иникъ не ѿи́метъ·

ѿ того зна́еми сꙋть ꙗ҆́ко не сꙋть боѕи, не ѹ҆бо́итесѧ и҆хъ ѹ҆бо.
ꙗ҆́коже б̂о и҆ сꙋсꙋдъ члчс̑҇кь съкрꙋшенъ не требѣ быва́етъ, тацы же сꙋть и҆ боѕи и҆хъ.
е҆гда́ же поста́влени бꙋдꙋтъ въ домꙋ, ѻ́чи и҆хъ по́лни сꙋть пра́ха ѿ но́гꙋ въходѧщихъ въ до́мъ.
и҆ ꙗ҆́ко комꙋ приѻ҆бидѣвшꙋ цр҃ѧ, и҆ ѻ҆пѧти сꙋть две́рцами.
і҆ ꙗко къ гробꙋ принесеномꙋ мер꙽твомꙋ, хра́мы и҆хъ ѹ҆твержают̑ жръцы две́рми и҆ зам꙽ки и҆ завѣсами, да не ѿ разбо́инъ ѻ҆кра́дени бꙋдꙋтъ.

Свѣти́ла ж꙽гꙋтъ и҆мъ мно́ѕи, ѿ них же не мо́жетъ ви́дѣти ни е҆дін̑҇, н̂о ꙗ҆ко брьвна въ домꙋ сꙋть.
срд̑цеж̑ и҆хъ то́чатъ чрьви и҆же ѿ землѧ̀, и҆ ѻ҆деждꙋ их̑, ѻ҆ниже не чꙋ́ютъ сего.
ѻ҆чрьнѣло е҆сть лице и҆хъ ѿ ды́ма хра́мнаго.
по телесемъ и҆хъ и҆ по главѣ̀ парѧтъ ненетопы́ри но́щнїи, и҆ ла́стовицы и҆ пти́цы, такожд̑е и҆ кот꙽ки скачꙋтъ.
ѿ того ѹ҆вѣсте ꙗ҆́ко не сꙋть бо́зи, не ѹ҆бо́итесѧ ѹ҆бо и҆хъ, зла́то б̂о лежа́щее на них̑ на красꙋ, а҆ще не ѻ҆цысти́тъ кт̂о ржа̀ не блеснетсѧ, и҆ е҆гда б̂о слїаша ѧ҆̀ не чюша·

За всѧ́кꙋ цѣнꙋ̀ кꙋплени сꙋть, в нихже нѣсть дх҃а.
без ногꙋ на рамѣхъ но́сѧт̑ ѧ҆̀, ꙗ҆влѧ́ще свое нечестїе чл҃комъ·

ѻ҆срамлѧют̑ же сѧ слꙋжа́щеи и҆мъ паде́нїѧ ради, е҆гда когда падꙋтсѧ на́ землю, и҆ не могт̑ꙋ са́ми въста́ти.
и҆ а́ще кт̂о поста́вит̑ ѧ҆̀ просты не мо́гꙋтъ постꙋпи́ти, и҆ а́ще прекло́нитсѧ не могт̑ꙋ и҆спра́вити себе.
н̂о ꙗ҆́ко мрътвьцемъ да́ры и҆мъ полага́ютъ.
требы же и҆хъ недосто́инїи жръцы възе́млют̑.
та́кожде же и҆ же́ны и҆хъ варѧтъ ѿ нихъ, ни е҆ді́номꙋ же ѹ҆бо́гꙋ ни не́мощнꙋ подаю҆тъ.
требахъ и҆хъ нечи́стѣ и҆ кровотоки же́ны прикаса́ютсѧ.
разꙋмѣвше ѹ҆бо ѿ сего ꙗ҆́ко не сꙋть бо́ѕи, не бо́итесѧ их̑.
ѿкꙋдꙋ б̂о прозовꙋтсѧ бо́ѕи, ꙗ҆́ко же́ны слꙋжатъ богомъ сребренымъ и҆ зла́тымъ, и҆ древѧнымъ.
и҆ въ хра́мех̑ и҆хъ жръцы сѣда́ютъ, и҆мꙋще ризы растерзаны, и҆ главы и҆ бра́ды ѻ҆голени, и҆хже главы̀ непокровены сꙋть.
рекꙋт же въпїюще пред̑ богѝ свои҆ми ꙗ҆ко нѣцыи на вечери мр҃тв꙽ца̑·

ѿ ризъ и҆хъ въземлюще жръцы, ѻ҆дѣ́ютъ же́ны своѧ и҆ дѣти.
и҆ а́ще ѿ кого ѕл̂о постражд̑ꙋтъ и҆ли добро̀, не могꙋтъ ѿда́ти.
н̂и цр҃ѧ могꙋтъ поста́вити н̂и ѹ҆ѧ́ти.
та́кожде же ни богат̑ства ниже ѕл̂а възда́ти.
а҆ще кт̂о и҆мъ чт̂о ѻ҆бѣща́́въ не ѿда́сть, не въспро́сѧтъ·

