Ѿ І҆Ѡ҆А́ННА СТ҃ОЄ БЛАГ҃ОВѢСТОВА́НЇЄ

Глв̑҇а, а҃.

зач̑҇, а҃·

В нача́лѣ б̂ѣ сло́во, и҆ сло́во б̂ѣ ѹ҆ б҃а, и҆ бг҃ъ б̂ѣ сло́во·

с̂е б̂ѣ и҆сконѝ ѹ҆ б҃а·

Вс̂ѧ тм̑ѣ бы́ша.
и҆ без него ничтоже бысть е҆же бысть·

В то́м꙽ живо́тъ б̂ѣ, и҆ жи во́тъ б̂ѣ свѣтъ чл҃комъ·

И҆ свѣтъ въ тмѣ свѣтитсѧ, и҆ тма̀ е҆го не ѻ҆бъѧ́тъ·

Бысть чл҃къ по́сланъ ѿ б҃а, и҆́мѧ е҆мꙋ і҆ѻа́ннъ·

Се́й прїиде въ свѣдѣтельство, да свѣдѣтельствꙋетъ ѻ҆́ свѣтѣ, да вс̂и вѣрꙋ и҆мꙋть е҆мꙋ·

Не б̂ѣ то́й свѣтъ, н̂о да свѣдѣтельствꙋетъ ѻ҆́ свѣтѣ·

Бѣ свѣт꙽ и́стинныи, и҆же просвѣща́етъ всѧ́каго чл҃ка грѧдꙋщ́аго въ миръ·

В ми́рѣ б̂ѣ, и҆ миръ тѣмъ бысть, и҆ ми́ръ е҆го не позна̀·

Въ своа̀ прїиде.
и҆ своѝ е҆го не прїа́шѧ·

Є҆лици же прїа́шѧ е҆го, дасть и҆мъ ѻ҆бласть чѧдомъ бж҃їимъ быти, вѣ́рꙋющимъ въ и҆мѧ е҆го·

И҆же не ѿ крови, ни ѿ похо́ти плотъскыѧ̀, ни ѿ похоти мꙋжьскы́а, н̂о ѿ б҃а родишасѧ·

И҆ сло́во плоть бы́сть, и҆ всели́сѧ в н̂ы·

И҆ видѣхом꙽ сла́вꙋ е҆го, сла́вꙋ ꙗ҆́ко е҆дїнороднаго ѿ ѻ҆ц҃а, и҆спо́лнь блгд̑ти і҆ и҆стинны·

І҆ѻа́ннъ свѣдѣтельствꙋе҆тъ ѻ҆ немъ, и҆ възва̀ гл҃ѧ.
се́й б̂ѣ е҆гоже рѣхъ, и҆же по мнѣ грѧдыи, предо мною бысть, ꙗ҆́ко первѣе мене б̂ѣ·

И҆ ѿ и҆сполне́нїа е҆го м̂ы вс̂и прїа́хомъ, и҆ блгд̑ть въз꙽ блгд̑ть·

Ꙗ҆́ко зако́нъ моѷсе́ѻм̑ данъ бысть.
блгд̑ть же і҆ и҆стина і҆с҃ хм҃ъ бысть·

зач̑҇, в҃·

Бг҃а никтоже видѣ нигдѣже.
е҆дїноро́дныи сн҃ъ, сы́й в ло́нѣ ѿч҃и, то́й и҆сповѣда·

И҆ с̂е е҆сть свѣдѣтельство і҆ѻа́нново.
е҆гда посла́шѧ жидове ѿ і҆ерс̑҇ли́ма и҆е҆ре́ѧ и҆ левѷты, да въпросѧт꙽ е҆го, т̂ы кто̀ е҆си;
і҆ и҆сповѣда, и҆ не ѿве́ржесѧ.
і҆ и҆сповѣда, ꙗ҆́ко нѣсмь а҆зъ х҃с·

И҆ въпроси́шѧ е҆го.
чт̂о ѹ҆бо, и҆лїа л̂и е҆си т̂ы;
и҆ гл҃а, нѣсмъ.
прро̑҇къ л̂и е҆си;
и҆ ѿвѣща̀, н̂и.
рѣша же е҆мꙋ, кто̀ е҆си, да ѿвѣтъ да́мы посла́вшимъ н̂ы.
чт̂о гл҃еши ѻ҆ тебѣ самомъ;
рече.
а҆зъ гла́съ вопїю́щаго в пꙋсты́ни, и҆спра́вите пꙋть гн҃ь, ꙗ҆́коже рече и҆са́іа прро̑҇къ·

И҆ по́сланїи, бѣ́хꙋ ѿ фарисе́и.
и҆ въпроси́шѧ е҆го и҆ рѣшѧ е҆мꙋ.
чт̂о ѹ҆бо кр҃ща́еши, а҆ще т̂ы нѣ́си х҃с.
н̂и и҆лїа, н̂и прро̑҇къ;
ѿвѣща и҆мъ і҆ѻа́ннъ, гл҃ѧ.
а҆зъ кр҃ща́ю водо́ю, посредѣ же васъ стои́тъ, е҆гоже в̂ы не вѣсте.
то́й е҆сть грѧды́ѝ по мнѣ̀, и҆же предо мно́ю бысть.
емꙋже нѣ́смь а҆зъ досто́инъ, да ѿрѣшꙋ̀ реме́нь сапогꙋ е҆го·

сїа въ виѳава́рѣ бышѧ, ѻ҆б онъ полъ і҆ѻрда́на.
и҆дѣже б̂ѣ і҆ѻа́ннъ крс̑҇тѧ·

зач̑҇, г҃·

Въ ѹ҆́трѣѝ же, видѣ і҆ѻа́нн꙽ і҆с҃а грѧдꙋща к꙽ себѣ.
и҆ гл҃а, с̂е а҆гнец꙽ бж҃їи, вземлѧѝ грѣхы̀ ми́рꙋ.
се́й е҆сть ѻ҆ не́мже а҆зъ рѣхъ.
по мнѣ грѧдетъ мꙋжъ, и҆же предо мно́ю бысть, ꙗ҆́ко пе́рвѣе менѐ б̂ѣ·

І҆ а́з꙽ не вѣ́дѧхъ е҆го, н̂о да ꙗ҆ви́тсѧ і҆и҆л҃еви, сего ради прїидохъ а҆зъ в꙽ водѣ̀ крс̑҇тѧ·

И҆ свѣдѣтел̑҇ствова і҆ѻа́ннъ, гл҃ѧ.
ꙗ҆́ко видѣхъ дх҃ъ сходѧщъ ꙗ҆́ко го́лꙋбъ с꙽ нб҃се, и҆ пребысть на не́мъ.
и҆ а҆зъ не вѣдѣхъ е҆го.
но посла́выѝ м̂ѧ крс̑҇ти́ти водою̀, то́й мн̂ѣ рече.
над̑ негоже ѹ҆́зриши дх҃ъ сходѧщь, и҆ пребыва́ющь на немъ, то́й е҆сть крс̑҇тѧѝ дх҃ом꙽ ст҃ы́мъ·

И҆ а́зъ видѣхъ, и҆ свѣдѣтельствовахъ, ꙗко се́и е҆сть сн҃ъ бж҃їи·

зач̑҇, д҃·

Въ ѹ҆трѣи же па́ки стоа́ше і҆ѻа́ннъ, и҆ ѿ ѹ҆чн҃къ е҆го дв̂а.
и҆ ѹ҆зрѣв꙽ і҆с҃а грѧдꙋща, гл҃а.
с̂е а́гнець бж҃їи·

И҆ слы́шаста е҆го ѻ́ба ѹ҆чн҃ка гл҃юща, и҆ по і҆с҃ѣ и҆до́ста·

ѻ҆бращь же сѧ і҆с҃, и҆ видѣвъ ѧ҆̀ по себѣ и҆дꙋща, гл҃а и҆́ма, чесо̀ и҆́щета;
ѻ҆на же рѣ́ста е҆мꙋ.
ра́вви, е҆же гл҃етсѧ сказа́емо, ѹ҆чи́телю, гд̂ѣ живеши;
и҆ гл҃а и҆ма, прїидѣта и҆ ви́дѣта·

Прїидо́ста же и҆ видѣ́ста гдѣ живѧ́ше, и҆ ѹ́ него пребы́ста дн҃ь то́и.
бѣ̀ же часъ ꙗ҆́ко десѧ́тыи·

Бѣ же а҆ндре́а братъ си́мона петра̀, е҆ді́нъ ѿ ѻ҆бою слы́шавшою ѿ і҆ѻа́нна, и҆ по немъ шед̑шею·

ѻ҆брѣте се́и прежд̑е бра́та свое҆го си́мона, и҆ гл҃а е҆мꙋ.
ѻ҆брѣто́хом̑ месїю, е҆же е҆сть сказа́емо х҃с.
и҆ приведѐ е҆го къ і҆с҃ови·

Възрѣв же нань і҆с҃, реч̑҇.
т̂ы е҆си си́монъ сн҃ь і҆ѻ́нинъ, т̂ы нарече́шисѧ ки́фа, е҆же сказа́етсѧ петръ·

зач̑҇. е҃·

Въ ѹ҆́трѣѝ же въсхотѣ и҆зыти в꙽ галиле́ю, и҆ ѻ҆брѣте фили́ппа.
и҆ гл҃а е҆мꙋ, грѧдѝ по мнѣ.
бѣ̀ же фили́пп꙽ ѿ виѳсаи́ды, ѿ града а҆ндре́ѻ҆ва и҆ петро́ва·

ѻ҆брѣте фили́ппъ наѳана́и҆ла, и҆ гл҃а е҆мꙋ.
е҆гоже писа̀ моѷсїи в꙽ зако́нѣ, и҆ прро̑҇цы, ѻ҆брѣто́хом̑ і҆с҃а, сн҃а і҆ѻ́сифова и҆же ѿ назаре́ѳа·

И҆ гл҃а е҆мꙋ наѳана́илъ, ѿ назаре́ѳа мо́жет̑ ли чт̂о добро̀ быти;
гл҃а е҆мꙋ фили́ппъ.
прїидѝ и҆ ви́жд̑ь·

Видѣв же і҆с҃ наѳана́и҆ла грѧдꙋща к꙽ себѣ, и҆ гл҃а ѻ҆ немъ.
с̂е въи҆стинꙋ і҆ил҃ьтѧнин꙽, в нем꙽же льстѝ нѣсть·

Гл҃а е҆мꙋ наѳана́илъ.
ка́ко м̂ѧ зна́еши;
ѿвѣща̀ і҆с҃, и҆ рече е҆мꙋ.
прежде да́же не въз꙽гласѝ тебе фили́ппъ, сꙋща под̑ смоко́вницею видѣхъ тѧ·

ѿвѣща̀ наѳана́илъ, и҆ гл҃а е҆мꙋ.
ра́вви.
ты е҆си сн҃ь бж҃їи, т̂ы е҆си цр҃ь і҆ил҃евъ·

ѿвѣща̀ і҆с҃, и҆ речѐ е҆мꙋ.
зане рѣх꙽ т̂и, ꙗ҆́ко видѣхъ тѧ под̑ смоко́вницею, вѣрꙋеши.
бо́лшѧ сих̑ ѹ҆зриши·

И҆ гл҃а е҆мꙋ.
а҆минь а҆минь гл҃ю вамъ.
ѿселѣ ѹ҆зрите нб҃о ѿвръ́сто, и҆ а҆́гг҃лы бж҃їа въсходѧ́ща, и҆ низходѧ́ща над̑ сн҃а члчс̑҇каго·

Глв̑҇а, в҃·

зач̑҇, ѕ҃·

И въ тре́тїи дн҃ь, бракъ бысть в ка́нѣ галиле́йстѣи.
и҆ б̂ѣ мт҃и і҆с҃ова т̂ꙋ·

Зван̑҇ же бысть и҆ і҆с҃, и҆ ѹ҆чн҃цы е҆го на́ бракъ.
и҆ не доста́вшꙋ винꙋ.
гл҃а мт҃и і҆с҃ова к немꙋ̀, вина не и́мꙋть·

Гл҃а е́й і҆с҃.
что̀ е҆сть мн̂ѣ и҆ тебѣ же́но;
не ѹ҆̀ прїиде час꙽ъ мой·

Гл҃а мт҃и е҆го слꙋгамъ.
е҆же аще гл҃етъ вамъ, сътвори́те.
бѣ́хꙋ же т̂ꙋ водоно́си ка́мени ше́сть, лежа́ще по ѻ҆чищенїю и҆ѹ҆де́йскꙋ, вмѣстѧщемъ по двѣма и҆ли трїемъ мѣрамъ·

Гл҃а и҆мъ і҆с҃, наполните водоно́сы воды̀.
и҆ напо́лниша и҆хъ до верха̀.
и҆ гл҃а и҆мъ, почръпѣте нн҃ѣ, и҆ принесѣте а҆рхїтрикли́нови.
и҆ принесо́ша·

И҆ ꙗ҆́коже вкꙋсѝ а҆рхїтриклин̑҇ вина бы́вшаго ѿ воды̀, и҆ не вѣ́дѧше ѿкꙋд́ꙋ е҆сть, слꙋгы же вѣдѧхꙋ поче́рьпшеѝ во́дꙋ·

пригласѝ жениха а҆ръхитриклин꙽, и҆ гл҃а е҆мꙋ.
всѧк꙽ чл҃къ, прежд̑е до́брое вино̀ полага́етъ, і҆ е҆гда ѹ҆пїю́тсѧ, тогда хꙋжд̑ъшее.
ты же съблюдѐ до́брое вино̀ досе́лѣ·

с̂е сътворѝ нача́токъ ѕна́менїемъ і҆с҃, в꙽ ка́нѣ галиле́йстѣй, и҆ ꙗ҆́вѝ сла́вꙋ свою̀, и҆ вѣ́ровашѧ во́нь ѹ҆чн҃цы е҆го·

зач̑҇, з҃·

По семъ сни́де в капернаѹ́мъ, самъ и҆ мт҃и е҆го, и҆ братїа е҆го и҆ ѹ҆чн҃цы е҆го, и҆ т̂ꙋ не мно́гы дн҃и пребышѧ·

И҆ близ̑ б̂ѣ па́сха і҆ѹ҆де́йска, и҆ взы́де въ і҆е҆рлс̑҇и́мъ і҆с҃, и҆ ѻ҆брѣте в꙽ цр҃кви продаю́щаѧ ѻ҆в꙽цѧ̀ и҆ волы, и҆ голꙋби, и҆ пѣнѧжникы сѣдѧ́щаѧ, и҆ сътворѝ бич̑҇ ѿ вр́ьвїи, вс̂ѧ и҆з꙽гна и҆з꙽ цр҃кве ѻ҆вцѧ̀ и҆ волы̀.
и҆ тр́ъжникомъ рас꙽сы́па пѣнѧѕѧ, и҆ д꙽скы ѻ҆провр́ьже.
и҆ прода́ю́щимъ го́лꙋбы рече, възмѣте сїѧ ѿсю́дꙋ, и҆ не твори́те до́мꙋ ѿц҃а мое҆го, до́мꙋ кꙋ́пленаго·

Помѧнꙋшѧ же ѹ҆чн҃цы е҆го, ꙗ҆́ко пи́сано е҆сть·

жа́лость до́мꙋ твое҆го снѣсть м̂ѧ·

ѿвѣщашѧ же і҆ю҆де́е, и҆ рѣшѧ е҆мꙋ.
коѐ зна́менїе ꙗ҆́влѧ́еши, ꙗ҆́ко сїа твори́ши;
ѿвѣща і҆с҃, и҆ рече им̑.
разори́те цр҃ковь сїю, и҆ трїми дн҃ьми въздви́гнꙋ ю҆̀.
рѣшѧ же і҆ю҆де́е.
четыридесѧтъ и҆ шестїю лѣтъ създана бысть цр҃ковь сїа, и҆ ты ли трими дн҃ьми въздви́гнеши ю҆̀;
ѻ҆́н꙽ же гл҃аше ѻ҆ цр҃кви тѣла свое҆го·

Є҆гда ѹ҆бо в꙽ста̀ ѿ мр҃твыхъ, помѧнꙋша ѹ҆ченицы, ꙗ҆́ко с̂е гл҃аше, и҆ вѣ́роваша писанїю, и҆ словеси е҆же рече і҆с҃·

Є҆гд̑аже б̂ѣ въ і҆ерс̑҇ли́мх̑ѣ, в꙽ пра́здникъ па́схы, мно́ѕи вѣроваша въ и҆мѧ е҆го, видѧще ѕнаменїа е҆го ꙗ҆́же творѧше·

Са́м꙽ же і҆с҃, не вдааше себе в꙽ вѣ́рꙋ их̑, и҆́мже самъ вѣдѧше вс̂ѧ.
и҆ ꙗ҆́ко не требоваше да кт̂о свѣдѣтельствует̑ ѻ҆ чл҃цѣ.
самъ б̂о вѣдѧше что̀ б̂ѣ в꙽ чл҃цѣ·

Глв̑҇а, г·

зач̑҇, и҃.

Бѣ же чл҃къ ѿ фарїсе́й, никоди́мъ и҆мѧ е҆мꙋ, кн҃зь жидов꙽скыи, се́и прїиде къ і҆с҃ꙋ но́щїю, и҆ реч̑҇ е҆мꙋ.
ра́вви, вѣмъ, ꙗ҆́ко ѿ б҃а пришелъ е҆си ѹ҆чи́тель.
никтоже бо мо́жетъ ѕна́менїи сихъ твори́ти, их̑же т̂ы твориши, а҆ще не бꙋдетъ б҃гь с ним̑·

ѿвѣща̀ і҆с҃, и҆ реч̑҇ е҆мꙋ.
а҆ми́нь а҆ми́нь гл҃ю тебѣ.
а҆ще не кто роди́тсѧ свы́ше, не мо́жет̑ ви́дѣти црс̑҇твїа бж҃їа·

Гл҃а к немꙋ никоди́мъ.
ка́ко мо́жет꙽ чл҃кь роди́тисѧ ста́ръ сы́и;
е҆да мо́жетъ второ́е внити въ ѹ҆тро́бꙋ матере своеа̀, и҆ роди́тисѧ;
ѿвѣща̀ і҆с҃.
а҆ми́нь а҆ми́нь гл҃ю тебѣ, а҆ще кт̂о не роди́тсѧ водо́ю и҆ дх҃ом꙽, не мо́жетъ вни́ти в꙽ црс̑҇твїе бж҃їе·

Рожд̑е́нное ѿ плоти, плоть е҆сть.
и҆ роже́нное ѿ дх҃а, дх҃ь е҆сть·

Не диви́сѧ, ꙗ҆́ко рѣхъ т̂и, подоба́етъ вамъ роди́тисѧ свы́ше·

дх҃ъ, и҆дѣже хо́щетъ, ды́шетъ, и҆ глс̑҇а е҆го слы́шиши, н̂о не вѣ́си ѿкꙋ́дꙋ прихо́дитъ, и҆ ка́мо и҆́детъ·

Та́ко е҆сть всѧкъ чл҃кь рожд̑енны ѿ дх҃а·

ѿвѣща̀ никоди́мъ, и҆ рече е҆мꙋ.
како мо́гꙋтъ сїа быти;
ѿвѣща і҆с҃, и҆ реч̑҇ е҆мꙋ.
т̂ы е҆си ѹ҆чи́тель і҆ил҃евъ, и҆ сихъ л̂и не вѣсѝ;
а҆ми́нь а҆ми́нь гл҃ю тебѣ, ꙗ҆́ко е҆же вѣ́мы, гл҃емъ.
и҆ е҆же видѣхом̑, свѣдѣтельствꙋемъ, и҆ свѣдѣтельства на́шего не прїе́млете·

А҆ще земнаѧ рекохъ вамъ, и҆ не вѣ́рꙋете.
како а҆ще рекꙋ вам̑ нбс̑҇наа, вѣ́рꙋете·

зач̑҇, ѳ҃·

И҆́ никтоже взы́де на́ нб҃о, то́кмо съше́дыѝ с꙽ нб҃се, сн҃ь члчс̑҇кїи, сы́и на нб҃си.
и҆ ꙗ҆́коже моѷсїи възнесѐ змїю в꙽ пꙋсты́ни, тако подоба́етъ възнестисѧ сн҃ꙋ члчс̑҇комꙋ, да всѧкъ вѣ́рꙋаѝ во́нь не поги́бнетъ, н̂о и́мать животъ вѣ́чныи·

зач̑҇, і҃·

Тако б̂о възлюбѝ б҃ъ миръ, ꙗ҆́ко и҆ сн҃а свое҆го е҆ді́нород̑наго далъ е҆сть, да всѧк̑҇ вѣрꙋаѝ во́нь не поги́бнет̑, н̂о и́мать живо́тъ вѣчныи·

Не посла̀ б̂о б҃ъ сн҃а свое҆го в꙽ ми́ръ, да сꙋ́дитъ ми́рови, н̂о да сп҃се́тсѧ и҆мъ ми́ръ·

Вѣрꙋаѝ во́нь, не бꙋдетъ ѻ҆сꙋженъ.
а҆ невѣрꙋаѝ, ѹ҆же ѻ҆сꙋженъ е҆сть, ꙗ҆́ко не вѣ́рова въ и҆мѧ е҆ді́нород̑наго сн҃а бж҃їа·

Се́и же е҆сть сꙋд꙽, ꙗ҆ко свѣтъ прїиде в꙽ ми́ръ, и҆ възлюби́шѧ чл҃цы па́че тм̂ꙋ, неже свѣтъ.
бѣшѧ бо и҆хъ дѣла ѕл̂а·

Всѧкь б̂о дѣлааѝ ѕлаа, ненави́дитъ свѣта, и҆ не прихо́дит̑ къ свѣтꙋ, да не ѻ҆бличатсѧ дѣла е҆го ꙗ҆́ко лꙋка́ва сꙋть·

Творѧѝ же и́стинꙋ, грѧдетъ къ́ свѣтꙋ, да ꙗ҆́вѧт̑сѧ дѣла е҆го ꙗ҆ко ѻ́ бз҃ѣ сꙋть съдѣ́лана·

зач̑҇, а҃і·

По си́хже прїиде іс҃ и҆ ѹ҆чн҃цы е҆го в꙽ жидо́вскꙋю зем̑лю, и҆ т̂ꙋ живѧше с ними, и҆ креща́ше·

Бѣ же і҆ѻа́ннъ крс̑҇тѧ въ е҆но́нѣ, бли́зъ сали́ма, ꙗ҆́ко во́ды мно́гы бѣх́ꙋ т̂ꙋ.
и҆ прихождахꙋ, и҆ кр҃щахꙋсѧ·

Не ѹ҆̀ б̂о б̂ѣ в꙽саженъ въ темни́цꙋ і҆ѻ҆а́ннъ·

Бы́сть же стѧза́нїе ѿ ѹ҆чн҃къ і҆ѻа́нновѣхъ съ і҆ю҆де́ѝ ѻ҆ ѻ҆чище́нїи.
и҆ прїидо́ша къ і҆ѻа́ннꙋ, и҆ реко́шѧ е҆мꙋ.
ра́вви, и҆же б̂ѣ с тобо́ю ѻ҆б о́нъ полъ і҆ѻ҆рда́на, е҆мꙋже т̂ы свд̑ѣтельствова, с̂е се́и кр҃ща́етъ, и҆ вс̂и грѧдꙋтъ к немꙋ·

ѿвѣща̀ і҆ѻа́ннъ, и҆ рече.
не мо́жетъ чл҃къ прїимати ничесоже, а҆ще не бꙋ́детъ дано̀ е҆мꙋ с꙽ нб҃сѐ·

в̂ы сами мн̂ѣ свѣдѣтельствꙋете, ꙗ҆́ко рѣхъ, нѣ́смь а҆зъ х҃с, н̂о ꙗ҆́ко посланъ есмь пред̑ ним̑·

И҆мѣаѝ невѣ́стꙋ, женихъ е҆сть.
а҆ дрꙋгъ жениховъ стоѧ и҆ послꙋшаѧ е҆го, радостїю радꙋетсѧ за́ глс̑҇а жениховъ·

Сїа ѹ҆бо ра́дость моа̀ и҆спол꙽нисѧ.
ѻ҆номꙋ подоба́етъ растѝ, мнѣ же ма́литисѧ·

Грѧдыѝ свы́ше, над̑ всѣми е҆сть, сы́и ѿ землѧ, ѿ землѧ е҆сть, и҆ ѿ землѧ̀ гл҃етъ·

Грѧдыѝ с꙽ нб҃сѐ, над̑ всѣми е҆сть.
и҆ е҆же видѣ и҆ слы́ша, с̂е свѣдѣтельствꙋетъ, и҆ свѣдѣтельства е҆го никтоже прїе́млетъ·

Прїе́мыѝ е҆го свѣдѣтельство, вѣ́рова, ꙗ҆́ко б҃ъ и́стиненъ е҆сть·

Є҆гоже б̂о посла̀ б҃ъ, гл҃ы бж҃їа гл҃етъ.
не в мѣ́рꙋ бо б҃ъ даетъ дх҃а.
ѿц҃ь бо лю́битъ сн҃а, и҆ всѧ̀ дасть в рꙋцѣ е҆го·

Вѣрꙋаѝ в꙽ сн҃а, и́мать живот̑ въчныи.
а҆ и҆же не вѣрꙋетъ в꙽ сн҃а, не ѹ́зритъ живота̀, н̂о гнѣвъ бж҃їи пребывает̑ на нем̑·

Глв̑҇а, д҃·

Єгда ѹ҆бо разꙋмѣ і҆с҃, ꙗ҆́ко ѹ҆слы́шашѧ фарисе́е, ꙗ҆́ко і҆с҃ множаиша ѹ҆чн҃кы творитъ и҆ кр҃ща́етъ, неже і҆ѻ҆а́ннъ.
і҆с҃ же самъ не кр҃ща́ше, н̂о ѹ҆чн҃цы е҆го.
ѻ҆ста́ви і҆ѹ҆де́ю, і҆ и҆де пакы в꙽ галиле́ю·

