И҆Ѡ҆И́ЛЬ ПРО҃РКЪ

ГЛАВА̀ ПЄр̑ВАѦ

Сло́во гн҃е е҆же бы́сть къ і҆ѻ҆и҆лю ваѳꙋи́левꙋ·

Слы́шите с̂е ста́рцы, и҆ внꙋша́ите вс̂и живꙋщїи на землѝ.
а҆ще е҆сть бы́ло си́це въ дн҃и ваша̑, или въ дн҃и ѿц҃ь вашихъ.
ѻ҆ ни́хъ ча́домъ свои҆мъ и҆сповѣдите, а҆ ча́да ва́ша ча́домъ и҆хъ, а҆ ча́да и҆хъ ро́дꙋ дрꙋго́мꙋ.
ѻ҆ста́нокъ гꙋсѣниць поꙗ҆́до́ша прꙋ́зи, и҆ ѻ҆ста́нокъ прꙋжїи поꙗ҆до́ша м꙽ши́ца, и҆ ѻ҆ста́нокъ м꙽ши́ць поꙗ҆до́ша си́плеве·

Ѹ҆трезвитесѧ пїѧ́нїи ѿ вина̀ свое҆го и҆ пла́читесѧ, рыда́ите вс̂и пїющеи вино̀ до пїан꙽ства, ꙗ҆́ко и҆зѧ́сѧ ѿ ѹ҆́стъ ва́шихъ весе́лїе и҆ ра́дость.
ꙗ҆́ко ꙗ҆зык̑҇ възы́иде на́ землю мою крѣ́покъ и҆ без꙽ числа̀, зꙋ́бы е҆го ꙗ҆́ко и҆ зꙋ́бы льво́вы, и҆ чрѣновит̑цы е҆го ꙗ҆́ко и҆ льви́чищꙋ.
положи виноград̑ мои въ погꙋбленїе, и҆ смоквинїе мое въ сломле́нїе.
в꙽зыска́ѧ ѻ҆бъи҆ска и҆̀ и҆ съврьже, ѻ҆бѣли ло́зїе е҆го.
въспла́четсѧ къ мнѣ паче невѣ́сты препоѧ́саны въ врѣтище по мꙋжи е҆ѧ̀ дв҃ьственнм̑ѣ·

И҆з꙽връжесѧ тре́ба и҆ възлїѧ́нїе и҆з до́мꙋ гн҃ѧ.
пла́читесѧ жръцы слꙋжа́щеи тре́бникꙋ, ꙗ҆́ко пострада́ша полѧ́ны.
пла́чисѧ земле ꙗ҆́ко пострада п꙽шени́ца, и҆ пресше вино̀, ѹ҆мни́сѧ ма́сло древѧ́ное, ѻ҆срами́шасѧ дѣлателе.
пла́читесѧ се́ла по пшени́цы, и҆ по ꙗ҆чме́ни, ꙗ҆́ко и҆ погибо́ша̑ и҆манїѧ съ ни́вы.
виноград̑ пос꙽ше, и҆ смокви́нїе, ѻ҆малѣ ши́пчїе.
и҆ фини́ѯ, и҆ ꙗ҆́блонь, и҆ вс̂е дре́во пол꙽ское и҆сше, ꙗ҆́ко срами́ша ра́дость сн҃ове чл҃чи.
препоѧши́тесѧ и҆ пїите жръцы плачитесѧ слꙋжа́щеи тре́бникꙋ, внидѣте ѹ҆сплѣте на врѣтищехъ слꙋжа́щеи б҃ꙋ, ꙗ҆́ко ѿꙗ҆́сѧ ѿ до́мꙋ б҃а вашего тре́ба и҆ възлїѧ́нїе.
ѻ҆ст҃ите а҆л꙽ка́нїе, проповѣди́те цѣ́лбꙋ·

