НАꙊ́МЪ ПРО҃РКЪ

ГЛАВА̀ ПЄр̑ВАѦ

Внѧ́тїе нинев꙽вїино.
кни́ги видѣнїѧ наѹ҆́млѧ е҆л꙽кесе́е҆ва·

Бг҃ъ ревни́въ, и҆ м꙽стѧ́и г҃ь.
съ ꙗ҆́ростїю м꙽стѧ́и г҃ь сꙋпоста́ты е҆го, и҆ ѿм꙽ща́етъ враги е҆го.
г҃ь терпелив꙽ и҆ вели́ка крѣпость е҆го.
и҆ ѻ҆чищаѧ́й не ѻ҆чи́ститъ.
г҃ь сконча́нїемъ и҆ съ трꙋсомъ пꙋть́ е҆го, и҆ ѻ҆блацы прах̑ но́гꙋ е҆го.
запреща́ѧи мо́рю и҆ послꙋшаѧ́й ѐ, и҆ вс̂ѧ рѣки и҆скажа́ѧи.
ѹ҆малѧа́й васанитид̑скаѧ и҆ кар꙽ми́льскаѧ, процвѣта́ющаѧ дꙋбра́вы ѻ҆скꙋдѣша.
го́ры потрѧсо́шасѧ ѿ нег̑҇, и҆ хол꙽ми поколѣба́шасѧ.
и҆ ѹ҆сꙋмнѣсѧ землѧ̀ вс̂ѧ ѿ лица е҆мꙋ, и҆ вс̂и живꙋщеи на не́и.
ѿ лица гнѣ́ва е҆го кт̂о стерпи́тъ, и҆ли кт̂о сѧ съпроти́витъ въ гнѣвѣ ꙗ҆́рости е҆го.
ꙗ҆́рость е҆го раста́етъ вла́сти, и҆ ка́менїе сътресѧ ѿ него̀·

Бл҃гости́въ г҃ь тръпѧ́щим̑ е҆мꙋ въ дн҃ь скорбѣнїѧ, и҆ зна́ѧ боѧ́щаѧсѧ е҆го.
и҆ въ потопѣ пꙋтѝ сконча́нїе сътори́тъ, и҆ въста́ющаѧ враги е҆го проженет̑ тм̂а.
чт̂о помышлѧ́ете къ гв҃и, сконча́нїе сътворит̑, не м꙽ститъ два́жды и҆́ногдою въ скор꙽би·

ꙗ҆ко до ко́ренїа по́схнетъ, и҆ ꙗ҆́ко съгребꙋтъ ѻ҆плитающїѧ, поꙗ҆́стсѧ ꙗ҆́ко тро́сть сꙋхоты̀ пол꙽на, и҆с тебе и҆зы́идетъ.
что помышлѧ́ете до г҃а ѕл̂ѣ, совѣщава́юще съпроти́внаа·

Се гл҃ть г҃ь владѧ́и вода́ми мно́гами, и҆ си́це растꙋ́пѧтсѧ, и҆ слꙋхъ тво́и не ѹ҆слы́шитсѧ ксемꙋ̀·

и҆ нн҃ѣ съкрꙋшꙋ же́злъ е҆го ѿ тебѐ, и҆ съѹ҆́зы твоѧ̀ расы́плю.
и҆ заповѣсть ѻ҆ тебѣ̀ г҃ь, не рас꙽сѣ́етсѧ ѿ и́мени твое҆го к꙽семꙋ̀.
ѿ до́мꙋ бо́га твое҆го потреблю̀ и҆зваа́ныѧ и҆ слїѧ́ныѧ.
положꙋ̀ гро́бъ тво́и ꙗ҆́ко нечестенъ еси с̂е на́ горах̑ но́гы бл҃говѣствꙋ́ющаго и҆ възвѣща́ю҆щаго ми́ръ.
празд̑нꙋи і҆ѹ́до праз̑ники твоѧ̀, ѿда́ждь мл҃твы твоѧ̀.
зане не прило́жатъ ꙗ҆ко про́ити въ ѻ҆бет꙽ша́нїе.
скон̑҇ча́сѧ і҆ и҆зве́ржесѧ·

