Библия (1581). [34] Даниил

ДАНЇИЛЬ ПРО҃РКЪ

ГЛАВА̀ ПЄр̑ВАѦ

Видѣнїе, в҃·

В лѣто тре́тїе црс̑҇тва і҆ѻ҆а҆ки́мова цр҃ѧ і҆ѹ́дина.
прїиде навходоносо́ръ цр҃ь вавѷлон꙽скь на і҆ерс̑҇лимъ, и҆ вое҆ва́ша нань.
и҆ дасть г҃ь в рꙋкꙋ е҆го і҆ѻ҆а҆ки́ма цр҃ѧ і҆ѹ́дина, и҆ ѿ ча́сти сосꙋдъ хра́ма бж҃їѧ.
и҆ принесѐ ѧ҆̀ в꙽ землю сенаа́ръ б҃а е҆го, и҆ сосꙋды внесѐ въ хра́мъ и҆мъ и҆мѣнїѧ б҃а свое҆го·

И҆ рече цр҃ь къ а҆сфа́нꙋ старѣ́ишинѣ ка́женикъ е҆го, въвестѝ ѿ сн҃овъ плѣн꙽ничь сн҃овъ і҆и҆л҃евъ, и҆ ѿ племе́не цр҃ска, и҆ ѿ крѣп꙽кихъ ю́ношь на ни́х же нѣсть поро́ка, и добры̀ ѻ҆́зрѣчью, и҆ смы́слены въ все́и премꙋдрости, и҆ вѣдꙋщаѧ ѹ҆мѣнїе и҆ премꙋдрость, і҆ и́мже е҆сть крѣпос̑҇ в ни́хъ.
ꙗ҆́коже пред̑стоѧти въ домꙋ цр҃и.
и҆ наѹ҆чи́ти ѧ҆̀ книгам̑ и҆ ꙗ҆́зы́кꙋ халде́искꙋ·

И҆ рече и҆мъ цр҃ь, по всѧ дн҃и ѿ трапезы цр҃ѧ, и҆ ѿ вина̀ пи́тїѧ е҆го да ѧ҆̀ кръмитъ лѣта трѝ.
и҆ пото́мъ ста́ти пред̑ цр҃емъ·

И҆ быс̑҇ в нихъ ѿ сн҃овъ і҆ѹ́динъ данїи́лъ, и҆ а҆на́нїа, и҆ а҆за́рїѧ, и҆ мисаи́лъ.
и҆ сътворѝ и҆мъ и҆мена̀ старѣ́ишина ка́женичь.
данїи́лꙋ, валтаса́ръ.
а҆ а҆на́нїи, седрах̑.
а҆за́рїи же, мисах̑.
а҆ мисаи́лꙋ, а҆вед̑наго<.>

И҆ положѝ дании҆лъ на срд̑цы свое҆мъ, ꙗ҆́коже не ѻ҆скверни́тисѧ ѿ тра́пезы цр҃ѧ, и҆ ѿ вина̀ пи́тїѧ е҆го.
и҆ молѝ старѣ́ишинꙋ ка́женичь, ꙗ҆́коже да сѧ не ѻ҆сквернит̑.
и҆ быс̑҇ данїил̑҇ въ млс̑҇ть и҆ в꙽ щедроты̀, пред̑ старѣ́ишиною ка́женичью.
и҆ рече старѣ́ишина ка́женичь данїи́лꙋ, бою́сѧ а́зъ господи́на мое҆го цр҃ѧ заповѣда́вшаго ꙗ҆́дь ва́шꙋ, и҆ питїе ва́ше.
е҆гда̀ когда ви́дитъ лица̀ ва́ша̑ ѹ҆ны́вша, па́че ѻ́трокъ точе́нь ва́шихъ.
и҆ ѿсꙋдите главꙋ̀ мою цр҃ю.

И҆ рече данїи́лъ къ меласар꙽рꙋ, и҆же приста́ви старѣ́ишина ка́женичь къ данїилꙋ, и҆ а҆на́нїи, и҆ а҆за́рїи, и҆ мисаи́лꙋ.
и҆скꙋсѝ ѻ́троки твоѧ до десѧти дн҃ъ.
и҆ да н̂ы дасѝ ѿ сѣмен꙽ зе́мльныхъ да ѧ́мы, и҆ да пїемъ во́дꙋ.
и҆ да сѧ ꙗ҆вѧ́тъ пред̑ тобо́ю ѻ҆́зрачи на́ша, и҆ ѻ́зрачи ꙗ҆дꙋщихъ ѻ҆трокъ ѿ трапе́зы цр҃ѧ.
и҆ ꙗ҆́коже ѹ́зриши сътворѝ съ ѻтроки твои҆ми.
и҆ послꙋша и҆хъ, і҆ и҆скꙋси ѧ҆̀ до десѧти дн҃ъ.
по скон꙽ча́нїи же десѧти дн҃ъ ꙗви́шасѧ ѻ́зрачи и҆хъ бл҃ги, и҆ тїи крѣпи пло́тїю паче ѻ́трокъ ꙗ҆дꙋщихъ ѿ трапе́зы цр҃ѧ·

И҆ быс̑҇ а҆меласарръ ѿмеща̀ ꙗ҆́ди и҆хъ и҆ вино̀ пи́тїѧ и҆хъ, и҆ даѧ́ше и҆мъ сѣмена̀ четыремъ ѻ́трокомъ.
и҆ дасть и҆м꙽ б҃ъ смы́слъ и҆ мꙋдрость въ все́и кни́жнеи премꙋдрости.
данїи́л꙽ же разꙋменъ бы́сть въ всем̑ видѣ́нїи и҆ снх̑ѣ·

И҆ бы́сть по скон꙽ча́нїи тѣхъ дн҃їи, и҆ рече цр҃ь привестѝ ѧ҆̀.
и҆ въведе ѧ҆̀ старѣ́ишина ка́женичь пред̑ цр҃ѧ навходоносо́ра.
и҆ бесѣдова с ними цр҃ь, и҆ не ѻ҆брѣте́сѧ ѿ всѣхъ подо́бенъ данїи́лꙋ, и҆ а҆нанїи, и҆ а҆за́рїи, и҆ мисаи҆лꙋ.
и҆ ста́ша пред̑ цр҃емъ.
и҆ въ всем꙽ гл҃ѣ премꙋдрѣмъ и҆ ѹ҆мѣнїи, е҆гоже вопраша̀ ѿ нихъ цр҃ь, ѻ҆брѣте ѧ҆̀ десѧти́жды сꙋгꙋбъ над̑ всѣми ба́лїами, и҆ во́лх꙽вы сꙋщими въ все́мъ цртс̑҇вѣ е҆го.
и҆ бысть данїи́лъ до е҆ді́наго лѣта кѷра цр҃ѧ·

Глв̑҇а, в҃· видѣ́нїе г҃·

В лѣто второ́е црс̑҇тва навходоносо́рова, со́нъ ви́дѣ навходоносо́ръ.
и҆ ѹ҆жасе́сѧ дꙋхъ е҆го, и҆ сказа́нїе е҆го ѿстꙋпѝ ѿ него.
и҆ рече цр҃ь призва́ти ба́лїѧ, и҆ влъх꙽вы, и҆ чародѣ́ица, и҆ хал꙽дѣѧ, възвѣсти́ти цр҃ю со́нъ е҆го·

И҆ прїидо́ша, и҆ ста́ша̑ пред̑ црем꙽.
и҆ рече и҆мъ цр҃ь, ви́дѣхъ сонъ.
и҆ ѹ҆жасе́сѧ дꙋхъ мои, ꙗ҆́кож̑ разꙋмѣти со́нъ.
и҆ гл҃аша хал꙽дѣи сѷрьскы цр҃ю.
и҆ рѣша, цр҃ю въ вѣки живѝ.
т̂ы сповѣжд̑ь со́нъ рабом̑ твоим̑, и҆ сказа́нїе е҆го съвѣсти́мъ т̂и·

ѿвѣща́в же цр҃ь реч̑҇ халдѣ́ѻмъ, сло́во ѿстꙋпило е҆сть ѿ менѐ.
а҆ще ѹ҆бо не совѣсти́те м̂и сна̀, и҆ сказа́нїѧ е҆го.
въ пагꙋбꙋ бꙋ́дете, и҆ домо́ве ва́ши раз꙽гра́бѧтсѧ.
а҆ще л̂и со́нъ и҆ сказа́нїе е҆го совѣсти́те мнѣ̀.
подаа́нїѧ, и҆ да́ры, и҆ честь мно́гꙋ прїимете ѿ мене.
точїю со́нъ и҆ сказа́нїе е҆го совѣсти́те мнѣ̀·

И҆ ѿвѣща́ша второе и҆ рѣша цр҃ю.
цр҃ь да повѣсть со́нъ рабомъ свои҆м꙽, и҆ сказа́нїе е҆го совѣстимъ е҆мꙋ.
и҆ ѿвѣща̀ цр҃ь, и҆ реч̑҇, по и҆́стиннѣ вѣдѣ а҆́зъ, ꙗ҆ко вре́мѧ в̂ы то́чїю проважд̑а́ете.
ꙗ҆́коже разꙋмѣсте ꙗ҆ко ѿстꙋпи́ло е҆сть сло́во ѿ менѐ.
а҆ще ѹ҆бо сна̀ не совѣсти́те мнѣ̀.
е҆ді́нъ е҆́сть завѣтъ ва́шъ.
и҆ вѣдѣ ꙗ҆́ко сло́во л꙽же и҆ расы́пано слага́ете совѣща́ти предо мно́ю, до́ндеж̑ времѧ минетъ.
со́нъ мо́и повѣди́те мнѣ̀, да ѹ҆вѣ́де, и҆ сказа́нїе е҆го совѣсти́те мнѣ̀·

ѿвѣща́ша же па́ки халдѣи пред̑ цр҃емъ, и҆ рѣша.
нѣсть чл҃ка на землѝ, и҆же возможет̑ совѣсти́ти сло́во с̂е цр҃ю.
ꙗ҆́ко весь цр҃ь вели́кїи, и҆ кнѧ́ѕь, не вопрошает̑ си́цево словесѐ, всего вол꙽хва халдѣиска.
ꙗ҆́ко сло́во е҆гоже вопраша́етъ цр҃ь тѧ́жко.
и҆ нѣсть дрꙋга́го и҆же совѣсти́тъ пред̑ цр҃емъ.
н̂о точїю бо́ѕи и҆́хже нѣсть жи́тїе съ всею̀ пло́тїю·

Тогда̀ цр҃ь въ ꙗ҆́рости и҆ въ гнѣвѣ мно́ѕѣ, речѐ погꙋби́ти вс̂ѧ мꙋ́дрыѧ вавѷлон꙽ски.
і҆ и҆зыиде за́повѣдь, и҆ мꙋдрїи ѹ҆бива́хꙋсѧ.
възыска́ша данїила, и҆ дрꙋгъ е҆го ѹ҆бити ѧ҆̀·

Тогда̀ данїилъ ѿвѣща совѣтъ и҆ ра́зꙋмъ а҆рїѻ́хꙋ а҆р꙽химагерꙋ црс̑҇кꙋ, и҆же и҆зыиде ѹ҆бити мꙋдрых̑ вавѷлон꙽скь.
и҆ вопрашаше и҆̀ гл҃ѧ, кнѧ́же цр҃ь, ѻ҆ чесомъ и҆зыиде ра́зꙋм꙽ безъ срама и҆ с̂е ѿ лица̀ цр҃ѧ.
совѣсти́ же сло́во данїи́лꙋ а҆рїѻхъ.
данїил̑҇ же вниде и҆ молѝ цр҃ѧ ꙗ҆́коже врѣмѧ да е҆мꙋ да́сть, и҆ сказа́нїе е҆го совѣстит̑ цр҃ю·

И҆ вниде данїи́лъ въ до́мъ свои, и҆ совѣсти сло́во а҆нанїи, і҆ а҆зарїи, и҆ миса́и҆лꙋ дрꙋгомъ свои҆мъ.
и҆ щедрости проша́хꙋ ѹ҆ б҃а нбс̑҇наго ѻ҆ та́инѣ се́и.
ꙗ҆коже да не погы́бнет꙽ данїи́лъ и҆ дрꙋѕи е҆го, съ прочими мꙋдрыми вавѷлон꙽скы·

Тогда̀ данїи́лꙋ во снѣ но́щїю та́ина ѿкры́сѧ.
и҆ блс̑҇ви данїи́лъ б҃а нбс̑҇наго, и҆ рече.
бꙋ́ди и҆мѧ г҃а б҃а блс̑҇вено ѿ вѣка и҆ до вѣка.
ꙗ҆ко премꙋдрость, и҆ смышле́нїе, и҆ крѣ́пость того̀ е҆сть.
то́и б̂о премѣнѧ́етъ времена и҆ лѣта.
поставлѧ́етъ цр҃ѧ, и҆ преставлѧ́ет꙽.
да́ѧ премꙋдрость мꙋ́дрымъ, и҆ невѣ́дꙋщимъ смышле́нїе.
то́и ѿкрыва́етъ глꙋбо́каѧ и҆ съкровен꙽наѧ, свѣдыи те́мнаѧ.
и҆ совѣтъ с ни́мъ е҆сть.
т̂ы б҃ъ ѿц҃ъ на́шихъ, и҆сповѣда́ю и҆ хвалю̀, ꙗ҆́ко премꙋдрость и҆ си́лꙋ далъ м̂и е҆си.
и҆ нн҃ѣ совѣстилъ м̂и е҆си е҆гоже просихъ ѹ҆ тебѐ, ꙗ҆́ко со́нъ цр҃ь совѣстилъ м̂и е҆си.
сказа́ти с̂е цр҃ю·

И҆ прїиде данїи́лъ къ а҆рїѻ҆хꙋ, ꙗ҆же б̂ѣ приста́вилъ цр҃ь погꙋби́ти мꙋдрыѧ вавѷлон꙽скы.
и҆ рече е҆мꙋ, мꙋ́дрыхъ вавѷлон꙽скь не погꙋблѧ́и.
н̂о и҆зведи м̂ѧ пред̑д̑ цр҃ѧ, и҆ сказанїе сна̀ совѣщꙋ е҆мꙋ.
а҆рїѻ́хъ же слы́шавъ с̂и словеса̀, с꙽ пот꙽щанїемъ въведе данїи́ла пред̑ цр҃ѧ.
и҆ рече е҆мꙋ, ѻ҆брѣтохъ мꙋжа ѿ плѣн꙽никъ жидов̑҇скь, и҆же сказа́нїе цр҃ю совѣстит̑.
и҆ ѿвѣща цр҃ь, и҆ реч̑҇ данїи́лꙋ, е҆мж̑ꙋ и҆м̂ѧ вал꙽тасаръ.
а҆ще мо́жеши совѣсти́ти со́нъ и҆же видѣхъ, і҆ и҆сказа́нїе е҆го повѣ́си·

И҆ ѿвѣща данїи́лъ пред̑ цр҃емъ, и҆ рече.
та́ины е҆ѧ́же цр҃ь вопраша́етъ, нѣсть мꙋ́дрых̑ во́лхвъ ни́же балїи газарин꙽скь си́ла совѣсти́ти цр҃ю.
н̂о е҆сть б҃ъ на нб҃си ѿкрыва́ѧи та́ины.
и҆ совѣсти цр҃ю навходоносорꙋ, е҆мꙋже бы́ти въ послд̑ѣнѧѧ дн҃и.
цр҃ю въ вѣки живи.
со́нъ тво́и и҆ видѣнїе главы твое́ѧ на ло́жи твоем̑.
т̂о б̂ѣ цр҃ю помышленїа твоа на ло́жи твоем̑ възыидо́ша, чесомꙋ ес̑҇ бы́ти посем̑.
и҆ ѿкрива́ѧи та́ины, ꙗ҆вѝ тебѣ е҆мꙋже е҆сть бы́ти.
и҆ мнѣ̀ не премꙋ́дростїю сꙋщею въ мнѣ па́че всѣхъ живꙋщих̑, та́ина с̂и ꙗ҆ви́сѧ.
н̂о смире́нїѧ ради ꙗ҆́коже совѣстити цр҃ю, да разꙋмѣ́еши размышле́нїѧ срцд̑а свое҆го.
рече данїи́лъ навходоносорꙋ цр҃ю·

Ты цр҃ю ви́дѧше, и҆ с̂е тѣло е҆ді́но велїе, тѣло т̂о и҆ ѻ҆бличїе е҆го ѻ҆крꙋгло.
стоѧ̀ пред̑ лицемъ твоим̑, и҆ ѻ҆зракъ лица е҆го стра́шенъ.
тѣло е҆гоже глава̀ ѿ зла́та жи́ва.
рꙋцѣ, и҆ пе́рси, и҆ мы́шцѣ е҆го сребренѣ, чре́во, и҆ стегнѣ мѣдѧнѣ, го́лени желѣзни, и҆ ча́сть нѣ́каѧ скꙋде́лна·

Ви́дѧше до́ндеже ѹ҆тръжесѧ ка́мен꙽ ѿ горы̀ не рꙋка́ми.
и҆ ѹ҆да́ри тѣло в но́ѕѣ желѣзни и҆ скꙋделни, і҆ и҆стни и҆̀ до кон꙽ца.
тогда̀ и҆стре́сѧ ѕѣло, скꙋде́ль, желѣ́зо, мѣ́дь, сребро̀ и҆ зла́то.
и҆ бы́сть ꙗ҆ко пра́хъ ѿ гꙋмна лѣтнѧ.
и҆ взѧтъ и҆̀ премно́гїи вѣтръ, и҆ мѣсто не ѻ҆брѣтесѧ и҆мъ.
ка́мень же и҆же раз꙽дрази ѻ҆́браза, бысть гора̀ вели́ка и҆ наплъни вс̂ю землю·

с̂е е҆сть со́нъ·

и҆ сказанїе е҆го речем̑ пред̑ цр҃емъ·

е҆мꙋже б҃ъ нбс̑҇ныи црс̑҇тво дасть крѣп꙽ко и҆ дръжавно, и҆ чьсти въ всемъ мѣсте.
на не́м же живꙋтъ сн҃ве чл҃чи, и҆ ѕвѣрїе по́льстїи, и҆ п꙽тица нбс̑҇ныѧ, и҆ ры́бы мор꙽скыѧ, далъ е҆сть въ рꙋкꙋ твоею̀.
и҆ поста́вилъ т̂ѧ ес̑҇ властелі́на всѣмъ·

Ты̀ е҆си глава̀ злата.
и҆ въ слѣдъ тебе въста́нетъ црс̑҇тво дрꙋгое мнѣи тебѐ, е҆же е҆сть сребро̀·

Црс̑҇тво же третїе е҆же е҆сть мѣдь, и҆же съдолѣ́етъ все́и земли.
и҆ црс̑҇тво четвертое бꙋ́детъ крѣпле а҆ки желѣзо.
и҆ ꙗ҆́коже желѣзо стон꙽чева́етъ и҆ ѹ҆мѧкча́етъ вс̂е, та́коже и҆ т̂о ѹ҆тон꙽читъ и҆ ѹ҆мѧк꙽читъ вс̂е.
и҆ е҆же ви́дѣ но́ѕѣ и҆ прьсты ча́сть желѣза, ча́сть же гли́ны.
црс̑҇тво и҆́но раздѣлено бꙋдетъ, и҆ ѿ ко́рене желѣза бꙋдетъ в не́мъ.
а҆ ꙗ҆́коже ви́дѣ желѣзо смѣшено съ гли́ною, и҆ прьсты но́жнїи, ча́сть желѣзна и҆ ча́сть глин꙽на.
ча́сть же бꙋдетъ цр҃ьства крѣп꙽ка, ѿ себѐ само бꙋдетъ съкрꙋшено.
и҆ ꙗ҆́ко ви́дѣ желѣзо смѣшено къ гли́нѣ.
смѣшено бꙋдетъ въ племе́нехъ чл҃чихъ, и҆ не бꙋдетъ прилипа́юще сїи к꙽ семꙋ, ꙗ҆́коже желѣзо не смѣша́етсѧ съ гли́ною·

