ЗАХАРИѦ ПРО҃РКЪ

ГЛАВА * А҃

Въ ѻ҆́смыи мс̑҇цъ, втораго лѣта при дарїи.
быс̑҇ сло́во гн҃е къ захарїи варахїи҆нꙋ сн҃ꙋ а҆д꙽до про̑҇ркꙋ, гл҃ѧ, прогнѣвасѧ г҃ь на ѿц҃а ва́ша гнѣвомъ ве́лїемъ.
и҆ речеши к ним̑, си́це гл҃етъ г҃ь вседръжи́тель.
ѻ҆брати́тесѧ къ мнѣ̀, гл҃етъ г҃ь си́лъ, и҆ ѻ҆бращꙋсѧ к ва́мъ, гл҃ет̑ г҃ь си́лъ.
и҆ не бꙋ́дите ꙗ҆́коже ѿц҃ы ва́ши, и҆́мже помаваа́хꙋ и҆мъ прро̑҇цы пред̑нїи гл҃юще, си́це гл҃етъ г҃ь вседръжи́тель, възврати́тесѧ ѹ҆бо ѿ пꙋтїи ва́шихъ лꙋка́вныхъ, и҆ ѿ дѣа́нїи ва́шихъ непрїѧ́зньных̑.
и҆ не послꙋшаша, и҆ не внѧ́ша послꙋша́ти менѐ, гл҃етъ г҃ь вседръжи́тель.
ѿц҃ы ва́ши гдѣ̀ сꙋть.
и҆ прро̑҇цы е҆да̀ въ вѣкъ поживꙋт꙽.
ѻ҆баче словеса̀ моа̀ и҆ зако́ны моа̀ прїе́млите е҆ли́ко а҆зъ заповѣдаю въ дх҃ъ сво́и рабо́мъ моим̑ прро̑҇ком̑, и҆же пости́гнꙋ ѿц҃а ва́ша.
и҆ ѿвѣщаша, и҆ рѣша, ꙗ҆́коже ѻ҆полчи́сѧ г҃ь вседръжи́тель сътворити на́мъ по пꙋтемъ на́шимъ, и҆ по дѣа́нїемъ на́шимъ, та́ко сътвори на́мъ·

Въ четве́ртыи межд̑ꙋ десѧтьма е҆ді́нагона́десѧте мс̑҇ца, се́и ес̑҇ мцс̑҇ъ сават̑, въ вто́рое лѣто при да́рїи.
бы́сть сло́во гн҃е къ захарїи варахїинꙋ сн҃ꙋ а҆д꙽до прро̑҇кꙋ, гл҃ѧ.
ви́дѣхъ но́щїю, и҆ с̂е мꙋжъ всѣдъ на ко́нь ры́жъ, и҆ стоа́ше ме́ждꙋ горама ѻ҆сѣнѧ́ющима, и҆ за ни́мъ ко́ни ры́жи, и҆ пѣ́ѕи, и҆ срѣ́ни, и҆ бро́ни.
и҆ рѣхъ, чт̂о с̂и г҃и.
и҆ рече къ мнѣ̀ а҆гг҃лъ гл҃ѧи въ мнѣ̀, а҆зъ покажꙋ т̂и что̀ сꙋть с̂и.
и҆ ѿвѣща̀ мꙋжъ стоѧ́й междꙋ горами, и҆ рече къ мнѣ̀, с̂и сꙋть ꙗ҆́же посла̀ г҃ь ѻ҆бъи҆ти зе́млю.
и҆ ѿвѣщаша̑ а҆гг҃лꙋ гн҃ю стоа́щемꙋ межд̑ꙋ гора́ма, и҆ рѣша, ѻ҆бъи҆дохомъ зе́млю вс̂ю, и҆ с̂е всѧ̀ землѧ̀ вселена е҆сть и҆ молит̑.
и҆ ѿвѣща а҆гг҃лъ гн҃ь, и҆ рече.
г҃и вседръжи́телю, доко́лѣ не и́маши помилова́ти і҆ерс̑҇ли́ма, и҆ град̑ і҆ѹ́довъ ꙗ҆́же презрѣ.
се сед̑мое десѧ́т꙽ лѣто.
и҆ ѿвѣща̀ г҃ь вседръжи́тель а҆гг҃лꙋ гл҃ющемꙋ въ мнѣ̀ гл҃ы до́бры словеса̀ ѹ҆тѣш꙽на·

И҆ рече къ мнѣ̀ а҆гг҃лъ гл҃ѧи въ мнѣ̀, възъпїи гл҃ѧ, си́це гл҃етъ г҃ь вседръжи́тель, ревновах꙽ сїѻ́нꙋ и҆ і҆ерс̑҇ли́мꙋ рве́нїемъ вели́ком꙽.
и҆ гнѣ́вомъ ве́лїимъ а҆зъ прогнѣвах꙽сѧ на ꙗ҆зы́ки напада́ющаа м̂и.
зане а҆зъ ѹ҆бо прогнѣвах̑сѧ ма́лы, ѻ҆ни́ же налегоша въ зл̂а·

Сего ради си́це гл҃етъ г҃ь, ѻ҆бращꙋсѧ къ і҆ерс̑҇ли́мꙋ щедрота́ми, и҆ храмъ мо́и соѕиждет̑сѧ в нем̑, гл҃етъ г҃ь вседръжи́тель.
и҆ мѣрами протѧ́гнетсѧ въ і҆ерс̑҇ли́мѣ е҆щѐ.
и҆ рече къ мнѣ̀ а҆гг҃лъ гл҃ѧ́и въ мнѣ̀, възъпїи гл҃ѧ, си́це гл҃етъ г҃ь вседръжи́тель, е҆щѐ прелїѧ́тисѧ и҆́мꙋтъ гра́ды до́брыми, и҆ поми́лꙋет̑ г҃ь е҆щѐ сїѻна, і҆ и҆зволитъ е҆щѐ і҆ерс̑҇ли́ма·

И҆ възведох꙽ ѻ́чи моѝ и҆ ви́дх̑ѣ, и҆ с̂е четы́ри ро́зи.
и҆ рѣхъ къ а҆гг҃лꙋ гл҃ющемꙋ въ мнѣ̀, чт̂о сꙋть с̂и г҃и.
и҆ рече къ мнѣ̀, с̂и ро́зи расто́чшеи і҆ѹ́дꙋ и҆ і҆и҃лѧ, и҆ і҆ерс̑҇ли́ма·

И҆ показа ми г҃ь четы́ри древодѣ́лѧ.
и҆ рѣхъ, что̀ с̂и грѧдꙋтъ сътворити г҃и.
и҆ реч̑҇, с̂и ро́зи расточшеи і҆ѹ́дꙋ и҆ і҆ил҃ѧ низлож꙽ша, и҆ никтоже и҆хъ въздвиж̑ главы̀.
і҆ и҆зыидо́ша с̂и поѻ҆стрити ѧ҆̀ въ рꙋкахъ и҆хъ четы́ре и҆ рози ꙗ҆зы́цы възносѧщеи рози на́ землю гн҃ю расточи́ти ю҆̀·

Глв̑҇а, в҃·

И възведох̑ ѻ҆́чи моѝ и҆ ви́дѣх꙽.
и҆ с̂е мꙋжъ, и҆ въ рꙋцѣ е҆го ѹ҆́же землемѣрно.
и҆ рѣхъ к немꙋ, гдѣ̀ грѧдеши т̂ы.
и҆ рече къ мнѣ̀, размѣрити і҆ерс̑҇ли́ма, и҆ ви́дѣти т̂о коли́ка широта е҆го е҆сть и҆ коли́ка дол꙽гота.
и҆ с̂е а҆гг҃лъ гл҃ѧи въ мнѣ̀ стои́т꙽, і҆ и́нъ а҆гг҃лъ и҆схожда́ше въ стрѣтенїе е҆мꙋ.
и҆ рече к немꙋ гл҃ѧ, теци и҆ гл҃и къ ю́ноши ѻ҆́номꙋ, гл҃ѧ, плод̑на всели́тисѧ і҆ерс̑҇ли́мꙋ ѿ мно́жества чл҃чьска и҆ скот̑ и҆же посредѣ е҆го.
и҆ а́зъ бꙋдꙋ е҆мꙋ, гл҃етъ г҃ь, стѣна ѻ҆́гнена ѻ҆́крс̑҇тъ, и҆ в꙽ сла́вꙋ бꙋдꙋ посредѣ е҆го.
ѿбѣга́ите ѿ лица сѣвера, гл҃етъ г҃ь.
зане ѿ четы́рь вѣтръ нбс̑҇ных꙽ съберꙋ в̂ы, гл҃етъ г҃ь.
въ сїѻ́нъ воз̑враща́итесѧ живꙋщеи въ дщере вавѷлон꙽стѣ·

