МИХЄ́Ѧ ПРО҃РКЪ
ГЛАВА̀ ПЄр̑ВАѦ
Сло́во гн҃е и҆же бы́сть къ михе́ѻви морасѳи́тинꙋ, въ дн҃и і҆ѻ҆а҆ѳам̑ли, и҆ а҆ха́зовы, і҆ е҆зекїины цр҃ь і҆ѹ́динъ.
и҆х꙽же ради видѣ ѻ҆ самарїи, и҆ ѻ҆ і҆ерс̑҇лимѣ·
Слы́шите лю́дїе вс̂и словеса̀, и҆ внемлѝ зе́мле и҆ вс̂и и҆же на не́и.
и҆ бꙋ́детъ г҃ь въ вас̑҇ въ послꙋшествова́нїе, г҃ь ѿ до́мꙋ свое҆го ст҃го.
и҆м꙽же се г҃ь и҆схо́дит̑ ѿ мѣста свое҆го.
и҆ сни́дет̑, и҆ настꙋ́питъ на высоты зе́мныѧ.
и҆ поколѣ́блютсѧ го́ры под̑ ни́мъ, и҆ раздо́ли раста́ютсѧ ꙗ҆ко во́скъ ѿ лица̀ ѻ҆гню, и҆ ꙗ҆́ко вода̀ сходѧ́щи по го́рь.
бесче́стїѧ ради і҆а́ковлѧ вс̂е сѐ, и҆ грх̑ѣ ра́ди до́мꙋ і҆и҆л҃ва.
чт̂о бесче́стїе до́мꙋ і҆а́ковлю, не самарїѧ л̂и ѹ҆бо.
чт̂о грѣ́хъ до́мꙋ і҆ѹ́динꙋ, не і҆ерс̑҇лимъ л̂и ѹ҆бо.
и҆ положꙋ самарїю въ стра́жбꙋ ѻ҆́вощꙋ по́л꙽скомꙋ и҆ в сад̑ виногра́дꙋ, и҆ развергꙋ въ про́пасть камы́ки е҆ѧ̀, и҆ ко́ренїе е҆ѧ̀ ѿкры́ю.
и҆ всѧ и҆зваѧ́ныѧ е҆ѧ̀ съкрꙋшат꙽, и҆ всѧ па́пьды е҆ѧ̀ запа́лѧт̑ ѻ҆гне́мъ, и҆ всѧ кꙋми́ры е҆ѧ̀ положꙋ въ пагꙋбꙋ.
поне́же ѿ наи҆ма блд̑ꙋница събра̀, и҆ ѿ наи҆ма влд̑ꙋница съврати·
Сего ради възрыдает̑ и҆ въсплачет̑сѧ, и҆ по́иде боса и҆ нага.
сътво́ритъ плач̑҇ а҆ки ѕмїевъ, и҆ печа́ль а҆ки дще́рь сѷри́н꙽скь.
ꙗ҆́ко ѻ҆бы́иде ꙗ҆́зва е҆ѧ̀ и҆ прїиде до і҆ѹ́ды, и҆ присѧ́же до вра́тъ людїи мои҆хъ до і҆ерс̑҇лима·
И҆же въ ге́ѳѣ не възвелича́итесѧ, і҆ и́же въ а҆кѷмѣ не съгражд̑аите и҆з до́мꙋ смѣшнаго, прьстїю посы́плетесѧ на посмѣѧ́нїе ваше.
всели́вшїѧсѧ до́брѣ разорю град̑ е҆ѧ̀.
не и҆зы́идетъ живꙋщїѧ въ е҆на́нь пла́катисѧ дом꙽ и҆ и҆мѣ́ющь е҆ѧ̀ прїиметъ ѿ вас̑҇ ꙗ҆́звꙋ бо́лѣзнїи.
кт̂о нача въ бл҃гости, вселившїисѧ бо́лѣзни, ꙗ҆́ко сни́де ѕл̂о ѿ г҃а на вра́та і҆ерс̑҇лимлѧ.
