СОФОНИꙖ ПРо̑РК꙽

ГЛАВА̀ А҃

Сло́во гн҃е е҆же бы́сть къ софо́нїи хꙋсїинꙋ сн҃ꙋ годолїинꙋ а҆марїинꙋ е҆зекїинꙋ, въ дн҃и і҆ѻ҆сїѧ сн҃а а҆мо́нѧ цр҃ѧ і҆ѹ́дина·

ѻ҆скꙋдѣ́нїемъ да ѻскꙋдѣетъ вс̂ѧ ѿ лица̀ землѝ, гл҃ет̑ г҃ь.
да ѻ҆скꙋдѣ́етъ чл҃къ и҆ ско́ти, да ѻ҆скꙋдѣ́ютъ пти́ца нбс̑҇ныа и҆ ры́бы мор꙽скїѧ.
и҆ да и҆знемо́гꙋтъ нечести́вїи, і҆ и҆змꙋ безако́нныѧ ѿ лица̀ землѝ, гл҃етъ г҃ь.
и҆ прострꙋ рꙋкꙋ свою на і҆ѹ́дꙋ, и҆ на всѧ живꙋщаѧ въ і҆ерс̑҇лимѣ.
і҆ и҆змꙋ ѿ мѣ́ста сего и҆мена̀ ваа́лова, і҆ и҆мена жре́ческа съ жре́чествомъ, и҆ покланѧющаѧсѧ на клѣтехъ чи́нꙋ нбс̑҇номꙋ, и҆ кленꙋщаѧсѧ гм҃ъ, и҆ кленꙋщаѧсѧ мелехомъ, ѹ҆клон꙽шаѧсѧ ѿ г҃а, и҆ не възыска́вшихъ г҃а, и҆ не терпѧ́щаа гв҃и·

Ѹ҆бо́итесѧ ѿ лица̀ г҃а б҃а, занѐ бли́зъ дн҃ь гн҃ь.
ꙗ҆́ко ѹ҆готовил̑҇ г҃ь жрътвꙋ свою, и҆ ѻ҆ст҃и нареч̑҇нныѧ своѧ.
и҆ бꙋдет̑ въ дн҃ь жрътвы гн҃ѧ, и҆ ѿмщꙋ до кн҃ѕь и҆ до до́мꙋ цр҃ѧ, и҆ до всѣхъ ѻ҆болче́ныхъ въ ѻ҆дѣѧ́нїѧ чю́жда.
и҆ ѿмщꙋ на всѧ̀ ꙗ҆́вѣ пред̑врат̑ныа въ дн҃ь тои, и҆сполнѧ́ющих̑ хра́мъ г҃а б҃а свое҆го нече́стїѧ и҆ льсти·

И҆ бꙋ́детъ въ дн҃ь ѻ҆́нъ, гл҃етъ г҃ь, глас̑҇ во́плѧ ѿ вра́тъ и҆збада́ющихъ, и҆ пла́чь ѿ вто́рыхъ, и҆ сътренїе ве́лїе ѿ хо́лмъ·

Пла́чите живꙋщїи в пож꙽же́неи, ꙗ҆́ко ѹ҆подоби́шасѧ лю́дїе ханаа́нови, и҆ потреби́шасѧ вс̂и велича́ющеисѧ сребромъ·

И҆ бꙋдет̑ в то́и дн҃ь, и҆зыщꙋ і҆ерс̑҇лима съ свѣти́лники.
и҆ мщꙋ на мꙋ́жа нерадѧ́щаѧ ѻ҆ съхране́нїихъ и҆мъ, гл҃ющаа въ срд̑цыхъ свои҆хъ, не и҆мать бл҃га сътворити г҃ь, ниже и҆мать ѻ҆злоби́ти.
и҆ бꙋ́детъ си́ла и҆хъ в расхище́нїе, и҆ до́мъ и҆хъ въ и҆счезнове́нїе.
и҆ съзи́ждꙋтъ храмы, и҆ не и҆мꙋть пожи́ти в ни́хъ.
и҆ насадѧ́тъ виногра́ды, и҆ не и҆мꙋть пи́ти вина̀ их̑·