Зане си́це гл҃етъ г҃ь вседръжитель, въ слд̑ѣ сла́вы посла м̂ѧ на ꙗ҆зы́ки и҆спровръг꙽шаѧ вас̑҇.
зане каса́ѧйсѧ ва́съ, ꙗ҆́ко каса́ѧйсѧ въ ѕѣницꙋ ѻ҆́ка свое҆го.
зане а҆зъ нанесꙋ рꙋкꙋ мою̀ на́ нѧ, и҆ бꙋдꙋтъ коры́сть и҆спроверг꙽шимъ е҆го.
и҆ разꙋмѣ́ете ꙗ҆́ко г҃ь вседръжи́тель посла м̂ѧ·

Ѹ҆краша́исѧ и҆ весели́сѧ дщ̂и сїѻ́нѧ, зане а҆зъ прїидꙋ, и҆ вселюсѧ посредѣ тебе, гл҃етъ г҃ь.
и҆ прибѣгнꙋтъ ꙗ҆зы́цы мно́ѕи къ г҃ꙋ въ то́и дн҃ь, и҆ бꙋдꙋтъ е҆мꙋ в лю́ди, и҆ вселѧ́тсѧ посредѣ тебе, и҆ разꙋмѣ́еши ꙗ҆́ко г҃ь вседръжи́тель посла м̂ѧ к тебѣ̀.
и҆ закононаслѣдитъ г҃ь і҆ѹ́дꙋ ѹ҆ча́стїе е҆го на ст҃ꙋю землю, і҆ и҆зволи́тъ е҆щѐ і҆ерс̑҇ли́мꙋ, да говѣ́етъ всѧ́ка пло́ть ѿ лица гн҃ѧ, ꙗ҆́ко въста̀ и҆зъ ѻ҆бла́къ ст҃ыхъ свои҆хъ·

Глв̑҇а, г҃·

И показа м̂и г҃ь і҆с҃а і҆е҆ре́ѧ вели́каг̑҇ стоа́ща пред̑ лицем̑ а҆гг҃ла гн҃ѧ, и҆ непрїѧ́знь стоа́ше ѻ҆деснꙋю е҆го проти́витисѧ е҆мꙋ.
и҆ рече г҃ь къ дїа́волꙋ, запреща́етъ г҃ь ѻ҆ тебѣ непрїѧ́зни, и҆ запреща́етъ г҃ь ѻ҆ тебѣ и҆збра́выи і҆ерс̑҇лима, нѣсе лѝ с̂е ꙗ҆́ко главнѧ и҆сторжена и҆́зъ ѻ҆гнѧ̀.
и҆ і҆с҃ б̂ѣ ѻ҆болчен̑҇ в ри́зы гнюси́вы, и҆ сто́итъ пред̑ лицем̑ а҆гг҃ла.
и҆ ѿвѣща̀, и҆ рече къ стоа́щим̑ пред̑ лицем꙽ е҆го, гл҃ѧ, ѿи҆мѣте ри́зы гнюси́выѧ ѿ него̀.
и҆ рече к немꙋ, с̂е ѿꙗ҆́хъ ѿ тебе безако́нїѧ твоа̀.
и҆ ѻ҆блецѣте и҆̀ в꙽ подирь, и҆ възложи́те крꙋнꙋ и҆ клобꙋ́къ чи́стъ на главꙋ̀ е҆мꙋ.
и҆ възложи́ша крꙋнꙋ и҆ клобꙋкъ чистъ на главꙋ̀ е҆го, и҆ ѻ҆блекоша и҆̀ в꙽ ризы, и҆ а҆гг҃лъ гн҃ь стоа́ше.
и҆ засвѣдѣтельствова́ше а҆гг҃лъ гн҃ь къ і҆с҃ꙋ, гл҃ѧ·

Си́це гл҃етъ г҃ь вседръжи́тель, а҆́ще въ пꙋти моа̀ и҆деши, и҆ а́ще повеленїѧ моа̀ съхрани́ши, и҆ ты расмотриши хра́мъ мо́и, и҆ а́ще съхрани́ши дво́ръ мои, и҆ дам꙽ т̂и възвраща́ющаасѧ посредѣ стоа́щихъ сих̑.
послꙋша́и же і҆с҃е і҆е҆ре́ю вели́кїи, т̂ы і҆ и҆скренїи твоѝ сѣдѧ́щеи пред̑ лицемъ твои҆мъ, зане мꙋжи дивоблꙋд꙽ци сꙋть.
зане а҆зъ въвождꙋ раба̀ мое҆го восто́ка.
занѐ ка́мень и҆же дахъ пред̑ лицемъ і҆с҃а, на ка́мени е҆ді́номъ сед̑мь ѿчесъ сꙋть.
с̂е аз̑ и҆зры́ю ров꙽, гл҃етъ г҃ь вс̂едръжи́тель, і҆ и҆зыщꙋ вс̂ю ѻ҆бидꙋ землѝ въ дн҃ь е҆ді́нъ.
въ ѻ҆́нъ дн҃ь, гл҃етъ г҃ь вседръжитель, съзоветъ ко́ждо и҆скренѧго свое҆го под̑ лозо́ю е҆го и҆ под̑ смоко́вницею е҆го·

Глв̑҇а, д҃·

И ѻ҆брати́сѧ а҆гг҃лъ гл҃ѧи въ мнѣ̀, и҆ възведе м̂ѧ ꙗ҆́ко с̂е е҆гда̀ въста́нетъ чл҃къ ѿ сна̀ свое҆го.
и҆ рече къ мнѣ̀, чт̂о т̂ы ви́диши.
и҆ рѣхъ, ви́дѣхъ, и҆ с̂е свѣщникъ зла́тъ ве́сь, и҆ просвѣтил꙽цѣ е҆го ве́рхꙋ е҆го, и҆ сед̑мь свѣти́лник̑҇ ве́рхꙋ е҆го, и҆ сед̑мь ꙗ҆́чаиць свѣти́лникомъ връх꙽нимъ е҆го.
и҆ дв̂ѣ масли́нѣ верхꙋ е҆го, е҆ді́на ѻ҆деснꙋю просвѣти́лца е҆го, и҆ е҆ді́на ѻ҆шю́ю.
и҆ въпроси́хъ и҆ рѣх꙽ къ а҆гг҃лꙋ гл҃ющемꙋ въ мнѣ̀, гл҃ѧ, чт̂о сꙋть с̂и г҃и.
и҆ ѿвѣща а҆гг҃лъ гл҃ѧи во мнѣ̀ и҆ рече къ мнѣ̀ гл҃ѧ, не разꙋмѣ́еши л̂и что̀ сꙋть с̂и.
и҆ рѣхъ, н̂и г҃и·

и҆ ѿвѣща̀ и҆ рече къ мнѣ̀, гл҃ѧ.
с̂е сло́во гн҃е къ зороваве́лю, гл҃ѧ, не в си́лꙋ вели́кꙋ, н̂и въ крѣпость, н̂о дх҃омъ мои҆мъ, гл҃етъ г҃ь вседръжи́тель·

кт̂о ты е҆си го́ро вели́каѧ пред̑ лицемъ зороваве́лю и҆справи́ти и҆ вынесꙋ ка́мень зако́нонаслѣдїѧ р꙽веньствїе блгд̑ти е҆го·

И҆ бы́сть сло́во гн҃е къ мнѣ̀, гл҃ѧ, рꙋцѣ зороваве́ли ѻ҆сновасте хра́мъ се́и, и҆ рꙋцѣ е҆го съвръши́сте и҆̀.
и҆ разꙋмѣ́ете ꙗ҆́ко г҃ь вседръжи́тель посла м̂ѧ къ ва́мъ.
занѐ кт̂о ѹ҆кори́лъ т̂ѧ е҆сть въ дн҃и дол꙽ги, и҆ възра́дꙋют̑сѧ и҆ ви́дѧтъ ка́мень и҆же ѿ чи́стаго ѻ҆́лова въ рꙋкꙋ зороваве́лю.
сед̑мь с̂и ѻ҆чеса гн҃ѧ сꙋть призїра́ющаа на всю̀ зе́млю.
и҆ ѿвѣщахъ, и҆ рѣх꙽ к немꙋ чт̂о е҆сть ѻ҆бѣ маслин꙽ницы с̂и и҆же ѻ҆деснꙋю свѣщника и҆ ѻ҆шю́ю е҆го.
и҆ вопросих̑ втори́цею, и҆ рѣх꙽ к немꙋ, чт̂о сꙋть ѻ҆бѣ вѣтви масли́ннїи и҆же в꙽ рꙋкꙋ ѻ҆бо́ю ѹ҆сѧцалницꙋ златꙋю, възлива́ющꙋю и҆ възноша́ющꙋю въ ꙗ҆ча́ица зла́тыѧ.
и҆ рече къ мнѣ̀, гл҃ѧ, не вѣси л̂и что е҆сть с̂и.
и҆ рѣх꙽, н̂и г҃и.
и҆ реч̑҇, с̂и ѻ҆́ба сн҃а вла́зѣ ꙗ҆́же пред̑стои҆та гв҃и всеѧ̀ землѧ̀·