шꙋмъ ѻ҆рꙋ́жїѧ и҆ кон꙽никъ живꙋщимъ в лахїи, нача́лникъ грѣхꙋ т̂а е҆сть дще́ри сїѻ́ни, ꙗ҆́ко в тебѣ ѻ҆брѣто́шасѧ бесче́стїѧ і҆и҆л҃ева·
Сего ра́ди даси ѿпꙋща́емыѧ до прича́стїѧ ге́ѳова до́мы сꙋ́ѧ.
до́мове сꙋ́ии вътще бы́ша цр҃емъ і҆и҆л҃евомъ..
до́ндеже приведꙋ прича́сники твоѧ живꙋщаѧ в лахи́сѣ, да́же до ѻ҆дола́ма прїидетъ сла́ва дщери сїѻ́ни ѻ҆бръсни́сѧ и҆ ѻ҆стризи по ча́дѣхъ своихъ младыхъ, раз꙽шири ѻбръсненїе твое ꙗ҆́ко ѻ҆релъ, ꙗ҆́ко плѣне́ни бы́ша ѿ тебѐ·
Глв̑҇а, в҃·
Бы́ша помышлѧ́юще трꙋды, и҆ дѣ́лающимъ злаѧ в ло́жих̑ свои҆хъ, и҆ досвѣта съвръша́хꙋть е҆̀.
и҆м꙽же възвд̑иго́ша къ б҃ꙋ рꙋцѣ свое҆ѧ ю҆́ности, и҆ помышлѧ́хꙋ на се́ла, и҆ граблѧ́хꙋ си́роты, и҆ до́мы ѿи҆махꙋ.
и҆ въсхитахꙋ мꙋж́а, и҆ до́мъ е҆го, мꙋж́а и҆ прича́стїе е҆го·
Сего ради се гл҃етъ г҃ь, се а҆зъ помышлѧ́ю на племѧ се ѕл̂о, ѿ негоже не под̑вигнете вы́и вашихъ, и҆ не по́идете прости вънеза́пь ꙗ҆́ко врѣ́мѧ ѕл̂о е҆сть·
В то́и дн҃ь прїиметсѧ на́ вы прит꙽ча, и въспла́четсѧ пла́чь съ гла́сомъ, гл҃ющемъ, стра́сть пострада́хом̑.
ча́сть людїи мои҆хъ и҆змѣрисѧ ю҆́жем̑, и҆ не бы̀ кт̂о ставѧ е҆го ꙗ҆́ко възврати́тисѧ, се́ла ваша размѣри́шасѧ.
сего ради не бꙋ́детъ тебѣ въмещꙋщаго ю҆́же въ прича́стїе въ со́ньмѣ гн҃и·
Не пла́читесѧ слеза́ми ни слези́те с̂и ѻ҆ семъ, не ѿвержетъ б̂о ѹ҆кори́зны.
гл҃ѧи до́мъ і҆а́ковль, рагнѣва дх҃ъ гн҃ь, а҆ще сꙋть начат̑цы е҆го, не сꙋть ли ѹ҆бо словеса е҆го добра с ни́мъ и҆ про́ста и҆схо́дѧтъ.
и҆ проти́вꙋ лю́дїе мои съпротиви́шасѧ на вра́ждꙋ съпроти́въ ми́рꙋ е҆го.
ко́жꙋ е҆го ѻ҆дра́ша ѿꙗ҆́ти ѹ҆пова́нїе съкрꙋше́нїе ра́тное·
Сего ради старѣ́ишины людїи мои҆хъ и҆зве́ргꙋтсѧ и҆з домо́въ пи́ща и҆хъ, злыхъ ради нача́токъ и҆хъ ѿри́нꙋшасѧ.
приближи́тесѧ горахъ вѣчныхъ·
Въстанѣте поидѣте ꙗ҆́ко нѣсть вамъ с̂е поко́и.
нечистоты ра́ди и҆стлѣ́сте тлѣнїем̑, прогна́стесѧ ники́м же гони́ми·
дꙋхъ поста́ви л꙽жꙋ, нака́пи тебѣ вино̀ и҆ пїанъство.
и҆ бꙋдетъ ѿ ка́плѧ людїи мои҆хъ, събира́емъ събере́тсѧ і҆а́ковъ съ всѣми.
пожида́ѧ пождꙋ̀ ѻ҆ста́вшихъ і҆и҆л҃евъ.
