Рече́ же дх҃ъ къ фїли́ппꙋ пристꙋпѝ, и прилѣписѧ колесни́цы с́ей·

При́текъ же фїли́ппъ, ѹ҆слы́ша е҆го чтꙋ́ща проро́ка і҆са́їю·

И҆ речѐ, ѹ҆́бо разꙋмѣ́еши ли ꙗ҆́же чтеши;
ѻ́н же речѐ, ка́ко ѹ҆бо могꙋ, а҆ще не кт̂о наста́вит̑ м̂ѧ;
ѹ҆моли́ же фїли́ппа въз꙽шед̑ша сѣсти с ним̑·

Сло́во же писа́нїа̀ е҆же чтѧ́ше, б̂ѣ с̂е·

Ꙗ́ко ѻ҆вчѧ̀ на заколенїе веде́сѧ, и ꙗ҆ко а҆гнецъ прѧ́мо стригꙋщемꙋ е҆го без꙽гла́сенъ та́ко не ѿверза́етъ ѹ҆стъ свои́хъ·

Въ смире́нїи е҆го, сꙋ́дъ е҆го взѧ́тсѧ·

Род̑ же е҆го кт̂о и҆сповѣ́сть;
ꙗ҆́ко взе́млетсѧ ѿ землѧ̀ животъ е҆го·

ѿвѣща́в же ка́женик꙽ къ фїли́ппꙋ рече.
молю т̂ѧ, ѻ҆ ко́мъ прро̑҇къ гл҃етъ с̂е.
ѻ҆ себѣ л̂и, и҆лѝ ѻ҆ и҆номъ нѣ́кое҆мъ·

ѿвр́ъзъ же фїли́ппъ ѹ҆ста своѧ̀, и҆ нача ѿ писанїа сего, бл҃говѣсти́ти е҆мꙋ і҆с҃а.
и҆ ꙗ҆́коже и҆дѧхꙋ пꙋтемъ, прїидо́ша на нѣкꙋю во́дꙋ·

И҆ рече ка́женикъ.
с̂е вода̀, чт̂о въз꙽бранѧ́етъ ми крс̑҇ти́тисѧ;

Рече же е҆мꙋ фїли́ппъ, а҆ще вѣрꙋеши ѡ всего̀ срд̑ца свое҆го, мо́щно ти е҆сть·

ѿвѣща́в же рече вѣ́рꙋю сн҃а бж҃їѧ бы́ти і҆с҃а х҃а·

И҆ повелѣ̀ ста́ти колесни́цы.
и҆ слѣзо́ста ѻ҆́ба на́ водꙋ, фїли́ппъ же и҆ ка́женикъ, и҆ крс̑҇тѝ е҆го.
е҆гда же взыдо́ша ѿ воды̀, дх҃ъ ст҃ы́и нападѐ на ка́женика.
а҆гг҃лъ же гн҃ь въсхитѝ фїли́ппа, и҆ не видѣ̀ е҆го ктомꙋ ка́женикъ·

и҆дѧ́ше бо въ пꙋть свои ра́дꙋѧ҆сѧ·

зач̑҇, к҃а·

Фили́ппъ же ѻ҆брѣтесѧ въ а҆зо́тѣ.
и҆ проходѧ бл҃говѣствова́ше градомъ всѣмъ, до́ндеже прїити е҆мꙋ въ кеса́рїю·

Глв̑҇а, ѳ҃·

Са́влъ же е҆ще ды́хаа преще́нїем̑, и҆ ѹ҆бїиством̑ на ѹ҆чн҃ки гн҃ѧ, пристꙋ́пль къ а҆рхїере́ю, и҆спросѝ ѿ него посла́нїа въ дама́скъ, къ собо́рищем꙽, ꙗ҆́ко да а҆ще нѣ́кїа ѻ҆брѧ́щетъ на пꙋти сꙋща мꙋ́жа и҆ жены̀, свѧ́заны приведетъ въ і҆ерс̑҇ли́мъ·

внегда же и҆дꙋ́щꙋ, бы́сть е҆мꙋ прибли́житисѧ къ дама́скꙋ,<.>

И҆ внеза́пꙋ ѻ҆блиста̀ е҆го свѣтъ ѿ нб҃се, и пад̑ на́ землю, слы́ша глс̑҇а гл҃ющь е҆мꙋ.
са́вле са́вле что м̂ѧ го́ниши;
рече же, кт̂о е҆си г҃и;
г҃ь же рече.
а҆зъ е҆смь і҆с҃, е҆гоже т̂ы гониши.
жестоко т̂и е҆сть противꙋ рожнꙋ пра́ти.
тре́петен꙽ же и҆ недоѹ҆мѣѧсѧ реч̑҇.
г҃и, чт̂о хо́щеши да сътворю;
г҃ь же рече к немꙋ.
н̂о въста́ни и҆ вниди въ́ град̑, и речетъ ти сѧ чт̂о т̂и подобает꙽ твори́ти.
мꙋжїе же и҆дꙋщеи с ни́м꙽, стоѧ́хꙋ чюдѧ́щесѧ, слы́шаще ѹ҆бо гла́съ, никого́же видѧ́ще.
въставъ же са́влъ ѿ землѧ ѿверъ́стома ѻ҆чи́ма е҆го, ни е҆ді́наго видѧ́ше.
водѧ́ще же е҆го̀ за́ рꙋкꙋ, введо́ша въ дама́скъ.
и҆ б̂ѣ дн҃и тр̂и не видѧ̀.
и҆ ни ѧ҆́сть ни пи́тъ·

зач̑҇·

Бѣ же нѣ́кто ѹ҆чн҃къ первыи въ дама́сцѣ, и҆́менемъ а҆на́нїѧ.
и҆ рече к немꙋ г҃ь въ видѣ́нїи, а҆на́нїе.
ѻ҆́н же рече, с̂е а҆зъ г҃и·

г҃ь же к немꙋ̀.
въста́въ пои҆дѝ на сто́гнꙋ нарица́емꙋю пра́вꙋ, и взыщѝ въ домꙋ̀ і҆ѹ҆́довѣ, савла и҆́менемъ тарсѧни́на.
се б̂о мл҃твꙋ дѣ́етъ.
и҆ видѣ въ видѣ́нїи мꙋ́жа и҆́менемъ а҆на́нїю вшед̑ша и҆ възлож꙽ша на́нь рꙋ́кꙋ, ꙗ҆ко да про́зритъ.
ѡт̑вѣща́в же а҆на́нїа, г҃и, слы́шахъ ѡт̑ мног̑҇ ѻ҆ мꙋжи сем̑ коли́ка, ѕл̂а сътворѝ ст҃ым̑ твои҆́мъ въ і҆е҆рлс̑҇и́мѣ.
и҆ зд̂ѣ и҆́мать вла́сть ѡт̑ а҆рхїере́й, свѧза́ти вс̂ѧ нарица́ющаѧ и҆мѧ твое.
рече́ же к немꙋ̀ г҃ь.
и҆дѝ, ꙗ҆́ко съсꙋдъ и҆збра́нъ м̂и ес̑҇ се́й, пронести и҆́мѧ моѐ прд̑е ꙗ҆́зы́ки и҆ царьми, и҆ сн҃ьми і҆и҆л҃евыми.
а҆з꙽ б̂о скажꙋ е҆мꙋ, е҆лѝка подоба́етъ е҆мꙋ ѻ҆ и҆́мени мое҆мъ пострада́ти.
по́иде же а҆на́нїа, и҆ вни́де въ храминꙋ, и҆ възлож̑ⷷ на́нь рꙋцѣ, рече.
са́вле брате, г҃ь посла́ мѧ і҆с҃, ꙗ҆́вле́и ти сѧ на пꙋтѝ, и҆́м꙽же и҆дѧ́ше, ꙗ҆ко да про́зриши, і҆ и҆спо́лнишисѧ дх҃а ст҃а.
і҆ абїе ѡт̑падо́ша ѡт̑ ѻ҆́чїю е҆го.
ꙗ҆́ко чешꙋѧ̀, прозрѣ же а҆́бїе, и҆ въста́въ крс̑҇ти́сѧ.
и҆ прїе́мъ пи́щꙋ ѹ҆крѣпи́сѧ·

зач̑҇ к҃в·

Бы́сть же са́влъ съ сꙋщими въ дама́сцѣ ѹ҆чн҃кы дн҃и нѣ́кїа.
и҆ а҆́бїе на со́нмищихъ проповѣ́даше і҆с҃а, ꙗ҆́ко се́й е҆сть сн҃ъ бж҃їи.
дивлѧ́хꙋ же сѧ вс̂и слы́шащеѝ, и҆ гл҃ахꙋ, не се́й л̂и е҆сть гони́выи въ і҆ерс̑҇ли́мѣ нарицающаѧ и҆́мѧ сїе, и҆ зд̂ѣ на сѐ прїи҆де, да свѧ́заны тѣхъ приведетъ къ а҆рхїере́ѻм̑; са́влъ же паче крѣплѧ́шесѧ, и смꙋща́ше і҆ѹ҆де́ѧ живꙋщаѧ въ дама́сцѣ, препира́ѧ, ꙗ҆́ко с̂е е҆сть х҃с.
ꙗ҆́коже и҆спо́лнишасѧ дн҃їе дово́лни, съвѣща́ша і҆ѹ҆де́е ѹ҆би́ти е҆го.
ѹ҆вѣ́ден же быс̑҇ са́влꙋ съвѣтъ и́хъ.
стрѣжа́хꙋ же врата дн҃ь и҆ нощь, ꙗ҆́ко да ѹ҆бію҆тъ того.
поем̑ше же е҆го ѹ҆чн҃цы но́щїю свѣси́ша по стенѣ̀ въ кошницы.
пришед̑ же са́влъ въ і҆ерс̑҇ли́мъ, покꙋша́шесѧ прилѣплѧ́тисѧ ѹ҆чн҃цѣхъ.
и҆ вс̂и боѧ҆хꙋсѧ е҆го, не вѣ́рꙋюще ꙗ҆́ко е ѹ҆чени́къ.
варна́ва же прїе́мъ е҆го приведе къ а҆пс̑҇ломъ, и҆ повѣ́да им̑, ка́ко на пꙋтѝ видѣ г҃а, и ꙗ҆́ко гл҃а е҆мꙋ, и҆ ка́ко въ дамасцѣ дер̑҇за́аше ѻ҆ и҆мене і҆с҃овѣ.
и҆ бѣа́ше с ни́ми входѧ і҆ и҆сходѧ̀ въ і҆ерс̑҇ли́мѣ, и҆ дерза́а ѻ҆ и҆́мени г҃а і҆с҃а.
гл҃аше же и стѧза́шесѧ съ е҆́ллины.
ѻ҆ни́ же и҆ска́хꙋ е҆го ѹ҆би́ти.
разꙋмѣвше же бра́тїа, сведоша е҆го въ кесарїю.
и҆ ѡт̑пꙋсти́ша въ та́рсъ·

цръ҃кви же ѹ҆бо по все́и і҆ѹ҆де́ѝ и҆ галилеи и҆ самарїи и҆мѧхꙋ мир꙽, съѕида́ющесѧ и҆ ходѧ́ще въ́ страсѣ гн҃и, и҆ ѹ҆тѣше́нїемъ ст҃а́го дх҃а ѹ҆мно́жахꙋсѧ.

зач̑҇ к҃г·

И́ бы́сть петрꙋ̀ посѣщаю́щꙋ всѣхъ, сни́ти и къ ст҃ымъ живꙋщимъ въ ли́дѣ.
ѻ҆брѣте же тꙋ чл҃ка нѣ́коего, е҆неа и҆́менем̑, ѡт̑ ѻ҆сми лт̑ѣ лежа́ща на ѻ҆дрѣ̀, и҆же б̂ѣ раз꙽сла́бленъ·

И҆ рече е҆мꙋ пе́тръ·

е҆не́ѧ, и҆сцѣлѧетъ тѧ і҆с҃ х҃с·

въста́ни с посте́лѧ твое́ѧ.
и҆ а҆́бїе въста̀·

и҆ видѣша е҆го вс̂и живꙋщеѝ въ ли́дѣ и҆ въ а҆ссаро́нѣ и҆же ѻ҆брати́шасѧ къ г҃ꙋ·

Въ і҆ѻ́пїи же б̂ѣ нѣ́каа ѹ҆чн҃ца и҆менем̑ тави́ѳа, ꙗ҆́же сказа́ема гл҃етсѧ се́рна.
сїѧ бѧ́ше и҆спо́лнена бл҃гих̑ дѣлъ и҆ млс̑҇тынѧ и҆хже творѧ́ше, бы́сть же въ дн҃и т̂ы, болѣ́вши е́й ѹ҆мрети.
ѻ҆мы́вше же ю҆̀, положи́ша въ го́рницы.
бли́з꙽ же сꙋщи ли́дѣ и҆ѻ҆пїи, ѹ҆чн҃цы́ же слы́шавше, ꙗ҆́ко пе́тръ е҆сть в неи, посла́ша дв̂а мꙋ́жа к немꙋ, молѧ́ще, не ѻ҆блени́тисѧ прїити до них̑.
въста́в же пе́тръ, и҆́де с ни́ми е҆гоже пришед̑ша възведо́ша въ го́рницꙋ, и҆ пред̑ста́ша е҆мꙋ вс̂ѧ вдови́ца пла́чюще, и҆ показꙋюще ри́зы и҆ ѻ҆де́жа е҆ли́ка творѧше с ними сꙋщи се́рна.
и҆згнав же во вс̂ѧ петръ, и҆ прекло́нь колѣ́нѣ помоли́сѧ, и҆ ѻ҆бращьсѧ к тѣ́лꙋ рече, тави́ѳа въста́ни.
ѻ҆на же ѿве́рзе ѻ҆́чи свои, и҆ видѣ́вши петра, сѣде подав же е́й рꙋ́кꙋ, въставї ю҆̀ призва́в же ст҃ыѧ и҆ вдови́ца, поста́вї ю҆̀ живꙋ ѹ҆вѣ́дано же бысть с̂е по всеи і҆ѻ҆пїи, и҆ мно́ѕи вѣ́роваша въ г҃а·

бы́сть же дн҃и доволны пребыти е҆мꙋ въ и҆ѻ҆пїи, ѹ҆ нѣ́кое҆го си́мона ѹ҆смарѧ̀·

Глв̑҇а, і҃·

зач̑҇ к҃д·

Мꙋ́жъ же нѣ́кїи б̂ѣ въ кесарїи, и҆менемъ корни́лїе, со́тник̑҇.
ѿ спи́ры нарицающаѧсѧ италїйскїа.
бл҃гоговѣи҆нъ, и҆ боѧ҆сѧ б҃а съ всѣмъ до́мом̑ своим̑.
творѧ же млс̑҇тынѧ мно́гы лю́демъ, и҆ молѧ́сѧ б҃ꙋ всегда̀.
видѣ̀ въ видѣнїи ꙗ҆́вѣ, ꙗ҆́ко в ча́съ девѧ́тыи дн҃е, а҆гг҃ла бж҃їа съшед̑ша к немꙋ, и҆ рекша е҆мꙋ.
корни́лїе.
ѻ҆́н же възрѣв꙽ нань, и҆ пристра́шенъ бы́въ, речѐ.
что ес̑҇ г҃и;
рече же е҆мꙋ.
мл҃твы твоа и҆ ми́лостынѧ твоѧ̀, възыдо́ша на па́мѧть прд̑е бг҃омъ.
и҆ нн҃ѣ послѝ въ і҆ѻ҆пїю мꙋ́жа и҆ призовѝ си́мона нарица́емаго петра̀.
се́й страничьствꙋет꙽ ѹ҆ нѣ́коего си́мона ѹ҆смарѧ̀.
е҆мꙋже е҆сть хра́мъ при́ мори.
то́и речетъ тебѣ гл҃ы, в них̑же сп҃си́шисѧ̀ ты̀ и҆ вес̑҇ дом̑ твоѝ.
и҆ ꙗ҆́коже ѿи́де а҆гг҃лъ гл҃ѧи корнилїю, пригласи́въ дв̂а ѡ ра́бъ своих̑, и҆ во́и҆на бл҃гочьсти́ва ѿ слꙋжа́щих꙽ е҆мꙋ̀.
и҆ сказа́въ и́мъ вс̂ѧ, посла̀ и́хъ въ і҆ѻ҆пїю·

Въ ѹ҆трѣи же и҆дꙋщемъ им̑ по пꙋтѝ, и҆ къ́ градꙋ приближа́ющим̑сѧ, взы́де пе́тръ на го́рницꙋ помоли́тисѧ, въ ча́съ шестыи.
бы́сть же приа҆́лченъ, и хотѧше вкꙋсити, гото́вѧщем же ѻ҆нѣмъ нападѐ нань ѹ҆́жасъ, и҆ видѣ нб҃о ѿвр́ьсто, и҆ сходѧ́щь нань съсꙋд꙽ нѣ́кїи ꙗ҆́ко плащени́цꙋ вели́кꙋ, ѿ четыри кра́ѧ привѧ́занъ, и҆ ни́зꙋ висѧ́щь на́ землю, въ не́мже бѧ́хꙋ вс̂ѧ четвероно́га зем̑лѝ, и҆ ѕвѣ́рїе, и҆ га́ди, и҆ пти́ца нбс̑҇ныа и҆ бы гла́съ к немꙋ̀, въста́въ петре заколѝ, и҆ ꙗ҆́ждь.
пе́тръ же рече, ника́коже г҃и.
ꙗ҆́ко николи́же ꙗ҆до́хъ всѧ́ко скве́рно и҆л̂и нечи́сто·

И с̂е гла́съ па́ки к немꙋ̀ втори́цею ꙗ҆́же б҃ъ ѻ҆чи́стилъ е҆сть, ты не скверны̀.
се́ же бы́сть трищи.
и҆ па́кы взѧт̑сѧ съсꙋд꙽ на́ нб҃о·

Ꙗ́коже в себѣ дивлѧ́шесѧ петръ, что̀ ѹ҆бо бꙋдет꙽ видѣнїе е҆же видѣ, и҆ с̂е мꙋжїе по́сланїи ѿ корни́лїа въпро́ш꙽ше, и҆ ѹ҆вѣ́дѣвше до́мꙋ си́монова, ста́ша пред̑ враты̀, и҆ въз꙽гла́ш꙽ше въпроша́хꙋ, а҆ще си́монъ, нарица́емыи петръ зд̂ѣ ѻ҆бита́етъ.
петрꙋ́ же помышлѧ́ющꙋ ѻ҆ видѣ́нїи, речѐ е҆мꙋ дх҃ъ, с̂е мꙋжїе и҆́щꙋтъ тебѐ, н̂о въставъ сни́ди, і҆ и҆дѝ с ними, ничто́же раз꙽сꙋжа́ѧ, занѐ а҆́зъ посла́хъ и҆хъ·

зач̑҇ к҃е·

Съшед̑ же петръ к мꙋже́мъ и҆ речѐ.
с̂е а҆зъ е҆ссмь е҆гоже и҆щете·

Чт̂о ес̑҇ вина̀, е҆ѧ҆же ра́ди прїидо́сте;
ѻ҆ни́ же реко́ша,<.>

Корни́лїе со́тникъ, мꙋж꙽ пра́веденъ и҆ боѧ́сѧ б҃а, Свѣдѣтел̑҇ствованъ ѿ всего̀ ꙗ҆зы҆ка і҆ѹ҆де́ска·

Гл҃ано бы́сть е҆мꙋ ѿ а҆́гг҃ла ст҃а, призва́ти т̂ѧ в домъ свои,<.>

И҆ слы́шати гл҃ы ѿ тебѐ, призвав꙽ же их̑ ѹ҆чредѝ·

На ѹ҆трѣи҆ же пе́тръ въстав̑҇ и҆де с ни́ми.
и҆ нѣцыи ѿ бра́тїа е҆же ѡ і҆ѻ҆пїи и҆до́ша с нимъ·

И҆ на ѹ҆трѣи внидо́ша въ кесарїю.
корни́лїе же б̂ѣ чаѧ и҆хъ съзва́въ срод̑ники своѧ, и҆ любез̑ныа дрꙋги·

Ꙗ҆коже бы́сть вни́ти петрꙋ, срѣте е҆го корни́лїе, падъ на́ ногꙋ е҆го поклони́сѧ·

Пе́тръ же е҆го въз꙽дви́же гл҃ѧ,<.>

Въста́ни, и҆ а҆зъ са́мъ чл҃къ е҆смь·

и҆ с нимъ бесѣ́дꙋѧ́ вни́де, и҆ ѻ҆брѣте събра́вшасѧ мно́ги,<.>

Рече́ же к ни́мъ, в̂ы вѣ́сте, ꙗ҆ко не лѣпо е҆сть мꙋжꙋ і҆ѹ҆де́ѧнинꙋ, Прилѣплѧ́тисѧ и҆л̂и приходи́ти и҆́ноплеме́нникꙋ·

И мн̂ѣ б҃ъ показа̀, ни е҆ді́ного же скве́рна и҆л̂и нечи́ста гл҃ати чл҃ка, тѣмже и҆ без꙽ сꙋмнѣнїѧ прїидо́хъ призва́нъ.
въпроша́ю в̂ы, ѹ҆бо ко́им̑ словом̑ посла́сте по мене;

И҆ корнилїе рече.
ѿ четве́ртаго дн҃е да́же до сего часа̀ бѣхъ постѧ́сѧ, и҆ в девѧ́тыи часъ молѧхъсѧ въ домꙋ̀ мое҆мъ.
и҆ с̂е мꙋжъ ст̂а предо мно́ю въ ѻ҆де́жи свѣтлѣ·

И҆ речѐ, корни́лїе, ѹ҆слы́шана бы́сть мл҃тва твоѧ́ и҆ млс̑҇ты́нѧ твоѧ̀.
помѧнꙋшасѧ пред̑ бг҃ом̑,<.>

Послѝ ѹ҆́бо въ і҆ѻ҆пїю, и҆ призовѝ си́мона, и҆же нарица́етсѧ пе́тръ, се́й ѻ҆бита́етъ в домꙋ̀ си́мона ѹ҆смарѧ̀, близ̑ морѧ, и҆же пришед̑ гл҃етъ теб́ѣ.
а҆бїе ѹ҆бо послах̑ к тебѣ̀.
ты же добрѣ сътворѝ пришед̑·

Нн҃ѣ ѹ҆бо вс̂и м̂ы пред̑ бг҃омъ прїидо́хомъ, слы́шати вс̂ѧ повелѣнаѧ тебѣ ѿ бг҃а·

зач̑҇ к҃ѕ·

Ѿве́рзъ же пе́тръ ѹ҆ста̀ рече, по и́стинѣ разꙋмѣваю, Ꙗ́ко не на лица зритъ б҃ъ.
н̂о въ всѧ́комъ ꙗ҆́зы́цѣ боѧ́исѧ е҆го и҆ дѣ́лаѧѝ правд̑ꙋ, прїѧ́тен̑҇ е҆мꙋ е҆сть·

Сло́во е҆же посла̀ сн҃омъ і҆ил҃евомъ, бл҃говѣствꙋѧ ми́ръ і҆с҃ хм҃ъ, се́й е҆сть всѣмъ г҃ь·