Глв̑҇а, е҃·

И ѻ҆брати́хсѧ, и҆ възведо́хъ ѻ҆́чи мои.
и҆ ви́дѣхъ, и҆ се се́рпъ летѧ́щь.
и҆ рече къ мнѣ̀, чт̂о т̂ы ви́диши.
и҆ рѣ́хъ, а҆зъ ви́ждꙋ се́рпъ летѧ́щь, в долготꙋ ла́ктъ дво́юдесѧ́тꙋ, и҆ въ широтꙋ десѧт̑ ла́ктъ.
и҆ реч̑҇ къ мнѣ, си клѧ́тва и҆сходѧ́щїа на лице всеѧ̀ землѧ̀.
зане всѧкъ та́ть ѿ сего до смр҃ти м꙽сти́тсѧ.
и҆ вы́несꙋ и҆̀, гл҃етъ г҃ь вседръжи́тел̑҇, и҆ вни́детъ въ до́мъ та́тиныи, и҆ въ до́мъ кленꙋщагосѧ и҆менемъ моим̑ въ лжꙋ, и҆ ѻ҆бита́етъ посредѣ до́мꙋ е҆го, и҆ скон꙽чаетъ и҆̀, и҆ дре́во е҆го и҆ ка́менїе е҆го·

И҆зы́иде а҆гг҃лъ гл҃ѧи въ мнѣ̀, и҆ рече къ мнѣ̀, възри ѻ҆чи́ма свои҆ма и҆ ви́ждъ, чт̂о сходѧ́щее с̂е.
и҆ рѣ́хъ, чт̂о е҆сть.
и҆ рече ми, с̂и мѣ́ра и҆сходѧ́щїѧ, и҆ рече, с̂е непра́вда их̑ по всеи землѝ.
и҆ се талан꙽тъ ѻ҆ловѧ́нъ въземлѧ́сѧ, и҆ с̂е жена̀ е҆ді́на сѣдѧ́ше посредѣ мѣ́ры.
и҆ рече, с̂и е҆сть безако́нїе.
и҆ вывръжесѧ посредѣ мѣ́ры, и҆ въве́рже талан꙽тъ ѻ҆ловѧ́ныи въ ѹ҆ста е́й·

И҆ възведо́хъ ѻ҆́чи мои, и҆ ви́дѣхъ, и с̂е двѣ женѣ сходѧ́щи, и҆ дꙋхъ въ кры́лꙋ и҆́ма, и҆ тѣ и҆мѣа́ше тѣ кры́лѣ ꙗ҆́ко кры́лѣ вод̑динѣ, и҆ взѧ́ста мѣ́рꙋ междꙋ земле́ю и҆ нб҃омъ.
и҆ рх̑ѣ къ а҆гг҃лꙋ гл҃ющемꙋ въ мнѣ̀, камо сїи несета̀ мѣ́рꙋ.
и҆ рече къ мнѣ̀, създа́ти е́й хра́минꙋ въ землѝ вавѷлон꙽стѣи, и ѹ҆готова́ти и҆ положи́ти ю҆̀ т̂ꙋ на ѹ҆готова́нїе е҆мꙋ·

Глава, ѕ҃·

И ѻ҆брати́хсѧ, и҆ възведо́хъ ѻ҆́чи мои.
и҆ ви́дѣхъ, и҆ се четы́ри колесни́ца сходѧ́щаѧ посредѣ двою горꙋ.
го́ры же тѣ бѣша го́ры мѣдѧны.
в꙽ колесни́цы прьвѣ́и ко́ни ры́жи.
в꙽ колесни́цы вторѣи ко́ни вра́ни.
и҆ в꙽ колесни́цы третѣи ко́ни срѣни.
и҆ в꙽ колесни́цы четве́ртѣи ко́ни пѣѕ́и и҆ бро́ни·

И҆ ѿвѣщахъ и҆ рѣхъ къ а҆гг҃лꙋ гл҃ющемꙋ въ мнѣ, чт̂о сꙋть с̂и г҃и.
и҆ ѿвѣща а҆гг҃лъ гл҃ѧи въ мнѣ̀, и҆ рече къ мнѣ, с̂и сꙋть четы́ри вѣтри нбс̑҇нїи, и҆же и҆схо́дѧтъ пред̑ста́ти г҃ꙋ всеѧ̀ землѧ̀·

В не́иже бѣхꙋ ко́ни вра́ни и҆схожд̑ахꙋ на землю сѣвер꙽скꙋю.
и҆ срѣ́нїи и҆схожа́хꙋ въ слѣ́дъ и҆хъ.
и҆ ры́жїи и҆схожд̑ахꙋ на́ землю ю҆́жнꙋю.
пѣ́ѕїи и҆ бронїи и҆схожд̑а́хꙋ і҆ и҆ска́хꙋ и҆ ѻ҆зира́хꙋ ѻ҆бъи҆ти зе́млю·

И҆ рече, и҆дѣте и҆ ѻ҆бъи҆дѣте зе́млю, и҆ ѻ҆бъи҆до́ша всю зе́млю.
и҆ въз꙽пи и҆ възва̀ м̂ѧ, и҆ реч̑҇ къ мнѣ̀, гл҃ѧ, с̂е и҆сходѧ́щеи на землю сѣвер꙽скꙋю, покоиша ꙗ҆́рость мою на землѝ сѣвер꙽стеи·

И҆ бы́сть сло́во гн҃е къ мнѣ̀, гл҃ѧ, прїими ꙗ҆́же ѿ плѣ́на ѿ кн҃ѕь и҆ ѿ ключи́мыхъ е҆го, и҆ ѿ разꙋмѣвшихъ е҆го, ѿ е҆лда́ѧ, и҆ ѿ товїѧ, и҆ ѿ и҆лі́ѧ.
и҆ въни́деши т̂ы въ дн҃ь ѻ҆́нъ въ до́мъ и҆ѻ҆сїѧ софо́нїина, грѧдꙋщаго ѿ вавѷло́на.
и҆ прїимеши сребро и҆ зла́то и҆ сътво́риши крꙋ́нꙋ, и҆ възло́жиши на главꙋ і҆сꙋсꙋ и҆ѻ҆седе́ковꙋ і҆е҆рею вели́комꙋ.
и҆ рече́ши к немꙋ, сице гл҃етъ г҃ь вседержи́тель, се мꙋж́ъ восто́къ и҆мѧ е҆мꙋ, и҆ под̑ ни́мъ въсїѧ́етъ, и҆ съзи́жд̑етъ храм̑ гн҃ь, и҆ то́и прїиметъ добро дѣа́нїе, и҆ сѧдет꙽꙽ и҆ ѻ҆бладает̑ на прс̑҇тлѣ свое҆м꙽, и҆ бꙋдет̑ і҆е҆реи ѻ҆деснꙋ́ю е҆го.
и҆ совт̑ѣ ми́ренъ бꙋдет̑ междꙋ двѣма.
а҆ крꙋ́на бꙋдет̑ тръпѧ́щим̑, и҆ ключи́мым̑ е҆мꙋ, и҆ разꙋмѣвшимъ е҆го, и҆ въ бл҃года́ть сн҃ꙋ софо́нїинꙋ, и҆ въ ѱало́мъ въ храм̑ гн҃ь.
і҆ и҆здале́ча ѿ сихъ прїидꙋтъ и҆ съзи́ждꙋтъ хра́мъ гн҃ь, и҆ разꙋмѣ́ете ꙗ҆́ко г҃ь вседержитель посла м̂ѧ к꙽ вам̑.
и҆ бꙋдете а҆ще послꙋша́юще ѹ҆слы́шите глс̑҇а г҃а б҃а вашег̑҇·

