Библия (1581). [51] Матфей

Ѿ МАт̑ѲЄ́А С҃ТОЄ БЛ҃ГОВѢСТВОВАНІ́Є

Глв̑҇а, а҃.

зач̑҇, а҃.

Кни́га род̑ства і҆ѵ҃ хв҃а, сн҃а дввд̑а, сн҃а а҆враа́млѧ·

А҆враа́мъ родѝ і҆саа́ка·

І҆саак же родѝ і҆а́кова·

і҆а́ков же родѝ і҆ѹ́дꙋ и҆ бра́тїю е҆го·

І҆ѹ́да же родѝ фареса и҆ за́ра, ѿ ѳама́ры·

фаре́с же родѝ е҆сро́ма·

е҆сро́м же родѝ а҆ра́ма·

а҆ра́м же родѝ а҆минада́ва.
а҆минада́в же родѝ наа҆ссо́на.
наа҆ссо́н же родѝ салмо́на·

салмо́н же родѝ въѻ́за, ѿ раха́вы.
воѻ́з же родѝ ѻ҆ви́да ѿ рꙋѳы·

ѻ҆вид̑ же родѝ і҆ессе́а.
і҆е҆ссеиж̑ родѝ дв҃да цр҃ѧ·

двд̑ъ же цр҃ь родѝ соло́мона, ѿ ѹрїины.

Соло́мон же родѝ ровоа́ма·

ровоа́м же род̑и̑ а҆ві́а.
а҆вїа же родѝ а҆́сса.
а҆́сса же родѝ і҆ѻ҆сафата.
і҆ѻ҆сафа́т же родѝ і҆ѻ҆ра́ма·

І҆ѻ҆ра́м же родѝ ѻ҆зі́ю.
ѻ҆зі́а же родѝ і҆ѻ҆аѳа́ма·

і҆ѻ҆а҆ѳам̑ же родѝ а҆ха́за.
а҆хаз же родѝ е҆зекію.
е҆зекі́а же родѝ манасїю·

Манасїа же родѝ а҆мо́на·

а҆мо́н же род̑и̑ і҆ѻ҆сїю.
і҆ѻ҆сїа же родѝ е҆хонїю, и҆ братїю е҆го, въ преселе́нїе вавѷло́нское·

По преселе́нїи же вавѷло́нстѣмъ, і҆е҆хонїа родѝ, салаѳїилѧ.
салаѳїиль же род̑и̑ зороваве́лѧ.
зороваве́л же родѝ, а҆виѹ́да·

а҆виѹ́д же родѝ е҆лїакі́ма·

е҆лиакі́м же роди а҆зора.
а҆зо́р же родѝ садо́ка·

садо́к꙽ же родѝ а҆хі́ма.
а҆хи́м же родѝ е҆лиѹ́дꙋ.
е҆лиѹ́д же род̑и̑ е҆леа҆за́ра·

е҆леа҆за́р же родѝ матѳа́на.
мат̑ѳа́н же родѝ і҆а́кова·

і҆а́ков же родѝ і҆ѻ́сифа, мꙋжа мр҃їина, і҆з неа́же родис́ѧ і҆с҃ гл҃емыи х҃с·

Всѣх꙽ же родо́въ ѿ а҆враа́ма до дв҃да, родове четы́ринадесѧте·

І҆ ѿ дв҃да до преселе́нїа вавѷло́ньскаго, родове четы́рина́десѧте·

И҆ ѿ преселе́нїа вавѷлоньскаго до х҃а, ро́дове четы́ринадесѧте·

зач̑҇, в҃·

І҆ѵ҃ хв҃о рожд̑ество, си́це б̂ѣ·

ѻ҆брꙋченѣ ѹ҆бо бы́вши мт҃ри е҆го мр҃їи, і҆ѻ҆́сифови, пре́же даже не сни́тисѧ и́ма, ѻбрѣтесѧ и҆мꙋ́щи въ чревѣ ѿ дх҃а ст҃а·

і҆ѻ́сиф же мꙋжъ еа̀ пра́веденъ сыѝ, и҆ не хотѧ еа̀ ѻ҆бличи́ти, въсхотѣ та́и пꙋсти́ти ю҆̀·

Сіа́ же е҆мꙋ помы́слившꙋ, с̂е а҆́гг҃лъ гн҃ь въ снѣ̀ ꙗ҆ви́сѧ е҆мꙋ̀, гл҃ѧ, і҆ѻ́сифе сн҃ꙋ двд̑въ, не ѹ҆бо́исѧ прїа́ти мр҃їа́мъ жены твоеа̀·

Рожд̑ьшее б̂о сѧ в не́и, ѿ дх҃а е҆сть ст҃а·

родит̑ же сн҃а, и҆ нарече́ши и҆мѧ е҆мꙋ̀ і҆с҃.
то́и б̂о сп҃се́тъ лю́ди своѧ̀ ѿ грѣхъ их̑.
се́ же вс̂е бы́сть, да събꙋ́детсѧ рече́ное ѿ г҃а прро̑҇комъ гл҃ющимъ·

с̂е дв҃аа въ чревѣ прїи́метъ, и҆ роди́тъ сн҃а, и҆ нарекꙋтъ и҆мѧ е҆мꙋ̀ е҆мманꙋи҆лъ, е҆же е҆сть сказа́емо с на́ми б҃ъ·

въста́в꙽ же і҆ѻ́сифъ ѿ сна̀, сътворѝ ꙗ҆́коже повелѣ̀ е҆мꙋ̀ а҆́гг҃лъ гн҃ь.
и҆ прїат̑ женꙋ̀ свою̀ и҆ не знаа́ше еѧ̀, до́ндеже родѝ сн҃а свое҆го первенца̀, и҆ наречѐ и҆мѧ е҆мꙋ і҆с҃·

Глв̑҇а, в҃.

зач̑҇, г҃·

Ис҃ꙋ же ро́жд̑ьшꙋсѧ въ ѳлее҆мѣ и҆ѹ҆дѣ́истѣмъ, въ дн҃и и҆́рода цр҃ѧ·

Се̂ влъ́сви ѿ въсто́къ прїидо́шѧ въ і҆е҆рс̑҇ли́м꙽ гл҃юще, гдѣ̀ е҆сть рожд̑еѝсѧ цр҃ь и҆ю҆де́искы́и;

Видѣ́хомъ б̂о ѕвѣздꙋ е҆го на въсто́цѣ, и҆ прїидо́хомъ поклони́тисѧ е҆мꙋ·

слы́шав꙽ же и́род̑ цр҃ь, смꙋтисѧ, и҆ вс̂ѧ і҆е҆рс̑҇ли́ма с нимъ.
и҆ събравъ вс̂ѧ пръ́восщ҃е́нникы, и҆ кни́жникы люд̑скыѧ̀, въпраша́ше ѿ них̑, гдѣ̀ х҃с ражд̑а́е҆тсѧ;
ѻ҆ни же реко́ша е҆мꙋ̀, въ виѳлее́мѣ і҆ѹ҆дѣ́истм̑ѣ.

Та́ко б̂о пи́сано е҆сть прро̑҇комъ.
и҆ т̂ы виѳлее́мъ земле і҆ѹ́дова, ничи́мже менши е҆си въ влд̑кахъ і҆о́у҆довахъ·

и҆с тебѐ б̂о и҆зы́дет꙽ вожд̑ь, и҆же ѹ҆пасет̑ лю́ди моѧ̀ і҆и҃лѧ·

Тогда̀ и҆род̑ та́и призва̀ влъхвы, и҆ і҆спытоваше ѿ нихъ вре́мѧ ꙗ҆́влъшаасѧ ѕвѣзды̀.
и҆ посла́в꙽ и҆хъ въ виѳлеем̑, речѐ.
шед̑ше, и҆спыта́ите и҆звѣ́стно ѻ҆ ѻ҆троча́ти·

е҆гда же ѻ҆брѧ́щете, възвѣсти́те м̂и.
ꙗ҆́ко да и҆ а́зъ шед̑ поклонюсѧ е҆мꙋ·

ѻ҆ни же послꙋшавше царѧ̀, и҆до́шѧ·

и҆ се ѕвѣзда̀ ю҆̀же видѣшѧ на въсто́цѣ, и҆дѧ́ше прд̑е ни́ми.
до́ндеже пришед̑ши ста̂ връхꙋ̀ и҆дѣже б̂ѣ ѻ҆троча̀.
ви́дѣв꙽ше же ѕвѣзд̑ꙋ, възра́довашѧс̑҇ ра́достїю ве́лїею ѕѣло̀.

И҆ пришед̑ше въ хра́минꙋ видѣшѧ ѻ҆троча̀ с марїею ма́терїю его.
и҆ падъше поклони́шасѧ е҆мꙋ·

и҆ ѿвръзше съкро́вищѧ своѧ̀, принесо́шѧ е҆мꙋ да́ры.
злато, и҆ лива́нъ, и҆ сми́рнꙋ, и҆ вѣ́сть прїемше въ снѣ не възврати́тисѧ къ и́родꙋ·

и҆нѣм꙽ пꙋтем̑ ѿи҆до́ша въ странꙋ свою̀·

зач̑҇ д·

Ѿшед̑шим же и҆́мъ, с̂е а҆́гг҃лъ гн҃ь въ снѣ ꙗ҆ви́сѧ і҆ѻ́сифꙋ гл҃ѧ, въста́въ поимѝ ѻ҆тро́ча и҆ мт҃ре е҆го, и҆ бѣжи въ е҆гѷпет꙽.
и҆ бꙋ́ди та́мо, до́ндеже рекꙋ т̂и.
хощетъ б̂о и҆род̑ и҆ска́ти ѻ҆троча́те да погꙋбит̑ е҆̀·

ѻ҆́н же въста́въ, поѧ҆тъ ѻ҆троча̀ и҆ мт҃ре е҆го но́щїю, и҆ ѿиде въ е҆гѷпет̑.
и҆ бѣ та́мо до ѹ҆ме́ртїа и҆́родова·

да събꙋ́детсѧ рече́но́е ѿ г҃а прро̑҇комъ гл҃ющемъ, ѿ егѷпта възвах̑ сн҃а мое҆го·

Тогда̀ и҆род̑ видѣвъ ꙗ҆ко порꙋга́нъ быс̑҇ ѿ влъ́хвъ, разгнѣвасѧ ѕѣло̀·

и҆ посла́въ, и҆збѝ вс̂ѧ дѣти, сꙋщаѧ̀ въ виѳлее́мѣ, и҆ въ всѣх꙽ предѣ́лехъ е҆го, ѿ двою̀ лѣтꙋ и҆ нижа́иша, по́ времени е҆же и҆звѣстно и҆спыта̀ ѿ влъ́хвъ·

Тогда̀ сбы́стьсѧ рече́ное и҆е҆ремїемъ прро̑҇комъ гл҃ющемъ, глс̑҇а в р́амѣ слы́шанъ бысть, пла́чь и҆ рыда́нїе и҆ во́пль мно́гъ.
рахи́ль пла́чющисѧ чѧдъ свои҆хъ, и҆ не хотѧ́ше ѹтѣшитисѧ, ꙗ҆́ко нѣ сꙋт꙽·

ѹ҆мръшꙋ же и҆́родꙋ.
с̂е а҆гг҃лъ гн҃ь въ снѣ ꙗви́сѧ и҆ѻ́сифꙋ въ е҆гѷптѣ, гл҃ѧ.
въста́въ поимѝ ѻ҆троча̀ и҆ мт҃ре е҆го, и҆ и҆дѝ в землю і҆и҃левꙋ.
и҆з꙽мро́шѧ б̂о и҆щꙋщеѝ дш҃ꙋ ѻ҆троча́те·

ѻ҆́н же въставъ, поѧ́тъ ѻ҆троча̀ и҆ мт҃ре е҆го, и҆ прїиде в землю і҆и҃левꙋ·

Слы́шав꙽ же ꙗ҆́ко а҆рхела́и црс̑҇твꙋе҆тъ въ і҆ѹ҆де́й в мѣсто ирода ѿц҃а свое҆го̀, ѹ҆боѧ́сѧ та́мо и҆ти.
вѣсть же прїе́мъ въ снѣ̀ ѿи́де въ пре́дѣлы галиле́искїа.
и҆ пришд̑е всели́сѧ въ́ градѣ нарица́емѣмъ назеретъ ꙗ҆́ко да сбꙋдетсѧ рече́ное прро̑҇кы, ꙗ҆́ко назоре́и наречетсѧ·

Глав̑҇, г҃.

зач̑҇, е҃·

Въ̀ дн҃и же ѻ҆́ны, прїиде і҆ѻа́нн꙽ крс̑҇ти́тель проповѣдаа в꙽ пꙋсты́ни і҆ѹ҆де́истѣѝ, и҆ гл҃ѧ.
пока́итесѧ, прибли́жи б̂о сѧ црс̑҇твїе нбс̑҇ное·

Се́й б̂о ес̑҇ рече́ныи і҆са́йемъ прро̑҇комъ, глющем̑, глс̑҇а въпїю́щаго в꙽ пꙋсты́ни.
ѹ҆гото́ваите пꙋть гн҃ь пра́вы творите стеѕѧ̀ е҆го̀.
са́м же і҆ѻа́ннъ и҆мѧ́ше ри́зꙋ свою̀ ѿ вла́съ вельбꙋжд̑ь, и҆ по́ѧсъ ѹ҆смѣнъ ѻ҆ чреслѣхъ свои҆хъ.
снѣ́дь же е҆го̀ б̂ѣ, прꙋжїе и мд̑е дивїи·

Тогда̀ и҆схожда́ше к немꙋ і҆е҆рс̑҇ли́ма, и҆ вс̂ѧ і҆ѹ҆деа, и҆ вс̂ѧ страна̀ і҆ѻ҆рда́нскаа̀.
и҆ кр҃ща́хꙋсѧ въ і҆ѻ҆рда́ни ѿ него̀, и҆сповѣдающе грѣхы̀ своѧ̀·

Видѣ́в же мно́гы фарисе́а и҆ сад̑дꙋке́а грѧдꙋщ́а на кр҃щенїе е҆го, речѐ и҆мъ.
рожд̑енїа е҆хи́днова, кт̂о сказа вамъ бѣжати ѿ бꙋ́дꙋщаго гнѣ́ва;
сътвори́те ѹ҆́бо плд̑о достои́нъ покаа́нїа.
и҆ не начина́ите гл҃ати в себѣ, ѿц҃а и҆́мамы а҆враа́ма.
гл҃ю б̂о вамъ, ꙗ҆ко мо́жетъ б҃ъ ѿ ка́менїа сего̀ възд̑ви́гнꙋти чѧ́да а҆враа́мꙋ·

Ѹ҆же б̂о и҆ секі́ра при́ корени древа лежи́тъ.
всѧко ѹ҆бо древо и҆́же не твори́тъ плода добра̀, посѣка́емо быва́етъ, и҆ въ ѻ҆гнь вмѣта́емо·

А҆́зъ ѹ҆бо кр҃ща́ю в̂ы водо́ю, в꙽ покаа́нїе.
грѧды́и же по мн̂ѣ, крѣпли́и мене ес̑҇, е҆мꙋже нѣ́смь досто́инъ сапогѝ понестѝ, то́й в̂ы крс̑҇титъ дх҃ом̑ ст҃ым꙽ и҆ ѻ҆гнем̑.
Є҆мꙋж́е лопа́та в рꙋцѣ е҆го̀, и҆ потребитъ гꙋмно свое, и҆ събере́тъ пшени́цꙋ свою в꙽ жи́тницꙋ, плѣвы же съжжетъ ѻ҆гнем̑ негаса́ющимъ·

зачѧ́ло, ѕ҃·

Тогда̀ прихо́дит̑ і҆с҃ ѿ галиле́а на і҆ѻ҆рдан̑҇ къ і҆ѻ҆а́ннꙋ, крс̑҇титисѧ ѿ него̀·

І҆ѻ҆̀анн꙽ же възбранѧ́ше е҆мꙋ гл҃ѧ.
а҆зъ требꙋю тобою крс̑҇ти́тисѧ, и҆ ты л̂и грѧде́ши къ мнѣ̀ ѿвѣща́в же і҆с҃, речѐ к немꙋ̀.
ѻ҆ста́ви н҃нѣ, та́ко б̂о подобно е҆сть нам̑ и҆спо́лнити всѧ́кꙋ пра́вдꙋ.
тогда ѻ҆ста́ви е҆го·

И҆ крс̑҇ти́всѧ і҆с҃, взы́де а҆́бїе ѿ воды̀.
и҆ с̂е ѿвръзо́шасѧ е҆мꙋ̀ нб҃са, и҆ видѣ дх҃ъ бж҃їи и҆сходѧ́щь ꙗ҆́ко го́лꙋбь, грѧдꙋщь на́нь.
и҆ с̂е глс̑҇а съ нб҃се гл҃ѧ·

сей е҆сть сн҃ъ мо́и възлюбленыи, ѻ҆ нем꙽же бл҃говолих̑·

Глав̑҇, д҃.

зч̑҇а, з҃·

Тогда̀ і҆с҃ възведе́нъ бысть дх҃ом̑ в пꙋсты́ню и҆скꙋси́тисѧ ѿ дїа́вола.
и҆ пости́всѧ дн҃їи четы́ридесѧте и҆ но́щїи четы́ридесѧте, послѣди взалка̀·

и҆ пристꙋпль к немꙋ̀ и҆скꙋси́тель, речѐ.
а҆́ще сн҃ъ е҆си бж҃їи, рц̂и ꙗ҆́ко да ка́менїе с̂е хлѣби бꙋ́дꙋтъ·

ѻ́н же ѿвѣщавъ, рече.
пи́сано е҆сть.
не ѻ҆ хлѣбѣ еді́номъ жив꙽ бꙋ́детъ чл҃къ, н̂о ѻ҆ всѧкомъ гл҃ѣ и҆сходѧ́щимъ и҆зъ ѹ́стъ бж҃їихъ·

Тогда̀ поѧ́тъ е҆го дїа́волъ, въ ст҃ы́и град̑, и҆ постави е҆го̀ на крилѣ цр҃ковнем̑.
и҆ гл҃а е҆мꙋ̀.
а҆́ще сн҃ъ е҆си бж҃їи, врьзисѧ ни́зꙋ.
пи́сано б̂о е҆сть, ꙗ҆́ко а҆́гг҃лом̑ свои҆мъ заповѣсть ѻ҆ тебѣ съхрани́ти т̂ѧ, и҆ на рꙋка́хъ во́змꙋтъ т̂ѧ, да не когда̀ претъкнеши ѻ҆ ка́мень но́гꙋ твою·

Рече же е҆мꙋ і҆с҃, пакы пи́сано е҆сть.
не и҆скꙋсиши г҃а б҃а свое҆го̀·

пакы поѧ́тъ е҆го̀ дїа́волъ на́ горꙋ высокꙋ ѕѣло̀, и҆ показа̀ е҆мꙋ вс̂ѣ црс̑҇твїа мира, и҆ сла́вꙋ и҆хъ, и҆ гл҃а е҆мꙋ.
сїѧ̀ вс̂ѧ тебѣ дам̑, аще пад̑ покло́нишимисѧ·

Тогда̀ гл҃а емꙋ̀ і҆с҃, и҆дѝ за мно́ю сатана̀.
пи́сано бо е҆сть.
г҃ꙋ б҃ꙋ твое҆мꙋ̀ покло́нишисѧ, и҆ томꙋ̀ е҆ді́номꙋ послꙋж́иши·

тогда̀ ѻ҆ста́ви е҆го̀ дїа́волъ·

и҆ с̂е а҆́гг҃ли пристꙋпи́ша и҆ слꙋжа́хꙋ е҆мꙋ̀·

зач̑҇, и҃·

Слы́шав же і҆с҃, ꙗ҆́ко і҆ѻ҆а́ннъ предан꙽ бысть, ѿиде в꙽ галиле́ю, и҆ ѻ҆ста́вль наза́ретъ, пришд̑е всели́сѧ в꙽ каперънаѹ҆мъ, в꙽ помо́рїе, в꙽ предѣлѣхъ заѹ҆ло́них꙽ и҆ нефѳали́млих̑ да сбꙋдетсѧ реченное и҆са́і҆емъ прро̑҇комъ гл҃ющем̑·

землѧ завꙋло́нѧ, и҆ землѧ нефѳали́млѧ, пꙋть мо́рѧ ѻ҆б онъ полъ і҆ѻ҆рда́нѣ, галиле́а ꙗ҆зы́к꙽.
лю́дїе сѣдѧ́щеѝ въ тмѣ̀, видѣша свѣтъ ве́лїи.
и҆ сѣдѧ́щим̑ въ странѣ̀ и҆ сѣни см҃ртнѣи свѣтъ восїа и҆мъ·

ѿто́лѣ начат̑ і҆с҃ проповѣ́дати, и҆ гл҃ати<.>

Пока́итесѧ, прибли́жи бо сѧ црс̑҇тво нбс̑҇ное·

зач̑҇, ѳ҃·

Ходѧ́ же при́ мори галиле́истѣм꙽, видѣ два̀ бра́та.
си́мона гл҃емаго пет̑ра, и҆ а҆ндрѣ́а бра́та е҆го, вмѣта́юща мержю в мо́ре.
бѣ́ста б̂о ры́барѧ·

І҆ гл҃а и҆́ма грѧдѣта по мнѣ̀, и҆ сотворю̀ в̂ы ловцѧ чл҃комъ·

ѻ҆на же а҆́бїе ѻ҆ста́вльшѧ мре́жѧ, по немъ и҆до́ста·

И҆ прешед̑ ѿтꙋ́дꙋ, видѣ̀ и҆́на два̀ бра́та, і҆а́кова зеведе́ѻ҆ва, и҆ і҆ѻ҆а́нна бра́та е҆го, в кораблѝ съ зеведе́ѻмъ ѿц҃ем꙽ ею̀, завѧза́юща мре́жю свою̀, и҆ възва̀ ѧ҆̀.
ѻ҆на же а҆́бїе ѻ҆ста́вльша кора́бль, и҆ ѿц҃а своего̀, по нем꙽ и҆до́ста·

и҆ прохожад̑ше вс̂ю галиле́ю і҆с҃.
ѹ҆ча̀ на со́нмищих̑ и҆х꙽, и҆ проповѣ́даа е҆ѵг̑҇лїе цр҃ьствїа, и҆ исцѣлѧа̀ всѧкъ недꙋ́гъ, и҆ всѧ́кꙋ ꙗ҆́зю в лю́дехъ.

І҆ и҆зы́де слꙋх꙽ е҆го по все́и сѷрїи.
и҆ приведо́шѧ е҆мꙋ вс̂ѧ болѧ́щаа разли́чными недꙋ́гы, и҆ стра́стьми ѻ҆дръжи́мы, и҆ бѣ́сны, и҆ мѣ́сѧчныа, и҆ расла́блены жи́лами.
и҆ і́сцѣлѝ и҆хъ·

зач̑҇, і҃·

И҆ по немъ идо́шѧ наро́ди мно́ѕи ѿ галилеа, и҆ десѧтигра́дъ, і҆ ѿ і҆е҆рс̑҇ли́ма, і҆ ю҆де́а, и҆ съ ѻ҆́ного по́лꙋ і҆ѻ҆рда́на·

Глв̑҇а, е҃·

Ѹ҆зрѣ́в же наро́ды, в꙽зы́де на горꙋ.
и҆ сѣд꙽шꙋ е҆мꙋ, пристꙋпи́шѧ к не́мꙋ ѹ҆ченицы̀ е҆го̀.
и҆ ѿве́рзъ ѹ҆ста своѧ̀, ѹ҆ча́ше и҆хъ гл҃ѧ·

Бл҃же́ни ни́щїи дх҃омъ, ꙗ҆ко тѣх꙽ е҆сть црс̑҇твїе нбс̑҇ное·

бл҃же́ни пла́чющеи, ꙗ҆ко тїи ѹ҆тѣшатсѧ·

бл҃жени кро́т꙽цїи, ꙗ҆́ко тїи наслѣдѧт꙽ зе́млю·

бл҃же́ни а҆́лчющеѝ и҆ жа́ждꙋщеѝ пра́вды, ꙗ҆́ко тїи насы́тѧт̑сѧ·

Бл҃же́ни млс̑҇тивїи, ꙗ҆́ко тїи поми́ловани бꙋ́дꙋтъ·

Блаж̑ни чи́стїи срд̑цемъ, ꙗ҆ко тїи бг҃а ѹ҆́зрѧтъ·

бл҃же́ни ми́ротв́орцы, ꙗ҆́ко тїи сн҃ове бж҃їи нарекꙋтсѧ·

Бл҃же́ни и҆з꙽гна́ни пра́вды ра́ди, ꙗ҆ко тѣхъ єс̑҇ црс̑҇тво нбс̑҇ное·

Блаже́ни е҆сте егда̀ поно́сѧтъ вам̑, і҆ и҆жденꙋтъ, и҆ рект̑ꙋ всѧ́къ ѕо́лъ гл҃ъ на́ вы лжꙋще менѐ ради.
ра́дꙋитесѧ и҆ весели́тесѧ, ꙗ҆́ко м꙽зда̀ ва́ша мно́га на нб҃сѣх꙽·

Та́ко б̂о и҆згна́шѧ прро̑҇ки и҆же бѣша пре́же вас̑҇·

Вы̂ е҆сте со́ль землѝ.
а҆́ще же со́ль ѻ҆бꙋа́етъ, чимъ ѻ҆соли́тсѧ;
ни въ чтоже бꙋ́детъ ктомꙋ̀, то́чїю да и҆ссы́пана бꙋ́детъ во́нъ, и҆ попира́ема человѣкы·

зач̑҇, аі҃·

Вы е҆сте свѣтъ ми́рꙋ.
не мо́жетъ град̑ ѹ҆кры́тисѧ врьхꙋ̀ горы̀ стоа̀, ни вжига́ютъ свѣти́лника, и҆ поставлѧ́ютъ е҆го под̑ спꙋ́домъ, н̂о на свѣщницѣ, и҆ свѣтитъ всѣмъ и҆́же въ храминѣ сꙋть·

Та́ко да просвѣти́тсѧ свт̑ѣ ва́шь пред̑ чл҃кы, ꙗ҆́ко да видѧт̑ ва́ша до́браа дѣ́ла, и҆ прославѧт̑ ѿц҃а ва́шег̑҇ и҆́же на нб҃сехъ·

не мни́те ꙗ҆́ко прїидохъ разорити зако́на и҆лѝ прро̑҇кы.
не прїидо́хъ разори́ти, но испо́лнити·

А҆минь б̂о гл҃ю ва́мъ, до́ндеже пре́идетъ нб҃о и҆ землѧ̀, і҆ѻ́та е҆ді́на и҆ли е҆ді́на чръта не пре́идет̑ ѿ зако́на, до́ндеже вс̂ѧ бꙋ́дꙋтъ·

и҆же а҆ще разори́тъ е҆ді́нꙋ заповѣдїи си́хъ ма́лых̑, и҆ наѹ҆чи́тъ та́ко чл҃кы, мнїй нарече́тсѧ въ црс̑҇твїи нбс̑҇немъ.
а҆ и́же сотвори́тъ и҆ наѹ҆чи́тъ, се́и ве́лїи нарече́тсѧ въ црс̑҇твїи нбс̑҇немъ·

зач̑҇, ві҃·

Гл҃ю б̂о вамъ, ꙗ҆́ко а҆ще не и҆збꙋ́детъ пра́вда ва́шѧ па́че кни́жникъ и҆ фарисе́и, не вни́дете въ црс̑҇твїе нбс̑҇ное·

Слы́шасте ꙗ҆ко рече́но бы́сть дре́вним̑, не ѹ҆бїе́ши.
и҆же б̂о а҆́ще ѹ҆бїе́тъ, повинен̑҇ е҆сть сꙋдꙋ̀·

А҆́з же гл҃ю вам꙽, ꙗ҆ко вс̂ѧкъ гнѣ́ваѝсѧ на бра́та свое҆го̀ всꙋ́е, пови́ненъ е҆сть сꙋдꙋ, и҆́же б̂о а҆ще речетъ бра́тꙋ свое҆мꙋ̀, ра́ка, повиненъ е҆сть со́нмищꙋ.
а҆ и҆же рече́тъ ю҆ро́де, пови́ненъ е҆сть гее҆́ннѣ ѻ҆́гненѣи·

а҆́ще ѹ҆́бо принесе́ши даръ тво́и къ ѻ҆лтарю, и҆ тꙋ помѧне́ши, ꙗ҆́ко бра́тъ твои и҆́мать нѣ́что на́ тѧ, ѻ҆стави т̂ꙋ да́ръ тво́и прд̑е ѻ҆лтаре́м꙽, и҆ шд̑е преже смири́сѧ съ бра́томъ своим̑, и҆ тогда̀ пришд̑е принеси даръ сво́и·

Бꙋ́ди ѹ҆вѣщава́асѧ съ сопе́рникомъ свои҆мъ ско́ро, до́ндеже е҆си на пꙋтѝ с нимъ, да не преда́стъ тебѐ съпе́рник̑҇ сꙋдїи, и҆ сꙋдїа тѧ преда́стъ слꙋѕѣ, и҆ в темни́цꙋ в꙽ве́рженъ бꙋ́деши.
а҆мин̑҇ гл҃ю тебѣ, не и҆зы́деши ѿтꙋ́дꙋ до́ньдеже въздасѝ послѣ́днїи кодрантъ·

зач̑҇, гі҃·

Слы́шасте, ꙗ҆́ко речено быс̑҇ пръ́вым̑.
не прелюбы̀ сътвори́ши·

А҆́з же гл҃ю вам̑ ꙗ҆́ко всѧ́къ и҆же възрит꙽ на женꙋ̀ къ е҆же въжд̑елѣти е́и, ѹ҆же любодѣ́иствова с нею в꙽ срд̑ци свое́мъ·

а҆́ще же ѻ҆́ко твоѐ десно́е съблажнѧ́етъ т̂ѧ, и҆змѝ е҆̀, и҆ ве́рзи ѿ себѐ.
ѹ҆́не б̂о т̂и е҆сть, да поги́бнетъ е҆ді́нъ ѿ ѹ́дъ твои҆хъ, а҆ не вс̂е тѣ́ло твоѐ в꙽вержено бꙋ́детъ в гее́ннꙋ ѻ҆́гненꙋю.
и҆ а҆ще же десна́ѧ твоа рꙋка̀ съблажнѧ́етъ т̂ѧ, ѹ҆сѣци ю҆̀, и҆ ве́ръзи ѿ себѐ.
ѹ҆́не б̂о ти е҆сть, да поги́бнетъ е҆ді́нъ ѿ ѹ҆́дъ твои҆хъ, а҆ не всѐ тѣ́ло твоѐ и́детъ в гее́ннꙋ·

Рече́но же бы́сть, ꙗ҆́ко и҆же а҆́ще пꙋстит̑ женꙋ̀ свою, да дастъ е́й кні́гꙋ распꙋстнꙋю̀.
а҆́з же гл҃ю вамъ.
ꙗ҆ко всѧкъ ѿпꙋщаѧѝ женꙋ̀ свою̀ ра́звѣ словесѐ любодѣ́иннаго, твори́тъ ю҆̀ прелюбодѣ́иствовати.
и҆ і́же пꙋщени́цꙋ по́имет꙽ прелюбы̀ дѣи́ствꙋетъ·

зач̑҇, ді҃·

Па́кы слы́шѧсте, ꙗ҆́ко рече́но бысть, дре́внимъ, не въ лжꙋ̀ клене́шисѧ, въздаси же гв҃и клѧ́твы твоа̀·

А҆́зъ же гл҃ю ва́мъ, не клѧ́тисѧ всѧ́ко, ни нб҃омъ, ꙗ҆́ко прс̑҇тлъ е҆сть бж҃їи.
ни земле́ю, ꙗ҆ко под̑ножїе е҆сть нога́ма е҆го.
нѝ і҆е҆рс̑҇ли́момъ, ꙗ҆́ко град̑ е҆сть вели́каго цр҃ѧ.
ниже главо́ю своею̀ клени́сѧ, ꙗ҆́ко не мо́жеши вла́са е҆ді́ного бѣла и҆лѝ черъна сътвори́ти·

Бꙋди же сло́во ва́ше.
е́й, е́й.
нѝ, нѝ, лихо е҆же сею̀, ѿ непрїа́зни е҆сть·

слы́шасте ꙗ҆ко речено бысть·

ѻ҆́ко, за ѻ҆́ко.
и҆ зꙋ́бъ, за́ зꙋбъ·

А҆зъ же гл҃ю ва́мъ.
не проти́витисѧ ѕл̂ꙋ.
н̂о а҆́ще т̂ѧ кто̀ ѹ҆да́рит̑ в꙽ деснꙋ́ю твою лани́тꙋ, ѻ҆брати е҆мꙋ и҆ дрꙋгꙋю́.
и҆ хотѧ́щемꙋ сꙋди́тисѧ с то́бою, и҆ ри́зꙋ твою взѧти, ѿпꙋсти е҆мꙋ̀ и҆ срачи́цꙋ·

и҆ а҆ще кто т̂ѧ по́имет꙽ по си́лѣ поприще е҆ди́но, и҆дѝ с нимъ двѣ̀·

зач̑҇, еі҃·

Просѧ́щемꙋ ѹ҆ тебѐ, да́и.
и҆ хотѧ́щаго ѿ тебѐ заѧ́ти, не ѿвратѝ·

слы́шасте, ꙗ҆́ко рече́но е҆сть.
възлю́биши и҆́скрьнѧго твое҆го, и҆ възненави́диши врага̀ свое҆го̀·

а҆́з же гл҃ю вам̑.
люби́те врагы̀ ва́ша, блс̑҇ви́те кленꙋщаѧ в̂ы, добро̀ творите ненави́дѧщим̑ ва́съ.
и҆ моли́тесѧ за творѧ́щихъ вам̑ напа́сть, и҆ і҆згонѧ́щаѧ в̂ы, ꙗ҆́ко да бꙋ́дете сн҃ове ѿц҃а ва́шего и҆же е҆сть на нб҃сехъ·

ꙗ҆́ко сл҃нце своѐ сїа́етъ на злы́а и бл҃гыѧ, и҆ дожд̑итъ на правд̑ены и҆ на непра́ведны·

А҆́ще б̂о лю́бите лю́бѧщихъ васъ, кꙋ́ю мздꙋ и́мате;
не и҆ мытаре ли тожд̑е творѧтъ;
и҆ а́ще цѣлꙋ́ете дрꙋгы ва́шѧ то́кмо, что ли́ше творитѐ;
не и҆ ꙗ҆зы́чнїцы л̂и та́кожд̑е творѧтъ;
бꙋ́дѣте ѹ҆б̂о в̂ы съвръше́ни, ꙗ҆́коже ѿц҃ь ва́шь нбс̑҇ныи съвръше́нъ е҆сть·

Глав̑҇, ѕ҃.

