ВТОРИ́Є КНЇГИ МАКАВЄІ҆СКИЄ
Глв̑҇а, а҃·
Бра́тїи и҆же по е҆гѷптꙋ і҆ѹ҆де́ѻмъ, ра́доватисѧ·
Бра́тїа и҆же въ і҆ерс̑҇лимѣ і҆ѹ҆деи, і҆ и́же въ стра́нѣ і҆ѹ҆де́истѣи.
ми́ръ бл҃гъ, и҆ бл҃го да сътво́ритъ вамъ б҃ъ·
И҆ да помѧне́тъ завѣтъ свои и҆же къ авраа́мꙋ і҆ и҆саа́кꙋ і҆ и҆а́ковꙋ рабо́мъ свои҆мъ вѣрнимъ·
и҆ да́сть вамъ срд̑це всм̑ѣ въ е҆же чествова́ти е҆го, и҆ творите хотѣ́нїѧ е҆го срд̑цем вели́кимъ, и дш҃евнымъ и҆зволе́нїемъ·
И҆ да ѻ҆тве́рзет̑ срд̑ца ва́ша в зако́нъ свои, и҆ въ повелѣ́нїи·
И҆ ми́ръ да сътво́ритъ, и҆ ѹ҆слы́шит̑ мл҃твꙋ ва́шꙋ.
и҆ ѹ҆мили́тсѧ вамъ, и҆ не ѻ҆ста́вит̑ васъ въ вре́мѧ лꙋка́во·
и҆ нн҃ѣ зде е҆смы̀ молѧ́щи за вас̑҇·
Црс̑҇твꙋющꙋ дими́трїю лѣта рѯ҃ѳ·
Мы і҆ѹ҆де́и писа́хомъ вамъ въ ско́рби и҆ въ го́рести нашед̑шима намъ, въ лѣтех̑ сихъ ѿне́леже ѿстꙋпи и҆а҆сонъ і҆ и́же с нимъ ѿ ст҃ыѧ землѧ̀ и҆ црс̑҇тва·
И҆ пож꙽го́ша вра́та и҆ пролїѧ́ша кро́вь непови́ннꙋ·
И҆ моли́хом꙽сѧ къ г҃ꙋ и҆ ѹ҆слы́шани е҆смы̀·
и҆ принесо́хом꙽ же́ртвꙋ и҆ смида́лъ, и҆ вож꙽го́хомъ свѣти́лники и҆ пред̑ложи́хом̑ хлѣбы·
И҆ нн҃ѣ проважда́ите дн҃и кꙋщныѧ, хаслева мс̑҇ца, лѣта, рп҃и·
и҆же въ і҆ерс̑҇лимѣ, і҆ и́же въ і҆ѹ́деи и ста́рцы і҆ѹ҆де́искїи·
А҆ристоволꙋ дидаска́лꙋ птоломе́ѧ цр҃ѧ, сꙋщемꙋ ѿ помаза́нникъ і҆ере́иска ро́дꙋ·
І҆ и́же въ е҆гѷптѣ і҆ѹ҆де́ѻмъ ра́доватисѧ и҆ здрав꙽ствова́ти·
ѿ вели́кихъ бѣ́дъ бг҃ом̑ сп҃сени ве́лма бл҃годари́мъ е҆мꙋ, ꙗ҆́ко ѹ҆бо цр҃ю ѻ҆долѣ́хомъ·
Се́и б̂о и҆звари въчине́ныхъ въ ст҃омъ гра́дѣ въ перси́дꙋ·
Бы́сть б̂о во́ждь и҆ ѻ҆ немъ непостоѧ́наа мнѧ́шесѧ бы́ти си́ла.
посѣко́ша въ ка́пищи нане́и,<.>
Совѣтом̑ прельще́нъ ѻ҆ жерцех̑ нанеѝ·
А҆ки б̂о съпребыва́ѧ е́й прїиде въ мѣсто а҆нтїѻ́хъ і҆ и́же с ни́мъ дрꙋѕи взѧ́тїа ра́ди сре́бръник꙽ въ пре́лести сло́ва·
Пред̑ложи́ша б̂о и҆хъ жерцы̀ нанеѝ·
ѻ́номꙋ пришед̑шꙋ съ малы́ми въ притво́ръ теме́новъ, заключа́ющїи же ка́пище ꙗ҆́ко внїиде а҆нтїѻ́хъ.
ѻ҆тве́рз꙽ше въ д꙽скахъ съкровенꙋю две́ръ мета́юще ка́менїе поби́ша и҆гемона і҆ и́же с ни́мъ, и҆ раздѣли́ша на ѹ́ды, и҆ гла́вы посѣче́ны и҆змета́ша во́нъ·
По всѧ̀ блс̑҇вен̑҇ наш꙽ б҃ъ и҆же преда̀ нечествова́вших̑·
хотѧ́ще празднова́ти, к҃е, дн҃е.
мс̑҇ца хасле́ва ѻ҆чище́нїе цр҃кви, потре́бно непщева́хомъ и҆звѣсти́ти вамъ, да и҆ в̂ы празд̑нꙋ́ете да́же до кꙋщнаго пра́знд̑ика, и҆ ѻ҆гнѧ̀, когда нее҆мїѧ създа цр҃ьковь и҆ ѻ҆лта́рь принесе же́ртвꙋ·
Ибо е҆гда̀ въ перси́дꙋ ведѧ́хꙋсѧ ѿц҃ы на́ши, тогда̀ жер꙽цы̀ боѧ́щїисѧ б҃а взѧ́ша ѿ ѻ҆гнѧ ѻ҆л꙽та́рнаго·
И҆ та́ино съкры́ша в дол̑҇ кладѧѕѧ чи́нъ и҆мѣю́ще без̑вод̑ныи.
и҆ в немъ заключи́ша, ꙗ҆коже всѣмъ невѣ́домо бы́ти мѣсто·
Є҆гда же преминꙋша лѣта мно́га, и҆ ѹ҆годи́сѧ б҃ꙋ да по́слетсѧ нее҆мїѧ ѿ цр҃ѧ прьсид̑ска, внꙋ́цы жерцовъ съкры́вших̑ посла̀ къ взыска́нїю ѻ҆гнѧ̀·
И та́ко повѣда́ша намъ не ѻ҆брѣто́ша ѻ҆гнѧ̀ н̂о во́дꙋ тꙋ́чнꙋ, и҆ повелѣ и҆мъ чръпати и҆ принести себѣ, и҆ же́ртвы и҆же напра́влени бѣхꙋ повелѣ̀ жръцем꙽ нее҆мїѧ покропити водо́ю дрова̀ и належа́щаѧ·
Ꙗ҆́коже бы́сть и҆ вре́мѧ пре́иде е҆гда̀ слн҃це въсїѧ пе́рвїе на ѻ҆блацѣ сꙋщи, въж꙽же́сѧ ѻ҆́гнь вели́къ ꙗ҆́коже диви́тисѧ всѣмъ, моли́твꙋ же творѧ́хꙋ вс̂и жерцы̀, и҆ е҆гда̀ съгорѣ жрътва, і҆ѻ҆наѳа́нꙋ начина́ющꙋ про́чим꙽ же ѿвѣща́ющим̑ ꙗ҆́ко нее҆мїю·
Бѣ же мл҃тва и҆мѣющи ѻ҆́бразъ сїи·
Ги҃ г҃и б҃е всѣхъ тво́рче, стра́шныи и҆ крѣ́пкїи, и҆ пра́вед̑ныи и҆ млс̑҇тивыи, и҆ е҆ді́ныи цр҃ю и҆ бл҃гїи, е҆ді́ныи да́телю·
Є҆ді́не пра́вед̑не и҆ вседръжи́телю и҆ вѣ́чныи сп҃асаѧ́й і҆и҆л҃ѧ ѿ всѧ́кого ѕл̂а·
Сътвори́выи ѿц҃ы и҆збра́нны, и҆ ѻ҆ст҃ивыи и҆хъ·
Прїими жрътвꙋ за всѧ̀ лю́ди і҆и҆л҃ѧ, и҆ съхрани ча́сть твою и҆ ѻ҆ст҃и·
Събери расточе́нїе на́ше.
і҆ и҆зба́ви рабо́тающих̑ ꙗ҆зы́комъ·
Ѹ҆ничиже́ныхъ и҆ ме́рз꙽ских̑ при́зри, и да ѹ҆вѣ́дѧтъ ꙗ҆зы́цы ꙗ҆ко т̂ы е҆си б҃ъ нашъ·
Помꙋ́чи наси́лꙋющихъ и҆ досажда́ющимъ въ горды́ни.
ѹ҆стро́и лю́ди твоѧ в мѣсто ст҃ое твое ꙗ҆́ко рече моѷсїи·
Жерцы же поѧ́хꙋ пѣ́нїѧ.
ꙗ҆́коже съгорѣ жертва.
и҆ ѻ҆ста́вшеи воды̀ нее́мїѧ повелѣ ка́менїе бо́льшее поли́ти.
ꙗ҆́коже сїе бысть пла́мень возгорѣсѧ, ѿ ѻ҆лтарѧж̑ ѻ҆блиста́вшаго свѣта съгорѣ.
ꙗ҆́коже ꙗ҆́влена бысть ве́щъ·
Возвѣщено е҆сть цр҃ю прьскꙋ, ꙗ҆́ко въ мѣстѣ в немже ѻ҆́гнь съкры́ша преселенїи жерцы̀, вода̀ ꙗ҆ви́сѧ ѿнелѣже нее҆мїѧ і҆ иже с ни́мъ ѻ҆чисти́ша жрътвы.
ѻ҆гради́ же цр҃ь мѣсто т̂о и҆скꙋша́ѧи ве́щи.
и҆́мже дарова цр҃ь мно́ги да́ры·
и҆ ꙗ҆́же взѧ̀ паки предаде, прозва же нее҆мїѧ і҆ и҆же с ним̑ мѣсто т̂о е҆ѳарь.
е҆же сказꙋ́етсѧ ѻ҆чищенїе·
нарѣца́ет же сѧ ѿ мно́гих̑ неѳарь·
Глв̑҇а, в҃·
Ѡбрѣте же сѧ в под̑писа́нїихъ і҆е҆ремїи про̑҇рка, ꙗ҆ко повелѣ ѻ҆гнѧ̀ взѧти и҆же преселѧю҆щихъсѧ, ꙗ҆́ко знаменовасѧ·
И҆ ꙗ҆́ко заповѣ́даше селенымъ про̑҇ркъ да́ѧи и҆мъ законъ.
да не забыва́ютъ повеленїи гн҃ихъ·
И҆ да не соблазнѧ́тсѧ ѹ҆́мы ви́дѧщи и҆́долы зла́ты и҆ сребрены и҆ ѻ҆нихъ ѹ҆тваръ.
і҆ и́на такова рекꙋщи, молѧ́ше не ѿврещѝ зако́на ѿ срд̑ца и҆хъ·
Бѣ же въ писа́нїи ꙗ҆́ко скѷнїѧ и кїѻт̑, повелѣ про̑҇ркъ бжс̑҇твенаго ѿвѣта бы́вшаго е҆мꙋ съпослѣдьствовати·
Ꙗ҆́коже взыиде в горꙋ на ню́же моѷсїи въшед̑ и҆ ви́дѣ бж҃їе наслѣдїе.
и҆ грѧдꙋщи т̂ꙋ і҆е҆ремїѧ ѻ҆брѣте пещерꙋ и҆ жили́ще, и҆ кїѻ́тъ і҆ ѻ҆лта́рь ѳимїѧма внесе т̂ꙋ и҆ двери загради·
И҆ пристꙋпиша нѣ́цїи ѿ послд̑ѣствꙋю҆щихъ да знаменꙋ́ютъ себѣ пꙋть, и҆ не мого́ша ѻ҆брѣстѝ·
Ꙗ҆́кож̑ позна̀ і҆е҆ремїѧ повинꙋ́ющи тѣхъ рече да не вѣдомо бꙋдетъ мѣсто до́ндеже соберетъ б҃ъ събра́нїѧ лю́дїи млс̑҇тивъ бꙋдетъ·
И҆ тогда̀ г҃ь пока́жетъ сїѧ и҆ ꙗ҆ви́тсѧ сла́ва гн҃ѧ, и҆ ѻ҆бла́къ бꙋдет̑ ꙗ҆́ко и҆ моѷсїю ꙗ҆влѧ́шесѧ·
Ꙗ҆́ко и҆ соло́монъ моли да мѣсто ѻ҆ст҃итсѧ вельма.
бесѣдова́ше же, и҆ ꙗ҆́ко премꙋдрость и҆мѣѧ възнесе жрътвꙋ ѻ҆бновленїѧ, и҆ съвръшенїе цр҃кви·
Ꙗ҆́коже и҆ моѷсїи молѧ́шесѧ къ г҃ꙋ и҆ сни́де ѻ҆́гнь съ нб҃се и҆ поꙗ҆́сть жрътвꙋ.
такоже и҆ соло́монъ моли́сѧ и҆ сни́де ѻ҆́гнь съ нб҃си и҆ пож꙽же вс̂есож꙽женїе·
И҆ рече моѷсїи сего ради да не ꙗ҆́стьсѧ иж̑ за грѣхъ попалисѧ·
Та́коже и҆ соло́монъ, и҃, дн҃їи празнова.
но́сит же сѧ в꙽ написанїих꙽, и҆ въ па́мѧтописаса́нїю по нее҆мїи сїѧ.
ꙗ҆́коже строа́щи кни́гоположницꙋ.
собра̀ ꙗ҆́же ѻ҆ цр҃ех꙽ и҆ про̑҇рцех̑, и҆ ѻ҆ дв҃дѣ, и҆ е҆пистолїѧ цр҃еи ѻ҆ възложенїи·
Та́коже і҆ и҆ѹ́да пад꙽шаѧ ꙗ҆́же бра́нїю бысть намъ собра̀ вс̂ѧ, и҆ сꙋть пред̑ нами.
и҆́хже ѹ҆бо а҆́ще пребꙋ́ете сих̑ приносѧщихъ вам̑ послите.
хотѧ́ще ѹ҆бо празнова́ти ѻ҆чищенїе писа́хомъ вамъ.
бл҃го б̂о творитѐ празнꙋ́юще дн҃и·
Бг҃ъ же сп҃сыи вс̂ѧ лю́ди своа и҆ възда́сть наслѣдїе всѣмъ, и҆ црс̑҇твїе и҆ сщ҃еньство и҆ ст҃ыню, ꙗ҆́коже ѻ҆бѣща въ зако́нѣ, ѹ҆пова́емъ б̂о на б҃а ꙗ҆́ко ско́рѣ ва́съ поми́лꙋетъ и҆ съберетъ ѿ под̑нбс̑҇ныѧ въ мѣсто ст҃ое.
и҆зѧтъ б̂о насъ ѿ великихъ бѣдъ, и҆ мѣсто ѻ҆чисти.
ꙗ҆́же по і҆ѹ́де маккаве́ю и҆ братїи е҆го, и҆ цр҃кви вели́кїа, ѻ҆чищенїе и҆ ѻ҆бновленїе прс̑҇тла не бысть·
Є҆ще же и҆ къ а҆нтїѻ́ховꙋ ꙗ҆вленїю и҆ сн҃а е҆го е҆ѹ҆па́тора бра́нїи.
и҆ съ нб҃си бы́вших̑ ꙗ҆́вленїи бл҃гимъ мꙋжествам̑ і҆ѹ҆де́иства ради любочестно да всю̀ странꙋ ма́ли сꙋще м꙽щахꙋ, и҆ варва́ръ мно́жество погонѧ́хꙋ.
и҆ прои҆менова́не во всю вселеннꙋю цр҃квъ созда́ша и҆ гра̑ и҆зба́виша, и҆ хотѧ́щихъ разори́ти закон꙽ и҆справлѧ́хꙋ гм҃ъ.
со всѣмъ смире́нїем̑ ѻ҆цищенїе быва́ше и҆мъ·
Па́ки же ѿ а҆со́на кирине́ѧ и҆звѣщена пѧтьма кни́гами, и҆ покꙋша́хом̑сѧ е҆ді́но съчинено съкратити·
Раз̑мышлѧ́ющи б̂о мно́жество числомъ и҆ сꙋщаго неможенїѧ хотѧщим̑ престꙋпити и҆сторїи по́вѣсть мно́жества ради ве́щи настоа́хомъ·
Хотѧ́щим̑ б̂о честѝ дш҃ею водими.
любомꙋдрънымъ же в раз꙽мышленїе взѧти люботрꙋдїе всѣм же чтꙋщимъ по́льза.
и҆ нам꙽ же прїѧ́вшимъ ѕл̂острада́нїе съкращенїе не ѹ҆добъ с по́томъ и҆ бдѣнїемъ вещь тво́рим̑·
Ꙗ҆́ко б̂о ѹ҆готова́ющемꙋ пи́ръ і҆ и҆щꙋщемꙋ и҆́ныхъ ѹ҆добїа небл҃годарне.
та́коже многыхъ ради бл҃годаренїи любовїю трд̑ꙋ потерпим̑.
е҆ді́но въпрос̑҇ ради ѻ҆ кои҆хждо писа́нїю разлꙋча́юще.
дрꙋго́е же послѣдовати под̑писанымъ, ради съкращенїѧ трꙋжда́ющесѧ·
Ꙗ҆́коже б̂о новаго храма а҆рхитектонꙋ всего ѻ҆бложенїѧ настоа́нїе е҆сть.
такоже под̑писати начина́ющемꙋ ꙗ҆же подоба́етъ къ ѹ҆крашенїю взыскают̑сѧ, та́ко мню̀ и҆ ѻ҆ насъ.
внити и҆ ѻ҆ всх̑ѣ словесехъ творити, и҆ много веществовати ѻ҆ всѣхъ по ча́сти.
начина́ющемꙋ же по́вѣсть досто́итъ, е҆ді́ного съкращенаго реченїѧ гони́ти, и҆́ноже ве́щи съдѣла́ное въпрашати творѧ́щемꙋ же прогл҃анїе съкращати·
ѿсюдꙋ ѹ҆бо начина́емъ по́вѣсти пред̑реченымъ толика́го заченше.
а҆бїе б̂о е҆ді́но по́вѣсть ѹ҆множати, и҆́нꙋ же повс̑҇ѣ съкраща́ти·
Глв̑҇а, г҃·
Сего ради е҆гда̀ ст҃ыи гра́дъ ѻ҆бита́шесѧ въ всѧ́комъ ми́рѣ, и҆ закон꙽ ꙗ҆́ко блажа́ише съхранѧе҆мых̑.
і҆ѻ҆нїа рад̑и̑ а҆рхїереѧ бл҃гочестїе же и҆ ненавидѣнїе лꙋка́въства.
и҆ сами цр҃и чествова́хꙋ мѣсто, и҆ цр҃ковь вели́кими да́ры прославлѧ́ше·
Ꙗ҆́ко да и҆ селевкїѧ а҆сїискаго цр҃ѧ ѿ расходъ свои҆хъ, въздаѧ́ше на слꙋжбꙋ жрътвы пристоꙗ҆́щи расхо́ды·
Си́мо же ѿ колѣна венїами́нѧ пред̑ста́телѧ цр҃кви поста́вленъ, повѣда а҆рхие҆ре́ю ѻ҆ престꙋпле́нїи града·
н̂о е҆гда премощи ѻ҆нїи не можа́ше, прїиде къ а҆пол̑҇лонїю фрасе́ю и҆же въ ѻ́но вре́мѧ бысть вое҆во́да страны сѷрїиски и҆ финикїиски·
И҆ възвѣсти е҆мꙋ ѻ҆ бога́тествѣхъ неи҆счисленыхъ бы́ти в꙽ храни́лищи і҆ерс̑҇лимъскомъ·
Ꙗ҆́коже мно́жество разних̑ безчи́слено бы́ти не подоба́етъ сїѧ къ сло́вꙋ жрътвъ бы́ти же мо́щно под̑ вла́стїю цр҃евою па́сти сїѧ·
Є҆гда̀ донесе къ цр҃ю а҆пол꙽лонїи ѻ҆ бога́тъствах̑ ѻ҆ възвѣще́нныхъ е҆мꙋ ꙗ҆вѝ.