Ꙗ҆́ко бли́зъ дн҃ь гн҃ь вели́кїи, бли́зъ и҆ ско́ръ ѕѣ́ло.
глс̑҇а дн҃е гн҃ѧ го́рекъ и҆ жесто́къ ѹ҆чини́сѧ си́ленъ, дн҃ь гнѣ́ва дн҃ь то́и, дн҃ь ско́рбенъ и҆ бѣденъ, дн҃ь без꙽го́дїю і҆ и҆счезе́нїю, дн҃ь тмѣ̀ и҆ мра́кꙋ, дн҃ь ѻ҆́блакꙋ и҆ м꙽глѣ.
дн҃ь трꙋбѣ и҆ кли́чꙋ на гра́ды тве́рдыѧ и҆ на ѹ҆́глы высо́кїѧ.
и҆ ѻ҆скор꙽блю чл҃ки, и҆ по́идт̑ꙋ ꙗ҆́ко слѣ́пи, занѐ гв҃и прегрѣши́ша.
і҆ и҆злїю́ кро́вь и҆хъ ꙗ҆́ко прьсть, и҆ пло́ти и҆хъ ꙗ҆́ко лаи҆на.
и҆ сребро и҆хъ и҆ зла́то и҆хъ не и҆мать мощѝ и҆зѧ́ти и҆хъ въ дн҃ь гнѣ́ва гн҃ѧ.
и҆ ѻ҆гне́мъ рве́нїѧ е҆го поꙗ҆де́на бꙋ́детъ всѧ землѧ̀.
занѐ кон꙽ча́нїе и҆ тща́нїе сътво́ритъ на всѣхъ живꙋщихъ на землѝ·

Глв̑҇а, в҃·

Съберѣтесѧ, и҆ съ ни́ми моли́тесѧ ꙗ҆зы́къ ненаказа́н꙽ныи, прежде бы́ти вамъ ꙗ҆́ко цвѣтꙋ ми́моходѧ́щꙋ въ дн҃ь прежде прїити на́ вы гнѣ́вꙋ ꙗ҆́рости гн҃ѧ, прежде прїити на вс̂ѧ дн҃и гнѣ́ва ꙗ҆́рости гн҃ѧ.
възы́щете г҃а вс̂и смире́нїи землѧ̀ сꙋдъ съдѣ́ите.
взы́щете пра́вды, възы́щете кро́тости и҆ ѿвѣща́ите ѧ҆̀, ꙗ҆́ко да покры́етесѧ въ дн҃ь гнѣ́ва гн҃ѧ.
занѐ га́за расхище́на бꙋдетъ, и҆ а҆скало́нъ въ и҆счезнове́нїе бꙋдетъ, и҆ а҆зо́тъ на месам꙽брїю ѿвръжет̑сѧ, и҆ а҆к꙽каро́нъ и҆скорени́тсѧ·

Го́ре живꙋщимъ въ схини́змѣ мор꙽стеи пришел꙽цы сꙋдїѧмъ.
сло́во гн҃е на васъ хананеѝ зе́мле и҆ноплемен꙽никъ, и҆ погꙋблю в̂ы ѿ жили́ща.
и҆ бꙋдетъ крѷтъ жи́ръ па́ствамъ и҆ ѻ҆гра́дъ ѻ҆́вцамъ.
и҆ бꙋдетъ схини́зма мор꙽ска про́чимъ до́мꙋ і҆ѹ́довꙋ, на ни́хъ пожирꙋ́ютъ, въ хра́мы а҆скалонꙋ къ вечерꙋ ѻ҆бита́ютъ ѿ лица̀ сн҃овъ і҆ѹ́довъ.
ꙗ҆́ко присѣти и҆хъ г҃ь б҃ъ мои, и҆ възврати плѣ́нъ ихъ.
слы́шахъ поноше́нїѧ моа́въ, и҆ претыка́нїѧ сн҃овъ а҆ммо́нь ѻ҆ни же поноша́хꙋ лю́демъ мои҆мъ, и҆ велича́хꙋсѧ на предѣ́лы моѧ·