И҆ въ дн҃ь цр҃ь тѣхъ въставит̑ б҃ъ нбс̑҇ныи црс̑҇тво е҆же въ вѣкы не расы́плетсѧ, и҆ црс̑҇тво е҆го лю́демъ и҆́нѣмъ не ѻ҆ста́нетъ.
ѻ҆тон꙽читъ і҆ и҆звѣ́етъ вс̂ѧ црс̑҇тва, а҆ т̂о ста́нетъ въ вѣкы·

а҆ ꙗ҆́коже ви́дѣ, ꙗ҆́ко ѿсѣче́сѧ ѿ горы камы́къ без̑ рꙋкꙋ, и҆ ѻ҆тон꙽чи гли́нꙋ, и҆ желѣзо, и҆ мѣдь, и҆ сребро̀ и҆ зла́то.
б҃ъ вели́кїи совѣсти цр҃ю е҆мꙋже е҆сть бы́ти посе́мъ.
и҆стиненъ со́нъ, і҆ и҆звѣстно сказа́нїе е҆го·

Тогда̀ цр҃ь навходоносо́рь ниць падѐ, і҆ поклони́сѧ данїилꙋ.
и҆ рече крꙋпы̀ п꙽шени́чны и҆ бл҃говонѧнїа положити е҆мꙋ.
и҆ ѿвѣща̑ цр҃ь, рече данїи́лꙋ, пои҆́стин꙽нѣ б҃ъ ва́шъ, то́и е҆сть б҃ъ бг҃омъ, и҆ г҃ь гм҃ъ, и҆ цр҃ь цр҃емъ, ѿкрѣва́ѧ та́ины.
ꙗ҆́ко возмо́же ѿкры́ти таи́нꙋ сїю·

И҆ възвели́чи цр҃ь данїи́ла, и҆ да́ры вели́кы и҆ мно́ги дас̑҇ е҆мꙋ.
и҆ поста́ви и҆̀ над̑ всею̀ страно́ю вавѷлон꙽скою, и҆ кнѧз̑ вое҆во́дам̑, над̑ всѣми мꙋдрыми вавѷлон꙽скы и҆ данїил̑҇ просѝ ѹ҆ цр҃ѧ, и҆ приста́ви к꙽ дѣлесем̑ страны вавѷлон꙽скы, седра́ха, миса́ха, и҆ а҆вед̑наго.
данїилъ же бѣа́ше въ дворѣ цр҃евѣ·

Глв̑҇а, г҃· Видѣнїе, д҃·

Въ ѻ҆смоена́десѧте лѣто навходоносо́ръ цр҃ь сътвори тѣло зла́то, высота е҆го ѯ҃ ла́кт꙽, а҆ широта̀ е҆го, ѕ҃ ла́ктъ.
и҆ постави е҆̀ на поли деи҆рам̑стѣ въ странѣ вавѷлон꙽стѣ·

И́ посла̀ навходоносо́ръ цр҃ь събра́ти вс̂ѧ ѵ҆па́ти, и҆ вое҆воды, и҆ мѣстныѧ кнѧ́ѕѧ, и҆ влд̑ки, и҆ мꙋчи́телѧ, и҆ сꙋщихъ над̑ вла́стьми, и҆ вс̂ѧ кн҃ѕѧ стран꙽скыѧ, прїити на ѻ҆бновленїе кꙋми́рꙋ и҆же поста́ви навходоносоръ цр҃ь·

И҆ събра́шасѧ мѣстнїи кн҃ѕи, и҆ ѵ҆па́ты, и҆ вое҆воды, и҆ влд̑ки, и҆ мꙋчителе вели́цїи и҆же над̑ вла́стьми, и҆ вс̂и кнѧ́ѕи стран꙽стїи, прїити на ѻ҆бновленїе тѣла и҆же поста́ви навходоносоръ цр҃ь.
и҆ ста́ша пред̑ тѣ́ломъ е҆же постави навходоносор꙽ цр҃ь.
и҆ проповѣдникъ вопїаше крѣпокъ, вам̑ сѧ гл҃етъ ꙗ҆зы́цы, лю́дїе, колѣ́на, пле́мена, вон꙽же часъ и҆л̂и го́дъ ѹ҆слы́шите гла́съ трꙋбы, свирѣлин̑҇ же и҆ гꙋсленъ, пипе́лы и҆ пѣсньница сам꙽бикїи҆н꙽ же, и҆ прегꙋдничь и҆ съгла́сныхъ, и҆ всего ро́да мꙋсикїи҆на, па́дающе покланѧ́итесѧ тѣлꙋ зла́томꙋ е҆же поста́ви навходоносо́ръ цр҃ь.
і҆ и҆же не пад̑ покло́нитсѧ, в то́и ча́съ въверженъ бꙋдетъ в пе́щъ ѻ҆гнемъ палѧ́щꙋ·

И҆ бы́сть е҆гда̀ ѹ҆слы́шаша людїе гласъ трꙋбенъ, свирѣлин̑҇ же и҆ гꙋсленъ, сам꙽бикїи҆н꙽ же и҆ прегд̑ꙋничь, и҆ съгла́сныхъ, и҆ всего ро́да мꙋсикїина, падающе вс̂и лю́дїе, пле́мена, ꙗ҆зы́цы покланѧ́хꙋсѧ тѣлꙋ зла́томꙋ е҆же поста́ви навходоносоръ цр҃ь·

Тогда̀ пристꙋпи́ша мꙋжи халде́исти и҆ насочи́ша на і҆ѹ҆деѧ.
и҆ ѿвѣща́вше рѣша, цр҃ю навходоносо́ре.
цр҃ю въ вѣки живи.
т̂ы цр҃ю заповѣ́да за́повѣдь, ве́сь чл҃къ и҆же а҆ще ѹ҆слы́шитъ гла́съ трꙋбы, пища́лїи же и҆ гꙋслїи, цѣвни́ца же и҆ прегꙋдница, и҆ пи́скъ, и҆ всего ро́да мꙋсикїина, да падет̑ и҆ поклонит̑сѧ тѣлꙋ зла́томꙋ.
а҆ще ли же н̂и, да въвръженъ бꙋдетъ в꙽ пещъ ѻ҆гне́мъ горѧ́щꙋ·

Сꙋть ѹ҆бо мꙋжи і҆ѹ҆де́и, и҆́хже поста́ви над̑ дѣлы землѧ вавѷлон꙽скы, седра́хъ, миса́хъ, и҆ а҆вед̑наго.
мꙋжи тїи не послꙋшаша за́повѣди твое́ѧ цр҃ю, и҆ бого́мъ твоим̑ не слꙋж́атъ, и҆ тѣлꙋ зла́томꙋ е҆же поста́ви, не покланѧ́ют̑сѧ·

Тогда̀ навходоносоръ ꙗ҆́ростїю и҆ гнѣвомъ реч̑҇ привести, седра́ха, миса́ха, и҆ а҆вед̑наго.
и҆ мꙋжи тїи приведени бы́ша пред̑ цр҃ѧ.
ѿвѣща́в же навходоносо́ръ, и҆ рече и҆мъ, а҆ще вои҆́стиннꙋ, седрах̑, мисах꙽, и҆ а҆вед̑наго, богом̑ мои҆мъ не слꙋжите.
и҆ тѣлꙋ зла́томꙋ е҆же поста́вих̑ не покланѧ́етесѧ.
нн҃ѣ ѹ҆бо а҆́ще е҆сте готови, да ꙗ҆́ко ѹ҆слы́шите гла́съ трꙋбы, пищалїи же и҆ гꙋслїи, цѣвница же и҆ прегꙋдница, и҆ пи́скъ и҆ всего ро́да мꙋсикїина, пад̑ше покланѧ́итесѧ тѣлꙋ е҆же сътворихъ.
и҆ а҆ще л̂и не покло́нитесѧ, в тои го́дъ въвръжени бꙋдете в꙽ пещъ ѻ҆гнемъ горѧ́щю.
и҆ кт̂о е҆сть б҃ъ, и҆же и҆змет̑ вы ѿ рꙋкꙋ мое́ю.
и҆ ѿвѣщаша, седрах̑ миса́хъ, и҆ а҆вед̑наго.
гл҃юще цр҃ю навходоносорꙋ.
не требꙋ́емъ м̂ы ѻ҆ гл҃ѣ семъ ѿвѣщати тебѣ̀.
е҆сть б̂о б҃ъ нашъ на́ нб҃сехъ е҆мꙋже м̂ы слꙋжим̑, си́ленъ и҆зѧ́ти н̂ы ѿ пе́щи ѻ҆гнемъ горѧ́щаѧ, и҆ ѿ рꙋкꙋ твое́ю и҆збавити н̂ы цр҃ю.
а҆ще ли н̂и, вѣсто да т̂и е҆сть цр҃ю, ꙗ҆́ко бого́мъ твои҆мъ не слꙋжимъ, и҆ тѣлꙋ зла́томꙋ е҆же поста́ви не кланѧ́емсѧ·

Тогда̀ навходоносо́ръ и҆сполни́сѧ ꙗ҆́рости, и҆ зрак꙽ лица е҆го ѻ҆пꙋснѣ на седра́ха, миса́ха и҆ а҆вед̑наго.
и҆ рече раждежете пе́щъ сед̑мижды сед̑мицею, дон꙽деже до конца̑ раждежет̑сѧ.
и҆ мꙋжем̑ крѣпостїю реч̑҇, ѻ҆кова́вше седра́ха, миса́ха, и҆ а҆вед̑наго въврещи в пе́щъ ѻ҆гнемъ горѧ́щꙋ·

Тогда̀ мꙋжи тїи ѻ҆ковав꙽ше ѧ҆̀ съ гащ꙽ми и҆хъ, и҆ клобꙋки, и҆ съ насте́гнъвами, и҆ съ ѻ҆дѣнїами и҆хъ, въвръгоша ѧ҆̀ посредѣ пе́щи ѻ҆гнѧ̀ горѧ́ща.
понеже гл҃ъ цр҃ь премо́же.
и҆ пе́щъ раждежена бы́сть и҆зли́ха·

И҆ мꙋжа т̂ы насоч꙽шаѧ на седра́ха, миса́ха, и҆ а҆вед̑наго и҆ждеже и҆хъ пла́мень ѻ҆гненыи ѻ҆́крс̑҇тъ·

И҆ мꙋжи трїе тїи, седра́хъ, миса́хъ, и҆ а҆вед̑наго, падоша посредѣ пещи ѻ҆гнем꙽ горѧщаѧ ѻ҆кова́ни·

И҆ хождахꙋ посредѣ пла́мене пою́ще б҃а, и҆ блс̑҇вѧще г҃а.
и҆ с ни́ми ставъ а҆за́рїѧ помоли́сѧ си́це, и҆ ѿвръзъ ѹ҆ста своѧ̀ посредѣ ѻ҆гнѧ̀, и҆ рече·

Блс̑҇венъ е҆си г҃и б҃е ѿц҃ь на́шихъ, и҆ хвално и҆ просла́влено и҆мѧ твое въ вѣкы.
ꙗ҆́ко праведенъ е҆си ѻ҆ всѧческихъ ꙗ҆же сътвори нам̑, и҆ вс̂ѧ дѣла твоѧ̀ и҆́стин꙽на, и҆ прави пꙋтїе твоѝ.
и҆ вс̂и сꙋди твоѝ и҆́стин꙽ни, и҆ сꙋд꙽бы и҆стин꙽ны сътворилъ е҆си, по всемъ ꙗ҆́же наведе на́ ны, и҆ на гра́дъ ст҃ыи ѿц҃ь на́шихъ і҆ерлс̑҇и́мъ.
ꙗ҆ко и҆стин꙽ною и҆ сꙋдомъ наведе сїѧ вс̂ѧ на́ ны, грѣхъ ради на́шихъ.
ꙗ҆ко съгрѣшихомъ и҆ безаконовахомъ ѿстꙋпити ѿ тебе, и҆ и҆ прегрѣшихомъ ѻ҆ всемъ, и҆ за́повѣдїи твои҆хъ не послꙋшахомъ.
н̂и съблюдохомъ, н̂и сътворихом̑ ꙗ҆коже заповѣ́да намъ, да бл҃го намъ бꙋдетъ.
и҆ вс̂е е҆ли́ко сътвори на́мъ·

и҆ вс̂е е҆ли́ко наведе на́ ны, вои҆́стин꙽о сꙋдъ сътвори.
и҆ преда́сть н̂ы въ рꙋцѣ врагъ безаконенъ, ме́рзокъ престꙋпникъ, и҆ цр҃ю неправед̑нꙋ и҆ лꙋкавнѣ́ишꙋ паче всеѧ̀ землѧ.
и҆ нн҃ѣ нѣсть на́мъ ѿвръсти ѹ҆стъ, стꙋдꙋ и҆ поношенїю бы́ша рабомъ тв꙽оим̑, и҆ чтꙋщимъ т̂ѧ·

Не преда́и же нас̑҇ до кон꙽ца и҆мени твое҆го ра́ди, и҆ не раздрꙋши завѣта твое҆го, и҆ не ѻ҆ста́ви млс̑҇ти твое́а ѿ на́съ.
а҆враа́ма рад̑и̑ возлю́бленаго ѿ тебе, и҆ за і҆саа́ка раба̀ твое҆го, и҆ і҆ил҃ѧ ст҃аго твое҆го.
и҆́мже гл҃а ѹ҆мно́жити сѣмѧ и҆хъ, ꙗ҆́ко ѕвѣзды нбс̑҇ныѧ, и҆ ꙗ҆́ко пѣсокъ въскра́и морѧ.
ꙗ҆́ко влады́ко ѹ҆малихомсѧ паче всѣхъ ꙗ҆зыкъ.
і҆ е҆смы смирени по все́и земли дне́сь, грѣхъ ради нашихъ.
и҆ нѣсть въ времѧ с̂е кнѧ́ѕѧ н̂и пророка н̂и во́жда, н̂и всесъж꙽женїѧ, н̂и жрътвы, н̂и приношенїѧ, н̂и кади́ла, н̂и мѣста пожрѣти пред̑ тобою, і҆ и҆зъѻ҆брѣсти млс̑҇ть.
н̂о дш҃ею съкрꙋшен꙽ною, и҆ дх҃омъ смирен꙽ном꙽ да прїѧ́ты бꙋдем̑, ꙗ҆́ко въ всесож꙽женїихъ ѻ҆́вних̑ и҆ юн꙽чих̑, и҆ ꙗ҆ко въ т꙽махъ а҆́гнецъ тꙋченъ.
та́ко да бꙋдетъ жрътва на́ша пред̑ тобо́ю дне́сь, и҆ сконча́емсѧ по тебѣ̀, ꙗ҆ко нѣсть стꙋда ѹ҆пова́ющимъ на́ тѧ.
и҆ нн҃ѣ въ слѣдъ тебе и҆́демъ всѣмъ срд̑цемъ, и҆ бои́м꙽сѧ тебѐ.
і҆ и́щемъ лица̀ твое҆го, не посрами нас̑҇.
н̂о сътвори с на́ми по смотренїю твое҆мꙋ, и҆ по мно́жествꙋ млс̑҇ти твое́ѧ.
і҆ и҆зми н̂ы по чюдесем̑ твоим̑, и҆ да́ждь сла́вꙋ и҆мени твое҆мꙋ г҃и.
и҆ да срамѧт̑сѧ вс̂и ꙗ҆влѧ́ющеи рабо́мъ твои҆мъ зла́ѧ.
и҆ постыдѧ́тсѧ ѿ всѧ́коѧ си́лы, и҆ крѣпости и҆хъ да съкрꙋшатсѧ.
и҆ разꙋмѣ́ютъ ꙗ҆́ко т̂ы е҆си г҃ь б҃ъ е҆ді́нъ, и҆ сла́венъ по все́и в꙽селен꙽нѣи·

И҆ не преста́ша въмѣта́юще ѧ҆̀ слꙋги цр҃евы, ж꙽гꙋще пещ̑҇ нафѳою и҆ смоло́ю, і҆ и҆згрѣбъми и҆ ло́зїемъ.
и҆ распала́шесѧ пла́мень над̑ пещїю, на м҃ѳ ла́ктъ.
и҆ ѻ҆быиде и҆ пож꙽же ꙗ҆́же ѻ҆брѣте ѻ҆ пещи халде́истѣи.
а҆гг҃лъ же гн҃ь сни́де кꙋпно съ а҆зарїиною ча́дїю.
в꙽ пе́щъ, и҆ ѿꙗ҆́тъ пла́мень ѻ҆гненыи ѿ пе́щи.
и҆ сътвори средѣ пещи ꙗ҆́ко дх҃ъ хладенъ шꙋмѧщь.
и҆ не прикоснꙋсѧ и҆хъ ѿнꙋдь ѻ҆́гнь, н̂и ѻ҆скорби, н̂и стꙋжи и҆мъ·

Тогда̀ тїи трїе ꙗ҆́ко е҆ді́ными ѹ҆сты поа́хꙋ, и҆ блс̑҇вѧхꙋ, и҆ славлѧхꙋ б҃а въ пещи гл҃юще·

Блс̑҇венъ е҆си г҃и б҃е ѿц҃ь на́шихъ, и҆ хва́ленъ, и҆ превозноша́емъ въ вѣки.
и҆ блс̑҇вено и҆мѧ славы твое́ѧ ст҃ое, и҆ хвалимъ, и҆ превъзноша́емъ въ вѣки·

Блс̑҇венъ е҆си въ цр҃кви ст҃ыѧ сла́вы твое́ѧ, и҆ хвали́мъ, и҆ превъзноси́мъ въ вѣки·

Блс̑҇венъ е҆си видѧ́и бездны, сѣдѧ́и на херꙋви́мехъ, и҆ хвалимъ, и҆ превозносимъ въ вѣки·

Блс̑҇венъ е҆си на прс̑҇тлѣ сла́вы црс̑҇твїа твое҆го, и҆ хвалимъ, и҆ превозносим̑ въ вѣки·

Блс̑҇вен̑҇ е҆си на тверди нбс̑҇нѣи, и҆ хвалимъ, и҆ прревозносим̑ въ вѣки·

Блс̑҇ви́те вс̂ѧ дѣла гн҃ѧ г҃а, по́ите и превозноси́те е҆го во вѣки·

Блс̑҇ви́те а҆гг҃ли гн҃и, нб҃са гн҃ѧ г҃а, пои́те и҆ превозноси́те е҆го въ вѣки·

Блс̑҇ви́те воды вс̂ѧ превы́шнѧа нб҃съ, и҆ вс̂ѧ си́лы гн҃ѧ г҃а, по́ите и҆ превозноси́те е҆го въ вѣки·

Блс̑҇ви́те сл҃нце и҆ мс̑҇ць, ѕвѣзды небесныѧ г҃а, по́ите и҆ превозносите ег̑҇ въ вѣки·

Блс̑҇ви́те всѧ́къ до́ждь и҆ роса, и҆ вс̂и дс҃и г҃а, пои́те и҆ превозноси́те е҆го въ вѣки·

Блс̑҇ви́те ѻ҆гнь и҆ ва́ръ, зима̀ и҆ зно́и г҃а, по́ите и҆ превозноси́те е҆го въ вѣки·

Блс̑҇ви́те росы і҆ и҆ней, ле́ды и҆ мраз̑ г҃а, поите и҆ превозносите е҆го въ вѣки·

