Ѿ МА́РЬКА СТ҃ОЄ БЛ҃ГОВѢСТВОВА́НЇЄ

Глв̑҇а, а҃.

зач̑҇, а҃·

Зача́ло е҆ѵг̑҇лїа і҆ѵ҃ хв҃а, сн҃а бж҃їа, ꙗ҆́коже е҆сть пи́сано въ прро̑҇цѣхъ.
с̂е а҆зъ посыла́ю а҆гг҃ла мое҆го пред̑ лицемъ твои҆мъ, и҆же ѹ҆гото́вит̑ пꙋть тво́и пред̑ тобою·

Гласа въпїю́щаго в꙽ пꙋсты́ни.
ѹ҆гото́ваите пꙋть гн҃ь, правы твори́те стеѕѧ е҆го·

Бысть і҆ѻ҆а́ннъ крс̑҇тѧ в꙽ пꙋсты́ни и҆ проповѣдаѧ кр҃ще́нїе покаа́нїа въ ѿпꙋщенїе грѣхо́въ.
и҆ и҆схождаше к немꙋ̀ вс̂ѧ і҆ѹ҆де́скаа̀ страна, і҆ и҆ерс̑҇лі́млѧне, и҆ кр҃щахꙋсѧ вс̂и въ і҆ѻ҆рда́ни рѣцѣ ѿ него, и҆сповѣда́юще грѣхы своѧ̀·

Бѣ же і҆ѻ҆а́ннъ ѻ҆блъче́нъ власы вльбꙋ́жды, и҆ по́ѧсъ ѹ҆смѣнъ ѻ҆ чреслѣхъ его, и҆ ꙗ҆ды̀ а҆криды и҆ мед̑ дивїи.
и҆ проповѣ́даше гл҃ѧ.
грѧдетъ крѣплїи мене въ слѣдъ мене, е҆мꙋ же нѣсмь досто́инъ прекло́нсѧ разрѣшити ре́мень сапо́гъ его·

а҆зъ ѹ҆бо крс̑҇тихъ в̂ы в꙽ водѣ, то́и же крс̑҇тит̑ в̂ы дх҃омъ ст҃ым̑·

зач̑҇, в҃·

И҆́ бысть въ ѻ҆нѣхъ дн҃ехъ, прїиде і҆с҃ ѿ назар́ета галиле́икаго.
и҆ крс̑҇ти́сѧ ѿ і҆ѻ҆а́нна въ і҆е҆рда́ни.
и҆ а́бїе въсходѧ ѿ воды, видѣ разводѧ́щасѧ нб҃са, и҆ дх҃ъ ꙗ҆́ко го́лꙋбь сходѧщъ нань.
и҆ гласъ бысть с нб҃се, т̂ы еси сн҃ъ мо́и възлю́бленныи, ѻ҆ не́мже бл҃говолих̑·

И а́бїе дх҃ъ и҆зведе его в꙽ пꙋстыню.
и҆ бѣ т̂ꙋ в꙽ пꙋсты́ни дн҃їи четыридесѧте и҆скꙋша́емъ сатаною.
и҆ б̂ѣ съ звѣрмѝ, и҆ а҆гг҃ли слꙋжа́хꙋ е҆мꙋ·

По преда́нїи же і҆ѻ҆а́нновѣ, прїиде і҆с҃ в꙽ галиле́ю, проповѣдаа е҆ѵг̑҇лїе црс̑҇твїа бж҃їа, и҆ гл҃ѧ·

ꙗ҆ко и҆сплънисѧ вре́мѧ, и҆ прибли́жисѧ црс̑҇твїе бж҃їе·

пока́итесѧ, и҆ вѣ́рꙋите въ е҆ѵг̑҇лїе·

зач̑҇, г҃

Ходѧ же при мори галиле́истѣмъ, видѣ̀ си́мона, и҆ а҆ндрѣ́а, бра́та того си́мона, в꙽мѣта́юща мре́жа в꙽ мо́ре, бѣ́ста б̂о рыбарѣ.
и҆ рече и́ма і҆с҃, прїидѣта в꙽ слѣ́дъ мене, и҆ сътворю вас̑҇ бы́ти ловцѧ чл҃комъ.
и҆ а҆бїе ѻ҆ста́вльше мрежѧ своа̀, по немъ и҆до́ста·

И҆ прешедъ ма́ло ѿтꙋ́дꙋ, ѹ҆зрѣ і҆а́кова зеведе́ѻ҆ва, і҆ и҆ѻ҆а́нна бра́та е҆го, и҆ т̂а в꙽ кораблѝ стро́ѧща мре́жѧ, і҆ а́бїе възва ѧ҆̀.
и҆ ѻ҆ста́вльше ѿц҃а свое҆го зеведеа в꙽ кораблѝ с нае́мникы, по немъ и҆до́ста·

и҆ внидошѧ в капернаѹ҆мъ.
і҆ а́бїе в сꙋбо́ты вшд̑е в со́нмище, ѹ҆чѧше.
и҆ дивлѧ́хꙋсѧ ѻ҆ ѹ҆че́нїи е҆го.
б̂ѣ б̂о ѹ҆ча и҆хъ ꙗ҆́ко вла́сть и҆мы̀, и҆ не ꙗ҆́ко кни́жницы·

зач̑҇, д҃·

И҆́ бѣ в꙽ со́нмищи и҆хъ чл҃къ в дꙋ́сѣ нечи́стѣ, и҆ възва̀ гл҃ѧ.
ѻ҆ста́ви, чт̂о намъ и҆ тебѣ і҆с҃е назарѧни́не;
прише́лъ е҆си погꙋби́ти насъ;
вѣм т̂ѧ кт̂о е҆си ст҃ыѝ бж҃їи.
и҆ запрѣти е҆мꙋ і҆с҃, гл҃ѧ.
ѹ҆млъчѝ, і҆ и҆зыди и҆з него.
и҆ сътрѧсѐ е҆го дꙋхъ нечи́стыи.
и҆ възъпѝ гласомъ великомъ, і҆ и҆зы́де и҆з него.
и҆ ѹ҆жасо́шѧсѧ вс̂и, ꙗ҆́ко стѧза́тисѧ и҆мъ к꙽ себѣ гл҃ющемъ.
чт̂о есть с̂е;
что̀ ѹ҆ченїе но́вое с̂е·

ꙗ҆ко по ѻ́бласти и҆ дꙋховомъ нечи́стым̑ вели́тъ, и҆ послꙋшаютъ е҆го;
і҆ и҆зы́де слꙋхъ е҆го а҆́бїе въ всю̀ странꙋ галиле́искꙋ.

зач̑҇, е҃·

І҆ абїе и҆з со́нмища и҆сходѧ́ще, прїидо́шѧ в꙽ домъ сїмоновъ, и҆ а҆ндре́ѻвъ, съ і҆а́ковомъ і҆ и҆ѻ҆а́нномъ·

Те́ща же сі́монова лежа́ше ѻ҆гне́мъ жего́ма.
і҆ а́бїе гл҃аша е҆мꙋ ѻ҆ не́и.
и҆ пристꙋ́пль възд̑ви́же ю҆̀, е҆́мь за рꙋ́кꙋ еа̀.
и҆ ѻ҆ста́вї ю҆̀ ѻ҆́гнь а҆́бїе, и҆ слꙋжа́ше и́мъ·

По́здѣ же бы́вшꙋ, е҆гд̑а захожа́ше сл҃нце.
приношахꙋ к немꙋ вс̂ѧ недꙋжныѧ, и҆ бѣсныа, и҆ б̂ѣ весь градъ събрасѧ к꙽ две́ремъ, І҆ и҆сцѣлѝ многы злѣ страждꙋщаѧ разли́чными недꙋ́гы·

И҆ бѣсы мно́гы и҆згна̀, и҆ не ѻ҆ставлѧше гл҃ати бѣсы, ꙗ҆́ко вѣдѧхꙋ е҆го х҃а сꙋща·

зач̑҇, ѕ҃·

І҆ ѹ҆тро но́щи сꙋщи ѕѣло, въставъ и҆зы́де, і҆ и҆де в пꙋ́сто мѣсто, и҆ т̂ꙋ мл҃твꙋ дѣа́ше·

И҆ гна́шѧ е҆го си́монъ, і҆ и́же с нимъ.
и҆ ѻ҆брѣтше е҆го гл҃ашѧ е҆мꙋ, ꙗ҆ко вс̂и тебе и́щꙋтъ.
и҆ гл҃а и҆мъ.
и҆демъ в꙽ ближнѧа ве́си, и҆ грады.
да и҆ т̂ꙋ проповѣдае҆мъ, на сѐ б̂о и҆зыдохъ.
и҆ бѣ проповѣ́даа на со́нмищихъ и҆хъ, въ все́и галиле́и, и҆ бѣсы и҆згонѧ·

И҆ прїиде к немꙋ прокаженъ молѧ е҆го, и҆ на колѣнꙋ па́даа̀ пред̑ нимъ, и҆ гл҃ѧ е҆мꙋ, ꙗ҆́ко а҆́ще хо́щеши, мо́жеши мѧ ѻ҆чи́стити·

І҆с҃ же млс̑҇рдовавъ, про́стеръ рꙋ́кꙋ коснꙋ е҆го, и҆ гл҃а е҆мꙋ.
хощꙋ̀, ѻ҆чи́стисѧ.
и҆ ре́кшꙋ е҆мꙋ.
а҆бїе ѿи́де ѿ него прокаже́нїе, и҆ чи́стъ бысть.
и҆ запрѣщъ е҆мꙋ, и҆ а҆бїе и҆згна̀ е҆го.
и҆ гл҃а е҆мꙋ, блюдѝ, никомꙋже ничесоже рц̂и.
н̂о шед̑ покажисѧ і҆е҆ре́ѻви, и҆ принеси за ѻ҆чище́нїе твое, ꙗ҆́же повелѣ̀ моѷсїи, въ свд̑ѣтельство им̑·

ѻ҆́н же и҆зшед̑, начѧ́тъ проповѣдати много, и҆ проносити сло́во, ꙗ҆коже ктомꙋ не мож꙽ти е҆мꙋ ꙗ҆вѣ въ́ град̑ внити, н̂о вн̂ѣ в пꙋстѣхъ мѣстѣхъ б̂ѣ, и҆ прихождахꙋ к немꙋ ѿ всю́дꙋ·

Глв̑҇а, в҃.

зач̑҇, з҃·

И вни́де па́ки в꙽ капернаѹ҆мъ по́ дн҃ехъ, и҆ слы́шано бысть, ꙗ҆ко в꙽ домꙋ е҆сть.
і҆ а҆бїе събра́шѧсѧ мно́ѕи, ꙗ҆́коже ктомꙋ нев̑҇мѣщатисѧ ни при две́рехъ.
и҆ гл҃аше им̑ сло́во·

И҆ прїидошѧ к немꙋ носѧ́ще расла́блена жи́лами, носи́ма четырми.
и҆ не могꙋщм̑е прибли́житисѧ к немꙋ наро́да ради, ѿкры́шѧ покровъ, и҆дѣже б̂ѣ, и҆ прокопавше, свѣ́сишѧ ѻ҆́дръ, на нем꙽же расла́бленыи лежа́ше·

Видѣв же і҆́сс҃ вѣрꙋ и҆хъ, гл҃а расла́бленомꙋ.
ча́до, ѿпꙋща́ютъ ти сѧ грѣси твоѝ·

бѣхꙋ же нѣцїи ѿ кни́жникъ, т̂ꙋ сѣдѧ́ще, и҆ помышлѧ́юще в꙽ срд̑цыхъ свои҆хъ.
чт̂о се́и та́ко гл҃етъ хꙋлы;
кт̂о можетъ ѻ҆ставлѧти грѣхы̀, то́кмо е҆ді́нъ бг҃ъ;
и҆ а҆бїе разꙋмѣв꙽ і҆с҃ дх҃омъ свои҆мъ, ꙗ҆́ко та́ко ті́и помышлѧ́ютъ в꙽ себѣ̀.
речѐ и҆мъ: что̀ сїа помышлѧ́ете в꙽ срд̑цыхъ вашихъ чт̂о ес̑҇ ѹ҆добѣе рещи расла́бленомꙋ, ѿпꙋщают꙽ ти сѧ грѣси, и҆ли рещѝ, въста́ни, и҆ възми ѻ҆́дръ твои, и҆ ходи.
н̂о да ѹ҆вѣ́сте, ꙗ҆ко власть и́мат̑ сн҃ъ члчс̑҇кїи на земли ѿпꙋщати грѣхы, гл҃а расла́бленомꙋ.
тебѣ гл҃ю, въстани и҆ възмѝ ѻ҆дръ твой, и҆ и҆дѝ в꙽ домъ твои.
и҆ въста̀ а҆бїе, и҆ взем꙽ ѻ҆́дръ, и҆зы́де пред̑ всѣми, ꙗ҆́ко диви́тисѧ всѣмъ, и҆ сла́вити б҃а, гл҃ющемъ.
ꙗ҆ко николиже та́ко видѣхом̑·

зач̑҇, и҃·

И҆ і҆зыде пакы к꙽ мо́рю, и҆ весь народъ и҆дѧше к꙽ немꙋ, и҆ ѹ҆чаше их̑·

и҆ ми́могрѧды, видѣ левїю а҆лфе́ѻва, сѣдѧ́ща на мытници, и҆ гл҃а е҆мꙋ, по мнѣ грѧди.
и҆ в꙽ставъ, в꙽ слѣдъ е҆го и҆де·

И҆ бысть възлежа́щꙋ е҆мꙋ в домꙋ е҆го, и҆ мно́ѕи мытаре и҆ грѣшницы възлежахꙋ съ і҆с҃омъ, и҆ съ ѹ҆ченикы е҆го.
бѣхꙋ б̂о мно́ѕи, и҆ по немъ и҆доша·

И҆ книжницы и҆ фарїсе́е видѣвше е҆го ꙗ҆́дꙋща с мытари и҆ грѣшникы, гл҃ахꙋ ѹ҆ченикомъ е҆го.
что̀ ꙗ҆ко с мытари и҆ грѣшникы ꙗ҆́сть и҆ пїетъ;
и҆ слы́шавъ і҆с҃, гл҃а и҆́мъ.
не требꙋю҆тъ здра́вїи врача, н̂о болѧ́щїи.
не прїидохъ приѕва́ти пра́вед̑никы, н̂о грѣшникы на покаа́нїе·

зач̑҇, ѳ҃·

И҆́ бѣхꙋ ѹ҆чн҃цы і҆ѻ҆а́ннови и҆ фарїсе́истїи постѧщесѧ, и҆ прїидошѧ и҆ гл҃ашѧ е҆мꙋ.
почто ѹ҆ченицы і҆ѻ҆а́ннови и҆ фарїсе́истїи постѧтсѧ, а҆ твоѝ ѹ҆чн҃цы не постѧ́тсѧ;
и҆ рече и҆́мъ і҆с҃, е҆да мо́гꙋтъ сн҃ове бра́чнїи дондеже жених̑ с ними е҆сть, пости́тисѧ;
ели́ко вре́мѧ с꙽ собо́ю и҆мꙋтъ жениха, не мо́гꙋтъ пости́тисѧ.
прїидꙋтъ же дн҃їе, е҆гда̀ ѿи́метсѧ ѿ нихъ жених̑, и҆ тогда̀ постѧ́тсѧ в꙽ ты́и дн҃и·

И҆ никто́же приложенїа пла́та небѣлена пришива́етъ к ри́зѣ ветсѣ.
а҆́ще лиж̑ н̂и, во́зметъ конецъ е҆го но́вое ѿ ветхаго, и҆ го́рши дира бꙋ́детъ·

И҆ никтоже влива́етъ вина но́ва в мѣхы ве́тхы.
а҆ще ли же н̂и, просадитъ вино но́вое мѣхы, и҆ вино пролие́тсѧ, и҆ мѣ́си погы́бнꙋтъ.
н̂о вино но́во в꙽ мѣхи новы в꙽лїа́ти·

зач̑҇, і҃·

И҆́ бысть мимоходити е҆мꙋ в сꙋбо́ты сквозѣ сѣ́анїа, и҆ нача́шѧ ѹ҆ченицы е҆го пꙋть творити, въстръза́юще кла́сы·

І҆ фарїсе́е гл҃ахꙋ е҆мꙋ.
ви́ждь чт̂о творѧтъ в сꙋбо́ты, е҆же не достоитъ;
и҆ то́и гл҃аше и҆́мъ·

Нѣсте л̂и николиже чл̂и, чт̂о сътвори двд̑ъ, е҆гда̀ требованїе и҆мѣ̀, и҆ взалка сам̑, і҆ и҆же с ни́мъ;
ка́ко вни́де в дом̑ бж҃їи, прї а҆вїѳаа́рѣ а́рхїере́ѝ, и҆ хлѣбы пред̑ложе́нїа снѣсть, и҆́хже не достоаше ꙗ҆́сти, токмо і҆е҆ре́ѻ҆мъ, и҆ дастъ и҆ сꙋщимъ с нимъ, и҆ гл҃аше и҆мъ.
сꙋбо́та чл҃ка ради бысть, а҆ не чл҃къ сꙋбо́ты ради·

тѣмже г҃ь е҆сть сн҃ъ чл҃ческїи и҆ сꙋбо́тѣ·

Глв̑҇а, г҃·

И вни́де па́ки в꙽ со́нмище, и҆ б̂ѣ та́мо чл҃къ, сꙋхꙋ и҆мы̀ рꙋкꙋ, и҆ назира́хꙋ е҆го, а҆ще в꙽ сꙋботы и҆сцѣлитъ е҆го, да нань въз꙽гл҃ют꙽.
и҆ гл҃а чл҃кꙋ, сꙋ́хꙋ и҆мꙋще рꙋ́кꙋ, стани посредѣ·

и҆ гл҃а и҆мъ.
достои҆тъ л̂и в сꙋбо́ты добро̀ тво́рити, и҆л̂и зл̂о твори́ти;
дш҃ꙋ спс̑҇ти, и҆ли погꙋби́ти;
ѻ҆ни́ же млъчѧхꙋ·

И҆ възрѣ́въ на нихъ съ гнѣ́вомъ, скорбѧ̀ ѻ҆ ѻ҆ка́мененїи сръдецъ и҆хъ.
гл҃а чл҃кꙋ, прострѝ рꙋкꙋ твою̀.
и҆ про́стрѐ, и҆ ѹ҆тверди́сѧ рꙋка е҆го цѣла ꙗ҆ко дрꙋга́а·

зач̑҇, а҃і·

І҆ и҆зшед̑ше фарисе́е а҆бїе съ и҆родиа́ны, съвѣтъ творѧхꙋ на́нь, ка́ко е҆го погꙋбѧтъ·

І҆с҃ же ѿи́де съ ѹ҆чн҃кы свои҆ми к꙽ мо́рю.
и҆ мно́гъ народъ, ѿ галиле́а по немъ и҆де, и҆ ѿ і҆юде́ѧ, и҆ ѿ і҆ерс̑҇ли́ма, и҆ ѿ и҆дꙋме́а, и҆ съ ѻ҆́ного полꙋ и҆ѻ҆рда́нѣ, и҆ ѿ тѷра и҆ сидо́на, множество мно́го, слы́шавше е҆ли́ка творѧ́ше, прїи҆до́шѧ к немꙋ.
и҆ реч̑҇ ѹ҆чн҃комъ свои҆мъ, да корабль бꙋдетъ ѹ҆ него наро́да ради, да не стꙋжа́ю҆тъ е҆мꙋ.
мно́гы б̂о и҆сцѣли, ꙗ҆коже напа́дати е҆мъ, да е҆мꙋ прикоснꙋт꙽сѧ, е҆ли́цы и҆мѧ́хꙋ ра́ны·