въкꙋпѣ положꙋ̀ възвраще́нїе и҆хъ а҆ки ѻ́вца въ пꙋсты́ни, и҆ ꙗ҆́ко па́ствꙋ средѣ ло́жа и҆хъ, и҆стекꙋтъ ѿ чл҃къ.
възы́иде просѣче́нїемъ пред̑ лице́мъ их̑, просѣко́ша и҆ прои҆до́ша вра́та, и҆ прои҆до́ша и́ми.
і҆ и҆зы́иде цр҃ь и҆хъ пред̑ ни́ми, г҃ь же во́ждъ и҆хъ·
Глв̑҇а, г҃·
И рече́тъ, слы́шите с̂е вла́сти і҆а́ковлѧ, и҆ ѻ҆ста́вшїи до́мꙋ і҆и҆л҃ѧ, не ва́мъ л̂и ѹ҆бо е҆сть разꙋмѣти сꙋд꙽.
ненави́дѧщеи добра̀, а҆ възы́щꙋщеи зл̂а.
схита́ющеи ко́жа и҆хъ с нихъ, и҆ пло́ть и҆хъ ѿ ко́сти и҆хъ.
н̂о ꙗ҆коже ѻ҆бъꙗ҆ша пло́ть людїи мои҆хъ, и҆ ко́жꙋ и҆хъ ѿ ко́сти их̑ ѻдра́ша, и҆ ко́сти и҆хъ стол꙽ко́ша, и съдроби́ша ꙗ҆́ко пло́ть в коно́бъ, и҆ ꙗко мѧ́са в ла́ткꙋ.
та́коже възъпїютъ къ гв҃и и҆ не послꙋшае҆тъ и҆х꙽, и҆ ѿврати́тъ лицѐ свое ѿ нихъ в т̂о вре́мѧ.
поне́же съзли́ша в нача́тцх̑ѣ и҆хъ на́ нѧ·
Се̂ гл҃етъ г҃ь до прро̑҇къ льстѧ́щихъ лю́ди моѧ, хаплющих̑ ѧ҆̀ зꙋбы̀, и҆ проповѣдающихъ на́ нѧ ми́ръ, и҆ не вда́сѧ въ ѹ҆ста̀ и҆хъ въста́виша на́ нѧ ра́ть·
Сего ра́ди но́щь бꙋдетъ вамъ ѿ видѣнїѧ, и҆ тма̀ бꙋдет꙽ вамъ ѿ влъхвова́нїа.
и҆ за́идетъ слн҃це на про̑҇рки, и҆ помръкнетъ на́ нѧ дн҃ь.
и҆ срамѧ́тсѧ ви́дѧщеи сны̀, и҆ ѻ҆брꙋга́ютсѧ вол꙽сви.
и҆ догл҃ютъ до ни́хъ вс̂и сїи, занѐ не бꙋдетъ послꙋшаѧ́й и҆хъ.
а҆ще а҆зъ не наплъню си́лы дх҃омъ гн҃имъ, и҆ сꙋдомъ и҆ си́лою.
ꙗ҆́ко и҆звѣсти́ти і҆а́ковꙋ бесче́стїе е҆го, и҆ і҆ил҃еви грѣх꙽ е҆го·
Слы́шите с̂е старѣ́ишины до́мꙋ і҆а́ковлѧ, и҆ ѻ҆ста́вшїи до́мꙋ і҆и҆л҃ева.
гнꙋша́ющеисѧ сꙋда, и҆ вс̂е пра́вое развраща́ющеи.
възгражда́ю҆щеи сїѻ́на кро́вьми, и҆ і҆рс̑҇ли́ма непра́вдами·
Старѣ́ишины е҆го на м꙽здѣ̀ сꙋжда́хꙋ, и҆ жръцы̀ е҆го на взѧ́тїи ѿвѣщава́хꙋ, и҆ про̑҇рцы е҆го на сребрѣ влъхвова́хꙋ.