в̂ы вѣсте гл҃ъ бы́вшїи по все́и і҆ѹ҆де́и,<.>

Наче́нъ ѿ галиле́а, по кр҃щенїи е҆же проповѣ́да і҆ѻ҆а́ннъ,<.>

І҆с҃а и҆же ѿ назаре́та, ꙗ҆ко пома́за е҆го б҃ъ дх҃омъ ст҃ым꙽ и҆ си́лою, и҆же прїиде бл҃годѣтельствꙋѧ, і҆ и҆сцѣлѧ́ѧ вс̂ѧ наси́лованныѧ ѿ дїѧ́вола, Ꙗ́ко бг҃ъ бѧ́ше с нимъ.
и҆ м̂ы е҆смы свѣдѣтеле всѣмъ, и҆́хже сътворѝ въ странѣ і҆ѹ҆де́истѣи, и҆ въ і҆е҆рс̑҇ли́мѣ,<.>
Є҆гоже и҆ ѹ҆би́ша повѣш꙽ше на́ древѣ.
сего б҃ъ възд̑виже тре́тїи дн҃ь,<.>

И҆ даде е҆мꙋ ꙗ҆́вѣ бы́ти не всѣмъ лю́демъ, н̂о свѣдѣтелемъ прежде нареченным̑ ѿ б҃а намъ,<.>

И҆ же ꙗ҆́дохомъ с нимъ и҆ пихомъ по въскр҃се́нїи е҆го ѿ мр҃твых̑.
и҆ повелѣ намъ проповѣ́дати лю́дем̑, и҆ засвѣдѣтельствовати, Ꙗ́ко то́и е҆сть нарече́нныи ѿ б҃а сꙋдїѧ живы́мъ и҆ ме́рътвымъ·

ѻ҆ семъ вс̂и прро̑҇цы свѣдѣтельствꙋють, ѻ҆ставленїе грѣхомъ прїѧ́ти и҆́менемъ е҆го всѧ́комꙋ вѣрꙋю҆щемꙋ во́нь·

зач̑҇ к҃з·

Є҆́ще́ же гл҃ющꙋ петрꙋ̀ гл҃ы сїѧ, нападѐ дх҃ъ ст҃ыи на всѧ̀ слы́шащаѧ̀ сло́во,<.>

И҆ ѹ҆жасо́шасѧ и҆́же ѿ ѻ҆брѣзанїа вѣрнїи, е҆ли́цы прїидо́ша с петром̑, ꙗ҆́ко и҆ въ ꙗ҆́зы́цѣхъ да́ръ ст҃аго дх҃а и҆злїѧ́сѧ.
слы́шахꙋ бо и҆хъ гл҃юща ꙗ҆зы́кы и҆ велича́юща б҃а·

Тогда ѿвѣща петръ.
е҆да во́дꙋ възбрани́ти мо́жетъ кт̂о, е҆же не крс̑҇ти́тисѧ сим꙽ и҆же дх҃ъ ст҃ыи прїа҆ша ꙗ҆коже и҆ м̂ы;
повелѣ же и҆мъ крс̑҇ти́тисѧ.
въ и́мѧ гс̑҇дне тогда̀ моли́ша е҆го пребы́ти дн҃и нѣ́кыѧ·

Глв̑҇а, а҃і·

Слы́шашѧ же апс̑҇ли, и҆ братїѧ сꙋ́щїи въ і҆ѹ҆де́и, ꙗ҆ко и҆ ꙗ҆́зы́цы прїѧ́ша сло́во бж҃їе·

и҆ е҆гда взы́де пе́тръ въ і҆е҆рс̑҇лим̑, препира́хꙋсѧ с нимъ и҆же ѿ ѻбрѣзанїѧ, гл҃юще, Ꙗ҆́ко к мꙋже́мъ ѻ҆брѣ́занїѧ не и҆мꙋ́щимъ вни́де и҆ ѧ҆дѐ с ни́мѝ·

Наче́н же пе́тръ, сказаше и҆мъ по́ рѧдꙋ, гл҃ѧ·

А҆зъ бѣхъ въ́ градѣ и҆ѻ҆пїистемъ молѧ́сѧ,<.>

И҆ видѣхъ въ ѹ҆жасѣ видѣнїе, съходѧ́щъ съсꙋ́дъ нѣ́кїи ꙗ҆́ко плащани́цꙋ ве́лїю ѿ четы́ри краѧ ви́сѧщꙋ с н҃бс꙽, и҆ прїиде даже до менѐ, в ню́же възрѣвъ сматрѧ́хъ, и҆ видѣхъ четвероно́гаѧ, и҆ звѣ́рѧ земныѧ и га́ды и҆ пти́ца нбс̑҇ныа·

И҆ слы́шахъ глас̑҇ гл҃ющь мн̂ѣ, въставъ пе́тре заколѝ, и҆ ꙗ҆́жд̑ь,<.>

Рѣ́хъ же, ника́коже г҃и, ꙗ҆́ко всѧ́ко скве́рно л̂и нечи́сто николи́же вни́де въ ѹ҆ста моа̀·

ѿвѣща́ же ми гла́съ втори́цею с нб҃се гл҃ющь, ꙗ҆же б҃ъ ѻ҆чистѝ, т̂ы не сквернѝ.
с̂е же бы́сть трети́цею, и҆ па́кы взѧ́шасѧ вс̂ѧ на́ нб҃о·

И҆ с̂е а҆́бїе трїе мꙋжие ста́ша пред̑ хра́миною, въ не́иже бѣхъ, посла́ни ѿ кесарїѧ къ мн̂ѣ.
реч̑҇ же ми дх҃ъ и҆тѝ с ни́ми, ничто́же разсꙋжа́а·

Прїидо́шѧ же съ мною и҆ ше́сть братїа сїѝ, и҆ внидо́хомъ в домъ мꙋ́жа.
сказа же намъ, како видѣ̀ а҆́гг҃ла ст҃а в домꙋ своемъ, ста́вша и҆ ре́кша е҆мꙋ, послѝ въ і҆ѻ҆пъ мꙋжа, и҆ призовѝ си́мона нарица́е҆маго петра̀, и҆же речетъ гл҃ы к тебѣ, в них̑же сп҃се́шисѧ т̂ы и҆ весь до́мъ твои·

внегда же начах̑ гл҃ати, нападѐ дх҃ъ ст҃ыи на нихъ, ꙗ҆́коже и҆ на н̂ы въ началѣ·

помѧнꙋх́ же гл҃ъ гн҃ь, ꙗ҆́коже гл҃аше·

і҆ѻа́нн꙽ ѹ҆бо крс̑҇ти въдою, в̂ы же и҆́мате крс̑҇титисѧ дх҃ом꙽ ст҃ым̑·

да а҆́ще ѹ҆́бо равен꙽ даръ даде и́м꙽ б҃ъ, ꙗ҆́коже и҆ нам꙽ вѣровавшимъ въ г҃а і҆с҃а х҃а, а҆́з же кт̂о бѣхъ си́ленъ въз꙽бранити бг҃а;

Слы́шавше же сїѧ̀ ѹ҆молкоша, и҆ сла́влѧхꙋ б҃а, гл҃юще, ѹ҆бо і҆ ꙗ҆зы́комъ б҃ъ покаа҆нїе дасть въ животъ·

зач̑҇ к҃и·

ѻ҆ви же ѹ҆бо разсѣѧни быша ѿ с́корби бы́вшаѧ при стефа́нѣ, прои҆доша до фѷникїѧ, и҆ кѷпра, и҆ а҆нтиѻ҆хїа, ни е҆ді́номꙋ же гл҃юще сло́ва, токмо е҆ді́нѣмъ і҆ѹ҆де́ѻмъ·

Бѧ́хꙋ же нѣцыи ѿ ни́хъ мꙋжїе кѷпрьстїи, и҆ кѷрине́йстїи, и҆же вшед̑ше въ а҆нтїѻ҆хїю, гл҃ахꙋ къ е҆́ллином꙽, бл҃говѣствꙋюще г҃а і҆с҃а.
и҆ б̂ѣ рꙋка̀ гн҃ѧ с ними,<.>

Мно́го же число̀ вѣ́ровавше, ѻ҆брати́шасѧ къ г҃ꙋ.
слы́шано же бы́сть сло́во въ ѹ҆шїю цр҃кве, сꙋщей же въ і҆ерс̑҇ли́мѣхъ ѻ҆ нихъ, и҆ посла́ша варна́вꙋ преити до антїѻ҆хїѧ́.
и҆же пришедъ, и҆ видѣвъ блгд̑ть бж҃їю, възра́довасѧ, и҆ молѧ́ше всѣхъ и҆зволе́нїе҆мъ срд̑ца терпѣти ѻ҆ г҃ѣ, ꙗ҆́ко б̂ѣ мꙋжъ бл҃гъ, і҆ и҆спол̑҇нь дх҃а ст҃а и҆ вѣ́ры.
и҆ приложи́сѧ наро́дъ многъ гв҃и·

И҆зы́де же въ та́рсъ варна́ва, възыскати са́вла.
и҆ ѻ҆брѣтъ е҆го, приведе и҆̀ въ ан̑҇тїѻ҆хїю.
бы́сть же и҆мъ лѣто цѣ́ло събра́тисѧ въ цр҃кви, и҆ ѹ҆чи́ти народ꙽ мно́гъ, нарещи́ же прежд̑е въ а҆нтїѻ҆хїѝ ѹ҆чн҃кы хрїстїа҆́ны·

Въ ты́ѧ҆ же дн҃и снидо́шасѧ ѿ і҆ерс̑҇ли́ма про̑҇ро́цы въ а҆нтїѻ҆хїю.
въста́в же е҆ді́нъ ѿ них꙽ и҆́менем̑ а҆га́въ, назна́менаше дх҃омъ, глад꙽ вели́къ хотѧ́щъ бы́ти по все́и вселе́ннѣи.
и҆же и҆ бысть при клавдїѝ ке́сари·

Ѹ҆чн҃кы́ же, а҆ще и҆мѣ́аше кт̂о.
повелѣша ко́ждо их̑ на слꙋжбꙋ посла́ти живꙋ́щимъ въ і҆ѹ́деѝ бра́тїѧ҆мъ, е҆же и҆ сътвори́ша, посла́вше къ ста́рцем̑ рꙋкою варна́влею и҆ са́влею·

Глв̑҇а, в҃і·

зач̑҇ к҃ѳ·

Въ ѻ҆́но же вре́мѧ, възложѝ и҆́род ц҃ръ рꙋцѣ, ѻ҆зло́бити нѣкїѧ и҆же ѿ цр҃кве·

Ѹ҆би́ же і҆а́кова брата і҆ѻ҆а́ннова мечемъ·

И҆ видѣвъ ꙗ҆́ко го́дѣ е҆сть і҆ѹ҆де́ѻмъ приложѝ ꙗ҆́ти и҆ петра̀·

Бѣхꙋ же дн҃їе ѻ҆прѣсночнїи, е҆гоже и҆ е́мъ, всадѝ въ темни́цꙋ.
предавъ четы́ремъ четвери́цамъ во́и҆номъ стрещѝ е҆го,<.>

Хотѧ по па́сцѣ и҆звести е҆го к лю́демъ.
и҆ ѹ҆бо петра̀ стрежа́хꙋ въ темни́цы.
молитва же б̂ѣ прилѣ́жна быва́ема ѿ цр҃кве къ б҃ꙋ ѻ҆ немъ·

Є҆гда же хотѧ́ше е҆го и҆звестѝ и҆́родъ, в нощи той б̂ѣ петръ сп̂ѧ междꙋ̀ дв̂ѣма во́и҆нома,<.>

Свѧ́занъ ѹ҆́жема желѣ́знома двѣма̀, стра́жїе пред̑ две́рми стрежа́хꙋ темни́цꙋ·

И҆ с̂е а҆́гг҃лъ гн҃ь прїиде, и҆ свѣтъ въсїѧ въ хра́минѣ·

Тлъкнꙋв же въ ре́бра петра̀ въздвиже е҆го гл҃ѧ, въстани въскорѣ·

и҆ спадоша е҆мꙋ ѹ҆́жа желѣзнаа с рꙋ́кꙋ.
реч̑҇ же а҆гг҃лъ к немꙋ, препоѧ҆́шисѧ, и҆ въстꙋпѝ въ плесни́цы своѧ̀.

Сътвори же тако.
и҆ гл҃а е҆мꙋ, ѻ҆блецысѧ въ ри́зꙋ свою и҆ послд̑ѣствꙋй м̂и·

І҆ и҆зшед̑ въ слд̑ѣ и҆дѧше е҆го, и҆ не вѣ́дѧше ꙗ҆ко и́стинна ес̑҇ бы́вшее ѿ а́гг҃ла,<.>

Мнѧ́ше же со́нъ зрѣти.
прошед̑ше же пр́ъвꙋю стра́жꙋ и҆ вторꙋ́ю, прїидо́ста въ врата желѣ́знаѧ въводѧ́щаѧ въ грд̑а, ꙗ҆́же ѻ҆ себѣ ѿверзо́шасѧ и́ма·

І҆ и҆зшед̑ше преи҆доша стогнꙋ е҆ді́нꙋ.
и҆ а́бїе ѿстꙋпѝ а҆́гг҃лъ ѿ него·

И҆ пе́тръ бы́въ въ себѣ, рече.
нн҃ѣ вѣмъ въи҆́стиннꙋ, ꙗ҆́ко посла̀ б҃ъ а҆гг҃ла свое҆го і҆ и҆зѧ́тъ м̂ѧ и҆з рꙋки и҆́родовы, и҆ всего чаѧ́нїѧ людїи і҆ѹ҆де́йскыхъ·

зач̑҇ л҃·

Смо́трь же, прїиде в домъ ма́рїинъ, ма́тере і҆ѻ҆а́нновы, нарица́емаго ма́рка,<.>

И҆дѣже бѣхꙋ мно́ѕи събрани, и҆ молѧ́щесѧ.
тлъкнꙋ́вшꙋ же петрꙋ въ врата̀ дворꙋ.
пристꙋпѝ рабы́ни слы́шати, и҆́менемъ родїи.
и҆ позна́вши гласъ петро́въ, ѿ ра́дости не ѿвр́ьзе вратъ,<.>

Прите́кши же сказа̀ петра пред̑ враты стоѧ҆ща.
ѻ҆ни же к неи рѣша,<.>

Бѣснꙋе҆ши ли сѧ;
ѻ҆на же креплѧ́шесѧ тако быти·

ѻ҆ни же гл҃ахꙋ, а҆гг҃лъ е҆го е҆сть.
петръ же пребываше тлъкїи.
ѿвр́ьзше же видѣша е҆го, и҆ ѹ҆жасо́шасѧ·

Помаа́въ же им̑ рꙋкою́, молча́ти, сказа̀ им̑, како г҃ь е҆го и҆зведе и҆с темни́цы.
рече же, възвѣсти́те і҆а́ковꙋ, и҆ бра́тїѧмъ сїѧ̀.
і҆ и҆зшедъ и҆́де въ и́но мѣсто·

Бы́вшꙋ же дн҃и, б̂ѣ мо́лва не ма́ла въ во́и҆нѣхъ,<.>

Чт̂о ѹ҆бо петрꙋ бы́сть.
и҆́род же пои҆скавъ е҆го, и҆ не ѻ҆брѣтъ, и҆ і҆стѧза́въ стра́жїи, повелѣ ѿвести и҆хъ.
и҆зшед̑ ѿ и҆ѹ҆де́а в кесарїю́ живѧ́ше·

Бѣ же і҆́родъ гнѣ́ваѧсѧ на ти́рѧны и҆ сидо́нѧны·

е҆ді́нодꙋшно же прїидо́шѧ к немꙋ̀, и҆ ѹ҆моли́вше вла́ста посте́лника царева, проша́хꙋ ми́ръ да быша пита́лисѧ страны их̑ ѿ црс̑҇тва е҆го.
въ нарочит̑ же дн҃ь ѻ҆блъкъсѧ і҆родъ въ ѻ҆дежꙋ ца́рьскꙋ,<.>

И҆ сд̑ѣ на сꙋдищи пред̑ народом̑ съ гордостию гл҃аше к ним̑.
наро́дъ же възглашаше, гласъ бж҃їи а҆ не чл҃чь.
внеза́пꙋ же поразѝ е҆го а҆гг҃лъ гн҃ь, зане не дадѐ сла́вꙋ б҃ꙋ.
и҆ бывъ чер꙽вми и҆зъѧ҆денъ, и҆здъше.
и҆ сло́во бж҃їе растѧше и҆ мно́жашесѧ·

зач̑҇ л҃а·

Варна́ва же и҆ са́влъ въз꙽врати́стасѧ въ і҆ерс̑҇ли́мъ сконча́вше слꙋ́жбꙋ·

Пое҆мше же съ собою і҆ и҆ѻ҆а́нна нарица́емаго ма́рка·

Глв̑҇а, г҃і·

Бѧ́хꙋ же нѣ́цыи въ а҆нтїѻ҆хїи сꙋщей цр҃кви, проро́цы и҆ ѹ҆чи́теле,<.>

Варнава́ же и҆ симеѻн̑҇ нарица́емыи ни́геръ, и҆ лꙋкїе киринеанинъ, манаи҆нъ же и҆родꙋ четвертовла́стникꙋ дрꙋгъ, І҆ с́авлъ.
слꙋжа́щим же и҆́мъ гв҃и, и҆ постѧ́щимъсѧ, рече дх҃ъ ст҃ыи, ѿдѣлите м̂и варнавꙋ и҆ савла на дѣло, на неже призвахъ и҆хъ.

Тогда пости́вшесѧ и҆ помолившесѧ, и҆ възлож̑ше рꙋ́ки на́ нѧ, послаша их̑·

Сїа ѹ҆́бо по́слана бывша ѿ дх҃а ст҃а, снидо́ша въ селевкі́ю·

ѿтꙋ́дꙋ же ѿплы́ша въ ки́пръ.
и҆ бывше въ салами́нѣ, възвѣща́хꙋ сло́во бж҃їе на со́нъмищихъ і҆ѹ҆де́искихъ.

И҆мѣ́ста же і҆ѻ҆а́нна слꙋгꙋ.
прошед̑ша же ѻ҆́стров̑҇ да́же до па́фа, ѻ҆брѣто́ста же нѣ́кое҆го мꙋжа вол꙽хва л꙽жепророка і҆ѹ҆де́анина е҆мꙋже и҆мѧ вар и́и҆сꙋсъ, и҆же бѣ съ а҆нѳипа́томъ се́ргїе҆мъ па́вломъ мꙋжемъ разꙋ́мным̑·

Се́и́ призвав꙽ варна́вꙋ и҆ са́вла, взыска̀ ѹ҆слы́шати сло́во бж҃їе·

Противлѧ́ше же сѧ им̑ е҆лли́ма влъ́хвъ, тако б̂о сказает̑сѧ и҆́мѧ е҆го.
и҆скїи раз̑врати́ти а҆нѳипа́та ѿ вѣры·

Са́влъ же, и҆же и҆ па́велъ и҆спо́лънисѧ дх҃а ст҃а, и҆ възрѣвъ нань, рече·

ѽ и҆спо́лънене всѧ́коѧ̀ льсти и҆ всѧкоѧ̀ зло́бы, сы́не дїаволовъ, вра́же всѧ́коа пра́вды, не преста́е҆ши ли раз̑враща́ѧ пꙋтѝ гн҃ѧ пра́выѧ;
и҆ нн҃ѣ с̂е рꙋка гн҃ѧ на́ тѧ, и҆ бꙋдеши слѣпъ, не видѧ сл҃нца до́ времене, и҆ вънеза́пꙋ нападе нань мра́къ и҆ т̂ма, и҆ ѻ҆сѧза́ѧ и҆скаше вожда·

Тогда̀ видѣвъ а҆нѳѷпатъ бы́вшее, вѣ́рова, дивѧ́сѧ ѻ҆ ѹ҆че́нїи гн҃и·

зач̑҇ л҃в·

Ѿвез̑ше же сѧ ѿ па́фа сꙋщїѝ съ па́влом̑, прїидо́ша въ пергїю памфилїискꙋю·

І҆ѻ҆аннъ же ѿлꙋчи́всѧ ѿ нею, възъврати́сѧ въ і҆ерс̑҇ли́мъ.
ѻ҆на же прошед̑ша ѿ пергїи, прїидо́ста въ а҆нтїѻ҆хі́ю писидїискꙋю,<.>

И҆ вшед̑ше въ со́нмище въ дн҃ь сꙋбо́тныи, сѣдо́ста·

По чте́нїи же зако́на и҆ прро̑҇къ, посла́ша нача́лницы со́нмища к ним̑, гл҃юще,<.>

Мꙋ́жїе бра́тїа, а҆ще е҆сть сло́во въ васъ ѹ҆тѣшенїѧ къ лю́демъ, гл҃ита·

Въста́в же па́велъ, и҆ помаа́въ рꙋкою, рече·

мꙋ́жїе і҆ил҃ьтѧне, и҆ боѧ́щеѝсѧ б҃а, ѹ҆слы́шите.
б҃ъ людїи сихъ, и҆збра̀ ѿц҃а на́шѧ, и лю́ди възнесѐ въ прише́льствїи въ земли е҆гѵ́пет̑стѣи·

И҆ съ мы́шцею высо́кою и҆зведе и҆хъ и҆з неѧ̀, и҆ до четы́ридесѧть лѣт꙽ препита и҆хъ въ пꙋсты́ни·

И҆ низложи́въ ꙗ҆́зыкъ седмь, въ земли ханаа́ньстѣи, даде им̑ въ наслѣ́дїе землю и҆хъ·

И҆ по си́хъ ꙗ҆́ко лѣтъ четы́рист̂а и҆ пѧт̑десѧть, дадѐ и҆мъ сꙋдїѧ до самꙋ́ила прро̑҇ка·

И҆ ѿтꙋдꙋ проси́ша цр҃ѧ, и дадѐ и҆мъ б҃ъ саѹ҆́ла сн҃а ки́ссова, мꙋжа ѿ колѣна вениа҆ми́нова, лѣт꙽ четы́ридесѧ́ть·

И҆ преста́вль е҆го, въздви́же им̑ дв҃да въ цр҃ѧ.
е҆мꙋже и҆ рече свѣдѣтельствовавъ·

ѻ҆брѣтох̑ дв҃да і҆е҆се́ѻ҆ва, мꙋ́жа по́ срд̑цꙋ мое҆мꙋ,<.>

И҆ же сътворит̑ вс̂ѧ хотѣ́нїа моѧ̀.
ѿ сего̀ сѣмени бг҃ъ по ѻ҆бѣтова́нїю, въз꙽дви́же і҆ил҃ю сп҃се́нїе і҆с҃а,<.>

Проповѣ́давшꙋ і҆ѻ҆а́ннꙋ пред̑ лицем̑ внитїа е҆го, кр҃ще́нїе покаа́нїѧ всѣмъ лю́дем̑ і҆ил҃евымъ·

зач̑҇ л҃г·

И҆́ ꙗ҆́коже скон̑҇чава́ше і҆ѻ҆а́ннъ тече́нїе, гл҃аше·

Кого м̂ѧ непщꙋ́ете бы́ти;
нѣ́смь а҆зъ, н̂о сѐ грѧдет̑ по мнѣ, е҆мꙋже нѣ́смь досто́и҆нъ разрѣшити реме́нь сапогꙋ е҆го·

Мꙋ́жїе бра́тїа, сн҃ове ро́да а҆враа́млѧ, і҆ и́же въ васъ боѧ́щейсѧ б҃а,<.>

Ва́мъ сло́во сп҃се́нїа сего посла́сѧ.
живꙋщїѝ б̂о въ і҆ерс̑҇ли́мѣ и҆ кнѧ́ѕи и҆́хъ сего не разꙋмѣ́вше, и҆ гласъ прро̑҇ческих̑ и҆же по всѧ сꙋбо́ты что́мых̑,<.>

Сꙋди́вше сконча́ша, и҆ ни е҆ді́ноѧ̀ вины̀ смр҃тны ѻ҆брѣтше, проси́шѧ ѹ҆ пила́та ѹ҆би́ти е҆го.
ꙗ҆коже сконча́шѧ вс̂ѧ ꙗ҆́же ѻ҆ не́мъ пи́санаа̀, снемше съ́ древа.
положи́ша въ гробѣ,<.>