подобаше же е҆мꙋ проитѝ сквозѣ самарїю·

зач̑҇, в҃і·

Прїиде ѹ҆бо въ́ град̑ самарїи́скїи, гл҃емыи сѷхарь, близъ ве́си ю҆̀же дастъ і҆а̀ковъ іѻ́сифꙋ сн҃ꙋ свое҆мꙋ·

Бѣ же т̂ꙋ и҆сточникъ і҆а҆ковль.
і҆с҃ же трꙋжд̑ъсѧ ѿ пꙋти, сѣдѧ́ше та́ко на и҆сто́чницѣ, бѣ же ꙗ҆́ко час̑҇ шестыи·

Прїиде жена̀ ѿ самарї́а почръпа́ти во́дꙋ·

Гл҃а е́й і҆с҃, да́жд̑ъ м̂и пи́ти.
ѹ҆чн҃цы б̂о е҆го ѿшли бѣхꙋ въ́ градъ, да бр́ашна кꙋ́пѧть·

Гл҃а е҆мꙋ жена̀ самарѧныни.
ка́ко т̂ы жидови́нъ сыи, ѿ мене пити про́сиши жены̀ самарѧныни сꙋщей;
не прикаса́ют̑ бо сѧ жидове самарѧ́нѣхъ·

ѿвѣща̀ і҆с҃, рече е́й.
а҆ще б̂ы вѣ́дала да́ръ бж҃їи, и҆ кт̂о е҆сть гл҃ѧѝ т̂и, да́жд̑ь м̂и пити, т̂ы бы проси́ла ѹ҆ него, и҆ далъ т̂и бы̀ во́дꙋ жи́вꙋ·

Гл҃а е҆мꙋ жена̀, г҃и ни почръпа́ла и҆маши, и҆ стꙋденецъ е҆сть глꙋбо́къ.
ѿкꙋдꙋ ѹ҆бо и́маши во́дꙋ жи́вꙋ;
е҆да т̂ы болїи е҆си ѿц҃а нашего і҆а́кова, и҆же дастъ нам̑ стꙋденецъ се́й.
и҆ то́й и҆з꙽ него пит̑, и҆ сн҃ове е҆го, и҆ скотѝ е҆го;
ѿвѣща̀ і҆с҃, и҆ рече е́й.
всѧ́къ пїаѝ ѿ воды̀ сеа̀, вжа́жд̑етсѧ па́кы.
а҆ и҆же пїе́тъ ѿ воды̀ ю҆̀же а҆зъ дамъ е҆мꙋ, не вжа́жд̑етсѧ въ́ вѣкы.
н̂о вода̀ ю҆̀же а҆зъ дамъ е҆мꙋ, бꙋ́дет꙽ в немъ и҆сто́чникъ воды̀ текꙋща в꙽ жївотъ вѣчныи·

Гл҃а к немꙋ жена̀.
г҃и, да́жд̑ь м̂и сїю во́дꙋ, да ни жа́жд̑ꙋ, нї прихожд̑ꙋ сѣмо почръпати·

гл҃а е́й і҆с҃, и҆дѝ пригласѝ мꙋж́а свое҆го, и҆ прїидѝ сѣмо·

ѿвѣща̀ жена̀, и҆ рече е҆мꙋ.
не и́мамъ мꙋж́а·

Гл҃а е́й і҆с҃.
до́брѣ реч̑҇ ꙗ҆́ко мꙋжа не и́мамъ.
пѧть б̂о мꙋжїи и҆мѣ́ла е҆си, и҆ нн҃ѣ е҆гоже и́маши, нѣсть т̂и мꙋжъ.
с̂е въи҆́стинꙋ рекла̀ е҆си·

Гл҃а е҆мꙋ жена.
г҃и, ви́жꙋ ꙗ҆́ко прро̑҇къ е҆си т̂ы.
ѿц҃ы на́ши в го́рѣ се́й поклони́шасѧ.
и҆ в̂ы гл҃ете, ꙗ҆ко въ і҆е҆рс̑҇ли́мѣхъ е҆сть мѣ́сто, и҆дѣже кла́нѣтисѧ подоба́етъ·

Гл҃а е́й і҆с҃, же́но, вѣрꙋ м̂и и҆мѝ, ꙗ҆́ко грѧдетъ часъ, е҆гда нѝ в꙽ горѣ̀ се́й, ни въ і҆ерс̑҇лі́мх̑ѣ покло́нитесѧ ѿц҃ꙋ·

в̂ы кла́нѧе҆тесѧ.
е҆гоже не вѣ́сте.
м̂ы кла́нѧемсѧ е҆гоже вѣ́мы.
ꙗ҆́ко сп҃се́нїе ѿ і҆ѹ҆де́й е҆сть·

н̂о грѧдетъ часъ, и҆ нн҃ѣ е҆сть, е҆гда и҆стиннїи поклонницы покло́нѧтсѧ ѿц҃ꙋ дх҃омъ і҆ и҆стиною.
и҆б̂о ѿц҃ъ, таковѣхъ и҆щет̑ поклонѧ́ющихъсѧ е꙼мꙋ·

дх҃ъ е҆сть б҃ъ, і҆ и҆же кла́нѧетсѧ е҆мꙋ, дх҃омъ і҆ и́стиною достои́тъ кла́нѧтисѧ·

Гл҃а е҆мꙋ жена̀, вѣм́ы, ꙗ҆́ко месїа прїидет̑ гл҃емыѝ х҃с, е҆гда то́й прїидетъ, възвѣститъ нам̑ вс̂ѧ·

Гл҃а е́й і҆с҃.
а́зъ е҆смь гл҃ѧѝ с тобою·

И҆ тогда̀ прїидо́шѧ ѹ҆ченицы е҆го, и҆ чюжд̑ахꙋсѧ ꙗ҆́ко съ жено́ю гл҃аше.
никтоже б̂о рече чесо́ и҆́щеши, и҆ли чт̂о гл҃еши с нею́;
ѻ҆стави же водоно́съ свой жена̀, і҆ и́де въ ѓрад̑, и҆ гл҃а чл҃комъ.
прїдѣте, и҆ видите чл҃ка, и҆же рече м̂и вс̂ѧ е҆ли́ка сътворихъ.
е҆да то́й ес̑҇ х҃с;
и҆зыдоша же и҆́з града, и҆ грѧдѧ́хꙋ к немꙋ·

Межд̑ꙋ же симъ, молѧ́хꙋ е҆го ѹ҆чн҃цы е҆го, гл҃юще, ра́вви, ꙗ҆́жд̑ъ·

ѻ҆́н же рече и҆мъ.
а҆зъ бра́ш꙽но и҆́мам̑ ꙗ҆́сти, е҆гоже в̂ы не вѣ́сте·

Гл҃ахꙋ же ѹ҆чн҃цы к꙽ себѣ.
е҆да кт̂о принесе е҆мꙋ ꙗ҆́сти;
гл҃а и҆мъ і҆с҃.
моѐ бра́шно е҆сть, да сътворю во́лю пославшаго м̂ѧ, и҆ съвершꙋ дѣ́ло е҆го·

не вы̀ л̂и гл҃ете, ꙗ҆́ко е҆ще четы́ри мѣсѧци сꙋть, и҆ жатва прїидетъ;
с̂е гл҃ю вамъ, възведѣте ѻ҆́чи ваши, и҆ ви́дите ни́вы, ꙗ҆́ко пла́вы сꙋть к꙽ жа́твѣ ѹ҆же.
и҆ жнѧѝ, м꙽здꙋ̀ прїе́млетъ.
и҆ събира́етъ плод̑ в꙽ животъ вѣ́чныи, да сѣаѝ в꙽кꙋпѣ радꙋетсѧ и́ жнѧѝ.
ѻ҆ семъ б̂о сло́во е҆сть и҆стинное, ꙗ҆ко и҆́нъ ес̑҇ сѣ́аѝ, і҆ и́нъ е҆сть жнѧѝ.
а҆зъ послахъ в̂ы жати, и҆дѣже в̂ы не трꙋди́стесѧ.
и҆нїи трꙋди́шасѧ, и҆ в̂ы в꙽ трꙋдъ их̑ в꙽нидо́сте·

ѿ града же того мно́ѕи вѣ́роваша во́нь ѿ самарѧнъ, за́ слово женѣ свѣдѣтельствꙋющи.
ꙗ҆́ко речѐ м̂и вс̂ѧ е҆ли́ка сътворихъ·

Є҆гда же прїидо́ша к немꙋ самарѧ́не, молѧ́хꙋ е҆го дабы̀ пребылъ ѹ҆ них̑.
и҆ пребысть т̂ꙋ два̀ дн҃и.
и҆ мно́го па́че вѣ́роваша за́ слово е҆го·

Женѣ ж́е гл҃ахꙋ, ꙗ҆́ко не ктомꙋ за твою бесѣ́дꙋ вѣ́рꙋемъ.
сами б̂о слы́шахомъ.
и҆ вѣмы, ꙗ҆́ко се́й е҆сть въи҆́стинꙋ сп҃съ мирꙋ х҃с·

По двоюж̑ дн҃ю и҆зыде ѿтꙋдꙋ, і҆ иде в꙽ галилею.
самъ б̂о і҆с҃ свѣдѣтельствоваше, ꙗ҆́ко прро̑҇къ въ свое҆мъ ѿч҃ьстви чьсти не и҆́мат꙽.
е҆гда же прїиде в галиле́ю, прїа́шѧ е҆го галиле́ане, вс̂ѧ видѣв꙽ше, ꙗ҆́же сътворѝ въ і҆е҆рс̑҇ли́мѣхъ в꙽ пра́зд̑никъ.
и҆ тїи б̂о прїидо́шѧ в꙽ пра́зд̑никъ·

Прїиде же пакы і҆с҃ в꙽ ка́нꙋ галилеи҆скꙋ, и҆дѣже сътворѝ во́дꙋ в꙽ вино̀·

зач̑҇, г҃і·

И҆́ б̂ѣ нѣ́кїи цр҃евъ мꙋж́ъ, е҆гоже сн҃ъ болѧше в꙽ капернаѹ҆мѣ се́й слы́шавъ ꙗ҆́ко і҆с҃ прїиде ѿ і҆ѹ҆де́а в꙽ галиле́ю, и҆́де к немꙋ, и҆ молѧ́ше е҆го, да снидетъ і҆ и́сцѣлитъ сн҃а е҆го.
хотѧше б̂о ѹ҆мрети·

Рече ѹ҆бо і҆с҃ к꙽ немꙋ.
а҆ще зна́менїи и҆ чюдесъ не ви́дите, не и́мате вѣ́ровати·

Гл҃а к꙽ немꙋ цр҃ев꙽ мꙋжъ.
г҃и, сни́ди прежд̑е даже не ѹ҆́мретъ ѻ҆троча моѐ·

Гл҃а е҆мꙋ і҆с҃.
и҆дѝ, сн҃ъ твой жи́въ ес̑҇.
и҆ вѣ́рова чл҃къ словесѝ е҆же рече е҆мꙋ і҆с҃, і҆ и҆дѧ́ше·

А҆бїе же в꙽ходѧ́щꙋ е҆мꙋ, с̂е рабѝ е҆го срѣто́ша е҆го.
и҆ възвѣсти́ша е҆мꙋ гл҃юще, ꙗ҆́ко сн҃ъ твой живъ ес̑҇·

Въпрашаше ѹ҆бо ѿ нихъ часъ, в кото́рыи̑ бо́ле е҆мꙋ бысть, и҆ рѣшѧ е҆мꙋ.
ꙗ҆́ко вчера̀ в꙽ час̑҇ сед̑мыи, ѻ҆стави е҆го ѻ҆́гнь·

Разꙋмѣ же ѿц҃ъ, ꙗ҆́ко то́й б̂ѣ часъ, во́ньже рече е҆мꙋ і҆с҃, ꙗ҆ко сн҃ъ твой живъ е҆сть.
и҆ вѣ́рова самъ.
и҆ ве́сь домъ е҆го·

Се̂ пакы в꙽то́рое зна́менїе сътворѝ і҆с҃, пришедъ ѿ і҆ѹ҆де́а въ галиле́ю·

Глв̑҇а, е҃·

зач̑҇, д҃і·

По си́х б̂ѣ пра́зд̑никъ і҆ѹ҆де́искый, и҆ взы́де і҆с҃ в꙽ъ і҆ерс̑҇ли́м꙽·

е҆́сть же въ і҆ерс̑҇ли́мѣхъ на ѻ҆́вчїи кꙋпели.
ꙗ҆́же гл҃етсѧ е҆ѷре́искы, виѳе́зда.
пѧть притво́ръ и҆мꙋщи·

В тѣ́хъ слежа́ше множество болѧ́щихъ, слѣпых̑, хро́мыхъ, сꙋхихъ, чѧ́ющихъ движе́нїа водѣ·

А҆́гг҃лъ б̂о гн҃ь на всѧ́ко лѣто схожд̑а́ше в кꙋпѣ́ль и҆ възмꙋща́ше во́дꙋ·

І҆ и́же пр́ъвѣе вла́жаше по возмꙋще́нїи водѣ̀, здра́в꙽ быва́ше, ꙗ҆́цѣ́м же недꙋгомъ ѻ꙼дръжимъ быва́ше·

Бѣ же т̂ꙋ нѣ́кїи чл҃къ, тридесѧте и҆ ѻ҆смь лт̑ѣ и҆́мыѝ в недꙋ́зѣ свое҆мъ·

Сего видѣвъ і҆с҃ лежа́ща.
и҆ разꙋмѣв꙽ ꙗ҆́ко мно́га лѣта ѹ҆же и҆мѧше в недꙋ́зѣ, гл҃а е҆мꙋ.
хо́щеши л̂и цѣлъ бы́ти;
ѿвѣща е҆мꙋ недꙋж́ъный.
е҆́й г҃и, чл҃ка не и҆мамъ да е҆гда възмꙋтитсѧ вода̀, в꙽ве́ржет м̂ѧ в кꙋпѣлъ·

Є҆гда же прихождꙋ̀ а҆́зъ, и҆́нъ прежде мене сла́зитъ·

Гл҃а е҆мꙋ і҆с҃, въста́ни, възмѝ ѻ҆дръ твои, и҆ ходи·

И҆ а҆́бїе здра́въ бы́сть чл҃къ.
и҆ взе́м꙽ ѻ҆дръ сво́и, и҆ хожда́ше.
б̂ѣ же сꙋбо́та в то́й дн҃ь·

Гл҃ахꙋ же жидове и҆сцѣлѣвшемꙋ.
сꙋбота е҆сть, и не досто́ит꙽ ти взѧ́ти ѻ҆дра̀ свое҆го·

Ѡ҆́н же ѿвѣща̀ и҆мъ.
и҆же м̂ѧ сътворѝ цѣла̀, то́й мн̂ѣ рече.
възми ѻ҆́дръ твои и҆ ходи·

Въпроси́ша же е҆го, кт̂о е҆сть чл҃къ рекїи́ т̂и възмѝ ѻ҆дръ твои и҆ ходи·

И҆сцѣлѣвыи же не вѣдѧше кт̂о е҆сть.
і҆с҃ б̂о ѹ҆клони́сѧ народꙋ сꙋщꙋ на мѣстѣ·

Потомже ѻ҆брѣте е҆го і҆с҃ въ цр҃кви и҆ рече е҆мꙋ.
с̂е здравъ бы́сть, ктомꙋ̀ не съгрѣша́и, да не го́ре ти чт̂о бꙋ́детъ·

И҆́де же чл҃къ, и҆ повѣда и҆ѹ҆де́ѻмъ, ꙗ҆́ко і҆с҃ е҆сть и҆́же м̂ѧ сътворѝ цѣла̀·

И҆ сего ради гонѧ́хꙋ і҆с҃а и҆ѹ҆де́е, і҆ и҆ска́хꙋ е҆го ѹ҆би́ти, зане сїа творѧ́ше в сꙋбо́тꙋ.
і҆с҃ же ѿвѣщава́ше и́мъ·

зач̑҇, е҃і·

Ѿц҃ъ мо́и досе́лѣ дѣ́лаетъ, и҆ а҆́зъ дѣ́лаю·

Сего́же ради па́че и҆ска́хꙋ е҆го и҆ѹ҆де́е ѹ҆би́ти, ꙗ҆́ко не то́кмо разарѧ́ше сꙋбо́тꙋ, н̂о и҆ ѿц҃а свое҆го гл҃аше б҃а, ра́вен сѧ творѧ б҃ꙋ·

ѿвѣща́в же і҆с҃ и҆ рече и҆́мъ.
а҆ми́нь а҆ми́нь гл҃ю ва́мъ, не мо́жетъ сн҃ъ твори́ти ѻ҆ себѣ ничесо́же, а҆ще не е҆́же ви́дитъ ѿц҃а творѧ́ща.
ꙗ҆́же б̂о ѻ҆́нъ творит̑ сїа и҆ сн҃ъ та́кожд̑е твори́тъ·

ѿц҃ъ бо любитъ сн҃а.
и҆ вс̂ѧ показꙋ́етъ е҆мꙋ ꙗ҆́же са́мъ твори́тъ, и҆ бо́лша си́хъ пока́жетъ е҆мꙋ дѣ́ла, да вы̀ чꙋ́дитесѧ·

Ꙗ҆́коже б̂о ѿц҃ъ въскр҃ша́етъ мертвыа и҆ живи́тъ, та́ко и҆ сн҃ъ и҆́хже хо́щетъ живитъ·

ѿц҃ъ б̂о не сꙋ́дит̑ никомꙋже, н̂о сꙋд꙽ ве́сь да́сть сн҃ови, да вс̂и чтꙋть сн҃а, ꙗ҆́коже чтꙋть ѻ҆ц҃а·

И҆́же не чте́ть сн҃а, не чте́ть ѻ҆ц҃а посла́вшаго е҆го·

зач̑҇, ѕ҃і·

А҆́ми́нь а҆ми́нь гл҃ю ва́мъ, ꙗ҆ко сл́ꙋшаѧѝ словесѐ мое҆го.
и҆ вѣрꙋаѝ посла́вшемꙋ м̂ѧ, и҆́мать живо́тъ вѣчныи·

И҆ на сꙋдъ не прїидеть, н̂о пре́идеть ѿ смр҃ти в животъ·

А҆ми́нь а҆ми́нь гл҃ю вамъ, ꙗ҆́ко грѧдетъ час̑҇, и́ нн҃ѣ есть, е҆гда мр҃твїи ѹ҆слы́шѧтъ глс̑҇а сн҃а бж҃їа.
и҆ ѹ҆слы́шавшеѝ, ѻ҆живꙋтъ·

Ꙗ҆́коже б̂о ѿц҃ъ и҆́мать живо́т꙽ в себѣ, та́ко да́сть и҆ сн҃ови живо́тъ и҆мѣти в себѣ, и҆ ѻ҆́бласть дасть е҆мꙋ и҆ сꙋ́дъ творити ꙗ҆ко сн҃ъ чл҃чь е҆сть, не диви́тесѧ семꙋ·

Ꙗ҆́ко грѧдетъ ча́съ, во́нже вс̂и с́ꙋщїи въ гробѣхъ, ѹ҆слы́шѧтъ гла́съ сн҃а бж҃їа·

І҆ и҆зы́дꙋть сътво́ршеѝ бл҃га́ѧ, въ воскрешенїе животꙋ·

А҆ сътво́ршеѝ зла́а, въ воскрешенїе сꙋдꙋ·

Не могꙋ а҆́з꙽ ѻ҆ себѣ̀ творити ничесо́же·

зач̑҇, з҃і·

Ꙗ҆́коже слы́шꙋ, сꙋждꙋ, и҆ сꙋдъ мо́и пра́веденъ е҆сть.
ꙗ҆́ко не и́щꙋ во́лю мою̀, н̂о во́лю посла́вшаго м̂ѧ ѻ҆ц҃а·

А҆ще а҆́зъ свѣдѣтельствꙋю ѻ҆ мнѣ, свѣдѣтельство мое нѣсть и҆́стино.
и҆́нъ е҆сть свѣдѣтельствꙋаѝ ѻ҆ мнѣ·

И҆ вѣмъ ꙗ҆́ко и҆́стинно е҆сть свѣдѣтел꙽ство, е҆́же свѣдѣтельствꙋетъ ѻ҆ мнѣ·

Вы̂ посла́сте къ і҆ѻа́ннꙋ, и҆ свѣдѣтельствова ѻ҆ и҆́стиннѣ·

А҆з꙽ же не ѿ чл҃ка свѣдѣтельства прїе́млю н̂о сїа гл҃ю, да в̂ы сп҃се́ни бꙋ́дете·

ѻн̑҇ бѣ свѣти́лникъ, горѧ и҆ свѣтѧ, вы́ же хотѣ́сте възрадоватисѧ в ча́съ свѣтѣнїа е҆го·

А҆з же и҆́мамъ свѣдѣтельство боле і҆ѻ҆а́ннова.
дѣ́ла б̂о ꙗ҆́же дастъ мн̂ѣ ѿц҃ъ да съвръшꙋ ѧ҆̀, т̂а дѣ́ла, ꙗ҆́же а҆зъ творю̀, свѣдѣтельствꙋютъ ѻ҆ мнѣ, ꙗ҆́ко ѿц҃ъ м̂ѧ посла̀.
и҆ посла́выѝ м̂ѧ ѿц҃ъ, то́й свѣдѣтельствова ѻ҆ мнѣ̀,<.>

Ни гла́са е҆го нигдѣже слы́шасте·

ни видѣ́нїа е҆го видѣ́сте, и҆ словесѐ е҆го не и́мате пребыва́юща в꙽ васъ.
зане е҆гоже то́й посла̀, семꙋ̀ в̂ы вѣ́рꙋ не е́млете·

И҆спыта́ите писа́нїа, ꙗ҆ко в̂ы мнитѐ в нихъ и҆мѣти животъ вѣ́чныи, и҆ т̂а сꙋть свѣдѣтельствꙋюща ѻ҆ м̀нѣ, и҆ не хо́щете прїитѝ къ мнѣ, да живот̑ и́мате·

Сла́вы ѿ чл҃къ не прїе́млю, н̂о разꙋмѣхъ в̂ы, ꙗ҆ко любве бж҃їа не и́мате в себѣ·

А҆зъ прїидох̑ въ и҆мѧ ѿц҃а мое҆го, и҆ не прїе́млете менѐ·

А҆ще и҆нъ прїидетъ въ и҆мѧ своѐ, того̀ прїе́млете·

Ка́ко в̂ы мо́жете вѣровати.
сла́вы дрꙋгъ ѿ дрꙋга прїе́м꙽люще.
и҆ сла́вꙋ ю҆́же ѿ е҆ді́ного б҃а не и́щете;
не мни́те, ꙗ҆ко а҆зъ на в̂ы рекꙋ̀ къ ѿц҃ꙋ.
е҆сть и҆же на в̂ы гл҃етъ моѷсїи, на́нь же в̂ы ѹ҆пова́ете·

А҆ще б̂о бы́сте вѣ́ровали моѷсе́ѻви, вѣ́ровали бысте ѹ҆бо и҆ мнѣ.
ѻ҆ мнѣ̀ б̂о то́и писа̀.
а҆ще ли того писа́нїѻм꙽ не вѣ́рꙋете, ка́ко мои́мъ гл҃омъ вѣрꙋ и҆мете;

Глв̑҇а, ѕ҃·

По сихъ и́де і҆с҃ на ѻ́нъ полъ мо́рѧ галиле́а тиверїа́дъскы, и҆ по нем̑ и҆дѧше наро́дъ мно́г꙽, ꙗ҆́ко видѧхꙋ зна́менїа е҆го, ꙗ҆же творѧ́ше на недꙋж́ных̑·

Взы́де же на́ горꙋ і҆с҃, и҆ т̂ꙋ сѣдѧше съ ѹ҆чн҃кы свои́ми·

Бѣ же бли́зъ па́сха, пра́знд̑икъ жидо́вскыи·

зач̑҇, и҃і·

Възвед̑ ѹ҆бо і҆с҃ ѻ҆́чи, и҆ видѣ ꙗ҆́ко мно́гъ народъ грѧдетъ к꙽ немꙋ, гл҃а к꙽ фїли́п꙽пꙋ чимъ кꙋ́пимъ хлѣ́бы, да ꙗ҆́дѧт̑ сїи;
се́же гл҃аше и҆скꙋша́а е҆го.
сам꙽ б̂о вѣ́дѧше, чт̂о хо́щетъ сътвори́ти·

ѿвѣща̀ е҆мꙋ фили́ппъ.
двѣма сто́ма пѣ́нѧѕь хлѣбы не довлѣют̑ и҆мъ, да ко́жд̑о их̑ ма́ло чт̂о прїимет̑·

Гл҃а е҆мꙋ е҆ді́нъ ѿ ѹ҆чн҃къ е҆го, а҆ндрѣа́ братъ симона петра.
е҆сть ѻ҆трочищъ зд̂ѣ е҆ді́нъ, и҆же и́мать пѧть хлѣбъ ꙗ҆́чме́ннѣхъ, и҆ дв̂ѣ ры́бѣ.
но сїи что сꙋть в сели́ко;
рече же і҆с҃, сътвори́те чл҃кы възлежти·

Бѣ же трава̀ мно́га на мѣ́стѣ.
възлеже ѹ҆бо мꙋжїи числомъ ꙗ҆́ко пѧть ты́сѧщь·

Прїа́тъ же хлѣбы і҆с҃.
и҆ хвалꙋ̀ въздавъ, подастъ ѹ҆чн҃комъ, ѹ҆чн҃цы же възлежа́щимъ·

Та́кожде и҆ ѿ ры́бꙋ, е҆лико хотѧ́хꙋ.
и҆ ꙗ҆́ко насы́тишасѧ, гл҃а ѹ҆чн҃комъ своим̑.
съберѣте и҆збыткы ѹ҆крꙋ́хъ, да не поги́бнетъ ничтоже.
събра́ша же, и҆ і҆сполнишѧ дв̂анадесѧте ко́шѧ ѹ҆крꙋхъ, ѿ пѧти хлѣбъ ꙗ҆́чме́ннх̑ѣ, и҆же и҆збы́ша ꙗ҆́дъшимъ·

зач̑҇, ѳ҃і·

Чл҃цы же видѣвше зна́менїе, е҆же сътворѝ і҆с҃, гл҃ахꙋ, ꙗ҆́ко се́и е҆сть въи҆́стинꙋ прро̑҇къ.
грѧдыѝ в꙽ миръ·