съберѣте ста́рца и҆ всѧ живꙋщаѧ на землѝ въ дом̑ б҃а вашего.
и҆ възовѣте къ г҃ꙋ продолжа́юще.
ѹ҆҇ лю́те мнѣ̀, ѹ҆҇ лю́те мнѣ въ дн҃ь, ꙗ҆ко бли́зъ е҆сть дн҃ь гн҃ь, и҆ ꙗ҆́ко стрс̑҇ть ѿ стрс̑҇ти прїидетъ.
ꙗ҆́ко пред̑ ѻ҆чи́ма вашима пи́ща взѧ́шасѧ, и҆ ѿ до́мꙋ б҃а вашего весе́лїе и҆ ра́дость.
въскопыснꙋша ю҆́ница ѹ҆ ꙗ҆сли и҆хъ, и҆ съплѣснивѣша жи́тница ѿ лѣплѣнїѧ и҆хъ, погибо́ша и҆мѣ́нїѧ и҆хъ, раскопа́шасѧ тѣсцы ꙗ҆́ко посше пшени́ца.
чт̂о положимъ себѣ̀.
въспла́кашасѧ ста́да волꙋѧ ꙗ҆́ко не бѣ̀ па́жити и҆мъ, и҆ па́ствы ѻ҆́вчаѧ погибо́ша.
к тебѣ г҃и възъпїю, ꙗ҆́ко ѻ҆́гнь потреби предѣ́лы пꙋсты́нѧ, и҆ пла́мень пож꙽же вс̂е дре́во по́льское.
и҆ ско́ти по́льстїи възрѣша к тебѣ, ꙗ҆́ко посхо́ша и҆сто́чницы вод̑нїи, и҆ ѻ́гнь поꙗ҆́сть предѣ́лы пꙋсты́нѧ·

Глв̑҇а, в҃·

Въстрꙋби́те трꙋбо́ю въ сиѻ́нѣ, проповѣ́дѣте въ горѣ мое́и ст҃ѣи, и҆ да съберт̑ꙋсѧ вс̂и живꙋщеи на зем̑лѝ.
ꙗ҆́ко пред̑стои҆тъ дн҃ь гн҃ь, ꙗ҆́ко бли́зъ дн҃ь тм̂ы и҆ бꙋрѧ, и҆ дн҃ь ѻ҆́блака и҆ м꙽глы·

Ꙗ҆́ко і҆ ѹ́трина расы́плет̑сѧ по гора́мъ лю́дїе мно́ѕи и҆ крѣ́пцы подо́биї и҆мъ не бы́ша ѿ вѣка, и҆ по них̑ не приложи́тсѧ до лѣтъ в род̑ и҆ ро́дъ·

пред̑ ни́ми ѻ́гнь потреблѧ́ай, и҆ за ни́ми въз꙽гараѧсѧ пл́амень.
ꙗ҆ко и҆ ра́и пи́ща землѧ̀ пред̑ ни́мъ, а҆ за ним̑ по́ле пагꙋбы.
і҆ и҆з бꙋ́дꙋщаго ѿ него не бꙋ́детъ.
ꙗ҆́ко и҆ ви́дъ ко́ньскь видѣ́нїе и҆хъ, и҆ ꙗ҆́ко кон꙽ницы та́коже проженꙋтъ·

ꙗ҆́ко и҆ глс̑҇а ѻ҆рꙋж́їѧ на връхъ го́ръ и҆стекꙋтъ, и҆ ꙗ҆́ко глас̑҇ пламене ѻ҆́гнена попалѧ́юща тростїе, и҆ ꙗ҆́ко лю́дїе мно́ѕи крѣ́пцы вополча́ющеисѧ на ра́ти.
пред̑ лицемъ и҆хъ съкрꙋша́тсѧ лю́дїе, ꙗ҆́ко и҆ вс̂е лицѐ пред̑ зно́емъ пали́мо·

ꙗ҆ко и҆ пѣш꙽цы поекꙋтъ, и҆ мꙋ́жи хра́бри възыидꙋтъ на град̑.
и҆ ко́ждо въ пꙋть свои по́идетъ, и҆ не съвратѧ́тъ пꙋтїи свои҆хъ, не ѿи҆дꙋтъ ѻ҆тѧж꙽чава́ющеи.
въ ѻ҆рꙋжїи и҆хъ по́идꙋтъ, и въ стрѣлахъ и҆хъ падꙋтсѧ и҆ не скон꙽чают̑сѧ.
гра́да и҆мт̑ꙋсѧ, и҆ на забрала̑ въстекꙋтъ.
на хлѣвинꙋ възлѣзꙋтъ, и҆ две́рцами вни́дꙋтъ ꙗ҆́ко и҆ та́тїе.
пред̑ лице́мъ их̑ смѧтет̑сѧ землѧ̀, и҆ потрѧсе́тсѧ нб҃о.
слн҃це и҆ мс̑҇ць поме́ръкнета, и҆ ѕвѣ́зды ѹ҆гасѧтъ свѣтъ свои.
и҆ г҃ь да́сть глас̑҇ свои пред̑ лицемъ си́лы свое҆ѧ, ꙗ҆́ко мно́гъ е҆сть ѕѣ́ло по́лкъ е҆го, ꙗ҆́ко крѣ́пка дѣ́ла словес̑҇ е҆го.
занѐ вели́къ дн҃ь гн҃ь, вели́къ и҆ свѣтелъ ѕѣ́ло, и҆ кт̂о е҆сть дости́женъ е҆мꙋ·

