ИѠСИѦ ПРО҃РКЪ

ГЛАВА̀ А҃·

Сло́во гн҃е е҆же бысть къ і҆ѻ҆сїи верїинꙋ въ дн҃и ѻ҆ѕїины, і҆ и҆ѻ҆а҆ѳа́млѧ, и҆ а҆ха́зовы, і҆ и҆е҆зекїины цр҃еи і҆ѹ́динъ, и҆ въ дн҃и і҆е҆ровоа́млѧ сн҃а і҆ѻ҆асова црѧ і҆и҆л҃ева·

Нача́токъ слова̑ гн҃ѧ къ і҆ѻ҆сїи·

и҆ рече г҃ь къ і҆ѻ҆сїи, и҆дѝ, пои҆ми себѣ женꙋ̀ блꙋженїѧ, и҆ роди ча́да блꙋже́нїѧ.
поне́же блꙋдѧ́щи съблꙋ́дитъ землѧ̀ ѿ г҃а·

і҆ и҆де і҆ поѧ̀ гомо́рь дщер꙽ давидаи҆́млю.
и҆ зача̀ и҆ роди е҆мꙋ сн҃ъ·

и҆ рече г҃ь к немꙋ, прозови и҆мѧ е҆мꙋ і҆е҆зра́ель·

зане е҆щѐ ма́ло, да и҆ м꙽щꙋ крови і҆е҆зрае҆левы в꙽ домꙋ і҆и҆ѹ̀, и҆ покою̀ црс̑҇тво до́мꙋ і҆и҆л҃ева·

и҆ бꙋдетъ в то́и дн҃ь съкрꙋшꙋ лꙋкъ і҆и҆л҃евъ на полѧ́нѣ і҆е҆зрае҆левѣ.
и҆ зачав̑҇ши и҆ роди дще́ре.
и҆ рече е҆мꙋ г҃ь, прозови и҆мѧ е́й непомилова́на.
зане не приложꙋ к꙽семꙋ̀ помилова́ти до́мꙋ і҆и҆л҃ева, н̂о съпроти́въ съпроти́влюсѧ и҆мъ·

Сн҃ы же і҆ѹ́дины поми́лꙋю, и҆ сп҃сꙋ ѧ҆̀ ѻ҆ г҃и бѕ҃ѣ и҆хъ.
и҆ не сп҃сꙋ и҆хъ лꙋкомъ, н̂и мечемъ, н̂и бра́нїю, н̂и ко́ньми, н̂и кон꙽ники.
и҆ ѿдо́и непоми́лован꙽нꙋю.
и҆ зача́вши па́ки и҆ роди сн҃ъ·

и҆ рече г҃ь, прозови и҆мѧ е҆мꙋ не лю́дїе моѝ.
зане в̂ы не лю́дїе моѝ, и҆ а́з꙽ нѣсмь б҃ъ ва́шъ·

И҆ бꙋдетъ число̀ сн҃овъ і҆и҆л҃евъ а҆ки пѣсокъ мор꙽скїи, и҆же не и҆змѣри́тсѧ н̂и и҆с꙽чтетсѧ.

И҆ бꙋдетъ въ мѣстѣ на не́мже речесѧ и҆мъ не лю́дїе моѝ в̂ы, са́ми т̂ꙋ прозоветесѧ сн҃ове б҃а жива́го·

И҆ съберꙋтсѧ сн҃ве і҆ѹ́дины, и҆ сн҃ове і҆ил҃евы въкꙋпь, и҆ поста́вѧтъ себѣ вла́сть е҆ді́нꙋ, і҆ и҆зыидꙋтъ ѿ землѧ̀, ꙗ҆́ко вели́къ дн҃ь і҆и҆л҃евъ·

Глв̑҇а, в҃·

Рцѣте бра́тꙋ свое҆мꙋ, лю́дїе моѝ.
и҆ сестрѣ свое́и, помилован꙽наѧ.
сꙋди́те с̂и съ ма́терїю свое́ю сꙋди́те с̂и.
ꙗ҆́ко та не жена̀ моѧ̀, и҆ а́зъ не мꙋжъ е҆ѧ̀.
и҆ ѿвръгꙋ блꙋженїѧ еѧ ѿ лица̀ свое҆го, и҆ любодѣ́иство еѧ̀ ѿ среды со́сꙋ еѧ̀.
ꙗ҆́кож̑ съвлекꙋ ю҆̀ на́гꙋ и҆ поста́влю ю҆̀ ꙗ҆́коже и҆ въ дн҃ь рожд̑енїа е҆ѧ̀.
и҆ положꙋ ю҆̀ ꙗ҆́ко пꙋсты́ню, и҆ ѹ҆чиню ю҆̀ ꙗ҆́ко землю без꙽ воды̀, и҆ побїю ю҆̀ жа́ждею.
и҆ чад̑ еѧ̀ не поми́лꙋю, ꙗ҆́ко ча́да блꙋженїѧ сꙋть.
ꙗ҆́ко въз꙽блꙋди мт҃и их̑, ѻ҆срами роди́вшаѧсѧ.
рече б̂о, да и҆дꙋ въ слд̑ѣ хо́тїи свои҆хъ да́ющих̑ мнѣ хлѣбы моѧ̀, и҆ водꙋ мою̀ и҆ ризы моѧ̀, и҆ рѣчнаа моа, и҆ ма́сло мое, и҆ вс̂е е҆же мене достои́тъ·

Сего ради с̂е а҆́зъ заграждꙋ пꙋть еѧ̀ тернїем꙽, и҆ възгражд̑ꙋ распꙋтїа еѧ̀, и҆ стеѕѧ свое́ѧ не ѻ҆брѧ́щетъ.
и҆ поже́нетъ хо́ти своѧ, и҆ не пости́гнет̑ и҆хъ.
и҆ възы́щетъ и҆хъ, и҆ не ѻ҆брѧ́щетъ.
и҆ речетъ, да и҆дꙋ и҆ възвращꙋсѧ к꙽ мꙋжꙋ свое҆мꙋ прьвомꙋ, ꙗко добрѣе м̂и б̂ѣ тогда̀ не́гли нн҃ѣ, н̂о а҆зъ не разꙋмѣхъ·

А҆зъ б̂о да́хъ е́й пшени́цю, и вино, и ма́сло, и сребро̀ ѹ҆мно́жихъ е́и.
сїи же сребрени и҆ зла́ты сътвори́ша ваа́лови·