И҆ дꙋ́си нечистїи е҆гда видѧхꙋ е҆го, припа́дахꙋ к꙽ немꙋ, и҆ зва́хꙋ гл҃юще.
ꙗ҆́ко т̂ы еси сн҃ь бж҃їи·

И҆ много прѣща́ше и҆мъ, да не ꙗ҆́влена е҆го сътворѧ́тъ·

зач̑҇, в҃і·

И҆́ взы́де на горꙋ, и҆ призва̀ и҆хже хотѧ́ше са́мъ, и҆ прїидо́шѧ к немꙋ.
и҆ сътвори дв̂анадесѧте, да бꙋ́дꙋтъ съ нимъ, и҆ да посыла́етъ их̑ проповѣдати, и҆ и҆мѣти власть цѣлити недꙋгы, и҆ і҆зъгони́ти бѣсы·

И҆ нарече сі́монꙋ и҆мѧ петръ.
и҆ і҆а́кова зеведеѻ҆ва, и҆ і҆ѻ҆а́нна брата і҆а́ковлѧ, и҆ наречѐ и҆́ма и҆мена̀, въа҆нергесъ, е҆же е҆сть сн҃а гро́мова, и҆ а҆ндрѣ́а, и҆ фїли́ппа, и҆ варѳоломе́а, и҆ матѳе́а, и҆ ѳомꙋ, и҆ і҆а́кова а҆лѳе́ѻ҆ва, и҆ ѳад̑де́а, и҆ си́мона канани́та, и҆ і҆ю́дꙋ и҆скариѻ́тскаго, и҆же и҆ предастъ е҆го·

зач̑҇, г҃і·

И҆́ прїидо́шѧ в꙽ домъ, и҆ събрасѧ пакы народъ, ꙗ҆ко не можти и҆мъ ни хлѣба ꙗ҆́сти·

И҆ слы́шавше и҆же бѣхꙋ ѹ҆ него̀, и҆зыдо́шѧ да и҆мꙋтъ е҆го.
гл҃ахꙋ б̂о, ꙗ҆́ко неи́стовъ е҆сть·

И҆ кни́жницы и҆же ѿ і҆ерс̑҇ли́ма низшед꙽шеѝ, гл҃ахꙋ, ꙗ҆́ко вее҆лзевꙋлъ и҆́мать, и҆ ꙗ҆́ко ѻ҆ кнѧзи бѣсо́встѣмъ и҆зго́нитъ бѣсы·

И҆ призвавъ и҆хъ, в꙽ при́тчѧх꙽ гл҃аше и҆мъ.
ка́ко можетъ сатана сатанꙋ и҆згонити;
и҆ а́ще црс̑҇тво на сѧ раздѣлитсѧ, не мо́жетъ стати црс̑҇тво т̂о·

И҆ а́ще домъ на́ сѧ раздѣлитсѧ, не мо́жетъ стати дом̑ то́и·

и҆ а́ще сатана въста̀ на́ сѧ самъ, и҆ раздѣлисѧ, не мо́жетъ ста́ти, н̂о конецъ и҆́мать·

Никтоже мо́жетъ съсꙋ́ды крѣпкаго в꙽шед̑ в дом̑ его расхи́тити, а҆ще не пе́рвѣе крѣпкаго свѧ́жет̑, и҆ тогда̀ домъ его расхи́титъ·

зач̑҇, д҃і·

А҆́ми́нь гл҃ю вамъ, ꙗ҆ко вс̂ѧ ѿпꙋстѧтсѧ съгрѣшенїѧ сн҃омъ члчс̑҇кымъ, и҆ хꙋле́нїа е҆ли́ка а҆ще въсхꙋ́лѧтъ·

А҆ иже въсхꙋ́литъ на́ дх҃ь ст҃ыи, не и҆́мать ѿпꙋщенїа въ вѣкы, н̂о пови́ненъ е҆сть вѣ́чномꙋ сꙋдꙋ.
зане гл҃ахꙋ, дꙋхъ нечистъ и҆́мать·

Прїидоша ѹ҆бо ма́ти и҆ братїѧ е҆го.
и҆ вн̂ѣ стоа́ще послашѧ к немꙋ зовꙋще е҆го·

и҆ сѣдѧ́ше народ̑ ѻ҆ немъ рѣша же е҆мꙋ.
с̂е ма́ти твоа̀ и҆ братїѧ твоѧ, и҆ сестры твоѧ вн̂ѣ и҆́щꙋтъ тебе·

и҆ ѿвѣща и҆мъ гл҃ѧ.
кт̂о е҆сть ма́ти моа̀ и҆ братїѧ моѧ̀;
и҆ съглѧ́давъ ѻ҆́крестъ себе сѣдѧ́щаѧ, гл҃а, с̂е ма́ти моа̀ и҆ братїа моѧ, и҆же б̂о а҆́ще сътвори́тъ во́лю бж҃їю, се́и братъ мои и҆ сестра̀ моа̀, и҆ ма́ти м̂и е҆сть·

Глава̀, д҃·

зач̑҇, е҃і·

И па́кы нача́тъ ѹ҆чити при́ мори, и҆ събра́сѧ к немꙋ народ̑ многъ, ꙗ҆́коже самомꙋ влѣзшꙋ в꙽ корабль, сѣдѣти в꙽ мо́ри, и҆ ве́сь народ̑ при́ мори на землѝ бѧ́ше.
и҆ ѹ҆чаше и҆хъ при́тчѧми мно́го, и҆́ гл҃аше и҆мъ въ ѹ҆ченїи своемъ·

Слы́шите.
с̂е и҆зы́де сѣа́ѝ сѣ́ати·

И҆ бысть егда сѣаше, ѻ҆́во паде на пꙋтѝ, и҆ прїидо́ша пти́цѧ и҆ позоба́шѧ е҆̀·

дрꙋгое же падѐ на ка́мени, и҆дѣже не и҆мѧ́ше землѧ мно́ги, и҆ а҆́бїе прозѧбѐ, зане не и҆мѧ́ше глꙋбины земныа.
слн҃цꙋ же въсїа́вшꙋ, присвѧ́де, и҆ зане не имѧ́ше корене, и҆́сше·

И҆ дрꙋго́е падѐ въ тръннїи, и҆ взы́де тр́ънїе, и҆ подави е҆̀, и҆ плода̀ не дастъ·

И҆ дрꙋго́е паде на землѝ до́брѣ, и҆ даа́ше плод̑, въсходѧщъ, и҆ растꙋщъ.
и҆ приплодоваше на, л҃, и҆ на, ѯ҃, и҆ на́ сто.
и҆ гл҃аше, и҆мѣ́аѝ ѹ҆ши слы́шати да слы́шитъ·

зач̑҇, ѕ҃і·

Є҆́гда же бысть е҆ді́нъ, въпроси́шѧ его и҆же бѣхꙋ с нимъ съ ѻ҆бѣманадесѧте, ѻ҆ притчи·

И҆ гл҃аше и҆мъ, вам̑ е҆сть дано вѣдати та́ины црс̑҇твїѧ бж҃їа, ѻ҆нѣм же в꙽нѣшнимъ в꙽ прит꙽чѧхъ вс̂ѧ быва́ютъ.
да ви́дѧще ви́дѧтъ, и҆ не ѹ́зрѧтъ.
и҆ слы́шаще слы́шѧтъ, и҆ не разꙋмѣютъ.
да не когда ѻ҆брѧтѧтсѧ, и҆ ѻ҆ста́вѧт꙽сѧ и҆мъ грѣсѝ.
и҆ гл҃а и҆мъ.
не вѣ́сте ли при́тча сеа̀;
и҆ ка́ко вс̂ѧ притчѧ разꙋмѣ́ете;
сѣ́аѝ, сло́во сѣ́етъ.
сїи же сꙋть и҆же на пꙋтѝ, и҆дѣже сѣ́етсѧ сло́во, и҆ е҆гда̀ ѹ҆слы́шѧт꙽, а҆́бїе прїидетъ сатана, и҆ ѿи́метъ сло́во сѣ́анное в꙽ срд̑цихъ и҆хъ·

И҆ сїи сꙋть та́кожд̑е и҆же на ка́менныхъ сѣ́емїи.
и҆же е҆гда ѹ҆слы́шитъ сло́во, а҆́бїе с ра́достїю прие́млютъ е҆̀, и҆ не и҆мꙋтъ коре́нїа в себѣ, н̂о време́нни сꙋть·

Таже бы́вши печали, и҆л̂и гоне́нїю словесѐ ради, а҆́бїе съблажнѧют꙽сѧ·

А҆ сїи сꙋть и҆же в꙽ трънїи сѣ́емїи.
слы́шащеѝ сло́во, и҆ печали вѣка сего, и лесть богатьства, и҆ ѻ҆ про́чихъ похотїи в꙽ходѧ́ще, подавлѧют̑ слово, и҆ беспло́дъно быва́етъ·

и҆ сїи сꙋть и҆же на земли до́брѣи сѣ́емїи, и҆же слы́шѧтъ сло́во, и҆ прїе́млютъ, и҆ плод̑ствꙋютъ, на, л҃, и҆ на, ѯ҃, и҆ на сто·

И҆ гл҃аше и҆мъ·

е҆да свѣти́лникъ приходитъ, да под̑ спꙋ́дом꙽ положатъ е҆го, и҆л̂и под̑ ѻ҆дромъ;
не да ли на свѣщницѣ положенъ бꙋдет꙽;
нѣсть бо та́ино, е҆же не ꙗ҆ви́тсѧ.
ни бысть потае҆но, н̂о да прїидетъ въ ꙗ҆вле́нїе·

А҆ще кто и҆́мать ѹ҆ши слы́шати, да слы́шитъ·

зач̑҇, з҃і·

И҆́ гл҃аше и҆мъ, блюдѣте чт̂о слы́шите.
в нюже мѣрꙋ мѣ́рите, възмѣритсѧ вамъ, и҆ приложитсѧ вамъ слы́шѧщым꙽·

И҆же б̂о а҆ще и҆́мать, дастьсѧ е҆мꙋ.
а҆ и҆же не и҆́мать, и҆ е҆же и́мать, ѿи́метсѧ ѿ него·

И҆ гл҃аше, та́ко е҆сть и҆ црс̑҇твїе бж҃їе, ꙗ҆́коже чл҃къ в꙽мѣта́етъ сѣмѧ в꙽ зем꙽лю, и҆ спитъ, и҆ въста́етъ но́щїю и҆ дн҃їю, и҆ сѣмѧ прозѧба́етъ и҆ растетъ, ꙗ҆коже не вѣсть ѻ́нъ.
в себѣ б̂о землѧ пло́дитъ преже травꙋ, потом̑ класъ.
таже и҆сполнѧетъ пшени́цꙋ в꙽ кла́сѣ.
е҆гда же съзрѣ́етъ плодъ, а҆́бїе по́слетъ ср́ъпъ, ꙗ҆́ко наста̀ жа́тва·

И҆ гл҃аше, чесомꙋ ѹ҆подо́бим̑ црс̑҇твїе бж҃їе;
и҆ли кое́й притчи приложимъ е҆̀;
ꙗ҆ко зе́рно горꙋшично, е҆же е҆гда всѣ́ано бꙋ́детъ в земли, мнѣе всѣхъ сѣменъ е҆сть земных꙽, и҆ е҆гда̀ всѣано бꙋ́детъ възрастетъ, и҆ бꙋдетъ бо́ле всѣхъ зелїи, и҆ сътворит꙽ вѣтви ве́лїа, ꙗ҆́ко мощи под̑ сѣнїю е҆го пти́цѧмъ нбс̑҇нымъ вїтати·

И҆ таковѣми притчѧми мно́гами гл҃аше им̑ сло́во, ꙗ҆́коже можахꙋ слы́шати·

Бес при́тча же не гл҃аше и҆мъ словесе·

ѻ҆со́б꙽ же ѹ҆чн҃комъ свои҆мъ сказаа́ше всѧ·

зач̑҇, и҃і·

И҆́ гл҃а и҆мъ в꙽ то́и дн҃ь, вечерꙋ бывшꙋ, пре́идемъ на ѻ҆нъ полъ.
и҆ ѿпꙋщ꙽ше наро́ды, поѧ́ша е҆го, ꙗ҆́коже бѣ в корабли.
и҆ і́нїи корабли бѣхꙋ с ни́мъ·

И҆ бысть бꙋ́рѧ вѣтрена вели́ка, влъны же влива́хꙋсѧ в корабль, ꙗ҆́коже ѹ҆же погрꙋжатисѧ е҆мꙋ.
и҆ б̂ѣ самъ на кормѣ на възглавници, сп̂ѧ, и҆ възбꙋди́шѧ е҆го, и҆ гл҃ашѧ е҆мꙋ.
ѹ҆чи́телю, нерадиши ли ꙗ҆́ко погиба́ем꙽;
и҆ в꙽ставъ, запрѣти вѣтрꙋ, и҆ рече мо́рю, млъчѝ, преста́ни.
и҆ ѹ҆ле́же вѣтръ, и҆ бысть ти́шина ве́лїа.
и҆ рече и҆мъ, что та́ко страшли́ви е҆сте;
ка́ко не и́мате вѣ́рꙋ;
и҆ ѹ҆боа́шѧсѧ страхомъ ве́лїемъ, и҆ гл҃ахꙋ дрꙋгъ къ дрꙋгꙋ, кто ѹ҆бо се́и е҆сть, ꙗ҆́ко и҆ вѣтръ и҆ мо́ре, послꙋшают̑ е҆го;

Глв̑҇а, е҃·

зач̑҇, ѳ҃і·

И прїидо́ша на ѻ҆нъ полъ мо́рю, въ странꙋ гадари́нскꙋю·

І҆ и҆злѣз꙽шꙋ е҆мꙋ и҆с кораблѧ, а҆́бїе срѣте е҆го ѿ гробъ чл҃къ, в꙽ дꙋ́сѣ нечи́стѣ, и҆же жили́ще и҆мѧше въ гробѣхъ.
и҆ ни вери́гами никтоже можа́ше е҆го свѧза́ти.
зане е҆мꙋ мно́гажд̑ы пꙋты и҆ ю́жи желѣзны свѧ́занꙋ сꙋщꙋ, и҆ растръза́тисѧ ѿ него ю́жемъ желѣзномъ и҆ пꙋтом̑ съкрꙋша́тисѧ, и҆ никтоже можаше е҆го ѹ҆мꙋ́чити.
и҆ вы́нꙋ нощь и҆ дн҃ь въ гробѣхъ и҆ в горахъ б̂ѣ, вопїа и҆ тлъкыисѧ ка́менїемъ·

Ѹ҆зрѣв꙽ же і҆с҃а и҆здале́че, течѐ, и҆ поклони́сѧ е҆мꙋ, и҆ възъпи гл҃сомъ ве́лїемъ, рече.
что̀ мнѣ и҆ тебѣ і҆с҃е сн҃е б҃а вышнѧго;
заклина́ю т̂ѧ бг҃ом꙽, не мꙋ́чи мене.
гл҃аше б̂о е҆мꙋ.
и҆зыди дꙋше нечи́стыи ѿ чл҃ка·

И҆ въпрашаше е҆го, что̀ т̂и е҆сть и҆мѧ;
и҆ ѿвѣща гл҃ѧ, легеѻ҆нъ и́мѧ мнѣ, ꙗ҆́ко мно́ѕи е҆смы, и҆ моли́шѧ его мно́го, да не по́слетъ их̑ вн̂ѣ страны·

Бѣ же т̂ꙋ при горѣ стадо сви́но ве́лїе пасо́мо.
и҆ моли́шѧ е҆го вс̂и бѣ́си гл҃юще.
посли́ н̂ы в꙽ свинїа, да в н̂ѧ вни́демъ.
и҆ повелѣ и҆мъ а҆бїе і҆с҃·

И҆ і҆зшед̑ше дꙋ́си нечи́стїи, в꙽нидошѧ в꙽ свинїѧ.
и҆ ѹ҆стреми́сѧ ста́до по́ брегꙋ в꙽ море, бѣхꙋ же ꙗ҆ко двѣ ты́сꙋщи, и҆ ѹ҆топа́хꙋ в мо́ри.
пасꙋщїи же свинїѧ, бѣжашѧ, и҆ възвѣсти́шѧ въ градѣ и҆ в се́лех꙽·

И҆ і҆зыдо́ша ви́дѣти что е҆сть бы́вшее.
и҆ прїидо́шѧ къ іс҃ови, и҆ видѣша бѣснова́вшагосѧ, сѣдѧща, и҆ ѻ҆блъче́на, и҆ смы́слѧща, и҆мѣвшаго легеѻ҆нъ, и҆ ѹ҆боа́шѧсѧ.
повѣдашѧ же и҆мъ видѣвшеѝ, ка́ко бысть бѣсномꙋ, и҆ ѻ҆ свинїѧхъ·

И҆ нача́шѧ молити его.
ѿи҆ти ѿ предѣ́лъ и҆хъ·

И҆ влѣзшꙋ е҆мꙋ в꙽ корабль, молѧ́ше е҆го бѣснова́выисѧ, дабы бы́лъ с нимъ·

І҆с҃ же не дастъ е҆мꙋ, н̂о рече емꙋ.
и҆дѝ в дом̑ твои к꙽ твои҆мъ, и҆ възвѣсти и҆м꙽, е҆ли́ка т̂и г҃ь сотворѝ, и҆ поми́лова т̂ѧ·

И҆ і́де, и҆ нача проповѣ́дати в꙽ десѧтигра́дѣ, е҆ли́ка сътвори е҆мꙋ і҆с҃, и҆ вс̂и дивлѧ́хꙋсѧ·

зач̑҇, к҃·

И҆ прешед̑шꙋ і҆с҃ꙋ в꙽ корабли па́ки на ѻ҆нъ полъ.
събрасѧ наро́дъ многъ ѻ҆ нем̑, и҆ бѣ при́ мори·

И҆ с̂е прїиде е҆ді́нъ ѿ а҆рхїсинагогъ, и́менемъ и҆а҆и́ръ, и҆ видѣвъ е҆го, падѐ при ногꙋ е҆го.
и҆ молѧше е҆го много гл҃ѧ, ꙗ҆́ко дщ̂и моа̀ на кончи́нѣ е҆сть, да пришед̑ възложи́ши на ню рꙋ́цѣ, ꙗ҆́ко да сп҃се́тсѧ и҆ жива бꙋ́детъ.
и҆ і́де с ни́мъ,

зач̑҇, к҃а·

И҆́ по немъ и҆дѧхꙋ народи мно́зи, и҆ ѹ҆гнѣта́хꙋ е҆го·

И҆ жена̀ нѣ́каа сꙋщи в точе́нїи кро́ве, лт̑ѣ дванадесѧте, и҆ мно́го пострада́вши ѿ многъ врачев̑҇, і҆ и҆зда́вши своѧ вс̂ѧ, и҆ ни е҆ді́ноа пользы ѻ҆брѣтши, н̂о паче в꙽ горше пришед̑ши, слы́шавши ѻ҆ і҆с҃ѣ, пришед̑ши в̂ наро́дѣ съзадѝ, прикоснꙋсѧ ри́зѣ е҆го, гл҃аше б̂о, ꙗ҆́ко а҆ще прикоснꙋ́сѧ ри́замъ е҆го, сп҃се́на бꙋ́дꙋ.
и҆ а́бїе и҆з꙽сѧ́кнꙋ и҆сточникъ кро́ве еа̀.
и҆ разꙋмѣ тѣломъ, ꙗ҆ко и҆сцѣлѣ ѿ ра́ны.
и҆ а́бїе і҆с҃, разꙋмѣ̀ в себѣ си́лꙋ и҆зшед̑шꙋю ѿ него, и҆ ѻ҆бра́щсѧ в꙽ наро́дѣ, гл҃аше.
кто прикоснꙋсѧ ри́ѕахъ моих̑;
и҆ гл҃ахꙋ е҆мꙋ ѹ҆чн҃цы е҆го.
видиши народъ ѹ҆гнѣта́ющь т̂ѧ, и҆ гл҃еши кто сѧ прикоснꙋ̀ мн̂ѣ;
и҆ ѻ҆бъглѧ́даше ви́дѣти сътворшꙋю с̂е·

