АВВАКꙊ́МЪ ПРО҃РКЪ

ГЛАВА̀· А҃

Внѧ́тїе е҆же ви́дѣ а҆в꙽вакꙋмъ прро̑҇къ·
доко́лѣ г҃и възовꙋ и҆ не ѹ҆слы́шиши.
възопїю к тебѣ ѻ҆биди́мъ, и҆ не и҆зба̑ви́ши.
въскꙋю мнѣ̀ ѹ҆каза̑ трꙋды и҆ болѣзни, ѹ҆смотри́ти страсти и҆ бесчестїе, проти́вꙋ мнѣ̀ бы́сть сꙋдъ, и҆ сꙋдїи възе́млетъ.
сего ради расыпа́етсѧ за́конъ, и҆ не и҆зво́дитсѧ до съвръшенїѧ сꙋдъ, ꙗ҆́ко нечести́выи преѻ҆бидитъ правди́ваго·

сего ради и҆зы́идетъ сꙋдъ ѹ҆кривленъ.
види́те ѻ҆бидливїи, смотрите и҆ чюди́тесѧ чюдеси і҆ и҆сче́знѣте.
поне́же дѣло аз̑ дѣ́лаю въ дн҃ехъ ва́шихъ, е҆мꙋже не и҆́мате вѣ́ровати а҆ще кт̂о и҆сповѣсть·

Зане с̂е а҆зъ въставлю халдѣ́ѧ хра́брыѧ странꙋ̀ бо́рзꙋю и҆ лю́тꙋю, ходѧ́щꙋю на широты̀ зе́мныѧ прїѧ́ти се́ла не са́мъ себѣ.
стра́шенъ н̂и ꙗ҆вленъ е҆сть.
ѿ самого сꙋдъ е҆го бꙋдетъ, и҆ взѧ́тїе е҆го ѿ него̀ и҆зы́идетъ.
и҆ ско́чат̑ па́че ры́си ко́ни и҆хъ, и҆ быстрѣиши вол꙽къ а҆рав꙽скь.
ѻ҆бъточа́тъ кон꙽ницы и҆хъ, и҆ ѹ҆стремѧ́тсѧ и҆здалеча, и҆ въсперꙋтъ а҆ки ѻ҆релъ гото́въ на ꙗ҆дь.
сконча́нїе на нечести́выѧ прїидетъ, съпротивѧ́ющимсѧ пред̑ лицемъ их̑ проти́вꙋ.
и҆ съберетъ ꙗ҆́ко пѣсокъ плѣн꙽ники·

И҆ самъ то́и над̑ цр҃и въспита́етсѧ и мꙋчители и҆гранїе е҆го.
тожд̑е же все́и твердѣли порꙋга́етсѧ, и҆ посы́плет꙽ прьстїю, и҆ ѻ҆блада́етъ ею̀.
тогда̀ премени́тъ дх҃ъ, и҆ преидетъ т̂а крѣпость б҃ꙋ мое҆мꙋ·

Нѣ́си ли т̂ы и҆скони г҃ь б҃ъ ст҃ы́и мои, и҆ не ѹ҆́мрем̑.
г҃и на сꙋдъ ѹ҆чини и҆̀.
и҆ създа м̂ѧ ѻ҆блича́ти наказа́нїе е҆го.
чи́сто ѻ҆́ко ꙗ҆́ко не ви́дѣти зл̂а, и҆ възирати на трꙋды болѣзньныѧ·

въскꙋю не възира́еши на ѻ҆бидѧ́щаѧ, и҆ помол꙽чава́еши внегда̀ пожира́етъ нечести́выи правди́ваго.
и҆ сътвориши чл҃кы ꙗ҆́ко ры́бы мор꙽скїѧ, и҆ ꙗ҆́ко га́ды не и҆мꙋща старѣ́ишины.
сконча́нїе ѹ҆́дою въсхити, и҆ привлече и҆̀ мре́жею.
и҆ събра и҆̀ сѣтьми свои҆ми.
сего ради възвесели́тсѧ и҆ възра́дꙋетсѧ срд̑це е҆го.
сего ради пожрет̑ мре́жи свое́й, и҆ кадитъ сѣть свою̀, ꙗ҆́ко тѣми раз̑блажи ча́сть свою̀ и҆ пища е҆го и҆збран꙽ныѧ.
сего ради препина́етъ мре́жꙋ свою̀, да при́сно и҆збивати страны̀ не пощади́тъ·