Глв̑҇а з҃·

И бы́сть въ четве́ртое лѣто при дарїи цр҃и.
бы́сть сло́во гн҃е к꙽ захарїи, в꙽ четвертыи мс̑҇ца девѧ́таго, е҆же е҆сть хаслеѷ.
и҆ посла̀ въ веѳи́ль сар꙽саръ, и҆ а҆рвесеер꙽ цр҃ь, и҆ мꙋжи и҆же с ни́мъ ѻ҆цы́ститисѧ гв҃и, гл҃ѧ, къ сщ҃енным̑ и҆же в꙽ хра́мѣ г҃а бг҃а вседръжителѧ и҆ къ прро̑҇комъ, а҆ще вниде здѣ̀, в пѧ́тыи мс̑҇ць ст҃ыни.
плача̀ и҆л̂и постѧ́сѧ, ꙗ҆́коже сътвори ѹ҆же мно́га лѣта·

И҆ бы́сть сло́во г҃а вседръжи́телѧ къ мнѣ̀, гл҃ѧ, рцы̀ къ вси́мъ лю́демъ землѧ̀ и҆ къ сщ҃енным̑ гл҃ѧ, а҆ще пости́тесѧ и҆ли пла́че вопльстви́те въ пѧ́тыи и҆ сед̑мыи мс̑҇цъ сед̑мьдесѧ́тъ лѣтъ, е҆да̀ по́стомъ по́стистемисѧ.
и҆ а́ще ꙗ҆́сте и҆ пїете, не вы̀ л̂и ꙗ҆́сте и҆ в̂ы пїете.
не се л̂и сꙋть словеса̀ ꙗ҆́же гл҃а г҃ь рꙋкою проро́къ пред̑ нихъ е҆гда̀ б̂ѣ і҆ерс̑҇лим̑ вселен꙽, и҆ гобзꙋ́ющеи гра́ды е҆го ѻ҆крс̑҇тъ, и҆ под̑горїе и҆ подольныѧ вселе́ни бѧхꙋ·

И҆ бы́сть сло́во гн҃е къ заха́рїи, гл҃ѧ, си́це гл҃етъ г҃ь вседръжитель.
сꙋдъ пра́ведетъ сꙋди́те, и҆ млс̑҇ти и҆ щедроты твори́те кождо и҆скрьнемꙋ свое҆мꙋ.
а҆ вдови́цы, и҆ си́ра, и҆ прише́лца, и҆ ѹ҆бога не насильствꙋ́ите.
и҆ зло́бы кождо бра́та свое҆го да не по́мните н̂и вражды въ срд̑цахъ своих̑·

и҆ противи́шасѧ внима́ти, и҆ да́ша плеща и҆хъ не мꙋдръствꙋ́юща, и҆ ѹ҆шеса̀ своа ѻ҆тѧжи́ша не ѹ҆слышати, и҆ срд̑ца своа̀ ѹ҆чини́ша проти́вна не послꙋша́ти зако́на мое҆го, и҆ сло́во е҆же посла̀ г҃ь вседръжи́тель дх҃омъ свои҆мъ рꙋкою прро̑҇къ пред꙽ нихъ·

И҆ бы́сть гнѣвъ вели́кїи ѿ г҃а вседръжи́телѧ.
и҆ бꙋдетъ в꙽ неже кова́ръство рече, и҆ не ѹ҆слы́шаша е҆го.
си́це възъпїютъ, и҆ не и́мамъ ѹ҆слы́шати, гл҃етъ г҃ь вседръжи́тель.
и҆ вынесꙋ ѧ҆̀ ꙗ҆́коже въ ви́хрѣ въ всѧ ꙗ҆́зы́ки и҆же не разꙋмѣша.
и҆ землѧ̀ запꙋстѣ́етъ по них̑ ѿ мимоходѧ́ща и҆ ѿ воз̑враща́ющагосѧ.
и҆ ѹ҆чиниша и҆збра́ннꙋю зе́млю в꙽ запꙋстѣнїе·

Глава, и҃·

И бы́сть сло́во г҃а вседръжи́телѧ къ мнѣ̀, гл҃ѧ, си́це гл҃етъ г҃ь вседръжи́тель.
ревновахъ і҆ерс̑҇ли́мꙋ и҆ сїѻ́нꙋ рве́нїемъ вели́комъ, и҆ ꙗ҆́ростїю велїею ревнова́хъ е҆мꙋ·

Та́ко гл҃етъ г҃ь, ѻ҆бращꙋсѧ на сїѻ́на, и҆ вселюс̑҇ посредѣ і҆ерс̑҇ли́ма.
и҆ наречетсѧ і҆ерс̑҇ли́мъ гра́дъ и҆́стин꙽ныи и҆ гора̀ г҃а вседръжи́телѧ, гора̀ ст҃аѧ·

Си́це гл҃етъ г҃ь вседръжи́тель, е҆щѐ сѧ́дꙋтъ старцы и҆ стари́ца на пꙋтехъ і҆ерс̑҇лим̑скихъ, кождо жезлъ сво́и и҆мыи въ рꙋцѣ свое́и ѿ мно́жества дн҃їи.
и҆ пꙋтїе гра́да и҆сполнѧт̑сѧ ѻ҆́трочищь и҆ ѻ҆троковиць и҆гра́юще на пꙋтехъ е҆го·

Си́це гл҃етъ г҃ь вседръжитель, а҆ще и҆знемо́жет̑ пре ѻ҆ста́нкомъ людїи сихъ въ ѻ҆́нх̑ѣ дн҃ехъ.
е҆да̀ и предо мно́ю изнемо́жет̑, гл҃етъ г҃ь вседръжи́тель·

Си́це гл҃етъ г҃ь вседръжи́тель, с̂е а҆́зъ сп҃сꙋ лю́ди моѧ̀ ѿ землѧ̀ восточныѧ, и҆ ѿ землѧ̀ за́пад̑ныѧ.
и҆ въведꙋ ѧ҆̀ въ землю их̑ и҆ вселю́сѧ посредѣ і҆ерс̑҇ли́ма, и҆ бꙋдꙋтъ м̂и въ люди, и҆ а́зъ бꙋдꙋ и҆мъ въ б҃а въи҆́стин꙽нꙋ и҆ въ пра́вдꙋ·

Си́це гл҃етъ г҃ь вседръжи́тель, дꙋ ѹ҆крѣпѧ́тсѧ рꙋ́ки ва́ша слы́шащихъ въ дн҃и с̂и словеса̀ с̂и ѿ ѹ́стъ прро̑҇ческь, ѿ негоже дн҃е ѻ҆снова́сѧ хра́мъ г҃а вседръжи́телѧ, и҆ цр҃кви ѿнелѣже създа́сѧ.
зане прежд̑е дн҃їи ѻ҆́нѣхъ м꙽зда чл҃ком̑ не бѣ̀ въ ѹ҆спх̑ѣ, и҆ м꙽зда ското не бѧше, и҆ и҆сходѧщемꙋ и҆ въходѧщемꙋ не б̂ѣ мира ѿт̑ печа́ли, и҆ послю̀ вс̂ѧ чл҃ки когождо на и҆скренѧго свое҆го.
и҆ нн҃ѣ не по дн҃емъ ѻ҆́нѣмъ пръвымъ а҆́зъ сътворю̀ ѻ҆стан꙽кꙋ людїи си́хъ, гл҃етъ г҃ь вседръжи́тель, н̂о покажꙋ ми́ръ.
вино да́сть плод̑ сво́и, и҆ землѧ̀ да́сть жи́та своѧ̀, и҆ нб҃о да́сть вла́гꙋ свою.
и҆ наслѣ́дѧтъ ѻ҆стан꙽кꙋ лю́дїи мои҆хъ всѧ с̂и.
и҆ бꙋдете ꙗ҆́коже бѣсте въ клѧ́твꙋ въ ꙗ҆́зы́цехъ до́ме і҆ѹ́довъ, и҆ до́ме і҆ил҃в꙽.
та́ко провождꙋ в̂ы, и҆ бꙋдете въ блс̑҇ве́нїе·

дръза́ите, и҆ крепѣтес̑҇ рꙋка́ми вашими.
зане си́це гл҃етъ г҃ь вседръжи́тель, ꙗ҆коже помы́слихъ ѻ҆злоби́ти в̂ы, внегда̀ прогнѣваша м̂ѧ ѿц҃ы ва́ши, гл҃етъ г҃ь вседръжи́тель, и҆ не покаѧ́хсѧ, тако ѻ҆пол꙽чихсѧ.
и҆ помы́шлѧю въ дн҃и сїѧ добро̀ сътвори́ти і҆ерс̑҇ли́мꙋ и҆ до́мꙋ і҆ѹ́довꙋ, дръза́ите.
си̂ словеса̀ ꙗ҆́же сътвори́те, гл҃ите и҆́стин꙽нꙋ ко́ждо и҆скренемꙋ свое҆мꙋ.
и҆стиннꙋ и҆ сꙋдъ ми́ренъ сꙋди́те въ вра́техъ свои҆хъ.
и҆ кождо ѕло́бы и҆скренѧ́го свое҆го не помышлѧ́ите въ срд̑цыхъ ва́ших̑.
и҆ клѧ́твы и҆ л꙽жа не люби́те, зане вс̂ѧ сѝ възненавидѣхъ, гл҃етъ г҃ь вседръжитель·

