Библия (1581). [46] Малахия

МАЛАХИ́Ѧ ПРО҃РКЪ

ГЛАВА̀· А҃

Бг҃осмышле́нїе словесе гн҃ѧ на і҆и҆л҃ѧ в рꙋ́кꙋ а҆гг҃ла е҆го.
положи́те с̂е на срд̑цых̑ ваших̑, възлюби́хъ в̂ы гл҃етъ г҃ь.
и҆ рѣ́сте, ѻ҆ чемъ възлюбил̑҇ е҆си н̂ы.
не брат̑ ли б̂ѣ і҆са́въ і҆а́ковꙋ, гл҃етъ г҃ь, и҆ возлю́бихъ і҆а́кова, а҆ і҆са́ва възненави́дѣхъ.
и҆ ѹ҆чиних̑ предѣ́лы е҆го въ и҆щезнове́нїе, и҆ достоѧ́нїе е҆го въ ны́рища пꙋсты́нна.
занѐ а҆ще речет̑ и҆дꙋме́ѧ разорихсѧ, и҆ ѻ҆брати́мсѧ и҆ възижд̑емъ ѻ҆пꙋстѣвшаѧ е҆ѧ̀·

Си́це гл҃етъ г҃ь вседръжи́тель, сами възи́ждꙋтъ, и҆ а́з꙽ разорю.
и҆ нарече́тсѧ и҆мъ предѣ́лъ безако́нїѧ, и҆ лю́дїе на нѧ́же ѻ҆полчит̑сѧ г҃ь до́ вѣка.
и҆ ѻ҆чеса ваша ви́дѧт̑, и҆ в̂ы речете, възвели́чисѧ г҃ь превы́ше предѣ́лъ і҆и҆л҃въ·

Сн҃ъ сла́витъ ѿц҃а, и҆ ра́бъ г҃а свое҆го ѹ҆бои́тсѧ.
т̂о а҆ще ѿц҃ъ е҆смь а҆зъ, т̂о гд̂ѣ сла́ва моѧ.
и҆ а́ще г҃ь е҆смь а҆зъ, т̂о гдѣ е҆сть бо́ꙗ҆знь моѧ̀.
гл҃етъ г҃ь вседръжи́тель на́ вы сщ҃еннїи ѻ҆злобꙋ́ющеи и҆мѧ мое.
и҆ рѣ́сте, ѻ҆ чемъ ѻ҆злоби́хомъ и҆мѧ твое.
приносѧ́ще къ ѻ҆лтареви мое҆мꙋ хлѣ́бы скве́рны.
и҆ рѣ́сте, ѻ҆ чесо́мъ ѻ҆скверни́хомъ ѧ҆̀.
гл҃етсѧ вамъ, трапе́за гн҃ѧ ѹ҆ничиже́на е҆сть, и҆ над̑ложе́наѧ бра́шна ѹ҆ничижи́ли е҆сте.
занѐ а҆ще приведете слѣ́по на жрътвꙋ, не ѕло л̂и·

и҆ а́ще приведете хро́мо ли недꙋ́жно, т̂о не ѕло л̂и.
приведи е҆̀ кн҃ѕю свое҆мꙋ е҆да̀ по́иметъ е҆̀, а҆ще ѻ҆бинет꙽сѧ лица твое҆го, гл҃етъ г҃ь вседръжи́тель·

И҆ нн҃ѣ ѻ҆цы́ститесѧ прд̑е лицемъ бг҃а вашего, и҆ моли́тесѧ е҆мꙋ да поми́лꙋетъ в̂ы.
в рꙋ́ки ваша бы́ша с̂и, а҆ще ѻ҆бинꙋсѧ ли́ць ваших̑, гл҃етъ г҃ь вседръжи́тель·

