Ѿ ЛꙊКЇ СТ҃ОЄ БЛ҃ГОВѢСТВОВА́НЇЄ

Глв̑҇а, а҃·

зч̑҇а, а҃·

Поне́же ѹ҆бо мно́ѕи нача́шѧ чини́ти по́вѣсть ѻ҆ и҆звѣстованыхъ в насъ ве́щехъ, ꙗ҆́коже преда́ша намъ иже и҆спе́рва самовид̑цы и҆ слꙋгы̀ бы́вшеѝ словесѝ.
и҆зво́лисѧ и҆ мнѣ послѣдовавшꙋ вы́ше всѣхъ и҆спы́тно, по́ рѧдꙋ писа́ти тебѣ, дръжа́вныи ѳеѻ҆фїле, да разꙋмѣ́еши ѻ҆ них꙽же наѹ҆чилъсѧ е҆си словесехъ ѹ҆тверже́нїе·

зач̑҇, в҃·

Бысть въ́ дн҃и и҆́рода цр҃ѧ і҆ѹ҆деиска, ие҆ре́и нѣ́кїи, и҆менемъ заха́рїа, ѿ дн҃евны́а чреды а҆вїа́нѧ, и҆ жена̀ е҆го ѿ дще́рїи а҆а҆ро́новѣхъ, і҆ и́мѧ еѝ е҆лїсавеѳь·

Бѣста же пра́ведна ѻ́ба пред̑ бм҃ъ, ходѧ́ща въ всѣхъ за́повѣдехъ и҆ ѻ҆правда́нїихъ гн҃ихъ беспоро́чна.
и҆ не бѣ и҆́ма чада, понеже е҆лисавеѳь б̂ѣ непло́ды, и҆ ѻ́ба зама́торѣвша въ́ дн҃ехъ свои҆хъ бѣ́ста·

Бысть же слꙋжа́щꙋ е҆мꙋ в чинꙋ чреды̀ своеа̀ пред̑ бм҃ъ по ѻ҆бы́чаю сщ҃е́нничества, ключи́сѧ е҆мꙋ покади́ти в꙽шед̑ в꙽ цр҃квь гн҃ю.
и҆ всѐ мно́жество людїи б̂ѣ мл҃итвꙋ дѣѧ́ вн̂ѣ в꙽ годъ ѳимїа́ма·

Ꙗ҆́ви́ же сѧ е҆мꙋ а҆гг҃лъ гн҃ь, стоа̀ ѻ҆деснꙋ́ю ѻ҆лтарѧ кадѝлнаго.
и҆ смꙋти́сѧ захарїа видѣвъ, и҆ страхъ нападѐ нань.
рече же к немꙋ а҆гг҃лъ.
не бо́исѧ заха́рїа, зане ѹ҆слы́шана бысть мл҃тва твоа̀.
и҆ жена̀ твоа̀ е҆лїсавеѳ꙽ родитъ сн҃а тебѣ, и҆ нарече́ши и҆́мѧ е҆мꙋ і҆ѻ҆а́ннъ.
и҆ бꙋдетъ тебѣ ра́дость и҆ весе́лїе, и҆ мно́ѕи ѻ҆ рожествѣ е҆го възрадꙋ́ютсѧ.
бꙋ́детъ б̂о ве́лїи предъ гм҃ь.
и҆ вина̀ и҆ сике́ра не и҆́мать пити·

и҆ дх҃а ст҃а и҆спо́лнитсѧ е҆ще и҆з꙽ чрева мт҃ре своеа̀.
и҆ мно́гы ѿ сн҃о́въ і҆ил҃евъ ѻ҆брати́тъ къ г҃ꙋ б҃ꙋ и҆хъ·

И҆ то́и пред̑и́детъ пред̑ нимъ, дх҃омъ, и҆ си́лою и҆лїиною.
ѻ҆брати́ти срд̑ца ѿц҃емъ на чѧ́да, и҆ проти́вныа в꙽ мꙋ́дрости пра́вед̑ныхъ, ѹ҆гото́вати гв҃и лю́ди съвръшены·

и҆ рече заха́рїа къ а҆гг҃лꙋ.
по чесомꙋ разꙋмѣ́ю с̂е;
а҆зъ б̂о е҆смь старъ, и҆ жена̀ моа̀ зама́торѣвши въ́ дн҃ехъ своих̑·

И҆ ѿвѣщавъ а҆гг҃лъ рече е҆мꙋ.
а҆зъ е҆смь гаврїилъ предъстоаѝ пред̑ бм҃ъ, и҆ по́сланъ е҆смь гл҃ати к тебѣ, и҆ бл҃говѣстити тебѣ сїа.
и҆ с̂е бꙋ́деши млъ́ча и҆ не могы̀ прогл҃ати, до негоже дн҃е бꙋ́дꙋтъ сїа, зане не вѣ́рова словесемъ мои́мъ, ꙗ҆́же с꙽бꙋдꙋтсѧ въ́ времѧ своѐ·

И҆ бѣшѧ лю́дїе ждꙋ́ще заха́рїю, и҆ чюждахꙋсѧ коснѧ́щꙋ е҆мꙋ в цр҃кви·

И҆зшед̑ же не можа́ше гл҃ати к ни́мъ.
и҆ разꙋмѣшѧ ꙗ́ко видѣнїе видѣ в꙽ цр҃кви.
и҆ то́й б̂ѣ помава́а и҆мъ, и҆ пребыва́ше нѣмъ·

И҆ бысть, ꙗ҆ко и҆спл́ънишѧсѧ дн҃їе слꙋж́бы е҆го, и҆́де в домъ свои·

зач̑҇, г҃·

По си́хъ же дн҃ехъ зачатъ е҆лисавеѳъ жена е҆го, и҆ таѧ́шесѧ мцс̑҇ѧ пѧть гл҃ющи, ꙗ҆́ко та́ко мн̂ѣ сътворѝ г҃ь въ́ дн҃и, в нѧже призрѣ̀ ѿѧ́ти поноше́нїе моѐ в꙽ чл҃цехъ·

Въ мцс̑҇ь же шестыи, по́сланъ бысть а҆гг҃лъ гаврїилъ ѿ б҃а, въ́ град̑ галїле́искыи, е҆мж̑ꙋ и҆мѧ назаре́ѳъ, к꙽ дв҃ѣи ѻ҆брꙋче́нѣи мꙋжеви е҆мꙋже и҆мѧ і҆ѻ҆́сифъ, ѿ домꙋ двд̑ва, і҆ и́мѧ дв҃ѣи марїа́мъ.
и҆ вшед̑ к неи а҆гг҃лъ, рече.
радꙋисѧ ѻ҆бра́дованнаа, г҃ь с тобо́ю, блс̑҇вена ты в꙽ женахъ.
ѻ҆на же ви́дѣвши, смꙋтисѧ ѻ҆ словесѝ е҆го, и҆ помышлѧше каково бꙋ́дет̑ цѣлова́нїе с̂е·

И҆ речѐ а҆гг҃лъ е́й.
не бо́исѧ марїа́мъ, ѻ҆брѣте б̂о блгд̑ть ѿ б҃а.
и҆ с̂е зачнеши въ́ чревѣ, и҆ ро́диши сн҃а, и҆ нарече́ши и҆́мѧ е҆мꙋ і҆с҃.
се́й бꙋ́детъ ве́лїи, и҆ сн҃ъ вы̂шнѧго нарече́тъсѧ.
и҆ дастъ е҆мꙋ г҃ь б҃ъ прс̑҇тлъ двд̑а ѿц҃а е҆го, и҆ въцр҃итсѧ в домꙋ і҆а́ковли въ́ вѣкы, и҆ црс̑҇твїю е҆го не бꙋ́детъ конца̀·

Рече же марїам̑ къ а҆гг҃лꙋ.
како бꙋ́детъ с̂е, и҆дѣже мꙋж́а не зна́ю;
и҆ ѿвѣщавъ а҆гг҃лъ, рече е́й, дх҃ъ ст҃ыи на́идетъ на т̂ѧ, и҆ си́ла вы́шнѧго ѻ҆сѣнитъ т̂ѧ·

Тѣмже и҆ ражда́емое ст҃о, наречетсѧ сн҃ъ бж҃їи·

И҆ с̂е е҆лисавеѳь ю҆́жника твоа̀, и҆ т̂а зачатъ сн҃а в꙽ ста́рости своеѝ.
и҆ сїи мцс̑҇ь шестыи е҆сть е́й, нарица́е҆мѣи непло́ды.
ꙗ҆́ко не и҆знеможетъ ѿ б҃а всѧкъ гл҃ъ·

Рече же марїѧмъ.
с̂е раба̀ гн҃ѧ, бꙋ́ди мн̂ѣ по гл҃ꙋ твое҆мꙋ.
и҆ ѿі́де ѿ неа̀ а҆гг҃лъ·

зач̑҇, д҃·

Въста́вши же марїам̑ въ́ дн҃и т̂ы, и҆́де в го́рнѧа съ тща́нїем̑, въ́ град̑ і҆ѹ́довъ, и҆ в꙽ниде в дом̑ заха́рїинъ, и҆ цѣлова̀ е҆лисавеѳь·

И҆ бысть ꙗ҆́ко ѹ҆слы́ша е҆лисавеѳь цѣлованїе мр҃їино, възыгра́сѧ младе́нецъ, въ чревѣ еа̀.
и҆ и́спл́ънисѧ дх҃а ст҃а е҆лисавеѳь, и҆ възъпѝ гла́сомъ ве́лїемъ, и҆ рече.
блс̑҇ве́на т̂ы в꙽ женахъ, и҆ блс̑҇венъ плод̑ чре́ва твое҆го.
и҆ ѿкꙋ́дꙋ мн̂ѣ с̂е, да прїиде мати г҃а мое҆го къ мнѣ̀ сѐ б̂о ꙗ҆́ко быс̑҇ глас̑҇ цѣлованїа твое҆го въ ѹ҆шїю моею̀, възыграсѧ младе́нецъ радощами въ́ чревѣ мое҆мъ·

И҆ бл҃же́на вѣровавшїа, ꙗ҆́ко бꙋ́детъ съвръшенїе гл҃анымъ е́й ѿ г҃а·

И҆ рече марїа́мъ.
вели́читъ дш҃а моа г҃а, и҆ възра́довасѧ дх҃ъ мои ѻ҆ бѕ҃ѣ сп҃сѣ моемъ·

Ꙗ҆ко призрѣ на смире́нїе рабы своеа̀.
се б̂о ѿ нн҃ѣ блажатъ м̂ѧ вс̂и ро́ди.
Ꙗ҆́ко сътворѝ мн̂ѣ вели́чїе си́лныи, и҆ ст҃ое и҆мѧ е҆го·

И҆ млс̑҇ть е҆го в род̑ и҆ род̑ на боѧ́щїимсѧ е҆го·

Сътвори дръжа́вꙋ мы́шцею своею̀, расточѝ гръдыа мысли срцд̑а и҆хъ·

Низложи си́лныа съ престолъ, и҆ възнесѐ смире́ныа.
алчющаѧ и҆сп́лъни бл҃гъ, и҆ бога́тѧщаасѧ ѿпꙋсти тща·

Въспрїа́тъ і҆и҆л҃ѧ ѻ҆́трока свое҆го, помѧнꙋти милости.
ꙗ҆коже гл҃а къ ѿц҃емъ на́шим̑, а҆враа́мꙋ и҆ сѣмени е҆го до вѣка·

Пребыстъ же марїам̑ с нею ꙗ҆́ко три мцс̑҇а, и҆ възврати́сѧ в꙽ домъ сво́и·

Є҆лисавети же и҆спо́лнисѧ вре́мѧ родити е́й, и҆ роди сн҃а.
и҆ слы́шашѧ ѻ҆крс̑҇тъ живꙋщеѝ и҆ ѹ҆жикы еа̀, ꙗ҆́ко възвели́чилъ е҆сть г҃ь млс̑҇ть свою с нею, и҆ радовахꙋсѧ с нею·

И҆ бысть въ ѻ҆смыи дн҃ь, прїидо́шѧ ѻ҆брѣзати ѻ҆троча̀ и҆ нарица́хꙋ е҆̀ и҆менемъ ѿц҃а е҆го заха́рїю.
и҆ ѿвѣщавши ма́ти е҆го, рече.
нѝ, н̂о да нарече́тсѧ і҆ѻ҆а́ннъ, и҆ рѣшѧ к꙽ неи, ꙗ҆́ко никтоже е҆сть в꙽ срод̑ствѣ твое́мъ, и҆же нарица́етсѧ и҆́менемъ тѣмъ·

И҆ помава́хꙋ ѿц҃ꙋ е҆го, е҆же ка́ко б̂ы хотѣлъ нарещи е҆̀·

І҆ и҆спрошъ д꙽счицꙋ, написа гл҃ѧ.
і҆ѻ҆а́ннъ бꙋ́детъ и́мѧ е҆мꙋ.
и҆ чюждахꙋсѧ вс̂и·

ѿвръзо́шѧ же сѧ ѹ҆ста е҆го а҆бїе, и҆ ꙗ҆́зы́къ е҆го, и҆ гл҃аше блс̑҇вѧ б҃а·

И҆ бысть на всѣхъ страхъ живꙋщихъ ѻ҆́крс̑҇тъ и҆хъ, и҆ въ всеи странѣ і҆ѹдеистѣй повѣ́даеми бѣхꙋ вс̂и гл҃и сїи·

И҆ положи́шѧ вс̂и слы́шав꙽шеѝ в꙽ срд̑ци своемъ гл҃юще.
что ѹ҆бо ѻ҆троча̀ с̂е бꙋ́детъ;
и҆ рꙋка̀ гн҃ѧ б̂ѣ с ни́мъ·

И҆ заха́рїа ѿц҃ъ е҆го и҆спо́лънисѧ дх҃а ст҃а.
и҆ прро̑҇чествова гл҃ѧ·

Блс̑҇ве́нъ г҃ь б҃ъ і҆ил҃евъ.
ꙗ҆́ко посѣти, и҆ сътворѝ и҆збавле́нїе лю́демъ своим̑·

И҆ въз꙽дви́же рогъ сп҃се́нїа нам̑ в꙽ домꙋ двд҃вѣ ѻ҆трока свое҆го, ꙗ҆́коже гл҃а ѹ҆сты̀ ст҃ыхъ сꙋщихъ ѿ вѣка прро̑҇къ е҆го, сп҃се́нїе ѿ врагъ на́шихъ, і҆ и҆з꙽ рꙋкы̀ всѣхъ ненави́дѧщихъ насъ.
сътвори́ти млс̑҇ть съ ѿц҃ы на́шими, и҆ помѧнꙋти завѣтъ ст҃ыи свой.
клѧ́твꙋ е҆ю́же клѧ́тсѧ къ а҆враа́мꙋ ѿц҃ꙋ на́шемꙋ, да́ти намъ бе страха и҆з рꙋкы врагъ на́шихъ и҆збавльшемсѧ.
слꙋжи́ти е҆мꙋ прпд̑бїемъ, и҆ пра́вдою пред̑ нимъ вс̂ѧ дн҃и живота на́шего·

И҆ т̂ы ѻ҆троча прро̑҇къ вы́шнѧго наречешисѧ, пред̑идеши б̂о предъ лицемъ гн҃имъ ѹ҆гото́вати пꙋти е҆го·

да́ти ра́зꙋмъ сп҃се́нїа лю́демъ е҆го, въ ѻ҆ставленїе грѣхъ их̑.
млс̑҇рдїа ради млс̑҇ти б҃а на́шего, в нихже посѣти насъ въстокъ съвы́ше.
просвѣти́ти въ тмѣ и҆ сѣн́и смр҃тнѣи сѣдѧ́щаѧ, напра́вити но́гы на́ша на пꙋть ми́ренъ·

Ѡ҆троча же растѧ́ше и҆ крѣплѧ́шесѧ дх҃омъ.
и҆ б̂ѣ в꙽ пꙋсты́нѧхъ, до́ дн҃е ꙗ҆́вле́нїа свое҆го къ і҆ил҃ю·

Глава̀, в҃.

зач̑҇, е҃·

Бы́сть же въ́ дн҃и т̂ы, и҆зыде повелѣ́нїе ѿ кесарѧ а҆́вгꙋста, написа́ти вс̂ю вселе́ннꙋю·

с̂е написа́нїе пе́рвое быст꙽·

владꙋщ́ꙋ сирїею, кирини́ю̀.
і҆ и҆дѧ́хꙋ вси написа́тисѧ кождо въ сво́и градъ·

Взы́де же и҆ѻ́сифъ ѿ галиле́а, и҆з꙽ града назаре́ѳа.
въ і҆ѹ҆де́ю въ́ градъ дввд̑ъ, и҆же нарица́етъсѧ виѳлеѻ҆мъ, зане быти е҆мꙋ ѿ домꙋ и҆ ѻ҆ч҃ьства двд̑ва, написа́тисѧ с марїею̀ ѻ҆брꙋченою е҆мꙋ женою сꙋщею непра́з꙽дною·

бы́сть же е҆гда бы́ста т̂ꙋ, и҆спо́лнишѧсѧ дн҃їе родити е́й.
и роди сн҃а свое҆го пе́рвенца, и҆ повитъ е҆го.
и҆ положи е҆го въ ѧ́слехъ, зане не б̂ѣ и҆́ма мѣста въ ѻ҆би́тели·

И҆ па́стырїе бѣхꙋ в то́иже странѣ бдѧ́ще, и҆ стрегꙋще стра́ждꙋ нощнꙋю ѻ҆ ста́дѣ свое҆мъ.
и҆ с̂е а҆гг҃лъ гн҃ь ст̂а в нихъ, и҆ сла́ва гн҃ѧ ѻ҆сїа и҆хъ.
и҆ ѹ҆боа́шасѧ стра́хомъ ве́лїемъ.
и҆ рече и҆мъ а҆́гг҃лъ, не бо́итесѧ.
сѐ б̂о бл҃говѣствꙋю вамъ ра́дость ве́лїю, ꙗ҆́же бꙋ́детъ всѣмъ лю́демъ.
ꙗ҆́ко родисѧ вамъ днс̑҇е сп҃съ, и҆же е҆сть х҃с г҃ь, въ градѣ двд̑вѣ.
и҆ с̂е вамъ зна́менїе, ѻ҆брѧ́щете младе́нець повитъ лежащь въ ѧ́слехъ.
и҆ внеза́пꙋ бысть съ а҆́гг҃ломъ множество во́й нбс̑҇ных꙽, хвалѧ́щих꙽ бг҃а, и҆ гл҃ющих̑.
слава въ вы́шнихъ б҃ꙋ, и҆ на землѝ мир̑҇, въ чл҃вецѣхъ бл҃говоле́нїе·

И҆ бысть ꙗ҆́ко ѿи҆до́шѧ ѿ нихъ на́ нб҃о а҆гг҃ли.
и҆ чл҃вецы па́стырїе рѣша дрꙋгъ къ́ дрꙋгꙋ, пре́идем̑ до виѳлее́ма, и҆ ви́дим̑ гл҃ъ се́й бы́вшїи, и҆же г҃ь сказа̀ намъ·

И҆ прїидо́шѧ поспѣш꙽шесѧ, и҆ ѻ҆брѣто́шѧ марїа́мь же і҆ и҆ѻ́сифа, и҆ младе́нець лежа́щь въ ѧ́слехъ·

Видѣвша же, сказа́шѧ ѻ҆ гл҃ѣ гл҃аннѣмъ и҆мъ ѻ҆ ѻ҆троча́ти семъ·

и҆ вс̂и слы́шавшеѝ, диви́шасѧ ѻ҆ гл҃анныхъ ѿ па́стырїи к нимъ·

Марїа́мь же съблюда́ше вс̂ѧ гл҃ы сїа, слага́ющи в꙽ срд̑цы своем̑·

зач̑҇, ѕ҃·

И҆́ въз꙽врати́шѧсѧ па́стырїе, славѧще и҆ хвалѧ́ще б҃а ѻ҆ всѣхъ ꙗ҆же слы́шѧша и видѣшѧ, ꙗ҆коже гл҃ано бысть к нимъ·

И҆ е҆гда и҆сполнишѧсѧ ѻ҆смь дн҃їи, да ѻ҆брѣжꙋтъ е҆го, и҆ нареко́шѧ и҆мѧ е҆мꙋ і҆с҃, нареченное а҆гг҃еломъ прежд̑е даже не зачат̑сѧ въ́ чревѣ·

И҆ е҆гда и҆сполнишасѧ дн҃їе́ ѻ҆чище́нїа ею̀ по законꙋ моѷсе́ѻвꙋ.

зач̑҇, з҃·

Възнесо́ста е҆го въ і҆ерс̑҇ли́мъ, поставити е҆го пред̑ гм҃ъ, ꙗ҆́коже е҆сть пи́сано в зако́нѣ гн҃и, ꙗ҆́ко всѧкъ младе́нець, мꙋжеска по́лꙋ, разверза́а ложесна̀, ст҃о гв҃и наречетсѧ·

И҆ е́же дати жрътвꙋ, по реченномꙋ в зако́нѣ гн҃и, дв̂а го́рличища, и҆ли дв̂а птенца голꙋбина·

зач̑҇, и҃·

И҆́ се̂ б̂ѣ чл҃къ въ і҆ерс̑҇ли́мѣ, е҆мꙋже и҆мѧ симеѻ́нъ, и҆ чл҃къ се́й пра́веденъ и҆ бл҃гочести́въ, ча́а ѹ҆тѣхы і҆и҆л҃евы, и҆ дх҃ъ б̂ѣ ст҃ъ в немъ.
и҆ бѣ е҆мꙋ ѻ҆бѣща́нно дх҃омъ ст҃ымъ, не ви́дѣти смр҃ти, преже даже не ви́дитъ х҃а гн҃ѧ·

И҆ прїиде дх҃омъ в꙽ цр҃ковь,<.>

И е҆гда в꙽ведо́ста роди́телѧ ѻ҆троча і҆с҃а, сътворити и҆́ма по ѻ҆бы́чаю зако́нномꙋ ѻ҆ немъ.
и҆ то́й прїе́мъ е҆го на рꙋкꙋ свою̀, и҆ блс̑҇ви б҃а, и҆ реч̑҇.
нн҃ѣ ѿпꙋща́еши раба̀ твое҆го влд̑ко, по гл҃ꙋ твое҆мꙋ с ми́ромъ.
ꙗ҆ко видѣ́стѣ ѻ҆́чи мои сп҃се́нїе твое, е҆же е҆си ѹ҆гото́валъ пред̑ лицемъ всѣхъ людїи.
свт̑ѣ въ ѿкрове́нїе ꙗ҆́ѕы́комъ, и҆ сла́вꙋ людїи твои҆хъ і҆и҆л҃ѧ·

И҆ б̂ѣ и҆ѻ́сифъ, и҆ мт҃и е҆го, чюдѧ́щасѧ ѻ҆ гл҃емыхъ ѻ҆ немъ·

И҆ блс̑҇ви ѧ҆̀ симеѻ́нъ, и҆ рече к꙽ марїи ма́тери е҆го.
с̂е лежитъ се́й на паденїе и҆ на въста́нїе мно́гымъ въ і҆и҆л҃и, и҆ въ зна́менїе прерѣка́емо.
и҆ тебѣ же само́и дш҃ꙋ про́идет̑ ѻ҆рꙋжїе, ꙗ҆́ко ѹ҆бо да ѿкры́ютсѧ ѿ мно́гъ срд̑цъ помышле́нїѧ·

И҆ б̂ѣ а҆́нна прро̑҇чица, дщ̂и фанꙋ́илева, ѿ колѣна а҆сѷрова.
с̂и заматорѣвши въ́ дн҃ех꙽ мно́ѕѣх꙽, живши с꙽ мꙋж́емъ сед꙽мь лѣтъ ѿ дв҃ьства свое҆го, и҆ т̂а вдова ꙗ҆́ко лѣтъ ѻ҆́смъдесѧтъ четы́ри, ꙗ҆́же не ѿхождаше ѿ цр҃кви, посто́мъ и҆ мл҃твами слꙋжа́щи дн҃ь и҆ нощь·

И҆ т̂а в то́й часъ приста́вши.
и҆сповѣдавшесѧ гв҃и, и҆ гл҃аше ѻ҆ немъ всѣмъ ча́ющим̑ и҆збавленїа въ і҆ерс̑҇ли́мѣ·

И҆ ꙗ҆́ко скон꙽чашасѧ вс̂ѧ по зако́нꙋ гн҃ю, въз꙽врати́шасѧ в꙽ галиле́ю, въ́ градъ свои назареѳъ·

ѻ҆троча же растѧ́ше и҆ крѣплѧ́шесѧ дх҃омъ, и҆сплънѧ́асѧ премꙋ́дрости, и҆ блгд̑ть бж҃їа б̂ѣ на немъ.

И҆ хожд̑а́ста роди́телѧ е҆го на всѧ́ко лѣто въ і҆е҆рлс̑҇имъ, в꙽ пра́знд̑ик꙽ па́схы·

И҆ е҆гда бысть двоюнадесѧте лѣтꙋ, въсходѧ́щемъ и҆мъ въ і҆е҆рлс̑҇имъ по ѻ҆бычаю пра́знд̑ика, и҆ скончѧ́вшемъ дн҃и, и҆ възвращѧ́ющимсѧ и҆мъ.
ѻ҆ста̀ ѻ҆трокъ і҆с҃ въ і҆е҆рлс̑҇имѣ, и҆ не разꙋмѣ і҆ѻ́сифъ, и҆ мати е҆го, мнѣвша же е҆го в꙽ дрꙋжинѣ сꙋща, преидо́ша дн҃е пꙋть, и҆ і҆скаста е҆го в꙽ срод̑ницѣхъ и҆ в꙽ зна́емыхъ.
и҆ не ѻ҆брѣтша е҆го, въз꙽вратистасѧ въ і҆ерлс̑҇имъ в꙽зыска́юща е҆го.
и҆ бысть по трїехъ дн̂ехъ, ѻ҆брѣто́ста е҆го в꙽ цр҃к꙽ви, сѣдѧ́ща посредѣ ѹ҆чи́телїи, и҆ послꙋшающа и҆хъ, и҆ въпраша́юща и҆хъ·

Ѹ҆жаса́хꙋ же сѧ вс̂и послꙋшающеѝ е҆го, ѻ҆ разꙋмѣ и҆ ѻ҆ ѿвѣтехъ е҆го·

И҆ видѣвша е҆го, дивистасѧ, и҆ к немꙋ мт҃и е҆го рече.
ча́до, чт̂о сътвори на́ма тако;
с̂е ѿц҃ъ тво́и и҆ а́зъ болѧ́ща и҆ска́ховѣ тебѐ·

И҆ рече к ни́ма.
чт̂о ꙗ҆́ко и҆ска́сте менѐ;
не вѣ́ста ли ꙗ҆́ко в꙽ тѣхъ ꙗ҆́же ѿц҃а мое҆го досто́итъ быти м̂и;
и҆ т̂а не разꙋмѣста гл҃а, и҆же гл҃а и҆́ма·

И҆ сни́де с ни́ма, и҆ прїиде в꙽ назареѳъ, и҆ б̂ѣ повинꙋасѧ и́ма.
мт҃и же е҆го съблюда́ше вс̂ѧ гл҃ы сїа в꙽ срцд̑и своем̑·

И҆ і҆с҃, преспѣва́ше премꙋ́дростїю и҆ възрастом̑ и҆ блгд̑тїю ѿ б҃а и҆ чл҃къ·

Глав̑҇, г҃.

зач̑҇, ѳ҃·

В пѧ́тое же надесѧть лѣто влд̑чества тиверїа кесарѧ, ѻ҆блада́ющꙋ понтїискомꙋ пила́тꙋ і҆ѹ҆де́ею.
и҆ четвертовластвꙋющꙋ галиле́ею и́родꙋ·

Фили́ппꙋ же бра́тꙋ е҆го четвертовластвꙋющꙋ и҆тири́ею и҆ трахонитъскою страною, и҆ лисанїю, авилинїею четвертовластвꙋющꙋ.
прї архїере́ѝ а҆́ннѣ и҆ каи҆а́фѣ, бы́сть гл҃ъ бж҃їи къ і҆ѻ҆а́ннꙋ заха́рїинꙋ сн҃ꙋ в꙽ пꙋсты́ни.
и҆ прїиде въ вс̂ю странꙋ и҆ѻ҆рда́нскꙋю, проповѣдаа кр҃щенїе покаа́нїа въ ѻ҆ставленїе грѣхо́въ, ꙗ҆́коже е҆сть пи́сано в꙽ книзѣ словесъ і҆са́йа прро̑҇ка гл҃юща.
глс̑҇а въпїю́щаго в꙽ пꙋсты́ни.
ѹ҆гото́ваите пꙋть гн҃ь, пра́вы творите стеѕѧ е҆го всѧ́ка де́брь и҆спо́лнитсѧ, и҆ всѧ́ка гора и҆ холмъ смѣри́тсѧ·

И҆ бꙋ́дꙋтъ стропо́тнаѧ въ пра́ваѧ.
и҆ ѻ҆стрїи в꙽ пꙋтѝ глад̑кы·

И҆ ѹ҆зритъ всѧ́ка плоть сп҃се́нїе бж҃їе·

гл҃аше же и҆сходѧ́щим̑ наро́домъ крс̑҇ти́тисѧ ѿ него.
порожд̑енїа е҆хи́днова, кт̂о сказа̀ вамъ бѣжа́ти ѿ грѧдꙋщаго гнѣва;
сътвори́те ѹ҆бо плоды досто́ины покаа́нїа, и҆ не начина́ите гл҃ати в себѣ, ѿц҃а и҆́мамы а҆враа́ма.
гл҃ю б̂о вамъ, ꙗ҆́ко мо́жетъ б҃ъ ѿ ка́менїа сего въздви́гнꙋти чѧ́да а҆враа́мꙋ.
ѹ҆же б̂о и҆ сѣки́ра при корени дре́ва лежи́тъ.
всѧ́ко ѹ҆бо дре́во не творѧ́щеѐ плода добра, посѣка́етсѧ и҆ въ ѻ҆гнь в꙽мѣтает̑сѧ·

И҆ въпраша́хꙋ е҆го народи гл҃юще.
что ѹ҆бо сътворимъ·

ѿвѣщв же гл҃а и҆мъ.
и҆мѣ́ай двѣ ри́ѕѣ, да подасть не и҆мꙋщемꙋ.
і҆ и҆мѣаѝ бра́шна, такоже да твори́тъ·

Прїидо́шѧ же и҆ мытаре крс̑҇ти́тисѧ ѿ него, и҆ рѣшѧ к немꙋ.
ѹ҆чи́телю, чт̂о сътворим̑;
ѻ҆́нже рече к ним̑, ничтоже боле ѿ повелѣннаго вамъ твори́те·

Въпрашахꙋ же е҆го и҆ воини гл҃юще.
и҆ мы́ чт̂о сътворимъ;
и҆ рече к нимъ.
никогоже ѻ҆би́дите, ни ѻ҆клеветава́ите.
и҆ дово́лни бꙋ́дѣте ѻ҆бро́кы ва́шими·

Чѧ́ющем же лю́демъ, и҆ помышлѧ́ющемъ всѣмъ в꙽ срд̑цыхъ свои҆хъ ѻ҆ і҆ѻ҆а́ннѣ, е҆да то́и е҆сть х҃с, ѿвѣщава́ше і҆ѻ҆а́ннъ всѣмъ, гл҃ѧ·

А҆зъ ѹ҆бо водою кр҃ща́ю в̂ы, грѧде́т же крѣплїи мене, е҆мꙋже нѣсмь досто́и҆нъ ѿрѣши́ти реме́нь сапо́гꙋ е҆го, то́й в̂ы крс̑҇ти́тъ дх҃омъ ст҃ым̑, и҆ ѻ҆гнем̑·

Ємꙋже лопа́та в рꙋкꙋ е҆го, и҆ ѻ҆требит̑ гꙋмно своѐ, и҆ събере́тъ пшени́цꙋ в житницꙋ свою.
плѣвы же съжежет̑ ѻ҆гнемъ негаса́ющим̑.
мно́га же ѹ҆бо і҆ и҆на ѹ҆тѣшаа, бл҃говѣствова́ше лю́демъ·

зач̑҇, і҃·

І҆род̑ же четвертовластникъ ѻ҆бличаем̑ ѿ него, ѻ҆ і҆родиѧ́дѣ женѣ бра́та свое҆го, и҆ ѻ҆ всѣхъ ꙗ҆́же сътворѝ зла́ѧ и҆́родъ.
и҆ приложи и҆ с̂е надъ всѣми, и҆ затворѝ і҆ѻ҆а́нна в꙽ темни́ци·

Бы́сть же е҆гда крс̑҇ти́шѧсѧ вс̂и людїе.
і҆и҆с҃ꙋ кр҃щъшꙋсѧ и҆ молѧ́щꙋсѧ, ѿвръзесѧ нб҃о, и҆ сни́де дх҃ъ ст҃ыи теле́снымъ ѻ҆́бразомъ ꙗ҆́ко го́лꙋбь нань·

И҆ гласъ с꙽ нб҃се бысть гл҃ѧ.
ты е҆си сн҃ъ мои възлюбленныи, ѻ҆ тебѣ бл҃говолихъ·

зач̑҇, а҃і·

И҆ то́й б̂ѣ і҆с҃, ꙗ҆ко лѣтомъ тридесѧте.
начина́а, сыи ꙗ҆́ко мнимъ сн҃ъ і҆ѻ́сифовъ, и҆лїевъ.
матѳа́новъ, левїи́нъ.
мельхі́и҆нъ, и҆а҆нна́евъ.
и҆ѻ҆сїфовъ, маттаѳїе́въ.
а҆мо́сов꙽, наѹ́мовъ.
е҆сли́мовъ, нагге́ѻвъ.
маа́ѳовъ, маттаѳи́евъ.
семїев̑҇, і҆ѻ́сифовъ.
і҆ѹ҆динъ, и҆ѻ҆а҆нна́новъ.
риси́евъ, зороваве́левъ.
салаѳі́илев̑҇, нирїевъ.
мелхїевъ, а҆ддїевъ.
коса́мовъ, е҆лмо́дамовъ.
и҆ровъ, і҆ѻ҆сїе́въ.
е҆лїезеровъ, і҆ѻ҆ри́мовъ, матѳа́товъ, левїинъ.
симеѻ́новъ, і҆ѹ҆динъ.
і҆ѻ́сифовъ, і҆ѻ҆а҆на́мовъ.
е҆лиаки́мовъ, мелеа́евъ.
менна́нов꙽, маттаѳа́евъ.
наѳа́новъ, двд̑въ.
и҆е҆се́ѻвъ, ѻ҆ви́довъ.
въѻ҆зовъ, салмо́новъ.
наа҆ссо́новъ.
а҆минода́вовъ.
а҆ра́мовъ, и҆ѻ҆а҆ра́мовъ.
е҆сро́мов̑҇, фаре́совъ.
і҆ѹ́динъ, и҆а́ковль.
и҆саа́ковъ, а҆враа́мовъ.
ѳарра́новъ, нахо́ровъ.
серꙋ́ховъ, рагавовъ.
фале́ковъ, е҆веровъ.
сала́новъ, кайна́новъ.
а҆рфаѯа́довъ, си́моновъ.
но́евъ, ламеховъ.
маѳꙋса́левъ, е҆но́ховъ.
и҆а҆редовъ, малеле́илевъ.
кайнановъ, е҆но́совъ.
си́ѳовъ, а҆да́мовъ.
бж҃їи·

Глв̑҇а, д҃.