І҆с҃ же разꙋмѣвъ, ꙗ҆́ко хотѧтъ прїитѝ, да въсхи́тѧтъ е҆го, и҆ сътворѧт̑ е҆го цр҃ѧ, ѿи́де паки в꙽ го́рꙋ е҆ді́н꙽·

Ꙗ҆́ко поздѣ бысть, снидошѧ ѹ҆ченицы е҆го на́ море.
і҆ влѣѕо́шѧ в корабль, и҆ і҆дѧ́хꙋ на ѻ́нъ полъ морѧ в꙽ капернаѹ́мъ.
и҆ тм̂а а҆́бїе бысть, и҆ не ѹ҆̀ б̂ѣ пришелъ к нимъ і҆с҃·

Мо́ре же вѣтрꙋ ве́лїю ды́хающꙋ, въз꙽двиза́шесѧ.
гребше же ꙗ҆́ко стадїи двадесѧтъ и҆ пѧть, и҆л̂и тридесѧте, ѹ҆зрѣша і҆с҃а ходѧща по́ морю, и҆ близ̑ кораблѧ̀ бывша, ѹ҆боа́шѧсѧ·

ѻ҆́н꙽ же гл҃а и҆мъ, а҆зъ е҆смь, не бо́йтесѧ.
хотѧ́хꙋ же прїа́ти е҆го в꙽ кора́бль, и҆ абїе корабль бысть на земли, в нюже и҆дѧ́хꙋ·

Въ ѹ҆трѣи же народ̑ и҆же стоѧ́ше ѻ҆б онъ полъ мо́рѧ, видѣвъ ꙗ҆́ко кораблѧ̀ и҆ного̀ не бѣ̀ т̂ꙋ, то́кмо е҆ді́нъ то́и, во́ньже внидо́ша ѹ҆чн҃цы е҆го, и҆ ꙗ҆́ко не вни́де съ ѹ҆чн҃кы свои́ми і҆с҃ в кора́бль, н̂о е҆ді́ни ѹ҆чн҃цы е҆го и҆до́ша·

И҆ і́ни прїидо́ша кораблѝ ѿ тиверїа́ды, бли́зъ мѣста, и҆дѣже ꙗ҆до́ша хлѣ́бы, хвалꙋ̀ въздавше гв҃и·

Є҆гда же видѣша наро́ди, ꙗ҆ко і҆с҃а не бысть т̂ꙋ, ни ѹ҆чн҃кы е҆го, влѣзо́шѧ сами в кораблѧ, и҆ прїидо́шѧ в꙽ капернаѹ҆мъ, и҆́щꙋще і҆с҃а.
и҆ ѻ҆брѣтше е҆го ѻ҆б онъ полъ мо́рѧ, рѣш́а е҆мꙋ.
ра́вви, когда зд̂ѣ бысть;
ѿвѣща̀ и҆мъ і҆с҃, и҆ рече.
а҆ми́нь а҆ми́нь гл҃ю вамъ.
и҆́щете мене, не ꙗ҆́ко видѣсте зна́менїе, н̂о ꙗ҆́ко ꙗ҆до́сте хлѣ́бы, и насы́тистесѧ·

зач̑҇, к҃·

Дѣ́лаите не бра́шно ги́блющее, н̂о бра́шно пребыва́ющее въ животѣ вѣчнемъ, е҆же сн҃ь члчс̑҇кїи вамъ дасть.
сего б̂о ѿц҃ь зна́мена б҃ъ·

Рѣша же к꙽ немꙋ.
чт̂о сътворимъ, да дѣ́лаемъ дѣ́ла бж҃їа;
ѿвѣща̀ і҆с҃, и҆ рече и҆мъ.
с̂е е҆сть дѣло бж҃їе, да вѣрꙋете в꙽ то́и, е҆гоже посла̀ ѻ҆́нъ·

Рѣша же е҆мꙋ.
ко́е ѹ҆бо т̂ы твориши зна́менїе, да ви́димъ и҆ вѣрꙋ и҆мем̑ тебѣ;
чт̂о дѣ́лаеши;
ѿц҃ы наши ꙗ҆́дошѧ ма́ннꙋ в꙽ пꙋсты́ни, ꙗ҆коже е҆сть пи́сано хлѣбъ с꙽ нб҃сѐ дастъ и҆мъ ꙗ҆́сти·

Рече ѹ҆бо и҆мъ і҆с҃.
а҆ми́нь а҆ми́нь гл҃ю вамъ·

не моѷсїи дастъ вамъ хлѣб꙽ с꙽ нб҃сѐ, но ѿц҃ь мой дастъ вамъ хлѣба и́стиннаго с нб҃сѐ·

Хлѣбъ бо бж҃їи е҆сть сходѧѝ с꙽ нб҃сѐ, и҆ дааѝ живот̑ ми́рꙋ·

Рѣшѧ ѹ҆бо к немꙋ.
г҃и, всегда̀ да́ждь намъ хлѣбъ се́и·

Реч̑҇ же и҆мъ і҆с҃·

зач̑҇, к҃а·

А҆́зъ е҆смь хлѣбъ животныи.
грѧдыѝ къ мнѣ, не и́мать в꙽залка́тисѧ.
и҆ вѣрꙋаѝ в м̂ѧ, не и́мать в꙽жада́тисѧ никогдаже.
н̂о рѣхъ вам̑, ꙗ҆́ко и҆ видѣ́сте м̂ѧ, и҆ не вѣ́рꙋете·

Все е҆же дастъ ми ѿц҃ь, къ мнѣ прїидет̑.
и҆ грѧдꙋщаго къ мнѣ не и҆жд̑енꙋ во́нъ·

Ꙗ҆́ко снидохъ с нб҃се, не да творю во́лю мою̀, н̂о во́лю посла́вшаго мѧ ѿц҃а·

Се же е҆сть во́лѧ посла́в꙽шаго м̂ѧ ѿц҃а, да вс̂е е҆же дастъ м̂и, не погꙋблю ѿ него, н̂о въскрешꙋ е҆̀ в꙽ послд̑ѣнїи дн҃ь·

зач̑҇, к҃в·

Се́ же е҆сть волѧ посла́вшаго м̂ѧ, да всѧкъ видѧѝ сн҃а, и҆ вѣрꙋа в него, и҆́мать животъ вѣчныи, и҆ въскрешꙋ е҆го а҆зъ в꙽ послѣднїи дн҃ь·

Роптахꙋ ѹ҆бо і҆ѹ҆де́е ѻ҆ немъ, ꙗ҆́ко рече, а҆́зъ е҆смъ хлѣбъ съшедыѝ с꙽ нб҃сѐ.
и҆ гл҃ахꙋ, не се́й л̂и е҆сть і҆с҃ сн҃ъ і҆ѻ́сифовъ.
е҆мꙋже м̂ы зна́емъ ѿц҃а и҆ мт҃ре;
ка́ко ѹ҆бо гл҃етъ се́й.
ꙗ҆ко с нб҃се снидох̑;
ѿвѣща̀ ѹ҆бо і҆с҃, и҆ рече и҆мъ.
не роп꙽щи́те междꙋ собою.

Никтоже можетъ прїѝти къ мнѣ̀, а҆ще не ѿц҃ъ посла́выѝ м̂ѧ привлечет̑ е҆го, и҆ а҆зъ въскрешꙋ е҆го в꙽ послд̑ѣнїи дн҃ъ·

Є҆сть пи́сано въ прро̑҇цѣхъ.
и҆ бꙋ́дꙋтъ вси ѹ҆че́ни б҃ꙋ·

Всѧкъ слы́шавыѝ ѿ ѻ҆ц҃а и҆ навы́къ, прїидетъ къ мнѣ.
не ꙗ҆́ко ѿц҃а видѣлъ ес̑҇ кто̀, то́кмо сыи ѿ б҃а, сїй видѣ ѿц҃а·

А҆ми́нь а҆мин̑҇ гл҃ю вамъ.
вѣрꙋаѝ в м̂ѧ, и҆́мать живота вѣ́чнаго·

зач̑҇, к҃г·

А҆́зъ е҆смь хлѣбъ живо́тныи.
ѿц҃ы ваши ꙗ҆до́шѧ ма́ннꙋ в꙽ пꙋстыни, и҆ ѹ҆мро́ша·

Се́й е҆сть хлѣбъ сходѧѝ с нб҃сѐ, да а́ще кто̀ ѿ него ꙗ҆́сть, не ѹ҆мретъ·

А҆зъ е҆смь хлѣбъ живот꙽ныи, и҆же съше́дыи с꙽ нб҃се.
а҆ще кто̀ снѣсть ѿ хлѣба сего, живъ бꙋ́детъ въ вѣкы.
и҆ хлѣбъ е҆гоже а҆зъ дамъ, плоть моа е҆сть.
ю҆же а҆зъ дахъ за живо́тъ ми́ра·

прѧ́хꙋ же сѧ межд̑ꙋ собою жи́дове гл҃юще.
ка́ко мо́жетъ се́й намъ дати плоть свою ꙗ҆́сти;
рече же и҆мъ і҆с҃, а҆ми́нь а҆ми́нь гл҃ю вамъ.
а҆ще не снѣсте плоти сн҃а чл҃ческаго, и҆ пїе́те кро́вь е҆го, живота не и҆мате в꙽ себѣ·

Ꙗ҆́дыѝ мою̀ пло́ть, и҆ пїаѝ мою кро́въ, и҆́мать животъ вѣ́чныи.
и҆ а҆зъ въскр҃шꙋ е҆го в꙽ послд̑ѣнїи дн҃ь·

Плоть б̂о моа̀ и҆́стинно ес̑҇ бра́шно, и҆ кровь моа̀ и҆́стинно ес̑҇ пи́во·

зач̑҇, к҃д·

Ꙗ҆́дыѝ мою плоть, и҆ пїаѝ мою кров̑҇, въ мнѣ пребыва́етъ, и҆ а҆зъ в нем̑·

Ꙗ҆́коже посла̀ м̂ѧ живы́и ѿц҃ъ.
и҆ а҆зъ жи́вꙋ ѿц҃а ради.
и́ ꙗ҆́дыѝ м̂ѧ, и҆ то́й, живъ бꙋ́детъ мене ради.
се́й е҆сть хлѣбъ съше́дыѝ с нб҃сѐ.
не ꙗ҆коже ꙗ҆́дошѧ ѿц҃ы ваши ма́ннꙋ, и҆ ѹ҆мро́ша.
ꙗ҆́дыѝ хлѣбъ се́й, жи́въ бꙋ́детъ въ вѣкы·

Сїа рече на с́онмищи ѹ҆ча в капернаѹ҆мѣ·

Мно́ѕи ѹ҆бо слы́шав꙽ше ѿ ѹ҆чн҃къ е҆го, рѣшѧ.
жестоко е҆сть сло́во с̂е, и҆ кто мо́жетъ е҆го послꙋшати;
вѣдыи же і҆с҃ в себѣ ꙗ҆́ко ро́пщꙋтъ ѻ҆ семъ ѹ҆чн҃цы е҆го, рече им̑.
сѐ ли в̂ы бла́знитъ;
а҆ще ѹ҆бо ѹ҆ѕрите сн҃а члчс̑҇каго въсходѧ́ща и҆дѣже б̂ѣ пре́жде;
дх҃ь е҆сть и҆же ѻ҆живлѧ́етъ, плоть не по́лзꙋетъ ничтоже.
гл҃ы ꙗ҆́же а҆зъ гл҃ахъ вамъ, дх҃ь сꙋть и҆ животъ сꙋть.
н̂о сꙋть ѿ васъ нѣцїи, и҆же не вѣ́рꙋютъ·

Вѣдѧше б̂о и҆скони і҆с҃.
кт̂о сꙋть невѣрꙋющеѝ, и҆ кт̂о е҆сть предааѝ е҆го·

И҆ гл҃аше, сего ради рѣхъ вамъ, ꙗ҆́ко никтоже мо́жетъ прїитѝ ко мнѣ, а҆ще не бꙋ́дет̑ е҆мꙋ дано ѿ ѻ҆ц҃а мое҆го·

ѿ сего мно́ѕи ѿ ѹ҆чн҃къ е҆го и҆до́шѧ в꙽спѧть, и҆ ктомꙋ не хожд̑ах́ꙋ с нимъ·

Рече же і҆с҃ ѻ҆бѣманадесѧте.
е҆д̂а и҆ в̂ы хо́щете и҆тѝ;
ѿвѣща̀ е҆мꙋ симонъ петръ.
г҃и, к꙽ къмꙋ̀ и҆́демъ;
гл҃ы живота̀ вѣчнаго и҆́маши.
и҆ м̂ы вѣровахом꙽, и҆ позна́хомъ, ꙗ҆ко т̂ы е҆си х҃с, сн҃ь б҃а живаго·

ѿвѣща̀ и҆мъ.
не а҆з꙽ л̂и васъ дванадесѧте и҆збрахъ, і҆ е҆ді́нъ ѿ васъ дїа́волъ е҆сть;
гл҃аше же і҆ѹ҆дꙋ си́монова и҆скарїѻ́та.
се́и б̂о хотѧше предати е҆го, е҆ді́нъ сы́и ѿ ѻ҆боюнадесѧте·

Глв̑҇а, з҃·

зач̑҇, к҃е·

Схожда́ше і҆с҃ по си́хъ в галиле́ѝ.
не хотѧ́ше б̂о въ и҆ѹ҆де́ѝ ходи́ти.
ꙗ҆́ко и҆ска́хꙋ е҆го и҆ѹ҆де́е ѹ҆би́ти·

Бѣ же близ꙽ пра́здникъ и҆ѹ҆де́искыи, потъче́нїе сѣни·

Рѣшѧ же к немꙋ бра́тїа е҆го.
преиди ѿсю́дꙋ, і҆ и҆дѝ въ и҆ѹ҆де́ю, да и҆ ѹ҆чн҃цы твоѝ ви́дѧтъ дѣ́ла твоа ꙗ҆́же твори́ши·

Никто́же б̂о в та́инѣ ничесо́же творит꙽, і҆ и́щет꙽ са́мъ ꙗ҆вѣ бы́ти·

А҆ще с̂и твори́ши, ꙗ҆вѝ себе ми́рови·

Ни братїа б̂о е҆го вѣ́ровахꙋ в него̀.
гл҃а ѹ҆бо и҆мъ і҆с҃·

вре́мѧ мое не ѹ҆̀ прїиде, вре́мѧ же ва́ше всегда̀ гото́во е҆́сть·

не мо́жет̑ ми́ръ ненави́дѣти васъ, мене же ненави́дитъ·

Ꙗ҆́ко а҆́зъ свѣдѣтелс̑҇твꙋю̀ ѻ҆ не́мъ ꙗ҆́ко дѣ́ла е҆го ѕл̂а сꙋтъ.
в̂ы взы́дѣте в пра́зникъ се́й, а҆́з꙽ не взы́дꙋ в пра́здникъ се́й, ꙗ҆́ко вре́мѧ моѐ не ѹ҆̀ и҆спо́лнисѧ.
сїа ре́къ и҆мъ, ѻ҆ста̀ в꙽ галиле́и·

е҆гда же взыдо́ша братїа е҆го в пра́зд̑ник̑҇, тогда̀ и҆ сам̑ взы́де, не ꙗ҆́вѣ, н̂о ꙗ҆́ко та́и·

жи́дове же и҆ска́хꙋ е҆го в пра́зник꙽.
и҆ гл҃ахꙋ, гд̂ѣ е҆сть ѻ҆́нъ·

И҆ ро́потъ мно́гъ б̂ѣ ѻ҆ нем̑ в наро́дѣхъ, ѻ҆вѝ гл҃ахꙋ, ꙗ҆ко бл҃гъ е҆́сть·

и҆нїи же гл҃ахꙋ, нѝ н̂о льстит̑ наро́ды·

никото́рыи же ѹ҆бо ꙗ҆́вѣ гл҃аше ѻ҆ немъ, стра́ха ради и҆ѹ҆де́искаго·

зач̑҇, к҃ѕ·

А́бїе же въ преполовле́нїе праз̑ни́ка, възы́де і҆с҃ въ цр҃ковъ, и҆ ѹ҆ча́ше.
и҆ дивлѧ́хꙋсѧ і҆ѹ҆де́е гл҃юще.
ка́ко се́й кни́гы вѣсть не ѹ҆чи́всѧ, ѿвѣща ѹ҆бо им̑ і҆с҃, и҆ речѐ.
моѐ ѹ҆че́нїе нѣ́сть моѐ н̂о посла́вшаго м̂ѧ·

а҆ще кт̂о хо́щетъ во́лю е҆го твори́ти, разꙋмѣ́етъ ѻ҆ ѹ҆че́нїи, коѐ ѿ бг҃а е҆́сть, и҆лѝ а҆́зъ ѻ҆ себѣ̀ гл҃ю.
гл҃ѧѝ ѻ҆ себѣ̀, сла́вы своеа̀ и҆́щетъ.
а҆ и҆ща́ѝ сла́вы посла́вшаго е҆го, се́й и҆́стиненъ е҆́сть, и҆ нѣ́сть непра́вды в не́мъ·

Не моѷсїи л̂и да́сть вамъ зако́нъ, и҆ никто́же ѿ вас̑҇ творитъ зако́на;
чт̂о менѐ и҆́щете ѹ҆би́ти ѿвѣща̀ народ꙽ и҆ речѐ, бс̑҇ѣ ли и҆́маши;
кт̂о тебе и҆́щетъ ѹ҆би́ти ѿвѣща̀ і҆с҃, и҆ рече и҆мъ.
е҆ді́но дѣло сътворихъ, и҆ вс̂и дивите́сѧ·

Сего ради не моѷсїи дастъ вамъ ѻ҆брѣзанїе.
не ꙗ҆́ко ѿ моѷсе́а е҆сть, н̂о ѿ ѻ҆ц҃ъ.
и҆ в сꙋбо́тꙋ ѻ҆брѣ́заете чл҃ка.
а҆ще ѻ҆брѣ́занїе прїе́млетъ чл҃къ в сꙋбо́тꙋ, да не разори́т꙽сѧ зако́нъ моѷсе́ѻвъ, на мѧ л̂и гнѣ́ваетесѧ, ꙗ҆́ко всего чл҃ка зрд̑а́ва сътворих̑ в сꙋбо́тꙋ;
не сꙋди́те на лицѧ, н̂о пра́вед̑ныи сꙋд꙽ сꙋди́те·

Гл҃ахꙋ ѹ҆бо нѣцїи ѿ і҆ерс̑҇ли́млѧнъ, не се́и ли е҆сть е҆гоже и҆щꙋт꙽ ѹ҆би́ти и҆ с̂е не ѻ҆бинꙋ́асѧ гл҃етъ, и҆ ничесоже е҆мꙋ не гл҃ютъ, е҆да ка́ко разꙋмѣша кнѧ́ѕи, ꙗ҆́ко се́и е҆сть х҃с;
н̂о сего вѣмы ѿкꙋ́дꙋ е҆сть.
х҃с же е҆гда прїидетъ, никтоже вѣсть ѿкꙋ́дꙋ бꙋ́детъ·

Възва ѹ҆бо в꙽ цр҃кви ѹ҆ча і҆с҃, и҆ гл҃ѧ.
и҆ менѐ вѣ́сте, и҆ вѣсте ѿкꙋдꙋ е҆смь.
и҆ ѻ҆ себѣ не прїидохъ, н̂о е҆сть и́стиненъ посла́выи м̂ѧ, е҆гоже в̂ы не вѣ́сте.
а҆зъ вѣм꙽ е҆го, ꙗ́ко ѿ него е҆смь, и҆ то́и мѧ посла̀·

И҆ска́хꙋ же да и́мꙋть е҆го, и҆ никтоже възложи нань рꙋкы, ꙗ҆́ко не ѹ҆̀ б̂ѣ пришелъ часъ е҆го·

Мно́зи же ѿ наро́да вѣ́роваша в него, и҆ гл҃ахꙋ, ꙗ҆́ко х҃с е҆гда прїидетъ, е҆да бо́лшѧ зна́менїа сътворитъ, ꙗ҆же се́и творитъ;
слы́шашѧ фарїсе́е народ̑ ро́п꙽щꙋщъ ѻ҆ немъ сїа·

И҆ посла́шѧ фарїсе́е и҆ а҆рхїере́е слꙋгы̀, да и҆мꙋть е҆го·

Рече же і҆с҃.
е҆ще ма́ло вре́мѧ с ва́ми е҆смь, и҆ і҆дꙋ к꙽ посла́вшемꙋ м̂ѧ·

Пои́щете мене и҆ не ѻ҆брѧ́щете·

и҆ і҆деже е҆смь а҆зъ, в̂ы не мо́жете прїити·

Рѣшѧ же і҆ю҆де́е к꙽ себѣ.
ка́мо се́и хощетъ и҆тѝ, ꙗ҆́ко м̂ы не ѻ́брѧ́щем̑ е҆го;
е҆да в раз꙽сѣѧнїе е҆ллиньское хощетъ и҆тѝ;
и҆ ѹ҆чи́ти е҆ллины;
чт̂о е́сть с̂е сло́во, е҆же рече, взы́щете мене, и҆ не ѻ҆брѧщете, и҆ і҆дѣже е҆смь а҆зъ, в̂ы не мо́жете прїити·

зач̑҇, к҃з·

В послѣднїи же дн҃ь вели́кїи пра́зд̑ника, стоа́ше і҆с҃, и҆ зва́ше гл҃ѧ.
а҆ще кт̂о жа́жд̑етъ, да прїидетъ къ мнѣ, и҆ пїетъ·

Вѣ́рꙋаѝ в м̂ѧ, ꙗ҆́коже рече писа́нїе, рѣкы ѿ чрева е҆го и҆стекꙋтъ воды̀ жи́вы·

Се же рече ѻ҆́ дс҃ѣ, е҆гоже хотѧхꙋ прїимати вѣрꙋющеи въ и҆мѧ е҆го·

Не ѹ҆̀бо бѣ дх҃ь ст҃ыи, ꙗ҆́ко і҆с҃ не ѹ҆̀ б̂ѣ просла́вленъ·

Мно́зїи же ѿ народа слы́шавше сло́во, гл҃ахꙋ.
се́и е҆сть въи́стинꙋ прро̑҇къ·

дрꙋѕїи гл҃ахꙋ, се́и е҆сть х҃с.
ѻ҆́ви же гл҃ахꙋ, е҆да ѿ галиле́а х҃с прихо́дитъ;
не писа́нїе л̂и реч̑҇, ꙗ҆́ко ѿ сѣмене дввд̑а, и ѿ виѳлее́мьскыа ве́си, и҆дѣже бѣ двд̑ъ, х҃с прїидетъ;
распрѧ же бысть в наро́дѣ е҆го ради.
нѣцїи же ѿ них̑ хотѧхꙋ ꙗ҆ти е҆го, н̂о никтоже възложи нань рꙋцѣ̀·

Прїидо́шѧ же слꙋгы̀ къ а҆рхїере́ѻмъ и҆ фарїсе́ѻмъ.
и҆ рѣшѧ и҆мъ тїи, почто̀ не приведо́сте е҆го·

ѿвѣща́шѧ слꙋгы̀.
николиже та́ко гл҃алъ чловекъ, ꙗ҆́ко се́и чл҃къ·

ѿвѣща́шѧ ѹ҆бо и҆мъ фарисе́е, е҆да и҆ в̂бі прельще́ни бысте;
е҆д̂а кт̂о ѿ кн҃ѕь вѣрова во́нь, и҆ли ѿ фарїсе́й;
но народ̑ се́и и҆же не вѣсть зако́на, проклѧти сꙋть·

Гл҃а никоди́мъ к ним̑, и҆же пришедыѝ к немꙋ но́щїю, е҆ді́нъ сыи ѿ нихъ.
е҆д̂а законъ наш꙽ сꙋдитъ чл҃кꙋ, а҆ще не слы́шитъ ѿ него прежд̑е, и҆ разꙋмѣетъ что творитъ;
ѿвѣща́ша, и҆ реко́ша е҆мꙋ, е҆да и҆ т̂ы ѿ галиле́а е҆си;
и҆спита́й и҆ ви́жд̑ь, ꙗ҆́ко прро̑҇кь ѿ галиле́а не приходитъ·

И҆ і҆де кождо в꙽ до́мъ свой, і҆с҃ же и҆де в꙽ го́рꙋ е҆леѻ́ньскꙋ, заѹ́тра же па́кы прїиде в꙽ цр҃ковь, и҆ вс̂и людїе и҆дѧхꙋ к немꙋ, и҆ сѣдъ ѹ҆чаше их̑·

Глв̑҇а, и҃·

зач̑҇, к҃и·

Приведо́ша же книжиицы и҆ фарисе́е к немꙋ женꙋ̀ въ прелюбодѣа́нїи ꙗ҆́тꙋ, и҆ поста́виша ю҆̀ посредѣ, и҆ гл҃аша к немꙋ, ѹ҆чи́телю.
сїа жена̀ ꙗ҆́та е҆́сть нн҃ѣ въ прелюбодѣа́нїи·

в зако́нѣ же намъ моѷсїи повелѣ̀ таковыа̀ ка́менїемъ побива́ти.
ты́ же чт̂о гл҃еши;
се́ же рѣша и҆скꙋша́юще е҆го, да бы́ша и҆мѣ́ли чт̂о гл҃ати на́нь.
і҆с҃ же до́лꙋ прекло́ньсѧ, пр́ьстом̑ писа́ше на землѝ.
не слага́а и҆мъ.
ꙗ҆́коже прилежа́хꙋ въпраша́юще е҆го.
въскло́ньсѧ рече к ни́мъ.
и҆же е҆́сть без грѣха̀ в꙽ васъ, преже вр́ьзи ка́мен̑҇ на́ ню·

И҆ па́кы до́лꙋ прекло́ньсѧ писа́ше на землѝ.
ѻ҆ни́ же слы́шавше, и҆ со́вѣстїю ѻ҆блича́еми, и҆схожа́хꙋ е҆ді́нъ по е҆ді́номꙋ·

