Библия (1581). [33] Иезекииль

И҆Є҆ЗЄКЄ́И҆ЛЬ ПРО҃РКЪ

ГЛАВА̀ А҃

И бы́сть въ тридесѧт̑ное лѣто въ четве́ртыи мс̑҇ць, пѧтыи дн҃ь мс̑҇ца.
а҆́зъ бѣхъ среди плѣн꙽никъ, при рецѣ ховар̑҇.
ѿврьзошасѧ нб҃са, и видх̑ѣ видѣнїе бж҃їе, пѧтыи мс̑҇ца.
с̂е лѣто пѧ́тое плѣне́нїѧ і҆ѻ҆а҆ки́ма цр҃ѧ і҆ѹ́дина·

Бы́сть сло́во гн҃е къ і҆езекїилю сн҃ꙋ вꙋѕїевꙋ жерцꙋ въ землѝ хал꙽дѣистеи, при рѣцѣ хова́ръ·

И быс̑҇ на мнѣ̀ рꙋка гн҃ѧ.
и҆ ви́дѣх꙽, и҆ се вѣтръ въздви́жесѧ и҆ грѧдѧ́ше ѿ сѣвера, и҆ ѻ́блакъ вели́къ в немъ, и҆ свѣтъ ѻ҆́крс̑҇тъ е҆го, и҆ ѻ́гнь блистаѧ́исѧ.
и҆ посредѣ е҆го, ꙗ҆́ко видѣнїе чи́стаго прꙋда среди ѻ҆гнѧ̀, и҆ свѣт꙽ в немъ.
и҆ по́средѣ ꙗ҆́ко подобїе четы́рехъ живо́тенъ, и҆ с̂е видѣнїе и҆хъ ꙗ҆́ко подо́бїе чл҃ка в нихъ.
и҆ четыри лица е҆ді́номꙋ.
и҆ четы́ри кры́ла е҆ді́номꙋ.
и҆ стегнѣ и҆хъ пра́вы, и҆ пернаты но́ги и҆хъ, і҆ и҆скры ꙗ҆́ко блиста́ющаѧсѧ мѣ́дь, и҆ легцѣ кры́лѣ их̑.
и҆ рꙋка чл҃ча под̑ кры́лꙋ и҆хъ, ѻ҆ четырех̑ страна́хъ и҆хъ.
и҆ лица и҆хъ и҆ кры́ла и҆хъ четы́рех꙽, держа́щесѧ дрꙋгъ дрꙋга.
лица же и҆хъ четыре, не ѻ҆бращахꙋсѧ внегда ходи́ти им̑, ко́ждо прѧмо лицꙋ их̑ хождахꙋ.
и҆ подо́бїе лица̀ и҆хъ, лице чл҃че, и҆ лице льво́во ѻ҆деснꙋю четы́ремъ, и҆ лицѐ те́льче ѻ҆шꙋю четы́ремъ, и҆ лицѐ ѻ҆́рле четы́ремъ.
лица же и҆хъ и҆ кры́ла и҆хъ просте́рта го́рѣ четы́ремъ, комꙋж́до дв̂ѣ съвокꙋпленѣ дрꙋг̑҇ къ дрꙋ́гꙋ.
двѣ ж̑ покрыва́стѣ съверхꙋ телеса̀ и҆хъ, и҆ къждо прѧ́мо лицꙋ свое҆мꙋ и҆дѧ́ше, и҆дѣже а҆ще бѧ́ше дх҃ъ шествꙋѧ, и҆дѧ́хꙋ и҆ не ѻ҆бращахꙋсѧ.
и҆ посредѣ животныхъ видѣнїе ꙗ҆́ко ѹ҆́глемъ ѻ҆гнѧ̀ горѧща, и҆ ꙗ҆́ко видѣ́нїе свѣщамъ съѻ҆бращающим̑сѧ посредѣ живо́тных̑, и҆ свѣтъ ѻ҆гнѧ̀.
и҆ ѿ ѻ҆гнѧ̀ и҆схожд̑аше ꙗ҆́ко мо́лнїѧ, и҆ живо́тнаѧ теча́хꙋ и҆ ѻ҆бращахꙋсѧ ꙗ҆́ко видѣ́нїе везе́ково·

И҆ ви́дѣхъ и҆ с̂е ко́ло е҆ді́но на землѝ, дръжасѧ живо́тнымъ четы́ремъ.
и҆ видѣнїе коле́сомъ, и҆ сътворе́нїе и҆мъ, ꙗ҆́ко видѣнїе ѳарси́съ.
и҆ подо́бїе в четы́рехъ, и҆ видѣнїе и҆хъ, и҆ дѣ́ло и҆хъ бѧ́ше, ꙗ҆́коже б̂ы ко́́ло въ ко́лесѣ.
на четы́ри страны̀ и҆хъ шествова́хꙋ и҆ не ѻ҆браща́хꙋсѧ внегда̀ шествова́хꙋ н̂и хреб꙽ты и҆хъ, и҆ высота̀ и҆хъ бѧ́ше, и҆ стра́шни бѧ́хꙋ.
и҆ ви́дѣхъ т̂а, и҆ плещи и҆хъ полны ѻ҆чесъ четы́ремъ.
и҆ внегда шествова́ти живо́тнымъ, шествовахꙋ и҆ колеса̀ дръщесѧ и҆хъ.
и҆ внегда въздвиѕа́тисѧ живо́тнымъ ѿ землѧ̀, възд̑виѕахꙋсѧ и҆ колеса̀.
и҆дѣже а҆ще бѧ́ше ѻ҆́блакъ, та́мо бѧ́ше и҆ дх҃ъ ѹ҆стремлѧ́асѧ, е҆же шествовати.
шествова́хꙋ живо́тнаѧ, и҆ колеса̀ въздвиѕахꙋсѧ с ни́ми.
занеже дх҃ъ жизни бѧше въ колесх̑ѣ·

Вънегд̑а и҆дѧхꙋ сїи и҆дѧ́хꙋ и҆ колеса̀.
е҆гда̀ стоа́ꙋ сїи, стоахꙋ и҆ колеса̀ с ни́ми.
и҆ е҆гда̀ въздвиѕахꙋсѧ ѿ землѧ̀, въздвиѕа́хꙋсѧ и҆ колеса̀.
ꙗ҆ко дх҃ъ жи́зни бѧ́ше въ коле́сѣхъ.
и҆ подобїе над̑ гла́вою живо́тныхъ ꙗ҆ко твердость, и҆ ꙗ҆ко видѣнїе стькла стра́шна, простер꙽то над̑ гла́вою и҆хъ съвы́ше.
и҆ под̑ ѹ҆твер꙽жденїемъ под̑ кры́ла их̑ протѧ́жено, съкрылѧ́ющисѧ дрꙋгъ къ дрꙋгꙋ комꙋждо дв̂ѣ съпрѧ́женѣ покрыва́ющи телеса̀ своѧ̀.
и҆ слы́шахъ гла́съ кры́лꙋ и҆хъ внегда̀ парѧхꙋ, ꙗ҆́ко шꙋмъ вод̑ мно́гъ, ꙗ҆́ко и҆ гласъ г҃а сад̑да.
и҆ внегда̀ и҆дѧхꙋ сїи гла́съ свовес̑҇ ꙗ҆́ко гла́съ по́лка, и҆ внегда̀ стоа́хꙋ и҆ ѹ҆молча́хꙋ кры́ла и҆хъ.
и҆ с̂е гласъ над̑ ѹ҆твер꙽жденїемъ, е҆же над̑ гла́вою и҆хъ.
внегда̀ стоа́хꙋ сїи, и҆ възд̑виѕахꙋ кры́лѣ своѝ.
и҆ над̑ твердїю ꙗ҆́же над̑ главою и҆хъ, ꙗ҆́ко видѣнїе ка́мени сапфира, и подобїе прс̑҇тла на не́м꙽.
и҆ на подобїи прс̑҇тла подо́бїе ꙗ҆́ко і҆ ѻ҆браз̑ чл҃чь на не́мъ сверхꙋ.
и҆ ви́дѣхъ ꙗ҆́ко видѣнїе прꙋда чистаго, ꙗ҆́ко и҆ ви́дѣнїе ѻ҆́гнено в нем꙽, и҆ свѣтъ ѻ҆́крс̑҇тъ ѿ видѣнїа чре́слъ и҆ вы́ше, ѿ видѣнїа чреслъ да́же и҆ до долꙋ.
ви́дѣхъ а҆ки видѣнїе ѻ҆гнѧ̀;
и҆ свт̑ѣ е҆го ѻ҆́крс̑҇тъ.
ꙗ҆́ко видѣ́нїе дꙋгы̀, е҆гда̀ е҆сть на ѻ҆́блацехъ въ дн҃ь до́ждѧ.
та́ко видѣнїе свѣта ѻ҆́крс̑҇тъ·

Глв̑҇а, в҃·

Сѐ видѣ́нїе подо́бїе сла́вы гн҃ѧ.
и҆ ви́дѣх꙽ и҆ падох̑ ни́ць.
и҆ рече къ мнѣ̀, сн҃е чл҃чь, ста́ни на но́ги своѧ да гл҃ю тебѣ·

И҆ прїиде на мѧ дх҃ъ, и҆ взѧ̀ м̂ѧ и҆ въздви́же м̂ѧ, и҆ поста́ви м̂ѧ на нога́хъ мои҆хъ.
и҆ слы́шахъ гл҃юща къ мнѣ̀.
и рече къ мнѣ·

Сн҃е чл҃чь, послю́ тѧ а҆́зъ къ до́мꙋ і҆и҆л҃евꙋ къ прогнѣваю҆щим̑ мѧ ꙗ҆́же ѻ҆горчи́ша м̂ѧ са́ми, и҆ ѿц҃ы их̑ ѿврьгошасѧ мене до дне́шнего дн҃е.
и҆ сн҃ове жестоколи́чнїи и҆ твердосръдечнїи, къ ним же послю́ тѧ а҆зъ.
и҆ речеши к ни́мъ·

Сѐ гл҃етъ а҆дона́и г҃ь, а҆ще ѹ҆бо ѹ҆слы́шатъ и҆л̂и ѹ҆боѧ́тсѧ.
занеже домъ разъгнѣ́ваѧй е҆сть, и҆ позна́ютъ ꙗ҆́ко прро̑҇къ е҆си т̂ы посредѣ и҆хъ·

И҆ ты̀ сн҃е чл҃чь, да не ѹ҆бои́шисѧ и҆хъ, ни ѹ҆жаса́исѧ ѿ лица̀ и҆хъ.
зане́же раз̑сверѣпѣютъ, и҆ ѻ҆бы́идꙋтъ т̂ѧ ѻ́крс̑҇тъ.
посреди б̂о скорпїевъ т̂ы живе́ши.
и҆ словесъ и҆хъ не ѹ҆бо́исѧ, и҆ ѿ лица̀ и҆хъ не ѹ҆жаса́исѧ.
занеже до́мъ ѻ҆горчева́ѧи е҆сть·

Ты́ же сн҃е чл҃чь гл҃еши словеса̀ моѧ к нимъ, а҆ще ѹ҆слы́шатъ и҆л̂и ѹ҆боѧ́тсѧ·

занѐ до́мъ прогнѣваѧи е҆сть·

И҆ т̂ы сн҃е чл҃чь послꙋшаи гл҃ющаго к тебѣ, не бꙋди раз꙽гнѣва́ѧи, ꙗ҆́коже и҆ домъ разнѣваѧи.
ѿврьзи ѹ҆ста̀ своѧ, и҆ снѣжд̑ь ꙗ҆же а҆зъ да́мъ тебѣ.
и҆ ви́дѣхъ, с̂е рꙋка простерта къ мн̂ѣ, и҆ в не́и сви́ток̑҇ кни́жныи.
разви е҆го предо мно́ю, и҆ в немъ бѧ́ше напи́сано зади и҆ преди.
и҆ впи́сано бѧше в нем̑ рыда́нїе, и҆ жа́лость, и҆ го́ре·

Глв̑҇а, г҃·

И рече къ мн̂ѣ, сн҃е чл҃чь, снѣжд̑ь сви́токъ сїи, и҆дѝ и҆ рцы сн҃омъ і҆и҆л҃евымъ.
и҆ ѿврьзохъ ѹ҆ста̀ своѧ, и҆ напита мѧ сви́тка сего.
и҆ рече къ мн̂ѣ, сн҃е чл҃чь, ѹ҆ста̀ твоѧ снѣдѧтъ, и҆ чрево твое насы́тит̑сѧ сви́тка сего дан꙽наго тебѣ.
и҆ снѣдохъ е҆го, и҆ бы́сть въ ѹ҆стѣхъ моихъ ꙗ҆́ко медъ сла́докъ·

И҆ рече къ мнѣ сн҃е чл҃чь, и҆ди вни́ди въ дом꙽ і҆и҆л҃евъ.
и҆ гл҃и словеса̀ моѧ к нимъ, ꙗ҆́ко не к лю́демъ глꙋбокорѣчным̑ і҆ и́ноꙗ҆зы́чномъ.
посыла́емъ е҆си к꙽ домꙋ і҆и҆л҃евꙋ.
ниже к꙽ людемъ мно́гимъ глꙋбокорѣчнымъ і҆ и҆ноꙗзы́чномъ, ни тѧ́жкомъ ꙗ҆зы́комъ сꙋщемъ, и҆хже да не разꙋмѣ́еши словесъ.
а҆ще къ та́цѣмъ посла́лъ т̂ѧ бы́хъ, т̂о и҆ тїи послꙋшали бы́ша тебе, а҆ дом̑ і҆и҆л҃евъ не въсхощетъ послꙋшати тебе.
ꙗ҆́ко весь домъ і҆и҆л҃евъ непокори́въ е҆сть, и҆ жестоцы срд̑цы.
и҆ с̂е да́хъ лице твое си́лно пред̑ лицемъ их̑, и҆ чело̀ твое крѣплѣи пред̑ чело́мъ их̑.
и҆ бꙋдетъ всегда̀ твер꙽же камени, и҆ ꙗ҆́ко креме́нь дахъ чело̀ твоѐ.
не ѹ҆бо́исѧ и҆хъ ни ѹ҆жаса́исѧ лица̀ и҆хъ, за неже домъ разгнѣва́ѧи е҆сть·

И҆ реч̑҇ къ мнѣ, сн҃е чл҃чь, всѧ словеса̀ ꙗ҆́же гл҃ахъ с тобо́ю, възмѝ въ срд̑це свое, и ѹшима свои́ма послꙋшаи.
и҆ шед̑ вни́ди съ плѣн꙽ники къ сн҃омъ людїи сихъ, и҆ речеши к нимъ.
та́ко гл҃етъ а҆дона́и г҃ь.
а҆ще ѹ҆бо послꙋшаютъ, и҆ а́ще ѹ҆бо попꙋстѧтъ.
в꙽зѧ́ мѧ дх҃ъ, и слы́шахъ гла́съ за собо́ю трꙋса вели́ка.
и҆ блс̑҇вена слава гн҃ѧ ѿ мѣста е҆го, и҆ гласъ кры́лъ живо́тныхъ съкрылѧ́ющесѧ дрꙋгъ къ дрꙋгꙋ.
и гласъ колес̑҇ дрьжа́щих̑сѧ живо́тныхъ, и҆ глас̑҇ трꙋса вели́ка.
и҆ дх҃ъ въздви́же м̂ѧ и҆ взѧ́ мѧ.
и пои҆дохъ възнесенъ въ ѹ҆стремле́нїи дх҃а свое҆го.
и рꙋка̀ гн҃ѧ бысть на мнѣ ѹкрѣплѧ́ющи м̂ѧ.
и внидо́хъ въ плѣн꙽ники възнесе́ны, и҆ ѻ҆быидохъ живꙋщаѧ на рѣцѣ̀ хова́рь.
и҆ сѣдох̑ т̂ꙋ седмь дн҃їи, ходѧ посреди их̑·

И҆ бысть по седми дн҃їи слово гн҃е къ мнѣ гл҃ѧ.
сн҃е чл҃чь стра́жа дах̑ тѧ домꙋ і҆и҆л҃евꙋ.
да слы́шиши сло́во ѿ ѹ҆стенъ мои҆хъ, и҆ въспрети́ши им̑ ѿ мене.
внегда гл҃ю безакон꙽никꙋ, смр҃тїю ѹ́мреши.
и҆ не възвѣсти́ши е҆мꙋ ни съгл҃еши.
ꙗ҆́ко ѻ҆ста́тис̑҇ безакон꙽никꙋ, и҆ ѻ҆брати́тисѧ ѿ пꙋти е҆го, ꙗ҆́коже живꙋ бы́ти е҆мꙋ.
безакон꙽ник꙽ же то́и въ безако́нїи своем̑ ѹ́мретъ.
кро́ви же е҆го ѿ рꙋки твое́а взыщꙋ·

И ты же а҆ще възвѣсти́ши безакон̑҇никꙋ, и҆ не ѻ҆братит̑сѧ ѿ безако́нїѧ свое҆го, и҆ ѿ пꙋти свое҆го безако́нна.
то́и безакон꙽никъ въ безако́нїи свое҆мъ ѹ́мретъ, а҆ т̂ы дш҃ꙋ свою и҆зба́виши·

И҆ егда̀ съврати́тсѧ правдивыи ѿ правдъ свои҆хъ, и҆ сътворитъ съгрѣше́нїе.
и҆ дамъ мꙋкꙋ пред̑ ним꙽, тои ѹ҆мрет̑, ꙗ҆́ко т̂ы ѻ҆ста́ви е҆го въ грѣсехъ свои ѹ҆мрѣти, занѐ не помѧнꙋтсѧ пра́вды е҆го ꙗ҆́же сътвори.
кро́ви же е҆го ѿ рꙋки твое́ѧ взыщꙋ·

Ты́ же а҆ще възвѣсти́ши правди́вомꙋ, ꙗ҆́коже не съгрѣшити, и҆ то́и не съгрѣшитъ.
правди́выи же жи́знїю ѻ҆живетъ, и҆ ты свою дш҃ꙋ и҆зба́виши·

И҆ бысть на мн̂ѣ рꙋка гн҃ѧ.
и҆ рече къ мнѣ, въста́ни і҆ и҆зыиди на́ поле, и҆ т̂ꙋ съгл҃етсѧ к тебѣ.
и҆ въста́хъ и҆зыидо́хъ на́ поле, и҆ с̂е т̂ꙋ сла́ва гн҃ѧ стоѧ́ше.
ꙗ҆́коже виденїе, и҆ ꙗ҆коже слава е҆же ви́дѣхъ на рецѣ̀ хова́рѣ.
и҆ падо́хъ на лицы свое҆мъ, и҆ прїиде на мѧ дх҃ъ, и҆ поста́ви мѧ на ногꙋ моею.
и҆ гл҃а къ мн̂ѣ, и҆ рече м̂и.
вни́ди и҆ затворисѧ средѣ домꙋ свое҆го·

Ты́ же сн҃е чл҃чь сѐ дадѧ́тсѧ на́ тѧ ѹ́зы и҆ свѧ́жꙋт꙽ т̂ѧ и́ми, и҆ не и҆зы́идеши ѿ среды их̑.
и҆ ꙗ҆зы́къ твои привѧжꙋ̀ къ горта́ни твое҆мꙋ, и҆ ѻ҆нѣмѣ́еши.
и҆ не бꙋдеши мꙋжъ ѻ҆бличе́нїѧ, поне̑ домъ разгнѣ́ваѧи е҆сть.
и҆ внегда̀ гл҃ю тебѣ, ѿврьзꙋ ѹ҆ста̀ твоѧ.
и҆ речеши к нимъ, с̂е гл҃етъ а҆дона́и г҃ь·

Слы́шаи да слы́шитъ, и҆ не покарѧ́ѧисѧ дасѧ поко́ритъ.
занеж̑ домъ разгнѣваѧи е҆сть·

Глв̑҇а, д҃·

И т̂ы сн҃е чл҃чь, възми себѣ плин꙽ѳꙋ, и҆ положи е҆̀ пред̑ лицемъ свои҆мъ.
и҆ да впи́шеши на не́и град̑ і҆ерс̑҇лмъ, и҆ да даси ѻ҆́крс̑҇тъ е҆го гражд̑енїе.
и да съгради́ши на не́и забра́ла, и҆ да ѻ҆деже́ши и҆̀ ѻ҆строго́мъ.
и҆ да даси ѻ҆́крс̑҇тъ е҆го по́лки, и҆ да ѹ҆чини́ши поставле́нїѧ стрѣ́лъ ѻ҆́крс̑҇тъ·

Ты же возми себѣ сковрадꙋ желѣзнꙋ, и да положи́ши е҆ѧ̀ въ стѣнꙋ желѣ́знꙋ межд̑ꙋ собо́ю, и҆ межд̑ꙋ гра́домъ.
да ѹ҆гото́виши лицѐ свое к немꙋ, и҆ бꙋдетъ в꙽ затво́ры, и҆ затвори́ши и҆̀.
зна́менїе с̂е е҆сть сн҃въ і҆и҆л҃евъ·

Ты же да спи́ши на лѣв́ыхъ ре́брехъ свои҆хъ.
и҆ да положи́ши непра́вды до́мꙋ і҆и҆л҃ева на нихъ, по числꙋ дн҃ь пѧ́тьдесѧ́тъ и҆ сто, ꙗ҆́же спи́ши на ни́хъ.
и҆ а́зъ да́хъ тебѣ дв̂ѣ непра́вдѣ их̑ в꙽ число̀ дн҃еи, в꙽ девѧтьдесѧ́тъ и҆ сто̀ дн҃ь.
и҆ во́змеши непра́вды до́мꙋ і҆и҆л҃ева, и҆ съверши́ши ѧ҆̀.
и҆ спи́ши на десныхъ ре́брехъ свои҆хъ второ́е, и҆ возмеши неправды до́мꙋ і҆ѹ́дина, четыридесѧ́тъ дн҃ь.
дн҃ь за е҆ді́но лѣто положихъ тебѣ ѧ҆̀·

На затворе́нїе і҆ерс̑҇лима ѹ҆готова́еши лицѐ свое, и҆ мы́шцꙋ свою ѹ҆тверди́ши, и҆ прорече́ши до него·

Се̂ а҆зъ дах̑ тебѣ ѹ҆́зы, и҆ не ѻ҆брати́шисѧ ѿт̑ ре́бръ на ре́бра, дон꙽деже сконча́ютсѧ дн҃їе затворе́нїѧ твое҆го·

Ты же сн҃е чл҃чь, възми себѣ п꙽шени́цꙋ, и҆ ꙗ҆ч꙽мень, и҆ бо́бъ, и҆ лѧ́щꙋ, и҆ про́со, и҆ пы́ро, и҆ вложи́ши ѧ҆̀ в꙽ сосꙋдъ е҆ді́нъ гли́нѧнъ.
и҆ сътвори́ши ѧ҆̀ себѣ въ хлѣ́бы по числꙋ дн҃їи, ꙗ҆́же спи́ши на ре́брехъ свои҆хъ, девѧтьдесѧ́тъ и҆ сто дн҃їи ꙗ҆́ждь себѣ.
ꙗ҆́дь же твоѧ̀ ꙗ҆́же ꙗ҆си в мѣ́рꙋ, двадесѧт̑ си́кль на́ дн҃ь, ѿ го́да до го́да ꙗ҆си сїа.
и҆ воды в꙽ мѣ́рꙋ и҆спїеши, ше́стꙋю ча́сть и҆́на, ѿ го́да до го́да и҆спїеши.
и҆ погреб꙽никъ ꙗ҆ч꙽мѧнъ и҆з꙽ꙗ҆си ѧ҆̀ в лаи҆нѣ моты́лъ чл҃чь погребе́ши ѧ҆̀ пред̑ ѻ҆чи́ма и҆хъ, и҆ рече́ши и҆мъ·

Се̂ гл҃етъ г҃ь б҃ъ і҆и҆л҃евъ, та́ко и҆з꙽ꙗ҆дѧтъ сн҃ве і҆и҆л҃еви хлѣ́бъ свои нечи́стъ въ странахъ, и҆дѣж́е расы́плю ѧ҆̀ аз̑ та́мо·

И҆ рѣ́хъ, ника́коже б҃е і҆и҆л҃евъ, с̂е дш҃а моѧ нѣсть сѧ ѻ҆скверни́ла в нечистотѣ, и҆ мертве́чинѣ, и҆ звѣроꙗ҆́динѣ.
нѣсмь ꙗ҆́лъ ѿ роже́нїѧ мое҆го досе́лѣ, и҆ нѣсть въшло въ ѹ҆ста̀ моѧ̀ мѧ́со ме́рз꙽ско и҆ скверна́во.
и҆ рече къ мнѣ̀, с̂е дах̑ тебѣ моты́ла говѧ́жа в꙽ моты́лъ мѣ́сто чл҃чь, и҆ сътвори́ши хлѣ́бы себѣ в ни́хъ.
и҆ рече къ мнѣ̀, сн҃е чл҃чь, с̂е а҆зъ сътрꙋ ѹ҆тверже́нїе хлѣ́бное въ і҆ерс̑҇лмѣ.
і҆ и҆з꙽ꙗ҆дѧ́тъ хлѣ́бъ в мѣ́рꙋ, и҆ въ ѻ҆скꙋдѣ́нїи.
и҆ во́дꙋ в мѣ́рꙋ на па́гꙋбꙋ и҆спїютъ.
и҆ поги́бнетъ чл҃къ и҆ бра́тъ е҆го, і҆ и҆ста́ютъ въкꙋ́пѣ в꙽ непра́вдахъ свои҆хъ·

Глв̑҇а, е҃·

Ты же сн҃е чл҃чь, възми себѣ ме́чь ѻ҆́стръ паче бри́твы стрыжи́тел꙽ски.
и҆ притѧжи и҆̀ себѣ и҆ възложи на главꙋ свою и҆ на бра́дꙋ свою.
и҆ възми превѣсню мѣ́ръ, и҆ размѣри́ши ѧ҆̀·

четве́ртꙋю ча́сть да и҆ж꙽же́ши на ѻ҆гнѝ средѣ гра́да, въ сконча́нїе дн҃їи затворе́нїа твое҆го.
и҆ да во́змеши четве́ртꙋю ча́сть, и҆ съж꙽же́ши ѧ҆̀ средѣ гра́да.
четве́ртꙋю же ча́сть и҆ съдроби́ши мече́мъ ѻ҆́крс̑҇тъ е҆го.
четве́ртꙋю ча́сть расы́плеши вѣтромъ, и҆ ме́чь и҆звлече́ши въ слѣ́дъ и҆хъ.
и҆ во́змеши ѿтꙋ́дꙋ ма́ло и҆хъ числомъ, и҆ прїимеши ѧ҆̀ въ скꙋтъ свои.
и҆ ѿ тѣ́х же во́змеши е҆ще и҆ в꙽верже́ши ѧ҆̀ средѣ ѻ҆гнѧ, і҆ и҆ж꙽же́ши ѧ҆̀ на ѻ҆гнѝ.
и҆ ѿ того и҆зы́идет̑ ѻ҆́гнь на ве́сь до́мъ і҆и҆л҃евъ·

Се̂ гл҃ет̑ а҆дона́и г҃ь.
с̂е і҆ерс̑҇лимъ посредѣ стран̑҇ положихъ т̂ѧ, и҆ стра́нъ ꙗ҆́же ѻ҆́крс̑҇т꙽ е҆го.
и҆ рече́ши, и҆змѣни ѻ҆правда́нїе мое въ безако́нїе, ѿ стра́нъ ꙗ҆́же ѻ҆́крс̑҇тъ е҆го.
тѣмъ е҆льмаже ѻ҆правда́нїѧ моѧ ѿри́нꙋша, и҆ по зако́ном̑ мои҆мъ не ходи́ша в н̂ѧ·

Сего ради гл҃етъ а҆дона́и г҃ь.
поне́же ѻ҆́бразъ вашъ ѿ стра́нъ ꙗ҆́же ѻ҆́крс̑҇тъ вас̑҇.
и҆ не ходи́сте в зако́нехъ мои҆хъ, и҆ ѻ҆правда́нїи моихъ не сътвори́сте.
н̂о и҆ по сꙋ́домъ ꙗ҆зы́ческомъ ꙗ҆́же ѻ҆́крс̑҇тъ вас̑҇ не сътвори́сте·

Сего ради с̂е гл҃етъ а҆дона́и г҃ь.
с̂е а҆зъ на́ тѧ, и҆ сътворю средѣ тебѐ сꙋ́дъ пред̑ стра́нами.
и҆ сътворю средѣ тебѐ е҆го́же нѣ́смь сътвори́лъ, и҆ е҆мꙋже не сътворю̀ подо́бно ктомꙋ̀ всего съгнꙋше́нїѧ ради твое҆го·

Сего ради и҆з꙽ꙗ҆дѧ́тъ ѿц҃ы ча́да своѧ средѣ тебѐ, и҆ ча́да и҆з꙽ꙗ҆дѧ́тъ ѿц҃а.
и҆ сътворю в тебѣ сꙋ́ды, и҆ раз꙽сѣ́ю вс̂ѧ ѻ҆ста́вшаѧ тебѐ по всемꙋ вѣтрꙋ·

Сего ради живꙋ а҆зъ гл҃етъ а҆дона́и г҃ь.
поне́же ѻ҆сщ҃енїѧ моѧ ѻ҆скверни всѣми не ѹ҆го́дными твои҆ми, и҆ съгнꙋшен꙽ми твои҆ми.
и҆ а́зъ ѿри́нꙋ т̂ѧ, и҆ не пощади́тъ ѻ҆́ко мое, и҆ а́зъ не поми́лꙋю.
че́тверть тебе смр҃тїю потреби́тсѧ.
че́тверть тебѐ гла́дом̑ скончает̑сѧ средѣ тебѐ.
че́тверть же тебѐ падетъ мече́мъ ѻ҆́крс̑҇тъ тебѐ.
че́тверть же тебе расы́плю по всемꙋ вѣтрꙋ, и҆ ме́чь и҆звлекꙋ въ слѣ́дъ и҆хъ.
и҆ сконча́етсѧ ꙗ҆рость моѧ и҆ гнѣ́въ мои на ни́хъ, и҆ ѹ҆тѣшꙋсѧ.
и҆ ѹ҆вѣ́дѧтъ ꙗ҆́ко а҆зъ г҃ь.
гл҃ахъ въ рве́нїи мое҆мъ внегда̀ скон꙽ча́хъ гнѣ́въ мои на ни́хъ.
и҆ положꙋ т̂ѧ в꙽ пꙋсты́ню и҆ въ ѹ҆кори́знꙋ ѻ҆́крестнымъ тебѐ, и҆ пред̑ всѧ́кимъ проходѧ́щимъ.
и҆ бꙋ́деши стенѧ̀, и҆ в порꙋга́нїе, въ при́тчю и҆ въ страх̑ въ странахъ ꙗ҆́же ѻ҆́крс̑҇тъ тебѐ.
внегда̀ сътворю в꙽ тебѣ сꙋды въ гнѣ́въ и҆ въ ꙗ҆́рость, и҆ въ ѿмще́нїе ꙗ҆́рости и҆ въ ѻ҆бличе́нїе, а҆зъ г҃ь гл҃ах̑.
внегда послю̀ стрѣ́лы своѧ гла́да мое҆го на́ нѧ, и҆ бꙋдꙋт꙽ въ сконча́нїе.
послю́ расы́пати в̂ы, и҆ гла́дъ ѻ҆бѣщаю на вы, и҆ сътрꙋ ѹ҆тверже́нїе хлѣ́ба твое҆го.
и҆ спꙋщꙋ на́ тѧ глад̑, и҆ ѕвѣ́рь зо́лъ, и҆ ѹ҆мꙋ́чꙋ т̂ѧ.
смр҃ть же и҆ кро́вь про́идетъ скво́ѕѣ т̂ѧ, и҆ ме́чь наведꙋ на́ тѧ, а҆зъ г҃ь гл҃ахъ·

Глв̑҇а, ѕ҃·

И бы́сть сло́во гн҃е къ мнѣ̀ гл҃ѧ, сн҃е чл҃чь, ѹ҆тверди лицѐ свое къ горамъ і҆и҆л҃вым̑ и҆ прорцы къ ним̑.
и҆ рече́ши, го́ры і҆и҆л҃евы, слы́шите слово гн҃е·

Се̂ гл҃етъ а҆дона́и г҃ь гора́мъ и҆ хо́лмомъ, и҆ по́лѧмъ и҆ де́бремъ.
се̂ а҆зъ наведꙋ на́ вы мечь и҆ потребѧ́тсѧ высоты̀ ваша.
и҆ поги́бнꙋтъ тре́бницы ва́ши, и҆ съкрꙋшатсѧ кꙋми́рницы ваши.
и҆ побїют̑ ꙗ҆́звеныа ваша пред̑ кꙋми́ры вашими, и҆ да́мъ стрꙋ́пъ сн҃омъ і҆и҆л҃евомъ пред̑ кꙋми́ры и҆хъ.
и҆ да́мъ ко́сти ваша̑ ѻ҆́крс̑҇тъ тре́бникъ вашихъ, въ всх̑ѣ селехъ вашихъ.
и҆ ѻ҆пꙋстѣют̑ гради ваши, и҆ высо́каѧ ваша поги́бнт̑ꙋ ꙗ҆́коже да сѧ потребѧ́тъ.
и҆ ѻ҆гнꙋсѧт̑сѧ тре́бницы ваши и҆ съкрꙋшат̑сѧ, и҆ почїю́тъ кꙋми́ры ваши, и҆ ѿвръгꙋтсѧ кꙋми́рницы ваши, и҆ потребѧ́тсѧ дѣ́ла ваша.
и҆ падꙋтъ ꙗ҆зве́нїи ваши средѣ вас̑҇.
и҆ позна́ете ꙗ҆́ко а҆зъ г҃ь.
и҆ ѻ҆ста́влю ꙗ҆́коже бы́ти ѿ ва́съ снабдѣ́номъ мече́мъ въ странахъ, и҆ в расы́панїе ва́ше въ странахъ.
и҆ помѧнꙋтъ ѹ҆цѣлѣ́вшїи ѿ вас̑҇ бы́вшее въ плѣне́нїи та́мо·

Клѧ́ша бо сѧ срд̑цемъ и҆хъ блꙋди́вшим̑ и҆ ѻ҆ста́вшимъ ѿ мене, и҆ ѻ҆чи́ма их̑ злы́ма въ слѣ́дъ хꙋдо́жествъ их̑.
и҆ възбїютсѧ по лицемъ свои҆мъ ѻ҆ зло́бѣ, и҆же твори́ша в꙽ согнꙋше́нїих̑, и҆ въ всѣ́хъ хꙋдожествїи҆хъ.
и҆ позна́ютъ ꙗ҆́ко а҆зъ г҃ь.
не тꙋ́не гл҃ахъ сътвори́ти и҆мъ все зл̂о сѐ·

Си же гл҃етъ а҆дона́и г҃ь, въсплещи рꙋко́ю, и҆ въстрепли ного́ю, и҆ рцы̀ бл҃го бл҃го ѻ҆ всемъ съгнꙋше́нїи зло́бы до́мꙋ і҆и҆л҃ева, ꙗ҆́ко мече́мъ и҆ гла́домъ и҆ смр҃тїю падꙋтъ.
да́лнїи смр҃тїю сконча́ютсѧ.
а҆ бли́жнїи мече́мъ падꙋтъ, а҆ ѻ҆держи́мыи гла́домъ скон꙽ча́ютсѧ.
и҆ сконча́ю гнѣ́въ мои на нихъ.
и҆ ѹ҆вѣсте ꙗ҆́ко а҆зъ г҃ь.
внегда бꙋ́дꙋтъ ꙗ҆зве́нїи ваши средѣ кꙋми́ръ вашихъ, ѻ҆́крс̑҇тъ тре́бникъ вашихъ.
на всемъ хо́лмꙋ высо́цѣ, и҆ на всѣхъ версѣхъ го́рнихъ.
и҆ пд̑о дꙋбомъ сѣ́нномъ, и҆ под̑ всѣмъ дꙋ́бомъ ча́стомъ.
и҆дѣ́же да́ша т̂ꙋ ѻ҆бъѹ҆ха́нїѧ бл҃гово́ннаѧ всм̑ѣ кꙋми́ромъ их̑.
прострꙋ рꙋ́кꙋ свою на́ нѧ, и҆ положꙋ зе́млю ихъ в па́гꙋбꙋ, и҆ потребле́нїе.
ѿ пꙋстынѧ девла́та, и҆ всего вселе́нїѧ и҆хъ.
и҆ позна́ете ꙗ҆́ко а҆зъ г҃ь·

Глв̑҇а, з҃·

И бы́сть сло́во гн҃е къ мнѣ̀ гл҃ѧ.
и҆ т̂ы сн҃е чл҃чь рцы̀, с̂е гл҃етъ г҃ь.
землѝ і҆и҆л҃вѣ конецъ прише́лъ е҆сть.
на четы́ри краи землѧ̀ пришел̑҇ е҆сть коне́цъ.
нн҃ѣ коне́цъ тебѣ, і҆ и҆спꙋщꙋ ꙗ҆́рость мою на́ тѧ, и҆ ѿм꙽щꙋ въ пꙋтехъ твои҆хъ, и҆ да́мъ на́ тѧ вс̂ѧ съгнꙋше́нїѧ твоѧ.
и҆ не пощади́тъ ѻ҆́ко мое на́ тѧ, и҆ не поми́лꙋю.
занѐ сꙋ́дъ твои на́ тѧ и҆дет̑, и҆ съгнꙋше́нїѧ твоѧ средѣ тебе бꙋдꙋтъ.
и҆ ѹ҆вѣ́дѧтъ ꙗ҆́ко а҆зъ г҃ь·

И҆мже с̂е гл҃етъ а҆дона́и г҃ь, зло́бъ е҆ді́на зло́ба с̂е и҆детъ.
коне́цъ прише́лъ е҆сть, прише́лъ коне́цъ к тебѣ.
въста́ни, се пришло е҆сть плете́нїе на́ тѧ живꙋщаго на землѝ.
пришел̑҇ е҆сть го́дъ, прише́лъ е҆сть дн҃ь, ни съ пли́щемъ ни съ болѣзнїю.
нн҃ѣ въ бли́зъ разлїю гнѣ́въ мои на́ тѧ, и҆ сконча́ю ꙗ҆́рость мою на тебѣ.
и҆ ѻ҆сꙋжꙋ т̂ѧ по пꙋтемъ твои҆мъ.
и҆ дам̑ на́ тѧ всѧ съгнꙋше́нїѧ твоѧ.
и҆ не пощади́тъ ѻ҆́ко мое и҆ не поми́лꙋю.
зане́же пꙋти твоѧ на́ тѧ дамъ, и҆ съгнꙋше́нїа твоѧ на́ тѧ возмт̑ꙋсѧ.
и҆ позна́еши ꙗ҆́ко а҆зъ г҃ь бїѧи·

Се̂ дн҃ь гн҃ь прихо́дит꙽, се коне́цъ пришел̑҇ е҆сть.
и҆зыиде плете́нїе, и҆ процвѣте же́злъ, проѕѧ́бе ѹ҆кори́зна.
и҆ съкрꙋшитъ ѹ҆тверже́нїе безако́н꙽ника.
и҆ не съ пли́щемъ ни съ пот̑ща́нїемъ и҆же ѿ нихъ сꙋть, и҆ нѣсть красы в нихъ.
прише́лъ час̑҇ приближи́лсѧ дн҃ь.
кꙋпѧи да сѧ не ра́дꙋет̑, и҆ прода́ѧи да сѧ не пла́четъ.
ꙗ҆́ко гнѣ́въ на всѐ мно́жество их̑.
зане́ же притѧжава́а къ прода́ющемꙋ, к꙽ семꙋ не възврати́тсѧ.
и҆ е҆ще въ жи́зни живꙋщемꙋ, ꙗ҆́ко видѣ́нїе на всѐ мно́жество и҆хъ не възврати́тсѧ.
и҆ чл҃къ въ ѻ҆чеси жи́знь е҆го не ѹ҆держит̑·

Въстрꙋби́те трꙋбо́ю, и҆ раз꙽сꙋди́те все, и҆ не бꙋ́детъ грѧдꙋщаго на рать, ꙗ҆́ко гнѣ́въ на все мно́жество и҆хъ.
ра́ть и҆з꙽внꙋ съ мечем̑, глад̑ же и҆ смр҃ть и҆знꙋтри.
и҆же на́ поли мечемъ сконча́етсѧ, сꙋщих꙽ же въ гра́дѣ гла̑ и҆ смр҃ть сконча́етъ.
и҆ ѹ҆цѣлѣ́ютъ сп҃се́нїи ѿ нихъ, и҆ бꙋ́дꙋтъ въ горах̑ ꙗ҆́ко скорбѧ́ще всѧ и҆збїю в꙽ неправдах̑ и҆хъ.
всѧ рꙋ́ки раз꙽слабѣ́ютъ, и҆ всѧ сте́гни ѹ҆калѧют̑сѧ мо́кростїю.
и҆ препоѧшꙋтсѧ въ врѣтища, и҆ покры́етъ ѧ҆̀ ѹ҆́жасъ.
и҆ на всѧ́ком̑ лицѣ сра́мъ на нихъ, и҆ на всѧ́кои главѣ плѣшъ.
сребро и҆хъ на стогнах̑ повержетсѧ, и҆ зла́то и҆хъ преѻ҆бидитсѧ.
сребро и҆хъ и҆ злато не въз꙽мо́жетъ и҆зба́вити и҆хъ ѿ гнѣ́ва бж҃їѧ.
дш҃а и҆хъ не насы́титсѧ, и҆ чре́во и҆хъ не напо́лнитсѧ, зане́же съблазнъ непра́вости и҆хъ, и҆збо́рное ѹ҆тва́ри въ презрѣ́нїе положи́ша е҆̀, и҆ ѻбразы ме́рзостїи свои҆хъ и҆ помраже́нїѧ сътвори́ша ѿ ни́хъ.
сего ради дахъ е҆̀ и҆мъ в꙽ нечистотꙋ, и҆ предамъ ѧ҆̀ в чю́жди рꙋцѣ ꙗ҆́коже разграби́ти ѧ҆̀, и҆ про́чимъ на землѝ въ плѣне́нїе, и҆ ѻ҆сквернѧтъ е҆̀.
и҆ ѿвращꙋ лице свое ѿ нихъ, и҆ ѻ҆скврънѧтъ страж꙽бꙋ мою.
и҆ вни́дꙋтъ в ню без꙽ сꙋмнѣ́нїѧ, и҆ ѻ҆сквернѧт̑ ю҆̀, и҆ сътво́рѧтъ мѧте́жъ.
поне́же землѧ̀ по́лна сꙋ́дꙋ кро́ве, и҆ гра̑ по́лнъ безако́нїа.
и҆ приведꙋ лꙋка́выа страны̀, и҆ прїимꙋтъ до́мы и҆хъ.
и҆ ѿвращꙋ велича́нїе крѣ́пости и҆хъ, и҆ ѻ҆сквернѧ́тсѧ ѻ҆сщ҃енїѧ и҆хъ.
и҆ ѻ҆цыще́нїе прїидетъ.
пои҆́щеши ми́ра, и не бꙋдетъ·

Лю́то до лю́та бꙋдет̑, и҆ вѣсть до вѣсти бꙋдетъ.
и҆ взы́щетсѧ видѣ́нїе ѿ прро̑҇ка, и҆ зако́нъ поги́бнетъ ѿ жерца̀, и҆ совѣтъ ѿ ста́рець.
цр҃ь въз꙽сѣтꙋетъ, и҆ кн҃ѕь ѻблече́тсѧ въ па́гꙋбꙋ, и҆ рꙋ́ки людїи землѧ̀ раслабѣ́ютъ.
по пꙋтемъ и҆хъ сътворю и҆мъ, и҆ сꙋды их̑ ѿм꙽щꙋ им̑.
и҆ разꙋмѣют̑ ꙗ҆́ко а҆зъ г҃ь·

Глв̑҇а, и҃·

И бы́сть в лѣто ше́стое, въ ше́стыи мс̑҇ць, въ пѧ́тыи дн҃ь мс̑҇ца.
сѣдѣ́хъ в꙽ домꙋ̀ мое҆мъ, и҆ ста́рцы і҆ѹ́дини сѣдѧ́хꙋ ѹ҆ менѐ.
и҆ бы́сть на мнѣ рꙋка̀ а҆дона́ѧ г҃а.
и҆ ви́дѣхъ и҆ с̂е ѻ҆бли́чїе мꙋж́еско, ѿ чре́слъ е҆го до до́ла ѻ҆́гнь.
ѿ чре́слъ же горѣ ꙗ҆́ко и҆ видѣ́нїе за́рѧ, и҆ ꙗ҆́ко в꙽зо́ръ прꙋ́да чи́ста.
и҆ простре подо́бїе рꙋки, и҆ ꙗ҆́ м̂ѧ за ве́рхъ главы̀ мое҆ѧ.
и҆ взѧ м̂ѧ дх҃ъ средѣ землѧ̀ и҆ средѣ нб҃си.
и҆ веде м̂ѧ въ і҆ерс̑҇лимъ в꙽ видѣ́нїи бж҃їи.
пред̑ пригра́ды врат̑ зрѧ́щих̑ на сѣверъ, и҆дѣж́е б̂ѣ сто́лпъ поста́вленъ и҆ ѻ҆́бразъ р꙽венїѧ притѧжава́ющаго.
и҆ с̂е т̂ꙋ бѧ́ше сла́ва б҃а і҆и҆л҃ева по видѣ́нїю е҆же ви́дѣхъ на́ поли·

И҆ рече къ мнѣ̀, сн҃е чл҃чь, възри ѻ҆чи́ма свои҆ма на сѣ́веръ.
и҆ възрх̑ѣ ѻ҆чи́ма мои҆ма на сѣ́веръ.
и҆ се ѿ сѣ́вера къ вра́томъ зрѧ́щимъ на въсто́къ тре́бника, и҆дѣж́е ѻ҆́бразъ р꙽венїѧ сего въ вхо́дѣ е҆ѧ̀·

И҆ реч̑҇ къ мнѣ сн҃е чл҃чь, ви́дѣ ли чт̂о се тво́рѧтъ сїи безако́нїѧ вели́ка, до́мъ і҆и҆л҃евъ тво́ритъ зд̂ѣ, ѿдѣлѧ́тисѧ ѿ ст҃ни мое҆ѧ.
и҆ е҆ще ѻ҆брати́сѧ и҆ ѹ́зриши бол̑҇ша.
и҆ в꙽веде м̂ѧ къ пред̑вратїю две́рномꙋ, и҆ ви́дѣх꙽, и҆ се сква́жнѧ е҆ді́на въ стѣнѣ.
и҆ рече къ мнѣ, сн҃е чл҃чь, раскопаи въ стѣнѣ.
и҆ раскопах̑, и҆ се две́ри е҆ді́ны.
и҆ рече къ мнѣ̀, вни́ди и҆ ви́жд̑ь безако́нїѧ зла́ѧ ꙗ҆́же тво́рѧтъ сїи зд̂ѣ.
и҆ вънидо́хъ и҆ ви́дѣхъ, и҆ се всѧ́къ ѻ҆́бразъ га́да и҆ ско́та сꙋѧа съгнꙋше́нїѧ, и҆ кꙋми́ры до́мꙋ і҆и҆л҃ва напи́сани бы́ша на стѣнѣ всю́дꙋ ѻ҆́коло.
и҆ сед̑мьдесѧ́тъ мꙋж́ъ ѿ ста́рець до́мꙋ і҆и҆л҃ева, и҆е҆хонїѧ а҆са́фовъ стоѧ́ше средѣ и҆хъ.
и҆ сїи стоѧ́хꙋ пред̑ лицемъ написанїѧ на стѣнѣ, и҆ ко́жд̑о ихъ и҆мы́и кади́лницꙋ в рꙋцѣ свое́и, и҆ ды́мъ кади́ла въсхожд̑аше·

И҆ реч̑҇ къ мнѣ̀, ви́дѣ ли сн҃е чл҃чь, е҆же ста́рцы до́мꙋ і҆и҆л҃ева тво́рѧтъ зд̂ѣ, кожд̑о и҆хъ в ло́жи та́инѣмъ.
занѐ рѣша, не ви́дитъ г҃ь, ѻ҆ста́вилъ е҆сть зе́млю·

И҆ рече къ мнѣ̀.
е҆ще ѻ҆брати́сѧ и҆ ѹ́зриши безако́нїѧ бо́льша, ꙗ҆́же сїи тво́рѧтъ.
и҆ в꙽веде м̂ѧ въ пред̑вра́тїе две́рїи гн҃ь зрѧ́щих̑ на сѣ́веръ.
и҆ с̂е же́ны сѣдѧ́ща ѹ҆ фамꙋса, и҆ пла́чющасѧ та́мо за кꙋми́ръ·

И҆ рече къ мнѣ̀, ви́дѣ ли сн҃е чл҃чь.
и҆ е҆ще ѹ҆́зриши хꙋдо́жество их̑ бо́льши сего.
и҆ в꙽веде мѧ въ дво́ръ до́мꙋ гн҃ѧ внꙋтръ.
и҆ пред̑ две́рїе хра́ма гн҃ѧ, междꙋ е҆ла́момъ и҆ ме́ждꙋ тре́бникомъ, ꙗ҆́ко дв̂адесѧть и҆ пѧт̑ мꙋжъ, за́ди дав꙽ша къ хра́мꙋ гн҃ю, и҆ лица̀ и҆хъ прѧ́мо въстокꙋ.
и҆ сїиже покланѧютсѧ на въсто́къ слн҃цꙋ·