зач̑҇, в҃і

Ис҃ же и҆спо́лнь дх҃а ст҃а въз꙽врати́сѧ ѿ и҆ѻ҆рдана, и҆ ведѧ́шесѧ дх҃омъ в꙽ пꙋсты́нѧ, дн҃їи четы́ридесѧте и҆скꙋша́емъ ѿ дїа́вола.
и҆ не ꙗ҆́сть ничесоже въ дн҃и т̂ы.
и҆ сконча́вшемсѧ им̑, послѣди възалка и҆ рече е҆мꙋ дїа́вол꙽.
а҆ще сн҃ъ е҆си бж҃їи, рци ка́меневи семꙋ да бꙋ́детъ хлѣбъ.
и҆ ѿвѣща і҆с҃ к немꙋ гл҃ѧ.
пи́сано е҆сть, ꙗ҆ко не ѻ҆ хлѣбѣ е҆ді́номъ живъ бꙋдетъ чл҃къ, н̂о ѻ҆ всѧ́комъ гл҃ѣ бж҃їи·

И҆ възведъ е҆го дїа́волъ на́ горꙋ высокꙋ, показа е҆мꙋ вс̂ѧ црс̑҇твїа вселе́нныѧ, в часѣ̀ време́ннѣ.
и҆ рече е҆мꙋ дїа́волъ.
тебѣ дам꙽ власть сїю вс̂ю и҆ сла́вꙋ и҆хъ, ꙗ҆́ко мн̂ѣ дана̀ е҆сть, и҆ е҆мꙋже а҆ще хощꙋ, дамъ ю҆̀.
т̂ы ѹ҆бо а҆ще покло́нишисѧ предо мною, бꙋ́дꙋтъ тебѣ вс̂ѧ·

И ѿвѣщавъ рече е҆мꙋ і҆с҃.
и҆дѝ за мною сатана̀.
писано е҆сть.
покло́нишисѧ г҃ꙋ б҃ꙋ твое҆мꙋ, и҆ томꙋ е҆ді́номꙋ послꙋжиши·

И҆ веде е҆го въ і҆е҆рлс̑҇имъ, и҆ поста́ви е҆го на крилѣ цр҃ко́внѣмъ, и҆ рече е҆мꙋ.
а҆ще сн҃ъ е҆си бж҃їи, врь́зисѧ ѿсю́дꙋ до́лꙋ.
пи́сано б̂о е҆сть, ꙗ҆ко а҆гг҃ломъ свои́мъ заповѣ́сть ѻ҆ тебѣ съхрани́ти т̂ѧ, и҆ на рꙋкахъ възмт̑ꙋ т̂ѧ, да не когда прит꙽кнеши ѻ҆ ка́мень но́гꙋ твою̀·

И҆ ѿвѣща́въ рече е҆мꙋ і҆с҃.
ꙗ҆́ко рече́но е҆сть, не и҆скꙋ́сиши г҃а б҃а твое҆го.
и҆ скончавъ вс̂е и҆скꙋше́нїе дїа́волъ, ѿи́де ѿ него до времене·

И въз꙽врати́сѧ і҆с҃, в си́лѣ дх҃о́внѣи в галиле́ю, и҆ вѣсть и҆зы́де по все́и странѣ ѻ҆ немъ.
и҆ то́и ѹ҆ча́ше на сон꙽мищихъ и҆хъ, сла́вимъ всѣми·

зач̑҇, г҃і·

И҆́ прїиде в꙽ назареѳъ, и҆дѣже б̂ѣ въспитанъ, и҆ вни́де по ѻ҆бы́чаю свое҆мꙋ в꙽ дн҃ь сꙋбо́тныи в꙽ со́нмище, и҆ в꙽ста̀ честѝ.
и҆ да́шѧ е҆мꙋ кни́гꙋ и҆са́і꙼а прро̑҇ка.
и҆ раз꙽гнꙋвъ кни́гꙋ, ѻ҆брѣте мѣсто, и҆дѣже б̂ѣ напи́сано.
дх҃ь гн҃ь на мнѣ, е҆гоже ради пома́за м̂ѧ, бл҃говѣ́сти́ти ни́щимъ посла̀ м̂ѧ, и҆сцѣли́ти съкрꙋше́ныа срд̑цемъ, проповѣ́дати плѣне́нымъ ѿпꙋще́нїе, и҆ слѣпымъ прозрѣнїе, ѿпꙋсти́ти съкрꙋше́ныа въ ѿра́дꙋ, проповѣ́дати лѣто гн҃е прїа́тно·

И҆ съгнꙋв́ъ кни́гꙋ, ѿдавъ слꙋзѣ, сѣ́де.
и҆ всм̑ѣ в со́нмищи ѻ҆́чи бѣхꙋ зрѧ́ще нань·

И҆ начатъ гл҃ати к ни́мъ, ꙗ҆ко днесь сбыстьсѧ писа́нїе с̂е въ ѹ҆шїю ва́шею.
и҆ вс̂и свѣдѣтельствовахꙋ е҆мꙋ·

зач̑҇, д҃і·

І҆ дивлѧ́хꙋсѧ ѻ҆ словесехъ блгд̑ти, и҆сходѧщихъ и҆зъ ѹ́стъ е҆го·

И҆ гл҃ахꙋ.
не се́и ли е҆сть сн҃ъ і҆ѻ́сїфовъ;
и҆ рече к нимъ.
всѧ́ко речете м̂и при́т꙽чꙋ сїю, врачю̀ и҆сцѣлисѧ самъ.
е҆ли́ка слы́шѧхом̑ бы́вшаа̀ в꙽ капернаѹ҆́мѣ, сътвори и҆ здѣ въ ѿч҃ьствїи своем̑·

рече же.
а҆ми́нь гл҃ю вамъ.
ꙗ҆́ко никото́рыи прро̑҇къ прїа́тенъ е҆сть въ ѿч҃ьствїи свое҆мъ.
по и́стинѣ же гл҃ю вам̑.
мно́гы вдови́цѧ бѣшѧ въ дн҃и и҆лїины въ і҆ил҃и, е҆гда заключи́сѧ нб҃о три лѣта, и҆ мс̑҇цѧ шесть, ꙗ҆ко бысть гладъ вели́къ по все́и землѝ, и҆ ни къ е҆ді́нои и҆хъ по́сланъ бысть и҆лїа, то́кмо в саре́птꙋ сидо́нскꙋю, к꙽ женѣ вдови́ци·

И мно́ѕи прокаже́ни бѣхꙋ прї е҆лисе́и прро̑҇цѣ въ і҆ил҃и, и҆ ние҆ді́нже ѿ нихъ ѻ҆чи́стисѧ, то́кмо нее҆ма́нъ, сирїанинъ·

И҆ і҆спо́лнишѧсѧ вс̂и ꙗ҆́рости в со́нмищи, слы́шавше сїа.
и҆ в꙽ста́вше и҆згнашѧ е҆го вонъ и҆з꙽ гра́да, и҆ ведошѧ е҆го до врьхꙋ горы̀, на не́иже град̑ и҆хъ създанъ бѧше, да бы́шѧ е҆го низри́нꙋли.
ѻ҆́н же прошедъ посрд̑ѣ и҆хъ и҆дѧше·

зач̑҇, е҃і·

И҆́ сни́де в꙽ капернаѹ҆мъ, града галиле́иска, и҆ бѣ ѹ҆ча и҆хъ в сꙋбо́ты.
и҆ ѹ҆жасахꙋсѧ ѻ҆ ѹ҆ченїи е҆го, ꙗ҆́ко съ властїю б̂ѣ сло́во е҆го·

И҆ в со́нмищи б̂ѣ чл҃къ, и҆мы̀ дꙋхъ бѣ́са нечи́ста, и҆ възъпѝ гласомъ ве́лїемъ гл҃ѧ.
ѻ҆ста́ви, чт̂о намъ и҆ тебѣ, і҆с҃е назарѧ́нине.
пришелъ е҆си погꙋбити нас̑҇;
вѣмъ т̂ѧ кт̂о е҆си, ст҃ыи бж҃їи·

И҆ запрѣтѝ е҆мꙋ і҆с҃, гл҃ѧ.
премлъчѝ, и҆ і҆зыди и҆з него·

И҆ поврьгь е҆го бѣсъ посредѣ, и҆зы́де и҆з него, ника́коже вредивъ е҆го·

И҆ бысть ѹ́жасъ на всѣхъ, и҆ стѧза́хꙋсѧ дрꙋгъ къ дрꙋгꙋ гл҃ще.
чт̂о слово с̂е;
ꙗ҆ко властїю и҆ си́лою велитъ нечистымъ дꙋховом꙽ и҆ і҆сходѧтъ;

зач̑҇, ѕ҃і·

І҆ и҆схожд̑аше глас̑҇ ѻ҆ немъ въ всѧко мѣсто страны·

в꙽ставъ же и҆з со́нмища, вни́де в домъ си́моновъ·

Теща же симонова б̂ѣ ѻ҆дръжима ѻ҆гнем꙽ велїемъ, и҆ молиша е҆го ѻ҆ неи.
и҆ став꙽ над̑ нею, запрети ѻ҆гню̀, и҆ ѻ҆ста́ви ю҆̀.
а҆бїе же в꙽ста́вши, слꙋжа́ше им̑.
заходѧ́щꙋ же слн҃цꙋ, вс̂и е҆ли́цы и҆мѧ́хꙋ болѧ́щїа недꙋ́гы разли́чными, привожахꙋ и҆хъ к немꙋ·

ѻ҆́н же на е҆ді́номъ кожд̑о ихъ рꙋцѣ възложь, и҆сцѣлѧ́ше и҆хъ·

И҆схожд̑ахꙋ же и҆ бѣси ѿ мно́гъ, въпїю́ще и҆ гл҃юще, ꙗ҆́ко т̂ы е҆си хс҃, сн҃ь бж҃їи·

И҆ запрѣща́а не дадѧше и҆мъ гл҃ати, ꙗ҆́ко вѣдѧхꙋ х҃а самого сꙋща.

Бывшꙋ же дн҃и, из꙽шед̑ и҆де в꙽ пꙋсто мѣсто е҆ді́н꙽, и҆ народ̑и̑ и҆скахꙋ е҆го, и҆ прїидо́шѧ до него, и҆ дръжа́хꙋсѧ е҆го, да не бы ѿшелъ ѿ нихъ.
ѻ҆́н же рече к ни́мъ.
ꙗ҆́ко и҆ дрꙋгымъ градовомъ бл҃говѣстити м̂и подоба́етъ црс̑҇твїе бж҃їе, ꙗ҆́ко на с̂е по́сланъ е҆смь.
и҆ б̂ѣ проповѣдаа̀ на со́нмищыхъ галилеискыхъ·

Глв̑҇а, е҃·

зач̑҇, з҃і·

Бысть же належащꙋ е҆мъ наро́дꙋ, да бышѧ слы́шали сло́во бж҃їе,<.>

И҆ то́и бѣ стоѧ прї е́зерѣ генисаре́тстѣ·

Рыбарїе же ѿшед꙽ше ѿ нею, плака́хꙋ мрѣжѧ·

Влѣз же въ е҆ді́нъ ѿ кораблю и҆́же бѣ си́моновъ, моли е҆го ѿ землѧ ѿстꙋпи́ти ма́ло.
и҆ сѣдъ ѹ҆ча́ше и҆с кораблѧ̀ наро́ды·

ꙗ҆́коже преста̀ гл҃ѧ, рече к си́монꙋ, постꙋпѝ въ глꙋбинꙋ, и҆ въвръзѣте мре́жѧ вашѧ в лови́твꙋ.
и҆ ѿвѣща́в꙽ си́монъ, рече е҆мꙋ.
наста́вниче, ѻ҆бнощъ вс̂ю трꙋжд̑ьшесѧ ничесоже ꙗ҆́хом̑, по гл҃ꙋ же твое҆мꙋ в꙽ве́ргꙋ мре́жꙋ, и҆ с̂е сътво́рше, ѧ́шѧ множество ры́бъ мно́го, протръза́ше же сѧ мрежа их̑, и҆ поманꙋшѧ прича́стникомъ и҆же бѧ́хꙋ въ дрꙋземъ кораблѝ, да прише́дше помо́гꙋтъ и҆мъ.
и҆ прїидо́ша, і҆ и҆спо́лниша ѻ҆́ба кораблѧ̀, ꙗ҆ко погрꙋжа́тисѧ и҆́ма·

Видѣв же си́монъ пе́тръ, припадѐ к꙽ колѣ́нома і҆с҃овома, гл҃ѧ·

и҆зы́ди ѿ менѐ, ꙗ҆́ко мꙋжъ грѣшен̑҇ е҆́смь г҃и.
ѹ́꙼жасъ бо ѻ҆дръжа́ше е҆го, и҆ вс̂ѧ сꙋщаѧ с нимъ, ѻ҆ лови́твѣ ры́бъ ꙗ҆́же ѧ́ша.
та́кожд̑е же і҆ и҆а́кова і҆ и҆ѻ҆а́нна, сн҃а зеведе́ѻва, ꙗ҆же бѣс́та ѻ҆бещника си́монови·

и҆ речѐ к си́монꙋ і҆с҃, не бо́исѧ.
ѿсе́лѣ бꙋдеши чл҃кы ловѧ̀.
і҆ и҆з꙽влекъше ѻ҆́ба кораблѧ̀ на́ землю, ѻ҆ста́вльше вс̂ѧ, въ слѣдъ е҆го и҆до́шѧ·

зач̑҇, и҃і·

И҆́ бысть е҆гда б̂ѣ і҆с҃ въ е҆ді́номъ ѿ градо́въ, и҆ с̂е мꙋжъ и҆спо́лнь прокаже́нїа, и҆ видѣвъ і҆с҃а, па̑ ни́ць молѧсѧ е҆мꙋ гл҃ѧ.
г҃и, а҆́ще хо́щеши, мо́жеши м̂ѧ ѻ҆чи́стити·

и҆ просте́ръ рꙋкꙋ коснꙋ̀ е҆го, ре́къ.
хощꙋ̀, ѻ҆чи́стисѧ.
і҆ а́бїе прока́за ѿи́де ѿ него̀·

И҆ то́и заповѣ́да е҆мꙋ̀ никомꙋже повѣд́ати, н̂о ше̑ покажисѧ і҆е҆ре́ѻви, и҆ принесѝ ѻ҆ ѻ҆чищенїи твое҆мъ, ꙗ҆́коже повелѣ̀ моѷсїи, въ свѣдѣтельство и҆мъ.
прохожа́ше же паче сло́во ѻ҆ немъ, и҆ схожа́хꙋсѧ народи мно́зи слы́шати, и҆ цѣли́тисѧ ѿ него̀, ѿ недꙋ́гъ своих̑.
то́й же б̂ѣ ѿходѧ в пꙋстыню и҆ мл҃ѧсѧ·

зач̑҇, ѳ҃і·

И҆́ бысть въ е҆ді́нъ ѿ дн҃їи, и҆ то́и б̂ѣ ѹ҆ча̀, и҆ бѣхꙋ сѣдѧ́ще фарисе́е, и҆ зако́ноѹ҆чи́телїе, и҆же бѧхꙋ пришлѝ ѿ всѧ́кїа ве́си галиле́искїа, і҆ и҆ѹ҆де́искїа̀, і҆ и҆ерс̑҇ли́м꙽скїа, и҆ си́ла гн҃ѧ б̂ѣ и҆сцѣлѧ́ющи и҆хъ·

И҆ с̂е мꙋж́їе носѧ́ще на ѻ҆дрѣ̀ чл҃ка, и҆же б̂ѣ расла́бленъ, і҆ и҆ска́хꙋ внестѝ е҆го и҆ положи́ти пред нимъ.
и҆ не ѻ҆брѣтше кꙋдѣ̀ внестѝ е҆го наро́да рад̑и̑.
възлѣ́зше на́ храмъ, сквозѣ скꙋде́лы низвѣ́сиша е҆го съ ѻ҆дромъ на средꙋ̀ пред̑ і҆с҃а.
и҆ ви́дѣвъ вѣ́рꙋ и҆хъ, рече е҆мꙋ.
чл҃че ѻ҆ставлѧ́ют꙽ ти сѧ грѣсѝ твоѝ.
и҆ нача́шѧ помышлѧ́ти кни́жницы и҆ фарисе́е, гл҃юще.
кт̂о е҆сть се́и, и҆же гл҃етъ хꙋлы̀;
кт̂о мо́жетъ ѻ҆ставлѧ́ти грѣхы̀, то́кмо е҆ді́нъ б҃ъ;
разꙋмѣ́в же і҆с҃ помышле́нїа и҆хъ, ѿвѣща́въ речѐ к нимъ.
чт̂о помышлѧ́ете въ срд̑цыхъ ва́ших̑;
чт̂о е҆сть ѹ҆до́бѣе рещѝ·

ѻ҆ставлѧ́ютъ ти сѧ грѣсѝ твоѝ.
и҆ли рещѝ, въста́ни и҆ ходи;
н̂о да ѹ҆вѣ́сте, ꙗ҆́ко вла́сть и҆́мать сн҃ъ члчс̑҇кыи на землѝ ѿпꙋща́ти грѣхы, речѐ расла́бленомꙋ.
тебѣ̀ гл҃ю, въста́ни, възмѝ ѻ҆́дръ твоѝ, и҆дѝ в до́мъ свои.
і҆ а́бїе въстав̑҇ пред ни́ми, Вземъ на не́мже лежа́ше, и҆́де в дом̑ свои, сла́вѧ б҃а.
и҆ ѹ҆́жасъ прїа́тъ вс̂ѧ, и҆ славлѧ́хꙋ б҃а, І҆ и҆спо́лнишѧсѧ стра́ха гл҃юще, ꙗ҆́ко видѣхом̑ пресла́внаѧ днс̑҇е·

зач̑҇, к҃·

И҆́ по се́мъ и҆зы́де, и҆ ѹ҆зрѣ̀ мытарѧ̀, и҆́менемъ левїю, сѣдѧ́ща на мы́тници.
и҆ рече е҆мꙋ, и҆дѝ по мнѣ.
и҆ ѻ҆ста́вль вс̂ѧ, въста́въ, въ слѣдъ е҆го и҆́де·

И҆ сътворѝ чреже́нїе ве́лїе левїи е҆мꙋ въ домꙋ своемъ.
и҆ б̂ѣ наро́дъ мытаре́и мно́гъ, і҆ и҆нѣхъ, и҆же бѣхꙋ с ним̑ възлежа́ще.
и҆ ропта́хꙋ кни́жницы нань, и҆ фарисе́е къ ѹ҆чн҃комъ е҆го гл҃юще.
почт̂о с мытарѝ и҆ грѣш́никы ꙗ҆́сте и҆ пїе́те;
и҆ ѿвѣщавъ і҆с҃, речѐ к ни́мъ.
не требꙋю́тъ здра́вїи врача, н̂о болѧ́щїи.
не прїидохъ призвати пра́ведъныхъ, н̂о грѣшныа в꙽ покаа́нїе·

зач̑҇, к҃а·

Ѡни́ же рѣша к немꙋ.
почт̂о ѹ҆чн҃цы і҆ѻ҆а́ннови постѧтсѧ ча́сто, и҆ мл҃итвы творѧтъ, такоже и фарїсе́истїи, а҆ твоѝ ꙗ҆́дѧ́тъ и҆ пїютъ;
ѻ҆н же рече к нимъ.
е҆да мо́жете сн҃ы бра́чныа дондеже женихъ с ни́ми е҆сть, сътворити пости́тисѧ;
прїидꙋт же дн҃їе, е҆гда ѿѧ́тъ бꙋ́детъ ѿ ни́хъ женихъ, и҆ тогда̀ постѧтсѧ в т̂ы дн҃и·

Гл҃аше же и҆ при́тчю к ні́мъ.
ꙗ҆́ко никтоже приставле́нїа ри́зы но́вы приставлѧ́етъ на ри́зꙋ в́ет꙽хꙋ.
а҆ще ли же, н̂и.
и҆ новꙋю раздере́тъ, и҆ ветсѣи не съгласꙋ́ет е҆же ѿ но́ваго·

И҆ никтоже влива́етъ вина но́ва в мѣ́хы ве́тхы, а҆ще ли же н̂и, растръгнетъ но́вое вино мѣ́хы, и҆ са́мо и҆злїетсѧ, и҆ мѣ́си поги́бнт̑ꙋ, н̂о вино̀ но́вое в꙽ мѣхы но́вы вливати, и҆ ѻ҆бое съблюде́тсѧ.
и҆ никтоже пи́въ ветхое, а҆бїе хо́щетъ но́вомꙋ.
гл҃етъ бо, ветхое лꙋ́чше е҆сть·

Глв̑҇а, ѕ҃.

зач̑҇, к҃в·

Бысть же в сꙋбо́тꙋ второпе́ръвꙋю, и҆тѝ е҆мꙋ сквозѣ сѣѧнїа, и҆ въстръга́хꙋ ѹ҆ченицы е҆го кла́сы, и҆ ꙗ҆́дѧ́хꙋ стира́юще рꙋка́ми·

Нѣцїи же ѿ фарїсе́и рѣша и҆мъ.
чт̂о творитѐ, е҆гоже не досто́ит̑ творити в сꙋбо́ты;
и҆ ѿвѣщавъ і҆с҃, рече к нимъ.
ни л̂и сего̀ чл̂и е҆сте, е҆же сътвори дв҃дъ, е҆гда̀ взалка́сѧ самъ, и҆ і́же с нимъ сꙋщїи, ка́ко вни́де в꙽ домъ бж҃їи, и҆ хлѣбы пред̑ложенїѧ вземъ, и҆ ꙗ҆́стъ, и дастъ и҆ сꙋщимъ с нимъ, и҆хже не, достоаше ꙗ҆́сти, то́кмо е҆ді́нѣмъ е҆ре́ѻмъ;
и҆ гл҃аше и҆мъ, ꙗ҆ко г҃ь е҆сть сн҃ъ члчс̑҇кїи и҆ сꙋботѣ·

Бы́сть же и҆ въ дрꙋгꙋ́ю сꙋботꙋ, внити е҆мꙋ в сон̑҇мище, и҆ ѹ҆чт̑ии̑·

И҆ б̂ѣ т̂ꙋ чл҃къ.
и҆ рꙋка̀ е҆мꙋ десна́а б̂ѣ сꙋха̀.
назира́хꙋ же кни́жъницы и҆ фарїсе́е, а҆ще в сꙋбо́тꙋ и҆сцѣли́тъ, да ѻ҆брѧ́щꙋтъ рѣчь нань·

ѻ҆́н же вѣ́дѧше помышленїа и҆хъ, и҆ рече чл҃кꙋ и҆мꙋщемꙋ сꙋхꙋ рꙋкꙋ.
въстани, и҆ стани посредѣ·

ѻ҆́н же въставъ, ста̀·

Рече же і҆с҃ к ни́мъ.
въпрошꙋ в̂ы, чт̂о достоитъ в сꙋбо́ты, добро твори́ти, и҆ли ѕл̂о творити, дш҃ꙋ спс̑҇тѝ и҆ли погꙋби́ти;
и҆ възрѣвъ на вс̂ѧ и҆хъ, рече е҆мꙋ.
прострѝ рꙋ́кꙋ твою̀.
ѻ҆́н же сътвори тако.
и҆ ѹ҆твердисѧ рꙋка е҆го здра́ва ꙗ҆́ко дрꙋга́а·

ѻ҆ни же и҆сполнишѧсѧ безꙋм́їѧ, и҆ гл҃ахꙋ дрꙋгъ къ́ дрꙋгꙋ, чт̂о бышѧ сътворили і҆с҃ови·

зач̑҇, к҃г·

Бысть же въ́ дн҃и т̂ы, и҆зы́де в го́рꙋ помоли́тисѧ, и҆ б̂ѣ ѻ҆́бнощь в꙽ мл҃твѣ бж҃їи·

И҆ е҆гда бысть дн҃ь, призва̀ ѹ҆чн҃кы своѧ.
и҆ і҆збра̀ ѿ нихъ дв̂анадесѧте, и҆х꙽же и҆ а҆пс̑҇лы нарече.
си́мона, е҆гоже и҆менова петра, и҆ а҆ндре́ѧ брата е҆го.
і҆а́кова, и҆ і҆ѻ҆а́нна.
фили́ппа, и҆ варѳоломе́а.
матѳе́а, и҆ ѳомꙋ.
і҆а́кова а҆лѳе́ѻ҆ва, и҆ си́мона нарица́емаго ѕилота.
и҆ѹ҆дꙋ і҆а҆ковлѧ, и҆ і҆ꙋдꙋ и҆скарїѻ́т꙽скаго, и҆же и҆ бысть преда́тель.

зач̑҇, к҃д·

І҆ сшед̑ с ними ст̂а на мѣ́стѣ ра́внѣ, и҆ народ̑ ѹ҆чн҃къ е҆го, и҆ множество мно́го людїи ѿ всеѧ̀ і҆ю҆де́а, и҆ і҆е҆рлс̑҇и́ма, и҆ помо́рїа тѷр꙽ска и҆ сидо́ньска, и҆же прїидошѧ послꙋшѧти е҆го, и҆ і҆сцѣли́тисѧ ѿ недꙋ́гъ свои҆хъ, стражд̑ꙋщеѝ ѿ дꙋхъ нечи́стыхъ, и҆ і҆сцѣлѧхꙋсѧ.
и҆ весь наро́дъ искаше прикаса́тисѧ е҆мъ, ꙗ҆́ко си́ла ѿ него и҆схожд̑аше и҆ і҆сцѣлѧ́ше вс̂ѧ·

И҆ то́и възвед̑ ѻ҆́чи своѝ на ѹ҆чн҃кы своѧ, гл҃аше·

Бл҃жени ни́щїи, ꙗ҆ко ваше е҆сть црс̑҇твїе бж҃їе·

Бл҃жени а҆́лчꙋщеѝ нн҃ѣ, ꙗ҆́ко насы́титесѧ.

Бл҃жени пла́чющеѝ нн҃ѣ, ꙗ҆ко въсмѣетесѧ·

Бл҃жени бꙋ́дете е҆гда̀ възненави́дѧтъ васъ чл҃цы.
и҆ е҆гда̀ разлꙋчѧтъ в̂ы, и҆ поно́сѧтъ, и҆ пронесꙋтъ и́мѧ ваше ꙗ҆ко зл̂о, сн҃а члчс̑҇каго ради.
вьзрадꙋитесѧ в꙽ то́и дн҃ь и҆ взыгра́ите, сс̀ б̂о м꙽зд̑а̀ вашѧ мно́га на нб҃сѝ·

По сим̑ б̂о творѧ́хꙋ прро̑҇комъ ѿц҃ы их̑·

зач̑҇, к҃е·

ѻбаче го́ре вамъ бога́тымъ, ꙗ҆́ко ѿстоитѐ ѹ҆тѣше́нїѧ ва́шего·

Го́ре вамъ насыще́нїи нн҃ѣ, ꙗ҆́ко в꙽за́лчете·

Го́ре вамъ смѣю́щимсѧ нн҃ѣ, ꙗ҆́ко възрыда́ете и҆ въспла́чете·

Го́ре е҆гда до́брѣ рекꙋтъ вамъ вс̂и члц҃ы·

По симъ б̂о творѧхꙋ лжепрро̑҇комъ ѿц҃ы ихъ·

Но̂ вамъ гл҃ю слы́шащимъ.
люби́те врагы̀ ваша.
добро̀ твори́те ненави́дѧщимъ васъ.
блс̑҇ви́те кленꙋщаѧ в̂ы.
моли́тесѧ за творѧ́щихъ вамъ ѻ҆би́дꙋ·

Бїю́щемꙋ т̂ѧ в лани́тꙋ, пода́жд̑ь и҆ дрꙋ́гꙋю.
и҆ ѿ взима́ющаго т̂и ри́зꙋ, и҆ срачи́цꙋ не въз꙽бранѝ.
всѧ́комꙋ же просѧ́щемꙋ ѹ҆ тебѐ, да́й.
и҆ ѿ възимающаго твоѧ, не и҆стѧза́й·

зач̑҇, к҃ѕ·

І҆ ꙗ҆́коже хо́щете да творѧтъ вамъ чл҃цы, и҆ в̂ы твори́те и҆мъ та́кожд̑е.
и҆ а́ще лю́бите лю́бѧщаѧ в̂ы, каа̀ вам̑ блгд̑ть е҆сть;
и҆бо и҆ грѣшницы лю́бѧщаѧ и҆хъ лю́бѧтъ.
и҆ а҆ще бл҃готворитѐ бл҃готворѧ́щимъ вамъ, каа̀ вамъ блгд̑ть е҆сть;
и҆бо и҆ грѣшницы то́жд̑е творѧтъ·

И҆ а́ще взаи́мъ дае́те ѿ ни́х꙽же ча́ете въспрїа́ти, каа̀ вамъ блгд̑ть е҆сть;
и҆бо и҆ грѣшницы грѣшникомъ взаимъ дава́ют꙽, да въспрїимꙋтъ ра́внаѧ·

ѻ҆ба́че люби́те врагы̀ вашѧ, и҆ бл҃го твори́те.
и҆ в заи́мъ да́йте, ничесоже ча́юще, и҆ бꙋ́детъ м꙽зда̀ ва́шѧ мно́га, и҆ бꙋ́дете сн҃ове вы́шнѧго, ꙗ҆́ко то́и бл҃гь е҆сть, на без꙽блгд̑тныа и҆ ѕлы́а.
бꙋ́дѣте ѹ҆бо милосръди, ꙗ҆́коже и҆ ѿц҃ь вашъ млс̑҇рдъ ес̑҇·

зач̑҇, к҃з·

Не сꙋди́те, и҆ не сꙋ́дѧтъ вамъ.
и҆ не ѻ҆сꙋжайте, да не ѻ҆сꙋжени бꙋ́дете·

ѿпꙋща́ите, и҆ ѿпꙋстѧтъ вамъ.
да́ите, и҆ дастъсѧ вамъ.
мѣрꙋ добрꙋ на́тканꙋ и҆ потрꙋ́снꙋ и҆ прелива́ющꙋсѧ, дадꙋтъ на лоно̀ ва́ше.
тою б̂о мѣ́рою, е҆ю́же мѣ́рите, възмѣритсѧ вамъ·

Рече же при́тчю и҆мъ.
е҆да мо́жетъ слѣпе́цъ слѣпца води́ти;
не ѻ҆ба ли въ ѧ́мꙋ в꙽паде́тасѧ;
нѣсть ѹ҆чени́къ над̑
ѹ҆чи́телем꙽ свои́мъ.
съврьше́н же всѧкъ бꙋдет̑, ꙗ҆́коже ѹ҆чи́тель е҆го·

Что же ви́диши сꙋч́ецъ и҆же е҆сть въ ѻ҆чеси бра́та твое҆го, бр́ьвна же е҆же е҆сть въ ѻ҆чесѝ твоемъ не чꙋе́ши;
и҆ли ка́ко мо́жеши рещи бра́тꙋ твое҆мꙋ.
бра́те ѻ҆ста́ви, да и҆змꙋ̀ сꙋчецъ, и҆же е҆сть въ ѻ҆чесѝ твоемъ, самъ сꙋщаго въ ѻ҆чесѝ своемъ бр́ъвна не видѧ;
лицемѣре, и҆змѝ прьв́ѣе бръвно̀ и҆зъ ѻ҆чесѐ твое҆го, и҆ тогда̀ про́зриши и҆зѧти сꙋч́ецъ и҆з꙽ ѻ҆чесѐ бра́та твое҆го·

