А҆МОСЪ ПРО҃РКЪ

ГЛАВА̀ ПЄр̑ВАѦ

Словеса̀ а҆мо́сова ꙗ҆́же бы́ша въ карїа́ѳїаримѣ ѿ ѳекꙋе, ꙗ҆́же видѣ до і҆ерс̑҇ли́ма въ дн҃и і҆ѻ҆ѕїи҆ны цр҃ѧ і҆ѹ́дина, и҆ въ дн҃и і҆еровоа́млѧ і҆ѻ҆а҆сова цр҃ѧ і҆ил҃ева, прежде двѣма лѣтома̑ трꙋса·

и҆ рече г҃ь ѿ сїѻ҆на въз꙽гл҃а, і҆ и҆зъ і҆ерс̑҇ли́ма да́сть гла́съ свои.
и҆ сѣтова́ша па́жити па́ствиныѧ, и҆ пос꙽ше ве́рхъ карми́ль·

И҆ рече г҃ь на трѝ бесчестїѧ дама́ска, и҆ на четы́ри не ѿвращꙋсѧ и҆хъ, поне́же растер꙽ша пи́лами желѣзными и҆мꙋщаѧ въ ѹ҆тробѣ галаа҆ди́тенынѧ·

И҆ послю̀ ѻ҆́гнь въ до́мъ а҆заи́ль, и҆ пож꙽жетъ ко́ренїе сн҃а а҆де́рева.
и҆ съкрꙋшꙋ засо́вы дама́ска, и҆ потреблю̀ живꙋщаѧ с꙽ полѧ ѻ҆́н꙽нова, и҆ посѣкꙋ племѧ ѿ мꙋж꙽ хлор꙽рань, и҆ плѣнѧт̑сѧ лю́дїе сѷр꙽стїи нарочнїи, гл҃тъ г҃ь·

Се гл҃ет꙽ г҃ь, на трѝ бесчестїа га́зы, и҆ на четы́ри не ѿвращꙋсѧ и҆хъ, плѣненїѧ и҆хъ ра́ди плѣн꙽ники соло́монѧ въгна́ти во и́дꙋмею.
и҆ послю̀ ѻ҆́гнь на забра́ла газїи҆на, и҆ поѧ́сть ко́ренїе е҆ѧ̀.
и҆ потреблю̀ живꙋщаѧ из̑ а҆зота, і҆ и҆звер꙽жетсѧ племѧ и҆зъ а҆скалона.
и҆ възведꙋ рꙋ́кꙋ свою на а҆карона̑ и҆ поги́бнꙋтъ ѻ҆ста́точнїи и҆ноплеме́н꙽никъ, гл҃етъ г҃ь·

Се гл҃етъ г҃ь на трѝ бесчестїа тѷрова, и҆ до четы́рь не ѿвращꙋсѧ е҆го.
поне́же затвори́ша плѣнники соло́монѧ во і҆дꙋмеѝ и҆ не помѧнꙋша завѣта бра́тнѧ.
и҆ послю̀ ѻ҆́гнь на забра́ла тѷрова, и҆ поꙗ҆́сть ко́ренїе е҆го·

Се гл҃етъ г҃ь, на трѝ бесчестїѧ и҆дꙋме́иска, и҆ на четы́ри не ѿвращꙋсѧ е҆ѧ̀.
поне́же прогна̀ бра́та свое҆го съ ѻ҆рꙋжїемъ, и҆ расыпа ѹ҆тро́бꙋ на́ землю.
и҆ въсхити въ свѣдѣнїе грозꙋ себѣ̀, и҆ ѹ҆стремленїе е҆го снабдѣ на побы́ть.
и҆ послю̀ ѻ҆́гнь въ ѳема́нъ, и҆ поꙗ҆́сть ко́ренїѧ гра́да еѧ̀·

Се гл҃етъ г҃ь, на трѝ бесчестїѧ сн҃овъ а҆м꙽монь, и҆ на четы́ри не ѿвращꙋсѧ и҆хъ.
поне́же распарахꙋ и҆мꙋщаѧ въ ѹ҆тробѣ галаа҆ди́тенынѧ, ꙗ҆́ко да рас꙽ширѧтъ предѣлы своѧ̀·

и҆ раждегꙋ ѻ҆́гнь на забрала рав꙽ва, и҆ поꙗ҆́сть ко́ренїе е҆ѧ̀ съ во́племъ въ дн҃ь ра́тныи, и҆ потрѧсет̑сѧ въ дн҃ь сконча́нїѧ е҆ѧ̀.
и҆ ѿидетъ въ плѣн꙽ники мельхи́мъ, и҆ жерцы и҆ кнѧ́ѕи и҆хъ въкꙋпѣ, гл҃етъ г҃ь·

Глв̑҇а, в҃·

Се̂ гл҃етъ г҃ь, на трѝ бес꙽честїѧ моа́влѧ, и҆ на четы́ри не ѿвращꙋсѧ е҆го.
поне́же и҆ж꙽жегоша ко́сти цр҃ѧ и҆дꙋме́иска въ пе́пелъ.
и҆ послю̀ ѻ҆́гнь на моа́ва, и҆ поꙗ҆́сть ко́ренїѧ град̑ е҆го, и҆ ѹ́мретъ съ си́лою моа́въ съ во́племъ и҆ гла́сомъ трꙋбы̀.
и҆ потреблю сꙋдїѧ и҆з него̀, и҆ вс̂ѧ кн҃ѕѧ е҆го и҆збїю с ни́мъ, гл҃етъ г҃ь·