И҆ реч̑҇ къ мнѣ̀, сн҃е чл҃чь.
е҆да ма́ло с̂и твори́ти безако́нїѧ до́мꙋ і҆ѹ́дина, ꙗ҆́же тво́рѧтъ зд̂ѣ.
поне́же напо́л꙽ниша зе́млю безако́нїѧ, и҆ ѻ҆брати́шасѧ разгнѣ́вати м̂ѧ.
и҆ с̂е сїи простира́ютъ ло́зꙋ ꙗ҆́ко и҆ хꙋлѧ́ще м̂ѧ.
и҆ а́зъ сътворю и҆мъ съ ꙗ҆́ростїю.
и҆ не пощади́тъ ѻ҆́ко мое, и҆ не поми́лꙋю.
и҆ призовꙋтъ въ ѹ҆́ши мои гла́сомъ вели́комъ, и҆ не ѹ҆слы́шꙋ и҆хъ

Глв̑҇а, ѳ҃·

И възопи въ ѹ҆́ши моѝ гласом̑ вели́комъ гл҃ѧ, приближи́лосѧ е҆сть м꙽щенїе гра́да.
и҆ ко́ждо и҆мѣа́ше сосꙋды въ рꙋцѣ своеѝ потре́бныа.
и҆ с̂е ше́сть мꙋжъ и҆до́ша ѿ вра́тъ высо́кихъ зрѧ́щих̑ на сѣверъ, и҆ кое҆мꙋжд̑о сосꙋды поги́бели въ рꙋкꙋ е҆го.
и҆ мꙋж꙽ е҆ді́нъ посредѣ и҆хъ ѻ҆блеченъ въ жречески ри́зы, и҆ поа́съ ѿ сапфи́ра ѻ҆ чреслх̑ѣ е҆го.
и҆ внидо́ша и҆ ста́ша близ̑ требника мѣ́дѧнаго, и҆ сла́ва б҃а і҆и҆л҃ева възы́иде ѿ херꙋви́ма сꙋщаго в нем̑, в непокровенм̑ѣ до́мꙋ.
и҆ призва мꙋжа ѻ҆бол꙽чена в꙽ ризꙋ жреческꙋ, и҆же и҆мѣа́ше на чреслѣхъ своих̑ поа́съ·

И҆ реч̑҇ г҃ь к немꙋ, проиди средѣ гра́да средѣ і҆ерс̑҇ли́ма.
и҆ даждь зна́менїа на лица̀ мꙋж́еска, и҆же болѣзнꙋ́ютъ и҆ стенꙋтъ, ѿ безако́нїи быва́ющихъ средѣ их̑·

И҆ симъ ре́че слы́шащꙋ мнѣ.
и҆дѣте въ́ град̑ въ слд̑ѣ е҆го, и҆ с꙽сѣцѣте и҆ не пощади́те ѻ҆чи́ма ва́шима̑ и҆ не поми́лꙋите, ни ста́рца н̂и ю҆́ноши, н̂и дв҃цы, н̂и младенца, н̂и жены, и҆збїите въ потребле́нїе.
а҆ на всѣхъ на ни́хъже е҆сть зна́менїе, не прикаса́итесѧ, ѿ ѻ҆сщ҃енныхъ мои́хъ начнѣте.
и҆ нача́ша ѿ мꙋж́ъ ста́рых̑, и҆же бѣша внꙋтръ въ дворѣ·

И҆ реч̑҇ к ни́́мъ, ѻ҆скверни́те до́мъ, и҆ напол̑҇ни́те мертвьца, і҆ и҆зыидѣте.
і҆ и҆зыдо́ша и҆збивахꙋ живꙋщихъ въ градѣ·

И҆ бы́сть внегда̀ сѣча́хꙋ, ѻ҆ста́хъ а҆́зъ, и҆ падо́хъ ни́ць.
и҆ възопихъ, и҆ рѣхъ.
горе го́ре, ѽ люте мн̂ѣ а҆дона́ю г҃и.
потреблѧ́еши ѻ҆стан꙽ки і҆и҆л҃евы, внегда̀ разлива́еши ꙗ҆́рость свою̀ на і҆ерс̑҇ли́мъ·

И҆ реч̑҇ къ мнѣ, непра́вда до́мꙋ і҆и҆л҃ева і҆ и҆ѹ́дина възвелича́етсѧ ѕѣ́ло, ꙗ҆́ко и҆ напо́лнисѧ землѧ̀ лю́дїи мног̑҇, и҆ град̑ напо́лнис̑҇ непра́вдъ и҆ нечистот̑.
ꙗ҆ко рѣша, ѻ҆ста́вилъ е҆сть г҃ь зе́млю, и҆ не ви́дитъ г҃ь.
н̂о а҆зъ е҆смь и҆ не пощади́тъ ѻ҆́ко мое, н̂и поми́лꙋю.
пꙋти и҆хъ на главы̀ и҆хъ дах̑.
и҆ с̂е мꙋжъ ѻ҆болченыи въ жреческїѧ ри́зы, и҆ препоа́саны поѧ́сомъ чресла̀ е҆го.
ѿвѣщава́ше гл҃ѧ, сътворих̑ ꙗ҆́коже заповѣ́да м̂и·

Глв̑҇а, і҃·

И ви́дѣхъ, и҆ с̂е верхꙋ твердѣли над̑ главо́ю херꙋвим̑скою, и҆ ꙗ҆́ко ка́мень сапфи́ровыи, и҆ ꙗ҆́ко подо́бїе прс̑҇тла на нем̑.
и҆ рече къ мꙋж́ꙋ ѻ҆блеченомꙋ въ ѹ҆тва́рь.
вни́ди средѣ колесъ ꙗ҆же под̑ херꙋви́момъ, и҆ напо́лни госести своѧ гла́вень ѻ҆гненъ ѿ среды херꙋви́ма, и҆ расы́пли по́ градꙋ.
и҆ вни́де предо мно́ю.
херꙋви́м же стоѧ́ше ѻ҆деснꙋю до́мꙋ, и҆ внегда̀ въхожд̑аше мꙋжъ, и҆ ѻ҆блак̑҇ напо́лни сѣнь внꙋтреню.
и҆ въздви́жесѧ сла́ва гн҃ѧ свы́ше херꙋви́ма, в непокрове́нїе до̂мꙋ, и напо́лни до́мъ ѻ҆́блакъ и҆ дворъ напо́лнисѧ сла́вы гн҃ѧ.
и҆ глас̑҇ кры́лꙋ херꙋви́м꙽скꙋ слы́шашесѧ до внѣшнѧго двора̀, ꙗ҆́ко и҆ гла́съ бж҃їи сад꙽да, и҆ гл҃юща·

И҆ бы́сть внегда̀ заповѣ́даше мꙋж́ꙋ ѻблечен꙽номꙋ въ ѹ҆тва́рь ст҃ꙋю, гл҃ѧ.
возмѝ ѻ҆́гнь ѿ среды ко́лесъ, и҆же средѣ херꙋви́м꙽.
и҆ внїиде и҆ ста̀ бли́зъ колесъ.
и҆ простре херꙋви́мъ рꙋ́кꙋ свою̀ межд̑ꙋ херꙋви́момъ, средѣ ѻ҆гнѧ̀ сꙋщаго херꙋви́мома, и҆ взѧ̀ и҆ вда́сть въ рꙋцѣ ѻ҆болчен꙽номꙋ въ ѹ҆тва́рь ст҃ꙋю.
и҆ взѧ̀ і҆ и҆зыиде.
и҆ видѣхъ херꙋви́ми, и҆ с̂е ѻ҆бличїе рꙋкъ чл҃чь подъ крылы и҆хъ·

И҆ ви́дѣхъ с̂е четы́ри колеса стоа́хꙋ дръжа́щесѧ херꙋви́мꙋ.
и҆ ко́ло е҆ді́но держа́шесѧ е҆ді́ного херꙋви́ма.
и҆ ко́ло же е҆ді́но дръжа́сѧ дрꙋгаго херꙋви́ма.
взор꙽ же коле́съ ꙗ҆́ко и҆ взоръ ка́менїѧ ѻ҆́гнена.
и҆ взоръ и҆хъ ѻ҆бли́чїе въ четы́рехъ, ꙗ҆́коже е҆гда̀ е҆сть ко́ло в꙽ ко́леси.
и внегда̀ и҆дѧ́хꙋ на четы́ри части и҆дѧхꙋ, и҆ не ѻ҆бращахꙋсѧ внегда̀ и҆дѧ́хꙋ, ꙗ҆́ко на не́же мѣсто а́ще възрѧ́ше е҆ді́нъ нача́токъ, въ слд̑ѣ е҆го идѧ́хꙋ и не ѻ҆браща́хꙋсѧ.
всѧ́ же тѣлеса их̑ и҆ хреп꙽ти и҆хъ, и҆ рꙋци и҆хъ, и҆ кры́ла и҆хъ, и ко́леса полна ѻ҆чесъ, ѻ҆́крс̑҇тъ четы́рехъ колесъ и҆хъ.
ко́леса же сїи нарекошасѧ слы́шащꙋ мн̂ѣ ге́льге́ль.
четы́ри же лица̀ комꙋж́до и҆хъ.
е҆ді́номꙋ лице херꙋви́мле, лице же дрꙋгомꙋ лице львово, третїеж̑ лице те́лче, и҆ четвертое лице ѻ́рле.
и҆ взѧшесѧ херꙋви́ми·

се̂ е҆сть живо́тнаѧ, еже ви́дѣхъ на рѣцѣ хова́рѣ.
и҆ е҆гда̀ и҆дѧ́хꙋ херꙋви́ми, и҆дѧ́хꙋ и҆ колеса̀ и҆хъ, и сїи дръжа́щесѧ ихъ·

И҆ внегда̀ въздви́ѕахꙋ херꙋвими кры́ла, ꙗ҆́ко възвыситисѧ ѿ землѧ̀, и҆ не ѻ҆браща́хꙋсѧ колеса̀ и҆хъ, и҆ та́ же дръжа́щесѧ их̑·

И҆ егда̀ стоа́хꙋ тїи, стоа́хꙋ и҆ ѻ҆ни.
и҆ внегда̀ възвышахꙋсѧ тїи, възвышахꙋсѧ и҆ ѻ҆нѝ с ними·

занеже дх҃ъ живо́тенъ б̂ѣ в ни́хъ.
и҆зы́иде б̂о сла́ва гн҃ѧ ѿ непокрове́ннаго до́мꙋ, и҆ взыиде на херꙋві́мы, и҆ възд̑виго́ша крыла херꙋви́ми, и҆ възвыси́шасѧ херꙋви́ми ѿ землѧ̀ предо мно́ю.
е҆гд̑а изыидо́ша тїи, и҆ колеса̀ дръжа́хꙋсѧ и҆хъ.
и҆ къ пред̑вратїю врат̑ до́мꙋ гн҃ѧ ꙗ҆же проти́вꙋ восто́кꙋ, и҆ сла́ва г҃а б҃а і҆и҆л҃ева б̂ѣ на нихъ.
с̂е е҆сть живо́тнаѧ и҆же ви́дѣхъ пред̑ бм҃ъ і҆и҆л҃евомъ на рѣцѣ ховарь.
и҆ позна́х꙽ ꙗ҆́ко херꙋви́ми бѧ́хꙋ четыри.
четыри лица е҆ді́номꙋ, и҆ четыри кры́ла е҆ді́номꙋ, и҆ подобїе рꙋкѝ чл҃чи под̑ крылы и҆хъ, и҆ подобїе ѻ҆бличїи и҆хъ.
и҆ с̂и бѣхꙋ ѻ҆бли́чїе, и҆́хже видѣхъ при рѣцѣ хова́рь, и҆ въ зрѣнїе и҆хъ.
и҆ кого́ждо предъ лицемъ своимъ ходи́ти·

Глв̑҇а, а҃і·

И въздви́же м̂ѧ дх҃ъ, и҆ възведе м̂ѧ къ вра́том꙽ до́мꙋ гн҃ѧ ꙗ҆́же зрѧт̑ на востокъ·

и҆ с̂е предъ предъвра́тїемъ вра́тнымъ ꙗ҆́ко дв̂адесѧть и҆ пѧть мꙋж́ъ.
и҆ ви́дѣхъ среди их̑ і҆езонїю і҆е҆зекова, и҆ фалтїю ванеѻ҆ва старѣ́ишины лю́дъски·

И҆ реч̑҇ г҃ь къ мнѣ̀, сн҃е чл҃чь, сїи мꙋжи помышлѧ́ющїи сꙋѧ́ѧ.
и҆ совѣтъ творѧ́щеи въ градѣ семъ гл҃ющеи, не в новѣ ли сѧ т̂ꙋ съгради́ша до́мове.
се́и е҆сть коноб꙽, а҆ в̂ы мѧ́са·

Сего рад̑и̑ прор꙽цы на́ нѧ, прор꙽цы сн҃е чл҃чь.
и҆ паде на мнѣ̀ дх҃ъ, и҆ рече къ мнѣ̀ гл҃ѧ.
с̂е гл҃етъ г҃ь, та́ко рц̂ы т̂ы до́мꙋ і҆и҆л҃евꙋ, и҆ мышленїа ваша а҆́зъ вм̑ѣ.
ѹ҆мно́жисте мр҃твьца въ гра́дѣ сем̑, и҆ наполни́сте пꙋтѝ е҆го ꙗ҆́звен꙽ных̑·

Того ради та́ко гл҃етъ а҆дона́и г҃ь, мр҃твьца ꙗ҆́же и҆зби́сте среди е҆го, тїи сꙋть мѧ́са, а҆ сїи конобъ е҆сть, и҆ васъ и҆зведꙋ ѿ среды и҆хъ·

Меча сѧ бои҆те, н̂о мечь наведꙋ на вас̑҇ гл҃етъ а҆дона́и г҃ь.
и҆зведꙋ ва́съ ѿ среды̀ е҆го и҆ предамъ васъ въ рꙋци чю́ждихъ, и҆ сътворю въ вас̑҇ сꙋдъ.
мечемъ падете на гора́хъ і҆и҆л҃евахъ сꙋжд̑ꙋ вам̑ и҆ ѹ҆вѣсте ꙗ҆́ко а҆зъ г҃ь.
т̂о не бꙋдет̑ вамъ въ конобъ, и҆ в̂ы не бꙋдете по́средѣ е҆го мѧ́са·

На горахъ і҆ил҃евах̑ сꙋжꙋ ва́мъ, и҆ ѹ҆вѣсте ꙗ҆ко а҆зъ г҃ь.
ꙗ҆́ко по за́повѣдемъ моим̑ не ходи́сте и҆ сꙋ́довъ мои҆хъ не сътвори́сте.
н̂о и҆ сꙋдовъ ѻ҆́крс̑҇тныхъ стра́нъ не сътвори́сте·

И҆ бы́сть внегда̀ прорицахъ с̂и, фалтїѧ ванеѻ҆въ ѹ҆́мре.
и҆ падохъ ни́ць и҆ възопихъ гла́сомъ вели́комъ гл҃ѧ, го́ре мнѣ лю́тѣ мнѣ̀ лю́тѣ мнѣ̀ а҆дона́ю г҃и, на сконча́нїе т̂ы тво́риши ѻ҆ста́нокъ і҆и҆л҃евъ·

И҆ бы́сть сло́во гн҃е къ мнѣ̀ гл҃ѧ сн҃е чл҃чь, бра́тїа твоа и҆ дом̑ ѿц҃а твое҆го, и҆ мꙋжи плѣн꙽никъ твоих̑, и҆ весь до́мъ і҆и҆л҃евъ скон꙽чева́етсѧ.
и҆же реко́ша себѣ̀ са́ми живꙋщеи въ і҆ерс̑҇ли́мѣ, далече ѹ҆да́литесѧ ѿ г҃а нам̑ да́на е҆сть землѧ̀ въ прича́стїе.
сего ради рекох̑, с̂е гл҃етъ а҆дона́и г҃ь, ꙗ҆́ко ѿринꙋ ѧ҆̀ въ страны̀, и҆ раз꙽сѣю ѧ҆̀ по все́и зе́мли.
и҆ бꙋ́дꙋ и҆мъ въ ѻ҆сщ҃е́нїе ма́ло въ странахъ и҆же внїидꙋт꙽ та́мо·

Сего ради рѣхъ, се̂ гл҃етъ а҆дона́и г҃ь.
и҆ прїимꙋ ѧ҆̀ ѿ стра́нъ, и҆ съберꙋ ѿ земль, и҆дѣже раз꙽сѣѧх̑ ѧ҆̀ в ни́хъ, и дамъ и҆мъ землю і҆и҆л҃вꙋ и҆ внїидꙋтъ та́мо и҆ ѿве́ргꙋтъ вс̂ѧ съгнꙋшенїѧ ѿ неѧ̀, и҆ вс̂ѧ безако́нїа еѧ̀ с не́ѧ.
и҆ дамъ им̑ срд̑це и҆́но, и҆ дх҃ъ но́въ да́мъ им̑.
і҆ и҆стор꙽гнꙋ ка́менное срд̑це ѿ плотїи и҆хъ, и҆ дамъ им̑ срд̑це пло́тѧно.
ꙗ҆́коже по дѣ́ломъ мои҆мъ да хо́дѧтъ, и҆ заповѣ́ди моѧ̀ да съхранѧтъ и҆ сътворѧ́тъ ѧ҆̀.
и҆ бꙋдт̑ꙋ м̂и въ лю́ди, и҆ а́зъ им̑ бꙋдꙋ въ б҃ъ·

а҆ и́хже срд̑це по съгнꙋшенї ихъ и҆ по безаконїихъ хо́дитъ, пꙋти тѣх꙽ на главѣ и҆хъ положꙋ, гл҃етъ а҆донаи г҃ь.
и҆ въздвиго́ша херови́ми кры́ла своѧ̀, и҆ колеса̀ дръжа́хꙋсѧ и҆хъ.
сла́ва же б҃а і҆и҆л҃ева б̂ѣ на нихъ свы́ше и҆хъ·

И҆ възыиде сла́ва гн҃ѧ ѿ среды гра́да, и҆ ста̀ на́ горѣ ꙗ҆же бѣше проти́вꙋ гра́дꙋ на востокъ·

И҆ дх҃ъ взѧ̀ м̂ѧ, и҆ принесе м̂ѧ на́ землю хал̑҇дѣ́искꙋ въ плѣн꙽ники, въ видѣнїи дх҃омъ бж҃їимъ·

И҆ възыидо́хъ ѿ видѣнїѧ е҆же видх̑ѣ.
и҆ гл҃ахъ къ плѣн꙽никомъ вс̂ѧ словеса̀ гн҃ѧ, ꙗ҆́же сказа̀ мн̂ѣ·

Глв̑҇а, в҃і·

И бы́сть сло́во гн҃е къ мнѣ̀ гл҃ѧ сн҃е чл҃чь, средѣ до́мꙋ гнѣваю҆ща т̂ы живеши.
и҆же и҆́мꙋтъ ѻ҆́чи на видѣнїе, и҆ не ви́дѧтъ.
и҆ ѹ́ши и҆мт̑ꙋ на слы́шанїе, и҆ не слы́шатъ.
зане до́мъ гнѣ́ваѧй е҆сть.

И҆ ты же сн҃е чл҃чь, сътвори себѣ̀ сосꙋды плѣн꙽нически.
и҆ плѣненъ бꙋ́деши дн҃їю предъ ни́ми, и҆ преселе́нъ бꙋ́деши ѿ мѣста твое҆го, на мѣ́сто дрꙋго́е пред̑ ними ꙗ҆́ко да ви́дѧтъ.
занѐ дом̑ гнѣ́ваѧй е҆сть·

І҆ и҆знесеши сосꙋды своѧ̀, ꙗ҆́ко сосꙋдъ плѣн꙽ническїи дн҃їю пред̑ ѻ҆чима и꙽хъ.
ты́ же и҆зыидеши вечер̑҇ пред̑ ни́ми, ꙗ҆́коже хо́дит꙽ плѣн꙽никъ.
прокопа́и себѣ̀ въ стѣнѣ, і҆ и҆зы́идеши сквоѕѣ ню пред̑ ними.
на ра́мѣ свои во́змеши, и҆ покровенъ и҆зыидеши.
лице свое покры́еши и҆ не ви́диши землѧ̀.
понеже ди́въ т̂ѧ дахъ до́мꙋ і҆и҆л҃евꙋ·

И҆ сътворих̑ та́ко все е҆ли́ко м̂и заповѣда г҃ь.
и҆ сосꙋды и҆знесохъ ꙗ҆́ко сосꙋды плѣн꙽нича дн҃їю.
и҆ вечерь прокопах̑ себѣ̀ стѣнꙋ рꙋкою, и҆ ѻ҆та́и и҆зыидох꙽, и҆ на ра́мѣ взѧх̑ пред̑ ними·

И҆ бы́сть сло́во гн҃е къ мнѣ̀ гл҃ѧ, сн҃е чл҃чь, не рѣхъ л̂и к тебѣ дом̑ і҆и҆л҃евъ гнѣ́ваѧй е҆сть, что же т̂ы тво́риши.
рцы̀ к нимъ, с̂е гл҃етъ г҃ь б҃ъ кнѧ́ѕю и҆ старѣ́ишинамъ і҆ерс̑҇ли́млем̑, и҆ всемꙋ до́мꙋ і҆и҆л҃евꙋ и҆же сꙋть средѣ и҆хъ.
рц̂ы, ꙗ҆́коже аз̑ чюдеса́ творю̀ ꙗ҆коже и҆ сътворихъ.
си́це и҆мъ бꙋдет̑ въ преселенїи, и въ плѣненїи и҆зы́идꙋтъ.
и҆ кнѧ́ѕь средѣ и҆хъ на ра́мꙋ въздви́гнетсѧ.
и҆ ѻ҆таи и҆зы́идет꙽ стѣнꙋ прокопа́етъ ꙗ҆́коже е҆мꙋ и҆злз̑ѣти сквоѕѣ ню̀.
лице свое покры́етъ ꙗ҆́коже не ви́дѣти е҆го ѻ҆чеси, и҆ тои же земли не ѹ҆́зритъ.
и҆ прострꙋ мрежю свою̀ на́нь, і҆ и҆метсѧ въ ѻ҆дер̑҇жа́нїи мое҆мъ.
и҆ въведꙋ и҆̀ бъ вавѷлон̑҇ на́ землю хал꙽дѣ́искꙋ, и҆ не ѹ́зрит̑ еѧ̀ н̂о тꙋ̀ сконча́етсѧ.
и҆ вс̂ѧ и҆же ѻ҆́крс̑҇т꙽ е҆го помо́щники е҆го, и҆ вс̂ѧ под̑е҆́млющаѧ е҆го рас꙽сѣ́ю по всѣмъ вѣтром̑, и ме́чь пролью въ слд̑ѣ и҆хъ.
и҆ ѹ҆вѣдѧт̑ ꙗ҆́ко а҆зъ г҃ь, е҆гда̀ расыплю ѧ҆̀ въ странахъ, и҆ рас꙽сѣю ѧ҆̀ по землѧ́мъ.
и҆ ѻ҆ста́влю себѣ̀ мꙋжа в число̀ ѿ меча и҆ ѿ гла́да и҆ ѡ смр҃ти, ꙗ҆́кож̑ да и҆сповѣдѧтъ вс̂ѧ безако́нїѧ и҆хъ въ странахъ, и҆дѣже въшли бꙋ́дꙋтъ та́мо.
и ѹ҆вѣ́дѧтъ ꙗ҆́ко а҆зъ г҃ь·

И҆ бы́сть сло́во гн҃е къ мнѣ̀ гл҃ѧ, сн҃е чл҃чь, хлѣбъ сво́и с недостат꙽комъ и҆зъꙗ҆си, и҆ во́дꙋ свою̀ съ страда́нїем꙽ и҆ скорбїю и҆спїеши.
и҆ рече́ши къ лю́дем̑ землѧ̀, с̂е гл҃етъ а҆дона́и г҃ь.
живꙋщим꙽ въ і҆ерс̑҇ли́мѣ на́ земли і҆и҆л҃евѣ, хлѣ́бы и҆хъ с недостаткомъ и҆зъꙗ҆дѧ́тъ, и҆ водꙋ и҆хъ с па́гꙋбою и҆спїютъ.
ꙗ҆́кож̑ да погибнетъ землѧ̀ с ко́нцемъ свои҆мъ, в нечестїи б̂о всѝ живꙋщеи в не́и.
и҆ гра́ди их̑ вселе́нїи ѻ҆пꙋстѣ́ютъ, и҆ землѧ и҆хъ въ поги́бель бꙋ́детъ.
и҆ ѹ҆вѣсте ꙗ҆́ко а҆зъ г҃ь·

И҆ бы́сть сло́во гн҃е къ мнѣ̀ гл҃ѧ сн҃е чл҃чь, ка́ѧ притча с̂и ва́мъ на́ земли і҆и҆л҃евѣ, гл҃ющим̑, ꙗ҆ко дол꙽зи дн҃и поги́бе вс̂е видѣнїе.
сего ра́ди рц̂ы к ни́мъ, с̂е гл҃етъ а҆дона́и г҃ь.
да ѻ҆брати́ши притчю т̂ꙋ, и҆ потом̑ не рекꙋтъ прит̑ча тоѧ̀ до́мъ і҆и҆л҃вь.
и҆ гл҃и к ни́мъ, приближи́шасѧ дн҃їе и҆ сло́во всего видѣнїѧ.
зане же не бꙋдетъ къ семꙋ всѧ́ко видѣнїе ло́жно, и҆ вол꙽хвꙋѧ средѣ сн҃овъ і҆и҆л҃евыхъ.
ꙗ҆́ко азъ г҃ь съгл҃ю словеса́ моѧ̀ и҆ сътворю̀.
и҆ не продол꙽жꙋ въ́ дн҃и ва́ша до́ме съгнѣваѧи, съгл҃ю сло́во и҆ сътворю, гл҃етъ а҆дона́и г҃ь·

И҆ бы́сть сло́во гн҃е къ мнѣ̀ гл҃ѧ, сн҃е чл҃чь, с̂е до́мъ і҆и҆л҃евъ гл҃ющихъ.
видѣнїе е҆же сеи ви́дѣ на дн҃и мно́ги, и҆ на ча́сы дол꙽ги прорица́етъ·

Сего ра́ди рц̂ы к нимъ, с̂е гл҃етъ г҃ь б҃ъ.
не продолжи́тсѧ к семꙋ̀ всѧ́къ гл҃ъ мо́и, сло́во е҆же възъгл҃ю и҆спо́лнитсѧ, гл҃етъ г҃ь·

Глв̑҇а, г҃і·

И бы́сть слово гн҃е къ мн̂ѣ гл҃ѧ, сн҃е чл҃чь, прорцы̀ на прро̑҇ки прорица́ющаѧсѧ, и речеши прро̑҇комъ прорица́ю҆щимсѧ ѿ срд̑ца и҆хъ, прор꙽цы.
и҆ речеши к нимъ·

Слы́шите сло́во гн҃е, с̂е гл҃етъ а҆дона́и г҃ь.
лю́тѣ прорица́ющимъ ѿ срд̑ца свое҆го, прорица́ющимъ въ слд̑ѣ дꙋха свое҆го, а҆ ѿню́дъ не вѣдѧщемъ.
ꙗ҆́ко лиси́ца в пꙋсты́ни, та́ко прро̑҇цы твоѝ бы́ша і҆и҆л҃ю.
не ста́ша на твердѣли, ни поста́вишас̑҇ стѣно́ю за домъ і҆и҃лвъ, ни съпроти́вишас̑҇ въ бою въ дн҃ь гн҃ь.
ви́дѧще ло́жнаѧ, и҆ въл꙽хвꙋ́ющеи сꙋѧ́ѧ гл҃ющеи, гл҃етъ г҃ь.
а҆з же г҃ь нѣсмь ихъ посла́лъ, и҆ начаша въставлѧ́ти сло́во·

не ло́жное л̂и ѹ҆бо видѣнїе ви́дѣсте, и҆ въл꙽хвова́нїѧ сꙋ́ѧѧ рекосте, и҆ гл҃ете рекꙋще, г҃ь, г҃ь.
а҆з же нѣсмь гл҃алъ·

Сего ради рцы̀, с̂е гл҃етъ а҆дона́и г҃ь·

понеже словеса̀ лжа сꙋть, и҆ бъл꙽хвова́нїѧ ваша сꙋ́ѧ.
того ра́ди с̂е азъ на вы гл҃етъ а҆дона́и г҃ь.
и҆ прострꙋ рꙋкꙋ свою на прро̑҇ки ви́дѧщаѧ лжꙋ̀, и҆ ѿвѣщава́ющаѧ сꙋѧѧ.
въ наказа́нїе людїи мои҆хъ не бꙋдꙋтъ, и въ писа́нїи домꙋ і҆и҆лева не в꙽пи́шꙋтсѧ, и҆ въ зе́млю і҆и҆л҃евꙋ не внидꙋтъ.
и҆ ѹ҆вѣдѧтъ ꙗ҆́ко а҆зъ а҆дона́и г҃ь.
имже прельсти́ша лю́ди моѧ, гл҃ще ми́ръ ми́ръ, и҆ не бѧ́ше ми́ра.
сїи же съгражд̑а́ютъ стѣнꙋ̀, а҆ ѻ҆ни пома́заютъ ю҆̀, а҆ще сѧ паде́тъ.
гл҃и къ помаза́ющимъ, паде́тсѧ.
и҆ бꙋдꙋтъ тꙋча потоплѧ́ющи, и҆ дамъ ка́менїе стрѣльное въ свꙋзы и҆хъ и҆ падꙋтсѧ, и҆ вѣтръ възъдви́жꙋщь разме́щет̑, и҆ рас꙽сѧдет̑сѧ и҆ падетсѧ стѣна.
и҆ не рекꙋтъ л̂и к ва́мъ, где е҆сть помазанїе ва́ше е҆же пома́засте·

Того ради с̂е гл҃ет̑ а҆дона́и г҃ь.
и҆ навергꙋ бꙋрю разорѧ́ю҆щꙋ съ ꙗ҆́ростїю, и҆ тꙋча потоплѧ́ю҆щи гнѣвомъ мои҆мъ бꙋдетъ, и҆ каменїе стрѣльное навергꙋ ꙗ҆́ростїю въ сконча́нїе.
и҆ ра́скопа́ю стѣнꙋ ю́же пома́засте, и҆ паде́тсѧ.
и҆ положꙋ ю҆̀ на землѝ, и҆ ѿкры́етсѧ ѻ҆снова́нїе еѧ и҆ падетсѧ, и҆ сконча́етсѧ съ ѻ҆бличе́нїемъ.
и҆ позна́ете ꙗ҆́ко аз̑ г҃ь.
и҆ скон꙽ча́ю ꙗ҆́рость свою до стѣны̀ и҆ до помазающихъ ю҆̀.
и҆ реко́хъ к вам̑ нѣсть стѣны, ни помазаю҆щих̑ еѧ̀.
прро̑҇цы і҆и҆л҃евы прорица́ющеисѧ къ і҆ерс̑҇лимꙋ, и҆ ви́дѧщеи миръ е҆го·

и҆ ми́ра не бꙋдет̑, гл҃етъ а҆дона́и г҃ь·

И҆ ты сн҃е чл҃чь, ѹ҆твердѝ лицѐ свое на дщери людїи свои҆хъ, на прорица́ющаѧсѧ ѿ срд̑ца свое҆го.
и҆ прорцы̀ до нихъ, и҆ речеши.
с̂е гл҃етъ а҆дона́и г҃ь.
го́ре с꙽шева́ющимъ въз꙽гла́вїица̑ под̑ всѧкїи ло́коть рꙋкѝ, сътворѧю҆щимъ покри́вала на всѧ главы̀ всего телесѝ, ꙗ҆́коже разврати́ти дш҃а.
дш҃а разврати́ша людїи моих̑, и҆ дш҃а потварѧ́хꙋ.
и҆ ѻ҆сквернавлѧ́хꙋ мѧ к лю́демъ мои҆мъ, горьсти ради ꙗ҆ч꙽ме́нны и҆ ѹ҆крꙋха ради хлѣба, ꙗ҆ко и҆зби́ти дш҃а и́мже не бѣ̀ лѣпо ѹ҆мрѣти.
и҆ ѻ҆живи́ти дш҃а, и҆мже не бѣ лѣпо жи́ти.
л꙽жꙋще лю́демъ мои҆мъ, послꙋшающимъ л꙽жѝ·

Сего рад̑и̑ се гл҃етъ г҃ь, с̂е а҆зъ на воз꙽гла́вїѧ ва́ша, и҆миже в̂ы раз꙽враща́ете дш҃а тамо.
и҆ ѿвръгꙋ ѧ҆̀ ѿ мы́шць ва́шихъ, і҆ и҆спꙋщꙋ дш҃а ꙗ҆́же вы развраща́стѐ на расыпанїе.
и҆ растерза́ю въз꙽гла́вїѧ ва́ша, и ѿи҆мꙋ лю́ди моѧ ѿ рꙋки вашеѧ, и҆ ксемꙋ не бꙋдꙋтъ в рꙋкꙋ вашею на раз̑враще́нїе.
и҆ позна́ете ꙗ҆́ко а҆зъ г҃ь.
понеже развраща́сте срд̑ца пра́ведных̑ в непра́вдꙋ, а҆ а́зъ не развраща́хъ их̑.
и҆ ѹ҆крѣплѧ́сте рꙋци безако́нникꙋ, ѿнюдъ не ѿврати́тисѧ ѿ пꙋтѝ е҆го зла́го, и҆ живꙋ бы́ти е҆мꙋ.
сего ради не ѹ́зрите лжа̀, и҆ вол꙽хвова́нїа ксемꙋ не имате вол꙽хвова́ти.
и҆зба́влю лю́ди моѧ ѿ рꙋкъ вашихъ, и҆ ѹ҆вѣсте ꙗко а҆зъ г҃ь·

Глв̑҇а, д҃і·

И прїидоша къ мн̂ѣ мꙋжи ѿ ста́рець і҆и҆л҃евъ, и҆ сѣдо́ша̑ предо мною·

И҆ бы́сть слово гн҃е къ мн̂ѣ гл҃ѧ, сн҃е чл҃чь мꙋжи сїи положи́ша ра́зꙋмы своѧ на срд̑цахъ свои҆хъ, и҆ мꙋче́нїе непра́вдъ ихъ поставиша пред̑ лицемъ свои҆мъ, а҆ще ѿвѣща́ю и҆мъ·

сего ра́ди гл҃и к нимъ, и҆ речеши и҆м꙽·

Сѐ гл҃етъ а҆дона́и г҃ь, чл҃къ, чл҃къ ѿ домꙋ і҆и҆л҃ева, и҆же а҆ще поло́житъ ра́зꙋмы своѧ въ срд̑цы свое҆мъ, и҆ мꙋче́нїе непра́вды своеѧ ѹ҆чи́нитъ прд̑е лицемъ свои҆мъ.
и҆ прїидет̑ къ про̑҇ркꙋ въпроси́ти е҆го ѻ҆ мн̂ѣ.
а҆зъ г҃ь ѿвѣща́ю е҆мꙋ в немъ, и҆миже держит̑сѧ разꙋмъ е҆го.
ꙗ҆́коже да не ѹ҆клонитъ до́мꙋ і҆и҆л҃ева по срд̑цемъ и҆хъ, ѹ҆даленыхъ ѿ мене помышле́нїемъ и҆хъ·

Сего ради рцы̀ домꙋ і҆и҆л҃евꙋ, с̂е гл҃ет꙽ г҃ь б҃ъ.
ѻ҆брати́тесѧ и҆ ѿврьзи́тесѧ ѿ хꙋдо́жествъ ва́шихъ, и҆ ѿ всѣхъ неправдъ ва́ши̑ ѿврати́те лица̀ ваша.
занѐ чл҃къ ѿ до́мꙋ і҆и҃лва и҆ ѿ новоприше́дших̑ къ і҆и҆л҃еви·

и҆же а҆ще ѹ҆дали́тсѧ ѿ мене, и҆ поло́жит̑ ра́зꙋмы своѧ на срд̑цы свое҆мъ, и҆ мꙋче́нїе непра́вды своеѧ ѹ҆чи́нитъ пред̑ лицемъ свои҆мъ.
и҆ прїидетъ л̂и къ прро̑҇кꙋ ꙗ҆ко въпроси́ти е҆го ѻ҆ мн̂ѣ.
а҆зъ г҃ь ѿвѣща́ю е҆мꙋ в немъ, і҆ им̑же держи́тсѧ, и҆ ѹ҆твержꙋ лице мое на чл҃ка того.
и҆ положꙋ и҆̀ въ и҆зги́бель и҆ в꙽ потребле́нїе, і҆ и҆звергꙋ и҆̀ ѿ среды людїи мои҆хъ.
и҆ ѹ҆вѣсте ꙗ҆́ко а҆зъ г҃ь.
и прро̑҇къ а҆ще прельстит̑сѧ, и҆ съгл҃етъ слово.
а҆зъ г҃ь прельстих̑ прро̑҇ка того.
и҆ прострꙋ рꙋкꙋ свою на́нь, и҆ потреблю и҆̀ ѿ среды і҆и҆л҃евы.
и прїимꙋтъ непра́вдꙋ свою, по непра́вдѣ въпраша́ющаго.
такоже бꙋдетъ непра́вда прро̑҇ка, ꙗ҆́коже да сѧ не прельщает̑ ктомꙋ до́мъ і҆и҆л҃евъ ѿ менѐ, и да не ѻ҆сквернавлѧ́ютсѧ ктомꙋ въ всх̑ѣ градехъ их̑.
и҆ бꙋдꙋтъ м̂и в лю́ди, а҆ а҆зъ бꙋдꙋ и҆мъ въ б҃ъ, гл҃етъ а҆дона́и г҃ь·

И҆ бы́сть слово гн҃е къ мн̂ѣ гл҃ѧ, сн҃е чл҃чь, страна̀ а҆ще съгрѣшитъ м̂и ꙗ҆́ко па́стисѧ грѣхомъ и҆ прострꙋ рꙋкꙋ свою на ню̀.
и҆ сътрꙋ ѹ҆тверже́нїе хлѣбное, и҆ пꙋщꙋ на ню̀ глад̑, и҆ възмꙋ с неѧ чл҃ки и҆ скотъ.
и҆ а҆ще бꙋдꙋтъ сїи трїе мꙋжи среди еѧ̀, но́е, дани́лъ, і҆ и́ѻвъ, тїи въ пра́вдѣ свое́и сп҃сꙋтсѧ, гл҃етъ а҆дона́и г҃ь.
а҆ще и҆ звѣри злы́и напꙋщꙋ̀ на́ землю и҆ ѹ҆мꙋчꙋ ю҆̀, и҆ бꙋдет̑ въ па́гꙋбꙋ, и҆ не бꙋдет̑ проходѧ́щаго сквозѣ ню̀ ѿ лица̀ звѣрина.
и҆ сꙋть трїе сїи мꙋжи среди еѧ̀.
жи́въ а҆зъ гл҃етъ а҆дона́и г҃ь.
ни сн҃ове ни дще́ри их̑ сп҃сꙋтсѧ, н̂о тїи сами сп҃сꙋтсѧ.
а҆ землѧ̀ въ потребле́нїе и҆ в сѣчь бꙋдет̑.
а҆ще наведꙋ на тꙋ зе́млю ме́чь и҆ гл҃ю мечю, проидѝ зе́млю и възмѝ с неѧ чл҃къ и҆ скотъ.
а҆ три мꙋжи сїи бꙋдꙋтъ л̂и среди еѧ̀.
живꙋ а҆зъ гл҃етъ а҆дона́и г҃ь, не и҆зба́вѧтъ ни сн҃овъ ни дще́ръ свои҆хъ, н̂о тїи сами сп҃сꙋтсѧ.
а҆ще л̂и и҆ смр҃ть пꙋщꙋ на́ землю, и҆ разлїю ꙗ҆́рость свою на ню̀ въ кро́вѣ, ꙗ҆́коже потреби́ти с неѧ чл҃ки и҆ скоти.
а҆ но́е, и҆ данїилъ, і҆ и́ѻвъ, бꙋдꙋтъ л̂и посредѣ еѧ, живꙋ а҆зъ гл҃етъ а҆дона́и г҃ь, ни сн҃ове ни дще́ри не ѻ҆стант̑ꙋ им̑·

тїи же въ пра́вдѣ свое́и сп҃сꙋтсѧ, і҆ и҆зба́вѧтъ дш҃а своѧ·

Се̂ гл҃етъ а҆дона́и г҃ь, а҆ще же и҆ четыри м꙽стѝ пꙋщꙋ̀ на і҆ерс̑҇лима, мечь, гла́дъ, звѣри злы̀, смр҃ть, ꙗ҆́ко потребити члки и ско́ты.
се же ѻста́влени в не сп҃сенїи ѿ него, сїи и҆зведꙋтъ сн҃ы и҆ дще́ри.
с̂е тїи и҆сходѧтъ к꙽ ва́мъ и҆ ѹзрите пꙋтѝ и҆хъ, и҆ хꙋдожества и҆хъ.
и҆ пока́ютсѧ ѻ҆ ѕло́бахъ, ꙗ҆́же наведо́хъ на і҆ерс̑҇лимъ, всѧ̀ ѕлобы ꙗ҆́же наведо́хъ на́нь.
и҆ ѹ҆тѣшатъ васъ и҆мже ѹ́зрите пꙋтѝ их̑, и҆ хꙋдожества и҆хъ.
и҆ разꙋмѣ́ете ꙗ҆́ко не въсꙋе е҆смь сътвори́лъ всѐ е҆ли́ко сътворихъ в нем̑, гл҃етъ а҆дона́и г҃ь·

Глв̑҇а, е҃і·

И бы́сть слово гн҃е къ мн̂ѣ гл҃ѧ сн҃е чл҃чь, чт̂о ѹ҆бо древо ло́зное ѿ всѣхъ древесъ ло́зныхъ, ꙗ҆́же сꙋть въ древесѣхъ дꙋбра́вныхъ.
а҆ще възмꙋтъ ѡ нихъ древо, ꙗ҆коже сътвори́ти дѣло.
и҆ а́ще възмꙋтъ ко́лъ, ꙗ҆́коже ѻ҆бѣсити на немъ съсꙋдъ.
ра́звѣ е҆же ѻ҆гневи дастьсѧ въ потребле́нїе, лѣтномꙋ ѹ҆чище́нїю е҆го.
потреблѧ́етъ ѻ́гнь, и҆ скон̑҇чава́етсѧ до конца̀, е҆да потре́бно бꙋдетъ на дѣло.
и҆ е҆ще цѣлꙋ́емꙋ сꙋщꙋ не бꙋдетъ на дѣло.
ко́ль па́че а҆ще ѻ́гнь е҆̀ попали́тъ до конца̀, а҆ще бꙋдетъ на дѣло потомъ·

Сего ра сице гл҃етъ г҃ь б҃ъ, ꙗ҆́коже лоза̀ винограднаѧ въ древѣ дꙋбра́внем̑, тꙋ же да́хъ на потребле́нїе ѻ҆гневи.
також̑ дамъ живꙋщаѧ въ і҆ерс̑҇лі́мѣ, и҆ дам лице мое на нѧ.
ѿ ѻ҆гнѧ и҆зы́идꙋтъ и҆ ѻ́гнь поѧ́сть ѧ҆̀.
и҆ ѹ҆вѣдѧтъ ꙗ҆́ко а҆зъ г҃ь.
е҆д̂а ѹ҆твержꙋ лице свое на́ нѧ, и҆ дамъ землю в꙽ пагꙋбꙋ, зане́ же в꙽падо́ша въ грѣхъ, гл҃етъ а҆дона́и г҃ь·

Глв̑҇а, ѕ҃і·

И бы́сть слово гн҃е къ мн̂ѣ гл҃ѧ сн҃е чл҃чь, съвѣсти і҆ерс̑҇ли́мꙋ безако́нїѧ е҆го, и҆ речеши·

Сѐ гл҃етъ а҆дона́и г҃ь і҆ерс̑҇ли́мꙋ, корень твои и҆ бы́тїе твое ѿ землѧ̀ ханане́иски, ѿц҃ъ твои а҆м꙽море́и, и҆ мт҃и твоа хетт꙽е́иска.
и҆ роже́нїе твое воньже сѧ дн҃ь родил̑҇ е҆си, не завѧза́ша т̂и пꙋпа и҆ водо́ю не ѻ҆мы́ша т̂ѧ на сп҃сенїе.
ни солїю ѻ҆соли́сѧ, ни пелена́ми быс̑҇ пови́тъ.
и҆ не пощадѣ тебе ѻ́ко мое ꙗ҆́коже сътвори́ти тебѣ е҆ді́но ѿ всего сего, ꙗ҆́ко пострада́ти чт̂о ѹ҆ тебе.
и҆ ѿврьженъ бы́сть на лице полю лꙋкава́нїемъ дш҃а твоеѧ, въ дн҃ь воньже сѧ родилъ е҆си.
и҆ проидохъ сквозѣ т̂ѧ и ви́дѣхъ т̂ѧ смѧтен̑҇нꙋ въ крови твое́и.
и҆ рекохъ т̂и е҆гда б̂ѣ въ крови твое́и жива бꙋди.
и҆ реко́х꙽ въи҆стин꙽нꙋ тебѣ, въ крови твоеи жива̀ бꙋ́ди.
ѹ҆мно́жисѧ чисте ꙗ҆́кож̑ въстокъ слн҃чныи дахъ т̂ѧ.
и҆ ѹ҆мно́жисѧ и҆ ѹ҆вели́чисѧ, и҆ внїиде въ грады град̑.
со́сцы твоѝ възрастоша, и҆ вла́си твоѝ просїѧшасѧ.
ты́ же бысть на́га и҆ без꙽ красы̀.
и҆ проидохъ сквозѣ т̂ѧ, и҆ видѣхъ т̂ѧ, и с̂е вре́мѧ твое ꙗ҆́ко времѧ разарѧ́ющих̑.
и҆ прострохъ кры́лѣ своѝ на тѧ, и҆ прикры́хъ стꙋдъ твои.
и҆ клѧ́хъ ти сѧ и҆ внїидохъ в завѣтъ с тобою, гл҃етъ а҆дона́и г҃ь.
и҆ бысть мн̂ѣ.
и҆ ѻ҆мых̑ водо́ю, и҆ ѻ҆пласкахъ кровь твою ѿ тебе, и҆ пома́захъ т̂ѧ ма́сломъ, и҆ ѻ҆блекохъ т̂ѧ въ пестроты̀, и҆ ѻ҆бꙋхъ т̂ѧ в꙽ червле́ны.
и҆ припоѧсах̑ т̂ѧ синѧто́ю, и҆ възложих̑ на тѧ трихап꙽тонъ.
и҆ ѹ҆тварихъ т̂ѧ ѹ҆тва́рїю и҆ възложи́хъ ѻ҆брꙋчи на рꙋцѣ твоѝ, и҆ гри́внꙋ на вы́ю твою.
и҆ дахъ приток̑҇ в но́здри твоѧ̀, и҆ ѹ҆серѧ́зѧ въ ѹ́ши твоѝ, и҆ вѣнец̑҇ хвалы̀ на главꙋ̀ твою.
и҆ ѹ҆тваре́на бысть зла́томъ и҆ сребром̑ и҆ ѻдежд̑а твоѧ багрѧ́ны, и҆ трихапта и҆з꙽мечтаны·

Крꙋпы̀ пшени́чны и҆ мед̑ и҆ ма́сло ꙗ҆́лъ е҆си, и҆ бы́сть добръ ѕѣло ѕѣло.
и҆ ѹ҆пра́висѧ на црс̑҇тво.
и҆зы́иде и́мѧ твое въ страны̀ въ добротѣ твоеи.
занѐ съвръшен̑҇на бѣ лѣпотою, ю҆же ѹ҆чиних̑ на тебѣ, гл҃етъ а҆дона́и г҃ь.
ты же ѹ҆пова̀ на добротꙋ̀ свою, и҆ съблꙋди къ и́мени свое҆мꙋ, и҆ расы́па блꙋженїе свое по всемꙋ распꙋтїю.
томꙋ бысть е҆мж̑ꙋ не бꙋдетъ.
и҆ взѧ̀ ѿ ри́зъ свои҆хъ, и҆ сътворѝ себѣ кꙋми́ры съшве́ны, и҆ съблꙋдѝ к нимъ, и҆ не вни́деши, и҆х꙽же нѣсть ни бꙋдꙋтъ.
и҆ взѧ̀ съсꙋды хвалы̀ твоеѧ, ѿ сребра мое҆го и҆ зла́та мое҆го ѿ негоже да́хъ тебѣ.
и҆ сътвори себѣ ѻ́бразы мꙋжески, и҆ съблꙋдѝ в них̑.
и҆ взѧ̀ ри́зы своѧ и҆з меч꙽тан꙽ныѧ, и҆ ѻ҆дѣѧ е҆̀.
и҆ ма́сло мое и҆ ѳимїам꙽ мои положѝ пред̑ лицемъ их̑.
и҆ хлѣбы моа ꙗ҆́же дахъ тебѣ крꙋп꙽ пшениченъ, и҆ масла и҆ ме́да и́хже напита́хъ т̂ѧ.
положѝ ѧ҆̀ пред̑ лицем̑ и҆хъ въ во́ню бл҃гоѹ҆ха́нїа·