ѻ҆́нже призва̀ и҆лиѻ҆дора и҆же бы́сть над̑ богат̑ствы е҆го, посла̀ съ заповѣдми да пред̑рече́ное бога́тество принесетъ.
скоро же и҆лиѻ҆доръ творѧ́ше ше́ствїе·
Гл҃аше ꙗ҆́ко по гра́дѣхъ килїи и҆ сирїи и҆ финикїи проходѧ̀·
Ве́щи же црс̑҇кои повелѣнїе конча́ѧ.
прїиде же въ і҆ерс̑҇лім̑ и҆ любомд̑ꙋро ѿ а҆рхїере́ѧ град̑ска прїѧт̑ повѣда̀ ѻ҆ бы́вшемъ ꙗ҆вле́нїю, и҆ чт̂о ради прїиде сказа̀·
Въпраша́ше же а҆ще и҆́стинно сїѧ тако бꙋдꙋтъ·
Тогда а҆рхїе҆рей показа̀ пред̑ставле́на бы́ти сїѧ къ прекръмле́нїю вдовам꙽ и҆ сирота́мъ нѣцїи б̂о бы́ти и҆рка́на то́вїи ѕѣло мꙋжа чс̑҇тна.
не ꙗ҆́коже б̂ѣ зносѧ нечести́выи си́монъ·
Всего же сребра̀ тала́нтъ у҃, а҆ злата с·
ѻ҆бидити же ст҃ыни мѣста вѣровавшихъ, и҆ чс̑҇тноа цр҃кви по всемꙋ ми́рꙋ чести, и҆ наси́лїе по всемꙋ хотѧ́ше бы́ти.
и҆лиѻ҆до́ръ же си́хъ ра́ди и҆мѣѧше црс̑҇кое повелѣнїе, гл҃аше всѧко подоба́етъ бы́ти семꙋ въ црс̑҇ко повелѣнїе.
въчини́ же дн҃ь и҆ вниде съзрѣти хотѧ̀, бѣ же не ма́ло смѧтенїе по градꙋ сего ради·
Сщ҃енницы же пред̑ ѻ҆лтаре́мъ въ ст҃ительскихъ ризахъ поврьго́ша себе призыва́хꙋ съ нб҃си ѻ҆ завѣте възаконе́номъ свои҆мъ сїѧ съхрани́ти.
бѣ же зрѧ лицѐ а҆рхїере́ѻво смѧтесѧ мы́слїю·
зра́къ б̂о и҆ ви́дъ и҆змѣненъ ꙗ҆ви́сѧ по дш҃и понꙋжде́нїѧ·
ѻ҆блежа́ше б̂о ѻ҆ мꙋжи ѹ҆́жасъ, и҆ страх̑ теле́сныи, и҆́хже ради и҆звѣстно быс̑҇ зрѧ́щимъ срд̑ца настоѧ́щаѧ бо́лѣзнь.
и҆́нїи же събрани ѿ домо́въ сотѣка́хꙋсѧ на всѐро́днꙋю слꙋжбꙋ.
занѐ хотѧ́ше прїити мѣсто въ порꙋга́нїе·
Же́ны же препоѧса́шасѧ по прьсехъ власени́цами на пꙋтехъ ѹ҆множа́хꙋсѧ.
заключе́нїи же дв҃цы, е҆ді́ны ѹ҆бо прибѣга́хꙋ къ вра́томъ, і҆ и́нїи же на стѣны.
нѣцїи же ѻ҆кон̑҇цами приничахꙋ вси́ же въздѣюще рꙋцѣ на́ нб҃о молѧ́хꙋсѧ поми́ловати мно́жество смѧте́ное въ паде́нїи.
чаѧ́нїе ждꙋще вели́каго а҆рхїере́ѧ.
и҆ сїи ѹ҆бо възыва́хꙋ вседръжи́телѧ г҃а, да вовѣре́наѧ вѣрнымъ свои҆мъ съхранитъ съ всѣмъ ѹ҆тверже́нїемъ·
И҆лиѻ҆до́р же и҆же смы́сли съвръша́ше.
здѣ же е҆мꙋ съ даноносцы въ газофилакїю пришед̑шꙋ·
Вседръжи́тель же г҃ь всѧ́коѧ вла́сти си́лныи, ꙗ҆вле́нїе ве́лїе сътворѝ·
Ꙗ҆́коже всѣмъ дръзнꙋвшим̑ събра́тисѧ.
и҆ пришед̑шим꙽ бж҃їю си́лꙋ въ ѹ҆клоне́нїе и҆ въ ѹ́жасъ премѣни́ти.
тако да всѝ и҆же дръзи бѣхꙋ·
Ꙗ҆́висѧ б̂о и҆мъ ко́нь стра́шенъ и҆мѣющи вса́дника предобрым̑ покро́вом̑ ѹ҆крашена.
носѧ́ же ко́рень въстрес елиѻ҆до́рꙋ прьвыхъ ѻ҆рꙋжник̑҇.
сѣдѧ́и же ꙗ҆влѧ́шесѧ злато ѻ҆рꙋжїе и҆мѣѧ.
и҆́нїи же дв̂а ꙗ҆ви́шасѧ е҆мꙋ ю҆́ноши си́лою кра́сни.
предо́бри сла́вою ѹ҆краше́ни же ѻ҆дѣѧ́нїи.
и҆же ѻ҆бъстоѧ́ша е҆го и҆ ѿ ѻ҆бѣю же странꙋ бѣхꙋ беспреста́ни, мно́ги налага́ю҆ще е҆мꙋ раны.
внеза́пꙋ же и҆лиѻ҆дор̑҇ падѐ на́ землю, е҆гоже мно́га м꙽гла̀ ѻ҆бъѧ́тъ, въсхити́вше же и҆ на ѻ҆дрѣ носѧ́ща положена съ мно́гимъ тече́нїемъ граби́тели въ пред̑рече́нꙋю входѧ́ще газофилакїю, ноша́хꙋ без̑помощне себѣ ѻ҆рꙋжникомъ поста́вленом, ꙗ҆́вленꙋ бж҃їю си́лꙋ позна́ша·
Се́и же бжс̑҇твенымъ дѣѧ́нїем̑ безгла́сенъ лежа́ше, и҆ всѧ́кого ѹ҆пова́нїѧ и҆ спасенїѧ лише́нъ·
Сїи же г҃а блс̑҇вѧхꙋ, ꙗ҆́же възвели́чи мѣсто свое и҆ цр҃ковь.
и҆же пре́жде стра́ха и҆ смѧте́нїѧ и҆спо́лнъ.
ꙗ҆влѧ́ющꙋ вседержи́телю б҃ꙋ, ра́дости и҆ весе́лїѧ и҆сполни́сѧ·
Тогда̀ б̂о ѿ дрꙋ́гъ и҆лиѻ҆доровыхъ нѣ́цыи молѧ́хꙋ съ тща́нїемъ ѻ҆нїю призва́ти вы́шнѧго, да живо́тъ пода́сть е҆мꙋ въ послѣ́днемъ и҆здыха́нїи лежа́щемꙋ·
Помышлѧ́ше же а҆рхїере́и да не ко́гда цр҃ь помы́слит̑ лꙋка́в꙽ство нѣ́кое и҆лиѻдора ра́ди на і҆ѹ҆деи сътвори́ти.
принесе за сп҃сенїе мꙋ́жа же́ртвꙋ·
Є҆гда же а҆рхїере́и молѧ́шесѧ, и҆ сїи ю҆́ноши паки ꙗ҆ви́шасѧ и҆лиѻ҆до́рꙋ в тѣх́ же ѻ҆дѣѧ́нїѧх̑ ѻ҆блече́ни и҆ ставше рѣша и҆ѻ҆нїи жеръцꙋ хвалꙋ възда́и, е҆го б̂о ради г҃ь тебѣ живо́тъ дарова.
ты же бїенъ възвѣсти всѣмъ вели́чества бж҃їѧ и҆ держа́вы·
И҆ сїѧ ре́кше неви́дими быша.
и҆лиѻдоръ же жертвы принес̑҇ гв҃и и҆ възда ѻ҆бѣты вели́ки, и҆ молѧ́сѧ живо́тъ дарова́вшемꙋ·
И҆ ѻ҆нїѧ прїѧ́тъ.
и҆ възврати́сѧ къ цр҃ю съ во́и.
свѣдѣтельствова́ше же всѣмъ ꙗ҆́же ви́дѣ ѻ҆чи́ма дѣ́ла ве́лїѧ б҃а·
Є҆гда же цр҃ь въпраша́ше и҆лиѻ҆дора, кт̂о бꙋдетъ ключимъ е҆ще е҆ді́ною въ і҆ерс̑҇лимъ посла́ти рече, а҆ще кое҆го и҆́маши вра́га и҆ли црс̑҇твꙋ твое҆мꙋ лаѧ́телѧ пошли тамо, и҆ ꙗ҆зве́на е҆го прїимеши.
а҆ще и҆ сп҃сет̑сѧ сего ради зане въ мѣстѣ то́мъ и҆́стиннаа бж҃їѧ нѣ́каѧ си́ла·
Сеи б̂о ѻ҆би́тель на нб҃си и҆мѣ́ѧи посѣти́тел̑҇ и҆ помо́щникъ е҆сть мѣстꙋ томꙋ.
и҆ грѧдꙋщихъ къ ѕл̂отворе́нїю поразитъ и҆ погꙋ́битъ·
И҆ ꙗ҆́же и҆лиѻ҆дорꙋ газофилакїи снабдѣ́нїе си́це и҆мѣетсѧ·
Глв̑҇а, д҃·
Си́монъ же пред̑рече́ныѧ сребреники и҆ ѿч҃ествꙋ разори́тель лꙋка́во гл҃аше ѻ҆ ѻ҆нїи.
ꙗ҆́ко самъ и҆лиѻ҆дора поѻ҆щрѧ́ше к си́мъ, и҆ то́и бѧ́ше ражъжигатель лꙋка́въствꙋ·
Провиди́тель же гра́да и҆ защити́тель лю́дем̑, и҆ ревни́тель зако́нꙋ бж҃їю дръза́ше гл҃ати на совѣтꙋющаго ѻ҆ ве́щех̑·
Вра́жди же в꙽ толи́ко приходѧ́щи да́же нѣ́кои҆мъ ѿ си́мона и҆скꙋше́нымъ ѹ҆бїиствомъ сконча́тисѧ·
Помышлѧ́ше и҆ѻ҆нїѧ лю́тое пре́нїе и а҆пол꙽ло́нїѧ неи҆стовъствова́ти, ꙗ҆́ко ѹ҆доли сѷрїи и҆ финикїи вое҆во́ды, пришед̑ша къ лꙋка́въствꙋ си́моновꙋ, къ цр҃ю ѿи҆де·
Не быва́ѧи град̑скїи клеве́тникъ, н̂о ѻ҆́бщꙋю по́лзꙋ вс̂е събою самѣмъ всемꙋ мно́жествꙋ помышлѧ́ющи·
Видѧше б̂о без̑ цр҃ева провидѣ́нїѧ не́мощно бы́ти и҆ полꙋчи́ти ми́ръ, е҆ще же и҆ вещеи, ни си́мона мощи ѻ҆ста́вити ѿ бꙋ́ести е҆го·
н̂о по селев꙽кїевѣ животѣ, и҆ въспрїѧ́тъ црс̑҇тва а҆нтїѻ́хъ и҆же преи҆менова́шесѧ е҆пифа́нъ·
Жела́ше и҆а҆со́нъ бра́тъ ѻ҆нїи а҆рхїере́иства вни́де къ цр҃ю, ѻ҆бѣщавающи е҆мꙋ сребра талантъ, т҃ѯ·
И҆ ѿ приход̑ и҆́ныхъ тала́нтъ, п҃·
Ксим꙽ же ѻ҆бѣща́ше і҆ и́ныхъ написа́ти р҃н·
А҆ще пода́стьсѧ вла́стїю е҆го гимнасїѧ и҆ е҆фивїѧ е҆мꙋ поста́вити·
И҆же въ і҆ерс̑҇лимѣ а҆нтїѻ҆хїѧ́нъ преписа́ти·
Повелѣвшꙋ же цр҃ю и҆ нача́ло ѹ҆дръжа.
а҆́бїе же на ꙗ҆зыческїи ѻ҆бы́чаи под̑ро́дныѧ своа приводи́ти нача·
И҆ поставленаѧ і҆ѹ҆де́ѻмъ чл҃колю́бїа цр҃ьска і҆ѻ҆а́нномъ ѿц҃а е҆в꙽поломїѧ посыла́вшаго послы дрꙋж́бы ради и҆ съпоборе́нїѧ к ри́млѧномъ и҆ прїѧ́т꙽·
И҆ зако́ны град̑скихъ пра́вилъ ѻ҆ставлѧ́ющи, лꙋка́ваѧ повелѣ́нїѧ ѹ҆твержа́ше·
дерзнꙋ б̂о под̑ кра́емъ гра́да ѹ҆чи́телницꙋ поста́вити, и҆ держа́вныхъ е҆фивовъ въ блд̑ꙋство поставлѧ́ти·
Бѣ же си́це нача́ло и҆ въхожд̑енїе ꙗ҆зы́ческа жи́тельства, нечести́ваго ради и҆ не а҆рхїере́искаго насонова неподо́бнаго бестꙋдїа нанесе́наго, ꙗ҆́ко не ктомꙋ ѻ҆́крс̑҇тъ ѻ҆лтарѧ жерцы̀ творѧ́хꙋ слꙋже́нїе·
Но ѻ҆бнища хра́мъ и҆ жертвы не помнѧ́хꙋсѧ, тща́хꙋсѧ прича́стницы бы́ти палестрамъ и҆ преда́нїи е҆го стропти́выхъ·
И҆ первыѧ чести нивъчто́же въмѣни́ша, е҆л꙽линъскїѧ сла́вы предо́брѣе хотѧ́хꙋ·
И҆́хже бл҃годаѧ́нїѧ бѣдъна въ прю имѣѧ́ше, і҆ и҆хъ повелѣ́нїѧ да възлю́бѧтсѧ·
И҆ всѣмъ сим̑ хотѧ́хꙋ подоби́тисѧ.
сихъ бра́нныхъ гꙋби́тели и҆мѣхꙋ нечествова́ти въ бжс̑҇твеныхъ зако́нѣхъ не ѹ҆до́бъ·
н̂о симъ послѣдꙋѧ времѧ и҆звѣстит̑.
бывшꙋ же празникꙋ а҆гоновꙋ въ тѷре и҆ цр҃ь бысть т̂ꙋ, посла̀ и҆а҆сонъ сра́мныа мꙋ́жи носѧ́щи сребра̀ дидраг̑҇м꙽ т҃, въ жрътвꙋ и҆раклеѻ҆вꙋ.
и҆́хже вопраша́хꙋ принесшїи да не възлагают̑ въ жрътвꙋ ꙗ҆ко не достои҆тъ.
н̂о въ и҆́ныѧ расходи и҆хъ въмѣнити, сїѧ ѹ҆бо посла̀ пославшимъ въ жрътвꙋ и҆раклеѻ҆вꙋ.
ради принесеных̑ же да́ны сꙋть въ дѣ́ло кораблемъ тревѣтрилнымъ·
По́сланъ же въ е҆гѷпетъ а҆поллонїи неетеѻ҆въ сн҃ъ прьвых̑ ради птоломе́ѧ филомитора цр҃ѧ·
Є҆гда̀ позна̀ а҆нтїѻ́хъ чю́жда себе потреб꙽ цр҃ьскыхъ сътворена, съ крѣпкими свои҆ми совѣтова.
приходѧ́щи ѿтꙋдꙋ прїиде въ і҆ѻп꙽пїю, и҆ ѿтꙋдꙋ въ і҆ерс̑҇лим̑.
величествене ѿ а҆сона и҆ града воспрїѧт̑, и҆ со свѣщами свѣтлыми и҆ хва́лами в꙽шелъ ес̑҇·
И҆ ѿтꙋдꙋ въ фѷникїю во́и воз̑врати.
и҆ по трїех̑ временех̑ посла̀ и҆а҆сонъ менела́ѧ брата къ вышереченомꙋ сі́монꙋ носѧ́щи цр҃ю сребреники и҆ ѻ҆ вещех̑ нꙋжныхъ ѿвѣтъ принести·
Ѡ҆́н же пред̑ста цр҃ю възвели́чи лице вла́сти е҆го, и҆ себе възврати къ а҆рхїере́иствꙋ полага́ющи паче и҆а҆со́на талантъ сребра, т҃·
Прїѧт̑ же ѿ цр҃ѧ за́повѣди прїиде, ничтоже б̂о и҆мѣ́ющи досто́ино сщ҃енствꙋ.
дш҃ею б̂о же́стокъ мꙋчитель и҆ ѕвѣра лю́та̑ гнѣвъ и҆мѣѧ.
и҆а҆сонъ же свое҆го бра́та плѣни, самъ ѿ и҆́наго бѣглецъ въ а҆мани́тъскꙋю странꙋ̀ бысть.
менела́и же начальство па́ки воспрїа·
И҆ ѻ҆ сребреницехъ же цр҃еви ѻ҆бѣщаных̑ ничто́же радѧше·
Творѧ́щꙋ же състратꙋ кра́ѧ град̑ска е҆па́рхꙋ, къ семꙋ б̂о бѣ̀ носѧ́и дѣа́нїѧ прошенъ.
е҆ѧ́же ради вины ѻ҆́ба къ цр҃ю призва́ни.
и҆ менела́и ѿꙗ҆тъ е҆сть ѿ сщ҃еньства, и҆ предаде лисима́хꙋ бра́тꙋ е҆го·
Състрат̑ же преведенъ бы́сть въ кѷпръ·
И҆ е҆гда сїѧ дѣа́хꙋсѧ слꙋчисѧ тарсѧ́номъ и҆ малотом꙽ ра́спрѧ въздвигнꙋти.
сего ради и҆же а҆нтїѻ́хꙋ цр҃ю наложницꙋ тꙋ́не да́ша.
тща́нно же б̂о цр҃ь прїиде ѹ҆тѣшити тѣх꙽, ѻ҆ставле́и и҆ намѣстника е҆ді́ного ѿ кнѧ́ѕь своих̑ а҆ндроника.
мнѧ́ше же менела́и въспрїѧ́ти себѣ вре́мѧ бл҃года́нно, зла́тыѧ нѣ́кїѧ сосꙋды ѿ цр҃кве ѹ҆краде дарова а҆ндро́никꙋ·
І҆ и́на прода в꙽ тѷръ и҆ въ ѻ́крес̑҇ныа гра́ды.
и҆же е҆гда и҆́стиннѣише позна ѻ҆нїѧ ѻ҆блича́ше е҆го сам̑ въ мѣстѣ небоѧ́знене бли́зꙋ дафнїи и҆ ан̑҇тиѻ҆хїи лежа́щем꙽ и҆деже менела́и пристꙋпи къ а҆ндроникꙋ молѧ́щи, да ѻ҆нїю ѹ҆бїет̑.