Бг҃ъ же въскрс̑҇и е҆го ѿ ме́рътвыхъ,<.>

И҆ же ꙗ҆́ви́сѧ на́ дн҃и мно́ги, възшед̑шим꙽ с ним̑ ѿ галиле́ѧ въ і҆ерс̑҇лим̑, и҆же нн҃ѣ сꙋть свѣ́дѣтеле е҆го к лю́дем̑.
и҆ мы вам̑ бл҃говѣствꙋе҆мъ е҆же къ ѿц҃ем̑ ѻ҆бѣтова́нїе бы́вшее, Ꙗ҆́ко сїе бг҃ъ сконча̀ чѧ́домъ и҆хъ, нам̑ въздви́гъ і҆с҃а·

Ꙗ҆́коже и҆ въ ѱалмѣ второмъ пи́шетъ, сн҃ъ мо́и е҆си т̂ы, а҆зъ днес̑҇ родихъ т̂ѧ·

А҆ ꙗ҆́коже въскр҃сѝ е҆го ѿ мр҃твыхъ, не ктомꙋ̀ хотѧ́ща въз꙽врати́тисѧ въ и҆стлѣнїе, си́це реч̑҇, ꙗ҆́ко да́мъ вам̑ преподо́бнаѧ дв҃дова вѣрнаѧ·

Тѣмже и҆ въ дрꙋгом̑ гл҃етъ, не дасѝ прпд̑бномꙋ свое҆мꙋ ви́дѣти и҆стлѣ́нїѧ̀·

дв҃дъ б̂о ѹ҆́бо свое҆мꙋ ро́дꙋ послꙋжи́въ, бж҃їи҆мъ съвѣтом̑ ѹ҆́спе,<.>

И҆ приложи́сѧ къ ѿц҃емъ своим̑, и҆ видѣ и҆стлѣ́нїе.
а҆ е҆гоже б҃ъ възд̑ви́же, не видѣ и҆стлѣнїѧ·

Вѣ́домо ѹ҆́бо да бꙋ́детъ вам̑ мꙋ́жїе бра́тїѧ, ꙗ҆́ко ради сего̀ вамъ ѻ҆ставленїе грѣхов̑҇ проповѣ́дае҆тсѧ, и҆ ѿ всѣхъ, и҆хже не мого́сте в зако́нѣ моѷсе́ѻвѣ ѻ҆правд̑итисѧ, ѻ҆ семъ всѧ́къ вѣ́рꙋѧѝ ѻ҆правд́аетсѧ·

Блюдѣте ѹ҆бо, да не прїидетъ на васъ рече́нное въ прро̑҇цѣхъ·

Видите неради́вїи, и҆ чюди́тесѧ, и҆ ѹ҆зрите і҆ и́сче́знете.
ꙗ҆́ко дѣло а҆зъ съдѣлаю въ дн҃и ваша, е҆мꙋже не и҆́мате вѣ́ровати, а҆ще кт̂о повѣсть вам̑·

И҆сходѧ́щим же им̑ ѿ со́нмища і҆ѹ҆де́иска, молѧ́хꙋ ꙗ҆зы́цы въ дрꙋгꙋю сꙋбо́тꙋ гл҃атисѧ и҆мъ гл҃омъ сим̑·

Раз꙽шед̑шꙋ же сѧ съборꙋ, послѣ́доваша мно́ѕи ѿ і҆ѹ҆де́и и҆ чьсти́вых̑ пришле́ць, па́влꙋ и҆ варнавѣ,<.>

И҆ же гл҃юще им̑, ѹ҆вѣрѧ́хꙋ их̑ пребы́вати въ бл҃годати бж҃їи·

Въ грѧдꙋщꙋю же сꙋботꙋ мало сѧ не ве́сь град̑ събра̀ послꙋшати слово бж҃їе·

Видѣвше же і҆у҆де́е народы, и҆сплънишасѧ за́висти,<.>

И҆ въпреки гл҃ахꙋ гл҃емым̑ ѿ павла,<.>

Съпроти́въ гл҃юще, и҆ хꙋ́лѧще·

дръзнꙋв꙽ша же па́велъ и҆ варна́ва, рекоста.
вам̑ б̂ѣ лѣ́по пр́ьвѣе гл҃ати слово бж҃їе·

а҆ понеже ѿврьго́сте е҆̀.
и҆ недосто́ины творите сами себе вѣчномꙋ животꙋ, с̂е ѻ҆браща́емсѧ въ ꙗ҆зы́ки.
тако б̂о заповѣда намъ г҃ь,<.>

Положихъ т̂ѧ въ свѣтъ ꙗ҆́зы́комъ, еже бы́ти ти въ сп҃се́нїе даже до послѣдъних̑ землѝ·

Слы́шаще же ꙗ҆́зы́цы радовахꙋсѧ.
и҆ славлѧхꙋ слово гн҃е·

И҆ вѣровашѧ е҆лицы ѹ҆чинени бѣхꙋ въ жизнь вѣчьнꙋю·

проношаше же сѧ слово гн҃е по всеи странѣ·

І҆ѹ҆де́е же наѹ҆стиша бл҃гочестивыѧ жены, и҆ бл҃гоѻбраз̑ныѧ и҆ пръвыхъ гражданъ.
и҆ въздвигоша гоненїе велико на па́вла и҆ вар̑҇навꙋ, і҆ и҆з꙽гнашѧ и҆́хъ ѿ предѣлъ своих̑·

ѻ҆на же ѿрѧсше прахъ ѿ но́гъ свои҆хъ на нихъ, прїидо́шѧ въ и҆ко́нїю̀·

ѹ҆ченицы же и҆сплънѧ́хꙋсѧ радости и҆ дх҃а ст҃а·

Глв̑҇а, д҃і·

Бы́сть же въ и҆конїи́ въкꙋпѣ внити им̑ въ со́нмище і҆ѹ҆де́иское, и҆ гл҃ати тако, ꙗ҆ко вѣ́ровати і҆ѹ҆де́ѻмъ же и҆ е́ллином̑ мно́жество много·

Невѣрꙋю҆щїи же і҆ѹ҆де́е, въздвигоша и ѻ҆злобиша дш҃а ꙗ҆́зыком̑ на братїю·

дово́лно же ѹ҆бо вре́мѧ пребышѧ дръза́юще, ѻ҆ г҃ѣ свѣдѣтельствꙋю҆щимъ сло́вꙋ бл҃годати свое҆ѧ̀, и҆ да́ющꙋ зна́менїѧ и҆ чюдеса̀ быти рꙋками и҆хъ·

Раздѣлишѧ же сѧ мно́жество града.
и ѻ́ви ѹ҆б̂о бѧхꙋ съ і҆ѹ҆де́и, ѻ҆ви же съ а҆пс̑҇лы·

и҆ ꙗ҆́коже бысть стромленїе ꙗ҆́зыкомъ же і҆ и҆ѹ҆де́ѻмъ съ начѧлники и҆хъ, досадити и҆ ка́менїе҆мъ побити и҆хъ, ѹ҆вѣдѣвше же·

зач̑҇ л҃д·

Прибѣгоста въ́ грады лѷкаѻ҆́нскїѧ, въ лѷстрꙋ и҆ дервїи, і҆ и҆же въ ѻ҆крестных̑, и҆ т̂ꙋ бѣста бл҃говѣствꙋю҆ще·

И҆ нѣкто мꙋжъ въ лѷстрѣхъ не́мощенъ нога́ма сѣдѧше хро́мъ ѿ чрева матери свое҆ѧ сыи,<.>

И҆ же николиже б̂ѣ ходил̑҇.
се́й слы́шаше па́вла гл҃юща·

Иже възрѣвъ нань, и҆ видѣвъ ꙗ҆́ко вѣрꙋ и҆́мать спс̑҇тисѧ, рече велїим̑ гласом̑ тебѣ гл҃ю, во и҆мѧ і҆с҃а х҃а, въста́ни на ногꙋ свою правъ·

ѻ҆н же а҆́бїе въскочивъ и҆ хожд̑аше·

Народи же видѣв꙽ше е҆же сътвори па́велъ, възд̑вигоша гласъ свои лѷкаѻ́ньски, гл҃юще.

Бо́ѕи ѹ҆подо́бльшесѧ чл҃ком꙽ снидоша к намъ·

Нарицахꙋ же ѹ҆бо варна́вꙋ ді́ѧ, павла же е҆рмїю, понеже то́й бѧше началникъ словꙋ·

Жре́цъ же дїе́въ, сꙋщаго пред̑ градомъ их̑, приведе пред̑ враты ю҆́нца и҆ вѣнца, съ народы хотѧше жрети·

Слы́шавшеж̑ а҆пс̑҇ли, варнава и҆ па́велъ, растръзавше ризы своѧ въско́чиша въ нард̑о, зовꙋще и҆ гл҃юще,<.>

Мꙋжїе чт̂о сїѧ творитѐ и҆ м̂ы подобострастна е҆свѣ̀ вамъ чл҃ка,<.>

Бл҃говѣствꙋю҆ща вамъ, ѿ сих꙽ сꙋетных̑ ѻ҆бращатисѧ къ бг҃ꙋ жи́вꙋ,<.>

И҆ же сътворѝ нб҃о и҆ землю, и҆ мо́ре, и҆ вс̂ѧ ѧж̑ в них̑·

иж̑ въ мимошед̑шаѧ ро́ды ѻ҆ставил̑҇ б̂ѣ вс̂ѧ ꙗ҆́зыки ходити въ пꙋти своа, и҆де ѹ҆́бо не несвѣдѣтельствована себѐ ѻ҆стави бл҃готворѧ̀, съ нб҃се вамъ дождевы даѧ̀, и҆ вре́мена плодоносна, насыщаѧ пи́ща и҆ веселїѧ срд̑ца наша·

И҆ сїѧ гл҃юще, е҆́два ѹ҆ста́виста народы не жрети и҆́ма.
н̂о ѿи҆ти комꙋ́ждо въ своа с̂и·

Пребыва́ющема же и҆́ма и҆ ѹ҆чѧ́щема.
прїидоша же ѿ а҆нтїѻ҆хїѧ і҆ и҆конїа, нѣцыи і҆ѹ҆де́е, и҆ стѧзаю҆щемасѧ и҆́ма съ дръзновенїе҆мъ·

Наѹ҆сти́ша народи ѿстꙋпи́ти ѿ нею, гл҃юще, ꙗ҆ко ничтоже гл҃ета и҆́стинно, н̂о вс̂е лже́та·

И҆ наѹ҆сти́вше народы, и҆ ка́менїем̑ поби́вше па́вла, и҆звлеко́ша внѣ гра́да, мнѧще е҆го ѹ҆мерша.
ѻ҆́крестъ же ставшем̑ его ѹ҆чн҃ком̑, въстав̑҇ вниде въ́ град̑·

зач̑҇, л҃е·

И҆́ наѹ҆трѣи и҆зыде съ варна́вою въ дервїю.
бл҃говѣствова́вше же градꙋ томꙋ, и҆ наѹ҆чи́вше мно́ги, възврати́стасѧ въ ли́стрꙋ і҆ и҆конїю́ и҆ а҆нътиѻ҆хїю, ѹ҆твержа́юще дш҃а ѹ҆ченикомъ, молѧ́ще пребыти въ вѣрѣ,<.>

И҆ ꙗ҆́ко мно́гими скорбъми подоба́етъ намъ внити въ црс̑҇твїе бж҃їе·

ѻ҆сщ҃ьше же и҆мъ попы на вс̂ѧ цр҃кви,<.>

И҆ помоли́вшесѧ съ постомъ, преда́ша их̑ гв҃и, в негоже вѣ́роваша·

и҆ прошед̑ше писидїю́, прои҆доста в꙽ пам̑филїю.
и҆ гл҃авше в пергїи сло́во гн҃е снїдо́ста въ и҆талїю·

И҆ ѿтꙋ́дꙋ ѿплышѧ въ а҆нтїѻ҆нїю́, ѿнꙋ́дꙋже бѣста предана̀ блгд̑ти бж҃їи въ дѣло е҆же скончаста·

Пришед̑шаж̑ и҆ събра́вшѧ цр҃ковь, сказаста е҆ли́ка сътвори б҃ъ с ни́ма, и҆ ꙗ҆́ко ѿвр́ьзе ꙗ҆́зы́комъ дверь вѣ́ры·

Пребыста же т̂ꙋ вре́мѧ не ма́ло съ ѹ҆ченикы·

Глв̑҇а, е҃і·

И нѣ́цыи съшед̑ше ѿ и҆ѹ҆де́а ѹ҆ча́хꙋ бра́тїю, ꙗ҆́ко а҆ще не ѻ҆брѣ́жетесѧ по ѻ҆бы́чаю моѷсе́ѻ҆вꙋ, не мо́жете спс̑҇тѝсѧ.
бы́вши же ѹ҆бо распрѝ, и҆ стѧза́нїю не ма́лꙋ па́влꙋ и҆ варна́вѣ к нимъ, ѹ҆чиниша взы́ти па́влꙋ и҆ варна́вѣ и҆ нѣ́кымъ дрꙋги́мъ ѿ них̑, къ а҆пс̑҇ломъ и҆ ста́рцемъ въ і҆ерс̑҇ли́мъ, ѻ҆ въпроше́нїи се́мъ.
пред̑по́сланїи же ѿ цр҃кве, прохожа́хꙋ финикїю и҆ самарїю, повѣ́дающе ѻ҆браще́нїе ꙗ҆́зыком̑, и҆ творѧ́хꙋ радость вели́кꙋ всеи бра́тїи·

Пришедъше же въ і҆ерс̑҇ли́мъ, прїа́та быста ѿ цр҃кве и҆ а҆пс̑҇лъ и҆ ста́рецъ, сказа́ста же е҆ли́ка б҃ъ сътворѝ с ни́ма.
и҆ ꙗ҆ко ѿве́рзе ꙗ҆зы́комъ две́ръ вѣ́ры·

зач̑҇, л҃ѕ·

Въста́ша же нѣ́цыи и҆же ѿ е҆́реси фарїсе́искїа вѣ́ровавшеѝ, гл҃юще, ꙗ҆ко подоба́етъ ѻ҆брѣ́зати и҆хъ, завѣщава́ти же и҆ блюстѝ зако́нъ моѷсе́ѻвъ.
събра́ша же сѧ а҆пс̑҇ли и҆ ста́рцы вѣ́дѣти ѻ҆ словесѝ семъ.
мно́гꙋ же взыска́нїю бывшꙋ, въста́въ петръ речѐ к ни́мъ·

Мꙋ́жїе братїе, в̂ы вѣсте, ꙗ҆ко ѿ дн҃їи пе́рвыхъ б҃ъ въ на́съ и҆збра, ѹ҆сты̀ мои́мы ѹ҆слы́шати ꙗ҆зы́комъ сло́во бл҃говѣ́стїа, и҆ вѣ́ровати.
и҆ срд̑цевѣ́децъ б҃ъ свѣдѣтельствова и҆мъ, давъ и҆мъ дх҃ъ ст҃ыи, ꙗ҆́коже и҆ на́мъ, и҆ ничто́же разсꙋдѝ междꙋ на́ми же и҆ ѻ҆нѣми, вѣ́рою ѻ҆чи́щь срд̑ца и́хъ.
нн҃ѣ ѹ҆бо что̀ и҆скꙋша́ете б҃а възложи́ти и҆́го на вы́а ѹ҆чн҃комъ, е҆гоже ни ѿц҃ы на́ши, ни м̂ы възмого́хомъ понестѝ;

Н҆о блгд̑тїю г҃а і҆с҃а х҃а вѣ́рꙋемъ спс̑҇ти́сѧ, ꙗ҆коже и҆ ѻ҆нѝ.
ѹ҆молча́ же вс̂е мно́жество, и҆ послꙋшлхꙋ варнавꙋ и҆ па́вла повѣда́ющих̑ е҆ли́ка сътворѝ б҃ъ зна́менїа и҆ чюдеса̀ въ ꙗ҆зы́цѣхъ с ни́ма.
по ѹ҆молча́нїи же и҆́х꙽, ѿвѣща̀ і҆ꙗ҆́ковъ, гл҃ѧ.
мꙋ́жїе братїе послꙋ́шаите мене.
сѷмеѻ҆́нъ повѣда, ꙗ҆ко пре́жде б҃ъ посѣтѝ прїа́ти ѿ ꙗ҆зы́къ лю́ди ѻ҆ и҆́мени своем꙽.
и҆ семꙋ съгласꙋ́ютъ словеса̀ про̑҇ро́къ, ꙗ҆коже пи́шетъ,<.>

По си́хъ ѻ҆бращꙋ̀сѧ, и҆ съзи́ждꙋ кро́въ двд̑въ па́дшїи.
и҆ раско́панаѧ е҆го съзи́ждꙋ, і҆ и҆спра́влю е҆го, ꙗ҆ко да взы́щꙋтъ про́чїи чл҃цы г҃а, и҆ вс̂и ꙗ҆зы́цы в ни́хъже нарица́етсѧ и҆́мѧ мое на них̑, гл҃етъ г҃ь творѧ́и сїа вс̂ѧ.
разꙋмна ѿ в́ѣка сꙋть бв҃и вс̂ѧ дѣла е҆го.
тѣмже а҆зъ сꙋжд̑ꙋ не стꙋжа́ти и҆же ѿ ꙗ҆́зы́къ ѻ҆браща́ющим̑сѧ къ б҃ꙋ, н̂о заповѣ́дати, и҆м꙽ ѻ҆грѣба́тисѧ ѿ тре́бъ и҆́дольских̑, и҆ ѿ блꙋда, и҆ ѹ҆да́вленины, и҆ ѿ ќрове.
е҆ли́ка не ѹ҆гд̑она себѣ быти и҆нм̑ѣ не твори́ти, моѷсе́и б̂о ѿ родовъ дре́вних̑, по вс̂ѧ гра́ды проповѣдающаѧ е҆го и҆́мать, въ сон꙽мищихъ по всѧ̀ сꙋботы что́мыхъ·

Тогда̀ и҆зво́лисѧ а҆пс̑҇ломъ и҆ ста́рцем꙽, съ всею цр҃ковїю, и҆збра́вше мꙋ́жа ѿ нихъ, посла́ти въ а҆нтїѻ҆хїю, съ па́вломъ и҆ варна́вою, і҆ѹ҆дꙋ нарица́емаго варса́вꙋ,<.>

И҆ си́лꙋ мꙋ́жа наро́читы въ бра́тїи, писа́вше рꙋко́ю свое́ю̀ сїа<.>

А҆пс̑҇ли и҆ ста́рцы и҆ бра́тїа, сꙋщимъ въ ан̑҇тїѻ҆хїи, и҆ сирїи́ и҆ киликїи бра́тїи и҆же ѿ ꙗ҆́зы́къ, ѻ҆́ г҃ѣ ра́доватисѧ·

Поне́же ѹ҆бо слы́шахом̑, ꙗ҆ко нѣ́цыи ѿ насъ и҆зшед꙽ше възмꙋти́ша васъ словесы̀, раз꙽враща́юще дш҃а ва́ша,<.>

Гл҃юще ѻ҆брѣ́затисѧ и҆ блюстѝ закон̑҇, и҆́мже не сложи́хомсѧ.
и҆зво́лисѧ нам̑ бы́вшим̑ е҆дїнодꙋшно и҆збра́вше мꙋ́жа послати к вамъ, съ возлю́бленными нашими варна́вою и҆ па́вломъ,<.>

Чл҃кома и҆же преда́вшема дш҃а своѧ ѻ҆ и҆мени г҃а нашего і҆с҃а х҃а·

Посла́хом̑ ѹ҆бо и҆ѹ҆дꙋ и҆ си́лꙋ, и҆ тѣхъ сло́вомъ сказа́ю҆щихъ та́ѧжде.
и҆зво́ли бо сѧ ст҃омꙋ дх҃ꙋ и҆ нам꙽, ничто́же множа́е възложити вамъ тѧготꙋ̀, ра́звѣ нꙋжныхъ сихъ, ѻ҆грѣба́тисѧ ѿ и́доложе́ртвенныхъ, и҆ кро́ве, и҆ ѹ҆да́вленины и҆ блꙋда̀.
и҆ е҆лика не хощете вам̑ быти, и҆нм̑ѣ не творите.
ѿ них̑же съблюда́юще себе, бл҃го сътворитѐ.
здрав̑҇ствꙋите·

ѻ҆ни́ же ѹ҆бо по́слани бывше, прїидоша въ а҆нтїѻ҆хїю́, и҆ събра́вше народъ, въдаша посла́нїе,<.>

Прочетъше же възра́довашасѧ ѻ҆ ѹ҆тѣшенїи і҆ѹ҆да же и҆ си́ла и҆ т̂а про̑҇ро́ка сꙋща.
словомъ мно́зѣмъ ѹ҆тѣшиста братїю и҆ ѹ҆твердиста.
пребыв꙽ше же лѣто, ѿпꙋщена быста с ми́ромъ ѿ братїа къ а҆пс̑҇ломъ.
и҆зво́ли же сѧ си́лѣ пребыти т̂ꙋ.
і҆ю́да же възврати́сѧ въ і҆ерс̑҇лимъ·

зач̑҇, л҃з·

Па́велъ же и҆ варна́ва живѧста въ а҆нътїѻ҆нїи́, ѹ҆чаще и҆ бл҃говѣствꙋюще съ и́нѣми мно́гыми, слово гн҃е·

По нѣ́ких же дн҃ехъ, речѐ па́велъ къ варна́вѣ.
възвра́щьшесѧ подоба́етъ посѣти́ти братїю на́шꙋ въ всѣхъ градѣхъ в ни́хже проповѣ́дахомъ сло́во гн҃е, ка́ко пребыва́ютъ·

варна́ва же въсхотѣ поѧ́ти съ собою҆ і҆ѻ҆а́нна нарица́емаго ма́рка·

па́вел же велѧше ѿс́тꙋпльшаго ѿ наю ѿ памъфилїѧ, и҆ не шедша с ни́ми на дѣ́ло въ неже положени быша не поѧ́ти сего съ собою·

бысть ѹ҆бо распрѧ̀, ꙗ҆́ко ѿлꙋчи́тисѧ и҆мъ ѿ себѐ.
и҆ варна́ва ѹ҆бо пое҆мъ ма́рка, ѿплы̀ въ кѷпръ·

па́велъ же и҆збравъ силꙋ, и҆зы́де предан̑҇ блгд̑ти бж҃їи ѿ братїа·

прохожад̑ше сирїю и҆ киликїю ѹ҆твержа́а цр҃кви·

Глв̑҇а, ѕ҃і·

Приспѣ же въ де́рвь и҆ листрꙋ, и҆ с̂е ѹ҆чн҃къ нѣ́кїи б̂ѣ т̂ꙋ и҆́менем꙽ тимоѳе́и, сн҃ъ жены̀ нѣ́кїѧ і҆ѹ҆де́анынѧ вѣ́рны, ѿ ѻ҆ц҃а же е́ллина·

и҆же свѣдѣтельствованъ б̂ѣ ѿ сꙋщих꙽ въ лѷстрѣхъ і҆ и҆конїи братїи, сего въсхотѣ̀ па́велъ с нимъ и҆зы́ти·

и҆ прїем꙽ ѻ҆брѣ́за е҆го, за і҆ѹ҆деи сꙋщихъ на мѣстѣхъ ѻ҆нѣхъ·

вѣдахꙋ б̂о вс̂и ѿц҃а е҆го, ꙗ҆́ко е҆́ллинъ бѧше·

и҆ ꙗ҆́коже прохожд̑ахꙋ гра́ды, предаа́ше и҆мъ хранити н꙽равы сꙋжденыа ѿ а҆пс̑҇лъ и҆ ста́рецъ и҆же въ і҆ерс̑҇лимѣ·