Се̂ гл҃етъ г҃ь, на трѝ бесчестїѧ сн҃овъ і҆ѹ́динъ, и҆ на четы́ри не ѿвращꙋсѧ и҆хъ.
поне́же ѿринꙋша закон꙽ гн҃ь, и҆ повеленїѧ е҆го не снабдѣша.
и҆ прельсти́ша ѧ҆̀ сꙋ́ѧа и ꙗ҆же сътвори́ша, и҆́мже въслѣдова́ша ѿц҃ы и҆хъ въ слд̑ѣ и҆хъ.
и҆ послю̀ ѻ҆гнь на і҆ѹдꙋ, и҆ поꙗ҆́сть ко́ренїѧ і҆ерс̑҇ли́мꙋ·

Се гл҃етъ г҃ь, на трѝ бесчестїѧ і҆и҆л҃ѧ, и҆ на четы́ри не ѿвращꙋсѧ е҆го.
поне́же прода́ша правдꙋ на сребрѣ̀, и҆ ѹ҆бога́го на сапоѕѣхъ, ходѧ́щихъ на пра́сѣ земльнѣмъ и҆ потыкахꙋсѧ на главы ѹ҆богихъ, и҆ пꙋть смире́ных̑ съвраща́хꙋ.
и҆ сн҃ъ и҆ ѿц҃ъ в꙽лажа́ста къ е҆ді́нои рабѣ̀, ꙗ҆́ко да ѻ҆сквернавѧ́тъ и҆мѧ бо́га и҆хъ.
и ри́зы и҆хъ вѧзаю҆ще ѹ҆́жи завѣсы творѧ́хꙋ дръжа́щасѧ тре́бника.
и҆ вино ѿ ѻ҆бло́гъ пїа́хꙋ въ домꙋ̀ бо́га и҆хъ·

А҆́з же ѿвръгохъ а҆море́ѧ ѿ лица и҆хъ, е҆гоже б̂ѣ высота ꙗ҆́ко и҆ высота ке́дрова, и҆ крѣпокъ бѧ́ше ꙗ҆́ко и҆ дꙋбъ.
и҆ съвръгохъ плод̑ е҆го съ верха, и҆ ко́ренїѧ е҆го и҆з ни́зꙋ·

А҆́з же и҆зведохъ в̂ы и҆з꙽ землѧ́ е҆гѷпет꙽ски, и҆ водихъ в̂ы въ пꙋсты́ни, м҃ лѣтъ, ꙗ҆ко прїа́ти землю а҆море́искꙋ.
и҆ поѧ́хъ ѿ сн҃овъ ва́шихъ въ прро̑҇ки, и ѿ ю́нотъ ва́ших̑ въ ѻ҆сщ҃енїе.
е҆да̀ нѣсть с̂е сн҃ве і҆и҆л҃ви гл҃етъ г҃ь.
и҆ напаѧ́сте ѻ҆сщ҃енныѧ вино́мъ, и҆ прро̑҇комъ заповѣ́дасте гл҃юще, не прорече́те·

Сего ра́ди с̂е а҆зъ повалю под̑ ва́ми ꙗ҆коже ва́лѧт̑сѧ ко́ла пол꙽на тростїѧ.
и҆ поги́бнет̑ ѹ҆бѣжа́нїе ѿ текꙋщаго, и҆ крѣп꙽кїи не ѹ҆держитъ крѣпости свое́ѧ, и҆ храбрыи не стерпи́тъ.
и҆ бы́стрыи нога́ма свои҆ма не ѹ҆цѣлѣетъ, и҆ ко́н꙽никъ не сп҃сетъ дш҃а свое́ѧ, и҆ крѣпкїи не ѻ҆брѧ́щетъ срд̑ца свое҆го.
въ си́лахъ нагїи побѣгнетъ в то́и дн҃ь гл҃етъ г҃ь·

Глв̑҇а, г҃·

Слы́шите сло́во с̂е е҆же гл҃а г҃ь на́ вы до́ме і҆и҆л҃евъ, и҆ на всѐ племѧ̀ е҆же и҆зведохъ и҆зъ зем̑лѧ е҆гѷпет꙽скы, рекїи, в̂ы то́чїю позна́хъ ѿ всѣх꙽ племенъ на землѝ.
сего ради м꙽щꙋ на ва́съ вс̂ѧ грѣхи ва́ша·

А҆́ще по́идете дв̂а въкꙋпѣ и҆ бех꙽ма не съзна́етесѧ.
и҆л̂и възреветъ ле́въ и҆з дꙋбравы свое́а лови́твы не и҆мы́и.
и҆ли испꙋститъ гла́съ сво́и л꙽вичищ꙽ и҆з ло́жа свое҆го бе́хма а҆ще не въстор꙽гнетъ ничесо́же.
и҆л̂и падетъ пти́ца без̑ и҆ме́лы.
и҆л̂и прꙋжит̑сѧ прꙋгло а҆ще не и҆метъ ничесоже.
и҆л̂и воз꙽гласитъ трꙋба въ́ градѣ, и҆ не въз꙽боѧт̑сѧ лю́дїе.
и҆л̂и бꙋдет̑ ѕло́ба въ градѣ е҆ѧ́же г҃ь не сътворѝ.
поне́же не сътворитъ г҃ь б҃ъ дѣтели, а҆ще не ꙗ҆вит꙽ наказанїѧ свое҆го къ рабо́мъ свои҆мъ прро̑҇комъ.
ле́въ възревет̑, и҆ кт̂о сѧ не ѹ҆бои́тъ.
г҃ь б҃ъ гл҃а, и҆ кт̂о не проречетъ·

