ПЄРЬВЫЄ КНИ́ГИ МАКАВЄ́ИСКЇЄ

Глв̑҇а, а҃·

И бы́сть внегда порази, а҆леѯан̑҇дръ филип̑҇па македо́ньска иже и҆зы́иде ѿ землѧ̀ хет꙽тимъ.
и҆ порази дарїѧ цр҃ѧ пе́рьска и҆ медьска·

и҆ црс̑҇твова в него мѣсто первѣе во е҆ла́ди·

и҆ съста́ви бра́ни мно́ги и҆ въздержа тверды́ни, и҆ ѹ҆би цр҃҃и зе́мъскїѧ·

и҆ про́иде да́же до предѣ́лъ землѝ, и҆ прїѧ́тъ користи мно́гихъ ꙗ҆зы́къ, и҆ ѹ҆тѣши́сѧ землѧ̀ пред̑ ни́мъ.
и҆ възвышенъ бы́сть и҆ възнесе́сѧ срд̑це е҆го, и҆ събра си́лꙋ крѣ́пкꙋ ѕѣло̀·

и҆ начальствова стра́нами и҆ ꙗ҆зы́ки и҆ мꙋчи́тельми, и҆ бы́ша е҆мꙋ в дан꙽ники·

И҆ по сих̑ паде на ло́же и҆ позна и҆же ѹ҆́мретъ, и҆ съзва ѻ҆́трококи своѧ добрород̑ныѧ, и҆же с ним̑ бѧхꙋ въскор꙽млени ѿ ю҆́ности е҆го·

и҆ раздѣли и҆мъ црс̑҇тво свое, е҆ще жи́вꙋ е҆мꙋ сꙋщꙋ·

И҆ црс̑҇твова а҆леѯан̑҇дръ лѣтъ, в҃і, и҆ ѹ́мре·

И҆ въздержа́ша ѻ҆́троки е҆го ко́ждо в мѣстѣ свое҆мъ, и҆ възложи́ша вс̂и дїаді́мы по смр҃ти е҆го.
и҆ сн҃ове и҆хъ по ни́хъ лѣта мно́га, и҆ ѹ҆мно́жиша ѕлаѧ на землѝ, і҆ и҆зы́иде ѿ ни́хъ ко́рень грѣха·

А҆нтїѻ́хъ е҆пиѳа́нъ сн҃ъ а҆нтїѻ́ха цр҃ѧ, и҆же бы́сть в ри́мѣ.
и҆ црс̑҇твова лѣтъ, рл҃з, црс̑҇тва е҆лли́ньска·

Въ дн҃ехъ же тх̑ѣ и҆зыидо́ша ѿ і҆и҆л҃ѧ сн҃ове безако́ннїи, и҆ поѹ҆сти́ша мно́гихъ рекꙋщи.
по́идемъ и҆ завѣща́емъ завѣтъ съ ꙗ҆зы́ки и҆же ѻ҆́крс̑҇тъ насъ.
ꙗ҆́ко ѿнележе ѿлꙋчи́хом̑сѧ ѿ них̑ ѻ҆брѣто́ша нас̑҇ многа ѕла́а, и҆ бл҃го видѣсѧ сло́во въ ѻ҆́чїю и҆хъ, и҆ пред̑посла́ша нѣ́кихъ ѿ людїи, і҆ и҆до́ша къ цр҃ю·

и҆ дасть и҆мъ вла́сть твори́ти ѻ҆правда́нїѧ ꙗ҆зы́ческа.
и҆ създа́ша себѣ ѹ҆чи́лище въ і҆ерс̑҇ли́мѣ по нечистота́хъ ꙗ҆зы́ческихъ, и҆ сътвори́ша себѣ неѻ҆брѣза́нїе, и҆ ѿстꙋпи́ша ѿ завѣ́та ст҃а́го и҆ съпрѧго́шас̑҇ ꙗ҆́зы́комъ, и҆ въда́шасѧ твори́ти лꙋка́ваѧ.
и҆ ѹ҆готова́сѧ црс̑҇тво пред̑ а҆нтїѻ́хомъ, и҆ нача црс̑҇твова́ти въ землѝ е҆гѷпетьстѣ, да црс̑҇твꙋет꙽ на двѣма црс̑҇твома.
и҆ вни́де въ е҆гѷпетъ въ наро́дѣ тѧ́жцѣ, на колесни́цахъ и҆ сло́нѣхъ и҆ вса́дники и҆ съвокꙋпле́нїе корабле́и мно́жество.
и҆ въста́ви бра́нь на птоломе́ѧ цр҃ѧ е҆гѷпет̑ска.
и҆ ѹ҆боѧ́сѧ птоломѣ́и ѿ лица е҆го и҆ побѣже, и҆ падо́ша ꙗ҆звени мно́ѕи.
и҆ взѧ́ша гра́ды тве́рды в землѝ е҆гѷпет꙽стѣи, и҆ взѧ коры́сти землѝ е҆гѷпет꙽скїѧ·

И҆ ѻ҆брати́сѧ а҆нтїѻх̑ внегда порази егѷпта, въ рм҃г лѣто.
и҆ взы́иде на і҆и҆л҃ѧ і҆ и҆е҆рс̑҇лимъ въ наро́дѣ тѧ́жцѣ.
и҆ вни́де въ ст҃илище съ горды́нею и҆ взѧ ѻ҆лтарь зла́тыи и҆ свѣти́лник̑҇ свѣщныи, и҆ всѧ съсꙋ́ды е҆го и҆ трапезꙋ пред̑ложе́нїѧ и҆ възлїѧ́лники и҆ фїѧ́ла, и҆ кади́лницы златыа и҆ катапетасмꙋ и҆ вѣн꙽вы, и҆ ѹ҆краше́нїе златое и҆же на лицы цр҃кви бѧ́ше и҆ съкрꙋшѝ вс̂ѧ.
и҆ взѧ̀ сребро и҆ зла́то и҆ съсꙋ́ды въжделѣ́нїѧ, и҆ взѧ сокро́вища та́иныѧ и҆́хже ѻ҆брѣте, и҆ взѧ̀ и҆ ѿи҆де в зе́млю свою·

и҆ сътвори ѹ҆бїиство, и҆ гл҃а въ го́рдости вели́цѣ·

И҆ бы́сть пла́чь вели́к꙽ въ і҆и҆л҃и, и҆ въ всѣхъ мѣстѣхъ их̑, и҆ въздыха́ша нача́лницы и҆ ста́рцы, и҆ ю́ноша и҆ дв҃ы и҆знемо́гоша, и҆ красота же́ньскаѧ и҆змѣни́сѧ, всѧ́къ жени́хъ прїѧ́тъ пла́чь, и҆ сѣдѧ́щїѧ на ѻ҆́дрѣ бра́чнѣ быс̑҇ в꙽ печа́ли·

И҆ потрѧсесѧ землѧ̀ ѻ҆бита́ющихъ ради на не́и, и҆ весь до́мъ і҆а́ковль ѻ҆блече́сѧ стꙋ́домъ·

И҆ по дво́ю лѣтꙋ дн҃їи, посла цр҃ь нача́лника да́нем̑ въ гра́ды і҆ю́дины, и҆ прїиде въ і҆ерс̑҇лимъ съ наро́домъ вели́комъ.
и҆ гл҃а к ним̑ словеса ми́рнаѧ во льсти, и҆ вѣрова́ша е҆мꙋ.
и҆ нападе на гра́дъ стремле́нїем̑ и҆ порази е҆го ꙗ҆звою вели́кою, и҆ погꙋби лю́ди мно́ги ѿ і҆и҆л҃ѧ.
и҆ взѧ кори́сти град̑ски, и҆ пож꙽же е҆го ѻ҆гнемъ и҆ разорѝ до́мы е҆го, и҆ стѣ́ны е҆го ѻ҆́крестъ.
и҆ плѣни́ша жены и҆ ча́да, и҆ ско́ти раздѣли́ша·

И҆ създа́ша гра́дъ дв҃двъ стѣнꙋ великꙋ и҆ крѣпкꙋ и҆ пи́ргы крѣ́пки, и҆ быс̑҇ им̑ въ крѣпос̑҇·

и҆ поста́виша т̂ꙋ лю́ди грѣшницы мꙋжи безако́нницы и҆ възмого́ша в немъ·

и҆ поставиша ѻ҆рꙋжїѧ и҆ бра́шно, и҆ събира́ша кори́сти і҆ерс̑҇лим̑скїѧ и҆ полага́ша т̂ꙋ.
и҆ бы́ша въ сѣть вели́кꙋ, и҆ бы́сть на лаѧ́тельство ст҃ыни, и҆ въ дїѧ́вола лꙋка́ваго і҆и҆л҃ю вы́нꙋ.
и҆ пролїѧ́ша кро́вь непови́ннꙋ ѻ҆́крс̑҇тъ ст҃ыни, и҆ ѻ҆скверни́ша̑ ст҃ыню.
и҆ бѣжа́ша ѻ҆бита́ющїи і҆ерс̑҇лимꙋ и҆хъ ради, и҆ бы́сть ѻ҆бита́нїе чюждимъ.
и҆ чюждꙋ сѣмени роженїе е҆го, и҆ ча́да е҆го ѻ҆ста́виша е҆го, и҆ ст҃ынѧ е҆го разоре́на ꙗ҆́ко пꙋсты́нѧ.
пра́здницы е҆го ѻ҆бращени сꙋть въ пла́чь, и҆ сꙋбо́ты е҆го в поноше́нїе.
чести е҆го ѹ҆ничижают̑.
по сла́вѣ е҆го ѹ҆мно́жено е҆сть без̑честїе е҆го, и҆ высота е҆го ѻ҆бращена е҆сть во пла́чь·

И҆ писа цр҃ь а҆нтїѻ́хъ всемꙋ црс̑҇твꙋ свое҆мꙋ да бꙋ́дꙋтъ вс̂и лю́дїе е҆ді́но·

И҆ ѻ҆ста́ви ко́жд̑о зако́нъ свои і҆ и҆зво́лиша вси ꙗ҆́зы́цы по сло́вꙋ цр҃ѧ а҆нтїѻ́ха·

и҆ мно́ѕи ѿ і҆и҆л҃ѧ и҆зво́лиша слꙋже́нїю е҆го, и҆ пожро́ша и҆́доломъ и҆ ѻ҆скверни́ша сꙋбо́тꙋ·

И҆ посла цр҃ь кни́ги рꙋко́ю вѣстникъ въ і҆ерс̑҇лимъ, и҆ въ всѧ гра́ды і҆ѹ́дины да наслѣдѧ́тъ зако́ны чю́ждих̑ зе́мъскихъ.
и҆ въздержа́тъ всесъжиже́нїе и жертвы и҆ възлїѧ́нїе ѿ ст҃ыни·

и҆ ѻ҆сквернити сꙋбо́ты и҆ пра́зд̑ники, и҆ ѻ҆скверни́ти ст҃аѧ ст҃ых·

и҆ съзида́ти ѻ҆лтари и҆ ка́пища і҆ и́долы, и҆ пожре́нїѧ мѧ́съ свинихъ и҆ ско́ты ѻ҆́бщаѧ.
и҆ ѻ҆ста́вити сн҃ы своѧ неѻ҆брѣзаны, и҆ ѻ҆сквернити дш҃а и҆хъ въ всѣхъ нечистота́хъ, даже забꙋдꙋтъ зако́нъ, і҆ и҆змѣнѧтъ всѧ ѻ҆правда́нїѧ бж҃їѧ.

І҆ и́же а҆ще не сътво́рѧтъ по гл҃ꙋ цр҃ѧ, да ѹ҆мрꙋтъ по словесѣхъ сихъ.
и҆ написа всемꙋ црс̑҇твꙋ свое҆мꙋ, и҆ приста́ви нача́лники на всѧ лю́ди.
и҆же повелѧ́ше гра́домъ і҆ѹ́динымъ пожрети по всѧ́къ гра́дъ и҆ град̑·

И҆ събра́шасѧ мно́ѕи ѿ людїи к ни́мъ всѧ́къ ѻ҆ста́вивыи зако́нъ гн҃ь, и҆ сътвори́ша лꙋка́во на землѝ·

И҆ положи́шас̑҇ лю́ди і҆и҆л҃вы в та́иныхъ, и҆ въ всѧ́комъ ѹ҆бѣжищꙋ и҆хъ, е҃і дн҃е, мс̑҇ца хасле́ва, пѧ́томꙋ и҆ четы́ресо́тномꙋ лѣтꙋ.
създа́ша скве́рнꙋ ѻпꙋстѣ́нїѧ на ѻ҆л꙽та́рь бж҃їи, по всѣмъ гра́домъ и҆ѹ́динымъ ѻ҆́крс̑҇тъ съзида ка́пища·

и҆ пред̑ две́рїю домо́въ и҆ на сто́гнахъ и҆ жрѧ́хꙋ, и҆ кни́ги зако́на бж҃їѧ их̑же ѻ҆брѣто́ша съжго́ша ѻ҆гнем̑, низдержа́вши их̑ и҆деже ѻ҆брѣтоша кни́гꙋ завѣта гн҃ѧ·

И҆ е҆ли́цы же въздръжа́ша зако́нъ гн҃ь, по повелѣ́нїю цр҃ѧ закла́хꙋ е҆го.
в си́лѣ свое́и сътворѧ́хꙋ сїѧ людемъ і҆и҆л҃евымъ, и҆же ѻ҆брѣт꙽шимсѧ въ всѧ́комъ мс̑҇цѣ и҆ мс̑҇цѣ въ гра́дѣхъ·

и҆ двадесѧ́тыи дн҃ь мс̑҇ца жрѧ́хꙋ въ ка́пищи, и҆же б̂ѣ на прс̑҇тлѣ.
и҆ жены ѻ҆брѣзающаѧ сн҃ы своа закала́ша по повелѣ́нїю цр҃ѧ.
і҆ ѻ҆бѣша́хꙋ дѣтища за шїи по всѣхъ домохъ и҆хъ, і҆ и҆хъ и҆же ѻ҆брѣзаша тѣхъ закала́хꙋ·

И҆ мно́ѕи ѿ людїи і҆и҆л҃евыхъ ѹ҆держа́шасѧ и҆ ѹ҆тверди́шасѧ е҆же не ꙗ҆́сти скве́рныхъ.
і҆ и҆збра́ша на́ипач̑҇ ѹ҆мрети, неже ѻ҆скверни́тисѧ бра́шны, и҆ не хотѣша простꙋпи́ти зако́на бж҃їѧ ст҃го.
и҆ закла́ни сꙋть, и҆ бы́сть гнѣ́въ ве́лїи на і҆и҆л҃ѧ ѕѣло̀·

Глв̑҇а, в҃·

Въ дн҃ехъ тх̑ѣ въста мат꙽фїѧ сн҃ъ і҆ѻа́ннов꙽꙽, сн҃а симеѻ́нѧ сщ҃енникъ ѿ сн҃овъ и҆ѻ҆а҆ри́въ ѿ і҆ерс̑҇лима, и҆ сѣде во моди́не.
і҆ и҆мѧ́ше сн҃овъ е҃ і҆ѻа́нна и҆же прои҆менова́шесѧ гад̑дис̑҇, и҆ симо́на и҆же прои҆менова́шесѧ ѳасеи, і҆ и҆ѹ́дꙋ и҆же зва́шесѧ мак̑҇кавеи, и҆ е҆леа҆за́ръ и҆же прои҆менова́шесѧ а҆наран꙽, и҆ѻ҆а҆наѳа́нъ и҆же прои҆менова́шесѧ а҆п꙽ѳꙋсъ·

и҆ ви́дѣша хꙋле́нїѧ быва́ющаѧ въ і҆ѹ҆де́и і҆ и҆ерс̑҇лимѣ·

И҆ реч̑҇ ѹ҆вы мн̂ѣ, почто̀ роженъ е҆смь ви́дѣти сътре́нїе людїи моих̑, и҆ сътре́нїе гра́да ст҃го.
и҆ сѣдѣти т̂ꙋ въ е҆же да́тисѧ в рꙋцѣ врагъ, и҆ ст҃аѧ в рꙋки чю́ждимъ·

бы́сть храмъ е҆го ꙗ҆́ко чл҃къ без꙽честенъ, съсꙋды сла́вы е҆го пленени и҆зведе́ни сꙋть.
побїени сꙋть ста́рцы е҆го на сто́гнахъ мече́мъ.
ко́и ꙗ҆зы́къ не наслѣдова црс̑҇тва и҆ не въздержа коры́сти е҆го, всѧ же ѹ҆тва́ръ е҆го взѧ́та е҆сть.
вмѣсто свободы бы́сть рабьство.
и҆ се ст҃аѧ наша и҆ красота на́ша и҆ сла́ва наша ѻ҆пꙋстѣ́на е҆сть, и҆ ѻ҆скверниша е҆ѧ̀ ꙗ҆зы́цы.
почто̀ ѹ҆бо намъ е҆ще жи́ти.
и растерза ри́зы своѧ мат꙽таѳїѧ и҆ сн҃ы е҆го, и҆ ѻ҆блеко́шасѧ въ врѣтища и҆ плакаша ѕѣ́ло.
и҆ прїидо́ша посла́нїи ѿ цр҃ѧ, понꙋжда́юще ѿбѣгъшихъ въ гра̑ моди́нъ да пожрꙋтъ·

и҆ мно́ѕи ѿ і҆и҆л҃ѧ пристꙋпи́ша к ним̑·

Мат̑таѳїѧ же и҆ сн҃ове е҆го крѣ́пко ста́ша.
и҆ ѿвѣща́ша послан̑҇нїи ѿ цр҃ѧ·

и҆ рѣша мат꙽таѳїю гл҃юще·

кн҃ѕь и҆ пресла́вныи и҆ ве́лїи е҆си въ гра́дѣ сем̑ и҆ ѹ҆тверженъ въ сн҃ехъ и҆ бра́тїи·

нн҃ѣ ѹ҆бо пристꙋпи преже и҆ сътвори повелѣ́нїе цр҃ѧ, ꙗ҆́ко сътвори́ша вси ꙗ҆зы́цы, и҆ мꙋжи і҆ѹ́дины, и҆ ѻ҆ста́вшїи въ і҆ерс̑҇лимѣ·

и҆ бꙋдеши т̂ы и҆ до́мъ твои посреди дрꙋгъ цр҃евых꙽.
и҆ т̂ы и҆ сн҃ове твои просла́витесѧ въ сребрѣ и҆ зла́тѣ и҆ в да́рѣхъ мно́ѕх̑ѣ·

И҆ ѿвѣща мат꙽таѳїѧ и҆ рече гла́сомъ велїимъ.
а҆ще и҆ вси ꙗ҆зы́цы въ домꙋ црс̑҇твїѧ цр҃ѧ послꙋшаша ѿстꙋпи́ти ко́ждо ѿ слꙋже́нїѧ ѿц҃ъ своих̑, і҆ и҆зво́лиша въ за́повѣдехъ е҆го·

А҆зъ же и҆ сн҃ове мои и бра́тїѧ моѧ, повинꙋемсѧ зако́нꙋ ѿц҃ъ нашихъ·

милостивъ бꙋдетъ намъ б҃ъ.
нѣсть намъ ключи́мо ѻ҆ста́вити зако́нъ и҆ ѻ҆правда́нїѧ бж҃їѧ·

не послꙋшаем̑ словесъ цр҃ѧ престꙋпи́ти слꙋже́нїе на́ше на десно и҆ли на шꙋе·

И҆ ꙗ҆́ко преста гл҃ати словеса сїѧ.
пристꙋпи мꙋжъ и҆ѹ҆деани́нъ пред̑ ѻ҆чи́ма всѣхъ жрѣти въ ка́пищи и҆же въ моди́не, по повелѣ́нїю цр҃евꙋ.
и҆ ви́дѣ мат̑таѳїи и҆ поболѣ, и въстрепета́ша внꙋтренѧѧ е҆го.
и҆ вож꙽жесѧ ꙗ҆́рость е҆го по сꙋдꙋ зако́на.
и҆ наскочи и҆ раз꙽сѣче е҆го въ капищы, и҆ мꙋжа е҆гоже цр҃ь посла̀ и҆же принꙋжда́ше жрѣти ѹ҆бѝ, въ времѧ ѻ́но и҆ ка́пище разори·

И҆ възревнова зако́нъ ꙗ҆́ко сътвори финее́съ зам꙽врїи сн҃ꙋ саломи.
и҆ възопи мат꙽таѳїи въ гра́дѣ гла́сомъ ве́лїим̑ всѧ́къ ревнꙋѧ́и зако́нꙋ, и҆ стоѧ́и въ завѣтѣ да и҆зы́идетъ въ слѣдъ мене.
и҆ ѿбѣжа самъ и҆ сн҃ове е҆го в горы, и҆ ѻ҆ста́ви е҆ли́каже и҆мѣ въ гра́дѣ·

Тогда снидо́ша мно́ѕи и҆щꙋще сꙋда и҆ пра́вды въ пꙋсты́ни и҆ сѣдо́ша т̂ꙋ сами, и҆ сн҃ове их̑ и҆ жены и҆хъ и҆ ско́ты их̑ ꙗ҆́ко ѹ҆мно́жишасѧ на нихъ ѕлаѧ.
и҆ възвѣщено е҆сть мꙋжемъ цр҃евымъ и҆ си́лнымъ и҆же бѧ́хꙋ въ і҆ерс̑҇лимѣ гра́дѣ дв҃двѣ.
ꙗ҆́ко ѿи҆до́ша мꙋжи нѣцыи, и҆же разори́ша за́повѣдь цр҃ьскꙋ в мѣста та́ина въ пꙋсты́ню·

И҆ теко́ша по ни́хъ мно́ѕи и҆ ꙗ҆́ша и҆хъ и҆ ѻ҆полчи́шасѧ на них̑, и҆ поста́виша проти́вꙋ бра́нь въ дн҃ь сꙋбо́тныи.
и реко́ша к ни́мъ, противлѧ́етесѧ и҆ нн҃ѣ е҆ще, и҆зыидѣте и҆ сътвори́те по сло́вꙋ цр҃ѧ и҆ живете·

И҆ рѣша не и҆зы́идемъ ни сътво́римъ по сло́вꙋ цр҃евꙋ да с꙽кве́рнимъ дн҃ь сꙋбо́ты·

И въскори́ша на нихъ бра́нь, и҆ не ѿвѣща́ша им̑ ни ка́мени верго́ша на них̑, ни загради́ша мѣста таина рекꙋщи.
ѹ҆́мремъ вс̂и въ простотѣ на́шеи.
и҆ свѣдѣтели бꙋдꙋтъ на на́съ нб҃о и҆ землѧ, и҆же непра́во погꙋбитѐ нас̑҇·

И҆ воста́ша на них̑ въ бра́ни в꙽ сꙋботы.
и҆ ѹ҆мро́ша сїѝ и҆ же́ны и҆хъ и҆ сн҃ове и҆хъ и҆ скоты их̑, да́же до тысѧщи дш҃ъ чл҃къ·

И҆ позна̀ мат꙽таѳїѧ и҆ дрꙋѕи е҆го, и҆ въскорбѣша ѻ҆ нихъ ѕѣло.
и҆ рече мꙋжъ и҆скренемꙋ свое҆мꙋ, а҆ще вс̂и сътворимъ ꙗ҆́ко бра́тїѧ на́ша сътвори́ша, и҆ не ѻ҆полчаем̑сѧ на ꙗ҆зы́цы ѻ҆ дш҃ахъ на́ших̑, и҆ ѻ҆правда́нїи ради нн҃ѣ насъ скоро и҆скоренѧт̑ ѿ землѧ̀.
и҆ помысли́ша въ дн҃ь ѻ҆́нъ гл҃ющи·

всѧкъ чл҃къ и҆же а҆ще прїидетъ к нам̑ на́ брань въ дн҃ь сꙋботныи, ѻ҆полчаем̑сѧ проти́вꙋ е҆го и҆ не ѹ҆́мрем̑ вс̂и, ꙗ҆́кож̑ ѹ҆мро́ша бра́тїѧ на́ша въ та́иных̑·

Тогда̀ собраша к нимъ сонмище і҆ѹ҆де́иско крѣпцїи въ си́ле ѿ і҆и҆л҃ѧ.
всѧк̑҇ и҆зволивыи зако́нꙋ и҆ вс̂и и҆же бѣжаша̑ ѿ злыхъ приложи́шасѧ им̑.
и҆ быша им̑ въ ѹ҆твержд̑енїе и҆ събра́ша воѝ, и҆ поби́ша грѣшныхъ въ гнѣве свое҆мъ·

и҆ мꙋж́еи без꙽законныхъ въ ꙗ҆́рости свое́и, и҆ прочїи бѣжаша во ꙗ҆зы́цы спастисѧ.
и҆ ѻ҆бы́иде мат꙽таѳїѧ и҆ дрꙋѕи е҆го и҆ разори́ша капища.
и҆ ѻ҆брѣзаша ѻ҆́троки неѻ҆брѣзанныѧ е҆лицх̑ѣ ѻ҆брѣтоша въ предѣлех꙽ і҆и҆л҃ѧ въ крѣпости.
и҆ погна́ша сн҃овъ гордынѧ, и҆ ѹ҆спѣ дѣло въ рꙋкꙋ их̑.
и҆ въздержа́ша зако́нъ ѿ рꙋкꙋ ꙗ҆зыкъ и҆ ѿ рꙋкꙋ цр҃евꙋ, и҆ не да́ша рогъ грѣшникꙋ·

И приближи́шасѧ дн҃и мат꙽таѳїю ѹ҆мрѣти, и҆ рече сн҃омъ свои҆мъ.
нн҃ѣ ѹ҆крѣписѧ горды́нѧ и҆ ѻ҆бличенїе, и҆ времѧ низъвра́щенїю и҆ гнѣвъ ꙗ҆́рости·

И҆ нн҃ѣ ча́да възревнꙋите законꙋ и҆ дади́те дш҃а ва́ша за завѣт꙽ ѿц҃ъ ва́ших̑ и҆ помните дѣла ѿч҃а и҆же сътвори́ша въ родѣхъ своих̑, и҆ прїимете сла́вꙋ ве́лїю і҆̀ и҆мѧ вѣчное·

А҆враа́мъ не въ и҆скꙋшенїихъ л̂и ѻ҆брѣтенъ е҆сть вѣренъ, и҆ вмѣни́сѧ е҆мꙋ въ правдꙋ·

І҆ѻ́сифъ въ времѧ тѣсноты свое́ѧ съхрани за́повѣдь, бы́сть господи́нъ е҆гѷптꙋ·

финее҆съ ѿц҃ъ на́шъ внегда̀ ревнова ревностїю и҆ прїѧт̑ завѣтъ сщ҃еньства вѣчнаг̑҇.