И҆ бы́сть сло́во г҃а вседръжи́телѧ къ мнѣ̀, гл҃ѧ, си́це гл҃етъ г҃ь ввседръжи́тель, по́стъ четве́ртыи, и҆ по́стъ пѧ́тыи, и҆ по́стъ сед̑мыи, и҆ по́стъ десѧ́тыи бꙋдетъ до́мꙋ і҆ѹ́довꙋ въ ра́дость, и҆ въ весе́лїе, и҆ въ празд̑ники бл҃гы, и҆ възвеселитесѧ, і҆ и́стиннꙋ и҆ ми́ръ възлюби́те·

Си́це гл҃етъ г҃ь вседръжи́тель, е҆щѐ лю́дїе мно́ѕи прїидꙋтъ, и҆ живꙋще́и въ гра́дѣхъ мно́ѕѣхъ.
и҆ сън꙽мꙋтсѧ живꙋщеи въ пѧтигра́дъ въ е҆ді́нъ градъ, гл҃юще, грѧдѣмъ и҆дꙋще моли́тисѧ лицю̀ гн҃ю вседръжи́телевꙋ, и҆ възыска́ти лица̀ гн҃ѧ вседръжи́телева.
и҆дꙋ и҆ а́зъ.
и҆ прїидꙋтъ лю́дїе мно́ѕи, и҆ ꙗ҆зы́ци мно́ѕи възыска́ти лица̀ г҃а вседръжи́телѧ въ і҆ерс̑҇ли́мѣ, и҆ ѻ҆цыститисѧ пред̑ лицем̑ г҃а вседръжи́телѧ·

Си́це гл҃етъ г҃ь вседержитель, во ѻ́ны дн҃и и҆мет̑сѧ де́сѧть мꙋжь ѿ всх̑ѣ пле́менъ ꙗ҆зы́ческих̑, і҆ и҆мꙋтсѧ за ри́зꙋ мꙋжа жидови́на, гл҃юще, и҆́дем̑ с тобо́ю, зане слы́шахом̑ ꙗ҆́ко б҃ъ с ва́ми ес̑҇·

Глв̑҇а, ѳ҃·

Бг҃осмышленїе словесѐ гн҃ѧ на́ землю а҆драха и҆ дама́ска жрътва е҆мꙋ.
зане г҃ь призритъ на чл҃ки и҆ на вс̂ѧ колѣна і҆и҆л҃ева.
и҆ е҆ѳа́мъ въ предѣлы е҆го, тѷръ, и҆ сидо́нъ, ꙗ҆́ко ѹ҆мꙋдрѣсте ѕѣло.
и҆ създа̀ тѷръ твердь себѣ̀, и҆ пощадѣ себѣ̀ сребро̀ ꙗ҆́ко пе́рсть, и҆ зла́то ꙗ҆́ко бре́нїе пꙋтное·

Сего ради г҃ь зако́нонаслѣдитъ ѧ҆̀, и҆ поразитъ въ мо́ре си́лꙋ е҆го, и то́и ѻ҆гнемъ поꙗ҆́стьсѧ.
и҆ ви́дитъ а҆скало́нъ, и҆ ѹ҆бои́тсѧ.
и҆ га́за, и҆ ѻ҆строп꙽ти́тсѧ ѕѣло.
и҆ а҆к꙽каро́нъ, ꙗ҆́ко постыдѣсѧ ѻ҆ прегрѣшенїи е҆го.
и҆ поги́бнетъ црс̑҇тво ѿ га́зы, и҆ а҆скалонъ не и҆́мать всели́тисѧ·

И҆ вселѧ́тсѧ и҆ноплеме́нницы въ а҆зотъ, и҆ разрд̑ꙋшꙋ досажде́нїе и҆ноплемен꙽никомъ.
і҆ и҆змꙋ кро́вь их̑ ѿ ѹ́стъ и҆хъ, и ме́рзость и҆хъ посредѣ зꙋбъ и҆хъ.
и҆ ѻ҆ста́вѧтсѧ и҆ сїи б҃ꙋ на́шемꙋ, и҆ бꙋдꙋтъ ꙗ҆́ко ты́сѧщникъ въ домꙋ̀ і҆ѹ́довѣ, и҆ а҆к꙽каро́нъ ꙗ҆́ко и҆е҆в꙽вꙋсеи.
и҆ под̑ставлю храмꙋ мое҆мꙋ въздвиженїе не ми́моходи́ти ни възврати́ти, и҆ ктомꙋ не и҆́мать прїити на нѧ̀ николи́же выгонѧ́и, ꙗ҆́ко нн҃ѣ видѣхъ ѻ҆чима мои́ма·

Радꙋ́исѧ ѕѣло дщ̂и сїѻ́нѧ, проповѣда́и дщ̂и і҆ерс̑҇ли́млѧ.
се цр҃ь твои грѧдет꙽ т̂и пра́веденъ и҆ сп҃саа́й.
тои кро́токъ, и҆ всд̑ѣ на ꙗ҆ре́мникъ и҆ жре́бецъ ю҆́нъ.
и҆ потребит̑ ѻ҆рꙋжїѧ ѿ е҆фре́ма, и ко́нѧ ѿ і҆ерс̑҇ли́ма.
и҆ потреби́тъ лꙋкъ бра́нныи, и речетъ ми́ръ ꙗ҆зы́комъ.
и҆ ѻ҆бладае҆тъ вода́ми ѿ мо́рѧ и҆ до мо́рѧ, и҆ ѿ рѣкъ до и҆схо́дищъ землѝ.
и҆ т̂ы въ кро́вь завѣта свое҆го и҆спꙋсти́лъ е҆си ѹ҆́зники твоа̀ ѿ рова не и҆мꙋща воды̀.
сѧ́дете въ твердѣ свѧ́зани сон꙽мища, и҆ за е҆ді́нъ дн҃ь прише́ствїю т̂и сꙋгꙋ́бо възвратит꙽ т̂и.
зане же напрѧго́хъ т̂ѧ себѣ̀ і҆ѹ́до ꙗ҆́ко лꙋ́къ, і҆ и҆спо́лнихъ е҆фрѣма.
и҆ въздвигнꙋ ча́да твоа̀ сїѻ́не , на ча́да е҆́ллин꙽ска, и҆ посѣщꙋ т̂ѧ ꙗ҆́ко ѻ҆рꙋжїе
хра́бра·

И҆ г҃ь на ни́хъ ꙗ҆́вит̑сѧ, і҆ и҆зыдетъ ꙗ҆ко молнїѧ стрѣла е҆го.
и҆ г҃ь б҃ъ вседръжи́тель въ трꙋбꙋ вострꙋ́битъ, і҆ и́детъ въ шꙋмѣ преще́нїа свое҆го.
и҆ г҃ь вседержи́тель защити́тъ и҆хъ, и поꙗ҆дѧ́тъ ѧ҆̀, и҆ посы́плютъ и҆хъ ка́менїемъ пра́щнымъ.
і҆ и҆спїютъ кро́вь и҆хъ ꙗ҆́ко вино, і҆ и҆сплънь ѻ҆кри́нъ е҆ле́ѧ, и҆ ꙗ҆́ко ѻ҆лта́рь.
и҆ сп҃сетъ ѧ҆̀ г҃ь б҃ъ и҆хъ въ дн҃ь ѻ҆́нъ ꙗ҆ко ѻ҆́вца лю́ди е҆го, занѐ ка́менїе ст҃о валѧет̑сѧ на зем̑ли ег̑҇.
ꙗ҆́ко е҆же бл҃го томꙋ̀, и҆ е҆же добро̀ томꙋ̀.
пшени́ца ю҆́ношамъ, и҆ вино̀ бл҃гоѹ҆хан꙽но въ ю҆́ноты и҆ дв҃ы·

Глв̑҇а, і҃·

Проси́те ѿ г҃а до́жда въ вре́мѧ ра́но и поз꙽дно.
г҃ь сътвори пи́рь виденїѧ, и до́ждь зи́менъ да́сть и҆мъ, и҆ комꙋждо зелїе на селѣ.
зане провѣща́ющеи гл҃аша трꙋ́ды, и҆ вражи́тели вѣдѣнїѧ ло́жна, и҆ со́нїѧ л꙽жа̀ гл҃ахꙋ и҆ сꙋе́тно ѹ҆тѣша́хꙋ.
сего ради и҆зъꙗ҆́шасѧ ꙗ҆ко ѻ҆́вца, и҆ ѻ҆злоби́шасѧ ꙗ҆́ко не бѣ̀ и҆сцѣле́нїѧ·