Повѣди́те странамъ въ а҆сѷрїихъ, и въ странахъ ꙗ҆́же въ земли е҆гѵпет꙽стеи, и҆ рцѣте, съберѣтесѧ къ горѣ̀ самарїистеи, и҆ гл҃ите чюде́сна мно́га средѣ е҆ѧ̀, и҆ по си́лѣ е́й.
и҆ не разꙋмѣ е҆же бꙋдетъ съпроти́вное, гл҃етъ г҃ь, и҆мѣ́ющеи непра́вдꙋ и҆ стра́сть в селехъ их̑·

Сего ра́ди с̂е гл҃етъ г҃ь б҃ъ, тѷре, ѻ҆́крс̑҇т꙽ землѧ̀ твоа̀ ѻ҆пꙋстѣ́етъ, и҆ ѿведет̑ ѿ тебе крѣпость твою̀, и҆ разграбѧт̑сѧ се́ла твоа̀·

Се гл҃етъ г҃ь, ꙗ҆кож̑ и҆ пастꙋхъ е҆гда̀ и҆стор꙽гнет̑ ѿ ѹ҆стъ львовъ дв̂ѣ голени, и҆л̂и ѻ҆бъѹ҆шїе ѹ҆́ха.
та́коже и҆стор꙽гнꙋтсѧ и҆ сн҃ве і҆и҆л҃еви живꙋщїи въ самарїи средѣ племене, и҆ въ дама́сцѣ словꙋщїим̑·

Жръцы послꙋ́шаите і҆ и҆звѣстите до́мꙋ і҆а́ковлю, гл҃етъ г҃ь б҃ъ вседръжи́тель.
поне́же въ дн҃ь е҆гда̀ м꙽щꙋ безъчестїѧ і҆и҆л҃ева на немъ, и҆ м꙽щꙋ на тре́бницехъ веѳи́лихъ.
и҆ разорѧт̑сѧ главы̀ требникꙋ, и҆ падꙋтсѧ на́ землю.
и҆ съкрꙋшꙋ и҆ побїю храмъ съ преклѣты и҆ до хра́ма лѣтнѧго, и҆ поги́бнꙋтъ до́мове костѧнїи, и҆ потребѧт̑сѧ и҆ дрꙋѕїи до́мове мно́ѕи, гл҃етъ г҃ь·

Глв̑҇а, д҃·

Слы́шите сло́во с̂е ю́ница васанитид꙽скы ꙗ҆́же въ горѣ̀ самарїистѣ, ꙗ҆же преѻ҆бидꙋютъ ѹ҆бо́гїѧ, и҆ попира́ю҆щаѧ ни́щаѧ.
гл҃ющаѧ господемъ свои҆мъ, подади́те нам꙽ ꙗ҆́ко да пїемъ·

Клѧтсѧ г҃ь ст҃ыми свои҆ми, ꙗ҆́ко с̂е дн҃їе градꙋтъ на́ вы и҆ во́змꙋтъ в̂ы въ ѻ҆рꙋжїи, і҆ и҆же с ва́ми въвръгꙋтъ в коно́бъ под̑гнѣща́е҆мыи ѻ́гньни расы́пателе.
і҆ и҆змт̑ꙋ в̂ы на́гы жена̀ и҆ мꙋжъ прѧ́мо себѣ сама̀, и҆ ѿврьжетесѧ въ горꙋ̀ а҆рма́на̑ гл҃етъ г҃ь·

Внидо́сте въ веѳи́ль, и҆ безако́нновасте въ гал꙽га́лѣ, и҆ ѹ҆мно́жисте безъчествова́ти.
и҆ принесо́сте заѹ́тра тре́бы ва́ша въ тредн҃ьны і҆ и҆збра́ннаѧ ва́ша.
и҆ почто́ша внѣш́нїи зако́нъ, и҆ призва́ша и҆сповѣда́нїе.
съвѣсти́те, ꙗ҆ко с̂е възлюби́ша жръцы̀ і҆и҆л҃еви, гл҃етъ г҃ь б҃ъ·

А҆з же да́мъ ва́мъ ѻ҆чище́нїе зꙋбомъ въ всѣхъ гра́дѣх꙽ вашихъ, и҆ недоста́токъ хлѣба въ всѣхъ мѣстехъ ва́шихъ.
и҆ не ѻ҆брати́стесѧ къ мн̂ѣ, гл҃етъ г҃ь.
и҆ а҆зъ ѹ҆ста́вихъ дожд̑ъ ѿ ва́съ прежд̑е треми мс̑҇цы жа́твы.
и҆ надождꙋ на е҆ді́нъ грд̑а, а҆ на дрꙋгїи е҆ді́нъ не надождꙋ.
ча́сть е҆ді́на надожд̑итсѧ, и҆ ча́сть на ню́же не надожд̑ꙋ пос꙽хнет̑.
и҆ съберꙋтсѧ дв̂а и҆ три грады въ град̑ е҆ді́нъ пити во́дꙋ, и҆ не насы́тѧт̑сѧ.
и҆ не ѻ҆брати́стесѧ къ мн̂ѣ, гл҃етъ г҃ь.
поби́хъ в̂ы раждеже́нїемъ и҆ златени́цею, и҆ ѹ҆мно́жисте беще́ствовати ꙗ҆́коже, ѹ҆мно́жисте ѻ҆гра́ды ва́ша и҆ виногра́ды ва́ша.
и҆ смокви́нїе ваше и҆ масличїе ва́ше поꙗ҆до́ша гꙋсе́ница, и҆ та́кожде не ѻ҆брати́стесѧ къ мн̂ѣ, гл҃етъ г҃ь·