зач̑҇, ѕі҃·

Вънемлѣте млс̑҇тынѧ ва́ша не твори́те пред̑ чл҃ки, да ви́дими бꙋ́дете и́ми·

а҆ще ли же, н̂и мз꙽ды не и҆мате ѿ ѻ҆ц҃а ва́шего, и҆же ес̑҇ на нб҃сех̑·

Є҆гда̀ ѹ҆бо твори́ши млс̑҇тыню, не въстрꙋби прд̑е собою ꙗ҆коже лицемѣ́ри творѧ́тъ в сонмищих̑, и҆ въ стъгна́х꙽, ꙗ҆́ко да просла́вѧтсѧ ѿ чл҃къ·

А҆минь гл҃ю вамъ, въспрїе́млютъ м꙽здꙋ свою̀·

Тебѣ же творѧ́щꙋ млс̑҇тынѧ, да не ѹ҆вѣсть шꙋ́ица твоа̀ что твори́тъ десни́ца твоа̀, ꙗ҆ко да бꙋ́детъ млс̑҇тыни твоа̀ в та́инѣ·

И҆ ѻ҆ц҃ъ тво́и видѧѝ в та́инѣ, тои́ възда́сть тебѣ ꙗ҆вѣ·

И҆ е҆гда̀ мо́лишисѧ, не бꙋ́ди ꙗ҆коже лицемѣри, ꙗ҆ко лю́бѧт̑ в сонмищих̑, и҆ в꙽ стогнах꙽ пꙋтїи стоѧ҆ще моли́тисѧ, ꙗ҆ко да ꙗ҆вѧ́тсѧ чл҃ком꙽·

А҆ми́нь гл҃ю вам̑, ꙗ҆́ко въспрїимꙋть м꙽здꙋ свою̀·

Ты́ же е҆гда мо́лишисѧ, вни́ди в꙽ клѣть свою̀, и҆ затворивъ две́ри твоа̀, помоли́сѧ ѿц҃ꙋ твоемꙋ в та́инѣ.
и҆ ѿц҃ъ твои видѧѝ в та́инѣ, възда́сть тебѣ ꙗ҆вѣ·

молѧ́ще же сѧ, не ли́ш꙽ше гл҃ите ꙗ҆коже ꙗ҆зы́чницы.
мнѧ́т꙽ бо ꙗ҆ко въ мно́гогл҃анїи свое҆мъ ѹ҆слы́шани бꙋдꙋтъ·

не подо́битесѧ ѹ҆бо им̑, вѣсть б̂о ѻ҆ц҃ъ ва́шъ и҆хже требꙋете, пре́жде проше́нїѧ ва́шего·

си́це ѹ҆бо мл҃и́тесѧ вы̀·

Ѿч҃е на́шъ, и҆же е҆си.
на́ нб҃сех̑, да ст҃и́тсѧ и҆мѧ твоѐ, да прїидетъ црс̑҇твїе твоѐ·

да бꙋдет̑ волѧ твоа̀, ꙗ҆ко на́ нб҃си и҆ на землѝ·

хлѣ́бъ на́шъ насꙋщныи да́ждъ на́мъ дне́сь.
и҆ ѻ҆ста́ви на́мъ дол꙽гы на́ша, ꙗ҆ко и҆ мы̀ ѻ҆ставлѧ́емъ дол꙽жникомъ на́шим̑·

и҆ не в꙽веди на́съ в напа́сть.
н̂о и҆зба́ви нас̑҇ ѿ лꙋка́ваго·

Ꙗ҆́ко твоѐ е҆сть црс̑҇твїѐ и҆ си́ла и҆ сла́ва, въ вѣки, а҆мин̑҇·

зач̑҇, зі҃·

А҆́ще бо ѿпꙋща́ете чл҃ком̑ съгрѣшенїа̀ и҆́хъ, ѿпꙋститъ и҆ ва́мъ ѻ҆ц҃ъ вашъ нбс̑҇ныи·

А҆́ще лѝ не ѿпꙋща́ете чл҃ком̑ съгрѣше́нїа и҆хъ, ни ѻ҆ц҃ъ ва́шъ ѿпꙋститъ ва́мъ съгрѣше́нїи ва́шихъ·

Є҆ѓдаж̑ постите́сѧ.
не бꙋдѣте ꙗ҆коже лицемѣри, сѣтꙋюще, помрача́ют̑ б̂о лица своѧ̀.
ꙗ҆ко да ꙗ҆́вѧ́тсѧ чл҃комъ постѧ́щесѧ.
а҆ми́нь гл҃ю ва́мъ ꙗ҆́ко въспрїимꙋтъ м꙽здꙋ свою̀·

Ты́ же постѧ́сѧ, пома́жи главꙋ̀ свою̀, и҆ лице твоѐ ѹ҆мы́и, ꙗ҆́ко да не ꙗ҆ви́шисѧ чл҃ком̑ постѧ́сѧ, н̂о ѻ҆ц҃ꙋ твое҆мꙋ и҆же в та́йнѣ.
и҆ ѻ҆ц҃ъ твои видѧ́и в та́инѣ, възда́сть тебѣ ꙗ҆́вѣ·

Не съкрыва́ите себѣ съкро́вищъ на землѝ, и҆дѣже червь и҆ тл̂ѧ тли́тъ.
і҆ и҆дѣже та́тїе под̑ко́поваютъ и҆ кра́дꙋтъ·

Съкрыва́ите же себѣ̀ съкро́вища на́ нб҃си, и҆дѣже ни че́рвь ни тлѧ̀ тлитъ, и҆ і҆дѣже та́тїе не под̑ко́пова́ютъ, ни кра́дꙋт꙽.
и҆дѣже б̂о ес̑҇ съкро́вище ва́ше, т̂ꙋ бꙋдет̑ и҆ срд̑це ва́ше·

зач̑҇, иі҃·

Свѣти́лникъ тѣлꙋ е҆сть ѻ҆́ко.
а҆ще ѹ҆́бо бꙋдетъ ѻ҆́ко твое про́сто, вс̂е тѣло твоѐ свѣтло бꙋ́дет꙽·

а҆́ще л̂и ѻ́ко твоѐ лꙋка́во бꙋдетъ, вс̂е тѣ́ло твоѐ темно бꙋ́детъ.
а҆́ще ѹ҆бо свѣтъ и҆же в꙽ тебѣ̀, тма̀ е҆сть, т̂о тма̀ ко́лми;
никто́же мо́жетъ двѣма̀ господи́нома рабо́тати.
либо е҆ді́наго възлю́битъ, а҆ дрꙋга́го възненави́дитъ.
и҆ли е҆ді́ного дръжи́тсѧ, ѻ҆ дрꙋзѣм꙽ же неради́ти на́чнетъ.
не мо́жете б҃ꙋ рабо́тати и҆ мамо́нѣ·

сего̀ ради гл҃ю ва́мъ, не пецѣтесѧ дш҃ею вашею чт̂о ꙗ҆́сте, и҆ли чт̂о пие́те.
ни тѣломъ ва́шим̑, въ что̀ ѻ҆блече́тесѧ.
не дш҃а ли болши е҆сть пи́ща, и҆ тѣло ѻ҆дежд̑а;
възри́те на пти́цѧ нб҃сьныа, ꙗ҆ко не сѣютъ ни жнꙋтъ, ни събира́ютъ в꙽ жи́тницѧ, и҆ ѿц҃ъ ва̑ нбс̑҇ныи пита́етъ и҆хъ.
не вы̀ л̂и паче лꙋ́чши и҆хъ е҆сте;
кто же ѿ ва́съ пекїисѧ можетъ приложити въз́растꙋ свое҆мꙋ ла́котъ е҆ді́нъ;
и҆ ѻ҆ ѻ҆де́жди чт̂о пече́тесѧ;
смотри́те крины селныхъ, ка́ко растꙋтъ, не трꙋжа́ютсѧ ни прѧдꙋт꙽.
гл҃ю же вам̑, ꙗ҆́ко ни соло́монъ въ все́и сла́вѣ своеѝ ѻ҆блечесѧ ꙗ҆ко е҆ді́нъ ѿ сихъ·

А҆́ще же сѣно се́л꙽ное, днс̑҇е сꙋще, и҆ ѹ҆трѣ в пещь вмѣта́емо, б҃ъ та́ко ѻ҆дѣетъ.
не мно́го л̂и паче васъ ма́ловѣри;

зач̑҇, ѳі҃·

Не пецѣтесѧ ѹ҆́бо гл҃юще чт̂о ꙗ́мы, и҆ли чт̂о пїем̑, и҆ли чимъ ѻ҆дежд̑имсѧ;
всѣхъ б̂о сихъ ꙗ҆зы́цы и́щꙋтъ.
вѣсть бо ѿц҃ъ ва́шъ нбс̑҇ныи, ꙗ҆ко требꙋе҆те си́хъ всѣхъ·

и҆щи́те же преже црс̑҇твїа бж҃їа, и҆ пра́вды е҆гѻ̀, и҆ сїа вс̂ѧ приложа́тсѧ ва́мъ·

Не пецѣтесѧ ѹ҆́бо на ѹ҆трѣи, ѹ҆́тренїи б̂о собо́ю пече́тъсѧ.
до́влеть дн҃еви зло́ба е҆го·

Глав̑҇, з҃.

зач̑҇, к҃·

Не сꙋди́те, да не сꙋди́ми бꙋдете·

И҆мже бо сꙋдомъ сꙋдите, сꙋдѧтъ ва́мъ.
и҆ в꙽ ню́же мѣ́рꙋ мѣ́рите, възмѣритсѧ ва́мъ·

Что́ же ви́диши сꙋче́цъ, и҆же во ѻ҆цѣ бра́та твое҆го, бръвно́ же е҆же е҆сть въ ѻ҆́цѣ твое҆мъ не чꙋ́еши;
и҆ли ка́ко речеши бра́тꙋ твое҆мꙋ, ѻ҆ста́ви да и҆змꙋ сꙋчецъ и҆зъ ѻ҆чесе твое҆го, и҆ се бръвно въ ѻ҆́цѣ твоем̑;
лицемѣ́ре, и҆зми первѣе бръвно и҆зъ ѻ҆чесе твоего̀, и҆ тогда ѹ҆́зриши и҆зѧ́ти сꙋчецъ и҆зъ ѻ҆чесе бра́та твоего·

не дади́те ст҃аѧ ѱо́мъ, ниж̑ помѣта́йте би́серъ ва́шихъ прд̑е свинїѧ́ми, да не поперꙋть и҆хъ нога́ми свои́ми, и҆ вра́щшесѧ расто́ргнꙋтъ вы̀·

зач̑҇·

Просите, и҆ да́ст꙽сѧ вам̑·

и҆щѣте, и҆ ѻ҆брѧ́щете.
толцѣте, и҆ ѿве́рзетсѧ ва́мъ·

всѧкъ бо просѧ́и, прие҆́млетъ·

і҆ и҆щаѝ, ѻ҆брѣта́етъ.
и҆ толкꙋщемꙋ ѿве́рзетсѧ·

И҆ли кто е҆сть ѿ ва́съ чл҃къ, е҆гоже а҆ще въспро́сит̑ сн҃ъ е҆го хлѣба, е҆да ка́мень пода́стъ е҆мꙋ;
или а҆ще рыбы про́сит̑, е҆да̀ ѕмїю̀ подасть е҆мꙋ;
а҆ще бо вы̀ лꙋка́ви сꙋще, ѹ҆мѣ́ете даѧнїѧ̀ бл҃га даѧ́ти ча́домъ ва́шимъ.
ко́лми па́че ѻ҆ц҃ъ ва́шъ нбс̑҇ныи, да́стъ бл҃га просѧ́щим̑ ѹ него̀;

зач̑҇, ка҃·

Вс̂ѧ̀ ѹ҆бо е҆ли́ка а҆ще хо́щете да творѧт̑ вамъ члц҃ы, та́ко и҆ вы̂ творите и҆м꙽.
се̂ бо е҆сть зако́нъ и҆ прро̑҇цы·

вни́дѣте ѹ҆зскыми вра́ты, ꙗ҆ко простра́нна врата и҆ широ́къ пꙋть, в꙽водѧѝ в па́гꙋбꙋ, и҆ мно́ѕи сꙋть входѧ́щеѝ им̑.
чт̂о ѹ҆з꙽скаа врата и҆ тѣсенъ пꙋть, в꙽водѧѝ в животъ, и҆ ма́ло и҆хъ е҆сть и҆же ѻ҆брѣта́ютъ е҆го·

зач̑҇, кв҃·

Внемлѣте же ѿ лжихъ прро̑҇къ, и҆же прихо́дѧтъ к вамъ въ ѻ҆де́жахъ ѻ́въчѧхъ, внꙋтрь же сꙋть влъ́цы хы́щ꙽ницы, ѿ плд̑о и҆хъ позна́ете и҆хъ·

е҆да̀ ѻ҆бъе҆́млютъ ѿ трь́нїа гро́зды, и҆л̂и ѿ рѣпїа смо́квы;
та́ко всѧ́ко дрѣво добро̀, плоды̀ добры̀ творит̑.
а҆ зло̀ дрѣ́во, плоды̀ злы творитъ.
не мо́жетъ дрѣ́во добро̀, плод꙽ зо́лъ твори́ти.
ни дрѣ́во зл̂о.
плодъ до́бръ твори́ти·

всѧ́ко ѹ́бо дрѣ́во и҆же не творит̑ плода добра̀, посѣка́ютъ е҆̀, и҆ въ ѻ҆́гнь в꙽мѣта́ютъ.
тѣ́мже ѹ҆́бо ѿ плд̑о и҆хъ позна́ете и҆хъ·

зач̑҇, кг҃·

Не всѧ́къ гл҃ѧѝ ми, г҃и г҃и, в꙽ни́дет꙽ въ црс̑҇тво нбс̑҇ное, н̂о творѧѝ во́лю ѿц҃а мое҆го, и҆же е҆сть на нб҃сехъ·

Мно́ѕи рекꙋтъ мнѣ̀ въ ѻ́нъ дн҃ь, г҃и г҃и, не въ твое л̂и и́мѧ прро̑҇чьствовахом꙽, и҆ твои́мъ и́менем̑ бѣсы и҆згони́хом꙽, и҆ твоим̑ и҆́менемъ си́лы мно́гы сътвори́хомъ;
и҆ тогда̀ и҆сповѣмъ им̑, ꙗ҆́ко николи́же знах̑ ва́съ.
ѿи҆дѣте ѿ менѐ дѣлающеѝ безаконїе·

зач̑҇, кд҃·

Всѧ́къ ѹ҆́бо и҆́же слы́шит꙽ словеса моа̀ сїѧ̀, и твори́тъ ѧ҆̀, ѹ҆по́доблю е҆го мꙋж́ꙋ мꙋ́дрꙋ, и҆же създа̀ хра́минꙋ свою̀ на ка́мени.
и҆ сниде до́ждь, и҆ прїдошѧ рѣкы̀, и҆ възвѣ́ашѧ вѣтри, и҆ нападо́шѧ на хра́минꙋ т̂ꙋ, и҆ не паде́сѧ, ѻ҆снована̀ б̂о б̂ѣ на ка́мени·

и҆ всѧ́къ слы́шаѝ словеса̀ моѧ с̂и, и҆ не творѧ̀ и҆хъ, ѹ҆подо́битсѧ мꙋж́ꙋ ѹ҆ро́дивꙋ, и҆же създа̀ хра́минꙋ свою̀ на пѣсцѣ̀.
и҆ сниде до́ждь, и҆ прїидо́ша рѣкы, и҆ възвѣ́ашѧ вѣтри, и ѻ҆прѣшасѧ хра́минѣ то́и, и҆ падесѧ, и҆ бѣ разрꙋшенїе еа̀ велїе·

и҆ бы́сть е҆гда̀ сконча̀ і҆с҃ словеса̀ сїа, дивлѧ́хꙋсѧ народ̑и̑ ѻ҆ ѹ҆че́нїи е҆го.
бѣ б̂о ѹ҆ча их̑ ꙗ҆́ко власть и҆мѣа, и҆ не ꙗ҆́ко книж̑ницы и҆ фарисе́е·

Глав̑҇, и҃·

Въше́дшꙋ же е҆мꙋ с горы̀, въ слѣдъ е҆го и҆дѧ́хꙋ наро́ди мно́ѕи.
и҆ сѐ прокаженъ пришед̑, кла́нѧшесѧ е҆мꙋ гл҃ѧ, г҃и.
а҆́ще хо́щеши, мо́жеши мѧ ѻ҆чи́стити.

И҆ просте́ръ рꙋ́кꙋ і҆с҃, коснꙋсѧ е҆мъ, гл҃ѧ.
хощꙋ, ѻ҆чистисѧ.
и҆ а́бїе ѻ҆чи́стисѧ е҆мꙋ прока́за·

и гл҃а е҆мꙋ і҆с҃.
ви́жд̑ь, никомꙋже повѣжд̑ь.
н̂о ше́дъ покажисѧ і҆е҆ре́ѻ҆ви, и҆ принесѝ да́ръ, и҆же повелѣ в зако́нѣ моѷсїи, въ свѣдительство им̑·

зач̑҇, ке҃·

Вшед̑шꙋ же е҆мꙋ в капернаѹ҆мъ, пристꙋпѝ к немꙋ со́тник̑҇, молѧ е҆го и҆ гл҃ѧ г҃и.
ѻ҆трокъ мои лежи́тъ в домꙋ ѻ҆слабленъ, лютѣ стра́жд̑а.
и҆ гл҃а емꙋ і҆с҃, а҆зъ прише́дъ и҆сцѣлю е҆го̀·

И҆ ѿвѣщав̑҇ со́тникъ, рече е҆мꙋ.
г҃и, нѣсмь досто́и҆нъ да под꙽ кро́въ мои вни́деши.
н̂о то́кмо рцы сло́во, і҆ и҆сцелѣетъ ѻ҆трок̑҇ мо́и.
и҆бо а҆́зъ чл҃къ е҆смь подъ вла́стїю, и҆мы́и под꙽ собо́ю во́ины, и҆ гл҃ю е҆мꙋ, и҆і́ди, і҆ и҆детъ.
и҆ дрꙋго́мꙋ прїиди, и҆ прїидетъ.
и҆ рабꙋ моемꙋ сътвори сѐ.
и҆ сътвори́тъ·

Слы́шавъ же і҆с҃, ѹ҆диви́сѧ, и҆ рече грѧдꙋщим̑ по не́мъ.
а҆ми́нь гл҃ю ва́мъ;
н̂и въ і҆и҆л҃и толико вѣры ѻ҆брѣтохъ·

гл҃ю же вам̑, ꙗ҆́ко мно́ѕи ѿ въсто́къ и҆ за́падъ прїидт̑ꙋ и҆ възлѧ́гꙋтъ съ а҆враа́мом̑, і҆ и҆саа́ком̑, і҆ и҆ꙗ҆ковомъ, въ црс̑҇твїи нбс̑҇немъ.
сн҃ве же црс̑҇твїѧ̀ и҆згна́ни бꙋдꙋтъ въ тмꙋ кромѣшнюю, т̂ꙋ бꙋдетъ пла́чь и҆ скре́жетъ ѕꙋбомъ.
и҆ рече і҆с҃ со́тникꙋ.
и҆дѝ, и҆ ꙗ҆коже вѣрова бꙋди тебѣ.
і҆ и҆сцелѣ ѻ҆́трокъ е҆го в то́и час̑҇·

зч̑҇а, к҃ѕ·

И҆́ прише́дъ і҆с҃ в до́мъ петро́въ, видѣ те́щꙋ е҆го лежа́щꙋ и҆ ѻ҆гне́мъ жего́мꙋ.
и҆ прикоснꙋсѧ рꙋцѣ еа̀, и҆ ѻ҆ста́ви ю̀ ѻ҆гнь и҆ въста̀, и҆ слꙋжа́ше е҆мꙋ·

По́здѣ же бы́вшꙋ, приведо́ша к немꙋ бѣ́сны мно́ги, і҆ и҆згна̀ дꙋхи сло́вомъ.
и҆ вс̂ѧ болѧ́щаѧ̀ и҆сцѣлѝ, да събꙋ́детсѧ рече́ное і҆са́йемъ прро̑҇комъ, гл҃ющем꙽.
то́й недꙋ́гы нашѧ прїа́тъ, и҆ болѣз꙽ни понесѐ·

Видѣ́в же і҆с҃ мно́гы народы ѻ҆́крестъ себе, повелѣ̀ ѹ҆чеником̑ и҆тѝ на ѻ҆́нъ пол꙽.
и҆ пристꙋ́пль е҆ді́нъ кни́жник̑҇, рече е҆мꙋ̀.
ѹ҆чи́телю, и҆дꙋ̀ по тебѣ ꙗ҆́може а́ще и҆деши·

И҆ гл҃а е҆мꙋ і҆с҃.
ли́си ꙗ҆́звины и҆мꙋтъ, и҆ пти́цѧ нбс̑҇ныѧ гнѣз́да.
сн҃ъ же чл҃чьскїи не и́мать гд̂ѣ главы̀ под̑клони́ти·

дрꙋгїи же ѿ ѹ҆ченикъ е҆го рече е҆мꙋ̀.
г҃и, повелѝ м̂и пержд̑е и́ти, и҆ погреб꙽сти ѿц҃а мое҆го.
і҆с҃ же рече е҆мꙋ.
грѧди по мнѣ, и҆ ѻ҆ста́ви мр҃твыхъ погреб꙽сти своѧ̀ мр҃твецѧ̀·

зач̑҇, к҃з·

Влѣз́шꙋ же е҆мꙋ в꙽ кора́бль, по нем̑ и҆до́шѧ ѹ҆чн҃ци е҆го·

и҆ с̂е трꙋсъ вели́къ бысть в мо́ри, ꙗ҆коже кораблю̀ покрыва́тисѧ влъна́ми, то́й же спа́ше.
и҆ пришд̑еше ѹ҆ченицы е҆го възбꙋдишѧ е҆го гл҃юще.
г҃и, сп҃си н̂ы, погибаем̑.
и҆ гл҃а и҆мъ, чт̂о страшли́ви е҆сте маловѣри;
тогда̀ въста́въ, запрѣтѝ вѣтромъ и҆ мо́рю.
и҆ бысть ти́шина ве́лїа.
чл҃цы же чюди́шасѧ гл҃юще.
кт̂о е҆сть сей, ꙗ҆́ко и҆ вѣтри и҆ мо́ре послꙋша́ютъ е҆го;

зач̑҇, к҃и·

И҆́ пришд̑ешꙋ е҆мꙋ на ѻ҆нъ полъ, въ странꙋ гергеси́нскꙋю, срѣто́ста е҆го два̀ бѣ́сна, ѿ гробъ и҆сходѧ́ща, люта ѕѣло̀, ꙗ҆́ко не мож꙽ти никомꙋ минꙋти пꙋтемъ тѣм꙽.
и҆ с̂е възъпи́ста гл҃юще.
чт̂о нам̑ и҆ тебѣ і҆с҃е сн҃е бж҃їи;
прише́лъ е҆си сѣмо преже вре́мене мꙋ́чити насъ·

бѧ́ше же далече ѡ нею̀ ста́до свинїи мно́го пасо́мо·

Бѣ́си же молѧхꙋ е҆го, гл҃юще.
а҆ще и҆зго́ниши н̂ы, повели нам̑ и҆тѝ въ ста́до свино́е.
и҆ речѐ и҆мъ, и҆дѣте·

ѻ҆ни же и҆зшд̑еше и҆дошѧ въ стадо свино́е.
и҆ с̂е а҆бїе ѹ҆стремисѧ ста́до вс̂е по́ брегꙋ в꙽ мо́ре, и҆ ѹ҆топо́шѧ въ водахъ.
пасꙋщїи же бѣжа́шѧ, и҆ шд̑еше въ град̑, възвѣсти́ша вс̂ѧ, и҆ ѻ҆ бѣсною·

и҆ с̂е ве́сь град̑ и҆зы́де въ срѣтенїе і҆с҃ови.
и҆ видѣв꙽ше е҆го моли́шѧ, ꙗ҆ко дабы прешелъ ѿ предѣлъ и҆хъ·

Глав̑҇, ѳ҃.