Занѐ и҆ ѿ васъ затво́рѧтсѧ две́́ри, и҆ не възгнѣтитѐ ѻ҆лтаре́ви мое҆мꙋ тꙋне.
нѣсть во́лѧ моѧ въ вас̑҇, гл҃етъ г҃ь вседержи́тель, и҆ жрътвы не прїимꙋ ѿ рꙋ́къ вашихъ.
занѐ ѿ восток̑҇ слн҃ца и҆ до за́падъ е҆го и҆мѧ моѐ сла́витсѧ в ꙗ҆зы́цехъ, и҆ на всѧ́комъ мѣ́стѣ ѳемїа́мъ прино́ситсѧ и҆мени мое҆мꙋ и҆ жертва чи́ста.
занѐ ве́лїе и҆мѧ мое въ ꙗ҆зы́цехъ, гл҃етъ г҃ь вседержи́тель.
вы же скверните е҆̀, гл҃юще, трапе́за гн҃ѧ ѻ҆скверне́на е҆сть, и҆ над̑лага́ющаѧсѧ бра́шна е҆го ѹ҆коре́на бы́ша.
и҆ рѣ́сте, с̂и ѿ стра́сти бы́ша.
и҆ ѿдꙋнꙋхъ ѧ҆̀, гл҃етъ г҃ь вседержи́тель.
и҆ ѹ҆вѣ́си хище́нїѧ и҆ хро́ма и҆ ѕло дѣ́ющасѧ, и приведо́сте ѧ҆̀ на жертвꙋ, н̂о не прїимꙋ и҆хъ ѿ рꙋ́къ вашихъ, гл҃етъ г҃ь вседержи́тель.
и҆ проклѧ́тъ и҆же б̂ѣ си́ленъ и҆ б̂ѣ въ ста́дѣ е҆го мꙋжескь по́лъ, и҆ моли́тва е҆го на́нь и҆ жре́тъ растлѣ́вшаѧ гв҃и.
занѐ цр҃ь ве́лїи а҆зъ е҆смь, гл҃етъ г҃ь вседержи́тель, і҆ и҆мѧ мое просвѣще́нно въ ꙗ҆зы́цех̑·

Глв̑҇а, в҃·

И нн҃ѣ за́повѣдь с̂и к вамъ сщ҃енїи.
а҆ще не ѹ҆слы́шите, и҆ а́ще не положите на срд̑цыхъ вашихъ да́ти сла́вꙋ и҆мени мое҆мꙋ, гл҃етъ г҃ь вседержи́тель.
и҆ послю̀ на́ вы клѧ́твꙋ, и҆ прокленꙋ блс̑҇венїе ваше и҆ ѻ҆кленꙋ е҆̀.
и҆ разорю блс̑҇венїе ваше и҆ не бꙋдетъ въ васъ, занѐ в̂ы не влага́сте въ срд̑ца ваша.
с̂е а҆зъ ѿлꙋчю вамъ ра́мо, і҆ и҆ски́даю трибꙋхи лютомыи на лица ваша, трибꙋхи лю́томыи пра́зд̑никъ вашихъ, и҆ прїимꙋ в̂ы въкꙋ́пѣ·

И҆ разꙋмѣете занѐ а҆зъ г҃ь посла́хъ к ва́мъ за́повѣдь сїю, бы́ти завѣтꙋ мое҆мꙋ къ левѷтомъ, гл҃етъ г҃ь вседержи́тель.
завѣтъ мои б̂ѣ с ним̑ жи́зни и҆ ми́рꙋ.
и҆ дахъ е҆мꙋ бо́ꙗ҆знїю боꙗ҆́тисѧ мене, и҆ ѿ лица и҆мени мое҆го сꙋмнѣтисѧ е҆мꙋ.
зако́нъ и҆́стинны б̂ѣ въ ѹ҆стх̑ѣ е҆го, и҆ непра́вда не ѻ҆брѣте́сѧ въ ѹ҆стнахъ е҆го.
въ ми́ръ и҆справлѧ́ѧ и҆детъ съ мно́ю, и҆ мно́ги ѻ҆братит̑ ѿ непра́вды.
ꙗ҆́ко ѹ҆стнѣ і҆е҆реѻ҆вѣ съхранѧ́ете разꙋмъ, и҆ зако́на възы́щꙋ ѿ ѹ҆стъ е҆го, ꙗ҆ко а҆гг҃лъ г҃а вседръжителѧ е҆сть.
вы же ѹ҆клони́стесѧ ѿ пꙋтїи, і҆ и҆знемощьствисте мно́ги ѿ зако́на, и҆стлисте завѣтъ левѷи҆нъ, гл҃етъ г҃ь вседръжи́тель.
и҆ а́зъ да́хъ в̂ы въ ѹ҆ничижденїе и҆ ѻ҆слаблены въ всѧ̀ ꙗ҆зы́ки, зане в̂ы не съхрани́сте пꙋтїи моих̑.
н̂о лица̀ ѻ҆бинꙋстесѧ въ зако́нѣ.
не б҃ъ ли е҆ді́нъ създа васъ.
не ѿц҃ъ л̂и е҆ді́нъ всѣмъ ва́мъ.
чт̂о а҆ще ѻ҆ста́висте ко́ждо бра́та свое҆го, ѻ҆скверни́ти завѣтъ ѿц҃ь ва́шихъ·