Блс̑҇вите сланы и҆ снѣзи, но́щь и҆ дн҃їе г҃а, по́ите и҆ превозноси́те е҆го въ вѣки·

Блс̑҇ви́те свт̑ѣ тм̂а, млънїѧ и҆ ѻ́блаци г҃а, по́ите и҆ превозноси́те е҆го въ вѣки·

Блс̑҇ви́те землѧ̀, го́ры, и҆ хлъми, вс̂ѧ проѕѧба́ющаѧ на не́и г҃а, поите и҆ превозноси́те е҆го въ вк̑҇ѣ·

Блс̑҇ви́те и҆сточницы, мо́рѧ, и҆ рѣки, кі́ти, и҆ вс̂ѧ движа́щїасѧ въ водах̑ г҃а, по́ите и҆ превозноси́те е҆го въ вѣки·

Блс̑҇ви́те вс̂ѧ пти́ца нбс̑҇ныа, ѕвѣрїе, и҆ вс̂и скоти г҃а, по́ите и҆ превоз̑носи́те е҆го въ вѣки·

Блс̑҇ви́те сн҃ве чл҃чьстїи, и҆ блс̑҇ви і҆и҆л҃ю г҃а, по́ите и҆ превозноси́те е҆го въ вѣки·

Блс̑҇ви́те і҆ере́и гн҃и раби г҃а, пои́те и҆ превозноси́те е҆го въ вѣки·

Блс̑҇ви́те дс҃и и҆ дш҃а правед̑ных̑ прпд̑бнїи и҆ смиренїи срд̑цем̑ г҃а, по́ите и҆ превозноси́те е҆го въ вѣки·

Блс̑҇ви́те, а҆на́нїа, а҆за́рїа, миса́илъ г҃а, по́ите и҆ превозноси́те е҆го въ вѣки·

Ꙗ҆́ко и҆зѧт̑ н̂ы ѿ а́да, и҆ сп҃се н̂ы ѿ рꙋки смр҃ти і҆ и҆збави н̂ы ѿ среды пе́щи и҆ горѧ́ща пла́мене, и҆ ѿ среды ѻ҆гнѧ и҆зба́ви н̂ы·

И҆сповѣдаитесѧ гви ꙗко бл҃гъ ꙗ҆́ко въ вѣки млс̑҇ть е҆го.
блс̑҇ви́те вс̂и чтꙋщеи г҃а б҃а богом꙽, по́ите и҆сповѣ́даитесѧ, ꙗ҆́ко въ вѣки млс̑҇ть е҆го·

Навходоносор꙽꙽ же слы́ша пою́ща их̑ и҆ чюдисѧ, и҆ въстав̑҇ съ т꙽ща́нїемъ.
и҆ рече вельмо́жамъ своим̑, не три л̂и бѣ́хомъ мꙋжа въврьгли средѣ ѻ҆гнѧ̀ свѧ́заны.
и҆ рѣша цр҃ю, и҆́стин꙽ною цр҃ю.
и҆ рече цр҃ь, с̂е а҆зъ ви́ждꙋ мꙋжа четы́ри разд̑рѣшены, и҆ ходѧщаѧ средѣ ѻ҆гнѧ, и҆ расыпа́нїѧ нѣсть в них̑.
ѻ҆зрѣч꙽ же четве́ртаго подобна сн҃ꙋ бж҃їю·

Тогда̀ прїиде навходоносоръ къ ѹ́стїю пе́щи ѻ҆гнем̑ раждеженыѧ, и҆ реч̑҇, седрах̑, миса́хъ, а҆вед̑наго раби б҃а вы́шнѧго, и҆зыидете, и҆ прїидѣте.
і҆ и҆зыиде седра́хъ, мисах̑, а҆вед̑наго, ѿ среды ѻ҆гнѧ̀.
и҆ събра́шасѧ кн҃ѕи, и҆ вое҆воды ѻ҆блада́ющеи страна́ми, и҆ вельмо́жа цр҃ѧ, и҆ ви́дѧхꙋ мꙋжа, ꙗ҆́ко нѣсть телесемъ и҆хъ съдолѣлъ ѻ҆́гнь, и҆ вла́са главы и҆хъ не ѻ҆палѝ, и҆ ры́зы и҆х꙽ не и҆змѣни́шасѧ, и҆ вонѧ ѻ҆гнены не бѧ́ше в них̑·

И҆ поклони́сѧ пред̑ ни́ми цр҃ь б҃ꙋ.
и҆ ѿвѣща̀ навходоносоръ цр҃ь, и́ рече.
блс̑҇вен̑҇ б҃ъ седрахов̑҇ миса́ховъ, и҆ а҆вед̑наго, и҆же посла̀ а҆гг҃ла свое҆го, і҆ и҆зѧ̀ ѻ҆́троки своа̀ ꙗ҆́ко ѹ҆пова́ша к немꙋ.
и҆ сло́во цр҃ево премѣни́ша, и҆ преда́ша телеса̀ своѧ̀ въ ѻ҆гнь ꙗ҆коже да не послꙋжатъ н̂и поклонѧ́тсѧ всемꙋ̀ бо́гꙋ и҆́номꙋ, н̂о точїю б҃ꙋ свое҆мꙋ·

А҆́з же заповѣда́ю за́повѣдь, вс̂и лю́дїе племена̑ ꙗ҆́зы́къ, а҆ще речете хꙋлꙋ до б҃а седра́хова, и҆ миса́хова, и҆ а҆вед̑наго, въ пагꙋбꙋ бꙋдꙋтъ, и҆ до́мове и҆хъ въ раз꙽грабленїе.
ꙗ҆́ко нѣсть б҃а дрꙋгаго, и҆же возможетъ и҆зба́вити си́це.
тогда̀ цр҃ь ѻ҆прави седра́ха, мисаха̑ и҆ а҆вед̑наго, въ странѣ вавѷлон꙽стеи.
и҆ възвеличи ѧ҆̀ и҆ сподоби ѧ҆̀ старѣ́ишин꙽ствꙋ жидовъ всѣхъ сꙋщихъ въ црс̑҇твїи е҆го·

Видѣнїе, е҃·

Навходоносоръ цр҃ь, всѣмъ лю́дем̑, племенемъ, ꙗ҆зы́ком̑, сꙋщїимъ въ все́и земли, ми́ръ вамъ ѹ҆мно́жит̑сѧ.
зна́менїѧ и҆ чюдеса е҆же сътворѝ со мно́ю б҃ъ вы́шнїи.
ѹ҆год̑но бы́сть предо мно́ю совѣстити вам̑, ꙗ҆́ко вели́ко и҆ крѣп꙽ко.
црс̑҇тво е҆го, црс̑҇тво вѣчное, и҆ вла́сть е҆го въ ро́ды и҆ ро́ды·

Глв̑҇а, д҃·

Азъ навходоносо́ръ ѻ҆билꙋѧ бѣхъ в домꙋ̀ свое҆мъ, и҆ бл҃го цвѣтыи на прс̑҇тлѣ своем̑.

Сонъ ви́дѣхъ и҆ ѹ҆стра́ши м̂ѧ.
и҆ смѧто́хсѧ на ло́жи моемъ, и҆ видѣ́нїѧ главы̀ мое҆ѧ смѧта́хꙋ м̂ѧ.
и҆ мно́ю заповѣдасѧ за́повѣдь, привестѝ пред̑ мѧ всѧ̀ мꙋжа мꙋдрыѧ вавѷлон꙽скы, да сказа́нїе сна̀ възвѣтѧ́тъ мн̂ѣ.
и҆ въхожда́хꙋ ба́лїѧ, и҆ вол꙽сви газарин꙽стїи, и҆ халдѣ́и, и҆ со́нъ а҆зъ рѣхъ пред̑ ними.
и҆ сказа́нїѧ е҆го не възвѣсти́ша м̂и.
до́ндеже дрꙋгїи вни́де пред̑ мѧ данїилъ, е҆мꙋже и҆мѧ валтасаръ, по и́мени б҃а мое҆го, и҆же дх҃ъ бж҃їи ст҃ъ и҆́мать в꙽ себѣ, и҆ со́нъ пред̑ нимъ рѣхъ.
валтаса́ре кнѧ́же ба́лїискь, е҆гоже а҆зъ разꙋмѣхъ ꙗ҆́ко дх҃ъ бж҃їи ст҃ыи и҆́маши и҆ всѧ̀ та́ина не ѿнемо́жетсѧ тебѣ.
слы́ши видѣ́нїе сна̀ мое҆го и҆же ви́дѣхъ и҆ сказа́нїе е҆го повѣждъ мн̂ѣ.
и҆ вѣдѣнїе главы̀ моеѧ на ло́жи мое҆мъ.
зрѣхъ, и҆ с̂е дꙋбъ средѣ землѧ̀, и҆ высота̀ е҆го възвеличисѧ ѕѣло, и҆ досѧза́ше до нб҃се.
и҆ ко́ренїе е҆го в꙽ кон꙽цых̑ землѧ̀ всеѧ̀.
ли́ствїе е҆го кра́сно, и҆ плод̑ е҆го мног꙽, и҆ пи́ща всѣхъ в нем̑.
и҆ под ни́мъ вселѧ́хꙋсѧ вс̂и ѕвѣрїе ди́вїи, и҆ въ вѣтвехъ е҆го живѧ́хꙋ вс̂ѧ пти́ца нбс̑҇ныѧ, и҆ ѿ него пита́шесѧ вс̂ѧ землѧ̀.
ви́дѣхъ въ снѣ̀ но́щїю на ло́жи мое҆мъ.
и҆ с̂е бъж꙽дрїи ст҃ыи ѿт̑ нб҃се сни́де, и҆ въз꙽гласѝ крѣп꙽цѣ, и҆ рече, посѣцѣте дꙋбъ, и҆ ѻ҆бїате вѣ́ѧ е҆го.
и҆ ѻ҆брꙋшите ли́ствїе е҆го, и҆ расы́плете плод̑ е҆го.
да сѧ възы́блютъ звѣрїе и҆же под ни́мъ, и҆ пти́ца съ вѣтвеи е҆го.
то́чїю прониче́нїе ко́ренїѧ е҆го въ землѝ ѻ҆ста́вите.
и҆ въ ѹ́зе желѣзне и҆ мѣ́дьне и въ травѣ вн̂ѣ, и҆ ро́сѣ нбс̑҇нѣи вселит̑сѧ, и҆ съ звѣрем̑ ди́вїим̑ ча́сть е҆го.
ѿ чл҃къ и҆змѣнит̑сѧ срд̑це е҆го, и҆ срд̑це звѣрино дас̑҇ѧ е҆мꙋ.
и҆ седмь вре́менъ и҆змѣнит̑сѧ ѻ҆ нем̑.
сказа́нїемъ бъж꙽дре сло́во и҆ гл҃ъ ст҃ъ въпро́съ.
да ѹ҆вѣ́дѧтъ живꙋщеи ꙗ҆́ко владе́тъ вы́шнїи цр҃ьствомъ чл҃чемъ, и҆ е҆мꙋже въсхо́щет̑ дастъ е҆̀.
и҆ похꙋле́нїе чл҃че въста́вит̑ в нѐ.
сїи со́нъ и҆же ви́дѣхъ а҆́зъ навходоносо́ръ цр҃ь.
ты́ же валтаса́ре сказа́нїе е҆го повѣждь пре́ди.
ꙗ҆́ко вс̂и мꙋдрїи црс̑҇тва мое҆го не могꙋтъ сказа́нїѧ е҆мꙋ и҆сповѣдати мн̂ѣ.
ты́ же данїи́ле мо́жеши, ꙗ҆́ко дх҃ъ бж҃їи ст҃ъ в тебѣ·

Тогда̀ данїилъ е҆мꙋже и҆мѧ валтаса́ръ, ѹ҆жасе́сѧ а҆ки е҆ді́нъ ча́съ, и҆ размышле́нїѧ ег̑҇ смꙋщахꙋ е҆го.
и҆ ѿвѣща̀ цр҃ь, и҆ ре́че валтасаре, со́нъ мои и҆ сказа́нїе е҆го да тебе не т꙽щитъ.
и҆ ѿвѣща̀ валтаса́ръ, и҆ рече, гдс̑҇не, да бꙋдетъ со́н꙽ сїи ненави́дѧщимъ т̂ѧ, и҆ сказа́нїе е҆го враго́мъ твои҆мъ.
дꙋбъ и҆же ви́дѣ възвели́чивыисѧ и҆ ѹ҆крепѣвыи, е҆гоже высота̀ досѧза́ше нб҃се, и҆ ко́ренїе е҆го въ все́и землѝ, и҆ ли́ствїе е҆го бл҃го цвѣтно, и҆ пло́дъ е҆го мног̑҇, и҆ пи́ща всѣмъ в꙽ немъ, под ни́мъ живѧ́хꙋ звѣрїе ди́вїи, и҆ въ вѣтвех̑ е҆го ѹ҆гнѣздѧ́хꙋсѧ пти́ца нбс̑҇ныѧ.
ты̀ е҆си цр҃ю, ꙗ҆́ко възвели́чисѧ и҆ ѹ҆крепѣ.
и҆ вели́чество твое възвели́чисѧ и҆ досѧже нб҃се, и҆ вла́сть твоѧ до конець зе́мльных̑.
и҆ ꙗ҆́ко ви́дѣ цр҃ь а҆гг҃ла, и ст҃аго сходѧ́ща съ нб҃се, и҆ рече, посѣцѣте дб̑҇ꙋ, и҆ расы́плете и҆̀ то́чїю прониче́нїе ко́ренїѧ е҆го в зем̑лѝ ѻ҆ста́вите, и҆ въ ѹ́зѣ желѣзнѣ и҆ мѣдѧнѣ, и҆ въ зла́це внѣ̀ и҆ въ росѣ нбс̑҇неи въдво́ритсѧ, съ звѣремъ ди́вїимъ ча́сть е҆го.
до́ндеже седмь вре́менъ премѣни́тсѧ ѻ҆ немъ·

Се́ же сказа́нїе е҆го цр҃ю.
и҆ сказа́нїе вы́шнѧго с̂е е҆сть, е҆же приспѣ̀ на господи́на мое҆го цр҃ѧ.
и҆ж꙽денꙋтъ т̂ѧ ѿ чл҃кь, и҆ съ дивїимъ звѣремъ бꙋдетъ житїе твоѐ.
и҆ траво́ю а҆ки вола̀ напита́ютъ т̂ѧ, и҆ ѿ росы̀ небнс̑҇ыѧ тѣло твое ѻ҆брастетъ.
и҆ се́д꙽мь временъ и҆змѣни́тсѧ ѻ҆ тебѣ, до́ндеже ѹ҆вѣси ꙗ҆ко съвладе́тъ вы́шнїи црс̑҇твомъ чл҃чемъ, и҆ е҆мꙋже въсхо́щетъ дасть е҆̀·

и҆ е́же рече, ѻ҆ста́вите проникнове́нїе ко́ренїѧ дꙋба въ землѝ.
црс̑҇тво твое тебѣ̀ бꙋдетъ, ѿнележе ѹ҆вѣси вла́сть нбс̑҇нꙋю.
сего ради цр҃ю совѣтъ мо́и да ти бꙋдетъ ѹ҆го́денъ, и҆ грѣхѝ своѧ млс̑҇тьми расы́пли, и҆ непра́вды твоѧ щедрота́ми ѹ҆богихъ, негли бꙋдетъ въздержа̀ ꙗ҆́рость грѣхомъ твои҆мъ б҃ъ·

се̂ всѐ пости́же навходоносо́ра цр҃ѧ.
по дво́ю же надесѧте мс̑҇цꙋ црс̑҇тва е҆го, въ вавѷло́нѣ б̂ѣ ходѧ̀, и҆ на забра́лѣхъ гра́да съ всею сла́вою е҆го, и на сѣнехъ е҆го хожда́ше<.>

И҆ ѿвѣща̀ цр҃ь, и҆ рече, нѣсть ли с̂е вавѷлонъ вели́каѧ ю҆́же а҆зъ съгради домꙋ црс̑҇твꙋ въ дръжа́ве крѣпости моеѧ, въ че́сть сла́вы моеѧ.
е҆ще б̂о сло́вꙋ сꙋщꙋ въ ѹ҆стѣхъ цр҃ихъ.
глс̑҇а съ нб҃се бысть, црс̑҇тво твое преи҆де ѿ тебѐ, и҆ ѿ чл҃къ ѿженꙋтъ т̂ѧ, и҆ съ звѣремъ ди́вїимъ жи́тїе твое.
и҆ траво́ю а҆ки вола напитают̑ т̂ѧ.
и҆ седмь вре́менъ и҆змѣнит̑сѧ ѻ҆ тебѣ, дондеже ѹ҆вѣси ꙗ҆́ко съвладѣетъ вы́шнїи црс̑҇твомъ чл҃чемъ, и҆ е҆мꙋже въсхо́щетъ дасть е҆̀·

В то́и ча́съ сло́во сконча́сѧ на цр҃и навходоносо́рѣ.
и҆ ѡ чл҃кь ѿгна́сѧ, и҆ травꙋ а҆ки волъ ꙗ҆дѧ́ше, и҆ ѿ росы нбс̑҇ныѧ тѣло е҆го ѻ҆брастѐ, дон꙽деже вла́си е҆мꙋ ꙗ҆́ко львꙋ̀ възвелича́ша, и҆ но́гте е҆мꙋ а҆ки пти́цамъ·

И҆ по сконча́нїи тх̑ѣ дн҃їи.
а҆зъ нав꙽ходоносо́ръ ѻ҆́чи своѝ на́ нб҃о въздви́гъ, и҆ ѹ́мъ мои къ мнѣ сѧ възвратѝ.
вышнѧго блс̑҇вих̑ и҆ живꙋщаго въ вѣки похвали́хъ.
ꙗ҆́ко власть е҆го, вла́сть вѣ́чна, и црс̑҇тво е҆го в ро́ды и҆ ро́ды.
и҆ вс̂и живꙋщеи на землѝ нивочто́же намѣни́шасѧ.
по во́ли свое́и тво́ритъ в꙽ си́лѣ нбс̑҇нѣи, и҆ в селе́нїи земльнм̑ѣ.
и҆ нѣсть и҆же сѧ проти́витъ рꙋцѣ е҆го, и҆ речетъ е҆мꙋ, чт̂о сътворѝ.
в꙽ то времѧ ѹ́мъ мой възврати́сѧ къ мн̂ѣ, и҆ в че́сть црс̑҇тва свое҆го прїидохъ.
и҆ ѻ́зречь моѧ възвратисѧ къ мн̂ѣ.
и҆ мꙋчи́теле моѝ, и҆ вельмо́жа моѧ и҆ска́хꙋ мене.
и҆ въ црс̑҇твѣ свое҆мъ ѹ҆тверди́хсѧ, и҆ вели́чество и҆зъѻ҆би́лнѣе приложи́ ми сѧ·

Нн҃ѣ ѹ҆бо а҆зъ навходоносо́ръ, хвалю̀ и҆ превозноша́ю, и҆ сла́влю цр҃ѧ нбс̑҇наго.
ꙗ҆́ко всѧ̀ дѣла е҆го и́стин꙽на, и҆ пꙋтїе е҆го сꙋ́ди.
и҆ вс̂ѧ ходѧ́щаѧ съ презрѣнїемъ мо́жетъ смири́ти·