На па́стырѧ прогнѣва́сѧ ꙗ҆́рость моѧ̀, и҆ на а́гньца моѧ̀ посѣщꙋ.
и҆ посѣти́тъ г҃ь б҃ъ вседръжи́тель ста́да свое҆го до́мꙋ і҆ѹ́дова, и҆ ѹ҆чини́тъ ѧ҆̀ ꙗ҆ко конѧ̀ лѣпа е҆мꙋ въ бра́ни.
и҆ ѿ него̀ призрѣ, и҆ ѿ него̀ ѹ҆чини, и҆ ѿ него лꙋкъ въ дꙋхъ ꙗ҆рости мое́ѧ, и҆з него и҆зыидетъ всѧк̑҇ и҆згонѧ̀ ѻ҆ томъ.
и҆ бꙋдꙋтъ ꙗ҆́ко хра́бри попира́юще бренїе на пꙋтехъ въ бра́ни, и҆ ѻ҆полча́тсѧ ꙗ҆́ко г҃ь с ни́ми, и҆ постыдѧ́тсѧ вса́дници кон꙽нїи·

И҆ ѹ҆крѣплю до́мъ і҆ѹ́довъ, и҆ до́мъ і҆ѻ́сифовъ сп҃сꙋ, и҆ вселю ѧ҆̀ ꙗ҆ко възлобихъ ѧ҆̀.
и҆ бꙋдꙋтъ в не́же кова́ръство не възврати́хъ и҆хъ.
зане а҆зъ г҃ь б҃ъ и҆хъ и҆ ѹ҆слы́шꙋ ѧ҆̀.
и҆ бꙋдꙋтъ ꙗ҆́ко хра́бри е҆фрѣмови, и҆ възра́дꙋетсѧ срд̑це и҆мъ ꙗ҆́ко ѿ вина̀.
и҆ ча́да своѧ̀ ви́дѧтъ, и҆ възвеселѧт̑сѧ, и҆ възра́дꙋетсѧ срд̑це и҆мъ ѻ҆ г҃и.
възвѣщꙋ и҆мъ, и҆ прїимꙋ ѧ҆̀, и҆ ѹ҆мно́жатсѧ ꙗ҆́коже бѣа́хꙋ мно́ѕи.
и҆ всѣю ѧ҆̀ въ лю́дехъ, и҆ да́лнїи помѧнꙋт꙽ м̂ѧ, и҆ въспита́ютъ ча́да своа̀ и҆ ѻ҆братѧ́тсѧ.
и҆ възвращꙋ ѧ҆̀ ѿ землѧ̀ е҆гѷпет꙽ски, и҆ ѿ а҆сѷрїи прїимꙋ ѧ҆̀, и҆ въ галаа҆ди́тъ и҆ въ лива́нъ въведꙋ ѧ҆̀, и҆ не и҆́мать ѻ҆ста́ти ѿ них̑ н̂и е҆ді́нъ·

и҆ про́идꙋтъ въ мо́ре ѹ҆́з꙽ко, и҆ поразѧтъ мо́ре во́лны, і҆ и҆с꙽сѧчютъ вс̂ѧ глꙋбины рѣчныѧ.
и҆ раз꙽дрꙋшитсѧ всѧ́ко досажд̑енїе а҆сѷрїиско, и҆ скѷпетръ е҆гѷпет꙽скь ѿи҆мет̑сѧ и҆ ѹ҆крѣплю ѧ҆̀ ѻ҆ г҃и бѕ҃ѣ и҆хъ, і҆ ѻ҆ и҆мени е҆го восхалѧт̑сѧ, гл҃етъ г҃ь·

Глв̑҇а, а҃і·

Разве́рзи лива́не две́ри своѧ, и҆ да поꙗ҆́сть ѻгнь тисїе твое.
да пла́че вопльствит̑ пѷти́съ занѐ падѐ кедръ, ꙗ҆́ко вельмо́жа вельмѝ ѻ҆стра̑сти́шасѧ.
въспла́че вопльстви́те дꙋби васинитид̑стїи, ꙗ҆ко низвержесѧ дꙋбра́ва съсажд̑еннаѧ.
гла́съ пла́чющихъ па́стырь, ꙗ҆́ко ѻ҆стрс̑҇тисѧ величїе и҆хъ.
глас̑҇ въпїющихъ лев꙽, ꙗ҆́ко погꙋбисѧ шата́нїе і҆ѻ҆рдане·

Си́це гл҃етъ г҃ь вседръжи́тель, паси́те ѻ́вца заколе́нїю, ꙗ҆́же стѧжа́вшеи ѧ҆̀ и҆скала́хꙋ и҆ не раска́ѧхꙋсѧ.
и҆ прода́ющеи ѧ҆̀ гл҃ахꙋ, блс̑҇венъ г҃ь, и҆ ѻ҆богати́хомсѧ.
и҆ па́стыри и҆хъ не печа́хꙋсѧ ничи́мже ѻ҆ ни́хъ·

Сего ради не пощажд̑ꙋ ктомꙋ̀ на живꙋщих̑ по землѝ, гл҃етъ г҃ь.
и҆ се а҆зъ предамъ чл҃ки кого́жд̑о в рꙋцѣ и҆скренемꙋ и҆ в рꙋ́цѣ цр҃ю свое҆мꙋ.
і҆ и҆с꙽сѣкꙋтъ землю, и҆ не и́мамъ и҆зѧ́ти ѿ рꙋкѝ и҆хъ.
и҆ ѹ҆пасꙋ ѻ́вца заколе́нїю въ землѝ ханаа́мли.
и҆ прїимꙋ себѣ дв̂а жезла̀, е҆ді́наго нарх̑ѣ добротꙋ̀, а҆ дрꙋгаго нарѣхъ с꙽хинизмꙋ, и҆ ѹ҆пасꙋ ѻ́вца.
і҆ и҆змꙋ тр̂и па́стырѧ въ мс̑҇цъ е҆ді́нъ, и҆ ѻ҆тѧжи́тъ дш҃а моѧ на нѧ, и҆б̂о дш҃а и҆хъ възывахꙋ на́ мѧ.
и҆ рѣхъ, не ѹпасꙋ васъ.
и ѹ҆мира́ющїѧ, да ѹ́мретъ.
і҆ и҆щеза́ющїѧ, да и҆ще́знетъ.
и҆ про́чаѧ да поꙗ҆́сть ка́ѧждо пло́ть бли́жнѧго свое҆го·

И҆ прїимꙋ̀ жезлъ мои до́брыи, и҆ ѿврьгꙋ и҆̀ разори́ти завѣтъ мои и҆же завѣща́хъ къ всѣмъ лю́дем̑ землѝ.
и҆ разори́тсѧ въ дн҃ь ѻ́нъ.
и҆ разꙋмѣ́ютъ хананеѝ ѻ́вца хранѧ́щаѧ ми сѧ, занѐ сло́во гн҃е е҆сть·

И҆ рекꙋ к нимъ, а҆ще добро пред̑ ва́ми ес̑҇, дадите м꙽здꙋ м̂и, и҆л̂и ѿрецѣтесѧ, и҆ даша м꙽здꙋ м̂и тридесѧть сре́бръникъ.
и҆ рече г҃ь къ мн̂ѣ, вложѝ ѧ҆̀ в꙽ горни́лъ и҆ смотрѝ а҆ще и҆скꙋше́но ес̑҇ и҆мже ѻ́бразомъ и҆скꙋше́нъ бы́хъ по ни́хъ·

и҆ прїѧхъ тридесѧть сре́бръникъ, и҆ вложихъ и҆хъ въ храм̑мъ гн҃ь в꙽ горни́лъ.
и҆ ѿве́ргъ же́злъ вторы́и схини́зма, разори́ти завѣтъ и҆же посредѣ і҆ѹ́ды и҆ посредѣ і҆и҆л҃ѧ·

И҆ рече г҃ь къ мнѣ, е҆ще прїимꙋ себѣ сосꙋды па́стыр꙽ски па́стырѧ не быва́лца, занѐ с̂е а҆зъ въздви́гнꙋ па́стырѧ небыва́лца на землѝ, ѹ҆ги́бшаѧ не посѣти́тъ, и҆ заблꙋждьшаѧ не и́мать възыска́ти, и҆ съкрꙋше́ныѧ не и́мать и҆сцѣли́ти, и҆ съдра́выѧ не и́мать напра́вити, и҆́мѧ и҆збра́нныхъ поѧсть, и҆ гле́зны им̑ и҆звїетъ.
ѽ пасꙋщеи сꙋ́етнаѧ и҆ ѻ҆ста́вльше ѻ҆вца.
мечь на мы́шцꙋ е҆го, и҆ на ѻ́ко е҆мꙋ десно́е.
мы́шца е҆го с꙽хнꙋщи да ѹ́с꙽хнетъ, и҆ ѻ́ко е҆мꙋ десное ѻ҆слѣпа́ѧ да ѻ҆слѣп꙽нетъ·