Посла́хъ на́ вы смр҃ть на пꙋтѝ е҆гѷпет꙽стѣ, и҆зби́хъ ѻ҆рꙋжїемъ ю́ноша ваша плѣномъ ко́ньство и҆хъ, і҆ и҆зведо́хъ ѻ҆гнемъ плъки ваша въ гнѣвѣ своем̑ и҆ та́кожде не ѻ҆брати́стесѧ къ мн̂ѣ гл҃етъ г҃ь.
разори́хъ в̂ы ꙗ҆коже разорѝ б҃ъ содо́мꙋ и҆ гоморꙋ, и҆ бы́ста ꙗ҆́ко главнѧ̀ и҆стръжена и҆зъ ѻ҆гнѧ̀.
и҆ такожде не ѻ҆брати́стесѧ къ мн̂ѣ, гл҃ет̑ г҃ь·

Сего ра́ди си́це сътворю т̂и і҆и҆л҃ю.
ѻ҆ба́че ꙗ҆ко си́це сътворю т̂и, ѹ҆готовисѧ призыва́ти б҃а твое҆го і҆и҆л҃ю.
поне́же ѹ҆твержа́етъ гром̑, и҆ съграждает̑ вѣтръ, и҆ съвѣстꙋа въ чл҃цех꙽ по зако́ны е҆го, сътворѧ́ай ѹ҆треню и҆ м꙽глꙋ̀, и҆ въсходѧ̀ на высо́кїѧ землѧ, г҃ь б҃ъ вседръжи́тель и́мѧ е҆мꙋ·

Глв̑҇а, е҃·

Слы́шите слово с̂е гн҃е, а҆зъ прїемлю на́ вы пла́чь.
дом꙽ і҆ил҃евъ паде́сѧ, и҆ не прило́житъ въста́ти.
дв҃ца і҆ил҃ѧ съблазни́сѧ на землѝ свое́и, нѣсть и҆збавлѧ́ющаго ю҆̀·

Понеже с̂е гл҃етъ г҃ь, и҆з꙽ гра́да и҆з негоже и҆схожда́ше ты́сѧщи, ѻ҆ста́нетъ в немъ ст̂о.
і҆ и҆з негоже и҆схожда́ше ст̂о, ѻ҆ста́нетъ в немъ і҃ до́мꙋ і҆ил҃евꙋ·

Понеже с̂е гл҃етъ г҃ь къ до́мꙋ і҆и҆л҃евꙋ, възыщѣте менѐ да поживетѐ.
а҆ не в꙽зыска́ите веѳи́лѧ, и҆ въ галга́лꙋ не входи́те, и҆ ѹ҆ кла́деѕѧ клѧ́твы не минꙋ́ите.
ꙗ҆́ко гал꙽гала плѣнѧ́ема плѣни́тсѧ, и҆ веѳи́ль бꙋдетъ а҆ки не бы́въ·

възыщѣте г҃а, да поживетѐ.
ꙗ҆́ко да не просвѣтитсѧ ꙗ҆́ко ѻ́гнь до́мъ і҆ил҃евъ, и҆ поꙗ҆́стъ и҆̀, и҆ не бꙋдетъ ѹ҆гаша́ющаго домꙋ і҆и҆л҃ѧ.
г҃ь творѧ́и въ высотꙋ̀ сꙋдъ, и҆ пра́вдꙋ на землѝ положѝ·

Творѧ́и вс̂е и҆ претворѧ́ѧй.
и҆ ѿвраща́ѧй в꙽ заѹ́трїа сѣнь смр҃тнꙋю, и҆ дн҃ь в но́щь ѿмьнѣва́ѧ.
призыва́ѧй во́дꙋ морьскꙋю, и҆ разлива́ѧ ю҆̀ на лицѐ землѝ.
г҃ь б҃ъ вседръжи́тель и́мѧ е҆мꙋ.
разлꙋча́ѧй съкрꙋше́нїе на крѣпость, и҆ стра́стна ѹ҆тверди́ти·

Възненави́дѣша ѹ҆ вра́тъ наказа́ющаго, и҆ сло́во препра́ведно ѻ҆гнꙋси́ша·

сего ради понеже пресꙋжда́ете ѹ҆бо́гаго, и҆ м꙽здꙋ̀ и҆збо́рнꙋ прїѧсте ѿ него.
домы̀ ѹ҆краше́ны съгради́сте, и҆ не всели́тесѧ в ни́хъ.
виногра́ды въсхотѣны насади́сте, и҆ нѣсть в̂ы пи́ти вина̀ ѿ нихъ·

Ꙗ҆́ко ви́дѣхъ мно́га беще́стїѧ ва́ша, и҆ крѣпцы грѣси ваши.
попира́юще правд̑и́ваго прїемлюще премѣны, и҆ ѹ҆бо́гїѧ ѹ҆ вра́тъ ѹ҆кланѧ́юще·

сего ра́ди смыслѧ́и в тои го́дъ премлъчитъ, ꙗ҆́ко год̑ зо́лъ е҆сть·

Възыщѣте добра̀ а҆ не зла̀ ꙗ҆ко да живетѐ, и҆ бꙋдет꙽ та́ко с ва́ми г҃ь б҃ъ вседръжи́тель.
ꙗ҆́коже рѣсте, възненави́дѣхомъ зл̂о и҆ възлюби́хомъ добро̀.
и҆ ѹ҆стави́те ѹ҆ вра́тъ сꙋдъ, ꙗ҆́ко да поми́лꙋетъ г҃ь б҃ъ вседръжи́тель ѻ҆ста́вшаѧ і҆ѻ́сифовы·