зач̑҇, к҃ѳ·

И влѣзъ в кора́бль, пре́иде и҆ прїиде въ сво́и гра́дъ·

И҆ сѐ принесо́шѧ е҆мꙋ ѻсла́блена жи́лами на ѻ҆дрѣ лежа́щъ·

и҆ видѣвъ і҆с҃ вѣрꙋ и҆хъ, рече ѻ҆сла́бленомꙋ, дерза́и чѧдо, ѿпꙋща́ют꙽ ти сѧ грѣси твоѝ·

И҆ се нѣцыѝ ѿ кни́жникъ, рѣша в себѣ, се́и хꙋлит̑.
и҆ видѣвъ і҆с҃ помышле́нїѧ и҆хъ, рече.
въскꙋю вы̀ мы́слите лꙋка́ваѧ въ срд̑цых̑ свои҆хъ;
чт̂о бо е҆сть ѹ҆до́бѣе рещи, ѿпꙋща́ют꙽ ти сѧ грѣси, и҆ли рещѝ воста́ни и҆ ходѝ;
н̂о да ѹ҆вѣсте, ꙗ҆ко вла́сть и́мать сн҃ъ чл҃чьскїи на земли ѿпꙋща́ти грѣхѝ, тогда̀ гл҃а расла́бленомꙋ, въста́ни.
възмѝ сво́и ѻ҆дръ, и҆ і҆ди в дом̑ твои·

И въста́въ взе́мъ ѻ҆дръ сво́и, и҆ і҆де в до́мъ сво́и·

видѣвше же наро́ди чюди́шасѧ.
и҆ просла́вишѧ б҃а, да́вшаго вла́сть таковꙋю чл҃комъ·

зч̑҇а, л҃·

И҆́ преходѧ̀ іс҃ ѿтꙋ́дꙋ, видѣ чл҃ка сѣдѧ́ща на мы́тници, мат̑ѳе́а гл҃ема, и҆ гл҃а е҆мꙋ, по мнѣ грѧдѝ, и҆ въста́в꙽ по нем̑ и҆́де·

и҆ бы́сть е҆мꙋ възлежа́щꙋ в домꙋ̀, и҆ с̂е мно́ѕи мытарѐ и҆ грѣшницы пришд̑еше, възлежа́хꙋ съ і҆с҃омъ, и҆ съ ѹ҆ченикы е҆го·

и҆ видѣв꙽ше фарисе́е, гл҃ахꙋ ѹ҆ченико́мъ е҆го.
почт̂о с мытари и҆ грѣшникы ѹ҆чи́тель ваш꙽ ꙗ҆́стъ и пїетъ;
і҆с҃ же слы́шавъ, рече и҆мъ.
не требꙋ́ютъ здра́вїи врача̀ н̂о болѧ́щїи.
шд̑еше наѹ҆чи́тесѧ, чт̂о е҆сть, млс̑҇ти хощꙋ, а҆ не жрътвѣ.
не прїидохъ б̂о призва́ти пра́вед̑ники, н̂о грѣшникы на покаа́нїе·

зач̑҇, л҃а·

Тогда̀ пристꙋпи́шѧ к꙽ немꙋ ѹ҆ченици і҆ѻ҆а́ннови гл҃юще.
почт̂о м̂ы, и҆ фарисе́е постимсѧ мно́го, ѹ҆ченицы же твои не постѧ́тсѧ;
и҆ рече и҆мъ і҆с҃.
е҆да мо́гꙋтъ сн҃ве брачнїи пла́кати, донели́ко вре́мѧ с ними е҆сть женихъ;
прїидꙋт же дн҃їе, е҆гда̀ ѿи҆мет̑сѧ ѿ них̑ жених̑, и҆ тогда̀ постѧт̑сѧ·

Никто́же б̂о приставлѧет̑ приставле́нїа пла́та небѣ́лена, ри́зѣ ветсѣ.
во́змет б̂о ко́нчинꙋ свою̀ ѿ ри́зы, и҆ горши дира̀ бꙋдетъ·

ниже влива́ют꙽ вина̀ но́ва в꙽ мѣхы ве́тхы.
а҆ще ли же н̂и, т̂о просадѧтсѧ мѣси, и вино̀ пролїе҆тсѧ, и҆ мѣ́си погы́бнꙋтъ·

н̂о влива́ютъ вино̀ но́во в мѣхы но́вы, и҆ ѻ҆бое съблюдетсѧ·

зач̑҇, л҃в·

Сїѧ е҆мꙋ гл҃ѧщꙋ к ним꙽, с̂е кнѧѕь нѣкїи пришд̑е кла́нѧшесѧ е҆мꙋ гл҃ѧ, ꙗ҆́ко дщи моа нн҃ѣ ѹ҆мретъ.
н̂о пришд̑е възложи на ню̀ рꙋ́кꙋ свою̀, и҆ ѻ҆живетъ·

и҆ въставъ і҆с҃, по немъ и҆де, и҆ ѹ҆ченицы е҆го·

и҆ с̂е жена̀ кровоточи́ва два̀надесѧте лѣтъ, пристꙋпльши съзади, прикоснꙋ́сѧ въскри́лїи ри́зы е҆го.
гл҃аше б̂о в себѣ, а҆́ще то́кмо прикоснꙋсѧ ри́зѣ е҆го, сп҃се́на бꙋ́дꙋ·

і҆с҃ же ѻ҆бра́щсѧ, и҆ видѣвъ ю҆̀, рече.
дръза́и дщѝ, вѣра твоа̀ сп҃се т̂ѧ·

и҆ сп҃сена бысть жена̀ ѿ часа того·

и҆ пришд̑е і҆с҃ в до́мъ кнѧ́жь, и҆ видѣ̀ сопцѧ, и҆ народ̑ млъвѧщъ, гл҃а и҆мъ, ѿи҆дѣте, не ѹ҆мретъ бо дв҃ца, н̂о спитъ.
и҆ рꙋгахꙋсѧ е҆мꙋ·

е҆гад̑ же и҆згнанъ бысть народъ, в꙽шд̑е, ѧ́тъ ю҆̀ за́ рꙋкꙋ, и҆ въста̀ дв҃ца.
и҆ и҆зы́де вѣсть с̂и по все́и земли то́и·

зач̑҇, л҃г·

И҆́ преходѧ́щꙋ ѿтꙋдꙋ і҆с҃ови, по немъ идоста дв̂а слѣцѧ, зовꙋща и҆ гл҃юща помилꙋи н̂ы і҆с҃е сн҃е дввд̑ъ·

Пришед̑шꙋ же е҆мꙋ в꙽ домъ, пристꙋпи́ста к꙽ немꙋ слѣпцѧ.
и҆ гл҃а има і҆с҃.
вѣрꙋ́ета л̂и ꙗ҆́ко могꙋ̀ с̂е сътворити;
гл҃аста е҆мꙋ е́й г҃и·

Тогда̀ прикоснꙋ́сѧ ѻ҆чїю и҆х꙽, гл҃ѧ.
по вѣрѣ ва́ю бꙋди ва́ма.
и҆ ѿверзостасѧ ѻ҆́чи и́ма.
и҆ запрѣтѝ и҆́ма і҆с҃, гл҃ѧ.
блюдѣта да никтоже ѹ҆вѣ́сть.
ѻ҆на же и҆зшедша просла́виста е҆го по все́и земли той·

тѣ́ма же и҆сходѧ́щема, с̂е приведо́шѧ к немꙋ чл҃ка нѣма, бѣснꙋе́ма.
и҆ и҆згна́нꙋ бѣс́ꙋ, прогл҃а нѣмы́и·

и҆ диви́шѧсѧ наро́ди, гл́юще, ꙗ҆ко николиже ꙗ҆висѧ та́ко въ і҆и҃ли·

фарисе́е же гл҃ахꙋ, ѻ҆ кнѧзи бѣсо́вьстѣмъ и҆зго́нитъ бѣсы·

и҆ прохожд̑аше і҆с҃ гра́ды вс̂ѧ и҆ ве́си ѹ҆ча на сонмищихъ их̑, и҆ проповѣдаа е҆ѵг̑҇лїе црс̑҇твїа, и҆ цѣлѧ всѧкъ недꙋгъ и҆ всѧкꙋ ꙗ҆́ѕю в꙽ людехъ·

зач̑҇, л҃д·

Видѣв же наро́ды, млс̑҇рдова ѻ҆ нихъ, ꙗ҆ко бѣхꙋ смѧте́ни и҆ ѿвръжени, ꙗ҆ко ѻ҆вцѧ не и҆мꙋща па́стырѧ·

Тогда̀ гл҃а ѹ҆че́никомъ свои҆мъ.
жа́тва ѹ҆бо мно́га, дѣ́лателїи же ма́ло.
моли́тесѧ ѹ҆бо господинꙋ жа́твѣ, ꙗ҆́ко да и҆зведет̑ дѣ́лателѧ на жа́твꙋ свою̀·

Глв̑҇а, і҃.

зач̑҇·

И призвавъ ѻ҆́бана́десѧте ѹ҆ченика своѧ̀, дастъ и҆мъ власть на дꙋсѣх꙽ нечи́стых̑, ꙗ҆ко да и҆зго́нѧт̑ и҆хъ, и҆ сцѣлити всѧкъ недꙋгъ и҆ всѧкꙋ болѣзнь·

дванадесѧтим̑ же а҆плс̑҇омъ и҆мена̀ сꙋтъ сїа̀.
пе́рвыи си́монъ и҆же нарица́етсѧ петръ, и҆ а҆ндре́а брат꙽ е҆го.
и҆а́ковъ зеведе́ѻ҆въ, и҆ і҆ѻа́ннъ брат̑ е҆го.
фили́ппъ, и҆ варѳоломе́и.
ѳома̀, и҆ матѳе́и мытарь.
і҆а́ковъ а҆л꙽феѻ҆въ, и҆ келеве́и нареченыи фад̑де́и.
сі́мон꙽ кананитъ, и҆ і҆ѹ́да и҆скариѻ́тъскїи и҆же и҆ предастъ е҆го<.>

Сїа̀ ѻ҆́бана́десѧте посла̀ і҆с҃ заповѣ́давъ и҆мъ гл҃ѧ.
на пꙋть ѧ҆зы́къ не и҆дѣте, и҆ въ градъ самарѧ́нскыи не внидѣте.
и҆дѣте же паче къ ѻ҆вцѧмъ поги́бшим̑ до́мꙋ і҆ил҃ева·

ходѧ́ще же проповѣ́дꙋите, гл҃юще, ꙗ҆́ко прибли́жисѧ црс̑҇твїе нбс̑҇ное·

болѧ́щаа и҆сцѣлите, прокаже́ныа ѻ҆чища́ите, мр҃твыа в꙽скр҃шаите, бѣ́си и҆згоните.
тꙋ́не прїа́сте, тꙋ́не дади́те·

зач̑҇, л҃е·

Не стѧжи́те зла́та, нѝ сребра, нѝ мѣди при поѧсѣхь ваших̑.
ни пи́ры на пꙋти, ни двою ризꙋ, н̂и сапогъ, н̂и же́злъ.
досто́инъ б̂о е҆сть дѣ́латель м꙽зды своеа̀·

Во́нже а҆ще коли́жд̑о грд̑а и҆л̂и весь вни̂дете, и҆спыта́ите кт̂о в немъ досто́инъ е҆сть, и҆ т̂ꙋ пребꙋдѣте дондеже и҆зы́дете·

входѧще же в до́мъ, цѣлꙋ́ите е҆го.
гл҃юще ми́ръ до́мꙋ семꙋ.
и҆ а҆ще ѹ҆бо бꙋ́детъ до́мъ досто́инъ, прїидет̑ ми́ръ ва́шъ нань.
а҆ще ли же не бꙋ́детъ досто́инъ, мир꙽ ва́шъ к вам꙽ възврати́тсѧ·

и҆ і҆́же а҆ще не прїимет꙽ васъ, ниже послꙋшаетъ словесъ ва́шихъ, и҆сходѧ́ще и҆з꙽ домꙋ, и҆лѝ и҆з града того, ѿтрѧсѣте пра́хъ но́гъ ва́шихъ·

а҆минь гл҃ю ва́мъ, ѿрад̑нѣе бꙋ́детъ земли содом̑стѣ и҆ гоморстѣи в꙽ дн҃ь сꙋдныи, неже гра́дꙋ томꙋ·

зач̑҇, л҃ѕ·

Се̂ а҆́зъ посыла́ю вас̑҇ ꙗ҆́ко ѻ҆вцѧ посредѣ влъ́ковъ.
бꙋдѣте ѹ҆бо мꙋдри ꙗ҆́ко змїа, и҆ цѣли ꙗ҆ко голꙋбїе·

Внемлѣте же ѿ чл҃къ.
предадѧт꙽ б̂о в̂ы на со́нмы, и҆ на собо́рищих̑ и҆хъ бїю́тъ вас̑҇.
предъ влд̑кы же и҆ цр҃ѧ веде́ни бꙋ́дете, менѐ ради.
въ свѣдѣтельство и҆мъ, и҆ ѧ҆зы́комъ.
е҆гда же предаю́тъ в̂ы, не пецѣтесѧ, како и҆лѝ чт̂о възгл҃ете.
дасть бо сѧ вамъ в то́и часъ, чт̂о въз꙽гл҃ете.
не вы б̂о бꙋдете гл҃ющеѝ, н̂о дх҃ь ѿц҃а ва́шего гл҃ѧѝ в꙽ вас꙽.
предастъ же братъ бра́та на смр҃ть, и҆ ѿц҃ъ ча́до.
и въста́нꙋтъ чѧда на родителѧ, и҆ ѹ҆бїютъ и҆хъ.
и҆ бꙋдете ненави́дими всѣми, и҆́мени мое҆го рад̑и̑.
претръпѣвыи же до конца то́и сп҃сенъ бꙋдетъ·

зач̑҇, л҃з·

Є҆́гда же го́нѧтъ в̂ы въ́ градѣ семъ, бѣгаите в꙽ дрꙋгїи.
а҆минь б̂о гл҃ю вам̑, не и́мате скончати гра́ды і҆и҃левы, дон꙽деже прїидетъ сн҃ь члчс̑҇кїи·

Нѣсть ѹ҆ченикъ над꙽ ѹ҆чи́телемъ своимъ, ниже рабъ, над̑ господиномъ свои҆мъ.
до́влетъ ѹ҆ченикꙋ, да бꙋ́детъ ꙗ҆́ко ѹ҆чи́тель его, и҆ рабъ, ꙗ҆́ко г҃ь е҆го·

А҆ще господина до́мꙋ веелзевꙋла нареко́шѧ, ко́лми паче домашнѧа̀ е҆го;
не ѹ҆бо́итесѧ ѹ҆бо и́хъ.
ничт̂оже бо е҆сть покровено, е҆же не ѿкры́етсѧ.
и҆ та́ино, е҆же не ѹ҆вѣ́дѣно бꙋ́детъ·

Є҆же гл҃ю ва́мъ въ тмѣ, рцѣте въ свѣтѣ.
и҆ е҆же въ ѹ҆́ши слы́шите, проповѣ́дите въ кровѣхъ.
и҆ не ѹ҆боитесѧ ѿ ѹ҆бива́ющих тѣ́ло, дш҃ꙋ же не могꙋщих꙽ ѹ҆бити.
ѹ҆бои́те же сѧ паче могꙋщаго и҆ дш҃ꙋ и҆ тѣ́ло погꙋбїти в꙽ гее́ннѣ·

не двѣ́ ли птици цѣни́тасѧ е҆ді́номꙋ а҆ссарїю;
и҆ ни еді́на ѿ нею падетъ на земли без̑ ѿц҃а ва́шего.
ва́м же и҆ власи главнїи вс̂и и҆зъчтени сꙋть.
не ѹ҆бо́итес̑҇ ѹ҆бо, мно́ѕх̑ѣ пти́цъ лꙋ́чши е҆сте в̂ы·

зач̑҇ л҃и·

Всѧкъ ѹ҆бо и҆же и҆сповѣ́сть мѧ пред꙽ чл҃кы, и҆сповм̑ѣ е҆го и҆ а҆з꙽ пред̑ ѿц҃ем꙽ моим̑, и҆же на нб҃сех꙽.
а҆ и҆же ѿвръжет̑сѧ мене пред̑ чл҃кы, ѿвръгꙋсѧ е҆го и҆ а́зъ прд̑е ѿц҃емъ моим̑, и҆же на нб҃сехъ·

Не мните ꙗ҆ко прїидох꙽ въврещи ми́ръ на землю.
не прїидох̑ бо въврещѝ мирь, н̂о мечь.
прїидох̑ б̂о разлꙋчити чл҃ка на ѿц҃а свое҆го, и҆ дще́ре на мт҃ре свою̀.
и҆ невѣстꙋ на свекро́вь свою̀.
и҆ вра́ѕи чл҃кꙋ дома́шнїи е҆го·

зач̑҇, л҃ѳ·

И҆́же лю́бит̑ ѻ҆ц҃а и҆ли мт҃ре паче мене, нѣ́сть менѐ досто́инъ.
и҆ і́же лю́бит̑ сн҃а и҆ли дщере паче менѐ, нѣсть мене досто́инъ.
и҆ і́же не прїимет̑ крс̑҇та свое҆го, и҆ в꙽ слд̑ѣ мене грѧ́дет̑, нѣсть мене досто́и҆нъ·

Ѡ҆брѣтыѝ дш҃ꙋ свою̀, погꙋбит̑ ю҆̀.
а҆ и́же погꙋбиит̑ дш҃ꙋ свою̀ мене рад̑и̑, ѻ҆брѧщет̑ ю҆̀.

И҆же ва̀съ прїе́млет̑, менѐ прїемлет̑.
и҆ і́же прїемлет꙽ мене, прїемлет̑ посла́вшаго м̂ѧ.
прїемлѧѝ пророка въ и҆мѧ прро̑҇че, м꙽здꙋ прро̑҇чю прїимет꙽.
и҆ прїемлѧѝ правд̑еника въ и҆мѧ пра́вед̑ниче, м꙽здꙋ пра́ведничю прїимет꙽·

І҆ и́же а҆ще напоит̑ е҆ді́ного ѿ малыхъ сих̑ ча́шꙋ стꙋденꙋ̀ во́дꙋ, токмо въ и҆мѧ ѹ҆чн҃ка.
а҆ми́нь гл҃ю вам̑, не погꙋбит̑ м꙽здꙋ свою̀·

Глав̑҇, а҃і·

И бы́сть е҆гда съвершѝ і҆с҃, заповѣ́даѧ ѻ҆бѣманадесѧте ѹ҆ченико́ма свои́ма, пре́иде ѿтꙋ́дꙋ ѹ҆чи́ти и҆ проповѣдати въ градѣхъ их̑·

зч̑҇а, м҃·

І҆ѻ҆а́ннъ же слы́шав꙽ въ ѹ҆зылищи дѣла хв҃а, посла́въ два ѿ ѹ҆ченикъ своих̑.
рече е҆мꙋ.
ты́ ли е҆си грѧдыѝ, и҆лѝ и҆ного чѧ́емъ;
и҆ ѿвѣщавъ і҆с҃ рече и҆мъ.
шед̑ша възвѣстита і҆ѻ҆а́ннови, ꙗ҆́же слы́шита и҆ ви́дита.
слѣпїи прозира́ютъ и҆ хро́мїи хо́дѧтъ, прокаже́нїи ѻ҆чища́ютсѧ, и҆ глꙋсїи слы́шѧт꙽ мр҃твїи въста́ют꙽, и҆ ни́щїи бл҃говѣствꙋють.
и҆ бл҃же́нъ е҆сть и҆́же а҆ще не събла́знит̑сѧ ѻ҆ мнѣ·

тѣма же и҆схо́дѧ́щема, начѧ́тъ і҆с҃ наро́домъ гл҃ати ѻ҆ і҆ѻ҆а́ннѣ.
чесо и҆зыдо́сте в꙽ пꙋсты́ню видѣти;
тро́сть лѝ вѣтром꙽ колѣблем̑;
но̀ чесо и҆зыдо́сте видѣти;
чл҃ка лѝ в꙽ мѧк꙽кы ри́зы ѻ҆блъчена;
с̂е и҆же мѧ́к꙽каѧ носѧщеѝ, въ домохъ црс̑҇кыхъ сꙋтъ·

но чесо и҆зыдо́сте видѣти;
прро̑҇ка л̂и;
еѝ гл҃ю вамъ, и҆ лише прро̑҇ка·

се́и бо е҆сть, ѻ҆ не́мже е҆сть пи́сано·

Сѐ а҆́з꙽ посыла́ю а҆гг҃ла мое҆го прд̑е лицемъ твои҆мъ, и҆́же ѹ҆готовит̑ пꙋть твои пред꙽ тобою·

а҆мин̑҇ гл҃ю ва́мъ.
не въста̀ в роженых̑ жена́ми болїи и҆ѻ҆а́нна крс̑҇тлѧ.
мнїи же, въ црс̑҇твїи нбс̑҇нѣмъ, болїи е҆го е҆сть·

ѿ дни же і҆ѻа́нна крс̑҇тлѧ досе́лѣ, цр҃ьствїе нбс̑҇ное нꙋ́дитсѧ.
и҆ нꙋжници въсхища́ютъ е҆̀.

Всѝ бо прро̑҇ци и҆ зако́нъ до и҆ѻ҆а́нна проре́кошѧ.
и҆ а҆́ще хо́щете прїꙗ҆́ти, то́и е҆сть и҆лїа хотѧ́и прїити.
и҆мѣѧи ѹ҆ши слы́шати, да слы́шитъ·

зч̑҇а, м҃а

Комꙋ же ѹ҆подоблю̀ ро́дъ сеи.
подо́бен꙽ е҆сть дѣтем̑, сѣдѧ́щим꙽ на то́ржищих꙽, и҆ възглаша́ющимъ дрꙋгомъ свои́мъ, и҆ гл҃ющимъ.
писка́хомъ ва́мъ, и҆ не плѧсасте.
плака́хомъ вам̑, и҆ не рыда́сте·

Прїиде б̂о і҆ѻа́нъ ни ꙗ҆́ды нѝ пїѧ, и҆ гл҃ете бѣ́съ и́мат̑.
прїиде сн҃ъ чл҃ческїи ꙗ҆́дый и҆ пїа, и҆ гл҃ете, с̂е чл҃къ ꙗ҆́дца и҆ винопїицѧ, мытаремъ дрꙋгъ и҆ грѣшникомъ.
и҆ ѻ҆пра́вдисѧ премꙋ́дрость.
ѿ чѧдъ свои҆хъ·

зч̑҇а, м҃в·

Тогда̀ начат̑ і҆с҃ понаша́ти градовом꙽, в нихже бы́ша множа́ишаѧ си́лы е҆го, зане не пока́ашѧсѧ̀·

Го́ре тебѣ̀ хорази́нъ, го́ре тебѣ вѷѳсаи́да.
ꙗ҆ко аще в тѷрѣ и сидо́нѣ быша си́лы былѝ бы́вшаѧ в ва́съ, древле ѹ҆́бо въ вре́тищи и҆ пе́пелѣ пока́ѧлисѧ бы́шѧ, ѻ҆ба́че гл҃ю вамъ, ти́рꙋ и҆ сидо́нꙋ ѿра́днѣе бꙋ́детъ в꙽ дн҃ь сꙋдныи, неже ва́мъ·

И҆ т̂ы капернаѹ҆мъ, и҆же до нб҃съ възнесы́исѧ, до а́да съни́деши.
занѐ а҆́ще в содо́мѣхъ бы́шѧ си́лы былѝ, бы́вшаѧ в тебѣ, пребы́ли ѹ҆́бо бышѧ до дне́шнѧго дн҃е.
ѻ҆баче гл҃ю ва́мъ, ꙗ҆́ко земли содо́мъстѣи ѿрад̑нѣе бꙋ́дет̑ в꙽ дн҃ь сꙋдныи, неже тебѣ·

в то̀ вре́мѧ ѿвѣща і҆с҃, речѐ.
и҆сповѣда́ю ти сѧ ѻ҆ч҃е г҃и нб҃си и҆ землѝ, ꙗ҆́ко ѹ҆таилъ е҆си сїѧ ѿ премꙋдрыхъ и҆ разꙋмных̑, и҆ ѿкры́лъ е҆си та̀ младенцм̑е.
еѝ ѻ҆ч҃е, ꙗ҆́ко та́ко бы́сть бл҃говоле́нїе предъ тобо́ю·

зч̑҇а, м҃г·

Вс̂ѧ мнѣ предана̀ сꙋть ѻ҆ц҃емъ моим̑·

и҆ никто́же зна́ет꙽ сн҃а, токмо ѿц҃ъ, ни ѻ҆ц҃а кт̂о зна́етъ, то́кмо сн҃ъ, и҆ е҆мꙋже а҆ще во́литъ сн҃ъ ѿкры́ти·

прїидѣте ко мнѣ всѝ трꙋжд̑ающеисѧ и҆ ѻ҆бремененїи, и҆ а́зъ поко́ю в̂ы.

Възмѣте и҆́го мое на себе, и҆ наѹ҆чи́тесѧ ѿ менѐ, ꙗ҆́ко кро́токъ е҆смь, и҆ смирен̑҇ срд̑цемъ, и҆ ѻ҆брѧ́щете поко́и дш҃амъ ва́шимъ·

и҆́го б̂о мое бл҃го, и҆ бремѧ мое ле́гко е҆сть·

Глв̑҇а, в҃і.

зч̑҇а, м҃д·

В т̂о вре́мѧ и҆де і҆с҃ в сꙋботы сквоѕѣ сѣѧнїа.
ѹ҆чн҃цы же е҆го възалка́шѧсѧ, и҆ начѧ́ша въстерѕа́ти кла́сы и҆ ꙗ҆́сти.
фарисее же видѣ́вше, рѣша е҆мꙋ.
с̂е ѹ҆ченицы твоѝ творѧ́тъ, е҆гоже не достоит̑ творити в сꙋботы.
ѻ҆н же речѐ и҆́мъ·

нѣ́сте ли члѝ чт̂о сътвори двд̑ъ, е҆гда̀ възалка са́мъ, и҆ сꙋщїи с нимъ;
ка́ко вни́де в́ хра́мъ бж҃їи, и҆ хлѣбы пред̑ложенїѧ снѣсть, и҆́хже не досто́ино емꙋ б̂ѣ ꙗ҆́сти, ни сꙋщимъ с ним̑, то́кмо и҆е҆ре́ѻ҆мъ е҆ди́нѣмъ;
и҆л̂и нѣ́сте чл̂и в꙽ зако́нѣ, Ꙗ҆́ко в꙽ сꙋбо́ты сщ҃е́ницы в꙽ цр҃кви сꙋботы сквернѧтъ, и҆ непови́нни сꙋть;

Гл҃ю же ва́мъ, ꙗ҆́ко цр҃кве бо́ле е҆сть здѣ̀·

А҆́ще ли бы́сте видѣли чт̂о е҆сть млс̑҇ти хо́щꙋ, а҆ не же́ртвѣ, нико́лиже ѹ҆́бо бы́сте ѻ҆сꙋжд̑али непови́нных̑.
г҃ь бо е҆́сть и҆ сꙋбо́тѣ сн҃ъ чл҃чскїи·

зч̑҇а, м҃е·

И҆́ пришед̑ ѿтꙋдꙋ прїиде на сон̑҇мище их̑.

И҆ с̂е чл҃къ б̂ѣ т̂ꙋ, рꙋкꙋ и҆мы̀ сꙋхꙋ.
и҆ въпросишѧ е҆го гл҃юще, а҆ще досто́итъ въ сꙋбо́ты цѣлити;
да на́нь въз꙽гл҃ютъ·

ѻ҆́н же рече и҆́м꙽.
кто̀ е҆сть ѿ ва́съ чл҃къ, и҆́же и҆́мать ѻ҆вчѧ е҆ді́но, и҆ а́ще впаде́тсѧ в сꙋбо́ты въ ѧ́мꙋ, не и҆́метъ ли, и҆ и́змет꙽;
ко́льми ѹ҆бо лꙋ́чши е҆сть чл҃къ ѻ҆вча́те;

Тѣмже ѹ҆бо досто́итъ в сꙋбо́ты добро твори́ти·

Тогда̀ гл҃а чл҃кꙋ, прострѝ рꙋ́кꙋ твою.
и҆ простретъ, и҆ ѹ҆тверди́сѧ цѣла̀ ꙗ҆ко дрꙋга́а·

зач̑҇, м҃ѕ·

Фарисе́е же шедше совѣтъ сътвори́ша нань, како да е҆го погꙋбѧт̑.
і҆с҃ же разꙋмѣвъ, ѿи҆́де ѿтꙋ́дꙋ,

зач̑҇·

И҆́ по немъ и҆до́шѧ наро́ди мно́ѕи, и҆ і҆сцѣлѝ и҆хъ всѣхъ·

и҆ запрѣти и҆мъ да не ꙗ҆́вѣ е҆го творѧтъ Ꙗ҆́ко да с꙽бꙋдетсѧ рече́ное и҆саїемъ прро̑҇комъ гл҃ющемъ·

Се̂ ѻ҆́трокъ мои е҆гоже и҆зво́лихъ, възлю́бленныѝ мои, на́ньже бл҃говоли дш҃а моѧ.
положꙋ дх҃ь мои на немъ, и҆ сꙋдъ ꙗ҆́зы́комъ възвѣститъ.
не прерѣчет̑, ни възопїет꙽.
ниже ѹ҆слы́шитъ кт̂о на распꙋтїих꙽ гла́са е҆го.
тро́сти съкрꙋше́ны не прело́митъ, и҆ ле́на в꙽не́мшасѧ не ѹ҆гаситъ, до́ндеже и҆зведетъ в꙽ побѣдꙋ сꙋдъ.
и҆ на и҆мѧ е҆го ꙗ҆зы́ци ѹ҆повают̑·

Тогда̀ приведо́ша к немꙋ бѣснꙋ́ющасѧ слѣпа и҆ нѣма, и҆ и҆сцѣли е҆го, ꙗ҆ко слѣпомꙋ и҆ нѣмомꙋ гл҃ати и҆ глѧ́дати·

И҆ дивлѧ́хꙋсѧ вси наро́ди гл҃юще.
е҆да се́и е҆сть х҃с, сн҃ъ двд̑в꙽;
фарїсе́е же слы́шавше, рѣша.
се́и не и҆зго́нитъ бѣсы, токмо ѻ҆ вее҆лзевꙋ́лѣ кнѧ́ѕи бѣсо́в꙽стѣмъ·

Вѣдыи же іс҃ мы́сли их̑, рече и҆мъ.
всѧ́ко црс̑҇тво раздѣ́лшеесѧ на сѧ, запꙋстѣе҆тъ.
и҆ всѧкъ град̑, и҆ли домъ раздѣли́выѝсѧ на́ сѧ, не ста́нетъ.
и҆ а́ще сатана̀, сатанꙋ̀ и҆зго́нит꙽, на́ сѧ раздѣлилсѧ е҆сть, ка́ко ѹ҆бо̀ ста́нетъ црс̑҇тво е҆го;

И҆ а́ще а҆́зъ ѻ҆ вее҆льзевꙋ́лѣ и҆згоню̀ бѣсы, сн҃ове ва́ши ѻ́ комь и҆зго́нѧт꙽;

Сего ра́ди тїи вамъ бꙋ́дꙋть сꙋдїѧ̀.
а҆́ще ли же а҆зъ ѻ҆ дс҃ѣ бж҃їи и҆згоню̀ бѣ́сы, ѹ҆бо пости́же на васъ црс̑҇твїе бж҃їе·

И҆лѝ ка́ко мо́жетъ кт̂о вни́ти в домъ крѣ́пкаго, и҆ съсꙋ́ды е҆го расхи́тити, а҆́ще не пе́рвѣе свѧ́жетъ крѣпкаго, и҆ тогда̀ до́мъ е҆го расхи́титъ;

зач̑҇, м҃з·

И҆́же нѣ́сть со мно́ю, на́ мѧ е҆сть, и҆ і́же не събира́етъ съ мно́ю, растачает̑·

Сего̀ ра́ди гл҃ю вамъ, всѧ́къ грѣхъ и҆ хꙋла, ѿпꙋ́стит̑сѧ чл҃комъ, а҆ ꙗ҆́же на дх҃ъ хꙋла̀, не ѿпꙋ́ститсѧ чл҃ком̑.
и҆ і҆же а҆ще речетъ сло́во на́ сн҃а члчс̑҇каго, ѿпꙋ́ститсѧ е҆мꙋ.
а҆ и҆же речетъ на́ дх҃а ст҃го, не ѿпꙋ́ститсѧ е҆мꙋ, ни в сїи вѣкъ, ни в бꙋ́дꙋщїи·

И҆л̂и сътвори́те дрѣ́во добро, и҆ пло́дъ е҆го до́бръ.
и҆л̂и сътвори́те древо зл̂о, и҆ пло́дъ е҆го зол꙽.
ѿ плода̀ бо древо познано бꙋ́детъ·

Порожд̑енїа е҆хи́днова, ка́ко мо́жете добро гл҃ати, зл̂и сꙋще;
ѿ и҆збы́тка бо срд̑цꙋ, ѹ҆ста гл҃ютъ·

Бл҃гыи чл҃къ, ѿ бл҃гаго съкро́вища и҆зно́ситъ бл҃га́а.
и҆ лꙋка́выи чл҃к꙽, ѿ лꙋка́ваго съкро́вища, и҆зно́ситъ лꙋка́ваѧ·

Гл҃ю же ва́мъ, ꙗ҆́ко всѧ́ко сло́во пра́здно е҆же а҆ще рекꙋтъ чл҃цы, въздадѧ́тъ ѻ҆ не́мъ сло́во въ дн҃ь сꙋд꙽ныи·

ѿ слове́съ б̂о свои҆хъ ѻ҆пра́вдишисѧ, и҆ ѿ слове́съ своих̑ ѻ҆сꙋ́дишисѧ·

зч̑҇а, м҃и·

Тогда̀ ѿвѣща́ша нѣцїи ѿ кни́жник꙽ и фарисе́и гл҃юще.
ѹ҆чи́телю, хо́щем̑ ѿ тебе знаменїе видѣти·

ѻ҆́н же ѿвѣщавъ рече и҆мъ.
родъ лꙋка́въ и҆ прелюбодѣ́и, зна́менїѧ и́щетъ.
и҆ зна́менїе не дастьсѧ е҆мꙋ, то́кмо зна́менїе і҆ѻ́ны про̑҇рка.
ꙗ҆́коже б̂о бѣ̀ і҆ѻ́на въ чревѣ ки́товѣ три дн҃и, и҆ три но́щи.
та́ко бꙋ́детъ и҆ сн҃ъ члчс̑҇кїи в꙽ срд̑ци зем꙽ли три дн҃и, и҆ три но́щи·

Мꙋжїе ниневи́т꙽стїи в꙽ста́нꙋтъ на сꙋдъ с родом̑ симъ, і҆ ѻ҆сꙋ́дѧтъ и҆̀, ꙗ҆́ко пока́ашѧсѧ про́повѣдїю іѻ́ниною.
и҆ с̂е бо́ле і҆ѻ́ны зд̂ѣ·

Цр҃ца ю́ж꙽скаа в꙽ста́нетъ на сꙋдъ с родомъ сим꙽, и҆ ѻ҆сꙋдитъ и҆̀, ꙗ҆́ко прїиде ѿ коне́цъ землѧ̀ слы́шати премꙋ́дрость соло́моновꙋ.
и҆ се бо́ле соло́мона зд̂ѣ·

Є҆гда же нечи́стыи дх̑ꙋ и҆зы́детъ ѿ чл҃ка, прехо́дитъ сквозѣ безвод̑наѧ мѣста, ища̀ поко́ѧ, и҆ не ѻ҆брѣта́етъ.
тогда рече́тъ, въз꙽вращꙋ́сѧ в꙽ домъ мо́и ѿнꙋдꙋже и҆зыдо́хъ.
и҆ пришед̑ ѻ҆брѧ́щетъ пра́зденъ, помете́нъ и҆ ѹ҆краше́нъ.
тогда̀ и҆́дет, и҆ по́иметъ с꙽ собою сед̑мь и҆нѣхъ дꙋховъ лютѣиших̑ себѐ, и҆ вшед̑ше живꙋтъ т̂ꙋ.
и҆ бꙋдꙋтъ послѣднѧа чл҃кꙋ томꙋ горша пе́рвых꙽.
та́ко бꙋдетъ и҆ ро́дꙋ семꙋ лꙋка́вомꙋ·

зач̑҇, м҃ѳ·

Є҆́ще же е҆мꙋ гл҃ющꙋ к꙽ народомъ.
с̂е мати е҆го и҆ братїа е҆го стоѧ́хꙋ вн̂ѣ, и҆щꙋще гл҃ати е҆мꙋ.
рече же нѣ́кїи е҆мꙋ.
с̂е мт҃и твоа̀, и҆ бра́тїа твоѧ вн̂ѣ стоѧ́тъ хотѧ́ще гл҃ати тебѣ.
ѻ҆́нъ же ѿвѣща́въ рече къ гл҃ющемꙋ е҆мꙋ.
кто е҆сть мт҃и моа̀, и҆ кт̂о сꙋть братїѧ моа̀;
и҆ про́стеръ рꙋ́кꙋ свою на ѹ҆чн҃ки своѧ, рече.
с̂е мт҃и моа̀ и҆ братїѧ моа̀.
и҆же б̂о а҆ще сътворитъ во́лю ѿц҃а мое҆го и҆же е҆сть на нб҃сехъ, то́и брат̑ мои, и҆ сестра̀, и҆ мт҃и м̂и е҆сть·

Глв̑҇а, г҃і·

В дн҃ь же то́и и҆зшд̑е і҆с҃ и҆з домꙋ сѣдѧ́ше при мори.
и҆ събра́шасѧ к немꙋ наро́ди мно́ѕи, ꙗ҆́коже е҆мꙋ в кора́бль влѣ́сти и҆ сѣсти, и҆ весь наро́дъ на помо́рїи стоа́ше.
и҆ гл҃а и҆мъ при́тчами мно́го, гл҃ѧ.