ѻ҆́н же грѧдѧ́ше къ ѻ҆нїи, и҆ даде десни́цꙋ съ клѧ́твою совѣтꙋѧ е҆мꙋ ле́стїю·
Вечерꙋ же бы́вшꙋ лежа́щима и҆́ма, нападе нан̑҇ ѻ҆та́и прише́дъ, и҆ ѹ҆би е҆го.
е҆ѧ́же ради вины̀ не токмо і҆ѹ҆де́и, н̂о е҆щѐ і҆ и҆́нїи ꙗ҆зы́цы мно́ѕи прогнѣва́хꙋсѧ ѹ҆бїиства ради неправед̑наго и҆́мже ѹ҆би мꙋж́а·
Возвращ꙽шꙋ же сѧ цр҃ю ѿ киликїиских̑ мѣстъ, и҆до́ша і҆ѹ҆де́и къ а҆нтїѻхїи въкꙋпѣ и҆ е́ллини, повѣда́юще ѻ҆ ѹ҆бїиствѣ ѻ҆нїинѣ·
ѻ҆скорбисѧ дш҃ею а҆нтїѻ́хъ ѻ҆нїи рад̑и̑, и҆ ѹ҆клоньсѧ в꙽ ми́лость сле́зы и҆злїѧ.
помина́ѧ ѻ҆ скончанїи трезваго и҆ ра́зꙋмнаго.
разъꙗ҆́ри же сѧ дш҃ею на а҆ндроника, и҆ перфирꙋ и҆звлече, и҆ хитонъ раздра, по всемꙋ градꙋ повелѣ ѻ҆бводи́ти, в нем̑ же ѻ҆нїю ѹ҆би, тамож̑ и҆ е҆го ѹ҆би.
г҃ь въздас̑҇ е҆мꙋ досто́инꙋю мꙋ́кꙋ.
мно́гаж̑ сщ҃енно грабительства въ цр҃кви ѿ лисима́ха съдѣла съ менелаѻ҆вымъ совѣтом̑, и҆зыиде же вѣсть внѣ̀, собрасѧ мно́жество на лисимаха, мно́го ѹ҆же зла́то и҆знесено.
наро́дом же въста́ющимъ и҆ гнѣ́ва и҆сполненымъ.
ѹ҆готова лисима́хъ ѻ҆рꙋжникъ, ҂г҃, и҆ начат̑ безакон̑҇ными рꙋка́ми ѻ҆бидѣти.
приведе нѣ́коего гꙋби́телѧ състарѣвшасѧ во́зрастом̑ и҆ разꙋмом̑ безꙋ́мне.
н̂о ꙗ҆́ко въразꙋмѣша насилїе лисима́хово, и҆нїи ка́менїе, и҆нїи дреко́лїѧ ѕылнаѧ восхитиша, нѣцыи б̂о пепел̑҇ на лисима́ха мета́ша̑ и҆ мно́ѕи паки ѹ҆ранени, нѣцы́и же падо́ша и҆ всѣх же въ бг̑҇ѣ ѻ҆братиша̑.
сщ҃енно же грабителѧ близъ сѣкро́вища ѹ҆би́ша.
ѻ҆ сихъ б̂о сꙋдъ на менела́ѧ възд̑виго́ша·
И҆ е҆гда̀ прїиде цр҃ь въ тѷръ на сїю потребꙋ, принесо́ша словеса̀ посланїи тр̂и мꙋжа ѿ ста́рец̑҇·
И҆ е҆гда̀ премога́шесѧ менелай, ѻ҆бѣща птоломею мно́ги сребреники дати на ѹ҆тѣшенїе цр҃ѧ·
Взѧ же птоломѣи, и҆ въ нѣкїи притворъ ѿведе, ꙗ҆́ко прохлажд̑а́тисѧ цр҃ѧ.
и҆ се́ѧ ве́щи злы́ѧ и҆ вины менела́ѧ свободи ѿ ѻ҆клевета́ющихъ·
Бѣднїи же и҆же пред̑ скифы гл҃аша ѿпꙋстишасѧ ꙗ҆́ко неразꙋмни, і҆ и҆хъ смр҃тїю ѻ҆сꙋди.
скоро ѹ҆бо неправед̑нꙋ тщетꙋ воспрїаша граждане и҆ люди и҆ сщ҃енныѧ сосꙋды, прею прогнани сꙋть·
Сеѧ̀ рад̑и̑ вины и҆ тири прогнѣ́вани на погребенїе тщивѣиши бы́ша, менела́и же и҆хъ ради дръжавнаго ѹ҆множенїѧ пребыва́ше во вла́сти, ѹ҆можа́ющисѧ ѕлобѣ.
и҆ великъ бысть на лаꙗ҆тельство гража́номъ·
Глв̑҇а, е҃·
Тогоже времени а҆нтиѻ́хъ второ́е прехоже́нїе ѹ҆гото́ва въ е҆гѷпет꙽.
слꙋчи же сѧ всѣмъ по всемꙋ гра́дꙋ ви́дѣти въ дн҃и м҃, риска́ю҆́щихъ на ко́нехъ въ зла́тыхъ ри́зах̑ и҆ въ полцехъ конницы съ копїи въчинени.
и҆схоже́нїѧ сътвори́ти ѿ бли́зꙋ, и҆ щи́томъ въздвигне́нїѧ и҆ ѻме́мниковъ мно́жество, и҆ мече́и совлече́нїе, и҆ стрѣлъ мета́нїѧ.
и҆ зла́тымъ ѻ҆рꙋжїемъ блиста́нїѧ, всѧ́кихъ бро́неи.
тѣмже всѝ молѧ́хꙋсѧ на бл҃го ꙗ҆вле́нїе бы́ти·
Быс̑҇ же бесѣда л꙽жи́ва, ꙗ҆́ко живота̀ и҆схожа́ше а҆нтиѻ́хъ·
Взѧ́тъ и҆а҆со́нъ не ма́ло ты́сѧщъ мꙋжїи вниде въ град̑ внеза́пꙋ.
и҆ гража́не на стѣнꙋ притѣка́хꙋ и҆ конецъ взѧ́тїю гра́да быс̑҇ менелаи же побѣже въ кра́и гра́да·
И҆а҆сонъ не праща́ше ѹ҆паде́нїѧ гража́номъ свои҆мъ.
ни помышлѧ́ше преспѣва́нїѧ на ѹ҆жи́ки лꙋка́во выти вельмѝ ча́юще враго́мъ и҆ не гража́ном̑ себѣ премѣне́нїе прїѧти.
и҆ нача́льства па́ки не въздержа̀, конецъ б̂о лаѧ́тельствъ свои҆хъ съ трꙋдомъ прїѧтъ.
и҆ бѣглецъ па́ки и҆де въ а҆мани́ты.
конецъ зла́го жи́тїѧ полꙋчѝ, заключенъ къ а҆рета́нꙋ а҆рап̑҇скꙋ мꙋчителю, бѣгающи ѿ града въ градъ всѣмъ ненави́дѣнъ.
ꙗ҆́ко ѿстꙋпникъ зако́на и҆ гнꙋша́емъ ꙗ҆́ко ѿч҃ества и҆ гража́номъ вра́гъ, въ егѷпетъ и҆згна́нъ е҆сть, і҆ и҆же мно́ги ѿ ѻ҆ч҃ества свое҆го и҆згна̀.
страньствꙋѧ погиба́ше.
къ лакедемонїѻмъ ѿи҆де, ꙗ҆́ко ѹ҆жи́чества рад̑и̑ прибѣжище хотѧ̀ и҆мѣти.
и҆же мно́гихъ безъгро́бне съкры̀, и҆ са́мъ неѻ҆плака́нъ и҆ непогребенъ ѻ҆ста́сѧ ни пꙋтнѧго погребенїѧ сподоби́сѧ, ни ѿч҃ескомꙋ гробꙋ причасти́сѧ.
припад̑шим же цр҃ю ѻ҆ бы́вшихъ ѹ҆сꙋмнисѧ цр҃ь да не і҆ѹ҆де́ѧ ѿстꙋпитъ и҆ того ради прїи́де ѿ е҆гѷпта скорбѧ̀ дш҃ею.
взѧ̀ града ѻ҆рꙋжника повелѣ же страти́гомъ неща́дно напада́ющихъ, и҆ по домехъ въсходѧ́щи закала́ти.
бы́ша б̂о паде́нїѧ ю҆́ношамъ и҆ ста́рцемъ и҆ женам꙽ и҆ ча́домъ и҆стребле́нїѧ, дв҃амъ же и҆ ѻ́троком̑ смр҃ть.
бѣша же токмо въ трехъ дн҃ехъ ҂п҃, ѹ҆бїеныхъ.
҂м҃, свѧ́заныхъ, не ме́нши же проданыхъ.
н̂о ни та̀ довлѣша и҆мъ.
дръзнꙋ па́ки вни́ти въ цр҃ковь всеа землѧ̀ ст҃ѣишꙋ, и҆мѣѧи менела́ѧ въди́телѧ, и҆ зако́нъ ѿч҃ь быс̑҇ преда́тель, и҆ скверными рꙋка́ми прие҆млѧше ст҃ыѧ съсꙋды, и҆же ѿ и́ных̑ цр҃еи бѣхꙋ поста́влена на красотꙋ мѣста и҆ сла́вꙋ и҆ честь, и҆ скверными рꙋка́ми възима́ѧ подаѧ́ше.
премѣни́сѧ мы́слїю а҆нтїѻх̑ не помышлѧ́ѧ ꙗ҆́ко грѣхъ ра́ди ѻ҆бита́ющих̑ въ градѣ мало прогнѣвасѧ влд̑ка, тѣмже быс̑҇ на мѣсто презрѣнїе а҆щеж̑ не слꙋчи́сѧ им̑ мно́гими грѣхи быти ѻ҆бъѧ́тым̑.
ꙗ҆́ко и҆лиѻ҆до́ръ по́сланыи ѿ селевкїа цр҃ѧ къ взѧтїю съкровища, сеи пришед̑ внезапꙋ бїенъ и҆ премѣнис̑҇ дрьзостїю.
н̂о не ра́ди мѣста ꙗ҆зык̑҇ н̂о ꙗ҆зы́ка ради мѣсто г҃ь и҆збра̀·
Тѣмже ѹ҆бо и҆ сїе мѣсто съприча́стно бы́сть люде́и лꙋка́выхъ.
послѣди же бл҃годѣѧ́нымъ ѿ г҃а съѻ҆бщи́сѧ, и҆же ѻ҆ста́вленое во гнѣвѣ вседръжи́телѧ, паки въ примѣре́нїю вели́каго влд̑кы съ всею сла́вою и҆справисѧ·
Тѣмже а҆нтїѻ́хъ ҂а҃, и҆ и҃ со́т꙽, ѿꙗ҆́тых̑ ѿ цр҃кве тала́нтъ скорѣ́ише въ а҆нтїѻ҆хїю възвратисѧ чаѧ́и ѿ горды́ни землѧ̀ плыти, и҆ пꙋчинꙋ̀ преше́дъ изы́иде разгордѣнїѧ ра́ди срд̑ца.
ѻ҆ста́ви же пред̑ста́тели къ ѻ҆ѕлобле́нїю лю́демъ, въ і҆ерс̑҇ли́мѣ ѹ҆бо фили́п꙽па родомъ фриге́нина, ѻ҆бы́чаи жесточа́ишїи и҆мѣѧй ѿ поста́вльшаго.
въ гаризи́не же а҆ндро́ника и҆ менела́ѧ и҆же злѣ́ише и́ныхъ ѻ҆ѕлоблѧ́ше гража́нъ.
прїиде къ гража́номъ і҆ѹ҆де́искимъ и҆мѣѧй ѕлобы завѣтъ·
И҆ посла̀ ненавидѣна нача́лника а҆поллонїѧ с во́и, ҂к҃в·
повелѣ е҆мꙋ всѣхъ съвръшеныхъ времены погꙋби́ти же́ны и҆ ю́ноши продаѧ́ти·
Се́и же пришедъ въ і҆ерс̑҇лимъ и҆ ми́рне под̑сꙋди́сѧ даже до дн҃е ст҃ыѧ сꙋбо́ты·
И҆ тогда̀ празднꙋющимъ і҆ѹ҆де́ѻмъ въѻ҆рꙋжитисѧ свои҆мъ повелѣ·
Вси же въкꙋпѣ и҆же на позо́ръ теча́хꙋ закла̀ и҆ гра́дъ съ ѻ҆рꙋжїи протѣкающи людїи мно́жество погꙋбѝ·
І҆ѹ́да же мак꙽каве́и и҆же десѧтыи бы́сть, ѿи́де в пꙋсто мѣсто ѕвѣрїимъ ѻ҆́бразомъ живѧ́ше съ сꙋщими с ним̑, и҆ травꙋ̀ ꙗ҆́ко пи́щꙋ ꙗ҆дѧ́щи пребыва́хꙋ, въ е҆же не причаститисѧ къ ѻ҆скверне́нїю·
Глв̑҇а, ѕ҃·
По ма́лѣ же вре́мени, посла̀ цр҃ь ста́рца нѣкое҆го а҆ѳинее҆нина понꙋждати і҆ѹ҆де́ѧ, премѣни́тисѧ ѿч҃еских̑ преда́нїи и҆ бжс̑҇твеных̑ закон̑҇ не придръжа́тисѧ, ѻ҆сквер꙽нити же въ і҆ерс̑҇лимѣ хра́мъ, и҆ прои҆меновати дїѧ и҆ ѻ҆лимъбїю.
і҆ и҆же въ гаризи́не ꙗ҆́коже ѻ҆бита́ющїи и҆мѣхꙋ мѣсто дїѧ стра́ннаго.
стропти́во же и҆ всм̑ѣ родомъ б̂ѣ нападе́нїѧ лꙋкавъства и҆же цр҃ковь любодѣѧ́нїѧ и҆ козлогласова́нїѧ б̂ѣ полна̀ ѿ ꙗ҆зы́къ и҆ живꙋщихъ со блꙋдницами, и҆ въ сщ҃енных̑ притворехъ женамъ приближа́ющим̑сѧ и҆ неподо́бнаѧ внꙋтрь вноша́хꙋ·
ѻ҆лта́рь же паки полнъ бысть неподо́бныхъ и҆хже зако́нъ възбранѧ́ше ниже сꙋботъ хранѧ́хꙋ, ни дн҃и пра́здникъ ѿч҃ь въздержа́хꙋ·
ни просто себе нитоже і҆ѹ҆де́ѧ и҆менова́ше ведѧ́хꙋ же сѧ з горкою нꙋждею въ дн҃ь рожденїѧ цр҃ева къ жрътвѣ·
Бы́вши же дїѻнисїѻвꙋ пра́зникꙋ, понꙋжда́хꙋсѧ і҆ѹ҆де́и кисы и҆мꙋще хвали́ти дїѻнисїѻна·
шепта́нїе же и҆зы́иде въ бли́жнѧѧ грады е҆́ллинъскїѧ·
птоломѣю поста́вившꙋ въ і҆ѹ҆деи празнова́ти сїи празникъ и҆ пожирати.
не и҆зволѧ́ющихъ прїитѝ на повелѣнїѧ ꙗ҆́зы́ческа да ѹ҆бїют̑ бѣ б̂о ви́дѣти бѣдно·
дв̂ѣ бо же́ны ѻ҆клеветани сꙋть ѻ҆брѣзавшїѧ чада своѧ, и҆́мже къ со́сцамъ ѻ҆́троки повѣсиша и҆ пред̑ наро́домъ проводѧ́хꙋ и҆хъ по градꙋ и҆ съ стѣны свергоша.
и҆нїи же къ ближним̑ съвокꙋплѧ́ющесѧ пещерамъ, и҆ та́ино сꙋботныи дн҃ь празднꙋ́юще.
е҆гда̀ възвѣщено бысть филиппꙋ съж꙽жени сꙋть.
зане боѧ́хꙋсѧ бл҃гоѻ҆бразне и҆мѣти славы бл҃гочестнаго дн҃е.
молю ѹ҆бо чтꙋщихъ кни́гꙋ сїю не ѹ҆страшатисѧ нанесеныхъ ради.
мнѣти же мꙋченїѧ сїѧ не къ погꙋбленїю н̂о къ наказанїю ро́да на́шего быти.
и҆б̂о не мно́го вре́мѧ ѻ҆ста́витсѧ нечествꙋю҆щимъ, н̂о скоро мщенїе воздастьсѧ.
вели́каго бл҃годѣа́нїѧ е҆сть знаменїе·
не бо ꙗ҆́ко на и҆́ных ꙗ҆зы́цех̑ ждетъ долготръпеливыи влд̑ка, да́же къ срѣтенїю и҆хъ грѣховъ и҆ къ и҆сполнеенїю мꙋ́читъ.
тако и҆ на нас̑҇ сꙋдѝ бы́ти, да не до конца ѻ҆ставлѧет̑ грѣхомъ на́шимъ бы́ти, послѣди насъ м꙽ститъ, понеже никогда ѿ насъ млс̑҇рдїе свое ѿи́метъ.
ѻ҆блича́ющи б̂о въ сꙋпротивныхъ не ѻ҆ста́витъ лю́дїи свои҆хъ.
ѻ҆баче же къ потръпѣнїю и҆ сїѧ намъ да речетсѧ малых̑ ради внити въ повс̑҇ѣ.
е҆леа҆заръ нѣкто ѿ прежнихъ кни́жникъ.
мж̑ꙋ времены прешед̑, и҆ ли́цемъ кра́сенъ.
ѻ҆творенымъ ѹ҆стомъ насилѧе҆мъ мѧ́са свинїѧ ꙗ҆́сти·
Ѡ҆́н же съ честїю смр҃ть наче нежел̂и животъ съ нена́вистїю и҆зволѧше, во́лею пред̑и҆дѧ́ше на мꙋ́кꙋ плю́ющи.
и҆́м꙽же ѻ҆́бразомъ подоба́ше ѹ҆битисѧ и҆́ным̑ тръпенїе подаѧ́ше.
и҆ не ѻ҆сквернѧшесѧ сътворити неподо́бнаѧ живота̀ ради любве.
безаконици же ѹ҆млс̑҇рді́шасѧ вчиненїи древнѧго ради к꙽ мꙋжꙋ зна́нїѧ, взе́мше е҆го та́ино молѧ́хꙋ принесо́ша мѧ́са ꙗ҆́же ꙗ҆́сти е҆мꙋ подоба́шесѧ и҆ е҆го ради ѹ҆гото́вана, лицемѣрне же сътвори́ти сїе ꙗ҆́сти мѧ́са ѿ жрътвы цр҃емъ повелѣныѧ да сїе съдѣла́въ ѿ смр҃ти и҆зба́вит̑сѧ и҆ древнѧѧ ради дрꙋжбы полꙋчи́ти чл҃колюбїѧ.
ѻ҆н же размышле́нїе бл҃го въспрїѧтъ досто́ино во́зраста и҆ ста́ростїю ѻ҆бдержи́мъ лѣпотныа сѣдины.
и҆ ѿ ѻ҆трочества предобраго жи́тїѧ просвѣща́емъ дѣѧ́ньми.
такоже и҆ ст҃омꙋ и҆ бг҃озда́нномꙋ зако́нꙋ послѣдꙋѧ, ѿвѣща̀ скоро гл҃ѧ въврещи́сѧ волѧщи въ а́дъ.
не бо̀ во́зрастꙋ нашемꙋ досто́ино е҆сть лицемѣрити.
да многи ѿ ю́ныхъ непщꙋ́юще е҆леа҆за́ра, ч҃ лт̑ѣ, преити къ жи́тїю и҆ноплемен꙽ныхъ.
и҆ ѻ҆нѝ мое҆го ради лицемѣрїѧ и҆ маловремен̑҇наго живота̀ прельстѧ́тсѧ.