Наче́нше ѿ старецъ, до послѣднихъ·

и҆ ѻ҆ста̀ е҆ді́нъ і҆с҃, и҆ жена̀ посредѣ сꙋщи.
въскло́нь же сѧ і҆с҃, и҆ нѝ е҆ді́ного ви́дѣвъ, то́чїю женꙋ̀·

Речѐ е́й, гд̀ѣ сꙋть и҆́же важда́хꙋ на́ тѧ, нѝкы́иже ли тебе ѻ҆сꙋдѝ;
ѻ҆на́ же рече никто́же г҃и, реч̑҇ же е́й і҆с҃.
нѝ а҆́зъ тебе ѻ҆сꙋжда́ю.
и҆дѝ, и҆ ѿсе́лѣ ктомꙋ̀ не съгрѣша́и·

зач̑҇, к҃ѳ·

Па́кы же и҆мъ і҆с҃ рече, гл҃ѧ·

азъ е҆́смъ свѣтъ ми́рꙋ.
ходѧѝ по мнѣ̀, не и҆́мать ходи́ти въ тмѣ̀, н̂о и́мать свѣтъ живо́тныи·

Рѣша же е҆мꙋ фарисе́е.
ты ѻ҆ себѣ̀ са́мъ свѣдѣтел̑҇ствꙋеши.
свѣдѣтельство твоѐ нѣсть и҆́стинно·

ѿвѣща̀ і҆с҃ и҆ рече им̑.
аще а́зъ свѣдѣтельствꙋю ѻ҆ себѣ̀, и҆́стинно е҆́сть свѣдѣтельство моѐ·

ꙗ҆́ко вѣмъ ѿкꙋ́дꙋ прїидо́хъ, и҆ ка́мо и҆дꙋ̀.
вы же не вѣсте ѿкꙋ́дꙋ прихо́ждꙋ и҆ ка́мо грѧдꙋ·

Вы по́ плоти сꙋдите.
а҆́зъ не сꙋждꙋ̀ нико́мꙋже и҆ а҆́ще сꙋждꙋ а҆́зъ, сꙋдъ мо́и и́стинен꙽ е҆́сть·

Ꙗ҆́ко е҆ді́нъ н́ѣсмь, но а́зъ и҆ посла́выѝ м̂ѧ ѿц҃ь.
и҆ в зако́нѣ же ва́шемъ пи́сано е҆́сть.
ꙗ҆ко дв̂ою чл҃кꙋ свѣдѣтельство и҆́стинно е҆́сть·

а҆́з꙽ е҆́смь свѣдѣтельствꙋаѝ ѻ҆ мнѣ самомъ, и҆ свѣдѣтельствꙋетъ ѻ҆ мнѣ посла́выи̑ м̂ѧ ѿц҃ь.
гл҃ахꙋ же е҆мꙋ гд̀ѣ е҆́сть ѿц҃ъ тво́и;
ѿвѣща і҆с҃.
ни менѐ вѣсте ни ѿц҃а мое҆го.
а҆ще м̂ѧ бы́сте вѣдѣли, и҆ ѿц҃а мое҆го вѣдали бы́сте.
сїа гл҃ы гл҃а і҆с҃, в газоѳилакїи, ѹ҆ча въ цр҃кви.
и҆ никто́же не ат̑ е҆го, ꙗ҆ко не ѹ҆̀ бѣ прише́лъ ча́съ е҆го·

зач̑҇, л҃·

Рече же и҆мъ паки і҆с҃.
а҆зъ и҆дꙋ, и҆ в꙽зы҆щете мене, и҆ въ грѣсѣ ва́шемъ ѹ҆́мрете·

Ꙗ҆́може а҆зъ и҆дꙋ, в̂ы не мо́жете прїитѝ·

Гл҃ахꙋ ѹ҆бо і҆ꙋде́е, е҆да сѧ самъ ѹ҆бїетъ, ꙗ҆́ко гл҃ет̑ ꙗ҆́може а҆зъ и҆дꙋ̀, в̂ы не мо́жете прїитѝ;
и҆ рече и́мъ, в̂ы ѿ ни́жнихъ е҆сте, а҆зъ ѿ вы́шнихъ е҆смь.
в̂ы ѿ ми́ра сего̀ е҆сте.
а҆зъ нѣсмь ѿ мира сего.
рѣхъ ѹ҆бо вамъ, ꙗ҆ко ѹ҆мрете въ грѣсѣхъ ва́ших̑.
а҆ще б̂о не и҆мете вѣры ꙗ҆́ко а҆зъ е҆смь, ѹ҆мрете въ грѣсѣхъ ва́шихъ·

Гл҃ахꙋ же е҆мꙋ, т̂ы кт̂о е҆си;
и҆ рече и҆мъ і҆с҃, начѧ́токъ, ꙗ҆ко и҆ гл҃ю вам̑.
мно́га и́мам̑ ѻ҆ вс̑҇а гл҃ати и҆ сꙋди́ти, н̂о посла́выѝ м̂ѧ и҆стиненъ е҆сть.
и҆ а҆зъ ꙗ҆́же слы́шахъ ѿ него, сїа гл҃ю в꙽ ми́рѣ·

Не разꙋмѣшѧ ѹ҆бо ꙗ҆́ко ѿц҃а и҆мъ гл҃аше·

Рече же и҆мъ і҆с҃.
е҆гда възнесете сн҃а чл҃веческаго, тогда̀ разꙋмѣ́ете, ꙗ҆́ко а҆зъ е҆смь, и҆ ѻ҆ себѣ ничесоже не творю, н̂о ꙗ҆́коже наѹ҆чѝ м̂ѧ ѿц҃ъ мой сїа гл҃ю.
и҆ посла́выѝ м̂ѧ со мною ес̑҇·

Не ѻ҆ста́ви мене е҆ді́ного ѿц҃ъ, ꙗ҆́ко а҆з꙽ ѹ҆год̑наѧ е҆мꙋ всегда творю̀.
с̂и е҆мꙋ гл҃ющꙋ, мно́ѕи вѣ́ровашѧ в него·

зач̑҇, л҃а·

Гл̂аше же і҆с҃, к꙽ вѣ́ровавшимъ к немꙋ і҆ѹ҆де́ѻмъ.
а҆ще в̂ы пребꙋ́дете в꙽ словесѝ мое́мъ, въи́стинꙋ ѹ҆чн҃цы моѝ бꙋ́дете, и҆ разꙋмѣ́ете и́стинꙋ, і҆ и́стина свободи́тъ в̂ы·

ѿвѣща́ша и҆ рѣшѧ е҆мꙋ, сѣмѧ а҆враа́мле е҆смы, и никомꙋже рабо́тахомъ николиже.
ка́ко ты гл҃еши ꙗ҆́ко свобод̑ни бꙋ́дете;
ѿвѣща̀ и҆мъ і҆с҃.
а҆ми́нь а҆ми́нь гл҃ю вамъ, ꙗ҆́ко всѧкъ творѧѝ грѣхъ, рабъ е҆сть грѣхꙋ.
ра̀бъ же не пребывает̑ в домꙋ въ вѣкы.
сн҃ъ пребыва́ет꙽ въ́ вѣкы.
а҆ще ѹ҆бо сн҃ъ в̂ы свободи́тъ, въи́стинꙋ свободни бꙋдете·

Вѣмъ ꙗ҆́ко сѣмѧ а҆враа́мле е҆сте, н̂о и́щете мене ѹ҆бити, ꙗ҆́ко сло́во моѐ не вмѣща́етсѧ въ вы̂·

А҆зъ е҆же видѣхъ ѹ҆ ѻ҆ц҃а мое҆го, гл҃ю.
и҆ вы̀ ѹ҆бо е҆же видѣсте ѹ҆ ѿц҃а вашего, творитѐ·

ѿвѣща́шѧ, и҆ рѣша е҆мꙋ.
ѿц҃ъ нашъ а҆враа́мъ ес̑҇·

Гл҃а и҆мъ і҆с҃.
а҆ще чѧда а҆враа́млѧ бы́сте были, дѣла а҆враа́млѧ бысте творили.
нн҃ѣ же и́щете менѐ ѹ҆бити чл҃ка и҆же и҆́стинꙋ вамъ гл҃ахъ, ꙗ҆́же слы́шахъ ѿ б҃а·

Сего а҆враа́мъ нѣсть сътворилъ.
в̂ы творитѐ дѣла ѿц҃а ва́шего·

Рѣша же е҆мꙋ.
м̂ы ѿ любодꙋ́анїа нѣсмы рождени, е҆ді́ного ѿц҃а и҆́мамы б҃а·

зач̑҇, л҃в·

Рече же и҆мъ і҆с҃, а҆ще б҃ъ ѿц҃ъ вашъ бы̂ былъ, любили бы́сте ѹ҆бо мене.
а҆зъ б̂о ѿ б҃а и҆зыдохъ, и҆ прїидохъ·

Не ѻ҆ себѣ б̂о прїидохъ, но то́й м̂ѧ посла̀.
почто̀ бесѣ́ды моеа̀ не разꙋмѣе҆те;
ꙗ҆ко не мо́жете слы́шѧти словесѐ мое҆го·

Вы̂ ѿц҃а ва́шего дїа́вола е҆сте, и҆ по̀хоти ѿц҃а ва́шего хо́щете творити.
ѻ҆́нъ чл҃коѹ҆бїи́ца бѣ и҆сконѝ, и҆ въ и́стинѣ не стои́тъ, ꙗ҆́ко нѣсть и́стины в немъ.
е҆гда гл҃етъ лж̂ꙋ, ѿ свои҆хъ гл҃етъ, ꙗ҆́ко лож̑ е҆сть, и҆ ѿц҃ъ л꙽жи·

А҆́з же зане и́стинꙋ гл҃ю, не вѣрꙋете м̂нѣ·

Кт̂о ѿ вас̑҇ ѻ҆блича́етъ м̂ѧ ѻ҆ грѣсѣ;
а҆ще ли и́стинꙋ гл҃ю, почто̀ в̂ы не вѣ́рꙋете мн̂ѣ;
и҆же е҆сть ѿ б҃а, гл҃ы бж҃їа послꙋшае҆тъ.
сего ради в̂ы не послꙋшаете, ꙗ҆́ко ѿ б҃а нѣ́сте·

ѿвѣща́ша і҆ѹ҆де́е, и҆ рѣшѧ е҆мꙋ.
не до́брѣ ли м̂ы гл҃емъ.
ꙗ҆́ко самарѧнин̑҇ е҆си т̂ы, и҆ бѣсъ и҆́маши;
ѿвѣща̀ і҆с҃.
а҆зъ бѣса не и҆мамъ, н̂о чт̂ꙋ ѿц҃а мое҆го, и҆ в̂ы не чтете мене.
а҆з же не и҆щꙋ̀ сла́вы моеа̀, е҆сть и҆ща̀ и҆ сꙋдѧ·

зач̑҇, л҃г·

А҆́ми́нь а҆ми́нь гл҃ю вамъ.
а҆́ще кт̂о сло́во моѐ съблюдет̑, смр҃ти не и҆́мать ви́дѣти въ вѣкы·

Рѣша ѹ҆бо е҆мꙋ жи́дове.
нн҃ѣ разꙋмѣхом̑, ꙗ҆́ко бѣсъ и҆́маши.
а҆враа́мъ ѹ҆́мретъ, и҆ пророцы.
и҆ т̂ы гл҃еши, а҆ще кт̂о сло́во мое съблюдетъ, смр҃ти не и҆́мать в꙽кꙋсити въ́ вѣкы·

Є҆д̂а т̂ы болїи е҆си ѿц҃а на́шего а҆враа́ма, и҆же ѹ́мрет̑;
и҆ прро̑҇цы ѹ҆мро́шѧ.
кого сѧ самъ т̂ы твори́ши;
ѿвеща̀ і҆с҃, а҆ще а҆зъ сла́влюсѧ самъ, сла́ва моа ничесоже е҆сть.
е҆сть ѿц҃ъ моѝ сла́влѧѝ м̂ѧ, е҆гоже в̂ы гл҃ете, ꙗ҆ко б҃ъ нашъ е҆сть, и҆ не позна́сте е҆го.
а҆з же вѣмъ е҆го·

и҆ а́ще рекꙋ ꙗ҆́ко не вѣмъ е҆го, бꙋдꙋ подобенъ вамъ ло́жъ.
н̂о вѣмъ е҆го, и҆ слов́о е҆го съблюдаю·

А҆враа́м꙽ ѿц҃ъ вашъ рад̑ б̂ы бы́лъ, даб̂ы видѣлъ дн҃ь мой.
и҆ видѣ и҆ възра́довасѧ·

Рѣша же і҆ѹ҆де́е к немꙋ, пѧтидесѧт꙽ лѣт꙽ не ѹ҆̀ и҆́маши, и҆ а҆враа́ма ли е҆си ви́дѣлъ;
рече же и҆мъ і҆с҃.
а҆ми́нь а҆мин̑҇ гл҃ю вамъ, прежд̑е да́же а҆враа́мъ не бысть, а҆зъ е҆смь·

Взѧшѧ же ка́менїе, да вр́ъгꙋтъ на́нь, і҆с҃ же съкры́сѧ, і҆ и҆зы́де и҆з꙽ цр҃кве, прошедъ посредѣ и҆хъ, и҆ мимохожд̑аше тако·

Глв̑҇а, ѳ҃·

зач̑҇, л҃д·

И ми́мои҆ды̀, видѣ чл҃ка слѣпа ѿ рожд̑ьства.
и҆ въпроси́шѧ е҆го ѹ҆чн҃цы е҆го гл҃юще, ра́вви, кт̂о съгрѣши, се́и л̂и и҆ли родителѧ его, да слѣпъ родисѧ;
ѿвѣща̀ і҆с҃, ни се́и съгрѣши, ни родителѧ е҆го, н̂о да ꙗ҆́вѧт̑сѧ дѣла бж҃їа на немъ·

Мн̂ѣ подоб́ает̑ дѣ́лати дѣ́ла посла́вшаго м̂ѧ, до́нъдеже дн҃ь е҆сть.
прїидет̑ нощъ, е҆гда никтоже мо́жетъ дѣ́лати.
е҆гда в꙽ ми́рѣ е҆смь, свѣтъ е҆смь ми́рꙋ·

Сї́а ре́къ, плю́нꙋ на́ землю, и҆ сътвори бренїе ѿ плюнове́нїа, и҆ пома́за ѻ҆́чи бре́нїемъ слѣпо́мꙋ, и҆ рече е҆мꙋ, и҆дѝ ѹ҆мы́исѧ в꙽ кꙋпѣ́ли силоам̑стѣ.
е҆же сказа́етсѧ по́сланъ.
и҆д̂е же и҆ ѹ҆мы́сѧ, и҆ прїиде видѧ̀·

Съсѣ́ди же, и҆ и́же бѣхꙋ ви́дѣли е҆го прежде, ꙗ҆́ко слѣпъ б̂ѣ, гл҃ахꙋ.
не се́и ли е҆сть сѣдѧѝ и҆ просѧ̀;
ѻ҆́ви гл҃ахꙋ, ꙗ҆́ко се́й ес̑҇, и҆нїи же гл҃ахꙋ, ꙗ҆́ко подо́бенъ е҆мꙋ ес̑҇, ѻ҆́н же гл҃аше, ꙗ҆́ко а҆зъ е҆смь·

Гл҃ахꙋ же е҆мꙋ, како ти сѧ ѿвръз́остѣ ѻ҆́чи;
ѿвѣща́ ѻ҆нъ и҆ рече.
чл҃къ нарицаемыи і҆с҃, бре́нїе сътворѝ, и҆ пома́за ѻ҆́чи моѝ, и҆ речѐ м̂и, и҆дѝ в꙽ кꙋпѣ́ль силоа́млю, и҆ ѹ҆мы́йсѧ.
шед̑ же и҆ ѹ҆мы́всѧ прозрх̑ѣ·

Рѣшѧ же е҆мꙋ, кт̂о е҆сть;
гл҃а, не вѣмъ·

Ведоша же е҆го к꙽ фарїсе́ѻм̑, и҆же б̂ѣ и҆ногда слѣпъ.
бѣ же сꙋбо́та е҆гда̀ сътворѝ бре́нїе і҆с҃, и҆ ѿвръзе е҆мꙋ ѻ҆́чи.
паки же въпраша́хꙋ е҆го и҆ фарі́се́е, како прозрѣ, ѻ҆н же реч̑҇ им̑.
бренїѐ положѝ мнѣ на ѻ҆́чи.
и҆ ѹ҆мых̑сѧ, и҆ ви́жꙋ·

Гл҃ахꙋ же ѿ фарїсе́й нѣ́цыи, нѣсть сї́и ѿ б҃а чл҃къ, ꙗ҆́ко сꙋбо́тꙋ не хранит̑.
ѻ҆́ви гл҃ахꙋ, ка́ко мо́жет̑ чл҃къ грѣшен̑҇ си́цева зна́менїа твори́ти;
и҆ распрѧ̀ б̂ѣ в꙽ нихъ·

Гл҃ахꙋ ѹ҆бо слѣпцꙋ па́ки.
т̂ы чт̂о гл҃еши ѻ҆ немъ, ꙗ҆́ко ѿвр́ьзе ѻ҆́чи твоѝ;
ѻ҆́н же рече ꙗ҆́ко прро̑҇къ ес̑҇·

Не ꙗ҆́ша ѹ҆бо вѣ́ры і҆ѹ҆де́е ѻ҆ нем̑, ꙗ҆́ко слѣпъ б̂ѣ и҆ прозрѣ, до́ндеже въз꙽гласи́ша родителѧ того прозрѣ́вшаго·

И҆ въпросиша ѧ҆̀ гл҃юще, се́й л̂и ес̑҇ сн҃ъ ва́ю·

е҆гоже в̂ы гл҃ете ꙗ҆́ко слѣпъ роди́сѧ, како ѹ҆бо нн҃ѣ ви́дитъ;
ѿвѣща́ста же и́ма роди́телѧ е҆го, и҆ рѣста.
вѣмы ꙗ҆́ко се́й е҆сть сн҃ъ на́ю, и҆ ꙗ҆́ко слѣпъ родисѧ.
ка́ко же нн҃ѣ ви́дитъ, не вѣмы.
и҆ли кт̂о ѿвр́ъзе е҆мꙋ ѻ҆́чи, м̂ы не вѣмы.
самъ въз́растъ и҆́мать, самого въпроси́те, сам̑ ѻ҆ себѣ да гл҃етъ·

Си̂ рекоста роди́телѧ е҆го, ꙗ҆́ко боѧ́стасѧ жи́довъ.
ѹ҆же б̂о сѧ бѣ́хꙋ сложили жи́дове.
да а҆ще кт̂о е҆го и҆сповѣсть х҃а, ѿлꙋченъ со́нмищѧ да бꙋ́детъ·

Сего рад̑и̑ роди́телѧ е҆го реко́ста, ꙗ҆́ко въз́растъ и҆́мать, самого въпроси́те·

Въз꙽гласи́шѧ же втори́цею чл҃ка и҆же б̂ѣ слѣ́пъ, и҆ рѣша е҆мꙋ, дажд̑ъ сла́вꙋ бв҃и.
м̂ы вѣмы, ꙗ҆́ко чл҃къ се́й грѣшенъ е҆сть.
ѿвѣща же ѻ҆́нъ, и҆ рече.
а҆ще грѣшникъ ес̑҇, не вѣ́де.
е҆ді́но вѣмъ, ꙗ҆ко слѣпъ бѣх꙽, нн҃ѣ ви́жꙋ·

Рѣшѧ же е҆мꙋ паки.
чт̂о сътворѝ тебѣ·

ка́ко ѿверзе ѻ҆́чи твоѝ;
ѿвѣща̀ и҆мъ, рекохъ вам̑ ѹ҆же, и҆ не слы́шасте;
чт̂о пакы хо́щете слы́шѧти;
е҆д̂а и҆ в̂ы ѹ҆чн҃цы е҆го хо́щете бы́ти;
ѻ҆́ни же ѹ҆кори́ша е҆го, и҆ рѣшѧ е҆мꙋ.
т̂ы ѹ҆чн҃къ е҆си того.
мы же моѵ꙼се́ѻви е҆смы ѹ҆чн҃цы.
м̂ы вѣмы ꙗ҆́ко моѷсе́ѻви гл҃а б҃ъ.
сего же не вѣмы ѿкꙋдꙋ е҆сть·

ѿвѣща́ чл҃къ, и҆ рече и҆мъ.
ѻ҆ се́мъ б̂о ди́вно е҆сть, ꙗ҆́ко в̂ы не вѣ́сте ѿкꙋ́дꙋ е҆сть, и҆ ѿвр́ъзе ѻ҆́чи моѝ.
вѣмы же, ꙗ҆́ко грѣшникы б҃ъ не послꙋш́ае҆тъ, н̂о а҆ще кт̂о бг҃очтецъ е҆сть, и҆ во́лю е҆го творит̑, того послꙋ́шае҆тъ.
ѿ вѣка нѣсть слы́шано, ꙗ҆́ко кт̂о ѿвр́ъзе ѻ҆́чи слѣпꙋрожд̑е́нꙋ.
а҆ще не бы̀ был̑҇ се́й ѿ б҃а, не мо́глъ бы творити ничесоже·

ѿвѣща́шѧ и҆ рѣшѧ е҆мꙋ.
въ грѣсѣхъ т̂ы родилсѧ е҆си ве́сь, и҆ т̂ы ли н̂ы ѹ҆чиши і҆ и҆з꙽гна́ша е҆го вонъ·

Ѹ҆слы́шѧ і҆с҃, ꙗ҆́ко и҆з꙽гна́шѧ е҆го во́нъ.
и҆ ѻ҆брѣтъ е҆го рече е҆мꙋ.
т̂ы вѣрꙋеши ли в꙽ сн҃а бж҃їа;
ѿвѣща̀ ѻ҆́нъ, и҆ рече.
и҆ кт̂о е҆сть г҃и, да вѣ́рꙋю в него;
рече же е҆мꙋ і҆с҃.
и҆ ви́дѣлъ е҆го е҆си, и҆ гл҃ѧѝ с тобою, то́й ес̑҇·

ѻ҆́н же реч̑҇, вѣрꙋю г҃и.
и҆ поклонисѧ е҆мꙋ·

зач̑҇, л҃е·

И҆́ рече і҆с҃.
на сꙋ́дъ а҆зъ в꙽ миръ се́й прїидохъ, да неви́дѧщеѝ, ви́дѧт̑.
и҆ ви́дѧщеѝ, слѣпи бꙋдт̑ꙋ.
и҆ слы́шашѧ ѿ фарїсе́й сїа сꙋщїи с ним̑, и҆ рѣша е҆мꙋ, е҆д̂а и҆ м̂ы слѣпы е҆смы;
рече же им̑ і҆с҃.
а҆ще бы́сте слѣ́пи были, не бы́сте и҆мѣли грѣха̀.
нн҃ѣ же гл҃ете ꙗ҆ко ви́димъ, и҆ грѣхъ вашъ пребывает̑·

Глв̑҇а, і҃·

зач̑҇·

Ами́нь а҆ми́нь гл҃ю вамъ.
не входѧѝ дв́ерми въ дворъ ѻ҆в꙽чїи, н̂о прелазѧ и҆нꙋдѣ, то́и тать е҆сть и҆ разбо́иник̑҇·

а҆ входѧѝ две́рми, па́стыр꙽ е҆сть ѻ҆вцѧмъ.
семꙋ две́рник꙽ ѿвръза́етъ, и҆ ѻ҆вцѧ глс̑҇а е҆го слы́шатъ.
и҆ своѧ ѻ҆вцѧ глаша́етъ по́ имени, и҆ и҆зго́нитъ и҆хъ·

И҆ е҆гда̀ своѧ̀ ѻ҆вцѧ и҆ждене́тъ, пред ними хо́дитъ, и҆ ѻ҆вцѧ̀ по немъ и҆́дꙋтъ, ꙗ҆ко вѣдѧтъ глс̑҇а е҆го.
по чꙋжемꙋ же не́ йдꙋтъ, н̂о бѣжатъ ѿ него́, ꙗ҆́ко не зна́ютъ чꙋжаго гла́са·

Сїю при́тчꙋ рече и҆мъ і҆с҃, ѻ҆ни же не разꙋмѣша, чт̂о бѣше ꙗ҆́же гл҃аше и҆мъ·

рече же пакы и҆мъ і҆с҃.
а҆ми́нь а҆ми́нь гл҃ю вамъ, ꙗ҆́ко а҆з꙽ е҆смь дверъ ѻ҆вцѧмъ.
вс̂и е҆ли́ко их̑ прїиде прежд̑е мене, та́тїе сꙋть и҆ разбо́йницы, но̂ не послꙋ́шаша их̑ ѻ҆вцѧ·

зач̑҇, л҃ѕ·

А҆́зъ е҆смь две́ръ.
мно́ю а҆ще кт̂о вни́детъ, сп҃сетсѧ, и҆ вни́детъ, і҆ и҆зыдетъ, и҆ па́жить ѻ҆брѧ́щет꙽·

Та́ть не прихо́дитъ, развѣ да ѹ҆крадетъ, и҆ ѹ҆бїе́тъ и҆ погꙋбитъ·

а҆зъ прїидо́хъ, да животъ и҆́мꙋт꙽, и҆ лиш꙽ше и҆́мꙋть·

а҆зъ е҆смь па́стырь до́брыи.
па́стырь до́брыи дш҃ꙋ свою полага́етъ за ѻ҆вцѧ̀·

а҆ нае́мникъ і҆ и҆же нѣсть па́стырь, е҆мꙋже нѣ́ сꙋть ѻ҆вцѧ̀ своѧ, ви́дитъ во́лка грѧдꙋща, и҆ ѻ҆ставлѧ́етъ ѻ҆вцѧ̀ и҆ бѣга́етъ, и҆ во́лкъ расхи́титъ и҆хъ, и҆ распꙋ́дитъ ѻ҆вцѧ.
а҆ нае́мникъ бѣжитъ, ꙗ҆́ко нае́мникъ е҆сть, и҆ нерадит̑ ѻ҆ ѻ҆вцѧх̑.
а҆з꙽ е҆смь па́стырь до́брыи, и҆ зна́ю моа, и҆ зна́ютъ м̂ѧ моѧ, ꙗ҆́коже зна́етъ м̂ѧ ѿцъ, и҆ а́з꙽ зна́ю ѿц҃а, и҆ дш҃ꙋ мою полага́ю за ѻ҆вцѧ̀·

І҆ и́ны ѻ҆вцѧ и҆́мамъ, ꙗ҆́же нѣ́ сꙋтъ ѿ двора̀ сего.
и҆ тыѧ м̂и подоба́етъ привестѝ.
и҆ глс̑҇а мой ѹ҆слы́шатъ, и бꙋ́детъ е҆ді́но ста́до, и҆ е҆ді́нъ па́стырь·

зач̑҇, л҃з·

Сего ради м̂ѧ ѿц҃ъ любитъ.
ꙗ҆́ко аз̑ дш҃ꙋ мою полага́ю, да па́кы прїимꙋ ю҆̀·

Никтоже во́зметъ ю҆́ ѿ мене, н̂о а҆зъ полага́ю ю҆̀ ѻ҆ себѣ.
ѻ҆́бласть и҆́мамъ положити ю҆̀, и҆ ѻ҆́бласть и҆́мамъ пакы прїати ю҆̀·

Сїю за́повѣдь прїахъ ѿ ѻ҆ц҃а мое҆го·

Распрѧ же па́кы бысть въ і҆ѹ҆де́ехъ за словеса̀ сїа·

Гл҃ахꙋ же мно́ѕи ѿ нихъ, бѣс꙽ и҆́мать, и неи́стовъ е҆сть, чт̂о е҆го послꙋшаете;
и҆́нїи гл҃ахꙋ.
сїи гл҃и нѣ́ сꙋть бѣснꙋ́ющагосѧ.
е҆да мо́жет꙽ бѣсъ слѣпо́мꙋ ѻ҆́чи ѿврѣсти·

зач̑҇.

