Библия (1581). [49] 3 Маккавейская

ТРЄ́ТИЄ КНИ́ГИ МАКАВЄ́ИСКЇЄ

ГЛВ̑А А҃·

Филопатор же внегда ѹвѣдев̑҇ ѿ възвращ꙽шихсѧ бы́вшее ѿнѧ́тїе дръжи́мых̑ ѿ него мѣстъ а҆нтїѻ́хомъ, и҆ заповѣда̀ всѣмъ во́емъ своим̑ пѣшцемъ и҆ кон꙽никомъ събра́тисѧ.
взѧ́т꙽ же и҆ сестрꙋ̀ свою а҆рсино́ю, і҆ и҆зы́иде въско́рѣ до рафїискихъ мѣстъ.
и҆дѣже ѻ҆полчи́шасѧ во́и и҆же ѿ а҆нтїѻ́ха·

Ѳеѻ҆до́тъ же нѣкто и҆сполнити преда́тельство ѹ҆мы́сли, поꙗ҆́тъ пред̑врꙋчен꙽ныѧ е҆мꙋ крѣпча́ишїѧ ѻ҆рꙋжники, и҆ прїиде но́щїю къ птоломѣ́евꙋ станꙋ.
ꙗ҆́ко да самъ ѹ҆бїетъ е҆го, и҆ в си́цевыхъ разрешит̑ бра́нь·

Но̂ сего и҆зведѐ досиѳе́и нарица́емыи сн҃ъ дрими́ловъ, и҆же бѣше ѿ ро́да і҆ѹ҆де́иска·

Послѣдж̑е и҆змѣни зако́ны ѿч҃ескїѧ, и҆ догмат̑ и҆хъ ѿчюжди́сѧ.
и҆ в него мѣсто незна́ема нѣ́коего заключѝ въ ста́не томъ.
е҆мꙋже слꙋчи́сѧ под̑ꙗ҆́ти ѻ҆наг̑҇ болѣзньнꙋю смр҃ть·

Съста́вленѣ же бы́вши бра́ни и҆ во́емъ а҆нтиѻ́ховымъ па́че мꙋжа́ющимсѧ·

А҆рсино́а же беспреста́ни проходѧ́щи вои, съ ѹ҆миле́нїемъ и҆ слеза́ми плете́нїе влс̑҇а разрѣши́вши молѝ помощѝ себѣ мꙋжестве́нне, и҆ ча́да и҆ же́ны своѧ свободи́ти.
ксемꙋ же ѻ҆бѣща̀ да́ти побѣди́вшимъ комꙋждо дв̂ѣ мна́сѣ зла́та·

И҆ та́ко сꙋпоста́томъ слꙋчи́сѧ, рꙋкосѣче́нїемъ побѣжде́номъ бы́ти, и҆ мно́гимъ копїедръжцемъ ꙗ҆́том̑ бы́ти.
Ѹ҆дръжавши же побѣдꙋ ѕл̂о совѣтїѧ, сꙋди бли́жнѧѧ страны̀ пришед̑ наѹ҆че́нїемъ ѹ҆тѣшити·

сътвор же сїѧ, и҆ хра́мы и҆хъ да́ры ѹ҆красѝ, и҆ дарова, и҆ сего ради мꙋжествены под̑рꙋчныѧ поста́ви·

И҆ внегда же ѹ҆слы́шаша і҆ѹ҆де́и ѻ҆ си́хъ посла́ша ѿ прозви́теръ, и҆ старецъ къ филопато́рꙋ поздравлѧ́ющих̑ е҆го, и҆ дары приносѧ́щих̑, и҆ ѻ҆ слꙋчивших̑сѧ бл҃гополꙋче́нїѧхъ съпраща́ющи·

слꙋчисѧ е҆мꙋ паче провожделѣти да скорѣе к нимъ прїидет.
е҆же и҆ бы́сть.
и҆ пришед̑ въ і҆ерс̑҇ли́мъ, и҆ великомꙋ б҃ꙋ пожрѐ, и҆ блгд̑ти възда̀, и҆ ꙗ҆́же лѣтъ б̂ѣ мѣстꙋ сътворѝ, и҆ вшед̑ вне и҆ хꙋдожествꙋ и҆ бл҃голѣпїю е҆го ѹ҆сꙋмнисѧ.
та́кожд̑е и҆ бл҃гочи́нїю храма ѹ҆диви́сѧ.
и҆ съ вожделѣнїемъ ѕѣлным꙽ въсхотѣ вни́ти въ ст҃ыню.
ѻ҆ни же съпроти́вльшесѧ е҆мꙋ и҆ рѣша, ника́коже подоба́етъ бы́ти семꙋ.
занѐ ниже ѿ рода на́шего лѣтъ е҆сть вни́ти та́мо, ниже всѣмъ і҆ере́ѻмъ, н̂о е҆ді́номꙋ прои҆гꙋменꙋ, и҆ всѣхъ а҆рхїере́ѻви, и҆ сїе е҆ді́ною лѣта.
ѻ҆н꙽ же ника́коже вѣсхотѣ гл҃ъ и҆хъ послꙋшати к꙽семꙋ же и҆ зако́нъ прочто́ша е҆мꙋ и҆ не ѻ҆ста́висѧ похотѣнїѧ свое҆го.
н̂о гл҃аше, подоба́етъ рече вни́ти м̂и.
а҆ще же ѻ҆ни лиша́ютсѧ си́цевыѧ че́сти, мнѣ же не подоба́етъ рече.
и҆ въпроша́ше чт̂о ради приходѧ́щемꙋ е҆мꙋ въ всѧкъ хра́мъ ни е҆ді́нъ възбранѝ сꙋщихъ·

Нѣкто же непрозори́телно рече ѕл̂ѣ сїе сътворим е҆мꙋ.
бы́вшꙋ же рече́нїю ѻ҆ семъ коеѧ ради вины̀ не подоба́етъ сїе, ѻ҆н꙽ же рече ника́коже бꙋди сего̀·

Но подоба́етъ м̂и вни́ти и҆ хотѧ́щимъ им̑ и҆ нѐ·

І҆ереѻ́м же всѣми чю́вствы припад̑шимъ, и҆ молѧ́щим̑ вели́каго б҃а помощѝ и҆мъ в настоѧ́щеи и҆хъ нꙋжди, и҆ ѹ҆стремле́нїе ѕл̂ѣ нашед̑шее премѣнити.
и҆ внегда во́плю съ слеза́ми хра́мъ наплъниша·

Тогда и҆же по гра́де ѻ҆ста́вшїи ѻ҆ семъ смꙋти́шасѧ, і҆ и҆скочиша вн̂ѣ, без̑вѣстно сїе полага́юще быти.
та́кожд̑е и҆ заключе́ныѧ дѣвы въ черто́зех̑ съ ражда́ющими и҆збѣгша, и҆ пе́пеломъ и҆ пра́хомъ гла́вы посы́пахꙋ·

рида́нїѧ и стена́нїѧ стогны и҆сполниша.
и҆ проѹ҆готова́нныѧ въ срѣтенїе хорꙋгвѝ възима́хꙋ и҆ стꙋды покрыва́хꙋ.
и́нїи же забы́вши сїѧ, рыска́нїе бесчи́нно въ́ градѣ съста́виша.
и҆ новорожде́ныѧ младе́нцы, к꙽оим же и҆ матере и҆ пита́телницы ѻ҆ставлѧ́ющи сѣмо и҆ ѻ҆ва́мо, е҆ді́ны по доме́хъ, дрꙋзїи же по ст҃ынѧхъ безъѻ҆бра́зне въ превы́шнїи хра́мъ събира́хꙋсѧ.
бѣше же разли́чна моли́тва събра́нныхъ въ сїе непреподо́бное начина́нїе е҆го·

К си́мъ же и҆ гражда́номъ дръзнꙋвшимъ не ѻ҆ста́вити е҆го съвръше́нне вни́ти т̂ꙋ.
е҆мꙋже прои҆зволе́нїе свое и҆сполнити помышлѧ́ющꙋ.
и҆ пригласи́ша въѻ҆рꙋжи́тисѧ комꙋждо, и҆ мꙋжестве́нне наѹ҆ча́хꙋ по ѿч҃ескомъ зако́нѣ ѹ҆мрѣти.
и҆ сего ради ве́лїе смѧте́нїе сътвори́ша въ граде.
е҆два же ѿ і҆ере́и и҆ презви́теръ нѣцыи премѣни́ша и҆хъ на сїе моле́нїе пришед̑ше ста́ти.
мно́жество же людїи ꙗ҆́ко и҆ пре́жде в си́хъ пребыва́ше молѧ́щисѧ.
і҆ и҆же ѻ҆ цр҃и презви́тери мно́го покꙋша́хꙋсѧ прегръдыи е҆го ѹ́мъ премѣни́ти, ѿ вожделѣнїѧ е҆го.
ѻ́н꙽ же ѹ҆бо дръзостне всѣхъ ѿсла̀, и҆ къ вхожд̑енїю творѧ́ше ѻ҆пасе́нїе, съвръшити непщꙋѧ пред̑рече́ное.
сїѧ же ѹ҆бо и҆же ѻ҆ немъ сꙋщїи зрѧ́хꙋ.
і҆ и҆змѣни́шас̑҇ е҆же съ нашими призыва́ти вс̂ѧ съдръжа́щаго.
и҆ нашед꙽шемꙋ безако́нїю прегръдаго не преда́ти·

Тогда ѿ разли́чныхъ гла́совъ, и҆ бо́лѣзни наро́да быс̑҇ во́пль, и҆ непостоѧ́ненъ кли́чь.
ꙗ҆́ко непщева́ти и҆мъ, и҆же не то́кмо бѣше чл҃комъ, н̂о и҆ стѣна́мъ, и҆ всемꙋ по́ждꙋ шꙋмѣнїе·