Глв̑҇а, в҃і·

Бг҃осмышле́нїе словесе гн҃ѧ на і҆и҆л҃ѧ.
гл҃етъ г҃ь проп꙽ныи нб҃о, и҆ ѻ҆снова́выи зе́млю, и҆ съзида́ѧ дх҃ъ чл҃кꙋ в нем̑.
с̂е а҆зъ полага́ю і҆ерс̑҇лима ꙗ҆́ко пред̑две́рїѧ движе́маѧ всѣмъ лю́демъ ѻ́крс̑҇тъ.
н̂о і҆ѹ́да бꙋдетъ ѻ҆сѣде́нїе на і҆ерс̑҇ли́ма.
и҆ бꙋдетъ въ дн҃ь ѻ́нъ, положꙋ̀ і҆ерс̑҇ли́ма ка́мень попира́ющсѧ всѣми ꙗ҆зы́ки.
и҆ всѧк꙽ попира́ѧи е҆го рꙋга́ѧ порꙋга́етсѧ, и҆ съберꙋтсѧ вонь вс̂и ꙗ҆́зы́цы зем̑лѧ̀·

Въ дн҃ь ѻ́нъ, гл҃ет̑ г҃ь вседръжитель, поражꙋ̀ всѧ́къ ко́нь въ прежасъ, и҆ вса́дника е҆мꙋ въ безꙋмїе.
и҆ на домъ і҆ѹ́довъ ѿвръзꙋ ѻ́чи моѝ, и҆ всѧ̀ ко́нѧ лю́дем꙽ поражꙋ̀ въ ѻ҆слѣпле́нїе.
и҆ рекꙋтъ ты́сѧщницы і҆ѹ́дови вс̂и въ срд̑цыхъ свои҆хъ, ѻ҆брѧщемъ себѣ живꙋщаѧ въ і҆ерс̑҇лимѣ ѻ҆ г҃ѣ вседръжи́тели бѕ҃ѣ и҆хъ·

Въ дн҃ь ѻ́нъ положꙋ ты́сѧщники і҆ѹ́дины ꙗ҆́ко главню̀ ѻ́гньнꙋ въ дрова̀, и҆ ꙗ҆́ко свѣщꙋ ѻ́гньнꙋ въ сте́блїе.
и҆ поѧдѧ́тъ ѻ҆деснꙋю и҆ ѻ҆шю́ю васъ вс̂ѧ лю́ди ѻ҆крс̑҇тъ.
и҆ всели́тсѧ і҆ерс̑҇лимъ е҆ще в себѣ на землѝ.
и҆ сп҃сетъ г҃ь се́ла і҆ѹ́дова ꙗ҆́коже и҆спръва, ꙗ҆́ко да не велича́етсѧ похва́ла до́мꙋ двд҃ва, и҆ велича́нїѧ живꙋщимъ въ і҆ерс̑҇лимѣ на і҆ѹ́дꙋ·

И҆ бꙋдетъ въ дн҃ь ѻ́нъ защи́титъ г҃ь ѿ живꙋщих̑ въ і҆ерс̑҇лі́мѣ, и҆ бꙋдетъ не́мощныи в нихъ в꙽ тои дн҃ь ꙗ҆́ко двд҃ъ, а҆ до́мъ двд҃овъ ꙗ҆ко домъ бж҃їи, ꙗ҆́ко а҆гг҃лъ гн҃ь пред̑ ними<.>

И҆ бꙋдетъ въ дн҃ь ѻ́нъ възыщꙋ и҆зѧ́ти вс̂ѧ ꙗ҆́зы́ки грѧдꙋщаѧ на і҆ерс̑҇лим̑.
і҆ и҆злїю на до́мъ двд҃въ, и҆ на живꙋщаа въ і҆ерс̑҇лимъ дх҃ъ блгд̑ти и҆ щедрот̑.
и възрѧ́тъ на́нь е҆гоже прободоша.
и҆ пла́че вопльствѧтсѧ ѻ҆ немъ плака́нїемъ ꙗ҆́ко ѻ҆ возлю́блен꙽нѣмъ, и҆ ѻ҆стрс̑҇тѧ́тсѧ ѻ҆ немъ болѣзньно ꙗ҆́ко ѻ҆ перве́нцѣ·

Въ дн҃ь ѻ́нъ възвели́читсѧ пла́чевопльствїе въ і҆ерс̑҇ли́мѣ, ꙗ҆ко пла́чево́пльствїе ремо́на на́ поли магедо́нѣ.
и҆ пла́четсѧ землѧ̀ на колѣна.
колѣ́на ѻ҆ себѣ.
колѣ́на до́мꙋ двд҃ва ѻ҆ себѣ, и҆ же́ны их̑ ѻ҆ себѣ.
колѣно до́мꙋ наѳа́нова ѻ҆ себѣ, и҆ же́ны и҆хъ ѻ҆ себѣ.
колѣно до́мꙋ лев꙽вѷина ѻ҆ себѣ, и҆ жены и҆хъ ѻ҆ себѣ.
колѣно симеѻ́не ѻ҆ себѣ, и҆ же́ны и҆хъ ѻ҆ себѣ.
вс̂ѧ про́чаѧ колѣна̑ колѣно и҆ колѣно ѻ҆ себѣ, и҆ жены и҆хъ ѻ҆ себѣ·

Глв̑҇а, г҃і·

Въ дн҃ь ѻ́нъ бꙋдетъ всѧ́ко мѣсто разверза́ѧсѧ до́мꙋ двд҃вꙋ и҆ живꙋщим̑ въ і҆ерс̑҇лі́ме въ подвиже́нїе и҆ въ раздѣле́нїе·

И҆ бꙋдетъ въ дн҃ь ѻ҆н꙽ гл҃етъ г҃ь саваѻ́ѳъ, потреблю̀ и҆мена̑ непрїѧзньныхъ телесъ ѿ землѧ̀, и҆ ктомꙋ не бꙋдет꙽ и҆мъ помѣне́нїе.
и҆ лжа́ѧ прро̑҇ки, и҆ дꙋхъ нечи́стыи и҆змꙋ̀ ѿ землѧ̀·

И бꙋдетъ а҆ще проречетъ чл҃къ, и҆ речетъ к꙽ немꙋ ѿц҃ъ е҆го и҆ мт҃и е҆го рожд̑шаѧ е҆го не жи́въ бꙋдеши, ꙗ҆́ко л꙽жа гл҃а въ и҆мѧ гн҃е.
и҆ запнете е҆мꙋ ѿц҃ъ е҆го и҆ мт҃и ег̑҇ е҆гда̀ прро̑҇чествовати начнетъ·

И҆ бꙋдетъ въ дн҃ь ѻ́нъ, постыдѧт̑сѧ прро̑҇цы ко́ждо ѿ видѣнїѧ е҆мꙋ не прро̑҇чествова́ти и҆мъ, и҆ ѻ҆блекꙋтсѧ въ кожꙋ срънинꙋ занѐ сълга́ша.
и҆ рече́тъ, нѣсмь прро̑҇къ а҆зъ, ꙗ҆́ко чл҃къ дѣлаѧ́й зе́млю а҆зъ е҆смь, занѐ чл҃къ роди мѧ ѿ ю́ности моеѧ·

И҆ рекꙋтъ к не́мꙋ, чт̂о ꙗ҆́зва с̂и посредѣ рꙋкꙋ твое́ю.
и҆ рече, е҆же прободо́ша м̂ѧ въ домꙋ възлю́блен꙽нѣм꙽ м̂и·

ѻ҆рꙋжїе въста́ни на па́стырѧ мое҆го, и҆ на мꙋжа ѿ колѣна мое҆го, гл҃етъ г҃ь вседръжи́тель.
поражꙋ̀ па́стырѧ, и҆ разы́идꙋтсѧ ѻ́вца.
и҆ ѻ҆бращꙋ рꙋкꙋ мою на малы́ѧ па́стырѧ·