И҆ бы́сть потомъ гл҃етъ а҆донаи г҃ь.
и҆ поѧ̀ сн҃ы своа и҆ дщери своа ꙗ҆́же е҆си родила̑, и҆ закла и҆мъ в꙽ потребле́нїе.
ꙗ҆́ко ма́ло съблꙋдѝ.
і҆ и҆скла̀ чада своѧ, и҆ дас̑҇ ѧ҆̀ внегда и҆зꙋмисѧ к нимъ, сѐ па́че всего съблꙋже́нїѧ твое҆го и҆ съгнꙋше́нїи твои҆хъ.
и҆ не помѧнꙋ дн҃е младенъства твое҆го, е҆гда б̂ѣ нага̀ и҆ безъстꙋдова́ѧ, и҆ смѣше́на в꙽ кро́ве свое́и, и҆ жи́тъ.
и҆ бысть по всѣхъ непра́вдахъ твои҆хъ.
лю́те люте тебѣ гл҃етъ а҆дона́и г҃ь.
и҆ създа̀ себѣ хра́мъ блꙋдническь, и҆ сътворѝ себѣ полага́нїѧ на всѣхъ стогнахъ и҆ на зача́лѣ всѧ́кого пꙋтѝ, създа̀ блꙋди́лища своѧ, и҆ расы́па добротꙋ̀ свою.
и҆ разложѝ го́лени своа всѧ́комꙋ ми́моходѧ́щꙋ, и҆ ѹ҆мно́жи блд̑ꙋ свои.
и҆ съблꙋди съ сн҃омъ е҆гѷпет꙽скомъ съсѣ́ды твои҆ми дебе́лымъ пло́тїю.
и҆ мно́гажды съблꙋди разгнѣ́вати м̂ѧ·

И҆ се прострꙋ рꙋ́кꙋ мою на́ тѧ, и҆ ѿве́ргꙋ зако́ны твоѧ.
и҆ предамъ т̂ѧ дш҃амъ ненави́дѧщимъ тебе дще́ри и҆ноплеме́нникъ, съвраща́ющаѧ т̂ѧ с пꙋти твое҆го, и҆мже нечествова и҆ съблꙋди къ сн҃омъ а҆сѷровымъ, и҆ та́коже сѧ не насы́ти.
и҆ съблꙋди и҆ не насы́тисѧ.
и҆ ѹ҆мно́жи завѣтъ свои к꙽ землѝ ханане́истеи и҆ халдѣ́истеи, и҆ в сихъ же сѧ не насыти·

Чимъ ѻ҆чи́щꙋ срд̑це твое, гл҃етъ а҆дона́и г҃ь.
и҆мже сътвори вс̂е с̂е дѣ́ло же́ны блд̑ꙋница дерза́юща, и҆ съблꙋди трегꙋ́бъ въ дще́рех꙽ свои҆хъ.
е҆гда̀ съгради блꙋдилище свое в нача́лѣ всего пꙋти, и҆ степе́ни своѧ сътвори на всѣ́хъ сто́гнахъ.
и҆ не бы́сть ꙗ҆́ко блꙋ́дница събирающа наи҆́мно, жена б̂о любодѣѧ подо́бна тебѣ, ѿ мꙋж́а свое҆го в꙽землющи наи҆мно.
всѣмъ блꙋди́вшимъ с нею даа́ше наи҆мно, ты же даде наи҆мъ хотемъ своим̑ всѣ́мъ, и҆ задѣваше т̂ы и҆мъ бре́мѧ, ꙗ҆́коже приходи́ти им̑ к тебѣ ѿ всю́дꙋ въ блꙋже́нїи твоем̑·

И҆ бы́сть въ тебѣ съпроти́вно.
ѻ҆бы́чаю жен꙽скꙋ въ блꙋже́нїи твое҆мъ, и҆ с тобо́ю не блꙋди́ша, е҆гд̑а даѧ́ше наи҆́мно, и҆ наи҆́мно не да́сть тебѣ, и҆ бы́сть в тебѣ съпроти́вно.
сего ради слы́ши блꙋднице сло́во гн҃е·

Се̂ гл҃ет̑ а҆дона́и г҃ь, занѐ и҆злїѧ́ша мѣдь твою, и҆ ѿкры́сѧ сра́мъ твои въ блꙋже́нїи твое҆мъ къ хо́темъ твои҆м꙽, и҆ въ всѧ помышле́нїѧ безако́нїи твои҆хъ, и҆ въ кро́ве чад̑ твои҆хъ ꙗ҆́же дадѐ и҆мъ.
сего ради се а҆зъ на́ тѧ съберꙋ всѧ хо́ти твоѧ, к ним̑ же примеси́сѧ с ни́ми.
и҆ съберꙋ ѧ҆̀ на́ тѧ ѿвсю́дꙋ и҆ ѿкры́ю зло́бы твоѧ к ни́мъ, и҆ ѹ́зрѧтъ ве́сь сра́мъ твои.
и҆ ѿм꙽щꙋ т̂и ѿме́стїе любодѣ́ица, и҆ пролива́ющихъ кро́вь.
и҆ положꙋ въ крове ꙗ҆́рости мое҆ѧ и҆ р꙽ве́нїѧ.
и҆ преда́мъ т̂ѧ в рꙋцѣ и҆хъ, и҆ раскопа́ютъ блꙋди́лище твое, и҆ разорѧтъ степе́ни твоѧ.
и҆ съвлекꙋтъ с тебе ри́зы твоѧ, и҆ во́змꙋтъ съсꙋды хвалы твое҆ѧ, и҆ ѻ҆ста́вѧт꙽ т̂ѧ на́гꙋ безъстꙋдꙋ́ющꙋ.
и҆ приведꙋтъ на́ тѧ наро́ды, и҆ зазлѧ́тъ тебѣ ка́менїем̑, и҆с꙽сѣкꙋтъ т̂ѧ меч꙽ми свои҆ми.
и҆ запа́лѧтъ до́мы твоѧ ѻ҆гнемъ, и҆ сътво́рѧтъ в꙽ тебѣ ѿме́стїе пред̑ женами мно́гими.
и҆ ѻ҆бра́щꙋ т̂ѧ ѿ блꙋже́нїѧ, и҆ наи҆мна ктомꙋ не дасѝ.
и҆ ѹ҆ста́влю ꙗ҆́рость мою на тебѣ, и҆ възметсѧ р꙽ве́нїе мое ѿ среды твое҆ѧ.
и҆ почїю и҆ ктомꙋ не попекꙋсѧ.
поне́же не помѧнꙋ дн҃е младе́нъства твое҆го, и҆ прогнѣва м̂ѧ въ всѣ́хъ сих̑.
и҆ се а҆зъ пꙋти твоѧ на главꙋ̀ твою̀ да́хъ гл҃етъ а҆дона́и г҃ь.
и҆ та́коже не сътвори́хъ по всемꙋ̀ нече́стїю твое҆мꙋ въ всѣхъ безако́нїи҆хъ твои҆хъ·

Се̂ е҆сть все е҆ли́ко реко́ша на́ тѧ къ при́тчю, гл҃юще.
ꙗ҆́коже мт҃и та́ко и҆ дщи.
дщи мт҃ри твое҆ѧ т̂ы е҆си, ѿринꙋвшїѧ мꙋж́а свое҆го и҆ ча́да своа.
и҆ сестра се́стръ твои҆хъ т̂ы, ѿринꙋвшихъ мꙋжа и҆хъ, и҆ ча́да.
мт҃и твоѧ хет꙽те́ѧ, и҆ ѿц҃ъ твои а҆м꙽море́и.
сестра твоѧ старѣ́ишаѧ самарїѧ, т̂а и҆ дще́ри е҆ѧ живꙋщїѧ ѻ҆ лѣ́во тебе.
и҆ сестра твоа мен꙽шаа живꙋщїѧ ѻ҆ десно тебе, содо́ма и҆ дще́ри е҆ѧ̀.
н̂о ниже по пꙋте́мъ и҆хъ ходи́ла е҆си, ни сътвори по безако́нїемъ и҆хъ по ма́лꙋ, и҆ над̑ ни́ми е҆си въ всѣ́хъ пꙋте́хъ свои҆хъ.
жи́въ а҆зъ гл҃етъ а҆дона́и г҃ь, понеже не сътвори́ла съдо́ма сестра̀ твоа ѻ҆на и҆ дще́ри еѧ̀, ꙗ҆коже т̂ы сътворѝ и҆ дще́ри твоа̀.
ѻ҆баче с̂е безако́нїе съдо́мы сестры̀ твое́ѧ, гор꙽дость въ ѻ҆бъꙗ҆денїи хлѣба.
и҆ въ и҆зъѻ҆билїи вина̀ и҆ въ празности напита́шесѧ т̂а и҆ дще́ри еѧ̀, с̂е бѧ́ше е҆и и҆ дщеремъ еѧ̀.
и҆ рꙋкѝ ѹ҆бо́гомꙋ и҆ ни́щемꙋ не подаа́хꙋ и҆ велича́хꙋсѧ, и҆ сътвори́ша безаконїѧ предо мно́ю.
и҆ ѿвръгох꙽ ѧ҆̀ ꙗ҆́кож̑ ви́дѣ·

Самарїѧ же полъ грѣхъ твои҆хъ не съгрѣши, и҆ ѹ҆мно́жи безако́нїѧ твоа̀ па́че ѻ҆нх̑ѣ.
и҆ ѻ҆правдѝ сестры̀ твоѧ̀ въ всѣхъ безаконїихъ твои҆хъ ꙗ҆́же сътворѝ.
и҆ т̂ы прїими мꙋче́нїе своѐ, в нем꙽же расы́па сестры своа̀ въ грѣсх̑ѣ твоих̑, и҆миже безакон꙽нова паче тѣхъ, и҆ ѻ҆правї ѧ паче себѐ.
того ради и҆ т̂ы срамлѧ́исѧ, и҆ прїими без̑честїе своѐ, е҆́льма же ѻ҆правѝ сестры своѧ̀.
и҆ ѿвращꙋ въз꙽вращенїѧ и҆хъ, въз꙽вращенїе содо́м꙽ско и҆ дщерь еѧ̀, и҆ възъвращенїе самарїиско и҆ дщерь еѧ̀.
и҆ въз꙽вращꙋ въз꙽вращенїе твое средѣ тебе.
ꙗ҆́коже прїимеши мꙋче́нїе твое, и҆ без꙽чести бꙋ́деши ѿ всѣхъ ꙗ҆́же сътвори на раз꙽гнѣванїе мнѣ̀.
и҆ сетра твоѧ̀ съдома и҆ дщери еѧ̀ ѹ҆ста́вѧтсѧ ꙗ҆́коже бѣша и҆спрьва.
и҆ самарїѧ и҆ дщери еѧ̀ ѹ҆ста́вѧтсѧ ꙗ҆́коже бѣша и҆спрьва.
и҆ тыж̑ и҆ дщ̂и твоѧ̀ ѹ҆стави́тесѧ ꙗ҆́коже бѣсте прежд̑е.
а҆ще б̂о не бы̀ была сестра̀ тебѣ̀ содо́ма въ послꙋшанїе въ ѹ҆стѣхъ твоих̑, въ дн҃и презрѣнїѧ твое҆го, прежд̑е ѿкровенїѧ грѣх꙽ тои҆хъ.
ꙗ҆́коже нн҃ѣ ѹ҆кори́зна е҆си дще́рь сѷрьскъ, и҆ всѣх꙽ дще́рь сꙋщих̑ ѻ҆́крс̑҇тъ еѧ̀, и҆ноплеме́нникъ ѻ҆дръжащих̑ т̂ѧ ѻ҆́крс̑҇тъ.
нечестїѧ твоа̀ и҆ безако́нїа твоа̀ т̂ы съвокꙋпи, гл҃ет̑ г҃ь·

Се̂ гл҃етъ а҆дона́и г҃ь.
и҆ сътворю въ тебѣ ꙗ҆́коже е҆си сътворила, ꙗ҆коже нечестовасѧ престꙋпити завѣтъ мо́и.
и҆ въспомѧнꙋ а҆зъ на завѣтъ сво́и ꙗ҆́же с тобо́ю въ дн҃ь мла̑деньства твое҆го.
и҆ съставлю тебѣ завѣтъ вѣчныи, и҆ помѧнеши пꙋтѝ своѧ̀, и҆ безъчести бꙋ́деши внегда̀ пои҆меши се́стры своѧ̀ старѣ́ишаѧ съ ю́ными твои҆ми.
и҆ дам̑ ѧ҆̀ тебѣ на съгражд̑енїе, н̂о не ѿ завѣта твое҆го.
и҆ съставлю а҆зъ завт̑ѣ с тобо́ю, и҆ ѹ҆вѣси ꙗ҆́ко а҆зъ г҃ь.
ꙗ҆́кож̑ да помѧнꙋ всѧ ѹ҆срамлѧ́еши, и҆ да не бꙋдетъ тебѣ̀ ктомꙋ̀ ѿврьсти ѹ҆стъ ѿ лица безъчестїѧ твое҆го.
внегда̀ ѻ҆цыща́ешисѧ по всемꙋ̀ е҆ли́ко сътвори́ла е҆си, гл҃етъ а҆дона́и г҃ь·

Глв̑҇а, з҃і·

И бы́сть сло́во гн҃е къ мнѣ̀ гл҃ѧ, сн҃е чл҃чь, сповѣжд̑ь по́вѣсть и҆ рцы̀ притчю на до́мъ і҆и҆л҃евъ, и҆ рече́ши.
с̂е гл҃етъ а҆дона́и г҃ь, ѻ҆релъ великїи велекрылыи дол꙽гыи протѧженїем꙽, и҆же и҆сполнъ е҆сть но́готь.
сїи и҆́мать по́вѣсть внїити в꙽ дꙋбравꙋ, и҆ в꙽зѧти и҆збо́рное смрѣча, и҆ конецъ мѧ́к꙽каго ѻ҆стрꙋга̀.
и҆ пренесе ѧ҆̀ въ землю ханане́искꙋ, въ́ градѣ ѹ҆тверженѣ положи ѧ҆̀.
и҆ взѧ̀ ѿ пло́да земнаго, и҆ дасть е҆̀ на́ поли плод̑нѣ да ѹ҆твердит̑ ко́ренїе, над̑ вода́ми мно́гами смотри́мо ѹ҆ченїе.
и҆ проѕѧбе и҆ бы́сть въ виноградъ не́мощенъ ма́лъ, вели́чествомъ ꙗ҆вленїемъ е҆го ло́зїе е҆го в немъ, и҆ ко́ренїе е҆го под̑ ни́мъ бѧ́ше, и҆ бы́сть въ виноград̑, и҆ сътвори ѿ воды̀, и҆ простре възведенїѧ своѧ̀·

И҆ бы́сть ѻ҆релъ дрꙋгїи велик̑҇ вели́кома крылома и҆ мно́ги но́гты.
и҆ с̂е виноград̑ се́и и҆ то́и ѻ҆плѣтаѧсѧ ѻ҆ немъ, и҆ ко́ренїе е҆го к немꙋ и҆ лозїе е҆го и҆спꙋсти е҆мꙋ напои҆ти и҆̀ съ грꙋдїемъ ѿ прꙋжи сада е҆го на́ поли до́брѣ, и҆ на водѣ̀ мно́ѕѣ напита́етсѧ тои, ꙗ҆́ко сътворити проѕѧбенїе и҆ приноси́ти плод̑, ꙗ҆коже бы́ти въ виноград̑ вели́къ·

Сего ради и҆ рцы̀, с̂е гл҃етъ а҆дона́и г҃ь а҆ще и҆спра̑вит꙽, не коре́нїе л̂и ѹ҆бо мѧк꙽коты ег̑҇ и҆ плод̑ и҆з꙽гнїетъ, и҆ пос꙽хнет̑ всѧка лѣтора́сль пло́дꙋ е҆го.
и҆ не мы́шцею вели́кою, н̂и люд̑ми мно́гими и҆стръгнꙋти и҆̀ и҆с ко́ренїѧ е҆мꙋ.

И҆ с̂е насажд̑ена е҆сть е҆да̀ того ради ѹ҆спѣ́етъ и҆ не и҆спра́вит̑.
гдѣ̀ б̂о а҆ще и҆ коснетъ и҆̀ вѣтръ знои҆нъ посхнетъ сꙋхотою·

съ грꙋдїем꙽ проѕѧбенїа е҆го по́схнет꙽·

И҆ бы́сть слово гн҃е къ мн̂ѣ гл҃ѧ, сн҃е чл҃чь, рцы̀ к꙽ домꙋ гнѣвающемꙋ м̂ѧ не вѣсте л̂и чт̂о е҆сть с̂е.
рцы̀ и҆мъ с̂е грѧдетъ цр҃ь вавѷлон꙽скь на і҆ерс̑҇лим̑ и҆ во́зметъ цр҃ѧ е҆го и҆ кнѧ́ѕѧ е҆го, и҆ ѿведетъ ѧ҆̀ къ себѣ въ ваѷлонъ.
и҆ пои҆метъ ѿ племе́не цр҃ьска, и҆ завѣща́етъ к немꙋ завѣтъ и҆ въведет̑ и҆̀ въ клѧ́твꙋ.
и҆ старѣ́ишины землѧ по́иметъ, ꙗ҆́коже бы́ти въ црс̑҇тво не́мощно.
ꙗ҆́коже быхом̑ не въздвиза́тис̑҇, и҆ снабдѣти завѣта е҆го и҆ поставлѧ́ти и҆̀·

И҆же ѿврьжесѧ ѿ него и҆ посла̀ послы̀ въ е҆гѷпетъ, да́ти е҆мꙋ конѧ и҆ лю́ди многи.
а҆ще и҆спра́витъ и҆ а҆ще сп҃сетсѧ творѧи съпроти́вное.
и҆ престꙋпа́ѧи завѣтъ, а҆ще сп҃сетсѧ·

Живꙋ̀ а҆зъ гл҃етъ а҆дона́и г҃ь.
а҆ще не на мѣсте цр҃ь црс̑҇твова́вшїи в нихъ, и҆же похꙋлѝ клѧ́твꙋ мою, и҆ престꙋпѝ завѣт꙽ мои с нимъ.
средѣ вавѷло́на сконча́е҆тсѧ, и҆ не в си́лѣ вели́цѣ и҆ не в народѣ мно́зѣ.
сътворитъ же с нимъ фараѻ́нъ бра́нь, ѻ҆строгомъ и҆ съгражд̑енїемъ стрѣлъ пра́щныхъ, ꙗ҆́ко ѿꙗ҆́ти дш҃а многи.
и҆ похꙋлѝ клѧ́твꙋ ꙗ҆́коже престꙋпи́ти завт̑ѣ, и҆ с̂е дадѐ рꙋкꙋ свою.
и҆ всѐ с̂е сътвори е҆мꙋ, е҆да сп҃сетсѧ·

Сего ради рцы̀, с̂е гл҃етъ а҆дона́и г҃ь.
а҆ще бы̀ клѧтвы моеѧ не пристꙋпи́лъ ю́же похꙋлѝ, и҆ да́мъ ю҆̀ на главꙋ е҆го.
и҆ пропнꙋ̀ мрежꙋ свою нань.
и҆ ꙗ҆́тъ бꙋдет̑ въ ѻ҆дръжанїи е҆ѧ, и҆ приведꙋ и҆̀ въ вавѷлонъ, и҆ ѻ҆сꙋжд̑ꙋ е҆го т̂ꙋ ѻ҆ неправд̑ѣ е҆го, е҆ю́же неправдова̀ къ мн̂ѣ въ всѣхъ бѣгъствх̑ѣ е҆го.
и҆ всѝ и҆збра́ннїи съ всѣми дѣлесы̀ и҆хъ мечемъ падꙋтъ, и҆ всѧ̀ ѻ҆ста́вшаѧ и҆хъ раз̑сѣ́ю по всемꙋ вѣтрꙋ.
и҆ ѹ҆вѣсте ꙗ҆́ко а҆зъ г҃ь гл҃ахъ·

Сѐ гл҃етъ а҆дона́и г҃ь, и҆ поимꙋ а҆зъ ѿ и҆збра́нныхъ ке́дра высо́каго ѿ врьха̀, и҆ да́мъ на главꙋ̀ ѿра́сли е҆го.
ѿ срд̑чнаго верха̀ е҆мꙋ ѻ҆чешꙋ̀, и҆ всажꙋ и҆̀ в горѣ̀ высоцѣ а҆зъ.
и҆ повы́шꙋ и҆̀ в горѣ̀ высо́цѣ і҆и҆л҃евѣ, и҆ всажꙋ и҆ прорасти́тъ ѿрасль и҆ сътвори́тъ ѻ́вощь, и҆ бꙋдетъ в ке́дръ вели́къ.
и҆ почїетъ под̑ нимъ всѧ́ка пти́ца.
и҆ под̑ сѣнїю е҆го почїетъ всѧ́ка пти́ца, и҆ ло́зїе е҆го ѹ҆стро́итсѧ.
и҆ ѹ҆вѣсть всѧ́ко дре́во польское, ꙗ҆́ко а҆зъ г҃ь смирѧ́ѧй древо высо́кое, и҆ възносѧ дре́во смире́нно, и҆ ѹ҆сꙋшаѧ древо сꙋро́во, и҆ прораща́ѧ древо сꙋхо.
а҆́зъ г҃ь гл҃ах꙽ и҆ сътворихъ·

Глв̑҇а, и҃і·

И бысть слово гн҃е къ мн̂ѣ гл҃ѧ, сн҃е чл҃чь, чт̂о ва́мъ притча сѝ на землѝ і҆и҆л҃евѣ гл҃ющимъ.
ѿц҃ы зоба́ша па́родки, а҆ зꙋбомъ чад̑ и҆хъ ѻ҆ско́мины бы́ша·

Живꙋ̀ а҆зъ гл҃ет̑ а҆дона́и г҃ь.
а҆ще бꙋдетъ е҆ще гл҃ема̑ прит꙽ча сѝ въ і҆и҆л҃и.
ꙗ҆ко всѧка дш҃а моѧ сꙋть.
ꙗ҆́ко дш҃а ѿч҃а, такоже и҆ дш҃а сн҃овнѧ, всѧ́ка дш҃а моѧ ст̑ꙋ.
дш҃а же ꙗ҆же съгрѣша́етъ, т̂а ѹ́мретъ.
и҆зоба́вшаго парод̑ки зꙋбы ѻ҆скомин꙽нѣ бꙋдꙋтъ.
чл҃къ же и҆же е҆сть пради́въ, и҆же сътворитъ сꙋдъ и҆ правдꙋ, на горах̑ не снѣсть.
и҆ ѻ́чїю своею не въздви́гнетъ на кꙋми́ры домꙋ і҆и҆л҃ева.
и҆ жены по́дрꙋга свое҆го не ѻ҆сквернавитъ.
и҆ къ женѣ̀ сквернавѣ сꙋщи не приближит̑сѧ.
и҆ чл҃кꙋ не наси́лит̑.
заи́мъ долъжныи ѿда́сть.
и҆ въсхище́нїѧ не въсхитит̑.
хлѣбъ свои а҆лчнꙋ да́сть, и нага́го ѻблечетъ в ри́зꙋ.
сребра̀ свое҆го в ли́хвꙋ не в꙽дасть, и҆ прибы́тка не во́зметъ, ѿ неправды ѿврати́т꙽ъ рꙋкꙋ свою.
и҆ сꙋдъ сътворит̑ междꙋ мꙋжемъ и҆ подрꙋгомъ своимъ.
и҆ въ за́повѣдехъ мои҆хъ хо́дитъ, и҆ ѻ҆правданїѧ моѧ снабдилъ е҆сть.
ꙗ҆коже сътворити т̂а ꙗ҆́ко правдив̑҇ сеи е҆сть, жи́знь жи́ти и́мать·

гл҃етъ а҆дона́и г҃ь·

И҆ а҆ще ро́дитъ сн҃а раз̑сыпателѧ, пролива́юща кро́вь и҆ творѧ́ща грѣхи.
в꙽ пꙋть ѿц҃а своег̑҇ правди́ваго не ходѝ, н̂о и҆ на гора́хъ жер꙽лъ е҆сть.
и женꙋ̀ по́дрꙋга свое҆го ѻ҆сквернави́лъ е҆сть.
и҆ ѹ҆богаго и҆ ни́щаго преѻ҆бидѣлъ е҆сть.
и҆ въсхище́нїе въсхити́лъ е҆сть, и҆ заи҆ма̀ не далъ е҆сть.
и҆ к꙽ кꙋми́ромъ положѝ ѻ҆́чи своѝ.
безако́нїѧ сътворѝ.
съ плодомъ ли́хое прїѧлъ е҆сть.
се́и жи́знь не живет꙽.
вс̂ѧ сѝ безаконїѧ сътворѝ, смр҃тїю ѹ́мретъ, кровь е҆го на немъ бꙋдет̑·

А҆ще ли ро́дит̑ сн҃а ѻ́н꙽ же ви́дѣ грѣхи ѿц҃а своег̑҇, ꙗ҆́же сътвори́лъ е҆сть, ѹ҆бои́т же сѧ и҆ не сътворитъ по ни́мъ.
на гора́хъ не снѣсть, и҆ ѻ́чїю свои҆хъ не положитъ къ кꙋми́ромъ домꙋ і҆и҆л҃ева.
и҆ жены̀ подрꙋга свое҆го не ѻ҆сквернави́тъ.
и҆ чл҃кꙋ не наси́литъ.
и҆ въ заи҆мъ не заѧ.
и҆ въсхище́нїѧ не въсхи́титъ.
хлѣбъ свои а́лч꙽нꙋ д́асть.
и҆ на́га ѻ҆дежетъ ри́зою.
и҆ ѿ непра́вды ѿврати́тъ рꙋкꙋ свою̀.
ли́хвы и҆ мно́жества̀ не во́зметъ.
правдꙋ сътворитъ.
и҆ в꙽ заповѣдехъ мои҆хъ хо́дитъ.
не сконча́етсѧ в непра́в꙽дѣ ѿц҃а свое҆го, н̂о жи́знїю живе́тъ.
ѿц҃ъ бо е҆го печа́ли и҆ ско́рби и҆ въсхищенїе въсхитѝ, и҆ съпроти́вно сътворѝ средѣ людїи, и҆ ѹ҆мретъ в непра́вдѣ свое́и.
и҆ рекосте, почт̂о нѣсть прїѧлъ сн҃ъ непра́вды ѿц҃а свое҆го·

Се виждь, ꙗ҆́ко сн҃ъ правдꙋ и҆ млс̑҇ть сътворѝ.
вс̂ѧ зако́ны моѧ снабдѣ, и҆ сътвори ѧ҆̀, жи́знїю живет̑·

Дш҃а же съгрѣша́ющїа т̂а и҆ ѹ́мрет̑.
и сн҃ъ не возмет̑ непра́вды ѿц҃а своего, и҆ ѿц҃ъ не во́змет̑ непра́вды сн҃а своег̑҇·

пра́вда правди́ваго на немъ бꙋдет꙽, и҆ безаконїе безако́нника на немъ бꙋдетъ·

И҆ безако́нникъ а҆ще сѧ ѻ҆братит̑ ѿ всѣхъ безако́нїи, ꙗ҆́же е҆сть сътвори́лъ.
и҆ снабди́тъ всѧ̀ за́повѣди моѧ, и҆ сътвори́тъ сꙋдъ и҆ пра́вдꙋ и҆ млс̑҇ть, жи́знїю живе́т꙽, и҆ не ѹ́мретъ.
всѧ̀ съгрѣше́нїѧ е҆ли́ко бꙋдетъ сътвори́лъ не помѧнꙋтсѧ е҆мꙋ.
въ пра́вдѣ е҆го ꙗ҆́же сътвори живъ бꙋдетъ·

Є҆да въсхотѣнїем̑ въсхощꙋ смр҃ти грѣшника, гл҃етъ а҆дона́и г҃ь.
а҆ не ꙗ҆́коже ѻ҆брати́тисѧ е҆мꙋ ѿ пꙋтѝ ѕл̂а и҆ жи́вꙋ бы́ти·

И҆ а́ще сѧ съврати́тъ прав꙽дивыи с пꙋти свое҆го, и҆ сътво́ритъ непра́вдꙋ по всѣмъ безако́нїемъ, ꙗ҆́же е҆сть сътвори́лъ безако́нникъ.
а҆ще сътворитъ не живе́тъ.
вс̂ѧ пра́вды е҆го ꙗ҆́же е҆сть сътвори́лъ, не помѧнт̑ꙋсѧ.
въ престꙋпле́нїи им̑же престꙋпѝ, и҆ въ грѣсехъ е҆го ꙗ҆́же съгрѣши, в ни́хъ ѹ́мретъ·

И҆ реко́сте, не ѹ҆́правитсѧ пꙋть гн҃ь.
слы́шите ѹ҆бо до́ме і҆и҆л҃евъ, е҆да пꙋть мои не ѹ҆́пра́витсѧ, не ваш̑҇ ли пꙋть ѹ҆бо не ѹ҆́пра́витсѧ·

е҆гда съврати́тсѧ пра́вдивыи ѿ пра́вды своеѧ, и сътвори́тъ грѣхъ и҆же ес̑҇ сътвори́лъ, т̂о в немъ ѹмретъ.
и҆ е҆гда ѻ҆брати́тсѧ безако́нникъ ѿ безако́нїѧ свое҆го и҆же е҆сть сътвори́лъ, и҆ сътво́ритъ сꙋдъ и҆ пра́вдꙋ, то́и дш҃ꙋ свою снабдѣлъ е҆сть.
и҆ ви́дѣ и҆ ѻ҆братисѧ ѿ всего безако́нїѧ свое҆го е҆же сътворѝ, жи́знїю живе́тъ, и҆ не ѹ́мретъ.
и҆ гл҃етъ до́мъ і҆и҆л҃евъ, не ѹ҆́пра́вит̑сѧ пꙋть гн҃ь.
е҆да пꙋть мои не ѹ҆́правъ ѽ доме і҆и҆л҃евъ, ѹ҆бо вашъ пꙋть не ѹ҆правлѧ́етсѧ·

Сего ради комꙋждо по пꙋтѝ е҆го ѻ҆сꙋжꙋ вам̑ до́ме і҆и҆л҃евъ, гл҃етъ а҆дона́и г҃ь.
ѻ҆брати́тесѧ и҆ ѿврьзитесѧ ѿ всѣхъ нечестїи вашихъ, и҆ не бꙋдетъ ва́мъ на мꙋче́нїе.
непра́вды ѿврьзите ѿ себе, и҆ всѧ̀ нечестїѧ ва́ша, ꙗ҆́же нечествова́сте къ мнѣ.
и҆ сътвори́те себѣ срд̑це но́во, и҆ дх҃ъ но́въ.
въскꙋю б̂о ѹ҆мира́ете до́ме і҆и҆л҃евъ·

Ꙗ҆́ко не хощꙋ см҃рти грѣшника ѹ҆мира́ющаго, гл҃етъ а҆дона́и г҃ь.
ꙗ҆́кож̑ ѻ҆брати́тисѧ е҆мꙋ ѿ пꙋтѝ е҆го, и жи́ти дш҃и е҆го, гл҃етъ а҆дона́и г҃ь.
ѻ҆брати́тесѧ ѹ҆бо и҆ жи́ви бꙋдете·

Глв̑҇а, ѳ҃і·

Ты́ же возмѝ пла́чь на кн҃ѕѧ і҆и҆л҃евы.
и҆ рече́ши к нимъ, мт҃и твоѧ льви́ца, средѣ левъ почѝ, средѣ левъ ѹ҆мно́жи льви́чища своѧ·

И҆ ѿско́чи е҆ді́нъ ѿ льви́чищъ еѧ̀, и҆ бысть ле́въ.
и наѹ҆чи́сѧ въсхита́ти въсхита́нїа, и҆ чл҃ки и҆зъꙗ҆́сть.
и҆ слы́шаша ѻ҆ немъ страны̀, и҆ ꙗ҆́тъ бысть в꙽ расы́панїи свое҆мъ, и҆ приведоша и҆̀ въ ѹ҆здѣ̀ въ е҆гѷпетъ·

И҆ ви́дѣ ꙗ҆́ко ѿведенъ бысть ѿ неѧ, и погиба́ше бытїе еѧ̀.
и҆ поѧ̀ и҆нъ ѡ льви́чищъ свои҆хъ и҆ ле́въ ѹ҆чинѝ и҆̀.
и҆ живѧ́ше средѣ ле́въ, левъ бы́сть.
и҆ наѹ҆чи́сѧ въсхита́ти въсхище́нїѧ, и҆ чл҃ки и҆зꙗ҆́сть.
и҆ пасѧшесѧ в лю́тости свое́и.
и҆ гра́ды и҆хъ пꙋсты поста́ви, и҆ погꙋбѝ землю и҆ конець еѧ̀ гла́сомъ рыка́нїѧ е҆го·

И да́сть нань страны ѻ҆́крс̑҇тъ ѿ земль, и҆ пропѧ на́нь мрежа и҆хъ и҆ ꙗ҆тъ быс̑҇.
и҆ положи́ша и въ ѹ҆здѣ и҆ в꙽ъ пꙋтѣ, и҆ приведо́ша и҆̀ къ цр҃ю вавѷлон̑҇скꙋ, и҆ въврьгоша и҆̀ в темни́цꙋ.
ꙗ҆ко да сѧ не слы́шитъ гла́съ е҆го потомъ в꙽ гора́хъ і҆и҆л҃евахъ·

Ма́ти твоѧ ꙗ҆́ко виногра́дъ, и҆ ꙗ҆́ко цвѣтен̑҇ ши́пчанъ на водѣ в꙽саженъ, и҆ ѿра́сль е҆го бысть ѿ воды̀ мно́ги.
и҆ бы́сть е҆мꙋ же́злъ крѣпости въ племени старѣишинъсте, и҆ възнесе́сѧ в꙽ вели́чїи свое҆мъ средѣ ло́зїѧ.
и҆ ви́дѣ вели́чество свое въ мно́жествѣ ло́зїа свое҆го·

И҆ ѻ҆бломи́сѧ въ ꙗ҆́рости, и҆ на́ землю поврьженъ бы́сть, и҆ вѣтръ зно́инъ посꙋшѝ ѻ́вощъ е҆го.
ѹ҆свѧднꙋша и҆ ѻ҆пꙋстѣша жезли крѣпости е҆го, ѻ́гнь посꙋшѝ и҆̀, ѻ҆гнь потреби и҆̀ въ пꙋсты́ни·

И҆ нн҃ѣ насади́ша и҆̀ на землѝ безъче́стнѣ и҆ без̑во́днѣ.
і҆ и҆зы́иде ѻ́гнь ѿ жезла̀ и҆ ѻ́вощевъ е҆го, и҆ поꙗ҆дѐ и҆̀·

И҆ не бꙋдетъ в немъ жезла̀ крѣпости племени хорꙋгве, ꙗ҆кож̑ владѣти им̑.
въ прит̑чю пла́чнꙋю е҆сть, и҆ бꙋдет̑ въ пла́чь·

Глв̑҇а, к҃·

И бы́сть в лѣто сед̑мое въ пѧ́тыи мс̑҇ць, в девѧтыи дн҃ь мс̑҇ца.
прїидо́ша ста́рцы ѿ до́мꙋ і҆и҆л҃ева въпраша́ти г҃а, и сѣдо́ша пред̑ лицем̑ м̂и.

И҆ бы́сть сло́во гн҃е къ мнѣ гл҃ѧ.
сн҃е чл҃чь, гл҃и къ ста́рцемъ і҆и҆л҃евом꙽.
и҆ рече́ши к нимъ, с̂е гл҃етъ а҆дона́и г҃ь.
а҆ще въпраша́ти мене в̂ы прихо́дите.
жи́въ а҆зъ а҆ще ѿвѣща́ю вам꙽, гл҃етъ г҃ь.
и҆л̂и ѿместїю м꙽щꙋ и҆хъ, сн҃е чл҃чь а҆ще м꙽сти́ши и҆хъ·

Безако́нїѧ же ѿц҃ь и҆хъ совѣсти им̑.
и҆ речеши к нимъ, с̂е гл҃етъ а҆дона́и г҃ь.
ѿ негоже дн҃е и҆зво́лихъ до́мъ і҆и҆л҃евъ.
и҆ ѹ҆вѣдѣнъ быхъ племени до́мꙋ і҆а́ковлѧ, и҆ ѹ҆вѣденъ бы́хъ им̑ в꙽ земли е҆гѷпетъсте́и.
и҆ въздвигох̑ рꙋкꙋ мою за нѧ, гл҃ѧ, аз̑ г҃ь б҃ъ ваш̑҇·

въ тои дн҃ь под̑ѧ́хъ ѧ҆̀ рꙋкою своею, ꙗ҆́коже и҆звестѝ ѧ҆̀ и҆зъ землѧ̀ е҆гѷпет̑ски, в꙽ зе́млю ю҆же ѹ҆гото́вахъ и҆м꙽, землю кипѧ́щꙋ млекомъ и҆ ме́дом꙽, сѝ е҆сть паче всѣхъ зе́мль·

И҆ рекох̑ к ни́мъ, ко́ждо гнꙋшенїѧ ѿ ѻ҆чїи свои҆хъ ѿврьзите, и҆ въ тва́рехъ е҆гѷпетъскахъ не ѻ҆сквернѧ́итесѧ, а҆зъ г҃ь б҃ъ вашъ·

И҆ ѿврьгошасѧ менѐ, и҆ не хотѣша послꙋшати м̂ѧ.
ко́ждо гнꙋше́нїи ѿ ѻ́чїю свои҆хъ не хотѣша ѿврещѝ, и҆ тва́рїи е҆гѷпет̑скь не ѻ҆ста́виша.
и҆ реко́хъ, ꙗ҆́коже разлїати ꙗ҆́рость свою на́ нѧ, и҆ скон꙽ча́ти гнѣвъ свой на нихъ, средѣ землѧ̀ е҆гѷпетъски·

И҆ сътворихъ ꙗ҆́ко да и́мѧ мое паче всего да сѧ не ѻ҆сквернитъ пред̑ страна́ми.
в них̑ же сꙋть сїи средѣ и҆хъ, пред ни́ми же ѹ҆вѣденъ быхъ к нимъ, ꙗ҆́ко и҆звести ѧ҆̀ и҆з꙽ землѧ е҆гѷпет꙽ски·

І҆ и҆зведо́хъ ѧ҆̀ в пꙋсты́ню, и҆ дахъ им̑ за́повѣди моѧ̀, и҆ ѻ҆правда́нїѧ моѧ ꙗ҆ви́хъ и҆мъ.
и҆же а҆ще сътворит̑ ѧ҆̀ чл҃къ, жи́въ бꙋдетъ в нихъ.
и҆ сꙋбо́ты моѧ дахъ и҆мъ.
ꙗ҆́коже бы́ти въ зна́менїе междꙋ мною, и҆ межд̑ꙋ и́ми.
ꙗ҆́коже разꙋмѣти и҆мъ ꙗ҆ко а҆зъ г҃ь ѻ҆сщ҃аѧ и҆̀·

И҆ гл҃ахъ к꙽ до́мꙋ і҆и҆л҃евꙋ в꙽ пꙋсты́ни, въ заповѣди моа ходи́ти.
и҆ разгнѣ́ва м̂ѧ домъ і҆и҆л҃ев꙽ въ пꙋсты́ни, в꙽ за́повѣдех̑ б̂о моих̑ не ходи́ша, и҆ ѻ҆правданїѧ моѧ ѿврьгоша, ꙗ҆́же сътворив̑҇ чл҃къ, жи́въ бꙋдетъ в ни́хъ.
и҆ сꙋбо́ты моѧ ѻ҆скверни́ша·

И҆ рекох̑ ꙗ҆́коже разлїѧти ꙗ҆́ро́сть свою на́ нѧ въ пꙋсты́ни, ꙗ҆́ко потреби́ти ѧ҆̀.
и҆ сътвори́хъ, ꙗ҆коже паче всего да сѧ и́мѧ мое не ѻ҆сквернитъ пред̑ страна́ми, и҆з них̑же и҆зведо́хъ ѧ҆̀ пред̑ ѻ҆чи́ма и҆хъ·

Того ради въздвиго́хъ рꙋкꙋ мою на́ нѧ въ пꙋсты́ни, е҆же не в꙽вестѝ и҆хъ въ землю ю҆же да́хъ и҆м꙽, текꙋщꙋ мле́комъ и҆ ме́домъ, всх̑ѣ зе́мль и҆збран̑҇нѣ́ишꙋ.
ꙗ҆́ко сꙋды моѧ ѿврьгоша, и҆ въ за́повѣдехъ моих̑ не ходиша.
и҆ сꙋбо́ты моѧ ѻ҆скверни́ша.
ꙗ҆́ко къ кꙋми́ромъ срд̑це и҆хъ похотѣ̀·

И҆ пощади ѧ҆̀ ѻ́ко мое, ꙗ҆́кож̑ не потребити и҆хъ на сконча́нїе въ пꙋсты́ни·

И рекохъ к꙽ ча́домъ и҆хъ в꙽ пꙋсты́ни, в зако́ны ѿц҃ь вашихъ не ходи́те, и҆ ѻ҆правле́нїи и҆хъ не снабдѣваи҆те, и҆ къ тва́ремъ е҆гѷпетъскамъ не примеша́итесѧ.
а҆зъ г҃ь б҃ъ вашъ и҆ ѻ҆правле́нїѧ моѧ снабдите, и҆ сътвори́те ѧ҆̀.
и҆ сꙋбо́ты моѧ ѻ҆сщ҃аите.
и҆ бꙋдетъ въ зна́менїе междꙋ мно́ю и҆ междꙋ ва́ми, ꙗ҆́коже съвѣдѣти ꙗ҆́ко а҆зъ г҃ь б҃ъ ва́шъ·

И҆ раз̑гнѣваше м̂ѧ, и҆ ча́да их̑ въ за́повѣдехъ мои҆хъ не ходи́ша, и҆ ѻ҆правле́нїи мои҆хъ не снабдѣша, ꙗ҆́коже сътвори́ти ѧ҆̀.
сїѧ б̂о сътвори́въ чл҃к꙽ живъ бꙋдетъ в꙽ нихъ.
и҆ сꙋбо́ты моѧ ѻ҆скверни́ша·

И҆ въздви́гнх̑ꙋ рꙋкꙋ свою на́ нѧ, ꙗ҆коже расы́пати ѧ҆̀ въ странах̑, и҆ раз̑сѣѧ́ти ѧ҆̀ въ зем̑лѧх̑·

Но дахъ и҆мъ за́повѣди недо́бры, и ѻ҆правле́нїѧ моѧ в ни́х꙽же не бꙋдꙋть жи́ви·

И҆ ѻ҆сквернавлю ѧ҆̀ в дѣа́нїи их̑.
е҆гда привожд̑а́хꙋ ѿврьза́ющаѧ ѹ҆тро́бꙋ за грѣхъ и҆хъ.
да разꙋмѣют̑ ꙗ҆́ко а҆зъ г҃ь·

Сего ради гл҃и к до́мꙋ і҆и҆л҃евꙋ, сн҃е чл҃чь.
и҆ речеши к ни́м꙽, с̂е гл҃етъ а҆дона́и г҃ь, и҆ до сего разъгнѣваше м̂ѧ ѿц҃ы ва́ши въ градх̑ѣ их̑, и҆́мже съгрѣши́ша къ мн̂ѣ.
и҆ въведохъ в꙽ зе́млю в ню́же въздвиго́хъ рꙋкꙋ свою, ꙗ҆́коже да́ти ю҆̀ им̑.
и҆ ви́дѣша весь хо́лмъ высо́къ, и҆ всѐ древо сѣн꙽но, и҆ положи́ша тре́бы т̂ꙋ богом̑ своим̑, и҆ ѹ҆чини́ша т̂ꙋ ꙗ҆́рость да́ровъ своих̑, и҆ положи́ша т̂ꙋ во́ню бл҃гово́нїѧ их̑, и҆ възлїѧша т̂ꙋ воз̑лїѧ́нїа их̑·

И҆ реко́хъ к ним̑, чт̂о ес̑҇ а҆ва́ма ꙗ҆ко в̂ы вхо́дите та́мо.
и҆ прозва́ша и҆́мѧ е҆мꙋ а҆ва́ма до днешнего дн҃е·

Сего ра́ди рцы̀ к до́мꙋ і҆и҆л҃евꙋ, с̂е гл҃етъ а҆донаи г҃ь.
а҆ще въ безаконїих̑ ѿц҃ь вашихъ в̂ы ѻ҆сквернѧ́етесѧ, и҆ въ слѣдъ тва́ри и҆хъ в̂ы съблꙋжа́е҆те.
и҆ въ прино́сѣхъ трꙋдъ ва́ших̑, и҆ в наро́цѣхъ ва́шихъ, е҆гда сꙋть ча́да ваша въ ѻ҆гни.
вы̀ ѻ҆сквернѧ́е҆тесѧ въ всѣхъ кꙋми́рехъ ва́шихъ до днешнѧго дн҃е.
а҆з же ѿвѣща́ю вамъ доме і҆и҆л҃евъ, жи́въ а҆зъ гл҃ет̑ а҆дона́и г҃ь, а҆ще ѿвѣща́ю вамъ, и҆ а́ще възы́идетъ в꙽ дꙋхъ ва́шъ с̂е·

И҆ не бꙋдетъ ꙗ҆́коже в̂ы гл҃ете, бꙋдем̑ а҆ки страны̀ и҆ племена зе́мнаѧ, слꙋж́ите дре́вꙋ и҆ ка́менїю·

Сего рад̑и̑ живъ а҆зъ гл҃етъ а҆дона́и г҃ь.
а҆ще не рꙋко́ю крѣпкою и҆ мыш̑҇цею высо́кою, и҆ въ ꙗ҆́рости разлїѧнѣ црс̑҇твꙋю в꙽ вас̑҇·

І҆ и҆зведꙋ в̂ы ѿ людїи, и҆ прїимꙋ в̂ы ѡ стра́нъ в ни́х же бѣсте расѣꙗ҆́ни·

рꙋко́ю крѣпкою и҆ мы́шцею высоко́ю, и҆ ꙗ҆́ростїю разлїаною·

Црс̑҇твовати бꙋдꙋ над ва́ми.
и҆ приведꙋ васъ в пꙋсты́ню лю́д꙽скꙋ·

И҆ съвопраша́юсѧ с ва́ми т̂ꙋ лицемъ к лицꙋ̀, ꙗ҆коже съвопраша́хсѧ съ ѿц҃ы ва́шими, в꙽ пꙋсты́ни е҆гѷпет̑стѣ.
такоже сꙋждꙋ и҆ вамъ гл҃етъ а҆дона́и г҃ь·

И҆ проведꙋ̀ в̂ы под̑ же́злъ мои, и҆ въведꙋ в̂ы в число̀ завѣта.
и҆ съберꙋ ѡ васъ нечести́выѧ и҆ ѿврьгшаѧсѧ·

И҆ съ землѧ ѻ҆бита́нїѧ и҆хъ и҆зведꙋ̀ ѧ҆̀, и҆ въ зе́млю і҆и҆л҃евꙋ не вни́дꙋтъ.
и҆ позна́ете ꙗ҆́ко а҆зъ г҃ь·

Вы́ же доме і҆и҆л҃евъ, си́це гл҃етъ а҆дона́и г҃ь, ко́ждо васъ по кꙋми́рохъ ва́шихъ ходи́сте, и҆ слꙋжи́сте и҆мъ.
и потом̑ а҆ще послꙋшае҆те мене, і҆ и́мени
мое҆го ст҃ого не ѻ҆сквернави́те ксемꙋ в да́рѣхъ ва́ших̑.
и҆ в рꙋкотворе́нїихъ вашихъ на горѣ мое́и ст҃ѣи
, и҆ на горѣ высо́цѣ і҆и҆л҃евѣ, гл҃етъ а҆дона́и г҃ь
, т̂ꙋ послꙋжатъ м̂и весь домъ і҆и҆л҃въ до ко́нца
на землѝ.
и҆ т̂ꙋ прїимꙋ ѧ҆̀.
и҆ т̂ꙋ присѣщꙋ прино́съ и҆хъ, и҆ прино́съ наро́къ ва́шихъ въ всѣхъ ѻ҆сщ҃енныхъ ва́шихъ·

Въ во́ню б̂о бл҃гово́нїѧ прїимꙋ в̂ы, е҆гда и҆зведꙋ̀ в̂ы и҆з людїи, и҆ прїимт̑ꙋ в̂ы ѿ стран̑҇.
и҆ ѻ҆сщ҃ꙋсѧ въ ва́съ пред̑ ѻ҆чи́ма люд̑скима, и҆ ѹ҆вѣсте ꙗ҆ко а҆зъ г҃ь.
е҆гда въведꙋ в̂ы в зе́млю і҆и҆л҃евꙋ, в зем̑лю в ню́же въздвигохъ рꙋкꙋ свою, да́ти ю҆̀ ѿц҃емъ вашимъ·

И҆ помѧнете т̂ꙋ пꙋтѝ ваша, и на всѧ̀ мер꙽зкїѧ грѣхѝ ва́ша, в них̑ же сѧ в̂ы ѻ҆сквернѧ́ете.
и҆ ѻ҆зрите лица ва́ша̑ въ всх̑ѣ ѕло́бах̑ ваших̑ ꙗ҆́же сътвори́сте·

И҆ позна́ете ꙗ҆́ко а҆зъ г҃ь.
е҆гда сътворю̀ вамъ та́ко ꙗ҆́коже и҆́мѧ мое да сѧ не ѻ҆скверни́тъ, не по пꙋте́мъ вашимъ ѕлым̑, ни по рꙋкотворе́нїем꙽ вашимъ расы́панымъ до́ме і҆и҆л҃ев꙽, гл҃етъ а҆дона́и г҃ь·

И҆ бысть слово гн҃е къ мн̂ѣ гл҃ѧ, сн҃е чл҃чь, ѹ҆тверди лицѐ свое на ю́гъ, и҆ възрѝ на дарꙋмъ.
и҆ прорцы̀ на дꙋбра́вꙋ старѣ́ишинꙋ а҆ге́ва·

И҆ рече́ши дꙋбра́вѣ а҆ге́вовѣ, слы́ши сло́во гн҃е.
с̂е гл҃ет̑ а҆дона́и г҃ь, с̂е а҆зъ възгнѣщꙋ в тебѣ ѻ́гнь, и҆ пож꙽жет̑ в тебѣ всѧ́ко дре́во ѕелено, и҆ всѧ́ко дре́во сꙋхо, не ѹ҆га́шетъ пла́мень раждеже́ныи·