Нѣсть б̂о дре́во добро̀, творѧ плода ѕл̂а.
ниже дре́во ѕл̂о, творѧ плода добра̀.
всѧко б̂о дре́во ѿ плода̀ свое҆го позна́етсѧ·

Не ѿ трь́нїа б̂о че́шꙋть смо́квы, ни ѿ кꙋпи́ны е́млютъ гро́здїа·

Бл҃гїи чл҃къ ѿ бл҃гаго съкро́вища срд̑ца свое҆го и҆зно́ситъ бл҃го́е·

И҆ злыи чл҃къ ѿ зла́го съкро́вища срд̑ца свое҆го и҆зно́ситъ ѕло́е.
ѿ и҆збы́тка б̂о срд̑ца, гл҃ютъ ѹ҆ста е҆го·

зач̑҇, к҃и·

Что же м̂ѧ зове́те, г҃и г҃и, и҆ не творитѐ ꙗ҆́же гл҃ю;
всѧкъ грѧдыѝ ко м꙽нѣ, и҆ слышаѝ словеса̀ моѧ, и҆ творѧ ѧ҆̀, скажꙋ ва̀мъ комꙋ̀ е҆сть подо́бенъ.
подо́бенъ е҆сть чл҃кꙋ ѕи́жд̑ꙋщꙋ хра́минꙋ, и҆же и҆скопа̀ и҆ ѹ҆глꙋбѝ, и҆ положѝ ѻ҆снова́нїе на камени·

Навод̑не́нїю же бы́вшꙋ, припадѐ рѣка̀ хра́минѣ то́й, и҆ не мо́же поколѣбати еа̀.
ѻ҆снована б̂о б̂ѣ на ка́мени·

Слы́шавыи же, и҆ не сътвори́выѝ подо́бенъ е҆сть чл҃кꙋ созд̑а́вшꙋ хра́минꙋ на земли без꙽ ѻ҆снова́нїа, е҆иже припаде рѣка̀, и҆ а́бїе падесѧ.
и҆ бысть разрꙋше́нїе хра́мины тоа̀ велїе·

Глв̑҇а, з҃·

Єгда же сконча̀ вс̂ѧ гл҃ы своѧ в꙽ слꙋх́ы лю́демъ,

зач̑҇, к҃ѳ·

Вни́де в꙽ капернаѹ҆мъ·

Со́тникꙋ же нѣ́коемꙋ рабъ болѧ ѕл̂ѣ хотѧ́ше ѹ҆мрети, и҆же б̂ѣ е҆мꙋ че́стенъ·

Слы́шав же ѻ҆ і҆с҃ѣ, посла̀ к꙽ немꙋ̀ ста́рцѧ і҆ю҆де́йскыа, молѧ е҆го, ꙗ҆ко да пришед̑ сп҃сет̑ раба̀ е҆го·

ѻ҆ни́ же пришед̑ше къ і҆с҃ови, молѧ́хꙋ е҆го то́щно, гл҃юще.
ꙗ҆́ко досто́инъ е҆сть е҆же а҆ще дасѝ е҆мꙋ, лю́битъ б̂о ꙗ҆ѕы́къ нашъ, и҆ со́нмище то́и създа̀ намъ.
і҆с҃ же и҆дѧ́ше с ни́ми·

Є҆ще же е҆мꙋ недале́че сꙋщꙋ ѿ хра́мины, посла̀ к꙽ немꙋ со́тникъ дрꙋ́гы, гл҃ѧ е҆мꙋ.
г҃и не дви́жисѧ.
нѣсмь б̂о досто́инъ, да подъ кровъ мо́и в꙽ни́деши.
тѣмже ни себѐ досто́ина сътворихъ прїити́ к тебѣ.
н̂о рцѝ сло́во, и҆ і҆сцѣлѣетъ ѻ҆трокъ мой.
и҆бо и҆ а҆з꙽ чл҃кь е҆смь подъ влд̑кою ѹ҆чиненъ, и҆мѣю́ под̑ собо́ю во́ины, и҆ гл҃ю семꙋ, и҆дѝ, и҆ і́детъ.
и҆ дрꙋго́мꙋ прїидѝ, и҆ прїидетъ.
и҆ рабꙋ мое҆мꙋ, сътворѝ с̂е, и҆ сътвори́тъ·

Слы́шав же сїа і҆с҃, чюдисѧ е҆мꙋ.
и҆ ѻ҆бра́щьсѧ и҆дꙋщемꙋ по немъ наро́дꙋ, рече.
гл҃ю вамъ, нѝ въ і҆ил҃и толи́кы вѣ́ры ѻ҆брѣтохъ.
и҆ въз꙽вра́щшесѧ по́сланїи, ѻ҆брѣто́шѧ болѧ́щаго раба̀ и҆сцѣлѣв꙽ша·

зач̑҇, л҃·

И҆́ бысть по семъ, и҆дѧше въ градъ, нарица́емый наи́нъ, и҆ с ни́мъ и҆дѧ́хꙋ ѹ҆чн҃цы е҆го мно́ѕи, и҆ наро́дъ мно́г꙽·

Ꙗ҆́коже прибли́жисѧ къ вратом̑ града.
и҆ с̂е и҆зношѧ́хꙋ ѹ҆мрьш́а, сн҃а е҆ді́нород̑на ма́тери свое́й.
и҆ та̀ б̂ѣ вдова̀, и҆ наро́дъ ѿ града многъ с нею·

И҆ видѣвъ ю҆ г҃ь, млс̑҇рдова ѻ҆ не́й, и҆ реч̑҇ ей, не пла́чи·

И҆ пристꙋ́пль коснꙋсѧ въ ѻ҆́дръ·

носѧ́щїи же ста́шѧ.
и҆ реч̑҇, ю҆́ноше, тебѣ гл҃ю, в꙽стани.
и҆ сѣде мр҃твыи, и҆ начатъ гл҃ати, и҆ дастъ е҆го ма́тери свое́й·

Прїатъ же страхъ вс̂ѧ, и҆ сла́влѧхꙋ б҃а гл҃юще.
ꙗ҆ко прро̑҇къ ве́лїи въста̀ в насъ.
и҆ ꙗ҆́ко посѣтѝ б҃ъ людїи свои҆хъ·

зач̑҇, л҃а·

И҆́ і҆зы́де сло́во с̂е по все́и і҆ю́де́ѝ ѻ҆ немъ, и по все́и странѣ·

И҆ възвѣсти́шѧ і҆ѻ҆а́ннꙋ ѹ҆чн҃цы е҆го ѻ҆ всѣхъ сихъ.
и҆ призвавъ дв̂а нѣ́каа ѿ ѹ҆чн҃къ свои҆х꙽ і҆ѻ҆а́ннъ, посла̀ къ і҆с҃ꙋ гл҃ѧ.
ты л̂и е҆си грѧды́ѝ, и҆ли и҆но́го чѧ́емъ;
пришед̑ша же к немꙋ́ мꙋжа рѣста.
і҆ѻ҆а́нн꙽ крс̑҇тль посла̀ насъ к тебѣ гл҃ѧ.
ты л̂и е҆си грѧды́ѝ, и҆ли̂ и҆ного чѧ́емъ;
в꙽ тои же часъ и҆сцѣлѝ многы ѿ недꙋгъ и҆ ран̑҇, и҆ дꙋхъ ѕлыхъ, и҆ мно́гымъ слѣпым̑ дарова̀ прозрѣн́їе·

И҆ ѿвѣщавъ і҆с҃ рече и́ма.
шед̑ша възвѣсти́та і҆ѻ҆а́ннꙋ, ꙗ҆́же видѣ́ста и҆ слы́шѧста.
ꙗ҆ко слѣпїи прозира́ютъ, хро́мїи хо́дѧтъ, прокаже́нїи ѻ҆чища́ютсѧ, глꙋсїи слы́шѧтъ, мр҃твїи въста́ютъ, ни́щїи бл҃говѣствꙋютъ.
и҆ бл҃же́нъ е҆сть и҆же а҆ще не събла́знит꙽сѧ ѻ҆ мнѣ·

ѿшед̑шама же ѹ҆чн҃кома і҆ѻ҆а́нновома.
начатъ гл҃ати к наро́домъ ѻ҆ і҆ѻ҆а́ннѣ.
чесо̀ и҆зыдо́сте в꙽ пꙋсты́ню ви́дѣти.
трость ли вѣтром̑ колѣблемъ;
н̂о чесо̀ и҆зыдо́сте ви́дѣти;
чл҃ка ли в꙽ мѧ́к꙽ки ри́ѕы ѻ҆дѣ́ана;
с̂е и҆же въ ѻ҆дежи сла́внѣи, и҆ пи́щи сꙋщеѝ, в꙽ црс̑҇твїи сꙋть.
н̂о чесо и҆зыдо́сте ви́дѣти, прро̑҇ка ли;
е́й гл҃ю вам̑, и҆ ли́ше прро̑҇ка·

Се́и б̂о е҆сть, ѻ҆ не́м꙽же пи́сано е҆сть·

Се̂ а҆зъ послю̀ а҆́гг҃ла мое҆го пред̑ лицемъ твои́мъ, и҆же ѹ҆стро́итъ пꙋть твой пред̑ тобо́ю·

Гл҃ю б̂о вамъ, бо́лїи в роженыхъ женами прро̑҇къ і҆ѻ҆а́нна крс̑҇тлѧ никтоже е҆сть.
мнїи же, в꙽ црс̑҇твїи бж҃їи болїи е҆го е҆сть·

И҆ всѝ лю́дїе слы́шавше, и҆ мытарїе, ѻ҆пра́вдишѧ б҃а, кр҃щьшесѧ кр҃ще́нїемъ і҆ѻ҆а́нновомъ·

Фарїсе́е же и҆ зако́нницы совѣтъ бж҃їи ѿврьго́ша в себѣ, не крс̑҇щьшесѧ ѿ него·

рече же г҃ь.

зач̑҇, л҃в·

Комꙋ ѹ҆бо ѹ҆подоблю чл҃кы ро́да сего.
и҆ комꙋ сꙋть подо́бни;
подо́бни сꙋть ѻ҆тро́чищемъ сѣдѧ́щимъ на тръжищы́хъ, и҆ приглашѧ́ющимъ дрꙋгъ дрꙋга, и҆ гл҃ющимъ.
пи́скахомъ вамъ, и҆ не плѧса́сте.
рыдахомъ вамъ, и҆ не пла́касте·

Прїиде б̂о і҆ѻ҆а́ннъ крс̑҇тль, нѝ хлѣб́а ꙗ҆ды̀, нѝ вина̀ пїа, и гл҃ете, бѣсъ и҆́мать·

Прїиде сн҃ь члчс̑҇кїи ꙗ҆́ды̀ и пїа, и҆ гл҃ете, с̂е чл҃къ ꙗ҆́дъца и҆ винопїица, дрꙋгъ мытаре́мъ и҆ грѣшникомъ.
и҆ ѻ҆пра́вдисѧ премꙋдрость ѿ чѧд̑ своих̑ всѣх꙽·

зач̑҇, л҃г·

Молѧ́ше же е҆го нѣ́кїи ѿ фарїсеи, дабы̀ ꙗ҆́лъ с ни́мъ·

И҆ вшед̑ в домъ фарїсе́ѻвъ, възлеже·

И҆ с̂е жена̀ въ́ градѣ ꙗ҆́же б̂ѣ грѣшница, и҆ ѹ҆вѣдѣвши ꙗ҆ко възлежитъ въ хра́минѣ фарисе́ѻвѣ, прине́сши а҆лава́стръ мѷра, и҆ ста́вши при но́гꙋ е҆го съзади, пла́чꙋщисѧ начатъ ѹ҆мывати нозѣ е҆го слезами, и҆ власы̀ главы̀ своеа̀ ѻ҆тира́ше, и ѻ҆блобыза́ше но́ѕѣ е҆го, и҆ ма́заше мѷромъ·

Видѣ́в же фарїсе́й възва́выѝ е҆го, рече в себѣ гл҃ѧ·

се́й а҆ще б̂ы былъ прро̑҇къ, вѣдѣлъ б̂ы кт̂о и҆ какова̀ жена прикаса́етсѧ е҆м꙽, ꙗ҆ко грѣшница е҆сть·

И҆ ѿвѣщавъ і҆с҃, рече к немꙋ.
си́моне, и҆́мам̑ т̂и нѣчто рещѝ·

ѻ҆́н же рече, ѹ҆чт҃лю рц̂и·

И҆ рече.
дв̂а длъжника̀ бѣ́ста заимода́вцꙋ нѣ́коемꙋ.
е҆ді́нъ б̂ѣ длъженъ пѧтїю сотъ дина́рїи, дрꙋгїи же пѧтїюдесѧтъ.
не и҆мꙋщема же въздати.
ѻ҆бѣма ѿда̀.
кото́рыи ѹ҆бо ею̀ рц̂ы паче възлю́битъ е҆го;
ѿвѣщав же си́монъ, рече.
мн̂ю ꙗ҆́ко е҆мꙋже вѧ́ще ѿда̀·

ѻ҆́н же рече е҆мꙋ, пра́во сꙋдилъ е҆си·

И҆ ѻ҆бра́щ꙽сѧ к꙽ женѣ, рече си́монови.
ви́диши ли сїю женꙋ;
внидо́хъ в домъ тво́и, воды̀ на́ нозѣ моѝ не дастъ.
сїа же слезами ѻ҆блїа м̂и но́ѕѣ, и҆ власы̀ главы̀ своеа̀ ѻ҆тры.
лобза́нїа м̂и не дастъ, сїа же ѿнелиже внидохъ, не преста̀ ѻ҆блобыза́ющи м̂и но́ѕѣ.
ма́сломъ главы̀ моеа̀ не пома́за, сїа же мѷромъ пома́за м̂и но́ѕѣ.
е҆гоже ради гл҃ю т̂и, ѿпꙋща́ютсѧ грѣсѝ еа̀ мно́ѕи, ꙗ҆́ко възлюбѝ мно́го·

А҆ е҆мꙋже ма́ло ѻ҆ставлѧ́етсѧ, ме́нше лю́битъ.
реч̑҇ же е́й, ѿпꙋща́ютсѧ тебѣ грѣсѝ·

И҆ нача́шѧ възлежа́щеѝ с ни́мъ гл҃ати в себѣ.
кт̂о се́и е҆сть, и҆же и҆ грѣхы ѿпꙋща́етъ;
рече же к꙽ женѣ, вѣра твоа сп҃се т̂ѧ, и҆дѝ в꙽ ми́ръ·

Глв̑҇а, и҃·

зач̑҇, л҃д·

И бысть по семъ, и҆ то́и прохожа́ше сквозѣ гра́ды и҆ ве́си, проповѣ́дꙋа и҆ бл҃говѣствꙋѧ црс̑҇твїе бж҃їе, и҆ ѻ́банадесѧте с нимъ.
и҆ жены̀ нѣкыа, и҆же бѣхꙋ и҆сцѣле́ны ѿ дꙋховъ злыхъ и҆ недꙋгъ.
ма́рїа́ нарица́емаа магдалы́ни, и҆з неа́же бѣсов꙽ сед̑мъ и҆зы́де, і҆ и҆ѻа́нна, жена̀ хꙋзанѧ приста́вника и҆́родова, и҆ сꙋса́нна, і҆ и́ны мно́гы, ꙗ҆́же слꙋжа́хꙋ е҆мꙋ ѿ и҆мѣнїи свои́хъ·

Разꙋмѣва́ющꙋ же наро́дꙋ мно́гꙋ.
и҆ ѿ всѣхъ гра́довъ грѧдꙋщ́им̑ к немꙋ, рече притчꙋ·

зач̑҇, л҃е·

И҆́зы́де сѣа́ѝ сѣѧти сѣмене свое҆го.
и е҆гда сѣ́аше, ѻ҆в́о паде при пꙋтѝ, и҆ попрано бысть, и҆ пти́цѧ нбс̑҇ныа позоба́ша е҆̀·

А҆ дрꙋго́е паде на ка́мени, и҆ прозѧбъ ѹ҆́сше, зане не и҆мѧше вла́ги·

и҆ дрꙋго́е паде посредѣ те́рнїа, и҆ възрастъ те́рнїе, и҆ подавѝ е҆̀·

дрꙋго́е же падѐ на землѝ бла́зѣ, и҆ прозѧбъ сътворѝ плод̑ стори́цею.
сїѧ гл҃ѧ въз꙽гласѝ.
и҆мѣ́аѝ ѹ҆́ши слы́шати, да слы́шитъ.

Въпраша́хꙋ же е҆го ѹ҆чн҃цы е҆го, гл҃юще.
что е҆сть при́тча сїа·

ѻ҆́н же рече, вамъ е҆сть дано̀ вѣ́дати та́йны црс̑҇твїа бж҃їа·

про́чимъ же в꙽ при́тчѧхъ, да ви́дѧще, не ви́дѧтъ.
и҆ слы́шаще, не разꙋмѣю́тъ·

Є҆́сть же сїа при́тча·

сѣ́мѧ е҆сть сло́во бж҃їе.
а҆ и҆же при пꙋти, сꙋть слы́шащеѝ.
потомже прихо́дитъ дїа́волъ, и҆ взе́млетъ сло́во ѿ срд̑ца и҆хъ, да не вѣ́ровавше, сп҃сꙋтсѧ·

а҆ иже на ка́мени, и҆же е҆гд̑а ѹ҆слы́шѧтъ, с ра́достїю прїе́млют꙽ сло́во.
и҆ сїи ко́рене не и́мꙋт꙽.
и҆же въ времѧ вѣ́рꙋютъ, и҆ въ́ времѧ напасти ѿпа́даютъ·

а҆ и҆же в те́рнїи пад̑шее, сїи сꙋть слы́шавшеѝ, и҆ ѿ печа́ли и҆ богатьства и҆ сла́стьми жите́искими ходѧще подавлѧ́ютсѧ, и҆ не съврьшѧ́ютъ плода·

А҆ и҆же на до́брѣи землѝ, сїи сꙋть, и҆же до́брым꙽ срд̑цемъ и҆ бл҃гомъ слы́шавше сло́во, дръжатъ, и҆ плодъ творѧтъ в꙽ трьпѣнїи·

Сїа гл҃ѧ въз꙽гласѝ.
и҆мѣ́аѝ ѹ҆ши слы́шати, да слы́шитъ·

зач̑҇, л҃ѕ·

Никто же ѹ҆бо свѣти́лника в꙽жегъ, покрива́етъ е҆го съсꙋ́домъ, и҆л̂и под̑ ѻ́дръ под̑лага́етъ, н̂о на свѣщникъ възлага́етъ, да входѧ́щеѝ ви́дѧт꙽ свѣтъ·

нѣсть б̂о та́йно, е҆же не ꙗ҆́вле́но бꙋ́детъ.
ниже ѹ҆тае́но, е҆же не позна́етсѧ, и҆ въ ꙗ҆́вле́нїе прїидетъ·

Блюдѣте ѹ҆бо ка́ко слы́шите.
и҆же б̂о и҆́мать, дастьсѧ е҆мꙋ.
і҆ и́же а́ще не и́мать, и҆ е҆же мни́тсѧ и҆мѣ́а, во́зметсѧ ѿ него·

Прїидошѧ же к немꙋ ма́ти и҆ бра́тїѧ е҆го, и҆ не можа́хꙋ бесѣдовати к немꙋ наро́да ради.
и҆ възвѣсти́шѧ е҆мꙋ гл҃юще.
ма́ти твоа̀ и҆ братїѧ твоа̀ в꙽н̂ѣ стоѧтъ, ви́дѣти т̂ѧ хотѧще·

ѻ҆́нъ же ѿвѣщавъ рече к ни́мъ.
ма́ти моа̀ и҆ бра́тїѧ моа̀ сїи сꙋть, слы́шащеѝ слово́ бж҃їе, и҆ творѧ́ще е҆̀·

зач̑҇, л҃з·

І҆ бысть въ е҆ді́нъ ѿ дн҃їи, и҆ то́и влѣзе в꙽ кора́бль, и҆ ѹ҆чн҃цы е҆го, и҆ рече к нимъ.
пре́идемъ на ѻ́нъ полъ е҆́зера, и҆ поидошѧ.
и҆дꙋщ́имъ же им̑, ѹ҆спе.
и҆ сни́де бꙋрѧ вѣтренаа̀ въ е҆́зеро, и҆ скончава́хꙋсѧ и҆ в бѣдѣ̀ бѣх́ꙋ.
и҆ пристꙋп́льше въздвиго́шѧ е҆го, гл҃юще.
наста́вниче, наста́вниче, погыба́емъ·

ѻ҆́н же в꙽ставъ запрѣтѝ вѣтрꙋ, и҆ вълне́нїю въдно́мꙋ.
и҆ ѹ҆лего́ста, и҆ бысть ти́шина·

Рече же и҆мъ.
гд̂ѣ е҆сть вѣра ва́шѧ;
ѹ҆боа́вше же сѧ, чюди́шѧсѧ, гл҃юще дрꙋгъ къ́ дрꙋгꙋ.
кто̀ ѹ҆бо се́й е҆сть, ꙗ҆ко и҆ вѣтромъ повелѣва́етъ.
и҆ водѣ̀, и҆ послꙋшаютъ е҆го;

зач̑҇, л҃и·

И҆́ преидо́шѧ въ странꙋ гадари́нскꙋ, ꙗже е҆сть ѻ҆б онъ полъ галиле́а·

и҆з꙽шед꙽шꙋ же е҆мꙋ на́ землю, срѣте е҆го мꙋжь нѣќїи ѿ града, и҆же и҆мѧше бѣсы ѿ лѣтъ мно́гыхъ, и҆ в ри́зꙋ не ѻ҆блача́шесѧ, и҆ въ храмѣ не живѧше, н̂о въ гробѣхъ·

Ѹ҆зрѣв же і҆с҃а, и҆ възъпивъ припаде к немꙋ, и҆ гла́сомъ ве́лїемъ рече.
что̀ мн̂ѣ и҆ тебѣ і҆с҃е сн҃е б҃а вы́шнѧго;
молю́ ти сѧ, не мꙋч́и менѐ·

Повелѣ ѹ҆бо дꙋ́хꙋ нечи́стомꙋ, и҆зы́ти ѿ чл҃ка, ѿ мно́г꙽ б̂о лѣтъ въсхища́ше е҆го, и҆ вѧза́хꙋ е҆го ю҆́жи желѣ́зны, и҆ пꙋт́ы стрегꙋще е҆го, и҆ растръзаѧ ю҆́зы, гони́мъ бываше бѣс́омъ сквозѣ пꙋсты́нѧ·

Въпроси́ же е҆го і҆с҃ гл҃ѧ.
что̀ т̂и е҆сть и҆́мѧ;
ѻ҆́н же рече, легеѻ҆нъ.
ꙗ҆́ко бѣ́си мно́ѕи в꙽нидо́шѧ во́нь.
и҆ молѧ́хꙋ е҆го, да не повели́тъ и҆мъ в꙽ бе́з꙽днꙋ и҆тѝ·

Бѣ же т̂ꙋ ста́до свинїи мно́го, пасо́мо в꙽ горѣ̀, и҆ молѧ́хꙋ е҆го, да повели́тъ и҆мъ в т̂ы внити.
и҆ повелѣ и҆мъ·

и҆зшедше же бѣ́си ѿ чл҃ка, внидо́ша въ свинїа.
и҆ ѹ҆стремисѧ стадо по́ брегꙋ въ е҆зеро, и҆ і҆стопѐ·

Видѣвше же пасꙋщ́їи бы́вшее.
бѣжа́шѧ, и҆ възвѣсти́шѧ въ́ градѣ и҆ в се́лехъ·

И҆зыдо́шѧ же ви́дѣти бы́вшее, и҆ прїидо́шѧ къ і҆с҃ови, и҆ ѻ҆брѣто́шѧ чл҃ка сѣдѧ́ща, и҆з негоже бѣ́си и҆зыдо́ша, ѻ҆блъчена и҆ смы́слѧща, при ногꙋ і҆с҃овꙋ, и҆ ѹ҆боа́шасѧ·

Възвѣстишѧ же и҆мъ и҆ видѣвшеѝ, ка́ко сп҃се́сѧ бѣснова́выѝ·

И҆ моли е҆го весь народ̑ страны гадари́нскыа, ѿи́ти ѿ нихъ, ꙗ҆́ко стра́хомъ ве́лїем̑ ѻ҆дръжи́ми бѣ́хꙋ·

ѻ҆́н же влѣзъ в кора́бль, възвратисѧ·

Молѧ́ше же сѧ е҆мꙋ мꙋжъ, и҆з негоже и҆зыдо́шѧ бѣ́си, дабы̂ с нимъ былъ·

ѿпꙋсти же е҆го і҆с҃, гл҃ѧ.
въз꙽вратисѧ в домъ свои.
и҆ повѣдаи, е҆ли́ка т̂и сътворѝ б҃ъ·

И҆ і҆де по всемꙋ градꙋ проповѣ́даа, е҆ли́ка сътвори емꙋ іс҃·

зач̑҇, л҃ѳ·

Бы́сть же егда възвратисѧ іс҃, прїа́тъ его народ̑.
бѣхꙋ б̂о вс̂и чѧ́юще его·

И҆ с̂е прїиде мж̑ꙋ, емꙋже и́мѧ и҆аи́ръ, и҆ то́и кнѧзь со́нмищꙋ б̂ѣ, и҆ па̑ при ногꙋ іс҃овꙋ, молѧ́ше его вни́ти в домъ свой.
ꙗ҆́ко дщи еді́нород̑на б̂ѣ емꙋ, ꙗ҆ко лѣтъ двоена́десѧте, и҆ т̂а ѹ҆мира́ше·

Є҆гда же и҆дѧ́ше, наро́ди ѹ҆гнѣта́хꙋ его·

И҆ жена̀, сꙋщи в точе́нїи кро́ве ѿ двоюнадесѧте лѣтꙋ, ꙗ҆́же врачемъ и҆зда́вши вс̂е и҆мѣнїе, и҆ не възмо́же ни ѿ еді́ного и҆сцѣлѣти.
и҆ пристꙋ́пльши съзади коснꙋ́сѧ кра́а ри́зъ е҆го.
и҆ а҆бїе ст̂а то́къ кро́ве еа̀·

И҆ рече і҆с҃, кто̀ е҆сть коснꙋв́ыѝсѧ мнѣ;
ѿмѣта́ющим꙽ же сѧ всѣмъ.
рече петръ, и҆ і́же с нимъ.
наста́вниче, наро́ди ѻ҆дръжѧтъ т̂ѧ и҆ гнетꙋтъ, и҆ гл҃еши кт̂о е҆сть коснꙋ́выисѧ̀ мн̂ѣ;
і҆с҃ же рече, прикоснꙋсѧ мн̂ѣ нѣ́кто.
а҆зъ б̂о чюх̑ си́лꙋ и҆з꙽шед̑шꙋю и҆з мене·

Видѣвши же жена̀ ꙗ҆ко не ѹ҆таи́сѧ, трепе́щꙋщи прїиде, и҆ пад̑ши пред̑ ним̑, за нюже винꙋ прикоснꙋ́сѧ е҆мꙋ, повѣда е҆мꙋ пред̑ всѣми люд̑мѝ, и҆ ꙗ҆ко и҆сцѣлѣ а҆́бїе·

ѻ҆́н же рече е́и, дръзай дщ̂и, вѣра твоа сп҃сѐ т̂ѧ, и҆дѝ в꙽ ми́ръ·

Є҆ще е҆мꙋ гл҃ющꙋ, прїиде нѣкто ѿ а҆рхїсинаго́га, гл҃ѧ е҆мꙋ, ꙗ҆́ко ѹ҆мре дщи̂ твоа̀, не дви́жи ѹ҆чи́телѧ·

І҆с҃ же слы́шавъ, ѿвѣща̀ е҆мꙋ гл҃ѧ.
не бо́исѧ, то́кмо вѣ́рꙋй, и҆ сп҃се́на бꙋд́етъ·

Прише̑ же в домъ, не ѻ҆ста́ви нѝ е҆ді́ного внити, то́кмо петра и҆ і҆ѻа́нна и҆ і҆а́кова, и҆ ѿц҃а ѻ҆трокови́ца и҆ ма́тере·

Пла́кахꙋ же сѧ вс̂и, и҆ рыда́хꙋ еа̀·

ѻ҆́н же рече, не пла́читесѧ, не ѹ҆́мре б̂о, н̂о спит̑·

И҆ рꙋга́хꙋсѧ е҆мꙋ, вѣ́дѧще ꙗ҆́ко ѹ҆́мре·

ѻ҆́н же и҆з꙽гнавъ вонъ всѣхъ, и҆ е҆мъ за́ рꙋкꙋ еа̀, въз꙽гласѝ гл҃ѧ.
ѻ҆трокови́це в꙽ста́ни·

И҆ въз꙽вратисѧ дх҃ъ еа̀, и҆ въскр҃се а҆́бїе.
и҆ повелѣ да́ти е́й ꙗ҆сти.
и҆ диви́стасѧ роди́телѧ еа̀·

ѻ҆́н же повелѣ и́ма, никомꙋже повѣдати бы́вшее·

Глв̑҇а, ѳ҃·

зач̑҇, м҃·

Созва́в же ѻ҆банадесѧте, дастъ и҆́мъ силꙋ и҆ вла́сть на вс̂ѧ бѣс́ы, и҆ недꙋѓы цѣли́ти.
и҆ посла̀ и҆хъ проповѣдати црс̑҇твїе бж҃їе, и҆ и҆сцѣли́ти болѧ́щаѧ·

И҆ рече к нимъ, ничесоже възмѣте на пꙋть, ни жезла̀ н̂и пи́ры, н̂и хлѣба, н̂и сребра̀.
ни по двѣма ри́зома и҆мѣти·

И҆ во́ иже домъ вни́дете, тꙋ пребыва́ите, и҆ ѿтꙋдꙋ и҆сходи́те.

И҆ ели́цы а҆ще не прїе́млютъ васъ, и҆сходѧ́ще ѿ града того, и҆ пра́хъ ѿ ногъ ва́шихъ, ѿтрѧсѣте, въ свѣдѣтелство на нѧ·

И҆сходѧще же прохожа́хꙋ сквозѣ ве́си бл҃говѣствꙋюще, и҆ і҆сцѣлѧ́юще всю́дꙋ·

зач̑҇, м҃а·

Слы́шав же и҆род̑ четвертовластникъ быва́ющаѧ ѿ него вс̂ѧ, и҆ недоѹ҆мѣвашесѧ, зане гл҃емо б̂ѣ ѿ нѣ́кыхъ, ꙗ҆ко і҆ѻ҆а́ннъ въста̀ ѿ мр҃твыхъ.
ѿ и҆нѣх꙽ же, ꙗ҆́ко і҆лїа ꙗ҆́ви́сѧ·

ѿ дрꙋгых̑ же, ꙗ҆ко прро̑҇къ е҆ді́нъ ѿ дре́внихъ въскр҃се·

И҆ рече и҆́родъ.
і҆ѻ҆а́нна а҆зъ ѹ҆сѣкнꙋхъ.
кто же е҆сть се́и, ѻ҆ немже а҆зъ слы́шꙋ такова́ѧ;
и҆ і҆ска́ше ви́дѣти е҆го·

И҆ въз꙽вращъшесѧ а҆пс̑҇ли, повѣ́даша е҆мꙋ е҆ли́ка сътвори́шѧ·

И҆ пои́мъ и҆хъ ѿи́де е҆ді́нъ на мѣ́сто пꙋ́сто гра́да нарица́емаго виѳсаі́да·

Наро́ди же разꙋмѣ́вше, по немъ и҆до́шѧ·

и҆ прїемъ и҆хъ, гл҃аше и҆мъ ѻ҆ црс̑҇твїи бж҃їи.
и҆ требꙋющаѧ и҆сцѣленїѧ цѣлѧше·

дн҃ь же начатъ прекланѧ́тисѧ·

зач̑҇, м҃в·

Пристꙋ́пльше же ѻ҆́банадесѧте, реко́шѧ е҆мꙋ.
ѿпꙋсти народ̑, да шед̑ше въ ѻ҆крестныа ве́си и҆ се́ла, вита́ют̑, и҆ ѻ҆брѧ́щꙋтъ бра́шно, ꙗ҆ко зд̂ѣ в пꙋстѣ мѣстѣ е҆смы·

Рече же к ним꙽, дади́те и҆мъ в̂ы ꙗ҆́сти·

ѻ҆ни же рѣша, нѣсть ѹ҆ насъ вѧ́ще, то́кмо пѧть хлѣбъ, и҆ ры́бѣ дв̂ѣ.
а҆ще ѹ҆бо не шед̑ше м̂ы кꙋп́имъ въ вс̂ѧ люди сїа бра́шна.
бѣхꙋ б̂о мꙋжїи ꙗ҆́ко пѧть ты́сꙋщь·

Рече же къ ѹ҆чн҃комъ свои́мъ, посади́те и҆хъ на кꙋ́пы по пѧтидесѧтъ.
и҆ сътвори́шѧ та́ко, и҆ посади́шѧ и҆хъ вс̂ѧ·

Прїим же пѧть хлѣбъ и҆ ѻ́бѣ ры́бѣ, возрѣ́въ на́ нб҃о, блс̑҇ви и҆хъ, и҆ сломѝ, и҆ даа́ше ѹ҆чн҃комъ, пред̑ложи́ти наро́дꙋ.
и҆ ꙗ҆до́шѧ и҆ насы́тишѧсѧ вс̂и.
и взѧ́шѧ и҆збы́вшаа и҆м꙽ ѹ҆крꙋхы, ко́шѧ дв̂анадесѧте·

зач̑҇, м҃г·

И҆́ бысть е҆гда молѧ́шесѧ е҆ді́нъ, с ним̑ бѣхꙋ ѹ҆чн҃цы·

И҆ въпроси их̑ гл҃ѧ.
кого м̂ѧ гл҃ютъ наро́ди быти;
ѻ҆ни же ѿвѣща́вше, рѣша.
і҆ѻ҆а́нна крести́телѧ.
и҆нїи же, и҆лїю.
дрꙋѕїи же, ꙗ҆́ко прро̑҇къ нѣ́кїи ѿ дре́внихъ въскр҃се.