И҆ нн҃ѣ гл҃етъ г҃ь б҃ъ вашъ, ѻ҆братитесѧ къ мнѣ всѣмъ срд̑цемъ вашимъ, съ а҆́л꙽чьбою, и҆ съ пла́чемъ, и҆ съ же́лею.
и҆ разе́рзѣте срд̑ца ваша, а҆ не ри́зы ва́ша.
и҆ ѻ҆брати́тесѧ къ г҃ꙋ б҃ꙋ ва́шемꙋ, ꙗ҆́ко млс̑҇тивъ и҆ щед̑рь е҆сть, тръпе́ливъ и҆ мно́гомлс̑҇тив꙽, и҆ раска́ѧвасѧ ѻ҆ зло́бахъ·

Кт̂о вѣ́сть ѻ҆братит̑ ли сѧ и҆ раска́етъ, и҆ ѻ҆ста́витъ за собо́ю блс̑҇ве́нїе.
тре́бꙋ и҆ възлїа́нїе г҃ꙋ б҃ꙋ на́шемꙋ.
въстрꙋби́те трꙋбо́ю въ сїѻ́нѣ, ѻ҆ст҃ите а҆л꙽ка́нїе, проповѣди́те цѣльбꙋ.
съберѣте лю́ди, ѻ҆ст҃ите цр҃кви, и҆ съберѣте ста́рца.
съвокꙋпи́те младе́н꙽ца, и҆ с꙽сꙋща со́съ.
да и҆зы́идетъ женѧ́исѧ ѿ ло́жа свое҆го, и҆ невѣ́ста ѿ чертож꙽ница свое҆ѧ.
межд̑ꙋ степе́ны и҆ тре́бникомъ въспла́чют̑сѧ жръцы слꙋжа́щеи г҃ꙋ, и҆ рекꙋт꙽, пощади г҃и лю́ди своѧ, и҆ не да́жд̑ь ча́сти свое҆ѧ на ѹ҆кори́знꙋ да не ѻ҆блада́ютъ и҆ми страны, ꙗ҆́коже да не рекꙋтъ въ странахъ гдѣ е҆сть б҃ъ их̑.
и҆ възревнова̀ г҃ь ѻ҆ землѝ свое҆и, и҆ пощадѣ лю́ди своѧ.
и҆ ѿвѣща г҃ь лю́дем̑ свои҆мъ, и҆ рече, с̂е а҆зъ вамъ послю пшени́цꙋ, и҆ вино̀, и҆ ма́сло древѧ́ное, и҆ насы́титесѧ и҆хъ, и҆ не дамъ вас̑҇ к꙽семꙋ на порꙋга́нїе въ страны̀·

І҆ и́же ѿ сѣ́вера, ѿженꙋ и҆̀ ѿ вас̑҇ на землю без воды̀.
и҆ погꙋблю лице е҆го въ мо́ри пер꙽вѣмъ, и҆ зад̑нѧа е҆го въ мо́ри послд̑ѣнемъ.
и҆ възы́идетъ гно́и е҆го и҆ възы́идетъ смрад̑ е҆го ꙗ҆́ко възвели́чи дѣла своѧ·

Ѹ҆пова́и зе́мле радꙋи҆сѧ и҆ веселꙋ́и, ꙗ҆́ко възвели́чи г҃ь ꙗ҆́ко сътвори т̂и.
ѹ҆пова́ите ско́ти по́льстїи ꙗ҆́ко прозѧбнꙋша по́лѧ пꙋсты́нѧ, ꙗ҆́ко дре́во принесе плд̑о свои, виноград̑ и҆ смо́кви да́ста си́лꙋ свою̀·