и҆ прои҆зволѧ́хꙋ тогда вс̂и ѹ҆н꙽ше ѹ҆мрѣти, неже на мѣсто сїе ѻ҆скверне́нїе ви́дѣти·

Глв̑҇а, в҃·

Тогда ѹ҆бо а҆рхїереи нарица́е҆мыи си́монъ, проти́вꙋ хра́мꙋ преклони колѣна, и҆ рꙋцѣ просте́ръ бл҃гочин̑҇но творѧ́ше мл҃твꙋ сїю·

Ги҃ г҃и цр҃ю нбс̑҇ныи, и҆ влд̑ко всѧ́кого зда́нїѧ.
ст҃ыи въ ст҃ыхъ само нача́лниче, вседръжи́телю, во́нми нам̑ и҆з꙽неможенным꙽, і҆ и҆зба́ви ѿ непреподо́бнаго, и҆ сквернаго и҆ не́мощїю ѻ҆гражде́ннаго, дръзости.
ты бо създа́выи вс̂ѧ, и҆ всѣхъ съдръжа́и, си́ленъ и҆ крѣпокъ е҆си, и҆ клѧ́твы, и҆ гръдости дѣ́ющимъ чт̂о сꙋдиши.
ты̀ прежде безако́нїе сътворших꙽, в них же и҆ гиган꙽ти бы́ша и҆ силе и҆ мꙋжествꙋ ѹ҆пова́вшихъ растлѝ, наводѧ̀ и҆мъ безмѣрнꙋю во́дꙋ.
т̂ы прегръдаѧ творѧ́щихъ содо́млѧнъ, и҆ въ безвѣстныхъ ѕло́бахъ бы́вших̑ ѻ҆гнемъ и҆ жю́пеломъ попалѝ, ѻ́браз̑ по нихъ быва́ющимъ ѻ҆ста́ви.
т̂ы сверѣпаго фараѻ́на поработи́вша лю́ди твоѧ ст҃ыѧ і҆и҆л҃ѧ, разли́чными и҆ мно́гими и҆скꙋсѝ мꙋ́ками.
и҆ сказа́лъ е҆си и҆мъ си́лꙋ твою, и҆ въ ѻ́нѣх꙽ ве́лїю дръжа́вꙋ твою ꙗ҆вил̑҇ е҆си, и҆ гонѧ́ща е҆го за люд꙽ми твои҆ми съ колесни́цами и҆ наро́дъ мно́жествомъ заключѝ въ глꙋбинѣ мор꙽стѣи.
вѣрꙋющихъ же т̂и всѧ́кого зда́нїѧ силнѣ́ишемꙋ невре́дны преве́лъ е҆си.
и҆же ви́дѣвше дѣла твоеѧ рꙋкѝ, въсхвали́ша тебе вседръжи́телѧ.
т̂ы цр҃ю създа́выи непроходи́мꙋю и҆ неи҆змѣри мꙋ зе́млю, и҆збра́лъ е҆си градъ сїи, и҆ ѻ҆ст҃илъ е҆си мѣсто сїе и́мени твое҆мꙋ ничто́же требꙋющемꙋ, и҆ просла́вилъ е҆си въ ꙗ҆вле́нїи великолѣпїѧ съставле́нїе.
сътвориж̑ себѣ сїе къ сла́вѣ вели́це, и҆ хвале́нїю и́мени твое҆го ст҃аго.
и҆ ѹбо любѧ̀ домъ і҆и҆л҃евъ и҆звѣсти́лъ е҆си, ꙗ҆́ко а҆ще бꙋдетъ вамъ съвраще́нїе, и҆ ѻ҆бы́иметъ васъ тѣснота̀, тогда пришед̑ше въ мѣсто сїе помоли́тесѧ, и҆ ѹ҆слы́шꙋ мл҃твꙋ ва́шꙋ.
и҆ ѹ҆бо вѣренъ е҆си і҆ и́стиненъ.
понеже мно́гащи ѻ҆скорбленомъ бывшимъ ѿц҃емъ на́шимъ помо́же и҆мъ т̂ы въ нищетѣ̀, і҆ и҆зба́вилъ е҆си ѿ вели́кихъ бѣдъ.
мы́ же сїѧ нн҃ѣ ст҃ыи цр҃ю мно́гихъ ра́ди и҆ вели́кихъ наших̑ грѣховъ страждем̑, и҆ повинꙋемсѧ враго́мъ нашимъ, и҆ есмы̀ в не́мощехъ ꙗ҆́ко въ дн҃е низпаде́нїѧ·

дръзости́выи же и҆ скве́рныи се́и начинает̑ похꙋли́ти на землѝ възвыше́нное мѣсто и́мени твое҆мꙋ ст҃омꙋ.
а҆щеж̑ и҆ жили́ще твое нб҃о нб҃си непристꙋпно чл҃комъ е҆сть.
н̂о поне́же бл҃говоли́лъ е҆си сла́вꙋ твою в лю́дех̑ твоих̑ і҆и҆л҃и и҆ ѻ҆ст҃илъ е҆си мѣсто сїе.
да не ѻ҆сꙋдиши на́съ в нечистотѣ сих̑, ниже да погрꙋзи́ши насъ въ сквернѣ сихъ.
даже не похва́лѧтсѧ зако́нопрестꙋпнїи въ дꙋши и҆хъ, м̂ы попра́хомъ хра́мъ ст҃ыни, ꙗ҆́коже попираютсѧ храмы мер꙽зостеи, и҆хже т̂ы ѻ҆мрази́лъ е҆си·

ѻ҆ста́ви грехи наша, и҆ разрд̑ꙋши непра́вости наша, и҆ ꙗ҆ви млс̑҇ть твою в ча́съ сїи.
скоро да варѧт꙽ н̂ы щедроты̀ твоѧ.
и҆ даи же хва́лы въ ѹста̀ стра́ждꙋщих̑ и҆ съкрꙋше́нныхъ дш҃ами, сътвори́выи намъ миръ ѿсю́дꙋ·

Всеви́децъ же, и҆ прежде всѣхъ ст҃ыи въ ст҃ых꙽ ѹ҆слы́ша мл҃твꙋ смире́нїѧ.
и҆ хꙋло́ю и҆ безстꙋдїем꙽ вельма възнесеннаго ѹ҆ꙗ҆звѝ, ѿсю́дꙋ и҆ ѿѻ́нюдꙋ горды́нѧ е҆го, ꙗ҆́коже вѣтромъ тро́сть.
и҆ на пожди ктомꙋ безъчи́нне лежа́ти ѹ́дами расла́бленнꙋ, ниже прогласи́ти могꙋщи.
пра́веднымъ б̂о бѣше ѹ҆ꙗ҆зве́нъ сꙋдом̑.
ѿню́дꙋже дрꙋзи е҆го и҆ тѣла стра́жїе внезапꙋ и҆ въско́рѣ ви́дѣвше ѻ҆бъе́мшꙋю е҆го бо́лѣзнь.
възбоѧ́шасѧ да не живота гоньзнет꙽, въско́рѣ е҆го и҆з꙽влеко́ша вн̂ѣ, и҆бо нашед̑шимъ ѹ҆ꙗ҆зве́ни стра́хомъ·

Послѣде же прише́дъ в себѣ, н̂о никакоже в꙽ покаа́нїе прїиде.
запрети́ же ѻ҆ семъ, и҆ съ преще́нїемъ го́ркимъ ѿи́де.
пришед̑ же въ е҆гѷпетъ зло́бою ѻ҆дръжимъ, съ пред̑рече́нными прича́сники, і҆ и́ными всеѧ̀ пра́вды ѿлꙋчен̑҇ными.
не то́кмо бесчи́сленными стꙋдодѣѧ́нїи довлѧ́ше.
н̂о и҆ на толи́ко бестꙋдїе възы́иде, ꙗ҆́коже бѣдне вѣща́нїе въ мѣстехъ всѣхъ съста́вити.
и҆ мно́зи дрꙋзи взира́юще на црс̑҇кое похотѣнїе, и҆ сїи послѣдова́ша ѻ́наго зл̂охотѣнїю.
и҆ пред̑ста́ви цр҃ь народ̑нꙋ на ꙗ҆́зы́къ і҆ѹ҆де́искїи и҆здати ненависть.
повелѣ̀ на столпѣ̀ въ дворѣ̀ поста́вити и҆дола, и҆ пригвоздѝ писа́нїе, е҆же ни е҆ді́наго не жрꙋщихъ въ ст҃аѧ и҆хъ вни́ти.
всѣх же пожръшихъ вписа́ти в лю́ди, и҆ въ слꙋже́бныи чи́нъ поста́вити.
съпроти́в же гл҃ющихъ нꙋждею ꙗ҆́вши живота̀ лиши́ти.
и҆сповѣда́вших же своѧ и҆мена, назнаменова́ти в тѣло кїс꙽совымъ ли́стомъ въ ѻ҆гнѝ раже́гши.
е҆же е҆сть зна́менїе деѻ҆ни́сово, и҆ ѿлꙋчи́ти в рабъство.
н̂о да не всм̑ѣ ѿринове́нъ ꙗ҆́витсѧ под̑писа̀.
а҆ще же нѣцыи ѿ нихъ прои҆зво́лѧтъ по назнаменова́нїю возврати́тисѧ къ пожре́нїю, си́хъ ра́вныхъ гражд̑ан꙽ства а҆леѯан꙽дрїискаго сътворю быти.