Рече же и҆мъ.
вы же кого м̂ѧ гл҃ете быти;
ѿвѣщав же петръ, рече.
х҃а бж҃їа·

ѻ҆́н же запрѣщь им̑, повелѣ̀ никомꙋже гл҃ати сего, рекъ, ꙗ҆́ко подоба́етъ сн҃ꙋ члчс̑҇комꙋ мно́го пострадати, и҆ і҆скꙋше́нꙋ быти ѿ ста́рецъ, и҆ а҆рхїере́й и҆ кни́жникъ, и҆ ѹ҆бїенꙋ бы́ти, и҆ третїи дн҃ь в꙽ста́ти·

зач̑҇, м҃д·

Гл҃аше же къ всѣмъ.
а҆́ще кто хо́щет̑ по мнѣ и҆тѝ, да ѿврьж́етсѧ себе, и҆ возметъ крс̑҇тъ свой на кїижд̑о дн҃ь, и҆ послѣ́дꙋет꙽ м̂и·

И҆же б̂о а҆ще хо́щет̑ дш҃ꙋ свою̀ спс̑҇тѝ, погꙋбит̑ ю҆̀.
иже бо погꙋбитъ дш҃ꙋ свою мене ради, се́и сп҃сет̑ ю҆̀·

Что̀ б̂о по́льзꙋетъ чл҃къ, приѻ҆брѣтъ ми́ръ ве́сь, себе же погꙋбивъ, и҆ли ѿтщети́въ;
и҆же б̂о а҆ще посты́дитсѧ менѐ, и҆ мои́хъ словес̑҇, сего сн҃ъ члчс̑҇кїи постыди́тсѧ, е҆гда прїидетъ въ сла́вѣ свое́й, и҆ ѿч҃їи, и҆ ст҃ыхъ а҆гг҃лъ·

Гл҃ю же вамъ въи́стинꙋ, сꙋть нѣцїи ѿ здѣ стоѧ́щих̑, и҆же не и҆́мꙋтъ вкꙋсити смр҃ти, до́ндеже ви́дѧт̑ црс̑҇твїе бж҃їе·

зач̑҇, м҃е·

Бысть же по словесѣхъ сих̑ ꙗ҆́ко дн҃їи ѻ҆́смъ·

И҆ пое́мъ петра, і҆ и҆ѻа́нна, і҆ и҆а́кова.
взы́де на́ горꙋ помоли́тисѧ.
и҆ бысть е҆гда молѧ́шесѧ, видѣнїе лица е҆го и́но.
и҆ ѻ҆дѣѧ́нїе е҆го бѣло блиста́асѧ·

И҆ с̂е мꙋж́ѧ дв̂а с нимъ гл҃юща, ꙗ҆же бѣ́ста моѷсїи і҆ и҆лїа, ꙗ҆́вльшасѧ в꙽ сла́вѣ.
гл҃аста же и҆сход꙽ е҆го, и҆же хотѧ́ше скончати въ і҆ерс̑҇ли́мѣ·

Пе́тръ же и҆ сꙋщаѧ с нимъ бѣхꙋ ѻ҆тѧгчени сномъ·

Ѹ҆бꙋж́д꙽ше же сѧ видѣша сла́вꙋ е҆го, и҆ ѻ́ба мꙋжа стоѧ́ща с нимъ·

И҆ бысть е҆гда раз꙽лꙋчистасѧ ѿ него, рече пе́тръ къ і҆с҃ꙋ, наста́вниче, добро̀ е҆сть намъ зд̂ѣ быти.
и҆ сътворим̑ сѣни тр̂и, е҆ді́нꙋ тебѣ, і҆ е҆ді́нꙋ моѷсе́ѻви, и҆ е҆ді́нꙋ и҆лїи, не вѣды е҆же гл҃аше·

с̂е же е҆мꙋ гл҃ющꙋ, бысть ѻ҆́блакъ свѣтел̑҇ и҆ ѻ҆сѣнѝ их̑.
ѹ҆боѧ́ша же сѧ в꙽шед̑шем̑ и҆мъ въ ѻ҆́блакъ, и҆ глс̑҇а бысть и҆зъ ѻ҆́блака, гл҃ѧ.
се́й е҆сть сн҃ъ мои възлюбленыи, того послꙋшаите.
и҆ егда бысть глс̑҇а, ѻ҆брѣтесѧ іс҃ е҆ді́н꙽.
и҆ тїи ѹ҆млъча́ша, и҆ никомꙋже въз꙽вѣсти́ша в꙽ т̂ы дн̂и ничесоже ѿ тѣх꙽ ꙗ҆́же видѣша·

зач̑҇, м҃ѕ·

Бысть же в꙽ про́чїи дн҃ь, съшед̑шемъ им̑ съ горы̀, срѣте его народъ мно́гъ·

и с̂е мꙋжь и҆з наро́да възъпѝ гл҃ѧ.
ѹ҆чт҃лю, молю̀ ти сѧ, при́ѕри на сн҃а моего, ꙗ҆́ко еді́нороденъ м̂и есть, и҆ с̂е дꙋхъ е҆́млетъ е҆го, и҆ внеза́пꙋ вопиетъ, и҆ прꙋжа́етсѧ с пѣнами, и҆ е́два ѿходитъ ѿ него съкрꙋша́а его.
и҆ моли́хсѧ ѹ҆ченикомъ твои́мъ, да и҆жденꙋтъ е҆го, и҆ не възмого́ша·

ѿвѣщав же і҆с҃, рече.
ѽ ро́де невѣрный и҆ раз꙽вращен̑҇, доко́лѣ бꙋ́дꙋ в꙽ вас̑҇, и҆ трьплю в̂ы;
приведи м̂и сн҃а твое҆го сѣм́о, е҆ще же грѧдꙋщ́ꙋ е҆мꙋ, повр́ьже е҆го бѣсъ, и҆ сътрѧсѐ.
запрѣти же і҆с҃ дꙋ́хови нечи́стомꙋ, і҆ и҆сцѣлѝ ѻ҆трока, и҆ вдастъ е҆го ѿц҃ꙋ е҆го·

дивлѧ́хꙋ же сѧ вс̂и ѻ҆ вели́чїи бж҃їи·

зач̑҇, м҃з·

Всѣм꙽ же чꙋдѧ́щемъсѧ ѻ҆ всѣхъ ꙗ҆́же творѧше і҆с҃, рече къ ѹ҆чеником꙽ свои҆мъ.
вложи́те в̂ы въ ѹ҆ши ваши словеса̀ сїа.
сн҃ъ б̂о члчс̑҇кїи и҆́мать преда́тисѧ в рꙋцѣ члчс̑҇тѣ·

ѻ́ни́ же не разꙋмѣшѧ гл҃а сего, б̂ѣ б̂о прикровенъ ѿ ни́хъ, да не ѻ҆щꙋтѧтъ е҆го.
и҆ боѧ́хꙋсѧ въпроси́ти е҆го ѻ҆ гл҃ѣ семъ·

Вни́де же помышле́нїе в нихъ, кт̂о и҆хъ вѧ́щшїи б̂ы былъ·

І҆с҃ же вѣды помышле́нїе срд̑ца и҆хъ, прї́емъ ѻ҆троча̀, поста́вї е҆̀ ѹ҆ себѐ, и҆ рече и҆мъ.
и҆же а҆ще прїиметъ ѻ҆тороча́ с̂е въ и҆мѧ моѐ, менѐ прїе́млетъ.
і҆ и́же а́ще менѐ прїе́млетъ, прїе́млетъ посла́вшаго м̂ѧ.
и҆же б̂о ме́ншїи е҆сть в꙽ вас̑҇, се́й е҆сть вели́къ·

зач̑҇, м҃и·

Ѿвѣща́в же і҆ѻ҆а́ннъ, рече, наста́вниче, видѣхомъ нѣ́кое҆го ѻ҆ и҆мени твое́мъ и҆згонѧ́ща бѣсы, и҆ въз꙽брани́хомъ е҆мꙋ, ꙗ҆́ко в꙽ слѣдъ не хо́дит꙽ с нами·

И҆ рече к немꙋ і҆с҃, не брани́те.
и҆же б̂о нѣсть на вы̀, по васъ е҆сть·

зачало·

Бы́сть же е҆гда скончава́хꙋсѧ дн҃їе́ въсхоженїю е꙼го, и҆ то́й ѹ҆твердѝ лицѐ своѐ и҆тѝ въ і҆е҆рс̑҇ли́мъ.
и҆ посла̀ вѣ́ст꙽никы пред̑ лицемъ свои́мъ.
і҆ и҆з꙽шедъше внидо́ша в꙽ ве́сь самарѧнскꙋ, ꙗ҆ко да ѹ҆гото́вѧтъ е҆мꙋ.
и҆ не прїа́шѧ е҆го, ꙗ҆́ко лице е҆го б̂ѣ грѧды̀ въ і҆е҆рс̑҇ли́мъ·

Видѣвша же ѹ҆ченика е҆го, і҆а́ковъ і҆ѻ҆а́ннъ, рѣста.
г҃и, хо́щеши л̂и рече́вѣ да ѻ҆́гнь сни́дет̑ с꙽ нб҃се, и҆ потребитъ и҆хъ, ꙗ҆́коже і҆лїа сътворѝ;
ѻ҆бра́щь же сѧ і҆с҃ запрѣтѝ и́ма, и҆ рече.
не вѣ́ста ко́его дх҃а е҆ста в̂ы.
сн҃ъ б̂о члчс̑҇кыи не прїиде дш҃ъ члчс̑҇кых꙽ погꙋбити, н̂о спс̑҇тѝ.
і҆ и҆до́шѧ въ и́нꙋ весь·

зач̑҇. м҃ѳ·

Бысть же и҆дꙋщ́емъ и҆мъ по пꙋти, рече нѣкїи к꙽ немꙋ, и҆дꙋ̀ по тебѣ ꙗ҆́може а҆́ще и́деши г҃и·

И҆ рече е҆мꙋ і҆с҃.
ли́си ꙗ҆́звины и́мꙋть, и҆ птицѧ нбс̑҇ныѧ гнѣзда, сн҃ъ же члчс̑҇кїи не и҆́мать гд̂ѣ главꙋ̀ под̑клони́ти·

Рече же къ дрꙋгомꙋ.
ходи в꙽ слѣдъ мене·

ѻ҆н же рече, г҃и, повелѝ м̂и шед̑ше прежде погреб꙽стѝ ѿц҃а мое҆го·

Рече же е҆мꙋ і҆с҃.
ѻ҆ста́ви мр҃твыѧ̀ погребъстѝ своѧ мр҃твецѧ, ты же шед̑ възвѣщай црс̑҇твїе бж҃їе·

Рече же и҆ дрꙋгїи.
и҆дꙋ̀ по тебѣ г҃и.
пре́жд̑е же повелѝ м̂и ѿвѣща́ти м̂и сѧ, и҆же сꙋть в꙽ домꙋ моем̑·

Рече же к꙽ немꙋ і҆с҃.
никтоже възложъ рꙋ́кꙋ свою на ра́ло, и҆ зрѧ̂ в꙽спѧть, ѹ҆пра́вленъ е҆сть въ црс̑҇твїи бж҃їи·

Глв̑҇а, і҃·

зач̑҇, н҃·

По си́х же ꙗ҆́вѝ г҃ь і҆ и҆нѣхъ сед̑мъдесѧтъ, и҆ посла̀ и҆хъ по двѣма предъ лицемъ свои́мъ, въ всѧкъ грд̑а и҆ мѣсто, ꙗ҆́може хотѧше самъ и҆тѝ·

Гл҃аше же к нимъ.
жатва ѹ҆бо мно́га, дѣл́ателїи же ма́ло·

Моли́тесѧ ѹ҆бо господи́нꙋ жа́твѣ, да и҆зведетъ дѣлателѧ на жа́твꙋ свою̀·

И҆дѣте, с̂е а҆зъ посыла́ю в̂ы ꙗ҆́ко а҆гньцѧ, посредѣ влъко́въ·

Не носи́те влага́лищѧ, ни пи́ры, ни сапоги.
и никогоже на пꙋти цѣлꙋите·

Во́нь же ащ́е домъ вни́дете, пе́рвѣе гл҃ите, ми́ръ до́мꙋ семꙋ.
и҆ а҆ще ѹ҆бо бꙋ́детъ т̂ꙋ сн҃ъ ми́ра, почи́етъ на немъ ми́ръ вашь.
а҆́ще ли же, н̂и, к вамъ въз꙽врати́тсѧ·

В то́м же домꙋ пребыва́ите, ꙗ҆́дꙋщ́е и҆ пїю́ще ꙗ҆́же сꙋть ѹ҆ нихъ.
досто́инъ б̂о е҆сть дѣ́латель м꙽зды̀ своеа̀·

Не преходи́те и҆з́ домꙋ в꙽ домъ·

И҆ вонже а҆ще град̑ входите, и҆ прїе́млютъ вы̂.
ꙗ҆́ди́те пред̑лага́емаа вамъ, и҆ і҆сцѣли́те недꙋж́ныа и҆же сꙋть в немъ, и҆ гл҃ите и҆мъ.
прибли́жисѧ на в̂ы црс̑҇твїе божїе·

Во́нже а҆́ще град̑ входите, и҆ не прїе́млютъ васъ, и҆з꙽шед̑ше на распꙋтїѧ е҆го рцѣте, и҆ прахъ прилѣпшїи насъ ѿ града ва́шего ѿтрѧса́емъ вам̑.
ѻ҆баче с̂е вѣдите, ꙗ҆ко прибли́жисѧ на вы̀ црс̑҇твїе бж҃їе·

Гл҃ю вамъ, ꙗ҆́ко содомлѧномъ в꙽ дн҃ь то́и ѿрад̑нѣе бꙋ́детъ, неже гра́дꙋ томꙋ·

Го́ре тебѣ хоразинъ.
го́ре тебѣ виѳсаи́да.
ꙗ҆́ко а́ще в꙽ тѷрѣ и҆ сидо́нѣ бышѧ си́лы были бы́вшаѧ в꙽ ва́ю, дре́вле ѹ҆бо въ вре́тищи и҆ пе́пелѣ сѣдѧ́ще пока́ѧлисѧ быша.
ѻ҆ба́че тѷрꙋ и҆ сидо́нꙋ ѿрад̑нѣе бꙋ́детъ на сꙋдѣ, неже ва́ма·

И҆ т̂ы капернаѹ҆ме, и҆же до нб҃съ възнесыисѧ, до а́да низведе́шисѧ·

зач̑҇, н҃а·

Слꙋшааѝ васъ, менѐ слꙋш́аетъ.
и ѿмѣтааѝсѧ васъ, мене ѿмѣта́етсѧ.
ѿмѣта́аѝ же сѧ мене, ѿмѣта́етсѧ посла́вшаго м̂ѧ·

Въз꙽врати́шѧ же сѧ сед̑мьдесѧтъ с ра́достїю гл҃юще, г҃и, и҆ бѣ́си повинꙋютсѧ нам̑ ѻ҆ и́мени твоемъ·

Рече же и҆мъ.
видѣхъ сатанꙋ ꙗ҆́ко молнїю с꙽ нб҃се спад̑ша·

зач̑҇·

Се̂ даю̀ вамъ власть настꙋпати на змїю̀ и҆ на скорпїю́, и҆ на всю̀ си́лꙋ вражїю.
ничесоже васъ вреди́тъ·

ѻ҆баче ѻ҆ семъ не радꙋитесѧ, ꙗ҆́ко дꙋ́си вам̑ повинꙋю́тсѧ.
радꙋите же сѧ ꙗ҆́ко и҆мена̀ вашѧ напи́сана сꙋть на нб҃сех̑·

В то́и часъ възра́довасѧ дх҃омъ і҆с҃, и҆ рече.
и҆сповѣдаю ти сѧ ѿч҃е, г҃и нб҃си и҆ землѝ, ꙗ҆́ко ѹ҆таи́лъ е҆си сїа ѿ премꙋ́дрꙋхъ и҆ разꙋм́ныхъ, и҆ ѿкрылъ е҆си т̂а младе́нцемъ.
е́й ѿч҃е, ꙗ҆́ко та́ко бысть бл҃говоле́нїе пред̑ тобо́ю·

зач̑҇, н҃в·

И҆́ ѻ҆бра́щсѧ къ ѹ҆чн҃икомъ, рече.
всѧ̀ мн̂ѣ преда́на бы́ша ѿ ѻ҆ц҃а мое҆го.
и҆ никтоже вѣсть кт̂о е҆сть сн҃ь, то́кмо ѿц҃ь.
и҆ кт̂о е҆сть ѿц҃ь, то́кмо сн҃ь;
и҆ е҆мꙋже а҆ще хо́щетъ сн҃ь ѿкры́ти.
и҆ ѻ҆бра́щсѧ къ ѹ҆чн҃комъ е҆ді́нъ рече·

Блаже́нѣ ѻ҆́чи ви́дѧщеѝ ꙗ҆́же ви́дите.
гл҃ю б̂о вамъ, ꙗ҆́ко мно́ѕи прро̑҇цы и҆ цр҃їе въсхотѣшѧ ви́дѣти, ꙗ҆́же в̂ы ви́дите, и҆ не ви́дѣша.
и҆ слы́шати, ꙗ҆́же слы́шите, и҆ не слы́шашѧ·

зач̑҇, н҃г·

И҆́ се зако́нникъ нѣќїи въста̀, и҆скꙋша́а е҆го и҆ гл҃ѧ.
ѹ҆чт҃лю, чт̂о сътвори́въ животъ вѣчныи наслѣдꙋю;
ѻ҆́н же рече к немꙋ.
в꙽ зако́нѣ чт̂о пи́сано е҆сть;
ка́ко чтеши;
ѻ҆́н же ѿвѣщавъ рече.
възлю́биши г҃а б҃а твое҆го ѿ всего срд̑ца твое҆го, и҆ ѿ всеа̀ дш҃а твоеа̀, и҆ всею̀ крѣпостїю твоею̀, и҆ всм̑ѣ помышле́нїемъ твои́мъ.
и҆ бли́жнѧго свое҆го ꙗ҆́ко самъ себѐ·

Рече же е҆мꙋ.
пра́во ѿвѣща̀, с̂е сътворѝ, и҆ жи́въ бꙋ́деши·

ѻ҆́н же хотѧ ѻ҆пра́вдитисѧ самъ, рече къ і҆с҃ꙋ.
и҆ кто̀ е҆сть бли́жнїи мой;
ѿвѣщав же і҆с҃, рече·

Чл҃къ нѣ́кїи схожд̑а́ше ѿ і҆е҆рлс̑҇и́ма въ і҆е҆рихонъ, и҆ в разбо́йникы впаде, и҆же съвле́кше е҆го, и҆ ꙗ҆́звы възложи́вше ѿи҆до́шѧ, ѻ҆ста́вльше е҆лѣ жи́ва сꙋща·

по слꙋ́чаю же сщ҃е́нникъ нѣкїи схожда́ше пꙋте́мъ тѣмъ, и҆ видѣв꙽ е҆го, мимои́де·

Та́кожд̑е же и҆ леввит̑ бывъ на томъ мѣ́стѣ, пришед̑ и҆ видѣвъ, ми́мои́де·

Самарѧни́нъ же нѣ́кто грѧды́ѝ прїиде над̑ него, и҆ видѣ́въ е҆го млс̑҇рдова.
и҆ пристꙋ́пль ѻ҆бѧза̀ стрꙋ́пы е҆го, възлива́ѧ ма́сло и҆ вино̀.
всади́в꙽ же е҆го на свой скотъ, приведе е҆го в꙽ гости́нницꙋ, и҆ прилежа̀ е҆мъ·

И҆́ наѹ́трїа и҆з꙽шедъ, и҆зем꙽ дв̂а сре́бреника дастъ гости́нникꙋ.
и҆ рече е҆мꙋ, прилежѝ е҆мъ.
и҆ е҆же а́ще прїиждиве́ши, а҆зъ е҆гда въз꙽вращꙋсѧ въздамъ т̂и·

Кт̂о ѹ҆бо ѿ тх̑ѣ трїехъ бли́жнїи мни́тъ ти сѧ бы́ти в꙽пад̑шемꙋ в разбо́иникы;
ѻ҆́н же рече, сътвори́выѝ млс̑҇ть с нимъ·

Рече же е҆мꙋ і҆с҃.
и҆дѝ и т̂ы творѝ та́кожд̑е·

зач̑҇, н҃д·

Бы́сть же ходѧ́щемъ и́мъ, и҆ самъ вни́де в ве́сь нѣ́кꙋю.
жена же нѣ́каа̀ и́менемъ марѳа прїа́тъ е҆го в꙽ домъ свой.
и҆ сестра̀ е́й б̂ѣ нарицаемаа ма́рїа, ꙗ҆же и҆ сѣдъши при́ ногꙋ і҆с҃овꙋ, слы́шаше сло́во е҆го·

Ма́рѳа же млъвѧше ѻ҆ мно́ѕѣ слꙋж́бѣ.
ста́вши же рече.
г҃и, небреже́ши ли, ꙗ҆́ко сестра̀ моа̀ е҆ді́нꙋ м̂ѧ ѻ҆ста́ви слꙋжи́ти;
рцѝ ѹ҆бо е́й, да м̂и помо́жетъ·

ѿвѣща́в же і҆с҃, речѐ е́й.
ма́рѳа ма́рѳа пече́шисѧ, и҆ млъ́виши ѻ҆ мно́зѣ.
е҆ді́но же е҆сть на потре́бꙋ.
ма́рїа же бл҃гꙋю часть и҆збра̂, ꙗ҆́же не ѿи́мет꙽сѧ ѿ неѧ̀·

Глв̑҇а, а҃і·

зач̑҇, н҃е·

И бысть в꙽негда̀ быти е҆мꙋ на мѣ́стѣ нѣ́кое҆мъ молѧ́щꙋсѧ, и҆ ꙗ҆́ко преста̀, речѐ нѣкїи ѿ ѹ҆чн҃къ е҆го к немꙋ.
г҃и, наѹ҆чѝ н̂ы моли́тисѧ, ꙗ҆́коже і҆ и҆ѻа́ннъ наѹ҆чѝ ѹ҆ченикы своѧ̀·

Рече же и҆мъ.
е҆гда мо́литесѧ, гл҃ите.
ѻ҆́ч҃е нашъ, и҆же на нб҃сехъ , да ст҃и́тсѧ и҆́мѧ твоѐ. да прїидетъ црс̑҇твїе твое.
да бꙋ́детъ волѧ твоа̀, ꙗ҆́ко на́ нб҃си и҆ на земли.
хлѣбъ нашъ насꙋщныи подава́й нам̑ на всѧкъ дн҃ь.
и҆ ѻ҆ста́ви намъ грѣхы на́ша.
и҆бо и҆ са́ми ѻ҆ставлѧ́е҆мъ всѧ́комꙋ длъжникꙋ на́шемꙋ.
и҆ не в꙽веди насъ въ и҆скꙋше́нїе, н̂о и҆зба́ви нас̑҇ ѿ лꙋка́ваго·

И҆ рече к нимъ.
кт̂о ѿ васъ и҆мать дрꙋ́га, і҆ и́детъ к немꙋ полꙋ́нощи, и҆ речетъ е҆мꙋ, дрꙋже, даждъ м̂и в꙽заи́мъ тр̂и хлѣбы.
понеже дрꙋгъ прїиде с пꙋти къ мнѣ, и҆ не и҆мамъ чесо прд̑еложити е҆мꙋ·

И҆ то́й и҆зъ ѹ́трьѹ́дꙋ ѿвѣщавъ речетъ.
не творѝ м̂и трꙋды̀ , ѹже дверѝ затворены сꙋть, и҆ дѣти моѧ̀ со мною на ло́жи сꙋть, не могꙋ в꙽ста́въ да́ти тебѣ·

Гл҃ю же вамъ, а҆ще и҆ не дастъ е҆мꙋ в꙽ставъ, зане дрꙋгъ е҆мꙋ е҆сть, н̂о за безъѻ́чьство е҆го в꙽ста́въ дастъ е҆мꙋ е҆ли́ка требꙋ́етъ·

зач̑҇, н҃ѕ·

И҆́ а́зъ гл҃ю вамъ.
проси́те, и҆ дастъсѧ вамъ.
и҆ща́те, и҆ ѻ҆брѧ́щете.
тлъцѣте, и҆ ѿвр́ьзетсѧ вамъ·

Всѧкъ б̂о просѧѝ, прїе́млетъ.
і҆ и҆щаѝ, ѻ҆брѣта́етъ.
и҆ тлъкꙋщемꙋ ѿвр́ьзетсѧ·

Кото́раго же вас̑҇ ѿц҃а въпроситъ сн҃ъ хлѣба, е҆да ка́мень подастъ е҆мꙋ;
и҆л̂и ры́бы, е҆да в꙽ ры́бы мѣсто змїю подастъ е҆мꙋ;
и҆л̂и а҆ще про́ситъ ꙗ҆́ица̀, е҆да подастъ е҆мꙋ скорпїю;
а҆ще ѹ҆бо в̂ы зл̂и сꙋще, ѹ҆мѣ́ете даанїа бл҃га даа҆ти ча́домъ ва́шимъ.
ко́лми паче ѿц҃ъ и҆же с꙽ нб҃се дастъ дх҃ъ ст҃ъ просѧ́щим̑ ѹ҆ него;

зач̑҇, н҃з·

И҆ бѣ и҆згонѧ бѣ́са̀, и҆ то́й б̂ѣ нѣмъ.
бы́сть же бѣсꙋ и҆з꙽шед̑шꙋ, прогл҃а нѣмыи, и҆ диви́шасѧ наро́ды·

Нѣцыи ж ѿ нихъ рѣшѧ, ѻ҆ веелзевꙋ́лѣ кнѧѕи бѣсовстѣмъ и҆згонитъ бѣ́сы·

дрꙋѕїи же и҆скꙋша́юще, зна́менїѧ ѿ него и҆ска́хꙋ с нб҃се·

ѻ҆́н же вѣ́ды помышленїѧ и҆хъ, рече и҆мъ.
всѧ́ко црс̑҇тво са́мо в себѣ раздѣлѧ́асѧ, запꙋстѣ́етъ.
и҆ домъ на домъ, па́даетъ.
а҆ще же и҆ сатана̀ самъ в себѣ раздѣли́сѧ.
ка́ко ста́нетъ црс̑҇тво е҆го;
ꙗ҆́ко гл҃ете, ѻ҆ веелзевꙋ́лѣ и҆згонѧ́ща м̂ѧ бѣ́сы;
а҆ще же а҆зъ ѻ҆ веельзевꙋ́лѣ и҆згоню бѣсы, сн҃ве ваши ѻ҆ ком̑ и҆зго́нѧтъ;
сего ради тїи бꙋ́дꙋтъ вамъ сꙋдїѧ·

А҆ще ли же ѻ҆ пе́ръстѣ бж҃їи и҆згоню̀ бѣс́ы, ѹ҆бо пости́же на васъ црс̑҇твїе бж҃їе·

Є҆гда крѣпъкїи въѻ҆рꙋжи́всѧ хранитъ свой двор̑҇, въ смиренїи сꙋть имѣнїа е҆го·

Є҆гд̑аже крѣплїи нашедъ побѣдитъ е҆го, вс̂е ѻ҆рꙋжїе е҆го во́зметъ на неже ѹ҆поваше, и҆ корысть е҆го раздаетъ·

зач̑҇, н҃и·

И҆́же нѣсть со мно́ю, на́ мѧ е҆сть.
и і́же не събира́етъ со мно́ю, растача́етъ·

Є҆гда же нечи́стыи дꙋхъ и҆зы́детъ ѿ чл҃ка, прехо́дитъ сквозѣ безвод̑наѧ мѣ́ста, и҆ща̀ поко́а, и҆ не ѻ҆брѣта́а, гл҃етъ.
въз꙽вращꙋсѧ в꙽ дом̑ мой ѿнꙋ́дꙋже и҆зы́дохъ.
и҆ пришед̑ ѻ҆брѧ́щетъ и҆̀ помете́нъ и҆ ѹ҆крашен꙽.
тогда и҆́детъ и҆ пои́метъ сед̑мь дрꙋгых̑ дꙋховъ, горшихъ себе, и҆ вшед̑ше живꙋтъ т̂ꙋ.
и҆ быва́ютъ послд̑ѣнѧа чл҃кꙋ томꙋ го́рша прь́вых̑·

Бы́сть же е҆гда гл҃аше сїа.
възвд̑и́гши нѣ́каа жена̀ гласъ ѿ наро́да, рече е҆мꙋ.
блаже́но чре́во носи́вшее т̂ѧ, и҆ сосцѧ̀, ꙗ҆́же е҆си ссалъ·

ѻ҆́н же рече.
тѣмже ѹ҆бо бл҃жени слы́шѧщеѝ сло́во бж҃їе, и҆ хранѧ́ще е҆̀·

зач̑҇, н҃ѳ·

Наро́дом же събира́ющимсѧ, начат꙽ гл҃ати.
ро́дъ се́и лꙋкавъ е҆сть, зна́менїа и҆́щетъ и҆ зна́менїе не дастъсѧ е҆мꙋ, то́кмо зна́менїе и҆ѻ́ны прро̑҇ка·

Ꙗ҆́коже б̂о бы́сть и҆ѻ́на зна́менїе ниневи́томъ, та́ко бꙋ́детъ и҆ сн҃ъ члчс̑҇кїи ро́дꙋ семꙋ·

цр҃ца ю҆́ж꙽скаа в꙽станетъ на сꙋдъ с мꙋжи ро́да сего, и҆ ѻ҆сꙋди́тъ и҆хъ.
ꙗ҆́ко прїиде ѿ конецъ землѧ слы́шати премꙋ́дрость соло́моновꙋ.
и҆ с̂е мно́жае соло́мона зд̂ѣ·

Мꙋжїе ниневи́тьстїи в꙽ста́нꙋтъ на сꙋдъ с ро́дом꙽ симъ, и҆ ѻ҆сꙋ́дѧтъ и҆̀, ꙗ҆ко пока́ашасѧ про́повѣдїю и҆ѻ́ниною.
и҆ с̂е мно́жае и҆ѻ́ны зд̂ѣ·

Никтоже ѹ҆бо свѣти́л꙽ника вжегъ, въ скро́вѣ полага́етъ, ни под̑ спꙋдомъ, н̂о на свѣти́лницѣ, да входѧ́щеѝ свѣтъ ви́дѧтъ·

зач̑҇, ѯ҃·

Свѣти́лникъ тѣлꙋ е҆сть ѻ҆́ко.
е҆гда у҆бо ѻ҆́ко твоѐ про́сто бꙋ́детъ, все тѣло твое свѣтло бꙋ́детъ.
е҆гда же лꙋка́во бꙋ́детъ, и҆ тѣ́ло твоѐ те́мно.
блюди ѹ҆бо, е҆да свѣтъ и҆же в тебѣ, тм̂а е҆сть.
а҆ще б̂о тѣ́ло твоѐ вс̂е свѣтло, не и҆мы̀ нѣќїа части те́мны, бꙋ́детъ свѣтло вс̂е, ꙗ҆́ко с̂е е҆гда свѣти́лникъ блиста́нїемъ просвѣща́етъ т̂ѧ·

Є҆гда же гл҃аше, молѧше е҆го фарїсе́й нѣ́кїи, да ѻ҆бѣдꙋетъ ѹ҆ него.
в꙽шед̑ же, възле́же·

фарїсе́й же видѣвъ диви́сѧ, ꙗ҆́ко не пре́жде крс̑҇ти́сѧ прь́вѣе ѻ҆бѣда·

Рече же г҃ь к꙽ немꙋ.
нн҃ѣ в̂ы фарїсе́е внѣшнее стклѧни́ци и҆ блюдꙋ ѻ҆чища́ете, внꙋтренее же ва́ше, полно грабленїа е҆сть и҆ лꙋкав꙽ства·

Безꙋ́мнїи, не и́же ли сътворѝ в꙽нѣшнее, и҆ внꙋтренее сътворилъ е҆сть;
ѻ́ба́че в сꙋщихъ дади́те млс̑҇тынѧ, и҆ с̂е вс̂ѧ чи́ста вамъ бꙋдꙋтъ·

зач̑҇, ѯ҃а·

Но го́ре вамъ фарїсе́ѻм̑, ꙗ҆́ко ѻ҆десѧ́тьствꙋете ѿ мѧ́твы и҆ пига́на, и҆ всѧ́кого зе́лїа, и҆ ми́мохо́дите сꙋдъ и҆ любве бж҃їа.
сїа же подоба́ше твори́ти, и҆ ѻ҆нѣхъ не ѻ҆ставлѧ́ти·