И҆ съгори́тъ в немъ всѧ́ко лицѐ ѿ восто́ка до сѣвера.
и҆ ѹ҆вѣсть всѧ́ка пло́ть, ꙗ҆́ко а҆зъ г҃ь ражд̑его́хъ ѧ҆̀, и҆ не ѹ҆га́снꙋтъ·

И҆ реко́хъ ника́кож̑ г҃и.
сїи гл҃ютъ къ мн̂ѣ, не прит̑ча л̂и е҆сть ѹ҆бо гл҃ема·

Глв̑҇а, к҃а·

И бы́сть слово гн҃е къ мнѣ гл҃ѧ.
сего ради прорцы̀ сн҃е чл҃чь, и҆ ѹ҆твердѝ лицѐ свое къ і҆ерс̑҇лимꙋ.
и҆ призри къ ст҃ынѧмъ и҆хъ, и҆ прорцы̀ ѻ҆ земли і҆и҆л҃евѣ·

И҆ речеши к зем̑ли і҆и҆л҃евѣ, с̂е гл҃етъ а҆дона́и г҃ь.
с̂е аз̑ на тѧ и҆зм꙽кнꙋ̀ мечь свой и҆з но́жницъ е҆го, и҆ потреблю и҆с те́бе неправди́ва и҆ безако́нника·

І҆ и҆зы́идетъ мечь мои и҆з но́жницъ свои҆хъ, на всѧ́кꙋ пло́ть ѿ восто́ка до сѣвера.
и҆ ѹ҆вѣсть всѧка пло́ть ꙗ҆ко а҆зъ г҃ь.
и҆зм꙽ко́хъ мечь свои и҆з ножницъ е҆го, и҆ ктомꙋ не възвратит̑сѧ.
и҆ т̂ы сн҃е чл҃чь, въздохнѝ съкрꙋше́нїем̑ чреслъ твоих̑, и҆ съ бо́лѣзнїю въздо́хнеши пред̑ ѻ҆чи́ма их̑·

И҆ бꙋдетъ а҆ще рект̑ꙋ к тебѣ, чесо рад̑и̑ т̂ы в꙽здышеши.
и҆ рече́ши, ѻ҆ проповѣда́нїи ꙗ҆́ко грѧдет̑.
и҆ съкрꙋши́тсѧ всѧ́ко срд̑це, и҆ ѻ҆слабѣ́ютъ всѧ̀ рꙋки, і҆ и҆з꙽дшет̑ всѧка пло́ть и҆ всѧкъ дх҃ъ, и҆ всѧ стегна ѻ҆сквернавѧ́тсѧ мо́кростїю.
с̂е грѧдетъ и҆ бꙋдет̑тъ, гл҃етъ а҆дона́и г҃ь·

И҆ бы́сть сло́во гн҃е къ мн̂ѣ гл҃ѧ, сн҃е чл҃чь, прорцы̀ и҆ рече́ши.
с̂е гл҃етъ а҆дона́и г҃ь, рцы̀ мече́ви, ме́чю ѻ҆стри́сѧ и҆ разгнѣваисѧ ꙗ҆́коже да и҆с꙽сѣче́ши сѣче́нїе.
ѻ҆стри́сѧ ꙗ҆́ко да бꙋдеши въ блища́нїе, и҆ гото́въ на расы́панїе.
сѣци похꙋлѝ ѿринѝ вс̂е древо·

И҆ дасть и҆̀ ѹ҆гото́ванъ ꙗ҆́ко дръжа́ти за чрены е҆го, наѻ҆стри́сѧ мечь, гото́въ е҆сть, ꙗ҆́коже дати и҆̀ в рꙋцѣ сѣкꙋщихъ·

Възопїи и҆ въспла́чисѧ сн҃е чл҃чь, ꙗ҆́ко бысть в лю́дех̑ с̂е, и҆ въ всѣхъ старѣ́ишинахъ і҆и҆л҃евахъ ѹ҆бѣгшихъ меча̀.
под̑ мечь быша с людми мои҆ми·

Сего ради въсплещꙋ рꙋкама свои҆ма ꙗ҆́ко ѻ҆пра́висѧ.
т̂о чт̂о ꙗ҆́ко и҆ ѿринет̑сѧ племѧ̀ и҆ не бꙋдетъ, гл҃етъ а҆дона́и г҃ь·

И҆ ты̀ сн҃е чл҃чь прорцы, и҆ въсплещѝ рꙋка́ма, и҆ ѹ҆сꙋгꙋби меч̑҇, тре́тїи мечь ꙗ҆звенымъ е҆сть.
ме́чь ꙗ҆зве́нымъ вели́къ·

И҆ ѹ҆жасиши ѧ҆̀ ꙗ҆́ко да сѧ съкрꙋши́тъ срд̑це и҆хъ, и҆ ѹ҆мно́жатсѧ не́мощнїи.
въ всѣхъ вра́тѣхъ и҆хъ предадѧ́тсѧ на ѹсѣче́нїе ме́чное·

Блаѕе ѻ́стръ бы́сть на сѣче́нїе, бла́ѕе на блиска́нїе, проходѝ ꙗ҆́ко молнїи, ѻ҆стри́сѧ ѻ҆десно и ѻ҆ лѣво.
а҆може а҆ще лицѐ твое въста́витсѧ.
и҆ а́зъ въсплещꙋ рꙋко́ю мое́ю к рꙋцѣ мое́и, и҆ ѻ҆ставлю ꙗ҆́рос̑҇ свою, а҆зъ г҃ь гл҃ахъ·

И҆ бы́сть слово гн҃е къ мн̂ѣ гл҃ѧ, сн҃е чл҃чь, ѹ҆чини себѣ пꙋтѝ дв̂а, ꙗ҆́коже внити мечю̀ цр҃ѧ вавило́нъска.
ѿ страны̀ е҆ді́ноѧ и҆зы́иде на вла́сти дв̂ѣ, и҆ рꙋкꙋ ѹ҆гото́ваютъ в нача́ле пꙋтием̑.
да ѹ҆чиниши ꙗ҆́ко внити мечю на рав꙽ва́ѳъ сн҃ы а҆м꙽мо́нѧ, и҆ на жидов꙽꙽скꙋ и҆ на і҆ерс̑҇лима·

Понеже ста́нет̑ средѣ е҆го цр҃ь вавило́ньскъ на прьвм̑ѣ пꙋтѝ, на нача́ле ѻ҆бо́ю пꙋтїю.
ꙗ҆́коже влъхвова́ти вол꙽хвова́нїе, ꙗ҆́коже въскипѣти жезло́мъ.
и҆ въпраша́ти ваꙗ҆́ныхъ, и҆ вражи́ти въ ꙗ҆́трехъ·

И҆ бысть ѻ҆деснꙋю е҆го враже́нїе на і҆ерс̑҇ли́ма.
ꙗ҆́ко ѻ҆бъста́вити ѻ҆строг̑҇ и҆ ꙗ҆́ко ѿврьз꙽тѝ ѹ҆ста̀ съ во́племъ, и҆ възвы́шити гласъ съ глаше́нїемъ трꙋбнымъ.
и҆ ꙗ҆́ко поста́вити ѻ҆стро́гъ пред̑ вра́ты е҆го, и҆ насы́пати прьсти, и҆ поста́вити стрѣ́лы<.>

И҆ ты же вол꙽хвꙋѧ и҆мъ вол꙽хвова́нїе пред̑ ними, седморѧщи седмори́цам꙽.
и҆ то́и въспомина́ѧ непра́вдꙋ е҆го помѧнꙋти·

Того ра́ди с̂е гл҃етъ а҆дона́и г҃ь, понеже въспомѧнꙋсте неправды ва́ша, внегда ѿкры́шасѧ нече́стїѧ ва́ша.
ꙗ҆́ко ꙗ҆ви́тисѧ грѣхомъ ва́шимъ, въ всѣхъ безако́нїихъ ва́шихъ, и҆ въ всѣхъ хꙋдожествѣхъ вашихъ.
понеже въспомѧнꙋсте, в тѣхъ и҆ поги́бнете·

И҆ ты̀ сквернавыи старѣ́ишино і҆и҆л҃ев꙽, е҆гож̑ пришел̑҇ дн҃ь въ времѧ неправ̑҇ды.
с̂е гл҃ет̑ г҃ь, со́ими клобꙋк꙽, и҆ положѝ вѣнець т̂а не такова̀ бꙋдетъ·

Смирѝ высо́кое, и҆ възнесѐ смире́нное.
неправдою непра́вдꙋ положꙋ̀ ѧ҆̀, и҆ т̂а не такова̀ бꙋдетъ.
до́ндеже прїидет̑ е҆мꙋже досто́итъ, и҆ предам̑ е҆мꙋ·

И҆ ты́ сн҃е чл҃чь прорцы̀, и҆ рече́ши.
се гл҃етъ а҆дона́и г҃ь къ сн҃омъ а҆м꙽мо́немъ, и҆ къ ѹ҆кори́знѣ и҆хъ.
и҆ рече́ши, ме́чь ме́чь и҆зм꙽че́нъ на сѣче́нїе, и҆зм꙽ченъ на сконча́нїе, въста́ни ꙗ҆́коже да блиска́еши въ видѣнїи своем̑ сꙋ́ии҆мъ, и҆ внегда вражи́ши л꙽жа̀·

Ꙗ҆́коже преда́ти вы́ѧ ꙗ҆звеных̑ безако́нникъ, и҆хже приспѣ дн҃ь въ вре́мѧ непра́вды.
възврати́сѧ в но́жницꙋ свою, не ста́ни в мѣсте семъ е҆мꙋже бысть, на землѝ твое́и ѿсꙋждꙋ т̂и·

И҆ възлїю на́ тѧ гнѣвъ свои.
въ ѻ҆гнѝ гнѣва моего въз꙽дхнꙋ на́ тѧ·

И҆ предам̑ т̂ѧ в рꙋцѣ мж̑ꙋ иноꙗ҆зычен̑҇, творѧ́щимъ расы́панїе.
ѻ҆гню бꙋдеши ꙗ҆́дь.
и҆ кро́вь твоѧ бꙋдет̑ средѣ землѧ̀ твоеѧ.
не бꙋдетъ твоеа па́мѧти занѐ а҆зъ г҃ь гл҃ахъ·

Глв̑҇а, к҃в·

И быс̑҇ сло́во гн҃е къ мнѣ̀ гл҃ѧ, а҆ще сꙋ́диши гра́дꙋ кро́вномꙋ, а҆ще ꙗ҆́ви́ши е҆мꙋ вс̂ѧ безако́нїѧ е҆го.
и҆ речеши, с̂е гл҃етъ а҆дона́и г҃ь.
ѽ гра́де проливаѧ́й кро́вь средѣ себе, ꙗ҆́кож̑ прїити времени е҆го.
творѧ́и кꙋми́ры ѻ҆ себѣ, ꙗ҆коже ѻ҆скверни́тисѧ само́мꙋ·

Въ кро́вихъ е҆го ꙗ҆́же пролїѧ съгрѣши.
и҆ въ кꙋми́рехъ твоих̑ ꙗ҆́же сътворѝ ѻ҆сквернавлѧ́шесѧ.
и҆ съкрати дн҃и своѧ̀, и҆ приведе вре́мѧ лт̑ѣ свои҆хъ·

Сего ради да́хъ т̂ѧ на ѹ҆кори́знꙋ въ страна́хъ, и на порꙋга́нїе всѣмъ землѧмъ, ꙗ҆́же приближа́ют̑сѧ к тебѣ, и҆ ꙗ҆́же ѹ҆далѧют̑сѧ ѡ тебѐ и҆ порꙋгают̑сѧ тебѣ.
и҆ възъпїют̑ на́ тѧ нечи́стъ словꙋщїи и҆ мно́гъ въ безаконїи е҆го·

Старѣишины до́мꙋ і҆и҆л҃ева ко́ждо къ своим̑ ѹ҆жикам̑ и҆х꙽ смѧтошасѧ въ тебѣ̀, ꙗ҆́коже да пролїютъ кро́вь·

ѿц҃ꙋ же и҆ мт҃ри ѕл̂о гл҃ахꙋ въ тебѣ.
и҆ прохода ѻ҆бращахꙋ в непра́вдꙋ въ тебѣ.
сиротꙋ и҆ вдови́цꙋ преѻ҆бидѧхꙋ в꙽ тебѣ̀.
и҆ ст҃аѧ моа похꙋли́ша, и҆ сꙋбо́ты моа ѻ҆сквернавлѧхꙋ в тебѣ·

Мꙋ́жи разбо́иници бѣша въ тебѣ, ꙗ҆́коже да пролїютъ кро́вь.
на гора́хъ ꙗ҆́дѧ́хꙋ въ тебѣ, и҆ неправдꙋ творѧ́хꙋ средѣ тебе.
стыдѣнїе ѿч҃ее ѿкры́ша въ тебѣ.
и҆ в нечистотѣ сѣдѧ́щꙋ ѻ҆брꙋга́ша в꙽ тебѣ·

Ко́ждо къ женѣ по́дрꙋга свое҆го безаконнова́ша, и҆ ко́ждо невѣстꙋ свою̀ ѻ҆сквернавлѧ́ше в꙽ нече́стїе·

И҆ ко́ждо сестрꙋ̀ свою дще́рь ѿц҃а свое҆го ѻ҆брꙋгава́хꙋ в꙽ тебѣ.
м꙽зды възима́хꙋ в꙽ тебѣ, ꙗ҆кож̑ да пролїют̑ кровь.
растъ и҆злиха в꙽зима́хꙋ в꙽ тебѣ·

И҆ скон꙽ча́ю сконча́нїе ѕлобы твоеа ꙗ҆́же в насилїи, мене б̂о забы̀, гл҃ет꙽ а҆дона́и г҃ь.
с̂е ѹ҆бо поражꙋ рꙋ́кою мое҆ю к꙽ рꙋцѣ в них̑же скон̑҇чал̑҇сѧ е҆си, и҆ е҆же сътворил̑҇ е҆си, и҆ ѻ҆ кровых̑ бы́вшихъ средѣ тебе.
а҆ще потерпит̑ срд̑це твое, и҆ а҆ще ѹ҆дръжатъ рꙋцѣ твоѝ въ дн҃и, в нѧ́же а҆зъ творю въ тебѣ·

А҆зъ г҃ь гл҃ахъ и҆ сътворю̀, и҆ расыплю въ странахъ, и҆ раз̑сѣю т̂ѧ въ землѧхъ·

И҆ ѻ҆скꙋдѣ́етъ нечистота̀ твоѧ̀ и҆с тебѐ.
и҆ владѣти бꙋдꙋ тобо́ю пред̑ ѻ҆чи́ма страна́мъ, зане а҆зъ г҃ь·

И҆ бысть сло́во гн҃е къ мнѣ̀ гл҃ѧ, сн҃е чл҃чь с̂е бы́ша мнѣ̀ дом̑ і҆и҆л҃евъ, смѣшени вс̂и с мѣ́дїю, и҆ съ ѻ҆́ловомъ чи́стомъ, и҆ съ сви́нцем꙽ средѣ пе́щи сребра̀ смѣшени сꙋть·

Сего ра́ди р꙽цы, с̂е гл҃етъ а҆дона́и г҃ь поне́же бы́сте вс̂и смѣшенїе е҆ді́но.
сего ради с̂е а҆зъ прїимꙋ васъ средѣ і҆ерс̑҇ли́ма.
ꙗ҆́коже прїемлетъ сребро̀ и҆ мѣ́дь, и҆ желѣзо и҆ свинецъ, и҆ ѻ҆лово чи́стое средѣ пещи.
ꙗ҆́кож̑ вдꙋнꙋти в нѧ̀ ѻ҆гню ꙗ҆́коже пожещѝ.
та́ко прїимꙋ ва́съ въ гнѣвѣ мое҆мъ, и҆ въ ꙗ҆́рости мое́и.
и҆ въведꙋ и҆ ѻ҆ста́влю и҆ пожегꙋ ва́съ.
и҆ възъдмꙋ на́ вы въ ѻ҆гни гнѣ́ва мое҆го, и҆ пож꙽жени бꙋдете средѣ еѧ̀.
ꙗ҆́коже пожигает̑сѧ сребро̀ средѣ пе́щи, та́коже пож꙽жетесѧ средѣ еѧ̀.
и҆ позна́ете ꙗ҆ко а҆зъ г҃ь, възлїѧхъ ꙗ҆́рость свою̀ на ва́съ·

И҆ бы́сть сло́во гн҃е къ мнѣ̀ гл҃ѧ, сн҃е чл҃чь рцы е҆мꙋ, т̂ы е҆си землѧ̀ неѻ҆дожди́ма въ дн҃ь ꙗ҆́рости·

Є҆гоже старѣ́ишины средѣ е҆го, ꙗ҆́ко львы рыка́ю҆ще.
въсхитающе въсхищенїѧ.
дш҃а из̑ꙗ҆дающе наси́лїемъ.
бога́тество и҆ честь прїе҆млюще.
вдови́ца е҆го ѹ҆мно́жиша средѣ е҆го·

И҆ жерцы е҆го ѿвръго́шас̑҇ зако́на мое҆го, и҆ ѻ҆скверни́ша ст҃аа моа̀.
ме́ждꙋ ст҃ымъ и҆ сквер̑҇на́вом не разлꙋчи́ша.
и҆ межд̑ꙋ нечи́стом̑ и҆ чи́стомъ не разлꙋчи́ша.
ѿ сꙋбо́тъ мои҆хъ покрывахꙋ ѻ҆чи своѝ, и҆ ѻ҆сквер̑҇навлѧ́хꙋ м̂ѧ средѣ и҆хъ·

Кнѧ́ѕи е҆го средѣ е҆го, ꙗ҆́ко влъцы въсхита́юще въсхита́нїѧ.
ꙗ҆́коже пролїати кро́вь, и҆ погꙋбити дш҃а, ꙗ҆́коже глад̑ство гладова́ти·

И҆ про̑҇рцы е҆го помаза́ющеисѧ сами, падꙋтъ ви́дѧщеи сꙋ́аѧ.
и҆ влъхвꙋ́ющеи и҆ лжа, гл҃ющеи.
с̂е гл҃етъ а҆донаи г҃ь.
а҆ г҃ь не гл҃а·

Лю́ди землѧ̀ съклѣща́юще въсхыща́юще въсхитанїѧ.
сиротѣ и҆ ѹ҆богꙋ наси́лїе творѧ́ще.
и҆ къ приходꙋ не живꙋще съ сꙋдо́мъ·

И҆ възыскахъ ѿ нихъ мꙋжа живꙋща правѣ, и҆ стоа́ща ѿнꙋдь пред̑ лицемъ моим̑ въ времѧ гнѣва, ꙗ҆́коже не до ко́нца погꙋби́ти е҆го, и҆ не ѻ҆брѣтох꙽·

И҆ възлїѧ́хъ на́ нѧ ꙗ҆́рость свою въ ѻ҆гни гнѣва мое҆го, ꙗ҆́коже сконча́тї ѧ҆̀.
пꙋти и҆хъ на главы̀ и҆хъ дах꙽, гл҃тъ а҆дона́и г҃ь·

Глв̑҇а, к҃г·

И бы́сть сло́во гн҃е къ мнѣ гл҃ѧ сн҃е чл҃чь, дв̂ѣ женѣ бѣста д꙽щери матери е҆дїноа.
и҆ съблꙋди́ста въ егѷп꙽те, въ юности свое҆и съблꙋди́ста.
т̂ꙋ ѿпадо́ста със꙽ца ею̀, и҆ тꙋ расыпа́ста дв҃ьство.
и҆мена же и҆́ма, ѻ҆ѻ҆л꙽ла старѣ́ишаѧ, ѻ҆ѻ҆лива же мен̑҇шаѧ сестра е҆ѧ̀·

И҆ бы́ста мнѣ̀, и҆ роди́ста сн҃ы и҆ дщери.
и҆мена же и҆́ма, самаре́ѧ ѻ҆ѻ҆л꙽ла, і҆ и҆ерс̑҇ли́мъ ѻ҆ѻ҆лива·

И съблꙋди ѻ҆ѻ҆л꙽ла ѿ менѐ, и҆ възложи на хо́ти своѧ̀ къ а҆сѷрїѻмъ приближа́ющимъсѧ е҆й.
ѻ҆блечен꙽ны в червеница, старѣ́ишины, и҆ вое҆воды и҆ ю́ноты, и҆збра́нныѧ вс̂ѧ ко́нники снꙋзны на конехъ.
и҆ дасть блꙋженїе е҆ѧ̀ к ни́мъ, къ и҆збра́ннымъ сн҃омъ а҆сѷрїискомъ всѣмъ, и҆ на всѧ̀ к ним̑же възложи.
въ всѣхъ нечистота́хъ и҆хъ ѻ҆сквернавлѧшесѧ·

И҆ блꙋженїѧ свое҆го е҆же и҆зъ е҆гѷпта не ѻ҆ста́ви, ꙗ҆́ко с не́ю лега́хꙋ въ ю́ности еѧ̀.
и҆ тїи расыпа́ша дв҃ьство еѧ̀, и҆ раз꙽лїѧша блꙋженїе и҆хъ на ню̀·

Того ради предахъ ю҆̀ в рꙋцѣ хотемъ еѧ̀ в рꙋцѣ сн҃омъ а҆сѷрїискомъ, к ним̑же възлага́ше·

Тїи ѿкры́ша стыдѣнїе еѧ̀, сн҃ы и҆ дщери еѧ̀ поа́ша, и҆ самꙋ мечемъ ѹ҆сѣкнꙋша.
и҆ бы́сть поно́съ въ женахъ, и҆ ѿм꙽щенїе сътвори́ша в не́и ѻ дще́рехъ·

И҆ ви́дѣ сестра̀ еѧ̀ ѻ҆ѻ҆ли́ва, и҆ расыпа възложенїе свое па́че еѧ̀.
и҆ блꙋженїе еѧ̀, па́че блꙋженїѧ сестры свое́ѧ ѹ҆мно́жи къ сн҃омъ а҆сѷрїискомъ възложѝ.
старѣ́ишины и҆ вое҆воды ближ̑нѧа еѧ̀, и҆ ѻ҆блечен꙽ны въ бл҃гои҆стька́нны, кон̑҇ники снꙋзны на ко́нех̑, ю́ноша и҆збра́нны вс̂ѧ.
и҆ ви́дѣх꙽ ꙗ҆́ко ѻ҆сквернисѧ пꙋть е҆ді́нъ ѻ҆бою.
и҆ приложи къ блꙋженїю свое́мꙋ, и҆ ви́дѣ мꙋжа въпи́саны на стенѣ ѻ҆́бразы хальдѣ́иски, въпи́саны ша́ромъ, и҆ ѻпоѧ́санны по лѧдвїем̑ и҆хъ по́ѧсы и҆змечтанными, и҆ прево́и ѻ҆мочени на глава́хъ и҆хъ, ѻ҆болчени мно́гоѻ҆бразно , подо́бно къ сн҃омъ вавѷлоньскимъ, халдѣ́иски землѧ̀ ѿч҃ества и҆хъ.
и възложи на́ нѧ взорь ѻ҆́чїю своею·

И҆ посла̀ послы̀ к ни́мъ въ зе́млю хальдѣ́искꙋ.
и҆ прїидо́ша к не́и сн҃ове вавѷлоньстїи на ложи стоа́ще, и҆ ѻ҆сквернави́ша ю҆̀ в꙽ соблꙋжених̑.
и҆ ѻ҆сквернависѧ в них̑, и҆ ѿстꙋпи дш҃а еѧ̀ ѿ них̑·

И ѿкры блꙋженїе еѧ̀, и҆ ѿкры̀ стыдѣ́нїе еѧ̀.
и ѿстꙋпи дш҃а моѧ̀ ѿ неѧ, ꙗ҆́коже ѿстꙋпи дш҃а моа̀ ѿ сестры еѧ̀·

И҆ ѹ҆мно́жи блꙋженїе своѐ, ꙗ҆́ко помѧнꙋти дн҃и ю҆́ности свое́ѧ, в нѧ́же съблꙋди въ е҆гѷпте·

И҆ възложи на халдѣѧ, их̑же пло́ти ꙗ҆́ко плоти ѻ҆слѧ, и҆ ꙗ҆ко ло́на коньска ло́на и҆хъ.
и҆ присѣти безако́нїе ю҆́ности свое́ѧ, ꙗ҆же творѧ́ше въ е҆гѷпте въ станꙋ̀ твое҆м꙽, и҆дѣже сосца ю҆́ности твое́ѧ ѿпадо́ста·

Того ради ѻ҆ѻ҆ливо, с̂е гл҃етъ а҆дона́и г҃ь.
с̂е а҆́зъ воста́влю хо́ти твоѧ̀ на́ тѧ , ѿ них̑же ѿстꙋпи дш҃а твоѧ̀.
и҆ наведꙋ ѧ҆̀ на тѧ ѻ҆́крс̑҇тъ сн҃ы вавѷлоньски, и҆ вс̂ѧ халдѣѧ, факꙋмъ, и҆ сꙋдїи, и҆ кꙋѳъ, и҆ вс̂ѧ сн҃ы а҆сѷрїиски.
с ними ю҆́ноша и҆збра́нны, старѣ́ишины, и҆ вое҆воды, и҆ всѧ̀ колеснич̑҇ники нарочи́ты, ко́нники на ко́нх̑ѣ.
и҆ прїидꙋтъ на́ тѧ вс̂и ѿ сѣвера , съ ѻ҆рꙋж́їем꙽ и҆ с колесни́цами, и҆ съ мно́гом̑
наро́домъ.
и҆ защищенїе и҆ щи́ты и҆ шлемы възложатъ на́ тѧ, и҆ поста́вѧтъ страж꙽бꙋ ѻ҆́крс̑҇тъ тебѐ·

И҆ дамъ пред̑ лицемъ и҆хъ сꙋдъ, и҆ ѿм꙽стѧть т̂и въ сꙋдѣхъ свои҆хъ.
и҆ дамъ рвенїе мое въ тебѣ̀, и҆ сътворю̀ с тобо́ю гнѣвъ ꙗ҆́рости мое́ѧ·

Но́здри твоа и҆ ѹ҆ши твоѧ̀ ѻ҆брѣжт̑ꙋ, и҆ ѻ҆ста́вшаѧ мечемъ и҆с꙽сѣкꙋтъ.

Тїи сн҃ы твоѧ и҆ дще́рѧ твоѧ̀ пои҆мт̑ꙋ, и҆ ѻ҆ста́вшаѧ твоѧ потребит̑ ѻ҆́гнь.
и҆ съвлекꙋтъ с тебе ри́зы твоѧ̀, и воз̑мꙋтъ сосꙋ́ды хвалы̀ твое́ѧ·

И҆ ѿвращꙋ нече́стїѧ твоѧ̀ ѿ тебе, и҆ блꙋженїѧ твое҆го е҆же въ е҆гѷпте не помѧнꙋ ктомꙋ·

Поне́же с̂е глетъ а҆дона́и г҃ь.
с̂е а҆зъ преда́ю т̂ѧ въ рꙋцѣ и҆́хже ненави́диши, и҆ ѿ ни́хже ѿстꙋпи дш҃а твоѧ̀.
и҆ сътворѧтъ въ тебѣ в ненависти, и҆ възмꙋтъ вс̂ѧ трꙋды твоѧ̀ и҆ дѣлеса̀ твоѧ̀, и҆ бꙋдеши нага и҆ съ стꙋдомъ.
и҆ ѿкры́етсѧ стыдѣнїе блꙋженїѧ твое҆го, и҆ нечестїѧ твое҆го·

Блꙋженїе твоѐ сътвори тебѣ с̂е, внегда̀ съблꙋдѝ въ слд̑ѣ стра́нъ, и҆ ѻ҆сквернавлѧ́шесѧ въ кꙋмирх̑ѣ·

И҆ въ пꙋти сестры̀ свое́ѧ походи́ла е҆си, и҆ да́мъ ча́шꙋ еѧ̀ въ рꙋцѣ твоѝ·

Се̂ гл҃етъ а҆дана́и г҃ь, ча́шꙋ сестры̀ твое́ѧ и҆спїеши глꙋбокꙋю и҆ широ́кꙋю.
и҆ бꙋдетъ на смх̑ѣ и҆ похꙋхна́нїе ли́хое, на ѹ҆питїе и҆ раслабленїѧ напо́лнишис̑҇.
ча́ша же потребленїѧ и҆ погибенїѧ, ча́ша сестры̀ твое́ѧ самарїи.
і҆ и҆спїеши ю҆̀ и҆ посмер̑҇чеши, и҆ чрепъ еѧ̀ раз̑бїеши, и҆ сосца своѧ̀ ѿтръѕа́еши·

И҆ празд̑ники твоѧ̀, и҆ нача́ла мс̑҇ць твои҆хъ въз꙽вращꙋ.
поне́же а҆зъ гл҃ах꙽, рече а҆дона́и г҃ь·

Сего рад̑и̑ с̂е гл҃етъ а҆дона́и г҃ь, в꙽ того мѣсто и҆́мже забы̀ м̂ѧ, и҆ ѿвр́ьже м̂ѧ за тѣло своѐ.
и҆ т̂ы возми нечестїе свое и҆ блд̑ꙋ сво́и·

И҆ реч̑҇ г҃ь къ мнѣ, сн҃е чл҃чь, а҆ще сꙋ́диши ѻ҆ѻ҆л꙽лѣ, и҆ ѻ҆ѻ҆ливѣ.
и҆ со́вѣстиши и҆́ма безако́нїа ею̀, ꙗ҆ко любодѣйствꙋета, и҆ кровь въ рꙋкꙋ ею̀.
и҆ въ кꙋмирехъ еѧ̀ любодѣ́иствꙋета.
и҆ чада ею ꙗже породи́ста мнѣ̀, приведꙋ ѧ҆̀ и҆́ма средѣ ѻ҆гнѧ̀.
до́ндеже е҆гоже ненави́дѣхъ сътвори́ста м̂и·

ѻ҆сквернавлѧхꙋ ст҃аѧ моа, в то́и дн҃ь и҆ сꙋбо́ты моѧ̀ ѻ҆сквернавлѧ́хꙋ, внегда̀ закала́хꙋ ча́да своѧ̀ кꙋмиромъ.
и҆ въхожд̑ахꙋ въ ст҃аа моѧ̀ въ то́и дн҃ь ѻ҆скврънавлѧхт̑ꙋ ѧ҆̀·

И с̂е та́ко творѧ́ста средѣ до́мꙋ мое҆го.
и҆ пꙋщаста къ мꙋжемъ грѧдꙋщимъ и҆зда́леча, им̑же послы̀ посыла́ста к ни́мъ.
и҆ а́бїе и҆деж̑ прїидѧхꙋ и҆змываю҆щес̑҇, и҆ ѹ҆тварѧ́ше ѻ҆́чи своѝ, и҆ ѹ҆краша́шесѧ ѹ҆тваренїемъ.
и҆ сѣдѧ́ше на ѻ҆́дрѣ постланѣ, и҆ трапеза ѹ҆крашен꙽на пред̑ нею̀·

И҆ ѳимїа́мъ мои, и҆ ма́сло мое пред̑лага́ше пред̑ ними, и҆ веселѧ́хꙋсѧ в них̑.
и҆ гла́съ съглашенїѧ въз꙽глаша́хꙋ къ мꙋжемъ, ѿ мно́жества чл҃ча приходѧ́ща ѿ пꙋсты́нѧ·

И҆ даѧ́ста прьстьни на́ рꙋки и҆хъ, и҆ вѣнецъ хвалы̀ на главы̀ и҆хъ.
и҆ рекох̑, не в см̑ѣ ли ѹ҆бо любодѣ́иство е҆сть, и҆ дѣлеса̀ блꙋдница, с̂и и҆ с̂и проблꙋди́сѧ·

И҆ влажахꙋ к не́и, ꙗ҆́коже вла́зѧтъ къ женѣ блꙋдницы.
та́ко влажа́хꙋ къ ѻ҆ѻ҆л꙽лѣ, и҆ къ ѻ҆ѻ҆ливѣ, и҆ къ жена́ма безако́нницама, ꙗ҆́коже сътвори́ти безако́нїе.
мꙋжи же правдиви сїи·

и҆ ѿм꙽стѧ́тъ и҆́ма ѿм꙽щенїем̑ любодѣискомъ, и҆ сꙋдомъ пролива́ю҆щих꙽ кро́вь.
ꙗ҆́ко любодѣ́ицы е҆ста и кро́вь въ рꙋкꙋ е҆ю·

Се̂ гл҃тъ а҆дона́и г҃ь.
приведи на конѣхъ наро́ды, да́ждь в нею мѧтежъ и҆ раз꙽грабренїе.
и҆ разбїи ка́менїем꙽ в не́ю, ка́менїем꙽ наро́дъскомъ, и҆ да и҆збодꙋтъ копїи свои́ми.
сн҃ы и҆х꙽ и дщери и҆збїютъ, и҆ до́мы и҆хъ пожегꙋтъ ѻ҆гнем꙽.
и҆ въз꙽вращꙋ нечестїе ѿ землѧ̀, и҆ нака́жꙋтсѧ вс̂ѧ же́ны, и҆ не сътворѧ́тъ по нече́стїю еѧ̀.
и҆ дастьсѧ нече́стїе ва́ю на́ вы, и҆ вс̂и грѣхи кꙋми́ръ ва́шихъ прїимете.
и҆ разꙋмѣ́ете ꙗ҆́ко а҆зъ гл҃ѧ, а҆дона́и г҃ь·

Глв̑҇а, к҃д·

И бы́сть сло́во гн҃е къ мнѣ̀ въ ѳ҃ е лѣто, въ мс̑҇ць ѳ҃, и҆ въ і҃ дн҃ь мс̑҇ца, гл҃ѧ.
сн҃е чл҃чь, в꙽пиши себѣ и҆мѧ дн҃е сего, ѿ не́гоже нача̀ цр҃ь вавѵлоньскъ на і҆ерс̑҇ли́ма, ѿ сего же дн҃е днс̑҇ь·

Рцы притчю къ домо́ви гнѣ́вающемꙋ, и҆ речеши к ни́мъ.
с̂е гл҃етъ а҆дона́и г҃ь.
навѣси коно́бъ на вѣси, и влїи во́нь во́дꙋ.
и҆ въверѕи во́нь рас꙽сѣченїе, вс̂е раче́нїе добро̀, го́лень и҆ ра́ма ѻ҆брѣ́зана ѿ ко́стїи ѡ и҆збра́нїѧ ѿ скота̀ пома́занаго.
и҆ под̑гнѣща́и ко́стьсми под̑ нимъ·

въз꙽врѣ і҆ и҆скипѣ, и҆ съврѣша ко́сти е҆го средѣ е҆го·

Того ради с̂е гл҃етъ а҆дона́и г҃ь.
ѽ граде кро́вныи коно́бе в нем꙽же е҆сть ꙗ҆́дь, и҆ ꙗ҆́дь не и҆зы́иде и҆з него̀, по ѹ́дом꙽ е҆го и҆знесе, не падѐ на не́мъ прича́стїе·

Ꙗ҆́ко кро́вь е҆го средѣ е҆го е҆сть, на глад̑цѣ камы́цѣ ѹ҆чинх̑и ю҆̀.
не пролїѧхъ еѧ̀ на́ землю, ꙗ҆́коже покры́ти ю҆̀ земле́ю.
ꙗ҆́коже възвести ꙗ҆́рость мою̀ на ню̀, въ ѿм꙽щенїе м꙽стити да́хъ кро́вь е҆го, на глад̑цѣ камыцѣ вчини́хъ ю҆̀, ꙗ҆́коже не покры́ти еѧ̀·

Того ради с̂е гл҃тъ а҆дона́и г҃ь, ѽ люте граде кро́вныи.
а҆́з же възвели́чю главню̀ и҆ въз꙽гнѣщꙋ ѻ҆́гнь, ꙗ҆́ко да и҆стлѣ́ютъ мѧ́са и ѻ҆скꙋдꙋетъ ю҆ха, и҆ ко́сти и҆схнт̑ꙋ.
и҆ ста́нетъ на главнѧ́хъ е҆го то́щъ.
раз꙽горѣсѧ ꙗ҆ко да и҆згори́тъ, и҆ распали́тсѧ і҆ и҆спрѧ́жетсѧ мѣ́дь е҆го.
і и҆ста́етъ средѣ е҆го нечи́стота е҆го и҆ ѻ҆скꙋдѣ́етъ ꙗ҆́дь е҆го.
да сѧ смирит̑ ꙗ҆́дь е҆го, и҆ не и҆зы́идетъ и҆з него·

Мно́гъ ꙗ҆́дь е҆го, и҆ срамитсѧ ꙗ҆́дь е҆го.
в нечистотѣ̀ твое҆и ѹ҆кропъ.
понеж̑ ѻ҆сквер̑҇навлѧ́шесѧ т̂ы.
и҆ не ѻ҆чи́стисѧ ѿ неистоты свое́ѧ, и҆ не ѻ҆чи́стишисѧ посем꙽.
до́ндеже наполню ꙗ҆́рость мою̀ въ тебѣ·

А҆́зъ г҃ь гл҃ах꙽, и҆ приспѣ́етъ и҆ сътворю̀.
и҆ не ѿлꙋчю, и҆ не пощажꙋ, и не ѹ҆молю́сѧ·

По пꙋтем꙽ твои҆м꙽, и҆ по помы́сломъ твои҆мъ сꙋжд̑ꙋ тебѣ, гл҃етъ а҆дона́и г҃ь·

Сего ради с̂е а҆зъ сꙋжд̑ꙋ тебѣ по помы́слом̑ твои҆мъ, и по крове́мъ твои҆мъ сꙋжд̑ꙋ тебѣ.
и҆ нечисто и словꙋщїи вели́кїи на раз꙽гнѣ́ванїе·

И҆ бы́сть сло́во гн҃е къ мнѣ̀ гл҃ѧ, сн҃е чл҃чь, с̂е а҆зъ въземлю ѿ тебѐ помышленїѧ ѻ҆чїю твое́ю, не възрыда́еши н̂и въспла́чешисѧ, н̂и прїидꙋт꙽ тебѣ сле́зы.
стени молча въздыха́нїе же́лныхъ чре́слъ е҆сть·

Да бꙋдт̑ꙋ вла́си твоѝ сплетени на тебѣ̀, и҆ сапо́ѕи твоѝ на но́гахъ твои҆хъ.
и҆ да не ѹ҆тѣшишисѧ ѹ҆стна́ми и҆хъ, и҆ хлѣба мꙋжеска да не и҆зъѧ҆си·

И҆ гл҃ахъ къ лю́демъ заѹ҆́тра, ꙗ҆коже заповѣ́да ми.
и҆ ѹ́мре жена̀ моа вечеръ.
и сътворих̑ заѹ҆́тра ꙗ҆́коже повелѣ м̂и·

И҆ рекоша къ мнѣ лю́дїе, не повѣси л̂и на́мъ чт̂о то̀ е҆сть е҆же т̂ы тво́риши.
и҆ рекохъ к ни́мъ, сло́во гн҃е бы́сть ко мнѣ, гл҃ѧ, рцы къ до́мꙋ і҆и҆л҃евꙋ.
с̂е а҆зъ гл҃етъ а҆дона́и г҃ь.
рцы̀ къ до́мꙋ і҆и҆л҃евꙋ, с̂е а҆зъ ѻ҆скверна́влю ѻ҆сщ҃енїѧ моа, велича́нїѧ крѣпости ва́шеѧ, по́мыслы ѻ҆́чїю ва́шею, и҆ ꙗ҆́же щадѧт̑ дш҃а ва́ша.
и҆ сн҃ы ва́ша и҆ дщерѧ ваша ꙗ҆́же ѻ҆ста́висте, мечем̑ падꙋт꙽.
и҆ сътво́рите ꙗ҆́коже а҆зъ сътворихъ.
ѿ ѹ́стъ и҆хъ да сѧ не ѹ҆тѣши́те.
и хлѣ́ба мꙋж́еска да не ꙗ҆сте.
и҆ вла́сы ва́ши на глава́хъ ва́ших̑, и҆ сапо́ѕи ва́ши на ногах̑ ваших̑.
да сѧ не бїете н̂и пла́чете, і҆ и҆ста́ете в непра́вда ва́шихъ.
и҆ не ѹ҆тѣшите ко́ждо ва́съ бра́та свое҆го.
и҆ бꙋдетъ ва́мъ е҆зекїиль на дивленїе.
посемꙋ̀ е҆ли́ко сътворихъ да сътво́рите, е҆гда приспѣ́ет꙽ с̂е, и҆ разꙋмѣе҆те ꙗ҆́ко а҆зъ а҆дона́и г҃ь·

И҆ т̂ы сн҃е чл҃чь, не точїю въ дн҃ь то́и е҆гда̀ въземлю ѿ нихъ крѣ́пость и҆хъ, възнесенїе хвалы и҆хъ , по́мыслы ѻ҆́чїю и҆хъ, и҆ възнесе́нїе дш҃а и҆хъ, сн҃ы и и҆ дщери и҆хъ.
въ то́и дн҃ь прїидетъ ѹ҆целѣвыи к тебѣ̀, совѣстити тебѣ̀ въ ѹ́ши.
въ то́и дн҃ь ѿве́рзт̑ꙋсѧ ѹ҆ста твоѧ̀ по ѹ҆целѣвшемꙋ, и҆ съгл҃еши, и҆ не премол꙽чиши ктомꙋ.
и҆ бꙋ́деши и҆мъ на дивъ.
и҆ ѹ҆вѣ́дѧт꙽ ꙗ҆́ко а҆зъ а҆дона́и г҃ь·

Глв̑҇а, к҃е·

И бы́сть сло́во гн҃е къ мнѣ̀ гл҃ѧ, сн҃е чл҃чь , ѹ҆тверди лице свое на сн҃ы а҆м꙽мо́нѧ, и прорцысѧ на́ нѧ.
и҆ рече́ши сн҃омъ а҆м꙽мо́немъ, гл҃ѧ.
слышите сло́во г҃а а҆дона́ѧ.
с̂е гл҃етъ а҆дона́и г҃ь, е҆льмаже пора́довастесѧ до ст҃ыхъ, мои҆хъ, ꙗ҆́ко ѻ҆сквернавле́на бы́ша, и҆ ѻ҆ землѝ і҆и҆л҃евѣ, ꙗ҆́ко поги́бе.
и҆ ѻ҆ домꙋ і҆ѹ́динѣ, ꙗ҆́ко ѿиде въ плѣне́нїе.
того ради предамъ вас̑҇ сн҃омъ кеде́млемъ в наслѣ́дїе, и҆ вселѧ́тсѧ въ грѣсѣ́хъ в꙽ тебѣ, и҆ сътво́рѧтъ в꙽ тебѣ села и҆хъ.
тїи поꙗ҆дѧт̑ пло́ды твоѧ, и тїи и҆спїют̑ бл҃готꙋ твою.
и҆ дамъ град̑ твои а҆м꙽мо́не паствѣ вельблюд̑стѣ, и҆ сн҃ы а҆м꙽мо́нѧ на па́ствы ѻ҆́вча.
и҆ разꙋмѣ́ете ꙗ҆́ко а҆зъ а҆дона́и г҃ь·

И҆́мже с̂е гл҃етъ г҃ь б҃ъ, поне́же въсплеска̀ рꙋко́ю свое҆ю, и҆ въстрепа ного́ю свое҆ю, и҆ порадовасѧ дш҃ею свое҆ю ѻ҆ земли і҆и҆л҃евѣ.
того ради с̂е а҆зъ прострꙋ рꙋ́кꙋ свою на́ тѧ.
и҆ дамъ т̂ѧ въ разграбле́нїе странам̑.
и҆ потреблю т̂ѧ ѿ людїи, и҆ погꙋблю т̂ѧ ѿ стра́нъ па́гꙋбою.
и҆ ѹ҆вѣси ꙗ҆́ко а҆зъ а҆дона́и г҃ь·

Се̂ гл҃етъ а҆дона́и г҃ь, поне́же рече моа́въ и҆ сїи҆ръ, се ꙗ҆́коже всѧ страны до́мъ і҆и҆л҃евъ і҆ и҆ѹ́да.
сего ради с̂е а҆зъ расы́плю сꙋроваго моа́ва ѿ ра́тных̑ е҆мꙋ, ѿ под̑го́рїѧ е҆го и҆збрънꙋ зе́млю до́мꙋ веѳїаси́моѳова, над̑ и҆сто́чником̑ гра́да, подо́лгъ мо́рскаго вае҆лмо́на, и҆ карїе҆ѳе́ма, сн҃ы кеде́млѧ на сн҃ы а҆м꙽мо́нѧ.
да́хъ ѧ҆̀ в꙽ наслѣ́дїе, и ѿда́м꙽ ѧ҆̀ на в꙽зѧ́тїе, ꙗ҆́коже да не бꙋ́детъ па́мѧти сн҃овъ а҆м꙽мо́нь въ странах̑.
и҆ в꙽ моа́ве же сътворю ѿме́стїе.
и҆ ѹ҆вѣ́дѧтъ ꙗ҆́ко а҆зъ г҃ь·

Се̂ гл҃етъ а҆дона́и г҃ь, поне́же сътвори и҆дꙋме́а , е҆гда ѿм꙽сти́ша ѿме́стїе въ гнѣ́вѣ в домꙋ̀
і҆ѹ́динѣ, и҆ помни́ша ѕло́б꙽, и҆ ѿм꙽стиша прѧ̀ ѡ нихъ.
того ради с̂е гл҃етъ а҆дона́и г҃ь, прострꙋ рꙋ́кꙋ свою на и҆дꙋме́ю, и҆ потреблю с неѧ чл҃ки и҆ ско́тъ, и҆ поста́влю ю҆̀ пꙋстꙋ.
и҆ ѿ ѳема́нъ, и҆ ѿ деда́нъ жено́ми мече́мъ падꙋтъ.
и҆ да́мъ ѿм꙽ще́нїе мое на и҆дꙋме́ю в рꙋцѣ людїи мои҆хъ і҆и҆л҃ѧ.
и҆ сътво́рѧтъ въ и҆дꙋме́и по гнѣ́вꙋ мое҆мꙋ, и҆ по ꙗ҆́рости мое́и.
и҆ ѹ҆вѣ́дѧтъ ѿмще́нїе мое, гл҃етъ а҆дона́и г҃ь·

Се̂ гл҃етъ а҆дона́и г҃ь, поне́же сътвори́ша и҆ноплеме́нницы въ гнѣ́вѣ, и҆ въста́виша ѿмще́нїе порадова́ющесѧ в꙽сею дш҃ею, ꙗ҆́коже расы́пати дш҃а по вра́ждѣ вѣ́чнеи.
того ради с̂е гл҃етъ а҆дона́и г҃ь, се̂ а҆зъ прострꙋ рꙋцѣ свои на и҆ноплеме́нники, и҆ потреблю кри́ты, и҆ погꙋблю про́чаѧ живꙋщаѧ подо́лгъ мо́рѧ.
и҆ сътворю в нихъ ѿмще́нїе вели́ко, въ ѻ҆бличе́нїи ꙗ҆́рости мое҆ѧ.
и҆ разꙋмѣ́ютъ ꙗ҆́ко а҆зъ а҆дона́и г҃ь, е҆гда̀ дам̑ ѿмще́нїе мое на́ нѧ·

Глв̑҇а, к҃ѕ·

И бы́сте въ е҆ді́нона́десѧтое лѣто, первыи дн҃ь мс̑҇ца.
бы́сть сло́во гн҃е къ мнѣ̀ гл҃ѧ.
поне́же помы́сли тѷр꙽ на і҆ерс̑҇лима, бл҃го съкрꙋшисѧ поги́бе.
страны ѻ҆брати́шасѧ къ мнѣ, і҆ и҆спо́лнены ѻ҆пꙋстѣ·

Того ради с̂е гл҃етъ а҆дона́и г҃ь.
с̂е а҆зъ на́ тѧ тѷре, и҆ приведꙋ на́ тѧ страны мно́ги.
ꙗ҆́коже въсхо́дитъ мо́ре волна́ми свои҆ми.
и҆ ѻ҆бы́идꙋтъ гра́ды твоѧ, и҆ разорѧтъ сн҃ы твоѧ, и҆ развѣ́ю пра́хъ е҆го и҆з него, и҆ да́мъ ѧ҆̀ въ гла́докъ камы́къ.
простира́ло мре́жамъ средѣ мо́рѧ, ꙗ҆́ко а҆зъ гл҃ах̑ а҆дона́и г҃ь, и҆ бꙋ́детъ на плѣне́нїе странамъ.
и҆ дще́ри е҆го ꙗ҆́же на́ поли мече́мъ ѹ҆бїе́ни бꙋ́дꙋтъ.
и҆ ѹ҆вѣдѧтъ ꙗ҆́ко а҆зъ г҃ь·

Ꙗ҆́ко се гл҃етъ а҆дона́и г҃ь, с̂е а҆зъ наведꙋ на́ тѧ тѷре навходоносо́ра цр҃ѧ вавѷло́ньска ѿ сѣ́вера, цр҃ь цр҃емъ е҆сть, на ко́нѣхъ и҆ съ ѻ҆рꙋж́їемъ, и҆ съ собо́ромъ ко́нническомъ стра́нъ мно́гъ ѕѣ́ло.
дще́ри твоѧ на́ поли мече́мъ и҆збїют̑.
и҆ приста́витъ на́ тѧ стра́жбꙋ, и҆ ѻ҆гради́тъ т̂ѧ.
и҆ ѻ҆бры́етъ т̂ѧ ѻ҆бровомъ, и҆ съгради́тъ ѻ҆́крс̑҇тъ ѻ҆строги.
и҆ заста́витъ съ ѻ҆рꙋж́їем̑, и҆ ко́пїѧ е҆го прѧ́мо тебѣ поста́вит̑·