зач̑҇, н҃·

Се̂ и҆зы́де сѣаѝ да сѣ́етъ.
и҆ сѣющꙋ е҆мꙋ.
ѻ҆́ва падошѧ при пꙋтѝ.
и҆ прїидо́шѧ пти́цѧ, и҆ позобашѧ ѧ҆̀.
дрꙋга́ѧ же падошѧ на ка́менныхъ, и҆дѣже не и҆мѣ́аше землѧ̀ мно́гы, и҆ а́бїе прозѧбо́шѧ, за́не не и҆мѣ́аше глꙋбины землѧ̀.
сл҃нцꙋ же въсїа́в꙽шꙋ, присвѣнꙋшѧ, и҆ зане не и҆мѣ́ахꙋ коренїѧ, и҆схо́шѧ.
дрꙋга́ѧ же падошѧ в꙽ трьнїи, и҆ взы́де трьнїе и҆ подави их̑·

дрꙋга́ѧ же падошѧ на землѝ до́брѣи.
и҆ даа́хꙋ пло́дъ.
ѻ҆́во ѹ҆бо сто̀, ѻ҆́во же шестьдесѧт̑.
ѻ҆́во тридесѧть·

И҆мѣаѝ ѹ҆́ши слы́шати, да слы́шит̑·

зач̑҇, н҃а·

И҆́ пристꙋпивше ѹ҆чн҃ци е҆го, рекоша е҆мꙋ, почто̀ при́тчами гл҃еши и҆м꙽;
ѻ҆́нъ же ѿвѣщавъ, рече и҆мъ.
ꙗ҆́ко ва́мъ дано е҆сть разꙋмѣти та́ины црс̑҇твїа нбс̑҇наго.
ѻ҆нѣмъ же не дано̀ е҆сть·

И҆же б̂о и҆́мать, дастьсѧ е҆мꙋ, и҆ преи҆збꙋ́детъ е҆мꙋ.
а҆ и҆же не и́мать, и҆ е҆же и́мать възметсѧ ѿ него·

Сего ра́ди в꙽ при́тчѧхъ гл҃ю и҆мъ, ꙗ҆́ко ви́дѧще неви́дѧтъ, и҆ слы́шаще не слы́шѧтъ, ни разꙋмѣютъ.
и҆ събыва́етсѧ в них̑ про̑҇рчество і҆са́іно, гл҃ющее.
слꙋ́хомъ ѹ҆слы́шите, и҆ не и́мате разꙋмѣти.
и҆ зрѧ́ще ѹ҆́зрите, и҆ не и҆́мате ви́дѣти.
ѻ҆тлъстѣ б̂о срд̑це людїи сих̑, и҆ ѹ҆ши́ма тѧж̑ко слы́шаша, и҆ ѻ҆́чи свои смѣжи́шѧ, да не когда̀ ѹ҆зрѧтъ ѻ҆чи́ма, и҆ ѹ҆ши́ма ѹ҆слышѧтъ, и҆ срд̑цем̑ разꙋмѣютъ, и҆ ѻ҆братѧ́тсѧ, и҆ і҆сцѣлю̀ и҆хъ·

Ва́ша же бл҃же́наа̀ ѻ҆чеса̀, ꙗ҆́ко ви́дѧтъ, и҆ ѹ́ши ва́ши, ꙗ҆ко слы́шѧтъ·

А҆минь б̂о гл҃ю ва́м꙽, ꙗ҆́ко мно́ѕи про̑҇рцы и҆ пра́вед̑ницы въжд̑елѣшѧ ви́дѣти ꙗ҆́же ви́дите, и҆ не видѣшѧ.
и҆ слы́шѧти ꙗ҆́же слы́шите, и҆ не слы́шаша·

Вы̂ же ѹ҆бо ѹ҆слы́шите прит̑чю сѣющаго·

Всѧ́комꙋ слы́шащемꙋ сло́во црс̑҇твїа, и҆ не разꙋмѣвающꙋ, прихо́дитъ лꙋка́выи, и҆ въсхищаетъ всѣѧнное в꙽ срд̑ци е҆го, с̂е е҆сть иже при пꙋтѝ сѣ́анное·

А҆ на ка́мен꙽ныхъ сѣ́анное, се́и е҆сть слы́шаѝ сло́во, и҆ а́бїе с ра́достїю прїе́млетъ е҆̀, не и́мать же ко́рене в себѣ, н̂о временен̑҇ е҆сть·

Бы́вши же печали и҆л̂и гоне́нїю словесѐ ра́ди, а҆́бїе съблажнѧ́етсѧ·

А҆ сѣ́анное в꙽ тернїи, се́и е҆сть слы́шаѝ сло́во, и҆ печа́ль вѣка сего̀, и҆ лесть бога́тъства, подавлѧ́етъ сло́во, и҆ бес плода̀ быва́етъ·

А҆ сѣ́анное на до́брѣи зем̑лѝ, се́и е҆сть слы́шаѝ сло́во, и҆ разꙋмѣва́а, и҆же ѹ҆бо пло́дъ прино́ситъ, и҆ твори́тъ, ѻ҆́въ сто, ѻ҆́в꙽ же шестьдесѧт̑, ѻ҆́въ тридесѧть·

зач̑҇, н҃в·

И҆́нꙋ при́тчю пред̑ложи и҆мъ гл҃ѧ.
ѹ҆подобисѧ црс̑҇твїе нбс̑҇ное чл҃кꙋ сѣ́авшꙋ до́брое сѣмѧ на селѣ̀ своемъ.
спѧ́щемъ же чл҃комъ, прїиде вра́гъ е҆го, и҆ всѣ́а плѣвелы посредѣ пшени́ца, и҆ ѿи́де.
е҆гда же прозѧбе трава̀, и҆ плод̑ сътворѝ, тогда̀ ꙗ҆ви́шѧсѧ и҆ плѣ́велїе·

Пришед̑ше же рабѝ господи́на, рѣ́шѧ е҆мꙋ.
г҃и, не до́брое ли сѣмѧ сѣ́алъ е҆си на селѣ своемъ;
ѿкꙋ́дꙋ ѹ҆бо и҆́мать плѣвелы;
ѻ҆́нъ же рече и҆мъ.
врагъ чл҃къ с̂е сътворѝ·

Раби же рѣшѧ е҆мꙋ.
хо́щеши ли ѹ҆бо, да шед̑ше и҆сплевемъ ѧ҆̀;
ѻ҆́нъ же речѐ и҆м꙽, н̂и.
да не когда̀ въстръга́юще плѣвелы, въстръ́гнете кꙋпно с ни́ми и҆ пшени́цꙋ.
ѻ҆ста́вите растѝ ѻ҆боѐ кꙋпно до жа́твы, и҆ въ времѧ жа́твы рекꙋ жа́телем̑.
съберѣте пе́рвѣе плѣвелы, и҆ свѧжи́те и҆хъ в꙽ снопы̀ ꙗ҆́ко съжежтѝ ѧ҆̀·

А҆ пшени́цꙋ съберѣте в꙽ жи́тницꙋ мою·

зач̑҇, н҃г·

И҆́нꙋ при́тчꙋ пред̑ложи и҆мъ, гл҃ѧ.
подобно е҆сть црс̑҇твїе нбс̑҇ное, зрьнꙋ горꙋшичнꙋ, е҆́же взе́мъ чл҃къ, всѣ́а на селѣ своем꙽, е҆же ма́лѣише ѹ҆бо е҆сть ѿ всх̑ѣ сѣменъ.
е҆гда же възрастетъ, бо́лее всѣхъ ѕе́лїи е҆сть, и҆ быва́етъ дрѣво, ꙗ҆́ко прїитѝ пти́цѧмъ нбс̑҇ным꙽, и҆ вита́ти на вѣтвѣхъ е҆го·

И҆́нꙋ при́тчю гл҃а и҆мъ.
подобно е҆сть црс̑҇твїе нбс̑҇ное, ква́сꙋ, и҆же вземши жена съкры̀ в꙽ мꙋ́чныхъ са́тѣхъ тр̂и, дондеже въскисо́шѧ вс̂ѧ·

Сїа вс̂ѧ гл҃а і҆с҃ в꙽ при́тчѧхъ народомъ, и҆ бес при́тча ничесо́же гл҃аше к нимъ, ꙗ҆́ко да с꙽бꙋ́детсѧ рече́ное прро̑҇комъ гл҃ющимъ.
ѿврьзꙋ въ при́тчѧхъ ѹ҆ста моа, ѿры́гнꙋ съкрове́наѧ ѿ сложе́нїа ми́рꙋ·

Тогда ѻ҆ста́вль наро́ды, прїиде в дом̑ і҆с҃·

зач̑҇, н҃д·

И҆́ пристꙋпи́шѧ к немꙋ ѹ҆чн҃цы е҆го гл҃юще.
скажѝ намъ при́тчю плѣвелъ се́лныхъ·

ѻ҆́нъ же ѿвѣщавъ, речѐ и҆мъ·

Всѣ́авыи до́брое сѣмѧ, е҆сть сн҃ь члчс̑҇кїи·

а҆ село, е҆сть ми́ръ.
до́брое же сѣмѧ, сїи сꙋть сн҃ве црс̑҇твїа·

А҆ плѣвели сꙋть сн҃ве непрїа́зниннїи·

а врагъ всѣавыи и҆хъ, е҆сть дїавол꙽·

а҆ жа́тва, кончи́на вѣка е҆сть·

а҆ жа́теле, а҆́гг҃ли сꙋть·

ꙗ҆́коже ѹ҆бо събира́ютъ плѣвелъ, и҆ ѻ҆гнемъ съжизаютъ, тако бꙋ́детъ в꙽ скончанїе вѣ́ка сего·

По́слет꙽ сн҃ь члчс̑҇кїи а҆́гг҃лы своа, и҆ съберꙋтъ ѿ црс̑҇твїа е҆го вс̂ѧ съблазны, и҆ творѧ́щаѧ безако́нїе, и҆ в꙽ве́ргꙋть и҆хъ в пещь ѻ҆́гненꙋ·

т̂ꙋ бꙋдетъ плачь, и҆ скре́жетъ зꙋбом꙽·

Тогда пра́вед̑ницы просвѣтѧтсѧ ꙗ҆ко слн҃це в꙽ црс̑҇твїи ѿц҃а и҆хъ.
и҆мѣаѝ ѹ҆ши слы́шати, да слы́шитъ·

зач̑҇, н҃е·

Па́кы подобно е҆сть црс̑҇твїе нбс̑҇ное съкро́вищꙋ съкрове́нꙋ на селѣ, е҆же ѻ҆брѣт꙽ чл҃къ, съкры̀, и҆ ѿ ра́дости е҆го и҆дет̑, и҆ вс̂ѧ е҆ли́ка и҆́мать, продаетъ, и҆ кꙋпꙋ́етъ село̀ то̀·

зач̑҇·

Па́кы подо́бно е҆сть црс̑҇твїе нбс̑҇ное чл҃кꙋ кꙋпцꙋ, и҆́щꙋщꙋ до́брыа би́серы.
и҆же ѻ҆брѣте е҆дінъ мно́гоцѣ́ненъ би́серъ, шедъ про́дасть вс̂е е҆ли́ко и҆мѧше, и҆ кꙋпѝ е҆го·

Па́кы подобно е҆сть црс̑҇твїе нбс̑҇ное не́водꙋ в꙽ве́рженꙋ в море, и́ ѿ всѧ́кого ро́да събра́вшꙋ.
и҆же е҆гда и҆спол꙽нисѧ, и҆з꙽влеко́ша и҆̀ на кра́и, и сд̑ѣше и҆збрашѧ до́брыа в сосꙋды, а҆ злы́ѧ и҆зверго́шѧ вон꙽·

Та́ко бꙋ́детъ въ сконча́нїе вѣка.
и҆зы́дꙋтъ а҆́гг҃ли, и҆ ѿлꙋчѧтъ ѕлыѧ ѿ среды̀ пра́вед̑ныхъ, и҆ в꙽ве́ргꙋтъ их̑ в꙽ пещь ѻ҆́гненꙋ.
тꙋ бꙋдетъ плачь и҆ скрежетъ зꙋбо́мъ·

Гл҃а и҆мъ і҆с҃, разꙋмѣ́сте ли сїа вс̂ѧ;
гл҃ашѧ е҆мꙋ, е҆ѝ г҃и·

ѻ҆́н же рече и҆м꙽.
сего ра́ди всѧкъ кни́жникъ наѹ҆чи́всѧ црс̑҇твїю нбс̑҇номꙋ, подо́бенъ е҆сть чл҃кꙋ домови́тꙋ, и҆же и҆зно́ситъ ѿ съкро́вища свое҆го но́ваѧ и҆ ветха́ѧ·

зач̑҇, н҃ѕ·

И҆́ бысть е҆гда̀ сконча і҆с҃ при́тчꙋ сїю, преиде ѿтꙋ́дꙋ.
и҆ пришед̑ въ ѿч҃ьствїе своѐ, ѹ҆ча́ше и҆хъ на со́нмищых̑ и҆хъ, ꙗ҆́ко дивитисѧ и҆мъ, и҆ гл҃ати.
ѿкꙋдꙋ семꙋ премꙋ́дрость сїа и҆ си́лы;
не се́и л̂и е҆сть текто́новь сн҃ъ;
не мт҃и л̂и е҆го нарица́етсѧ м҃рїа́мь, и҆ братїа е҆го, і҆аковъ, и҆ і҆ѻ҆сїи, и҆ си́монъ, и҆ і҆юда;
и҆ сестры е҆го, не всѧ̀ л̂и в꙽ нас꙽ сꙋть;
ѿкꙋ́дꙋ ѹ҆бо семꙋ сїа вс̂ѧ;
и҆ блажнѧ́хꙋсѧ ѻ҆ нем꙽·

І҆с҃ же речѐ и҆м꙽.
нѣсть прро̑҇кь бе́с чести, то́кмо въ ѿч҃ьствїи свое҆мъ, и҆ в домꙋ̀ свое҆м꙽.
и҆ не сътвори т̂ꙋ си́лы мно́гы, за невѣрство и҆хъ·

Глв̑҇а, д҃і·

зач̑҇, н҃з·

В то времѧ ѹ҆слы́шавъ и҆́род꙽ четвертовла́стникъ слꙋх꙽ і҆с҃овъ, и҆ рече ѻ҆трокомъ свои҆мъ, се́и е҆сть і҆ѻа́ннъ креститель, то́и въскр҃се ѿ мрътвыхъ, и҆ сего ради си́лы дѣют꙽сѧ ѻ҆ немъ·

И҆́родъ б̂о е́мъ і҆ѻ҆а҆нна, свѧза̀ е҆го и҆ всади в тем꙽ницꙋ, и҆родїѧ́ды ради жены фили́ппа бра́та свое҆го·

Гл҃аше бо е҆мꙋ і҆ѻ҆а́ннъ, не досто́итъ т̂и и҆мѣти еа̀.
и҆ хотѧше е҆го ѹ҆би́ти, ѹ҆боа́сѧ наро́да.
зане ꙗ҆́ко прро̑҇ка е҆го и҆мѣ́ахꙋ·

дн҃и же бывшꙋ рожд̑ьства и҆́родова, плѧса̀ дщ̂и и҆родїа́дина посредѣ.
и҆ ѹ҆годѝ и҆́родови, тѣмже и҆ с꙽ клѧ́твою изрече е́й да́ти е҆гоже а҆ще въспро́ситъ·

ѻ҆на же нава́жд̑ена матерїю своею̀, да́жд̑ь м̂и рече зд̂ѣ на блю́дѣ главꙋ і҆ѻ҆а́нна крс̑҇ти́телѧ.
и҆ печа́ленъ бысть цр҃ь.
клѧ́твы же ради и҆ за възлежа́щихъ с ним̑, повелѣ̀ да́ти е́й.
и҆ посла́въ ѹ҆сѣкнꙋ і҆ѻ҆а́нна в темни́ци.
и҆ принесо́ша главꙋ̀ е҆го на блю́дѣ, и҆ дашѧ дв҃ци, и҆ ѿнесѐ ма́тери свое́й·

И҆ пристꙋпльше ѹ҆ченицы е҆го, взѧ́ша тѣло е҆го, и҆ погребо́ша е҆̀, и҆ пришед̑ше възвѣсти́ша і҆сви·

И҆ слы́шавъ і҆с҃, ѿи́де ѿтꙋ́дꙋ в꙽ корабли в꙽ пꙋ́сто мѣ́сто е҆ді́нъ·

и҆ слы́шавше наро́ди, по немъ и҆до́ша, пѣши ѿ градовъ·

зач̑҇, н҃и·

І҆ и҆зшд̑е і҆с҃, видѣ мно́гъ народ̑, и҆ млс̑҇рдова ѻ҆ нихъ, і҆ и҆сцѣли недꙋжныа их̑·

Поздѣ же бы́вшꙋ, пристꙋпи́ша к немꙋ ѹ҆ченицы̀ е҆го гл҃юще.
пꙋ́сто е҆сть мѣ́сто, и҆ часъ ѹ҆же минꙋ̀.
ѿпꙋстѝ наро́ды, да шед̑ше в꙽ ве́си кꙋпѧтъ брашна себѣ·

І҆с҃ же рече и҆мъ, не требꙋютъ ѿи҆ти.
дади́те и҆мъ в̂ы ꙗ҆́сти·

ѻ҆ни же гл҃ашѧ е҆мꙋ.
не и́мамы зд̂ѣ то́кмо пѧть хлѣбъ, и҆ двѣ ры́бѣ·

ѻ҆́нъ же рече, принесѣте ми их̑ сѣмо.
и҆ повелѣ наро́домъ възлежти на травѣ, и҆ прїемъ пѧть хлѣ́бы, и҆ ѻ҆бѣ рыбѣ, възрѣвъ на нб҃о, блс̑҇ви, и҆ преломивъ, дасть ѹ҆чн҃комъ хлѣбы, ѹ҆ченицы же наро́домъ.
и҆ ꙗ҆́до́шѧ вс̂и и҆ насы́тишѧсѧ.
и҆ взѧ́шѧ и҆збы́т꙽кы ѹ҆крꙋхъ, дванадесѧте ко́шѧ и҆спо́лнь.
ꙗ҆́дꙋщих̑ же б̂ѣ мꙋжїи ꙗ҆́ко пѧть тысꙋщъ, ра́звѣ женъ и҆ дѣтїи·

зач̑҇, н҃ѳ·

І҆ а́бїе понꙋди і҆с҃ ѹ҆ченикы своа̀ в꙽лѣ́сти в кора́бль, и҆ вари́ти е҆го на ѻ҆́номъ полꙋ, дондеже ѿпꙋсти́тъ наро́ды·

И ѿпꙋсти́въ наро́ды, в꙽зы́де на горꙋ е҆ді́нъ помоли́тисѧ·

Поздѣ же бы́вшꙋ, е҆ді́нъ б̂ѣ т̂ꙋ.
корабль же б̂ѣ посредѣ мо́рѧ вла́асѧ влънами.
бѣ б̂о проти́венъ вѣтръ·

В четве́ртꙋю же стражꙋ нощи, и҆́де к нимъ і҆с҃, ходѧ по́ морю.
и҆ видѣ́вше е҆го ѹ҆ченицы по́ морю ходѧща, смꙋти́шасѧ, гл҃юще, ꙗ҆́ко приѕракъ е҆сть.
и҆ ѿ страха възъпиша·

А҆́бие же рече и҆м꙽ и҆с҃, г҃лѧ.
дръза́ите, а҆зъ е҆смь, не бо́итесѧ·

ѿвѣща́въ же петръ, речѐ.
г҃и, а҆ще т̂ы е҆си, повели ми прїити к тебѣ по водамъ.
ѻ҆́н же реч̑҇, прїиди·

І҆ и҆злѣзъ и҆с кораблѧ петръ, хожд̑аше по водам꙽, прїити къ і҆с҃о́ви.
видѧ же вѣтръ крѣпокъ, ѹ҆боа́сѧ·

и҆ наче́нъ ѹ҆топати, възъпѝ гл҃ѧ.
г҃и, сп҃си м̂ѧ·

И҆ а́бїе і҆с҃ про́стеръ рꙋкꙋ, ѧ҆тъ е҆го, и҆ гл҃а е҆мꙋ.
маловѣре, почто сѧ ѹ҆сомнѣ̀ и҆ влѣ́зшема и҆́ма в кора́бль, преста̀ вѣтръ·

Сꙋщїи же в꙽ кораблѝ пришед̑ше, поклони́шасѧ е҆мꙋ, гл҃юще.
въи́стинꙋ бж҃їи сн҃ъ е҆си.
и҆ прешед̑ше, прїидо́ша в꙽ зе́млю генисаретъскꙋ·

зач̑҇, ѯ҃·

И҆́ позна́вше е҆го мꙋжїе мѣ́ста того, посла́шѧ въ всю̀ странꙋ т̂ꙋ.
и҆ принесо́шѧ к꙽ немꙋ вс̂ѧ болѧ́щаѧ, и҆ молѧ́хꙋ е҆го, да то́кмо прикоснт̑ꙋсѧвъскри́лїю ризъ е҆го.
и҆ е҆лици прикоснꙋшѧсѧ, сп҃се́ни бы́шѧ·

Глв̑҇а, е҃і·

Тогда̀ пристꙋпи́шѧ къ і҆с҃ови и҆же ѿ і҆ерс̑҇ли́ма кни́жницы и҆ фарисе́е, гл҃юще.
почто̀ ѹ҆ченицы̀ твоѝ престꙋпа́ют̑ преда́нїа ста́рець;
не ѹ҆мыва́ютъ б̂о рꙋк꙽ своих̑ е҆гда̀ хлѣбъ ꙗ҆дѧт̑·

ѻ҆́нъ же ѿвѣща́въ рече и҆мъ.
почто̀ и҆ в̂ы престꙋпа́ете за́повѣдь бж҃їю за преданїе ва́ше;
б҃ъ б̂о заповѣда̀, гл҃ѧ.
чтѝ ѿц҃а и҆ ма́тере, і҆ и҆же злосло́витъ ѿц҃а и҆ли ма́тере, сме́ртїю да ѹ҆́мрет.
вы же гл҃ете, и҆же а҆ще рече́тъ ѿц҃ꙋ и҆ли ма́тери, даръ.
е҆же а҆́ще ѿ мене пользова́лсѧ е҆си.
и҆ да не почте́тъ ѿц҃а свое҆го и҆л̂и мт҃ри.
и҆ разори́сте за́повѣдь бж҃їю, за преданїе ваше.
лицемѣ́ри, до́брѣ прро̑҇чьствова ѻ҆ васъ і҆са́іа гл҃ѧ·

Приближа́ют̑сѧ мнѣ̀ людїе сїи ѹ҆сты̀ свои́ми, и҆ ѹ҆стнами чтꙋтъ м̂ѧ, срд̑це же и҆хъ дале́че ѿстоитъ ѿ мене.
всꙋе же чтꙋтъ м̂ѧ, ѹ҆ча́ще ѹ҆ченїѧ за́повѣди члчс̑҇кы·

И҆ призвавъ наро́ды, рече и҆мъ.
слы́шите, и҆ разꙋмѣите·

Не входѧ́щее въ ѹ҆ста сквернит̑ чл҃ка, но исходѧ́щеѐ и҆зъ ѹ҆стъ, т̂о скверни́тъ чл҃ка·

зач̑҇, ѯа҃·

Тогда̀ пристꙋпльше ѹ҆чн҃цы его, рѣшѧ е҆мꙋ.
вѣ́си ли, ꙗ҆ко фарисе́е слы́ша́вше сло́во, съблазни́шѧсѧ;
ѻ҆́н꙽ же ѿвѣщавъ рече.
всѧкъ садъ е҆гоже не насади ѿц҃ъ мо́и нбс̑҇ныи, и҆скорени́тсѧ·

ѻ҆ста́вите и҆хъ, вожд̑и сꙋть слѣпи слѣпцем꙽·

Слѣпець же слѣп꙽ца а҆ще во́дитъ, ѻ҆́ба въ ѧ́мꙋ в꙽паде́тасѧ·

ѿвѣщавь же петръ, рече е҆мꙋ.
скажи намъ при́тчꙋ сїю.
і҆с҃ же рече и҆мъ.
е҆дина́че ли и҆ в̂ы без꙽ ра́зꙋма е҆сте;
не ѹ҆̀ ли разꙋмѣвае҆те, ꙗ҆́ко всѧко е҆же в꙽ходитъ въ ѹ҆ста̀, въ чрево вмѣщаетсѧ, и҆ а҆федрономъ и҆схо́дитъ;
и҆сходѧ́щаѧ же и҆зъ ѹ҆стъ, ѿ срд̑ца и҆схо́дѧтъ, и҆ т̂а сквернѧтъ чл҃ка·

ѿ срд̑ца б̂о и҆схо́дѧтъ помышле́нїѧ зла, ѹ҆бїиства, прелюбодѣѧ́нїѧ, любодѣ́анїѧ, татбы̀, лжесвѣдѣтельства, хꙋлы̀, сїѧ сꙋть сквернѧ́щаа чл҃ка.
а е́же не ѹ҆мывенами рꙋка́ми ꙗ҆́сти, не сквернит̑ чл҃ка·

зач̑҇, ѯв҃·

И҆́ ізъшедъ ѿтꙋдꙋ і҆с҃, ѿи́де въ страны тѷрскїа и҆ сидо́нскїа·

И҆ с̂е жена ханане́иска ѿ предѣлъ тѣхъ и҆зшд̑еши, възъпѝ к꙽ немꙋ, гл҃ющи.
поми́лꙋи м̂ѧ г҃и, сн҃е дввд̑ъ, дщѝ моѧ̀ злѣ бѣсꙋе҆тсѧ.
ѻ҆́н же не ѿвѣща е́й словесѐ.
и҆ пристꙋпльше ѹ҆чн҃цы̀ е҆го, молѧ́хꙋ е҆го, гл҃юще.
ѿпꙋсти ю҆̀, ꙗ҆́ко въпїет̑ в꙽ слд̑ѣ насъ·

ѻ҆́н же ѿвѣщавъ, речѐ.
нѣ́смь по́сланъ, то́кмо къ ѻ҆вцамъ поги́бшимъ до́мꙋ і҆ил҃ева·

ѻ҆на же пришед̑ши поклонисѧ е҆мꙋ, гл҃ющи.
г҃и, помозѝ м̂и·

ѻ҆н же ѿвѣщав꙽, рече.
нѣсть добро ѿꙗ҆́ти хлѣба чадомъ, и҆ поврещѝ ѱомъ.
ѻ҆на же реч̑҇, е́й г҃и, и҆бо и҆ ѱи ꙗ҆дѧ́тъ ѿ крꙋпи́цъ па́дающихъ ѿ трапе́зы господїи своих̑·

Тогда ѿвѣща́въ і҆с҃, рече е́й·

ѽ же́но, ве́лїа вѣра твоа̀, бꙋди тебѣ ꙗ҆́коже хощеши·

і҆ и҆сцѣлѣ дщѝ еа̀ ѿ того часа·

зач̑҇. ѯг҃·

І҆ прешд̑е ѿтꙋдꙋ і҆с҃, прїиде на́ море галиле́иское.
и҆ въз꙽шед̑ на́ горꙋ, сѣдѣ̀ т̂ꙋ·

И҆ пристꙋпи́шѧ к немꙋ народи мно́ѕи, и҆мꙋще с꙽ собою хро́мы, слѣпы, нѣмы, бѣдны, і҆ и́ны мно́гы.
и҆ приверго́шѧ их̑, к꙽ нога́ма і҆с҃овома, і҆ и҆сцѣли и҆хъ, ꙗ҆́коже наро́домъ дивитисѧ, видѧ́ще нѣмыѧ гл҃юща, бд̑ѣ́ныѧ здра́вы, хро́мыѧ ходѧ́ща, и҆ слѣпыѧ ви́дѧща, и҆ сла́влѧхꙋ б҃а і҆ил҃ева·

зач̑҇, ѯд҃·

І҆с҃ же призвавъ ѹ҆чн҃кы своѧ̀, рече им̑.
млс̑҇рдꙋю ѻ҆ наро́дѣ семъ.
ꙗ҆ко ѹ҆же дн҃и тр̂и присѣдѧтъ мн̂ѣ, и҆ не имꙋтъ чесо ꙗ҆́сти.
и҆ ѿпꙋстити их̑ не ꙗ҆́дшѧ не хощꙋ̀, да не ка́ко ѻ҆слабѣютъ на пꙋти·

