АГ꙽ГЄ́И ПРО҃РКЪ

ГЛАВА̀ ПЄр̑ВАѦ *

Въ второ́е лѣто при да́рїи цр҃и, въ ше́стыи мс̑҇ць въ прьвыи мс̑҇ца·

Бы́сть сло́во гн҃е в рꙋ́кꙋ а҆г꙽ге́ѧ прро̑҇ка, гл҃ѧ, рцы̀ ѹ҆бо къ зорова́велю салаѳїилевꙋ ѿ колѣ́на і҆ѹ́дова, и҆ къ і҆с҃ꙋ і҆ѻ҆седе́ковꙋ і҆ере́ю вели́комꙋ, гл҃ѧ.
си́це гл҃етъ г҃ь вседръжитель, гл҃ѧ, лю́дїе сїи гл҃ютъ, не прїиде вре́мѧ създа́ти храм̑ гн҃ь·

И҆ быс̑҇ слово гн҃е в рꙋкꙋ а҆г꙽геѧ про̑҇рка, гл҃ѧ.
врѣмѧ ѹ҆бо ва́мъ е҆сть зда́ти хра́мы ваша̑ кѷлостат̑мы, а҆ храм̑ мои запꙋстѣ·

И҆ нн҃ѣ си́це гл҃етъ г҃ь вседръжитель, положи́те срд̑ца ваша в пꙋтѝ ва́ша.
сѣѧ́сте мно́го, и҆ взѧ́сте ма́ло.
ꙗ҆́ли е҆сте, и҆ не в сы́тость.
пи́сте, и҆ не въ пїѧнъство.
ѻ҆блеко́стесѧ, и҆ не съгрѣстесѧ в ни́хъ.
и҆ събира́ѧй м꙽зды̀, събра̀ въ влага́лище ѹ́тло.

Си́це гл҃етъ г҃ь вседръжи́тель, положи́те срд̑ца ва́ша в пꙋтѝ ва́ша.
възыдѣте на горꙋ̀, и҆ ѹ҆сѣцѣте дре́ва, и҆ принесѣте и҆ съзи́ждете хра́мъ, и҆ бл҃говолю в немъ и҆ просла́влюсѧ, рече г҃ь.
при́зрѣсте на мно́га и҆ бы́ша ма́ла, и҆ внесо́сте ѧ҆̀ въ хра́м꙽ и҆ ѿдꙋнꙋхъ ѧ҆̀.
сего ра́ди си́це гл҃ет꙽ г҃ь вседръжи́тель, занѐ хра́мъ мои е҆сть пꙋстъ, вы́ же го́ните ко́ждо домъ свои.
сего ради ѹ҆дръжитсѧ нб҃о ѿ росы̀, и҆ землѧ̀ ѹ҆скꙋдитъ и҆зноше́нїѧ е҆ѧ на ва́съ.
и҆ наведꙋ ѻ҆рꙋжїе на зе́млю, и҆ на го́ры, на пшени́цꙋ, и҆ на вино̀, и҆ на еле́и, и҆ на всѧ̀ е҆ли́ко и҆зно́ситъ землѧ̀.
и҆ на чл҃ки, и҆ на ско́ты, и҆ на всѧ̀ трꙋды рꙋчныѧ и҆хъ·

И꙽ слы́ша зорова́вель салаѳїилевъ ѿ колѣ́на і҆ѹ́дова, и҆ і҆сꙋсъ і҆ѻ҆седе́ковъ і҆ере́и вели́кїи, и҆ вс̂и про́чїи лю́дїе гла́съ г҃а б҃а и҆хъ, и҆ сло́во а҆г꙽ге́ѧ про̑҇рка, ꙗ҆́коже посла и҆̀ г҃ь б҃ъ и҆хъ к ни́мъ.
и҆ ѹ҆боѧ́шасѧ лю́дїе ѿ лица̀ гн҃ѧ·

И҆ рече а҆г꙽ге́и а҆гг҃лъ гн҃ь в посла́нїе гн҃е лю́демъ, гл҃ѧ.
а҆зъ е҆смь с ва́ми, гл҃етъ г҃ь·