Глв̑҇а, е҃· Видѣнїе, ѕ҃·

Валтаса́ръ цр҃ь сътворѝ вече́рю вельмо́жамъ своим꙽ ты́сѧщи мꙋжъ.
пред̑ ты́сѧщею же винопи́тїи валтасаръ реч̑҇ въ вкꙋше́нїи вина̀, ꙗ҆́коже принестѝ сосꙋды зла́ты и҆ сре́брены, ꙗ҆́же бѣ̀ и҆зне́слъ ѿц҃ъ е҆го навходоносо́ръ ѿ хра́ма г҃а б҃а и҆же въ і҆ерс̑҇лимѣ, и҆ да пїютъ в нихъ цр҃ь и҆ вельмо́жа е҆го, и҆ же́нимы е҆го, и҆ лежꙋщеи ѻ́крс̑҇тъ е҆го.
и҆ принесо́ша сосꙋды златыѧ и҆ сре́бреныѧ, ꙗ҆́же и҆знесѐ навходоносо́ръ цр҃ь ѿ хра́ма г҃а б҃а и҆же въ і҆ерс̑҇лимѣ.
и҆ пїѧхꙋ в ни́хъ цр҃ь и҆ вельмо́жа е҆го, и҆ женимы е҆го и҆ лежꙋщеи ѻ҆́крс̑҇тъ е҆го, и҆ похвали́ша̑ богѝ зла́тыѧ, и҆ сре́бреныѧ, и҆ мѣдѧныѧ, и҆ ка́меныѧ, и҆ древѧныѧ, и҆ желѣзныѧ.
и҆ б҃а вѣчнаго не блс̑҇виша, и҆мꙋщаго вла́сть дх҃а и҆хъ·

въ то́и ча́съ и҆зыидо́ша прьсты рꙋкѝ чл҃ча, и҆ писа́хꙋ проти́вꙋ лам꙽па́ды на пра́зѣ стѣны̀ хра́ма цр҃ѧ·

и҆ цр҃ь видѧ́ше прьсты рꙋ́ки пи́шꙋщїа.
тогда̀ цр҃ю ѻ҆зре́чь и҆змѣни́сѧ, и҆ размышленїа е҆го смꙋща́хꙋть и҆̀, и҆ съѹ҆́зы чре́слъ е҆го раслаблѧ́хꙋсѧ, и҆ колѣни сꙋсъ сража́стасѧ.
и҆ възъпѝ цр҃ь си́лою, ꙗ҆́коже въвести во́л꙽хвы, и҆ халдѣѧ газарин꙽ски.
и҆ ѿвѣща̀ цр҃ь мꙋ́дрымъ вавѷлон꙽скимъ.
и҆же почте́тъ въписа́нїе с̂е, и҆ ра́зꙋмъ е҆го съвѣсти́тъ мн̂ѣ.
тои въ багрѧни́цꙋ ѻ҆блече́тсѧ, и҆ гри́вна зла́таѧ на вы́и е҆го, и҆ тре́тїи въ црс̑҇твѣ мое҆мъ съ властѝ начне́тъ.
и҆ вхожда́хꙋ вс̂и мꙋ́дрїи къ цр҃ю.
и҆ не можа́хꙋ въписа́нїѧ почести, ни ра́зꙋма цр҃ю възвѣсти́ти.
цр҃ь же вал꙽таса́ръ възмѧте́сѧ, и҆ ѻзречь е҆го и҆змѣни́сѧ на не́мъ.
и҆ вельмо́жа е҆го смꙋщахꙋсѧ·

И҆ цр҃ца вни́де въ хра́мъ пи́рныи.
и҆ ѿвѣща цр҃ца и҆ реч̑҇, цр҃ю въ вѣ́ки живѝ.
да не смꙋтѧ́тъ тебѐ размышле́нїѧ твоѧ, и҆ ѻ҆зречь твоѧ да сѧ не и҆змѣнѧ́етъ.
е҆сть мꙋж́ъ въ црс̑҇твѣ твое҆мъ, в не́мже дх҃ъ бж҃їи.
и҆ въ дн҃и ѿц҃а твое҆го бъждрета, и҆ смы́слъ ѻ҆брѣте́сѧ в нем̑.
и҆ цр҃ь навходоносо́ръ ѿц҃ъ твои, кн҃ѕѧ и҆̀ поста́ви вол꙽хвомъ, и҆ ба́лїам̑, и҆ халдѣ́емъ газарин꙽скимъ.
ꙗ҆́ко дх҃ъ и҆зли́ха бѣа́ше в не́мъ, и҆ премꙋдрость и҆ смы́слъ ѻ҆брѣте́сѧ в не́м, сказа́ѧ сны̀, и҆ съвѣ́стꙋѧ дръжи́маѧ а҆гг҃лы, и҆ разрд̑ѣша́ѧ съѹ҆́зы данїи́лъ.
и҆ цр҃ь нарече е҆мꙋ и҆мѧ вал꙽таса́ръ·

нн҃ѣ ѹ҆бо да сѧ взове́тъ, и҆ сказа́нїе съвѣсти́тъ тебѣ·

Тогда̀ данїил̑҇ въведе́сѧ пред̑ цр҃ѧ.
и҆ рече цр҃ь пред̑ всѣми, т̂ы ли е҆си данїи́лъ ѿ сн҃овъ плѣн꙽никъ жидо́въскъ, и҆же приведе навходоносор꙽ ѿц҃ъ мои.
слы́шахъ ѻ҆ тебѣ ꙗ҆́ко дх҃ъ бж҃їи в тебѣ, и҆ бъжд̑ре́нїѧ и҆ смы́слъ, и҆ премꙋдрость и҆з꙽ѻ҆би́ла ѻ҆брѣте́сѧ в тебѣ.
и҆ с̂е нн҃ѣ внидо́ша пред̑ мѧ мꙋ́дрїи, вол꙽сви газари́н꙽стїи, да въписа́нїе с̂е почтꙋтъ, и҆ сказа́нїа е҆го съвѣстѧт̑ м̂и, и҆ не мого́ша съвѣсти́ти мн̂ѣ.
а҆́з꙽ же слы́шахъ ѻ҆ тебѣ ꙗ҆́ко мо́жеши сꙋ́ды сказати.
нн҃ѣ ѹ҆бо а҆ще възмо́жеши въписа́нїе с̂е прочести, и҆ сказа́нїе е҆го съвѣсти́ти мн̂ѣ.
въ багрѧни́цꙋ ѻ҆блече́шисѧ, и҆ гри́вна зла́та на вы́и твое́и бꙋдет̑, и҆ тре́тїи въ црс̑҇твѣ мое҆мъ съвластѝ начне́ши.
тогда̀ ѿвѣща данїи́лъ, и҆ рече пред̑ цр҃емъ.
даѧ́нїа твоѧ с тобо́ю да бꙋдꙋтъ, и҆ да́ръ до́мꙋ твое҆го и҆́номꙋ да́ждь.
а҆з꙽ же писа́нїе почтꙋ цр҃ю, и҆ сказа́нїе е҆го съвѣщꙋ тебѣ.
цр҃ю, б҃ъ вы́шнїи, црс̑҇тво и҆ вели́чество, и҆ че́сть и҆ сла́вꙋ да́сть навходоносо́рꙋ ѿц҃ꙋ твое҆мꙋ.
и҆ ѿ величества е҆же е҆мꙋ да́сть, вс̂и лю́дїе, племена, ꙗ҆зы́цы бѧ́хꙋ трѧсꙋщесѧ и҆ боѧ́щесѧ ѿ лица̀ е҆го.
и҆ ꙗ҆́же хотѧ́ше ѹ҆бива́ше, и҆ ꙗ҆́же хотѧ́ше живлѧ́ше, и҆ ꙗ҆́же хотѧ́ше възвыша́ше, и҆ ꙗ҆́же хотѧ́ше смирѧ́ше·

и҆ е҆гда̀ възнесе́сѧ срд̑це е҆го, и҆ ѹ҆твер꙽ди́сѧ дх҃ъ е҆го ꙗ҆́коже презоровати.
съведе́сѧ ѿ прс̑҇тла црс̑҇тва, и҆ че́сть ѿꙗ҆́сѧ ѿ него.
и҆ ѿ чл҃кь ѿгна́сѧ, и҆ срд̑це е҆го съ ѕвѣремъ ѿда́сѧ, и҆ жи́тїе е҆го съ дивїи҆ми ѻ҆слы̀.
и҆ траво́ю а҆ки вола̀ пита́хꙋ е҆го, и҆ ѿ росы нбс̑҇ныа ѻ҆брасте тѣ́ло е҆го, ѻ҆брасте до́ндеже вла́си главы е҆го ꙗ҆́ко львомъ възвелича́ша, и҆ но́гте е҆го ꙗ҆́ко пти́цамъ.
до́ндеже разꙋмѣ ꙗ҆́ко владѣ́етъ вы́шнїи црс̑҇твомъ чл҃чемъ, и҆ е҆мꙋже хо́щетъ да́сть е҆̀·

И҆ т̂ы ѹ҆бо сн҃ꙋ е҆го валтаса́ре, не смири срд̑ца свое҆го пред̑ гм҃ъ е҆гоже с̂е вс̂е ѹ҆ видѣ́нїе.
н̂о на г҃а б҃а нбс̑҇наго възнесе́сѧ, и҆ съсꙋ́ды хра́ма е҆го принесе пред̑ сѧ.
ты же и҆ вельмо́жа твоѧ, и҆ же́нимы твоѧ, и҆ лежꙋщеи ѻ҆́крс̑҇тъ тебе, вино пїѧ́сте в ни́хъ.
и҆ боги зла́тыѧ, и҆ сре́бреныѧ, и҆ ка́меныѧ, и҆ древѧныѧ, и҆ желѣ́зныѧ, и҆же ни видѧтъ ни слы́шатъ ни разꙋмѣ́ютъ, похвали.
и҆ бг҃а в негоже дыха́нїе твое в рꙋ́кꙋ е҆го и҆ вс̂и пꙋти твои, не позна̀ е҆го ниже просла́ви.
сего ради ѿ лица е҆го пꙋсти́шасѧ прьсты рꙋ́чнїи, и҆ писа́нїе с̂е вчини́ша·

се же е҆сть писа́нїе вчине́ное·

Ма́ни, ѳе́келъ, фа́ресъ·

с̂е сказа́нїе гл҃а·

ма́ни.
и҆змѣри б҃ъ црс̑҇тво твое и҆ скон꙽ча е҆̀·

ѳе́келъ.
поста́висѧ в꙽ мѣ́рахъ, и҆ ѻ҆брѣте́сѧ ли́хꙋемо.
фа́ресъ.
раздѣли́сѧ цр҃ьство твое ѿ тебе, и҆ ѿда́стьсѧ ми́домъ и҆ пе́рсомъ·

И҆ рече вал꙽тасаръ ѻ҆блецѣте и҆̀, и҆ ѻ҆блеко́ша данїи҆ла в꙽ багрѧни́цꙋ, и҆ гри́внꙋ зла́тꙋю възложи́ша на вы́ю е҆го.
и҆ заповѣ́да ѻ҆ немъ ꙗ҆́коже бы́ти е҆мꙋ кн҃ѕю, и҆ тре́тїемꙋ въ црс̑҇твѣ е҆го·

Видѣ́нїе з҃<.>

Валтаса́ра цр҃ѧ хал꙽деиска ѹ҆би́ша в т̂ꙋ но́щъ.
дарїи же мидеани́нъ прїа црс̑҇тво, сы́и шестидесѧт̑ и҆ двою лѣтꙋ·

Глв̑҇а, ѕ҃·

И бы́сть ѹ҆год̑но пред̑ да́рїемъ, и҆ поста́ви въ црс̑҇твѣ кн҃ѕь р҃, и҆ к҃, ꙗ҆коже бы́ти и҆мъ въ всемъ црс̑҇твѣ е҆го.
над̑ ни́ми же три чино́вники, ѿ ни́х꙽же б̂ѣ данїи́лъ тре́тїи.
ꙗ҆коже повѣдаемъ рѣчи и҆мъ кн҃ѕемъ, да цр҃ю не зазлѧ́ютъ.
и҆ бѣ данїи́лъ над̑ ни́ми, ꙗ҆́ко дх҃ъ бѣа́ше и҆з꙽ѻ҆би́ла в немъ, и҆ цр҃ь поста́ви и҆̀ въ всемъ црс̑҇твѣ свое҆мъ.
чино́вницы же и҆ кнѧ́ѕи и҆ска́хꙋ вины̀ на данїи́ла.
и҆ всеа вины̀ и҆ събла́зна и҆ грѣха̀ не ѻбрѣтес̑҇ до него, ꙗ҆́ко и҆звѣ́стъ бѣ́аше·

И҆ рѣша чино́вницы, не ѻ҆брѧ́щемъ до данїила вины̀, а҆ще не въ зако́нх̑ѣ б҃а е҆го.
тогда̀ чино́в꙽ницы и҆ кн҃ѕи ста́вше пред̑ цр҃емъ рѣша е҆мꙋ, дарїе цр҃ю, въ вѣки живи.
съвѣща́ша вси и҆же въ црс̑҇твѣ твое҆м꙽, вое҆во́ды, и҆ кн҃ѕи, и҆ ѻблада́ющеи страна́ми, ꙗ҆́коже ѹ҆ста́вити ѹ҆ста́въ црс̑҇кь и҆ ѹ҆крѣпи́ти заро́къ.
ꙗ҆́ко а҆ще кт̂о про́ситъ проше́нїа всего ѹ҆ бо́га, и҆ли чл҃ка до дн҃ъ л҃, ра́звѣ то́чїю ѹ҆ тебе цр҃ю, да сѧ въвръжетъ в ро́въ лев꙽скь.
нн҃ѣ ѹ҆бо цр҃ю ѹ҆ста́ви заро́къ, и҆ положи писанїе, ꙗ҆́ко да сѧ не и҆змѣнитъ заповѣдь мид̑ска и҆ прьска, ꙗ҆́ко да сѧ не премѣнитъ сꙋпроти́въ семꙋ·

И҆ тогда̀ цр҃ь да́рїи повелѣ въписа́нїе и҆ заповѣдь.
данїил̑҇ же е҆гда ѹ҆вѣде, ꙗ҆́ко за́повѣдь вчини́сѧ, вни́де в до́мъ свои.
двер꙽ца же ѿвер꙽сты е҆мꙋ в нога́тицы е҆го проти́вꙋ і҆е҆рлс̑҇имꙋ.
въ три́ же вре́мена дн҃е бѣа́ше прекланѧ́а колѣ́ни свои, молѧ́сѧ и҆сповѣда́ѧ пред̑ бг҃омъ свои҆мъ, ꙗ҆́коже б̂ѣ творѧ́и преже·

Тогда̀ мꙋжи ѻ҆ни блюдо́ша, и҆ ѻ҆брѣто́ша данїи́ла просѧ́ща и҆ молѧщасѧ пред̑ гм҃ъ свои҆мъ.
и҆ пришед̑ше рѣша пред̑ цр҃емъ.
цр҃ю не заро́къ л̂и т̂ы б̂ѣ ѹ҆чини́лъ ꙗ҆́ко весь чл҃къ и҆же а҆ще просит̑ всего ѹ҆ б҃а, и҆ли чл҃ка до л҃ дн҃ъ, н̂о то́чїю ѹ҆ тебе цр҃ю, да сѧ въвержет̑ в ро́въ лев꙽скь.
и҆ рече цр҃ь, и҆стин꙽но сло́во, и҆ за́повѣдь мид̑ска и҆ пер꙽ска не минетъ.
и҆ тогда̀ ѿвѣща́ша пред̑ цр҃емъ и҆ гл҃аша, данїи́лъ и҆же ѿ сн҃ов꙽ плѣ́нникъ жидо́в꙽скь, не покори́сѧ за́повѣди твое́и и҆ неради ѻ҆ заро́цѣ иже в꙽чинѝ.
три б̂о времена дн҃е про́ситъ ѹ҆ б҃а свое҆го проше́нїи своих̑.
тогда̀ цр҃ь ꙗ҆́ко слы́шавъ сло́во с̂е, ѕѣ́ло съжашли с̂и ѻ҆ нем꙽, и҆ ѻ҆ данїи́лѣ, и҆ прѧ́сѧ и҆зба́вити и҆̀, и҆ бѣ̀ до вечера прѧ́сѧ ꙗ҆́ко и҆зба́вити и҆̀.
тогда̀ мꙋжи ѻ҆ни гл҃аша цр҃ю.
вѣ́ждь цр҃ю ꙗ҆́ко ми́домъ и҆ пе́рсомъ, нѣсть лѣ́по премѣни́ти заро́ка и҆ ѹ҆ста́ва и҆же цр҃ь съста́витъ·

Тогда̀ цр҃ь рече, и҆ приведо́ша данїи́ла и҆ въвергоша и҆̀ в ровъ лев꙽скь.
и҆ рече цр҃ь данїи́лꙋ, б҃ъ е҆мꙋже т̂ы слꙋжиши прс̑҇но, и҆зба́витъ т̂ѧ.
и҆ принесо́ша камы́к꙽ е҆ді́нъ, и҆ възложи́ша и҆̀ на ѹ҆́стїе р꙽вꙋ, и҆ знамена цр҃ь прьстьнемъ свои҆мъ, и҆ прьстьнемъ вельмо́жъ е҆го, да сѧ не и҆змѣнитъ дѣѧ́нїе ѻ҆ данїи́лѣ.
и҆ ѿи҆де цр҃ь в до́мъ свои, и҆ леже без꙽ вечерѧ, и҆ ꙗ҆́ди не внесо́ша к꙽ немꙋ, и҆ сонъ ѿстꙋпи ѿ него.
и҆ заключи б҃ъ ѹ҆ста̀ львом̑ и҆ не стꙋжи́ша данїи́лꙋ.
тогда̀ цр҃ь въста́въ заѹ҆́тра на свѣте, и҆ прїиде къ р꙽вꙋ лев꙽скꙋ.
и҆ възъпи жрѣ́ломъ крѣ́пкомъ, данїи́ле рабе б҃а жива́го.
б҃ъ твои е҆мꙋже т̂ы слꙋжиши прс̑҇но, възмо́же л̂и и҆зба́вити т̂ѧ и҆з꙽ ѹ҆́стъ льво́въ.
и҆ рече данїи́лъ цр҃ю, цр҃ю въ вѣ́ки живи.
бг҃ъ мо́и посла̀ а҆гг҃ла свое҆го, и҆ затвори ѹ҆ста льво́ва, и҆ не расы́паша мене.
ꙗ҆́ко ѻ҆брѣте́сѧ пред̑ ни́мъ пра́вда моѧ.
и҆ пред̑ тобо́ю же цр҃ю съгрѣше́нїа не сътвори́хъ·

Тогда̀ цр҃ь възвесели́сѧ ѻ҆ немъ, и҆ рече данїи́ла и҆звести и҆з꙽ рва.
и҆ все тлѣнїе не ѻ҆брѣте́сѧ ѻ҆ немъ, ꙗ҆́ко вѣрова къ бꙋ свое҆мꙋ.
и҆ рече цр҃ь, и҆ приведо́ша мꙋж́а ѻ҆клевета́вшаѧ данїи́ла.
и҆ в ро́въ лев꙽скь въверго́ша ѧ҆̀, и҆ сн҃ы и҆хъ и҆ же́ны их̑.
и҆ не доидо́ша д꙽на р꙽вꙋ даже содолѣша и҆мъ льви, и҆ всѧ ко́сти и҆хъ ѻ҆тон꙽чи́ша·

Тогда̀ да́рїи цр҃ь въписа̀ всѣм꙽ лю́демъ, племенемъ, ꙗ҆зы́комъ живꙋщїимъ въ все́и землѝ.
ми́ръ вамъ ѹ҆мно́житсѧ.
ѿ лица мое҆го заповѣдасѧ за́повѣдь, ꙗ҆́коже въ все́и землѝ цр҃ства мое҆го трѧсꙋщем̑сѧ и҆ боѧщемсѧ бы́ти ѿ лица б҃а данїи́лѧ.
ꙗ҆́ко то́и е҆сть б҃ъ живы́и, и҆ пребываѧй въ вѣ́ки.
и҆ црс̑҇тво е҆го не расы́плетсѧ, и҆ вла́сть е҆го до кон꙽ца под̑е́млетъ.
і҆ и҆збавлѧ́етъ, и҆ тво́рит̑ зна́менїѧ и҆ чюдеса̀, на нб҃си и҆ на земли, и҆же и҆зба́ви данїи́ла ѿ ѹ҆́ст꙽ льво́въ.
данїилъ же ѹ҆правѝ въ црс̑҇ьтвѣ да́рїевѣ, и҆ кѵ́ра пер꙽сина·