и҆ сего ради порочнꙋ ста́рость мою сътворю̀ а҆ще б̂о н҃нѣшнѧѧ мꙋки чл҃ческїѧ и҆зба́влюсѧ, н̂о рꙋки всемогꙋщаго ни живъ ни скончан̑҇ и҆збѣжꙋ.
тм̑ѣже ѹ҆бо мꙋжествене разлꙋча́ющисѧ живота̀ ста́рость досто́инꙋ ꙗ҆влю, ю҆́ношам̑ же ѹ҆бо ѻ҆́бразъ поста́влю.
а҆ще бо́дрою дш҃ею и҆ крѣпко за чс̑҇тныѧ и҆ ст҃ыѧ зако́ны подо́бнаѧ смр҃ти възнесꙋ.
и҆ симъ реченнымъ.
съ тща́нїемъ на мꙋкꙋ влеча́шесѧ·
И҆мже ведꙋщимъ е҆го, мало прежде бл҃гоживот̑наго въ бѣдно жи́тїе пременѧ́хꙋ пред̑реченыхъ ради слове́съ, ꙗ҆́ко сїи мнѧ́хꙋ бестрꙋдїе бы́ти.
хотѧ́ же ра́нами сконча́тисѧ, въстена̀ и҆ реч̑҇·
Ги҃ и҆же и҆́маши ст҃ыи ра́зꙋмъ, ꙗ҆вле́но ты̀ вѣси ꙗ҆́ко ѿ смр҃ти можах̑ и҆зба́витисѧ, же́стоки теле́сныѧ потръплю̀ бо́лѣзни по дш҃и, стра́ха б̂о ради твое҆го любовїю сїа страждꙋ<.>
И҆ сеи ѹ҆бо симъ ѻ҆́бразомъ живо́тъ сконча̀.
не то́кмо ю́ношамъ, н̂о и҆ всѣмъ ꙗ҆зы́комъ памѧть смр҃ти своеѧ, и҆ ѻ́бразъ си́лы и҆ крѣпости ѻ҆ставлѧ́ющи·
Глава̀, з҃·
Слꙋчи́ же сѧ седми бра́тїи въкꙋпѣ съ мт҃рїю ꙗ҆́тымъ, понꙋжда́тисѧ ѿ цр҃ѧ ꙗ҆́сти проти́вꙋ правилъ мѧсъ свиныхъ, бича́ми и҆ жи́лами волꙋ́ѧми мꙋчими·
Є҆ді́нъ же ѿ нихъ и҆же бѣ прьвыи та́ко рече.
чт̂о имаши въпраша́ти ѿ насъ, и҆ чт̂о хо́щеши ѹ҆чи́тисѧ·
готови б̂о е҆смы ѹ҆мрѣти, нежели престꙋпи́ти ѿч҃ескїѧ законы·
Разгнѣва же сѧ цр҃ь и҆ повелѣ сковрады и҆ коно́би разжещи.
и҆мже скоро разжеже́ном꙽ повелѣ прьвомꙋ ѿ нихъ и҆же гл҃а раз꙽сѣщи ꙗ҆зы́къ, и҆ кожꙋ главнꙋю съдрати, вы́ше же рꙋцѣ и҆ но́ѕѣ е҆мꙋ ѿсѣщи.
И҆ прочїи е҆го бра́тїа и҆ мт҃и сматрѧ́щи.
и҆ е҆гда ѹ҆же неключим̑ сътворенъ бы́сть, повелѣ ѻ҆гню̀ преда́ти.
и҆ е҆ще ды́шꙋщꙋ повелѣ̀ пещѝ на сковрадѣ на не́иже до́лго мꙋча́шесѧ·
Прочїи въкꙋпѣ съ мт҃рїю междꙋ собо́ю ѹ҆крѣплѧ́хꙋсѧ ѹ҆мрѣти крѣпко, рекꙋщи сице·
Гь҃ б҃ъ ѹ҆зритъ и҆́стиннꙋ.
и҆ ѹ҆тѣшитсѧ ѻ҆ насъ·
І҆́мже ѻ҆бразомъ пред̑ лицем꙽ въ свѣдѣтельство пѣсни просвѣти моѷсїѧ гл҃ѧ, и҆ ѻ҆ рабѣхъ свои҆хъ ѹ҆тѣшитсѧ.
ѹ҆мрьшꙋ ѹ҆бо прьвомꙋ.
симъ ѻ҆́бразомъ и҆ врота́го и҆зводѧ́хꙋ на порꙋга́нїе.
и҆ ко́жꙋ съ главы̀ е҆го съ вла́сы съдра́ша, въпраша́хꙋ, а҆ще ꙗ҆́сть преже неже ѹ҆мꙋчитсѧ все тѣло по ѹ́дах̑·
ѻн̑҇ же ѿвѣща ѿч҃еским̑ гла́сомъ реч̑҇, н̂и.
тѣмже и҆ се́и порѧдꙋ прїꙗ҆́ть мꙋче́нїе ꙗ҆́ко и҆ прьвыи·
въ послѣднем̑ же и҆здыханїи быс̑҇, и҆ реч̑҇·
Ты б̂о ѻ҆каа҆н꙽нѣиши ѿ настоꙗ҆́щаго живота̀ нас̑҇ погꙋблѧ́еши.
цр҃ь же мира сконча́ных̑ насъ свои҆хъ ради зако́нъ въздви́гнетъ въ воскрс̑҇енїе живота̀ вѣчнаго<.>
Посем꙽ третїи порꙋга́шесѧ, и҆ ꙗ҆́зык̑҇ испрошенъ а҆бїе възда́сть, и҆ рꙋки дрьзостне простре, и҆ мꙋжествене рече.
ѿ нб҃си сїѧ притѧжа́хъ и҆ е҆го ради зако́на призира́ю сїѧ.
и҆ ѿ него сїѧ паки ѹ҆пова́ю въспрїѧти·
тако да цр҃ь і҆ и҆же с ним̑ ѹ҆ди́влѧ́хꙋсѧ ю҆́ношестѣ дш҃и, ꙗ҆́ко нивъчто́же полага́ше мꙋки, и҆ се́и тако скончасѧ<.>
Також̑ и҆ четвертаго мꙋча́хꙋ мꙋчители.
и е҆гда̀ ѹ҆же бы́сть къ смр҃ти, та́ко рече.
ѹ҆бива́емыи ѿ чл҃къ ѹ҆пова́нїа ча́етъ ѿ б҃а, паки и҆мъ въскреснꙋти·
Тебѣ б̂о въскрс̑҇нїе въ живо́тъ не бꙋдетъ·
Привед꙽ше же и҆ пѧ́таго мꙋчиша, и҆ ѻнъ възрѣвъ нань рече власть въ чл҃цехъ и҆́маши тлѣненъ сыи е҆же хо́щеши твори́ши.
не мниж̑ родꙋ нашемꙋ ѿ б҃а ѻ҆ста́витисѧ.
ты же тръпѝ и҆ зрѝ велїю дръжа́вꙋ е҆го.
ка́ко тебе и҆ сѣмѧ твое ѹ҆мꙋчитъ·
Посем̑ приведо́ша шестаго и҆ тои ѹ҆мрѣти начина́ющи тако реч̑҇, не прельщаисѧ сꙋетно.
мы б̂о себе ради сїѧ стражд̑емъ съгрѣша́юще къ б҃ꙋ нашемꙋ, и҆ досто́ина ѹ҆дивле́нїѧ бысть·
ты же не мнишисѧ пови́ненъ бы́ти, бг҃оборъствовати начал̑҇ е҆си.
приведшиж̑ мт҃рь ди́внꙋю и҆ бл҃ги памѧти досто́инꙋ.
ꙗ҆же погиба́ющихъ седмь сн҃овъ е҆ді́наго дн҃е и҆ вре́мени ви́дѧщи, бл҃годш҃не приноша́ше ѹ҆пова́нїа г҃а ради.
ко́жд̑о же и҆хъ ѹ҆тѣша́ше ѿч҃ескимъ гласом꙽ крѣпко, и҆сполнена мꙋдрости.
и҆ женьскаѧ помышле́нїѧ мꙋжескою дш҃ею възносѧ́щи рече к нимъ.
не вѣмъ како въ чрево мое ꙗ҆ви́стесѧ, ниже б̂о аз̑ дх҃ъ и҆ дш҃ꙋ дахъ вамъ и҆ живо́тъ.
и҆ ко́ждо ѹ҆ды не а҆зъ созда́хъ, н̂о мира творецъ създа́выи родъ чл҃чь и҆ всѣх꙽ и҆спытꙋѧ роже́нїе и҆ дх҃ъ, вам̑ жи́зненъ паки съ млс̑҇тїю въздастъ ꙗ҆́ко нн҃ѣ сами себе презира́ете ради зако́на е҆го·
А҆нтїѻ́х же непщꙋѧй ѹ҆ничижи́ти поно́сенъ ви́дѣ гла́съ е҆ще же ю҆нѣ́ишꙋ сꙋща не то́кмо словесы̀ молѧ́шесѧ, н̂о и҆ съ клѧтвою ѹ҆крѣплѧ́ше богата и҆ бл҃жена сътвори́ти и҆ преведена, ѿ ѻ҆ч҃ескихъ закон꙽.
и҆ дрꙋга бы́ти и҆ вещи требꙋю҆щаѧ е҆мꙋ възда́ти.
н̂о на сїѧ е҆гда ю́ноша никакоже ѹ҆клонѧ́шесѧ възва̀ цр҃ь мт҃рь и҆ совѣтоваше е́и да ю́ноши сътворитъ на сп҃сенїе.
е҆гда же мно́гими е҆го словесы̀ бысть ѹ҆молена.
ѻ҆бѣща̀ совѣтова́ти сн҃ꙋ свое҆мꙋ.
приклони́вшисѧ е҆мꙋ посмѣѧсѧ жестокꙋ мꙋчи́телю·
сице рече ѿч҃ескимъ гласомъ, сн҃е поми́лꙋи мѧ носи́вшꙋю т̂ѧ въ чревѣ ѳ҃, мс̑҇ць.
и҆ дои҆вшꙋю т̂ѧ лѣта г҃, и҆ въскорми́вшꙋю т̂ѧ и҆ приведшꙋю въ во́зрастъ се́и.
молю́ тѧ ча́до да зри́ши на́ нб҃о и҆ зе́млю, и҆ на всѧ̀ ꙗ҆́же в нихъ сꙋть, и҆ ѹ҆разꙋмѣ́еши ꙗ҆́ко ѿ не сꙋщихъ сътворѝ сїѧ б҃ъ, и҆ чл҃чь род̑ та́коже бы́ти.
не ѹ҆бо́исѧ плоторастерза́телѧ сего, н̂о досто́и҆нъ бывъ бра́тїи твоей въспрїимѝ смр҃ть.
да въ млс̑҇ти съ бра́тїею твое́ю въспрїимꙋ т̂ѧ.
е҆ще же сїѧ е́й гл҃ющи, ю҆́ноша реч̑҇.
кого потерпите не послꙋшаю повелѣнїи цр҃евыхъ.
н̂о повелѣнїѧ зако́на слꙋшаю да́ннаго ѿц҃емъ нашим꙽, моѷсїѻмъ.
тыж̑ всѧ́коѧ ѕло́бы ѻ҆брѣта́тель бывый на і҆ѹ҆де́а, не ѹ҆бѣжи́ши рꙋкꙋ бж҃їю.
Мы́ бо за грѣхѝ наша сїѧ стражд̑емъ а҆ще же ради ꙗ҆́зве́нїѧ и҆ наказа́нїѧ живы́и г҃ь мало прогнѣвасѧ.
н̂о па́ки примѣритсѧ рабо́мъ свои҆мъ ты же ѽ непрпд̑бныи и҆ всѣхъ чл҃къ сквернавѣ́ишїи, не въздвиѕа́исѧ сꙋе҆тно кичасѧ т꙽щетнымъ ѹ҆пова́нїемъ, на бнс̑҇ыѧ ѻ́троки възносѧ рꙋкꙋ.
не ѹ҆бо вседръжи́телѧ и҆ всевидца б҃а сꙋда и҆збѣглъ е҆си.
бра́тїѧ б̂о моѧ мало нн҃ѣ болѣзни потръпѣша по завѣтꙋ бж҃їю вѣчнаго живота̀ полꙋчи́ша.
ты же сꙋдомъ бж҃їимъ пра́вымъ горды́нѧ твоеѧ мꙋки въспрїимеши възда́нїе.
аз̑ же ꙗ҆́ко и҆ бра́тїѧ моѧ дш҃ꙋ и҆ тѣло мое предаю за ѿч҃ескїѧ зако́ны, възыва́ющи б҃а і҆и҆л҃ю въско́рѣ млс̑҇тива бы́ти.
тебе же смꙋще́нїемъ и҆ бие҆нїемъ и҆сповѣда́ти, зане е҆ді́нъ то́кмо б҃ъ е҆сть.
на мнѣ и҆ братїи моеи престанетъ вседръжителѧ гнѣвъ, нанесеныи праведно всемꙋ родꙋ на́шемꙋ·
Тогда̀ цр҃ь разъꙗ҆ри́сѧ ꙗ҆́ростїю нань паче всѣхъ горчае, нанесенаго ради посмѣха горкаго.
и҆ се́и ѹ҆бо чи́сто премѣни́сѧ, по всемꙋ на г҃а ѹ҆пова́ѧ.
послѣди же сн҃овъ и҆ мт҃и сконча́сѧ.
тѣмже ѻ҆ жрътвахъ и҆ ѻ҆ находѧ́щих̑ ѕло́бахъ толи́ко и҆звѣстисѧ·
Глв̑҇а, и҃·
Іѹ́да же маккаве́и і҆ и́же с ним̑ внидоша та́ино въ се́ла, и҆ призыва́хꙋ срод̑ники.
и҆ пребыва́ющихъ въ і҆ѹ҆де́иствѣ прїемлѧхꙋ.
и҆ събра̀ша ҂ѕ҃ мꙋж́їи, и҆ призы̀вахꙋ г҃а призрити на́ люди ѿ всѣхъ попира́емыхъ.
ѻ҆чисти же и҆ храмъ ѿ нечестивыхъ чл҃къ ѻ҆сквернѧемыи.
помиловати же і҆ ѻ҆пꙋстѣныи град̑, и҆ хотѧщїи ра́вно ѻ҆́трокомъ бы́ти·
и҆ гласъ кро́ви вопїю́щихъ к тебѣ ѹ҆слы́ши.
помѧни же и҆ зако́нопрестꙋпныхъ погꙋбленїѧ и҆́мже ѻ҆́троки непови́н꙽ныѧ погꙋби́ша, и҆ бы́вших̑ хꙋленїи на и҆мѧ твое, и҆ възненави́дѣ лꙋкавъства·
Бысть же въ събра́нїю маккаве́и, и҆ непостоа́ненъ ꙗ҆зы́комъ бысть.
гнѣвъ б̂о гн҃ь въ ми́лость ѻ҆братисѧ, и҆ напада́хꙋ на веси и҆ грады безъвѣстно и҆ сожига́хꙋ.
и҆ бл҃говременна мѣста възимающе, не ма́ла паденїѧ чл҃ком̑ сътвори́ша.
на́ипаче въ но́щи сїе съдѣла́нїе быва́ше.
и҆ бесѣда мꙋж́ества е҆го прохожда́ше всюдꙋ·
Ви́дѧ же филиппъ пома́лꙋ грѧдꙋща мꙋжа̑ въ кори́сть, ча́стѣе же въ бл҃годн҃ьствїе слꙋчи́сѧ е҆мꙋ преспѣвати.
къ птоломею вое҆во́дѣ ѹ҆до́ли сѷрїи і҆ финикїи, писа̀ помощѝ цр҃ьскомꙋ повелѣнїю.
ѻ҆́н же скоро посла никано́ра сн҃а патроклова прьвѣ́ишихъ дрꙋгъ даде е҆мꙋ ѿ пам꙽филїискыхъ ꙗ҆зы́къ ѻ҆рꙋженых̑ во́инъ, ҂к҃, да весь і҆ѹ҆де́искїи род̑ и҆збїют̑.
посла́ же и҆ горгїѧ мꙋжа стратига и҆ въ бранехъ преѹ҆чена·
Поста́ви же ника́норъ да́нь цр҃ю и҆же ри́млѧномъ даа́ше, ҂в҃, талантъ ѿ плѣненїѧ і҆ѹ҆де́и испо́лнити·
А҆́бїе же въ помо́рьскїѧ гра́ды посла̀ созыва́ющи на кꙋпленїе і҆ѹ҆де́ѻв̑҇ свѧзневъ, ѻ҆бѣща́ющисѧ, ч҃, ѹ҆́зниковъ на талантъ да́ти.
не зрѧ́щи на м꙽щенїе послѣдꙋ́ющее е҆мꙋ ѿ вседръжителѧ·
І҆ѹ́дѣ же възвѣщено б̂ѣ ѻ҆ пришествїи никаноровѣ, презира́юще свое ѻ҆полченїе пришествїа е҆го ради, ѹ҆жасшесѧ и҆ не вѣ́роваша бж҃їю ѿмщенїю, ѿбѣго́ша во и҆но мѣсто.
и҆нїи же ѻ҆ста́вшаѧ вс̂ѧ продаѧ́хꙋ, въкꙋпѣ же г҃а молѧ́хꙋ да и҆зба́витъ их̑ ѿ нечести́ваго никанора, и҆же преже неже полꙋчи прода́де, и҆ а҆ще не и҆хъ ради н̂о ради завѣта и҆же бысть къ ѿц҃емъ и҆хъ.
и҆ призванїа ради честнаго и҆ великолѣпаго и҆мени е҆го на нихъ·
Собра же маккаве́и и҆же ѻ҆́крс̑҇тъ его, ҂ѕ҃. молѧ́ше да не ѹ҆жаснꙋтсѧ ѿ сꙋпротивникъ.
ниже да ѹ҆страшат̑сѧ безако́нно грѧдꙋщих̑ на сѧ враговъ мно́жество.
н̂о крѣп꙽ко проти́витисѧ пред̑ ѻ҆чи́ма и҆мѣ́ющи досади́тел̑҇ства, и҆же мѣсто ст҃ое и҆́ми въ зло ѻ҆бращено.
и҆ посмѣѧ́нїа града и҆ ѻ҆скверненїе е҆ще же и҆ прароди́тельскїѧ за́повѣди попра́нїе.
ѻ҆ни б̂о ѻ҆рꙋжїемъ надѣют̑сѧ, рѣша дръзостне.
мы же на вседръжи́телѧ б҃а могꙋщаго и҆ грѧдꙋщихъ на на́съ и҆ весь ми́ръ е҆ді́нымъ манове́нїемъ низложи́ти надѣ́емсѧ.
наказа́ же и҆хъ ѻ҆ застꙋпленїи бы́вшихъ въ прародителехъ.
і҆ е҆же под̑ сенахеримом꙽, рп҃е тысѧщь ꙗ҆́ко погибо́ша.
и҆ въ вавѷлонѣ к нимъ гала́товъ ѻ҆полченїе быв̑҇шее, ꙗ҆́ко вс̂и въ бра́нь прїидо́ша̑ и҆́хже б̂ѣ, ҂и҃, съ македо́нѧны, ѿ них̑ же, ҂д҃, македо́нѧн̑҇ ѿчаѧ́шас̑҇.
по семъ сїи, ҂и҃. р҃к.