И҆ бꙋдетъ въ дн҃ь ѻ́нъ на всю̀ зе́млю, гл҃етъ г҃ь, дв̂ѣ е҆ѧ ча́сти потребите́сѧ и҆ ѹ҆ги́блете, а҆ третїа ѻ҆ста́нетъ на не́и.
и҆ проведꙋ третїю ча́сть с꙽квозѣ ѻ́гнь, и҆ раздегꙋ ѧ҆̀ ꙗ҆́коже раждиза́етсѧ сребро̀, і҆ и҆скꙋшꙋ ѧ҆̀ ꙗ҆́коже и҆скꙋша́етсѧ зла́то.
то́и призоветъ и́мѧ мое, и҆ а҆зъ ѹ҆слы́шꙋ и҆̀, и҆ рекꙋ, лю́дїе моѝ с̂и сꙋть.
и҆ тїи рекꙋтъ г҃ь б҃ъ мо́и·

Глв̑҇а, д҃і·

Сѐ де́нь гн҃ь грѧде́тъ, и҆ раздѣлитсѧ коры́сть твоѧ в тебѣ.
и҆ съберꙋ вс̂ѧ ꙗ҆́зы́ки на і҆ерс̑҇лимъ въ бра́нь, и҆ пре́имꙋтъ гра́дъ, и҆ расхитѧтсѧ домове, и҆ же́ны ѻ҆сквернѧ́тсѧ·

І҆ и҆зы́идетъ по́лъ гра́да въ плѣне́нїе, а҆ ѻ҆ста́нокъ людїи моих̑ не и́мꙋтсѧ потреби́ти ѿ гра́да·

І҆ и҆зы́идетъ г҃ь, и҆ ѻ҆полчи́тсѧ въ ꙗ҆зы́цехъ ѻ́нѣхъ, ꙗ҆́коже дн҃ь ѻ҆плъче́нїю е҆го въ дн҃ь бра́ни.
и҆ прише́дъ ста̀ г҃ь б҃ъ мой, и҆ вс̂и ст҃їи с ним̑·

И҆ ста́нета но́ѕѣ е҆го въ дн҃ь ѻ́нъ на горѣ̀ е҆леѻ́н꙽стеи, ꙗ҆́же е҆сть прѧ́мо і҆ерс̑҇лимꙋ на восто́къ.
и҆ разведетсѧ гора̀ е҆леѻн꙽скаѧ по́лъ еѧ̀ къ востоком̑, и҆ полъ еѧ̀ къ морю, про́пасть ве́лїѧ ѕѣло.
и҆ ѹ҆кло́нитсѧ полъ горы̀ на сѣверъ, и полъ еѧ на ю́гъ, дебрь ве́лїѧ.
и҆ засы́плетсѧ дебрь го́рнѧа, и҆ къ прилежа́щїи прил꙽пнетъ де́брь го́рнѧа и҆ до нас꙽са.
и҆ нарастет̑, ꙗ҆́коже нарасте ѿ лица̀ трꙋсꙋ въ дн҃ь ѻ҆зїѧ цр҃ѧ і҆ѹ́дова·

И҆ прїидетъ г҃ь б҃ъ мои, и҆ вс̂и ст҃їи с нимъ.
и҆ бꙋдетъ въ дн҃ь ѻ́нъ, не бꙋдетъ свѣтъ н̂о зима̀ и҆ мра́зъ, бꙋдетъ дн҃ь е҆ді́нъ, и҆ дн҃ь то́и зна́емъ бꙋдетъ гв҃и, и҆ не дн҃ь и҆ не но́щь, и҆ при ве́чере бꙋдет꙽ свѣтъ·

И҆ въ дн҃ь ѻ́нъ и҆зы́идетъ вода̀ жи́ва ѿ і҆ерс̑҇лима, полъ еѧ̀ въ мо́ре прьвое, и҆ полъ еѧ̀ въ мо́ре послѣднее.
въ жатвꙋ и҆ въ ве́снꙋ бꙋдет̑ та́ко.
и҆ бꙋдетъ г҃ь въ цр҃ѧ по всеи землѝ.
въ дн҃ь ѻ́нъ бꙋдетъ г҃ь е҆дін̑҇ і҆ и́мѧ е҆го е҆ді́но, ѻ҆бходѧ̀ всю зе́млю и҆ пꙋсты́нѧ ѿ гавалъ и҆ до рем꙽мона на ю́гъ і҆ерс̑҇лимꙋ.
и҆ възнесе́тсѧ на мѣстѣ, и҆ пребꙋдет̑ ѿ вра́тъ венїами́нь до мѣста вра́тъ пръвыхъ и҆ даже до вра́тъ ѹ҆гол꙽ныхъ.
и҆ ѿ стол꙽па̀ а҆нани́лъ и҆ до под̑точи́лїѧ цр҃ѧ.
и҆ вселѧ́тсѧ во́нь, и҆ а҆наѳе́ма не бꙋдетъ ктомꙋ̀, и҆ всели́тсѧ і҆ерс̑҇лимъ надѣ́ющисѧ·

И҆ с̂е бꙋдетъ паде́нїе е҆же и҆с꙽сѣчетъ г҃ь вс̂ѧ лю́ди, е҆ли́ко вое҆ва́ша на і҆ерс̑҇лимъ.
і҆ и҆ста́ютъ пло́ти и҆мъ стоѧ́щемъ на нога́хъ и҆мъ, и҆ ѻ҆чеса̀ и҆мъ и҆стекꙋтъ и҆зъ ѻ҆бо́чїи и҆хъ, и҆ ꙗ҆зы́къ и҆хъ растает̑ въ ѹ҆стѣхъ и҆хъ.
и҆ бꙋдетъ въ дн҃ь ѻ́нъ ѹ́жасъ гн҃ь ве́лїи на ни́хъ.
і҆ и҆метъ ко́ждо за́ рꙋкꙋ бли́жнѧго свое҆го, и҆ прило́житсѧ рꙋка̀ е҆го къ рꙋцѣ бли́жнѧго свое҆го, и҆ е҆ще і҆ѹ́да ѻ҆полчи́тсѧ въ і҆ерс̑҇лимѣ, и҆ съберет꙽ крѣпость всѣхъ людїи ѻ́крс̑҇тъ, зла́то и҆ сребро̀ и҆ ри́зы въ мно́жествїе ѕѣло.
и҆ с̂е е҆сть паде́нїе ко́немъ, и҆ м꙽скомъ, вельблю́домъ, и҆ ѻ҆слом̑, и҆ всѣмъ ско́томъ сꙋщимъ въ плъцѣхъ ѻ́нѣхъ по паде́нїю семꙋ.
и бꙋдетъ е҆ли́ко а҆ще ѻ҆ста́нетъ ѿ всѣхъ ꙗ҆зы́къ прише́дъшихъ на і҆ерс̑҇ли́мъ, и҆ възы́идꙋтъ лѣто на лѣто покланѧ́тисѧ цр҃ю г҃ꙋ вседръжи́телю, и҆ празнова́ти въ празд̑ньство скѷнопигїино·

И҆ бꙋдетъ е҆ли́ко а҆ще не възы́идꙋтъ ѿ всѣхъ пле́менъ землѧ̀ въ і҆ерс̑҇лимъ поклони́тисѧ цр҃ю г҃ꙋ вседръжи́телю, и҆ сї ѻ́нѣхъ приложатсѧ, не бꙋдетъ на ни́хъ до́жда.
а҆ще ли же колѣно е҆гѷпет꙽ско не възы́идетъ ни прїидетъ, и҆ на си́хъ бꙋдетъ ꙗ҆́зва е҆ю́же а҆щеѹ҆рази́тъ г҃ь вс̂ѧ ꙗ҆зы́ки е҆ли́ко а҆ще не възы́идꙋтъ празнова́ти празника скѷнопигїѧ.
с̂е бꙋдетъ грѣхъ е҆гѷптꙋ, и҆ грѣхъ всѣмъ ꙗ҆зыкомъ е҆ли́ко а҆ще не възы́идꙋтъ празнова́ти пра́зникъ скѷнопигїин̑҇.

Въ дн҃ь ѻ́нъ бꙋдетъ е҆же въ ѹ҆здѣ коне́ви ст҃о г҃а вседръжи́телѧ, и҆ бꙋдꙋтъ коно́би въ домꙋ гн҃и ꙗ҆́ко ча́ша̑ пред̑ лицемъ ѻ҆лта́реви.
и҆ бꙋдетъ всѧкъ коно́бъ въ і҆ерс̑҇лимѣ и҆ въ і҆ѹ҆де́и ст҃о гв҃и вседръжи́телю.
и прїидꙋтъ вс̂и жрꙋщеи, и҆ прїимꙋтъ ѿ нихъ и҆ сварѧт̑ в нихъ.
и҆ не бꙋдетъ ханане́и е҆ще въ храмѣ г҃а вседръжи́телѧ въ дн҃ь ѻ́нъ·

Конецъ про̑҇ркꙋ заха́рїи.
и҆́мать в себѣ, глв̑҇а, д҃і·