ѻ҆ставленъ бы́сть і҆ѹ́да, и҆ ме́рзости бы́сть і҆и҆л҃ь и҆ і҆ерс̑҇ли́мъ.
зане ѻ҆скверни і҆ѹ́да ст҃аѧ гн҃ѧ ꙗ҆́же възлюби, и҆ нача́токъ бо́гомъ чю́ждим̑.
потреби́тъ г҃ь чл҃ка творѧ́щаго с̂и, до́ндеже смиритсѧ ѿ се́лъ і҆а́ковль, и҆ ѿ приносѧ́щихъ жрътвꙋ бг҃ꙋ вседръжи́телю.
и҆ с̂и и҆́хже ненави́дѣхъ творѧ́сте.
покрывасте слеза́ми ѻ҆лтарь гн҃ь, и҆ пла́чемъ и҆ въздыха́нїемъ ѿ трꙋ́довъ.
е҆щѐ л̂и достоино призрѣти на жрътвꙋ ва́шꙋ, л̂и прїѧ́ти прїѧ́тно и҆з рꙋкъ ва́шихъ.
и҆ рѣсте, чесо ра́ди.
ꙗ҆́ко г҃ь засвидѣтельствова междꙋ тобо́ю, и҆ межд̑ꙋ жено́ю ю҆́ности твое́ѧ ю҆же пꙋстѝ.
и҆ т̂а ѻ҆бѣщница твоѧ̀, и҆ жена̀ завѣтꙋ твое҆мꙋ.
и҆ не добрѣ сътворѝ ѻ҆ста́нокъ дх҃ꙋ твое҆мꙋ.
и҆ рѣсте, чесо и҆́наго про́ситъ б҃ъ л̂и сѣмене.
и҆ съхрани́тесѧ дх҃омъ ва́шимъ, и҆ жены̀ ю҆́ности свое́ѧ не ѻ҆ста́виши.
н̂о а҆ще възненавидѣвъ ѿпꙋстиши ю҆̀, гл҃етъ г҃ь б҃ъ і҆и҆л҃евъ.
покры́ет꙽ г҃ь нече́стїѧ помышленїѧ ва́ша, гл҃етъ г҃ь вседръжи́тель.
и҆ съхранитесѧ дх҃омъ свои҆мъ, и҆ не ѻ҆ста́вите совѣта, прогнѣва́юще б҃а сло́весы ва́шими.
и҆ рѣсте, ѻ҆ чесомъ прогнѣвахомъ е҆го.
занѐ рѣсте, всѧ́къ творѧ́и зл̂о добръ пред̑ гм҃ь, и҆ ѻ҆ тѣхъ са́мъ и҆зволи́лъ е҆сть, и҆ гдѣ̀ е҆сть б҃ъ пра́вдѣ·