Глв̑҇а, з҃· Видѣнїе, и҃·

Въ прьвое лѣто валтаса́ра цр҃ѧ халдѣ́иска, данїи́лъ сонъ ви́дѣ.
и҆ видѣнїѧ главы е҆го на ло́жи е҆го.
и҆ сон̑҇ в꙽писа̀.
а҆зъ данїи́лъ видх̑ѣ въ видѣнїи мое҆мъ но́щїю, и҆ с̂е д҃ вѣтри нбс̑҇нїи налего́ша на́ море вели́кое.
и҆ четыре звѣрїе вели́цїи и҆схожда́хꙋ и҆з мо́рѧ разли́чь себе·

Прьвыи а҆ки льви́ца и҆мꙋщи кры́лѣ, кры́лѣ же е҆ѧ а҆кѝ ѻ҆рлꙋ̀.
и҆ зрѧ́хъ дон꙽деже прострѐ кры́лѣ своѝ, и҆ въз꙽дви́жесѧ ѿ землѧ̀, и҆ на ногꙋ чл҃чꙋ ста̀, и҆ срд̑це чл҃че дастьсѧ е́й·

И҆ с̂е звѣръ вторы́и подо́бен̑҇ медвѣ́дицы, и҆ в ча́сти е҆ді́нои ст̂а, и҆ трѝ ре́бра въ ѹ҆стѣхъ е́й средѣ зꙋбъ еѧ̀.
и҆ си́це гл҃ахꙋ е́и, въста́ни, и҆ ꙗ҆́ждъ плоти мно́ги·

Въ слѣдъ сего ви́дѣхъ, и҆ с̂е звѣръ и́нъ а҆ки ры́сь, томꙋ же кры́ла четы́ре п꙽тича над̑ ним̑ четыре же главы звѣрїи.
и҆ вла́сть да́стьсѧ е҆мꙋ·

Въ слѣдъ сего ви́дѣхъ, и҆ с̂е звѣръ четве́ртыи горд꙽ и҆ стра́шенъ, и҆ крѣпокъ и҆зли́ха.
зꙋ́бы же е҆го желѣзни и҆ ве́лїи и҆ но́гти мѣдѧни, ꙗ҆ды́и и҆ ѻ҆тон꙽чеваѧ ѻ҆ста́нокъ же нога́ма попира́ше.
то́и же разлꙋча́ѧсѧ и҆зли́ха па́че всѣхъ звѣрїи преж꙽нихъ, и҆ ро́гъ і҃ е҆мꙋ.
и҆ смотрѣх же в розѣ́хъ е҆мꙋ, и҆ с̂е ро́гъ дрꙋгїи ма́лъ възы́иде пред̑ ни́ми, трїе же ро́зи пре́днїи стръгнꙋшасѧ е҆мꙋ ѿ лица̀ е҆го.
и҆ с̂е ѻ҆́чи а҆ки ѻ́чи чл҃чи в ро́зѣ то́мъ, и҆ ѹ҆ста гл҃юща вели́ка.
зрѧ́хъ, до́ндеже прс̑҇тли поста́вишасѧ, и҆ ве́тхїи дн҃ьми сѣдѧ́ше, и҆ ѻ҆де́жда е҆го бѣла а҆ки снѣ́гъ.
и҆ вла́си главы е҆го а҆ки во́лна чи́ста.
прс̑҇тлъ е҆го пла́мы ѻ́гненъ.
колеса̀ е҆го ѻ́гнь палѧ̀.
рѣка̀ ѻ́гнена теча́ше и҆сходѧ́щи пред нимъ.
тысѧща тысѧщь слꙋжа́хꙋ е҆мꙋ, и҆ тмы̀ тем꙽ пред̑стоꙗ҆́хꙋ пред нимъ.
сꙋ́дище сѣ́де, и҆ кни́ги ѿврьзо́шасѧ.
ви́дѣхъ тогда̀ ѿ гла́са словесъ вели́кихъ ꙗ҆́же ро́гъ ѻ́нъ гл҃аше.
до́ндеже ѹ҆би́сѧ звѣр꙽ и҆ поги́бе тѣло е҆го, и҆ да́стьсѧ въ ж꙽же́нїе ѻ́гнено.
и҆ про́чихъ ѕвѣрїи преста́висѧ вла́сть, и҆ продлъженїе жи́тїѧ да́стьсѧ и҆мъ до лѣта и҆ времене·

Ви́дѣхъ въ снѣ̀ но́щїю, и҆ се на ѻ́блацехъ нбс̑҇ныхъ ꙗ҆́ко сн҃ъ чл҃чь иды́и бѧ́ше, и҆ до ве́тхаго дн҃ьми дои҆де, и҆ пред̑ нимъ приведе́сѧ е҆мꙋ.
и҆ томꙋ сѧ да́сть вла́сть, и҆ чтс̑҇ь, и҆ црс̑҇тво.
и҆ всѝ лю́дїе, пле́мена, ꙗ҆зы́цы томꙋ̀ порабо́таютъ.
и҆ влас̑҇ е҆го, вла́сть вѣчнаѧ, ꙗ҆́же не ми́мои҆детъ, и҆ црс̑҇тво е҆го не расы́плет̑сѧ·

Възгорѣсѧ дх҃ъ мои.
а҆зъ данїилъ въ ѹ́жасѣ мое҆мъ, и҆ видѣ́нїѧ главы мое́ѧ смѧтѧ́хꙋ м̂ѧ.
и҆ прїидо́хъ къ е҆ді́номꙋ стоѧ́щихъ ѹ҆ него, наѹ҆чи́тисѧ всемꙋ семꙋ.
и҆ повѣда м̂и и҆стовое, и҆ сказа́нїе слове́съ възвѣстѝ м̂и.
сїи ѕвѣрїе ве́лїи четы́ре, четыре црс̑҇тва въста́нꙋтъ на зем̑ли ꙗ҆́же во́змꙋтсѧ, и҆ преимꙋтъ црс̑҇тво вы́шнѧго, и҆ во́змꙋтъ е҆̀ до вѣка, и҆ до́ вѣка вѣкъ.
и҆ вопраша́хъ коне́чнѣ ѻ҆ ѕвѣри четве́ртѣмъ, ꙗ҆́ко бѣа́ше разли́чь ѿ всего ѕвѣри, и҆ гръдъ и҆зли́ха.
зꙋ́бы е҆го желѣзни и҆ но́гти е҆го мѣдѧни, ꙗ҆ды́и и҆ ѻ҆тон꙽чева́ѧ, ѻ҆ста́нокъ же нога́ма попира́ше.
и҆ ѻ҆ десѧти ро́зѣхъ е҆го и҆же на главѣ̀ е҆го.
и҆ ѻ҆ дрꙋзм̑ѣ въше́дшим̑, и҆ стрѧ́сшемъ прьвыѧ трѝ.
ро́гъ же то́и е҆мꙋже ѻ҆́чи, и҆ ѹ҆ста̀ гл҃юща вели́ко, и҆ видѣнїе е҆го бо́ле прочїих꙽.
зрѣхъ, и҆ ро́гъ тои творѧ́ше рать съ ст҃ыми, и҆ ѹ҆крепѣ к нимъ.
до́н꙽деже прїидетъ ве́тхїи дн҃ьми, и сд̑ꙋ дасть ст҃ымъ вы́шнѧго.
и҆ вре́мѧ приспѣ̀, и҆ црс̑҇тво прїѧша ст҃їи.
и҆ рече, ѕвѣръ четве́ртыи, црс̑҇тво четве́ртое е҆сть на землѝ, е҆же преспѣ́етъ вс̂ѧ црс̑҇тва, и҆ поꙗ҆́сть вс̂ю зе́млю, и҆ попере́тъ ю҆̀ и҆ посѣчет̑ ю҆̀.

И҆ десѧть же ро́гъ е҆мꙋ, десѧть цр҃ь въста́нетъ.
и҆ по нихъ въста́нет꙽ дрꙋгїи, и҆же преспѣ́етъ ѕло́бами вс̂ѧ и҆же прежде е҆го, и҆ трѝ цр҃ѧ смири́тъ.
и҆ словеса̀ къ вы́шнемꙋ съгл҃етъ, и҆ ст҃ыѧ вы́шнѧго смирит̑ и҆ помы́слитъ премѣнити времена̀ и҆ зако́нъ.
и҆ дастьсѧ в рꙋкꙋ е҆го до вре́мене и҆ вре́менꙋ, и҆ полъ вре́мене.
и҆ сꙋ́дище сѧ́детъ, и҆ вла́сть е҆го преставѧтъ, ꙗ҆́ко потреби́ти и҆ погꙋби́ти до конца̀.
црс̑҇тво же и҆ влас̑҇ и҆ вели́чество црс̑҇тва и҆же под̑ всѣмъ нб҃семъ, дастьсѧ ст҃ымъ вы́шнѧг̑҇.
црс̑҇тво же е҆го, црс̑҇тво вѣчное.
и҆ вс̂ѧ вла́сти томꙋ рабо́тати начнꙋтъ и҆ послꙋшати·

до здѣ̀ сконча́нїе словеси·

А҆зъ данїилъ, на долзѣ ра́зꙋми моѝ смꙋща́хꙋ мѧ, и҆ ѻзречь моѧ̀ премѣни́сѧ на мн̂ѣ, и гл҃ъ въ срд̑цы мое҆мъ снабдх̑ѣ·

Глв̑҇а, и҃· Видѣнїе, ѳ҃·

Въ лѣто тре́тїе црс̑҇тва валтасара цр҃ѧ, видѣнїе ꙗ҆́ви́сѧ мн̂ѣ, а҆зъ данїилъ поꙗ҆́вльшемсѧ мн̂ѣ прежд̑е.
и҆ бѣ́хъ в сꙋсои сва́ри ꙗже ес̑҇ въ странѣ е҆ламъстѣ.
и҆ ви́дѣхъ въ видѣнїи а҆ки бѣ́хъ на ѹ҆ва́лѣ.
и҆ въздви́гъ ѻ́чи свои, и҆ ви́дѣхъ.
и҆ с̂е ѻ҆ве́нъ е҆ді́нъ стоѧ на ѹ҆ва́лѣ томꙋ же дв̂а ро́га, ро́га же высо́ка, е҆ді́нъ же вы́шнїи и҆же въсхожда́ше послѣжде.
и҆ ви́дѣхъ ѻ҆ве́нъ бꙋдꙋщь по́ морю, и҆ на сѣверъ, и҆ на ю́гъ, и҆ на восто́ченъ.
и҆ вс̂и ѕвѣрїе не стант̑ꙋ пред̑ нимъ, и҆ не бѣа́ше и҆збавлѧ́юща и҆з рꙋки е҆го.
и҆ сътвори по во́ли свое́и и҆ возвели́чисѧ.
а҆́з же бѣхъ смыш꙽лѧѧ·

И҆ с̂е козе́лъ козїи и҆дѧ́ше ѿ восто́къ на лице всеѧ̀ землѧ, и҆ не бѣ̀ прикаса́ѧсѧ землѝ.
и҆ козлꙋ̀ томꙋ̀ рогъ види́мъ междꙋ ѻ҆чи́ма е҆го.
и҆ прїиде до ѻ҆́вна и҆мꙋщаго рога̀ е҆гоже ви́дѣхъ стоа́ща на ѹ҆валѣ, и҆ течѐ к немꙋ̀, предо мно́ю, въ си́лѣ крѣпости е҆го.
и҆ ви́дѣхъ и҆̀ доходѧ́щь до ѻ҆вна̀ и҆ разгнѣвасѧ к немꙋ, и҆ порази ѻ҆вна̀, и҆ съкрꙋши ѻ҆́ба ро́га е҆го, и҆ попра и҆̀, и҆ не бѣа́ше и҆же и҆̀ и҆зба́витъ.
козелъ же козїи возвели́чисѧ.
и҆ внегда̀ раскрепѣ съкрꙋшисѧ ро́гъ е҆го вели́кїи, и҆ възы́идоша дрꙋзїи четы́ре ро́зи под̑ нимъ, по четы́рехъ вѣтрехъ нбс̑҇ныхъ.
и҆ ѿ е҆ді́наго ихъ възыиде ро́гъ е҆ді́нъ крѣпокъ.
и возвели́чисѧ и҆зли́ха къ ю́гꙋ, и҆ къ восто́кꙋ, и҆ къ за́падꙋ.
и҆ възвели́чисѧ до си́лы нбс̑҇ныѧ, и҆ падѐ на́ землю ѿ си́лы и҆ ѿ ѕвѣздъ, и҆ попра ѧ҆̀.
и҆ до́ндеже а҆рхїстрати́гъ и҆зба́витъ плѣн꙽ники.
того ради и҆ тре́ба смѧте́сѧ.
и҆ быс̑҇ и҆ поспѣсѧ е҆мꙋ.
и҆ ст҃ое ѻ҆пꙋстѣ́ет꙽.
и҆ да́стьсѧ на тре́бꙋ грѣхъ.
и҆ повръжесѧ пра́вда на́ землю, и҆ сътворѝ и҆ поспѣсѧ е҆мꙋ·

И҆ слы́шахъ е҆ді́наг̑҇ ст҃го гл҃юща, и҆ рече е҆ді́нъ ст҃ыи ѳел̑҇монїи гл҃ющꙋ е҆мꙋ.
и҆ доколѣ видѣнїе ста́нетъ и тре́ба ѻ҆тѧ́таѧ, и҆ грх̑ѣ ѻ҆пꙋстѣнїѧ дан꙽ныи, и҆ ст҃ое и҆ си́ла поперет̑сѧ.
и҆ рече е҆мꙋ, до́ вечера и҆ ѹ́тра, дн҃ъ ты́сѧщи, и҆ с҃. и҆ ѻ҆чи́стит̑сѧ ст҃ое·

И҆ бы́сть внегда̀ ви́дѣхъ а҆́зъ данїи́лъ видѣнїе, и҆ прошахъ смышленїа.
и҆ с̂е ста̀ предо мно́ю а҆ки ѻ҆́бразъ мꙋжескь.
и҆ слы́шахъ гла́съ мꙋжескь средѣ ѹ҆валъ.
и҆ призва̀, и҆ рече, гаврїи҆ле скажи видѣнїе ѻ҆́номꙋ.
и҆ прїиде, и҆ ста̀ дръжасѧ стоа́нїа мое҆го.
и҆ е҆гда̀ прїиде, ѹ҆жасох̑сѧ и҆ падохъ ни́ць на землѝ.
и҆ рече къ мнѣ̀, разꙋмѣи сн҃е чл҃чь, е҆щѐ б̂о до го́да сконча́нїе видѣнїю.
и҆ е҆гда̀ гл҃аше со мно́ю, падохъ ни́ць на землѝ.
и҆ прикоснꙋсѧ мнѣ, и҆ поста́ви м̂ѧ на но́гꙋ мое́ю, и҆ рече, с̂е а҆зъ възвѣ́стꙋю тебѣ бы́шащаѧ послѣди гнѣвнаѧ сн҃омъ людїи твои҆хъ, ꙗ҆́ко в го́дъ сконча́нїю пребыва́етъ.
ѻ҆́вен̑҇ и҆же видѣ и҆мꙋщь рога, цр҃ь е҆сть мид̑скь и҆ прьскь.
а҆ козелъ козїи, цр҃ь е҆́л꙽лин꙽скь е҆сть.
ро́гъ же вели́кїи и҆же междꙋ ѻ҆чи́ма е҆го, т̂о е҆сть цр҃ь пр́ьвыи.
семꙋ же съкрꙋшившꙋсѧ е҆же ста́ша четы́ре ро́зи под̑ ним̑.
четыре црс̑҇тва въста́нꙋтъ ѿ страны̀ е҆го, не въ крѣпости же е҆го.
и҆ послѣди цр҃ьства е҆мꙋ скон꙽чавающимсѧ грѣхом̑ и҆хъ.
въста́нетъ цр҃ь безъсра́мным̑ лицемъ, разꙋмѣѧ гада́нїѧ, и҆ дръжавна крѣпость е҆го, не въ крѣпостиж̑ е҆го.
и҆ ѹ҆пра́витъ, и҆ сътворитъ, и҆ расы́плет꙽ крѣпкїѧ, и҆ лю́ди ст҃ы, и҆ ꙗ҆ремъ жаже́лѧ е҆го и҆спра́витъ, лꙋка в꙽ рꙋцѣ е҆го.
и҆ въ срд̑цы свое҆м꙽ възвели́читсѧ, и҆ лꙋ́ками расы́плетъ мно́ги ꙗ҆́же возмо́жет̑ прельстити.
и҆ на пагꙋбꙋ мно́гомъ въста́нетъ, и҆ а҆ки ли́ца рꙋкою съкрꙋши́тъ.
и҆ видѣнїе ѹ҆трины и҆ вечера, речен꙽наго, и҆стин꙽но е҆сть.
ты́ же знамена́и видѣнїе, ꙗ҆ко въ дн҃и мно́ги е҆сть·

А҆́з же данїи́лъ ѹ҆спохъ, и҆ крьж꙽девах̑ до дн҃їи мно́гъ.
и҆ въстахъ, и҆ творѧхъ дѣлеса цр҃ѧ.
и҆ почюждахсѧ видѣнїю, и҆ не бѣ́аше разꙋмѣва́ющаго·

Глв̑҇а, ѳ҃·

Въ прьвое лѣто да́рїѧ сн҃а сѷи́рова ѿ племени мид꙽ска и҆же црс̑҇твова̀ въ црс̑҇твѣ хал̑҇де́истѣ·

Въ лѣто е҆дїно црс̑҇тва е҆го, а҆зъ данїи́лъ разꙋмѣхъ въ кни́гахъ число̀ лѣтъ е҆же быс̑҇ сло́во гн҃е къ і҆еремїи про̑҇ркꙋ, на скончанїе ѻ҆пꙋстѣнїѧ і҆ерс̑҇лимлѧ се́дмьдесѧ́тъ лѣтъ.
и҆ да́хъ лицѐ свое къ г҃ꙋ б҃ꙋ, ꙗ҆́ко възыскати моли́твы и҆ проше́нїѧ съ а҆лка́нїемъ, и҆ въ врѣтищи и҆ пе́пелѣ.
и҆ моли́хсѧ къ г҃ꙋ б҃ꙋ мое҆мꙋ, і҆ и҆сповѣдахсѧ е҆мꙋ, и҆ рѣхъ·

Ги҃ б҃е вели́кїи и чю́дныи, и҆ снабдѣваѧ́й завѣтъ твои и҆ млс̑҇ть твою любѧ́щимъ т̂ѧ, и҆ снабдѧ́щимъ за́повѣди твоѧ.
съгрѣши́хомъ, и҆ безаконова́хомъ, нечествова́хомъ, и҆ склони́хомсѧ ѿ за́повѣдеи твои҆хъ, и҆ ѿ сꙋдовъ твои҆хъ.
и҆ не послꙋшахомъ ра́бъ твои҆хъ про̑҇ркъ, и҆же гл҃аша въ и҆мѧ̀ твое къ цр҃емъ на́шимъ, и҆ къ кнѧ́земъ на́шимъ, и҆ ѿц҃емъ на́шим꙽, и҆ всѣмъ лю́демъ землѧ̀.
тебѣ г҃и пра́вда, на́м же стыдѣнїе лицꙋ̀ ꙗ҆́ко и҆ дн҃ь сїи мꙋжꙋ і҆ѹ́динꙋ.
и҆ живꙋщим̑ въ і҆ерс̑҇лимѣ, и҆ всемꙋ і҆и҆л҃ю, бли́жним̑ и҆ да́лнимъ въ все́и землѝ, и҆дѣже ѧ҆̀ е҆си разсѣ́ѧлъ та́мо въ ѿврьже́нихъ и҆хъ, и҆м꙽же сѧ ѿврьгоша тебе г҃и·