Тѣмже ѹ҆бо е҆ді́ны бл҃гочестїѧ своѧ нивъчто́же вмѣнѧ́ющи, съ радостїю себе вда́ша.
мнѧ́щи себѣ великоѧ нѣкоѧ причасти́тисѧ по́чести ѿ сꙋщаго съжи́тїѧ цр҃ьска.
мно́жаишїи же рода дш҃ею ѹ҆крѣпи́вшесѧ не разлꙋчи́шасѧ бл҃гочестїѧ, н̂о сребреники за живо́тъ ѻ҆беща́ша въ и҆змѣне́нїе дати.
даже то́кмо и҆мена̀ ѿ написа́нїи свободѧ́тъ.
въ бл҃гоѹ҆пова́нїи же бы́ша помощъ полꙋчи́ти.
а҆ ѿлꙋчи́вшихъ же сѧ ѿ них̑ гнꙋша́хꙋсѧ и҆ ꙗ҆́ко ра́тниковъ ро́да свое҆го сꙋди́ша, такожд̑е и҆ ѻ́бщаго съжи́тїѧ и҆ бл҃годѣѧ́нїѧ лишахꙋ·

Глв̑҇а, г҃·

Иже сразꙋмѣ злоби́выи цр҃ь, и҆ в꙽ толи́ко разгнѣва́нїе прїиде.
ꙗ҆́ко не то́кмо на ꙗ҆же въ а҆леѯан꙽дрїи гнѣвъ сво́и показа.
н̂о и҆ на и҆же въ странѣ то́и тѧ́жце разгнѣ́васѧ и҆ съпротивисѧ.
повели́телем же потщав꙽шимсѧ всх̑ѣ събра́ти в꙽кꙋпꙋ, и҆ гор꙽ча́ишею смр҃тїю живота̀ лиши́ти·

Си́м же бы́вшимъ вѣсть бѣдна прои҆зыиде на род̑ і҆ѹ҆де́искїи.
и҆ чл҃комъ зл̂омꙋдръствꙋ́ющимъ ѻ́бразъ и҆зда́нъ бы́сть въ злотворенїа закон̑҇.
занѐ мнѧ́хꙋ и҆хъ възбранѧ́ти ѿ зако́нъ·

Но і҆ѹ҆де́и бѣхꙋ съхранѧ́юще къ цр҃емъ неразвра́тно бл҃горазꙋмїе и҆ вѣрꙋ, чествꙋ́юще б҃а и҆ зако́на е҆го съдръжа́щесѧ.
бесчи́ныѧ же ѿлꙋча́хꙋ ѿ себѐ, е҆ꙗ҆́же ради вины̀ в нѣкои҆хъ ꙗ҆влѧ́хꙋсѧ съпроти́вны·

Правед̑ных꙽ же бл҃годѣа́нїемъ всѣмъ чл҃комъ съжи́тїе ѹ҆краша́шесѧ, и҆ бл҃говолен꙽ны ѿ ни́хъ пребыва́хꙋ.
и҆ноплемен꙽ницы же ника́коже въменѧхꙋ бл҃годѣанїѧ и҆хъ похва́лнаго въ всх̑ѣ, растоѧ́ни ра́ди въ поклоненїи и҆ пи́щи.
и҆ ѹ҆ничижа́хꙋ гл҃юще, ꙗ҆́ко сїи чл҃цы ниже цр҃ю ниже воем̑ подобно жрътвꙋ творѧт̑.
зл̂охитрены же быти нарицахꙋ, и҆ великимъ ве́щемъ съпроти́вны, и҆ несътерпи́мымъ ѻ҆бъꙗ҆́ша враждова́нїемъ·

Є҆́л꙽лини же ничи́мже сꙋще ѻ҆биди́ми ѿ них꙽ по гра́дѣ, ви́дѣша смѧте́нїе нечаан꙽но на ни́хъ, и҆ съпоможенїѧ непот꙽кновена бы́ша им̑.
н̂о помощѝ не възмого́ша.
мꙋчи́тел꙽ско б̂о бѣше повеле́нїе, и҆ ѹ҆теша́хꙋ нꙋж́дꙋ и҆мꙋщихъ и҆ преити сїѧ въскорѣ гл҃ахꙋ.
не пред̑ста́ти б̂о сицевомꙋ безꙋмномꙋ смѧтенїю въчто̀·

Та́кож̑ и҆ нѣцїи дрꙋѕи и҆ сосѣди съкꙋп꙽ствꙋю҆щеи та́и нѣ́кїѧ по́мощи вѣрны подаа́хꙋ съи҆стерзати и҆хъ ѿтꙋдꙋ.
и҆ е҆ли́ко възмо́жно къ застꙋпленїю ѻ҆беща́хꙋ·

ѻ҆н꙽ же ѹ҆бо по настоа́щемꙋ бл҃годеньствїю разгордева́ѧсѧ, и҆ не зрѧ вели́каго б҃а дръжа́вы.
неп꙽щꙋѧ вы́нꙋ въ сицевомъ пребы́ти ѕл̂осъвѣтїи.
написа̀ на́ нѧ посла́нїе·

Цр҃ь п꙽толомѣи филопаторъ сꙋщимъ въ е҆гѷпте, и҆ по мѣстахъ страти́гомъ и҆ стратила́томъ радоватис̑҇, и҆ здрав꙽ствова́ти.
здрав̑҇ствꙋ́ю же и҆ а́зъ са́мъ и҆ ве́щи на́ши.
ѻ҆ и́же въ а҆сїи бы́вшїѧ намъ ра́ти ю҆же да вѣсте и҆ в̂ы ꙗ҆ко бого́въ съпоборенїемъ и҆ на́шею си́лою непобѣди́ма бы́ша·

тѣмже м̂ы хотѧ́щи на бл҃года́тныи конецъ привести по да́рꙋ, не нꙋждею копѣи.
н̂о смиренїем꙽ и҆ мно́гимъ чл҃колю́бїемъ.
и҆ ѹ҆строи҆ти живꙋщаѧ въ ѹ҆́доли сѷрїи, и҆ финикїи ꙗ҆́зы́ки.
бл҃го твори́ти же ра́достне і҆ и́же по гра́дехъ жерцемъ раздѣлѧ́ющи и҆мъ дары мно́ги·

Провожделѣхомъ и҆ въ і҆ерс̑҇лим̑ вни́ти, и почестѝ хра́мъ сꙋемꙋдреныхъ.
ѻ҆ни́ же никогда̀ хотѧ́щи преста́ти свое҆го неразꙋмїѧ.
сло́вом꙽ ѹ҆бо прїа́ша на́ше прише́ствїе, дѣтелїю же лестне.
и҆ провожделѣвшимъ на́мъ внити въ храм̑ и҆хъ, и҆ лѣ́потными, и҆ добрѣ́ишими да́ры чествова́ти·

ѻ҆ни́ же дре́вними го́рдостьми носи́ми възбрани́ша намъ вни́ти, и҆ н̂ивочтоже въмѣни́ша на́шꙋ че́сть.
и҆́мже и́мамы къ всѣмъ чл҃ком꙽ чл҃колю́бїе.
и҆же і҆ и҆звѣстно показа́ша к на́мъ злоразꙋмїе, точїю непщꙋ́ющи бы́ти са́ми род̑ бл҃гъ, и҆ цр҃емъ і҆ и́хъ добродѣ́лателемъ съпротивлѧ́ющесѧ ничто́же пови́ннаго хотѧ́ще носи́ти.
мы́ же сихъ безꙋмїемъ ѻ҆бъꙗ҆́ти бы́вше съ побѣ́дою възврати́хомсѧ, и҆ въ е҆гѷптѣ всм̑ѣ ꙗ҆зы́комъ любочл҃чне срѣтившимъ ꙗ҆́коже лѣтъ б̂ѣ сътвори́хомъ и҆мъ.
та́ко и҆ всѣмъ и҆же ѿ ро́да и҆хъ сꙋщимъ непамѧтозло́бїе сказахом꙽ вы́нꙋ.
ра́ди съпоборенїѧ и҆ древних꙽ несчи́сленыхъ ве́щеи врꙋченыхъ им̑, и҆ дер꙽знꙋвшихъ съ простостїю.
н̂о и҆змѣнити въсхотѣхомъ и҆хъ ѿтꙋ́дꙋ, и҆ прича́стники гражан꙽ства а҆леѯа́ндрїискаго сподоби́ти.
та́кож̑ и҆ съслꙋженїѧ вѣчнаго жре́чества прїа́ти.
ѻ҆ни́ же съпроти́вныа прїѧ́ша ра́змыслы, и҆ сърасленымъ ѕл̂онра́вїемъ до́брое ѿринꙋша, и҆же прс̑҇но въ зло́е ѹ҆клонѧющесѧ.
не то́кмо ѿврати́ша нече́стно гражан꙽ство, н̂о и҆ гнꙋшают̑сѧ словом̑ и҆ дѣ́ломъ і҆ и́же в ни́хъ малых̑ к на́мъ нелестне прилежащихъ.
и҆ по всѧ́къ ча́съ ча́юще на́съ въско́ре нестро́инымъ жи́тїем꙽ съврати́тисѧ съ и҆справленїи.
тѣм꙽же си́хъ ради ви́нъ и҆ дѣа́нїи по всемꙋ ѻ҆́бразꙋ съпротивлѧ́ютсѧ нам̑.
и҆ м̂ы проразꙋмѣва́ющи да не когда̀ вни́дет̑ намъ нѣ́каѧ внезапость посем̑ смѧтенїе, си́хъ ради нечести́вых꙽ по хреб꙽тꙋ предатель·

мы́ же и҆мамы варва́ри во́и.
тѣм꙽же ѹ҆бо повелѣва́емъ внегда̀ прїидетъ к ва́мъ посла́нїе сїе, въскорѣ въ е҆ді́нъ дн҃ь назнаменова́нныхъ събра́вши, съ жена́ми, и҆ ча́ды хꙋлне и҆ сра́мне посли́те к на́мъ въ ѹ҆́захъ желѣзных̑ ѿ всюдꙋ ѻ҆кова́нныхъ.
въ смр҃ть досто́инꙋю и҆ страх̑ ѕломыслѧ́щих̑.
нестрое́нїа рад̑и̑·