Жена́ же ѹ҆боа́вшисѧ и҆ трепе́щꙋщи, вѣдѧщи е҆же бысть е́й, прїиде, и҆ припаде к немꙋ, и҆ рече е҆мꙋ вс̂ю и́стинꙋ.
ѻ҆́н же рече е́й, дщ̂и.
вѣ́ра твоа сп҃се т̂ѧ.
и҆дѝ в꙽ ми́ръ, и҆ бꙋ́ди цѣла̀ ѿ раны твоеа̀·

Є҆ще е҆мꙋ гл҃ющꙋ, прїидо́шѧ ѿ а҆рхїсинаго́га гл҃юще, ꙗ҆́ко дщ̂и твоа ѹ́мре, что̀ е҆ще дви́жеши ѹ҆чи́телѧ і҆с҃ же а́бїе слы́шавъ сло́во гл҃емое, гл҃а а҆рхїсинаго́гови.
не бо́исѧ, то́кмо вѣрꙋи.
и҆ не ѻ҆ста́ви по себѣ ни е҆ді́ного и҆ти, то́кмо пет̑ра, и҆ і҆а́кова, и҆ і҆ѻ҆а́нна брата и҆а́ковлѧ·

И҆ прїиде в꙽ домъ а҆рхїсинаго́говъ, и҆ видѣ млъвꙋ, плачꙋщеѝсѧ и҆ крича́ще много, и҆ вшед̑, гл҃а и҆мъ.
чт̂о млъвите, и҆ пла́четесѧ;
ѻ҆трокови́ца нѣ́сть ѹ҆мръла̀, н̂о спитъ.
и҆ рꙋга́хꙋсѧ е҆мꙋ·

ѻ҆́н же и҆згнавъ вс̂ѧ, поѧ́тъ ѿц҃а ѻ҆троковица и҆ мт҃ре, и҆ і҆же бѣхꙋ с нимъ, вни́де и҆дѣже бѣ ѻ҆троковица лежащи.
и҆ е҆мъ за́ рꙋкꙋ ѻ҆троковицꙋ, гл҃а е́й, талиѳа кꙋми, е҆же е҆сть сказа́емо, дв҃це тебѣ гл҃ю, в꙽ста́ни.
и҆ а́бїе въста дв҃ца, и҆ хожд̑аше.
б̂ѣ б̂о лѣтъ два̂надесѧте.
и҆ ѹ҆жасо́шѧсѧ ѹ҆жасомъ ве́лїемъ.
и҆ запрѣти и҆мъ мно́го, да никтоже ѹ҆вѣсть сего.
и҆ рече дати е́й ꙗ҆́сти·

Глв̑҇а, ѕ҃·

зач̑҇, к҃в·

И ізыде ѿтꙋ́дꙋ, и҆ прїиде въ ѿч҃ьствїе свое, и҆ по нем꙽ и҆дошѧ ѹ҆чн҃цы е҆го·

И҆ бы́вши сꙋбо́тѣ, начатъ на со́нмищи ѹ҆чити, и҆ мно́ѕи слы́шаще дивлѧ́хꙋсѧ гл҃юще.
ѿкꙋ́дꙋ семꙋ сїа;
и҆ что премꙋ́дрость да́наа е҆мꙋ, и҆ си́лы таковы̀ рꙋкама е҆го быва́ют꙽;
не се́и л̂и е҆сть тектонъ, сн҃ь мр҃їин꙽.
братъ же и҆а́ковꙋ, и҆ і҆ѻ҆сїи, и҆ і҆ѹ́дѣ, и҆ си́монꙋ;
и҆ не сестры л̂и е҆го зд̂ѣ сꙋть в насъ;
и҆ блажнѧ́хꙋсѧ ѻ҆ немъ·

Гл҃аше же и҆мъ і҆с҃, ꙗ҆́ко нѣсть прро̑҇къ без꙽ чьсти, то́кмо въ ѿч҃ьствїи своем̑, и҆ в꙽ сро́д꙽ствѣ, и҆ в домꙋ своемъ.
и҆ не можа́ше т̂ꙋ ни е҆ді́ноа си́лы сътворити, токмо ма́ло недꙋж́ныхъ възлож̑ рꙋцѣ, и҆сцѣлѝ.
и҆ дивлѧ́шесѧ за невѣрствїе ихъ·

И҆ ѻ҆бхожа́ше ве́си ѻ҆́крс̑҇тъ ѹ҆ча·

зач̑҇, к҃г·

И҆́ призва̀ ѻ҆́бана́десѧте, и҆ начатъ и҆хъ посыла́ти, два̂ два̂, и҆ даа́ше и҆мъ власть над̑ дꙋхи нечи́стыми·

И заповѣда и҆мъ, да ничесоже во́змт̑ꙋ на пꙋть, то́кмо же́злъ е҆ді́нъ.
н̂и пи́ры, н̂и хлѣб́а, н̂и при поѧсѣ мд̑и̑ѣ, н̂о ѻ҆бꙋвени в꙽ санда́лїа, и҆ не ѻ҆блачи́тисѧ в꙽ двѣ ри́зѣ·

И҆ гл҃аше и҆мъ, и҆дѣже а҆́ще в꙽ни́дете в домъ, т̂ꙋ пребыва́ите, дон̑҇деже и҆зы́дете ѿтꙋ́дꙋ.
и е҆лицы а҆ще не прїимꙋтъ в̂ы, ниже послꙋшаютъ васъ, и҆сходѧ́ще ѿтꙋдꙋ, ѿтрѧсѣте прахъ и҆же под̑ ногами ва́шими, въ свѣдѣтельство им̑.
а҆ми́нь гл҃ю вамъ, ѿрад̑нѣе бꙋ́детъ содо́момъ и҆ гомо́ром̑ в дн҃ь сꙋдныи, неже гра́дꙋ томꙋ·

И҆ і҆зшед̑ше проповѣдахꙋ да пока́ютсѧ.
и҆ бѣ́сы мно́гы и҆згонѧхꙋ, и҆ ма́захꙋ ма́сломъ мно́гы недꙋжны, и҆ сцѣлѣва́хꙋ·

зач̑҇, к҃д·

И҆́ ѹ҆слы́шавъ цр҃ь и҆́родъ, ꙗ҆́вѣ б̂о бысть и́мѧ е҆го.
и гл҃аше, ꙗ҆́ко і҆ѻ҆а́ннъ крс̑҇тѧѝ ѿ мр҃твых̑ в꙽ъста̀, и҆ сего рад̑и̑ си́лы дѣ́ютсѧ ѻ҆ немъ·

И҆нїи гл҃ахꙋ, ꙗ҆ко и҆лїа е҆сть.
и҆нїи же гл҃ахꙋ, ꙗ҆ко прро̑҇къ е҆сть, и҆ли ꙗ҆́ко е҆ді́нъ ѿ прро̑҇къ·

Слы́шав же и҆́род̑, рече, ꙗ҆ко е҆гоже а҆з꙽ ѹ҆сѣкнꙋхъ і҆ѻ҆а́нна, то́и е҆сть, то́и въста̀ ѿ мр҃твых꙽·

То́и б̂о и́родъ пославъ, ꙗ҆́тъ і҆ѻа́нна, и҆ свѧза̀ е҆го в темници, и҆родїѧ́ды ради жены фїли́ппа бра́та свое҆го, ꙗ҆́ко ѻ҆женисѧ ею̀·

Гл҃аше б̂о і҆ѻ҆а́ннъ и́родови.
не достоитъ тебѣ и҆мѣти женꙋ̀ фїли́ппа бра́та твое҆го·

И҆́родїа же гнѣвашесѧ нань, и҆ хотѧше е҆го ѹ҆бити, и҆ не можа́ше.
и҆́род̑ б̂о боа́шесѧ і҆ѻ҆а́нна, вѣды е҆го мꙋж́а пра́вед̑на и҆ ст҃а, и҆ съблюда́ше е҆го, и҆ послꙋшав꙽ е҆го мно́га творѧше, и҆ в꙽ сла́дость е҆го послꙋшаше.
и҆ приклю́чшꙋсѧ дн҃и потребнꙋ, е҆гда и҆́ро̑ рожд̑ьствꙋ свое҆мꙋ ве́черю творѧше, кнѧѕе́мъ своимъ и҆ ты́сꙋщникомъ, и҆ старѣ́ишинам꙽ галиле́искамъ.
и҆ вшед̑ши дще́ри тоа̀ и҆родїѧ́ды, и҆ плѧса́вши, и҆ ѹ҆гожд̑ьши и҆́родови, и҆ възлежа́щимъ с ним̑.
рече цр҃ь дв҃ци, просѝ ѹ҆ менѐ е҆же а҆ще хо́щеши, и҆ дамъ т̂и.
и҆ клѧ́тсѧ ей, ꙗ҆́ко а҆ще попро́сиши м̂и дамь т̂и, и҆ до полъ црс̑҇твїа моего, ѻ҆на же и҆зшед̑ши реч̑҇ мт҃ри свое́й, чесо̀ прошꙋ̀;
ѻ҆на же рече, главꙋ̀ і҆ѻ҆а́нна крс̑҇тлѧ.
и҆ вшед̑ши а҆́бїе съ тща́нїемъ к꙽ цр҃ю, просѝ гл҃ющи.
хощꙋ̀, да м̂и дасѝ ѿ него на блю́дѣ главꙋ і҆ѻ҆а́нна крс̑҇тлѧ.
и҆ приско́рбенъ бысть цр҃ь, клѧ́твы же рад̑и̑, и҆ за възлежа́щихъ с нимъ, не въсхотѣ ѿрещисѧ еа̀.
и҆ а́бїе пославъ цр҃ь спекꙋлатора, повелѣ принестѝ главꙋ его.
ѻ́н же шедъ ѹ҆сѣкнꙋ его в темни́ци.
и҆ принесѐ главꙋ его на блю́дѣ, и҆ дастъ ю҆̀ дв҃ци, и҆ дв҃ца дастъ ю҆̀ матери свое́й·

И҆ слы́шавше ѹ҆чн҃цы е҆го, прїидо́шѧ и҆ взѧ́шѧ трꙋпъ его, и҆ положи́шѧ его въ гробѣ·

зач̑҇, к҃е·

И҆́ събра́шѧсѧ а҆плс̑҇и къ і҆с҃ꙋ, и҆ възвѣсти́шѧ емꙋ вс̂ѧ, и҆ ели́ка сотвориша и҆ наѹ҆чи́шѧ·

И҆ рече и҆мъ.
прїидѣте вы сами в пꙋ́сто мѣсто, еді́ни, и҆ почїите ма́ло.
бѣхꙋ б̂о приходѧ́щеѝ и҆ ѿходѧ́щеѝ мно́ѕи, и҆ ни ꙗ҆́сти и҆мъ б̂ѣ коли·

И҆ і҆до́шѧ в꙽ пꙋ́сто мѣсто кораблемъ еді́ни.
и҆ видѣшѧ их̑ и҆дꙋща народ̑и̑, и҆ позна́шѧ их̑ мно́ѕи, и҆ пѣши ѿ всѣхъ градовъ стицѧхꙋсѧ та́мо.
и҆ предвари́шѧ и҆хъ, и҆ снидо́шасѧ к немꙋ.
и і҆зшед̑, видѣ̀ і҆с҃ народ̑ мно́гъ, и҆ млс̑҇рдова ѻ҆ нихъ, зане бѣхꙋ ꙗ҆ко ѻ҆вцѧ̀ не и҆мꙋще па́стырѧ·

И начатъ и҆хъ ѹ҆чити мно́го·

И҆ ѹ҆же часꙋ многꙋ бы́вшꙋ·

Пристꙋ́пльше к꙽ немꙋ ѹ҆чн҃цы его, гл҃ашѧ.
ꙗ҆ко пꙋ́сто есть мѣсто, и҆ час̑҇ ѹ҆же мног꙽, ѿпꙋсти и҆хъ, да шед̑ше въ ѻ҆крс̑҇тных̑ се́лехъ и҆ ве́сехъ, кꙋ́пѧтъ себѣ хлѣбы.
не и҆мꙋтъ б̂о чесо ꙗ҆сти.
ѻ҆н же ѿвѣщавъ, рече и҆мъ.
дади́те и҆м꙽ в̂ы ꙗ҆сти.
и҆ гл҃ашѧ е҆мꙋ.
да шед̑ше кꙋ́пимъ двѣма стома пѣнѧѕь хлѣбы, и҆ дамы и҆мъ ꙗ҆сти·

ѻ҆́н же рече и҆мъ, коли́ко хлѣбы и҆́мате;
и҆дѣте и҆ ви́дите.
и҆ ѹ҆вѣдѣвше гл҃аша, пѧть хлѣ́бъ, и҆ двѣ рыбѣ.
и҆ повелѣ и҆мъ посади́ти всѧ на спо́ды на спо́ды на травѣ зеленѣ.
и҆ възлегошѧ на́ лѣхы на лѣхы, по сто и҆ по пѧтьдесѧт̑.
и прїемъ пѧть хлѣ́бъ и҆ дв̂ѣ ры́бѣ, възрѣвъ на нб҃о, блс̑҇ви, и҆ преломи хлѣ́бы, и҆ даа́ше ѹ҆чн҃комъ свои҆м꙽, да пред̑лага́ютъ пред̑ ними, и҆ ѻ҆бѣ рыбѣ раздѣли всѣмъ.
и҆ ꙗ҆́доша вс̂и, и҆ насы́тишѧсѧ.
и҆ взѧ́шѧ ѹ҆крꙋ́хы дванадесѧте ко́ша и҆сполнь, и҆ ѿ ры́бꙋ·

Бѧ́ше же ꙗ҆́дших̑ хлѣбы ꙗ҆́ко пѧть ты́сѧщь мꙋ́жїи·

зач̑҇, к҃ѕ·

И҆́ а́бїе понꙋди ѹ҆чн҃кы своѧ вни́ти в꙽ кора́бль, и҆ вари́ти е҆го на ѻ҆́номъ полꙋ к꙽ виѳсаи҆дѣ, до́ндеже самъ ѿпꙋсти наро́ды·

И҆ ѿрек꙽сѧ и҆мъ, и҆́де в꙽ го́рꙋ помоли́тисѧ·

И҆ ве́черꙋ бы́вшꙋ, б̂ѣ кора́бль посредѣ морѧ, и҆ сам̑ е҆ді́нъ на землѝ·

И҆ видѣ и҆хъ стра́жꙋща в꙽ пла́ванїи, бѣ б̂о вѣтръ проти́венъ и҆мъ.
и҆ ѻ҆ четве́ртѣи стражи нощънѣи, прїиде к ни́мъ по́ морю ходѧ̀.
и҆ хотѧ́ше минꙋти и҆хъ.
ѻ҆ни же видѣ́вше е҆го ходѧща по морю, мнѣхꙋ при́зракъ бы́ти, и҆ възъпи́шѧ.
вс̂и б̂о е҆го ви́дѣшѧ, и҆ смꙋти́шасѧ.
и҆ а́бїе гл҃а с ними.
и҆ рече и҆мъ, дръза́и҆те, а҆зъ е҆смь, не бо́итесѧ·

И҆ въни́де к нимъ в кора́бль, и҆ ѹ҆ле́же вѣтръ.
и҆ ѕѣло и҆зли́ха в себѣ ѹ҆жаса́хꙋсѧ и҆ дивлѧ́хꙋсѧ.
не разꙋмѣшѧ б̂о ѻ҆ хлѣбѣхъ.
бѣ̀ б̂о срд̑це их̑ ѻ҆ка́менено.
и прешед̑ше, прїидо́шѧ в зе́млю генисаретъскꙋ, и҆ приста́шѧ·

зач̑҇, к҃з·

И҆́ і҆зшед̑шемъ и҆мъ и҆с кораблѧ̀.
а҆́бїе позна́вше е҆го, ѻ҆бте́кше вс̂ю странꙋ т̂ꙋ, нача́шѧ на ѻ҆дрѣхъ приносити болѧ́щаѧ, и҆дѣже слы́шахꙋ ꙗ҆́ко т̂ꙋ е҆сть.
и҆ ꙗ҆́може а҆́ще вхожд̑аше в꙽ ве́си, и҆л̂и въ грады, и҆л̂и се́ла, на распꙋтїих̑ полага́хꙋ недꙋж́ныа, и҆ молѧхꙋ е҆го, да по́не въскри́лїю ри́зы е҆го прико́снꙋт꙽сѧ.
и҆ е҆лицы а҆́ще прикасахꙋсѧ е҆мъ, сп҃са́хꙋсѧ·

Глв̑҇а, з҃·

И събрашасѧ к꙽ немꙋ фарїсе́е, и҆ нѣ́цїи ѿ кни́жникъ пришед̑шеѝ ѿ і҆ерс̑҇ли́ма.
и҆ видѣвше нѣ́кыа ѿ ѹ҆чн҃къ е҆го нечи́стыми рꙋками, си̂рѣчь, не ѹ҆м꙽ве́нами ꙗ҆́дꙋщ́е хлѣбы, рꙋга́хꙋсѧ.
фарисе́е б̂о и҆ вс̂и і҆юде́е, а҆ще не трыюще ѹ҆мыютъ рꙋкъ, не ꙗ҆дѧтъ, дръжа́ще преданїа старець.
и҆ ѿ тръжища а҆ще не покꙋплютсѧ, не ꙗ҆́дѧтъ.
і҆ и́на мно́га сꙋть ꙗ҆́же прїѧ́шѧ дръжати.
погрꙋженїа стклѧ́ницѧм̑ и҆ чва́номъ, и҆ котломъ и҆ ѻ҆дро́мъ·

зач̑҇, к҃и·

Пото́мъ же въпрашѧхꙋ е҆го фарисе́е и҆ кни́жницы, почто̀ ѹ҆чн҃цы твоѝ не хо́дѧтъ по преда́нїю ста́рецъ, н̂о не ѹ҆мвенами рꙋками ꙗ҆́дѧтъ хлѣбъ;
ѻ҆́нже ѿвѣщавъ, рече и҆мъ.
ꙗ҆́ко добрѣ прро̑҇чьствова и҆са́іа ѻ҆ васъ лицемѣрехъ.
ꙗ҆́коже е҆сть пи́сано.
сїи людїе ѹ҆стна́ми мѧ чтꙋтъ, срд̑це же и҆хъ дале́че ѿстои́тъ ѿ менѐ.
сꙋ́е же чтꙋтъ м̂ѧ, ѹ҆чѧ́ще ѹ҆че́нїа ѕа́повѣди члчс̑҇кы, ѻ҆ставл꙽ьше б̂о за́повд̑ѣ бж҃їю, дръжитѐ преда́нїа члчс̑҇каа·

Креще́нїа чваномъ, и҆ стклѧницѧмъ, и҆ і́на подобна такова̀ мно́га творитѐ.
и҆ гл҃аше и҆мъ, до́брѣ ѿмѣта́ете за́повд̑ѣ бж҃їю, да преданїе ва́ше съблюде́те·

Моѷсїи б̂о рече, чтѝ ѿц҃а твое҆го и҆ мт҃ре твою.
и і́же злосло́витъ ѿц҃а и҆л̂и мт҃ре, смр҃тїю да ѹ́мрет꙽.
вы̀ же гл҃ете, а҆ще речетъ чл҃къ ѿц҃ꙋ и҆ли мт҃ри, корва́нъ, е҆же е҆сть да́ръ, и҆же а҆ще ѿ мене пл́ьзевалъ е҆си.
и҆ не ктомꙋ ѻ҆ставлѧ́ете.
е҆го ничесо́же сътвори́ти ѿц҃ꙋ свое҆мꙋ и҆ли ма́тери свое́й, престꙋпа́юще сло́во бж҃їе преданїе҆мъ ва́шимъ, е҆же преда́сте.
и҆ подо́бна такова̀ мно́га творитѐ·