Бышѧ же тогда ѻ҆бновле́нїа въ і҆ерс̑҇ли́мѣх꙽, и҆ зима̀ б̂ѣ.
и҆ хожаше і҆с҃ в꙽ цр҃ъкви, въ притворѣ соло́мони·

ѻ҆быдошѧ же е҆го и҆ѹ҆де́е, и҆ гл҃ахꙋ е҆мꙋ.
доќолѣ дш҃а нашѧ взе́млеши;
а҆ще т̂ы е҆си х҃с, рц̂и намъ не ѻ҆бинꙋ́асѧ·

ѿвѣща и҆мъ і҆с҃, рѣхъ вам꙽, и҆ не вѣрꙋете.
дѣла ꙗ҆же а҆зъ творю ѻ҆ и҆мени ѿц҃а мое҆го, т̂а свѣдѣтельствꙋютъ ѻ҆ мн̂ѣ.
н̂о вы не вѣ́рꙋете, нѣсте б̂о ѿ ѻ҆вецъ моих̑, ꙗ҆́коже рх̑ѣ вам̑·

зач̑҇, л҃и·

ѻ҆вцѧ моѧ̀ гла́са мое҆го слꙋшѧютъ, и҆ а҆зъ зна́ю и҆х꙽, и҆ по мн̂ѣ грѧдꙋт꙽, и҆ а҆зъ животъ вѣчныи дамъ и҆мъ, и҆ не погы́бнꙋтъ въ́ вѣки, и҆ не въсхи́титъ и҆хъ никтоже ѿ рꙋкы мое́а̀·

ѿц҃ъ мой и҆же дасть мн̂ѣ, болїи всѣхъ е҆сть, и҆ никтоже мо́жетъ въсхи́тити и҆хъ ѿ рꙋкы̀ ѿц҃а мое҆го·

А҆зъ и҆ ѿц҃ъ е҆ді́но е҆свѣ·

Взѧ́шѧ же ка́менїе пакы и҆ѹ҆де́е, да побїютъ е҆го·

ѿвѣща̀ и҆мъ і҆с҃.
мно́га добра̀ дѣ́ла ꙗ҆вихъ вамъ ѿ ѻ҆ц҃а моего, за коѐ и҆х꙽ дѣло ка́менїе ме́щете на́ мѧ;
ѿвѣщашѧ е҆мꙋ и҆ѹ҆де́е гл҃юще.
ѻ҆ добрѣ дѣлѣ ка́менїе не ме́щемъ на тѧ, н̂о ѻ҆ хꙋлѣ.
ꙗ҆ко т̂ы чл҃къ сы́й, твори́ши себе б҃а·

ѿвѣща̀ и҆мъ і҆с҃, нѣсть л̂и пи́сано в зако́нѣ ва́шемъ.
а҆зъ рѣх꙽, бо́ѕи е҆сте;
а҆ще ѻ҆ны̀ рече богы, к ни́мъже сло́во бж҃їе бысть, и҆ не мо́жетъ разори́тисѧ писанїе, е҆гоже ѿц҃ъ ст҃и, и҆ посла̀ в꙽ ми́ръ.
в̂ы гл҃ете, ꙗ҆́ко хꙋлꙋ гл҃еши, зане рѣх꙽ ꙗ҆́ко сн҃ъ бж҃їи е҆смь;
а҆ще не творю дѣ́ла ѿц҃а мое҆го, не и҆мѣте м̂и вѣ́ры.
а҆ще л̂и творю, а҆ще и҆ мн̂ѣ не вѣ́рꙋете, дѣ́ломъ мои́мъ вѣ́рꙋите, да разꙋмѣете и҆ вѣ́рꙋете, ꙗ҆́ко въ мн̂ѣ ѿц҃ъ, и҆ а́зъ в немъ·

зач̑҇,

І҆ и́ска́хꙋ ѹ҆бо па́кы ꙗ҆́ти е҆го.
і҆ и҆зыде ѿ рꙋкъ и҆хъ, і҆ и́де паки на ѻ́нъ пол̑҇ і҆ѻ҆рда́на, на мѣ́сто и҆дѣже б̂ѣ і҆ѻ҆а́н꙽ прежде крс̑҇тѧ, и҆ пребысть т̂ꙋ·

И҆ мно́ѕи прїидо́шѧ к немꙋ, и҆ гл҃ахꙋ, ꙗ҆́ко і҆ѻ҆а́ннъ ѹ҆бо ѕна́менїа не сътвори ни е҆ді́ного.
всѧ же е҆ли́ка рече і҆ѻ҆а́н꙽ ѻ҆ семъ, и́стина б̂ѣ.
и҆ мно́ѕи вѣ́роваша в него т̂ꙋ·

Глв̑҇а, а҃і·

зач̑҇, л҃ѳ·

Бѣ же нѣ́кто болѧ̀ ла́зар̑҇ ѿ виѳанїѧ, ѿ веси марїины и҆ ма́р꙽ѳы сестры̀ е҆а̀·

Бѣ же марїа пома́завшїа г҃а мїромъ, и҆ ѻ҆те́рши но́ѕѣ е҆го власы свои́ми, е҆ꙗ҆́же бра́тъ ла́зарь болѧ́ше·

Посла́стѣ ѹ҆бо сестрѣ к немꙋ гл҃ющи.
г҃и, с̂е е҆гоже лю́биши, боли́тъ·

Слы́шав же і҆с҃, рече.
сїа болѣзнь, нѣсть къ смр҃ти, н̂о ѻ҆ сла́вѣ бж҃їи да просла́вит̑сѧ сн҃ъ бж҃їи е҆ѧ̀ ради·

Люблѧше же і҆с҃ ма́рѳꙋ, и҆ сестрꙋ е҆ѧ̀.
и҆ ла́зарѧ·

Є҆гда же ѹ҆слы́ша ꙗ҆ко болитъ.
тогда̀ пребы́сть на немже бѣ мѣ́стѣ, дв̂а дн҃и·

Пото́м же гл҃а ѹ҆чн҃комъ.
и҆́демъ въ і҆ю҆де́ю па́ки·

Гл҃ашѧ е҆мꙋ ѹ҆чн҃цы̀.
ра́вви, нн҃ѣ и҆ска́хꙋ тебѐ ка́менїем̑ побити і҆ю҆де́е, и҆ паки ли и҆́деши та́мо;
ѿвѣща і҆с҃, не дв̂а л̂и на́десѧте часа̀ е҆ста во́ дн҃е;
а҆ще кт̂о хо́дитъ во́ дн҃е, не поткнетсѧ, ꙗ҆́ко свѣтъ ми́ра сего ви́дит̑·

А҆ще же кт̂о хо́дитъ в нощи, потъкнетсѧ, ꙗ҆ко нѣ́сть свѣта в немъ·

Сїа рече, и҆ по семъ гл҃а и҆́мъ, ла́зарь дрꙋ́гъ нашь ѹ҆спе.
но и҆дꙋ̀ да возбꙋжд̑ꙋ е҆го·

Рѣшѧ же ѹ҆чн҃цы е҆го.
г҃и, а҆ще ѹ҆спе, сп҃сенъ бꙋдетъ·

Рече же і҆с҃.
ѻ҆ смр҃ти е҆го·

ѻ҆ни же мнѣшѧ, ꙗ҆́ко ѻ҆ ѹ҆спе́нїи сн҃а гл҃етъ·

Тогда рече и҆́мъ і҆с҃ не ѻ҆бинꙋѧсѧ, ла́зарь ѹ҆́мрет̑, и҆ радꙋюсѧ васъ, ради, да вѣ́рꙋете, ꙗ҆ко не бѣхъ тамо, н̂о и́демъ к немꙋ·

Рече же ѳома, гл҃емыи близне́цъ, ѹ҆чн҃комъ.
и҆демъ и҆ м̂ы, да ѹ҆́мремъ с ни́мъ·

Пришедъ же і҆с҃, ѻ҆брѣте е҆го четы́ри дн҃и ѹ҆же и҆мꙋща въ гробѣ·

Бѣ же виѳанїа близъ і҆ерс̑҇ли́ма.
ꙗ҆́ко стадїи пѧтьнадесѧт̑.
и҆ мно́ѕи ѿ і҆ю҆деи бѧхꙋ пришлѝ к ма́рѳѣ и҆ марїи, да ѹ҆тѣшѧтъ и҆́хъ ѻ҆ бра́тѣ е҆ю̀·

Ма́рѳа же е҆гда ѹ҆слыша ꙗ҆́ко і҆с҃ грѧдетъ, срѣте е҆го.
марїа же до́ма сѣдѧше·

Рече же ма́рѳа къ і҆с҃ꙋ.
г҃и, а҆ще бы зд̂ѣ былъ, не бы бра́тъ мо́и ѹ҆мерлъ.
н̂о и҆ нн҃ѣ вм̑ѣ, ꙗ҆́ко е҆ли́ка а҆́ще про́сиши ѿ б҃а.
да́ст꙽ тебѣ б҃ъ.
гл҃а е́й і҆с҃, воскрс̑҇нетъ брат̑ тво́й·

Гл҃а е҆мꙋ ма́рѳа.
вѣ́мъ ꙗ҆ко воскрс̑҇нетъ въ воскресенїе в послд̑ѣнїи дн҃ь·

Рече же е́й і҆с҃.
а҆́зъ е҆смь воскресе́нїе и҆ живо́тъ·

вѣрꙋаѝ в м̂ѧ, а҆ще и҆ ѹ҆мретъ, ѻ҆живетъ.
и҆ всѧк̑҇ живыѝ, и҆ вѣрꙋѧ в м̂ѧ, не ѹ҆мрет̑ въ вѣкы·

Є҆́млеши ли вѣрꙋ семꙋ;
гл҃а е҆мꙋ, е҆́й г҃и.
а҆зъ вѣровахъ, ꙗ҆ко ты е҆си х҃с сн҃ъ бж҃їи, и҆́же в ми́ръ грѧдыи·

И҆ сїа ре́кши, и҆́де, и҆ пригласѝ марїю сестрꙋ свою тай ре́кши.
ѹ҆чи́тель прише́лъ е҆сть, и҆ глашает̑ т̂ѧ·

ѻ҆на́же ꙗ҆́ко ѹ҆слы́ша, въста̀ ско́ро и҆ і҆де к немꙋ.
не ѹ҆̀же б̂о бѣ пришелъ і҆с҃ в꙽ ве́сь, н̂о бѣ на мѣ́стѣ и҆дѣже срѣте е҆го ма́рѳа·

І҆ю҆де́е же ѹ҆бо сꙋщїи с нею в домꙋ и҆ ѹ҆тѣша́юще ю҆̀.
видѣвше ма́рїю ꙗ҆́ко ско́ро въста̀ и҆ і҆зы́де, по неи и҆до́шѧ, гл҃юще, ꙗ҆́ко и҆́детъ на́ гроб꙽ да пла́четъ та́мо·

Ма́рїѧ же ꙗ҆́ко прїиде и҆дѣже бѣ і҆с҃, видѣ́вши е҆го, падѐ е҆мꙋ на́ ногꙋ, гл҃ющи е҆мꙋ.
г҃и, а҆ще бы бы́лъ зд̂ѣ, не бы̀ ѹ҆мерлъ мо́и бра́тъ·

І҆с҃ же ꙗ҆́ко видѣ ю҆̀ пла́чющꙋсѧ, и҆ пришед̑шаѧ с не́ю і҆ю҆деѧ пла́чющꙋсѧ, запрѣти дх҃ꙋ, и҆ возмꙋти́сѧ са́мъ, и҆ реч̑҇, гдѣ положѝсте е҆го·

Гл҃ашѧ е҆мꙋ.
г҃и, прїиди и҆ ви́жд̑ь.
прослези́сѧ і҆с҃·

Гл҃ахꙋ ѹ҆́бо жи́дове, ви́жд̑ь ка́ко люблѧ́ше е҆го·

Нѣцыи же ѿ нихъ рѣша, не можа́ше ли се́и ѿве́рзыи ѻ҆́чи слѣпо́мꙋ, сътворити да и҆ се́й не ѹ҆́мретъ;
і҆с҃ же па́ки прѣтѧ в себѣ прїиде къ́ гробꙋ·

Бѣ же пещера, и҆ ка́мень лежа́ше на не́и·

Гл҃а і҆с҃, возмѣте ка́мень·

Гл҃а е҆мꙋ сестра ѹ҆ме́ршаго ма́рѳа.
г҃и, ѹ҆же смерди́т꙽, четверодне́вен꙽ бо е҆сть.

Гл҃а е́й і҆с҃, не рх̑ѣ л̂и ти ꙗ҆ко а҆ще вѣ́рꙋеши, ѹ҆́зриши сла́вꙋ бж҃їю;
взѧ́шѧ же ка́мень и҆дѣже бѣ ѹ҆мерыи лежа̀·

І҆с҃ же возве́дъ ѻ҆́чи горѣ, реч̑҇, ѿч҃е.
хвалꙋ̀ тебѣ въздаю̀, ꙗ҆́ко ѹ҆слы́ша м̂ѧ.
а҆з же ви́дѣхъ ꙗ҆́ко всегд̑а м̂ѧ послꙋ́шѧеши, н̂о наро́да ради стоа́щаго ѻ҆́крестъ рѣхъ, да вѣ́рꙋ и҆́мꙋть ꙗ҆́ко т̂ы мѧ посла̀·

И҆ сїа рек̑҇, гла́сомъ вели́ком̑ възва̀.
ла́заре грѧдѝ вонъ.
и҆ и҆зы́де ѹ҆мерыѝ ѻ҆бѧ́зан꙽ рꙋка́ма и҆ ногама ѹ҆кро́емъ, и҆ лице е҆го ѹ҆брꙋ́сомъ ѻ҆бѧ́зано.
гл҃а им̑ і҆с҃.
разрѣши́те е҆го, и҆ ѻ҆ста́вите и҆тѝ·

Мно́ѕи ѹ҆бо ѿ і҆ѹ҆де́й пришед̑шеѝ к꙽ ма́рїи, и҆ видѣ́вше ꙗ҆же сътворѝ і҆с҃, вѣровашѧ во́нь·

Нѣцїи же ѿ нихъ и҆дошѧ к꙽ фарїсе́ѻмъ, и҆ рекоша и҆мъ ꙗ҆же сътворѝ і҆с҃·

зач̑҇, м҃·

Събра́шѧ ѹ҆бо а҆рхїере́е и҆ фарїсе́е со́н꙽мъ, и҆ гл҃ахꙋ, что сътворимъ.
ꙗ҆́ко чл҃къ се́й мно́га зна́менїѧ творитъ;
а҆ще ѻ҆ста́вим̑ е҆го та́ко, вс̂и вѣрꙋютъ в него.
и҆ прїидꙋтъ римлѧне, и҆ възмꙋтъ мѣ́сто и҆ ѧ҆ѕы́къ на́шъ·

Є҆ди́нъ же нѣ́кто ѿ нихъ, кайа́фа, а҆рхїере́й сыи лѣтꙋ томꙋ, рече им̑.
в̂ы не вѣ́сте ничесоже ни помышлѧ́ете, ꙗ҆́ко ѹ́не е҆сть нам̑, да е҆ді́нъ чл҃къ ѹ҆́мрет꙽ за́ люди, а҆ не ве́сь ꙗ҆зык̑҇ поги́бнетъ.
сего же ѻ҆ себѣ не рече, н̂о а҆рхїере́й сыи лѣтꙋ томꙋ, прореч̑҇, ꙗ҆́ко хотѧше і҆с҃ ѹ҆мрети за́ люди.
и҆ не то́кмо за́ люд̑и̑.
н̂о да и҆ чѧ́да бж҃їа расточенаѧ съберетъ въ е҆ді́но·

ѿ того же дн҃е съвѣща́ша да ѹ҆бїю́тъ е҆го·

І҆с҃ же ктомꙋ̀ не ꙗ҆́вѣ хожд̑аше въ і҆ѹ҆де́ехъ, но и҆де ѿтꙋ́дꙋ въ странꙋ близъ пꙋсты́нѧ, въ е҆фремъ нарица́емыи град̑, и҆ т̂ꙋ хожд̑аше съ ѹ҆ченикы свои́ми·

Бѣ же близъ па́сха і́ѹ҆де́иска, и҆ взыдо́шѧ мно́ѕи въ і҆ерс̑҇лим̑ ѿ стра́нъ прежд̑е па́схы да ѻ҆чи́стѧт꙽сѧ·

И҆скахꙋ ѹ҆бо і҆с҃а, и҆ гл҃ахꙋ к꙽ себѣ в꙽ цр҃кви стоа́ще.
чт̂о мнитсѧ вам̑, ꙗ҆ко не и҆́мать ли прїитѝ в꙽ празд̑никъ;
да́шѧ ѹ҆бо а҆рхїере́е и҆ фарїсе́е за́повѣдь.
да а҆ще кто̀ ѻ҆щꙋти́тъ е҆го гд̂ѣ бꙋдет̑, повѣ́сть, ꙗ҆ко да и҆мт̑ꙋ е҆го·

Глв̑҇а, в҃і·

зач̑҇, м҃а·

Ис҃ же прежд̑е шестихъ дн҃їи па́схы, прїиде въ виѳанїю̀, и҆дѣже бѣ ла́заръ ѹ҆ме́рыѝ, е҆гоже въскр҃сѝ ѿ мр҃твых̑·

Сътвори́шѧ же е҆мꙋ вече́рю т̂ꙋ.
и҆ ма́рѳа слꙋжа́ше.
лазаръ же е҆ді́нъ б̂ѣ ѿ възлежа́щихъ с нимъ·

Ма́рїа же прїе́мши ли́трꙋ мѷра, нарда писти́кы, мно́гоцѣнны, пома́за но́ѕѣ і҆с҃овѣ, и҆ ѻ҆трѐ власы̀ свои́ми ноѕѣ е҆го, хра́мина же и҆спл́ънисѧ ѿ вонѧ масти бл҃гово́нныа·

Гл҃а же е҆ді́нъ ѿ ѹ҆чн҃къ е҆го, і҆ѹ҆да сі́моновъ и҆скарїѻ́тъскїи, и҆же хотѧше е҆го преда́ти.
чесо ради мѷро с̂е не продано бысть на трихъ стѣхъ пѣнѧѕь, и҆ дано̀ ни́щимъ;

Се же рече, не ꙗ҆́ко ѻ҆ ни́щихъ печа́шесѧ, н̂о ꙗ҆́ко тат̑ б̂ѣ.
и҆ ковчежецъ и҆мѣа́ше.
и҆ вмѣта́емаѧ ноша́ше·

Рече же і҆с҃, не дѣите еа̀, да в꙽ дн҃ь погре́бенїа мое҆го съблюде́тъ е҆̀·

Ни́щаѧ б̂о всегда̀ и҆́мате с꙽ собо́ю, мене же не всегда и҆́мате·

Разꙋмѣ же народ̑ мно́гъ ѿ і҆ѹ҆де́й ꙗ҆ко т̂ꙋ ес̑҇.
и҆ прїидо́шѧ, не і҆с҃а ради токмо, н̂о да и҆ лазарѧ ви́дѧтъ, е҆гож̑ въскр҃сѝ ѿ мрт҃выхъ·

Съвѣща́ша же а҆рхїере́е, да и҆ ла́зарѧ ѹ҆бїютъ, ꙗ҆ко мноѕи е҆го ради и҆дѧхꙋ ѿ і҆ѹ҆де́й, и҆ вѣровахꙋ въ і҆с҃а·

Въ ѹ҆трѣи же дн҃ь, народ̑ мно́гъ прише́дыѝ в꙽ празнд̑икъ, слы́шавше ꙗ҆́ко і҆с҃ грѧдетъ въ і҆е҆рс̑҇ли́мъ, прїа́ша ва́йе ѿ фѷникъ, і҆ и҆зыдо́шѧ въ срѣтенїе е҆мꙋ, и҆ зва́хꙋ гл҃юще.
ѻ҆са́нна, блс̑҇венъ грѧдыи̑ въ и҆мѧ гн҃е, цр҃ъ і҆ил҃евъ·

ѻ҆брѣтъ же і҆с҃ ѻ҆слѧ̀, всѣ́де на не.
ꙗ҆́коже е҆сть пи́сано.
не бо́йсѧ дщ҃и сїѻ́нѧ, с̂е цр҃ь твой грѧдетъ, сѣдѧ̀ на жребѧти ѻ҆сли·

сих же не разꙋмѣшѧ ѹ҆ченицы е҆го преже, н̂о е҆гда просла́висѧ і҆с҃.
тогда̀ помѧнꙋшѧ, ꙗ҆́ко сїа бѣшѧ ѻ҆ немъ пи́сана, и҆ сїа сътвори́шѧ е҆мꙋ·

Свѣдѣтельствоваше же наро́дъ и҆же б̂ѣ преже с нимъ е҆гда ла́зарѧ въз꙽гласѝ ѿ ѓроба, и҆ въскр҃си е҆го ѿ мр҃твыхъ·

Сего ради и҆ срѣте е҆го народъ, ꙗ҆ко слы́шашѧ е҆го сїе сътворша зна́менїе·

зач̑҇, м҃в·

Фарісе́е же рѣша к꙽ себѣ.
ви́дите, ꙗ҆ко никаѧ же по́л꙽за е҆сть;
с̂е ми́ръ по немъ и́детъ·

Бѣ́хꙋ же нѣ́цїи е҆́ллини ѿ вшед̑шихъ да покло́нѧтсѧ въ пра́знд̑икъ·

Сїи ѹ҆бо пристꙋпиша к꙽ фили́ппꙋ, и҆же б̂ѣ ѿ виѳсайды галилейскїа, и҆ молѧ́хꙋ е҆го гл҃юща.
г҃и, хо́щемъ і҆с҃а ви́дѣти·

Прїиде фили́ппъ, и҆ гл҃а а҆ндре́ѻви.
и҆ пакы а҆ндре́а и҆ фили́ппъ гл҃аста і҆с҃ови.
і҆с҃ же ѿвѣща̀ и́ма гл҃ѧ.
прїиде часъ, да просла́вит̑сѧ сн҃ъ члчс̑҇кїи·

зач̑҇·

А҆ми́нь а҆ми́нь гл҃ю вамъ.
а҆ще зерно пшени́чно пад̑ на землѝ не ѹ҆́мретъ, то е҆ді́но пребывает̑, а҆ще л̂и ѹ҆́мрет̑, мно́гъ плод̑ сътворит̑·

зач̑҇·

Любѧѝ дш҃ꙋ свою, погꙋбит̑ ю҆̀, и҆ ненавидѧѝ дш҃ꙋ свою в꙽ ми́рѣ семъ, в꙽ животѣ̀ вѣчнем꙽ съхранитъ ю҆̀·

а҆ще кт̂о мн̂ѣ слꙋ́житъ, мн̂ѣ да послд̑ѣствꙋетъ.
і҆ и҆деже е҆смь а҆зъ, т̂ꙋ и҆ слꙋга мой бꙋ́детъ·

И҆ а́ще кт̂о мн̂ѣ слꙋжит̑, почтет̑ е҆го ѿц҃ъ мой·

Нн҃ѣ дш҃а моа̀ възмꙋтисѧ.
и҆ что̀ рекꙋ;
ѿч҃е сп҃си́ м̂ѧ ѿ часа̀ сего н̂о сего ради прїидохъна часъ се́й·

зач̑҇·

Ѿч҃е, просла́ви и҆́мѧ твое·

Прїиде же гла́съ с꙽ нб҃се, и҆ просла́вих̑, и҆ паки просла́влю·

Народ̑ же стоаѝ слы́шав̑҇ гл҃ахꙋ, гр́омъ бысть·

И҆́нїи гл҃ахꙋ а҆гг҃лъ гл҃а е҆мꙋ.
ѿвѣща̀ і҆с҃, и҆ реч̑҇.
не мене ради глс̑҇а се́й бысть, н̂о наро́да ради·

Нн҃ѣ сꙋдъ ес̑҇ ми́рꙋ семꙋ.
нн҃ѣ кнѧѕь ми́ра сего и҆з꙽гнанъ бꙋдет̑ во́нъ·

И҆ а́ще а҆зъ възнесе́нъ бꙋ́дꙋ ѿ землѧ, вс̂ѧ привлекꙋ к꙽ себѣ·

Се́ же гл҃аше, назна́менꙋа коею̀ смр҃тїю хотѧше ѹ҆́мрети·

ѿвѣща̀ е҆мꙋ наро́дъ, м̂ы слы́шахомъ ѿ зако́на, ꙗ҆́ко х҃с пребыва́етъ въ́ вѣкы.
и҆ ка́ко т̂ы гл҃еши, възнестисѧ подоба́ет꙽ сн҃ꙋ члчс̑҇комꙋ;
кт̂о е҆сть се́й сн҃ъ чл҃ческїи;
рече же и҆мъ і҆с҃.
е҆ще ма́ло вре́мѧ свѣтъ в꙽ васъ е҆сть.
ходи́те до́ндеже свѣтъ и҆́мате, да тм̂а васъ не и҆метъ.
и҆ ходѧѝ въ тмѣ, не вѣ́сть ка́мо и́детъ·