намъ стыдѣнїе лицꙋ̀, и҆ цр҃емъ на́шимъ, и҆ кнѧѕемъ нашимъ, и҆ ѿц҃емъ на́шимъ и҆же съгрѣши́хом꙽ тебѣ·

Гꙋ҃ же б҃ꙋ нашемꙋ щедроты̀ и҆ ѻ҆цыще́нїѧ, ꙗ҆́ко ѿстꙋпи́хом꙽ ѿ г҃а.
и҆ не послꙋшахомъ гласа г҃а б҃а на́шего ходи́ти въ зако́нѣ е҆го, и҆же дасть пред̑ лицемъ на́шимъ въ рꙋкꙋ ра́бъ е҆го про̑҇ркъ.
и҆ весь і҆и҆л҃ь престꙋпѝ зако́нъ твои, и҆ склони́сѧ е҆же не послꙋшати гла́са твое҆го.
и҆ прїиде на́ ны клѧ́тва, и҆ заклѧ́тїе в꙽пи́саное въ зако́нѣ моѷсїѻвѣ ра́ба бж҃їѧ, ꙗ҆́ко съгрѣшихомъ е҆мꙋ.
и҆ ѹ҆ставѝ словеса̀ своѧ̀ ꙗ҆́же гл҃а на ны, и҆ на сꙋдїѧ на́ша и҆же сꙋди́ша на́мъ, и҆ навестѝ на́ ны ѕло́бы вели́ки ꙗ҆цѣ́х же не было под̑ всѣмъ нб҃семъ, по всемꙋ бывшемꙋ въ і҆ерс̑҇лимѣ.
ꙗ҆́коже е҆сть в꙽пи́сано въ зако́нѣ моѷсїѻвѣ, вс̂е ѕло̀ приведе на́ ны.
и҆ не помоли́хомсѧ лицꙋ̀ г҃а б҃а на́шего, ѿвратитисѧ ѿ непра́вдъ на́шихъ, и҆ ꙗ҆́ко слы́слити въ все́и и҆́стиннѣ твое́и г҃и.
и҆ ѹ҆бꙋди́сѧ г҃ь б҃ъ на ѕло́бꙋ на́шꙋ, и҆ наведе на́ ны.
ꙗ҆́ко праведенъ г҃ь б҃ъ на́шъ въ всемъ дѣѧ́нїи е҆го е҆же сътворѝ, и҆ не послꙋшахом̑ гласа е҆го·

И҆ н҃нѣ г҃и б҃е наш꙽, и҆же и҆зведѐ лю́ди своа ѿ зем̑лѧ̀ е҆гѷпет̑ски рꙋко́ю крѣп꙽кою, и҆ сътворѝ себѣ само́мꙋ ꙗ҆́ко и҆ дн҃ь сїи.
съгрѣши́хомъ, и҆ безако́нновахомъ г҃и всѣмъ помилованїемъ твоим꙽.
да сѧ ѿврати́тъ ꙗ҆́рость твоѧ ѿ гра́да твое҆го і҆ерс̑҇лима, и҆ ѿ горы̀ ст҃ыѧ твое҆́ѧ.
ꙗ҆́ко съгрѣши́хом꙽ непра́вдами и҆ безако́нїемъ ѿц҃ь на́шихъ, и҆ гра́дъ твои и҆ лю́дїе твоѝ въ ѹ҆кори́знꙋ бы́ша въ всѣхъ ѻ́крс̑҇т꙽ных̑ насъ.
и҆ н҃нѣ г҃и б҃е нашъ ѹ҆слы́ши мл҃твꙋ раба твое҆го и҆ проше́нїе е҆го.
и҆ ꙗ҆вѝ лицѐ свое на ѻ҆сщ҃енїе твоѐ ѻ҆пꙋстѣвшее себе ра́ди г҃и.
приклонѝ г҃и б҃е мои слх̑ꙋ твои, и҆ ѹ҆слы́ши.
ѿврьзи ѻ҆́чи твоѝ и҆ ви́ждь потребле́нїе на́ше, и҆ гра́да твое҆го в не́мже прозва́сѧ и́мѧ твое.
ꙗ҆́ко не на́шими пра́вдами м̂ы ѹ҆пова́ю҆ще ѻ҆чища́емъ ни щедротою на́шею пред̑ тобо́ю, н̂о къ щедрота́мъ твоим̑ мно́гимъ г҃и.
щедротами ѹ҆слы́ши г҃и, ѻ҆цысти г҃и, вон꙽мѝ г҃и, и҆ сътворѝ.
и҆ не премедлѝ тебе ра́ди б҃е мои, ꙗ҆́ко и́мѧ твое призва́сѧ в лю́дех̑ твои҆хъ и҆ въ градѣ твое҆мъ.
е҆щеж̑ м̂и гл҃ющꙋ и҆ молѧ́щꙋ, і҆ и҆сповѣда́ю҆щꙋ грѣхѝ своѧ, и҆ грѣхѝ людїи свои҆хъ і҆и҆л҃ѧ, и҆ припадающꙋ м̂и пред̑ гм҃ъ бм҃ъ мои҆мъ, ѻ҆ горѣ̀ ст҃ѣи е҆го·

І҆ е҆ще гл҃ющꙋ м̂и в꙽ моли́твѣ, и҆ с̂е мꙋжъ гаврїилъ е҆гоже ви́дѣхъ въ видѣнїи мое҆мъ в нача́лѣ парѧща̑ и҆ прикоснꙋсѧ мн̂ѣ а҆ки в ча́съ тре́бы вече́рнѧѧ.
и҆ наказа́ мѧ, и҆ гл҃а къ мнѣ̀.
и҆ рече, данїиле, нн҃ѣ и҆зыидо́хъ ѹ҆стро́ити тебѣ ра́зꙋмъ.
в нача́ло мл҃твы твоеѧ и҆зы́иде сло́во, и҆ а́зъ прїидох̑ съвѣсти́ти тебѣ, ꙗ҆́коже мꙋжъ помышле́нїи е҆си т̂ы·

Размы́сли же въ словеси, и҆ разꙋмѣ́и въ ꙗ҆вле́нїи.
о҃ сед̑ми́нъ съкрати́шасѧ ѻ҆ лю́дехъ твои҆хъ и҆ ѻ҆ гра́дѣ твоем̑ ст҃ѣмъ, до́н꙽деже ѻ҆бет꙽ша́етъ съгрѣше́нїе, и҆ скон꙽ча́етсѧ грѣ́хъ, и҆ знамена́ютсѧ грѣси, и҆ ѻ҆цыстѧт̑сѧ непра́вды.
и҆ приведе́тсѧ пра́вда вѣчнаѧ, и҆ знамена́етсѧ видѣ́нїе прро̑҇къ.
и҆ пома́жетсѧ ст҃ыи ст҃ых̑.
и҆ ѹ҆вѣ́си и҆ разꙋмѣ́еши, ѿ и҆схо́да словеси ꙗ҆́ко ѿвѣща́ти и҆ ꙗ҆́ко съгради́ти і҆ерс̑҇лі́мъ, до х҃а старѣ́ишины, сед̑ми́нъ сед̑мь, и҆ сед̑ми́нъ ѯ҃, и҆ в҃. и҆ възврати́тсѧ и҆ съградитсѧ широ́цѣ и҆ забра́ла і҆ и҆стощат̑сѧ лѣта.
и҆ по сед̑минахъ ѯ҃ и҆ в҃, потребит̑сѧ пома́занїе и҆ сꙋ́дъ.
град̑ же и҆ ст҃ое расы́плетсѧ съ старѣ́ишиною грѧдꙋщимъ.
и҆ потребѧ́тсѧ а҆ки в꙽ потопѣ, и҆ до кон꙽ца ра́ти съкраще́нѣ.
и҆ раз꙽блажи́тъ завѣтъ мно́зѣмъ сед̑мина е҆ді́на.
по́л꙽ же сед̑мины и҆ ста́витъ тре́бники и҆ тре́бꙋ.
и҆ кри́лꙋ ѡ потребле́нїѧ и҆ до скон꙽ча́нїѧ и҆ пот꙽ща́нїѧ в꙽чини́тъ на поги́бель.
и҆ раз꙽блажи́тъ завѣтъ мно́зѣмъ сед̑мина е҆ді́на.
в по́л꙽ же сед̑мины ѿи҆мет̑сѧ тре́ба, и҆ възлїѧ́нїе на ст҃ыи храм̑.
ѻ҆мръзѣ́нїе и҆ ѻ҆пꙋстѣ́нїе и҆ до скон̑҇ча́нїа го́дꙋ, скон꙽ча́нїе да́стьсѧ на ѻ҆пꙋстѣ́нїе·

Глв̑҇а, і҃·

В лѣто пе́рвое кѷрово цр҃ѧ прьска, сло́во ꙗ҆́ви́сѧ данїи́лꙋ, е҆мꙋже прозва́сѧ и҆мѧ валтаса́ръ.
и҆стин꙽но же сло́во, и҆ си́ла вели́ка, и҆ ра́зꙋмъ да́стьсѧ е҆мꙋ въ ꙗ҆вле́нїе·

В т̂ы дн҃и а҆зъ данїи́лъ бх̑ѣ желѣѧ тр̂и сед̑ми́ны дн҃ьныхъ, хлѣ́ба помы́слена не ꙗ҆дох̑, и҆ мѧ́со и҆ вино не вни́де въ ѹ҆ста̀ моа, и ма́стїю не пома́зах꙽сѧ, до три сед̑ми́нъ дн҃ьных̑.
въ дн҃ь е҃і, а҃ мс̑҇ца, а҆зъ бѣ́хъ бли́зъ рѣкѝ вели́кїѧ с̂и е҆сть е҆деке́ль.
и҆ възд̑виго́хъ ѻ҆чи свои и ви́дѣхъ.
и҆ с̂е мꙋж́ъ ѻ҆блъче́нъ въ багрѧни́цꙋ, и҆ чресла е҆го препоꙗ҆́сани зла́томъ свѣтломъ, тѣ́ло же е҆го а҆ки ѳарси́съ, лице же е҆го а҆ки ѻ҆зречь мо́лнїѧ, ѻ҆́чи же е҆го а҆ки свѣща ѻ҆́гнены.
и҆ мы́шцы е҆го и҆ го́лени а҆ки ѻ҆зреч̑҇ мѣ́ди блиска́ющасѧ.
глас̑҇ же словес̑҇ е҆го а҆ки глас̑҇ наро́да.
и ви́дѣхъ а҆зъ е҆ді́нъ данїи́лъ.
а҆ мꙋ́жи и҆же со мно́ю не ви́дѣша ꙗ҆́вле́нїѧ, н̂о ѹ҆́жасть вели́ка паде на ни́хъ, и҆ ѿбѣгнꙋша въ стра́сѣ.
а҆з꙽ же ѻ҆ста́хъ е҆ді́нъ, и҆ ви́дѣхъ ꙗ҆вле́нїе вели́кое с̂е.
и҆ не ѻ҆ста̀ въ мнѣ крѣ́пость, и҆ сла́ва моѧ ѻ҆брати́сѧ въ расыпанїе, и҆ не ѹ҆держа́хъ крѣ́пости.
и слы́шахъ глас̑҇ словесе е҆го, и҆ внегда̀ слы́шахъ бѣхъ преклоненъ, лице же мое на землѝ.
и҆ с̂е рꙋка прикаса́ющесѧ мнѣ, и҆ въста́ви м̂ѧ на колѣ́нѣ мои, и҆ на стопы рꙋ́кꙋ мое҆ю·

И҆ рече къ мнѣ, данїи́ле мꙋ́жꙋ помышле́нїи, разꙋмѣ́и въ словесѣхъ сих̑ ꙗ҆́же а҆зъ гл҃ю к тебѣ, и҆ ста́ни на стоа́нїи свое҆мъ, ꙗ҆́ко нн҃ѣ посла́нъ е҆смь к тебѣ.
и҆ е҆гда̀ съгл҃а сло́во с̂е къ мнѣ̀, въстах̑ съ трꙋсом̑.
и҆ рече къ мнѣ, не бо́исѧ данїи́ле, ꙗ҆́ко ѿ перваго дн҃е вон꙽же пода́сть срд̑це свое ꙗ҆́ко разꙋмѣти, и трꙋди́тисѧ предо мно́ю бм҃ъ твои҆мъ, ѹ҆слышашасѧ словеса твоѧ̀, а҆з꙽ же прїидо́хъ въ словесе́хъ твои҆хъ·

Кн҃ѕь же црс̑҇тва прьска стоѧ́ше проти́вꙋ мнѣ двадесѧти и҆ е҆ді́нъ дн҃ь.
и҆ с̂е михаи҆лъ е҆ді́нъ ѿ старѣ́ишинъ прьвыхъ прїиде помощѝ мнѣ, и҆ того ѻ҆ста́вихъ съ кн҃ѕи црс̑҇тва прьска.
и҆ прїидох̑ сказа́ти тебѣ е҆же срѧ́щет̑сѧ лю́демъ твои҆мъ в꙽ послд̑ѣнѧѧ дн҃и, ꙗ҆ко с̂е видѣ́нїе въ дн҃и.
и҆ внегда же гл҃а съ мно́ю по словесе́мъ симъ, дах̑ лице свое на́ землю и҆ преклони́хсѧ.
и҆ с̂е а҆ки ѻ҆зреч̑҇ чл҃ча прикосне́сѧ ѹ҆стх̑ѣ мои҆хъ.
и҆ ѿверзо́хъ ѹ҆ста̀ своѧ и҆ гл҃ахъ, и҆ рѣхъ къ стоѧщемꙋ предо мною.
г҃и въ видѣ́нїи твое҆мъ ѻ҆брати́сѧ ѹ҆тро́ба моѧ въ мнѣ, и҆ не и҆мыи си́лы.
ка́ко возмо́же ра́бъ твои гл҃ати г҃и съ гм҃ъ симъ мои҆мъ.
аз̑ бо ѿнемого́х꙽сѧ и҆ ѿ нн҃ѣ не ста́нетъ въ мнѣ крѣпость, си́ла б̂о и҆ дыха́нїе не ѻ҆ста въ мнѣ·

И҆ приложи и҆ прикосне́сѧ мнѣ ꙗ҆́ко ѻ҆зречь чл҃ча, и҆ ѹ҆крѣпи м̂ѧ, и҆ реч̑҇ м̂и, не бо́исѧ мꙋж́ꙋ помышле́нїи, ми́ръ тебѣ.
мꙋжа́исѧ и҆ крѣпи́сѧ.
и҆ е҆гда̀ гл҃а съ мно́ю ѹ҆крѣпи́х꙽сѧ, и҆ рѣ́хъ, да гл҃етъ г҃ь мои, ꙗ҆́ко ѹ҆крѣпилъ мѧ е҆си.
и҆ реч̑҇, а҆ще вѣ́си почто е҆смь пришел̑҇ к тебѣ.
и҆ нн҃ѣ въз꙽вращꙋсѧ ꙗ҆́ко бра́титисѧ съ кн҃ѕемъ прьском̑.
а҆з꙽ же и҆схожд̑ахъ, кн҃ѕь же е҆л꙽лин꙽скь грѧдѧ́ше.
н̂о да т̂и совѣтꙋ́ю въчине́ное въписа́нїе и҆стин꙽ны.
и҆ нѣ́сть ни е҆ді́ного под̑дръжа́ща съ мно́ю ѻ҆ семъ, н̂о то́чїю миха́илъ кнѧ́ѕь вашъ·

Глв̑҇а, а҃і·

Аз꙽ же въ пр́ьвое лѣто кѷрово ста́хъ въ дръжа́вꙋ и҆ крѣпость.
и҆ прїидо́хъ да совѣстꙋ́ю тебѣ.
с̂е е҆ще трїе цр҃и въста́нꙋтъ въ прьсех̑, четве́ртыи же разбогатѣетъ бога́тества вели́ка паче всѣ́хъ.
и҆ по прїѧ́тїи бога́тества, въста́нетъ на всѧ црс̑҇тва е҆л꙽линъ си́хъ.
и҆ въста́нетъ дрꙋгїи цр҃ь си́ленъ, и҆ ѻ҆бладает̑ вла́стїю мно́гою, и҆ сътво́ритъ въ во́лю свою.
и҆ дон꙽деже стои҆тъ.
црс̑҇тво е҆го съкрꙋши́тсѧ, и҆ раздѣлит̑сѧ на четы́ре вѣтры нбс̑҇ныѧ, и҆ не на конецъ, ни въ вла́сть е҆го е҆ю́же съвладѣ.
ꙗ҆́ко разори́тисѧ црс̑҇твꙋ е҆го, и҆ дрꙋгїи без нихъ ѿда́стьсѧ.
и҆ ѹ҆крѣпи́тсѧ цр҃ь ю҆́жныи, и҆ ѿ кнѧ́ѕь е҆го, е҆ді́нъ ѹ҆крепѣ́етъ на́нь, и҆ ѻ҆блада́етъ вла́стїю мно́гою, кромѣ вла́сти е҆го.
и҆ по лѣтехъ е҆го смири́тсѧ.
и҆ дщѝ цр҃ѧ ю́ж꙽ска вни́детъ къ сѣвер꙽скꙋ цр҃ю, ꙗ҆коже сътвори́ти завѣтъ с ни́мъ.
и҆ не ѹ҆дръжитъ крѣпости мы́шца, и҆ не ста́нетъ племѧ̀ е҆ѧ̀.
и҆ предастьсѧ та, и҆ привед꙽шеи ю҆̀ и҆ дѣва, и҆ въкрѣплѧ́ѧи ю҆̀ въ врѣменехъ.
и҆ въста́нет̑ ѿ цвѣта и҆ ѿ ко́ренїа е҆ѧ̀ на ѹ҆готова́нїе е҆го.
и҆ прїидет̑ въ си́лѣ, и҆ вни́дет̑ въ ѹ҆тверже́нїѧ цр҃ѧ сѣвер꙽скаго, и҆ сътворитъ в нихъ, и҆ ѹ҆крепѣ́ет꙽ в нихъ.
и҆ богѝ и҆хъ съ слїа́ньми их̑, и҆ всѧ сосꙋды их̑ похотѣны и҆ сребра̀, съ плѣн꙽ники принесетъ въ е҆гѷпет̑.
и҆ то́и въста́нетъ по цр҃и сѣ́вер꙽сте·

И҆ вни́детъ въ црс̑҇тво цр҃ѧ ю́жнаго, и възврати́тсѧ на свою зе́млю.
и҆ сн҃ове е҆го съберꙋтъ наро́дъ си́ленъ мно́гъ.
и҆ вни́детъ грѧды́и потоплѧ́ѧ, и҆ мимои҆детъ, и҆ до крѣпости е҆го съни́детъ.
и҆ разгнѣ́вает̑сѧ и҆ то́и вра́титсѧ съ цр҃емъ сѣвер꙽ском̑ и҆ поста́витъ наро́дъ мно́гъ, и҆ предастьсѧ в рꙋцѣ е҆го народъ.
и҆ поймт̑ꙋ наро́дъ, и҆ възвесели́тсѧ срд̑це е҆го, и҆ съдолѣ́етъ т꙽мам̑, и҆ не ѹ҆крепѣет̑.
и҆ възврати́тсѧ цр҃ь сѣ́вер꙽скїи и҆ ѿведетъ наро́дъ мно́гъ, и҆ на кон꙽цы лт̑ѣ прїидетъ грѧды́и вхо́домъ си́лою вели́кою и҆ съ и҆мѣ́нїемъ вели́комъ·