Сего ради ѻ҆бращꙋсѧ, и҆ возмꙋ пшени́цю свою въ времѧ еѧ̀, и҆ вино свое въ год̑ е҆го.
и҆ ѿи́мꙋ ри́зы своѧ̀, и҆ рѣчнаѧ своѧ̀, да не закрыва́етъ стꙋда свое҆го.
и҆ нн҃ѣ ѿкрыю нечистотꙋ̀ еѧ̀ пред̑ хо́тьми еѧ̀.
и҆ никтоже ѿи́мет꙽ е҆ѧ̀ ѿ рꙋки мое́ѧ.
и҆ ѿвращꙋ вс̂ѧ весе́лїѧ еѧ̀, и҆ празд̑ники еѧ̀, и҆ новленїѧ мс̑҇ць еѧ̀, и҆ сꙋбо́ты е҆ѧ̀, и҆ вс̂ѧ вели́ки дн҃и еѧ̀.
и҆ погꙋблю виногра́ды еѧ̀, и҆ смоквинїѧ еѧ̀, вс̂е е҆ли́ко вѣща̀, м꙽зды м̂и сꙋть сїа да́ша мнѣ̀ хо́ти моѧ̀.
и҆ положꙋ ю҆̀ въ свѣдѣнїе, и҆ поꙗ҆дѧтъ ю҆̀ ѕвѣрїе по́льстїи, и҆ птица нбс̑҇ныѧ, и҆ га́ди зе́мнїи.
и҆ м꙽щꙋ на не́и дн҃и ваа́ловы, в нѧ́же требы кладѧ́ше и҆мъ.
и҆ въдѣа́ше ѹ҆серѧ́зѧ своѧ̀, и҆ мониста̀ своѧ̀, и҆ хожда́ше въ слѣдъ хо́тїи свои҆хъ а҆ менѐ забы̀, гл҃етъ г҃ь·

Сего ради с̂е а҆зъ съблажню ю҆̀, и҆ ѹ҆чиню ю҆̀ ꙗ҆́ко пꙋстыню, и҆ воз̑гл҃ю въ срд̑це еѧ̀, и҆ дамъ е́й притѧжа́нїе е҆ѧ̀ ѿтꙋдꙋ и҆ по́лѧнꙋ а҆́хроѻ҆вꙋ, ѿвръсти смы́слъ е҆ѧ̀.
и҆ смирит̑сѧ т̂ꙋ по дн҃емъ дт̑ѣства е҆ѧ̀, и҆ по дн҃емъ и҆зведенїѧ еѧ̀ ѿ землѧ е҆гѷпет꙽скы·

И҆ бꙋдетъ въ то́и дн҃ь гл҃етъ г҃ь, призоветъ м̂ѧ мж̑ꙋ мои, а҆ не възоветъ мене к꙽семꙋ ваа҆лимъ.
н̂извергꙋ и҆мена̀ ваа҆лимлѧ ѿ ѹ́стъ е҆ѧ, и҆ не въспомѧнꙋ̀т꙽сѧ к꙽семꙋ и҆мена их̑·

И҆ завѣща́ю и҆мъ завѣтъ в꙽ то́и дн҃ь, съ ѕвѣр꙽ми пол̑҇скими, и҆ съ птицами нбс̑҇ными, и҆ съ га́ды зе́мными.
и лꙋкъ, и҆ меч̑҇, и҆ бра́нь съкрꙋшꙋ съ земли, и҆ вселю ѧ҆̀ съ ѹ҆пова́нїемъ.
и҆ поимꙋ т̂ѧ себѣ въ вѣкъ.
и҆ пои҆мꙋ т̂ѧ себѣ̀ въ правдꙋ, и҆ въ сꙋды, и҆ въ млс̑҇ть, и҆ въ щедроты.
и҆ поимꙋ т̂ѧ себѣ̀ въ вѣрꙋ, и҆ ѹ҆вѣси г҃а·

И҆ бꙋдетъ в то́и дн҃ь гл҃етъ г҃ь, послꙋшаю небесе, и҆ ѻ҆на̀ послꙋшаютъ земли, и҆ землѧ послꙋша́етъ п꙽шени́ца, и҆ вина, и҆ ма́сла.
и҆ сїи послꙋшаютъ і҆и҆л҃ѧ.
и҆ всѣ́ю ѧ҆̀ себѣ на землѝ.
и҆ поми́лꙋю непоми́лованꙋю.
и҆ рекꙋ не лю́демъ мои҆мъ, лю́дїе моѝ е҆сте в̂ы.
и҆ тїи рекꙋтъ, г҃ь б҃ъ наш̑҇ т̂ы е҆си·

Глв̑҇а, г҃·

И рече г҃ь къ мнѣ̀ е҆ще и҆дѝ, и҆ възлюбѝ женꙋ̀ любѧ́щꙋю ѕѣло, и҆ любодѣю.
ꙗ҆́ко лю́битъ б҃ъ сн҃ы і҆и҆л҃евы.
сїи же възира́ютъ къ бого́мъ чюжд̑имъ, и҆ любѧтъ сковрад̑ники съ сꙋхвами·

И҆ наѧ́хъ себѣ̀ пѧ́ть надесѧть сребром, и҆ двана́десѧть спꙋды ꙗ҆чменѧ, н̂о и҆ виномъ сед̑мїюдесѧть и҆ двѣма вѣдрома.
и҆ рцы е́й, дн҃и мно́ги да сѣдиши ѹ҆ мене, и҆ а́з꙽ ѹ҆ тебе.
и҆ не съблꙋди́ши, н̂и бꙋдеши мꙋжꙋ.
зане дн҃и мно́ги сѧ́дꙋт꙽ сн҃ове і҆и҆л҃евы не сꙋщꙋ цр҃ю, н̂и сꙋщꙋ кн҃ѕю, н̂и сꙋщꙋ и҆мѣнїю, н̂и сꙋщꙋ тре́бникꙋ, н̂и жречествꙋ, н̂и проповѣда́нїю·

И҆ посем̑ ѻ҆братѧт̑сѧ сн҃ове і҆и҆л҃и, и҆ възыщт̑ꙋ г҃а б҃а свое҆го, и҆ дв҃да цр҃ѧ свое҆го.
и҆ въсчюдѧт̑сѧ ѻ҆ г҃и и҆ ѻ҆ бл҃гостѧх̑ е҆го въ послѣднѧа дн҃и·

Глв̑҇а, д҃·

Слы́шите сло́во гн҃е сн҃ове і҆и҆л҃и, ꙗ҆́ко сꙋ́дъ гв҃и къ в꙽селшим̑сѧ на земли.
зане нѣсть и҆́стин꙽ны, н̂и млс̑҇ти н̂и свѣдѣнїѧ бж҃їѧ на землѝ.
клѧ́тва, и҆ л꙽жа, и҆ ѹ҆бо́и, и҆ татьба, и҆ любодѣа́нїе расыпа́лосѧ по землѝ, и҆ кровь с кров̑҇ми смѣша́ютъ·

Сего ради и҆ въскор꙽битъ землѧ̀, и҆ ѹ́малитсѧ съ всѣми всел꙽шимисѧ на не́и, съ ѕбѣремъ по́льским꙽꙽, и҆ съ га́ды зе́мными, и҆ съ пти́цами небе́сными.
и҆ ры́бы мор꙽скыѧ ѻ҆скꙋдѣю́тъ.
ꙗ҆́ко да никтоже не прит̑сѧ, н̂и ѻ҆блича́етсѧ никто́же·

Лю́дїе же моѝ а҆ки съпроти́въ гл҃ѧи жрецъ, и҆ ѿнемо́жесѧ въ дн҃ех꙽, и҆ ѿнемо́жет̑сѧ прро̑҇къ с тобо́ю но́щїю.
к но́щи прит꙽кнꙋхъ мт҃рь твою·