І҆сꙋсъ е҆гда̀ и҆сполни сло́во, и҆ бысть сꙋдїѧ въ і҆и҆л҃и·

халевъ е҆гда̀ свѣдѣтельствова въ цр҃ви, воспрїѧ́тъ земли наслѣдїе.
дв҃дъ въ свое́и ми́лости наслѣдова прс̑҇тлъ црс̑҇твїѧ во вѣкъ вѣка·

И҆лїѧ е҆гда̀ възревнова ревностїю зако́на, взѧсѧ ꙗ҆́ко на́ нб҃о·

А҆на́нїѧ, а҆зарїѧ, мисаил̑҇, вѣрꙋю҆ще сп҃сошасѧ ѿ пла́мени.
данилъ въ простотѣ свое́и и҆зѧ́тсѧ ѿ ѹ҆стъ львовъ·

И҆ та́ко помышлѧ́ите по род̑ і҆ род̑, ꙗ҆ко вс̂и ѹ҆пова́ющїи на́нь не и҆знемогꙋтъ.
и҆ ѿ словесъ мꙋж́а грѣшна не ѹ҆боитесѧ, и҆же слава е҆го въ мотыла и҆ въ червъ.
дньс̑҇ въздвигнет̑сѧ а҆ ѹтре не ѻ҆брѣтесѧ, ꙗ҆́ко ѻ҆братисѧ въ пер̑҇сть свою и҆ помышленїи е҆го поги́бе·

И҆ в̂ы сн҃ве ѹ҆крѣпитесѧ и҆ мꙋжа́итесѧ въ законѣ, ꙗ҆́ко в немъ прослави́тесѧ.
и҆ с̂е симеѻ҆нъ братъ ва́шъ, вѣмъ ꙗ҆́ко мꙋжъ совѣта е҆сть, того послꙋша́ите вс̂ѧ дн҃и и҆ то́и бꙋдетъ вамъ въ ѿц҃а·

І҆ѹ҆да мак꙽каве́и сей крѣпокъ въ си́лѣ ѿ ю҆́ности свое́ѧ, се́и бꙋдетъ ва́мъ нача́лникъ во́и, и҆ то́и сътворитъ бра́нь лю́демъ.
и҆ в̂ы приведѣте къ себѣ вс̂ѧ творци зако́на, и҆ м꙽стите м꙽щенїе людїи вашихъ·

воздаите воздаѧ́нїе ꙗ҆зы́комъ, и҆ внемлѣте въ за́повѣди за́кона·

И҆ блс̑҇ви их̑ и҆ приложисѧ къ ѿц҃емъ свои҆м꙽, и҆ ѹ́мре въ лѣто, рм҃ѕ.
и҆ погребо́ша е҆го сн҃ове е҆го во гробѣхъ ѿц҃ъ е҆го въ модине.
и҆ пла́каша е҆го весь і҆и҆л҃ь пла́чем꙽ ве́лїимъ·

Глв̑҇а, г҃·

И въста і҆ѹ́да нарица́емыи мак꙽каве́и сн҃ъ е҆го в꙽ него мѣсто, и҆ помагахꙋ е҆мꙋ вс̂и братїѧ е҆го, и҆ вс̂и е҆лицы прилѣпишасѧ къ ѿц҃ꙋ е҆го.
и҆ ѻ҆полчахꙋсѧ ѻ҆полченїемъ і҆и҆л҃ь съ веселїемъ.
и҆ распространи славꙋ лю́дем̑ свои҆мъ, и҆ ѻ҆блечесѧ въ бронѧ ꙗ҆́ко гигантъ.
и҆ препоа́сасѧ ѻ҆рꙋжїем꙽ бра́ни свое́ѧ въ ѻ҆полченїих꙽, и҆ защищаше ѻ҆полченїѧ мечемъ свои҆мъ.
и҆ ѹ҆подобисѧ львꙋ въ дѣлехъ свои҆хъ и҆ ꙗ҆́ко скѷменъ рыка́ющъ в ловитвѣ.
и҆ погони безаконныѧ и҆спыта́ѧи смꙋща́ющихъ лю́ди е҆го пож꙽же пла́менем̑ и възвращени сꙋть безаконїи ѿ страха е҆го, и҆ вс̂и дѣ́латели безако́нїа смѧтошасѧ.
и҆ ѹ҆правлено е҆сть спс̑҇енїе въ рꙋкꙋ е҆го.
и҆ ѻ҆горчи цр҃и мно́ги и҆ възвесели і҆а́кова въ дѣлехъ своих̑, и҆ въ вѣки па́мѧть е҆го въ блс̑҇венїе·

и҆ прохожаше гра́ды і҆ѹ́дины, и҆ погꙋби нечьстивыхъ ѿ нихъ.
и҆ ѻ҆брати гнѣвъ ѿ і҆и҆л҃ѧ.
і҆ и҆меновасѧ даж̑ до послѣдних̑ земли, и҆ собра погибаю҆щихъ·

И собра а҆пол꙽лонъ ꙗ҆зы́ки ѿ самарїѧ силꙋ ве́лїю е҆же ратова́ти на і҆и҆л҃ѧ·

И҆ позна і҆ѹ́да и҆зыиде въ срѣтенїе е҆мꙋ.
и҆ порази е҆го и҆ ѹ҆би того, и҆ падоша ꙗ҆звенїи, но́ѕи и҆ прочїи побѣгоша.
и҆ взѧтъ користи и҆хъ.
и҆ мечъ а҆пол꙽лоновъ ѿꙗ҆́тъ і҆ѹ́да, и҆ бысть вою҆ю́щи им̑ вс̂ѧ дн҃и·

И҆ слы́ша серонъ началникъ во́и сѷръских̑, ꙗ҆́ко собра і҆ѹ҆́да съвокꙋпленїе и҆ цр҃ковъ вѣрных̑ с ним̑ изыиде въ брань·

и҆ реч̑҇ сътворю себѣ и҆́мѧ и҆ прославлюсѧ въ црс̑҇твїи, и҆ поборю і҆ѹ́дꙋ и҆ сꙋщих̑ с ним̑, и҆ ѹ҆ничижа́ющих̑ слово цр҃ево.
и҆ ѹ҆готовасѧ и҆ приложисѧ е҆же възы́ити.
и҆ взыиде с нимъ полкъ нечестивыхъ крѣпокъ по́мощи е҆мꙋ и҆ сътворити ѿм꙽щенїа на сн҃ехъ і҆и҆л҃евыхъ.
и҆ приближисѧ даже до въсхода веѳорон̑҇ска.
і҆ и҆зыиде і҆ѹ́да въ сретенїе е҆мꙋ въ малѣ·

Ꙗ҆́коже ви́дѣша полкъ грѧдꙋщїи въ срѣтенїе и҆мъ, рѣша і҆ѹ́дѣ како мо́жемъ в꙽ мали сꙋще ѻ҆полчатисѧ противꙋ мно́жества сего толь крѣпка, и҆ м̂ы ѹ҆трꙋжени е҆смы̀ постомъ днс̑҇ь·

И҆ рече і҆ѹ́да, ѹ҆добъ е҆сть ѻ҆бъѧ́ти мно́гихъ въ рꙋкꙋ малыхъ·

И҆ нѣсть разньства пред̑ бм҃ъ нбс̑҇нымъ спс̑҇ти въ мно́ѕѣ и҆ въ ма́ле.
ꙗ҆́ко не въ мно́жествѣ во́и ѻ҆долѣнїѧ брани е҆сть, н̂о ѿ нб҃си крѣпость.
сїи грѧдꙋтъ къ намъ въ мно́жествѣ клѧтвы безаконїа.
е҆же расто́ргнꙋти насъ и҆ же́ны на́ша и҆ чада наша, е҆же скориствовати нами.
м̂ы бо ѻ҆полча́емсѧ за дш҃а наша и҆ законы наша.
и҆ самъ г҃ь съкрꙋшитъ и҆хъ пред̑ лицемъ на́шимъ, вы же не ѹ҆страша́итесѧ и҆хъ·

Ꙗ҆́коже преста гл҃ати, и҆ наскочи на нихъ въскорѣ, и҆ сътресѧ сиронъ и҆ во́и его пред̑ нимъ.
и҆ погна̀ е҆го въ нисхожденїе веѳора, даже до полѧ.
и҆ падоша ѿ нихъ ꙗ҆́ко и҃, сотъ мꙋжъ.
прочїи же побѣгоша въ землю филистима, и҆ нападе страх̑ і҆ѹ́дин꙽, и҆ братїи е҆го и҆ бо́ѧзнь на всѧ̀ ꙗ҆зыки ѻ҆́крс̑҇тъ и҆хъ.
и҆ прїиде до цр҃ѧ и҆мѧ е҆го, и҆ ѻ҆ ѻ҆полченїи і҆ѹ́динѣ повѣда́хꙋ вс̂и ꙗ҆зы́цы.
ꙗ҆́коже слы́ша цр҃ь а҆нтїѻхъ словеса сїѧ.
прогнѣвасѧ дш҃ею и҆ посла̀ и҆ събра во́и всего црс̑҇тва свое҆го полкъ крѣпокъ ѕѣло, ѿверзе сокровище свое и҆ дасть ѻ҆броки вои́номъ въ лѣто.
и҆ заповѣда и҆мъ в лѣто быти готовомъ на всѧкꙋ потребꙋ·

И҆ ви́дѣ ꙗ҆ко ѻ҆скꙋдѣ сребро̀ ѿ съкровища, и҆ дани ѿ стран̑҇ ма́ли.
ради расхожд̑енїѧ и҆ ꙗ҆́звы ꙗ҆́же сътвори въ земли да возметъ законнаѧ и҆же бѧхꙋ ѿ пр́ьвыхъ дн҃їи·

и҆ ѹ҆страшисѧ да не и҆мѣе҆т꙽ и҆ е҆ді́ною и҆ дважды въ расходы, и҆ даѧ́нїѧ ꙗ҆́же даѧ́ преже пространною рꙋкою·

і҆ и҆зъбытъчествова паче цр҃еи бывшихъ прежде възнесѧ дш҃ею ѕѣло, и҆ помысли и҆тѝ въ персидꙋ.
и҆ прїѧти да́ни стра́нъ и҆ събра́ти сребра̀ мно́го·

И҆ ѻ҆ста́ви лисїю чл҃ка пресла́вна ѿ ро́да цр҃ьствїѧ над̑ ве́щми црс̑҇кими, ѿ рѣкѝ е҆фра́та да́же до рѣкѝ е҆гѷпта.
и҆ пита́ти а҆нтиѻ́ха сн҃а свое҆го, до́ндеже ѻ҆брати́тсѧ са́мъ.
и҆ предадѐ е҆мꙋ полъ си́лъ и҆ сло́новъ·

и҆ заповѣда е҆мꙋ ѻ҆ всх̑ѣ и҆хже съвѣща̀ и҆ ѻ҆ ѻ҆бита́ющих̑ въ і҆ѹ҆деи і҆ и҆ерс̑҇лі́мѣ·

посла́ти на ни́хъ е҆же съкрꙋши́ти і҆ и҆сто́ргнꙋти крѣпость і҆и҆л҃евꙋ, и҆ ѻ҆ста́нки і҆ерс̑҇лима, и҆ ѿѧти па́мѧть и҆хъ ѿ мѣста, и҆ всели́ти сн҃овъ и҆норо́дныхъ въ всѣхъ предѣлехъ и҆хъ, и҆ по жребїю раздѣли́ти землю и҆хъ·

И҆ цр҃ь въспрїѧтъ полъ си́лы ѻ҆ста́вшихъ, і҆ и҆зы́иде ѿ а҆нтиѻ҆хїи ѿ гра́да црс̑҇тва свое҆го, лѣта рм҃з·

и҆ пре́иде е҆фра́тъ рѣкꙋ̀ и҆ прохожа́ше въ вы́шнѧѧ стра́ны·

І҆ и҆збра лисїю п꙽толоме́ѧ сн҃а доримеѻ́ва, и҆ никано́ра и҆ горгїѧ мꙋжи си́лнїи ѿ дрꙋгъ цр҃евыхъ, и҆ посла̀ с ни́ми, ҂м҃ мꙋжїи, и҆ ҂з҃. ко́н꙽никъ.
е҆же итѝ в зе́млю і҆ѹ́динꙋ и҆ растли́ти ю҆̀ по словесѝ цр҃ьскꙋ·

И҆ ѿше́дше съ всею си́лою своею и҆ прїидоша и҆ ста́ша близъ е҆м꙽маѹ́ма̑ в землѝ польстѣ·

И҆ слы́шаша кꙋп꙽цы̀ страны̀ тоѧ и҆мѧ и҆х꙽, и҆ взѧ́ша̑ зла́то и҆ сребро̀ мно́го ѕѣло и҆ ѻ́троки и҆ прїидо́ша въ станы̀ да прїимꙋтъ сн҃овъ і҆и҆л҃евыхъ въ рабы̀.
и҆ приложи́шасѧ к нимъ во́и сѷръскїѧ и҆ землѝ и҆ноплеменникъ·

И҆ ви́дѣ і҆ѹ҆да и҆ бра́тїѧ е҆го ꙗ҆́ко ѹ҆мно́жишасѧ ѕла́ѧ.
и҆ воѝ приближа́шесѧ къ предѣломъ и҆хъ, и҆ позна́ша словеса̀ цр҃ва и҆же повелѣ лю́демъ сътвори́ти в погꙋбле́нїе и҆ сконча́нїе·

И҆ рече ко́ждо къ и҆́скренемꙋ свое҆мꙋ, въста́нѣмъ за и҆згна́нїѧ людїи наших̑ и҆ ѻ҆полча́е҆мсѧ за люди на́ша и҆ ст҃ыѧ·

И҆ собра́сѧ сонмъ е҆же бы́ти гото́вомъ къ ѻ҆полъче́нїю.
и҆ е҆же моли́ти и҆ проси́ти млс̑҇ти и҆ щедро́тъ·

І҆ и҆ерс̑҇ли́м꙽ б̂ѣ безъѻ҆би́теленъ а҆ки пꙋстъ.
и҆ не бѣ въходѧ́ и и҆сходѧ́и ѿ рода е҆го и҆ ст҃аѧ попра́шасѧ, и҆ сн҃ве и҆нород̑ных̑ въ краю̀.
бы́сть ѻ҆бита́нїе ꙗ҆зы́ком꙽ и҆ взѧ́сѧ веселїе ѿ і҆а́кова, і҆ ѻ҆скꙋдѣ тꙋ̀ сопѣль и҆ гꙋсли·

И҆ собра́шасѧ и҆ прїидо́ша въ маси́фꙋ проти́вꙋ і҆ерс̑҇лі́мꙋ, ꙗ҆́ко мѣсто мл҃твы въ масифе прьвѣе і҆и҆л҃ю·

И҆ пости́шас̑҇ того днѝ и҆ ѻ҆блеко́шасѧ въ врѣтища и҆ пепелъ посы́паша на главы своѧ, и҆ растеръза́ша ѻ҆дѣѧ́нїѧ своѧ.
и҆ распростро́ша кни́гꙋ зако́нꙋ ѿ них̑же и҆спыта́хꙋ ꙗ҆зы́цы написа́ти на ни́хъ подо́бїѧ и҆́долъ свои҆хъ.
и҆ принесо́ша ри́зы свѧти́тельскїѧ и҆ прьворо́дныѧ и҆ десѧти́ны.
и҆ въздви́гнꙋша назаре́ѧ иже наплъниша дн҃и, и҆ възопи́ша гла́сомъ ве́лїимъ на нб҃о рекꙋщи.
чт̂о сътвори́мъ симъ и҆ гдѣ и҆хъ въведе́мъ, и҆ ст҃аѧ твоѧ попра́шасѧ и҆ ѻ҆скврънишасѧ, и҆ сщ҃енницы твоѝ въ ско́рби и҆ смире́нїю.
и҆ се ꙗ҆зы́цы събра́шасѧ на́ ны да расто́ргнꙋтъ насъ, ты̀ вѣси и҆же помышлѧ́ютъ на на́съ.
ка́ко мо́жем̑ потерпѣти пред̑ лицемъ ихъ, а҆ще не ты помо́жеши намъ·

и҆ въстрꙋби́ша и҆ възопи́ша гла́сомъ ве́лїимъ·

И҆ посе́м꙽ поста́ви і҆ѹ҆да вое҆во́ды людїи, ты́сѧщники и҆ со́тники, пѧтьдесѧ́тники, и҆ десѧтонача́лники и҆ реч̑҇.
съѕида́ющим̑ домы̀, и҆ ѻ҆брꙋча́ющим̑ же́ны и҆ садѧ́щимъ виногра́ды, и҆ ѹ҆жасным̑ възврати́тисѧ комꙋждо в дом̑ свои по зако́нꙋ.
и҆ въздви́гнꙋша ѻ҆плъче́нїѧ, и҆ поста́виша на юг̑҇ е҆м꙽маѹ́ма̑·

И҆ рече і҆ѹ́да, препоѧши́тесѧ и҆ бꙋдѣте въ сн҃ы си́лны, и҆ бꙋдѣте ѹ҆гото́вани въ заѹ́трїе ѻ҆полчи́тисѧ на ꙗ҆́зы́ки сїѧ и҆же събра́шас̑҇ растерза́ти насъ и҆ ст҃аѧ наша.
ꙗ҆́ко лꙋче е҆сть нам̑ ѹ҆мрѣти въ бра́ни, неже́ ви́дѣти ѕла́ѧ людїи нашихъ и҆ ст҃ыхъ.
ꙗ҆́кож̑ во́лѧ бꙋдет̑ въ нб҃си та́ко сътворит̑·

Глв̑҇а, д҃·

И поꙗ҆́тъ горгїѧ, ҂е҃ мꙋжїи, и҆ ҂а҃ ко́нникъ и҆збра́нныхъ и҆ подвиго́ша плъкъ но́щїю е҆же наи҆тѝ на полкъ и҆у҆деиск꙽ и҆ поби́ти их̑ внеза́пꙋ.
и҆ сн҃ве и҆же ѿ краѧ бѣ́хꙋ во́жди им̑.
и҆ слы́ша і҆ѹ́да и҆ въста̀ сам̑ и҆ си́лнїи, поби́ти си́лꙋ цр҃евꙋ ꙗ҆же въ е҆м꙽маѹ́ме.
да́же е҆ще силы расточе́ни бы́ша ѻ҆плъче́нїѧ·

И҆ прїиде горгїѧ въ ѻ҆плъче́нїа і҆ѹ́дина но́щїю и҆ ни е҆ді́наг̑҇ ѻ҆брѣтѐ.
и҆ска́ше и҆хъ въ гора́хъ ꙗ҆ко рече бѣжат̑ сїи ѿ насъ.
и҆ въкꙋпѣ дн҃ю ꙗ҆́вльшꙋсѧ ꙗ҆ви́сѧ і҆ѹ́да на́ поли со трема̀ ты́сѧщема мꙋжїи.
токмо щи́тъ и҆ мечь не и҆мѧ́хꙋ ꙗ҆́коже хотѧ́хꙋ.
и҆ ви́дѣша̑ плъкъ ꙗ҆зы́ческъ крѣпокъ въѻ҆рꙋжен̑҇ и҆ кон̑҇ницы ѻ҆крс̑҇тъ е҆го, и҆ сїи наѹ҆чени ѻ҆полче́нїю·

И҆ рече і҆ѹ҆да мꙋжемъ и҆же с нимъ бѧ́хꙋ.
не ѹ҆бо́итесѧ мно́жества и҆хъ, и҆ стремле́нїѧ и҆хъ не ѹжаса́итесѧ·

Помина́ите ка́ко сп҃сени бы́ша ѿц҃ы на́ши в мори чрьмнемъ, е҆гда гонѧ́ше и҆хъ фараѻ́нъ съ воѝ мно́гими.
нн҃ѣ възопїем̑ на́ нб҃о а҆ще како ѹ҆млс̑҇рдит̑сѧ на́ ны, и҆ помѧнет̑ завт̑ѣ ѿц҃ъ, и҆ съкрꙋшит̑ плъкъ сїи пред̑ лицем̑ нашим̑ днесь·

и҆ ѹ҆вѣдѧт̑ всѝ ꙗ҆́зы́цы ꙗ҆́ко е҆сть и҆збавлѧ́ѧи и҆ сп҃саѧи і҆и҆л҃ѧ·

И҆ възведо́ша и҆ноплемен̑҇ницы ѻ́чи своѝ, и҆ ви́дѣша и҆хъ грѧдꙋщих̑ съпротивꙋ.
і҆ и҆зыидо́ша ѿ плъка въ бра́нь, и҆ въстрꙋби́ша и҆же съ і҆ѹ́дою и҆ постꙋпи́ша и҆ сътре́ни сꙋть ꙗ҆зы́цы и҆ побѣгоша в по́ле.
послѣднїиж̑ падо́ша мечемъ·

и҆ прогна́ша и҆хъ даже до а҆саримо́ѳа и҆ даже до по́ль и҆дꙋме́искъ и҆ а҆зот̑скъ и҆ а҆мнискъ и҆ падо́ша̑ ѿ нихъ даже до трею ты́сѧщю мꙋжїи·

И҆ ѻ҆брати́сѧ і҆ѹ́да и҆ воѝ е҆го ѿ гоне́нїѧ въ слѣдъ е҆го.
и҆ рече къ лю́демъ, не въжделѣите коры́стїи, ꙗ҆́ко бра́нь противꙋ на́съ.
и҆ горгїѧ и҆ воѝ е҆го близъ насъ на гора́хъ.
н̂о сто́ите нн҃ѣ проти́вꙋ вра́гъ на́ших̑, и҆ побо́рете и҆хъ·

и҆ по сихъ прїимете коры́сти без̑ бо́ѧзни·

И҆ еще гл҃ющꙋ і҆ѹ́де сїѧ, и҆ сѐ ꙗ҆ви́сѧ ча́сть нѣкаѧ расмотрѧ́щи з горы̀ и҆ ви́дѣ ꙗ҆́ко въ бѣгъ ѻ҆брати́шасѧ со во́и.
и҆ заж꙽жени сꙋть ѻ҆полче́нїѧ, ды́мъ б̂о зри́мыи ꙗ҆влѧ́ше бы́вшее·

съѕира́ющїи же ѹ҆боꙗ҆́шасѧ ѕѣло·

ви́дѣша же ѻ҆плъче́нїе і҆ѹ́дино в по́ли гото́во на́ брань·

и҆ бѣжа́ша вси въ зе́млю и҆ноплеме́нник̑҇·

И҆ ѻ҆брати́сѧ і҆ѹ́да на коры́сти ѻ҆полченїи и҆ взѧ̀ зла́то мно́го и҆ сребра̀ и҆ ꙗ҆́ки́нѳа и҆ поръфи́ры мо́рскїѧ и҆ бога́т꙽ства вели́ка.
и҆ воз꙽враща́ющисѧ пѣснь поꙗ҆́хꙋ и҆ блс̑҇вѧ́хꙋ б҃а нбс̑҇наго ꙗ҆ко бл҃гъ е҆сть ꙗ҆́ко въ вѣкъ млс̑҇ть е҆го·

И҆ бы́сть сп҃сенїе вели́ко на і҆и҆л҃и въ дн҃ь ѻ҆нъ.
е҆ли́цы же и҆ноплемен̑҇никъ ѹ҆целѣша, прїидоша и҆ възвѣсти́ша лисїи всѧ̀ и҆же слꙋчи́сѧ·

ѻ҆́н꙽ же слы́шавъ ѹ҆нѝ дш҃ею, ꙗ҆́ко не ка́ко хотѣ̀ такова̀ бы́сть въ і҆и҆л҃и, и҆ не какова заповѣда цр҃ь и҆ сїѧ и҆зы́иде·

И҆ въ грѧдꙋщее лѣто събра̀ лисїѧ мꙋжїи и҆збранных̑ ше́стьдесѧтъ ты́сѧщъ и҆ ко́нникъ, ҂е҃, да побїетъ і҆ерс̑҇лимъ·

И҆ прїидо́ша въ і҆ѹ҆де́ю, и҆ ѻ҆полчи́шасѧ въ веѳсо́ре и҆ срѣте и҆хъ і҆ѹ́да со десѧтїю ты́сѧщъ мꙋже́и.
и҆ ви́дѣ плъкъ крѣпок̑҇ и҆ помоли́сѧ и҆ рече.
блс̑҇венъ е҆си сп҃се і҆и҆л҃евъ съкрꙋши́выи стремле́нїе си́лнаго рꙋко́ю раба̀ твое҆го дв҃да.
и҆ предалъ е҆си плъкъ и҆ноплеменныхъ в рꙋкꙋ и҆ѻ҆наѳа́нꙋ сн҃ꙋ саѹ́лю, и носѧ́щаго ѻ҆рꙋжїе е҆го.
ѻ҆бꙗ҆́выи полк꙽ сїи рꙋкою людїи твои҆хъ і҆и҆л҃ѧ.
и҆ да постыдѧ́тсѧ ѻ҆ си́лѣ и҆ конникꙋ и҆хъ.
даждь и҆мъ бо́ѧзнь и҆ раста́и дръзос̑҇ си́лнаго и҆хъ, и҆ да поколѣблютсѧ сътрѣнїемъ свои҆мъ, низложѝ и҆хъ мечемъ любѧ́щихъ т̂ѧ.
и҆ да похва́лѧтъ тебе вси видѧ́щїи и҆́мѧ твое въ пѣснехъ·

И҆ съста́виша бра́нь и҆ падо́ша ѿ плъка ли́сїи, ҂е҃ мꙋжїи и҆ падо́ша проти́вꙋ и҆хъ.
видѧ́ше же лисїѧ свои҆хъ бѣжа́нїе, і҆ѹ҆де́и же дръзость и҆ ꙗ҆́ко гото́ви сꙋть, и҆л̂и жи́ти и҆л̂и ѹ҆мрѣти крѣпко.
ѿи́де въ а҆нтиѻ҆хїю і҆ и҆збра̀ боле бы́вшихъ во́и, ѹмы́сли па́ки ѻ҆полчи́тисѧ на і҆ѹ҆де́ю·

Рече же і҆ѹ҆да и҆ бра́тїѧ е҆го.
сѐ сътврени сꙋть враѕи наши взы́идемъ нн҃ѣ ѻ҆чисти́ти ст҃аѧ и҆ ѻ҆бнови́ти.
и҆ събра̀ весь плъкъ и҆ взыидо́ша на горꙋ̀ сїѻ́нъ, и҆ ви́дѣша̑ ст҃ыню ѻ҆пꙋстѣнꙋ и҆ прс̑҇тлъ ѻ҆сквръненъ и҆ вра́та съж꙽жены, и҆ въ притво́рехъ възрасто́ша дре́вїѧ а҆ки въ дꙋбравѣ, и҆л̂и а҆ки въ е҆ді́неи ѿ горъ.
и҆ пастофо́рїѧ разбїена.
и҆ разтерза́ша ри́зы своѧ, и҆ пла́каша пла́чем꙽ ве́лїимъ·

и҆ възложи́ша пе́пелъ на главы своѧ и҆ падо́ша лицем̑ на́ зем̑лю и҆ въстрꙋби́ша трꙋбнымъ зна́менїем̑ и҆ возопи́ша на́ нб҃о·

Тогда̀ повелѣ і҆ѹ́да мꙋжемъ ратова́ти и҆же въ краю, дондеже ѻ҆чи́стит̑ ст҃аѧ·

І҆ и҆збра̀ сщ҃енники непоро́чны хотѧ́щихъ зако́на бж҃їѧ.
и҆ ѻ҆чи́стиша ст҃аѧ и҆ ѿвръго́ша ка́менїе ѻ҆сквръненїѧ въ мѣсто нечи́сто.
и҆ совѣща́ша ѻ҆ прс̑҇тлѣ всесъжже́нїѧ ѻ҆скверне́нѣмъ чт̂о е҆мꙋ сътворѧтъ.
и҆ нападѐ и҆мъ совѣтъ благъ разори́ти е҆го.
да не когда бꙋдетъ и҆мъ въ поноше́нїе ꙗ҆́ко ѻ҆скверни́ша е҆го ꙗ҆зы́цы и҆ разори́ша прс̑҇тлъ и҆ положи́ша ка́менїе на горꙋ̀ хра́ма въ мѣсто подо́бно до́ндеже прїидетъ прро̑҇къ ѿвѣща́ти ѻ҆ нихъ.
и҆ взѧ́ша ка́менїе цѣлы по законꙋ, и҆ създа́ша прс̑҇тлъ но́въ по пре́жнемꙋ, и҆ созда́ша ст҃аѧ, и҆ ꙗ҆́же внꙋтръ хра́ма·

и҆ притво́ры и҆ всѧ̀ и҆ сътвориша сосꙋды ст҃ыѧ но́вы и҆ внесо́ша свѣти́лникъ и҆ прс̑҇тлъ, вс̂есож̑же́нїи и҆ ѳимїѧмовъ и҆ трапе́зꙋ въ храм̑ и҆ жрѣша на прс̑҇тлѣ.
и҆ въжго́ша свѣти́лники и҆же на под̑свѣщницех̑ сꙋть, и҆ свѣтѧ́хꙋ въ хра́мѣ, и҆ положи́ша на трапезѣ хлѣбы.
и҆ простро́ша катапета́смы, и҆ сконча́ша всѧ̀ дѣла̑ и҆же творѧ́хꙋ.
и҆ ѕѣло рано воста́ша̑ въ е҃ и҆ к҃ дн҃ь мцс̑҇а девѧ́таго, сѝ е҆сть мс̑҇ць хаслевъ, рм҃и лѣта·

И҆ принесо́ша же́ртвꙋ по зако́нꙋ на ѻ҆л꙽та́рь всесожиже́нїа нова, и҆же сътвори́ша по вре́мени и҆ по дн҃и въньже ѻ҆скверниша е҆го ꙗ҆́зы́цы·

Во ѻ́нъ ѻ҆бновисѧ въ пѣснехъ и҆ гꙋслехъ и҆ кини́рехъ и҆ кѵм̑ва́лѣхъ·

и҆ падо́ша всѝ лю́дїе на лицы̀ и҆хъ, и҆ поклони́шасѧ, и҆ блс̑҇виша на нб҃о поспѣша́ющаго им̑.
и҆ сътвори́ша ѻ҆бновле́нїе прс̑҇тла дн҃е ѻ́смаго.
и҆ принесо́ша всесъжже́нїѧ съ весе́лїемъ, и҆ пожро́ша жрътвꙋ спс̑҇енїѧ и҆ хвале́нїѧ.
и҆ ѹ҆краси́ша пред̑ лицем̑ хра́мꙋ вѣнцы̀ зла́тыми и҆ а́спидьскими, и҆ ѻ҆бнови́ша вра́та и҆ пастофо́рїѧ, и҆ поста́виша двери.
и҆ бы́сть весе́лїе в лю́дехъ вели́ко ѕѣло и҆ ѻ҆брати́сѧ поноше́нїе ꙗ҆зы́ковъ.
и҆ поста́ви і҆ѹ́да и҆ бра́тїа е҆го, и҆ весь съборъ і҆и҆л҃евъ да дѣ́етсѧ дн҃ь сщ҃енїѧ прс̑҇тла въ времена своѧ, ѿ лѣта на лѣто по днїи и҃, ѿ пѧ́того и҆ двадесѧтого дн҃е мс̑҇ца хасле́въ съ весе́лїем꙽ и҆ радостїю·

И҆ създа́ша въ вре́мѧ ѻ́но горꙋ сїѻ́нъ и҆ ѻ҆крꙋгъ стѣ́ны высо́ки и҆ пи́ргы крѣпки.
да не когда прїидꙋтъ ꙗ҆зы́цы и҆ поперꙋтъ еѧ̀ ꙗ҆́коже преже сътвори́ша.
и҆ посадѝ тꙋ̀ во́ѧ храни́ти е҆го, и҆ ѹ҆твердѝ е҆го хранити веѳ꙽сꙋра́на.
е҆же и҆мѣти лю́ди въ тверды́ни проти́вꙋ лица̀ и҆дꙋме́иска·

Глв̑҇а, е҃·

И бы́сть ꙗ҆́ко слы́шаша ꙗ҆зы́цы ѻ҆́крс̑҇тъ, ꙗ҆́ко създа́сѧ прс̑҇тлъ, и҆ ѻ҆бнови́сѧ ст҃ынѧ ꙗ҆́ко и҆ прежде, и҆ разгнѣвашасѧ ѕѣло.
и҆ совѣща́шасѧ ѿꙗ҆́ти ро́дъ і҆а́ковль, и҆же бѣхꙋ посреди и҆хъ·

