І҆Ѡ́НА ПРО҃РКЪ

ГЛАВА̀ ПЄр̑ВАѦ

И бы́сть сло́во гн҃е къ і҆ѻ́нѣ а҆маѳїинꙋ, гл҃ѧ, въста́ни і҆ и҆ди въ ниневїю гра̑ вели́кїи, и҆ проповѣжд̑ь в нем̑, ꙗ҆́ко възы́де во́пль ѕло́бы е҆го къ мн̂ѣ·

И҆ въста́въ і҆ѻ́на ꙗ҆́кож̑ бѣжа́ти въ ѳарси́съ ѿ лица̀ гн҃ѧ.
и҆ сни́де въ і҆ѻ҆пїю, и҆ ѻ҆брѣте кора́бль и҆дꙋщь въ ѳарси́съ.
и҆ да́сть наи́мъ свои, и҆ вниде во́нь плы́ти с ни́ми въ ѳарси́съ ѿ лица̀ гн҃ѧ.
и҆ въста́ви г҃ь вѣтръ вели́къ въ мо́ри.
и҆ бы́сть бꙋрѧ вели́ка въ мо́ри, кора́бль же страда́ше ꙗ҆ко съкрꙋши́тисѧ.
и҆ ѹ҆боѧ́шасѧ кора́бльницы, и҆ въпїѧ́хꙋ къждо къ б҃ꙋ свое҆мꙋ.
і҆ и҆зметанїе сътвори́ша сосꙋдомъ и҆же в꙽ кораблѝ въ мо́ре, ꙗ҆ко ѻ҆блег꙽читисѧ ѿ них̑.
і҆ѻ́на же сни́де в꙽ пожд̑ь кораблю̀, и҆ спа́ше т̂ꙋ и҆ храпѧ́ше.
и҆ прїиде к немꙋ корьмникъ, и҆ рече е҆мꙋ, чт̂о т̂ы хра́плеши.
въста́ни молѝ б҃а свое҆го, ꙗ҆́ко да сп҃сетъ н̂ы б҃ъ, да не поги́бнемъ·

И҆ рече ко́ждо къ подрꙋгꙋ свое҆мꙋ, грѧдѣте да възве́ржемъ жре́бїѧ, да разꙋмѣ́емъ чесо ради е҆сть зло́ба с̂и на нас̑҇.
и҆ мета́ша̑ жре́бїѧ, и҆ спадѐ жре́бїи на і҆ѻ́нꙋ.
и҆ рѣша к немꙋ, и҆звѣстѝ на́мъ кого̀ ради с̂е зл̂о намъ, что́ ли т̂и ес̑҇ дѣло.
и҆ ѿкꙋдꙋ грѧде́ши, и҆ камо и҆де́ши, и҆ ѿ коеѧ страны̀ и҆ кои҆хъ людїи т̂ы е҆си.
и҆ рече к нимъ, рабъ гн҃ь а҆зъ е҆смь, и҆ г҃а б҃а а҆зъ молю̀ и҆же сътворѝ мо́ре и҆ сꙋшꙋ·

И҆ ѹ҆боѧ́шасѧ мꙋжїе бо́ѧзнїю вели́кою, и҆ рѣша к немꙋ, что̀ с̂е е҆си сътвори́лъ.
занѐ разꙋмѣша мꙋжи ꙗ҆́ко ѿ лица̀ гн҃ѧ бѣжа̀, ꙗ҆́коже б̂ѣ и҆звѣсти́лъ и҆мъ.
и҆ рѣша к немꙋ, чт̂о т̂и сътво́римъ, да ѹ҆ста́нетъ мо́ре ѿ насъ.
ꙗ҆́ко море въсхожда́ше и҆ въставлѧ́ше па́че бꙋрѧ·

И҆ рече і҆ѻ́на к ни́мъ, възмѣте м̂ѧ и҆ въврь́зите въ мо́ре, и҆ ѹ҆ста́нетъ мо́ре ѿ васъ.
понеже позна́хъ а҆зъ ꙗ҆́ко менѐ ради бꙋрѧ сїѧ ве́лїѧ на́ вы ес̑҇·

И҆ нꙋжда́хꙋсѧ мꙋжи възвратити къ землѝ, и҆ не можа́хꙋ.
ꙗ҆́ко мо́ре въсхожда́ше и҆ въстаа́ше па́че на́ нѧ.
и҆ възъпи́ша къ гв҃и, и҆ рѣша, ника́коже г҃и да не поги́бнемъ дш҃а ра́ди чл҃ка сего, ника́коже до на́съ кро́вь правди́ва, занѐ т̂ы г҃и ꙗ҆́коже въсхотѣ сътворѝ·