Ѹ҆подоби́ша бо сѧ лю́дїе моѝ а҆ки не и҆мꙋще ѹ҆мѣнїѧ.
ꙗ҆́ко т̂ы ѹ҆мѣнїе ѿве́рже, ѿвръгꙋ и҆ а́зъ тебе ѿ жречествова́ти мнѣ̀.
и҆ ꙗ҆́ко забы́лъ е҆си зако́нъ б҃а свое҆го, забꙋдꙋ и҆ а́зъ ча́да твоа̀.
по мно́жествꙋ и҆хъ та́ко съгрѣшиша̑ мнѣ̀, сла́вꙋ их̑ въ бесчестїе положꙋ·

Грѣхи людїи мои҆хъ и҆зъꙗ҆дѧтъ, и в неправда́хъ и҆хъ възмꙋтъ и҆нїи дш҃а и҆хъ·

И҆ бꙋдетъ ꙗ҆́коже лю́дїе та́ко и҆ жрецъ.
и҆ м꙽щꙋ в꙽ нихъ пꙋти и҆хъ и҆ мышленїѧ и҆хъ ѿда́мъ и҆мъ.
и҆ бꙋдꙋтъ ꙗ҆́сти, и҆ не насы́тѧтсѧ.
съблꙋди́ша, и҆ не и҆спра́вѧтсѧ.
поне́же г҃а ѻ҆ста́виша ꙗ҆́ко снабдѣти·

Блꙋдъ, и҆ вино, и҆ пїаничество прїѧт̑ срд̑це лю́дїи мои҆хъ.
зна́менїи въпрошахꙋ, и҆ же́злы е҆го повѣда́хꙋ е҆мꙋ.
дх҃омъ блꙋженїѧ прельстишасѧ, и҆ съблꙋди́ша ѿ б҃а свое҆го·

Връхом̑ гор꙽нымъ требы кладѧ́хꙋ, и҆ холмом̑ требы полага́хꙋ.
под̑ дꙋбом̑, и҆ под̑ бором̑, и҆ под̑ дꙋбомъ вѣтвенемъ ꙗ҆́ко добръ кро́въ·

Сего ради блꙋ́дѧт꙽ дщерѧ ва́ша, и҆ невѣсты ва́ша любодѣют̑·

и҆ не присѣщꙋ дщерехъ ва́шихъ е҆гда̀ блꙋ́дѧтъ, и҆ невѣсты ва́ша е҆гда̀ любодѣ́ютъ·

Ꙗ҆́ко и҆ тїи съ блд̑ꙋники съгрѣзи́шасѧ, и҆ с꙽ съвръшеными требы кладѧхꙋ, и҆ лю́дїе смыслѧ́щеи съ блꙋдницею с꙽плета́хꙋсѧ·

Ты же і҆и҆л҃ю не неразꙋмѣва́и, і҆ѹ́да не в꙽ходи въ галга́лꙋ, и҆ не въсходите в до́мъ ѻ҆́н꙽новъ.
и҆ не кла́нѧитесѧ госпо́демъ л꙽жи́вымъ.
ꙗ҆ко ю҆́ница стрѣкомъ.
стрѣчема разгорѣсѧ і҆и҆л҃ь.
нн҃ѣ напасеть ѧ҆̀ г҃ь ꙗ҆́ко те́лца на простран꙽нѣ.
прича́стникъ кꙋми́ромъ е҆фрѣмъ, положи себѣ̀ събла́зны, и҆зволи ханане́ѧ, блꙋдѧ́ще въз꙽блꙋдиша.
възлю́биша безъчестїе ѿ меженїѧ е҆мꙋ.
съвра́тъ дх҃а е҆мꙋ въсви́щетъ въ крылꙋ е҆го, и҆ срамѧтсѧ ѿ тре́бникъ и҆хъ·

Глв̑҇а, е҃·

Слы́шите с̂е жер꙽цы, и҆ вон꙽мите домꙋ і҆и҆л҃евъ, и҆ до́ме цр҃ь внꙋшите, ꙗ҆́ко к꙽ ва́мъ е҆сть сꙋдъ.
ꙗ҆́ко прꙋгло бы́сте страж꙽бѣ, и҆ ꙗ҆́ко мрежа препѧта въ и҆тавїрїи ловѧ́щїи сѣти поток꙽ше.
а҆з же каза́тель вамъ, а҆зъ ѹ҆вѣдѣхъ е҆фрема, и҆ і҆и҃ль не ѿстꙋпи ѿ мене.
зане нн҃ѣ съблꙋди е҆фрем꙽, и҆ ѻ҆сквернисѧ і҆и҆л҃ь.
не положи́ша мышленїи свои҆хъ възврати́тисѧ къ б҃ꙋ свое҆мꙋ, ꙗ҆́ко дх҃ъ блꙋженїѧ е҆сть в нихъ, и҆ г҃а не ѹвѣдѣша·

И҆ смирит̑сѧ ѹ҆кори́зна і҆и҆л҃ѧ в꙽ лице е҆мꙋ.
і҆ил҃ь и҆ е҆фрм̑ѣ ѿнемо́жетасѧ в꙽ непра́вдах̑ своих̑, и ѿнемо́жет̑сѧ і҆ и҆ѹ́да с ни́ми·

Съ ѻ҆́вцами и҆ с тел̑҇цы пои҆дꙋтъ възыска́ти г҃а, и҆ не ѻ҆брѧ́щꙋтъ е҆го, ѹ҆клони бо сѧ ѿ них̑.
ꙗ҆ко г҃а ѻ҆ста́виша, ꙗ҆ко ча́да чюжд̑а породи́ша себѣ.
нн҃ѣ поꙗ҆дѧтъ ѧ҆̀ си́плеве и҆ прича́стїѧ и҆хъ·

Въстрꙋби́те въстрꙋбите на хол꙽мѣх꙽, въз꙽гласи́те на высокихъ, проповедите въ домꙋ ѻ҆́н꙽новѣ.
ѹ҆жасесѧ венїаминъ, е҆фрѣмъ в꙽ пагꙋбꙋ бы́сть въ дн҃и наказа́нїѧ, въ пле́менехъ і҆и҆л҃евахъ ѹ҆каза́хъ вѣрнаѧ.
бы́ша кнѧ́ѕи і҆ѹдины ꙗ҆́ко прелага́ющеи ме́жда, на нѧ разлѣю ꙗ҆ко во́дꙋ гнѣвъ свои·

Съдолѣ же е҆фрѣмъ съпе́рника свое҆го попра сꙋдъ ꙗ҆́ко начатъ ходити въ слѣдъ сꙋихъ.
а҆́з же ꙗ҆́ко мѧтежъ е҆фрѣмови, и҆ ꙗ҆́ко ѻ҆сте́нь до́мꙋ і҆ѹ́динꙋ.
и҆ вѣсть е҆фрѣмъ ꙗ҆́звꙋ свою, і҆ и҆ѹ́да бо́лѣзнь свою.
і҆ и҆де е҆фрѣмъ къ а҆сѷрїемъ, и҆ пꙋсти послы̀ къ цр҃ю и҆а҆ривꙋ, и҆ то́и не мо́же и҆зба́вити ва́съ, и҆ не преста́нетъ ѿ вас̑҇ бо́лѣзнь·