ѿ смр҃ти чл҃ка не и҆зба́вѧтъ, ни мен꙽ша ѿ крѣ́пка не ѿи҆мꙋтъ.
чл҃ка слѣ́па къ видѣ́нїю не навратѧ́тъ, въ нꙋж́и чл҃кꙋ не помо́гꙋтъ.
в꙽довы не поми́лꙋютъ, и҆ сиротѣ добра не сътво́рѧтъ.
подо́бни сꙋть ка́менїю го́рномꙋ бо́ѕи их̑, древѧ́нїи, и҆ ка́мени, и҆ позлаще́ни, и҆ посребрени·

слꙋжа́щеи и҆мъ посрамѧт̑сѧ·

ка́ко ѹ҆бо мнѣти, и҆ли прозва́ти ѧ҆̀ бо́гы.
ктомꙋ же и҆ сами тїи халдѣ́и не чтꙋтъ и҆хъ.
и҆же е҆гда̀ ѹ҆́зрѧтъ нѣ́ма не могꙋща гл҃ати, принесꙋт꙽ е҆го к꙽ ве́лю, е҆мꙋже мо́лѧтсѧ, да гл҃етъ, ꙗ҆́ко и҆ си́лнꙋ сꙋщꙋ почю́ти и҆ не могт̑ꙋ, тїи разꙋмѣвше ѻ҆ста́вѧтъ и҆хъ, чюв꙽ства б̂о не и҆мꙋт꙽.
же́ны же препина́юще ѹ҆́жа, на распꙋтїи҆хъ сѣдѧ́т꙽, кадѧще ѻ҆́требѣ.
и҆ е҆гда кото́раѧ ѿ ни́хъ под̑влече́на ѿ нѣ́коего мимохо́да, бꙋ́́детъ с ним̑.
бли́жнюю ѹ҆карѧ́ет꙽, ꙗ҆́ко нѣ́сть сподоби́ласѧ ꙗ҆́ко т̂а, ни ѹ҆́же е҆ѧ̀ претръгнꙋ́лосѧ е҆сть.
вс̂е быва́емое в ни́хъ л꙽жа е҆сть·

Ка́ко ѹ҆бо мнѣти и҆ли прозыва́ти ѧ҆̀ бо́ги сꙋща.
дре́водѣ́лѧми и҆ злата́ри сътворе́ни ст̑ꙋ.
ничтоже и҆но не быва́юща, н̂о е҆же хотѧ́тъ хи́трїи т̂о бꙋ́детъ.
и҆ тїи и҆же ѧ҆̀ тво́рѧтъ, не бꙋ́дꙋтъ долговѣ́чни.
ка́ко ли хотѧ́тъ сътворе́ни и҆́ми бы́ти бо́ѕи.
ѻ҆ста́виша б̂о по себѣ л꙽жꙋ, и҆ ѹ҆кори́знꙋ пото́мъ бꙋдꙋщимъ.
е҆гда б̂о прїидетъ на них̑ ра́ть, и҆ зла́ѧ.
совѣщава́ютъ къ себѣ жерцы̀ гдѣ сѧ съкрыют̑ с ни́ми·

Ка́ко ѹ҆бо нѣ́сть чю́ти, ꙗ҆́ко не сꙋть бо́ѕи.
не и҆збавлѧ́ютъ б̂о себе ѿ ра́ти, ни ѿ ѕл̂а, древѧ́ни сꙋще и҆ ка́мѧни и҆ позлаще́ни и҆ посребрени, позна́ютсѧ пото́мъ странамъ всм̑ѣ ꙗ҆́ко л꙽жа сꙋть·

И҆ цр҃емъ ꙗ҆́вни бꙋдт̑ꙋ ꙗ҆́ко не сꙋть бо́ѕи, н̂о дѣ́ло рꙋ́кꙋ чл҃чꙋ.
и҆ нѣсть ни е҆ді́ного дѣ́ла бж҃їа в них̑.
комꙋ нѣсть ра́зꙋмно, ꙗ҆́ко не сꙋть бо́ѕи.
цр҃ю стран꙽скꙋ не съпроти́вѧт̑сѧ.
ни до́ждѧ чл҃комъ не подаю́тъ.
ни прѧ̀ не раз꙽сꙋ́дѧтъ, и҆ не и҆зба́вѧт̑ ѿ ѻ҆би́ды страны.
не́мощ꙽ни сꙋще ꙗ҆́коже вра́ны межд̑ꙋ нб҃омъ и҆ землею.
и҆ е҆гда̀ падетъ ѻ҆́гнь на храмѣ бого́въ древѧ́ных̑, и҆ ка́менхъ, и҆ позлаще́ныхъ, и҆ посребре́ныхъ, жер꙽цы и҆хъ пробѣ́гнꙋтъ и҆ ѹ҆целѣютъ, а҆ ѻни ꙗ҆́ко слѣмена посреди съгорѧ́тъ.
цр҃ю же и҆ ратнымъ не ста́нꙋтъ проти́вꙋ·