Сего ради с̂е гл҃ет̑ г҃ь б҃ъ вседръжи́тель.
на всѣхъ стогна́хъ бꙋдетъ пла́чь, и҆ на всѣхъ пꙋтехъ речетсѧ, ѹ҆҇ лю́те, ѹ҆҇ люте.
призове́тсѧ ра́таи на пла́чь, и҆ на рыда́нїе всѧ̀ вѣдꙋщаѧ пла́чь.
и҆ на всѣхъ пꙋте́хъ плачь, и́м꙽же проидꙋ̀ средѣ тебе, рече г҃ь·

Ѹ҆҇ лю́те помышлѧ́ющимъ дн҃ь гн҃ь.
въскꙋ́ю же вамъ сїи дн҃ь гн҃ь, се бо е҆сть тма̀ а҆ не свѣтъ.
ꙗ҆коже а҆ще ѹ҆бѣжи́тъ чл҃къ ѿ лица львꙋ̀, и҆ пред̑ста́нетъ е҆мꙋ меч꙽ка.
и҆ въм꙽кне́тсѧ въ до́мъ и҆ в꙽вержетъ рꙋцѣ своѝ къ стенѣ̀, и҆ ѹ҆хо́питъ и҆̀ ѕмїѧ.
нѣсть л̂и дн҃ь гн҃ь тма̀ а҆ не свѣтъ, и҆ м꙽гла̀ не и҆мꙋщи свѣта свое҆го·

Възненави́дѣхъ и҆ ѿврьго́хъ пра́знд̑ики ва́ша, и҆ не ѻ҆бонѧ́ю въ со́нмх̑ѣ ва́шихъ.
занѐ а҆ще принесете м̂и всесъж꙽же́нїа, и҆ тре́бъ ва́шихъ не прїимꙋ̀, и҆ сп҃сенаго просвѣще́нїѧ ва́шего не призрю̀.
ѿста́ви ѿ мене гласъ пѣснїи твои҆хъ, и҆ пѣсни пища́лїи твои҆хъ не послꙋшаю·

И҆ пова́литсѧ ꙗ҆́ко и҆ вода̀ сꙋдъ, и҆ пра́вда ꙗ҆́коже и҆ водотечи бес прехо́да.
е҆да̀ заколе́нїѧ и҆л̂и тре́бы принесо́сте м̂и въ пꙋсты́ни лѣтъ м҃, до́ме і҆ил҃въ<.>

И҆ въздви́гнꙋсте хра́мъ моло́ховъ, и҆ звѣздꙋ̀ бо́га вашего рем꙽фа́на, ѻ҆́бразы ꙗ҆́же сътвори́сте себѣ.
и҆ преселю̀ в̂ы ѻ҆б онъ по́лъ дама́ска, гл҃етъ г҃ь вседръжи́тель·

Глв̑҇а, ѕ҃·

Люте хꙋлѧ́щимъ сїѻ́на, и҆ ѹ҆пова́ющимъ го́рою самарїискою.
ѻ҆бъи҆ма́ша вла́сти стран꙽ски, и҆ внидо́ша себѣ домъ і҆ил҃евъ.
и҆ минѣте вс̂и, и҆ внидѣте в꙽ халанꙋ̀, и҆ проидѣте тꙋдꙋ въ и҆маѳь маѳи́ровꙋ вели́кꙋю, и҆ снидѣте ѿтꙋдꙋ въ ге́ѳь и҆ноплеме́нник꙽, крѣпѣ́ише ѿ всѣхъ црс̑҇твїи.
а҆ще бо́лши сꙋть предѣли си́хъ предѣлъ ва́шихъ·

приходѧ́щихъ въ дн҃ь золъ, приближа́ющесѧ и҆ прикаса́ющеи сꙋботахъ л꙽жи́хъ.
спѧ́щеи на ѻ́дрѣхъ костѧныхъ, и҆ боѧ́щесѧ на посте́лѧхъ свои҆хъ.
ꙗ҆дꙋщеи ко́злища ѿ паств꙽ и҆ телца ѿ среды ста́дъ галатїискь.
пле́щꙋщеи проти́вꙋ гла́сꙋ пища́лїи, ꙗ҆́ко стоѧ́ща мнѣша и҆ не ꙗ҆́ко бѣжа́ща.
пїющеи цѣжд̑еное вино̀, и҆ старѣ́ишими вонѧми ма́жꙋщеисѧ, и҆ не страда́хꙋ ничесо́же въ сокрꙋше́нїе і҆ѻ́сифово·

Сего рад̑и̑ нн҃ѣ плѣн꙽ницы бꙋдꙋтъ вла́сти си́лнымъ, и҆ ѿи҆мет̑сѧ р꙽за́нїе ко́ньско ѿ е҆фрема·

Ꙗ҆́ко клѧ́сѧ г҃ь собо́ю, гл҃ѧ г҃ь б҃ъ си́лъ, и҆мже гнꙋша́юсѧ а҆зъ всеѧ ѹ҆кори́зны і҆и҆л҃ѧ, се́ла е҆го възненави́дѣх꙽ и҆ развер꙽гꙋ град̑ съ всѣми живꙋщими в немъ·