Зане а҆зъ е҆смь ꙗ҆́ко паньѳи́рь е҆фрѣмови, и҆ ꙗ҆́ко ле́въ до́мꙋ і҆ѹ́динꙋ.
и҆ а́зъ въсхищꙋ і и҆дꙋ, и҆ возмꙋ, и҆ не бꙋдет̑ комꙋ ѿꙗ҆́ти·

И҆дꙋ и҆ въз꙽вращꙋсѧ на мѣсто свое и҆ почїю, до́ндеже поги́бнꙋтъ и҆ ѻ҆братѧ́тсѧ и҆ възы́щт̑ꙋ лица мое҆го·

Глв̑҇а, ѕ҃·

Съ скорбѣнїемъ свои҆мъ ѹ҆ранѧ́тъ къ мнѣ̀, гл҃юще, и҆демъ и҆ ѻ҆брати́мсѧ къ г҃ꙋ б҃ꙋ на́шемꙋ.
ꙗ҆́ко то́и побѝ н̂ы, і҆ и҆сцѣ́литъ н̂ы.
ꙗ҆́з꙽витъ, и҆ врачꙋ́етъ н̂ы.
і҆ и҆сцѣ́лит꙽ н̂ы по двою дн҃ю.
въ дн҃ь третїи въскреснемъ, и҆ живи бꙋдемъ пред̑ ним̑.
и҆ ѹ҆вѣмъ и҆ поженемъ ѹ҆вѣдѣти г҃а.
ꙗ҆́ко свт̑ѣ гото́въ ѻ҆брѧ́щемъ и҆̀ и҆ прїидетъ намъ ꙗ҆́ко дождь ра́ныи и҆ поздны землѝ·

Чт̂о т̂и сътворю е҆фрѣме.
чт̂о т̂и сътворю і҆ѹ́до.
млс̑҇ть б̂о ва́ша ꙗ҆́ко ѻ҆́блакъ ѹ҆тренїи, и҆ ꙗ҆ко роса ра́но пада́ющїѧ·

Сего ради пожа́хъ прро̑҇ки ва́ша, и҆ побихъ ѧ҆̀ словесемъ ѹ҆́стъ моих̑, и҆ сꙋдъ мои ꙗ҆́ко свѣтъ и҆зы́идетъ.
зане млс̑҇ти хощꙋ неглѝ требѣ, и҆ ѹ҆вѣдѣнїе бж҃їе нежели всесъж꙽женїе.
сїи же сꙋть ꙗ҆́ко чл҃къ престꙋпаѧй завѣт꙽, т̂ꙋ преѻ҆бидиша м̂ѧ гл҃етъ г҃ь.
дѣлаѧй сꙋ́ѧа мꙋтѧ́щи во́дꙋ.
а҆ крѣпость твоѧ̀ ꙗ҆́ко мꙋжа и҆скꙋша́юща.
съкры́ша жер꙽цы пꙋть ѹ҆би́ша сикѷмꙋ, ꙗ҆́ко безако́нїе сътвори́ша.
в домꙋ̀ і҆и҆л҃и ви́дѣхъ т̂ꙋ вещь грознꙋ, блꙋженїемъ е҆фрѣмовымъ ѻ҆скверни́сѧ і҆и҆л҃ь.
і҆ и҆ѹ́да ѻ҆ста́ви жа́твꙋ свою, начни и҆ма́ти вино свое, вънегда̀ възвраща́ю плѣн꙽ники лю́дїи мои҆хъ·

Глв̑҇а, з҃·

Внегда̀ и҆сцѣлю і҆и҆л҃ѧ, и҆ ѿкры́етсѧ непра́вда е҆фрѣмова, и҆ зло́ба самарїиска ꙗ҆́ко възлюби́ша л꙽жꙋ.
и҆ та́ть к немꙋ вни́детъ, и҆ съвлача и҆̀ разбо́иникъ.
на пꙋти е҆мꙋ ꙗ҆́коже вкꙋпѣ спою́тъ, ꙗ҆́ко пою́щи въ срд̑цы свое҆мъ вс̂ѧ зло́бы и҆хъ помѧнꙋ́хъ.
нн҃ѣ ѻ҆быидо́ша мѧ ра́звѣтї и҆хъ, проти́вꙋ лицꙋ м̂и бы́ша·

Зло́бами свои҆ми възвесели́ша цр҃ѧ, и҆ л꙽жа́ми свои҆ми кн҃ѕѧ·

вс̂и любодѣ́юще ꙗ҆́ко пе́щь жего́ма на пече́нїе, и҆ждеже́тъ ѧ҆̀ ѿ пла́мене.
ѿ примеше́нїѧ ма́сти, дон꙽деже въмѣси́тсѧ т̂о вс̂е.
въ дн҃и цр҃ь ваших̑, нача́ша кн҃ѕи ꙗ҆ри́тисѧ ѿ вина̀.
простро́ша рꙋ́ки своѧ съ расыпа́тели.
зане разгорѣшасѧ ꙗ҆́ко пе́щь срд̑ца и҆хъ внегда̀ пресѣда́ютъ и҆мъ.
вс̂ю нощ꙽ сна̀ е҆фрѣ́мъ насыти́сѧ, заѹ҆́тра бы́сть и҆ разгорѣсѧ ꙗ҆́ко ѻ҆́гнь пла́мене.
вс̂и съгрѣшасѧ ꙗ҆́ко пе́щь жего́ма, и҆ ѻ́гнь и҆з꙽ꙗ҆́сть сꙋдїѧ и҆хъ.
вс̂и цр҃и и҆хъ падоша, и҆ не бѣ̀ в ни́хъ молѧисѧ къ мнѣ̀·

Є҆фре́мъ въ людех̑ самъ смѣша́шесѧ.
е҆фрѣ́мъ бы́сть погребенъ ѻ҆прѣснокъ не ѻ҆бращаем̑.
из̑ꙗдо́ша чюжд̑їи крѣ́пость е҆го, сеи же не разꙋмѣ.
н̂о и҆ сѣди́ны ꙗ҆ви́шасѧ на немъ, ѻ҆́н꙽ же не позна̀·

И҆ смири́тсѧ ѹ҆кори́зна і҆и҆л҃ева в꙽ лице е҆мꙋ, и҆ не възврати́шасѧ къ г҃ꙋ б҃ꙋ свое҆мꙋ, и҆ не възыска́ша е҆го ѻ҆ всемъ се́мъ·

и҆ бѣа́ше е҆фрѣмъ ꙗ҆́ко го́лꙋбъ не и҆мы́и срд̑ца.
е҆гѷптїа моли́ша въ а҆сѷрїа и҆до́ша.
ꙗ҆́коже бо и҆дꙋтъ възложꙋ на́ нѧ мре́жꙋ свою.
ꙗ҆ко пти́ца нбс̑҇ныа свергꙋ ѧ҆̀.
накажꙋ ѧ҆̀ въ слꙋхъ скор꙽бѣ́нїѧ и҆хъ·