Забра́ла твоѧ и҆ сꙋ́ны разоритъ ѻ҆рꙋжїемъ свои҆мъ, мно́жествомъ ко́нь е҆го покры́етъ т̂ѧ пра́хъ и҆хъ.
и҆ ѿ и҆рза́нїѧ ко́нь е҆го, и ѿ колесни́цъ ѻ҆рꙋж́їѧ е҆го, потрѧт̑сꙋсѧ гра́ди твои.
въсходѧ́щꙋ е҆мꙋ въ врата твоа, а҆ки въсходѧ́щꙋ въ градъ с по́лѧ.
слѣдом̑ ко́нь е҆го попере́тъ всѧ сте́гны твоѧ.
лю́ди твоѧ мече́мъ и҆с꙽сѣче́тъ, и҆ бы́тїе крѣ́пости твое҆ѧ на земли поврьжетъ.
и҆ плѣни́тъ си́лꙋ твою, и҆ по́иметъ и҆мѣ́нїѧ твоѧ.
и҆ расы́плетъ забра́ла твоѧ, и҆ до́мы твоа похо́тныѧ расы́плетъ.
и҆ дре́во твое и҆ ка́менїе твое и҆ пе́рсть твою, средѣ мо́рѧ въвержетъ.
и҆ разоритъ мно́жество свирецъ твои҆хъ, и҆ глас̑҇ пѣсни́вецъ не ѹ҆слы́шитсѧ ктомꙋ.
и҆ да́мъ т̂ѧ въ камы́къ гла́док꙽.
простира́ло мре́жное бꙋдеши.
не съгради́шисѧ ксемꙋ.
ꙗ҆́ко а҆зъ гл҃ахъ, гл҃етъ а҆дона́и г҃ь·

Ꙗ҆́ко с̂е гл҃етъ а҆дона́и г҃ь тѷрꙋ, не ѿ гла́са ли ѹ҆бо паде́нїѧ твое҆го, е҆гда̀ въстена́ша ꙗ҆зве́нїи твои, е҆гда̀ и҆с꙽сѣко́ша ѧ҆̀ средѣ тебѐ.
потрѧсꙋтсѧ ѻ҆́строви, и҆ съни́дꙋтъ съ прс̑҇тлъ свои҆хъ вс̂и кн҃ѕи стра́нъ мо́рскихъ.
и҆ свергꙋтъ вѣнца съ гла́въ свои҆хъ, и҆ ри́зы своѧ и҆змечта́ныѧ съвлекꙋтъ съ себе, ѹ҆жасе́нїемъ ѹ҆жаснꙋтсѧ.
на зем̑ли сѧдꙋтъ и҆ ѹ҆боѧ́тсѧ поги́бели их̑, и҆ постенꙋтъ ѻ҆ тебѣ·

Ꙗ҆́ко и҆ плач̑҇ ѻ҆ тебѣ прїимꙋтъ, гл҃юще.
ка́ко поги́бе и҆ расы́пасѧ ѿ мо́рѧ гра́де хвали́мыи, бы́выи си́ленъ на́ мори съ живꙋщими твои҆ми.
и҆же да́сть страх̑ свои всѣмъ живꙋщимъ в нем̑.
и҆ ѹ҆боѧ́тсѧ вс̂и ѻ҆́строви в мо́ри ѿ власти е҆го·

Ꙗ҆́ко с̂е гл҃етъ а҆дона́и г҃ь.
е҆гда̀ да́мъ т̂ѧ гра́дъ ѻ҆пꙋстѣв꙽шъ, ꙗ҆́ко гра́ды не вселе́ны николи́же.
вънегда възведꙋ на́ тѧ бе́зднꙋ, и҆ покры́етъ т̂ѧ вода̀ мно́га.
и҆ сведꙋ т̂ѧ къ слазѧ́щимъ въ про́пасть к лю́дем̑ вѣ́ка.
и҆ вселю т̂ѧ въ глꙋби́нахъ земныхъ, ꙗ҆́ко пꙋсты́ню вѣ́чнꙋю съ слазѧ́щими въ про́пасть.
ꙗ҆́ко да сѧ не всели́ши, ни въста́неши на́ землю живота̀·

На па́гꙋбꙋ т̂ѧ ѿда́мъ, и҆ не бꙋдеши ктомꙋ.
и҆ възы́щешисѧ, и҆ не ѻ҆брѧ́щешисѧ въ вѣ́къ, гл҃етъ а҆дона́и г҃ь·

Глв̑҇а, к҃з·

И бы́сть сло́во гн҃е къ мнѣ гл҃ѧ, и҆ т̂ы сн҃е чл҃чь возмѝ на тѷръ пла́чь.
и҆ рече́ши тѷрꙋ вселе́нномꙋ в мо́рстм̑ѣ вхо́дѣ, то́ржищꙋ людїи ѿ ѻ҆́стровъ мно́гъ·

Се̂ гл҃етъ а҆дона́и г҃ь тѷрꙋ, т̂ы рече, ꙗ҆́ко а҆зъ сам̑ възложи́хъ на́ сѧ свою добротꙋ, въ срд̑цы мо́рстемъ вее҆лли́м꙽мꙋ·

Сн҃ве твои възложи́ша на́ тѧ добротꙋ ѿ сани́ра, и҆стесасѧ тебѣ по тон̑҇кꙋ ѿ до́скъ кипари́сенъ.
ѿ дꙋбра́вы в꙽зѧ́ша сътвори́ти тебѣ слемена е҆ло́ва, ѿ васанити́ды сътвори́ша весла твоѧ·

ѻ҆сщ҃енїѧ твоѧ ѿ сло́на, до́мы дща́ны ѿ ѻ҆́стровъ хети́мль·

Чрьвлени́ца съ мечтанїем̑, ѿ е҆гѷпта бы́сть тебѣ постели, ꙗ҆́ко възложи́ти тебѣ сла́вꙋ.
и҆ ѻ҆блещи т̂ѧ въ червлени́цꙋ.
и҆ въ багрѧни́цꙋ ѿ ѻ҆́стровъ.
е҆ла́да же бы́сть ѻ҆де́жд̑а твоѧ·

И҆ кн҃ѕи твои живꙋщеи в сидо́нѣ, и҆ въ а҆ра́дѣ бы́ша весльницы твои·

Премꙋдрїи твои тѷре и҆же бѣша в꙽ тебѣ, сїи корм꙽чїи твои.
ста́рцы кни́жнїи, и҆ премꙋдрїи и҆хъ и҆же бы́ша в꙽ тебѣ, тїи ѹ҆крѣплѧхꙋ совѣтъ твои·

И҆ всѝ корабли моръстїи, и҆ весльницы и҆хъ бы́ша въ тебѣ, премѣнѧ́юще смѣше́нїю твое҆мꙋ, и҆ бы́ша въ тебѣ къ за́ходом̑ заход̑и̑·

Персе, и҆ хевꙋе҆съ, и҆ лиди, бѣша в силѣ твое́и.
мꙋж́и до́блїи, и҆же щи́ти и҆ шле́мы повѣсиша в꙽ тебѣ, сїи да́ша сла́вꙋ твою.
сн҃ве а҆радїѻ́ньстїи, и҆ си́ла твоа на забра́лх̑ѣ ѻ҆́крс̑҇тъ бы́ша.
н̂о и҆ миди в сꙋнѣхъ твои҆хъ бы́ша стра́жїе, тꙋ́лы своа ѻ҆бѣсиша на забра́лѣхъ твои҆хъ ѻ҆́крс̑҇тъ.
сїи съверши́ша твою добротꙋ·

Кархидо́нѧне кꙋпцы твои, ѿ мно́жества си́лы твое҆ѧ, сре́бро, и҆ зла́то, и҆ мѣдь, и҆ желѣ́зо, и҆ чистое ѻ҆лово, и҆ свинец̑҇, да́ша кꙋплю твою·

Є҆ла́да вс̂ѧ, и҆ бли́жнїи твои продаа́хꙋ в꙽ тебѣ дш҃а чл҃ча.
и҆ съсꙋды мѣдѧны да́ша кꙋ́плю твою.
ѿ до́мꙋ ѳор꙽го́мова, конѧ, и҆ ко́нники, и҆ мща́та, да́ша кꙋ́плю твою·

Сн҃ве родїѻ́ньстїи кꙋпцы твои, ѿ ѻ҆́стров̑҇ ѹ҆мно́жиша кꙋ́плю твою, и҆ роги и҆ зꙋ́бы сло́новы.
и҆ в꙽води́мымъ въздаа́ше м꙽зды твоѧ чл҃ки кꙋ́пль твоих̑ ѿ мно́жества примѣ́ска твое҆го·

Вонѧ, і҆ багрѧни́ца, і҆ и҆змечта́наа, и синѧтꙋ, ѿ ѳарсис̑҇, и҆ рамота, и҆ хота да́ша кꙋ́плю твою·

І҆ѹ́да и҆ сн҃ве і҆и҆л҃еви, сїи кꙋпцы твои продаѧ́нїемъ пшени́ца, и҆ вонѧ ли́ць, касїю же, и҆ рочныи мед̑, ма́сла, и҆ точеница, да́ша примѣсникꙋ твое҆мꙋ·

Дамаскъ кꙋплѧ твоѧ въ мно́жествѣ дѣлес̑҇ твои҆хъ, ѿ мно́жества си́лы твое҆ѧ в꙽сеѧ·

Вино бл҃го ѿ хел꙽вона, и҆ во́лнꙋ блеща́щꙋсѧ ѿ миди́та.
и҆ вино деданїи, і҆ и҆ѻ҆а́ннїи, и҆ меѻ҆зел̑҇·

ѿ а҆сѷръ, желѣ́зо съдѣла́но, и҆ колеса̀ въ примѣсницѣхъ твои҆хъ сꙋть.
деда́нъ кꙋпцы твои съ ско́томъ и҆збра́нномъ, въ ѻ҆рꙋж́їи же а҆равїа, и҆ вс̂и кн҃ѕи кида́рстїи, сїи кꙋпцы рꙋко́ю твое҆ю.
вел̑҇блю́ды, и҆ ѻ́вны и҆ а́гньца, в꙽ тебѣ продадѧт̑, и҆ми́же кꙋпъ тво́рѧтъ·

Кꙋпцы сава, и҆ рег꙽ма, и҆ хꙋсїи, кꙋпцы твои, съ ро́чными сла́стьми, и҆ с ка́менїемъ драгимъ и҆же и҆ зла́то да́ша кꙋплѧ тебѣ·

Хар꙽ра́нъ, хал꙽ла́нъ, и҆ деда́нъ, сїи кꙋпцы твои сава, и҆ а҆с꙽сѵ́ръ, и҆ харман̑҇ кꙋпцы твои.
приносѧ́ще кꙋплю в꙽ махали́мъ, и҆ въ галимъ, червлени́ца, і҆ и҆змечта́нїе, і҆ и҆мѣ́нїа и҆збра́ннаѧ въ магозои҆съ.
сложена свѧза́н꙽на ѹ҆́жи.
и҆ въ кипари́снѣхъ кораблихъ въ тѣхъ кꙋ́плѧ твоѧ·

Корабли кархидон꙽сти кꙋпцы твои, въ мно́жествѣ смѣсникъ твоих̑·

И҆ насыти́сѧ и҆ ѻ҆тѧжча ѕѣ́ло въ средахъ морсках̑.
въ водѣ мно́ѕѣ плавлѧ́хꙋ т̂ѧ весльницы твои·

Вѣтрь ю҆́жныи съкрꙋши т̂ѧ в꙽ срд̑цы морстем̑.
да си́лы твоѧ и҆ смѣсникъ твои҆х꙽, и҆ весльницы твои, и҆ кор꙽мницы твои, и҆ смѣсницы твои.
и҆ вс̂и мꙋж́и твои до́блїи в꙽ тебѣ, и҆ ве́сь со́нмъ твои, падꙋтъ средѣ тебе въ срд̑цы мор꙽стем̑·

Въ дн҃ь паде́нїѧ твое҆го ѿ гла́са кричавы твое҆ѧ, кор꙽мницы твои стра́хомъ ѹ҆боѧ́тсѧ, и҆ постꙋпѧтъ ѿ кора́бль свои҆хъ вс̂и весльницы твои.
и҆ присад̑ницы, и҆ пловцы мор꙽стїи на земли падꙋтъ.
і҆ и҆змѣнѧтъ глас̑҇ свои ѻ҆ тебѣ.
и҆ въскричатъ ѻ҆ тебѣ го́рце, и҆ въспла́чꙋт꙽.
и҆ въсы́плютъ персть на главы своѧ, и҆ ѻ҆плѣши́вѣютъ плѣшїю по тебѣ, и҆ ѻ҆блект̑ꙋсѧ въ врѣтище.
и҆ въспла́чютсѧ по тебѣ го́ркою дш҃ею, пла́чь го́рекъ во́змꙋтъ по тебѣ.
и҆ во́змꙋтъ по тебѣ сн҃ове и҆хъ пла́чь, пла́канїе тебѣ.
кт̂о ꙗ҆́ко тѷръ ѹ҆молкїи средѣ мо́рѧ, вели́кꙋ нѣ́кꙋю ѻ҆брѣте мздꙋ ѿ мо́рѧ·

Напо́лни страны ѿ мно́жества твое҆го, и҆ ѿ смѣсникъ твои҆хъ ѻ҆богати вс̂ѧ цр҃ѧ зе́мныа.
нн҃ѣ же съкрꙋши́лсѧ е҆си въ мо́ри въ глꙋбинах̑ вод̑ныхъ.
смѣсницы твои и҆ весь со́нмъ твои средѣ тебе паде, и҆ вс̂и весльницы твои.
вси же живꙋщеи въ ѻ҆́стровѣхъ ѹ҆ны́ли бꙋдт̑ꙋ по тебѣ.
и҆ цр҃їе и҆хъ ѹ҆жастїю ѹ҆жаснꙋтсѧ, и҆ пременѧтъ лице и҆хъ.
кꙋпцы ѿ стра́нъ възд̑ви́жꙋтъ по тебѣ.
въ поги́бели бы́сть, и҆ ксемꙋ не бꙋ́деши въ вѣ́ки·

Глв̑҇а, к҃и·

И бы́сть сло́во гн҃е ко мнѣ гл҃ѧ, и҆ т̂ы сн҃е чл҃чь, рцы кн҃ѕю тѷрскꙋ, с̂е гл҃етъ адона́и г҃ь.
понеже възнесе́сѧ срд̑це твое, и҆ ре́клъ е҆си, а҆зъ е҆смь б҃ъ, в село бж҃їе вселих̑сѧ в꙽ срд̑це мо́рско.
тыж̑ чл҃къ е҆си а҆ не б҃ъ, и҆ положи срд̑це свое ꙗ҆ко срд̑це бж҃їе·

Є҆да премꙋ́дрѣи т̂ы е҆си дани́ла.
премд̑ꙋрїи не сꙋть тебѐ наказа́ли·

дѣи ли хи́тростїю свое҆ю, и҆ли смы́слом̑ свои҆мъ сътворил̑҇ е҆си себѣ си́лы, и҆ притѧжа сребро и҆ зла́то в꙽ домохъ свои҆хъ.
и҆ли въ гра́дѣ твое҆мъ хи́трость, кꙋплею свое҆ю ѹ҆мно́жи си́лою свое҆ю, и҆ възнесе́сѧ срд̑це твое в си́лѣ твое́и·

Того ради с̂е гл҃етъ а҆дона́и г҃ь, е҆льмаже даде срд̑це свое ꙗ҆́ко срд̑це бж҃їе.
в꙽ того мѣсто с̂е а҆зъ наведꙋ на́ тѧ чюжд̑а расыпа́телѧ ѿ стра́нъ.
і҆ и҆змъкнꙋтъ меча и҆хъ на́ тѧ, и҆ на добротꙋ хи́трости твое҆ѧ.
и҆ постелютъ добротꙋ твою в꙽ погꙋбле́нїе, и҆ сведꙋтъ т̂ѧ, и҆ ѹ҆мреши смр҃тїю ꙗ҆звенъ въ срд̑цы мо́рстѣ.
е҆да рече́ши гл҃ѧ, пред̑ ѹ҆бива́ющими т̂ѧ, б҃ъ е҆смь.
т̂ы бо чл҃къ е҆си а҆ не б҃ъ, въ рꙋцѣ б̂о ѹ҆бива́ющих̑ т̂ѧ смр҃тьми.
в рꙋ́кꙋ неѻ҆брѣ́заныхъ ѹ҆́мреши, в рꙋ́кꙋ чюжд̑ихъ.
ꙗ҆́ко аз̑ реко́хъ, гл҃ет̑ а҆дона́и г҃ь·

И҆ бы́сть сло́во гн҃е къ мнѣ̀ гл҃ѧ.
сн҃е чл҃чь, взе́мъ пла́чь ѻ҆ кн҃ѕи тѷрстѣ, и҆ рцы е҆мꙋ.
се г҃лет̑ а҆дона́и г҃ь.
т̂ы е҆си зна́менїе сличе́нїѧ, и҆спо́лнъ премꙋ́дрости, и҆ вѣнецъ доброты.
и҆ в꙽ пищи раѧ бога́тество е҆го бы́сть.
т̂ы всѧ́къ ка́мень драгїи навѧза́лъ с̂и е҆си.
сардїѻ́нъ, пан꙽зїѻ́нъ, змара́гдонъ, и҆ а҆кин꙽ѳонъ, а҆н꙽фра́ѯъ, сап꙽фирон꙽, и҆ а҆спин̑҇, и҆ сребро, и҆ зла́то, и҆ лигѷрїѻнъ, и҆ хаа҆ти́нъ, и҆ а҆метисон̑҇, и҆ зла́тыи камы́къ верилїѻ́нъ, и҆ но́г꙽тъ.
и҆ зла́та напо́лнихъ до́мы твоѧ и҆ жи́тница твоѧ, ѿ негоже дн҃е съгради́сѧ·

Сыи херꙋви́мъ ѹ҆чиних̑ т̂ѧ в горѣ ст҃ѣи бж҃їи быс̑҇ т̂ы, средѣ ка́мень ѻ҆́гненъ·

И҆ бы́сть непоро́ченъ т̂ы въ дн҃ехъ свои҆х꙽, ѿ негоже дн҃е съгради́сѧ т̂ы, до́ндеже ѻ҆брѣто́шасѧ непра́вды твоѧ в꙽ тебѣ.
ѿ мно́жества кꙋ́плѧ твое҆ѧ, напо́лни до́мы своѧ безако́нїѧ.
и҆ съгрѣши, и҆ ꙗ҆́звенъ бы́сть ѿ горы бж҃їѧ сведе т̂ѧ херꙋвимъ ѻ҆сѣнѧ́ѧ́й, ѿ среди камы́къ ѻ҆́гненъ·

Възнесе́сѧ срд̑це твое доброты̀ ради твое́ѧ, и҆стлѣ̀ хитрость твоѧ̀ съ доброто́ю твое́ю.
мно́жества рад̑и̑ грѣха твое҆го на́ землю повръгохъ т̂ѧ, пред̑ цр҃и дах̑ т̂ѧ ѻ҆бличи́ти·

Мно́жества ради безако́нїи твоих̑, и҆ непра́вдъ ради кꙋпль твоих̑, ѻ҆сквер̑҇ни сщ҃енїе твое·

І҆ и҆зведꙋ ѻ҆́гнь ѿ среды тебе.
вс̂и в̂ы ѻ҆́гнь раждига́ете, и҆ възмага́ете пла́мы.
пои҆дѣте по свѣтꙋ ѻ҆гнѧ̀ ва́шего, и҆ по пла́мени и҆же ражд̑егосте.
и҆ дамъ т̂ѧ въ прахъ на землѝ, пред̑ всѣми ви́дѧщими т̂ѧ·

И҆ вс̂и ви́дѧщеи тебѐ въ странахъ ѹ҆ныли бꙋдꙋтъ по тебѣ, па́гꙋба ѹ҆чине́нъ е҆си и҆ не бꙋдеши въ вѣкъ·

И҆ бы́сть сло́во гн҃е къ мнѣ̀ гл҃ѧ.
сн҃е чл҃чь, ѹ҆тверди лицѐ свое на сидо́на, и҆ прорцы ѻ҆ немъ, и҆ рцы̀.
с̂е гл҃етъ а҆дона́и г҃ь, с̂е а҆зъ на́ тѧ сидо́не.
и҆ просла́влюсѧ въ тебѣ.
и҆ разꙋмѣе́ши ꙗ҆́ко а҆зъ е҆смь г҃ь.
е҆гда̀ сътворю въ тебѣ рас꙽сꙋжд̑енїѧ, и҆ ѻ҆сщ҃ꙋсѧ въ тебѣ̀.
и҆ пꙋщꙋ на́ тѧ смр҃ть, и҆ кро́вь въ страна́хъ твоих̑·

и҆ падꙋт꙽ ꙗ҆́звенїи средѣ тебе мечем̑, в꙽ тебѣ и҆ ѻ́крс̑҇тъ тебе.
и҆ ѹ҆вѣ́дѧт꙽ ꙗ҆ко а҆зъ г҃ь·

И҆ не бꙋ́детъ ктомꙋ̀ до́мꙋ і҆и҆л҃евꙋ на боде́нїе го́р꙽ко, и҆ тернъ бо́лѣзни ѿ всѣхъ ѻ҆́крс̑҇тъныхъ е҆мꙋ нечествова́вшаѧ и҆хъ.
и҆ разꙋмѣ́ютъ ꙗ҆́ко а҆зъ е҆смь а҆дона́и г҃ь.

Се гл҃етъ а҆дона́и г҃ь, съберꙋ до́мъ і҆и҆л҃евъ ѿ странъ, и҆дѣже расыпа́шасѧ та́мо.
и҆ ѻ҆сщ҃ꙋсѧ в нихъ пред̑ люд̑ми и҆ страна́ми.
и҆ вселѧ́тсѧ на́ земли свое́и, ю҆́же дахъ рабꙋ̀ свое҆мꙋ і҆а́ковꙋ.
и҆ вселѧ́тсѧ с надежд̑ею, и҆ сътворѧтъ до́мы, и҆ насадѧ́тъ винограды.
и҆ вселѧт̑сѧ на не́и с надежд̑ею.
е҆гда̀ сътворю сꙋдъ въ всх̑ѣ, и҆же ѹ҆кори́ша ѧ҆̀ ѻ҆́крс̑҇тънїи их̑.
и҆ разꙋмѣют̑ ꙗ҆́ко а҆зъ г҃ь б҃ъ и҆хъ, и҆ б҃ъ ѿц҃ь их̑·

Глв̑҇а, к҃ѳ·

Въ в҃і лѣто, и҆ въ в҃і мс̑҇ць, во пр́ьвыи дн҃ь мс̑҇ца.

Бы́сть сло́во гн҃е къ мнѣ гл҃ѧ.
сн҃е чл҃чь, ѹ҆тверди лице своѐ на фараѻ́на цр҃ѧ е҆гѷпетъска, и҆ прорцы на́нь, и҆ на е҆гѷпетъ ве́сь гл҃и, и҆ рц̂ы.
с̂е гл҃ет̑ а҆дона́и г҃ь, с̂е а҆зъ наведꙋ на́ тѧ фараѻ́не цр҃ю е҆гѷпет̑скїи ѕмїю вели́кїи, сѣдѧ́щїи средѣ рѣ́къ, и҆ гл҃еши моѧ сꙋть рѣ́ки, а҆з꙽ же ѧ҆̀ сътворих̑·

А҆́зъ б̂о дамъ ѹ҆здꙋ в че́люсти твоѝ и прилѣплю ры́бы рѣчныѧ кры́лꙋ твое҆ю.
і҆ и҆зведꙋ т̂ѧ ѿ среды рѣки твое́а и҆ чешꙋѧ́хъ твои҆хъ прильпнꙋтъ.
и҆ ѿвръгꙋ т̂ѧ въ пꙋсты́ню, и҆ всѧ̀ ры́бы рѣки твое́ѧ.
и҆ поражꙋ т̂ѧ въско́ре на лицы по́лю паде́ши.
и҆ не събере́шисѧ, и҆ не ѻ҆гради́шисѧ.
ѕвѣремъ зе́мнымъ и҆ пти́цамъ нбс̑҇ным̑ да́хъ т̂ѧ въ ꙗ҆де́нїе.
и҆ ѹ҆вѣ́дѧтъ вс̂и живꙋщїи въ е҆гѷптѣ, ꙗ҆́ко а҆́зъ е҆смь г҃ь.
зане бы́сть жезлъ тростѧн꙽ до́мови і҆и҆л҃евꙋ.
е҆гда сѧ ꙗ҆́ша по тѧ̀ рꙋка́ма свои́ма, и҆ съкрꙋшиша̑сѧ, и҆ е҆гда̀ плеснꙋ̀ ѻ҆ них̑ всѧ́ка рꙋка̀.
и҆ е҆гда̀ почи́ша ѹ҆ тебе сътресѧ.
и҆ сломи и҆хъ вс̂ѧ чресла·

Того ра́ди с̂е гл҃етъ а҆дона́и г҃ь.
с̂е а҆́зъ наведꙋ̀ на́ тѧ ме́чь, и҆ погꙋблю чл҃кы ѿ тебѐ и҆ скотъ.
и҆ бꙋ́детъ землѧ̀ е҆гѷпет꙽ска въ погибель, и҆ въ ѻ҆пꙋстѣнїе.
и҆ разꙋмѣ́ютъ ꙗ҆́ко а҆зъ е҆смь г҃ь·

Поне́же гл҃аше, ꙗ҆́ко рѣки моа сꙋть, и҆ а́зъ сътворихъ ѧ҆̀.
того ра́ди с̂е а҆зъ наведꙋ на тѧ мечь, и҆ на всѧ̀ рѣки твоѧ.
и҆ дамъ землю е҆гѷпет꙽скꙋ въ ѻ҆пꙋстѣнїе, мечь и҆ погибель ѿ магдола и҆ съи҆ни́съ, даже и҆ до предѣлъ мꙋ́риньскъ·

Не прои҆детъ в не́и нога̀ чл҃ча, н̂и нога̀ скотїѧ не постꙋпитъ по не́и, и҆ не вселѧтсѧ м҃ лѣтъ.
и҆ дамъ зе́млю е҆го въ пагꙋбꙋ средѣ землѝ ѻ҆пꙋщеныѧ, и҆ гради и҆хъ средѣ̀ град̑ ѻ҆пꙋстѣвшь, бꙋдꙋтъ неꙗ҆влени четыредесѧ́тъ лѣтъ.
и҆ рас꙽сѣ́ю е҆гѷпта въ странах̑, и҆ разбѣю ѧ҆̀ въ зе́млѧх꙽·

Се̂ гл҃етъ а҆дона́и г҃ь, по четырьдесѧ́тихъ лѣтехъ, съберꙋ е҆гѷптѧны ѿ стран̑҇, и҆дѣже ѧ бѣхъ расы́палъ та́мо.
и҆ въз꙽вращꙋ плѣн꙽ники е҆гѷпет꙽ски, и҆ вселю ѧ̀ въ зе́млю фатꙋри́съ, въ землю ѿню́дꙋже поѧ́шасѧ·

И҆ бꙋдетъ вла́сть смирен꙽на, тꙋ, па́че всѣхъ вла́стеи.
и҆ бꙋдет̑ смирен꙽на, ꙗ҆коже не възнестисѧ ктомꙋ̀ на страны.
и҆ ма́лы ѧ҆̀ сътворю, ꙗ҆коже не быти и҆мъ множа́ишимъ въ страна́хъ·

И҆ не бꙋдетъ ктомꙋ до́мꙋ і҆и҆л҃евꙋ в꙽ наде́ждꙋ, въспомина́юще безако́нїе, ꙗ҆́кож̑ въслѣди́ти по них̑.
и҆ разꙋмѣ́ютъ ꙗ҆ко а҆зъ г҃ь·

И҆ бы́сть в сед̑мое междꙋ десѧтма лѣтома, въ е҆ді́нъ дн҃ь мс̑҇ца прьваго.
бы́сть сло́во гн҃е къ мнѣ̀ гл҃ѧ, сн҃е чл҃чь, нав꙽ходоносо́ръ цр҃ь вавѷлон꙽скь, поработи си́лꙋ свою работою вели́кою на тѷра.
всѧ́ка глава̀ плѣшива, и҆ всѧко рамо на́го.
и м꙽зда не бы́сть е҆мꙋ, н̂и силе е҆го на тѷра работы ра́ди, е҆ю́же порабо́тисѧ на́нь·

Того ра́ди с̂е гл҃ет̑ а҆дона́и г҃ь.
с̂е а҆зъ да́ю навходоносо́рꙋ цр҃ю вавѷлоньскꙋ, зе́млю е҆гѷпет꙽скꙋ, и҆ по́иметъ мно́жество еѧ̀, и҆ плѣнитъ плѣненїе еѧ̀, и҆ повою́ютъ се́ла еѧ̀.
и҆ бꙋдетъ м꙽зда си́ле е҆го, за слꙋж꙽бꙋ е҆го ю́же послꙋжи на тѷра.
и҆ дах꙽ е҆мꙋ зе́млю е҆гѷпет̑скꙋ, зане же колико съдѣла̀·

Се гл҃етъ а҆дона́и г҃ь.
въ то́и дн҃ь възы́идетъ рогъ всемꙋ до́мꙋ і҆и҆л҃евꙋ, и҆ тебѣ да́мъ ѹ҆ста̀ ѿвръста средѣ и҆хъ.
и҆ ѹ҆вѣдѧтъ ꙗ҆́ко а҆зъ г҃ь·

Глв̑҇а, л҃·

И бы́сть сло́во гн҃е къ мнѣ̀ гл҃ѧ, сн҃е чл҃чь, проповѣждь.
и҆ рцы̀ с̂е гл҃етъ а҆дона́и г҃ь.
възрыда́ите, ѽле ѽле дн҃ь, ꙗ҆́ко бли́зъ дн҃ь гн҃ь, и҆ приближа́етсѧ дн҃ь ѻ҆́блака, и҆ времѧ стра́ньско бꙋдетъ·

И҆ прїидетъ мечъ на е҆гѷптѧны, и҆ бꙋдет̑ мѧтежъ въ мꙋрѣхъ.
и҆ падꙋтъ ꙗ҆́звенїи въ е҆гѷптѣ, и҆ по́иметсѧ мно́жество и҆хъ, и҆ падꙋтсѧ ѻ҆снова́нїѧ е҆го.
и҆ расыплютсѧ прьсе, и кри́тѧне, и҆ ливлѧ́не, и҆ мꙋри, и҆ лидѧ́не, и҆ вс̂ѧ а҆равїѧ, и҆ вс̂и примѣсницы и҆ сн҃ове и҆же ѿ завѣта мое҆го, в꙽ немъ мечемъ падꙋтъ с ни́мъ·

Се гл҃ет̑ г҃ь, и҆ падт̑ꙋсѧ под̑пира́ющеи е҆гѷпта.
и҆ сни́детъ ѹ҆кори́зна е҆го до магдо́ла и҆ до сои҆нис̑҇, мече́мъ падꙋтъ в нем꙽, гл҃ет꙽ а҆дона́и г҃ь.
и҆ ѻ҆пꙋстѣют̑ средѣ стра́нъ поги́бшь, и҆ гради их̑ средѣ гра́дъ ѻ҆пꙋстѣвше бꙋдꙋтъ.
и҆ разꙋмѣютъ ꙗ҆́ко а҆зъ г҃ь.
е҆гда̀ дамъ ѻ҆́гнь на е҆гѷпетъ, и҆ съкрꙋшатсѧ вс̂и помага́ющеи е҆мꙋ·

Въ то́и дн҃ь прїидꙋтъ а҆гг҃ли ѿ лица̀ мое҆го в꙽ сеим̑, т꙽ща́щесѧ погꙋбити наде́ждꙋ мꙋр꙽ски землѝ.
и҆ бꙋдетъ им̑ мѧтежъ въ дн҃ь е҆гѷпет꙽скь, ꙗ҆ко с̂е приспѣ·

Се гл҃етъ а҆дона́и г҃ь, и҆ погꙋблю мно́жество е҆гѷпет꙽ско, рꙋкою навходоносоровою цр҃ѧ вавѷлон꙽ска, и҆ люд̑ми е҆го с ни́мъ.
расыпа́теле ѿ стран꙽ по́слани погꙋбити зе́млю, і҆ и҆змъкнт̑ꙋ вс̂и меча̀ своа на е҆гѷпта, и҆ напо́лнит̑сѧ землѧ̀ ꙗ҆́звеныхъ.
и҆ дамъ рѣки и҆хъ въ ѻ҆пꙋстѣнїе, и҆ ѿдам̑ зе́млю в рꙋцѣ ѕлы́хъ, и҆ погꙋблю зе́млю и҆ конца еѧ̀ въ рꙋкꙋ чюждихъ, а҆зъ г҃ь гл҃ахъ·

Ꙗ҆ко с̂е гл҃етъ а҆дона́и г҃ь, погꙋблю ѻ҆гнꙋшенїѧ с мем꙽ѳи́съ, и҆ старѣишины съ землѧ̀ е҆гѷпет꙽ски и҆ не бꙋ́дꙋтъ ктомꙋ и҆ да́мъ страх̑ въ земли е҆гѷпет꙽стѣи.
и҆ погꙋблю̀ зе́млю патор꙽скꙋ·

и҆ да́мъ ѻ҆́гнь на тани́нъ.
и҆ сътворю̀ ѿмщенїе в꙽ диѻ҆сѣ гра́дѣ.
и҆ разлїю крѣ́пость свою̀ на саи́нъ, крѣпость е҆гѷпет꙽скꙋ.
и҆ погꙋблю мно́жество мем꙽ѳово.
и҆ дам̑ ѻ҆́гнь на е҆гѷпта.
и҆ мѧте́жемъ воз꙽мѧтетсѧ саи҆съ.
и҆ въ диѻ́́съ град̑ бꙋдет꙽ расѣли́на, и҆ разлѣют̑сѧ во́ды.
ю҆́ноша солньча гра́да, и҆ вꙋвастава мечемъ падꙋтъ, и҆ же́ны въ плѣне́нїи падꙋт꙽.
и҆ въ тафнесъ посꙋмрачитсѧ дн҃ь.
е҆гда̀ съкрꙋшатъ т̂ꙋ хорꙋгви е҆гѷпет꙽ски, и҆ поги́бнетъ т̂ꙋ ѹ҆кори́зна крѣпости е҆го.
тогож̑ покры́етъ ѻ҆́блакъ, и҆ дщери е҆го въ плѣненїе ѿведꙋтсѧ.
и҆ сътворю сд̑ꙋ въ е҆гѷптѣ, и҆ разꙋмѣ́ютъ ꙗ҆ко а҆зъ е҆смь г҃ь·

И҆ бы́сть въ е҆ді́нона́десѧте лѣто, въ прьвыи мс̑҇цъ, сед̑мыи дн҃ь мс̑҇ца.
бысть сло́во гн҃е ко мнѣ̀ гл҃ѧ, сн҃е чл҃чь, мышцы фараѻ́на цр҃ѧ е҆гѷпет̑ска сътрохъ, и҆ с̂е не свѧзасѧ ꙗ҆ко да́ти е҆мꙋ цѣ́лбꙋ, приложити е҆мꙋ ѹ҆тѣшенїе, ꙗ҆́ко свѧза́ти и҆ ѹ҆крѣпити, и҆зѧ́ти ме́чь·

Того ради с̂е гл҃етъ а҆дона́и г҃ь, с̂е аз̑ на фараѻ́на цр҃ѧ е҆гѷпет꙽ска, и҆ съкрꙋшꙋ мы́шцы е҆го крѣпцѣѝ и҆ протѧженѣи и҆ сътренѣи, і҆ и҆зражꙋ ме́чь ег̑҇ и҆з рꙋки е҆го.
и҆ рас꙽сѣю е҆гѷпта въ странах, и҆ развѣю е҆̀ въ землѧхъ.
и҆ ѹ҆крѣплю мыш̑҇ци цр҃ѧ вавѷло́н꙽ска·

и҆ дамъ ме́чь свои в рꙋкꙋ е҆го.
и҆ наведетъ и҆̀ на е҆гѷпта, и҆ плѣнитъ плѣненїе е҆го, и҆ по́иметъ плѣнъ е҆го.
и҆ ѹ҆крѣплю мы́шца цр҃ѧ вавѷлон꙽ска и҆ мы́ш꙽цы фараѻ́ни раслабѣета.
и҆ ѹ҆вѣдѧт꙽ ꙗ҆ко а҆зъ е҆смь г҃ь.
е҆гда̀ да́м꙽ ме́чь мо́и в рꙋцѣ цр҃ѧ вавѷлон꙽ска, и҆ простретъ и҆̀ на е҆гѷпта.
и҆ рас꙽сѣ́ю е҆гѷпта въ странахъ, и҆ развѣю и҆̀ въ землѧхъ.
и҆ ѹ҆вѣ́дѧтъ вс̂и ꙗ҆́ко азъ е҆смь г҃ь·

Глв̑҇а, л҃а·

И бы́сть въ е҆ді́нона́десѧте лѣто, въ тре́тїи мс̑҇цъ, въ е҆ді́нъ дн҃ь мс̑҇ца.
бысть слово гн҃е къ мнѣ̀ гл҃ѧ, сн҃е чл҃чь, р꙽цы фараѻ́нꙋ цр҃ю е҆гѷпетскꙋ, и҆ къ мно́жествꙋ е҆го, комꙋ сѧ ѹ҆подоби сам̑ въ высотѣ̀ свое́и·

Се̂ а҆сѷръ кѷпарисовъ в꙽ дꙋбра́вѣ до́бръ ѿрасльми, и҆ высокъ вели́чеством̑ и҆ частъ кро́вомъ, и҆ средѣ ѻ҆́блакъ бысть вла́сть е҆го·

водами въскор̑҇ми и҆̀, бездна възнесе и҆̀.
рѣ́ки еѧ̀ приведе ѻ҆́крс̑҇тъ садовъ е҆го, и҆ състав̑҇ еѧ̀ и҆спꙋстѝ во всѧ̀ древеса пол꙽скаѧ·

сего ради възнесе́сѧ вели́чьство е҆го паче всѣхъ древе́съ по́льскихъ.
и҆ ѿтꙋ́дꙋ раз꙽ширишасѧ вѣтвїѧ е҆го, и҆ възнесо́шасѧ ѿра́сли е҆го ѿ во́ды мно́ги.
е҆гда̀ протѧжесѧ, въ ѿра́слх̑ѣ е҆го въгнѣзди́шасѧ вс̂ѧ пти́ца нбс̑҇ныѧ, и҆ под̑ вѣтвъми е҆го ражд̑ахꙋсѧ вс̂и ѕвѣрїе по́льстїи, под̑ сѣнїю е҆го всели́сѧ вс̂е мно́жество стра́ньско.
и҆ бысть до́бръ въ высотѣ е҆го мно́жества ради вѣтвїи е҆го, ꙗ҆́ко бѣша ко́ренїе е҆го въ водѣ̀ мно́ѕѣ.
и҆ кѷпариси не възд꙽вигнꙋшасѧ над̑ него̀ в раѝ бж҃їи.
и҆ бо́рове неприклон꙽ни вѣѧхъ е҆го, и҆ е́лїе не бысть прикло́н꙽но ѿра́слѣхъ е҆го·

вс̂е дре́во е҆же в раѝ бж҃їи, не бы́сть приклон꙽но е҆мꙋ въ добротѣ е҆го.
мно́жества ради вѣи́ е҆го, до́бръ сѧ сътвори въ множ̑ствѣ е҆го.
и҆ възревнова́ша е҆мꙋ вс̂ѧ древеса̀ пи́ща ра́ѧ бж҃їѧ·

Того рад̑и̑ с̂е гл҃етъ а҆дона́и г҃ь, понеже бы́сть вели́къ вели́чествомъ, и҆ да́сть вла́сть свою̀ въ средꙋ ѻ҆́блак̑҇, и҆ вознесесѧ срд̑це е҆го въ высотѣ е҆го.
и҆ ви́дѣхъ е҆гда сѧ възнесѐ, и҆ предахъ ѧ҆̀ въ рꙋцѣ кнѧ́ѕѧ стра́ньска, и҆ сътворѝ пагꙋбꙋ е҆го по нече́стїю е҆го·

И҆з꙽гнах̑ и҆̀ а҆зъ, и҆ потреби́ша и҆̀ расыпа́тели чюждїи, и҆ повръго́ша и҆̀ на гора́хъ·

и҆ въ всѣхъ де́брехъ падо́ша вѣтви е҆го, и҆ сътрошасѧ ѿра́сли е҆го на всѧ́комъ по́лѣ земнемъ·

И҆ снидо́ша ѿ покро́ва е҆го вс̂и лю́дїе земнїи, и҆ разори́ша и҆̀·

ѻ҆ паденїи е҆го почїютъ вс̂ѧ пти́ца нбс̑҇ныѧ, и҆ ѻ҆ вѣ́иѧхъ е҆мꙋ бы́ша вс̂и ѕвѣри по́льстїи·

Ꙗ҆́кож̑ да сѧ не възвы́сѧт꙽ вс̂ѧ древеса̀ ꙗ҆́же въ водѣ, и҆ не дадѧ́тъ вла́сти свое́ѧ средѣ ѻ҆́блакъ.
и҆ не ста́нꙋтъ въ высотѣ и҆хъ късемꙋ пїющеи во́дꙋ.
ꙗ҆́ко вс̂и ѿда́ни бы́ша въ смр҃ть въ зе́млю глꙋбины, средѣ сн҃овъ члчс̑҇къ сводимъ въ пропа́сть·

Се̂ гл҃етъ а҆дона́и г҃ь, вон꙽же дн҃ь сведесѧ во а́дъ пла́касѧ, бездна ѧ҆̀ покры.
и҆ не пꙋсти рѣки еѧ̀.
и҆ възбранихъ мно́жествꙋ вод̑·

Смерчесѧ ѻ҆ немъ дꙋбра́ва, и҆ всѧ̀ древа по́льскаѧ ѻ҆ немъ расла́бишасѧ.
ѿ гла́са паденїѧ е҆го потрѧсꙋтсѧ страны̀.
е҆гда̀ съвождахꙋть и҆̀ во а́дъ съ сходѧ́щими въ потокъ·

И҆ ѹ҆тѣшахꙋть и҆̀ въ зем̑ли долѣшнїи, и҆ вс̂ѧ древеса пища і҆ и҆збран꙽наѧ и҆ до́браѧ дꙋбра́вы, всѧ пїющаѧ во́дꙋ.
и҆ та̀ б̂о сведо́шасѧ с ни́мъ во а́дъ съ ꙗ҆́звеными ѿ меча̀.
и҆ плод̑ е҆го, и҆ живꙋщеи под̑ покро́вом̑ е҆го средѣ жи́зни поги́бнꙋтъ·

Комꙋ приклоненъ бы́сть си́лою и҆ сла́вою, и҆ вели́чеством꙽ въ древесѣхъ пи́щных̑ слѣѕи сниди съ древесъ пи́ща, въ глꙋбинꙋ зе́мнꙋю·

Средѣ неѻ҆брѣзаныхъ ѹ҆спнеши съ ꙗ҆́звеными мечемъ.
та́ко фараѻ́нъ, и҆ вс̂е мно́жество крѣ́пости е҆го, гл҃етъ а҆дона́и г҃ь·

Глв̑҇а, л҃в·

И бы́сть въ второ́енадесѧте лѣто, въ в꙽торы́инадесѧте мцс̑҇ъ, въ е҆ді́нъ дн҃ь мс̑҇ца·

Бысть сло́во гн҃е къ мнѣ гл҃ѧ, сн҃е чл҃чь, прїимѝ пла́чь до цр҃ѧ е҆гѷпет꙽ска, и҆ рече́ши е҆мꙋ.
львꙋ стра́ньскꙋ ѹ҆подоби́сѧ, и҆ ꙗ҆ко змїи и҆же в мо́ри.
и҆ бодѧ́ше ро́ги в рѣка́хъ твои҆хъ, и҆ мꙋтѧ́ше во́дꙋ нога́ма твои҆ма, и҆ попира́ше рѣки твоѧ̀·

Се̂ гл҃етъ а҆дона́и г҃ь, и҆ възложꙋ на́ тѧ сѣть свою въ и҆зведе́нїи людїи мно́гъ, і҆ и҆зведꙋ т̂ѧ ѹ҆́дою свое́ю.
и҆ прострꙋ т̂ѧ на зем̑лѝ и҆ по́лѧ наплънѧт̑сѧ тебе, и҆ посажꙋ̀ на тебѣ вс̂ѧ пти́ца нбс̑҇ныѧ.
и҆ насыщꙋ̀ ѿ чре́слъ твои҆хъ всѧ̀ звѣрѧ зе́мныѧ, и҆ поврьгꙋ пло́ти твоѧ на горах̑, и҆ хлъмы твоѧ гню́состїю твое́ю.
и҆ напою полѧ ѿ кро́ви твоеа, и҆ напїетсѧ землѧ̀ ѿ гноѧ твое҆го, на горахъ и҆ де́бри наплъню ѿ тебе·

И покры́ю нб҃о е҆гда̀ ѹ҆га́снеши, и҆ помрачю̀ ѕвѣзды е҆го.
сл҃нце въ ѻ́блаце покры́ю, и҆ мс̑҇цъ не просвѣтит̑ свѣта свое҆го.
всѧ̀ свѣти́ла нбс̑҇ныѧ помрачю̀ на́ тѧ, и҆ да́мъ тмꙋ̀ на землю твою, гл҃етъ а҆дона́и г҃ь·

И҆ разъгнѣ́ваю срд̑ца людїи мно́гъ, е҆гда и҆зведꙋ плѣн꙽ники твоѧ въ страны̀ землѧ̀ е҆ꙗ҆́же не позна̀.
и҆ ѹ҆ны́ли бꙋдꙋтъ страны̀ мно́ги по тебѣ, и҆ цр҃и и҆хъ ѹ҆жастїю ѹ҆жаснꙋтсѧ над̑ тобою, всеѧ̀ ра́ди непра́вости твоеѧ ꙗ҆́же сътворѝ.
вънегда̀ и҆зъвлекꙋ ме́чь пред̑ лице́мъ и҆хъ, ча́юще паде́нїѧ их̑, ѿ дн҃е паденїѧ твое҆го.
Ꙗ҆́ко с̂е гл҃етъ а҆дона́и г҃ь, мечь цр҃ѧ вавѷло́ньска прїидетъ тебѣ съ мече́мъ щꙋд꙽скомъ, и҆ поражꙋ̀ крѣпость твою.
расы́пателе ѿ стра́нъ вс̂и, и҆ погꙋбѧтъ ѹ҆кори́знꙋ е҆гѷпет̑скꙋ.
и҆ съкрꙋши́тсѧ всѧ̀ крѣпость е҆го, и҆ ѿи҆мꙋ̀ всѧ̀ ско́ты е҆го ѿ воды мно́ги.
и҆ не възмѧтетъ еѧ̀ нога̀ чл҃чьска, и҆ стопа̀ ско́тїѧ не стꙋпит̑ на неѝ.
та́ко тогда̀ премлъкнꙋтъ во́ды и҆хъ, и҆ рѣки и҆хъ ꙗ҆́ко ма́сло потекꙋтъ, гл҃етъ а҆дона́и г҃ь.
е҆гда̀ да́мъ е҆гѷпта въ па́гꙋбꙋ, і҆ ѻ҆пꙋстѣет̑ землѧ̀ до конца̀ еѧ̀.
е҆гда рас꙽сѣ́ю вс̂ѧ живꙋщаѧ на не́и, и҆ ѹ҆вѣдѧтъ ꙗ҆́ко а҆зъ е҆смь г҃ь·

Пла́чь е҆сть, и҆ въспла́чꙋтсѧ по не́мъ, дще́ри стра́ньски въспла́чютсѧ по нем̑, и҆ по всеи си́лѣ е҆го въспла́чютсѧ гл҃етъ а҆дона́и г҃ь·

И҆ бы́сть въ второ́енадесѧте лѣто, прьваго мс̑҇ца, въ пѧ́тыина́десѧте дн҃ь.
бы́сть слово гн҃е къ мнѣ̀ гл҃ѧ, сн҃е чл҃чь, въспла́чисѧ ѻ҆ крѣпости е҆гѷпет̑стѣи, прекланѧ́ѧ преведи и҆̀.
и҆ сведꙋтъ дще́ри е҆го стра́ньстїи въ глꙋбинꙋ̀ земнꙋю, къ сходѧ́щим̑ въ про́пасть ѿ во́дъ лѣпыхъ.
слѣзи и҆ лѧ́жеши съ неѻ҆брѣзаными.
средѣ ꙗ҆́звеных̑ мечемъ падꙋтъ с ни́мъ, и҆ ѹ҆спнет̑ вс̂ѧ крѣпость е҆го·

И҆ рекꙋтъ т̂и щюдове и҆же въ глꙋбинѣ про́пасти, бꙋди кого ѹ҆́ней е҆си, слѣ́зи лѧ́зи съ неѻ҆брѣзаными средѣ ꙗ҆́звеныхъ мече́мъ·

Тꙋ а҆сѷрь и҆ весь сън꙽мъ е҆го, и҆ вс̂и ꙗ҆́звенїи та́мо сѧ даша, и҆ гроби е҆го въ глꙋбинѣ про́пасти.
и҆ бы́сть сън꙽мъ е҆го ѻ҆́крестъ гроба̀ е҆го·

Вс̂и ꙗ҆́звенїи пад̑шеи мече́м꙽, и҆же даша гробы своѧ въ стегнѣ до́лꙋ.
и҆ бы́сть сън꙽мъ ѻ҆́крес̑҇ гроба е҆го, вс̂и ꙗ҆́звенїи па́дающїи мече́мъ·

ви́дѣвше стра́хъ е҆го на землѝ живо́тне, во́змꙋтъ стыдѣнїе и҆хъ съ своди́мыми въ про́пасть·