По замꙋченїю же сих̑ въ прочее времѧ ѹ҆строим̑ намъ ве́щи въ бл҃гочи́нїе, и҆ лꙋчшим̑ завѣщанїем̑ и҆спра́вѧтсѧ·

Но а҆ще кт̂о съкрыет̑ нѣ́коего і҆ѹ҆деа́нина, ѿ ста́ра да́же до младе́нца с꙽сꙋщаго, прелютеишими мꙋ́ками ѹ҆мꙋ́ченъ бꙋдетъ без̑ ми́лости.
а҆ще же и҆звѣстит̑ кт̂о хотимое, сїи прїиметъ бога́т꙽ство въпад̑шаго.
е҆ще же и҆ ѿ цр҃ьска сребра̀ дра́хмъ дв̂ѣ ты́сѧщи, и҆ свобо́дою вѣнчает̑сѧ·

Всѧ́ко же мѣсто и҆дѣже а҆ще ѻ҆брѧ́щетсѧ крыющи і҆ѹ҆де́а пꙋсто и҆ ѻ҆гнемъ съж꙽жено да бꙋдетъ, и҆ всѧкаго мр҃тваго е҆́стества, и҆ всего неключи́маго прича́стно да бꙋдетъ въ вѣчное врѣмѧ.
и҆ посла́нїѧ же ѻ҆́бразъ си́це напи́санъ бы́сть·

Глв̑҇а, д҃·

И внегда̀ прїиде повеленїе сїе въ кꙋю любо странꙋ̀.
тогд̑а ꙗ҆зы́цы народ̑не составлѧ́хꙋ пирова́нїѧ съ восклица́нїем꙽ и҆ ра́достїю.
занѐ древле ѹ҆готова́шасѧ мы́слїю на ѻ҆жесточенїе си́хъ.
нн҃ѣ же съ де́рзостїю и҆ ꙗ҆вленымъ ѿриновенїемъ начина́хꙋ·

І҆ѹ҆деѻм̑ же бѣше несътерпи́мъ плач̑҇, и҆ ѕѣ́ло рыда́телен꙽ съ слеза́ми во́плѧ и҆ стена́нїемъ.
ꙗ҆ко ѻ҆жести́тисѧ срд̑цемъ и҆хъ ѿ всю́дꙋ, вс̂е смѧтенїа ради и҆ нечаа́ннаго и҆ внезапаго ѻ҆сꙋжд̑енїѧ црс̑҇ка, въ поги́бель·

И҆ не бы́сть кои за́конъ, и҆л̂и град̑, и҆л̂и повсю́дꙋ вселе́нное мѣсто, и҆же ст҃ыхъ плача̑ и҆ рыда́нїѧ и҆хъ не и҆сполни́сѧ·

Си́це б̂о го́ркимъ прилежа́нїемъ дш҃и ѿ страти́говъ и҆же по гра́дехъ в꙽кꙋпѣ посила́хꙋсѧ къ цр҃ю.
ꙗ҆́коже неи҆зреченныхъ ради мꙋче́нїи и҆ нѣ́кто и҆мъ ѿ вра́гъ и҆хъ взима́ющи пред̑ ѻ҆чи ѻ҆б꙽щꙋю млс̑҇ть, помышлѧ́ющи без꙽вѣстныи и҆хъ жи́тїѧ конецъ.
и҆ даже когда̀ і҆ и҆мъ не слꙋчи́тсѧ сїе.
слезам̑ трескор꙽бным꙽ вда́ша себѐ.
ведѧ́ше бо сѧ ста́рець мно́жество седи́нами ѹ҆бѣлени, и҆ ѿ ста́рости слѧчены.
ведꙋщїи же с нꙋждею бесра́мне на́ нѧ гл҃ахꙋ въско́рѣ шествова́ти.
ѻ҆ниж̑ претыка́ющесѧ бѣжати понꙋжда́хꙋсѧ·

Та́коже и҆ посѧг꙽шїи секра́ты къ жи́тїю съѻ҆б꙽щенїа ю҆́ноты, въ веселїѧ мѣсто и҆ ѹ҆тѣшенїѧ прїѧ́ша пла́чь.
и҆ пра́хомъ ми́роѹ҆ха́н꙽ныѧ вла́сы посы́паша.
и҆ ѿкровены ведо́ми бы́ша, рыда́нїе въ мѣсто пѣнїи весе́лыхъ въкꙋпѣ начина́хꙋ.
ѻ҆бъꙗ҆́ти б̂о бы́ша и҆ноꙗ҆́зы́чныхъ мꙋченїѝ, и҆ свѧза́ни народ̑не и҆ влекоми бы́ша съ нꙋж́дею даже къ кораблю всаже́нїѧ·

Та́коже и҆ сꙋпрꙋги си́хъ въ ю́ношеском̑ во́зрасте ѹ҆́жа въ венец꙽ мѣсто на шїѧх̑ и҆мѣша, и въ мѣсто веселїа и҆ младе́нческа похвале́нїа въ про́чїи дн҃и бра́ка рыданїемъ провождахꙋ.
зане при нога́хъ ѹ҆жѐ ви́дѧще а҆́дъ лежа́щь·

Ведени же бы́ша звѣри́нымъ ѻ҆́бразомъ въ ѹ҆́захъ желѣ́зных꙽, и҆ ѹ́жахъ.
и҆ е҆ді́ни ѹ҆бо ꙗ҆рмомъ корабльнымъ пригвождени бы́ша шїѧми.
и҆нїи же за но́ги нерастерза́ными пꙋтами ѹ҆крѣплени.
е҆ще же на́ипаче ча́стыми дщица́ми ѻ҆бложени, да́же ѿвсю́дꙋ помрачат̑сѧ и҆ не ѹ҆ви́дѧтъ свѣта·

Веденїе же въ всемъ плове́нїи ꙗ҆́ко преда́телем꙽ твори́ша.
сим꙽ же на гл҃емѣи ладїи веденомъ бы́вшимъ, и҆ повеленїю съвершившꙋсѧ по вожд̑елѣнїю црс̑҇кꙋ.
повелѣ же и҆хъ прд̑е гра́домъ в꙽ конорыстателномъ мѣсте поста́вити, просто въ ѻ҆б꙽меренїю.
къ ѻ҆́бразꙋ всѣмъ в꙽ходѧ́щимъ въ град̑, та́коже і҆ и҆сходѧ́щимъ въ странꙋ̀, да не зл̂омꙋ дръствꙋ́ютъ, и҆́мже ни́же во́емъ свои҆мъ приѻ҆бщѝ, ни́же ѿнꙋдь их̑ сподоби́ти кое҆го покро́ва.
ꙗ҆́коже быс̑҇ сїе слы́ша цр҃ь ꙗ҆ко нѣ́цїи ѿ ро́да и҆хъ и҆з гра́да та́и и҆схожда́хꙋ частѣе, е҆же ѹ҆тѣши́ти бра́тїю и҆хъ въ нꙋжди, и҆ стра́сти сꙋщихъ.
раз꙽гнѣвасѧ ѕѣло̀, и҆ повелѣ съ прилежа́нїем̑ и҆ сим꙽ ѻ҆́нѣхъ ѻ҆́бразом꙽ сътвори́ти, да не ѹ́ймꙋтъ н̂и е҆ді́ноѧ же мꙋ́ки ѻ҆нѣхъ.
ксемꙋ же написа́ти всѧ́ко колѣно по и҆мени, гл҃ющи, и҆б̂о не по пред̑възвѣщен꙽нои крат̑ко рабо́тѣ дѣл꙽ тѧжча́ишихъ съгрѣши́вшимъ сътворю̀·

но нн҃ѣ но́воповелен꙽ными совѣты съвръшене е҆ді́наго ча́са всх̑ѣ повелѣва́ю погꙋби́ти·

Бы́сть же ѹ҆бо си́хъ пописа́нїе съ прилѣжнымъ тща́нїемъ, и҆ съ при́сно че́стнымъ сѣда́нїемъ ѿ восто́къ сл҃нца да́же до за́падъ.
и҆ не възмого́ша кон꙽ца сътвори́ти въ дн҃ех꙽ четы́редесѧ́тих̑·

Цр҃ь же вы́нꙋ ѕѣлне ра́достїю и҆сполнѧ́шесѧ, и҆ пи́ръ всѣмъ и҆́доломъ состави.
зане прельщенъ б̂ѣ дале́че ѿ и҆́стиннаго ра́зꙋма, и҆ скверныма ѹ҆стнама, нѣмаѧ и҆ не могꙋщаѧ гл҃ати и҆мъ, и҆л̂и дви́гнꙋтисѧ хвалѧ́ше.
вели́комꙋ же б҃ꙋ неподобнаѧ скверны гл҃а·

По пред̑реченаго же вре́мени прехожденїю, приноша́хꙋ книж̑ницы цр҃еви и҆звѣщенїѧ е҆же ника́кож̑ мощѝ пописа́нїе і҆ѹ҆де́и сътвори́ти.
несъчи́сленаго ради их̑ мно́жества.
занеже ѹ҆бо сꙋть по и҆ныхъ странахъ множа́ишїи, і҆ и́нымъ же по домохъ състоа́щимсѧ, и҆́ным же по твердынѧхъ.
ꙗ҆́ко не возмощи ѿню̑ всѣмъ и҆же въ е҆гѷптѣ страти́гом꙽ сътвори́ти сего·

Цр҃ь же запрети и҆мъ жесточа́е, мнѧ̀ дарова́нных̑ бы́ти их̑, и҆ сего ради ѻ҆стави́вшихъ ѹ҆бѣщи им̑ въ тверды́нѧ.
н̂о слꙋчисѧ и҆мъ извѣсте е҆го ѻ҆ семъ ѹ҆вѣрити.
гл҃ющи со ѻ҆бъꙗ҆вленїемъ.
и҆б̂о хартїи ѹ҆жѐ и҆ писа́телнымъ тростемъ ѻ҆скꙋдѣвати и҆́миже съвершити сїе·