Го́ре и҆мъ, ꙗ҆́ко ѿскочи́ша ѿ мене.
грѣшни сꙋть, ꙗ҆́ко нечествова́ша къ мнѣ.
а҆ а́зъ ѧ҆̀ и҆зба́вихъ, сїи же согл҃аша до мене л꙽жꙋ.
и не възъпи́ша къ мнѣ срд̑ца их̑, н̂о пла́кахꙋсѧ ѻ҆ лжи и҆х꙽.
ѻ҆ пшени́цꙋ и҆ ѻ҆ вино сѣча́хꙋсѧ.
накажт̑ꙋсѧ мно́ю.
а҆з꙽ же ѹ҆крѣпихъ мы́шцꙋ и҆хъ, и҆ къ мнѣ помы́слиша ѕл̂ѣ.
съврати́шасѧ ни въчтоже , бы́ша ꙗ҆́ко лꙋ́къ напрѧ́женъ·

Падꙋтсѧ кн҃ѕи и҆хъ мечемъ, ненаказа́нїа дѣ́ла ꙗ҆зы́ка и҆хъ.
с̂и зло́ба и҆хъ въ землѝ е҆гѷпет̑стѣи·

Глв̑҇а, и҃·

Ꙗко землѧ̀ непроходи́ма, ꙗ҆́ко трꙋба, ꙗ҆́ко ѻ҆ре́лъ въ до́мꙋ гн҃и.
поне́же престꙋпи́ша завѣтъ мои, и҆ на зако́нъ мои нечествова́ша̑.
къ мнѣ възовꙋтъ , б҃е позна́хом꙽ т̂ѧ, ꙗ҆́ко і҆и҆л҃ь воз̑врати бл҃гаѧ враги б̂о прогна́ша·

Сами цр҃ѧ поста́виша, а҆ не мною нача́ша.
кнѧ́ѕи ѹ҆ста́виша, и҆ не ꙗ҆ви́ша м̂и.
съ сребра свое҆го и҆ зла́та сътвори́ша себѣ кꙋми́ры, ꙗ҆́ко да потребѧ́тсѧ·

ѿврьзи те́лець свои самарїе, раз꙽гнѣ́васѧ ꙗ҆́рость моѧ на́ нѧ.
до чесо не мо́гꙋтъ ѹ҆чиститисѧ и҆же въ і҆и҆л҃и.
и҆ т̂о древодѣлѧ сътворѝ, и нѣсть б҃ъ.
занѐ л꙽стѧ̀ бѧ́ше те́лець твои самарїе·

Ꙗ҆́ко вѣтромъ и҆сте́пено всѣѧша, и҆ разрд̑ꙋше́нїе их̑ пожде́тъ и҆хъ, съ гор꙽сть не и҆мы́и си́лы да сътвори́тъ мꙋкꙋ̀.
а҆щеж̑ и҆ сътвори́тъ, т̂о и́нїи и҆з꙽ꙗ҆дѧт̑ ю҆̀·

Погрѧ́зе і҆и҆л҃ь, нн҃ѣ бы́сть въ страна́хъ ꙗ҆́ко сосꙋдъ непотре́бен꙽.
тїи възыдо́ша въ а҆сѷрїю.
процвѣте ѻ҆ себѣ въ мнѣ̀, е҆фрѣмъ м꙽здꙋ възлюбѝ.
сего ради преда́стьсѧ въ страны̀, нн҃ѣ преждꙋ̀ и҆хъ.
да почїют꙽ ма́ло помаза́ти цр҃ѧ и҆ кн҃ѕѧ.
ꙗ҆́ко ѹ҆множѝ е҆фрѣмъ тре́бникь, въ грѣхъ бы́ша е҆мꙋ.
въпишѝ е҆мꙋ мно́жество зако́нъ е҆го.
въ чю́ждаѧ намени́шасѧ тре́бницы възлю́бленїи.
тѣм꙽же а҆ще и҆ поло́жат̑ тре́бꙋ і҆ и҆зъꙗ҆дѧ́тъ мѧ́са, г҃ь не прїимет̑ и҆хъ.
нн҃ѣ помѧне́тъ неправды их̑, и҆ м꙽сти́тъ грѣхъ и҆хъ.
тїи въ е҆гѷпетъ възврати́шасѧ, и въ а҆сѵрїих̑ нечи́стаѧ и҆зъꙗ҆́дѧ́тъ.
и҆ забы̀ і҆ил҃ь сътво́ршаго и҆̀, и҆ възъградѝ тре́бища.
і҆ и҆ѹ́да ѹ҆мно́жи гра́ды ѹ҆твержены, н̂о послю̀ ѻ́гнь на гра́ды е҆го и҆ потреби́тъ ко́ренїѧ и҆х꙽·

Глв̑҇а, ѳ҃·

Не ра́дꙋисѧ і҆ил҃ю, н̂и весели́сѧ ꙗ҆́коже и҆ лю́дїе, ꙗ҆ко съблꙋдил̑҇ е҆си ѿ г҃а б҃а свое҆го.
възлюбѝ даа́нїа на всх̑ѣ гꙋмнх̑ѣ пшени́ца.
и҆ тѣскъ не позна ихъ, и҆ вино̀ сълга̀ и҆мъ·

Не всели́шасѧ на землѝ гн҃и.
вселисѧ е҆фре́мъ въ е҆гѷптѣ, и҆ въ а҆сѷрїихъ и҆зъꙗ҆́дѧ́тъ нечи́стаѧ, вс̂и ꙗ҆́дꙋщеи ѻ҆сквернѧ́тсѧ.
понеже хлѣби и҆хъ дш҃ь и҆хъ, не вни́дꙋтъ въ до́мъ гн҃ь.
чт̂о сътво́рѧтъ въ дн҃ь сон꙽ма, и҆ въ дн҃ь празд̑ника гн҃ѧ.
сего ра́ди с̂е по́идꙋтъ ѿ трꙋда е҆гѷпет̑ска, и҆ пожде́тъ и҆хъ мем꙽фи́съ, и҆ потреби́тъ ѧ҆̀ мах꙽ма́съ.
сребро̀ их̑ пагꙋба прича́стїе, трънїе въ дворех̑ и҆мъ·

Приспѣва́ютъ дн҃їе м꙽ще́нїа твое҆го.
и҆ ѻ҆зли́тсѧ і҆и҆л҃ь ꙗ҆́ко про̑҇ркъ несмы́сленъ чл҃къ носѧ́и дх҃ъ.
ѿ мно́жества непра́вдъ твоихъ ѹ҆мно́жисѧ и҆зъѹ҆мле́нїе.
стражба̀ е҆фрѣмъ съ бм҃ъ, про̑҇ркъ прꙋгло лꙋка́во на пꙋтехъ е҆мꙋ, и҆зъѹ҆мле́нїе в꙽ домꙋ б҃а е҆го ѹ҆твердѝ, і҆ и҆стлѣша по днемъ хол꙽ма.
въспомѧнетъ непра́вды и҆хъ м꙽ще́нїе грѣхъ и҆хъ·