И҆ взѧ́ша і҆ѻ́нꙋ и҆ въврь́гоша и҆̀ в мо́ре.
и҆ ѹ҆ста̀ море ѿ влъне́нїѧ свое҆го.
и҆ ѹ҆боѧ́шасѧ мꙋжи бо́ѧз̑нїю вели́кою г҃а, и҆ положи́ша тре́бы гв҃и и҆ моли́шасѧ мл҃твою·

Глв̑҇а, в҃·

Повелѣ̀ г҃ь ки́тꙋ вели́комꙋ пожрѣти і҆ѻ́нꙋ.
и҆ бѣ̀ і҆ѻ́на въ чре́вѣ ки́товѣ три дн҃и и҆ три но́щи·

И҆ моли́сѧ і҆ѻ́на къ г҃ꙋ б҃ꙋ свое҆мꙋ въ чре́вѣ ки́товѣ, и҆ рече·

Възъпи́хъ въ печа́ли мое́и къ г҃ꙋ б҃ꙋ мое҆мꙋ, и҆ ѹ҆слы́ша м̂ѧ.
и҆с чре́ва а҆дова во́пль мои, ѹ҆слы́ша глс̑҇а мои.
ѿвръже м̂ѧ въ глꙋбинꙋ̀ срд̑ца мор꙽скаго, и рѣки ѻ҆быдо́ша м̂ѧ.
вс̂ѧ высоты твоа и҆ влъны̀ твоѧ по мн̂ѣ преи҆до́ша·

и҆ а҆зъ рѣхъ, ѿри́нꙋхсѧ ѿ ѻчїю твое́ю.
приложꙋ ли ѹ҆бо при́зрѣти м̂и къ цр҃кви ст҃еи твое́и.
възлїасѧ на́ мѧ вода̀ до дш҃а мое҆ѧ, бе́здна ѻ҆бы́де мѧ послѣднѧѧ.
понретъ глава̀ моѧ въ про́пасти го́рьскїѧ.
снидо́хъ въ зе́млю е́йже вереѧ̀ и҆ закле́пи вѣчнїи.
и҆ да и҆зы́детъ и҆зъ и҆стлѣ́нїѧ живо́т꙽ мои к тебѣ г҃и б҃е мои.
е҆гда̀ скончева́шесѧ ѿ мене дш҃а моѧ, г҃а помѧнꙋхъ.
и҆ да прїидетъ к тебѣ̀ моли́тва моѧ, къ цр҃кви ст҃еи твое́й·

хранѧ́щеи сꙋе҆тнаѧ и҆ лжꙋ̀, млс̑҇ть свою ѻ҆ста́виша.
а҆зъ же съ гла́сомъ хвале́нїѧ і҆ и҆сповѣданїѧ пожрꙋ̀ тебѣ.
е҆ли́ко ѻ҆бѣща́хъ възда́мъ тебѣ, на сп҃сенїе мое гв҃и·

И҆ повелѣ̀ г҃ь кі́тови і҆ и҆зве́рже і҆ѻ́нꙋ на сꙋхо·

Глв̑҇а, г҃·

И бы́сть сло́во гн҃е къ і҆ѻ́нѣ второ́е, гл҃ѧ, въста́ни і҆ и҆дѝ в꙽ ниневїю град̑ вели́кїи и҆ проповѣждь в немъ по проповѣда́нїю прь́вомꙋ е҆же а҆зъ рѣхъ к тебѣ·

И҆ въста̀ і҆ѻ́на и҆ вниде въ нинев꙽вїю ꙗ҆́коже гл҃а г҃ь·

Нинев꙽вїи же бѣа́ше гра́дъ вели́къ б҃ꙋ ꙗ҆́коже трїи дн҃ъ пꙋть.
и҆ нача̀ і҆ѻ́на въходи́ти въ градъ ꙗ҆́ко хожде́нїе дн҃и е҆ді́наго.
и҆ проповѣда̀ и҆ рече, е҆ще три дн҃їе, и҆ нинев꙽вїи расы́плетсѧ·

И҆ вѣ́роваша мꙋжїе нинев꙽вит̑стїи бв҃и.
и҆ заповѣда́ша а҆лка́нїе, и҆ ѻ҆блеко́шасѧ въ врѣтища ѿ малых̑ и҆ до вели́кихъ·

И҆ до́иде сло́во до цр҃ѧ нинев꙽ви́т꙽ска.
и҆ въста цъ стола̀ свое҆го, и҆ све́рже ри́зы своѧ с꙽ себе, и҆ ѻ҆блече́сѧ въ врѣтище и҆ сѣде на землѝ.
и҆ заповѣдасѧ и҆ рече ѿ цр҃ѧ в꙽ нинев꙽вїи и҆ ѿ дрꙋговъ е҆го, гл҃юще·