Сїеж̑ б̂ѣ дѣ́ло промышленїѧ неѻ҆сѧза́емаго и҆ помага́ющаго и҆мъ съ нб҃си б҃а·

Глв̑҇а, е҃·

Тогда̀ цр҃ь тѧж̑це и҆спол꙽нисѧ гнѣва, и҆ крꙋчи́ны по всемꙋ̀ непремѣнне, и҆ призва̀ е҆рмона сло́номъ нача́лника, и҆ повелѣ въ грѧдꙋщїи дн҃ь и҆зобилне накорми́ти слоны ѻ҆броки плода ливан꙽ска, и҆ виномъ несмѣшенымъ всѣх꙽ напои҆ти, и҆́хже б̂ѣ числомъ, ф҃. и҆ ѻ҆сверѣпѣвши вином̑ нещад̑но, въвести въ срѣтенїе сме́рти і҆ѹ҆де́искїѧ·

Сїѧ же повелѣвъ възврати́сѧ, и҆ множа́е дрꙋговъ въ пирова́нїе събра̀.
во́и же ненави́дѧще бѣша і҆ѹ҆де́ѻвъ·

а҆ слононача́лник꙽ повеле́нное прилѣжно съвръша́ше.
кси́м же слꙋги въ вече́ръ досто́ини дѣ́ющесѧ свѧза́ша рꙋцѣ стра́стных̑, и҆ прочїе ѹ҆́зъ ѻ҆нихъ ѹ҆крѣплѧ́хꙋ.
мнѧ́ще в но́щъ т̂ꙋ прїѧ́ти и҆мъ въкꙋпѣ конечнꙋю поги́бель.
ѻ҆ни́ же всѧ́кого ѻ҆сененїѧ ꙗ҆́зы́ков꙽ пꙋсти непщꙋ́ющесѧ бы́ти, ради ѻ҆бъе҆́мшїа и҆хъ ѿвсю́дꙋ нꙋжды.
призыва́хꙋ вседръжи́телѧ г҃а, и҆ всѧ́коѧ си́лы крѣпльшаго млс̑҇тиваго б҃а их̑ и҆ ѿц҃а непреста́ннымъ гла́сомъ вс̂и съ слеза́ми молѧ́щи, ꙗ҆́же на ни́хъ совт̑ѣ непреподо́бныи и҆змѣни́ти.
і҆ и҆зба́вити и҆хъ ѿ и҆же пред̑ нога́ма ѹ҆готова́нныѧ смр҃ти, съ ѕѣлною ча́стїю проꙗ҆́вленїѧ.
си́хъ ѹ҆бо прилѣжна мл҃тва възыиде на́ нб҃о·

Є҆рмон꙽ же нещад̑но слоны напо́и вином̑ і҆ и҆сполни всѧкоѧ сверѣпости, и҆ ливан꙽скими плоды напита̀.
ра́но въ дворъ прїиде ѻ҆ си́х꙽ възвѣсти́ти цр҃ю·

Зда́нїе же бл҃гое ѿ вѣ́чнаго времени в но́щи, и҆ въ дн҃и мни́мое бы́ти.
ѿ дарꙋ́ющаго всѣмъ и҆́мже а҆ще са́мъ въсхо́щетъ.
сна̀ ча́сть посла̀ въ цр҃ѧ, и҆ слад̑це и҆ глꙋбо́це ѹ҆дръжа́сѧ в нем̑ дѣа́нїемъ влд̑ки.
и҆ повеленїѧ пред̑ѹ҆ста́вленаго мно́го погрѣши.
и҆ непремѣ́нныи е҆го совѣт꙽ ѕѣлне солга̀·

І҆ѹ҆де́и же проназнаменова́ннаго вре́мени и҆збѣжа́ша ст҃го б҃а и҆хъ воспѣва́хꙋ.
и҆ паки молѧ́хꙋ бл҃гоизмѣнна показа́ти е҆го и҆ ве́лма немо́щна ꙗ҆зы́комъ прегорды́мъ рꙋкою дръжа́вы свое́ѧ·

Преполовѧ́щи же сѧ ѹ҆бо десѧ́томꙋ ча́сꙋ і҆ и҆же къ зва́нїю ѹ҆́чине́ныи видѧ̀ зва́н꙽ныхъ събра́вших̑сѧ.
тогда̀ дръзнꙋ в꙽ни́де, и҆ пристꙋпль къ цр҃ю е҆два̀ въз꙽дви́же е҆го̀, и҆ показа̀ пи́ра врѣмѧ прешед̑ше ѹ҆жѐ.
і҆ и҆же ѻ҆ сихъ словесех̑ въспомѧнꙋ.
е҆же цр҃ь в꙽ себѣ размы́сли.
и҆ ѻ҆бращ꙽сѧ въ мѣсто, повелѣ пришед̑ших̑ в꙽ пирова́нїе кое҆гожд̑о въ свое҆мъ мѣсте, въсклони́ти.
е҆гда́ же быс̑҇ сїе в꙽ пирова́нїе вда́ша себѐ, и҆ в немъ сꙋщи ѻ́ мно́ѕѣ че́сти гл҃ахꙋ, е҆же час̑҇ въ веселїе поста́вити.
въ мно́ѕе же бесѣде бы́вши и҆мъ, цр҃ь е҆рмо́на призва̀.
и҆ съ ве́лїем꙽ преще́нїемъ въпрошаше.
чт̂о ради и҆ ко́ѧ вина е҆же ѻ҆ста́вишасѧ і҆ѹ҆де́и в сїи дн҃ь жи́ви бы́ти.
ѻ҆́номꙋ же показа́вшꙋ и҆же но́щїю повеле́нное съвершене сътвори, ксемꙋ же и҆ дрꙋгом̑ с꙽послꙋшествова́вшим̑ семꙋ̀ бы́ти та́ко.
и҆ сего ра́ди лю́теише фалари́да сътвори́ша е҆го.
и҆ пригл҃а дне́шнемꙋ снꙋ̀ блгд̑ть да и҆́мꙋтъ·

Ты́ же непрело́жне въ грѧдꙋщїи дн҃ь по прьвомꙋ ѹ҆готꙋи сло́ны, въ погꙋбленїе их̑.
сїѧ же рекшꙋ цр҃ю, любезне вс̂и и҆ съ ра́достїю прїѧ́ша, и҆ въспѣвше въкꙋпѣ, ко́ждо в до́мъ сво́и ѿи҆до́ша·

и҆ не проводи́ша в сїе вре́мѧ но́щное тако.
н̂о совѣща́ша да́же прелю́тѣише посмѣа́нїе нанест̑ꙋ стра́стнымъ.
и҆ ѹ҆бо пѣтлꙋ воз꙽гласи́вшꙋ ѹ҆трьнемꙋ, и҆ ѕвѣри ѹ҆готова е҆рмо́нъ, въ вели́цѣмъ столпѣ повапленомъ, і҆ и҆же по гра́дех̑ мно́жество събра́шесѧ, ко зрѣнїю мꙋченїа и҆хъ, ча́юще ѹ҆́тра съ тща́нїем꙽·

І҆ѹ҆деи же бес꙽преста́но ѿ дш҃а стенѧ́щи, мно́го слезнꙋ мл҃твꙋ съ слад̑кимъ пѣнїемъ простира́юще рꙋцѣ на́ нб҃о, молѧ́хꙋ вели́каго б҃а.
па́ки и҆мъ помощѝ въскорѣ·

Внегда́ же слн҃це лꙋ́ча рас꙽сѣѧ, и҆ цр҃ь дрꙋговъ въспрїѧ.
е҆рмо́нъ пред̑ста зва́ше къ и҆схо́дꙋ.
показꙋѧ провожделѣное цр҃ем̑ готово бы́ти.
ѻ҆́н же въспрїѧ́вши е҆го ѹ҆страшисѧ зако́нопрестꙋпнаго ради повелѣнїѧ.
и҆ по всемꙋ невѣдѣнїемъ ѻ҆дръжи́мъ бы́сть.
въпроша̑ше чт̂о ве́щь сїѧ ю҆́же въско́рѣ е҆мꙋ съверши·

Сїе же б̂ѣ дѣа́нїе всѣхъ влд̑ки б҃а, и҆же проѹ҆готова́ныѧ на і҆ѹ҆де́и мꙋченїа въ забве́нїе е҆мꙋ в꙽ложи·

Є҆рмо́н же показова́ше, та́кож̑ и҆ вс̂и дрꙋѕи е҆го, ѕвѣры, и҆ во́и ѹ҆готованы цр҃ю по твое҆мꙋ непрело́жномꙋ повеле́нїю, ѻ҆́н же гл҃ъ ради и҆х꙽ и҆спол̑҇нисѧ тѧж꙽ча́е ꙗ҆́рости, и҆б̂о разорѝ ѻ҆ сихъ провидѣнїе бж҃їе вс̂е е҆го ѹ҆мышленїе·

И҆ възрѣвъ рече съ прещенїемъ.
е҆лицы роди́тели сꙋть здѣ и҆л̂и ѻ҆трочатъ роди́тели, и҆же сверѣпымъ и҆ дивїимъ ѹ҆готова́ша и҆зоби́ленъ ѻ҆брокъ, вмѣсто неѻ҆клеветан꙽ныхъ мнѣ̀ и҆ прароди́телемъ мои҆мъ, и҆ ѻ҆бъꙗ҆ви́вших꙽ вс̂ецѣлꙋю і҆ и҆звѣстнꙋю вѣрꙋ вы́нꙋ.
и҆б̂о а҆ще не любви ра́ди съвоспита́телныѧ, и҆ потрребы, живота̀ ѹ҆бо си́хъ ра́ди ко́и҆ждо гоньзнꙋлъ б̂ы·