и҆ къ гв҃и не почива́хꙋ гл҃юще, е҆да̀ л̂и г҃ь в на́съ, не прїидетъ ѕло̀ на́ ны·
Сего ради васъ дѣлѧ ꙗ҆ко и҆ ни́ва разоре́тсѧ съѻ́нъ, и҆ і҆рс̑҇ли́мъ ꙗ҆́ко стражба̀ пд̑ꙋческа бꙋдетъ, и҆ гора̀ до́мꙋ ꙗ҆́ко и҆ лꙋгъ дꙋбрав꙽скь·
Глв̑҇а, д҃·
И бꙋдетъ въ послѣднѧѧ дн҃и ꙗ҆вле́на гора̀ гн҃ѧ ѹ҆гото́вана над̑ връхѝ гръными, и҆ възнесе́тсѧ выше хол꙽мь, и҆ потща́тсѧ к не́и лю́дїе, и҆ прїидꙋтъ к неи страны̀, и҆ рекꙋтъ.
грѧдѣте да възы́идем꙽ на горꙋ̀ гн҃ю, и҆ в до́мъ б҃а і҆а́ковлѧ.
и҆ покажꙋтъ на́мъ пꙋть е҆го, и҆ по́идемъ по пꙋтем̑ е҆го·
Ꙗ҆́ко ѿ сїѻ́на и҆зы́идет꙽ закон̑҇, и҆ сло́во гн҃е и҆зъ і҆ерс̑҇лима.
и҆ рас꙽сꙋдит̑ средѣ людїи мно́гь, и҆ нака́жетъ страны̀ крѣпки до землѧ̀ да́лнѧѧ·
И раскꙋю́тъ ѻ҆рꙋжїѧ своѧ на ра́ла, и сꙋ́лица своѧ на сръпы̀.
не възмꙋт꙽ лю́дїе противꙋ лю́демъ меча̀, и҆ не наѹ҆ча́тсѧ ксемꙋ̀ вое҆ва́ти·
И҆ почїетъ ко́ждо под̑ лозо́ю свое́ю, и҆ ко́жд̑о под̑ смоко́вїю свое́ю, и не бꙋдетъ постраша́ющаго.
занѐ ѹ҆ста̀ гн҃ѧ вседръжи́телѧ гл҃аже с̂е.
ꙗ҆́ко вс̂и лю́дїе по́идꙋт ко́ждо въ пꙋть свои, а҆ мы̀ по́идем꙽ въ и҆мѧ г҃а б҃а на́шего, въ вѣкъ и҆ про́че та́мо·
Въ то́и дн҃ь гл҃етъ г҃ь, съберꙋ̀ съкрꙋше́ннꙋю, и҆ ѿврьженꙋю прїимꙋ̀ е҆ѧже ѿринх̑ꙋ.
и҆ положꙋ̀ съкрꙋше́ннꙋю въ ѻ҆ста́нокъ и҆ ѿврьженꙋю въ странꙋ̀ крѣп꙽кꙋ.
и҆ црс̑҇твꙋ́етъ г҃ь в нихъ в горѣ̀ сїѻ́нѣ, ѿ нн҃ѣ и҆ въ вѣкъ·
Ты́ же сто́лпе па́ствы м꙽гле́нъ дщ̂и сїѻ́нѧ к тебѣ̀ прїидетъ, и҆ внидетъ вла́сть прьваѧ црс̑҇тво и҆з вавѷло́на дще́ри і҆ерс̑҇ли́мли·
И҆ н҃нѣ въскꙋю позна̀ ѕл̂о.
не бѣ́ лли тебѣ цр҃ѧ.
и҆л̂и совт̑ѣ твои погиба́ше.
ꙗ҆ко ѻ҆быидо́ша т̂ѧ бо́лѣзни ꙗ҆́ко ражда́ющїѧ.
претръпева́и и҆ крѣпи́сѧ, и҆ приближа́исѧ дщ̂и сїѻ́нѧ ꙗ҆́ко ражда́ющїѧ.
занѐ н҃нѣ и҆зыидеши и҆з гра́да и҆ ѹ҆сли́шисѧ на́ поли, и҆ до́идеши вавѷло́на.
ѡтт̑ꙋ́дꙋ ѿи҆метъ т̂ѧ, и҆ ѿтꙋдꙋ и҆зба́витъ т̂ѧ г҃ь б҃ъ твои ѿ рꙋкъ вра́гъ твои҆хъ.