и҆ нача́ша ѹ҆бива́ти въ лю́дехъ і҆ и҆згонѧ́ти·

И҆ поборѧ́ше і҆ѹ҆да сн҃ы и҆са́вовы въ и҆дꙋмеѝ і҆ и҆же въ а҆краватинѣ ꙗ҆́ко ѻ҆бсѣдѧ́хꙋ і҆и҆л҃ѧ·

и҆ поразѝ и҆хъ ꙗ҆́звою вели́кою.
и҆згна̀ и҆хъ и҆ взѧ̀ коры́сти их̑, и҆ помѧнꙋ лꙋкавъство сн҃овъ веа́нь.
и҆же бѣхꙋ лю́демъ в сѣть, и҆ въ собла́знъ въ е́же лаѧ́ти и҆хъ въ пꙋтехъ и҆ затвори́шасѧ ѿ него въ пи́ргехъ.
и҆ пристꙋпѝ к ни́мъ, и҆ проклѧ̀ и҆хъ и҆ заж꙽же столпы̀ и҆хъ ѻ҆гнемъ, съ всѣмъ и҆же в нихъ бѧ́хꙋ·

И҆ про́иде къ сн҃омъ а҆м꙽монимъ и҆ ѻ҆брѣте рꙋкꙋ крѣпкꙋ и҆ лю́ди мно́ги, и҆ тимоѳеѧ во́жда и҆хъ·

И҆ поста́ви с ними брани мно́ги, и҆ сътре́ни сꙋть пред꙽ лицем꙽ е҆го, и҆ побѝ и҆хъ и҆ взѧ̀ ꙗ҆зира и҆ дще́ри е҆го.
и҆ ѻ҆брати́сѧ въ і҆ѹ҆де́ю и҆ събра́шасѧ ꙗ҆зы́цы ꙗ҆́же въ галаа́дѣ проти́вꙋ і҆и҆л҃ьтѧномъ сꙋщим̑ въ предѣлех̑ и҆хъ да и҆збїютъ и҆хъ.
и҆ побѣгоша въ дїаѳе́мꙋ тверды́ни.
и҆ посла́ша писа́нїѧ къ і҆ѹ́дѣ и҆ бра́тїи е҆го рекꙋщи.
събра́шасѧ на́ ны ꙗ҆́зы́цы по ѻ́крс̑҇тъ насъ и҆зби́ти насъ.
и҆ готовѧтсѧ прїитѝ и҆ взѧ́ти твер̑҇ды́ню в неже въбѣга́емъ, и҆ тимоѳе́и е҆сть вое҆во́да во́емъ и҆хъ.
нн҃ѣ б̂о пришедъ і҆ и҆зба́ви насъ ѿ рꙋкꙋ их̑.
ꙗ҆́ко паде мно́жество ѿ насъ.
и҆ всѝ бра́тїѧ наша сꙋщїи в мѣстѣ тꙋви́не ѹ҆бїени сꙋть, и҆ плени́ша же́ны и҆хъ и҆ ча́да и҆хъ и҆ коры́сти.
и҆ погибоша т̂ꙋ ꙗ҆́ко ты́сѧща мꙋжїи·

И҆ е҆ще писа́нїѧ чтѧ́хꙋсѧ и҆ се и҆нїѝ вѣстники прїидо́ша ѿ галиле́ѧ въ разъдраныхъ ри́захъ, възвѣща́юще по словесемъ си́мъ рекꙋщи.
съвокꙋпи́шасѧ противꙋ себе ѿ птоломаи́да̑ и҆ тѵ́ра и҆ сидо́на, і҆ и҆сполнена е҆сть всѧ̀ галиле́ѧ и҆ноплеменникъ е҆же и҆скорени́ти насъ.
ꙗ҆коже слы́ша і҆ѹ́да и҆ людїе словеса̀ сїѧ.
и҆ събра̀ собор꙽ вели́къ совѣща́тисѧ, чт̂о сътворѧт̑ бра́тїи своеи сꙋщимъ въ скорби, и҆ поборѧ́ющимъ ѻ҆ нихъ.
и҆ рече і҆ѹ́да̑ си́монꙋ братꙋ своемꙋ и҆збери себѣ мꙋжи, и҆дѝ і҆ и҆зба́ви братїю твою в галиле́и.
а҆з же и҆ бра́тъ мои и҆ѻ҆наѳа́нъ и҆де́мъ в галаа҆ди́тъ.
и҆ ѻ҆ста́ви си́фа сн҃а захарїина и҆ а҆са́ню воево́ды лю́дем꙽, съ прочими во́и въ і҆ѹ҆де́и на стреже́нїе.
и҆ заповѣда им̑ рекꙋщи прилежи́те людемъ симъ, и҆ не сътвори́те брани на ꙗ҆зы́ки дондеже ѻ҆брати́мсѧ·

И҆ раздѣли́ша си́монꙋ мꙋжїи три ты́сѧщи да и҆детъ въ галиле́ю.
і҆ѹ́дѣ же ѻ҆смь ты́сѧщъ въ галаа҆ди́тъ.
і҆ и҆де си́монъ в галиле́ю, и҆ съста́ви бра́ни мно́ги на ꙗ҆зы́ки, и҆ сътрошасѧ ꙗ҆́зы́цы ѿ лица̀ е҆го.
и҆ гна въ слѣдъ и҆хъ даже до вра́тъ птоломаи́ды, и҆ падо́ша ѿ ꙗ҆зы́къ ꙗ҆ко три ты́сѧщи мꙋжїи·

и҆ взѧ̀ коры́сти и҆хъ и҆ поꙗ҆тъ и҆хъ ѿ галиле́и и҆ въ а҆рвати́съ съ жена́ми и҆ чады и҆ всѧ̀ е҆ли́ка бѧ́ше и҆мъ.
и҆ приведѐ въ і҆ѹ҆дею съ весе́лїемъ ве́лии҆мъ.
і҆ и҆ѹ́да мак꙽каве́и и҆ ѻ҆наѳа́нъ бра́тъ е҆го преидо́ша і҆ѻ҆рда́нъ.
і҆ и҆до́ша пꙋть три дн҃и в пꙋсты́ни, и҆ срѣто́ша навате́ѧ и҆ прїѧша и҆хъ ми́рно, и҆ повѣда́ша им̑ всѧ̀ и҆же слꙋчи́шасѧ братїи и҆хъ въ галаа҆дити·

и҆ ꙗ҆́ко мноѕи ѿ ни́хъ ꙗ҆́ти сꙋть, и҆с восора, и҆ восо́ре, и҆ въ а҆лими́се, и҆ хаско́ре и҆ македе и҆ карнаи́не.
сїи всѝ гра́ды тверды и҆ вели́ки.
н̂о и҆ въ прочїих̑ градх̑ѣ галаа҆ди́ти сꙋть затворени въѹ́трїе строѧтсѧ ѻ҆плъчи́ти на твердынѧ, и҆ ꙗ҆́ти і҆ и҆зби́ти всѣхъ сих̑ въ е҆ді́нъ дн҃ь.
и҆ ѻ҆брати і҆ѹ́да и҆ во́и е҆го пꙋть въ пꙋсты́ню въ восоръ внеза́пꙋ, и҆ ѻ҆бо́има градъ и҆ ѹ҆би всѧкъ мꙋжескъ полъ ѹ҆сты̀ меча̀.
и҆ взѧ̀ всѧ коры́сти и҆хъ и҆ сож꙽же е҆го ѻ҆гнемъ·

И҆ въста́ша ѿтꙋде но́щїю і҆ и҆доша даже до тверды́ни, и҆ бысть пред̑ зарею и҆ въздвиго́ша ѻ́чи своѝ, и҆ се люди мно́ѕи и҆мже нѣсть числа̀.
носѧ́щи лѣствицы и҆ миханы взѧ́ти твердыню и҆ ратова́хꙋ их̑·

И ви́дѣ і҆ѹ́да ꙗ҆́ко нача́сѧ брань и҆ во́пль градныи взыиде до нб҃си ꙗ҆́ко трꙋба̀ и҆ гласъ велїи.
и҆ рече мꙋжем̑ си́лы бїитесѧ днесь за бра́тїю вашꙋ.
и҆зы́иде трема нача́лы въ слѣдъ и҆ въстрꙋби́ша трꙋба́ми, и҆ възопи́ша въ мл҃твѣ.
и҆ позна̀ ѻ҆полче́нїе тимоѳе́ѻво ꙗ҆́ко мак꙽кавеи е҆сть, ѿбѣжа̀ ѿ лица̀ е҆го, и҆ поби́ша и҆хъ ꙗ҆звою ве́лїею.
и҆ падо́ша ѿ нихъ въ дн҃ь ѻ́нъ ꙗ҆́ко ѻ҆смь ты́сѧщъ мꙋжїи·

И҆ ѻ҆брати́сѧ і҆ѹ́да въ мафꙋ и҆ побо́ре и ꙗ҆́тъ е҆го, и҆ ѹ҆бѝ весь мꙋжескъ по́лъ е҆го, и҆ взѧ̀ коры́сти е҆го и҆ сож꙽жѐ е҆го ѻ҆гнемъ·

ѿтꙋдꙋ пои҆де и҆ взѧ̀ хасфон̑҇ и҆ макед̑ и҆ восор̑҇, и҆ прочаѧ грады галади́тиди·

по сих̑ глаголх̑ѣ събра̀ тимоѳе́и полкъ ин̑҇, и҆ ѻ҆полчи́сѧ ѻ҆бонꙋ странꙋ потока.
и҆ посла̀ і҆ѹ҆да созрѣти пол̑҇къ, и҆ възвѣсти́ша е҆мꙋ рекꙋще собрани ст̑ꙋ к немꙋ вси ꙗ҆зы́цы ꙗ҆́же ѻ҆́крс̑҇тъ насъ си́ла велїѧ ѕѣло·

и҆ а҆равовъ наѧ́тъ въ по́мощъ себѣ.
и ѻ҆полчают̑сѧ ѻ҆бо́нꙋ странꙋ̀ потока готови прїити на́ тѧ на́ брань·

І҆ и҆де і҆ѹ́да въ стрѣтенїе и҆хъ, и҆ реч̑҇ тимоѳе́и нача́лникомъ во́и свои҆хъ, е҆гда приближи́тсѧ і҆ѹ́да и҆ во́и е҆го на потокъ вод̑ныи, а҆ще прїидетъ к нам̑ прежд̑е.
не мо́жемъ постоѧ́ти е҆мꙋ ꙗ҆ко могꙋщи възможетъ противꙋ насъ·

а҆ще же страшитсѧ и҆ ста́нетъ ѻ҆бо́нꙋ странꙋ̀ рѣки пре́идемъ к нимъ, и҆ возможем̑ противꙋ е҆го.
Ꙗ҆́коже приближисѧ і҆ѹ́да на потокъ водныи, поста́ви кни́жники людїи на потоцѣ, и҆ повелѣ и҆мъ гл҃ѧ не ѻ҆ставлѧ́ите всѧкого ста́ти, н̂о да грѧ́дꙋтъ вс̂и на́ брань.
и҆ прїиде на нихъ прежде и҆ вс̂и лю́дїе въ слѣдъ е҆го, и҆ сотрени сꙋть вс̂и ꙗ҆зы́цы ѿ лица е҆го·

И҆ повръго́ша ѻ҆рꙋжїѧ своа, и҆ бѣжаша в томенъ, и҆же е҆сть в карънаи҆не.
и҆ взѧ́ша град̑ и҆ томенъ и҆ заж꙽же со всѣми и҆же в немъ, и҆ ѹ҆боѧ́сѧ карнаи҆мъ, и҆ не возможе стати противꙋ лица і҆ѹ́дина·

И҆ собра̀ і҆ѹ́да̑ всѣхъ і҆и҆л҃ьтѧнъ и҆же бѧхꙋ въ галадитиде ѿ ма́ла даже до вели́ка·

И҆ жены и҆хъ, и҆ чада и҆хъ, и҆ користь полка велїю ѕѣло.
прїити в землю і҆ѹ́динꙋ, и҆ прїидоша даже до е҆фрона и҆ сїи град̑ ве́лїи на и҆сходѣ твердъ ѕѣло.
и҆ не бысть ѹ҆клонитисѧ ѿ него̀ на де́сно и҆ шꙋе, н̂о посредѣ е҆го преити.
и҆ запрошасѧ и҆же бѧхꙋ въ гра́дѣ и҆ заградиша врата ка́менїемъ.

И҆ посла̀ к ним꙽ і҆ѹ́да словеса мирнаѧ рекꙋщи.
прои҆демъ по землѝ вашеи е҆же ѿи҆ти въ землю на́шꙋ.
и҆ никт̂о васъ ѻ҆бидитъ, токмо нога́ми прои҆демъ·

И҆ не хотѧхꙋ и҆мъ ѿверсти и҆ повелѣ і҆ѹ́да проповѣдати во ѻ҆пол꙽ченїю, ѻ҆полчитисѧ кое҆мꙋждо в нем̑же кт̂о е҆сть мѣсте.
и҆ ѻ҆полчишасѧ мꙋжи си́лы, и҆ ратова́ша град̑ то́и весь дн҃ь и҆ вс̂ю но́щъ.
и҆ предасѧ град̑ въ рꙋкꙋ е҆го.
и҆ поби всѧкъ мꙋжескъ пол̑҇ ѹ҆сты̀ меча̀ і҆ и҆ раскопа е҆го.
и҆ взѧ̀ корысти е҆го, и҆ про́иде сквоѕѣ градъ по ѹ҆бїенымъ.
и҆ преи҆до́ша і҆ѻ҆рданъ въ поле вели́кое противꙋ лицꙋ веѳъса́ню.
и҆ б̂ѣ і҆ѹ́да събира́ющи долнѣишихъ·

И҆ помолѧ́шесѧ людемъ по всемꙋ пꙋти, до́нже прїидꙋт꙽ въ землю і҆ѹ́динꙋ.
и҆ възыидоша на́ горꙋ сїѻ́нъ съ веселїемъ и҆ ра́достїю.
и҆ принесоша вс̂ѧсож꙽женїѧ ꙗ҆́ко не паде ѿ ниих̑ н̂и е҆ді́нъ, до́ндеже ѻ҆братишасѧ въ ми́рѣ, и҆ въ дн҃и в нѧже бысть і҆ѹ́да.
і҆ѻ҆наѳа́нъ въ галаа́дѣ и҆ симон̑҇ брат̑ е҆го въ галилеи, противꙋ лицꙋ птоломаи҆́да·

Слыша і҆ѻ҆сифъ захарїинъ сн҃ъ, и҆ а҆зарїѧ началникъ силы побѣдꙋ вещи бл҃гыхъ, и҆ бра́нь ю҆́же сътвори и҆ рече.
сътворим̑ и҆ м̂ы себѣ̀ и҆мѧ, і҆ и҆демъ ѻ҆пол̑҇ча́тисѧ проти́вꙋ ꙗ҆́зы́комъ и҆же ѻ҆́крс̑҇тъ насъ.
и҆ възвѣсти сꙋщимъ ѿ си́лы е҆го и҆же с ни́ми, і҆ и҆до́ша на а́мнїю·

І҆ и҆зыиде горгїѧ ѿ гра́да, и҆ мꙋжи е҆го въ срѣтенїе и҆мъ во бра́нь.
і҆ и҆змѣнисѧ і҆ѻ́сиф̑҇ и҆ а҆зарїѧ и҆ гнани сꙋть даже до предл̑҇ѣ і҆ѹ́диныхъ.
и҆ падо́ша въ дн҃ь ѻ҆́нъ ѿ людїи і҆и҆л҃евыхъ ꙗ҆ко двѣ тысѧщи мꙋжїи·

и҆ бысть ꙗ҆́зва вели́ка въ людехъ и҆же не послꙋша́ша і҆у́ды и҆ братїи е҆го, ча́юще крѣпча́е сътвори́тисѧ·

Тїи же не бѧхꙋ ѿ сѣмени мꙋжїи ѻ́нѣхъ и҆миже дастьсѧ спасе́нїе і҆и҆л҃ю рꙋкою их̑.
и҆ мꙋж́ъ і҆ѹ́да и҆ бра́тїѧ е҆го прослави́ша ѕѣло, пред̑ всѣмъ і҆и҆л҃емъ и҆ ꙗ҆зы́ки всѣми и҆дж̑ѣ слы́шашесѧ и҆мѧ и҆хъ.
и҆ съвокꙋпишасѧ к нимъ бл҃го гл҃ющеи·

І҆ и҆зыиде і҆ѹ́да и҆ братїа е҆го и҆ поборѧ́хꙋ сн҃ы и҆савовы въ земли и҆же е҆сть къ ю́гꙋ.
и҆ порази хевронъ и҆ дще́ри е҆го, и҆ разори твердынѧ е҆го и҆ столпы е҆го пож꙽же ѻ҆́крс̑҇тъ.
и҆ воздви́жесѧ и҆тѝ въ зем̑лю и҆ноплеменникъ, и҆ прохожд̑аше самарїю.
въ дн҃ь ѻ҆́нъ падо́ша сщ҃енницы на брани, е҆гда̀ хотѧхꙋ мꙋжатисѧ бл҃го, внегда̀ и҆зыидꙋтъ на́ брань безъ совѣта е҆го.
и҆ ѹ҆клонисѧ і҆ѹ́да̑ во а҆зотъ въ зе́млю и҆ноплеме́нникъ и҆ разбѝ ка́пища их̑ и҆зваѧ́нїа бо́гъ их̑ и҆ пож꙽же ѻ҆гнемъ, и҆ взѧ̀ корысти град̑ски и҆ ѻ҆братис̑҇ въ зем̑лю і҆ѹ́динꙋ·

Глв̑҇а, ѕ҃·

И цр҃ь а҆нтїѻх̑ прохожд̑аше вы́шнѧѧ страны̀.
и҆ слы́ша ꙗ҆́ко е҆сть въ е҆лимѣхъ въ пер̑҇си́дѣ град̑ преславленъ и҆ ѹ҆мно́женъ сребромъ и҆ зла́том̑ хра́мъ же в немъ богат̑ ѕѣ́ло.
и҆ т̂ꙋ запо́ны златы, и҆ бронѧ и҆ ѻ҆рꙋжїа ꙗ҆́же ѻ҆ста́ви а҆леѯандръ филиппа, цр҃ь македоньскїи.
иже црс̑҇твова прьвыи въ е҆́ллинх̑ѣ, и҆ прїиде и възыска́ше взѧти град̑ и҆ попленити е҆го, и҆ не возмо́же ꙗ҆ко позна́сѧ слово сꙋщимъ во́ градѣ·

И҆ воста́ша проти́вꙋ е҆го въ бра́нь и҆ побѣже ѿтꙋдꙋ.
і҆ и҆де съ скор̑҇бїю ве́лїею и҆ ѻ҆братисѧ въ вавѷлонъ·

И҆ прїиде възвѣща́ѧи е҆мꙋ нѣкто въ перси́дꙋ, ꙗ҆́ко ѿбѣго́ша ѻ҆полченїѧ ходившїи въ і҆ѹ҆де́ю·

И҆ ходѝ лисїѧ съ си́лою крѣпкою въпрьвых̑, и҆ погнанъ бысть ѿ лица и҆хъ.
и҆ возмогоша ѻ҆рꙋжїи и҆ си́лами и҆ кори́стьми мно́гими, и҆же взѧ́ша ѿ ѻ҆полченїи и҆́хже и҆зби́ша.
и҆ разориша мерзость ю҆́же созда̀ на прс̑҇тлѣ въ і҆ерс̑҇лимѣ и҆ ст҃ыню·

ꙗ҆ко преже ѻ҆крꙋжиша зданїѝ высокими, н̂о и҆ веѳсꙋранъ град̑ е҆го·

И҆ бысть ꙗ҆́ко ѹ҆слы́ша цр҃ь словеса та̀ ѹ҆страшисѧ и҆ смꙋтисѧ ѕѣло.
и҆ паде на ло́же и҆ въпаде в недꙋгъ за скорбъ, ꙗ҆́ко не събыстьсѧ е҆мꙋ и҆же помышлѧ́ше.
и҆ бѣ т̂ꙋ дн҃и мно́ги, ꙗ҆́ко ѻ҆бнови́сѧ нань скорбъ вели́ка, и҆ мнѧше ꙗ҆́ко ѹ҆́мретъ.
и҆ съзва̀ вс̂ѧ дрꙋги своа и҆ рече и҆м꙽.
ѿи҆де со́нъ ѿ ѻ́чїю мое́ю, и҆ спадохъ срд̑цемъ ѿ печа́ли, и҆ рѣхъ въ срд̑цы в колики скорби е҆смь дошелъ и҆ во́лнꙋ ве́лїю в не́иже нн҃ѣ е҆смь.
ꙗ҆́ко бл҃гъ и҆ любим̑ въ вла́сти мое́и.
нн҃ѣ же помина́ю зла́ѧ и҆́хже сътворихъ въ і҆ерс̑҇лимѣ, и҆ взѧхъ вс̂ѧ сосꙋды зла́та и҆ сребрьна в немъ·

и҆ послахъ и҆зѧти ѻ҆бита́ющих̑ і҆ѹ҆деѻ́въ вотще.
познахъ ꙗ҆́ко сихъ ради ѻ҆брѣтоша м̂ѧ зла́ѧ сїѧ, и҆ с̂е гибнꙋ скорбїю ве́лїею в земли чю́ждеи·

И҆ призва̀ филиппа е҆ді́ного ѿ дрꙋгъ свои҆хъ, и҆ поста́ви е҆го над̑ всѣмъ црс̑҇твомъ свои҆мъ.
и҆ даде е҆мꙋ дїа́димꙋ и҆ ры́зꙋ и҆ прьстень, водити а҆нтиѻ́ха сн҃а е҆го и҆ въскормити е҆го е҆же цр҃ьствоват̂и.
и҆ ѹ́мре т̂ꙋ а҆нтїѻ́хъ цр҃ь в лѣто, рм҃ѳ.
и҆ позна̀ лисїѧ ꙗ҆́ко ѹ҆́мре цр҃ь, и҆ поста́ви црс̑҇твовати а҆нтїѻ́ха сн҃а е҆го, е҆гоже въскорми ю҆́ношꙋ.
и нарече и҆мѧ е҆го е҆впа́торъ.
і҆ и҆же въ кра́ю бѣша затвори́ша і҆и҆л҃ѧ ѻ҆́крс̑҇тъ ст҃ыхъ.
і҆ и҆скахꙋ и҆мъ зла́ѧ всегда̀ и҆ ѹ҆тверженїе ꙗ҆зыкомъ.
и҆ помы́сли і҆ѹ́да и҆згнати их̑ и҆ съзва̀ вс̂ѧ лю́ди да ѻ҆бъстоѧ́тъ и҆хъ, и҆ събрашас̑҇ въкꙋпѣ и҆ ѻ҆бъсѣдоша и҆хъ лѣта, рн҃и, и҆ сътворѝ ѻ҆ них̑ стрѣлостоателници и҆ миханы, і҆ и҆зыидо́ша ѿ них̑ ѿ затвора.
и҆ съдрꙋжиша̑сѧ тѣмъ нѣцїи нечестивыхъ ѿ і҆и҆л҃ѧ и҆доша къ цр҃ю и҆ рѣша доколѣ не сътвориши сꙋда̀ и҆ м꙽стиши братїю на́шꙋ.
м̂ы бл҃говолимъ слꙋжити ѿц҃ꙋ твое҆мꙋ и҆ ходити въ за́повѣдехъ е҆го, и҆ послꙋжи́ти повеленїем̑ е҆го·

и҆ ꙗ҆́ко сꙋщїи людїи сих̑, сего ради ѿчюждаю҆тсѧ ѿ насъ.
ѻ҆баче е҆лицы ѻ҆брѣтахꙋсѧ ѿ насъ погꙋблѧ́хꙋсѧ, и҆ наслѣдїѧ на́ша расточахꙋсѧ·

и҆ не на на́съ токмо простроша рꙋкꙋ, н̂о и҆ на всѧ̀ предѣлы на́ша·

и҆ с̂е приближи́шасѧ дньс̑҇ къ краю въ і҆ерс̑҇лимъ взѧти е҆го, и҆ веѳсꙋранъ ѹ҆тверди.
и҆ а́ще не пред̑вариши и҆хъ скорѣише, болша сихъ сътворѧтъ, и҆ не воз̑можеши въздръжа́ти и҆хъ·

И҆ прогнѣвасѧ цр҃ь ꙗ҆́ко сїѧ слыша.
и҆ созва̀ дрꙋ́ги своѧ̀ и҆ нача́лницы си́лы свое́ѧ і҆ и҆же над̑ конники.
н̂о и҆ ѿ црс̑҇твъ и҆́ных̑ и҆ ѿ ѻ҆токъ мо́рьскихъ прїидо́ша к немꙋ си́лы наѧ́тисѧ·

И҆ бы́сть число̀ во́и е҆го, ҂р҃, пѣшець.
и҆ ҂к҃, ко́нник̑҇.
и҆ слоновъ, л҃в, въдѧ́щих꙽ бра́нь.
и҆ прїидоша по и҆дꙋмеи, и҆ приближишас̑҇ къ веѳ꙽сꙋранꙋ и҆ ратовахꙋ дн҃и мно́ги, и҆ сътвори́ша миханы, і҆ и҆зыидо́ша и҆ пож̑гоша их̑ ѻ҆гнем̑, и҆ бышас̑҇ межественѣ·

И҆ ѿи́де і҆ѹ́да ѿ кра́ѧ и҆ ста̀ въ веѳ꙽сахарїѧ пред̑ ѻ҆полченїемъ црс̑҇ким̑·

И҆ въста̀ цр҃ь ѕѣло ра́но, и҆ воздвигнꙋ ѻполченїе въ ѹ҆стремленїе е҆го по пꙋтѝ веѳсахарїѧ.
и҆ раз̑сѣа́шасѧ си́лы въ бра́нь и҆ въстрꙋби́ша трꙋба́ми, и҆ слон꙽ником̑ показа́ша кро́вь гроздовꙋ и҆ морона, е҆же пред̑ста́ти им̑ во брань.
и҆ разлꙋчи́ша ѕвѣрїѧ въ дебрехъ.
и҆ пред̑сташа кое҆мꙋждо сло́нꙋ, ҂а҃, мꙋжїи, ѻ҆блечены въ бронѧ плетены, и҆ шле́мы мѣдѧны на глава́хъ и҆хъ.
и҆ е҃ со́тъ ко́нникъ вчине́ныхъ кождо ѕвѣрю и҆збрани·

сїи бѣша преже вре́мени и҆дѣже а҆ще б̂ѣ ѕвѣрь.
і҆ и҆дѣже а҆ще и҆дѧше и҆дѧ́хꙋ въкꙋпѣ и҆ не ѿстꙋпа́хꙋ ѿ него.
н̂о и҆ пи́рги древѧ́ны на ни́хъ крѣ́пки защища́ющи, на ко́ждо ѕвѣрꙋ ѻ҆поѧ҆са́ни съ миханы и҆ на коем̑ждо мꙋжїи, л҃в, вою́ющїи с ни́хъ и҆ ѹ҆прави́тель е҆го·

и҆ прочїи ко́нники сю́дꙋ и҆ сю́дꙋ поста́ви на двѣ ча́сти, ѻ҆полче́нїѧ ѻ҆крꙋжа́ющи и҆ ѻ҆гражда́ющи въ де́брехъ·

и҆ ꙗ҆́ко въсїа слн҃це на щиты зла́ты, и҆ ѻ҆б꙽сїа́ша го́ры ѿ нихъ и҆ ѻ҆блиста́ша ꙗ҆́ко лам꙽па́ды ѻ҆гненыѧ.
и҆ разлꙋчи́сѧ ча́сть нѣ́каѧ ѻ҆полче́нїѧ цр҃ева на горы высо́ки, и҆ нѣ́цыи на ни́жшаа, и҆ грѧдѧ́хꙋ крѣпце и҆ чи́нно.
и҆ поколѣба́шасѧ вси слы́шащїи гла́съ мно́жества и҆хъ и҆ пꙋти ше́ствїѧ мно́гихъ и҆ сраже́нїа ѻ҆рꙋжїи.
бѣ б̂о ѻ҆полче́нїе вели́ко ѕѣло и҆ крѣ́пко·

И҆ приближи́сѧ і҆ѹ́да и҆ ѻ҆полче́нїе е҆го въ бра́нь, и҆ падо́ша ѿ ѻ҆полче́нїѧ цр҃ева, ѕ҃ со́тъ мꙋжїи.
и҆ ви́дѣ е҆леа҆за́ръ сн҃ъ а҆вара́нь е҆ді́наго ѿ ѕвѣрїи ѻ҆блече́на въ бро́ню цр҃ьскꙋ·

и҆ бы́сть вы́ше про́чїи҆хъ ѕвѣрїи, и҆ видѣсѧ е҆мꙋ ꙗ҆́ко в немъ е҆сть цр҃ь·

и҆ дадесѧ самъ е҆же и҆зба́вити лю́ди своѧ, и҆ сътвори́ти себѣ и҆мѧ вѣчное и҆ те́къ къ немꙋ съ дерзостїю, посред̑и̑ дебри побива́ющи ѻ҆деснꙋю и҆ ѻ҆лѣвꙋю и҆ разделѧ́хꙋсѧ ѿ него сю́дꙋ и҆ сю́дꙋ и҆ вни́де под̑ сло́на и҆ под̑ложи́сѧ е҆мꙋ, и҆ ѹ҆би е҆го, и҆ паде на́ землю на́нь и҆ ѹ́мре т̂ꙋ·