и҆ ча́да сїѻ́нѧ радꙋитесѧ, и҆ весели́те ѻ҆ г҃и бѕ҃ѣ вашемъ, ꙗ҆́ко да́сть вамъ пи́щꙋ въ пра́вдꙋ.
и҆ надожди́тъ вамъ до́жд̑ь ра́ныи и҆ по́зд̑ныи ꙗ҆́коже и҆ пре́жде.
и҆ напо́лнѧтсѧ гꙋмна ваша пшени́ца, и҆ прелїю́тсѧ тѣсцы вино́мъ и҆ ма́сломъ.
и҆ ѿдам̑ вамъ в лѣтъ мѣсто в нѧ́же поꙗ҆до́ша̑ прꙋ́зи, и҆ м꙽ши́ца, и҆ си́плеве, и҆ гꙋсе́ница, си́ла моѧ вели́ка ю҆́же послах̑ на́ вы.
і҆ и҆з꙽ꙗ҆́сте ꙗ҆́дꙋще и҆ насы́титесѧ, и҆ похва́лите и҆мѧ г҃а б҃а вашего и҆же сътвори с ва́ми чюдеса̀.
и҆ не посрамѧт̑сѧ лю́дїе мои въ вѣ́къ·

И҆ бꙋ́дете вѣ́дѣти и҆же посреди і҆и҆л҃ѧ а҆зъ е҆смь, и҆ а́зъ г҃ь б҃ъ вашъ и҆ нѣсть и҆́наго.
и҆ не посрамѧ́тсѧ лю́дїе мои въ вѣ́къ·

Глв̑҇а, г҃·

И бꙋдетъ посе́мъ, и҆злїю ѿ дх҃а мое҆го на всѧ́кꙋ пло́ть, и҆ прорекꙋтъ сн҃ове ва́ши и҆ дщерѧ ва́ша.
и҆ ста́рцы ва́ши со́нїѧ ѹ҆́зрѧтъ, и҆ ю́ноты ва́ши видѣнїѧ ѹ҆ви́дѧт꙽.
и҆б̂о на ра́бы моѧ̀, и҆ на рабы́нѧ моѧ̀ въ дн҃и т̂ы и҆злїю ѿ дх҃а мое҆го·

и҆ да́мъ чюдеса̀ на нб҃си и҆ на́ земли, кро́вь и҆ ѻ́гнь, и҆ па́рꙋ ды́мнꙋю·

сл҃нце ѻ҆брати́тсѧ во тм̂ꙋ и҆ мс̑҇ць въ кро́вь, прежде пришествїѧ дн҃е гн҃ѧ вели́каго и҆ стра́шнаго.
и҆ бꙋдетъ всѧ́къ и҆же призоветъ и҆мѧ гн҃е сп҃сетсѧ·

ꙗ҆́ко въ горѣ сїѻ́нѣ и҆ въ і҆ерс̑҇ли́мѣ бꙋдетъ сп҃са́емыи, ꙗ҆́кож̑ рече г҃ь, и҆ бл҃го совѣстꙋ́ющеи ꙗ҆́же г҃ь призва̀·

Ꙗ҆́ко с̂е а҆зъ въ дн҃и т̂ы и҆ въ год̑ то́и е҆гда̀ възвращꙋ плѣн꙽ники і҆ѹ́дины и҆ і҆ерс̑҇ли́млѧ съберꙋ вс̂ѧ страны̀ и҆ сведꙋ ѧ҆̀ на по́лѧнꙋ і҆ѻ҆сафа́товꙋ.
и҆ рас꙽сꙋждꙋсѧ с ни́ми т̂ꙋ по лю́дехъ мои҆хъ, и҆ ча́сти мое́ѧ і҆ил҃ѧ и҆же рас꙽сѣашасѧ въ странахъ, и҆ землю мою̀ раздѣли́ша, и҆ на люди моа̀ възвръго́ша жребїѧ, и҆ даша ѻ҆трочища блꙋ́дницамъ, и҆ ѻ҆трокови́ца продаа́хꙋ на винѣ̀ и҆ пїа́хꙋ.
чт̂о мнѣ чт̂о ли ва́мъ тѷре и҆ сидоне, и҆ вс̂ѧ галиле́ѧ и҆ноплемен꙽никъ·

е҆да̀ ѿда́нїе в̂ы да́ете мнѣ̀, и҆л̂и памѧтꙋе҆те па́мѧть в̂ы до менѐ, ѻ҆́стрѣ и҆ бы́стрѣ ѿда́мъ ѿда́нїе ва́ше на главы ва́ша.
поне́же сребро̀ мое и҆ зла́то мое взѧ́сте, і҆ и҆збра́ннаѧ моа̀ и҆ до́браѧ внесо́сте въ тре́бища ва́ша·