цр҃кви же ѹ҆твержа́хꙋсѧ вѣ́рою, и҆ прибыва́хꙋ в число̀ по всѧ̀ дн҃и.
прошедше же фрѷгїю́ и҆ галатїи́скꙋю стра́нꙋ, възбранени быша ѿ ст҃аго дх҃а гл҃ати сло́во въ а҆сїи́.
пришедше же въ мисїю́, покꙋша́стасѧ въ виѳїнїю́ пои҆ти, и҆ не ѻ҆ста́ви и҆хъ дх҃ъ.
прешедше же мисїю́, снидо́ша въ тро́а҆дꙋ.
и҆ видѣнїе въ нощи ꙗ҆́висѧ па́влꙋ.
мꙋ́жъ нѣкїи б̂ѣ македо́нѧнинъ стоѧ̀, молѧ̀ е҆го, и҆ гл҃ѧ.
пришедъ въ македо́нїю помози намъ.
ꙗ҆́коже видѣнїе видѣ, а҆́бїе възыска́хомъ и҆зыти въ македо́нїю, разꙋмѣвше, ꙗ҆́ко приз̑ва́ н̂ы г҃ь бл҃говѣсти́ти и҆мъ.
ѿвезше же сѧ ѿ троа́ды, прїидо́хомъ въ самофра́къ, въ ѹ҆трѣи же въ неа҆по́ль.
ѿтꙋ́дꙋ же въ фїлиппꙋсы, и҆же е҆сть перваѧ̀ часть македо́нїи градъ колонїа́.
бѣхом же в то́мъ градѣ пребыва́юще дн҃и нѣ́кїа.
въ дн҃ь же сꙋбо́тъныи, и҆зыдо́хомъ вн̂ѣ гра́да при рѣцѣ, и҆дѣ́же мнѧ́шесѧ молитвеница быти, и҆ сѣдше гл҃ахомъ събра́в꙽шимсѧ женамъ.
и҆ нѣ́каа жена̀, и҆́менем꙽ лѵ꙽дїа́, порфѷропродалница, града ѳїа҆ти́рскаго чтꙋщи б҃а, слы́шаше.
е́йже г҃ь ѿве́рзе срд̑це, внимати гл҃емымъ ѿ па́вла.
ꙗ҆коже крс̑҇ти́сѧ т̂а и҆ домъ еа̀, ѹ҆моли гл҃ющи, а҆ще смотр́исте м̂ѧ вѣ́рнꙋ гв҃и быти, вшедше в домъ мои пребꙋдите.
и҆ принꙋди насъ·

зач̑҇, л҃и·

Бы́сть же и҆дꙋщимъ нам̑ на мл҃твꙋ, рабыни нѣ́каѧ̀ и҆мꙋщи дꙋхъ пытлив̑҇ срѣте насъ, ꙗ҆́же дѣ́ланїе мно́го даа́ше господемъ свои҆м꙽ въл꙽хвꙋ́ющи.
т̂а послѣ́довавши па́влꙋ и҆ намъ, взыва́ше гл҃ющи.
сїѝ чл҃цы рабѝ бг҃а вы́шнѧго сꙋть, и҆же възвѣща́ютъ намъ пꙋть сп҃се́нїа.
с̂е же творѧ́ше на мно́гы дн҃и, стꙋжив же с̂и павел꙽, и҆ ѻ҆бращьсѧ, дꙋ́хови реч̑҇.
запрѣща́ю т̂и именемъ і҆с҃ х҃а, и҆зыдѝ и҆з неа̀.
і҆ и҆зы́де томъ ча́сѣ.
ви́дѣвше же господїе еа̀, ꙗ҆́ко и҆зы́де наде́жд̑а дѣ́ланїа и҆хъ, пое́мше па́вла и҆ си́лꙋ, привлекоша на то́ргъ къ́ кнѧѕем꙽, и҆ ведше их̑ къ вое҆во́дамъ, рѣша, сїи чл҃цы възмꙋща́ютъ нашъ градъ і҆ѹ҆де́е сꙋще, и҆ завѣщавают̑ ѻ҆бы́чаа̀, ꙗ҆́же не досто́итъ намъ прїима́ти, ни творити ри́млѧномъ сꙋщем꙽.
и҆ сни́десѧ народъ на нихъ и҆ вое҆во́ды растерза́вше и҆мъ ри́ѕы, велѧ́хꙋ па́лицами бити и҆хъ.
мно́гы же да́вше и҆м꙽ ра́ны, въсадиша въ темни́цꙋ.
завѣща́вше темни́чномꙋ стражꙋ твердо стре́щѝ и҆хъ·

ѻ҆́н же завѣща́нїе таково прїе́мъ, всадѝ и҆хъ въ внꙋтренюю темни́цꙋ,<.>

И҆ ногы и҆хъ забѝ въ кладѣ.
въ полꙋнощи же па́вел꙽ и҆ си́ла молѧ́щесѧ поѧста б҃а·

послꙋшахꙋ же и҆хъ ю҆́жни́цы.
внеза́пꙋ же трꙋсъ бысть ве́лїи, ꙗ҆ко поколѣбатисѧ ѻ҆снова́нїю темни́чномꙋ.
ѿверзо́ша же сѧ а҆бїе двери вс̂ѧ, и҆ всѣм꙽ ю҆́зы ѻ҆сла́бѣша·

Възбꙋждь же сѧ темничныи стра́жъ, и҆ видѣвъ ѿве́рсты две́ри темници, и҆звлекъ но́жъ хотѧше себѐ ѹ҆бити, мн̂ѧ и҆збѣгша ю҆́жникы·

въз꙽гласи же гласомъ вели́кымъ па́велъ, гл҃ѧ·

ничто́же сътворѝ себѣ ѕла̀, всѝ б̂о е҆смы зд̂ѣ·

проси́в же свѣща, въскочѝ, и҆ трепетенъ бывъ, припадѐ къ па́влꙋ и҆ си́лѣ·

і҆ и҆зведъ и҆хъ вонъ реч̑҇, господїе, чт̂о м̂и подобает̑ творити, да сп҃сꙋсѧ;
ѻ҆на же реко́ста, вѣрꙋи въ г҃а і҆с҃ х҃а, сп҃сешисѧ т̂ы и҆ вес̑҇ дом꙽ твои·

И҆ гл҃аста е҆мꙋ сло́во гн҃е и҆ всѣмъ и҆же въ домꙋ е҆го.
и҆ пое́мъ их̑ въ то́и часъ но́щїю и҆змы̀ ѿ ра́нъ.
и҆ крс̑҇тисѧ самъ, и҆ своѝ е҆мꙋ вс̂и а҆́бїе·

въвед же и҆хъ въ домъ свои, поста́ви трапе́зꙋ.
и҆ възрадовасѧ съ всм̑ѣ до́момъ свои҆мъ, вѣ́ровавъ б҃ꙋ·

дн҃и же бывшꙋ послаша въе҆во́ды паличники, гл҃юще, ѿпꙋстѝ чл҃ка ѻ́на.
сказа же темни́чныи стражъ словеса̀ сїа па́влꙋ, ꙗ҆́ко посла́ша вое҆во́ды да ѿпꙋщени бꙋдете·

нн҃ѣ ѹ҆бо и҆зшедше и҆дѣта с ми́ром̑;
па́велъ же речѐ к ним̑.
би́вше насъ прд̑е людмѝ, неѻ҆сꙋждена чл҃ка ри́млѧнина сꙋща, въсадиша въ темницꙋ, и҆ нн҃ѣ ѻ҆́таи и҆зво́дѧ насъ;
н̂и ѹ҆бо.
н̂о да пришедша са́ми и҆зведꙋт꙽.
сказаша же па́личницы въе҆водамъ гл҃ы сїа.
и҆ ѹ҆боѧ́шасѧ слы́шавше ꙗ҆́ко ри́млѧнина е҆ста.
и҆ пришедше ѹ҆молиша и҆хъ, і҆ и҆звд̑еше молѧ́хꙋ и҆зыти и҆з града·

і҆ и҆зъшед̑ше же и҆с темни́цы, прїидоша къ лидїи́·

и҆ ви́дѣвше братїю ѹ҆тѣшиша и҆хъ і҆ и҆зыдо́ша·

Глв̑҇а, з҃і·

зач̑҇, л҃ѳ·

Прешед̑ше же а҆мфипо́ль и҆ а҆пол꙽лонїю, вънидо́ста въ селꙋнь и҆дѣже́ б̂ѣ со́нмище і҆ѹ҆де́йское.
по ѻ҆бы́чаю же свое҆мꙋ павел̑҇ въни́де к нимъ,<.>

И҆ по сꙋбо́тахъ трехъ стѧза́шесѧ с ними ѿ писа́нїи, сказа́ѧ̀ и҆ пред̑лага́ѧ̀ им̑, ꙗ҆́ко х҃ꙋ подоба́ше пострада́ти, и҆ въскреснꙋти ѿ мр҃твыхъ, и҆ ꙗ҆́ко се́й е҆сть х҃с і҆с҃, е҆гоже а҆зъ проповѣ́даю вамъ.
и нѣ́цыи ѿ нихъ вѣ́роваша, и҆ приложи́шасѧ къ павлꙋ и҆ си́лѣ·

И҆ ѿ бл҃гочестивых̑ же е҆ллинъ мно́жество же мно́го, же́н же бл҃горд̑оныхъ не ма́ло·

Възревнова́вше же непоко́ршеисѧ і҆ѹ҆де́е, и҆ прїем̑ше то́ржники нѣ́кїа мꙋ́жа ѕл̂ы, и҆ крамолꙋ сътвор̑҇ше мол̑҇вѧхꙋ по́ градꙋ.
пришед̑ше же въ до́мъ и҆а҆ссо́нов꙽, и҆ска́хꙋ и҆хъ и҆звестѝ къ наро́дꙋ.
не ѻ҆брѣтше же и҆х꙽, влеча́хꙋ и҆а҆ссо́на и҆ нѣкїа ѿ братїа къ градона́чалникомъ, въпїюще, Ꙗ҆́ко и҆же вселе́ннꙋю разврати́вше, сїи зд̂ѣ прїидо́ша, и҆́хже прїат̑ и҆а҆ссо́нъ.
и҆ сїи вс̂и проти́вно велѣ́нїем̑ кесаре́вомъ творѧ́тъ, цр҃ѧ гл҃юще и҆ного быти і҆с҃а·

смꙋти́ша же народ̑ и҆ градонача́лникы слы́шащихъ сїа.
и҆ прїе́мше мыто̀ ѿ и҆а҆ссо́на и҆ ѿ про́чих̑ ѿпꙋсти́ша и҆хъ·

Братїа же а҆бїе въ нощи ѿсла́ша па́вла и҆ си́лꙋ въ бе́рь.
и҆же пришед̑ше и҆до́ша въ собо́ръ і҆ѹ҆де́искїи·

сїи же бѧ́хꙋ бл҃город̑нѣиши въ солꙋ́ни, и҆же прїѧша сло́во съ всм̑ѣ ѹ҆се́рдїемъ, по вс̂ѧ дн҃и разсꙋжа́юще писа́нїа, а҆ще сꙋть сїа та́ко·

Мно́ѕи ѹ҆бо ѿ нихъ вѣ́роваша, и҆ ѿ е́ллин꙽скихъ же́нъ бл҃гоѻ҆́бразныхъ, и҆ мꙋже́и не ма́ло·

И҆ ꙗ҆́ко ѹ҆вѣ́даша и҆же ѿ солꙋ́нѧ і҆ѹ҆де́е, ꙗ҆́ко и҆ въ бе́рѣ проповѣ́дасѧ ѿ па́вла сло́во бж҃їе, прїидо́ша и҆ тамо дви́жꙋще народы·

А҆бїеж̑ тогда̀ па́вла ѿпꙋсти́ша братїа и҆тѝ на помо́рїе·

ѻ҆ста́ша же си́ла и҆ тимоѳе́и т̂ꙋ.
провожа́ющеи же павла, ведо́ша е҆го до а҆ѳѷнъ·

И҆ прїе́мше за́повѣдь къ си́лѣ и҆ тимоѳе́ю, да ꙗ҆́ко въско́рѣ прїидꙋтъ к немꙋ, і҆ и҆зыдо́ша·

зач̑҇, м҃·

Въ а҆ѳи́нѣх же ждꙋщꙋ и҆хъ па́влꙋ, раздража́шесѧ дх҃ъ е҆го в немъ зрѧ́щꙋ и҆́долы по́лнъ сꙋщъ градъ·

Стѧза́ше же сѧ ѹ҆бо на со́нмищи съ і҆ѹ҆де́и, и҆ съ честивыми,<.>

И҆ на то́ржищихъ по всѧ̀ дн҃и съ приключа́ющимисѧ·

Нѣцыи же ѿ е҆пикꙋрїи и҆ ѿ сто́икъ филосо́фъ, стѧза́хꙋсѧ с нимъ·

И҆ нѣцыи гл҃ахꙋ, чт̂о ѹ҆бо хо́щетъ блѧди́выи сеи гл҃ати;
и҆нїи же, чюжи́м꙽ бѣсомъ мни́тсѧ проповѣ́дникъ быти, ꙗ҆́коже і҆с҃а и҆ въскр҃шеніе бл҃говѣствоваше и҆мъ·

зач̑҇·

Пое҆мше же е҆го, на а́рїевъ лед̑ ведошѧ гл҃юще·

не мо́жемъ разꙋмѣти, чт̂о но́вое сїе ѹ҆че́нїе тобою гл҃емое;
странна б̂о нѣ́каѧ влага́еши въ ѹ́шеса наша·

хощемъ ѹ҆бо разꙋмѣти чт̂о хотѧт̑ сїѧ быти.
а҆ѳѷне́е же вс̂и и҆ приходѧ́щеѝ страннїи, ни въ чтоже и҆́но ѹ҆пражнѣхꙋсѧ, развѣ гл҃ати чт̂о и҆л̂и слы́шати новое·

Став же па́вел꙽ посредѣ а҆рїева ле́да, рече·

Мꙋ́жїе а҆ѳинейстїи, по всемꙋ зрю̀ ꙗ҆́ко въ вѣрѣ блꙋдѧ́ще е҆сте·

Проходѧи б̂о и҆ съглѧ́даѧ бо́ги вашѧ, ѻбрѣтохъ и҆ кꙋмиръ на не́мже б̂ѣ напи́сано и҆мѧ невѣ́домомꙋ б҃ꙋ.
е҆гоже ѹ҆бо не вѣ́дꙋще бл҃голѣпнѣ чтете,<.>

Сего а҆зъ проповѣ́дꙋю вамъ.
б҃ъ сътворивыи мир̑҇ и҆ вс̂ѧ ꙗ҆́же в немъ, се́й нб҃ꙋ и҆ землѝ г҃ь сыи,<.>

Не въ рꙋкотворе́ныхъ храмх̑ѣ живет̑, ни ѿ рꙋкъ члчс̑҇кыхъ ѹ҆гоженїа прїе́млетъ требꙋѧ что.
самъ даѧ всѣмъ живот̑, и҆ дыханїе по всѣческих̑·

Сътворилъ же е҆сть ѿ е҆ді́ноа кро́ве вес̑҇ ꙗ҆́зыкъ чл҃чь, жити по всемꙋ лицꙋ земномꙋ, ѹ҆ста́вивъ пред̑ѹ҆чиненаѧ времена̀, и҆ предѣ́лы селенїѧ и҆́хъ, възыскати г҃а,<.>

А҆ще ѹ҆бо възы́щꙋт꙽ е҆го, и҆ ѻ҆брѧщꙋтъ.
ꙗ҆́ко не дале́че ес̑҇ ѿ е҆ді́ного кождо насъ сꙋща.
ѻ҆ немъ б̂о живемъ и҆ дви́жемсѧ и҆ е҆́смы̀·

Ꙗ҆́коже и҆ нѣ́цыи ѿ вашихъ кни́жникъ реко́шѧ, сего б̂о и҆ ро́дъ е҆смы.
род̑ ѹ҆бо сꙋще бж҃їи, не должни е҆смы̀ непщевати, подобнꙋ быти бжс̑҇твꙋ златꙋ и҆л̂и сребрꙋ и҆л̂и ка́менїю начертанїю хꙋдож̑нꙋ и҆ смы́шленїю чл҃ка,<.>

Лѣта ѹ҆бо невѣдѣнїѧ презрѣвъ б҃ъ, ꙗ҆же нн҃ѣ повелѣва́етъ чл҃комъ всѣмъ, всюдꙋ пока́ѧтисѧ, зане ѹ҆ста́вилъ е҆сть дн҃ь вонже хощетъ сꙋдити вселе́ннѣи въ пра́вдꙋ, ѻ҆ мꙋжи ѻ҆ немже повелѣ, вѣрꙋ подаѧ всѣмъ, въскресивъ е҆го ѿ мер꙽твыхъ,<.>

Слы́шавше же въскресенїе мр҃твыхъ, ѻ҆́ви ѹ҆бо рꙋга́хꙋсѧ, ѻ҆́ви же рѣшѧ, да слы́шимъ т̂ѧ паки ѻ҆ семъ.
и҆ тако па́велъ и҆зыде ѿ среды̀ и҆́хъ·

Нѣ́цыи же мꙋжїе прилѣпи́вшасѧ е҆мꙋ, вѣ́роваша.
в нихже б̂ѣ и҆ диѻ҆ни́сїе а҆реѻ҆паги́т̑с́кїи, и҆ жена̀ и҆менем̑ дама́рь, и҆ дрꙋѕїи мноѕи с ними·

Глв̑҇а, и҃і·

По сихъ же ѿлꙋчи́всѧ па́велъ ѿ а҆ѳи́нъ, и҆ прїиде въ корин̑҇ѳъ.
и҆ ѻ҆брѣте нѣ́кое҆го жидови́на именемъ а҆килꙋ,<.>

По́нтѧнина родомъ, но́вопришед꙽ша ѿ и҆та́лїѧ, и҆ приски́лꙋ женꙋ̀ е҆го, зане повелѣ̀ клавдїе́ ѿлꙋчитисѧ всм̑ѣ і꙼ѹ҆де́ѻмъ ѿ ри́ма,<.>

И҆ прїиде к ним̑.
и҆ зане е҆ді́нохꙋдожникомъ быти им̑, пребысть ѹ҆ нихъ, и҆ дѣла́ше.
бѧ́хꙋ б̂о ѹ҆смаре хитростїю·

стѧза́ше же сѧ на со́нм꙽ищихъ по всѧ̀ сꙋботы, препираша же і҆ѹ҆де́а і҆ е́ллины·

И҆ ꙗ҆́коже снидоста ѿ македо́нїа си́ла же и҆ тимоѳе́и, тꙋжа́ше дх҃омъ па́вель, свѣдѣтельствꙋѧ і҆ѹ҆де́ѻмъ х҃а і҆с҃а·

противѧ́щим же сѧ и҆́мъ и҆ хꙋлѧщим̑, ѿтрѧсъ ри́зы своѧ, реч̑҇ к нимъ, кров̑҇ ва́ша на главахъ ва́шихъ, чи́стъ аз.
ѿ нн҃ѣ въ ꙗ҆́зыки и҆дꙋ̀·

и҆ прешед̑ ѿтꙋдꙋ, прїиде въ домъ нѣ́кое҆го, и҆́менем꙽ и҆ѹ҆стъ, чтꙋща б҃а, е҆мꙋже хра́мина б̂ѣ въскраѝ со́нмища·

Криспъ же начѧ́лникъ съборꙋ вѣрова гв҃и съ всѣмъ домомъ свои҆мъ.
и҆ мноѕи ѿ коринъѳѧнъ слы́шавше вѣ́ровахꙋ, и҆ кр҃ща́хꙋсѧ·

Рече же г҃ь въ видѣнїи нощъномъ па́влꙋ, не бо́исѧ, н̂о гл҃и, и҆ да не ѹ҆млъкнеши, зане а҆зъ е҆смь с тобою·

И҆ никтоже приложит꙽ ѻ҆злобити т̂ѧ,<.>

Зане лю́дїе сꙋть ми мно́ѕи въ́ градѣ семъ·

сѣде же лѣто и҆ мѣсѧца шесть, ѹ҆ча в них̑ словꙋ бж҃їю·

Галиѻ́нꙋ же а҆нѳипатꙋ сꙋщꙋ въ а҆ха́і҆ѝ, нападо́ша е҆ді́нодꙋшно і҆ѹ҆де́е на па́вла, и҆ приведо́ша е҆го на сꙋдилище, гл҃юще, ꙗ҆́ко кро́мѣ зако́на се́й развѣщава́етъ чл҃ки чтити бг҃а·

Хотѧ́щꙋ же па́влꙋ ѿврести ѹ҆ста, рече галиѻ́нъ къ і҆ѹ҆де́ѻмъ·

А҆ще бы̂ неправда была каѧ̀ и҆л̂и ѻ҆би́да зл̂а ѽ і҆ѹ҆де́е, по сло́вꙋ ѹ҆бо послꙋшалъ бых꙽ васъ·

А҆ще л̂и же стѧза́нїѧ сꙋть ѻ҆ словеси, и҆ ѻ и́менех̑, и҆ ѻ҆ зако́нѣ вашем̑, вѣдите са́ми.
сꙋдїѧ б̂о а҆зъ симъ не хощꙋ бы́ти·

І҆ и҆згна и҆хъ ѿ сꙋди́лища.
е́мше же вс̂и е҆ллини сосѳе́на начѧ́лника собо́рꙋ, бїѧ́хꙋ пред̑ сꙋдищем̑, и҆ ничтоже ѻ҆ сих꙽ галиѻ́нꙋ радѣнїе бысть·

Па́велъ же е҆ще пребывъ дн҃и довлъны, и҆ цѣловавъ бра́тїю ѿплѝ въ сирїю, и҆ с ним̑ а҆ки́ла и҆ приски́ла ѻстри́гъ главꙋ̀, въ кег꙽хреи҆хъ, ѻ҆брекъсѧ бо б̂ѣ.
приста же въ е҆фе́сѣ, и҆ тѣхъ ѻ҆стави т̂ꙋ·

Сам же вшед̑ въ со́нмище стѧза́шесѧ съ і҆ѹ҆де́ѝ.
молѧ́щим̑ же и҆мъ е҆го, ѻ҆ мно́ѕѣ вре́мени пребы́ти ѹ҆ них̑, не ѻ҆бѣщасѧ, н̂о ѿреч̑҇сѧ им̑, рекъ, ꙗ҆́ко подоба́етъ м̂и всѧко пра́зд̑никъ грѧдꙋщїи сътвори́ти въ і҆ерс̑҇ли́мѣ, паки же въз꙽вращꙋсѧ къ вамъ бг҃ꙋ хотѧ́щꙋ.
и҆ ѿвезесѧ ѿ е҆фе́са·

А҆ки́ла же и҆ прискила ѻ҆ста́ша въ е҆фе́сѣ·

зач̑҇, м҃а·

И҆́ съшед̑ въ кесарїю́, възшед̑ и҆ цѣловав̑҇ цр҃ковь, сни́де въ а҆нтиѻ҆нїю́.
и҆ сътворь вре́мѧ нѣ́кое, и҆зы́де,<.>