Глв̑҇а, в҃·

На стражбѣ свое́и ста́нꙋ, и҆ възлѣ́зꙋ на камы́къ, да смотрю ꙗ҆́ко ви́дѣти чт̂о съгл҃етъ въ мнѣ̀, и҆ чт̂о ѿвѣща́ю до ѻ҆бличенїа мое҆го·

И҆ ѿвѣща г҃ь къ мнѣ̀, и҆ реч̑҇, въпиши видѣнїе ꙗ҆́вѣ же во дъскꙋ, ꙗ҆́ко да пого́нитъ ю҆̀ чты́и.
зане е҆щѐ видѣнїе въ времѧ, и҆ просїѧет̑сѧ въ совръшенїе а҆ не вътще.
а҆ще ѹ҆медлит꙽ претер꙽пи е҆мꙋ, ꙗ҆́ко и҆дѧ́и прїидет꙽ и҆ не премед̑литъ·

а҆ще неп꙽щꙋетъ не бл҃говолит̑ дш҃а моа в немъ.
а҆ пра́вди́выи мои ѿ вѣры жи́въ бꙋдетъ·

презоривыи же и҆ ѻ҆бид̑ливыи мꙋжъ и҆ велича́выи н̂ичесоже не сконча́етъ, и҆же рас꙽шири а҆ки а҆дъ дꙋшꙋ свою̀, се́и б̂о ꙗ҆́ко и҆ смерть не насыщенъ.
и҆ съберетъ к немꙋ̀ вс̂ѧ страны̀, и҆ съберетъ к немꙋ̀ вс̂ѧ лю́ди, не всели́сѧ ѹ҆бо, притчꙋ на́нь прїимꙋть и҆ гада̑нїе въ по́вѣсть е҆го.
и҆ рекꙋтъ лю́те множа́и в себѣ̀ не сꙋщаѧ е҆го, доколѣ ѻ҆тѧгча́ѧй ѹ҆́зꙋ свою̀ тѧж꙽цѣ.
ꙗ҆́ко внезапꙋ въста́нꙋт꙽ хаплющеи е҆го, и҆ ѹ҆трезвѧ́тсѧ мыслѧ́щїи на́ тѧ, и҆ бꙋдеши въ раз꙽грабленїе и҆мъ.
поне́же т̂ы плѣни страны̀ мно́ги, и҆ пленѧ́тъ т̂ѧ вс̂и ѹ҆ста́вшїи лю́дїе кро́ви ради чл҃ча, и҆ нечестїѧ землѧ̀ и҆ гра́да и҆ всѣхъ живꙋщих̑ на не́и·

Горе грабѧ́щимъ грабленїе зло́е до́мови свое҆мꙋ, ѹ҆чини́ти въ высотꙋ̀ гнѣздо своѐ, ꙗ҆́ко и҆стръгнꙋти ѿ рꙋки злых̑.
ѹ҆мы́сли стыдѣнїе до́мꙋ свое҆мꙋ, сконча̀ лю́ди мно́ги, и҆ съгрѣши дш҃а твоа̀.
зане камы́къ съ стѣны възопїетъ, и҆ стꙋгъ ѿ древа въз꙽гл҃етъ се́же·