зач̑҇, к҃ѳ·

И҆ призвавъ весь наро́дъ, гл҃аше и҆м꙽.
послꙋшаите мене вс̂и, и҆ разꙋмѣите.
ничесо́же е҆сть вн̂ѣѹ҆дꙋ чл҃ка, входи́мо во́нь, е҆же мо́жетъ ѻ҆скверъни́ти е҆го.
н̂о и҆сходѧ́щаѧ ѿ него, т̂а сꙋть сквернѧ́щаа чл҃ка.
а҆ще кто и҆́мать ѹ҆ши слы́шати, да слышит̑·

И҆ е҆гда̀ вни́де в до́мъ ѿ наро́да, въпрашѧхꙋ е҆го ѹ҆чн҃цы е҆го ѻ҆ при́тчи·

И҆ гл҃а и҆мъ, тако ли и҆ в̂ы неразꙋ́мливи е҆сте;
не разꙋмѣ́ете ли, ꙗ҆́ко вс̂е е҆же и҆з внꙋ входи́мое в꙽ чл҃ка, не мо́жетъ ѻ҆сквернити е҆го, ꙗ҆́ко не вхо́дитъ е҆мꙋ в꙽ срд̑це, н̂о въ́ чрево, и҆ а҆федро́номъ и҆схо́дитъ, и҆стреблѧ́а вс̂ѧ бра́шна;
гл҃аше же, ꙗ҆ко и҆схо́дѧщеѐ ѿ чл҃ка, т̂о скверни́тъ чл҃ка.
изъ ю́тръѹ҆дꙋ б̂о срд̑ца члчс̑҇ка помышленїѧ ѕла̂ и҆схо́дѧтъ, прелюбодѣѧ́нїа, любодѣѧнїа, ѹ҆бі́иства, татбы, лихои҆́мъства, ѻ҆би́ды, лꙋка́в꙽ствїа, лесть, стꙋдодѣѧнїа, ѻ҆́ко лꙋка́во, хꙋла̀, гръды́ни, безꙋмьство.
вс̂ѧ сїа ѕла́ѧ и҆зъ ѹ҆тръ и҆схо́дѧтъ, и҆ сквернѧ́тъ чл҃ка·

зач̑҇, л҃·

И҆ ѿтꙋ́дꙋ в꙽ставъ и҆́де в꙽ предѣ́лы тѷрскы и҆ сидо́нскы·

И҆ вшедъ в до́мъ, никогоже хотѧ́ше дабы е҆го чюлъ, и҆ не мо́же ѹ҆таи҆тисѧ·

слы́шавши б̂о жена̀ ѻ҆ немъ, е҆ѧ́же дщ̂и и҆мѧ́ше дꙋхъ нечи́стъ, прише́дши припаде к꙽ нога́ма е҆го·

Жена же б̂ѣ е҆́ллинска, сѷрофѷни́сса ро́домъ·

молѧ́ше е҆го, да бѣ́са и҆жденетъ и҆з дще́ре еа̀·

Іс҃ же рече е́й, ѻ҆ста́ви, да пр́ьвѣе насытѧтсѧ чѧ́да.
нѣсть б̂о добро ѿѧ́ти хлѣба чѧ́домъ, и҆ поврещѝ ѱомъ·

ѻ҆на же ѿвѣщавши, гл҃а емꙋ, е́й г҃и.
и҆бо и҆ ѱѝ под̑ трапе́зою ꙗ҆́дѧтъ ѿ крꙋпи́цъ дѣте́и·

И҆ рече е́ѝ, ѕа сїе сло́во и҆дѝ, и҆зы́де бѣсъ и҆з꙽ дще́ре твоеа̀·

И҆ шед̑ши в домъ свои, ѻ҆брѣте бѣ́съ и҆зшед̑шъ, и҆ дщере лежа́щꙋ на ѻ҆дрѣ·

зач̑҇. л҃а·

И҆́ пакы и҆зшед̑ і҆с҃ ѿ предѣлъ тѷрскъ, и сидо́нскъ.
прїиде на́ море галиле́йско, межд̑ꙋ предѣ́лы декапо́льскы·

И҆ приведо́ша к꙽ немꙋ глꙋ́ха гꙋгни́ва, и молѧ́хꙋ е҆го да възложит̑ нань рꙋ́кꙋ.
и҆ пое́мъ е҆го ѿ народа е҆ді́ного, вложѝ пръ́сты своа̀ въ ѹ҆ши е҆го, и҆ плю́нꙋвъ коснꙋ̀ е҆го въ ꙗ҆зы́къ, и҆ възрѣвъ на́ нб҃о, въздохнꙋ̀, и҆ гл҃а е҆мꙋ, е҆ффа́ѳа.
е҆же е҆сть, развръзисѧ.
и҆ а́бїе разврьзо́стасѧ слꙋ́ха е҆го, и҆ разрѣши́сѧ ю҆́за ꙗ҆зы́ка е҆го, и҆ гл҃аше пра́во, и҆ запретѝ и҆мъ, да никомꙋже повѣдѧтъ.
е҆ли́коже и҆мъ то́и запрѣщаше, паче и҆зли́ха проповѣ́дахꙋ.
и҆ преи҆зли́ха дивлѧ́хꙋсѧ гл҃юще, до́брѣ вс̂е творитъ, и҆ глꙋхыа творит̑ слы́шати, и҆ нѣмы́ѧ гл҃ати·

Глв̑҇а, и҃·

зач̑҇, л҃в·

В ты́а дн҃и ѕѣло мно́гꙋ наро́дꙋ сꙋщꙋ, и҆ не и҆мꙋщимъ чесо̀ ꙗ҆́сти, призва́въ і҆с҃, ѹ҆ченикы своа, гл҃а им̑.
млс̑҇рдꙋю ѻ҆ наро́дѣ, ꙗ҆ко ѹ҆же тр̂и дн҃и присѣдѧтъ мн̂ѣ, и҆ не и҆мꙋть чесо̀ ꙗ҆́сти.
и҆ а́ще ѿпꙋщꙋ и҆хъ не ꙗ҆дшѧ в꙽ до́мы своѧ, ѻ҆слабѣютъ на пꙋтѝ.
мно́ѕи б̂о ѿ нихъ и҆здале́че пришлѝ сꙋть·

И҆ ѿвѣща́ша е҆мꙋ ѹ҆чн҃цы е҆го.
ѿкꙋ́дꙋ сихъ възможетъ кт̂о зд̂ѣ насы́тити хлѣба в꙽ пꙋсты́ни;
и҆ въпросѝ и҆хъ, коли́ко и҆́мате хлѣ́бы;
ѻ҆ни же рѣша, сед̑мь.
и҆ повелѣ наро́дꙋ възлежти на земли.
и҆ прїемъ сед̑мь хлѣбы, хвалꙋ въздавъ преломи, и҆ даа́ше ѹ҆чн҃комъ свои҆мъ, да пред̑лага́ют̑.
и҆ пред̑ложи́шѧ пред̑ наро́домъ.
и҆ і҆мѧ́хꙋ ры́бицъ ма́ло, и҆ сїа блс̑҇вивъ, рече пред̑ложи́ти и҆ тыа̀, ꙗ҆́до́шѧ же и҆ насы́тишѧсѧ.
и҆ взѧ́шѧ и҆збы́ткы ѹ҆крх̑ꙋ, сед̑мь ко́шницъ·

бѣхꙋ же ꙗ҆́дшеѝ ꙗ҆́ко четы́ри ты́сꙋщѧ, и ѿпꙋсти и҆хъ.
и҆ а́бїе влѣзъ в꙽ кора́бль съ ѹ҆чн҃кы свои́ми, прїиде въ страны далманꙋѳа́н꙽скы·

зач̑҇, л҃г·

И҆́ ізыдо́шѧ фарисе́е, и҆ нача́шѧ стѧза́тисѧ с нимъ, и҆́щꙋще ѿ него зна́менїа с꙽ нб҃се, и҆скꙋша́юще е҆го.
и҆ въздохнꙋвъ дх҃омъ своимъ, гл҃а.
чесо̀ родъ се́и зна́менїа и҆́щетъ;
а҆ми́нь гл҃ю вамъ, а҆ще да́стьсѧ ро́дꙋ семꙋ зна́менїе.
и҆ ѻ҆ставль и҆хъ, влѣзъ па́кы в кора́бль, и҆́де на ѻ҆нъ полъ.
и҆ забы́шѧ ѹ҆чн҃цы е҆го взѧти хлѣ́бы, и҆ ра́звѣ е҆діного хлѣб́а не и҆мѧхꙋ с꙽ собо́ю в꙽ корабли.
и҆ прѣщаше и҆мъ гл҃ѧ.
ѕри́те, блюдѣтесѧ ѿ кваса фарисе́иска, и҆ ѿ кваса и҆́родова.
и҆ помыш꙽лѧ́хꙋ дрꙋгъ къ дрꙋгꙋ гл҃юще, ꙗ҆́ко хлѣбы не и҆́мамы.
и҆ разꙋмѣвъ і҆с҃, гл҃а и҆мъ.
что помышлѧ́ете, ꙗ҆ко хлѣбы не и́мате;
не ѹ҆̀ л̂и чꙋе́те, ниже разꙋмѣ́ете;
е҆ще ли ѻ҆ка́менено срд̑це ваше и҆́мате;
ѻ҆́чи и҆мꙋщ́е не ви́дите, и҆ ѹ҆ши и҆мꙋще не слы́шите;
и не по́мните ли е҆гда пѧть хлѣбы преломихъ в пѧть ты́сѧщь, колѝко, ко́шь и҆спо́лнь ѹ҆крꙋхъ прїа́сте;
гл҃ашѧ е҆мꙋ, дв̂ана́десѧте·

Є҆гда же сед̑мь в четы́ри ты́сѧща, коли́ко ко́шницъ и҆сполненїа ѹ҆крꙋхъ прїа́сте;
ѻ҆ни же рѣшѧ, сед̑мь·

И҆ гл҃а и҆мъ, ка́ко не разꙋмѣ́ете;

зач̑҇, л҃д·

И҆́ прїиде въ виѳсаид́ꙋ, и҆ приведо́ша к н꙽емꙋ слѣ́па.
и҆ молѧ́хꙋ е҆го, да е҆го ко́снетъ.
и҆ ем́ъ за́ рꙋкꙋ слѣпа́го, и҆зведѐ е҆го вонъ и҆з веси.
и҆ плю́нꙋвъ на́ ѻ҆́чи е҆го, възложъ рꙋцѣ на̀нь, въпрашаше е҆го, а҆ще чт̂о ви́дитъ.
и҆ възрѣвъ, гл҃аше.
ви́жꙋ чл҃кы ꙗ҆ко дре́вїе ходѧ́ще.
пото́м же пакы възложи рꙋцѣ на́ ѻчи е҆го, и҆ сотвори е҆го прозрѣти, и҆ ѹ҆творисѧ, и҆ ѹ҆зрѣ свѣтло вс̂е.
и҆ посла̀ е҆го в дом̑ е҆го гл҃ѧ.
н̂и в ве́сь вниди, ни повѣжд̑ь комꙋ в꙽ ве́си·

зач̑҇, л҃е·

И҆́ ізы́де і҆с҃, и҆ ѹ҆чн҃цы е҆го в꙽ ве́си кесарїа́ фили́пповы.
и҆ на пꙋти́ въпраша́ше ѹ҆чн҃кы своа, гл̂ѧ и҆мъ.
кого̀ м̂ѧ гл҃ютъ чл҃цы бы́ти;
ѻ҆ни же ѿвѣща́ша.
і҆ѻ҆а́нна крс̑҇тлѧ, и҆ і҆нїи і҆лїю, дрꙋѕїи́ же е҆ді́ного ѿ прро̑҇къ.
и҆ то́и гл҃а и҆мъ.
вы же кого̀ м̂ѧ гл҃ете быти;
ѿвѣща́в꙽ же пет̑ръ гл҃а е҆мꙋ, т̂ы е҆си х҃с·

зач̑҇, л҃ѕ·

И҆́ запрѣти и҆мъ, да никомꙋже гл҃ют̑ ѻ҆ немъ·

И҆ начатъ ѹ҆чи́ти и҆хъ, ꙗ҆́ко подоба́етъ сн҃ꙋ члчс̑҇комꙋ мно́го пострада́ти, и҆ і҆скꙋше́нꙋ бы́ти ѿ ста́рецъ, и҆ а҆рхїере́й, и҆ кни́жник꙽, и҆ ѹ҆бїенꙋ бы́ти, и҆ тре́тїи дн҃ь въскрс̑҇нꙋти·

И҆ не ѻ҆бинꙋ́асѧ сло́во гл҃аше.
и҆ прїемь е҆го петръ, начатъ прѣтити е҆мꙋ·

ѻ҆́н же ѻ҆бра́щьсѧ, и҆ въз꙽рѣ́въ на ѹ҆чн҃кы своѧ, запрѣти петро́ви гл҃ѧ.
и҆дѝ за мно́ю сатана.
ꙗ҆ко не мы́слиши ꙗ҆же сꙋть бж҃їа, н̂о ꙗ҆же члчс̑҇ка·

И҆ призвавъ наро́ды съ ѹ҆ченикы свои́ми, рече и҆мъ·

зач̑҇, л҃з·

И҆́же хощетъ по мнѣ и҆ти, да ѿвр́ъжетсѧ себѐ, и҆ возметъ крс̑҇тъ свои, и҆ по мнѣ̀ грѧдетъ·

И҆же б̂о а҆ще хо́щетъ дш҃ꙋ свою спс̑҇ти, погꙋбит̑ ю҆̀·

а и҆же погꙋбитъ дш҃ꙋ свою мене ради, і҆ е҆ѵг̑҇лїа, то́и сп҃сетъ ю҆̀·

Каа̀ б̂о пол꙽за чл҃кꙋ, а҆́ще приѻ҆брѧщетъ ми́ръ весь, и҆ ѿщети́тъ дш҃ꙋ свою̀;
и҆ли что̂ дастъ чл҃кь и҆змѣ́нꙋ на дш҃и свое́й;
и҆же б̂о а҆ще постыдитсѧ менѐ, и҆ мои҆хъ слове́съ, в ро́дѣ́ семъ прелюбодѣ́инемъ и҆ грѣшнемъ, и҆ сн҃ь члчс̑҇кїи постыдитсѧ е҆го, е҆гда прїидетъ въ сла́вѣ ѿц҃а свое҆го, съ а҆́гг҃лы ст҃ыми·

Глв̑҇а, ѳ҃·

зач̑҇, л҃з·

И гл҃аше и҆мъ.
а҆ми́нь гл҃ю вамъ, ꙗ҆́ко сꙋть нѣ́цїи ѿ здѣ стоѧ́щихъ, и҆же не и҆мꙋт꙽ в꙽кꙋсити смр҃ти, до́ндеже ви́дѧтъ црс̑҇твїе бж҃їе пришедшее в си́лѣ·

зач̑҇, л҃и·

И҆́ по шесть дн҃їи поѧ́тъ і҆с҃ петра̀, и҆ і҆а́кова, и҆ і҆ѻа́нна, и҆ възведе и҆хъ на́ горꙋ высокꙋ ѻ҆собь е҆ді́ны, и҆ преѻ҆брази́сѧ пред̑ ни́ми.
и҆ ри́зы е҆го быша блеща́щесѧ, бѣлы ѕѣло̀ ꙗ҆́ко снѣ́гъ, ꙗ҆́цѣх же не мо́жетъ бѣли́лникь ѹ҆бѣлити на землѝ.
и҆ ꙗ҆́висѧ и҆мъ, и҆лїа с моѷсе́ѻмъ.
и҆ бѣ́ста съ і҆с҃омъ гл҃юща·

И҆ ѿвѣщавъ петръ, гл҃а і҆с҃ови.
ра́вви, добро̀ е҆сть намъ зд̂ѣ быти, и҆ сътворимъ кро́вы тр̂и, тебѣ е҆ді́нъ, и҆ моѷсе́ѻви е҆ді́нъ, и҆ і҆лїи е҆ді́нъ.
не вѣдѧше б̂о чт̂о рещѝ, бѣхꙋ б̂о пристра́шни.
и҆ бысть ѻ҆б́лакъ ѻ҆сѣнѧ́а их̑.
и҆ прїиде глс̑҇а и҆зъ ѻ҆́блака, гл҃ѧ се́й е҆сть сн҃ъ мо́и възлю́бленыи, того посл́ꙋшаите·

И҆ внеза́пꙋ възрѣ́вше, ктомꙋ никогоже видѣша, то́кмо і҆с҃а е҆ді́ного с꙽ собою·

сходѧ́щем же и҆мъ с꙽ горы̀, запрѣти и҆мъ, да никомꙋже повѣдѧтъ ꙗ҆́же видѣша, то́кмо е҆гда сн҃ъ члчс̑҇кїи и҆з мр҃твыхъ въскрс̑҇нетъ·

зач̑҇, л҃ѳ·

І҆ сло́во ѹ҆дръжа́шѧ в себѣ, стѧзающесѧ, чт̂о е҆сть е҆же и҆з мр҃твыхъ въскрс̑҇нꙋт́и·

И въпрашѧ́хꙋ е҆го гл҃юще, ꙗ҆́ко гл҃ютъ кни́жницы, ꙗ҆́ко и҆лїи подоба́етъ прїитѝ преже;
ѻ҆́н же ѿвѣщавъ, рече и҆мъ.
и҆лїа ѹ҆бо пришед̑ преже, ѹ҆стро́итъ вс̂ѧ.
и҆ како е҆сть пи́сано ѻ҆ сн҃ѣ члчс̑҇тѣмъ, да мно́го постра́жетъ, и҆ ѹ҆ничиженъ бꙋдетъ.
н̂о гл҃ю вамъ, ꙗ҆́ко и҆лїа прїиде, и҆ сътвори́шѧ е҆мꙋ е҆ли́ка хотѣш́ѧ, ꙗ҆́коже е҆сть пи́сано ѻ҆ немъ·

И пришед̑ къ ѹ҆чн҃комъ.
видѣ народъ мно́гъ ѻ҆ нихъ, и҆ кни́жникы стѧза́ющасѧ с ни́ми.
і҆ а́бїе весь народ̑ видѣвъ е҆го ѹ҆жасе́сѧ.
и҆ прирі́щꙋще цѣлова́хꙋ е҆го, и҆ въпросѝ кни́жникы, что̀ стѧза́е҆тесѧ к себѣ;

зач̑҇, м҃·

І҆ ѿвѣщавъ е҆ді́нъ ѿ наро́да, рече·

ѹ҆чт҃лю, приведохъ сн҃а мое҆го к тебѣ, и҆мꙋщь дꙋхъ нѣмъ.
и҆ і҆дѣже коли́ждо им́етъ е҆го, разбива́етъ е҆го, и҆ пѣ́ны тѣщ́итъ, и҆ скрежещетъ зꙋбы̀ свои́ми, и҆ ѻ҆цѣпѣнѣвае҆тъ.
и҆ рѣхъ ѹ҆чн҃комъ твои҆мъ, да и҆жд̑енꙋтъ е҆го, и҆ не възмого́шѧ·

ѻ҆́н же ѿвѣщавъ гл҃а е҆мꙋ.
ѽ ро́де невѣ́ренъ, доко́лѣ в꙽ вас̑҇ бꙋд́ꙋ;
доко́лѣ трьплю в̂ы;
приведѣте е҆го ко мнѣ·

И приведо́ша е҆го к꙽ немꙋ.
и҆ видѣвъ е҆го, а҆́бїе дꙋхъ сътрѧсѐ е҆го.
и҆ падъ на землѝ валѧ́шесѧ, пѣны тѣщ́а·