тисѧщъ поби́ша по́мощи ради да́нныѧ и҆мъ ѿ нб҃си, и҆ ползꙋ мно́гꙋ взѧ́ша·
Сих̑ ра́ди въспомѧновенїи дръзостных̑ поста́ви и҆ готовыхъ ѹ҆мрѣти зако́нъ рад̑и̑ и҆ ѿч҃ества·
Четверо ча́стне же во́и поста́ви, в꙽чини же и҆ бра́тїю свою вое҆водами по стране чі́на, сі́мона і҆ и҆ѻ҆си́фа і҆ и҆ѻ҆наѳа́на.
под̑да же комꙋждо их̑ ты́сѧщꙋ и҆ пѧ́ть сотъ.
е҆ще же и҆ е҆лїа҆зара честѝ ст҃ꙋю кни́гꙋ, и҆ дасть зна́менїе по́мощи бж҃їа, и҆ въ перво́м꙽ стрѣтенїи самъ вое҆во́да срѣтесѧ съ никаноромъ.
бысть же и҆мъ всемогꙋщїи съпоборник꙽, и҆ ѹ҆би́ша воин̑҇ бо́ле, ҂ѳ҃. ꙗ҆́звеныхъ же и҆ безъѹ҆́дных̑ бо́льшꙋю ча́сть сътвори́ша во́и никаноровыхъ, всѣх же в꙽ бѣгъство понꙋди́ша.
сребреники ѻ҆ бы́вшем̑ кꙋпленїю и҆хъ взѧ́ша.
гони́ша же и҆хъ ѕѣлно и҆ поби́ша, ѹ҆ста́ же и҆хъ ѿ времени заключены·
бѣ б̂о преже сꙋботы сеѧ ради вины не медлѣша гонѧ́ще их̑.
ѻ҆рꙋжїѧ же их̑ и҆ коры́сти събира́ющи, сꙋботꙋ дѣѧхꙋ блс̑҇вѧщи і҆ и҆сповѣда́ю҆щисѧ гв҃и сп҃съшаго их̑ въ дн҃ь сїи, и҆ нача́ло млс̑҇ти въчини́вшаго и҆мъ.
по сꙋботѣ же не́мощнымъ и҆ сиротам̑ и҆ вдовамъ и҆ ѻ҆би́димымъ раздѣли́ша коры́сти, про́чаѧ же съ ѻ҆́троки свои҆ми раздѣли́ша.
сїи и҆ съдѣꙗ҆́вшїи ѻ҆бщꙋю мл҃твꙋ сътвори́ша, млрс̑҇даго г҃а мл҃ѧщи въ конецъ примѣритисѧ рабомъ свои҆мъ·
И҆ сꙋщихъ съ тимоѳе́ѻмъ и҆ вакхидомъ ꙗ҆́ша и҆ ѹ҆би́ша боле ҂к҃. и҆ тверды́нѧ вы́шнѧѧ въздержа́ша, и҆ многа̑ плѣне́нїѧ раздѣли́ша равночастне себѣ, и҆ не́мощнымъ и҆ сиротам̑ и҆ вдовам̑ е҆ще же и҆ презви́теромъ сътвори́ша.
събравше же ѻ҆рꙋжїѧ и҆хъ прилѣжне всѧ положи́ша в мѣстехъ бл҃говре́мен꙽ныхъ·
Про́чаѧ же коры́сти въ і҆ерс̑҇лимъ принесо́ша.
и҆ филархина тимоѳе́ѻва ѹ҆би́ша мꙋжа непреподо́бнѣиша, и҆же мно́гихъ і҆ѹ҆де́ѻв꙽ ѻ҆ѕло́бльша.
празнꙋю́щи же дн҃и побѣды въ ѿч҃ествѣ, заже́гшаго сщ҃енныѧ врата, калистена ꙗ҆ша ѹбѣгшаго въ е҆ді́нꙋ кꙋщицꙋ и҆ досто́инꙋю м꙽здꙋ нечестїю е҆го възда́ша.
преклѧтѣ́ишїи же никано́ръ и҆же ты́сꙋща кꙋпцовъ на прода́нїе і҆ѹ҆деѻвъ приведъ, смиренъ помощїю гн҃ею ѿ мни́мыхъ е҆мꙋ малыхъ быти.
славы ѿложъ ри́зы, по́ зем̑ли бѣглъцевымъ ѻ҆́бразомъ пꙋста себе сътворъ, е҆ді́нъ прїиде въ а҆нътїѻхїю.
велико нечестїе ѻ҆ погꙋбленїи свое҆го во́ю наслѣдова.
і҆ и҆же ѻ҆бѣща ри́млѧномъ да́нь възда́ти ѿ плѣне́нїѧ і҆ерс̑҇лимъска.
проповѣдаше нн҃ѣ защитителѧ б҃а и҆мѣти і҆ѹ҆де́ѻмъ.
и҆ сего ради неꙗ҆звеным꙽ быти і҆ѹ҆деѻм꙽, зане послѣдоваша закономъ ѿ того поста́вленымъ·
Глв̑҇а, ѳ҃·
Тогоже времени а҆нтїѻ́хъ бещестїемъ ѻ҆братисѧ ѿ перси́ды, вшедъ б̂о въ гл҃емыи персиполисъ, и҆ нача̀ расхища́ти храм̑ и҆ град̑ ѻ҆бъдержа́тїи тѣмже множество ѹ҆стремлѧю҆щих̑сѧ съ ѻ҆рꙋжїи въ по́мощъ, в꙽ бѣгъ ѻ҆брати́ша.
и҆ тако слꙋчи́сѧ а҆нтиѻхꙋ бѣжати ѿ поселѧ́нъ и҆ ѻ҆братисѧ сраменъ.
пришедшꙋ же е҆мꙋ къ е҆квата́нꙋ, възвѣсти́сѧ е҆мꙋ бы́вшаа ѻ҆ никано́ре и҆ тимоѳе́ю·
възнесе же сѧ ꙗ҆́ростїю мнѧ́сѧ ѕло́бꙋ е҆го нанести на і҆ѹ҆деѧ ѿбѣгшихъ ради·
тѣмже повелѣ а҆рматилатꙋ беспреста́ни бѣжа́ти ше́ствїе.
нбс̑҇номꙋ сꙋдꙋ понꙋжда́ющꙋ е҆го.
сице б̂о гордели́ве реч̑҇, многомꙋжїе і҆ѹ҆де́иское пришедъ сътворю вът꙽ще.
вседръжитель же г҃ь б҃ъ і҆и҆л҃евъ поразѝ е҆го неи҆сцѣлною и҆ незри́мою ꙗ҆́звою·
Внезапꙋ же и҆змѣншꙋсѧ е҆го сло́вꙋ ꙗть е҆го внꙋтренѧѧ лютаѧ болѣзнь, и҆ гръко мꙋча́шесѧ·
ѕѣло праведне многими и҆ чю́ждими различїи и҆ныхъ ѹ҆тробы мꙋчившаго.
ѻ҆́н же ника́коже гордынѧ своеѧ̀ преста̀ е҆щеж̑ велича́нїа и҆сполнѧ́шес̑҇ более ѻ́гнедышꙋще ꙗ҆́ростїю на і҆ѹ҆де́а.
и҆ заповѣда ѹ҆скори́ти шествїе, слꙋчисѧ е҆мꙋ ѹ҆стромлене и҆дꙋщꙋ пасти ѿ колесница, и҆ злымъ паде́нїем̑ пад̑ша всѧ ѹ҆́ды плоти съкрꙋши.
ѻ҆́н же е҆ще мнѧи волна́мъ морскимъ повелѣвати горды́нѧ ради паче чл҃къ·
и҆ множество великихъ горъ мнѧсѧ въ мѣри́лехъ и҆змѣрити.
на зем̑ли быс̑҇ в носи́лѣ ноша́шесѧ.
ꙗ҆вленꙋ бж҃їю силꙋ всѣмъ показꙋѧ.
ꙗ҆́коже ѿ телеси е҆го червемъ кипѣти.
и҆ живꙋщꙋ въ бо́лѣзнехъ плоти е҆го и҆злїѧхꙋ смра́дъ, ѿ смрада же е҆го и҆ гно́ѧ вси вои гнꙋша́хꙋсѧ·
і҆ и҆же мало прежде нбс̑҇ных̑ ѕвѣздъ коснꙋтисѧ мнѧ́щаго, е҆гоже никто можа́ше носи́ти смрада ради лютаго.
ѿсюдꙋ ѹ҆бо нача̀ тѧ́гость мно́гїѧ горды́нѧ своеѧ познава́ти дх҃овною наѹ҆ченъ ꙗ҆́ывою.
м꙽гновенїемъ е҆ді́нѣмъ болѣзни своеѧ пребыва́нїе прїемлюще·
И҆ е҆гда ниже самъ смрада свое҆го носи́ти можа́ше, тако реч̑҇.
пра́ведно е҆сть повинꙋтисѧ б҃ꙋ.
и҆ не смр҃тна сꙋща равне б҃а мꙋдръствова́ти го́рде.
молѧ́ше же сѧ скверныи къ никогда поми́ловавшемꙋ е҆го влд̑це, тако гл҃ѧ.
ст҃ыи град̑ е҆гоже спѣшахсѧ пришед̑ въ пра́хъ ѻ҆братити, и҆ гробища созда́ти свободна ѻ҆ста́влю і҆ѹ҆деѻ́въ, и҆хже хотѣхъ ниже погребенїю сподобити но пти́цамъ и҆ звѣремъ на растеръза́нїе предати съ младенцы.
и҆ всх̑ѣ и҆хъ равно а҆ѳине́ѻмъ сътвори́ти храм же ст҃ыи е҆гоже прежде плени предобрѣ́ишими да́ры ѹ҆краси́ти и҆̀, и҆ сщ҃е́нныѧ сосꙋды мно́го множице́ю возда́ти и҆ подоба́ющаѧ къ жертвам̑ ѿ свои҆хъ расход̑ даровати.
къ сим̑ же і҆ѹ҆де́ѧ бы́ти на всѧ́комъ мѣстѣ вселе́нныѧ, проходи́ти и҆ проповѣда́ти бж҃їю дръжа́вꙋ.
н̂о ника́коже преста бо́лѣзнь, на́иде б̂о на́нь пра́вым꙽ бж҃їимъ сꙋ́дом̑.
на себе же не ѹ҆пова̀.
писа̀ къ і҆ѹ҆де́ѻмъ симъ ѻ҆́бразомъ посланїе моли́твеныи чинъ мꙋще.
и҆мѣше же сѧ си́це·
Предо́брым̑ гражаномъ і҆ѹ҆деѻ́мъ, ѕѣло радова́тисѧ и҆ здравъствова́ти, и҆ бл҃годѣи҆ствовати·
Цр҃ь и҆ стратигъ а҆нтїѻх̑.
А҆ще бл҃го можете и҆ чада ва́ша, и҆ своѧ познана вам̑ сꙋть, молюс̑҇ б̂о б҃ꙋ величества рад̑и̑ на́ нб҃о ѹ҆пова́нїе и҆мыи и҆ аз̑ в немощи лежа̀ вашеѧ чести и҆ бл҃горазꙋмїѧ въспоминаѧ любезне, воз꙽вращаѧсѧ ѿ перси́д꙽скихъ мѣстъ, и҆ впадо́хъ в болезнь тѧжкꙋ нꙋжно и҆мѣхъ радити ѻ҆бщаго ради всѣх꙽ ѹ҆тверже́нїѧ.
и҆ не нерадѧ ѻ҆ сихъ ꙗ҆же ѻ҆ мнѣ, н̂о ѹ҆пова́нїе много и҆мѣ́ющи ѹ҆бѣжа́ти недꙋга, зрѧ̑ ꙗ҆́ко и҆ ѿц҃ъ мои въ ѻ҆нѣхъ временех꙽ въ вы́шнихъ мѣстехъ вое҆ва̀, показа̀ и҆же по немъ прїиметъ нача́л꙽ство, да а҆ще чт̂о проти́вно слꙋчитсѧ, и҆л̂и възвѣсти́тсѧ чт̂о бѣ́дно, вѣдꙋщесїѧ и҆же въ страна́хъ е҆мꙋже ѻ҆ста́вишасѧ ве́щи не смꙋтѧ́тсѧ.
къ си́м же помышлѧ́а прилежа́щихъ си́лныхъ.
и҆ съсѣдъ црс̑҇твїю временемъ придръжа́щих꙽, и҆ прїемлющихъ ѿшедшее.
прїѧх꙽ сы́на а҆нтїѻ́ха цр҃ѧ, е҆гоже мно́гащи въстѣка́ющаго на вы́шнѧѧ е҆пар꙽хїа мно́гимъ вашимъ препорꙋчахъ и҆ составлѧ́хъ.
писа́х же к немꙋ ꙗ҆́же подъпи́сана сꙋть·
Молю ѹ҆бо вас̑҇ и҆ прошꙋ, помѧните бл҃готворенїе ѻ́бщее, да кождо же съдръжит̑ бл҃горазꙋмїе къ мнѣ и҆ сн҃ꙋ.
ѹ҆пова́ю б̂о е҆го кротце и҆ чл҃колюбне послѣдꙋюща мое҆мꙋ прои҆зволе́нїю, ѻ҆бще с вами быти.
мꙋже ѹ҆бїица же ѹ҆бо и҆ хꙋлникъ злѣ́ишаѧ пострада, ꙗко сеи и҆ныхъ преложи на стра́н꙽нꙋю, на гора́хъ лю́тою смр҃тїю и҆счезѐ·
Принесе же тѣло е҆го фили́п꙽пъ съвръстникъ е҆го.
и҆же боѧ́щисѧ сн҃а а҆нтїѻ́ха къ птоломе́ю филомиторꙋ въ е҆гѷпетъ
ѿи҆де·
Глв̑҇а, і҃·
Маккаве́и і҆ и́же с ним̑ бѣхꙋ гм҃ъ себе защища́ющи храм̑ же и҆ град̑ воспрїѧт̑, ка́пища и҆́хже и҆ноплеме́нницы по тор̑҇жищехъ ѹ҆строи́ша, е҆щѐ же и҆ требища раскопа̀.
и҆ ѻ҆чищше хра́м꙽, и҆́нъ ѻ́лтарь сътвори́ша.
и раж꙽жегше ка́менїе и҆ възем̑ше ѻ҆́гнь принесо́ша жрътвꙋ по дво́ю лѣтꙋ и҆ мс̑҇ць, ѕ҃·
и҆ ѳимїамы и҆ свѣщницы и҆ хлѣбы пре́дъложенїѧ сътвори́ша ихже ради сътворенїи.
молѧ́хꙋ г҃а, пад̑ше ниц̑҇, да не ктомꙋ си́цевыа ѕло́бы слꙋча́тсѧ и҆мъ.
н̂о а҆ще когда̀ и҆ съгрѣшатъ ѿ него съ кротостїю наказꙋ́ютсѧ, и҆ не варва́ромъ и҆ хꙋлным꙽ ꙗ҆зы́комъ предадѧ́тсѧ·
Во́нь же дн҃ь храмъ ѿ и҆ноплемен꙽никъ ѻ҆скврънисѧ.
слꙋчисѧ в то́и же дн҃ь ѻ҆чищенїю быти храма.
к҃е го дн҃е мс̑҇ца, и҆же е҆сть хаслевъ·
И҆ съ веселїемъ празнова́хꙋ дн҃їи, и҃. по ѻ҆́бразꙋ сѣни помина́ющи.
ꙗ҆́ко преже мала́го времени празнд̑ика сѣн꙽наго въ горахъ и҆ въ пещерахъ ѕвѣрїимъ ѻ҆́бразомъ бѣша пасо́ми.
ѳирса ради и҆ вѣтвїи зеленыхъ е҆ще же и҆ фини́къ и҆мѣ́ющих̑ пѣснь приноша́хꙋ да́вшемꙋ ѻ҆чистити мѣсто свое·
И҆ повелѣша ѻ҆́бъщꙋю за́повѣдь и҆ повелѣнїѧ всемꙋ ꙗ҆зы́кꙋ і҆ѹ҆де́искꙋ по всѧ̀ лѣта празнова́ти дн҃и сїа·
И҆ а҆нтїѻ́хъ ѹ҆бо и҆же прои҆менова́шесѧ е҆пифа́нъ скон꙽ча́нїе та́ко и҆мѣ·
Нн҃ѣ же ѿ е҆ѹ҆патора̑ сн҃а а҆нтїѻ́ха нечестива́го бы́в꙽шаѧ речемъ, съкраща́ющи лꙋка́ваѧ и҆же въ бра́нех̑ сътворена сꙋть.
се́й б̂о воспрїѧ црс̑҇твїе и҆ поста́ви над̑ дѣтельми црс̑҇кими, лисїѧ нѣ́коего ѹ҆доли сѷрїискїѧ и҆ финикїискїѧ во́и протарха.
п꙽толоме́и же нарица́емыи макронъ пра́вед̑ное съблюда́ти и҆́де въ і҆ѹ҆де́ю бы́вшеѧ ради ѻ҆биды, и҆ покꙋша́шесѧ ꙗ҆́же к ни́мъ ми́рно проводи́ти.
ѿнюдꙋже ѻ҆клевета́нъ ѿ дрꙋгъ къ е҆ѹ҆паторꙋ.
и҆ по всемꙋ преда́тель слы́ша, сего ради кѷпра въвѣренаго ѿ филомитора ѻ҆стави, и҆ къ а҆нтїѻ́хꙋ е҆пифа́нꙋ ѿи́де съ бл҃горо́дъствомъ и҆ вла́стїю ѿ а҆ѳимїѧ, ꙗ҆́дом̑ животъ сконча̀·
Горгїѧ же е҆гда̀ быс̑҇ вое҆вода мѣстомъ прїѧтымъ и҆ по всемꙋ і҆ѹ҆де́и ратова́ше·
С ним̑ же и҆дꙋме́ане в꙽зима́хꙋ въ времена твер̑҇дынѧ, наѹ҆ча́хꙋ і҆ѹ҆деѻ́въ прибѣга́ющихъ ѿ і҆ерс̑҇лима прїима́ти, и҆ ратова́ти начина́хꙋ·
Сꙋщїи же съ маккавеѻ́мъ сътвори́ша мл҃твꙋ и҆ молѧ́щи б҃а съпобо́рника им̑ бы́ти, на и҆дꙋмеискїѧ твердыни ѹ҆стреми́шасѧ.
и҆́мже прилѣжа́щимъ мꙋжествене ѹ҆дръжа́ни бы́ша мѣста̀·
Всѣхъ же на стѣнахъ ратꙋ́ющихъ ѹ҆би́ша боле нежели два̀десѧть ти́сѧщъ.
и҆збѣгших̑ же нѣкои҆хъ бо́ле ҂ѳ҃, въ два́ пирги тверды и҆ запа́сны и вс̂ѧ къ браненїю и҆мꙋща·
Мак꙽каве́и же къ и҆хъ поборенїю ѻ҆ста́ви си́мона і҆ и҆ѻ́сифа, е҆ще же и҆ закхе́ѧ, і҆ и́же с нимъ доволных꙽, сам̑ же ѿи́де·
Сꙋщїи же съ си́моном̑ прельсти́шасѧ ѿ нѣ́кои҆хъ и҆же въ столпѣхъ сребра̀ ради.
и҆ ҂о҃, дидра́гмъ воспрїимши ѻ҆ста́виша нѣ́кои҆хъ и҆збѣжа́ти·
Възвѣсти же сѧ мак꙽каве́ю ѻ҆ бы́вшем̑ и҆ собра̀ нача́лники люде́и и҆ повѣда на них̑ ꙗ҆́ко сребра́ ради прода́ша бра́тїю и҆ сꙋпоста́ти и҆хъ ѿпꙋстиша.