Глв̑҇а, в҃·

Възыиде в꙽дыха́ѧй въ лице твое ѿе҆́млѧ ѿ ѻ҆скор꙽бленїа.
ѹ҆смотри пꙋть, ѹ҆крѣпи чресла̀, възмꙋжа́и крѣ́постїю ѕѣло.
поне́же ѿврати г҃ь ѹ҆кори́знꙋ і҆а́ковлю ꙗ҆́коже ѹ҆кори́знꙋ і҆и҆л҃евꙋ.
зане сътреса́ющеи сътрѧсоша ѧ҆̀, и҆ лозы их̑ расы́паша.
щи́ты си́лныхъ, ѿ чл҃къ мꙋж́а си́лны и҆гра́ющаѧ въ ѻ҆гни, бръзды ѻ҆рꙋжїѧ и҆хъ въ дн҃ь ѹ҆готова́нїѧ их̑, и҆ кон꙽ницы възмѧтꙋтсѧ на пꙋтех̑, и҆ смѧтꙋтсѧ ѻ҆рꙋжїѧ и҆ сплетꙋтсѧ на стьгнахъ.
ви́дъ и҆хъ ꙗ҆́ко свѣща ѻ҆́гнены, и҆ ꙗ҆́ко молнїа мы́кающасѧ.
и҆ помѧнꙋтъ старѣ́ишины и҆хъ, и҆ пробѣгнꙋтъ дн҃їи, и҆ ѿнемогꙋтсѧ пꙋтїе и҆хъ.
и҆ потщат̑сѧ на забра́ла, и҆ ѹ҆гото́вѧтъ пред̑нѧа̀ страж̑бы их̑·

вра́та град̑наѧ ѿве́рзꙋтсѧ, и҆ црс̑҇тва̑ ѿпадо́ша, і҆ и҆мѣнїе ѿвръзесѧ.
сїи же въсхожд̑а́ше.
и҆ рабы́нѧ еѧ̀ ведѧ́хꙋсѧ ꙗ҆́ко го́лꙋбїе горка́юще въ срд̑цых̑ свои҆хъ.
і҆ нинев꙽вїины ꙗ҆́ко кꙋпель вод̑наѧ воды еѧ̀.
и҆ сїи же бѣжа́ще не ста́ша, и҆ не бѧ́ше ставлѧ́ющаго.
расхита́хꙋ сребро̀, расхитахꙋ зла́то, и не бѧ́ше конца и҆мѣнїѧ еѧ, ѻ҆тѧг꙽чаша па́че всѣхъ сосꙋды и҆зволе́нїа е҆ѧ̀.
и҆ сътрѧсенїе и҆ потрѧсенїе и҆ въски́пѣнїе, и҆ срд̑ца съкрꙋшенїе, и҆ раслабленїе колѣнїю, и҆ бо́лѣзнь по всм̑ѣ чре́сломъ, и҆ лице всѣхъ ꙗ҆́ко ѻ҆полѣнїе ла́точьное·

Гдѣ е҆сть ста́ѧ лев̑҇скаѧ, и҆ па́жить сꙋщаѧ льви́чищем̑.
ка́мо и҆́дет̑ ле́въ, ꙗ҆́ко влѣсти тамо льви́чищь, и҆ не бѧ́ше постраша́ющаг̑҇.
ле́въ въсхити́тъ довлѣ́ющее льви́чищемъ е҆го, и҆ ѹ҆дави ло́вомъ е҆го, и҆ напо́лни лови́твы гнѣздо свое, и҆ ста́ю свою̀ въсхита́нїѧ.

Се а҆зъ на́ тѧ, гл҃етъ г҃ь всемꙋ̀ съдръжи́тель.
и҆ пожегꙋ ды́момъ мно́жества твоѧ̀, и҆ львы твоа̀ поꙗ҆́сть ѻ҆рꙋжїе, и҆ потреблю съ землѧ̀ лови́твꙋ твою̀, и҆ не ѹ҆слы́шат̑сѧ к꙽семꙋ̀ дѣла твоа̀·

Глв̑҇а, г҃·

Ѡ гра́де кро́вьныи, и҆ весь лжив̑҇ по́лнъ непра́вды.
не пои҆́щет̑сѧ лови́тва, въ гла́съ рат̑ныи, и҆ глас̑҇ трꙋса ко́лнаго, и҆ ко́нѧ текꙋща, и҆ ѻ҆рꙋжїѧ шꙋмѧща, и҆ кон꙽ника е҆́дꙋща, и҆ блиска́юща ме́ча, и҆ свита́ющьсѧ щит̑, и҆ мно́жества ꙗ҆́звенъ, и҆ тѧ́жка паденїѧ.
и҆ не бѧ́ше кон꙽ца страна́мъ еѧ̀.
і҆ и҆знемо́гꙋтъ въ тѣлесех̑ и҆хъ ѿ мно́жества блꙋженїѧ еѧ̀.
блд̑ꙋница добра̀ и҆ ѻ҆брадова́на, старѣ́ишина влъхвом̑, продающаѧ страны̀ въ блꙋженїе еѧ̀, и҆ племена въ вол꙽свх̑ѣ еѧ̀·