и҆ въпросѝ ѿц҃а е҆го, коли́ко лт̑ѣ е҆сть, ѿнелиже с̂е бысть е҆мꙋ;
ѻ҆́н же рече, и҆здѣтска.
и҆ мно́гажд̑ы въ ѻ҆́гнь въве́рже е҆го, и҆ в꙽ во́ды, да погꙋбит̑ е҆го.
н̂о а́ще что мо́жеши, помозѝ намъ млс̑҇рдовавъ ѻ҆ насъ·

І҆с҃ же рече е҆мꙋ.
е҆же а҆ще чт̂о мо́жеши вѣ́ровати, вс̂ѧ възможна вѣрꙋю҆щемꙋ·

І҆ а҆́бїе възъпи ѿц҃ь ѻ҆трочате, съ слезами гл҃аше.
вѣрꙋю г҃и, помоѕѝ мое҆мꙋ невѣрїю·

Видѣв же і҆с҃, ꙗ҆́ко сри́щетсѧ народъ, запрѣтѝ дꙋ́хꙋ нечи́стомꙋ, гл҃ѧ е҆мꙋ.
дꙋше нѣм́ыи и҆ глꙋхї́и, а҆зъ т̂и повелѣва́ю, и҆зы́ди и҆з него, и҆ ктомꙋ не в꙽ни́ди в него·

И҆ възъпи́въ, и҆ мно́го прꙋжа́всѧ, и҆зы́де·

И҆ бысть ꙗ҆́ко мр҃твъ, ꙗ҆́коже мно́зѣмъ гл҃ати, ꙗ҆́ко ѹ҆мрет̑·

І҆с҃ же е҆́мъ е҆го за́ рꙋкꙋ, възд̑ви́же е҆го, и҆ в꙽ста̀·

И҆ вшед̑шꙋ е҆мꙋ в домъ, ѹ҆чн҃цы е҆го въпрашахꙋ е҆го е҆ді́ного, ꙗ҆́ко м̂ы не възмогохомъ и҆згна́ти е҆го;
и҆ рече и҆мъ.
се́и род̑ ничи́мже мо́жетъ и҆зы́ти, то́кмо мл҃твою и҆ постом̑.
и҆ ѿтꙋ́дꙋ и҆з꙽шед̑ше, и҆дѧ́хꙋ сквозѣ галиле́ю, и҆ не хотѧше да кто̀ ѹ҆вѣсть.
ѹ҆чаше б̂о ѹ҆чн҃кы своѧ, и гл҃аше и҆мъ.
ꙗ҆́ко сн҃ь члчс̑҇кїи пре́данъ бꙋдетъ в꙽ рꙋц́ѣ чл҃чьстѣ, и҆ ѹ҆бїютъ е҆го, и҆ ѹ҆бїенъ бывъ, в꙽ тре́тїи дн҃ь въскрс̑҇нетъ.
ѻ҆ни же не разꙋмѣва́хꙋ гл҃а, и҆ боа́хꙋсѧ е҆го въпросити·

зач̑҇, м҃а·

И҆́ прїиде в капернаѹ҆мъ, и҆ в домꙋ бывъ, въпраша́ше и҆хъ, что на пꙋти в себѣ помышлѧ́сте;
ѻ҆ни́ же молча́хꙋ.
дрꙋгъ къ дрꙋгꙋ б̂о стѧза́шасѧ на пꙋти, кто̀ е҆сть болїи·

И҆ сѣд꙽ пригласѝ ѻ҆́бана́десѧте, и҆ гл҃а и҆м꙽·

А҆ще кт̂о хо́щетъ ста́рѣи быти, да бꙋ́детъ всѣхъ ме́ншїи, и҆ всѣмъ слꙋга̀·

И҆ прїимъ ѻ҆троча, поста́ви е҆̀ посредѣ и҆хъ.
и҆ ѻ҆бьем́ъ е҆̀, рече им̑.
и҆же а́ще е҆діно таковыхъ ѻ҆троча́тъ прїиметъ въ и҆мѧ моѐ, мене прїе́м꙽летъ.
и҆ і҆же мене прїе́млетъ, не менѐ прїе́млет̑, н̂о посла́вшаго м̂ѧ·

ѿвѣща же е҆мꙋ і҆ѻ҆а́ннъ, гл҃ѧ·

ѹ҆чителю, видѣхомъ нѣ́коего и҆́менемъ твои҆мъ и҆згонѧ́ща бѣсы, и҆же не хо́дитъ по насъ, и҆ възбрани́хом̑ е҆мꙋ, ꙗ҆́ко не послѣдꙋетъ намъ·

І҆с҃ же реч̑҇, не брани́те е҆мꙋ.
никтоже б̂о е҆сть и҆же сътворитъ си́лꙋ ѻ҆́ и́мени моемъ, и҆ възмо́жет̑ в꙽ско́рѣ зло́словити м̂ѧ.
и҆же б̂о нѣсть на в̂ы, по васъ е҆сть·

И҆же б̂о а҆ще напои́тъ в̂ы ча́шꙋ во́дꙋ въ и҆мѧ мое, ꙗ҆́ко хв҃и е҆сте.
а҆ми́нь гл҃ю вамъ, не погꙋби́тъ мзды̀ своеа̀·

зач̑҇, м҃в.

И҆́ іже а́ще събла́знитъ е҆ді́ного ѿ малыхъ сихъ вѣ́рꙋющих̑ в м̂ѧ.
добрѣе е҆сть е҆мꙋ паче, а҆ще ѻ҆блежитъ ка́мень жръ́новныѝ ѻ҆ вы́ѝ е҆го, и҆ в꙽врьжен꙽ бꙋ́детъ в мо́ре·

И҆ а́ще съблажнѧ́ет̑ т̂ѧ рꙋка твоа̀, ѿсѣци ю҆̀.
добрѣ т̂и есть бѣдникꙋ в꙽ живо́тъ вни́ти, неже ѻ́бѣ рꙋцѣ и҆мꙋщꙋ вни́ти в꙽ гее́ннꙋ, въ ѻ҆гнь неѹ҆гаса́ющїи, и҆деже че́рвь и҆хъ не ѹ҆мирает̑ и҆ ѻ́гнь не ѹ҆гаса́ет·

И҆ а́ще нога твоа̀ съблажнѧ́ет꙽ т̂ѧ, ѿсѣцѝ ю҆̀.
добрѣ т̂и е҆сть вни́ти в꙽ жївотъ хро́мꙋ.
неже дв̂ѣ ноѕѣ и҆мꙋщꙋ в꙽верженꙋ быти в гее́ннꙋ, въ ѻ́гнь неѹ҆гаса́ющїи, и҆деже червь их̑ не ѹ҆мира́етъ, и҆ ѻ҆́гнь не ѹ҆гаса́етъ·

И҆ а́ще ѻ҆́ко твое съблажнѧ́ет꙽ т̂ѧ, и҆ст꙽кнѝ е҆̀.
добрѣ т̂и е҆сть съ е҆ді́нѣмъ ѻ҆́ком̑ в꙽ни́ти в꙽ црс̑҇твїе бж҃їе.
неже дв̂ѣ ѻ҆́цѣ и҆мꙋщꙋ в꙽ве́рженꙋ быти в꙽ гее́ннꙋ ѻ҆́гненꙋю, и҆деже червь и҆хъ не ѹ҆мира́ет꙽, и҆ ѻ҆гнь не ѹ҆гаса́ет꙽·

Всѧкъ б̂о ѻ҆гнем̑ ѻ҆соли́тсѧ.
и҆ всѧ́ка жертва со́лїю ѻ҆соли́тсѧ.
добро̀ соль.
а҆ще же соль не слана̀ бꙋ́детъ, чимъ ѻ҆соли́тсѧ;
и҆мѣите соль в себѣ.
и҆ ми́ръ и҆мѣите межд̑ꙋ собою·

Глв̑҇а, і҃·

И ѿтꙋ́дꙋ в꙽ставъ, пре́иде въ предѣлы и҆ю҆деискыа, ѻ҆б онъ полъ и҆ѻ҆рда́на.
и҆ снидо́шѧсѧ пакы наро́ди к немꙋ.
и҆ ꙗ҆́ко ѻ҆бы́чаи и҆мѣ̀, па́кы ѹ҆ча́ше и҆хъ·

зач̑҇. м҃г·

И҆́ пристꙋ́пльше фарїсе́е, въпроси́шѧ е҆го, а҆ще достоитъ мꙋжꙋ женꙋ̀ пꙋсти́ти;
и҆скꙋшающе е҆го·

ѻ҆нъ же ѿвѣщавъ рече и҆мъ.
что вамъ заповѣ́да моѷсїи;
ѻ҆ни же рѣш́ѧ, моисїи повелѣ кни́гꙋ распꙋстнꙋю написати, и҆ пꙋстити.
и҆ ѿвѣщавъ і҆с҃, рече и҆мъ.
по жестосрьдїю ва̀шемꙋ написа̀ вамъ за́повѣдь сїю.
ѿ зача́ла же създанїа, мꙋж́а и҆ жен́ꙋ сътворил̑҇ ѧ҆̀ е҆сть б҃ъ·

Сего ради ѻ҆ста́витъ чл҃кь ѿц҃а свое҆го и҆ мт҃ре, и҆ прилѣпи́т꙽сѧ к꙽ женѣ свое́й, и҆ бꙋдꙋтъ ѻ҆ба в꙽ плоть е҆ді́нꙋ·

Тѣмже ѹ҆же нѣ́ста дв̂а, н̂о плоть е҆ді́на.
е҆же ѹ҆бо б҃ъ съчета, чл҃кь да не разлꙋча́етъ·

И҆ в домꙋ пакы ѹ҆чн҃цы е҆го ѻ҆ семъ въпроси́ша е҆го, и҆ гл҃а и҆мъ·

зач̑҇, м҃д·

И҆́же а҆ще пꙋститъ женꙋ̀ свою̀, и҆ ѻ҆женитсѧ и҆ною, прелюбы̀ твори́тъ на ню·

И҆ а́ще жена̀ пꙋститъ м́ꙋжа, и҆ поса́гнетъ за и҆но́го, прелюбы твори́тъ·

И҆ приношѧ́хꙋ к꙽ немꙋ дѣти, да ко́снетсѧ и҆хъ.
ѹ҆чн҃цы же прѣща́хꙋ приносѧ́щимъ·

Видѣвъ же і҆с҃, негодова.
и҆ рече и҆мъ, ѻ҆ста́вите дѣтїи приходити ко мнѣ, и҆ не брани́те и҆мъ.
тацх̑ѣ б̂о е҆сть црс̑҇твїе бж҃їе.
а҆ми́нь гл҃ю вамъ.
и҆же а́ще не прїимет̑ црс̑҇твїа бж҃їа ꙗ҆́ко ѻтроча̀, не и҆́мать вни́ти в н̂е.
и҆ ѻ҆бье́мъ и҆хъ, възло́жь рꙋцѣ на нихъ блс̑҇вѧше и҆хъ·

зач̑҇, м҃е·

И҆́ і҆сходѧ́щꙋ е҆мꙋ на пꙋть, притекъ нѣ́кїи и҆ покло́нсѧ на колѣнꙋ е҆мꙋ, въпраша́ше е҆го.
ѹ҆чт҃лю бл҃гыи, чт̂о сотворю̀, да животъ вѣчныи наслд̑ѣствꙋю;
і҆с҃ же рече е҆мꙋ.
что м̂ѧ гл҃еши бл҃га;
никтоже бл҃гъ, то́кмо е҆ді́нъ б҃ъ.
заповѣди вѣсѝ;
не прелюбы сотвори́ши, не ѹ҆б́їи, не ѹ҆кради, не лжесвѣ́дѣтельствꙋи, не ѻ҆би́ди.
чтѝ ѿц҃а твое҆го и҆ мт҃ре·

ѻ҆́н же ѿвѣщавъ рече е҆мꙋ.
ѹ҆чт҃лю, сїа вс̂ѧ съхранихъ ѿ ю́ности моеа̀·

І҆с҃ же възрѣвъ нань, возлюбѝ е҆го, и҆ рече е҆мꙋ.
е҆ді́ного е҆си не докончалъ.
и҆ди, е҆ли́ка и҆́маши прода́ждь, и҆ да́ждь ни́щимъ, и҆ і҆мѣти и҆́маши съкро́вище на нб҃си.
и҆ прїидѝ и҆ ходи в꙽ слд̑ѣ менѐ вземъ крестъ·

ѻ҆́н же дрѧхлъ быв꙽ ѻ҆ словесѝ, ѿи҆де скорбѧ̀, бѣ б̂о и҆мѣ́а стѧжанїѧ мно́га.
и҆ възрѣвъ і҆с҃.
гл҃а ѹ҆чн҃комъ своимъ·

зач̑҇, м҃ѕ·

Ка́ко неѹ҆до́бь и҆мꙋщеѝ богатьство в црс̑҇твїе бж҃їе вни́дꙋтъ.
ѹ҆чн҃цы же ѹ҆жаса́хꙋсѧ ѻ҆ словесѣхъ е҆го·

І҆с҃ же па́кы ѿвѣщавъ гл҃а и҆мъ.
чѧ́да, ка́ко неѹ҆до́бь ѹ҆пова́ющимъ на богатьство, в꙽ црс̑҇твїе бж҃їе вни́ти.
ѹ҆до́бѣе б̂о е҆сть вльбꙋ́дꙋ сквозѣ и҆глинѣ ѹ҆ши проитѝ, неже богатꙋ в꙽ црс̑҇твїе бж҃їе вни́ти·

ѻ҆ни же и҆зли́ха дивлѧ́хꙋсѧ, гл҃юще к꙽ себѣ, т̂о кт̂о мо́жет̑ сп҃се́нъ бы́ти;
възрѣв же на них̑ і҆с҃, гл҃а.
ѿ чл҃къ невъзможно, н̂о не ѿ б҃а.
всѧ б̂о възможна сꙋть ѿ б҃а·

Нача́т же петръ гл҃ати е҆мꙋ.
се̂ м̂ы ѻ҆ста́вихомъ вс̂ѧ, и҆ в꙽ слд̑ѣ тебе и҆до́хомъ·

ѿвѣщав же і҆с҃, рече.
а҆ми́нь гл҃ю вамъ.
никтоже е҆сть и҆же ѻ҆ста́вилъ е҆сть домъ, и҆ли братїю, и҆ли сестры̀, и҆ли ѿц҃а, и҆ли мт҃ре, и҆ли женꙋ̀, и҆ли чѧда, и҆ли се́ла, мене ради, и҆ е҆ѵг̑҇лїа, а҆ще не прїиметъ стори́цею, нн҃ѣ́ въ времѧ с̂е, домов̑҇, и҆ братїѧ и҆ сестръ, и҆ ѿц҃ѧ и҆ мт҃ре и҆ чѧдъ, и҆ селъ, по и҆згна́нїи.
и въ вѣкъ грѧд́ꙋщїи животъ вѣчныи·

Мно́ѕи же бꙋ́дꙋт꙽ прьвїи, послд̑ѣ́ни, и҆ послд̑ѣнїи, прь́ви·

Бѣхꙋ же на пꙋти въсходѧ́ще въ і҆ерлс̑҇и́мъ, и҆ б̂ѣ варѧа и҆хъ і҆с҃.
и҆ ѹ҆жаса́хꙋсѧ, и҆ в꙽ слд̑ѣ и҆дꙋще боа́хꙋсѧ·

зач̑҇, м҃з·

И҆́ пое҆мъ па́кы ѻ҆банадесѧте, начат̑ и҆мъ гл҃ати ꙗ҆́же хотѧхꙋ е҆мꙋ быти.
ꙗ҆́ко с̂е въсхо́димъ въ і҆е҆рлс̑҇и́мъ, и҆ сн҃ь члчс̑҇кїи пре́данъ бꙋ́детъ а҆рхїереѻ҆мъ и҆ кни́жникомъ, и҆ ѻ҆сꙋ́дѧтъ е҆го на смр҃ть, и҆ предадѧтъ е҆го ꙗ҆́ѕы́ком꙽, и҆ порꙋгаютсѧ е҆мꙋ, и҆ ѹ҆ѧ́звѧтъ е҆го, и҆ ѻ҆плю́ютъ е҆го, и҆ ѹ҆бїют̑ е҆го.
и҆ третїи дн҃ь въскрс̑҇нетъ·

И҆ пред̑ ним̑ прїидо́ста, и҆і҆а́ковъ и҆ і҆ѻ҆а́нъ, сн҃а зеведе́ѻва, гл҃юща.
ѹ҆чт҃лю, хо́щевѣ, да е҆же а҆ще про́сивѣ, сътвори́ши на́ма·

ѻ҆́н же рече и҆́ма, чт̂о хо́щета да сътворю̀ ва́ма;
ѻ҆на же рѣ́ста е҆мꙋ.
дажд̑ь намъ да е҆ді́нъ ѻ҆деснꙋю тебе и҆ е҆ді́нъ ѻ҆шꙋюю тебѐ сѧ́девѣ в꙽ сла́вѣ твое́й·

І҆с҃ же реч̑҇ и҆ма, не вѣ́ста чесо про́сита.
мо́жета ли пи́ти чашꙋ ю҆̀же а҆зъ пїю, и҆ кр҃ще́нїем̑ и́мже а҆зъ крс̑҇ща́юсѧ крс̑҇ти́тисѧ;
ѻ҆на же рѣста е҆мꙋ, мо́жевѣ·

І҆с҃ же рече и́ма.
чашꙋ ѹ҆бо ю҆̀же а́зъ пїю и҆спїе́та.
и҆ кр҃щенїемъ, и́мже а҆зъ креща́юсѧ крс̑҇ти́тасѧ.
а҆ е҆же сѣ́сти ѻ҆деснꙋю́ мене, и҆ ѻ҆шꙋю́ю, нѣсть мн̂ѣ дати, н̂о и҆́мже ѹ҆гото́вано е҆сть·

И слы́шавше де́сѧть, нача́шѧ негодовати ѻ҆ і҆а́ковѣ и҆ і҆ѻ҆а́ннѣ·

І҆с҃ же призва́въ и҆хъ, гл҃а и҆мъ·

Вѣ́сте, ꙗ҆ко мнѧ́щеѝсѧ владати ꙗ҆́ѕы́кы, съѻ҆долѣва́ютъ и҆мъ.
и҆ вели́цїи и҆хъ, ѻ҆бладаютъ и́ми·

Не та́коже бꙋ́дет̑ в꙽ васъ.
н̂о и҆же а҆ще хо́щетъ в꙽ васъ вѧщшїи быти, да бꙋд́етъ вам̑ слꙋга̀.
и҆ і҆же а́ще хо́щет̑ в꙽ васъ быти старѣи, да бꙋ́детъ всѣмъ рабъ·

И҆бо и҆ сн҃ъ чл҃чь не прїиде да послꙋж́атъ е҆мꙋ, но да послꙋж́итъ, и҆ дати дш҃ꙋ свою и҆з꙽бавленїе за мно́гы·

зач̑҇. м҃и·

И҆ прїидо́шѧ въ і҆е҆рїхо́нъ.
и҆ і҆сходѧ́щꙋ е҆мꙋ ѿ і҆е҆рїхо́на, и҆ ѹ҆чн҃комъ е҆го, и҆ наро́дꙋ многꙋ.
сн҃ь тимеѻ҆въ, вартиме́и слѣпыи, сѣдѧ́ше при пꙋтѝ просѧ.
и҆ слы́шавъ ꙗ҆́ко і҆с҃ назарѧни́нъ е҆сть, начатъ зва́ти и҆ гл҃ати.
сн҃е дввд̑ъ і҆с҃е поми́лꙋи м̂ѧ.
и҆ прѣщахꙋ е҆мꙋ мно́ѕи, да ѹ҆млъчи́тъ·