бы́вших̑ ѹ҆бо преда́тель ѹ҆би, и҆ внезапꙋ два̀ столпы раздрꙋши.
ѻ҆рꙋжїи же вс̂ѧ сꙋща́ѧ въ двꙋ̀ твердынѧхъ рꙋка́ми ѹ҆спѣва́ѧ погꙋби бо́ле, ҂к҃·
Тимоѳе́и же и҆же преж̑ ѿ і҆ѹ҆де́и бысть пораженъ, созва̀ во́и странныхъ мно́жество, і҆ и́же въ а҆сїи ко́н꙽никъ собра̀ не ма́ло прїиде, ꙗ҆ко ѻ҆рꙋжїем꙽ і҆ѹ҆де́ю прїѧ́ти·
Мак꙽кавеи же і҆ и́же с ним̑, приближа́ющисѧ е҆мꙋ къ мл҃твѣ бж҃їи ѻ҆братишасѧ, главы̀ земле́ю посыпа́юще и҆ чресла̀ вретищами препоѧсавше пред̑ ѻ҆́лтарем꙽ ниць пад̑ше.
молѧ́хꙋ ми́лостива и҆мъ бы́ти.
враждова́ти же враждꙋю́щимъ на нихъ и҆ сꙋпоста́томъ сꙋпроти́вит̑сѧ, ꙗ҆́ко зако́нъ реч̑҇·
Бы́вши же по моли́твѣ воспрїѧ̀ша ѻ҆рꙋжїѧ далече ѿ гра́да и҆зшед̑ше, приближ̑ше же сѧ ра́тником̑ в себѣ бы́ша·
Слн҃цꙋ же воз̑сїѧва́ющꙋ ѻ҆бо́и же совокꙋпи́шасѧ·
Сїи же и҆мꙋще бл҃гополꙋченїе и҆ побѣ́ды бла́гость прибѣжи́ща ради ꙗ҆́же къ г҃ꙋ.
ѻ҆ни же вое҆водꙋ бра́ни по́мощїю и҆мѣа́хꙋ·
Пребывающи же бра́ни ꙗ҆ви́ша̑сѧ сꙋпоста́томъ ѿ нб҃си мꙋжїи, е҃, на ко́нехъ зла́ты ѹ҆́зды и҆мꙋще бл҃голѣпне правѧ́ще і҆ѹ҆де́ѻвъ.
ѿ них̑ же два̀ мак꙽каве́ѧ средѣ и҆мѣ́ющи, ѻ҆рꙋжїи свои́ми защища́ющи здрава сохранѧ́хꙋ.
на сꙋпостаты же стрелѧн̑҇ми и кера́внами мета́хꙋ.
и҆́мже смѣсишасѧ невѣдѣнїемъ сѣча́хꙋсѧ мѧтежа и҆сполнени.
ѹ҆би́ша же сѧ·
҂к҃ и҆ пѧть сотъ пѣшець, кон꙽никъ же х҃·
Тимоѳе́и же ѹ҆бо побѣже въ газарꙋ гл҃емꙋю твердыню бл҃голѣпнꙋю стра́жꙋ, вое҆вод꙽ствꙋ́ющꙋ же т̂ꙋ хереѹ̀·
Мак꙽каве́и же і҆ и҆же с ним̑ бѣхꙋ веселѧ́щесѧ, ѻ҆быидоша стра́жꙋ дн҃и д҃. сꙋщїи же внꙋтрь твердыни мѣста ѹ҆пова́юще паче мѣры хꙋлѧхꙋ и҆ словеса̀ неподобна и҆зноша́хꙋ·
Ꙗ҆́влъшꙋ же сѧ, к҃е дн҃и, ю҆́ноши и҆же съ мак꙽каве́ѻмъ бѣхꙋ, раз꙽жегшесѧ ꙗ҆́ростїю власфимїи ради, приближишас̑҇ къ стѣнѣ, ѕвѣроѻ҆́бразною ꙗ҆́ростїю в꙽пад̑шаго им̑ раз꙽сѣкоша і҆нїи же сим̑ подобне въсходѧ́ще съ нꙋжд̑ею къ и҆же внꙋтръ зажгоша столпы.
и҆ вожег꙽ше ѻ҆́гнь и҆ злорекꙋщих̑ живых̑ сож꙽гоша, и҆нїи же врата разсѣко́ша, въспрїѧвше̑ прочїи чинъ, взѧ́ша град̑.
и҆ тимоѳе́а съкровеннаг̑҇ в нѣ́коем̑ р꙽вѣ заклаша, и҆ брата е҆го хереа҆на, и҆ а҆пол꙽лофана.
сїѧж̑ сотворше со пѣсньми і҆ и҆сповѣдан꙽ми блс̑҇вѧхꙋ г҃а бл҃годѣтелѧ ве́лїѧ и҆ побѣдода́телѧ і҆и҆л҃еви·
Глв̑҇а, а҃і·
По ма́лѣ же вре́мени, лисїѧ приѻ҆бразныи цр҃еви и҆ срод̑ник꙽ и҆ дѣтелемъ пред̑ста́тель, ѕѣ́ло тѧ́жце помышлѧ́ѧ ѻ҆ бы́вшихъ, събра̀, ҂п҃, и҆ ко́нники всѣ, прїиде въ і҆ѹ҆дею ча́ющи гра́дъ е҆л꙽линомъ ѻ҆бита́нїе сътвори́ти, хра́м꙽ же сребро даненъ сътвори́ти ꙗ҆́коже и҆ про́чїихъ ꙗ҆́зы́къ ка́пища, и҆ по всѧ̀ лѣта пременѧти нача́ло жре́чества, ника́коже помышлѧ́ѧ бж҃їю держа́вꙋ, н̂о ѹ҆пова́ѧ тма́мъ пѣшецъ и҆ в тисѧщахъ ко́нникъ, и҆ въ п҃, сло́новъ.
въшед̑ въ і҆ѹ҆де́ю и҆ приближи́сѧ къ веѳсꙋсꙋ сꙋщемꙋ в꙽ тѣснѣ стра́нѣ, і҆ерс̑҇лима же ѿстоѧ́ше ꙗ҆́ко ста́дей пѧть, и҆ сїе ѻ҆скорблѧ́ше.
ꙗ҆́коже позна мак꙽кавеи і҆ и́же с ни́мъ ратꙋ́юща е҆го тверды́нѧ.
съ пла́чем̑ и҆ слеза́ми молѧ́хꙋ га съ всѣмъ наро́домъ бл҃гаго а҆гг҃ла посла́ти къ сп҃сенїю і҆и҆л҃ѧ·
Сам꙽ же мак꙽кавеи взѧ̀ ѻ҆рꙋж́їе первѣе про́чих̑ ѹ҆тверди вкꙋпѣ съ собо́ю бѣдꙋ под̑ѧ́ти, помощи братїи свое́и.
вкꙋпѣ же съ ѹ҆се́рдїемъ ѹ҆стреми́шасѧ и҆зы́ити и̑ ерс̑҇лима, ꙗ҆ви́сѧ пред̑водѧ̀ их̑ ко́н꙽никъ въ ѻ҆де́жд̑и бѣ́лѣ, въѻ҆рꙋженъ въ зла́то храбръствꙋѧ·
Въкꙋпѣ же вс̂и блс̑҇виша млс̑҇рдаго г҃а.
и҆ воз̑мого́ша дш҃ами, не то́чїю чл҃къ н̂о и҆ ѕвѣреи лютѣ́ише, и҆ стѣ́ны желѣзны съкрꙋша́ти сꙋще гото́ви и҆дѧ́хꙋ въ ѹ҆тва́ре, съ нб҃си и҆мѣ́ющи гн҃ю млс̑҇ть съпоборствꙋ́ющꙋ и҆мъ.
л꙽воѻ҆́бразно же ѹ҆стремльшесѧ на сꙋпоста́ты.
простро́ша ѿ ни́хъ ҂а҃і, пѣшец̑҇ и҆ ко́нникъ ҂а҃ и҆ ѕ҃ со́тъ, всѣхъ же понꙋди́ша бѣжа́ти.
мно́ѕи же ѿ них̑ ꙗ҆́звенїи на́ѕи ѹ҆цѣлѣша, и҆ сам̑ же лисїѧ стꙋдно бѣжащи ѹ҆иде·
Не безꙋма же сы́и внѧтъ бы́вшее на́нь пораже́нїе.
и҆ ѹ҆разꙋмѣ непобѣднымъ бы́ти е҆вреѻ҆мъ.
вс̂емогꙋщеи бж҃їеи помощи съпоборъствꙋ́ющи и҆мъ, посла̀ к ни́мъ совѣтꙋѧ смири́тисѧ ѻ҆ всѣхъ правед̑ныхъ, ꙗ҆́ко и҆ цр҃ѧ ѹ҆вѣща́ти и҆ понꙋди́ти дрꙋ́га им̑ бы́ти·
И҆зво́ли же маккаве́и ѻ҆ всѣхъ ѻ҆ них̑ же моли полезнаѧ радѧ·
Є҆ли́ка б̂о мак꙽каве́и въздаде лисїю написꙋѧ ѻ҆ і҆ѹ҆де́ѻхъ ѻ҆ста́ви цр҃ь.
бѣша же писа́нїѧ і҆ѹ҆де́ѻмъ посла́нныѧ ѿ лисїѧ и҆мꙋще ѻ҆́бразъ си́цев꙽·
Лисїа, мно́жествꙋ і҆ѹ҆де́искꙋ ра́доватисѧ.
і҆ѻ҆а́ннъ и҆ а҆вессало́мъ, и҆же посла́ни сꙋть ѿ вас̑҇ да́ющи писа́нїѧ проша́хꙋ ѿвѣта ѻ҆ нихъ назнамена́ннаго·
е҆ли́ка же ѹ҆бо подоба́ше цр҃ю принести и҆звѣстих̑.
и҆ ꙗ҆́же б̂ѣ въспрїѧта ѿпꙋсти.
а҆ще б̂о въ ве́щех̑ бл҃горазꙋмїе съблюдете и҆ въ про́чїе и҆скꙋшꙋсѧ пови́ненъ вамъ бл҃гихъ бы́ти.
ѻ҆ сих̑ же по ча́сти заповѣдаю си́мъ, і҆ и́же ѿ мене посла́ни сꙋть побесѣдовати с ва́ми, здравъствꙋ́ите·
Лѣта рм҃и, мс̑҇ца диѻ҆скори дн҃ѧ к҃д·
Црс̑҇ка же посланїѧ съдержа́шесѧ си́це·
Цр҃ь а҆нтїѻх̑, лисїи бра́тꙋ ра́доватисѧ, ѿц҃ꙋ нашемꙋ въ боги премѣншꙋсѧ, хотѧщꙋ и҆же въ цр҃ьствїи сꙋщихъ несмѧте́нных̑ бы́ти, къ своинстве́номꙋ прилѣжа́нїю.
слы́шахомъ і҆ѹ҆де́и не бл҃говолѧщихъ ѿц҃а мое҆го повелѣнїи е҆же премѣни́тисѧ на е҆л꙽лин꙽скїа зако́ны.
н̂о и҆зволѧют̑ держа́ти своѧ за́повѣди.
и҆ моле́нїа ради дарꙋютсѧ и҆мъ зако́ны и҆хъ.
хотѧщи же и҆ сїѧ ꙗ҆зы́кꙋ бес мѧте́нїа бы́ти, сꙋди́хомъ тогда и҆мъ хра́м꙽ създа́ти, и держа́тисѧ по прароди́тельскомꙋ и҆хъ зако́нꙋ·
Бл҃го ѹ҆бо сътвори́ши аще послеши к ни́мъ и҆ десни́цꙋ даси.
ꙗ҆́ко да позна́вши наше прои҆золе́нїе бл҃годꙋшни бꙋ́дꙋт꙽, и҆ любе́зни пребꙋ́дꙋтъ къ на́шемꙋ застꙋпле́нїю·
Къ і҆ѹ҆де́ѻмъ же црс̑҇ка посланїѧ си́цева бѣ·
Цр҃ь а҆нтїѻх̑ ста́рцемъ і҆ѹ҆де́искимъ и҆ про́чимъ і҆ѹ҆де́ѻмъ ра́доватисѧ.
а҆ще сдрав̑҇ствꙋете да бꙋ́детъ ꙗ҆́коже хо́щемъ, и҆ сами же здравствꙋемъ·
и҆з꙽ꙗ҆ви нам̑ менелаи, хотѣсте ѿшед̑ши вам̑ бы́ти съ нашими.
ѿходѧ́щимъ ѹ҆бо да́же до дн҃е, л҃, мс̑҇ца ѯанѳїѧ дади́м же десни́цꙋ безбоѧзни бы́ти і҆ѹ҆де́ѻмъ свои҆ми расхо́ды и҆ зако́ны ꙗ҆́ко и҆ преже.
и҆ ни е҆ді́нъ и҆хъ ни пое҆ді́номꙋ ѻ҆́бразꙋ стꙋжитъ ѻ҆ неразꙋмѣнихъ·
Посла́хомъ же и҆ менела́а ѹ҆тѣша́юща вас̑҇ зрдавъствꙋите·
Лѣта, рм҃и.
ѯанѳїа мс̑҇ца е҃і дн҃ѧ посла́ша же и҆ ри́млѧне к ним̑ посланїе и҆мѣющи си́це·
Ки́ндъ мем̑мїискїи, и҆ ти́тъ манїискїи, ста́рцы рим̑стїи лю́демъ і҆ѹ҆де́искимъ ра́доватисѧ·
ѻ҆ нихъ же лисїѧ срод̑никъ цр҃евъ ѿпꙋсти вамъ, и҆ м̂ы събл҃говолѧ́емъ ꙗ҆́же сꙋди цр҃ю ѿвѣща́ти, скорѣе посли́те кого съзира́ти ѻ҆ сихъ, да поста́вимъ ꙗ҆́коже подоба́етъ вамъ·
Мы б̂о и҆демъ ко а҆нтїѻхїи.
сего ради ѹ҆скори́те и҆ посли́те нѣ́кои҆хъ да и҆ мы ѹ҆вѣмы кое҆ѧ е҆сте во́лѧ, здравъствꙋ́ите·
Лѣта рм҃и, е҃і дн҃ѧ мс̑҇ца ѯанѳїѧ·
Глв̑҇а, в҃і·
Бы́вшимъ же завѣтомъ сим̑, лисїѧ ѿи҆де къ цр҃ю·
Іѹде́и же ѻ҆ земле тѧжа́нїю бы́ша·
ѻ҆ста́вшимъ же по мѣстом꙽ вое҆во́дам̑, тимоѳеи и҆ а҆пол꙽лонїи сн҃ъ генеѻ҆в꙽, е҆ще же и҆ерони́мъ и҆ димофо́нъ, к си́м же и҆ никано́ръ кѷпрїа́рхъ, не ѻ҆ставлѧ́хꙋ и҆хъ бл҃гостоѧти и҆ ꙗ҆́же въ молча́нїю бы́ти·
И҆ѻ҆п꙽пїане же толи́ко сътвори́ша нече́стїе.
моли́ша і҆ѹ҆де́и с ни́ми живꙋщих꙽, вни́ти въ прд̑еставленыѧ ѿ нихъ ладїи съ жена́ми и҆ ча́ды, ꙗ҆́ко ни еді́нѣи вра́ждѣ межд̑ꙋ и҆ми настоѧ́щи, по ѻ҆́бщꙋ б̂о повеленїю грд̑аскꙋ.
и҆ сїѧ въспрїѧ́вши и҆мъ ꙗ҆́ко въ ми́ръ хотѧ́ще, ничтоже прозрѣвше хотѧщихъ.
ѿве́зши и҆хъ погрꙋзи́ша бо́ле двꙋ сот̑·
Позна же і҆ѹ́да бы́вшꙋю на срод̑ники своѧ поги́бель, възвѣсти мꙋжемъ и҆же с ним̑, и҆ призыва́ѧ пра́веднаго сꙋдїю б҃а.
прїиде къ скверноѹ҆бїицам̑ бра́тїи ег̑҇.
и҆ приста́нища но́щїю пожже, и҆ ла́дїа попали.
і҆ и҆збѣгшихъ же ѿ ѻ҆гнѧ̀ закла̀.
стра́нѣ же заклю́чшисѧ ѿи҆де.
ꙗ҆́коже па́ки прїиде и҆ всѣхъ и҆ѻп̑҇пїѧ́нъ и҆ско́рени и҆ гража́нъство·
Съразꙋмѣ же и ѻ҆ и҆же въ а҆мнїи живꙋщимъ і҆ѹ҆де́ѻмъ симъ ѻ҆́бразомъ сътвори́ти хотѧ́щихъ, и҆ а҆мни́тен̑҇ но́щїю ꙗ҆́тъ и҆ зажже приста́нище съ столпомъ, ꙗ҆́коже ꙗ҆ви́тисѧ зарѧм̑ ѻ҆гнѧ̀ въ і҆ерс̑҇лимѣ ста́дїи сꙋщи, см҃·
ѿтꙋ́дꙋ же ѿшед̑шимъ ѳ҃ ста́дїи, пꙋть творѧ́хꙋ на тимоѳеѧ·
Срѣтошасѧ с ни аравѧ́не множае, ҂е҃ мꙋжїи, и҆ конникъ, е҃ ст̑о.
е҆гда же бран̑҇ ѕѣло творѧ́шесѧ.
и҆ по́мощ̑҇ бж҃їѧ преспѣѧше ꙗ҆́же ѻ҆ і҆ѹ҆дѣ.
прочїи а҆равѧ́не ѻ҆долѣни, проша́хꙋ ѿ і҆ѹ́ды десницꙋ себѣ да́ти, ѻ҆бѣща́юще па́стве да́тисѧ.
и҆ въ прочихъ пользевати их̑·
і҆ѹ́да же съразꙋмѣ ꙗ҆́ко и҆́стинно въ мно́гихъ и ключи́мыхъ ѻ҆бѣща ми́ръ да́ти им̑.
взѧ́вши же десни́цꙋ ѿи҆доша въ странꙋ свою̀·
Ѡ҆бъѧ же и҆ нѣ́кои гра́дъ е҆фирꙋньскъ твердъ и҆ стѣна́ми ѻ҆гражден꙽, и҆же ѿ всѐсмѣшеных̑ ꙗ҆́зы́къ ѻ҆бита́шесѧ е҆мꙋже и҆мѧ каспинъ·
Сꙋщїи же внꙋтри надѣ́ющесѧ на крѣпость стн̑҇ѣ и҆ ѹ҆готова́нїе бра́шенъ.
без̑боѧ҆знено творѧхꙋ і҆ѹ́де проклѧ́тїе и҆ хꙋленїе гл҃ющии ꙗ҆́же не подоба́етъ·
Сꙋщїи же съ і҆ѹ́дою призыва́юще вели́каго нача́лника мира.
и҆же безъ ѻ҆́вновъ и҆ миха́ническихъ а҆рган꙽, въ времена і҆сꙋса раздрꙋши е҆рихо́нъ·
Нападо́ша ѕвѣроѻ҆́бразно стенѣ и҆ взѧ́ша град̑ бж҃їимъ хотѣнїемъ без꙽числена закланїѧ сътвори́ша·
ꙗ҆́коже прилѣжа́щемꙋ приста́нищꙋ широта и҆мꙋщи ста́дїи дв̂ѣ, і҆ ѹ҆бїеныхъ кро́ви и҆сполнена ꙗ҆ви́сѧ.
ѿтꙋдꙋ ѿи҆до́ша ста́дїи, з҃ сот̑ и҆ н҃, и҆ прїидо́ша в хара́кꙋ къ гл҃емымъ тꙋвїиномъ і҆ѹде́ѻмъ·
И҆ тимоѳе́ѧ же въ мѣстехъ не ꙗ҆́ша.