И҆ бꙋдетъ а҆ще ѻ҆ста́нет꙽ десѧть мꙋжъ въ е҆ді́номъ домꙋ̀, ѹ҆мрꙋтъ.
и҆ ѻ҆ста́нꙋтъ ѻ҆ста́точнїи, и҆ во́змꙋтъ сво́и и҆мъ, и҆ понꙋдѧтсѧ и҆знести ко́сти их̑ и҆з домꙋ.
и҆ речетъ строѧ́щимъ домъ, а҆ще е҆ще е҆сть ѹ҆ тебе.
и҆ речет꙽, млъчи, не въмѣне́нїа ра́ди и҆́мене гн҃ѧ·

Понеж̑ с̂е г҃ь заповѣда́етъ, и҆ побїетъ храм̑ вели́кїи столче́нїемъ, и҆ хра́мъ малы́и рас꙽сѣде́нїемъ·

А҆ще пожент̑ꙋ въ ка́менїи кони, и҆ а҆ще ѹ҆млъкнт̑ꙋ въ жен꙽стѣ по́лꙋ.
ꙗ҆́ко ѻ҆брати́сте на гнѣвъ сꙋдъ, и҆ пло́дъ пра́вды на го́ресть.
веселꙋ́ющеисѧ ни е҆ді́нѣм꙽ же сло́вом̑ бл҃гом̑.
гл҃ющеи, не крѣпостїю л̂и м̂ы свое҆ю и́мамы вла́сть.
тм̑ѣже с̂е а҆зъ въста́влю на́ вы до́ме і҆и҆л҃въ, гл҃етъ г҃ь б҃ъ, вою́юща и҆хъ странꙋ̀ и҆ стꙋжа́тъ вамъ ꙗ҆́ко не вни́ти въ е҆ма́ѳь и҆ до водоте́чи захода·

Глв̑҇а, з҃·

Си́це показа м̂и г҃ь.
и҆ с̂е приплод̑ прꙋжїи и҆ды́и заѹ҆́трьнїи, и҆ с̂е м꙽ши́ца и҆мже го́гъ цр҃ь.
и҆ бꙋ́детъ а҆ще скон꙽ча́етъ ꙗ҆ды́и травꙋ зе́мнꙋю.
и҆ рѣ́хъ, г҃и г҃и млс̑҇тивъ бꙋ́ди.
кт̂о въста́вит̑ і҆а́кова, ꙗ҆́ко ма́лъ е҆сть, раска́исѧ ѻ҆ семъ г҃и.
с̂е да не бꙋ́дет̑, гл҃етъ г҃ь·

Си́це показа м̂и г҃ь.
и҆ с̂е възва прю въ ѻ҆гни г҃ь б҃ъ, и҆ поꙗ҆́сть безд̑нꙋ мно́гꙋ, и҆ поꙗ҆́сть часть.
и҆ рѣхъ, г҃и г҃и ѹ҆ста́ви ѹ҆бо.
кт̂о въста́витъ і҆а́кова, ꙗ҆́ко ма́лъ ес̑҇, раска́исѧ ѻ҆ семъ г҃и.
и҆ с̂е не бꙋ́детъ, гл҃етъ г҃ь·

Си́це показа м̂и г҃ь.
и҆ с̂е мꙋж́ъ стоѧ̀ на гра́дѣ а҆дама́н꙽тини, и҆ в рꙋцѣ е҆го а҆дамас̑҇·

и҆ рече г҃ь къ мнѣ, чт̂о т̂ы ви́диши а҆мо́се.
и҆ рѣхъ, а҆дама́съ·

и҆ рече г҃ь къ мнѣ, с̂е а҆зъ ѹ҆чиню а҆дама́са средѣ людїи мои҆хъ і҆и҆л҃ѧ, к꙽семꙋ не приложꙋ минꙋти е҆го.
и҆ потребѧт̑сѧ тре́бища смѣш꙽наѧ, и҆ тре́бы і҆и҆л҃евы ѻ҆пꙋстѣ́ютъ, и҆ въста́нꙋтъ на дом̑ і҆еровоа́мль съ ѻ҆рꙋж́їемъ·

И҆ посла̀ а҆масе́ѧ жре́ць веѳи́левъ къ цр҃ю і҆е҆ровоа́мꙋ і҆и҆л҃евꙋ, гл҃ѧ.
съвраты тво́рит̑ на́ тѧ а҆мо́съ средѣ до́мꙋ і҆и҆л҃ева, не възмо́жетъ землѧ̀ под̑ꙗ҆́ти всх̑ѣ словесъ е҆го.
понеже с̂е гл҃етъ а҆мос̑҇, ѻ҆рꙋжїемъ скон꙽ча́етсѧ і҆е҆ровоа́мъ, и҆ і҆ил҃ь плѣненъ ѿведе́тсѧ ѿ землѧ̀ свое҆ѧ·

И҆ рече а҆масе́а къ а҆мо́сови, видѧ́и грѧди и҆ ѿи҆ди т̂ы на землю і҆ѹ́динꙋ, и҆ та́мо живи, и҆ та́мо да прорица́еши.
а҆ въ веѳи́ли посе́мъ не приложѝ прорица́тисѧ, ꙗ҆́ко ѻ҆сщ҃енїе цр҃ѧ е҆сть, и҆ до́мъ е҆сть црс̑҇тва·