ѻ҆нъ же мно́жае паче зваше, сн҃ꙋ дввд̑ъ, поми́лꙋи м̂ѧ·

И҆ ставъ і҆с҃, рече е҆го възгласи́ти.
и҆ въз꙽гласи́шѧ слѣп꙽ца, гл҃юще е҆мꙋ.
дръза́й, в꙽ъстани, зоветь т̂ѧ·

ѻ҆́н же ѿвр́ьгъ ри́ѕы своѧ в꙽ътавъ прїиде къ і҆с҃ови·

И҆ ѿвѣщавъ гл҃а е҆мꙋ і҆с҃, чт̂о хо́щеши да сътворю тебѣ;
слѣпы́и же гл҃а е҆мꙋ.
ѹ҆чи́телю, да прозрю·

І҆с҃ же рече е҆мꙋ.
и҆дѝ, вѣра твоа̀ сп҃се т̂ѧ.
и҆ а́бїе зпрорз̑ѣ, и҆ по і҆с҃ѣ и҆де в꙽ пꙋть·

Глв̑҇а, а҃і·

зач̑҇, м҃ѳ·

И е҆гда̀ прибли́жишѧсѧ въ і҆е́рлс̑҇и́мъ, въ виѳсфагі́ю и҆ виѳанїю к꙽ горѣ е҆леѻ́ньстѣи, посла̀ дв̂а ѿ ѹ҆чн҃къ свои҆х꙽, и҆ гл҃а и҆мъ.
и҆дѣта в꙽ весь ꙗже есть прѧмо ва́ма, и҆ а́бїе входѧ́ща в н̂ю, ѻ҆брѧ́щете жрѣ́бѧ привѧ́зано, на не́же никтоже ѿ чл҃къ всѣде, ѿрѣш꙽ша е҆̀, приведѣта.
и҆ а́ще кт̂о ва́ма речетъ, чт̂о твори́та с̂е;
рцѣта, ꙗ҆́ко г҃ь требꙋе́тъ е҆̀, и҆ а́бїе по́слетъ е҆̀ сѣмо·

И҆до́ста же, и҆ ѻ҆брѣто́ста жрѣбѧ привѧ́зано при дверехъ вн̂ѣ на распꙋтїи.
и҆ ѿрѣши́ста е҆̀·

И҆ нѣцїи ѿ стоѧ́щихъ т̂ꙋ, гл҃ахꙋ и҆мъ.
чт̂о дѣ́ета ѿрѣшающа жрѣбѧ;
ѻ҆на же рѣста и҆мъ , ꙗ҆́коже заповѣ́да и҆ма і҆с҃, и҆ ѻ҆ста́виша ѧ҆̀·

И҆ приведо́ста жрѣбѧ къ і҆с҃ови, и҆ възложи́шѧ на не ри́ѕы своѧ̀, и҆ всѣ́де на не·

Мно́ѕи же ри́ѕы своѧ постла́шѧ по пꙋти.
дрꙋѕїи же ва́іе рѣзахꙋ ѿ дре́вїа, и҆ постила́хꙋ по пꙋти·

И҆ предходѧщеѝ, и҆ в꙽ слѣдъ грѧдꙋщеѝ, въпїа́хꙋ, гл҃юще.
ѻ҆са́нна, блс̑҇венъ грѧдыѝ въ и҆мѧ гн҃е, блс̑҇вено грѧдꙋщее црс̑҇тво въ и҆мѧ гн҃е, ѿц҃а нашего дв҃да.
ѻ҆са́нна в꙽ вы́шънихъ·

зач̑҇, н҃·

І҆ вни́де въ і҆ерс̑҇лимъ і҆с҃, и҆ в꙽ цр҃ковъ.
и҆ съглѧ́давъ вс̂ѧ, поздѣ ѹ҆же сꙋщꙋ часꙋ, и҆зыде в꙽ъ виѳанїю , съ ѻ҆бѣмана́десѧте·

И҆ на ѹ҆трїа и҆зшед̑шемъ и҆мъ ѿ виѳанїа, взал꙽ка.
и҆ видѣвъ смоковницꙋ и҆здалече и҆мꙋщꙋ листъвїе, прїиде, а҆ще ѹ҆бо что ѻ҆брѧ́ще на неи.
и҆ пришед̑ к неи, и҆ ничесоже ѻ҆брѣте, токмо листвїе.
не ѹ҆҇ б̂о б̂ѣ вре́мѧ смоквамъ·

и҆ ѿвѣщавъ і҆с҃, рече е́й.
да не ктомꙋ ѿ тебе въ вѣкы никтоже плода снѣсть·

И҆ слы́шахꙋ ѹ҆чн҃цы е҆го·

И҆ пр̂їидо́шѧ пакы въ і҆ерлс̑҇и́мъ·

И вшедъ і҆с҃ в꙽ цр҃ковь, начат̑ и҆згони́ти продаю́щаѧ и кꙋпꙋ́ющаѧ в꙽ъ цр҃кви, и҆ трапе́ѕы тръжником꙽, и сѣдалищѧ продаю̀щихъ го́лꙋби, и҆спроврьже.
и҆ не даа́ше да кт̂о мимонесетъ сосꙋдъ сквозѣ цр҃ковь·

И҆ ѹ҆чаше гл҃ѧ и҆мъ.
нѣ́сть л̂и пи́сано, ꙗ҆́ко хра́мъ мои, хра́мъ мл҃твѣ наречетсѧ всѣмъ ꙗ҆ѕыкомъ вы же сътвори́сте е҆го врьте́пъ разбо́иником̑·

И҆ слы́шашѧ кни́жницы і҆ а҆рхїере́е, и҆ и҆ска́хꙋ , како е҆го погꙋбѧтъ.
боѧ́хꙋ бо сѧ е҆го.
ꙗ҆ко весь народ̑ дивлѧшесѧ ѻ҆ ѹ҆че́нїи е́го·

И҆ ꙗ҆́ко по́здѣ бысть, и҆схожд̑аше вонъ и҆з града·

И ѹ҆тро мимоходѧ́ще, видѣша смоковницꙋ, и҆с꙽со́хшꙋ и҆с коренїа·

И҆ в꙽спомѧнꙋвъ петръ, гл҃а е҆мꙋ.
ра́вви , ви́ждь смоко́вницꙋ ю҆же проклѧтъ, ѹ҆́сше·

И҆ ѿвѣщавъ і҆с҃ гл҃а и҆мъ·

зач̑҇, н҃а·

І҆мѣ́ите вѣрꙋ бж҃їю.
а҆ми́нь б̂о гл҃ю вамъ, ꙗ҆́ко и҆же а҆ще речетъ горѣ се́и, дви́гнисѧ и҆ в꙽ве́рзисѧ в꙽ море, и҆ не раз꙽мы́слитъ в꙽ срд̑цы свое҆мъ, н̂о вѣрꙋ и҆метъ, ꙗ҆́ко е҆же гл҃етъ, быва́етъ.
бꙋ́детъ е҆мꙋ е҆же а́ще реч̑҇тъ·

Сего ради гл҃ю вамъ, вс̂ѧ е҆ли́ка а҆ще молѧ́щесѧ про́сите, вѣрꙋите ꙗ҆́ко прїе́млете, и҆ бꙋ́детъ вамъ·

И҆ е҆гда стоитѐ молѧ́щесѧ, ѿпꙋща́ите а҆ще чт̂о и҆́мате на кого, да и҆ ѿц҃ь ва́ш꙽ и҆же е҆сть на нб҃сехъ, ѿпꙋ́ститъ вам̑ съгрѣше́нїѧ ва́шѧ·

Аще ли же в̂ы не ѿпꙋщѧ́ете, ни ѿц҃ь вашъ и҆же е҆сть на нб҃сехъ, ѿпꙋститъ вамъ съгрѣше́нїи вашихъ·

зач̑҇, н҃в·

І҆ прїдо́шѧ паки въ і҆ерс̑҇ли́мъ, и҆ в꙽ цр҃ькви ходѧ́щꙋ е҆мꙋ, прїидо́ша к немꙋ, а҆рхїере́е и҆ кни́жницы и҆ ста́рцы.
и҆ гл҃ашѧ е҆мꙋ, коею̀ ѻ҆́бластїю сїа твори́ши;
и҆ кт̂о т̂и ѻ҆́бласть сїю даст꙽, да сїа твори́ши;
і҆с҃ же ѿвѣщавъ, рече и҆мъ.
въпрошꙋ̀ в̂ы и҆ а҆зъ сло́во е҆ді́но, и҆ ѿвѣщаите м̂и, и҆ рекꙋ̀ вамъ коею̀ ѻ҆́бластїю сїа творю̀·

Кр҃ще́нїе і҆ѻ҆а́нново, с꙽ нб҃се ли б̂ѣ, и҆ли ѿ чл҃къ;
ѿвѣща́ите м̂и·

И҆ мы́шлѧхꙋ к꙽ себѣ гл҃юще.
а҆́ще речемъ, с꙽ нб҃се, речет̑, почто ѹ҆бо не вѣ́ровасте е҆мꙋ;
н̂о а҆ще речемъ, ѿ чл҃къ, боѧ́хꙋсѧ людїи.
всѝ б̂о и҆мѣ́ахꙋ і҆ѻ҆а́нна ꙗ҆́ко въи́стинꙋ прро̑҇къ б̂ѣ·

И ѿвѣща́вше гл҃ашѧ, не вѣмы·

И҆ ѿвѣщавъ і҆с҃, гл҃а и҆мъ.
н̂и а҆зъ гл҃ю вамъ коею̀ ѻ҆́бластїю сїа творю̀·

Глв̑҇а, в҃і·

зач̑҇, н҃г·

И нача́тъ и҆мъ в꙽ при́тчѧхъ гл҃ати.
виногра́дъ насади чл҃къ, и҆ ѻ҆гради ѻ҆пло́том꙽, і҆ и҆скопа̀ точи́ло, и҆ създа̀ сто́лпъ, и҆ предастъ е҆го тѧжа́телемъ, и҆ ѿи҆де.
и҆ посла̀ к тѧжа́телемъ въ́ времѧ, раба̀, да ѿ тѧжа́тель прїиметъ ѿ плода виногра́да·

ѻ҆ни же ем̑ше е҆го, би́ша, и҆ посла́шѧ тощь·

И҆ пакы посла̀ к нимъ дрꙋгїи рабъ, и҆ того̀ ка́менїем̑ би́вше, проби́шѧ главꙋ̀ е҆мꙋ̀, и҆ послашѧ бесче́стенъ.
и҆ па́кы и҆но́го посла̀, и҆ того ѹ҆би́ша, и҆ мно́гы и҆́ны, ѻ҆́вы ѹ҆бо бїюще, ѻ҆́вы же ѹ҆бива́юще·

Є҆ще ѹ҆бо е҆ді́ного сн҃а и҆мѣ възлю́бленнаго свое҆го, посла̀ и҆ того к ним̑ послд̑ѣ гл҃ѧ.
ꙗ҆ко ѹ҆срамѧ́тсѧ сн҃а мое҆го·

ѻ҆ни же тѧжа́теле рѣшѧ к꙽ себѣ, ꙗ҆ко се́и е҆сть наслѣдник꙽, прїидѣте ѹ҆бїемъ е҆го, и҆ на́ше бꙋдетъ наслд̑ѣ́ствїе.
и҆ е́мше е҆го ѹ҆би́шѧ, и҆ и҆зверъѓошѧ вонъ и҆з виногра́да·

Что ѹ҆бо сътвори́тъ г҃ь виногра́да;
прїидетъ и҆ погꙋбитъ тѧжа́телѧ, и҆ дастъ виноград̑ и҆нѣмъ·

н̂и писа́нїа ли сего чл̂и е҆сте;
ка́мень, е҆гоже не в рѧдꙋ сътвори́шѧ ѕи́жд̑ꙋщеѝ, се́й бысть въ главꙋ̀ ю҆́глꙋ, ѿ г҃а быс̑҇ с̂и, и҆ е҆сть ди́вна въ ѻ҆чїю на́шею·

І҆ и҆ска́хꙋ е҆го ꙗ҆́ти, и҆ ѹ҆боа́шѧсѧ наро́да·

Разꙋмѣшѧ б̂о, ꙗ҆ко к нимъ при́тчю рече.
и҆ ѻ҆ста́вльше е҆го ѿи҆до́шѧ·

зач̑҇, н҃д·

І҆ посла́шѧ к꙽ немꙋ нѣ́кїа ѿ фарисе́и, и і҆родїѧ́нъ, да е҆го ѻ҆бльстѧтъ сло́вомъ.
ѻ҆ни же пришед̑ше, гл҃ашѧ е҆мꙋ.
ѹ҆чт҃лю, вѣмы ꙗ҆́ко и́стинен꙽ е҆си, и҆ не ради́ши ни ѻ҆ ко́мже.
не зри́ши б̂о на лицѐ чл҃комъ, н̂о въи́стинꙋ пꙋти бж҃їю ѹ҆чиши.
досто́итъ л̂и кинсо́нъ кесареви дати, и҆ли н̂и;
да́мы ли, и҆ли не да́мы;
ѻ҆́н же вѣды их̑ лицемѣ́рїе, рече и҆мъ.
что̀ мѧ и҆скꙋшѧ́ете;
принесѣте м̂и пѣнѧзь да ви́жд̑ꙋ.
ѻ҆ни же принесо́шѧ.
и҆ гл҃а им̑, чїи ѻ҆́бразъ сїи, и҆ над̑писа́нїе;
ѻ҆ни́ же рѣшѧ е҆мꙋ, кесаре́въ.
и҆ ѿвѣщав꙽ і҆с҃, рече и҆мъ.
възд̑ади́те кесаре́ва, кесаре́ви, и҆ бж҃їа бв҃и.
и҆ чюди́шѧсѧ ѻ҆ немъ·

зач̑҇, н҃е·

И҆ прїидо́ша сад̑дꙋке́е к нем́ꙋ, и҆же гл҃ют̑ въскрс̑҇нїю не быти, и҆ въпроси́шѧ е҆го гл҃юще.
ѹ҆чт҃лю, моѷсїи написа̀ намъ, ꙗ҆ко а҆ще комꙋ братъ ѹ҆мрет̑, и҆ ѻ҆ста́витъ жен́ꙋ, а҆ чѧдъ не ѻ҆ста́витъ.
да по́иметъ братъ е҆го женꙋ е҆го, и҆ въскрс̑҇ит̑ сѣмѧ бра́тꙋ свое҆мꙋ.
сед̑мь бра́тїи б̂ѣ, и҆ пе́рвыи поѧ́тъ женꙋ, и҆ ѹ҆мира́а не ѻ҆ста́ви сѣмене·

И҆ вторыи поѧ́тъ ю҆̀, и҆ ѹ҆мре, и҆ ни то́и ѻ҆ста́ви сѣмене·

И҆ тре́тїи такоже.
и҆ поѧ́шѧ ю҆̀ сед̑мь, и҆ не ѻ҆ста́вишѧ сѣмене.
послд̑ѣ же всѣхъ ѹ҆́мре и҆ жена.
в꙽ въскр҃се́нїе ѹ҆бо е҆гд̑а въскрс̑҇нт̑ꙋ, кото́ромꙋ и҆хъ бꙋдетъ жена̀;
сед̑мь б̂о и҆мѣша ю҆̀ женꙋ̀·

И҆ ѿвѣщавъ і҆с҃, рече и҆мъ.
не сего ли ради прелща́етесѧ, не вѣдѧще писа́нїѧ, ни си́лы бж҃їа;
е҆гда б̂о и҆з мр҃твыхъ въскре́снꙋтъ, ни же́нѧт̑сѧ, ни посага́ют̑·

н̂о сꙋть ꙗ҆́ко а́гг҃ли на нб҃сехъ·

ѻ҆ мрътвых же ꙗ҆ко въста́ютъ, нѣ́сте ли чл̂и в кни́гахъ моѷсе́ѻ҆вѣхъ, при кꙋпинѣ ꙗ҆́ко рече емꙋ б҃ъ гл҃ѧ;
а҆зъ б҃ъ а҆враа́мовъ, и҆ б҃ъ и҆саа́ковъ, и҆ б҃ъ і҆а́ковль, нѣсть б҃ъ мр҃твыхъ, н̂о б҃ъ живыхъ;

Вы̂ ѹ҆бо мно́ѕи прелща́етесѧ·

зач̑҇, н҃ѕ·

І҆ пристꙋп́ль е҆ді́нъ ѿ книжникъ, слы́шавъ и҆хъ стѧза́ющѧсѧ, и҆ видѣвъ ꙗ҆́ко до́брѣ ѿвѣща̀ и҆м꙽, въпросѝ е҆го, каа̀ е҆сть пр́ьваа всѣхъ за́повѣдїи;
і҆с҃ же ѿвѣща е҆мꙋ.
ꙗ҆́ко пр́ьвѣиши всх̑ѣ за́повѣдїи, слы́ши і҆ил҃ю.
г҃ь бг҃ъ вашъ, г҃ь е҆ді́нъ е҆сть·

И҆ възлю́биши г҃а б҃а твое҆го всѣмъ срд̑цемъ твоим̑, и҆ всею дш҃ею̀ твоею̀, и҆ всѣмъ ѹ҆мо́мъ твои҆мъ, и҆ всею̀ крѣ́постїю твоею̀.
сїа е҆сть пр́ьваа за́повѣдь·

И҆ втора́а подобна е́й.
възлю́биши бли́жнѧго свое҆го ꙗ҆ко самъ себѐ·

Бо́лши сею̀ и́на за́повѣдь нѣсть·

И҆ рече е҆мꙋ кни́ж꙽никъ.
до́брѣ ѹ҆чи́телю въи́стинꙋ рече, ꙗ҆́ко е҆ді́нъ е҆сть б҃ъ и҆ нѣсть ин̑҇ ра́звѣ е҆го.
и҆ е҆же любити е҆го всм̑ѣ срд̑цем꙽, и҆ всѣмъ ра́зꙋмомъ, и҆ всею дш҃ею, и҆ всею крѣ́постїю.
и҆ е҆же люби́ти бли́жнѧго ꙗ҆́ко себе.
бо́ле е҆сть всѣхъ вс̂есъжже́нїи и҆ жрътвъ·

І҆с҃ же видѣв꙽, ꙗ҆́ко смыслено ѿвѣща̀, рече е҆мꙋ, не дале́че е҆си ѿ црс̑҇твїа бж҃їа·

И҆ никто́же смѣ́аше ктомꙋ е҆го въпроси́ти·

И ѿвѣща́въ і҆с҃, гл҃аше, ѹ҆ча̀ въ цр҃ькви·

Ка́ко гл҃ютъ кни́жницы, ꙗ҆ко х҃с сн҃ь е҆сть дввд̑ъ;
то́и б̂о дв҃дъ рече дх҃омъ ст҃ымъ.
гл҃а г҃ь гв҃и мое҆мꙋ, сѣди ѻ҆деснꙋю менѐ, дондеже положꙋ врагы̀ твоѧ под̑ножїе нога́ма твои́ма·

Са́мъ ѹ҆бо дввд̑ъ гл҃етъ е҆го г҃а, и҆ ѿкꙋдꙋ сн҃ь е҆мꙋ е҆сть;
и҆ мно́гъ народ̑ послꙋшаше е҆го в꙽ сла́дость·

зач̑҇, н҃з·

І҆ гл҃аше и҆мъ въ ѹ҆че́нїи свое́мъ.
блюдѣтесѧ ѿ кни́жникъ хотѧ́щихъ въ ѻ҆дѣѧ́нихъ ходити.
и҆ цѣлова́нїа на тр́ъжищыхъ, и҆ пр́еже сѣда́нїа на со́нмищыхъ, и҆ прьво възлеженїа на вечерх̑ѣ, поѧ҆да́юще до́мы в꙽довицъ, и҆ непщеванїемъ далече молѧ́щесѧ.
сїи прїимꙋтъ ли́шше ѻ҆сꙋжд̑енїе·