и҆ видѣша си́лꙋ цр҃евꙋ и҆ ѹ҆стремле́нїе во́и, и҆ възвратишасѧ ѿ них̑·

ѻ҆полче́нїе же цр҃ево взы́иде проти́вꙋ и҆хъ въ і҆ерс̑҇лимъ·

и҆ приближи́сѧ цр҃ь въ і҆ѹ҆дею и҆ въ горꙋ сїѻ́нъ, и҆ сътвори ми́ръ и҆же бѧ́хꙋ въ веѳсꙋре.
і҆ и҆зыидо́ша и҆з гра́да, ꙗ҆́ко не бѣ и҆мъ пи́ща е҆же затвори́тисѧ в немъ, ꙗ҆́ко сꙋбо́та бѣше земли.
и҆ взѧ̀ цр҃ь веѳсꙋрам̑, и҆ поста́ви т̂ꙋ стра́жи храни́ти е҆го.
и҆ ѻ҆брати ѻ҆полче́нїѧ на мѣсто ст҃нѧ дн҃и мно́ги.
и҆ поста́ви т̂ꙋ стрѣлостоѧ́телницы и҆ миханы, и҆ ѻ҆гнемет̑ницы и҆ ка́менометницы и҆ скорпїѻ́ны зане же въсхотѣ мета́ти съ пра́щею сътвори́ша же и҆ тїи миха́ны проти́вꙋ миха́нъ и҆хъ, и҆ бра́шасѧ дн҃и мно́ги пи́ща же не бѧ́ше въ гра́дѣ.
занеже сед̑мое лѣто бы́сть.
и҆же ѻ҆ста́виша въ і҆ѹ҆де́и ѿ ꙗ҆зы́къ поꙗ҆до́ша и҆ ѻ҆ста́въшее предъложе́нїѧ·

И҆ ѻ҆ста́ша въ ст҃ыхъ мꙋжїи ма́ло ꙗ҆́ко ѻ҆бъꙗ҆́тъ и҆хъ гла́дъ, и҆ расточе́ни сꙋть е҆ді́нъ ко́ждо в мѣсто свое<.>

И҆ слы́ша лисїѧ, ꙗ҆́ко фили́п꙽пъ егоже поста́ви цр҃ь а҆нтїѻ́хъ е҆ще жи́вꙋ е҆мꙋ.
да въско́рмитъ а҆нтїѻ́ха сн҃а е҆го въ е҆же црс̑҇твова́ти е҆мꙋ.
и҆ възъвратисѧ ѿ персѵ́ды и҆ медїи, и҆ воѝ црс̑҇кїи ходи́вшїи с нимъ.
и҆ ꙗ҆́ко и҆́щет̑ прїѧти съ ве́щьми, т꙽ща́сѧ пои҆тѝ ѿ кра́ѧ и҆ гл҃ати къ цр҃ю и҆ вое҆во́дамъ во́и и҆ мꙋжемъ, ѻ҆скꙋдѣхом̑ всѧ̀ дн҃и и҆ пи́ща намъ ма́ла е҆сть, и҆ мѣсто е҆гоже ѻ҆бъстои҆мъ ѹ҆твержено.
и҆ прилежитъ намъ стро́ити ѻ҆ црс̑҇твѣ нн҃ѣ ѹ҆бо дае҆мъ десни́цꙋ чл҃комъ тѣмъ.
и҆ сътворимъ с тѣми ми́ръ и҆ съ всѣми людмѝ и҆хъ.
и҆ поста́вим꙽ и҆мъ да хо́дѧтъ в зако́нѣхъ свои҆хъ ꙗ҆́ко и҆ преже.
ради б̂о законъ их̑ и҆же раздрꙋша́емъ прогнѣ́вашасѧ, и҆ сътвори́ша вс̂ѧ сїѧ·

и҆ ѹ҆год̑но бы́сть сло́во пред̑ цр҃емъ и҆ нача́лники.
и҆ посла̀ к нимъ ми́ръ сътвори́ти и҆ прїѧ́ша т̂а.
и҆ клѧсѧ им̑ цр҃ь и҆ нача́лницы ѻ҆ сихъ, і҆ и҆зы́идоша ѿ твердыни, и҆ вниде цр҃ь въ го́рꙋ сїѻ́нъ, и҆ ви́дѣ твердыни мѣста, и҆ ѿвержесѧ клѧ́твы е҆ю́же клѧт̑сѧ, и҆ повелѣ разорити стѣнꙋ ѻ҆́крс̑҇тъ.
и҆ ѿи҆де тща́тельно ѻ҆братисѧ въ а҆нтїѻхїю, и҆ ѻ҆брѣте филип꙽па господ̑ствꙋюща градомъ.
и҆ вое҆ва на́нь и҆ взѧ̀ град̑ нꙋждею·

Глв̑҇а, з҃·

Лѣта, рн҃а, и҆зы́иде димитрїи селеѹ҆кїевъ сн҃ъ ѿ ри́ма.
и҆ възыде съ малыми лю́дми въ градъ приморьскїи и҆ црс̑҇твова т̂ꙋ·

И҆ бысть ꙗ҆́ко восходѧше в꙽ домъ цр҃ьства ѿц҃ъ свои҆хъ.
ꙗ҆́ша силы а҆нтиѻ҆ха и҆ лисїѧ привести е҆го к немꙋ, и҆ вещь е҆мꙋ ꙗ҆ви́сѧ и҆ рече.
не покажи́те м̂и лица и҆хъ и҆ ѹ҆биша их̑ воѝ·

И҆ сѣде димитрїи на прс̑҇тлѣ црс̑҇тва свое҆го, и҆ прїидоша к немꙋ мꙋжи безаконїи и҆ нечестивїи ѿ і҆и҆л҃ѧ.
и҆ а҆лкима вожда́ше и҆хъ, хотѧ́и жречествовати, и҆ ѻ҆клевета лю́ди пред̑ цр҃емъ рекꙋщи·

погꙋбилъ і҆ѹ́да и҆ бра́тїа е҆го всѣхъ дрꙋгъ твои҆хъ, и҆ на́съ расточи ѿ землѧ̀ на́шеѧ.
нн҃ѣ ѹ҆бо послѝ мꙋжа е҆мꙋже вѣрꙋеши, да и҆́дет̑ и҆ видитъ и҆стребленїѧ вс̂ѧ ꙗ҆́же сътвори нам̑ и҆ стра́нѣ цр҃ьскои.
и҆ да мꙋ́читъ и҆хъ и҆ всѣхъ помага́ющих̑ и҆мъ.
и҆ призва цр҃ь вак꙽хи́да дрꙋга цр҃ьска, и҆же господ̑свова́ше ѻ҆бонꙋ странꙋ рѣкѝ вели́кое въ црс̑҇твѣ и҆ вѣрна цр҃еви.
и҆ посла̀ е҆го и҆ а҆лкима нечести́ваго и҆ поста́ви е҆мꙋ жречество·

и҆ повелѣ̀ е҆мꙋ сътвори́ти м꙽ще́нїѧ въ сн҃охъ і҆и҆л҃евѣхъ.
и҆ ѿидо́ста и҆ прїидоша съ си́лою ве́лїею в зе́млю і҆и҆ѹ́динꙋ, и҆ посла̀ вѣстники къ і҆ѹ҆дѣ и҆ бра́тїи е҆го словесы̀ ми́рными съ ле́стїю, и҆ не внѧ́ша словесем꙽ и҆хъ.
ви́дѣша б̂о ꙗ҆́ко прїидо́ста съ си́лою ве́лїею.
и҆ събрашасѧ къ а҆лки́мꙋ и҆ вкахи́де събра́нїѧ кни́жник̑҇ и҆зыска́ти пра́веднаѧ.
и҆ первїи притѧжа́тели и҆же бѣхꙋ въ сн҃ѣхъ і҆и҆л҃евѣхъ.
и҆ в꙽зыска́хꙋ ѿ нихъ мир̑҇ реко́ша б̂о, чл҃къ жрецъ ѿ сѣмени а҆а҆ро́нѧ прїиде въ си́лех̑ не и҆зобидит̑ и҆ не прельстит̑ нас̑҇.
и҆ гл҃а съ ни́ми словеса̀ ми́рна и҆ клѧт̑сѧ им̑ рекꙋщи, не воздам̑ вамъ ѕла́ѧ, ниже дрꙋгомъ ва́шим̑, и҆ вѣроваша е҆мꙋ·

И҆ пои҆ма̀ ѿ нихъ ѯ҃ мꙋжїи, и҆ ѹ҆бѝ и҆хъ въ е҆ді́нъ дн҃ь по словесех̑ ꙗ҆́ко пи́сано е҆сть·

Плоти прпд̑бныхъ твои҆хъ и҆ крови и҆хъ пролїѧша ѻ҆крс̑҇тъ іерс̑҇лима, и҆ не бѣ погрѣба́ѧи·

И҆ нападѐ стра́хъ и҆ тре́петъ на всѧ̀ лю́ди.
ꙗ҆́ко реко́ша нс̑҇ѣ им̑ и҆стинны и҆ сꙋда, престꙋпницы б̂о повелѣнїемъ, и҆ клѧ́твою и҆же клѧ́шасѧ·

И҆ въздви́жесѧ вакхи́дъ ѿ і҆ерс̑҇ли́ма и҆ приближи́сѧ въ вїизе́ѳъ и҆ посла̀ и҆ ꙗ҆́тъ мно́ги ѿ ни́хъ, и҆ нѣкихъ ѿ людїи закла̀ и҆ въ кладезь вели́къ въверже.
и҆ преда́сть странꙋ̀ а҆л꙽ки́мꙋ, и҆ ѻ҆ста́ви си́лꙋ въ по́мощь е҆мꙋ·

И҆ ѿи́де вакхи́дъ къ цр҃ю.
и҆ понꙋжда́ше а҆лкхи́мъ ѻ҆ а҆рхїере́иствѣ и҆ събрашас̑҇ к немꙋ всѝ възмꙋща́ющїи лю́ди своѧ.
и҆ ѻ҆дръжа́ша землю і҆ѹ́динꙋ, и҆ сътвори́ша ꙗ҆́зю вели́кꙋ въ і҆и҆л҃и·

И҆ видѣ і҆ѹ́да вс̂ѧ ѕлаа и҆же сътвори а҆́лкимъ, і҆ и́же с ним̑ бѧхꙋ сн҃ве і҆и҆л҃еви на́ипаче ꙗ҆зык̑҇, і҆ и҆зы́иде въ всѧ предѣли і҆ѹ́дины по ѻ́крс̑҇тъ и҆ сътворѝ м꙽ще́нїе на мꙋжех̑ ѹ҆трꙋжд̑ьшихсѧ, и҆ преста́ша сходити страны̀.
ꙗ҆коже ви́дѣ а҆лки́м꙽, ꙗ҆́ко ѹ҆крѣпи́сѧ і҆ѹ́да і҆ и҆же с ни́мъ·

и҆ позна̀ ꙗ҆́ко не можа́ше потръпѣти и҆хъ, и҆ ѻ҆брати́сѧ къ цр҃ю и҆ ѻ҆клевета и҆хъ лꙋка́ве·

и҆ посла̀ цр҃ь никано́ра е҆ді́наго ѿ нача́лникъ свои҆хъ добророднѣиша, ненави́дѧщаго и҆ вражд̑ꙋю҆щаго на і҆и҆л҃ѧ, и҆ повелѣ е҆мꙋ и҆зби́ти лю́ди.
и҆ прїиде никанор꙽ въ і҆ерс̑҇лим̑ со во́емъ вели́кимъ.
и҆ посла̀ къ і҆ѹ́дѣ и҆ бра́тїи е҆го со ле́стїю словесы̀ ми́рными рекꙋщи.
не бꙋдетъ л̂и бра́нь междꙋ на́ми и҆ ва́ми, прїидꙋ съ мꙋжи ма́лы да ви́жꙋ лица̀ ва́ша с ми́ром꙽, и҆ прїиде къ і҆ѹ́дѣ и҆ поздравлѧ́хꙋсѧ дрꙋгъ дрꙋга ми́рно, и҆ во́и ѹ҆готовани бѧ́хꙋ въсхити́ти і҆ѹ́дꙋ.
и҆ позна́сѧ слово і҆ѹ҆дѣ ꙗ҆́ко со ле́стїю прїиде к немꙋ, и҆ ѹ҆стра́шис̑҇ ѿ него.
и҆ не хотѣ̀ ктомꙋ ви́дѣти лица̀ е҆го, и҆ позна̀ никано́ръ, ꙗ҆́ко ѿкрове́нъ е҆сть совѣтъ е҆го.
і҆ и҆зы́иде въ срѣте́нїе і҆ѹ́дѣ близъ кафарсара́ма·

И҆ падо́ша ѿ никано́ра во́и ꙗ҆ко пѧть ты́сѧщъ мꙋжїи, и҆ бѣжа́ша во́ градъ дв҃двъ·

И҆ по словесехъ сих̑ възы́иде никано́ръ на горꙋ сїѻнъ.
і҆ и҆зыидоша̑ ѿ і҆ере́и ѿ ст҃ыхъ и҆ ѿ ста́рецъ люд̑ских̑ поздра́вити е҆го ми́рно и҆ показа́ти е҆мꙋ всесож꙽же́нїе прине́сеное за цр҃ѧ·

И҆ посмѣѧ́сѧ ѹ҆ничижѝ и҆хъ и҆ ѻ҆сквернѝ и҆хъ, и҆ гл҃а го́рдо.
и҆ клѧтсѧ съ ꙗ҆́ростїю рекꙋщи, а҆ще не предас̑҇ѧ і҆ѹ́да и҆ во́и е҆го в рꙋкꙋ моею нн҃ѣ.
е҆гда възвращенъ бꙋдꙋ въ ми́ръ, и҆ пожгꙋ̀ хра́мъ сїи.
і҆ и҆зы́иде сїи ꙗ҆ростїю ве́лїею.
и҆ внидо́ша жръцы̀ и҆ ста́ша пред̑ лицемъ прс̑҇тла и҆ хра́мꙋ.
и҆ пла́чюще рекоша·

Ты̀ г҃и и҆збра́лъ е҆си хра́мъ сїи, нарещи́сѧ и҆́мени твоемꙋ в нем, да бꙋдетъ хра́мъ мл҃твы и҆ въ проше́нїе лю́демъ твоим̑ сътворѝ м꙽щенїе на чл҃цѣ семъ и҆ во́ехъ е҆го, и҆ да падт̑ꙋ в ме́чь.
помѧни власфи́мїѧ и҆хъ, и҆ не даждь и҆мъ ѻ҆би́тели·

І҆ и҆зы́иде никано́ръ ѿ і҆ерс̑҇лима, и҆ прїиде въ веѳоро́нъ, и҆ срѣтѐ е҆го си́ла сѷр꙽ска·

І҆ѹ́да приближи́сѧ въ а҆дасꙋ съ треми ты́сѧщ꙽ми мꙋжїи.
и҆ помоли́сѧ і҆ѹ́да и҆ реч̑҇ и҆же послани бѧ́хꙋ ѿ цр҃ѧ сенахири́ма̑ г҃и ꙗ҆ко хꙋли́ша т̂ѧ.
і҆ и҆зы́иде а҆гг҃лъ твои и҆ поразѝ ѿ нихъ, рп҃е ты́сѧщь, та́ко съкрꙋши ѻ҆плъче́нїе сїе пред̑ нами днесь.
и҆ да позна́ют̑ про́чїи ꙗ҆ко ѕло̀ гл҃а на ст҃аѧ твоѧ.
и҆ сꙋди е҆мꙋ по ѕло́бѣ е҆го·

И҆ сътвори́ша̑ во́и бра́нь г҃і дн҃ь мцс̑҇а а҆дара.
и҆ сътресѧ ѻ҆плъче́нїе никано́рово, и҆ паде сам̑ прьвѣе въ бра́ни.
ꙗ҆́коже ви́дѣша во́и е҆го ꙗ҆́ко паде никано́ръ.
поврьгоша ѻ҆рꙋжїа своа и҆ бѣжа́ша, и҆ гна́ша и҆хъ пꙋть дн҃е е҆ді́наго ѿ а҆да́са, до́н꙽деже прїитѝ въ гаси́ръ.
и҆ трꙋбами трꙋби́ша за ни́ми съ зна́менїи.
і҆ и҆зыдо́ша ѿ всѣхъ селъ і҆ѹ҆де́искъ ѻ́крс̑҇тъ.
и҆ размета́ша и҆хъ рога́ми и҆ възвраща́хꙋсѧ паки к нимъ, и҆ падо́ша всѝ мече́мъ, и҆ не ѻ҆ста̀ ѿ них̑ ни е҆ді́нъ·

И҆ взѧша коры́сти и҆хъ и҆ плѣнъ.
и҆ главꙋ̀ никано́рꙋ ѿсѣко́ша и҆ десни́цꙋ е҆го ю҆же простре го́рдо, и҆ принесо́ша и҆ повѣсиша проти́вꙋ і҆ерс̑҇лі́мꙋ и҆ възвесели́шасѧ лю́ди ѕѣло.
и҆ твориша дн҃и того весе́лїе вели́ко.
и҆ ѹ҆ста́виша твори́ти всѧ̀ лѣта дн҃ь тои, г҃і мс̑҇ца а҆да́ръ.
и҆ ѹ҆млъча̀ землѧ̀ і҆ѹ҆дина дн҃и ма́лы·

Глв̑҇а, и҃·

И слы́ша і҆ѹ́да и҆мѧ ри́млѧн̑҇ ꙗ҆́ко си́лнїи крѣпостїю·

и҆ сїи бл҃говолѧ́тъ всѣмъ прилож꙽шим̑сѧ и҆мъ, и҆ е҆ли́циж̑ прїидо́ша к ним̑ соста́виша с ними дрꙋжбꙋ, и҆ ꙗ҆́ко сꙋть си́лни крѣпостїю.
и҆ слы́шаша бра́ни и҆хъ и҆ мꙋжества бл҃га ꙗ҆́же творѧтъ въ гала́техъ, и҆ ꙗ҆́ко въздержа́ша и҆хъ и҆ приведо́ша под̑ да́нь.
и҆ коли́ка сътвори́ша въ странѣ̀ и҆спанїи, і҆ и҆же ѹ҆держати рꙋды сребра̀ и҆ зла́та ꙗ҆же та́мо, и҆ въздержа́ша всѧ́ко мѣсто совѣтомъ свои҆мъ, и҆ длъготръпе́нїемъ·

И҆ мѣсто б̂ѣ далече ѿстоѧ̀ ѿ нихъ ѕѣло, и҆ цр҃еи наше́дшихъ ѿ краѧ землѝ, дондеже сътро́ша и҆ поразиша и҆хъ ꙗ҆́звою вели́кою.
прочїи же даютъ и҆мъ да́ни по всѧ лѣта·

И҆ фили́п꙽па персѧни́на ките́искаго цр҃ѧ, и҆ въста́вшихъ на них̑ съкрꙋши́ша и҆хъ въ брани, и҆ въздер̑҇жа́ша и҆хъ·

И҆ а҆нтїѻ́ха вели́каго цр҃ѧ а҆сїи, шед̑шаго противꙋ их̑ ѻ҆пол̑҇ченїе на́ брань и҆мѣ́ющи, р҃к, сло́нов̑҇, и҆ ко́нник̑҇ и҆ колесницъ и҆ во́и вели́къ ѕѣло сътренъ ѿ нихъ, и҆ ꙗ҆́ша е҆го жи́ва.
и҆ поста́виша и҆мъ даѧ́ти да́нь вели́кꙋ и҆ црс̑҇твꙋющимъ по немъ·

И҆ даѧ́ти и҆ ми́ра и҆ ѹ҆ставле́нїѧ, и҆ странꙋ̀ и҆ндѣ́искꙋ, и҆ медїискꙋ, и҆ лид̑скꙋ, и҆ ѿ предо́брыхъ стра́нъ и҆хъ.
и҆ взѧ́ша и҆хъ ѿ него даша е҆ѹ҆ме́нїю цр҃ю·

Ꙗ҆́ко совѣща́ша и҆же ѿ е҆ла́ды прїитѝ и҆ взѧ́ти и҆хъ, и҆ ꙗ҆́ви́сѧ слово тѣмъ и҆ посла́ша к ним̑ вое҆во́дꙋ е҆ді́наго и҆ ѻ҆полчи́шасѧ противꙋ их̑.

И҆ падо́ша ѿ нихъ ꙗ҆ѕве́нїи мно́ѕи·

и҆ плѣнени ведо́ша же́ны и҆хъ и҆ ча́да их̑ и҆ расточи́ша и҆хъ.
и҆ зе́млю и҆хъ въздержа́ша, и҆ разори́ша тверды́нѧ их̑, въ работꙋ̀ и҆зведо́ша и҆хъ даже до сего дн҃е, и҆ прочаѧ црс̑҇тва.
и҆ ѻ҆то́ки и҆же нѣкогда проти́вишасѧ тѣмъ и҆стреби́ша, и҆ поработи́ша и҆хъ.
съ дрꙋги же свои҆ми и҆ съ смирѧ́ющимисѧ им̑ съхранѧхꙋ дрꙋжбꙋ, и҆ въздержа́хꙋ црс̑҇тво ближнѧѧ и҆ далнѧа.
е҆ли́цыж̑ слы́шахꙋ и҆мѧ и҆хъ ѹ҆боѧ́шасѧ ѿ нихъ, е҆ли́цым̑ же аще хо́щꙋтъ помощи и҆ црс̑҇твова́ти, црс̑҇твꙋютъ.
их̑же а҆ще хо́щꙋтъ пременѧ́ютъ, и҆ възнесо́шасѧ ѕѣло.
и҆ въ всѣхъ сихъ не възлага́ше ни е҆ді́нъ и҆хъ дїади́мы, ни ѻ҆блеча́шесѧ перфи́рою да възвели́чатсѧ ѻ҆ неи.
и҆ вꙋлевътїриѻ́нъ сътвори́ша себѣ, и҆ всѧ дн҃и совѣтова́хꙋ в немъ т҃ и҆ к҃ совѣтниковъ вы́нꙋ ѻ҆ мно́жествѣ е҆же бл҃гоѹ҆твори́ти и҆хъ.
и҆ ѹ҆вѣрѧ́ютъ е҆ді́номꙋ чл҃кꙋ началъствовати по лѣтꙋ, и҆ господъствова́ти всею землею свое҆ю и҆ всѝ повинꙋ́ютсѧ е҆ді́номꙋ.
и҆ нѣсть за́висти ниже рве́нїе в нихъ·

І҆ и҆збра̀ і҆ѹ́да е҆ѹ҆полемо́на сн҃а і҆ѻ҆а́ннова сн҃а а҆ккосова и҆ а҆со́на сн҃а е҆лїаза́ра и҆ посла и҆хъ в рим̑ съста́вити с ни́ми дрꙋжбꙋ, и҆ споборе́нїе е҆же ѿꙗ҆́ти ѿ них̑ и҆го и҆хъ.
ꙗ҆́ко ви́дѣша црс̑҇тво е҆́ллин̑҇ско, порабоща́емых̑ і҆и҆л҃ѧ въ работꙋ̀.
і҆ и҆до́ша в римъ пꙋть ве́лїи ѕѣло, и҆ внидо́ша въ вꙋлевтирїѻ́нъ и҆ ѿвѣща́ша и҆ рѣша.
і҆ѹ́да мак꙽каве́и и҆ братїѧ е҆го, и҆ лю́дїе і҆ѹ҆де́истїи посла́ша̑ насъ к ва́мъ съставлѧ́ти с꙽ вами дрꙋжбꙋ и҆ ми́ръ, и҆ писа́ти насъ споборницы и҆ дрꙋги ва́ша·

И҆ ѹ҆годно быс̑҇ сло́во пред̑ ними.
и҆ сїе въсписа́нїе посла́нїѧ е҆же въсписа́ша на дщи́цахъ мѣдѧныхъ.
и҆ посла́ша въ і҆ерс̑҇лимъ бы́ти в нихъ т̂ꙋ въ па́мѧть ми́рꙋ и҆ съпоборники бл҃гы бꙋдꙋтъ ри́млѧномъ, и҆ ꙗ҆зы́кꙋ і҆ѹ҆деи́скꙋ на́ мори и҆ на землѝ въ вѣкъ·

ѻ҆рꙋжїе же и҆ врази далече бꙋдꙋтъ ѿ ни́хъ.
і҆ иж̑ а҆ще настои҆тъ бра́нь ри́млѧномъ, прьвѣе нежели всѣ съпобо́рницы и҆хъ въ всемъ господ̑стве и҆хъ.
да съпоборѧ́етъ ꙗ҆зы́къ і҆ѹ҆деискїи, в кое времѧ напи́шꙋтъ к нимъ срд̑цемъ плънымъ.
и҆ ратꙋ́ющимъ не дают̑ ни сосꙋжа́ютъ пшени́цы и҆ ѻ҆рꙋжїѧ и҆ сребрьники и҆ кораблѝ.
ꙗ҆́ко ѹ҆го́дно ри́млѧномъ, и҆ съхранѧтъ за́повѣди и҆хъ ничто ѿ нихъ прїемлюще та́коже и҆ а҆ще ꙗ҆зы́кꙋ і҆ѹ҆деи́скꙋ преже слꙋчитсѧ бра́нь помо́гꙋтъ ри́млѧне ѿ дш҃а в не́же времѧ а҆ще и под̑пи́шꙋтъ.
и҆ съпоборѧ́ющимъ не дастьсѧ пшени́ца и҆ ѻ҆рꙋжїѧ и҆ сребро̀ и҆ кораблѝ ꙗ҆́ко ѹ҆го́дно бы́сть ри́млѧномъ, и҆ съхранѧ́ти заповѣди и҆хъ безъ лести·

По сихъ словесехъ поста́виша ри́млѧне лю́демъ і҆ѹ҆деи́скимъ, а҆ще же по словесехъ сихъ совѣща́ютсѧ сїи и҆ли ѻ҆нѝ приложи́ти и҆л̂и ѹ҆ꙗ҆́ти нѣчто, сътворѧт̑ проклѧ́тїе и҆хъ и҆ е҆же а҆ще приложат̑ и҆л̂и ѹ҆имꙋтъ·

ѻ҆ ѕло́бахъ и҆же цр҃ь дими́трїи сътворѝ в ни́хъ напи́шемъ е҆мꙋ рекꙋще·

въскꙋю ѻ҆тѧготѝ и҆́го твое на дрꙋги наши и҆ сопобо́рники і҆ѹ҆де́и.
а҆ще ѹ҆бо па́ки прїидꙋтъ на тѧ.
сотворим̑ и҆мъ сꙋдъ, и҆ ѻ҆плъча́емсѧ с тобо́ю мо́ремъ и҆ земле́ю·

Глв̑҇а, ѳ҃·

И слы́ша димитрїи ꙗ҆́ко падѐ ника́нор̑҇ и҆ си́лы е҆го во бра́ни, и҆ приложи вакхида и҆ а҆кима̑ паки посла́ти въ і҆ѹ҆де́ю и҆ десны́и рог̑҇ с ни́ми·

І҆ и҆до́ша пꙋть и҆же ведетъ въ галга́лы.
и҆ прїидоша въ месалоѳъ и҆же е҆сть въ а҆рьвилехъ и҆ взѧ́ша е҆го, и҆ поби́ша дш҃ъ чл҃ческь мно́го.
въ мс̑҇ць пр́ьвыи лѣта, рн҃в.
пристꙋпиша воѝ ко і҆ерс̑҇ли́мꙋ.
и҆ въста́ша і҆ и҆доша въ верею, ҂к҃, мꙋжїи, и҆ ҂в҃, ко́н꙽никъ.
і҆ѹ́да бѣ ѻ҆полченъ во е҆лаа́сѣ, и҆ ҂г҃, мꙋжїи и҆збран꙽ныхъ с ни́мъ·

И҆ ви́дѣша мно́жество во́и ꙗ҆ко мно́ги сꙋть, и҆ ѹ҆страшишасѧ ѕѣло, і҆ и҆збѣго́ша̑ мно́ѕи ѿ ѻ҆полченїа и҆ не ѻ҆стасѧ ѿ них̑ токмо, и҃, сотъ мꙋжїи·

И҆ ви́дѣ і҆ѹ́да ꙗ҆ко расторжесѧ ѻ҆полченїе е҆го и҆ брань ѻ҆скор꙽блѧ́ше е҆го.
и҆ съкрꙋшисѧ срд̑цемъ ꙗ҆́ко не и҆мѣ́аше времени събрати и҆хъ и҆ ѻ҆слабѣ·

И҆ рече ѻ҆ста́въшимъ, воста́нѣмъ и҆ възыидем̑ на сꙋпоста́ты на́ша.
а҆ще мо́жемъ ѻ҆плъчати противꙋ и҆хъ.
и҆ ѻ҆бращахꙋ е҆го рекꙋщи не мо́жемъ, н̂о сп҃сем̑ токмо дш҃а своѧ, нн҃ѣ и҆ ѻ҆братисѧ и҆ братїѧ на́ша расторгошасѧ, и҆ ѻ҆плъчимъсѧ к нимъ мы́ же ма́ли·

И реч̑҇ і҆ѹ́да не бꙋди м̂и сътвори́ти ве́щи се́ѧ бѣжати ѿ них·

Приближисѧ времѧ наше, ѹ́мремъ мꙋжества ради братїѧ нашеѧ·

И҆ не ѻ҆ставлѧ́емъ вины̀ славе на́шеи.
и҆ воздвижесѧ сила ѿ ѻ҆полченїа и҆ ста̀ во срѣтенїе им̑.
и҆ разлꙋчишасѧ ко́нницы на двѣ части и҆ пращницы и҆ стрѣл꙽цы пред̑и҆дѧхꙋ силе, и҆ пред̑подвижници вс̂и силнїи·