Се̂ а҆зъ на́ тѧ, гл҃етъ г҃ь б҃ъ всемꙋ̀ съдръжи́тель.
и҆ ѿкры́ю заждь твои къ лицꙋ твое҆мꙋ.
ѻ҆бличю̀ стра́намъ стыдѣнїе твое, и҆ црс̑҇твомъ бесче́стїе твоѐ.
и҆ въз꙽ве́ргꙋ на́ тѧ ѻ҆гнꙋшенїе по нечистота́мъ твои҆мъ, и҆ положꙋ т̂ѧ въ при́тчꙋ.
и҆ бꙋдетъ всѧ́къ видѧ́и т̂ѧ сни́детъ с тебѐ.
и҆ рече́тъ, грѣшнаѧ нинев꙽вїи.
кт̂о постенетъ по не́и.
ѿкꙋдꙋ и҆спрошꙋ ѹ҆тѣше́нїе е́й.
ѹ҆готови́ти ча́сть ѹстрои́ти странꙋ ѹ҆гото́вити ча́сть а҆м꙽монꙋ живꙋщїѧ въ рѣках̑·

вода̀ ѻ҆́крс̑҇тъ еѧ̀, е́йже нача́токъ мо́рѧ, и҆ вода̀ забра́ла еѧ̀, и҆ е҆ѳїѻ́пїа крѣ́пость еѧ̀ и҆ е҆гѷпетъ, и҆ нѣсть кон꙽ца бѣгъствꙋ твое҆мꙋ.
фꙋдъ и҆ ли́вы бы́ша помо́щницы еѧ̀.
и҆ с̂и въ преселе́нїе пои҆детъ плѣн꙽ница.
и҆ младе́нца еѧ̀ разбїютъ въ зачат̑цех꙽ всѣхъ пꙋтїи еѧ̀, и҆ ѻ҆ всѣхъ сла́вных̑ е҆ѧ̀ въз꙽вергт̑ꙋ жре́бїѧ, и҆ всѧ вое҆воды е҆ѧ̀ свѧ́жꙋтсѧ пꙋт́ы·

И҆ т̂ы ѹ҆пїешисѧ и҆ бꙋдеши ѻ҆бид̑на.
ты́ же сама̑ себѣ̀ взы́щеши ѹ҆ставленїѧ ѿ враг̑҇.
вс̂ѧ твердѣли твоѧ̀ ꙗ҆́ко смоквинїе стра́жа и҆мꙋщее, а҆ще поколѣблют̑сѧ и҆ в꙽падꙋтъ въ ѹ҆ста̀ ꙗ҆дꙋщаго·

Се̂ лю́дїе твоѝ ꙗ҆́ко же́ны въ тебѣ̀, враго́мъ твои҆мъ ѻ҆творѧ́ема ѻ҆тво́рѧтсѧ вра́та землѧ̀ твое́ѧ, и҆ поꙗ҆́сть ѻ҆́гнь вереѧ твоа̀.
во́дꙋ держанїѧ въсхити себѣ̀ са́мъ, и҆ ѹ҆твръди тве́рди твоа̀.
влѣзи въ бре́нїе и҆ попери въ плѣвах꙽, ѹ҆тверди па́че лаи҆́ны.
та́мо поꙗ҆́сть т̂ѧ ѻ҆́гнь, потреби́тъ т̂ѧ ѻ҆рꙋжїе, поꙗ҆́дѧт̑ т̂ѧ а҆ки прꙋѕи.
и҆ ѻ҆тѧж꙽ча́етъ а҆ки м꙽шица.
ѹ҆мно́жи кꙋплѧ̀ твоа пач̑҇ ѕвѣздъ нбс̑҇ныхъ.
м꙽шица ѹ҆стреми́шасѧ, и҆ възлетѣша.
восльпе а҆ки прꙋгъ помо́щникъ тво́и сѣдѧ̀ на плети́нѣ въ дн҃ь стꙋден꙽.
слн҃це възы́идетъ и҆ ѿлетѣ, и҆ не позна́сѧ мѣсто е҆го·

Люте е́й.
въздрѣма́шасѧ пастꙋсѝ твоѝ цр҃ь а҆сѷрїискь ѹ҆спѝ си́лныѧ твоѧ̀, въз̑дви́гошас̑҇ лю́дїе твоѝ къ гора́мъ, и҆ не бѧ́ше ждꙋщаго.
не бꙋдетъ цѣлбы съкрꙋшенїю твое҆мꙋ раз̑горѣсѧ ꙗ҆́зва твоа.
вс̂и слы́шавшїи вѣ́сть твою, въспле́щꙋтъ рꙋка́ма по тебѣ̀.
и҆́мже до кого не до́иде ѕлоба твоѧ̀ всегда̀·

Конец̑҇ прро̑҇кꙋ наѹ҆́мꙋ, и҆́мать в себѣ̀ главъ, г҃·