н̂и е҆ді́но же дѣло съвръшивъ възвратисѧ.
ѻ҆ставльше стра́жꙋ въ нѣкое҆мъ мѣсте ѕѣло твердѣ.
досиѳе́и же и҆ съсипа́тръ и҆же бѣхꙋ вое҆воды съ мак꙽каве́ѻм꙽, и҆зшедше погꙋби́ша ѿ тимоѳе́ѧ ѻ҆ста́вшихъ въ тверды́ни боле ҂і҃ мꙋжїи.
и҆ мак꙽каве́и же въчини во́ѧ своѧ и҆ поста́ви и҆хъ по́лкъ противꙋ пол̑҇ка.
и҆ на тимоѳе́ѧ пои́де и҆мѣ́ющи съ собо́ю, р҃к пѣшецъ, ко́нникъ же, ҂в҃ и е҃ сот̑.
позна́ же тимоѳе́и прише́ствїе і҆ѹ́дино, повелѣ же́ны и҆ дѣти и҆ про́чаѧ ѹ҆готованїѧ въвестѝ въ тверды́ню нарица́емꙋю карнїю.
б̂ѣ б̂о непобори́мо и҆ въсходꙋ невозмо́жно мѣста ради тѣсноты̀·
Є҆гда́ же по́лкъ і҆ѹ́дын̑҇ прьвыи ꙗ҆ви́сѧ, и҆ бысть ѹ҆́жасъ на сꙋпоста́ты ѿ вс̂еви́дѧщаго страха̑ бж҃їѧ, и҆ въ бѣгъство ѹ҆стремишасѧ е҆ді́нъ ѿ дрꙋга́го.
ꙗ҆́ко множицею ѿ своих̑ ѹ҆стра́шатисѧ, и҆ ѻ҆рꙋжїи свои҆ми ѹ҆да́рени ѻ҆слаблѧхꙋсѧ<.>
Творѧ́ше же і҆ѹ́да гоненїе прилѣжно ѹ҆бива́юще иноплеме́нникъ, и҆ простре ѿ нихъ ҂л҃, мꙋжїи.
сам же тимоѳе́и впаде въ странꙋ̀ досиѳе́ѧ и҆ сосипа́тра, и҆ многомъ моле́нїемъ молѧ́ше да жи́въ ѿпꙋ́ститсѧ.
занѐ мно́гихъ ѹ҆бо сро́дники и҆ нѣкоих̑ бра́тїю и҆мѣѧ́ше.
и҆ си́хъ ѻ҆́бесловесити слꙋчитсѧ, а҆ще ѹ҆мретъ.
вѣрꙋющим же и҆мъ мно́гихъ проше́нїи здра́ва е҆го пꙋсти́ша бра́тїи рад̑и̑ сп҃сенїѧ.
и҆зы́иде мак꙽каве́и въ карнїю и҆ въ таргатїю и҆ ѹ҆бѝ, ҂к҃е·
Посих̑ же погꙋбле́нїю, ѻ҆брати і҆ѹ҆да во́и на е҆фро́нъ град̑ твердъ, в нем̑же живѧ́ше лисїѧ и҆ мно́жество ра́зных̑ ꙗ҆зы́къ.
ю҆́ноша же си́лнїи стоѧ́ще предъ стѣна́ми крѣпко бранѧ́хꙋ·
в нем̑ же бѣхꙋ а҆ргани, и҆ прочїи во́искїи ѻ҆рꙋжїѧ.
призва́вше же си́лнаго съ дръжа́вою съкрꙋша́ющаго ра́тныхъ си́лы, взѧша же градъ под̑ рꙋкꙋ.
и҆ ѹ҆би́ша и҆же внꙋтрь ҂к҃е.
и҆ ѿшед̑ше ѿтꙋдꙋ и҆ ѹ҆стреми́шасѧ на скиѳ̑҇ск꙽ градъ, ѿстоѧщъ ѿ і҆ерс̑҇лима ста́деи х҃·
Свѣдѣтельствова́вшим̑ же живꙋщимъ та́мо і҆ѹ҆деѻ҆мъ ѻ҆ скиѳ̑҇скихъ гража́нехъ, ꙗ҆́ко и҆мѣ́ютъ бл҃горазꙋмїе и҆ въ всѧ дн҃и и҆ времена̀ неключимыѧ творѧ́хꙋ бл҃годаре́нїе и҆мъ и҆ ѹ҆тѣше́нїе.
и въ прочїю пол̑҇зꙋ родꙋ бѣша съ помощни.
и҆ прїидо́ша въ і҆ерс̑҇лимъ дн҃е великаго праздника седми́цам̑ настоꙗ҆́щи.
и҆ по гл҃емїи же пенди́костїи, и҆доша проти́вꙋ горгїа страти́га и҆дꙋме́иска·
и҆зы́иде же с пѣшцы трема ты́сѧщами, и҆ ко́нникъ, у҃. и҆ сътвори́ша бра́нь и҆ слꙋчи́сѧ па́сти маломъ ѿ і҆ѹ҆де́и.
досиѳе́и же нѣкто ѿ вакино́ра ко́нник̑҇ мꙋжъ крѣпокъ горгїю придержа́ше.
ꙗ҆́ть е҆го за хлами́дꙋ и҆ ведѧ́ше чс̑҇тно и҆ хотѧ́ше нѣкто ѿ ко́нникъ ѳракїиских꙽, притекъ ꙗ҆ти жива проклѧто́го горгїю и҆ рамо рас꙽сѣче, ѹ҆бѣжа́ же горгїѧ въ мари́сꙋ.
во́и же горъгїевы на мно́ѕѣ бранѧхꙋсѧ и҆ ѹ҆трꙋж꙽шесѧ.
призва̀ і҆ѹ҆да г҃а помо́щника̑ и҆ вое҆во́дꙋ бра́ни быти.
нача̀ гласом̑ ѿч҃ескимъ съ пѣсньми и҆ во́племъ въз꙽пѝ, и҆ нечаѧ́нне на во́ѧ горгїевы нападе.
і҆ѹ҆да же собра̀ во́и прїиде въ градъ ѻ҆дола́мъ·
И҆ е҆гда седмыи дн҃ь прїиде по ѻ҆бы́чаю ѻ҆чище́нїѧ·
в томъ мѣсте сꙋбо́тꙋ сотвори́ша.
наѹ҆трїи же прїиде съ свои҆ми і҆ѹ́да да телеса̀ простертыхъ возметъ и҆ с роди́тели положитъ въ гробѣхъ ѿч҃ескихъ·
ѻ҆брѣто́ша же под̑ ризами ѹ҆бїены ѿ даровъ и҆́дольскихъ, ѻ҆ них же закон̑҇ запреща́ше і҆ѹ҆деѻм̑·
Всѣмъ же ꙗ҆́вѣ бысть ꙗ҆́ко сеѧ ради вины падо́ша·
Вс̂и ѹ҆бо блс̑҇виша правыи сꙋдъ гн҃ь ꙗ҆ко та́ина сотворѝ ꙗ҆влена.
и҆ къ моле́нїю ѻ҆брати́вшесѧ моли́ша да сътворе́ныи грѣхъ не воспомѧне́тсѧ·
І҆ѹ́да же крѣпча́ише молѧ́ше люди снабдѣти себе безъ грѣха̀, ѻ҆чи́ма ви́дѧщи бы́в꙽шаѧ грѣхъ ради·
И҆ сътворъ ѿ мꙋжїи събра́нїе ѹ҆тва́рїи ꙗ҆́ко ҂в҃ дра́гмъ сребра̀, и҆ посла̀ въ іерс̑҇лим̑ принестѝ за грѣхи мрт҃выхъ жрътвꙋ.
предобре и҆ ѹ҆годне творѧ̀ ѻ҆ воскр҃сенїи помишлѧ́ѧ·
А҆ще б̂о пад̑шихъ въста́нїѧ не ча́етъ, на́ипач̑҇ ѹ҆бо былѝ срамоты ѻ҆ мр҃твыхъ моли́тисѧ.
посемъ зрѧ́и съ бл҃гочестїемъ ѹ҆сопшимъ добрѣ́ишее ѿло́женое бл҃годаре́нїе, прпд̑бїе и҆ бл҃гочестїе и҆ дары подадѐ.
ѿню́дꙋже за ѹ҆мръшихъ моле́нїе сътворь грѣхи ѻ҆чисти́тъ·
Глава̀, г҃і·
Лѣта рм҃ѳ, позна і҆ѹ́да а҆н꙽тїѻ́ха е҆ѹ҆па́тора прїити съ мно́жеством꙽ на і҆ѹ҆де́ю, и҆ с ни́мъ лисїѧ приѻ҆браз̑ныи е҆мꙋ и҆ над̑ вещъми старѣ́ишїи.
кождо и҆мꙋщи съ собо́ю си́лꙋ е҆́ллинъскꙋ пѣшецъ р҃і ти́сѧщъ, и҆ ко́нникъ, ҂е҃ и҆ т҃, и҆ слоновъ к҃в, колесни́цъ с коса́ми т҃·
Смѣси же сѧ тѣмъ и҆ менела́и, и҆ съ вели́кою ле́стїю молѧ́ше а҆нтїѻ́ха не ради ѿч҃ествꙋ сп҃сенїѧ, мнѧ́сѧ въ нача́льство поста́витисѧ·
Цр҃ь же цр҃еи въздви́же ꙗ҆́рость а҆нтїѻховꙋ на нечестива.
и҆ ѹ҆видѣ лисїю вино́ю бы́ти всѣхъ злыхъ, повелѣ ꙗ҆́ко ѻ҆быча́и е҆сть въ мѣстѣ ѹ҆бити вед̑ше е҆го въ верїю, бѣ же в том̑ мѣсте стол̑҇пъ н҃ лакот̑ и҆сполнъ пепелꙋ, се́и сосꙋды и҆мѣа́ше ѻ҆бносѧ́щъ ѻ҆́крс̑҇тъ во пропа́сть пепала.
и҆ здѣ въ пепелъ воврещи повелѣ сщ҃ен꙽ства граби́телѧ симъ его погонѧ́ющи на погꙋбленїе·
И҆ сицево́ю смр҃тїю зако́нопрестꙋпъникꙋ слꙋчи́сѧ ѹ҆мрѣти.
ниже погребенїа полꙋчи менела́и препра́вед̑не.
понеж̑ б̂о мно́га съгрѣшенїѧ на ѻ҆лтари бж҃їемъ сътвори.
е҆мꙋже ѻ҆́гнь и҆ пепелъ б̂ѣ ст҃ъ, и҆ ѻ́нъ въ пепелъ смр҃ти ѻ҆сꙋжденъ бы́сть·
Но цр҃ь ѹ҆мом̑ не ѻ҆бꙋздан̑҇, грѧдѧ́ше злобнѣиша ѿц҃а свое҆го себе показа́ти і҆ѹ҆деѻ҆мъ.
их̑же і҆ѹ́да позна̀, повелѣ лю́демъ да дн҃ь и҆ но́щь г҃а воз̑зовꙋтъ·
И҆же ꙗ҆́ко всегда и҆ нн҃ѣ поможетъ им̑ зако́на ради, ѿч҃ества и҆ ст҃го хра́ма̑ лишити хотѧ́щих̑.
и҆ нн҃ѣ ма́ло препочивши лю́ди не ѻ҆ста́ви хꙋленїемъ ꙗ҆зы́ческимъ под̑рꙋчны́хъ бы́ти.
всѣмъ та́коже вкꙋпѣ сътворѧ́ющим̑ и҆ просѧ́щимъ ѿ г҃а млс̑҇рдїѧ, съ плачем̑ и҆ постомъ по три дн҃и без̑преста́ни простерты, ѹ҆крѣпи и҆хъ і҆ѹ҆да и҆ повелѣ ѹ҆готоватисѧ·
Сам꙽ же і҆ѹ́да съ старцы совѣща первѣе нежели цр҃ь пꙋсти во́и въ і҆ѹ҆де́ю и҆ бы́ти града ѻ҆держа́нїю, и҆зшед̑ших̑ сꙋдити ве́щи гн҃ею по́мощїю.
даде же вла́сть во́и гв҃и ми́ра, моли своих̑ мꙋ́жествене бранитисѧ даже до смр҃ти закон̑҇ ра́ди и҆ сщ҃енного града и҆ ѿч҃ества и҆ гражан̑҇ства, и҆ ѻ́крс̑҇тъ модина во́и поста́ви.
даде же сꙋщимъ с нимъ зна́менїе побѣдꙋ бж҃їю.
съ ю҆́ноши же крѣпча́ишими и҆зы́иде но́щїю на црс̑҇кїи ста́нъ, и҆ ѹ҆би въ ѻ҆полченїи, ҂д҃, мꙋжїи.
и҆ большаго ѿ слоновъ съ сꙋщими на немъ ѹ҆би, и҆ въ ко́нецъ вс̂е ѻ҆полче́нїе стра́ха и҆ възмꙋще́нїа и҆сполниша, і҆ и҆зыидо́ша блаѕе·
Посем же ꙗ҆влѧ́ющꙋсѧ дн҃и.
по́мощїю и҆ покрове́нїемъ гн҃имъ защища́еми·
Цр҃ь же прїѧ́тъ вкꙋше́нїе хра́брости і҆ѹ҆де́искїа.
и҆ покꙋша́шесѧ вни́ти въ мѣста, и҆ въ веѳ꙽сꙋрскїѧ тверды́нѧ стра́жи і҆ѹ҆де́искїѧ прїиде, и҆ ѹ҆дарѧ́ѧ премѣни́шасѧ и҆ ѹ҆мали́шасѧ·
Сꙋщїи же внꙋтрѣ і҆ѹ́да потре́бнаѧ посла̀.
възвѣстиж̑ таинаа сꙋпоста́том̑ родокос̑҇ нѣкто и҆менемъ ѿ і҆ѹ҆де́иских̑ во́и , възыскан̑҇ же бы́сть и҆ ꙗтъ и҆ ѹ҆бїенъ·
Повтори же цр҃ь сло́во съ веѳсꙋраны и҆ десни́цꙋ даде, и҆ прїѧ́тъ да́ры ѿи҆де.
и҆ съста́ви бра́нь съ і҆ѹ́дою, и преможен꙽ бы́сть.
ꙗ҆́коже позна ѿмещꙋщасѧ фили́ппа въ а҆нтїѻхїи поставленаго над̑ дѣтелми и҆ смѧте́сѧ, и҆ моли і҆ѹ҆де́ѻв꙽.
повинꙋ же сѧ и клѧ́сѧ ѻ҆ всѣхъ пра́вед̑но, и҆ совѣтова.
и҆ принесе жрътвꙋ, и҆ чествова хра́мъ и҆ поми́лова мѣсто.
и҆ мак꙽кавеѧ прїѧ́тъ, и҆ поста́ви страти́га ѡ птоломаи́ды да́же до герри́нська кнѧ́ѕьства·
И҆ прїиде въ птоломаи́дꙋ, и҆ стꙋжа́хꙋ птоломаи́дѧне ѻ҆ завѣтехъ, занѐ ѿверго́шас̑҇ завѣти, и взыиде на сꙋдище лисїѧ, и҆ ѹ҆ста́ви и҆збра́нное , и҆ лю́ди ѹ҆тѣши.
и҆ ѿи҆де въ а҆нтїѻ҆хїю·
И҆ си́це бы́сть црс̑҇ко и҆схоже́нїе, и҆ па́ки въз꙽враще́нїе·
Глв̑҇а, д҃і·
По трїехъ же лѣтехъ прїиде въ і҆ѹ҆де́искꙋю стра́нꙋ.
дими́трїи селев꙽кїев꙽ , съ мно́жествомъ ѕѣ́лным꙽, трех̑ ради гра́довъ приста́нищных̑ и҆ ѹ҆держа
странꙋ·
и҆ ѹ҆бѝ а҆нтїѻ́ха и҆ е҆го приѻ҆бра́знаго лисїю.
а҆лким̑ же нѣ́кто бы́выи пре́жде а҆рхїере́и, во́лею же ѻ҆скверненъ въ времена̀ смѣшенїѧ.
и҆ помышлѧ́ѧ ꙗ҆́ко никимже ѻ҆́бразомъ нѣсть е҆мꙋ сп҃сенїа, ниже прихоже́нїѧ къ ст҃омꙋ ѻ҆лтарю̀·
Прїиде къ цр҃ю дими́трїю, рн҃а, лѣта.
приносѧ е҆мꙋ вѣнецъ зла́т꙽ и҆ фини́ки, кси́м же и҆ цвѣти , и҆же цр҃ковнїи сꙋще видѧхꙋсѧ.
и҆ въ дн҃ь ѻ҆́нъ бысть въ млъча́нїи.
ѹ҆смотри́ же вре́мѧ неразꙋмїю свое҆мꙋ и҆ призва́сѧ дими́трїемъ въ собо́ръ, и҆ въпроше́нъ бысть.
в кое҆мъ раз̑лоѕе и҆ совѣтѣ стоѧ́тъ і҆ѹ҆де́и, ксим же рече.
гл҃емїи і҆ѹ҆де́и а҆сиде́и и҆хъже во́ждъ і҆ѹ҆да, и҆ мак꙽каве́и брани строи́тели и҆ ра́спрѧ въздвиза́ютъ не помышлѧ́ютъ црс̑҇каго бл҃гостоꙗ҆́нїѧ полꙋчи́ти.
ѿню́дꙋже ѿлꙋчен̑҇ е҆смь прародительскїѧ сла́вы.
сирч̑҇ѣ сщ҃енонача́лъства.
грѧды́и нн҃ѣ прїидо́хъ.
прьвое ѹ҆бо полезныхъ ради цр҃еви вѣрꙋ съдръжа́щи.
второ́е же и҆ свои҆хъ гража́нъ созираѧ пред̑реченыхъ ѹ҆бо безъсловесїе, по всемꙋ род̑ нашъ не мало ѻ҆жесточает̑·
Ко́ждо же сихъ зна́но ти бꙋди ѽ цр҃ю ѻ҆ странѣ̀ и҆ ѻ҆ стоѧ́нїю рода проразꙋмѣ́и.
по е҆мꙋже и҆́маши къ всѣм꙽ любочл҃чїѧ бл҃госрѣте́нїе·
донелиж̑ б̂о і҆ѹ҆да е҆сть невозмо́жно ми́ра полꙋчи́ти дѣтелеи.
си́цевым же рече́ннымъ ѿ него.
и҆ про́чїи дрꙋзи вра́ждꙋ и҆мꙋщи на і҆ѹ́дꙋ, разждего́ша дими́трїѧ.
призва́ же ско́ро никано́ра гл҃ема старѣ́ишинꙋ е҆лефа́новъ и҆ вое҆водꙋ поста́ви і҆ѹ҆деѻ́м꙽, и҆ посла̀ да́въ за́повд̑ѣ, самаго і҆ѹ́дꙋ ѹ҆бити і҆ и҆же с ни́мъ расточи́ти·
поста́вити же а҆лки́ма а҆рхїере́ѧ вели́каго хра́ма·
Тогда̀ ꙗ҆зы́цы ѹ҆бѣгшїѧ въ і҆ѹ҆де́ю къ і҆ѹ́де, смѣси́шасѧ внеза́пꙋ съ никаноромъ.