Ꙗ҆́ко гро́знъ въ пꙋсты́ни ѻ҆брѣто́хъ і҆и҆л҃ѧ, и҆ ꙗ҆ко стра́жъ на смоко́вницы ра́н꙽ны ѹ҆ви́дѣхъ ѿц҃а и҆хъ.
сїи же внидо́ша къ вельфегорꙋ, и҆ ѿлꙋчи́шасѧ на стыдѣ́нїе.
и҆ бы́ша възлю́бленїи ꙗ҆ко гню́сни.
е҆фрѣмъ ꙗ҆́ко птица̑ залетѣ̀.
сла́вы и҆хъ ѿ порожде́нїи ѿ бо́лѣзни ѹ҆тро́бы ражда́ющаѧ, и҆ ѿ зача́тїи.
и҆мже а҆ще и҆ въскръмѧтъ ча́да своѧ, без них̑ бꙋдꙋтъ ѿ чл҃къ.
тѣмже и҆ лю́тѣ имъ е҆сть занѐ ѻ҆ста́вих̑ ѧ҆̀·

плоть моѧ̀ ѿ них̑·

Є҆фрѣмъ ꙗ҆́ко ви́дѣхъ в лови́твѣ пред̑поста́ви ча́да своѧ.
і҆ е҆фрѣмъ и҆зведѐ на заколе́нїе чада е҆го.
да́жд̑ь и҆мъ г҃и, чт̂о дасѝ и҆мъ.
да́жд̑ь им̑ ѹ҆тро́бꙋ неплодѧ́щꙋсѧ, и҆ съсцы сꙋхи·

Вс̂ѧ ѕло́бы и҆хъ в꙽ галга́лѣх꙽ ꙗ҆ко т̂ꙋ и҆хъ възненавидх̑ѣ.
ѕло́бы ради хꙋдожествъ и҆хъ, и҆з домꙋ свое҆го и҆жд̑енꙋ ѧ҆̀.
к꙽семꙋ да не приложꙋ̀ люби́ти и҆хъ.
вс̂и кнѧ́ѕи и҆хъ не покорѧ́тсѧ·

Поболѣ е҆фрѣмъ, ко́ренїе е҆го и҆схоша, пло́да ксемꙋ̀ да не принесе́тъ.
поне́же а҆ще и҆ поро́дѧт꙽, побїю по́мыслы ѹ҆тро́бы и҆хъ·

ѿринет̑ ѧ҆̀ б҃ъ ꙗ҆́ко не послꙋшаша е҆го, и҆ бꙋдт̑ꙋ прише́лцы в꙽ странах̑·

Глв̑҇а, і҃·

Виноград̑ бл҃голо́зенъ і҆и҆л҃ь плод̑ ѻ҆би́ленъ е҆го.
по мно́жествꙋ плода е҆го ѹ҆мно́жи тре́бники.
по бл҃готамъ землѧ̀ е҆го въз꙽гради ка́пища.
раздѣли́ша срд̑ца своѧ̀, нн҃ѣ поги́бнꙋтъ.
са́мъ раскопа́етъ тре́бники и҆хъ, съкрꙋшитъ кꙋми́ры и҆хъ.
и҆́мже нн҃ѣ рекꙋтъ, нѣсть цр҃ѧ в на́съ.
ꙗ҆́ко не боѧ́хомъсѧ г҃а, цр҃ь же чт̂о сътворитъ на́мъ.
гл҃ѧ словеса̀ и завѣты, л꙽же́ю завѣщают̑ завѣтъ, проѕѧ́бнетъ сꙋдъ а҆ки тро́скот꙽ на цѣли́знѣ.
телцꙋ до́мꙋ ѻ҆́н꙽нова ѻ҆бита́ютъ в꙽сели́вшїисѧ въ самарїю.
ꙗ҆́ко желѣша лю́дїе е҆го к немꙋ, и҆ ꙗ҆кож̑ раз̑гнѣва ѧ҆̀ порадꙋют̑сѧ на сла́вѣ е҆го ꙗ҆ко пресели́сѧ ѿ них̑.
и҆ въ а҆сѷрїю же свѧза́вша и҆̀ ѿведоша въ да́ръ і҆а҆ри́вꙋ цр҃ю·

Є҆фрѣмъ прїиметъ срамъ, и҆ срами́тсѧ і҆и҆л҃ь ѻ҆ совѣтѣ свое҆мъ.
ѿвръже самарїѧ цр҃ѧ свое҆го а҆ки ро́згꙋ на лице водѣ.
н̂из꙽вергꙋтсѧ требища ѻ҆́н꙽нова съгрѣшенїѧ і҆и҆л҃ева.
те́рнїе и во́лчецъ возни́кнетъ по тре́бникомъ и҆хъ.
и҆ рекꙋтъ къ гора́мъ покры́ите н̂ы, и҆ хол꙽момъ падѣте на насъ.
ѿнелѣ хол꙽ми съгрѣши і҆и҆л҃ь, т̂ꙋ поста́виша, не постигнетъ и҆хъ на хол꙽мѣ.
ра́тна ча́да непра́вды прїиди, накажꙋ ѧ҆̀ помышленїю мое҆мꙋ.
и҆ съберꙋтсѧ лю́дїе на нѧ внегда̀ наказꙋ́ют꙽ ѧ҆̀ въ дво́ю непра́вдахъ их̑·

Є҆фрѣмъ ю҆́ница неѹ҆чена лю́битъ ѻ҆долѣнїе, а҆́з же наи҆дꙋ на добротꙋ̀ вы́ѧ еѧ̀.
настꙋплю е҆фрѣмови , ѹ҆молчю ѿ і҆ѹ́ды, ѹ҆крѣпи́тъ е҆мꙋ і҆а́ковъ.
сѣ́ите себѣ въ пра́вдꙋ, и҆ пожнете плод̑ жи́тъ.
и҆ просвѣтѣте себѣ̀ свѣтъ видѣнїѧ.
до́ндеже времѧ възыщи́те г҃а, до́ндеже прїидꙋтъ ва́мъ жита пра́вды·

Въскꙋ́ю премолчасте безако́нїе, и плод̑ е҆го ѻ҆бъи҆ма́сте, и҆зъꙗ҆́сте плод̑ лжа̀.
ꙗ҆́ко ѹ҆пова ѻ҆рꙋжїемъ свои҆мъ въ мно́жествѣ си́лы твое́ѧ.
и҆ въста́нетъ па́гꙋба в лю́дех̑ твои҆хъ, поги́бнꙋтъ ꙗ҆́коже поги́бе и҆ кнѧ́ѕь сал꙽мана в домꙋ̀ а҆рвеи҆́ли въ дн҃и ра́тны, ма́терь по ча́дѣхъ потреби́ша.
та́коже сътворю̀ вам̑ до́ме і҆и҆л҃въ ѡ лица зло́бы ва́шеѧ·

Глв̑҇а, а҃і·

Заѹ҆́тра ѿвръгошасѧ ꙗ҆́ко зарѧ ѿве́ржесѧ цр҃ь і҆и҆л҃вь.
и҆́мже младе́нецъ і҆и҆л҃ь, и҆ а́зъ възлю́бихъ и҆̀.
и҆зъ е҆гѷпта възвах̑ сн҃а мое҆го.
ꙗ҆́коже призва́хъ ѧ҆̀, та́кожд̑е ѿхожда́хꙋ ѿ лица̀ мое҆го·