чл҃цы, и҆ ско́т꙽, говѧда, и҆ ѻ҆вца да не вкꙋсѧтъ ничесо́же·

ни да паст̑ꙋсѧ ни воды̀ да пїютъ.
и҆ ѻ҆блекошасѧ въ врѣтища чл҃цы же и҆ ско́ти, и҆ възъпи́ша къ б҃ꙋ продлъжа́юще.
и҆ ѻ҆брати́сѧ кожд̑о ѿ пꙋтѝ злобы своеѧ и҆ ѿ непра́вды ꙗ҆же в рꙋкꙋ е҆го, гл҃ще.
кт̂о вѣсть раска́ет ли сѧ, и҆л̂и ѹ҆молитсѧ б҃ъ, и҆ ѿврати́тъ гнѣвъ ꙗ҆́рости своеѧ, да не поги́бнемъ·

И҆ ви́дѣ б҃ъ дѣлеса̀ и҆хъ, ꙗ҆́ко ѻ҆брати́шасѧ ѿ пꙋтїи свои҆хъ злы́хъ·

и҆ раска́ѧсѧ б҃ъ ѻ҆ злобѣ ю́же гл҃а сътори́ти и҆мъ и҆ не сътворѝ·

Глв̑҇а, д҃·

И съжали с̂и і҆ѻ́на жа́лобою вели́кою, и҆ смѧте́сѧ.
и҆ моли́сѧ къ гв҃и, и҆ рече.
ѽ г҃и, не се́ ли ѹ҆бо словеса̀ моѧ бѣша е҆ще сꙋщꙋ м̂и на землѝ мое́и.
сего ради варих̑ бѣжати въ ѳарсис̑҇, занѐ разꙋмх̑ѣ ꙗ҆́ко млс̑҇тив꙽ ты е҆си и҆ щедръ, и҆ тер꙽пеливъ, и҆ многомлс̑҇тив꙽, и҆ раска́ѧисѧ ѻ҆ зло́бах̑ чл҃ческахъ.
и҆ н҃нѣ влд̑ко г҃и възмѝ дш҃ꙋ мою ѿ менѐ, ꙗ҆́ко ѹ́не м̂и ѹ҆мрѣти неглѝ жи́ти·

И҆ рече г҃ь къ і҆ѻ́нѣ, почт̂о ѕѣло ѹ҆бо раз꙽жали с̂и.
і҆ и҆зы́де і҆ѻ́на и҆з гра́да, и҆ сѣде прѧ́мо гра́дꙋ.
и҆ сътворѝ себѣ кꙋщꙋ и҆ сѣдѧ́ше под̑ нею в сѣни дон꙽деже ви́дитъ чт̂о бꙋдетъ гра́дꙋ.
и҆ повелѣ г҃ь б҃ъ ты́квѣ, и҆ възни́че над̑ главо́ю і҆ѻ́нѣ, да бꙋдетъ сѣнь над̑ главо́ю е҆мꙋ ѻ҆сѣни́ти и҆̀ ѿ зазлѣ́нїи е҆го.
и҆ ѻ҆бра́довасѧ і҆ѻ́на ѻ҆ ты́квѣ ра́достїю вели́кою.
и҆ повелѣ̀ б҃ъ чрь́ви ѹ́тренемꙋ наѹ́трїѧ, и҆ под̑ѧдѐ ты́квꙋ и҆ ѹ҆с꙽ше·

И҆ бы́сть е҆гда възы́иде слн҃це, повелѣ̀ б҃ъ вѣтрꙋ зно́инꙋ жегꙋщꙋ.
и҆ приразѝ слн҃це на главꙋ̀ і҆ѻ́нинꙋ, и҆ ѿнемога́шесѧ.
и҆ ѿчаѧва́шесѧ дш҃а свое́ѧ, и҆ рече, ѹ́не м̂и ѹ҆мрѣти негли жи́ти.
и҆ рече г҃ь б҃ъ къ і҆ѻ́нѣ, ѕѣло л̂и с̂и жали́ши по ты́квѣ.
и҆ рече і҆ѻ́на, ѕѣло с̂и жалю̀ и҆ до смр҃ти.
и҆ рече г҃ь, ты̀ ѹ҆бо поскорбѣ̀ по ты́квѣ ѻ҆ не́иже нѣ́си сѧ трꙋди́лъ, ни въскорми́лъ еѧ̀.
быс̑҇ ѻ҆бнощъ, и҆ поги́бе ѻ҆бнощъ.
а҆ аз̑ л̂и не пощажд̑ю нинев꙽вїѧ гра́да вели́каг̑҇, в немже живꙋтъ мно́жае двоюна́десѧте те́мъ чл҃кь, и҆же не позна́ша десница̑ своеѧ ни шꙋи́ца их̑, и҆ ско́ти и҆хъ мно́ѕи·

Коне́цъ пророкꙋ, і҆ѻ́нѣ·

и́мать в себѣ̀, глв̑҇а, д҃·