Вакхид̑ же б̂ѣ ѻ҆деснꙋю ро́га и҆ приближисѧ ѻ҆полченїю ѿ дво́ю ча́сти и҆ воз̑глашахꙋ трꙋба́ми, и҆ вострꙋбиша и҆же бїѧхꙋ ѿ страны̀ і҆ѹ́дины трꙋбами.
и҆ подвижесѧ землѧ̀ ѿ гласа ѻ҆пол̑҇ченїи.
и҆ бысть бра́нь смѣшена ѿ ѹ́тра даже до́ вечера·

и҆ ви́дѣ і҆ѹ́да ꙗ҆́же крѣпча́иша е҆сть часть во́и вакхидовых̑ въ десных̑, и҆ събрашасѧ к немꙋ вс̂и крѣпцы срд̑цемъ, и҆ сътресѧ десныи рогъ ѿ нихъ.
и҆ гнаше въ слд̑ѣ их̑ даже до горы а҆зота.
и҆ е҆же в лѣвомъ розѣ ви́дѣша ꙗ҆́ко сотресѧ де́сныи ро́гъ·

І҆ ѡ҆братишас̑҇ по стопам̑ і҆ѹ́дынымъ, і҆ и҆же с нимъ созади и҆ ѻ҆тѧгчисѧ бра́нь.
и҆ падоша ꙗ҆́звени мно́ѕи ѿ сихъ и҆ ѿ тх̑ѣ.
і҆ и҆ѹ́да падѐ и҆ прочїи бѣжа́ша.
и҆ взѧша і҆ѻ҆наѳан̑҇ и҆ си́монъ і҆ѹ́дꙋ брата свое҆го и҆ погребо́ша е҆го во́ гробѣ ѿц҃ъ свои҆хъ въ модинѣ, и҆ рыдаша е҆го ве́сь і҆ил҃ь пла́чем̑ ве́лїимъ, и҆ сѣтовахꙋ дн҃и мно́ги и҆ реко́ша како падѐ си́лныи спаса́ѧи і҆и҆л҃ѧ.
и҆ проча́ѧ словес̑҇ бра́неи і҆ѹ́динъ и҆ бл҃гихъ и҆ мꙋж́ества и҆́хже сътвори, и҆ вели́чьства е҆го не сꙋть писана мно́га б̂о бѣхꙋ ѕѣ́ло·

И҆ бысть по преставленїи і҆ѹ́динѣ в꙽зыидо́ша безако́н꙽ницы въ всѧ̀ предѣлы і҆и҃лѧ и҆ проѕѧбоша всѝ дѣла́ющїи безако́нїе·

Въ дн҃и ѻ҆́ны бы́сть глад̑ велик꙽ ѕѣло, и҆ ѻ҆слабѣ страна с ними.
і҆ и҆збра̀ вак꙽хидъ нечестивыхъ мꙋж́їи и҆ поста́ви и҆хъ господїи страны̀, и҆зыска́хꙋ і҆ и҆спыта́хꙋ дрꙋгъ і҆ѹ́диныхъ и҆ приводѧхꙋ и҆хъ къ вак꙽хиде и҆ м꙽стѧхꙋсѧ и҆хъ и҆ посмевахꙋсѧ им̑·

И҆ бы́сть скорбъ вели́ка въ і҆и҆л҃и ꙗ҆́же не бысть ѿ дн҃їи, в них же не ви́дѣсѧ про̑҇ркъ въ і҆и҆л҃и·

И҆ събрашасѧ вс̂и дрꙋги і҆ѹ́дины и҆ рекоша і҆ѻ҆наѳанꙋ, ѿнелѣже братъ тво́и і҆ѹ́да скончасѧ, и҆ мꙋжъ подобенъ е҆мꙋ нѣсть и҆зыити противꙋ вра́гъ и҆ вакхиды, и҆ враждꙋ́ющихъ ꙗ҆зы́кꙋ на́шемꙋ·

Нн҃ѣ ѹ҆бо тебе дньс̑҇ и҆збрахомъ быти въ е҆го мѣсто начални́ка, и҆ во́жда и҆же ратовати бра́нь нашꙋ.
и҆ воспрїѧт̑ і҆ѻ҆наѳанъ въ времѧ т̂о вожденїе въ і҆ѹ҆ды мѣсто брата свое҆го.
и҆ позна̑ вакхидъ, і҆ и҆скаше е҆го ѹ҆бити·

И҆ позна і҆ѻ҆наѳа́нъ и҆ симонъ братъ е҆го, и҆ вс̂и и҆же с ни́мъ бѧхꙋ.
и҆ побѣгоша въ пꙋсты́ню ѳекꙋе.
и҆ ста́ша ѹ҆ воды̀ р꙽ва а҆сфара.
и҆ позна вакхидъ во дн҃и сꙋботъ.
и҆ преиде самъ и вс̂и воѝ е҆го ѻ҆бонꙋ странꙋ і҆ѻ҆рдана.
и҆ посла̀ брата свое҆го во́жда наро́дꙋ, и҆ моли наватеѻ҆въ дрꙋговъ своих̑ пред̑ставити им̑ сосꙋды их̑ мно́гїѧ.
і҆ и҆зыидоша сн҃ове а҆м꙽ври ѿ мидава, и҆ ꙗ҆́ша і҆ѻ҆а́нна и҆ всѧ̀ е҆лико и҆мѣ, и҆ ѿи҆доша и҆мꙋщи та·

По словесехъ же сихъ възвѣстиша і҆ѻ҆наѳа́нꙋ и҆ симонꙋ братꙋ е҆го ꙗ҆́ко сн҃ве а҆м꙽врїины творѧт̑ бракъ великїи и҆ ведꙋтъ невѣстꙋ ѿ надаваѳа дщерь е҆ді́наго ѿ великихъ началникъ ханаа́нъскь съ честїю ве́лїею·

И҆ ѻ҆брꙋчисѧ і҆ѻ҆а́ннꙋ братꙋ и҆хъ и҆ възыдо́ша, и҆ съкрышасѧ под̑ сѣнїю горы̀.
и҆ въздвигнꙋша ѻ҆́чи своѝ и҆ ви́дѣша, и҆ с̂е во́пль и҆ ѹ҆готованїе мно́гое, и҆ жених̑ и҆зы́де и҆ дрꙋѕи е҆го, и҆ братїа е҆го противꙋ их̑ съ тѵм̑па́ны и҆ мꙋсѷкїами и҆ ѻ҆рꙋжїи мно́гими·

И҆ восташа к ним̑ ѿ лаѧ́тельства иже ѿ а҆наѳа́на и҆ ѹ҆биша и҆хъ.
и҆ падоша ꙗ҆́звени мно́ѕи.
и҆ прочїи бѣгоша въ горы, и҆ взѧша вс̂ѧ корысти и҆хъ.
и҆ ѻ҆братишас̑҇ бра́ки въ сѣтова́нїе, и҆ гласъ мꙋсѷкїискїи въ пла́чь.
и҆ ѿм꙽стиша м꙽щенїе кро́ве брата свое҆го, и҆ ѻ҆братишасѧ на брег̑҇ і҆ѻ҆рда́ньскїи·

И҆ слы́ша вакхид̑ и҆ прїиде в꙽ дн҃ь сꙋбот̑ныи даже до страны̀ і҆ѻ҆рда́ньскїѧ съ си́лою ве́лїею·

И҆ рече къ свои҆мъ і҆ѻ҆наѳан̑҇ въстанѣмъ нн҃ѣ и҆ ѻ҆полча́емсѧ за дꙋша на́ша·

нѣсть б̂о днесь ꙗ҆ко вчера и҆ третїи дн҃ь, се б̂о бра́нь противꙋ нас̑҇ и҆ созади нас̑҇, вода же і҆ѻ҆рдан꙽скаѧ сюдꙋ и҆ сюдꙋ и҆ брегъ и҆ лѣсъ, и҆ нѣсть мѣста ѿи҆тѝ·

Нн҃ѣ ѹ҆бо возъпїите на́ нб҃о, да и҆зба́витесѧ ѿ рꙋкъ врагъ на́ших̑.
и҆ събрасѧ бра́нь и҆ простре і҆ѻ҆наѳан̑҇ рꙋкꙋ свою ѹ҆бити вакхида, и҆ ѹ҆клонисѧ ѿ него воспѧт̑ и҆ прескочи і҆ѻ҆наѳанъ і҆ и҆же с ним̑ бѣхꙋ і҆ѻ҆рдан̑҇, и҆ преплывахꙋ на ѻ҆бонꙋ странꙋ и҆ не прехождахꙋ і҆ѻ҆рдана, и҆ падоша ѿ страны вакхидины дн҃и ѻ́ного, ꙗ҆́ко ҂а҃, мꙋжїи.
и҆ ѻ҆братисѧ въ і҆ерс̑҇лим̑, и҆ сътвори гра́ды тверды въ і҆ѹ҆деѝ.
и҆ тверды́ню въ е҆ри́хонѣ и҆ ꙗ҆́же въ е҆м꙽маѹ҆мѣ и҆ веѳоронѣ, и҆ веѳиле, и҆ ѳанаѳе, и҆ фараѳоне, и҆ тефоне, стѣны высоки и҆ врата и҆ заворы.
и҆ постави стража̑ в нихъ е҆же враждовати і҆и҆л҃ю и҆ ѹ҆твер̑҇ди град̑ веѳсꙋрам̑ и҆ газарꙋ и҆ а҆крꙋ·

И҆ постави в нихъ си́лы и҆ пред̑ложенїе бра́шенъ.
и҆ взѧ̀ сн҃ы во́ждеи страны̀ ѻ҆миры, и҆ поста́ви и҆хъ въ кра́ю въ і҆ерс̑҇ли́мѣ въ стражбꙋ.
в лѣто, рн҃г, мс̑҇ца втораго.
и҆ заповѣ́да а҆лкимъ разорити сѣнꙋ двора ст҃ыхъ внꙋтрънѧго, и҆ разорити дѣла про̑҇ркъ.
и҆ нача разарѧти, въ времѧ ѻ҆́но пораженъ бысть а҆лким̑, и҆ въспѧти́шасѧ дѣла е҆го.
и҆ заградишасѧ ѹ҆ста е҆го и҆ раслабѣ и҆ не можа́ше ктомꙋ гл҃ти слова и҆ заповѣдати ѻ҆ домꙋ своем̑, и҆ ѹ́мре а҆лкима въ времѧ ѻ҆́но съ мꙋкою ве́лїею·

И҆ ви́дѣ вакхид̑ ꙗ҆́ко ѹ҆́мре а҆лкимъ и҆ ѻбратисѧ къ цр҃ю, и҆ ѹ҆молча землѧ̀ лѣта дв̂а.
и҆ совѣщаша вс̂и безаконицы рекꙋще.
с̂е і҆ѻ҆наѳанъ і҆ и҆же с ни́мъ в покоѝ ѻ҆бита́ютъ ѹ҆пова́юще·

Нн҃ѣ б̂о и҆зведем̑ вакхида, и҆ пои҆ма́етъ их̑ всх̑ѣ въ е҆ді́нꙋ но́щ꙽.
и҆ шед̑ше совѣщаша с ним̑.
и҆ въста̀ съ силою мно́гою.
и҆ посла̀ е҆пистолїю та́и всѣмъ споборителемъ е҆го и҆же въ і҆ѹ҆деѝ да и҆́мꙋтъ і҆ѻ҆наѳана і҆ и҆же с ни́мъ·

И҆ не возмо́гоша ꙗ҆ко познасѧ и҆мъ совѣтъ их̑, и҆ ꙗ҆́ша ѿ мꙋж́їи страны началныхъ ѕло́бы н҃, мꙋжїи, и҆ ѹ҆биша их̑·

І҆ и́де і҆ѻ҆наѳан̑҇ и҆ си́монъ і҆ и҆же с ними въ веѳ꙽васею в пꙋсты́ню, и҆ созда разоренаѧ е҆го и҆ ѹ҆би е҆го·

И҆ позна̀ вакхид̑ и҆ собра вс̂е мно́жество свое, і҆ и҆же ѿ і҆ѹ҆деѧ возвѣсти и҆ прише̑ ѻ҆полчисѧ на веѳвасъ и҆ вое҆ваше е҆го дн҃и мно́ги.
и҆ сътвори миханы, и҆ ѻ҆стави і҆ѻ҆наѳанъ симона брата свое҆го въ градѣ, і҆ и҆зыиде въ странꙋ.
и҆ прїиде в꙽ числѣ, и҆ порази ѻ҆димира и҆ братїю е҆го, и҆ сн҃ове фасеронѣ въ жили́щихъ и҆хъ.
и҆ нача̀ бити и҆ възыиде въ си́лы, симонъ же і҆ и҆же с нимъ и҆зшед̑ше ѿ града и҆ пож꙽гоша миханы·

и҆ ратовахꙋ противꙋ вак̑҇хида, и҆ сътресѧ ѿ них꙽, и҆ ѻ҆злоблѧхꙋ е҆го ѕѣло.
ꙗ҆́ко б̂ѣ совѣт̑ е҆го и҆ воход̑ е҆го т꙽ще.
и҆ прогнѣвашесѧ ꙗ҆́ростїю мꙋжемъ безако́ннымъ совѣщавши́мъ е҆мꙋ прїити во странꙋ и҆ ѹ҆би ѿ них̑ мно́гихъ·

и҆ совѣщасѧ ѿи҆ти в землю свою.
и҆ позна і҆ѻ҆наѳан̑҇ и҆ посла̀ к немꙋ старѣиших̑ съставити миръ с ни́мъ, и҆ возда́ти и҆мъ плѣненїе.
и҆ прїѧ́тъ и҆ сътвори по словесехъ е҆го.
и҆ клѧсѧ е҆мꙋ не и҆зыскати е҆мꙋ зл̂а вс̂ѧ дн҃и живота е҆го.
и҆ воздасть е҆мꙋ плѣненїе е҆же преже плѣни ѿ землѧ і҆ѹ́дины·

И҆ ѻ҆бращ꙽сѧ ѿиде въ землю свою, и не приложи ктомꙋ прїити въ предѣлы и҆хъ·

И҆ преста мечъ ѿ і҆и҆л҃ѧ, и҆ ѻбита і҆ѻ҆наѳа́нъ в махъмасе.
и҆ нача̀ і҆ѻ҆наѳан̑҇ сꙋдити люди і҆ и҆стреби нечестивых꙽ ѿ і҆и҆л҃ѧ·

Глв̑҇а, і҃·

И въ лѣто, р҃ѯ, в꙽зы́иде а҆леѯан꙽дръ сн҃ъ антїѻ́ховъ прего́рдыи, и҆ ѹ҆держа птоломаи́дꙋ и҆ прїѧ́ша е҆го, и҆ цр҃ьствова т̂ꙋ·

И҆ слы́ша дими́трїи цр҃ь и҆ събра во́и мно́го ѕѣ́ло, і҆ и҆зы́иде проти́вꙋ е҆мꙋ на́ брань·

И҆ посла дими́трїи къ и҆ѻ҆наѳа́нꙋ е҆писто́лїѧ словесы ми́рными велича́юще е҆го.
рече б̂о, пред̑вари́мъ сътвори́ти ми́ръ съ ни́ми, преже неже сътво́ритъ съ а҆леѯан꙽дромъ проти́вꙋ насъ·

Помѧнетъ б̂о всѧ ѕла́ѧ ꙗ҆́же сътвори́хомъ на него, и҆ на бра́тїю е҆го, и҆ на ꙗ҆зы́къ е҆го·

И҆ да́сть и҆мъ вла́сть събирати во́и, и҆ ѹготова́ти ѻ҆рꙋж́їа, и҆ быти е҆го дрꙋга е҆мꙋ, і҆ ѻ҆мїра и҆же бѧ́хꙋ въ краю повелѣ да́ти е҆мꙋ·

И҆ прїиде и҆ѻ҆наѳа́нъ въ і҆ерс̑҇лимъ и҆ почте е҆писто́лїѧ въ ѹ҆слыша́нїе всѣм꙽ лю́демъ, і҆ и́же ѿ кра́ѧ·

И҆ ѹ҆страши́шасѧ стра́хомъ ве́лїи҆мъ, е҆гда слы́шаша ꙗ҆ко да́сть е҆мꙋ цр҃ь вла́сть събира́ти воѝ·

И҆ преда́ша и҆же ѿ кра́ю и҆ѻ҆наѳа́нꙋ ѻ҆ми́ра, и҆ не ѿда их̑ срод̑никомъ и҆хъ.
и҆ ѻ҆бита и҆ѻ҆наѳан꙽ въ і҆ерс̑҇лимѣ, и҆ нача̀ съзида́ти и҆ ѻ҆бнови́ти гра́дъ·

И҆ рече къ творѧ́щим̑ дѣ́ла зда́ти зда́нїѧ и҆ го́рꙋ сїѻ́нъ ѻ҆́крс̑҇тъ ѿ ка́менїи четвероѹ҆го́лныхъ къ ѹ҆тверже́нїю, и҆ сътвори́ша си́це·

И҆ побѣго́ша и҆ноплеме́нницы и҆же бѧхꙋ въ тверды́нѧхъ, их̑же създа вак꙽хи́дъ·

И҆ ѻ҆ста́ви ко́ждо мѣсто свое, и҆ ѿи҆де в зе́млю свою·

ѻ҆ба́че же въ веѳсꙋрѣ ѻ҆ста́ша нѣцыи.
ѿ ѻ҆ста́вльшихъ зако́нъ и҆ за́повѣди бж҃їа, б̂ѣ бо и҆мъ ѹ҆бѣжище·

И҆ слы́ша а҆леѯа́ндръ цр҃ь ѻ҆бѣща́нїѧ и҆же е҆ли́ка посла̀ дими́трїи и҆ѻ҆наѳа́нꙋ.
и҆ повѣда́ша е҆мꙋ бра́ни и҆ мꙋжества ꙗ҆́же сътвори сеи, и҆ бра́тїа е҆го, и҆ трꙋды их̑же и҆мѣхꙋ·

И҆ рече, е҆да ли ѻ҆брѧ́щемъ кое҆го мꙋж́а такова, и҆ нн҃ѣ сътво́римъ е҆го въ дрꙋ́га и҆ събор꙽ника на нихъ.
и҆ написа е҆писто́лїѧ и҆ посла е҆мꙋ, по словесх̑ѣ сих̑ рекꙋщи·

Цр҃ь а҆леѯа́ндръ бра́тꙋ и҆ѻ҆наѳа́нꙋ радоватисѧ·

Слы́шахомъ ѻ҆ тебѣ ꙗ҆́ко мꙋж́ъ си́ленъ е҆си крѣпостїю, и҆ ѹ҆го́денъ е҆си бы́ти намъ дрꙋ́гъ·

И҆ нн҃ѣ поставлѧ́емъ т̂ѧ дне́сь а҆рхїере́ѧ ꙗ҆зы́ка твое҆го.
и҆ дрꙋ́га цр҃ьска нарѣца́тисѧ·

И҆ посла̀ е҆мꙋ перфи́рꙋ и҆ вѣнецъ зла́тъ·

И҆ мд̑ꙋръствова́ти ꙗ҆́же на́ша, и҆ снабдѣва́ти дрꙋж́бꙋ къ намъ·

И҆ ѻ҆блечесѧ и҆ѻ҆наѳа́нъ въ ст҃ꙋю ри́зꙋ сед̑маго мс̑҇ца лѣта р҃ѯ, въ дн҃ь пра́зд̑ника кꙋщнаго·

И҆ събра си́лы и҆ ѹ҆гото́ва ѻ҆рꙋжїѧ многа·

И҆ слы́ша дими́трїи словеса сїѧ, и҆ ѻ҆скорби́сѧ ѕѣ́ло и҆ рече·

Чт̂о с̂е сътвори́хомъ ꙗ҆́ко пред̑вари нас̑҇ а҆леѯа́ндръ поста́вити дрꙋжбꙋ і҆ѹ҆деѻмъ въ ѹ҆тверже́нїе·

Напишꙋ и҆ а́зъ и҆мъ словеса моли́твена и҆ възвыше́нїѧ и҆ да́ры, въ е҆же да бꙋ́дꙋтъ намъ въ по́мощь·

И҆ написа и҆мъ по словесе́хъ сихъ·

Цр҃ь дими́трїи ꙗ҆зы́кꙋ і҆ѹ҆де́искꙋ радоватисѧ.
понеже снабдѣсте завѣтъ к нам̑, и҆ пребыва́сте въ дрꙋжбѣ на́шеи.
и҆ не пристꙋпи́сте къ врагомъ на́шимъ, слы́шахомъ и҆ радовахомсѧ·

и҆ нн҃ѣ пребываите е҆ще съхрани́ти к намъ вѣрꙋ·

и҆ въздадемъ вамъ бл҃гаѧ и҆́хже ради творите съ нами.
и҆ ѻ҆ста́вимъ вамъ ѻ҆ставле́нїѧ мно́га, и҆ дадим̑ вамъ да́ры.
и҆ нн҃ѣ разрѣшаю васъ и҆ ѻ҆ставлѧю вам̑ всѣхъ і҆ѹ҆де́ѻвъ ѿ да́неи, и҆ цѣны со́ли, и҆ ѿ вѣнцевъ.
и҆ в мѣсто трети́ны сѣменїи, и҆ в мѣсто пол ча́сти пло́довъ дре́вныхъ, прилѣжа́щее м̂и взѧ́ти ѻ҆ставлѧ́ю ѿ дне́сь и҆ потом̑, е҆же не в꙽зима́ти ѿ землѝ і҆ѹ́дины.
и҆ ѿ трехъ предѣлъ прилежа́щихъ е́и ѿ самарїѧ и҆ галиле́ѧ и҆ ѿ дн҃ешнѧго дн҃е и҆ въ вѣкъ вѣка·

І҆ерс̑҇лимъ бꙋдет̑ ст҃ъ и҆ свободенъ съ предѣ́лы свои҆ми.
и҆ десѧти́ны и҆ да́ни ѻ҆ставлю, и҆ влас̑҇ кра́ѧ и҆же въ і҆ерс̑҇лимѣ, и҆ да́мъ а҆рхїерею да е҆же а҆ще поста́витъ в неи, и҆ мꙋжа и҆хже а҆ще и҆зберетъ самъ храни́ти ю҆̀.
и҆ всѧ́кꙋ дш҃ꙋ и҆ѹ҆де́искꙋю и҆же плѣне́на е҆сть ѿ землѧ̀ і҆ѹ́дины, въ все црс̑҇тво мое ѻ҆ста́влю свобо́днꙋ тꙋ́не, и҆ всѣ да ѻ҆ставлѧ́ютсѧ да́нїи и҆ ско́тъ свои҆хъ·

И҆ всѧ пра́здники и҆ сꙋбо́ты и҆ новомѣсѧчїѧ.
и҆ дн҃и въчине́нїи, и҆ три дн҃и прежд̑е празд̑ника, и҆ дн҃и по пра́здницѣ бꙋ́дꙋтъ вс̂и дн҃и свобо́дни и҆ ѿпꙋщени всѣмъ і҆ѹ҆деѻм꙽ сꙋщимъ въ црс̑҇твїи мое҆мъ·

И҆ никто и҆мѣти бꙋ́детъ вла́сти повелѣти и҆ ни стꙋжи́ти нѣ́коего и҆хъ ѻ҆ всѧ́кои ве́щи·

И҆ да напи́шꙋтсѧ ѿ і҆ѹ҆де́и въ воѝ цр҃ьски до тридесѧтъ ты́сѧщъ мꙋжїи и҆ дадꙋтсѧ и҆мъ ѻ҆бро́ки ꙗ҆́ко подоба́етъ всѣмъ во́емъ црс̑҇ким̑·

И҆ да поста́вѧтсѧ ѿ нихъ въ тверды́нѧхъ црс̑҇кихъ велїи҆хъ.
и҆ ѿ сихъ поставлѧ́ютсѧ на потребы цр҃евы сꙋщїи въ вѣ́рꙋ.
и҆ нача́лницы бꙋдꙋтъ ѿ них̑ и҆ да хо́дѧтъ въ зако́нѣхъ свои҆хъ.
ꙗ҆́же повелѣ цр҃ь въ земли і҆ѹ́динѣ·

И҆ трехъ предѣлехъ прило́жшихсѧ і҆ѹ҆деи ѿ страны самарїѧ.
да приложатсѧ і҆ѹ҆деи, да бꙋ́дꙋтъ въ е҆ді́но ѹ҆мале́нїѧ ра́ди, е҆же не послꙋшати и҆ныѧ вла́сти н̂о то́кмо а҆рхїереѧ·

Птоломаи́дꙋ и҆ предѣ́лы е҆ѧ̀ да́хъ да́ръ ст҃ымъ и҆же сꙋть въ і҆ерс̑҇лимѣ на потре́бнаѧ ст҃ымъ·

И҆ а́зъ да́мъ ко́ижд̑о лѣтъ, е҃і.
ты́сѧщь си́кль сребра ѿ гл҃емыхъ цр҃ьскихъ ѿ мѣстъ прилежа́щихъ·

И҆ всѧ́ко ѹ҆множе́ное е҆же не възда́ша ѿ потребъ ꙗ҆́ко въ прьвыхъ лѣтехъ.
ѿ нн҃ѣ дадꙋтъ въ дѣ́ла хра́мꙋ·

И҆ въ сїа.
҂е҃, си́клѧ сребра и҆́хже взимахꙋ ѿ потре́бъ а҆ки въ пре́жнихъ лѣтехъ ст҃го ѿ сло́ва по лѣтꙋ·

и҆ сїѧ ѻ҆ставлѧ́ютсѧ жрьцемъ слꙋжа́щимъ·

и҆ е҆ли́цы же прибѣга́ютъ къ цр҃кви и҆же въ і҆ерс̑҇лимх̑ѣ и҆ въ всѣхъ предѣлехъ е҆го·

длъжни сꙋщи цр҃ьскаѧ и҆ всѧ́ка ве́щь да ѿрѣши́тсѧ·

и҆ всѧ̀ е҆ли́ка е҆сть и҆хъ въ црс̑҇твїи мое҆мъ·

и҆ съзида́ти и҆же ѻбновлѧ́ти дѣ́ла ст҃ыхъ·

І҆ и҆зда́нїѧ да́стьсѧ ѿ ве́щи цр҃ьскїѧ.
и҆ е҆же съзида́ти стѣ́ны і҆ерс̑҇лима.
и҆ ѹ҆тверже́нїе ѻ҆́крс̑҇тъ.
и҆зда́нїе да́стьсѧ ѿ събра́нїѧ цр҃ьска, и҆ на съзида́нїе стѣ́нъ въ і҆ѹ҆де́и·

Ꙗ҆́ко слы́ша і҆ѻ҆наѳа́нъ и҆ лю́ди словесъ сихъ не вѣроваша и҆мъ ниже въспрїѧ́ша.
ꙗ҆́ко помѧнꙋша зло́бꙋ ве́лїю ю҆́же сътвори въ і҆и҆л҃и и҆ ѻ҆скорби и҆хъ ѕѣ́ло·

И҆ бл҃говоли́ша съ а҆леѯа́ндромъ ꙗ҆ко се́и быс̑҇ и҆мъ нача́лникъ словесемъ ми́рным꙽ и҆ съпоборѧ́хꙋ е҆мꙋ всѧ дн҃и·

И҆ събра̀ цр҃ь а҆леѯа́ндръ си́лꙋ велїю и҆ ѻ҆плъчи́сѧ противꙋ дими́трїѧ·

И҆ сътвори́ша бра́нь дв̂а цр҃ѧ, и҆ побѣже ѻ҆пол̑҇че́нїе дими́трїево и҆ гна̀ е҆го а҆леѯа́ндр꙽ и҆ ѹ҆крѣпи́сѧ на ни́хъ, и҆ възмо́же бра́нь ѕѣло, дондеже за́иде слн҃це.
и҆ паде дими́трїи въ дн҃ь ѻ́нъ·

И҆ посла̀ а҆леѯа́дръ къ птоломѣю цр҃ю е҆гѷпетъскꙋ старѣ́ишины по словесехъ си́хъ рекꙋщи·

Понеже ѻ҆брати́хсѧ въ црс̑҇тво мое и҆ сѣдох̑ на прс̑҇тлѣ ѿц҃ъ мои҆хъ.
и҆ ѹ҆дръжа́хъ нача́льство и҆ съкрꙋшихъ дими́трїѧ.
и҆ въздержа́хъ странꙋ нашꙋ, и҆ съста́вихъ противꙋ е҆го ра́ть и҆ съкрꙋши́сѧ сам и҆ ѻ҆плъче́нїе е҆го ѿ насъ, и҆ сѣдо́хъ на прс̑҇тлѣ црс̑҇тва е҆го·

И҆ н҃нѣ соста́ви междꙋ нами дрꙋжбꙋ.
и҆ нн҃ѣ дажд̑ь мнѣ дщерь твою въ женꙋ̀ и҆ бꙋдꙋ зѧ́ть твои, и҆ дамъ тебѣ да́ры и҆ сїе достоѧ́нїе твое·

И҆ ѿвѣща̀ цр҃ь птоломеи рекꙋщи, бл҃гъ дн҃ь въньже ѻ҆брати́лсѧ е҆си в землю ѿц҃ъ твои҆хъ и҆ сѣлъ е҆си на прс̑҇тлѣ црс̑҇тва и҆хъ·