И҆ ѿвѣща а҆мо́съ, и҆ рече къ а҆масе́ю, не бѣ́хъ прро̑҇къ а҆́зъ, н̂и сн҃ъ прро̑҇чь е҆смь, н̂о пасты́ръ бѣ́хъ ꙗ҆́годичїе древѧ́ное градѧ̀.
и҆ поѧ м̂ѧ г҃ь ѿ ѻ҆вець, и҆ рече къ мнѣ̀.
и҆дѝ, и҆ прорцы̀ на люди моѧ і҆и҆л҃ѧ.
и҆ нн҃ѣ слы́ши сло́во гн҃е, ты же гл҃еши, не прорица́и на і҆и҆л҃ѧ, и҆ не стꙋжа́и до́мꙋ і҆а́ковлю·

сего ради с̂е гл҃етъ г҃ь, жена̀ твоѧ въ гра́дѣ съблꙋ́дитъ, сн҃ове же твои и҆ дще́ри ѻ҆рꙋ́жїемъ падꙋтъ, и҆ землѧ твоѧ ѹ҆́жем꙽ сѧ и҆змѣ́ритъ.
и҆ т̂ы на земли нечс̑҇тѣ скон꙽ча́ешисѧ, и҆ і҆ил҃ь же плѣне́нъ ѿт̑веде́тсѧ ѿ землѧ̀ свое҆ѧ·

Глв̑҇а, и҃<.>

Си́це показа м̂и г҃ь.

и҆ с̂е съсд̑ꙋ и҆ме́лника.
и҆ рече г҃ь, чт̂о т̂ы ви́диши а҆мо́се.
и҆ рх̑ѣ, съсд̑ꙋ и҆ме́лника.
и҆ рече г҃ь къ мнѣ̀, приспѣ конецъ на лю́ди моѧ і҆и҆л҃ѧ, не приложꙋ к꙽семꙋ минꙋти е҆го.
и҆ възъпїю́тъ во́плеве хра́ма в то́и дн҃ь, гл҃етъ г҃ь.
мо́ѕи пад̑ше въ всемъ мѣ́сте наве́ргꙋ молча́нїе·

Слы́шите с̂е стꙋжа́ющеи и҆з꙽ ѹ҆́тра ѹ҆бо́гомꙋ, и҆ насильствꙋющеи ни́щаго съ землѝ.
гл҃ющеи, коли мине́тъ мс̑҇ць да продам꙽, и҆ коли преи҆дꙋтъ сꙋбо́ты, да ѿвръземъ и҆мѣ́нїа наша ꙗ҆́ко сътвори́ти мѣ́рꙋ ма́лꙋ, и҆ вели́чити мѣ́ры, и҆ сътвори́ти превѣ́снѧ непра́вды, ꙗ҆́ко притѧжа́ти ѹ҆бо́гїѧ сре́бромъ, и҆ ни́щаго в сапо́гъ мѣ́сто, и҆ ѿ всего кꙋпа възвитїи҆мъ·

Клене́тсѧ г҃ь на презо́рство і҆а꙼ковле, а҆ще забꙋдт̑ꙋсѧ вс̂ѧ дѣ́ла ваша на ѻ҆долѣ́нїе.
и҆ ѻ҆ сих̑ не възмѧте́тсѧ вс̂ѧ землѧ̀.
и҆ въспла́четсѧ всѧ́къ живѧ́и на не́и.
и҆ възы́идет̑ ꙗ҆́ко пово́нь поги́бель е҆ѧ̀, и҆ сни́детъ ꙗ҆́ко рѣка е҆гѷпет꙽ска·

И҆ бꙋдетъ в то́и дн҃ь гл҃етъ г҃ь, за́идетъ слн҃це полꙋдне, и҆ помер꙽кнет̑ въ дн҃ь свѣтъ.
и҆ превращꙋ празд̑ники ваша въ же́лю, и҆ вс̂ѧ пѣ́сни ваша въ пла́чь.
и҆ възложꙋ на всѧ́къ хребет̑т̑ врѣтище, и҆ на всѧ́кꙋ главꙋ̀ плѣш꙽.
и҆ положꙋ и҆̀ ꙗ҆́ко же́лю лю́бимаго, и҆ сꙋщаѧ с ни́мъ ꙗ҆́ко дн҃ь болѣ́зньныи·

Се̂ дн҃їе и҆дꙋтъ гл҃етъ г҃ь, послю̀ глд̑а на́ землю.
не глд̑а хлѣ́ба ни жа́жды воды̀, н̂о глд̑а слы́шанїа сло́ва бж҃їа.
и҆ поколѣ́блют̑сѧ во́ды ѿ мо́рѧ до мо́рѧ, и҆ ѿ сѣвера до востокъ.
ѻ҆бътекꙋтъ и҆́щꙋще сло́ва бж҃їѧ, и҆ не ѻ҆брѧ́щт̑ꙋ·

Въ тои дн҃ь ѻ҆скꙋдѣют̑ дв҃ы до́брыѧ, и ю́ноша в недоста́токъ.
кленꙋщеисѧ ѻ҆чище́нїемъ самарїискомъ, и҆ гл҃ющеи, жи́въ бо́гъ твои да́нъ, и҆ жи́въ бо́гъ твои вер꙽савее.
и҆ падт̑ꙋсѧ и҆ не въста́нꙋтъ пото́мъ·