И҆ проходѧ по́ рѧдꙋ галатїи́скꙋю странꙋ и҆ фригїю́, ѹ҆твержа́ѧ вс̂ѧ ѹ҆ченикы·

І҆ѹ҆де́анинъ же нѣ́кто а҆поллосъ и҆́менемъ, а҆леѯа́ндрѧнинъ ро́домъ, мꙋ́жъ словесенъ, приключисѧ въ е҆фе́сѣ, си́ленъ сы́и въ книгахъ.
се́й б̂ѣ ѻ҆глашенъ пꙋтѝ гн҃ю, и горѧ̀ дх҃ом̑, гл҃аше и҆ ѹ҆ча́ше и҆звѣстно, ꙗ҆́же ѻ҆ г҃ѣ, вѣ́дыи то́кмо кр҃щенїе і҆ѻ҆а́нново.
и҆ се́й же начѧт̑ дръзати на со́нмищих̑·

Слы́шавше же е҆го а҆кѷла и҆ приски́ла прїѧ́ша е҆го, і҆ и҆звѣ́стнѣе томꙋ сказа́шѧ гн҃ь пꙋть·

хотѧщꙋ же е҆мꙋ преи́тѝ въ а҆ха́и҆ю пред̑пославше бра́тїѧ.
написа́шѧ ѹ҆чн҃комъ прїѧ́ти е҆го·

И҆же и҆ пришед̑ тамо пособ꙽ствова мно́го вѣ́ровавшим̑ блгд̑тїю.
твр́ьдо б̂о і҆ѹ҆де́ѧ не престаѧ ѻ҆блича́ше пред̑ лю́дъми, сказа́ѧ писа́нми быти х҃а і҆с҃а·

Глв̑҇а, ѳ҃і·

зач̑҇, м҃в·

Бы́сть же внегда̀ а҆пполо́сꙋ быти въ кори́нѳѣ, павлꙋ же прошедшꙋ вы́шнѧѧ страны, прїити въ е҆фе́съ.
и҆ ѻ҆брѣтъ нѣ́кыа ѹ҆чн҃кы̀, реч̑҇ к нимъ, а҆ще ѹ҆бо дх҃ъ ст҃ъ прїа́ли е҆сте вѣ́ровавше;
ѻ҆ни́ же рѣша к немꙋ.
н̂о ниже а҆ще дх҃ъ ст҃ъ е҆сть слы́шахомъ, рече́ же к нимъ, въ что̀ ѹ҆бо крс̑҇ти́стесѧ ѻ҆ни́ же реко́ша, въ і҆ѻа́нново кр҃щенїе.
рече́ же па́велъ, і҆ѻ҆а́ннъ ѹ҆бо крс̑҇тѝ кр҃щенїемъ покаа́нїа, лю́демъ гл҃ѧ, въ грѧдꙋ́щаго по не́мъ да вѣ́рꙋютъ, с̂ирѣчь въ х҃а і҆с҃а.
слы́шавше же крс̑҇ти́шасѧ въ и҆́мѧ г҃а і҆с҃а.
и҆ възло́жьшꙋ на нѧ пав̑҇лꙋ рꙋцѣ, прїиде дх҃ъ ст҃ыи на́ нѧ.
гл҃ахꙋ же въ ꙗ҆́зы́кы, и҆ про̑҇ро́чествовахꙋ.
бѣше же всѣхъ мꙋже́и ꙗ҆́ко дв̂анадесѧте.
вшед̑ же въ со́нмище, дръза́ше не ѻ҆бинꙋ́ѧсѧ ѹ҆чаше по три мс̑҇ца, бесѣдꙋа и҆ ѹ҆вѣрѧа ꙗ҆́же ѻ҆ црс̑҇твїи бж҃їи·

И҆ ꙗ҆коже нѣ́цыи ѻ҆жесточа́хꙋсѧ и҆ прѧхꙋ ѕлосло́вѧще пꙋть гн҃ь пред̑ народом̑, ѿстꙋпль ѿ нихъ, ѿлꙋчѝ ѹ҆чн҃кы, по всѧ дн҃и стѧза́асѧ въ ѹ҆чи́лищи мꙋчи́телѧ нѣ́кое҆го·

Се́же бысть по дв̂ѣ лѣтѣ, ꙗ҆́коже всѣмъ живꙋщим̑ въ а҆сїи́ слы́шати слово г҃а і҆с҃а, жи́довомъ же и҆ е҆́ллиномъ.
си́лы же не просты творѧше бг҃ъ рꙋка́ма па́вловома, ꙗ҆коже и҆ на недꙋ́жныа наноси́ти ѿ по́та тѣла е҆го главотѧ́жа и҆ ѹ҆брꙋсца, і҆ и҆сцѣли́тисѧ и҆мъ ѿ недꙋгъ, и҆ дꙋхово́мъ лꙋка́вымъ и҆сходити ѿ нихъ·

Начаша же нѣ́цыи ѿ скита́ю҆щихсѧ і҆ѹ҆де́и ѻ҆ба́ѧнникъ и҆менова́ти на и҆мꙋщаѧ дꙋхи лꙋка́выа, и҆́мѧ г҃а і҆с҃а, гл҃юще, заклина́емъ в̂ы і҆с҃омъ е҆гоже па́вел̑҇ проповѣ́дꙋетъ·

бѧ́хꙋ же нѣ́цыи сн҃ове ске́вы і҆ѹ҆де́анина а҆рхїере́а седмь, и҆же с̂е творѧ́ще.
ѿвѣща́в же дꙋхъ лꙋка́выи, речѐ.
і҆с҃а зна́ю и҆ па́вла свѣмъ, вы же кт̂о е҆сте;
и҆ скача̀ на нихъ чл҃къ в не́мже б̂ѣ дꙋх꙽ лꙋка́выи, и҆ ѻ҆долѣвъ и҆мъ ѹ҆крѣпи́сѧ на нихъ, ꙗ҆́коже на́гомъ и҆ ѹ҆ра́неномъ и҆збѣжа́ти ѿ храма ѻ҆́ного.
с̂е же бысть разꙋмно всѣмъ живꙋщим꙽ въ е҆фе́сѣ і҆ѹ҆де́ѻм же и҆ е҆́ллиномъ, и҆ нападе стра́хъ на всѣхъ и҆хъ, и҆ велича́шесѧ и҆́мѧ г̂а і҆с҃а.
мно́ѕи же ѿ вѣ́ровавшихъ прихожа́хꙋ и҆сповѣ́даю҆ще и҆ сказꙋ́юще дѣ́ла своа.
дово́лни же ѿ сътворшихъ чародѣа́нїѧ, събра́вше кни́ги своѧ, съжига́хꙋ пред꙽ всѣми.
и҆ съложи́ша цѣ́ны и҆хъ, и҆ ѻ҆брѣто́ша сребра̀ пѧть те́мъ.
си́це крѣ́пко сло́во гн҃е растѧше и҆ крѣплѧшесѧ·

И҆ ꙗ҆коже сконча́шасѧ сїа, вложѝ павлови дх҃ъ, прошедъ македонїю и҆ а҆ха́и҆ю, и҆тѝ въ і҆ерс̑҇ли́мъ, рек꙽, ꙗ҆́ко бы́вшꙋ м̂и та́мо, подоба́е҆тъ м̂и и҆ ри́мъ ви́дѣти·

Посла́в же въ македо́нїю дв̂а ѿ слꙋжа́щихъ е҆мꙋ, тимоѳе́ѧ и҆ е҆ра́ста, са́м же пребы́сть вре́мѧ въ а҆сїи·

Бы́сть же въ времѧ ѻ҆но мол̑҇ва не ма́ла ѻ҆ пꙋтѝ гн҃и.
дїми́трїе б̂о нѣ́кто и҆́менемъ, сребросѣ́чецъ, творѧ̀ хра́мы сре́брѧны а҆ртеми́дѣ, даа́ше хитръцемъ дѣ́ланїе не ма́ло, и҆хже събравъ, и҆ ꙗ҆́же ѻ҆ си́цевых̑ дѣ́лателѧ, рече, мꙋ́жїе, вѣсте ꙗ҆́ко ѿ сего̀ дѣ́ланїѧ дово́льство житїю на́шемꙋ е҆сть·

И҆ ви́дите и҆ слы́шите, ꙗ҆́ко не то́кмо е҆фес꙽, н̂о ѿнꙋ́дъ и҆ всю а҆сїю́ па́велъ се́й препрѣ́въ і҆ ѻ҆братѝ мног̑҇ народ̑, гл҃ѧ, ꙗ҆́ко нѣ́ сꙋть бо́ѕи и҆же рꙋка́ми члчс̑҇кама быва́е҆мїи.
не то́кмо же с̂е, бѣдꙋ̀ прїе́млетъ наша ча́сть въ ѻ҆бличе́нїе прїити, н̂о и҆ вели́кїѧ боги́нѧ хра́мъ а҆ртеми́динъ нивъчто́же вмѣни́тсѧ, хо́щетъ же и҆ разори́тисѧ вели́чество е҆ѧ̀, е҆ꙗ҆́же вс̂ѧ асїа́ и҆ вселе́ннаа почита́ет꙽·

Слы́шавше же, и҆ бы́вше и҆спо́лнени ꙗ҆́рости, въпїа́ше гл҃юще, вели́ка а҆ртеми́да е҆фе́ськаѧ, і҆ и҆спо́лнисѧ градъ ве́сь мѧтежа.
ѹ҆стреми́ша же сѧ е҆дїнодꙋшно въ позо́рище, въсхи́щьше га́і꙼а и҆ а҆риста́рха македо́нѧны, дрꙋги па́вловы.
па́влꙋ же хотѧ́щꙋ внити въ наро́дъ, не ѻ҆ставлѧ́хꙋ е҆го ѹ҆чн҃цы.
нѣ́цы и҆же і҆ ѿ а҆сїи́скихъ нача́лникъ, сꙋще е҆мꙋ любе́зни, посла́вше к немꙋ молѧхꙋ не вдати себѐ въ позоръ·

дрꙋѕїи же ѹ҆бо, и҆́но нѣчто въпїа́хꙋ, б̂ѣ б̂о собр́анїе смꙋще̂нно и҆ множа́ишїи не вѣ́дѧхꙋ чесо̀ ради събра́шасѧ.
ѿ наро́да же и҆збраша а҆леѯа́ндра, и҆зведшимъ е҆го і҆ѹ҆де́ѻмъ алеѯа́ндръ же помаа́въ рꙋкою, хотѧше ѿвѣщати народꙋ·

разꙋмѣвше же ꙗ҆́ко і҆ѹ҆де́ѧнинъ е҆сть, гласъ быс̑҇ е҆ді́нъ ѿ всѣх꙽ ꙗ҆ко въ дв̂а часа̀ въпїю́щим̑, вели́ка а҆рте́мида е҆фе́ськаѧ.
ѹ҆ста́вль же кни́жникъ народ̑, рече, мꙋ́жїе е҆фе́сьтїи, кто б̂о е҆сть чл҃къ и҆же не вѣсть ꙗ҆́ко е҆фе́ськїи градъ слꙋжи́тель е҆сть вели́цеи боги́ни а҆рътеми́ди, и҆ диѻ҆пе́тови без꙽ всѧкого ѿвѣта ѹ҆бо сꙋщемъ си́мъ, потребно е҆сть вамъ безмо́лвы быти, и҆ ничтоже безчи́нно творити·

приведосте б̂о мꙋ́жа сїа, ни хра́мъ а҆ртемидинъ ѻ҆крадша н̂и хꙋлѧще боги́нѧ ва́шеѧ.
а҆ще ѹ҆бо дими́треи се́и и҆же с ни́мъ хꙋдожницы и҆́мꙋть къ комꙋ̀ слово, сꙋдїи сꙋть и҆ а҆нѳѷпати сꙋть, да пое́млютъ дрꙋгъ на́ дрꙋга, а҆ще ли что̀ ѻ҆ и҆ныхъ и҆́щете·

по зако́нꙋ цр҃кви да разрѣшитсѧ·

и҆бо бѣд꙽ствꙋемъ ѻ҆клевета́е҆ми быти ѻ҆ крамолѣ ѻ҆ дне́шнѣи, ни е҆ді́нѣи винѣ сꙋщи, ѻ҆ не́иже възмо́жемъ въздати сло́во ѻ҆ крамолѣ̀ се́й, и҆ сїа рекъ, распꙋстѝ събравшисѧ народъ·

Глв̑҇а, к҃·

По ѹ҆ста́вленїи же мо́лвы, призвавъ па́велъ ѹ҆чн҃кы ѹ҆тѣши.
и҆ цѣловавъ и҆хъ, и҆зыде и҆тѝ въ македо́нїю·

проше̑ же стра́ны тыѧ̀, и҆ ѹ҆тѣшивъ и҆хъ сло́вом̑ мно́ѕѣмъ, прїиде въ е҆лладꙋ.
сътвор же мцс̑҇а тр̂и, бы́вшꙋ же нань навѣтꙋ ѿ і҆ѹ҆де́и, хотѧщꙋ ѿвести́сѧ въ сирі́ю бысть хотѣнїе въз꙽врати́тисѧ сквозѣ македо́нїю·

Послѣдова же е҆мꙋ даже до а҆сїи сосипа́тръ берѧнинъ пи́ровъ.

Селꙋ́нѧнь же, а҆риста́рхъ и҆ секꙋндъ, и҆ га́і꙼ѧ дервѧнинъ, и҆ тимоѳе́и.
а҆сиѧ҆не же ти́хикъ и҆ трофимъ.
сі́и прежде шед̑ше жда́хꙋ насъ въ троа҆дѣ.
мы же ѿвезо́хом̑сѧ по днех̑ ѻ҆прѣсночных̑ ѿ фили́ппъ, и҆ прїидохомъ к нимъ въ троа́дꙋ до дн҃їи пѧть, и҆дѣже пребы́хомъ дн҃и се́дмъ·

зач̑҇, м҃г·

Въ е҆ді́нꙋ же ѿ сꙋбо́тъ, събраномъ ѹ҆ченикомъ преломити хлѣбъ, павел̑҇ же бесѣдоваше к нимъ хотѧ и҆зы́ти на ѹ҆треи и҆ простре слово до полꙋнощи.
бѧхꙋ же свѣща мно́ги въ горни́цы и҆дѣже бѣхомъ събрани·

Сѣдѧ́ же нѣ́кто ю҆ноша и҆́менемъ е҆втѷхъ при ѻ҆концы, ѻ҆тѧгченъ сномъ глꙋбоком̑, гл҃ющꙋ па́влꙋ ѻ҆ мно́ѕѣ,<.>

Прекло́нъсѧ ѿ сна̀, паде ѿ трикровника до́лꙋ, и҆ взѧ́ша е҆го мер꙽тва·

Съшд̑е же павелъ нападе на́нь, и҆ ѻ҆бье҆мъ е҆го реч̑҇, не молвите, и҆бо дш҃а е҆го в немъ ес̑҇.
въшд̑е же и҆ преломль хлѣбъ и҆ въкꙋшь.
доволно же бесѣдовав̑҇ даже до зореи, и҆ тако и҆зы́де·

приведоша же ѻ҆трока жи́ва, и҆ ѹ҆тѣшишасѧ не ма́ло·

Мы́ же пришд̑еше въ кора́бль, ѿвезо́хом̑сѧ въ а҆ссо́нъ, ѿтꙋ́дꙋ хотѧ́ще поѧ҆ти па́вла.
та́ко бо б̂ѣ нам̑ повелѣл꙽ хотѧ самъ пѣшъ и҆тѝ.
и҆ ꙗ҆коже съвъкꙋписѧ с нами въ а҆сс́онѣ, и҆ взем̑ше е҆го прии҆до́хомъ въ митилинъ·

И҆ ѿтꙋдꙋ ѿве́зшесѧ въ ѹ҆треѝ приста́хомъ в а҆нтикрихїи.
въ дрꙋгїи же ѿвезо́хомсѧ въ самонъ.
и пребы́вше въ троггилїѝ, въ настоѧ҆щїи же дн҃ь прїидо́хомъ въ ми́литъ·

зач̑҇, м҃д·

Сꙋди бо па́велъ ми́мои҆тѝ е҆фе́съ, ꙗ҆́ко да не бꙋ́детъ е҆мꙋ закоснѣти въ а҆сїи·

т꙽ща́ше бо сѧ а҆ще възмо́жно бꙋ́детъ е҆мꙋ въ дн҃ь пѧтьдесѧт̑ныи, быти въ і҆ерс̑҇ли́мѣ·

ѿ ми́лита же посла́въ въ е҆фе́съ, призвати попы̀ цр҃ько́вныа·

и҆ ꙗ҆́коже прїидо́ша к꙽ немꙋ, рече к꙽ ни́мъ·

Вы̂ вѣ́сте ꙗ҆ко ѿ пе́рваго дн҃е ѿне́лиже прїидо́хъ въ а҆сїю́ како с ва́ми вс̂е времѧ быхъ работаѧ гв҃и съ всѣмъ смиреномꙋ́дрїемъ, и҆ мно́гими слеза́ми, и҆ напа́стьми, прилꙋчи́вших̑ ми сѧ ѿ і҆ѹ҆де́искихъ навѣтъ, ꙗ҆́ко ничтоже ѻ҆бинꙋ́хсѧ ѿ поле́зныхъ, е҆же не сказа́ти вамъ, и҆ наѹ҆чити васъ пред̑ людми и҆ по домом̑, засвѣдѣтельствꙋѧ і҆ѹ҆де́ѻ҆м же и҆ е́ллиномъ, е҆же къ бг҃ꙋ покаѧ́нїе, и҆ вѣ́рꙋ ꙗ҆же къ г҃ꙋ на́шемꙋ і҆с҃ꙋ х҃ꙋ·

И҆ нн҃ѣ с̂е а҆зъ свѧ́занъ дх҃омъ, грѧдꙋ̀ въ і҆ерс̑҇лим̑, ꙗ҆́же в не́мъ хотѧ́щаѧ приключи́тисѧ мн̂ѣ, не вѣ́дыи, ѻ҆ба́че ꙗ҆́ко д҃хъ ст҃ыи по всѧ гра́ды свѣдѣтельствꙋет̑ м̂и гл҃ѧ, ꙗ҆́ко ѹ҆́зы мене и҆ ско́рби ждꙋть.
н̂о нѣ́сть ми́ попече́нїе ни е҆ді́но, н̂и и҆́мамъ дш҃ꙋ мою че́стнꙋ себѣ, ꙗ҆́ко е҆же сконча́ти тече́нїе мое съ ра́достїю, и҆ слꙋ́жбꙋ ю҆́же прїѧх̑ ѿ г҃а і҆с҃а.
засвѣдѣтельствовати е҆ѵг̑҇лїе бл҃года́ти бж҃їа.

И҆ нн҃ѣ с̂е а҆зъ вѣмъ, ꙗ҆́ко ктомꙋ не ѹ҆́зрите лица̀ мое҆го в̂ы вс̂и, в ни́хже проидо́хъ проповѣ́дꙋа црс̑҇твїе бжїе·

Тѣмже свѣдѣтельствꙋю вам̑ въ дне́шнїи дн҃ь, ꙗ҆́ко чи́стъ а҆зъ ѿ крове всѣхъ.
не ѻ҆бинꙋ́хъ бо сѧ е҆же не сказа́ти вамъ вс̂ю во́лю бж҃їю·

Внима́ите ѹ҆бо себѣ, и҆ всемꙋ ста́дꙋ, в немже вас̑҇ дх҃ъ ст҃ыи поста́ви е҆пс̑҇копы, па́сти цр҃ковь г҃а и҆ бг҃а, е҆ѧже снабдѣ̀ кро́вїю свое҆ю̀·

А҆зъ б̂о вѣмъ с̂е, ꙗ҆́ко по ѿше́ствїѝ мое҆мъ въни́дꙋтъ во́лцы тѧ́жцы въ ва́съ, не щадѧ́ще ста́да·

И҆ ѿ васъ самѣхъ въста́нꙋтъ мꙋ́жїе гл҃юще развраще́ннаѧ, е҆же ѿторгати ѹ҆чн҃кы въ слѣдъ себе·

Сего ра́ди бди́те помина́юще, ꙗ҆́ко тр̂и лѣта но́щь и҆ дн҃ь не преста́ахъ ѹча̀ съ слеза́ми е҆ді́ного когождо васъ·

И҆ нн҃ѣ предаю̀ васъ бра́тїе бг҃ови, и҆ словꙋ бл҃года́ти е҆го, могꙋщемꙋ назда́ти и҆ да́ти вамъ наслѣ́дїе въ ѻ҆сщ҃е́нныхъ всх̑ѣ.
сребрꙋ и҆ли зла́тꙋ и҆л̂и ри́замъ, ни е҆ді́номꙋ въжделѣхъ.
са́ми вѣ́сте, Ꙗ҆́ко требова́нїю мое҆мꙋ и҆ сꙋщимъ съ мно́ю послꙋжисте рꙋцѣ мои сїѝ.
вс̂ѧ сказа́хъ вамъ ꙗ҆ко та́ко трꙋжа́ющимсѧ подоба́е҆тъ застꙋпа́ти немо́щныѧ·

Помина́ите же сло́во г҃а і҆с҃а, ꙗ҆ко са́м꙽ речѐ.
бл҃же́нѣе е҆сть па́че даа҆ти, не́жел̂и прїима́ти.
и҆ сїа ре́къ, прекло́нь колѣ́нѣ своѝ съ всѣми и҆́ми помоли́сѧ·

Мно́гъ же бысть плач̑҇ всѣмъ.
и҆ напад̑ше на вы́ю па́влꙋ ѻ҆блобыза́хꙋ е҆го.
скорбѧ́ще наипа́че ѻ҆ словеси е҆же рече, ꙗ҆́ко ктомꙋ не и҆́мт̑ꙋ лице е҆го ѹ҆зрѣти.
провожа́хꙋ е҆го въ кора́бль·

Глв̑҇а, к҃а·

И ꙗ҆коже бы́сть ѿвести́сѧ намъ ѿто́ргъшесѧ ѿ них̑, прѧ́мо ходи́вше прїидо́хом꙽ въ ко́нъ.
въ дрꙋгїи же дн҃ь въ родонъ, и҆ ѿтꙋ́дꙋ въ пата́рꙋ.
и҆ ѻ҆брѣтше кора́бль преходѧ́щь въ финикїю, възшед̑ше ѿвезо́хомсѧ·

Възни́кшꙋ же кѷпрꙋ, и҆ ѻ҆ста́вльше е҆го ѻ҆шꙋ́ю, пла́вахомъ въ сирїю́, и҆ приста́хомъ въ тѷрѣ.
т̂ꙋ б̂о бѧ́ше кораблю̀ и҆зложи́ти бре́мѧ.