І҆ гл҃ашѧ емꙋ ѹ҆чн҃цы̀ е҆го.
ѿкꙋдꙋ намъ в пꙋстыни хлѣ́би толи́цы ꙗ҆́ко да насы́титсѧ толикъ наро́дъ;
и҆ гл҃а и҆мъ і҆с҃.
коли́ко хлѣбъ и́мате;
ѻ҆ни́ же рѣша.
сед̑м꙽, и҆ мало ры́биц꙽.
и҆ повелѣ наро́домъ възлежти на зем꙽лѝ.
и҆ прїемъ сед̑мь хлѣ́бы, и҆ ры́бы, хвалꙋ възда́въ преломѝ, и҆ дасть ѹ҆чн҃комъ свои҆мъ, ѹ҆чн҃цы же наро́дом̑.
и҆ ꙗ҆до́ша вс̂и, и҆ насытишасѧ.
и҆ взѧ́ша и҆збы́ткы ѹ҆крꙋхъ, сед̑мь ко́шницъ и҆сполнь.
ꙗ҆дшихъ же бѧше, четы́ри тысꙋща мꙋжїи, развѣ женъ и҆ дѣтїи·

И҆ ѿпꙋсти́въ наро́ды, влѣзе в꙽ корабль, и҆ прїиде в꙽ предѣ́лы магдалын꙽скы·

Глв̑҇а, ѕ҃і·

зач̑҇, ѯе҃·

И пристꙋпи́ша к немꙋ фарисе́е и҆ сад̑дꙋкеѐ, и҆скꙋша́юще, въпроси́шѧ е҆го, ѕна́менїа с нб҃се показа́ти и҆мъ.
ѻ҆́нъ же ѿвѣщавъ рече и҆мъ.
ве́черꙋ бы́вшꙋ, гл҃ете, ве́дро, чрьмнꙋетъ бо сѧ нб҃о.
и҆ ѹ҆трꙋ, днес̑҇ зима̀, чрьмнꙋетъ бо сѧ дрѧселꙋ́а нб҃о.
лицемѣри, лице ѹ҆бо нб҃си ѹ҆мѣете раз꙽сꙋжати, ѕна́менїа же временемъ, не мо́жете и҆скꙋсити;
ро́дъ лꙋкавъ и҆ прелюбодѣ́иныи, ѕна́менїа и҆́щет̑.
и҆ ѕна́менїе не дастъсѧ е҆мꙋ, то́кмо зна́менїе і҆ѻ́ны прро̑҇ка.
и҆ ѻ҆ста́вль и҆х꙽ ѿи́де·

И҆ прешед̑ше ѹ҆чн҃цы е҆го на ѻ҆н꙽ полъ, забы́шѧ хлѣ́бы взѧти·

зач̑҇, ѯѕ҃·

І҆с҃ же рече и҆м꙽.
внемлѣте и҆ блюдѣтесѧ ѿ кваса фарисе́иска и҆ сад̑дꙋке́иска·

ѻ҆ни́ же помышлѧ́хꙋ в себѣ, гл҃юще.
ꙗ҆́ко хлѣ́бы не взѧхомъ·

Разꙋмѣвь же і҆с҃, рече и҆мъ.
что мы́слите в себѣ маловѣ́ри, ꙗ҆́ко хлѣ́бы не взѧ́сте;
не ѹ҆̀ ли разꙋмѣете, ниже помните, пѧть хлѣбы пѧтимъ ты́сꙋщам꙽, и҆ коли́ко, ко́шъ взѧ́сте;
нѝ л̂и сед̑мь хлѣбы четы́ремъ ты́сꙋщѧмъ, и҆ коли́ко ко́шницъ взѧ́сте;
ка́ко не разꙋмѣете, ꙗ҆́ко не ѻ҆ хлѣбх̑ѣ рѣхъ вам꙽, внимати.
н̂о ѿ кваса фарисе́иска и҆ сад̑дꙋке́иска;
тогда разꙋмѣша, ꙗ҆́ко не речѐ храни́тисѧ ѿ кваса хлѣбнаго, но ѿ ѹ҆че́нїа фарисе́иска и҆ сад̑дꙋке́иска·

зач̑҇, ѯз҃·

Пришед̑ же і҆с҃ въ страны кесарїа фили́п꙽повы, въпрашаше ѹ҆чн҃кы своа, гл҃ѧ.
кого̀ м̂ѧ гл҃ютъ чл҃цы сꙋща сн҃а члчс̑҇каго;
ѻ҆ни же рѣшѧ.
ѻ҆́ви ѹ҆бо і҆ѻа́нна крс̑҇тлѧ, и҆нїи же и҆лїю, дрꙋзїиж̑ і҆е҆ремїю, и҆ли е҆ді́ного ѿ про̑҇ркъ·

Гл҃а и҆м꙽ і҆с҃.
вы же кого̀ м̂ѧ гл҃ете быти;
ѿвѣщавъ же си́монъ пе́тръ, рече.
т̂ы е҆си х҃с, сн҃ь б҃а живаго·

И҆ ѿвѣщавъ і҆с҃, рече е҆мꙋ·

Блаже́нъ е҆си си́моне, варъ і҆ѻ́на, ꙗ҆́ко плоть и҆ кровь не ѧ҆ви тебѣ, н̂о ѿц҃ь мо́и и҆же на нб҃сехъ.
і а́зъ же тебѣ гл҃ю, ꙗ҆́ко т̂ы е҆си петр꙽, и҆ на семъ ка́мени съзи́жд̑ꙋ цр҃квь мою.
и҆ вра́та а҆дова не ѹ҆долѣ́ютъ е́и·

И҆ дам꙽ ти ключѧ црс̑҇твїа нбс̑҇наго.
и҆ е҆же а҆ще свѧ́жеши на земли, бꙋдетъ свѧзано на́ нб҃сехъ·

и҆ е́же а҆ще разрѣшиши на земли, бꙋ́детъ разрѣшено на нб҃сехъ·

зач̑҇, ѯи҃·

Тогда запрѣти і҆с҃ ѹ҆чн҃комъ свои́м꙽, да никомꙋже рекꙋтъ, ꙗ҆́ко се́и і҆с҃ е҆сть х҃с·

ѿтолѣ начатъ і҆с҃ ска́зовати ѹ҆чн҃комъ свои҆мъ, ꙗ҆́ко подобаетъ е҆мꙋ и҆тѝ въ і҆ерлс̑҇и́мъ, и҆ мно́го пострада́ти ѿ старецъ, и҆ а҆рхїере́и и҆ книж꙽никъ, и҆ ѹ҆бїенꙋ быти, и҆ тре́тїи дн҃ь въскрс̑҇нꙋти·

Пе́тръ же начатъ прерѣцати е҆мꙋ гл҃ѧ.
млс̑҇рдъ ты г҃и, не имать быти тебѣ с̂е·

ѻ҆́нъ же ѻ҆бращ꙽сѧ рече петро́ви.
и҆дѝ за мною сатана̀, съблазнъ м̂и е҆си, ꙗ҆́ко не мы́слиши ꙗ҆́же сꙋть бж҃їа, н̂о чл҃чьскаа·

зач̑҇, ѯѳ҃·

Тогда̀ і҆с҃, рече ѹ҆ченикомъ свои҆м꙽.
а҆ще кто̀ хо́щетъ по мнѣ и҆тѝ, да ѿврьжетсѧ себѐ, и҆ во́зметъ крс̑҇тъ сво́и, и҆ по мнѣ грѧдетъ·

И҆́же б̂о а҆ще хо́щетъ дш҃ꙋ свою̀ спс̑҇ти, погꙋбитъ ю҆̀.
и҆ і҆же а́ще погꙋбитъ дш҃ꙋ свою̀ мене ради, ѻ҆брѧ́щетъ ю҆̀.
каа̀ б̂о по́лза чл҃кꙋ, а҆ще ми́ръ ве́сь приѻ҆брѧ́щетъ, дш҃ꙋ же свою ѿтщетит̑;
и҆ли чт̂о дасть чл҃кь и҆змѣ́нꙋ за дш҃ꙋ свою;
прїитѝ б̂о и҆́мать сн҃ъ чллс̑҇кїи въ славѣ ѿц҃а свое҆го, съ а҆гг҃лы свои́ми, и тогда̀ възда́стъ комꙋжд̑о по дѣанїем̑ е҆го·

А҆минь гл҃ю вамъ, ꙗ҆ко сꙋть нѣцїи ѿ здѣ̀ стоѧ́щихъ, и҆же не и́мꙋтъ вкꙋсити смерти, дондеже ви́дѧт̑ сн҃а чл҃чьскаго грѧдꙋща въ црс̑҇твїи своем̑·

Глв̑҇а, з҃і·

зач̑҇, о҃·

И по́ дн҃ехъ шестихъ, поа́тъ і҆с҃ петра и҆ і҆а́кова, и҆ і҆ѻ҆а́нна брата е҆го, и҆ възведе и҆хъ на́ горꙋ высокꙋ е҆ди́ны.
и҆ преѻ҆брази́сѧ пред̑ ними, и҆ просвѣти́сѧ лице е҆го ꙗ҆́ко сл҃нце, ри́зы же е҆го быша бѣлы ꙗ҆ко свѣтъ·

И҆ с̂е ꙗ҆ви́стасѧ и҆мъ моѷсїи і҆ и҆лїа, с нимъ гл҃юща·

ѿвѣщавь же пе́тръ, реч̑҇ къ і҆с҃ови.
г҃и, добро е҆сть намъ зд̂ѣ быти.
а҆ще хо́щеши, сътворимъ зд̂ѣ тр̂и сѣни, тебѣ е҆ді́нꙋ, и҆ моѷсе́ѻ҆ви е҆ді́нꙋ, і҆ е҆ді́нꙋ и҆лїи.
е҆ще же е҆мꙋ гл҃ющꙋ, с̂е ѻ҆́блакъ свѣтелъ ѻ҆сѣни их̑·

и҆ с̂е гласъ и҆зъ ѻ҆́блака гл҃ѧ.
се́и е҆сть сн҃ъ мо́и възлю́бленныи, ѻ҆ не́мже бл҃говолих̑, того послꙋшаите·

И҆ слы́шавше ѹ҆чн҃цы, падоша ни́цы, и҆ ѹ҆боа́шасѧ ѕѣло.
и҆ пристꙋ́пль і҆с҃, прикоснꙋ́сѧ их̑, и҆ рече.
в꙽ста́нѣте, и не бо́итесѧ·

Възвед̑ше же ѻ҆́чи своѝ, никогоже видѣшѧ, то́кмо і҆с҃а е҆ді́ного·

И҆сходѧ́щемъ и҆мъ съ горы̀, заповѣда имъ і҆с҃, гл҃ѧ.
никомꙋже повѣдите видѣнїѧ, до́ндеже сн҃ъ члчс̑҇кїи и҆з꙽ мр҃твых̑ въскрс̑҇нетъ·

зач̑҇, о҃а·

И҆́ въпроси́ша е҆го ѹ҆чн҃цы е҆го, гл҃юще.
что ѹ҆бо кни́жницы гл҃ютъ, ꙗ҆́ко и҆лїи подоба́етъ прїити прежд̑е, і҆с҃ же ѿвѣщавъ рече и҆мъ.
и҆лїа ѹ҆бо прїи́детъ пре́жд̑е, и҆ ѹ҆стро́итъ вс̂ѧ·

Гл҃ю же вамъ, ꙗ҆́ко и҆лїа ѹ҆же прїиде, и҆ не позна́шѧ е҆го.
но сътвори́шѧ ѻ҆ немъ, е҆лика въсхотѣшѧ·

Та́ко и҆ сн҃ь члчс̑҇кїи и҆́мат̑ пострадати ѿ них̑·

Тогда разꙋмѣшѧ ѹ҆чн҃цы, ꙗ҆́ко ѻ҆ і҆ѻ҆а́ннѣ крс̑҇тли рече и҆мъ·

зач̑҇, о҃в·

И҆́ пришед̑шемъ и҆мъ к꙽ наро́дꙋ, пристꙋпи к немꙋ чл҃къ, кла́нѧасѧ е҆мꙋ и҆ гл҃ѧ.
г҃и, поми́лꙋи сн҃а мое҆го, ꙗ҆́ко на новы мцс̑҇ѧ бѣсꙋе́тсѧ, и҆ зл̂ѣ стражд̑етъ.
мно́жицею б̂о па́дае҆тъ въ ѻ҆́гнь, и҆ мно́жицею в꙽ во́дꙋ.
и҆ приведох̑ е҆го къ ѹ҆чн҃комъ твои҆м꙽, и҆ не възмого́ша е҆го и҆сцѣлити·

ѿвѣща́въ же і҆с҃, рече.
ѽ ро́де невѣ́ренъ, и҆ раз꙽враще́нъ, доко́лѣ бꙋ́дꙋ с вами, доко́лѣ трьплю васъ;
приведѣте м̂и е҆го сѣмо.
и҆ запрѣти е҆мꙋ і҆с҃, і҆ и҆зы́де и҆з него бѣсъ, і҆ и҆сцѣлѣ ѻ҆́трокъ ѿ часа̀ того·

Тогда̀ пристꙋпльше ѹ҆чн҃цы і҆с҃ови е҆ді́номꙋ рѣшѧ.
почто м̂ы не въз꙽мого́хомъ и҆з꙽гнати е҆го;
і҆с҃ же рече и҆мъ.
за невѣ́рствїе ваше·

А҆минь б̂о гл҃ю вамъ.
а҆ще и҆́мате вѣрꙋ ꙗ҆́ко зе́рно горꙋшно, рече́те горѣ се́и, преиди ѿсю́дꙋ тамо, и҆ пре́идетъ.
и҆ ничтоже не невъзможно бꙋ́детъ вам꙽.
се́и же родъ не и҆сходитъ, то́кмо моли́твою и҆ постомъ·

Живꙋщем꙽ же и҆мъ в꙽ галиле́и.
рече и҆мъ і҆с҃.
предан꙽ и҆́мать бы́ти сн҃ь члчс̑҇кїи, в рꙋцѣ человѣкомъ, и҆ ѹ҆бїютъ е҆го, и҆ третїи дн҃ь в꙽станетъ·

И҆ ско́рбни бышѧ ѕѣло̀·

зач̑҇, о҃г·

Пришед̑шимъ же и҆мъ в꙽ капернаѹ҆м꙽, пристꙋпи́ша прїе҆млющеѝ дидрахма к꙽ петрови, и҆ рѣша.
ѹ҆чи́тель ваш꙽ не дасть ли дидрахма;
гл҃а, е́й.
и҆ е҆гда̀ в꙽ни́де в домъ, прд̑еварѝ е҆го і҆с҃, гл҃ѧ.
что ти сѧ мнитъ си́моне;
цр҃їе земъстїи ѿ кыих̑ прїемлютъ да́ни, и҆ли ки́нсонъ, ѿ свои҆хъ л̂и сн҃ов, и҆л̂и ѿ чꙋжд̑ихъ;
гл҃а е҆мꙋ петръ, ѿ чꙋжд̑ихъ·

Рече е҆мꙋ і҆с҃.
ѹ҆бо свобод꙽ни сꙋть сн҃ове.
н̂о да не събла́знимъ и҆хъ.
шед̑ в꙽ море, в꙽верзи ѹ҆́дицꙋ, и҆ ꙗ҆́же пре́жде и҆меши рыбꙋ возми.
и҆ ѿверзъ ѹ҆ста̀ е́й ѻ҆брѧщеши статир꙽·

то́и вземъ дажд̑ь и҆мъ за́ м̂ѧ и҆ за сѧ·

Глв̑҇а, и҃і·

зач̑҇, о҃д·

В то́и часъ пристꙋпишѧ ѹ҆чн҃цы къ і҆с҃ꙋ гл҃юще.
кто ѹ҆бо бо́лїи е҆сть в꙽ црс̑҇твїи нбс̑҇нѣмъ;
и҆ призвавъ і҆с҃ ѻ҆троча̀, поста́ви е҆̀ посредѣ их̑, и҆ рече·

А҆минь гл҃ю вамъ, а҆ще не ѻ҆братите́сѧ, и҆ бꙋ́дете ꙗ҆́ко дѣти, не вни́дете в꙽ црс̑҇тво нбс̑҇ное.
и҆же б̂о сѧ смѣритъ ꙗ҆ко ѻ҆троча с̂е, то́и е҆сть болїи в꙽ црс̑҇твїи нбс̑҇нѣмъ·

І҆ и҆же а́ще прїиметъ ѻ҆троча таково̀ въ и҆мѧ моѐ, менѐ прїе́млет꙽.
а҆ и҆же а҆ще събла́знитъ е҆диного малыхъ сихъ вѣ́рꙋющихъ в м̂ѧ, ѹ҆́не е҆мꙋ е҆сть, да ѻ҆бѣ́ситсѧ жръновъ ѻ҆се́льскыи на выѝ е҆го, и҆ пото́нетъ в пꙋчи́нѣ морстѣи.
го́ре ми́рꙋ ѿ събла́знъ.
нꙋж́да бо е҆сть прїити събла́зном꙽.
ѻ҆ба́че го́ре чл҃кꙋ томꙋ̀, и҆́мже събла́знъ прихо́дит·

Аще л̂и рꙋка твоа̀ и҆лѝ нога твоа̀ съблажнѧ́етъ тѧ.
ѿсѣци ю҆̀, и҆ врьзи ѿ себѐ.
добрѣише т̂и е҆сть вни́ти в живот̑ хро́мꙋ, и҆лѝ бѣ́днꙋ.
не́жели двѣ рꙋцѣ и҆ двѣ ноѕѣ и҆мꙋщꙋ, в꙽верженꙋ бы́ти въ ѻ҆́гнь вѣ́чныи·

И҆ а́ще ѻ҆́ко твоѐ съблажнѧ́етъ тѧ, и҆зми е҆̀, и҆ врьзи ѿ себѐ.
добрѣ́ише ти е҆сть съ е҆ді́нѣмъ ѻ҆́комъ в живо́тъ вни́ти, не́же двѣ ѻ҆́цѣ и҆мꙋщꙋ в꙽ве́рженꙋ бы́ти в гее́нꙋ ѻ҆́гненꙋю·

зач̑҇, о҃е·

Блюдѣте, да не пре́зрите е҆ді́ного ѿ ма́лыхъ сих̑·

Гл҃ю б̂о ва́мъ ꙗ҆́ко а҆́гг҃ли и҆хъ на нб҃сѣхъ вы́нꙋ ви́дѧтъ лицѐ ѿц҃а мое҆го нбс̑҇наго·

Прїиде б̂о сн҃ь чл҃чьскїи взыска́ти и҆ спс̑҇ти погы́бшаго·

Что сѧ вамъ мнитъ;
а҆ще бꙋ́детъ нѣ́кое҆мꙋ чл҃кꙋ, сто̀ ѻ҆ве́цъ, и҆ заблꙋдитъ е҆ді́на ѿ нихъ.
не ѻ҆ста́вит̑ л̂и девѧтьдесѧтъ и҆ девѧть въ горах̑, и҆ ше́дъ и҆́щетъ заблꙋжд̑ьшеѐ;
и҆ а́ще бꙋ́детъ ѻ҆брѣсти ю҆̀.
а҆ми́нь гл҃ю вам̑.
ꙗ҆́ко радꙋетсѧ ѻ҆ не́и, па́че, неже ѻ҆ девѧтьдесѧ́тихъ и҆ девѧть не заблꙋж꙽шихъ·

Та́ко нѣсть во́лѧ пред̑ ѿц҃ем꙽ вашимъ нбс̑҇нымъ, да погы́бнетъ е҆ді́нъ ѿ ма́лыхъ сихъ·

А҆́ще съгрѣшитъ к тебѣ брат̑ твои, и҆дѝ і҆ ѻ҆бличѝ е҆го межд̑ꙋ собо́ю и҆ тѣмъ е҆ді́нѣмъ·

А҆́ще тебѐ послꙋшаетъ, приѻ҆брѣ́лъ е҆си бра́та твое҆го.
а҆́ще ли тебѐ не послꙋшаетъ, пои҆ми с꙽ собо́ю па́кы е҆ді́ного и҆ли дв̂а, да при ѹ҆стх̑ѣ двою̀ и҆ли трїехъ свѣдѣтелїи ста́нет̑ всѧкъ гл҃ъ·

А҆ще же не послꙋшаетъ и҆хъ, повѣжд̑ь цр҃кви·

а҆ще же и҆ цр҃ковь преслꙋшаетъ, бꙋди т̂и ꙗ҆́ко ꙗ҆́зы́чникъ и҆ мыта́рь·

зач̑҇, о҃ѕ·

А҆́минь б̂о гл҃ю вамъ, е҆ли́ка а҆́ще свѧ́жете на земли, бꙋ́дꙋтъ свѧ́зана на нб҃си.
и҆ е҆ли́ка а҆ще разрѣшитѐ на земли, бꙋдт̑ꙋ разрѣше́на на нб҃сех̑·

Па́кы а҆ми́нь гл҃ю вамъ.
ꙗ҆́ко а҆ще два ѿ васъ совѣща́ета на земли, ѻ҆ всѧ́кои вещи е҆же а҆ще про́сита, бꙋдетъ и҆́ма ѿ ѻ҆ц҃а мое҆го и҆же на нб҃сех̑·

И҆дѣже бо е҆ста дв̂а и҆ли трїе со́брани въ и҆мѧ моѐ, т̂ꙋ е҆смь посредѣ и҆хъ·

Тогда̀ пристꙋ́пль к немꙋ петръ, рече.
г҃и, коль краты а҆ще съгрѣшитъ в꙽ м̂ѧ брат̑ мои, и҆ ѿпꙋщꙋ е҆мꙋ;
до сед̑мь кратъ ли;
гл҃а е҆мꙋ і҆с҃, не гл҃ю тебѣ до сед̑мь кратъ.
н̂о до сед̑мьдесѧтъ кратъ сед̑ми́цею·

зач̑҇, о҃з·

Сего ради ѹ҆подобисѧ црс̑҇твїе нбс̑҇ное чл҃кꙋ цр҃ю, и҆же въсхотѣ̀ стѧза́ти сѧ ѻ҆ словесѝ с рабы̀ свои́ми.
наче́ншꙋ же е҆мꙋ стѧза́тисѧ, приведоша е҆мꙋ е҆ді́ного длъжника тмою тала́нтъ.
не и҆мꙋщꙋ же е҆мꙋ въздати, повелѣ и҆̀ г҃ь е҆го продати, и҆ женꙋ е҆го и҆ чѧ́да, и҆ вс̂ѧ е҆ли́ка и҆мѧ́ше, и҆ ѿдати·

Пад̑ ѹ҆бо рабъ то́и кла́нѧшесѧ е҆мꙋ гл҃ѧ.
г҃и, потрьпи на мнѣ, и҆ вс̂ѧ т̂и въздамъ·

Млс̑҇рдовавь же г҃ь раба того, простѝ е҆го, и҆ длъгъ ѿпꙋстѝ е҆мꙋ·

И҆зшед̑ же рабъ то́и, ѻ҆брѣте е҆ді́ного клеврѣтъ свои҆хъ, и҆же б̂ѣ длъженъ е҆мꙋ ст̂о пѣнѧѕь.
и҆ е҆мъ е҆го давлѧ́ше гл҃ѧ.
ѿдажд̑ь м̂и и҆мьже м̂и е҆си длъженъ.
па́дъ ѹ҆бо клеврѣтъ е҆го на ноѕѣ е҆го, молѧше е҆го гл҃ѧ.
потрьпи на мнѣ, и҆ вс̂ѧ въздам꙽ т̂и.
ѻ҆нъ же не хотѧше, н̂о ведъ всади е҆го в темни́цꙋ, дондеже въздасть длъжно́е·

Видѣвше же клевре́ти е҆го бывшаѧ, съжа́лиша с̂и ѕѣло, и҆ пришед̑ше сказа́шѧ господинꙋ свое҆мꙋ вс̂ѧ бывшаѧ·

Тогда̀ призвавъ е҆го господинъ е҆го, гл҃а е҆мꙋ·

Ра́бе лꙋка́выи, весь длъгъ ѻ҆нъ ѿпꙋстихъ тебѣ, понеже ѹ҆молѝ м̂ѧ.
не подоба́ше л̂и и҆ тебѣ поми́ловати клеврѣта свое҆го, ꙗ҆́коже и҆ а҆зъ т̂ѧ поми́ловахъ;
и҆ прогнѣвавъсѧ г҃ь е҆го, предасть е҆го мꙋчи́телемъ, дондеже въздасть весь длъгъ свои·

Тако и҆ ѿц҃ь мои нбс̑҇ныи сътворитъ вамъ, а҆ще не ѿпꙋститѐ кождо братꙋ свое҆мꙋ ѿ срд̑цъ ваших꙽ прегрѣшенїа и҆́хъ·

Глв̑҇а, ѳ҃і·

И бы́сть е҆гда сконча і҆с҃ словеса̀ сїѧ, пре́иде ѿ галиле́ѧ.
и҆ прїиде в꙽ предѣлы і҆ю҆де́искїа, ѻ҆б онъ полъ і҆ѻрда́на.
и҆ по немъ и҆доша наро́ди мно́ѕи, і҆ и҆сцѣли и҆хъ т̂ꙋ·

зач̑҇, о҃и·

И҆́ пристꙋпиша к немꙋ фарисе́е, и҆скꙋша́юще е҆го, и҆ гл҃аша е҆мꙋ.
а҆ще достои҆тъ чл҃кꙋ пꙋсти́ти женꙋ свою по всѧ́кои винѣ;
ѻ҆́нъже ѿвѣщавъ реч̑҇ и҆мъ.
нѣ́сте ли чл̂и, ꙗ҆ко сътвори́выи и҆скони, мꙋжескїи полъ и҆ женьскїи сътворилъ ѧ҆̀ е҆сть;
и҆ рече, сего ради ѻ҆ставитъ чл҃кь ѿц҃а свое҆го и҆ матере, и҆ прилѣпи́тсѧ к꙽ женѣ своеѝ, и҆ бꙋдета ѻ҆́ба в꙽ плоть е҆ді́нꙋ.
ꙗ҆́коже ктомꙋ нѣ́ста два̀, но плоть е҆ді́на.
е҆же ѹ҆бо б҃ъ съчета̀, чл҃кь да не разлꙋчае҆тъ·

Гл҃аша е҆мꙋ.
что̀ ѹ҆бо моѷсїи заповѣда дати кни́гꙋ распꙋстнꙋю, и҆ ѿпꙋсти́ти ю҆̀;
гл҃а и҆мъ, ꙗ҆́ко моѷсїи по жестосрьдїю ва́шемꙋ повелѣ вамъ пꙋстити жены ваша.
и҆з начала же не бысть тако·

Гл҃ю же вамъ, ꙗ҆́ко и҆же а҆ще пꙋститъ женꙋ свою̀, развѣ словесе прелюбодѣина, и҆ ѻ҆женитсѧ и҆ною, прелюбы творить.
и҆ женѧѝсѧ пꙋщени́цею, прелюбы дѣ́етъ·

Гл҃ашѧ е҆мꙋ ѹ҆ченицы̀ е҆го.
а҆ще та́ко е҆сть вина̀ чл҃кꙋ съ женою, ѹ҆не е҆сть не жени́тисѧ·

ѻ҆нъ же рече и҆мъ.
не всѝ в꙽мѣща́ютъ словесе сего̀, но и҆мъже дано̀ е҆́сть·

сꙋть б̂о скопцы̀, и҆же и҆з꙽ чре́ва ма́тер꙽нѧ родишѧсѧ та́ко.
и҆ сꙋ́ть скопцы̀, и҆же скопи́шасѧ ѿ чл҃къ·

И҆ сꙋ́ть скопцы̀, и҆же и҆сказі́ша са́ми себе црс̑҇твїа ради нбс̑҇наго.
могїи в꙽мѣ́стити, да в꙽мѣ́ститъ·

Тогда̀ приведо́ша к немꙋ дѣти, да рꙋцѣ възложит̑ на них̑, и҆ помо́литсѧ, ѹ҆чн҃цы же запрѣти́шѧ и҆мъ.
і҆с҃ же рече и҆мъ.
ѻ҆ста́вите дѣтїи, и҆ не възбранѧ́ите и҆мъ прїити къ мнѣ.
таковы́хъ б̂о е҆сть црс̑҇тво нбс̑҇ное.
и҆ възло́жъ на них̑ рꙋцѣ, ѿи́де ѿтꙋдꙋ·

зач̑҇, о҃ѳ·

И҆́ с̂е е҆ді́нъ нѣкїи пристꙋпль, рече емꙋ.
ѹ҆чи́телю б҃лгїи, что бл҃го сътворю̀, да и́мам̑ живо́тъ вѣ́чныи;
ѻ҆́нъ же рече е҆мꙋ.
что м̂ѧ гл҃еши бла́га;
никто́же бл҃гъ, то́кмо е҆ді́нъ б҃ъ.
а҆ще ли хо́щеши внити в живот̑, съблюд̑и̑ за́повѣди·

Гл҃а е҆мꙋ, кы́а;
і҆с҃ же рече.
е҆же не ѹ҆бїеши, не прелюбы сътвори́ши, не ѹ҆кра́деши, не лжесвѣдѣтельствꙋеши.
чтѝ ѿц҃а и҆ мт҃ре.
и҆ възлю́биши и́скренѧго свое҆го ꙗ҆́ко самъ себѐ·

Гл҃а е҆мꙋ ю҆́ноша, вс̂ѧ сїа съхранихъ ѿ ю́ности моеа̀.
что̀ е҆смь и҆ е҆ще не докончал꙽;
рече е҆мꙋ і҆с҃.
а҆ще хо́щеши съврьшенъ быти, и҆ди, продаждь и҆мѣнїе твоѐ, и҆ даждь ни́щымъ, и҆ і҆мѣти и́маши съкро́вище на нб҃си, и҆ грѧди в꙽ слѣдъ мене·

Слы́шав꙽ же ю́ноша сло́во, ѿи́де скорбѧ̀.
бѣ б̂о и҆мѣ́а стѧжанїа мно́га.
і҆с҃ же рече ѹ҆чн҃комъ свои҆мъ.
а҆ми́нь гл҃ю вамъ, ꙗ҆́ко не ѹ҆добъ бога́тыи вни́детъ в꙽ црс̑҇тво нбс̑҇ное·

Пакы же гл҃ю вамъ.
ꙗ҆ко ѹ҆добѣе е҆сть вельбꙋ́дꙋ сквозѣ и҆глѣны ѹ҆ши проити, неже бога́тꙋ в꙽ црс̑҇твїе бж҃їе вни́ти·

Слы́шавше же ѹ҆чн҃цы е҆го, дивлѧ́хꙋсѧ ѕѣло, гл҃юще.
кто̀ ѹ҆бо может̑ сп҃сенъ быти;
възрѣвь же і҆с҃, рече и҆мъ.
ѿ чл҃къ с̂е невъзмо́жно е҆сть, ѿ бг҃а же вс̂ѧ възмо́жна·

Тогда̀ ѿвѣща́въ петръ, речѐ е҆мꙋ.
с̂е м̂ы ѻ҆ста́вихомъ вс̂ѧ, и҆ в꙽ слѣ́дъ тебе и҆до́хомъ.
что̀ ѹ҆бо бꙋ́детъ намъ;
і҆с҃ же речѐ и҆мъ.
а҆ми́нь гл҃ю вамъ.
ꙗ҆́ко вы̀ шед̑шеѝ по мнѣ, в꙽ па́кы бытїе, е҆гда̀ сѧ́детъ сн҃ь члчс̑҇кїи на престо́лѣ сла́вы своеа̀, сѧ́дете и҆ в̂ы на двоюна́десѧте престо́лꙋ, сꙋдѧ́ще ѻ҆бѣмана́десѧте колѣнома і҆ил҃евома·