Сице е҆рмо́нъ съ нечаѧ́ннымъ, и҆ пребѣднымъ прещенїемъ ѿиде, и҆ зраком꙽, и҆ лицем꙽ измѣни́сѧ·

По е҆ді́номꙋ же и҆ вс̂и дрꙋѕи събранїи сѣтованїемъ ѻ҆дръжими бы́вше ѿи҆доша кождо въ свое без̑временїе·

І҆ѹ҆де́и же ꙗ҆́же ѿ цр҃ѧ слы́шавше проꙗ҆влѧ́ющаго б҃а и҆ г҃а, и҆ и҆ цр҃ѧ цр҃емъ хвалѧ́хꙋ ѻ҆ полꙋченїи по́мощи е҆го·

Поси́х же предани их̑ цр҃ь па́ки състави пи́ръ.
и҆ молѝ дрꙋгов꙽ въ весе́лїе премѣни́тисѧ.
е҆рмона же призва̀, и҆ рече съ прещенїемъ, коли́ко т̂и мнитсѧ страстныи ѻ҆ сих̑ повелѣти;
е҆щѐ и҆ нн҃ѣ ѹ҆готꙋи сло́ны въ ѹ́трїе на погꙋбленїе і҆ѹ҆деи́ско·

Срод̑ницы же съвозлежа́щїи непостоа́нномꙋ е҆го смы́слꙋ дивѧ́щесѧ, прои҆знесо́ша сїѧ.
доколѣ ѻ҆̀ цр҃ю а҆ки беслове́сных̑ нас̑҇ и҆скꙋша́еши, повелѣва́ѧ ѹ҆же сих̑ третее погꙋби́ти, и҆ па́ки ѻ҆ вещах̑ разрд̑ѣша́ѧ въ премененїе ꙗ҆́же тобо́ю повелѣнна.
их̑же ради чаѧ́нїѧ гра́дъ стꙋжа́етъ.
і҆ и҆спо́лнисѧ ѹ҆же смете́нїѧ.
и҆ множицею нꙋ́дитсѧ разыити́сѧ·

Цр҃ь же и҆спо́лнисѧ беслове́сїѧ по всемꙋ ꙗ҆́ко фалари́дъ.
и҆ бы́вшимъ къ призре́нїю і҆ѹ҆де́искꙋ повелѣ̀ т꙽щатисѧ.
а҆ в꙽ своеиж̑ дш҃и премѣне́нїе нивъчто́же в꙽мени.
и҆ съврьше́ною і҆ и҆звѣ́стною клѧ́твою клѧ́тсѧ, сихъ неѿло́жно посла́ти въ а́дъ, ногами и҆ копы́ты ѕвѣреи сверѣпыхъ съкрꙋши́ти и҆хъ, и҆ посем̑ вое҆ва́ти ѻ҆гне́мъ на і҆ѹ҆̀дею, и҆ гро́бища в не́и сътвори́ти.
и҆ про́чаѧ ко́пїемъ низложи́ти въскорѣ.
и҆ непроходи́мыи на́ми хра́мъ и҆хъ ѻ҆гнем̑ съжещѝ.
и҆ съвръшаю́щихъ та́мо жрътвꙋ въ вѣ́чное времѧ поста́вити·

Тогда дрꙋѕи съ ра́достїю ѿи҆до́ша, и҆ сродницы съ вѣрою.
и҆ повелѣша во́иномъ стрещѝ бл҃говре́мен꙽ныѧ мѣста града.
слононачалник̑҇ же звѣремъ въско́рѣ, ꙗ҆́ко и҆ прежде въ поставле́нїе ѻ҆бро́къ повелѣ̀ и҆зоѻ҆би́ленъ ѿ ливан꙽скихъ плод̑ ѹ҆готова́ти, и҆ пи́тїе ѿт̑ вина̀ несмѣшен̑҇наго.
и҆хже ѹ҆готова̀ стра́шне на погꙋбле́нїе и҆хъ.
сего же дѣлма бесчи́сленни чл҃цы и҆же ѿ града в꙽ конорыста́тел̑҇ное мѣсто събра́шасѧ ви́дѣти.
ѻ҆н꙽ же вни́де въ дво́ръ пред̑лежи́маго ра́ди възбꙋди́ти цр҃ѧ·

цр҃ь же гнѣвомъ тѧ́жцемъ и҆спо́лнисѧ съ звѣр꙽ми сверѣпыми и҆зы́иде, хотѧ̀ непремен̑҇нымъ срд̑цемъ, и҆ зѣницею ѻ́ка ви́дѣти бо́лѣзнь, и҆ страсть проназнаменова́нныхъ въ сме́рть болѣзнꙋю.
вънегда же сло́ны и҆сходи́ша и҆зъ ѻ҆гра́ды, и҆ съпослѣдова́ша и҆мъ во́и въѻ҆рꙋже́нны.
и҆ ѿ мно́гихъ ше́ствїѧ пра́хъ ви́дѣша, и҆ тѧ́жка гласа кли́чь слы́шаша і҆ѹ҆де́и.
и҆ мнѣша бы́ти коне́цъ живота свое҆го въ м꙽гновенїи, и҆ стра́стнаго чаѧ́нїѧ и҆хъ.
въ ѹ҆миле́нїе и҆ стена́нїе и҆змени́шас̑҇ и҆ ѻ҆блобыза́хꙋ дрꙋгъ дрꙋга съплѣта́ющесѧ сро́дникомъ, и҆ на вы́ѧ напада́юще прародителемъ свои҆м꙽.
такоже и҆ ѿц҃ы сн҃ом꙽ и҆ матере ча́дом̑.
но́во же поро́ждьшїи ѹ҆ со́сцъ и҆мꙋще младе́нцы коне́чно здоѧ́хꙋ мле́ко.
въспомѧнꙋвши же ѹ҆бо паки пред̑бы́вшꙋю и҆мъ съ нб҃си по́мощь, въско́рѣ и҆ еді́нодꙋшне възвръгше себе на ню̀.
и҆ младе́нца ѿлꙋчиша ѿ со́сцъ и҆ възъпи́ша гласом꙽ велїи́мъ ѕѣло.
и҆ силнаго всѣхъ нача́ша моли́ти, ѹ҆щедри́ти ихъ съ ꙗ҆вле́нїемъ, при вратехъ ѹ҆жѐ стоѧ́щихъ·

Глв̑҇а, ѕ҃·

Єлеа҆за́ръ же нѣкто мꙋжъ зна́емъ ѿ і҆ере́и страны̀ тоѧ̀.
въ ста́рости ѹ҆жѐ прешед̑ во́зрастомъ, и҆ всею добродѣтелїю въ жи́тїи ѹ҆кра́шенъ, и҆же ѹ҆стро́и ѻ́крс̑҇тъ себе презвитери призывати ст҃аго б҃а.
такоже и҆ сам꙽ молѧ́шесѧ си́це.
ѽ цр҃ю вы́шнїи всекрѣпкїи вседръжи́телю бж҃е, и҆же създа́нїе всѐ строѧ́й въ щедрота́хъ.
възрѝ нн҃ѣ на сѣмѧ а҆враа́мле, и҆ на сщ҃енаа ча́да і҆а́ковлѧ, часть сщ҃енꙋю людїи твоих̑ бж҃е ѿч҃е.
и҆же в꙽ землѝ чю́ждеи стран̑҇ствꙋющꙋю, и҆ бес пра́вды погиба́ю҆щꙋю·

Ты бо фараѻ́на прьвѣе въ е҆гѷптѣ силнаго, ѹ҆мно́женаго в꙽ колесни́цахъ, и҆ възносѧ́щагосѧ дръзостїю безъ млс̑҇ти, и҆ ꙗ҆зы́комъ велерѣчꙋюща съ гръдыми во́и пон꙽том̑ въ ма́ле погꙋбѝ.
ро́дꙋ же і҆и҆л҃евꙋ свѣтомъ проꙗ҆вѝ млс̑҇ть·

Ты̀ и҆ възвели́чившагосѧ сенахери́ма цр҃ѧ а҆сѷрїискаго в тѧ́гости погꙋбѝ, съ бесчи́слен꙽ными во́и, и҆же ко́пїемъ под̑рꙋчнꙋ сътворѝ всю зе́млю.
и҆ низложенъ бысть ст҃аго ради гра́да твоег̑҇, хꙋлна б̂о и҆ прегръда на́нь гл҃а.
сътвори́лъ б̂о е҆си сїѧ да и҆звѣстнꙋ пока́жеши ꙗ҆́зы́комъ многою твою дръжа́вꙋ·

Ты̀ и҆ въ вавѷло́не трїех꙽ ѻ҆тро́къ ѻ҆гню дш҃а на погꙋбле́нїе, въ е҆же не слꙋжи́ти то́кмо скве́рным̑, ѻ҆гнѧ̀ пе́щнаго ѻ҆броси́телне и҆зба́вилъ е҆си даже до вла́съ невреди́мы, пла́мень же весь посла́лъ е҆си съпроти́внымъ·

Ты̀ данїила за́вистїю дїаволею въвръжена в ро́въ на снѣде́нїе льво́мъ звѣремъ сверѣпымъ, на свѣтъ и҆зве́лъ е҆си здра́ва.
и҆ і҆ѻ́нꙋ ѿ чре́ва кѵ́та мор꙽скаго храни́телѧ въ глꙋбинѣ̀ та́емаго неща́дне, всм̑ѣ свои҆мъ показа́лъ е҆си.
и҆ н҃нѣ ѻ҆̀ ѿч҃е не ты ли е҆́си всѣ́хъ млс̑҇тивыи присети́тель;
въскорѣ ꙗ҆висѧ сꙋщимъ ѿ ро́да і҆и҆л҃ьска.
і҆ и҆зба́ви ѿ ꙗ҆зы́къ хꙋлныхъ, и҆ ѻ҆скверне́ныхъ·

