А҆ВДИ́Ꙗ ПРО҃РКЪ

ГЛАВА̀ ПЄр̑ВАѦ

Видѣнїе а҆вдїино.
с̂е гл҃етъ г҃ь б҃ъ и҆дꙋмеѝ.
слꙋхъ слы́шахъ ѿ г҃а и҆звѣстова́нїе въ страны̀ посла̀.
въстанѣте, да въста́немъ на́ нѧ ратїю·

се ма́ла да́хъ т̂ѧ странамъ, безъ чести т̂ы е҆си ѕѣло.
презоръ срд̑ца твое҆го въздви́же т̂ѧ живꙋщаго въ пеще́рахъ ка́менахъ.
възвыша́ѧй храмъ сво́и, гл҃ѧи въ срд̑цы свое҆мъ, кт̂о м̂ѧ съве́ржетъ на́ землю.
а҆ще възнесешисѧ ꙗ҆́ко и҆ ѻ҆релъ, и҆ сътвори́ши с̂и гнѣздо средѣ ѕвѣздъ, и҆ ѿтꙋдꙋ све́ргꙋ т̂ѧ гл҃етъ г҃ь.
а҆ще та́тїе бы́ша вълѣзли к тебѣ̀ и҆л̂и разбо́иницы но́щїю, ка́мо б̂ы ѿве́рженъ.
не бы́ша л̂и ѹ҆кра́ли до сы́тостнаг̑҇ себѣ̀.
и҆л̂и а҆ще бы́ша е҆́млющеи виноград̑ вълѣ́зли к тебѣ, т̂о не бы́ша л̂и ѻ҆ста́вили па́родокъ.
ка́ко ѻ҆бъи҆скасѧ и҆са́въ, и҆ ѻ҆ста́ша съкровен꙽наѧ е҆го.
до предѣлъ и҆спꙋсти́ша т̂ѧ вс̂и мꙋжи завѣта твое҆го съпроти́виша ти сѧ.
премого́ша т̂ѧ мꙋжи мир꙽ницы твоѝ.
ꙗ҆дꙋщеи с тобо́ю положи́ша ле́сть под̑ тобою, нѣсть смы́сла в не́мъ·

Въ то́и дн҃ь гл҃етъ г҃ь, погꙋблю̀ премꙋдрыѧ ѿ и҆дꙋме́а, и смы́слъ ѿ горы̀ и҆са́вовы.
и҆ ѹ҆боѧ́тсѧ вои҆ни твои и҆же ѿ ѳема́нъ, ꙗ҆́ко да ѿи҆мет̑сѧ чл҃къ ѿ горы̀ и҆савовы, сѣченїѧ ра́ди и҆ бесчестїѧ е҆же на бра́та свое҆го і҆а́кова.
ꙗ҆́ви стыдѣнїе, и҆ ѿвръжешисѧ въ вѣкъ.
ѿ него́же дн҃е съпротивисѧ ѿ съпроти́вныхъ въ дн҃ь плѣнѧ́ющихъ и҆ноплемен꙽никъ си́лꙋ е҆го.
и҆ стран꙽ницы в꙽нидо́ша въ вра́та е҆го, і҆ ѻ҆ і҆ерлс̑҇имѣ въз꙽вергоша жребїѧ.
и҆ т̂ы бѣа́ше ꙗ҆́ко е҆ді́нъ ѿ нихъ.
не бꙋ́ди ви́дѣлъ дн҃е по бр́атѣ свое҆мъ въ дн҃ь щюжд̑ихъ.
и҆ не бꙋ́дисѧ ра́довалъ по сн҃охъ і҆ѹ́динх̑ѣ въ дн҃ь погибели и҆хъ.
и҆ не бꙋди воз꙽гл҃алъ велики рѣчи въ дн҃ь ско́рби и҆хъ·

и҆ не въходи въ вра́та лю́дїи мои҆хъ въ дн҃ь бо́лѣзни и҆хъ.
и҆ не ви́ждь послѣдѝ на со́нмъ и҆хъ въ дн҃ь потребле́нїѧ и҆х꙽.
и҆ не прилага́и на си́лꙋ и҆хъ въ дн҃ь поги́бели и҆хъ·

не престаи на и҆збѣгъ и҆хъ потребити и҆збыва́ющаѧ ѿ нихъ.
и҆ не преста́и бѣжа́щаѧ и҆хъ въ дн҃ь скор꙽би и҆хъ.
и҆́мже приближа́етсѧ дн҃ь гн҃ь на вс̂ѧ ꙗ҆́зы́ки.
ꙗ҆́коже сътворѝ, си́це бꙋдетъ т̂и.
въздаа́нїе твоѐ възда́стьсѧ на главꙋ̀ твою̀.
поне́же ꙗ҆́коже е҆си пи́лъ ѹ҆ горы̀ моеѧ̀ ст҃ыа, и҆спїютъ вс̂ѧ страны̀ вино̀, и҆спїют̑ и҆ възы́идꙋтъ и҆ бꙋдꙋтъ по и҆стиннѣ ꙗ҆ко не бы́вшеи.
въ го́рѣ же сїѻ́нѣ бꙋдетъ сп҃съ, и҆ бꙋдетъ ст҃а·

и҆ преи҆мꙋтъ до́мъ і҆а́ковль прее҆мъшаѧ и҆хъ.
и҆ бꙋдетъ до́мъ і҆а́ковль ѻ҆́гнь, и҆ до́мъ і҆ѻ́сифовъ пла́мы, а҆ до́мъ и҆са́вовъ ꙗ҆́ко тростїе.
и҆згорѧтъ в них̑ и҆ поꙗ҆дѧ́тъ ѧ҆̀.
и҆ не бꙋдет̑ и҆збавлѧа́й до́мꙋ и҆савова, ꙗ҆́ко г҃ь гл҃а.
и҆ прїимꙋтъ и҆же въ а҆гевѣ горꙋ и҆са́вовꙋ, і҆ и҆же в раздолїи т̂о и҆ноплемен꙽ники.
и҆ прїимꙋтъ го́рꙋ е҆фрѣмовꙋ, и҆ полѧ́нꙋ самарїискꙋ, а҆ венїамин̑҇ галаа҆дит꙽скꙋ.
преселенїю с̂е нача́токъ сн҃овъ і҆и҆л҃евъ землѧ ханане́иска до сареп꙽ѳы.
преселенїе же і҆ерс̑҇ли́мле до е҆фра́та.
и҆ пленѧ́тъ гра́ды нагев꙽вовы.
и҆ възы́идꙋтъ сп҃са́емїи ѿ горы̀ сїѻ́нѧ м꙽сти́ти горы и҆савовы.
и҆ бꙋдет̑ црс̑҇тво гв҃и·

Конецъ прро̑҇кꙋ а҆вдїю.
и́мать в себѣ̀ гла́вꙋ, а҃·