и҆ н҃нѣ събра́шасѧ на тѧ страны̀ мно́ги, глющеи, пора́дꙋемсѧ, и҆ позрѣ́чете по сїѻ́нꙋ ѻ́чи на́ши.
сїи же не разꙋмѣша помышле́нїѧ гн҃ѧ, и҆ не домы́слишасѧ совѣта е҆го, ꙗ҆́ко не събра̀ и҆хъ а҆ки снопо́въ гꙋме́нныхъ·
Въста́ни и҆зве́рзи ѧ҆̀ дщ̂и сїѻнѧ, ꙗ҆́ко ро́ги твоѧ положꙋ̀ желѣ́зны, и҆ но́гти па́зногти твоѧ̀ мѣ́дѧны.
и҆ ѻ҆тон꙽чи́ши лю́ди мно́ги, и҆ възло́жиши гв҃и мно́жество и҆хъ, и҆ крѣпость их̑ гв҃и всеѧ̀ землѧ̀·
И҆ н҃нѣ ѻ҆градит̑сѧ дщ̂и е҆фрѣмова ѻ҆гражде́нїем̑.
ра́ть ѹчиню̀ на вы, желзло́мъ поразитъ за че́люсть пле́мена і҆и҆л҃ева·
Глв̑҇а, е҃·
И т̂ы виѳлеѻ́ме до́ме е҆фра́ѳа̑ е҆да̀ мал̑҇ е҆си т̂ы ꙗ҆́коже быти в ты́сꙋщахъ і҆ѹ́диныхъ·
ѿ тебе б̂о мн̂ѣ и҆зы́идетъ старѣишина ꙗ҆́ко бы́ти въ кнѧж꙽ство въ і҆и҆л҃и, и҆сходи же е҆го и҆ско́ни дн҃їи вѣ́чныхъ·
Сего рад̑и̑ дасть ѧ҆̀ до вре́мене, ражда́ющаѧ ро́дитъ.
и҆ ѻ҆ста́вшеи бра́тїѧ и҆хъ възвратѧт̑сѧ къ сн҃омъ і҆и҆л҃евомъ.
и҆ ста́нетъ и҆ ѹ́зритъ, и҆ ѹ҆пасетъ па́ствꙋ свою съ крѣпостїю г҃ь.
и҆ въ сла́вꙋ и́мени г҃а б҃а томꙋ бꙋдꙋтъ.
занѐ нн҃ѣ възвели́читсѧ до конець землѝ.
и҆ бꙋдетъ се́и ми́ръ.
е҆гда̀ а҆сѷръ прїидетъ на зе́млю ва́шꙋ, и҆ е҆гда̀ възы́детъ на странꙋ̀ ва́шꙋ·
и҆ въста́нꙋтъ на́нь се́дмь пастꙋхъ и҆ ѻ́смь ꙗ҆́звъ чл҃чскь.
и҆ ѹ҆пасꙋтъ а҆сѷра ѻ҆рꙋ́жїемъ, и҆ зе́млю невро́довꙋ ко́пїѧми еѧ̀.
і҆ и҆зба́витъ ѿ а҆сѷра е҆гда прїидетъ на зе́млю ва́шꙋ, и҆ е҆гда въстꙋпит̑ на предѣлы ва́ша.
И҆ бꙋдетъ ѻ҆ста́нокъ і҆а́ковль въ страна́хъ сре́дѣ людїи мно́гъ а҆ки роса̀ ѿ г҃а па́дающи, и҆ ꙗ҆́ко а́гньцы на садѣ̀, ꙗ҆́коже да не събере́тсѧ ни е҆ді́нъ, ни сътръпи́тъ въ сн҃охъ чл҃честѣхъ·
И҆ бꙊдетъ ѻ҆станок̑҇ і҆а́ковль въ страна́хъ средѣ людїи мно́гъ а҆ки ле́въ въ ско́тѣхъ въ дꙋбра́вѣ, и҆ ꙗ҆́ко льви́чищъ въ ста́дѣхъ ѻ́вчїихъ.
ꙗ҆́коже е҆гда про́идетъ и҆ ѿлꙋчи́въ въсхи́тить, и҆ не бꙋдет̑ ѿи҆ма́ющаго.