Глв̑҇а, г҃·

Се̂ а҆зъ послю̀ а҆гг҃ла своего и҆ призритъ на пꙋть предъ лицемъ мои҆мъ.
и҆ внеза́пꙋ прїидетъ въ цр҃ковь свою г҃ь е҆гоже в̂ы и҆́щете, и҆ а́гг҃лъ завѣта е҆гоже в̂ы хо́щете.
с̂е прїидетъ гл҃етъ г҃ь вседръжи́тель, и҆ кт̂о потръпи́тъ дн҃ь прише́ствїа е҆го, и҆ кт̂о посто́итъ въ видѣнїи е҆го.
зане сей въсхо́дитъ ꙗ҆́ко ѻ́гнь разваренїѧ, и҆ ꙗ҆́ко мы́ло перꙋщихъ.
и҆ сѧ́детъ разварѧ́а и҆ ѻ҆цыщаѧ ꙗ҆́ко сребро и҆ ꙗ҆́ко зла́то.
и҆ ѻ҆цы́ститъ сн҃ы левѷи҆ны, и҆ прелїетъ ѧ҆̀ ꙗ҆́ко зла́то и҆ ꙗ҆́ко сребро̀.
и҆ бꙋ́дꙋтъ гв҃и приносѧ́ще жрътвꙋ въ пра́вдꙋ.
и҆ го́дѣ бꙋдетъ гв҃и жрътва і҆ѹ́дова въ і҆ерс̑҇лимѣ ꙗ҆́коже дн҃и вѣка, и҆ ꙗ҆́коже лѣта пред̑нѧа.
и҆ прїидꙋ к꙽ вамъ на сꙋдъ, и҆ бꙋдꙋ свѣдитель ско́ръ на прокази́телѧ, и҆ на прелюбодѣ́ица, и҆ на кленꙋщаѧсѧ и҆менемъ моим̑ въ л꙽жꙋ, и҆ на лиша́щаѧ м꙽зды нае҆мника, и҆ на насильствꙋ́ющаѧ вдови́ца, и҆ п꙽ха́ющаѧ си́рыѧ, и҆ на ѹ҆кланѧ́ющаѧ сꙋдъ прише́лца, и҆ на не боѧ́щаѧсѧ менѐ, гл҃етъ вседръжи́тель·

Занѐ а҆зъ гь б҃ъ вамъ и҆ не и҆змѣнѧ́юсѧ.
и҆ в̂ы сн҃ы і҆а́ковли и҆ не съдръза́етесѧ ѿ грѣхъ ѿц҃ь вашихъ.
ѹ҆клони́сте зако́ны моѧ и҆ не съхрани́сте.
ѻ҆брати́тесѧ къ мнѣ̀ и҆ ѻ҆бращꙋсѧ къ вамъ, гл҃тъ г҃ь вседръжи́тель.
и҆ рѣ́сте, ѻ҆ чесом̑ ѻ҆брати́мсѧ.
е҆да̀ ѻ҆больща́етъ чл҃къ б҃а.
занѐ в̂ы ѻ҆больсти́сте м̂ѧ.
и҆ рѣ́сте, ѻ҆ чесомъ ѻ҆больсти́хомъ тѧ.
ꙗ҆́ко десѧти́ны и҆ начат꙽цы с꙽ вами сꙋть, и҆ възира́юще в̂ы възира́ете на́ нѧ, и҆ мене б̂о ѻ҆больща́ете, лѣто с̂е и҆скон꙽ча́сѧ.
и҆ внесо́сте вс̂ѧ тѧжа́нїѧ въ сокро́вища, и҆ расхище́нїе ни́щаго въ домы ваша.
ѻ҆братите же сѧ ѻ҆ сем̑, гл҃етъ г҃ь вседръжи́тель.
а҆ще не ѿверзꙋ вамъ хлѧ́бїи нбс̑҇ныхъ, і҆ и҆злїю вамъ блс̑҇ве́нїе мое до́ндеже ѹ҆довлите́сѧ.
и҆ ра́зньствꙋ́ю вамъ въ бра́шна, и҆ не и҆мамъ и҆стли́ти вам̑ пло́дъ зе́мльных̑.
и҆ не и҆мꙋть и҆знемощи ва́мъ виногра́ди се́лнїи, гл҃етъ г҃ь вседръжи́тель.
и҆ ѹ҆бла́жатъ в̂ы вс̂и ꙗ҆зы́цы, занѐ бꙋдете в̂ы землѧ̀ и҆зволена, гл҃етъ г҃ь вседръжи́тель·