И҆ в꙽ та̀ лѣта мно́ѕи въста́нꙋтъ на цр҃ѧ ю́ж꙽ска.
и҆ сн҃ове расы́пателе людїи твои҆хъ въздви́гнꙋтсѧ ꙗ҆ко поста́вити видѣнїе, и҆ ѿнемогт̑ꙋсѧ.
и҆ вни́детъ цр҃ь сѣ́вер꙽скїи, и҆ пролѣет̑ къ прьсти, и прїимет̑ гра́ды тве́рды.
мы́шцы же цр҃ѧ сѣвер꙽ска не ста́нет꙽.
и҆ въста́нꙋтъ и҆збо́рнїи е҆го, и҆ не бꙋдетъ крѣпости ꙗ҆́коже ста́ти.
и҆ сътворитъ входѧ́и к не́мꙋ по во́ли свое́и, и҆ нѣсть стоѧ́щаго пред̑ лицем̑ е҆го.
и҆ ста́нетъ на землѝ гавеи́рь, и҆ съвръши́тсѧ в рꙋцѣ е҆го.
и҆ вчи́нит̑ лицѐ свое вни́ти всеѧ си́лы црс̑҇тва свое҆го, и҆ пра́вѣ вс̂е сътво́ритъ с ним̑.
и҆ дще́ре женѣ дасть е҆мꙋ бы́ти с нею, и҆ не томꙋ бꙋ́детъ, н̂и пребꙋдетъ ѹ҆ него.
и҆ възврати́тъ лицѐ свое въ ѻстровы, и҆ по́имет꙽ мно́ги, и҆ пога́ситъ кнѧ́ѕѧ ѹ҆кори́зна е҆го.
ѻ҆ба́че ѹ҆кори́зна е҆го възврати́тсѧ е҆мꙋ.
и҆ ѻ҆брати́тъ лицѐ свое въ крѣпость землѧ̀ свое́ѧ, и҆ ѿнемо́жет̑сѧ и҆ паде́тсѧ, и҆ не ѻ҆брѧ́щетсѧ.
и҆ въста́нетъ ѿ ко́ренїѧ е҆го црс̑҇тво на ѹ҆готова́нїе е҆го, преводѧ и҆ творѧ сла́вꙋ црс̑҇тва.
и҆ в т̂ы дн҃и съкрꙋшитсѧ и҆ не в личесѣхъ ни въ ра́ти.
и҆ ста́нетъ въ ѹ҆готова́нїи е҆го похꙋли́сѧ, и҆ не да́ша на́нь сла́вы црс̑҇тва.
и҆ прїидетъ съ ѻ҆би́лїемъ, и҆ съдолѣет̑ црс̑҇твꙋ ле́стьми.
и҆ мы́шцы потоплѧ́ющаго пото́питесѧ ѿ лица̀ е҆мꙋ и҆ съкрꙋшитсѧ.
и҆ старѣ́ишина завѣта.
и҆ ѿ совокꙋпле́нїѧ сътвори́т꙽ к немꙋ лесть.
и҆ възы́детъ и҆ съдолѣ́ет꙽ е҆мꙋ в ма́лѣ странѣ̀.
и҆ съ блажа́ишими страна́ми прїидетъ, и҆ сътвори́тъ е҆гоже не сꙋть сътвори́ли ѿц҃ы е҆мꙋ, и҆ ѿц҃ы ѿц҃ь е҆го.
плѣне́нїемъ и҆ плѣне́нїи ми́ръ раздѣлитъ, и҆ на е҆гѷпта помышлѧ́етъ мы́сль е҆го, и҆ до вре́мене.
и҆ въста́нет̑ крѣпость е҆го и҆ срд̑це е҆го на цр҃ѧ ю́ж꙽скаго в си́лѣ вели́цѣ.
цр҃ь же ю́жескь сътво́ритъ с нимъ сѣчь си́лою вели́кою и҆ крѣ́пкою ѕѣло·

И҆ не ста́нꙋт꙽ ꙗ҆́ко помышлѧ́ютъ нань помышле́нїѧ.
і҆ и҆з꙽ꙗ҆дѧ́тъ досто́инаѧ е҆го и҆ съкрꙋши́тъ и҆ и си́лы расы́плетъ, и҆ падꙋтъ ꙗ҆́звенїи мно́ѕи.
и҆ ѻ́ба цр҃ѧ и҆ срд̑це е҆ю на лꙋ́кованїе, и҆ на тра́пезѣ е҆ді́нои съгл҃ета л꙽жꙋ, и҆ не ѹ҆пра́вит̑сѧ.
ꙗ҆́ко е҆ще конец̑҇ въ вре́мѧ·

И҆ възврати́тсѧ на свою землю съ и҆мѣ́нїемъ мно́гомъ, и҆ срд̑це е҆го на завѣтъ ст҃ыи, и҆ сътворит̑, и҆ въз꙽врати́тсѧ на свою зе́млю.
и҆ въз꙽ꙗ҆́ри́тсѧ на завѣтъ ст҃ыи, и҆ въз꙽врати́тсѧ и҆ смы́слитъ на ѻ҆ста́вшаѧ завѣты, и҆ мы́шцы и҆ племѧ̀ ѿ него, и҆ ѻ҆сквернѧ́тъ сщ҃енїѧ, и҆ преста́вѧтъ ѹ҆чаще́нїе, и҆ дадѧ́т꙽ в н̂е ѻ҆гнꙋше́нїе и҆скажено.
и҆ безаконꙋ́ющеи завѣтъ наведꙋтъ съ пре́лестїю·

Лю́дїе же вѣдꙋще б҃а своег̑҇ премо́гꙋтъ и҆ сътво́рѧтъ.
и҆ смы́сленїи лю́дїе смы́слѧтъ мно́го, и҆ ѿнемо́гꙋтсѧ въ мечи и҆ въ пла́мене и҆ въ плѣне́нїи и҆ въ раз꙽грабле́нїе дн҃ьно́е.
и҆ е҆гда ѿнемогꙋтсѧ помо́жет̑т̑сѧ и҆мъ по́мощь мала.
и҆ прило́жатсѧ мно́ѕи на́ нѧ съ пре́лестїю.
и҆ ѿ смы́слившихъ ѿнемо́гꙋтсѧ, ꙗ҆ко раж꙽жещи ѧ҆̀ і҆ из̑бра́ти и҆ ѿкры́ти до кон꙽ца̑ вре́мени, ꙗ҆́ко е҆ще въ вре́мѧ, и҆ сътво́ритъ по во́ли свое́и.
и҆ цр҃ь възвы́ситсѧ и҆ възвели́читсѧ на всего бо́га, и҆ на б҃а бо́гъ съгл҃етъ преси́лне, и҆ ѹ҆пра́витъ дон꙽деже скон̑҇ча́ет꙽ гнѣвъ.
въ сконча́нїе б̂о быва́етъ.
и҆ до всѣхъ бо́гъ ѿц҃ь е҆го не смы́слит̑, ꙗ҆ко паче всѣхъ възвели́читсѧ.
и҆ бо́га маѻ́зеи на мѣсте свое҆мъ съсла́витъ.
и҆ бо́га е҆гоже не видѧ́ше ѿц҃ы е҆го въсла́витъ сребро́мъ и҆ зла́томъ, и҆ камы́комъ цѣн꙽нымъ, и҆ помышле́нїемъ.
и҆ сътворитъ твердѣлемъ ѹ҆бѣжище съ бого́мъ чю́ждимъ е҆гоже позна̀, и҆ ѹ҆мно́жит̑ сла́вꙋ, и҆ повине́тъ и҆мъ мно́ги, и҆ зе́млю раздѣ́литъ да́ровы.
и҆ въ вре́мѧ коне́чное сни́детсѧ с нимъ цр҃ь сѣвер꙽скїи въ ѻ҆рꙋжїи и҆ с кон꙽ники, и҆ с кораблѝ мно́ги.
и҆ вни́детъ въ зе́млю съ расы́панїемъ и҆ съкрꙋшитъ, и҆ минет̑ на землю сѣ́вер꙽скꙋ, и҆ мно́ѕи ѿнемо́гꙋтсѧ.
сїи же сп҃сꙋтсѧ ѿ рꙋкѝ е҆до́млѧ и҆ моа́влѧ, и҆ ѿ вла́сти сн҃овъ а҆м꙽мо́нь.
и҆ прострѐ рꙋкꙋ свою на́ землю, и҆ землѧ̀ е҆гѷпет꙽ска не бꙋдетъ въ сп҃се́нїе.
и҆ съвластѝ начнет̑ въ сокровен꙽ныхъ зла́та и҆ сребра̀, и҆ въ всемъ по́хотнѣмъ е҆гѷпет꙽стѣ.
и҆ леѷви́т꙽стѣ и҆ мѵр꙽стѣ и҆ въ твердѣлехъ и҆хъ.
и҆ слы́шанїѧ и҆ пот꙽ща́нїа възмꙋтѧ́тъ и҆̀ ѿ восто́к꙽ же и҆ сѣверь.
и҆ прїиде въ ꙗ҆́рости мно́ѕѣ, ꙗ҆ко погꙋби́ти и҆ нарещѝ мно́ги.
и҆ пот꙽кнꙋтъ кꙋщꙋ свою на е҆фадо́нѣ межд̑ꙋ мо́рема на горѣ̀ ст҃ѣи сѣ́вера·

Глв̑҇а, в҃і·

И в то́и го́дъ въста́нетъ михаи́лъ кнѧ́ѕь вели́кїи, стоѧй ѹ҆ сн҃ов꙽ людїи твоих̑.
и҆ бꙋдетъ год̑ скорбѣ́нїѧ ꙗ҆́ко̑ нѣсть было̀ такова̀, и҆ быс̑҇ стра́сть на землѝ града того.
и҆ в то врѣмѧ сп҃сꙋтсѧ лю́дїе твоѝ вс̂и, и҆ ѻ҆брѣты́исѧ впи́санъ въ кни́ги.
и҆ мно́ѕи спѧ́щеи и҆хъ въ зе́мльнѣи прьсти въста́нꙋтъ.
сїи въ жи́знь вѣчнꙋю, а҆ ѻ҆нѝ въ ѹ҆кори́знꙋ и҆ въ стыдѣ́нїе вѣчное·

и҆ смыслившеи просвѣтѧ́тсѧ а҆ки свѣтъ твердѣлныи.
и҆ ѿ правди́выхъ мно́гихъ а҆ки ѕвѣзды въ вѣки, и҆ е҆щѐ.
тыж̑ данїи́ле загради словеса̀, и҆ зна́менаи кни́ги до вре́мене скон̑҇ча́нїѧ.
дон꙽деже наѹ҆ча́тсѧ мно́ѕи, и҆ ѹ҆мно́житсѧ видѣ́нїе·

И҆ ви́дѣхъ а҆зъ данїилъ, и҆ с̂е дв̂а дрꙋга́ѧ стоѧ́сте е҆ді́нъ ѻ҆ сю́ю странꙋ̀ ѹ́стїѧ рѣцѣ, а҆ дрꙋгїи ѻ҆бонꙋ странꙋ̀.
и҆ рѣхъ къ мꙋжꙋ ѻ҆блъче́номꙋ въ багрѧницꙋ, и҆же бѧ́ше врьхꙋ воды̀ рѣчныѧ, доко́лѣ скон꙽ча́нїе ꙗ҆́же нарече чюдеса̀.
и҆ слы́шахъ ѡ мꙋжа ѻ҆блъче́наго въ багрѧни́цꙋ, и҆же бѧ́хꙋ врьхꙋ воды̀ рѣчны́ѧ, и҆ въздви́же десницꙋ свою на нб҃о, и҆ клѧ́сѧ в꙽ живꙋщей въ вѣки, ꙗ҆́ко въ вре́мѧ и҆ въ времене, и҆ в пол̑҇ вре́мене.
и҆ е҆гда сконча́етсѧ расы́панїе рꙋки людїи ѻ҆сщ҃енъ, и҆ ѹ҆вѣ́дѧтъ с̂е вс̂и.
а҆з же слы́шахъ, и҆ не разꙋмѣхъ.
и҆ рѣх꙽, г҃и что послѣднѧѧ сихъ.
и҆ рече, ходѝ данїиле, ꙗ҆́ко загражде́на словеса̀ и҆ знаменана до вре́мене сконча́наго·

дон꙽деже и҆щетꙋтсѧ и҆ ѻ҆бѣлѧ́тсѧ, и҆ разгорѧ́тсѧ мно́ѕи и҆ ѻ҆ст҃ѧтсѧ.
и҆ събезаконꙋют̑ безакон꙽ницы, и҆ не разꙋмѣ́ютъ вс̂и нечести́вїи, н̂о ѹ́мнїи разꙋмѣют̑·

ѡ времене же премененꙋ ѹ҆чаще́нїѧ, дн҃ъ а҃ с҃ч.
бл҃женъ тръплѧ́и и҆ постигїи въ дн҃и ҂а҃ тл҃е.
ты́ же и҆дѝ почива́и, е҆ще б̂о дн҃їе въ и҆сполне́нїе сконча́нїю и҆ почїеши, и҆ въста́неши въ прича́стїе свое въ сконча́нїе дн҃ъ.

Цр҃ь же а҆стѷагис̑҇ приложи́сѧ къ ѿц҃ем꙽ свои҆мъ.
и҆ прїѧ кѷръ пръсїинъ црс̑҇тво е҆го·

Глв̑҇а, г҃і·

Бѣ мꙋжъ жи́выи въ вавѷло́нѣ, и́мѧ же е҆мꙋ і҆ѻ҆а҆ки́м꙽.
и҆ поѧ̀ женꙋ е́йже и́мѧ сꙋса́на дщ̂и хел꙽кїева, добра̀ ѕѣло, и҆ боѧ́щисѧ б҃а.
роди́телѧ же еѧ̀ правд̑нва, и҆ наѹ҆чиста дще́рь свою по зако́нꙋ моѷсїѻвꙋ·

Бѣ же і҆ѻ҆а҆ки́мъ бога́тъ ѕѣло, и҆ б̂ѣ ѻ҆гра́дъ бли́зъ двора̀ е҆го.
и҆ схожда́хꙋсѧ к немꙋ жи́дове, и҆мже бѧ́ше славнѣ́и и҆хъ всѣхъ·

И҆ ѻ҆бра́ша дв̂а ста́рца ѿ людїи сꙋдїи в то̀ лѣто.
ѻ҆ неюже гл҃а влд̑ка, ꙗ҆ко и҆зы́идетъ безако́нїе и҆з вавѷло́на ѿ ста́рецъ сꙋдїи, и҆же мнѧхꙋсѧ строѧще лю́ди.
сїѧ пребыва́сте в꙽ домꙋ і҆ѻ҆а҆ки́мли, и҆ прихожд̑а́хꙋ к нима вс̂и прѧ́щеисѧ·

И҆ бы́сть внегда ѿхожда́хꙋ лю́дїе въ пла́днїѧ, в꙽хожда́ше и сꙋса́на и҆ хожда́ше въ ѻ҆градѣ мꙋжа своего.
и҆ смотрѣста еѧ̀ ѻ́ба ста́рца вс̂ѧ дн҃и входѧ́ща, і҆ и҆сходѧ́ща.
и҆ бы́сте в хотѣнїи еѧ̀.
и҆ разъврати́ста ѹмъ свои, и҆ ѹ҆клони́ста ѻ́чи своѝ ꙗ҆ко не възглѧда́ти на́ нб҃о, ни помѧнꙋти сꙋдъ пра́ведныхъ·

И҆ бѣста ѻ́ба ѻ҆сла́биласѧ на ню̀, и҆ не съвѣсти́ста сама̀ себѣ бо́лѣзни свое҆ѧ.
ꙗ҆ко стыдѣстасѧ и҆сповѣдати помышле́нїе свое, ꙗ҆́ко хотѧ́ста бы́ти з нею̀.
и҆ блюдѧ́ста жада́юща всѧ̀ дн҃и зрѧ́ща еѧ̀.
и҆ рѣста дрꙋг꙽ къ дрꙋгꙋ, и҆дѣве ѹ҆бо домо́вѣ, ꙗ҆́ко ѻ҆бѣденъ ча́съ е҆сть.
и҆ шед̑ша и҆ разыдо́стасѧ ѿ себе.
и҆ ѻ҆бра́щ꙽шасѧ прїидо́ста е҆ди́намо.
и҆ ѻ҆тѧза́ю҆ща самасѧ, винꙋ̀ и҆сповѣда́ста похотѣнїе свое.
и҆ тогда ѻ́бъщ꙽нѣ съчини́ста вре́мѧ, когда ѹ҆лꙋчиста ѻ҆брѣсти е҆ді́нꙋ·

И҆ бы́сть внегда̀ блюдѧ́ста ю҆̀ дн҃ь поко́сенъ, вни́де тогда а҆ки вчера̀ и҆ тре́тїимъ дн҃е, съ двѣма то́чїю ѻ҆трокови́цама, и҆ въсхотѣ̀ мы́тисѧ въ ѻ҆гра́дѣ, ꙗ҆́ко зно́и бѧ́ше.
и҆ не бѧ́ше нико́гоже т̂ꙋ, ра́звѣ двою ста́рцꙋ съкрове́нꙋ и҆ стрегꙋщꙋ еѧ̀.
и҆ рече ѻ҆трокови́цама, принесета масло и҆ смѣше́нїе, и҆ две́ри ѻ҆́гра́дныѧ затво́рита да сѧ и҆змы́ю.
и҆ сътвори́стѣ ꙗ҆́кож̑ рече, и҆ затвори́ста две́ри ѻ҆град̑ныѧ і҆ и҆зыдо́ста принестѝ повелѣ́ное и́ма, и҆ не ви́дѣстѣ ста́рцꙋ ꙗ҆ко бѣа́ста съкровена·

И҆ бы́сть ꙗ҆́ко и҆зыдо́ста ѻ҆троковицы, въста́ша̑ ѻ́ба ста́рца, и҆ рѣста, с̂е две́ри ѻ҆град̑ныѧ затвори́шасѧ, и҆ никто́же не ви́дит̑ насъ, а҆ похотѣнїѧ твое҆го е҆свѣ.
ѻ҆бѣща́и на́ сѧ, и҆ бꙋди с на́ма.
а҆ще ли н̂и, т̂о послꙋши́вѣ на́ тѧ, ꙗ҆́ко б̂ѣ с нею̀ ю́ноша.
и҆ того ра́ди ѿпꙋстѝ ѻ҆трокови́цы ѿ себѐ·

И҆ въз꙽дше сꙋса́на, и҆ ре́че, тѣ́сно ми ѿвсю́дꙋ.
а҆ще б̂о сѐ сътворю̀ смр҃ть м̂и е҆сть, и҆ а́ще не сътворю̀ не ѹ҆бѣжꙋ ѿ ва́ю.
и҆зволенѣ́е е҆сть м̂и не сътвори́вши впа́сти в рꙋ́цѣ ва́ю, негли съгрѣши́ти пред̑ бм҃ъ·