А҆щеж̑ нечестїемъ ѻ҆бъꙗ҆́то е҆сть въ преселе́нїю жи́тїе на́ше.
т̂ы и҆зба́вивыи насъ ѿ рꙋкꙋ вра́гъ си́хъ.
ꙗ҆́ко прои҆зво́лиши влд̑ко погꙋби.
то́кмо да не сꙋ́етныхъ сꙋемꙋдрїи блс̑҇вѧтъ ѻ҆ погꙋбле́нїи възлю́бленных̑, гл҃щи, ниже б҃ъ и҆хъ и҆зба́ви и҆хъ.
тѣмже т̂ы и҆же всѧ́кꙋ крѣпость и҆ силꙋ и҆мѣѧ́й превѣчныи всѧ́ческихъ, нн҃ѣ при́зри и҆ поми́лꙋи насъ въ хꙋле́нїи безако́нныхъ безсловесне преда́тель ѻ́бразы живота̀ лиша́емыхъ.
да ѹ҆дивѧтсѧ нн҃ѣ ꙗ҆́зы́цы несчи́сленои крѣпости твоеи.
и҆ си́лѣ твое́и ю́же и҆маши ѻ҆ сп҃сенїи ро́да і҆а́ковлѧ.
н҃нѣ б̂о т̂ѧ мо́литъ вс̂е мно́жество младе́нецъ , и҆ роди́тели и҆хъ съ слеза́ми.
покажи нн҃ѣ ꙗ҆́ко с на́ми е҆си г҃и.
и҆ не ѿвратѝ лица̀ твое҆го ѿ нас̑҇.
н̂о ꙗ҆́коже реклъ е҆си, ниже въ землѝ врагъ, своѧ презри́ши, сїе нн҃ѣ съвръши г҃и.
е҆леа҆за́рꙋ же конча́ющꙋ ѹ҆жѐ мл҃твꙋ сїю·

Цр҃ь же съ звѣ́рми и҆ ве́лїею силою во́и прибли́жилъсѧ ес̑҇ къ и҆подро́мꙋ.
ви́дѣвши же і҆ѹ҆де́и вельма въ нб҃о възъпи́ша, ꙗ҆́коже и҆ прилежа́щимъ бра́здамъ растръза́тисѧ.
и҆ не ѹ҆дръжи́мъ пла́чь сътвори́ша всѣмъ во́емъ·

Тогда̀ велесла́вныи вседръжитель, и́стинныи б҃ъ ꙗви ст҃ое своѐ лице.
и҆ ѿврьзе две́ри нбс̑҇ныѧ, и҆з них̑ же ꙗ҆вишасѧ дв̂а лѣпа и҆ стра́шна а҆гг҃ла, и҆ снидо́ша ꙗ҆вле́не всѣмъ.
ра́звѣ і҆ѹ҆де́ѻ҆мъ.
и҆же съпроти́въ ста́ша и҆ си́лꙋ сꙋпоста́тъ и҆сполниша смѧте́нїѧ, и҆ ѹ́жаса.
и҆ нерастерзаными пꙋты свѧ́заша неподви́жне.
та́кож̑ и҆ тѣло цр҃ьское.
и дръзость е҆го и҆же тѧ́жкимъ гнѣвомъ ѻ҆бъѧ́та бѣ̀ разреши́сѧ.
звѣри же на послѣдꙋ́ющаѧ въѻ҆рꙋже́ныѧ во́и ѻ҆брати́шас̑҇ и҆ попира́хꙋ и҆хъ, и҆ погꙋблѧ́хꙋ.
и҆ внеза́пꙋ ѻ҆брати́сѧ гнѣвъ цр҃ьскїи въ ѹ҆миле́нїе, и҆ слезѧ́ше пред̑ѹ҆гото́ваныхъ ра́ди и҆мъ мꙋче́нїи.
слы́ша б̂о во́пль, и҆ ви́дѣ въскорѣ погиба́ющихъ, прослезѝ, и҆ съ гнѣвомъ дрꙋгомъ преща́ше, гл҃ѧ, вы̀ прецрс̑҇твꙋ́ете, и҆ мꙋчи́тельско прехо́дите подо́бїе, и҆ поси́хъ мене ва́шего бл҃года́телѧ низлагаете, и҆ дꙋхъ премени́ти ловѧ́ще.
ꙗ҆́же неполезна̑ црс̑҇твꙋ сътвори́ти.
і҆ и҆же к на́мъ дръжа́внихъ въ вѣре страны̀ твердынѧ.
ѿ до́мꙋ ѿлꙋчи́вши кое҆гождо бесловесне здѣ̀ събра́сте.
кто же и҆ныи ра́звѣе вас̑҇ си́це неподо́бными ѻ҆бъѧ́тъ ꙗ҆́звами.
и҆же и҆з нача́ла бл҃горазꙋмїе к на́мъ показꙋ́ющих̑, и҆ по всемꙋ разнѧ́щихъ ѿ всѣхъ ꙗ҆́зык̑҇ и ѿ злѣ́ишихъ чл҃къ мно́жищею под̑ꙗ҆́ша бѣды.
тѣмже рѣша́щи раѕрѣши́те непра́ведныѧ ѹ́зы, и҆ въ своа и҆хъ съ ми́ромъ посли́те·

Но противле́нїѧ дѣлма свое҆го е҆же к ним꙽, примири́тесѧ прежде съ ни́ми.
и҆ тогда по́слете свобо́дны сн҃ы вседръжи́телѧ бг҃а жива́го на нб҃си.
и҆же ѿ начала роди́телеи нашихъ да́же до нн҃ѣ непрет꙽кнове́нно въ сла́вѣ бл҃го стоа́нїѧ съдръжитъ вещи на́ши.
рекшꙋ же ѹ҆бо е҆мꙋ сїѧ, і҆ѹ҆деѝ въско́рѣ разрѣше́ни бы́ша.
и҆ вънегда и҆збѣго́ша сме́рти, ст҃аго б҃а и҆хъ блс̑҇вѧхꙋ·

Посемъ цр҃ь въ́ градъ възврати́сѧ, и призва и҆же над̑ росхо́ды старѣ́ишаго, и҆ повелѣ даѧ́ти вино̀, и҆ про́чаѧ къ пирова́нїю потре́бнаѧ, і҆ѹ҆де́ѻмъ на дн҃їи з҃. по повелѣнїю же се́мъ сꙋди и҆мъ та́може в꙽ веселїи дн҃ь спс̑҇нїа провожд̑ати, в нем̑же мѣсте мнѣша поги́бель взѧ́ти·

Тогда̀ и҆же прьвѣе въ поноше́нїи бы́ша бли́зъ а҆́да.
на́ипаче же ѿ сосѣд꙽ въ порꙋга́нїи за го́ркꙋю и҆ бѣ́дно подъе҆́млемꙋю сме́рть.
нн҃ѣ же пирова́нїе сп҃сенїѧ свое҆го съста́виша, и҆ мѣсто ѹ҆готова́нное въ паде́нїе гробъ и҆хъ, въ весе́лїе сѣда́нїѧ раздѣли́ша, и ѻ҆ста́виша рыда́нїе, и҆ сѣтова́нїе вс̂е смѧтенїѧ ѿвръго́ша, и҆ въспрїе́м꙽ши пѣсни ѿч҃ескимъ гла́сомъ хвали́ша чюдо творца б҃а и҆ сп҃са и҆хъ.
и҆ цр҃ь же състави ради и҆хъ порова́нїе ѕелное.
и҆ без̑преста́ни възира́ше на нб҃о и҆сповѣда́ше вели́колѣпне дръжа́вꙋ е҆го, бы́вшаго ради пресла́внаго сп҃сенїѧ·

Полага́вшїи же і҆ѹ҆де́и прьвѣе въ погибель ѻ҆слоꙗ҆ди́телных꙽ пти́ць, та́кожд̑е и҆ съ радостїю пописа́вшїи.
срамото́ю ѻ҆бъꙗ҆́ти бы́вше стенѧ́хꙋ.
ви́дѣша б̂о ѻ҆гнедыха́тел꙽нꙋю и҆хъ дръзость нестро́ине ѹ҆га́шенꙋ·

І҆ѹ҆де́и же ꙗ҆́ко пред̑рекохомъ състави́ша свобо́ды веселїѧ, и҆ съ блс̑҇ве́нїемъ въ и҆сповѣда́нїи смире́нне и҆ ѱа́лмехъ провожда́хꙋ.