сїи же ваа҆лимꙋ требꙋ кладѧ́хꙋ, і҆ и҆зваѧ́нымъ кадѧ́хꙋ.
а҆з꙽ же помогох꙽ е҆фрѣмови, взѧ́хъ и҆̀ на мы́шцꙋ свою̀, и҆ не разꙋмѣша ꙗ҆ко и҆сцѣлихъ ѧ҆̀.
въ и҆стлѣнїи чл҃чьстѣ привлекох̑ ѧ҆̀ нака́заны любленїѧ мое҆го·

И҆ бꙋдꙋ и҆мъ ꙗ҆́ко ѹ҆дарѧа́й чл҃ка за челюсти, възрю̀ к немꙋ и҆ премогꙋ е҆мꙋ.
всели́сѧ е҆фрем̑ въ е҆гѷпетъ, а҆сѷр же самъ цр҃ь е҆го ꙗ҆́ко не въсхотѣ възврати́тисѧ.
и҆ ѿнемо́жесѧ ѻ҆рꙋжїе въ гра́дѣхъ их̑, и҆ ѹ҆молче въ рꙋ́кꙋ е҆го, і҆ и҆зъꙗ҆дѧ́тъ ѿ развѣтъ свои҆хъ·

и҆ лю́дїе е҆го висѧ́ще ѿ ѻ҆бита́нїѧ е҆го.
и҆ б҃ъ на честнаѧ е҆го разгнѣ́ваетсѧ и҆ не възнесетъ е҆го·

Что̀ т̂ѧ ѹ҆строю̀ е҆фрѣме, защищꙋ т̂ѧ і҆и҆л҃ю.
что̀ т̂ѧ положꙋ ꙗ҆́ко и҆ а҆да́ма, ѹ҆строю̀ т̂ѧ ꙗ҆́ко и҆ севои́мъ.
превратисѧ срд̑це мое, в семъ смѧтесѧ раскаа́нїе мое.
не сътворю̀ по гнѣвꙋ ꙗ҆рости мое́ѧ.
не ѻ҆ста́влю ꙗ҆́ко потреби́тисѧ е҆фрѣмови, зане б҃ъ а҆зъ е҆смь а҆ не чл҃къ, въ тебѣ̀ ст҃ъ.
и҆ не вни́дꙋ въ гра́дъ въ слѣдъ г҃а ходи́ти·

Ꙗ҆́ко ле́въ възреветъ, ꙗ҆́ко то́и възреве́тъ, и҆ ѹ҆жаснт̑ꙋсѧ ча́да живот̑·

И҆ прїидꙋтъ ꙗ҆́ко пти́ца из̑ е҆гѷпта, и ꙗ҆ко го́лꙋбъ ѿ землѧ̀ а҆сѷр꙽скы.
и҆ ѹ҆ста́влю ѧ҆̀ в꙽ домохъ их̑, гл҃етъ г҃ь·

Глв̑҇а, в҃і·

Ѡбыиде м̂ѧ лже́ю е҆фрѣмъ, и҆ безъче́стїемъ дом̑ і҆и҆л҃въ, і҆ и҆ѹ́да нн҃ѣ позна̀ ѧ҆̀ б҃ъ лю́дїе ст҃и прозва́шасѧ гв҃и.
Є҆фрѣм꙽ же зо́лъ дх҃ъ гонѧ̀ знои, весь дн҃ь тща́ѧ и҆ сꙋѧа ѹ҆мно́жи, и҆ завѣтъ съ а҆сѷрїи завѣща̀, и҆ млс̑҇ть въ е҆гѷпетъ въпꙋсти.
и҆ сꙋд꙽ гв҃и къ і҆ѹ́дѣ м꙽стити і҆а́кова.
по пꙋтемъ е҆́го, и҆ по хꙋ́дожествомъ е҆го ѿдасть е҆мꙋ.
въ ѹ҆тробѣ прельсти бра́та свое҆го.
и҆ трꙋды своими ѹ҆крепѣ къ б҃ꙋ, и҆ ѹ҆крепѣ съ а҆гг҃лом̑ и҆ възмо́же·

Пла́кашасѧ и҆ моли́ша ми сѧ, в꙽ до́мꙋ ѻ҆́н꙽ни ѻ҆брѣтоша м̂ѧ и҆ т̂ꙋ гл҃асѧ к ни́мъ.
г҃ь же б҃ъ вседръжи́тель бꙋдетъ па́мѧть е҆го·

И҆ т̂ы ѻ҆́ бѕ҃ѣ свое҆мъ ѻ҆брати́шисѧ, млс̑҇ть и҆ сꙋдъ снабди́ши, и҆ приближа́исѧ къ б҃ꙋ свое҆мꙋ прс̑҇но·

Ханаан̑҇ въ рꙋцѣ е҆го ꙗ҆́ремъ непра́вды, премага́ти възлю́би.
и҆ рече е҆фрѣмъ, ѻ҆баче ѻ҆богатѣхъ, ѻ҆брѣтохъ ѿд꙽шенїе ѹ҆ него.
вс̂ѧ болѣзни е҆го не ѻ҆брѧ́щꙋтсѧ е҆мꙋ непра́вдъ ꙗ҆́же съгрѣши·

А҆зъ г҃ь б҃ъ твои и҆зведы́и т̂ѧ из̑ землѧ̀ е҆гѷпет꙽ски.
е҆ще же вселю т̂ѧ в꙽ кꙋщахъ, ꙗ҆́коже въ дн҃и празд̑никъ.
и гл҃ахъ прро̑҇ки, и҆ видѣнїѧ ѹ҆мно́жих̑, и҆ в рꙋкахъ прро̑҇чьсках̑ сподобих̑сѧ.
а҆ще галаад̑ ѹ҆бо нѣсть ло́жъ, бѧхꙋ въ гал꙽га́лѣхъ кнѧ́ѕи тре́бы кладꙋще, и требницы и҆хъ ꙗ҆́ко и҆ же́лви на цѣли́знѣ по́льстеи.
и҆ ѻ҆тыде і҆а́ковъ на́ поле а҆сѷрїиско, и рабо́та і҆и҆л҃ь ѻ҆ женѣ, и҆ ѻ҆ женѣ снабдѣ·

И҆ прро̑҇комъ и҆зведе г҃ь і҆и҆л҃ѧ и҆з꙽ землѧ е҆гѷпет꙽ски, и прро̑҇комъ снабдѣсѧ.
разгнѣва м̂ѧ е҆фрѣмъ и воз̑ꙗ҆ри м̂ѧ, и҆ кро́вь е҆го на нем̑ пролїет̑сѧ и҆ ѹ҆кори́знꙋ е҆го ѿда́сть е҆мꙋ г҃ь·

Глв̑҇а, г҃і·

По словесѝ е҆фрѣмовꙋ ѻ҆правленїѧ прїѧ и҆ се́и въ і҆и҆л҃и.
и҆ положи ѧ҆̀ ваа́лови, и҆ ѹ́мре.
и҆ нн҃ѣ приложи́ша съгрѣша́ти, и҆ сътвори́ша сїи себѣ слїа́никъ съ зла́та и҆ с꙽ сребра и҆хъ·