И҆ възъпи жрѣломъ вели́комъ сꙋса́на.
възъпи́ста же и҆ ѻ҆ба ста́рца проти́вꙋ е́и.
и҆ текъ е҆ді́нъ ѿврьзе две́ри ѻ҆гра́дныѧ.
и҆ ꙗ҆́ко ѹ҆слы́шаша крыча́нїе въ ѻ҆гра́дѣ дома́шнїи, въм꙽кнꙋшасѧ стран꙽ными две́рми ви́дѣти слꙋчи́вшеесѧ е́й.
е҆гда́ же и҆сповѣда́ста ста́рца словеса̀ своѧ, ѹ҆стыдѣшасѧ раби еѧ̀ ѕѣло, ꙗ҆́ко николиж̑ и҆звѣща́сѧ таково̀ сло́во ѻ҆ сꙋса́нѣ·

И҆ бы́сть наѹ́трїѧ, ꙗ҆ко събра́шасѧ лю́дїе к꙽ мꙋжꙋ еѧ̀ і҆ѻ҆а҆ки́мꙋ, прїидо́ста и҆ ѻ҆ба ста́рца полна безакон̑҇наго помышле́нїѧ на сꙋса́нꙋ, ѹ҆мори́ти ю҆̀.
и҆ рѣста пред̑ людми, посли́те по сꙋса́нꙋ дще́рь хел꙽кїевꙋ.
ѻ҆ни́ же посла́ша.
и҆ прїиде т̂а, и҆ вс̂ѧ ѹ́жики е҆ѧ̀.
сꙋса́на же бѧ́ше мла́да ѕѣло, и҆ добра̀ ѻ́бразомъ.
ббезако́ннїи же повелѣш́а ѿкры́ти ю҆̀ бѧше б̂о покрове́н꙽на, ꙗ҆́ко да сѧ насы́тѧтъ доброты е҆ѧ̀.
и҆ ви́дѣша ю҆̀ вс̂и.
въста́вшаж̑ ѻ҆ба ста́рца посредѣ людїи, и҆ възложи́ста рꙋцѣ на главꙋ̀ еѧ̀.
сїѧ же пла́чющи возрѣ̀ на́ нб҃о.
ꙗ҆́ко бѧ́ше срд̑це еѧ ѹ҆пова́ѧ къ г҃ꙋ.
рѣста же ѻ҆ба ста́рца, ходѧ́щема на́ма ѻ҆бѣма въ ѻ҆гра́дѣ, вни́де с̂и съ двѣма̑ ѻ҆трокови́цама, и҆ затворѝ две́ри ѻ҆гра́дныѧ, и҆ ѿпꙋсти ѻ҆трокови́цы.
и҆ прїиде к неи ю́ноша и҆же бѧ́ше съкрове́нъ, и҆ възлеже с нею̀.
на́м же сꙋще въ ѹ́глѣ ѻ҆града, ви́дѣвша безако́нїе теко́ховѣ на́ нѧ, и҆ ви́дѣвша ѧ҆̀ под̑ви́гнꙋховѣсѧ.
и҆ не мого́ховѣ ꙗ҆́ти е҆го, и́мже па́че на́ю можа́ше, и҆ ѿврьзе две́ри ѻ҆гра́дныѧ и҆ско́чи.
сїю же и́м꙽ше, въпраша́ховѣ кт̂о быс̑҇ ю҆́ноша, и҆ не хотѣ̀ повѣда́ти на́ма.
ѻ҆ се́мъ послꙋшествꙋ́евѣ.
и҆ вѣрова и́ма сън꙽мь а҆ки ста́рцемъ люд꙽скомъ и҆ сꙋдїѧм꙽.
і҆ ѻ҆сꙋди́ша ю҆̀ на ѹ҆мрьтїе·

И҆ възъпѝ сꙋса́на жрѣломъ вели́комъ, и҆ рече.
бж҃е вѣчныи, и҆ съкровен꙽ных̑ свѣдѣтелю, съвѣдыи вс̂е прежде бытїѧ и҆хъ, т̂ы вѣ́си ꙗ҆́ко лжꙋ̀ послꙋшествова́ста̑ на́ мѧ, и҆ с̂е ѹ҆мира́ю, не сътво́рши ничесо́же, е҆же сїѧ сълꙋкова́ста на́ мѧ.
и҆ послꙋша г҃ь гла́са еѧ·

И҆ ведо́мѣ е́и на погꙋбле́нїе.
въздви́же б҃ъ дх҃омъ ст҃ымъ ѻ́трока ю́на, е҆мꙋже и́мѧ данїи́лъ.
и҆ възъпѝ жрѣломъ вели́комъ чи́стъ а҆зъ ѿ кро́ви е҆ѧ̀.
ѻ҆брати́ша же сѧ вс̂и лю́дїе к немꙋ̀ и҆ рѣша, чт̂о сло́во с̂е е҆же т̂ы гл҃еши.
се́и же ста́въ сре́дѣ, ре́че, си́це л̂и ѹ҆роди́вїи сн҃ове і҆и҆л҃еви, не и҆зъѹ҆проша́вше ни и́стин꙽ны разꙋмѣвше, ѻ҆сꙋди́сте дще́рь і҆и҆л҃евꙋ.
ѻ҆брати́тесѧ на сꙋдище, л꙽жа б̂о сїѧ послꙋшествова́ста на ню̀·

И҆ ѻ҆брати́шасѧ вс̂и лю́дїе с пот꙽ща́нїем꙽.
и҆ рѣша е҆мꙋ ста́рцы, ходѝ, и҆ сѧ́ди посредѣ на́съ, и҆ съвѣстѝ намъ.
ꙗ҆́ко тебѣ е҆сть далъ б҃ъ ста́рчество.
и҆ рече к нимъ данїилъ, разведѣте ѧ҆̀ ѿ себе дале́че, и҆ въпраша́ю ѧ҆̀.
и҆ ꙗ҆ко разведо́ша ѧ҆̀ ко́иждо ѿ кое҆гождо·

и҆ призва̀ е҆ді́наго ею̀, и҆ рече к немꙋ, ѻ҆бет꙽ша́лче дн҃їи зо́лъ, нн҃ѣ приспѣша грѣсѝ твоѝ ꙗ҆же творѧ́ше прежде, сꙋдѧ̀ сꙋды непра́ведны, непови́нныѧ ѻ҆сꙋжда́ѧ, праща́ѧ же пови́нныѧ.
гл҃ющꙋ б҃ꙋ, чиста и҆ правди́ва не ѹ҆бива́и·

н҃нѣ ѹ҆бо сїю а҆ще е҆си ви́дѣлъ, рцы̀ под̑ кїимъ дре́вомъ ви́дѣлъ ѧ҆̀ е҆си бесѣдꙋю҆ща къ себѣ̀.
се́и же рече, под̑ тръномъ·

рече же данїилъ, пра́во сълга̀ на свою дш҃ꙋ·

се бо а҆гг҃лъ бж҃їи прїимъ ѿвѣтъ ѿ б҃а, растор꙽гнет̑ т̂ѧ польма.
и҆ ѿпꙋсти́въ и҆̀.
повелѣ привестѝ дрꙋга́го.
и҆ рече е҆мꙋ, племѧ̀ ханаа́не а҆ не і҆ѹ́дино, доброта̀ прельсти т̂ѧ, и҆ похотѣ́нїе разврати срд̑це твое·

си́це ли твори́ли е҆сте дщерем̑ і҆и҆л҃евомъ, да ѻ҆ны̀ боѧ́щасѧ бесѣдовахꙋ к꙽ ва́мъ·

н̂о н҃нѣ дщ̂и іѹ҆дина не претръпи́тъ безако́нїѧ ва́шего·

н҃нѣ ѹ҆бо гл҃и м̂и под̑ кїимъ дре́вомъ ви́дѣ сїѧ бесѣ́дꙋюща к꙽ себѣ.
се́и же рече, под̑ чесми́ною·

рече же е҆мꙋ данїилъ, пра́во сълга и҆ ты̀ на свою главꙋ̀·

жде́тъ б̂о а҆гг҃лъ бж҃їи мече́мъ рас꙽сѣщи т̂ѧ по́льма, ꙗ҆́ко да потреби́тъ в̂ы·

И҆ възъпѝ весь сѣн꙽мь жрѣломъ вели́комъ, и҆ блс̑҇ви б҃а сп҃саю҆щаго надѣющаѧсѧ к немꙋ̀.
и҆ въста́вше въста́ша на ѻ́ба ста́рца ꙗ҆́ко въста́ви ѧ҆̀ данїилъ, ѿ ѹ́стъ же е҆ю̀ л꙽жа послꙋшествова́вшема̑.
и҆ сътвори́ша и́ма ꙗ҆́коже слꙋкова́сте бли́жномꙋ, сътвори́ти по зако́нꙋ моѷсїѻвꙋ·

и҆ поби́ша ѧ҆̀, и҆ сп҃сесѧ кро́вь непови́нна в то́и дн҃ь·

Хел꙽кїѧ же и҆ жена̀ е҆го похвали́сте б҃а ѻ҆ дще́ри е҆ю̀ сꙋса́нѣ съ и҆ѻ҆а҆ки́момъ мꙋжемъ еѧ̀ и҆ съ ѹ́жиками всѣми, ꙗ҆́ко не ѻ҆брѣтесѧ неправда́нїе ѻ҆ не́и·

данїи́лъ же бы́сть вели́къ пред̑ люд̑ми ѿ дн҃е того и҆ потомъ·

Глв̑҇а, д҃і·

И бѧ́ше данїилъ жи́зненикъ съ цр҃емъ сла́венъ паче дрꙋг꙽ е҆го̀.
и҆ бѧ́ше кꙋмиръ вавѵлонѧном̑ е҆мꙋже и҆мѧ ви́лъ.
і҆ и҆здавахꙋ е҆мꙋ на кыиждо дн҃ь крꙋп꙽ пшени́ченъ а҆лтавасъ в҃і, ѻ҆ве́цъ м҃, вина̀ мѣръ ѕ҃. и҆ цр҃ь чтѧше и҆̀, и҆ хождаше по всѧ̀ дн҃и кла̑нѧтисѧ е҆мꙋ.
данїилъ же кланѧ́шесѧ б҃ꙋ свое҆мꙋ.
и҆ рече е҆мꙋ цр҃ь, почто не покланѧ́ешисѧ ви́лꙋ.
сеи же рече, не покланѧ́юсѧ кꙋми́ромъ рꙋка́ма сътворе́номъ, н̂о жи́вꙋ б҃ꙋ сътвор꙽шемꙋ нб҃о и҆ землю, и҆ владꙋщемꙋ всѣми·

и҆ рече цр҃ь, не мнитъ л̂и ти сѧ ви́лъ жи́въ сы́и бо́гъ.
и҆л̂и не ви́диши коли́ко ꙗ҆́сть и҆ пїетъ на всѧ̀ дн҃и.
и҆ рече данїилъ посмѣѧ́всѧ, не прельщаисѧ цр҃ю.
то́и внꙋтръѹ҆́дꙋ кал̑҇ е҆сть, а҆ внѣѹ҆́дꙋ мѣдь, и҆ нѣсть ꙗ҆́лъ н̂и пи́лъ никогда́же.
и҆ раз꙽гнѣвавсѧ цр҃ь, призва жер꙽ца е҆го.
и҆ рече и҆мъ, а҆ще л̂и не повѣсте м̂и кт̂о ꙗ҆́сть бра́шно с̂е, т̂о ѹ҆́мрете.
а҆щеж̑ ѹ҆ка́жете ꙗ҆ко вил̑҇ и҆з꙽ꙗ҆́даеть е҆̀, ѹ҆́мретъ данїи́лъ, ꙗ҆ко похꙋли́лъ е҆сть ви́ла.
и҆ рече данїил꙽ цр҃ю, бꙋди по гл҃ꙋ твое҆мꙋ.
бѣа́ше же жрець ви́ловъ, о҃, кро́мѣ же́нъ, и҆ дѣтїи·

И прїиде цр҃ь съ данїи́ломъ въ хра́мъ виловъ.
и҆ рѣша жерцы ви́ловы, с̂е м̂ы и҆зыдемъ во́нъ.
ты же цр҃ю поста́ви ꙗ҆́дь, и҆ вино̀ съчерпа́но, затвори́ же двери, и҆ знамена́и прьстьнемъ свои҆мъ.
и҆ пришед̑ заѹ҆́тра, а҆ще не ѻ҆брѧ́щеши всего̀ изъꙗ҆дена виломъ, тогда̀ и҆з꙽мремъ, и҆л̂и данїи́лъ съл꙽га́выи на́ ны·

Сїи же и҆мѣа́хꙋ под̑ трапезою съкровенъ вход̑д̑, и҆ вхождахꙋ тѣмъ всегда̀ і҆ и҆з꙽ꙗ҆́дахꙋ е҆̀.
и҆ бысть ꙗ҆́ко и҆зыидоша ѻ҆нѝ, и цр҃ь поста́ви бра́шно ви́лꙋ.
и҆ повелѣ данїи́лъ ѻ҆́трокомъ свои҆мъ, и҆ принесоша пе́пелъ, и҆ потрꙋси́ша весь хра́мъ пред̑ цр҃емъ.
і҆ и҆зшед꙽ша заключи́ша двери, и҆ знамена́ша прьстьнем̑ цр҃евомъ и҆ ѿи҆доша.
жерцыж̑ влѣз꙽ше нощїю по ѻ҆бы́чаю свое҆мꙋ, и҆ жены их̑, и҆ ча́да их̑, і҆ и҆зъѧ́ша і҆ и҆спи́ша вс̂е·

И҆ ѹ҆ранѝ цр҃ь заѹ҆́тра и҆ данїилъ с ни́мъ.
и҆ рече цр҃ь, цѣ́ла л̂и сꙋть зна́менїа данїиле.
се́и же реч̑҇ цѣла цр҃ю.
и҆ ѿвръзоша две́ри, и҆ возрѣ цр҃ь на трапезꙋ, и҆ възъпи гла́сом̑ вели́ком꙽, вели́къ е҆си ви́ле, и҆ нѣсть льсти въ тебѣ̀ н̂и е҆ді́ноѧ же.
и҆ посмѣѧ́сѧ данїилъ.
и҆ ѹ҆дръжа цр҃ѧ ꙗ҆́ко не вни́ти е҆мꙋ внꙋтръ.
и҆ рече ви́ждъ ѹ҆бо, и҆ разꙋмѣи чїѧ сꙋтъ стопы сїѧ.
и҆ рече цр҃ь, ви́ждꙋ стопы̀ мꙋж́ескы, и҆ жен꙽скы, и҆ дѣтъскы.
и҆ раз꙽гнѣвавсѧ цр҃ь.
ꙗ҆́тъ тогда̀ жер꙽ца, и҆ жены и҆хъ, и҆ дѣти и҆хъ, и҆ показа́ша е҆мꙋ съкровен꙽ныа две́ри и҆́миж̑ входѧ́ще и҆зъꙗ҆дахꙋ ꙗ҆́же на трапеѕѣ.
и҆зби ѧ҆̀ цр҃ь, и҆ дастъ ви́ла данїилꙋ, и҆ разби и҆̀ и҆ храм̑ е҆го разорѝ·

И҆ бѣаше ѕмїи вели́кїи въ мѣсте том̑ и҆ чтѧхꙋ и҆̀ вавѷлонѧне, и҆ рече цр҃ь данїилꙋ, е҆да̀ и҆ семꙋ реч̑҇ши ꙗ҆́ко мѣдь е҆стъ, се́и жи́въ е҆стъ и҆ ꙗ҆́сть и҆ пїет̑, не мо́жеши рещи ꙗ҆́ко нѣсть се́и бо́гъ жи́въ, поклони́ же сѧ е҆мꙋ.
и҆ рече данїилъ, г҃ꙋ б҃ꙋ мое҆мꙋ поклоню́сѧ, ꙗ҆́ко то́и е҆сть б҃ъ жи́въ.
ты́ же цр҃ю да́ждь м̂и вла́сть, и҆ ѹ҆бїю змїѧ без̑ меча и҆ безъ жезла̀, и҆ рече цр҃ь, даю т̂и и҆̀·

И҆ взѧ̀ данїилъ смолꙋ и҆ сѣрꙋ и҆ во́лнꙋ, и҆ възвари въкꙋпь.
и҆ сътвори́въ гомо́лю, въвръже въ ѹ҆ста̀ ѕмїю, і҆ и҆зъꙗ҆́дъ расѣдесѧ ѕмїи.
и҆ рече данїилъ, с̂е чествова́нїѧ ва́ша.
и҆ бысть ꙗ҆ко ѹ҆слы́шаша вавѷлонѧне стꙋжиша с̂и ѕѣло, и҆ ѻ҆братишасѧ на цр҃ѧ, и҆ рѣша, жидови́нъ бы́сть цр҃ь.
ви́ла расы́па, и҆ ѕмїѧ ѹ҆бѝ, и҆ жерца и҆с꙽сѣче.
и҆ рѣша пришед̑ше къ цр҃ю, предаждь на́мъ данїила, а҆ще ли н̂и т̂о ѹ҆бїем꙽ т̂ѧ и҆ дом̑ твои.
и҆ ви́дѣвъ цр҃ь ꙗ҆́ко т꙽ща́тъ им̑ ѕѣло, и҆ нꙋжденъ бы́въ предасть данїила·

сїи же въвръго́ша и҆̀ в ровъ лев꙽скь, и҆ бѣ т̂ꙋ дн҃ъ ѕ҃. бѧ́шеж̑ в ровѣ з҃, ле́въ, и҆ даѧ́хꙋ и҆мъ дв̂ѣ телесѣ на́ дн҃ь, и двѣ же ѻ҆вцы̀.
тогда же не да́ша и҆мъ, да и҆зъꙗ҆дѧ́тъ данїила·

А҆в꙽вакꙋм꙽ же прро̑҇къ бѧ́ше на жидов꙽стѣи, то́иже сварив̑҇ варенїе и҆ въдробив꙽ хлѣбы в нощ꙽вы, и҆дѧше на́ поле донести жа́телемъ.
и҆ рече а҆гг҃лъ гн҃ь а҆в꙽вакꙋмꙋ, донести ѻ҆бѣд꙽ и҆же и҆́мать въ вавѷлонъ данїилꙋ, в ровъ лев꙽скь.
и҆ рече а҆в꙽ва́кꙋм꙽, г҃и вавѷлона не вѣде.
и҆ ꙗ҆́тъ и҆̀ а҆гг҃лъ гн҃ь за ве́рхъ е҆го, и҆ дръжа за вла́сы главы е҆го, и҆ поста́ви и҆̀ въ вавѷлонѣ връхꙋ р꙽ва шꙋмомъ дх҃а е҆го.
и҆ възъпи ав꙽вакꙋмъ гл҃ѧ, данїиле данїи́ле, возми́ ѻ҆бѣдъ и҆же посла̀ тебѣ б҃ъ.
и҆ рече данїилъ, помѧнꙋлъ б̂о мѧ ес̑҇ б҃ъ, и҆ нѣси ѻ҆ста́вилъ любѧ́щихъ т̂ѧ·

И҆ въстав̑҇ данїилъ и҆ ꙗ҆́сть.
а҆гг҃лъ же бж҃їи поста́ви а҆в꙽вакꙋма внезапꙋ на мѣстѣ е҆го·

Цр҃ь же прїиде в сед̑мы́и дн҃ь желѣти данїила, и҆ прїиде над̑ ро́въ, и҆ възрѣ, и҆ с̂е данїил̑҇ седѧ.
и҆ възъпи цр҃ь гла́сомъ вели́комъ, и҆ рече, великъ е҆си г҃и б҃е данїиловъ, и҆ нѣсть и҆́наго раз꙽вѣ тебе, і҆ и҆схити и҆́.
пови́н꙽ныѧ же па́гꙋбѣ е҆го въвръже в ро́въ, і҆ и҆зъꙗ҆дени бы́ша пред꙽ ни́мъ·

Конецъ прро̑҇кꙋ данїилꙋ.
и҆́мать в себѣ̀ гла́въ, д҃і·