зач̑҇, м҃г·

До́ндеже свѣтъ и҆́мате, вѣ́рꙋйте въ́ свѣтъ, да сн҃ове свѣта бꙋ́дете·

Сїа гл҃а і҆с҃, и҆ ѿшед̑ съкрысѧ ѿ них̑·

Толи́ка зна́менїа сътво́ршꙋ е҆мꙋ пред̑ ни́ми, не вѣровахꙋ в него да събꙋ́дет̑сѧ сло́во и҆са́і꙼а прро̑҇ка, е҆же рече.
г҃и, кт̂о вѣ́рова слꙋ́хꙋ на́шемꙋ;
и҆ мы́ш꙽ца гн҃ѧ комꙋ̀ ѿкры́сѧ;
сего ради не можа́хꙋ вѣ́ровати, ꙗ҆́ко па́ки реч̑҇ и҆са́і꙼а.
ѻ҆слѣпи ѻ҆́чи и҆хъ, и҆ ѻ҆ка́менилъ е҆сть срд̑цѧ и҆хъ, да не ви́дѧтъ ѻ҆чи́ма, ни разꙋмѣютъ срд̑цемъ, и҆ ѻ҆братѧ́тсѧ, і҆ и҆сцѣлю их̑·

Сїа рече и҆са́і꙼а, е҆гда видѣ̀ сла́вꙋ е҆го, и҆ гл҃а ѻ҆ немъ·

ѻ҆баче ѹ҆бо и҆ ѿ кнѧ́ѕь мно́ѕи вѣ́ровашѧ в него.
н̂о фарїсе́й ради не и҆сповѣдовахꙋ, да не и҆з сон̑҇мищъ и҆згнани бꙋ́дꙋтъ.
възлюби́ша бо па́че сла́вꙋ члчс̑҇кꙋю неж̑ славꙋ бж҃їю·

І҆с҃ же възва̀ и҆ рече.
вѣ́рꙋаѝ в꙽ м̂ѧ, не вѣ́рꙋет꙽ в꙽ м̂ѧ, н̂о в꙽ посла́вшаго м̂ѧ·

И҆ видѧѝ м̂ѧ, ви́дитъ посла́вшаго м̂ѧ·

а҆зъ свѣтъ в꙽ ми́ръ прїидох̑, да всѧкъ вѣ́рꙋаѝ в м̂ѧ, въ тм̂ѣ не пребꙋ́детъ·

И҆ а́ще кто̀ ѹ꙼слы́шит̑ гл҃ы моѧ, и҆ не вѣ́рꙋетъ.
а҆зъ не сꙋжд̑ꙋ е҆мꙋ.
не прїидохъ б̂о да сꙋжд̑ꙋ ми́рови, н̂о да сп҃сꙋ ми́ръ·

ѿмѣта́аѝсѧ мене, и҆ не прїе́млѧѝ гл҃ъ мои҆хъ, и҆́мать сꙋдѧ́щаго е҆мꙋ·

Сло́во еже гл҃ахъ, т̂о сꙋдитъ е҆мꙋ в꙽ послд̑ѣнїи дн҃ь·

Ꙗ҆́ко а҆зъ ѻ҆ себѣ не гл҃ахъ, н̂о посла́выѝ мѧ ѿц҃ъ, то́й мн̂ѣ за́повѣдь дасть, чт̂о рекꙋ, и҆ чт̂о въз꙽гл҃ю.
и҆ вѣмъ ꙗ҆ко за́повѣдь е҆го животъ вѣчныи е҆сть.
ꙗ҆́же ѹ҆бо а҆зъ гл҃ю, ꙗ҆́коже рече мн̂ѣ ѿц҃ъ, та́ко творю·

Глв̑҇а, г҃і·

зач̑҇, м҃д·

Прежде же пра́здника па́сцѣ, вѣды̀ і҆с҃, ꙗ҆́ко прїиде е҆мꙋ час̑҇ да пре́йдетъ ѿ мира сего къ ѿц҃ꙋ, възлю́бль своа сꙋщаа в꙽ ми́рѣ, до конца̀ възлюби ѧ·

и҆ вече́ри бы́вши, дїа́волꙋ ѹ҆же вложи́вшꙋ въ срд̑це і҆ѹ́дѣ си́моновꙋ и҆скариѻ́т꙽скомꙋ, да е҆го предастъ·

Вѣды̀ і҆с҃, ꙗ҆ко вс̂ѧ дасть е҆мꙋ ѿц҃ъ в рꙋцѣ, и҆ ꙗ҆́ко ѿ б҃а и҆зы́де, и҆ къ б҃ꙋ грѧдетъ·

Въста́въ с вечерѧ, и҆ положи ри́ѕы.
и҆ прїе́мъ ле́нътиѻ҆нъ препоѧ́сасѧ, потом же в꙽лїа во́дꙋ въ ѹ҆мыва́лницꙋ, и҆ нача́т꙽ ѹ҆мыва́ти но́гы ѹ҆чн҃ком꙽, и҆ ѻ҆тира́ти ленти́емъ, и҆́мже б̂ѣ препоѧ́санъ·

Прїиде же к си́монꙋ петрꙋ.
и҆ гл҃а е҆мꙋ тои.
г҃и, т̂ы л̂и моѝ ѻ҆мы́еши но́ѕѣ;
ѿвѣща і҆с҃, и҆ рече е҆мꙋ.
е҆же а҆зъ творю, т̂ы не вѣси нн҃ѣ, разꙋмѣ́еши же по сихъ·

Гл҃а е҆мꙋ петръ, не ѹ҆мы́еши ногꙋ моею̀ въ́ вѣкы·

ѿвѣща̀ е҆мꙋ і҆с҃.
а҆ще не ѹ҆мы́ю тебе, не и́маши части съ мно́ю·

Гл҃а е҆мꙋ си́монъ пе́тръ, г҃и, не но́ѕѣ моѝ то́к꙽мо, н̂о и҆ рꙋцѣ и҆ главꙋ̀·

Гл҃а е҆мꙋ і҆с҃.
и҆змове́ныи не требꙋ́етъ.
то́кмо но́ѕѣ ѹ҆мыти, е҆сть б̂о весь чистъ.
и҆ в̂ы чисти е꙼сте, н̂о не всѝ, вѣдѧше б̂о предаю́щаго е҆го, сего ради рече, ꙗ҆́ко не всѝ чисти е҆сте·

зач̑҇, м҃е·

Є҆́гда же ѹ҆мы но́гы и҆хъ, прїа́тъ ри́ѕы своѧ, и҆ възле́гъ па́кы, рече им̑.
вѣ́сте л̂и чт̂о сътворихъ вамъ;
вы глаша́ете м̂ѧ ѹ҆чт҃лѧ и҆ г҃а, и҆ до́брѣ гл҃ете, е҆́смь б̂о·

А҆́ще ѹ҆бо а҆зъ ѹ҆мыхъ ваши но́ѕѣ, г҃ь и҆ ѹ҆чт҃ель, и҆ в̂ы дл́ъжни е҆сте дрꙋгъ дрꙋгꙋ ѹ҆мыва́ти но́ѕѣ.
ѻ҆́бразъ б̂о дахъ вам꙽.
да ꙗ҆́коже а҆зъ сътвори́хъ вамъ, и҆ в̂ы творитѐ·

А҆ми́нь а҆ми́нь гл҃ю вамъ, нѣсть рабъ болїи г҃а свое҆го, ни посла́нникъ бо́лїи посла́вшаго е҆го.
а҆ще сїа вѣ́сте, бл҃же́ни е҆сте а҆ще творитѐ ѧ҆̀·

Не ѻ҆ всѣхъ васъ гл҃ю.
а҆зъ б̂о вѣмъ и҆́хже и҆збрах̑.
н̂о да писа́нїе събꙋ́детсѧ.
ꙗ҆́дыѝ со мною хлѣбъ, въздви́же на́ мѧ пѧ́тꙋ свою·

ѿсе́лѣ гл҃ю вамъ, прежде даже не бꙋдетъ, да е҆гда̀ бꙋ́детъ, вѣрꙋ и҆мете ꙗ҆ко а҆зъ е҆смь·

А҆ми́нь а҆ми́нь гл҃ю вамъ.
прїемлѧѝ а҆ще кого̀ послю, менѐ прїе́млетъ.
а҆ прїе́млѧѝ менѐ, прїе́млетъ посла́вшаго м̂ѧ·

сїа рек꙽ і҆с҃, възмꙋтисѧ дх҃омъ, и҆ свѣдѣтельствова и҆ рече.
а҆ми́нь а҆ми́нь гл҃ю вамъ, ꙗ҆́ко е҆ді́нъ ѿ васъ предастъ м̂ѧ·

Съзира́хꙋ же сѧ междꙋ собою ѹ҆чн҃цы, недоѹ҆мѣющесѧ ѻ҆ ком̑ гл҃етъ·

Бѣ же е҆ді́нъ ѿ ѹ҆чн҃къ е҆го възлежа на лонѣ і҆с҃овѣ, е҆гоже люблѧше і҆с҃.
поманꙋ же семꙋ си́мон̑҇ петръ, въпроси́ти.
кт̂о ѹ҆бо е҆сть ѻ҆ не́мже гл҃етъ;
напад же то́й на пр́ъси і҆с҃ови, гл҃а е҆мꙋ.
г҃и, кт̂о е҆сть;
ѿвѣща̀ і҆с҃, то́й е҆сть, е҆мꙋже а҆зъ ѻ҆мочивъ хлѣбъ подамъ·

и҆ ѻ҆мо́чь хлѣбъ, дасть і҆ѹ́дѣ си́моновꙋ и҆скариѻ́т꙽скомꙋ.
и҆ по хлѣбѣ тогда̀ вни́де во́нь сатана̀·

Гл҃а ѹ҆бо е҆мꙋ і҆с҃, е҆же твори́ши сътворѝ ско́ро.
сего же никтоже разꙋмѣ ѿ възлежа́щихъ к꙽ чесомꙋ рече е҆мꙋ·

Нѣцїи же мнѧ́хꙋ, понеже ковче́жець и҆мѣаше и҆ѹ́да, ꙗ҆́ко гл҃еть е҆мꙋ і҆с҃, кꙋпѝ е҆же требꙋ́ем꙽ на пра́здникъ, и҆ли ни́щимъ да нѣчто дасть.
прїим же ѻ́нъ хлѣбъ, а҆́бїе и҆зыде.
бѣ же нощь, е҆гда и҆зыде·

Гл҃а і҆с҃.

зач̑҇, м҃ѕ·

Нн҃ѣ просла́висѧ сн҃ъ члчс̑҇кїи, и҆ б҃ъ просла́висѧ ѻ҆ немъ.
а҆ще б҃ъ просла́висѧ ѻ҆ немъ, и҆ б҃ъ просла́витъ е҆го в себѣ, и҆ а́бїе просла́витъ е҆го·

чѧд̑ца, е҆ще с вами ма́ло е҆смь.
взы́щете мене.
ꙗ҆́коже рѣхъ и҆ѹде́ѻмъ.
ꙗ҆́ко ꙗ҆́може а҆зъ и҆дꙋ̀, в̂ы не мо́жете прїитѝ, и҆ вамъ гл҃ю нн҃ѣ.
за́повѣдь но́вꙋю даю̀ вамъ, да лю́бите дрꙋгъ дрꙋга, ꙗ҆́коже възлюбихъ в̂ы, да и҆ в̂ы лю́бите себе·

ѻ҆ семъ разꙋмѣют̑ вс̂и ꙗ҆́ко моѝ ѹ҆чн҃цы е҆сте, а҆ще любов̑҇ и́мате междꙋ собою·

Гл҃а е҆мꙋ̀ си́мон̑҇ пе́тръ.
г҃и, ка́мо и҆́деши;
ѿвѣща̀ е҆мꙋ і҆с̀.
ꙗ҆може а҆з꙽ и҆дꙋ̀, не мо́жеши нн҃ѣ по мнѣ и҆тѝ, послд̑ѣ же по мнѣ и҆́деши·

гл҃а е҆мꙋ пе́тръ.
г҃и, почто̀ не могꙋ нн҃ѣ по тебѣ и҆тѝ;
нн҃ѣ дш҃ꙋ мою за тѧ положꙋ·

ѿвѣща̀ е҆мꙋ і҆с҃.
дш҃ꙋ ли твою за́ мѧ положи́ши;
а҆ми́нь а҆ми́нь гл҃ю тебѣ, не възгласи́тъ а҆лекто́ръ, дондеже ѿве́ржешисѧ мене три́щи·

Глв̑҇а, д҃і·

зач̑҇, м҃з·

Да не смꙋща́е҆тсѧ срд̑це ва́ше, вѣ́рꙋите в꙽ б҃а, и҆ в м̂ѧ вѣрꙋите.
в домꙋ ѿц҃а мое҆го ѻ҆бители мно́ги сꙋть·

А҆ще ли же н̂и, реклъ быхъ вам̑, и҆дꙋ̀ ѹ҆готовати мѣ́сто ва́мъ, и҆ а҆́ще ѹ҆готоваю мѣ́сто ва́мъ, па́ки прїидꙋ, и҆ поимꙋ в̂ы к себѣ, да и҆дѣже е҆смь а҆́зъ, и҆ вы̀ бꙋдете, и҆ ꙗ҆́може а҆́зъ и҆дꙋ, вѣ́сте, и҆ пꙋть вѣ́сте·

Гл҃а е҆мꙋ ѳома̀.
г҃и, не вѣмы камо и҆́деши, и҆ ка́ко мо́жемъ пꙋть вѣдѣти;

Гл҃а е҆мꙋ і҆с҃, а҆́зъ е҆смь пꙋть, и҆ і҆́стинна, и҆ живо́тъ·

Никто́же прїидетъ къ ѿц҃ꙋ, то́кмо мно́ю·

А҆ще м̂ѧ бысте зна́ли, и҆ ѿц҃а мое҆го зна́ли бы́сте ѹ҆бо, и҆ ѿсе́лѣ позна́сте е҆го, и҆ ви́дѣ́сте е҆го·

Гл҃а е҆мꙋ фили́ппъ, г҃и, покажи на́мъ ѿц҃а, и довлетъ на́мъ·

Гл҃а е҆мꙋ і҆с҃.
толи́ко времѧ с ва́ми е҆смъ, и҆ не позна̀ менѐ фили́ппе;
видѣвыи мене, видѣ ѿц҃а.
и҆ како т̂ы гл҃еши покажи нам̑ ѿц҃а;
не вѣ́рꙋе҆ши ли ꙗ҆ко а҆́з꙽ въ ѿц҃и, и҆ ѿц҃ъ въ мнѣ̀ е҆сть·

зач̑҇, м҃и·

Гл҃ы ꙗ҆́же а҆́зъ гл҃ю вамъ, ѻ҆ себѣ не гл҃ю.
ѿц҃ъ же въ мнѣ пребыва́ѧѝ, то́и твори́тъ дѣ́ла.
вѣрꙋите мн̂ѣ ꙗ҆́ко а҆́зъ въ ѿц҃ы, и҆ ѿц҃ъ въ мнѣ·

А҆ще ли же н̂и, за т̂а дѣ́ла вѣ́рꙋи҆те м̂и.
а҆ми́нь а҆ми́нь гл҃ю ва́мъ, вѣрꙋѧѝ в м̂ѧ, дѣ́ла ꙗ҆́же а҆зъ творю, и҆ то́и сътвори́тъ, и҆ бо́лшѧ сихъ сътворитъ, ꙗ҆ко а҆зъ къ ѿц҃ꙋ моемꙋ грѧдꙋ·

И҆ е҆же а҆ще чт̂о про́сите ѻ҆ц҃а ѻ҆ и́мени моемъ, т̂о сътворю, да просла́витсѧ ѿц҃ъ въ сн҃ѣ·

І҆ а҆ще чесо̀ про́сите въ и҆мѧ мое, а҆зъ сътворю̀·

А҆ще лю́бите м̂ѧ, за́повѣди моѧ съблюдѣте.
и҆ а҆́зъ ѹ҆молю ѿц҃а, и҆ і҆ного ѹ҆тѣшителѧ дас̑҇ вам꙽, да бꙋ́детъ с ва́ми въ́ вѣки, дх҃ъ и҆́стинныи, е҆гоже ми́ръ не мо́жетъ прїѧ́ти, ꙗ҆ко не ви́дитъ е҆го, ниже знает̑ е҆го·

Вы́ же зна́ете е҆го, ꙗ҆ко в꙽ ва́съ пребыва́етъ, и҆ в꙽ васъ бꙋдетъ·

Не ѻ҆ста́влю васъ си́ры, прїидꙋ к вам̑.
е҆ще ма́ло.
и҆ ми́ръ ктомꙋ не ви́дитъ менѐ.
вы же ви́дите м̂ѧ.
ꙗ҆ко а҆зъ живꙋ, и҆ в̂ы жи́ви бꙋ́дете·

В то́и дн҃ь разꙋмѣе҆те в̂ы, ꙗ҆ко а҆зъ въ ѿц҃ы мое҆мъ, и҆ в̂ы въ мнѣ̀, и҆ а҆зъ в꙽ вас̑҇·

зач̑҇·

И҆́мѣѧѝ за́повѣди моѧ и҆ съблюда́ѧ и҆хъ, то́и е҆сть любѧи м̂ѧ.
а҆ любѧѝ м̂ѧ, възлюбленъ бꙋ́детъ ѿц҃емъ моим̑, и҆ а҆́зъ възлюблю̀ е҆го, и҆ ꙗ҆влю́сѧ е҆мꙋ самъ·

Гл҃а е҆мꙋ і҆ѹ҆да не скариѻ́тскыи.
г҃и, и҆ чт̂о бысть, ꙗ҆ко нам̑ хо́щеши ꙗ҆́ви́тисѧ, а҆ не ми́рови;
ѿвѣща̀ і҆с҃ и҆ рече е҆мꙋ.
а҆ще кто лю́бит̑ м̂ѧ, сло́во мое съблюдетъ,<.>

И҆ ѿц҃ь мо́и възлю́битъ е҆го.
и҆ к немꙋ прїидевѣ, и҆ ѻ҆би́тель ѹ҆ него сътворивѣ·

Не любѧѝ м̂ѧ, слове́съ мои҆хъ не съблюда́ет꙽·

И҆ сло́во е҆же слы́шасте, нѣсть моѐ, н̂о посла́вшаго м̂ѧ ѿц҃а·

Сїа гл҃ахъ вамъ, в꙽ васъ сы́и.
ѹ҆тѣшитель же дх҃ъ ст҃ыи, е҆гоже по́слет꙽ ѿц҃ъ въ и҆мѧ мое, то́и в̂ы наѹ҆чи́тъ всемꙋ̀.
и҆ въспомѧнетъ вамъ вс̂ѧ ꙗ҆́же рѣхъ вамъ·

Ми́ръ ѻ҆ставлѧ́ю вамъ.
ми́ръ мо́и даю̀ вамъ.
не ꙗ҆коже миръ дае҆тъ, а҆зъ даю вамъ·

зач̑҇, м҃ѳ·

Да не смꙋщает̑сѧ срд̑це ва́ше ни ѹ҆страша́етъ·

Слы́шасте ꙗ҆ко рѣхъ вамъ, и҆дꙋ и҆ прїидꙋ к вамъ·

А҆ще бысте люби́ли м̂ѧ, възрадовалисѧ бысте ѹ҆бо.
ꙗ҆ко рѣхъ и҆дꙋ къ ѿц҃ꙋ.
ꙗ҆́ко ѿц҃ъ мо́и болїи мене е҆сть·

И҆ нн҃ѣ рѣхъ вамъ, преже да́же не бꙋ́дет꙽.
да егда̀ бꙋ́детъ, вѣрꙋ и҆ме́те·

Ктомꙋ не мно́го гл҃ю с ва́ми·

Грѧдет̑ б̂о сего ми́ра кнѧѕь, и҆ въ мнѣ не и҆́мать ничесоже.
н̂о да разꙋмѣе́тъ мир̑҇, ꙗ҆ко люблю̀ ѿц҃а.
и҆ ꙗ҆́коже заповѣда мнѣ ѿц҃ъ, та́ко творю.
въста́нѣте и҆́демъ ѿсю́дꙋ·

Глв̑҇а, е҃і·

зач̑҇, н҃·

Азъ е҆смь лоза̀ и҆стиннаѧ, и҆ ѿц҃ъ мо́и дѣ́латель е҆сть.
всѧ́кꙋ ро́згꙋ ѻ҆ мнѣ не творѧщꙋю плода, и҆зметъ ю҆̀.
и҆ всѧкꙋ творѧ́щꙋю пло́дъ, ѻ҆требитъ ю҆̀.
да мно́жа́ишїи пло́дъ принесетъ·

Ѹ҆же в̂ы чи́сти е҆сте, за́ слово е҆же гл҃ахъ вам꙽.
бꙋ́дѣте въ мнѣ̀, и҆ а҆зъ в꙽ васъ·

Ꙗ҆́коже розга̀ не мо́жетъ плода сътвори́ти ѻ҆ себѣ, а҆ще не бꙋдетъ на лозѣ, та́ко и҆ в̂ы, а҆ще въ мнѣ̀ не пребꙋ́дете·

А҆́зъ е҆смь лоза̀, вы же ро́ждїе.
и҆ і҆́же бꙋ́детъ въ мнѣ, и҆ а҆зъ в не́мъ, то́и сътворитъ пло́дъ мно́гъ.
ꙗ҆́ко без менѐ не мо́жете твори́ти ничесо́же·

А҆ще кт̂о въ мнѣ не пребꙋ́детъ, и҆звержетсѧ во́нъ.
ꙗ҆́коже розга̀, и҆ і҆ссы́шет꙽.
и́ събира́ютъ ю҆̀, и҆ въ ѻ҆гнь влага́ют̑, и́ с꙽гара́етъ·

А҆ще пребꙋ́дете въ мнѣ.
и҆ гл҃и моѝ в꙽ ва́съ пребꙋдꙋть.
емꙋже а҆ще хо́щете проси́те, и҆ бꙋ́дет̑ ва́мъ·

ѻ сем̑ просла́висѧ ѿц҃ъ мо́и, да пло́дъ мно́гъ сътворитѐ.
и҆ бꙋ́дете моѝ ѹ́ченицы·

зач̑҇, н҃а·

Ꙗ҆́коже възлюбѝ м̂ѧ ѿц҃ъ, и҆ а́зъ възлюби́хъ васъ.
бꙋ́дѣте в любви мо́ей·

А҆ще за́повѣди моѧ̀ съблюде́те, пребꙋ́дете в любви мо́ей, ꙗ҆́коже а҆зъ за́повѣди ѿц҃а мое҆го съблюдох̑, и҆ пребыва́ю в꙽ него любвѝ·

Сїѧ гл҃ахъ вамъ, да радость моа̀ в꙽ васъ бꙋдетъ, и҆ радость ва́шѧ и҆сплънитсѧ·

Си̂ е҆сть за́повд̑ѣ моа̀, да лю́бите дрꙋгъ дрꙋга, ꙗ҆́коже възлюбих̑ в̂ы·

Бо́лша сеа̀ любвѐ никтоже и҆́мат̑, да кто̀ дш҃ꙋ свою положит̑ за́ дрꙋгы своѧ.
в̂ы дрꙋѕи моѝ е҆сте, а҆ще творитѐ е҆ли́ка а҆зъ заповѣдаю вамъ.
не ктомꙋ васъ гл҃ю рабы.
ꙗ҆ко ра́бъ не вѣсть чт̂о творитъ г҃ь е҆го.
ва́съ же рекохъ дрꙋ́гы, ꙗ҆ко вс̂ѧ ꙗ҆же слы́шах̑ ѿ ѻ҆ц҃а мое҆го, сказахъ вам̑·

Не в̂ы менѐ избра́сте, н̂о а҆зъ и҆збра́хъ вас̑҇ и҆ положи́хъ вас̑҇, да в̂ы и҆́дете, и҆ пло́дъ принесе́те, и҆ плод̑ вашъ пребꙋдет꙽·

да е҆гоже а҆ще про́сите ѿ ѻ҆ц҃а въ и҆мѧ моѐ, дастъ вамъ·

зач̑҇, н҃в·

Си̂ заповѣ́даю вамъ, да лю́бите дрꙋгъ дрꙋга·

а҆ще миръ васъ ненави́дит̑, ви́дите, ꙗ҆́ко мене прежд̑е вас̑҇ възненавидѣ̀.
а҆ще ѿ мира бысте были, миръ ѹ҆бо своѐ любилъ б̂ы·

Ꙗ҆́коже ѿ мира нѣ́сте, н̂о а҆зъ и҆збрах̑ в̂ы ѿ мира, сего ради ненави́дит̑ васъ миръ·

Поминайте сло́во, е҆же а҆з꙽ рѣхъ вамъ·

Нѣсть рабъ болїи г҃а свое҆го·

а҆ще мене и҆з꙽гна́шѧ, и҆ вас̑҇ и҆жденꙋтъ.
а҆ще сло́во моѐ съблюдо́шѧ, и҆ ваше съблюдꙋтъ·

Но̂ сїа вс̂ѧ творѧт̑ вамъ за и҆мѧ моѐ, ꙗ҆ко не вѣ́дѧтъ посла́вшаго м̂ѧ·

А҆ще не бых̑ пришелъ и҆ гл҃алъ и҆мъ, грѣха не бы́шѧ и҆мѣ́ли·

Нн҃ѣ же вины̀ не и҆́мꙋть ѻ҆ грѣсѣ свое҆мъ·

Ненави́дѧѝ мене, и҆ ѿц҃а мое҆го ненавидит̑·

а҆ще дѣлъ не бых̑ сътворилъ в них̑, и҆́хже и҆нъ никтоже сътворѝ, грѣха не бы́шѧ и҆мѣ́ли·