И҆ посе́мъ ѹ҆ста́виша ѻ҆бщїи наро́къ, въ всѐ преселе́нїе и҆хъ въ ро́ды.
е҆же предъреченыа дн҃и празнд̑ова́ти въ весе́лїи, не пи́тїѧ ради, и҆ ꙗ҆денїѧ, н̂о сп҃се́нїѧ ра́ди бы́вшаго и҆мъ ѿ бг҃а·

Посе́м же прїидоша къ цр҃ю просѧщи ѿпꙋщенїа въ своѧ̀ их̑·

А҆ пописа́нїа же ꙗ҆́же бы́ша на них̑ ѿ пѧ́таго и҆ к҃ го дн҃е мс̑҇ца па́хона, да́же до четвер꙽таго̀надесѧте дн҃е мс̑҇ца е҆пи́фа·

Въ дн҃ех꙽ же четыридесѧтих̑ съставиша и҆мъ поги́бель.
и҆ ѿ пѧ́таго дн҃е мс̑҇ца е҆пи́фа да́же до сед̑маго, въ тѣх꙽ трїех꙽ дн҃ехъ в ни́х же пресла́вне ꙗ҆ви млс̑҇ть свою всѣхъ силнѣ́ишꙋю е҆ю́же и҆збави и҆хъ безъвредных̑ въкꙋпѣ.
бл҃говременїе же полꙋчи́ша въ всемъ ѿ цр҃ѧ да́же до четверта́гона́десѧть дн҃е тогоже мс̑҇ца.
воньже и҆доша моли́ти цр҃ѧ ѻ҆ ѿрѣшенїи и҆хъ·

похвали́ же и҆хъ цр҃ь, и҆ написа̀ и҆мъ под̑писа́телно посла́нїе къ страти́гомъ и҆же по гра́дехъ вели́кодꙋшне прилежа́нїе и҆мѣти ѻ҆ всемъ ро́де і҆ѹ҆де́искомъ·

Глв̑҇а, з҃·

Цр҃ь е҆гѷпет꙽скїи п꙽толомѣи филопа́торъ.
сꙋщимъ въ црс̑҇твїи мое҆мъ страти́гом꙽ и҆ во́емъ, и҆ всѣмъ в꙽чиненым̑ над̑ ве́щьми на́шими радоватисѧ и҆ здравъствова́ти.
здра́въствꙋ́емъ же и҆ м̂ы, и҆ ча́да на́ша.
и҆ внегда̀ и҆спра́вльшꙋ намъ вели́комꙋ б҃ꙋ ве́щи ꙗ҆́коже предърѣхомъ·

Тогда̀ нѣ́цїи дрꙋѕи на́ши злонра́вїем̑ свои҆мъ ча́стѣе нам꙽ прилага́ющесѧ поѹ҆сти́ша насъ въ сїе, е҆же б̂ы ѿ црс̑҇твїѧ на́шего събра́ти всѣхъ і҆ѹ́деѻ́въ въ е҆ді́но мѣсто.
и҆ ѿстꙋпник̑҇ мꙋченїи ѹ҆мꙋ́чити их̑, проносѧ́щи на́мъ гл҃ы и҆же нико́гдаже въ бл҃го стоа́нїи црс̑҇тва на́шего ве́щи бꙋдт̑ꙋ а҆ще не съвръши́тсѧ сїе.
зане же и҆́мꙋть сїи къ всѣмъ чл҃комъ несъжи́тїе.
и҆же и҆ свѧ́занныхъ и҆хъ приведо́ша к꙽ намъ съ ѹ҆коризною ꙗ҆ко плѣн꙽никовъ·

па́че же ꙗ҆́ко преда́теле́и безъ всѧ́кого разсꙋжденїѧ і҆ и҆спыта́нїѧ хотѣша и҆хъ ѹ҆би́ти.
сверепѣ́имимъ подобїемъ паче зако́на скѷфска воѻ҆рꙋжены·

Мы́ же ѹ҆бо им̑ ѻ҆ сих̑ жесточа́е запрети́хом̑, зане и҆́мамы къ всѣмъ чл҃ком̑ смиреномꙋдрїе, и҆ е҆два̀ животъ и҆мъ дарова́хомъ·

и҆б̂о и҆ нбс̑҇наго б҃а позна́хом꙽ крѣ́пость, застꙋпа́ющꙋю і҆ѹ҆де́а, и҆ ꙗ҆́ко ѿц҃а за сн҃ы вы́нꙋ съпобор꙽ствꙋ́ющꙋ·

ксемꙋ же и҆ любовь юже и҆́мꙋть к намъ и҆звѣстнꙋ размы́слихомъ, та́кожд̑е и҆ къ прароди́телемъ на́шимъ бл҃горазꙋмїе неразвра́тно, и҆ си́хъ ра́ди ви́нъ пра́ведне ѿпꙋсти́хомъ всѧ́ко съпротивленїе по е҆мꙋже л̂и ѻ҆́бразꙋ.
и҆ повелѣхомъ комꙋждо въ своѧ̀ и҆хъ сꙋщества възврати́тисѧ, и҆дѣже а҆ще сꙋть.
ники́мъ же ѻ҆́бразомъ ѿнꙋдь н̂и е҆ді́наго их̑ не ѹ҆тщета́юще.
ни́же поносѧ́щи ѻ҆ бы́вшихъ свезани и҆хъ надъ и҆мѝ.
зна́емо б̂о да́ есть вамъ ꙗ҆́ко а҆ще чт̂о ѕл̂о ѹ҆хитримъ по си́хъ на нихъ, и҆л̂и лꙋкаво, и҆л̂и в чемъ ѻ҆скорбимъ и҆хъ.
т̂о разгнѣваемъ не чл҃ка н̂о всѣхъ си́лъ влд̑кꙋ и҆ б҃а вы́шнѧго.
и҆же намъ вы́нꙋ ѿм꙽ститъ ѻ҆ вещехъ сихъ по всемꙋ̀ неи҆збѣжне.
съ сим̑ и҆мѣите здра́вїе·

Взѧ́вши же і҆ѹ҆де́и ѿ цр҃ѧ посла́нїе не тща́шасѧ въскорѣ ѿи҆ти.
н̂о примоли́ша цр҃ѧ даже сꙋщїи ѿ рода и҆хъ полꙋчатъ и҆ми до́лжное мꙋченїе, и҆же ст҃го б҃а и҆ зако́нъ е҆го во́лне ѿстꙋпи́ша, пригл҃аша б̂о цр҃ю ꙗ҆́ко чрева ра́ди свое҆го бжс̑҇твенаѧ преда́нїѧ престꙋпи́ша, т̂о ниже цр҃ьскимъ повеле́нїемъ бл҃горазꙋмни бꙋдꙋтъ.
ѻ҆н꙽ же пои҆́стиннѣ сїѧ гл҃а та́ко бы́ти, и҆ похваливъ даде и҆мъ вла́сть сїю е҆же ꙗ҆́ти всѣхъ престꙋпникъ зако́на бж҃їѧ, по всѣхъ мѣстѣхъ црс̑҇твїѧ е҆го, съ дръзостїю безъ всѧ́коѧ цр҃ьскїѧ вла́сти и҆ съзренїа, ѹ҆би́ти і҆ и҆скорени́ти и҆хъ·

Тогда̀ і҆ѹ҆де́и бл҃годари́ша цр҃ю ꙗ҆́ко подо́ба бѣше, і҆ере́и же и҆хъ ѻ҆ сихъ и҆ вс̂е мно́жество вкꙋпѣ воз̑гласи́ша а҆л꙽лилꙋі҆а̀, и҆ съ ра́достїю ѿи҆до́ша·

Си́це же приклю́чшагосѧ престꙋпника мꙋча́хꙋ и҆же бѣше ѿ ро́да и҆хъ, и҆ ѻ́бразъ подава́хꙋ и҆́нѣмъ, и҆ въ мꙋченїи том̑ ѹ҆би́ша дн҃и ѻ҆́наго бо́леи триста мꙋжїи.
ѹ҆бива́ющи же и҆хъ бл҃гоѹ҆мне веселѧ́хꙋсѧ·

А҆ и́же да́же до сме́рти съ гм҃ъ бм҃ъ пребы́ша, полꙋчи́вши съвръшенꙋю свобо́дꙋ вѣнча́ша себе ѿ разли́чных꙽ цвѣтъ сплет꙽ше вѣн꙽цы.
и҆ ѿи҆доша ѿ гра́да съ веселїем꙽, и҆ въс꙽клица́нїемъ, въ хваленїих̑, и҆ вс̂е бл҃гогла́сныхъ пѣнїихъ бл҃годарѧ́ще б҃а ѿц҃ь, и҆ сп҃са і҆и҆л҃ева·

Пришед̑ше же въ мѣсто п꙽толомаи҆дꙋ нарица́емое родофорон꙽ское, в немже ѻ҆жида́хꙋ их̑ корабли мно́ѕи.
и҆ по ѻ҆бщемъ и҆хъ совѣте, и҆ т̂ꙋ сътвори́ша пиръ спс̑҇нїѧ на дн҃и сед̑мь·

Цр҃ь б̂о дарова кое҆мꙋждо и҆хъ потреб꙽наѧ на пꙋти да́же до жили́ща и҆хъ.
сꙋщи же свобо́дни ѿи҆доша е҆ді́ни земле́ю , дрꙋѕїи же мо́ремъ, и҆нїи же рѣко́ю
цр҃ьскимъ повеле́нїемъ ко́ждо въ своѧ̀ с̂и.
и҆ ѹ҆дръжа́ша вла́сть над̑ вра́ги бо́льшꙋю неже прежде сла́вою , и҆ стра́хом̑, та́кожд̑е и҆ сꙋщества кое҆гождо ѹ҆целѣша
.
въспрїѧша б̂о ѿ пописа́нїи ко́ждо.
а҆ще же кт̂о и҆мѣ что̀ ѿ и҆мѣнїи и҆хъ стра́хомъ ве́лии҆мъ ѿдаѧ́хꙋ и҆м꙽.
величїа же ра́ди и҆ силы бж҃їѧ ю҆́же сътворѝ ѻ҆ сп҃сенїю и҆х꙽, бл҃гословлѧ́хꙋ е҆го въ вѣчное врѣмѧ ѻ҆ і҆ил҃и·

Конецъ тре́тих̑ кни́гъ мак꙽каве́иских̑ и҆ ма́ють в себѣ̀, гла́въ, з҃·

Сїѝ тре́тїи кни́ги мак꙽каве́искїи въ про́чїихъ библїа́хъ не ѻ҆брѣта́ютсѧ ниже в само́и тои слове́нъскои и҆ ни в лати́нъскихъ а҆ни в лѧт̑скихъ, то́чїю въ гре́ческои и҆ в че́скои н̂о и҆ мы̀ и҆хъ не ѻ҆ста́вихомъ·