Ка́ко б̂о мнѣти и҆л̂и прозыва́ти ꙗ҆́ко бо́ѕи сꙋть.
н̂и ѿ разбо́иникъ н̂и ѿ та́тїи и҆збавѧ́тъ себе, бо́ѕи древѧ́ни, и҆ ка́мени, и҆ посребрени, и҆ позла́щени, и҆́хже съдолѣвше, и҆ възем꙽ше зла́то и҆ сребро и҆ ризы и҆хъ ѿи҆дꙋтъ.
и҆ са́ми себѣ̀ не помо́гꙋт꙽·

Тѣмже ѹ҆́не е҆сть бы́ти цр҃емъ, и҆же ꙗ҆влѧет̑ своѐ мꙋж́ество.
и҆л̂и сосд̑ꙋ въ домꙋ потребенъ, и҆́мже похва́литсѧ владѧ́и и҆мъ, неглѝ л꙽жи бо́ѕи.
и҆л̂и двери в꙽ домꙋ снабдѣва́юща е҆же в нем꙽, негли л꙽жи бо́ѕи.
и҆ древѧ́нъ стол꙽пъ въ црс̑҇тѣ домꙋ̀, неглѝ л꙽жи бо́ѕи.
слн҃це б̂о и҆ мс̑҇ць и҆ ѕвѣзды свѣтли сꙋще, и҆ пꙋща́еми на потребꙋ, бл҃гопослꙋшливи сꙋть.
та́кожд̑еже и҆ молнїѧ е҆гда̀ просвѣтѧт̑сѧ бл҃говид̑ни сꙋть.
тожде же и вѣтръ в се́и странѣ вѣе́тъ.
и҆ ѻ҆блаком̑ е҆гда́ сѧ повели́тъ ѿ бг҃а и҆ти на всю̀ вселен꙽нꙋю, скон꙽чавают̑ повеленїе·

ѻ҆́гнь же пꙋщенъ съвы́ше и҆скази́ти пꙋсты́нѧ и҆ дꙋбра́вꙋ, сътвори́тъ повеленїе.
сїи же н̂и ѻ҆́бразы н̂и си́лами их̑ ѹ҆подоблени сꙋть·

Тѣмже н̂и мнѣти н̂и прозыва́ти их̑ бог̑҇ сꙋщ꙽ н̂и си́лномъ и҆мъ сꙋщем̑ н̂и прѧ̀ раз̑сꙋдити, н̂и добра̀ сътвори́ти чл҃комъ·

разꙋмѣвше ѹ҆бо ꙗ҆ко не сꙋть бо́ѕи, не бо́итесѧ их̑.
н̂и цр҃ь б̂о не проклент̑ꙋ н̂и блс̑҇вѧт̑.
зна́менїѧ на́ нб҃си н̂и въ странах̑ не пока́жют̑.
н̂и просвѣтѧт̑сѧ ꙗ҆́ко слн҃це, н̂и ѻ҆свѣтѧт̑ ꙗ҆́ко мс̑҇ць.
ѕвѣрь ѹ҆́нее их̑ е҆сть, и҆же мо́жет̑ въ бг̑҇ѣ в꙽ завѣтрїе себе пользова́ти.
н̂и е҆ді́ною же вино́ю е҆сть нам̑ ꙗ҆́вѣ ꙗ҆́ко сꙋть бо́ѕи.
тѣмже не бо́итесѧ их̑·

Ꙗ҆́кож̑ б̂о во ѻ҆́вощи пꙋди́ло ничесоже снабдит̑, та́коже и҆ бо́ѕи их̑ сꙋть, древѧ́ни и҆ ка́мѧни, и҆ посребре́ни, и҆ позлаще́ни·

по то́и же винѣ и҆ х꙽врас̑҇ и҆же во ѻград̑и̑, на нем̑же вс̂ѧ п꙽ти́ца сѣдают̑·

Та́кожд̑е же и҆ мр҃твьцꙋ поврьженꙋ во тмѣ̀, подобни сꙋть бо́ѕи их̑ древѧ́нїи позлащени и҆ посребрени.
ѿ багрѧни́ца в ню́же ѻ҆дѣ́ани, и҆ ѿ мрамо́рѧ и҆же на них̑ плѣснївѣет̑, позна́ите ѧ҆̀ ꙗ҆́ко не ст̑ꙋ бо́ѕи.

Тїи б̂о послѣди и҆з꙽ꙗ҆дени бꙋдт̑ꙋ ѿ чер꙽въ и҆ бꙋдт̑ꙋ во ѹ҆кори́знꙋ въ странѣ·

Ѹ҆нїи ес̑҇ чл҃къ правдив꙽ не и҆мы́и кꙋмирь бꙋдет̑ б̂о дале́че ѿ ѹ҆кори́зны·

Конец̑҇ прро̑҇кꙋ варꙋхꙋ и҆́мат̑ в себѣ глв̑҇а ѕ҃.