и҆ сн҃ы і҆ѹ́дины и҆ і҆и҃левы ѿда́сте сн҃ом̑ е҆л꙽ли́нскомъ, ꙗ҆́ко да и҆жденете ѧ҆̀ ѿ предѣлъ и҆хъ.
с̂е а҆́зъ воставлю ѧ҆̀ ѿ мѣста в неже ѿдасте ѧ҆̀ та́мо, и҆ ѿдам̑ ѿда́нїе ваше на главы̀ ва́ша.
и҆ ѿда́мъ сн҃ы ва́ша и҆ дще́рѧ ва́ша в рꙋцѣ сн҃овъ і҆ѹ́динъ, и҆ ѿдадѧт̑ ѧ҆̀ въ плѣнъ въ странꙋ̀ далече сꙋщꙋ, ꙗ҆́ко г҃ь гл҃а·

Проповѣ́дите с̂е въ странахъ, ѻ҆ст҃ите ра́ть, воставите сѣч꙽ца, приходи́те и҆ восходи́те вс̂и мꙋжи вои҆н꙽стїи.
рас꙽сѣцѣте ра́ла ва́ша на ѻ҆рꙋжїѧ, и҆ сер꙽пы ва́ша на лꙋща.
немощныи да гл҃етъ, ꙗ҆́ко могꙋ̀ а҆́зъ.
съвокꙋплѧ́итесѧ и҆ въходи́те всѧ страны̀ ѻ҆бѣ́мо, и҆ съберѣтесѧ т̂ꙋ.
кро́ткїи да бꙋдетъ хра́бръ да въста́нꙋтъ и҆ възы́идꙋтъ вс̂ѧ страны̀ на полѧ́нꙋ і҆ѻ҆сафа́товꙋ, ꙗ҆́ко т̂ꙋ сѧ́дꙋ рас꙽сꙋди́ти вс̂ѧ страны ꙗ҆́же ѻ҆крс̑҇тъ.
и҆спꙋсти́те сер꙽пы ꙗ҆́ко пред̑сто́итъ и҆манїе виногра́да, внидѣте и҆ перѣте ꙗ҆́ко и҆спо́лнъ тѣскъ, и҆злива́ютсѧ под̑ста́ви, ꙗ҆ко ѹ҆мно́жишасѧ злобы и҆хъ.
гла́си прогласи́шасѧ на поли сꙋднѣмъ, ꙗ҆ко близъ дн҃ь гн҃ь в꙽ поли сꙋднѣм꙽·

Слн҃це и҆ мс̑҇ць помер꙽кнета, и҆ ѕвѣзд̑ы съкрыютъ свѣтъ свои.
г҃ь же ѿ сїѻ́на възоветъ, и҆ ѿ і҆е҆рс̑҇ли́ма да́сть гла́съ сво́и, и҆ потрѧсетсѧ нб҃о и҆ землѧ̀.
г҃ь же пощадитъ лю́ди своѧ̀, и҆ ѹ҆крѣ́питъ г҃ь сн҃ы і҆ил҃евы.
и҆ ѹ҆вѣсте ꙗ҆ко а҆зъ г҃ь б҃ъ ваш꙽, вселѧ́асѧ в꙽ сїѻ́нѣ въ горѣ мое́и ст҃еи.
и҆ бꙋдетъ і҆ерс̑҇ли́мъ ст҃ъ, і҆ и́ноплемен꙽ник̑҇ не про́идетъ е҆го к꙽семꙋ·

И҆ бꙋдетъ в то́и дн҃ь, прока́плютъ го́ры наслажденїе, и҆ хо́лми и҆сто́чатъ мле́ко, и҆ вс̂и и҆сточницы і҆ѹ́дины и҆сто́чат꙽ во́ды.
і҆ и҆сточникъ ѿ до́мꙋ гн҃ѧ и҆зы́идетъ, и҆ напоит̑ водотечь си́тїѧ.
е҆гѷпетъ въ поги́бель бꙋ́детъ, і҆ и҆дꙋме́ѧ въ по́ле поги́бели бꙋдетъ·

ѿ непра́вдъ сн҃овъ і҆ѹ́динъ, поне́же пролїѧша кро́вь правди́вꙋ на землѝ свое́и.
а҆ жидов꙽скаѧ въ вѣ́ки сѧ в꙽селит̑, и҆ і҆ерс̑҇ли́м꙽ в род̑ і҆ род̑.
и҆ взы́щꙋ кро́ви их̑ и҆ не ѹ҆чи́щꙋ.
и҆ г҃ь вселит̑сѧ въ сїѻ́нѣ·

Конецъ прро̑҇кꙋ і҆ѻ҆и́лю, и҆́мать в себѣ̀ гла́въ, г҃·