ѹ҆҇ лю́те градѧ́и град̑ кро́вьми, и҆ готовлѧ́ѧй град̑ непра́вдами, нѣсть л̂и с̂е ѹ҆бо пред̑ гм҃ь вс̂едръжи́телемъ.
и҆ ѻ҆скꙋдѣша лю́дїе мно́ѕи ѻ҆гнемъ, и҆ стра́ны мно́ги ѿнемого́шасѧ.
ꙗ҆́ко напол̑҇нисѧ вс̂ѧ землѧ̀ разꙋмѣти сла́вꙋ гн҃ю, ꙗ҆ко во́да мно́га покры́етъ ѧ҆̀.
и҆҇ напаѧ́й по́дрꙋга свое҆го съвращенїе мꙋтно, и҆ ѹ҆пїѧ́айсѧ ꙗ҆ко призирает̑ къ пещера́мъ и҆хъ.
мно́жество бес꙽честное ѿ сла́вы и҆спїи, и҆ т̂ы срд̑це поколѣбли́сѧ и҆ стрѧ́снисѧ.
ѻ҆бы́де ѻ҆ тебѣ ча́ша десни́ца гн҃ѧ, и҆ събрасѧ бесчестїе на славꙋ твою.
зане бесчестїе дꙋбрав꙽ско покры́етъ т̂ѧ, и҆ трꙋдъ ѕвѣринъ престрашитъ т̂ѧ, кро́ви ра́ди чл҃чь и҆ бесчестїи земльныхъ, и҆ града и҆ всѣхъ живꙋщихъ на не́и·

Чт̂о ѹ҆спѣет̑ и҆зваѧ́ныи.
ꙗ҆́ко и҆зваѧ́ша и҆̀ и҆ създа́ша и҆ слїанїе прее́лесть л꙽жꙋю.
ꙗ҆ко ѹ҆пова̀ създа́выи къ създанїю свое҆мꙋ сътвори́ти кꙋми́ры глꙋхы.
ѹ҆҇ лю́те гл҃ющемꙋ дре́вꙋ, ѹтрезви́сѧ въста́ни, и҆ камы́кꙋ възвыси́сѧ.
и҆ т̂оже е҆сть пре́лесть.
а҆ с̂е е҆сть скова́нїе зла́тное и҆ сре́бреное, и҆ всего̀ дꙋха нѣсть в не́мъ.
а҆ г҃ь въ цр҃кви ст҃ѣи свое́й, да сѧ ѹ҆бои́тъ ѿ лица̀ е҆мꙋ вс̂ѧ землѧ̀·

Мл҃тва а҆ввакꙋма прро̑҇ка с пѣснїю·

Глв̑҇а, г҃·

Ги҃ ѹслышахъ слꙋхъ тво́и, и҆ ѹ҆боѧ́хсѧ.
г҃и разꙋмѣхъ дѣла твоа̀, и҆ ѹ҆жасохсѧ·

междꙋ двѣма животома ѹ҆вѣ́сисѧ, внегда̀ приближа́тсѧ лѣта позна́ешисѧ, внегда̀ бꙋдетъ го́дъ пока́жешисѧ, вне́гда смѧтет̑сѧ дш҃а моа̀ въ гнѣвѣ млс̑҇ть помѧне́ши·

бг҃ъ ѿ ю́га прїидет꙽, и҆ ст҃ыи ѿ горы̀ присѣн꙽ныѧ ча́сти·

покры̀ нб҃са добродѣтель е҆го, и҆ хваленїѧ е҆го и҆спо́лнъ землѧ̀·

и҆ сїанїе е҆го ꙗ҆́ко свѣтъ бꙋ́детъ, рози въ рꙋкꙋ е҆го.
и҆ положѝ любо́вь твердꙋ крѣпости свое́ѧ·

пред̑ лицемъ е҆го и҆зы́идет꙽ сло́во, і҆ и҆зы́идетъ на́ поле за пѧ́тъ но́гꙋ е҆го·

ста̀ и҆ под̑вижа́сѧ землѧ̀, призрѣ і҆ и҆стаа́ша страны̀·

и҆ съкрꙋшат̑сѧ го́ры нꙋждею, і҆ и҆стаа́ша хол꙽ми въчнїи.
шествїѧ вѣчнаа и҆хъ за трꙋдъ видѣша·