тꙋ е҆ла́мъ и҆ вс̂ѧ си́ла е҆го ѻ҆́крс̑҇тъ гроба̀ е҆го.
вс̂е мно́жество е҆го и҆ вс̂и ꙗ҆звенїи па́дшїи мече́мъ, и҆сходѧ́щеи неѻ҆брѣзани въ глꙋбинꙋ земнꙋю.
да́вшїи стра́хъ свои на землѝ жи́вѣ, и҆ прїѧша мече́нїе свое съ сходѧ́щими въ про́пасть, средѣ ꙗ҆́звеныхъ та́мо сѧдаша.
в꙽ мосо́хъ, и҆ ѳо́вель и҆ вс̂ѧ си́ла ѻ҆́крс̑҇тъ гроба е҆го.
вс̂и неѻ҆брѣзанїи ꙗ҆́звенїи ѿ ме́чь да́вшїи стра́хъ свои на землѝ жи́вѣ.
и҆ ѹ҆спо́ша съ щюд̑ми пад̑шимисѧ ѿ вѣка̑, и҆же снидо́ша въ а҆́дъ въ ѻ҆рꙋжїи во́истемъ.
и҆ положи́ша меча своѧ под̑ възгла́вїемъ свои҆мъ, и҆ бы́ша безако́нїѧ и҆хъ на ко́стехъ и҆хъ·

Ꙗ҆́ко ѹ҆страшиша щю́ди въ житїи своем̑, и҆ стра́хъ си́лнымъ бы́ша насил꙽нымъ на землѝ живꙋщимъ·

Тꙋ е҆до́мъ и҆ цр҃и е҆го и҆ вси кнѧ́ѕи а҆сѷровы, да́вшїи крѣпость свою на ꙗ҆́звꙋ мечнꙋю.
т̂ꙋ кнѧѕи сѣверстїи вс̂и, т̂ꙋ вс̂ѧ вое҆во́ды а҆сѷровы и҆же съве́дени бы́ша съ ꙗ҆́звеными съ стра́хомъ и҆хъ, и҆ съ крѣпостїю и҆хъ стыдѧ́щесѧ.
ѹ҆спо́ша неѻ҆брѣзани съ ꙗ҆́звеными мече́мъ, и҆ прїꙗ҆́ша мꙋченїе своѐ съ сводѧ́щими въ про́пасть·

Ты̂ ѹ҆зрѣвъ цр҃ъ фараѻнъ, и҆ ѹ҆тѣшитсѧ ѻ҆ все́и крѣ́пости и҆хъ.
фараѻ́ни ꙗ҆́звенїи мечем̑ и҆ вс̂ѧ си́ла е҆го, гл҃етъ а҆дона́и г҃ь.
ꙗ҆́ко дасть стра́хъ свой на землѝ жи́вѣ.
и҆ ѹ҆с꙽пнетъ сре́дѣ неѻ҆брѣ́заных̑ ꙗ҆́звеныхъ мече́мъ, фараѻ҆нъ, и҆ вс̂е мно́жество е҆го, гл҃ет̑ а҆дона́и г҃ь·

Глв̑҇а, л҃г·

И бы́сть сло́во гн҃е къ мн̂ѣ гл҃ѧ, сн҃е чл҃чь, гл҃и къ сн҃ом̑ людїи своих̑, и҆ рече́ши к ним̑.
землѧ̀ на ню́же а҆зъ а҆́ще наведꙋ̀ мечь.
и҆ по́имт̑ꙋ лю́дїе землѧ̀ чл҃ка е҆ді́наго ѿ себѐ, и҆ поста́вѧтъ и҆̀ себѣ стра́жъ.
и҆ ѹ҆́зритъ мечь градꙋщїи на́ землю, и҆ въстрꙋбитъ трꙋбо́ю, и҆ проповѣсть лю́дем̑.
и҆ послꙋшае҆тъ слы́шавыи трꙋбꙋ, и҆ не снабди́тсѧ.
и҆ на́идетъ ме́чь, и҆ пости́гнетъ и҆̀, кро́вь е҆го на главѣ̀ е҆го бꙋдетъ.
ꙗ҆́ко слы́шавъ гла́съ трꙋбныи и҆ не снабдѣсѧ, кро́вь е҆го на не́мъ бꙋдетъ.
и҆ то́иже ꙗ҆ко снабдѣ̀ дш҃ꙋ свою и҆зба́ви·

И҆ страж̑ же а҆ще ви́дитъ ме́чь грѧдꙋщь, и҆ не въстрꙋ́битъ трꙋбою, и҆ не проповс̑҇ѣ лю́демъ, да сѧ лю́дїе снабдѧ́тъ·

и҆ нашед̑ ме́чь во́зметъ ѿ нихъ дш҃а.
таковы́и ѹ҆бо безако́нїѧ ради свое҆го в꙽зѧ́сѧ, а҆ кро́ви еѧ̀ ѿ рꙋкѝ стра́жевы в꙽зыщꙋ̀·

И҆ т̂ы сн҃е чл҃чь, стра́жа т̂ѧ е҆смь поста́вилъ до́мꙋ і҆и҆л҃евꙋ, и҆ ѹ҆слы́шиши сло́во ѿ ѹ́стъ мои҆хъ и҆ проповѣси и҆мъ ѿ менѐ·

Є҆гда̀ рекꙋ̀ грѣшникꙋ, грѣшниче см҃ртїю ѹ́мреши.
и҆ не бꙋдеши гл҃ати грѣшникꙋ, ꙗ҆́коже снабдѣтисѧ.
и҆ нечести́вꙋ, ꙗ҆́коже ѻ҆брати́тисѧ е҆мꙋ ѿ пꙋтѝ е҆го, и҆ жи́вꙋ бы́ти е҆мꙋ.
то́и безако́нникъ, безако́нїемъ свои҆мъ ѹ́мретъ, а҆ кро́ви е҆го ѿ рꙋкѝ твое҆ѧ в꙽зыщꙋ̀.
а҆ще л̂и проповѣ́си нечести́вꙋ пꙋть е҆го, ꙗ҆́ко ѻ҆брати́тисѧ с него, и҆ не ѻ҆брати́тсѧ с пꙋтѝ свое҆го.
то́и в нече́стїи свое҆мъ ѹ́мретъ, а҆ ты̀ дш҃ꙋ свою и҆зба́виши·

И҆ ты сн҃е чл҃чь, рцы̀ домꙋ і҆и҆л҃евꙋ.
си́це рѣсте гл҃юще.
ꙗ҆́ко прелести на́ша, и҆ безако́нїѧ наша в насъ сꙋть, и҆ мы̀ в ни́хъ та́емъ.
и҆ ка́ко намъ жи́вомъ бы́ти·

Рцы̀ и҆мъ ѹ́бо, жи́въ а҆зъ гл҃етъ а҆дона́и г҃ь.
ꙗ҆́ко не хощꙋ см҃рти грѣшника, н̂о ꙗ҆́коже ѻ҆брати́тисѧ е҆мꙋ ѿ пꙋтѝ свое҆го, и҆ жи́вꙋ бы́ти е҆мꙋ.
ѻ҆браще́нїемъ ѻ҆брати́тесѧ, ѿ пꙋтѝ ва́шего ѕла́го.
въскꙋ́ю ѹ҆мира́е҆те до́ме і҆и҆л҃евъ·

И҆ т̂ы сн҃е чл҃чь, р꙽цы̀ къ сн҃омъ людїи свои҆хъ.
пра́вда прав̑҇ди́ваго не изба́витъ е҆го, во́ньже дн҃ь прельсти́тсѧ.
и҆ безако́нїе безако́нника не ѹ҆бїетъ, во́ньже дн҃ь ѻ҆братит̑сѧ ѿ безако́нїѧ свое҆го·

И҆ правди́выи не мо́жетъ спс̑҇тисѧ въ дн҃ь грѣха̀ е҆го.
е҆гда рекꙋ правди́вомꙋ, жи́знїю жи́въ бꙋдеши.
сеиж̑ ѹ҆пова́ѧ пра́вдою свое́ю, и сътворит̑ безако́нїе.
всѧ̀ пра́вды е҆го не въспомѧнꙋтсѧ.
в непра́вдѣ е҆го ю́же сътворѝ, в то́и ѹ́мрет̑.
и҆ егда̀ рекꙋ̀ нечести́вомꙋ, смр҃тїю ѹ́мреши.
и ѻ҆брати́тсѧ ѿ пꙋтѝ свое҆го, и҆ сътвори́тъ сꙋдъ и҆ пра́вдꙋ.
и҆ заи́мъ сꙋд лъжꙋ ѿда́сть, и҆ въсхище́нїе възврати́тъ.
безако́н꙽никъ въ приказа́нїи живота̀ ходи́ти бꙋдет̑, ꙗ҆́ко не сътвори́ти непра́ведна, жи́знїю жи́въ бꙋдетъ и҆ не ѹ҆мретъ·

вс̂и грѣси е҆го ꙗ҆́же е҆сть съгрѣши́лъ не помѧнꙋтсѧ.
ꙗ҆́ко сꙋдъ и҆ пра́вдꙋ сътворѝ, и҆ жи́въ бꙋдетъ в нихъ·

И҆ гл҃ютъ сн҃ове людїи твои҆хъ, не пра́въ пꙋть гн҃ь.
с̂е пꙋть и҆хъ не пра́въ.
е҆гда̀ съврати́тсѧ правди́выи ѿ пра́вды своеѧ, и҆ сътвори́тъ безако́нїе, ѹ́мретъ в нем̑ и҆ е҆гда грѣшникъ възврати́тсѧ ѿ безако́нїѧ свое҆го, и҆ сътво́ритъ сꙋдъ и҆ пра́вдꙋ, то́и жи́въ бꙋдетъ в них̑·

Слы́ши до́ме і҆и҆л҃евъ, е҆да пꙋть мои непра́въ.
ѹ҆бо ваши пꙋтїе ст̑ꙋ непра́ви.
се же л̂и е҆сть е҆же реко́сте не пра́въ пꙋть гн҃ь.
комꙋждо васъ по пꙋтѝ е҆го сꙋжд̑ꙋ вам̑ доме і҆и҆л҃евъ·

И҆ бы́сть въ второ́енадесѧте лѣто, мс̑҇ца втора́гонадесѧте въ пѧ́тыи дн҃ь, плѣнникъ нашихъ.
прїиде къ мнѣ ѿ і҆ерс̑҇лі́ма ѹ҆целѣ́выи, гл҃ѧ, повое҆ва́ша гра́дъ.
и҆ рꙋка̀ гн҃ѧ быс̑҇ на мнѣ̀ вечеръ, прежде пришествїѧ ѹ҆целѣвшаго.
и҆ ѿврьзе ѹ҆ста̀ моа ꙗ҆коже прїиде къ мнѣ̀ заѹ́тра, и҆ ѿврьзо́шасѧ ѹ҆́ста̀ моѧ не преста́ша ктомꙋ̀·

И҆ бы́сть слово гн҃е къ мн̂ѣ гл҃ѧ, сн҃е чл҃чь, живꙋщеи на ѻ҆пꙋстѣвшихъ тѣхъ на землѝ і҆и҆л҃евѣ гл҃юще гл҃ютъ, на не́иже а҆враам̑, и҆ прїѧтъ зе́млю.
а҆ мы мно́жаиши е҆смы, намъ дана̀ е҆сть землѧ̀ въ ѻ҆дръжа́нїе·

Того ради рцы̀ и҆мъ, с̂е гл҃етъ а҆донаи г҃ь.
е҆́льма же съ кро́вїю ꙗ҆́стѐ, и҆ ѻ́чи ва́ши въздвиго́сте къ кꙋми́ромъ, и҆ кро́вь пролива́ете.
и҆ зе́млю наслѣдите.
ста́сте с мече́мъ ва́шимъ, сътвори́сте съгнꙋше́нїѧ.
и҆ ко́ждо женꙋ̀ по́дрꙋга свое҆го ѻ҆сквернави́сте.
и҆ зе́млю причасти́сте·

Того ради рцы̀ и҆мъ, с̂е гл҃етъ а҆донаи г҃ь, живꙋ̀ а҆зъ.
с̂е падꙋтъ мече́мъ сꙋщїи въ ѻ҆пꙋстѣвшихъ.
і҆ и҆же сꙋть на лицѝ по́лѧ, звѣремъ по́льскимъ предадꙋтсѧ на и҆зъꙗ҆́де́нїе.
и҆ сꙋща̑ѧ въ градехъ, і҆ и҆же въ пеще́рахъ.
см҃ртїю поражꙋ̀.
и҆ дамъ зе́млю на ѻ҆пꙋстѣнїе·

И҆ поги́бнетъ ѹ҆кори́зна крѣпости е҆го.
и҆ ѻ҆пꙋстѣ́ютъ го́ры і҆и҆л҃евы, занѐ не бꙋдетъ проходѧ́щего.
и҆ ѹ҆вѣдѧтъ ꙗ҆́ко аз̑ г҃ь.
и҆ сътворю̀ зе́млю и҆хъ пꙋ́стꙋ, и҆ ѻ҆пꙋстѣ́етъ съгнꙋше́нїи ради и҆хъ ꙗ҆́же сътвори́ша·

И҆ ты же сн҃е чл҃чь сн҃ове людїи твои҆хъ, гл҃ют̑ ѻ҆ тебѣ ѹ҆ забра́лъ, и҆ ѹ҆ вра́тъ дво́рныхъ.
и҆ гл҃ютъ ко́ждо къ по́дрꙋгꙋ свое҆мꙋ, и҆ ко́ждо къ бра́тꙋ свое҆мꙋ, гл҃юще.
събере́мсѧ и҆ слы́шимъ чт̂о е҆сть сло́во и҆сходѧ́щее ѿ ѹ́стъ г҃а.
и҆ прїидꙋтъ к тебѣ, ꙗ҆́коже и҆схо́дѧт̑ лю́дїе.
и҆ сѧ́дꙋтъ лю́дїе моѝ предъ тобо́ю, и҆ слышат̑ гл҃ы твоа, и҆ не сътворѧт̑ и҆хъ.
ꙗ҆́ко лжа̀ въ ѹ҆стѣхъ, и҆ въ слд̑ѣ ѻ҆скверне́нїѧ срд̑ца и҆хъ ходѧт̑.
и҆ бꙋдеши и҆мъ ꙗ҆́ко гласъ пѣсни́вца сла́дка, гла́сомъ до́бре съста́влена.
и҆ слы́шат̑ гл҃ы твоѧ, и҆ не сътворѧт̑ их̑.
и҆ егда прїидет̑, рекꙋтъ, с̂е прїиде.
и҆ ѹ҆вѣдѧт̑ ꙗ҆́ко прро̑҇къ ты̀ средѣ и҆хъ·

Глв̑҇а, л҃д·

И бы́сть сло́во гн҃е къ мнѣ гл҃ѧ, сн҃е чл҃чь, прорцы̀ с̂е ѻ҆ пастꙋсѣхъ і҆и҆л҃евѣхъ.
прорцы̀ с̂е, и҆ рцы̀ пастꙋхомъ.
с̂е гл҃етъ а҆дона́и г҃ь.
ѽле пастꙋси і҆и҆л҃евѣ е҆да пасꙋтсѧ пастꙋси сами, не ѻ҆́вца ли ѹ҆бо пасꙋтъ пастꙋси.
с̂е мле́ко ꙗ҆дѧсте, и҆ во́лною ѻ҆дѣва́стесѧ, и҆ тꙋ́чное закаласте, а҆ ѻ҆вецъ мои҆хъ не пасо́сте.
и҆знемо́г꙽шаго не под̑ꙗ҆́сте, и҆ болѧ́щаго не ѹ҆врачева́сте, и҆ съкрꙋше́н꙽наго не ѻ҆бѧза́сте, и҆ ѹ҆ꙗ҆зве́н꙽наго не зарасти́сте, и҆ плава́ющаго не ѻ҆брати́сте, и҆ поги́бшаго не пои҆ска́сте.
и҆ крѣ́пкое притѧжа́сте трꙋдо́мъ, и҆ вла́стїю наказа́сте ѧ҆̀ и҆ нарꙋга́нїемъ·

И҆ расыпашасѧ ѻ҆́вца моа е҆лма не и҆мѣа́хꙋ пастꙋха, и҆ бы́ша на и҆з꙽ꙗ҆де́нїе ѕвѣ́ремъ по́льскимъ·

И҆ расыпа́шасѧ ѻ҆́вца моѧ̀ по всѣмъ горамъ, и҆ заблꙋди́ша по всѣмъ хо́лмомъ высо́кимъ.
и҆ на лицы всеѧ̀ землѧ̀ расыпашасѧ ѻ҆́вцѧ моѧ, и҆ не бѣ̀ възыска́юща, ни ѻ҆браща́юща·

Того ради ѽ пастꙋси слышите сло́во гн҃е.
живꙋ а҆зъ, гл҃етъ а҆дона́и г҃ь.
поне́же ѹ҆чине́на сꙋть ста́да моѧ в꙽ расхище́нїе, и҆ ѻ́вца моѧ въ снѣде́нїе всѣмъ ѕвѣ́ремъ по́льнымъ, зане́ же не бѣ па́стырѧ.
ниже ѹ҆бо посѣща́хꙋ пасты́ри ста́да мое҆го, н̂о пасо́ша пасты́ри сами себе, а҆ ѻ҆вець мои҆хъ не пасо́ша·

Сего ради пастꙋси слы́шите сло́во гн҃е, с̂е гл҃ет̑ а҆дона́и г҃ь.
с̂е а҆зъ на пастꙋхи, и҆ в꙽зы́щꙋ ѻ҆вець свои҆хъ ѿ рꙋ́кꙋ пастꙋш꙽скꙋ, и҆ ѿста́влю ѧ҆̀ ѿ па́ствы ѻ҆вець мои҆хъ, и҆ не пасꙋтъ и҆хъ ктомꙋ пастꙋси, ниже да пасꙋтъ сами себе.
и҆ ѿи҆мꙋ ѻ҆́вца своѧ и҆з꙽ ѹ҆́стъ и҆хъ, и҆ ктомꙋ не бꙋ́дꙋтъ и҆мъ на и҆з꙽ꙗ҆де́нїе·

И҆мже с̂е гл҃етъ а҆дона́и г҃ь.
с̂е а҆зъ възы́щꙋ ѻ҆вець свои҆хъ, и҆ присѣщꙋ и҆хъ.
ꙗ҆́коже присѣща́етъ пастꙋхъ па́ствы свое҆ѧ, въ дн҃ь е҆гда̀ е҆сть ѻ҆́блаченъ и҆ м꙽глѧ́нъ, средѣ ѻ҆вець е҆мꙋ разлꙋченъ.
та́ко възы́щꙋ ѻвець свои҆хъ, і҆ и҆зба́влю ѧ҆̀ ѿ всего мѣста, на не́мже сꙋть расы́пани та́мо, въ дн҃ь ѻ҆́блаченъ и҆ примра́ченъ·

І҆ и҆зведꙋ ѧ҆̀ ѿ стра́нъ, и҆ съберꙋ ѧ҆̀ ѿ земль.
и҆ въведꙋ ѧ҆̀ в꙽ зе́млю и҆хъ, и҆ распасꙋ ѧ҆̀ на горахъ і҆и҆л҃евах̑, и҆ въ де́брехъ, и҆ въ всемъ селѣ земнѣмъ.
на жирꙋ бла́зѣ напасꙋ ѧ҆̀·

На горѣ высо́цѣ і҆и҆л҃евѣ бꙋ́детъ лѣпота и҆хъ, и҆ бꙋ́дꙋтъ ѻ҆гра́ды и҆хъ т̂ꙋ·

и ѹ҆спнꙋтъ и҆ почїютъ т̂ꙋ.
и҆ въ пи́щи бла́зѣ, и҆ на па́жити тꙋчнѣ напасꙋтсѧ на горахъ і҆и҆л҃евах̑.
а҆з꙽ же распасꙋ ѻ҆́вца своѧ, и҆ а́зъ покою ѧ҆̀.
и҆ разꙋмѣ́ютъ ꙗ҆́ко а҆зъ е҆смь г҃ь·

Се̂ гл҃етъ а҆дона́и г҃ь.
поги́бшаго възыщꙋ, и҆ заблꙋди́вшаго ѻ҆брѧ́щꙋ.
и҆ съкрꙋше́нное свѧжꙋ, и҆ не́мощнаго ѹ҆крѣплю, и҆ крѣ́пкаго снабжꙋ.
и҆ распасꙋ ѧ҆̀ съ сꙋдо́мъ·

И҆ в̂ы ѻ҆́вца моѧ, с̂е гл҃етъ а҆дона́и г҃ь, с̂е а҆зъ расꙋжд̑ꙋ межд̑ꙋ ѻ҆вцею и҆ ѻ҆вцею, и҆ ѻ́вномъ и҆ козломъ.
не довлѣ ли вамъ ꙗ҆́ко бл҃гꙋю па́житъ живетѐ.
и҆ ѻ҆ста́нокъ па́жити вашеѧ, нога́ми вашими попира́ете.
и҆ ѹ҆сто́ѧвшꙋюсѧ во́дꙋ пива́сте, и҆ ѻ҆ста́нокъ нога́ми вашими възмꙋща́сте.
и҆ ѻ́вца моѧ попра́нїе но́гъ вашихъ живѧ́хꙋ, и҆ възмꙋще́нꙋю во́дꙋ нога́ма ва́шима пїѧ́хꙋ·

Того ради с̂е г҃лет̑ а҆дона́и г҃ь.
с̂е а҆зъ к вамъ, и҆ расꙋжд̑ꙋ междꙋ ѻ҆вча́темъ си́лнымъ, и҆ междꙋ не́мощномъ.
е҆льмаже ребры свои҆ми, и҆ плеща́ми вашими порѣе҆те, и҆ ро́ги вашими бодитѐ, и҆ вс̂е не́мощное и҆зрѣ́ете, дон꙽деже и҆жденете ѧ҆̀ во́нъ.
и҆ расѣѧ́сте ѻ҆́вца моѧ всемꙋ ми́мохо́дꙋ.
н̂о сп҃сꙋ ѻ҆́вца своа, и҆ ктомꙋ не бꙋ́дꙋтъ на разграбле́нїе.
и҆ расꙋждꙋ междꙋ ѻ҆вчатемъ и҆ ѻ҆вча́темъ, и҆ междꙋ ѻ҆́вномъ къ ѻ҆́внꙋ·

И҆ въста́влю пастꙋхъ в них̑ е҆ді́нъ и҆же пасетъ ѧ҆̀, раба мое҆го дв҃да.
то́и пасетъ ѧ҆̀ и҆ тои покоит̑ ѧ҆̀, и҆ бꙋ́детъ пастꙋх́ъ и҆хъ·

А̑ же г҃ь бꙋ́дꙋ и҆мъ въ б҃ъ.
и ра́бъ мои двд̑ъ кн҃ѕь средѣ и҆хъ, а҆зъ г҃ь гл҃ахъ·

И҆ завѣща́ю двд̑ви завѣтъ ми́рныи.
и потреблю ѕвѣ́ри злы съ землѧ̀.
и҆ вселѧ́тсѧ въ пꙋсты́ни, ѹ҆пова́ющеи ѹ҆спнꙋтъ въ дꙋбра́вахъ·

прорцы сн҃е чл҃чь ѻ҆ дꙋбра́вѣ а҆ггевъстѣ·

И҆ дамъ и҆мъ ѻ҆́крс̑҇тъ горы̀ мое҆ѧ блс̑҇венїе.
и҆ спꙋщꙋ до́ждь вамъ въ вре́мѧ е҆го, дождеве блс̑҇венїѧ бꙋдꙋтъ.
и҆ древеса на́ поли дадѧ́тъ плод̑ свои, и҆ землѧ̀ дасть силꙋ свою.
и҆ вселѧ́тсѧ на землѝ и҆хъ с наде́жд̑ею в꙽ ми́ръ·

и҆ ѹ҆вѣ́дѧт̑ ꙗ҆́ко а҆зъ е҆смь г҃ь.
е҆гда̀ съкрꙋшꙋ ѹ҆́зы и҆́га и҆хъ, і҆ и҆збавлю ѧ҆̀ и҆з рꙋки поработивших̑ ѧ҆̀, и҆ не бꙋдт̑ꙋ ктомꙋ въ плѣне́нїе.
и҆ ѕвѣ́рїе зе́мнїи не поꙗ҆дѧ́тъ их̑.
и҆ вселѧ́тсѧ съ наде́ждею, и҆ не бꙋдет̑ пострашаѧ и҆хъ.
и҆ въста́влю и҆мъ садъ ми́рныи въ и҆мѧ.
и҆ не бꙋ́детъ ктомꙋ мало и҆хъ число на землѝ.
не бꙋ́дꙋтъ погꙋбле́ни гла́домъ на землѝ, и҆ не под̑и҆мꙋтъ ѹ҆коре́нїѧ ѿ стра́нъ ктомꙋ.
и҆ ѹ҆вѣ́дѧтъ ꙗ҆́ко а҆зъ е҆смь г҃ь б҃ъ и҆хъ с ни́ми, а҆ в̂ы лю́дїе мои до́ме і҆и҆л҃евъ, гл҃етъ а҆дона́и г҃ь.
а҆ в̂ы ѻ҆́вца моѧ, и҆ ѻ́вца па́ствы мое҆ѧ е҆сте, и҆ а́зъ г҃ь б҃ъ вашъ, г҃лет̑ а҆дона́и г҃ь·

Глв̑҇а, л҃е·

И бы́сть сло́во гн҃е къ мнѣ гл҃ѧ, сн҃е чл҃чь, ѻ҆брати лице свое къ горѣ сеи҆ръ, и҆ прорцы до неѧ, и҆ рцы е́й.
с̂е гл҃етъ а҆дона́и г҃ь, с̂е а҆зъ на́ тѧ го́ро сеи҆ръ, и҆ прострꙋ рꙋ́кꙋ свою на́ тѧ, и҆ поста́влю т̂ѧ пꙋстꙋ, и҆ ѻ҆пꙋстѣ́еши.
и҆ въ гра́дѣхъ твои҆хъ пꙋсты́ню сътворꙋ, и҆ т̂ы въ пꙋсты́ню бꙋ́деши.
и҆ разꙋмѣ́еши ꙗ҆́ко а҆зъ е҆смь г҃ь·

Поне́же бы́сть в꙽ тебѣ вра́жда вѣ́чнаѧ, и҆ присѣди до́мꙋ і҆и҆л҃вꙋ на лꙋкахъ, рꙋко́ю вражїи҆мъ мечем̑, въ вре́мѧ печа́ли и҆хъ, и҆ въ вре́мѧ ѻ҆би́ды и҆хъ послѣжде·

Сего ради жи́въ а҆зъ, гл҃етъ а҆дона́и г҃ь.
а҆ще бы не въ кро́ви съгрѣши́лъ, н̂о кро́вь т̂ѧ прожене́тъ, кро́ви б̂о свое҆ѧ възненави́дѣ, кро́вь твоѧ прожене́тъ т̂ѧ, и҆ ѹ҆жикъ свои҆хъ възненави́диши, и҆ въста́влю ѧ҆̀ тебѣ ра́тники·

И҆ поста́влю горꙋ сеи҆ръ, пꙋстꙋ ѻ҆пꙋстѣвшꙋ.
и҆ погꙋблю ѿ неѧ чл҃ки и҆ ско́тъ, и҆ ми́мохо́да и҆ пѣшника и҆ напо́лню ꙗ҆́звеныхъ хо́лмы твоѧ, и҆ де́бри твоѧ, и҆ на всѣхъ по́лехъ твои҆хъ, ꙗ҆́звенїи мечемъ падꙋтъ в꙽ тебѣ.
и҆ пꙋстꙋ въ вѣ́къ поста́влю т̂ѧ, и҆ гра́ди твои не населѧ́тсѧ.
и҆ разꙋмѣ́еши ꙗ҆́ко а҆зъ е҆смь г҃ь·

Поне́же рече, ѻ҆́бѣ стра́нѣ и҆ ѻ́бѣ землѝ мои бꙋ́дета, и҆ прїимꙋ и҆̀.
а҆ г҃ь т̂ꙋ е҆сть·

Сего ради жи́въ а҆зъ, гл҃етъ а҆дона́и г҃ь.
и҆ сътворꙋ тебѣ по вра́ждѣ твое҆и, и҆ по ревности твое҆и, ю҆же сътвори ѿ ненавидѣ́нїѧ в нихъ.
и҆ ꙗ҆влю́ ти сѧ е҆гда сꙋждꙋ т̂и, и҆ разꙋмѣ́еши ꙗ҆́ко а҆зъ е҆смь г҃ь·

Слы́шах̑ глас̑҇ всѣхъ твоих̑ хꙋлъ, ꙗ҆́же гл҃аше ѻ҆ горахъ і҆и҆л҃вах̑, гл҃ѧ, го́ры і҆и҆л҃евы высо́кїѧ вѣ́чныа, пꙋсты́нѧмъ да́шасѧ въ прїѧ́тїе.
и҆ вел꙽ми възгл҃а до мене ѹ҆сты свои҆ми, и҆ ѹ҆мно́жи до мене словеса, ꙗ҆́же а҆зъ слы́шахъ·

Се̂ гл҃етъ а҆дона́и г҃ь.
въ весе́лїи всеѧ̀ землѧ̀, пꙋстꙋ т̂ѧ сътворꙋ въ вѣ́къ, ꙗ҆́коже сѧ пора́дова прича́стїю до́мꙋ і҆и҆л҃ева ꙗ҆́ко поги́бе.
та́ко сътворꙋ тебѣ.
въ пꙋсты́ню бꙋ́деши го́ро сеи҆ръ.
и҆ всѧ и҆дꙋмеѧ потреби́тсѧ.
и҆ ѹ҆вѣдѧтъ ꙗ҆́ко а҆зъ е҆смь г҃ь б҃ъ и҆х·

Глв̑҇а, л҃ѕ·

И т̂ы сн҃е чл҃чь, прорцы до го́ръ і҆и҆л҃евъ, и҆ рцы̀.
го́ры і҆и҆л҃евы слы́шите сло́во гн҃е, с̂е гл҃етъ а҆дона́и г҃ь.
понеже рече вра́гъ на́ вы, бл҃го, пꙋстаѧ въ вѣ́къ въ прїѧ́тїе намъ бы́сть.
того ради рцы, гл҃ѧ, с̂е гл҃етъ а҆дона́и г҃ь.
занеже бы́ти вам̑ въ погꙋбле́нїе въ всѣхъ страна́хъ, и҆ зане же бы́ти вамъ въ нечестїи ѿ всѣхъ ѻ҆́крс̑҇тныхъ вамъ.
ꙗ҆́коже быти вамъ въ прїѧ́тїе всѣмъ про́чимъ странамъ, и҆ бы́ти поно́сꙋ ꙗзы́кꙋ въ ѹ҆стѣхъ, и҆ въ ѹ҆кори́знꙋ въ странах̑·

Сего ради горы і҆и҆л҃евы слы́шите сло́во гн҃е.
с̂е гл҃етъ а҆дона́и г҃ь, горамъ и҆ хо́лмомъ и҆ потокомъ и҆ де́бремъ, и҆ полѧ́намъ, и҆ ѻ҆пꙋщенымъ, и҆ погꙋбле́нымъ, и҆ гра́домъ разоренымъ.
и҆же бы́ша въ повое҆ва́нїе, и҆ въ попра́нїе ѻ҆ста́вшимъ странамъ ѻ҆́крс̑҇тнымъ их̑·

Того ради с̂е гл҃етъ а҆донаи г҃ь.
а҆ще не въ ѻ҆гни рве́нїѧ мое҆го гл҃ахъ на про́чаѧ страны, и҆ на и҆дꙋме́ю всю.
ꙗ҆́ко да́ша прича́стїе мое себѣ въ наслѣдїе, съ весе́лїемъ ѿ всего срд̑ца.
нечествова́вше дш҃а, ꙗ҆́ко потреби́ти повое҆ва́нїемъ·

Того ради прорцы до землѝ і҆и҆л҃евы, и҆ рцы горамъ, и҆ хо́лмомъ, и҆ полѧнамъ, и҆ де́брем̑·

Се̂ гл҃етъ а҆дона́и г҃ь, с̂е а҆зъ въ рве́нїи мое҆мъ и҆ въ ꙗ҆́рости мое҆и гл҃ах̑, въ ѹ҆кори́зны мѣсто, ю҆́же прїѧ́сте ѿ стра́нъ.
того ради с̂е гл҃етъ а҆дона́и г҃ь.
с̂е а҆зъ въздви́жꙋ рꙋ́кꙋ свою на страны, ꙗ҆́же ѻ҆крс̑҇тъ вас̑҇.
си́це без꙽че́стїе и҆хъ прїимꙋтъ·

Ваша же вина и҆ плод̑ горы іи҆л҃евы, поꙗ҆́дѧ́т꙽ лю́дїе мои, ꙗ҆́ко надѣют̑сѧ прїити·

Ꙗ҆́ко с̂е а҆зъ на вас̑҇, и призрꙋ на вы.
и҆ раздѣ́лаетесѧ, и҆ насѣ́ете.
и҆ ѹ҆мно́жꙋ въ вас̑҇ чл҃ки, весь до́мъ і҆и҆л҃въ до кон꙽ца.
и҆ населѧтсѧ гра́ди, и҆ пꙋсты́нѧ ѻ҆градѧтсѧ.
и҆ ѹ҆мно́жꙋ вас̑҇ люд̑ми и҆ скотомъ, и҆ ѹ҆мно́жатсѧ и҆ възрастꙋтъ.
и҆ вселю въ вас̑҇ ꙗ҆ко прежде, и҆ бл҃го сътворꙋ вамъ ꙗ҆́ко в перваѧ лѣта прежде вас̑҇.
и҆ разꙋмѣ́ете ꙗ҆́ко а҆зъ е҆смь г҃ь·

Се̂ гл҃етъ а҆дона́и г҃ь, поне́же гл҃ахъ тебѣ.
землѧ̀ ꙗ҆дꙋщи чл҃ки ты е҆си, и҆ бесча́дъ ѿ страны твое҆ѧ бы́сть.
того ра́ди чл҃къ ксемꙋ не поꙗ҆си, и҆ страна твоа не сътворитъ тебе бесча́дъ, гл҃ет꙽ г҃ь.
и҆ не ѹ҆слы́шитсѧ въ вас̑҇ ктомꙋ бесче́стїе стра́н꙽ско, и҆ ѹ҆кори́зны стра́н꙽ски не под̑и҆мете ктомꙋ, и҆ страна твоѧ не бꙋ́детъ бесчад̑, гл҃етъ а҆дона́и г҃ь·

И҆ бы́сть сло́во гн҃е къ мнѣ гл҃ѧ сн҃е чл҃чь.
домъ і҆и҆л҃евъ всели́сѧ на землѝ свое҆и, и҆ ѻ҆сквернави́ша ю҆̀ пꙋтемъ и҆хъ, и҆ кꙋми́рми и҆хъ, и҆ нечистота́ми и҆хъ.
по нечистотѣ сѣдѧ́щїѧ, бы́сть пꙋть и҆хъ пред̑ лицемъ мои҆мъ.
и҆ разлѣѧ́хъ ꙗ҆́рость мою на́ нѧ, кро́ви ради ю҆́же пролїа́ша на́ землю, и҆ кꙋми́рми и҆хъ ѻ҆сквернави́ша ю҆̀.
и҆ расыпахъ ѧ҆̀ въ страны, и҆ развѣѧхъ ѧ҆̀ в землѧ̀.
по пꙋти их̑, и҆ по хꙋдожеством̑ и҆хъ сꙋди́хъ и҆мъ·

И внидо́ша въ страны̀ в нѧ́же внидо́ша та́мо, и҆ ѻ҆сквернави́ша и́мѧ мое ст҃ое.
внегда гл҃ахꙋ и҆мъ лю́дїе гн҃и сїи, и҆ ѿ землѧ̀ сїи ѿшлѝ сꙋть.
пощадѣхъ ѧ҆̀ и҆́мени ради мое҆го ст҃ого, е҆же ѻ҆сквернавѝ домъ і҆и҆л҃евъ т̂ꙋ а́може вни́де·

Того ради рцы̀ домꙋ і҆и҆л҃евꙋ, с̂е гл҃етъ а҆дона́и г҃ь.
не ва́мъ а҆зъ творю̀ доме і҆и҆л҃евъ, н̂о и҆мени мое҆го ра́ди ст҃го е҆же ѻ҆сквернави́сте въ стра́нахъ т̂ꙋ а҆́може внидо́сте·

Но̂ ѻ҆сщ҃ꙋ и҆́мѧ свое вели́кое ѻ҆скверненое въ странах̑, е҆же ѻ҆сквернави́сте сре́дѣ и҆хъ.
и҆ разꙋмѣ́ютъ страны̀ ꙗ҆ко азъ е҆смь г҃ь, гл҃етъ а҆дона́и, вънегда̀ ѻ҆сщ҃ꙋсѧ въ ва́съ пред̑ ѻ҆чи́ма и҆́хъ·

и҆ пои҆мꙋ в̂ы ѿ стра́нъ, и҆ съберꙋ в̂ы ѿ всѣхъ роже́нїи, и҆ въведꙋ в̂ы в зе́млю вашꙋ·

И҆ въскроплю̀ на́ вы водꙋ чи́стꙋ, и҆ ѻ҆чи́ститесѧ ѿ всх̑ѣ нечисто́тъ ва́шихъ, и҆ ѿ всѣхъ кꙋми́ръ вашихъ ѻ҆чищꙋ васъ·

И҆ дам̑ вамъ срд̑це но́во, и дх҃ъ но́въ дамъ вамъ.
и҆ ѿврьгꙋ срд̑це ка́меное ѡ пло́ти вашеѧ.
и҆ дамъ вамъ срд̑це пло́тѧно, и дх҃ъ мои да́мъ въ вас̑҇·

И҆ сътворю̀, да в за́повѣдехъ мои҆хъ хо́дите, и҆ сꙋды моѧ снабдитѐ и сътворитѐ ѧ҆̀·

И҆ вселите́сѧ на землѝ, ю҆же да́хъ ѿц҃емъ ва́шимъ.
и҆ бꙋдете м̂и въ лю́ди, а҆́з же бꙋдꙋ вамъ въ б҃ъ.
и҆ сп҃сꙋ в̂ы ѿ нечистот̑ ва́шихъ, и҆ ѻ҆чи́щꙋ в̂ы ѿ грѣхъ ва́шихъ всѣхъ.
и҆ призовꙋ пшени́цꙋ и҆ ѹмно́жꙋ ѧ҆̀, и҆ не дам̑ на вы гла́да·

и҆ распложꙋ̀ пло́дъ дре́вныи, и пло́ды по́льскїѧ, ꙗ҆́коже не прїимете ктомꙋ̀ гла́дныѧ ѹ҆кори́зны въ странахъ·

И҆ помѧнете пꙋтѝ своѧ злы́ѧ, и҆ ходо́жъства ва́ша не бл҃гаѧ.
и҆ съгнꙋша́етесѧ пред̑ лицемъ и҆хъ, ѻ҆ безако́нїихъ ва́шихъ, и҆ ѻ҆ согнꙋше́нїих꙽ ва́шихъ·

Не вас̑҇ ра́ди творю̀ доме і҆и҆л҃евъ, гл҃етъ а҆дона́и г҃ь.
съвѣстно да бꙋдетъ вамъ доме і҆и҆л҃евъ.
постыди́тесѧ и҆ ѹ҆клони́те ѿ пꙋтѝ ва́шего до́ме і҆и҆л҃евъ·

Се̂ гл҃етъ а҆дона́и г҃ь, во́нже дн҃ь ѻ҆чищꙋ в̂ы ѡ безаконїи ва́шихъ.
и҆ населю гра́ды и҆ съградѧ́тсѧ пꙋсты́нѧ, и҆ землѧ̀ погибшаѧ раздѣлаетсѧ.
и҆́мже погꙋблена бы́сть пред̑ ѻ҆чима всемꙋ ми́моходѧ́щемꙋ·

и҆ рекꙋтъ, землѧ̀ ѻ҆на погибшаѧ бы́сть ꙗ҆́ко гра́дъ пи́щ꙽ныи.
и҆ гра́ди ѻ҆пꙋстѣвшїи и҆ раскопанїи, забра́лы ѹ҆твержд̑ени ста́ша.
и҆ разꙋмѣ́ютъ страны̀, е҆ли́коже и҆хъ ѻ҆ста́нетъ ѻ҆́крс̑҇тъ ва́съ, ꙗ҆ко а҆́зъ г҃ь съградихъ разоре́ныѧ, и҆ насади́хъ поги́бшаѧ.
а҆зъ г҃ь гл҃ах̑ и҆ сътворю̀·

Се гл҃етъ а҆дона́и г҃ь.
с̂е е҆щѐ ѻ҆бращꙋсѧ сътвори́ти до́мꙋ і҆и҆л҃евꙋ, ꙗ҆́ко сътвори́ти и҆мъ.
и҆ ѹ҆мно́жꙋ ѧ҆̀ ꙗ҆́ко ста́до лю́дъско, ꙗ҆́ко ѻ҆вца̀ ст҃ыѧ, и҆ ꙗ҆́ко ѻ҆вца̀ і҆ерс̑҇ли́млѧ въ пра́знд̑икъ е҆го.
та́ко бꙋдт̑ꙋ гра́ди ѻ҆пꙋстѣвшїи по́лни ѻ҆вець, и҆ чл҃кь.
и҆ разꙋмѣ́ютъ ꙗ҆́ко а҆зъ г҃ь·

Глв̑҇а, л҃з·

И бысть на мнѣ̀ рꙋка гн҃ѧ, і҆ и҆зведе м̂ѧ въ дꙋсѣ гн҃и, и҆ поста́ви м̂ѧ средѣ по́лѧ.
се́же бѧше по́лно ко́стеи чл҃чьскихъ.
и҆ ѻ҆бведе м̂ѧ ѻ҆крс̑҇тъ и҆хъ, и҆ ѻкрс̑҇тъ.
и҆ с̂е мно́ги ѕѣло на лицы по́лѧ, и҆ сꙋхы ѕѣ́ло·

И҆ рече къ мнѣ̀, сн҃е чл҃чь, ѻ҆живлю л̂и ко́сти сїѧ.
и҆ реко́хъ, г҃и б҃е т̂ы вѣ́си т̂о·

И҆ реч̑҇ къ мнѣ̀, прор꙽цы ѻ҆ костех̑ сих̑, прорцы сн҃е чл҃чь.
и҆ реч̑҇ши к ним̑, ко́сти сїѧ сꙋхїѧ слы́шите сло́во гн҃е.
с̂е гл҃етъ а҆дона́и г҃ь ко́стем̑ симъ.
с̂е а҆зъ въведꙋ въ васъ дх҃ъ живо́тенъ.
и҆ да́мъ на ва́съ жи́лы, и҆ възведꙋ на ва́съ пло́ть, и҆ прострꙋ по ва́мъ ко́жю, и҆ да́мъ дх҃ъ мо́и въ ва́съ, и҆ ѻ҆живетѐ.
и҆ ѹ҆вѣсте ꙗ҆́ко а҆зъ е҆смь г҃ь·

И҆ прореко́хъ ꙗ҆́коже заповѣ́да м̂и г҃ь.
и҆ бысть гла́съ внегда̀ м̂и пророчествова́ти.
и҆ с̂е трꙋсъ, и҆ съвокꙋплѧ́хꙋсѧ ко́сти, ко́сть къ ко́сти ка́ѧждо къ соста́вꙋ свое҆мꙋ·

и҆ ви́дѣхъ, и҆ с̂е бы́ша и҆м꙽ жи́лы, и҆ пло́ть растѧ́ше и҆ въсхожда́ше.
и҆ протѧжесѧ и҆́ма ко́жа верхꙋ.
дх҃а же не бѣа́ше в꙽ нихъ·

И҆ ре́че къ мнѣ̀, прорцы̀ ѻ҆ дꙋсѣ, прорцы сн҃е чл҃чь.
и҆ рцы̀ дх҃ови, с̂е гл҃ет꙽ а҆дона́и г҃ь.
ѿ четы́рехъ вѣтръ да прїидетъ дꙋхъ, да д꙽хнетъ въ мер̑҇твыѧ сїѧ, и҆ ѻ҆живꙋтъ·

И҆ прорекохъ ꙗ҆́коже повелѣ ми.
и҆ внїиде в нѧ̀ дх҃ъ, и҆ ѻ҆жиша.
и҆ ста́ша на нога́хъ свои҆хъ, събо́ръ мно́гъ ѕѣло·

И҆ реч̑҇ г҃ь къ мнѣ̀ гл҃ѧ, сн҃е чл҃чь, сїѧ ко́сти весь до́мъ і҆и҆л҃евъ е҆сть.
тїи б̂о гл҃ют꙽, сꙋхи бы́ша ко́сти на́ша, поги́бе надежд̑а на́ша, раз̑гласи́хомъсѧ·

Того ради прор꙽цы сн҃е чл҃чь.
и҆ р꙽цы к нимъ, с̂е гл҃етъ а҆дона́и г҃ь.
с̂е а҆зъ ѿвръзꙋ гро́бы ваша, і҆ и҆зведꙋ васъ ѿ гробъ ва́шихъ лю́дїе моѝ.
и҆ въведꙋ в̂ы зъ землю і҆и҆л҃евꙋ, и҆ ѹ҆вѣсте ꙗ҆ко а҆зъ е҆смь г҃ь.
внегда̀ ѿвръсти м̂и гро́бы ва́ша, е҆же възвести в̂ы ѿ гро́бъ ва́шихъ лю́ди моѧ.
и҆ дамъ дх҃ъ мои въ ва́съ, и҆ жи́ви бꙋдете.
и҆ поста́влю в̂ы на́ земли ва́шеи.
и҆ ѹ҆вѣсте ꙗ҆ко а҆зъ г҃ь, гл҃ах̑.
и҆ сътворю, гл҃етъ а҆дона́и г҃ь·

И҆ бы́сть сло́во гн҃е къ мнѣ гл҃ѧ, сн҃е чл҃чь, возми себѣ̀ же́злъ е҆ді́нъ, и҆ въпиши на нем̑ і҆ѹ́дꙋ, и҆ сн҃ы і҆и҆л҃евы прилежа́щаѧ к немꙋ.
и҆ же́злъ вто́рыи возми себѣ̀, и҆ напиши и҆̀, і҆ѻ́сифовъ же́злъ, и҆ е҆фрѣмовъ, и҆ всѧ̀ сн҃ы і҆и҆л҃евы, и҆ приложи́вшаѧсѧ к немꙋ.
и҆ съвокꙋпи ѧ҆̀ са́мы себѣ̀ въ же́злъ е҆ді́нъ, ꙗ҆́коже свѧза́ти ѧ҆̀.
и҆ бꙋдꙋтъ въкꙋпѣ в рꙋ́цѣ твое́и·

И҆ бꙋдетъ е҆гда̀ гл҃ютъ к тебѣ сн҃ве людїи твои҆хъ, въпраша́юще.
не совѣсти́ши л̂и нам̑ т̂ы, чт̂о сѐ е҆сть тебѣ.
и҆ речеши к нимъ, с̂е гл҃етъ а҆дона́и г҃ь.
с̂е а҆зъ пои҆мꙋ племѧ̀ і҆ѻ́сифово, е҆же е҆сть в рꙋцѣ е҆фремовѣ, и҆ племена і҆и҆л҃ева, прилежа́щаа к немꙋ.
и҆ да́мъ ѧ҆̀ с ни́мъ къ племени і҆ѹ́динꙋ.
и҆ бꙋдетъ въ жезлъ е҆ді́нъ в꙽ рꙋцѣ і҆ѹ́динѣ·

И҆ бꙋдꙋтъ дре́ва на нихже писа́ти бꙋдеши в рꙋцѣ твое́и, пред̑ ѻ҆чима и҆хъ.
и҆ речеши к ни́мъ, с̂е гл҃етъ а҆дона́и г҃ь·

Се̂ а҆зъ пое́млю ве́сь до́мъ і҆и҆л҃евъ ѿ среды стра́нъ, а҆́може бѣша въшли та́мо.
и҆ съберꙋ ѧ҆̀ на́ землю і҆и҆л҃евꙋ, и҆ дамъ ѧ҆̀ въ странꙋ̀ на землѝ мое́и, въ горахъ і҆и҆л҃евахъ.
и҆ кнѧ́ѕь е҆ді́нъ бꙋдетъ въ всѣхъ и҆хъ въ цр҃ь·

И҆ не бꙋдꙋтъ ктомꙋ въ дв̂ѣ странѣ, н̂и раздѣлѧт̑сѧ ктомꙋ на дво́е црс̑҇тво.
да сѧ не ѻ҆сквернавлѧ́ютъ е҆щѐ в кꙋмирехъ и҆хъ, и҆ в꙽ согнꙋшенїи и҆хъ, и҆ во всѣхъ непра́вдах̑ и҆хъ.
і҆ и҆збавлю ѧ҆̀ ѿ всего безако́нїѧ и҆хъ, е҆же съгрѣшиша в нихъ, и҆ ѻ҆чищꙋ ѧ҆̀.
и҆ бꙋдт̑ꙋ м̂и в лю́ди, и҆ а́зъ бꙋдꙋ и҆мъ въ б҃ъ.
и҆ рабъ мо́и дв҃дъ кнѧ́ѕь средѣ их̑, и҆ пастꙋхъ е҆ді́нъ бꙋдет꙽ всѣмъ им̑·

Въ заповѣдехъ моих̑ ходи́ти начнт̑ꙋ, и҆ сꙋды моа̀ снабдѧтъ и҆ сътво́рѧт꙽ ѧ҆̀.
и҆ вселѧ́тсѧ на землѝ свое́и, ю҆же дахъ рабꙋ мое҆мꙋ і҆а́ковꙋ, на не́иже жи́ша та́мо ѿц҃ы и҆хъ.
и҆ вселѧ́тсѧ на не́и тїи, и҆ сн҃ове и҆хъ, и҆ сн҃ове сн҃овъ и҆хъ до́ вѣка.
и҆ дв҃дъ рабъ мои, кнѧѕь и҆хъ бꙋдетъ въ вѣкъ·

И҆ ѹ҆твержꙋ и҆мъ завѣтъ ми́ренъ, и҆ завѣща́нїе вѣчно бꙋдет̑ и҆мъ.
и҆ ѹ҆кореню ѧ҆̀, и҆ ѹ҆мно́жꙋ.
и҆ дамъ ѻ҆сщ҃енїе мое посредѣ и҆хъ въ вѣкъ, и҆ бꙋдетъ в꙽селенїе мое в них̑.
и҆ бꙋдꙋ и҆мъ б҃ъ, а҆ ѻ҆ни бꙋдꙋтъ м̂и лю́дїе.
и҆ ѹ҆вѣдѧтъ страны, ꙗ҆́ко а҆зъ е҆смь г҃ь ѻ҆сщ҃аѧ́й ѧ҆̀.
внегда̀ бꙋдꙋтъ ѻ҆сщ҃енїѧ моѧ̀ средѣ и҆хъ въ вѣкъ·

Глв̑҇а, л҃и·

И бы́сть сло́во гн҃е къ мн̂ѣ гл҃ѧ, сн҃е чл҃чь.
ѹ҆твердѝ лицѐ свое на го́га, и҆ на́ зем̑лю маго́га, и҆ на кн҃зѧ рос꙽ска, мосо́хъ, и҆ ѳо́вель·

И҆ рцы̀ е҆мꙋ, с̂е гл҃етъ а҆дона́и г҃ь.
с̂е а҆зъ на́ тѧ го́гъ и҆ маго́гъ кн҃зѧ рос꙽ска, мосо́хъ, и҆ ѳо́вель.
и҆ съвращꙋ̀ т̂ѧ ѻ҆́крс̑҇тъ, и҆ въложꙋ ѹ҆здꙋ̀ въ че́люсти твоѧ.
и҆ съберꙋ т̂ѧ, и҆ вс̂ю си́лꙋ твою, конѧ̀ и҆ кон꙽ники ѻ҆блъче́ны въ бро́нѧ вс̂ѧ, събо́ръ мно́гъ, шле́мы, и҆ меча, и҆ щиты вс̂ѧ и҆мꙋща.