Го́ре вам꙽ фарїсеѻ́мъ, ꙗ҆́ко лю́бите пред̑сѣданїа на со́нмищыхъ.
и҆ цѣлованїѧ на тръжищыхъ·

Го́ре вамъ кни́жницы и҆ фарїсе́е лицемѣ́ри, ꙗ҆́ко е҆сте ꙗ҆́ко гро́би невѣ́доми.
и҆ чл҃цы ходѧ́щеѝ врьхꙋ не вѣ́дѧтъ·

ѿвѣщав же нѣкїи ѿ зако́нникъ, рече е҆мꙋ.
ѹ҆чт҃лю, сїа гл҃ѧ, и҆ намъ досажд̑а́еши·

ѻ҆́н же рече, и҆ вамъ зако́нникомъ го́ре, ꙗ҆́ко наклада́ете на чл҃кы бремена̀ неѹ҆добь носи́ма, и҆ са́ми е҆ді́нѣмъ пръ́стомъ ва́шимъ не прикаса́етесѧ бременем̑·

зач̑҇, ѯ҃в·

Го́ре вамъ, ꙗ҆ко ѕи́жд̑ете гро́бы прро̑҇к꙽.
ѿц҃ы же ваши и҆зби́шѧ и҆хъ, ѹ҆бо свѣдѣтельствꙋете и҆ събл҃говолите дѣломъ ѿц҃ь ва́ших̑.
ꙗ҆́ко тїи ѹ҆бо и҆зби́шѧ и҆хъ, вы же ѕи́жд̑ете и҆хъ гро́бы·

Сего ради и҆ премꙋ́дрость бж҃їа рече.
послю̀ в ни́хъ прро̑҇кы, и҆ а҆пс̑҇лы, и҆ ѿ них̑ ѹ҆бїютъ и і҆жд̑енꙋтъ, да взы́щетъсѧ кро́вь всѣхъ прро̑҇къ, пролива́емаа̀ ѿ сложенїѧ ми́рꙋ, ѿ рода сего, ѿ крове а҆́велѧ, до кро́ве заха́рїа, поги́бшаго межд̑ꙋ ѻ҆лтаремъ и҆ хра́момъ.
е́й гл҃ю вамъ, в꙽зы́щетсѧ ѿ рода сего·

Го́ре вамъ зако́нникомъ.
ꙗ҆́ко взѧ́сте ключь разꙋмѣнїа.
сами не внидо́сте, и҆ входѧ́щымъ възбрани́сте·

Гл҃ющꙋ же е҆мꙋ сїа к нимъ, нача́шѧ кни́ж꙽ницы и҆
фарїсе́е бд̑ѣ́нѣ гнѣватисѧ на́нь, и҆ преста́ати е҆го ѻ҆ мно́ѕѣ, ла́юще е҆го, и҆́щꙋще ѹ҆лови́ти нѣ́что ѿ ѹ҆стъ е҆го, да на́нь въз꙽гл҃ютъ·

Глв̑҇а, в҃і·

Ѿ нихже събра́вшемсѧ тмам̑ наро́да, ꙗ҆ко попира́ти дрꙋгъ дрꙋга, начатъ гл҃ати ѹ҆ченикомъ своим̑ пр́ъвѣе.
внемлѣте себѣ ѿ кваса фарисейска, е҆же е҆сть лицемѣ́рїе·

зач̑҇, ѯ҃г·

Ничтоже б̂о покрове́но е҆сть, е҆же не ѿкры́етсѧ.
и та́йно, е҆же не разꙋмѣетсѧ. зане е҆ли́ка въ тмѣ рѣ́сте въ свѣтѣ ѹ҆слы́шитсѧ.
и҆ е҆же къ ѹ҆́хꙋ гл҃асте въ храмѣхъ, проповѣстьсѧ на кровѣхъ·

Гл҃ю же вамъ дрꙋгомъ свои́мъ, не ѹ҆бо́йтесѧ ѿ ѹ҆бива́ющихъ тѣ́ло, и҆ потомъ не могꙋщихъ ли́шше чт̂о сътворити.
сказа́ю же вамъ, кого̀ ѹ҆боите́сѧ, ѹ҆бо́йтесѧ и҆мꙋщ́аго власть по ѹ҆бїе́нїи въврещѝ в꙽ де́бръ ѻ҆́гненꙋю.
е́й гл҃ю вамъ, того ѹ҆бо́йтесѧ·

Не пѧт̑ ли пти́цъ цѣнитсѧ пѣ́нѧзема двѣма, и҆ ни е҆ді́на ѿ нихъ нѣсть забве́на пред̑ бм҃ъ.
н̂о и҆ власѝ главы̀ ва́шеѧ̀ вси и҆зъчте́ни сꙋть.
не ѹ҆боитесѧ ѹ҆бо, мно́ѕѣхъ пти́цъ ѹ҆́н꙽ши е҆сте в̂ы·

зач̑҇, ѯ҃д·

Гл҃ю же вамъ.
всѧкъ и҆же а҆ще и҆сповѣсть м̂ѧ предъ чл҃кы, и҆ сн҃ъ члчс̑҇кїи и҆сповѣсть е҆го пред̑ а҆гг҃лы бж҃їими.
а҆ ѿвръгїи́сѧ мене пр̀ед̑ чл҃кы, ѿвръженъ бꙋ́детъ пред̑ а҆гг҃лы бж҃їими·

И всѧкъ и҆же речетъ сло́во на́ сн҃а чл҃ческаго, ѻ҆ста́витсѧ е҆мꙋ.
а҆ на ст҃го дх҃а хꙋли́вшемꙋ, не ѻ҆ста́витсѧ·

Єгда же приведꙋтъ в̂ы на собо́рища, и҆ власти и҆ влд̑чьства, не пецѣтесѧ, ка́ко, и҆ли чт̂о ѿвѣща́ете, и҆ли чт̂о речете.
ст҃ыи б̂о дх҃ъ наѹ҆читъ в̂ы в то́й часъ, ꙗ҆́же подобает̑ рещѝ·

зач̑҇, ѯ҃е·

Рече же е҆мꙋ нѣ́кїи ѿ наро́да, ѹ҆чителю, рц̂и братꙋ моемꙋ раздѣли́ти со мно́ю достоа́нїе·

ѻ҆н же рече е҆мꙋ.
чл҃че, кто̀ м̂ѧ поста́ви сꙋдїю, и҆ли дѣли́телѧ над̑ вами;
рече же к ним̑·

блюдѣте и҆ храни́тесѧ ѿ лихои́мъства.
ꙗ҆ко не ѿ и҆збы́тка комꙋ живот̑ е҆го е҆сть ѿ и҆мѣ́нїѧ е҆го·

зач̑҇, ѯ҃ѕ·

Рече же при́тчꙋ к ни́мъ гл҃ѧ.
чл҃кꙋ нѣкое҆мꙋ бога́тꙋ ѹ҆гобзисѧ ни́ва, и҆ мы́шлѧше в себѣ гл҃ѧ.
что̀ сътворю̀, ꙗ҆́ко не и́мамъ гд̂ѣ събрати плодо́въ мои҆хъ;
и҆ рече, с̂е сътворю.
разорю житницѧ моѧ̀, и҆ болшѧ съзи́ждꙋ.
и́ съберꙋ т̂ꙋ вс̂ѧ жи́та моѧ и҆ бл҃га́ѧ моѧ.
и҆ рекꙋ дш҃и мое́й.
дш҃е, им́аши мно́га бл҃га, лежа́ща на лѣта мно́га.
почива́й, ꙗ҆́ждъ, пїи́, веселисѧ·

Рече же е҆мꙋ б҃ъ.
безꙋм́не, в сїю нощ꙽ дш҃ꙋ твою и҆стѧ́жꙋтъ ѿ тебе.
а҆ ꙗ҆же ѹ҆гото́ва, комꙋ бꙋ́детъ;
тако събира́ай себѣ, а҆ не в꙽ б҃а бога́тѣа·

рече же къ ѹ҆чн҃ком̑ свои́мъ·

Сего ради гл҃ю вамъ, не пецѣтесѧ дш҃ею ва́шею, что̀ ꙗ҆сте.
н̂и тѣ́ломъ, въ что̀ ѻ҆блече́тесѧ, дш҃а, бо́лши е҆сть пи́ща.
и҆ тѣло ѻ꙽дежда·

Смотри́те вра́нъ, ꙗ҆́ко н̂и сѣютъ н̂и жнꙋтъ, и҆́мже нѣсть съкро́вища, н̂и житница, и҆ б҃ъ пита́етъ и҆хъ.
ко́лми паче в̂ы е҆сте лꙋчши пти́цъ;
кто же ѿ ва́съ пекїисѧ мо́жетъ приложити въ́зрастꙋ свое҆мꙋ ла́коть е҆ді́нъ;
а҆ще ѹ҆бо н̂и ма́ло чесо̀ мо́жете, чт̂о ѻ҆ про́чихъ пече́тесѧ;
смотри́те кри́ны, ка́ко растꙋтъ, не трꙋжда́ютсѧ, ни прѧдꙋтъ.
гл҃ю же вамъ, ꙗ҆́ко ни соло́монъ въ все́й сла́вѣ свое́й ѻ҆блечесѧ ꙗ҆́ко е҆ді́нъ ѿ сихъ·

А҆ще же травꙋ на селѣ̀ днс̑҇е сꙋщꙋ, и҆ ѹ҆́трѣ в пещъ в꙽ме́щꙋщемꙋ, б҃ъ та́ко ѻ҆дѣ́етъ, ко́льми паче васъ маловѣ́ри;
и҆ в̂ы не и҆щи́те чт̂о ꙗ҆́сте, и҆ли чт̂о пїе́те и҆ не възноси́тесѧ.
всх̑ѣ б̂о сих̑ ꙗ҆́зы́цы мира сего и҆щт̑ꙋ.
ва́шъ же ѿц҃ъ вѣсть, ꙗ҆́ко требꙋе́те сихъ.
ѻ҆баче и҆щите црс̑҇твїа бж҃їа, и҆ сїа вс̂ѧ приложатсѧ вамъ·

зач̑҇, ѯ҃з·

Не бо́йсѧ ма́лое ста́до, ꙗ҆́ко бл҃гои҆зволи ѿц҃ъ вашъ дати вам̑ црс̑҇тво·

Продади́те и҆мѣнїа ва́шѧ, и҆ дадите млс̑҇тынѧ·

Сътвори́те себѣ влага́лища неветша́ющѧ, съкро́вище не ѻ҆скꙋ́дѣе́мо на нб҃сехъ, и҆дѣже тат̑ не приближа́етсѧ, н̂и мо́ль растлѣва́етъ.
и҆дѣже б̂о е҆сть съкро́вище ваше, т̂ꙋ и҆ срд̑це ваше бꙋ́детъ·

да бꙋ́дꙋтъ чресла̀ ва́ша препоѧ́сана, и҆ свѣти́лници горѧ́ще, и в̂ы подо́бни чл҃комъ чѧ́ющимъ г҃а свое҆го, когда въз꙽врати́тсѧ ѿ бра́къ, да пришед̑шꙋ и҆ тлъкнꙋвшꙋ, а҆б́їе ѿвр́ъзꙋтъ е҆мꙋ·

Бл҃же́ни рабѝ тїи, и҆́х꙽же пришед̑ г҃ь ѻ҆брѧщет̑ бдѧ́ща.
а҆минь гл҃ю вамъ, ꙗ҆́ко препоѧ́шетсѧ, и҆ посадитъ их̑, и҆ минꙋвъ послꙋж́итъ им̑.
и҆ а҆ще прїидетъ въ вторꙋю́ стражꙋ, любо в꙽ третїю стражꙋ прїидетъ, и҆ ѻ҆брѧ́щетъ их̑ та́ко, блажени сꙋть рабѝ тїи·

Се̂ же вѣ́дите, ꙗ҆́ко а҆ще б̂ы вѣдалъ господинъ хра́мины, в кїй часъ та́ть прїидет̑, бдѣлъ ѹ҆бо б̂ы, и҆ не бы̀ далъ под̑копати домꙋ свое҆го.
и҆ вы ѹ҆бо бꙋ́дѣте гото́ви.
ꙗ҆́ко во́ньже часъ не мнитѐ, сн҃ъ чл҃чъ прїидет̑·

Рече же е҆мꙋ петръ.
г҃и, к намъ ли при́тчю сїю гл҃еши.
и҆ли къ всѣмъ;
рече же г҃ь·

зач̑҇, ѯ҃и·

Кто ѹ҆бо е҆сть вѣ́рныи строи́тель и҆ мꙋдрыи, е҆гоже поста́витъ г҃ь над̑ челѧдїю свое́ю, даѧ́ти въ времѧ житомѣренїе;
блаже́нъ рабъ то́и е҆гоже пришед̑ г҃ь е҆го, ѻ҆брѧ́щетъ творѧ́ща та́ко.
въи҆стинꙋ гл҃ю вам̑, ꙗ҆ко над̑ всѣм꙽ и҆мѣнїемъ свои́мъ поста́витъ е҆го·

А҆ще ли же речетъ рабъ то́и в꙽ срд̑цы своем̑ коснитъ господи́нъ мои прїитѝ, и҆ начнетъ би́ти рабы̀ и҆ рабы́нѧ, ꙗ҆́сти же и҆ пи́ти, и҆ ѹ҆пива́тисѧ.
прїидет̑ господинъ раба̀ того, в꙽ дн҃ь во́ньже не ча́етъ, и҆ в часъ во́ньже не вѣсть, и проте́шетъ е҆го, и҆ часть е҆го с невѣрными положитъ·

То́и же рабъ вѣдѣвыѝ во́лю господина свое҆го, и҆ не ѹ́гото́вавъ, ниже сътворивъ по во́ли е҆го, бїе́нъ бꙋ́детъ мно́го·

Не вѣдѣвыи же, сътвори́в꙽ же досто́инаѧ ра́намъ, бїе́нъ бꙋ́детъ ма́лы·

зач̑҇, ѯ҃ѳ·

Всѧ́комꙋ же е҆мꙋже дано̀ бꙋдетъ мно́го, мно́го взы́щетсѧ ѿ него.
и҆ е҆мꙋже преда́шѧ мно́жаише, мно́жаише про́сѧтъ ѿ него·

ѻ҆гнѧ прїидох꙽ въврещѝ на́ землю, и҆ что̀ хощꙋ, а҆ще ѹ҆́же възгорѣ́сѧ;
крс̑҇ще́нїе же и҆́мамъ крс̑҇ти́тисѧ, и҆ ка́ко ѹ҆дръжꙋсѧ дондеже сконча́ютсѧ;
мните ли ꙗ҆́ко ми́ра прїидохъ дати на́ землю;
ни̂ гл҃ю вамъ, но̂ раздѣле́нїа.
бꙋдт̑ꙋ б̂о ѿсе́лѣ пѧть въ е҆ді́номъ домꙋ раз꙽дѣле́ны, трїе на́ дв̂а, и҆ дв̂а на́ три.
раздѣлитсѧ ѿц҃ь на́ сн҃а, и҆ сн҃ъ на ѿц҃а, мт҃и на дще́ре, и҆ дщ̂и на ма́тере, свекры̀ на невѣстꙋ свою̀, и҆ невѣ́ста на свекро́вь свою̀·

Гл҃аше же наро́домъ, е҆гда ѹ҆́ѕрите ѻ҆́блакъ въсходѧщь ѿ запа́да, а҆́бїе гл҃ете, тꙋ́чѧ грѧ́де́тъ, и҆ быва́етъ та́ко·

и҆ е҆гда ю҆́гъ вѣющь, гл҃ете, зно́й бꙋдетъ, и҆ быва́етъ·

Лицемѣри, лице нб҃ꙋ и҆ земли вѣсте и҆скꙋшати.
вре́мени же сего ка́ко не и҆скꙋша́ете;
что и҆ ѻ҆ себѣ не сꙋдите пра́ведное;
егда б̂о грѧдеши с꙽ сопе́рником꙽ свои́мъ къ́ кнѧзю, на пꙋти дажд̑ь дѣланїе и҆збы́ти ѿ него·

да не ка́ко привлечет̑ тебѐ к꙽ сꙋдїи, и҆ сꙋдїа т̂ѧ предастъ слꙋзѣ, и҆ слꙋга̀ всади́тъ т̂ѧ в темъни́цꙋ·

Гл҃ю тебѣ, не и҆зы́деши ѿтꙋдꙋ, до́ндеже и҆ послд̑ѣнюю мѣдницꙋ въздаси·

Глв̑҇а, г҃і·

зач̑҇, о҃·

Прїидо́шѧ же нѣцїи в т̂о врѣмѧ повѣ́дающе е҆мꙋ ѻ҆ галиле́ихъ, и҆́хже кро́вь пилатъ смѣсѝ съ жрътвами и҆хъ·

и҆ ѿвѣщавъ і҆с҃, рече и҆мъ.
мните ли ꙗ҆́ко галиле́ане сїи грѣшнѣиши паче всѣхъ галиле́ан꙽ бѧхꙋ, ꙗ҆ко тако пострада́шѧ;
н̂и гл҃ю вамъ, н̂о а́ще не пока́етесѧ, вс̂и та́коже погы́бнете·

И҆ли ѻ҆нѝ ѻ҆см꙽надесѧте на ни́хже падѐ сто́лпъ силоа́мъскїи, и҆ побѝ и҆х꙽.
мните ли ꙗ҆́ко тїи длъжнѣиши бѣхꙋ паче всѣхъ живꙋщихъ въ і҆ерс̑҇ли́мѣ;
н̂и гл҃ю вам꙽, н̂о а҆ще не пока́етесѧ, вс̂и та́кожде погы́бнете·

Гл҃аше же сїю при́тчю·

Смоко́вницꙋ и҆мѧше нѣкїи въ виноградѣ своемъ в꙽сажденꙋ.
и҆ прїиде и҆ща̀ плода̀ на не́й, и҆ не ѻ҆брѣте·

Рече же к винаре́ви, с̂е третїе лѣто ѿнелиже прихожд̑ꙋ и҆ща̀ плода на смоко́вници се́й, и҆ не ѻ҆брѣта́ю.
посѣци ю҆̀ ѹ҆бо, въскꙋ́ю и҆ зе́млю ѹ҆пражнѧ́е́тъ ѻ҆́н же ѿвѣщавъ, рече е҆мꙋ.
г҃и, ѻ҆ста́ви ю҆̀ и҆ се̂ лѣто, до́нъдеже ѻ҆копа́ю ѻ҆́крс̑҇тъ еа̀, и҆ ѻ҆сы́плю гно́емъ, и҆ а́ще ѹ҆бо сътворитъ пло́дъ, а҆́ще ли же н̂и, въ грѧдꙋщее посѣче́ши ю҆̀·

зач̑҇, о҃а·

Бѧше же ѹ҆ча̀ на е҆ді́ном̑ ѿ со́нмищъ в сꙋботы·

И҆ с̂е жена̀ б̂ѣ и҆мꙋщ́и дх̑ꙋ недꙋж́енъ, лѣтъ ѻ҆см꙽надесѧть, и҆ б̂ѣ слѧ́ка.
и҆ не могꙋщ́исѧ въсклони́ти ѿнꙋдь·

Ви́дѣв же ю҆̀ і҆с҃, пригласѝ, и҆ рече е́й, же́но ѿпꙋще́на е҆си ѿ недꙋ́га твое҆го.
и҆ възложи на ню рꙋцѣ, и҆ а́бїе про́стресѧ, и҆ сла́влѧше б҃а·

ѿвѣщав же старѣишина събо́рꙋ, недꙋгꙋ́а, зане в сꙋбо́тꙋ и҆сцѣли ю҆̀ і҆с҃, гл҃аше наро́дꙋ.
шесть дн҃їи ес̑҇, в нѧже досто́итъ дѣ́лати, в꙽ ты ѹ҆бо приходѧще цѣли́тесѧ, а҆ не въ дн҃ь сꙋботныи·

ѿвѣщав же ѹ꙼бо е҆мꙋ г҃ь, и҆ рече.
лицемѣ́ре, кождо васъ в сꙋботꙋ не ѿрѣша́етъ ли свое҆го вола и҆ли ѻ҆сла ѿ ꙗ҆́слїи.
и҆ ве́дъ напаа́ет꙽;
сїю же дще́ре а҆враа́млю сꙋщ́ꙋ, ю҆̀же свѧза̀ сатана̀, с̂е ѻ҆смоенадесѧте лѣто, не достоа́ше ли разрѣши́тисѧ е́й ѿ ю́зы сеа̀ в꙽ дн҃ь сꙋботныи;
и҆ сѝ е҆мꙋ гл҃ющꙋ, стыдѧ́хꙋсѧ вс̂и противлѧющеѝсѧ е҆мꙋ.
и҆ вс̂и лю́дїе ра́довахꙋсѧ, ѻ҆ всѣхъ сла́вныхъ быва́ющихъ ѿ него̀·

зач̑҇, о҃в·

Гл҃аше же, комꙋ подо́бно е҆сть цр҃твїе бж҃їе.
и҆ комꙋ ѹ҆подоблю е҆̀;
подобно е҆сть зернꙋ горꙋшнꙋ, е҆же прїем̑ чл҃къ, в꙽верже в꙽ виноград̑ свой, и҆ възрастѐ, и҆ бысть дре́во ве́лїе, и҆ птица нбс̑҇ны́а всели́шасѧ в꙽ вѣтвїе е҆го·

И҆ па́кы рече.
комꙋ ѹ҆подо́блю црс̑҇твїе бж҃їе;
подо́бно е҆сть ква́сꙋ, е҆же прїе́мши жена, съкры̀ в мꙋцѣ са́та тр̂и, до́ндеже въски́се вс̂е·

И҆ прохождаше скво́зѣ грады и҆ веси, ѹ҆ча, и҆ ше́ствїе творѧ въ і҆е҆рс̑҇лимъ·

Рече же нѣкїи е҆мꙋ.
г҃и, а҆ще ма́ло е҆сть сп҃са́ющих꙽сѧ;
ѻ҆н꙽ же рече к нимъ.
подвизайтесѧ внѝти сквозѣ тѣ́снаа вра́та.
ꙗ҆́ко мно́ѕи гл҃ю вамъ в꙽зы́щꙋт꙽ внити, и҆ не възмо́гꙋтъ·

ѿнелиж̑ въста́нетъ домꙋ влд̑ка, и҆ затворит̑ дверѝ, и҆ на́чнетѐ вн̂ѣ стоа́ти и҆ ѹ҆дарѧти в꙽ дверѝ гл҃юще.
г҃и, г҃и ѿвр́ъзи намъ.
и҆ ѿвѣщавъ речетъ вамъ.
не вѣ́дѣ васъ ѿкꙋ́дꙋ е҆сте·

Тогда̀ на́чнете гл҃ати.
ꙗ҆́дохомъ пред̑ тобою и҆ пи́хомъ, и҆ на распꙋтїих̑ на́шихъ ѹ҆чилъ е҆си·

И҆ речетъ, гл҃ю вамъ, не вѣмъ вас̑҇ ѿкꙋд́ꙋ е҆сте, ѿстꙋпи́те ѿ мене вс̂и дѣлателїе непра́вдѣ.
т̂ꙋ бꙋд́етъ плач́ъ и҆ скрежет̑ зꙋбомъ·

Є҆гда ѹ҆зрите а҆враа́ма, і҆ и҆саа́ка, і҆ и҆а́кова, и҆ всѧ̀ прро̑҇кы въ црс̑҇твїи бж҃їи, вас̑҇ же и҆згони́мыхъ во́н꙽.
и҆ прїидꙋтъ ѿ въстокъ и҆ запад̑, и҆ сѣвера и҆ ю́га, и҆ възлѧ́гꙋтъ въ црс̑҇твїи бж҃їи·

И҆ с̂е сꙋть послд̑ѣнїи, и҆же бꙋдꙋтъ п́ерви.
и сꙋть пе́рвїи, и҆же бꙋдꙋтъ послѣ́дъни·

зач̑҇, о҃г·

В то́и дн҃ъ пристꙋпи́шѧ нѣцїи ѿ фарїсе́й , гл҃юще е҆мꙋ.
и҆зыди і҆ и҆ди ѿсю́дꙋ, ꙗ҆́ко и҆́родъ хо́щетъ т̂ѧ ѹ҆би́ти·

И҆ рече и҆мъ.
шд̑еше рцѣте ли́сꙋ томꙋ.
с̂е и҆згоню бѣ́сы, і҆ и҆сцѣле́нїа творю днс̑҇е и҆ ѹ́трѣ, и҆ в꙽ тре́тїи сконча́ю·

ѻ҆баче подоба́етъ м̂и днс̑҇е, и҆ ѹ҆трѣ и҆ въ бли́жнїи и҆тѝ, ꙗ҆́ко не възмо́жно е҆сть прро̑҇кꙋ погы́бнꙋти кромѣ і҆е҆рс̑҇ли́ма·

И҆е҆рс̑҇ли́мъ, и҆е҆рс̑҇лїм꙽, и҆зби́выѝ прро̑҇кы, и҆ ка́менїемъ побиваа́ посланыа к꙽ немꙋ.
ко́ль кра́ты въсхотѣхъ събрати чѧ́да твоѧ, ꙗ҆коже ко́кошъ гнѣ́ѕдо̀ свое под̑ крилѣ, и҆ не въсхотѣ́сте;
се ѻ҆ставлѧ́етсѧ вамъ дом̑ вашъ пс̑҇ꙋ·

Гл҃ю же вам̑, ꙗ҆́ко не и́мате мене ви́дѣти, дондеже прїидет̑, е҆гд̑а реч́ете, блс̑҇ве грѧдыѝ въ и҆мѧ гн҃е·

Глав̑҇, д҃і.

зач̑҇, о҃д·

И҆ бы́сть е҆гда вни́ти е҆мꙋ в дом̑ нѣкое҆го кнѧ́зѧ фарїсе́йска в сꙋбо́тꙋ хлѣбъ ꙗ҆́сти, и҆ тїи бѣхꙋ назира́юще е҆го·

И҆ с̂е чл҃къ нѣќїи и҆мыи вод̑ныи трд̑ꙋ, б̂ѣ пре ни́мъ·

И҆ ѿвѣщавъ і҆с҃, рече к꙽ зако́нникомъ, и҆ фарїсе́ѻм̑ гл҃ѧ.
а҆ще досто́итъ в сꙋбо́тꙋ цѣли́ти;
ѻ҆ни же ѹ҆млъча́шѧ.
и҆ прїе́м꙽ и҆сцѣли е҆го, и҆ ѿпꙋстѝ·

И҆ ѿвѣщав̑҇ к нимъ рече.
кото́раго ѿ васъ ѻ҆се́л꙽, и҆ли волъ, в꙽ стꙋденецъ в꙽падетъ.
не а҆б́їе ли̂ и҆стръгнетъ е҆го в꙽ дн҃ъ сꙋбо́тныи и҆ не възмого́ша ѿвѣща́ти е҆мꙋ к симъ·

Гл҃аше же к꙽ зва́ннымъ при́тчю.
ѻ҆бдръжа̀ ка́ко пред̑ѣда́нїа и҆збира́хꙋ гл҃ѧ к нимъ.
е҆гда̀ зва́нъ бꙋдеши кимъ на́ бракъ, не сѧди на пред̑немъ мѣс́ѣ , е҆да̂ кт̂о чс̑҇тнѣе тебе бꙋдетъ зва́ныхъ.
и҆ пришед̑ и҆же тебе зва́выи и҆ ѻ҆́ного, речетъ.
т̂ы даждъ семꙋ мѣс́то, и҆ тогда̀ начне́ши съ стꙋдо́мъ послд̑ѣнее мѣсто дръжа́ти·

н̂о е҆гда званъ бꙋд́еши , шед̑ сѧди на послд̑ѣнемъ мѣ́стѣ, да е҆гда̀
прїидетъ зва́выѝ т̂ѧ, речетъ т̂и, дрꙋже, посѧди вы́ше.
тогдо̀ бꙋдетъ т̂и сла́ва предъ зва́нными с тобою·

Ꙗ҆́ко всѧкъ възносѧѝсѧ, смѣритсѧ.
и҆ смирѧаѝсѧ.
възнесет̑сѧ·

за, о҃е·

Гл҃аше же и҆ къ зва́вшемꙋ е҆го.
е҆гда сътвориши ѻ҆бѣдъ и҆ли вече́рꙋ, не зовѝ дрꙋгъ свои҆хъ ни братїѧ твоѧ, н̂и срод̑никъ твои҆хъ, н̂и съсѣдъ бога́тыхъ.
е҆да коли и҆ тїи т̂ѧ та́коже въз꙽зовꙋтъ, и҆ бꙋ́дет̑ т̂и въздаа́нїе н̂о е҆гда твориши пи́ръ зовѝ ни́щаѧ, маломо́щи, хро́мыа, слѣпы́а, и҆ бл҃женъ бꙋ́деши.
ꙗ҆́ко не и҆мꙋтъ т̂и чт̂о въздати.
въздастъ же ти сѧ в꙽ въскр҃се́нїе праведныхъ·

Слы́шав же нѣкїи ѿ възлежа́щих̑ с нимъ сїа, рече е҆мꙋ.
бл҃женъ и҆же снѣсть ѻ҆бѣд꙽ в꙽ црс̑҇твїи бж҃їи·

зач̑҇, о҃ѕ·

ѻн же рече е҆мꙋ·

Чл҃къ нѣкїи сътворѝ вечерꙋ ве́лїю, и҆ зва̀ мно́гы.
и҆ посла̀ рабъ свой в год̑ вече́рѧ, рещѝ зва́ннымъ, грѧдѣт́е, ꙗ҆ко ѹ҆же готова сꙋтъ вс̂ѧ·

и҆ нача́ша вкꙋпѣ ѿрица́тисѧ вс̂и·

Пе́рвыи рече е҆мꙋ.
село̀ кꙋпихъ, і҆ и́мамъ нꙋждꙋ и҆зыити и҆ ви́дѣти е҆̀.
молю́ ти сѧ и҆мѣй м̂ѧ ѿрече́на·

И҆ дрꙋгїи рече, сꙋпрꙋгъ въло́вныхъ кꙋпих꙽ пѧть, и҆ грѧдꙋ̀ и҆скꙋсити и҆хъ.
молю̀ т̂ѧ и҆мѣи м̂ѧ ѿрече́на·

И҆ дрꙋгїи рече.
женꙋ̀ поѧх̑, и҆ сего ради не могꙋ̀ прїитѝ·

И҆ пришед̑ рабъ то́й, повѣ́да господинꙋ свое҆мꙋ сїа·

Тогда разгнѣ́вав꙽сѧ домꙋ влд̑ка, рече рабꙋ̀ свое҆мꙋ.
и҆зыди скоро на распꙋтїѧ, и҆ сто́гны гра́да и҆ ни́щаѧ, и҆ бѣдныа и҆ слѣ́пыа и҆ хромыа в꙽веди сѣмо.
и҆ рече рабъ.
г҃и, бысть ꙗ҆коже повелѣ̀, и҆ е҆ще мѣ́сто ес̑҇.
и҆ рече господи́нъ к꙽ рабꙋ̀.
и҆зы́ди на пꙋтѝ и҆ ха́лꙋ́гы, и҆ ѹ҆бѣди вни́ти, да наполнитсѧ домъ мой·

Гл҃ю б̂о вам̑, ꙗ҆ко ни е҆ді́нъ мꙋжїи тѣхъ зва́ныхъ в꙽кꙋ́ситъ моѧ вечерѧ.
мно́ѕи б̂о ст̑ꙋ звани, ма́ло же и҆збра́нныхъ·

зач̑҇, о҃з·

И҆дѧ́хꙋ же с нимъ наро́ди мно́ѕи.
и҆ ѻ҆бра́щъсѧ рече к нимъ.
а҆ще кт̂о грѧдетъ къ мнѣ, и҆ не възненави́дитъ ѿц҃а свое҆го и҆ ма́тере, и҆ женꙋ и҆ чѧд̑, и҆ братїѧ и҆ се́стръ, е҆ще же и҆ дш҃ꙋ свою, не мо́жетъ мой бы́ти ѹ҆чн҃къ·

І҆ иже не но́ситъ крс̑҇та свое҆го и҆ в꙽ слѣдъ мене грѧдетъ, не мо́жетъ мой бы́ти ѹ҆ченикъ·

Кто̀ б̂о ѿ вас̑҇ хотѧѝ сто́лпъ создати, не прежде л̂и сѣдъ разъчтетъ и҆мѣ́нїе, а҆ще и҆́мать е҆же е҆сть на съвръше́нїе;
да не когд̑а положитъ ѻ҆снованїе, и҆ не възмо́жет̑ съвръши́ти.
вс̂и видѧщеѝ начнꙋт꙽ рꙋга́тисѧ е҆мꙋ гл҃юще, ꙗ҆ко се́й чл҃къ начатъ здати, и҆ не мо́жетъ съвръшити;
и҆л̂и кїи цр҃ъ и҆ды̀ къ и҆номꙋ цр҃ю, снитисѧ с ним̑ на́ брань, не сѣдъ л̂и преже совѣщава́етъ, а҆ще си́ленъ ес̑҇ срѣ́стисѧ съ десѧтїю ты́сѧщъ, грѧдꙋщ́аго съ двѣма десѧтьма тысѧщама нань;
а҆ще ли же н̂и, е҆ще дале́че е҆мꙋ сꙋщꙋ, моленїе пославъ, мо́литсѧ ѻ смире́нїи·