И҆ въздви́же г҃ь дх҃ъ зорова́велю салаѳїилевꙋ ѿ колѣна і҆ѹ́дова, и҆ дх҃ъ і҆сꙋсꙋ и҆ѻ҆седе́ковꙋ і҆ере́ю вели́комꙋ, и҆ дх҃ъ прочїимъ всѣмъ лю́демъ.
и҆ внидоша̑ и҆ творѧ́хꙋ дѣла въ хра́мѣ г҃а вседръжи́телѧ б҃а и҆хъ, въ четве́ртыи тре́тїѧго десѧте, мс̑҇ца ше́стаго, въ второ́е лѣто при дарїи цр҃и·

Глв̑҇а, в҃·

Се́дмаго мс̑҇ца въ прьвыи тре́тїѧгодесѧте.
гл҃а г҃ь рꙋко́ю а҆г꙽ге́ѧ про̑҇рка, гл҃ѧ, рцы́ же къ зорова́велю салаѳїилевꙋ ѿ колѣна і҆ѹ́дова, и҆ къ і҆сꙋсꙋ і҆ѻ҆седе́ковꙋ і҆ере́ю вели́комꙋ и҆ къ всѣмъ про́чїимъ лю́дем꙽, гл҃ѧ.
кт̂о ѿ васъ и҆же ви́дѣ хра́мъ се́и въ сла́вꙋ е҆го пръвꙋю.
и҆ како в̂ы ви́дите е҆го нн҃ѣ, ꙗ҆коже не сꙋща пред̑ ва́ми.
и҆ нн҃ѣ ѹ҆крѣплѧ́исѧ зорова́велю, гл҃етъ г҃ь.
ѹ҆крѣплѧ́исѧ і҆сꙋсе і҆ѻ҆седе́ковъ і҆ере́ю вели́кїи, и҆ да ѹ҆крѣплѧ́ютсѧ вс̂и лю́дїе землѧ̀, гл҃ет꙽ г҃ь вседръжи́тель.
и҆ твори́те зане а҆́зъ с ва́ми е҆смь, гл҃етъ г҃ь в꙽седръжитель·

Сло́во е҆же гл҃ахъ с ва́ми е҆гда и҆сходи́сте и҆зъ землѧ̀ е҆гѷпет꙽ски, и҆ дх҃ъ мои настоитъ посредѣ васъ.
дръза́ите.
занѐ си́це гл҃етъ г҃ь вседръжи́тель.
е҆ще е҆ді́ною, а҆зъ потрѧсꙋ̀ нб҃омъ и҆ земле́ю, моремъ и҆ сꙋшею.
и҆ сътрѧсꙋ̀ всѧ ꙗ҆́зы́ки, и҆ прїидꙋтъ и҆збр́анн̑҇аѧ всѣмъ ꙗ҆зы́комъ, і҆ и҆спо́лню храм̑ сеи сла́вы, гл҃етъ г҃ь вседерж́ит̑ель.

Мое сребро̀, и҆ мое зла́то, гл҃етъ г҃ь вседръжи́тель.
занѐ ве́лїѧ бꙋдетъ сла́ва хра́мꙋ семꙋ̀ послѣднѧѧ паче прьвыѧ, гл҃етъ г҃ь вседръжи́тель.
и҆ на мѣсте семъ да́мъ ми́ръ, гл҃ет꙽ г҃ь вседръжи́тель, и҆ ми́ръ дш҃и въ посꙋжде́нїе всѧ́кꙋ ѕи́ждꙋщемꙋ въз꙽дви́гнꙋти цр҃ковь сїю·