Сего ради живꙋ а҆зъ, гл҃етъ г҃ь си́лъ б҃ъ і҆и҆л҃евъ.
занѐ моа́въ ꙗ҆́ко содо́ма, и҆ сн҃ове а҆м꙽мо́ни ꙗ҆́ко гомо́ра, и҆ дама́ск꙽ ѻ҆ста́вленъ ꙗ҆́ко сто́гъ гꙋме́нныи, і҆ и҆щезнетъ въ вѣ́къ.
и҆ про́чїи людїи моих̑ расхитѧ́тъ ѧ҆̀, и҆ про́чїи ꙗ҆зы́ка наслѣдѧ́тъ и҆хъ.
с̂е и҆мъ за досажде́нїе и҆хъ, занѐ поноси́ша и҆ възвели́чишасѧ на люди г҃а вседръжи́телѧ.
свѣтелъ бꙋдетъ г҃ь на нихъ, и҆ потреби́тъ всѧ бо́ги землѧ и҆х꙽.
и҆ покло́нѧтсѧ е҆мꙋ ко́жд̑о ѿ мѣста свое҆го вс̂и ѻ҆то́цы ꙗ҆зы́чнїи.
и҆ в̂ы мꙋри ꙗ҆звеницы ѻ҆рꙋжїѧ мое҆го бꙋдете.
и҆ простретъ рꙋ́кꙋ свою на сѣверъ, и҆ погꙋ́битъ а҆сѷрїѧ, и҆ поло́житъ нинев꙽вїю въ и҆́щезнове́нїе безвод̑но ꙗ҆́ко пꙋсты́ню.
и҆ пожирꙋ́ютъ посредѣ е҆ѧ̀ ста́да, и҆ вс̂и ѕвѣ́рїе зем̑нїи.
и҆ хамо́лви и҆ е́жи на пѧ́трехъ е́й въгнѣздѧ́тсѧ, и҆ ѕвѣ́рїе възвы́ютъ в раскопа́нїе е҆ѧ̀, и҆ вра́ни въ вра́техъ е҆ѧ̀, занѐ ти́сїе възноше́нїе е҆и.
сеи град̑ досади́телникъ живѧ́и на ѹ҆пова́нїе, гл҃ѧи въ срд̑цы свое҆мъ а҆зъ е҆смь, и҆ нѣсть по мнѣ̀ па́ки.
ка́ко бы́сть въ и҆щезнове́нїе жи́ръ ѕвѣрем̑.
всѧ́къ ми́моходѧи скво́зѣ нѧ̀ позви́жд̑етъ и҆ двигнетъ рꙋцѣ своѝ·

Глв̑҇а, г҃·

Ý свѣтлыи і҆ и҆зба́вленыи град̑ го́лꙋбь.
не слы́ша гла́са н̂и прїѧтъ наказа́нїѧ.
на г҃а не ѹ҆пова̀, и҆ къ б҃ꙋ свое́мꙋ не прибли́жисѧ.
кнѧ́ѕи в нем̑ ꙗ҆́ко львѝ вы́юще, сꙋдїѧ е҆го ꙗ҆́ко влъци а҆равїистїи не ѻ҆ставлѧ́хꙋ с̂и на ѹ́тро.
про̑҇рцы е҆го дꙋхоно́сцы мꙋжи неради́ви.
сщ҃еннїи е҆го сквернѧ́тъ ст҃аѧ, и҆ нечествꙋ́ютъ в꙽ зако́нъ.
г҃ь же пра́веденъ по́средѣ е҆го и҆ не и́мат̑ сътвори́ти непра́вды.
наѹ́тра ѹ҆тро дасть сꙋдъ свои въ свѣтъ, и҆ не ѹ҆кры́сѧ.
и҆ не разꙋмѣ непра́вды въ прельще́нїе и҆ не в꙽ побѣдꙋ.
въ растлѣнїе низложи́хъ велича́выѧ, и҆щезнꙋтъ до́мы и҆хъ и҆ ѻ҆пꙋщꙋ пꙋтѝ и҆хъ ѿнꙋдь не проходи́тисѧ.
и҆щезнꙋтъ гра́ди и҆хъ занѐ не быти ни е҆ді́номꙋ н̂и жи́ти.
рѣхъ, ѻ҆ба́че ѹ҆бо́итесѧ менѐ, и҆ прїимѣте наказа́нїе, и҆ не и́мате потреби́тисѧ ѿ ѻ́чїю мое́ю за всѧ̀ е҆ли́ко м꙽стих̑ ѻ҆ нем̑.
гото́висѧ ѹ҆ранѝ, и҆стлѣ̀ вс̂е ли́ствїе и҆мъ·