Всѝ тїи персе, и҆ мꙋри, и҆ лѷди, и҆ лѷвїесъ, и҆ фꙋтъ с ни́ми, и҆ вс̂и сїи щи́ты и҆ шле́мы и҆мꙋще.
гомерь, и вс̂и и҆же ѻ҆ нем̑.
до́мъ тръгама́нь и҆ вс̂ѧ ѹ҆тверже́нїѧ е҆го, и҆ страны̀ мно́ги с ни́мъ·

Ѹ҆готови́сѧ ѹ҆готови́сѧ сам̑ т̂ы, и҆ ве́сь събо́ръ твои събраныи к тебѣ̀, и҆ бꙋдеши м̂и въ пре́днюю стражбꙋ̀.
ѿ дн҃ь мно́жаиш꙽ да сѧ ѹ҆гото́виши, и҆ въ послѣднѧѧ лѣта прїидеши.
и҆ прїидеши на землю, въ зе́млю ѿвраще́нꙋю ѿ меча̀ събранꙋю ѿ людїи мно́гъ, къ землѝ і҆и҆л҃евѣ, ꙗ҆же бы́сть пꙋста̀ всю́дꙋ·

И҆ тїи же ѿ стра́нъ и҆зыдо́ша, и҆ вселѧ́тсѧ с ми́ромъ вс̂и тїи.
и҆ на́идет̑ до́ждь, и҆ прїидеши ꙗ҆́ко бꙋ́рѧ.
прїидеши ꙗ҆́ко и҆ ѻ́блацы покрыти зе́млю.
и҆ паде́ши т̂ы, и҆ вс̂и и҆же в꙽ тебѣ, и҆ страны мно́ги с тобо́ю·

Се̂ гл҃ет꙽ а҆дона́и г҃ь.
в꙽ то́и дн҃ь възы́идꙋтъ гл҃и на срд̑це твое, и҆ помы́слиши помышле́нїѧ ѕл̂а, и҆ рече́ши.
да в꙽зыидꙋ на́ землю ѿврьженꙋ, и҆ прїидꙋ на млъча́щаѧ лю́ди, и҆ съ млъча́нїемъ живꙋща на землѝ, на не́иже нѣсть гра́да, ни две́рїи, ни верѣи.
ꙗ҆́коже плѣни́ти плѣны, и҆ взѧ́ти и҆мѣнїе и҆хъ.
ꙗ҆́ко ѻ҆брати́ти рꙋкꙋ мою на землю ѻ҆пꙋщенꙋ, ꙗ҆́же насели́сѧ ѻ҆ странѣ̀ събранѣ ѿ людїи мно́гъ.
сътвори́вше притѧже́нїѧ и҆мѣнїе живꙋщихъ на пꙋ́пѣ землѝ·

Сав̑҇ва и҆ деда́нъ, кꙋпцы̀ ѳарси́съ, и҆ вс̂ѧ льво́ве и҆хъ рекꙋтъ тебѣ.
е҆да̀ на плѣне́нїе ꙗ҆́ко плѣнити т̂ы грѧде́ши.
и҆ смѧсти древеса̀ съзва́лъ е҆си лю́ди своѧ, в꙽зѧ́ти сребро̀ и҆ зла́то, ѿвестѝ притѧжа́нїѧ і҆ и҆мѣнїѧ, ꙗ҆́ко плѣни́ти плѣнъ вели́къ·

Того рад̑и̑ прорцы̀ сн҃е чл҃чь, и҆ рцы̀ го́гꙋ.
с̂е гл҃ет̑ а҆дона́и г҃ь, не в то́и ли дн҃ь ѹ҆бо внегда̀ вселѧт̑сѧ лю́дїе моѝ і҆и҆л҃ь с ми́ром̑.
и҆ ѹ҆вѣ́си и҆ въста́неши, и҆ прїидеши ѿ мѣста свое҆го ѿ конца̀ сѣверьска, т̂ы и҆ страны̀ мно́ги с тобо́ю, кон꙽ницы на ко́нѣхъ вс̂и.
събо́ръ вели́къ и҆ си́ла мно́га.
и҆ възы́идеши на люди моѧ і҆и҆л҃ю, ꙗ҆́ко ѻ́блакомъ покры́ти зе́млю.
въ послѣ́днѧѧ дн҃и бꙋдет̑·

и҆ възведꙋ т̂ѧ на́ землю мою̀.
да мѧ ѹ҆вѣдѧт̑ вс̂ѧ страны̀, е҆гда̀ ѻ҆сщ҃юсѧ пред ни́ми ѽ го́гъ·

Се̂ гл҃етъ а҆дона́и г҃ь го́гꙋ, ты̀ е҆си ѻ҆ немже гл҃ахъ въ дн҃и прьвыѧ, рꙋко́ю ра́бъ мои҆хъ про̑҇ркъ і҆и҆л҃евыхъ, проре́кшихъсѧ въ ты̀ дн҃и и҆ лѣта ꙗ҆́ко привестѝ т̂ѧ на́ нѧ·

И҆ бꙋдетъ в꙽ то́и дн҃ь, въ дн҃и прише́ствїѧ го́гова на́ землю і҆и҆л҃евꙋ, гл҃етъ а҆дона́и г҃ь.
възы́идетъ ꙗ҆́рость моѧ въ гнѣвѣ мое҆мъ и҆ р꙽ве́нїѧ моѧ.
въ ѻ҆гнѝ гнѣва мое҆го гл҃ахъ т̂о, да а́ще не бꙋдетъ в то́и дн҃ь трꙋсъ велик꙽ на землѝ і҆и҆л҃вѣ.
въстрѧсꙋтсѧ ѿ лица̀ гн҃ѧ, го́гъ, и҆ ры́бы морьскїѧ, и҆ пти́ца нбс̑҇ныѧ, и҆ ѕвѣри польстїи, и҆ весь гад̑ пол꙽зѧ́и по землѝ, и҆ всѝ чл҃цы на лицѝ всеѧ землѧ̀.
и҆ распадꙋтсѧ го́ры, и҆ расы́плютсѧ де́бри, и҆ ве́сь гра́дъ на́ землю сѧ паде́тъ.
и҆ позовꙋтъ на́нь весь стра́хъ мечныи въ всѣхъ горах̑ мои҆хъ, гл҃етъ а҆дона́и г҃ь·

Ме́чь чл҃ка на бра́та е҆го бꙋдетъ.
и҆ ѿсꙋждꙋ е҆мꙋ смр҃тїю, и҆ кро́вїю, и҆ до́ждем̑ потоплѧ́ющемъ, и҆ ка́менїемъ град̑нымъ.
ѻ́гнь и҆ ка́мень горѧ́щь ѻ҆дождꙋ̀ нань, и҆ на всѧ̀ сꙋщаѧ с нимъ.
и҆ възвели́чюсѧ, и҆ ѻ҆сщ҃ꙋсѧ, и҆ просла́влюсѧ, и҆ ѹ҆вѣ́денъ бꙋдꙋ пред̑ страна́ми мно́ѕѣми.
и҆ ѹ҆вѣ́дѧтъ ꙗ҆́ко а҆зъ е҆смь г҃ь·

Глв̑҇а, л҃ѳ·

И т̂ы сн҃е чл҃чь прорцы̀ до го́га, и҆ рцы̀.
се̂ гл҃етъ а҆дона́и г҃ь, с̂е а҆зъ на́ тѧ го́гъ кнѧ́ѕѧ рос꙽ска, мосо́хъ, и҆ ѳо́вель.
и҆ съберꙋ̀ и҆ наста́влю т̂ѧ, и҆ възведꙋ т̂ѧ ѿ кон꙽ца сѣвер꙽ска, и҆ възведꙋ т̂ѧ на́ горы і҆и҆л҃евы.
і҆ и҆стрѧснꙋ рожа́никъ твои ѿ рꙋкѝ твое́ѧ лѣвыѧ, и҆ стрѣлы твоѧ̀ ѿ рꙋкѝ твое́ѧ десныа.
и҆ поражꙋ т̂ѧ на горахъ і҆и҆л҃евахъ, и҆ падеши т̂ы и҆ вси и҆же ѹ҆ тебе, и҆ мно́ги страны̀ с тобо́ю.
ѿдадѧ́тсѧ въ мно́жество п꙽тичьско в꙽семꙋ парѧ́щемꙋ, и҆ всм̑ѣ ѕвѣремъ по́льскимъ, и҆деже т̂ѧ ѿдахъ на и҆зъꙗ҆денїе.
на лицы по́лю паде́ши, ꙗ҆́ко а҆зъ гл҃ахъ, гл҃етъ а҆дона́и г҃ь·

И҆ пꙋщꙋ ѻ҆́гнь на маго́га, и҆ ѹ҆селѧ́тсѧ ѻ҆́строви съ ми́ромъ.
и҆ ѹ҆вѣдѧтъ ꙗ҆́ко а҆зъ е҆смь г҃ь.
і҆ и҆мѧ мое ст҃ое съвѣстно бꙋдетъ средѣ людїи мои҆хъ і҆и҆л҃евѣхъ, и҆ не ѻ҆сквер꙽нитсѧ и҆мѧ мое ст҃ое ктомꙋ.
и҆ ѹ҆вѣдѧтъ страны̀, ꙗ҆́ко а҆зъ е҆смь г҃ь ст҃ый средѣ і҆и҆л҃ѧ·

Се приспѣ и҆ ѹ҆вѣси ꙗ҆́ко бꙋдетъ, гл҃етъ а҆дона́и г҃ь, с̂е е҆сть то́и дн҃ь ѻ҆ немже гл҃ахъ.
і҆ и҆зыидꙋтъ живꙋщїи въ градѣхъ і҆и҆л҃евѣхъ, и҆ пожгꙋтъ ѻ҆рꙋжїе, и҆ щиты и҆ ко́пїѧ, и҆ рожа́ники и҆ с꙽ стрѣла́ми, і҆ и́здрꙋчми, и҆ лꙋщами.
и҆ раждегꙋтъ и҆ми ѻ҆́гнь сед̑мь лѣтъ.
и҆ не възмꙋтъ древо с по́лѧ, н̂и съсѣкꙋтъ въ дꙋбра́вѣ.
н̂о ѻ҆рꙋжїемъ раждегꙋтъ ѻ҆́гнь.
и҆ плѣнѧтъ плѣнившаѧ и҆хъ, и҆ смѧтꙋтъ смѧ́тшаѧ и҆хъ, гл҃етъ а҆дона́и г҃ь·

И҆ бꙋдетъ въ то́и дн҃ь, го́гꙋ мѣсто нарочно гробъ і҆и҆л҃евъ, много мꙋж́но, и҆ пришед̑ших꙽ ѿ восток̑҇ мор꙽скихъ.
и҆ заградѧ́тъ ѹ́стїе де́бри.
и҆ погребꙋтъ т̂ꙋ гога, и҆ вс̂е мно́жество е҆го.
и҆ прозове́тсѧ т̂о мно́гомꙋжно го́гово.
и҆ вкопа́ютъ ѧ҆̀ весь домъ і҆и҆л҃евъ да ѻ҆чи́ститсѧ землѧ сед̑мь мс̑҇ць.
и҆ погребꙋтъ ѧ҆̀ всѝ лю́дїе зе́мнїи.
и҆ бꙋдетъ и҆мъ в нарокъ, во́нже дн҃ь прославлюсѧ, гл҃етъ а҆дона́и г҃ь·

И҆ мꙋжа ѿнюдъ нарекꙋтъ проходѧ́щаѧ зе́млю, ꙗ҆́коже ѻ҆ста́вшаѧ на лицы земли погрести, и҆ ѻ҆чисти́ти зе́млю.
до сед̑ми мс̑҇ць и҆ възы́щꙋт꙽ ѕѣло.
весь проходѧи землјо и҆ мимоходѧ́и, и҆ ѹ҆зрѣвыи ко́сть чл҃чю, сътворит̑ ѹ҆ неѧ зна́менїе.
до́ндеже погребꙋ ю҆̀ погрѣба́ющеи въ многомꙋжнѣ го́говѣ·

і҆ и҆мѧ же мѣстꙋ прозовет̑сѧ паде́нїе мно́гомꙋжно.
и҆ ѻ҆чи́ститсѧ землѧ̀·

И҆ т̂ы сн҃е чл҃чь прорцы̀, с̂е гл҃етъ а҆дона́и г҃ь.
рцы̀ все́и пти́цы парѧ́щеи, и҆ къ всемꙋ̀ ѕвѣрю пльскомꙋ.
съберѣтесѧ, и҆ прїидѣте.
съберѣтесѧ ѿ всѣхъ ѻ́крс̑҇тныхъ е҆го на заколе́нїе е҆же закла́хъ вамъ, заколе́нїе ве́лїе на гора́хъ і҆и҆л҃евахъ.
да ꙗ҆стѐ мѧ́са, и҆ пїете кро́вь.
мѧ́са щюдовъ и҆зъꙗ҆стѐ, и҆ кро́вь кн҃ѕь зе́мныхъ и҆спие҆те.
ѻ́вны, и҆ телца, и҆ козлы, и҆ волы, и҆ пти́ць пито́мыхъ, и҆ вс̂и тꙋчнїи.
и҆ да ꙗ҆сте мѧса до сы́тости, и҆спїете кро́вь ѿ коле́нїѧ мое҆го е҆же закла́хъ.
и҆ насы́титесѧ ѿ трапе́зы мое́ѧ, ко́нѧ, и҆ кон꙽ника щюда, и҆ вс̂е мꙋжество во́инъско, гл҃етъ а҆дона́и г҃ь.
и҆ дамъ сла́вꙋ мою въ вас̑҇, и҆ ѹ҆зрѧ́тъ всѧ̀ страны̀ сꙋдъ мои и҆же сътвори́хъ, и҆ рꙋкꙋ мою ю́же наведо́хъ на́ нѧ.
и҆ ѹ҆вѣсть весь дом̑ і҆и҆л҃евъ ꙗ҆́ко а҆зъ е҆смь г҃ь б҃ъ и҆хъ, ѿ сего дн҃е и҆ проче·

И҆ ѹ҆вѣдѧтъ вс̂ѧ страны̀, ꙗ҆́ко грѣхъ ра́ди и҆хъ плѣне́ни бы́ша до́мъ і҆и҆л҃евъ.
понеж̑ ѿврьгошасѧ мене, и҆ ѿврати́хъ лицѐ свое ѿ ни́хъ, и҆ да́хъ ѧ҆̀ в рꙋцѣ враго́мъ и҆хъ, и҆ падо́ша мече́мъ вс̂и.
по нечистота́мъ и҆хъ, и҆ по мрьз̑скимъ грѣхо́мъ ѹ҆чини́хъ им̑, и҆ съкры́хъ лицѐ мое ѿ ни́хъ·

Того ра́ди с̂е гл҃етъ а҆дона́и г҃ь, нн҃ѣ въз꙽вращꙋ плѣн꙽ники і҆а́ковлѧ, и҆ поми́лꙋю домъ і҆и҆л҃евъ.
и҆ възревнꙋю и́мени ради мое҆го ст҃аго, и҆ во́змт̑ꙋ нече́стїе и҆хъ и҆ всѧ̀ непра́вды и҆хъ, ꙗ҆же неправдова́ша къ мнѣ̀.
е҆гда̀ в꙽селѧ́тсѧ на землѝ и҆хъ с ми́ромъ, и҆ не бꙋдет̑ постраша́ющаго.
внегда̀ въз꙽вращꙋ ѧ҆̀ ѿ стра́нъ, і҆ и҆зведꙋ ѧ҆̀ ѿ зе́мль и҆хъ.
и҆ ѻ҆свѧщꙋсѧ в нихъ предъ страна́ми, и҆ ѹ҆вѣдѧтъ ꙗ҆́ко а҆зъ е҆смь г҃ь б҃ъ их̑.
внегда̀ ꙗ҆влю́сѧ и҆мъ въ страна́хъ, и҆ съвокꙋплю ѧ҆̀ на́ землю и҆хъ, и҆ не ѻ҆ста́влю ѿ них꙽ та́мо ктомꙋ, и҆ не ѿвращꙋ лица свое҆го ктомꙋ ѿ нихъ.
зане́ же разлїѧхъ ꙗ҆́рость мою на до́мъ і҆и҆л҃евъ, гл҃етъ а҆дона́и г҃ь·

Глв̑҇а, м҃·

И бы́сть въ пѧ́тое междꙋ десѧтма лѣтома плѣне́нїа нашего, пѧ́того мс̑҇ца, въ десѧ́тыи дн҃ь мс̑҇ца.
въ четве́ртоенадесѧте лѣто по плѣне́нїи гра́дꙋ.

Въ то́и дн҃ь быс̑҇ на мнѣ рꙋка гн҃ѧ, и҆ веде м̂ѧ та́мо.
въ видѣнїи бж҃їи веде же м̂ѧ на́ землю і҆и҆л҃евꙋ.
и҆ поста́ви м̂ѧ на горѣ высо́цѣ ѕѣ́ло, на не́и же ꙗ҆́ко съгражде́нїе гра́да прѧ́мо полꙋ́дне.
и҆ въведе м̂ѧ та́мо.
и҆ с̂е мꙋж́ъ и҆ в꙽зоръ е҆го бѧ́ше ꙗ҆́ко видѣ́нїе мѣ́ди льща́щисѧ, и҆ въ рꙋцѣ е҆го връвь градѧ́щихъ, и҆ тростѧна мѣ́ра, то́иже стоѧ́ше ѹ҆ вра́тъ.
и҆ рече къ мнѣ мꙋжъ.
видѣ ли сн҃е чл҃чь.
ви́ждъ ѻ҆чи́ма свои҆ма, и҆ ѹ҆ши́ма свои҆ма слы́ши, и҆ ѹ҆чини въ срд̑цы свое҆мъ вс̂е е҆ли́коже тебѣ показаю а҆зъ, зане того ради влѣзлъ е҆смь сѣмо да т̂и покажꙋ.
и҆ ѹ҆ка́жеши т̂ы вс̂е е҆ли́ко ви́диши до́мꙋ і҆и҆л҃евꙋ·

И҆ с̂е ѻ҆гра́да внѣѹ҆́дꙋ ѻ҆́крс̑҇тъ хра́ма.
и҆ в рꙋцѣ мꙋжꙋ мѣ́ра тростѧна шести ла́ктъ и҆ пѧ́ди.
і҆ и҆змѣри в꙽нѣшнꙋю стѣнꙋ шириню ра́вно тро́сти, и҆ высотꙋ е҆го ра́вно тро́сти.
и҆ вни́де въ вра́та зрѧ́щаа на въсто́къ, сед̑мїю степе́нъ.
и҆змѣрити с̂е, ше́сть ѻ҆ сїю странꙋ, шесть же ѻ҆бо́нꙋ.
е҆ламъ две́рныи ра́вно тро́сти дол꙽готꙋ, и҆ широтꙋ ра́вно тро́сти.
е҆лам же и҆же средѣ ѳеи҆ла, шести ла́ктъ.
и҆ ѳе́е вторы́и ра́вно тро́сти, долготꙋ и҆ широтꙋ, е҆лам̑ же пѧти ла́ктъ.
и҆ тре́тїи ѳе́е ра́вно тро́сти, и҆ дол̑҇готꙋ и҆ широтꙋ.
е҆ла́м꙽ же вра́тныи, и҆же бли́зъ е҆ла́ма дво́рнаго, ѻ҆сми ла́кт꙽, е҆лам̑ же двою ла́ктꙋ.
е҆лам꙽ же ѹ҆́трьѹ҆дѣ две́рїи, и҆ ѳе́е две́рныи, прѧ́мо же ѳе́е, три ѻ҆ сїю странꙋ, три же ѻ҆бонꙋ, мѣра же е҆ді́на тремъ, мѣра е҆ді́на е҆ла́момъ ѻ҆́ба по́лы.
и҆ размѣри широтꙋ две́рнꙋю десѧти ла́ктъ, широта же вра́тнаѧ тринадесѧти лак꙽тъ, въ е҆ді́нъ ла́коть своди́ма.
прѧ́мо ѳе́е е҆ді́наго ла́кти.
ла́кти же предѣ́лъ ѻ҆́ба по́лы.
ѳе́е шести ла́ктіи ѻ҆ сїю странꙋ, и҆ шести лактъ ѻ҆боѝ с̂и и҆ по́лъ.
и҆ размѣри врата ѿ стѣны ѳе́е, до стѣны ѳе́е, широта ла́ктъ двою десѧтꙋ и҆ пѧти ла́ктъ, къ вра́томъ.
и҆ непокровен꙽ное е҆ла́м꙽ма внѣ вра́т꙽, шестидесѧт̑ ла́ктъ, два десѧ́ти ѳе́емъ ѿ врат̑ ѻ҆́крс̑҇тъ.
и҆ не покровен꙽ное двор꙽ца внѣ̀ непокровен꙽ное е҆ла́ма, ѹ҆́тръѹ҆́дѣ вра́тъ, пѧ́тьдесѧ́тъ ла́ктъ·

и҆ две́рца съкрове́ны къ ѳеи҆мъ и҆ къ е҆ла́мъ, ѹ҆́трьѹ҆́дѣ вра́тъ ѻ҆́крс̑҇тъ двор꙽ца.
та́кождеже и҆ е҆ла́момъ две́рца ѹ҆́трьѹ҆́дѣ ѻ҆́крс̑҇тъ, и҆зваѧ́нїа на е҆ла́мѣ ѻ҆́ба по́лы·

И҆ въведе м̂ѧ въ дво́ръ ѹ҆́трьнїи.
и҆ с̂е прегражд̑ены ста́ѧ и҆ сто́лпи ѻ҆́крс̑҇тъ двора.
прегражд̑енїи же тридесѧте въ столпх̑ѣ.
и҆ стаѧ на ю́жнаѧ вра́та по долготѣ вра́тнѣ сто́лпи до́лнїи.
и҆ размѣри широтꙋ дво́рнꙋю ѿ непокрове́наго двора ѹ҆́трьнѧго внѣѹ҆́дꙋ, къ непокровеномꙋ, вра́тъ зрѧ́щихъ на въсто́къ·

И҆ въведе м̂ѧ на сѣ́веръ ли́ць.
и҆ с̂е вра́та зрѧ́ща на сѣ́веръ врата внѣшнаѧ.
и҆ размѣри долготꙋ и҆хъ и҆ широтꙋ.
и҆ ѳее трѝ ѻ҆ сїю странꙋ, три же ѻ҆бо́нꙋ.
и҆ е҆лаѷ, и҆ е҆ламо́нъ, и́ ваѧ́нїѧ и҆хъ.
и҆ бы́сть по мѣ́рѣ врат̑ зрѧ́щихъ на въсто́къ, пѧтидесѧ́тъ лак꙽тъ дол꙽гота их̑, а҆ широта и҆хъ двꙋдесѧ́тꙋ и҆ пѧти лак꙽тъ.
и҆ дво́рца и҆хъ, и҆ е҆ламон꙽꙽, и҆ ваѧ́нїѧ и҆хъ, ꙗ҆́коже и҆ вра́тъ зрѧ́щихъ на въсто́къ.
и҆ сед̑мїю въсход̑ въсхождаа́хꙋ на́ нѧ, е҆ламо́нъ ѹ҆́трьѹ҆́дѣ.
вра́та же дворꙋ ѹ҆́трьнемꙋ ꙗ҆́коже и҆ вра́та зрѧ́щаѧ на въсто́к꙽.
и҆ размѣри дво́ръ ѿ вра́тъ до врат꙽ ла́ктъ ст̂о·

И҆ приведе м̂ѧ къ ю҆́гꙋ лицемъ.
и҆ с̂е вра́та зрѧ́ща на ю҆́гъ.
і҆ и҆змѣри ѧ҆̀ по ѳе́е и҆ е҆леѷ, и҆ е҆ламо́н꙽ по мѣ́рамъ симъ.
и҆ две́рца и҆хъ, и҆ е҆ламо́нъ по мѣрамъ тѣмъ.
и҆ дверца и҆хъ, и҆ е҆ламо́нъ ѻ҆́крс̑҇тъ, ꙗ҆́коже и҆ дверца т̂ꙋ е҆ла́мъ.
пѧтидесѧ́тъ ла́ктъ долгота и҆хъ, а҆ широта двꙋдесѧ́тꙋ и҆ пѧти ла́ктъ.
и҆ сед̑мъ въсхо́домъ и҆мъ.
и҆ е҆ла́мъ ѹ҆́трьѹ҆́дꙋ.
і҆ и҆зваѧ́нїѧ и҆хъ, е҆ді́на ѻ҆ сїю странꙋ, а҆ дрꙋга́ѧ ѻ҆бо́нꙋ къ е҆леѷвꙋ.
и҆ вра́та прѧ́мо вра́томъ и҆ двора ѹ҆́трънѧго на ю҆́гъ.
и҆ размѣри дво́ръ ѿ вра́тъ до врат̑ на ю҆́гъ, ст̂о ла́ктъ в широтꙋ·

И҆ въведе м̂ѧ въ дво́ръ ѹ҆́трьнїи вратъ ꙗ҆́же на ю҆́гъ.
и҆ размѣри вра́та ꙗ҆́же на ю҆́гъ по тм̑ѣже мѣ́рамъ.
ѳе́е и҆ е҆леѷ, и҆ е҆ламонъ по тѣмже мѣ́рамъ.
и҆ две́рца и҆хъ, и҆ е҆ламо́нъ ѻ҆́крс̑҇тъ, пѧтидесѧтъ ла́ктъ долгота и҆хъ, а҆ широта двꙋдесѧ́тꙋ и҆ пѧти ла́ктъ.
е҆ла́м꙽ же въ дворѣ внѣшнемъ, и҆ ваѧ́нїѧ е҆лаѷвꙋ.
и҆ сед̑мь въсход̑·

И҆ въведе м̂ѧ въ дво́рь зрѧ́щихъ на въсток꙽.
и҆ размѣри и҆̀ по мѣрамъ симъ.
и҆ ѳе́е и҆ е҆леѷ, и҆ е҆ла́мъ по мѣ́рамъ сим̑.
и҆ две́рца е҆го, и҆ е҆ла́мон̑҇ ѻ҆́крс̑҇тъ, пѧтидесѧтъ ла́ктъ долгота е҆го, а҆ широта е҆го двꙋдесѧ́тꙋ и҆ пѧти ла́ктъ.
и҆ е҆ла́мъ въ дворѣ ѹ҆́трьнѣмъ.
и҆ ваѧ́нїѧ на е҆леѷвѣ ѻ҆́ба по́лы.
и҆ ѻ́смь въсход̑ е҆мꙋ·

И҆ въведе м̂ѧ въ дво́ръ и҆же на сѣ́веръ ли́ць.
и҆ размѣри по мѣ́рамъ сим꙽.
и҆ ѳе́е, и҆ е҆леѷ, и҆ е҆лам̑ пѧтидесѧ́тъ ла́ктъ дол꙽гота е҆го, а҆ широта двꙋдесѧ́ти и҆ пѧти ла́кт꙽.
и҆ е҆ламъ въ ѹ҆́трьнѣмъ дворѣ, и҆ ваѧ́нїѧ е҆леѷвꙋ ѻ҆́ба по́лы.
и҆ ѻ́смь въсхо̑ е҆мꙋ.
прегра́ды е҆го и҆ дворца̀ е҆го, и҆ е҆ламо́нъ пред̑ вра́ты е҆го вторыми, и҆ раздо́лїе, т̂ꙋ и҆змыва́ютъ всесъж꙽же́нїа.
ѹ҆́трь же е҆лам̑ма вра́тнаго двѣ трапе́зѣ ѻ҆ сїю странꙋ, двѣ же ѻ҆бо́нꙋ, ꙗ҆́коже закла́ти нихъ всесъж꙽же́нїѧ, и҆ е҆же за грѣхи, и҆ за невидѣнїе.
и҆ в раздо́ли ꙗ҆́же на ю҆́гъ всесъж꙽же́нїи ѹ҆ две́рїи зрѧ́щихъ на сѣ́вер꙽꙽, двѣ трапе́зѣ.
на въсто́къ и҆ на ю҆́гъ в꙽торыхъ і҆ е҆ла́м꙽ма вратнаго дв̂ѣ трапеѕѣ на востокъ.
четы́ри ѻ҆ сїю странꙋ, четы́ри же ѻ҆бо́нꙋ.
ѹ҆ вра́тъ ꙗ҆́же на ю҆́гъ, на тѣхъ да закала́ютъ заколе́нїѧ, проти́вꙋ ѻ҆сми трапе́зъ заколе́нїи.
четы́ре же трапе́зы всесъж꙽же́нїи ка́мѧны и҆стесаны, въ долготꙋ ла́кти е҆ді́наго и҆ по́лъ, та́кожде же и҆ в широтꙋ, а҆ ла́кти въ высотꙋ.
на т̂ы да възлага́ютъ съсꙋды в нѧже закала́ютъ всесъж꙽же́нїѧ, и҆ заколе́нїѧ.
и҆ да и҆мѣ́ютъ ѻ҆гражде́нїе ма́ло и҆сте́сано пѧ́ди, ѹ́трьѹ́дѣ ѻ́крс̑҇тъ.
врьхꙋ же трапе́зы покро́въ, покрыва́тисѧ и҆мъ ѿ до́жда и҆ зно́ѧ·

И҆ въвеведѐ м̂ѧ въ дво́ръ ѹ́трьнїи.
и҆ се дв̂ѣ прегра́дѣ въ ѹ́трьнѣмъ дворѣ̀, е҆дїна̀ на юг̑҇ ѹ҆ вра́тъ зрѧ́щихъ на сѣ́веръ и҆ въводѧ́щаѧ на ю́гъ.
а҆ дрꙋга́ѧ на сѣвер̑҇ ѹ҆ вра́тъ зрѧ́щихъ на ю́гъ а҆ въводѧ́щаѧ к꙽ сѣверꙋ·

И҆ рече къ мнѣ̀, прегра́да сїѧ ꙗ҆же ѕритъ на ю́гъ, жръце́мъ е҆сть и҆же стрегꙋтъ стражбꙋ̀ хра́ма.
а҆ прегра́да ꙗ҆́же ѕри́тъ к꙽ сѣверꙋ, жръце́мъ е҆сть стрегꙋщимъ тре́бникъ.
тїи сꙋть сн҃ове садо́кови, пристꙋпа́ющеи ѿ левѷѧ къ гв҃и слꙋжи́ти е҆мꙋ·

и҆ размѣ́ри дво́ръ ст̂а лак꙽тъ в꙽ долготꙋ̀, и широтꙋ ст̂а лак꙽тъ на четы́ре ча́сти е҆го.
и҆ требникъ прѧмо хра́мꙋ·

И҆ въведе мѧ въ е҆ла́мъ храмныи.
и҆ размѣри е҆лам̑а пѧти лак꙽тъ широтꙋ̀ ѻ҆ е҆ді́нꙋ странꙋ̀, пѧти же лак꙽тъ ѻ҆бонꙋ.
широта́ же две́рнаа четыренадесѧть лак꙽тъ.
и҆ под̑бо́ѧ двернаѧ е҆лам̑ма, три ла́кти ѻ҆сюю странꙋ̀, три же ѻ҆бонꙋ.
длъгота̑ е҆лам̑ма двадесѧть лак꙽тъ, а҆ широта̀ а҃і лак꙽тъ.
и҆ е҆ді́нънадесѧте степен̑҇ въсхожд̑ахꙋ к немꙋ.
и҆ сто́лпи бѣа́хꙋ ѹ҆ е҆ла́мъ, е҆ді́нъ ѻ҆ сїю странꙋ̀ а҆ дрꙋгїи ѻ҆бонꙋ·

Глв̑҇а, м҃а·

И въведе мѧ въ хра́мъ, и҆ раз̑мѣри е҆лам̑, шести лактъ широтꙋ̀ ѻ҆сю́ю странꙋ̀, шести же ла́ктъ широтꙋ ѻ҆бонꙋ, и҆ широтꙋ врат̑нꙋю десѧт̑ лактъ.
и҆ вра́тницы вра́томъ пѧти ла́ктъ ѻ҆сю́ю странꙋ, пѧти́ же ѻ҆бонꙋ.
і҆ и҆змѣри длъготꙋ̀ е҆го м҃ лак꙽тъ, а҆ широтꙋ̀ к҃ лак꙽тъ.

И҆ вни́де въ дво́ръ ѹ́трьнїи.
и҆ разъмѣри е҆ла́мъ дворныи двꙋ ла́ктꙋ, а҆ две́ри шести лак꙽тъ, а҆ подбо́ѧ дверныѧ седмїю ла́ктъ ѻ҆сю́ю странꙋ̀, сед꙽ми же ѻ҆бонꙋ.
и҆ размѣри длъготꙋ̀ двернꙋю м҃ лак꙽тъ, а҆ широтꙋ̀ к҃ ла́ктъ пред̑ лицем̑ хра́мꙋ·

И҆ рече къ мнѣ̀, с̂е ст҃ое ст҃ыхъ.
и҆ размѣ́ри стѣнꙋ̀ хра́ма шести лактъ и҆ широтꙋ̀ страннꙋю д҃ лактъ ѻ҆́крс̑҇т꙽.
страна́ же, стра́нꙋ до страны̀, тридесѧть и҆ трѝ два́щи.
и҆ межд̑ина̑ въ стѣнѣ̀ хра́мнѣи в꙽ страна́хъ ѻ҆́крс̑҇тъ, ꙗ҆коже на прозра́къ бы́ти в꙽ходѧ́щимъ, да ѿнꙋдь не пристꙋпа́ютъ къ стѣнѣ̀ хра́мнѣи.
широта́ же внѣшнѧѧ страны̀ по приложе́нїю ѿ стѣны̀ къ вы́шнѣи ѻ́крс̑҇тъ храма.
ꙗ҆́коже да сѧ раширѧ́етъ съвы́ше.
и҆ да ѿ до́лнихъ въсхо́дѧтъ на помосты, а҆ ѿ сре́днихъ къ трикровнымъ.
и҆ ѳрае҆лъ хра́мныи высота̀ ѻ́крс̑҇тъ, межд̑а стран꙽наѧ ра́вно трости шести ла́ктъ межд̑а, широта́ же стѣны̀ стран꙽ныѧ внѣ̀ѹ́дѣ пѧти ла́ктъ.
и҆ про́чаѧ междꙋ стра́нъ хра́мныхъ.
и҆ меж꙽дꙋ прегра́дами широта̀ десѧти ла́ктъ ѻ҆бѣмо ѻ́крс̑҇тъ хра́ма.
двери же преград̑ къ про́чемꙋ, две́ремъ ꙗ҆́же къ сѣверꙋ, двери же е҆ді́ны къ ю́гꙋ.
широта́ же къ свѣтꙋ про́чаго пѧти ла́ктъ широта̀ ѻ́крс̑҇тъ.
предѣ́л же проти́вꙋ про́чемꙋ е҆же къ морю, о҃ лак꙽тъ широта̀ стѣны̀.
предѣлѧ́ющаѧ широта̀ ѻ́крс̑҇т꙽, и҆ длъгота̀ е҆го ч҃ лак꙽тъ.
и҆ размѣри проти́вꙋ хра́мꙋ ст̂а лак꙽тъ.
и҆ про́чаѧ и҆ предѣлѧ́ющаѧ, и҆ стъны и҆хъ и҆ дол̑҇гота̀ ст̂а лак꙽тъ.
и҆ широта̀ проти́вꙋ хра́мꙋ, и҆ прочаѧ противꙋ, ст̂а лак꙽тъ.
и҆ размѣри длъготꙋ̀ предѣлꙋ проти́вꙋ лицꙋ про́чномꙋ съза́ди хра́мꙋ томꙋ, и҆ прочаѧ ѻ҆сю́ю странꙋ и҆ ѻ҆бо́нꙋ, ст̂а лак꙽тъ длъготꙋ.
хра́м же и҆ стѣны, е҆ла́мъ внѣшнїи, и҆ доскы ваѧ́ныѧ, и҆ дверца стѣны сщ҃енїѧ ѻ҆́крс̑҇тъ трем꙽, ꙗ҆́коже прекланѧ́тисѧ.
храм꙽ же и҆ еже близъ е҆го ѻ҆граждено дре́вомъ и҆ ѻ́крс̑҇тъ пожд̑ь, ѿ по́да же до дверецъ, дверца же ѻ҆творѧ́емы троѧ́ко на прекланѧ́нїе.
и҆ до близъ ѹ́трьнѧго, и҆ до внѣшнѧго.
и҆ на все́и стѣнѣ ѻ҆́крс̑҇тъ, и҆ на ѹ́трьнѣмъ, и҆ на внѣшнемъ мѣри.
і҆ и҆зваѧ́ни херꙋвими, н̂и и҆зваꙗ҆́нїѧ, н̂и ваѧ́нїе ѻ҆ба полы·

лице же чл҃чьско къ ваꙗ҆нїю ѻ҆́ба полы, и҆ лице л꙽вово къ ваѧ́нїю ѻ҆ба полы и҆зваѧн̑҇ весь храм̑ ѻ́крс̑҇тъ.
ѿ по́жда до до́скъ преградных̑, херꙋвим̑ и҆ ваѧ́нїѧ и҆зваѧна.
ст҃ое҆ же, и҆ хра́мъ ѿврьза́емъ на четыри страны̀.
пред̑ лицем̑ ст҃ыхъ видѣнїе ꙗ҆́ко зра́къ.
тре́бника древѧ́на, три ла́кти высота̀ е҆го, а҆ долгота̀ двꙋ лактꙋ, широта̀ же та́кожд̑е.
и҆мѣѧ́ше же и҆ ѹ́глы и҆ степени е҆го, и҆ стѣны и҆хъ древѧны·

И҆ рече къ мнѣ̀, с̂и трапе́за ꙗ҆́же пред̑ лицемъ гн҃имъ.
двою же две́ри хра́мꙋ, и҆ ст҃омꙋ дво́ѧ двери, двои҆мъ дверемъ ѻ҆браща́ющимсѧ.
и҆ дв̂ѣ две́ри е҆ді́нѣмъ, двѣ́ же вторы́мъ дверемъ.
хра́мнїи же херꙋвим̑ и҆ ваѧ́нїѧ, по ваѧ́нїи ст҃ыхъ, и҆ древеса̀ бл҃га прд̑е лицемъ е҆ла́м꙽мꙋ внѣ̀ѹ́дѣ, и҆ дверца съкрове́ны.
и҆ разъмѣ́ри ѻ҆́ба полы въ покро́вѣх꙽ е҆лам̑мꙋ, и҆ страны̀ храмꙋ съпрѧ́жены·

Глв̑҇а, м҃в·

И въведе мѧ въ дво́ръ внѣшнїи на восто́ки проти́вꙋ вра́том̑ ꙗ҆же къ сѣ́верꙋ.
и҆ въведе мѧ ѹ́трь, и҆ с̂е преград̑ шесть, пѧть дръжа́щасѧ про́чаг̑҇, и҆ дръжа́щасѧ предѣла и҆же к꙽ сѣ́верꙋ.
противꙋ лицꙋ̀, ст̂а лак꙽тъ длъгота къ сѣ́верꙋ, а҆ широта̀ н҃ лак꙽тъ.
въпи́саны ꙗ҆́ко и҆ вра́та двора ѹ́трьнѧго, и҆ ꙗ҆́ко ѻ҆столпле́нїе внѣшнѧго двора̀.
врѧ́жены сꙊть лицемъ стаѧ тр̂и.
ꙗ҆́же проти́вꙋ прегра́дам̑ проходъ десѧти лак꙽тъ в широтꙋ̀, въ ѹ́трьнїи въхо́дъ е҆ді́наго лак̑҇ти, ст̂а лак꙽тъ длъгота̀.
и҆ две́ри и҆хъ къ сѣверꙋ, и҆ прохо́ди помостни та́кожде, ꙗ҆́ко и҆звержесѧ ѻ҆стол꙽пле́нїе и҆з не́го ѿ долѣшнѧго ѻ҆стол̑҇пле́нїа, и҆ межд̑а си́це стаѧ̀.
и҆м꙽же трегꙋбъ бѧ́хꙋ и҆ стол꙽пъ не и҆мѣша, ꙗ҆́коже и҆ сто́лпи прегра́дъ.
того ради и҆зъмлѧ́хꙋ и҆з ни́зꙋ и҆ сред̑нихъ ѿ землѧ̀ пѧтидесѧ́тъ лак꙽тъ.
и҆ свѣтъ внѣ̀ѹ́дѣ, ꙗ҆́коже и҆ прегра́да двора̀ внѣшнѧго ѕрѧ́щаѧ противꙋ прегра́дамъ ꙗ҆́же къ сѣверꙋ.
длъгота̀ пѧтидесѧтъ лак꙽тъ.
ꙗ҆ко длъгота̀ преград̑ ѕрѧ́щихъ въ дво́ръ внѣшнїи бѧше пѧтидесѧтъ лак꙽тъ.
т̂ы сꙋть съли́чнаѧ тм̑ѣ, все́ же ст̂а лак꙽тъ.
двери же предгра́дъ тѣхъ въхо́да и҆же на восто́ки, ꙗ҆́коже въходи́ти и҆ми ѿ двора̀ внѣшнѧго.
по свѣтꙋ тѣхъ на лицѐ ю́гꙋ, и҆ прѧ́мо про́чнаго и҆ прегра́ды.
и҆ прохо́ди проти́вꙋ лицꙋ и҆хъ, по мѣрамъ ꙗ҆́же къ сѣверꙋ.
по длъготѣ̀ и҆хъ, и҆ по широтѣ и҆хъ.
и҆ по всѣмъ и҆схо́домъ и҆хъ, и по всѣмъ ѻ́братомъ и҆хъ, и҆ по две́ремъ и҆хъ преград̑ ꙗ҆́же къ югꙋ.
и҆ по дверемъ ѿ ко́нца проходꙋ а҆ки къ свѣтꙋ межда тро́сти и҆ на восто́къ ꙗ҆́коже входи́ти и҆ми·

И҆ рече къ мнѣ̀, ше́сть прегра́дъ ꙗ҆́же къ сѣверꙋ, и҆ прегра́дъ ꙗ҆́же къ ю́гꙋ сꙋщаѧ противꙋ лицꙋ ме́ждъ.
т̂ы сꙋть прегра́ды ст҃аго.
в ни́х же да ꙗ҆́да́ютъ жръцы̀ сн҃ове садо́кови, и҆же пристꙋпа́ютъ къ гв҃и въ ст҃аа ст҃ыхъ.
и҆ т̂ꙋ пожрꙋтъ въ ст҃аѧ ст҃ыхъ, тре́бꙋ е҆же за грѣхѝ и҆ е҆же за невѣдѣнїе, поне́же мѣсто ст҃о.
да не въхо́дѧт꙽ та́мо ра́звѣ жерцы̀.
да не въхо́дѧтъ ѿ ст҃аго въ дворъ внѣшнїи, ꙗ҆коже прс̑҇но да бꙋдꙋтъ ст҃и приносѧ́щеи, и҆ да сѧ не прикаса́ю҆тъ ри́зѣ и҆хъ в ни́хже слꙋжать, понеже ст҃ы сꙋть.
н̂о да ѻ҆блекꙋтсѧ в ри́зы и́ны, е҆гда прикаса́ютсѧ лю́дехъ·

И҆ съвръшисѧ размѣре́нїе хра́ма ѹ́трьѹ́дѣ.
і҆ и҆зведе мѧ по пꙋтѝ вра́тномꙋ ѕрѧ́щихъ на восто́къ, и҆ размѣри сказанїе хра́ма̑ ѻ҆́крс̑҇тъ съ заповѣдїю.
и҆ ста̀ на ю́гъ вра́тъ зрѧ́щихъ на востокъ, и҆ размѣри пѧть сот꙽ тростїю мѣрною.
и҆ ѻ҆брати́сѧ на сѣверъ, и҆ размѣри на лицѐ сѣвера, лак꙽тъ пѧ́тьсотъ тростїю мѣрною.
и҆ ѻ҆брати́сѧ къ мо́рю, и҆ размѣри на лицѐ мо́рѧ, пѧтьсо́тъ тростїю мѣрною.
и҆ ѻ҆брати́сѧ на ю́гъ, и҆ размѣри противꙋ ю́гꙋ, е҃ сотъ тростїю мѣрною.
на четыри страны̀ тою́жъ тро́стїю и҆ заповѣда и҆ ѻ҆гра́дꙋ ѻ́крс̑҇тъ е҆мꙋ, пѧтїю со́тъ ла́ктъ долготꙋ, пѧти со́т же лак꙽тъ широтꙋ.
разлꙋчи́ти междꙋ ст҃ыми и҆ прегражде́нїемъ е҆же ѻ́крс̑҇тъ хра́ма·

Глв̑҇а, м҃г·

И въведе мѧ къ вра́томъ зрѧ́щимъ на восто́ки.
і҆ и҆зведе мѧ.
и҆ с̂е сла́ва бг҃а і҆и҆л҃ева грѧдѧ́ше по пꙋтѝ и҆же на востокъ.
и҆ гла́съ плъ́ка а҆ки глс̑҇а сꙋгꙋбыхъ мно́гъ, и҆ землѧ̀ свѣтѧ́шесѧ а҆ки свѣтъ ѿ сла́вы е҆го ѻ́крс̑҇тъ.
и҆ видѣнїе е҆же ви́дѣхъ по ѻ́бразꙋ и҆же ви́дѣхъ, е҆гда въхожда́хъ пома́зати гра́дъ.
и҆ видѣнїе же ѻрꙋжїѧ подобѧ́шесѧ видѣ́нїю, е҆же ви́дх̑ѣ на рецѣ хова́рѣ.
а҆бїе же ви́дѣвъ падо́хъ.
сла́ва же гн҃ѧ вни́де въ хра́мъ по пꙋтѝ вра́тномꙋ зрѧ́щихъ на востокъ·

И҆ взѧ́ мѧ дх҃ъ, и҆ въведе́ мѧ въ двор꙽ ѹ́трьнїи.
и҆ с̂е плънъ сла́вы домъ гнь.
и҆ ста́хъ, и҆ с̂е гла́съ ѿ хра́ма гл҃ющаго къ мн̂ѣ.
и҆ мꙋжъ стоѧ́ше дръжа́сѧ менѐ.
и҆ рече къ мн̂ѣ.
сн҃е чл҃чь, ви́дѣ ли мѣсто прс̑҇тла мое҆го, и҆ мѣсто стопы̀ ногꙋ моею, и҆деже всели́тсѧ и́мѧ мое средѣ домꙋ і҆и҆л҃ва̑ въ вѣкъ·

И҆ не ѻ҆сквернѧ́тъ ктомꙋ и́мени мое҆го ст҃ого домъ і҆и҆л҃евъ, тїи и҆ старѣ́ишины и҆хъ съблꙋже́нїемъ, и҆ съгрѣшенїи ста́рѣишинъ и҆хъ средѣ и҆хъ·

Вънегда̀ полага́шесѧ прд̑едверїе мое въ прд̑едве́рїи и҆хъ, и҆ пра́ѕи моѝ дрьжа́щесѧ пра́гъ и҆хъ.
и҆ да́ша стѣнꙋ̀ мою ꙗ҆́ко дръжа́щꙋюсѧ мене, и҆ ѻ́нѣхъ.
и҆ ѻ҆скверниша и́мѧ мое ст҃ое въ безаконїихъ е҆же творѧ́хꙋ.
и҆ скончах̑ ѧ҆̀ въ ꙗ҆́рости мое́и ѹ҆бо́емъ.
и҆ нн҃ѣ да ѿри́нꙋтъ блꙋже́нїе их̑, и҆ ѹ҆боѧт̑сѧ старѣ́ишины их̑ ѿ менѐ, и҆ вселю́сѧ средѣ и҆хъ въ вѣкъ·