Тако ѹ҆бо в꙽сѧкъ ѿ васъ.
и́же не ѿречетсѧ всего свое҆го и҆мѣ́нїа.
не мо́жетъ быти мой ѹ҆ченикъ·

добро̀ е҆сть со́ль.
а҆ще же со́ль ѻ҆бꙋа́етъ, в чемъ ѻ҆соли́тсѧ;
н̂и в землѝ н̂и в гно́и требꙋ́етъ.
во́нъ и҆з꙽сы́пѧтъ ю҆̀·

И҆мѣ́аѝ ѹ́ши слы́шати, да слы́шитъ·

Глава. е҃і·

зач̑҇, о҃и·

Бѣхꙋ же приближа́ющесѧ е҆мꙋ вс̂и мытарїе и҆ грѣшницы посл́ꙋшати е҆го·

И ропта́хꙋ фарїсе́е и҆ кни́жницы гл҃юще.
ꙗко се́й грѣшникы прїе́млет̑, и҆ с ни́ми ꙗ҆стъ·

Рече же к нимъ прит̑чю сїю гл҃ѧ.
кїи чл҃къ ѿ васъ и҆мы̀ ст̂о ѻ́вецъ, и҆ погꙋбль е҆ді́нꙋ ѡ нихъ.
не ѻ҆ста́витъ ли̂ девѧтьдесѧтъ и҆ девѧ в꙽ пꙋсты́ни, і҆ и́детъ в꙽ слѣдъ поги́бъшаа до́ндеже ѻ҆брѧщетъ ю҆̀;
и҆ ѻ҆брѣтъ възлага́етъ на рамѣ своѝ радꙋѧсѧ·

И҆ пришед̑ в домъ съзывает̑ др́ꙋгы и҆ съсѣды гл҃ѧ и҆мъ.
радꙋитесѧ со мною̀, ꙗ҆́ко ѻ҆брѣтохъ ѻ҆вцꙋ мою поги́бшꙋю·

Гл҃ю вамъ, ꙗ҆́ко та́ко ра́дость бꙋ́детъ на нб҃си.
ѻ҆ е҆ді́ном̑ грѣшницѣ ка́ющемсѧ, нежели̂ ѻ҆ девѧтьдесѧтихъ и девѧть пра́ведъникъ, и҆же не требꙋют̑ покаа́нїа·

И҆ли̂ каа̀ жена̀ и҆мꙋщи десѧт̑ драх̑мъ, а҆ще погꙋбитъ е҆ді́нꙋ дра́хмꙋ.
не в꙽жиза́етъ л̂и свѣти́лника, и҆ помететъ хра́минꙋ, і҆ и́щетъ прилѣжъно, до́ндеже ѻ҆брѧ́щетъ;
и҆ ѻ҆брѣтши съзыва́етъ дрꙋгы́нѧ и҆ със́ѣды гл҃ющи.
радꙋитесѧ со мно́ю , ꙗ҆́ко ѻ҆брѣтохъ драхъмꙋ поги́бшꙋю·

Тако гл҃ю вамъ, радость быва́етъ пред̑ а҆гг҃лы бж҃їи, ѻ҆ е҆ді́номъ грѣшницѣ ка́ющимъсѧ·

зач̑҇, о҃ѳ·

Рече же.
чл҃къ нѣкїи и҆мѣ̀ дв̂а сн҃а.
и҆ рече ю҆нѣишїи е҆ю̀ ѿц҃ꙋ.
ѻ҆ч҃е, дажд̑ь м̂и досто́йнꙋю часть и҆м́ѣнїа.
и раздѣли и҆́ма и҆мѣ́нїе.
и҆ не по мно́ѕх̑ѣ дн҃ех̑ събравъ вс̂е мнїи сн҃ъ, ѿи҆де на странꙋ дале́че, и҆ т̂ꙋ расточи и҆мѣнїе свое, живы̀ блꙋ́дно.
и҆жди́вшꙋ же е҆мꙋ вс̂е, бысть глад̑ крѣ́покъ на странѣ то́й, и҆ то́й начатъ лиша́тисѧ.
и҆ шед̑ прилѣписѧ е҆ді́номꙋ ѿ жи́тель тоа̀ страны.
и҆ посла̀ е҆го на се́ла своѧ̀ пастѝ свинїѧ.
и҆ жела́ше насы́тити чре́во своѐ ѿ рожецъ, ꙗ҆́же ꙗ҆дѧ́хꙋ свинїѧ.
и҆ никтоже даа́ше е҆мꙋ·

в꙽ себе же пришед̑, рече.
колико нае́мникомъ ѿц҃а мое҆го и҆збываютъ хлѣбы, а҆з же гла́домъ ги́блю;
в꙽ставъ и҆дꙋ къ ѿц҃ꙋ мое҆мꙋ, и҆ рекꙋ е҆мꙋ.
ѻ҆ч҃е, съгрѣших̑ на́ нб҃о и҆ пред̑ тобо́ю, и҆ ѹ҆же нѣсмь досто́инъ нарещисѧ сн҃ъ твой, сътворѝ м̂ѧ ꙗ҆́ко е҆ді́ного ѿ нае́мникъ твоих̑.
и҆ в꙽ставъ и҆́де къ ѿц҃ꙋ свое҆мꙋ·

Є҆ще же е҆мꙋ далече сꙋщꙋ, ѹ҆зрѣ е҆го ѿц҃ъ е҆го, и҆ милъ е҆мꙋ бысть.
и҆ текъ нападѐ на вы́ю е҆го, и҆ ѻ҆блобыза̀ е҆го·

Рече же е҆мꙋ сн҃ъ.
ѻ҆ч҃е, съгрѣшихъ на́ нб҃о и҆ пред̑ тобо́ю, и҆ ѹ҆же нѣсмь досто́инъ нарещисѧ сн҃ъ твой·

Рече̑ ѿц҃ъ к꙽ рабомъ свои́мъ.
и҆знесѣте ѻ҆де́ждꙋ пе́рвꙋю, и҆ ѻ҆блецѣте е҆го, и҆ дади́те пр́ъстень на́ рꙋкꙋ е҆го, и҆ сапогы на́ ноѕѣ.
и҆ приведъше теле́цъ ѹ҆пита́нныи, заколи́те, и҆ ꙗ҆́дъше весели́мсѧ, ꙗ҆́ко сн҃ъ мой се́й мр҃твъ б̂ѣ, и҆ ѻ҆живе.
і҆ и҆зги́блъ б̂ѣ, и҆ ѻ҆брѣтесѧ.
и҆ нача́шѧ весели́тисѧ·

Бѣ же сн҃ъ е҆го ста́рѣи на селѣ̀.
и҆ ꙗ҆́ко грѧды̀ прибли́жисѧ к꙽ до́мꙋ, слы́ша пѣнїа и҆ ли́кы.
и҆ призвавъ е҆ді́ного ѿ ѻ҆трокъ, въпраша́ше, чт̂о ѹ҆бо сїѧ сꙋтъ.
ѻ҆́н же рече е҆мꙋ.
ꙗ҆ко братъ твой прїиде, и҆ закла ѿц҃ъ твой телецъ ѹ҆пита́нныи̑, ꙗ҆ко здра́ва е҆го прїа́тъ·

Раз꙽гнѣ́вав же сѧ, и҆ не хотѧше вни́ти·

ѿц҃ъ же е҆го и҆з꙽шед꙽ молѧ́ше е҆го·

ѻ҆н же ѿвѣщавъ, рече ѿц҃ꙋ.
с̂е толи́ко лѣтъ рабо́таю тебѣ, и҆ николиже за́повѣди твоѧ престꙋпихъ, и҆ мн̂ѣ николиже далъ е҆си козлѧте, да съ дрꙋгы свои́ми възвесели́лъсѧ быхъ·

Є҆гда же сн҃ъ твой се́й.
и҆зѣдыи твое и҆мѣнїе с꙽ любодѣйцами, прїиде, закла̀ е҆мꙋ телецъ пито́мыи·

ѻ҆н же рече е҆мꙋ, чѧдо, т̂ы всегда со мною е҆си, и҆ всѧ моѧ, твоѧ сꙋть.
възвесели́ти же сѧ и҆ възрадовати подоба́ше, ꙗ҆́ко брат̑ твой се́й мр҃твъ б̂ѣ, и҆ ѻ҆живе.
і҆ и҆зги́блъ б̂ѣ и҆ ѻ҆брѣтесѧ·

Глв̑҇а, ѕ҃і.

зач̑҇, п҃·

Гл҃аше же и҆ къ ѹ҆чн҃комъ своим̑.
чл҃къ нѣ́кїи б̂ѣ бога́тъ, и҆же и҆мѧше приста́вника, и҆ то́й ѻ҆клеветанъ бысть к꙽ немꙋ, ꙗ҆́ко расточа́етъ и҆мѣ́нїе е҆го, и҆ пригласивъ е҆го, рече е҆мꙋ.
что̀ с̂е слы́шꙋ ѻ҆ тебѣ;
възд̑аждъ ѿвѣтъ ѻ҆ приставленїи домо́в꙽нѣмъ.
не възмо́жеши б̂о ктомꙋ до́мꙋ стро́ити·

Рече же в себѣ приста́вник до́мꙋ.
что̀ сътворю, ꙗ҆́ко г҃ь мой ѿе́млетъ строе́нїе домꙋ ѿ менѐ;
копа́ти не могꙋ̀, просити стыждꙋсѧ.
разꙋмѣхъ чт̂о сътворю.
да е҆гда ѿста́вленъ бꙋдꙋ ѿ строе́нїа до́мꙋ, прїимꙋтъ м̂ѧ в до́мы своѧ·

И҆ призвавъ е҆ді́ного когождо длъжникъ господи́на свое҆го.
гл҃аше пе́рвомꙋ, коли́цѣмъ длъженъ е҆си господинꙋ мое҆мꙋ;
ѻ҆́н же рече.
ст̂о мѣръ ма́сла·

И҆ рече е҆мꙋ, прїими пи́санїе твое, и҆ сѣдъ ско́ро, напиши, пѧтьдесѧтъ·

Пото́мже рече дрꙋго́мꙋ.
ты же коли́цѣмъ дл́ъженъ е҆си;
ѻ҆н же рече, ст̂о мѣръ пшени́ца·

И҆ гл҃а е҆мꙋ.
прїими писа́нїе твое, и напишѝ, ѻ҆смъдесѧтъ·

И҆ похвали г҃ь до́мꙋ строи́телѧ непра́веднаго, ꙗ҆ко мꙋдрѣ сътворѝ.
ꙗ҆́ко сн҃ове вѣка сего мꙋдрѣиши па́че сн҃въ свѣта в родѣ свое́мъ сꙋть·

И҆ а҆зъ вамъ гл҃ю, сътвори́те себѣ дрꙋгы̀ ѿ мамо́ны непра́вды, да е҆гда ѻ҆скꙋдѣе́те, прїимт̑ꙋ в̂ы в꙽ вѣчныа кро́в̂ы·

зач̑҇, п҃а·

Вѣ́рныи в꙽ ма́лѣ, и҆ въ мно́ѕѣ вѣренъ е҆сть.
и҆ непра́ведныи в꙽ ма́лѣ, и҆ въ мно́ѕѣ непра́веденъ е҆сть·

А҆ще ѹ҆бо в꙽ непра́веднѣмъ и҆мѣнїи вѣ́рни не бы́сте, въ и҆стиннѣмъ кто̀ вамъ вѣ́рꙋ и҆метъ;
и҆ а҆ще в꙽ чюжемъ вѣрни не бысте, ва́ше кто̀ вам̑ дастъ;
н̂икїиже рабъ мо́жетъ двѣма господи́нома рабо́тати.
либо е҆ди́ного възненави́дитъ, а҆ дрꙋга́го възлю́бит̑·

И҆л̂и е҆ді́ного дръжи́тсѧ, ѻ҆ дрꙋѕѣм꙽ же неради́ти начнет.
не мо́жете б҃ꙋ рабо́тати и҆ мамо́нѣ·

Слы́шахꙋ же сїа вс̂ѧ и҆ фарїсе́е, сребролюбцы сꙋще, и҆ рꙋгахꙋсѧ е҆мꙋ·

І҆ рече им̑·

зач̑҇, п҃в·

Вы̂ е҆сте ѻ҆правдающеѝ себѐ пред̑ чл҃кы, б҃ъ же вѣсть срд̑ца ваша̀.
ꙗ҆́ко е҆же е҆сть в́ъ чл҃цехъ высоко, мр́ъзость е҆сть предъ бм҃ъ.

Законъ и҆ прро̑҇цы до і҆ѻ҆а́нна, ѿто́лѣ црс̑҇твїе бж҃їе бл҃говѣствꙋе҆тсѧ, и҆ всѧкъ в н̂е нꙋдитсѧ·

Ѹ҆до́бѣе же е҆сть нб҃ꙋ и҆ земли преитѝ, неже ѿ зако́на е҆ді́ной чертѣ поги́бнꙋти·

Всѧкъ пꙋщааѝ женꙋ свою, и҆ приводѧ и҆́нꙋ, прелюбы дѣ́етъ.
и҆ женѧѝсѧ пꙋще́ною ѿ мꙋжа, прелюбы̀ творитъ·

зач̑҇, п҃г·

Чл҃къ же нѣкїи б̂ѣ богатъ, и҆ ѻ҆блача́шесѧ в꙽ порфѷрꙋ и҆ вѷссонь, веселѧсѧ на вс̂ѧ дн҃и свѣтло·

Ни́щъ же б̂ѣ нѣкт̂о и҆менемъ ла́заръ, и҆же лежа́ше пред̑ враты е҆го гно́инъ, и҆ жела́ше насытитисѧ ѿ крꙋпи́цъ па́дающих̑ ѿ трапе́зы бога́таго.
н̂о и҆ ѱи приходѧще ѻ҆близахꙋ гной е҆го·

Бы́сть же ѹ҆мрети ни́щемꙋ, и҆ несе́нꙋ быти а҆гг҃лы на лоно а҆враа́мле·

Ѹ҆́мрет̑ же и҆ бога́тыи, и҆ погребо́шѧ е҆го·

И҆ въ а́дѣ възвед̑ ѻ҆́чи своѝ сыи в꙽ мꙋќахъ, ѹ҆зрѣ а҆враа́ма и҆здалече, и҆ лазарѧ на лонѣ е҆го·

И҆ то́й въз꙽глашъ, реч̑҇ ѿч҃е а҆враа́ме, поми́лꙋи мѧ, и҆ послѝ ла́зарѧ, да ѻ҆мо́читъ конецъ пе́рста свое҆го в꙽ водѣ, и҆ ѹ҆стꙋдитъ ꙗ҆́зы́къ мой, ꙗ҆́ко стра́ждꙋ в꙽ пла́мени сем̑·

Рече же а҆враа́мъ.
ча́до помѧни ꙗ҆ко въспрїа́лъ е҆си бл҃га́ѧ твоѧ в꙽ животѣ̀ твое́мъ, и҆ ла́заръ такоже зла́ѧ.
нн҃ѣ же зд̂ѣ ѹ҆тѣша́етсѧ, ты же стра́ждеши·

И҆ над̑ всѣми сими, междꙋ на́ми и҆ вами про́пасть вели́ка ꙋтвердисѧ, ꙗ҆ко да хотѧ́щеѝ преи҆ти ѿсю́дꙋ к вамъ, не възмогꙋтъ ни́же ѿтꙋдꙋ к намъ прехо́дѧтъ,<.>

Рече же, молю т̂ѧ ѹ҆бо ѿч҃е, до по́слеши е҆го в домъ ѿц҃а мое҆го.
и҆мам б̂о пѧть братїѧ, ꙗ҆́ко да засвѣдѣтельствꙋетъ и҆мъ, да не и҆ тїи прїидꙋт꙽ на мѣсто с̂е мꙋчное·

Гл҃а е҆мꙋ а҆враам̑, и҆мꙋт꙽ моѷсе́а и҆ прро̑҇кы, да послꙋш́ают̑ и҆хъ·

ѻ҆́н же рече, н̂и ѿч҃е а҆враа́ме, н̂о а҆ще кт̂о ѿ мр҃твыхъ и́детъ к̂ ним̑, пока́ютсѧ·

Рече же е҆мꙋ, а҆ще моѷсе́а и҆ прро̑҇кы не послꙋша́ютъ, ни а҆ще кт̂о ѿ мр҃твыхъ въскрс̑҇нетъ, не и҆мт̑ꙋ вѣ́ры·

Глв̑҇а, з҃і·

Рече же къ ѹ҆чн҃комъ свои҆м꙽.
не възмо́жно е҆сть не прїитѝ събла́ѕномъ.
го́ре же, е҆гоже ради прихо́дитъ.
ѹ҆не е҆мꙋ бы́ло б̂ы, а҆ще жр́ъно ѻ҆сельскїи ѻ҆блежалъ бы ѻ҆ вы́и е҆́го, и҆ в꙽верженъ в꙽ мо́ре, неже да събла́знит̑ ма́лыхъ сих̑ е҆ді́ного·

зач̑҇, п҃д·

Внемлѣте себѣ.
а҆ще съгрѣшитъ тебѣ бра́тъ твой, запрѣтѝ е҆мꙋ.
и҆ а҆́ще пока́етсѧ, ѻ҆ста́ви е҆мꙋ·

И҆ а҆ще сед̑ми́щи на́ дн҃ь съгрѣшитъ к тебѣ, и҆ седми́щи на́ дн҃ь ѻ҆брати́тсѧ гл҃ѧ ка́юсѧ, ѻ҆ста́ви е҆мꙋ·

И҆ рекоша а҆пс̑҇ли гв҃и.
приложѝ намъ вѣрꙋ·

Ре же г҃ь.
а҆́ще бы́сте и҆мѣ́ли вѣ́рꙋ ꙗ҆́ко зе́рно горꙋшно, гл҃али бысте ꙗ҆́годичинѣ се́й, въстръгнисѧ и҆ всади́сѧ в꙽ мо́ре, и҆ послꙋш́ала б̂ы васъ·

Которыи же ѿ васъ рабъ и҆мѣ́а, ѻ҆рꙋщь, и҆ли пасꙋщь, и҆же пришед̑шꙋ е҆мꙋ с꙽ села̀, речетъ а́бїе, минꙋв꙽ възлѧ́зи, н̂о не речет ли е҆мꙋ, ѹ҆гото́ваи чт̂о вечерѧ́ю, и҆ препоѧсавсѧ слꙋжи м̂и, до́ндеже ꙗ҆́мъ и҆ пїю, и҆ потом̑ ꙗ҆́сѝ и҆ пїе́ши т̂ы;
е҆да и҆́мать хвалꙋ̀ рабꙋ̀ томꙋ̀, ꙗ҆́ко сътвори повелѣнаѧ;
не мню̀.
та́ко и҆ в̂ы, е҆гда сътворитѐ вс̂ѧ повелѣ́ннаа вам꙽, гл҃ите, ꙗ҆́ко рабѝ непотребни е҆смы, ꙗ҆ко е҆же дл́ъжни б̂ѣхомъ сътворити, сътвори́хом꙽·

И҆ бысть и҆дꙋщꙋ е҆мꙋ въ і҆ерс̑҇ли́мъ, и҆ то́и прохожд̑аше межд̑ꙋ самари́ею и҆ галиле́ею̀·

зач̑҇, п҃е·

Входѧщꙋ же е҆мꙋ в нѣкꙋю весь, срѣто́ша е҆го десѧть прокаже́нѣхъ мꙋжїи, и҆же ста́ша и҆здале́че, и҆ тїи възнесо́ша глс̑҇а гл҃юще.
і҆с҃е наста́в꙽ниче поми́лꙋи н̂ы·

И҆ видѣвъ, рече и҆мъ.
шед̑ше покажи́тесѧ сщ҃е́нникомъ·

И҆ бысть и҆дꙋщ́емъ и҆мъ, ѻ҆чс̑҇тишѧсѧ.
е҆ді́н же ѿ нихъ видѣв꙽ ꙗ҆́ко и҆сцѣлѣ, въз꙽врати́сѧ съ гласом̑ ве́лїемъ сла́вѧ б҃а, и҆ падѐ ни́ць при ногꙋ е҆го хвалꙋ̀ е҆мꙋ въздаа̀, и҆ то́и б̂ѣ самарѧнинъ·

ѿвѣща́в же і҆с҃, реч̑҇.
не де́сѧть л̂и ѻ҆чс̑҇тишасѧ.
да де́вѧть гд̂ѣ ка́ко не ѻ҆брѣто́шасѧ въз꙽вра́щьшесѧ дати сла́вꙋ б҃ꙋ, то́кмо и҆ноплеме́нникъ се́й.
и҆ рече е҆мꙋ, в꙽став̑҇ и҆дѝ, вѣ́ра твоа̀ сп҃сѐ т̂ѧ·

зач̑҇, п҃ѕ·

Въпроше́н же бывъ ѿ фарисе́й, когда прїидетъ црс̑҇твїе бж҃їе·

ѿвѣщавъ и҆мъ рече·

не прїидетъ црс̑҇твїе бж҃їе съ съблюде́нїемъ.
ниже рекꙋтъ, с̂е зд̂ѣ и҆ли с̂е ѻ҆́нде.
с̂е б̂о црс̑҇твїе бж҃їе внꙋтръ васъ е҆сть·

Рече же къ ѹ҆ченикомъ свои́мъ.
прїидꙋтъ дн҃і́е, е҆гда въжд̑елѣете е҆ді́ного дн҃е сн҃а члчс̑҇каго ви́дѣти, и҆ не ѹ҆́ѕрите.
и҆ рекꙋт꙽ вамъ, с̂е зд̂ѣ, с̂е ѻ҆́нде.
не и҆зы́дѣте, н̂и поженѣте·

Ꙗ҆́ко б̂о мл́ънїи блиста́ющисѧ ѿ под̑нбс̑҇ныа, на подънбс̑҇нѣй свѣтитсѧ, та́ко бꙋ́детъ сн҃ъ члчс̑҇кїи в꙽ дн҃ь свои·

Прежд̑е же подоба́етъ е҆мꙋ мно́го пострадати, і҆ и҆скꙋше́нꙋ быти ѿ рода сего·

зач̑҇, п҃з·

И҆ ꙗ҆коже бысть въ дн҃и но́евы, та́ко бꙋд́етъ и҆ въ дн҃е сн҃а члчс̑҇ка, ꙗ҆́дѧ́хꙋ, пїа́хꙋ, женѧ́хꙋсѧ, посѧга́хꙋ, до негоже дн҃е вни́де но́е в꙽ ковчегъ, и҆ прїиде пото́пъ, и҆ погꙋбѝ вс̂ѧ·

Та́коже и҆ ꙗ҆́коже бысть въ́ дн҃и ло́товы, ꙗ҆́дѧ́хꙋ, пїа́хꙋ, кꙋпова́хꙋ, продаа́хꙋ, сажд̑ахꙋ зда́хꙋ.
во́нь же дн҃ь и҆зы́де лот̑ ѿ содо́млѧнъ, ѻ҆дожди ка́мыкъ горѧщь, и҆ ѻ҆́гнь с꙽ нб҃се, и҆ погꙋбѝ вс̂ѧ.
по томꙋже бꙋ́детъ и҆ в꙽ дн҃ь, во́нь же сн҃ъ члчс̑҇кїи ꙗ҆́ви́тсѧ·

в꙽ то́й дн҃ь и҆же бꙋ́детъ на́ кровѣ, и҆ съсꙋды е҆го в домꙋ, да не сла́зитъ взѧти и҆хъ.
і҆ и҆же на селѣ, та́кожде да не въз꙽врати́тсѧ в꙽спѧ́ть.
помина́ите женꙋ̀ ло́товꙋ·

И҆же а҆ще взы́щетъ дш҃ꙋ свою̀ спс̑҇тѝ, погꙋбит꙽ ю҆̀.
а҆ и҆же а҆́ще погꙋбитъ ю҆̀, живитъ ю҆̀·

Гл҃ю вамъ, в т̂ꙋ нощь бꙋде́та дв̂а на ѻ҆дрѣ е҆ді́номъ, е҆дїнъ пое́млетсѧ, а҆ дрꙋгїи ѻ҆ставлѧ́етсѧ·

Бꙋдетѣ дв̂ѣ вкꙋпѣ ме́лющи, е҆ді́на пое҆млетсѧ, а҆ дрꙋгаа ѻ҆ставлѧ́етсѧ.
дв̂а бꙋдета на селѣ̀, е҆ді́нъ пое́млетсѧ, а҆ дрꙋгїи ѻ҆ставлѧ́етсѧ·

И҆ ѿвѣща́вше гл҃ашѧ е҆мꙋ, гд̂е г҃и;
ѻ҆́н же рече и҆мъ, и҆дѣже тѣло, та́мо съберꙋтсѧ и҆ ѻ҆рли·

Глв̑҇а, и҃і·

Гл҃аше же и҆ при́тчю к нимъ, како подоба́етъ всегда моли́тисѧ, и҆ не стꙋжати с̂и, гл҃ѧ·

зач̑҇, п҃и·

Сꙋдїа б̂ѣ нѣ́кїи в꙽ нѣ́коемъ гра́дѣ, б҃а не боа́сѧ, и҆ чл҃къ не срам̑лѧ́асѧ·

Вдова же нѣ́каа б̂ѣ въ градѣ том꙽, и҆ прихожд̑аше к немꙋ гл҃ющи, ѿм꙽стѝ мене ѿ съпр́ъника мое҆го.
и҆ не хотѧ́ше на до́лзѣ времени·

Послѣди же рече в себѣ.
а҆ще и҆ б҃а не боюсѧ, и҆ чл҃къ не срамлѧ́юсѧ, н̂о зане творит̑ м̂и трꙋды вдови́ца сїа, ѿмщꙋ еа̀ да не доконца̀ приходѧщи застоитъ менѐ·

Рече же г҃ь.
слы́шите, что̀ сꙋдїи неправдѣ гл҃ет꙽.
б҃ъ же не и́мать ли сътвори́ти ѿмщенїе и҆з꙽бра́нъныхъ свои́хъ, въпїющихъ к немꙋ дн҃ь и҆ нощь, и҆ длъготрьпитъ ѻ҆́ них̑;
гл҃ю вамъ.
ꙗ҆́ко сътворитъ ѿм꙽щенїе и҆хъ в꙽ско́рѣ·

ѻ҆ба́че сн҃ъ члчс̑҇кїи пришед̑, ѹ҆бо ѻ҆брѧщетъ л̂и с̂и вѣрꙋ на земли;
рече же и҆ къ дрꙋгым꙽ ѹ҆пова́ющимъ събо́ю, ꙗ҆́ко сꙋть правед̑ници, и҆ ѹ҆ничижа́ющихъ про́чихъ, при́тчю сїю·

зач̑҇, п҃ѳ·

Чл҃ка дв̂а внидо́ста въ цр҃ковь помоли́тисѧ.
е҆ді́нъ фарисе́й, а҆ дрꙋгїи мытарь.
фарисе́й же ста́въ, си́це в себѣ молѧ́шесѧ, бж҃е хвалꙋ̀ тебѣ въздаю̀, ꙗ҆́ко нѣсмь ꙗ҆́коже про́чїи чл҃цы.
хи́щницы непра́ведъницы, прелюбодѣ́е, и҆л̂и ꙗ҆коже се́й мытаръ.
пощꙋсѧ дв̂а кра́ты в сꙋбо́тꙋ, десѧти́нꙋ даю всего е҆ли́ка притѧжꙋ·

Мытар̑҇ же и́здале́че стоѧ̀, не хотѧ̀ н̂и ѻ҆чїю възвести на́ нб҃о, н̂о біа́ше пе́р꙽си своа̀ гл҃ѧ, б҃е млс̑҇тивъ бꙋди мн̂ѣ грѣшномꙋ·

Гл҃ю вамъ, ꙗ҆ко сни́де се́й ѻ҆пра́вданъ в домъ свой, паче ѻ҆ного·

Ꙗ҆́ко всѧкъ възносѧѝсѧ смири́тсѧ.
смирѧаѝ же себе, възнесет̑сѧ·

зач̑҇, ч҃·

Приношахꙋ же к немꙋ и҆ младенцѧ, да и҆хъ ко́снетсѧ.
видѣвше же ѹ҆́чн҃цы запрѣтиша им̑.
і҆с҃ же призвавъ их̑, гл҃а.
ѻ҆ста́вите дѣтїи приходи́ти къ мнѣ, и҆ не брани́те им̑.
та́ковыхъ б̂о е҆сть црс̑҇твїе бж҃їе·

А҆ми́нь б̂о гл҃ю вамъ.
и҆́же а҆ще не прїиметъ црс̑҇твїѧ бж҃їа ꙗ҆́ко ѻ҆троча̀, не и҆́мать внѝти в н̂е·

зач̑҇, ч҃а·

И҆́ въпросѝ е҆го нѣ́кїи кнѧѕь, гл҃ѧ.
ѹ҆чи́телю бл҃гі́и, что̀ сътворивъ животъ вѣ́чный наслѣдъствꙋю;

Рече же е҆мꙋ і҆с҃.
что̀ м̂ѧ гл҃еши бл҃га;
никтоже бл҃гъ, токмо е҆ді́нъ б҃ъ.
за́повѣди вѣсѝ;
не прелюбы̀ твори.
не ѹ҆бїи.
не ѹ҆кради.
не лжесвѣдѣтельствꙋи.
чтѝ ѿц҃а твое҆го и҆ мт҃ере твою·

ѻ҆н же рече, вс̂ѧ сїа съхранихъ ѿ ю́ности моеа̀·

Слы́шав же сїа і҆с҃, рече е҆мꙋ.
е҆ще е҆ді́ного не докон̑҇чалъ е҆си.
всѧ е҆ли́ка и҆́маши прода́ждь, и҆ разда́и ни́щимъ, і҆ и҆мѣти и́маши съкровище на нб҃си.
и҆ грѧди в꙽ слд̑ѣ мене.
ѻ҆́н же слы́шавъ с̂е, приско́рбенъ бысть, бѣ̀ б̂о бога́тъ ѕѣло̀.
видѣв꙽ же е҆го і҆с҃ приско́рбна бывша, рече.
ка́ко неѹ҆добь и҆мꙋщеѝ богат̑ство, в꙽ црс̑҇твїе бж҃їе вни́дꙋтъ·

Ѹ҆до́бѣе б̂о е҆сть велбꙋ́дꙋ сквоѕѣ и҆глинѣ ѹ҆ши проитѝ, неже бога́тꙋ в꙽ црс̑҇твїе бж҃їе вни́ти·

Рѣшѧ же слы́шавшеѝ, т̂о кт̂о мо́жетъ сп҃сенъ бы́ти;
ѻ҆́н꙽ же рече.
невъзмо́жнаѧ ѿ чл҃къ, възможна сꙋтъ ѿ б҃а·

Рече же петр꙽.
с̂е м̂ы ѻ҆ста́вихомъ вс̂ѧ, и҆ по тебѣ и҆до́хомъ·

ѻ҆́н же рече и҆мъ.
а҆ми́нь гл҃ю вамъ, ꙗ҆́ко никтоже е҆сть и҆же ѻ҆ста́витъ домъ, и҆л̂и родителѧ, и҆ли братїю, и҆ли сестры, и҆лї женꙋ̀, и҆ли чѧ́да, црс̑҇твїа ради бж҃їа, и҆же не прїиметъ мно́жицею въ вре́мѧ с̂е, и҆ в꙽ вѣкъ грѧдꙋщїи живот̑ вѣ́чныи·

зач̑҇, ч҃в·

Пое́м же ѻ́банадесѧте, рече к ним̑.
с̂е въсходимъ въ і҆ерс̑҇ли́мъ, и сконча́ютсѧ вс̂ѧ пи́саннаа прро̑҇кы ѻ҆́ сн҃ѣ чл҃честѣ.
предадѧтъ бо е҆го ꙗ҆́ѕы́комъ, и҆ порꙋга́ютсѧ е҆мꙋ, и҆ ѹ҆корѧтъ е҆го, и҆ ѻ҆плю́ютъ е҆го, и҆ би́вше ѹ҆бїю́тъ е҆го, и҆ в꙽ третїи дн҃ь въскрс̑҇нетъ·

И҆ тїи ничесоже ѿ сихъ разꙋмѣшѧ.
и҆ б̂ѣ гл҃ъ се́й съкровенъ ѿ ни́хъ, и҆ не разꙋмѣвахꙋ гл҃емыхъ·

зач̑҇, ч҃г·

Бы́сть же е҆гда прибли́жишасѧ въ і҆е҆ри́хонъ, слѣпецъ нѣкїи сѣдѧ́ше при пꙋти, просѧ̀.
слы́шав же наро́дъ ми́моходѧщъ, въпрашаше что̀ ѹ҆бо е҆сть с̂е·

Повѣ́даша же е҆мꙋ, ꙗ҆ко і҆с҃ назарѧнинъ ми́мохо́дит̑·

И҆ въз́пѝ гл҃ѧ.
і҆с҃е сн҃е двд̑въ пом҃лꙋи҆ м̂ѧ·

И҆ пред̑и҆дꙋщеѝ преща́хꙋ е҆мꙋ, да ѹ҆млъчи́тъ·

ѻ҆́н же паче мно́жае въпїаше, сн҃е двд̑въ, поми́лꙋй м̂ѧ·

Став же і҆с҃, повелѣ привести е҆го к꙽ себѣ·

Прибли́ж꙽шꙋ же сѧ е҆мꙋ к немꙋ.
въпросѝ е҆го гл҃ѧ.
чт̂о хо́щеши да ти сътворю;
ѻ҆н же́ рече.
г҃и, да прозрю.
і҆с҃ же рече е҆мꙋ прозрѝ, вѣра твоа сп҃се́ т̂ѧ.
и҆ а́бїе прозрѣ.
и҆ в꙽ слѣдъ е҆го и҆дѧше, сла́влѧ б҃а·

И҆ вс̂и лю́дїе ви́дѣвше, възда́шѧ хвалꙋ̀ бв҃и·

Глв̑҇а, ѳ҃і.