И҆ всѧ́къ и҆же ѻ҆ста́витъ домъ, и҆ли бра́тїю, и҆ли сестры̀, и҆ли ѿца, и҆ли ма́тере, и҆ли женꙋ, и҆ли чѧда, или се́ла, и҆́мени мое҆го ради, стори́цею прїиметъ, и҆ животъ вѣ́чныи наслѣдитъ·

Мно́ѕи же бꙋ́дꙋтъ прьви, пслд̑ѣнїи.
и҆ послд̑ѣни, прьвїи·

Глв̑҇а, к҃·

зач̑҇, п҃·

Подо́бно е҆сть црс̑҇твїе нбс̑҇ное, чл҃кꙋ домови́тꙋ, и҆же и҆зы́иде кꙋ́пно ѹ҆тро наѧ́ти дѣ́лателѧ в꙽ виноградъ свои.
и҆ совѣща́въ съ дѣ́латели по пѣнѧзю на дн҃ь, посла̀ и҆хъ в꙽ виноградъ свои·

І҆ и҆зшедъ в꙽ третїи часъ, видѣ и́ны стоа́ща на тръжищи пра́зд꙽ны, и҆ тѣмъ рече.
и҆дѣте и҆ вы в виноградъ мои.
и҆ еже бꙋдетъ правда, дамъ вамъ.
ѻ҆ни же и҆до́ша·

Пакы же и҆з꙽шед̑ в꙽ шестыи, и҆ девѧ́тыи час̑҇, сътворѝ та́кожд̑е·

Въ е҆ді́ныи же надесѧ́те часъ и҆зшедъ, ѻ҆брѣте дрꙋгы́ѧ стоа́ща пра́знд̑ы.
и҆ гл҃а и҆мъ, что̀ зд̂ѣ стоитѐ ве́сь дн҃ь пра́знд̑ы;
гл҃аша е҆мꙋ, ꙗ҆́ко никтоже нас̑҇ наѧт̑·

И҆ гл҃а и҆мъ, и҆дѣте и҆ в̂ы в꙽ виноградъ мо́и.
и҆ е҆же бꙋ́детъ пра́ведно, прїимете·

Ве́черꙋ же бы́вшꙋ, гл҃а господинъ виногра́да къ приста́вникꙋ свое҆мꙋ, призови дѣ́лателѧ, и҆ дажд̑ь им̑ м꙽здꙋ, наченъ ѿ послд̑ѣних̑ до пе́рвых̑.
и҆ пришед̑ше и҆же въ е҆ді́ныи надесѧ́те час, прїа́ша по пѣнѧѕю·

Пришед̑ше же пе́рвїи, мнѣ́хꙋ вѧ́ще прїати.
прїа́шѧ и҆ тїи по пѣнѧзю.
прїем꙽ше же роптахꙋ на господи́на, гл҃юще, ꙗ҆́ко сїи послѣ́днїи, е҆ді́нъ часъ сътвори́ша, и҆ ра́вны намъ сътворилъ и҆хъ е҆си, поне́сшим̑ тѧготꙋ̀ дн҃е и҆ ва́ръ·

ѻ҆́нъ же ѿвѣщавъ, рече е҆ді́номꙋ их̑.
дрꙋ́же, не ѻ҆би́жꙋ тебѐ.
не по пѣ́нѧзю л̂и совѣща̀ со мно́ю;
возми своѐ, і҆ и҆дѝ.
хощꙋ же и҆ семꙋ послд̑ѣнемꙋ дати, ꙗ҆́коже и҆ тебѣ.
и҆л̂и нѣсть м̂и лѣть сътвори́ти е҆же хощꙋ въ свои҆х꙽ м̂и;

А҆ще ѻ҆́ко твоѐ лꙋка́во е҆сть, ꙗ҆́ко а҆зъ бл҃гъ е҆смь;
та́ко бꙋ́дꙋтъ послѣднїи, прьви.
и҆ пе́рвїи, послд̑ѣни·

Мно́ѕи б̂о сꙋть зва́ни, ма́ло же и҆збра́нныхъ·

зач̑҇, п҃а·

И҆́ въсходѧ і҆с҃ въ і҆ерс̑҇ли́мъ, поѧ́тъ ѻ҆́банадесѧте ѹ҆чн҃ка е҆ді́ны на пꙋти.
и҆ рече и҆мъ.
с̂е въсхо́димъ въ і҆ерс̑҇лим̑, и҆ сн҃ъ члчс̑҇кыи пре́данъ бꙋдет̑ а҆рхїе҆ре́ѻ҆м꙽ и҆ кни́жникомъ, и҆ ѻ҆сꙋдѧтъ е҆го на смр҃ть, и҆ предадѧтъ е҆го ꙗ҆́ѕы́ком꙽, на порꙋга́нїе и҆ бїе́нїе и҆ пропѧтїе, и҆ в꙽ тре́тїи дн҃ь въскрс̑҇нетъ·

Тогда̀ пристꙋпѝ к꙽ немꙋ м҃ти сн҃ꙋ зеведеѻ҆вꙋ съ сыно́ма свои́ма, кла́нѧющисѧ, и҆ просѧ́щи нѣ́что ѿ него.
ѻ҆́нъ же реч̑҇ е́й, чесо хо́щеши;
гл҃а е҆мꙋ.
рц̂и, да сѧ́дета сїа ѻ҆́ба сн҃а моѧ, е҆ді́нъ ѻ҆деснꙋ́ю тебе, и҆ е҆ді́нъ ѻ҆шꙋю тебѐ, въ цр҃ьствїи твое҆мъ·

ѿвѣщавъ же і҆с҃, рече.
не вѣ́стасѧ чесо про́сита.
мо́жета ли пити ча́шꙋ, ю҆же а҆зъ и҆́мам꙽ пити·

И҆ли крс̑҇щенїемъ, и҆м꙽же а҆з꙽ крс̑҇ща́юсѧ, крс̑҇ти́тисѧ;
гл҃аста е҆мꙋ, мо́жевѣ.
и҆ гл҃а и҆́ма, чашꙋ ѹ҆бо мою̀ и҆спїе́та, и҆ крс̑҇щенїемъ, и҆́м꙽же а҆зъ крс̑҇ща́юсѧ, крс̑҇ти́тасѧ·

А҆ е҆же сѣ́сти ѻ҆деснꙋ́ю мене, и҆ ѻ҆шꙋю мене, нѣсть моѐ дати, но и҆́мъже ѹ҆гото́васѧ ѿ ѻ҆ц҃а мое҆го·

И҆ слы́шав꙽ше де́сѧть, негодовашѧ ѻ҆ ѻ҆бою бра́тꙋ·

І҆с҃ же призвавъ и҆хъ, рече.
вѣсте ꙗ҆́ко кнѧ́ѕи ꙗ҆ѕы́къ, господьствꙋютъ и҆́ми, и҆ вели́цїи, ѻ҆бладаю҆тъ и҆́ми.
не та́коже бꙋ́детъ в꙽ вас̑҇.
н̂о и҆же а҆ще хо́щетъ в꙽ васъ вѧ́щшїи быти, да бꙋ́детъ вамъ слꙋга.
и҆ і҆же а҆ще хо́щетъ в꙽ васъ быти прьвыи, бꙋди вамъ рабъ·

Ꙗ҆́коже сн҃ъ члчс̑҇кїи не прїиде да послꙋжатъ е҆мꙋ, н̂о послꙋжити, и҆ дати дш҃ю свою̀ и҆збавленїе за мно́гыхъ·

зач̑҇, п҃в·

И҆́ исходѧ́щꙋ е҆мꙋ ѿ і҆е҆рихо́на, по нем꙽ и́де наро́дъ мно́гъ·

И҆ с̂е два̀ слѣпцѧ сѣдѧ́ща при пꙋти, слы́шав꙽ша ꙗ҆́ко і҆с҃ мимо хо́дитъ, възъпи́ста гл҃юща, поми́лꙋи н̂ы г҃и сн҃е дввд̑ъ.
народ̑ же запрѣтѝ и́ма да ѹ҆млъчита.
ѻ҆на же паче въпїа́ста гл҃юща.
поми́лꙋи н̂ы г҃и сн҃е дввд̑ъ·

И҆ ставъ і҆с҃, възгласи ѧ҆̀, и҆ рече.
чт̂о хо́щета, да сотворю вама;
гл҃аста е҆мꙋ.
г҃и, да ѿверзетасѧ ѻ́чи на́ю.
млс̑҇рдовавь же і҆с҃, прикоснꙋ́сѧ ѻ́чїю и҆́ма.
и҆ а́бїе прозрѣ́ста и҆́ма ѻ҆́чи, и҆ по немъ и҆до́ста·

Глав̑҇, к҃а·

зач̑҇, п҃г·

И егда прибли́жишасѧ въ і҆е҆рлс̑҇и́мъ, и҆ прїидошѧ въ вѷѳ꙽сфагїю к꙽ горѣ елеѻ҆н꙽стѣи·

Тогда і҆с҃ посла̀ два ѹ҆чн҃ка, гл҃ѧ и҆ма.
и҆дѣта в꙽ весь ꙗ҆же прѧмо ва́ма.
и҆ абїе ѻ҆брѧ́щете ѻ҆слѧ привѧ́зано, и҆ жрѣбѧ с нимъ, и҆ ѿрѣшивше приведѣта м̂и.
и҆ а҆ще вама кто̀ речетъ чт̂о, речѐта, ꙗ҆ко г҃ь е҆ю̀ требꙋ́етъ, а́бїе же по́слетъ ѧ҆̀·

Се̂ же вс̂е бысть, да с꙽бꙋ́детсѧ реченое прро̑҇комъ гл҃ющимъ.
рцѣте дще́ри сїѻ́новѣ.
с̂е цр҃ь твои грѧдетъ тебѣ кро́ток̑҇, всѣдъ на ѻ҆слѧ и҆ жрѣбѧ, сн҃а ꙗ҆ре́мнича·

шд̑еша же ѹ҆чн҃ка, и҆ сътворша ꙗ҆́коже повелѣ и҆ма і҆с҃.
приведо́ста ѻ҆слѧ̀ и҆ жрѣбѧ, и҆ възложи́шѧ врьхꙋ ею̀ ри́ѕы своа̀, и҆ всѣде врьхꙋ их̑·

Мно́жаишїи же народи постила́хꙋ ри́ѕы своа по пꙋти·

дрꙋѕїи же рѣзахꙋ вѣтви ѿ дре́въ, и҆ постилахꙋ по пꙋти·

Наро́ди же прд̑еходѧ́щеѝ е҆мꙋ, и҆ въслѣдъствꙋющеи зва́хꙋ гл҃юще, ѻ҆са́нна сн҃ꙋ дввд̑ꙋ.
блс̑҇венъ грѧдыи въ и҆мѧ гн҃е, ѻ҆са́нна в꙽ вышних̑·

И҆ в꙽шед̑шꙋ е҆мꙋ въ і҆ерс̑҇лимъ, потрѧсе́сѧ весь гра́дъ гл҃ѧ, кто̀ е҆сть се́й;
наро́ди же гл҃ахꙋ, се́й е҆сть і҆с҃ прро̑҇къ, и҆же ѿ назарета галиле́иска·

зач̑҇, п҃г·

И҆́ вни́де в꙽ цр҃ковь бж҃їю, і҆ и҆з꙽гна̀ вс̂ѧ продаю́щаѧ и҆ кꙋпꙋ́ющаѧ в꙽ цр҃кви, и҆ трапе́зы тръжнїкомъ и҆спровръже, и҆ сѣда́лищѧ продаю́щихъ го́лꙋбы.
и҆ гл҃а и҆мъ.
пи́сано е҆сть, храм̑ мои, храмъ мл҃твы нарече́тсѧ.
в̂ы же сътвори́сте и҆̀ врьтепъ разбо́иником꙽·

И҆ пристꙋпи́ша к꙽ немꙋ хро́ми и҆ слѣпи в꙽ цр҃кви, і҆ и҆сцѣли и҆хъ·

Видѣ́вшеж̑ а҆рхїере́е и҆ книжницы чюдеса̀ ꙗже сътвори, и҆ ѻ́троки зовꙋща в꙽ цр҃кви, и҆ гл҃ющѧ, ѻ҆са́нна сн҃ꙋ двд̑вꙋ.
негодова́ша, и҆ рѣша е҆мꙋ.
слы́шиши л̂и, чт̂о сїи гл҃ютъ;
і҆с҃ же рече и҆м꙽, е́й.
нѣ́сте ли чл̂и николи́же;
ꙗ҆ко и҆зъ ѹ҆стъ младе́нецъ, и҆ с꙽сꙋщихъ съврьши́лъ е҆сѝ хвалꙋ;
и҆ ѻ҆ставль и҆хъ, и҆зы́де во́нъ и҆з꙽ гра́да в꙽ вѷѳа́нїю, и҆ водвори́сѧ тꙋ̀·

зач̑҇, п҃д·

Ѹ́трꙋ же въз꙽вра́щ꙽сѧ въ градъ, в꙽залка.
и҆ ѹзрѣв꙽ смоковницꙋ е҆ді́нꙋ при пꙋтѝ, прїиде к не́й, и҆ ничто́же ѻ҆брѣте на неи, то́кмо ли́ствїе е҆ді́но.
и҆ гл҃а е́й.
да николиже ѿ тебѐ плода̀ бꙋ́детъ въ вѣки.
і҆ а́бїе и҆́сше смоко́вница.
и҆ видѣвше ѹ҆чн҃цы диви́шасѧ гл҃юще, како а҆бїе и́сше смоко́вница;
ѿвѣщавь же і҆с҃, рече и҆мъ.
а҆ми́нь гл҃ю вамъ.
а҆ще и҆́мате вѣрꙋ, и҆ не ѹ҆сꙋмните́сѧ, не то́кмо смоко́вничное сътворитѐ.
н̂о а҆ще и҆ горѣ се́й речете, дви́гнисѧ, и҆ врьзисѧ в꙽ мо́ре, бꙋ́детъ.

И҆ вс̂ѧ е҆ли́ка а҆ще въспро́сите въ мл҃твѣ, вѣрꙋюще, прїимете·

зач̑҇, п҃е·

И҆́ пришед̑шꙋ е҆мꙋ въ цр҃ковь, пристꙋпи́ша к немꙋ ѹ҆чащꙋ, а҆рхїере́е и҆ ста́рцы люд꙽стїи гл҃юще.
коею̀ властїю сїа твориши;
и҆ кто̀ т̂и дастъ ѻ҆́бласть сїю;
ѿвѣщавь же і҆с҃, рече и҆м꙽.
въпрошꙋ в̂ы и҆ а҆зъ слово е҆ді́но, е҆же а҆ще рече́те мн̂ѣ, и҆ а҆зъ вамъ рекꙋ, коею̀ властїю сїа творю.
крс̑҇щенїе і҆ѻа́нново ѿкꙋ́дꙋ б̂ѣ, с꙽ нб҃се ли, и҆л̂и ѿ человѣкъ;
ѻ҆ни́ же помышлѧхꙋ в себѣ гл҃юще.
а҆ще речемъ с꙽ нб҃се, речетъ нам̑, почто̀ ѹ҆бо не вѣровасте е҆мꙋ;
а҆ще ли речемъ ѿ чл҃къ.
бои́мсѧ наро́да.
вс̂и б̂о и҆мꙋтъ і҆ѻ҆а́нна ꙗ҆ко прро̑҇ка.
и҆ ѿвѣщавше і҆с҃ови, рѣшѧ, не вѣмы.
рече и҆мъ и҆ то́и, ни а҆зъ вамъ гл҃ю, коею̀ вла́стїю сїа творю·

зач̑҇, п҃ѕ·

Что́ же сѧ вамъ мнитъ;
чл҃къ нѣкїи и҆мѧше дв̂а сн҃а, и҆ пришед̑ к пе́рвомꙋ речѐ.
ча́до, и҆дѝ, днесь дѣ́лаи в꙽ виногра́дѣ мое́мъ.
ѻ҆́н꙽ же ѿвѣщав̑҇, речѐ.
не хощꙋ.
послѣди же раска́ав꙽сѧ, и҆́де.
и҆ пристꙋпль къ дрꙋгомꙋ, речѐ та́кожд̑е.
ѻ҆́нъ же ѿвѣщавъ, речѐ.
а҆́зъ г҃и и҆дꙋ, и҆ не́ иде.
кы́и ѿ ѻ҆бою̀ сотворѝ во́лю ѿч҃ю;
гл҃аша е҆мꙋ, пе́рвый.

Гл҃а и҆мъ і҆с҃.
а҆ми́нь, гл҃ю ва́мъ.
ꙗ҆́ко мытаре и҆ любодѣицѧ варѧ́ютъ вы̀ в꙽ црс̑҇твїи бж҃їи.
прїиде б̂о к ва́мъ і҆ѻа́ннъ крс̑҇тль пꙋтемъ пра́вед̑нымъ, и҆ не вѣ́ровасте е҆мꙋ.
мытаре же и҆ любодѣ́ицѧ вѣ́ровашѧ е҆мꙋ·

Вы же видѣ́вше не раска́астесѧ послѣдѝ вѣ́роватї е҆мꙋ·

зач̑҇, п҃з·

И҆́нꙋ притчꙋ слы́шите.
чл҃кь нѣкїи бѣ домови́тъ, и҆же насадѝ виноград̑, и҆ ѻ҆пло́томъ ѻ҆гради е҆го, и҆ і҆скопа̀ в нем̑ точи́ло, и҆ създа̀ столпъ, и҆ вдаст꙽ дѣ́лателемъ, и҆ ѿи́де·

Є҆гда же прибли́жисѧ времѧ плодо́мъ, посла̀ рабы своѧ к꙽ дѣ́лателемъ, прїѧ́ти плоды е҆го·

И҆ е́мше дѣ́лателе рабы е҆го, ѻ҆вого ѹ҆бо би́ша, ѻ҆вого же ѹ҆би́шѧ, ѻ҆вого же ка́менїе҆мъ поби́ша·

Па́ки посла̀ и҆́ны рабы мно́жаишѧ пе́рвыхъ.
и҆ сътвори́шѧ и҆мъ та́кожд̑е·

Послѣди же посла̀ к ним̑ сн҃а свое҆го гл҃ѧ, ѹ҆срамѧ́тсѧ сн҃а мое҆го.
дѣлателе же ви́дѣвше сн҃а, рѣшѧ в себѣ, се́и е҆сть наслѣ́дникь, прїидѣте ѹ҆бїе҆м꙽ е҆го, и҆ ѹ҆дръжимъ достоа́нїе е҆го.
и҆ е́мше е҆го, и҆зведо́шѧ вонъ и҆з виногра́да, и҆ ѹ҆би́шѧ·

Є҆гда ѹ҆бо прїидетъ господинъ винограда, что̀ сътворитъ дѣ́лателемъ тѣм꙽;
гл҃ашѧ е҆мꙋ, злыхъ ѕл̂ѣ погꙋби́тъ их̑, и҆ виноград̑ предастъ и҆нѣмъ дѣлателемъ, и҆же въздадѧтъ е҆мꙋ плоды въ времена̀ своѧ·

Гл҃а и҆мъ і҆с҃, нѣсте ли чл̂и николиже в꙽ писанихъ;
ка́мень, е҆гоже не в рѧдꙋ̀ сътвори́ша ѕи́жд̑ꙋщеѝ, се́й бысть въ главꙋ ѹ҆глꙋ.
ѿ г҃а бысть с̂и.
и҆ е҆сть ди́вна въ ѻ҆чїю ва́шею·

зач̑҇, п҃и·

Сего̀ ради гл҃ю вамъ, ꙗ҆́ко ѿи́метсѧ ѿ васъ црс̑҇твїе бж҃їе, и҆ дастъсѧ ꙗ҆ѕы́кꙋ творѧщемꙋ плоды е҆го.
и҆ падыѝ на ка́мени сем꙽, съкрꙋшитсѧ.
а҆ на немьже падетъ, сътрые҆тъ и҆̀·

И҆ слы́шавше а҆рхїере́е и҆ фарїсе́е прит꙽ча е҆го, разꙋмѣшѧ ꙗ҆ко ѻ҆ нихъ гл҃етъ.
и҆ і́щꙋще е҆го ꙗ҆́ти, ѹ҆боѧ́шѧсѧ наро́да.
понеже ꙗ҆́ко прро̑҇ка е҆го и҆мѣа́хꙋ·

Глв̑҇а, к҃в·

зач̑҇, п҃ѳ·

И ѿвѣщавъ і҆с҃, пакы реч̑҇ и҆мъ в꙽ при́тчахъ гл҃ѧ.
ѹ҆подобисѧ црс̑҇твїе нбс̑҇ное чл҃кꙋ цр҃ꙋ, и҆же сътвори бракы сн҃ꙋ свое҆мꙋ.
и҆ посла̀ рабы своѧ призвати зва́ныѧ на́ бракы, и҆ не хотѧхꙋ прїити·

Па́кы посла̀ и҆́ны рабы гл҃ѧ.
рцѣте зва́нымъ·

Се ѻ҆бѣды мои ѹ҆гото́вахъ.
ю́нцы моѝ и҆ ѹ҆питаннаѧ и҆сколе́на, и҆ вс̂ѧ гото́ва, прїидѣте на́ бракы·

ѻ҆ни же небре́гше ѿи҆до́ша, ѻ҆́въ ѹ҆бо на село своѐ, ѻ҆́в꙽ же на кꙋплѧ своѧ.
про́чїи же е҆́мше рабы е҆го, досади́шѧ и҆мъ, и҆ ѹ҆би́шѧ и҆хъ.
и҆ слы́шавъ цр҃ь то́й, разгнѣвасѧ.
и҆ пославъ воѧ своѧ, погꙋбѝ ѹ҆бїица ѻ́ны, и҆ гра́дъ и҆хъ заж꙽же·

Тогда гл҃а рабомъ свои҆мъ, бракъ ѹ҆бо гото́въ е҆сть.
ѕва́нїи же не бы́ша досто́ини·

И҆дѣте ѹ҆бо на и҆схо́дищѧ пꙋтїи, и҆ е҆ли́цѣхъ а҆ще ѻ҆брѧщете, призовѣте на бракы·

І҆ и҆з꙽шед̑ше раби ѻ҆ни на распꙋтїѧ, събра́шѧ всѣхъ, е҆ли́цѣхъ ѻ҆брѣто́шѧ злы́ѧ же и҆ до́брыѧ.
і и҆сполнисѧ бра́къ възлежа́щихъ·

Вшд̑е же цр҃ь ви́дѣти възлежа́щихъ.
видѣ т̂ꙋ чл҃ка не ѻ҆болчена въ ѻ҆дѣа́нїе бра́чное·

И҆ гл҃а е҆мꙋ, дрꙋ́же, ка́ко вни́де сѣмо, не и҆мы̀ ѻ҆дѣа́нїа бра́чна;
ѻ҆́н же ѹ҆мол꙽че·

Тогда̀ рече цр҃ь слꙋгамъ.
свѧза́вше е҆мꙋ рꙋцѣ и҆ ноѕѣ, възмѣте е҆го и҆ в꙽ве́рѕѣте, въ тмꙋ̀ кромѣшнꙋю.
т̂ꙋ бꙋ́детъ плачь и҆ скрежетъ зꙋбомъ.
мно́ѕи б̂о сꙋть звани, мало же и҆збра́нныхъ·

зач̑҇,ч҃·

Тогда шд̑еше фарїсе́е, совѣтъ прїе́м꙽ше, ꙗ҆́ко да ѻ҆больстѧть е҆го словом꙽.
и҆ посылаютъ к немꙋ ѹ҆чн҃кы своа̀ съ и҆родїѧ́ны, гл҃юще.
ѹ҆чи́телю, вѣмы ꙗ҆ко и́стиненъ е҆си, и҆ пꙋти бж҃їю въи́стинꙋ ѹ҆чи́ши, и҆ не ради́ши ни ѻ҆ ком꙽же.
не бо̀ зри́ши на лице чл҃ком꙽.
рц̂и ѹ҆бо намъ, что̀ ти сѧ мни́тъ;
досто́ино ли е҆сть дати кинсо́нь кесаре́ви, и҆ли н̂и;
разꙋмѣвь же і҆с҃ лꙋка́в꙽ство и҆хъ, рече.
что м̂ѧ и҆скꙋшѧ́ете лицемѣ́ри;
покажи́те м̂и злати́цꙋ кинсо́ннꙋю.
ѻ҆ни́ же принесо́ша е҆мꙋ пѣнѧзь.
и гл҃а и҆мъ, чїи ѻ҆́бразъ се́й и҆ написа́нїе;
гл҃аша е҆мꙋ, кесарев꙽·

Тогда̀ гл҃а и҆мъ.
въздади́те ѹ҆бо кесаре́ва кесаре́ви.
и҆ бж҃їа бв҃и·

И҆ слы́шавше, диви́шасѧ.
і҆ ѻ҆ста́вльше е҆го ѿи҆до́ша·

зач̑҇, ч҃а·

В то́й дн҃ь пристꙋпи́шѧ к немꙋ сад꙽дꙋке́е, и҆же гл҃ют̑ не бы́ти въскр҃се́нїю.
и҆ въпроси́ша е҆го, гл҃юще.
ѹ҆чи́телю, моѷсїи рече.
а҆ще кт̂о ѹ҆́мретъ не и҆мы̀ чѧ́дъ, да по́иметъ братъ е҆го женꙋ его, и҆ въскр҃ситъ сѣмѧ бра́та свое҆го.
бѣше же в насъ сед̑мь братїа, и҆ пе́рвыи ѻ҆женьсѧ ѹ҆мре, и҆ не и҆мы̀ сѣмене, ѻ҆стави женꙋ свою бра́тꙋ свое҆мꙋ.
та́кожд̑е же и҆ вторыи, и҆ тре́тїи, даже до седмаго·

Послѣди же всѣхъ ѹ҆мре и҆ жена.
в꙽ въскр҃шенїе ѹ҆бо, кото́раго ѿ сед̑михъ бꙋ́детъ жена;
вси б̂о и҆мѣша ю҆̀·

ѿвѣщавь же і҆с҃, рече и҆мъ.
прельща́етесѧ, не вѣ́дѧще писа́нїа, ни си́лы бж҃їа.
в꙽ въскр҃се́нїе б̂о ни же́нѧтсѧ ни посага́ютъ.
н̂о ꙗ҆́ко а҆́гг҃ли бж҃їи на нб҃си сꙋть.
ѻ҆ въскр҃сенїи же мр҃твыхъ, нѣсте ли чл̂и рече́наго вамъ бг҃ом꙽, гл҃ющемъ.
а҆зъ е҆смь б҃ъ а҆враа́мовъ, и҆ б҃ъ и҆саа́ковъ, и҆ б҃ъ і҆а́ковль;
нѣсть б҃ъ, б҃ъ мр҃твыхъ, н̂о б҃ъ живых̑·

И҆ слы́шавше народи, дивлѧ́хꙋсѧ ѻ҆ ѹ҆ченїи е҆го·

зач̑҇, ч҃в·

Фарисе́е же слы́шавше ꙗ҆ко посрами сад̑дꙋке́ѧ.
събра́шѧсѧ в꙽ кꙋ́пѣ·

И҆ въпроси е҆ді́нъ ѿ них̑ зако́ноѹ҆чи́тель, и҆скꙋша́ѧ е҆го, и҆ гл҃ѧ.
ѹ҆чи́телю, каа̀ за́повѣдь болши е҆сть в꙽ зако́нѣ;
і҆с҃ же рече е҆мꙋ.
възлю́биши г҃а б҃а твое҆го всѣмъ срд̑цемъ твои҆мъ.
и҆ всею дш҃ею твоею, и҆ всею мы́слїю твоею̀·

Си̂ е҆сть прьваа и҆ болшаа за́повѣдь·

Втора́а же подобна е́й.
възлю́биши и́скренѧго твое҆го ꙗ҆́ко самъ себе.
в сїю ѻ҆бою̀ за́повѣдїю весь законъ и҆ прро̑҇цы ви́сѧтъ·

Събраном꙽ же фарїсеѻм̑, въпроси и҆хъ і҆с҃, гл҃ѧ.
что сѧ вамъ мнитъ ѻ҆ х҃ѣ, чїи е҆сть сн҃ъ;
гл҃аша е҆мꙋ, дввд̑ъ·

Гл҃а и҆мъ.
како ѹ҆бо дв҃дъ дх҃омъ г҃а е҆го нарицаетъ гл҃ѧ.
рече г҃ь гв҃и мое҆мꙋ, сѣди ѻ҆деснꙋю мене, до́ндеже положꙋ врагы твоѧ под̑но́жїе нога́ма твои́ма·

а҆ще ѹ҆бо дв҃дъ нарицает̑ е҆го г҃а, и҆ ка́ко сн҃ь е҆мꙋ е҆сть;
и҆ никтоже можа́ше ѿвѣщати е҆мꙋ словесѐ, ниже смѣ́аше кт̂о ѿ того дн҃е въпроси́ти е҆го ктомꙋ·

Глв̑҇а, к҃г·

зач̑҇, ч҃г·

Тогда і҆с҃ гл҃а к наро́домъ, и҆ ѹ҆чн҃комъ свои҆мъ, гл҃ѧ.
на моѷсе́ѻвѣ сѣда́лищи сѣдо́шѧ кни́жницы и҆ фарїсе́е·

вс̂ѧ ѹ҆бо е҆ли́ка а҆ще рекꙋ́тъ вам̑ блюсти, съблюда̀йте и творите·

по дѣ́лом же и҆хъ не твори́те·

гл҃ютъ б̂о, и҆ не творѧ́тъ·

Свѧзꙋ́ют꙽ б̂о бремена тѧ́жка и҆ бѣ́днѣ носи́ма, и҆ възлага́ютъ на плеща члчс̑҇ка.
прьстом же свои҆мъ не хотѧтъ дви́гнꙋти и҆хъ.
всѧ же дѣла своѧ творѧт꙽, да видими бꙋдꙋтъ чл҃кы.
раширѧ́ют̑ же храни́лищѧ своѧ, и҆ велича́ютъ въскрилїа ри́ѕъ свои҆хъ.
лю́бѧт же прежевъзлега́нїа на вечерѣхъ, и҆ прежесѣданїа на со́нмищихъ, и҆ цѣлова́нїѧ на тръжищихъ, и҆ зва́тисѧ ѿ чл҃къ ѹ҆чи́телю ѹ҆чи́телю.
вы же не нарица́итесѧ ѹ҆чи́теле.
е҆ді́нъ б̂о е҆сть ѹ҆читель вашъ х҃с, вси же в̂ы братїѧ е҆сте.
и҆ ѿц҃а не зовѣте себѣ на землѝ.
е҆ді́нъ б̂о ѿц҃ъ вашъ и҆же на нб҃сехъ.
ниже нарица́итесѧ наста́вници.
е҆ді́нъ б̂о е҆сть наста́вникъ вашъ х҃с.
болїи же в꙽ васъ, да бꙋ́детъ вам꙽ слꙋга·

И҆же б̂о възнесет̑сѧ, смири́тсѧ.
и҆ смѣрѧ́аѝсѧ, възнесе́тсѧ·

зач̑҇, ч҃д·

Горе же вамъ кни́жници и҆ фарисе́е лицемѣ́ри, ꙗ҆́ко затворѧ́ете црс̑҇твїе нбс̑҇ное предъ чл҃кы.
вы б̂о не вхо́дите, ни входѧ́щихъ ѻ҆ставлѧ́ете в꙽нити·

горе вамъ кни́жницы и҆ фарисее лицемѣри, ꙗ҆́ко снѣда́ете до́мы вдовицъ и҆ виною далече мл҃твы творѧще.
сего ради ли́шшее прїимете ѻ҆сꙋже́нїе·

Горе вамъ книжници и҆ фарїсе́е лицемѣри, ꙗ҆ко преходите мо́ре и҆ сꙋшꙋ, сътворити е҆ді́ного пришельца, и҆ е҆гд̑а бꙋдетъ, творите е҆го сы́на геенны, сꙋгꙋ́бѣиша васъ·

Горе вамъ вожди слѣпїи, гл҃ющеѝ, и҆же а҆ще кленет̑сѧ цр҃квїю, ничесоже е҆сть.
а҆ и҆же кленетсѧ зла́томъ цр҃ковнымъ, дл́ъженъ ес̑҇.
бꙋ́и слѣпїи, коѐ б̂о б̂оле е҆сть, зла́то ли, и҆л̂и цр҃кви, ст҃ѧ́щїа зла́то;
і҆ и҆же а҆ще кленетсѧ ѻ҆лтарем̑, ничесоже ес̑҇.
а҆ и҆же кленет̑сѧ да́ромъ и҆же врьхꙋ̀ е҆го, дл́ъженъ ес̑҇.
бꙋи и҆ слѣпїи что б̂о бо́ле, даръ л̂и, и҆ли ѻ҆лта́рь ст҃ѧѝ даръ;
и҆же ѹ҆бо кленет̑сѧ ѻ҆лтаре́мъ, кленетсѧ и҆м꙽, и҆ сꙋщим̑ връхꙋ е҆го̀.
і҆ и҆же клене́тсѧ цр҃ковїю, клене́тсѧ ею̀, и҆ живꙋщим̑ в неи.
и҆ кленыѝсѧ нб҃се́мъ, кленетсѧ прс̑҇толом̑ бж҃їим̑, и҆ сѣдѧ́щим̑ на немъ.