Нн҃ѣ же и҆ ви́дѣшѧ, и҆ възненавидѣша мене и҆ ѿц҃а мое҆го.
н̂о да с꙽бꙋ́детсѧ сло́во, пи́саное в꙽ законѣ и҆хъ, ꙗ҆́ко възненавидѣша м̂ѧ тꙋне·

Є҆гда же прїидетъ ѹ҆тѣшитель, е҆гоже а҆зъ послю̀ вам̑ ѿ ѻ҆ц҃а.
дх҃ъ и҆́стинны, и҆же ѿ ѻ҆ц҃а и҆сходит̑, то́й свѣдѣтельствꙋе҆тъ ѻ҆ мнѣ.
и҆ вы же свд̑ѣтельствꙋе҆те, ꙗ҆ко и҆сконѝ со мною е҆сте·

Глв̑҇а, ѕ҃і·

Сїа гл҃ахъ вамъ, да не събла́знитесѧ, ѿ со́нмищ꙽ и҆жд̑енꙋтъ в̂ы·

зач̑҇, н҃г·

Но̂ прїидетъ часъ, да всѧк̑҇ и҆же ѹ҆бїетъ в̂ы, мнитъсѧ слꙋжбꙋ приносити б҃ꙋ·

И҆ сїа сътворѧтъ, ꙗ҆ко не позна́шѧ ѻ҆ц҃а, ни мене.
н̂о сїа гл҃ахъ вам꙽, да е҆гда прїид̂ет꙽ часъ, помина́ите с̂е, ꙗ҆́ко а҆зъ рѣхъ вамъ·

Си́х же вам̑ и҆спе́ръва не рѣхъ, ꙗ҆́ко с вами бѣхъ·

Нн҃ѣ же и҆дꙋ̀ к посла́вшемꙋ м̂ѧ.
и҆ никто́же ѿ васъ въпраша́етъ мене ка́мо и҆́деши;
н̂о ꙗ҆́ко сїа гл҃ахъ вамъ, ско́рбь и҆сполни срд̑цѧ ва́шѧ.
н̂о а҆з꙽ и́стинꙋ вамъ гл҃ю.
ѹ҆́не е҆сть вамъ да а҆з꙽ и҆дꙋ̀, а҆ще б̂о не и҆дꙋ а҆зъ, ѹ҆тѣшитель не прїидетъ к вамъ·

а҆ще ли же и҆дꙋ, послю̀ е҆го к вамъ.
и҆ пришед̑ ѻ́нъ, ѻ҆бличитъ мира, ѻ҆ грѣсѣ, и҆ ѻ҆ пра́вдѣ, и҆ ѻ҆ сꙋдѣ̀.
ѻ҆ грѣсѣ ѹ҆бо, ꙗ҆́ко не вѣ́рꙋютъ в м̂ѧ.
ѻ҆ пра́вдѣ же, ꙗ҆́ко къ ѿц҃ꙋ моемꙋ и҆дꙋ̀, и҆ ктомꙋ не ви́дите мене·

ѻ҆ сꙋдѣ же, ꙗ҆́ко кнѧ́зь ми́ра сего ѻ҆сꙋженъ бысть·

е҆ще много и́мамъ гл҃ати вамъ, н̂о не мо́жете носи́ти нн҃ѣ.
Є҆гда же прїидет̑ ѻ́нъ дх҃ъ и́стинны, наста́витъ в̂ы на всѧ́кꙋ и́стиннꙋ·

не ѻ҆ себѣ б̂о гл҃ати и҆́мать, н̂о е҆ли́ка а҆ще ѹ҆слы́шитъ, гл҃ати и́мать, и҆ грѧдꙋщаѧ възвѣстит꙽ вамъ·

ѻ҆н꙽ м̂ѧ просла́витъ, ꙗ҆́ко ѿ мое҆го прїимет꙽, и҆ възвѣститъ вамъ·

зач̑҇, н҃д·

Вс̂ѧ е҆ли́ка и҆́мать ѿц҃ъ, моѧ̀ сꙋтъ.
сего ради рѣхъ, ꙗ҆́ко ѿ мене прїимет̑, и҆ възвѣститъ вамъ·

в꙽ ма́лѣ, и҆ ктомꙋ не ви́дите мене, и҆ пакы в ма́лѣ, и҆ ѹ҆зрите м̂ѧ, ꙗ҆ко и҆дꙋ̀ къ ѿц҃ꙋ·

Рѣша же ѿ ѹ҆чн҃къ е҆го к себѣ.
что̀ е҆сть с̂е е҆же гл҃етъ намъ, в꙽ малѣ и҆ не ви́дите менѐ, и҆ пакы в꙽ малѣ и҆ ѹ҆зрите м̂ѧ, и҆ ꙗ҆́ко а҆зъ и҆дꙋ̀ къ ѿц҃ꙋ;
гл҃ахꙋ ѹ҆бо, что̀ с̂е е҆сть, е҆же гл҃етъ, в꙽ ма́лѣ;
не вѣмы чт̂о гл҃етъ·

Разꙋмѣ же і҆с҃, ꙗ҆́ко хотѧхꙋ е҆го въпрашѧти, и҆ рече и҆мъ.
ѻ҆ семъ л̂и стѧза́етесѧ межд̑ꙋ собою, ꙗ҆́ко рѣхъ, в꙽ ма́лѣ и҆ не ви́дите менѐ, и҆ паки в ма́лѣ и҆ ѹ҆́зрите мѧ·

а҆мин̑҇ а҆ми́нь гл҃ю вамъ, ꙗ҆́ко въспла́четесѧ и҆ възрыда́ете в̂ы, а҆ ми́ръ възрадꙋетсѧ.
вы же печал꙽ни бꙋ́дете.
но печаль ва́шѧ в ра́дость бꙋ́деть,<.>

Жена̀ е҆гда ражд̑аетъ, ско́рбь и҆́мать, ꙗ҆́ко прїиде годъ еа̀.
е҆гда же родитъ ѻ҆троча̀.
ктомꙋ не по́мнитъ ско́рби за ра́дость, ꙗ҆́ко роди́сѧ чл҃къ в꙽ ми́р꙽·

и҆ вы же печаль и҆́мате ѹ҆бо нн҃ѣ.
па́кы же ѹ҆зрю̀ в̂ы, и҆ възрадꙋетсѧ срд̑ц ва́ше, и҆ радости ва́шеа̀ никтоже възметъ ѿ васъ·

И҆ в꙽ то́й дн҃ь менѐ не въпро́сите ничесоже·

зач̑҇, н҃е·

А҆́ми́нь а҆ми́нь гл҃ю вамъ.
ꙗ҆ко е҆ли́ка а҆ще чесо про́сите ѿ ѻ҆ц҃а въ и҆мѧ мое.
дастъ вамъ·

доселѣ не проси́сте ничесоже въ и́мѧ моѐ.
проси́те, и҆ прїимете, да радость вашѧ и҆спо́лънена бꙋ́детъ·

Сїа в꙽ при́тчахъ гл҃ахъ вам̑.
но прїидетъ час̑҇, е҆гда ктомꙋ в꙽ притчѧх̑ не гл҃ю вам̑, н̂о ꙗ҆́вѣ ѻ҆ ѿц҃и възвѣщꙋ вамъ·

в꙽ то́й дн҃ь въ и́мѧ моѐ въпро́сите.
и҆ не гл҃ю вам̑, ꙗ҆́ко а҆з꙽ ѹ҆молю ѿц҃а ѻ҆ васъ.
сам̑ б̂о ѿц҃ъ лю́бит̑ в̂ы, ꙗ҆́ко в̂ы мене възлюби́сте, и вѣровасте, ꙗ҆ко а҆зъ ѿ б҃а и҆зыдох̑ и҆зыдох̑ ѿ ѻ҆ц҃а и҆ прїидох̑ в꙽ мир̑҇, й па́кы ѻ҆ставлѧю ми́ръ и҆ и́дꙋ къ ѿц҃ꙋ·

Гл҃ашѧ е҆мꙋ ѹ҆чн҃цы е҆го.
с̂е нн҃ѣ не ѻ҆бинꙋ́асѧ гл҃еши, а҆ при́тча никое́аже не гл҃еши.
нн҃ѣ вѣмы ꙗ҆ко вѣси вс̂ѧ, и҆ не требꙋ́еши да кто т̂ѧ въпрашает̑.
ѻ҆ семъ вѣ́рꙋемъ, ꙗ҆́ко ѿ б҃а и҆зшелъ е҆си.
ѿвѣща́ и҆́мъ і҆с҃, нн҃ѣ л̂и вѣрꙋе҆те;
с̂е грѧдетъ часъ, и҆ нн҃ѣ прїиде, да разы́детесѧ ко́ждо въ своѧ, и҆ мене е҆ді́ного ѻ҆ста́вите.
и҆ нѣ́смь е҆ді́нъ, ꙗ҆́ко ѿц҃ъ со мною̀ е҆сть·

Сїа гл҃ахъ вам̑, да въ мнѣ ми́ръ и҆́мате·

В мирѣ ско́рбни бꙋ́дете.
н̂о дръза́йте, ꙗ҆́ко а҆зъ побѣдих̑ ми́ръ·

Глв̑҇а, з҃і·

зач̑҇, н҃ѕ·

Сїа гл҃а і҆с҃.
и҆ възведе ѻ҆́чи своѝ на́ нб҃о и҆ рече.
ѿч҃е, прїиде ча́съ, просла́ви сн҃а свое҆го.
да и҆ сн҃ъ твои просла́вит̑ т̂ѧ·

Ꙗ҆́коже да́лъ е҆си е҆мꙋ вла́сть всѧ́коѧ пло́ти·

да всѧ́ко е҆же да́лъ е҆си е҆мꙋ, дастъ и҆́мъ живот̑ вѣ́чныи.
се же е҆сть живо́тъ вѣ́чныи, да зна́ют̑ тебе е҆ді́ного и҆́стиннаго б҃а.
и҆ е҆гоже посла̀ і҆с҃ х҃а.
а҆́зъ просла́вих̑ т̂ѧ на зем̑лѝ.
дѣло съвершихъ е҆же да́лъ е҆си мнѣ да сътворю·

И҆ нн҃ѣ просла́ви м̂ѧ т̂ы ѿч҃е ѹ҆ тебе самого, сла́вою ю҆̀же и҆мѣхъ ѹ҆ тебе пре́жд̑е ми́ръ не бы́сть·

Ꙗ҆́вихъ и҆́мѧ твоѐ чл҃комъ, и҆́хже да́л꙽ е҆си мнѣ ѿ мира.
твоѝ бѣша, и҆ мнѣ и҆хъ да́лъ е҆си, и сло́во твоѐ съхрани́шѧ·

Нн҃ѣ разꙋмѣша ꙗ҆́ко вс̂ѧ е҆ли́ка да́лъ е҆си мн̂ѣ, ѿ тебе сꙋть.
ꙗ҆́ко гл҃ы и҆́хже да́лъ е҆си мн̂ѣ, дах꙽ и҆́мъ.
и҆ тїи прїѧша.
и разꙋмѣша въи҆́стинꙋ, ꙗ҆́ко ѿ тебе и҆зыдо́хъ.
и вѣ́ровашѧ ꙗ҆́ко т̂ы мѧ посла̀·

А҆зъ ѻ҆ си́хъ молю.
не ѻ҆ все́мъ ми́рѣ молю.
н̂о ѻ҆ тѣхъ и҆́хже да́лъ е҆си мн̂ѣ, ꙗ҆́ко твоѝ сꙋть·

И҆ моѧ̀ вс̂ѧ, твоѧ сꙋть, и҆ твоѧ моѧ̀, и҆ просла́вихсѧ в ни́хъ.
и҆ ктомꙋ нѣсмь в ми́рѣ, и҆ сїи в ми́рѣ сꙋть, и҆ а҆́зъ к тебѣ грѧдꙋ·

ѿч҃е ст҃ыи, съблюдѝ и҆хъ въ и҆мѧ твоѐ,<.>

И҆́хже да́лъ е҆си мн̂ѣ, да бꙋдꙋть е҆ді́но ꙗ҆́коже и҆ м̂ы·

е҆гда бѣхъ с ни́ми в ми́рѣ, а҆́зъ съблюдахъ их̑ въ и҆мѧ твоѐ.
ихже да́лъ е҆си мнѣ съхрани́хъ, и҆ никтоже ѿ ни́хъ погы́бе, то́кмо сн҃ъ поги́белныи·

да сбꙋдет̑сѧ писа́нїе·

Нн҃ѣ же к тебѣ грѧдꙋ̀, и҆ сїа гл҃ю в ми́рѣ, да и҆мꙋть радость мою и҆сполненꙋ в себѣ·

А҆́зъ дах̑ и҆́мъ сло́во твоѐ.
и҆ ми́ръ възненавидѣ и҆́хъ, ꙗ҆́ко нѣ́ сꙋть ѡ мира, ꙗ҆́коже и҆ а҆́зъ ѿ мира нѣсмь·

Не молю да възмеши и҆хъ ѿ мира, н̂о да съблюдеши их̑ ѡ непрїа́зни·

ѿ мира нѣ́ сꙋть, ꙗ҆́ко и҆ а҆зъ ѿ мира нѣ́смь·

Ст҃и их̑ въи҆́стинꙋ твою, сло́во твое и҆́стина е҆сть·

зач̑҇, н҃з·

Ꙗ҆́коже мене посла̀ в ми́ръ, и҆ а҆́зъ посла́хъ и҆́хъ в ми́ръ.
и҆ за них̑ а҆́зъ сщ҃ꙋ себе, да и҆ тїи бꙋдꙋть сщ҃е́ни въи҆́стинꙋ·

Не ѻ҆ си́хже молю то́кмо, н̂о и҆ ѻ вѣ́рꙋющїих̑ словесѐ их̑ ради в м̂ѧ.
да всѝ е҆ді́но сꙋть.
ꙗ҆коже т̂ы ѿч҃е въ мнѣ, и҆ а҆зъ в тебѣ.
да и҆ тїи в на́съ е҆ді́но бꙋдт̑ꙋ·

да и҆ ми́ръ вѣрꙋ и҆мет̑, ꙗ҆ко т̂ы м̂ѧ посла̀.
и҆ а҆́зъ сла́вꙋ ю҆́же да́лъ е҆си мн̂ѣ, да́хъ и҆мъ.
да бꙋдт̑ꙋ е҆ді́но, ꙗ҆́коже и҆ м̂ы е҆ді́но е҆смы·

а҆зъ в ни́хъ, и҆ т̂ы въ мнѣ, да бꙋдꙋт꙽ съверше́ни въ е҆ді́но, и҆ да разꙋмѣет ми́ръ ꙗ҆́ко т̂ы м̂ѧ посла̀,<.>

И҆ възлюбилъ и҆́хъ е҆си, ꙗ҆́коже мене възлюбил̑҇ е҆си·

ѿч҃е, и҆́хже да́лъ е҆си мн̂ѣ, хощꙋ да и҆дѣже е҆смь а҆́зъ, и҆ тїи бꙋдꙋт съ мно́ю.
да ви́дѧтъ сла́вꙋ мою, ю҆же далъ е҆си мн̂ѣ.
ꙗ҆ко възлюби́лъ м̂ѧ е҆си прежде сложенїѧ ми́ра·

ѿч҃е пра́вед̑ныи, и҆ ми́ръ тебе не позна̀·

а҆з же т̂ѧ познах̑, и҆ сїи позна́шѧ, ꙗ҆́ко т̂ы м̂ѧ посла̀·

И҆ сказах̑ и҆мъ и҆м̂ѧ твоѐ, и҆ скажꙋ̀ да любы̀ е҆ю҆же м̂ѧ е҆си възлюбилъ, в нихъ бꙋдетъ, и҆ а҆зъ в нихъ·

Глв̑҇а, и҃і·

зач̑҇, н҃и·

И сїа рекъ і҆с҃, и҆зы́де съ ѹ҆ченикы свои́ми на ѻ́нъ полъ пото́ка ке́дръска, и҆дѣже б̂ѣ врьтоградъ, во́ньже вни́де самъ, и҆ ѹ҆чн҃цы е҆го·

Вѣдѧше же и҆ѹ́да предаа́и е҆го мѣ́сто, ꙗ҆ко множи́цею събира́шесѧ і҆с҃ т̂ꙋ съ ѹ҆чн҃кы своими·

И҆ѹ́да же прїе́мъ спи́рꙋ, и҆ ѿ а҆рхїере́й и҆ фарїсе́й слꙋгы̀, прїиде та́мо съ свѣти́лы и҆ свѣща́ми и҆ ѻ҆рꙋжїи·

І҆с҃ же вѣды вс̂ѧ грѧдꙋщаа на́нь.
и҆зшед̑ рече и҆мъ, кого̀ и҆́щете;
ѿвѣща́шѧ е҆мꙋ, і҆с҃а назарѧнина.
гл҃а и҆мъ і҆с҃, а҆зъ е҆смь·

Стоа́ше же і҆ и҆ѹ́да и҆же предаа́ше е҆го, с ними.
да ꙗ҆́коже рече и҆мъ, а҆зъ е҆смь, и҆дошѧ в꙽спѧть, и҆ падошѧ на землѝ·

Па́кы же въпросѝ и҆хъ і҆с҃, кого̀ и҆́щете;
ѻ҆ни́ же рѣшѧ, і҆с҃а назаре́а·

ѿвѣща і҆с҃, рѣхъ вамъ, ꙗ҆́ко а҆зъ е҆смь.
а҆ще ѹ҆бо менѐ и҆щете, ѻ҆ста́вите сихъ и҆тѝ.
да събꙋ́детсѧ сло́во е҆же рече.
ꙗ҆́ко и҆хже далъ е҆си мн̂ѣ, не погꙋбихъ ѿ нихъ никогоже·

Си́мон же петръ и҆мы̀ ножъ, и҆звлечѐ е҆го, и҆ ѹ҆да́ри а҆рхїере́ѻва раба̀, и҆ ѹ҆рѣ́за е҆мꙋ ѹ҆хо десно́е.
бѣ же и҆́мѧ рабꙋ ма́л꙽хъ·

Рече же петрови і҆с҃, вънзѝ но́жъ в н́ожницꙋ·

Ча́шꙋ ю́же дастъ м̂и ѿц҃ъ, не и́мамъ л̂и пи́ти еа̀;
спи́ра же, и҆ ты́сꙋщникъ, и҆ слꙋгы̀ и҆ѹ҆де́йскыа ꙗ҆́ша і҆с҃а, и҆ свѧза́ша е҆го, и҆ ведо́ша е҆го къ а́ннѣ пе́рвѣе.
б̂ѣ б̂о те́сть каі꙼а́фѣ, и҆же б̂ѣ а҆рхїере́й лѣтꙋ томꙋ·

Бѣ же каі꙼а́фа да́выи съвѣтъ и҆ѹ҆де́ѻмъ, ꙗ҆́ко ѹ҆́не е҆сть е҆ді́номꙋ чл҃кꙋ ѹ҆мрети за́ люди·

По і꙼с҃ѣ же и҆дѧше си́монъ пе́тръ, и҆ дрꙋгїи ѹ҆чн҃къ·

Ѹ҆чн҃къ же то́й б̂ѣ зна́емъ а҆рхїере́ѻви, и҆ вни́де съ і҆с҃ом꙽ въ дво́ръ а҆рхїере́ѻвъ·

Пе́тръ же стоа́ше при дверехъ вн̂ѣ·

И҆зыде ѹ҆бо ѹ҆чн҃къ то́й иже б̂ѣ зна́емъ архїере́ѻви, и҆ рече две́рници, и҆ в꙽веде петра̀·

гл҃а же раба̀ дверница петро́ви, е҆д̂а и҆ т̂ы ѿ ѹ҆чн҃къ е҆си чл҃ка сего;
гл҃а ѻ́н꙽, нѣ́смь·

Стоѧ́хꙋ же рабѝ и҆ слꙋгы̀ ѻ҆́гнь сътворше·

Ꙗ҆́ко зима̀ б̂ѣ и҆ грѣахꙋсѧ.
бѣ ж́е с ними петръ стоа и҆ грѣ́асѧ·

а҆рхїере́й же въпросѝ і҆с҃а ѻ҆ ѹ҆чн҃цѣх꙽ е҆го, и҆ ѻ҆ ѹ҆ченїи е҆го.
ѿвѣща̀ е҆мꙋ і҆с҃.
а҆зъ не ѻ҆бинꙋасѧ гл҃ахъ мирꙋ.
а҆зъ всегда̀ ѹ҆чих꙽ на со́нмищих̑, и҆ въ цр҃кви, и҆дѣже вс̂и людїе сн́емлютсѧ, и҆ та́й не гл҃ахъ ничесоже.
что м̂ѧ въпраша́еши;
въпросѝ слы́шавших̑, что̀ гл҃ахъ и҆мъ.
с̂е сїи вѣдѧт̑ ꙗ҆́же рѣхъ а҆зъ·

Сїа же ре́кшꙋ е҆мꙋ, е҆ді́нъ ѿ пред̑стоа́щихъ слꙋ́гъ, ѹ҆да́ри в꙽ лани́тꙋ і҆с҃а, рекъ, та́ко л̂и ѿвѣщава́еши а҆рхїере́ѻви;
ѿвѣща е҆мꙋ і҆с҃, а҆ще зл̂ѣ гл҃ахъ, свд̑ѣтельствꙋй ѻ҆ злѣ.
а҆́ще ли до́брѣ, что̀ м̂ѧ бїе́ши;
посла же е҆го а҆нна свѧ́зана к꙽ каі꙼а́фѣ а҆рхїере́ѻви·

Бѣ же си́монъ петръ стоа̀ и҆ грѣ́асѧ.
рѣшѧ емꙋ.
е҆д̂а и҆ т̂ы ѿ ѹ҆ченикъ е҆го е҆си;
ѻ҆́н же ѿвр́ьжесѧ и҆ рече, нѣ́смь·

Гл҃а еді́нъ ѿ рабъ а҆́рхїере́ѻвъ, ѹ҆́жика сы́и, емꙋже петръ ѹ҆рѣ́за ѹ҆́хо.
не а́зъ ли т̂ѧ видѣхъ в врьтогра́дѣ с нимъ;
паки ѹ҆бо петръ ѿвр́ьжесѧ, и҆ а́бїе пѣтель въз꙽гласи·

зач̑҇, н҃ѳ·

Ведо́ша же іс҃а ѿ каи҆а́фы в꙽ прето́ръ·

бѣ же ѹ҆тро, и҆́ тїи не внидо́шѧ в꙽ прето́ръ, да не ѻ҆сквернѧтсѧ, н̂о да ꙗ҆́дѧт̑ пасхꙋ·

И҆зы́де же пилатъ к ним̑ вонъ, и҆ рече.
кꙋ́ю рѣч꙽ прино́сите на чл҃ка сего;
ѿвѣщаша и҆ рѣшѧ е҆мꙋ.
а҆ще не бы былъ се́и злодѣ́и, не быхом̑ предали е҆го тебѣ·

Рече же и҆мъ пилатъ.
пои҆мѣте е҆го в̂ы, и҆ по зако́нꙋ ва́шемꙋ сꙋди́те е҆мꙋ·

Рѣша же е҆мꙋ і҆ѹ҆́де́е.
намъ не досто́итъ ѹ҆бити никогоже.
да сло́во іс҃ово с꙽бꙋдет꙽сѧ е҆же рече, назна́менꙋа коею̀ смерътїю хотѧ́ше ѹ҆мрети·

в꙽ниде же паки пилат꙽ в꙽ прето́ръ, и҆ гласѝ іс҃а, и҆ рече е҆мꙋ.
т̂ы ли еси цр҃ъ і҆ѹ҆де́йск꙽ ѿвѣща̀ емꙋ і҆с҃.
ѻ҆ себѣ ли ты с̂е гл҃еши, и҆́ли и҆нїи тебѣ реко́шѧ ѻ҆ мн̂ѣ;
ѿвѣща̀ пилат̑, е҆да а҆зъ жидовинъ е҆смь;
ро́дъ твой, и҆ а҆рхїере́е предаша т̂ѧ мн̂ѣ.
что̀ е҆си сътворил꙽;
ѿвѣща і҆с҃.
црс̑҇тво мое нѣсть ѿ ми́ра сего.
а҆́ще ѿ мира сего бы́ло б̂ы црс̑҇тво моѐ, слꙋгы моѧ̀ ѹ҆бо подвиза́лисѧ бы́ша, да не преданъ бых̑ былъ і҆́ѹ҆де́ѻмъ.
нн҃ѣ же црс̑҇тво моѐ нѣсть ѿсю́дꙋ·

Реч̑҇ же е҆мꙋ пилат̑.
ѹ҆́бо цр҃ъ ли е҆си т̂ы ѿвѣща і҆с҃ т̂ы гл҃еши, ꙗ҆́ко цр҃ь е҆смь аз̑·

А҆зъ на сѐ родихсѧ, и҆ на сѐ прїидох̑ в꙽ ми́ръ, да свѣдѣтельствꙋю исти́нꙋ и҆ всѧкъ и҆же ес̑҇ ѿ и҆́стины, послꙋша́етъ гла́са моего·

Гл҃а е҆мꙋ пилат̑, что̀ ес̑҇ и́стина;
и҆ с̂е рекъ, паки и҆зы́де къ і҆ѹ҆де́ѻмъ, и҆ гл҃а и҆мъ.
а҆зъ ни еді́ноа̀ вины ѻ҆брѣта́ю в немъ·

Єсть же ѻ҆бы́чаи вам̑, да е҆ді́ного вамъ ѿпꙋщꙋ на па́схꙋ.
хощете ли ѹ҆́бо, да ѿпꙋщꙋ вам̑ цр҃ѧ і҆ѹ́де́йска;
възъпи́ша же вс̂и гл҃юще, не сего, н̂о вара́вꙋ·