Ты́ же сн҃е чл҃чь, скажи домꙋ і҆и҆л҃евꙋ хра́мъ.
и҆ да помлъкнꙋтъ ѿ грх̑ѣ свои҆хъ.
и҆ видѣнїе е҆го и҆ заповѣди е҆го.
тїи же да во́змꙋтъ мꙋ́кꙋ всего мѣсто е҆же сътвори́ша.
и҆ да въпи́шеши хра́мъ, и҆ ѹ҆готова́нїе е҆го, і҆ и҆схо́ды е҆го, и҆ въхо́ды е҆го, и҆ бытїе е҆го, и҆ всѧ̀ повелѣнїѧ е҆го, и҆ вс̂ѧ зако́ны е҆го съвѣсти́ши и҆мъ.
и҆ да въпи́шеши прд̑е ними, и҆ снабдѧ́тъ вс̂ѧ ѻ҆правда́нїѧ моѧ, и҆ сътворѧт̑ ѧ҆̀.
и҆ въ писа́нїи хра́ма на врьхꙋ̀ горы̀ вс̂ѧ предѣлы е҆го ѻ́крс̑҇т꙽, ст҃аѧ ст҃ых̑ сꙋть·

с̂е зако́нъ хра́ма·

се́же мѣры тре́бника лактемъ, дв̂ꙋ ла́ктꙋ и҆ пѧ́ди.
ꙗ҆дро же и҆ глꙋбина̀ ла́кти, широта́ же толи́ка же.
и҆ ѻ҆гражд̑енїе ѹ́стїѧ е҆мꙋ ѻ́крс̑҇тъ, пѧ́ди·

се же высота̀ требника·

ѿ глꙋбины нача́ла вдоле́нїѧ е҆го къ ѻ҆цысти́лꙋ вели́комꙋ.
сеже поди, дв̂ꙋ лактꙋ.
а҆ ѿ ѻ҆цысти́ла малого къ ѻ҆цысти́лꙋ великомꙋ ла́кти д҃, и҆ широта̀ ла́кти.
и҆ а҆рїиль, д҃ ла́ктъ.
а҆ ѿ а҆рїила и҆ вы́ше ѹ́гла лак꙽тъ.
а҆ а҆рїиль, в҃і лак꙽тъ въ дол̑҇готꙋ, и҆ в҃і лак꙽тъ в широтꙋ.
на четы́ре ѹ́глы на четыре ча́сти е҆го.
цысти́ло же д҃і лак꙽тъ въ дол̑҇готꙋ̀, и҆ д҃і лак꙽тъ широта̀.
на четы́ре ѹ́глы на четыре ча́сти е҆го.
и҆ въ ѻ҆гражде́нїе е҆ю̀ ѻ́крс̑҇тъ ѻ҆бдержа́ѧ полъ ла́кти, и҆ ѻ҆бдержа́нїе е҆го лак̑҇ти ѻ҆́крс̑҇тъ.
и҆ степе́ни е҆го зрѧ́ща на востокъ·

И҆ рече къ мн̂ѣ, сн҃е чл҃чь, с̂е гл҃етъ г҃ь б҃ъ і҆и҆л҃евъ.
с̂е за́повѣди требника, въ дн҃ь сътворенїѧ е҆го.
ꙗ҆́коже възноси́ти всесъж꙽же́нїѧ и҆ блюстѝ ѻ҆ кро́ви.
и҆ дасѝ жръцемъ и҆ левѷтомъ, и҆же ѿ племени сꙋть садо́кова, пристꙋпа́ющим̑ къ мн̂ѣ.
гл҃етъ г҃ь б҃ъ, ꙗ҆́коже слꙋжи́ти мн̂ѣ, те́лець ѿ говѧ́дъ за грѣхъ.
и҆ да возмꙋтъ ѿ кро́ви е҆го, и҆ да възло́жат̑ на четы́ре ѹ́глы тре́бникꙋ, и҆ на четыре части цысти́лꙋ, и҆ ѻ҆ степени ѻ́крс̑҇тъ.
и҆ да ѻ҆кропи́ши е҆ю̀.
и҆ да во́змꙋтъ те́лець и҆же за грѣхъ, и҆ да съж꙽же́тсѧ въ ѿлꙋченм̑ѣ храмѣ вн̂ѣѹ́дѣ ст҃ыхъ.
а҆ въ вторы́и дн҃ь да по́имꙋтъ дв̂а ко́злища ѿ ко́зъ непоро́чен꙽, за грѣхъ.
и҆ да ѻ҆цыстѧт̑ требникъ, ꙗ҆́коже ѻ҆цысти́ша и҆̀ те́лцемъ.
и҆ ꙗ҆́ко ско́нчаютъ ѻ҆цыще́нїе.
да принесꙋтъ телецъ ѿ говѧдъ непороченъ, и҆ ѻ́венъ ѿ ѻ҆вець непороченъ, и҆ да принесꙋтъ прд̑е г҃а.
и҆ да възве́ргꙋтъ на нѧ жръцы со́ль, и҆ да възнесꙋтъ ѧ҆̀ гв҃и всесож꙽же́нїа.
седмь дн҃ъ да сътво́риши ко́злищ꙽ за грѣхъ вс̂ѧ дн҃и, а҆ те́лець ѿ говѧ́дъ, а҆ ѻ́венъ ѿ ѻ҆вець непорочен̑҇, и҆ да сътворѧтъ вс̂ѧ дн҃и.
и҆ да ѻ҆цы́стѧтъ тре́бник꙽, и҆ да ѻ҆цы́стѧт̑ и҆̀, и҆ да наплънѧтъ рꙋкꙋ е҆го.
и҆ да скон̑҇ча́ютъ се́дмь дн҃їи·

И҆ бꙋдетъ по ѻ҆смѣмъ дн҃и, и҆ потом̑.
да сътворѧт̑ жръцы̀ всесъж꙽же́нїѧ ваша, і҆ е҆же сп҃сенїа вашего.
и҆ прїимꙋ̀ в̂ы, гл҃етъ г҃ь·

Глв̑҇а, м҃д·

И ѻ҆брати м̂ѧ на пꙋть вра́т꙽ ст҃ыхъ внѣшнихъ, зрѧ́щихъ на восто́къ.
та́же бѣхꙋ заключен̑҇на.
и҆ рече ко мнѣ̀, т̂а врата заключен̑҇на бꙋдꙋтъ.
и҆ не ѿвр́ьзꙋтсѧ.
и҆ никтож̑ не про́идетъ и҆́ми.
ꙗ҆́ко г҃ь б҃ъ і҆и҆л҃въ вни́детъ и҆́ми, и҆ бꙋдꙋтъ заклю́чен꙽на·

занѐ старѣ́ишина то́и сѣдит̑ в нихъ, ꙗ҆́сти хлѣбъ пред̑ гм҃ъ.
по пꙋтѝ е҆ла́мъ вра́тномꙋ вни́детъ, и҆ по пꙋти е҆го и҆зы́идет꙽·

И҆ въведе мѧ по пꙋти вра́тъ, ꙗ҆́же къ сѣверꙋ прѧ́мо хра́мꙋ.
и҆ с̂е по́лнъ сла́вы до́мъ гн҃ь·

и҆ падо́хъ ниць на лицы свое҆мъ·

И҆ ре́че г҃ь къ мнѣ̀, сн҃е чл҃чь вчини въ срд̑цы свое҆мъ, и҆ ви́ждь ѻ҆чима, и҆ ѹ́шима, слы́ши вс̂е е҆ли́коже а҆зъ гл҃ю с тобо́ю по всемꙋ повелѣнїю хра́ма гн҃ѧ, и҆ всѧ̀ зако́ны е҆го.
и҆ ѹ҆чиниши срд̑це свое на пꙋтѝ хра́ма̑, по всѣмъ пꙋтемъ е҆го въ всх̑ѣ ст҃ых̑.
и҆ речеши, къ до́мꙋ гнѣ́вающемꙋ м̂ѧ къ домꙋ і҆и҆л҃евꙋ·

Се гл҃етъ г҃ь б҃ъ і҆и҆л҃евъ, довлѣт꙽ в̂ы ѿ всего̀ безако́нїѧ до́ме і҆и҆л҃евъ, ꙗ҆́коже въвести вам̑ сн҃ы и҆ноплемен꙽ник̑҇ неѻ҆брѣзаны срд̑цем̑ и҆ неѻ҆брѣзаны плотїю, ꙗ҆́коже бывати и҆м꙽ въ ст҃ых̑, и҆ ѻ҆сквернавлѧ́хꙋ ст҃аѧ моѧ̀.
внегда̀ прино́сите в̂ы хлѣбы, ло́и и҆ мѧса.
и҆ престꙋпа́сте завѣт꙽ мо́и въ всѣхъ безако́нихъ ва́ших̑.
и҆ не снабдѣша снабдѣнїѧ ст҃ых̑ моих̑.
и҆ заповѣ́дасте снабдѣнїѧ снабдѣва́ти ст҃ыхъ мои҆хъ·

Того ради с̂е гл҃етъ а҆дона́и г҃ь, весь сн҃ъ и҆ноплемен꙽никь неѻ҆брѣ́занъ срд̑цемъ, и҆ пло́тїю, да не вни́детъ въ ст҃аѧ моѧ̀.
ꙗ҆́же въ всѣхъ сн҃овѣхъ и҆ноплемен꙽ничестѣхъ, и҆же сꙋть средѣ до́мꙋ і҆и҆л҃ева.
н̂о и҆ левѷте и҆же сѧ ѿвръгоша мене, е҆гда̀ прелща́шесѧ і҆и҆л҃ь.
и҆же прельстишасѧ ѿ менѐ въ слѣдъ по́мыслъ свои҆хъ, и҆ во́змт̑ꙋ непра́вдꙋ свою.
и҆ бꙋдꙋтъ слꙋжа́ще въ ст҃ыхъ мои҆хъ, врата́ри ѹ҆ дверїи хра́мꙋ, слꙋжащеи хра́мꙋ.
тїи да закала́ютъ вс̂есъж꙽женїѧ, и҆ требы лю́демъ.
и҆ тїи да ста́нꙋтъ предъ люд̑ми слꙋжи́ти и҆мъ, поне́же и҆ слꙋжаша и҆мъ пред̑ лицемъ кꙋмир꙽ском̑.
и҆ бы́сть до́мꙋ і҆и҆л҃евꙋ въ мꙋченїе непра́вды.
того ра́ди въз꙽двигохъ на нѧ рꙋкꙋ свою, гл҃етъ г҃ь б҃ъ і҆и҆л҃въ, и҆ во́змꙋтъ безако́нїе свое.
и҆ не пристꙋ́пѧт̑ къ мнѣ̀ слꙋжи́ти мнѣ, н̂и приноси́ти къ ст҃ым̑ ст҃ых̑.
и҆ воз̑мꙋтъ безако́нїе свое въ прельщенїи е҆же сѧ прельсти́ша.
и҆ ѹ҆чинитъ ѧ҆̀ снабдѣти стра́ж꙽бы хра́ма на всѐ дѣло е҆го, и҆ на всѐ е҆же тво́рѧтъ.
жер꙽цы и҆ левѷти сн҃ове садо́кови, и҆же снабдѣша снабдѣнїѧ моѧ̀ и҆ пꙋтѝ моѧ, е҆гда̀ прельщашесѧ дом̑ і҆и҆л҃евъ ѿ мене.
сїи да прино́сѧтъ слꙋж́бы къ мнѣ̀.
и҆ ста́нꙋтъ пред̑ лицем̑ моим̑, приноси́ти мнѣ тре́бꙋ ло́и и҆ кровь, гл҃етъ а҆дона́и г҃ь.
сїи пристꙋпѧ́тъ къ трапеѕѣ мое́и слꙋжити мнѣ̀, и҆ снабдѧ́тъ снабдѣнїѧ моа̀.
и҆ бꙋдет̑ внегда̀ въхо́дѧтъ въ вра́та двора̀ ѹ҆́трьнѧго, въ ры́зы платнѧ́ны да сѧ ѻ҆блекꙋтъ.
да сѧ не ѻ҆блекꙋтъ в сꙋкнѧ́ны, е҆гда̀ слꙋжатъ ѿ вра́тъ двора̀ ѹ҆́трьнѧго.
клобꙋки плат꙽нѧ́ны да и҆́мꙋтъ на глава́хъ своих̑, и҆ препоа́санїѧ платнѧ́на да и҆мꙋт꙽ на чреслѣхъ свои҆хъ, и҆ да не препоѧ́шꙋтсѧ крѣп꙽ко.
и҆ е҆гда̀ и҆схо́дѧтъ къ лю́демъ въ внѣшнїи дво́ръ, да съвлекꙋтъ ри́зы в ни́хже тїи слꙋжат꙽, и҆ да положа́тъ ѧ҆̀ въ ст҃аѧ ст҃ыхъ.
и҆ ѻ҆блекꙋтсѧ в ри́зы и҆́ны·

и҆ да не ѻ҆ст҃ѧ́тъ лю́дїи ри́зами их̑.
и҆ гла́въ свои҆хъ да не ѻ҆бръснꙋтъ, и҆ вла́съ свои҆хъ да не растѧ́тъ.
покрыва́юще покрыва́ютъ гла́вы своѧ̀, и҆ вина̀ да не пїетъ всѧ́къ жре́цъ, е҆гда̀ въхо́дитъ въ ѹ҆́трьнїи двор꙽·

и вдови́ца, и҆ пꙋщеница, да не пое҆́млютъ себѣ̀ женѣ, н̂о дв҃цю ѿ племе́ни до́мꙋ і҆и҆л҃ева.
и҆ а́ще бꙋдет̑ в꙽дова жерча́ѧ, да ю҆̀ по́иметъ·

и҆ лю́ди моа̀ да нака́жꙋтъ разлꙋчи́ти междꙋ ст҃ымъ и҆ сквернавымъ, и҆ междꙋ чи́стымъ и҆ нечи́стымъ совѣстѧтъ им̑.
и҆ расꙋжденїе ѻ҆ кро́ви.
да ѹ҆ста́вѧтъ, ꙗ҆́ко расꙋжда́ти ѻ҆правда́нїѧ моѧ̀.
и҆ зако́ны моѧ̀, и҆ повелѣнїѧ моа въ всѣхъ празд̑ницех̑ мои҆хъ снабдѧ́тъ, и҆ сꙋбо́ты моѧ̀ ѻ҆ст҃ѧт꙽·

и҆ на дш҃ю чл҃чьскꙋ не прїидꙋтъ ѻ҆скверна́витисѧ.
н̂о точїю над̑ ѿц҃ъ и҆ мт҃ре, и҆ сн҃а и҆ дще́ре, и҆ бра́та и҆ сестрꙋ ꙗ҆́же не посѧгла̀ за мж̑ꙋ ѻ҆скверни́тсѧ.
и҆ по ѻ҆чище́нїи е҆го, сед̑мъ дн҃ъ да сочтетъ себѣ̀.
и҆ вон꙽же въхо́дѧтъ въ дво́ръ ѹ҆́трьнїи слꙋжити ст҃ыни мое́и, да принесꙋтъ ѻ҆чищенїе, гл҃етъ г҃ь б҃ъ·

и҆ не бꙋдет̑ им̑ въ прича́стїе, а҆зъ им̑ прича́стїе.
да сѧ не дастъ и҆мъ ча́сть въ сн҃овѣх꙽꙽ і҆и҆л҃евѣх꙽, ꙗ҆ко а҆зъ ча́сть их̑.
тре́бы и҆ е҆же за грѣхи и҆ за видѣнїе, сїи да ꙗ҆дѧтъ·

и҆ все нарече́нное въ і҆и҆л҃и тѣмъ да бꙋ́детъ, приносъ всѣхъ и҆ прьвенцы всѣх꙽, и҆ ѹ҆ча́стїѧ вс̂ѧ, ѿ всѣхъ прино́съ ва́шихъ жерцем꙽ да бꙋдетъ·

и҆ нача́токъ жи́та ва́шего да да́сте жерцꙋ, ꙗ҆́коже положи́ти блс̑҇ве́нїа въ домх̑ѣ ва́шихъ.
всеѧ мер꙽твечины и҆ ѕвѣ́роꙗ҆́дины ѿ птиць и҆ ѿ скот̑, да не ꙗ҆дѧт̑ жерцы·

Глв̑҇а, м҃е·

И е҆гд̑а размѣрѧ́ете зе́млю на ча́сти.
да ѿлꙋчите нача́токъ гв҃и ст҃о ѿ землѧ̀, въ долготꙋ̀ двꙋдесѧ́тꙋ и҆ пѧти ти́сѧщъ ла́ктъ, а҆ в широтꙋ̀ десѧти ти́сѧщь лак̑҇тъ, ст҃о да бꙋ́детъ въ всѣхъ предѣ́лехъ е҆го ѻ҆́крс̑҇тъ·

и҆ да бꙋдетъ ѿ того ѻ҆сщ҃енїе пѧтьсо́тъ до пѧтисотъ на четы́ри ѹ҆́глы ѻ҆́крс̑҇тъ, межда же е҆мꙋ н҃ ла́ктъ ѻ҆́крс̑҇тъ.
ѿ того размѣренїѧ да размѣриши въ длъготꙋ ҂к҃е, а҆ в широтꙋ ҂і҃. в том̑же да бꙋдетъ ѻ҆сщ҃енїе ст҃аѧ ст҃ыхъ, ст҃о ѿ землѧ̀ да бꙋ́детъ жерцемъ слꙋжа́щимъ въ ст҃емъ, да бꙋдетъ пристꙋпа́ющимъ слꙋжити гв҃и·

и҆ бꙋдетъ и҆мъ мѣсто на до́мъ ѿлꙋченыи, ѻ҆сщ҃енїю и҆хъ.
҂к҃е лактъ в дол꙽готꙋ, и҆ ҂і҃ в꙽ широтꙋ, да бꙋдет̑ левѷтомъ слꙋжа́щимъ хра́мꙋ·

Тѣмъ въ прича́стїе гра́ды всели́тисѧ·

ча́сть же гра́дꙋ да дасѝ широтꙋ ҂е҃, а҆ долготꙋ ҂к҃е, ꙗ҆́коже приносъ ст҃ых̑, всемꙋ̀ домꙋ і҆и҆л҃евꙋ да бꙋдетъ и҆ старѣ́ишинѣ ѿ того́же въ прино́сы ст҃ых꙽, въ прича́стїе градꙋ пред̑ лицемъ прино́съ ст҃ыхъ, и҆ пред̑ лицемъ прича́стїѧ гра́дꙋ е҆же къ мо́рю, и҆ ѿтꙋдꙋ е҆же на востокъ.
долгота же ꙗ҆́ко е҆ді́на ча́сть ѿ предѣлъ и҆же къ мо́рю, долгота́ же къ предѣ́ломъ и҆же на восто́къ.
землѧ̀ бꙋдетъ е҆мꙋ въ прича́стїе въ і҆и҆л҃и.
и҆ да не наси́лѧтъ ктомꙋ̀ старѣ́ишины і҆и҆л҃евы лю́демъ моим̑, и҆ землю да причастѧтъ до́мъ і҆и҆л҃евъ по племенемъ и҆хъ·

Се̂ гл҃етъ г҃ь, довлѣи ва́мъ старѣ́ишины і҆и҆л҃евы.
непра́вдꙋ и҆ трꙋдъ ѿврьѕите, сꙋдъ же и҆ правдꙋ сътвори́те.
і҆ и҆змѣни́те наси́лїе ѿ людїи, гл҃етъ г҃ь.
мѣры пра́вед̑ны, и҆ превѣ́снѧ пра́вед̑ны, и҆ хини́ѯъ пра́веденъ да е҆сть ва́мъ.
мѣрныи хини́ѯъ е҆ді́нъ ра́венъ да е҆сть ва́мъ ꙗ҆́ко възима́ти десѧти́нꙋ гомо́ра хини́ѯъ, и҆ десѧти́на гомо́ра е҆фи, проти́вꙋ гомо́рꙋ да е҆сть ра́венъ.
мѣры же двадесѧти ѻ҆́воли, пѧтьдесѧ́ть же си́кль да е҆сть мна̀ ва́мъ.
с̂е же прино́съ е҆же ѿлꙋчи́те ѿ мѣръ ѿ гомо́ра пшени́ца.
шестꙋюж̑ ча́сть е҆фи ѿ ко́ра ѻ҆би́лїѧ, и҆ шестꙋю ча́сть е҆фи ѿ ко́ра ꙗ҆ч꙽мене.
за́повѣдь же масленаѧ, котѵ́лꙋ ма́сла, по десѧти котѵ́лъ ма́сла.
ꙗ҆ко де́сѧть котѵ́лъ гомо́ръ сꙋть.
и҆ ѻ҆в꙽ча̀ е҆ді́но ѿ десѧти ѻ҆́венъ ѹ҆ча́стїе, ѿ всѣхъ ѿчествъ і҆и҆л҃евъ, на требꙋ и҆ на всесъж꙽женїе, и҆ на сп҃сеное, ѻ҆цы́стити ѻ҆ вас̑҇, гл҃етъ г҃ь б҃ъ.
вс̂и же лю́дїе землѧ̀ да дадѧтъ сїи прино́сы старѣ́ишинѣ і҆и҆л҃евꙋ.
и҆ старѣ́ишиною да быва́ют꙽ всесъж꙽женїѧ, и҆ требы, и҆ възлїа́нїѧ бꙋдꙋтъ въ празд̑ники, и҆ в нача́ла мс̑҇ць, и҆ в сꙋбо́ты и҆ въ всѧ̀ празнд̑ики до́мꙋ і҆и҆л҃ева.
та́кожде да сътво́рѧтъ за грѣхи требꙋ, и҆ всесъж꙽женїѧ, и҆ сп҃сеное ꙗ҆ко ѻ҆чища́ти въ днешнїи дн҃ь за до́мъ і҆и҆л҃евъ·

Се̂ гл҃етъ г҃ь б҃ъ, въ прьвыи мс̑҇цъ въ е҆ді́нъ дн҃ь мс̑҇ца·

да пои҆мете те́лецъ ѿ говѧд̑ без̑ порока.
ѻ҆цыстити ст҃ое.
и҆ да во́змет̑ жрецъ ѿ кро́ви ѻ҆цыщенїѧ, и҆ да возлїетъ на пра́гы хра́ма, и҆ на четыре ѹ҆́глы хра́ма ст҃го, и҆ на требник̑҇, и҆ на пра́ги двора ѹ҆́трьнѧго.
си́це да сътво́ритъ въ сед̑мыи дн҃ь того́же мс̑҇ца ѿ кое҆гождо не вѣ́дꙋща, и҆ блꙋ́домъ ѻ҆болга́на, и҆ ѻ҆цыстите хра́мъ·

Въ прьвыи мс̑҇цъ четвер̑҇таго на́десѧте дн҃е мс̑҇ца, да бꙋдетъ ва́мъ па́сха праздникъ.
сед̑мь дн҃ъ да ꙗ҆сте ѻ҆прѣсноки.
и҆ сътворитъ старѣ́ишина въ то́и дн҃ь, за сѧ̀, и҆ за до́мъ, и҆ за всѧ лю́ди землѧ, те́лецъ ѿ говѧд̑ за грѣхъ.
сед̑м꙽ же дн҃ь праздника да сътво́ритъ всесъж꙽женїѧ гв҃и сед̑м꙽ те́лець, сед̑м꙽ же ѻ҆́венъ непоро́ченъ по всѧ дн҃и сед̑мь дн҃ъ.
а҆ за грѣх꙽ ко́злищъ ѿ ко́зъ всѧ̀ дн҃и·

и҆ требы и҆ ѻ҆прѣсноки тел꙽цꙋ, и҆ ѻ҆прѣсноки ѻ҆́внꙋ да сътворит̑.
и҆ ма́сла и҆́нъ ѻ҆прѣсноком̑·

В сед̑мыи же мс̑҇цъ в꙽ пѧты́инадесѧте дн҃ь мс̑҇ца, по томꙋ же сед̑мь дн҃ъ, ꙗ҆́кож̑ и҆ за грх̑ѣ ꙗ҆́коже всесож̑женїа и҆ ꙗ҆́ко мана́а и҆ ꙗ҆́кож̑ ма́сло древѧ́ное·

Глв̑҇а, м҃ѕ·

Се гл҃етъ г҃ь б҃ъ, вра́та ꙗ҆́же въ дворѣ ѹ҆́трьнѣмъ зрѧ́щаѧ на восто́къ, да бꙋдт̑ꙋ затворе́на на́ шесть дн҃їи дѣ́ланыхъ·

въ дн҃ь же сꙋбо́тныи да сѧ ѻ҆творѧ́ютъ, и҆ въ дн҃ь нача́ла мс̑҇ца да сѧ ѻ҆творѧ́ютъ.
и҆ да внїидетъ старѣ́ишина по пꙋтѝ е҆лам꙽ма врат̑ внѣшнихъ, и҆ да ста́нет̑ пред̑ дверїемъ вра́тнымъ.
и҆ да сътворѧтъ жерцы всесъж꙽женїѧ е҆го, и҆ сп҃се́ное е҆го.
и҆ да сѧ покло́нитъ ѹ҆ пред̑дверїѧ вра́тнаго, и҆ да и҆зы́идетъ.
вра́та же да сѧ не заключат̑ до́ вечера и҆ да сѧ покланѧ́ютъ лю́дїе землѧ̀ ѹ҆ вратъ тѣхъ в сꙋбо́ты, и҆ в нача́ла мѣсѧчнаѧ пред̑ гм҃ь.
и҆ всесъж꙽женїѧ да принесетъ старѣ́ишина въ дн҃ь сꙋботныи гв҃и, ше́сть а҆́гнець непороченъ, и҆ ѻ́венъ непоро́ченъ.
и҆ мана́ѧ ѻ҆прѣсноки ѻ҆́внꙋ, и҆ а́гньцемъ требꙋ да́нїе рꙋкою е҆го.
и҆ ма́сла и҆́нъ ѻ҆прѣсноком̑·

И҆ въ дн҃ь нача́ла мс̑҇ць телецъ съ ста́да непорочен̑҇, и҆ шесть а҆́гне́цъ, и҆ ѻ҆́венъ непороченъ да бꙋдт̑ꙋ.
и҆ ѻ҆прѣсноцы телцю, ѻ҆прѣсноцы же ѻ҆́внꙋ да бꙋдꙋтъ мана́а.
и҆ а́гньцемъ ꙗ҆́коже пости́гнет̑ рꙋка̀ е҆го.
и҆ ма́сла и҆́нъ ѻ҆прѣ́сноком̑·

И҆ е҆гда̀ въхо́дит̑ старѣишина, по пꙋти е҆лам꙽ма вратнаг̑҇ да внидет̑, и҆ по пꙋти вратномꙋ да и҆зыидет̑·

И҆ е҆гда̀ въходѧт̑ лю́дїе пред̑ г҃а въ праздники.
въходѧ́щїи по пꙋтѝ вратъ ꙗ҆́же на сѣ́веръ, поклонѧт̑сѧ, да и҆схо́дѧтъ по пꙋти вратъ ꙗ҆же на ю́гъ.
і҆ и҆же въходѧ́тъ по пꙋти вратъ ꙗ҆́же на ю́гъ, да и҆зыидетъ по пꙋти вра́т꙽ ꙗ҆же на сѣверъ.
да сѧ не ѻ҆браща́ютъ въ вра́та и҆́миже е҆сть вшелъ, н̂о прѧ́мо е́й да и҆зы́идет꙽.
старѣ́ишина же средѣ и҆хъ, е҆гда̀ съ входѧ́щими внидетъ, и҆ съ и҆сходѧ́щими и҆зы́идетъ.
и҆ въ пра́здники и҆ въ сон꙽мы да бꙋдетъ мана́ѧ ѻ҆прѣсноцы те́лцꙋ, и҆ ѻ҆прѣсноцы ѻ҆́внꙋ.
и҆ а́гньцемъ бꙋдетъ ѻ҆бѣтъ посщ҃ен̑҇, ꙗ҆́коже а҆ще пости́гнетъ рꙋка е҆го.
и҆ масла и҆нъ ѻ҆прѣснокомъ·

А҆ще л̂и сътворитъ старѣ́ишина и҆сповѣда́нїе всесож꙽женїе, сп҃сенное гв҃и.
да ѻ҆творит̑ себѣ вра́та зрѧ́щаѧ на восто́къ, и҆ да сътво́ритъ всесож꙽женїе свое, и҆ сп҃се́нное свое.
ꙗ҆коже е҆сть ѻ҆бы́чаи твори́ти въ дн҃ь сꙋбо́тныи·

и҆ да и҆зыидетъ, и҆ затво́рит꙽ двери по и҆схожд̑енїи е҆го.
а҆́гнец꙽ же непорочен̑҇ лѣтошнїи, да сътворѧетъ всесож꙽женїе вс̂ѧ дн҃и гв҃и.
заѹ҆́тра да е҆̀ сътворитъ·

и҆ мана́ѧ да сътворит̑ е҆мꙋ заѹ҆́тра, заѹ҆́тра ше́стꙋю ча́сть мѣры.
и҆ ма́сла третїю ча́сть и҆нъ, ꙗ҆коже смѣси́ти крꙋпы.
мана́ѧ гв҃и за́повѣдь вѣ́чнꙋю прс̑҇но.
да сътворитѐ а҆́гнецъ и҆ мана́ѧ и҆ ма́сло древѧ́но, да сътворитѐ заѹ҆́тра̑ всесъж꙽женїе прс̑҇но·

Се̂ гл҃етъ г҃ь б҃ъ, а҆ще да́сть старѣ́ишина да́ни е҆ді́номꙋ ѿ сн҃овъ своих̑, ѿ прича́стїѧ свое҆го, сн҃омъ е҆го да бꙋ́детъ ча́сть и҆хъ т̂а·

а҆ще л̂и дасть да́ни е҆ді́номꙋ ѿт̑ рабъ свои҆хъ, да бꙋ́детъ е҆мꙋ до лѣта ѻ҆ста́внаго, да возда́сть па́ки старѣ́ишинѣ.
ра́звѣ прича́стїѧ сн҃овъ е҆го тѣмъ да бꙋдетъ.
да не воземлетъ старѣ́ишина ѿ прича́стїѧ люд̑ска, ꙗ҆́коже наси́лити и҆м꙽ ѿ ча́сти и҆хъ.
ѿ прича́стїѧ свое҆го да прича́стит̑ сн҃ы своѧ̀.
ꙗ҆́коже да сѧ не расы́плют꙽ лю́дїе моѝ ко́ждо ѿ прича́стїѧ свое҆го·

И҆ въведе мѧ во вхо̑ вра́тныи ꙗ҆́же на ю́гъ, въ преград̑ ст҃ыхъ жрецъ ꙗ҆́же зритъ на сѣвер̑҇.
и҆ с̂е тꙋ мѣсто ѿлꙋчено.
и҆ рече къ мнѣ, с̂е мѣсто е҆сть и҆дѣже ва́рѧт̑ жерцы е҆же за невѣдѣнїе, и҆ е҆же за грѣхи т̂ꙋ.
да пекꙋт꙽ мана́ѧ прс̑҇но, ꙗ҆́коже не и҆зноси́ти во дворъ внѣшнїи ѻ҆сщ҃ати лю́ди·

І҆ и҆зведе м̂ѧ въ двор̑҇ внѣшнїи, и҆ ѻ҆бведе м̂ѧ на четы́ри части двора.
и҆ с̂е дво́ръ на ѹ́глы дво́рныи преградъ на ѹ҆́глы дворъ.
на четырехъ ѹ҆́глѣхъ дво́ра дворецъ ма́лъ, въ долготꙋ лактъ м҃, а҆ широта лак꙽тъ л҃·

мѣра е҆ді́на въ четырехъ.
и҆ ѻ́крс̑҇тъ и҆хъ прегра́ды ѻ҆́крс̑҇тъ четырь.
и҆ сока́лцы под̑ преградами бы́вша.
и҆ рече къ мнѣ, сїи хра́ми съкальчнїи, т̂ꙋ да ва́рѧт̑ слꙋжа́щеи храмꙋ заколе́нїѧ люд̑ска·

Глв̑҇а, м҃з·

И въведе м̂ѧ къ пред̑две́рїю хра́ма.
и҆ се вода̀ и҆схожд̑аше ниже непокрове́н꙽наго хра́ма на въсто́къ.
ꙗ҆́ко лице хра́мꙋ зрѧ́ше на въсто́къ.
і҆ и҆схожда́ше вода̀ ѿ ѹ҆́гла деснаго ѿ ю҆́га къ тре́бникꙋ·

І҆ и҆зведе м̂ѧ по пꙋти вра́тномꙋ ꙗ҆́же на сѣ́веръ.
и҆ ѻ҆бведе м̂ѧ пꙋтемъ вра́тнымъ внѣѹ҆́дѣ къ вра́томъ дво́рнымъ, ꙗ҆́же зрѧ́тъ на въсто́къ.
и҆ се вода̀ и҆схожда́ше ѿ ѹ҆́гла десна́го.
ꙗ҆коже и҆схо́дъ мꙋ́жескъ проти́вꙋ, и҆ мѣ́ра в рꙋцѣ е҆го.
и҆ размѣри ты́сѧщꙋ мѣрою, и҆ приведе м̂ѧ чресъ во́дꙋ да́же до гле́знъ.
и҆ па́ки и҆змѣри ты́сѧщꙋ, и҆ преведе м̂ѧ чресъ во́дꙋ и҆ възы́иде вода̀ по поѧса.
и҆ размѣри тысѧщꙋ пото́къ, и҆ не могох̑ преи҆ти.
ꙗ҆́ко кипѧ́ше вода̀ а҆ки шꙋмъ пото́чныи е҆гоже не пре́идꙋтъ·

И҆ рече къ мнѣ, а҆ще е҆си ви́дѣлъ сн҃е чл҃чь.
и҆ веде м̂ѧ, и҆ ѻ҆брати м̂ѧ на брегъ рѣчныи.
въ ѻ҆браще́нїи мое҆мъ, и҆ се на́ брезѣ рѣ́чнемъ дꙋ́бїе мно́го ѕѣло ѻ҆́ба полы·

И҆ рече къ мнѣ, вода с̂и текꙋщїѧ въ галиле́ю на въсто́къ, и҆схожда́ше къ а҆равїи, и҆ грѧдѧ́ше до мо́рѧ къ водѣ и҆сход̑нѣи, і҆ и҆сцѣлитъ во́ды·

И҆ бꙋ́детъ вс̂ѧ дш҃а живо́тъ живо́тных̑, на вс̂ѧ на нѧже на́идетъ т̂а рѣка, жи́ви бꙋ́дꙋтъ.
и҆ бꙋ́дꙋтъ ры́бы мно́ги т̂ꙋ ѕѣло, ꙗ҆́ко прїидетъ та́мо ѕѣло вода с̂и, і҆ и҆сцѣлитъ.
и҆ жи́въ бꙋ́детъ на негоже а҆ще прїидетъ рѣка, и҆ бꙋдт̑ꙋ жи́ви.
и҆ ста́нꙋт꙽ т̂ꙋ ры́бари, ѿ и҆н꙽гад꙽ди до и҆н꙽галѣи҆мъ.
сꙋши́ло мре́жамъ бꙋдет̑.
ѻ҆ себѣ бꙋдетъ.
и҆ ры́бы е҆ѧ̀, ꙗ҆́ко ры́бы мо́рѧ вели́каго мно́жество мно́го ѕѣло·

И҆ въ и҆злазъ е҆го, и҆ въ ѻ҆браще́нїи е҆го, и҆ въ превознесе́нїи е҆го.
мѣлина е҆го не и҆сцѣлитсѧ, в꙽ соль сѧ в꙽да́сть·

И҆ к рѣцѣ възы́идꙋтъ, на́ брезѣ е҆ѧ̀ ѻ҆́ба по́лы все дре́во ꙗ҆до́мое.
не ѻ҆бет꙽ша́етъ ѹ҆ неѧ, ни ѻ҆скꙋдѣ́етъ ѹ҆ неѧ плод̑ е҆ѧ.
на ко́ждыи мс̑҇цъ принесет̑ прьвое ѿ плода.
и҆м꙽же во́ды и҆хъ сїѧ ѿт̑ ст҃ыхъ и҆схо́дѧтъ.
и҆ бꙋдетъ плод̑ и҆хъ въ снѣдь, и҆ ли́ствїе е҆го въ здра́вїе·

Се̂ гл҃етъ г҃ь б҃ъ, сїа предѣлы да причастите зе́мльныа двѣма на́десѧт꙽ма племен꙽ма сн҃овъ і҆и҆л҃евъ.
приложе́нїе прича́стїю.
да прича́ститсѧ ко́ждо ꙗ҆́коже и҆ брат̑ е҆го, на ню́ же въз꙽двигох̑ рꙋ́кꙋ мою ꙗ҆́коже да́ти ѿц҃мъ и҆хъ.
и҆ паде́тъ землѧ̀ и҆хъ въ причастїе ва́м꙽·

Се же предѣ́ли землѧ̀.
на сѣ́вер꙽, ѿ мо́рѧ вели́каго, сходѧ́щаго и҆ ѻ҆бходѧ́щаго вхо́дъ, и҆маѳельдамъ, моа́въ, лови́твы е҆фрѣмовы, и҆лїа́мъ, средѣ предѣла дама́скова, и҆ средѣ маѳи а҆ѵ́нань а҆ѷнанѧ.
при́сно свы́ше предѣ́лъ а҆ѷринити́дьскь·

Сїи предѣ́ли ѿ мо́рѧ ѿ двора е҆на́нова предѣ́ли дама́скови, и҆ е́же к꙽꙽ сѣверꙋ, и҆ предѣ́лъ е҆м꙽ма́мовъ, и҆ предѣ́лъ сѣ́вер꙽скъ.
и҆ е́же на въсто́ки межд̑ꙋ а҆ѵ́ринитид̑скою, и҆ междꙋ дама́ском̑, и҆ междꙋ галаа҆дит̑скою, и҆ междꙋ землею і҆и҆л҃евою.
і҆ѻ҆рда́нъ дѣ́литъ к мо́рю е҆же на въсто́ки фини́чески.
а҆ки и҆ на въсто́ки.
и҆ е́же на ю҆́гъ, и҆ на въсто́ченъ.
ѿт̑ ю҆́га до финикона до воды̀ марїѻ́ѳъ, и҆ дѵм̑.
продол꙽жи къ мо́рю вели́комꙋ.
сїю странꙋ ю҆́гъ, и҆ въсто́ченъ.
т̂ꙋ странꙋ мо́рѧ вели́каго, да предѣлѧ́етъ да́же и҆ прѧ́мо въхо́дꙋ и҆ма́ѳъ·

И҆ да раздѣли́те зе́млю и҆мъ, племенем꙽ і҆и҆л҃евомъ.
разложи́те ю҆̀ жре́бїем̑, ва́мъ, и҆ прихо́домъ ѻ҆бита́вшимъ средѣ вас̑҇, и҆же сꙋть роди́ли сн҃ы средѣ вас̑҇.
и҆ бꙋдꙋтъ вам̑ ꙗ҆́ко т̂озе́мльцы сн҃омъ і҆и҆л҃евомъ, с ва́ми да ꙗ҆дѧ́тъ въ прича́стїи средѣ племе́нъ і҆и҃лев꙽.
и҆ бꙋдꙋтъ въ пле́мени приход̑стѣ въ прихо́дѣхъ с ни́ми т̂ꙋ да да́сте прича́стїе, гл҃етъ г҃ь б҃ъ·

Глв̑҇а, м҃и·

Си же и҆мена̀ племе́нъ ѿ нача́ла е҆же къ сѣверꙋ по странѣ̀ схожде́нїѧ предѣлѧ́ющаг̑҇ къ вхо́дꙋ сима́ѳова двора̀, пред̑вра́тїе предѣлъ дама́сковъ къ сѣверꙋ по странѣ̀ сима́ѳова двора̀·

И҆ да бꙋдетъ и҆мъ е҆же на восто́ки, да́же и҆ до мо́рѧ, данъмїиска е҆ді́на.
и҆ ѿ предѣлъ дан꙽товъ къ восто́ком꙽, да́же и҆ до морѧ, а҆сѷрьмїиска е҆ді́на.
та́же и҆ ѿ предѣлъ а҆сѷрь и҆же къ восто́комъ, даж̑ и҆ до морѧ, неѳали́млѧ е҆ді́на·

ѿ предѣл꙽ же неѳали́мль ѿ страны̀ восточны, даже до страны̀ морѧ, манасїи е҆ді́на.
ѿ предѣ́л же манасі́инъ и҆же на восто́ки, даже і҆ и҆же к꙽ мо́рю, е҆фрѣмꙋ е҆дїна.
ѿ предѣл же е҆фре́мль и҆же на восто́къ, даже и҆ до мо́рѧ, рꙋви́мꙋ е҆ді́на.
ѿ предѣл꙽ же рꙋви́мль и҆же на восто́ки, даже и҆же до мо́рѧ, і҆ѹ́дина е҆ді́на.
а҆ ѿ предѣлъ і҆ѹ́динъ, и҆же къ восто́комъ, даже и҆ до мо́рѧ, да ста́нетъ нача́ло нарече́ннꙋю.
двꙋдесѧтꙋ и҆ пѧти тысщ̑҇ꙋ широта̀ и҆ длъгота̀, ꙗ҆́коже е҆ді́на час̑҇ къ востокомъ, и҆ ꙗ҆́же к꙽ морю.
и҆ да бꙋдетъ ст҃ое средѣ и҆хъ.
прино́сыж̑ нарекꙋтъ гв҃и, въ длъготꙋ̀ двꙋдесѧтꙋ и҆ пѧть тысѧщь, толи́ко же и҆ в широтꙋ̀.
с̂е да бꙋдетъ приносъ ст҃ыхъ жръце́мъ.
и҆же къ сѣверꙋ в долготꙋ̀ дв̂адесѧть и҆ пѧть тысѧщ̑҇, и҆ къ морю в широтꙋ̀ девѧть тысѧщь.
и҆ къ восто́кꙋ і҃, и҆ на ю́гъ в꙽ долготꙋ̀ двадесѧть и҆ пѧть тысѧщъ.
и҆ да бꙋ́детъ наро́къ ст҃ых꙽ средѣ е҆го, жръцемъ сщ҃енымъ сн҃омъ садо́ковом̑, стрегꙋщимъ страж꙽бы хра́ма, и҆же не прельсти́шасѧ въ прельще́нїе сн҃ов̑҇ і҆и҆л҃евъ, ꙗ҆́коже сѧ прельсти́ша левѷте.
тѣмъ зача́токъ да́емыи, ѿ зача́токъ землѧ̀ ст҃ое ст҃ыхъ ѿ предѣ́лъ левѷт꙽скь.
левѷтом꙽ ближнѧа предѣ́лъ жре́ческь, двꙋдесѧ́тꙋ и҆ пѧти ты́сѧщь в꙽ долготꙋ, а҆ в широтꙋ десѧти тысѧщь.
всѧ долгота двꙋдесѧ́тꙋ и҆ пѧти ты́сѧщ̑҇, а҆ широта десѧти ты́сѧщь.
да сѧ не прода́сть ѿ него, ни замѣнит̑, ни да сѧ ѹ́ймет̑ прьвое жи́то землѧ̀, ꙗ҆́ко ст҃о е҆сть гв҃и.
пѧ́ть же ты́сѧщ̑҇ и҆збы́точныхъ ѿ широты къ двѣмадесѧтма и҆ пѧ́ть ты́сѧщь, прд̑егражде́нїе гра́дꙋ, да бꙋ́детъ гра́дꙋ на вселе́нїе и҆ межда е҆го.
и҆ да бꙋдетъ гра́дъ средѣ е҆го·

се же мѣры е҆го.
ѿ сѣвера, четырь тысѧщь и҆ пѧтьсотъ.
ѿ ю́га, четырь тысѧщь и҆ пѧтьсо́т꙽.
и҆ ѿ восто́къ, четы́рь тысѧщь и҆ пѧтьсот꙽.
и҆ ѿт̑ мо́рѧ, четырь ты́сѧщь и҆ пѧтьсо́тъ.
и҆ да бꙋдетъ межда гра́дꙋ.
к꙽ сѣверꙋ дв̂ꙋ ст̂ꙋ и҆ пѧтидесѧтъ, и҆ къ ю́гꙋ дв̂ꙋ ст̂ꙋ и҆ пѧтидесѧт̑, и҆ на востокъ дв̂ꙋ стꙋ и҆ пѧтидесѧтъ, и҆ к꙽ мо́рю дв̂ꙋ ст̂ꙋ и҆ пѧтидесѧтъ·

И҆збы́токъ же длъготы̀ дръжа́исѧ начал̑҇ ст҃ыхъ.
десѧть ты́сꙋщь къ восто́комъ, десѧть же къ мо́рю, да бꙋдꙋтъ приноси ст҃аго.
и҆ да бꙋдꙋтъ жи́та еѧ̀ хлѣби дѣлаю҆щимъ град̑.
дѣлающеи же гра́дъ, да и҆ дѣлаютъ ѿ всѣхъ племе́нъ і҆и҆л҃евъ.
весь нача́токъ двадесѧти и҆ пѧти ты́сѧщ꙽, пѧ́тїю и҆ двѣма десѧт꙽ма ты́сѧщь на ты́ре ча́сти, да наречетѐ е҆го нача́токъ ст҃аго, ѿ прича́стїѧ град̑наго.
а҆ и҆збы́токъ старѣ́ишинѣ, ѿ того и҆ ѿ ѻ́ного, ѿ прино́съ ст҃аго.
въ прича́стїе же гра́дꙋ съ прежда пѧтѝ и҆ двꙋдесѧтꙋ ты́сѧщь длъгота̀ до предѣлъ и҆же к꙽ мо́рю, и҆ къ востокомъ съ прежда пѧти и҆ двꙋдесѧти ты́сѧщъ до предѣлъ и҆же к мо́рю, держа́сѧ ча́стїи старѣ́ишины.
и҆ да бꙋ́детъ принос̑҇ ст҃ыхъ, и҆ ѻ҆сщ҃енїе храма средѣ е҆го.
ѿ прича́стїѧ левѷт꙽ска, и҆ ѿ прича́стїа град̑наго, средѣ старѣ́ишин꙽ско да бꙋ́детъ.
средѣ предѣ́лъ і҆ѹ́динъ, и҆ средѣ предѣ́лъ венїами́нь, старѣ́ишин꙽ско да бꙋ́детъ·

А҆ и҆збыточ̑҇ное племе́нъ е҆же къ восто́комъ, да́же и҆же къ мо́рю, венїами́нꙋ е҆ді́на.
ѿ предѣ́лъ же венїами́нь, и҆же на восто́ки, да́же до страны и҆же к мо́рю, симеѻ́нꙋ е҆ді́на.
ѿ предѣ́лъ же симеѻ́нь, ѿ страны и҆же на въсто́къ, да́же и҆же к мо́рю, и҆саха́рꙋ е҆ді́на.
а҆ ѿ предѣ́лъ и҆саха́ровъ, и҆же къ восто́комъ, да́же и҆же к мо́рю, заѹ҆ло́нꙋ е҆ді́на.
ѿ предѣ́лъ же заѹ҆ло́нь, ѿ въсто́ка слн҃чнаго, да́же до страны мо́рѧ, гад̑дꙋ е҆ді́на.
ѿ предѣ́лъ же гад̑довъ, да́же и҆же къ восто́чню до лива́на.
и҆ да бꙋ́дꙋтъ предѣ́ли е҆го ѿ ю҆́га, и҆ воды маримоѳ꙽кад̑скаго, прича́стїѧ до мо́рѧ вели́каго.
т̂а землѧ̀ ю҆́же вло́жите въ жре́бїи племенемъ і҆и҆л҃евомъ, и҆ с̂е раздѣ́ли их̑, гл҃етъ г҃ь б҃ъ·

Се же и҆звод̑и̑ грд̑анїи.
к꙽ сѣверꙋ, четы́рь ты́сѧщь, и҆ пѧтьсо́тъ мѣ́рою.
вра́та же гра́дꙋ, по и҆мени племе́нъ і҆и҆л҃евъ.
вра́та троѧ на сѣ́веръ.
вра́та рꙋви́млѧ е҆ді́на, вра́та же і҆ѹ́дина е҆ді́на, и҆ вра́та левѷи҆на е҆ді́на.
и҆ на въсток̑҇ четы́рь ты́сѧщь, и҆ пѧ́ть со́тъ.
и҆ вра́та троѧ.
вра́та е҆ді́на і҆ѻ́сифова, вра́та же е҆ді́на венїами́нѧ, и҆ вра́та да́нова е҆ді́на.
и҆ ꙗ҆́же въ ю҆́гꙋ четы́рь ты́сѧщь, и҆ пѧть со́тъ мѣрою.
и҆ вра́та троѧ.
вра́та е҆ді́на симеѻ́нꙋ, вра́та же е҆ді́на и҆саха́рꙋ, и҆ вра́та е҆ді́на заѹ҆ло́нꙋ.
и҆ е́же к мо́рю четы́рь ты́сѧщь, и҆ пѧ́ть сот̑ мѣ́рою.
вра́та же троѧ.
вра́та е҆ді́на гад̑дови, вра́та же а҆сѷрови е҆ді́на, и҆ вра́та неѳали́мови е҆ді́на, ѻ҆́крс̑҇тъ е҆же ѻ҆смина́десѧти ты́сѧщь.
и҆мѧ же гра́дови ѿ негоже дн҃е бꙋдет̑, г҃ь т̂ꙋ бꙋдет̑ и҆мѧ е҆мꙋ·

Коне́цъ прро̑҇кꙋ і҆е҆зекїилю, и҆́мать в себѣ глав̑҇, м҃и·