хотѧ́ща і҆ѹ҆де́искаго неполꙋче́нїѧ и҆ бл҃говременїѧ гони́тели бы́ти·
Слы́шавши же і҆ѹ҆де́и никано́рово прише́ствїе, и҆ повинове́нїе ꙗ҆́зы́къ, поко́ивше зем̑лю молѧ́хꙋ даже до́ вѣка поста́вльшаго лю́ди своѧ прс̑҇но съ ꙗ҆вле́нїемъ въспомага́ѧ свое҆ѧ ради ча́сти·
Повелѣвшꙋ же вое҆во́дѣ ско́ро ѿтꙋдꙋ дви́гнꙋшасѧ, и҆ смѣси́шасѧ съ страно́ю деса́влею·
Си́монъ же братъ і҆ѹ́динъ сътворѝ съ никано́ром̑ бра́нь мале же ѹ҆страшисѧ нахожде́нїѧ рад̑и̑ сꙋпоста́тъ, ꙗ҆́коже слыша никанор̑҇ мꙋжество и҆же ѻ҆ і҆ѹ́де сꙋщих̑, и҆ бл҃годш҃їе и҆мже подвиза́ютсѧ за ѿч҃ество и҆ страша́шесѧ сꙋда крове ради сътвори́ти·
Сего ради посла̀, посидо́на, і ѳеѻ҆до́та, и҆ мат̑таѳїа, дати и҆ взѧ́ти десни́цꙋ·
На мно́ѕѣ же ѻ҆ семъ бывшꙋ совѣтꙋ, и҆ вое҆во́да къ мно́жествꙋ и҆знесе.
всѣмъ е҆ді́но бысть и҆зволе́нїе прїѧ́ти дрꙋжбꙋ.
и҆ нареко́ша дн҃ь во́ньже на ѹ҆е҆дине́нїе сни́дꙋтсѧ, и҆ прїиде, и҆ поста́виша комꙋждо сѣда́лище·
Повелѣ же і҆ѹ́да въѻ҆рꙋженымъ быти гото́вом̑ въ мѣстѣ подо́бнѣ, да не когда ѿ сꙋпоста́тъ внеза́пꙋ ѕлодѣѧнїе бꙋдет̑ и҆ съвръше́нꙋ бесѣдꙋ сътвори́ша.
пребысть же никано́ръ въ і҆ерс̑҇лимѣ, и҆ никое҆гоже ѕла̀ сътворѝ.
ста́да же народовъ събра́нныхъ ѿпꙋстѝ·
И҆мѣѧше же і҆ѹ́дꙋ всегда̀ въ лицы̀ и҆ дш҃евне прилежа́ше мꙋжꙋ.
молиж̑ е҆го жени́тисѧ и҆ ча́да сътвори́ти.
и҆ ѻ҆женьсѧ бл҃гостоѧше и҆ соѻ҆бщисѧ жи́тїю·
А҆лким же ви́дѧщи межд̑ꙋ и҆ма бл҃горазꙋмїе и҆ бы́вшаѧ совѣща́нїѧ·
Прїиде къ дими́трїю и҆ гл҃аше, никанора вещемъ чюждим꙽ мꙋдръствова́ти·
і҆ѹ҆дꙋ же совѣт꙽ника црс̑҇тва свое҆го въспрїѧти.
цр҃ь же възꙗ҆ри́сѧ, и҆ стропти́выми ѻ҆клевета́нїи е҆го разъсверѣпѣ·
писа̀ никано́рꙋ рекꙋщи.
ѻ҆ завѣща́нїѧхъ сихъ тѧ́жко ми е҆сть носити.
повелѣва́ю же т̂и мак꙽кавеѧ свѧзана̑ посла́ти к на́мъ въ а҆нтїѻхїю·
Ѹ҆вѣдѣ же ѻ҆ си́хъ никано́ръ и҆ смѧтесѧ и҆ бѣдне пребыва́ше.
не хотѧ ѿврещисѧ завѣща́наго, занѐ ничто́же видѣ ѻ҆би́дна въ мꙋжи.
н̂о понеже цр҃ю съпротивитисѧ не бѣ бл҃говре́мѧ снабдѧ́ше воин̑҇ством̑ сїѧ съвершити·
Мак꙽каве́и же ви́дѧщи собою грознѣе дѣа́ти никанора, ѻ҆бычное срѣтнїе ѕвѣрско і҆мꙋща.
разꙋмѣ не ѿ блажа́иша быти прещенїѧ с̂и, собра̀ нема́ло и҆же ѻ҆́крс̑҇тъ себе, и҆ съкрысѧ ѿ никанора.
позна́ же дрꙋгъ е҆го ꙗ҆́ко род̑нѣише ѿ мꙋжа ратꙋ́етсѧ, прїиде къ вели́комꙋ и҆ ст҃омꙋ хра́мꙋ, и҆ възносѧ́щим̑ подобныѧ жертвы повелѣ преда́ти мꙋжа·
И҆м꙽же е҆гда̀ съ клѧ́твою рекшимъ не вѣдѣти ка́мо е҆сть и҆ще́мыи.
и҆ простеръ рꙋкꙋ на цр҃ковъ клѧт̑сѧ рекꙋщи, а҆ще не предасте ми свѧ́зана і҆ѹ́дꙋ.
т̂о бж҃їи храм̑ в равнинꙋ сътворꙋ и҆ ѻ́лтарь раскопа́ю, и҆ капище дїѻнисїю сътворю здѐ.
и҆ сїѧ рекъ ѿи́де·
Жръцы же въздѣ́юще рꙋцѣ на́ нб҃о призывахꙋ строи́телѧ и҆ съпоборьника ꙗзыка и҆хъ, сꙋщаго всегда, сїѧ рекꙋщи·
Ты г҃и всѣхъ сы́и, не требꙋ́ѧи ничтоже бл҃говолил꙽ е҆си храмъ ѻ҆бита́нїѧ твое҆го быти в насъ·
И҆ нн҃ѣ ѽ ст҃е всѧкого ѻ҆сщ҃енїѧ и҆ г҃и, съхрани въ вѣк꙽ несквернен̑҇ храмъ твои секраты ѻ҆чищеныи·
загради́ же всѧка ѹ҆ста̀ неправед̑на.
разїи же нѣ́кто ста̀рецъ ѿ і҆ерс̑҇ли́ма ѻ҆клеветан̑҇ бысть никанорꙋ·
Мꙋжъ любополитъ и҆ ѕѣло добрѣсло́выи.
и҆ по бл҃горазꙋмїю ѿц҃ъ і҆ѹ҆деѻ҆мъ и҆меновашесѧ·
Бысть б̂о въ прежних̑ временех̑ смѣшенїѧ сꙋдъ вносѧ і҆ѹ҆де́иства ради си́цевъ, ꙗ҆́ко тѣло и҆ дш҃ꙋ предаа́ше съ всѧкимъ прилѣжанїемъ·
Хотѧ́ше же ника́норъ и҆з꙽вѣстно ꙗ҆вити не́нависть ю҆́же и҆мѣ на і҆ѹ҆де́и, посла̀ во́инъ пѧть сот̑ ꙗ҆́ти е҆го.
мнѧше б̂о ѻ҆́наго ꙗ҆́вши сим̑ съдѣлати по́лезнаѧ.
мно́жествꙋ же хотѧ́щꙋ столпъ раскопа́ти и҆ дворныи двери раздрꙋша́ющи, і҆ повелѣша ѻ҆́гнь принести и҆ двери зажещи·
Є҆гда̀ и҆маше е҆го мечемъ сѧ пораѕи.
лꙋче хотѧ ѹ҆́мрети неже л̂и врагомъ под̑рꙋчникъ быти, и҆ своѐ бл҃город̑ство ѻ҆без̑честити.
скоростиж̑ ради не смр҃тна ꙗ҆́зва бысть, наро́дом̑ же двери разбива́ющимъ, ѻ҆́н꙽ же притекъ дръзновенне на стѣнꙋ сверже самъ себе мꙋжествено наро́ды, ѻ҆ни же а҆́бїе разбѣгошасѧ паденїѧ е҆го ради.
и҆ паде посредѣ и҆хъ.
е҆ще же дыхаше разжен̑҇ дш҃ею воста̀, кро́виж̑ е҆го ѕѣлне текꙋщи, и҆ тѧжча́ишими ранами бысть ꙗ҆́звенъ.
и҆ теча̀ народ̑ прои҆де, и҆ ста̀ на нѣ́коемъ ка́мени высоцѣ, и҆ ѹ҆же без̑ кро́ви бысть·
ѻ҆бъѧ́тъ внꙋтренѣѧ своѧ̀ ѻ҆бѣма рꙋка́ма врьжесѧ на наро́ды.
възыва́ю҆щи владꙋщаго животом̑ и҆ дх҃омъ.
сїѧ е҆мꙋ̀ па́ки воздати, и҆ сим̑ ѻ҆́бразом̑ живота̀ гонзе·
Глв̑҇а, е҃і·
Никано́р же ꙗ҆́ко ви́дѣ і҆ѹ́дꙋ бити въ мѣстехъ самарїи помысли съ всѣмъ ѹ҆стремленїемъ дн҃е сꙋботнаго сътворити бра́нь·
По нꙋжди же последꙋ́юще е҆мꙋ і҆ѹ҆де́и и гл҃юще, ника́кож̑ сице ѕвѣрьскы и҆ варьвар꙽скы сътвориши·
сла́вꙋ же возда́и ст҃ыни, и҆ почти вс̂ѧ видѧщаго.
нечестивыи же вопроси а҆ще е҆сть си́лныи на́ нб҃си, и҆же повелѣ празнова́ти дн҃ь сꙋбо́тныи·
Ѡ҆́нѣм же ѿвѣщавшим̑, е҆сть г҃ь живъ се́и на́ нб҃си си́лен꙽, и҆же повелѣ праз̑новати сед̑мыи дн҃ь·
Ѡ҆́н же рече и҆ а́зъ си́ленъ е҆смь на землѝ, повелѣва́ѧи прїѧти ѻ҆рꙋжїѧ и҆ потребнаѧ цр҃еви и҆спо́лнити.
ѻ҆баче же не воздръжа сътвори́ти и҆злїѧ́ннаго совѣта·
Ника́норъ же вели́кою горды́нею воздвижен̑҇, помысли ѻ҆́бщꙋю бра́нь състави́ти на і҆ѹ҆дꙋ·
Маккаве́и же всегда̀ надѣѧ́шесѧ съ всѣмъ ѹ҆пова́нїемъ застꙋпленїе ѿ г҃а полꙋчи́ти.
и҆ ѹ҆тѣшаше свои҆хъ да не ѹ҆боѧ́тсѧ пришествїа ꙗ҆́зыкъ.
и҆мѣ́ющи же въ ра́зꙋме пред̑бы́вшꙋю им̑ ѿ нб҃си по́мощъ·
і҆ нн҃ѣ чают̑ ѿ вседръжителѧ быти себѣ̀ побѣде и҆ по́мощи.
и҆ наказа и҆хъ ѿ за́кона и҆ про̑҇ркъ, въспомина́ѧ им̑ предъбы́вшаѧ под̑виги, и҆ ѹ҆сердны и҆хъ сътвори.
и҆ та́ко дш҃ами их̑ воздви́же въкꙋпѣ показа и҆мъ ꙗ҆́зы́ческа льщенїѧ, и҆ клѧ́твамъ престꙋпленїѧ.
кое҆гождо и҆хъ въѻ҆рꙋжи не щи́томъ и҆ ко́пїи ѹ҆тверженїи, н̂о словесы̀ благи́ми ѹ҆тѣши.
и҆ сказа̀ со́нъ достовѣренъ, и҆ ѹ҆тробы всх̑ѣ възвесели·
бы́сть же е҆го си́цево видѣнїе.
ѻ҆ни́ю бывшаго а҆рхїере́ѧ мꙋжа добраго и҆ бл҃гаго, срамли́ва видѣнїем̑ кротка же ѻ҆бразом и҆ бе́сѣдою лѣпа и҆же ѿ дт̑ѣства прилежа́щаго всѣмъ бл҃гим꙽, рꙋцѣ въздѣжꙋща моли́ти за всѧ̀ лю́ди і҆ѹ҆де́искїѧ·
посемъ ꙗ҆ви́тисѧ і҆ и́наго мꙋжа сѣдинами и҆ сла́вою ди́вна, и҆ вели́ко бл҃голѣпїе бы́ти ѻ́крс̑҇тъ е҆го·
ѿвѣща́вшаго же ѻ҆нїю и҆ рекшаго, се́и е҆сть братолюби́тель и҆ мно́го мл҃ѧсѧ ѻ҆ лю́дехъ и҆ ѻ҆ ст҃ѣмъ гра́дѣ, і҆еремїѧ бж҃їи про̑҇ркъ·
просте́ршꙋ же і҆еремїи десни́цꙋ да́ти і҆ѹ́дѣ ме́чь зла́тъ.
да́вши же въз꙽гласѝ сїѧ, прїими ст҃ыи мечь даръ ѿ б҃а, и҆мже съкрꙋши́ши сꙋпоста́ты.
ѹ҆крѣпльше же сѧ і҆ѹ́диными словесы̀ пребл҃гими, и҆миж̑ въѻрꙋжи́шасѧ, и҆ дш҃а ю́ношъ и҆спра́вишас̑҇, вое҆ва́ти и҆ бра́тисѧ крѣпко да ѿ ве́щеи си́ла позна́етсѧ.
занѐ сего рад̑и̑ храмъ ст҃ыи и҆ градъ погиба́ше.
бѣ́ бо ѻ҆ жена́хъ и҆ ча́дехъ, е҆ще же и҆ ѻ҆ бра́тїи и҆ ѹ́жикахъ въ бѣдѣ ѹ҆мале́нїѧ живꙋщимъ.
ве́лїи же быс̑҇ и҆ прьвыи страх̑ и҆же за ст҃ыню хра́ма.
такожд̑е и҆ въ градѣ сꙋщимъ бѣдне възмꙋще́ным̑ гръдаго ради совѣт́а.
ꙗ҆ко всм̑ѣ ѹ҆жѐ ча́ющимъ сꙋдꙋ пришед̑шꙋ.
и҆ сꙋпоста́томъ ѹ҆жѐ смѣсившимсѧ и҆ во́и съчине́ни.
и҆ звѣри и҆ ко́нницы въ бл҃говре́меннѣ мѣстѣ на лѣхи въчине́ни.
съразꙋмѣва́ѧ же мак꙽каве́и мно́гих꙽ прише́ствїе, и҆ ѻ҆рꙋжїи разли́кихъ ѹ҆краше́нїе, и҆ сверѣп꙽ства звѣреи.
просте́рши рꙋцѣ на́ нб҃о, призыва́ше чю́до творѧ́щаг̑҇ и҆ низꙋ ви́дѧщаго г҃а, и҆же не по ѻ҆рꙋжїемъ си́лы, н̂о ꙗ҆́коже годѣ е҆мꙋ дас̑҇ досто́инымъ ѻ҆долѣ́нїе·
рече же призыва́ю симъ ѻ҆бразомъ·
Ты̀ влд̑ко посла́лъ е҆си а҆гг҃ла твое҆го при е҆зекїи цр҃и і҆ѹ́динѣ, и҆ ѹ҆би́лъ е҆си ѿ во́евъ сенахири́мовыхъ, р҃п҃҂е҃·
и҆ нн҃ѣ влд̑ко силныи на нб҃сехъ послѝ а́гг҃ла твое҆го бл҃га пред꙽ на́ми въ стра́сѣ и҆ тре́петѣ вели́чества мы́ш꙽ца твое҆ѧ, да ѹ҆боѧтсѧ съ хꙋле́нїемъ пришед̑шїи на лю́ди твоѧ·
и҆ се́и же сице помоли́сѧ.
никано́ръ і҆ иже с нимъ съ трꙋба́ми и҆ пѣсньми подвиза́хꙋсѧ.
і҆ѹ́да же съ призыва́нїемъ и҆ мл҃твами смѣси́сѧ съ сꙋпостаты.
рꙋка́ма б̂о бо́рющисѧ, г҃а же срд̑цемъ молѧ́щи.
простроша боле л҃҂е, ꙗ҆́вле́нїемъ бж҃їимъ ѕѣло възра́довавшесѧ·
Бы́сть же по пораже́нїю и҆ съ ра́достїю възвраща́хꙋсѧ, и҆ позна́ша никано́ра пад̑ша съ ѻрꙋжїи свои҆ми.
бывшꙋ же во́плю и҆ смѧте́нїю блс̑҇вѧхꙋ си́лнаго ѿч҃ескимъ гла́сомъ.
и҆ повелѣ и҆же за всѧ́кꙋ плоть и҆ дш҃ꙋ и҆ гра̑ свое҆го ро́да, и҆ во́зрастъ прьвоподви́жникъ и҆ бл҃горазꙋмїѧ снабди́тель і҆ѹ́да, никано́ровꙋ главꙋ̀ и҆ рꙋкꙋ съ рамом̑ ѿсѣщи, и҆ принести въ і҆ерс̑҇лимъ.
и҆ пришед̑ше же та́мо и҆ съзва̀ всѧ колѣна ꙗ҆́зы́ка свое҆го и҆ жръцевъ і҆ и҆же въ кра́ю сꙋщих̑.
и҆ ста̀ пред̑ ѻ҆лтарем̑.
и҆ показа̀ и҆мъ главꙋ̀ никано́ровꙋ и҆ рꙋкꙋ хꙋленїѧ ю́же прострѐ на храм꙽ ст҃ыи вседръжи́телѧ възносѧсѧ·
и҆ ꙗ҆зы́къ нечести́ваго никано́ра ѿсѣчь и҆ повелѣ̀ раз̑дроби́ти птицам̑, рꙋкꙋ же безꙋмнаго противꙋ цр҃кви възвѣ́сити·
Вси́ же на́ нб҃о блс̑҇виша г҃а прꙗ҆вле́наго, рекꙋщи, блс̑҇вен̑҇ съхрани́выи мѣсто свое нескве́рно.
възвѣси же никаноровꙋ главꙋ̀ на кра́ю, и҆звѣстна всм̑ѣ и҆ ꙗ҆влѧ́ѧ гн҃еѧ по́мощи зна́менїе·
И҆ повелѣша вс̂и ѻ҆́бщим̑ совѣтом̑ ника́коже ѻ҆ста́вити без̑ празнд̑ова́нїа дн҃и сего, и҆мѣти же пра́зник̑҇ сей, г҃і дн҃ѧ, в҃і мс̑҇ца.
а҆дар꙽ же гл҃етсѧ сѷрїиским̑ гласом̑, прд̑е е҆ді́ным̑ днем̑ мардохе́ева дн҃и·
ꙗ҆́же бо ѻ҆ никано́рѣ и҆мѣ́ютсѧ си́це.
и҆ ѿ тх̑ѣ вре́мен̑҇ ѹ҆дръжа́сѧ град̑ ѿ е҆вре́и·
И҆ аз̑ здѣ ѻ҆ставлю сло́во.
и҆ а҆ще ѹ҆бо бл҃го и҆ пра́во съчине́нїю семꙋ̀ и҆ сам̑ хотх̑ѣ, а҆ще же бл҃госъврьше́не и҆ въ мѣрꙋ сїе врꙋче́но м̂и быс̑҇.
ꙗ҆́коже бо вино̀ по всемꙋ̀ пи́ти и҆лѝ всегд̑а вода̀ съпроти́вно ес̑҇.
им̑же ѻ҆бразом̑ вино̀ с водо́ю смѣшава́ти весели́тъ и҆ блгд̑ть скончава́етъ.
такожд̑е съчине́нїе и҆ ѹ҆краше́нїе сло́ва весели́тъ слꙋхи послꙋшаю҆щихъ.
в сем꙽ же бꙋди и҆ скон꙽ча́нїе·
Конецъ вторы́хъ кни́гъ мак꙽каве́искихъ.
и҆ ма́ють в себѣ гла́въ, е҃і·