сїи гл҃ютъ, коли́те чл҃кы ѻ҆скꙋдѣша б̂о тел꙽цы.
сего ради бꙋдт̑ꙋ ꙗ҆ко ѻ҆блакъ ѹ́тренїи, и҆ ꙗко и роса̀ жа́твенаѧ, и҆дꙋще ꙗ҆́ко и҆ плѣ́вы с то́ка, и҆ пра́хъ съ вѣтвїѧ развѣва́емыи ви́хромъ·

А́з же г҃ь б҃ъ твои ѹ҆твержа́ѧй нб҃о и съзида́ѧи зе́млю, е҆гоже рꙋ́цѣ стѧжа́сте вс̂е вои҆н꙽ство нбс̑҇ное, и҆ не показа́хъ т̂и е҆го ꙗ҆́ко ходи́ти въ слѣдъ и҆хъ·

А҆зъ же изведо́хъ т̂ѧ и҆зъ землѧ̀ е҆гѷпет꙽ски, и҆ б҃а развѣ̀ мене да не позна́еши.
и҆ сп҃саю҆щаго нѣсть ра́звѣ менѐ·

А҆зъ пасо́хъ т̂ѧ въ пꙋсты́ни на землѝ невселе́ннѣ по па́ствамъ и҆хъ, и҆ ѹ҆мно́жишасѧ до и҆сполне́нїѧ, и҆ възнесо́шасѧ срд̑ца их̑, сего ради забы́ша м̂ѧ.
и бꙋдꙋ и҆м꙽ ꙗ҆́ко пан꙽ѳи́рь, и҆ ꙗ҆́ко и҆ ры́сь на пꙋти а҆сѷрїемъ, и҆ срѧ́щꙋ ѧ҆̀ ꙗ҆́ко и҆ медвѣдь ли́ховаемъ, и҆ разд̑рꙋшꙋ съключе́нїе срд̑ць и҆хъ, і҆ и҆зъѧдѧ́тъ ѧ҆̀ щенцы̀ дꙋбра́внїи, и҆ звѣрь польскїи растор̑҇гнетъ ѧ҆̀.
в расы́панїе твое і҆и҆л҃ю кт̂о помо́жетъ тебѣ̀.
гдѣ̀ цр҃ь твои, то́и да сп҃сетъ т̂ѧ въ всѣх꙽ гра́дехъ твои҆хъ.
и҆ да сꙋди́тъ ти е҆мꙋже гл҃а, да́ждь м̂и цр҃ь и҆ кн҃ѕь.
и҆ да́хъ цр҃ѧ въ гнѣвѣ свое́мъ, и҆ ѹ҆дръжа́хсѧ въ ꙗ҆́рости мое́и·

Съвраще́нїе непра́вды е҆фрѣмовы, съкрове́нъ грѣ́хъ его.
бо́лѣзни а҆ки раждающїи прїимꙋтъ и҆̀.
с̂е сн҃ъ мои мꙋ́дрыи, занѐ нн҃ѣ сътръпит̑ вс̂е съкрꙋше́нїе ча́дъ е҆го·

ѿ рꙋкѝ а́довы и҆зба́влю ѧ҆̀, и҆ ѿ смр҃ти и҆скꙋплю ѧ҆̀.
гдѣ̀ прѧ̀ твоѧ смр҃ти, гдѣ́ ли ѻ҆сте́нъ твои а҆́де·

Ѹ҆тѣше́нїе съкры́сѧ ѿ ѻ́чїю твое҆ю, занѐ се́и междꙋ братїѧ разлꙋ́читъ·

Наведе́тъ г҃ь вѣтръ знои҆нъ и҆с пꙋсты́ни на́нь, и҆ пресꙋшитъ водоте́чи е҆го, и҆ ска́зитъ и҆сточ꙽ники е҆го, се́и и҆ска́зитъ зе́млю е҆го и҆ вс̂ѧ сосꙋ́ды е҆го лю́быѧ·

Глв̑҇а, д҃і·

Поги́бнетъ самарїѧ ꙗ҆́ко съпроти́висѧ б҃ꙋ свое҆мꙋ, ѻ҆рꙋжїемъ падт̑ꙋ, и҆ младе́нцы и҆хъ потребѧ́тсѧ, и҆ въ ѹ҆тро́бѣ и҆мꙋщаѧ и҆хъ расѧ́дꙋтсѧ·

ѻ҆брати́сѧ і҆и҆л҃ю къ г҃ꙋ б҃ꙋ свое҆мꙋ, занѐ ѿнемо́жесѧ въ непра́вдахъ твоих̑.
възмѣте съ собо́ю словеса̀, и҆ ѻ҆брати́тесѧ къ г҃ꙋ б҃ꙋ свое҆мꙋ·

рцѣте е҆мꙋ, мо́жеши весь ѿврещѝ грѣхъ.
ꙗ҆коже да не прїимете неправды, н̂о да прїимете бл҃гаѧ.
и҆ ѿда́мъ плод̑ ѹ҆стен̑҇ ва́шихъ.
а҆с꙽сѷръ не сп҃сетъ ва́съ.
на ко́нихъ не възы́демъ, ксемꙋ̀ не рече́мъ, е҆ще бози на́ши дѣло рꙋкъ на́ших̑.
ꙗ҆ко въ тебѣ поми́лꙋетсѧ сирота̀.
и҆сцѣлю̀ се́ла и҆хъ, възлюблю ѧ҆̀ и҆сповѣдан꙽не, ꙗ҆́ко възврати́сѧ гнѣвъ мои ѿ ни́хъ.
бꙋдꙋ ꙗ҆́ко и҆ роса̀ і҆и҆л҃ю, процвѣте́тъ ꙗ҆́ко и҆ цвѣтъ, и҆ простре́тъ ко́ренїе свое ꙗ҆́ко и҆ дꙋбра́ва.
по́идꙋтъ де́бри е҆го и҆ бꙋдетъ ꙗ҆́ко и҆ ма́слина пло́дна, и҆ ѻ҆бонѧ́нїе е҆го ꙗ҆́ко и҆ дꙋбра́вы.
ѻ҆градѧ́тсѧ и҆ сѧ́дꙋтъ под̑ кро́вомъ и҆хъ живꙋтъ и҆ ѹ҆твердѧт̑сѧ пшени́цею, и҆ процвѣте́тъ ꙗ҆́ко и҆ виногра́дъ.
па́мѧть е҆го ꙗ҆́ко и҆ вино̀ дꙋбра́вы.
е҆фрѣмови чт̂о е҆мꙋ е҆ще и҆ кꙋмиром̑, а҆зъ смири́хъ и҆̀.
а҆з꙽ же ѹ҆крѣплю̀ и҆̀ ꙗ҆́ко и҆ смрѣ́чъ ѹ҆чащен꙽.
ѿ мене ѻ҆брѣте́сѧ плодъ твои.
кт̂о мꙋдръ, и҆ снабди́тъ с̂е·

смы́слен꙽, и҆ разꙋмѣет̑ с̂е.
ꙗ҆́ко и҆спра́влени пꙋтїе гн҃и, и҆ правди́вїи хо́дѧт̑ в нѧ̀·

а҆ нечести́вїи ѿнемо́гꙋтсѧ въ них̑·

Коне́цъ пророкꙋ, і҆ѻ҆сїи·

и́мать в себѣ̀, гла́въ, д҃і·