възнесе́тсѧ рꙋка твоѧ на сожалѧ́ющаѧ тебѣ, и҆ вс̂и вра́зи твоѝ потребѧ́тсѧ·
И҆ бꙋдет̑ в тои дн҃ь гл҃етъ г҃ь, потреблю̀ ко́нѧ твоѧ и҆с꙽ сре́ды твоеѧ, и҆ погꙋблю̀ ѻ҆рꙋжїе твое, и҆ потреблю̀ гра́ды ѿ землѧ̀ твоеѧ, и҆ разве́ргꙋ вс̂ѧ тве́рди твоѧ.
и҆ ѿврь́гꙋ влъхвова́нїѧ ѿ рꙋкꙋ твоею, и҆ влъхвꙋющїи не бꙋдꙋт꙽ в тебѣ̀.
и҆ потреблю̀ и҆зваѧ́н꙽ныѧ твоа, и҆ кꙋми́ры твоѧ и҆с꙽ среды тебе.
и҆ посемъ да сѧ не поклониши дѣлесем̑ рꙋкꙋ твоею.
и҆ посѣкꙋ̀ лꙋги средѣ тебе, и҆ погꙋблю̀ гра́ды твоѧ.
и҆ сътворю̀ съ гнѣ́вомъ и҆ съ ꙗ҆́ростїю месть страна́мъ, поне́же не послꙋшаша·
Глв̑҇а, ѕ҃·
Слы́шите е҆гоже ради гл҃а г҃ь.
въста́ни, и҆ съприсѧ съ гора́ми, и҆ да слы́шат̑ хо́лми глас̑҇ твои·
Слы́шите хо́лми сꙋдъ гн҃ь, и҆ де́бри по́жди земльнїи.
ꙗ҆́ко сꙋдъ гн҃ь къ лю́дем꙽ е҆го, и҆ съ і҆и҆л҃емъ съпритсѧ·
Лю́дїе моѝ чт̂о сътвори́хъ вамъ.
чим̑ л̂и васъ ѻ҆скорби́хъ.
чи́м ли в̂ы стꙋжи́хъ.
ѿвѣщаите м̂и.
зане лѝ и҆зведохъ т̂ѧ из̑ землѧ̀ е҆гѷпет꙽ски, і҆ и҆з до́мꙋ работы̀ и҆зба́вихъ т̂ѧ, и҆ пꙋсти́хъ пред̑ тобо́ю моѷсїѧ, и҆ а҆а҆ро́на, и҆ марїа́мъ<.>
Лю́дїе моѝ помѧнѣте ѹ́бо чт̂о совѣща̀ на́ вы валаа́къ цр҃ь моа҆ви́т꙽скь, и҆ чт̂о е҆мꙋ ѿвѣща̀ валаа́мъ сн҃ъ веѻ́ровъ ѿ сести́ма до галга́лъ, ꙗ҆́ко да позна́е҆тсѧ пра́вда гн҃ѧ·
ѻ҆ че́мъ пости́гнꙋ г҃а.
срѧ́щꙋ б҃а мое҆го вы́шнѧго.
а҆ще срѧ́щꙋ и҆̀ съ всесъжеже́нїемъ те́лцы лѣтошними.
а҆ще прїимет̑ г҃ь ѿ ты́сѧщъ ѻ́венъ, и҆л̂и ѿт̑ те́мъ ко́злищъ тꙋченъ.
а҆ще дамъ пръве́нца моѧ за бесче́стїѧ моѧ.
плод̑ ѹ҆тробы мое́ѧ за грѣхѝ дш҃а моеѧ.
а҆ще и҆звѣсти́сѧ тебѣ чл҃че чт̂о добро̀, и҆л̂и чесо г҃ь про́ситъ ѿ тебѐ.
н̂о е҆же твори́ти сд̑ꙋ и҆ люби́ти млс̑҇ть, и҆ гото́вꙋ бы́ти ꙗ҆коже по́ити съ гм҃ъ бм҃ъ твои҆мъ·
Гла́съ гн҃ь гра́дꙋ призове́тсѧ, и҆ сп҃сетъ боѧ́щаѧсѧ и́мени е҆го.