зач̑҇, ч҃д·

И вшед̑ прохождаше въ і҆е҆рихон̑҇.
и҆ с̂е мꙋжъ, нарица́емыи закхей, и҆ се́й б̂ѣ ста́рѣи мытаре́мъ, и҆ то̀й б̂ѣ богат̑, і҆ и҆скаше ви́дѣти і҆с҃а, кт̂о е҆сть, и҆ не можаше ѿ наро́да, ꙗ҆́ко възрастомъ малъ б̂ѣ·

И҆ преди тек꙽, възлѣзе на ꙗ҆́годичинꙋ, да ви́дитъ е҆го, ꙗ҆ко тꙋдѣ хотѧше минꙋти·

и҆ ꙗ҆́ко прїиде на мѣ́сто, възрѣвъ і҆с҃, видѣ е҆го, и҆ рече к немꙋ, закхе́е, потща́всѧ слѣзи.
днс̑҇е б̂о в домꙋ твоем̑ подоба́етъ м̂и быти·

И҆ потща́в꙽сѧ слѣзе, и҆ прїатъ е҆го радꙋасѧ·

И҆ ви́дѣвше вс̂и, ропта́хꙋ гл҃юще, ꙗ҆́ко къ грѣшномꙋ мꙋж́ꙋ вни́де витати·

Ста́в же закхе́й рече къ г҃ꙋ.
с̂е полъ и҆мѣнїа мое҆го г҃и дам꙽ ни́щим̑.
и҆ а҆ще кого̀ чимъ ѻ҆бидѣхъ, въз꙽вращꙋ̀ четвери́цею·

Рече же к немꙋ і҆с҃·

ꙗ҆ко днс̑҇е сп҃се́нїе до́мꙋ семꙋ бысть, зане и҆ се́й сн҃ъ а҆враа́мль е҆сть.
прїиде б̂о сн҃ъ чл҃чь взыскати и҆ спс̑҇ти поги́бшаго·

Слы́шащим же и҆мъ сїа, приложи при́тчю, зане близъ е҆мꙋ бы́ти і҆ерс̑҇ли́ма, и҆ мнѧ́хꙋ ꙗ҆́ко а҆бїе црс̑҇тво бж҃їе хо́щетъ ꙗ҆́ви́тисѧ, и҆ рече ѹ҆бо·

зач̑҇, ч҃е·

Чл҃къ нѣкїи добра̀ ро́да, и҆́де на странꙋ дале́че, прїати себѣ црс̑҇тво, и҆ въз꙽врати́тисѧ·

Призвав же десѧть рабъ свои́хъ, дасть и҆мъ де́сѧть мнасъ, и҆ рече к нимъ.
кꙋ́плю дѣите дондеже прїидꙋ·

И҆ гражане е҆го ненави́дѧхꙋ е҆го, и҆ посла́шѧ мл҃твꙋ въ слѣдъ е҆го гл҃юще, не хо́щемъ семꙋ да црс̑҇твꙋет꙽ над нами·

И҆ бы́сть е҆гда̀ въз꙽врати́сѧ прїи́мъ црс̑҇тво, рече пригласи́ти рабы̀ тїи, и҆́мже дасть сребро̀, да ѹ҆вѣсть каковꙋ̀ кꙋплю̀ сꙋть сътворили·

Прїиде же пе́рвыи гл҃ѧ.
г҃и, мнасъ твоа̀ придѣла де́сѧть мнасъ·

И҆ рече е҆мꙋ.
благїи рабе, и҆ до́брыи.
ꙗ҆́ко ѻ҆ ма́лѣ вѣрен̑҇ бысть, бꙋди ѻ҆́бласть и҆мѣ́а над̑ десѧтїю градо́въ·

И҆ прїиде вторыи гл҃ѧ.
г҃и, мна́съ твоа̀ сътворѝ пѧть мнасъ·

Рече же и҆ томꙋ̀, и҆ т̂ы бꙋди над̑ пѧтїю градо́въ·

И҆ дрꙋгїи прїиде гл҃ѧ.
г҃и, с̂е мна́съ твоа̀, ю҆̀же и҆мѣхъ положе́нꙋ въ ѹ҆брꙋ́сѣ, боѧ́хъ б̂о сѧ тебе, ꙗ҆́ко чл҃къ ꙗ҆́ръ е҆си.
взе́млеши е҆гоже не положи.
и҆ жнеши е҆гоже не сѣѧ́въ·

Гл҃а же е҆мꙋ, ѿ ѹ҆стъ твои҆хъ сꙋжд̑ꙋ ти лꙋка́выи ра́бе.
вѣ́дѧше ꙗ҆́ко а҆зъ чл҃къ ꙗ҆́ръ е҆смь, в꙽зе́млю е҆гоже не положивъ, и҆ жнꙋ̀ е҆гоже не сѣа́въ.
и҆ почто не вдасть мое҆го сребра̀ кꙋпцемъ.
и҆ а́зъ пришед꙽ с ли́хвою и҆стѧзалъ быхъ е҆̀.
и҆ прд̑естоа́щимъ рече.
възмѣте ѿ него мнас̑҇, и҆ дади́те и҆́мꙋщемꙋ де́сѧть мна́съ.
и҆ рѣша е҆мꙋ.
г҃и, и҆́мать десѧть мна́съ.
гл҃ю б̂о вамъ, ꙗ҆́ко всѧ́комꙋ и҆мꙋщемꙋ дастьсѧ, а҆ ѿ неи҆мꙋщаго, и҆ е҆же и́мать ѿи́метсѧ ѿ него·

ѻ҆баче врагы̀ моѧ ѻ҆ны̀, не хотѣвшаѧ мн̂ѣ да цр҃ь бых꙽ был̑҇ над ними, приведѣте сѣм́о, і҆ и҆с꙽сѣцѣте предо мно́ю·

И҆ сїа рекъ, и҆дѧше преди въсходѧ̀ въ і҆ерс̑҇ли́мъ·

зач̑҇, ч҃ѕ·

И҆́ бысть ꙗ҆́ко прибл́ижисѧ въ виѳсфаги́ю и҆ виѳанїю, к꙽ горѣ нарица́емѣй е҆леѻ́н꙽, посла̀ дв̂а ѹ҆чн҃къ свои҆х꙽ гл҃ѧ, и҆дѣте в꙽ прѧ́мнꙋю весь, в нюже входѧ́ща ѻ҆брѧ́щета жребѧ̀ привѧ́зано на не́же никтоже николи́же ѿ чл҃к꙽ всѣде.
ѿрѣшша е҆̀ приведѣта.
и҆ а҆́ще кт̂о в̂ы въпроша́етъ, почто̀ ѿрѣшае́та, си́це рцѣта емꙋ, ꙗ҆́ко г҃ь е҆го требꙋет꙽·

шед̑ша же по́сланнаѧ, ѻ҆брѣто́ста ꙗ҆́коже рече и҆́ма·

ѿрѣшающема же и҆́ма жрѣбѧ̀, реко́шѧ господїе е҆го к ни́ма.
что ѿрѣшѧ́ета жрѣбѧ;
ѻ҆на же реко́ста, ꙗ҆́ко г҃ь е҆го треб́ꙋет꙽.
и҆ приведоста е҆̀ къ і҆с҃ови·

И҆ въз꙽врьгше ри́ѕы своѧ на жрѣбѧ, всадишѧ і҆с҃а.
и҆д́ꙋщꙋ же е҆мꙋ, постила́хꙋ ри́ѕы своѧ по пꙋти·

зач̑҇, ч҃з·

Приближа́ющꙋ же сѧ е҆мꙋ ѹ҆же а҆бїе къ нисхоженїю горѣ̀ е҆леѻ́ньстѣй, нача́шѧ вс̂е множество ѹ҆чн҃къ, радꙋющесѧ хвалити б҃а гла́сомъ ве́лїемъ, ѻ҆ всѣхъ си́лахъ ꙗ҆же видѣшѧ, гл҃юще.
блс̑҇вен꙽ грѧдыѝ цр҃ь въ и҆мѧ гн҃е.
ми́ръ на нб҃си, и҆ сла́ва в꙽ вы́шнихъ·

И҆ нѣ́цїи фарисе́е ѿ наро́да рѣшѧ к꙽ немꙋ.
ѹ҆чт҃лю, запрѣтѝ ѹ҆чн҃комъ свои́мъ·

и҆ ѿвѣщавъ, рече и҆мъ.
гл҃ю вамъ, ꙗ҆́ко а҆ще сїи ѹ҆млъчѧт꙽, ка́менїе възопїе́тъ·

И҆ ꙗ҆ко прибли́жисѧ, видѣвъ град̑, пла́касѧ ѻ҆ нем꙽ гл҃ѧ.
ꙗ҆́ко а҆ще б̂ы разꙋмѣлъ и҆ т̂ы в꙽ дн҃ь се́й твой, е҆же къ смире́нїю твое҆мꙋ.
нн҃ѣ же съкры́сѧ ѿ ѻ҆чїю твоею̀.
ꙗ҆́ко прїидꙋтъ дн҃їе на́ т̂ѧ.
и҆ ѻ҆бложѧт̑ вра́ѕи твой ѻ҆стро́гъ ѻ҆ тебѣ, и҆ ѻ҆бы́дꙋтъ т̂ѧ, и҆ ѻ҆бъи҆мꙋтъ т̂ѧ всю́дꙋ, и҆ разбїю́тъ т̂ѧ, и҆ чѧ́да твоѧ в тебѣ.
и҆ не ѻ҆ста́вѧтъ ка́мень на ка́мени в꙽ тебѣ, понеже не разꙋмѣ̀ вре́мене посѣще́нїѧ твое҆го·

зач̑҇, ч҃и·

И҆́ вшед̑ в꙽ цр҃ковь, начатъ и҆згони́ти продаю́щаѧ в не́й, и҆ кꙋпꙋю́щаѧ, гл҃ѧ и҆мъ.
пи́сано е҆сть.
домъ мой домъ мл҃твы е҆сть.
вы же сътвори́сте е҆го пеще́рꙋ разбо́йникомъ.
и҆ бѣ ѹ̀ча по всѧ дн҃и в꙽ цр҃кви·

А҆рхїере́е же и҆ кни́жницы и҆ска́хꙋ е҆го погꙋби́ти, и҆ старѣишины людемъ.
и҆ не ѻ҆брѣта́хꙋ чт̂о сътворѧтъ е҆мꙋ.
лю́дїе б̂о вс̂и дръжа́хꙋсѧ е҆го послꙋша́юще е҆го·

Глв̑҇а, к҃.

зач̑҇, ч҃ѳ·

И бы́сть въ е҆ді́нъ ѿ дн҃їи ѻ҆нх̑ѣ ѹ҆чѧ́щꙋ е҆мꙋ люди в꙽ цр҃кви, и҆ бл҃говѣствꙋющꙋ·

Прїидо́шѧ сщ҃е́нницы и҆ кни́жницы съ ста́рцы, и҆ рѣшѧ к немꙋ гл҃юще.
рцы намъ коею̀ ѻ́бластїю сїа твори́ши;
и҆ли кт̂о е҆сть давыи тебѣ вла́сть сїю;
ѿвѣща́в же реч̑҇ к ним̑.
въпрошꙋ вы и҆ а҆зъ е҆ді́ного словесѐ, и҆ рцѣте м̂и, кр҃ще́нїе і҆ѻ҆а́нново.
съ нб҃се л̂и б̂ѣ;
и҆ли ѿ чл҃къ·

ѻ҆ни́ же помышлѧхꙋ к себѣ гл҃юще.
ꙗ҆́ко а҆ще реч̑҇мъ съ нб҃се.
речет̑, почт́о ꙋбо не вѣровасте е҆мꙋ;
а҆ще ли же речем̑ ѿ чл҃къ, вс̂и лю́дїе ка́менїемъ побїют н̂ы·

И҆звѣстно бо ес̑҇ ѻ҆ і҆ѻа́ннѣ, ꙗ҆́ко прро̑҇къ бѣ·

И҆ ѿвѣща́шѧ, не вѣмы ѿкꙋ́дꙋ·

І҆с҃ же рече и҆́мъ.
ни а҆зъ гл҃ю ва́мъ, коею ѻ҆бластїю сїа творю·

зач̑҇, р҃·

Начѧт̑ же к людем̑ гл҃ати при́тчю сїю.
чл҃къ нѣкыи̑ насади виногра́дъ, и҆ вда́стъ е҆го дѣ́лателемъ, и҆ ѿи҆де на лѣта мно́га·

И҆ въ времѧ посла̀ к дѣ́лателемъ, ра́бъ, да ѿ плода виногра́да дадѧ́ть е҆мꙋ·

дѣлателе же би́вше е҆го, посла́шѧ то́щь.
и҆ приложи посла́ти дрꙋгїи ра́бъ·

ѻ҆ни же и҆ того би́вше, и҆ доса́жд̑ьше е҆мꙋ, посла́шѧ то́щь·

И҆ приложи посла́ти тре́тїи.
ѻ҆ни́ же и҆ того ѹ҆ꙗ҆звльше, и҆згна́ша·

Рече же господи́нъ виногра́да.
чт̂о сътворю;
послю̀ сн҃а мое҆го възлюбленнаго, е҆да ка́ко сего видѣ́вше, ѹ҆срамл́ѧютсѧ·

Видѣвше же е҆го дѣлателе, мы́шлѧхꙋ к себѣ гл҃юще, се́и е҆сть наслѣдникъ, прїидѣте ѹ҆бїемъ е҆го, да на́ше бꙋдетъ достоѧ́нїе·

И҆ і҆звед̑ше е҆го вонъ и҆з виногра́да, ѹ҆би́шѧ.
чт̂о ѹ҆бо сътвори́т꙽ и҆́мъ господи́нъ виногра́да;
прїидет꙽ и҆ погꙋби́тъ дѣл́ателѧ сїа, и҆ вда́сть виноград̑ и҆нѣмъ·

Слы́шавше же, реко́шѧ, да не бꙋ́детъ·

ѻ҆́н же възрѣвъ на ни́хъ, рече.
чт̂о ѹ҆бо пи́саное с̂е;

Ка́мень, е҆гоже небрего́шѧ ѕи́жд̑ꙋщеѝ, се́и бысть въ главꙋ ю꙽глꙋ·

Всѧкъ падыѝ на ка́мени томъ, съкрꙋши́тсѧ.
а҆ на не́мже падетъ, сътрыетъ е҆го·

зач̑҇, р҃а·

И҆́ взыска́шѧ а҆рхїере́е и҆ кни́жницы.
възложити на́нь рꙋцѣ в то́и час̑҇, и҆ ѹ҆боѧ́шасѧ народа.
разꙋмѣша бо, ꙗ҆ко к ним̑ при́тчю сїю рече·

И҆ съблюд̑ше, посла́шѧ ла́ѧтелѧ.
творѧще себе пра́вед̑ники быти, да и҆мꙋтъ е҆го въ словеси, въ е҆же преда́ти е҆го начѧ́льствꙋ и҆ ѻ҆́бласти и҆ге́монови·

И҆ въпроси́шѧ е҆го̀ гл҃юще.
ѹ҆чи́телю.
вѣм́ы ꙗ҆́ко пра́во гл҃еши и҆ ѹ҆чи́ши, и҆ не на лица зри́ши, н̂о въ и҆́стинꙋ пꙋти бж҃їю ѹ҆чи́ши.
досто́ит ли на́мъ кесаре́ви да́нъ даѧти, и҆ли нѝ;

Разꙋмѣв꙽ же и҆хъ лꙋка́вство, рече к ни́мъ.
что̀ м̂ѧ и҆скꙋшѧ́ете;
покажи́те м̂и ца́тꙋ.
чїи́ и҆́мать ѻ҆браз̑ и҆ над̑писа́нїе;
ѿвѣща́вше же реко́шѧ, кесаревъ·

ѻ҆́н же рече и҆м꙽.
въздади́те ѹ҆б̂о, ꙗ҆́же кесаре́ва, кесаре́ви.
и҆ ꙗ҆́же бж҃їа, бв҃и·

И҆ не мого́ша зазрѣти гл҃а е҆го пред̑ людми.
и҆ диви́вшесѧ ѻ҆ ѿвѣтѣ е҆го, ѹ҆молчѧ́шѧ·

зач̑҇, р҃в·

Пристꙋпи́шѧ же нѣ́цыѝ ѿ сад̑дꙋке́и, гл҃ющеѝ въскр҃се́нїю не бы́ти.
въпраша́хꙋ е҆го гл҃юще.
ѹ҆чи́телю, моѷси написа на́мъ.
а҆ще комꙋ бра́тъ ѹ҆́мретъ.
и҆мы̀ женꙋ.
и҆ то́и бесчѧ́денъ ѹ҆мретъ, да бра́тъ е҆го, пои́мет̑ женꙋ̀, и҆ въста́витъ сѣмѧ бра́тꙋ своемꙋ·

Сед̑мь ѹ҆бо бра́тїѧ б̂ѣ, и҆ первыи поѧ́тъ женꙋ, ѹ҆мре бесчѧ́денъ.
и҆ поѧ́тъ вт́орыи женꙋ̀, и҆ то́и ѹ҆мре бесчѧ́денъ.
и҆ тре́тїи поѧ́тъ ю҆̀.
та́кожд̑е же и҆ вс̂и сед̑мь<.>

І҆ не ѻ҆ста́виша чѧдъ, и҆ ѹ҆мро́шѧ.
послѣжд̑е же всѣх꙽, ѹ҆мре и҆ жена̀.
въ воскреше́нїе ѹ҆бо, кото́раго и҆хъ бꙋ́детъ жена̀;
сед̑мь бо и҆мѣшѧ ю҆̀ женꙋ·

И҆ ѿвѣща́въ рече и҆мъ і҆с҃.
сн҃ове вѣ́ка сего, же́нѧтсѧ и҆ посага́ют̑.
а҆ сподо́бльшеѝсѧ вѣкъ ѻ҆нъ ѹ҆лꙋчити, и҆ въскресе́нїе е҆же ѿ мр҃твыхъ, н̂и же́нѧтсѧ н̂и посага́ютъ, ни ѹ҆мрети бо ктомꙋ мо́гꙋть.
ра́вни б̂о ст̑ꙋ а҆́гг҃лом̑, и҆ сн҃ове сꙋть бж҃їи, въскр҃се́нїѧ сн҃ове сꙋще·

А҆ ꙗ҆́коже въста́ют̑ мр҃твїи, и моѷси ска́за при кꙋпи́нѣ, ꙗ҆́коже гл҃етъ г҃а б҃а а҆враа́млѧ, и҆ б҃а і҆са́акова, и҆ б҃а і҆а́ковлѧ.
б҃ъ же нѣсть мр҃твыхъ, н̂о живыхъ.
всѝ б̂о томꙋ жи́ви сꙋть·

ѿвѣща́вше же нѣцыи ѿ кни́жникъ, реко́ша.
ѹ҆чителю, добрѣ рече·

Ктомꙋ же не смѣ́ахꙋ е҆го въпроси́ти ничесоже·

Рече же к нимъ.
ка́ко гл҃ютъ х҃а сн҃а двд̑ва быти·

самъ б̂о двд̑ъ гл҃етъ в꙽ кні́ѕѣ ѱало́мъстѣй.
рече г҃ь гв҃и мое҆мꙋ, сѣди ѻ҆деснꙋю мене, до́ндеж̑ положꙋ врагы̀ твоѧ подножїе нога́ма твои́ма;
двд̑ъ ѹ҆бо г҃а е҆го нарицает̑, и҆ ка́ко сн҃ь е҆мꙋ е҆сть;

зач̑҇, р҃г·

Слы́шащим же всѣм́ъ лю́дем̑, рече ѹ҆чн҃комъ свои́мъ.
внемлѣте себѣ ѿ кни́жникъ, хотѧ́щихъ ходи́ти въ ѻ҆деждахъ, и҆ любѧ́щихъ цѣлованїѧ на тръжищыхъ, и҆ пред̑сѣданїѧ на со́нмищихъ, и преждезванїѧ на вечерѧх꙽·

И҆же снѣда́ютъ до́мы в꙽дови́цъ, и҆ виною далече мо́лѧтсѧ.
сїи прїимꙋтъ ли́шше ѻ҆сꙋжде́нїе·

Глв̑҇а, к҃а·

Възрѣв же видѣ̀ в꙽мѣта́ющаѧ, въ храм꙽ на бдѧ́щїи и҆мѣнїа, да́ры своѧ бога́тыа·

Видѣв же и҆ нѣ́кꙋю вдови́цꙋ ѹ҆бо́гꙋ в꙽мѣта́ющꙋ т̂ꙋ дв̂ѣ лѣп́тѣ.
и҆ рече, въи́стиннꙋ гл҃ю вам̑, ꙗ҆ко вдови́ца сїа ѹ҆бо́гаа̀ мно́жае всѣхь в꙽ве́рже.
всѝ б̂о сїи ѿ и҆збытка свое҆го въвръгошѧ в да́ры бв҃и.
сїа же ѿ лише́нїа свое҆го, вс̂е житїе е҆же и҆мѣ̀ в꙽вр́ъже·

зач̑҇, р҃д·

И҆́ нѣ́коимъ гл҃ющемъ ѻ҆ цр҃кви.
ꙗ҆ко ка́менїемь до́брымь и҆ сосꙋды ѹ҆краше́на, реч̑҇.
сїꙗ҆́ же ви́дѣте, прїидꙋтъ дн҃їе, в нѧже не ѻ҆ста́нетъ ка́мень на ка́мени, и҆же не разоритсѧ·

Въпроси́ша же е҆го гл҃юще.
ѹ҆чителю, когд̑а ѹ҆бо сїа бꙋдꙋть.
и҆ что̀ е҆сть знаменїе е҆гда хотѧтъ сїа быти;

зач̑҇, р҃е·

ѻ҆́н же рече, блюдѣте, да не прельщени бꙋ́дете.
мно́ѕи б̂о прїидꙋтъ въ и҆мѧ моѐ гл҃юще, ꙗ҆́ко а҆зъ е҆смь.
и҆ времѧ прибли́жисѧ.
не и҆зы́дѣте ѹ҆бо в꙽ слд̑ѣ и҆хъ·

Є҆гда же ѹ꙼слы́шите брани и҆ нестрое́нїа, не ѹ҆бо́итесѧ.
подоба́етъ б̂о си́мъ быти прежде, н̂о не ѹ҆̀ а҆́бїе кончи́на·

Тогда̀ гл҃аше и҆м꙽.
въста́нет꙽ б̂о ꙗ҆́ѕы́къ на ꙗ҆ѕык̑҇, и҆ црс̑҇тво на црс̑҇тво.
трꙋ́си же вели́ци по мѣ́ста, и҆ глади и҆ па́гꙋбы бꙋдт̑ꙋ, страхова́нїа же и҆ зна́менїѧ ве́лїа съ нб҃се бꙋ́дꙋтъ·

зач̑҇, р҃ѕ·

Пре́жде же сих̑ всѣхъ, възложѧтъ на вы̀ рꙋ́кы своѧ, і҆ и́жд̑енꙋтъ, предаю́ще на со́нмищѧ и҆ темни́цѧ, ведо́ми къ цр҃емъ, и҆ влд̑камъ, и҆́мени мое҆го ради·

Прилꙋчи́т же сѧ вамъ въ свѣдѣтельство·

Положи́те ѹ҆бо на срд̑цѣхъ ва́шихъ, не преже поѹ҆чатисѧ ѿвѣщавати.
а҆зъ б̂о вамъ дамъ ѹ҆ста̀ и҆ премꙋ́дрость, е́йже не възмо́гꙋтъ противитисѧ, и҆л̂и ѿвѣщати вс̂и противлѧ́ющеѝсѧ вамъ·

Предани же бꙋ́дете и҆ роди́тели и҆ братїею̀ и҆ ро́домъ и҆ дрꙋ́гы, и҆ ѹ҆мр҃твѧтъ ѿ васъ.
и҆ бꙋ́дете ненави́дими ѿ всѣхъ и́мени мое҆го ради.
и҆ власъ главы̀ ва́шеа̀ не поги́бнетъ.
в трьпѣ́нїи҆̀ ва́шем꙽, стѧжи́те дш҃а ва́шѧ·

Є҆гда же ѹ҆ѕрите ѻ҆бъстоим̑ і҆ерс̑҇ли́мъ во́и, тогда̀ разꙋмѣ́ете ꙗ҆́ко прибли́жисѧ запꙋстѣ́нїе е҆мꙋ·

Тогда сꙋщїи въ і҆ѹ҆де́ѝ, да бѣгают꙽ в го́ры.
і҆ и́же посредѣ е҆го, да и҆схо́дѧт̑ і҆ и́же въ странахъ, да не вхо́дѧтъ во́нь, ꙗ҆́ко дн҃їе ѿмщенїю сїи сꙋть, ꙗ҆ко и҆спо́лнитисѧ всемꙋ пи́саномꙋ·

Горе же и҆мꙋщимъ въ ѹ҆тробѣ, и҆ доѧ́щимъ в тыѝ дн҃и·

Бꙋ́детъ б̂о бѣда̀ ве́лїа на землѝ, и҆ гнѣвъ на́ людех꙽ сихъ.
и҆ па́дꙋтъ въ ѻ҆́стрїи меча, и҆ пленени бꙋдꙋтъ въ всѧ ꙗ҆́ѕы́кы, і҆ и҆ерс̑҇лимъ бꙋ́детъ попира́емъ ꙗ҆́ѕыкы.
до́ндеже сконча́ютсѧ времена̀ ꙗ҆́ѕы́къ·

И҆ бꙋ́дꙋтъ ѕна́менїѧ въ сл҃нци и҆ лꙋнѣ и҆ ѕвѣздахъ, и҆ на зем̑лѝ тꙋга̀ ꙗ҆́ѕы́комъ, ѿ нечаа́ніа шꙋ́ма морскаго и҆ възмꙋще́нїѧ, и҆здыха́ющем꙽ чл҃комъ ѿ страха и҆ чаанїа грѧдꙋщихъ на вселеннꙋю·

си́лы б̂о нбс̑҇ъныа подви́гнꙋтсѧ·

И҆ тогда ѹ҆ѕрѧть сн҃а члчс̑҇ка грѧдꙋща на ѻ҆блацх̑ѣ, съ си́лою и҆ сла́вою мно́гою·

зач̑҇, р҃з·

Начина́ющим же си́м бывати, въсъклони́тесѧ и҆ въздви́гнѣте главы̀ ва́шѧ, зане приближа́етсѧ и҆збавленїе ва́ше·

И҆ рече при́тчꙋ и҆мъ.
ви́дите смоко́вницꙋ, и҆ вс̂ѧ дре́ва, е҆гда прошибаю́тсѧ, ѹ́же ви́дѧще са́ми вѣ́сте, ꙗ҆́ко близъ жа́тва е҆сть.
та́ко и҆ в̂ы,<.>
Є҆гда ѹ҆зрите сїа быва́юща, вѣдите ꙗ҆́ко бли́зъ е҆сть црс̑҇твїе бж҃їе·

а҆ми́нь гл҃ю вам̑, ꙗ҆ко не и́мать преитѝ род̑ се́й, дондеже вс̂ѧ сїа бꙋ́дꙋтъ·

Нб҃о и҆ землѧ ми́мои҆́дет.
а҆ словеса моѧ не и҆мꙋть преитѝ·

Внемлѣте же себѣ, да не когда ѻ҆тѧгчѧ́ютъ срд̑цѧ вашѧ ѻ҆бьѧде́нїемъ и҆ пїа́нствомъ, и҆ печѧ́льми жите́йскыми, и҆ на́йдетъ на вы̀ внеза́пꙋ дн҃ь то́и.
ꙗ҆́ко сѣть б̂о прїидетъ на вс̂ѧ живꙋщаѧ на лици всеа̀ землѧ̀·

Бди́те ѹ҆бо на вѧко вре́мѧ молѧ́щесѧ, да сподо́битесѧ ѹ҆бѣжати всѣхъ сих̑ хотѧ́щих̑ быти, и҆ ста́ти пред̑ сн҃омъ члчс̑҇кым̑·

зач̑҇, р҃и·

Бѣ же въ дн҃е в꙽ цр҃кви ѹ҆ча̀, нощїю же и҆сходѧ̀ въдворѧшесѧ в꙽ го́рѣ нарица́емѣй е҆леѻ́нъ·

И҆ вс̂и людїе и҆зъ ѹ҆тра прихождахꙋ к немꙋ в꙽ цр҃ковъ, послꙋшати е҆го·

Глв̑҇а, к҃в·

Приближаше же сѧ пра́зникъ ѻ҆прѣ́снокъ, гл҃емыи па́сха·

І҆ и҆скахꙋ а҆рхїере́е и҆ кни́жницы, како бышѧ ѹ҆би́ли е҆го, боѧ́хꙋбосѧ людїи·

Вниде же сатана̀ въ і҆ѹ́дꙋ, нарица́емаго скарїѻт̑, сꙋщꙋ ѿ числа ѻ҆боюнадесѧте·

І҆ шед̑ гл҃а а҆рхїере́ѻм̑ и҆ вое҆во́дам̑ ка́ко е҆го предастъ им̑.
и҆ възрадовашасѧ, и҆ совѣща́ша е҆мꙋ сре́бреникы дати, і҆ и҆сповѣ́да.
і҆ и҆скаше подо́бна вре́мени, да предастъ е҆го и҆́мъ без꙽ наро́да·

Прїде же дн҃ь ѻ҆прѣ́снокъ, вонь же под́обно б̂ѣ вре́мѧ жрѣти па́схꙋ·

и҆ посла̀ петра і҆ и҆ѻа́нна, рекъ.
шед̑ше ѹ҆гото́ваите намъ па́схꙋ, да ꙗ҆́ми·

ѻ҆на же реко́ста е҆мꙋ.
гдѣ хо́щеши ѹ҆гото́вае҆мъ ѻ҆н же рече и҆́мъ.
се въсходѧ́щема ва́ма въ́ град̑, срѧ́щетъ вы чл҃къ в꙽ скꙋде́лъницѣ во́дꙋ носѧ̀, по немъ и҆дѣта в꙽ дом̑ вонже вхо́дитъ.
и҆ рцѣта до́мꙋ влады́цѣ.
гл҃етъ тебѣ ѹ҆чител̑҇, гд҃ѣ е҆сть ѻ҆би́тель, и҆дѣже па́схꙋ съ ѹ҆чн҃кы мои́ми снѣмъ;
и҆ той ва́ма пока́жетъ го́рницꙋ ве́лїю по́стланꙋ, т̂ꙋ ѹ҆гото́ваи́та·

шед̑ша же ѻ҆брѣто́ста ꙗ҆́коже рече и́ма, и҆ ѹ҆гото́васта па́схꙋ·

И҆ е҆гда бысть часъ, възлеже, и҆ ѻ҆́банадесѧте а҆пс̑҇ла с ним̑.
и҆ рече к нимъ, жела́нїемъ въжд̑елѣх꙽ сїю па́схꙋ ꙗ҆́сти с꙽ ва́ми, прежд̑е да́же не прїимꙋ мꙋ́къ.