И҆ нн҃ѣ сътворю т̂и ꙗ҆́же писа́лъ е҆си.
н̂о срѧ́щисѧ въ птоломаи́дѣ.
ꙗ҆́ко да ви́дим̑ дрꙋгъ дрꙋга.
и҆ бꙋдеши м̂и зѧ́ть ꙗ҆́коже ре́клъ е҆си·

І҆ и҆зы́иде птоломѣи ѿ е҆гѵ́пта са́м꙽ и҆ клеѻ҆па́тра дщѝ е҆го, и҆ прїиде въ птоломаи́дꙋ, лѣта рѯ҃в, и҆ срѣте е҆го а҆леѯа́ндръ цр҃ь, и҆ даде е҆мꙋ клеѻ҆па́трꙋ дще́рь свою, и҆ сътворѝ брак̑҇ е҆го въ птоломаи́дѣ, ꙗ҆́ко цр҃и въ сла́вѣ вели́цѣ·

И҆ написа̀ а҆леѯа́ндръ цр҃ь і҆ѻ҆наѳа́нꙋ прїитѝ въ срѣте́нїе е҆мꙋ·

І҆ и҆де съ сла́вою въ птоломаи́дꙋ, и҆ срѣтѐ ѻ҆́ба цр҃ѧ, и҆ даде им̑ сребро̀ и҆ зла́то и҆ дрꙋгомъ и҆хъ да́ры, и҆ ѻ҆брѣтѐ блгд̑ть пред ни́ми.
и҆ собра́шасѧ нань мꙋжи гꙋби́тели ѿ і҆и҆л҃ѧ, мꙋжи безако́ннїи ѻ҆клевета́юще е҆го и҆ не внѧ́тъ и҆мъ цр҃ь·

И҆ повелѣ̀ цр҃ь съвлещи і҆ѻ҆наѳана съ ризъ е҆го, и҆ ѻ҆блещи е҆го въ прьфи́рꙋ, и҆ сътвори́ша̑ та́ко·

И҆ посадѝ е҆го цр҃ь съ собо́ю.
и҆ рече нача́лникомъ свои҆мъ, и҆зы́идѣте с ни́мъ на средѣ града и҆ проповѣдѣте ни е҆дїномꙋ клевета́ти на́нь, ни ѻ҆ е҆дїнои вещи.
и҆ ни е҆дїнъ е҆мꙋ да стꙋжитъ ѻ҆ всѧ́комъ гл҃ѣ·

И҆ быс̑҇ ꙗ҆́ко ви́дѣша клеве́тницы сла́вꙋ е҆го ꙗ҆́ко проповѣда́ша, и҆ ѻ҆блече́на̑ е҆го перфи́рою и҆ бѣжа́ша всѝ·

И҆ просла́ви е҆го цр҃ь, и҆ написа̀ е҆го въ прьвых̑ дрꙋзѣхъ и҆ поста́ви е҆го вое҆во́дꙋ и҆ ча́сти началника·

И҆ възврати́сѧ і҆ѻ҆наѳа́нъ въ і҆ерс̑҇лимъ съ миромъ и҆ весе́лїемъ·

И҆ в лѣто рѯ҃е, прїиде дими́трїи сн҃ъ димитрїевъ ѿ крѵ́та̑ в зе́млю ѿц҃ъ свои҆хъ·

И҆ слы́ша а҆леѯа́ндръ цр҃ь и҆ ѻ҆скорби́сѧ ѕѣло, и҆ ѻ҆брати́сѧ въ а҆нтїѻхїю·

И҆ поста́ви дими́трїи а҆пол꙽лонїѧ сꙋщаго въ ѹ҆до́лѣ сѷрїистѣи, и҆ събра̀ си́лꙋ ве́лїю и҆ по́иде въ и҆а҆мнїю·

И҆ посла̀ къ і҆ѻ҆наѳа́нꙋ а҆рхїере́ю гл҃ющи.
ты̀ е҆ді́нъ възноси́шисѧ на́ ны, а҆з꙽ же бы́хъ в посмх̑ѣ и҆ въ поноше́нїе тебе рад̑и̑, и҆ чт̂о ради властельствꙋ́еши над̑ на́ми въ гора́хъ·

Нн҃ѣ ѹ҆бо а҆ще надѣешисѧ в силахъ твои҆хъ и҆зыидѝ к на́м꙽ на́ поле.
і҆ и҆скꙋсимсѧ т̂ꙋ междꙋ собо́ю, ꙗ҆́ко со мно́ю е҆сть си́ла гра́днаа въпроси и҆ наѹ҆чи́сѧ кт̂о е҆смь, и҆ про́чїи помага́ющїи намъ, и҆ гл҃ютъ нѣсть стоѧ́нїе ногѝ пред̑ лицемъ на́шимъ, ꙗ҆́ко два́щи в бѣгъ премени́шасѧ ѿц҃ы твоѝ в зе́млю и҆хъ·

И҆ нн҃ѣ не мо́жеши потръпѣти ко́нника̑ и҆ си́лы таковыѧ въ по́ли.
и҆дѣже нѣсть ка́мени ни стѣны̀, ни мѣста бѣжа́нїю·

Ꙗ҆́коже слы́ша і҆ѻ҆наѳан̑҇ словеса̀ а҆пол꙽лонїѧ подви́жесѧ мы́слїю, і҆ и҆з꙽бра̀ ҂і҃ мꙋжїи, і҆ и҆зыиде ѿ і҆ерс̑҇лима, и҆ сни́десѧ с нимъ симон̑҇ бра́тъ е҆го въ по́мощъ е҆мꙋ.
и҆ поста́виша ѻ҆пол꙽че́нїѧ въ и҆ѻ҆п꙽пїи и҆ заста́ша е҆мꙋ ѿ гра́да.
ꙗ҆́ко стража а҆пол꙽лонїѧ въ и҆ѻп꙽пїи бы́сть и҆ ратова̀ е҆го·

И҆ ѹ҆боѧ́вшесѧ ѿвръзоша и҆же ѿ гра́да и҆ въздержа̀ і҆ѻ҆наѳа́нъ и҆ѻ҆п꙽пїю·

И҆ слы́ша а҆пол꙽лонїи и҆ събра̀ ҂г҃ ко́нникъ и҆ си́лꙋ ве́лїю, і҆ и҆де въ азо́тъ ꙗ҆́ко пꙋтьствова́ше въкꙋпѣ проиде въ по́ле зане и҆мѣѧ́ше мно́жество ко́нникъ и҆ надѣ́ашесѧ на них̑·

И҆ гна̀ і҆ѻ҆наѳа́нъ въ слд̑ѣ е҆го во а҆зот̑, и съста́виша бра́ни въ слѣдъ е҆го въ ра́ть·

И҆ ѻ҆ста́ви а҆пол꙽лонъ, ҂а҃. ко́нникъ съза́ди и҆хъ въ та́инѣ·

И҆ позна̀ і҆ѻ҆наѳа́нъ ꙗ҆́ко е҆сть лаѧ́тели съза́ди е҆го.
и҆ ѻ҆быидо́ша е҆го ѻ҆пол̑҇ченїе и҆ стрелѧ́хꙋ на люди ѿ ѹ́тра даже до́ вечера·

Лю́ди же ста́ша ꙗ҆́ко заповѣда і҆ѻ҆наѳа́нъ, и҆ ѹ҆трꙋди́шасѧ ко́нницы и҆хъ.
и҆ ѿлꙋчи́сѧ си́монъ съ воем̑ свои҆мъ.
и҆ сони́десѧ на ѻ҆пол꙽ченїю.
ко́нницы б̂о ѹ҆трꙋжени бѧ́хꙋ.
и҆ съкрꙋши́шасѧ ѿ него и҆ побѣго́ша и҆ конницы расточи́шасѧ по́ полю.
и҆ бѣго́ша въ а҆зо́тъ, и҆ внидо́ша въ виѳъдагонъ и҆́дола и҆хъ и҆же ѹ҆целѣти·

И҆ пож꙽жѐ і҆ѻ҆наѳанъ а҆зот̑ и҆ гра́ды и҆же бѣхꙋ ѻ҆́крс̑҇тъ е҆го.
и҆ взѧ̀ коры́сти и҆хъ и҆ ка́пище даго́ново, и҆ въбѣгшихъ въ нѐ пож꙽жѐ ѻ҆гнемъ·

И҆ бы́сть падшихъ мече́мъ съ сож꙽же́ными ꙗ҆́ко ҂и҃ мꙋжїи·

И҆ ѿи́де ѿꙋдꙋ і҆ѻ҆наѳа́нъ и҆ прїиде въ а҆скалон̑҇, і҆ и҆зыидо́ша ѿ гра́да въ стрѣте́нїе е҆мꙋ въ сла́вѣ вели́цѣ·

И҆ ѻ҆брати́сѧ і҆ѻ҆наѳа́нъ въ і҆ерс̑҇ли́мъ съ сꙋщими с ни́мъ и҆мꙋщи коры́сти мно́ги·

И҆ бысть ꙗ҆́ко ѹ҆слы́ша а҆леѯа́ндръ цр҃ь словеса̀ сїѧ и҆ приложѝ просла́вити і҆ѻ҆наѳа́на.
и҆ посла̀ е҆мꙋ ѻ҆рꙋжїе позла́щено, ꙗ҆́ко ѻ҆бы́чаи е҆сть даѧ́ти срод̑никомъ цр҃евымъ.
и҆ дадѐ е҆мꙋ а҆к꙽карон̑҇ и҆ всѧ предѣлы е҆го въ ѻ҆дръжа́нїе·

Глв̑҇а, а҃і·

И цр҃ь е҆гѷпет꙽скїи събра си́лꙋ мно́гꙋ а҆ки пѣсокъ и҆же ес̑҇ въскра́и морѧ, и҆ корабли мно́ги·

І҆ и҆скаше воздръжа́ти црс̑҇тво а҆леѯа́ндрово ле́стїю, и҆ приложити црс̑҇твꙋ свое҆мꙋ.

І҆ и҆зыиде въ сѷрїю словесы мирными и҆ ѻ҆творѧхꙋсѧ е҆мꙋ и҆же ѿ град̑, и҆ срѣтѧхꙋ е҆го ꙗ҆́ко заповѣда́нїе б̂ѣ а҆леѯа́ндра цр҃ѧ и҆зыити е҆мꙋ въ срѣтенїе зане быс̑҇ тесть е҆го·

Ꙗ҆́коже въхожда́ше во́ град̑ птоломаи́ды, повелѣ си́ламъ и҆ стра́жы во кое҆мъждо градѣ.
ꙗ҆́коже приближи́сѧ а҆зо́тꙋ показаша е҆мꙋ, ка́пище даго́ново сож̑жено, и҆ а҆зо́тъ и҆ ѻ҆́крс̑҇тныѧ гра́ды е҆го разорены, и҆ телеса повръжена.
и҆ побїеных̑ их̑же побѝ въ бра́ни и҆ смета́ше б̂о ѧ҆̀ в꙽ кꙋпы при пꙋтѝ е҆го.
и҆ повѣда́ша цр҃ю ꙗ҆́же сътвори і҆ѻ҆наѳан̑҇, въ е҆же възненави́дѣти е҆го, и҆ ѹ҆молча цр҃ь·

И҆ срт̑ѣ і҆ѻ҆наѳа́нъ цр҃ѧ въ и҆ѻ҆ппе съ славою.
и҆ цѣлова́ше дрг̑҇ꙋ дрꙋга, и҆ ѹ҆споша т̂ꙋ·

І҆ и́де і҆ѻ҆наѳа́нъ съ цр҃емъ да́же до рѣки и҆же зва́шесѧ е҆левтера, и҆ ѻ҆братисѧ въ і҆ерс̑҇ли́мъ·

Цр҃ь же п꙽толомѣи господ̑ствова гра́ды помо́рьскїѧ, да́же до селевкїѧ приморьскїѧ, и҆ размышлѧ́ше на а҆леѯа́ндра совѣты лꙋка́вы·

И҆ посла̀ старѣишинъ къ дими́трїю гл҃ющи, прїиди сложим̑ ме́ждꙋ на́ми завѣт꙽.
и҆ да́мъ тебѣ дще́рь мою̀ ю҆́же и́мать а҆леѯа́ндръ.
и҆ цр҃ьствова́ти и҆́маши въ црс̑҇твїи ѿц҃а твое҆го.
раскаѧ́хъ бо сѧ да́вши е҆мꙋ дще́рь мою̀, в꙽зыска бо м̂ѧ ѹ҆бити.
и҆ возненавидѣ е҆го ради похотѣ́нїѧ црс̑҇тва е҆го·

И҆ ѿꙗ҆́тъ дще́рь свою и҆ да́сть еѧ̀ димитрїю.
и҆ ѻ҆чюжди́сѧ ѿ а҆леѯа́ндра, и҆ ꙗ҆ви́сѧ вражда и҆хъ.

И҆ вниде птоломѣи въ а҆нтїѻхїю, и҆ возложи двѣ дїадимѣ на главꙋ свою̀, а҆сїискꙋю і҆ е҆гѷпетъскꙋю·

А҆леѯа́нъдръ же цр҃ь бысть въ киликїи по временехъ ѻ҆нѣх꙽, ꙗ҆́ко ѿмѣта́хꙋсѧ и҆же ѿ мѣстъ ѻ҆ныхъ·

И҆ слы́ша а҆леѯан̑҇дръ и҆ прїиде на́нь бра́нїю.
і҆ и҆зведе птоломѣи въ срѣтенїе е҆мꙋ рꙋкою крѣпкою и҆ погони е҆го.
и҆ побѣжа а҆леѯан̑҇дръ въ а҆равїю защитити и҆ себе т̂ꙋ.
цр҃ь же п꙽толомѣи възнесесѧ.
и҆ ѹ҆секнꙋ зав꙽дїиль а҆равитинъ главꙋ а҆леѯан̑҇дровꙋ, и҆ посла̀ п꙽толомїю, и҆ цр҃ь птоломеи ѹ҆́мре въ третїи дн҃ь.
и҆ сꙋщїи въ тверды́нѧх̑ погыбоша, ѿ и҆же бѣхꙋ въ твердынѧхъ.
и҆ въцр҃исѧ димитрїи лѣта, ро҃з·

Въ дн҃и ѻ҆́ны собра̀ і҆ѻ҆наѳа́нъ и҆же ѿ і҆ѹ҆де́и, да воюют̑ кра́и и҆же въ і҆ерс̑҇ли́мѣ.
и҆ сътвори миха́ны мно́ги, і҆ и҆до́ша нѣцыи ненавидѧщи ꙗ҆зы́ка их̑, мꙋжи безако́нницы къ цр҃ю дими́трїю·

И҆ възвѣстиша е҆мꙋ ꙗ҆ко і҆ѻ҆наѳан̑҇ ѻ҆бъстоꙗ҆́ше кра́и, и҆ слы́шавъ раз̑гнѣ́васѧ·

Ꙗ҆́коже слы́ша скоро прїиде въ п꙽толомаи҆дꙋ, и҆ написа̀ къ і҆ѻ҆наѳа́нꙋ да не ѻ҆бъстои́тъ, н̂о срѣсти е҆го е҆мꙋ на бесѣдованїе въ п꙽толомаи҆дꙋ тща́н꙽но·

Ꙗ҆́коже слы́ша і҆ѻ҆наѳа́нъ повелѣ ѻ҆бъстоѧ́ти, і҆ и҆збра̀ ѿ старецъ і҆и҆л҃евъ і҆ и҆е҆ре́и, и да́стьсѧ въ бѣдꙋ и҆ взѧ̀ зла́то и҆ сребро̀ і҆ и́ны да́ры мно́ги·

І҆ и҆де къ цр҃ю въ п꙽толомаи҆дꙋ, и҆ ѻ҆брѣте блгд̑ть пред̑ нимъ.
и҆ ѻ҆клеветахꙋ е҆го нѣцыи безакон꙽нїи ѿ ꙗ҆зы́ка е҆го·

И҆ сътвори е҆мꙋ цр҃ь, ꙗ҆́ко сътвори́ша е҆мꙋ и҆же преже е҆го бы́ша и҆ възвыси е҆го пред̑ всѣми дрꙋги свои́ми, и҆ поста́ви е҆го нача́лника сщ҃е́н꙽ствꙋ, и҆ е҆ли́коже и҆́на и҆мѣ преже че́стна, и҆ сътвори е҆го въ пр́ьвых̑ дрꙋзх̑ѣ быти·

И҆ молѝ і҆ѻ҆наѳа́нъ цр҃ѧ сътворити і҆ѹ҆де́ю безъда́н꙽нꙋ и҆ тритопар꙽хїи и҆ самарїю.
и҆ ѻ҆беща емꙋ, т҃, тала́нтъ, и҆ годѣ бысть цр҃ю и҆ написа̀ і҆ѻ҆наѳа́нꙋ е҆пистолїа ѻ҆ всѣхъ сих̑ и҆мѣ́юще ѻ҆́бразъ си́цевъ·

Цр҃ь димитрїи бра́тꙋ і҆ѻ҆наѳа́нꙋ радова́тисѧ, и҆ ꙗ҆́зы́кꙋ і҆ѹ҆де́искꙋ.
въсписа́нїе же е҆пистолїи ю҆́же писа́хомъ ластенꙋ срод̑никꙋ на́шемꙋ ѻ҆ васъ, писа́хом꙽ и҆ к ва́мъ да вѣсте·

Цр҃ь димитрїи ластенꙋ ѿц҃ꙋ радова́тисѧ, и҆ ꙗ҆́зы́кꙋ і҆ѹ҆де́искꙋ дрꙋгомъ на́шимъ, и҆ съхранѧ́щимъ ꙗ҆́же к намъ пра́вед̑наѧ сꙋди́хомъ бл҃го сътвори́ти их̑, ради бл҃горазꙋмїѧ ꙗ҆́же къ на́мъ.
поставихомъ б̂о и҆мъ предѣлы і҆ѹ҆де́искїѧ и҆ тремъ гра́домъ, ли́дѣ, и҆ рамаѳемꙋ, и҆ а҆ѳеремꙋ, и҆же приложишасѧ і҆ѹ҆деѝ ѿ самарїѧ.
и҆ вс̂ѧ послꙋшествꙋ́ющаѧ и҆мъ, всѣмъ жрꙋщим꙽ въ і҆ерс̑҇лимѣ.
въ мѣсто цр҃ьскихъ их̑же прїемлѧ́ше цр҃ь ѿ них̑ пр́ьвѣе в коежд̑о лѣто ѿ житъ землѧ̀, и҆ ѿ ѻ́вощь дре́вныхъ, і҆ и́на ꙗ҆же прилѣжа́ше намъ десѧтины и҆ да́ни, и҆ соли точила, и҆ прилѣжа́щих̑ на вѣнцевъ, вс̂ѧ ѻ҆ста́влѧ́емъ и҆мъ.
и҆ ничто́же им̑ ѹ҆имет̑сѧ сихъ ѿ нн҃ѣ на вѣчное вре́мѧ·

Нн҃ѣ ѹ҆бо прилежи́те сихъ сътворити въписа́нїе.
и҆ да дастьсѧ і҆ѻ҆наѳа́нꙋ, и҆ да положитсѧ въ горѣ ст҃ѣи и въ мѣстѣ честнѣ·

И ви́дѣ димитрїи цр҃ь ꙗ҆́ко ѹ҆тѣшисѧ землѧ̀ пред̑ нимъ, и҆ ничто̀ емꙋ проти́вит̑сѧ и҆ ѿпꙋсти вс̂ѧ во́ѧ своѧ̀ когожд̑о в мѣсто свое.
ѻ҆баче же тꙋждих̑ си́лъ их̑же призва̀ ѿ ѻ́стрововъ ꙗ҆зык̑҇, и҆ вражд̑овахꙋ е҆мꙋ вс̂и си́лы ꙗ҆́же ѿ ѻц҃ъ его·

Трифо́нъ же б̂ѣ ѿ а҆леѯа́ндра перваго.
и ви́дѣ ꙗ҆́ко всѧ си́лы ро́пщꙋтъ на дими́трїѧ, і҆ и҆де къ симакꙋю а҆рави́тинꙋ и҆же въскорми а҆нтїѻ́ха дѣтище а҆леѯа́ндрово, и҆ прилежа́ше е҆мꙋ ꙗ҆́ко да да́сть е҆мꙋ е҆̀, да въцр҃итъ в мѣсто ѿц҃а е҆го.
и҆ възвѣсти е҆мꙋ е҆ли́ка сътвори дими́трїи, и҆ вра́ждꙋ е҆ю́же враждꙋю́тъ си́лы е҆го, и҆ пребы́сть т̂ꙋ дн҃и мно́ги.
и҆ посла и҆ѻнаѳа́нъ къ дими́трїю цр҃ю да и҆ждене́тъ и҆же ѿ краю въ і҆ерс̑҇лимѣ, і҆ и҆же въ тверды́нѧхъ, бѣхꙋ б̂о вою́ющи і҆и҆л҃ѧ.
и҆ посла дими́трїи къ і҆ѻ҆наѳа́нꙋ рекꙋщи.
не то́кмо сїѧ сътворю т̂и и҆ ꙗ҆зы́кꙋ твое҆мꙋ, н̂о и҆ сла́вою прославлю т̂ѧ и҆ ꙗ҆зы́къ твои а҆ще бл҃говреме́нїе полꙋчю·

Нн҃ѣ б̂о пра́во сътво́риши а҆ще после́ши м̂и мꙋжїи споборѧ́ющих̑ ꙗ҆́ко ѿстꙋпи́ша всѣ во́и мои·

и҆ посла е҆мꙋ и҆ѻ҆наѳа́нъ, ҂г҃, мꙋжїи сил̑҇ных̑ крѣ́постїю, въ ан̑҇тїѻхїю, и҆ прїидо́ша къ цр҃ю·

и҆ възвесели́сѧ цр҃ь ѻ҆ прише́ствїи и҆хъ·

и҆ събра́шасѧ и҆же ѿ гра́да въ сред̑ гра́да.
р҃к ты́сѧщъ мꙋжїи, и҆ совѣща́хꙋ ѹ҆би́ти цр҃ѧ, и҆ бѣжа цр҃ь въ дво́ръ.
и҆ ѻ҆бъѧ́ша и҆же бѣхꙋ ѿ гра́да пꙋти град̑скїѧ, и҆ нача́ша би́тисѧ·

И҆ призва цр҃ь і҆ѹ҆деѻ́в꙽ на по́мощь и҆ събра́шасѧ вси вкꙋпѣ к немꙋ, и҆ расточи́шасѧ вси въ градѣ и҆ ѹ҆би́ша в то́и дн҃ь, ҂р҃, мꙋжїи.
и҆ съж꙽го́ша гра́дъ и҆ взѧ́ша коры́сти мно́ги въ ѻн̑҇ дн҃ь, і҆ и҆зба́виша цр҃ѧ·

И҆ ви́дѣша и҆же бѧхꙋ ѿ гра́да, ꙗ҆́ко въздержа́ша і҆ѹ҆деи гра́дъ и҆ совѣт̑ і҆ и҆знемого́ша мыслїю и҆хъ, и҆ възъпи́ша къ цр҃ю съ моленїемъ рекꙋщи.
даждь намъ десни́цꙋ и҆ да преста́нꙋтъ і҆ѹ҆де́и ратова́ти насъ и҆ гра́дъ, и҆ ѿвръго́ша ѻ҆рꙋж́їѧ своѧ и҆ сътвори́ша ми́ръ.
и҆ просла́вишасѧ і҆ѹ҆деи пред̑ цр҃емъ и҆ пред̑ всѣми и҆же въ црс̑҇твїи е҆го·

И҆ възврати́шасѧ въ і҆ерс̑҇лим̑ и҆мѣ́ющи коры́сти мно́ги·

и҆ сѣ́де дими́трїи цр҃ь на прс̑҇тлѣ црс̑҇тва свое҆го, и҆ ѹ҆покои́сѧ землѧ̀ пред̑ ни́м꙽.
и҆ солга всѧ е҆ли́ка рече, и҆ ѻ҆тꙋжди́сѧ і҆ѻ҆наѳанꙋ и҆ не възда е҆мꙋ по бл҃готворе́нїѧхъ и҆хже въздасть е҆мꙋ, и҆ ѻ҆скорби е҆го ѕѣло·

По сихъ же ѻ҆брати́сѧ трифо́нъ и҆ а҆нтїѻ́хъ с ни́мъ ѻ҆тро́чищъ ю҆́ныи, и҆ въцр҃и е҆го и҆ възложи дїади́мꙋ.
и҆ събрашасѧ к немꙋ вс̂и во́и и҆́хже расточи дими́трїи·

и҆ ратова проти́вꙋ е҆го и҆ побѣже і҆ и҆змѣни́сѧ·

и҆ взѧ̀ трифо́нъ ѕвѣ́ри, и҆ въздръжа а҆нтїѻ҆хїю·

и҆ писа а҆нтїѻх̑ ю҆́ныи и҆ѻ҆наѳа́нꙋ рекꙋщи·

Поста́влю тебе сщ҃еньствꙋ, и҆ поста́влю тебе над четы́рми предѣ́лы и҆ бꙋ́деши въ дрꙋзѣхъ цр҃ьскихъ·

и҆ посла е҆мꙋ съсꙋ́ды зла́тыѧ въ слꙋже́нїе.
и҆ дас̑҇ е҆мꙋ вла́сть пити въ зла́тѣ, и҆ бы́ти в꙽ перфи́рѣ, і҆ и҆мѣти ѻ҆рꙋ́жїѧ съ зла́томъ·

и҆ си́мона бра́та е҆го поста́ви вое҆во́дою ѿ страны тѵ́ра, да́же до предѣ́лъ е҆гѷпта·

І҆ и҆зы́иде и҆ѻ҆наѳа́нъ и҆ прохожда́ше ѻ҆бо́нꙋ стра́нꙋ рѣки и҆ въ гра́дѣхъ·

и҆ събра́шасѧ к немꙋ всѧ си́лы а҆сѷрьскїѧ въ по́мощь·

и҆ прїиде въ а҆скало́нъ, и҆ срѣто́ша е҆го че́стно ѿ гра́да·

І҆ и́де ѿтꙋ́дꙋ въ га́зꙋ, и҆ заключи́шасѧ и҆же въ га́зѣ, и҆ ѻ҆бъстоѧ ю҆̀.
и҆ пожже ѻ҆́крс̑҇тнаѧ гра́да ѻ҆гнемъ и҆ плѣни ѧ҆̀·

И҆ моли́ша и҆ѻ҆наѳа́на и҆же ѿ га́зы и҆ дасть и҆мъ десни́цꙋ.
и҆ прїꙗ҆́тъ сн҃ы нача́лникъ и҆хъ в зало́зѣ, и҆ посла̀ и҆хъ і҆ерс̑҇лим̑ и҆ проиде странꙋ даже до дамаска·

И҆ слы́ша і҆ѻ҆наѳа́нъ ꙗ҆́ко сꙋть начал̑҇ницы дими́трїевы в꙽ кадисе ꙗ҆же въ галиле́и съ силою мно́гою·

Хотѧ́щи и҆зринꙋти е҆го ѿ страны̀, и҆ срѣте их̑.
бра́та же своего си́мона ѻ҆ста́ви въ странѣ, и҆ прїиде си́монъ къ веѳ꙽сꙋрꙋ, и҆ побороша его дн҃и мно́ги, и҆ заключѝ его і҆ и҆спроси́ша ѹ҆ него десни́цꙋ прїѧти, и҆ дадѐ и҆мъ.
і҆ и҆з꙽гна̀ и҆хъ ѿтꙋдꙋ и҆ взѧ̀ градъ, и҆ постави в немъ стражи·

І҆ѻнаѳа́н꙽ и҆ во́и его прїидо́ша къ водѣ̀ е҆ниса́ръ и҆ ѹ҆ранше ѹ́тро въ по́ли насоръ.
и҆ се ѻ҆полче́нїе и҆ноплеменник̑҇ и҆ срѣтѐ их̑ въ по́ли, и҆ поста́виша нань лаѧтельство въ гора́хъ, сїи же срѣтоша ѿ сꙋпроти́вꙋ.
лаѧ́теле же въста́ша̑ ѿ мѣстъ своих̑ и҆ соста́виша ра́ть·

и҆ побѣго́ша и҆же съ і҆ѻ҆наѳа́номъ всѝ и҆ ни е҆ді́нъ ѻ҆ста́сѧ ѿ нихъ, токмо мат̑таѳїѧ сн҃ъ а҆весолома, і҆ и҆ѹ́да сн҃ъ халфы нача́лника во́емъ·

И҆ растерза і҆ѻ҆наѳан̑҇ ри́зы своѧ, и҆ наложѝ землю на главꙋ̀ свою, и҆ помоли́сѧ.
и҆ ѻ҆брати́сѧ к нимъ въ бра́нь и҆ възъвратѝ их̑ на бѣгъ, и҆ ви́дѣша бѣжа́ща і҆ и҆же ѿ него, и҆ ѻ҆брати́шасѧ к немꙋ и҆ гна́ша с нимъ даже до кади́са ѻ҆полче́нїѧ их̑, и҆ прїидо́ша тꙋ̀.
и҆ падо́ша ѿ и҆ноплеме́нникъ в дн҃ь то́и ҂г҃, мꙋжїи·