зач̑҇, ч҃е·

Горе вамъ книжници и҆ фарїсе́е лицемѣри, ꙗ҆́ко ѻ҆десѧт̑ствꙋете мѧтвꙋ, и҆ копръ, и҆ кѷминъ.
и҆ ѻ҆стависте вѧщьшаѧ законꙋ, сꙋдъ и҆ млс̑҇ть и҆ вѣрꙋ.
сїа же подоба́ше твори́ти, и҆ ѻ҆нѣхъ не ѻ҆ставлѧти·

Вожд̑и слѣпїи ѻ҆цѣжа́ющѐи комары̀, велбꙋ́да же пожира́юще·

Горе вамъ книжницы и҆ фарисе́е лицемѣ́ри, ꙗ҆́ко ѻ҆чищѧете внѣшнее с꙽тклѧници и҆ блю́дꙋ, в꙽нꙋтръю҆дꙋ же сꙋть по́лни хищенїа и҆ непра́вды.
фарисе́ю слѣпыи, ѻ҆чисти преже в꙽нꙋтренее с꙽тклѧници и҆ блю́дꙋ, да бꙋдетъ и҆ внѣшнее и҆ма чи́сто·

горе вам̑ книжници и҆ фарисе́е лицемѣри, ꙗ҆ко подо́битесѧ гробо́мъ пова́пленом̑, и҆же внѣю́дꙋ ѹ҆бо ꙗ҆́влѧ́ютсѧ красни, в̂нꙋтръю҆дꙋже плъ́ни сꙋтъ костїи мр҃твыхъ, и҆ всѧ́коа нечи́стоты·

Тако и҆ вы, внѣю҆дꙋ ѹ҆бо ꙗ҆влѧ́етесѧ чл҃комъ праведни, внꙋтръю҆дꙋ же е҆сте плъни лицемѣ́рїа и҆ безаконїѧ·

зач̑҇, ч҃ѕ·

Горе вамъ книжници и҆ фарисе́е лицемѣ́ри, ꙗ҆́ко ѕи́жд̑ете гро́бы прро̑҇чьскїа, и҆ кра́сите ра́кы праведных̑, и҆ гл҃ете, а҆ще бы́хомъ были въ дн҃и ѿц҃ъ на́ших̑, не быхомъ ѹ҆бо ѻ҆бещници и҆мъ были в꙽ крови прро̑҇къ·

Тѣмже сами свѣдѣтельствꙋете себѣ ꙗ҆́ко сн҃ве е҆сте и҆зби́вшихъ прро̑҇кы.
и҆ в̂ы и҆спо́лните мѣрꙋ ѿц҃ъ вашихъ·

ѕмїа порожденїа е҆хи́днова, како ѹ҆бѣжитѐ ѿ сꙋда ѻ҆гнѧ гее́нскаго;
сего ради с̂е а҆зъ послю̀ к вамъ прро̑҇кы, и҆ премꙋдры, и҆ кни́жникы, и҆ ѿ них꙽ ѹ҆бїете и҆ ра́спнете, и҆ ѿ нихъ бїете на со́нмищихъ ваших̑, и҆ и҆ждене́те ѿ града въ град̑, ꙗ҆́ко прїидет̑ на в̂ы всѧка кровь пра́вед̑на пролива́ема на земли, ѿ крове авелѧ пра́веднаго, до́ крове заха́рїа сн҃а варахі́ина, е҆гоже ѹ҆бисте междꙋ цр҃ковїю і҆ ѻ҆лтаре́мъ·

А҆ми́нь гл҃ю ва́мъ, ꙗ҆́ко прїидꙋтъ всѧ сїа на родъ се́й·

Іерс̑҇ли́мъ, і҆ерс̑҇ли́м꙽, и҆зби́выи прро̑҇кы, и҆ ка́менїемъ побива́а по́сланныѧ к тебѣ, колькра́ты въсхотѣхъ събрати чѧ́да твоѧ, ꙗ҆́коже събира́етъ ко́кошъ птенцѧ своѧ подъ крилѣ, и҆ не въсхотѣсте;
с̂е ѻ҆ставлѧ́етсѧ вамъ домъ вашъ пꙋстъ·

Гл҃ю б̂о вамъ, ꙗ҆́ко не и҆́мате мене ви́дѣти ѿселѣ, до́ндеже речете, блс̑҇венъ грѧдыѝ въ и҆мѧ гн҃е·

Глв̑҇а, к҃д.

зач̑҇, ч҃з·

И изшед̑ і҆с҃, и҆дѧше ѿ цр҃кве.
и҆ пристꙋпи́шѧ к немꙋ ѹ҆ченицы е҆го, показати е҆мꙋ зданїа цр҃ко́внаа.
і҆с҃ же рече и҆мъ.
видите ли вс̂ѧ сїа;
а҆ми́нь гл҃ю вамъ, не и҆́мать ѻ҆стати здѣ ка́мень на ка́мени, е҆же не разори́тсѧ·

зач̑҇, ч҃и·

Сѣдѧ́щꙋ же е҆мꙋ на горѣ е҆леѻ́н꙽стѣи, пристꙋпи́ша к немꙋ ѹ҆ченицы на е҆ді́нѣ гл҃юще.
рц̂и намъ, когда сїа бꙋ́дꙋтъ;
и҆ что е҆сть зна́менїе твоего прише́ствїа и҆ кончи́на вѣкꙋ;
и҆ ѿвѣща́въ і҆с҃, рече и҆мъ.
блюдѣте, да никтоже васъ прельсти́тъ.
мно́ѕи б̂о прїидꙋтъ въ и҆мѧ моѐ, гл҃юще, а҆́зъ е҆смь х҃с, и҆ мно́гы прельстѧтъ·

Ѹ҆́слы́шати же и҆мате брани, и҆ слы́шанїа бра́немъ.
зри́те, не ѹ҆жаса́итесѧ.
подоба́етъ б̂о всѣмъ си́мъ быти.
н̂о не тогда е҆сть кончи́на.
въста́нетъ б̂о ѧ҆зы́къ на ѧ҆ѕы́къ, и҆ црс̑҇тво на црс̑҇тво·

И҆ бꙋ́дꙋтъ глади и па́гꙋбы и трꙋ́си по мѣста.
всѧ же сїа нача́ло болѣзнемъ·

Тогда̀ предадѧтъ вы̂ в꙽ ско́рби, и҆ ѹ҆бїю́тъ в̂ы, и҆ бꙋ́дете ненави́дими всѣми ѧ҆зы́кы, и҆мени мое҆го ради·

И҆ тогда̀ събла́знѧтъсѧ мно́ѕи, и҆ дрꙋгъ дрꙋга предадѧтъ, и҆ възненавидит̑ дрꙋгъ дрꙋга·

И҆ мно́ѕи л꙽же прро̑҇цы в꙽ста́нꙋт꙽, и҆ прельстѧтъ многыа, и҆ за ѹ҆мно́женїе беза́конїа, и҆зсѧ́кнетъ любы̀ мно́гыхъ·

зач̑҇, ч҃ѳ·

Претръпѣ́выи же до конца̀, то́и сп҃сетсѧ·

и҆ проповѣ́стьсѧ сїе е҆ѵг̑҇лїе цр҃ьствїа, по все́и вселе́ннѣи, въ свѣдѣтельство всѣмъ ѧ҆ѕы́комъ, и҆ тогда̀ прїидет̑ кончи́на·

Є҆гда ѹ҆бо ѹ҆́зрите мр́ьзость запꙋстѣ́нїа, рече́нꙋю дани́иломъ прро̑҇комъ, стоащꙋ на мѣ́стѣ ст҃ѣ, и҆же чте́тъ да разꙋмѣ́етъ·

Тогда̀ сꙋщїи въ и҆юде́и, да бѣжа́тъ на горы.
і҆ и҆же на кровѣ, да не схо́дит̑ взѧти ꙗ҆же в домꙋ е҆го.
і҆ и҆же на селѣ, да не възврати́тсѧ в꙽спѧт̑ взѧти ри́зъ свои҆хъ·

Горе же непразд̑ным̑, и҆ доѧ́щимъ в тыѝ дн҃и·

Моли́те же сѧ, да не бꙋ́детъ бѣжъство ваше зимѣ, ни в сꙋбо́тꙋ·

бꙋ́детъ б̂о тогда ско́рбъ ве́лїа, ꙗ҆кова же́ нѣ́сть была ѿ начѧ́ла ми́рꙋ, доселѣ, ниже и҆́мать быти·

и҆ а́ще не бышѧ прекрати́лисѧ дн҃їе тїи, не бы̀ ѹ҆бо спасла́сѧ всѧ́ка плоть.
и҆збра́нныхъ же ради прекратѧт̑ сѧ дн҃їе тїи·

Тогда а҆ще кт̂о речетъ вамъ.
с̂е здѣ х҃с, и҆ли ѻ҆́ндѣ, не и҆мѣте вѣры·

в꙽ста́нꙋтъ б̂о лжехристи и҆ л꙽же прро̑҇цы, и҆ дадѧ́тъ знаменїѧ ве́лїа и҆ чюдеса, ꙗ҆́коже прельстити а҆ще възможно і҆ и҆з꙽бранныа·

с̂е преже рѣхъ вамъ·

а҆ще ѹ҆бо рекꙋтъ вам̑.
с̂е в꙽ пꙋсты́ни ес̑҇, не и҆зыдѣте.
с̂е въ скро́вищыхъ, не и҆мѣте вѣры·

зач̑҇, р҃·

Ꙗ҆́коже б̂о мо́лнїи и҆схо́дитъ ѿ въсто́къ, и҆ ꙗ҆влѧ́етсѧ до западъ, та́ко бꙋ́детъ и҆ прише́ствїе сн҃а чл҃чьскаго·

идеже б̂о а҆ще бꙋ́детъ трꙋпъ, та́мо съберꙋтсѧ ѻ҆рлѝ·

А҆бїе же по скорби дн҃їи тѣхъ, слн҃це поме́р꙽кнетъ и҆ лꙋна̀ не да́стъ свѣта свое҆го, и҆ ѕвѣзды спа́днꙋтъ с꙽ нб҃се, и҆ си́лы нбс̑҇ныѧ подвигнꙋтсѧ·

И҆ тогда ꙗ҆́витсѧ зна́менїе сн҃а члчс̑҇каго на нб҃си·

И҆ тогда̀ въспла́чютсѧ вс̂ѧ колѣна земнаѧ.
и҆ ѹ҆́ѕрѧтъ сн҃а члчс̑҇каго грѧдꙋща на ѻ҆блацѣхъ нб҃сныхъ, съ си́лою и҆ сла́вою мно́гою.
и҆ по́слетъ а́гг҃лы своа, съ трꙋ́бнымъ гла́сомъ ве́лїемъ, и҆ съберꙋтъ и҆збра́нныѧ е҆го ѿ четы́рех꙽ вѣтръ, ѿ конецъ нб҃съ, до коне́цъ и҆хъ.
ѿ смоко́вница же наѹ҆чи́тесѧ при́тчи·

е҆гда ѹ҆же вѣйа еа̀ бꙋдꙋтъ мла́да, и҆ листвїе прозѧ́бнетъ·

вѣ́дите ꙗ҆ко бли́зъ е҆сть жа́тва·

та́ко и҆ в̂ы, е҆гда ви́дите сїа вс̂ѧ, вѣдите ꙗ҆́ко близъ е҆сть при две́рехъ·

зач̑҇, р҃а·

А҆́ми́нь гл҃ю вамъ, не мимои҆́детъ род̑ сей, до́ндеже вс̂ѧ сїа бꙋ́дꙋтъ.
н҃бо и҆ землѧ ми́мои҆́детъ, словеса же моѧ не ми́мои҆дꙋтъ·

зач̑҇, р҃в·

Ѡ҆ дн҃и же томъ, и҆ часѣ, никто́же вѣсть.
ни а́гг҃ли нбс̑҇нїи, то́кмо ѿц҃ъ мои е҆ді́нъ·

Ꙗ҆́коже б̂о бысть въ дн҃и но́евы, та́ко бꙋдет̑ и҆ пришествїе сн҃а члчс̑҇каго·

Ꙗ҆́коже б̂о бѣхꙋ въ дн҃и преже пото́па, ꙗ҆дꙋще же и҆ пїюще.
женѧ́щесѧ и҆ посага́юще, до негоже дн҃е вни́де но́е в ковчег̑҇, и҆ не ѹ҆вѣ́дѣша, дон꙽деже прїиде вода̀, и҆ взѧт̑ вс̂ѧ, та́ко бꙋ́дет̑ и҆ пришествїе сн҃а члчс̑҇каго·

Тогда̀ дв̂а бꙋдета на селѣ, е҆ді́нъ поемлет̑сѧ а҆ дрꙋгі́и ѻ҆ставлѧет̑сѧ.
дв̂ѣ мелющи в꙽ же́рновах̑, е҆ді́на пое́млет̑сѧ, и҆ е҆ді́на ѻ҆ставлѧ́етсѧ·

зач̑҇, р҃г·

Бди́те ѹ҆бо, ꙗ҆ко не вѣсте в꙽ кі́и часъ г҃ь вашъ прїидетъ·

Се же вѣдите ꙗ҆́ко а҆ще б̂ы вѣдалъ до́мꙋ влд̑ка, в꙽ кꙋю страждꙋ тать прїидетъ, бдѣлъ ѹ҆бо б̂ы, и҆ не бы далъ под̑копа́ти хра́ма свое҆го, сего ради и҆ в̂ы бꙋдѣте гото́ви, ꙗ҆ко в о́ньже часъ не мнитѐ, сн҃ъ члчс̑҇кїи прїидетъ·

Кт̂о ѹ҆бо е҆сть вѣрныи рабъ и҆ мꙋ́дрыи.
е҆гоже поста́вит̑ господи́нъ е҆го над̑ до́момъ свои́м꙽.
е҆же даа́ти и҆мъ пи́щꙋ въ времѧ и҆хъ;
блаже́нъ рабъ то́и, е҆гож̑ пришед̑ господинъ е҆го, ѻ҆брѧ́щетъ та́ко творѧща.
а҆ми́нь гл҃ю вамъ, ꙗ҆ко над̑ всѣмъ и҆мѣнїемъ свои҆мъ поста́витъ е҆го·

А҆ще ли же речет̑ злы́и ра́бъ то́и в꙽ срд̑ци своем꙽, коснитъ господинъ мои прїитѝ, и҆ начнетъ би́ти клеврѣты своѧ, ꙗ҆́сти же и҆ пи́ти съ пїа́ницами.
прїидетъ господи́нъ раба того, в꙽ дн҃ь в оньже не чае҆тъ, и҆ в часъ въ ньже не вѣсть, и҆ проте́шетъ е҆го по́лъма, и҆ часть е҆го с невѣ́рными положитъ.
т̂ꙋ бꙋд́етъ плачъ и҆ скрежет꙽ зꙋбомъ.

Глв̑҇а, к҃е.

зач̑҇, р҃д·

Тогд̑а ѹ҆подо́бит̑сѧ црс̑҇твїе нбс̑҇ное десѧти́мъ дв҃амъ ꙗ҆́же прїа́шѧ свѣти́лникы своѧ̀, і҆ и҆зыдо́шѧ въ срѣтенїе женихꙋ.
пѧ́ть же бѣ ѿ нихъ мꙋдры, и҆ пѧть ю҆ро́дивы.
ю҆ро́дивыѧж̑ прие́мше свѣти́лники своа̀, не взѧ́шѧ с꙽ собо́ю е҆ле́а.
мꙋ́дрыѧ же прїа́шѧ е҆ле́й въ сосꙋ́дѣхъ съ свѣти́лникы свои́ми.
коснѧ́щꙋ же женихꙋ̀, възрд̑ѣма́шѧсѧ вс̂ѣ, и҆ спа́хꙋ.
полꙋнощи же во́пль бысть.
с̂е женихъ грѧдет꙽, и҆сходи́те въ срѣтенїе е҆го·

Тогда̀ в꙽ста́вше вс̂ѣ дв҃ы т̂ы, и҆ ѹ҆краси́ша свѣти́лникы своѧ.
ю҆ро́дивыѧ же мꙋдрымъ рѣшѧ, дадите намъ ѿ ма́сла ва́шего, ꙗ҆ко свѣти́лницы наши ѹ҆гаса́ютъ·

ѿвѣща́шѧ же мꙋдрыѧ гл҃юще, е҆да ка́ко недостанетъ намъ и҆ вамъ.
и҆дѣте же паче к꙽ продаю́щим̑, и҆ кꙋпи́те себѣ, и҆дꙋщим же и҆мъ кꙋпи́ти прїиде женихъ, и҆ гото́выа внидоша с ним̑ на бракы, и҆ затворени быша две́ри·

Послѣди́ же прїидо́шѧ и҆ про́чаа дв҃ы, гл҃юще, г҃и г҃и, ѿвер̑҇зи нам̑.
ѻ҆нже ѿвѣщавъ рече.
а҆мин̑҇ гл҃ю вам̑, не вѣмъ вас̑҇·

бди́те ѹ҆бо, ꙗ҆ко не вѣсте дн҃е ни часа̀, в оньже сн҃ъ члчс̑҇кїи прїидетъ·

зач̑҇, р҃е·

Ꙗ҆́коже б̂о чл҃кь нѣкїи ѿходѧ, призва̀ своѧ рабы̀, и҆ преда́стъ и҆мъ и҆мѣ́нїе своѐ, и҆ ѻ҆вомꙋ ѹ҆бо дастъ пѧть тала́нтъ, ѻ҆вомꙋ же дв̂а, ѻ҆вомꙋ же е҆ді́нъ, комꙋжд̑о проти́вꙋ силѣ е҆го, и҆ ѿи́де а҆бїе.
шед̑ же прїе́мыѝ пѧть талантъ, дѣл́а в нихъ, и҆ сътворѝ дрꙋгы́а пѧть талантъ·

Такожде же і҆ и҆же дв̂а, приѻ҆брѣте и҆ то́и дрꙋгаѧ дв̂а·

Прїе́мыи же е҆ді́нъ, шедъ вкопа е҆го в꙽ землю, и҆ съкры̀ сребро господ̑и̑на свое҆го.
по мно́ѕѣ же времени, прїиде господинъ рабъ тѣх꙽, и҆ стѧза́сѧ с ни́ми ѻ҆ словесѝ·

И҆ пристꙋ́пль пѧт̑ тала́нтъ прїе́мыи, принесе дрꙋгы́а пѧть тала́нтъ, гл҃ѧ.
г҃и, пѧть талантъ ми е҆си предалъ, и҆ с̂е дрꙋгы́а пѧть тала́нт꙽ приѻ҆брѣтохъ и҆́ми·

Рече же е҆мꙋ г҃ь е҆го, добрыи рабе бл҃гі́и и вѣрныи, ѻ҆ малѣ бысть вѣренъ, над̑ мно́гыми т̂ѧ поста́влю, вни́ди в радость г҃а свое҆го·

Пристꙋпль же і҆ и҆же дв̂а таланта прїемыи, рече.
г҃и, дв̂а таланта ми е҆си предалъ, с̂е дрꙋгаѧ дв̂а тала́нта приѻ҆брѣтох꙽ и҆́ма.
рече же е҆мꙋ г҃ь е҆го, добрыи рабе, бл҃гїи и҆ вѣрныи, ѻ҆ ма́лѣ бысть вѣрен̑҇, над̑ многыми т̂ѧ поста́влю.
вни́ди в ра́дость г҃а свое҆го·

Пристꙋпль же и҆ прїемыѝ е҆ді́нъ талантъ, рече.
г҃и, вѣдѣх꙽ т̂ѧ ꙗ҆́ко жестокъ е҆си чл҃къ.
жнеши, ѹ҆дꙋже не сѣѧ́лъ е҆си.
и҆ събира́еши, ѹ҆́дꙋже не расточилъ е҆си·

и҆ ѹ҆боа́всѧ шед̑ съкрыхъ тала́нт тво́и в꙽ земли, и҆ с̂е и҆́маши твоѐ.
ѿвѣща́в же г҃ь е҆го рече е҆мꙋ.
лꙋка́выи ра́бе и҆ лѣни́выи, вѣ́дѧше ꙗ҆ко жнꙋ и҆дѣже не сѣѧ́хъ, и҆ събира́ю ѹ҆дꙋже не расточи́хъ·

Подоба́ше ѹ҆бо тебѣ вда́ти сребро̀ мое тръжникомъ, и҆ прише́дъ а҆зъ, взѧ́лъ быхъ своѐ с лихвою.
възмѣте ѹ҆бо ѿ него тала́нт꙽, и҆ дади́те и҆мꙋщемꙋ десѧтъ тала́нтъ·

Имꙋщемꙋ б̂о вездѣ дано бꙋ́дет꙽ и҆ преи҆збꙋдет̑.
ѿ неи҆мꙋщаго же, и҆ е҆же мнит̑сѧ и҆мѣ́а взѧто бꙋ́детъ ѿ него·

И҆ неключи́маго раба в꙽връз́ѣте въ т꙽мꙋ̀ кромѣшнюю, т̂ꙋ бꙋдетъ плачъ и҆ скрежет̑ зꙋбо́мъ·

Сїа гл҃ѧ въз꙽гласѝ.
и҆мѣаѝ ѹ҆ши слы́шати, да слы́шит̑·

зач̑҇, р҃ѕ·

Є҆́гда же прїидет̑ сн҃ъ члчс̑҇кїи в꙽ сла́вѣ своей, и҆ вс̂и ст҃їи а҆гг҃ли с ним꙽, тогда̀ сѧ́детъ на прс̑҇толѣ сла́вы своеа̀.
и҆ съберꙋтсѧ пред̑ нимъ вс̂и ꙗ҆́ѕы́цы, и҆ раз꙽лꙋчитъ и҆хъ дрꙋгъ ѿ дрꙋга, ꙗ҆́коже па́стырь разлꙋча́етъ ѻ҆вцѧ̀ ѿ ко́злищь.
и҆ поста́витъ ѻ҆вцѧ̀ ѻ҆деснꙋ́ю себе, а҆ ко́злища ѻ҆шꙋюю̀·

Тогда речет̑ цр҃ь сꙋщимъ ѻ҆деснꙋю е҆го.
прїидѣте блс̑҇венїи ѿц҃а мое҆го, наслѣ́дꙋите ѹ҆гото́ванное вамъ црс̑҇твїе, ѿ сложенїѧ мирꙋ.
възалкахъ бо сѧ, и҆ да́сте м̂и ꙗ҆́сти.
възжадахъсѧ, и҆ напои́сте м̂ѧ·

Стра́ненъ бѣхъ, и҆ в꙽ведо́сте мене.
на́гъ, и҆ ѻ҆дѣа́сте м̂ѧ·

боленъ, и҆ посѣти́сте мене·

в темници бѣхъ, и҆ прїидо́сте къ мнѣ·

тогда ѿвѣща́ютъ е҆мꙋ пра́ведници гл҃юще.
г҃и, когда т̂ѧ видѣхомъ а́лчюща, и҆ напита́хомъ;
и҆л̂и жа́ждꙋща, и҆ напои́хомъ;
когда же тѧ видѣ́хомъ стра́нна, и҆ в꙽ведохомъ;
и҆л̂и на́га, и҆ ѻ҆дѣа́хомъ;
когда же т̂ѧ видѣхомъ болѧща, и҆л̂и в темни́ци, и҆ прїидохом̑ к тебѣ;
и҆ ѿвѣща́въ цр҃ь, речетъ и҆мъ.
а҆ми́нь гл҃ю вам꙽.
понеже сътвори́сте е҆ді́номꙋ сихъ бра́тїи мои́хъ меншихъ, мн̂ѣ сътвори́сте·

Тогда̀ речетъ и҆ сꙋщимъ ѻ҆шꙋю е҆го.
и҆дѣте ѿ мене проклѧтїи въ ѻ҆́гнь вѣчныи, ѹ҆гото́ванныи дїаволꙋ и҆ а́гг҃ломъ е҆го·

в꙽залкахъ бо сѧ, и҆ не дасте м̂и ꙗ҆́сти.
възжадахъсѧ, и҆ не напои́сте мене·

Страненъ бѣх꙽ и҆ не в꙽ведо́сте менѐ.
нагъ, и҆ не ѻ҆дѣасте менѐ·

Бо́ленъ, и҆ в꙽ темни́ци, и҆ не посѣти́сте мене·

Тогда ѿвѣща́ютъ е҆мꙋ и҆ тїи гл҃юще.
г҃и, когда т̂ѧ видѣхомъ а҆лчюща, и҆л̂и жа́ждꙋща, и҆л̂и стра́нна, и҆л̂и на́га, и҆л̂и бо́лна, и҆л̂и в темни́ци, и҆ не послꙋжи́хомъ тебѣ;
тогда ѿвѣщае҆тъ и҆мъ, гл҃ѧ.
а҆ми́нь гл҃ю вамъ.
понеже не сътвори́сте е҆ді́номꙋ сихъ меншихъ, ни мнѣ сътвори́сте·

і и҆дꙋтъ сїи в꙽ мꙋ́кꙋ вѣчнꙋю.
пра́вед̑ници же в꙽ животъ вѣчныи·

Глв̑҇а, к҃ѕ·

И бысть е҆гда сконча̀ і҆с҃ словеса̀ сїа вс̂ѧ, рече ѹ҆чн҃комъ свои҆мъ·

зач̑҇, р҃з·

Вѣсте ꙗ҆́ко по двою̀ дн҃ю па́сха бꙋдетъ, и҆ сн҃ъ члчс̑҇кїи преданъ бꙋдетъ на пропѧ́тїе·

Тогда̀ събра́шасѧ а҆рхїере́е и҆ кни́жницы и҆ ста́рцы людъстїи, в꙽ дворъ а҆рхїере́ѻвъ, гл҃емаго каіа́фа, и҆ съвѣщашѧ, да і҆с҃а лестїю и҆мꙋтъ, и҆ ѹ҆бїютъ.
гл҃ахꙋ же, н̂о не в꙽ пра́зник꙽, да не мо́лъва бꙋдетъ в лю́дехъ·

зач̑҇, р҃и·

І҆с҃ꙋ же бы́вшꙋ въ виѳанїи, в домꙋ симона прокаженаго, пристꙋпѝ к немꙋ жена, стклѧницꙋ мѷра и҆мꙋщи многоцѣ́ннаго, и҆ възлива́ше на главꙋ е҆го възлежа́щꙋ.
видѣвше же ѹ҆чн҃ицы е҆го, негодова́шѧ гл҃юще, чосо рад̑и̑ ги́бель сїа бысть;
можа́ше б̂о с̂е мѷро продано̀ быти на мно́ѕѣ, и҆ датисѧ ни́щимъ.
разꙋмѣв же і҆с, рече и҆мъ что трꙋжае҆те женꙋ̀;
дѣ́ло б̂о добро̀ съдѣ́ла ѻ҆ мнѣ.
всегда̀ б̂о ни́щих̑ и҆́мате с꙽ собою̀, мене же не всегда и҆́мате.
възлїа́вши б̂о сїа мѷро с̂е на тѣло моѐ, на погребенїе м̂ѧ сътвори.
а҆ми́нь гл҃ю вамъ.
и҆дѣже а҆ще проповѣ́дано бꙋ́детъ е҆ѵг̑҇лїе сѐ въ всемъ ми́рѣ, рече́тсѧ, і҆ е҆же сътвори сїа в꙽ па́мѧть е҆ѧ̀.