Гл҃ю б̂о вамъ, ꙗ҆́ко ѿсе́лѣ не и́мамъ ꙗ҆сти ѿ него, до́ндеже сконча́ютсѧ в꙽ црс̑҇твїи бж҃їи·

И҆ прїи́мъ ча́шꙋ, хвалꙋ̀ въздавъ рече.
прїимѣте с̂е и҆ раздѣли́те себѣ.
гл҃ю б̂о вамъ, ꙗ҆́ко не и́мамъ пи́ти ѿ плода̀ ло́знаго, до́ндеже црс̑҇твїе бж҃їе прїидетъ·

И҆ прїи́мъ хлѣбъ, хвалꙋ въздавъ преломѝ, и҆ дастъ имъ, гл҃ѧ.
с̂е е҆сть тѣ́ло моѐ, е҆же за в̂ы дае́мо, с̂е твори́те в꙽ мое въспомина́нїе·

Та́кожде же и҆ ча́шꙋ по́ вечери гл҃ѧ.
сїа ча́шѧ но́выи завѣтъ моею̀ кро́вїю, ꙗ҆́же за вы̀ проливает̑сѧ·

ѻбаче с̂е рꙋка̀ предаю́щаго м̂ѧ, съ мно́ю е҆сть на трапе́ѕѣ·

И҆ сн҃ь ѹ҆бо члчс̑҇кїи и҆́детъ по реченномꙋ.
ѻ҆баче го́ре чл҃кꙋ томꙋ, и҆мже предастъсѧ·

И҆ тїи нача́шѧ и҆скати в себѣ, которыи ѹ҆бо ѿ нихъ хотѧѝ с̂е сътвори́ти·

Бы́сть же и҆ прѧ̀ в них̑, кїи мни́тсѧ и҆хъ бы́ти бо́лїи·

ѻ҆н же рече и҆мъ.
цр҃їе ꙗ҆́ѕы́къ, господ̑ствꙋютъ и҆мъ, и҆ ѻ҆блада́ющеѝ и́ми, бл҃годатели нарица́ютсѧ.
вы же не тако.
н̂о бо́лїи васъ, да бꙋ́детъ ꙗ҆́ко мнїи.
и҆ ста́рѣѝ ꙗ҆́ко слꙋжаѝ.
кто̀ б̂о бо́лїи, възлежаѝ ли, и҆л̂и слꙋжаѝ не възлежаѝ л̂и;
а҆з же посредѣ вас̑҇ е҆смь, ꙗ҆́ко слꙋжа́ѝ.
вы же е҆сте пребы́вше со мн́ою в꙽ напа́стехъ мои́хъ.
и҆ а́зъ завѣщава́ю вамъ, ꙗ҆́коже завѣща̀ мн̂ѣ ѿц҃ъ мой црс̑҇тво, да ꙗ҆сте и҆ пїете на трапе́ѕѣ моей в꙽ црс̑҇твїи мое́мъ, и҆ сѧ́дете на престо́лѣхъ, сꙋдѧ́ще ѻ҆бѣманадесѧте колѣнома і҆ил҃евома·

Рече же г҃ь, си́моне си́моне, с̂е сатана̀ про́ситъ васъ, дабы̀ сѣѧ́лъ ꙗ҆́ко пшени́цꙋ.
а҆з꙽ же молихъсѧ ѻ҆ тебѣ, да не ѻ҆скꙋдѣет̑ вѣра твоа.
и҆ т̂ы нѣ́когда ѻ҆бра́щсѧ, ѹ҆твердѝ братїю твою·

ѻ҆н же рече е҆мꙋ.
г҃и с тобою готовъ е҆смь и҆ в темни́цꙋ и҆ в꙽ смр҃ть и҆тѝ·

ѻ҆́н же рече.
гл҃ю т̂и пе́тре, не въз꙽гласит̑ пѣтелъ днс̑҇е, до́ндеже, три кр́аты ѿвр́ъжешисѧ мене не вѣ́дѣти·

И҆ рече и҆мъ, е҆гда послахъ в̂ы без꙽ влагали́ща, и҆ бе́зъ мѣха, и҆ без꙽ сапогъ.
е҆да чт̂о лишени бы́сте;
ѻ҆ни́ же рѣша ничесоже.
реч̑҇ же им̑, н̂о нн҃ѣ и҆же и҆мат̑ влага́лище, да во́зметъ, такожде же и҆ мѣхъ.
а҆ и́же не и҆́мать, да продастъ ри́зꙋ свою, и҆ кꙋпитъ ножъ.
гл҃ю бо вам̑, ꙗ҆́ко е҆ще пи́саное с̂е подоба́етъ да сконча́етсѧ ѻ҆ мнѣ̀, е҆же и҆ съ безако́нными вмѣни́сѧ.
и҆бо е҆же ѻ҆ мнѣ кончи́нꙋ и҆́мать·

ѻ҆ни́ же рѣшѧ.
г҃и, с̂е ножа̀ зд̂ѣ два̀·

ѻ҆н же рече и҆мъ, доволно е҆сть·

зач̑҇, р҃ѳ·

І из꙽шедь и́де по ѻ҆бы́чаю в꙽ го́рꙋ е҆леѻ́нъскꙋю, по не́м же и҆до́ша ѹ҆чн҃цы е҆го·

Быв же на мѣ́стѣ, рече и҆мъ.
моли́тесѧ, да не вни́дете в напасть·

И҆ самъ ѿстꙋпѝ ѿ нихъ ꙗ҆́ко вр́ъженїем̑ ка́мени.
и҆ покло́нь колѣ́нѣ, молѧ́шесѧ гл҃ѧ.
ѿч҃е а҆ще во́лиши, ми́монести ча́шꙋ сїю ѿ менѐ·

ѻ҆баче не моа̀ во́лѧ, н̂о твоа̀ да бꙋ́детъ·

Ꙗ҆́ви́ же сѧ е҆мꙋ а҆гг҃лъ, с꙽ нб҃се, ѹ҆крѣплѧ́а е҆го.
и҆ бывъ в꙽ по́двиѕѣ, прилѣжнѣе́ молѧ́шесѧ.
бысть же потъ его ꙗ҆́ко ка́плѧ кро́ве ка́плющи на́ землю.
и҆ в꙽ставъ ѿ моли́твы·

и҆ пришед̑ къ ѹ҆чн҃комъ, ѻ҆брѣте и҆хъ спѧ́ща ѿ печали, и҆ рече и҆мъ, чт̂о спитѐ;
в꙽ста́вше моли́тесѧ, да не в꙽ни́дете в꙽ напасть·

Є҆ще же е҆мꙋ гл҃ющꙋ, с̂е наро́дъ и҆ нарица́емыи І҆ѹ҆да, е҆ді́нъ ѿ ѻ҆боюнадесѧте, и҆дѧше пред̑ ними, и҆ пристꙋпѝ къ і҆с҃ови цѣ́ловати е҆го.
се бо б̂ѣ зна́менїе далъ и҆мъ.
е҆гоже а҆ще лобжꙋ̀ то́и ес̑҇·

І҆с҃ же рече е҆мꙋ.
и҆ѹ́до, лобза́нїемъ сн҃а члчс̑҇каго предае́ши;
видѣв꙽ше же и҆же бѣхꙋ ѻ҆ немъ быва́емоѐ рѣшѧ емꙋ.
г҃и, а҆ще ѹ҆да́римъ ноже́мъ;
и҆ ѹ҆да́ри е҆ді́нъ нѣкїи ѿ нихъ а҆рхїере́ѻва раба̀, и҆ ѹ҆рѣза е҆мꙋ ѹ҆хо десно́е·

ѿвѣща́в же і҆с҃, рече, ѻста́вите до сего,<.>

И҆ коснꙋв꙽ въ ѹ҆́хо е҆го, и҆сцѣлѝ е҆го·

Рече же і҆с къ пришед̑шим̑ нань а҆рхїере́ѻм̑, и҆ воево́дамъ цр҃ков꙽нымъ, и҆ ста́рцемъ.
ꙗ҆́ко на разбо́йника ли и҆зыдо́сте съ ѻ҆рꙋжїемъ и҆ дрекольми ꙗ҆́ти м̂ѧ.
по всѧ̀ дн҃и с́ꙋщꙋ м̂и с ва́ми въ цр҃кви, не простросте рꙋкъ на мѧ.
н̂о сѐ е҆сть ваша годи́на и ѻ́бласть те́мънаа·

Є҆́мше́ же е҆го ведо́шѧ, и в꙽ведоша е҆го въ дворъ а҆рхїере́ѻв̑҇·

Пе́тръ же в꙽ слд̑ѣ и҆дѧше и҆зда́лече·

Въз꙽гнѣщшемъ же ѻ҆гнь посредѣ двора, и҆ вкꙋпѣ сѣдѧ́щимъ им̑, сѣдѧще петръ посредѣ и҆хъ·

Ѹ҆зрѣвши же е҆го рабы́ни нѣ́каѧ сѣдѧщ꙽ при свѣтѣ, и҆ възрѣвши нань рече.
и҆ се́й с нимъ б̂ѣ·

ѻ҆н꙽ же ѿвр́ъжесѧ е҆го, гл҃ѧ же́но, не знаю е҆го·

И҆ по ма́лѣ дрꙋгїи видѣвъ е҆го, рече́.
и҆ т̂ы ѿ нихъ е҆си·

пе́тръ же рече, чл҃че нѣсмь·

И мимошед̑шꙋ ꙗ҆́ко часꙋ е҆ді́номꙋ, и҆нъ нѣкїи крѣплѧ́шесѧ гл҃ѧ.
въи́стинꙋ и се́й с нимъ б̂ѣ, и҆бо галиле́анинъ е҆сть·

Рече же пе́тръ, чл҃че, не вѣмъ е҆же гл҃еши·

И҆ а́бїе е҆ще гл҃ющꙋ е҆мꙋ, въз꙽гласѝ пѣтелъ·

И҆ ѻ҆бращъсѧ г҃ь възрѣ на петра.
и҆ помѧнꙋ̀ петръ сло́во гн҃е, ꙗ҆́коже рече е҆мꙋ, ꙗ҆́ко прежд̑е да́же пѣтелъ не въз꙽гласи́тъ, ѿвр́ъжешисѧ мене тр̂икраты.
і҆ и҆зшедъ во́нъ, пла́касѧ го́р꙽ко·

И҆ мꙋжїе дръжа́щеѝ і҆с҃а, рꙋга́хꙋсѧ е҆мꙋ бїю́ще.
и҆ закры́вше е҆го, бїа́хꙋ е҆го по лицꙋ̀, и҆ въпраша́хꙋ е҆го гл҃ще.
прорци, кт̂о е҆сть ѹ҆дареѝ т̂ѧ;
і҆ и́на мно́га хꙋ́лѧще гл҃ахꙋ нан̑҇·

И҆ ꙗ҆́ко бысть дн҃ь, събра́шасѧ ста́рцы люд̑стїи́, и҆ а҆рхїере́е и҆ кни́жницы, и҆ ведо́шѧ е҆го на со́нмъ свой гл҃юще, а҆ще т̂ы е҆си х҃с;
рцѝ намъ·

Рече же им̑.
а҆ще вамъ рекꙋ, не и҆мете вѣры.
а҆ще же и҆ въпрошꙋ̀ в̂ы, не ѿвѣща́ете м̂и, ни ѿпꙋститѐ·

ѿсе́лѣ, бꙋ́дет꙽ сн҃ъ чл҃ческыи сѣдѧи́ ѻ҆деснꙋю́ си́лы бж҃їа.

Рѣшѧ же вс̂и, ты ли ѹ҆бо е҆си сн҃ъ бж҃їи;
ѻ҆́н же к нимъ рече, в̂ы гл҃ете, ꙗ҆́ко а҆зъ е҆смъ·

ѻ҆ни же рѣшѧ, чт̂о е҆ще требꙋ́емъ свѣдѣтельства;
са́ми б̂о слы́шахомъ ѿ ѹ҆стъ е҆го·

Глв̑҇а, к҃г·

И въста́вше вс̂е мно́жество и҆хъ·

зач̑҇, р҃і·

Ведо́шѧ е҆го къ пилатꙋ·

Нача́ша же нань ва́дити гл҃юще.
сего̀ ѻ҆брѣто́хомъ раз꙽враща́юща ꙗ҆́ѕы́къ нашъ, и҆ възбранѧ́юща кесаре́ви дань даа́ти, гл҃юща себе х҃а цр҃ѧ быти·

Пилат же въпросѝ е҆го гл҃ѧ.

Ты̂ ли е҆си цр҃ь и҆ѹ҆де́ѻм̑ ѻ҆́н же ѿвѣщавъ рече е҆мꙋ, т̂ы гл҃еши·

Пила́т же рече къ а҆рхїере́ѻм̑ и҆ наро́дꙋ.
никое́а же ѻ҆брѣтаю вины̀ в꙽ чл҃цѣ семъ·

ѻ҆ни же крѣплѧ́хꙋсѧ гл҃юще, ꙗ҆́ко раз꙽враща́етъ лю́ди, ѹ҆ча по все́й и҆ѹ҆де́и·

наченъ ѿ галиле́а, до здѣ̀·

Пила́т же слы́шавъ галиле́ю, въпросѝ, а҆ще чл҃къ галиле́анинъ е҆сть.
разꙋмѣвъ ꙗ҆́ко ѿ ѻ́бласти и҆́родовы е҆сть, посла̀ е҆го къ и́родꙋ, сꙋщꙋ и҆ томꙋ въ і҆ерс̑҇ли́мѣ в тыѝ дн҃и·

И҆́род же видѣвъ і҆с҃а, радъ бысть ѕѣло.
бѣ б̂о жела́а ѿ мно́га вре́мене ви́дѣти е҆го, зане слы́шаше мно́га ѻ҆ немъ, и҆ надѣ́ашесѧ знаменїе н́ѣкое ви́дѣти ѿ него быва́емо.
въпраша́ше же е҆го словесы̀ мно́гы, ѻ҆́нъ же ничесоже ѿвѣщава́ше е҆мꙋ·

Стоа́хꙋ же а҆рхїере́е и҆ кни́жницы прилѣжно ва́дѧще нань·

Ѹ҆кори́в же е҆го и҆́родъ с во́ѝ свои́ми, и҆ порꙋга́всѧ, ѻ҆бл́ък꙽ е҆го в ри́зꙋ свѣтлꙋ, въз꙽врати е҆го к꙽ пила́тꙋ·

Бы́ста же с̂и дрꙋ́га и҆́род̑ же и҆ пила́тъ в꙽ то́й дн҃ь съ собо́ю, прежд̑е б̂о бѣста вра́ждꙋ и҆мꙋща междꙋ собо́ю·

Пила́т же съзва̀ а҆рхїере́ѧ и҆ кнѧ́ѕѧ и҆ люди, рече к нимъ.
приведо́сте м̂и чл҃ка сего, ꙗ҆ко раз꙽враща́юща люди.
и҆ с̂е а҆зъ пред вами и҆стѧзавъ, ни е҆ді́ноа ѻ҆брѣта́ю в꙽ чл҃цѣ сем꙽ вины̀, ꙗ҆же на́нь ва́дите.
н̂о ни и҆́родъ.
посла́хъ б̂о е҆го к немꙋ, и҆ с̂е ничтоже смр҃ти досто́йно сътворе́но е҆сть ѻ҆ нем̑·

Показавъ ѹ҆бо е҆го ѿпꙋщꙋ·

Нꙋждꙋ же и҆мѧ́ше на всѧ̀ пра́зникы ѿпꙋщати и҆мъ е҆ді́ного·

Възъпи́шѧ же вс̂и наро́ди, гл҃юще.
возмѝ сего, ѿпꙋсти же намъ вара́в꙽вꙋ.
и҆же б̂ѣ за нѣкꙋю крамолꙋ бы́вшꙋю въ́ градѣ и҆ ѹ҆бїиство, в꙽ве́рженъ в темни́цꙋ·

Па́ки же пилатъ въз꙽гласѝ хотѧ ѿпꙋстити і҆с҃а·

ѻ҆ни же въз꙽глашѧ́хꙋ гл҃юще, распнѝ распнѝ е҆го·

ѻ҆́нъ же третицею рече к ни́мъ, что̀ б̂о зл̂о сътвори се́й;
ничесоже досто́йна смр҃ти ѻ҆брѣтохъ ѻ҆ немъ.
показа́въ ѹ҆бо е҆го ѿпꙋщꙋ·

ѻ҆ни же прилежа́хꙋ гла́сы вели́кими, просѧ́ще е҆го на распѧ́тїе.
и҆ ѹ҆стоа́хꙋ гла́си их̑, и҆ а҆рхїере́йстїи·

Пила́т же посꙋди быти проше́нїю и҆хъ.
ѿпꙋсти же и҆же за крамолꙋ и҆ ѹ҆бїиство всажд̑е́наго в темни́цꙋ, е҆гоже прошѧ́хꙋ, і҆с҃а же предав꙽ воли и҆х꙽.
и҆ ꙗ҆ко поведо́ша е҆го, емше си́мона нѣ́кое҆го кирине́а грѧдꙋща с꙽ села̀, възложишѧ нань крс̑҇тъ носи́ти по і҆с҃ѣ·

И҆дѧ́ше же в꙽ слѣдъ е҆го народ̑ мно́гъ людїи, и҆ жены̀, ꙗ҆́же и҆ пла́кахꙋсѧ и҆ рыда́хꙋ е҆го·

ѻ҆бращь же сѧ к нимъ і҆с҃, рече.
дщерѧ і҆ерс̑҇ли́мъскы, не пла́чите ѻ҆ мнѣ, ѻ҆баче себе пла́чите, и҆ чѧдъ ва́шихъ.
ꙗ҆́ко с̂е дн҃їе́ грѧ́дꙋт꙽, в нѧ́же рекꙋт꙽.
блаже́ны непло́ды, и҆ ѹ҆тро́бы ꙗ҆́же не родишѧ, и҆ съсцѝ, и҆же не дои́шѧ·

тогда на́чнꙋтъ гл҃ати горамъ, падѣте на́ ны.
и҆ хлъмо́мъ, покры́ите н̂ы.
зане а҆ще в сꙋ́ровѣ дре́вѣ сїа творѧтъ, в сꙋ́сѣ что̀ б́ꙋдетъ;

зач̑҇, р҃аі·

Ведѧ́хꙋ же і҆ и́на дв̂а ѕлодѣѧ́ с ни́мъ ѹ҆би́ти.
и҆ е҆гда прїидо́ша на мѣсто, нарица́емое ло́бное, т̂ꙋ распѧ́шѧ е҆го, и҆ злодѣѧ́.
ѻ҆́вого ѹ҆бо ѻ҆дес́нꙋю, а҆ дрꙋга́го ѻ҆шꙋю·

І҆с҃ же гл҃аше, ѻч҃е ѿпꙋстѝ и҆мъ, не вѣдѧтъ б̂о что̀ творѧтъ·

Раздѣлѧ́ющеѝ же риѕы е҆го, мета́хꙋ жр́ебїа.
и҆ стоѧ́хꙋ лю́дїе зрѧще·

Рꙋгахꙋ же сѧ и҆ кн҃ѕи с ни́ми гл҃юще, и҆ныѧ сп҃сѐ, да сп҃се́тъ и҆ себѐ.
а҆ще то́й е҆сть х҃с бж҃їи и҆з꙽бра́нныи·

Рꙋга́хꙋ же сѧ е҆мꙋ и҆ во́ини пристꙋпа́юще, и҆ ѻ҆цет̑ придѣюще е҆мꙋ, и҆ гл҃ахꙋ.
а҆ще ты е҆си цр҃ь и҆ѹ҆де́йскъ, сп҃си́сѧ самъ·

Бѣ же и҆ написа́нїе напи́сано над ни́мъ, пи́смены е҆́ллин꙽скыми, и҆ ри́м꙽скыми, и҆ е҆вре́йскыми.
се́й е҆сть цр҃ь и҆ѹ҆де́йскъ·

Є҆ді́н же ѿ ѻ҆бѣше́ною ѕлодѣ́ю хꙋлѧ́ше е҆го, гл҃ѧ.
а҆ще т̂ы е҆си х҃с, сп҃си себе и҆ на́ю·

ѿвѣща́в же дрꙋгїи, прѣща́ше е҆мꙋ, гл҃ѧ.
ни ли т̂ы бои́шисѧ б҃а, ꙗ҆́ко в꙽ то́мже ѻ҆сꙋженъ е҆си;
и҆ м̂ы ѹ҆бо въ пра́вдꙋ.
досто́йнаѧ б̂о по дѣло́мъ на́ю въспрїе́млевѣ, се́й же ни е҆ді́ного зл̂а сътворѝ·

и҆ гл҃аше і҆с҃ови.
помѧнѝ м̂ѧ г҃и, е҆гда прїидеши въ црс̑҇твїи с̂и·

И҆ рече е҆мꙋ і҆с҃.
а҆ми́нь гл҃ю тебѣ, днс̑҇е со мно́ю бꙋ́деши в раѝ·

Бѣ же часъ ꙗ҆́ко шестыи, и҆ тм̂а бысть по все́й землѝ, до часа̀ девѧ́таго.
и҆ помр́ьче сл҃нце, и҆ завѣса цр҃ко́внаа раз̑дра́сѧ посредѣ·

И҆ въз꙽глашь гла́сом̑ ве́лїем꙽ і҆с҃, рече.
ѿч҃е, в рꙋцѣ твоѝ предаю дх҃ъ мой, и҆ сїа рекъ, и҆з꙽дъше·

Видѣв же со́тникъ бы́вшее, просла́ви б҃а гл҃ѧ.
въи́стинꙋ чл҃к꙽ се́й пра́веденъ б̂ѣ·

И҆ вс̂и пришед̑шеѝ наро́ди на позо́ръ се́й, ви́дѧще быва́ющаѧ, бїю́ще пр́ъси своа, въз꙽враща́хꙋсѧ·

Стоѧ́хꙋ же вс̂и ѕна́емїи е҆го и҆здале́че, и҆ жены̀ спослѣдъствова́въшаѧ е҆мꙋ ѿ галиле́а, зрѧ́ще сихъ·

И҆ се мꙋжъ, и҆́менемъ и҆ѻ́сифъ, совѣтникъ сы́й, мꙋжъ бл҃гъ и҆ пра́веден̑҇, се́й не б̂ѣ пристал̑҇ совѣтꙋ и҆ дѣ́лꙋ их̑, ѿ а҆римаѳе́а гра́да и҆ѹ҆де́йска, и҆же ча́ѧше и҆ то́й црс̑҇твїа бж҃їа.
се́й пристꙋ́пль к пила́тꙋ просѝ тѣло і҆с҃ово.
и҆ сне́мъ е҆̀ ѻ҆бвитъ плащаницею, и҆ положи е҆̀ въ́ гробѣ и҆з꙽сѣченѣ, в немъже не бѣ̀ никтоже нико́гдаже положен̑҇·

И҆ дн҃ь б̂ѣ пѧто́къ, и҆ сꙋбо́та свита́ше.
въ слд̑ѣ же шед̑шаѧ жены̀, ꙗ҆́же бѣхꙋ пришли с нимъ ѿ галиле́а, видѣшѧ гробъ, и҆ ꙗ҆́ко положено бысть тѣло е҆го·

Въз꙽вращьше же сѧ ѹ҆гото́ваша а҆рома́ты и҆ мѷро, и҆ в сꙋбо́тꙋ ѹ҆бо ѹ҆млъча́шѧ по́ заповѣди·

Глв̑҇а, к҃д·

зач̑҇, рв҃і·

Въ еді́нꙋ же ѿ сꙋботъ, ѕѣло̀ ра́но, прїидо́шѧ на́ гробъ·

носѧ́ще ꙗ҆́же ѹ҆гото́ваша а҆рома́ты·

И҆ дрꙋгыа с ни́ми.
ѻ҆брѣтошѧ же ка́мень ѿвале́нъ ѿ гроба.
и҆ вшед̑ше не ѻ҆брѣто́ша телесе г҃а і҆с҃а·

И҆ бысть недомыслѧщимсѧ и҆мъ ѻ҆ семъ·

И҆ с̂е мꙋж́а дв̂а ста́ста в нихъ, в ри́захъ бли́щащих̑сѧ·

Пристра́шнамъ же бы́вшамъ и҆мъ, и҆ покло́ншимъ лицѧ̀ на́ зем̑лю.
реко́ста к ни́мъ·

Чт̂о и҆́щете жива́го с мр҃твыми;
нѣсть зд̂ѣ, н̂о въста.
помѧнѣте ꙗ҆́коже гл҃а вамъ е҆щѐ сыѝ в галиле́ѝ, гл҃ѧ.
ꙗ҆́ко подоба́ет꙽ сн҃ꙋ чл҃чьскомꙋ пре́данꙋ бы́ти.
в рꙋцѣ чл҃къ грѣш́ник꙽, и҆ про́пѧтꙋ бы́ти, и҆ тре́тїи дн҃ь въскрс̑҇нꙋти.
и҆ помѧнꙋшѧ гл҃ы е҆го·

И҆ възвра́щшесѧ ѿ гроба, възвѣсти́шѧ вс̂ѧ сїа е҆ді́номꙋнадесѧте, и҆ всѣмъ про́чим̑·

Бѣша же магдалы́ни ма́рїа, и҆ і҆ѻа́нна, и҆ ма́рїа і҆а́ковлѧ, и҆ про́чаѧ с ни́ми, ꙗ҆́же гл҃ахꙋ къ а҆пс̑҇ломъ сїа.
и҆ ꙗ҆́ви́шасѧ пред̑ ни́ми ꙗ҆́ко лж̂а гл҃и и҆хъ, и҆ не вѣр́овахꙋ имъ·

зач̑҇, рг҃і·

Петръ же въста́въ течѐ къ́ гробꙋ.
и҆ прини́кь, видѣ̀ ри́зы е҆ді́ны лежа́ща.
ѿи́де в себѣ дивѧсѧ бы́вшемꙋ.

И҆ с̂е дв̂а ѿ них̑ бѣ́ста и҆дꙋщ́ѧ в то́иже дн҃ь, в꙽ ве́сь, ѿстоа́щꙋ стадїи шестьдесѧт̑ ѿ і҆е҆рс̑҇ли́ма, е҆иже и҆м́ѧ е҆ммаѹ҆съ.
и҆ т̂а бесѣ́доваста к себѣ̀ ѻ҆ всѣхъ сихъ приклю́чшихсѧ.
и҆ бысть бесѣд́ꙋющема и҆́ма и҆ съвопрашаю҆щимасѧ·

И҆ сам̑ і҆с҃ прибли́жисѧ и҆дѧ́ше с ни́ма, ѻ҆́чиж̑ ею̀ дръжа́стасѧ да е҆го не позна́ета.
реч̑҇ же к ни́ма.
чт̂о сꙋть словеса̀ сїа, ѻ҆ них̑же стѧзаетасѧ к себѣ̀ и҆дꙋща, и҆ е́ста дрѧх̑л́а;
ѿвѣща́в же е҆дін̑҇, е҆мж̑ꙋ и҆́мѧ клеѻ҆́па, речѐ к немꙋ̀.
т̂ы ли е҆дін̑҇ прише́лец̑҇ е҆си въ е҆рс̑҇лим̑, и҆ не ѹ҆вѣ́дѣ бы́вших̑ в нем̑ въ́ дн҃и сїа;
и҆ реч̑҇ и҆́ма.
кыих̑;
ѻ҆на же рѣ́ста е҆мꙋ, ꙗ҆́же ѻ҆ і҆с҃ѣ назарѧни́нѣ, и҆же бысть мꙋж́ъ прро̑҇къ, си́ленъ дѣ́ломъ и҆ сло́вомъ, пред̑ бг҃омъ, и҆ всѣ́ми люд̑ми·

Ка́ко преда́шѧ е҆го а҆рхїе҆ре́е и҆ кнѧ́ѕи на́ши на ѻ҆сꙋжденїе сме́рти, и҆ распѧ́ша е҆го·

Мы̂ же надѣа́хомсѧ, ꙗ҆́ко се́и е҆сть хотѧ̀ и҆зба́вити і҆и҆л҃ѧ·

Но̂ и҆ над̑ всѣ́ми си́ми, тре́тїи с̂е дн҃ь и҆́мать днесь, ѿнелиже сїа бы́ша·

Но̂ и҆ жены̀ нѣ́кыѧ ѿ нас̑҇ ѹ҆жаси́шѧ н̂ы, бы́вшаѧ̀ ра́но ѹ҆́ гроба, и҆ не ѻ҆брѣтше телесѐ, е҆го, прїидо́шѧ гл҃юще.
и҆ ꙗ҆́вле́нїе а҆гг҃лъ видѣвша, и҆же гл҃ютъ е҆го жи́ва.
и҆ і҆до́ша нѣ́цїи ѿ насъ къ́ гробꙋ, и҆ ѻ҆брѣто́ша та́ко, ꙗ҆́коже и҆ жены̀ рѣшѧ, самого же не видѣш́ѧ.
и҆ то́й рече к ни́мъ : ѽ несмы́сленаѧ, и҆ коснаѧ̀ срд̑цемъ, е҆же вѣ́ровати ѻ҆ всѣхъ, ꙗ҆́же гл҃ашѧ проро́цы·

не сїа ли подоба́ше пострадати х҃ꙋ, и҆ вни́ти въ сла́вꙋ свою;
и҆ наче́нъ ѿ моѷсе́а, и҆ ѿ всѣхъ прро̑҇къ, сказаа́ше и҆́ма, ѿ всѣхъ писа́нїи ꙗ҆́же ѻ҆ не́мъ.
и҆ приближишѧсѧ в꙽ ве́сь, в нюже и҆дѧ́ста.
и҆ то́и творѧ́шесѧ далеча́ише и҆ти.
и҆ нꙋ́жаста е҆го гл҃юще.
ѻ҆блѧ́зи с на́ма.
ꙗ҆́ко к ве́черꙋ е҆сть, и҆ приклони́лсѧ е҆сть дн҃ь.
и҆ въни́де с ни́ма ѻ҆блежти.
и҆ бы́сть ꙗ҆́ко възлеже́ с ни́ма.
прїим̑ хлѣбъ, блс̑҇ви, и҆ преломи́въ даѧ́ше и҆́ма·

ѻ҆нѣ́ма же ѿвръзо́стасѧ ѻ҆́чи, и҆ позна́ста е҆го.
и҆ то́й неви́димъ бысть и́ма.
и҆ реко́ста к себѣ, не срд̑це ли на́ю горѧ б̂ѣ в на́ю.
е҆гд̑а гл҃аше на́ма на пꙋтѝ, и҆ ꙗ҆́ко ска́зоваше на́ма писа́нїа;
и҆ въста́вшѧ в то́и часъ, възврати́стасѧ въ і҆е҆рс̑҇ли́мъ.
и҆ ѻ҆брѣто́ста съвокꙋ́плены е҆ді́ногона́десѧте, и҆ и҆же бѧ́хꙋ с ни́ми.
гл҃ющихъ, ꙗ҆ко въи҆́стиннꙋ въста̀ г҃ь, и҆ ꙗ҆висѧ сѷмонꙋ.
и҆ т̂а повѣ́даста ꙗ҆́же бы́ша на пꙋтѝ, и҆ ꙗ҆́ко позна́сѧ и҆́ма въ преломленїи хлѣба·

зач̑҇, рд҃і·

Сіа же и҆мъ гл҃ющемъ, самъ і҆с҃ ста̀ посредѣ и҆хъ, и҆ гл҃а и҆мъ, ми́ръ вам̑·

ѹ҆боѧ́вше же сѧ и҆ пристра́шни бы́вше, мнѧ́хꙋ дх҃ъ ви́дѧще·

И҆ рече и҆мъ, чт̂о смꙋще́ни е҆сте, и҆ почто̀ помышле́нїа вхо́дѧтъ в꙽ срд̑цѧ ва́шѧ;

Ви́дите рꙋцѣ моѝ и҆ но́ѕѣ моѝ, ꙗ҆ко самъ а҆́зъ е҆́смь.
ѻ҆сѧжи́те м̂ѧ и҆ ви́дите, ꙗ҆́ко дх҃ъ пло́ти и҆ кости не и́мать, ꙗ҆́коже менѐ ви́дите и҆мꙋща·

И҆ с̂е рекъ, показа̀ и҆мъ рꙋцѣ и҆ но́ѕѣ·

е҆ще же невѣрꙋю́щемъ и҆мъ, ѿ ра́дости и҆ чюдѧ́щемсѧ, рече им̑ и҆́мате ли чт̂о снѣ́дно зд̂ѣ.
ѻ҆ни же да́шѧ е҆мꙋ̀ ры́бы печены ча́сть, и҆ ѿ пчелъ сот꙽.
и҆ вземъ пред̑ ни́ми ꙗ҆́сть·

Рече же им̑.
с̂и сꙋтъ словеса̀, ꙗ҆́же гл҃ахъ вамъ е҆ще сыи с ва́ми.
ꙗ҆́ко подобаетъ скон꙽ча́тисѧ всѣмъ напи́санымъ, в зако́нѣ моѷсе́ѻ҆вѣ, и҆ прро̑҇цѣхъ, и҆ ѱалмх̑ѣ ѻ҆ мнѣ̀·

Тогда̀ ѿврьзе им̑, ѹ҆мъ, разꙋмѣти писа́нїа.
и҆ рече и҆мъ.
ꙗ҆́ко та́ко пи́сано е҆сть.
и та́ко подоба́ше пострада́ти х҃ꙋ.
и҆ въскрс̑҇нꙋти ѿ мр҃твыхъ тре́тїи дн҃ь.
и҆ пропов́ѣдатисѧ въ и҆мѧ е҆го покаа́нїю.
и҆ ѿпꙋщенїю грѣхомъ, въ всѣхъ ꙗ҆́зы́цех̑, наче́нше ѿ ие҆рс̑҇ли́ма.
вы же е҆сте свѣдѣтелїе симъ<.>

И҆ с̂е а҆зъ послю̀ ѻ҆бѣтованїе ѿц҃а мое҆го на в̂ы.
вы же сѧ́дѣте въ́ градѣ і҆е҆рс̑҇ли́м꙽стѣ, до́ндеже ѻ҆бле́четесѧ си́лою свы́ше·

И҆звед̑ же и҆хъ во́нъ, до виѳанїа.
и҆ въз꙽двигъ рꙋцѣ своѝ, блс̑҇ви и҆хъ.
и҆ бысть е҆гда блс̑҇вѧше и҆хъ, ѿстꙋпѝ ѿ них̑, и҆ възноша́шесѧ на́ нб҃о.
и҆ тїи поклонив̑҇шѧсѧ е҆мꙋ, и҆ въз꙽врати́шѧсѧ въ і҆е҆рс̑҇ли́мъ с ра́достїю вели́кою.
и҆ бѣхꙋ вынꙋ в꙽ цр҃кви, хвалѧ́ще и҆ блс̑҇вѧ́ще бг҃а.
а҆ми́нь·

Є҆́же ѿ лꙋки ст҃аго е҆ѵг̑҇листа, и҆́мать в себѣ, к҃д, глв̑҇а, а҆ зачалъ цр҃ковныхъ, рд҃і·