Сего ра́ди потръпи менѐ, гл҃етъ г҃ь, въ дн҃ь въскрс̑҇нїѧ мое҆го въ свѣдѣтельство.
занѐ сꙋдъ мои въ сон꙽мища ꙗ҆зы́къ прїѧти цр҃ѧ.
і҆ и҆злїати на́ нѧ гнѣвъ свои, весь гнѣвъ ꙗ҆́рости моеѧ.
занѐ ѻ҆гнем̑ рве́нїѧ моег̑҇ поѧде́на бꙋдетъ вс̂ѧ землѧ̀.
ꙗ҆́ко тогда̀ приѻ҆брѧ́щꙋ на лю́ди ꙗ҆зык꙽ в ро̑ и҆хъ, призыва́ти всѣмъ и́мѧ гн҃е, работати е҆мꙋ под̑ и́гом̑ е҆ді́нѣмъ.
ѿ конець рѣкъ е҆ѳиѻ҆пїискъ прїимꙋ̀ молѧ́щаѧ м̂ѧ, рас꙽сѣа́нїи принест̑ꙋ жрътвы м̂и·

Въ дн҃ь ѻн̑҇ не и́маши постыди́тисѧ ѿ всѣхъ нача́токъ свои҆хъ и́миже нечествова в꙽ м̂ѧ.
ꙗ҆́ко тогда̀ ѿи҆мꙋ ѿ тебе ѹ҆кори́зны досажде́нїѧ твое҆го, и҆ ктомꙋ не и́маши приложи́ти велича́тисѧ ѻ҆ горѣ̀ ст҃ѣи мое́и.
и҆ ѻ҆ста́влю в꙽ тебѣ̀ лю́ди кро́тки и҆ смире́ны, и҆ бꙋдт̑ꙋ надѣѧ́тисѧ на и҆мѧ гн҃е.
ѻ҆ста́нцы і҆и҆л҃евы не сътво́рѧт̑ непра́вды, и҆ не рект̑ꙋ сꙋ́етна, и҆ не и́мат̑ ѻ҆брѣ́стисѧ въ ѹ҆стех꙽ их̑ ꙗ҆зык̑҇ льстив̑҇, занѐ тїи пожирꙋют̑ и ѹ҆гнѣздѧт̑сѧ, и҆ не бꙋдет̑ пострашаѧ́й ихъ·

Ра́дꙋисѧ дщ̂и сїѻ́нова ѕѣло, проповѣдаи дщ̂и і҆ерс̑҇лимлѧ, весели́сѧ и҆ преѹ҆крашаисѧ ѿ всего срд̑ца свое҆го дщ̂и і҆е҆рлс̑҇имлѧ.
ѿꙗ҆́тъ г҃ь непра́вды твоѧ, і҆ и҆зба́вил̑҇ т̂ѧ ес̑҇ и҆з рꙋкѝ врагъ твоих̑.
въцр҃итсѧ г҃ь посредѣ тебе, и҆ не ѹ́зриши зл̂а ктомꙋ̀.
въ вре́мѧ ѻ́но реч̑҇ г҃ь і҆ерс̑҇лимꙋ, дръза́и сїѻ́не да не ѻ҆слабѣ́ете рꙋцѣ твоѝ, г҃ь б҃ъ твои в тебѣ̀ си́лен̑҇ спс̑҇ти т̂ѧ.
наведет̑ на́ тѧ весе́лїе, и҆ ѻ҆бновит̑ т̂ѧ въ любвѝ е҆мꙋ.
и҆ възвесели́тсѧ ѻ҆ тебѣ въ ѹ҆краше́нїе ꙗ҆́ко въ дн҃ь празд̑ника.
и҆ съберꙋ сътре́ныѧ, го́ре кт̂о прїимет̑ на́ нѧ поноше́нїе.
с̂е аз̑ сътворю̀ в тебѣ менѐ ра́ди, гл҃ет꙽ г҃ь, въ времѧ ѻ́но.
и҆ сп҃сꙋ ѹ҆тѣщен̑҇нꙋю, и҆ ѿриновен̑҇нꙋю прїимꙋ̀.
и положꙋ ѧ҆̀ в꙽ похвале́нїе, і҆ и҆мени́ты въ всю̀ зе́млю.
и҆ постыдѧт̑сѧ въ времѧ ѻ́но е҆гда добро̀ ва́мъ сътворю̀, и҆ въ вре́мѧ е҆гда прїимꙋ в̂ы, занѐ дахъ в̂ы и҆мени́ты въ похвале́нїе въ всх̑ѣ лю́дехъ землѧ̀, възвраща́ти м̂и плѣн꙽ники ва́ша пред̑ ва́ми, гл҃етъ г҃ь·