И҆ сѣ́дъ і҆с҃ прѧ́мо съкро́вищномꙋ храни́лищꙋ, зрѧ́ше ка́ко народъ мещет мѣдь въ съкро́вищное храни́лище.
и мно́ѕи бога́тїи вмѣтахꙋ многа.
и҆ пришед̑ши е҆ді́на в꙽дови́ца ѹ҆бо́га, въве́рже лѣптѣ дв̂ѣ, е҆же е҆сть кодра́н꙽тъ·

И҆ призвавъ ѹ҆чн҃кы своѧ, рече и҆мъ.
а҆ми́нь гл҃ю вамъ, ꙗ҆́ко вдови́ца сїа ѹ҆бо́гаа мно́жае всѣхъ в꙽ве́рже в꙽мѣта́ющых̑ въ скро́вищное храни́лище.
всѝ б̂о ѿ и҆збы́тка свое҆го в꙽врьго́шѧ.
сїа́ же ѿ лише́нїа свое҆го, вс̂ѧ е҆ли́ка и҆мѧ́ше в꙽ве́рже вс̂е житїе своѐ·

Глв̑҇а, г҃і·

зач̑҇, н҃и·

И исходѧщꙋ е҆мꙋ ѿ цр҃кве, гл҃а е҆мꙋ е҆ді́нъ ѿ ѹ҆чн҃къ е҆го.
ѹ҆чи́телю, ви́жд̑ь каково̀ каменїе, и҆ какова̀ зда́нїѧ·

И҆ ѿвѣща́въ і҆с҃, рече е҆мꙋ.
ви́диши ли сїа вели́ка зданїа;
не и҆́мать ѻ҆ста́ти зд̂ѣ ка́мень на ка́мени, и҆же не разори́тсѧ·

И҆ сѣдѧ́щꙋ е҆мꙋ на горѣ е҆леѻ́нстѣи прѧмо цр҃ькви, въпрашѧ́хꙋ е҆го е҆ді́ного, петръ, і҆ и҆а́ковъ, і҆ и҆ѻа́ннъ, и҆ а҆ндре́ѧ, рцѝ намъ, когда̀ сїа бꙋдꙋтъ;
и҆ кое бꙋ́детъ зна́менїе, е҆гда̀ и҆мꙋт꙽ вс̂ѧ сїа сконча́тисѧ;
і҆с҃ же ѿвѣщав꙽ и҆мъ, нача́тъ гл҃ати.
блюдѣтесѧ, да не кто̀ васъ прельсти́тъ.
мно́ѕи б̂о прїидꙋтъ въ и҆мѧ моѐ гл҃юще, ꙗ҆ко а҆зъ е҆смь, и҆ мно́гы прельстѧ́тъ.
е҆гда же ѹ҆слы́шите брани, и҆ слы́шанїа бра́немъ, не ѹ҆жаса́итесѧ.
подоба́етъ б̂о быти, н̂о не ѹ҆҇ кончи́на.
в꙽ста́нетъ б̂о ꙗ҆́ѕыкъ на ꙗ҆ѕыкъ, и҆ црс̑҇тво на црс̑҇тво, и҆ бꙋ́дꙋтъ трꙋси по мѣ́ста, и҆ бꙋ́дꙋтъ гла́ди и҆ мѧте́жи.
нача́ло болѣѕнемъ с̂и·

зач̑҇, н҃ѳ·

Блюдѣте же сѧ в̂ы сами.
предадѧ́т꙽ б̂о в̂ы в со́нмищѧ, и҆ на съборищихъ бїени бꙋдете.
и҆ пред̑ воево́дами и҆ цр҃и ведени бꙋ́дете мене ради, въ свд̑ѣтельство и҆мъ.
и҆ въ всѣхъ ꙗ҆́ѕы́цехъ подоба́етъ прежд̑е проповѣдатисѧ е҆ѵг̑҇лїю·

е҆гда же поведꙋтъ в̂ы предаю́ще, не пре́же пецѣтесѧ, чт̂о въз꙽гл҃ете.
ни поѹ҆ча́итесѧ.
н̂о е҆же а҆ще дастьсѧ вамъ в꙽ то́и часъ, с̂е гл҃ите.
не вы̀ б̂о бꙋ́дете гл҃ющеи́, н̂о дх҃ъ ст҃ыи·

Предасть же брат̑ бра́та на смр҃ть, и҆ ѿц҃ь чѧдо.
и҆ в꙽ста́нꙋт꙽ чѧда на роди́телѧ, и҆ ѹ҆бїютъ и҆х꙽·

и҆ бꙋ́дете ненавидими всѣми и́мени мое́го ради·

претръпѣвыи же до конца, се́и сп҃сенъ бꙋ́детъ·

зач̑҇, ѯ҃·

Є҆́гда же ѹ҆зрите мерзость запꙋстѣнїа, реченнꙋю данїи́ломъ прро̑҇комъ, стоѧ́щꙋ и҆дѣже не подобаетъ, чтыѝ да разꙋмѣ́етъ·

Тогда̀ сꙋщїи въ і҆юдеи, да бѣжѧтъ на́ горы, і҆ и́же на кровѣ, да не сла́зитъ в꙽ домъ, ни да вни́детъ взѧ́ти чесо ѿ домꙋ свое҆го.
и҆ и́же на селѣ̀ сыи, да не въз꙽врати́тсѧ в꙽спѧть, взѧти ри́зꙋ свою·

горе же непразд̑нымъ и҆ доѧ́щим̑ в тыѝ дн҃и·

Моли́те же сѧ, да не бꙋ́детъ бѣжьство ваше зимѣ·

Бꙋдꙋтъ б̂о дн҃їе тїи ско́рбь, ꙗ҆́кова не бысть такова ѿ нача́ла създа́нїю, е҆же създа б҃ъ до нн҃ѣ, и҆ не бꙋ́детъ·

И҆ а҆ще не бы̀ г҃ь прекратилъ дн҃їи, не бы̀ ѹ҆бо спс̑҇ласѧ всѧка плоть·

н̂о и҆з꙽бранных̑ ради и҆хже и҆з꙽бра̀, прекратит̑ дн҃и·

И тогда а҆ще кто речетъ вамъ.
с̂е здѣ х҃с, и҆ли с̂е ѻ҆́нде, не и҆мѣт́е вѣры·

в꙽ста́нꙋтъ б̂о лже христи, и҆ лже прро̑҇цы, и҆ дадꙋтъ ѕна́менїѧ и҆ чюдеса, къ е҆же прельсти́ти а҆ще възмо́жно і҆ и҆збра́нныа.
вы же блюдѣтесѧ, с̂е прежд̑е рѣхъ вамъ вс̂ѧ·

зач̑҇, ѯ҃а·

Но в ты́и дн҃и по скорби то́й, сл҃нце поме́р꙽кнетъ, и҆ лꙋна̀ не дасть свѣта свое҆го.
и҆ ѕвѣзды бꙋ́дꙋтъ с꙽ нб҃се спа́дающе, и҆ си́лы ꙗ҆́же на нб҃сехъ подви́жꙋтсѧ·

И҆ тогда̀ ѹ҆ѕрѧт̑ сн҃а члчс̑҇каго грѧдꙋща на ѻ́блацѣхъ съ си́лою и҆ сла́вою многою.
и҆ тогда по́слетъ а҆гг҃лы своа̀, и҆ съберетъ и҆з꙽бра́нныѧ своѧ ѿ четы́рехъ вѣтръ, ѿ конца землѝ до конца нб҃ꙋ.
ѿ смоковница же наѹ҆читесѧ при́тчи.
е҆гда ѹ҆же вѣтвїе еа̀ бꙋ́детъ мла́до, і҆ и҆зраща́е҆тъ листвїе, вѣдите ꙗ҆́ко близь е҆сть жатва.
та́ко и в̂ы е҆гда сїа ви́дите быва́юща, вѣ́дите ꙗ҆ко близъ е҆сть при дверехъ.
а҆ми́нь гл҃ю вамъ, ꙗ҆́ко не и́мать преитѝ родъ се́й, до́н꙽деже вс̂ѧ сїа бꙋдꙋтъ·

зач̑҇, ѯ҃в·

Нб҃о и҆ землѧ пре́идетъ, словеса же моѧ не пре́идꙋтъ·

ѻ҆ дн҃и же томъ и҆л̂и ѻ҆ часѣ, никтоже вѣсть, ни а́гг҃ели и҆же сꙋть на нб҃сехъ, ни сн҃ъ, то́кмо ѿц҃ь.
блюдѣте, бди́те, и҆ моли́тесѧ.
не вѣсте б̂о когда вре́мѧ бꙋдетъ·

ꙗ҆́коже чл҃къ ѿходѧ, ѻ҆ставль домъ сво́и, и҆ вдавъ рабомъ своим̑ власть, и҆ комꙋжд̑о дѣло своѐ, и҆ вратарю повелѣ, да бди́тъ·

бди́те ѹ҆бо, не вѣ́сте б̂о когда г҃ь до́мꙋ прїидетъ, вечеръ, и҆ли полꙋ́нощи, и҆ли в пѧтлоглаше́нїе, и҆ли ѹ҆́тро, да не пришед̑ в꙽незапꙋ, ѻ҆брѧщет꙽ в̂ы спѧщѧ.
а҆ ꙗ҆́же вамъ гл҃ю, всѣмъ гл҃ю, бди́те·

Глв̑҇а, д҃і·

Бѣ же па́сха и҆ ѻ҆прѣсноцы по двою дн҃їю·

И҆ і҆ска́хꙋ а҆рхїере́е и҆ кни́жницы, ка́ко е҆го лестїю е҆́м꙽ше ѹ҆бїютъ.
гл҃ахꙋ же, н̂о не в꙽ празд̑ник꙽, е҆да како млъва бꙋдетъ людъска·

зач̑҇, ѯ҃г·

І҆ сꙋщꙋ е҆мꙋ въ виѳанїи, в домꙋ си́мона прокаженаго, възлежащꙋ е҆мꙋ·

Пр꙽їиде жена̀ и҆мꙋщи а҆лава́стръ мѷра нар꙽днаго пистикїа мно́гоцѣнны.
и҆ съкрꙋши а҆лава́стръ, възливаше е҆мꙋ на главꙋ·

Бѣхꙋ же нѣцїи негодꙋ́юще в꙽ себѣ, и҆ гл҃юще.
въ что̀ ги́бель сїа мѷрнаа бысть;
можа́ше бо с̂е продано̀ бы́ти вѧ́ще трїи сотъ пѣнѧѕь, и҆ да́тисѧ ни́щимъ.
и҆ прѣща́хꙋ е́й·

І҆с҃ же рече, ѻ҆ста́вите еа̀, что̀ е́й трꙋды̀ даетѐ;
добро̀ дѣло съдѣла ѻ҆ мнѣ.
всегда б̂о ни́щаѧ и҆́мате с꙽ собою, и҆ е҆гда хо́щете, мо́жете и҆мъ добро творити.
мене же не всегда и҆́мате.
е҆же и҆мѣ сїа, сътворѝ.
пред̑вари пома́зати м̂и тѣло на погребе́нїе·

А҆ми́нь гл҃ю вамъ.
и҆деже а҆ще проповѣстьсѧ е҆ѵг̑҇лїе с̂е въ всемъ ми́рѣ, и҆ е҆же сътвори́ сїа, гл҃ано бꙋ́детъ в꙽ па́мѧть еа̀·

зач̑҇, ѯ҃д·

И҆ іѹ́да и҆скарїѻ́т꙽скїи е҆ді́нъ ѿ ѻ҆боюна́десѧте, и҆́де къ а҆рхїер́еѻмъ да предасть е҆го и҆мъ·

Ѡ҆ни же слы́шавше възра́довашасѧ, и҆ ѻ҆бѣща́шѧ е҆мꙋ сре́бреникы дати, и҆ и҆ска́ше ка́ко е҆го в꙽ подо́бно вре́мѧ предастъ·

И҆ в꙽ пр́ъвы дн҃ь ѻ҆прѣ́снокъ, е҆гда па́схꙋ жрѧ́хꙋ, гл҃аша е҆́мꙋ ѹ҆чн҃цы е҆го·

Гд̂ѣ хо́щеши, шед̑ше ѹ҆гото́вае҆мъ да ꙗ҆́си па́схꙋ;
и҆ посла̀ дв̂а ѿ ѹ҆чн҃къ своих̑, и҆ гл҃а и҆мъ.
и҆дѣта въ́ град̑, и҆ срѧ́щет̑ в̂ы чл҃къ в꙽ скꙋделницѣ во́дꙋ носѧ, по немъ и҆дѣта.
и҆ и҆дѣже а́ще вни́дет̑, рцѣта господи́нꙋ до́мꙋ, ꙗ҆́ко ѹ҆чт҃ль гл҃етъ, гдѣ е҆сть вита́лница, и҆деже пасхꙋ съ ѹ҆чн҃кы мои́ми снѣм́ъ;
и҆ то́и ва́ма пока́жетъ го́рницꙋ ве́лїю по́стланꙋ гото́вꙋ.
т̂ꙋ ѹ҆гото́ваита намъ·

І҆ и҆зыдоста ѹ҆чн҃ка е҆го, и҆ прїдо́ста въ́ градъ, и҆ ѻ҆брѣто́ста ꙗ҆́коже рече и́ма.
и҆ ѹ҆гото́васта па́схꙋ·

И҆ вече́рꙋ бывшꙋ, прїиде съ ѻ҆бѣманадесѧте·

и҆ възлежа́щемъ и꙽мъ и҆ ꙗ҆́дꙋщ́емъ, рече і҆с҃, а҆ми́нь гл҃ю вамъ, ꙗ҆ко е҆ді́нъ ѿ васъ предастъ м̂ѧ ꙗ҆́дыѝ съ мною·

ѻ҆ни же нача́шѧ скорбѣти, и҆ гл҃ати е҆мꙋ е҆ді́нъ по е҆ді́номꙋ.
е҆да а҆зъ;
и҆ дрꙋги́и, е҆да а҆зъ;
ѻ҆́н же ѿвѣщавъ, рече им̑.
е҆ді́нъ ѿ ѻ҆боюнадесѧте, ѻ҆мочеѝ со мною в соли́ло.
сн҃ъ ѹ҆бо члчс̑҇кыи и́дет̑ ꙗ҆́коже е҆сть пи́сано ѻ҆ немъ.
горе же чл҃кꙋ томꙋ, и҆мже сн҃ъ члчс̑҇кыи предастьсѧ.
добрѣе бы́ло бы̂ е҆мꙋ, а҆ще не бы̀ родилъсѧ чл҃къ то́и·

И҆ ꙗ҆́дꙋщ́емъ и҆мъ, прїе́мъ і҆с҃ хлѣбъ, и҆ блс̑҇вивъ преломѝ, и҆ дастъ и҆мъ, рече, прїимѣте ꙗ҆ди́те.
с̂е ес̑҇ тѣл́о мое·

И҆ прїимъ ча́шꙋ, хвалꙋ въздавъ, дастъ и҆мъ.
и҆ пи́ша ѿ неа̀ вс̂и.
и҆ реч̑҇ и҆мъ.
с̂е е҆сть кро́въ моа̀ но́ваго завѣта, за мно́гы и҆злива́ема·

А҆ми́нь же гл҃ю вамъ, ꙗ҆ко ктомꙋ не и҆мамъ пи́ти ѿ плода ло́знаго до́ дн҃е того, е҆гда е҆̀ пїю но́во в꙽ црс̑҇твїи бж҃їи·

и҆ въспѣ́вше и҆зыдо́шѧ в горꙋ е҆леѻ́нскꙋю·

И гл҃а и҆мъ і҆с҃, ꙗ҆́ко вс̂и съблазнитесѧ ѻ҆ мнѣ в но́щъ сїю.
пи́сано бо е҆сть, поражꙋ па́стырѧ, и҆ разы́дꙋтсѧ ѻ҆вца.
но по томъ е҆гда въскрс̑҇нꙋ варѧ́ю в̂ы в꙽ галиле́ѝ·

Петръ же рече е҆мꙋ.
и҆ а҆ще вс̂и събла́знѧт̑сѧ, н̂о не а́зъ·

И҆ гл҃а е҆мꙋ і҆с҃, а҆ми́нь гл҃ю тебѣ, ꙗ҆ко т̂ы днс̑҇е в нощъ сїю, прежде даже втори́цею пѣтель не въз꙽гласит̑, тр̂и кра́ты ѿвр́ьжешисѧ менѐ.
ѻ҆н же мно́жае гл҃аше паче.
а҆ще м̂и е҆сть с тобою ѹ҆мрети, не ѿвр́ьгꙋсѧ тебе.
тако же и҆ вс̂и гл҃ахꙋ·

И҆ прїид̂оша в꙽ весь, е҆йже и҆мѧ геѳсїманїи·

И҆ гл҃а ѹ҆чн҃ком̑ свои́мъ.
сѣди́те здѣ до́ндеже помолюсѧ·

и҆ поѧ́тъ петра, і҆ и҆а́кова, и҆ і҆ѻ҆а́нна с꙽ собою.
и҆ начатъ ѹ҆жаса́тисѧ и҆ тꙋжи́ти.
и҆ гл҃а и҆мъ, приско́рбна е҆сть дш҃а моа до смр҃ти.
бꙋд́ѣте зд̂ѣ и҆ бди́те.
и҆ прешедъ ма́ло, паде на земли, и҆ молѧ́шесѧ, да а́ще възможно е҆сть, да ми́мои҆дет꙽ ѿ него часъ·

и҆ гл҃аше, а҆́вва ѿч҃е, вс̂ѧ възмо́жна тебѣ, ми́монесѝ ѿ мене чашꙋ сїю.
н̂о не е҆же а҆зъ хощꙋ, н̂о е҆же т̂ы.
и҆ прїиде и҆ ѻ҆брѣте их̑ спѧ́ща.
и҆ гл҃а петрови, си́моне спи́ши ли;
не възможе е҆ді́ного часа побдѣти;
бди́те и҆ моли́тесѧ, да не вни́дете в꙽ напасть·

дх҃ъ бо бо́дръ, пло́ть же немощна·

И҆ па́кы шед̑ помоли́сѧ, тоже сло́во рекъ.
и҆ въз꙽вра́щсѧ, ѻ҆брѣте и҆хъ па́кы спѧ́щѧ·

Бѣхꙋ б̂о ѻ҆чеса́ и҆мъ тѧ́готна.
и҆ не и҆мѣа́хꙋ что бышѧ ѿвѣщали е҆мꙋ·

И҆ прїиде трети́цею, и҆ гл҃а и҆мъ.
спи́те про́чее и҆ почиваите.
приспѣ ќонец̑҇, прїиде часъ.
с̂е преда́етсѧ сн҃ъ чл҃ческїи в꙽ рꙋкы грѣшникомъ.
в꙽ста́нѣте и́демъ, с̂е предааѝ м̂ѧ прибли́жисѧ·

зач̑҇, ѯ҃е·

И҆́ абїе е҆ще е҆мꙋ гл҃ющꙋ, прїиде і҆ѹ́да е҆ді́нъ сыи ѿ ѻ҆боюна́десѧте, и҆ с ним̑ народ̑ многъ, съ ѻ҆рꙋжїемъ и҆ дреко́льми, ѿ а҆рхїере́и и҆ кни́жникъ и ста́рецъ·

да́сть же предааѝ е҆го зна́менїе и҆мъ, гл҃ѧ.
е҆гоже а҆ще лобжꙋ, то́и е҆сть, и҆мѣте е҆го, и ведѣте е҆го съхра́нно·

И҆ пришед̑, а҆бїе пристꙋ́пль к немꙋ гл҃а е҆мꙋ.
ра́вви ра́вви, и҆ ѻ҆блобыза е҆го·

ѻ҆ни́ же възложи́ша рꙋцѣ своѝ на́нь и҆ ꙗ҆́ша е҆го·

Є҆ді́н же нѣкто ѿ стоѧ́щихъ и҆звлекъ ножъ, ѹ҆да́ри раба̀ а҆рхїере́ѻва, и҆ ѹ҆рѣз́а е҆мꙋ ѹ҆хо·

И҆ ѿвѣща́въ і҆с҃, рече и҆мъ.
ꙗ҆́ко на разбо́иника ли и҆зыдосте съ ѻ҆рꙋжїемъ и҆ дреколми ꙗ҆́ти м̂ѧ;
по всѧ дн҃и бѣхъ при васъ в꙽ цр҃кви ѹ҆ча̀, и҆ не ѧ́сте мене.
н̂о да сбꙋдꙋтсѧ писа́нїа.
и҆ ѻ҆ста́вльше е҆го, вс̂и бѣжа́шѧ·

И҆ е҆ді́нъ нѣ́кто ю҆́ноша и́де по не́мъ, ѻ҆дѣ́ан꙽ в꙽ плаща́ницꙋ по́ нагꙋ, и҆ ѧ́ша того ю́ношꙋ·

ѻ҆н же ѻ҆ста́вль плащаницꙋ, нагъ бѣжа̀ ѿ них꙽.