ѻ҆тѧжчи́сте на́ мѧ словеса ваша, гл҃етъ г҃ь вседръжи́тель.
и҆ рѣсте, ѻ҆ чемъ ѻ҆клевета́хомъ на́ тѧ.
рѣсте сꙋетенъ работаѧ́й б҃ꙋ.
и҆ чт̂о бо́лѣ ꙗ҆́ко съхрани́хомъ съхране́нїѧ е҆го.
и҆ занѐ поидо́хомъ мл҃твеницы пред̑ лицемъ г҃а вседръжи́телѧ.
и҆ нн҃ѣ мы блажи́мъ чю́ждихъ, и҆ възижда́ютсѧ вс̂и творѧ́щеи везако́нїе.
противи́шасѧ бв҃и, и҆ спаслисѧ сꙋть.
с̂е ѻ҆клевета́ша боѧ́щаасѧ г҃а ко́ждо къ и҆скренемꙋ свое҆мꙋ, и҆ внѧ́тъ г҃ь, и҆ ѹ҆слы́ша.
и҆ написа кни́ги па́мѧтїи пред̑ собо́ю боѧ́щим̑сѧ г҃а и҆ говѣ́ющимъ и҆мени е҆го.
и҆ бꙋдт̑ꙋ м̂и гл҃етъ г҃ь вседержи́тель, въ дн҃ь ѻ҆́нъ и҆же а҆зъ сътворю в꙽ посꙋжде́нїе, і҆ и҆зво́лю ѧ҆̀ ꙗ҆́коже и҆зволѧ́етъ чл҃къ сн҃ъ свои до́брѣ рабо́тающь е҆мꙋ·

И҆ ѻ҆брати́тесѧ и҆ ви́дите междꙋ пра́вед̑нома, и҆ междꙋ непра́вед̑никꙋ.
и҆ междꙋ слꙋжа́щима бв҃и, и҆ междꙋ не рабо́тающаѧ е҆мꙋ·

Глава, д҃·

Ꙗко с̂е дн҃ь грѧдетъ горѧ̀ ꙗ҆́ко пе́щь и҆ попа́литъ ѧ҆̀.
и҆ бꙋдꙋтъ вс̂и и҆ноплемен꙽ницы, и҆ вс̂и творѧ́щеи безако́нїѧ ꙗ҆́ко сте́блїе.
и҆ вож꙽жеть ѧ҆̀ днь гн҃ь грѧды́и, гл҃етъ г҃ь вседержи́тель.
и не и҆мать ѻ҆ста́вити и҆мъ ко́рени лоза·

И҆ въсїѧ́етъ вамъ боѧ́щимсѧ и҆мени мое҆го слн҃҃це пра́вед̑но, і҆ и҆сцѣле́нїе кры́лꙋ е҆го.
і҆ и҆зы́идете и҆ възыгра́етесѧ ꙗ҆́ко тел꙽цы ѿ ѹ҆́зъ раздрѣше́ни.
и҆ поперетѐ безакон꙽ники, и҆ бꙋ́дꙋтъ пе́пелъ под̑ нога́ма вашима, въ дн҃ь во́ньже а҆зъ сътворю, гл҃тъ г҃ь вседръжитель·

помѧните зако́нъ моѷсеѧ раба̀ моего, ꙗ҆́коже повелѣхъ е҆мꙋ въ хоривѣ къ всемꙋ і҆ил҃ю, повелѣ́нїѧ и ѻ҆правда́нїѧ·

И҆ с̂е а҆зъ посыла́ю вамъ і҆лїю ѳезвитѧнина, прежде прише́ствїѧ дн҃е гн҃ѧ великаго и҆ просвѣще́ннаго, и҆же ѹ҆стро́итъ срд̑це ѿц҃ꙋ къ сн҃ꙋ, и҆ срд̑це чл҃кꙋ къ и҆скренемꙋ, да не прише́дъ поражю зе́млю гро́бїю·

Коне́цъ прро̑҇кꙋ малахїи и҆́мат̑ в себѣ гла́въ д҃·