Глв̑҇а, ѳ҃·

Видѣхъ г҃а стоа́ща ѹ҆ тре́бника, и҆ рече, пораѕи ѻ҆цыщенїе и҆ поколѣ́блютсѧ пред̑дверїѧ.
и҆ пресѣцы въ гла́вы всѣхъ, и҆ ѻ҆ста́вшаѧ их̑ ѻ҆рꙋжїемъ и҆збїи.
и҆ бѣжа́щїи их̑ не ѹ҆́бѣжит̑, и҆ не ѹ҆цѣлѣ́етъ ѿ них̑ ѹ҆цѣлѣваѧ́й.
а҆ще погребт̑ꙋсѧ въ земли, т̂о и҆ ѿтꙋдꙋ рꙋка̀ моа̀ и҆стрьгнет̑ ѧ҆̀.
и҆ а́ще възлѣзт̑ꙋ на́ нб҃о, т̂о и҆ ѿтꙋдꙋ свѳргꙋ ѧ҆̀.
и҆ а́ще сѧ съкрыют̑ на версѣ карми́лꙋ, т̂о и҆ ѿтꙋдꙋ възы́щꙋ и҆ пои҆мꙋ ѧ҆̀.
и҆ а́ще сѧ ѹ҆таѧ́тъ ѿ ѻ́чїю мое́ю въ глꙋби́нах̑ мор꙽ских̑, т̂о и҆ тꙋ̀ повелю ѕмїеви и҆ поли́жет꙽ ѧ҆̀.
и҆ а́ще по́идꙋтъ плѣнени пред̑ лицем̑ вра́гъ своих̑, т̂о и҆ тꙋ̀ повелю ѻ҆рꙋжїю і҆ и҆збїет̑ и҆хъ.
и҆ ѹ҆твержꙋ ѻ҆́чи своѝ на нѧ на́ зло а҆ не на добро̀·

И҆ г҃ь б҃ъ вседръжи́тель прикасаа́йсѧ землѝ, и҆ колѣблѧ ею̀.
и҆ въжделѣют̑ вс̂и живꙋщїи на землѝ.
и҆ в꙽зыидет̑ ꙗ҆́ко рѣка̀ скон꙽ча́нїе еѧ̀, и҆ снидет̑ ꙗ҆ко рѣка̀ е҆гѷпет̑ска·

Сътворѧа́й на́ нб҃о въсхо̑ е҆го, и҆ ѻ҆бѣща́нїе е҆го на землѝ ѹ҆твержа́ѧ.
призываѧ́й во́дꙋ мор꙽скꙋю, и҆ пролива́ѧ ю҆̀ на лице землѝ.
г҃ь б҃ъ вс̂едръжи́тель и҆мѧ е҆мꙋ·

Не ꙗ҆́коже сн҃ве мꙋр꙽стїи бꙋдете в̂ы мнѣ сн҃ове і҆и҆л҃ви, гл҃етъ г҃ь.
не і҆и҆л҃ѧ л̂и ѹ҆бо и҆зведохъ из̑ землѧ е҆гѷпет̑ски, і҆ и҆ноплеме́нникї і҆с кападокїа, и҆ сѷр꙽ры ѿ во́ѳра.
с̂е ѻ҆́чи г҃а б҃а на црс̑҇тво грѣшное, и҆ ѿве́ргꙋ е҆̀ с꙽ лица землѝ.
ѻ҆баче бы́хом̑ не ѿв́ергꙋ до́мꙋ і҆и҆л҃ева, гл҃етъ г҃ь.
поне́же с̂е аз̑ заповѣ́де и҆ развѣю дом̑ і҆и҆л҃евъ во вс̂ѧ страны̀ ꙗ҆́коже вѣет̑сѧ на то́цѣ, и҆ не падет̑ сътренїе на зем̑лѝ.
ѻ҆рꙋжїем̑ скон꙽чают̑сѧ вс̂и грѣшнїи лю́дїи моих̑ гл҃щеи не приближит̑сѧ н̂и прїидет̑ на нас̑҇ ѕл̂о·

В тои дн҃ь въставлю̀ храм̑ дв҃двъ пад̑шїисѧ, и҆ воз̑граждꙋ пад̑шаѧсѧ е҆го, и҆ раскопа́ное е҆го въставлю и҆ въз꙽граждꙋ, ꙗ҆́коже и҆ дн҃е вѣка.
ꙗ҆́ко да в꙽зы́щт̑ꙋ мене ѻ҆ста́вшїи чл҃цы, и҆ вс̂ѧ страны̀ в них̑ же призвасѧ и҆мѧ моѐ в них꙽ гл҃тъ г҃ь творѧ́и с̂е вс̂е·

Се дн҃їе прихо́дѧт̑, гл҃етъ г҃ь, и҆ пости́гнет̑ ва́ше и҆манїе виногра́да, и҆ съзрѣе гро́здїе въ жа́твꙋ.
и҆ прока́плют̑ го́ры наслажд̑е́нїе, и вс̂и хо́лми ѻ҆брастт̑ꙋ.
и҆ възвращꙋ плѣн꙽ники людїи моих̑ і҆и҆л҃ѧ, и҆ воз̑градѧт̑ гра́ды разоре́ныѧ, и҆ ѹ҆селѧт̑сѧ и҆ насадѧт̑ виногра́ды, і҆ и҆спїют̑ вино их̑.
и҆ сътворѧ ѻ҆гра́ды, и҆ поꙗ҆дѧт̑ плоды и҆хъ.
и҆ насажд̑ꙋ ѧ҆̀ въ земли их̑, и҆ не и҆стор꙽гнꙋтсѧ ксемꙋ̀ ѿ землѧ̀ и ю҆же дахъ и҆мъ, гл҃етъ г҃ь вседръжи́тель·

Конецъ прро̑҇кꙋ а҆мо́сꙋ.
и҆́мать в себѣ̀ гла́въ, ѳ҃·