села е҆ѳїѻп̑҇ска ѹ҆боѧ́тсѧ, и҆ хра́ми землѧ̀ мадїа́м꙽ски·

Є҆да̀ в рѣкахъ прогнѣва́ешисѧ г҃и.
и҆л̂и въ рѣкахъ ꙗ҆́рость твоа̀.
л̂и в꙽ мо́ри ѹ҆стремле́нїе твое·

ꙗ҆́ко всѧ́деши на конѧ твоа̀, и҆ ꙗ҆́жденїе твое спс̑҇нїе.
налѧца́ѧ налечеши лꙋкъ сво́и, на хорꙋгви, гл҃етъ г҃ь·

рѣка́ми расѧ́детсѧ зем̑лѧ̀, и҆ ѹ́зрѧт̑ т̂ѧ и҆ разболѧт̑сѧ лю́дїе·

расыпа́ѧ во́ды наше́ствїѧ е҆го, дасть безд̑на гла́съ свои, и҆ высота̀ вели́чїѧ своа̀·

въздви́жесѧ слн҃це, и҆ лꙋна ста̀ в чи́нꙋ свое҆мъ·

въ свт̑ѣ стрѣлы твоѧ̀ по́идꙋтъ, блиста́нїемъ мо́лнїѧ ѻ҆рꙋжїѧ твое҆го·

преще́нїемъ ѹ҆мали́ши зе́млю, и҆ ꙗ҆́ростїю низложиши ꙗ҆зы́ки·

и҆зы́де въ сп҃сенїе лю́демъ свои҆мъ, спс̑҇тѝ помаза́нныѧ своа̀·

вложи въ главы̀ безако́нных̑ смр҃ть, възд̑ви́же ѹ҆́зы твоѧ̀ до вы́а въ совер꙽шенїе·

Ссѣклъ е҆си ѹ҆жа́сом꙽ гла́вы си́лных̑, сътрѧсꙋтсѧ ѻ҆ не́и.
ѻ҆тво́рѧтъ ѹ҆́зды своѧ̀ а҆ки ꙗ҆́дыи ѹ҆богїи ѻ҆та́и.
и҆ наведе на мо́ре конѧ̀ своѧ̀, смꙋща́ющаѧ во́ды мно́ги.
снабдх̑ѣсѧ и҆ ѹ҆боѧ́сѧ срд̑це моѐ ѿ гла́са мо́лбы ѹ҆стенъ мои҆хъ.
и҆ вни́де тре́петъ въ ко́сти моѧ̀, и҆ въ мнѣ̀ смѧтесѧ крѣ́пость моа̀·

почїю въ дн҃ь печа́ли мое́ѧ, ꙗ҆ко да възы́ти м̂и въ лю́ди ѻ҆бита́нїѧ мое҆го.
занѐ смокви пло́да не сътво́рѧтъ, и҆ не бꙋдетъ пло́да въ виноградѣхъ·

съл꙽жетъ дѣ́ло масли́нно, и҆ по́лѧ не сътворѧт̑ ꙗ҆́ди.
ѻ҆скꙋдѣша ѻ҆́вца ѿ пи́ща, и҆ не бꙋ́детъ воло́въ прї ѧ́слех̑·

А҆́з же ѻ҆ г҃ѣ възра́дꙋюсѧ, и҆ възвеселю́сѧ ѻ҆ бѕ҃ѣ сп҃се мое҆мъ·

г҃ь б҃ъ мо́и, си́ла моѧ̀, и҆ ѹ҆чини́тъ но́ѕѣ моѝ на съвръше́нїе.
и҆ на высо́каѧ наводѧ̀ м̂ѧ, да побѣждꙋ̀ въ пѣснехъ е҆го·

Коне́цъ прро̑҇кꙋ а҆в꙽ва́кꙋмꙋ.
и҆́мать в себѣ̀, гла́въ, г҃·