І҆ и҆зъѻ҆брѣтше ѹ҆чн҃ки, пребы́хомъ т̂ꙋ дн҃їи сед̑мь, и҆же па́влови гл҃ахꙋ дх҃ом̑ не въсходи́ти въ і҆ерс̑҇ли́м꙽·

Є҆гда же бы́сть намъ сконча́ти дн҃и, и҆зшед̑ше и҆дѧ́хомъ, провожда́ющимъ насъ всм̑ѣ съ жена́ми и҆ дѣтми, до внѣ̀ гра́да·

И҆ покло́нше колѣ́нѣ при́ мори помоли́хомсѧ.
и҆ лобыза́вше дрꙋгъ дрꙋга, внидо́хом̑ въ кора́бль и҆ ѿвезо́хомсѧ·

ѻ҆ни́ же възврати́шасѧ въ своѧ с̂и.
м̂ы же пла́ванїе наче́нше ѿ тѷра, приста́хомъ въ птолемаи҆дѣ, и҆ цѣлова́вше бра́тїю, пребы́хомъ дн҃ь е҆дінъ ѹ҆ ни́хъ·

зач̑҇, м҃е·

Въ ѹ҆трѣи же и҆зшед̑ше и҆же ѻ҆ па́влѣ, прїидо́хомъ въ кесарі́ю.
и҆ вшед̑ше въ до́мъ филиппа бл҃говѣ́стника, сꙋща ѿ сед̑ми́хъ дїа́конъ, пребы́хомъ ѹ҆ него.
сегоже бѧ́хꙋ дще́рѧ дв҃ца четы́ри прорица́юще.
пребыва́ющим̑ же намъ на́ дн҃и мно́ги·

Сни́де нѣ́кто ѿ і҆ѹ҆де́ѧ прро̑҇къ и҆́менемъ а҆га́въ.
и҆ пришед̑ к на́мъ, и҆ възем̑ по́ѧ҆съ па́вловъ, и҆ свѧза́в же своѝ рꙋцѣ и҆ но́зѣ, рече, та́ко гл҃ет̑ дх҃ъ ст҃ыи, мꙋ́жа е҆гоже е҆сть по́ѧ҆съ се́и, тако свѧ́жт̑ꙋ е҆го въ і҆е҆рс̑҇ли́мѣ і҆ѹ҆де́е и҆ предадѧтъ в рꙋцѣ ꙗ҆́зы́комъ.
и҆ ꙗ҆коже слы́шахомъ сїа, молѧ́хомъ м̂ы же и҆ намѣстнїѝ, не въсходи́ти е҆мꙋ въ і҆ерс̑҇ли́мъ·

ѿвѣщав же па́велъ и҆ рече.
чт̂о творитѐ пла́чюще, и҆ съкрꙋша́юще м̂и срд̑це;

А҆зъ б̂о не то́чїю свѧ́занъ бы́ти хощꙋ̀, н̂о и҆ ѹ҆́мрети въ і҆ерс̑҇ли́мѣ гото́въ е҆́смь ѻ҆ имени г҃а і҆с҃а·

не повинꙋ́ющꙋ же сѧ е҆мꙋ, ѹ҆молча́хом̑ ре́кше, во́лѧ гн҃ѧ да бꙋ́детъ·

По́ дн҃ехъ же сих̑, ѹ҆гото́вльшесѧ, взыдо́хомъ въ і҆ерс̑҇лим̑·

Прїи҆до́ша же с на́ми и҆ нѣ́цыи ѿ ѹ҆ченик̑҇ ѿ кесарїа,<.>

Вѣ́дꙋще ѹ҆ негоже ѻ҆бита́е҆мъ мнасо́на нѣ́кое҆го кѷпрѧнина дре́внѧ ѹ҆чн҃ка·

Бы́вшем же на́мъ въ і҆ерс̑҇ли́мѣ, любе́зно прїѧ҆ша насъ бра́тїѧ·

На ѹ҆́трѣи҆ же вни́де па́велъ с на́ми къ і҆а́ковꙋ.
вс̂и же прїидо́ша ста́рцы.
и҆ цѣлова́въ и҆хъ, сказаа́ше по е҆ді́номꙋ ко́жд̑о и҆хже сътворѝ б҃ъ въ ꙗ҆́зы́цѣхъ слꙋже́нїемъ е҆го·

ѻ҆ни же слы́шавше сла́влѧхꙋ б҃а·

И҆ ре́кше е҆мꙋ.
ви́диши ли бра́те, коли́ко те́мъ е҆сть і҆ѹ҆де́и вѣ́ровавшихъ;
и҆ вс̂и ревни́теле зако́нꙋ сꙋть.
наѹ҆чени же сꙋть ѿ тебе.
ꙗ҆́ко ѿстꙋпле́нїю ѹ҆чи́ши ѿ зако́на моѷсе́ѻ҆ва живꙋщаа въ ꙗ҆зы́цѣхъ вс̂ѧ і҆ѹ҆де́ѧ.
гл҃ѧ не ѻ҆брѣ́зовати и҆мъ ча́дъ, ни по ѻ҆бы́чаем̑ ходити·

Чт̂о ѹ҆бо е҆сть, всѧ́ко подоба́етъ наро́дꙋ снитисѧ.
ѹ҆слы́шат̑ бо, ꙗ҆́ко прише́лъ е҆си·

Сїе ѹ҆бо творѝ е҆же т̂и гл҃ем꙽.
сꙋть ѹ҆ насъ мꙋ́жїе четы́ре ѻ҆бѣща́вше себе б҃ꙋ.
сих̑ поим̑.
ѻ҆чи́стисѧ с ни́ми і҆ и҆ждивѝ на них̑, да ѻ҆стри́жꙋтъ с̂и главы̀, и҆ разꙋмѣют̑ вс̂и ꙗ҆́ко и҆мже наѹ҆че́ни сꙋть ѿ тебе, ничтоже е҆сть, н̂о пребыва́еши и҆ сам̑ зако́нъ хранѧ·

ѻ҆ вѣ́ровавшихъ же ꙗ҆́зы́цѣхъ, м̂ы посла́хомъ сꙋжд̑ьше, ничто́же таково́е съблюда́ти и҆мъ, токмо да храни́ти себѐ ѿ и҆́доложер꙽тв꙽ и҆ крове и҆ ѹда́вленины и҆ блꙋда·

зач̑҇, м҃ѕ·

Тогда̀ па́велъ поим̑ мꙋ́жа на ѹ҆трѣи, с ни́ми ѻ҆чи́щьсѧ, вни́де въ ст҃и́лище завѣща́ѧ сконча́нїе д҃нем̑ ѻ҆чище́нїа, до́ндеже принесе́но бы́сть за е҆ді́ного когождо и҆хъ приноше́нїе·

И҆ ꙗ҆́коже хотѧ́хꙋ сед̑мь дн҃їи сконча́тисѧ,<.>

И҆ же ѿ а҆сїа і҆ѹ҆де́е видѣ́вше е҆го въ ст҃и́лищи, нава́диша ве́сь нард̑о, и҆ възложи́ша на́нь рꙋ́цѣ, въпїю҆ще, мꙋ́жїе і҆ил҃ьтьстїи, помози́те.
се́и е҆сть чл҃къ и҆же на́ люди и҆ закон̑҇, и҆ на мѣ́сто сїе, всѣх꙽ всю́дꙋ ѹ҆ча̀·

Є҆ще же и҆ е҆́ллины въведѐ въ цр҃ковь, и҆ ѻ҆сквернѝ ст҃ое мѣсто сїе·

Бѧ́хꙋ бо ви́дѣли трофи́ма е҆фе́сѧнина въ градѣ с нимъ, е҆гоже мнѧ́хꙋ ꙗ҆́ко въ цр҃ковь въве́лъ е҆сть па́велъ.
под̑ви́же же сѧ грд̑а ве́сь, и҆ бы́сть стеченїе лю́демъ·

И҆ е́мше па́вла влеча́хꙋ е҆го во́нъ и҆з꙽ цр҃кве, и҆ а́бїе затворишасѧ двѐри.
и҆́щꙋщимъ же им̑ ѹ҆би́ти е҆го,<.>

Взы́де вѣ́сть къ ты́сѧщникꙋ спи́рѣ, ꙗ҆́ко ве́сь възмꙋти́сѧ і҆ерс̑҇ли́мъ.
и҆же а҆бїе пои҆мъ во́и҆ны и҆ со́тники, причте на́ нѧ.
ѻ҆ни же видѣ́вше ты́сѧщника и҆ во́и҆ны, преста́ша бїю́ще па́вла·

Пристꙋпль же ты́сѧщник̑҇ ꙗ҆́тъ е҆го, и҆ повелѣ̀ свѧза́ти е҆го вери́гама желѣ́знома двѣма,<.>

И҆ въпраша́ше кт̂о ѹ҆бо е҆сть, и҆ чт̂о сътвори́лъ е҆сть.
дрꙋзїи же и҆́но нѣчто въпїѧ҆хꙋ въ наро́дѣ.
не могїи же разꙋмѣти и҆звѣ́стное мо́лвы ра́ди, повелѣ̀ ѿвестѝ е҆го въ по́лкъ·

е҆гда же бы́сть на степе́нехъ, прилꙋчи́сѧ въздви́женꙋ бы́ти е҆мꙋ ѿ во́и҆нъ, нꙋж꙽ды ра́ди наро́да·

Послѣ́доваше бо мно́жество людїи зовꙋще взѧти е҆го.
хотѧ́ же вни́ти въ по́лкъ па́велъ, гл҃а ты́сѧщникꙋ.
а҆́ще лѣть м̂и е҆сть гл҃ати тебѣ;
ѻ҆́нъ же рече, т̂о гре́чески ѹ҆мѣ́еши л̂и;
не т̂ы ли е҆си е҆гѷп꙽тѧнинъ и҆же прежд̑е сих̑ дн҃їи превѣщав̑҇.

И҆ і҆звед̑ въ пꙋсты́ню четы́ре ты́сѧща мꙋ́жїи сикаре́и;

Рече же па́велъ.
азъ чл҃къ ѹ҆бо е҆смь жидовин̑҇, ѿ та́рса киликїискаго, славнаго гра́да житель·

Молю́ же т̂ѧ повели м̂и гл҃ати къ лю́дем꙽.
повелѣ́вшꙋ же е҆мꙋ.

Па́велъ стоѧ̀ на степе́нехъ, пома́ав̑҇ рꙋко́ю къ лю́демъ.
мно́гꙋ же безмо́л꙽вїю бывшꙋ, въз꙽гласѝ е҆врѣ́искимъ ꙗ҆́зы́комъ гл҃ѧ·

Глв̑҇а, к҃в·

Мꙋ́жїе братїе и҆ ѿц҃ы, ѹ҆слы́шите мои къ вамъ нн҃ѣ ѿвѣтъ·

слы́шавше же ꙗ҆́ко е҆вре́искимъ ꙗ҆́зыкомъ въз꙽гласѝ к нимъ, паче приложиша без꙽молвїе·

и҆ рече, а҆зъ ѹ҆бо е҆смь мꙋ́жъ і҆ѹ҆деѧнинъ, роди́всѧ в та́рсѣ киликїистѣмъ, въспитан̑҇ же въ градѣ се́мъ, при ногꙋ гамали́и҆ловꙋ, нака́занъ и҆звѣстно ѻ҆те́ческомꙋ законꙋ, ревни́тель сыи бж҃їи ꙗ҆́коже всѝ в̂ы е҆сте днесь, и҆же се́и пꙋть гони́хъ даже до см҃рти, вѧжа̀ и҆ предаѧ̀ в темнїцꙋ, мꙋжа же и҆ жены̀, ꙗ҆коже а҆рхїе҆ре́и свидѣтельствꙋет꙽ ми, и҆ всѝ ста́рцы, ѿ нихже и҆ посла́нїа прие҆мъ къ живꙋщимъ бра́тїам꙽ в дама́сцѣ, и҆дѧ́хъ привестѝ та́мо сꙋщаа свѧ́заны въ і҆ерс̑҇лим̑, да мꙋ́чатсѧ.
бы́сть же м̂и и҆дꙋщꙋ и҆ приближа́ющꙋсѧ къ дама́скꙋ, въ полꙋдн҃е·

внеза́пꙋ съ нб҃се ѻ҆блиста̀ свѣт꙽ мног̑҇ ѻ҆ мнѣ̀, падох же на́ землю, и҆ слы́шах̑ глс̑҇а гл҃ющь м̂и, са́вле са́вле чт̂о мѧ го́ниши;
а҆з же ѿвѣща́хъ, кт̂о е҆си г҃и;
рече же къ мнѣ̀.
а҆зъ е҆смь і҆с҃ назоре́и е҆гоже т̂ы го́ниши.
а҆ и҆же съ мною сꙋщїѝ свѣтъ ѹ҆бо видѣша, и҆ пристра́шни бы́ша, гла́са же не слы́шаша гл҃ющаго къ мн̂ѣ.
рекох̑ же чт̂о сътворю̀ г҃и;
г҃ь же реч̑҇ къ мн̂ѣ, въста́въ и҆дѝ въ дама́скъ, и҆ т̂ꙋ речет̑ ти сѧ ѻ҆ всѣх꙽, и҆́хже повелѣ́но т̂и е҆сть творити·

і҆ ꙗ҆коже не видѣхъ ѿ сла́вы свѣта ѻ҆́ного, за́ рꙋкꙋ води́мъ ѿ сꙋщихъ съ мно́ю, внидохъ в дама́скъ·

А҆на́нїѧ же нѣ́кїи мꙋ́жь бл҃гоговѣ́инъ по законꙋ, свд̑ѣтельствова́нъ ѿ всѣхъ живꙋщихъ в дама́сцѣ і҆ѹ҆де́и, пришед̑ къ мнѣ, и҆ ста́въ рече м̂и.
са́вле брате прозрѝ.
и҆ а҆з꙽ в то́й часъ възрѣ́хъ на́нь.
ѻ҆́н же рече м̂и.
бг҃ъ ѿц҃ъ на́шихъ и҆зволи т̂ѧ разꙋмѣти хотѣ́нїе е҆го, и҆ ви́дѣти пра́вед̑ника, и҆ слы́шати гласъ ѿ ѹ҆стъ е҆го.
ꙗ҆́ко бꙋ́деши е҆мꙋ свѣдѣтель къ всѣм꙽ чл҃ком̑, и҆́хже ви́дѣ и҆ слы́ша·

И҆ нн҃ѣ чт̂о ме́длиши;
въста́въ крс̑҇ти́сѧ и҆ ѻ҆мыи грѣхи своѧ, призва́въ и҆́мѧ г҃а і҆с҃а·

Бы́сть же м̂и вз̑ъвраща́ющꙋсѧ въ і҆ерс̑҇лимъ, и҆ молѧ́щꙋ ми сѧ въ цр҃ькви, бы́ти въ ѹ҆́жасѣ, и҆ ви́дѣти е҆го гл҃юща м̂и.
потщи́сѧ, і҆ и҆зы́ди ско́ро ѿ і҆ес̑҇рлима.
зане не прїимꙋтъ свѣдѣтельства твое҆го е҆же ѻ҆ мнѣ̀, и҆ а҆зъ рх̑ѣ, г҃и са́ми вѣ́дѧт̑ ꙗ҆́ко а҆зъ бх̑ѣ всажа́ѧѝ в темни́цꙋ и҆ бїѧ̀ по со́нмищихъ вѣ́рꙋющаѧ в т̂ѧ·

И҆ е҆гда и҆злива́шесѧ кро́вь стефа́на свѣдѣтелѧ твое҆го, са́мъ бѣхъ стоѧ̀ и҆ поѹ҆ща́ѧ ѻ҆ ѹ҆бїиствѣ е҆го, и҆ стрегїи ри́зы ѹ҆бива́ющих̑ е҆го·

И҆ рече къ мнѣ, и҆дѝ, ꙗ҆ко а҆з꙽ въ ꙗ҆́зы́ки далече послю̀ т̂ѧ·

послꙋшахꙋ же е҆го да́же до сего словесѐ, и҆ въздвиго́ша глас̑҇ сво́й гл҃юще, възмѝ ѿ землѧ̀ такова́го, не подоба́етъ б̂о е҆мꙋ жи́ти.
въпїющемъ же и҆мъ и҆ помета́ющимъ ри́зы, и҆ пра́хъ въз꙽мѣта́ющимъ на въздꙋ́хъ.
повелѣ̀ ты́сѧщникъ ѿвестѝ е҆го въ по́лкъ, рек̑҇ ра́нами и҆стѧза́ти е҆го, да разꙋмѣетъ за кꙋ́ю винꙋ̀ та́ко въпїа́хꙋ на́нь.
и҆ ꙗ҆́коже протѧго́ша е҆го ве́рвьми.
реч̑҇ къ стоѧ́щемꙋ со́тникꙋ па́вел꙽.
а҆ще чл҃ка ри́млѧнина и҆ не ѻ҆сꙋжде́на лѣтъ е҆сть вамъ би́ти;

Слы́шав же со́тникъ, пристꙋпѝ къ ты́сѧщникꙋ сказа́ гл҃ѧ.
ви́жд̑ь чт̂о хо́щеши сътвори́ти·

чл҃къ б̂о се́й ри́млѧнинъ е҆сть.
пристꙋ́пль же ты́сѧщникъ реч̑҇ е҆мꙋ, гл҃и м̂и а҆ще т̂ы ри́млѧнинъ е҆си;
ѻ҆н꙽ же рече, е́й.
ѿвѣща́ же ты́сѧщник̑҇, а҆зъ мно́гою цѣно́ю нарече́нїе сїе и҆ жи́тельство стѧжахъ·

Па́велъ же речѐ, а҆зъ же и҆ роди́хсѧ в немъ.
а҆бїе же ѹ҆бо ѿстꙋпи́ша ѿ него хотѧ́щеи е҆го и҆стѧзати·

И҆ ты́сѧщникъ же ѹ҆боѧ́сѧ, разꙋмѣвъ ꙗ҆́ко ри́млѧнинъ е҆сть, и҆ ꙗ҆́ко б̂ѣ е҆го вдал꙽.
на ѹ҆́трѣи же хотѧ разꙋмѣти и҆стинꙋ чт̂о ради ѻ҆клевета́етсѧ ѿ і҆ѹ҆де́и, разрѣшѝ е҆го ѿ ѹ҆зъ, и҆ повелѣ̀ прїитѝ а҆рхїере́ѻм̑ и҆ всемꙋ събо́рꙋ и҆хъ.
и҆ све́дъ па́вла поста́ви е҆го пред̑ ни́ми·

Глв̑҇а, к҃г·

зач̑҇, м҃з·

Възрѣ́в же па́велъ на сонм꙽, рече.
мꙋ́жїе бра́тїе, а҆зъ всею со́вѣстїю бл҃гою живꙋ бв҃и да́же до сего дн҃е·

А҆рхїере́и же а҆на́нїѧ повелѣ̀ предъстоѧ҆щимъ е҆мꙋ би́ти е҆мꙋ ѹ҆ста̀·

Тогда̀ па́велъ рече к немꙋ, би́ти т̂ѧ имать б҃ъ стѣ́но пова́пленаа.
и҆ т̂ы сѣди́ши сꙋдѧ́ м̂и по зако́нꙋ, и҆ престꙋпа́ѧ зако́нъ вели́ши да бїю́тъ м̂ѧ;
пред̑стоѧ́щїи же рѣша, а҆рхїере́ю л̂и бж҃їю досажа́еши;
рече же па́велъ, не вѣ́дахъ бра́тїе ꙗ҆ко а҆рхїере́и е҆сть.
пи́сано бо е҆сть, кн҃ѕю людїи свои҆хъ да не речеши ѕл̂а·

Разꙋмѣ́в же па́велъ, ꙗ҆́ко е҆ді́на ча́сть есть сад̑дꙋке́и, а҆ дрꙋга́ѧ фарїсеи, възва̀ въ со́нмищи, мꙋ́жїе братїе, а҆зъ фарїсе́и е҆смь, сн҃ъ фарисе́ѻ҆въ.
ѻ҆ ѹ҆пова́нїи и҆ ѻ҆ въскр҃се́нїи ме́ртвыхъ, а҆зъ сꙋ́дъ прїе́млю·

с̂е же е҆мꙋ рекшꙋ, бы́сть распрѧ̀ фарїсе́ѻ҆мъ и҆ сад̑дꙋке́ѻ҆мъ.
и҆ раздѣли́сѧ наро́дъ.
сад̑дꙋке́и б̂о гл҃ют̑ не бы́ти въскр҃се́нїю, н̂и а҆гг҃ла н̂и дх҃а.
фарїсе́е же и҆сповѣ́дꙋютъ ѻ҆бо́ѧ·

Бы́сть же кли́чь великъ.
и҆ въста́вше кни́жницы сꙋщїи ча́сти фарисе́искїа, прѧ́хꙋсѧ межи собо́ю гл҃юще, ни е҆ді́но ѕл̂о ѻ҆брѣта́емъ въ чл҃цѣ се́мъ·

А҆ще ли же дх҃ъ гл҃а е҆мꙋ и҆л̂и а҆́гг҃лъ, не проти́вимсѧ б҃ꙋ·

Мно́зѣ же бы́вши распри, ѹ҆сꙋмнѣвсѧ ты́сѧщникъ да не расте́рзанъ бꙋ́дет̑ па́велъ ѿ них̑, повелѣ̀ во́иномъ сни́ти и҆ въсхи́тити е҆го ѿ среды их̑, и҆ вести е҆го въ по́лкъ.