Бѣ же вара́вва разбо́йникъ·

Глв̑҇а, ѳ҃і·

Тогда ѹ҆бо пилатъ поѧтъ і҆с҃а, и҆ бѝ е҆го.
и҆ во́и҆ни съпле́тше вѣне́цъ ѿ те́рнїа, възложи́шѧ е҆мꙋ на главꙋ.
и҆ в ри́зꙋ багрѧнꙋ ѻ҆блеко́шѧ е҆го.
и҆ гл҃ахꙋ ра́дꙋисѧ цр҃ю і҆ꙋде́искїи.
и҆ бїѧ́хꙋ е҆го по ланитома·

И҆зы́де же па́ки вонъ пила́тъ.
и҆ гл҃а и҆мъ, се̂ и҆звожд̑ꙋ е҆го вамъ во́нъ.
да разꙋмѣе҆те, ꙗ҆́ко в не́мъ ни е҆ді́ноѧ вины̀ ѻ҆брѣтаю·

И҆зыде же во́нъ і́с҃. носѧ терновъ вѣне́цъ.
и҆ багрѧнꙋ ризꙋ.
и҆ гл҃а и҆мъ.
с̂е чл҃къ·

Є҆гда же видѣшѧ е҆го а҆рхїе҆ре́е и҆ слꙋгѝ, възъпиша гл҃юще·

зач̑҇, ѯ҃·

Распнѝ распнѝ е҆го.
гл҃а и҆́мъ пилат̑.
пои҆мѣте е҆го в̂ы и҆ распнѣте.
а҆зъ б̂о не ѻ҆брѣтаю в немъ вины̀·

ѿвѣщаша е҆мꙋ і҆ꙋде́е.
м̂ы зако́нъ и́мамы, и҆ по зако́нꙋ нашемꙋ, до́лженъ е҆сть ѹ҆мрѣти, ꙗ҆ко себе сн҃а бж҃їа сътвори·

Є҆гда же слы́ша пила́тъ с̂е сло́во, паче ѹ҆боа́сѧ, и҆ вни́де въ преторъ паки, и҆ гл҃а і҆с҃ови, ѿкꙋдꙋ е҆си т̂ы·

І҆с҃ же, ѿвѣта не дастъ е҆мꙋ·

Гл҃а же е҆мꙋ пилат̑, мнѣ л̂и не гл҃еши;
не вѣ́си ли ꙗ҆́ко вла́сть и҆мамъ распѧти т̂ѧ, и҆ вла́сть и҆́мамм̑ пꙋсти́ти т̂ѧ;
ѿвѣща і҆с҃, не и́маши вла́сти ни е҆ді́ноѧ на мнѣ, а҆ще не бы̀ ти дано̀ свы́ше·

Сего ради преда́выѝ м̂ѧ тебѣ, бо́лїи грѣхъ и҆́мать·

ѿ сего и҆ска́ше пила́тъ пꙋсти́ти е҆го·

І҆ѹ҆де́е же въпїѧ́хꙋ гл҃юще, а҆ще сего пꙋсти́ши, нѣ́си дрꙋгъ кесаре́въ, всѧ́къ и҆же цр҃ѧ себе творѧ́и, противитсѧ кесарю·

Пила́т же слы́шавъ с̂е сло́во, и҆зведе во́нъ і҆с҃а, и҆ сѣде на сꙋди́щи на мѣстѣ гл҃емм̑ѣ лиѳо́стротон꙽, е҆вре́иски же гав꙽ва́ѳа·

Бѣ же пѧто́к꙽ па́сцѣ, час̑҇ же ꙗ҆́ко шесты́и·

И҆ гл҃а і҆ꙋде́ѻмъ, с̂е цр҃ь ва́шь·

ѻ҆ни́ же въпїѧ́хꙋ, възмѝ възмѝ распни е҆го·

Гл҃а и҆мъ пилатъ, цр҃ѧ ли ва́шего распнꙋ̀;
ѿвѣща́шѧ а҆рхїере́е, не и҆́мамы цр҃ѧ то́кмо ке́сарѧ·

Тогда же преда́стъ е҆го и҆мъ да распнетсѧ·

Пое́мше же і҆с҃а, и҆ ведо́шѧ, и҆ носѧ крс̑҇тъ свои́, и҆зы́де въ гл҃емое ло́бное мѣсто, е҆же гл҃етсѧ е҆вреискы, голго́ѳа, и҆дѣже пропѧ́шѧ е҆го, и҆ с ним̑ и́на дв̂а, сю́дꙋ и҆ сю́дꙋ, посредѣ же і҆с҃а·

написа́ же и҆ ти́тла пилатъ, и҆ положѝ на крс̑҇тъ·

Бѣ же напи́сано, і҆с҃ назарѧнин꙽, цр҃ь и҆ѹ҆де́искыи·

Сего же ти́тла мноѕи что́ша ѿ и҆ѹ҆де́и, ꙗ҆́ко близъ б̂ѣ мѣсто града, и҆дѣже пропѧ́ша і҆с҃а·

И҆ б̂ѣ напи́сано, е҆вре́искы, гре́ческы, рим̑скы·

Гл҃ахꙋ же пила́тꙋ а҆рхїе҆ре́е і҆ѹ҆де́истїи не пиши, цр҃ь і҆ѹ҆деискыи, н̂о ꙗ҆́ко сам̑ рече, цр҃ь е҆смь іѹ҆де́искыи·

ѿвѣща̀ пилатъ.
е҆же писа́хъ, писах̑·

во́ини же, е҆гда пропѧшѧ і҆с҃а, прїа́шѧ ри́зы е҆го, и҆ сътвори́шѧ четы́ри чѧсти, комꙋждо во́инꙋ ча́сть, и҆ хитонь.
бѣ же хитонь не швенъ, свы́ше и҆стка́нъ ве́сь·

Рѣша же к꙽ себѣ, не предере́мъ е҆го, н̂о ме́тнемъ жребїа ѻ҆ немъ, къмꙋ̀ бꙋ́детъ.
да събꙋ́детсѧ писа́нїе гл҃ющее.
раздѣли́ша ри́ѕы моѧ̀ себѣ, и҆ ѻ҆ мати́смѣ мое́и мета́шѧ жребїа·

Во́и҆ни же ѹ҆бо сїа сътвори́шѧ·

зач̑҇, ѯа҃·

Стоѧ́хꙋ же при крс̑҇тѣ і҆с҃овѣ, ма́ти е҆го, и҆ сестра̀ ма́тере е҆го, ма́рїа клеѻ҆пова, и҆ ма́рїа магдалы́ни·

І҆с҃ же видѣвъ матере, и҆ ѹ҆чн҃ка стоа́ща, е҆гоже люблѧше.
гл҃а ма́тери свое́й.
жено, с̂е сн҃ь твой·

Потом̑же гл҃а ѹ҆чн҃кꙋ, с̂е ма́ти твоа̀.
и҆ ѿ того̀ часа поѧ́тъ ю҆̀ ѹ҆чн҃къ въ своа с̂и·

По сем꙽ вѣ́ды і҆с҃, ꙗ҆́ко вс̂ѧ ѹ҆же съвр́ьшишасѧ, да с꙽бꙋ́детсѧ писанїе, гл҃а, жа́ждꙋ·

Съсꙋд же стоа́ше полнъ ѻ҆́цта.
ѻ҆ни же и҆спо́лнивше гꙋ́бꙋ ѻ́цъта, и҆ на трость възнъзше, придѣша къ ѹ҆стомъ его.
е҆гда же прїа́т꙽ ѻ҆́цетъ і҆с҃, рече.
съврьши́шасѧ·

И҆ прекло́нь главꙋ̀, преда́сть дх҃ь·

И҆ѹ҆де́е же, понеже пѧ́токъ б̂ѣ, да не ѻ҆ста́нꙋтъ на крс̑҇тѣ тѣлеса̀ в сꙋботꙋ, б̂ѣ б̂о вели́къ дн҃ь тоа̀ сꙋботы, моли́шѧ пила́та, да пребїют̑ го́лени и҆хъ, и҆ во́змꙋтъ·

прїидошѧ же воини, и҆ пр́ьвомꙋ ѹ҆бо преби́шѧ го́лени, и҆ дрꙋго́мꙋ распѧ́томꙋ с ни́мъ·

на і҆с҃а же пришедше, ꙗ҆́ко видѣшѧ его ѹ҆же ѹ҆ме́рша, не преби́шѧ емꙋ голенїи, н̂о еді́нъ ѿ во́ин̑҇ ко́пїе́мъ ре́бра емꙋ прободе.
и҆ а́бїе и҆зы́де кро́въ и҆ вода̀.
и҆ видѣвыѝ, свѣдѣтельствова, і҆ и́стинно е҆сть свѣдѣтельство е҆го·

и҆ то́и вѣсть ꙗ҆́ко и́стинꙋ гл҃етъ, да в̂ы вѣ́рꙋ и҆ме́те·

Быша б̂о сїа, да с꙽бꙋдетсѧ писа́нїе, кость не съкрꙋши́тсѧ ѿ него·

И҆ па́кы дрꙋго́е писа́нїе гл҃етъ.
възрѧтъ нань е҆гоже прободо́шѧ·

зач̑҇, ѯв҃·

По сих же моли пилата і҆ѻ́сифъ и҆же ѿ а҆римаѳе́а, сы́й ѹ҆ченикъ і҆с҃овъ, пота́е҆н же страха ради і҆ѹ҆де́йска, да въ́зметъ тѣ́ло і҆с҃ово.
и҆ повелѣ пилатъ·

Прїиде же, и҆ взѧтъ тѣло і҆с҃ово·

прїиде же и҆ никоди́мъ пришедыи къ і҆с҃ови но́щїю прежде, носѧ̀ смѣшенїе змѷрнено и҆ а҆ло́ино, ꙗ҆́ко ли́тръ ст̂о·

Прїѧ́ста же тѣ́ло і҆с҃ово, и҆ ѻ҆бви́ста е҆̀ ри́зами съ а҆рома́ты, ꙗ҆́коже ѻ҆бы́чай е҆сть і҆ѹ҆де́ѻм꙽ погрѣба́ти·

Бѣ жѐ на мѣстѣ и҆́дѣже распѧтсѧ, вр́ътъ.
и҆ в꙽ вр́ьтѣ гробъ но́въ в немже николи́же никтоже положе́нъ бѣ·

т̂ꙋ ѹ҆бо пѧтка̀ ради і҆ѹ҆де́йска, ꙗ҆́ко близъ бѧше гробъ, положиста і҆с҃а·

Глв̑҇а, к҃·

зач̑҇, ѯг҃·

Въ е҆ді́нꙋ же ѿ сꙋбо́тъ, ма́рїа магдалыни прїиде заѹ҆тра, е҆ще сꙋщи т̂мѣ, на́ гробъ, и҆ видѣ̀ ка́мень взѧт̑ ѿ гроба·

Течѐ ѹ҆бо, и҆ прїиде к꙽ си́монꙋ петрꙋ, и҆ к꙽ дрꙋго́мꙋ ѹ҆ченикꙋ, е҆гоже люблѧ́ше і҆с҃, и҆ гл҃а и҆́ма.
в꙽зѧ́ша г҃а ѿ гро́ба, и҆ не вѣмъ гд̂ѣ положишѧ е҆го·

И҆зы́де же петръ, и҆ дрꙋгїи ѹ҆ченикъ, і҆ и҆дѧста къ́ гробꙋ.
теча́ста же ѻ҆́ба в꙽ кꙋ́пѣ, и҆ дрꙋгыи ѹ҆ченикъ тече ско́рѣе петра, и҆ прїиде прежде къ́ гробꙋ.
и҆ приникъ, видѣ ри́ѕы лежащѧ, ѻ҆баче не вни́де·

Прїиде же си́монъ петръ, в꙽ слѣдъ е҆го, и҆ вниде въ́ гробъ, и҆ видѣ ри́зы е҆ді́ны лежа́щѧ, и҆ сꙋда́ръ и҆же б̂ѣ на главѣ̀ е҆го, не с ри́зами лежащь, н̂о ѻ҆собь свитъ на е҆ді́номъ мѣ́стѣ·

Тогда ѹ҆бо вниде и҆ дрꙋгїи ѹ҆ченикъ, прише́дыѝ прежде къ́ гробꙋ, и҆ видѣ, и҆ вѣ́рова·

Не ѹ҆̀ б̂о вѣдѧхꙋ писанїа, ꙗ҆́ко подобаетъ е҆мꙋ и҆з мр҃твыхъ въскреснꙋти·

И҆до́ста же па́ки к себѣ ѹ҆чн҃ка·

зач̑҇, ѯд҃·

Мар́їа же стоѧ́ше ѹ҆ гроба вн̂ѣ пла́чющи.
ꙗ҆́коже пла́кашесѧ, прини́че въ́ гробъ, и҆ видѣ̀ дв̂а а҆́гг҃ла в꙽ бѣлахъ ризахъ сѣдѧ́ща, е҆ді́ного ѹ҆ главы̀, и҆ е҆ді́ного ѹ҆ ногꙋ, и҆дѣже б̂ѣ лежа́ло тѣло і҆с҃ово·

и҆ гл҃аста е́й ѻ҆на̀.
же́но, чт̂о пла́чешисѧ;
гл҃а и҆́ма, ꙗ҆́ко взѧ́шѧ г҃а мое҆го, и҆ не вѣмъ гд̂ѣ положишѧ е҆го, и҆ сїа ре́кши, ѻ҆братисѧ в꙽спѧть, и҆ видѣ і҆с҃а стоа́ща, и҆ не вѣ́дѧше ꙗ҆ко і҆с҃ е҆сть·

Гл҃а е́й і҆с҃, же́но, чт̂о пла́чеши;
кого̀ и҆́щеши;
ѻ҆наже мнѧщи ꙗ҆́ко врьтогра́даръ е҆сть, гл҃а е҆мꙋ, г҃и, а҆ще т̂ы е҆си взѧлъ е҆го, повѣжд̑ь м̂и, гдѣ е҆си положилъ е҆го, и҆ а҆зъ възм̀ꙋ е҆го·

Гл҃а е́й і҆с҃, ма́рїе.
ѻ҆наже ѻ҆бра́щшисѧ, гл҃а е҆мꙋ, раввꙋни, е҆же гл҃етсѧ, ѹ҆чителю·

Гл҃а е́й і҆с҃, не прикасайсѧ мн̂ѣ.
не ѹ҆ б̂о взыдох꙽ къ ѿц҃ꙋ мое҆мꙋ, и҆ди же къ бра́тїи мое́й, и҆ рцѝ и҆́мъ, въсхожꙋ̀ къ ѿц҃ꙋ мое҆мꙋ, и҆ ѿц҃ꙋ ва́шемꙋ.
и҆ бг҃ꙋ мое҆мꙋ.
и҆ б҃ꙋ ва́шемꙋ·

Прїиде же ма́рїа магдалы́ни, повѣ́дꙋющи ѹ҆чеником̑, ꙗ҆́ко видѣ г҃а, и҆ сїа реч̑҇ е́й·

зач̑҇, ѯе҃·

Сꙋщꙋ же поздѣ въ дн҃ь то́й, въ еди́нꙋ ѿ сꙋботъ, и҆ две́ремъ затворе́ном꙽, и҆деже бѣхꙋ ѹ҆чн҃цы е҆го съ́брани стра́ха ради і҆ѹ҆де́йска·

Прїиде і҆с҃, и҆ ста посредѣ, и҆ гл҃а и҆мъ, ми́ръ вамъ.
и҆ с̂е рекъ, показа̀ и҆мъ рꙋцѣ, и҆ но́ѕѣ, и҆ ре́бра своа·

Възрадоваша же сѧ ѹ҆чн҃цы, видѣвше г҃а.
рече же и҆мъ і҆с҃ па́кы, ми́ръ вамъ·

ꙗ҆́коже посла̀ м̂ѧ ѿц҃ъ, и҆ а́зъ посыла́ю в̂ы.
и҆ с̂е рекъ дꙋ́нꙋ, и҆ гл҃а и҆мъ.
прїимѣте дх҃ъ ст҃ъ·

И҆́мже ѿпꙋститѐ грѣхы, ѿпꙋ́стѧтсѧ и҆мъ.
і҆ и́мже дръжитѐ.
дръжатсѧ·

ѳома же е҆ді́нъ ѿ ѻ҆боюнадесѧте гл҃емыи близнецъ, не б̂ѣ т̂ꙋ с ни́ми е҆гда̀ прїиде і҆с҃·

Гл҃ахꙋ же е҆мꙋ дрꙋѕїи́ ѹ҆чн҃цы, видѣхом̑ г҃а·

ѻ҆́н же рече и҆мъ.
а҆ще не ви́жꙋ на́ рꙋкꙋ е҆го ꙗ҆́звы гвоѕди́нныа, и҆ вложꙋ пръ́ста мое҆го въ ꙗ҆́звы гвозди́нъныа, и҆ вложꙋ рꙋ́кꙋ мою̀ в ре́бра е҆го, не и҆мꙋ вѣ́ры·

И҆ по́ дн҃ехъ ѻ҆смихъ, пакы бѣхꙋ внꙋтръ ѹ҆чн҃цы е҆го, и҆ ѳома с ними.
прїиде і҆с҃, две́ремъ затвореномъ.
и҆ ста̀ посредѣ и҆хъ, и҆ рече, ми́ръ вамъ·

Пото́мъ гл҃а ѳомѣ.
принесѝ пр́ъстъ твои сѣмо, и҆ ви́ждъ рꙋцѣ моѝ, и҆ принесѝ рꙋ́кꙋ твою, и҆ вложѝ в ре́бра моа.
и҆ не бꙋди невѣ́ренъ, н̂о вѣренъ·

ѿвѣща ѳома̀, и҆ рече е҆мꙋ.
г҃ь мои, и҆ б҃ъ мой·

Гл҃а е҆мꙋ і҆с҃, ꙗ҆́ко видѣвъ м̂ѧ, вѣ́рова·

Бл҃же́ни не видѣвшеѝ, и҆ вѣровавше·

Мно́га же і҆ и́на знаменїа сотворѝ і҆с҃, предъ ѹ҆чн҃кы свои́ми.
ꙗ҆́же нѣ́ сꙋть пи́сана в꙽ кни́гахъ сих꙽·

сїа же пи́сана бы́ша, да вѣрꙋете ꙗ҆́ко і҆с҃ е҆сть х҃с сн҃ъ бж҃їи·

И҆ да вѣ́рꙋюще, живота и҆́мате въ и҆мѧ е҆го·

Глв̑҇а, к҃а·

зач̑҇, ѯѕ҃·

По семъ ꙗ҆́висѧ пакы і҆с҃ ѹ҆ченикомъ свои́мъ въставъ ѿ мр҃твыхъ, на́ мори тиверїа́д꙽стѣмъ·

Ꙗ҆́ви же сѧ си́це·

Бѣхꙋ в꙽ кꙋпѣ си́мон꙽ петръ, и҆ ѳома̀ нарица́емыѝ близ꙽нецъ, и҆ наѳана́илъ, и҆же б̂ѣ ѿ ка́ны галиле́йскїа, и҆ сн҃а зеведе́ѻва, и҆ і́на ѿ ѹ҆чн҃къ е҆го дв̂а·

Гл҃а и҆мъ си́монъ петръ, и҆дꙋ рыбъ лови́ти.
гл҃ашѧ е҆мꙋ, и҆́демъ и҆ мы̂ с тобо́ю·

И҆зыдо́ша же и҆ всѣдо́ша а҆́бїе в кора́бль.
и҆ в т̂ꙋ но́щь не ꙗ҆́шѧ ничесоже.
ѹ҆трꙋ же бы́вшꙋ, ст̂а і҆с҃, при́ брезѣ, не позна́шѧ же ѹ҆чн҃ицы ꙗ҆́ко і҆с҃ е҆сть·

Гл҃а же и҆мъ і҆с҃, дѣти, е҆да̀ чт̂о снѣдно и҆́мате.
ѿвѣща́ша е҆мꙋ, н̂и.
ѻ҆н꙽ же рече и҆мъ, в꙽ве́рзѣте мре́жꙋ ѻ҆деснꙋ́ю странꙋ̀ кораблѧ̀ и҆ ѻ҆брѧ́щете.
в꙽врьго́ша же, и҆ ктомꙋ не можа́хꙋ привлещѝ е҆ѧ̀ ѿ мно́жества ры́бъ·

Гл҃а же ѹ҆чени́къ то́и, е҆гоже люблѧ́ше і҆с҃, петро́ви, г҃ь е҆сть.
си́монъ же пе́тръ слы́шавъ, ꙗ҆́ко г҃ь е҆сть, е҆пенди́том̑ препоѧ́сасѧ, б̂ѣ б̂о на́гъ, и҆ в꙽вр́ьжесѧ в мо́ре.
а҆ дрꙋѕїѝ ѹ҆ченицы корабице́мъ прїидо́шѧ.
не бѣшѧ б̂о далече ѿ землѧ, н̂о ꙗ҆́ко двѣстѣ лактїи.
влекꙋще мре́жꙋ ры́б꙽·

Ꙗ҆́коже и҆злѣзо́ша на́ землю, видѣшѧ ѻ҆́гнь лежа́щь, и҆ ры́бꙋ на немъ лежа́щꙋ, и҆ хлѣ́бъ.

И҆ гл҃а и҆мъ і҆с҃.
принесѣте ѿ ры́бъ ꙗ҆́же ꙗ҆́сте нн҃ѣ·

Влѣ́зъ же си́монъ пе́тръ, и҆звлечѐ мрежꙋ на́ землю, по́лнꙋ, вели́кых̑ ры́бъ, р҃ и҆ н҃ и҆ тр̂и.
и҆ толи́кꙋ сꙋщꙋ, не прото́ржесѧ мре́жа·

Гл҃а и҆́мъ і҆с҃, прїидѣте ѻ҆бѣдꙋите·

Ни е҆ді́нъ же смѣ́аше ѿ ѹ҆ченикъ и҆стѧза́ти е҆го, т̂ы кто̀ е҆си, вѣ́дѧще ꙗ҆ко г҃ь е҆сть·

Прїиде же і҆с҃, і҆ прїат̑ хлѣбъ, и҆ дастъ им̑.
и҆ ры́бꙋ та́кожде·

Се̂ ѹ҆же тре́тїе ꙗ҆́ви́сѧ і҆с҃ ѹ҆ченикомъ свои́мъ, въставъ ѿ мр҃твыхъ·

зач̑҇, ѯз҃·

Є҆́гда же ѻ҆бѣ́довашѧ.
гл҃а си́монꙋ петрꙋ і҆с҃.
си́моне и҆ѻ́нинъ, лю́биши ли м̂ѧ па́че сихъ;
гл҃а е҆мꙋ, е́й г҃и, т̂ы вѣ́си ꙗ҆́ко люблю̀ т̂ѧ·

Гл҃а е҆мꙋ, пасѝ а҆́гньцѧ моа·

Гл҃а е҆мꙋ па́кы в꙽торо́е.
си́моне и҆ѻ́нинъ, лю́биши л̂и м̂ѧ;
гл҃а е҆мꙋ, е́й г҃и, т̂ы вѣси ꙗ҆ко люблю̀ т̂ѧ·

Гл҃а е҆мꙋ, пасѝ ѻ҆́вцѧ̀ моѧ̀·

Гл҃а е҆мꙋ тре́тїе, сі́моне і҆ѻ́нинъ, лю́биши ли м̂ѧ;
ѻ҆скръбѣ же пе́тръ, ꙗ҆ко рече е҆мꙋ тре́тїе, лю́биши л̂и м̂ѧ·

И҆ гл҃а е҆мꙋ.
г҃и, т̂ы вс̂ѧ вѣсѝ, т̂ы вѣси, ꙗ҆ко люблю̀ т̂ѧ·

Гл҃а е҆мꙋ і҆с҃, пасѝ ѻ҆вца̀ моѧ̀·

А҆ми́нь а҆ми́нь гл҃ю тебѣ, е҆гда б̂ѣ ю҆́нъ, поѧ́сашесѧ самъ, и҆ хожаше ꙗ҆́може хотѧше.
е҆гда же съста́рѣешисѧ, възде́жеши рꙋцѣ твоѝ, и҆ і́нъ т̂ѧ поѧ́шетъ, и҆ веде́тъ, ꙗ҆́може не хо́щеши.
се́ же рече, назна́менꙋа коею̀ смр҃тїю просла́витъ бг҃а·

И҆ сїѧ рекъ, гл҃а е҆мꙋ, и҆дѝ по мнѣ̀·

ѻ҆бра́щъ же сѧ пе́тръ, видѣ ѹ҆ченика, е҆гоже люблѧ́ше і҆с҃, въ слѣдъ и҆дꙋща, и҆же и҆ възле́же на́ вечери на пр́ьси е҆го, и҆ реч̑҇.
г҃и, кто̀ е҆сть предааѝ т̂ѧ;
сего̀ видѣв꙽ петръ, гл҃а і҆с҃ови.
г҃и, се́й же чт̂о;
гла е҆мꙋ і҆с҃.
а҆ще хощꙋ да то́й пребыва́етъ, до́ндеже прїидꙋ, чт̂о к꙽ тебѣ;
т̂ы по мнѣ̀ грѧди·

И҆зы́де же сло́во с̂е в꙽ бра́тїю, ꙗ҆́ко ѹ҆чени́къ то́й не ѹ́мретъ·

И҆ не рече е҆мꙋ і҆с҃, ꙗ҆́ко не ѹ҆мрет̑.
н̂о а҆ще хощꙋ̀ томꙋ пребывати до́ндеже прїидꙋ̀, чт̂о к꙽ тебѣ;

Се́и е҆сть ѹ҆чн҃къ свѣдѣтельствꙋаѝ ѻ҆ сихъ, и҆же и҆ написа̀ сїа.
и҆ вѣм꙽ ꙗ҆́ко и́стинно е҆сть свѣдѣтельство е҆го·

Сꙋть же и҆ і́на мно́га, ꙗ҆́же сътворѝ і҆с҃, ꙗ҆же а҆ще пое҆ди́номꙋ пи́сана быва́ютъ, ни самомꙋ̀ мн̂ю всемꙋ ми́рꙋ вмѣ́стити пи́шемых̑ кни́гъ, а҆ми́нь·

Є҆́же ѿ і҆ѻа́нна ст҃го е҆ѵг̑҇листа, и҆́мать в себѣ, глв̑҇а, к҃а·

А҆ зачалъ цр҃ковныхъ, ѯз҃·