и҆ ѻ҆брати́сѧ і҆ѻ҆наѳа́н꙽ въ і҆ерс̑҇ли́мъ·

Глв̑҇а, в҃і·

И ви́дѣ і҆ѻ҆наѳа́нъ ꙗ҆́ко времѧ е҆мꙋ съпоспѣшествꙋ́етъ, і҆ и҆збра̀ мꙋжи и҆ посла̀ и҆хъ в ри́мъ съста́вити и҆ ѻ҆бнови́ти с ни́ми дрꙋжбꙋ, и҆ къ спартїаномъ, и҆ къ и҆нымъ мѣстом̑ посла̀ е҆пистолїи, по семꙋ ѻ҆́бразꙋ·

І҆ и҆до́ша в рим̑, и҆ внидо́ша въ совт̑ѣныи до́мъ и҆ реко́ша·

І҆ѻнаѳа́нъ а҆рхие҆ре́и и҆ лю́ди і҆ѹ҆де́искїѧ посла́ша нас̑҇ ѻ҆бнови́ти дрꙋжбꙋ и҆ съпоборе́нїе по пре́жнемꙋ.
и҆ да́ша е҆пистолїѧ и҆м꙽ і҆ и҆же по мѣсте да и҆зведꙋтъ и҆хъ в землю і҆ѹ́динꙋ съ миром̑.
и҆ с̂е е҆сть ѻ҆́бразъ е҆писто́лїѧмъ и҆́хъже писа̀ і҆ѻ҆наѳа́нъ, къ спартїатомъ·

І҆ѻ҆наѳа́нъ а҆рхїереи, и҆ ста́рцы людїи и҆ жерцы, и҆ про́чїи лю́ди і҆ѹ҆де́искїѧ спартїатомъ бра́тїи ра́доватисѧ понеже преже послани бѧхꙋ е҆писто́лїѧ къ ѻ҆нїанꙋ а҆рхїере́ю, ѿ да́рїѧ црс̑҇рвова́вшаго въ ва́съ, ꙗ҆́ко е҆сте братїѧ наша, ꙗ҆́ко и҆ писа́нїе содръжи́тъ.
въспрїѧ ѻ҆нїѧ мꙋжа посланаго сла́вна, и҆ прїать е҆пистолїа в ни́х же завѣща́но ѻ҆ съпоборе́нїю и҆ дрꙋжбѣ.
мы̀ ѹ҆бо не требꙋю҆ще ѻ҆ сихъ сꙋщихъ ѹ҆тѣшенїе и҆мꙋще ст҃ыхъ книгъ в рꙋка́хъ наших̑.
покꙋшахомсѧ посла́ти к ва́мъ, ѻ҆бновити бра́тъство и҆ дрꙋжбꙋ.
е҆же не ѿчюжди́тисѧ васъ.
мно́га б̂о времена проидо́ша ѿнелѣже посла́сте к намъ·

Мы̀ ѹ҆бо въ всѧко времѧ непреста́нно въ дн҃и вели́кихъ пра́з꙽дникъ и҆ прочихъ подоба́ющихъ днех̑ въспомина́емъ васъ въ жрътвахъ и҆же прино́симъ, и҆ въ ѻ҆бѣтехъ ꙗ҆ко подо́ба е҆сть, и҆ лѣпо въспомина́ти братїю·

Весели́мсѧ ѹ́бо ѻ҆ славе вашеи.
насъ же ѻ҆быидо́ша многи скорби и҆ многи брани, и҆ ратоваша нас̑҇ цр҃и и҆же ѻ҆́крс̑҇тъ насъ.
и҆ не хотѣхом̑ ѹ҆бо стꙋжи́ти вамъ и҆ прочїимъ съпобо́рником̑ и҆ дрꙋгомъ нашимъ, въ бранехъ си́хъ·

И҆мѣемъ б̂о ѿ нб҃се помощь помагающꙋ намъ, і҆ и҆зба́вихомсѧ ѿ врагъ нашихъ и҆ смири́шасѧ врази наши.
і҆ и҆збрахомъ ѹ҆бо новомѣсѧчїѧ а҆нтїѻхова сн҃а и҆ а҆нти́патра и҆а҆с꙽со́на·

И҆ посла́хом̑ к ри́млѧномъ ѻ҆бнови́ти с ними дрꙋжбꙋ и҆ съпоборе́нїе прежнее·

И заповѣдахомъ ѹ҆бо и҆мъ пои҆ти къ ва́мъ, и поздрави́ти вас̑҇ и҆ да́ти ва́мъ ѿ насъ посла́нїе ѻ҆ ѻ҆бновленїѝ бра́тъства на́шего·

И҆ нн҃ѣ добро̀ сътвори́те ѿвѣщава́юще намъ къ симъ.
и҆ с̂е въсписа́нїе посла́нїи их̑же посла̀ ѻ҆нїѧ·

Цр҃ь спар꙽ти́хтом̑ ѻ҆нїа, і҆ѻ҆наѳа́нꙋ сщ҃е́нникꙋ велїкомꙋ радова́тисѧ, ѻ҆брѣтесѧ въ писа́нїих꙽ ѻ҆ спартїатох̑ і҆ и҆ѹ҆деѻх̑ ꙗ҆ко сꙋть братїа, и҆ ꙗ҆ко сꙋть ѿ ро́да а҆враа́млѧ·

И҆ нн҃ѣ ѿнележе сїа познахом̑ добро творите пи́шꙋще нам̑ ѻ҆ ми́рѣ ва́шем̑.
и҆ мыж̑ въсписа́хомъ вам̑ ско́ты ва́ша и҆ ѻ҆дръжа́нїѧ ва́ша наша сꙋть, та́коже и҆ на́ша ваша есть·

И҆ посла́хомъ ѹ҆бо ꙗ҆́ко да възвѣстѧт̑ ва́мъ и҆ сїѧ·

и҆ слы́ша і҆ѻ҆наѳа́нъ ꙗ҆́ко ѻ҆брати́шасѧ нача́лницы димитрїевы съ воѝ мно́гими, па́че пр́ьвѣе бра́тисѧ на́нь.
і҆ изыиде ѿ і҆ерс̑҇ли́ма, и҆ срѣте и҆хъ во а҆маѳите странѣ·

Не бо̀ да́де и҆мъ вре́мѧ да вни́дꙋтъ въ стра́нꙋ е҆го·

и҆ посла̀ съзирателѧ въ ѻ҆полченїе е҆го и҆ ѻ҆братишасѧ и҆ возвѣстиша е҆мꙋ ꙗ҆ко си́це съчинѧ́ютсѧ·

напа́сти на́ нѧ но́щїю·

Ꙗ҆́коже за́иде слн҃це, заповѣ́да і҆ѻ҆наѳа́нъ свои҆мъ бдѣти, и҆ бы́ти съ ѻ҆рꙋжїѧми и҆ готовисѧ въ бра́нь вс̂ю но́щъ, и҆ поста́ви стра́жы по ѻ҆́крс̑҇тъ ѻ҆полченїѧ·

И҆ слы́шаша сꙋпоста́ти ꙗ҆́ко гото́въ е҆сть і҆ѻ҆наѳа́нъ съ свои҆ми на́ брань.
и҆ ѹ҆боа́шасѧ и҆ ѹ҆жасо́шасѧ срд̑цем̑ своим̑ и҆ заж꙽гоша ѻ҆гнемъ ѻ҆полченїѧ своа̀·

І҆ѻ҆наѳа́нъ же і҆ и́же с ни́мъ бѣша, непозна́ша да́же до ѹ҆́тра.
ви́дѧхꙋ же светѣнїѧ горѧ́щїѧ, и҆ погна̀ і҆ѻ҆наѳан̑҇ въ слд̑ѣ и҆хъ и҆ не ꙗ҆́ть и҆хъ, прои҆до́ша̑ б̂о е҆леѳ꙽терꙋ рѣкꙋ, и҆ ѻ҆брати́сѧ і҆ѻ҆наѳан̑҇ къ а҆равом̑ и҆же нарица́хꙋсѧ завде́и, и҆ пораѕи их̑ и҆ взѧ̀ кори́сти и҆хъ·

И҆ ѿи҆де и҆ прїиде во дама́скъ, и҆ прохожа́ше всю̀ странꙋ̀ т̂ꙋ·

Си́мон̑҇ же и҆зыде и҆ прїиде даже до а҆сколона, и҆ ближ̑них̑ тверды́нь, и҆ ѹ҆клони́сѧ во и҆ѻ҆пїю и҆ взѧт̑ ю҆̀·

Слы́ша б̂о ꙗ҆́ко совѣщашасѧ твердыню преда́ти странѣ димитрїевѣ·

И҆ поста́ви т̂ꙋ стражы, да стрегт̑ꙋт е҆го.
и҆ ѻ҆братисѧ і҆ѻ҆наѳан̑҇ и҆ събра ста́рца люд̑скїѧ.
и҆ совѣща́сѧ с ни́ми соѕида́ти твердыню въ і҆ѹ҆де́и, и҆ соѕида́ти стѣ́ны въ і҆ерс̑҇ли́мѣ и҆ въздви́гнꙋти высотꙋ ве́лїю межд̑ꙋ кра́ѧ гра́да.
и҆ во е҆же ѿлꙋчити еѧ̀ ѿ града да бꙋдетъ сїѧ е҆ді́на, ꙗ҆́ко да ни кꙋпꙋю҆тъ ниже прода́ютъ.
и҆ собра́шасѧ созда́ти град̑.
падѐ б̂о стѣна точна и҆же ѿ востока, и҆ ѹ҆готова нарѣца́емое хафенаѳа·

И҆ си́монъ созда̀ а҆дїадꙋ въ сефеле и҆ ѹ҆тверди враты и҆ заво́рами·

И возыска трифонъ црс̑҇твова́ти а҆зїею, и҆ воспрїѧ́ти дїади́мꙋ.
и҆ прострети рꙋкꙋ на а҆нтїѻ́ха цр҃ѧ.
и҆ ѹ҆боа́сѧ да не когда̀ не ѻ҆ста́витъ е҆го і҆ѻ҆наѳа́нъ, и҆ побо́ретъ противꙋ е҆го, и҆ взыска пр́ьвѣе ꙗ҆́ти і҆ѻ҆наѳа́на и҆ ѹ҆бити е҆го.
и҆ воста и҆ прїиде въ веѳсан̑҇, і҆ и҆зыиде і҆ѻ҆наѳан̑҇ въ стрѣтенїе е҆мꙋ, съ ҂м҃, мꙋжїи и҆збранныхъ на ѻ҆полченїе, и҆ прїиде въ веѳсанъ·

И҆ ви́дѣ трифонъ ꙗ҆́ко прїиде і҆ѻ҆наѳа́нъ со воѝ мно́гими.
и҆ прострети на́нь рꙋкѝ ѹ҆боа́сѧ, и҆ воспрїѧтъ е҆го честно, и҆ поста́ви е҆го въ всѣми дрꙋги свои҆ми и҆ да́сть е҆мꙋ да́ры, и҆ заповѣ́да всѣмъ во́емъ свои҆мъ послꙋша́ти е҆го ꙗ҆ко себе·

И҆ рече і҆ѻ҆наѳа́нꙋ, воскꙋю ѹ҆трꙋдѝ вс̂ѧ лю́ди бра́ни не настоа́щи намъ·

И҆ нн҃ѣ ѿпꙋсти и҆хъ в домы и҆хъ.
и҆збери же себѣ мꙋжїи ма́ло и҆же бꙋдꙋтъ с тобо́ю и҆ прїиди со мно́ю въ птоломаидꙋ, и҆ предам̑ тебѣ ю҆̀, и҆ про́чаѧ твердыни и҆ си́лы и҆ всѣхъ и҆же на потребы.
и҆ ѻ҆бра́щсѧ ѿи҆дꙋ·

Сего б̂о ради прїидохъ и҆ вѣрова е҆мꙋ.
и҆ сътвори ꙗ҆́коже реч̑҇ и҆ ѿпꙋсти си́лы, і҆ и҆до́ша въ землю і҆ѹ́динꙋ.
ѻ҆ста́ви же съ собо́ю, ҂г҃, мꙋжеи.
и҆́хже, ҂в҃, ѻ҆ста́ви въ галилеѝ.
тысѧща же и҆зыидоша с нимъ·

Ꙗ҆́коже вни́де і҆ѻ҆наѳа́нъ въ птоломаи҆дꙋ, заключи́ша вра́та гра́дъскаѧ въ птоломаи́де и҆ ꙗ҆́ша е҆го и҆ всѣхъ въшед꙽шихъ с нимъ.
и҆ ѹ҆биша и҆хъ мечемъ·

И҆ и҆ посла̀ трифо́нъ во́и и҆ ко́нницы въ галиле́ю и҆ въ по́ле вели́кое е҆же погꙋби́ти всѣхъ дрꙋговъ і҆ѻ҆наѳа́новыхъ·

позна́ша ꙗ҆́ко ѧт̑ е҆сть і҆ѻ҆наѳан̑҇ и҆ бїенъ и҆ вс̂и и҆же с ним꙽.
и҆ моли́ша са́ми себе і҆ и҆до́ша ѹ҆гото́вани на ѻ҆по́лченїе·

И҆ ви́дѣша гонимїи ꙗ҆́ко ѻ҆ дꙋши и҆мъ е҆сть.
и҆ ѻ҆братишасѧ и҆ прїидо́ша всѝ съ ми́ромъ въ зе́млю і҆ѹ́динꙋ.
и҆ пла́кашасѧ і҆ѻ҆наѳа́на і҆ и҆же с ни́мъ.
и҆ ѹ҆боа́шасѧ ѕѣло, и҆ пла́каше ве́сь і҆и҆л҃ь пла́чемъ ве́лїимъ.
и҆ взыска́ша вс̂и ꙗ҆зы́цы и҆же ѻ҆́крс̑҇тъ и҆хъ съкрꙋшити и҆хъ·

Рѣша б̂о не и҆мѣ́ютъ нача́лника и҆ помага́ющаго, нн҃ѣ ѹ҆бо ратꙋ́емъ и҆хъ, и҆ ѿи҆мемъ ѿ чл҃къ па́мѧть и҆хъ·

Глв̑҇а, г҃і·

И слы́ша си́монъ ꙗ҆́ко събра̀ трифо́нъ си́лꙋ мно́гꙋ прїити в зе́млю і҆ѹ́динꙋ и҆ съкрꙋши́ти ю҆̀, и҆ ви́дѣ лю́ди ꙗ҆́ко сꙋть въ стра́сѣ и҆ трепетѣ, и҆ взы́иде і҆ерс̑҇лимъ и҆ събра лю́ди и҆ моли и҆хъ и҆ рече.
в̂ы вѣсте е҆ли́ко а҆зъ и҆ бра́тїѧ моѧ и҆ до́мъ ѿц҃а мое҆го.
сътвори́хомъ ѻ҆ зако́нѣхъ и҆ ѻ҆ ст҃ыхъ бра́ни и҆ тѣсноты и҆́хже ви́дѣхомъ·

Сего ра́ди погибо́ша бра́тїѧ моѧ вси ради іи҆л҃ѧ и҆ ѻ҆ста́хъ а҆зъ е҆ді́нъ·

И҆ нн҃ѣ не бꙋ́ди м̂и пощадѣти дш҃а мое҆ѧ въ всѧ́ко вре́мѧ ско́рбїи, не бо̀ лꙋчши е҆смь бра́тїи мое҆ѧ·

ѻ҆ба́че м꙽ститисѧ и҆́мамъ ѻ҆ ꙗ҆зы́кꙋ мое҆мъ и҆ ѻ҆ ст҃ых̑, и҆ ѻ҆ женахъ и҆ ча́дѣхъ на́шихъ·

Ꙗ҆́ко събра́шасѧ вс̂и ꙗ҆зы́цы сътръти нас̑҇ вра́жды ра́ди·

И҆ възгорѣшасѧ дх҃ом̑ лю́дїе вкꙋпѣ послꙋшати словес̑҇ сихъ.
и҆ ѿвѣща́ша гла́сомъ ве́лїим̑ рекꙋщи·

ты е҆си во́ждь на́шъ в꙽мѣсто і҆ѹ́дино и҆ѻнаѳа́на бра́та твоего·

побори бра́нь на́шꙋ, и҆ всѧ̀ е҆ли́ка же рече́ши намъ сътво́римъ·

И҆ събра вс̂и мꙋжи бра́нницы, и҆ ѹ҆скори съверши́ти всѧ̀ стѣ́ны і҆ерс̑҇лим꙽скїѧ, и҆ ѹ҆тверди е҆го ѻ҆́крс̑҇тъ·

И҆ посла и҆ѻ҆наѳа́на сн҃а а҆весало́мова, и с ни́мъ си́лꙋ дово́лнꙋ въ и҆ѻ҆п꙽пїю·

і҆ и҆згна сꙋщихъ в неи и҆ пребыс̑҇ т̂ꙋ·

И҆ въздвижесѧ трифонъ ѿ птоломаиды съ си́лою ве́лїею и҆ прїиде въ зе́млю і҆ѹ́динꙋ, і҆ и҆ѻ҆наѳа́нъ с ни́мъ въ стра́жд̑и·

Си́мон꙽ же ѻ҆полчи́сѧ въ а҆дидꙋсѣ на лицы по́лѧ·

И҆ ꙗ҆ко позна трифо́нъ ꙗ҆́ко въста си́монъ вмѣсто бра́та свое҆го и҆ѻ҆наѳа́на, и҆ ꙗ҆́ко срѣсти е҆мꙋ и҆мать бра́нь·

Посла к немꙋ послы̀ рекꙋщи, сребра ради и҆же до́лженъ бра́тъ твои и҆ѻ҆наѳа́нъ цр҃ю и҆хъже ради и҆мѣ потре́бꙋ съдержимъ е҆го·

И҆ нн҃ѣ послѝ сребра тала́нтъ р҃, и҆ дв̂а сн҃а е҆го в зало́гъ, да не ѿпꙋщенъ бѣжитъ ѿ нас̑҇ и҆ ѿпꙋстимъ е҆го·

И҆ позна си́монъ ꙗ҆́ко ле́стїю гл҃аше с ни́мъ.
и҆ посла̀ сребро и҆ ѻ҆́троки.
да не ко́гда вра́жда бꙋ́детъ въ лю́дехъ рекꙋщи·

ꙗ҆́ко не посла̀ е҆мꙋ сребра и҆ ѻ́трокъ и҆ поги́бе·

И҆ посла̀ ѻ҆́троки, и҆ р҃, тала́нтъ.
и҆ солга и҆ не ѿпꙋсти и҆ѻ҆наѳа́на·

И҆ по си́хъ прїидетъ трифо́нъ въ странꙋ да сътре́тъ е҆ѧ̀, и҆ ѻ҆быдо́ша по пꙋти и҆же веде́тъ въ а҆до́ръ.
и҆ си́монъ и҆ ѻ҆полче́нїе е҆го въсхожа́хꙋ на всѧ́ко мѣсто и҆дѣже и҆дѧ́ше·

І҆ и́же ѿ кра́а посла́ша къ трифо́нꙋ старѣ́иших꙽, да потщитсѧ прїити к ни́мъ по пꙋсты́ни, и҆ посла́ти и҆мъ пи́ща·

И҆ ѹ҆готова трифо́нъ всѧ̀ ко́нники е҆го е҆же прїити·

И въ ѻ́нꙋ но́щь б̂ѣ снг̑҇ѣ ве́лїи ѕѣ́ло, и҆ не прїиде снѣ́га ради·

и҆ въста и҆ ѿи҆де въ галаа҆дити́дꙋ, и҆ е҆гда приближи́сѧ васка́ме.
ѹ҆би и҆ѻ҆наѳа́на, и҆ погребе и҆̀ т̂ꙋ·

И҆ ѻ҆братисѧ трифон̑҇, і҆ и҆де в зе́млю свою·

И҆ пос̂ла си́монъ и҆ взѧ́тъ ко́сти и҆ѻ҆наѳа́на бра́та свое҆го, и҆ погребе и҆̀ въ моди́нѣ гра́дѣ ѿт̑ц҃ъ свои҆хъ.
и҆ пла́каша е҆го весь і҆и҆л҃ь пла́чемъ ве́лїимъ, и҆ рыда́хꙋ е҆го дн҃и мно́ги·

Създа си́монъ нагро́бъ ѿц҃а свое҆го, и҆ бра́тїи свои҆хъ и҆ възнесе е҆го видѣ́нїемъ, ка́менїемъ теса́нымъ съза́ди и҆ пред̑и̑, и҆ поста́ви на́ нѧ сед̑мь пирамид̑ е҆ді́нꙋ проти́вꙋ е҆ді́ноѧ, ѿц҃ꙋ и҆ мт҃ри и҆ четы́ремъ бра́тїѧм꙽, и҆ симъ сътвори ѻ҆гра́ды и҆ ѻ҆бложи столпы вели́ки·

и҆ сътвори на столпѣхъ зна́менїѧ къ па́мѧти вѣ́чнѣи, и҆ бли́зъ зна́менїѧ корабли и҆зваѧ́ны.
и҆же ви́дѧт̑сѧ ѿ всѣхъ плавающих̑ на мори.
и҆ се́и гро́бъ и҆же сътвори в моди́нѣ да́же до сего дн҃е·

Трифо́нъ же хожд̑аше ле́стїю съ а҆нтїѻ́хомъ цр҃емъ ю҆́ным̑ и҆ ѹ҆би е҆го и҆ црс̑҇твова в него мѣсто, и҆ възложи на сѧ дїади́мꙋ а҆сїискꙋю, и҆ сътвори ꙗ҆́звꙋ вели́кꙋ на землѝ·

И҆ създа си́монъ тверды́нѧ і҆ѹ҆деискїа и҆ ѻ҆гради столпы высо́кими и҆ стѣна́ми ве́лїими и҆ вра́ты и҆ заво́рами, и҆ положи пи́ща въ тверды́нѧхъ·

І҆ и҆збра си́монъ мꙋжи и҆ посла къ дими́трїю цр҃ю да сътво́ритъ ѻ҆ставле́нїе странѣ·

Ꙗ҆́ко вс̂и дѣѧ́нїѧ трифо́новы бѣша похище́нїѧ·

И҆ посла̀ е҆мꙋ дими́трїи цр҃ь по словесе́хъ сих̑, ѿвѣща е҆мꙋ и҆ написа е҆пито́лїю сицевꙋ·

Цр҃ь дими́трїи, си́монꙋ а҆рхїере́ю, и҆ ста́рцемъ ꙗ҆зы́ка і҆ѹ҆де́иска ра́доватисѧ·

Вѣне́цъ зла́тыи и҆ прьстен̑҇ ꙗ҆́же посла́лъ е҆си въспрїѧ́хом̑·

и҆ гото́ви е҆смы сътвори́ти съ вами ми́ръ велик̑҇.
и҆ писати ꙗ҆́же на потре́бы, ѻ҆ста́вити вамъ ѻ҆ставле́нїѧ·

И҆ е҆ли́ка поста́вихомъ вамъ ѹ҆крѣпѧт̑сѧ.
и҆ тверды́нѧ ꙗ҆́же създасте да бꙋ́дꙋтъ вамъ·

ѿпꙋща́емъ же невидѣ́нїѧ и҆ съгрѣше́нїѧ да́же до дне́шнѧго дн҃е·

И҆ вѣне́цъ е҆гоже до́лжни бы́сте, и҆ а́ще чт̂о и҆́но бы́сть да́нное въ і҆ерс̑҇лимѣ ктомꙋ да не бꙋдетъ да́нное·

И҆ а́ще нѣцыи потре́бны ва́м꙽ писа́ти ꙗ҆́же ѻ҆ насъ да пи́шꙋтсѧ·

и҆ да бꙋ́детъ междꙋ на́ми ми́ръ·

Лѣта, р҃о, ѿꙗ҆то е҆сть и҆́го ꙗ҆зы́къ ѿ і҆и҆л҃ѧ·

И҆ нача́ша лю́ди і҆и҆л҃евы писа́ти въ писа́нїѧхъ и҆ въ гл҃анїѧх̑·

Лѣта перваго си́мона а҆рхїереѧ вели́каго во́ина и҆ во́жда і҆ѹ҆де́искаго·

Въ дн҃ехъ ѻ҆́нѣхъ прїиде въ га́зꙋ, и ѻ҆бы́иде е҆ѧ̀ бра́ньми·

И҆ сътвори миханы и҆ приближи́сѧ къ гра́дꙋ і҆ и҆̀зби стлъпъ е҆ді́нъ и҆ взѧ̀ е҆го, и҆ въскача́хꙋ въ гра́дъ и҆же бѧ́хꙋ въ махи́нѣ·

И҆ быс̑҇ движе́нїе ве́лїе въ гра́дѣ, и҆ възыидо́ша и҆же бѣхꙋ въ градѣ съ жена́мы и҆ ча́ды на стѣнꙋ растерза́ны и҆мꙋще ри́зы своѧ, и҆ възопи́ша гла́сомъ ве́лїимъ молѧ́щи си́мона десни́цꙋ и҆мъ да́ти, и҆ реко́ша.
не сътвори намъ по лꙋка́въствомъ на́шимъ, н̂о по млс̑҇ти твое́и·

И҆ ѻ҆ста́ви ѧ҆̀ си́монъ не вое҆ва и҆хъ, і҆ и҆згна и҆хъ ѿ гра́да и҆ ѻ҆чи́сти до́мы въ ни́х꙽же бѧ́хꙋ и҆́долы·

И҆ та́ко вни́де во́нь с пѣсньми блс̑҇вѧщи г҃а.
и҆ и҆звръжена ѿ него всѧ нечистота.
и҆ всели в немъ мꙋ́жи и҆же зако́нъ тво́рѧтъ.
и҆ ѹ҆тверди е҆го и҆ сътвори себѣ в немъ ѻ҆бита́нїе·

І҆ и́же ѿ кра́ѧ въ і҆ерс̑҇лмѣ възбранѧ́хꙋ и҆мъ и҆сходи́ти и҆ въходи́ти въ стра́нꙋ и҆ кꙋпи́ти и҆ пода́ти·

и҆ а҆лка́хꙋ ѕѣ́ло, и҆ мно́ѕи ѿ них̑ гла́домъ погибо́ша·

И҆ възопи́ша къ си́монꙋ десни́цꙋ прїѧти и҆ да́сть и҆мъ, і҆ и҆згна̀ и҆хъ ѿтꙋ́дꙋ.
и҆ ѻ҆чи́сти кра́и ѿ ѻ҆скверне́нїѧ·

и҆ вниде вонь въ тре́тїи и҆ двадесѧ́тыи дн҃ь втораго мс̑҇ца.
лѣта, ро҃а, съ хваленїем꙽ и҆ ва́їѧми, и҆ кинарех̑ и҆ кѷмвалех̑ и҆ сопѣлехъ и҆ пѣ́сньми и҆ пѣньми, ꙗ҆́ко сокрꙋшисѧ вра́гъ ве́лїи ѿ і҆и҆л҃ѧ·

И҆ поста́ви въ всѧко лѣто провожда́ти дн҃и тыѧ съ веселїем꙽.
и҆ ѹ҆твръди го́рꙋ ст҃ꙋю ꙗ҆́же близ̑ кра́ю, и҆ вселисѧ т̂ꙋ самъ і҆ и҆же с нимъ.
и҆ ви́дѣ си́монъ і҆ѻ҆а́нна сн҃а свое҆го, ꙗ҆́ко мꙋжъ е҆сть.
и҆ поста́ви е҆го во́жда си́лъ всх̑ѣ и҆ всели́сѧ въ газа́рѣ·

Глв̑҇а, д҃і·

И въ лѣто, ро҃в.
събра̀ цр҃ь димитрїи во́и своѝ і҆ и҆де въ медїю взѧ́ти по́мощъ себѣ, ꙗ҆́ко да ратꙋе́тъ проти́вꙋ трифо́на·

И҆ слы́ша а҆рсакїи цр҃ь прьскїи и҆ медьскїи, ꙗ҆́ко прїиде дими́трїи въ предѣлы е҆го·

И҆ посла̀ е҆ді́ного ѿ нача́лникъ своих̑, ꙗти е҆го жи́ва.
і҆ и́де и҆ пораѕи ѻ҆полченїе димитрїево, и҆ ꙗ҆́тъ е҆го и҆ приведе е҆го къ а҆рсакїю, и҆ всади е҆го в тем̑ницꙋ·

и҆ ѹ҆мол̑҇ча землѧ̀ вс̂ѧ дн҃и си́моновы, и҆ в꙽зыска бл҃га ꙗ҆зы́кꙋ свое҆мꙋ.
і҆ ѹ҆годисѧ и҆мъ вла́сть е҆го, и҆ слава е҆го вс̂ѧ дн҃и.
и҆ съ всею̀ сла́вою свое́ю взѧ̀ і҆ѻ҆п꙽пїю въ приста́нище.
и҆ сътворѝ въход̑ ѻ҆́токомъ мо́рьским꙽, и҆ распростре предѣлы ꙗ҆зыкꙋ свое҆мꙋ.
и҆ ѹ҆дръжа странꙋ̀ и҆ собра̀ плѣненїе мно́го·

и҆ господ̑ствова газары, и҆ веѳ꙽сꙋроны, и҆ краем̑, и҆ ѿꙗ҆́тъ нечистоты ѿ него, и҆ не бысть противлѧ́ющагосѧ е҆мꙋ.
и҆ ко́ждо дѣла́ше зе́млю свою̀ с миромъ, и҆ землѧ̀ даѧ́ше жита своѧ и҆ древеса польскїѧ плодъ сво́и·