Тогда шед̑ е҆дінъ ѿ ѻ҆боюна́десѧте, гл҃емыѝ і҆ю́да и҆скарїѻ́тъскїи къ а҆рхїе҆ре́ѻмъ рече.
что̀ м̂и хо́щете да́ти, и҆ а҆зъ вамъ предамъ е҆го̀·

ѻ҆ни же поста́виша е҆мꙋ тридесѧте сре́бреник̑҇.
и҆ ѿтолѣ и҆ска́ше подобна времене, да е҆го предасть·

В пе́рвыи же дн҃ь ѻ҆прѣ́сночныи, пристꙋпи́ша ѹ҆чн҃цы і҆с҃ови гл҃юще е҆мꙋ.
гд̂ѣ хо́щеши ѹ҆гото́ва҆емъ т̂и ꙗ҆́сти пасхꙋ;
ѻ҆́н же реч̑҇.
и҆дѣте въ́ градъ къ ѻ́нсїци, и҆ рцѣте е҆мꙋ, ѹ҆читель гл҃етъ, врѣмѧ моѐ бли́зъ е҆сть, ѹ҆ тебе сътворю па́схꙋ съ ѹ҆чн҃кы мои́ми.
и҆ сътвори́ша ѹ҆ченицы, ꙗ҆́коже повелѣ и҆мъ і҆с҃, и҆ ѹ҆гото́вашѧ па́схꙋ·

Вечерꙋ же бы́вшꙋ, възлежа́ше съ ѻ҆бѣманадесѧте ѹ҆ченико́ма·

І҆ ꙗ҆́дꙋ́щемъ и҆мъ, рече.
а҆ми́нь гл҃ю вамъ, ꙗ҆́ко е҆ді́нъ ѿ васъ предасть м̂ѧ·

И҆ скорбѧ́ще ѕѣло, начашѧ гл҃ати е҆мꙋ е҆ді́нъ кожд̑о и҆хъ.
е҆да а҆зъ е҆смъ г҃и;
ѻ҆́н же ѿвѣщавъ рече.
ѻ҆мочи́выѝ съ мною в соли́ло рꙋ́кꙋ, тои м̂ѧ предасть.
сн҃ъ же члчс̑҇кїи и҆́детъ, ꙗ҆коже е҆сть пи́сано ѻ҆ немъ.
го́ре же чл҃кꙋ томꙋ, и҆́мже сн҃ъ члчс̑҇кїи предастъсѧ, добро̀ б̂ы бы́ло е҆мꙋ, а҆ще сѧ не бы ро́дилъ чл҃къ то́и·

ѿвѣщав же і҆ѹ́да предааѝ е҆го, рече.
е҆да а҆зъ е҆смъ, рав꙽ви;
гл҃а е҆мꙋ, т̂ы рече·

Ꙗ҆́дꙋщемъ же и҆мъ, прїемъ і҆с҃ хлѣбъ, и҆ блс̑҇ви́въ, преломи, даѧ́ше ѹ҆чн҃комъ, и҆ рече.
прїимѣте, і҆ ꙗ҆ди́те, с̂е е҆сть тѣ́ло моѐ.
и҆ прїем꙽ ча́шꙋ, хвалꙋ̀ въздавъ, дастъ и҆м꙽ гл҃ѧ.
пїите ѿ неа̀ вс̂и.
сѐ бо е҆сть кров̑҇ моа̀ но́ваго завѣта, ꙗ҆́же за мно́гыѧ̀ и҆злива́ема, въ ѻ҆ставле́нїе грѣховъ·

Гл҃ю же вамъ, ꙗ҆́ко не и҆́мамъ пи́ти ѿ нн҃ѣ ѿ сего плода̀ ло́знаго, до́ дн҃е того, е҆гда и҆̀ пїю с вами но́во въ црс̑҇твїи ѿц҃а мое҆го·

И҆ въспѣв꙽ше, изидо́шѧ в꙽ го́рꙋ е҆леѻ́нскꙋю·

Тогда гл҃а и҆мъ і҆с҃. вс̂и в̂ы събла́знитесѧ ѻ҆ мнѣ в но́щъ сїю̀.
пи́сано б̂о е҆сть·

Поражꙋ па́стырѧ, и҆ разы́дꙋтсѧ ѻ҆вцѧ ста́да по въскр҃се́нїи же мое҆мъ, варѧ́ю в̂ы в꙽ галиле́ѝ.
ѿвѣщав же петръ, рече е҆мꙋ.
а҆ще и҆ вс̂и събла́знѧтсѧ ѻ҆ тебѣ а҆зъ николиже съблажнюсѧ·

Рече е҆мꙋ і҆с҃.
а҆ми́нь гл҃ю тебѣ, ꙗ҆ко в сїю нощь прежд̑е да́же а҆лекто́ръ не възгласи́тъ, тр̂икра́ты ѿве́ржешисѧ мене·

Гл҃а е҆мꙋ петръ.
а҆ще м̂и е҆сть и҆ ѹ҆мрети с тобою, не ѿвр́ъгꙋсѧ тебѐ·

такоже и҆ вс̂и ѹ҆ченицы рѣша·

Тогда̀ прїиде с ними і҆с҃ в꙽ весь, нарица́емꙋю геѳсїмани·

И҆ гл҃а ѹ҆чн҃комъ.
сѣди́те т̂ꙋ, дондеже шд̑е помолю́сѧ тамо.
и҆ пое҆мъ петра и҆ ѻ́ба сн҃а зеведе́ѻва, начѧтъ скорбѣти и҆ тꙋжи́ти·

Тогда гл҃а им̑ і҆с҃, приско́рбна е҆сть дш҃а моа̀ до см҃ръти.
пожд̑и́те зд̂ѣ, и҆ бди́те съ мно́ю·

И҆ прешедъ ма́ло, падѐ на лици свое҆мъ молѧсѧ и҆ гл҃ѧ.
ѿч҃е мо́и.
а́ще възможно е҆сть, да ми́мои҆́детъ ѿ мене чаша сїа.
ѻ҆баче не ꙗ҆коже а҆зъ хощꙋ, н̂о ꙗ҆́коже т̂ы·

И҆ пришд̑е къ ѹ҆чн҃комъ, и҆ ѻ҆брѣте и҆хъ спѧ́щѧ.
и҆ гл҃а петро́ви.
та́ко ли, не възмого́сте е҆ді́наго часа̀ побдѣти со мною;
бди́те и҆ моли́тесѧ, да не вни́дете в напасть.
дх҃ь б̂о бо́дръ, пло́ть же немощ꙽на·

паки втори́цею шд̑е, помоли́сѧ, гл҃ѧ.
ѻ҆ч҃е мои, а҆ще не мо́жетъ сїа ча́ша ми́мои҆ти ѿ мене, а҆ще не пїю еа̀, бꙋди во́лѧ твоа̀·

и҆ пришд̑е ѻ҆брѣте и҆хъ па́ки спѧ́щѧ, бѣ́ста б̂о и҆мъ ѻ҆́чи ѻ҆тѧготѣнѣ.
и҆ ѻ҆ста́вль и҆хъ, шедъ паки, помоли́сѧ трети́цею, тожд̑е сло́во ре́къ·

Тогда прїиде къ ѹ҆чн҃комъ свои҆мъ, и҆ гл҃а и҆мъ.
спи́те про́чее и҆ почиваите.
с̂е прибли́жисѧ часъ, и҆ сн҃ъ члчс̑҇кїи предае҆тсѧ в рꙋкы грѣшникомъ.
в꙽ста́нѣте, и́дем̑.
с̂е прибли́жисѧ предааѝ м̂ѧ·

И҆ е҆ще е҆мꙋ гл҃ющꙋ, с̂е і҆ѹ́да е҆ді́нъ ѿ ѻ҆боюнадесѧте прїиде, и҆ с нимъ народ̑ мно́гъ, съ ѻ҆рꙋжїемъ, и҆ дреко́льми, ѿ а҆рхїере́и и҆ ста́рецъ люд̑скыхъ·

Предааѝ же е҆го, дасть и҆мъ зна́менїе, гл҃ѧ.
е҆гоже а҆ще лобжꙋ̀, то́и е҆сть, и҆мѣте е҆го·

І҆ а́бїе пристꙋпль къ і҆с҃ови, рече.
радꙋисѧ равви, и҆ ѻ҆блобыза е҆го·

І҆с҃ же рече е҆мꙋ.
дрꙋже твори на неже е҆си прише́лъ;
тогда̀ пристꙋ́пльше, възложи́ша рꙋцѣ на і҆с҃а, и҆ ѧ́ша е҆го·

И҆ с̂е е҆ді́нъ ѿ сꙋщыхъ съ і҆с҃омъ, простеръ рꙋкꙋ̀, и҆звлечѐ нож̑ сво́и, и҆ ѹ҆да́ри раба а҆рхїере́ѻ҆ва, и҆ ѹ҆рѣ́за е҆мꙋ ѹ҆хо·

тогда гл҃а е҆мꙋ і҆с҃, възврати ножъ свои в мѣсто е҆го.
вс̂и б̂о прїе́мшеѝ ножъ, ножем̑ поги́бнꙋт꙽·

И҆л̂и мниттисѧ ꙗ҆́ко не могꙋ нн҃ѣ ѹ҆моли́ти ѿц҃а мое҆го, и҆ пред̑ставитъ м̂и вѧ́ще и́ли дв̂анадесѧте легеѻ́на а҆гг҃лъ;
ка́коже ѹ҆бо сбꙋ́дѹт̑сѧ писа́нїа, ꙗ҆́ко та́ко подобает̑ быти;
в꙽ то́и часъ рече і҆с҃ наро́дом̑.
ꙗ҆́ко на разбо́иника ли и҆зыдо́сте съ ѻ҆рꙋжїем̑ и҆ дреколми ꙗ҆ти м̂ѧ.
по всѧ дн҃и при вас̑҇ сѣдѣхъ в꙽ цр҃къви ѹ҆ча, и҆ не ꙗ҆сте мене·

Се же вс̂е быс̑҇ да с꙽бꙋ́дꙋт꙽сѧ писанїа прро̑҇чьскаѧ·

Тогда ѹ҆ченицы вс̂и ѻ҆ставльше е҆го бѣжа́шѧ·

зач̑҇, р҃ѳ·

Воини же е́мше і҆с҃а, ведоша к꙽ каі҆а҆фѣ а҆рхїере́ѻ҆ви, и҆дѣже книжницы и҆ ста́рци събра̂шасѧ.
петръ же и҆дѧше по немъ и҆здале́че до двора а҆рхїере́ѻ҆ва, и҆ вшед̑ внꙋтръ, сѣдѧ́ше съ слꙋга́ми, ви́дѣти кончі́нꙋ.
а҆рхїере́е же и҆ ста́рцы, и҆ со́нмъ весь, и҆скахꙋ лж꙽е свѣдѣтельства на і҆с҃а, ꙗ҆ко да ѹ҆бїют̑ е҆го, и҆ не ѻ҆брѣтахꙋ.
и҆ мно́гомъ лже свѣдѣтелемъ пристꙋ́пльшемъ, не ѻ҆брѣто́шѧ·

Послѣди же пристꙋпи́вша дв̂а лже свѣдѣтелѧ, рѣ́ста.
сей рече.
могꙋ̀ разори́ти цр҃ков꙽ бж҃їю, и҆ треми дн҃ьми създа́тї ю҆̀.
и҆ въстав̑҇ а҆рхїере́и, рече е҆мꙋ.
ничесоже ли ѿвѣщавае҆ши, чт̂о сїи на тѧ свѣдѣтельствꙋютъ;
і҆с҃ же млъча́ше·

и҆ ѿвѣща́въ а҆рхїере́и, рече е҆мꙋ.
заклина́ю т̂ѧ бг҃омъ живы́мъ, да рече́ши нам̑, а҆ще т̂ы е҆си х҃с, сн҃ъ бж҃їи·

Гл҃а е҆мꙋ і҆с҃.
т̂ы рече.
ѻ҆ба́че гл҃ю вам̑.
ѿсе́лѣ ѹ́зрите сн҃а члчс̑҇каго сѣдѧ́ща ѻ҆деснꙋю си́лы, и҆ грѧдꙋща на ѻ҆блацѣхъ нбс̑҇ныхъ·

Тогда̀ а҆рхїере́й растръза ри́ѕы своа̀ гл҃ѧ.
ꙗко хꙋлꙋ гл҃а.
чт̂о и҆ е҆ще требꙋе҆мъ свѣдѣтелїи;
с̂е нн҃ѣ слы́шасте хꙋлꙋ е҆го.
что̀ сѧ вамъ мнитъ;
ѻ҆ниже ѿвѣща́вше рѣшѧ, пови́ненъ е҆сть смръти·

Тогда̀ заплева́шѧ лице е҆го, и҆ па́кости е҆мꙋ дѣѧ́хꙋ·

ѡ҆́ви же за лани́тꙋ ѹ҆дари́шѧ гл҃юще, прорцѝ намъ х҃е кт̂о е҆сть ѹ҆дареѝ т̂ѧ;
пе́тръ же внѣ сѣдѧше в꙽ дворѣ·

И҆ пристꙋпи к немꙋ еді́на рабы́ни гл҃ющи.
и҆ ты̀ б̂ѣ съ і҆с҃омъ галиле́искымъ·

ѡ҆́нже ѿвръж́есѧ пред̑ всѣми гл҃ѧ.
не вѣмъ чт̂о гл҃еши.
и҆зшед̑шꙋ же е҆мꙋ къ вратомъ, ѹ҆зрѣ е҆го дрꙋга́а, и҆ гл҃а сꙋщим̑ т̂ꙋ.
и сей б̂ѣ съ і҆с҃омъ назореѻ҆мъ.
и҆ па́кы ѿвръжесѧ с клѧтвою, ꙗ҆ко не зна́ю чл҃ка.
по малѣ же пристꙋпи́вше стоѧ́щеѝ.
рѣшѧ петро́ви, въи҆стинꙋ и҆ ты ѿ нихъ е҆си.
и҆б̂о бесѣда твоа̀ ꙗ҆вѣ т̂ѧ творитъ·

Тогда начатъ роти́тисѧ и҆ клѧтисѧ, ꙗ҆́ко не зна́ю чл҃ка·

і҆ а҆бїе пѣтелъ въз꙽гласѝ·

И҆ помѧнꙋ̀ петръ гл҃ъ і҆с҃овъ, рече́ныи е҆мꙋ.
ꙗ҆́ко преже да́же пѣтел꙽ не възгласитъ, тр̂и кра́ты ѿвръжешисѧ мене.
і҆ и҆зшед̑ вонъ пла́касѧ го́рко·

Глв̑҇а, к҃з.

зач̑҇, р҃і·

Ѹ҆трꙋ же бы́вшꙋ, совѣтъ сътвори́шѧ вс̂и а҆рхїере́е, и҆ ста́рцы людстїи на і҆с҃а, ꙗ҆́ко ѹ҆бити е҆го·

И҆ свѧзавше е҆го ведоша, и҆ предаша его понтїискомꙋ пилатꙋ и҆ге́монꙋ·

зач̑҇, ра҃і·

Тогда̀ видѣвъ і҆ю́да преда́выи е́го ꙗ҆́ко ѻ́сꙋдишѧ е҆го, раска́авсѧ, възвратѝ тридесѧте сре́бреникы а҆рхїереѻм̑ и҆ старцемъ, гл҃ѧ.
съгрѣшихъ, предавъ кровъ непови́ннꙋ·

ѡ҆́ни же рѣшѧ.
что е҆сть намъ;
т̂ы ѹ҆зриши.
и҆ повръ́гъ сребреникы в꙽ цр҃кви, ѿи҆де, и҆ шед̑ ѹ҆дависѧ·

А҆рхие҆рее же прїе́мше сре́бреникы, рѣшѧ.
недосто́ино е҆сть вложити и҆хъ в꙽ корва́нꙋ, понеже цѣна крове е҆сть·

Совѣт꙽ же сътво́рше, кꙋпи́шѧ и҆́ми село̀ скꙋделниче, в꙽ погреба́нїе стра́ннымъ.
тѣмже нарече́сѧ село̀ т̂о, село̀ кро́ве, до сего дн҃е·

Тогда с꙽быстьсѧ рече́ное і҆е҆ремїемъ прро̑҇комъ гл҃ющемъ.

Ѝ прїа́шѧ тридесѧте сребреникъ цѣнꙋ цѣне́наго, е҆гоже цѣни́ша ѿ сн҃въ і҆ил҃евъ, и даша ѧ҆̀ на селѣ скꙋделничи, ꙗ҆́коже сказа̀ мн̂ѣ г҃ь.

І҆с҃ же ст̂а пред̑ и҆гѣмоном̑·

И҆ въпроси е҆го и҆гѣмонъ гл҃ѧ.
ты̀ л̂и е҆си цр҃ъ і҆ю҆де́скыи;

І҆с҃ же рече е҆мꙋ, т̂ы гл҃еши.

І҆ е҆гда нанъ гл҃ахꙋ а҆рхїерее́ и ста́рцы, ничесоже не ѿвѣщава́ше.

Тогда гл҃а е҆мꙋ пилатъ.
не слы́шиши л̂и, колико на т̂ѧ свѣдительствꙋю҆тъ;
и҆ не ѿвѣща̀ е҆мꙋ, ни къ е҆ді́номꙋ гл҃ꙋ, ꙗ҆́ко диви́тисѧ и҆гѣмонꙋ ѕѣло̀·

На всѧк же пра́здникъ ѻ҆бы́чаи б̂ѣ и҆гѣмонꙋ ѿпꙋщати е҆ді́ного наро́дꙋ свѧ́зана, е҆гоже хотѧ́хꙋ·

и҆мѧхꙋ же тогда свѧзана нарочита, гл҃емаго варавва·

Събраном же и҆мъ, рече и҆мъ пилат̑.
кого хощете ѿ ѻ҆бою ѿпꙋщꙋ вамъ, вара́ввꙋ л̂и, и҆ли і҆с҃а гл҃емаго х҃а;
вѣ́дѧше б̂о ꙗ҆́ко за́висти ради преда́шѧ е҆го·

Сѣдѧ́щꙋ же е҆мꙋ на сꙋдищи, посла̀ к немꙋ жена̀ е҆го, гл҃ющи.
ничтоже тебѣ, и҆ пра́вед̑никꙋ томꙋ.
много б̂о пострадахъ дн҃есь въ снѣ е҆го ради·

А҆́рхїере́е же и҆ ста́рцы наѹ҆сти́шѧ наро́ды да и҆спро́сѧтъ вара́ввꙋ, і҆с҃а же погꙋбѧтъ·

ѿвѣщав же и҆гѣмонъ рече и҆мъ.
кого хо́щете ѿ ѻ҆бою ѿпꙋщꙋ вамъ;
ѻ҆ниж̑ рѣшѧ, вара́ввꙋ.
гл҃а и҆мъ пилат꙽.
чт̂о ѹ҆бо сътворю і҆с҃ꙋ, гл҃емомꙋ х҃ꙋ;
гл҃ашѧ е҆мꙋ вс̂и, да распѧтъ бꙋдет̑·

И҆гѣмон же рече.
коѐ ѹ҆бо зл̂о сътворѝ;
ѻ҆ни же и҆зли́ха въпїа́хꙋ гл҃юще, да про́пѧтъ бꙋ́детъ·

Видѣв же пилат̑, ꙗ҆́ко ничтоже ѹ҆спѣвает̑, н̂о паче млъва бывает̑, прїе́мъ во́дꙋ, ѹ҆мы̀ рꙋцѣ пред̑ наро̀дом̑, гл҃ѧ.
неповинн̑҇е е҆смь ѿ крове правед̑наго сего, в̂ы ѹ҆́зрите·

и҆ ѿвѣщавше вс̂и людїе, рѣшѧ.
кров̑҇ е҆го на нас̑҇, и҆ на чѧ́дѣхъ наших̑·

Тогд̑а ѿпꙋсти им̑ вараввꙋ, і҆с҃а же бив꙽ предастъ и҆мъ, да е҆го пропнꙋтъ·

зач̑҇, рв҃і·

Тогда во́ини и҆гѣ́монови, прїе́мше і҆с҃а на сꙋдищи, събра́шѧ на́нь вс̂е множество во́инъ.
и҆ съвлекше е҆го, ѻ҆дѣа́шѧ е҆го хлами́дою чръвле́ною, и҆ с꙽плетше вѣнецъ ѿ тръ́нїа, възложи́шѧ на главꙋ̀ е҆го, и҆ трость в десні́цꙋ е҆го.
и҆ покло́ншесѧ на колѣнꙋ пред̑ нимъ, рꙋгахꙋсѧ е҆мꙋ гл҃юще.
радꙋисѧ цр҃ю і҆юде́искыи·

И҆ плю́нꙋвше нань, прїашѧ трость, и҆ бїа́хꙋ по главѣ̀ е҆го.
и҆ е҆гда порꙋга́шѧсѧ е҆мꙋ, съвлеко́шѧ с него багрѧ́ницꙋ, и҆ ѻ҆блеко́шѧ е҆го в ри́зы е҆го, и҆ ведо́шѧ е҆го на пропѧтїе·

и҆сходѧще же, ѻ҆брѣто́шѧ чл҃ка киринеиска, и҆менемъ сі́мона.
и҆ семꙋ задѣшѧ понести крс̑҇тъ е҆го̀·

зач̑҇, рг҃і·

И҆́ прише́дше на мѣ́сто нарица́емоѐ голгоѳа.
е҆же е҆сть гл҃емо, кра́нїево мѣсто·

дашѧ е҆мꙋ пити ѻ҆цетъ съ же́лчїю смѣшенъ.
и҆ вкꙋшь, не хотѧ́ше пи́ти·

Распе́нше же е҆го, раздѣли́ша ри́зы е҆го, врь́гше жрѣбїа, и҆ сѣдѧ́ще стрежахꙋ е҆го т̂ꙋ·

И҆ възложишѧ връхꙋ главы е҆го винꙋ̀ е҆го написанꙋ.
се́и есть і҆с҃, цр҃ь і҆юдеискыи·

Тогда̀ распѧ́шѧ с нимъ дв̂а разбо́иника, е҆ді́ного ѻ҆деснꙋю, і҆ е҆ді́ного ѻ҆шꙋ́юю·

Ми́мо ходѧ́щеи же хꙋ́лѧхꙋ е҆го, покива́юще гла́вами свои́ми, и҆ гл҃юще.
разарѧаѝ цр҃ковъ, и҆ трими дн҃ьми съѕида́а, сп҃си́сѧ самъ.
а҆ще сн҃ъ е҆си бж҃їи, сниди съ крс̑҇та·

Та́кожд̑еже и҆ а҆рхїе҆ре́е рꙋга́ющесѧ съ кни́жникы и҆ ста́рцы, и҆ фарисе́и гл҃ахꙋ.
и҆ны́ѧ сп҃сѐ, себе л̂и не мо́жетъ сп҃сътѝ.
а҆ще цр҃ь і҆ил҃евъ е҆сть, да сни́детъ нн҃ѣ съ крс̑҇та, и҆ вѣрꙋемъ в него.
ѹ҆пова̀ на́ б҃а, да и҆зба́витъ нн҃ѣ е҆го, а҆ще хо́щетъ е҆мꙋ.
рече б̂о ꙗ҆́ко бж҃їи е҆смь сн҃ъ·

Тожд̑е же и҆ разбо́иника распѧтаѧ с нимъ, поношѧ́ста е҆мꙋ·

ѿ шестаго же часа̀, тм̂а бысть по все́и землѝ, до часа девѧ́таго.
ѡ҆ девѧ́темъ же часѣ, възопѝ і҆с҃ гла́сомъ ве́лие҆мъ, гл҃ѧ.
и҆ли и҆ли, лима савах̑ѳани;
е҆же е҆сть, б҃е мои б҃е мои, в꙽скꙋ́ю м̂ѧ е҆си ѻ҆ста́вилъ;
нѣ́цїи же ѿ т̂ꙋ стоѧ́щих̑ слы́шавше, гл҃ахꙋ, ꙗ҆́ко и҆лїю глаша́етъ се́и·

И҆ а҆бїе текъ е҆ді́нъ ѿ нихъ, и҆ прїемъ гꙋ́бꙋ, и҆спол꙽нив же ѻ҆цта, и҆ възнез꙽ на трость напаа́ше е҆го.
про̀чі́и́ же гл҃ахꙋ, ѻ҆ста́ви, да ви́димъ а҆ще прїидетъ и҆лїа спс̑҇ти е҆го·

І҆с҃ же пакы въз꙽пи́въ гла́сомъ велїемъ, и҆спꙋстѝ дх҃ъ·

И҆ с̂е завѣса цр҃ко́внаа̀ раздра́сѧ на́ двое, с вы́шнѧго кра́а до ни́жнѧго·

И҆ землѧ потрѧсе́сѧ, и҆ ка́менїе распаде́сѧ, и҆ гро́би ѿврьзо́шѧсѧ, и҆ мно́га тѣлеса ѹ҆со́пшихъ ст҃ыхъ въста́шѧ.
і҆ и҆зшед̑ше и҆з꙽ гробъ по въск҃рсе́нїи е҆го, внидоша в꙽ ст҃ыи градъ, і҆ ꙗ҆́ви́шасѧ мно́зѣмъ·

Со́тник же и҆ і́же с нимъ стрегꙋщеѝ і҆с҃а, видѣвше трꙋ́съ, и҆ бы́вшаѧ, ѹ҆боа́шѧсѧ ѕѣло, гл҃юще, въи́стиннꙋ бж҃їи сн҃ъ б̂ѣ, се́и·

Бѣхꙋ же т̂ꙋ и҆ жены̀ мно́гы и҆здале́че зрѧще, и҆же и҆доша по і҆с҃ѣ ѿ галиле́а, слꙋжѧ́ще е҆мꙋ.
в них̑ же б̂ѣ ма́рїа магдалы́ни, и҆ марїа і҆а́ковлѧ і҆ и҆ѻсїи ма́ти.
и҆ мати сн҃ꙋ зеведе́ѻ҆вꙋ·

Поздѣ же бы́в꙽шꙋ, прїиде чл҃къ богатъ, ѿ а҆римаѳе́а, и҆́менемъ і҆ѻ́сїфъ, и҆же и҆ то́и ѹ҆чисѧ ѹ і҆с҃а.
се́и пристꙋпль к꙽ пила́тꙋ, просѝ тѣлесе і҆с҃ова·

Тогда пилатъ повелѣ дати тѣло.
и҆ прїемъ тѣло і҆ѻ́сифъ, ѻ҆бвитъ е҆̀ плаща́ницею чи́стою, и҆ положї е҆̀ в но́вѣмъ свое҆мъ гро́бѣ, и҆же и҆с꙽сѣче в ка́мени.
и҆ възвалѝ ка́мень ве́лїи надъ дверїи гроба, и҆ ѿи́де·

Бѣ же т̂ꙋ ма́рїа магдалы́ни, и҆ дрꙋга́а ма́рїа, сѣдѧ́щи прѧ́мо гро́бꙋ·

зач̑҇, рд҃і·

Въ ѹ́трѣи же дн҃ь, и҆же е҆сть по пѧтцѣ, събра́шасѧ а҆рхїере́е и҆ фарисе́е к꙽ пила́тꙋ гл҃юще, господи, помѧнꙋхомъ, ꙗ҆́ко льсте́цъ ѻ҆нъ рече е҆ще сыи жи́въ, по трїехъ дн҃ехъ в꙽ста́нꙋ.
повелѝ ѹ҆бо ѹ҆твердити гробъ до третїаго дн҃е.
да не како пришед̑ше ѹ҆ченицы е҆го, но́щїю ѹ҆кра́дꙋтъ е҆го, и҆ рекꙋтъ лю́демъ в꙽ста̀ ѿ мр҃твыхъ.
и҆ бꙋ́детъ послд̑ѣнѧа ле́сть горша пе́р꙽выа.
реч̑҇ же и҆мъ пилатъ, и҆́мате кꙋстодїю, и҆дѣте ѹ҆тверди́те ꙗ҆́коже вѣсте·

Ѡ҆ни́ же шед̑ше, ѹ҆тверди́ша гробъ, зна́менавше камень с кꙋстодїею·

Глв̑҇а, к҃и.

зач̑҇. ре҃і·

Въ вечер же сꙋбо́тныи, свитающи въ е҆ді́нꙋ ѿ сꙋботъ, прїиде ма́рїа магдалы́ни, и҆ дрꙋга́а ма́рїа, ви́дѣти гробъ.
и҆ се трꙋсъ бысть ве́лїи.
а҆гг҃лъ б̂о гн҃ь съшед̑ с нб҃се, пристꙋ́пль ѿвалѝ ка́мень ѿ дверїи гро́ба, и҆ сѣдѧ́ше на немъ.
бѣ же зра́къ е҆го ꙗ́ко мл́ънїи, и҆ ѻ҆дѣа́нїе е҆го бѣло ꙗ҆́ко снѣгъ·

ѿ страха же е҆го сътрѧсо́шасѧ стрегꙋщеѝ, и҆ бы́шѧ ꙗ҆́ко мерътви.
ѿвѣщав же а҆гг҃лъ, рече женамъ.
не бо́итесѧ в̂ы.
вѣмъ б̂о, ꙗ҆́ко і҆с҃а распѧтаго и҆́щете.
нѣсть зд̂ѣ.
в꙽ста̀ б̂о, ꙗ҆́коже рече.
прїидѣте.
ви́дите мѣ́сто, и҆деже лежа̀ г҃ь.
и҆ скоро шед̑ше, рцѣте ѹчн҃комъ е҆го, ꙗ҆́ко въста̀ ѿ мр҃твых꙽, и҆ с̂е варѧе҆тъ в̂ы в꙽ галиле́ѝ, та́мо е҆го ѹ҆зрите.
с̂е рѣхъ вамъ·

І҆ и҆зшед̑ше ско́ро ѿ гроба съ страхомъ, и҆ радостїю ве́лїею, теко́стѣ възвѣсти́те ѹ҆чн҃ком꙽ е҆го.
ꙗ҆́коже и҆дѧсте възвѣстити ѹ҆чн҃ком̑ е҆го и҆ с̂е і҆с҃ срѣте ѧ҆̀, гл҃ѧ, радꙋитесѧ·

ѻ҆нѣже пристꙋ́пльши, ꙗ҆стѣсѧ за ноѕѣ е҆го, и҆ поклони́стѣсѧ е҆мꙋ·

Тогда гл҃а и҆мъ і҆с҃, не бо́итесѧ.
и҆дѣте, възвѣсти́те бра́тїи моеѝ, да и́дꙋтъ в꙽ галиле́ю, и҆ т̂ꙋ м̂ѧ ви́дѧтъ.
и҆дꙋщема же и́ма, с̂е нѣ́цїи ѿ кꙋстодїа пришед̑ше въ́ градъ, възвѣсти́шѧ а҆рхїере́ѻмъ вс̂ѧ бы́вшаѧ.
и҆ събравшесѧ съ ста́рцы, совѣтъ сътвори́шѧ, сребреникы дово́лны дашѧ во́иномъ, гл҃юще.
рцѣте, ꙗ҆́ко ѹ҆чн҃цы е҆го но́щїю пришедъше ѹ҆крадоша е҆го, намъ спѧщемъ.
и҆ а́ще с̂е ѹ҆слы́шано бꙋдетъ ѹ҆ и҆гѣ́мона, м̂ы ѹ҆толимъ е҆го, и҆ васъ беспеча́лны сътвори́мъ.
ѻ҆ни́ же прїе́мше сре́бреникы, сътвори́шѧ ꙗ҆коже наѹ҆чени бы́шѧ.
и҆ промче́сѧ сло́во с̂е въ и҆ѹ҆де́е҆хъ, да́же до сего дн҃е·

зач̑҇, рѕ҃і.

Є҆́ді́нии҆ же надесѧте ѹ҆чн҃цы, и҆до́ша в галиле́ю, в꙽ го́рꙋ, ꙗ҆́може повелѣ̀ и́мъ і҆с҃.
и҆ видѣвше е҆го, поклони́шасѧ е҆мꙋ.
ѻ҆ви же ѹ҆съмнѣшѧсѧ·

И҆ пристꙋ́пль і҆с҃, речѐ и́мъ, гл҃ѧ.
дастъ м̂и сѧ всѧ́ка власть, на́ нб҃си и҆ на земли·

шед̑ше ѹ҆бо наѹ҆чи́те вс̂ѧ ꙗ҆́ѕы́кы, крс̑҇тѧ́ще и҆хъ, въ и҆мѧ ѿц҃а и҆ сн҃а и҆ ст҃аго дх҃а, ѹ҆ча́ще и҆хъ блюстѝ вс̂ѧ е҆ли́ка заповѣдах̑ вамъ.
и҆ с̂е а́зъ с ва́ми е҆смь вс̂ѧ дн҃и до сконча́нїѧ вѣ́ка, а҆ми́нь·

Конецъ, е҆же ѿ матъѳеа ст҃аго еѵг̑҇лїа.
и҆мать в себѣ, глв̑҇а, к҃и·

а҆ зач̑҇лъ.
цр҃ковныхъ, рѕ҃і·