послꙋшаи племѧ̀, кт̂о ѹ҆бо ѹ҆кра́ситъ гра́дъ, е҆да̀ ѻ́гнь, и҆л̂и домъ безако́нныхъ събира́ѧ и҆мѣнїѧ безако́нїѧ, и҆ съ ѹ҆кори́зною непра́вдꙋ·
и҆ а́ще ѻ҆правди́тсѧ въ мѣрахъ безако́нникъ, и҆ въ врѣтищи мѣры лꙋка́выѧ.
ѿ них же богат꙽ство и҆хъ бесче́стїѧ наплъниша, и҆ живꙋщеи в неи гл҃ахꙋ лжꙋ̀, и҆ ꙗ҆́зы́къ и҆хъ възнесе́сѧ въ ѹ҆стех̑ и҆хъ·
И҆ а́зъ начнꙋ̀ поража́ти т̂ѧ и҆ погꙋблю̀ т̂ѧ грѣхѝ твои҆ми.
т̂ы ꙗ҆сѝ и҆ не насы́тишисѧ, и҆ ѿри́нꙋ т̂ѧ тобо́ю.
и҆ съврати́шисѧ, и҆ не и҆збꙋдеши.
и҆ е҆ли́ко и҆хъ а҆ще и҆збꙋ́детъ ѻ҆рꙋжїю сѧ предадѧт꙽·
Ты̀ сѣ́еши, н̂о не по́жнеши.
т̂ы и҆з꙽гнете́ши масли́чїе, н̂о не пома́жешисѧ ма́слом̑.
и҆ наса́дите вино̀, и҆ не и҆спїете вина̀ того.
и҆ поги́бнꙋтъ зако́ни людїи мои҆хъ.
снабдѣша б̂о ѻ҆правле́нїѧ зам꙽брїина, и҆ вс̂ѧ дѣлеса̀ до́мꙋ а҆ха́влѧ.
и҆ походи́сте въ совѣтехъ и҆х꙽ ꙗ҆́коже преда́ти в꙽ пагꙋбꙋ, и живꙋщаѧ в не́и въ звизда́нїе, и҆ ѹ҆кори́зны люд̑ски прїимете·
Глв̑҇а, з҃·
Ѹ лю́те мн̂ѣ, быхъ а҆ки събираѧ́й сла́мꙋ на жа́твѣ и҆ ꙗ҆́ко па́родокъ въ и҆ма́нїи.
не бы́вшꙋ гро́знꙋ ꙗ҆́ко ꙗ҆́сти прьвоплод̑ныѧ ꙗ҆́же въжделѣ̀ дш҃а моѧ·
Ѹ҆҇ лю́те мн̂ѣ дш҃е ꙗ҆́ко поги́бе боѧзнивыи съ землѧ̀, і҆ и҆справлѧ́ющаго въ чл҃цехъ нѣсть.
вс̂и въ кро́вехъ прѧ́тсѧ, ко́ждо и҆х꙽ по́дрꙋгꙋ свое҆мꙋ залѧет̑, на ѕло́бꙋ рꙋцѣ и҆хъ ѹ҆готовлѧ́ютъ.
кн҃ѕь проситъ, и҆ сꙋдїи ми́рнаѧ словеса̀ гл҃ѧ, а҆ по́мыслъ дш҃а е҆го ле́сть.
и҆ ѿи҆мꙋ бл҃гости их̑.
ꙗ҆́ко мо́ль ꙗ҆дѧ́и и҆ ходѧ́и въ вре́дѣ въ дн҃ь присѣще́нїѧ ѹ҆҇ лю́те, ѹ҆҇ лю́те, ѿм꙽ще́нїѧ твоѧ приспѣша, н҃нѣ бꙋдꙋтъ пла́чи и҆хъ.
не ѹ҆пова́ите въ дрꙋзх̑ѣ ни надѣитесѧ старѣ́ишинахъ.
и҆ ѿ сожи́телница свое́ѧ хранисѧ сказа́ти е́й чт̂о.
понеже сн҃ъ не чте́т꙽ ѿц҃а, дщи́ же въста́нетъ на мт҃рь свою, и҆ невѣста на све́кровь свою.
вра́зи вс̂и мꙋжи и҆же в домꙋ е҆го·
А҆з же къ гв҃и възрю̀, тръплю̀ къ б҃ꙋ сп҃сꙋ мое҆мꙋ, и҆ ѹ҆слы́шитъ м̂ѧ б҃ъ мои.