Ста́рци на стогнахъ седѧ́хꙋ, и҆ вс̂и ѻ҆ бл҃гыхъ бесѣдовахꙋ, и҆ ю́ноши ѻ҆блача́хꙋсѧ сла́вою и҆ ризы ратны, гра́домъ дарова́хꙋ пи́ща и҆ въчинѧ́хꙋ их̑ в꙽ сосꙋды ѹ҆тверженїѧ донелѣже и҆меновано е҆сть и҆мѧ сла́вы е҆го даже до кра́ѧ земли, и҆ сътвори миръ на землѝ.
и҆ възвесели́сѧ і҆и҆л҃ь веселїемъ ве́лїимъ, и҆ сѣде ко́ждо под̑ виноградом̑ своим̑ и҆ смоко́вницею.
и҆ не быс̑҇ ѹ҆страша́ющаго и҆хъ, и҆ ѻ҆скꙋдѣ ратꙋѧ́и их̑ на́ земли.
и҆ цр҃и сътрошасѧ въ дн҃и ѻ҆́ны.
и҆ ѹ҆крѣпи всѣхъ смитеныхъ людїи свои҆хъ, зако́на възыска, и҆ ѿꙗ҆́тъ всѧко безаконїе и҆ лꙋка́въство.
ст҃аѧ прослави, и҆ ѹ҆мно́жи сосꙋды ст҃ыхъ·

И҆ слы́шасѧ в ри́мѣ ꙗ҆́ко ѹ҆́мре і҆ѻ҆наѳа́нъ, и҆ да́же до спар꙽тїи слы́шасѧ.
и҆ ѻ҆скорбишас̑҇ ѕѣло, ꙗ҆́ко слы́шаша и҆же си́монъ бра́тъ е҆го бысть въ мѣсто е҆го а҆рхїере́и.
и҆ дръжа вс̂ю странꙋ и҆ гра́ды в не́и, писа́ша к немꙋ дщицы мѣдѧны, ѻ҆бновити к немꙋ дрꙋжбꙋ и съпоборенїе ꙗ҆же сътвори́ша съ і҆ѹ́дою і҆ѻ҆наѳа́номъ и҆ братїею е҆го.
и҆ почто́шасѧ предъ цр҃ковїю въ і҆ерс̑҇ли́мѣ·

И҆ с̂е ѻ҆́бразъ посланїи и҆́хже посла́ша спартїа́ти·

Спартїатъ нача́лницы и҆ град̑, жерцꙋ великꙋ и҆ ста́рцемъ, жерцемъ и҆ прочимъ лю́демъ і҆ѹ҆де́искимъ братїѝ радова́тисѧ·

Ста́рцы и҆же по́слани сꙋть къ людемъ на́шимъ возвѣсти́ша намъ ѻ҆ ва́шеи сла́вѣ и҆ чести·

И҆ възвесели́хомсѧ ѻ҆ прихо́дѣ и҆хъ, и҆ писахомъ и҆же ѿ них̑ речена̑ въ совѣтехъ людїи си́це, н̂оминїю а҆нтїѻ́ховꙋ, и҆ а҆нтипатровꙋ и҆а҆соновꙋ, старцы і҆ѹ҆де́истїи прїидо́ша къ на́мъ поновлѧ́ющи с на́ми дрꙋж꙽бꙋ.
и҆ ѹ҆год̑но лю́демъ въспрїѧ́ти мꙋж́и славно, и҆ положи́ти восписа́нїе словес̑҇ их̑ въ ѿлꙋчныѧ люд̑скїѧ кни́ги.
да бꙋдетъ па́мѧть лю́дем̑ спартїа́том̑ ѻ҆́бразъ же тѣхъ писа́хомъ си́монꙋ архїерею·

Посемъ же посла̀ си́монъ нꙋминїѻ́на в ри́мъ и҆мѣ́ющи щи́тъ злат̑ вели́къ, тѧ́гостїю мнас̑҇, ҂а҃. на ѹ҆ставленїе с ни́ми дрꙋж꙽бы·

Ꙗ҆́коже слы́шаша лю́ди словеса сїѧ рѣша.
кꙋ́ю блгд̑ть воздадим̑ си́монꙋ и҆ сн҃омъ е҆го·

Ѹ҆твръди б̂о сам̑ и҆ бра́тїѧ е҆го и҆ до́мъ ѿц҃а е҆го.
и҆ побѝ враги і҆и҆л҃евы ѿ них꙽, и҆ поста́виша е҆мꙋ свободꙋ·

И҆ написа́ша во дьскѝ мѣдѧ́ны, и҆ поста́виша въ столпѣ въ горѣ сїѻнѣ.
и҆ с̂е е҆сть ѻ҆́бразъ писанїѧ, въ и҃і, дн҃ь мс̑҇ца, е҆лꙋлъ.
лѣта, ро҃в.
и҆ третїего лѣта си́монова̑ а҆рхъереиства въ і҆ерс̑҇ли́ме.
въ соборе вели́це жерцовъ, и҆ людеи и҆ кнѧ́ѕеи ꙗ҆зы́къ и҆ ста́рцеи страны̀ и҆звѣствꙋе҆мъ ва́мъ.
понеже мно́гащи бы́ша бра́ни въ странѣ̀.
си́монъ же сн҃ъ мат꙽таѳїевъ сн҃въ и҆а҆ри́вовъ, и҆ бра́тїѧ е҆го въда́ша себе бѣдѣ, и҆ сташа съпостатомъ ꙗ҆́зыкꙋ и҆хъ, ꙗ҆́ко да стоѧт̑ ст҃аѧ и҆хъ и҆ законъ·

И҆ славою вели́кою просла́виша лю́ди своѧ.
и҆ събра̀ і҆ѻ҆наѳа́нъ лю́ди своѧ, и҆ бысть и҆мъ а҆рхїереи.
и҆ приложисѧ къ лю́дем̑ своим̑.
и҆ хотѣша враѕи и҆хъ вни́ти въ странꙋ их̑ и҆ съкрꙋшити странꙋ их̑, и҆ простеръти рꙋкꙋ на ст҃аѧ их̑·

Тогда̀ въста̀ си́мон̑҇, и҆ брасѧ за лю́ди своѧ.
и҆ разда̀ сребрьник̑҇ мно́го свои҆м꙽, и҆ въ ѻ҆рꙋжїи силы ꙗ҆зы́ка свое҆го.
и҆ дас̑҇ и҆мъ ѻ҆броки и҆ ѹ҆тверди грады і҆ѹ҆де́искїѧ.
и҆ веѳсꙋран꙽, і҆ и҆же въ предѣлех̑ і҆ѹ҆де́иских̑ и҆деже бѧхꙋ ѻ҆рꙋжїѧ бра́нникъ преже, і҆ постави т̂ꙋ стра́жи мꙋж́и і҆ѹ҆де́искїа·

І҆ и҆ѻ҆п꙽пїю ѹ҆тверди и҆же на примо́рїю.
и҆ газара и҆же быс̑҇ въ предѣлех̑ а҆зота, в нем̑же врази преже ѻ҆битахꙋ.
и҆ постави т̂ꙋ іѹ҆де́и, и҆ е҆ли́каж̑ потребна бѣхꙋ на ѹ҆правленїе сих̑ положи в них̑·

и҆ ви́дѣша лю́дїе вѣрꙋ си́моновꙋ, и҆ сла́вꙋ ю҆́же помышлѧше сътворити лю́демъ свои҆м꙽·

И҆ поста́виша е҆го во́жда свое҆го и҆ а҆рхїере́ѧ.
сего ради зане же сътвори сїѧ всѧ.
и҆ правдꙋ и҆ вѣрꙋ е҆ѧ́же съдръжа лю́дем̑ свои҆мъ.
и҆ възыска всѧко възнести лю́ди своѧ.
и҆ въ дн҃и е҆го ѹ҆спѣва́ше в꙽ рꙋкꙋ е҆го.
е҆же и҆зѧти ꙗ҆зы́ки ѿ страны̀ е҆го, і҆ и҆же въ ѓрадѣ двд҃вѣ бѣхꙋ въ і҆ерс̑҇ли́мѣ.
и҆же сътвори́ша себѣ кра́и и҆з негож̑ и҆схожд̑ахꙋ и҆ сквернѧхꙋ ѻ҆́крс̑҇тъ ст҃ых̑.
и҆ творѧхꙋ ꙗ҆́звꙋ ве́лїю въ чистотѣ, и҆ поста́ви в нем̑ мꙋж́и і҆ѹ҆де́иски и҆ ѹ҆тверди е҆го къ ѹ҆крѣпленїю страны и҆ гра́да, и҆ въздви́же стѣны въ і҆ерс̑҇ли́мѣ·

И҆ цр҃ь димитрїи поста́ви е҆мꙋ нача́ло жречества.
посихъ, и҆ сътвори е҆го дрꙋга свое҆го, и҆ просла́ви е҆го сла́вою вели́кою·

Слыша б̂о сѧ ꙗ҆ко прои҆менꙋю́тсѧ і҆ѹ҆деѝ ѿ ри́млѧн̑҇ дрꙋѕи и҆ съпобо́рники.
и҆ ꙗ҆́ко въспрїѧ́ша посло́въ си́моновых̑ пресла́вно, и҆ ꙗ҆́ко бл҃говоли́ша і҆ѹ҆деи и҆ жер̑҇цы бы́ти си́мона во́жда і҆ере́ѧ въ вк̑҇ѣ до́ндеже воста́нетъ про̑҇ркъ вѣренъ, и҆ да бꙋдетъ над̑ ними вое҆во́да·

Ꙗ҆́ко радити е҆мꙋ ѻ҆ ст҃ыхъ и҆ поставлѧ́ти и҆хъ на дѣла и҆хъ, и҆ на странꙋ̀ и҆ на ѻ҆рꙋжїѧ и҆ на твердынѧхъ, ꙗ҆́ко да радити е҆мꙋ ѻ҆ ст҃ыхъ.
и҆ да слы́шит̑сѧ ѿ всѣхъ.
и҆ пишт̑ꙋсѧ въ и҆мѧ е҆го вс̂ѧ под̑писанїа въ странѣ, и҆ да ѻ҆блачит̑сѧ в꙽ порфи́рѧнꙋ и҆ зла́тꙋ ры́зꙋ.
и҆ не лт̑ѣ бꙋдетъ никомꙋже ѿ людїи и҆ ѿ жрецъ ѿврещисѧ таковыхъ и҆ въпреки гл҃ати ѿ него реченымъ.
и҆л̂и съвокꙋпити сонмъ въ стра́нѣ без̑ него, и҆ ѻ҆блещи перфирꙋ, и҆ носи́ти ѻ҆рꙋжїе позлащено.
и҆же а҆ще сътворитъ внѣ̀ сихъ, и҆л̂и ѿвръжетсѧ сихъ пови́ненъ бꙋдетъ·

И҆ ѹ҆годисѧ всѣмъ лю́демъ поста́вити си́мона, и҆ сътворити по словесехъ сихъ·

И҆ въспрїѧ́ть си́монъ и҆ бл҃гоѹ҆годи нача́ло жречествова́ти и҆ бы́ти вое҆во́да и҆ нача́лник̑҇ ꙗ҆зы́ка і҆ѹ҆де́иска и҆ жрецъ и҆ пред̑стоа́ти всѣмъ·

И҆ писа́нїе сїе рѣша въдрꙋѕити во дъщицахъ мѣдѧ́ныхъ и҆ поста́вити их̑ въ притворе ст҃ыхъ, въ мѣстѣ сла́внѣ.
ѻ҆́бразъ же сихъ поста́вити въ кни́гохранителницꙋ ꙗ҆́ко да и҆́мать си́монъ и҆ сн҃ове е҆го·

Глв̑҇а, е҃і·

И посла̀ цр҃ь а҆н꙽тїѻ́хъ сн҃ъ дими́трїѧ цр҃ѧ посланїѧ ѿ ѻ́стровъ морских̑.
сі́монꙋ а҆́рхиі҆ерею и҆ нача́лникꙋ ꙗ҆зыка і҆ѹ҆де́иска и҆ всемꙋ ꙗ҆зы́кꙋ·

И҆ бѣхꙋ съдръжа́щи ѻ҆́бразъ сїи·

Цр҃ь антїѻ́хъ, си́монꙋ жръцꙋ вели́комꙋ и҆ ꙗ҆зыка нача́лникꙋ, и҆ ꙗ҆зы́кꙋ і҆ѹ҆деискꙋ ра́доватисѧ·

Понеже мꙋжи гꙋбители ѹ҆держа́ша црс̑҇твїе ѿц҃ъ нашихъ·

Хощꙋ же съзрѣти црс̑҇тво и҆ да ѹ҆строю е҆̀ ꙗ҆́ко бысть прежде·

И҆ ѿ стра́нъ събрахъ мно́жество силъ, и҆ сътвори́хъ кораблѧ̀ воискїѧ.
хощꙋ же и҆зыитѝ въ странꙋ да ѿм꙽щꙋ̀ растлившим̑ странꙋ̀ нашꙋ и҆ ѻ҆пꙋстившимъ грады мно́ги въ цр҃ьствїи мое҆мъ·

Нн҃ѣ ѹ҆бо ѹ҆ставлѧ́ю тебѣ всѧ̀ приноше́нїѧ ꙗ҆́же ѹ҆ста́виша тебѣ предо мно́ю цр҃и.
и҆ е҆ли́кы и҆́ны да́ры ѻ҆ста́виша тебѣ и҆ ѻ҆бращꙋ тебѣ творити странꙋ твою зако́ны страны твоеѧ, і҆ерс̑҇лимꙋ же ст҃ꙋ быти и҆ свобо́днꙋ.
и҆ всѧ ѻ҆рꙋжїѧ е҆ли́ка ѹ҆готовалъ е҆си и҆ твердынѧ и҆хже създа́лъ е҆си и҆хже дръжи́ши да бꙋдꙋтъ т̂и.
и҆ весь длъгъ цр҃евъ и҆ ꙗ҆́же подоба́ютъ цр҃еви ѿ нн҃ѣ и҆ въ всѧко вре́мѧ ѻ҆ста́вѧтсѧ тебѣ·

Ꙗ҆́коже ѹ҆строи҆мъ црс̑҇тво наше просла́вимъ тебе и҆ люд̑и̑ твоѧ, и҆ цр҃ковь сла́вою вели́кою·

Ꙗ҆́коже ꙗ҆́ви́тсѧ сла́ва ваша по всеи землѝ·

Лѣта ро҃д, и҆зы́иде а҆нтіѻ҆́хъ в землю ѿц҃ъ свои҆хъ, и҆ събра́шасѧ к немꙋ всѝ во́и.
ꙗ҆́коже малом̑ бы́ти ѻ҆ста́вшимъ съ трифо́номъ·

И҆ гна̀ е҆го а҆нтїѻхъ цр҃ь и҆ прїиде бѣжа́щи въ дорꙋ и҆же при мори.
вѣдѣ б̂о ꙗ҆́ко събра́шасѧ ѕла́ѧ нань, и҆ ѻ҆ста́виша е҆го во́и.
и҆ ста̀ а҆нтїѻх̑ во до́ре и҆ с нимъ в҃і темъ мꙋжїи бра́нных̑.
и҆ ҂и҃ ко́нникъ·

И҆ ѻ҆бы́иде гра́дъ, и҆ корабли ѿ мо́рѧ прїидоша и҆ ѻ҆скоръблѧше градъ ѿ землѧ и҆ морѧ.
и҆ не ѻ҆ста́ви ни е҆ді́наго и҆зыити и҆л̂и внити·

Прїиде же нꙋминїѧ і҆ и҆же с ним꙽ ѿ ри́ма и҆мꙋще посланїе цр҃емъ и҆ странамъ в них же напи́сана сїѧ·

Лꙋкїи и҆па́тъ ри́мъскїи, птоломе́ю цр҃ю ра́доватисѧ·

Послы̀ і҆ѹ҆деистїи прїидо́ша к нам̑ дрꙋги наша и҆ спобо́рники, ѻ҆бновлѧ́ющи преж̑нюю дрꙋжбꙋ и҆ съпоборе́нїе·

Послани ѿ си́мона а҆рхїере́ѧ людїи і҆ѹ҆де́иских̑, принесо́ша же и҆ щит̑ зла́тыи мнасъ ҂а҃, годѣ бы́сть намъ писа́ти цр҃ем̑ и странамъ, да не наносѧтъ и҆мъ ѕла́ѧ, да не ратꙋ́ютъ и҆хъ ни гра́дов̑҇ и҆хъ ни стра́нъ и҆хъ, и да не съпоборѧютъ ратꙋющимъ противꙋ их̑·

лѣпо намъ б̂ѣ прїѧти ѿ них̑ щит̑.
аще ѹ҆бо нѣцыи гꙋби́теле бѣжа́ша ѿ страны и҆хъ к꙽ вамъ, преда́ите их̑ си́монꙋ а҆рхїере́ю да м꙽сти́тъ на них꙽ по зако́нꙋ свое҆мꙋ·

Сїа же писа̀ димитрїю цр҃ю, и҆ а҆т꙽талꙋ, и҆ а҆ра́ѳꙋ, и҆ а҆рса́кꙋ, и҆ въ всѧ страны.
и҆ сам̑ѱа́кꙋ, и҆ спартїа́томъ, и҆ въ дѣлонъ и҆ ми́дъ, и҆ сикїѻнꙋ, и҆ карїю, и҆ самон̑҇ и҆ пам꙽филїю, и҆ ликїю, и҆ а҆ликарнасон̑҇ и҆ въ родъ, и҆ фасели́дꙋ, и҆ кою, и҆ сиди́нꙋ, и҆ гортинанꙋ, и҆ кни́дꙋ, и҆ кѷпрꙋ, и҆ киринїю·

ѻ҆́браз꙽ же их̑ писа̀ си́монꙋ а҆рхїере́ю·

А҆нтїѻ́х же цр҃ь ѻ҆полчи́сѧ на доръ въ второ́е, приводѧ̀ вы́нꙋ е҆мꙋ рꙋки и҆ миханы̀ творѧ̀·

И҆ заключи трифо́на е҆же не входи́ти ниже и҆сходи́ти·

И҆ посла̀ е҆мꙋ симон̑҇ ҂в҃, мꙋжїи си́лныхъ в помощь е҆мꙋ, и сребро̀ и҆ зла́то и҆ сосꙋды мно́ги.
и҆ не въсхотѣ и҆хъ прїѧти, н̂о ѿвръже всѧ е҆ли́ка завѣща̀ е҆мꙋ прежде, и҆ ѻ҆чюжди́сѧ ѿ него.
и҆ посла̀ к немꙋ а҆ѳиновїѧ е҆ді́ного ѿ дрꙋгъ свои҆хъ, да побесѣдꙋетъ с ни́мъ рекꙋщи·

Вы̀ дръжитѐ і҆ѻ҆п꙽пїю и҆ гада́рꙋ и҆ кра́и иже е҆сть въ і҆ерс̑҇лимѣ гра́дѣ црс̑҇тва мое҆го.
предѣлы и҆хъ ѻ҆пꙋстѣсте, и҆ сътвори́сте ꙗ҆́звꙋ вели́кꙋ на землѝ, и҆ господьствовасте мѣста мно́га въ црс̑҇твїи мое҆мъ·

Нн҃ѣ ѹ҆бо ѿдади́те гра́ды и҆́хже взѧсте.
и҆ дани мѣстъ и҆́хже ѻ҆господ̑ствова́сте внѣ̀ предѣлъ і҆ѹ҆де́искихъ а҆ще же нѝ, да́ите въ мѣсто сихъ е҃ сот̑ талан̑҇т꙽ сребра̀, и҆ за ѻ҆пꙋстѣнїе е҆же ѻ҆пꙋстѣсте, и҆ дани мѣстъ и҆́на тала́н꙽тъ е҃ сот̑.
а҆ще же нѝ, прїидемъ и҆ ратꙋе҆мъ васъ·

И҆ прїиде а҆ѳиновїи дрг̑҇ꙋ црс̑҇кїи въ і҆ерс̑҇лимъ·

И҆ ви́дѣ сла́вꙋ си́моновꙋ и҆ свѣтлость зла́та и҆ сребра̀ и҆ пред̑ставле́нїѧ дово́лна и҆ ѹ҆жасесѧ.
и҆ възвѣсти е҆мꙋ словеса̀ цр҃ьска.
и҆ ѿвѣща̀ е҆мꙋ си́монъ и҆ рече ни чю́жꙋ зе́млю прїѧхом̑ н̂и и҆́ныѧ въздержим̑, н̂о наслѣдїе ѿц҃ъ нашихъ.
ѿ вра́гъ же наших̑ въ нѣкое времѧ нераз̑сꙋдне ѹ҆дръжа́сѧ.
мы́ же времѧ и҆мꙋщи въздержа́хомъ наслѣдїе ѿц҃ъ нашихъ.
а҆ е́же и҆ ѿ ѻ҆п꙽пїи, и҆ га́зора и҆́хже про́сиши сїи творѧ́хꙋ в лю́дехъ ꙗ҆́звꙋ ве́лїю, и҆ въ стране на́шеи·

ѿт̑ сихъ дадемъ талан꙽тъ р҃. и҆ не ѿвеща е҆мꙋ а҆ѳиновїи словесѐ, възъврати́ же сѧ съ ꙗ҆́ростїю къ цр҃ю и҆ възвѣстѝ е҆мꙋ словеса̀ сїѧ и҆ сла́вꙋ си́моновꙋ и҆ всѧ ꙗ҆́же ви́дѣ·

И҆ прогнѣвасѧ цр҃ь гнѣвомъ ве́лїимъ.
трифо́н же всѣде въ кора́бль ѿбѣже въ ѻ҆рѳосїадꙋ·

И҆ поста́ви цр҃ь кен꙽девеа вое҆во́дою примо́рьскимъ.
и҆ во́и пѣшецъ и҆ ко́нникъ дадѐ е҆мꙋ, и҆ повелѣ е҆мꙋ ѻ҆плъчи́тисѧ проти́вꙋ лица і҆ѹ҆де́иска·

И҆ заповѣда е҆мꙋ созда́ти кедро́нъ, и҆ ѹ҆тверди́ти вра́та ꙗ҆́ко да ратꙋ́етъ лю́ди·

Цр҃ь же гонѧ́ше трифо́на прїиде кендеве́и въ а҆мнїю.
и҆ нача̀ раздража́ти лю́ди и҆ в꙽ходи́ти въ і҆ѹ҆де́ю и҆ плѣнити люди и҆ ѹбива́ти·

И҆ созда̀ кедро́нъ, и҆ поста́ви тꙋ̀ ко́нники и҆ во́и.
ꙗ҆́ко да и҆сходѧ́ще прохо́дѧтъ пꙋтѝ і҆ѹ҆де́искїѧ ꙗ҆́коже повелѣ̀ е҆мꙋ цр҃ь·

Глава̀, ѕ҃і·

И възы́иде і҆ѻ҆а́нъ ѿ газо́ра·

и҆ възвѣсти си́монꙋ ѿц҃ꙋ свое҆мꙋ.
и҆же сътворѝ кен꙽деве́и·

И҆ призва̀ си́монъ дв̂ꙋ сн҃овъ свои҆хъ старѣ́ишихъ і҆ѹ́дꙋ і҆ и҆ѻ҆а́на, и҆ рече и҆мъ а́зъ и҆ братїѧ моѧ и҆ дом̑ ѿц҃а мое҆го поборѧ́хомъ врагѝ і҆и҆л҃евы ѿ ю́ности даже до сего дн҃ѧ.
и҆ ѹ҆спѣва́шесѧ в рꙋка́хъ нашихъ и҆зба́вити і҆и҆л҃ѧ мно́гащи.
нн҃ѣ же съста́рѣхсѧ, и҆ вы же въ млс̑҇ти дово́лни е҆сте бы́ти въ мѣсто менѐ и҆ бра́та мое҆го, і҆ из̑ше́дше поборѧ́итесѧ за ꙗ҆зы́къ на́ш꙽ по́мощь б̂о ѿ нб҃се с ва́ми да бꙋдет꙽·

І҆ и҆збра ѿ страны̀ ҂к҃ мꙋжїи бра́нных̑ и҆ ко́нникъ, і҆ и҆до́ша на кендеве́на и҆ ѻ҆блего́ша в꙽ модинѣ·

И҆ въста́ша заѹ́тра і҆ и҆доша на́ поле, и҆ с̂е во́и ѹ҆мно́женъ въ срѣтенїе и҆мъ пѣше́цъ и҆ ко́нникъ.
и҆ бѣ пото́къ средѣ́ их̑, и҆ ста̀ проти́вꙋ лица̀ и҆хъ сам̑ и҆ лю́дїе е҆го.
и҆ ви́дѣ лю́ди страшащасѧ преитѝ пото́къ, и҆ преиде прьвѣе, и҆ ви́дѣша е҆го мꙋжи, и҆ поидо́ша въ слѣдъ е҆го и҆ кон꙽ницы посредѣ пѣшец̑҇ ко́нницы же мно́ѕи ѕѣло.
и҆ въстрꙋбиша трꙋба́ми, и҆ ѹ҆сїѧ́сѧ кендеве́и и҆ во́и е҆го и҆ падо́ша ѿ нихъ ꙗ҆́звенїи мно́ѕи про́чїи же бѣгоша въ тверды́ню.
тогда̀ ѹ҆ꙗ҆зве́нъ е҆сть і҆ѹ҆да̑ братъ і҆ѻ҆а́новъ.
і҆ѻ҆а́нъ же гна̀ и҆хъ дондеже прїиде въ кедро́нъ е҆гоже созда̀.
и҆ побѣгоша къ столпомъ и҆же бѣхꙋ во селѣ̀ а҆зо́та, и҆ заж꙽жѐ и҆хъ ѻ҆гнемъ.
и҆ падо́ша ѿ ни́хъ, ҂в҃ мꙋжїи.
и҆ ѻ҆брати́сѧ въ землю і҆ѹ́динꙋ въ мирѣ·

И҆ птоломѣи сн҃ъ а҆вꙋвовъ поста́вленъ быс̑҇ воево́дою въ по́лѣ и҆ери́хона, і҆ и҆мѧше сребра̀ и҆ и҆ злата много, бѣ́ бо зѧ́ть а҆рхїере́ѻв̑҇ и҆ възъдви́жесѧ срд̑це е҆го, и҆ въсхотѣ̀ ѹ҆дръжа́ти странꙋ̀, и҆ помышлѧ́ше ле́стно на си́мона и҆ сн҃овъ е҆го ѹ҆бити и҆хъ·

Си́мон же прохожа́ше гра́ды е҆же въ странѣ̀ і҆ѹ҆деистеи, совѣща́ѧ ѻ҆ прѣлежа́нїю и҆хъ и҆ сниде въ е҆ри́хонъ самъ и҆ мат̑таѳеи і҆ и҆ѹ́да и҆ сн҃ове е҆го·

Лѣта ро҃з, мс̑҇ца а҃і, сѐ е҆сть мс̑҇ць сава́тъ·

И҆ въспрїѧт̑ и҆хъ сн҃ъ а҆вꙋвовъ въ тверды́ню нарица́емою до́косъ со ле́стїю ю҆же созд̑а·

И҆ сътворѝ и҆мъ пи́ръ вели́къ, и҆ съкры̀ т̂ꙋ мꙋжи.
и҆ е҆гда̀ ѹ҆пи́сѧ си́мон̑҇ и҆ сн҃ове е҆го, и҆ въста̀ птоломе́и і҆ и҆же с нимъ, и҆ взѧ̀ша ѻ҆рꙋжїѧ своѧ.
и҆ внидо́ша в пи́ръ и҆ ѹ҆биша е҆го, и҆ дв̂а сн҃а е҆го, и҆ нѣцїи ѿ ѻ́трокъ е҆го.
и҆ сътворѝ прелесть вели́кꙋ въ і҆и҆л҃и, и҆ възда̀ ѕла́ѧ за блага́ѧ·

И҆ писа̀ сїѧ птоломѣи и҆ посла̀ цр҃ю да по́слет̑ е҆мꙋ во́и в꙽ по́мощь, и҆ предасть е҆мꙋ странꙋ̀ и҆хъ и҆ гра́ды·

И҆ посла̀ и҆́ныа в газа́рꙋ ꙗ҆́ти і҆ѻ҆а́нна, и҆ ты́сѧщникомъ посла̀ посла́нїѧ да прїидꙋтъ к немꙋ, да да́сть и҆мъ сребро̀ и҆ зла́то и҆ да́ры·

І҆ и́ныѧ посла̀ ѻ҆бъѧ́ти і҆ерс̑҇лима и҆ горꙋ цр҃кви·

И҆ пред̑текъ нѣкїи възвѣсти і҆ѻа́ннꙋ въ газа́рꙋ ꙗ҆́ко поги́бе ѿц҃ъ е҆го и҆ бра́тїѧ е҆го, и҆ ꙗ҆ко посла̀ и҆ тебе ѹ҆би́ти, и҆ слы́шав̑҇ ѹ҆страшисѧ ѕѣло·

И҆ ѧ́ть мꙋжи и҆же прїидо́ша погꙋби́ти е҆го и҆ ѹ҆бѝ и҆хъ, позна̀ б̂о ꙗ҆́ко и҆щꙋтъ е҆го ѹ҆бити, и҆ прочаѧ словесъ і҆ѻ҆а́нновых꙽ и҆ бранїи е҆го, и҆ бл҃гаго мꙋж́ества е҆го их̑же бл҃гомꙋжествова̀, и҆ соѕида́нїѧ стѣнъ и҆хже създа̀, и҆ дѣѧ́нїи е҆го·

Сѐ сїѧ пи́сана сꙋть въ кни́ѕѣ дн҃еи а҆рхїере́иства е҆го, ѿнелѣже бысть а҆рхїере́и по ѿц҃ы свое҆мъ·

Конецъ, а҃, книгъ мак꙽каве́иских꙽ и҆́мать в себѣ, глв̑҇а ѕ҃і·