И ведошѧ і҆с҃а къ а҆рхїере́ѻмъ.
и҆ снидошасѧ к немꙋ вс̂и а҆рхїере́е, и҆ кни́жницы и҆ старцы·

И҆ петръ и҆здале́че въ слѣдъ е҆го и҆де до внꙋтръ въ дво́ръ а҆рхїе҆ре́ѻвъ, и҆ б̂ѣ сѣдѧ съ слꙋгами и҆ грѣѧсѧ при свѣщи·

А҆рхїере́е же и весь со́нмъ, и҆ска́хꙋ на і҆с҃а свѣдительства, да ѹ҆мрьтвѧтъ е҆го, и҆ не ѻ҆брѣтахꙋ.
мноѕи б̂о лжесвд̑ѣтельствовахꙋ нань, и҆ равна свд̑ѣтельствїа не бѣхꙋ·

И҆ нѣцїи в꙽ста́вше лже свѣдѣтельствовахꙋ нань, гл҃юще.
ꙗ҆́ко м̂ы слы́шахом̑ е҆го гл҃юща, ꙗ҆́ко а҆зъ разорю̀ цр҃ков꙽ сїю рꙋкотворе́нꙋю, и҆ трими дн҃ьми и҆́нꙋ нерꙋкотворе́нꙋ съзи́ждꙋ, и҆ ни та́ко равно б̂ѣ свд̑ѣтельство их̑·

и҆ въстав̑҇ а҆рхїере́и посредѣ, въпросѝ і҆с҃а гл҃ѧ.
не ѿвѣщава́еши л̂и ничесоже, чт̂о сїи на тѧ свѣдѣтельствꙋютъ;
ѻ҆н же млъча́ше, и҆ ничесоже ѿвѣщава́ше·

пакы а҆рхїере́и въпроси е҆го, и҆ гл҃а е҆мꙋ.
ты ли е҆си х҃с, сн҃ь блс̑҇ве́наго;
і҆с҃ же реч̑҇, а҆зъ е҆смь.
и҆ ѹ҆́зрите сн҃а чкчс̑҇каго ѻ҆деснꙋ́ю сѣдѧща си́лы, и҆ грѧдꙋщ́а съ ѻ҆блакы нбс̑҇ными·

А҆рхїерей же растръѕа ри́зы своѧ гл҃ѧ, что̀ е҆ще требꙋемъ свд̑ѣтелїи;
слы́шѧсте хꙋлꙋ.
чт̂о вам сѧ мнитъ;
ѻ҆ни же вс̂и ѻ҆сꙋди́шѧ е҆го, быти пови́нна смр҃ти·

И҆ нача́шѧ нѣ́цїи плювати на́нь, и҆ прикрывати лицѐ е҆го, и҆ мꙋ́чити е҆го, и҆ гл҃ати е҆мꙋ, прорцѝ, и҆ слꙋгы̀ по лани́тома е҆го бїа́хꙋ·

И҆ сꙋщꙋ петрови въ дворѣ низꙋ, прїиде е҆ді́на ѿ рабы́нь а҆рхїере́ѻвѣхъ, и҆ видѣвши петра грѣющасѧ, възрѣ́вши нань гл҃а.
и҆ т̂ы с꙽ назарѧнином̑ і҆с҃омъ б̂ѣ;
ѻ҆н же ѿвр́ьжесѧ гл҃ѧ.
не вѣ́дѣ ни свм̑ѣ чт̂о т̂ы гл҃еши.
і҆ и҆зы́де вон́ъ на пред̑дво́рїе, и҆ а҆лекто́ръ въз꙽гласѝ.
и҆ рабы́ни ви́дѣвши е҆го па́ки, начатъ гл҃ати пред̑стоѧ́щимъ, ꙗ҆́ко се́и ѿ них̑ е҆сть.
ѻ҆н же па́кы ѿмѣта́шесѧ.
и҆ по ма́лѣ пакы стоѧ́щїѝ гл҃ахꙋ петро́ви, въис́тинꙋ ѿ нихъ е҆си.
иб̂о галиле́анинъ е҆си, и҆ бесѣда твоа̀ подо́битсѧ·

ѻ҆н же начатъ роти́тисѧ и҆ клѧти́сѧ, ꙗ҆́ко не вѣм́ъ чл҃ка сего̀, е҆гоже в̂ы гл҃ете.
и҆ второ́е алекто́ръ въз꙽гласѝ·

И҆ помѧнꙋв꙽ петръ гл҃ъ е҆же рече е҆мꙋ і҆с҃, ꙗ҆́ко преже даже пѣтель не въз꙽гласитъ два краты, ѿврьжешисѧ мене тр̂и кра́ты.
и҆ наченъ пла́кашесѧ·

Глв̑҇а, е҃і.

зач̑҇, ѯ҃ѕ

И а́бїе на ѹ҆трїа, съвѣтъ сътворишѧ а҆рхїере́е съ ста́ръцы и҆ кни́жникы, и҆ весь со́нмъ, свѧза́вше і҆с҃а ведоша, и҆ преда́ша е҆го пилатꙋ·

и҆ въпросѝ е҆го пилатъ, т̂ы ли е҆си цр҃ь і҆ѹ҆д́еискъ ѻ҆́н же ѿвѣщавъ рече е҆мꙋ, т̂ы гл҃еши·

И҆ гл҃ахꙋ нань а҆ръхїере́е мно́го·

Пилат же па́кы въпроси е҆го гл҃ѧ, не ѿвѣщава́еши ли ничесоже;
ви́жд̑ь коли́ко на тѧ свѣдѣтельствꙋютъ;
і҆с҃ же ктомꙋ ничесоже ѿвѣща̀, ꙗ҆ко диви́тисѧ пила́тꙋ·

На всѧ́къ же пра́з꙽дникъ ѿпꙋща́ше им̑ е҆ді́наго свѧ́зна, е҆гоже проша́хꙋ·

Бѣ же нарица́емыѝ вара́в꙽ва с ко́вникы свои́ми свѧзанъ, и҆же в꙽ кровѣ ѹ҆би́йство сътвори́ша·

И҆ възъпи́въ народъ, начатъ проси́ти ꙗ҆́коже всегда творѧше и҆мъ·

Пилат же ѿвѣща и҆мъ, гл҃ѧ.
хо́щете ли пꙋщꙋ вамъ цр҃ѧ і҆юде́йска;
вѣдѧше б̂о ꙗ҆́ко за́висти ра́ди преда́ша е҆го а҆рхїере́е·

Архие҆ре́е же поманꙋша наро́дꙋ, да паче вара́в꙽вꙋ пꙋ́ститъ им̑·

Пилат̑ же ѿвѣщавъ пакы рече и҆мъ.
что́ ѹ҆бо хо́щете сътворю, е҆гоже гл҃ете цр҃ѧ і҆юде́иска;
ѻ҆ни́ же пакы въз꙽пи́шѧ гл҃юще, пропни́ е҆го·

пила́т же гл҃аше и҆мъ.
что̀ б̂о зл̂о сътворѝ;
ѻ҆ни́ же и҆зли́ха въпїа́хꙋ, пропни́ е҆го·

Пила́т же хотѧ наро́дꙋ хотѣнїе сътворити, пꙋстѝ и҆мъ вара́в꙽вꙋ, и҆ предасть і҆с҃а би́въ, да про́пнꙋтъ е҆го·

зач̑҇, ѯ҃з·

Во́и҆ни же ведо́шѧ е҆го в꙽нꙋтрь двора, еже ес̑҇ преторъ и҆ съзва́шѧ вс̂ю спи́рꙋ, и҆ ѻ҆блеко́ша е҆го в꙽ прѣпрꙋ́дꙋ, и҆ възложи́шѧ нань съпле́тше тръ́новъ вѣнец꙽.
и҆ нача́шѧ цѣловати е҆го, и҆ гл҃ати, радꙋисѧ цр҃ю і҆ю҆де́искыи.
и҆ бїа́хꙋ е҆го по главѣ тростью, и҆ плюва́хꙋ нань, и҆ прегибаю́ще колѣна покланѧ́хꙋсѧ е҆мꙋ·

и҆ е҆гда порꙋга́шасѧ е҆мꙋ, съвлеко́шѧ с него препрꙋ́дꙋ, и҆ ѻ҆блеко́шѧ е҆го в ри́зы своѧ.
и҆ і҆зведо́ша е҆го да про́пнꙋтъ е҆го·

и҆ задѣша ми́моходѧ́щꙋ нѣќое҆мꙋ си́монꙋ кѷрине́ю, грѧдꙋщꙋ с꙽ села̀, ѿц҃ꙋ а҆леѯандровꙋ и҆ рꙋѳовꙋ, да во́зметъ крс̑҇тъ е҆го·

зач̑҇, ѯ҃и·

І҆ приведо́шѧ е҆го на голго́ѳꙋ мѣсто, еже е҆сть сказа́емо ло́бное мѣ́сто.
и҆ даа́хꙋ е҆мꙋ пити, е҆сми́рнисмено вино.
ѻ҆́н же не прїа́тъ·

и҆ распе́ншеѝ.
е҆го, раздѣли́шѧ ри́ѕы его, мѣта́юще жд̑рѣбїа ѻ҆ нѧ кто̀ чт̂о во́змет꙽·

Бѣ же часъ третїи, и҆ пропѧ́ша его·

И҆ б̂ѣ написанїе вины его напи́сано.
цр҃ь і҆юде́искъ·

И҆ с нимъ распѧшѧ дв̂а разбо́иника, е҆дїного ѻ҆деснꙋю, и҆ е҆дїного ѻ҆шꙋюю е҆го·

И҆ збыстьсѧ писа́нїе, е҆же гл҃етъ.
и҆ съ безакон꙽ными в꙽мѣнисѧ·

И҆ мимоходѧ́щеѝ хꙋлѧхꙋ его покыва́юще глава́ми своими, и҆ гл҃юще.
ѹ҆́а̀.
разарѧ́аѝ цр҃ковь, и҆ треми дн҃ьми съзида́а, сп҃си́сѧ самъ, и҆ сни́ди съ крс̑҇та·

Такоже и҆ а҆рхїере́е рꙋга́ющесѧ дрꙋгъ къ́ дрꙋгꙋ съ книжники гл҃ахꙋ и҆́ны сп҃сѐ, себе не мо́жетъ спс̑҇ти.
х҃с, цр҃ь і҆и҆л҃евъ, да сни́детъ нн҃ѣ съ креста, да ви́димъ, и҆ вѣрꙋ и҆мем̑ е҆мꙋ·

И҆ пропѧтаѧ с ним̑ понашѧ́ста емꙋ·

Бы́вшꙋ же часꙋ шестомꙋ, тма̀ бысть по все́и землѝ до часа́ девѧ́таго.
и҆ в часъ девѧ́тыи, въз꙽пи і҆с҃ гла́сом꙽ ве́лїемъ, гл҃ѧ, е҆лои, е҆лои, лима савах̑ѳа́ни;
е҆же е҆сть сказа́емо.
б҃е бж҃е мои, въ что̀ м̂ѧ ѻ҆ста́ви;
и҆ нѣцїи ѿ стоѧ́щихъ слы́шавше гл҃ахꙋ, с̂е и҆лїю гласитъ·

Тек же е҆дїнъ, и҆ наполнивъ гꙋ́бꙋ ѻ҆цта, и҆ възложь на трость, напаа́ше е҆го гл҃ѧ.
ѻ҆ста́вите, да ви́димъ, а҆ще прїидетъ и҆лїа снѧти е҆го·

і҆с҃ же пꙋщь гласъ ве́лїи, и҆зд꙽ше·

и҆ завѣса цр҃ко́внаа̀ раз̑дра́сѧ на́ двое, свыше до ни́же·

Видѣв же сътникъ стоа̀ прѧ́мо емꙋ, ꙗ҆́ко та́ко въз꙽пивъ и҆́зд꙽ше.
рече, въи́стинꙋ чл҃къ се́й сн҃ъ б̂ѣ бж҃їи·

Бѣхꙋ же и҆ жены, и҆здале́че ѕрѧ́ще, въ них же б̂ѣ ма́рїа магдалы́ни, и҆ ма́рїа і҆а́кова ма́лаго, и҆ і҆ѻ҆сїи мт҃и, и҆ саломїи.
ꙗ҆же и҆ е҆гда б̂ѣ в꙽ галиле́и, хожд̑ахꙋ по нем̑ и҆ слꙋжа́хꙋ е҆мꙋ, і҆ и́ны мно́гыа, ꙗ҆́же взыдо́шѧ с нимъ въ і҆е҆рлс̑҇и́мъ·

И҆ ѹ҆же по́здѣ бы́вшꙋ, понеже б̂ѣ пѧтокъ, е҆же е҆сть к꙽ сꙋбо́тѣ·

зач̑҇, ѯ҃ѳ·

Прїиде і҆ѻ́сифъ, и҆же ѿ а҆римаѳе́а.
бл҃гоѻ҆бразенъ съвѣтникъ.
и҆же и҆ то́и б̂ѣ ча́а црс̑҇твїа бж҃їа.
дръзнꙋвъ в꙽ни́де к꙽ пилатꙋ, и҆ просѝ тѣло і҆с҃ово.
пилат же дивисѧ, а҆ще ѹ҆же ѹ҆́мре·

и҆ призвавъ со́тника въпросѝ е҆го, а҆ще ѹ҆же ѹ҆́мре.
и҆ ѹ҆вѣдѣвъ ѿ сотъника, дасть тѣло і҆ѻ́сифови·

И҆ кꙋпи́въ плащани́цꙋ, и҆ снемъ е҆го ѻ҆бвит̑ плащани́цею, и҆ вложи е҆го въ́ гробъ, и҆же б̂ѣ и҆зсѣченъ ѿ ка́мене·

И҆ привали ка́мень нд̑а двери гро́бꙋ·

ма́рїѧ же магдалыни и҆ ма́рїа и҆ѻ҆сі́ева, зрѧ́ста гдѣ е҆го полагахꙋ·

Глв̑҇а, ѕ҃і·

зач̑҇, ѻ҃·

И минꙋвши сꙋбо́тѣ, ма́рїѧ магдалы́ни, и҆ марїа і҆а́ковлѧ, и҆ саломи, кꙋпи́шѧ а҆рома́ты, да пришед̑ше пома́жꙋтъ і҆с҃а·

И҆ ѕѣло заѹ҆́тра въ е҆ді́нꙋ ѿ сꙋбо́тъ, прїидо́ша на́ гробъ въсїа́вшꙋ сл҃нцꙋ, и҆ гл҃ахꙋ к꙽ себѣ.
кт̂о ѿвалитъ намъ ка́мень ѿ дверїи гро́ба;
и҆ възрѣвше видѣша ꙗ҆́ко ѿваленъ бѣ ка́мень.
б̀ѣ б̂о ве́лїи ѕѣло·

И҆ влѣзше въ́ гробъ, видѣша ю́ношꙋ сѣдѧ́ща в десныхъ, ѻ҆дѣ́анъ въ ѻ҆де́жд̑ꙋ бѣ́лꙋ, и҆ ѹ҆жасо́шасѧ·

ѻ҆́н же гл҃а и҆мъ, не ѹ҆жаса́итесѧ.
і҆с҃а и҆́щете назарѧни́на, пропѧта́го·

Въста̀, нѣсть зд̂ѣ.
с̂е мѣ́сто и҆дѣже положи́ша е҆го.
н̂о и҆дѣте, рцѣте ѹ҆чн҃ком̑ е҆го и҆ петрови, ꙗ҆́ко варѧет̑ в̂ы в꙽ галиле́ѝ.
та́мо е҆го ви́дите, ꙗ҆́коже рече вам̑·

и҆з꙽шед̑ше, бѣжа́ша ѿ гроба.
и҆мѧше же их̑ тре́пет̑ и҆ ѹ́жас̑҇, и никомꙋже ничесо́же рѣша, боѧ́хꙋ бо сѧ·

зач̑҇, о҃а·

Въскр҃съ же і҆с҃ заѹ́тра в꙽ первꙋю сꙋбо́тꙋ, ꙗ҆висѧ прежд̑е мр҃їи магдалы́ни, из неа́же и҆з꙽гна сед̑мь бѣсовъ·

ѻ҆наже шед̑ши възвѣстѝ с нимъ бы́вшимъ, пла́чющимсѧ и҆ рыда́ющимъ·

И҆ ѻ҆ни слы́шавше ꙗ҆ко жи́въ е҆сть, и҆ видѣнъ бысть ѿ неа̀, не ꙗ҆́шѧ вѣры·

По сих же двѣма ѿ нихъ грѧдꙋщема, ꙗ҆ви́сѧ и҆нѣмъ ѻ҆́бразомъ, идꙋщема на село̀.
и҆ т̂а шедъша възвѣсти́та про́чимъ, и҆ ни тѣма вѣры ꙗ҆́шѧ·

Послѣди же възлежа́щим̑ и҆мъ, е҆ді́номꙋнадесѧте.
ꙗ҆ви́сѧ, и҆ поносѝ невѣ́рьствїю и́хъ и҆ жестосръдїю, ꙗ҆́ко видѣвшим̑ его въста́вша, не ꙗ҆́шѧ вѣ́ры·

И҆ рече и҆мъ.
шед̑ше в꙽ ми́ръ весь, проповѣдите е҆ѵг̑҇лїе все́и тва́ри.
и҆же вѣрꙋ и҆метъ и҆ крс̑҇тит̑сѧ, сп҃се́нъ бꙋ́детъ.
а҆ и҆же не и҆метъ вѣрꙋ, ѻ҆сꙋже́нъ бꙋдетъ·

зна́менїа же вѣ́ровавшимъ сїа послѣ́дꙋютъ·

И҆́менемъ мои́мъ бѣ́сы и҆жд̑енꙋтъ.
ꙗ҆ѕы́кы възгл҃ютъ но́вы.
змїѧ во́змꙋтъ.
а҆́ще и҆ чт̂о смр҃тно и҆спїютъ, не врѣди́тъ и҆хъ.
на недꙋж́ныа рꙋ́кы възложатъ, и҆ здра́ви бꙋдꙋтъ·

Г҃ь же ѹ҆бо по гл҃анїи его к нимъ, възнесесѧ на́ нб҃о, и҆ сѣде ѻ҆деснꙋ́ю б҃а·

ѻ҆ни же и҆зшед̑ше, проповѣ́дашѧ всю́дꙋ.
г҃ꙋ поспѣшествꙋю́щꙋ, и҆ сло́во ѹ҆тверъжа́ющꙋ послд̑ѣствꙋющими зна́менми, а҆ми́нь·

Конецъ, е҆же ѿ марка ст҃го еѵг̑҇лїста, и́мать в себѣ.
глв̑҇а, ѕ҃і·

а҆ зач̑҇ цр҃ковных̑, ѻ҃а·