Въ наста́вшꙋю же но́щь предъста́въ е҆мꙋ г҃ь рече, дерза́и па́вле.
ꙗ҆́коже бо свѣдѣтельствова ꙗ҆́же ѻ҆ мнѣ въ і҆ерс̑҇ли́мѣ, си́це т̂и подоба́етъ и҆ въ ри́мѣ свѣдѣтельствова́ти·

Бы́вшꙋ же дн҃и, сътво́рше нѣ́цыи ѿ і҆ѹ҆де́и съвѣтъ, заклѧ́ша себѐ гл҃юще, не ѧ҆сти ни пи́ти до́ндеже ѹ҆бїютъ па́вла·

Бѧ́ше же мно́жае четы́редесѧте мꙋжїи, и҆же сїю клѧ́твꙋ сътворшеѝ, и҆же пристꙋ́пльше къ а҆рхїере́ѻ҆мъ и҆ ста́рцемъ, рѣша, клѧ́твою проклѧ́хомъ себе ничт̂оже вкꙋси́ти, дон̑҇деже ѹ҆бїемъ па́вла.
нн҃ѣ ѹ҆бо в̂ы скажи́те ты́сѧщникꙋ съборомъ, ꙗ҆ко да ѹ҆трѣ сведе́тъ е҆го къ ва́мъ, ꙗ҆́ко хотѧ́щем̑ разꙋмѣти и҆звѣ́стнѣе ꙗ҆́же ѻ҆ не́мъ·

м̂ы же пре́же да́же не прибли́житисѧ е҆мꙋ, гото́ви е҆смы ѹ҆би́ти е҆го·

Слы́шав же сн҃ъ сестры па́вловы, ко́въ, пришед̑ и҆ влѣ́зъ въ по́лкъ, сказа̀ па́влꙋ·

Призва́в же па́велъ е҆ді́ного ѿ со́тникъ речѐ.
ю҆́ношꙋ сего приведѝ къ ты́сѧшникꙋ, и҆́мать бо е҆мꙋ нѣ́что сказати·

ѻ҆́н же ѹ҆бо пои҆мъ е҆го приведѐ къ ты́сѧщникꙋ, и҆ реч̑҇.
ѹ҆́жникъ па́велъ призва́въ м̂ѧ ѹ҆моли, сего ю҆́ношꙋ привести к тебѣ, и҆мꙋща нѣ́что гл҃ати тебѣ·

Поим̑ же е҆го за́ рꙋкꙋ ты́сѧщник̑҇, и҆ ѿшед̑ на е҆дїнѣ въпраша́ше е҆го, чт̂о е҆сть е҆же и҆́маши възвѣсти́ти м̂и·

Реч̑҇ же, ꙗ҆́ко і҆ѹ҆де́е съвѣща́ша ѹ҆моли́ти т̂ѧ, ꙗ҆ко да ѹ҆́трѣ па́вла сведе́ши к ни́мъ въ собо́ръ, ꙗ҆ко хотѧ́щемъ и҆звѣ́ст꙽нѣе и҆стѧза́ти ꙗ҆́же ѻ҆ не́м꙽.
т̂ы ѹ҆бо не послꙋшаи и҆хъ, ловѧ́тъ б̂о е҆го ѿ них̑ мꙋ́жїе мно́жае четы́ридесѧте, и҆же заклѧ́ша себе ни ꙗ҆́сти ни пи́ти до́ндеже ѹ҆бїютъ е҆го·

И҆ нн҃ѣ гото́ви сꙋть, ча́юще е҆же ѿ тебе ѻ҆бѣща́нїѧ.
ты́сѧщникъ же ѹ҆бо ѿпꙋстѝ ю҆́ношꙋ, завѣща́въ ни е҆ді́номꙋ же повѣ́дати ꙗ҆́ко сїѧ ꙗ҆ви́лъ е҆си мн̂ѣ·

И҆ призва́в꙽ дв̂а нѣ́кїѧ ѿ со́тникъ, рече.
ѹ҆гото́вите м̂и во́ины въѻ҆рꙋже́ны дв̂ѣст̂ѣ, ꙗ҆́ко да и҆́дꙋтъ до кесарїа, а҆ ко́нникъ, сед̑мьдесѧт꙽, и҆ стрѣле́цъ, дв̂ѣст̂ѣ, ѿ третїѧ́го часа̀ но́щи, ско́тъ же привести да всади́вше па́вла и҆ прово́дѧтъ до фили́ка и҆ге́мона, написа же и҆ посла́нїе, и҆мꙋще ѻ҆́браз̑ се́й·

Клавдїе лисі́ѧ держа́вномꙋ и҆ге́монꙋ фили́кꙋ ра́доватисѧ.
мꙋ́жа сего ꙗ҆́та ѿ і҆ѹ҆д́ей, и҆ хотѧ́щꙋ ѹ҆бїену бы́ти ѿ ни́хъ, пристꙋ́пль с во́и҆ны ѿѧ҆хъ е҆го, ѹ҆вѣдѣвъ ꙗ҆́ко ри́млѧнинъ е҆сть.
хотѧ́ же разꙋмѣти винꙋ е҆ѧ҆же ра́ди пои҆ма́хꙋ на́нь, сведох̑ е҆го в сон̑҇мище их̑, е҆гоже ѻ҆брѣтохъ пое́млема ѻ҆ взыска́нїи зако́на и҆х꙽, н̂и е҆ді́но же досто́йно сме́рти и҆л̂и ѹ́замъ съгрѣшенїе и҆мꙋща·

Сказанꙋ же бы́вшꙋ м̂и ко́вꙋ на́ мꙋжа хотѧ́щꙋ быти ѿ і҆ѹ҆де́й, а҆́бїе послахъ е҆го к тебѣ, завѣща́въ и҆ клеветником̑ гл҃ати пред̑ тобо́ю, ꙗ҆же и҆́мꙋть на́нь, зрд̑авъ бꙋ́ди·

Во́и҆ни ѹ҆бо по повелѣнномꙋ и҆мъ, вземше па́вла ведо́ша ѻ҆́бнощь въ а҆нтипатри́дꙋ·

Въ ѹ҆́трѣи же ѻ҆ста́вльше ко́н꙽ники и҆тѝ с ни́мъ, възврати́шасѧ въ по́лкъ·

ѻ҆ни же пришед̑ше въ кесарїю́, и҆ давше посланїе и҆ге́монꙋ, прд̑еставиша и҆ па́вла е҆мꙋ.
проче́тъ же и҆ге́монъ посла́нїе, и҆ въпро́шь, ѿ кое҆ѧ̀ ѻ҆́бласти е҆сть, и҆ ѹ҆вѣ́дѣвъ ꙗ҆́ко ѿ киликі́ѧ, да ѹ҆слы́шꙋ ѻ҆ тебѣ рече е҆гда и҆ клеветницы̀ твоѝ прїи҆дꙋтъ.
повелѣ же е҆го въ прето́рѣ и҆́родовѣ стрещи·

Глв̑҇а, к҃д·

По пѧти́х же дн҃ехъ, сниде а҆рхїере́и а҆на́нїѧ съ ста́рцы, и҆ съ ри́торомъ терти́ломъ нѣ́кои҆мъ, и҆же сказаша и҆ге́монꙋ ѻ҆ па́влѣ·

Призва́нꙋ же бы́вшꙋ е҆мꙋ, начатъ понашати терти́лъ, гл҃ѧ.
мно́гъ ми́ръ ѹ҆лꙋча́юще тобо́ю, і҆ и҆справле́нїемъ быва́емымъ ꙗ҆́зыкꙋ семꙋ твои҆мъ промышле́нїемъ.
всѧ́кимъ ѻ꙼бразом̑ и҆ вездѣ̀, хва́лимъ преславне фили́ѯе, съ всѧ́кымъ бл҃годаре́нїем̑.
н̂о да не мно́жае стꙋжа́ю тебѣ̀, молю́ т̂ѧ послꙋ́шати на́съ въ кра́тцѣ твое́ю кро́тостїю.
ѻ҆брѣтше б̂о мꙋжа сего гꙋби́телѧ, и҆ дви́жꙋща противле́нїе всѣмъ і҆ѹ҆де́ѻ҆мъ, живꙋщимъ по вселе́ннѣи, и҆ пред̑ста́телѧ сꙋща назоре́истеи е́реси, и҆же и҆ цр҃ковъ покꙋси́сѧ ѻ҆сквернити·

е҆гоже и҆ ꙗ҆хомъ, и҆ по за́конꙋ на́шемꙋ хотѣ́хомъ сꙋди́ти е҆мꙋ̀·

пришед̑ же лиси́ѧ тысѧщъникъ, мно́гою си́лою ѿ рꙋкъ на́ших꙽ и҆схити, и҆ к тебѣ посла̀·

повелѣв꙽ и҆ намъ гл҃ющимъ на́нь прїити к тебѣ̀, ѻ҆ не́мже възмо́жеши самъ раз꙽сꙋдити, и҆ ѻ҆ всѣхъ сихъ познати, ѻ҆ ни́хже м̂ы пое́млемъ на́нь.
сложи́ша же сѧ і҆ѹ҆де́е гл҃юще, симъ та́ко быти.
ѿвѣща́ же па́велъ, поманꙋвшꙋ е҆мꙋ и҆ге́монꙋ гл҃ати·

ѿ мно́гъ лѣтъ сꙋща т̂ѧ сꙋдїю̀ пра́ведна ꙗ҆́зы́кꙋ семꙋ свѣ́ды, бл҃годꙋшнее ꙗ҆́же ѻ҆ мн̂ѣ ѿвѣща́ю, могꙋщꙋ т̂и разꙋмѣти.
ꙗ҆ко не мно́жае е҆сть м̂и дн҃їи дв̂анадесѧтихъ, ѿне́лиже възыдохъ поклони́тисѧ въ і҆ерс̑҇ли́мѣ.
и҆ ни въ цр҃кви ѻ҆брѣто́ша мѧ къ нѣ́кое҆мꙋ, гл҃юща и҆л̂и развѣтъ творѧ́ща на́родꙋ, н̂и въ со́нмищихъ н̂и въ́ градѣ, н̂иже довести м̂и могꙋтъ е҆лика тебѣ̀ нн҃ѣ на м̂ѧ гл҃ютъ.
и҆сповѣдꙋю же тебѣ с̂е, ꙗ҆́ко въ пꙋть е҆гоже сїи гл҃ютъ е́ресь, тако слꙋжꙋ̀ ѻ҆те́ческомꙋ бг҃ꙋ, вѣ́рꙋѧ всѣмъ сꙋщимъ въ зако́нѣ и҆ про̑҇ро́цѣхъ пи́санымъ, ѹ҆пованїе и҆мы́и на б҃а, е҆гоже и҆ са́ми сїи ча́ютъ, въскрс̑҇нїе хотѧ́щее быти ме́ртвымъ.
пра́ведником же и҆ грѣшникомъ.
ѻ҆ се́м же і҆ а҆зъ подвиза́юсѧ, непоро́чнꙋ съвѣсть и҆мѣ́а къ б҃ꙋ и҆ чл҃ком̑ всегда̀.
по лѣтех же мно́ѕѣхъ прїидо́хъ млс̑҇тынѧ сътворити въ ꙗ҆́зы́к꙽ мои и҆ приноше́нїа, в нихже ѻ҆брѣто́ша м̂ѧ пости́вшесѧ въ цр҃кви, н̂и съ народом̑, н̂и съ мл́ъвою.
нѣ́цыи же ѿ а҆сї́а і҆ѹ҆де́е, и҆́мже подоба́етъ предъ тѧ прїити и҆ гл҃ати, а҆ще и҆́мꙋтъ чт̂о на м̂ѧ.
и҆л̂и сами тїи да гл҃ютъ, кꙋю̀ ѻ҆брѣто́ша въ мнѣ непра́вдꙋ, ставшꙋ м̂и въ со́нмищи.
и҆л̂и ѻ҆ е҆ді́номъ семъ гла́сѣ и҆же, възопих̑ стоѧ̀ в них̑, ꙗ҆́ко ѻ҆ въскрс̑҇нїи мертвыхъ а҆зъ сꙋдъ прїе́млю дне́сь ѿ васъ·

Слы́шав же сїѧ фили́ѯъ, ѿвѣщева́ше имъ, и҆звѣ́стнѣе свѣ́дыи ꙗ҆́же ѻ҆́ проповѣ́ди е҆ѵг̑҇льстеи, гл҃ѧ, е҆гда лиси́а ты́сѧщникъ прїидетъ, разсꙋждꙋ ꙗ҆́же ѻ҆ васъ.
повелѣв же со́тникꙋ стрещѝ па́вла, и҆мѣти же ѻ҆сла́бꙋ, и҆ ни е҆ді́номꙋ же възбранѧ́ти свои́мъ е҆мꙋ слꙋжи́ти и҆л̂и приходи́ти к немꙋ.
по́ днех же нѣ́ких꙽ пришед̑ фили́ѯъ съ дрꙋси́лїею женою свое́ю сꙋщею і҆ѹ҆де́ѧ҆нынею, приз̑ва̀ па́вла, да слы́шт̑и ѿ него̀ вѣ́рꙋ ꙗ҆же въ х҃а і҆с҃а.
гл҃ющꙋ же е҆мꙋ̀ ѻ҆ пра́вдѣ и҆ ѻ҆ въздержа́нїи, и҆ ѻ҆ сꙋдѣ хотѧщемъ быти, пристра́шенъ быв̑҇ фили́ѯъ ѿвѣща̀, нн҃ѣ ѹ҆бо и҆дѝ, вре́мѧ же полꙋчивъ призовꙋ т̂ѧ.
въкꙋпѣ же и҆ надѣѧ҆сѧ ꙗ҆́ко м꙽зда̀ дастьсѧ е҆мꙋ ѿ па́вла, ꙗ҆́ко да ѿпꙋститъ е҆го.
тѣмже и҆ ча́сто призыва́ѧ е҆го бесѣ́доваше с нимъ·

двѣма же лѣтома сконча́вшемасѧ, прїа́тъ и҆з꙽мѣненїе фили́ѯъ, поркїа фи́ста.
хотѧ же ѹ҆го́дное сътвори́ти і҆ѹ҆де́ѻмъ фили́ѯъ, ѻ҆ста́ви па́вла свѧ́зана·

Глв̑҇а, к҃е·

Фи́стъ же ѹ҆бо прїем꙽ власть, по трехъ дн҃ехъ възы́де въ і҆ерс̑҇ли́мъ ѿ кесарїѧ.
сказа́ша же е҆мꙋ а҆рхїере́е и҆ пе́рвїи і҆ѹ҆де́ѻ҆мъ на па́вла, и҆ молѧхꙋ е҆го просѧще блгд̑ть нань, ꙗ҆́ко да по́слетъ е҆го въ і҆ерс̑҇ли́м꙽, лови́твꙋ творѧще ꙗ҆́ко да ѹ҆бїютъ е҆го на пꙋтѝ.
фи́стъ же повелѣ стрещѝ павла въ кесарїи́, са́м же хотѧ̀ въско́рѣ и҆зы́ти.
и҆же ѹ҆бо си́лни въ ва́съ, рече, съ мно́ю шедше а҆ще е҆сть каѧ непра́вда въ мꙋжѝ се́мъ, да гл҃ютъ нань.
пребыв же ѹ҆ нихъ не мно́жае десѧти дн҃їи, сни́де въ кесарїю́·

на ѹ҆трѣѝ сѣдъ на сꙋдищи, повелѣ па́вла привестѝ.
приведе́нꙋ же бывшꙋ е҆мꙋ, ѻ҆́крс̑҇тъ ста́ша и҆же ѿ і҆е҆рлс̑҇и́ма съшедъшиѝ і҆ѹ҆де́е, мно́ги и҆ тѧ́жки вины̀ приносѧще на па́вла, и҆хже не можа́хꙋ и҆зъѧ҆ви́ти, ѿвѣщава́ющꙋ е҆мꙋ, ꙗ҆ко ни въ за́конѣ і҆ѹ҆де́истѣ н̂и въ цр҃кви н̂и на кесарѧ что̀ съгрѣшихъ.
фи́стъ же хотѧ ѹ҆годное і҆ѹ҆деѻ҆мъ сътворити, ѿвѣща́въ па́влови речѐ.
хо́щеши л̂и въ і҆ерс̑҇ли́мъ възшед̑ та́мо ѻ҆ си́хъ сꙋдъ прїа́ти ѿ менѐ;
рече же па́велъ, на сꙋдищи кесаре́вѣ стоа̀ е҆смь, и҆дѣже м̂и достои҆тъ сꙋдъ прїа́ти.
і҆ѹ҆де́а ничи́мже ѻ҆бидил̑҇ е҆смь, ꙗ҆́коже и҆ т̂ы добрѣ вѣ́си.
а҆ще ѹ҆бо непра́вдꙋа и҆л̂и досто́иное сме́рти сътворих̑ чт̂о, не ѿме́щꙋсѧ ѹ҆́мрети.
а҆ще ли же ничтоже е҆сть ѻ҆ мн̂ѣ е҆же сїи на мѧ клеве́щꙋтъ, никтоже м̂ѧ мо́жетъ тѣмъ вы́дати, кесарѧ̀ нарица́ющꙋ.
тогда фи́стъ състѧза́всѧ съ совѣтникы, ѿвѣща̀, кесарѧ̀ л̂и наре́клъ е҆си;
къ кесарю да и́деши.
дн҃ем же минꙋ́вшимъ нѣ́кои҆мъ·

зач̑҇, м҃и·

А҆гри́па цр҃ь и҆ верникїи снидо́ша в кесарїю цѣловати фи́ста.
ꙗ҆коже мно́ги дн҃и пребы́ста т̂ꙋ, фи́ст꙽ сказа̀ цр҃ю ꙗ҆же ѻ҆ па́влѣ, гл҃ѧ, мꙋж꙽ нѣ́кїи е҆сть ѻ҆ста́вленъ ѿ фили́ѯа ѹ҆́жникъ, ѻ҆ не́мже бывшꙋ м̂и въ і҆ерс̑҇ли́мѣ, ꙗ҆ви́ша а҆рхїере́е и҆ старцы і҆ѹ҆де́истїи, просѧ́ще нань прѧ̀.
к ни́мже ѿвѣщах꙽, ꙗ҆ко нѣ́сть ѻ҆бычаи ри́млѧномъ выдати кое҆го чл҃ка на поги́бель, пре́же даже ѻ҆клевета́емыи предъ лицемъ не и҆́мать клеве́щꙋщихъ е҆го, и҆ мѣсто ѿвѣта прїи́мет꙽ ѻ҆ свое҆мъ съгрѣше́нїи.
съшед̑шим же сѧ и́мъ зд̂ѣ, закоснѣнїа ни е҆ді́наго же сътворихъ, на ѹ҆трѣѝ сѣдъ на сꙋдищи, повелх̑ѣ привести мꙋжа.
ѻ҆крс̑҇тъ е҆го став̑҇ше клевет̑ницы̀, ни е҆ді́нꙋ винꙋ нанесо́ша и҆хже непщева́хъ а҆з꙽.
стѧза́нїа же нѣ́каа ѻ҆ свое́и разли́чнѣй вѣрѣ и҆мѧ́хꙋ к немꙋ, и҆ ѻ҆ нѣ́кое҆мъ і҆с҃ѣ ѹ҆ме́ршемъ, е҆гоже па́велъ гл҃аше жи́ва сꙋща·

Недоѹ҆мѣѧ же сѧ а҆зъ е҆же ѻ҆ семъ възыска́нїи, і҆ и҆стѧза́нїи.
гл҃ах̑ а҆ще хо́щетъ и҆ти въ і҆ерс̑҇ли́мъ, и҆ та́мо сꙋдъ прїима́ти ѻ҆ сих꙽.
па́влꙋ же и҆спроси́вшꙋ блюде́нꙋ быти е҆мꙋ до разсꙋженїѧ а҆вгꙋста,<.>

Повелѣхъ блюстѝ е҆го дондеже послю̀ е҆го къ кесарю̀·

А҆гри́ппа же къ фи́стꙋ рече, хотѣх꙽ а҆зъ и҆ са́мъ чл҃ка сего слы́шати.
ѻ҆́нже рече, ѹ҆трѣ ѹ҆слы́шиши е҆го·

На ѹ́трѣи же пришед̑шꙋ а҆гри́ппѣ и҆ верникїю́ съ мно́гою го́рдостїю, и҆ вшедшим̑ в сꙋде́бнѣи полатѣ, съ ты́сѧщникы, и҆ с наро́читыми мꙋжи гра́да, и҆ повелѣ́вшꙋ фи́стꙋ, приведоша па́вла.
и҆ рече фи́стъ, а҆гри́ппо царю, и҆ вс̂и пришед̑шеѝ с нами мꙋжїе, ви́дите сего̀, ѻ҆ немже вс̂е мно́жество і҆ѹ҆де́и сꙋжа́хꙋ м̂и, въ і҆ерс̑҇ли́мѣ же и҆ зд̂ѣ, въпїю́ще, ꙗ҆ко не подоба́етъ жи́ти е҆мꙋ ктомꙋ.
а҆з же разꙋмѣвъ ничтоже досто́ино е҆мꙋ сме́рти сътво́рша, и҆ самомꙋ же семꙋ нарица́ющꙋ сева́ста сꙋдих̑ посла́ти е҆го.
ѻ҆ нем̑же и҆звѣстнѣе чт̂о писа́ти господи́нꙋ не и҆́мамъ, тѣмже и҆ приведохъ е҆го пред̑ вами, наипа́че пред̑ тѧ а҆гри́ппо царю, ꙗ҆́ко да разсꙋжд̑енїю бывшꙋ, и҆́мам꙽ чт̂о писа́ти.
без꙽слове́сно б̂о мни́т ми сѧ посыла́ющꙋ ю́жника.
а҆ ꙗ҆́же на́нь вины̀ не сказати·

Глв̑҇а, к҃ѕ·

зач̑҇, м҃ѳ·

Агри́ппа же къ па́влꙋ речѐ, повелѣва́етъ ти сѧ ѻ҆ себѣ самомꙋ гл҃ати·

Тогда павелъ ѿвѣщева́ше просте́ръ рꙋ́кꙋ.
ѻ҆ всѣхъ ѻ҆ ни́хже ѻ҆клевета́емъ е́смь ѿ і҆ѹ҆де́и цр҃ю а҆гри́ппо, непщꙋ́ю себе бл҃же́на прїитѝ к тебѣ, хотѧ́ща пред̑ тобою́ ѿвѣща́ти днс̑҇е, паче вѣ́дца т̂ѧ сꙋща всѣм꙽ і҆ѹ҆де́искимъ ѻ҆бычае҆м же и҆ възыска́нїемъ.
тѣмже молю́тисѧ, долготерпѣли́вно послꙋ́шати менѐ·

Житїе ѹ҆б̂о мое е҆же ѿ ю́ности и҆спе́рва бывъшее въ ꙗ҆зы́цѣ мое҆мъ въ і҆ерс̑҇ли́мѣ, вѣ́дѧть вс̂и і҆ѹ҆де́е, вѣ́дѧще мѧ и҆спе́рва, а҆ще хотѧ́т꙽ свѣдѣтельствовати, ꙗ҆́ко по и҆звѣстнѣи е́реси нашеа вѣ́ры, жихъ фарисе́и·

И҆ нн҃ѣ ѻ҆ ѹ҆пова́нїи ѻ҆бѣтова́нїа, бывшаго ѿ б҃а къ ѿц҃емъ нашимъ, стою сꙋди́м꙽, в не́мже ѻ҆́бѣнадесѧте колѣ́нѣ наши бес꙽преста́ни нощъ и҆ дн҃ь слꙋжа́ще, надѣ́ютсѧ дои҆тѝ.
ѻ҆ немже ѹ҆пова́нїи ѻ҆клевета́емъ е҆смь царю а҆гри́ппо ѿ і҆ѹ҆де́и.
чт̂о невѣ́рно сꙋдитсѧ ва́ми, а҆ще б҃ъ мр҃твыа въз꙽ставлѧет̑ а҆зъ б̂о ѹ҆бо мнѣх꙽ себе проти́вꙋ и҆́мени і҆с҃а назоре́а, ꙗ҆ко подобае҆тъ мно́га сътвори́ти съпроти́вна, е҆же и҆ сътворих̑ въ і҆ерс̑҇ли́мѣхъ.
и҆ мно́ги ѿ ст҃ыхъ а҆зъ въ темни́цахъ затворѧх̑, е҆же ѿ а҆рхїере́и ѻ҆бласть прїе́м꙽.
ѹ҆бива́емом же и҆мъ прилага́хъ съвѣтъ, и҆ на всѣхъ сонмищахъ множи́цею мꙋча̀ и҆хъ принꙋжд̑ахъ хꙋлити, преи҆зли́ха же враждꙋ́а на них̑, гонѧ́хъ даже и҆ до внѣшних̑ градовъ·

въ них̑же иды̀ въ дама́скъ, съ ѻ҆́бластїю и҆ повелѣ́нїемъ е҆же ѿ а҆рхїере́й, в полꙋдн҃е на пꙋтѝ видѣ́хъ царю, съ нб҃сѐ па́че сїѧ҆нїѧ слн҃чнаго ѻ҆сїѧ҆вши м̂ѧ свѣтъ, і҆ и҆же съ мно́ю и҆дꙋщихъ.
всѣм же пад̑шимъ намъ на́ землю, слы́шахъ гла́съ гл҃ющь къ мнѣ, и҆ вѣща́ющъ е҆вреи́скимъ ꙗ҆́зы́комъ.
са́вле са́вле, чт̂о м̂ѧ го́ниши;
жесто́ко т̂и е҆сть проти́вꙋ ражнꙋ̀ пра́ти·

А҆зъ же рѣхъ, кт̂о е҆си г҃и;
ѻ҆́н же реч̑҇, а҆́зъ е҆смь і҆с҃ е҆гоже т̂ы го́ниши.
н̂о въста́ни, и҆ ста́ни на́ ногꙋ свое҆ю̀.
на се б̂о ꙗ҆́ви́х ти сѧ, сътвори́ти тѧ слꙋгꙋ̀ и҆ свѣдѣтелѧ, и҆хже ви́дѣлъ е҆си і҆ и҆хже ꙗ҆влю̀ тебѣ, и҆зима́а т̂ѧ ѿ людїи і҆ѹ҆де́искихъ и҆ ѿ ꙗ҆зык̑҇, к ни́мже а҆́зъ т̂ѧ послю̀, ѿве́рсти ѻ҆́чи их̑, да ѻ҆братѧ́тсѧ ѿ тмы̀ въ свѣтъ, и҆ ѿ ѻ҆́бласти сатанины къ бг҃ꙋ, е҆же прїа́ти и҆мъ ѻ҆ставле́нїе грѣхо́мъ, и҆ достоѧ́нїе въ ст҃ых̑ вѣ́рою и҆же въ м̂ѧ·