да сѧ не пора́дꙋетъ вра́гъ мои ꙗ҆́ко падо́хсѧ, и҆ въста́нꙋ.
занѐ а҆ще сѧ́дꙋ въ тмѣ̀, г҃ь свт̑ѣ мн̂ѣ·
Гнѣвъ гн҃ь тръплю̀ ꙗ҆ко съгрѣших̑ е҆мꙋ, дон꙽деже и҆спра́витъ прю̀ мою и҆ сътво́ритъ ѻ҆сꙋжде́нїе мое, і҆ и҆зведе́тъ м̂ѧ на свѣтъ, и҆ ѹ҆зрю̀ правд̑ꙋ е҆го·
и҆ ѹ́зритъ вра́гъ мои, и҆ ѹ҆смо́тритъ стыдѣнїе гл҃ющи къ мн̂ѣ, гдѣ̀ е҆сть б҃ъ твои.
ѻ́чи моѝ позерца́ета по не́и, нн҃ѣ бꙋдетъ въ попра́нїе а҆ки ка́лъ на пꙋте́хъ въ дн҃и гражде́нїѧ лаи҆нъ.
и҆ ѿврьжет̑ тои дн҃ь зако́ны твоа, и҆ гра́ди твоѝ прїидꙋтъ на поравна́нїе и҆ въ раздѣле́нїе а҆сѷрїиско, и҆ гра́ди твоѝ тве́рдїи въ раздѣле́нїе ѿ тѷра до рѣкѝ а҆сѷрїиски, и҆ ѿ мо́рѧ до́ морѧ, и҆ ѿ горы̀ до горы̀, дн҃ь водѣ̀ и҆ млъвѣ.
и҆ бꙋдетъ землѧ̀ въ па́гꙋбꙋ съ живꙋщими на не́и, ѿ пло́да нача́токъ их̑·
Пасѝ лю́ди своѧ жезлом̑ племѧ̀ свое ѻвца̀ прича́стїѧ твое҆го вселѧ́ющаѧсѧ е҆ді́ны в дꙋбра́вѣ, средѣ кармила попаст̑ꙋ васанити́дꙋ и҆ галаа҆дит̑скꙋ, ꙗ҆́коже и҆ дн̂е вѣка.
и҆ по дне и҆схо́да твое҆го из̑ е҆гѷпта ѹ́зрите чюдеснаа, ѹ́зрѧ страны̀ и҆ ѹ҆срамѧт̑сѧ ѿ всеѧ крѣпости их̑.
рꙋ́цѣ възло́жат̑ на ѹ҆ста̀ их̑ ѹ́ши их̑ ѻ҆гло́хнета.
поли́жт̑ꙋ прьсть ꙗ҆́ко ѕмїѧ плѣжꙋще по́ зем̑ли, смѧтт̑ꙋсѧ ѻ҆бше́ствїем̑ их̑.
ѻ҆ г҃ѣ бѕ҃ѣ на́шем̑ ѹ҆жа́снт̑ꙋсѧ и҆ ѹ҆боѧт̑сѧ ѿ него.
кт̂о б҃ъ а҆ки ты̀ ѿмща́а безако́нїа и҆ престꙋпа́ѧ непра́вд̑ы ѻ҆ста́вшим̑ прича́стїѧ е҆го.
и не ѹ҆дръжа свидѣ́нїе гнѣ́ва свое҆го ꙗ҆ко вольникъ млс̑҇ти ес̑҇.
то́и ѻ҆братит̑ и҆ поми́лꙋетъ н̂ы, и҆ погрꙋзит̑ непра́вды на́ша, и҆ въврьжет꙽ въ глꙋбины мор꙽скїѧ вс̂ѧ грѣхѝ на́ша.
дасѝ и́стин̑҇нꙋ і҆а́ковꙋ, и҆ ми́лость а҆враа́мꙋ ꙗ҆коже е҆си клѧл꙽сѧ ѿц҃емъ нашимъ въ дн҃и прьвыѧ·
Конецъ про̑҇ркꙋ михе́и.
и́мать в себѣ глв̑҇а, з҃·