Въ четве́ртый третїѧгодесѧте, девѧ́того мс̑҇ца, въ второ́е лѣто при да́рїи цр҃и.
бы́сть сло́во гн҃е къ а҆г꙽ге́ю про̑҇ркꙋ, гл҃ѧ, си́це гл҃етъ г҃ь вседръжи́тель, въпросѝ і҆ере́ѧ зако́на, гл҃ѧ.
а҆ще прїиметъ чл҃къ мѧ́со ст҃о въ конец꙽ ри́зы е҆го, и҆ коснетъ кра́и ризы е҆го въ хлѣбъ, л̂и в꙽ сочи́во, л̂и въ вино̀, л̂и въ ма́сло, л̂и въ всѧ́ко бра́шно, а҆ще ст҃итсѧ.
и҆ ѿвѣща́ша сщ҃еннїи и҆ рѣша, н̂и.
и҆ рече а҆г꙽ге́и, а҆ще косне́тъ ѻ҆скверне́но л̂и нечи́ста дꙋша на дꙋшю ѿ всѣхъ си́хъ, а҆ще ѻ҆сквръни́тсѧ.
и҆ ѿвѣща́ша і҆ере́и, и҆ рѣша̑ ѻ҆скверни́тсѧ.
и҆ ѿвѣща̀ а҆г꙽ге́и, и҆ рече, си́це лю́дїе сїи, си́це ꙗ҆зык꙽ се́и предо мно́ю, гл҃етъ г҃ь, и҆ си́це всѧ дѣла рꙋкꙋ е҆го, і҆ и҆же а҆ще коснет̑ т̂ꙋ ѻ҆скверни́тсѧ за прїѧтїе и҆хъ.
ѹ́тренѧѧ ѻ҆строптѧ́тсѧ ѿ лица̀ лꙋкавствомъ и҆хъ.
и҆ ненави́дѣсте въ вра́техъ ѻ҆блича́ющаго.
и҆ нн҃ѣ же положи́те на срд̑цыхъ ва́ших̑ ѿ дн҃е сего и҆ превы́ше, прежде положи́ти ка́мень на ка́мени въ хра́мѣ гн҃и.
чт̂о бѣсте е҆гда̀ вложи́сте в꙽ кꙋпьсель двадесѧте са́та, и҆ бы́ша десѧть са́та ꙗ҆чме́не.
и҆ влажа́сте в под̑точи́лїе че́рпати н҃ мѣрники и҆ бы́сть двадесѧтъ.
порази́хъ в̂ы в꙽ жито погрѣше́нїю, и҆ вѣтротлѣнїемъ, и҆ гра́домъ вс̂ѧ дѣла рꙋкъ ва́ших꙽.
и҆ не ѻ҆брати́стесѧ къ мнѣ, гл҃етъ г҃ь.
ѹ҆чини́те же срд̑ца ва́ша ѿ сего дн҃е и҆ про́че, ѿ четве́ртаго междꙋ двѣма десѧт꙽ма девѧ́таго мс̑҇ца, и҆ ѿ дн҃е ѿ негоже ѻ҆снова́сѧ цр҃кви гн҃ѧ, положи́те въ срд̑цыхъ ва́шихъ.
а҆ще е҆ще разꙋмѣ́етесѧ на гꙋмнѣ̀.
и҆ а҆ще е҆ще вино̀ и҆ смо́кви и҆ кисели́чїе, и҆ дре́ва маслин꙽наѧ не творѧ́щаѧ пло́да.
ѿ сего дн҃е свѧщꙋ·

И҆ бы́сть сло́во гн҃е втори́цею къ а҆г꙽гею про̑҇ркꙋ, в꙽ четве́ртыи междꙋ десѧт꙽ма, гл҃ѧ, рцы̀ къ зорова́велю салаѳїилевꙋ ѿ колѣна і҆ѹ́дова, гл҃ѧ.
е҆ще е҆ді́ною, а҆зъ потрѧсꙋ̀ нб҃омъ и҆ земле́ю, и҆ мо́ремъ и҆ сꙋшею.
и҆ раздрꙋшꙋ престо́лы цр҃ем̑ и҆ потреблю̀ си́лꙋ цр҃ь ꙗ҆зы́чныхъ, и҆ раздрꙋшꙋ ѻ҆рꙋжїѧ и҆ вса́дники, и҆ сни́дꙋтъ ко́ни и҆ вса́дницы и҆хъ, ко́ждо въ ѻ҆рꙋжїи къ бра́тꙋ свое҆мꙋ·

в то́и дн҃ь, гл҃етъ г҃ь вседержа́и, прїимꙋ т̂ѧ зорова́велю салаѳїилевъ ра́бе мои, гл҃етъ г҃ь, и҆ положꙋ т̂ѧ ꙗ҆́ко печать ꙗ҆́ко тѧ и҆зволихъ, гл҃етъ г҃ь вседръжи́тель·

Конецъ про̑҇ркꙋ а҆г꙽ге́ю.
и҆́мать в себѣ гла́въ, в҃·