Тѣмже царю а҆гри́ппо, не бых̑ проти́венъ нбс̑҇номꙋ видѣ́нїю.
н̂о сꙋщимъ въ дама́сцѣ пре́жд̑е, и҆ въ і҆ерс̑҇ли́мѣхъ, въ всѧ́кꙋ же стра́нꙋ і҆ѹ҆де́искꙋ и҆ ꙗ҆зы́ком̑ проповѣ́даю пока́атисѧ, и҆ ѻ҆браща́тисѧ къ бг҃ꙋ, досто́ина покаѧ́нїю дѣ́ла творѧ́ще·

Си́хъ ра́ди м̂ѧ і҆ѹ҆де́е е҆мше въ ст҃и́лищи хотѧ́хꙋ растерза́ти·

По́мощь ѹ҆бо ѹ҆лꙋчи́въ ꙗ҆́же ѿ бг҃а, да́же до́ дн҃е сего стоѧ̀, свѣдѣтельствꙋю ма́лꙋ же и҆ вели́кꙋ, ничт̂оже кромѣ вѣща́ѧ, и҆хже прро̑҇цы реко́ша хотѧ́щих̑ бы́ти, и҆ моѷсе́и·

А҆ще мꙋ́кꙋ прїемлет̑ х҃с, а҆ще пе́рвыи ѿ въскрешенїѧ ме́ртвыхъ, свѣтъ хо́щетъ проповѣ́дати лю́демъ і҆ѹ҆де́йскимъ и҆ ꙗ҆́зы́ком꙽·

Сїѧ же е҆мꙋ ѿвѣщава́ющꙋ, фи́стъ ве́лїемъ гла́сомъ речѐ, бѣснꙋеши ли сѧ па́вле.
мно́гїѧ т̂ѧ кни́ги въ неи҆стовьство прелага́ютъ·

ѻ҆́н же, не бѣснꙋ́юсѧ речѐ держа́вныи фи́сте, н̂о и҆стинны и҆ цѣломꙋ́дрїѧ гл҃ы вѣща́ю.
вѣсть б̂о ѻ҆ си́хь ца́рь, к немꙋже и҆ съ дерзнове́нїемъ гл҃ю.
ѹ҆таи҆ти б̂о сѧ е҆мꙋ чт̂о ѿ си́хъ не вѣ́рꙋю ни е҆ді́но·

Нѣ́сть б̂о въ ѹ҆́глѣ сътворе́но с̂е·

Вѣрꙋеши ли̂ царю а҆гри́ппо прро̑҇комъ вѣмъ ꙗ҆ко вѣ́рꙋеши·

А҆гри́ппа же къ па́влꙋ реч̑҇.
въ ма́лѣ м̂ѧ препира́еши христїѧ҆нина бы́ти·

Па́велъ же речѐ.
моли́лъ ѹ҆бо бы́хъ бг҃а и҆ въ ма́лѣ и҆ въ мно́ѕѣ, не то́кмо тебе, н̂о и҆ всх̑ѣ слы́шащих̑ м̂ѧ дне́сь, бы́ти и҆мъ тацѣмъ, ꙗ҆коже и҆ а҆зъ е҆смь, кромѣ ѹ҆зъ си́хъ.
и҆ сїа ре́кшꙋ е҆мꙋ,<.>

Въста̀ ца́рь, і҆ и҆ге́мон꙽, и҆ верникїѧ и҆ сѣдѧ́щеѝ с ними.
и҆ ѿшед̑ше бесѣ́довахꙋ дрꙋгъ къ дрꙋгꙋ гл҃ще, ꙗ҆́ко ничт̂оже сме́рти досто́ино и҆ли ѹ҆замъ твори́т꙽ чл҃къ се́и·

А҆гри́ппа же фѷстꙋ речѐ, ѿпꙋщенъ можа́ше чл҃къ се́и быти, а҆ще не бы́ нарицал̑҇ кесарѧ·

И҆ та́ко сꙋди е҆мꙋ и҆гѣмон꙽, посла́ти е҆го къ кесарю̀·

Глв̑҇а, к҃з·

зач̑҇, н҃·

И ꙗ҆коже сꙋжено бы́сть ѿплы́ти намъ въ и҆талїю, пре́даа́хꙋ павла же, і҆ и́ны нѣкїѧ ю́жники сотникꙋ и҆́менем̑ і҆ѹ҆лїю́, спи́ры севастїискїа·

Въшд̑еше же въ кора́бль а҆драмит̑скыи, въсхотѣ́вше плы́ти въ а҆сі́искаѧ мѣста, ѿвезо́хомсѧ,<.>

Сꙋщꙋ с нами а҆риста́рхꙋ македо́нѧнинꙋ ѿ солꙋнѧ·

Въ дрꙋгїи же пристахомъ въ сидонѣ.
чл҃колю́бїе же і҆ѹ҆лї́е па́влови дѣѧ́, повелѣ къ дрꙋгомъ шд̑ешам̑ прилѣжа́нїе ѹ҆лꙋчити·

И҆ ѿтꙋдꙋ ѿве́зшесѧ, прїидо́хомъ въ кѷпръ,<.>

Зане вѣтри бѣхꙋ проти́вни.
пꙋчинꙋ же кѷлїкїи́скꙋю и҆ памфѷлїискꙋю преплывше,<.>

Прїидохомъ въ мѷрꙋ ликїискꙋ.
и҆ т̂ꙋ ѻ҆брѣтъ со́тникъ корабль а҆леѯа́ндрьскыи пловꙋщь въ и́талїю, всади́ н̂ы вонь·

Въ мно́ги же дн҃и косно пла́вающе, и҆ е́два бывше въ кни́дѣ, не ѻ҆ставлѧ́ющꙋ насъ вѣтрꙋ,<.>

Преплыхомъ въ крит̑ и҆же въ салмонъ.
е҆́два̀ же и҆збира́юще кра́и,<.>

Прїидо́хомъ на мѣсто нѣ́кое нарица́емое до́брое приста́нище, и҆дѣже б̂ѣ близъ град̑ ласе́и.
мно́гꙋ же вре́мени минꙋ́вшꙋ·

И҆ сꙋщꙋ ѹ҆же събла́зненꙋ пла́ванїю, занеже и҆ постъ ѹ҆же б̂ѣ прише́лъ, съвѣтоваше па́велъ гл҃ѧ им̑,<.>

Мꙋжїе вижд̑ꙋ ꙗ҆́ко съ досаженїемъ, и҆ мно́гою тщето́ю, не токмо бременю и҆ кораблю, н̂о и҆ дш҃амъ на́шим̑ хо́щет꙽ бы̀ти пла́ванїе·

Со́тникъ же ко́рмъчїю и҆ нав꙽кли́ра послꙋшаше паче, неже л̂и павломъ гл҃емыхъ·

Не добрꙋ же пристанищꙋ сꙋщꙋ къ ѻзимѣнїю, корабницы съвѣща́шѧ ѿвестисѧ ѿтꙋдꙋ,<.>

А҆ще како възмо́гꙋтъ достигше въ фѷникїю ѻ҆зимѣти, въ пристанищи крит̑стѣмъ,<.>

Зрѧщимъ на ли́вꙋ и҆ къ хо́рꙋ.
дъхнꙋ́вшꙋ же ю҆гꙋ, мнѣ́вше во́лю свою ѹ҆лꙋчи́ти,<.>

Въземше вѣтрила, везꙋщесѧ въскра́и, прїидоша въ крит̑.
не по мно́ѕѣ же възвѣѧ проти́венъ е҆мꙋ вѣтръ бꙋ́рен꙽, нарица́емыи е҆вроклидонъ·

Въсхище́нꙋ же бы́вшꙋ кораблю̀, и҆ не могꙋщꙋ съпроти́витисѧ вѣтрꙋ, въдавшесѧ волнамъ носи́ми бѣхом̑.
ѻ҆́стров꙽ же нѣ́кїи ми́мотекше, нарица́ющьсѧ клавдїи́, е҆два възмогохом̑ ѹ҆дръжа́ти кора́бль, е҆гоже вземше всѧким̑ ѻ҆́бразом̑ помага́хꙋ под̑ѹ҆твръжаю҆ще корабль, боꙗ҆ще же сѧ да не в си́рть въпадт̑ꙋ.
низпꙋстивше па́рꙋсъ, си́це носи́ми бѣхом꙽, велми же ѻ҆бꙋрева́емом̑ намъ, на ѹ҆трѣи и҆змѣта́нїе творѧ́хꙋ бре́менемъ·

и҆ въ тре́тїи дн҃ь свои́ма рꙋка́ма ꙗ҆дрило кора́бленое вер꙽гохомъ·

Ни сл҃нцꙋ же ни звѣзда́м꙽ ꙗ҆́вльшемсѧ на мно́ги дн̂и, зимѣ же не ма́лѣ належа́щи·

Прочее ѿи҆ма́шесѧ наде́жда вс̂ѧ е҆же спс̑҇ти́сѧ намъ.
мно́гꙋ же неꙗ҆денїю сꙋщꙋ·

Тогда̀ ставъ па́велъ посредѣ и҆́хъ, рече.
подоба́ше ѹ҆́бо ѽ мꙋжїе послꙋшав꙽ше мене, не ѿвестисѧ ѿ кри́та·

и҆збыти же досаженїѧ сего и҆ тщеты.
и҆ с̂е нн҃ѣ молю̀ в̂ы бл҃годꙋшъствовати,<.>

Поги́бель б̂о дш҃и ни е҆ді́ного бꙋдет̑ ѿ васъ, развѣ кораблѧ.
пред̑ста̀ б̂о ми в сїю нощь, е҆гоже а҆зъ е҆смь е҆мꙋже и҆ слꙋжꙋ̀, а҆гг҃лъ бж҃їи гл҃ѧ.
не бо́исѧ па́вле, кесарю́ т̂и подоба́ет꙽ пред̑стати·

и҆ с̂е дарова тебѣ б҃ъ вс̂ѧ пла́вающаѧ с тобою.
тѣмже дръза́ите мꙋжїе,<.>

Вѣрꙋю б̂о бг҃ови ꙗ҆́ко та́ко бꙋдет̑, и҆́мже ѻ҆́бразомъ реч̑҇но м̂и бы́сть·

Въ ѻ҆́стров же нѣ́кїи подоба́етъ нам̑ ѿпа́сти.
ꙗ҆́коже четве́ртаѧнадесѧть нощь бы́сть, носи́момъ нам̑ въ а҆дрїи́скои пꙋчи́нѣ въ полꙋнощи, непщева́хꙋ кора́бленицы прибли́житисѧ им̑ къ нѣ́кое҆и странѣ·

І҆ и҆змѣривше глꙋбинꙋ, ѻ҆брѣтоша саже́неи двадесѧть·

Ма́ло же прешед̑ше, и҆ паки и҆змѣ́ривше, ѻ҆брѣто́ша саже́неи, пѧ́тьнадесѧть·

Боѧ́ще же сѧ да не како въ прꙋднаѧ̀ мѣста въпадꙋтъ·

ѿ н́оса кораблю̀ вр́ьгше котвы четы́ре, молѧ́хомсѧ да дн҃ь бꙋдет̑·

Кора́блеником̑ же и҆щꙋщемъ бѣжати и҆с кораблѧ, и҆ низ̑вѣсившемъ ладїю въ мо́ре, и҆звѣтом꙽ ꙗ҆́ко ѿ но́са хотѧщем̑ котвы прострѣти·

Рече па́велъ к꙽ со́тникꙋ и҆ во́ином̑, а҆ще не сїи пребꙋдꙋтъ въ кораблѝ, в̂ы сптс̑҇и́сѧ не мо́жете·

Тогда̀ во́ини ѿрѣ́заша ѹ҆жа ладїи́цы, и҆ ѻ҆ставиша̑сѧ ѿпасти·

до́ндеже хотѧ́ше дн҃ь бы́ти, молѧ́ше па́велъ всх̑ѣ прїа́ти пищꙋ гл҃ѧ·

Четы́ренадесѧтыи днесь дн҃ь ча́юще не ꙗ҆́д꙽ше пребываете ничтоже вкꙋсивше·

Тѣмже молю̀ вас̑҇ прїѧ́ти пи́щꙋ, се́ бо къ ва́шемꙋ спасе́нїю е҆сть·

Ни е҆ді́номꙋ б̂о ѿ васъ власъ ѿ главы̀ ѿпадет̑.
рекъ же сїѧ, и҆ прием̑ хлѣбъ, бл҃годарѝ б҃а предъ всѣми, преломль, начат̑ ꙗ҆́сти.
бл҃гонадежни же быв̑҇ше вс̂и, и҆ тїи прїѧ́шѧ пи́щꙋ.
бѣ же въ корабли всѣхъ дꙋшъ двѣстѣ сед̑мьдесѧтъ шесть·

Насы́щше же сѧ брш̑҇ана, ѻ҆блегчи́ша кора́бль, и҆змета́юще пшени́цꙋ в мо́ре.
е҆гда же дн҃ь бы́сть, землѧ не познавахꙋ, нѣдро же нѣ́кое сматрѧхꙋ и҆мꙋще пѣсокъ, въ неже съвѣща́ша а҆ще мо́щно е҆сть из̑влещи кора́бль·

и҆ а҆нъкѷры събрав̑҇ше везѧхꙋсѧ̀ по морю, и҆ кп̑҇ꙋпно ѻ҆слабив̑҇ше ѹ҆же кормилом̑, и҆ вз̑ъдвигше малое вѣтрило, и҆ дыха́ющꙋ вѣтрецꙋ везо́хомсѧ на кра́и.
въпад̑ше же въ мѣсто и҆со́пно, ѻ҆ставиша кора́бль, и҆ но́сꙋ ѹ҆бо ѻ҆прѣ́вшꙋсѧ, пребы́сть недви́жим̑.
корми́ло же разъбива́шесѧ ѿ нꙋжа во́лнъ.
вои́ном̑ же съвѣтъ бысть, да ѹ́жники поби́ют̑, да не кто̀ поплывъ и҆збѣгнет̑·

Со́т꙽никъ же хотѧше съблюстѝ па́вла, възбрани съвѣтꙋ и҆́хъ.
повелѣ же могꙋщим̑ пла́вати въскочьшеи пр́ъвѣе и҆зы́ти на кра́и·

А҆ прочїи ѻ҆ви ѹ҆бо на дщи́цахъ, ѻ҆́ви же на нѣчемъ ѿ караблѧ.
и҆ та́ко бы́сть всѣмъ спс̑҇ти́сѧ на́ землю·

Глв̑҇а, к҃и·

зач̑҇, н҃а·

Сп҃се́ни же бы́вше и҆же ѻ҆ павлѣ ѿ кораблѧ, тогда́ разꙋмѣша ꙗ҆ко мелетїи ѻ҆стров̑҇ нарица́етсѧ.
варвари же творѧхꙋ не ма́ло млс̑҇рдїе на́мъ·

Възгнѣщьше б̂о ѻ҆́гнь, прїа́ша всѣхъ насъ, за настоѧ́щїи до́ждь и҆ зи́мꙋ·

Съграма́ждьшꙋ же па́влꙋ мно́жество ро́ждїѧ, и҆ възлож̑шꙋ на ѻ҆гнь·

Є҆хи́дна ѿ тепло́ты и҆зшед̑ши, сѣкнꙋ въ рꙋ́кꙋ е҆го.
й ꙗ҆́коже видѣша ва́рвари ви́сѧщꙋ ѕмїю ѿ рꙋки е҆го, гл҃ахꙋ дрꙋгъ къ дрꙋгꙋ, всѧко ѹ҆бїи́ца е҆сть чл҃къ се́и҆, е҆гоже спасе̂на ѿ морѧ, сꙋд꙽ бж҃їи жити не ѡ҆ста́ви·

То́й же ѹ҆́бо ѿтрѧ́съ змїю въ ѻ҆́гнь, не пострада̀ ничтоже зл̂а.
ѻ҆́ни же ча́ѧхꙋ е҆го хотѧща възгорѣтисѧ, и҆л̂и па́сти внеза́пꙋ ме́ртва·

ѻ҆ мно́ѕѣ же того ча́ющем̑ и҆ зрѧ́щемъ ничтоже ѕл̂а в немъ бы́вша, претворшесѧ гл҃ахꙋ б҃а того бы́ти·

ѻ҆́крестъ же мѣ́ста ѻ҆́ного бѣа́хꙋ се́ла пр́ьваго въ ѻ҆стровѣ и҆менем̑ поплі́ѧ, и҆же прїимъ насъ, тр̂и дн҃и любезнѣ и҆ срд̑чнѣ ѹ҆чреди·

бы́сть же ѿц҃ꙋ поплїе҆вꙋ ѻ҆гнем̑ и҆ водным̑ трꙋдом̑ ѻ҆дръжи́мꙋ лежати.
к немꙋ же па́велъ вшед̑ и҆ помоли́всѧ, и҆ възло́жъ рꙋцѣ своѝ нань, и҆сцѣли е҆го·

Семꙋ же бы́в꙽шꙋ, и҆ прочїи и҆́мꙋщеи недꙋги въ ѻ҆́стровѣ, прихожа́хꙋ, і҆ и҆сцѣлева́хꙋсѧ,<.>

И҆ же мно́гими честьми почто́ша нас̑҇, и҆ ѿвозѧщим̑сѧ намъ дарованїа мно́га възнесше, полага́хꙋ ꙗ҆́же на потре́бꙋ·

По трехъ же мцс̑҇ехъ ѿвезо́хомъсѧ въ корабли, презимѣвшим̑ въ ѻ҆стровѣ а҆леѯа́ндрьстем̑ под̑пи́саномъ диѻ҆скоры, и҆ доплыв̑҇ше в сиракꙋсы, пребыхом̑ дн҃и тр̂и, ѿтꙋдꙋ же ѿплывше·

Прїидохом̑ въ ригі́ю и҆ по е҆ді́ном̑ дн҃и, възвѣѧ҆вшꙋ ю҆́гꙋ, въ вто́рыи дн҃ь прїидохомъ въ потиѻ҆лъ, и҆дѣже ѻ҆брѣт꙽ше бра́тїю, ѹ҆молени бы́хомъ ѿ ни́хъ пребыти дн҃їи сед̑мь, и҆ тако въ рим̑ прїидохомъ·

И҆ т̂ꙋ братїѧ слы́шавше ꙗ҆́же ѻ҆ нас̑҇.
и҆зыдо́ша въ срѣтенїе наше, даже до а҆пїева торга̀ и҆ трїехъ корчемницъ.
и҆́хже видѣв꙽ па́вел̑҇, и҆ бл҃годаривъ б҃а, прїѧт̑ дръз꙽новенїе·

Є҆гда же прїидохомъ в рим̑, со́тникъ предас̑҇ ѹ҆жники вое҆во́дѣ.
па́влꙋ же повелѣ пребыва́ти ѻ҆ себѣ̀, съблюда́ющимъ е҆го во́и҆номъ·

Бы́сть же по дн҃ехъ трехъ, съзвати па́влꙋ сꙋщаа і҆ѹ҆деѻмъ пр́ьвыѧ·

Съшед̑шем же сѧ и҆́мъ, гл҃аше к ним̑.
мꙋ́жїе братїе а҆́зъ ничтоже съпроті́вно сътворих̑ лю́демъ, и҆л̂и ѻ҆бы́чаем̑ ѻ҆теческымъ, ѹ́жникъ ѿ і҆ерс̑҇ли́млѧнъ преданъ быхъ въ рꙋцѣ ри́млѧном̑, и҆же разсꙋди́вше ꙗ҆́же ѻ҆ мнѣ̀ хотѧ́хꙋ пꙋстити, зане ни е҆ді́нѣи винѣ смр҃тнѣи бы́ти въ мн̂ѣ·

съпроти́в же гл҃ющемъ і҆ѹ҆де́ѻмъ, нꙋ́жа м̂и бы́сть нарица́ти кесарѧ,<.>

Не ꙗ҆́ко на ꙗ҆зы́къ мои и҆мѣѧ чт̂о ѻ҆клевета́ти·

Сеѧ̀ ради ѹ҆бо вины̀ ѹ҆молих̑ васъ ви́дѣти и҆ бесѣдовати.
наде́жда же ради і҆ил҃евы вери́гами си́ми ѻ҆блжоенъ е҆смь.
ѻ҆ни же к немꙋ рѣша, м̂ы ни писа́нїа ѻ҆ тебѣ прїа́хом̑ ѿ і҆ѹ҆де́и, ни пришед̑ кт̂о ѿ бра́тїѧ възвѣсти и҆л̂и гл҃а чт̂о ѻ҆ тебѣ зл̂о.

Мо́лим же сѧ ѿ тебе слы́шати, ꙗ҆́же мꙋдръствꙋеши.
ѻ҆ е҆реси же се́й вѣдомо ес̑҇ нам̑, ꙗ҆́ко всю́дꙋ съпротивъ гл҃ема ес̑҇.
ѹ҆ста́вивше же е҆мꙋ дн҃ь, прїидоша к немꙋ въ страннопрїе́мницꙋ мно́жаи҆шїи,<.>

И҆ мже сказа́ше свѣдѣтельствꙋѧ црс̑҇твїе бж҃їе, ѹ҆вѣрѧа же и҆хъ ꙗ҆́же ѻ҆ і҆с҃ѣ, ѿ зако́на моѷсе́ѻва и҆ пророкъ, ѿ ѹ҆тра да́же и҆ до́ вечера.
и҆ ѻ́ви ѹ҆бо вѣ́ровахꙋ гл҃емым̑, ѻ҆́ви же не вѣровахꙋ.
не съгла́сни же сꙋще дрꙋгъ къ дрꙋгꙋ, ѿхожа́хꙋ.
рекшꙋ па́влꙋ гл҃ь е҆ді́нъ·

Ꙗ҆́ко до́брѣ дх҃ъ ст҃ыи гл҃а і҆саїе҆мъ прро̑҇комъ къ ѿц҃емъ вашим꙽ гл҃ѧ,<.>

И҆ дѝ к лю́демъ сим̑ и҆ рцы̀, слꙋ́хомъ ѹ҆слы́шите, и҆ не и҆́мате разꙋмѣти.
и҆ ви́дѧще ѹ҆́зрите, и҆ не и҆́мате ви́дѣти.
ѻ҆дебелѣ б̂о срд̑це людїи сихъ, и҆ ѹ҆ши́ма тѧ́жко слы́шаша, и҆ ѻ҆́чи свои смѣжи́ша, да не ка́ко ви́дѧт̑ ѻ҆чи́ма, и҆ ѹ҆ши́ма ѹ҆слы́шат̑, и҆ срд̑цем̑ ѹ҆разꙋмѣ́ютъ, и҆ ѻ҆братѧтсѧ, і҆ исцѣлю̀ и҆хъ·

Вѣ́домо ѹ҆бо да бꙋ́дет̑ вамъ, ꙗ҆́ко ꙗ҆зы́комъ посла́сѧ сп҃се́нїе бж҃їе,<.>

Са́ми и҆ да слы́шатъ.
и҆ сїа томꙋ̀ ре́кшꙋ, ѿи҆до́ша і҆ѹ҆де́е, мно́го и҆мꙋще въ себѣ̀ взыска́нїе·

Пребы́сть же па́велъ дв̂ѣ лѣтѣ и҆спо́лнь свое҆ю̀ мъздо́ю, и҆ прїима́ше вс̂ѧ приходѧ́щаѧ к немꙋ̀ проповѣ́дꙋѧ̀ црс̑҇твїе бж҃їе,<.>

И҆ ѹ҆ча̀ ꙗ҆́же ѻ҆́ г҃ѣ на́шемъ і҆с҃ѣ х҃ѣ, съ всѧ́кимъ дерзнове́нїем̑ невъзбра́нно·

Коне́цъ дѣѧ́нїемъ ст҃ыхъ а҆пс̑҇лъ·

И҆мать в себѣ, глв̑҇а, к҃и·

А҆ зача́лъ цр҃ко́вныхъ, н҃а·